སྐྱེས་པའི་རབས་ཀྱི་རྒྱ་ཆེར་བཤད་པ།
དྷརྨ་ཀཱིརྟི།
རྒྱ་གར་སྐད་དུ། ཛཱ་ཏ་ཀ་མཱ་ལཱ་ཊཱི་ཀཱ། བོད་སྐད་དུ། སྐྱེས་པའི་རབས་ཀྱི་རྒྱ་ཆེར་བཤད་པ། བཅོམ་ལྡན་འདས་ངག་གི་དབང་པོ་ལ་ཕྱག་འཚལ་ལོ། །ཐུབ་པའི་ལེགས་སྤྱོད་རྨད་བྱུང་དཔག་མེད་པ། །སྙན་ངག་མཁན་པོ་འཕགས་པ་དཔའ་བོས་བཀོད། །བདག་བློ་ཞན་ཀྱང་གུས་པས་བཤད་པ་ནི། །བློ་ཆུང་དག་ལ་པན་ཕྱིར་རབ་ཏུ་བརྩམས། །དཔལ་ལྡན་ཞེས་བྱ་བ་ལ་སོགས་པའི་ཚིགས་བཅད་འདི་ནི་འོག་ནས་འབྱུང་པའི་སྙན་ངག་མཐའ་དག་གི་བསྡུས་པའི་དོན་ཡིན་ཏེ། བསོད་ནམས་དང་ཡེ་ཤེས་ཀྱི་ཚོགས་ཀྱི་རང་བཞིན་བྱང་ཆུབ་སེམས་དཔའི་སྤྱོད་པའི་དབང་དུ་བྱས་ནས་བདག་གིས་སྙན་ངག་འདི་བྱའོ། །ཞེས་བྱ་བ་ནི་ཚིགས་སུ་བཅད་པ་འདིའི་བསྡུས་པའི་དོན་ནོ། །དེ་ལ་ཕ་རོལ་ཏུ་ཕྱིན་པ་དྲུག་སྟེ། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཕ་རོལ་ཏུ་ཕྱིན་པ་དེ་དག་ལས་དང་པོའི་ཕ་རོལ་ཏུ་ཕྱིན་པ་གསུམ་པོ་སྦྱིན་པ་དང༌། ཚུལ་ཁྲིམས་དང༌། བཟོད་པའི་ཕ་རོལ་ཏུ་ཕྱིན་པ་ནི་བསོད་ནམས་ཀྱི་ཚོགས་ཏེ། འཁོར་བའི་འཁོར་དང༌། ལོངས་སྤྱོད་ཕུན་སུམ་ཚོགས་པའི་རྒྱུར་གྱུར་པས་སོ། །བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་གཉིས་ནི་རྣམ་པར་གྲོལ་བའི་རྒྱུར་གྱུར་པ་ཡིན་པར་ངེས་པར་གཟུང་ངོ༌། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་གཉིས་ཀའི་ཕྱོགས་ལ་བརྟེན་པ་ཡིན་ནོ། །གང་དག་ལ་དཔལ་ཡོད་པ་དེ་ནི་དཔལ་ལྡན་ཏེ། གཟི་མདངས་བཟང་པོ་དང་ལྡན་པ་ཡིན་ནོ། །དཔལ་དང༌། འོད་དང༌། འབར་བ་ཞེས་བྱ་བ་ནི་རྣམ་གྲངས་སོ། །འདིར་དཔལ་ཞེས་བྱ་བ་སྨོས་པས་ནི། བསོད་ནམས་ཀྱི་ཚོགས་ཀྱི་འབྲས་བུ་སྟེ། འཁོར་བའི་ལོངས་སྤྱོད་དང༌། འཁོར་ཕུན་སུམ་ཚོགས་པ་བཟུང་སྟེ། སྦྱོར་བ་འདིས་ཞེས་བྱ་བར་སྦྱར་བར་བྱའོ། །ཡོན་ཏན་དམ་པས་ཡོངས་བཟུང་བཀྲ་ཤིས་པ། །ཞེས་བྱ་བ་ནི་ཡོན་ཏན་ཡང་ཡིན་ལ་དམ་པ་ཡང་ཡིན་པས་ཡོན་ཏན་དམ་པའོ། །ཡང་ན་ཡོན་ཏན་བཟང་པོ་ཡིན་པས་ཡོན་ཏན་
དམ་པའོ། །ཡང་ན་སྐྱེས་བུ་དམ་པ་རྣམས་ཀྱི་ཡོན་ཏན་ཡིན་པས་སོ། །ཡོངས་བཟུང་ཞེས་བྱ་བ་ནི་འདི་དག་གིས་ཡོངས་སུ་བཟུང་བས་ནའོ། །ཡོན་ཏན་དམ་པ་ཡང་ཡིན་ལ་ཡོངས་སུ་བཟུང་བ་ཡང་ཡིན་པས་ཡོན་ཏན་དམ་པས་ཡོངས་བཟུང་ངོ། །དེ་དག་གི་བཀྲ་ཤིས་ཡིན་པས་ཡོན་ཏན་དམ་པས་ཡོངས་བཟུང་བཀྲ་ཤིས་སོ། །དེ་ལ་ཡོན་ཏན་ནི་གཞན་ལ་ཕན་པ་ཁ་ན་མ་ཐོ་བ་མེད་པའི་བསོད་ནམས་ལ་འཇུག་པའོ། །གལ་ཏེ་དེ་ནི་དེ་ལྟ་ན་དམ་པ་ཞེས་སྨོས་པ་ཅི་ཞིག་དགོས་ཤེ་ན། བྱང་ཆུབ་སེམས་དཔའ་མ་ཡིན་པ་ཡང་གཞན་ལ་ཕན་པ་ལ་འཇུག་པ་དེ་དག་ནི་བདག་ལ་ཕན་པ་དང་འབྲེལ་པའི་དངོས་པོ་སྟོན་ཅིང་ཡོན་ཏན་གྱི་འབྲས་བུ་ཡོད་པར་གྱུར་པ་སྟེ། གང་ཞིག་ཅེ་ན། ཉན་ཐོས་དང་རང་སངས་རྒྱས་ལྟ་བུ་སྟེ། དེའི་ཡོན་ཏན་ནི་རང་གི་རྒྱུད་ལས་བྱུང་བའི་ཉོན་མོངས་པ་འཇོམས་པའོ། །ཡོངས་སུ་སྔོ་བར་བྱེད་པ་སྟེ། སྔ་མ་ནི་དེ་ལྟ་བུ་མ་ཡིན་པའི་ཕྱིར་རོ། །ཡང་ན་ཡོངས་སུ་བཟུང་བ་ཡིན་པས་ན་ཡོངས་སུ་བཟུང་བ་སྟེ། ཡོན་ཏན་དམ་པ་རྣམས་ཀྱིས་ཡོངས་སུ་བཟུང་བས་ན། ཡོན་ཏན་དམ་པས་ཡོངས་བཟུང་ངོ༌། །ཡོན་ཏན་དམ་ཕས་ཡོངས་སུ་གཟུང་བའི་བཀྲ་ཤིས་པ་ནི། ཡོན་ཏན་དམ་པས་ཡོངས་བཟུང་བཀྲ་ཤིས་པའོ། །བཀྲ་ཤིས་ཞེས་བྱ་བ་ནི། དགེ་ཤིས་དང་དག་བྱེད་དོ། །གྲགས་པའི་གཞིར་གྱུར་ཅེས་བྱ་བ་ནི་གྲགས་པའི་གཞིར་གྱུར་པས་ན་གྲགས་པའི་གཞིར་གྱུར་ཏེ། གྲགས་པའི་གནས་སུ་གྱུར་པ་ཞེས་པའི་དོན་ཏོ། །འདིས་ནི་མངོན་དུ་འགྲོ་བས་དེའི་སྤྱོད་པ་སྟོན་པ་ཡིན་ནོ། །གལ་ཏེ་དེ་ལྟ་ཡིན་ན་ནི། བྱང་ཆུབ་སེམས་དཔའ་མ་ཡིན་པ་གཞན་བརྒྱ་བྱིན་དང༌། པ་བསངས་དང༌། སྐེམ་བྱེད་དང༌། ཉེ་དབང་ལ་སོགས་པའི་སྤྱོད་པ་དག་ལ་ཡང་གྲགས་པའི་གཞིར་གྱུར་པ་ཡོད་ཅེ་ན། སྨྲས་པ། མ་སྨད་བཞིན་དུ་ཤིན་ཏུ་ཡིད་དུ་འོང༌། །ཞེས་སྨོས་སོ། །གྲགས་པ་ནི་སྙན་པ་སྟེ་རྣམ་གྲངས་སོ། །མ་སྨད་ཅེས་བྱ་བ་ནི་སྨད་པ་མ་ཡིན་པས་ན་མ་སྨད་པ་སྟེ། དེས་རང་གི་རྒྱུད་བརྒྱན་
ཅིང་འཇིག་རྟེན་ལས་འདས་པར་གྱུར་པས་སོ། །ཡང་ན་མ་སྨད་པ་ནི་མཆོད་པར་འོས་པའི་གཞིར་གྱུར་པ་སྟེ་མ་སྨད་པའོ། །དེ་བས་ན་དེ་ཉིད་ཡིད་དུ་འོང་བ་སྟེ། མ་སྨད་ཤིན་ཏུ་ཡིད་འོང་ངོ༌། །འདིས་ནི་སྤྱོད་པ་དེའི་ཡེ་ཤེས་ཀྱི་ཚོགས་གཞན་ལ་ཕན་པར་སྟོན་པ་ཡིན་ནོ། །འཇིག་རྟེན་པ་རྣམས་ལ་ཡང༌། ཤེས་པ་ནི་ཡོད་མོད་ཀྱི་ཚོགས་ནི་མ་ཡིན་ཏེ། འདིས་སངས་རྒྱས་པའི་རྒྱུར་གྱུར་པ་དང༌། སངས་རྒྱས་སུ་འཇོག་པར་བྱེད་པས་ཚོགས་སོ། །ཡིད་འཕྲོག་པར་བྱེད་པས་ཡིད་དུ་འོང་བའོ། །སྐུ་ཚེ་སྔ་མ་རྣམས་སུ་ཞེས་བྱ་བ་ནི་འདི་ལྟར་སྔོན་གྱི་མཐའི་སྐྱེ་བ་ནས་གང་དུ་མངོན་པར་རྫོགས་པར་བྱང་ཆུབ་པའི་བར་བརྙེས་པའི་སྐྱེ་བ་དེ་ནི་མཐའི་བར་རོ། །ཐུབ་པ་ཞེས་བྱ་བ་ནི་གསུམ་ཐུབ་བས་ན་ཐུབ་པ་སྟེ། བཅོམ་ལྡན་འདས་སོ། །ཡང་ན་ཉོན་མོངས་པ་སྐྱེ་བ་འགོག་པས་ན་ཐུབ་བའོ། །དེའི་སྤྱོད་པ་ནི་སྤྱོད་པ་སྟེ་ཚུལ་ལོ། །དེའི་སྤྱོད་པ་རྨད་དུ་བྱུང་བ་ཡིན་པས་རྨད་དུ་བྱུང་བ་སྟེ་སྤྱོད་པ་ངོ་མཚར་བའོ། །ཡང་ན་དེའི་སྤྱོད་པ་འདས་པར་གྱུར་པས་ནི་མཐོང་བ་སྟེ། བརྒྱ་ལ་ཞིག་ན་ཉེ་བར་དམིགས་པ་ཡིན་པས་རྨད་དུ་བྱུང་བ་རྣམས་སོ། །གུས་པས་ཞེས་བྱ་བ་ནི་དགའ་ཞིང་ཞེས་པས་ཞེས་བྱའོ། །འདིས་ནི་བསམ་པ་ཕུན་སུམ་ཚོགས་པ་སྟོན་པ་ཡིན་ནོ། །རང་གི་སྙན་ངག་ཡིན་པས་བདག་གི་སྙན་ངག་གོ །བདག་གི་སྙན་ངག་ཉིད་མེ་ཏོག་ཡིན་པས་བདག་གི་སྙན་ངག་མེ་ཏོག་གོ །མེ་ཏོག་བཞིན་དུ་མེ་ཏོག་གི་མཆོད་པའི་ཡོ་བྱད་ཆོས་མཐུན་པ་ཡིན་པའི་ཕྱིར་ཇི་ལྟར་དེ་མེ་ཏོག་ལ་སོགས་པའི་སྙིམ་པ་སྟེ། བདག་གི་སྙན་ངག་མེ་ཏོག་སྙིམ་པའོ། །སྙིམ་པ་ནི་ལག་པ་གཉིས་སྦྱར་བའོ། །ཡང་ན་མེ་ཏོག་གི་སྙིམ་པ་ཡིན་པས་མེ་ཏོག་སྙིམ་པའོ། །རང་གི་སྙན་ངག་ཉིད་མེ་ཏོག་སྙིམ་པ་ཡིན་པས་ན་བདག་གི་སྙན་ངག་མེ་ཏོག་སྙིམ་པའོ། །དེས་ན་བདག་གི་སྙན་ངག་གི་མེ་ཏོག་སྙིམ་པ་ཞེས་བྱ་བ་འདིས་ནི་མཆོད་པའི་ཡོ་བྱད་ཅུང་ཟད་ཙམ་དུ་བསྟན་ཏེ། མེ་ཏོག་གི་གནས་དག་ལ་སྙན་ངག་ཉེ་བར་བསྟན་པ་ཡིན་ནོ། །དེ་ལྟར་ན་འདིས་ནི་སྦྱོར་བ་
ཕུན་སུམ་ཚོགས་པ་བཤད་པ་ཡིན་ནོ། །གྲགས་པའི་མཚན་མར་གྱུར་པ་འདི་རྣམས་ཀྱིས་ཞེས་བྱ་བ་དང༌། འཇིག་རྟེན་དོན་འགྱུར་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ནི་སྙན་ངག་བརྩམས་པའི་དགོས་པ་བསྟན་པ་ཡིན་ཏེ། དགོས་པ་དང་དགོས་པ་བྱེད་པ་གཉིས་ཀྱིས་བསྡུས་པའི་དོན་ཏེ། ཚིགས་བཅད་འདི་གཉིས་ནི་བདག་དང་གཞན་གྱི་དོན་མཐའ་དག་འདི་ལས་འབྱུང་བར་བསྟན་ཏོ། །དེ་ལ་གཞན་གྱི་དོན་མཐའ་དག་ལས་བརྩམས་ཏེ། གྲགས་པའི་མཚན་མར་གྱུར་པ་ཞེས་བྱ་བའི་ཚིགས་སུ་བཅད་པ་བསྟན་ཏེ། འདི་རྣམས་ཀྱི་ཞེས་བྱ་བ་ནི་སྔར་བཤད་པའི་བསོད་ནམས་དང་ཡེ་ཤེས་ཀྱིས་ཡོངས་སུ་བཟུང་བ་དེས་ན་གྲགས་པ་ཞེས་བྱ་བར་གྲགས་པར་བྱེད་པ་ཡིན་ཏེ་རབ་ཏུ་བསྔགས་པའོ། །ཇི་ལྟར་གྲགས་པ་ཡིན་ཞེ་ན་སྨྲས་པ། མངོན་སྣང་མཚན་མར་གྱུར་པ་ཞེས་སྨོས་ཏེ། སེམས་ཅན་རྣམས་ཀྱི་མངོན་པར་སྣང་བའི་མཚན་མར་གྱུར་པ་སྟེ། འདིས་ནི་གནས་ཀྱི་ཁྱད་པར་གྱི་སྤྱོད་པའི་ཁྱད་པར་བཤད་པ་ཡིན་ནོ། །ཡང་ན་མངོན་པར་སྣང་བ་ཡང་ཡིན་ལ། མཚན་མར་གྱུར་པ་ཡིན་བས་མངོན་སྣང་མཚན་མར་གྱུར་པའོ། །འདིས་ནི་དེའི་སྤྱོད་པ་དག་གིས་སྐྱེ་བོ་ཀུན་ལ་ཕན་པར་སྟོན་པར་བཤད་དེ་བསྡུས་པའི་དོན་ཏོ། །གྲགས་པ་ཞེས་བྱ་བ་ནི་དགེ་ཤིས་སོ། །འདི་རྣམས་ཀྱིས་ཞེས་བྱ་བ་ནི་སྤྱོད་པ་སྟེ་མངོན་སྣང་མཚན་མར་བྱས་པའོ། །དེ་གང་གི་ཞེ་ན། སངས་རྒྱས་ཉིད་ཀྱིའོ། །མཚན་མར་གྱུར་པ་ནི་རྟགས་སུ་གྱུར་པ་དང༌། མཚོན་པར་གྱུར་པའོ། །བདེ་བར་གཤེགས་འགྱུར་ལམ་ཞེས་བྱ་བ་ནི་བདེ་བར་གཤེགས་པར་འགྱུར་བ་ཡིན་པས་བདེ་བར་གཤེགས་འགྱུར་རོ། །མཛེས་པར་གཤེགས་པས་ན་བདེ་བར་གཤེགས་པའོ། །དེ་ཁོ་ན་ཉིད་ནི་ཕྱིན་ཅི་མ་ལོག་པའོ། །ལམ་རྣམས་ཞེས་བྱ་བ་ནི་འཕགས་པའི་ལམ་ཡན་ལག་བརྒྱད་པའོ། །གང་ཡིན་ཞེས་བྱ་བ་ནི་གང་གི་ཕྱིར་རོ། །བསྟན་པ་ནི་བཤད་པ་སྟེ་རབ་ཏུ་སྟོན་པ་ཡིན་ནོ། །ཡིད་ལ་དད་པ་མེད་པ་རྣམས་ཀྱང་ཞེས་བྱ་བ་ལ། འདིར་ཡང་ཞེས་བྱ་བ་ནི་
དེ་ཡང་དེ་ལྟར་འགྱུར་ཞེས་པ་སྟེ། ཀྱང་གི་སྒྲ་ནི་སྲིད་པའི་ཚུལ་ལོ། །ཡང་ན་ཡིད་ལ་དད་པ་མེད་པ་རྣམས་ཀྱང་དེ་བཞིན་དུ་འགྱུར་བ་སྟེ་གཞན་དག་གི་ཡང་ངོ༌། །འདིར་ཀྱང་གི་སྒྲ་ཡང་སྲིད་པའི་ཚུལ་ཉིད་དོ། །ཆོས་དང་ལྡན་པའི་གཏམ་གྱིས་རབ་ཏུ་དགའ་བ་ཞེས་བྱ་བ་ནི་གྲགས་པའི་སྤྱོད་པ་འདི་རྣམས་ཀྱིས་རབ་ཏུ་དགའ་བར་གྱུར་པའི་ཕྱིར་རོ། །ཇི་ལྟར་ཞེ་ན། འདིར་ཉན་པ་ཐ་མལ་པ་རྣམས་གང་གི་ཕྱིར་རབ་ཏུ་དགའ་བར་འགྱུར་བ་ཡིན་པས་སོ། །དེས་ན་ཡང་སྐྱེ་བོ་ཐ་མལ་པ་ལ་མངོན་པར་བརྟགས་ནས་འབད་དེ་བརྩམ་མོ་ཞེས་བྱ་བར་སྦྱར་རོ། །དེ་ལ་སྐྱེ་བོའི་བྱེ་བྲག་ཀྱང་རྣམ་པ་གསུམ་སྟེ། དད་པ་དང་ལྡན་པ་དང༌། དད་པ་ཉམས་པ་དང༌། ཐ་མལ་པའོ། །སྐྱེ་བོ་དེ་གསུམ་ཐ་མལ་པ་ལ་མངོན་པར་བརྟགས་ཤིང་འབད་ནས་བྱའོ་ཞེས་པ་ནི་ཚིགས་བཅད་འདིའི་བསྡུས་པའི་དོན་ཏོ། །དེ་སྐྱེ་བོ་དད་པ་དང་ལྡན་པའི་དབང་དུ་བྱས་ནས། བསྟན་པར་འགྱུར་བ་ནི་བདེ་བར་གཤེགས་འགྱུར་ལམ་རྣམས་གང་ཡིན་ཞེས་བྱ་བས་བསྟན་ཏོ། །དད་པ་ཉམས་པའི་དབང་དུ་བྱས་པ་ནི་ཡིད་ལ་དད་པ་མེད་པ་རྣམས་ཀྱང་དད་པར་འགྱུར་ཞེས་བྱའོ། །ཐ་མལ་པའི་དབང་དུ་བྱས་པ་ནི་ཆོས་དང་ལྡན་པའི་གཏམ་གྱིས་རབ་ཏུ་དགའ་བར་འགྱུར་ཞེས་བྱ་བ་ཡིན་ནོ། །དེ་ལ་ཆོས་ནི་ཡན་ལག་བཅུ་གཉིས་བརྗོད་པའི་རྣམ་པའོ། །གཏམ་ཡིན་པས་ན་གཏམ་སྟེ་རབ་ཏུ་དགའ་བའོ། །རབ་ཏུ་ཞེས་བྱ་བ་ནི་ལྷག་པར་ཞེས་བྱ་བ་དང༌། རབ་ཏུ་ཞེས་བྱ་བའི་དབྱེ་བས་སོ། །འགྱུར་ཞེས་བྱ་བ་ནི་འོང་བར་འགྱུར་བའོ། །འཇིག་རྟེན་གྱི་དོན་ནི་འཇིག་རྟེན་ལ་ཕན་པའི་ཕྱིར་རོ། །མངོན་པར་བརྟགས་ཞེས་བྱ་བ་ནི་བལྟས་ནས་བརྩམས་སོ། །ཞེས་བྱ་བའི་ཚིག་གི་དོན་ནོ། །འབར་ཞེས་བྱ་བ་ནི་ཀུན་ལ་སྦྱར་བར་བྱའོ། །ཐོས་པ་དང་གཙུག་ལག་དང་རིགས་པ་ནི་ཐོས་པ་དང་གཙུག་ལག་རིགས་པ་དག་སྟེ། ཐོས་པ་ནི་ཉན་པའོ། །གཙུག་ལག་ནི་སངས་རྒྱས་ཀྱིས་གསུངས་པའོ། །རིགས་པ་ནི་རིགས་པའི་བསྟན་བཅོས་སོ། །ཡང་ན་རིགས་པ་ནི་ཚད་མའོ། །མི་འགལ་
བ་ནི་སྐྱོན་དང་བྲལ་བའི་ལམ་དག་གིས་སོ། །འབད་པ་ནི་མངོན་པར་སྤྲོ་བས་སོ། །འཇིག་རྟེན་མཆོག་གི་སྤྱོད་པ་ཞེས་བྱ་བ་ནི་འཇིག་རྟེན་ནི་སྐྱེ་དགུའོ། །མཆོག་ནི་གཙོ་བོའོ། །སྤྱོད་པ་ནི་སྤྱོད་པའོ། །དམ་པ་ཞེས་བྱ་བ་ནི་ལྷག་པའོ། །ཕྱོགས་ཙམ་ཞེས་བྱ་བ་ནི་ཕྱོགས་གཅིག་གོ །མཉན་པར་རུང་བ་ནི་མཉན་དུ་རུང་བའོ། །ཤེས་པར་འགྱུར་བ་ཡིན་པས་ན་ཤེས་པར་རུང་བ་སྟེ། སྙན་ངག་གོ །རྟོགས་པ་ནི་ཉེ་བར་འདུལ་བའི་དོན་དུའོ། །མཉན་པ་ནི་རྣ་བའི་དབང་པོས་སོ། །རུང་བར་བྱ་བ་ནི་དགའ་བར་བྱ་བའོ། །རང་དོན་བརྩོན་པས་ཞེས་བྱ་བ་ལ་རང་གི་དོན་ནི་རང་ལ་ཕན་པའོ། །བརྩོན་པ་ནི་མངོན་པར་བརྩོན་པའོ། །ཡང་གི་སྒྲ་ནི་སྲིད་པའི་ཚུལ་ལོ། །གཞན་དོན་བརྩོན་ཞེས་བྱ་བ་ནི་གཞན་གྱི་དོན་ལ་སྤྱོད་པ་ཡིན་པས་གཞན་དོན་བརྩོན་པའོ། །ཡོན་ཏན་སྒྲུབ་པ་བཟང་པོ་ཞེས་བྱ་བ་ལ་སྒྲུབ་པ་ནི་ཕུན་སུམ་ཚོགས་པའོ། །བཟང་པོ་ནི་བཟང་པོར་གྱུར་པས་སོ། །རྗེས་སུ་མཐུན་མ་གྱུར་ཞེས་བྱ་བ་ནི། དེའི་རྗེས་སུ་མ་གྱུར་ཅེས་བྱའོ། །ཡང་ན་རང་དོན་བརྩོན་པ་ནི་ཉན་ཐོས་དང་རང་སངས་རྒྱས་ཏེ། དེས་ཀྱང་རྗེས་སུ་མཐུན་པར་མ་གྱུར་པ་སྟེ། དེ་བཞིན་གཤེགས་པའི་ཡོན་ཏན་ལ་ཡོངས་སུ་སྤྱོད་པའམ། །སྐྱེད་པར་མི་ནུས་ན་སྐྱེ་བོ་གཞན་དག་གིས་ལྟ་སྨོས་ཀྱང་ཅི་དགོས་ཞེས་བྱ་བའོ། །ཐམས་ཅད་མཁྱེན་པ་ཞེས་བྱ་བ་ནི་ཐམས་ཅད་ཐུགས་སུ་ཆུད་པའི་ཕྱིར་ཐམས་ཅད་མཁྱེན་པའོ། །འདི་ལྟར་མ་ནོར་བ་ནི་ཕྱིན་ཅི་མ་ལོག་པའོ། །གསལ་བ་ནི་སྣང་བར་གྱུར་པའོ། །གྲགས་པ་ནི་སྙན་པའོ། །ཆོས་དང་དགེ་འདུན་དང་བཅས་པ་ནི་ཆོས་དང་དགེ་འདུན་དང་ལྷན་ཅིག་པའོ། །སྤྱི་བོ་ནི་མགོ་བོའི་གཙུག་གིས་སོ། །འདུད་ཅེས་བྱ་བ་ནི་དེས་ཕྱག་འཚལ་བར་བྱེད་པའོ། །བཅོམ་ལྡན་འདས་དེ་སེམས་ཅན་ཐམས་ཅད་ལ་རྒྱུ་མེད་པར་བྱམས་པའི་ངོ་བོ་ཉིད་ཡིན་ཞེས་བྱ་བ་ནི་ཕྱོགས་སོ། །འབྱུང་པོ་ཀུན་ལ་དགའ་བཞིན་དུ་གྱུར་པ་ཞེས་བྱ་བ་ནི་གཏན་ཚིགས་སོ། །འདི་སྐད་ཐོས་ཏེ། བྱང་ཆུབ་སེམས་དཔའ་ཞེས་
བྱ་བ་ནི་དཔེའོ། །སེམས་ཅན་ཞེས་བྱ་བ་ནི་སྐྱེ་དགུའོ། །ཐམས་ཅད་ནི་ལུས་པ་མེད་པའོ། །རྒྱུ་མེད་པར་ཞེས་བྱ་བ་ནི་དགོས་པ་མེད་པར་རོ། །རབ་ཏུ་ཞེས་བྱ་བ་ནི། ཡང་དག་པར་རབ་ཏུ་དང་བའོ། །བྱམས་པ་ནི་མཉེས་གཤིན་པ་དང་ལྡན་པའོ། །ངོ་བོ་ཉིད་ཅེས་བྱ་བ་ནི་རང་བཞིན་ནོ། །འབྱུང་པོ་ཀུན་ཞེས་བྱ་བ་ནི་སེམས་ཅན་ཐམས་ཅད་དོ། །བདག་བཞིན་དུ་གྱུར་པ་ཞེས་བྱ་བ་ནི་བདག་དང་མཉམ་པས་སོ། །སྐུ་ཚེ་སྔ་མ་ལ་ཡང་ཞེས་བྱ་བ་ནི་བྱང་ཆུབ་སེམས་དཔའི་དུས་ནའོ། །སངས་རྒྱས་བཅོམ་ལྡན་འདས་ཞེས་བྱ་བ་ནི་རང་བཞིན་གྱིས་འཇིག་རྟེན་ལ་དེ་བཞིན་ཉིད་དུ་རབ་ཏུ་སྟོན་པ་ཡིན་པས་ན་སངས་རྒྱས་ཀྱི་ཡོན་ཏན་བཤད་པའོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་བས་ན་བཅོམ་ལྡན་འདས་སོ། །དེ་བས་ན་གཙོ་བོ་སྟེ་དམ་པ་དེ་ལ་སེམས་དང་བར་བྱ་བ་ནི་དད་པར་བྱ་བའོ། །དེ་ཡང་ཞེས་བྱ་བ་ནི་དཀོན་མཆོག་གསུམ་མོ། །འདི་སྐད་ཐོས་ཞེས་བྱ་བ་ནི་བཤད་པའོ། །བདག་ཅག་གི་བླ་མ་དཀོན་མཆོག་གསུམ་བླ་མར་བྱེད་པ་གང་ཡིན་པ་དེ་དག་ནི་བླ་མ་དཀོན་མཆོག་གསུམ་བླ་མར་བྱེད་པའོ། །བསྒྲུབ་པའི་ཡོན་ཏན་ནི་ཚུལ་ཁྲིམས་ཀྱིས་བསྒྲུབ་པའི་ཡོན་ཏན་ཏེ། སྐྱོན་མེད་ཅིང་འདྲེན་མར་མ་གྱུར་པས་བླ་མ་རྣམས་ཏེ། སློབ་དཔོན་དང༌། མཁན་པོ་དང༌། འཕགས་པ་དགའ་མགུ་བར་བྱའོ། །ཡོན་ཏན་གྱི་ཚོགས་ནི་ཡོན་ཏན་བསགས་པ་སྟེ་དེས་བདག་ཅག་གི་བླ་མར་གྱུར་པའོ། །མཁན་པོ་དག་གིས་ཡོངས་སུ་བསྒྲགས་པ་ནི་བསྔགས་པར་སྨྲ་བ་དག་བསྟན་པའོ། །འདི་ཞེས་བྱ་བ་ནི་སྟོན་པ་ཡིན་ཏེ། ཅི་ཞིག་སྟོན་པ་ཡིན་ཞེ་ན། བཅོམ་ལྡན་འདས་ཀྱི་སྐུ་ཚེ་སྔ་མ་ཞེས་བྱ་བ་ནི་བྱང་ཆུབ་སེམས་དཔར་གྱུར་པའིའོ། །རྟོགས་པ་བརྗོད་པ་སྤྱོད་པའི་མཚན་མའོ། །བྱང་ཆུབ་སེམས་དཔའ་ནི་བྱང་ཆུབ་སེམས་དཔས་ན་བྱང་ཆུབ་སེམས་དཔའོ། །དམ་བཅས་པས་ཁྱད་པར་ཅན་ཞེས་བྱ་བ་དང་པོ་སེམས་བསྐྱེད་པ་དེ་དང་རྗེས་སུ་མཐུན་པ་སྟེ། བཅོམ་ལྡན་འདས་ཤཱཀྱ་ཐུབ་པ་འདིས་སོ། །དམ་
བཅས་པ་ཁྱད་པར་ཅན་ནི་དམ་བཅས་པ་དམ་པའོ། །དེ་གང་ཡིན་ཞེ་ན། སངས་རྒྱས་ཏེ་དེ་དང་མཐུན་པ་ནི་འདྲ་བའོ། །གང་བྱིན་པ་དེ་ནི་སྦྱིན་པའོ། །ཚིག་སྙན་པ་ནི་གཏམ་སྙན་པའོ། །དོན་སྤྱོད་པ་ནི་ཕན་པ་སྤྱོད་པའོ། །སོགས་ཞེས་བྱ་བ་ལ་སོགས་པའི་སྒྲ་ནི་དོན་མཐུན་པ་དང་གཞན་ཡང་ཡོན་ཏན་དག་གོ །དོན་མཐུན་པར་སྤྱོད་པ་ནི་དོན་མཐུན་པ་སྟེ་དགེ་བའི་ཆོས་སོ། །གཞན་ཡང་ཡོན་ཏན་གྱི་ཆོས་རྣམས་ཡོངས་སུ་གཟུང་ངོ༌། །ཤེས་རབ་ཀྱིས་ཡོངས་སུ་ཟིན་པས་ཞེས་བྱ་བ་ནི་འདིས་ཡོངས་སུ་བཟུང་བས་ན་ཡོངས་སུ་ཟིན་པ་སྟེ། ཤེས་རབ་ཉིད་ཀྱིས་ཡོངས་སུ་གཟུང་བའི་ཕྱིར་ཤེས་རབ་ཀྱིས་ཡོངས་སུ་ཟིན་པའོ། །ཤེས་རབ་ཀྱིས་བཟུང་བས་ན་སྐྱོན་མེད་པ་སྟེ་མ་སྨད་པའོ་སྙིང་རྗེའི་རྒྱུ་མཐུན་པ་ཞེས་བྱ་བ་ནི་སྙིང་རྗེའི་རྒྱུས་སྙིང་རྗེ་དང་རྗེས་སུ་མཐུན་པ་སྟེ། རྒྱུ་མཐུན་པ་ནི་རྒྱུ་དང་འདྲ་བའི་ཚིག་གོ །ཡོངས་སུ་འཛིན་པ་ནི་མགུ་བར་བྱས་པའོ། །རང་གི་ཆོས་ཡིན་པས་ན་རང་གི་ཆོས་དེ་ལས་རྣམ་པ་དྲུག་གོ །དེ་ཡང་མཆོད་སྦྱིན་དང༌། མཆོད་སྦྱིན་བྱེད་དུ་འཇུག་པ་དང༌། འདོན་པ་དང༌། འདོན་དུ་འཇུག་པ་དང༌། སྦྱིན་པ་དང༌། ལེན་པའོ། །ཆོས་དེ་རྣམས་ལ་མངོན་པར་དགའ་བ་ལས་གྱུར་པའི་རིགས་ཀྱི་གཙང་སྤྲ་སྤྱོད་པ་གང་ཡིན་པ་དེ་ནི་རང་གི་ཆོས་ལ་མངོན་པར་དགའ་བ་ལས་གྱུར་པའི་གཙང་སྤྲའི་སྤྱོད་པ་སྟེ། དེ་ལ་གཙང་སྤྲ་ནི་དག་པའི་སྤྱོད་པ་སྟེ། དག་པར་སྤྱོད་པའི་ཚུལ་ཀུན་ཏུ་སྤྱོད་པའོ། །ཆེན་པོ་ཞེས་བྱ་བ་ནི་རིགས་གཞན་ལ་ལྟོས་པས་ཆེན་པོའོ། །ཇེ་མཐོ་ཇེ་མཐོར་ཞེས་བྱ་བ་ནི་སྐྱེས་ཤིང་སྐྱེས་པ་ནའོ། །ཡང་ན་མཐོ་བའི་རིགས་དེ་ལས་བྱང་ཆུབ་སེམས་དཔའ་མཐོ་བར་གྱུར་པའི་ཕྱིར་རོ། །སྐྱེ་བ་ཞེས་བྱ་བ་ནི་འབྱུང་བར་འགྱུར་བའོ། །ཡོངས་སུ་བཟུང་བ་ནི་ཐོབ་པར་བྱས་པའོ། །གྲགས་སོ་ཞེས་བྱ་བ་ནི་མངོན་སུམ་དུ་མ་གྱུར་བའི་ཚིག་གོ །དེ་ཞེས་བྱ་བ་ནི་བྱང་ཆུབ་སེམས་དཔའོ། །སྐྱེས་པའི་ལས་ནི་རུམ་སྐྱེད་པ་དང༌། མིང་གདགས་པ་དང༌། །བཟས་སྦྱིན་པ་དང༌། གཙུག་ཕུད་བྱ་བ་དང༌། ཚངས་སྐུད་གདགས་པ་དང༌། གཙུག་ཕུད་
བཅིང་བ་དང༌། སྐ་རགས་བཅིང་བ་ལ་སོགས་པ་གཟུང་ངོ༌། །སྦྱངས་པ་རིམ་པ་བཞིན་དུ་བྱས་པ་ནི་གོ་རིམས་བཞིན་དུ་བྱས་པའོ། །མངོན་པར་སྐྱེས་པ་ཞེས་བྱ་བ་ནི་མངོན་པར་འཕེལ་བ་ནའོ། །རང་བཞིན་གྱིས་ཡིད་གཞུངས་པ་ནི་ངོ་བོ་ཉིད་ཀྱིས་ཡིད་གཞུངས་པའོ། །མགོན་སྐྱབས་ཀྱི་ཁྱད་པར་ནི་མགོན་སྐྱབས་ཀྱི་སྦྱོར་བའོ། །ཆེད་ཆེར་འཛིན་པ་ཉིད་ལྟ་བ་ཡིན་ཏེ། ཤེས་པ་ལ་གཅིག་ཏུ་ལྟ་བ་ཞེས་བྱ་བའི་དོན་ཏོ། །ལེ་ལོ་ནི་སྙོམ་ལས་ཏེ། དེ་མེད་པ་ནི་ལེ་ལོ་མེད་པ་སྟེ། རིང་པོར་མ་ཐོགས་པས་ཞེས་བྱ་བའི་དོན་ཏོ། །རིག་པའི་གནས་བཅོ་བརྒྱད་ནི་འདི་ལྟ་སྟེ། རོལ་མོ་དང༌། འཁྲིག་ཐབས་དང༌། འཚོ་ཚིས་དང༌། གྲངས་ཅན་དང༌། སྒྲ་དང༌། གསོ་བའི་དཔྱད་དང༌། བཟོ་དང༌། འཕོང་དཔྱད་དང༌། གཏན་ཚིགས་ཀྱི་སྦྱོར་བ་དང༌། རྣལ་འབྱོར་དང༌། ཐོས་ཤིང་དྲན་པ་དང༌། སྐར་མའི་དཔྱད་དང༌། རྩིས་དང༌། མིག་འཕྲུལ་དང༌། སྔོན་གྱི་རབས་དང༌། དེ་བཞིན་དུ་བྱེ་བྲག་པ་དང༌། དོན་གྱི་ཕྲེང་བ་དང༌། རིག་པའི་བསྟན་བཅོས་དང༌། ཡོངས་སུ་བརྟགས་པའོ། །དེ་བཞིན་དུ་ཡང་བདག་གི་རིགས་ཞེས་བྱ་བ་ནི་བྲམ་ཟེའི་རིགས་ལ་གནས་པ་ལས་མ་འདས་པ་སྟེ། མི་འགལ་བ་ནི་བྲམ་ཟེའི་གནས་པ་ལས་མ་འཁྲུལ་པའོ། སྒྱུ་རྩལ་རྣམས་ཞེས་བྱ་བ་ནི་སྒྱུ་རྩལ་མཐའ་དག་སྟེ། སྙན་ངག་དང༌། གླུ་དབྱངས་དང༌། གླེགས་འདྲ་མཁན་དང༌། འཐབ་མོ་དང༌། རོལ་མོ་དང༌། མཚན་མ་དང། མེ་ཏོག་གི་ལས་ཀྱི་སྦྱོར་བ་དང༌། དམག་གི་བཀོད་པ་དང༌། རྩིས་དང༌། གཡོས་ཀྱི་ལས་དང༌། བུད་མེད་ཀྱི་མཚན་ཉིད་དང༌། སྐྱེས་པའི་མཚན་ཉིད་དང༌། གར་དང༌། ཚོང་དང༌། ཤིང་འཇོག་པ་དང༌། འདྲི་བ་དང༌། རྩིག་པའི་ལས་དང༌། རི་མོའི་ལས་དང༌། སོག་ལེའི་ལས་དང༌། ཁྱིམས་བརྟག་པའི་མཚན་ཉིད་དང༌། མལ་སྟན་གྱི་མཚན་ཉིད་དང༌། རིན་པོ་ཆེ་བརྟག་པ་དང༌། སྐུ་གཟུགས་ཀྱི་མཚན་ཉིད་དང༌། གླང་པོ་ཆེ་བརྟག་པ་དང༌། བཞད་གད་དང༌། བྲོ་གར་དང༌། ལུས་ཀྱི་བསྐུ་
མཉེ་དང༌། ལྟས་ཤེས་པ་དང༌། ཧོ་ར་ཛྙཱ་ན་ནོར་སྒྱུར་མཁན་དང༌། གཏེར་ཤེས་པ་དང༌། མཆོད་སྦྱིན་གྱི་ཆོ་ག་ཤེས་པ་དང༌། མཚོན་ཆ་བརྟག་པ་དང༌། ལུགས་ཀྱི་བསྟན་བཅོས་ཤེས་པ་དང༌། མིག་འཕྲུལ་ཤེས་པ་དང༌། བཞོན་པ་དང་ལྷན་ཅིག་སྤྱོད་པ་དང༌། དེ་ལ་སོགས་པའི་སྒྱུ་རྩལ་དྲུག་ཅུ་རྩ་བཞིའོ། །རང་གི་རིགས་ནི་བྲམ་ཟེའི་རིགས་སོ། །སློབ་དཔོན་དམ་པའི་གོ་འཕང་ནི་སློབ་དཔོན་དམ་པའི་གོ་འཕང་སྟེ། དམ་པའི་ཁྱད་པར་ཐོབ་པར་གྱུར་ཞེས་པའོ། །རིག་བྱེད་ཤེས་ལ་བྱ་བ་སྨོས་ཏེ། དེ་ཞེས་བྱ་བ་ནི་བྱང་ཆུབ་སེམས་དཔའོ། །རིག་བྱེད་ཤེས་ལ་ཞེས་བྱ་བ་དེ་ཚངས་པ་ཤེས་པའོ། །ཚངས་པ་བཞིན་ཞེས་བྱ་བ་ནི་ཚངས་པ་བཞིན་གྱུར་པའོ། །རྒྱལ་པོ་ཞེས་བྱ་བ་ནི་ཇི་ལྟར་ཡུལ་ན་གནས་པའི་རྒྱལ་པོ་བཞིན་དུ་སྐྱེ་དགུ་རྣམས་ལ་མཛེས་པ་ཡིན་ཏེ། བཀུར་བ་ནི་ཞེ་ས་དང་མཆོད་པ་མང་པོས་སོ། །གནས་ནི་སྣོད་དུ་གྱུར་པའོ། །སྐྱེ་དགུ་རྣམས་ནི་དོན་སྤྱོད་པ་སྟེ། སྤྲིན་ལས་ཆར་བབ་པ་ལྟ་བུ་ཡིན་ཏེ། བརྒྱ་བྱིན་ནི་མིག་སྟོང་ལྡན་ནོ། །མངོན་སུམ་ནི་མངོན་སུམ་ཉིད་དོ། །ཤེས་འདོད་རྣམས་ནི་ཤེས་པར་འདོད་པའི་སློབ་མ་རྣམས་སོ། །དོན་སྤྱོད་ནི་ཕན་པར་འདོད་པ་སྟེ། ཇི་ལྟར་བུའི་ཕ་ལྟ་བུར་རོ། །དེ་ཞེས་བྱ་བ་ནི་བྱང་ཆུབ་སེམས་དཔའོ། །སྐལ་བ་དང་ཡོན་ཏན་ཞེས་བྱ་བ་ནི་སྐལ་བ་དང་ཡོན་ཏན་ཏེ། སྐལ་བ་དང་ཡོན་ཏན་ཉིད་ཁྱད་པར་དུ་གྱུར་པ་ཡིན་པའི་ཕྱིར་སྐལ་བ་དང་ཡོན་ཏན་ཁྱད་པར་དུ་གྱུར་པའོ།། དེ་ཡང་དག་པར་སོགས་པ་ཡིན་པས་སྐལ་བ་དང་ཡོན་ཏན་ཁྱད་པར་དུ་གྱུར་པ་དང་ལྡན་པའོ། །སྐལ་བ་ནི་བསོད་ནམས་སོ། །ཡོན་ཏན་ནི་ཕ་རོལ་ཏུ་ཕྱིན་པ་དྲུག་གོ །ཁྱད་པར་ནི་ལྷག་པའོ། །ལྡན་པ་ནི་མངོན་དུ་བྱས་པའོ། །རྙེད་པ་ནི་དབྱིག་དང་གསེར་ལ་སོགས་པའོ།། བཀུར་སྟི་ནི་མཆོད་པའོ། །ཆེན་པོ་ནི་མང་པོ་སྟེ་མང་པོའི་སྒྲ་ནི་རེ་རེ་ལ་སྦྱར་ན་རྙེད་པ་ཆེན་པོ་དང་བཀུར་སྟི་ཆེན་པོའོ། །གྲགས་པ་ནི་སྙན་པར་གྲགས་པའོ། །ཁྱད་པར་ནི་ཁྱད་པར་དུ་འཕགས་པ་སྟེ་བྱུང་བར་གྱུར་ཏེ་ཞེས་བྱ་བ་ནི་བྱུང་ངོ་ཞེས་བྱ་བའི་ཐ་ཚིག་གོ །བྱང་ཆུབ་སེམས་དཔའ་
དེའི་བློ་ནི་སེམས་སོ། །ཆོས་ལ་གོམས་པ་ཞེས་བྱ་བ་ལ་ཆོས་ནི་རྣམ་པ་གཉིས་ཏེ། ཁྱིམ་ན་གནས་པའི་ཆོས་དང༌། མངོན་པར་འབྱུང་བའི་ཆོས་སོ། །ཁྱིམ་ན་གནས་པའི་ཆོས་ལ་གོམས་ཤིང་བསྒོམས་པར་གྱུར་ཀྱང་དེ་རྙེད་པ་ལ་སོགས་པ་དེ་ལ་མངོན་པར་དགའ་བར་མ་གྱུར་ཏེ། རབ་ཏུ་བྱུང་བ་དང་འདྲིས་པར་བྱས་པ་ཞེས་བྱ་བ་རབ་ཏུ་བྱུང་བ་ལ་འདྲིས་པར་བྱས་པས་ནི། བྱང་ཆུབ་སེམས་དཔའ་དེ་རབ་ཏུ་བྱུང་བ་ལ་དགའ་ཞིང༌། དེ་ལ་དགའ་བར་མ་གྱུར་པ་ནི། མངོན་པར་དགའ་བ་མེད་པ་ཡིན་ནོ། །སྔོན་གྱི་སྤྱོད་པས་དེ་བློ་ཡོངས་སུ་དག །ཅེས་བྱ་བ་ནི་སྐྱེ་བ་གཞན་དག་ལ་དེས་ཡོངས་སུ་དག་པར་བྱས་པ་སྟེ། གང་གིས་བློ་ཡོངས་སུ་དག་པ་དེ་ནི་བློ་ཡོངས་སུ་དག་པའོ། །འདོད་པར་བྱ་བ་ཡིན་པས་འདོད་པ་རྣམས་སོ། །མངོན་པ་ནི་རྟོགས་པའོ། །སྐྱོན་མང་ཞེས་བྱ་བ་ནི་བསགས་པ་དང༌། བསྲུངས་པ་དང༌། ཉེ་བར་སྤྱོད་པའི་ཀུན་ནས་ཉོན་མོངས་པ་ལ་སོགས་པའི་མངོན་པའི་ཉེས་པས་སོ། །ཁྱིམ་ན་གནས་པ་ནད་བཞིན་ཡོངས་སྤངས་ནས་ཞེས་བྱ་བ་ནི་ནད་ནི་མི་བདེ་བའོ། །ཡོངས་སུ་སྤངས་པ་ནི་ཡོངས་སུ་དོར་བའོ། །ནགས་ཚལ་གནས་ཤིང་ཞེས་བྱ་བ་ནི་ནགས་ཀྱི་ཕྱོགས་གཅིག་གོ །བརྒྱན་པར་གྱུར་ཞེས་བྱ་བ་ནི་སྡུད་པའོ། །དེ་ནི་ཞེས་བྱ་བ་ནི་བྱང་ཆུབ་སེམས་དཔའོ། །དེར་ནི་ཞེས་བྱ་བ་ནི་ནགས་ཀྱི་གནས་དེར་རོ། །ཆགས་མེད་ཅེས་བྱ་བ་ནི་ཞེན་པ་མེད་པ་སྟེ། ཆགས་པ་མེད་པར་གྱུར་པའི་ཕྱིར་ཆགས་པ་མེད་པའོ། །དེ་ཡིས་ཞེས་བྱ་བ་ནི་ཆགས་པ་མེད་པ་དེ་ཡིས་ཞེས་འདྲེན་པ་ཡིན་ནོ། །ཤེས་རབ་ཡོངས་སུ་སྦྱངས་པ་ནི་ཤེས་རབ་དག་པའོ། །ཞི་བ་ནི་ཉེ་བར་ཞི་བའོ། །མིའི་འཇིག་རྟེན་ཞེས་བྱ་བ་ནི་མིའི་འཇིག་རྟེན་དུའོ། །དམ་པ་ནི་གཞུང་ལུགས་སྟོན་པར་བྱེད་པའི་སྐྱེས་བུ་དམ་པ་དེ་དག་གི་རྗེས་སུ་སྤྱོད་པ་སྟེ། རྗེས་སུ་འཇུག་ཅིང་དབང་པོ་སྡོམ་པའོ། །བྲལ་བ་ནི་མེད་པར་གྱུར་པའོ། །ངན་པ་ནི་འཇིག་རྟེན་ངན་པ་བཞིན་དུ་སྤྱོད་པ་སྟེ། ངན་པ་བྱེད་པ་ཡིན་པས་
ངན་པ་སྤྱོད་པའོ། །ཆགས་པ་ནི་ཞེན་པའོ། །བཟློག་པ་ནི་བསལ་བའོ། །བྱམས་པའི་རང་བཞིན་ཞེས་བྱ་བ་ནི་བྱམས་པའི་ངོ་བོ་ཉིད་ཀྱིས་སོ། །རབ་ཞི་ཞེས་བྱ་བ་ནི་ཉེ་བར་ཞི་བ་ཉིད་དོ། །དེའི་ཞེས་བྱ་བ་ནི་བྱང་ཆུབ་སེམས་དཔའི་འོ། །རྣམ་པར་བརླན་པ་ཞེས་བྱ་བ་ནི་རྣམ་པར་བརླན་ཅིང་འཇོག་པའོ། །སེམས་མཐུན་ཞིང་ཞེས་བྱ་བ་ནི་མི་མཐུན་པ་མེད་པའོ། །ཕན་ཚུན་ནི་གཅིག་ལ་གཅིག་གོ །གནོད་པ་མེད་པ་ཞེས་བྱ་བ་ནི་ལྡོག་པ་སྟེ། དེ་གང་ལས་ལྡོག་པ་ཡིན་ཞེ་ན། གནོད་པའི་དངོས་པོ་སྟེ་ཀུན་ནས་གནོད་པའི་སེམས་ལས་སོ། །དཀའ་ཐུབ་ཅན་ཞེས་བྱ་བ་ནི་དྲང་སྲོང་བཞིན་ནོ། །གཅན་གཟན་ཁྲོ་བོ་ནི་སེང་གེ་དང༌། སྟག་དང༌། དོམ་ལ་སོགས་པའོ། །སྤྱོད་ཅེས་བྱ་བ་ནི་སྤྱོད་པ་དང་ལྡན་པའོ། །སྤྱོད་པ་དག་པ་ནི་གཞུང་ལུགས་དག་པའོ། །ཡང་ན་སྤྱོད་པ་དག་པ་ནི་བདུན་ལས་ལྡོག་པའོ། །དབང་པོ་དུལ་བ་ཞེས་བྱ་བ་ནི་དབང་པོ་དམ་པར་བསྡམས་པའོ། །ཆོ་ག་ཤེས་པ་ནི་ངན་དོན་ཙམ་གྱིས་ཆོ་ག་ཤེས་པའོ། །བཟའ་བ་དང་བགོ་བ་ལ་སོགས་པའི་རྒྱུས་སོ། །སྙིང་རྗེའི་ཡོན་ཏན་ཞེས་བྱ་བ་ནི་གོམས་པས་སོ། །འཇིག་རྟེན་ནི་སྣོད་ཀྱི་འཇིག་རྟེན་ནོ། །སྐྱེ་བོ་ནི་དེ་ན་གནས་པའི་སྐྱེ་བོ་ལ་བརྗོད་དོ། །མ་འདྲིས་པ་ནི་ཡོངས་སུ་འདྲིས་པར་མ་གྱུར་པའོ། །འང་གི་སྒྲ་ནི་སྲིད་པའི་དོན་ནོ། །ཇི་ལྟར་བྱང་ཆུབ་སེམས་དཔའ་སྐྱེ་བོ་ལ་བྱམས་པར་གྱུར་པ་དེ་བཞིན་དུ་མ་འདྲིས་པའི་སྐྱེ་བོ་དང་བྱང་ཆུབ་སེམས་དཔའ་དེ་ལ་བྱམས་པར་གྱུར་ཏོ། །འདོད་པ་ཆུང་བ་ནི་ཡོངས་སུ་བཟུང་བ་ལ་རྒྱབ་ཀྱིས་ཕྱོགས་པ་ཡིན་ཏེ། ཆོག་ཤེས་པའོ། །ངན་གཡོ་ཞེས་བྱ་བ་ནི་རྙེད་པ་དང་བཀུར་སྟིའི་ཆེད་དུ་སྤྱོད་ལམ་འཆོས་པའོ། །མི་ཤེས་པ་ནི་མངོན་པར་མི་ཤེས་པའོ། །ཆགས་པ་ནི། རྙེད་པ་དང༌། གྲགས་པ་དང༌། བདེ་བ་དག་ལའོ། །འདིས་ནི་ཆགས་པ་མེད་པར་བསྟན་པ་ཡིན་ནོ། །དེ་ནི་ཞེས་བྱ་བ་ནི་བྱང་ཆུབ་སེམས་དཔའོ། །ལྷ་རྣམས་ཀྱི་ཡིད་ཀྱང་མགུ་བར་གྱུར་པས་དང་ཞིང་གུས་པ་ལ་རབ་ཏུ་གཞོལ་བ་ནི་རྗེས་སུ་མཐུན་པའོ།།
བྱེད་པ་ནི་བྱེད་པ་དང་ལྡན་པའོ། །དེ་ནི་ཞེས་བྱ་བ་ནི་བྱང་ཆུབ་སེམས་དཔའོ། །རབ་ཏུ་བྱུང་བ་ནི་རྟགས་དང་ལྡན་པར་བྱས་ཞེས་བྱ་བའི་དོན་ཏོ། །མིས་ཞེས་བྱ་བ་ནི་སྐྱེ་བོས་སོ། །ཐོས་ཏེ་ཞེས་བྱ་བ་ནི་རྣ་བའི་དབང་པོ་གཏད་པ་ལས་སོ། །དེ་ནས་ཞེས་བྱ་བ་ནི་དེ་མ་ཐག་ཏུའོ། །ཡོན་ཏན་ཞེས་བྱ་བ་ནི་སྦྱིན་པ་དང༌། ཚུལ་ཁྲིམས་དང༌། དེས་པ་ལ་སོགས་པའོ། །སེམས་དྲངས་ནས་ཞེས་བྱ་བ་ནི་ཡོན་ཏན་འཛིན་པར་བྱེད་པ་སེམས་ཡིན་པས་སོ། །རྣམ་སྤངས་ཏེ་ཞེས་བྱ་བ་ནི་ཡོངས་སུ་དོར་བའོ། །དེ་གང་ཡིན་ཞེ་ན། གཉེན་དང་ཡོངས་སུ་བཟུང་བ་སྟེ། གཉེན་ནི་ཕ་དང་མ་དང་འབྲེལ་པའོ། །ཡོངས་སུ་བཟུང་བ་ནི། དབྱིག་དང༌། གསེར་དང༌། གླང་པོ་ཆེ་ལ་སོགས་པའོ། །དེའི་སློབ་མ་ཞེས་བྱ་བ་ནི། བྱང་ཆུབ་སེམས་དཔའ་དེའི་སློབ་མར་ཉེ་བར་ཁས་བླངས་པའོ། །ཇི་ལྟར་ཞེ་ན། འདི་ལྟར་དངོས་གྲུབ་གྲུབ་པ་ལྟ་བུར་རོ། །ཡང་ན་དེའི་སློབ་མ་ནི། དངོས་གྲུབ་བཞིན་དུ་སྟེ་བྱ་བ་རྣམས་གྲུབ་པ་བཞིན་དུའོ། །གྱུར་པ་ནི་ཐོབ་པའོ། །ཚུལ་ཁྲིམས་ནི་སོ་སོ་ཐར་པའི་སྡོམ་པའོ། །གཙང་བ་བསླབ་པའི་གཞི་ཡང་དག་པར་བསྲུང་བ་ལ་སོགས་པའོ། །དབང་པོ་དུལ་བ་ནི་དང་པ་ལ་སོགས་པ་ཡོངས་སུ་གཟུང་ངོ༌། །བསྒོམ་པ་ནི་གོམས་པའི་སྦྱོར་བས་སོ། །དྲན་པ་ཞེས་སྨོས་པས་ནི་དྲན་པ་ཉེ་བར་གཞག་པ་གཟུང་ངོ༌། །མ་ཉམས་པ་ནི་དྲན་པ་མངོན་དུ་འགྲོ་བས་དྲན་པ་ཉེ་བར་གནས་པའོ། །རབ་ཏུ་དབེན་པ་ནི་རབ་ཏུ་དབེན་པར་བྱས་པ་སྟེ། ལུས་ངག་ཡིད་གསུམ་རྣམས་དབེན་པར་གནས་པས་སོ། །བྱམས་པ་ཞེས་བྱ་བ་ལ་སོགས་པ་སྨོས་པས་ནི་སྙིང་རྗེ་དང༌། དགའ་བ་དང༌། བཏང་སྙོམས་གཟུང་ངོ༌། །ཡིད་ནི་སེམས་སོ། །ཏིང་ངེ་འཛིན་ནི་བསམ་གཏན་ནོ། །ཅི་ནུས་ཞེས་བྱ་བ་ནི་གང་གང་ལ་ཅི་ནུས་པ་སྟེ་ཇི་ལྟར་ནུས་པའོ། །དང་པོ་ཚུལ་ཁྲིམས་ལ་གཞག་པར་སྟོན་ཏོ། །ཚུལ་ཁྲིམས་ལ་གནས་ནས་དབང་པོའི་སྒོ་སྡོམ་པའོ། །དེ་ལ་སོགས་པའི་རིམ་པ་ཇི་ལྟར་འཚམ་བ་བཞིན་དུ་ཅི་ནུས་པ་སྟེ། སྟོབས་ཇི་ལྟ་བ་བཞིན་དུ་རྗེས་སུ་སྟོན་པ་ཞེས་བྱ་བའི་དོན་ཏོ། །སློབ་མ་
དེ་གང་ཡིན་ཞེ་ན། དེ་ནས་ཞེས་བྱ་བ་ནི་དེ་མ་ཐག་པའོ། །བདག་ཉིད་ཆེན་པོ་ཞེས་བྱ་བ་ལ། བདག་ཉིད་ཆེན་པོ་གང་ལ་ཡོད་པ་དེ་ལ་བདག་ཉིད་ཆེན་པོ་སྟེ། ཚུལ་ཁྲིམས་ལ་སོགས་པ་ཡོད་པའོ། །དེ་ཞེས་བྱ་བ་ནི་བྱང་ཆུབ་སེམས་དཔའོ། །རེ་ཞིག་ཅེས་བྱ་བ་ནི་དུས་གང་གི་ཚེ་ནའོ། །སློབ་མའི་ཚོགས་ཞེས་བྱ་བ་ནི་སློབ་མ་འདུས་པ་རྣམས་སོ། །ཕལ་ཆེར་ཞེས་བྱ་བ་ནི་མང་དུའོ། །ཡོངས་སུ་རྫོགས་པ་ནི་བྱ་བ་རྣམས་མཐར་ཕྱིན་པའོ། །རྒྱ་ཆེ་བ་ནི་ཡངས་པར་གྱུར་པ་ཞེས་བྱ་བའི་དོན་ཏོ། །དགེ་བ་ནི་དེས་དག་པའོ། །ལས་ནི་ལམ་སྟེ། འཕགས་པའི་ལམ་ཡན་ལག་བརྒྱད་པའོ། །རབ་ཏུ་བཀོད་པ་ནི་རྣམ་པར་གཞག་པའོ། །འཇིག་རྟེན་པ་རྣམས་ཞེས་བྱ་བ་ནི་སློབ་མའི་མཆོག་ཏུ་བཟུང་བ་ཡིན་ནོ། །ཡང་ན་འཇིག་རྟེན་པ་ཐ་མལ་པའོ། །ངེས་པ་ནི་མྱ་ངན་ལས་འདས་པའོ། །ངེས་བའི་ལམ་ནི་འཕགས་པའི་ལམ་ཡན་ལག་བརྒྱད་པ་དེ་ཉིད་སྦྱར་བར་བྱའོ། །བཙུད་པ་ནི་ཡང་དག་པར་ཞུགས་པར་བྱས་པས་སོ། །ངན་སོང་ནི་དམྱལ་བ་དང༌། དུད་འགོ་དང༌། ཡི་དགས་ལ་སོགས་པའོ། །སྒོ་ནི་འཇུག་པར་བྱེད་པ་སྟེ། བཅད་པ་ནི་བཀག་པའོ། །བདེ་འགྲོ་ཞེས་བྱ་བ་ནི་མཛེས་པར་འགྲོ་བས་བདེ་འགྲོའོ། །ཡང་ན་ལྷ་དང་མིའི་མྱ་ངན་ལས་འདས་པའོ། །ལམ་པོ་ཆེ་སྟེ་རྒྱལ་པོའི་ལམ་སྲང་བཞིན་དུ་ཞེས་བྱ་བ་ནི་དཔེས་ཉེ་བར་འཇལ་བ་སྟེ། ཇི་ལྟར་བྲམ་ཟེའི་ཁྱེའུ་སེང་གེ་ལྟ་བུའོ། །བྱས་ནས་ཞེས་བྱ་བ་ནི་བྱས་པར་གྱུར་ནས་ཞེས་པ་ཡིན་ནོ། །ཚེ་འདི་ལ་ཞེས་བྱ་བ་ནི་མཐོང་བའི་ཆོས་ལའོ། །བདེ་བ་སྤྱད་པའི་ཕྱིར་ཞེས་བྱ་བ་ནི་ཚངས་པའི་གནས་པ་བཞི་སྟེ། དེ་ཡང་གཅིག་ཏུ་བདེ་བ་ཡིན་པས་དེས་གནས་པའི་ཕྱིར་སྤྱོད་པའོ། །དེའི་ཚེ་ཞེས་བྱ་བ་ནི་སེམས་ཅན་གདུལ་བྱ་རྣམས་འདུལ་བའི་ཚེའོ། །ཡང་ན་དེའི་ཚེ་ཞེས་པ་ནི་སློབ་མ་སྨིན་པའི་ཚེ་ནའོ། །སློབ་མའི་ངང་ཚུལ་ཅན་ཡིན་པས་ན་སློབ་མའོ། །མ་ཕམ་པ་ནི་བྱམས་པ་འདིའོ། །རྗེས་སུ་མཐུན་པ་ཞེས་བྱ་བ་ནི་རྗེས་སུ་འགྲོ་བའོ། །རྣལ་འབྱོར་དང་མཐུན་པ་ནི་ཞིག་ནས་དང་ལྷག་མཐོང་དང་
རྗེས་སུ་མཐུན་པའི་གནས་སོ། །རི་སུལ་ནི་རིའི་སྨན་ལྗོངས་དང༌། ཕུག་དང་ཚང་ཚིང་དང་བཅས་པའོ། །གནས་ཤིང་སྤྱོད་པ་ནི་སྤྱོད་ཅིང་འདུག་པའོ། །དེ་ནས་ཞེས་བྱ་བ་ནི་དེ་མ་ཐག་པའོ། །རིའི་ཁྲོད་ནི་རིའི་ཁྲོད་དེ་སུལ་དག་གོ །དེ་ན་ནི་ཞེས་བྱ་བ་ནི་དེའི་ཚེ་ནའོ། །སྟག་མོ་ནི་སྟག་མོ་ཉིད་དོ། །ཕྲུ་གུ་འབྲངས་བར་གྱུར་པ་ཞེས་བྱ་བ་ནི་བཙས་པར་གྱུར་པའོ། །བཙས་པའི་ནད་ཀྱིས་སྡུག་བསྔལ་བ་ཉིད་ནི་ཉོན་མོངས་པའོ། །སྐྱོན་ནི་དེའི་སྐྱོན་གྱིས་ལྟོགས་ཤིང་དེས་ཤིན་ཏུ་གཟིར་བའི་སྡུག་བསྔལ་གྱི་དབང་དུ་གྱུར་ཏེའོ། །སྤྱོད་པ་ཉམས་པར་གྱུར་ཞེས་བྱ་བ་ནི་འགྲོ་བ་ཉམས་པ་སྟེ་མི་ནུས་པར་གྱུར་པའི་ཕྱིར་རོ། །མཐོང་བ་ནི་ཤེས་པའོ། །གང་ལ་མིག་ཟུང་ཡོང་པ་དེ་ནི་མིག་གཉིས་ལྟ་བའོ། །ལྟ་བ་ནི་མིག་གོ །གཉིས་ནི་ཟུང་ངོ༌། །ཞན་པར་གྱུར་པ་ནི་མིག་ཕུགས་སུ་ཞུགས་པའོ། །བཀྲེས་པ་ནི་ཟ་བར་འདོད་པའོ། །ལྟོ་བ་ནི་གསུས་པ་སྟེ་རབ་ཏུ་རྙོང་བ་ནི་རབ་ཏུ་ཞུམ་པར་གྱུར་པ་སྟེ། བཙས་པའི་ནད་ཀྱིས་ལྟོ་རབ་ཏུ་ཞུམ་པར་གྱུར་པའོ། །ཁ་ཟས་ཞེས་བྱ་བ་ནི་བཟའ་བ་བཞིན་དུ་མཐོང་བར་གྱུར་པས་སོ། །དེ་གང་ཡིན་ཞེ་ན། ཕྲུ་གུ་དེ་ཤིན་ཏུ་གཞོན་པའི་གཟུགས་ཅན་ནོ། །བདག་གི་ཞེས་བྱ་བ་ནི་རང་གིའོ། །བུ་ཞེས་བྱ་བ་ནི་རང་ལས་སྐྱེས་པའོ། །མ་ཞེས་བྱ་བ་ནི་འཛིན་པའོ། །ཡིད་གཅུགས་འཇིགས་མེད་ཅེས་བྱ་བ་ནི་དོགས་པ་མེད་པར་རོ། །ནུ་ཞོ་ནི། ནུ་མ་ནས་འོང་བའོ། །འདོད་ཕྱིར་ཞེས་བྱ་བ་ནི་སྲེད་པ་སྟེ། འཐུང་བར་འདོད་པའོ། །ལྷགས་པ་ཞེས་བྱ་བ་ནི་ཉེ་བར་ཕྱིན་པའོ། །སྟག་སྐད་ཅེས་བྱ་བ་ནི་སྐད་རྩུབ་པའོ། །ཉེར་ཉེར་སྐད་འབྱིན་ཅིང་ཞེས་བྱ་བ་ནི་སྒྲའི་ཁྱད་པར་ལས་བྱ་བ་ཡིན་ཏེ། འཇིགས་སུ་རུང་བས་བསྡིགས་པ་དང་སྐྲོད་པའོ། །གཞན་གྱི་ཞེས་བྱ་བ་ནི། ཕ་རོལ་གྱིའོ། །བཞིན་ཞེས་བྱ་བ་ནི། དཔེས་ཉེ་བར་འཇལ་བའོ། །བྱང་ཆུབ་སེམས་དཔས་སྟག་མོ་དེ་མཐོང་ནས། །བརྟན་ཡང་སྙིང་རྗེའི་དབང་གྱུར་བས། །ཞེས་བྱ་བ་ནི་བརྩེ་བའི་དབང་དུ་གྱུར་པས་འབར་བར་གྱུར་པའོ། །ཅིའི་ཕྱིར་འདར་ཞེ་ན། གཞན་གྱི་སྡུག་བསྔལ་གྱིས་སོ། །ཇི་ལྟར་འདར་ཞེ་ན། ས་གཡོས་པའི་ལྗོན་ཤིང་ལྟ་བུར་རོ། །ས་ནི་འབྱུང་བའི་
རྟེན་ནོ། །ལྗོན་ཤིང་ནི་ཤིང་སྟེ། ཇི་ལྟར་ས་གཡོས་པ་ན། ཤིང་འགུལ་བ་དེ་བཞིན་དུ་བྱང་ཆུབ་སེམས་དཔའ་གཞན་གྱི་སྡུག་བསྔལ་གྱིས་འདར་རོ་ཞེས་བྱ་བའི་དོན་ནོ། །བདག་གི་སྡུག་བསྔལ་ཞེས་བྱ་བ་ནི་རང་གི་སྡུག་བསྔལ་ཆེན་པོ་ལ་ཡང་བརྟན་པས་ཡི་ཆད་པ་དང། སྒྱིད་ལུག་པ་སྤངས་པ་ཡིན་ནོ། །སྙིང་རྗེའི་བདག་ཉིད་ཅེས་བྱ་བ་ནི་སྙིང་རྗེའི་བདག་ཉིད་དུ་གྱུར་པའོ། །གཞན་གྱི་ཞེས་བྱ་བ་ནི་ཕ་རོལ་གྱིའོ། །ཆུང་དུ་ནི་ཅུང་ཟད་ཙམ་གྱིས་ཀྱང་ངོ༌། །སྡུག་བསྔལ་ནི་ཕོངས་པའོ། །འདར་བར་གྱུར་པ་ཞེས་བྱ་བ་ནི་གནོད་པར་གྱུར་པའོ། །དེ་ཞེས་བྱ་བ་ནི་དེའི་ཕྱིར་རོ། །རྨད་དོ་ཞེས་བྱ་བ་ནི་ངོ་མཚར་རོ་ཞེས་བྱ་བའོ། །དེ་ནས་ཞེས་བྱ་བ་ནི་དེ་མ་ཐག་པའོ། །བྱང་ཆུབ་སེམས་དཔའ་བརྟབས་ཤིང་རིངས་པའི་ཚིག་གང་ཡིན་པ་དེ་ནི་རིངས་རིངས་སྐད་དུ་སྨྲ་བའི་ཚིག་བཟླས་པ་སྟེ། ཇི་ལྟ་བུ་ཞེས་བྱ་བ་ལྟ་བུའོ། །རང་བཞིན་ཁྱད་པར་ཅན་གསལ་བ་ཞེས་བྱ་བ་ལ་རང་བཞིན་ནི་ངོ་བོ་ཉིད་དོ། །ཁྱད་པར་ཅན་ནི་དམ་པའོ། །གསལ་བར་སྟོན་པ་ཞེས་བྱ་བ་ནི་རབ་ཏུ་སྟོན་པའོ། །སྙིང་རྗེ་ནི་བརྩེ་བའོ། །དབང་གིས་ཞེས་བྱ་བ་ནི་སྤྲོ་བས་སོ། །ཚིག་གི་འབྲུ་ཞེས་བྱ་བ་ནི་ཡི་གེའོ། །གསལ་བ་ཞེས་བྱ་བ་ནི་སེམས་མ་འཁྲུལ་པའོ། །སློབ་མ་ནི་མ་ཕམ་པའོ། །སྨྲས་པ་ནི་བསྟན་པའོ། །བུ་བུ་ཞེས་བྱ་བ་ནི་རྟག་པར་ཟློས་པའོ། །འཁོར་བ་ནི་འཁོར་བར་བྱེད་པས་ན་འཁོར་བའོ། །ཡོན་ཏན་མེད་པ་ཞེས་བྱ་བ་ནི་ཡོན་ཏན་ཕྱིར་རྒོལ་བར་གྱུར་པས་སོ། །ལྟོས་ཞེས་བྱ་བ་ནི་ལྟོས་ཤིག་ཅེས་པའོ། །གཅན་གཟན་མོ་ཞེས་བྱ་བ་ནི་གཅན་གཟན་གྱི་རིགས་སོ། །བྱམས་པ་ནི་བརྩེ་ཞིང་དགའ་བ་དང་རྗེས་སུ་འབྲེལ་བའོ། །མཚམས་ནི་རྣམ་པར་གནས་པའོ། །འདས་པ་ནི་བརྒལ་བའོ། །བདག་གི་བུ་ཞེས་བྱ་བ་ནི་རང་གི་བུའོ། །འདི་སྐད་བསྟན་ཏེ། བྱམས་པའི་མཚམས་སུ་བྱས་པ་སྟེ། སྟག་མོ་གང་ཡིན་པ་དེས་འདས་པར་བྱས་ཞེས་པའོ། །ཨེ་མ་ཞེས་པ་ནི་ངོ་མཚར་དུ་གྱུར་པའོ། །ཀྱི་ཧུད་ཅེས་བྱ་བ་ནི་སྐྱོ་བ་དང་རྗེས་སུ་བརྩེ་བས་སོ། །ཀྱི་ཧུད་ཅེས་བྱ་བ་ནི། དཀའ་བས་སོ། །བདག་ལ་བྱམས་པ་ནི་བདག་ལ་དགའ་བའོ། །མི་བཅད་དོ་
ཞེས་བྱ་བ་ནི་སྙིང་རྗེ་མེད་པའོ། །གང་གི་ཕྱིར་ཞེས་བྱ་བ་ནི་གང་གིས་སོ། །མ་ནི་སྐྱེད་པར་བྱེད་པའོ། །ཡང་གི་སྒྲ་ནི་སྲིད་པའི་ཚུལ་ལོ། །བུ་ནི་བུའོ། །བཟའ་བ་ནི་ཟ་བའོ། །འདོད་པ་ནི་མངོན་པར་འདོད་པའོ། །གང་གི་ཕྱིར་ཞེས་བྱ་བ་ནི་གང་གི་རྒྱུས་སོ། །འདི་འདྲའི་ཞེས་བྱ་བ་ནི་བུ་ཟ་བར་འདོད་པ་དེའི་ལས་སྟོན་པར་བྱེད་པ་ཡིན་ནོ། །ལས་ནི་བྱ་བའོ། །ཀྱང་གི་སྒྲ་ནི་སྲིད་པ་ཉིད་དོ། །བྱེད་པ་ནི་བྱེད་པར་གྱུར་པའོ། །རྩོལ་བ་དེ་ལྟ་བུ་ཞེས་བྱ་བ་ནི་རབ་ཏུ་གནས་པ་དང༌། འབད་པ་དང་འཇུག་པའོ། །བདག་ལ་བྱམས་པ་ནི་བདག་ལ་དགའ་བའོ། །འདི་ཞེས་བྱ་བ་ནི་ཉེ་བར་སྟོན་པ་ཡིན་ནོ། །དགྲ་ནི་ཤ་ཁོན་ཅན་ནོ། །སུ་ཞིག་ཅེས་བྱ་བ་ཇི་ལྟར་ཞེས་པའོ། །འཕེལ་བར་བྱེད་པ་ནི་སྐྱེད་པར་བྱེད་པའོ། །ཡོད་ཅེས་བྱ་བ་ནི་འོས་ཞེས་བྱ་བའི་དོན་ཏོ། །དེ་བས་ན་ཞེས་བྱ་བ་ནི་དེའི་ཕྱིར་ཞེས་བྱ་བ་སྟེ། བུ་ཟ་བར་འདོད་པ་དེ་བས་ན་ཆོལ་ཅིག་པའོ། །མྱུར་དུ་ཞེས་བྱ་བ་ནི་རིངས་པར་རོ། །ཚོལ་ཅིག་པ་ནི་བཙལ་བ་སྟེ། དེས་བུ་ཟ་བར་མི་འགྱུར་བ་དེ་ལྟར་ཚོལ་ཅིག་པའོ། །གང་ཞིག་ནས་ཞེས་བྱ་བ་ནི་ཇི་ལྟར་ཡོང་ངོ༌། །འདི་ཞེས་བྱ་བ་ནི་སྟག་མོའོ། །བཀྲེན་པའི་སྡུག་བསྔལ་ནི་ཞེས་བྱ་བ་ནི་འདོད་པའི་ཚོལ་བའོ། །བསལ་བ་ནི་གསོ་བའོ། །རྒྱུ་ནི་རྒྱུ་ཉིད་དོ། །ཇི་ལྟར་མོ་བདག་དང་ཕྲུ་གུ་རྣམས་མ་རུང་བར་མི་འགྱུར་བར་ཞེས་བྱ་བ་ནི་སྟག་མོ་དང་ཕྲུ་གུ་གཉིས་ཏེ། བུ་དང་བདག་ཉིད་མ་རུངས་པར་མ་གྱུར་པ་ཞེས་བྱ་བ་ནི་འཆི་བར་མ་གྱུར་པའོ། །དགག་པ་གཉིས་སྨོས་པ་ནི་དོན་གྱི་རང་བཞིན་སྨོས་པར་བྱེད་པ་སྟེ། འཚེ་བ་ཉིད་ཀྱིས་འཆི་བར་མི་འགྱུར་བའོ། །མོ་བདག་ལ་གནོད་པ་ནི་བུ་བསད་པའི་སྡིག་པས་འཇིག་རྟེན་ཕ་རོལ་དུ་ངན་སོང་དུ་འགྲོ་བའོ། །བདག་ཀྱང་འདི་ཞེས་བྱ་བ་འདིས་ནི་བྱང་ཆུབ་སེམས་དཔའ་རང་གི་ལུས་ཀྱི་སྦྱིན་པ་ཡིན་པ་ལ་བསམས་ནས་སྨྲས་པའོ། །དེས་ཞེས་བྱ་བ་ནི་སློབ་མའོ། །དེ་བཞིན་དུ་བགྱིའོ་ཞེས་ནས་སོ། །དེ་ཞེས་བྱ་བ་ནི་བྱང་ཆུབ་སེམས་དཔའ་ལས་དེའོ། །མཉན་ཏེ་ཞེས་བྱ་བ་ནི་མཉན་ནས་སོ། །དེའི་ཟས་ཞེས་བྱ་བ་ནི་སྟག་མོ་དང་སྦྱར་རོ། །ཚོལ་བ་ནི་བཙལ་བའོ། །འབད་པ་ནི་ནན་ཏན་ཏེ། དེ་བྱས་པར་གྱུར་ཏོ་ཞེས་བྱ་བའི་དོན་
ཏོ། །དེ་ནས་ཞེས་བྱ་བ་ནི་དེ་མ་ཐག་པའོ། །བྱང་ཆུབ་སེམས་དཔའ་ཞེས་བྱ་བ་ནི་བྱང་ཆུབ་ཀྱི་ཕྱིར་སེམས་དཔས་ན་བྱང་ཆུབ་སེམས་དཔའོ། །སློབ་མ་དེ་ཞེས་བྱ་བ་ནི་མ་ཕམ་པའོ། །སྙད་བཏགས་ཏེ་ཞེས་བྱ་བའི་དོན་དང་ལྡན་པར་བྱས་ཏེའོ། །བཏང་བ་ནི་གཞན་དུ་བཏང་བའོ། །བསམས་པ་ནི་བསམས་པ་ལ་ཞུགས་པའོ། །ཡོད་བཞིན་དུ་ཞེས་བྱ་བ་ནི་ལྡན་བཞིན་དུའོ། །ཚང་བ་ཞེས་བྱ་བ་ནི་མ་ལུས་པའོ། །ཚང་བ་ཞེས་སྨོས་པ་ནི་གཞན་དག་འདི་ལྟར་མ་གྱུར་པའི་ཕྱིར་ཏེ། ལ་ལ་ཡན་ལག་མ་ཚང་བ་ལས་ནི་ཡོངས་སུ་གཏོང་བ་དང་ལྡན་པ་ཡིན་ནོ་ཞེས་མི་འཛིན་པས་སོ། །ལུས་ནི་འཇིག་པའི་བདག་ཉིད་པས་ལུས་སོ། །ཅི་ཕྱིར་ཞེས་བྱ་བ་ནི་ཅིའི་རྒྱུས་སོ། །གཞན་ལ་ཞེས་བྱ་བ་ནི་གཞན་དག་གི་སྟེ་ཤའོ། །བཙལ་བ་ནི་བསླང་བར་བྱ་བའོ། །དེ་ཞེས་བྱ་བ་ནི་སློབ་མས་ཀྱང་ངོ༌། །གཏོལ་མེད་ཅེས་བྱ་བ་ནི་གློ་བུར་དུ་རྙེད་དམ་མི་རྙེད་མ་ངེས་ཞེས་བྱ་བའི་དོན་ཏོ། །གང་གི་ཕྱིར་བདག་གི་དགོས་པ་ཞེས་བྱ་བ་ནི་རྙེད་པ་ཕུན་སུམ་ཚོགས་པའོ། །དགོས་པ་མི་འགྲུབ་སྲིད་ཅེས་བྱ་བ་ནི་བྱ་བ་མི་འགྲུབ་ཅིང་འཇིག་པར་འགྱུར་ཞེས་བྱའོ། །གཉིས་སུ་ན་ཞེས་བྱ་བ་ནི་གཞན་ཡང་ངོ༌། །བདག་མེད་ཅེས་བྱ་བ་ནི་བདག་དང་བྲལ་བའོ། །འཇིག་ལ་ཞེས་བྱ་བ་ནི་འཇིག་པའི་ངོ་བོ་ཉིད་ཡིན་པས་སོ། །སྙིང་པོ་མེད་པ་ནི་སྙིང་པོ་མེད་པའི་བདག་ཉིད་དེ་ཆུ་ཤིང་གི་སྡོང་པོ་ལྟ་བུའོ། །སྡུག་བསྔལ་ཞེས་བྱ་བ་ནི་གནོད་པ་སྣ་ཚོགས་ཀྱི་གཞིར་གྱུར་པ་ཡིན་པས་སྡུག་བསྔལ་ལོ། །དྲིན་མེད་ཅེས་བྱ་བ་ནི་གང་ཕན་པ་བྱས་པ་གང་ཡིན་པ་དེ་ཡང་འཇིག་པར་བྱེད་པའི་ཕྱིར་རོ། །རྟག་ཏུ་ཞེས་བྱ་བ་ནི་དུས་ཐམས་ཅད་དུའོ། །མི་གཙང་བ་ནི་ཕྱིས་དང༌། གཅིན་དང༌། མཆིལ་མ་ལ་སོགས་པ་འཛག་པའི་ཕྱིར་མི་གཙང་བའོ། །ལུས་ནི་ལུས་སོ། །གཞན་ལ་ཞེས་བྱ་བ་ནི་གཞན་གྱི་དོན་དུའོ། །ཕན་ཐོགས་པར་གྱུར་པ་ནི་ཉེ་བར་སྦྱོར་བར་གྱུར་པའོ། །དགའ་བར་མི་འགྱུར་བ་ནི་དགའ་བར་གྱུར་པའོ། །མཁས་པ་ནི་རྟོགས་པའོ། །བདག་ནི་བདེ་བ་ལ་ཆགས་ཞེས་བྱ་བ་ནི་རང་གི་བདེ་བ་ལ་ཞེན་པའོ། །གཞན་གྱི་སྡུག་བསྔལ་ཡལ་
བར་འདོར་བ་ནི་ཐ་མལ་པར་འདུག་པ་ཉིད་དོ། །མཐུ་མེད་དམ་ཞེས་བྱ་བ་ནི། སྦྲོ་བ་ཉམས་པའོ། །དམ་ཞེས་བྱ་བའི་སྒྲ་ནི་རྣམ་པ་གཉི་གར་བརྟག་པའོ། །གཞན་གྱི་སྡུག་བསྔལ་ཞེས་བྱ་བ་ནི་དེ་གཞན་ལ་སྡུག་བསྔལ་ཡོད་པ་སྟེ། འདི་ལྟར་གཞན་དག་སྡུག་བསྔལ་བས་སྡུག་བསྔལ་བདག་ལ་བདེ་བ་མེད་དོ། །ནུས་པ་ཡོད་བཞིན་དུ་ཞེས་བྱ་བ་ནི་སྐྱེས་བུའི་བྱེད་པ་སྟེ། འདི་ལྟར་ལུས་ཡོངས་སུ་གཏོང་བའོ། །ཅི་སྟེ་ཞེས་བྱ་བ་ནི་ཅིའི་ཕྱིར་ཡལ་བར་འདོར་བར་བྱེད་ཅེས་བྱ་བ་ཡིན་ནོ། །ནུས་པ་ཡོད་བཞིན་ཞེས་བྱ་བ་ནི་ལྡན་པ་སྟེ་སྐྱེས་བུའི་བྱེད་པའོ། །བདག་གིས་ཞེས་བྱ་བ་ནི་བདག་ཉིད་ཀྱིས་སོ། །གལ་ཏེ་ཡལ་བོར་ཞེས་བྱ་བ་སྟེ། །གལ་ཏེ་ཐ་མལ་པར་བདག་འདུག་ནའོ། །གསོད་པའི་དགྲ་ནི་ཕས་ཀྱི་དགྲ་སྟེ་གསོད་པར་འདོད་པའོ། །སྡུག་བསྔལ་བྱིང་བ་ཞེས་བྱ་བ་ནི་ཕོངས་པར་བྱིང་བ་ཞེས་བྱ་བའི་དོན་ཏོ། །སྡིག་པ་བྱས་པ་བཞིན་ཞེས་བྱ་བ་ནི་བདག་གིས་ཏེ་ཕྱི་ནས་ཡིད་ལ་གཅགས་པའི་ཕྱིར་རོ། །བདག་གི་སེམས་ནི་རང་གི་སེམས་སོ། །དེ་འགྱོད་པའི་མི་དེས་སེམས་ཀུན་ཏུ་ཚིག་པ་ཡིན་ཏེ། ཇི་ལྟ་བུ་ཞེ་ན། འདི་ལྟར་མེ་ཆེན་པོས་འདམ་བུའམ་རྩྭ་དག་ཚིག་པ་ཡིན་ནོ། །དེ་བས་ཞེས་བྱ་བ་ནི་དེའི་ཕྱིར་རོ། །བསྲུང་བར་བྱ་བ་ནི་བསྲུང་བའོ། །ལུས་ཞེས་བྱ་བ་ལ། ཀ་ཞེས་བྱ་བའི་སྒྲ་ངན་པར་བསྟན་ཏོ། །གཡང་སར་ལྷུང་བ་ལ་ཐུག་པ་ཡིན་པས་དེའི་ཕྱིར་གང་གི་སྲོག་ཐུག་པ་ཡོད་པ་སྟེ་ལུས་ཀྱིའོ། །ཐུག་པ་ཞེས་བྱ་བ་ནི་ཉེ་བར་འདོད་པའི་སྲོག་དང་ལྡན་པའི་ལུས་ཞེས་བྱ་བའི་དོན་ཏོ། །ཕྲུ་གུ་བསྲུང་བ་ནི་ཕྲུ་གུ་གསོད་པ་ལས་སོ། །གཅན་མོ་ནི་སྟག་མོའོ། །དེའི་ཕྲུ་གུ་ནི་དེའི་བུའོ། །གཞན་ཡང་ཞེས་བྱ་བ་ནི་གཞན་ཡང་ཡོད་པར་བསྟན་པའོ། །ཡང་ན་གཞན་ཡང་ཞེས་བྱ་བ་ནི་འདི་ལྟར་ཡང་བསྟན་པ་ཡིན་ཏེ། འདི་ལྟར་མདོའི་ཚིག་བསྟན་པ་ནི་ཡང་དག་པར་འཛིན་དུ་འཇུག་པའོ། །སྤྲོ་བ་བསྐྱེད་པ་ནི་ཡང་དག་པར་གཟེངས་བསྟོད་པའོ། །དེ་ལ་བསྟན་པ་ནི་རབ་ཏུ་བཤད་པའོ། །གང་ལ་བཤད་པ་ཡིན་ཞེ་ན། གང་འཇིག་རྟེན་ལ་ཕན་པར་བརྩོན་པ་རྣམས་སོ། །འཇིག་རྟེན་ནི་སེམས་ཅན་ནོ། །ཕན་བརྩོན་ནི་ཕན་འདོགས་པར་བྱེད་པའོ། །བརྩོན་འགྲུས་ཞན་པ་ནི་
རྨོངས་པ་སྟེ། ཕ་རོལ་གནོན་པ་ཞན་པ་དང༌། སྤྲོ་བ་ཆུང་བ་རྣམས་སོ། །དགའ་བ་བསྐྱེད་པ་ནི་ཚིམ་པར་བྱ་བའོ། །སུ་ཞེ་ན། གང་ཞིག་སྦྱིན་པ་གཏོང་ཕོད་པ་སྟེ། དེ་གང་ཡིན་ཞེ་ན། མགོན་མེད་ཟས་སྦྱིན་ལ་སོགས་པའོ། །གཏོང་བ་ནི་བཏང་བའོ། །ཕོད་པ་ནི་རླབས་ཆེ་བ་ཉིད་དོ། །སྐྱེ་བོ་དམ་པ་ཞེས་བྱ་བ་ནི་བག་ཡོད་པ་ལ་གནས་པ་སྟེ། བྱང་ཆུབ་སེམས་དཔའ་དང་སྐྱེས་བུ་དམ་པ་དག་གོ །ཡིད་དྲང་བ་ནི་འདྲེན་པའོ། །འདི་སྐད་སྟོན་པ་ཡིན་ཏེ། སྐྱེས་བུ་དམ་པ་རྣམས་ཀྱི་སེམས་འདྲེན་པར་བྱེད་པ་ཡིན་ནོ། །ཞེས་བྱ་བའི་དོན་ཏོ།། ཡང་ན་བདག་ལས་སྐྱེས་པ་ནི་བུ་བུ་ལས་བསྟན་པ་ནི་རབ་ཏུ་སྟོན་པའོ། །བརྩོན་པ་ནི་འབད་པའོ། །སྤྲོ་བ་བསྐྱེད་པ་ནི་གཟེངས་བསྟོད་པའོ། །ཡིད་དྲང་བ་ནི་ཡིད་དྲང་བར་བྱ་བའོ། །བདུད་ནི་འདོད་པའི་ལྷའོ། །ཆེན་པོ་ནི་མང་པོ་ཉིད་དོ། །སྡེ་ནི་ཚོགས་སོ། །སྤ་བཀོང་བ་ནི་སེམས་ཞུམ་པར་བྱ་བའོ། །ཡང་ན་སྤ་བཀོང་བ་ནི་ཡིད་སྐྱོ་བར་བྱ་བའོ། །སངས་རྒྱས་ཀྱི་ཡོན་ཏན་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དོ། །གཞན་ཡང་དྲན་པ་ཉེ་བར་གཞག་པ་ལ་སོགས་པ་མཐའ་དག་གོ །དགའ་བ་ནི་ཡོན་ཏན་ལ་དགའ་བའོ། །དང་བ་ནི་སེམས་དང་བའོ།། གང་དེ་དག་ལ་མངོན་པར་དད་པ་དང་མ་དད་པ་རྣམས་ཀྱང་དང་བར་འགྱུར་རོ། །བདག་གི་དོན་བརྩོན་ཞེས་བྱ་བ་ནི་བདག་གི་དོན་ལ་གཞོལ་བའོ། །ངོ་ཚ་ཞེས་བྱ་བ་ནི་ངོ་ཚའི་གནས་ཀྱིས་སོ། །འཇུངས་དང་འདོད་ཆེན་ཞེས་བྱ་བ་ལ། འཇུངས་པ་ནི་ཀུན་ཏུ་བཟུང་བའི་ཡོ་བྱད་ཀྱི་ཚོགས་ཡོངས་སུ་མི་གཏོང་བའི་དང་ཚུལ་ལོ། །འདོད་ཆེན་ཞེས་བྱ་བ་ནི་ཞེན་པས་གཟུང་བ་སྟེ། བཟུང་བ་དང་རྗེས་སུ་འབྲེལ་པའོ། །དེ་ལྟར་དེས་ནི་འཇུངས་པ་དང་འདོད་ཆེན་པའི་སེམས་ཉེ་བར་བཅོམ་པ་ཡིན་ཏེ། ངོ་ཚ་བསྐྱེད་པར་གྱུར་པ་ཡིན་ནོ། །དད་པ་བསྐྱེད་པ་ནི་དང་བར་བྱེད་པ་ཡིན་ཏེ། སུ་དག་ཅེ་ན། ཐེག་པ་མཆོག་ལ་བརྟེན་པ་རྣམས་སོ། །ཐེག་པ་ཞེས་བྱ་བ་ནི་ཉན་ཐོས་དང་རང་སངས་རྒྱས་ཀྱི་ཐེག་པའོ། །མཆོག་གི་སྒྲ་ནི་རང་སངས་རྒྱས་ཀྱི་ཐེག་པ་ཡོངས་སུ་བཟུང་ངོ༌། །བརྟེན་པ་རྣམས་ཀྱང་ཐེག་པ་གསུམ་ལ་བརྟེན་པ་དད་པའོ། །ངོ་མཚར་
མེད་པ་ཞེས་བྱ་བ་ནི་ཡ་མཚན་མེད་པ་སྟེ། སུ་ཞིག་ཅེ་ན། གཏོང་བ་བྱས་པ་རྣམས་ཀྱི་སྟེ། སྦྱིན་པ་ཆུང་དུས་སྙེམས་པ་དེ་རྣམས་ཀྱི་ངོ་མཚར་གཞིག་པའོ། །སྤྱང་ཕྱིར་ཞེས་བྱ་བ་ནི་དག་པར་བྱ་བའི་ཕྱིར་ཏེ། གང་གི་ཞེ་ན། མཐོ་རིས་ལམ་ཆེན་ཞེས་བྱ་བ་ཡིན་ནོ། །གཏོད་ལ་དགའ་བ་ཞེས་བྱ་བ་ནི་སྦྱིན་པར་འདོད་པ་རྣམས་ཏེ། སུ་དག་ཅེ་ན། བྱང་ཆུབ་སེམས་དཔའ་སྦྱིན་པ་རྟུལ་ཕོད་པ་རྣམས་སོ། །གཏོང་ལ་དགའ་བ་ཞེས་བྱ་བ་ལ་སོགས་པའི་ཚིགས་བཅད་མཐའ་དག་ལ་དེ་བས་ལུས་ཀྱིས་ཡོངས་སུ་བསྲུང་བར་བྱ་ཞེས་སྦྱར་རོ། །དེའི་འབྲས་བུ་ཡོད་པར་བྱ་བ་ནི་དེ་འབྲས་བུ་གང་ཡིན་པ་དེ་འབྲས་བུ་དང་བཅས་པར་བྱ་བ་སྟེ། ཡིད་ལ་སེམས་པའི་སྨོན་ལམ་མོ། །བྱང་ཆུབ་མཆོག་ཀྱང་བདག་གིས་ཉེ་བར་བྱ། །ཞེས་བྱ་བ་ནི་བདག་གིས་བྱའོ་ཞེས་སྦྱར་རོ། །དེ་བས་ལུས་ཀྱིས་ཡོངས་སུ་བསྲུང་བར་བྱ་བའི་དང་པོའོ། །ཚིགས་སུ་བཅད་པ་ལྔས་ནི་རིམ་པ་བཞིན་དུ་དཔྱད་པས་དུས་གསུམ་གྱི་སེམས་ཅན་གྱི་དོན་སྒྲུབ་པའི་ཕྱིར་མངོན་པར་བརྟག་ཅིང་ངེས་པར་བྱས་པ་སྟེ། རང་གི་ལུས་བཏང་བས་སྟག་མོ་དང་སྟག་ཕྲུག་གཉིས་ཡང་དག་པར་བསྲུངས་པ་ནི་ད་ལྟར་གྱི་གཞན་གྱི་དོན་ནོ། །འཇིག་རྟེན་ཕན་བརྩོན་རྣམས་ལ་བསྟན་ཞེས་པའི་དང་པོའི་ཚིགས་བཅད་གསུམ་གྱིས་མ་འོངས་པའི་སེམས་ཅན་ཐམས་ཅད་ཀྱི་དོན་བསྟན་ཏོ། །ཕུན་སུམ་ཚོགས་པ་བསྐྱེད་པ་ལ་མངོན་པར་བརྟགས་ནས་ལུས་ཙམ་གྱིས་ཀྱང་ནམ་ཞིག་ཕན་ཐོགས་པར་གྱུར་ཞེས་བྱ་བ་ལ་སོགས་པས་ནི་འདས་པའི་དུས་ཀྱི་ལུས་ཀྱིས་གཞན་ལ་ཕན་པར་བྱ་བ་ཡིན་ནོ། །སྨོན་ལམ་ནི་འདོད་པའི་དོན་ནོ། །འབྲས་བུ་ཡོད་པར་བྱ་བའི་ཕྱིར་ཡང་བདག་གི་ལུས་གཏང་བར་བྱ་སྟེ། དེ་ཡིས་བསམས་པའི་སྨོན་ལམ་འདས་པར་གྱུར་པ་ཡིན་པས་དེའི་སྨོན་ལམ་སྒྲུབ་པ་ནི་འདས་པའི་སེམས་ཅན་རྣམས་ཀྱི་དོན་ཞེས་བརྗོད་དོ། །བྱང་ཆུབ་མཆོག་ཀྱང་ཉེ་བར་བྱ་ཞེས་བྱ་བ་འདི་ལ་ཀྱང་གི་སྒྲ་ནི་གཞན་གྱི་སྒྲ་མ་ཡིན་པར་སྟོན་ཏོ། །བྱང་ཆུབ་ཀྱི་མཆོག་ཐོབ་པ་ནི་གཞན་གྱི་དོན་བྱ་བས་སོ། །འགྲན་ཕྱིར་མ་ཡིན་ཞེས་བྱ་བ་ལ་སོགས་པའི་ཚིགས་བཅད་འདིའི་བསྡུས་པའི་དོན་ནི་འདི་ཡིན་ཏེ། མཐོང་བའི་ཆོས་དང༌། མངོན་པར་མཐོ་བ་དང༌། ངེས་པར་ལེགས་པའི་འབྲས་བུར་བཅས་པ་
དང་འབྲེལ་པའི་ཕྱིར་བདག་གིས་བྱས་པ་མ་ཡིན་པར་སྟོན་ཏོ། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །ཞེས་བྱ་བ་སྟེ། འཇིག་རྟེན་རྣམས་ནི་གཞན་ཕལ་ཆེར་ཟིལ་གྱིས་གནོན་པ་དང༌། བདག་ཉིད་ཀྱི་ཡོན་ཏན་འབྱུང་བའི་ཕྱིར་དགེ་བ་རྣམས་ལ་བརྩོན་པར་བྱེད་དེ་གཉི་ག་མ་ཡིན་པའི་ཕྱིར་འགྲན་ཕྱིར་མ་ཡིན་གྲགས་པའི་དོན་ཕྱིར་མིན་ཞེས་བྱའོ། །འདི་གཉིས་ཀྱིས་ནི་མངོན་པར་མཐོ་བ་འདོད་པ་མ་ཡིན་པར་སྟོན་ཏོ། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །ཞེས་བྱ་བ་སྟེ། འདི་གཉིས་ཀྱིས་ནི་མངོན་པར་མཐོ་བའི་ལྷར་སྐྱེ་བ་དང༌། མི་རིགས་ཁྱད་པར་ཅན་དུ་སྐྱེ་བ་མི་འདོད་པར་བསྟན་ཏོ། །བདག་གིས་བདེ་བ་མཆོག་ནི་ཐོབ་ཕྱིར་མིན། །ཞེས་བྱ་བ་འདིས་ནི་ངེས་པར་ལེགས་པ་དོན་དུ་མི་གཉེར་བ་ཡིན། བདག་གིས་བདེ་བ་མཆོག་ཅེས་བྱ་བ་ནི་བདག་བདེ་བ་མྱ་ངན་ལས་འདས་པ་ཐོབ་པ་ཡིན་ཏེ། དེ་ལ་ཡང་བརྩོན་པར་མི་བྱེད་དོ་ཞེས་པ་སྟེ། སྨྲས་པ། གཞན་དོན་སྒྲུབ་ཕྱིར་ཞེས་བྱ་བ་སྨོས་ཏེ། གཞན་དོན་བསྒྲུབ་པ་ཞེས་བྱ་བ་བཤད་པའི་གཞན་དོན་སྒྲུབ་པ་དེ་གང་ཡིན་ཞེ་ན། གཞན་གྱི་དོན་སྒྲུབ་པ་སྟེ། གཞན་གྱི་དོན་སྒྲུབ་པའི་རྣམ་པ་དོན་དུ་གཉེར་བའོ། །དེ་བས་བདག་ནི་ཞེས་བྱ་བས་ན་མཐོང་ཞིང་ཐོས་སམ་ཞེས་བྱ་བའི་ཚིགས་བཅད་འདིས་ནི་མངོན་པར་མཐོ་བ་ལས་བརྩམས་ཏེ། འདིས་ཞེས་བྱ་བ་ནི་རང་གི་ལུས་སྦྱིན་པའི་དགེ་བས་སོ། །དུས་གཅིག་ཏུ་ཞེས་བྱ་བ་ནི་ཅིག་ཅར་སྡུག་བསྔལ་བསལ་བ་དང་བདེ་བ་འབྱུང་བར་གྱུར་ཅིག་པའོ། །མངོན་པར་མཐོ་བ་ལས་བརྩམས་ཏེ། མཐོང་ཞིང་ཐོས་སམ་ཞེས་བྱ་བའི་ཚིགས་སུ་བཅད་པ་ལ། རེག་གམ་ཞེས་བྱ་བ་ནི་ལུས་དང་ངོ༌། །གཏམ་དུ་བརྗོད་པར་གྱུར་ཀྱང་ཞེས་བྱ་བ་ནི་ཆོས་བསྟན་པ་དང་མཉན་པས་སོ། །རྣམ་ཀུན་ཏུ་ཞེས་བྱ་བ་ནི་དགེ་བའི་རྩ་བ་བསྐྱེད་ཅིང་འཕེལ་བ་དང༌། ནུས་པར་ལྡན་ཞིང་རྣམ་པར་གྲོལ་བའི་མཚན་ཉིད་ནི། རྣམ་པ་ཀུན་ཏུ་ཕན་པའོ། །ཁྲོས་ཤིང་ངོ་མཚར་སྐྱེས་ནས་ཞེས་བྱ་བ་ལ། ཁྲོས་ཤིང་ངོ་མཚར་སྐྱེས་པ་ནི་ཅི་ཞིག་ཅེས་ལངས་ནས་བྲོས་ཏེ་གཞན་དག་གི་ཕྲུ་གུ་ཟོས་པར་དོགས་པ་དང༌། ལྟོགས་པས་ཟ་བར་འདོད་པ་ཡང་བཏང་སྟེའོ། །ཉེ་བར་འོངས་ཏེ་ཞེས་པ་ནི་དྲུང་དུ་ཕྱིན་པའོ། །བརྩམས་པ་ནི་
རྩོམ་པའོ། །དེ་སྤྱོད་པ་ཞེས་བྱ་བ་ནི་དེའི་ལས་ཁྱད་པར་ཅན་ནོ། །ལས་ཁྱད་པར་ཅན་དེས་ངོ་མཚར་བ་དེ་ནི་སྤྱོད་པ་ཁྱད་པར་ཅན་ངོ་མཚར་རོ། །དེ་བས་ན་མྱ་ངན་དང་སྡུག་བསྔལ་ནི་མྱ་ངན་དང་སྡུག་བསྔལ་ཏེ། མྱ་ངན་ནི་བླ་མ་སྡུག་པ་དང་བྲལ་བས་སོ། །སྡུག་བསྔལ་ནི་མྱ་ངན་གྱིས་ཀུན་ནས་བསླང་བ་སྟེ། ལུས་དང་སེམས་ཀྱི་སྡུག་བསྔལ་ལོ། །དེ་གཉིས་ཀྱི་ཤུགས་ཀྱིས་ཡང་དག་པར་བསྐྱེད་པའོ། །བཏང་བ་ནི་སྤངས་པ་སྟེ། གང་གི་མྱ་ངན་དང་སྡུག་བསྔལ་གྱི་ཤུགས་བཏང་བ་གང་ཡིན་པ་དེ་ནི་མྱ་ངན་དང་སྡུག་བསྔལ་གྱི་ཤུགས་བཏང་བའོ། །ཀྱེ་མའོ་སྡུག་བསྔལ་ཞེས་བྱ་བའི་ཚིགས་བཅད་ཕྱེད་ཀྱི་བྱེད་པས་ནི་ཤེས་རབ་ཀྱི་དབང་དུ་བྱས་ཏེ། སེམས་ཅན་ལ་བརྩེ་བའི་སྙིང་རྗེའི་བསམ་པ་དང༌། དེ་ལ་ཆགས་པ་མེད་པའི་ཤེས་རབ་སྟེ། དེ་གཉི་ག་བྱང་ཆུབ་ཀྱི་རྩ་བ་སྟེ། དེ་བས་ནི་འདི་དང་པོར་སྨོས་པས་ནི་བྱང་ཆུབ་སེམས་དཔའོ། །གཞན་གྱི་ཞེས་བྱ་བ་འདི་ནི་གཉིས་པོ་འདི་ཡིན་ཏེ། དེའི་དབང་དུ་བྱས་ནས། གཉིས་པའི་ཚིགས་བཅད་ཕྱེད་ཀྱིས་དོན་དམ་པ་རྣམས་ཞེས་བྱ་བ་ལ་སོགས་པ་སྟེ། དམ་པ་རྣམས་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་དང་ལྡན་པ་ནི་ངོ་མཚར་གྱི་བྱ་བ་ཡིན་ཏེ། ངོ་མཚར་དུ་བྱས་པར་གྱུར་པས་སོ། །གཞན་གྱི་ཞེས་བྱ་བ་ནི་བྱང་ཆུབ་སེམས་དཔའ་མ་ཡིན་པ་རྣམས་ཀྱིའོ། །ཨེ་མའོ་ཞེས་བྱ་བ་ལ་སོགས་པའི་ཚིགས་བཅད་འདིའི་ཕྱེད་ཀྱིས་ནི་བྱང་ཆུབ་སེམས་དཔའི་སྦྱོར་བ་དང༌། བསམ་པ་ཕུན་སུམ་ཚོགས་པ་བསྟན་ཏོ། །འོག་མ་ཕྱེད་ཀྱིས་ནི་དེའི་འབྲས་བུ་སྨིན་པ་ཡིན་ནོ། །ཕྱག་གི་གནས་ཞེས་བྱ་བ་ནི་རྟེན་དུ་གྱུར་པའོ། །དེ་ནས་རང་བཞིན་ཞི་བ་ཞེས་བྱ་བའི་ཚིགས་བཅད་འདིས་ནི་བྱང་ཆུབ་སེམས་དཔའ་བདག་གི་རྒྱུད་རབ་ཏུ་སྟོན་ཏོ། །རང་བཞིན་ཞི་བ་ཉིད་ནི་ས་བཞིན་དུ་བརྟན་པ་ཡིན་ཏེ། མི་བཟོད་པ་མེད་པའི་རྒྱུས་སོ། །མི་བཟོད་པ་མེད་པ་འདིས་ནི་མྱུར་དུ་བྱེད་པ་སྟོན་པ་ཡིན་ནོ། །སྐྱོན་དུ་གྱུར་པ་ཡིན་པས་དང་པོ་དེའི་སྡུག་བསྔལ་སྐྱེ་བ་ནི་མེད་དོ། །མགོན་པོ་འདིས་ནི་ཞེས་བྱ་བ་ལ་སོགས་པའི་ཚིགས་བཅད་འདིས་ནི་འགྲོ་བའི་དགྲ་དང་བདུད་འདི་གཉིས་ཏེ། དེ་གཉིས་ཀྱི་བྱེ་བྲག་དང་ལྡན་པའོ། །གཞན་གྱིས་ཕམ་གྱིས་དོགས་པའི་བདུད་དག་
ཀྱང། །ཞེས་བྱ་བ་ཡིན་ཏེ། བདུད་ཀྱང་གཞན་གྱིས་ཕམ་དུ་དོགས་པ་སྐྱེ་བར་འགྱུར་བ་གང་ཡིན་པ་དེ་ནི་གཞན་གྱིས་ཕམ་དུ་དོགས་པའོ། །སེམས་ཅན་ཐམས་ཅད་ཀྱི་སྐྱབས་སུ་གྱུར་པ་ཞེས་བྱ་བ་འདི་ནི་བསྟན་པའོ། །ཇི་ལྟར་སེམས་ཅན་ཐམས་ཅད་ཀྱི་སྐྱབས་ཡིན་ཞེ་ན། ཐུགས་རྗེ་ཤིན་ཏུ་རླབས་ཆེ་བ་དང༌། སྙིང་སྟོབས་དཔག་ཏུ་མེད་པས་སོ། །སྙིང་སྟོབས་དཔག་ཏུ་མེད་པ་ནི་ཤེས་རབ་དཔག་ཏུ་མེད་པའོ། །དེ་གཉི་གའི་སྦྱོར་བ་དོན་ཇི་ལྟ་བ་བཞིན་ཡོད་པས་བྱང་ཆུབ་སེམས་དཔའ་སྟེ། བྱང་ཆུབ་སེམས་དཔའ་དོན་ཇི་ལྟ་བ་ཉིད་དོ། །སློབ་མ་ཞེས་སྨོས་པ་ནི་མི་དག་བཟུང་སྟེ། དེ་ན་གཞན་མི་དག་མེད་པས་སོ། །དྲི་ཟ་དང་གནོད་སྦྱིན་ཞེས་བྱ་བ་ནི་གཤོལ་མདའ་འཛིན་པ་ལ་སོགས་པའི་རིའི་བར་དག་ལ་གནས་པས་སོ། །ཀླུ་ཞེས་སྨོས་པས་ནི། འདི་ནས་འོག་ན་གནས་པའི་སྤྲུལ་གཟུང་ངོ༌། །སུམ་ཅུ་རྩ་གསུམ་གྱི་བདག་པོ་ཞེས་སྨོས་པས་རི་རབ་ལ་གནས་པ་རྣམས་གཟུང་ངོ༌། །དེ་དག་གིས་སྐུ་གདུང་གི་སྟེང་དུ་ས་གཞི་ཐམས་ཅད་གཡོགས་པར་གྱུར་པ་སྟེ། ཕྲེང་བ་ལ་སོགས་པ་སྨོས་པས་ནི་གོས་དང་ཡོ་བྱད་རྣམས་གཟུང་ངོ༌། །རྒྱན་ཞེས་སྨོས་པས་ནི་ཡོ་བྱད་དེ། དྲི་ཞིམ་པོའི་ཡོ་བྱད་དང། གོས་ཀྱི་ཡོ་བྱད་དང༌། ཕྲེང་བ་དང༌། གོས་དང༌། རྒྱན་དང༌། རྒྱན་གྱི་ཡོ་བྱད་རྣམས་སོ། །ཙནྡན་གྱི་ཕྱེ་མ་ནི་དྲི་ཞིམ་པོའི་ཡོ་བྱད་དོ། །དེ་ལ་སོགས་པ་འཇིག་རྟེན་པ་རྣམས་ཀྱིས་མངོན་པར་མཆོད་དེ། མཆོད་པའི་ཡོ་བྱད་རྣམས་ཀྱིས་དེ་ཉིད་དུ་སློབ་མ་ལ་སོགས་པས་མཆོད་པ་བྱས་པའོ། །རབ་ཏུ་དད་པར་བྱའོ་ཞེས་བྱ་བ་ནི་མ་དད་པ་རྣམས་ཀྱི་དབང་དུ་བྱས་པའོ། །དད་པ་སྐྱེད་པ་རྣམས་ཀྱིས་ནི་དགའ་བ་སྐྱེད་པ་ཞེས་པ་ནི། དད་པ་རྣམས་ཕྱིར་ཞིང་ཉེ་བར་འགྲོ་བར་བྱ་བའི་ཕྱིར་བསྟན་པར་བྱའོ། །གནས་ནི་གནས་སུ་གྱུར་པ་སྟེ། དད་པ་དང་དགེ་པའི་ཚས་སྐྱེ་བའི་གནས་ཡིན་པས་སངས་རྒྱས་བཅོམ་ལྡན་འདས་གནས་ཏེ། གནས་དེ་དག་ལ་དད་པར་བྱའོ། །དེ་ལྟར་གནས་དེ་ལ་དད་པར་བྱས་ནས་ཆོས་ལ་རིམ་གྲོ་བསྐྱེད་ཅིང་ཆོས་མཉན་པར་བྱས་ཏེ་རབ་ཏུ་བྱེད་པ་སྒྲུབ་པ་དང༌། ངོ་བོ་ཉིད་ཁྱད་པར་ཅན་སྒྲུབ་པ་ལ་འབད་དེ་གནས་པར་བྱའོ་ཞེས་པ་
ཡིན་ནོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་ཀྱི་མདོ་དང་མཐུན་པའི་རྒྱ་ཆེར་བཤད་པ་ལས་སྟག་མོའི་སྐྱེས་པའི་རབས་ཏེ་དང་པོའོ།། །།དཔག་ཏུ་མེད་པའི་དུས་ནས་གོམས་པ་ནི་བསྐལ་པ་གྲངས་མེད་པ་གསུམ་དུ་གོམས་པར་བྱས་པའོ། །བསོད་ནམས་ཀྱི་ལས་བྱས་ཤིང་འདྲིས་པ་ཞེས་བྱ་བ་ནི་སྦྱིན་པའི་རྒྱུ་མཐུན་པ་དང་རྣམ་པར་སྨིན་པའི་ནུས་པའི་འབྲས་བུ་ཡིན་ཏེ། བསོད་ནམས་ཀྱི་ལས་བརྟག་པ་དང་གུས་པར་བྱེད་པའི་སྦྱོར་པ་གཉིས་ཀྱིས་ནི་དོན་གཉིས་འགྲུབ་པ་ཡིན་ནོ། །རྟག་ཏུ་སྦྱོར་པས་ནི་བསོད་ནམས་ཀྱི་ལས་རྒྱུ་མཐུན་པའི་འབྲས་བུ་སྦྱོར་བ་ཡིན། ཏ། རྟག་པར་བྱེད་པའི་བག་ཆགས་ཀྱིས་ཕྱིས་ཀྱང་བསོད་ནམས་ཀྱི་བྱ་བ་མངོན་པར་བསྒྲུབ་པ་ཡིན་པའི་ཕྱིར་རོ། །གུས་པར་བྱ་བའི་སྦྱོར་བས་ནི་བསོད་ནམས་ཀྱི་ལས་རྒྱ་ཆེར་སོགས་ཤིང་རྣམ་པར་སྨིན་པའི་འབྲས་བུ་སྦྱིན་པའི་ངེས་པར་འབྱུང་བར་འགྱུར་རོ། །དེ་ཡང་བསོད་ནམས་ཀྱི་ལས་གོམས་ཤིང་འདྲིས་པར་བྱས་པ་སྟེ། དཔག་ཏུ་མེད་པའི་དུས་ནས་གོམས་པར་བྱས་པས་སོ། །བསོད་ནམས་ཞེས་སྨོས་པས་ནི་སྦྱིན་པ་དང༌། ཚུལ་ཁྲིམས་དང༌། བཟོད་པའི་ཕ་རོལ་ཏུ་ཕྱིན་པ་གཟུང་ངོ༌། །དེ་བས་ན་དེ་ཉིད་ཀྱིས་རྒྱལ་པོ་ཉིད་དུ་གྱུར་པ་ཡིན་ཏེ། བསོད་ནམས་ཀྱི་འབྲས་བུའི་སྟོབས་ཀྱིས་སོ། །རྒྱལ་པོ་དག་གི་བུ་བཞིན་དུ་ཞེས་བྱ་བ་ནི་རང་གི་སྐྱེ་བོ་བཞིན་དུ་སྐྱེ་དགུ་སྐྱོང་བར་གྱུར་པའོ། །ཡོན་ཏན་ཅི་དང་ལྡན་པས་ཡོངས་སུ་སྐྱོང་ཞེ་ན། དེ་ཉིད་སྨྲས་པ། བྱིས་པ་ནས་རྒན་པོ་ལ་བསྙེན་བཀུར་བྱེད་པ་ཞེས་བྱ་བའི་ཡོན་ཏན་དང་ལྡན་པ་ཉིད་ཀྱིས་སོ། །གང་དག་སྐྱོང་བར་གྱུར་ཞེ་ན། རང་གི་ཚོགས་དང་གཞན་གྱི་ཚོགས་གཉིས་ཏེ། རང་གི་ཚོགས་ཀྱི་སྐྱེ་བོ་སྐྱོང་བར་བྱེད་པ་ནི་རྒན་པ་ལ་སོགས་པ་ལ་བསྙེན་བཀུར་བྱ་བ་ལ་དགའ་བ་དང༌། རྗེ་བློན་བྱམས་པ་དང༌། ཡིད་གཞུངས་པ་སྟེ། འདིས་ནི་རིགས་པ་རྟོགས་ཤིང་བློ་དྲི་མ་མེད་པར་གྱུར་པའོ། །གཞན་གྱི་ཚོགས་ཀྱི་སྐྱེ་བོ་སྐྱོང་བར་བྱེད་པ་ནི་ནུས་པ་གསུམ་དང་ལྡན་པ་དང༌། སྐལ་བ་ཕུན་སུམ་ཚོགས་པ་དང༌། དེས་ན་དེ་ཉིད་ཀྱི་ཚིག་གིས་ནི་ལུགས་ཀྱི་བསྟན་བཅོས་དང་གཉིས་སུ་དབྱེར་མེད་པ་ཡིན་ནོ། །ཡང་ན་འཁོར་གསུམ་དང་རྗེས་སུ་མཐུན་པའི་ཡོན་ཏན་གྱི་ཚོགས་
ཞེས་བྱ་བ་དེ་བསྟན་པའི་ཕྱིར་རྒན་པ་ལ་བསྙེན་བཀུར་བྱེད་པ་ལ་སོགས་པའི་ཡོན་ཏན་འདི་དག་བསྟན་ཏེ། ཆོས་ཀྱི་ཡོན་ཏན་དང་ནུས་པ་གསུམ་གྱི་ཡོན་ཏན་དང༌། དོན་གྱི་ཡོན་ཏན་དང༌། སྐལ་བ་ཕུན་སུམ་ཚོགས་པའི་ཡོན་ཏན་དང༌། དད་པའི་ཡོན་ཏན་ནོ། །ཕན་ཚུན་འགྲན་པ་བཞིན་དུ་གནས་པར་གྱུར་ཅེས་བྱ་བ་འདིས་ནི་ཇི་ལྟར་ཡོད་པའི་ཡོན་ཏན་དང་ལྡན་པ་དེ་དག་ཀྱང་ལྷན་ཅིག་ཏུ་གནས་པར་གྱུར་པ་ཡིན་པར་བསྟན་ཏོ། །དངོས་པོ་ཐམས་ཅད་ནི་དངོས་པོ་ཇི་སྲིད་པས་མ་ལུས་པའི་ཡོན་ཏན་ཡོད་པར་གྱུར་པ་སྟེ། ཆོས་དང་དོན་དང་འདོད་པ་ཕན་ཚུན་འགལ་བ་ཡིན་ཡང་དེའི་ཡོན་ཏན་འགལ་ཞིང་འཁྲུག་པས་གཙེས་པ་མེད་པར་གྱུར། ཞེས་པའི་དོན་ཏོ། །མ་དུལ་འཕྱར་བ་ཞེས་བྱ་བའི་ཚིགས་བཅད་འདིས་ནི་ཞེ་སྡང་དང༌། གཏི་མུག་དང༌། འདོད་ཆགས་ཀྱི་ཉེས་པས་མ་རུངས་པར་བྱས་པས་མ་དུལ་བ་ལ་སོགས་པའོ། །གསུམ་དུ་གྱུར་པའི་ཉེས་པས་གསུམ་པ་མེད་པ་སྟེ་ཉེས་པ་དེ་གསུམ་གྱི་གཉེན་པོར་གྱུར་པ་བྱམས་པ་དང༌། རྟེན་ཅིང་འབྲེལ་བར་འབྱུང་བ་དང༌། མི་སྡུག་པ་བསྒོམ་པ་དང་ལྡན་པ་སྟེ། དཔལ་དེ་དེ་ལ་མིང་ནི་དོན་བཞིན་དུ་གྱུར་ཅེས་བྱ་བ་ལ་སོགས་པ་ནི་མཚན་ཉིད་དང་མཚན་དུ་གྱུར་པའོ།། རང་བཞིན་རྒྱ་ཆེ་ཞེས་བྱ་བ་འདིའི་ལུས་ནི་བསམ་པ་དང༌། སྦྱིན་པའི་དངོས་པོ་དང༌། སློང་བའི་སྒྲུབ་པ་ཕུན་སུམ་ཚོགས་པ་ཡིན་ནོ། །རང་བཞིན་རྒྱ་ཆེ་བ་དང༌། སྙིང་རྗེའི་ཡོན་ཏན་ཞེས་བྱ་བ་འདིས་ནི་བསམ་པ་ཕུན་སུམ་ཚོགས་པ་བསྟན་ཏོ། །རྒྱ་ཆེ་བས་ནི་རང་གི་བདེ་བ་ལ་མི་ཆགས་པར་འགྱུར་བ་ཡིན་ནོ། །སྙིང་རྗེའི་ཡོན་ཏན་གྱིས་ནི་གཞན་གྱི་སྡུག་བསྔལ་སེལ་བར་མངོན་པར་འདོད་པ་ཡིན་ནོ། །ཡང་ན་བདག་གི་ལོངས་སྤྱོད་ལ་མི་ལྟོས་པ་དང༌། སེམས་ཅན་ལ་ལྟོས་པ་དང་གཉིས་སྟོན་པ་ཡིན་ནོ། །ཡང་ན་འབྲས་བུ་ལ་མི་ལྟོས་པ་དང༌། སེམས་ཅན་ལ་ལྟོས་པ་ཡིན་པར་བསྟན་ཏོ། །སྦྱིན་པའི་དངོས་པོ་ནི་ནོར་གྱི་རྒྱལ་པོས་མི་ལེན་ཅིང༌། སེམས་ཅན་གྱི་སྡུག་བསྔལ་སེལ་བར་འདོད་པ་ཡིན་པས། ལོངས་སྤྱོད་སེམས་ཅན་རྣམས་ལ་སྦྱིན་པའི་དངོས་པོ་སྒྲུབ་པ་ཡིན་ནོ། །ནོར་ལ་དབང་ཡོད་ཕྱིར་ཞེས་བྱ་བ་འདིས་ནི་སྦྱིན་པའི་དངོས་པོ་ཕུན་སུམ་
ཚོགས་པ་བསྟན་ཏོ། །འདོད་པའི་དོན་གྲུབ་ཅེས་བྱ་བ་སྨོས་པ་ནི་སྦྱིན་པའི་དངོས་པོ་སྒྲུབ་པ་ཕུན་སུམ་ཚོགས་པ་ཡིན་ཏེ། ཇི་ལྟ་བུ་འདོད་པ་དང༌། ཇི་སྙེད་འདོད་པ་དང༌། གང་འདོད་པ་དེ་དག་ཡང་དག་པར་སྒྲུབ་པའོ། །འདོད་པའི་དོན་གྲུབ་པས་ཕོངས་པ་དག་ངོ་ཟུམ་མི་གནག་བཞིན་བཟངས་མཐོང་བས་དགའ་བ་སྟེ། དེ་ལྟར་སློང་མོ་བ་རྣམས་ཕུན་སུམ་ཚོགས་པའོ། །དེའི་ཕུན་སུམ་ཚོགས་པ་གང་ཞེ་ན། སྦྱིན་པའི་དངོས་པོ་རྣམ་པ་ཐམས་ཅད་བསླངས་པ་སྟེ། འདོད་པ་ཞེས་སྨོས་པས་ཐོབ་པ་ཡིན་ཏེ། དེས་དུས་ཕྱི་ཞིག་ན་མིང་དང་གཟུགས་ཀྱི་ལུས་དགའ་བ་དང་མཛེས་པར་བྱེད་དོ། །སྦྱིན་པ་ལ་དགའ་བས་ཞེས་བྱ་བས་ནི་སྔར་སྨོས་པ་བཞིན་དུ་རྒྱུ་མཐུན་པའི་འབྲས་བུ་སྟོན་པ་ཡིན་ཏེ། རྒྱུ་མཐུན་པ་ནི་རྒྱུ་དང་འདྲ་བ་སྟེ་དེའི་ཚིག་གིས་སྔོན་གྱི་སྦྱིན་པ་བྱས་པས་སྦྱིན་པ་ལ་མངོན་པར་དགའ་བ་སྐྱེ་བར་འགྱུར་ཏེ། རྒྱུ་མཐུན་པའི་འབྲས་བུ་སྦྱིན་པ་ལ་དགའ་བ་ཉིད་དོ། །ཡོ་བྱད་ཕུན་སུམ་ཚོགས་པ་ཞེས་བྱ་བ་ལ་སོགས་པ་སྨོས་པ་ལ། ཡོ་བྱད་ནི་ནོར་དང་འབྲུ་ཞེས་སྨོས་པ་སྟེ། ཉེ་བར་སྤྱད་པ་དང༌། ལོངས་སྤྱད་པའི་བྱེ་བྲག་གིས་གསུམ་གྱི་ནང་དུ་འདུས་པ་ཡིན་ནོ། །གང་དག་མ་སྨོས་པའི་སྦྱིན་པའི་དངོས་པོ་དེ་ཡང་འདིའི་ནང་དུ་ཆུད་པ་ཡིན་ཏེ། དེ་དག་ཀྱང་དེའི་རང་བཞིན་ཡིན་པའི་ཕྱིར་རོ། །བདག་གི་བདག་ཉིད་ཆེ་བ་དང་རྗེས་སུ་མཐུན་པས་ཞེས་བྱ་བས་ནི་སྦྱིན་པའི་དངོས་པོ་མང་དུ་ཡོད་པ་བསྟན་ཏོ། །རེ་བ་ཇི་ལྟ་བ་བཞིན་ཞེས་བྱ་བས་ནི་གང་དང་གང་འདོད་པ་དེ་དེ་རེ་བ་ཇི་ལྟ་བ་བཞིན་དུའོ། །འདིས་ནི་དངོས་པོ་སྣ་ཚོགས་སྦྱིན་པར་བསྟན་པའོ། །གུས་པ་དང་བཅས་པར་ཞེས་བྱ་བ་ནི་བསྒྲུབ་པ་ཕུན་སུམ་ཚོགས་པར་བསྟན་ཏོ། །དུས་བཞིན་དུ་འབྱོར་པས་ཡིད་དུ་འོང་བ་ནི་དུས་གང་གི་ཚེ་གང་འདོད་པ་བཞིན་དུ་སྟེ། རྫོགས་ལྡན་གྱི་སྤྲིན་དང་འདྲ་བར་བདག་གི་བདག་ཉིད་ཆེ་བ་དང་རྗེས་སུ་མཐུན་པར་རེ་བ་ཇི་ལྟ་བར་དུས་བཞིན་དུ་འབྱོར་པ་སྒྲུབ་པའི་ཆོས་དང་མཐུན་པ་ཡིན་ནོ། །འདིས་ནི་རེ་བ་ཇི་ལྟ་བ་བཞིན་དུ་ཞེས་བྱ་བ་འདིའི་ཁྱད་པར་བསྟན་པ་སྟེ། ཟས་འདོད་པ་ལ་སོགས་པ་སྨོས་པས་ནི་གང་དང་གང་འདོད་པར་གྱུར་པ་དེ་དང་དེ་སྒྲུབ་པ་ཡིན་ནོ། །ཡང་ན་ཡོ་བྱད་ཐམས་ཅད་དེ། ནོར་དང་འབྲུ་ལ་སོགས་པ་གང་གོང་དུ་བསྟན་པ་དེས་ཟས་འདོད་པ་རྣམས་ལ་ནི་
ཟས། བཏུང་བ་འདོད་པ་རྣམས་ལ་ནི་བཏུང་བ་སྟེ། གང་གོང་དུ་བཤད་པ་དེ་སྦྱིན་པའོ། །མལ་ཆ་དང༌། སྟན་དང༌། གོས་དང༌། བཟའ་བ་དང༌། བྱུག་སྤོས་དང༌། ཕྲེང་བ་དང༌། དངུལ་ལ་སོགས་པའི་ནོར་སྒྲུབ་པས་སྙིང་དགའ་བར་བྱེད་དེ། བདག་གི་བདག་ཉིད་ཆེན་པོ་དང་རྗེས་སུ་མཐུན་པས་སོ། །སྦྱིན་པ་དེས་དགའ་བར་འགྱུར་ཏེ་ཞེས་བྱ་བ་ནི་རེ་བ་ཇི་ལྟ་བ་བཞིན་དུ་བསྒྲུབ་པ་ལ་སོགས་པ་གསུམ་གྱིས་སོ། །ཕྱོགས་ཐ་དད་པའི་ཡུལ་ན་གནས་པ་དེ་ནི་ཕྱོགས་ཐ་དད་པའི་ཡུལ་ན་གནས་པའོ། །ཡང་ན་ཕྱོགས་ཐ་དད་པའི་གནས་པས་མཚོན་པའི་ཚུལ་གང་ལ་ཡོད་པ་དེ་དག་གོ །ཕྱོགས་ཐ་དད་པ་ཞེས་སྨོས་པས་ནི་ཐག་རིང་པོ་ནས་འོང་བར་སྟོན་པ་མངོན་པར་མཚོན་པའོ། །ཡུལ་ན་གནས་པ་ཞེས་སྨོས་པས་ནི་ཡུལ་ན་གནས་པ་ཕུན་སུམ་ཚོགས་པ་སྟོན་ཏོ། །གཞན་དག་ན་རེ་རེ་བ་ཡོངས་སུ་རྫོགས་པར་བྱེད་པ་མེད་དམ། ཅིའི་ཕྱིར་ཐག་རིང་པོ་ནས་ལྷགས་ཤིང་འོངས་ཤེ་ན། དེའི་རྒྱུ་བསྟན་པའི་ཕྱིར། མི་ཡུལ་ཀུན་ཏུ་ཡིད་ཀྱིས་བརྟགས་ན་ཡང༌། །ཞེས་བྱ་བའི་ཚིགས་བཅད་འདི་སྨོས་སོ། །གཞན་དུ་བསླང་བའི་སྐབས་ནི་མ་རྙེད་པ་ཞེས་བྱ་བ་ནི་སེར་སྣ་ཆེ་བར་གྱུར་པ་སྟེ། སྐྱེ་བོ་རྣམས་སྦྱིན་པ་ལ་འཇུག་པ་མེད་པར་སྟོན་ཏོ། །དེ་བས་ན་རིང་པོ་ནས་ལྷགས་པར་གྱུར་པ་ཡིན་ནོ། །ནགས་ཚལ་གླང་པོ་མཚོ་ཆེན་དོགས་ལྷགས་བཞིན། །ཞེས་བྱ་བ་འདིས་ནི་ཡུལ་ན་གནས་པའི་སྐྱེ་བོ་དག་སྦྱིན་པ་ལ་འཇུག་ཅིང་རེ་བ་ཡོངས་སུ་རྫོགས་པར་བྱེད་པ་ཡོད་ཀྱང་དེ་དག་སྤངས་ཏེ་ལྷགས་པ་ཡིན་ནོ། །སྐྱེ་བོ་མཛའ་བ་ཤེས་བྱེས་ནས་འོངས་པ་དག །ཅེས་བྱ་བའི་ཚིགས་བཅད་འདིའི་ལུས་ནི་སྦྱོར་བ་དང༌། དངོས་དང༌། མཇུག་སངས་རྒྱས་ཀྱི་བཀའ་དང་མཐུན་པར་སྟོན་པ་ཡིན་ཏེ། དེ་ཡང་མདོའི་དོན་དང་མཐུན་པར་འགྱུར་བ་སྟེ། སྦྱིན་པའི་སྔ་རོལ་ཏུ་ཡིད་དགའ་བར་འགྱུར་བ་དང༌། སྦྱིན་པའི་ཚེ་ན་སེམས་དང་བར་འགྱུར་བ་དང༌། བྱིན་ནས་མཐར་ཡང་རྗེས་སུ་དགའ་བར་གྱུར་པ་ཡིན་ཏེ། སྦྱོར་བ་དང༌། དངོས་དང༌། མཇུག་ཉིད་ཀྱིས་ལུས་དང་ངག་དང་ཡིད་ཀྱི་ལས་བསྟན་ཏེ། གོ་རིམས་ཇི་ལྟ་བ་བཞིན་དུ་སྐྱེ་བོ་མཛའ་བཤེས་ཞེས་བྱ་བ་ལ་
སོགས་པ་དང་སྦྱར་རོ། །སྦྱིན་པ་ལས་བྱུང་བ་ཞེས་བྱ་བ་དང༌། ཚིགས་བཅད་འདི་གཉིས་ཀྱིས་ནི་མཐོང་བའི་ཆོས་ཀྱིས་རྟོགས་པ་གཉིས་བསྟན་ཏེ། བདག་ཉིད་ལ་ལྟ་བ་དང༌། གཞན་དག་ལ་ཡང་གྲགས་པར་བྱེད་པའོ། །སྦྱིན་པའི་བསོད་ནམས་མི་འཕེལ་བར་གྱུར་པས་ཞེས་བྱ་བའི་བློས་ཀུན་ཏུ་བརྟགས་པ་བཞིན་དུ་གཞན་ལ་ནོར་བགེགས་སུ་གྱུར་ཅིང་འཕེལ་བར་གྱུར་པས་སོ། །སྦྱིན་པའི་བསོད་ནམས་མི་འཕེལ་བ་དེ་ཉིད་སྨྲས་པ། སློང་བའི་སྐྱེ་བོ་འདུ་བ་ཉུང་བ་ཞེས་བྱ་བ་ཡིན་ཏེ། འདི་ཉིད་བསྒྲུབ་པའི་ཕྱིར། དེ་ལ་བརྟེན་ནས་ཕོངས་པ་ཚིམ་པར་གྱུར། །ཞེས་བྱ་བ་འདི་ཡིན་ཏེ། རྒྱལ་པོ་ནི་སྦྱིན་པའི་བསོད་ནམས་མི་འཕེལ་བར་གྱུར་པས་མགུ་བར་མ་གྱུར་ཏེ། སྦྱིན་ལ་དཔའ་བ་དེ་ནི་སྙིང་མ་ཚིམ། །ཞེས་བྱ་བ་འདི་ཡིན་ནོ། །ཕོངས་པ་རྣམས་ཚིམ་པར་གྱུར་ན་དེ་ཅིའི་ཕྱིར་ཚིམ་པར་མ་གྱུར་ཞེ་ན། སྨྲས་པ། ཕོངས་པ་རྣམས་ཀྱིས་སློང་བའི་ཚད་དག་གིས། །ཞེས་བྱ་བ་ལ་སོགས་པ་སྨོས་སོ། །བདག་གི་ལུས་ནི་ངེས་པར་སྦྱིན་བྱས་ནས་སམ། འདི་ནི་རྒྱལ་པོས་གྱི་ན་ད་རྣམས་བརྟགས་པ་སྟེ། དེ་བརྟག་པའི་ཕྱིར་བྲམ་ཟེ་རྒན་པོ་ལོང་བ་ཞིག་གི་གཟུགས་སུ་བསྒྱུར་ནས་ཞེས་བྱ་བ་ལ། གསུམ་སྨོས་པའི་ལོང་བ་སྨོས་པ་ནི་ལམ་དུ་འགྲོ་བར་མི་ནུས་པའོ། །རྒན་པོ་སྨོས་པ་ནི་དཀའ་བར་གྱུར་པ་ཡིན་ནོ། །བྲམ་ཟེ་སྨོས་པ་ནི་འདི་དག་གིས་སྦྱིན་པའི་གནས་སུ་བསྟན་པའོ། །སྙིང་རྗེ་དང་བྱམས་པ་བསྒོམ་པ་ཞེས་བྱ་བ་འདིར་རིམ་པ་སྨོས་པ་ནི་སྡུག་བསྔལ་བསལ་བར་བྱས་ལ། ཕྱི་ནས་བདེ་བ་ལ་གཞག་པར་བྱ་སྟེ། སྡུག་བསྔལ་ལས་ཐར་བར་མ་བྱས་པར་ནི་བདེ་བ་ལ་གཞག་པར་མི་ནུས་སོ། །ལྟ་བ་བརྟན་ཞིང་གསལ་ལ་ཞི་བ་ཞེས་བྱ་བ་ནི་འདོད་ཆགས་དང༌། གཏི་མུག་དང༌། ཞེ་སྡང་གི་ཉོན་མོངས་པ་ལ་མི་གནས་པར་སྟོན་པ་ཡིན་ནོ། །གཏི་མུག་བར་དུ་སྨོས་པ་ནི་དེ་གཉི་གའི་ཡང་རྒྱུར་གྱུར་པའི་ཕྱིར་རོ། །གཏི་མུག་ཆེ་བར་གྱུར་ན་ལྟ་བ་གསལ་བ་མེད་པར་འགྱུར་རོ། །བསུ་བ་བཞིན་ཞེས་བྱ་བ་ནི་ཐག་རིང་བ་ན་གནས་པའོ། །འཁྱུད་པ་བཞིན་ཞེས་བྱ་བ་དེ་དང་ཉེ་ན་གནས་པར་གྱུར་པ་སྟེ། ཡང་ན་བསུ་བ་ནི་སྙིང་རྗེ་བསྒོམས་པས་སོ། །འཁྱུད་པ་བཞིན་དུ་ལྟ་བ་ནི་བྱམས་པ་ཡོངས་སུ་
བསྒོམས་པ་སྟེ། སྡུག་བསྔལ་བསལ་བ་དང་བདེ་བ་ལ་ཉེ་བར་སྦྱར་བ་གཉིས་ཀྱིས་བྱ་བ་ཕུན་སུམ་ཚོགས་པའི་བསམ་པ་གསལ་བར་བྱེད་པ་ཡིན་ནོ། །ས་བདག་དམ་པ་ཁྱོད་ཀྱི་ཞེས་བྱ་བ་ལ་སོགས་པ་འདིའི་ལུས་ནི་གང་སློང་བ་དང༌། ཇི་ལྟ་བུ་སློང་བ་དང༌། གོང་ནས་འོངས་ཏེ་སློང་བའོ། །གནས་སྐབས་ཇི་ལྟ་བུས་ཤེ་ན། གནས་སྐབས་གཉིས་པོའི་ཡོན་ཏན་མེད་པས་ནི་ལམ་དུ་འགྲོ་བའི་ཕུན་སུམ་ཚོགས་པ་མེད་པ་ཡིན་ཏེ། མིག་གི་ཡོན་ཏན་མེད་པ་ནི་མི་མཐོང་བཞིན་ཞེས་བྱ་བའི་ཚིག་གིས་སོ། །ནུས་པའི་ཡོན་ཏན་ཡང་མེད་དེ་རྒན་པོ་ཞེས་བྱ་བའི་ཚིག་གིས་སོ།། གང་སློང་བ་དེ་ནི་མིག་གང་ལ་གང་ཡོད་པ་དེ་སྟེ། སྤྱན་འཚལ་ཕྱིར་ཞེས་བྱ་བ་ཡིན་ཏེ། དེའི་མིག་གཅིག་སློང་བ་སྟེ། འཇིག་རྟེན་གྱི་བྱ་བ་སྒྲུབ་པའི་ཕྱིར་རོ། །དེ་ལྟར་གང་དང་གང་གི་དོན་དུ་སློང་བ་དེ་ཚིག་བཅད་འདིས་བསྟན་པ་ཡིན་ནོ། །གང་སློང་བ་ནི་འདོད་པའི་ནོར་སློང་བ་སྟེ། སློང་བའི་དངོས་པོས་དེ་དགའ་བ་ཐོབ་པར་གྱུར་པ་ཡིན་ཏེ། སྤྱན་ནི་གཅིག་པུས་ཀྱང་འཇིག་རྟེན་བགྱི་བ་འགྲུབ་ཅེས་བྱ་བ་སྨོས་པ་ཡིན་ནོ། །སུ་ཡིས་བསྟན་ཞེས་བྱ་བ་ནི་ལྷས་ཡིན་ནམ་ཞེས་རྟོགས་པ་སྐྱེས་ཏེ་དྲིས་པའོ། །གཞན་གྱི་སྤྱོད་ལམ་ནི་མ་ཡིན་པའི་ཕྱིར་བདག་ཉིད་ལ་རྣམ་པར་རྟོག་པ་སྟེ། དེ་བས་ན་སློབ་དཔོན་གྱིས་འདི་སྨྲས་པ་ཡིན་ནོ། །རྒྱལ་པོ་དེའི་བསམ་པ་རིག་ནས་ཞེས་བྱ་བ་ནི་དེ་ཉིད་ཀྱིས་བསམས་པའོ། །ལྷའི་མཐུས་ཞེས་པ་ནི་གལ་ཏེ་ལྷའི་མཐུ་ཡིན་ན་འདིའི་མིག་གི་དབང་པོ་ཡང་ཅིའི་ཕྱིར་ལྷའི་མཐུས་དེ་ལྟར་མི་འགྱུར་ཏེ་འགྱུར་རོ་ཞེས་བྱ་བའི་གནས་སྐབས་སོ། །དེས་ན་དེ་ཉིད་སྨྲས་པ། ཆོ་ག་འདིས་མིག་དང་ལྡན་པར་འགྱུར་རོ་ཞེས་བྱ་བ་ནི་བདག་གིས་མིག་བྱིན་པ་དང༌། ལྷའི་མཐུ་དང་ལྡན་པའི་བྲམ་ཟེའི་མིག་གི་ཕུན་སུམ་ཚོགས་པའི་རྒྱུའོ་ཞེས་སོ། །ཡིད་ལ་རེ་བ་གང་གིས་འདིར་འོངས་པ། །ཞེས་བྱ་བ་ནི་མིག་གཅིག་ཐོབ་པར་འདོད་པ་གང་ཡིན་པ་དེ་ཉིད་བྲམ་ཟེ་ཁྱོད་ཀྱི་རེ་བ་བསྐང་བར་བྱ་ཞེས་བྱ་བ་ཡིན་ཏེ། མིག་གཅིག་སྦྱིན་ནོ་ཞེས་བྱ་བའི་དོན་ཏོ། །རེ་བ་བསྐང་བ་ཉི་ཚེར་མ་ཟད་དེ། གཞན་ཡང་མིག་གཉི་ག་ཡང་ངས་སྦྱིན་གྱིས་ཞེས་བྱ་བ་ཡིན་ནོ། །ཡང་ན་འདིའི་དོན་ནི་མིག་གཅིག་སྦྱིན་པ་ཉིད་ཇི་ལྟར་རེ་བ་བསྐང་བ་ཡིན་ཏེ། རེ་
བ་སྐོང་བ་ནི་རེ་ཞིག་ཇི་ལྟར་ཡང་མིག་གཉིས་ཐོབ་པར་བྱ་བ་ཡིན་ནོ། །འོན་ཀྱང་འདིས་ཡིད་ལ་རེ་བ་བཞིན་དུ་སློང་བར་མི་ནུས་ཏེ། ཅིའི་ཕྱིར་ཞེ་ན། མི་སྦྱིན་སྙམ་པ་དང༌། མིག་གཉིས་བསླངས་ན་རྒྱལ་པོ་ལ་གནོད་པར་འགྱུར་བ་དང༌། གཞན་གྱི་སེམས་སྲུང་བར་སྟོན་པ་ཡིན་ཏེ། ཡིད་ལ་རེ་བ་ནི་རེ་ཞིག་མིག་གཉི་ག་ཐོབ་པ་ཉིད་དེ། དེས་ན་དེ་ཉིད་སྨྲས་པ། ཡིད་ལ་རེ་བ་ཡོངས་སུ་བསྐང་བ་ཞེས་སྨོས་པ་དེ་ཉིད་ནི་མིག་གཉིས་ཀྱང་ནི་ངས་སྦྱིན་གྱིས་ཞེས་བྱ་བའི་ཚིག་གིས་སོ། །གཞན་དུ་ཇི་ལྟར་རེ་བ་ཡོངས་སུ་སྐོངས་བར་འགྱུར་ཏེ། ངའི་མིག་ནི་ཡ་གཅིག་འདོད་པ་ལ་ཞེས་བྱ་བ་སྟེ། སློང་བ་ལ་གཉིས་སྦྱིན་པའི་དོན་ནི་འདི་ཡིན་ནོ། །ཤུགས་ཀྱིས་སྐྲག་པ་ནི་ཤུགས་ཀྱིས་སྐྲག་པ་སྟེ། རྟབས་པ་དང་བཅས་པའི་ཤུགས་ཀྱིས་སྐྲག་པའོ། །རྟབས་པ་དང་བཅས་པ་དང་ཤུགས་ཀྱིས་སྐྲག་པ་དེ་གཉིས་ཀྱིས་གདུངས་པའི་ཡིད་གང་ཡིན་པ་དེ་ནི་རྟབས་པ་དང་བཅས་པའི་ཤུགས་ཀྱིས་སྐྲག་པ་དང་བཅས་པ་ཡིན་ནོ། །རྟབས་པ་ནི་ལུགས་ཀྱི་འགྱུར་བའོ། །ཤུགས་ནི་སྐྱོ་བའོ། །སྐྲག་པ་ནི་སེམས་སོ། །མི་རིགས་པ་དང་གནོད་པར་འགྱུར་ཞེས་པ་ནི་གནོད་པ་དང་རྗེས་སུ་འབྲེལ་པའོ། །ཡང་ན་དོན་མེད་པ་དང་མི་རིགས་པ་དང་རྗེས་སུ་འབྲེལ་པའོ། །སྦྱིན་པ་ལ་དགྱེས་ཆེས་བྱ་པ་འདིས་ནི་མིག་སྦྱིན་པ་ལས་ཟློག་པར་བྱེད་པ་སྟེ། མིག་སྦྱིན་པ་མི་རིགས་པ་དང༌། གནོད་པར་འདོད་པ་དེ་བསྒྲུབ་པར་འདོད་ནས། བྲམ་ཟེ་འདི་ནི་གཅིག་པུའི་ཕྱིར་ཞེས་བྱ་བ་ལ་སོགས་པའི་ཚིགས་སུ་བཅད་པ་སྨོས་པ་ཡིན་ནོ། །གཅེས་པ་དང༌། མི་གཅེས་པ་བློས་བརྟགས་ཤིང་སྦྱིན་པ་དང་མི་སྦྱིན་པར་བྱ་བ་སྟེ། གཅིག་པུ་དང་མང་པོ་ལ་གཅེས་པ་དང་མིག་གཅེས་པ་བརྟགས་པའི་རིགས་ཏེ། བདག་ཅག་ཐམས་ཅད་ཅེས་བྱ་བ་འདི་ནི་མང་པོ་ཉིད་དེ། བྱིས་པ་དང༌། བར་མ་དང༌། རྒན་པོ་དང་བཅས་པའི་བྲམ་ཟེ་དང༌། རྒྱལ་རིགས་དང་རྗེའུ་རིགས་ལ་སོགས་པ་ཅིའི་ཕྱིར་དོར་ཞེས་པའོ། །ཐམས་ཅད་ལ་གནོད་པར་འགྱུར་བའི་ཕྱིར་འདི་ཉིད་ཀྱིས་ནི་རེ་ཞིག་མིག་བཏང་བ་རིགས་པ་མ་ཡིན་པར་བསྟན་ཏོ། །གནོད་པར་འགྱུར་བ་ནི། སྐྱེ་དགུ་བདེ་བར་བསྐྱེད་པ་རྣམས། །མྱ་ངན་ཞུགས་ཀྱིས་མི་བསྲེགས་གསོལ། །ཞེས་བྱ་བ་ཡིན་ཏེ། སྐྱེ་དགུ་བདེ་བས་རྒྱལ་པོ་བདེ་ཞེས་བྱ་བའི་ཚིག་གིས་སོ། །ད་ནི་སྤྱན་སྩལ་མི་རིགས་སོ། །ཞེས་བྱ་བ་དེ་མི་རིགས་པར་སྒྲུབ་པ་སྟེ། སྤྱན་
སྩལ་བར་མི་རུང་བའི་དམིགས་ཀྱིས་དབྱེ་བ་ནི་གཞན་ནི་སྩལ་བར་རིགས་ཏེ་ཞེས་སྟོན་པ་ཡིན་ཏེ། གཞན་ཡང་གང་དག་ཡིན་ཞེ་ན། དེ་བསྟན་པའི་ཕྱིར། དཔལ་ཆེན་སྐྱེད་པར་འགྱུར་བའི་ཞེས་བྱ་བ་ལ་སོགས་པའི་ཚིགས་བཅད་གཉིས་སྨོས་པ་ཡིན་ནོ། །དཔལ་ཆེན་བསྐྱེད་པའི་ནོར་ཞེས་བྱ་བ་ཉིད་ཀྱིས་ནི་འདིའི་ནང་དུ་སྦྱིན་པའི་དངོས་པོ་ཐམས་ཅད་འདུས་པ་ཡིན་ཏེ། སྤྱད་པར་བྱ་བ་དང༌། ཡིད་དགའ་བར་བྱེད་པ་དང༌། བཀྲེས་པ་དང༌། སྐོམ་པའི་སྡུག་བསྔལ་ཟློག་པར་བྱེད་པ་དང༌། འཁྲིག་པའི་འདོད་པ་ཉེ་བར་སྤྱོད་པའི་བདེ་བ་དང༌། ཡོ་བྱད་ནི་ནོར་ལ་སོགས་པ་ཡིན་པས་དེ་ལྟར་སྨོས་པ་ཡིན་ནོ། །རྩོད་པ་ཟློག་པར་བྱེད་པ་ཡིན་པས་ནོར་ལ་སོགས་པ་འདིའི་ཐ་སྙད་དོ། །རིན་ཆེན་ཞེས་བྱ་བ་ནི་ཡིད་དགའ་བར་བྱེད་པས་སོ། །ཤིང་རྟ་དང་གླང་པོ་སྨོས་པས་ནི་ངལ་བ་ལས་གྱུར་པའི་སྡུག་བསྔལ་སེལ་བར་བྱེད་པའོ། །རྐང་གདུབ་འཁྲོལ་བའི་སྒྲ་རྣམས་གྲག་པ་ཡི། །ཞེས་བྱ་བ་ནི་འཁྲིག་པའི་འདོད་པ་ཉེ་བར་སྤྱོད་པའི་ཡོ་བྱད་དོ། །ཁང་པ་དུས་རྣམས་ཀུན་ཏུ་བདེ་ལྡན་པ། །ཞེས་བྱ་བ་འདིས་ནི་རྩོད་པ་མེད་པར་འགྱུར་བ་ཡིན་ནོ། །སྤྱན་རྩལ་བ་མི་རིགས་པ་དེ་དམིགས་ཀྱིས་དབྱེ་བ་ནི་གཞན་གྱི་མིག་གིས་གཞན་ལ་ཇི་ལྟར་སྤྱར་དུ་རུང་ཞེས་བྱ་བ་ལ་སོགས་པའི་ཚིགས་བཅད་གཉིས་ཏེ། རྒྱུ་དེ་གཉིས་ཀས་སྤྱན་སྩལ་བ་དེ་མི་རིགས་ཏེ། ཉིད་ཀྱི་སྤྱན་སྩལ་ཀྱང་དེའི་མིག་སྐྱེ་བར་མི་འགྱུར་བའི་ཕྱིར་དང༌། གལ་ཏེ་འབྱུང་བར་གྱུར་ན་ནི་ཁྱོད་ཀྱི་སྤྱན་མ་བྱིན་པར་ཡང་ཡོད་པར་འགྱུར་བའི་ཕྱིར་རོ། །གཞན་དག་གོ་མིག་གིས་ཞེས་བྱ་བ་འདིས་ནི་མིག་འབྱིན་པར་མི་རིགས་པའོ། །མིག་ཡོད་ཀྱང་ནོར་གྱི་ཕུན་སུམ་ཚོགས་པ་མེད་པ་དང༌། གོང་དུ་བཤད་པའི་ནོར་དང་ལྡན་པ་གང་གཅེས་པ་ཡིན་ཏེ། མིག་གཅེས་པ་ཡིན་ནམ། འོན་ཏེ་ནོར་དང་ལྡན་པས་གཅེས་པ་ཡིན་ཅེས་བསམས་ན་ནོར་ཉིད་གཙོ་བོ་ཡིན་ཏེ། མིག་དང་ལྡན་པ་ནོར་མེད་པར་ནི་ཉམས་པ་ཉིད་དུ་འགྱུར་ཏེ། མིག་ཡོད་ཀྱང་ནོར་གྱི་ཕུན་སུམ་ཚོགས་པ་མེད་པ་དང༌། ནོར་དང་ལྡན་ཞིང་མིག་མེད་དེ་ལོང་བ་ནི་བླའི། ཕོངས་པ་ནི་མ་ཡིན་ཏེ། ཕོངས་ཤིང་མིག་དང་ལྡན་པར་གྱུར་ན་གཞན་གྱི་འབྱོར་པ་མཐོང་ན་ཡིད་གདུངས་
པར་འགྱུར་རོ། །འབྱོར་པ་ཕུན་སུམ་ཚོགས་པ་ནི་ལོང་ན་ཡང་དབང་པོ་གཞན་གྱིས་ཉེ་བར་ལོངས་སྤྱོད་པའི་ཕྱིར་རོ། །དེ་བས་དཀོར་ལས་སྩལ་དུ་གསོལ། །ཞེས་བྱ་བ་ཡིན་ཏེ། ནོར་ཉིད་སྦྱིན་པར་བྱའི་སྤྱན་ནི་སྩལ་བར་བྱ་བ་མ་ཡིན་ཞེས་པའོ། །འདིར་ཡང་སྤྱན་སྩལ་བར་མི་རིགས་པ་དམིགས་ཀྱིས་འབྱེད་པས་གཞན་ཉིད་སྔར་བཤད་པ་སྟེ། ནོར་གཞན་དག་ནི་སྩལ་བར་རིགས་སོ། །གཅིག་གི་ཕྱིར་ནི་ཞེས་བྱ་བའི་དབང་དུ་བྱས་ནས་དཔལ་བསྐྱེད་པའི་ནོར་ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་བསྟན་པ་ཡིན་ནོ། །གཞན་ལ་ཇི་ལྟར་སྦྱར་དུ་རུང༌།། ཞེས་བ་ནི་དབྱེ་བའོ། །ལྷ་གཞན་ཡང་ཞེས་བྱ་བས་ཅི་ཞིག་སྟོན་པར་འགྱུར་ཞེ་ན་ནོར་དང་མིག་གཉིས་འདོད་པ་དེ་ལ་ནོར་ཉིད་ཆེས་ཕན་པ་ཡིན་གྱི། མིག་སྦྱིན་བ་ནི་མ་ཡིན་ནོ་ཞེས་སྟོན་པ་ཡིན་ནོ། །གང་ཞིག་སྦྱིན་ཞེས་སྨྲས་ནས་ནི་ཞེས་བྱ་བ་ལ་སོགས་པའི་ཚིགས་བཅད་གསུམ་གྱིས་ནི་མིག་སྦྱིན་པ་ཉིད་རིགས་པར་ཕྱོགས་བླངས་ནས་སྨས་པ་སྟེ། བསམ་པ་ཉམས་པ་དང༌། སྦྱོར་བ་ཉམས་པ་ལས་བརྩམས་ཏེ། གཉིས་ཀྱིས་ནི་བསམ་པ་ཉམས་པའོ། །གཅིག་གིས་ནི་སྦྱོར་བ་ཉམས་པ་སྟེ། རྒྱུ་གསུམ་གྱིས་སོ། །སྦྱིན་པའི་དངོས་པོ་ལ་ཆགས་པའམ། བདག་ཉིད་ལ་ཆགས་ཤིང་ཉམས་པས་འཇིགས་པའམ། ཕོངས་པ་རྣམས་ཀྱི་སྡུག་བསྔལ་ཡལ་བར་འདོར་པས་ནི་ཁས་བླངས་པའི་དངོས་པོ་སྦྱོར་བར་མི་འདོད་པ་ཡིན་ཏེ། སྦྱིན་པའི་དངོས་པོ་ལ་ཆགས་པ་དེ་ཉིད་མི་རིགས་པའི་དབང་དུ་བྱས་ནས། གང་གིས་སྦྱིན་ཞེས་སྨྲས་ན་ནི། ཞེས་བྱ་བ་ལ་སོགས་པའི་ཚིགས་བཅད་ཡིན་ཏེ། སྐྱེ་བོ་རྣམས་ནི་སྤྱིན་པའི་དངོས་པོ་ལ་ཆགས་ཤིང་འདོད་པ་ཡིན་པས་སོ། །འདོད་པ་གང་ཞེ་ན་སྦྱིན་པ་དང་འགལ་བའི་སེམས་ཀྱིས་ཀུན་ཏུ་འཛིན་པ་ཞེས་བྱ་བའི་ཚིག་གིས་སོ། །བདག་ལ་ཆགས་ཤིང་ཉམས་པས་འཇིགས་པའི་དབང་དུ་བྱས་ནས་སྦྱིན་ནོ་ཞེས་ནི་ཁས་བླངས་ནས་ཞེས་བྱ་བ་ལ་སོགས་པའི་ཚིགས་སུ་བཅད་པ་ཡིན་ཏེ། གང་ཞིག་ཡིད་ལ་གཞན་སེམས་པ། །ཞེས་བྱ་བ་ནི་མི་སྤྱིན་པར་ཡིད་ལ་སེམས་པའོ། །སེར་སྣས་མ་ངེས་བློ་ཅན་ཏེ། །ཞེས་བྱ་བ་ནི་སེར་སྣས་བདག་ཉིད་ལ་
ཆགས་ཤིང་སྦྱིན་པ་དང་མི་མཐུན་པ་ཡོད་པས་སོ། །སེར་སྣས་མ་ངེས་པའི་བློ་གང་ཡིན་པ་དེ་ནི། སེར་སྣས་མ་ངེས་པའི་བློ་ཅན་ཏེའོ། །མ་ངེས་པར་གྱུར་པ་དེ་ནི་ཕྱིས་མི་སྦྱིན་པའི་སེམས་ཡིན་ནོ་ཞེས་རྗེས་སུ་ཤེས་པའོ། །ཕོངས་པའི་སྐྱེ་བོ་ཡལ་བར་དོར་བའི་དབང་དུ་བྱས་ནས་སྦྱོར་བ། སྦྱིན་ནོ་ཞེས་ནི་ཁས་བླངས་ནས། །ཞེས་བྱ་བ་ལ་སོགས་པ་ཡིན་ནོ། །བརྟན་པར་བྱས་ནས་ཞེས་བྱ་བ་ནི་ཅི་ནས་ཀྱང་སྦྱིན་པར་བྱའོ་ཞེས་ཁས་བླངས་ནས་སོ། །སླུ་བའི་ཚིག་ནི་རྩུབ་པོ་ཡིས། །ཞེས་བྱ་བའི་ཚིག་གིས་ཕོངས་པ་རྣམས་ཀྱི་སྡུག་བསྔལ་ཡལ་བར་དོར་བའམ་གཞག་པ་དེའི་ཚིག་སྨྲ་བར་མི་ནུས་པ་ཡང་ཡིན་ཏེ། ཚིག་ནི་ངག་གི་སྦྱོར་བའོ། །སྐྱིན་བསབ་པ་ནི་ཅི་ཡང་མེད། །ཅེས་བྱ་བ་ནི་ཤིན་ཏུ་སྡིག་ཆེའོ་ཞེས་བྱ་བའི་དོན་ཏོ། །དེ་ལ་དེ་ཉིད་ངེས་པར་གཟུང་བས་བསྟན་པ་ནི་གཞན་གྱི་མིག་གིས་གཞན་ལ་ཇི་ལྟར་སྦྱར་དུ་རུང་ཞེས་བྱ་བ་དེའི་ལན་འདིས་བསྟན་པ་ཡིན་ཏེ། རྒྱུ་གཅིག་གིས་ནི་གྲུབ་པ་ཡི། །ཞེས་བྱ་བ་སྨོས་པ་ཡིན་ཏེ། རྐྱེན་གཅིག་གིས་བསྐྱེད་པ་ནི་ཅི་ཡང་མེད་པའི་ཕྱིར་རྒྱུ་རྐྱེན་གཞན་ལ་མ་ལྟོས་པའི་མིག་ནི་མེད་དོ། །རྒྱུ་རྐྱེན་གཞན་ལ་ལྟོས་པ་ནི་ལྷ་རྣམས་ཀྱིས་བྱས་པའི་མིག་ཉིད་ཀྱང་སྦྱིན་པར་བྱ་བ་དང༌། རྒྱུ་རྐྱེན་གཞན་ལ་ལྟོས་པར་འགྱུར་བ་ཡིན་ནོ། །སྦྱིན་པ་ཆེན་པོ་ལ་བགེགས་བྱ་བ་ཞེས་བྱ་བ་ནི་ནང་གི་སྦྱིན་པ་ནི་སྦྱིན་པ་ཆེན་པོ་སྟེ། ཕྱི་རོལ་ལས་ཁྱད་པར་དུ་གྱུར་པ་ཡིན་ནོ། །གང་གི་ཕྱིར་ནང་གི་སྦྱིན་པ་ནི་ཤིན་ཏུ་དཀའ་བ་ཡིན་པས་དེ་དག་དང་མ་འདྲེས་པའོ། །སྦྱིན་པའི་བགེགས་བྱེད་པས་མི་ཚུགས་པ་བསྟན་པ་ཡིན་ནོ། །དོགས་བ་སྐྱེད་པའི་མཚན་ཉིད་ཐ་མི་དད་ཅིང་སྦྱིན་པའི་བྱེ་བྲག་མིག་སྦྱིན་པ་དགག་པའི་ཕྱིར་ཡང་སྨྲས་པ། ལྷ་ནོར་དང་འབྲུ་དང་རིན་པོ་ཆེ་དང་ཞེས་བྱ་བ་ལ་སོགས་པ་སྨོས་ཏེ། འདི་དག་སྦྱིན་པ་བགེགས་བྱས་པར་གྱུར་ན་དེའི་ཚེ་བགེགས་བྱེད་པ་ཡིན་ན། དེ་ལྟ་ནི་མ་ཡིན་གྱི་བདག་ཉིད་སྦྱིན་པ་ཉེས་པར་འགྱུར་ཞེས་བསྟན་པ་ཡིན་ནོ། །གང་ཞིག་སློང་བ་དེ་ནི་སྦྱིན་པར་བྱ། །ཞེས་པའི་ཚིགས་བཅད་འདི་ལྟ་སྟེ། གཞན་ཡང་དེ་རྣམས་ཀྱི་སྦྱིན་པའི་བགེགས་ཀྱི་ཉེས་པར་བསྒྲུབས་པའི་ཕྱིར། གང་ཞིག་སློང་བ་དེ་ནི་སྦྱིན་པར་བྱ་ཞེས་བྱ་བ་འདིས་ཏེ། གང་
ལས་ཤེ་ན། སློང་བ་དེ་ཉིད་ཐོབ་ཅིང་སློངས་ནས་ནི་དགའ་བར་གྱུར་པ་ཡིན་ཏེ། སྦྱིན་པ་ལེན་པ་པོ་དགའ་བར་འགྱུར་བའི་དོན་ཡིན་ནོ། །དེ་ལྟར་རང་གི་མིག་སྦྱིན་པ་རིགས་པར་བསྟན་ནས་ནོར་དང་འབྲུ་ལ་སོགས་པ་གཞན་ནི་དེ་ལ་བྱིན་ཡང་སྦྱིན་པ་མ་ཡིན་པར་བསྟན་པའི་ཕྱིར། མི་འདོད་པ་ནི་བྱིན་ཡང་དགར་མི་འགྱུར། །ཞེས་བྱ་བ་སྟེ། འདི་ནི་མི་མཐུན་པའི་སྦྱིན་པས་དགའ་བར་མི་འགྱུར་བ་བསྟན་པའི་ཕྱིར་བཤད་དེ། འདིས་ནི་དགེ་བ་སྐྱེ་བའི་མཐུས་མི་མཐུན་པ་དང་ལྡོག་པ་བསྟན་པ་ཡིན་ནོ། །མི་སློང་བ་དང་མི་འདོད་པ་སྤྱིན་པ་ནི་མི་མཐུན་ཅིང་དགོས་པ་མེད་པའི་ཕྱོགས་ཡིན་ཏེ། ཇི་ལྟ་བུ་ཞེ་ན། དཔེས་བསྟན་པའི་ཕྱིར། ཆུས་ཁྱེར་བ་ལ་ཆུས་ཡིས་ཅི་ཞིག་བྱ། །ཞེས་པ་ཡིན་ཏེ། ཆོས་མཐུན་པའི་དཔེའོ། །སྐོམ་པ་ལ་ཆུའི་སྦྱིན་པ་དང་འདྲ་བར་བསླངས་པའི་དོན་ནི་འདི་ལ་སྦྱིན་ཞེས་བྱ་བ་སྨོས་ཏེ། བླངས་པ་དེ་ཉིད་སྦྱིན་ན་སྐྱེ་བོ་དགའ་བ་ཀུན་ཏུ་འཛིན་ཅིང་དགའ་བ་སྐྱེ་བར་འགྱུར་རོ། །དེ་ནས་རྒྱལ་པོ་དེ་ཞེས་བྱ་བ་ལ་སོགས་པའི་འདིའི་བསྡུས་པའི་དོན་ནི་གང་སྨྲ་བ་དང་གང་གི་ཕྱིར་སྨྲ་བ་དང༌། ཇི་ལྟར་སྨྲ་བ་དང༌། གང་ལ་སྨྲ་བ་ཞེས་བྱ་བ་ལ་སོགས་པ་འདི་དག་སྟེ། ཅི་རིགས་པར་སྦྱར་བར་བྱའོ། །ལ་ལས་དཀའ་ཐུབ་ཏིང་འཛིན་ཞེས་བྱ་བ་ལ་སོགས་པའི་ཚིགས་བཅད་འདིའི་བསྡུས་པའི་དོན་ནི་རྒྱལ་སྲིད་ཐོབ་པའི་རྒྱུ་དང༌། འབྲས་བུ་དང་ངོ་བོ་ཉིད་ཀྱི་ཁྱད་པར་ཡིན་ཏེ། རྟག་ཏུ་བྱེད་པ་དང་ཡུན་མི་ཐུང་བས་དེའི་དཀའ་ཐུབ་ཆེན་པོའོ། །དཀའ་ཐུབ་ཏིང་འཛིན་ཆེན་པོ་ཞེས་བྱ་བ་ནི་དཀའ་ཐུབ་ཉིད་ཏིང་འཛིན་ཡིན་པས་དཀའ་ཐུབ་ཏིང་ངེ་འཛིན་ནོ། །གང་དུ་རྒྱུ་སྦྱིན་པ་དང༌། ཡང་དག་པར་སྡོམ་པ་ལ་སོགས་པའི་མཚན་ཉིད་ཡོད་པ་དེ་ནི་དཀའ་ཐུབ་ཏིང་འཛིན་ཆོ་ག་ཞེས་བྱའོ། །གུས་པར་བྱེད་པའི་རྒྱུས་ཆོ་ག་ཞེས་བྱ་སྟེ། ཆོག་ཉམས་ན་ནི་གང་གིས་ཀྱང་ངམ། ཐམས་ཅད་ཀྱིས་ལུས་ཉོན་མོངས་པར་བྱས་ཏེ་རྟག་ཏུ་དཀའ་ཐུབ་དང་ཐོས་པ་ལ་བརྟེན་ཀྱང༌། གུས་པར་སྦྱོར་བའི་ཆོ་ག་ཉམས་ན་མི་ཐོབ་པོ། །འདིས་ནི་རྒྱལ་སྲིད་ཐོབ་པའི་རྒྱུ་བསྟན་ཏོ། །མང་པོ་ཇི་ལྟར་བསྟན་པའི་མཆོད་སྤྱིན་བརྒྱ་ཕྲག་ཡིན་ཏེ། འདིས་ནི་ཇི་སྲིད་དུ་བསྟེན་པར་བྱས་པའོ། །གྲགས་པ་ནི་མཐོང་བའི་
ཆོས་ཀྱི་འབྲས་བུ་སྟེ། མཐོ་རིས་ཞེས་བྱ་བ་ནི་འཇིག་རྟེན་ཕ་རོལ་ལོ། །དེ་ལྟར་ཇི་ལྟར་བསྟེན་པ་སྟེ་རྟག་ཏུ་བསྟེན་པ་དང་གུས་པར་བྱ་བའི་སྦྱོར་བའི་མཆོད་སྦྱིན་ཆེན་པོ་མང་པོས་འབྲས་བུ་ཅི་ཞིག་ཐོབ་ཅེ་ན། སྨྲས་པ། མཐོང་བའི་ཆོས་ལ་ནི་གྲགས་པའོ། །འཇིག་རྟེན་ཕ་རོལ་གྱི་འབྲས་བུ་ནི་མཐོ་རིས་སོ། །འདིས་ནི་འབྲས་བུ་ཕུན་སུམ་ཚོགས་པ་བསྟན་ཏོ། །བརྒྱ་བྱིན་དང་འགྲན་པའི་ལོངས་སྤྱོད་ཅེས་བྱ་བས་ནི་རང་བཞིན་ཕུན་སུམ་ཚོགས་པ་བསྟན་ཏོ། །ཅི་ཞིག་མཐོང་ན་ཞེས་བྱ་བ་ནི་འབྲས་བུ་ཞེས་བྱ་བའི་དོན་ཏོ། །ཅི་ཞིག་མཐོང་ནས་མིག་སྦྱིན་ཞེས་བྱ་བའི་དོན་ཏེ། གང་སྦྱིན་པ་དེ་ཐམས་ཅད་འབད་པ་མེད་པར་ཡོད་དོ། །ཞེས་པའོ། །ཆོ་ག་འདི་ནི་སུ་ལས་ལོབས་ཞེས་བྱ་བ་ནི་ཆོ་ག་འདི་ཞེས་བྱ་བ་ནི་འབྲས་བུ་ཡང་དག་པར་འཐོབ་ཅེས་བྱ་བའི་ལུང་ངོ༌། །སུ་ལས་ལོབས་ཞེས་བྱ་བ་ནི་གང་གིས་བསྟན་ཅེས་བྱ་བའི་ཚིག་སྟེ། རྩེ་ཞིག་མཐོང་ནས་ཁྱོད་ཀྱིས་མིག་སྦྱིན་ཞེས་བསྟན་པ་ཡིན་ནོ། །གང་གི་དོན་དུ་སྦྱིན་པ་དེ་ཐམས་ཅད་ཀྱང་ཕུན་སུམ་ཚོགས་པ་བསྟན་པའི་ཕྱིར་སྨྲས་པ། མཆོད་སྦྱིན་བྱས་པས་སུམ་ཅུ་རྩ་གསུམ་ཉེ། །ཞེས་བྱ་བའི་ཚིགས་བཅད་འདི་ཡིན་ནོ། །དེའི་ཕྱིར་རྒྱུ་ནི་སྔར་བྱས་ཟིན་པས་སོ། །ཇི་ལྟ་བུ་ཞེ་ན། མཆོད་སྦྱིན་བྱས་པས་ཞེས་བྱ་བ་ལ་སོགས་པས་སོ། །གལ་ཏེ་འཇིག་རྟེན་འདིའི་འབྲས་བུ་གྲགས་པ་དང༌། ཚིག་བཙུན་པོ་འདོད་ན་ནི་དེ་གཉི་ག་ཡང་ཕུན་སུམ་ཚོགས་པ་བསྟན་པའི་ཕྱིར། གྲགས་པས་ཀུན་ཏུ་རབ་ཏུ་གསལ་གྱུར་རིང༌། །མི་དབང་གཙུག་གི་འོད་ཀྱིས་རྐང་བརྒྱན་པ། །ཞེས་བྱ་བ་སྟེ་གོ་རིམས་བཞིན་དུ་སྦྱར་རོ། །ཅི་ཞིག་འདོད་ཕྱིར་མིག་ནི་སྦྱིན་པར་བྱེད། །ཅེས་བྱ་བ་ནི་གང་གི་དོན་དུ་བསྟན་པ་དེ་ཅི་ཞིག་མཐོང་ན། ཁྱོད་ཀྱིས་མིག་སྦྱིན་ཞེས་བྱ་བ་སྟེ། དེ་ཉིད་འདིར་ཡང་བསྟན་པ་ཡིན་ནོ། །ས་ཀུན་འཐོབ་ཕྱིར་དང་མཐོ་རིས་དང་ཐར་པ་སྟེ་འཇིག་རྟེན་ཕ་རོལ་གྱི་འབྲས་བུའོ། །ས་ཀུན་ཐོབ་པ་དང་མཐོ་རིས་འཐོབ་པ་ཞེས་བྱ་བ་འདི་གཉིས་ནི་མངོན་པར་མཐོ་བའི་དབང་དུ་བྱས་པའོ། །ཐར་པ་ནི་ཉན་ཐོས་དང་རང་སངས་རྒྱས་ཀྱི་འབྲས་བུ་སྟེ། འདིས་ནི་ངེས་པར་ལེགས་པ་འཐོབ་པའི་དབང་དུ་བྱས་པས་སོ། །གྲགས་
པ་ནི་མཐོང་བའི་ཆོས་ཀྱི་འབྲས་བུའོ། །སློང་བ་རྣམས་མཐོང་བའི་ཆོས་ལ་འབྲས་བུའམ་དོན་མེད་པར་རོ། །འཇིག་རྟེན་བསྐྱབ་ཕྱིར་ཞེས་བྱ་བ་ནི་སངས་རྒྱས་ཀྱི་གོ་འཕང་ཐོབ་པར་བྱ་བའི་གནས་སྐབས་ཀྱི་དོན་ནོ། །སྨན་དཔྱད་ལས་བྱུང་བ་ཞེས་བྱ་བའི་སྨན་དཔྱད་ལས་བྱུང་བ་ཇི་ལྟ་བུ་ཞེ་ན། སྨྲས་པ་དལ་བུས་དང་མ་སྣད་པར་རོ། །ཡང་ན་སྨན་དཔྱད་ལས་བྱུང་བ་བཞིན་དུ་ཞེས་བྱ་བའི་སྨན་ཡིག་ལས་བྱུང་བ་བཞིན་དུ་སྟེ། ཕྱོགས་གང་དུ་མཚོན་གཏང་བར་བྱ་བ་དང༌། ཇི་ལྟར་དབྱུང་བ་སྟོན་པ་ཡིན་ཏེ། དལ་བུས་བྱ་བ་དང་མ་སྣད་པར་རོ། །དེ་ལྟར་ཕྱུང་བ་ལ་རབ་ཏུ་དགའ་བ་བཞིན་དུ་ཞེས་འབྱིན་པ་དངོས་ཏེ། ལས་ཀྱི་དུས་ན་སེམས་དང་བ་གང་བཅོམ་ལྡན་འདས་ཀྱིས་གསུངས་པ་དེ་སྟོན་པ་ཡིན་ཏེ། སྦྱོར་བའི་ཚེ་ན་མཆོག་ཏུ་དགའ་བ་དང༌། བྱིན་ནས་ཀྱང་ཡིད་དགའ་བར་བྱེད་པ་སྟེ། གང་བཅོམ་ལྡན་འདས་ཀྱིས་གསུངས་བ་དེ་སྟོན་ཏོ། །སློང་བ་ནི་དོན་བསྒྲུབ་པའི་ཕྱིར་སློང་མོ་པའི་མིག་ཏུ་གནས་པར་གྱུར་པ་ནི་མིག་གིས་མཐོང་བར་བྱ་བའོ། །པདྨ་དང་བྲལ་བའི་པདྨའི་མཚོ་གང་ཡིན་པ་དེ་ནི་པདྨའི་མཚོའོ། །དེ་ལྟ་བུའི་བཞིན་གང་ལ་ཡོད་པ་དེ་ནི་པདྨ་མེད་པའི་པདྨའི་མཚོ་འདྲ་བའི་གདོང་ངོ༌། །གཞན་ལ་མེད་པའི་རབ་ཏུ་དགའ་བར་གྱུར། །ཞེས་བྱ་བ་ནི་སྐྱེ་བོ་དང་ཐུན་མོང་མ་ཡིན་པའི་དགའ་བ་ཡིན་ཏེ། དེ་ལྟར་ན་སྐྱེ་དགུ་དང་རྒྱལ་པོ་ནི་དེ་ལྟར་སྐྱེ་དགུ་བདེ་ལ་རྒྱལ་པོ་ཡང་བདེ། མི་བདེ་ན་ཡང་དེ་བཞིན་ནོ་ཞེས་པའི་ཚིག་གིས་རྒྱལ་པོ་ཉིད་མྱ་ངན་སྐྱེས་པ་ཡིན་མོད་ཀྱི། འོན་ཀྱང་དགའ་བ་སྐྱེ་བ་ཡིན་ཏེ། འདི་ནི་སྐྱེ་བོ་གཞན་ལ་མེད་པའི་དགའ་བའོ། །བྲམ་ཟེའང་མིག་དང་ལྡན་པར་མཐོང༌། །ཞེས་བྱ་བ་ནི་འཁོར་གྱིས་ཞེས་བྱ་བར་སྦྱར་རོ། །འཁོར་གཞན་རྣམས་ལ་མེད་པའི་རབ་ཏུ་དགའ་བ་དེ་ཉིད་མེད་པར་བསྟན་པའི་ཕྱིར། རྒྱལ་པོའི་བཙུན་མོའི་འཁོར་ཞེས་བྱ་བ་ལ་སོགས་པ་འདིའི་དོན་ཡིན་ནོ། །ཨེ་མའོ་བརྟན་ཞིང་ཞེས་བྱ་བ་ནི་རང་གི་བདེ་བ་ལ་འདོད་པ་མེད་པའི་བརྟན་པའོ། །ཨེ་མའོ་སྙིང་སྟོབས་ཆེ་ཞེས་བྱ་བ་ནི་རང་གི་མི་བདེ་བ་ལ་འཇིགས་པ་མེད་པའོ། །དེ་གཉི་གས་ཀྱང་ཤེས་རབ་ཀྱི་ཡོན་ཏན་བསྟན་ཏོ། །ཨེ་མའོ་སེམས་ཅན་ཕན་འདོགས་པ། །ཞེས་བྱ་བ་འདིས་
ནི་སྙིང་རྗེའི་ཡོན་ཏན་སྟོན་ཏོ། །ཤེས་རབ་དང་སྙིང་རྗེ་དེ་གཉིས་ཀ་སྨོས་པ་དེ་གཉིས་བསྒོམས་པས་བྱང་ཆུབ་པ་སྟེ། དེ་གཉིས་ཀ་ཡང་རྒྱུར་གྱུར་པའི་ཕྱིར་བྱང་ཆུབ་སེམས་དཔའི་སྒྲུབ་པའོ། །མི་གནས་པའི་མྱ་ངན་ལས་འདས་པ་དང༌། རབ་ཏུ་གནས་པའི་མྱ་ངན་ལས་འདས་པའི་རྒྱུར་གྱུར་ཅིང༌། དེ་གཉི་ག་ཡང་ཀུན་ནས་ཉོན་མོངས་པ་ཡང་མཐར་བྱེད་ཅིང་སྤོང་བས་ན་སེམས་དཔའ་ཆེན་པོའི་རབ་ཏུ་སྒྲུབ་པའོ། །དེ་བས་ན་ཞེས་བྱ་བ་ཉིད་སེམས་ཅན་ལ་ཕན་འདོགས་པས་ནའོ། །ཡང་ན་ཤེས་རབ་དང་སྙིང་རྗེའི་ཡོན་ཏན་གཉིས་དང་ལྡན་པས་སོ། །ངོ་མཚར་ཆེ་བའི་སེམས་ཅན་ཞེས་བྱ་བ་ནི་གང་གི་ཕྱིར་བརྟན་པ་དང༌། སྙིང་སྟོབས་ཆེ་བ་དང༌། སེམས་ཅན་ལ་ཕན་འདོགས་པར་བྱེད་པ་སྟེ། སེམས་ཅན་ཞེས་བྱ་བ་ཉིད་སྨོས་པ་ཡིན་ནོ། །ཡུན་རིང་པོར་འདི་ལྟར་ཉོན་མོངས་སུ་གཞུག་པའི་མི་རིགས་ཞེས་བྱ་བ་འདི་ལྟར་བརྗོད་པར་འདོད་དེ། ཡོངས་སུ་ཉོན་མོངས་པ་ལ་འཇིགས་པ་མེད་པའི་རྒྱུར་གྱུར་པ། དེ་ཉིད་སེམས་ཅན་གྱི་ཡོན་ཏན་ཉིད་ཡིན་ཏེ། སེམས་ཅན་གྱི་ཡོན་ཏན་དུ་གཟུང་ངོ༌། །མིག་གི་རྨ་ནི་སོས་ཞེས་བྱ་བ་ནི་མིག་གི་གནས་ཀྱི་རྨ་ཞེས་བརྗོད་པ་ཡིན་ནོ། །མིག་གི་རྨ་ནི་སོས་ཞེས་བྱ་བའི་ཚིག་གིས་ནི་གནས་ཀྱིས་གནས་པ་སྟོན་ཏེ། ཇི་ལྟར་རྒྱལ་པོ་མདུན་ས་ནི་མི་སྣང་ཡང༌། རྒྱལ་པོའི་གནས་སུ་སྟོན་པ་དང་འདྲའོ། །བསྲབས་ཤིང་སངས་པ་ཞེས་བྱ་བ་ལ་བསྲབས་པ་ཡིན། སངས་པ་ཡིན་པས་བསྲབས་ཤིང་སངས་པའོ། །བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་ནི་བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་སོ། །བཙུན་མོའི་འཁོར་ཞེས་སྨོས་པས་ནི་བཙུན་མོའི་འཁོར་ན་སྤྱོད་པའི་སྐྱེ་བོ་ཡིན་པས་དེ་སྐད་ཅེས་བྱའོ། །ཡང་ན་བཙུན་མོའི་འཁོར་གྱི་སྒྲ་ཉིད་འཁོར་གྱི་མི་རྣམས་ལ་འཇུག་གོ །བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་ཀྱི་མྱ་ངན་ནི་བཙུན་མོའི་འཁོར་དང་ཕོ་བྲང་འཁོར་གྱི་མྱ་ངན་ནོ། །བསྲབས་ཤིང་སངས་པ་ནི་བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་ཀྱི་མྱ་ངན་གང་ཡིན་པ་སྟེ། བཙུན་མོའི་འཁོར་དང་ཕོ་བྲང་འཁོར་གྱི་མི་རྣམས་ཀྱི་ཞེས་དེ་ལྟར་བསྡུ་བར་བྱའོ། །འདིར་རྒྱལ་པོ་ལ་ནི་མྱ་ངན་མེད་པ་ཡིན་ཏེ། འོན་ཀྱང་
བཙུན་མོའི་འཁོར་དང་ཕོ་བྲང་འཁོར་གྱིས་ནི་རྒྱལ་པོ་དེ་མྱ་ངན་ཡོད་དེ། བཙུན་མོའི་འཁོར་ལ་སོགས་པའི་ཚིག་གི་འབྲེལ་པ་ཅུང་ཟད་ཡོད་དེ། སྐྱེ་དགུ་བདེ་ན་ནི་རྒྱལ་པོ་བདེ་ཞེས་བྱ་བའི་ཚིག་གིས་སོ། །དེ་བསྟན་པའི་ཕྱིར། རྒྱལ་པོ་དེ་ཉིད་ཀྱི་མྱ་ངན་དང་བཅས་པ་ནི་གང་བཙུན་མོའི་འཁོར་ལ་སོགས་པ་ཡིན་ནོ་ཞེས་བསྟན་པ་ཡིན་ནོ། །རབ་ཏུ་དབེན་པ་འདོད་པའི་ཕྱིར་ཞེས་བྱ་བ་ནི་སྐྱེ་བ་གཞན་དུ་དཔེན་པ་ལ་གོམས་པ་སྟོན་པའོ། །རྫིང་བུའི་འགྲམ་ན་ཞེས་བྱ་བ་ནས་སྐྱིལ་མོ་ཀྲུང་བཅས་ཏེ་ཞེས་བྱ་བའི་བར་གྱི་ཚིག་གི་བསྡུས་པའི་དོན་ནི་མིག་གཉིས་མེད་པས་མིག་གི་ཡུལ་མ་བསྟན་ཏེ། རེག་བྱ་དང༌། དྲི་དང༌། སྒྲའི་ཡུལ་དང་ལྡན་པ་ཡིན་ནོ། །དེས་ཀྱང་ཡིད་དུ་འོང་བར་བསྟན་པ་ཡིན་ཏེ། ཇི་ལྟར་རིགས་པར་སྦྱར་བར་བྱའོ། །བརྒྱ་བྱིན་མདུན་དུ་འོངས་ནས་འདི་སུ་ཞེས་དྲིས་པ་སྟེ། མི་ལས་ཁྱད་པར་དུ་གྱུར་པ་ཞིག་ཡིན་པར་རྟོགས་སོ། །ཡང་ན་ལྷའི་དབང་པོ་ཉིད་ཀྱིས་རང་འོངས་པར་བརྡ་ཕྲད་པའི་ཕྱིར་རྐང་པའི་སྒྲ་བྱས་པར་གྱུར་ཏོ། །གཞན་དུ་ན་དྲི་བའི་སྐབས་མེད་པར་འགྱུར་རོ། །འདི་སུ་ཞེས་དྲིས་པ་དང༌། འདི་ལྟར་དེ་ཉིད་སྨྲས་པ། ཁྱོད་ཀྱི་དྲུང་དུ་འོངས་སོ་ཞེས་པ་སྟེ་སྐབས་དབྱེ་བའི་ཕྱིར་རོ། །བཀའ་སྩལ་དུ་གསོལ་ཞེས་བྱ་བའི་ཚིག་ནི་ཞེ་ས་དང་བཅས་པ་དང་ཞེས་བྱ་བ་ཡིན་ཏེ། མདུན་བསུ་བ་ལ་སོགས་པ་སྔོན་དུ་འགྲོ་བ་ཞེས་བྱ་བའི་དོན་ཏོ། །མཆོག་སློངས་ཤིག་ཞེས་བཤད་པ་ནི་ཅི་འདོད་པ་སྨོས་ཤིག་ཅེས་བྱ་བའི་ཐ་ཚིག་གོ །མཆོག་འདི་ཉིད་དུ་ངེས་པར་གཟུང་བའི་དངོས་པོ་བསྟན་པའི་ཕྱིར། བརྒྱ་བྱིན་བདག་ལ་ནོར་མང་ཞིང། །ཞེས་བྱ་བའི་ཚིགས་བཅད་འདིས་བསྟན་པ་ཡིན་ཏེ། འདི་ལུས་སུ་གཞག་པ་ནི་མཆོག་སློང་བའི་འབྱོར་པའི་མཚན་ཉིད་རྣམ་པ་གཉིས་ཏེ། ཕྱི་རོལ་གྱི་དངོས་པོ་དང་འབྲེལ་པ་དང༌། ནང་གི་དངོས་པོ་དང་འབྲེལ་པ་དང༌། དེ་གཉི་གའི་དོན་བསྟན་པའི་ཕྱིར་ཕྱི་རོལ་ཡང་རྣམ་པ་གཉིས་ཏེ། སེམས་ཅན་དང་སེམས་ཅན་མ་ཡིན་པའོ། །སེམས་ཅན་མ་ཡིན་པ་ནི་ནོར་དང་འབྲུ་ལ་སོགས་པ་ཡིན་ཏེ། ནོར་མང་ཞེས་བྱ་བ་སྨོས་པའོ། །མང་པོ་ཞེས་བྱ་བ་སྨོས་པས་ནི་དེ་ལས་གཞན་པའི་སེམས་ཅན་མ་ཡིན་པ་གཟུང་ངོ༌། །སེམས་ཅན་ནི་མཐུ་དང་གུས་པ་དང་ལྡན་པར་བསྟན་པ་སྟེ།
དམག་ཚོགས་ཆེ་ལ་ཞེས་སྨོས་པས་སོ། །ཕྱི་རོལ་དང་སེམས་ཅན་མཐའ་དག་ཕུན་སུམ་ཚོགས་པ་བཟུང་བས་ནི་ནང་གི་དངོས་པོ་ཡང་ཕུན་སུམ་ཚོགས་པར་བསྟན་ཏོ། །འོན་ཀྱང་སྔར་དེ་ལྟ་བུའི་རྣམ་པ་ཡིན་ན་ཡང་ལོང་བ་དག་ལ་མིག་བྱིན་པས་དེས་ན་མཆོག་འདི་སློང་ངོ་ཞེས་བྱ་བ་ཡིན་ཏེ། ལོང་བར་གྱུར་པས་ཞེས་བྱ་བ་སྨོས་པ་ཡིན་ནོ། །གང་གོང་དུ་བསྟན་པ་དེ་བསྟན་པས་ངོ་མཚར་མི་ཆེ་ཞིང་རླབས་ཅན་དུ་ཞེས་བྱ་བ་ཡིན་ཏེ། འདི་ནི་ངོ་མཚར་མི་ཆེ་ཞིང་བརྟན་བས་རླབས་ཅན་དུ་སྨྲས་པ་སྟེ། ངོ་མཚར་མེད་པས་གང་གི་ཕྱིར་མཆོག་དང་མཆོག་མ་ཡིན་པ་ཚོལ་བ་ལའོ། །བདག་ཉིད་ཀྱི་ཡོན་ཏན་དང་ལྡན་པས་སྔོན་མ་བྱུང་བའི་ངོ་མཚར་མེད་པའི་ཕྱིར་རོ། །ནོར་མང་པོ་ཡོད་ཅིང་དམག་ཚོགས་ཆེ་ལ་མཐུ་དང་ཡང་ལྡན་པ་ཡིན་ནོ། །གལ་ཏེ་དེ་ལྟར་གཉི་ག་དང་ལྡན་པ་ཡིན་ན་ཅིའི་ཕྱིར་མཆོག་ཚོལ་བར་བྱེད་ཅེ་ན། དེ་བསྟན་པ་ཡིན་ན། ལོང་བར་གྱུར་པས་འདི་ལྟ་བུའི་གནས་སྐབས་འདི་ལས་ནི་འཆི་བ་ཉིད་འདོད་དོ་ཞེས་མཆོག་སློང་བའི་ཚིག་གི་རྣམ་པ་ཡིན་ནོ། །ངོ་མཚར་མི་ཆེ་བ་དང་རླབས་ཅན་དུ་སྨྲ་བ་ནི་གང་གིས་མཆོག་ཀྱང་མི་ལེན་པ་སྟེ། དེ་བས་ན་དེ་སྨོས་སོ། །བདག་ལ་ནོར་མང་ཞེས་བྱ་བའི་ཚིགས་བཅད་འདིའི་དོན་གཞན་དུ་ནི་བསོད་ནམས་ཀྱི་ཚོགས་ཀྱི་འབྲས་བུའི་མཚན་ཉིད་ནི་རྣམ་པ་གསུམ་སྟེ་མཆོག་སྦྱིན་པར་བྱ་བ་དང༌། ཁྱོད་ཀྱིས་སྦྱིན་པར་བྱ་བ་དང༌། བདག་ལ་སྦྱིན་པའོ་སྦྱིན་པར་བྱ་བ་དེ་ལས་ནི་གཉིས་ཡོད་དེ། བཟོད་པའི་བསོད་ནམས་ཀྱི་ཚོགས་ཀྱི་འབྲས་བུའི་མཐུ་དང་ལྡན་པ་དང༌། དམག་ཚོགས་ཡོད་པའོ། །ད་ནི་ཞེས་བྱ་བས་ནི་ཚུལ་ཁྲིམས་ཀྱི་བསོད་ནམས་ཀྱི་ཚོགས་ཀྱི་འབྲས་བུ་ནང་གི་ཕུན་སུམ་ཚོགས་པ་ཡིན་ཏེ། དེ་ཡང་ཡོད་པ་ལས་མེད་པ་སྟེ། གང་ཡིན་ཞེ་ན། མིག་མེད་པའོ། །དེ་མཆོག་འདི་སློང་ངོ་ཞེས་བྱ་བ་ནི་འདི་ལྟར་ལོང་བའི་གནས་སྐབས་སུ་གྱུར་པས་འཆི་བ་འབའ་ཞིག་མངོན་པར་འདོད་ཅེས་བྱ་བ་ཡིན་ནོ། །སྔར་བཤད་པ་སྟེ། ངོ་མཚར་མི་ཆེ་བའི་རླབས་ཅན་དུ་འདིས་བསྟན་པ་ཡིན་ཏེ། ཚིགས་བཅད་འདིའི་དོན་གྱིས་སོ། །ཚིགས་བཅད་ཀྱི་དོན་གཉིས་སུ་ཡང་འགྱུར་བ་སྟེ། ལོང་བར་གྱུར་པས་ཞེས་བྱ་བ་ནི་ལྔ་པ་རྒྱུའི་མཚན་
ཉིད་དེ། ལོང་བ་ཉིད་ཀྱི་རྒྱུས་འཆི་བ་འབའ་ཞིག་མངོན་པར་འདོད་ཅེས་སྦྱར་ཏེ། འདི་ལྟར་འདིའི་དོན་དུ་ཡང་འགྱུར་རོ། །འདི་ལྟའི་གནས་སྐབས་གྱུར་བྱས་ནས། །ཞེས་བྱ་བ་ནི་མིག་མེད་པའི་གནས་སྐབས་སོ། །ད་ནི་དེ་ལ་ཁྱོད་ཀྱི་ཡིད་ནི་ཅི་སྙམ་སེམས། །ཞེས་བྱ་བ་ནི་འདི་དང་རྗེས་སུ་མཐུན་པའི་ཚིག་བཤད་པ་སྟེ། ཚིག་རྐང་གསུམ་གྱིས་སོ། །ཅི་ནས་ཡིད་ནི་རབ་ཏུ་ཆེས་པར་འགྱུར་བ་རུ། །ཞེས་བྱ་བ་ནི་དེ་དང་རྗེས་སུ་མཐུན་པར་བཤད། །བདག་གི་མིག་ནི་ཡ་གཅིག་མཐོང་བར་ཤོག །ཅེས་བྱ་བའི་བདེན་པའི་བྱིན་རླབས་ཀྱི་མཐུ་ཞེས་བྱ་བ་ནི་ད་ལྟར་བྱུང་བའི་དགེ་བའི་སེམས་ཀྱི་སྟོབས་སོ། །བསོད་ནམས་སྤེལ་བའི་ཁྱད་པར་གྱིས། །ཞེས་བྱ་བ་ནི་རྒྱའི་སྟོབས་སོ། །ཇི་ལྟ་བུའི་བསོད་ནམས་བསགས་པའི་ཁྱད་པར་གྱིས་ཤེ་ན་སྨྲས་པ། མིག་གི་སྦྱིན་པ་ལ་བྱུང་བའི་ལས་བྱས་པ་ལས་ཉེ་བར་བསགས་པས་སོ། །དེ་སྐད་སྨྲས་མ་ཐག་ཏུ་ཞེས་བྱ་བ་ནི་བདེན་པའི་བྱིན་གྱི་རླབས་ཀྱི་མཐུས་སྐྱེས་མ་ཐག་ཉིད་དོ། །ཨནད་རྙིལ་གྱིས་སྤྲས་པ་ཞེས་བྱ་བ་ལ་སོགས་པས་ནི་བདེན་པའི་བྱིན་གྱི་རླབས་ཀྱི་སྟོབས་ཀྱིས་མིག་ཁྱད་པར་ཅན་སྐྱེས་པར་སྟོན་པ་ཡིན་ནོ། །མིག་སྔ་མ་ལ་འགྲན་པ་བཞིན་ཞེས་བྱ་བ་ནི་སྔར་སྐྱེས་པའི་མིག་གི་ཡོན་ཏན་དང་ལྡན་པ་བཞིན་ཞེས་བྱ་བའི་དོན་ཏོ། །ལྷ་རྣམས་ཀྱིས་ནི་རྔ་བོ་ཆེ་དག་ཀྱང༌། །ཞེས་བྱ་བ་ལ་སོགས་པས་ནི་རེག་པར་བྱ་བ་དང་བལྟ་བར་བྱ་བ་དང༌། བསྣམ་པར་བྱ་བ་སྟེ་དོན་གསུམ་སྟོན་ཏོ། །ཡིད་དུ་འོང་བ་ཞེས་བྱ་བས་ནི། རེག་པར་བྱ་བའོ། །རྒྱལ་པོའི་སྤྱོད་མཆོག་བསྟོད་པའི་གཞི་ཞེས་བྱ་བ་ནི་དོན་ཕུན་སུམ་ཚོགས་པའོ། །སྙན་པའི་ཚིག་རྣམས་ཀུན་ཏུ་ཞེས་བྱ་བས་ནི་སྒྲ་ཕུན་སུམ་ཚོགས་པ་བསྟན་ཏོ། །སྤྱོད་མཆོག་བསྟོད་པའི་གཞི་ཞེས་བསྟན་པའི་སྤྱོད་པའི་མཆོག་གི་གཞི་དེ་ཉིད་ཀྱི་དབང་དུ་བྱས་ནས་སྨྲས་པ། ཀྱེ་མའོ་རླབས་ཆེན་ཞེས་བྱ་བ་ནས། །ཁྱོད་ཀྱིས་འགྲོ་བ་མགོན་བཅས་བགྱིས་པ་ལེགས།། ཞེས་བྱ་བ་ལ་སོགས་པ་སྟེ། ཀྱེ་མའོ་རླབས་ཆེན་ཞེས་བྱ་བའི་བསྡུས་པའི་དོན་ནི་འདི་ཡིན་ཏེ། སྦྱོར་བ་ཕུན་སུམ་ཚོགས་པས་བསམ་པ་ཕུན་སུམ་ཚོགས་པ་བསྟན་ཏོ། དང་པོའི་གཉིས་པོ་སྟེ། ཀྱེ་མའོ་རླབས་ཆེན་ཞེས་བྱ་བ་འདིས་ནི་སྦྱིན་པའི་དབང་པོ་ལ་ཆགས་པ་མེད་པར་བསྟན་ཏོ། །
ཨེ་མའོ་སྙིང་རྗེ་ཅན་ཞེས་བྱ་བ་འདིས་ནི་རབ་ཏུ་འཛིན་པར་བྱེད་པའི་སྙིང་རྗེ་དང་ལྡན་པ་སྟེ། འདི་གཉིས་ཀྱི་ཕྱིར་སྦྱོར་བ་ཕུན་སུམ་ཚོགས་པའོ། །འདི་ཡི་སེམས་ནི་ཇི་ལྟར་རྣམ་དག་ལྟོས། །ཞེས་བྱ་བ་འདིས་ནི་འབྲས་བུ་ཡོངས་སུ་འགྱུར་བའོ། །ཨེ་མའོ་བདག་གི་བདེ་ལ་སེམས་མ་ཆགས། །ཞེས་བྱ་བ་འདིས་ནི་བདག་ལ་ཆགས་པ་མེད་པ་ཡིན་ཏེ། གཉིས་ཀས་ཀྱང་བསམ་པ་ཕུན་སུམ་ཚོགས་པ་བསྟན་པའོ། །དེས་ན་དེ་ཉིད་བརྟན་ཞིང་དཔའ་མཆོག་ཅེས་བྱ་བ་ཡིན་ཏེ། བརྟན་པ་ནི་བརྟན་པའི་བསམ་པ་སྟེ་སེམས་རྣམ་པར་དག་པ་དང༌། བདག་ཉིད་གྱི་བདེ་བ་ལ་མ་ཆགས་པར་དེས་བསྟན་ཏེ། །དང་པོའི་གཉིས་པོ་འདིས་ནི་དཔའ་བ་སྟེ། སྦྱོར་བ་ཕུན་སུམ་ཚོགས་པ་དེས་སོ། །དེ་ལྟར་དང་པོའི་ཚིགས་བཅད་ཀྱིས་མིག་སྦྱིན་པའི་སྤྱོད་པ་གཞི་ལས་བསྟོད་པའི་དབང་དུ་བྱས་པའོ། །པདྨའི་སྤྱན་རྒྱས་ཞེས་བྱ་བ་ལ་སོགས་པ་འདིས་ནི་མིག་རྙེད་པའི་སྒོ་ནས་བསྟོད་པ་ཡིན་ཏེ། མགོན་དང་བཅས་པས་སོ། །བསོད་ནམས་ཚོགས་ནི་དོན་ཡོད་པ། །ཞེས་བྱ་བ་འདིས་ནི་དོན་གྱིས་ཏེ། བརྒྱ་བྱིན་གྱི་མཆོག་ལ་ལྟོས་པ་མེད་པར་བདེན་པའི་བྱིན་གྱིས་རླབས་ཀྱིས་རང་གི་མིག་སླར་རྙེད་པའོ། །བྱིན་གྱིས་ཞེས་བྱ་བ་ནི་བདེན་པའི་བྱིན་གྱིས་རླབས་ཀྱིས་སོ། །རྒྱལ་བ་ནི་བརྒྱ་བྱིན་མཆོག་ལ་མ་ལྟོས་པར་རང་གི་མིག་སླར་རྙེད་པའོ། །བསམ་པ་དག་པ་ནི་དེ་ཚེ་དང་ནི་ད་ལྟར་སློང་རྣམས་ཀྱི་ཞེས་བྱ་བ་དང༌། གང་ཡང་བདག་ལ་ཡ་གཅིག་མིག་བསླངས་ན། །ཞེས་བྱ་བའི་ཚིགས་བཅད་གཉིས་བསྟན་པ་དེའི་དབང་དུ་བྱས་པའོ། །དེ་ལྟར་ཞེས་བྱ་བ་ནི་སློང་བ་རྣམས་ཀྱིས་འདི་ལྟའི་གནས་སྐབས་ཞེས་གང་བཤད་པའི་ཚིགས་བཅད་དེས་བསྟན་ཏོ། །དཔག་ཚད་བརྒྱ་ནི་ཁོར་ཡུག་ཏུ། །ཞེས་བྱ་བ་ནི་རིང་དུ་བསྟན་པའོ། །བྲག་རི་རྣམས་ཀྱིས་བར་བཅད་ཀྱང། །ཞེས་བྱ་བ་ནི་སྒྲིབ་གཡོགས་བསྟན་ཏོ། །དེ་གཉི་ག་མཐོང་བ་ནི་ལྷའི་མིག་གི་མཚན་ཉིད་ཡིན་ནོ། །བྲག་རི་རྣམས་ཀྱིས་བར་བཅད་ཀྱང༌། །ཞེས་བྱ་བས་ནི་བར་དུ་གཅོད་པ་གཞན་བསྟན་པ་ཡང་རབ་ཏུ་འགྲུབ་བོ། །ཡ་མཚན་ཆེ་ཞིང་སེམས་རབ་ཏུ་དགའ་བར་འགྱུར་
བའི་མིག་གིས་ཞེས་བྱ་བ་ལ། ཡ་མཚན་ཆེ་བ་ནི་མིག་ཉམས་པ་ལས་ཡང་བསྐྱེད་པའོ། །སེམས་རབ་ཏུ་དགའ་བར་གྱུར་པས་ནི་དེས་ན་མགོན་དང་བཅས་པར་བྱས་པས་སོ། །རབ་ཏུ་སྦྱིན་པའི་བསོད་ནམས་ལས་གྱུར་པའི། །ཞེས་བྱ་བ་ལ་སོགས་པའི་ཚིགས་བཅད་གསུམ་གྱིས་ནི་སྦྱིན་པ་རབ་ཏུ་བསྒྲུབས་པར་བསྟན་པའི་ཕྱིར་རོ། །ཤི་བི་པ་རྣམས་དེ་ལྟར་རིག་བྱས་ཞེས་བྱ་བའི་ཚིགས་སུ་བཅད་པ་འདིས་ནི་ཡང་དག་པར་འཛིན་དུ་གཞུག་པའོ། །འཇིག་རྟེན་ཕན་ཕྱིར་སྦྱིན་པ་གང་བྱིན་པ། །ཞེས་བྱ་བའི་ཚིགས་བཅད་དེ་འདིས་ནི་ཤི་བི་པ་རྣམས་དེ་ལྟར་རིག་བྱས་ནས་ཞེས་བྱ་བའི་ཚིག་དེ་ཉིད་སྒྲུབ་པ་སྟེ། ཕྱི་རོལ་གྱི་ནོར་གྱི་སྦྱིན་པ་གྱིས་ཤིག་ཅེས་བྱ་བར་བཤད་པར་བྱའོ། །ལྷའི་མཐུ་ལྡན་ཞེས་བྱ་བ་ནི་ལྷའི་མཐུ་བཞིན་དུ་གང་གིས་ནུས་པས་མིག་གཉིས་ཀྱིས་མཐོང་བ་དེ་ནི་མིག་གིས་མཐོང་བས་དེ་ལྷའི་མཐུའོ། །རབ་ཏུ་སྦྱིན་པའི་བསོད་ནམས་ལས་གྱུར་པ། །ཞེས་བྱ་བ་ནི་མིག་རབ་ཏུ་སྦྱིན་པའི་བསོད་ནམས་ལས་གྱུར་པ་སྟེ། ལྷའི་མཐུ་ལྡན་ཞེས་བསྟན་པ་དེའོ། །ལྷའི་མཐུ་ལྡན་ཞེས་བྱ་བ་དེ་ཉིད་བསྟན་པའི་ཕྱིར། །དཔག་ཚད་བརྒྱ་ནི་ཚུན་ཆད་དུ། །ཞེས་བྱ་བའི་ཚིགས་སུ་བཅད་པ་ཡིན་ནོ། །ཤིན་ཏུ་རིང་ན་གནས་པ་ཡང༌། །བལྟ་བར་བྱ་བ་གསལ་བར་མཐོང། །ཞེས་བྱ་བ་ནི་ཉེ་བར་གནས་པ་བཞིན་དུ་རྣམ་པར་གསལ་བ་ཡིན་པའི་ཕྱིར་ཉེ་བར་གནས་པ་བཞིན་དུ་གསལ་བར་མཐོང་བའོ། །བལྟ་བར་བྱ་བ་ཞེས་བྱ་བ་ནི་ཕྱོགས་ཀུན་ཏུ་སྟེ། འོག་དང་སྟེང་དུ་ཡང་མངོན་སུམ་དུ་དམིགས་སོ། །སྦྱིན་པའི་མཐོང་བའི་ཆོས་ཀྱི་འབྲས་བུ་བསྟན་པ་དང༌། ཕ་རོལ་ཏུ་མངོན་པར་མཐོ་བ་རབ་ཏུ་བསྒྲུབ་པའི་ཕྱིར། གང་ཕྱིར་མི་ཡི་མིག་ནི་ཞེས་བྱ་བའི་ཚིགས་བཅད་བསྟན་ཏེ། གཞན་དག་ལ་བརྩེ་བ་ནི་གཞན་དག་ལ་སྙིང་བརྩེ་བ་སྟེ་སྙིང་རྗེ་ཞེས་བྱ་བའི་དོན་ཏོ། །འདིས་ནི་བཟོད་པ་བསྟན་ཏ། །གཞན་ལ་བརྩེ་བ་དང་དུལ་བའི་ཚུལ་ནི་གཞན་ལ་བརྩེ་ཞིང་དུལ་བའོ། །དེ་ལས་སྐྱེས་པ་ནི་གཞན་ལ་བརྩེ་ཞིང་དུལ་བ་ལས་བྱུང་བའོ། །དེ་བས་ན་མངོན་པར་མཐོ་བ་སྦྱིན་པའི་འབྲས་བུ་སྟེ་ལོངས་སྤྱོད་ཕུན་སུམ་ཚོགས་པའོ། །ཚུལ་ཁྲིམས་ཀྱི་འབྲས་བུ་ནི་གོམས་པའི་དངོས་པོ་ཕུན་སུམ་ཚོགས་པའོ། བཟོད་
པའི་འབྲས་བུ་ནི་འཁོར་ཕུན་སུམ་ཚོགས་པའོ། །མངོན་པར་མཐོ་བའི་ཐབས་ཀྱང་རྣམ་པ་གསུམ་སྟེ། གང་ཕྱིར་མི་ཡི་མིག་ནི་ཞེས་བྱ་བའི་ཚིགས་བཅད་ཕྱེད་པ་བསྒྲུབ་པའི་ཕྱིར། སྦྱིན་དང་སྤྱད་པས་ནོར་རྣམས་དོན་ཡོད་བྱོས། །ཞེས་བྱ་བ་གཉིས་ཀ་བཟུང་བ་ཡིན་ནོ། །གསུམ་པ་ནི་མ་བྱིན་ཞིང་གཞག་པ་དེ་བཟློག་པ་ཡིན་ཏེ། འཇིག་རྟེན་འདི་དང་གཞན་ལ་བདེ་བ་འབྱུང་བའི་ལམ་ཞེས་བྱ་བ་འཇིག་རྟེན་འདིར་ནི་གྲགས་པ་གཙོ་བོ་ཡིན་པས་འཇིག་རྟེན་འདིར་བདེ་བ་འབྱུང་བའོ། །ལམ་ནི་གང་གི་ཕྱིར་ལོངས་སྤྱོད་དོ། །དེ་བས་ན་དོན་ཡོད་བྱོས་ཞེས་བྱ་བ་ཡིན་ཏེ། སྦྱིན་དང་སྤྱད་པས་ནོར་རྣམས་དོན་ཡོད་ཞེས་བྱ་བའོ། །འདིར་དོན་གཉིས་པོ་དེ་རབ་ཏུ་བསྒྲུབ་པ་དང་སྐྱོན་བསྟན་པའི་ཕྱིར་བཤད་པ་སྟེ། མངོན་པར་འདོད་པ་ནི་ཁྱད་པར་དུ་འཕགས་པའི་གཏེར་བསྟན་པའི་ཕྱིར་དང༌། ངེས་པར་ལེགས་པའི་ལམ་ཉེ་བར་བསྟན་པའི་ཕྱིར། འཇིག་རྟེན་ཕན་ཕྱིར་ཞེས་བྱ་བའི་ཚིགས་བཅད་བརྩམས་པ་ཡིན་ནོ། །སྙིང་པོ་མེད་པའི་ཞེས་བྱ་བ་ནི་སྙིང་པོ་མེད་པས་མི་གཅེས་པ་ནི་སྙིང་པོ་མེད་པའོ། །དེའི་སྙིང་པོ་ནི་གང་བྱིན་པའི་སྙིང་པོ་ཡོད་པ་སྟེ། བྱིན་པ་གང་ཡིན་པ་སྟེ་གང་བཏང་བ་དང་སྙིང་པོའོ། །འཇིག་རྟེན་ཕན་ཕྱིར་ཞེས་བྱ་བ་ནི་སངས་རྒྱས་ཉིད་དུ་མངོན་པར་འདོད་པ་སྟེ། འདིས་ནི་ཁྱད་པར་དུ་ངེས་པར་ལེགས་པའི་ལམ་བསྟན་ཏོ། །ཇི་ལྟར་སྦྱིན་པ་སྦྱིན་པར་བྱ་བ་ཡིན་ཞེ་ན། སྨྲས་པ། སྦྱིན་པ་བྱིན་ན་གཏེར་དང་འདྲ་བར་འགྱུར། །ཞེས་བྱ་བ་སྟེ། མངོན་པར་འདོད་པ་གང་ཡིན་པ་དེ་ཁྱད་པར་དུ་གྱུར་པའི་གཏེར་ཡིན་པས་བཏང་བ་བྱས་ན་ནི་འཁོར་བའི་སྐྱེ་བ་གཞན་དག་ཏུ་ཉེ་བར་ལོངས་སྤྱོད་པར་འགྱུར་ཏེ། དེ་ལ་སྦྱིན་པ་བྱིན་ན་ཞེས་བྱ་བའི་དོན་ཏོ། །ཤིན་ཏུ་ཆུད་ཟོས་འགྱུར་ཞེས་བྱ་བ་ནི་གཏེར་རྣམ་པར་ཉམས་པ་སྟེ། གཅིག་ཏུ་ཆུད་ཟོས་པ་གང་ཡིན་པ་དེ་ནི་ཤིན་ཏུ་ཆུད་ཟོས་འགྱུར་ཞེས་བྱའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཡུལ་ཤི་བི་པའི་སྐྱེས་པའི་རབས་སོ།། །།སེམས་རབ་ཏུ་དང་བ་ལས་བྱུང་བ་ཞེས་བྱ་བ་ནི་སེམས་དམ་པ་དང་ཁྱད་པར་དུ་གྱུར་པ་
ལས་བྱུང་བའོ། །ཆུང་ཞེས་བྱ་བ་ནི་སྦྱིན་པའི་དངོས་པོ་ཆུང་ཞེས་བྱ་བ་མེད་ཅེས་བྱ་བའི་དོན་ཏོ། །རབ་ཏུ་བྱེད་པ་ནི་ཇི་ལྟ་བ་བཞིན་དུ་ཡོད་པའི་རྒྱལ་པོའི་ཡོན་ཏན་ནོ། །གྱུར་ཞེས་བྱ་བ་ནི་བདག་ཉིད་ཕུན་སུམ་ཚོགས་པ་ཡིན་ཏེ། འདིས་ནི་ཡོན་ཏན་དང་ལྡན་པར་བསྟན་ཏོ། །སྐལ་བ་ཕུན་སུམ་ཚོགས་པ་ཉིད་ཡོན་ཏན་ཡིན་པས་སྐལ་བ་ཕུན་སུམ་ཚོགས་པའི་ཡོན་ཏན་ནོ། །དེ་ཉིད་བཟང་པོ་སྟེ་བལྟ་ན་སྡུག་པར་གྱུར་པས་སོ། །ཟླ་བ་ལྟ་བུ་ནི་རྒྱལ་པོ་ཡིན་ལ། འོད་ལྟ་བུ་ནི་དེའི་ཡོན་ཏན་ནོ། །སྟོན་ཀ་ལྟ་བུ་ནི་སྐལ་བ་ཕུན་སུམ་ཚོགས་པའོ། །ཁྲོས་པའི་རྗེས་སུ་འབྲངས་པའི་དཔལ་དེ་ལ་གནས་ཏེ། གང་ལས་ཤེ་ན། འདི་ལྟར་དེའི་དགྲ་དྲེགས་པ་རྣམས་ཀྱང་བཏང་ཞེས་པས་སོ། །བྱམས་པའི་རྗེས་སུ་འབྲང་བའི་དཔལ་དུ་ཡང་འགྱུར་ཏེ། གང་ལས་ཤེ་ན། དེ་ལ་བརྟེན་པ་རྣམས་ལ་ཆགས་ཞེས་བྱ་བ་ཡིན་ཏེ། སྤྲོ་བ་ཕུན་སུམ་ཚོགས་པ་དང་ལྡན་ཞེས་བྱ་བའི་དོན་ཏོ། །དེའི་དགྲ་དྲེགས་པ་རྣམས་ཀྱང་བཏང་བས་དཔལ་ཞེས་བཤད་པ་དེ་ནི་བྱང་ཆུབ་སེམས་དཔའ་ལ་ཉེས་པ་དང་བཅས་ཏེ་མི་མཐུན་པ་ཡིན་པས་སྙིང་རྗེའི་ཡོན་ཏན་དང་འགལ་བར་སྣང་ངོ་ཞེ་ན། དེའི་ལན་བསྟན་པའི་ཕྱིར། དེ་ནི་ཆོས་ཀྱི་བདག་ཉིད་གྱུར་པས་ན་ཞེས་བྱ་བའི་ཚིགས་བཅད་བརྩམས་པ་ཡིན་ཏེ། གཞན་གྱི་གནོད་པ་ནི་གཞན་ལ་གནོད་པའོ། །དེས་གདུག་པ་ནི་གཞན་ལ་གནོད་པའི་གདུག་པའི་སེམས་སུ་མ་གྱུར་པའོ། །གལ་ཏེ་གཞན་ལ་གནོད་ཅིང་གདུག་པའི་སེམས་སུ་གྱུར་ན་ནི་སྙིང་རྗེའི་ཡོན་ཏན་དང་འགལ་བའི་སྐྱོན་དུ་འགྱུར་གྱི་དེ་མེད་པས་སོ། །ཅིའི་ཕྱིར་ཞེ་ན། དེ་སྨྲས་པ། ཆོས་ཀྱི་བདག་ཉིད་དུ་གྱུར་པ་ཞེས་པས་སོ། །དེ་ལྟ་ན་ནི་ཇི་ལྟར་དེའི་དགྲ་མཚོན་ཆ་བཏང་ཞེ་ན་དེ་བསྒྲུབ་པའི་ཕྱིར། འབངས་ཀྱང་དེ་ལ་གློ་བ་ཉེ་བར་གྱུར། །ཞེས་བྱ་བ་ཡིན་ཏེ། གློ་བ་ཉེ་བ་ནི་དེའི་འབངས་རྗེ་ལ་སྙིང་ཉེ་བ་དེས་དཔལ་མངོན་པར་སྦྱོར་བར་བྱེད་དེ། བྱང་ཆུབ་སེམས་དཔའ་མ་ཡིན་པའོ། །དེ་བདག་གི་ཚེ་སྔ་མ་འདས་པ་ཞེས་བྱ་བ་ལ། འདས་པ་ཞེས་སྨོས་པས་ནི། སྔ་མའི་ཁྱད་པར་བསྟན་པའི་ཕྱིར་རོ། །བདག་གི་
ཞེས་སྨོས་པས་ནི། ཚེ་རྗེས་སུ་དྲན་པའི་ཁྱད་པར་བསྟན་པའི་ཕྱིར་ཏེ། གཞན་གྱི་སྐྱེ་བ་དྲན་པ་དགག་པའོ། །རབ་ཏུ་སྐྱོ་བར་གྱུར་ནས། ཞེས་བྱ་བ་ནི། འཁོར་བའི་གནས་སྐབས་རྟོགས་ཤིང་ཚེ་སྔ་མ་ལ་དབུལ་བ་དེ་རྗེས་སུ་དྲན་པའི་རྒྱུས་ས། །སྦྱིན་པ་ཁྱད་པར་ཅན་ཞེས་བྱ་བ་ལ་ཅིའི་ཕྱིར་ཁྱད་པར་ཅན་ཡིན་ཞེ་ན། ཚེ་རབས་སྔ་མ་ལ་སྦྱིན་པ་དང༌། ཚུལ་ཁྲིམས་ལ་སོགས་པ་ཡང་དག་པར་བླང་བ་དང༌། བདག་གི་སྐྱེ་བ་རྗེས་སུ་དྲན་པའི་རྒྱུས་སྦྱིན་པ་ལ་སོགས་པའི་ཡོན་ཏན་དང་ལྡན་པ་སྟེ། ཅིའི་ཕྱིར་འབྲས་བུ་དང་འབྲེལ་ཅེ་ན་མངོན་སུམ་དུ་གྱུར་པས་སོ། །དེ་ལ་དགེ་སྦྱོང་དང༌། བྲམ་ཟེ་དང༌། ཕོངས་པ་དང༌། སློང་བ་ཉིད་སྨོས་པ་ནི་ཡོན་ཏན་འབྱུང་བའི་ཞིང་གི་དབྱེ་བ་བསྟན་པའི་ཕྱིར་ཏེ། དགེ་སྦྱོང་དང་བྲམ་ཟེ་ནི་འཇིག་རྟེན་པ་རྣམས་ཀྱི་ཡོན་ཏན་གྱི་ཞིང་དུ་ཡང་དག་པར་འདོད་པའི་ཕྱིར་རོ། །དོན་དམ་པ་དང་ཀུན་རྫོབ་གཉིས་སོ། །ཕོངས་པ་དང་སློང་བ་སྨོས་པས་ནི་རང་གི་འཚོ་བས་འཇིགས་པ་དང༌། སློང་བ་དེ་ཉིད་ཀྱི་འཚོ་བའི་དབྱེ་བས་སྙིང་རྗེའི་ཞིང་གི་དབྱེ་བ་བསྟན་པའོ། །བདེ་བའི་རྒྱུ་དང་གཞིར་གྱུར་པ་ཞེས་བྱ་བ་ནི་སྦྱིན་པ་པོ་དང་བྱང་ཆུབ་སེམས་དཔའོ། །བདེ་བའི་རྒྱུ་ཞེས་བྱ་བ་ལ་བདེ་བ་ནི་ལུས་དང་སེམས་ཀྱིས་མྱོང་བ་གང་ཡིན་པའོ། །དེའི་རྒྱུ་ནི་ལོངས་སྤྱོད་དོ། །དེའི་གཞིར་གྱུར་པ་ནི་སྦྱིན་པར་བྱ་བ་ཡིན་ཏེ། སྦྱིན་པའི་དངོས་པོ་དམ་པའོ། །འདིས་ནི་སྦྱིན་པའི་དངོས་པོ་ཕུན་སུམ་ཚོགས་པ་བསྟན་ཏེ། སྦྱིན་པ་ཐམས་ཅད་བྱིན་པར་སྟོན་ཏོ། །དེ་དག་གིས་ནི་གང་དག་ལ་སྦྱིན་པ་དང་གང་གི་ཕྱིར་སྦྱིན་པ་དེ་བསྟན་པ་ཡིན་ནོ། །བདེ་བའི་རྒྱུ་དང་གཞིར་གྱུར་པ་ཞེས་བྱ་བ་ལ། ཚུལ་ཁྲིམས་དང་གསོ་སྦྱོང་ནི་བདེ་བའི་རྒྱུ་སྟེ། ཚུལ་ཁྲིམས་ཀྱི་འབྲས་བུ་མངོན་པར་མཐོ་བ་ཕུན་སུམ་ཚོགས་པའོ། །དེའི་གཞིར་གྱུར་པ་ནི་ཚུལ་ཁྲིམས་ངན་པ་མ་ཡིན་པ་དེ་དག་གོ །ཡང་གང་སྲོག་གཅོད་པ་ལ་སོགས་པ་ལས་ལྡོག་པའི་མཚན་ཉིད་དོ། །མུ་སྟེགས་ལ་སོགས་པ་གཞན་དག་ནི་རང་གི་བཏགས་པའི་ཚུལ་ཁྲིམས་ཞེས་བྱ་བའི་དོན་ཏོ། །འདིས་ནི་བསླབ་པའི་གཞི་ལྡ་འཛིན་པར་བསྟན་
ཏོ། །གསོ་སྦྱོང་དང་ངེས་པར་གནས་པ་དག་ཀྱང་ཡང་དག་པར་ལེན་ཏེ། གསོ་སྦྱོང་ངན་པ་མ་ཡིན་པ་ནི་ཡན་ལག་བརྒྱད་པ་སྟེ། བདེ་བའི་རྒྱུ་དང་གཞིར་གྱུར་པ་ཞེས་བྱ་བ་དང་སྦྱར་རོ། །བསོད་ནམས་ཀྱི་མཐུ་བསྒྲགས་པ་ཞེས་བྱ་བ་ལ། བསོད་ནམས་ནི་དགེ་བ་དང་ཆོས་སོ། །དེའི་མཐུ་ནི་འབྲས་བུ་ཆེན་པོར་གྱུར་པ་ཡིན་པས་དེ་བསྒྲགས་པས་ཏེ། བསོད་ནམས་ཀྱི་མཐུ་བསྒྲགས་པའི་རྒྱུས་སོ། །ལེགས་པར་དགོད་པར་འདོད་པས་དང་བའི་སེམས་ཀྱིས་ཞེས་བྱ་བ་ནི་བསོད་ནམས་ཀྱི་འབྲས་བུ་མངོན་སུམ་དུ་བསྟན་པས་སོ། །དོན་ངེས་པ་ཞེས་བྱ་བ་ནི་མི་འགྱུར་བ་ཉིད་ཀྱི་དོན་ཏོ། །བདེ་བར་གཤེགས་ལ་བཀུར་སྟི་ཞེས་བྱ་བ་ལ། མཛེས་པར་གཤེགས་པས་ན་བདེ་བར་གཤེགས་པ་སྟེ། འདིའི་ལམ་དུ་ཞུགས་པ་ཞེས་བྱ་བའི་དོན་ཏོ། །དེ་ལ་བཀུར་སྟི་ནི་སྦྱིན་པ་དང༌། ཉེ་བར་འགྲོ་བ་དང་རིམ་གྲོ་ལ་སོགས་པའི་མཚན་ཉིད་དོ། །མེད་ཅེས་ཐོས་ཞེས་བྱ་བའི་སྒྲ་ནི་མཐོང་བར་འགྱུར་བ་མེད་བ་སྟེ། གང་ཐོས་པ་ཞེས་བྱ་བའི་དོན་ཏོ། །སྔོན་ཞེས་བྱ་བ་ནི་སྐྱེ་བ་གཞན་དག་ཏུའོ། །ཟན་དྲོན་ཁེངས་པ་ཞེས་བྱ་བ་ལ་སོགས་པའི་བསྡུས་པའི་དོན་ནི་དངོས་པོ་དང༌། ཚད་དང༌། ལེགས་པར་མ་སྦྱར་བ་སྟེ། སྦྱིན་པའི་དངོས་པོ་ཤིན་ཏུ་ཞན་པ་ཡིན་པས་དེ་སྐད་བསྟན་ཏོ། །ལན་ཚྭ་མེད་པ་ཞེས་བྱ་བ་འདིས་ནི་རོ་དམན་པའོ། །ཁེངས་པ་ཞེས་བྱ་བ་ནི་ཚོད་མ་མེད་པ་སྟེ། འདིས་ནི་རེག་བྱ་ཞེན་པའོ། །རྩུབ་པ་ཞེས་བྱ་བ་ནི་སྣུམ་མེད་པའོ། །འདིས་ནི་དྲི་དམན་པའོ། །འདི་དག་གིས་ནི་ལེགས་པར་མ་སྦྱར་བ་བསྟན་བ་ཡིན་ནོ། །དེ་དག་ཉེ་བར་བླངས་པའི་ཚུལ་ཡིན་ཏེ། དེས་ན་དེའི་ཕུན་སུམ་ཚོགས་པ་མེད་པར་གྱུར་པའོ། །ཟན་དྲོན་ཞེས་སྨོས་པས་ནི་དངོས་པོ་སྟེ་ངན་པའོ། །ཆང་གཅིག་ཞེས་པས་ནི་ཆུང་བ་སྟེ་ཚད་དོ། །དེ་གཉིས་ཀྱིས་ནི་ཕུན་སུམ་ཚོགས་པ་དང་བྲལ་བར་ཡང་སྟོན་ཏོ། །འབྲས་བུ་འབྱོར་པ་ཆེན་པོ་ཞེས་བྱ་བ་ནི་ཁ་དོག་ལ་སོགས་པ་ཕུན་སུམ་ཚོགས་པའི་དངོས་པོ་སྟེ། གཟུགས་བཟང་བར་གྱུར་པ་དང༌། གྲགས་པ་དང་ལྡན་པ་དང༌། དགའ་བར་གྱུར་པ་དང༌། གཞོན་ཤ་ཆགས་པ་དང༌། བདེ་བའི་རེག་པ་དང་
ལྡན་པའོ། །དེ་ལྟར་སྦྱིན་པའི་དངོས་པོ་ནི་ཁ་དོག་ལ་སོགས་པ་མེད་ཀྱང་བདེ་བར་གཤེགས་པ་ལ་བཀུར་སྟི་བྱས་པས་ནི་འབྲས་བུ་ཕུན་སུམ་ཚོགས་པ་བཤད་པ་ཡིན་ནོ། །ཡང་ན་མཐོ་རིས་ཀྱི་འབྲས་བུ་ཕུན་སུམ་ཚོགས་པའོ། །ཕྱི་རོལ་གྱི་དངོས་པོའི་འབྲས་བུ་ཕུན་སུམ་ཚོགས་པ་དང༌། ནང་གི་འབྲས་བུ་ཕུན་སུམ་ཚོགས་པ་སྟེ། དེ་ལས་ནང་གི་ཕུན་སུམ་ཚོགས་པའི་དངོས་པོའི་དབང་དུ་བྱས་ནས་སྦྱིན་པའི་དངོས་པོ་ཁ་དོག་ལ་སོགས་པ་མེད་ཀྱང་གཟུགས་མཛེས་པར་འགྱུར་བ་དང༌། དྲི་དང་བྲལ་བ་ཡིན་ཡང་གྲགས་པ་ཆེ་བ་དང༌། རེག་བྱ་ཕུན་སུམ་ཚོགས་པ་མེད་ཀྱང་བདེ་བའི་རེག་པ་དང་ལྡན་པ་སྟེ། འདི་ནི་ནང་གི་ཕུན་སུམ་ཚོགས་པའོ། །ཡང་ན་ནང་གི་ནི་ཟླ་མེད་པ་ཡིན་པས་དེ་ནི་ཐམས་ཅད་ཀྱི་མངོན་སུམ་དུ་གྱུར་པས་བརྗོད་པར་བྱ་བ་མ་ཡིན་ནོ། །ད་ནི་ཕྱི་རོལ་གྱི་དངོས་པོ་ཕུན་སུམ་ཚོགས་པའི་དབང་དུ་བྱས་ནས། ཤིང་རྟ་སྣ་ཚོགས་རྟ་དང་ཞེས་བྱ་བ་ལ་སོགས་པ་སྨོས་ཏེ། ཤིང་རྟ་དང༌། རྟ་དང་གླང་པོ་ཆེ་སྨོས་པས་ནི་ནུས་པ་ཕུན་སུམ་ཚོགས་པ་བསྟན་ཏོ། །ས་ཆེན་འདི་ནི་ཞེས་བྱ་བ་འདིས་ཡུལ་མི་དང༌། མཁར་དང༌། གྲོགས་པོ་དང༌། མཛའ་བཤེས་ལ་སོགས་པ་གཟུང་ངོ། །ནོར་མང་ཞེས་བྱ་བ་འདིས་ནི་མཛོད་ཕུན་སུམ་ཚོགས་པའོ། །དཔལ་ཡང་རྗེས་ཆགས་བཙུན་མོ་རྒྱ་ཆེན་ལྡན་ཞེས་བྱ་བ་འདིས་ནི་ལོངས་སྤྱོད་ཕུན་སུམ་ཚོགས་པའོ། །ལོང་སྤྱོད་པའི་དངོས་པོ་ཡང་རྣམ་པ་གཉིས་ཏེ། རྫས་ལ་ཉེ་བར་ལོངས་སྤྱོད་པའི་དངོས་པོ་དང༌། འཁྲིག་པ་ལ་ཉེ་བར་ལོངས་སྤྱོད་པའི་དངོས་པོར་བཤད་དེ། དེ་གཉིས་ཀྱང་གོ་རིམས་ཇི་ལྟ་བ་བཞིན་དུ་རང་བཞིན་གྱིས་ཕུན་སུམ་ཚོགས་པ་དང༌། ཉེ་བར་ལོངས་སྤྱོད་པའི་ཕུན་སུམ་ཚོགས་པའོ། །འབྲས་བུ་གྲུབ་པ་བཟང་པོ་ཞེས་བྱ་བ་ནི་འབྲས་བུ་ཕུན་སུམ་ཚོགས་པ་སྟེ། བཟང་པོ་ནི་མཛེས་པའོ། །ཟན་དྲོན་ཆང་གཅིག་ཅེས་བྱ་བ་ནི་སྔར་བཤད་པས་མཚོན་པར་བྱའོ། །བློན་པོ་ཆེན་པོ་ཞེས་བྱ་བ་ལ་སོགས་པ་ཉིད་སྨོས་པ་ནི་ཐག་ཉེ་བ་ན་སྤྱོད་པ་དང༌། རིགས་མཐོ་བ་ཕུན་སུམ་ཚོགས་པ་དང༌། གློ་བ་ཉེ་ཞིང་ཞུ་བར་ནུས་པའོ། །སྨྲ་བའི་སྤོབས་པ་ནི་སྨྲ་བར་ནུས་པའོ། །
ཐོགས་པ་མེད་པ་ནི་སྨྲ་བ་ཐོགས་པ་གང་ཡང་མེད་པ་གང་ལ་ཡོད་པའོ། །དེ་སྨྲ་བ་ནི་ཐོགས་པ་མེད་པས། གཏམ་གླེང་བའི་སྐབས་ནི་གཏམ་གླེང་བའི་དུས་སྐབས་ཏེ། དེ་བབ་པ་ནི་དེ་ཉིད་ལ་བབ་པའོ། །ངེས་པར་ནི་དུས་རྟག་ཏུའོ། །གསུང་བ་ནི་ཞེས་བྱ་བའི་དོན་ནི་གང་བཤད་པའི་ཚིགས་བཅད་དོ། །དེ་སྐད་ཅེས་བྱ་བ་འདི་ཚིགས་བཅད་གཉིས་སོ། །ངོ་མཚར་ཆེ་བ་དང༌། རབ་ཏུ་གཡེང་བ་ནི་ངོ་མཚར་ཆེ་བས་རབ་ཏུ་གཡེངས་པའོ། །དེའི་དོན་ཐོས་པ་མངོན་པར་འདོད་པས་རབ་ཏུ་གཡེངས་པའམ། དེའི་དོན་ཡོངས་སུ་ཤེས་པར་འདོད་པས་སོ། །སྐྱེ་བོ་ནི་བློན་པོ་ལ་སོགས་པའི་མཚོན་པའོ། །ཡང་ན་བདག་ཉིད་ལ་སྟོན་ཅིག་པ་སྟེ། གཞན་ལ་བསྟན་དུ་མི་རུང་བར་མངོན་པར་འདོད་པའི་དོན་འདྲི་བ་སྟེ། དེ་བས་ན་གསལ་བར་དྲིས་པའོ། །མི་བསྒྲག་ཅེས་བྱ་བ་ནི་དོགས་པ་བསུ་ནས་སྨྲས་པ་སྟེ། གསང་ན་ཞེས་བྱ་བ་འདིའི་དོན་ཡིན་ནོ། །གསང་བ་ནི་གསལ་བར་མི་བསྒྲག་པའོ། །གྲགས་པ་ཞེས་བྱ་བ་ནི་གསལ་བར་བདག་གིས་དྲིས་པའོ། །དེ་དགའ་ཞིང་རབ་ཏུ་བྱམས་པས་ཞེས་བྱ་བ་ནི་ལྷག་པར་དགའ་ཞིང་བྱམས་པ་ཉིད་དེ། སྔ་མ་བས་ཀྱང་ད་ལྟར་རབ་ཏུ་བྱམས་པ་སྟེ། བྱམས་པ་ནི་མངོན་པར་འདོད་པ་ཡང་དག་པར་བསྒྲུབས་པས་སོ། །བྱམས་པའི་ལྟབས་བཞིན་གསལ་ཞིང་དགའ་བའི་མཚན་མས་ཕྱོགས་གཅིག་ཏུ་ཟུང་གྱིས་ལྟ་ཞིང་དང་བའི་ལྟ་བས་ཏེ་དགའ་བའི་མཚན་མ་དག་གིས་སོ། །དོན་དང་རྒྱུ་མཚན་མ་ཕྱེ་བར་ཞེས་བྱ་བ་ལ་རྒྱུ་མཚན་དང་དོན་ནི་དོན་དང་རྒྱུ་མཚན་ནོ། །གང་གི་དོན་དང་རྒྱུ་མཚན་མ་ཕྱེ་བར་སྨྲས་པ་དེ་ནི་དོན་དང་རྒྱུ་མཚན་མ་ཕྱེ་བར་རོ། །རྒྱུ་མཚན་ཅི་ཞིག་བསྟན་པ་དང༌། འདིའི་དོན་ཅི་སྟོན་པ་སྟེ། དེ་ལྟར་མ་ཕྱེ་བར་སྨྲས་པའོ། །ངོ་མཚར་ཆེ་བ་དང་ཡིད་གཡོས་པ་ནི་སྔར་བསྟན་པ་གང་ཡིན་པ་སྟེ། ངོ་མཚར་ཆེ་བས་རབ་ཏུ་གཡེངས་བར་གྱུར་ཞེས་བྱ་བར་བསྟན་པ་ཡིན་ནོ། །ངོ་མཚར་ཆེན་པོས་རབ་ཏུ་གཡོས་པར་གྱུར་པ་ནི་བསྐྱོད་པ་སྟེ། ངོ་མཚར་ཆེན་པོས་རབ་ཏུ་གཡོས་པར་གྱུར་པ་ཉིད་རབ་ཏུ་གཡེངས་པ་ཡིན་ནོ། །ཡིད་ནི་སེམས་ཏེ་ངོ་མཚར་ཆེན་པོས་རབ་ཏུ་གཡོས་པའི་ཡིད་དོ། །གང་གི་ཕྱིར་ཞེས་བྱ་བ་ནི་གང་གི་རྒྱུའམ་གང་གི་མཚན་མའོ། །ཞིག་ཏུ་ཞེས་བྱ་བ་ནི་སྐྱེས་པའོ། །འདིར་ཞེས་བྱ་བ་ནི་འདི་ཉིད་དུའོ། །
ནོར་ཙམ་གྱིས་ནི་མཐོ་བ་ལ། །ཞེས་བྱ་བ་ནི་ཚུལ་ཁྲིམས་ལ་སོགས་པའི་ཡོན་ཏན་ནི་མ་ཚང་བ་ཞེས་བྱ་བའི་དོན་ཏེ། ལས་དག་གིས་མགུ་བ་ནི་ལས་ཀྱིས་མགུ་བ་སྟེ། དེས་སྒྲུབ་པ་ནི་བྱས་པའོ། །དམན་ཚིས་ཀྱིས་འཚོ་བ་གང་ཡིན་བདེ་ནི་ལས་ཀྱིས་མགུ་བར་བྱས་ནས་དམན་ཚིས་ཀྱིས་འཚོ་བ་སྟེ། ལུས་ངག་གི་འཚོ་ཞིང་སྤྱད་པར་བྱེད་པ་ནི་འཚོ་བའོ། །དེའི་འབྱོར་པ་དམན་ཞིང༌། ཞུས་པ་སྐྱེད་པར་བྱད་པ་ཡིན་པས་དམན་ཚིས་སོ། །གླ་འདིས་སྲོག་བཟུང་བ་ཡིན་པས་གླ་མི་སྟེ། གཞན་དག་གིས་ལས་བྱེད་པས་ན་སེམས་ཀྱིས་བསམས་ཤིང་དེ་ལ་ཞུགས་ཏེ་ཞེས་བྱ་བ་ནི་ཞུགས་པར་གྱུར་པའོ། །མཚན་ཉིད་ཇི་ལྟ་བུ་ཞེ་ན། བརྙས་ཤིང་ཞེས་བྱ་བ་ཡིན་ཏེ། གཞན་གྱིས་ཁྱད་དུ་གསད་པའི་གཞིར་གྱུར་པའོ། །ངལ་བ་ནི་རང་གི་ལུས་ཡོངས་སུ་དུབ་པར་གྱུར་པའོ། །དམན་པ་ནི་སེམས་ཞུམ་པའོ། །དེས་བརྙས་ཤིང་ངལ་བ་དམན་པའི་གནས་ནི་བརྙས་ཤིང་ངལ་བ་དམན་པའི་གནས་ཏེ། གནས་དེས་ཡོང་སུ་བརྙས་ཤིང་ངལ་བ་ཡིན་པས་སོ། །ཅིའི་ཕྱིར་དེ་ལྟར་ཉེས་པས་མ་རུང་བ་དེ་ལ་འཇུག་ཅེ་ན། སྨྲས་པ། མི་འཚོར་དོགས་ནས་ཞེས་བྱ་བ་ཡིན་ཏེ། འཚོ་བ་མེད་པས་འཇིགས་པས་སོ། །དབང་པོ་དུལ་ཞིང་ཞེས་བྱ་བ་ནི་དབང་པོ་བསྲུང་ཞིང་བསྡམས་པ་ཡིན་པར་སྟོན་ཏོ། །དགེ་སློང་དཔལ་གྱི་རྗེས་འབྲང་བཞིན། །ཞེས་བྱ་བ་ནི་ཀུན་ཏུ་ལྟ་བ་དང༌། རྣམ་པར་ལྟ་བ་དང༌། སྣམ་སྦྱར་དང༌། ལྷུང་བཟེད་དང༌། ཆོས་གོས་འཆང་བ་ལ་སོགས་པ་ཇི་ལྟར་མདོ་སྡེ་ལས་གསུངས་པ་བཞིན་དུ་རིག་པར་བྱའོ། །བཞི་ཞེས་སྨོས་པས་ནི་དགེ་འདུན་གྱི་ཚོགས་དང་རྗེས་སུ་མཐུན་པར་བསྟན་པའི་ཕྱིར་རོ། །འདིས་ནི་སྣོད་ཕུན་སུམ་ཚོགས་པ་བསྟན་ཏོ། །དང་ཞིང་འཇམ་པ་ཞེས་བྱ་བ་ལ་དན་བ་ནི་དད་པའི་གཞི་སྟེ་འཇམ་པ་ཞེས་བསྟན་པ་ཡིན་ནོ། །སྦྱིན་པ་པོའི་ཕུན་སུམ་ཚོགས་པ་ནི་དང་བ་ཞེས་བྱ་བ་ལ་སོགས་པའི་ཚིག་གིས་སོ། །ཚུལ་ཁྲིམས་ནི་སྔར་བཤད་པ་ཡིན་པས་ཡང་བཤད་པར་བྱ་བ་མ་ཡིན་ཏེ། ཚུལ་དང་ལྡན་ཡང་ནོར་ཙམ་གྱིས་ནི་ཞེས་བྱ་བའི་ཚིག་གིས་སོ། །ཕྱག་བྱས་ནས་ཞེས་བྱ་བ་ནི་བཀུར་སྟི་དང་གུས་པ་དང་བཅས་པའི་སྦྱིན་པའོ། །བསྙེན་
བཀུར་དང་བཅས་པས་བྱིན་པ་ནི་དེ་ཐོབ་པའོ། །ཟན་དྲོན་ཙམ་ཞིག་གུས་པར་བྱིན། །ཞེས་བྱ་བ་འདིས་ནི་སྦྱིན་པ་ཆུང་ཞེས་བྱ་བ་གང་ཡང་མེད་དོ། །ཞེས་གོང་དུ་བསྟན་པ་དེ་སྒྲུབ་པ་ཡིན་ནོ། །བདག་གི་ཁྱིམ་དུ་གུས་པར་ཞེས་བྱ་བ་འདིས་ནི་སྦྱིན་པའི་དངོས་པོ་དག་པར་སྟོན་ཏོ། །དེ་ཡི་མྱུ་གུ་ཙམ་ཞིག་བྱུང༌། །ཞེས་བྱ་བ་དག་གིས་ནི་གུས་པར་བྱས་ཏེ། བསོད་ནམས་བྱས་པས་བསྙེན་བཀུར་ཐོབ་པར་སྟོན་པ་ཡིན་ནོ། །ང་ཡིས་དེ་ལས་བསམས་ནས་ནི། །ཞེས་བྱ་བ་གོང་དུ་བཤད་པ་སྟེ། གང་ཡིན་ཞེ་ན། །རྒྱལ་པོ་ཆེན་པོ་ཅི་ལས་དགོངས། །ཞེས་བྱ་བ་ལ་སོགས་པ་དེ་ཉིད་བཤད་པའོ། །བསོད་ནམས་ཀྱིས་ནི་ངོམས་མི་མྱོང༌། །ཞེས་བྱ་བའི་ཚིགས་བཅད་ཕྱེད་པོ་འདིས་ནི་ལས་ཀྱི་འབྲས་བུ་མངོན་སུམ་དུ་གྱུར་པའི་ཕྱིར་སྦྱིན་པའི་ཞིང་ལ་སྦྱིན་པའི་དངོས་པོ་བྱིན་པས་མི་ངོམས་པར་བསྟན་ཏོ། །དགའ་བ་ནི་ཡིད་ཚིམ་པ་སྟེ། བདག་ཉིད་ཀྱིས་ཀྱང་ལས་ཀྱི་འབྲས་བུ་དེ་དང་མཉམ་པར་མངོན་སུམ་དུ་གྱུར་པའི་ཕྱིར་རོ། །ངོ་མཚར་ཆེ་བ་ནི་སྦྱིན་པའི་དངོས་པོ་ཆུང་བ་ལས་འབྲས་བུ་ཆེན་པོ་སྟོན་པས་སོ། །རབ་ཏུ་གུས་པ་ནི་སླར་ཡང་བསོད་ནམས་ལ་བརྩོན་པས་འཇུག་པར་སྟོན་ཏོ། །བསོད་ནམས་ཀྱིས་ཞེས་བྱ་བ་ནི་དང་ཞིང་འཇམ་པའི་ཡིད་ཀྱིས་ཞེས་བྱ་བ་ལ་སོགས་པ་གང་གོང་དུ་བསྟན་པ་དེའམ། ཡང་ན། །བདེ་བར་གཤེགས་ལ་བཀུར་སྟི་བྱས་པ་ཆུང་དུ་ཡང༌། །ཞེས་བྱ་བའི་ཚིགས་སུ་བཅད་པ་གང་བསྟན་པ་འདི་རུ་བཤད་དོ། །མངོན་པར་མཐོ་བའི་ཁྱད་པར་འདི་ལྟ་བུའི་རྣམ་པར་སྨིན་པ་ཞེས་བྱ་བ་ནི། ཤིང་རྟ་སྣ་ཚོགས་རྟ་དང་གླང་པོ་འགྱིང་བ་དང༌། །ཞེས་བྱ་བའི་ཚིགས་བཅད་གང་བསྟན་པ་དེས་བསྟན་པ་ཡིན་ཏེ། རྣམ་པར་སྨིན་པ་ཉིད་མངོན་པར་མཐོ་བ་ཡིན་པས་རྣམ་པར་སྨིན་པ་མངོན་པར་མཐོ་བའོ། །མངོན་པར་མཐོ་བ་ཉིད་བྱེ་བྲག་ཡིན་པས་ན་མངོན་པར་མཐོ་བའི་ཁྱད་པར་རོ། །བསོད་ནམས་ཀྱི་འབྲས་བུ་མངོན་སུམ་དུ་གྱུར་པས་ཞེས་བྱ་བ་ལ་སོགས་པ་ནི་གང་གོང་དུ་བསྟན་པའི། །བསོད་ནམས་ཀྱིས་ནི་ངོམས་མི་མྱོང༌། །ཞེས་བྱ་བའི་དཔང་དུ་བྱས་པ་ཡིན་ནོ། །དངོས་སྡིག་མི་མཛད་པ་ཞེས་བྱ་བའི་ལྡོག་པའི་ཚུལ་འདིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་ཏོ། །སྐྱེ་
དགུ་རྣམས་ལ་ཕ་བཞིན་དུ། །ཞེས་བྱ་བས་ནི་བཟོད་པའི་ཕ་རོལ་ཏུ་ཕྱིན་པ་བསྟན་ཏེ། ཁོ་ན་མེད་པའི་ཕྱིར་རོ། །བསོད་ནམས་ཀྱི་ཡོན་ཏན་སྒྲུབ་པ་ལ་མངོན་པར་ཕྱོགས་པ་ཞེས་བྱ་བ་འདིས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་ཏོ། །བསོད་ནམས་ཀྱི་ཡིད་ཡོན་ཏན་ཡིན་པས་གཙོ་བོར་ཡང་དག་པར་བཟུང་བས་སོ། །བརྩོན་འགྲུས་ཞེས་བྱ་བ་འདིས་ཀྱང་དགེ་བའི་ཆོས་མ་སྐྱེས་པ་རྣམས་བསྐྱེད་པ་དང༌། སྐྱེས་པ་རྣམས་ཕྱིར་ཞིང་འཕེལ་བར་བྱེད་པའོ། །སྦྱིན་པ་ཕུན་སུམ་ཚོགས་པ་ཞེས་བྱ་བས་ནི་སྦྱིན་པའི་ཕ་རོལ་ཏུ་ཕྱིན་པ་བསྟན་ཏོ། །གྲགས་པ་ཉིད་དཔལ་ཡིན་པས་གྲགས་དང་དཔལ་ལོ། །དེས་ན་གྲགས་པ་དང་དཔལ་ནི། སྦྱིན་པའི་ཕ་རོལ་ཏུ་ཕྱིན་པའི་མཐོང་བའི་ཆོས་ཀྱི་འབྲས་བུའོ། །དེ་བཞིན་དུ་ཆོས་ཀྱིས་ཚུལ་བཞིན་དུ་ཡུན་རིང་ས་ཆེན་སྐྱོང་བར་གྱུར། ཞེས་བྱ་བ་ནི་ཇི་ལྟ་བདེ་བཞིན་དུ་ཡུན་རིང་དུ་སྐྱོང་བར་གྱུར་ཅིག་པའོ། །ལྷ་མོ་དེ་དེ་ལྟར་གལ་ཞིག་མ་ཡིན་ཞེས་བྱ་བ་ནི་གོང་དུ་བསྟན་མ་ཐག་པ་སྟེ། དེ་བས་ན་འདི་ལྟར་ཞེས་བྱ་བ་ལ་སོགས་པའོ། །དེ་ཉིད་ལ་ནི་ཞེས་བྱ་བ་ནི་ལེགས་པའི་ལམ་ལ་སྟེ། ད་དུང་བརྩོན་པས་བསྟན་པར་བྱའོ། །ཅིའི་ཕྱིར་ཞེ་ན། དེའི་འབྲས་བུ་ཉམས་སུ་མྱོང་བ་སྟེ། མངོན་སུམ་དུ་མཐོང་བས་སོ། །དཔལ་ཕུན་སུམ་ཚོགས་པའི་རྒྱུ་ཡིན་པས་དཔལ་ཕུན་སུམ་ཚོགས་པའི་རྒྱུ་དེ་ལ་སེམས་ཞེན་པ་གང་ཡིན་པ་དེ་ནི་དཔལ་ཕུན་སུམ་ཚོགས་པ་ལ་ཞེན་པ་ཞེས་བྱའོ། །ཅིའི་ཕྱིར་རྒྱལ་པོ་ལ་དཔལ་ཕུན་སུམ་ཚོགས་པའི་རྒྱུ་འདི་འདྲ་བར་འགྱུར། ཅི་ཐམས་ཅད་ཉིད་སྐྱེ་བ་དྲན་པར་འགྱུར་རོ་ཞེ་ན། དེ་ནི་མ་ཡིན་པར་བསྟན་པའི་ཕྱིར་དེ་ལྟ་བས་ན་འདྲི་བ་སྟེ། དེ་ནས་ལྷ་མོ་ཞེས་བྱ་བའི་ཚིག་གིས་སོ། །བསོད་ནམས་ཀྱི་ཡོན་ཏན་ཞེས་བྱ་བ་ལ་སོགས་པས་ཀྱང་བསྐྱེད་པའི་གནས་ཡིན་པའི་ཕྱིར་དྲི་བ་ཡིན་ནོ། །གང་གིས་ཐོབ་པའི་མཚན་མ་དེས་ན་ཟན་ཆང་གཅིག་ཅེས་བྱ་བའི་སྐལ་པ་སྒོམ་པའོ། །ཐུབ་པ་ནི་རབ་ཏུ་བྱུང་བ་ལའོ། །གུས་པར་ཕུལ་བ་ཞེས་བྱ་བ་ནི་སྲི་ཞུས་བྱིན་པའོ། །དེ་ཚེ་གཉིད་ཀྱིས་ལོག་ལས་ཞེས་བྱ་བས་ནི་སྔ་མའི་ལུས་ཡང་དག་པར་རྟོགས་པའོ། །འཆི་བའི་སེམས་ལས་
སད་པ་བཞིན། །ཞེས་བྱ་བ་ཡིན་ཏེ། ཉིང་མཚམས་སྦྱོར་བར་གྱུར་པས་སོ། །མགོན་ཁྱོད་ཅེས་བྱ་བ་ནི་གང་གི་མགོན་གང་ཡིན་པ་དེ་ནི་མགོན་པོ་སྟེ། དེར་གྱུར་པ་དེ་ནི་མགོན་ཁྱོད་གྱུར་པའོ། །ས་དང་བཅས་པ་ཞེས་བྱ་བ་ནི་ཇི་ལྟར་སའི་མགོན་དུ་གྱུར་པ་ཞེས་བྱ་བ་ཡིན་ཏེ། དེས་ན་བདག་ཀྱང་ཁྱོད་དང་འདྲ་བར་གྱུར་ཞེས་བྱ་བ་བསྟན་པའི་དོན་ཏོ། །ཇི་ལྟར་ཐུབ་པས་ཞེས་བྱ་བ་ནི་སངས་རྒྱས་བཅོམ་ལྡན་འདས་ཀྱིས་ཏེ། ཇི་ལྟར་བསོད་ནམས་ཀྱི་འབྲས་བུ་བསྟན་པ་བཞིན་དུ་རྒྱལ་པོས་ཀྱང་བསོད་ནམས་ཀྱི་འབྲས་བུ་བསྟན་པ་སྟེ། དེ་བས་ན་བསོད་ནམས་ལ་གུས་པ་བསྐྱེད་པ་ཞེས་བྱ་བ་ནི་བསོད་ནམས་དེ་ཉིད་ཆུང་ངུ་ཡིན་ཡང་རྣམ་པར་སྨིན་པ་ཆེ་བ་ཡིན་པས་བསོད་ནམས་ལ་སེམས་མངོན་པར་དང་བ་སྟེ། བསོད་ནམས་ཀྱི་བྱ་བ་བསྐྱེད་པ་དག་པ་དང༌། སེམས་མངོན་པར་དང་བར་འགྱུར་ཞིང་ལས་ཀྱི་འབྲས་བུ་ལ་ཡིད་ཆེས་པས་སེམས་རྙོག་པ་དང་བྲལ་བ་ཡིན་ཏེ། ཆུ་དངས་པ་བཞིན་ནོ། །ཡ་མཚན་ལ་རྩེ་གཅིག་ཏུ་གྱུར་ཞེས་བྱ་བ་ནི་གོང་དུ་བཤད་པ་དག་གིས་ཡ་མཚན་དུ་གྱུར་པ་དེ་ལ་ཡང་དག་པར་བསྟན་པའོ། །ད་ནི་དགེ་བ་མི་ཆེ་བས་ཀྱང་ཞེས་བྱ་བ་ལ་སོགས་པའི་ཚིགས་བཅད་ལྔས་ནི་ཡང་དག་པར་ལེན་པའི་དབང་དུ་བྱས་པ་སྟེ། དེ་ལ་དགེ་བ་མི་ཆེ་བས་ཀྱང་ཞེས་བྱ་བའི་ཚིགས་བཅད་འདིའི་དོན་ནི་འདི་ཡིན་ཏེ། དགེ་བ་ཞེས་བྱ་བ་ནི་ཚུལ་ཁྲིམས་དང་སྦྱིན་པ་ལ་སོགས་པའོ། །རྒྱ་ཆེན་ཞེས་བྱ་བས་ནི་བདག་ཉིད་ཕུན་སུམ་ཚོགས་པ་སྟོན་ཏོ། །སྦྱིན་པ་དང་ཚུལ་ཁྲིམས་ཀྱི་བྱ་བས་རྣམ་པ་ཐམས་ཅད་ཀྱིས་མངོན་པར་མཐོ་བ་ལ་འཇུག་པ་དང་ལྡན་པར་བསྟན་པས་རྣམ་པ་ཐམས་ཅད་ཀྱིས་དགེ་བ་བྱ་བ་དང་ལྡན་པར་བསྟན་པའོ། །དེ་རྣམ་པ་ཐམས་ཅད་ཀྱིས་ནུས་པ་ཡིན་ན་ཡང་བྱ་བ་གཞན་བསྟན་པ་ཡིན་ནོ། །དེ་ལྟར་མི་རུང་ཞེས་བྱ་བའི་དོན་བསྟན་པ་ནི་དེ་ལྟར་ཡང་མི་བཟོད་དོ་ཞེས་བྱ་བ་སྟེ། འདི་ནི་དེ་བས་ན་སྐྱེ་བ་གཞན་དག་ཏུ་མེད་པར་བསྟན་པ་ཡིན་ཏེ། ཇི་ལྟར་ཞེ་ན། ནོར་གྱིས་ཆོག་པར་ཡོད་ཀྱང་ཞེས་བྱ་བ་སྨོས་པ་སྟེ། སྦྱིན་པའི་དངོས་པོ་ལ་ཡང་ངན་ཅིང་ཞེན་པའི་ཕྱིར་སྦྱིན་པ་ཆུང་བ་སྟེ། བདག་ཉིད་ལ་ཆགས་པ་དང་ལྡན་པས་དེ་ཕུན་སུམ་
ཚོགས་པ་ཡིན་ཡང་སྦྱིན་པ་མི་ནུས་པར་སྟོན་ཏོ། །དེ་ལྟར་མི་རུང་ཞེས་བྱ་བ་ལ་རུང་བ་ནི་བཟོད་པར་ཞེས་བསྟན་པ་ཡིན་ནོ། །ད་ནི་དེའི་རྒྱུ་བསྟན་པའི་ཕྱིར་བློ་བསྒྲིབས་ནས་ཞེས་སྨོས་ཏེ། མུན་པ་བཞིན་དུ་བློ་བསྒྲིབས་པ་ཡིན་པའི་ཕྱིར་རོ། །གྲགས་པ་ཞེས་སྨོས་པ་ནི་འཇིག་རྟེན་ཕ་རོལ་གྱི་འབྲས་བུ་ནི་རེ་ཞིག་གཞག་གི །འཇིག་རྟེན་འདིའི་འབྲས་བུ་མངོན་སུམ་དུ་འདོད་པའི་ཕྱིར་ཡང་སྦྱིན་པ་སྦྱིན་པར་བྱ་བ་སྟེ། གྲགས་པའི་དོན་དུ་ཡང་ངོ༌། །སེར་སྣའི་མུན་པས་ཞེས་བྱ་བ་ནི་སེར་སྣའི་མུན་པས་བློ་རབ་ཏུ་གཡོགས་པའི་ཕྱིར་རོ་ཞེས་བསྟན་པ་ཡིན་ནོ། །དེ་ཉིད་བསྒྲུབ་པའི་ཕྱིར། དབང་མེད་པར་ནི་གང་ཞིག་ཅེས་བྱ་བ་ལ་སོགས་པའི་ཚིགས་བཅད་བརྩམས་པ་ཡིན་ཏེ། དབང་མེད་པར་ནི་གང་ཞིག་བཏང་དགོས་ཞེས་བྱ་བ་ནི་རྐུན་པོ་དང༌། ཆུ་ལ་སོགས་པ་རྣམས་ཀྱིས་ཀྱང་ནོར་འཇིག་པར་འགྱུར་ལ། ཐ་མར་ཡང་བདག་ཉིད་འཆི་བས་མི་རྟག་པ་སྟེ། དེས་ན་ནོར་ནི་བཏང་དགོས་པ་ཡིན་ནོ། །དེ་བཞིན་སུ་ལའང་ཕན་མི་ཐོགས། །ཞེས་བྱ་བ་ནི་དབང་མེད་པར་ཡོངས་སུ་བཏང་བས་བདག་ཉིད་ཀྱི་ཡིན་ཞིང་གཞན་རྣམས་ཀྱི་ནོར་ཡིན་པའི་ཕྱིར་རོ། །ནོར་དེ་རིགས་པར་ཞེས་བྱ་བའི་ཡོན་ཏན་དེ་ཕན་པ་ཡིན་ཞིང༌། གལ་ཏེ་སྦྱིན་པའི་ཞིང་ལ་བྱིན་ན་ནི་ཡོན་ཏན་འགའ་ཞིག་ཐོབ་པར་འགྱུར་ཞེས་བྱ་བ་ཡིན་ཏེ། ཐ་ན་གྲགས་པ་ཡང་ངོ༌། །དེ་ལ་ཞེས་བྱ་བ་ནི་ངེས་པར་ཡོངས་སུ་བཏང་བ་ལའོ། །སེར་སྣའི་ལམ་ལ་བརྟེན་ཞེས་བྱ་བ་ནི་མི་སྟེར་བ་ཞེས་བྱ་བའི་དོན་ཏོ། །སྔར་ཤེས་བཞིན་དུ་སྟེ་ཡོན་ཏན་གྱི་ཉམས་སམ། ཡོན་ཏན་གྱི་རོ་ཚོར་བཞིན་དུ་སུ་ཞིག་དེ་ལྟར་མི་སྦྱིན་ཞེས་པའོ། །ཡོན་ཏན་དེ་དག་གང་ཡིན་ཞེ་ན། སྨྲས་པ། སྦྱིན་པ་ལས་བྱུང་ཡོན་ཏན་དགའ་ལ་སོགས་པ་ཞེས་སྨོས་ཏེ། ཇི་ལྟར་དགའ་བ་ལ་སོགས་པའི་ཡོན་ཏན་ཡིན་ཞེ་ན། ལྷག་པར་རྗེས་སུ་འབྲང་བའི་ཡིད་ཚིམ་པའི་དགའ་བ་སྐྱེས་པས་ལུས་སྦྱངས་པར་འགྱུར་རོ། །ལུས་སྦྱངས་པ་ལས་ནི་བདེ་བ་སོ་སོར་མྱོང་བར་འགྱུར་རོ། །སེམས་བདེ་བས་ནི་ཏིང་ངེ་འཛིན་ལ་མཉམ་པར་འཇོག་པར་འགྱུར་རོ། །སེམས་མཉམ་པར་
གཞག་པ་ལས་ནི་ཡང་དག་པ་ཇི་ལྟ་བ་བཞིན་ཤེས་པར་འགྱུར་ཏེ། དེ་ལྟར་དགའ་བ་ལ་སོགས་པའི་ཡོན་ཏན་སྦྱིན་པ་ལས་བྱུང་བའི་གྲགས་པ་དང་ཡང་ལྡན་པར་འགྱུར་རོ། །ད་ནི་སྦྱིན་པའི་ཆོས་དང༌། དོན་དང༌། འདོད་པའི་འཁོར་གསུམ་གྱི་རྒྱུ་ཉིད་དུ་བསྟན་པའི་ཕྱིར་འདི་བརྩམས་པ་ཡིན་ཏེ། སྦྱིན་པ་ཞེས་བྱ་གཏེར་ཆེན་ཞེས་བྱ་བའི་ཚིགས་བཅད་སྨོས་ཏེ། གཏེར་ཆེན་ཞེས་བྱ་བ་གཏེར་གཞན་ནི། གོད་པ་དང་ཡོངས་སུ་ཟད་པའོ། །རྗེས་སུ་འགྲོ་ཞེས་བྱ་བ་ནི་གཏེར་གཞན་ནི་འཇིག་རྟེན་ཕ་རོལ་དུ་མི་འགྲོ་བ་ཡིན་ཏེ། འདི་ནི་འཇིག་རྟེན་ཕ་རོལ་ཏུ་རྗེས་སུ་འབྲང་བ་ཡིན་ནོ། །གཏེར་གཞན་ནི་རྐུན་པོ་ལ་སོགས་པ་དང་ཐུན་མོང་ཡིན་གྱི། འདི་ནི་ཐུན་མོང་མ་ཡིན་ཏེ། སྦྱིན་པའི་བདག་ཉིད་ཁྱད་པར་འཕགས་པའི་དོན་གྱི་རྒྱུར་གྱུར་པ་ཡིན་ནོ། །ཇི་ལྟར་ཆོས་ཀྱི་རྒྱུར་འགྱུར་ཞེ་ན། ཆོས་ཀྱི་རྒྱུ་དེ་བསྟན་པའི་ཕྱིར་སྨྲས་པ། སྦྱིན་པ་འདོད་དང་སེར་སྣ་ཞེས་བྱ་བ་སྨོས་ཏེ། སྦྱིན་པ་དང་འགལ་བའི་སེམས་ཀྱིས་ཀུན་ཏུ་འཛིན་པ་ནི་སེར་སྣའོ། །གཞན་གྱི་ཕུན་སུམ་ཚོགས་པ་ལ་མི་བཟོད་པ་ནི་འདོད་པའོ། །སྐྱོན་ནི་དེ་ལས་གཞན་པ་སྟེ། སྲེད་པ་དང༌། ཞེ་སྡང་དང༌། ང་རྒྱལ་དང༌། མ་རིག་པ་ལ་སོགས་པའོ།། དེ་ཉིད་རྡུལ་ཡིན་པས་དེའི་རྡུལ་ཏེ། རྡུལ་ནི་སྒྲིབ་པའི་དོན་ཏོ། །དེ་བས་ན་སྐྱོན་དེ་རྣམས་སྦྱོང་བར་བྱེད་པས་ཆོས་ཀྱི་རྒྱུར་གྱུར་པའོ། །སྦྱིན་པ་འཁོར་བའི་ཞེས་པ་འདིའི་དོན་གྱིས་ནི་འདོད་པའི་རྒྱུར་གྱུར་པ་ཡིན་ཏེ། འཁོར་བ་ཉིད་ལམ་ཡིན་པས་ན་འཁོར་བའི་ལམ་སྟེ། བགྲོད་པར་བྱ་བ་ཡིན་པས་འཁོར་བའི་ལམ་ཞེས་བརྗོད་དོ། །འཁོར་བའི་ལམ་དུ་བགྲོད་པས་ངལ་བ་ནི་འཁོར་བའི་ལམ་བགྲོད་པས་ངལ་བ་སྟེ། བཀྲེས་པ་དང༌། སྐོམ་པ་ལ་སོགས་པའི་སྡུག་བསྔལ་གྱིས་ངལ་བའོ། །སེལ་བ་ཡིན་པས་མེད་པ་སྟེ། དེ་ལ་མེད་པ་ནི་འཁོར་བའི་ལམ་བགྲོད་ངལ་བ་མེད་པའོ། །འདིས་ནི་སྡུག་བསྔལ་ལས་ལྡོག་པར་བསྟན་ཏོ། །སྡུག་བསྔལ་བསལ་ནས་བདེ་བ་བསྒྲུབ་པའི་དབང་དུ་བྱས་ནས། སྦྱིན་པ་བདེ་བ་མང་པོ་ཞེས་བྱ་བ་ལ་སོགས་པའི་ཚིག་རྐང་ཡིན་ཏེ། གཅིག་མ་ཡིན་པའི་བདེ་བ་ཡིན་ཏེ། བདེ་བ་མང་པོའོ། །
དེ་དག་སྒྲུབ་པ་ནི་བདེ་བ་མང་པོ་འགྲུབ་པའོ། །གྲོགས་པོ་བཟང་པོ་ཞེས་བྱ་བ་ནི་གྲོགས་པོ་ཡང་ཡིན་ལ་བཟང་པོ་ཡང་ཡིན་པས་གྲོགས་པོ་བཟང་པོའོ། །ཇི་ལྟར་གྲོགས་པོ་བཟང་པོ་ཡིན་ཞེ་ན། སྔར་བཤད་པའི་ཚུལ་གྱིས་ཏེ། བདེ་བ་མང་པོ་སྒྲུབ་པར་བྱེད་པས་སོ། །མཆོག་ཡིན་ནོ་ཞེས་བྱ་བ་ནི་རྟག་ཏུ་ཉེ་བར་འཁོར་བའི་ཕྱིར་རོ། །དེ་ལྟར་སྦྱིན་པས་ཆོས་དང༌། དོན་དང༌། འདོད་པ་རྣམས་འགྲུབ་པར་བསྟན་ནས། སྦྱིན་པ་ནི་དང་པོ་ཡིན་ཏེ། དེས་ན་དེས་ཡོངས་སུ་བཟུང་བ་སྟེ། དེའི་དབང་དུ་བྱས་པ་ཡིན་པས་གཞན་ལས་གཙོར་བྱས་པ་ཡིན་ནོ། །སྦྱིན་པ་ཉིད་ཀྱིས་བསོད་ནམས་ཀྱི་ཚོགས་ཀྱི་འབྲས་བུ་མཐའ་དག་ཐོབ་པར་འགྱུར་རོ་ཞེས་བསྟན་པའི་དོན་ཡིན་ཏེ། བསོད་ནམས་ཀྱི་ཚོགས་ཀྱང་རྣམ་པ་གསུམ་སྟེ། སྦྱིན་པ་དང༌། ཚུལ་ཁྲིམས་དང༌། བཟོད་པ་སྟེ་རྣམ་པ་གསུམ་མོ། །བསོད་ནམས་ཀྱི་ཚོགས་རྣམ་པ་གསུམ་ལས་འབྲས་བུ་ཡང་རྣམ་པ་གསུམ་སྟེ། སྦྱིན་པས་ནི་ལོངས་སྤྱོད་ཆེན་པོར་འགྱུར་རོ། །བཟོད་པས་ནི་འཁོར་མང་བ་ཉིད་དུ་འགྱུར་རོ། །ཚུལ་ཁྲིམས་ཀྱིས་ནི་བདེ་འགྲོར་སྐྱེ་བ་སྟེ་བདག་གི་ཕུན་སུམ་ཚོགས་པའོ། །སྦྱིན་པའི་འབྲས་བུས་ནི་འབྱོར་པ་ཕུན་སུམ་ཚོགས་པའོ། །བཟོད་པས་ནི་བཀའ་ལུང་ཕུན་སུམ་ཚོགས་པའོ། །དེ་ཡང་སྦྱིན་པ་ཉིད་ཀྱིས་འགྲུབ་པ་སྟེ། སྔོན་སྦྱིན་པའི་དུས་སུ་སློང་མོ་བ་རྣམས་ཀྱི་ངག་བཞིན་དུ་བྱས་ཏེ། འདོད་པའི་དོན་རབ་ཏུ་བསྒྲུབས་པ་ཡིན་པའི་ཕྱིར་བཀའ་ལུང་མཉན་པའི་ཡོན་ཏན་ཐོབ་པའོ། །སུམ་ཅུ་རྩ་གསུམ་ཕོ་བྲང་གནས་སམ་ཞེས་བྱ་བ་ནི་ཚུལ་ཁྲིམས་ཀྱི་འབྲས་བུ་སྟེ། སྦྱིན་པའི་དུས་སུ་སློང་མོ་བ་རྣམས་ཀྱི་ངག་བཞིན་དུ་བྱས་ཏེ། འདོད་པའི་དོན་རབ་ཏུ་བསྒྲུབས་པ་ཡིན་པའི་ཕྱིར་བདེ་བ་བསྐྱེད་པ་ཡིན་ཏེ། དེ་བས་ན་སུམ་ཅུ་རྩ་གསུམ་གྱི་ཕོ་བྲང་དུ་གནས་པའི་རྒྱུར་གྱུར་པ་ཉིད་དོ། །གཟུགས་བཟང་ཡོན་ཏན་ཞེས་བྱ་བ་ཡང་ཚུལ་ཁྲིམས་ཀྱི་འབྲས་བུ་ཉིད་དོ། །དེའི་ཕྱིར་ཇི་ལྟར་འདིས་ཐོབ་པ་ཡིན་ཏེ། མདོག་ཕུན་སུམ་ཚོགས་པ་སྦྱིན་པའི་དངོས་པོ་མ་ཡིན་པ་ལས་སོ། །གང་ཞིག་འདོད་པ་
དེ་དག་ཐམས་ཅད་སྦྱིན་པས་ཐོབ་པར་འགྱུར་ཞེས་བྱ་བ་ནི་རེ་ཞིག་འདོད་པའི་ཁམས་ཀྱི་བསོད་ནམས་ཀྱི་འབྲས་བུ་ཐམས་ཅད་འདིས་འཐོབ་ཅེས་བྱ་བའི་དོན་ཏོ། །དེ་ལྟར་ངེས་དོན་གཏན་ལ་ཕབ་ན་ཞེས་བྱ་བ་ནི་འདི་ལྟར་བསྟན་ཅིང་དེ་ལྟར་ངེས་པའི་དོན་དུ་གྱུར་པ་ཡིན་པའི་ཕྱིར་རོ། །ཡང་དག་པར་བསྟན་པའི་ཕྱིར། སྦྱིན་པ་ནོར་གྱི་སྙིང་པོ་ཞེས་བྱ་བའི་ཚིགས་བཅད་བསྟན་པ་ཡིན་ཏེ། འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་རྒྱུ་ནི་སྦྱིན་པ་ཡིན་ཏེ། དེ་ལྟར་ངེས་དོན་གཏན་ལ་ཕབ་ན་སྦྱིན་པ་ནོར་གྱི་སྙིང་པོ་ཞེས་བྱ་བ་སྟེ། མཐོང་བའི་ཆོས་ཀྱི་ཐུན་མོང་དུ་གྱུར་པའི་ནོར་ལས་ཐུན་མོང་མ་ཡིན་པའི་རྒྱུར་གྱུར་པ་ཡིན་པས་སྦྱིན་པ་ནི་སྙིང་པོ་ལེན་པའོ། །སྦྱིན་པ་དབང་ཕྱུག་རྣམས་ཀྱི་རྒྱུ། །ཞེས་བྱ་བ་ནི་མ་འོངས་པའི་མངོན་པར་མཐོ་བའི་རྒྱུར་བྱས་པའོ། །སྐྱེ་བོ་མཆོག་གི་ཚུལ་ཞེས་བྱ་བ་ནི་འཇིག་རྟེན་ལས་འདས་པའི་བྱང་ཆུབ་སེམས་དཔའ་རྣམས་ཀྱི་ཚུལ་ལོ། །རྡུལ་ཙམ་སྦྱིན་པ་ཞེས་བྱ་བ་ལ། སྦྱིན་པ་རྡུལ་ཙམ་ཡང་སྦྱིན་པར་མི་བྱེད་པ་ནི་ཤེས་རབ་ཆུང་ངུ་དག་སྟེ། ངེས་དོན་གཏན་ལ་མ་ཕབ་པ་ཞེས་བྱ་བའི་དོན་ཏོ། །སྦྱིན་པ་ལ་སོགས་པ་ཞེས་བྱ་བ་ལ་སོགས་པ་སྨོས་པས་ཚུལ་ཁྲིམས་ལ་སོགས་པ་གཟུང་ངོ༌། །སློབ་དཔོན་དཔའ་བོས་མཛད་པའི་སྐྱེས་པའི་རབ་ཏུ་རྒྱ་ཆེར་བཤད་པ་ལས་ཟན་དྲོན་ཆང་པ་བྱིན་པའི་སྐྱེས་པའི་རབས་སོ།། །།བརླག་པར་འགྱུར་བ་ནི་ངན་སོང་གསུམ་དུ་འགྲོ་བས་ན་བརླག་པའོ། །ངན་སོང་གསུམ་དུ་འགྲོ་བ་བརྗོད་པས་ནི་གཞན་མ་བརྗོད་པ་ཡང་གྲུབ་པོ། སྐལ་བ་ཁྱད་པར་ཅན་དང་ལྡན་པ། ཡོན་ཏན་དང་སྤྲོ་བ་ཕུན་སུམ་ཚོགས་པ་ཞེས་བྱ་བས་ནི་སྐལ་བ་དང་སྐྱེས་བུ་བྱེད་པ་ཕུན་སུམ་ཚོགས་པ་གཉིས་ཡིན་ནོ། །སྤྲོ་བ་ཕུན་སུམ་ཚོགས་པས་ཞེས་བཤད་པའི་སྤྲོ་བ་ཕུན་སུམ་ཚོགས་པ་གང་ཡིན་ཞེ་ན། དེ་ཉིད་སྨྲས་པ། སྤྱོད་ཚུལ་མི་མཐུན་པ་མེད་པའི་ངང་ཚུལ་ཅན་ཞེས་བྱ་བའོ། །ཆོ་རིགས་བཙུན་པ་དང་ལྡན་ཞེས་བྱ་བ་ལ་སོགས་པ་ལ། རིགས་བཙུན་པ་དང༌། རིགས་པ་དང་གཞུང་ལེན་པར་བསྟན་པ་ཡིན་ནོ། །ཕོངས་པ་རྣམས་ནི་དགར་གྱུར་པས། །ཞེས་བྱ་བ་འདིས་
ནི་མཐོང་བའི་ཆོས་ཀྱི་འབྲས་བུ་གྲགས་པ་བསྟན་པའོ། །རྣམ་པར་རྟོག་པ་ཉིད་གཡོ་བ་ཡིན་པའི་ཕྱིར་རྣམ་པར་རྟོག་པ་གཡོ་བ་སྟེ། སྦྱིན་ནམ་མི་སྦྱིན་སྙམ་པའོ། །ཕྱོགས་གཉི་གར་རྒྱུ་བ་དང༌། ཆོས་མཐུན་པ་རྣམ་པར་རྟོག་པའི་གཡོ་བས་བསྐྱོད་པའི་ཡིད་དང་ལྡན་པའི་ཕོངས་པ་གང་ཡིན་པ་དེ་ནི་རྣམ་པར་རྟོག་པའི་གཡོ་བས་བསྐྱོད་པ་ཡིན་ལ། སེམས་ཅན་ཕོངས་པ་རྣམས་ལའོ། །ཡིད་ཆེས་པས་སྤོབས་པའི་ཕོངས་པའི་སྦྱོར་བ་གང་ཡིན་པ་དེ་ནི་ཡིད་ཆེས་སྤོབས་ཤིང་སློང་བའོ། །དེ་ནི་བདག་གི་བདེ་ཕྱིར་ནོར་མི་སྦེད། །ཅེས་བྱ་བ་འདི་དག་གིས་བསྡུས་པའི་དོན་ཡོངས་སུ་བཟུང་བ་ཡིན་པས་ནོར་ཡོངས་སུ་བཟུང་བའི་བྱ་བ་ཡིན་པ་སྟེ། འཇིག་རྟེན་པ་རྣམས་ནི་བདག་གི་བདེ་བའི་དོན་དང༌། མངོན་པར་ཆགས་པའི་དོན་དུ་བྱེད་པའོ། །གསུམ་པོ་དེ་མེད་པའི་ཕྱིར་རོ། །གཞན་གྱི་དོན་དུ་མེད་ཅེས་བྱ་བ་དང༌། བཟློག་པ་དེ་མི་ནུས་པའི་ཕྱིར་སྤངས་པར་གྱུར་པ་ཡིན་ཏེ། འདིས་ནི་འཇིག་རྟེན་ལས་འདས་པའི་ནོར་ཡོངས་སུ་བཟུང་བ་བསྟན་ཏོ། །མདོག་དང་བསུང་དང་འཇམ་པ་ལ་སོགས་པའི་ཞེས་པ་སོགས་པའི་སྒྲས་ནི་སྨིན་པའི་ནུས་པ་དང་བཟའ་བའི་ཡོན་ཏན་ལ་སོགས་པ་དང་ལྡན་པའོ། །རྣམ་པ་སྣ་ཚོགས་ཞེས་བྱ་བ་ནི་དངོས་པོའི་རྣམ་པའོ། །ཡང་ན་བཅའ་བ་ལ་སོགས་པ་རེ་རེའི་རྣམ་པ་ཡང་སྣ་ཚོགས་པར་གྱུར་པ་ཡིན་པས་སྣ་ཚོགས་པར་བཤམས་པའོ། །བཟའ་བ་དང་བཅའ་བ་ལ་སོགས་པའི་སྒྲས་གཞིབ་པ་དང་བལྡག་པ་ལ་སོགས་པ་ཡང་གཟུང་ངོ༌། །དེའི་བསོད་ནམས་ཀྱི་ཚོགས་རྣམ་པར་འཕེལ་བར་འདོད་པ་ཞེས་བྱ་བ་ལ། དེའི་ཞེས་བྱ་བ་ནི་བྱང་ཆུབ་སེམས་དཔའི་འོ། །འདིས་སྩོགས་པ་ཡིན་པས་ཚོགས་ཏེ་བསོད་ནམས་ཉིད་ཚོགས་སོ། །འདིར་སྦྱིན་པའི་ཉི་ཚེ་ལ་བསམས་པ་ཡིན་གྱི། ཚུལ་ཁྲིམས་དང་བཟོད་པ་རྣམ་པར་འཕེལ་བར་འདོད་པ་ནི་མ་ཡིན་ནོ། །ཉོན་མོངས་པ་ཐམས་ཅད་ནི་ཁམས་གསུམ་གྱི་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའོ། །ཉོན་མོངས་པ་ཉིད་བུད་ཤིང་ཡིན་པས་ཉོན་མོངས་པའི་བུད་ཤིང་ངོ༌། །དེ་ཡང་མི་མཐུན་པའི་ཆོས་སུ་བསྟན་ཏེ། ཇི་ལྟར་མེས་
བུད་ཤིང་བསྲེགས་པ་དེ་བཞིན་དུ་ཡེ་ཤེས་ཀྱི་མེས་ཉོན་མོངས་པ་ཐམས་ཅད་ངེས་པར་བསྲེག་པ་ཡིན་ནོ། །ཉོན་མོངས་པའི་བུད་ཤིང་ཐམས་ཅད་བསྲེགས་པ་གང་ཡིན་པ་དེ་ནི་ཉོན་མོངས་པའི་བུད་ཤིང་ཐམས་ཅད་བསྲེག་པ་ཡིན་ནོ། །དོགས་མེད་མི་གཡོ་ཞེས་བྱ་བ་འདིའི་བསྡུས་པའི་དོན་ནི་གང་འདུག་པ་དང༌། ཇི་ལྟར་འདུག་པ་དང༌། ཅིའི་ཕྱིར་འདུག་པ་སྟེ། ཚིག་རྐྱང་པ་འདིའི་དོན་འདི་དག་ནི་ཚིགས་བཅད་ཀྱིས་སྒྲུབ་པའོ། །གང་འདུག་པ་ནི་ཉོན་མོངས་པའི་བུད་ཤིང་ཐམས་ཅད་བསྲེགས་པའོ། །ཇི་ལྟར་འདུག་པ་ནི་ཉོན་མོངས་པའི་བུད་ཤིང་ཐམས་ཅད་བསྲེགས་པར་གྱུར་པ་ལས་ཤེས་པ་ཡིན་ཏེ། དེས་སྨྲས་པ། དོགས་མེད་མི་གཡོ་བརྟན་ཞིང་ཞི་བའི་ཞེས་བྱ་བ་དེས་བསྟན་པ་སྟེ། དོགས་མེད་ཅེས་སྨོས་པས་ནི་མཐོང་བས་སྤང་བར་བྱ་བའི་ཉོན་མོངས་པའི་བུད་ཤིང་ཐམས་ཅད་བསྲེགས་པར་བསྟན་ཏོ། །གང་གི་ཕྱིར་དོགས་པ་དང་མ་བྲལ་བ་ནི་བདག་ཏུ་ལྟ་བ་ཡིན་ཞིང་བདག་ཏུ་ལྟ་བ་ལ་འཇུག་པ་སྐྱེས་པ་ཡིན་ཏེ། དེ་མེད་བས་ན་དེ་མེད་པར་རྗེས་སུ་དཔག་པ་ཡིན་ནོ། །མི་གཡོ་བ་བརྟན་ཞིང་ཞི་བ་ཞེས་པ་དག་གིས་བསྒོམ་པས་སྤང་བར་བྱ་བའི་ཉོན་མོངས་པ་སྤངས་པར་བསྟན་པ་ཡིན་ཏེ། གཏི་མུག་དང༌། ཆགས་པ་དང༌། ཞེ་སྡང་གོ་རིམས་ཇི་ལྟ་བ་བཞིན་དུ་སྦྱར་ཏེ། ཀུན་ཏུ་རྨོངས་པས་ནི་ལྟ་བར་གཡོ་བར་འགྱུར་རོ། །ཆགས་པས་ནི་མི་བརྟན་པར་འགྱུར་རོ། །ཞེ་སྡང་གིས་ནི་མ་ཞི་བར་འགྱུར་ཏེ། ཉོན་མོངས་པ་དེ་དག་སྤངས་ཤིང་མེད་པའི་ཕྱིར་རོ། །མིག་གིས་ས་ལ་གཉའ་ཤིང་གང་དུ་ལྟ། །ཞེས་བྱ་བ་ནི་ཁྱིམ་དུ་འགྲོར་རུང་བའི་ལྟ་བ་དེས་དབང་པོའི་སྒོ་བསྡམས་པའོ། །རབ་ཏུ་ཞི་བར་གྱུར་ཅིང་ཞེས་བྱ་བ་འདིས་ནི་ཀུན་ཏུ་ལྟ་བ་ལ་སོགས་པ་ལ་ཤེས་བཞིན་དུ་ལྡན་པར་བསྟན་ཏོ། །དེ་ན་སྡོད་ཅེས་བྱ་བ་ནི་སྒོ་གང་ན་སློང་བའི་དོན་དུའོ། །ཅིའི་ཕྱིར་ཞེ་ན། སྨྲས་པ། དེའི་ལག་པདྨའི་མཆོག་ནི་ལྷུང་བཟེད་ཐོགས། །ཞེས་བྱ་བ་ནི་འདི་ཡིན་ཏེ། གང་གི་ཕྱིར་ལྷུང་བཟེད་ལག་ན་ཡོད་པ་ནི་སློང་བར་ཤེས་པ་ཡིན་ནོ། །སྦྱིན་པ་ཕུན་སུམ་ཚོགས་པ་དེ་ཞེས་བྱ་བ་ནི་ལེན་པ་དང་གཏོང་པ་པོ་ཕུན་སུམ་ཚོགས་པར་གྱུར་པས་སྦྱིན་པ་ཕུན་སུམ་ཚོགས་པ་སྟེ། འདིར་སྦྱིན་པའི་སྒྲ་ནི་རྒྱུད་ལ་
སོགས་པ་ལ་ཡང་དག་པར་འཇུག་སྟེ། གང་གིས་སྦྱིན་པ་དེ་ནི་སྦྱིན་པ་སྟེ། མཆོད་པ་དང་རྗེས་སུ་བཟུང་བའི་འདོད་པས་ལུས་དང་ངག་གིས་ལས་སྤྲོ་བ་དང་བཅས་པའི་ཞེས་བྱ་བའི་ཐ་ཚིག་གོ །དེ་ལ་བགེགས་བྱ་བའི་ཕྱིར་ཞེས་བྱ་བ་ནི་སྦྱིན་པའི་བར་དུ་གཅོད་པར་བྱ་བའི་ཕྱིར་རོ། །བཟའ་བ་དང་བཅའ་བ་ཉིད་སྨོས་པ་ནི་དེ་ན་བཏུང་བ་དང་བལྡག་པ་ལས་དགར་བའོ། །དེ་ལ་ཞེས་བྱ་བ་ནི་དམྱལ་བའི་གནས་སྐབས་ཀྱིས་སོ། །དེས་སྨྲས་པ་ནི་དམྱལ་བ་ཞེས་བྱ་བའི་མིང་ཡང་མ་བརྗོད་ཅིང་དངོས་པོ་མ་སྨྲས་པ་ནི་དེས་སྨྲས་པའོ། །ཁང་བའི་ངོས་ཀྱི་རྩིག་པ་ནས་བྱུང་སྟེ་བདག་གི་ལུས་ཡ་མཚན་ཆེ་བ་བསྟན་པས་བར་སྣང་ལ་གནས་ཏེ། དེ་ལ་ཚིག་འདི་བསྟན་པའི་ཕྱིར་རོ། །ཕོངས་པས་བསྔགས་པའི་ཚིག་གིས་བསླུས་ནས་ནི། །ཞེས་བྱ་བ་ནི་མཐོང་བའི་ཆོས་ཀྱི་གྲགས་པའི་ཕན་ཡོན་གྱིས་སོ། །ནོར་ཉམས་པའི་རྒྱུས་ནི་ཉེས་པ་བསྒྲགས་པའི་ཕྱིར་བཤད་པ་ཡིན་ཏེ། ཇི་ལྟར་ནོར་ཆུད་ཟོས་ཤེ་ན། དེ་དག་ནི་ལོ་སྟོང་ཕྲག་དུ་མར་ཡང༌། དམྱལ་བ་འདི་ན་གནས་འགྱུར་ཞེས་བྱ་བ་ཡིན་ནོ། །དེ་བསྒྲུབ་པའི་ཕྱིར། ནོར་ནི་འཁོར་གསུམ་ཁྱད་པར་རྒྱུ་ཡིན་ཏེ། །ཞེས་བྱ་བའི་ཚིགས་བཅད་ཡིན་ཏེ། ཇི་ལྟར་ནོར་འཁོར་གསུམ་གྱི་ཁྱད་པར་གྱི་རྒྱུ་ཡིན་ཞེ་ན། འདི་ལྟར་ནོར་ནི་ཆོས་དང་དོན་དང་འདོད་པ་རྣམས་ཀྱི་མངོན་སུམ་དང༌། བརྒྱུད་པའི་ཚུལ་གྱིས་ཏེ། ཇི་ལྟར་མངོན་སུམ་གྱི་རྒྱུ་ཡིན་ཞེ་ན། མཐོང་བ་ཉིད་ཀྱི་ཆོས་ལ་ཞིང་ལ་ནོར་སྐྱེད་པས་ཆོས་ཀྱི་རྒྱུ་ཡང་ནོར་ཡིན་ནོ། །ནོར་ཡང་ནོར་ཉིད་ཀྱི་རྒྱུན་ཡིན་ཏེ། ནོར་དང་ནོར་ནི་འབྲེལ་པ་སྟེ། །གླང་པོ་ནགས་ཀྱི་གླང་པོ་བཞིན། །ཞེས་བྱ་བའི་ཚིག་གིས་སོ། །འདོད་པའི་ཡང་རྒྱུར་གྱུར་པ་ཉིད་དེ་བརྒྱུད་པའི་ཚུལ་གྱིས་ཀྱང་ནོར་དང་ཆོས་ཀྱི་བྱ་བ་ཡིན་ཏེ། དེ་ཡང་རང་གི་ཆོས་ཀྱིའོ། །རྟག་ཏུ་ཡང་ཆོས་དང༌། ནོར་དང༌། འདོད་པ་རྣམས་ཀྱི་རྒྱུར་གྱུར་པ་ཉིད་དོ། །ཆོས་ཀྱང་འཁོར་གསུམ་གྱི་རྒྱུ་ཡིན་ཏེ། རྒྱུན་དུ་འཁོར་གསུམ་གྱི་རྒྱུར་གྱུར་པས་སོ། །མཐོང་བའི་ཆོས་ལ་ཡང་རེས་འགའ་དོན་དང༌། འདོད་པའི་རྒྱུར་གྱུར་པ་ཡིན་ནོ། །དེའི་
ཕྱིར་ན་ཁྱད་པར་གྱི་རྒྱུ་ཞེས་སྨོས་སོ། །དེ་མེད་བྱས་ན་ཞེས་བྱ་བ་ནི་འཁོར་གསུམ་གྱི་ཁྱད་པར་གྱི་རྒྱུ་ནོར་དང་ཆོས་མེད་པར་བྱས་ན་ཉམས་པར་བྱས་པའོ། །ཇི་ལྟར་ཞེ་ན། སྨྲས་པ། ནོར་ཆུད་གསན་པས་ཞེས་བྱ་བ་ཡིན་ཏེ། དེ་ལྟར་ནོར་ཉམས་པར་བྱས་ན་དམྱལ་བར་གནས་པར་འགྱུར་བའི་ཕྱིར་རོ། །དམྱལ་བར་གནས་པར་འགྱུར་བ་དེ་ལྟར་རབ་ཏུ་བསྒྲུབ་པའི་ཕྱིར། སྦྱིན་པའི་ཕྱིར་ནི་ཆོས་ཀྱི་རྩར་གྱུར་པའི། །ཞེས་བྱ་བའི་ཚིགས་བཅད་ཡིན་ནོ། །ཆུད་གཟན་སྡིག་བྱས་པས་ཞེས་བྱ་བ་ནི་ཆོས་ཉམས་པར་བྱས་པའོ། །དེའི་ཕྱིར་ཞེས་བྱ་བ་ནི་རྒྱུ་འདིས་སོ། །དམྱལ་བའི་གཤེད་པོ་ཞེས་བྱ་བ་ནི་མཐར་བྱེད་པའི་ཁ་ཡིན་པས་གཤེད་པོའོ། །དེ་ལྟར་ཚིགས་སུ་བཅད་པ་དེ་དག་གིས་ཡང་དག་པར་བསྟན་པར་བྱས་ནས། ཡང་དག་པར་ལེན་དུ་གཞུག་པའི་ཕྱིར་རོ། །དེ་བས་བློ་ནི་སྦྱིན་ལས་བཟློག་ན་ལེགས། །ཞེས་བྱ་བའི་ཚིགས་སུ་བཅད་པ་བརྩམས་པ་ཡིན་ནོ། །འོན་ཀྱང་འཕྲལ་དུ་ལྟུང་བར་ཁྱོད་མི་འགྱུར། །ཞེས་བྱ་བས་ནི་དུས་ཕྱི་ནས་ཀྱང་ལྟུང་བར་མི་འགྱུར་བ་སྟེ། ཆོས་ཀྱི་རྩ་བ་ནོར་ཡིན་པས་སོ། །དེ་དང་འགལ་བས་ན་དང་པོའི་ཚིགས་བཅད་ཕྱེད་ཀྱིས་ནི་སྦྱིན་པ་ལས་ལྡོག་པའི་ཡོན་ཏན་བསྟན་ནས། སྦྱིན་པ་ལ་ས་མི་ལྡོག་པའི་སྐྱོན་བསྟན་པའི་དབང་དུ་བྱས་ནས་སྨྲས་པ། སྙིང་རྗེ་དུ་ཞིང་ཞེས་བྱ་བ་ལ་སོགས་པ་འདིའི་དོན་ཡིན་ནོ། །སྦྱིན་པ་ལས་ལྡོག་ན་ནི་འཕྲལ་དུ་དམྱལ་བར་མི་ལྟུང་བ་ཉིད་ཀྱི་ཡོན་ཏན་ཡོད་དེ། དེའི་གཉེན་པོར་གྱུར་པས་སོ། །ད་ནི་ལན་པ་པོའི་ཕན་ཡོན་བསྟན་པའི་ཕྱིར་སྦྱིན་པ་ཚུལ་མིན་ཞེས་བྱ་བ་ལ་སོགས་པའི་ཚིགས་བཅད་ཡིན་ཏེ། ཚུལ་བཞིན་བྱེད་པ་དང་ལེན་པོ་ནི་མཐོ་རིས་འགྲོ་བ་ཡིན་ཏེ། ཅིའི་ཕྱིར་ཞེ་ན། སྦྱིན་པ་ཚུལ་མིན་མི་བྱེད་པར་གྱུར་པས་སོ། །ཆོས་ཀྱི་རྒྱུ་ནི་ནོར་རྣམ་པར་སྤེལ་བ་ན་ཆོས་རྣམ་པར་འཕེལ་བར་འགྱུར་རོ། །འདིས་སྒྲིབ་པར་བྱེད་པ་ཡིན་པས་སྒྲིབ་པའོ། །མཐོ་རིས་ཀྱི་ལ་མ་སྒྲིབ་པ་སྟེ། དེ་བས་ན་མཐོ་རིས་ཀྱི་ལམ་སྒྲིབ་པའོ། །ལྡོག་པ་ཞེས་བྱ་བ་ནི་སྦྱིན་པ་ལས་ལྡོག་པའོ། །འདི་ནི་ཞེས་བྱ་བ་ནི་བདུད་དོ། །བདག་ཉིད་ཀྱི་སྙིང་
སྟོབས་ནི་བདག་གི་སྙིང་སྟོབས་སོ། །བདག་གི་སྙིང་སྟོབས་ཉིད་ཀྱི་ཁར་བོར་བ་ཡིན་པས་བདག་གི་སྙིང་སྟོབས་ཀྱི་ཁར་པོར་བའོ། །བརྟན་པ་ནི་བདག་གི་སྙིང་སྟོབས་ཀྱི་ཁར་བོར་བ་དེ་བརྟན་པར་བྱས་པའོ། །ཚིག་འཇམ་པོ་རྒྱུན་མི་འཆད་པ་གང་ཡིན་པ་དེ་ནི་ཚིག་འཇམ་པ་རྒྱུན་མི་འཆད་པའོ། །འདིས་གནས་ནི་བདག་ཅག་ལ་ཕན་པ་ཡིན་པའི་ཕྱིར་བདག་ཅག་འདྲ་ལ་ཕན་པའོ། །བདག་ཅག་འདྲ་ལ་དགོངས་པ་ནི་བདག་ཅག་འདྲ་ལ་ཕན་པར་དགོངས་པ་སྟེ། དམྱལ་བར་ལྟུང་བ་ལས་བཟློག་པའོ། །དེ་ལ་མཐུན་པ་ནི་ལེ་ལོ་མེད་པའོ། །ཡང་ན་དགེ་བ་སྟེ་བདག་ཅག་འདྲ་ལ་ཕན་པར་དགོངས་པའོ། །འཕགས་པའི་ལམ་ནི་ལམ་གཞན་ལ་འཇུག་པའི་ལམ་མོ། །དེ་ལྟར་ཞེས་བྱ་བ་ནི་ཁྱད་པར་དུ་སྟེ། ལས་ཀྱི་འབྲས་བུ་མངོན་སུམ་དུ་མཐོང་བའི་ལྷ་རྣམས་ཀྱིས་སོ། །གཞན་ལ་ཕན་འདོགས་མཁས་པའི་སྤྱོད་པ་ཡིན། །ཞེས་བྱ་བ་ལ། ཕན་འདོགས་པའི་མཁས་པ་ནི་སྦྱིན་པ་ལས་ལྡོག་པའི་རྒྱུ་དམྱལ་བ་མངོན་སུམ་དུ་བསྟན་པས་སོ། །ཉེས་པ་བྱུང་བ་ཞེས་བྱ་བ་ནི་རླུང་དང་མཁྲིས་པ་དང་བད་ཀན་བྱུང་བའོ། །འདིས་ནི་རང་གི་འཚོ་བ་བསྟན་པ་ཡིན་ནོ། །ཉེས་པ་བྱུང་བའི་འོག་ཏུ་ཡང་ཞེས་བྱ་བ་ནི་ཉེས་པ་བྱུང་མ་ཐག་ཅེས་བྱ་བའི་དོན་ཏོ། །ཞི་བའི་ལམ་དེར་ཞེས་བྱ་བ་ནི་ཉེས་པ་མི་འབྱུང་བའི་ལམ་དུ་སྟེ། ཉེས་པ་མི་སྐྱེ་བ་ནི་ཐ་མལ་པར་གནས་པའོ། །ཉེས་པ་བྱུང་བའི་འོག་ཏུ་ཡང་ཉེས་པ་དེ་ཞི་བའི་ལམ་དུ་འགྲོ་བར་བྱ་བ་སྟེ། ནང་བྱུང་བ་དེ་མ་ཐག་པར་ཉེས་པ་དེ་དག་ཉིད་ལ་ཞི་བའི་ལམ་དུ་འགྲོ་བས་སོ། །ཞི་བའི་ལམ་དུ་འགྲོ་བས་ཀྱང་མ་རུང་བ་ནི་ཚབས་ཆེར་གྱུར་ལ་ཞེས་བྱ་བ་ཡིན་ཏེ། གསོར་མི་རུང་བར་གྱུར་པའོ། །ཆོ་ག་སྤྱད་པ་ནོངས་པ་ཡིས། །ཞེས་བྱ་བ་ནི་མཐུན་པའི་ཟས་ཀྱིས་མ་བཟློག་པ་དང༌། མི་མཐུན་པའི་ཟས་བསྟན་པས་ནི་སྨན་མི་ཐོགས་པ་ཞེས་བྱ་བ་ཡིན་ཏེ། ངལ་བའི་འབྲས་བུ་ཉི་ཚེར་ཟད་དེ། དེ་ལྟར་ནད་ཉེ་བར་ཞི་བར་མི་འགྱུར་རོ། །དེ་ལྟར་དཔེ་བསྟན་ནས་དཔེ་བསྒྲུབ་པར་བྱ་བ་དེ་བསྟན་པའི་ཕྱིར། སྦྱིན་ལ་ཞུགས་པ་བདག་གི་སྡུག་བསྔལ་འདི། །ཞེས་བྱ་བའི་ཚིགས་
བཅད་ཡིན་ཏེ། །དཔྱད་ཀྱིས་སློན་པར་རབ་ཏུ་མི་འགྱུར་དོགས། །ཞེས་བྱ་བ་ནི་ཕན་པར་བསྟན་པའི་དཔྱད་ཀྱིས་གསོ་བའི་ཡུལ་དུ་མི་འགྱུར་བའོ། །དེ་བསྒྲུབ་པའི་ཕྱིར་ཁྱོད་ཀྱིས་ཕན་པ་བསྟན་པའང་ཞེས་བྱ་བའི་ཚིགས་བཅད་ཕྱེད་བསྟན་པ་ཡིན་ཏེ། ཕན་པ་བསྟན་པ་ཡང་མི་ཉན་པར་ཞེས་བྱ་བ་ནི་ཕན་འདོགས་པའི་གདམས་ངག་མི་སྒྲུབ་པའོ། །སེམས་ཞེས་བྱ་བ་ནི་སྦྱིན་པར་འདོད་པའི་ཡིད་དོ། །ནད་དང་འདྲ་བ་ནི་དེའི་སྦྱིན་པའི་སེམས་ཏེ། སེམས་ལ་གནས་པར་གྱུར་པས་དེའི་སྒྲར་བརྗོད་དེ། ཇི་ལྟར་སྒྲ་འབྱིན་ཞེས་བྱ་བ་དེ་བཞིན་ནོ། །ནོར་ནི་འཁོར་གསུམ་ཁྱད་པར་རྒྱུ་ཡིན་ཏེ། །ཞེས་བྱ་བའི་ཚིག་གང་སྔར་བསྟན་པ་དེ་ལས་འདི་བརྩམས་པ་ཡིན་ཏེ། །སྦྱིན་པ་སྡིག་པར་འགྱུར་ཞེས་གང་སྨྲས་ཤིང༌། །ཞེས་བྱ་བའི་ཚིགས་བཅད་དེ་སྦྱིན་པ་སྡིག་པར་འགྱུར་ཞེས་གང་སྨྲས་པ་ཞེས་བྱ་བ་ལ། ཇི་ལྟར་སྨྲས་པ་ཡིན་ཞེ་ན། ནོར་ནི་འཁོར་གསུམ་གྱི་རྒྱུ་ཡིན་ཏེ། སྦྱིན་པས་ཆུད་ཟོས་པར་འགྱུར་ཞིང་དེའི་རྒྱུས་ཆོས་ཀྱང་ཉམས་པར་འགྱུར་ལ། ནོར་ཡང་ཆོས་ཀྱི་ཁྱད་པར་རྒྱུ་ཡིན་ཞེས་བྱ་བ་ཡིན་ཏེ། ནོར་ནི་འཁོར་གསུམ་གྱི་རྒྱུ་ཡིན་ནོ་ཞེས་བཤད་པར་གྱུར་པའོ། །གལ་ཏེ་སྦྱིན་པ་སྡིག་ཡིན་ན་ནི་གཞན་དུ་ན་ནོར་ཇི་ལྟར་སྡིག་པར་འགྱུར་བ་མ་ཡིན་ཏེ། སྤྱིན་པ་ནི་ཆོས་མ་ཡིན་པར་བཤད་པས་སོ། །གཏེར་དུ་སྦས་པའམ། འཇིག་པར་འགྱུར་བ་དེ་ཆོས་སུ་འགྱུར་རོ་ཞེ་ན། དེ་བསྟན་པའི་ཕྱིར། དེ་ནི་གཏེར་སྦས་ཞེས་བྱ་བ་ལ་སོགས་པའི་ཚིགས་བཅད་སྨོས་པ་ཡིན་ནོ། །དེ་བས་ན་ཉེ་བར་ལོངས་སྤྱོད་པས་ན་ཆོས་ཀྱི་རྒྱུར་གྱུར་པ་ཡིན་ཏེ། ཀུན་ཏུ་འཛིན་པ་ནི་མ་ཡིན་ནོ། །ཉེ་བར་ལོངས་སྤྱོད་པར་འདོད་པའི་ཚུལ་དང༌། འདོད་པའི་རྒྱུར་ནོར་གྱི་དབང་དུ་བྱས་པ་མ་ཡིན་ཞིང་ཆོས་ཀྱི་རྒྱུ་ཡང་མ་ཡིན་ཏེ། བར་དུ་གཅོད་པར་བྱེད་པས་སོ། །གཏེར་སྦས་ཞེས་བྱ་བ་ནི་ནོར་གཏེར་དུ་སྦས་ན་ཅི་ཞིག་ཆོས་ཀྱི་རྒྱུར་གྱུར་ཞེས་པའོ། །འོན་ཏེ་འཇིག་པ་སྟེ་འཇིག་པ་ནི་རྐུན་པོ་ལ་སོགས་པ་རྣམས་པ་ལྔས་སོ། །མངོན་སྟོན་ཕྲོགས་པར་གྱུར་པ་ནི་མངོན་སུམ་དུའོ། །རྐུན་མ་སྨོས་པས་རྒྱལ་པོ་ལ་སོགས་པ་བཟུང་སྟེ། ལྔ་པོ་དེ་དག་ཀྱང་མ་བྱིན་པར་
ལེན་པར་ཆོས་མཐུན་པས་སོ། །དེ་ལྟར་ལྔ་དང་ཐུན་མོང་དུ་གྱུར་པ་ཡིན་པས་འཇིག་པར་བསྟན་ཏོ། །གང་གོང་དུ་བསྟན་པའི། སྦྱིན་པ་ཚུལ་མིན་མི་བྱེད་ལེན་པ་པོ། །ཞེས་བྱ་བ་དག་གི་ལན་བསྟན་པའི་ཕྱིར། ནོར་སྦྱིན་པ་ནི་དམྱལ་བར་འགྲོ་བ་དང༌། །ཞེས་བྱ་བའི་ཚིགས་བཅད་འདི་བསྟན་པ་ཡིན་ནོ། །དེ་བསྒྲུབ་པའི་ཕྱིར། །ཁྱོད་ཀྱི་ཚིག་དེ་གཞན་དུ་མ་གྱུར་ཅིག །ཅེས་བྱ་བའི་ཚིགས་བཅད་བསྟན་པའོ། །ཕན་པར་འདོད་པ་བཞིན་བརྟན་པར་བྱ་བའི་ལག་པ་བརྐྱང་སྟེ་ཞེས་བྱ་བ་ནི་ཕན་ཞིང་བརྟན་པའི་ལག་པས་སོ།། ཕན་པར་སྨྲས་ན་ཡང་ལེགས་པར་རྟོགས་ལ་གང་དུ་དགའ་བར་སོང་ཤིག་པ་སྟེ། སྦྱིན་པ་ལས་ལོག་པར་གྱིས་ཤིག་པའོ། །བརྫུན་དུ་སྨྲས་ན་ཡང་ལེགས་པར་རྟོགས་ལ་གང་དུ་དགའ་བ་དེར་སོང་ཤིག་པ་སྟེ། སྦྱིན་པ་ལ་འཇུག་པར་གྱིས་ཤིག་པའོ། །དེ་གཉིས་ཀྱིས་ཅིར་འགྱུར་ཞེ་ན། དེ་སྨྲས་པ། ཕན་པར་སྨྲས་པ་འདི་ལེགས་པར་རྟོགས་ལ་གལ་ཏེ་སྦྱིན་པ་ལས་ལྡོག་ན་ནི་བདེ་བ་དང་ལྡན་པ་ཡིན་ཏེ། གུས་བཅས་དྲན་པར་གྱིས་ཞེས་པའོ། །གལ་ཏེ་བརྫུན་དུ་སྨྲས་ན་ཡང་ལེགས་པར་རྟོགས་ལ་སྦྱིན་པ་ལས་མ་ལོག་ན་ནི་འགྱོད་བཞིན་ང་ནི་དྲན་པར་བྱས་སོ་ཞེས་བྱ་བ་ཡིན་ནོ། །གང་སྔར་བསྟན་པའི་བརྫུན་དུ་སྨྲས་པ་ལ་ལེགས་པར་རྟོགས་ལ་སྦྱིན་པ་ལས་མ་ལོག་པ་ནི། འགྱོད་བཞིན་ང་ནི་དྲན་པར་བྱོས། །ཞེས་བྱ་བ་དེའི་ལན་བརྩམ་པའི་ཕྱིར། ཕོངས་པ་རྣམས་ཀྱིས་བག་སྤོབས་ཏེ་བསླངས་པ་ལ། ཞེས་བྱ་བའི་ཚིགས་སུ་བཅད་པ་འདི་ཡིན་ནོ། །དེས་ན་ཕོངས་པ་རྣམས་ཀྱིས་བག་ཕབ་སྟེ་བསླངས་པ་གང་ཡིན་པ་དེ་ནི་ཕོངས་པ་རྣམས་ཀྱིས་བག་ཕབ་སྤོབས་ཏེ་བསླངས་པའོ། །མི་བཟད་པ་ཡང་ཡིན་ལ་མེ་ལྕེ་ཡང་ཡིན་པས་མི་བཟད་མེ་ལྕེ་འབར་བའོ། །མི་བཟད་མེ་ལྕེ་འབར་བ་དེས་ཕོག་ནས་སྤྱིའུ་ཚུགས་སུ་ལྷུང་ཡང་ངོ༌། །དེའི་བསོད་ནམས་ཀྱི་མཐུ་ཡིས་ཞེས་བྱ་པ་ནི་གང་གི་བསོད་ནམས་ཀྱི་མཐུས་ཞེ་ན། སྔོན་བྱས་པའི་སྟེ་གང་གོང་དུ་བསྟན་པའི་བདག་གི་སྐལ་བའི་མཐུ་ལ་བརྟེན་པ་དང༌། སྦྱིན་པ་ལ་ཡང་ཉེས་དམིགས་མེད་པར་ཡང་ཤེས་པ་དང༌།
འཇིག་རྟེན་པའི་ཡང་དག་པའི་ལྟ་བ་ལས་ཀྱི་འབྲས་བུ་ལ་ཡིད་ཆེས་པའི་མཚན་ཉིད་ཀྱི་བསོད་ནམས་ད་ལྟར་བྱུང་བ་དང༌། དེ་གཉི་གའི་བསོད་ནམས་ཀྱི་མཐུས་སོ། །བསོད་ནམས་ཁྱད་པར་ཅན་ལས་བྱུང་བའི་ཞེས་བྱ་བ་འདིས་ནི་གཉི་ག་བསྟན་ཏེ། དེས་ན་ཁྱད་པར་ཅན་ཞེས་སྨོས་སོ། །ད་ནི་ཆར་འབེབས་འབར་བར་བྱེད། །ཅེས་བྱ་བ་ནི་འཕགས་པ་དེའི་རྫུ་འཕྲུལ་སྟོན་པ་ཡིན་ནོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཚོང་དཔོན་གྱི་སྐྱེས་པའི་རབས་སོ།། །།ཚུལ་ཁྲིམས་དང་གཏོང་བ་ལ་སོགས་པའི་ཚིག་འདི་དག་གིས་ནི་བསོད་ནམས་དང་ཡེ་ཤེས་ཀྱི་ཚོགས་དང་མ་འོངས་པ་དང༌། ད་ལྟར་གྱི་བསོད་ནམས་དང་ཡེ་ཤེས་ཀྱི་ཚོགས་ཀྱི་འབྲས་བུ་བསྟན་ཏོ། །གཏོང་བ་དང་ཚུལ་ཁྲིམས་རྣམ་པ་གཉིས་ནི་ད་ལྟར་བྱུང་བའི་བསོད་ནམས་ཀྱི་ཚོགས་ཏེ། སྦྱིན་པ་དང་ཚུལ་ཁྲིམས་ཀྱི་མཚན་ཉིད་དུ་བསྟན་ཏོ། །མང་དུ་ཐོས་པ་ཞེས་སྨོས་པ་ནི་ད་ལྟར་བྱུང་བའི་ཡེ་ཤེས་ཀྱི་ཚོགས་སོ། །ཆོ་རིགས་དང་དུལ་བ་ཞེས་སྨོས་པ་ནི་འདས་པའི་ཚུལ་ཁྲིམས་དང་དུལ་བ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུའོ། །འདས་པའི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་ནི་སྦྱོར་བ་ཕུན་སུམ་ཚོགས་པ་ཉིད་དོ། །ཤེས་པ་ཞེས་བྱ་བ་ས་ནི་འདས་པའི་ཚེའི་ཡེ་ཤེས་ཀྱི་ཚོགས་ཀྱི་འབྲས་བུའོ། །འདི་དག་གིས་དྲེགས་པ་མེད་དེ་ཞེས་པ་སྒྱུ་རྩལ་དུ་མ་དང་སྐད་ཀྱི་རྣམ་པ་ཤེས་ཀྱང་ངོ༌། འདི་དག་ནི་གོང་དུ་བཤད་པའི་སྦྱིན་པའི་ཁྱད་པར་གྱི་དོན་ནོ། །གློ་བུར་བ་ཐམས་ཅད་ལ་ཞེས་བརྩམས་ཏེ། སྦྱིན་པ་པོའི་གཙོ་བོར་གྱུར་པ་དེ་རྒྱུ་དེས་ན་འཇིག་རྟེན་ལ་ཕན་པའི་ཕྱིར་ཞུགས་པའོ། །སེར་སྣ་ལ་སོགས་པའི་ཉེས་པས་ཟིལ་གྱིས་མ་ནོན་པ་ཞེས་བྱ་བ་ལ། འདིར་སོགས་པའི་སྒྲ་ནི་ཆགས་པ་དང༌། ཕྲག་དོག་དང། །ཞེ་སྡང་ལ་སོགས་པ་སྟེ། སྦྱིན་པའི་བགེགས་ཀྱི་རྒྱུར་གྱུར་པས་ཉེས་པ་ཞེས་སྨོས་སོ། །འདོད་པའི་དོན་འབྱོར་ཐེ་ཚོམ་མེད་གྱུར་པས། །ཞེས་བྱ་བ་ལ། བྱིན་པ་དེ་ནི་འདོད་པའི་དོན་ནོ། །མ་བྱིན་པ་དེ་ནི་ཐེ་ཚོམ་སྟེ། དེ་མེད་པ་ཡིན་པའི་ཕྱིར་འདོད་པའི་དོན་འབྱོར་ཐེ་ཚོམ་
མེད་པའོ། །དེ་བས་སློང་ཞེས་ངེས་པར་ཞེས་བྱ་བ་ལ། ནོར་གང་སློང་བ་དེ་ནི་སློང་ཞེས་ངེས་པར་སྨྲས་སོ། །གང་གི་ཕྱིར་ཞེ་ན། སྨྲས་པ། དེའི་སེམས་ནི་ཞེས་བྱ་བ་ལ་སོགས་པ་སྨོས་ཏེ། ཆགས་པའི་སྐབས་མེད་པར་བྱས་པ་སྟེ། སེམས་ཅན་གྱི་དོན་ལ་ཆགས་པས་སོ། །ཤིན་ཏུ་མི་བཟད་ནོར་མིན་ཞེས་བྱ་བ་ལ། མི་བཟད་པ་ནི་དྲག་པའོ། །དེ་རབ་ཏུ་མང་པོར་གྱུར་པའི་ཕྱིར་ཤིན་ཏུའོ། །གཞན་མང་པོ་གཞན་དག་སྟེ། ནོར་མ་ཡིན་པ་དག་ལས་ཀྱང་ནོར་མ་ཡིན་པ་འདི་ཤིན་ཏུ་མི་བཟད་ནོར་མིན་པའོ། །དེ་ལྟར་བསགས་པ་དང། བསྲུང་བ་གཉིས་ཀྱི་དུས་ན་ཡང་ཉེས་པ་ཆེན་པོར་གྱུར་པས་ན་ཕུང་ཁྲོལ་ལམ་ནོར་བ་ཡིན་པར་བཤད་དོ། །རྒྱུ་རྐྱེན་མེད་པར་མྱུར་དུ་ཆུད་ཟ་བའི། །ཞེས་བྱ་བ་ལ་བར་དུ་གཅོད་པའི་ཉེས་པ་ཡིན་པས་ནའོ། །མྱུར་དུ་ཞེས་བྱ་བ་ནི་ཡུན་མི་རུང་བར་རོ། །དེ་ལ་མི་ཐོགས་པའི་ཚུལ་གང་ཡང་ཡོད་པ་དེ་ནི་རྒྱུ་རྐྱེན་མེད་པར་མྱུར་དུ་ཆུད་ཟ་བ་ཞེས་བྱ་བ་ཡིན་ཏེ། འདིས་ནི་ལེགས་པར་བསྲུངས་བཞིན་དུ་ཡང་འཇིག་པ་དང༌། མྱུར་དུ་འཇིག་པར་བཤད་དོ། །ཆགས་པའི་གཞི་ཡིན་པའི་ཕྱིར། དེས་ན་ངན་འགྲོའི་གྲོགས་སུ་གྱུར་པ་ཡིན་ཏེ། ངན་འགྲོའི་ལམ་གྱི་དེད་དཔོན་ཞེས་བྱ་བའི་དོན་ཏེ། ཇི་ལྟར་དེད་དཔོན་གྱིས་ལམ་དུ་འཇུག་པ་རྣམས་ཀྱི་གྲོགས་བྱེད་པར་གྱུར་པ་དེ་བཞིན་དུའོ། །བདག་དང་གཞན་གྱི་འབྱོར་པ་ཐོབ་ཅེས་བྱ་བ་ལ། གཞན་གྱི་འབྱོར་པ་ཐོབ་པ་ནི་མཐོང་བའི་ཆོས་ལ་སློང་བ་རྣམས་ཀྱི་དབུལ་བ་འཇིག་པའི་ཕྱིར་རོ། །བདག་གི་འབྱོར་པ་ཐོབ་པ་ནི་ཕུན་སུམ་ཚོགས་པ་ཐམས་ཅད་ཀྱི་ཕ་རོལ་ཏུ་ཕྱིན་པའི་རྒྱུར་གྱུར་པས་སོ། །དོན་དང་མཐུན་པར་འགྱུར་བ་ཞེས་བྱ་བ་ནི་འདོད་པའི་དོན་ཞེས་བྱ་བའི་ཐ་ཚིག་སྟེ། འདོད་པའི་དོན་ཕུན་སུམ་ཚོགས་པའོ། །སློང་བས་བསླང་ཞེས་ངེས་པར་སྨྲས་པ་ལ་སོགས་པ་འདིས་ནི་སྦྱོར་བ་ཕུན་སུམ་ཚོགས་པ་བསྟན་ཏོ། །ཕོངས་པ་རྣམས་ཀྱི་ཞེས་བྱ་བ་ལ་སོགས་པ་འདིས་ནི་དངོས་གཞི་ཕུན་སུམ་ཚོགས་པ་བསྟན་ཏོ། །འཇིག་རྟེན་དག་ན་ནོར་ནི་ཕལ་ཆེར་ཡང༌། །ཞེས་བྱ་བའི་ཚིགས་སུ་བཅད་པ་འདིས་ནི་མཇུག་ཕུན་
སུམ་ཚོགས་པ་བསྟན་ཏེ། དེས་ན་སྦྱིན་པའི་སྔ་རོལ་ན་ཡིད་བདེ་བར་འགྱུར་བ་དང༌། སྦྱིན་པའི་ཚེ་ན་དང་བ་དང༌། ཐ་མར་བྱིན་ནས་ཀྱང་རྗེས་སུ་དགའ་བར་བྱའོ་ཞེས་བཅོམ་ལྡན་འདས་ཀྱིས་གང་བསྟན་པ་དེ་དང་ཡང་འཐད་པ་ཉིད་དོ། །ཇི་ལྟར་འདོད་པ་བཞིན་ཞེས་བྱ་བ་ལ་གང་གི་ཚེ་གང་སློང་བ་དེའི་ཚེ་དེ་བྱིན་པ་ཡིན་ཏེ། དེ་བས་ན་ཇི་ལྟར་འདོད་པ་བཞིན་ཞེས་བྱ་བ་འདིས་ནི་དུས་དང་མཐུན་པའི་སྦྱིན་པ་བསྟན་ཏོ། །ཉོན་མ་མོངས་པར་ཞེས་བྱ་བ་ལ་ངོར་ལྟ་བ་དང་སྦྱིན་པ་དམན་པ་དང་ལྡན་པ་མི་སྦྱིན་པ་སྟེ། དེས་ན་བུ་ལྟ་བུ་ལ་ཕན་པའི་ཆེད་དུ་དགག་པ་ཡིན་ཏེ། འདིས་ནི་ཡུན་རིང་བའི་བདེ་བའི་རྒྱུར་གྱུར་པ་བཤད་དོ། །གུས་པ་ཁྱད་པར་ཅན་གྱིས་བརྒྱན། །ཞེས་བྱ་བ་ནི་བཀུར་སྟིའི་སྦྱིན་པའོ། །རླབས་ཆེ་བས་ཞེས་བྱ་བ་ནི་རྒྱ་ཆེ་བའོ། །ཀུན་ཏུ་ཞེས་བྱ་བ་ནི་ཕྱོགས་སུ་མ་ལྷུང་བར་བསྟན་པའོ། །ཡོན་ཏན་འདི་དག་དང་ལྡན་པས་ན་དེ་ཉིད་སྦྱིན་པ་རླབས་པོ་ཆེའོ། །ནོར་དང་འབྲུ་དང་རིན་པོ་ཆེ་དང་ཡོ་བྱད་ཀྱི་རྣམ་པ་བཞི་སྨྲོས་པ་ནི་ཡང་དག་པར་ཐ་སྙད་དང༌། བསགས་པར་བྱ་བ་དང་ཡོངས་སུ་ལོངས་སྤྱད་པ་འདི་དག་འཇིག་རྟེན་ན་ཡོངས་སུ་གཟུང་བའི་དངོས་པོ་སྟེ། དེ་བས་ན་བཞི་པོ་ཉིད་སྨོས་སོ། །སྦྱིན་པ་ཆེན་པོ་ཞེས་བྱ་བ་ནི་སྔོན་གྱི་དུས་ནས་བྱེད་པས་ཀྱང་ངོ༌། །སློང་བའི་ཚིག་སྨྲ་མ་ཕོད་དེ། བདག་གི་ཞོ་ཤས་འཚོ་བ་ཞེས་བྱ་བ་ནི་རྐུན་པོ་ཞེས་བྱ་བའི་དོན་ཏོ། །དེ་སྟེ་བདག་སྐལ་བ་ཆུང་བའི་སྐྱོན་གྱིས་མཐོ་བར་གྱུར་པ་ཞེས་བྱ་བ་ལ། བདག་སྐལ་བ་ཆུང་བའི་སྐྱོན་གྱིས་ཞེས་བྱ་བ་བདག་གི་སྐལ་བ་ཆུང་བའི་སྐྱོན་ནི་དབུལ་བ་འབྱུང་བའི་ལས་དང༌། ལོངས་སྤྱོད་པའི་བར་དུ་གཅོད་པར་གྱུར་པ་ཞེས་པ་སྟེ། མཐོང་བར་གྱུར་པ་དེའི་དབང་དུ་བྱས་ནས་སོ། །ནོར་རྣམས་ངོ་ནི་མི་རྟག་པར། །ཞེས་བྱ་བའི་ཚིགས་སུ་བཅད་པ་དང་པོའི་ཕྱེད་འདིས་ནི་མི་རྟག་པར་བརྟགས་ཏེ། སེམས་མི་གདུང་བར་བསྟན་ཏོ། །ཚིག་རྐང་འོག་མ་གཉིས་ཀྱིས་ནི་སློང་བ་རྣམས་ལ་ལྟོས་ཏེ་ཡིད་གདུངས་པར་བསྟན་ཏོ། །དེ་བསྒྲུབ་པའི་ཕྱིར། སྦྱིན་པ་དང་བཀུར་སྟི་ཞེས་བྱ་བ་ལ་སོགས་པའི་ཚིགས་སུ་བཅད་པ་སྟེ། སྦྱིན་པ་དང་བཀུར་སྟིས་
ཡུན་རིངས་བདེ་བྱས་པ་ཞེས་བྱ་བ་ལ། སྦྱིན་པ་དང་བཀུར་སྟི་ནི་སྦྱིན་པ་དང་བཀུར་སྟིའོ། །དེ་གཉིས་ལས་གང་བྱུང་བའི་བདེ་བ་ནི་སྦྱིན་པ་དང་བཀུར་སྟིའི་བདེ་བའོ། །དེས་བྱས་པ་ནི་སྦྱིན་པ་དང་བཀུར་སྟིས་བདེ་བ་བྱས་པའོ། །བསླང་བ་ནི་དེ་ལྟར་དཀའ་བ་ལྟ་ཞིག་ཅེས་བྱ་བ་ལ།། བདག་ནི་རེ་ཞིག་འདྲིས་པ་ལ་སློང་བར་མི་སྤྲོ་ན། མ་འདྲིས་པ་ལའང་སློང་བར་བྱེད་པ་དེ་དག་ནི་རེ་ལྟ་ཞིག་དཀའ་སྙམ་པ་སྟེ། དེ་བས་ན་དཀའ་བ་ལྟ་ཞིག་བྱའོ། །སྦྱིན་པ་དྲགས་པ་ཞེས་བྱ་བ་ལ། སྦྱིན་པ་དྲགས་པ་ཉིད་ཀྱི་ཉེས་དམིགས་ཀྱིས་ཉམས་པར་སྟོན་པ་ཡིན་ཏེ། རྐུན་པོས་མ་ཁྱེར་ཞེས་བྱ་བ་ལ་སོགས་པའི་ཚིགས་བཅད་ཕྱེད་ཀྱིས་སོ། །ཞུགས་པ་ནི་ཞུགས་པ་ཉིད་ཡིན་ཏེ། སྦྱིན་པ་དེ་ལ་རྗེས་སུ་ཆགས་པ་སྟེ་སྦྱིན་པ་ལ་ཞུགས་པའི་ཆགས་པ་སྟེ། བྱམས་པས་བསྐྱོད་པའོ། །དེ་བས་ཁྱོད་ལ་ཕན་ཕྱིར་ཞེས་བྱ་བའི་ཚིགས་བཅད་གཉིས་ཀྱིས་སྦྱིན་པ་དྲགས་པའི་རྒྱུས་ནོར་ཟད་པ་དང༌། མ་བྱིན་པ་ལས་ནི་འབྲེལ་པར་བཤད་དེ། དེ་གཉི་གའི་དཔེ་བསྟན་པའི་ཕྱིར་སྨྲས་པ། ཆུང་དུ་གོད་ཀྱང་ཞེས་བྱ་བ་ལ་སོགས་པའི་ཚིགས་བཅད་འདི་སྨོས་པ་ཡིན་ཏེ། རྟག་ཏུ་ཞེས་བྱ་བ་ནི་རྒྱུན་ཏུའོ། །ཆུང་ངུ་གོད་ཀྱང་ཞེས་བྱ་བ་ལ། ཀྱང་གི་སྒྲས་ནི་མང་པོ་སྤྱད་པ་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །གང་གིས་དུས་རྟག་ཏུ་བྱས་པ་ཡང་གྲོག་མཁར་ལྟར་མཐོན་པོར་བྱས་པའོ། །དར་བར་འདོད་པས་བསམ་པ་བྱས་ན་ལེགས། །ཞེས་བྱ་བ་འདིས་ནི་ཟད་ཅིང་གོད་པའི་ལམ་ཞེས་བྱ་བ་བསྟན་པ་ཡིན་ནོ། །མ་རབས་ཞེས་བྱ་བ་ནི་སྦྱིན་པ་མི་བྱེད་པའོ། །སྦྱིན་པར་བྱེད་པ་ནི་འཕགས་པ་ཉིད་དེ། ཚིགས་བཅད་འོག་ནས་སྨོས་པས་གང་ཐོབ་པའི་རྒྱུ་འདི་ལས་གང་ཐོབ་པར་འདོད་པ་ནི་མ་རབས་ཞེས་བྱ་བའི་དོན་ཏོ། །འདི་ལྟར་གྱུར་ཀྱང་གལ་ཏེ་མ་བྱིན་ན། །ཞེས་བྱ་བའི་ལན་ནི། བདག་ལ་མེད་ཀྱང་རུང་ཞེས་བྱ་བ་འདིའི་དོན་ཏེ། གང་ཡང་སྔོན་གྱི་འབྱོར་པ་བཟང་པོ་ཐོབ་པར་འགྱུར། །ཞེས་བྱ་བ་འདི་ཇི་ལྟར་སྦྱིན་པ་བྱིན་པ་འཕགས་པ་ཉིད་དེ། དེས་ན་དེ་མ་རབས་སུ་བསྒྲུབ་པའི་ཕྱིར། སློང་པའི་སྡུག་བསྔལ་ཞེས་བྱ་བའི་ཚིགས་བཅད་དོ། །སློང་བ་ཉིད་ཤི་བ་ཡིན་པས་སློང་བ་ཤི་བ་དང་འདྲའོ། །དེའི་གཉེན་པོའི་ལམ་ནི་ནོར་ཐོབ་པ་དང་
ནོར་རྙེད་པའོ། །དེས་དེའི་སྡུག་བསྔལ་གསོ་བར་བྱེད་དེ་སྡུག་བསྔལ་ནི་དབུལ་བའི་སྡུག་བསྔལ་ལོ། །དེ་ཡིས་ཕོངས་པ་ནི་སློང་བ་ཤི་བ་དང་འདྲ་བ་ཉིད་ཀྱིས་སོ། །སེར་བས་བསྣུན་པར་བྱེད་པ་ནི་མ་རབས་ཏེ། སློང་བ་ཤི་བ་དང་འདྲ་བ་འཛིན་པ་ལ་ཡང་མེད་ཅེས་བྱ་བའི་སེར་བས་རྡེག་པར་བྱེད་པས་སོ། །གང་རྡེག་པར་བྱེད་པ་དེ་ནི་མ་རབས་ཏེ། ཁྱད་པར་དུ་ཡང་ཡ་རབས་གཟི་བྱིན་ཅན་གྱིས་དེ་རྡེག་པར་བྱེད་པ་ནི་མ་ལགས་སོ། །དེ་ལྟར་རེ་ཞིག་འདིའི་མ་རབས་བསྒྲུབས་ནས། གང་ཞིག་ཐོབ་ཕྱིར་སེར་སྣ་ཞེས་བྱ་བ་ལ་སོགས་པའི་ཚིགས་བཅད་ཕྱེད་པོ་དེའི་དོན་བསྒྲུབ་པའི་ཕྱིར། སློང་བས་བརྡུངས་ནས་ཞེས་བྱ་བ་ལ་སོགས་པ་སྨོས་སོ། །གཞན་ལ་ཕན་པ་ལ་ཞུགས་པ་ལ་ཅི་སོགས་པར་བྱེད་དམ་ཞེས་པ་སྟེ། སྔ་ན་མེད་པའི་རིན་པོ་ཆེ་ལ་སོགས་པ་བདག་ལ་མེད་ཀྱང་རུང་བ་སྟེ། དེ་བདག་གི་སེམས་འདི་ལྟར་འདིས་བསྒྲུབ་པའོ། །གང་ཞིག་ཐོབ་ཕྱིར་སེར་སྣའི་སེམས་བྱུང་བ། །ཞེས་བྱ་བ་འདིས་བསྒྲུབ་པའི་ཕྱིར། སློང་བས་གདུངས་ཤིང་ཞེས་བྱ་བའི་དོན་དེ་སེར་སྣའི་སེམས་ཀྱིས་སློང་བའི་བདེ་བ་མི་བསྒྲུབ་ཅིང་སྔ་ན་མེད་པ་སོགས་པ་ནི་མི་རིགས་པ་ཉིད་དུ་བསྟན་ཏོ། །གང་ཞིག་ཐོབ་པའི་ཕྱིར་སེར་སྣའི་སེམས་བྱུང་བ་ན། ད་ནི་སྐྱེས་པ་ལ་ཡང་མི་རིགས་པའི་དབང་དུ་བྱས་ནས་གང་གིས་སེར་སྣའི་སྐྱོན་ཞེས་བྱ་བའི་ཚིགས་བཅད་བཤད་དོ། །གང་གིས་སེར་སྣའི་སྐྱོན་ནི་འཕེལ་འགྱུར་ཞིང༌། །ཞེས་བྱ་བ་ལ། སེར་སྣ་ནི་གཞན་གྱི་ཕུན་སུམ་ཚོགས་པ་ལ་མི་བཟོད་པ་སྟེ། དེས་ནི་སྙིང་རྗེ་མེད་པར་བསྟན་ཏ། །གཏོང་བའི་སེམས་ཀྱང་སྐྱེ་བར་མི་འགྱུར་བ། །ཞེས་བྱ་བ་ལ་ཆགས་པའི་གཉེན་པ་ནི་གཏང་བའི་སེམས་ཏེ། ཡོངས་སུ་སྐྱེ་བ་ཞེས་བྱ་བ་འདིས་ནི་ཤེས་རབ་རྣམ་པར་འཕེལ་བར་བྱེད་པ་སྟེ། ཤེས་རབ་ཀྱིས་ནི་ཕན་པ་མེད་པ་ངོ་བོ་ཉིད་ཀྱིས་ཡོངས་སུ་སྤྱོད་པའི་ཕྱིར་རོ། །གཏང་པའི་སེམས་སྐྱེ་བ་དེ་དང་སྦྱིན་པ་སྟེ། སྐྱེས་ན་ཡང་ཞེས་བྱ་བའི་དོན་ཏེ་མ་སྐྱེས་པ་ལ་ལྟ་སྨོས་ཀྱང་ཅི་དགོས། དེ་ཡོངས་སུ་གཟུང་བར་སྙད་བཏགས་ཞེས་བྱ་བ་ནི་ཡོངས་སུ་གཟུང་བ་ཉིད་སྙད་བཏགས་པ་སྟེ་སྙད་བཏགས་པ་ནི་སྒྲིབ་པའི་ཆོས་སོ། །ཡང་ན་གྱ་གྱུའོ། །ཡོངས་སུ་གཟུང་
བར་སྙད་བཏགས་པ་མི་ལྟོགས་པར་ནི་ཡོངས་སུ་གཟུང་བར་སྙད་བཏགས་པའི་རང་བཞིན་ནོ། །དེ་གང་ཞེ་ན། ཕོངས་པ་སྟེ། འདིས་རྣམ་པར་བཅོམ་པ་ཡིན་པས་ཕོངས་པ་ཉིད་ལས་ཡོངས་སུ་གཟུང་བར་སྙད་བཏགས་པ་ཉིད་དོ། །ཡོངས་སུ་གཟུང་བའི་ཚུལ་ཉིད་དུ་གནས་པས་བཅོམ་ཞེས་བྱ་བའི་དོན་ཏེ། ཕོངས་པའི་རྒྱུ་ཡིན་པས་རྒྱུ་ལ་འབྲས་བུ་བཏགས་པའོ། །ཕོངས་པ་དེ་ཉིད་བསྒྲུབ་པར་འདོད་པས། གློན་ནི་འགྱུ་བ་བཞིན་དུ་ཞེས་བྱ་བའི་ཚིགས་བཅད་བརྩམས་སོ། །གློག་ནི་འགྱུ་བ་བཞིན་དུ་ཞེས་བྱ་བ་ལ་སོགས་པས་ནི་སྐད་ཅིག་གིས་འཇིག་ཅིང་མི་རྟག་པར་བསྟན་ཏེ། རང་ཉིད་རྣམ་པར་འཇིག་པའི་ཕྱིར་རོ། །ཐུན་མོང་ཞེས་བྱ་བ་འདིས་ནི་ལྔའི་ཐུན་མོང་དུ་གྱུར་པ་སྟེ། འདིས་ནི་རྣམ་པར་འཇིག་པའི་རྒྱུས་འཇིག་པའི་ཕྱིར་ཏེ་འབྲལ་བའི་མི་རྟག་པ་བསྟན་ཏོ། །ཕོངས་པ་དུ་མའི་རྒྱུ་ཞེས་བྱ་བ་ནི་སྔར་བསྟན་པའི་ཕོངས་པ་ཞེས་བྱ་བ་ད་ཉིད་བསྟན་ཏེ། ཕོངས་པའི་རྒྱུ་ཞེས་བྱ་བ་ནི་བསགས་པ་དང་འཇིག་པའི་དུས་སུ་བསྲུང་བ་དང༌། གྲང་བ་དང༌། ཚ་བ་དང༌། གསད་པ་དང༌། བཅིང་བ་དང༌། བརྡེག་པ་ལ་སོགས་པ་ཕོངས་པའི་རྒྱུའོ། །འདིས་ནི་ཡོངས་སུ་བཅོམ་པས་ཕོངས་པ་ཉིད་དུ་བསྟན་ཏོ། །དེ་ལྟར་ཕོངས་པ་ལ་ནོར་གྱི་སེར་སྣའི་ཡ་རབས་སུ་ཞིག་བསྟན་པར་བྱེད་དེ་ནོར་སྦྱིན་པ་ཉིད་ལ་སུ་ཞིག་འདི་ལྟར་སེར་སྣ་བྱེད་པའོ། །ད་ནི་དེའི་རྒྱུ་བསྟན་པའི་ལམ་ལས་བརྩམས་ཏེ། བརྒྱ་བྱིན་ཁྱོད་ཀྱིས་ཞེས་བྱ་བའི་ཚིགས་སུ་བཅད་པ་འདིའོ། །གཉེན་པ་ནི་བདག་ཉིད་ཀྱི་ཉེ་དུ་ལྟ་བུ་སྟེ། ཅིའི་ཕྱིར་ན་ཕན་པ་སྨྲས་པས་སོ། །དེ་བས་ལམ་མིན་ཞེས་བྱ་བ་ལ། སྦྱིན་པའི་ལམ་མ་ཡིན་པ་ནི་སྦྱིན་པ་མ་ཡིན་པ་སྟེ། སྨྲས་པ་ཕན་པ་མ་ཡིན་པ་བསྟན་ཅིང་སྒྲུབས་པས་ནི་ཁྲོ་བ་ཡོངས་སུ་འཛིན་པའི་ཕྱིར། ཁྱོད་ཀྱི་ཐུགས་ནི་ཞེས་བྱ་བའི་ཚིགས་བཅད་སྨོས་སོ། །མཐུན་པའི་ཕྱོགས་ཉིད་བགྲོད་པར་དཀའ་བའོ། །ངོ་བོ་ཉིད་ཀྱི་སྦྱིན་པ་ནི་ངོ་བོ་ཉིད་ཀྱིས་སྦྱིན་པའོ། །ངོ་བོ་ཉིད་ཀྱི་སྦྱིན་པའི་མི་མཐུན་པའི་ཕྱོགས་ནི་སྦྱིན་པ་མ་ཡིན་པ་ངོ་བོ་ཉིད་ཀྱིས་མི་མཐུན་པའོ། །བགྲོད་དཀའ་བ་ནི་སྡུག་བསྔལ་གྱིས་
བགྲོད་དཀའ་བའི་ཕྱིར་རོ། །གཞུག་པ་ནི་འགྲོ་བའོ། །སླ་བ་ཞེས་བྱ་བ་ནི་འབད་པ་ཆུང་དུས་སོ། །འབྱོར་པ་ཕུན་སུམ་ཚོགས་པ་ཞེས་བྱ་བ་ནི་གོས་དང༌། རྒྱན་དང༌། ཡོ་བྱད་དང༌། མལ་ཆ་ལ་སོགས་པ་གཟུང་ངོ༌། ཁང་མཛོད་ཡོངས་སུ་གང་བ་དང་ཞེས་བྱ་བ་འདི་གཉིས་ཀྱིས་ནི་གང་སོགས་ཤིང་འདུ་བ་དེ་བསྟན་ཏོ། །གང་སོགས་པ་དེའི་དབང་དུ་བྱས་ནས། ལེགས་པར་བྱེད་ཅིང་ཞེས་བྱ་བ་ལ་སོགས་པ་སྟེ། ལེགས་པར་བྱེད་པ་ནི་ཇི་ལྟར་བྱ་བ་དེ་བཞིན་དུ་བྱེད་པའི་ཕྱིར་རོ། །རླབས་ཆེ་བ་ནི་རེ་རེ་ལ་ཡང་ལས་ཀྱི་མཐའ་མང་པོ་ཡོད་པའི་ཕྱིར་རོ། །རྣམ་པ་སྣ་ཚོགས་པ་ནི་ཞིང་རྨེད་པ་དང་ཆོང་ལ་སོགས་པ་སྟེ། ཞིང་གི་རྣམས་ནི་སྣ་ཚོགས་པས་སོ། །དར་བར་གྱུར་པ་ཞེས་བྱ་བ་ནི་བརྟན་པ་དང་གནས་པར་གྱུར་པ་སྟེ། གནས་པར་གྱུར་པ་གང་ཡིན་པ་དེ་ནི་འཇིག་རྟེན་ན་དར་བར་གྱུར་པ་ཞེས་བྱ་བའི་དོན་ཡིན་ཏེ། འཇིག་རྟེན་དབང་ཕྱུག་དབང་དུ་གྱུར་པ་ཞེས་བྱ་བ་ནི་གང་གིས་འཇིག་རྟེན་གྱི་དབང་ཕྱུག་གི་དབང་དུ་གྱུར་པ་སྟེ། སེམས་ཅན་འཇིག་རྟེན་པ་རྣམས་བཀའ་བཞིན་དུ་བྱེད་པར་བསྟན་ཏོ། །བདག་གི་བློ་ཡིས་ཞེས་བྱ་བ་ལ་སོགས་པ་སྨོས་པ་ལ། རང་གི་བློས་ལྕོགས་པ་ནི་བདག་གི་བློས་ལྕོགས་པའོ། །དེས་མཉམ་པར་གཞག་པ་ནི་མ་ཡེངས་པའམ། ཡང་དག་པར་ཁྱབ་པར་བྱས་པའོ། །ལས་དང་ཡོན་ཏན་གྱི་དབང་དུ་བྱས་པ་སྟེ། དེ་ཡང་གྲགས་པའི་རྗེས་སུ་མཐུན་པར་འགྱུར་བའི་འཇིག་རྟེན་པས་རབ་ཏུ་བསྔགས་པ་ནི་རིགས་མཐོ་བའམ་གྲགས་བ་དང་རྗེས་སུ་མཐུན་པའོ། །དེ་ཡང་རྣམ་པ་གཉིས་ཏེ། ལས་དང་རིགས་དང་རྗེས་སུ་མཐུན་པའོ། །འགྲན་ཟླ་ཟིལ་མནན་ཏེ་ཞེས་བྱ་བ་ནི་དགྲའི་ཕྱོགས་ལས་བརྩམས་པའོ། །སྐྱེ་བོ་རྣམས་ནི་ཞར་ལ་གྲོགས་བཙལ་ནས། །ཞེས་བྱ་བ་ནི་ཐ་མལ་པ་རྣམས་ལས་བརྩམས་པའོ། །ཞར་ལ་ཞེས་བྱ་བ་ནི་ཕན་ཚུན་འདུད་ཅིང་ཕྱག་འཚལ་བའོ། །མཛའ་བོར་བཅས་ལ་ཞེས་བྱ་བ་ལ་སོགས་པ་ནི་གྲོགས་པོའི་ཕྱོགས་ལས་བརྩམས་པའོ། །རྒྱལ་པོ་ལས་ཀྱང་ཞེས་བྱ་བ་ནི་ཕུན་སུམ་ཚོགས་པ་བསྟན་པའི་རྒྱུ་ཉིད་དུ་བསྟན་ཏེ། དེས་ཡོངས་སུ་བསྲུང་བའི་ཕྱིར་
རོ། །དཔལ་གྱིས་འཁྱུད་གྱུར་ན་ཞེས་བྱ་བ་ཡིན་ཏེ། འདི་ལྟར་ཡོངས་སུ་གཏོང་བ་ཅན་ནི་འབྱོར་པ་དང་བདེ་བ་ཡིན་ཏེ། འདི་ནི་ཉེ་བར་ལོངས་སྤྱོད་པའོ། །སྡོམ་ཞིང་མི་གཡེང་གནས་པ་ཞེས་བྱ་བ་ལ་སྡོམ་པ་ནི་སྦྱིན་པ་ལས་ལྡོག་པའོ། །མི་གཡེང་བ་ནི་ཉེ་བར་ལོངས་སྤྱོད་པ་ལས་ལྡོག་པའོ། །ཡང་ན་མི་གཡེང་བ་ནི་རྒྱལ་པོ་ལ་སོགས་པའི་ཆད་པའི་ལས་ཀྱིས་སོ། །དེ་ལ་མ་རབས་འགྱུར་བ་ཞེས་བྱ་བ་ནི་གང་དེ་ལྟར་བསྟན་པ་སྟེ། འཕགས་པས་མ་རབས་ཆོས་བྱ་ཞེས་བྱ་བ་ལ་སོགས་པ་དེའི་ལན་གྱིས་བསྟན་པ་ཡིན་ནོ། །འབྱོར་པ་མེད་པར་ཞེས་བྱ་བ་ལ། འབྱོར་པ་མེད་བཞིན་དུ་སྟེ། བདག་གི་དོན་ཞེས་བྱ་བ་ལས་བརྩམས་པའོ། །གང་ཞིག་ཅེས་བྱ་བ་ལ་སོགས་པའི་ཚིགས་སུ་བཅད་པ་གཉིས་བསྟན་པ་ལས་འཇིག་རྟེན་པ་དང༌། ཉན་ཐོས་དང་རང་སངས་རྒྱས་ཀྱི་དབང་དུ་བྱས་པའོ། །གཞན་གྱི་དོན་ལས་ཞེས་བྱ་བའི་ཚིགས་སུ་བཅད་པ་འདི་ནི་འཇིག་རྟེན་པའི་དབང་དུ་བྱས་པ་སྟེ། བདག་གི་དོན་ཆེད་ཆེར་འཛིན་པའོ། །གཞན་གྱི་དོན་ཆེད་ཆེར་མི་འཛིན་པ་དེས་ཀྱང་སྦྱིན་དགོས་པ་ཡིན་ཏེ། དེ་ཅིའི་ཕྱིར་ཞེ་ན། འདིས་ནི་ལོངས་སྤྱོད་ཆོག་པ་མེད་པས་སོ། །དེས་ནི་མཐོང་བའི་ཆོས་ཀྱིས་བདེ་བ་བསྟན་ནས་མཐོ་རིས་ཐོབ་མི་འགྱུར་ཞེས་བྱ་བ་ནི་འཇིག་རྟེན་ཕ་རོལ་གྱི་བདེ་བའོ། །ཅིའི་ཕྱིར་མཐོང་བའི་ཆོས་ཉིད་ལ་བསོད་ནམས་སུ་མི་འགྱུར་ཞེ་ན། སྦྱིན་པའི་འབྲས་བུ་ནི་འབྱོར་པ་ཡིན་པས་སོ་ཞེས་བྱ་བའི་དོན་ཏོ། །སེར་སྣ་ལ་སོགས་ཞེས་བྱ་བ་འདིའི་དོན་ནི་ཉན་ཐོས་དང་རང་སངས་རྒྱས་ཀྱི་དབང་དུ་བྱས་པ་སྟེ། གང་གི་ཕྱིར་དེ་ནི་ཉོན་མོངས་པ་སྤོང་བ་ལ་འབད་པས་སོ། །འབྱོར་པ་དེའི་ཕྱིར་ཞེས་བྱ་བ་ནི་ཕུན་སུམ་ཚོགས་པའི་རྒྱུའི་ཕྱིར་རོ། །གང་ཞིག་སྐྱེ་ཤིས་ཉེན་པའི་ཞེས་བྱ་བའི་ཚིགས་སུ་བཅད་པ་འདིས་ནི་བྱང་ཆུབ་སེམས་དཔའི་དབང་དུ་བྱས་པ་སྟེ་རྒ་བ་དང་ཤི་བ་ཞེས་བྱ་བ་ལ། གཉིས་ཁོ་ན་སྨོས་པས་ནི་ནད་ནི་ངེས་པར་འབྱུང་བའི་ཕྱིར་ལ། སྐྱེ་བ་ནི་མ་བཤད་ཀྱང་གྲུབ་པའི་ཕྱིར་འདི་ལྟར་བསྟན་ཏོ། །བདག་ཀྱང་གཏོང་བྱེད་ཅིང་ཞེས་བྱ་བ་འདིས་ནི་སེམས་ཅན་གྱི་དོན་བྱེད་པའི་ཚུལ་ཁྲིམས་ལ་འཇུག་
པའི་མཚན་ཉིད་བསྟན་ཏོ། །གཞན་སྡུག་བསྔལ་བས་བདག་གི་བདེ་བ་མི་མྱོང་བ་ཞེས་བྱ་བ་འདིས་ནི་སྡོམ་པའི་ཚུལ་ཁྲིམས་བསྟན་ཏོ། །ཁྱིམ་བདག་འབྱོར་པ་ཕུན་སུམ་ཚོགས་པ་ཞེས་བྱ་བ་ལ་སོགས་པ་གང་བསྟན་པ་དེའི་ལན་ནི་ནོར་རྣམ་པ་ཕུན་སུམ་ཚོགས་པ་ཞེས་བྱ་བའི་ཚིགས་བཅད་དོ། །བདག་གི་བསྒྲུབ་པ་ཕུན་སུམ་ཚོགས་པ་དང༌། གཞན་གྱི་བསྒྲུབ་པ་ཕུན་སུམ་ཚོགས་པའི་རྒྱུ་ནི་བདག་གི་སྒྲུབ་པས་གཞན་གྱི་དོན་ལས་བརྩམས་ཏེ། ཤིང་རྟ་གཅིག་གིས་ཞེས་བྱ་བ་ལ་སོགས་པའི་ཚིགས་སུ་བཅད་པའོ། །གང་དུ་ལམ་དྲངས་པ་ཞེས་བྱ་བ་ནི་དང་པོའི་ལམ་བྱེད་པའོ། །གཞན་ཞེས་བྱ་བ་ནི་གཉིས་པའོ། །དེ་བཞིན་གཞན་ཞེས་བྱ་བ་ནི་གསུམ་པའོ། །བདེ་བ་ནི་ཞེས་བྱ་བ་ནི་གཙོ་བོར་གྱུར་པ་སྟེ། དང་པོ་གང་གི་རྗེས་སུ་འགྲོ་བ་ལ་སོགས་པའི་བློས་འཁོར་བར་བྱང་ཆུབ་སེམས་དཔའི་ལམ་དམ་པ་མ་ཡིན་པ་སྟེ། བདག་གི་དོན་མཆོག་ཏུ་བྱེད་པ་ནི་ལམ་མོ། །འདི་ལྟར་གྱུར་ཀྱང་ཞེས་བྱ་བ་ནི་འབྱོར་པ་མ་ཟད་པར་གྱུར་ཀྱང་ངོ༌། །མི་བཟད་ངན་པ་ཞེས་བྱ་བ་ལ་ངན་པ་ནི་ཤིན་ཏུ་སྨད་པའོ། །མི་བཟད་པ་ནི་སྡིག་པ་མཆོག་ཏུ་བྱེད་པའོ། །ཉེས་དམིགས་མ་མཐོང་ནས་ཞེས་བྱ་བ་ནི་འཇིག་རྟེན་འདིའི་བསད་པ་དང་བཅིང་བ་ལ་སོགས་པ་གྲགས་པ་མ་ཡིན་པའི་ཉེས་དམིགས་དང༌། འཇིག་རྟེན་ཕ་རོལ་དུ་ངན་འགྲོ་ལ་སོགས་པའི་ཉེས་དམིགས་སོ། །རབ་ཏུ་འཇུག་པ་ནི་རབ་ཏུ་འགྲོ་བའོ། །གང་གིས་ཤེ་ན། ཤིན་ཏུ་གཡེངས་པའི་སེམས་ཀྱིས་སོ། །ཁྱོད་ཀྱིས་ནོར་ནི་ཟང་པར་འགྱུར་བའང་མ་བསམས་ཤིང་ཞེས་བྱ་བ་འདིའི་བསྡུས་པའི་དོན་ནི་སློང་བའི་སྐྱེ་བོའི་སྡུག་བསྔལ་བསལ་བའོ། །མི་བྱེད་པའི་རྒྱུ་དེ་ཡང་གསུམ་སྟེ། ནོར་ལ་ཆགས་པ་དང༌། བདག་གི་བདེ་བ་ལ་ཆགས་པ་དང༌། མི་དགེ་བའི་བཤེས་གཉེན་ལ་བརྟེན་པའོ། །རྒྱུ་གསུམ་པོ་དེ་དག་ཟིལ་གྱིས་མནན་ནས་གཞན་གྱི་དོན་སྒྲུབ་པ་ལ་སེམས་བརྟན་པར་འགྱུར་བའི་ཕྱིར་རོ། །རབ་ཏུ་ཆེ་བ་བརྟན་ཞེས་བྱ་བ་ནི་ཚིགས་བཅད་སྔ་མ་འདིར་བཟློག་པ་བསྟན་པས་འཇིག་རྟེན་གྱི་ངོ་བོ་ཉིད་བསྟན་ཏེ། ནོར་ནི་ཟད་པར་གྱུར་པ་ཞེས་བྱ་བ་བཟློག་པས་སོ། །གྲགས་པ་དང་འགལ་
བར་གྱུར་པས་ཞེས་བྱ་བའི་ཕྱེད་ཀྱིས་ནི་བདག་གི་བདེ་ཉམས་ཞེས་བྱ་བ་འདིའི་མི་མཐུན་པའོ། །བདག་གི་བདེ་ལ་ཆགས་པས་ཞེས་བྱ་བ་ནི་ང་ཡིས་བསླུས་པ་ཞེས་བྱ་བའི་མི་མཐུན་པའི་ཕྱོགས་བསྟན་ཏོ། །ཤིན་ཏུ་གཡེངས་པའི་སེམས་ཀྱིས་རབ་ཏུ་འཇུག །ཅེས་བྱ་བ་ནི་བདག་ཉིད་ཆེན་པོ་ཕུན་སུམ་ཚོགས་པའི་ཞེས་བྱ་བ་འདིའི་བཟློག་པའི་ཕྱོགས་སོ། །སྐྱེ་བོ་ནི་སྐྱེ་བ་ཐ་མལ་པའོ། །དེ་ལྟར་མི་མཐུན་པའི་ཕྱོགས་དང་གཉེན་པོ་བསྟེན་ཏེ། བྱམས་ཀྱིས་བསྐྱོད་པ་ཞེས་བྱ་བ་བརྒྱ་བྱིན་གྱིས་དང་པོ་སྨྲས་པ་དེའི་དབང་དུ་བྱས་པའོ། །ད་ནི་ཨེ་མའོ་རླབས་ཆེན་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་ནི་ཁྱིམ་བདག་འབྱོར་པ་ཕུན་སུམ་ཚོགས་པ་ཞེས་བྱ་བ་ལ་སོགས་པ་ལྷའི་དབང་པོ་བརྒྱ་བྱིན་གྱིས་སྨྲས་པ་དེའི་དབང་དུ་བྱས་པ་སྟེ། རླབས་ཆེན་ཁྱད་པར་གསལ་བ་ཞེས་བྱ་བ་ལ། རླབས་ཆེ་བ་ཉིད་ཀྱི་ཁྱད་པར་དེས་རང་བཞིན་གྱིས་རླབས་ཆེ་བ་སྟེ། བདག་ཉིད་ལ་ཆགས་པ་མེད་པར་གཞན་ལ་ཕན་པ་དང་བདེ་བ་ལ་འཇུག་པའོ། །སེར་སྣ་ཉིད་ཀྱི་མུན་པ་ནི་སེར་སྣའི་མུན་པའོ། །སྙིང་གི་སེར་སྣའི་མུན་པ་རབ་ཏུ་བསལ་བ་དེ་ཉིད་ནི་སྙིང་གི་སེར་སྣའི་མུན་པ་རབ་ཏུ་བསལ་བའོ། །སེར་སྣ་ནི་མུན་པ་དང་ཆོས་མཐུན་པ་ཡིན་ཏེ། །ནོར་ནི་སྙིང་པོ་མེད་ཅིང་སེམས་ཅན་དག་སྡུག་བསྔལ་བར་བྱེད་ལ་ཕན་པར་ལྟ་བའི་གནས་སུ་གྱུར་པའི་ཕྱིར་རོ། །དེ་བསྒྲུབ་པར་འདོད་ནས་སྨྲས་པ། རབ་ཏུ་སྦྱིན་ལ་ཞུམ་པའི་སེམས་སུ་ཡོངས་མ་གྱུར། །ཞེས་བྱ་བ་གང་ཡིན་པ་དེ་ཉིད་རྣམ་པ་སྙིང་ལ་ཡོད་པ་སྟེ། དེ་བས་ན་སྙིང་གི་སེར་སྣའི་མུན་པ་རབ་ཏུ་བསལ་བའོ། །རབ་ཏུ་སྦྱིན་པས་ཞུམ་པ་ནི་རབ་ཏུ་སྦྱིན་པ་ལ་ཞུམ་པ་སྟེ། རབ་ཏུ་སྦྱིན་པ་ལ་ཞུམ་པའི་སེམས་སུ་ཡོངས་མ་གྱུར། །ཞེས་བསྟན་པ་ནོར་མེད་པར་གྱུར་ཀྱང་ངོ༌། །དེ་བས་སྡོམ་ཞིང་མི་གཡེང་གནས་བྱས་ལ། །ཞེས་བྱ་བ་འདིའི་ཐབས་ཀྱིས་ཏེ་སྟོན་པའོ། །གང་ཞིག་སྐྱེ་ཤིས་ཉེན་པའི་འཇིག་རྟེན་སྐྱོང་འདོད་པ། །ཞེས་བྱ་བ་བྱང་ཆུབ་སེམས་དཔས་སྨྲས་པ་དེའི་དབང་དུ་བྱས་པ་ནི། གཞན་སྡུག་པའི་སྡུག་ལ་ངོ་མཚར་མི་ཆེ་སྟེ་ཞེས་བྱ་བའི་ཚིགས་བཅད་དོ། །འདིར་གཞན་གྱི་
སྡུག་བསྔལ་གྱིས་སྡུག་བསྔལ་བ་ནི་ངོ་མཚར་མ་ཡིན་ནོ་ཞེས་བྱ་བ་ནི་གང་སྔར་བསྟན་པའི་གཞན་སྡུག་བསྔལ་བས་བདག་གི་བདེ་བ་མི་མྱོང་བ་ཞེས་བྱ་བ་དེའི་དབང་དུ་བྱས་ཏེ་བཤད་པའོ། །སྙིང་རྗེའི་དབང་གིས་ཁྱོད་ནི་འཇིག་རྟེན་ཕན་པར་འདོད། །ཅེས་བྱ་བ་ནི་གང་སྔར་བྱང་ཆུབ་སེམས་དཔས་བསྟན་པའི་གང་ཞིག་སྐྱེ་ཤིས་ཉེན་པའི་ཞེས་བྱ་བ་ལ་སོགས་པ་བསྟན་པ་ཡིན་ནོ། །གངས་ཀྱི་རི་བོ་རླུང་གིས་ཞེས་བྱ་བའི་ཕྱེད་འདིས་ནི་གང་སྔར་བསྟན་པའི་དེ་ལ། །ཁྱོད་ཀྱི་དཔལ་ལྡན་ནོར་ཡང་ཅི་ཞིག་བྱ། །ཞེས་པ་དེ་བསྟན་པ་ཡིན་ནོ། །ད་ནི་དེའི་འབྱོར་པ་མི་སྣང་བར་བྱས་པའི་རྒྱུ་ལས་བསམས་ཏེ། གྲགས་པ་ཀུན་ཏུ་ཞེས་བྱ་བའི་ཚིགས་བཅད་སྨྲོས་སོ། །ཀུན་ཏུ་གྲགས་པའི་ཕྱིར་ཞེས་བྱ་བ་ནི་ཀུན་ཏུ་བསྟན་པའོ། །ཡོངས་སུ་བརྟག་པ་ནི་ཡོངས་སུ་བརྟགས་པའི་ཕྱིར་ཏེ། མ་བརྟགས་པར་ནི་གྲགས་པ་ཀུན་ཏུ་བསྒྲག་ཅིང་བསྒྲུབ་པར་མི་ནུས་སོ། །དེ་ལྟར་མ་བྱས་ན་ནི་ཞེས་བྱ་བའི་ཚིགས་བཅད་ཕྱེད་པ་འདི་ལ་མཛེས་པའི་རྗེས་སུ་འགྲོ་བ་ནི་ནོར་བུ་བཟང་པོ་སྟེ། འདིས་ནི་མཐོང་བའི་ཡུལ་དུ་བསྟན་ཏོ། །དེ་བཞིན་དུ་ཡོན་ཏན་ཐོས་པའི་ཡུལ་དུ་བསྟན་པ་ནི་གྲགས་པ་སྟེ། ནོར་བུ་བཟང་པོ་ལྟ་བུ་ནི་གྲགས་པའོ། །དེ་ལྟར་མ་བྱས་ན་ནི་ཞེས་བྱ་བ་ནི་ཡོངས་སུ་བརྟག་པ་མ་བྱས་པར་རོ། །ནོར་བུ་དག་ནི་གྲགས་པ་ཡིན་པས་ནོར་བུའི་གྲགས་པའོ། །རིན་ཆེ་བ་ཉིད་པས་ནི་རིན་ཆེན་ནོ། །བདག་གི་གྲགས་པ་ཡང་མི་ལྟོས་ལ་རིན་ཆེ་བ་ཉིད་དུ་ཡང་མི་ལྟོས་པ་སྟེ། ནོར་བུ་བཟང་པོ་ཡིན་ཡང་ཡོངས་སུ་བརྟག་པ་མེད་པར་རོ། །དེ་བཞིན་དུ་གྲགས་པ་ཡང་ཡོངས་སུ་བརྟག་པ་མེད་པར་ནི་ཀུན་ཏུ་གྲགས་པར་མི་འགྱུར་ཏེ། བརྟག་པའི་རྒྱུ་དེས་ན། །ཁྱོད་ཀྱི་ནོར་འདི་རྣམས་ནི་བདག་གིས་སྦས་པར་གྱུར། །ཞེས་བྱ་བ་ཡིན་ནོ། །དེ་བས་ཞེས་བྱ་བ་ནི་གང་གི་ཕྱིར་བརྟགས་པའི་རྒྱུ་དེས་ཁྱོད་ཀྱི་ནོར་སྦས་པར་གྱུར་པའོ། །དེས་ན་སྦྱིན་པ་ཆར་བཞིན་ཕོབས་ཞེས་བྱ་བ་ནི་གང་ནོར་སྦས་པ་དེ་ཉིད་ཀྱིས་བསྒྲུབ་པར་བསྟན་ཏོ། །ངས་ནི་རྗེས་སུ་བཟུང་བས་ནོར་ཡང་ཟད་མི་འགྱུར། །ཞེས་བྱ་བ་འདིས་ནི་མཆོག་སྦྱིན་པར་བསྟན་ཏོ། །ཁྱོད་ཀྱིས་བཟོད་པར་བྱོས་
ཞེས་བྱ་བ་འདིས་ནི། ནོར་སྦས་པ་དེ་དང་དེ་འདིས་ནི་བཟོད་པར་མཛོད་ཅིག་པའོ། །མགུ་བར་བྱས་པ་ཞེས་བྱ་བ་ནི་གྲགས་པ་ཀུན་ཏུ་བསྒྲགས་པ་ཞེས་བྱ་བ་ལ་སོགས་པའི་ཚིགས་བཅད་ལྔས་སོ། །དེ་ཡི་ནོར་གྱི་རྣམ་པ་སླར་བྱིན་ཏེ། དེ་བས་སྦྱིན་པ་ཞེས་བྱ་བའི་ཚིགས་བཅད་སྔར་བསྟན་པ་དེས་བསྟན་ཏོ། །བཟོད་པར་བྱས་ནས་ཞེས་བྱ་བ་ནི་བདག་གིས་གཙེས་པ་འདི་ཡང་ཁྱོད་ཀྱིས་བཟོད་པ་མཛོད་ཅེས་བྱ་བ་འདིས་བསྟན་ཏོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཚོང་དཔོན་ཟིལ་གྱིས་མ་ནོན་པའི་སྐྱེས་པའི་རབས་སོ།། །།ལྡུམ་བུ་དང༌། རྩྭ་དང་ཤིང་ལྗོན་པ་ཡིད་དུ་འོང་བ་ཞེས་བྱ་བ་འདིས་ནི་གྲིབ་མ་ཕུན་སུམ་ཚོགས་པ་བསྟན་ཏོ། །མེ་ཏོག་དང་འབྲས་བུར་ལྡན་པ་ཞེས་བྱ་བ་འདིས་ནི་ཟས་ཕུན་སུམ་ཚོགས་པའོ། །ཆུ་གཙང་མ་བཻ་ཌཱུཪྻ་ལྟ་བུ་ཞེས་བྱ་བ་ལ་སོགས་པ་བཞིས་ནི་མིང་གི་ཚོགས་བཏུང་བ་ཕུན་སུམ་ཚོགས་པའོ། །ས་གཞི་ནེའུ་གསིང་འཇམ་པ་དང་ལྡན་པ་དང༌། སྐྱེ་བོ་དཀའ་ཐུབ་ཅན་གནས་པ་དང་ལྡན་པས་ནི་འཇིགས་པ་མེད་པ་ཉིད་དུ་བསྟན་ཏེ། སྔར་བསྟན་པ་ཉིད་ཀྱིས་སྐྱེ་བོ་དཀའ་ཐུབ་ཅན་གནས་པའི་རྒྱུ་བསྟན་ཏོ། །དེ་ནི་ལུས་བཟང་ཞེས་བྱ་བ་ལ་སོགས་པ་བཞིས་ནི་མིང་གི་ཚོགས་དང༌། གཟུགས་ཀྱི་ལུས་ཕུན་སུམ་ཚོགས་པ་བསྟན་ཏོ། །ཡོན་ཏན་དེ་དག་ཉིད་དང་ལྡན་པའི་ཕྱིར། གཅན་གཟན་ངན་པས་གླགས་ལྟར་བག་མི་ཚ་བར་གནས་ཏེ། ཇི་ལྟར་གླགས་མི་ལྟ་བར་འདུག་ཅེ་ན། སྨྲས་པ། །རི་དགས་རྒྱལ་པོའི་ཚུལ་གྱིས་ཞེས་བྱ་བའོ། །ཆ་བྱད་དང༌། ཆོག་ཤེས་པ་གཉིས་ཀྱིས་ནི་ཐུབ་པ་བཞིན་མཛེས་པ་ཡིན་ཏེ། གང་གི་ཕྱིར་ཐུབ་པ་རྣམས་ནི་ཆ་བྱད་དང༌། ཆོག་ཤེས་པས་རབ་ཏུ་རྣམ་པར་འབྱེད་པ་ཡིན་ཏེ། དེ་བས་ན་འདི་བསྟན་ཏོ། །བདག་གིས་ལགས་པ་ཨ་ཛི་ན་གོན་ཞེས་བྱ་བའི་ཚིགས་བཅད་འདིས་ནི་བདག་ཉིད་ངན་པ་སྟེ། གནོད་པར་བྱེད་པ་སྤངས་བ་ཞེས་བྱ་བའི་དོན་ཏོ། །སློབ་མ་བདེར་གནས་ཤིང་ཞེས་བྱ་བ་ནི་སློབ་མ་བཞིན་དུ་བདེ་བས་སློབ་མ་བདེར་གནས་ཏེ། བདེ་བ་བྱེད་པའི་ཕྱིར་བདེ་བ་ལྟ་བུའོ། །འདུལ་བ་སྦྱིན་
པར་ནུས་པའི་དབང་དུ་བྱས་ནས་སློབ་མ་ཉིད་དང་ཆོས་མཐུན་པས་བདེ་བ་ཡང་ཡིན་ཏེ། འདི་ལྟར་བདེ་བས་འདུལ་བར་བྱེད་པའོ། །ཡོན་ཏན་ཁྱད་པར་ཅན་གྱིས་སྐྱེས་པ་ཞེས་བྱ་བ་ནི་ཡོན་ཏན་ཁྱད་པར་ཅན་གྱིས་ཡང་དག་པར་བསྐྱེད་པའོ། །བྱང་ཆུབ་སེམས་དཔའ་དེ་ལ་བྱམས་པ་དང་གུས་པ་ཁྱད་པར་ཅན་ཏེ་དེ་ལ་བྱམས་དང་གུས་པའོ། །ཕན་ཚུན་གཉེན་དུ་འབྲེལ་པ་ནི་སྐྱེ་གནས་ཀྱི་འབྲེལ་བ་སྟེ། དེས་འབྲེལ་པའི་བྱམས་ཤིང་ཆགས་པར་གྱུར་པ་གང་ཡིན་པ་ནི་ཕན་ཚུན་གཉེན་དུ་འབྲེལ་བཞིན་དུ་གཅིག་ལ་གཅིག་ཆགས་ཤིང་བྱམས་པར་གྱུར་པའོ། །གཅིག་ལ་གཅིག་ནི་ཕན་ཚུན་འབྲེལ་བས་སོ། །སྤོབས་པ་དང་བཀུར་སྟི་ནི་སྤོབས་པ་དང་བཀུར་སྟིའོ། །དེ་དག་གཅིག་ལ་གཅིག་སྤོབས་ཤིང་བཀུར་སྟིས་རབ་ཏུ་མཛའ་བར་གྱུར་པ་གང་ཡིན་པ་དེ་ནི་གཅིག་ལ་གཅིག་སྤོབས་ཤིང་བཀུར་སྟི་བྱེད་པས་རབ་ཏུ་མཛའ་བར་གྱུར་པ་སྟེ། དེ་བས་ན་འདི་ལྟར་རོ་ཞེས་བརྗོད་དོ། །དུད་འགྲོའི་རང་བཞིན་ལ་ནི་མི་ཕྱོགས་ཞེས་བྱ་བ་ནི་སྲོག་གཅོད་པ་ལས་ལྡོག་པའོ། །བདེ་བ་དང་མཐུན་ཞིང་ཞེས་བྱ་བ་ལ་སོགས་པ་འདིའི་ལུས་ནི་ཕན་པ་ཡིན་བདེ་བ་མ་ཡིན་པ་དང༌། བདེ་བ་ཡང་མ་ཡིན་ཕན་པ་ཡང་མ་ཡིན་ཞེས་བྱ་བ་ལ་སོགས་པ་རྣམ་པ་བཞི་ལས་དེ་ལ་ཕན་པ་མེད་པ་ནི་གཅིག་ཏུ་མི་བྱ་བ་ཡིན་ནོ། །གང་དུ་ཕན་པ་ཡོད་པ་དེ་ནི་གཅིག་ཏུ་བྱ་བ་སྟེ། དེ་ལ་ཕན་ལ་བདེ་བ་མ་ཡིན་པ་དང༌། ཕན་ལ་བདེ་བ་དེ་ནི་བྱ་བ་ཡིན་ནོ་ཞེས་བསྟན་ཏོ། །བདེ་དང་མཐུན་ཞིང་ཡོན་ཏན་མི་མཐུན་ཚུལ། །ཞེས་བྱ་བ་ནི་གང་དུ་ཕན་པ་དང་བདེ་བ་ཡོད་པ་དེ་བསྟན་ཏོ། །ཡོན་ཏན་མཐུན་ཞིང་བདེ་དང་མི་མཐུན་ཚུལ། །ཞེས་བྱ་བ་ནི་ཕན་པ་དེ་ཉིད་བདེ་བ་ཉིད་དུ་བསྟན་ཏོ། །ཡོན་ཏན་ཕྱོགས་ལ་བརྟེན་ན་ནི་ཞེས་བྱ་བ་ནི་གང་ལ་ཕན་པ་ཡོད་པ་དེ་ལ་བརྟེན་པ་ཞེས་བྱ་བའི་དོན་ཏོ། །གཞན་ལ་སྙིང་རྗེ་དང་སྒྲུབ་པ་ནི་སྙིང་རྗེ་དང་སྒྲུབ་པའོ། །དེ་གཉིས་ཀྱིས་བླ་མར་གྱུར་པ་ནི་གཞན་ལ་སྙིང་རྗེ་སྒྲུབ་པའི་བླ་མ་སྟེ། བསམ་པ་དང་སྦྱོར་བ་གཉིས་ཆེ་བའོ། །ཡང་ན་བདག་དང་གཞན་ལ་ཕན་པ་སྒྲུབ་པའོ། །ཡང་ན་གཞན་ལ་སྙིང་རྗེ་བ་ཉིད་སྒྲུབ་པ་ཡིན་པས་གཞན་ལ་སྙིང་རྗེ་ཆེ་བའི་བླ་མར་གྱུར་
པ་སྟེ། གཞན་ལ་ཕན་པར་སྒྲུབ་པ་ཡིན་པས་བླ་མ་ཞེས་བརྗོད་པ་ཡིན་ནོ། །ཡོན་ཏན་རྗེས་འགྲོ་རང་བཞིན་ཕུན་སུམ་ཚོགས། །ཞེས་བྱ་བ་ལ་སློབ་མ་རྣམས་ཀྱི་རང་བཞིན་ཕུན་སུམ་ཚོགས་པ་བསྟན་ཏོ། །སློབ་མ་དང་བླ་མའི་ཕུན་སུམ་ཚོགས་པ་གཉིས་ཀྱི་གྲགས་པ་ལྷ་ཡུལ་དུ་ཡང་གྲགས་པར་གྱུར་པའོ། །དཀྱིལ་འཁོར་ཡོངས་སུ་རྫོགས་པ་ཉེ་བ་ཅུང་ཟད་མ་རྫོགས་པ་བཟང་པོ་ནི་ཡོངས་སུ་མ་གང་བའི་མཛེས་པའོ། །འདུ་བ་གང་ཡོད་མཐའ་ནི་ཞེས་བྱ་བ་ལ་སོགས་པའི་ཚིགས་བཅད་དྲུག་སྨོས་པ་ལ། དེ་ལ་འདུ་བ་གང་ཡོད་དོ། །ཞེས་བྱ་བའི་ཚིགས་བཅད་འདིས་ནི་བསོད་ནམས་ཀྱི་ཚོགས་ཀྱི་འབྲས་བུ་གཡོག་འཁོར་དང་ལོངས་སྤྱོད་ཆེན་པོའི་བདག་ཉིད་སྲིད་པའི་ཕུན་སུམ་ཚོགས་པ་མཐར་རྒུད་པ་ཉིད་དུ་བསྟན་ཏེ། འདུ་བ་གང་ཡོད་མཐའ་ནི་འབྲལ་བར་འགྱུར། །ཞེས་བྱ་བ་ནི་མཐར་འབྱེ་བ་ཡིན་ཏེ། འདིས་ནི་བསོད་ནམས་ཀྱི་ཚོགས་ཀྱི་འབྲས་བུ་གཡོག་འཁོར་ཆེན་པོ་དང་བྲལ་ཞིང་མཐར་རྒུད་པ་ཉིད་དུ་བསྟན་ཏོ། །དར་བ་ཡོད་ན་ངན་པ་རྒུད་པའི་མཐའ། །ཞེས་བྱ་བ་འདིས་ནི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་ལོངས་སྤྱོད་ཆེན་པོ་ལས་མཐར་རྒུད་པ་ཉིད་དུ་བསྟན་ཏོ། །ཚེ་ཡང་གློག་བཞིན་འགྱུ་ཞིང་མི་བརྟན་ནོ། །ཞེས་བྱ་བ་འདིས་ནི་ཚུལ་ཁྲིམས་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་བདག་གི་ཕུན་སུམ་ཚོགས་པ་འཆི་བ་ཉིད་ཀྱིས་རྒུད་པར་བསྟན་ཏོ། །དེ་ཕྱིར་ཞེས་བྱ་བ་ནི་བསོད་ནམས་ཀྱི་ཚོགས་གསུམ་པོ་དེ་ཉིད་ཀྱི་ཕྱིར་བག་ཡོད་པར་བྱ་བ་སྟེ། ཕྱིས་ཀྱང་དེའི་རྒྱུ་འཕེལ་བ་ལ་བག་ཡོད་པར་བྱའོ། །ཡང་ན་འདིའི་བསྡུས་པའི་དོན་གཞན་ནི་དགེ་བའི་བཤེས་གཉེན་དང༌། ལུས་དང་སྲོག་དང་བྲལ་བ་དང༌། རྒུད་པ་དང༌། འཇིག་པ་ཞེས་བྱ་བ་སྟེ། དེ་བས་ན་མཐར་རྒུད་པས་འཇིགས་པ་མེད་བ་ལས་རྒྱུ་གསུམ་གྱིས་བག་ཡོད་པར་འགྱུར་ཏེ། ཚིགས་བཅད་འདིས་གོ་རིམས་བཞིན་དུ་སྦྱར་རོ། །བག་ཡོད་པར་བྱའོ་ཞེས་བསྟན་པ་ལ། ཇི་ལྟར་བག་ཡོད་པར་བྱ་བ་དང༌། དེའི་ཕན་
ཡོན་བསྟན་པའི་ཕྱིར། དེ་བས་སྦྱིན་པ་ཚུལ་ཁྲིམས་ཞེས་བྱ་བའི་ཚིགས་བཅད་སྨོས་སོ། །སྦྱིན་པ་ཞེས་བྱ་བས་ནི་སྦྱིན་པའི་བསོད་ནམས་ཀྱི་ཚོགས་བསྟན་ཏོ། །ཚུལ་ཁྲིམས་བརྒྱན་པ་ཞེས་བྱ་བས་ནི་ཚུལ་ཁྲིམས་དང༌། བཟོད་པའི་བསོད་ནམས་ཀྱི་ཚོགས་བསྟན་ཏོ། །ཚུལ་ཁྲིམས་ལས་ཐ་དད་པ་དེ་ཡང་གང་ཞེ་ན། གནོད་པར་བྱེད་པ་ལ་ལན་དུ་གནོད་པ་བྱེད་པའི་མཚན་ཉིད་ཀྱི་བཟོད་པ་མེད་པའོ། །ཚུལ་ཁྲིམས་མེད་ན་ནི་གནོད་པ་མི་བྱེད་པ་ལ་ཡང་གནོད་པ་བྱེད་པ་སྟེ། དེས་ན་གནོད་པ་བྱེད་པ་ལས་ལྡོག་པའོ། །དེ་བས་ན་སྤྱིར་གཉི་ག་ལ་སྦྱར་བ་ཡིན་ཏེ། ཚུལ་ཁྲིམས་སྨོས་པས་བཟོད་པ་མ་སྨོས་ཀྱང་གྲུབ་པ་ཡིན་ནོ། །སྐྱེ་བའི་ངན་འགྲོའི་ནང་ན་ཞེས་བྱ་བའི་ཚིགས་བཅད་ཀྱི་ཕྱེད་འོག་མས་ནི་བསོད་ནམས་ཀྱི་ཚོགས་དང་འབྲེལ་པའི་ཕན་ཡོན་ནོ། །རྟེན་ནི་གནས་ཞེས་བྱ་བའི་དོན་ཏོ། །སྐར་མ་རྣམས་ཀྱི་དཔལ་ནི་ཞེས་བྱ་བ་ལ་སོགས་པའི་ཚིགས་བཅད་གསུམ་སྨོས་པ་ནི་བསོད་ནམས་ཀྱི་གནས་སུ་སྨོས་པའི་ཕྱིར་རོ། །དེ་ལ་སྐར་མ་རྣམས་ཀྱི་དཔལ་ནི་ཞེས་བྱ་བའི་ཚིགས་བཅད་ནི་ཚུལ་ཁྲིམས་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་བསྒྲུབ་པའི་ཕྱིར་ཏེ། ཚུལ་ཁྲིམས་ནི་བདག་གི་ཕུན་སུམ་ཚོགས་པའི་འབྲས་བུ་སྟེ། དེ་ཡང་རིས་འདྲ་བ་ལས་ཚུལ་ཁྲིམས་དེ་ཁྱད་པར་དུ་གྱུར་པའི་འབྲས་བུ་ཉིད་དུ་བསྟན་ཏོ། །སྐར་མ་རྣམས་དང་བསིལ་བར་རིགས་འདྲ་ཞིང་ཆོས་མཐུན་པ་དེ་ལས་ཁྱད་པར་དུ་གྱུར་པའི་ཡོན་ཏན་གྱིས་ཟླ་བ་མཛེས་པ་ཡིན་ཏེ། མཛེས་ཤིང་ཁྱད་པར་དུ་གྱུར་པ་ཡིན་ནོ། །འོད་ཟེར་ཅན་ནི་འོད་དང་ལྡན་པ་སྟེ། ཆོས་མཐུན་པའི་འོད་དང་ལྡན་པ་གཞན་པ་བ་སངས་ལ་སོགས་པའི་འོད་ཟེར་ཅན་འོད་དང་ལྡན་པའོ། །ཉི་མས་ཞེས་བྱ་བ་ནི་ཚུལ་ཁྲིམས་ཀྱི་རང་བཞིན་གྱི་བསོད་ནམས་ཀྱི་ཡོན་ཏན་ལ་སོགས་པའོ། །སའི་དབང་ཕྱུག་ཅེས་བྱ་བ་ལ་སོགས་པའི་ཚིགས་བཅད་ནི་བཟོད་པའི་རང་བཞིན་གྱི་བསོད་ནམས་ཀྱི་ཚོགས་ཀྱི་འབྲས་བུ་སྟེ། ངེས་པར་འབྱུང་བ་སྟེ་ད་ལྟར་བྱུང་བའི་སྐྱེས་བུའི་བྱེད་པ་དགོན་པའི་རི་དགས་ཀྱང་ཅི་ཡང་མི་བྱེད་དོ་ཞེས་སྟོན་ཏོ། །དེ་ལྟར་བསོད་ནམས་མ་ཡིན་པ་རྗེས་སུ་འབྲང་
བ་ཞེས་བྱ་བ་ལ། ཇི་ལྟར་རྗེས་སུ་འབྲང་བ་ཡིན་ཞེ་ན། དེ་བསྟན་པའི་ཕྱིར། བསོད་ནམས་ཆེ་བས་ཞེས་བྱ་བ་འདིའི་དོན་ཡིན་ཏེ། བསྐྲད་པ་ཉིད་ཡིན་པས་བསྐྲད་པ་སྟེ། ཇི་ལྟར་གང་སུ་དག་གིས་བསྐྲད་ཅིང་དེ་རྗེས་སུ་འགྲོ་བ་བཟློག་སྟེ་དེ་དང་མི་མཐུན་པའི་ཕྱོགས་ལ་བརྟེན་པ་དེ་བཞིན་དུ། བསོད་ནམས་ཆེ་བས་སྐྲག་བ་བཞིན་དུ་དེ་ཉེ་བར་འགྲོ་བའི་གླགས་སྐབས་ཐོབ་པས་དེའི་མི་མཐུན་པའི་ཕྱོགས་ཀྱི་བསོད་ནམས་རབ་ཏུ་ཉམས་པས་དེའི་མི་མཐུན་པའི་ཕྱོགས་སོ། །ཁྲོས་བཞིན་ཞེས་བྱ་བ་གང་ལ་ཁྲོས་བཞིན་ཞེ་ན། བསོད་ནམས་ཆེ་བ་ལ་ཁྲོས་པ་བཞིན་དུ་དྲུང་དུ་འགྲོའོ། །སྔར་བསྟན་པའི་དེ་ལས་སྦྱིན་པ་ཚུལ་ཁྲིམས་ཞེས་བྱ་བའི་ཚིགས་བཅད་དེས་ནི་བསོད་ནམས་ཉི་ཚེ་སྤལ་བ་ལ་གྲོགས་པོ་བཙུད་པ་ཡིན་ནོ། །སྡུག་བསྔལ་གཞིར་གྱུར་ཞེས་བྱ་བའི་ཚིགས་བཅད་འདིས་ནི་མི་མཐུན་པའི་ཕྱོགས་སྤང་བ་དང། གཉེན་པོའི་ཕྱོགས་བསྟེན་པ་ལ་གྲོགས་པོ་དག་ཡང་དག་པར་འཛུད་པ་ཡིན་ནོ། །སྡུག་བསྔལ་གྱི་གཞིར་གྱུར་ཞེས་བྱ་བ་ནི་འདི་ལ་སྡུག་བསྔལ་གྱི་གནས་ཡིན་པས་སྡུག་བསྔལ་གནས་གཞི་སྟེ། གང་ལ་སྡུག་བསྔལ་གྱི་གནས་ཀྱི་བསོད་ནམས་མ་ཡིན་པའི་ལས་ཡོད་པ་དེ་ནི་སྡུག་བསྔལ་གྱི་གཞིའོ། །དེ་བས་ན་འདིས་ནི་སྡིག་པའི་ལས་ཏེ་ངན་སོང་གི་རྒྱུ་ཉིད་དུ་བསྟན་ཏོ། །གང་ལ་གཏམ་ངན་དང་རྗེས་སུ་འབྲེལ་པའི་སྡིག་པའི་ལམ་དེ་ནི་གཏམ་ངན་རྗེས་སུ་འབྲང་བའོ། །དེ་བས་སླར་ལོག་ལ་ཞེས་བྱ་བ་ནི་བསོད་ནམས་མ་ཡིན་པའི་ལམ་ལས་ལྡོག་པ་སྟེ། སེར་སྣ་དང་ཚུལ་ཁྲིམས་འཆལ་ཅིང་མི་བཟོད་པ་དེ་ལས་སླར་ལྡོག་པའོ། །དཔལ་ལྡན་པ་ཞེས་བྱ་བ་ནི་མཐོང་བའི་ཆོས་ཀྱི་གྲགས་པ་ལ་སོགས་པའོ། །བདེ་བ་རབ་ཏུ་འབྱུང་སྒྲུབ་ལ། ཞེས་བྱ་བ་ནི་བདེ་བ་རབ་ཏུ་འབྱུང་བའོ། །དེའི་སྒྲུབ་པ་ནི། བདེ་བ་རབ་ཏུ་འབྱུང་བ་སྒྲུབ་པས་ཏེ། འདིས་སྒྲུབ་པ་ཡིན་པས་སྒྲུབ་པའོ། །བསོད་ནམས་སྤྱད་པ་ལས་ཞེས་བྱ་བ་ནི་བསོད་ནམས་དང་འབྲེལ་པ་ལ་སྟེ། འདིས་ནི་རྟག་ཏུ་བྱེད་པ་ལ་སྦྱོར་བ་ཡིན་ནོ། །དེ་ལྟར་རེ་ཞིག་སྙན་པར་སྨྲ་བའི་མཚན་ཉིད་ཀྱི་བསྡུ་བའི་དངོས་པོས་བསྡུས་ནས་དོན་མཐུན་པའི་བསྡུ་
བའི་དངོས་པོས་བསྡུ་བའི་ཕྱིར། བདག་ཉིད་ཆེན་པོ་དེས་བསམས་པ་ཞེས་བྱ་བ་སྨོས་ཏེ། གཞན་དུ་ན་ཇི་སྐད་དུ་སྨྲས་པ་དེ་བཞིན་བྱེད་པ་ཉིད་དུ་སྟོན་པར་མི་འགྱུར་རོ། །འདིར་ཅིའི་ཕྱིར་སྦྱིན་པ་དང་དོན་སྤྱོད་པའི་བསྡུ་བའི་དངོས་པོ་མ་བཤད་ཅེ་ན། དེ་ནི་བཤད་པ་ཉིད་དེ། སྔར་སྦྱིན་པའི་རང་བཞིན་གྱི་བསྡུ་བའི་དངོས་པོ་བསྟན་པ་ནི་ཕན་ཚུན་གཉེན་དུ་འབྲེལ་པ་བཞིན་དུ་གཅིག་ལ་གཅིག་བྱམས་པར་ནི་གྱུར་ཞེས་བྱ་བའི་ཚིག་རྐང་གིས་བསྡུས་པ་ཡིན་ཏེ། ཐབས་སྦྱིན་པ་ཡང་བསྡུ་བའི་དངོས་པོར་གྲགས་པ་ཉིད་དེ་ཡང་བརྗོད་པར་མི་བྱའོ། །དོན་སྤྱོད་པའི་བསྡུ་བའི་དངོས་པོ་ཡང་བཤད་པ་དེ་ཉིད་དེ། གཅིག་ལ་གཅིག་སྤོབས་ཤིང་བཀུར་སྟི་ཞེས་བྱ་བ་ལ་སོགས་པའི་ཚིག་རྐང་གིས་བསྟན་ཏེ། གང་གི་ཕྱིར་སྤོབས་ཤིང་བཀུར་སྟི་ནི་དོན་སྤྱོད་པའི་བསྡུ་བའི་དངོས་པོ་སྟེ། དེ་བས་ན་བསྡུ་བའི་དངོས་པོ་བཞི་ཡང་བསྟན་པའི་ཚུལ་ཉིད་ཡིན་ཏེ། ཡང་ཚིག་བསྟན་པ་ནི་བརྗོད་པར་མི་ནུས་པའི་ཕྱིར་རོ། །མགྲོན་ལ་བསྙེན་བཀུར་བྱེད་པ་ཅིའི་ཕྱིར་ནུས་པ་མེད་ཅེ་ན། རྩྭ་ནི་སོས་བཅད་པར་ནུས་པ་ཡིན་ཏེ། དེ་བས་ན་བདག་གི་སོ་རྩེས་ཞེས་བྱ་བའི་ཚིགས་སུ་བཅད་པ་འདི་སྟེ། སྔར་མ་བྱུང་བ་ཉིད་བསྟན་ཅིང་མགྲོན་ལ་བསྙེན་བཀུར་མི་ནུས་པ་ཉིད་དེ། དེ་ལྟར་གསལ་བ་ཉིད་དུ་བསྟན་པའི་ཕྱིར་ཚིགས་བཅད་བརྩམས་པ་ཡིན་ཏེ། རྩྭའི་མྱུ་གུ་ཁ་བོ་ནི་ཞེས་བྱ་བ་ནི་རྫས་དང་རོས་མགྲོན་ལ་སྦྱིན་དུ་མི་རུང་བ་ཉིད་དུ་བསྟན་ཏོ། །ཡོང་ཡེ་ཞེས་བྱ་བ་ནི་མདོར་བ་སྤུ་ན་ནུས་པ་མེད་པ་དང་མཉམ་པའི་སྨད་པ་ནི་ཅུང་ཟད་ཀྱང་མེད་པའི་ཕྱིར་རོ། །དེ་བས་སྦྱིན་པ་མི་ནུས་པ་ཞེས་བྱ་བ་ནི་གཞན་ལ་ཕན་འདོགས་པའི་ནུས་པ་ཉིད་ལ་ཞན་པའོ། །ཡང་ན་ནུས་པ་མེད་པ་དང་ཞན་པ་ནི་ནུས་མེད་ཞན་པ་སྟེ། སློང་བ་རྣམས་ལ་ཕན་འདོགས་པར་མི་ནུས་པའོ། །གསོན་ཡང་ཅི་ལ་ཕན་ཞེས་བྱ་བ་ནི་གསོན་པ་ཞེས་བྱ་བ་འདིས་གཞན་ལ་ཕན་འདོགས་པ་གང་ཡིན་པ་དེ་ནི་ནུས་པ་མེད་པས་དོན་ཅི་ཞིག་ཡོད་ཅེས་སོ། །དགའ་བ་ཞེས་བྱ་བ་ནི་དགའ་བའི་རྒྱུ་སྟེ། རྒྱུ་ལ་འབྲས་བུ་བཏགས་པའི་ཕྱིར་རོ། །མྱ་ངན་ཡང་མྱ་ངན་གྱི་རྒྱུ་སྟེ། བདག་ནི་མགྲོན་བཞིན་འོངས་གྱུར་ན། །
ཞེས་བྱ་བ་ནི་སྔར་བསྟན་པའི་ནུས་པ་མེད་པ་དང་ལྡན་པའོ། །འདི་ལྟར་ཞེས་བྱ་བ་ནི་བདག་གི་སོ་རྩེས་ཞེས་བྱ་བའི་ཚིགས་བཅད་དུ་བསྟན་པ་དེའི་རྣམ་པས་མགྲོན་ལ་བསྙེན་བཀུར་བྱ་བར་མི་ནུས་པས་སོ། །མགྲོན་རྣམས་ཀྱི་བསྙེན་བཀུར་ནི་མགྲོན་གྱི་བསྙེན་བཀུར་རོ། །དེ་ལ་མི་རུང་བ་ནི་མགྲོན་གྱི་བསྙེན་བཀུར་བྱ་བར་མི་རུང་བའོ། །དེས་སྙིང་པོ་མེད་པ་ནི་མགྲོན་ལ་བསྙེན་བཀུར་བྱར་མི་རུང་བས་སྙིང་པོ་མེད་པའོ། །ལུས་ཉིད་ནོར་ཡིན་ཏེ། ནོར་ནི་འདོད་པའི་དོན་སྒྲུབ་པ་ཉིད་ཀྱིས་ཏེ། སེམས་ནི་ཁྱོད་དེ་བས་ན་རྟོགས་པ་དེ་ལས་མི་དགའ་བ་མ་བྱེད་ཅིག་པའོ། །ཡོངས་སུ་རྫོགས་པར་ཡོད་པ་འདི་ས་མགྲོན་གྱི་སྐྱེ་བོ་སྤོབས་པར་སློང་བ་ལ་མགྲོན་བྱའོ་ཞེས་སོ། །མཐུ་དང་རབ་ཏུ་དང་བ་དག་རབ་ཏུ་བསྟན་པ་སྟེ། ལྷ་རྣམས་བྱང་ཆུབ་སེམས་དཔའི་མཐུ་སྟོན་པར་བྱེད་ཅིང༌། བྱང་ཆུབ་སེམས་དཔའི་གཏམ་ལྷ་རྣམས་སྒྲོགས་པར་བྱེད་དོ། །མཐུ་དང་དང་བ་ལྷ་རྣམས་ལ་ནི་བསྟན་པར་གྱུར། །ཞེས་བྱ་བ་དེའི་རྒྱུ་བསྟན་པའི་ཕྱིར། དེ་ནས་ས་གཞི་ཞེས་བྱ་བ་ལ་སོགས་པའི་ཚིགས་བཅད་གསུམ་སྟེ། ཚིགས་བཅད་འདི་གསུམ་གྱི་བསྡུས་པའི་དོན་ནི་ས་འགུལ་བའི་མཚན་མ་དང༌། མཆོད་པའི་དབང་དུ་བྱས་པ་སྟེ། མཁའ་ལས་ལྷའི་རྔ་སྒྲ་ཞེས་བྱ་བ་ལ་སོགས་པ་ནི་མཆོད་པའི་དོན་ཏོ། །ཕན་ཚུན་བསྔོས་པས་མེ་ཏོག་གི་རྡུལ་རྣམས་ལྷགས་པར་གྱུར་པ་གང་ཡིན་པ་དེ་ནི་ཕན་ཚུན་བསྔོས་པའི་རྡུལ་རྣམས་ལྷགས་པའི་མེ་ཏོག་གོ །རབ་ཏུ་འཁྲིགས་པ་སྲབ་མོའི་ཞེས་བྱ་བ་ནི་རབ་ཏུ་འཁྲིགས་པ་གང་ཡིན་པའི་སྲབ་མོའི་གོས་ཡིན་གྱི། གཞན་རབ་ཏུ་འཁྲིགས་པ་ནི་མ་ཡིན་ནོ། །དེ་ལས་ཐོས་པ་ནི་ས་འགུལ་བ་ལ་སོགས་པའོ། །རབ་ཏུ་དགའ་ཞིང་ངོ་མཚར་སྐྱེས་པ་ནི་སྔར་དང་བ་ཐོབ་པའོ། །ཡིད་ལ་ཡ་མཚན་དང་ངོ་མཚར་ཆེ་བ་ཞེས་བྱ་བ་ནི་ངོ་མཚར་ཡ་མཚན་ཆེ་བ་གཉིས་ཀྱིས་དྲངས་པ་སྟེ། དེས་ངོ་མཚར་དུ་གྱུར་ནས་རྣམ་པར་རྟོག་པ་རྨད་དུ་བྱུང་བར་གྱུར་པའི་ཕྱིར་རོ། །ངོ་མཚར་ཆེ་བ་དེས་ན་དེ་ཉིད་ཉམས་སད་པས་འདོད་པ་སྟེ་དེས་སོ། །ཉི་མའི་འོད་རབ་ཏུ་གསལ་བ་གང་ཡིན་བ་དེ་ནི་ཉི་མའི་འོད་ཟེར་རབ་ཏུ་གསལ་བར་
གྱུར་པའོ། །འདིར་ཚ་བས་བྱས་པའི་ངལ་བ་དེས་གདུངས་པ་གང་ཡིན་པ་དེ་ནི་ཚ་བས་གདུངས་ཤིང་ངལ་བར་གྱུར་པའོ། །དེ་དག་གིས་ནི་བཀྲེས་པ་དང་སྐོམ་པ་དང༌། ངལ་བས་གདུངས་ཤིང་མགྲིན་པ་འགགས་པའོ། །ཡང་ན་བཀྲེས་པ་དང༌། སྐོམ་པ་དང༌། ངལ་བས་བྱས་པའི་གདུང་བ་དེས་མགྲིན་པ་འགགས་པ་གང་ཡིན་པའོ། །གྲོགས་དང་བྲལ་བས་གཅིག་པུར་གྱུར། །ཞེས་བྱ་བའི་ཚིགས་སུ་བཅད་པ་འདིའི་བསྡུས་པའི་དོན་ནི་ལུས་དང་སེམས་སྡུག་བསྔལ་གྱིས་ཉམ་ཐག་པ་བདག་ལ་བསྐྱབ་པའི་རིགས་སོ། །ཞེས་བསྟན་ཏོ། །དེ་ལ་སེམས་ཀྱི་སྡུག་བསྔལ་ནི་འཇིགས་པ་སྟེ། གྲོགས་མེད་པའི་ཕྱིར་རོ། །ནགས་ཚལ་སྟུག་པོའི་ནང་དུ་འདུག་པ་ནི་ལུས་ཀྱི་སྡུག་བསྔལ་ཡིན་ཏེ། དེ་ཡང་རྣམ་པ་གཉིས་སོ། །ལྷན་ཅིག་སྐྱེས་པའི་སྡུག་བསྔལ་དང༌། ལམ་དུ་ཞུགས་པས་དུབ་པའི་སྡུག་བསྔལ་ཏེ། བཀྲེས་པ་དང་ངལ་བ་དེ་གཉིས་ཀྱིས་དུབ་པའི་ལུས་ཞེས་སྨོས་པའི་ཕྱིར་རོ། །སྐོམ་པ་ཡང་ལྷན་ཅིག་སྐྱེས་པའི་སྡུག་བསྔལ་གྱི་རང་བཞིན་ཡིན་པས་མ་སྨོས་སོ། །ཚིགས་བཅད་སྔ་མའི་དོན་ཉིད་བསྟན་པའི་ཕྱིར་ཚིགས་བཅད་གཉིས་པ་ཡང་བརྩམས་ཏེ། བདག་ནི་ལམ་དང་ལམ་མིན་ཞེས་བྱ་བའོ། །ཡང་ན་ཁྱད་པར་དམིགས་པ་ཡིན་ཏེ། ཚིགས་བཅད་དེ་ལས་ནི་སྔ་མར་ནགས་ཚལ་སྟུག་པོའི་ནང་དུ་འདུག་ཅེས་བཤད་པ་ལ། ནགས་ཚལ་གྱི་རྒྱུ་མ་བསྟན་པས་དེའི་རྒྱུ་ལམ་དང་ལམ་མིན་ཞེས་བྱ་བ་འདིས་བསྟན་ཏོ། །ཇི་ལྟར་བསྟན་པའི་དོན་ཉིད་ཚ་བ་དང༌། སྐོམ་པ་དང༌། ངལ་བའོ་ཞེས་སྔར་བསྟན་པའི་ཁྱད་པར་ཏེ། སྔར་བཤད་པའི་ཚིགས་བཅད་ཀྱི་དོན་ཡང་ལྷན་ཅིག་སྐྱེས་པའི་སྡུག་བསྔལ་སྐོམ་པ་བསྐང་བ་སྟེ། དེའི་རང་བཞིན་བཀྲེས་པའི་སྡུག་བསྔལ་སྨོས་པ་ཡང་རབ་ཏུ་གྲུབ་བོ། །རིངས་རིངས་ལྟར་མགྱོགས་སུ་དོང་སྟེ་ཞེས་བྱ་བ་ནི་རྟབས་ཤིང་རིངས་པས་མགྱོགས་པར་འགྲོ་བ་གང་ཡིན་བ་དེ་ནི་རིངས་རིངས་ལྟར་མགྱོགས་སུ་དོང་བའོ། །དགའ་བ་དང་རྟབ་རྟབ་པོ་ནི་དགའ་བས་རྟབ་རྟབ་པའོ། །དེ་གཉིས་ཀྱིས་མགྱོགས་པར་འགྲོ་བ་གང་ཡིན་པ་དེ་ནི་དགའ་བས་རྟབ་རྟབ་པོར་གྱུར་ཅིང་
མགྱོགས་པོར་སོང་བའོ། །ཉ་བ་རྣམས་ཀྱིས་བརྗེད་ནས་བོར་བའམ། ཞེས་བྱ་བ་འདིས་ནི་གཞན་གྱིས་བསད་པ་ཉིད་དུ་བསྟན་ཏོ། །སྡངས་ཏེ་བརྒལ་བས་ཐང་ལ་འགྲེས་པ་དག །ཅེས་བྱ་བ་འདིས་ནི་རང་ཉིད་ཤི་བ་ཉིད་དུ་བསྟན་ཏེ། གཉི་གས་ཀྱང་བདག་གིས་མ་བསད་པ་ཉིད་དུ་བསྟན་ཏོ། །དེ་བས་ན་སྦྱིན་པའི་དངོས་པོ་ཉོན་མོངས་པ་མེད་པ་ཉིད་དུ་བསྟན་ཏོ། །ལ་ལ་ཞིག་གིས་ཞེས་བྱ་བ་འདིས་ནི་རྐུ་བ་དང་རྔོན་པ་མ་ཡིན་པ་ཉིད་དུ་བསྟན་ཏེ། དེས་ན་ཡང་ཉོན་མོངས་པ་མེད་པ་སྟེ། ལྷག་མ་རྣམས་ནི་སྔ་མ་བཞིན་ནོ། །ཆུང་དུ་ན་འབྲས་བུ་འདི་སྨོས་པ་ཡིན་ནོ། །རི་བོང་གྲོང་ན་ཉེ་བར་གནས་པ་གཞན་དག་ལ་ནི་ཡོད་དེ། བདག་ནི་ནགས་སུ་སྐྱེས་ནས་མེད་དོ་ཞེས་བསྟན་ཏོ། །དེས་ན་ཡང་མུད་ག་ལ་སོགས་པ་བཙོས་པའི་ཁྱད་པར་ལས་མ་གཏོགས་པར་ཡང་བཟའ་བར་ནུས་ཏེ། དེས་ན་དེ་དག་ཉིད་སྨོས་སོ། །གང་གི་དོན་སྒྲུབ་ནོར་ཅི་ཡོད་པ་ཞེས་བྱ་བ་འདིས་ནི་རང་དགར་ཡོད་པས་ཉོན་མོངས་པ་མེད་པའི་སྦྱིན་པ་བསྟན་ཏོ། །ལྷག་པའི་ཞེས་བྱ་བ་ནི་ཁྱད་པར་དུ་གྱུར་པའོ། །ནོར་དབྱིག་ཅེས་བྱ་བ་ནི་ནོར་ཐམས་ཅད་དེ་རེ་ཞིག་བདག་ཉིད་ཅེས་བྱ་བ་ལ། བདག་ཡོངས་སུ་གཏོང་བ་ལ་དགོངས་པའོ། །ཁྱོད་ལ་བརྟེན་ནས་བདག་ནི་དོན་ཡོད་གྱུར། །ཞེས་བྱ་བ་ནི་འདི་ལྟར་སྦྱིན་པས་སོ། །གུས་ཤིང་རིམ་གྲོ་སྐྱེད་དེ་ཞེས་བྱ་བ་ལ། གུས་པ་དང་རིམ་གྲོ་མེད་པར་གཞན་དུ་ན་དེ་ཇི་ལྟར་ནུས་པར་གྱུར་པའོ། །དེ་ལ་དེ་སྐད་ཅེས་སྨྲས་ཏེ་ཞེས་བྱ་བ་ནི་སློང་བའི་མགྲོན་ལ་དགའ་ཞིང་ཡོན་ཏན་ཆེ་བར་རྟོགས་ནས་ཞེས་བྱ་བའི་དོན་ཏོ། །ཇི་ལྟར་མཆོག་ཏུ་དགའ་བ་ཡིན་ཞེ་ན། ནོར་འདོད་པ་དག་གཏེར་ནི་མཐོང་བ་བཞིན། །ཞེས་བྱ་བ་ཡིན་ནོ། །ཇི་ལྟ་བུའི་མེའི་ནང་དུ་ཞུགས་ཤེ་ན། མེ་འབར་དེའི་ནང་དུ་ཞེས་བྱ་བ་དང༌། པདྨ་རྒྱས་པའི་ཆུ་ནང་ངང་པ་བཞིན། །ཞེས་བྱ་བའོ། །ཇི་ལྟར་གསེར་མཐོང་བས་ནི་མཆོག་ཏུ་དགའ་བ་དེ་ལྟ་བུ་མ་ཡིན་ཏེ། དེ་བས་ན་འཕྲལ་ལ་ཞེས་སྨོས་སོ། །ཅི་ཞིག་བཏང་ཞེ་ན། ལུས་སོ། །ཇི་ལྟར་བཏང་ཞེ་ན། ཆགས་པ་མེད་པ་མགྲོན་ལ་བྱམས་པའི་ཕྱིར་རོ། །འདི་ལྟར་
ཡང་ཆགས་པ་མེད་པ་ནི་མེ་ཏོག་དམན་མ་བཞིན་ནོ། །གཏོང་བ་རྒྱ་ཆེན་ཞེས་བྱ་བ་སྟེ། དེ་བས་ན་ལུས་ལ་ཆགས་པ་མེད་པར་ཡོངས་སུ་གཏོང་བས་སོ། །སེམས་ཀྱང་གསལ་བ་ནི་ཞེས་བྱ་བ་ནི་མགྲོན་ལ་བྱམས་པས་གཏོང་བའོ། །གཏོང་བ་རྒྱ་ཆེ་བ་དང་སེམས་ཀྱང་གསལ་བའི་རྒྱུ་བསྒྲུབ་པའི་ཕྱིར། །ཨེ་མའོ་ཡོན་ཏན་གོམས་བྱས་པ། །ཞེས་བྱ་བའི་ཚིགས་བཅད་སྨོས་ཏེ། དེ་བས་ལུས་ལ་ཆགས་པ་མེད་པར་དུད་འགྲོའི་སྐྱེ་གནས་སུ་གྱུར་པ་ཡང་སེམས་གསལ་བར་བྱེད་པ་དང༌། ཡོན་ཏན་ལ་གོམས་པའི་ཕྱིར་རོ། །རྒྱུ་དང་སྐྱེ་བ་སྣ་ཚོགས་པ་དག་ལ་ཡང་གཏོང་བ་རྒྱ་ཆེ་བར་བྱེད་པའོ། །དམ་པའི་སྤྱོད་གཞོལ་བ་ཞེས་བྱ་བ་ནི་སྙིང་སྟོབས་རྒྱ་ཆེ་བའོ། །གང་དུ་རྣམ་པར་མཛེས་པ་ནི་ཟླ་བ་སྟེ། གནས་སྐབས་ཇི་ལྟ་བ་བཞིན་དུ་ཡོངས་སུ་རྫོགས་པ་སྟེ། ད་ལྟའི་དུས་སུ་ཡང་གཉི་ག་ལ་སྦྱར་བར་བྱའོ། །ཇི་ལྟ་བུ་ཞེ་ན། དངུལ་གྱི་མེ་ལོང་བཞིན་དུའོ། །ཇི་ལྟར་མཛེས་པར་སྣང་ཞེ་ན། ཟླ་བའི་གཟུགས་བརྙན་བཞིན་དུ་མདངས་དང་ལྡན་པ་ལྟ་བུར་རོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་རི་བོང་གི་སྐྱེས་པའི་རབས་སོ།། །།དཀའ་ཐུབ་ཀྱི་ནགས་ཚལ་ན་གནས་པ་རྣམས་ལ་ཡང་ཞེས་བྱ་བ་ནི་གཞན་ཡོངས་སུ་བཟུང་བ་སྤངས་པའི་ཕྱིར་དཀའ་ཐུབ་ཀྱི་ནགས་ན་ནི་གཏོང་བ་མེད་དེ། གཏོང་བའི་ནུས་པ་མེད་པ་ཡིན་པའི་ཕྱིར་དེ་བས་ན་ཡང་གི་སྒྲ་སྨོས་སོ། །ཁྱིམ་ན་གནས་པ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ནི་དེ་ལས་བཟློག་པའི་ཕྱིར་རོ། །འཇིག་རྟེན་ལ་ཕན་པའི་ཕྱིར་འཁོར་བ་ན་གནས་པའི་ཚེ་ཞེས་བྱ་བ་ནི་གལ་ཏེ་འཇིག་རྟེན་ལ་ཕན་པ་ལ་ལྟོས་པ་མེད་པར་མཛད་ན་ནི་སྐད་ཅིག་གཅིག་གིས་འཁོར་བའི་ལམ་གྱི་མཐར་གཤེགས་པར་འགྱུར་རོ་ཞེས་བྱ་བའི་དོན་ཏོ། །སྤྱོད་པ་དང་ཡོན་ཏན་རྣམ་པར་དག་པས་མངོན་པར་མཚོན་པ་ཞེས་བྱ་བ་ལ། སྤྱོད་པ་ནི་ལུས་དང་ངག་གི་མཚན་ཉིད་དོ། །ཡོན་ཏན་ཡང་སྤྱོད་པའི་མཚན་ཉིད་དོ། །ཡང་ན་སྤྱོད་པ་ནི་སྦྱོར་པའོ། །ཡོན་ཏན་ནི་བསམས་པའོ། །སྤྱོད་པ་དང་ཡོན་ཏན་དག་ནི་རྣམ་པར་དག་པའི་སྤྱོད་པ་དང་ཡོན་ཏན་རྣམ་པར་དག་པའོ། །
དེས་མངོན་པར་མཚོན་པ་ནི་སྤྱོད་པ་དང་ཡོན་ཏན་རྣམ་པར་དག་པས་མཚོན་པའོ། །སའི་སྟེང་ན་རྒྱན་དུ་གྱུར་པ་ཞེས་བྱ་བ་ནི་རིགས་མཐོ་ཞིང་མཐོ་བའི་རྒྱུད་དུ་གྱུར་པ་སྟེ། ཤས་ཆེར་ལྷག་པར་མཛེས་པ་དེས་རྒྱན་དུ་གྱུར། །སྐྱེས་པའི་ལས་ལ་སོགས་པ་བྱ་བ་རྣམས་ནི་བྱས་ཞེས་བྱ་བ་འདིས་ནི་མཆོད་སྦྱིན་བསྟན་ཏོ། །རིག་བྱེད་ཡན་ལག་དང་བཅས་པ་ནི་བསླབས་ཞེས་བྱ་བ་འདིས་ནི་འདོན་པ་བསླབས་པའོ། །མཁས་པའི་གྲགས་པ་ས་མིའི་འཇིག་རྟེན་ཁྱབ་པར་བྱས། །ཞེས་བྱ་བ་འདིས་ནི་འདོན་དུ་འཇུག་པ་བསྟན་ཏོ། །ཕུལ་བ་རྣམས་བླངས་པ་ཞེས་བྱ་བ་འདིས་ནི་ལེན་པ་བསྟན་ཏོ། །གཉེན་དང་མཛའ་བཤེས་རྟེན་དང་ཞེས་བྱ་བ་ལ་སོགས་པས་ནི་སྦྱིན་པ་བསྟན་ཏོ། །བྲམ་ཟེ་ལས་སུ་བསྟན་པ་ལས་ལྷག་མ་ཅི་ཞིག་ལུས་ཤེ་ན། མཆོད་སྦྱིན་བྱེད་དུ་འཇུག་པ་སྟེ། དེ་ནི་བྱང་ཆུབ་སེམས་དཔའ་མི་མཛད་དེ། འགྲོ་བ་ཐམས་ཅད་ལ་འཚེ་བ་མེད་པ་དང་ལྡན་པའི་ཕྱིར་ཏེ། འཚེ་བ་སྤོང་བར་འདོད་པས་སོ། །མཉེན་དང་མཛའ་བཤེས་རྟེན་དང་ཞེས་བྱ་བ་ནི་ལས་དང་གསོ་དགོས་པའི་དབང་དུ་བྱས་པའོ། །ཕོངས་པ་རྣམས་ཞེས་བྱ་བ་ནི་སྙིང་རྗེའི་ཞིང་གི་དབང་དུ་བྱས་པའོ། །མགྲོན་དང་བཀུར་སྟི་བྱ་བ་རྣམས། །ཞེས་བྱ་བ་ནི་ཡོན་ཏན་གྱི་ཞིང་སྟེ་མགྲོན་ཡང་ཡོན་ཏན་གྱི་ཞིང་དུ་གཟུང་བར་བྱ་སྟེ། གང་གི་ཕྱིར་སློང་བ་དག་ནི་བྱང་ཆུབ་སེམས་དཔའི་དགེ་བའི་བཤེས་གཉེན་དུ་གཟུང་བར་བྱའོ་ཞེས་བྱ་བའི་ཚིག་གིས་སོ། །བླ་མ་ཞེས་བྱ་བ་ནི་ཕན་འདོགས་པའི་ཞིང་རོ། །ཟླ་བ་ལྟ་བུ་ནི་མཁས་པར་གྲགས་པའོ། །སྟོན་ཀ་ལྟ་བུ་ནི་གཏོང་བ་དང་དཔའ་བའོ། །བྱ་བ་ངན་པས་བྲེལ་པའི་ཉེས་པས་གླགས་པ་ཞེས་བྱ་བས་ནི་མངོན་པར་མཐོ་བའི་ཕྱོགས་དང་འགལ་བར་བསྟན་ཏོ། །བག་མེད་པའི་གནས་སུ་གྱུར་པ་ཞེས་བྱ་བ་འདིས་ནི་ངེས་པར་ལེགས་པ་དང་འགལ་བར་བསྟན་ཏོ། །བག་མེད་པ་གང་ཞེ་ན། དགེ་བའི་ཆོས་རྣམས་མི་སྒོམ་པ་སྟེ། འདིས་ནི་ཉོན་མོངས་པའི་ཀུན་ནས་ཉོན་མོངས་པས་ཉོན་མོངས་བ་ཉིད་དུ་བསྟན་ཏོ། །སྔ་མས་ནི་ལས་ཀྱི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །
ད་ནི་སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་བསྟན་ཏེ། ཚོལ་བ་ལ་སོགས་པའི་སྐྱོན་ཡིན་པའི་ཕྱིར་རོ། །ཉེ་བར་ཞི་བ་དང་འགལ་བ་ཞེས་བྱ་བ་ནི་ཉེ་བར་ལོངས་སྤྱོད་པའོ། །དབེན་དུ་གྱུར་པ་ཞེས་བྱ་བ་ནི་འཇིག་པའི་དུས་སུ་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་ལ་སོགས་པའི་ཕོངས་པ་བརྒྱའི་དབེན་དུ་གྱུར་པའི་ཕྱིར་རོ། །སོ་ཚིས་ཀྱི་ལས་བསྒྲུབ་པ་མཐའ་ཡས་པས་ཞེས་བྱ་བ་ནི་ནོར་སྒྲུབ་པ་ལ་སོགས་པའི་ཡོངས་སུ་མ་གྲུབ་པ་དང་མཐར་མ་ཕྱིན་པས་སོ། །ཆོག་མི་ཤེས་པ་ཞེས་བྱ་བ་ནི་ཉེ་བར་ལོངས་སྤྱོད་པས་ངོམས་པ་མེད་པའོ། །དེའི་ཉེས་པ་མེད་ཅིང་བདེ་ལ་ཞེས་བྱ་བ་ནི་ངན་པས་བྲེལ་པའི་ཉེས་པས་གླགས་པ་མེད་པའི་བདེ་བའོ། །ཆོས་སྒྲུབ་པ་དང་རྗེས་སུ་མཐུན་པ་ཞེས་བྱ་བ་ལ་ཆོས་ནི་འདིར་མངོན་པར་མཐོ་བ་ལ་དགོངས་སོ། །དེ་སྒྲུབ་པ་ནི་ཆོས་སྒྲུབ་པའོ། །འདིའི་རྗེས་སུ་མཐུན་པ་ནི་རྗེས་སུ་འགྲོ་བ་དང་ལུགས་སུ་འབྱུང་བ་སྟེ། བྱ་བ་ངན་པས་བྲེལ་པའི་གཉེན་པོས་བྱ་བ་བཟང་པོ་སྒྲུབ་པ་དང་རྗེས་སུ་མཐུན་པ་ཉིད་དུ་བསྟན་ཏོ། །ཐར་པའི་ཆོས་བརྩམས་པའི་གནས་སུ་གྱུར་པ་ཞེས་བྱ་བ་ལ། འདིར་ཆོས་ནི་ཐར་པ་སྒྲུབ་པའི་ཆོས་ལ་དགོངས་སོ། །ཐར་པའི་ཆོས་བརྩམས་པ་དེའི་རྩོམ་པའི་ལྷག་པའི་ཚུལ་ཁྲིམས་དང་སེམས་དང༌། ཤེས་རབ་ཀྱི་མཚན་ཉིད་དེའི་གནས་སུ་གྱུར་པའོ། །ཉོན་མ་མོངས་པར་རྙེད་པ་ཞེས་བྱ་བ་ནི་བསགས་པའི་སྡུག་བསྔལ་མ་ཡིན་པས་རྙེད་པ་སྟེ། སྔ་མ་ཉིད་དུ་ཡན་ཏན་ལ་དགའ་བའི་སྦྱིན་པ་པོ་དག་གིས་མཆོད་ཅིང་ཕུལ་བ་བསླངས་པ་ཞེས་བསྟན་པའི་ཕྱིར་ཏེ། འདིས་ནི་སྦྱིན་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །འཇིག་རྟེན་གྱི་བཀུར་སྟི་བྱས་པ་ཡིད་དུ་འོང་བ་དག་ཀྱང་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏེ། བདག་ཉིད་ཀྱི་ཕུན་སུམ་ཚོགས་པ་སྔར་བསྟན་པའི་ཕྱིར་ཚུལ་ཁྲིམས་ཀྱི་འབྲས་བུ་ཡང་བསྟན་ཏོ་ཞེས་བྱ་བའི་ཚིག་གིས་སོ། །རབ་ཏུ་བྱུང་བ་དཀའ་ཐུབ་ཅན་གྱི་དུལ་བ་དང་བསྡམས་པ་ལ་རབ་ཏུ་འབད་པ་ཞེས་བྱ་བ་ལ་
རབ་ཏུ་བྱུང་བའི་དཀའ་ཐུབ་ཀྱིས་དུལ་བ་དང་བསྡམས་པ་ནི་དཀའ་ཐུབ་ཅན་གྱི་རབ་ཏུ་བྱུང་བ་དུལ་བ་དང་བསྡམས་པའོ། །དེ་རབ་ཏུ་བྱུང་བའི་དུལ་བ་དང་བསྡམས་པ་མཆོག་ཏུ་བྱེད་པ་ནི་གཙོ་བོར་བྱེད་པ་སྟེ། དུལ་བ་དང་བསྡམས་པ་ཞེས་བྱ་བའི་དོན་ཏོ།། གྲགས་པ་ཆེ་བ་དང་ཞེས་བྱ་བ་ནི་གྲགས་པ་གསལ་བར་གྱུར་པས་སོ། །སྔོན་ཤེས་པ་རྗེས་སུ་དྲན་པ་དང་ཞེས་བྱ་བ་ནི་ཡོངས་སུ་འདྲིས་པའི་ཕྱིར་རོ། །སྲིད་པའི་ཡོན་ཏན་དང༌། རབ་ཏུ་ཞི་བས་མཚོན་པའི་ཕྱིར་ཞེས་བྱ་བ་ནི་སྲིད་པའི་ཡོན་ཏན་ཉེ་བར་ཞི་བ་གང་ཡིན་པ་དེ་ནི་རབ་ཏུ་ཞི་བའོ། །སྲིད་པའི་ཡོན་ཏན་ཉིད་རབ་ཏུ་ཞི་བ་དེས་མངོན་པར་མཚོན་ནས་སྲིད་པའི་ཡོན་ཏན་རབ་ཏུ་ཞི་བས་མངོན་པར་མཚོན་པའོ། །འདིས་ནི་ཐོས་པ་སྟེ། འགྲོགས་པས་ནི་མ་ཡིན་ནོ། །དེ་ལྟར་ན་མཐོང་བ་ཙམ་གྱིས་དེ་བཞིན་དུ་འོང་བར་འགྱུར་རོ་ཞེས་སྨོས་ཏེ། སྔོན་ཁྱིམ་པའི་གནས་སྐབས་བཞིན་རབ་ཏུ་བྱུང་ནས་ཀྱང་རབ་ཏུ་དབེན་པའི་བདེ་བ་མེད་པར་བྱེད་པ་འཁྲུག་པ་དང་ཞེས་བྱ་བ་ནི་བསམ་གཏན་གྱི་བདེ་བ་བཅོམ་པའོ། །ཡང་ན་རབ་ཏུ་བྱུང་བའི་བདེ་བ་བཅོམ་པའོ། །ཅི་ལྟ་ཞེ་ན། གཡེང་བ་དང་བར་ཆད་དུ་གྱུར་པ་དེ་ལ་ཞེས་བྱ་བ་ནི་གཡེང་བ་དང་བར་ཆད་དུ་གྱུར་པའི་ཁྱིམ་པའི་འདུ་འཛི་སྟེ། དབེན་པའི་འདུ་འཛིས་བར་དུ་གཅོད་པར་བྱེད་པས་འདྲེས་པའོ། །དེ་ལ་མི་དགའ་ནས་ཞེས་བྱ་བ་ནི་གཞན་གྱིས་ནི་དབེན་པའི་རོ་མི་ཤེས་ཤིང་འདུ་འཛི་ལ་དགའ་བ་སྟེ། དེ་བས་ན་མངོན་པར་འཇུག་པ་ལ་དགའ་བ་ཞེས་བསྟན་ཏོ། །རབ་ཏུ་དབེན་པ་ལ་དགའ་བའི་ཕྱིར་ཞེས་བྱ་བ་ལ་དགའ་བའི་ཕྱིར་ཞེས་བྱ་བ་ནི་ལུས་དང་སེམས་དབེན་པ་ལ་དགའ་བའི་ཕྱིར་ཏེ། ལུས་དབེན་པ་ནི་གཉིས་སུ་མེད་པར་གནས་པའོ། །སེམས་དབེན་པ་ནི་ཉོན་མོངས་པས་ཀུན་ཏུ་བཅོམ་པའི་སེམས་སྤངས་ཤིང་སེམས་ཀྱི་རྒྱུད་གཅིག་ཏུ་གྱུར་པའོ། །ཨནད་རྙིལ་གྱི་བཅག་འཕྲོ་ལྟར་མངོན་པར་སྔོ་བའི་ཆོས་གསལ་བ་གང་ཡིན་པའི་རླབས་ཀྱི་ཕྲེང་བ་འདི་ནི་ཨནད་རྙིལ་ལྟར་མདོག་སྔོ་བའོ། །དེ་འཐོར་བས་མཐའ་མར་གཏོར་བ་དེ་ནི་འཐོར་བས་མཐའ་
གཏོར་བའོ། །འདི་དག་གིས་ནི་སྐྱེ་བོ་གཞན་གྱིས་བགྲོད་པར་མི་ནུས་པར་བསྟན་ཏོ། །ས་གཞི་བྱེ་མ་སྐྱ་བོས་ཁེབས་པ་ཞེས་བྱ་བ་ནི་ཉམས་དགའ་བ་དང༌། རྐང་པ་དོར་བ་ན་རེག་ན་བདེ་བ་ཉིད་དུ་བསྟན་ཏོ། །མེ་ཏོག་དང་འབྲས་བུ་དང་འདབ་མས་བརྒྱན་པ་ཞེས་བྱ་བ་ནི་ཉམས་དགའ་བ་དང༌། འཚོ་བ་སྒྲུབ་ཏུ་རུང་བ་ཉིད་དུ་བསྟན་ཏོ། །ཤིང་རྣམ་པ་སྣ་ཚོགས་ཀྱིས་མཛེས་པར་བྱས་པ་ཞེས་བྱ་བ་ནི་འཚོ་བ་ཡོད་པ་སྒྲུབ་པ་དང་རྟག་ཏུ་མི་འབྲལ་བ་ཉིད་དུ་བསྟན་ཏོ། །ཆུ་གཙང་མ་བཏུང་དུ་རུང་བ་ཡོད་པ་ཞེས་བྱ་བ་ནི་བཏུང་བ་དང། ཁྲུས་དང༌། གཙང་སྦྲའི་ཡོ་བྱད་ཉིད་བསྟན་ཏོ། །དཀའ་ཐུབ་ཀྱི་གནས་དཔལ་དང་ལྡན་པར་བྱས་སོ་ཞེས་བྱ་བ་ནི་དཀའ་ཐུབ་ལ་དཀའ་ཐུབ་ཅན་དག་གིས་ལྷག་པར་བསྟེན་པའི་ཕྱོགས་ནི་དཀའ་ཐུབ་ཀྱི་གནས་ཞེས་བརྗོད་དོ། །ལུས་བཟང་ཞེས་བྱ་བ་ནི་ཁྱད་པར་དུ་གྱུར་པའི་ལུས་ཤིན་ཏུ་བཟང་བའོ། །རིང་པར་གྱུར་པ་ནི་ལུས་ཤིན་ཏུ་བཟང་པོ་དེ་ལོ་མ་དང༌། འབྲས་བུ་དང༌། རྩ་བ་ལ་སོགས་པ་ཟ་བའི་ཕྱིར་རོ། །དེ་ན་ཞེས་བྱ་བ་ནི་ཀ་རའི་གླིང་ནའོ། །དཀའ་ཐུབ་ཅན་ཞེས་བྱ་བ་ནི་དུལ་བ་དང་སྡོམ་པ་ལ་སོགས་པའི་མཚན་ཉིད་ཀྱི་དཀའ་ཐུབ་ཅན་གྱིས་མཛེས་པ་ལྟ་བུ་གན་གྱིན་པ་ནི་དཀའ་ཐུབ་པའོ། །ཟླ་བ་ཆོས་པ་ལྟ་བུ་ནི་བྱང་ཆུབ་སེམས་དཔའོ། །སྤྱོད་པ་དང་དབང་པོ་རབ་ཏུ་ཞི་ཞིང་དུལ་བ་གང་ཡིན་པ་དེ་ནི་སྤྱོད་པ་དང་དབང་པོ་རབ་ཏུ་ཞི་ཞིང་དུལ་བའོ། །རབ་ཏུ་ཞི་བ་དང༌། དུལ་བ་དང་སྤྱོད་པ་ལ་ལྟ་ཞིང་རྣམ་པར་ལྟ་བ་ཞེས་བྱ་བ་ལ་སོགས་པ་ལ། རབ་ཏུ་ཞི་ཞིང་དུལ་བའི་དབང་པོ་ནི་དབང་པོའི་སྒོ་བསྲུངས་པ་ཉིད་དོ། །བརྟུལ་ཞུགས་བསྡམས་ལ་ངེས་བྱས་ཞེས་བྱ་བ་ལ་བརྟུལ་ཞུགས་དང་བསྡམས་པ་ནི་བརྟུལ་ཞུགས་དང་བསྡམས་པའོ། །དེ་གཉིས་ལ་རྩེ་གཅིག་པ་གང་ཡིན་པ་དེ་ནི་བརྟུལ་ཞུགས་བསྡམས་ལ་ངེས་བྱས་སོ། །བརྟུལ་ཞུགས་ཀྱིས་ནི་བསྡམས་པ་ཡང་སྨོས་པ་ཡིན་ནོ། །མི་འཚེ་བ་དང༌། བདེན་པའི་ཚིག་དང༌། མི་རྐུ་བ་དང༌། རྟོག་པ་མེད་པ་ཉིད་དང་ཚངས་པར་སྤྱོད་པ་སྟེ། ལྔ་པོ་འདི་དག་ནི་བརྟུལ་
ཞུགས་སོ། །བསྡམས་པ་ནི་མི་ཁྲོ་བ་དང༌། བླ་མ་ལ་སྲི་ཞུ་ཆེ་བ་དང༌། གཙང་སྦྲ་དང༌། སྤྱོད་པ་ཡང་བ་དང༌། བག་ཡོད་པ་སྟེ་ལྔ་པོ་འདི་དག་ནི་བསྡམས་བ་ཞེས་བསྒྲགས་སོ། །བྱ་དང་རི་དྭགས་རྣམས་ཀྱང་དེ་ལ་འཁོར་ཏེ། དེ་བས་ན་ཐུབ་པ་ཞེས་བྱ་བ་སྟེ། རྒྱུ་འདིའི་ཕྱིར་རོ། །འདིས་ནི་དེ་ལ་ཕན་པ་དེས་དཀའ་ཐུབ་ཅན་ཁྱད་པར་དུ་གྱུར་པ་བསྟན་ཏོ། །སྐྱེ་བོ་དཀའ་ཐུབ་ཅན་ལ་འོས་པ་ཞེས་བྱ་བ་ནི་རྒྱུ་ཕབ་པ་བསྟན་པ་དང་ལྡན་པའོ། །འཚོ་བའི་ཕྱིར་ཞེས་བྱ་བ་ནི་སྤ་བ་དང༌། དྲེགས་པའི་ཕྱིར་མ་ཡིན་ནོ། །ཇི་སྲིད་དེ་ལྟར་འདོད་པ་ལ་གནས་པ་ཞེས་བསྟན་པའི་རིམ་པས་སོ། །ལྷའི་དབང་པོ་བརྒྱ་བྱིན་ཞེས་བྱ་བ་ནི་རང་གི་ངོ་བོ་དང་ཁྱད་པར་ལས་བསྟན་ཏོ། །ནུས་པ་ཡིན་པས་བརྒྱ་བྱིན་ཏེ། སྤྲོ་བ་དང༌། གསང་ཚིག་དང༌། གཙོ་བོའི་ནུས་པ་དང་ལྡན་པའི་ཕྱིར་རོ། །བརྒྱ་བྱིན་ཞེས་བྱ་བ་འདིས་ནི་རང་གི་ངོ་བོའི་ཁྱད་པར་བསྟན་ཏོ། །ལྷ་རྣམས་ཀྱི་དབང་པོ་ཞེས་བྱ་བས་ནི་ལས་ཀྱི་ཁྱད་པར་བསྟན་ཏོ། །ཡིད་བསམ་གཏན་ལ་ཞུགས་པ་ཞེས་བྱ་བ་ལ་སོགས་པ་ནི་དུས་གསུམ་དུ་མི་སྣང་བའི་རྒྱུ་ཡིད་ལ་མི་བྱེད་པས་སོ། །འདི་ལ་འཚོལ་བའི་དུས་སུ་དེར་མི་སྣང་བའི་རྒྱུ་ཡིད་ལ་མི་བྱེད་པ་ཅིའི་ཕྱིར་ཞེ་ན། ཡིད་བསམ་གཏན་ལ་ཞུགས་པས་ཚོལ་བའི་དུས་སུ་ཡང་དེ་མི་སྣང་བའི་རྒྱུ་ཡིད་ལ་མི་བྱེད་དོ། །ཅིའི་ཕྱིར་ཞེ་ན། ཆོ་ག་ཤེས་པ་ལ་གོམས་པ་དང༌། ཞེས་བྱ་བ་ནི་གང་ཡོངས་སུ་ལོངས་སྤྱོད་པའི་དུས་ན་མི་སྣང་བའི་རྒྱུ་དེ་ཡིད་ལ་མི་བྱེད་པ་སྟེ། ཅིའི་ཕྱིར་ཞེ་ན། ཁ་ཟས་ལ་རྨོངས་པ་མེད་པས་སོ། །ཞེན་པ་མེད་པ་ཞེས་བྱ་བ་ནི་བསམ་པས་དོན་དུ་མི་གཉེར་བའོ། །ཟས་ཁྱད་པར་ཅན་མི་འཚོལ་བ་ནི་སྦྱོར་བས་སོ། །བློ་བདེ་བར་བྱས་ཏེ་གནས་སོ་ཞེས་བྱ་བ་ནི་རྒྱུ་གཉིས་པོ་དེས་སོ། །དེ་བཞིན་དུ་ཞེས་བྱ་བ་ནི་ཇི་ལྟར་སྔ་མ་དེ་བཞིན་ནོ། །ཤིང་དང་ཤིང་གི་ལོ་མའི་ཁ་ཟས་ཀྱིས་བློ་བདེ་བར་གནས་པ་ཉིད་ཀྱི་རྒྱུ་བསྟན་པའི་ཕྱིར། ཆོག་ཤེས་ངེས་པ་ཞེས་བྱ་བའི་ཚིགས་བཅད་སྨོས་སོ། །རྩྭ་དང་ལོ་མ་ཆུ་ཡི་གནས། །
ཞེས་སྨོས་པས་ནི་གསུམ་པོ་འདི་དག་ནི་འབད་པས་བསྐྱེད་མི་དགོས་པར་ཐམས་ཅད་ན་ཡང་ཡོད་པའི་ཕྱིར་ཐོབ་པ་ཉིད་ཀྱི་འཇུག་པ་བསྟན་པ་ཡིན་ནོ། །ལོ་མ་ལྷགས་ཤིང་རྙིངས་བ་ནི་ཅུང་ཟད་རློན་པ་ཞེས་བྱ་བའི་དོན་ཏོ། །ཤིང་གི་ལོ་མའི་ཁ་ཟས་ཀྱི་ས་མི་དགའ་བ་མེད་པ་ནི་བློ་མི་དགའ་བ་མེད་པའོ། །ངོམས་པའི་རྒྱུ་བསྟན་པའི་ཕྱིར་མང་དུ་ཐོས་པས་ཞེས་བྱ་བ་ལ་སོགས་པའི་ཚིགས་བཅད་སྨོས་སོ། །ཚིགས་སུ་བཅད་པ་འདིའི་བསྡུས་པའི་དོན་ནི་ཁྱིམ་ན་གནས་པ་ཡང་རང་གི་བསོད་ནམས་དང༌། ཡེ་ཤེས་ཀྱི་ཚོགས་ཀྱི་འབྲས་བུ་ལ་འཇུག་པ་སྟེ། མངོན་པར་མཐོ་བ་དོན་དུ་གཉེར་བའོ། །རབ་ཏུ་བྱུང་བ་ཡང་ངེས་པར་ལེགས་པ་དོན་དུ་གཉེར་བའོ། །གང་དེ་དག་གི་དོན་རྩོམ་པ་དེའི་གཉེན་པོ་དང་རྗེས་སུ་མཐུན་པའི་ཡོན་ཏན་ཉེ་བའི་ཉོན་མོངས་པ་མེད་པ་ཉིད་དུ་བསྟན་ཏོ། །སྙེམས་པ་ནི་བདག་གིར་བྱེད་པ་སྟེ་བདག་གོ་ཞེ་ནའོ། །དེས་ན་སྙེམས་པས་ནི་བདག་ལ་བསྟོད་པ་དང་གཞན་ལ་སྨོད་པར་བྱེད་དེ། དེས་ན་ཤེས་རབ་ཡོངས་སུ་ཉམས་པ་ཐོབ་པར་འགྱུར་རོ། །འབྱོར་པ་རྣམས་ལ་སེར་སྣས་ནི་ལོངས་སྤྱོད་བསགས་པ་དང༌། ཕུན་སུམ་ཚོགས་པ་ཐད་པའི་རྒྱུ་ཡིན་ནོ། །ནགས་ཚལ་དུ་གནས་པ་ལ་ཆོག་མི་ཤེས་པས་ནི་ངེས་པར་ལེགས་པ་མི་འཐོབ་བོ། །ཐམས་ཅད་ལ་ཆགས་པ་མེད་པ་ལ་གོམས་པས་ནི་མྱ་ངན་ལས་འདའ་སྟེ། མྱ་ངན་ལས་འདས་པ་གསུམ་ཐོབ་པ་མངོན་པར་འདོད་པས་སོ། །དྲོ་ལ་བབ་པའི་ཚེ་ཞེས་བྱ་བ་ནི་བཟའ་བའི་དུས་ཏེ། དུས་འདི་ལ་བཟའ་བ་བྱའོ་ཞེས་པའོ། །བརྟུལ་ཞུགས་ཀྱི་དུས་དེ་ནི་བརྟུལ་ཞུགས་ཀྱི་དུས་ཞེས་བྱའོ། །ཟས་ཀྱི་དུས་ལ་བབ་པ་བསྟན་པ་ཞེས་བྱ་བ་ནི་འདི་ནི་བདག་ཅག་གི་ཁ་ཟས་ཀྱི་དུས་སོ་ཞེས་སོ། །མགྲོན་དུ་བོས་སོ་ཞེས་བྱ་བ་ནི་ཁྱེད་དང་འུ་བུ་ཅག་ལྷན་ཅིག་བཟའ་བར་བྱའོ་ཞེས་སོ། །མིག་བགྲད་བཞིན་ནི་འཛུམ་པ་མཛེས་ཞེས་བྱ་བ་འདིས་ནི་ལུས་ཀྱི་ཁྲོ་གཉེར་དེའི་གཉེན་པོ་དགའ་བའི་མཚན་མ་ཉིད་བསྟན་ཏོ། །ཡིད་འོང་རྣར་སྙན་ཚིག་གིས་དགའ་བར་བྱས་ནས་ནི། །ཞེས་བྱ་བ་ནི་ཚིག་རྩུབ་
ཅིང་ཁྲོ་བའི་དངོས་པོ་དེའི་གཉེན་པོའི་ཚིག་ཕུན་སུམ་ཚོགས་པ་ཡང་བསྟན་ཏོ། །དགའ་བས་ཚིམ་པར་གྱུར་ཞེས་བྱ་བ་འདིས་ནི་ཡིད་ཀྱི་རྣམ་པར་གྱུར་པའི་དངོས་པོ་དེའི་གཉེན་པོ་ཡིད་རབ་ཏུ་དགའ་བ་ཡང་བསྟན་ཏོ། །ཡིད་རབ་ཏུ་དགའ་ནས་དེ་བཞིན་དུ་ཞེས་བྱ་བས་ནི་ཇི་ལྟར་སྔ་མ་དེ་བཞིན་དུ་དེ་བྱེད་པར་བསྟན་ཏོ། །སྦྱིན་པར་འདོད་པའི་ཞེས་བྱ་བའི་ཚིགས་བཅད་འདིས་ནི་སྤྱོར་བ་འདོད་པ་ལ་ཞུམ་པ་མེད་པ་དང་ལྡན་པ་དེ་ཅིའི་ཕྱིར་ཞེ་ན། སྙིང་རྗེ་གོམས་པ་ལས་སྐྱེས་པས་སོ། །འདོད་པ་ཙམ་གྱིས་འགྲུབ་པར་རིག་ནས་ཞེས་བྱ་བ་ལ། འདོད་པ་ཙམ་གྱིས་དོན་གྲུབ་པར་རིག་པ་གང་ཡིན་པ་དེ་ནི་འདོད་པ་ཙམ་གྱིས་འགྲུབ་པར་རིག་པའོ། །དོགས་པ་དང་འཇིགས་པ་སྐྱེས་ཏེ་ཞེས་བྱ་བ་འདིས་ནི་སྐྱེས་པའི་དོགས་པ་དང་འཇིགས་པ་གང་ཡིན་པ་དེ་ནི་དོགས་པ་དང་འཇིགས་པ་སྐྱེས་པའོ། །འཇིགས་པ་ནི་བདག་གི་དཔལ་འཕྲོག་པར་བྱེད་པས་སོ། །དོགས་པ་ནི་ཅི་ཞིག་བསྟན་ནས་དཀའ་ཐུབ་སྤྱོད་པར་བྱད་པ་ཞེས་པའོ། །དེ་གཉིག་འི་རྒྱུ་དེ་དྲི་བར་གཉེན་དང་མཛའ་བཤེས་ཞེས་བྱ་བའི་ཚིགས་བཅད་འདི་སྨོས་ཏེ། འདིའི་དོན་ནི་སེམས་ཅན་དང་སེམས་ཅན་མ་ཡིན་པའི་བཟོད་པ་དང༌། སྦྱིན་པའི་བསོད་ནམས་ཀྱི་ཚོགས་ཀྱི་འབྲས་བུ་ཕུན་སུམ་ཚོགས་པ་མངོན་པར་སྤངས་ནས་ཅི་ཞིག་འདོད་པའི་ཕྱིར་དཀའ་ཐུབ་སྤྱོད་པར་བྱེད་ཅེས་བྱ་བའི་དྲི་བའི་སྐབས་འདི་ཡིན་ནོ། །གཞན་བསླུ་བའི་དོགས་པ་ཤེས་ན་དྲི་བའི་ཚིག་གི་རྒྱུ་བསྟན་པའི་ཕྱིར། བདེ་བར་སྦྱོར་བའི་ལོངས་སྤྱོད་ཅེས་བྱ་བའི་ཚིགས་བཅད་འདི་ལྟ་སྟེ། ཕྱེད་ཀྱིས་ནི་ཚིགས་བཅད་སྔ་མའི་ཕྱེད་ཉིད་ཀྱི་དོན་རྟོགས་པར་བྱའོ། །ཚིགས་བཅད་འོག་མའི་ཕྱེད་ཀྱིས་ཀྱང་གོང་མའི་ཕྱེད་ཉིད་ཀྱི་དོན་བསྟན་ཏོ། །གང་གི་ཡོན་ཏན་ཐོས་ནས་ཞེས་བྱ་བ་ནི་གང་ཐོས་ནས་དེ་སྤངས་པ་སྟེ། ཕུན་སུམ་ཚོགས་པ་དང་འདྲ་བའི་ཕུན་སུམ་ཚོགས་པ་ཚོགས་ཀྱི་ནང་དུ་ཞེས་བྱ་བའི་དོན་ཏོ། །རྒུད་པ་ཞེས་བྱ་བ་ལ་ལོངས་སྤྱོད་དང་ཤེས་པ་ལ་སོགས་པ་རྒུད་པའོ། །སྐྱེ་བོ་དཀའ་ཐུབ་ཅན་དང་མཐུན་པ་ཞེས་བྱ་བ་ནི་རབ་ཏུ་བྱུང་བའི་སྐྱེ་བོ་དང་མཐུན་པ་སྟེ། འདིས་ནི་རབ་ཏུ་བྱུང་བ་
རྣམས་ཀྱིས་ངེས་པར་ལེགས་པར་སྒྲུབ་པ་དང་རྗེས་སུ་མཐུན་པར་བསྟན་ཏོ། །སྲིད་པའི་བདེ་བ་ལ་མ་ཆགས་པ་དང་ཞེས་བྱ་བ་ནི་འོག་ནས་བསྟན་པའི་ཚིགས་བཅད་གང་གིས་སྦྱིན་པ་ལ་སོགས་པ་དེ་དག་ལ་ཆགས་པ་མེད་པའི་ཕྱིར་རོ། །སློང་བ་ཉིད་སྡུག་བསྔལ་དུ་རིག་ཅིང་ཞེས་བྱ་བ་ནི་གང་གི་ཕྱིར་ཆགས་པས་ནི་སློང་བར་གྱུར་ལ། སློང་བས་ནི་ཆགས་པར་འགྱུར་རོ། །དེ་བས་ན་སློང་བ་སྤངས་པ་ནི་མཆོག་ཡིན་ནོ། །ཆོག་ཤེས་པ་ལ་གོམས་པ་ཞེས་བྱ་བ་ནི་དཀའ་བས་རྙེད་པས་འཚོ་བ་གནས་པའི་སྒྲུབ་པས་ཆོ་ག་ཤེས་པའི་ཕྱིར་རོ། །ཆུང་མ་ཡིད་དུ་འོང་དང་བུ་དང་དབང་བྱེད་དང༌། །ཞེས་བྱ་བ་ནི་སེམས་ཅན་དུ་བསྟན་པའི་བསོད་ནམས་ཀྱི་ཚོགས་ཀྱི་འབྲས་བུ་བསྟན་པའོ། །ནོར་ནི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུའོ། །ཉོན་མོངས་པ་དང་བྲལ་བ་ཐོབ་དཀའ་བ་ཉིད་ཅེས་བྱ་བ་ལ་ཉོན་མོངས་པའི་སྒྲ་ནི་ཞེ་སྡང་ཉིད་དེ། ཅིའི་ཕྱིར་དེ་བཟུང་ཞེ་ན། ཆགས་པ་ལ་སོགས་པ་སྤྱིར་བསྟན་པ་ཡིན་ཡང་འདི་ནི་ཉོན་མོངས་པ་ཐམས་ཅད་ཀྱི་ནང་ན་ཐ་ཆད་ཡིན་ཏེ། བདག་དང་གཞན་གདུང་བར་བྱེད་པས་སོ། །ནོར་ཡང་ཉམས་ཤིང་ཞེས་བྱ་བ་ནི་ཕྱི་རོལ་གྱི་སེམས་ཅན་མ་ཡིན་པ་ལས་སོ། །མདོག་བཟང་ཞེས་བྱ་བ་ནི་ནང་གི་མདོག་རྒུད་པའོ། །གྲགས་པ་ནི་སེམས་ཅན་གཞན་གྱི་དད་པ་རྒུད་པའོ། །བདེ་བ་ལས་ཀྱང་ཞེས་བྱ་བ་ནི་བསམ་པ་དང་ཕན་འདོགས་པ་ཉམས་པའོ། །ཕོངས་པར་གྱུར་ལ་ཞེས་བྱ་བྱ་བ་བསྟན་པ་ལ་ཕོངས་པ་དེ་བསྒྲུབ་པའི་ཕྱིར་ཕོངས་པའི་གནས་སུ་གྱུར་པའི་ཕྱིར་ཞེས་བྱ་བ་འདིའི་དོན་ནོ། །བྱིས་པ་ཐ་མ་ཡིན་པར་འདོད་ཅེས་བྱ་བ་ནི་ཕོངས་པ་ཐམས་ཅད་ཀྱི་ནང་ན་ཁྱད་པར་དུ་སྙིང་རྗེའི་གནས་སུ་གྱུར་པ་ཞེས་བྱ་བ་ཡིན་ཏེ། བྱིས་པ་ནི་ཕོངས་པ་ཐམས་ཅད་ཀྱི་གནས་སུ་གྱུར་པའི་ཕྱིར་ཁྱད་པར་དུ་སྙིང་རྗེའི་གནས་སུ་གྱུར་པ་ཡིན་ནོ། །མཐོང་བ་ཙམ་དུའང་མི་འདོད་པ་ཉིད་ནི་ལྷན་ཅིག་གནས་པ་དང་ཕེབས་པར་སྨྲ་བ་ལྟ་ཅི་སྨོས་ཞེས་པའོ། །འདི་དག་ཚུལ་མིན་པ་ཡང་ཞེས་བྱ་བའི་ཚིགས་བཅད་འདིའི་བསྡུས་པའི་དན་ནི་
བདག་ལ་ཕན་པའི་ཁྱད་པར་མི་བྱེད་ཅིང་གཞན་གྱི་ཁ་ན་མ་ཐོ་བ་དང་སླུ་བར་བྱེད་པ་ཡང་བསྟན་ཏོ། །བདག་ཉིད་ཀྱང་ཕན་པ་མ་ཡིན་པ་དང༌། ལུགས་མ་ཡིན་པ་སྒྲུབ་པར་བྱེད་ལ། དེ་ལ་སྨས་པའི་ཕྱིར་གཞན་ཡང་རབ་ཏུ་སྦྱོར་བར་འདོད་དེ། ཁྱད་པར་སྒྲུབ་པར་མི་བྱེད་པ་དང་ཕན་བསྒྲུབ་པར་མི་བྱེད་པ་ཉིད་དོ། །མཁས་པའི་ང་རྒྱལ་ཞེས་བྱ་བའི་ཚིགས་བཅད་འདིས་ནི་འདི་དག་ཚུལ་མིན་ཞེས་བྱ་བའི་ཚིགས་བཅད་སྒྲུབ་པ་ཡིན་ཏེ། མཁས་པའི་ང་རྒྱལ་དང་གཏི་མུག་ནི་མཁས་པའི་ང་རྒྱལ་གཏི་མུག་དག་གོ །ཡང་ན་མཁས་པའི་ང་རྒྱལ་ཉིད་གཏི་མུག་སྟེ་མཁས་པའི་ང་རྒྱལ་གཏི་མུག་གོ །བདག་གི་རང་བཞིན་ང་རྒྱལ་གྱི་གཏི་མུག་གིས་བསྒྲིབས་པ་ཡིན་ཏེ། དེས་ཚུལ་མ་ཡིན་པ་ལ་ཚུལ་བཞིན་དུ་སྒྲུབ་པར་བྱེད་ལ། གཞན་ཡང་འདི་ལ་རབ་ཏུ་སྦྱོར་བར་འདོད་དོ། །འདིར་ཕན་པར་སྨྲ་ལའང་ཁྲོ་བས་རྩུབ་པ་ཞེས་བྱ་བ་ནི་སེམས་ཅན་དག་ནི་ཕན་པ་ཡིན་ན་ཡང་ཕན་པ་མ་ཡིན་བཞིན་དུ་རབ་ཏུ་ཁྲོ་བར་བྱེད་དོ། །དྲང་པོའི་རིམ་པ་མི་མཐུན་བ་ཞེས་བྱ་བ་ཅིའི་ཕྱིར་ཞེ་ན། གཟུ་ལུམས་ཅན་ཡིན་པའི་ཕྱིར་རོ། །འདུལ་བ་དང་མི་མཐུན་པ་ཅིའི་ཕྱིར་ཞེ་ན། འདུལ་བ་ལ་བརྩོན་འགྲུས་ཆུང་ཞེས་པའི་ཕྱིར་རོ། །མཁས་པའི་ང་རྒྱལ་གཏི་མུག་མེས་བསྲེགས་ཤིང༌། །ཞེས་བྱ་བ་ནི་བདག་ཉིད་གཞན་གྱི་ཐད་དུ་སོང་ནས་ཕན་པའི་དྲི་བའི་ཚིག་སྒྲུབ་པ་མེད་པའི་ཕྱིར་ཏེ། དེས་ན་དེ་ཉིད་ཀྱིས་བདག་ཀྱང་ལོག་པར་སྒྲུབ་པར་བྱེད་ལ། གཞན་ཡང་དེ་ལ་སྦྱོར་བར་བྱེད་པ་ཡིན་ནོ། །བརྟན་པ་ནི་བྱང་ཆུབ་སེམས་དཔའོ། །གཡོ་སྒྱུ་མེད་པ་ནི་འདུལ་བས་རྟག་ཏུ་བརྒྱན་ཞེས་བྱ་བ་ནི་སྔར་བསྟན་པའི་འདུལ་བ་དང༌། དྲང་པོའི་རིམ་པ་མི་མཐུན་པ་ཞེས་བྱ་བ་དེའི་གཉེན་པོའོ། །ཕན་པའི་བསམ་བ་དང་ཞེས་བྱ་བ་ནི་ཅི་ནས་ཕན་འདོགས་པར་བྱེད་པའོ། །ཕན་འདོགས་པར་བྱེད་པ་དེ་ཡང་གལ་ཏེ་ཟང་ཟིང་དང་བཅས་པའི་སེམས་ཀྱིས་ཡིན་ནམ་ཞེ་ན། སྨྲས་པ། གུས་དང་ཞེས་སྨོས་པས་སོ། །མཐུ་ཡང་ཅི་ཡོད་ཅེས་བྱ་བ་ནི་ནུས་པས་ཕན་འདོགས་པ་སྟེ། རྒྱུ་
འདི་གསུམ་གྱིས་ནི་ཕན་འདོགས་པར་འདོད་པ་ཟང་ཟིང་མེད་པའི་སེམས་ཀྱིས་ནུས་པ་ཉིད་དུ་བསྟན་ཏོ། །སྦྱིན་ལ་དགའ་བ་དེས་ངེས་པར་གྱུར་པ་ནི་སྦྱིན་པ་ལ་དགའ་པ་དང་མཐུན་པར་གྱུར་པའོ། །སྦྱིན་པ་དང་མི་མཐུན་པ་ནི་བསྙེན་བཀུར་མ་ཡིན་པ་འདོད་པས་སོ། །བཟླས་བརྗོད་བརྟུལ་ཞུགས་དཀའ་ཐུབ་ཅེས་བྱ་བའི་ཚིགས་བཅད་འདིའི་བསྡུས་པའི་དོན་ནི་འཇིག་རྟེན་ན་བསྙེན་བཀུར་དུ་མས་ང་ལ་མཆོག་སློང་བའི་ཕྱིར་འོང་ཞིང་མཐོང་བར་འདོད་དོ་ཞེས་བསྟན་པའི་ཚིག་རྐང་དེ་ཉིད་ཀྱིས་བསྟན་ཏོ། །མཆོག་སྦྱིན་པར་འོས་པ་ལ་ཞེས་བྱ་བ་འདིའི་ལན་ནི་འདི་ནི་མི་སུན་པའི་ཚུལ་མ་ལགས་ཞེས་པའོ། །བཟླས་བརྗོད་བརྟུལ་ཞུགས་མཆོད་སྦྱིན་དཀའ་ཐུབ་སྤྱད་པ་ཡིས། །ཞེས་བྱ་བ་འདིའི་ལན་ནི། མགུ་བར་མ་བགྱིས་པ་ཡང་མ་ལགས་ཞེས་བྱ་བ་ཡིན་ནོ། །ཁྱོད་ནི་མཐོང་བར་མི་འདོད་ཅི་ཡི་ཕྱིར། །ཞེས་བྱ་བ་འདིའི་ལན་ནི། ཁྱོད་དང་ཕྲད་པར་མི་འཚལ་བ་ཡང་མ་ལགས་སོ། །ཞེས་བྱ་བ་ཡིན་ནོ། །རྗེས་སུ་མཐུན་པའི་དངོས་པོའི་རྒྱུ་ནི་བསྟན་པར་མི་བྱ་སྟེ། རང་བཞིན་གྱིས་གྲུབ་པའི་ཕྱིར་རོ། །ད་ནི་ཕྲད་པར་མི་འདོད་པ་མ་ཡིན་ན་ཇི་ལྟར་མཐོང་བར་མི་འདོད་བ་ཡིན་ཞེ་ན། ཕྲད་པར་འདོད་པའི་རྒྱུ་ཡོད་ན་ཡང་མི་མཐོང་བའི་མཆོག་སློང་བའི་རྒྱུ་བསྟན་པའི་ཕྱིར། ལྷའི་གཟུགས་མཆོག་རྨད་དུ་བྱུང་བའི་ཞེས་བྱ་བའི་ཚིགས་བཅད་སྨོས་ཏེ། གང་མཐོང་བར་མི་འདོད་པའི་རྒྱུ་དེ་ཉིད་ཡིན་ནོ་ཞེས་བསྟན་ཏེ། ལྷའི་གཟུགས་མཆོག་རྨད་དུ་བྱུང་བ་ཞེས་བྱ་བ་འདིས་ནི་དབྱིབས་ཕུན་སུམ་ཚོགས་པ་བསྟན་ཏོ། །གསལ་བ་གང་ཡིན་པ་དེ་ནི་གསལ་བའོ། །གཟི་བརྗིད་དང་མདངས་ཀྱིས་ནི་ཁ་དོག་ཕུན་སུམ་ཚོགས་པ་བསྟན་ཏོ། །འདི་གཉིས་མཐོང་བར་མི་འདོད་པའི་རྒྱུ་བསྟན་པའི་ཕྱིར་སྨྲས་པ། བདག་གི་དཀའ་ཐུབ་ཉམས་པར་གྱུར་དུ་དོགས་ལགས་མོད། །ཅེས་བྱ་བ་འདིས་སོ། །རབ་ཏུ་དང་ཞིང་ཞི་བར་གྱུར་པ་ཡང༌། །ཞེས་བྱ་བ་ནི་སྔར་བསྟན་པ་ཉིད་ཀྱི་གསལ་བའོ། །དེ་ཉིད་བསྟན་པ་སྐྱེ་བོ་དཀའ་ཐུབ་ཅན་དང་མཐུན་པའི་ཚུལ་དག་དང༌། ཞེས་བྱ་བ་ནི་སྡོང་བུ་དང༌། རྩ་བ་དང༌།
འབྲས་བུ་ལ་སོགས་པ་འདི་དག་གིས་འཕགས་པའི་རིགས་གསུམ་བསྟན་ཏེ། ཁ་ཟས་ངན་ངོན་ཙམ་གྱིས་ཆོག་ཤེས་པ་དང༌། གནས་མལ་ངན་ངོན་ཙམ་གྱིས་ཆོག་ཤེས་པ་དང༌། ཆོས་གོས་ངན་ངོན་ཙམ་གྱིས་ཆོག་ཤེས་པའོ། །བསམ་གཏན་དང༌། ཚད་མེད་པ་དང༌། སྔོམ་པ་ཞེས་བྱ་བས་ནི་སྤོང་བ་ལ་དགའ་བའི་འཕགས་པའི་རིགས་བསྟན་ཏོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཨ་ཀ་ཏའི་སྐྱེས་པའི་རབས་སོ།། །།བདག་གི་ཆེ་བ་ཉིད་ཀྱིས་སྙིང་རྗེ་དང་ལྡན་ཞིང༌། ཞེས་བྱ་བ་ལ། བདག་ཉིད་ཀྱི་ཆེ་བ་ནི་བདག་གི་ཆེ་བའོ། །དེ་གང་ཡིན་ཞེ་ན། རིགས་ཀྱི་ཤེས་རབ་ཆེ་བའོ། །རིགས་དེ་གང་ཡིན་ཞེ་ན། མིང་དང༌། རྒྱུ་དང༌། ས་བོན་དང༌། བྱེད་པ་དང༌། ཁམས་ཞེས་བྱ་བ་ནི་དོན་གཞན་མ་ཡིན་ནོ། །གང་རྒྱུ་ཡོད་པ་ལས་ནི་ཐེག་པ་གསུམ་གྱིས་མྱ་ངན་ལས་འདའ་བར་འགྱུར། བདག་ཉིད་ཀྱི་ཆེ་བ་དང་སྙིང་རྗེ་རྣམ་པ་གཉིས་ཡོད་པ་ནི་ལྡན་པ་སྟེ། མངོན་པར་གྲུབ་པ་དང༌། རབ་ཏུ་ཐོབ་པ་ཞེས་བྱ་བ་ནི་དོན་གཞན་མ་ཡིན་ནོ། །འགྲོ་བ་ཡོངས་སུ་སྐྱོབ་པར་བྱེད་པས་འགྲོ་བ་ཡོངས་སུ་སྐྱོབ་པའོ། །ཤས་ཆེ་བའི་བསམ་པ་སྟེ། ས་ལ་འཇུག་པའི་དུས་སུ་བསམ་པ་དེས་འགྲོ་བ་ཡོངས་སུ་བསྐྱབ་པའི་ལྷག་པའི་བསམ་བ་ཅན་ཏེ། མངོན་པར་འཕེལ་བར་བྱེད་པ་ལྟ་བུའོ། །སྦྱིན་པ་དང༌། དུལ་བ་དང༌། དེས་པ་ལ་སོགས་པ་གང་ཡིན་པའི་ཡོན་ཏན་ནི་སྦྱིན་པ་དང༌། དུལ་བ་དང༌། དེས་པ་དང༌། ཡང་དག་བར་སྔོམ་པ་ལ་སོགས་པའོ། །དུལ་བ་དང་སྡོམ་པ་གཉིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟེ། དུལ་བ་ནི་དབང་པོའི་སྒོ་བསྡམས་པ་ཡིན་ཏེ། ཚུལ་ཁྲིམས་ཀྱི་འཁོར་ཞེས་བྱ་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ནང་དུ་འདུས་པ་ཉིད་དོ། །སྔོམ་པ་ཡང་ཚུལ་ཁྲིམས་ཉིད་དེ། ལུས་དང་ངག་གི་ཡང་དག་པར་སྡོམ་པའི་མཚན་ཉིད་ཡིན་པའི་ཕྱིར་རོ། །དེས་པ་ནི་བཟོད་པའི་ཕ་རོལ་ཏུ་ཕྱིན་པ་སྟེ། འགྲོགས་ན་བདེ་བའི་དངོས་པོ་ནི་དེས་པ་སྟེ། བཟོད་པ་དང་ལྡན་པ་ནི་དེས་པར་འགྱུར་རོ། །སོགས་པ་སྨོས་པས་ནི་བརྩོན་འགྲུས་ཀྱི་ཕ་རོལ་ཏུ་
ཕྱིན་བ་དང༌། བསྡུ་བའི་དངོས་པོ་ལ་སོགས་པ་གཟུང་ངོ༌། །འཇིག་རྟེན་ལ་ཕན་འདོགས་པ་དང་མཐུན་པ་ཞེས་བྱ་བ་ནི་གཞན་ལ་ཕན་ཞིང་བདེ་བ་དང་རྗེས་སུ་མཐུན་པའོ། །ཡོན་ཏན་ཁྱད་པར་ཅན་ཞེས་བྱ་བ་ནི་ཐེག་པ་ཆེན་པོའི་མདོ་སྡེ་ས་བཅུ་པ་ལ་སོགས་བདག་ཏུ་གསུངས་པའོ། །དེ་བྱམས་པའི་སྟོབས་ཞེས་བྱ་བའི་མིང་ནི་ས་བཅུ་བ་ཉིད་དུ་བསྟན་པའི་ཕྱིར། སེམས་ཅན་ཐམས་ཅད་ལ་བྱམས་པའི་ཡིད་དུ་གྱུར་པ་ཞེས་སྨོས་སོ། །དེ་བཞིན་དུ་གྱུར་ཞེས་བྱ་བ་ནི་བདེ་བའམ་སྡུག་བསྔལ་དེ་བཞིན་དུ་གྱུར་པ་སྟེ། ཇི་ལྟར་སྐྱེ་དགུ་རྣམས་ལ་གནོད་པ་དང་ཕན་འདོགས་པར་བྱེད་པ་དེ་བཞིན་དུ་དེ་ཡང་གནོད་པ་དང་ཕན་འདོགས་པར་བྱེད་དོ། །མཚོན་ཆ་དང་ནི་གཙུག་ལག་རྣམས་ལ་གོམས། །ཞེས་བསྟན་པ་ལ། ཇི་ལྟར་གོམས་པ་ཡིན་ཞེ་ན། དེ་བསྒྲུབ་པའི་ཕྱིར། མིའི་དབང་པོ་ཞེས་བྱ་བའི་ཚིགས་བཅད་སྨོས་སོ། །དེ་ཡི་མཚོན་ཆ་རྒྱན་དང་འདྲ་བར་གྱུར། །ཞེས་བྱ་བ་ནི་ཆད་པར་སྒྲུབ་པ་ཡིན་པ་ཉིད་དུ་བསྟན་ཏོ། །ཅིའི་ཕྱིར་ཞེ་ན། མིའི་དབང་པོས་བཀའ་ཁྲིམས་སྤྱི་བོས་མནོས་པའི་ཕྱིར་སྐལ་བ་ཁྱད་པར་ཅན་ཉིད་ཀྱིས་རྒྱལ་ཕྲན་རྣམས་རང་ཉིད་འདུ་བར་འགྱུར་རོ་ཞེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། འཇིག་རྟེན་ཕན་འབྱུང་བསྟན་ངག་ཚུལ་རྣམས་ཀྱི། །གཙུག་ལག་རྣམས་ཀྱང་རྣམ་པར་གསལ་བར་སྣང༌། །ཞེས་སྨོས་ཏེ། འཇིག་རྟེན་ལ་གནོད་པར་མི་འཇུག་པའོ། །བསྟན་ངག་ཚུལ་རྣམས་ཀྱི་ཞེས་བྱ་བ་ལ་འཇིག་རྟེན་ལ་གནོད་པར་མི་འཇུག་པའི་ཚུལ་ནི་བསྟན་ངག་ཚུལ་ལོ། །ཕན་པར་སེམས་པའི་ཕྱིར་ཞེས་བྱ་བ་ནི་སྙིང་རྗེའི་བསམ་པ་དང་ལྡན་པའི་ཕྱིར་ཏེ། འདིས་ནི་ཚུལ་ཁྲིམས་ཕུན་སུམ་ཚོགས་པ་བསྟན་ཏོ། །ཚུལ་མཁས་ཞེས་བྱ་བ་འདིས་ནི་ཤེས་རབ་ཕུན་སུམ་ཚོགས་པ་དང། སྦྱོར་བ་ཕུན་སུམ་ཚོགས་པ་བསྟན་ཏོ། །རྟོགས་མཁས་ཞེས་བྱ་བས་ནི་སྦྱོར་བ་ཕུན་སུམ་ཚོགས་པ་དང༌། ཤེས་རབ་ཕུན་སུམ་ཚོགས་པ་བསྟན་ཏོ། །ཕ་དང་འདྲ་ཞེས་བྱ་བ་འདིས་ནི་བསམ་པ་ཕུན་སུམ་ཚོགས་པ་དང༌། བྱེད་པ་ཕུན་སུམ་ཚོགས་པར་
བསྟན་ཏེ། དཔེར་ན་བུ་དག་ལ་ཚར་གཅོད་པ་དང༌། ཕན་འདོགས་པར་བྱེད་པ་དང༌། ཆོས་དང་འགལ་བར་མི་བྱེད་པའི་ཕ་བཞིན་དུ་སྐྱེ་དགུ་རྣམས་ལ་ཡང་དེ་ལྟར་སྦྱར་བར་བྱའོ། །བདེན་པ་དང༌། གཏོང་བ་དང༌། ཉེ་བར་ཞི་བ་དང༌། ཤེས་རབ་ལ་སོགས་པ་བྱིན་གྱི་རླབས་འདི་བཞིས་ནི་བསོད་ནམས་དང་ཡེ་ཤེས་ཀྱི་ཚོགས་བསྟན་ཏེ། དེ་ལས་དང་པོ་གསུམ་གྱིས་ནི་བསོད་ནམས་ཀྱི་ཆོགས་བསྟན་ཏོ། །ཤེས་རབ་ཀྱིས་ནི་ཡེ་ཤེས་ཀྱི་ཚོགས་བསྟན་ཏོ། །གཞན་ལ་ཕན་པར་ཡོངས་སུ་བསྔོ་པའི་ཕྱིར་ཞེས་བྱ་བ་ཡིན་ཏེ། གཞན་དུ་ན་བྱིན་གྱི་རླབས་རྣམ་པ་བཞི་ནི་རང་གི་དོན་དུ་ཡོངས་སུ་བསྔོས་པར་འགྱུར་ཞིང༌། ཉན་ཐོས་དང་རང་སངས་རྒྱས་ཀྱི་རྒྱུར་འགྱུར་བས་བསྔོ་བ་བྱེ་བྲག་མེད་པར་འགྱུར་རོ། །ཁྱད་པར་ཅན་དུ་གྱུར་ལ་རླབས་ཆེ་བའི་རིམ་པས་ཞེས་བྱ་བ་ནི་ཁྱད་པར་དང་བཅས་པ་ཡིན་པར་ཁྱད་པར་དུ་གྱུར་པ་སྟེ། སྲ་ཆུང་བའི་ཕྱིར་རོ། །སྔ་མ་མོས་པས་སྤྱོད་པའི་ས་ལས་ཁྱད་པར་དུ་གྱུར་པས་ཁྱད་པར་དུ་གྱུར་པའོ། །རླབས་ཆེ་བ་ནི་ཁྱད་པར་དུ་གཞན་ལ་ཕན་པ་སྒྲུབ་པར་བྱེད་པའོ། །རིམ་པ་ཞེས་བྱ་བ་སྨོས་པ་ནི་ས་དང་ས་དག་ཏུ་ཁྱད་པར་དུ་བྱེད་པའི་ཕྱིར་དང༌། རླབས་ཆེ་བའི་ཕྱིར་རོ། །བྱང་ཆུབ་ཀྱི་ཚོགས་བསགས་ཤིང་ཞེས་བྱ་བ་ལ། བྱང་ཆུབ་དག་གིས་ཚོགས་ཀྱི་བྱ་བ་ཡིན་བས་བྱང་ཆུབ་ཀྱི་ཚོགས་ཏེ། ཕ་རོལ་ཏུ་ཕྱིན་པ་དང༌། ཡོན་ཏན་གཞན་ཡང་ས་བཅུ་པའི་མདོ་ལས་གསུངས་པའོ། །གནོད་པ་མེད་པ་ཞེས་བྱ་བ་ནི་མེ་དང༌། ཆུ་དང༌། ནད་དང༌། མུ་གེ་དང༌། བྱི་བ་དང༌། སྲོག་ཆགས་གདུག་པ་སྦྲུལ་དང༌། བདག་གི་དམག་ཚོགས་དང༌། གཞན་གྱི་དམག་ཚོགས་དང༌། རྐུན་མ་ལ་སོགས་པ་དང་བྲལ་བའི་ཕྱིར་གནོད་པ་ཐམས་ཅད་མེད་པའོ། །ཕུན་སུམ་ཚོགས་ཕ་མཆོག་དང་ལྡན་པས་ཞེས་བྱ་བ་ནི་ལོ་ལེགས་པ་ལ་སོགས་པའི་ཕུན་སུམ་ཚོགས་པ་དང་ལྡན་པའོ། །མགུ་ཞིང་དར་བ་ཞེས་བྱ་བ་ལ། མགུ་བ་ནི་ཡིད་བདེ་ཞིང་ཚིམ་པ་ཕུན་སུམ་ཚོགས་པ་སྟེ། འདོད་པ་ཤས་ཆེ་བ་ཡོད་པའོ། །དར་བ་ནི་ལུས་འཕེལ་བའོ། །དེའི་
ཡུལ་ན་ནི་ཞེས་བྱ་བའི་ཡུལ་ཏེ་དེ་དག་ན་གནས་པ་གང་ཡིན་པ་དེ་ནི་དེ་ན་གནས་པའོ། །མཐུ་ཁྱད་ཆེ་བས་ན་ཞེས་བྱ་བ་ནི་ཁྱད་པར་ཡིན་ཏེ། ཁྱད་པར་ནི་ཐུན་མོང་མ་ཡིན་པའི་ཕྱིར་ཏེ། དཔག་ཏུ་མེད་པའི་བསོད་ནམས་དང་ཡེ་ཤེས་ཀྱི་ཚོགས་ཉེ་བར་བསགས་པའི་ཕྱིར་རོ། །གང་གི་ཞེས་བྱ་བ་ནི་མདངས་འཕྲོགས་པའི་གནས་སུ་ཕྱིན་པར་གྱུར་ཀྱང་ངོ༌། །རིག་སྔགས་དང་དཀའ་ཐུབ་ནི་རིག་སྔགས་དང་དཀའ་ཐུབ་བོ། །དེ་གཉིས་གྲུབ་པ་ནི་རིག་སྔགས་དང་དཀའ་ཐུབ་གྲུབ་པའི་རང་བཞིན་ཏེ། རིག་སྔགས་དཀའ་ཐུབ་གྲུབ་པའི་ངོ་བོ་ཉིད། །ཅེས་བྱ་བའི་དོན་ཏོ། །མིང་ནི་དོན་དང་མཐུན་པར་མ་གྱུར་ཞེས་བྱ་བ་ལ། དོན་མེད་པའི་མིང་གང་ཡིན་པ་དེ་ནི་དོན་མི་མཐུན་པའི་མིང་སྟེ། གང་གི་ཕྱིར་མདངས་འཕྲོགས་པ་ཞེས་བྱ་བ་དེའི་མིང་དོན་མེད་པར་འགྱུར་བ་སྟེ། འདི་ལྟར་མདངས་འཕྲོགས་པར་མི་ནུས་པའི་ཕྱིར་རོ། །ནགས་ན་རབ་ཏུ་རྒྱུ་བ་ཞེས་བྱ་བ་ལ། འདིར་རབ་ཏུ་ཞེས་བྱ་བའི་སྒྲ་ནི་དེ་དང་ལྡན་པ་སྟེ། ནགས་དང་ལྡན་པ་ན་རྒྱུ་བ་ཞེས་བྱ་བའི་དོན་ཏོ། །གྲིབ་མ་དང་ལྡན་པའི་ཤིང་ནི་གྲིབ་ཤིང་སྟེ་དེའི་རྩ་བ་དེ་ནི་གྲིབ་ཤིང་གི་དྲུང་ནའོ། །སྲད་བུ་འཁལ་ཞེས་བྱ་བ་ལ་སྲད་བུ་འཁལ་བ་ལ་ཞུགས་པ་ནི་སྲད་བུ་འཁལ་བ་སྟེ་དེ་བྱེད་པའོ། །འདི་ལྟ་བུའི་དགོན་པ་ཞེས་བྱ་བ་ནི་དེ་ན་སྐྱེ་བོ་གནས་པ་དང་བྲལ་བའི་ཕྱིར་རོ། །འགྲོ་བ་མེད་པ་ན་ཞེས་བྱ་བ་ནི་སྐྱེ་བོ་ལམ་དུ་འགྲོ་བ་དང་བྲལ་བའི་ཕྱིར་རོ། །གཅིག་པུ་ནི་གྲོགས་པོ་མེད་པའོ། །བལྟས་པས་ནི་གྱེན་ཀུན་དུ་བལྟས་པར་བྱས་པ་སྟེ། སྲིན་པོ་དང་ཤ་ཟ་དེ་དག་ལའོ། །དེ་བས་ནགས་ནའང་ཁྱིམ་བཞིན་དུ། །ཞེས་བྱ་བ་ནི་གང་སྔར་བསྟན་པ་འདི་ལྟ་བུ་དགོན་པ་དབེན་པ་འགྲོ་བ་མེད་པ་ན་ཞེས་བྱ་བ་དེའི་གཉེན་པོར་བསྟན་ཏོ། །མཚན་མོ་དག་ཀྱང་ཉིན་པར་བཞིན། །ཞེས་བྱ་བ་ནི་གང་གི་ཚེ་སྲིན་པོ་དང་ཤ་ཟ་རྣམས་ཀྱིས་གཞན་ཟིལ་གྱིས་གནོན་པའི་ནུས་པ་མེད་པ་དེའི་ཚེ་ཞེས་བྱ་བའི་དོན་ཏོ། །གང་གི་ཕྱིར་སྲིན་པོ་དང་ཤ་ཟ་དེ་དག་ནི་རང་བཞིན་གྱིས་གཏུམ་ཞིང་མ་རུངས་པ་ཡིན་ནོ་ཞེས་བསྟན་པ་དེའི་གཉེན་པོར་བསྟན་ཏོ། །གཅིག་པུར་གྲོགས་ཀྱི་
ནང་འདུག་འདྲ། །ཞེས་བྱ་བ་ནི་གང་སྔར་བསྟན་པའི་གཅིག་པུ་ཇི་ལྟར་མི་འཇིགས་ཞེས་བྱ་བ་དེའི་གཉེན་པོར་བསྟན་ཏོ། །ཁྱེད་ཅག་གང་ནས་ལྷགས་པའི་ཡུལ་དེའི་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་རྒྱུ་གསུམ་གྱིས་ཡུལ་ཇི་ལྟ་བ་བཞིན་དུ་ཡོངས་སུ་ཤེས་པའི་ཕྱིར་ཏེ། ཉམས་སད་པའི་དངོས་པོ་ཡོད་པའི་ཕྱིར་དང༌། ཡུལ་གསལ་བའི་རྣམ་པ་ཡིན་པའི་ཕྱིར་དང༌། ཡོན་ཏན་ཚོལ་བ་ཡོངས་སུ་ཤེས་པས་མཁས་པའང་ཡིན་ནོ་ཞེས་བསྟན་པ་ཡིན་ཏེ། ཡོན་ཏན་འཚོལ་བ་ཆེད་ཆེར་མི་འཛིན་པ་ཞེས་བྱ་བ་འདིས་ནི་ཉམས་སད་པའི་དངོས་པོ་བསྟན་ཏོ། །ཐོས་པར་མི་འདོད་པ་དེས། མི་དབང་གྲགས་པ་རྣམ་པར་སྤངས་པའམ། སྐལ་བ་ཅུང་ཟད་ཅིག་ཡོད་དོ་ཞེས་བྱ་བ་འདིས་ཡུལ་གསལ་བའི་རྣམ་པའོ། །དེ་བས་ན་ཞེས་བྱ་བ་ནི་གང་ཡུལ་དེ་ལས་འདིར་ལྷགས་པའོ། །མཐའ་འཁོབ་ཅེས་བྱ་བའི་ཡུལ་གྱི་ཡང་དགོན་པ་ཉིད་དེ། ཡོན་ཏན་ཤེས་པའི་སྐྱེས་བུ་མེད་པའི་ཕྱིར་ཏོ། །གང་གི་དབུང་བྱམས་པ་སྟེ། འདིའི་དོན་ནི་མཐུན་པ་ལ་སོགས་པའི་ཐབས་ཀྱིས་ས་སྲུང་བར་བྱེད་པའོ། །དེ་ལྟ་མོད་ཀྱི་བྱམས་པ་ལ་སོགས་པས་བསྲུང་བ་ནི་ཆད་པ་བྱམས་པ་གང་ཡིན་པའི་དཔུང་གིས་སོ་ཞེས་བྱ་བའི་ཚིག་སྟེ། གང་དེ་ཐ་མལ་པའི་དཔུང་ནི་ཆོ་ག་ཙམ་མོ། །ཆོ་ག་ཙམ་ཞེས་བྱ་བ་ནི་རྒྱལ་པོ་ལ་སོགས་པའི་སྤྱོད་པའོ། །འདི་ནི་རུ་མཚོན་ཁྲ་བོའི་དཔུང་ཡོངས་སུ་བཟུང་སྟེ། གཞན་ལ་གནོད་པའི་ཕྱིར་ནི་མ་ཡིན་ནོ། །མི་རིགས་ཞེས་བྱ་བ་ནི་དབྱེ་བ་ལས་བརྩམས་པའོ། །ཁྲོ་བ་ནི་ཞེ་སྡང་བ་སྟེ་དེའི་ཚིག་གིས་སྨྲ་བའོ། །རྩུབ་པ་ནི་སྤྱོ་བའོ། །འདི་གཉིས་ཀྱི་དབྱེ་བས་ནི་བསམ་པ་དང་སྦྱོར་བ་མེད་པར་བསྟན་ཏོ། །བཀའ་ཁྲིམས་ཆོས་ཡིན་སྒྱུ་མེད་ནོར་ཡང་ཞེས་བྱ་བ་ནི་མཐུན་པ་ལས་བརྩམས་པའོ། །ཆོས་ནི་བདེན་པའོ། །བཀའ་ཁྲིམས་ནི་གཞུང་ལུགས་སོ། །སྒྱུ་མེད་ཅེས་བྱ་བ་ནི་བྱ་བ་བསྒྲུབ་པའི་ཕྱིར་བདེན་པ་དང་ཚིག་བསྟན་པའོ། །ནོར་ཡང་དམ་པ་མཆོད་ཅེས་བྱ་བ་ནི་སྦྱིན་པ་ལས་བརྩམས་པ་སྟེ། དམ་པ་མཆོད་པའི་ཕྱིར་ཡིན་གྱི། རང་གི་དོན་བསྒྲུབ་པའི་ཕྱིར་
ནི་མ་ཡིན་ཏེ། དཔེར་ན་ལུགས་ཀྱི་བསྟན་བཅོས་ཀྱི་དོན་ལ་མཁས་པ་ནི་རང་གི་དོན་བསྒྲུབ་པའི་ཕྱིར་ནོར་ཉེ་བར་སྒྲུབ་པར་བྱེད་དོ། །དེ་ལྟར་ཡང་རྨད་དུ་བྱུང་ཡང་ཞེས་བྱ་བ་ནི་འདི་ལྟར་ངོ་མཚར་གྱི་ཡོན་ཏན་གྱི་མཆོག་ཏུ་གྱུར་པ་གང་ཡིན་པ་དེ་ནི་དེ་ལྟར་རྨད་དུ་བྱུང་བའོ། །དྲེགས་པ་ནི་མཐོ་བར་སེམས་པའོ། །ཡ་རབས་ཀྱི་ཚུལ་ལ་གནས་པ་གང་ཡིན་པའི་སྐྱེ་བོ་དེ་ནི་ཡ་རབས་ཀྱི་གཞུང་ལུགས་ལ་རྣམ་པར་གནས་པའི་སྐྱེ་བོའོ། །ཡང་ན་འཕགས་པའི་གཞུང་ལུགས་ལ་གནས་པའི་སྐྱེ་བོ་གང་ཡིན་པ་དེའོ། །རྟག་ཏུ་བདེ་ཞིང་ལོ་ལེགས་པས་རབ་ཏུ་དགའ་བ་ཕུན་སུམ་ཚོགས་ཞེས་བྱ་བ་ནི་རྟག་ཏུ་བདེ་ཞིང་དགའ་བ་དང༌། རྟག་ཏུ་ལོ་ལེགས་པའི་ཕྱིར་ཕུན་སུམ་ཚོགས་པའོ། །ཡོན་ཏན་མང་པོ་བརྗོད་པས་དེ་ལའོ། །སྙིང་ནས་བརྗོད་ཅིང་ཞེས་བྱ་བ་ནི་བརྩེ་བ་དང་ལྡན་པ་སྟེ། རིགས་པ་དང་མི་རིགས་པའོ། །བདེན་པ་ཞེས་བྱ་བ་ནི་སྙན་པ་དང་ཕན་པ་ནི་བདེན་པའོ་ཞེས་བསྟན་པའོ། །གསུམ་པོ་འདིས་ནི་གོ་རིམས་བཞིན་དུ་སེམས་ཅན་གཏི་མུག་གི་རང་བཞིན་དངོས་པོ་གང་ལ་མི་བཟོད་པའོ། །དེ་གྲགས་པ་ཞེས་བྱ་བ་ནི་དེའི་གྲགས་པ་ཡིན་པས་དེ་གྲགས་པའོ། །དེ་ཡིས་དེ་ལྷག་པར་གདུང་བར་འགྱུར་ཞེས་བྱ་བ་ལ། དེ་ཡིས་ཞེས་བྱ་བ་ནི་མི་བཟོད་པས་ཡིད་གདུངས་པས་ལྷག་པར་གདུང་ཞིང་ཚིག་པར་འགྱུར་རོ། །མཐོང་བ་ཉིད་ཀྱི་དུས་ནི་མཐོང་བའི་ཚེ་ཉེ་བར་གནས་པ་དེའི་དབང་དུ་བྱས་པའོ། །བཟའ་བ་བསླངས་པ་ནི་ཟས་བླངས་པ་བྱས་པའོ།། ཞིམ་པོ་ནི་ཤིན་ཏུ་གཡོས་ལེགས་པ་དང་ཞིམ་པ་ཞེས་བྱ་བའི་དོན་ཏོ། །ཁྱེར་ཏེ་འོངས་ན་ཡང་ཞེས་བྱ་བ་ནི་གུས་པ་དང་བཅས་པས་མདུན་དུ་འོངས་པའོ། །སྟག་གཟིག་རྩྭ་སྔོན་མི་འདོད་པ་བཞིན་དུ་ཞེས་བྱ་བ་ནི་དཔེར་ན་རི་དགས་རྣམས་ལ་རྩྭ་སྔོན་པོ་ཤིན་ཏུ་ཞིམ་པ་ཡིན་ཡང་སྟག་ལ་སོགས་པ་མངོན་པར་མི་འདོད་པ་ཡིན་ཏེ། རྒྱལ་པོ་ལ་འོས་པའི་རྩྭ་སྔོན་པོ་ལྟ་བུར་དེ་གནོད་སྦྱིན་རྣམས་ལ་མངོན་པར་མི་འདོད་བའི་ཕྱིར་རོ། །འོ་ན་ཇི་ལྟ་བུ་ཞེས་བྱ་བ་ནི་རྗེས་སུ་མཐུན་པ་སྒྲོགས་ཤིག་པའོ། །བཙལ་ལོ་ཞེས་བྱ་བ་ནི་བཙལ་བར་བྱའོ་ཞེས་སོ། །མི་ཤི་བའི་
ཤ་དང་ཁྲག་ཡོངས་སུ་གཟུང་བའི་ཕྱིར་ཏེ། གཞན་དུ་ན་ཁ་ཟས་དང་ཁྲག་བཏུང་བ་མེད་དོ། །བརྟུལ་ཞུགས་ཉམས་པ་ཞེས་བྱ་བ་ནི་དམ་བཅའ་བའི་རྗེས་སུ་འགྲོ་བ་སྟེ། ངེས་པར་ཡང་དག་པར་སྦྱིན་དུ་གཞུག་པའི་ཕྱིར་རོ། །མཆེ་བ་ཡོངས་སུ་གཙིགས་ཤིང་ཁ་མཆུ་ཡོངས་སུ་བསྐྱོད་པ་གང་ཡིན་པ་དེ་དག་ནི་ཁ་ནས་མཆེ་བ་གཙིགས་པའོ། །མི་སྡུག་ལ་འཇིགས་པ་ཞེས་བྱ་བ་ལ། མི་སྡུག་པ་ནི་མི་རྣམས་ལའོ། །འཇིགས་པ་ནི་འཇིགས་པ་བསྐྱེད་པའོ། །ཇི་ལྟར་ཞེ་ན། དེའི་རྣམ་པ་བསྟན་ཏེ། མཆེ་བ་གཙིགས་པ་ཞེས་བྱ་བ་ལ་སོགས་པའི་རྟགས་ཀྱིས་སོ། །འབར་ཞིང་སེར་བ་ཞེས་བྱ་བ་ནི་མདོག་རྣམ་པར་བསྒྱུར་ཞིང་འཇིགས་སུ་རུང་བ་ཉིད་དུ་བསྟན་ཏོ། །སྔོ་ཞིང་ཞེས་བྱ་བ་ནི་དབྱིབས་རྣམ་པར་གྱུར་པའོ། །སྣ་ལེབ་ཅིང་མི་སྡུག་པ་དང་ཞེས་བྱ་བ་ནི་གང་མཐོང་ན་བལྟ་བར་མི་སྡུག་པ་ལ་བ་ལང་གི་སྣ་ལྟ་བུ་གང་ཡིན་པའོ། །སྣ་ལེབ་ཅེས་སྨོས་པས་ནི་རྣམ་པར་འགྱུར་བའོ། །མི་སྡུག་པ་ནི་འཇིགས་སུ་རུང་བའོ། །མེ་འབར་བ་ལྟ་བུའི་སེར་བའི་སྐྲ་དང་ཁ་སྤུ་གང་ཡིན་པ་ནི་དེའོ། །མདོག་མུན་པ་ལྟར་གནག་པ་དེ་ནི་ཆར་སྤྲིན་ལྟར་གནག་པའོ། །འབའ་ཞིག་སེམས་ཞེས་བྱ་བ་ནི་དེ་དག་འཆི་བར་འགྱུར་རོ་སྙམ་དུ་སེམས་པས་སློང་བ་ལས་གཞན་ཡིད་ལ་མི་བྱེད་བར་དེ་འབའ་ཞིག་སེམས་པའི་ཕྱིར་རོ། །སྙིང་རྗེ་ཅན་ལ་འདི་ལྟ་བུ། །ཞེས་བྱ་བ་ལ་སོགས་པའི་ཚིགས་བཅད་གསུམ་སྟེ། གསུམ་པོ་འདིའི་བསྡུས་པའི་དོན་ནི་བཀྲེས་པའི་སྡུག་བསྔལ་གསོ་བའི་ཁ་ཟས་རྙེད་དཀའ་བ་དེས་གནོད་པའི་སྡུག་བསྔལ་དང༌། ཡང་ན་བཀྲེས་པའི་སྡུག་བསྔལ་བཟློག་པའི་ཁ་ཟས་རྙེད་ཀྱང་མི་དགེ་བ་བསགས་པའི་རྒྱུས་སྡུག་བསྔལ་བ་སྟེ། རྣམ་པ་ཐམས་ཅད་དུ་སྡུག་བསྔལ་ཞིང་དེའི་འབྲས་བུ་ཡང་སྡུག་བསྔལ་བའི་དབང་དུ་བྱས་ནས་བསམ་པ་དག་པས་དེ་དག་ལ་སྙིང་རྗེ་དེ་བས་ཆེར་ཡང་གྱུར་ཞེས་བྱ་བ་བསྟན་ཏོ། །འོན་ཏེ་སྙིང་རྗེ་དང་ལྡན་ཞིང་ནུས་པ་དང་ལྡན་པ་དེ་མེད་པའམ་ནུས་པ་མེད་པ་འདི་གཉིས་ཀྱིས་ནི་རེ་ཞིག་རྣམ་པ་ཐམས་ཅད་དུ་རྙེད་དཀའོ། །ཉིན་རེ་བཞིན་ཡང་དེ་བཙལ་བས། །ཞེས་བྱ་བ་ནི་དུས་
གཅིག་གི་ཚེ་རྙེད་ནས་བྱ་བ་བྱས་པར་གྱུར་པ་དེ་ལྟ་བུ་མ་ཡིན་ནོ་ཞེས་བྱ་བའི་དོན་ཏོ། །འདོད་པའི་དོན་ནི་མེད་པར་འགྱུར། །ཞེས་བྱ་བ་ནི་བཀྲེས་པའི་སྡུག་བསྔལ་གསོ་བའི་ཁ་ཟས་རྙེད་པའོ། །དེ་ལྟ་བུའི་ཁ་ཟས་ཟ་བ་རྣམས་ཞེས་བྱ་བ་ནི་སྙིང་རྗེ་ཅན་ལ་དེ་ལྟ་བུའི་ཁ་ཟས་ཟ་བ་རྣམས་ཀྱི་ཟས་ནི་རྙེད་པར་དཀའ་བའོ། །སྙིང་རྗེ་མེད་ཅིང་ཡིད་ནི་མ་ཞི་བ། །ཞེས་བྱ་བ་ནི་སྙིང་རྗེས་སྟོང་པའི་ཕྱིར་མ་ཞི་ཞིང་མི་དགེ་བའི་ཡིད་གང་ཡིན་པ་དེ་དག་སྟེ། འདིས་ནི་མི་ནུས་ཀྱང་རྟག་ཏུ་དེའི་ཁ་ཟས་ཀྱི་རྣམ་པ་ལ་གནས་པའོ། །ཚེ་འདི་དང་ནི་ཕ་རོལ་རང་དོན་སྲེག །ཅེས་བྱ་བ་ནི་སྙིང་རྗེའི་སྡུག་བསྔལ་བ་སྟེ། མཐོང་བའི་ཆོས་དང་འཇིག་རྟེན་ཕ་རོལ་གྱི་སྡུག་བསྔལ་ལོ། །ཡང་ན་ཚིགས་བཅད་གསུམ་པས་ནི་སྔར་བཤད་པའི་རྣམ་པ་བཞིའི་དབང་དུ་བྱས་པ་སྟེ། སྙིང་རྗེ་དང་ལྡན་ཞིང་ནུས་པ་དང༌། མི་ནུས་པའི་སྙིང་རྗེ་དང་ལྡན་པ་དང༌། མི་ནུས་ཤིང་སྙིང་རྗེ་དང་བྲལ་བ་དང༌། སྙིང་རྗེ་དང་མི་ལྡན་ཞིང་ནུས་པ་སྟེ་བཞི་པོ་དེ་དག་གི་དབང་དུ་བྱས་པའོ། །དེ་ལྟ་བུའི་ཁ་ཟས་ཟ་བ་རྣམས་ཞེས་བྱ་བ་ནི་སྙིང་རྗེ་དང་ལྡན་ཞིང་མི་ནུས་པ་དང་ནུས་པའི་དབང་དུ་བྱས་པའོ། །སྙིང་རྗེ་མེད་ཅིང་ཡིད་ནི་མ་ཞི་བ། །ཞེས་བྱ་བ་ནི་སྙིང་རྗེ་མེད་ཅིང་ནུས་པའི་དབང་དུ་བྱས་པའོ། །ཚེ་འདི་དང་ནི་ཕ་རོལ་རང་དོན་སྲེག །ཅེས་བྱ་བ་ནི་སྙིང་རྗེ་དང་བྲལ་ཞིང་མི་ནུས་པའི་དབང་དུ་བྱས་པའོ། །འདི་དག་སྡུག་བསྔལ་ནམ་ཞིག་མེད་པར་འགྱུར། །ཞེས་བྱ་བ་ནི་མཐོང་བའི་ཆོས་སམ་ཕྱི་མ་ལའོ། །གཞན་གསོད་པ་ལ་ཞུགས་པ་འདི་ལས་ཇི་ལྟར་བཟློག་པར་བྱ་ཞེས་བྱ་བ་ནི་གཞན་གྱི་སྲོག་གཅོད་པར་བྱེད་པ་ལས་བཟློག་པའོ། །རེ་བ་བཟློག་པ་ངོ་འཛུམ་གནག་གྱུར་པ། །ཞེས་བྱ་བ་ནི་རེ་བ་ཕྱིན་ཅི་ལོག་ཏུ་གྱུར་ཅིང་གཞན་དུ་སྟེ། འདོད་པའི་གགས་སུ་གྱུར་པ་ཞེས་བྱ་བའི་དོན་ཏོ། །རེ་བ་ཕྱིན་ཅི་ལོག་ཏུ་གྱུར་པས་བཞིན་གྱི་མདོག་ཉམས་པར་བྱས་པ་གང་ཡིན་པ་དེ་ནི་རེ་བ་བཟློག་པས་ངོ་འཛུམ་གནག་པར་གྱུར་པའོ། །བུ་ཡུག་གིས་ཀུན་ཏུ་འདྲེས་པའི་རླུང་ནི་བུ་ཡུག་རླུང་ངོ༌། །བུ་ཡུག་རླུང་གིས་རྙིས་པར་བྱས་པ་ནི་བུ་ཡུག་རླུང་གིས་རྙིས་པ་སྟེ། དེ་ལྟ་བུའི་པདྨ་ནི་བུ་ཡུག་རླུང་གིས་རྙིས་
པའི་པདྨའོ། །བརྟན་ཞིང་རྒྱས་པ་ཞེས་བྱ་བ་ལ་བརྟན་པ་དང་རྒྱས་པ་ནི་བརྟན་ཞིང་རྒྱས་པའོ། །བརྟན་པའི་ཁྱད་པར་ནི་རྒྱས་པ་སྟེ་རྣམ་པ་གཉིས་སོ། །ནད་ལ་སོགས་པས་རྒྱས་པར་གྱུར་པ་ནི་དེ་ལྟ་བུ་མ་ཡིན་ནོ། །བདག་རང་ཤི་བ་ཞེས་བྱ་བ་ནི་མངོན་པར་འདོད་པའི་སྦྱིན་པ་མ་ཡིན་པའོ། །གསོན་པའི་ཤ་ཡང་ཞེས་བྱ་བ་ལ་སོགས་པས་ནི་མངོན་པར་འདོད་པའི་སྦྱིན་པའི་དངོས་པོ་གཞན་ལ་མེད་པའོ། །འདི་དག་བདག་གི་ཐ་དད་དུ། །ཞེས་བྱ་བ་ལ་སོགས་པས་ནི་མི་སྤྱིན་པ་ནི་རྗེས་སུ་མཐུན་པ་མ་ཡིན་པ་སྟེ། སྐྱོན་གསུམ་པོ་འདི་སྤངས་པའི་ཐབས་བསྟན་པར་འདོད་པས་སོ། །དེ་བས་ན་འདི་ནི་ཞེས་བྱ་བ་ལ་སོགས་པ་བརྩམས་སོ། །གདུངས་པའི་རྨ་འདྲ་བ་ཞེས་བྱ་བ་ནི་འདི་ལྟ་བུའི་མཚན་ཉིད་དེ་རྟག་ཏུ་ན་བ་འདི་ལྟ་བུའི་ལུས་ཏེ། རྟག་ཏུ་ན་བ་ནི་ལུས་ནད་དང་བྲལ་བ་མེད་པའི་ཕྱིར་རོ། །རྟག་ཏུ་ན་བའོ་ཞེས་བསྟན་པ་ལ། ཇི་ལྟར་རྟག་ཏུ་ན་བ་ཉིད་ཡིན་ཞེ་ན་ནད་ཀྱི་འབྱུང་ཁུང་ཞེས་སྨོས་ཏེ། ནད་ནི་གནོད་པ་བྱེད་པ་སྟེ། དེ་ནི་ཚོར་བར་བྱེད་པའི་ཕྱིར་གདུངས་པའི་རྨ་ལ་སོགས་པའི་ནད་ཀྱི་ཡང་འབྱུང་གནས་ཡིན་པའི་ཕྱིར་རོ།། ཡང་ན་ནད་ཀྱི་འབྱུང་ཁུང་ཞེས་བྱ་བ་ནི་ནད་ཀྱི་ཚོར་བ་སྟེ། དེའི་འབྱུང་གནས་ཡིན་པའི་ཕྱིར་ཏེ། གང་ཅུང་ཟད་ཚོར་བ་དེ་ནི་སྡུག་བསྔལ་བ་ཡིན་ནོ་ཞེས་བྱ་བའི་ཚིག་གིས་སོ། །དགོས་པ་ཁྱད་པར་ཅན་དུ་སྤྱད་པ་ཡིས། །ཞེས་བྱ་བ་ནི་འབྲས་བུ་དང་བྲལ་བ་ནི་སྡུག་བསྔལ་ཉེ་བར་ཞི་བ་སྟེ། དེ་ཉིད་ཀྱི་ཁྱད་པར་ནི་སྔར་བསྟན་པའི་རྣམ་པ་སྟེ། སྡུག་བསྔལ་གྱི་སྡུག་བསྔལ་ལ་སྡུག་བསྔལ་གྱིས་ཉེ་བར་སྤྱད་པ་ནི་དགོས་པ་ཁྱད་པར་ཅན་དུ་སྤྱོད་པའོ། །ཤིན་ཏུ་བཟང་པོར་བྱ་བ་ཞེས་བྱ་བ་ནི་གཅིག་ཏུ་ནད་གཏན་དུ་ཉེ་བར་ཞི་བར་བྱེད་པའི་རྒྱུ་ཡིན་པའི་ཕྱིར་དང༌། ཤིན་ཏུ་བཟང་པོ་ནི་གཞན་ལ་ཕན་འདོགས་པ་མཆོག་ཏུ་བྱེད་པའི་ཕྱིར་ཏེ། ཉན་ཐོས་ལ་སོགས་པ་ཡང་རྩ་འབིགས་ཤིང་གསོ་བ་སྟོན་པར་བྱེད་དེ། འདིར་བཅོས་པ་གཉིས་ཀྱི་ཁྱད་པར་ནི་གདུངས་པའི་རྨའི་རྩ་བཀྲོལ་ཏེ། འདི་དག་ལ་ནི་དགོས་པ་
ཁྱད་པར་ཅན་དུ་སྤྱད་པ་མེད་དེ། དེ་བས་ན་འདི་ནི་ཤིན་ཏུ་བཟང་པོ་མ་ཡིན་ནོ། །དེ་རབ་ཏུ་དགའ་བར་གྱུར་པས་མིག་རྩ་དང༌། གདོང་གི་མདངས་བཟང་པོ་གང་ཡིན་པ་དེ་ནི་རབ་ཏུ་དགའ་བར་གྱུར་པས་མིག་རྩ་དང་གདོང་གི་མདངས་བཟང་པོའོ། །བདག་གི་ཤ་ནི་ཁྲག་དང་བཅས་པ་འདི། །ཞེས་བྱ་བ་འདིས་ནི་སྦྱིན་པའི་དངོས་པོ་དོན་དུ་གཉེར་བའི་མཚན་ཉིད་དང་ལྡན་པ་ཉིད་དུ་བསྟན་ཏོ། །འཇིག་རྟེན་རྣམས་ལ་ཕན་པའི་ཕྱིར། །ཞེས་བྱ་བ་འདིས་ནི་ཁྱེད་ཅག་གི་དོན་དུ་འདི་བཟུང་བ་ཡིན་ནོ་ཞེས་བྱ་བའི་ཚིག་གིས་ཡོངས་སུ་གཏོང་བད་ཡོངས་སུ་གཏོང་བ་ནི་སྔར་ཡོངས་སུ་བཏང་བའོ་ཞེས་གཞན་གྱི་ངོར་བྱེད་པ་བཞིན་ཏེ། ལེན་པར་མི་འགྱུར་བའི་རྒྱུ་མེད་པར་བསྟན་པ་ཡིན་ནོ། །མགྲོན་དུ་བྱར་རུང་ན་ཞེས་བྱ་བ་ནི་མགྲོན་ཉིད་དུ་རུང་བ་ནི་མགྲོན་བྱར་རུང་བའོ། །ཆེན་པོ་འབྱུང་བར་འགྱུར་བ་ནི་འབྲས་བུ་ཆེན་པོ་སྟེ། འཇིག་རྟེན་ཐམས་ཅད་ལ་ཕན་པའི་ཕྱིར་རོ། །མངོན་པར་མཐོ་བ་འབྱུང་བ་ནི་འཇིག་རྟེན་ཕ་རོལ་གྱི་འབྲས་བུ་ཡིན་པའི་ཕྱིར་ཏེ། ཁྱད་པར་ཅན་གྱི་མངོན་པར་མཐོ་བ་སངས་རྒྱས་ཉིད་ལ་མངོན་པར་མཐོ་བ་ཞེས་བརྗོད་དོ། །ཡིད་མ་ཆེས་ནས་ཞེས་བྱ་བ་ནི་གལ་ཏེ་ཡིད་ཆེས་ན་ནི་བརྟན་པ་ཡིན་ཏེ། ཅུང་ཟད་དེ་ལ་མི་བརྟན་པ་ཡོད་པས་གང་གི་ཕྱིར་བྱིན་ཅིག་ཅེས་བྱ་བ་ལ་སོགས་པ་སྨྲ་བས་མི་བརྗོད་དེ། དེ་བས་ན་ཡིད་མི་ཆེས་པའོ་ཞེས་རྟོགས་པ་ཡིན་ནོ། །བདག་གི་སྡུག་བསྔལ་དག་ཅེས་བྱ་བ་ནི་བཀྲེས་པའི་སྡུག་བསྔལ་ལོ། །སློང་བ་ཉིད་དམན་པ་ཡིན་པས་སློང་ཞིང་དམན་པའོ། །དེ་ལས་དུས་ལ་བབ་པ་ཞེས་བྱ་བ་ནི་སྦྱིན་པར་བྱ་བ་བཏུང་བར་བྱ་བ་སྟེ། རང་གི་ཁྲག་དང་ཤའོ། །སྦྱིན་པ་ལ་རྩོལ་བ་ནི་སྦྱིན་བར་སྩོལ་བ་སྟེ། རང་གི་ཤ་ཁྲག་སྟེ་སྦྱིན་པར་སྩོལ་བའོ། །རྟབ་རྟབ་པོར་གྱུར་ཏེ་མི་བཟོད་ཅིང་སེམས་འཁྲུགས་ནས་ཞེས་བྱ་བ་ལ། རྟབ་རྟབ་པོར་གྱུར་པ་ནི་རང་གི་ཤ་དང་ཁྲག་སྦྱིན་པར་བྱེད་པས་སོ། །དེའི་སྡུག་བསྔལ་དེས་མི་བཟོད་ཅིང་སྦྱིན་པར་བྱ་བ་མ་ཡིན་པ་སྦྱིན་པ་སྟེ། དེ་གཉིས་ཀྱིས་སེམས་འཁྲུགས་པར་གྱུར་པའོ། །སྦྱིན་པ་ལ་ཧ་ཅང་དགྱེས་ཆེས་པས་ཞེས་བྱ་བ་ནི་
སྦྱིན་པ་བྱས་པའི་དགྱེས་པ་ནི་སྦྱིན་པ་ལ་དགྱེས་པའོ། །དེ་ལ་ཧ་ཅང་ཞེས་བྱ་བ་ནི་ཤིན་ཏུ་རོ་ཚོར་བ་སྟེ། སྦྱིན་བ་ལ་ཁ་ཅང་དགྱེས་པའོ། །དེ་བས་ན་ཕན་པ་དང་གནོད་པ་ཞེས་བྱ་བ་ལ། ཕན་པ་དང་གནོད་པའི་རིམ་པ་ནི་ཕན་པ་དང་གནོད་པར་གྱུར་པ་སྟེ། རིམ་པ་དང་གང་གིས་ཕན་པ་དང་གནོད་པའོ། །དེ་ཉིད་ནི་འོག་ནས་འབྱུང་བ་བཞིན་དུ་རྟོགས་པར་བྱའོ། །མི་མཁྱེན་པ་ཡང་མ་ལགས་ཏེ། ཞེས་བྱ་བ་ནི་མཁྱེན་པ་ཉིད་དེ། སྐྱེས་བུ་རྣམས་ལ་གནོད་པར་འབྱུང་བ་ནི་སྐྱེ་དགུ་རྣམས་ལ་གནོད་པ་སྟེ། ཕན་པ་མ་ཡིན་པ་བསྐྱེད་པའོ། །དེ་ལ་ཕན་པ་མ་ཡིན་པ་འབྱུང་བ་ལ་ཅིའི་ཕྱིར་དེ་དགའ་བ་ཡིན་ཞེ་ན། གཞན་ལ་གནོད་པས་འཚོ་ཞིང་དགའ་བ་སྐྱེ་བའི་ཕྱིར་རོ། །གཞན་ལ་གནོད་པར་བྱེད་པ་ནི་གཞན་ལ་གནོད་པ་སྟེ། དེས་འཚོ་ཞིང་དགའ་བ་གང་ཡིན་པ་དེ་དག་ནི་གཞན་ལ་གནོད་པས་འཚོ་ཞིང་དགའ་བ་སྐྱེ་བའོ། །དེ་བས་ན་དེ་དག་ནི་དེས་དགའ་བ་ཡིན་ནོ་ཞེས་བསྟན་པའི་ཕྱིར་རང་བཞིན་དེ་ལྟར་ལགས་ཞེས་བྱ་བ་སྨོས་ཏེ། འདིས་ནི་ཆོས་ཉིད་ཀྱི་རིགས་པས་རིགས་པ་ཉིད་དུ་བསྟན་ཏོ། །ད་ནི་ཕན་པའི་རིམ་བ་ལ་མི་གཟིགས་པའི་དབང་དུ་བྱས་ཏེ། འདི་སྐད་སྟོན་ཏེ། སྦྱིན་པ་ལ་ནི་རྣམ་པ་འདི་གསུམ་བསམ་པར་བྱ་སྟེ། ལེན་པ་པོ་དང༌། སྦྱིན་པ་པོ་དང༌། སྦྱིན་པར་བྱ་བ་སྟེ། གསུམ་པ་ནི་ཕུན་སུམ་ཚོགས་པ་ཡིན་ན་ནི་སྦྱིན་པ་ཕུན་སུམ་ཚོགས་པར་འགྱུར་ཏེ། དེ་ལ་ལེན་པ་པོ་ཡོན་ཏན་མེད་པའི་དབང་དུ་བྱས་ནས། སྐྱེ་དགུ་རྣམས་ལ་གནོད་པ་གང་དང་གང་ཞེས་བྱ་བའི་ཚིགས་བཅད་སྨོས་སོ། །སྦྱིན་པ་པོ་དང་སྦྱིན་པའི་དབང་དུ་བྱས་ནས། རྒྱལ་སྲིད་དཔལ་འདི་ཞེས་བྱ་བའི་ཚིགས་བཅད་ཡིན་ནོ། །དེ་ལས་སྐྱེ་དགུ་ལ་ཕན་པའི་དབང་དུ་བྱས་ནས། རྒྱལ་སྲིད་དཔལ་འདི་ཞེས་བྱ་བའི་ཚིགས་བཅད་ཕྱེད་དང་པོའོ། །དེ་བས་བདག་གི་ཤ་སྦྱིན་སྩོལ་བའི་ཞེས་བྱ་བ་ནི་སྦྱིན་བའི་དངོས་པོའི་དབང་དུ་བྱས་པ་སྟེ། བདག་གི་ཤ་སྦྱིན་པར་སྩོལ་བ་ཐོང་ཤིག་ཅེས་བྱ་བ་ནི་རང་གི་ཤ་སྦྱིན་པ་ལ་སྩོལ་བ་ནི་རང་གི་
ཤ་སྦྱིན་པ་ལ་སྩོལ་བའོ། །བདག་གི་ཤ་སྦྱིན་པར་སྩོལ་བ་ཉིད་ནི་བདག་གི་ཤ་སྦྱིན་པར་སྩོལ་བ་སྟེ། ངེས་པར་བཟུང་བ་ནི་སྩོལ་བ་དང་གཏོང་བ་དང་སྦྱིན་པ་རབ་ཏུ་དགག་པ་སྟེ། རང་གི་ཤ་སྦྱིན་པ་ནི་ངེས་པར་བཟུང་བའོ། །གཞན་གྱི་ཤ་སྦྱིན་པ་ནི་དགག་པ་མ་ཡིན་ནོ། །འདིས་ནི་འདི་ལྟར་སྟོན་པ་ཡིན་ཏེ། གལ་ཏེ་འདི་ལྟར་སྦྱིན་པར་བྱ་བ་ཡིན་ན་ནི་དགྲ་ལ་སོགས་པ་སྦྱིན་པར་བྱ་བ་སྟེ། གལ་ཏེ་ངེས་པར་ཤ་ཉིད་སྦྱིན་པར་བྱའོ་ཞེ་ན། གཞན་དག་གི་ཤ་ཉིད་སྦྱིན་པར་བྱ་སྟེ། འདི་ཉིད་ངེས་པར་བཟུང་བའོ། །སྨྲས་པ། ལོག་པའི་ལམ་དུ་ཡིད་དམ་བཅས་པ་ཞེས་སྨོས་ཏེ། ལམ་མ་ཡིན་པ་ལ་ངེས་པར་བྱས་པ་ཞེས་བྱ་བའི་དོན་ཏོ། །དུ་ཞེས་བྱ་བ་ནི་རྒྱུའི་དོན་ཏོ། །ལོག་པའི་ལམ་དུ་ཡིད་དམ་བཅས་པ་ཉིད་བསྒྲུབ་པའི་ཕྱིར་སྐྱེས་བུ་དཔའ་བོ་ཁྱོད་ཀྱི་ཞེས་བྱ་བའི་ཚིགས་བཅད་སྨོས་སོ། །མི་བཟོད་པ་ནི་དང་དུ་ལེན་པར་མི་ནུས་པ་སྟེ། ཅིའི་ཕྱིར་ཞེ་ན། ཁྱོད་ཀྱི་མཐུས་བསྐྱབས་ཞེས་བྱ་བ་ནི། ཁྱོད་ཀྱི་མཐུས་བསྐྱབ་པའི་ཕྱིར་མི་བཟོད་དོ། །འཇིག་རྟེན་ཞེས་བྱ་བ་ནི་ག་ལས་ཤེ་ན། དེ་བསྒྲུབ་པའི་ཕྱིར་གཉིས་པའི་དོན་ཏོ། །ཕུང་བར་བྱེད་པ་ལ་མཁས་པ་ནི་མཁས་པ་སྟེ། འཇིག་རྟེན་ཕུང་ཞིང་གནོད་པར་བྱེད་པ་ལའོ། །དེ་ཡང་གནོད་པ་ནི་སྐྱེ་བ་གཞན་དུ་དུས་མཐའ་མེད་པར་ངན་སོང་གནོད་པའོ། །ཕུང་བར་བྱེད་པ་ལ་མཁས་པ་དེས་ཚུལ་གྱིས་ཞེས་སྨྲས་སོ། །ཁྱོད་ཀྱི་ཤ་དང་ཁྲག་སློང་བའི་ཚུལ་གྱིས་སོ། །ཚུལ་མིན་སྐྱེ་དགུ་ཞེས་བྱ་བ་ནི་དེས་ཕུང་བ་ནི་གང་གི་ཕྱིར་སྐྱེ་དགུ་རྣམས་རྒུད་པར་འགྱུར་བའོ། །ཡང་ན་ཚུལ་མིན་སྐྱེ་དགུ་ནི་ཁྱོད་ཀྱི་མཐུས་བསྐྱབས་པའི་འཇིག་རྟེན་མི་བཟོད་ཅིང་ཁྱོད་དང་བྲལ་བར་མི་བཟོད་པའོ། །དེ་ལྟར་ཐབས་འདིས་སྐྱེ་དགུ་ཚུལ་མ་ཡིན་པར་ཕུང་བར་འདོད་པའོ། །ད་ནི་རང་ཉིད་ཀྱི་ཤ་ཉིད་གཏང་བར་བྱའོ་ཞེས་འདིས་ངེས་པར་གཟུང་བ་སྐབས་དང་བཅས་པས་ཤ་ནི་གཞན་གྱི་སྦྱིན་པར་བྱའོ་ཞེས་འདིས་འདོད་པ་ཡིན་ཏེ། དེས་ན་བློན་པོ་ལ་སོགས་པས་ངེས་པར་བཟུང་བ་དོན་མེད་པར་མཐོང་བ་སྟེ། མཆོད་སྦྱིན་ཚེན་ཞེས་བྱ་བ་ལ་སོགས་པའི་ཚིགས་བཅད་གསུམ་སྨོས་
སོ། །ཚིལ་དང་ཞག་ལ་སོགས་པའི་བཟའ་བ་གང་ཡིན་པ་དེ་ནི་ཚིལ་དང་ཞག་ལ་སོགས་པའོ། །འདིས་ནི་སྦྱིན་པའི་དངོས་པོའི་གྱ་ནོམ་པ་བསྟན་ཏོ། །སུམ་ཅུ་རྩ་གསུམ་ཞེས་བྱ་བ་འདིས་ན་ལེན་པ་པོ་བསྟན་ཏོ། །བསྲེགས་པ་ཞེས་བྱ་བ་ནི་མེ་ལ་བསྲེགས་པའི་ཕྱིར་ཏེ་གུས་པ་མེད་པར་བསྟན་ཏོ། །མགུ་ཞེས་བྱ་བ་འདིས་ནི་ལེན་པ་རྗེས་སུ་འཛིན་པ་ཉིད་དུ་བསྟན་ཏོ། །གུས་པར་བྱིན་ཡང་ཞེས་བྱ་བ་ནི་མེ་ལ་མངོན་པར་བསྲེགས་པ་གུས་པ་མེད་པ་དེའི་གཉེན་པོ་ཡིན་ནོ། །ཁྱོད་ཀྱིས་ཞེས་བྱ་བ་འདིས་ནི་སྦྱིན་པ་པོའི་ཕུན་སུམ་ཚོགས་པ་བསྟན་ཏོ། །ཕུན་སུམ་ཚོགས་པ་ཞེས་བྱ་བ་འདིས་ནི་ཚིལ་དང་ཞག་ལ་སོགས་པ་ཞེས་བྱ་བ་བསྟན་པ་དེའི་གཉེན་པོ་སྦྱིན་པའི་དངོས་པོ་ཕུན་སུམ་ཚོགས་པ་བསྟན་ཏོ། །འདོད་མི་འགྱུར་ཞེས་བྱ་བ་འདིས་ནི་མགུ་བའི་མི་མཐུན་པའི་ཕྱོགས་བསྟན་ཏོ། །མོད་ཀྱི་ཞེས་བྱ་བ་ནི་འོན་ཀྱང་ཞེས་བྱ་བའི་དོན་ཏོ། །ལྷའི་ཐུགས་ནི་བདག་ཅག་ལྟ་བུའི་སྐྱེ་བོས་བཅོམ་པ་མ་ལགས་ཞེས་བྱ་བ་ནི་འདི་སྦྱིན་པར་བྱ། འདི་ནི་སྦྱིན་པར་མི་བྱ་ཞེས་སོ། །གལ་ཏེ་དེ་ལྟ་ན་ཅིའི་ཕྱིར་བདག་གི་ཤ་སྦྱིན་སྩོལ་བ་ཐོང་ཞེས་སྟོན་ཅེ་ན། དེའི་ལན་བསྟན་པའི་ཕྱིར། བདག་གི་དོན་དུ་གཅེས་པའི་སླད་དུ་ཞེས་བྱ་བ་ལ་སོགས་པ་ཡིན་ནོ། །རྐོ་ལོང་གསོལ་བར་གྱུར་ཏོ་ཞེས་བྱ་བ་ནི་འདི་ལ་སྦྱིན་པར་མི་བྱའོ་ཞེས་བྱ་བའི་རྐོ་ལོང་གསོལ་བར་གྱུར་པའོ། །དེ་ལྟར་འདས་པའི་ཚིག་དེས་ནི་དོན་མེད་པ་ཉིད་དུ་བསྟན་པ་སྟེ། རང་གི་ཤ་སྦྱིན་པའི་དབྱེ་བ་དང་ལྡན་པའོ། །ད་ནི་རང་གི་ཤ་སྦྱིན་པ་མ་ཡིན་པ་ཉིད་ལས་བརྩམས་ཏེ། གནོད་སྦྱིན་ལྔ་པོ་ཞེས་བྱ་བ་ལ་སོགས་པ་སྨོས་སོ། །ལྔ་པོ་ཞེས་བྱ་བ་ནི་ཉུང་བ་ཉིད་དོ། །ཐམས་ཅད་ཅེས་བྱ་བ་ནི་དེའི་གཉེན་པོ་སྟེ་མང་པོའོ། །འདི་རྣམས་ཀྱི་ཞེས་བྱ་བ་ནི་སྔར་བསྟན་པའི་མཚན་ཉིད་ཀྱི་སྐྱེ་དགུ་ལ་ཕན་པར་འཇུག་པའི་མཚན་ཉིད་དེ། དེའི་གཉེན་པོའི་འབངས་ཞེས་སྨོས་ཏེ། ཁྱད་པར་མེད་པས་བཟང་པོ་དང༌། བར་མ་དང༌། ཐ་མའི་འགྲོ་བ་དག་གོ །འདི་ལྟ་བུ་ཆོས་གང་གི་ལམ་ལགས་ཞེས་བྱ་བ་ནི་སྔོན་མ་
ཐོས་པའི་ཆོས་ཀྱི་ལམ་མོ། །བདག་ཅག་ལ་ཞེས་བྱ་བ་ནི་བདག་གི་དོན་ནི་དྲུག་པའོ། །དེ་ལ་ཤ་དང་ཁྲག་ཅེས་བྱ་བ་དེ་ལ་ནི་འདི་དག་ལ་ཤ་དང་ཁྲག་ཡོད་བཞིན་དུ་ཞེས་བྱ་བའི་ཚིགས་བཅད་བརྩམས་སོ། །བདག་གི་ཤ་སྦྱིན་པར་སྩོལ་བ་འདི་ཐོང་ཞེས་བསྟན་པ་ལ་ཇི་ལྟར་མི་གཏང་བ་ཡིན་ཞེ་ན། ངེད་ཅག་ལྟ་བུ་ཞེས་བྱ་བ་སྨོས་ཏེ། འཕགས་པ་རྣམས་ལ་ནི་མེད་ཅེས་བྱ་བ་ཡིན་ཏེ། བརྫུན་གྱི་ཚིག་མེད་པའི་ཕྱིར་དང༌། ཚོགས་པར་མི་འབྱུང་བ་དང༌། རྩུབ་པའི་ཚིག་མེད་པའི་ཕྱིར་རོ། །གསལ་བར་བསླངས་པ་ལ་ཞེས་བྱ་བ་ནི་ངེད་ཅག་ལྟ་བུས་ནི་མ་བསླངས་ཀྱང་ཡོད་པར་གྱུར་ན་མཚན་མ་ལས་ཤེས་པར་བྱ་སྟེ། སྦྱིན་པར་བྱའོ་ཞེས་བྱ་བའི་དོན་ཏོ། །ད་ནི་ལྔ་པོ་འདི་དག་ཅེས་བྱ་བ་ལ་སོགས་པའི་ཚིག་རྐང་གི་ལན་ཆོས་ཀྱི་ལམ་ཉིད་དུ་བསྟན་པའི་ཕྱིར། ཆོས་ཀྱི་བཀའ་ཁྲིམས་ཞེས་བྱ་བ་ལ་སོགས་པའོ། །མདུན་དུ་འགྲོ་བ་ཡིན་པས་ཐོག་མར་འགྲོ་བའོ། །ངན་པའི་ལམ་དུ་ཞེས་བྱ་བ་ནི་བརྫུན་དུ་སྨྲ་བ་དང༌། ཚིག་རྩུབ་པོའི་མཚན་ཉིད་ཀྱིས་སོ། །ངའི་ཡང་ཡིན་ལ་སྤྱོད་པའི་ལམ་ཡིན་བས་ངའི་སྤྱོད་པའི་ལམ་མོ། །དེའི་རྗེས་སུ་འགྲོ་བ་ནི་ངའི་སྤྱོད་པའི་ལམ་གྱི་རྗེས་སུ་འཇུག་པ་དེ་དག་གོ །ང་ཡི་འབངས་རྣམས་གནས་སབས་ཇི་ལྟར་གྱུར། །ཞེས་བྱ་བ་ནི་ཤིན་ཏུ་ཉམས་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་འདིར་སྦྱིན་པས་ནི་ཆོས་ཀྱི་ལམ་ཉིད་དུ་བསྟན་ལ། སྤྱིན་པ་མ་ཡིན་པས་ནི་ཆོས་མ་ཡིན་པའི་ལམ་ཉིད་དུ་བསྟན་ནས། ང་ནི་གང་སྔར་བསྟན་པའི་འབངས་ཐམས་ཅད་མགོན་མ་མཆིས་པར་བགྱིས་པའམ་ཞེས་བྱ་བ་དེའི་དབང་དུ་བྱས་པ་སྟེ། འདི་ཡང་སྐྱེ་དགུ་རྣམས་ཀྱི་དོན་གྱི་ཕྱིར། །ཞེས་སྨོས་ཏེ། འབངས་ཐམས་ཅད་མགོན་མ་མཆིས་པར་བགྱིས་པ་ཉིད་འགྲོ་བའི་དོན་བཟང་པོ་སྟེ། འགྲོ་བའི་དོན་ནུས་པ་ཞེས་བྱ་བའི་དོན་ཏོ། །སེར་སྣས་ཕྲོགས་པ་ཉིད་ནི་སེར་སྣས་ཕྲོགས་པར་གྱུར་པ་སྟེ། སེར་སྣས་ཕྲོགས་པའི་སྙིང་གང་ཡིན་པ་དེ་ནི་སེམས་སེར་སྣས་ཕྲོགས་པར་གྱུར་པའོ། །དགའ་བ་དང་གུས་པ་ནི་དགའ་བ་དང་གུས་པ་ནི་དགའ་བ་དང་གུས་པ་སྟེ། ང་ལ་དགའ་བ་དང་
གུས་པ་ནི་ང་ལ་དགའ་བ་དང་གུས་བ་དང་བཅས་པའོ། །བྱམས་པ་དང༌། བག་ཕབ་པ་ནི་བྱམས་པས་བག་ཕབ་པ་སྟེ། དེ་གཉིས་ཀྱི་སྙིང་པོ་གང་ཡིན་པ་དེ་ནི་བྱམས་པ་དང༌། བག་ཕབ་པའི་སྙིང་པོ་ཉིད་དོ། །འདི་ལྟར་བདག་ཅག་ལ་མི་བྱམས་བ་ཅི་ལས་གྱུར་ཞེས་བྱ་བ་འདིས་ནི་བག་ཕབ་པའི་སྙིང་པོ་བསྟན་ཏོ། །རྗེའི་ཆེད་དུ་འཚལ་བ་ལ་ཞེས་བྱ་བ་ལ་སོགས་པ་དང༌། འདི་ལྟར་བདག་ཅག་ལ་མི་བྱམས་པ་ཅི་ལས་གྱུར་ཞེས་བྱ་བའི་ལན་ནི། ང་ཁྱེད་ལ་མི་འཇར་ཞིང་མི་བྱམས་པ་ཡང་མ་ཡིན་ལ་ཞེས་བྱ་བ་ཡིན་ཏེ། འཇར་བ་ནི་བག་འབེབས་པར་བྱེད་པའི་དོན་ཏོ། །འཇར་བ་མེད་པ་ནི་མི་འཇར་བའོ། །མི་འཇར་བ་ཡང་ཡིན་ལ་མི་བྱམས་པ་ཡང་ཡིན་པས་ན་མི་འཇར་ཞིང་མི་བྱམས་པའོ། །ཤ་དང་ཁྲག་བདག་ཅག་ལ་མཆིས་བཞིན་དུ་ཞེས་བྱ་བ་ལ་སོགས་པའི་ལན་ནི། མ་བྱིན་དུ་དོགས་པ་ཡང་མེད་མོད་ཀྱི་ཞེས་བྱ་བ་ལ་སོགས་པའོ། །ཡོངས་སུ་དོགས་ཤིང་རྒལ་དཀའ་བ་གང་ཡིན་པ་དེ་ནི་དོགས་ཤིང་རྒལ་དཀའ་བ་སྟེ། དཀའ་བས་རྟོགས་པ་གང་ཡིན་པའི་བྱམས་པའི་ལམ་གང་ཡིན་པ་དེ་ནི་རྟོགས་པར་དཀའ་པའི་དོགས་པའོ། །རྟོགས་པར་དཀའ་བ་ཡང་ཡིན་ལ་རྒལ་བར་དཀའ་བ་ཡང་ཡིན་པས་དོགས་པ་དང་རྒལ་དཀའ་ཞིང་རྟོགས་པར་དཀའ་བ་སྟེ། སྐལ་བའི་ཚུལ་འདི་ཆུང་བ་དང་ཟད་པར་གྱུར་པ་དང་ཞེས་བྱ་བར་སྦྱར་རོ། །སློང་བ་རྣམ་པར་མཛེས་པ་གང་ཡིན་པ་དེ་ནི་སློང་བ་མཛེས་པ་སྟེ། སློང་བ་འཕེལ་བ་ཞེས་བྱ་བའི་དོན་ཏོ། །དབུལ་བ་ཞེས་བྱ་བའི་ཚིག་གིས་ནི་འབྱོར་པ་དང་ལྡན་པ་ནོར་གྱིས་རྒུད་པར་གྱུར་པ་ལ་སྟེ། དབུལ་ཞིང་ཕོངས་པར་གྱུར་པ་ལའོ། །ཡང་ན་དབུལ་བ་ཉིད་སློང་བ་འཕེལ་བ་ཡིན་ནོ། །ཡང་ན་ནོར་རིམ་གྱིས་ཉུང་ངུར་གྱུར་པ་ནི་མཛའ་བོ་ནོར་དང་ལྡན་པ་རྣམས་ལ་སློང་བ་འཕེལ་བ་མཛེས་པ་ཡིན་ཏེ། དེ་ཟད་ཅིང་དབུལ་པོར་གྱུར་པ་མཛའ་བོ་དག་ལ་སློང་བ་འཕེལ་བ་མཛེས་པ་ཡིན་ནོ། །འདི་ཇི་ལྟར་ཤེས་པར་བྱ་སྟེ། ནོར་དང་ལྡན་པ་ནི་དབུལ་པོ་ལ་མི་མཛེས་ཏེ། དེ་བས་ན་ང་ལ་ནི་ནོར་ཟད་
པ་ཡང་མེད་ལ། གང་ལྟར་བུས་བསྟན་པ་དེ་ཇི་ལྟར་ནོར་དང་ལྡན་པ་ལ་སྦྱར་ཏེ། འབྱོར་པ་ཉུང་ངུར་གྱུར་པ་ལ་ཡང་མི་རིགས་ན། འབྱོར་པ་ཆུང་བའི་མཛའ་བོ་ལ་ནོར་དང་ལྡན་པས་བསླང་བ་ལྟ་ཅི་སྨོས་ཏེ། དེ་བས་ན་ཁྱད་པར་བསྟན་པར་འགྱུར་ཏེ། ཤིན་ཏུ་སྐལ་བས་འགྱུར་བའི་ཕྱིར་རོ། །སྐྱེ་བོ་ཕོངས་པ་རྣམས་ཀྱིས་ཕྱིར་བསྐྱེད་པའི། །ལུས་ནི་ང་བདག་ཉིད་ལ་ཡོད་བཞིན་དུ། །ཞེས་བྱ་བ་འདིས་ནི་སྦྱིན་པའི་དངོས་པོ་ཐ་དད་པ་མེད་པར་བསྟན་ཏོ། །ལུས་ནི་ཆེན་པོ་ཤ་རྒྱས་ཞེས་བྱ་བ་འདིས་ནི་ཉུང་ངུར་གྱུར་པ་མེད་པར་བསྟན་ཏོ། །ཁྱེད་ལ་ཞེས་བྱ་བ་འདིས་ནི་མི་འཇར་ཞིང་མི་བྱམས་པའི་སྐྱོན་མེད་ཅིང་ལུས་རིང་བདག་ལ་སློང་བ་ནི་རིགས་པ་མ་ཡིན་ནོ་ཞེས་སྨོས་ཏེ། བརྒྱ་ལ་འབྱོར་པ་ཟད་པར་མ་གྱུར་ན་ཡང་བྱམས་ཤིང་ཡིད་གཅུགས་པར་བསྟན་པའི་ཕྱིར་དབུལ་བ་ལ་ཡང་སློང་བར་མི་རིགས་སོ། །ནམ་ཡང་ནང་གི་དངོས་པོ་ནི་སློང་བར་རིགས་པ་མེད་དེ། གཞན་ལ་གནོད་པ་དང་འབྲེལ་པའི་ཕྱིར་རོ་ཞེས་བསྟན་པའི་ཕྱིར། མི་ཤེས་གཞན་གྱི་གནོད་པ་འང་མི་བཟོད་ན། །ཞེས་བྱ་བའི་ཚིགས་བཅད་བརྩམས་སོ། །མི་ཤེས་པ་ཞེས་བྱ་བ་ནི་སྔོན་མ་མཐོང་ཞིང་མ་འདྲིས་པའོ། །ཁྱེད་ཀྱི་གནོད་པ་བདག་གིས་ག་ལ་བཟོད། །ཅེས་བྱ་བ་ནི་འདི་ལྟར་བྱམས་ཤིང་ཡིད་གཅུགས་པའི་དངོས་པོ་དག་ལ་སྟེ། །དེས་ན་ཁྱེད་ལ་ཡང་གནོད་པ་བཏང་སྙོམས་སུ་བྱ་ཞིང༌། གང་འདི་དག་ཁྱེད་ལ་སློང་ན་དེ་ལ་སྦྱིན་པའི་རྗེས་སུ་ཡི་རང་བར་བྱས་ཏེ། འདི་ལྟར་པའི་སྦྱིན་པ་ལ་ཁྱེད་ཅག་གིས་རྗེས་སུ་ཡི་རང་བ་དེ་ལྟར་བྱའོ། །ཇི་ལྟར་འོག་ནས་བརྗོད་པ་ཞེས་བྱ་བ་ནི་མདུན་ནས་སོ། །དེ་ལྟར་རེ་ཞིག་སྦྱིན་པའི་བྱ་བ་རིགས་པ་ཉིད་དུ་བསྟན་ནས། སྔར་བཤད་པའི་དབྱེ་བས་དབྱེ་བ་བསྟན་པའི་ཕྱིར། དེ་བས་ན་ང་ལ་རབ་ཏུ་བྱམས་པའི་ཞེས་བྱ་བ་ལ་སོགས་པ་སྨོས་སོ། །ཆོས་ཀྱི་བགེགས་ལ་འཛེམ་པ་མེད་པ་ཞེས་བྱ་བས་ནི་དེ་དག་ཆོས་མ་ཡིན་པ་ཉིད་དུ་བསྟན་པས་འཛེམ་པ་བསྐྱེད་པའི་མཚན་ཉིད་ཀྱི་དབྱེ་བ་བསྟན་ཏོ། །ཇི་ལྟར་དབྱེ་བ་དེ་ཡང་ཆོས་མ་ཡིན་པ་ཉིད་དུ་བསྟན་ཏོ། །ད་ནི་ལོག་པ་ཉིད་དུ་བསྟན་པར་འདོད་
པས། ངའི་དོན་དུ་ཁྱོད་ཅི་སྤྱོད་པ་འདི་ལྟ་བུ་བྱ་བ་མི་རིགས་ཏེ་ཞེས་བྱ་བ་འདི་བརྩམས་སོ། །ངེད་ཅག་གི་དོན་ནི་ངའི་དོན་ཏེ་ངེད་ཅག་གི་དོན་དུའོ། །ཁྱེད་ཅག་གིས་ནམ་ཡང་ངའི་དོན་དུ་སྦྱིན་པའི་བགེགས་ནི་བྱ་བ་མ་ཡིན་ནོ་ཞེས་བྱ་བའི་དོན་ཏོ།། བདག་གི་དོན་དུ་བཟའ་བ་ལ་སོགས་པ་ཞེས་བྱ་བ་ལ་བདག་ཉིད་ཀྱི་ཡིན་པས་བདག་སྟེ། མངོན་པར་མཐོ་བ་དང་ངེས་པར་ལེགས་པ་འཐོབ་པའི་ཕྱིར་རོ། །ཕྱི་རོལ་གྱི་དངོས་པོ་ནི་བཟའ་བ་དང་བཏུང་བ་ལ་སོགས་པའོ། །སོགས་པ་སྨོས་པས་ནི་སེམས་ཅན་དང་སེམས་ཅན་མ་ཡིན་པ་ཉིད་དོ། །དེ་ལྟར་བྱེད་པ་ཅི་འདྲར་འགྱུར། །ཞེས་བྱ་བ་ནི་སེམས་ཅན་ཐམས་ཅད་ཀྱི་དོན་དུ་ནང་གི་སྦྱིན་པ་ནི་སྔོན་གང་གིས་མ་སྦྱིན་ཏེ་བྱང་ཆུབ་སེམས་དཔའ་དག་གིས་སོ། །ལེགས་སམ་ག་ལ་ཏེ་མ་ལེགས་ཀྱང༌། །ཞེས་བྱ་བ་ནི། ཇི་ལྟར་ལེགས་པ་ཉིད་མ་ཡིན་ནོ། །ཞེས་བརྗོད་པར་བྱ་སྟེ། འདིས་ཀྱང་ཆོས་མ་ཡིན་པ་དང་བདེན་པ་མ་ཡིན་པ་ཉིད་བསྟན་ཏེ་སྦྱིན་པའི་གེགས་སོ། །དེ་ཞེས་བྱ་བ་ནི་ནང་གི་དངོས་པོ་གཏོང་བ་འགོག་པར་བྱེད་པ་སྟེ། འདི་ལྟར་ལེགས་པ་མ་ཡིན་པར་འགྱུར་ཞིང་ཆོས་མ་ཡིན་པ་དང་ལྡན་པ་སྟེ། ཁྱེད་ཅག་ནམ་ཡང་དེ་ལྟ་བུ་མ་བྱེད་ཅིག་པའོ། །ནང་གི་དངོས་པོ་གཏོང་བའི་དགག་པ་གང་ཡིན་པ་དེ་ནི་ལེགས་པ་མ་ཡིན་ལ། དགག་པ་མ་ཡིན་པ་དེ་ནི་ལེགས་པ་ཉིད་དོ། །ཁྱེད་ཀྱི་ནི་སྲོག་གཅོད་པ་ལ་རྗེས་སུ་ཡི་རང་བར་བྱའོ་ཞེས་བྱ་བ་ལྟ་བུ་ཡིན་ཏེ། དེས་ན་ངའི་རྗེས་སུ་འགྲོ་བར་བྱ་བ་ནི་རིགས་པས་དཔྱད་པར་བྱའོ་ཞེས་བྱ་བ་འདི་བརྩམས་སོ། །ངའི་གྲོགས་རྗེས་སུ་མཐུན་པ་ཞེས་བྱ་བ་བསྟན་པ་ལ། གྲོགས་ཀྱི་ངོ་བོ་ནི་གོགས་ཏེ་བཀའ་ལ་གཏོགས་ཏེ་ཞེས་བྱ་བའི་དོན་ཏོ། །ངེད་ཅག་བྱང་ཆུབ་སེམས་དཔའི་གྲོགས་དེ་དང་མཐུན་པ་ནི་ངའི་གྲོགས་མཐུན་པ་སྟེ། འདི་ནི་གཞན་མི་མཐུན་པའི་ཞེས་བསྟན་པའི་ཚུལ་དུ་འགྱུར་ཏེ། དེ་གང་ཡིན་ཞེ་ན། ལམ་ལོག་པར་འགྲོ་བ་ལས་བཟློག་པའི་སྟེ། ལམ་ལོག་པ་ལས་བཟློག་པ་
ཡིན་པས་ལོག་པར་འགྲོ་བ་དེ་ལས་བཟློག་པའོ། །དེ་གང་ཞེ་ན་ཡིད་དོ། །རིགས་པས་དཔྱད་པར་བྱའོ་ཞེས་བྱ་བ་ནི་གང་ལ་ལ་སེམས་ཅན་རྣམས་ཀྱི་དོན་དུ་བདག་ཉིད་ཡོངས་སུ་གཏོང་བར་བྱེད་པ་སྟེ། གཞན་གང་ཞིག་རྗེས་སུ་ཡི་རང་བར་མི་བྱེད་པ་དེ་ནི་རྗེས་སུ་ཡི་རང་བ་སྲོག་གཅོད་པའི་ཁ་ན་མ་ཐོ་བ་དང་ལྡན་པར་འགྱུར་རོ་ཞེས་འདིར་ཡང་ཁ་ཅིག་ཞུགས་པར་འགྱུར་ཞེས་འདིར་ཡང་ཁ་ཅིག་ཞུགས་པའོ། །ཅི་སྟེ་རིགས་སམ་མི་རིགས་ཤེ་ན། སྐྱེས་པའི་རབས་ཐོས་པས་ཀྱང་བསོད་ནམས་མེད་པར་འགྱུར་ཏེ། དེ་ན་ནི་བྱང་ཆུབ་སེམས་དཔའ་ནང་གི་དངོས་པོ་ཡོངས་སུ་གཏོང་བ་ཡོད་པའི་ཕྱིར་རོ། །དེ་ལ་རྗེས་སུ་ཡི་རང་བར་བྱེད་པ་དང༌། རྗེས་སུ་ཡི་རང་བ་ཡང་བསོད་ནམས་མ་ཡིན་པར་འགྱུར་ཏེ། གལ་ཏེ་འདས་མ་ཐག་པ་དེ་ལྟར་རིགས་པས་དཔྱད་པར་བྱས་པ་དེ་བས་ན་བསོད་ནམས་མ་ཡིན་པ་གང་ཡིན་བ་དེ་ཉིད་ལོག་པའི་ལམ་དེ་ལས་བཟློག་པར་བྱས་པ་དེ་ལ་རྗེས་སུ་ཡི་རང་བ་དང་མཐུན་པའི་ཚིག་གང་ཡིན་པ་དེ་ནི་རྗེས་སུ་ཡི་རང་བ་དང་མཐུན་པའི་ཚིག་གོ །བཟང་ངོ་ཞེས་བྱ་བ་ཉིད་ནི་བཟང་བ་ཉིད་དོ། །དེ་ལྟར་བྱེད་པ་ཅི་འདྲ་བར་འགྱུར་བ་ལྟ་ཅི་སྨོས། དེ་ལྟར་བྱ་བའི་ཁྱད་པར་བསྟན་པའི་ཕྱིར། ནོར་ནི་གཅིག་པུས་སྤྱད་པ་ཞེས་བྱ་བའི་ཚིགས་བཅད་གཉིས་སྨོས་སོ། །བྱ་བ་དེའི་ཁྱད་པར་རྣམ་པ་གཉིས་སུ་བསྟན་པ་སྟེ། སློང་བ་ཉིད་དུ་རྙེད་དཀའ་བའི་ཕྱིར་དང༌། སྦྱིན་པའི་དངོས་པོ་ཤེས་པས་མ་རུང་བ་ཡོངས་སུ་གཏོང་བ་ལེགས་པའི་ཕྱིར་རོ། །དེ་ལས་ནང་གི་དངོས་པོ་གཏོང་བ་རྙེད་དཀའ་བའི་དབང་དུ་བྱས་ནས། ནོར་ནི་གཅིག་པུས་སྤྱད་པ་མ་ཡིན་ལ། །ཞེས་བྱ་བའི་ཚིགས་བཅད་སྨོས་སོ། །གཅིག་པུས་མ་ཡིན་ལ་ཞེས་བྱ་བ་ནི་ནོར་འདི་དག་གཅིག་པུས་སྤྱད་པ་གང་ཡིན་པ་དེ་ནི་དེ་སྟེ། ནོར་གཅིག་པུས་སྤྱད་པར་བྱ་བ་ཞེས་བྱ་བའི་དོན་ཏོ། །ནོར་ཞེས་སྨོས་པས་ནི་བཟའ་བ་དང༌། བཏུང་བ་དང༌། གོས་ལ་སོགས་པ་བྱེ་བྲག་མེད་པར་གཟུང་ངོ༌། །ཉིན་རེ་མ་ཡིན་ལ་ཞེས་བྱ་བ་ནི། ཉི་མ་རེ་རེ་ཞིང་མ་ཡིན་པ་སྟེ། དུས་མ་ཡིན་པ་ཞེས་བྱ་བའི་དོན་ཏོ། །མི་འགྱུར་རོ་ཞེས་བྱ་བ་ནི་རྙེད་དཀའ་བ་ཉིད་དུ་
བསྟན་ཏོ། །སློང་བ་འདི་ལྟ་བུ་དང་ཞེས་བྱ་བ་ནི་ནང་གི་དངོས་པོ་ལོངས་སྤྱོད་ཅིང་སློང་བའི་སྐྱེ་བོ་ནི་ཉུང་བས་སོ། །ལྷ་དག་མཉེས་པར་བྱས་ཀྱང་མི་འགྲུབ་ན། །ཞེས་བྱ་བ་འདིས་ནི་ཤིན་ཏུ་རྙེད་དཀའ་བ་ཉིད་དུ་བསྟན་ཏོ། །སློང་བ་འདི་ལྟ་བུས་ཡང་ཞེས་བྱ་བའི་ཚིགས་བཅད་ཀྱིས་ནི་སྦྱིན་པའི་དངོས་པོ་ཉེས་པས་མ་རུང་བར་གྱུར་པའི་སྦྱིན་པ་དང༌། སྦྱིན་པ་གཏོང་བ་སླ་བ་ཉིད་དུ་སྟོན་པར་འདོད་པས་བརྩམས་པ་ཡིན་ནོ། །ཅུང་ཟད་ཅེས་བྱ་བ་ནི་འཆི་བའི་ཆོས་ཅན་ཡིན་ལ། ཇི་སྲིད་དུ་འདུག་པ་དེ་སྲིད་དུ་ཡང་མི་བདེ་བའི་གནས་སུ་གྱུར་ཅིང་མི་བདེ་བའི་གཞིར་གྱུར་པ་སྟེ། རྒ་བ་དང་ནད་ལ་སོགས་པའི་སྡུག་བསྔལ་གྱི་གཞིར་གྱུར་པའི་ཕྱིར་རོ། །ཐེ་ཚོམ་ཟ་བའང་ཞེས་བྱ་བ་ནི་སྦྱིན་པར་བྱ་བའམ། སྦྱིན་པར་མི་བྱ་ཞེས་སོ། །རྒྱ་ཆེར་མི་འགྱུར་ན་ཞེས་བྱ་བ་ནི་སློང་བའི་སྐྱེ་བོ་ཉིད་དོ། །འཇུངས་ཤིང་ཞུམ་པ་ཞེས་བྱ་བ་ནི་སྦྱིན་པར་མི་འདོད་པ་ཉིད་དོ། །མུན་པའི་མཆོག་ཡིན་ནོ་ཞེས་བྱ་བ་ནི་གཏི་མུག་གི་རབ་མཆོག་སྟེ། དེ་བས་ན་ཐེ་ཚོམ་ཟ་བ་ཡང་མི་རིགས་པ་ཉིད་ན། མི་སྦྱིན་པ་ལྟ་སྨོས་ཀྱང་ཅི་དགོས། རང་གི་ལུས་ལ་རྩ་བཀྲོས་ཏེ། གནོད་སྦྱིན་དེ་རྣམས་ལ་ཞེས་བྱ་བ་ནི། དང་པོ་ཉིད་དུ་རྗེས་སུ་འདོད་པ་ནི་འདི་ཉིད་དུ་ཡིན་པས་སོ། །ཆོས་ཀྱི་གྲོགས་ཀྱང་བྱ་བ་དང༌། །ཞེས་བྱ་བ་ནི། སློང་བ་རྣམས་ཀྱི་བྱང་ཆུབ་སེམས་དཔའ་དགེ་བའི་བཤེས་གཉེན་ཡིན་ནོ་ཞེས་བྱ་བའི་ཚིག་གིས་སོ། །འདི་ནི་རེ་ཞིག་འཇིག་རྟེན་ཕ་རོལ་གྱི་ཕན་ཡོན་ནོ། །ང་ཡང་རབ་ཏུ་དགའ་བར་འགྱུར་བ་ཞེས་བྱ་བ་ནི་མཐོང་བའི་ཆོས་ཀྱི་ཕན་ཡོན་ནོ། །ཆོས་དགའ་བ་དེ་གཉིས་ཀྱི་དངོས་པོས་ནི་འཛིན་པའི་འཇིག་པ་ལས་ལྡོག་པ་སྟེ། དེའི་ཕན་ཡོན་རྣམ་པ་གཉིས་བསྟན་ཏོ། །སྙིམ་པ་བཟེད་དེ་ཞེས་བྱ་བ་སྨོས་པས་ནི་སྣོད་དང་འབྲིམ་པས་དུས་ལས་འདས་ཀྱིས་དོགས་པའོ། །འདིར་ཁྱད་པར་བསྟན་པའི་ཕྱིར། ཙནྡན་དམར་པོའི་ཁུ་བ་འདྲ་བ་ཞེས་སྨོས་ཏེ། དམར་བའི་ཁྱད་པར་ནི་རྒྱལ་པོ་དེའི་མཚན་ཉིད་དང་ལྡན་པའོ། །ཁྲག་གི་མཚན་ཉིད་ཀྱི་ཁྱད་
པར་བསྟན་པའི་ཕྱིར་རོ། །མཚམས་དུས་ཀྱི་ཆར་སྤྲིན་ལྟ་བུ་ནི་ཁྲག་གོ །ཁྲག་དང་འབྲེལ་པ་དེ་ནི་གནོད་སྦྱིན་ནོ། །དགའ་བ་མཆོག་དང་ལྡན་པས་ལུས་ཀྱང་མ་ཉམས་པ་ནི་བརྟན་པ་དང་ལྡན་པའོ། །སེམས་ཀྱང་བརྒྱལ་བ་མེད་པ་ནི་ལུས་ཀྱི་ཡོན་ཏན་དང་ལྡན་པ་སྟེ། ཁྲག་གི་རྒྱུན་ཀྱང་ཟད་པར་ཡོང་མ་གྱུར་ཏོ། །ད་ནི་འདིས་འཚལ་ཏེ་ཞེས་བྱ་བ་ནི་ཁྲག་དེ་དགག་པ་སྟེ། གང་གཞན་སྔར་བསླངས་པར་གྱུར་པ་དེ་ནི་བྱིན་པར་གྱུར་ཏོ་ཞེས་བསྟན་པ་ཡིན་ནོ། །སྡུག་བསྔལ་མང་པོ་འབྱུང་བའི་གནས། །ཞེས་བྱ་བ་འདིས་ནི་སྡུག་བསྔལ་བ་ཉིད་དུ་བསྟན་ཏོ། །བྱས་པ་མི་གཟོ་ཞེས་བྱ་བ་འདིས་ནི་མི་གཙང་བ་ཉིད་དེ། གཙང་བའི་རྫས་ཀྱིས་བསྐྱེད་ཀྱང་ཡང་མི་གཙང་བ་ཉིད་ཡོངས་སུ་མི་འདོར་བས་སོ། །ཡང་ན་སྡུག་བསྔལ་མང་པོ་འབྱུང་བའི་གནས་དེ་ཉིད་ཀྱི་ཁྱད་པར་གྱི་དོན་ཏོ། །སྡུག་བསྔལ་གསོ་བའི་གཞིའི་དོན་ཏོ། །སློང་བ་རྣམས་ཀྱི་བསྙེན་བཀུར་ནི་སློང་བ་རྣམས་ལ་སྦྱིན་པའོ། །དེའི་གྲུབ་པ་ནི་སློང་བ་དག་ལ་སྦྱིན་པ་དེའི་དོན་གྲུབ་སྟེ། སློང་བ་དག་ལ་སྦྱིན་པའི་དོན་གྲུབ་པའོ། །རབ་ཏུ་དགའ་དང་རྗེས་སུ་མཐུན། །ཞེས་བྱ་བ་ནི་སྡུག་བསྔལ་མང་པོའི་འབྱུང་གནས་ཡིན་ཡང་བཟུང་བར་གྱུར་པ་བདེ་བའི་རྒྱུར་གྱུར་པ་སྟེ། སྦྱིན་པ་པོ་རང་གི་བདེ་བའི་རྒྱུར་གྱུར་པས་སོ། །བདེ་བ་ཞེས་སྨོས་པ་ནི། བྱས་པ་མི་གཟོ་བ་ཉིད་ཡིན་ནོ་ཞེས་གཞན་དག་ཏུ་བསྟན་པ་ནི་ལན་དུ་ཕན་འདོགས་པར་བཟུང་བའི་ཕྱིར་རོ། །རབ་ཏུ་དགའ་བ་དང༌། རབ་ཏུ་ཚིམ་པ་ཞེས་བྱ་བ་ནི་རབ་ཏུ་དགའ་བ་དང་རྗེས་སུ་མཐུན་པར་གྱུར་པ་ཞེས་བྱ་བ་བསྟན་མ་ཐག་པ་འདིའི་རྒྱུས་སོ། །ཨུཏྤ་ལའི་འདབ་མ་ལྟར་མདོག་སྔོ་ཞིང་མཐིང་ག་གང་ཡིན་པ་དེ་ནི་ཨུཏྤ་ལ་མཐིང་ག་ལྟར་མདོག་སྔོ་བའོ། །རྡོ་རྗེ་རིན་པོ་ཆེས་སྤྲས་པའི་རལ་གྲི་སྔོན་པོའི་འོད་ཀྱིས་མཛེས་པ་གང་ཡིན་པ་དེ་ནི་རལ་གྲི་རྣོན་པོ་རྡོ་རྗེ་རིན་པོ་ཆེས་སྤྲས་པའི་འོད་ཀྱིས་མཛེས་པའོ། །སྐབས་ནི་མེད་པར་བྱས་པས་ན། །ཞེས་བྱ་བ་ནི་སྲན་ཐུབ་པ་མེད་པའི་སྐབས་
མེད་པར་བྱས་པའོ། །ཅིའི་ཕྱིར་ཞེ་ན། སྦྱིན་པ་ལ་དགའ་བས་སོ། །དྲངས་པས་ན་ཞེས་བྱ་བ་ནི་འདྲེན་པར་བྱེད་པ་སྟེ། ཅི་ལྟར་འདི་བསྟན་མ་ཐག་པས་དྲངས་པ་སྟེ། དེ་བས་ན་དེ་ནི་ཚིགས་བཅད་ཀྱིས་སོ། །དེ་ལྟར་བྱས་པས་ཞེས་བྱ་བ་ནི་གྲགས་པའི་སེམས་ཀྱི་ཚིག་གིས་སོ། །ཆོས་ལ་དགའ་ཞིང་ཞེས་བྱ་བ་ནི་མངོན་པར་མཐོ་བ་འདོད་པའི་ཕྱིར་རམ། བདག་ཐར་པ་འདོད་པའི་ཕྱིར་རོ། །སྙིང་རྗེའི་དབང་དུ་གྱུར་ཏེ་ཞེས་བྱ་བ་ནི་སེམས་ཅན་གཞན་ལ་ཕན་པའི་དོན་ཏོ། །མདོག་གསལ་བར་བྱས་པ་ནི་མདོག་གསལ་བར་བྱས་པའོ། །བཞིན་མདངས་མ་གྱུར་ཅིང་རབ་ཏུ་དང་བ་ཞེས་བྱ་བ་ནི་བཞིན་མདངས་གསལ་བ་གཟུང་སྟེ། དགའ་བ་ཡིན་པས་རྗེས་སུ་དཔག་གོ །མི་གཡོ་བར་དེ་བཞིན་འདུག་པ་ཞེས་བྱ་བ་ནི་ལུས་ཀྱི་ཚོར་བ་ལ་སོགས་པས་སོ། །རབ་ཏུ་དང་བ་ཆེར་གྱུར་ཏོ། །ཞེས་བྱ་བ་ནི། བཞིན་མདངས་མ་གྱུར་ཅིང་གསལ་བའི་ཕྱིར་རོ། །ངོ་མཚར་ཆེར་གྱུར་ཏོ་ཞེས་བྱ་བ་ནི་མི་གཡོ་ཞིང་དེ་བཞིན་དུ་འདུག་པའི་ཕྱིར་ཏེ། ཤ་གཅོད་པ་དང་བཅས་པའི་སྡུག་བསྔལ་གྱིས་སོ། །ངོ་མཚར་ནི་སྙིང་རྗེས་གཞན་ལ་བདེ་བ་འདོད་པ་སྟེ། སེམས་ཅན་ལ་དགའ་བ་ཤས་ཆེ་བའི་ཕྱིར་རོ། །རྨད་དུ་བྱུང་བ་ནི་མི་གཡོ་བར་དེ་བཞིན་འདུག་པ་སྟེ། ཤ་ཆོད་པ་དང་བཅད་པའི་ཚོར་བའི་སྡུག་བསྔལ་ཟིལ་གྱིས་ནོན་པའི་ཕྱིར་རོ། །བདེན་ནམ་བརྫུན་ཞེས་དཔྱོད་ཅིང་ངོ་མཚར་སྐྱེས་ཞེས་བྱ་བ་ནི་ངོ་མཚར་རྨད་དུ་བྱུང་བ་སྐྱེས་པས་སོ། །དེ་ལ་བསྟོད་ཅིང་ཕྱག་ཀྱང་འཚལ་བར་གྱུར། །ཞེས་བྱ་བ་ནི་དེ་ལ་བསྟོད་པ་དང་ཕྱག་འཚལ་བར་གྱུར་པ་སྟེ། དེ་ལ་བསྟོད་པ་དང་འདུད་པ་ན། ཁྲག་དང་ཤ་སྦྱིན་པས་ཕྱག་འཚལ་བའོ། །གུས་པའི་དབང་གིས་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་གསང་ཚིག་དང༌། གཙོ་བོ་དང༌། སྤྲོ་བའི་ནུས་པ་བསྟན་ཏོ། །དང་པོའི་རྐང་པས་ནི་གསང་ཚིག་གི་ནུས་པ་བསྟན་ཏེ། གུས་པ་དང་གྲགས་པས་ནི་གསང་ཚིག་གི་ནུས་པ་བསྐྱེད་པས་སོ། །ཚིག་རྐང་གཉིས་
པས་ནི་བདག་བོའི་ནུས་པ་བསྟན་ཏེ། དཔལ་ཞེས་སྨོས་པའི་ཕྱིར་རོ། །ཁྱེད་ཀྱི་མཐུས་བསྐྱབས་ཞེས་བྱ་བ་འདིས་ནི་སྤྲོ་བའི་ནུས་པ་བསྟན་ཏོ། །བརྒྱ་བྱིན་མགོན་དུ་གྱུར་ལ་ཞེས་བྱ་བ་ལ། ནུས་པ་ཡིན་པས་བརྒྱ་བྱིན་ཏེ། སྤྲོ་བའི་ཡོན་ཏན་སྟན་པར་བྱེད་པའི་མིང་སྨོས་པས། སྤྲོ་བའི་ནུས་པའི་རྗེས་སུ་བསྟན་པའི་དོན་ཏོ། །དེ་ལས་བྱང་ཆུབ་སེམས་དཔའི་སྤྲོ་བ་འདི་ཁྱད་པར་དུ་བསྟན་པའི་ཕྱིར། ཁྱོད་ལྟ་བུའོ་བརྒྱལ་བར་བགྱིས་ཕ་དེ་བས་ནའོ། །ཐམས་ཅད་སའི་བདག་པོ་འམ་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི། གཅིག་ཏུ་མངོན་པར་མཐོ་བའི་སྤྱོད་པ་ལས་ཀྱང་བརྩམས་པ་མ་ཡིན་ལ། ངེས་པར་ལེགས་པ་ལས་ཀྱང་བརྩམས་པ་མ་ཡིན་ནོ། །རྣམ་པར་གྲོལ་བའམ་ཞེས་སྨོས་པ་ལ། རྣམ་པར་གྲོལ་བ་ནི་འདིར་ཉན་ཐོས་དང་རང་སངས་རྒྱས་ཏེ་རྣམ་པ་གཉིས་སོ། །མངོན་པར་མཐོ་བ་ནི་འདོད་ཆགས་དང་བྲལ་བ་དང་འདོད་ཆགས་དང་མ་བྲལ་བའི་དབྱེ་བས་སོ། །འདོད་ཆགས་དང་བྲལ་བའི་དབང་དུ་བྱས་ནས། ཚངས་པའམ་ཞེས་སྨོས་སོ། །འདོད་པ་སྤྱོད་པའི་མངོན་པར་མཐོ་བ་ཡང་རྣམ་པ་གཉིས་ཏེ། ལྷ་དང་མིའི་དབང་དུ་བྱས་པའོ། །ནོར་གྱིས་ཕྱུག་པའམ་དབང་པོའམ་ཞེས་བྱ་བ་ལ། ལྷའི་མངོན་པར་མཐོ་བ་ཡང་རྣམ་པ་གཉིས་ཏེ། རྒྱལ་ཆེན་རིགས་བཞི་དང་སུམ་ཅུ་རྩ་གསུམ་པའི་དབྱེ་བས་སོ། །དེ་ལ་རྒྱལ་ཆེན་རིགས་བཞི་དང་མངོན་པར་མཐོ་བའི་དབང་དུ་བྱས་ནས། ནོར་གྱིས་ཕྱུག་པའམ་ཞེས་བྱ་བ་ཡིན་ནོ། །སུམ་ཅུ་རྩ་གསུམ་པའི་དབང་དུ་བྱས་ནས་དབང་པོའམ་ཞེས་བསྟན་ཏོ། །མིའི་མངོན་པར་མཐོ་བའི་ཁྱད་པར་གྱི་དབང་དུ་བྱས་ནས། ཐམས་ཅད་སའི་བདག་པོའམ་ཞེས་བྱ་བ་ཡིན་ཏེ། འཁོར་ལོས་སྒྱུར་བའི་རྒྱལ་སྲིད་ཅེས་བྱ་བའི་དོན་ཏོ། །བཞེད་པའི་དོན་ནི་མི་རིང་སྟེ། རྩོལ་ཕོད་པ་གང་ཡིན་པས་ཐམས་ཅད་འཐོབ་པར་ནུས་པའོ། །རྙེད་པར་བྱ་དཀའ་བ་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་སྲིད་པའི་ལོངས་སྤྱོད་ལ་མི་གནས་པ་སྟེ། ཉེས་པ་གསུམ་གྱིས་མ་
རུངས་པར་བྱས་པར་སྟོན་ཏེ། དེ་ལ་ཉེས་པ་གསུམ་ནི་རྒྱུ་དང༌། ངོ་བོ་དང༌། འབྲས་བུའི་ཉེས་པས་སོ། །རྒྱུའི་ཉེས་པའི་དབང་དུ་བྱས་ནས་རྙེད་པར་དཀའ་ལ་ཞེས་བྱ་བ་སྟེ། གལ་ཏེ་འབད་པ་ཕུན་སུམ་ཚོགས་པས་ཐོབ་པར་འགྱུར་བ་ཡིན་ཡང་རྟག་པ་མེད་པས་སོ། །འདི་ལ་གང་གི་ཕྱིར་མི་རྟག་པ་ཡིན་ཞེ་ན། རང་བཞིན་གྱི་སྐྱོན་གྱི་དབང་དུ་བྱས་ནས། འཇིག་པར་སླ་བ་དང་ཞེས་བྱ་བ་ཡིན་ཏེ། རང་གི་ངང་གིས་འཇིག་པའོ། །འཇིག་པར་སླ་བ་ཡིན་ཡང༌། རང་གི་བྱ་བ་བྱེད་པར་ནུས་པར་གྱུར་ན། དེ་ལྟ་ན་ཡང་འདོད་པར་བྱ་བ་ཡིན་ན། དེ་མད་པར་བསྟན་པའི་ཕྱིར། ཆོག་པའི་བདེ་མེད་ཅེས་སྨོས་ཏེ། དེ་ལ་དེ་ཉེ་བར་ལོངས་སྤྱོད་པས་ཕྱིས་ཀྱང་སྤྱད་མི་དགོས་པར་མི་འགྱུར་བས་སོ། །ཅིའི་ཕྱིར་ཞེ་ན། རབ་ཏུ་ཞི་མེད་པ་ཞེས་སྨོས་ཏེ། གང་ཕུན་སུམ་ཚོགས་པ་དོན་དུ་གཉེར་བ་དེ་དག་ལ་ཆགས་པ་ལས་ཞི་བར་མི་ནུས་སོ། །ཅིའི་ཕྱིར་ཞེ་ན། སྲིད་པའི་ལོངས་སྤྱོད་བདེ་བ་ཞེས་བྱ་བ་ཡིན་ཏེ། འདིས་ནི་འདོད་པའི་ཁམས་ཀྱི་འདོད་པར་རྟོགས་པར་བྱའོ། །ཅི་ལྟར་འདི་རྟོགས་པར་བྱ་ཞེ་ན། ལྷ་དབང་དཔལ་ཞེས་སྨོས་སོ། །དེ་ལས་གཞན་པ་ཞེས་བྱ་བ་འདིས་ནི་ཐམས་ཅད་སའི་བདག་པོ་དང༌། ནོར་གྱིས་ཕྱུག་པ་གཉིས་ནི་ཐ་མལ་པ་ཉིད་དུ་བསྟན་ཏོ། །བདག་གི་སྡུག་བསྔལ་ཟད་པ་ཙམ་གྱི་ཕྱིར། །ཞེས་བྱ་བའི་ཚིགས་བཅད་འདིས་ནི། མྱ་ངན་ལས་འདས་པ་དོན་དུ་མི་གཉེར་བ་ཉིད་ཀྱི་དབང་དུ་བྱས་པ་སྟེ། དེ་མི་བཞེད་པའི་ཕྱིར་དང༌། ཚངས་པ་ཡང་ཡོངས་སུ་དགག་པར་བྱས་པ་ཡིན་ནོ། །བདག་གི་སྡུག་བསྔལ་ཟད་པ་ཙམ་གྱི་ཕྱིར། །ཞེས་བྱ་བ་ནི། ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པ་ཐོབ་པའོ། །སྡུག་བསྔལ་མི་བཟད་ནད་ཀྱིས་ཉེན་པའི་ཞེས་བྱ་བ་འདི་ལ། རབ་ཏུ་ཉེན་པ་ནི་རྟག་ཏུའོ། །མི་བཟད་པ་ནི་ཤས་ཆེ་བའོ། །སྡུག་བསྔལ་མི་བཟད་པ་དེས་བྱས་པའི་ངལ་བ་ནི་སྡུག་བསྔལ་མི་བཟད་པའི་ངལ་བ་སྟེ། དེའི་ནད་ཀྱིས་ཉེན་པའོ། །གལ་ཏེ་འདི་
ཐམས་ཅད་དོན་དུ་མི་གཉེར་ན་གཞན་གང་དོན་དུ་གཉེར་བ་ཡིན་ཞེ་ན། བསོད་ནམས་འདི་ཡིས་ཐམས་ཅད་ཅེས་བྱ་བའི་ཚིགས་བཅད་སྨོས་སོ། །ཐམས་ཅད་གཟིགས་པའི་གོ་འཕང་ཐོབ་ཅིང༌། ཞེས་བྱ་བ་འདིས་ནི་ཤེས་བྱ་སྒྲིབ་པ་སྤངས་པ་བསྟན་ཏོ། །སྐྱོན་གྱི་དགྲ་བཏུལ་ནས་ཞེས་བྱ་བ་འདིས་ནི་ཉོན་མོངས་པའི་སྒྲིབ་པ་ཐམས་ཅད་སྤངས་སོ། །བསོད་ནམས་འདི་ཡིས་ཞེས་བྱ་བ་འདིས་ནི་ཚོགས་ཕུན་སུམ་ཚོགས་པ་བསྟན་ཏོ། །ཐམས་ཅད་གཟིགས་པའི་གོ་འཕང་ཐོབ་ཅིང་སྐྱོན་གྱི་དགྲ་བཏུལ་ནས། ཞེས་པ་འདིས་ནི་འབྲས་བུ་ཕུན་སུམ་ཚོགས་པ་བསྟན་ཏོ། །རྒ་བ་དང་ན་བ་ཞེས་བྱ་བའི་ཚིགས་སུ་བཅད་པ་འོག་མ་ཕྱེད་ཀྱིས་ནི་དོན་ཐམས་ཅད་ཀྱི་བྱ་བ་ཕུན་སུམ་ཚོགས་པ་བསྟན་ཏེ། རྒ་ནད་འཆི་བའི་རླབས་ཆེན་པོ་དང་ཆོས་མཐུན་པ་སྟེ། ཆེན་པོ་ཡིན་པའི་ཕྱིར་དང༌། ཡང་དང་ཡང་དུ་རྒྱུན་མི་འཆད་པར་འཇུག་པའོ། །འདི་ལྟ་བུའི་བརྩལ་བ་ཞེས་བྱ་བ་ནི། སངས་རྒྱས་ཉིད་དོན་དུ་གཉེར་བའི་བརྩལ་བ་གང་ཡིན་པ་སྟེ། བྱང་ཆུབ་ཀྱི་སེམས་ཞེས་བྱ་བའི་དོན་ཏོ། །ལས་འདི་ཞེས་བྱ་བ་ནི། རང་གི་ཤ་དང་ཁྲག་སྦྱིན་པའི་ལས་སོ། །ཁྱོད་ལྟ་བུ་ཞེས་བྱ་བ་བྱང་ཆུབ་སེམས་དཔའ་རྣམས་སོ། །འཇིག་རྟེན་ཕན་པའི་ཕྱིར་ལགས་ཀྱང༌། །ཞེས་བྱ་བ་ནི་འགྲོ་བ་མཐའ་དག་ཡོངས་སུ་བསྐྱབ་པའི་ཕྱིར་ཏེ། ཐམས་ཅད་ཀྱི་ནོར་བུར་ཁྱོད་གྱུར་པས་བདག་ཀྱང་འགྲོ་བའི་ཁོངས་སུ་གཏོགས་པར་གྱུར་པ་སྟེ། དེ་བས་ན་ཇི་ལྟར་ཡང་དོན་དུ་གཉེར་པར་བྱའོ། །བདག་ཅག་རང་ལ་ཕན་འཚལ་བ། །ཞེས་སྨོས་ཏེ། ཡང་འབྱོར་པ་དོན་དུ་གཉེར་བའོ་ཞེས་བྱ་བ་སངས་རྒྱས་ཉིད་ཐོབ་པའོ། །མ་འཚལ་བ་ནི་ཞེས་བྱ་བ་ནི། འདིའི་དོན་དམ་པ་ལ་འཇུག་པའོ། །བདག་གི་དོན་ཡང་ཞེས་བྱ་བ་ནི། མ་འོངས་པའི་མཐའི་དུས་ཀྱི་ངན་སོང་གི་སྡུག་བསྔལ་གྱི་རྒྱུར་གྱུར་པའི་ལས་ཀྱང་ངོ༌། །རྗེས་སུ་གཟུང་བའི་རྒྱུར་གྱུར་བ། །ཞེས་བྱ་བ་ནི་རྗེས་སུ་བཟུང་བར་བྱེད་པའི་ལམ་དུ་གྱུར་པ་སྟེ། མི་ཤེས་པ་དེའི་རྗེས་སུ་བཟུང་བར་འགྲོ་བ་སྟེ། དེ་བས་ན་རྗེས་
སུ་བཟུང་བའི་རྒྱུར་གྱུར་པ་ཞེས་བརྗོད་དོ། །མི་ཤེས་པས་བདག་རྗེས་སུ་གཟུང་བར་འགྱུར་བའོ་ཞེས་བྱ་བའི་དོན་ཏོ། །རྣམ་པར་ཐར་པའི་ཆོས་ཀྱི་བདུད་རྩི་ལས། ཐོག་མར་བགོ་བར་བྱ་ཞེས་བྱ་བ་ལ། རྣམ་པར་གྲོལ་བ་ནི་རྣམ་པར་ཐར་པ་སྟེ། ཉོན་མོངས་པ་སྤངས་པའོ། །རྣམ་པར་ཐར་པ་ཉིད་ཆོས་ཡིན་པས་རྣམ་པར་ཐར་པའི་ཆོས་སོ། །འདིས་ནི་ཉན་ཐོས་ཀྱི་ཐེག་པས་མྱ་ངན་ལས་འདས་པའི་རྣམ་པར་གྲོལ་བའོ། །རྣམ་པར་ཐར་པའི་ཆོས་ཉིད་བདུད་རྩི་ཡིན་པས་རྣམ་པར་ཐར་པའི་ཆོས་ཀྱི་བདུད་རྩིའོ། །དེ་ཡང་དག་པར་འགྱེད་པ་ནི་རྣམ་པར་ཐར་པའི་ཆོས་ཀྱི་བདུད་རྩི་བགོ་བར་བྱ་བའོ། །ཀུན་ཏུ་ཤེས་པ་སྦྱིན་པའི་དབང་དུ་བྱས་ནས། ང་ནི་དེ་ལ་དགའ་བ་ལ་ཞེས་བྱ་བ་ལ་སོགས་པའི་ཚིགས་བཅད་སྨོས་ཏེ། །གཞན་ནོར་ཆུང་མ་དག་ལ་ཆགས་པ་དང༌། །ཞེས་བྱ་བ་ལ། གཞན་ནོར་ཞེས་བྱ་བ་སྨོས་པས་ནི་མ་བྱིན་པར་ལེན་པ་ལས་ལྡོག་པ་དང༌། ཆུང་མ་དག་ཅེས་བྱ་བས་ནི་གཞན་གྱིས་ཡོངས་སུ་བཟུང་བའི་ཆུང་མ་ནི། འདོད་པས་ལོག་པར་གཡེམ་པ་ལས་ལྡོག་པའོ། །བརྫུན་དུ་སྨྲ་བ་ཞེས་བྱ་བས་ནི་སྨད་པའི་ངག་ལས་ལྡོག་པ་སྟེ། དེ་ལྟར་ཡང་བསླབ་པའི་གཞི་ལྔ་དག་འཛིན་དུ་བཅུག་པའོ། །དེ་དག་ཅེས་བྱ་བ་ནི་མེ་ཏོག་གོ །རྫིས་བསྐྱོད་ཅེས་བྱ་བའི་སྒྲས་ནི་འདིར་ཤིང་དང་མེ་ཏོག་དང་སྦྱར་བར་བྱའོ། །འགུལ་བར་གྱུར་ཅེས་བྱ་བ་ནི་ས་འགུལ་བའོ། །རྒྱ་མཚོ་ཆེན་པོ་ཤིན་ཏུ་བདོ་བ་ཞེས་བྱ་བའི་ཚིགས་སུ་བཅད་པ་ཡང་ས་འགུལ་བས་ཞེས་བྱ་བའི་དབང་དུ་བྱ་བ་རྗེས་སུ་འབྲང་ངོ༌། །ཡང་ན་རྒྱ་མཚོ་ཆེན་པོ་ཤིན་ཏུ་བདོ་བ་ཞེས་བྱ་བ་འདིས་ནི་དོན་བྱས་པ་ཉིད་དུ་བལྟ་བར་བྱའོ། །རང་བཞིན་ལས་ནི་ལྷག་པའི་ཤུགས་དང་སྒྲས། །ཞེས་བྱ་བའི་རང་བཞིན་དེ་ལས་ལྷག་པའི་ཤུགས་དང་ལྡན་པའི་སྒྲ་དང་སྐད་གང་ལ་ཡོད་པའི་ཆུ་དེ་ནི་རང་བཞིན་ལས་ལྷག་པའི་ཤུགས་དང་སྒྲའོ། །སྲ་ཡམ་ཀྲ་མ་ཞེས་བྱ་བའི་ཚིགས་བཅད་འདི་ནི་རྒྱུ་ཕུན་སུམ་ཚོགས་པ་དང༌། འབྲས་བུ་ཕུན་སུམ་ཚོགས་པ་དང༌།
སེམས་ཅན་གྱི་དོན་བྱ་བའི་ཕུན་སུམ་ཚོགས་པའི་དབང་དུ་བྱས་པའོ། །རྒྱུ་ཕུན་སུམ་ཚོགས་པའི་དབང་དུ་བྱས་པ་ནི། སྐྱེ་བོ་དམ་པའི་ཆོས་རེ་བཟང་ཞེས་བྱ་བ་སྟེ། སྐྱེ་བོ་བཟང་པོ་ནི་བྱང་ཆུབ་སེམས་དཔའ་སྟེ། རང་གི་སྲོག་ལ་ཆགས་པ་མེད་པས་སོ། །ཆོས་ནི་གནས་པའོ། །ཡང་ན་འདུག་པ་ཡིན་པས་གནས་པ་སྟེ། རང་གི་སྲོག་ལ་ལྟོས་པ་མེད་པ་ནི། བྱང་ཆུབ་སེམས་དཔའི་སྤྱོད་པ་ལ་གནས་པའོ། །ཡང་ན་ཆོས་ནི་སེམས་བསྐྱེད་པའོ། །དེས་ཁྱད་པར་དུ་གྱུར་པ་ནི་སའི་ཕྱོགས་ལ་སོགས་པ་སྟེ། ལྷག་པའི་བསམ་པའི་ས་ལ་གནས་པའི་བྱང་ཆུབ་སེམས་དཔའ་རྣམས་སོ། །རང་གི་སྦྱིན་པ་ནི་མོས་པས་སྤྱོད་པའི་ས་ལ་གནས་པ་མེད་དོ། །འདིས་ནི་རྒྱུ་ཕུན་སུམ་ཚོགས་པ་བསྟན་ཏོ། །ཡོན་ཏན་བསྒོམས་པ་ཞེས་བྱ་བ་ནི་ཡོན་ཏན་དག་ལ་གོམས་པ་ཡིན་པས་ཡོན་ཏན་གནས་པའོ། །ཡོན་ཏན་གོམས་པ་ཉིད་དེའི་བྱ་བ་ཡིན་པས་དེའི་ཡོན་ཏན་གོམས་པར་བྱ་བའོ། །དེ་ལ་འདིས་ནི་སྦྱིན་པའི་ཕ་རོལ་ཏུ་ཕྱིན་པའི་ཡོན་ཏན་བྱས་པ་སྟེ། གང་གི་ཕྱིར་སྔོན་གྱི་ཕྱི་རོལ་གྱི་དངོས་པོ་ཡོངས་སུ་གཏོང་བ་ལ་གོམས་པ་དེའི་དབང་གིས་ནང་གི་དངོས་པོ་ཡོངས་སུ་གཏོང་བ་ཡིན་ནོ་ཞེས་བསྟན་པ་སྟེ། ཅི་རིགས་པར་སྔོན་གྱི་དུས་སུ་གོས་དང༌། བཟའ་བ་དང༌། བཏུང་བ་དང་མལ་སྟན་སྦྱིན་པ་སྟེ། །ཕོངས་པའི་ལུས་དང་མཐུན་བཞིན་དུ། །བྱང་ཆུབ་སེམས་དཔའ་གང་དུ་ཡོན་ཏན་ལ་གོམས་པས་གཏོང་བ་ཉིད་དོ། །འདིས་ནི་སྦྱོར་བ་ཁྱད་པར་ཅན་ཐོབ་པ་སྟེ། སྦྱོར་བ་ལ་སོགས་པས་འབྲས་བུ་ཕུན་སུམ་ཚོགས་པ་ཉིད་དེ། སྦྱོར་བ་ཁྱད་པར་ཅན་གྱིས་ཏེ། སངས་རྒྱས་ཉིད་དུ་འདིར་དགོངས་སོ། །གཞན་ལ་ཕན་པའི་བློ་རེ་དེས། །ཞེས་བྱ་བ་འདིས་ནི་སེམས་ཅན་གྱི་དོན་བྱ་བ་ཕུན་སུམ་ཚོགས་པའོ། །མཐུན་པ་དང་གུས་པ་དང་ཡོ་བྱད་ཀྱིས་ཞེས་བྱ་བ་ལ། མཐུན་པ་ཞེས་བྱ་བ་ནི་དེས་པའོ། །ཡང་ན་དམན་པའི་ཚུལ་ཉིད་དོ། །ཡང་ན་བྱས་པ་གཟོ་བ་ཉིད་དོ། །གུས་པ་ནི་དུལ་པའོ། །མཐུན་པ་དང་གུས་པའི་ཡོ་བྱད་ནི་མཐུན་ཞིང་གུས་པའི་ཡོ་བྱད་དོ། །དེ་མཉེན་པར་གྱུར་པ་ནི་མཐུན་པ་དང་གུས་པའི་ཡོ་བྱད་ཀྱིས་མཉེན་པར་གྱུར་པའོ། །གཟེངས་བསྟོད་པ་
ལས་བརྩམས་ནས་མངོན་པར་འཕེལ་བའོ། །སྙིང་རྗེའི་སྡུག་བསྔལ་བ་ལ་ཡང་བརྗོད་པར་བྱ་སྟེ། འདི་ལྟར་སྙིང་རྗེའི་དབང་གིས་རང་གི་ཤ་དང་ཁྲག་ཀྱང་ཡོངས་སུ་གཏོང་བར་བྱེད་པས་སོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བྱམས་པའི་སྟོབས་ཀྱི་སྐྱེས་པའི་རབས་སོ།། །།དབང་པོ་ཐུལ་བ་གོམས་པར་གྱུར་པ་ཞེས་བྱ་བ་ནི་སོ་སོར་བརྟགས་པས་བྱས་པ་མ་ཡིན་པའི་ཕྱིར་དབང་པོ་སྦས་པ་ལ། དབང་པོ་ཐུལ་བ་ལ་གོམས་པར་གྱུར་པ་ཉིད་དོ། །ཅིའི་ཕྱིར་དབང་པོ་ཐུལ་བ་ལ་གོམས་པར་གྱུར་པ་འདིར་ལུགས་ཀྱི་བསྟན་བཅོས་ཀྱི་རིམ་པ་དང་འགལ་བར་དང་པོར་བརྗོད་ཅེ་ན། ལུགས་ཀྱི་བསྟན་བཅོས་དེ་ནི་གཞོན་ནུའི་རིམ་པ་བསྟན་པ་དང༌། རིགས་པ་དང༌། རྒན་པ་ལ་བརྟེན་པའི་རིམ་པ་ཡིན་ལ། འདིར་ནི་རྒྱལ་པོ་དང༌། རྒྱལ་བུ་རྣམས་ཀྱི་གཙོ་བོར་གྱུར་པའི་ཡོན་ཏན་དབང་པོ་ཐུལ་བ་ཉིད་ཡིན་ཏེ། རིགས་པ་དང་རྒན་པ་ལ་བརྟེན་པ་ལ་སོགས་པའི་འབྲས་བུར་གྱུར་པ་ནི་དབང་པོ་ཐུལ་བ་ཡིན་ཏེ། དེ་བས་ན་འདི་བསྟན་ཏོ། །དཔའ་བ་དང་ཚུལ་ཕུན་སུམ་ཚོགས་པ་ནི་སྤྲོ་བ་དང་གསང་ཚིག་གི་ནུས་པ་བསྟན་ཏོ། །རྣམ་པར་རྒྱལ་བའི་དབང་ཐོབ་པ། །ཞེས་བྱ་བས་ནི། གཙོ་བོའི་ནུས་པ་བསྟན་ཏོ། །རྣམ་པར་རྒྱལ་བ་ཉིད་ནི་དཔལ་ཡིན་པས་རྣམ་པར་རྒྱལ་བའི་དཔལ་ལོ། །རྣམ་པར་རྒྱལ་བའི་དཔལ་ཐོབ་པ་གང་ཡིན་པ་དེ་ནི། རྣམ་པར་རྒྱལ་བའི་དཔལ་ཐོབ་པའོ། །ཡང་ན་ཕ་རོལ་གནོན་པ་བསྟན་ཏོ། །གང་གི་ཚུལ་དང་དུལ་བ་ཕུན་སུམ་ཚོགས་པས་བསྟན་པ་ནི་རྒྱལ་སྲས་སོ། །རྒན་པ་ལ་བསྙེན་བཀུར་ངེས་པར་བྱས་པས། ཞེས་བྱ་བ་ནི། རིགས་པས་རྒན་པ་ལ་བརྟན་པའི་ཕྱིར་རོ། །རྒན་པ་ལ་བསྙེན་བཀུར་ཉིད་ངེས་པ་ཡིན་ཏེ། དེ་བས་ན་རྒན་པ་ལ་བསྙེན་བཀུར་པར་བྱེད་པ་ངེས་པའོ། །རིག་བྱེད་གསུམ་པ་ཞེས་བྱ་བ། གསུམ་པ་ནི་ངེས་བརྗོད་དང༌། སྙན་ཚིག་དང༌། མཆོད་སྦྱིན་གྱི་རིག་བྱེད་དོ། །ཡང་ན་སྲིད་སྲུང་གི་རིག་བྱེད་དང༌། ཡང་ན་དེ་
ལྟ་བུ་འབྱུང་བ་ཡང་རིག་བྱེད་དོ། །བསྟན་པ་ནི་གྲངས་ཅན་དང༌། རྣལ་འབྱོར་པ་དང༌། འཇིག་རྟེན་རྒྱང་འཕེན་བ་བརྟག་པའོ། །དོན་གྱི་དེ་ཁོ་ན་ཉིད་ཁོང་དུ་ཆུད་པས་ཞེས་བྱ་བ་ནི་དེའི་གྲུབ་པའི་མཐའ་མངོན་པར་རྟོགས་པའོ། །འདི་ནི་མཆོད་སྦྱིན་ལ་སོགས་པའི་བྱ་བ་མི་བྱེད་པར་བསྟན་ཏོ། །རང་གི་ཆོས་དང་ལས་ལ་འབད་པ་ཞེས་བྱ་བ་ནི་གནས་དང༌། ལས་དང༌། རིགས་ཀྱིའོ། །ཡང་ན་ཐམས་ཅད་ཀྱི་ལས་ཀྱི་འཚོ་བའོ། །ཆོས་ནི་འཇིག་རྟེན་ཕ་རོལ་ཏུ་ཕྱིན་པའི་བྱ་པའོ། །ཡིད་མ་བྱུང་ཞིང་བདེ་བར་འཚོ་བ་ཞེས་བྱ་བ་ནི་སྡུག་བསྔལ་མེད་པས་ཡིད་སྐྱོ་བ་མེད་པའོ། །ཡང་ན་སྐྱོ་བ་མེད་པ་ནི་འཚེ་བ་མེད་པའི་ཕྱིར་རོ། །བདེ་བར་འཚོ་བ་ནི་ལོ་ལེགས་པ་ལ་སོགས་པའི་ཡོན་ཏན་དང་ལྡན་པས་སོ། །སྙིང་ཉེ་བ་ནི་རྒྱལ་པོའི་ཡོན་ཏན་ཕུན་སུམ་ཚོགས་པས་སོ། །བཀའ་ཁྲིམས་ནི་དོན་གྱི་བསྟན་བཅོས་སོ། །འཚོ་ཚིས་ཀྱི་བྱ་བ་ལེགས་པར་འབྱོར་པ་ནི་ཞིང་ལས་དང༌། བསྲུང་བ་དང༌། ཚོང་ལ་སོགས་པ་འཚོ་ཚིས་ཞེས་བརྗོད་དོ། །དཔའ་བ་ཕུན་སུམ་ཚོགས་པའི་རྣམ་པར་རྒྱལ་བའི་དཔལ་ཐོབ་པ་དང་ཞེས་བྱ་བ་འདིས་ནི་མ་ཐོབ་པ་འཐོབ་པར་བསྟན་ཏོ། །རང་གི་ཆོས་དང་ལས་དང་འབད་པ་དང་ཡིད་མ་བྱུང་ཞིང་བདེ་བར་འཚོ་བ་དང༌། འཚོ་ཚིས་བྱས་པ་ལེགས་པར་འབྱོར་པ་ཞེས་བྱ་བ་དག་གིས་ནི་རྣམ་པར་འཕེལ་བ་བསྟན་ཏོ། །ཡོན་ཏན་ལྡན་པས་ཞེས་བྱ་བས་ནི་ཐོབ་པ་རྣམ་པར་སྤེལ་བ་དང༌། ཡོངས་སུ་བསྲུང་བ་དབང་དུ་བྱས་པའོ། །ཡོན་ཏན་དང་ལྡན་པས་ཞེས་བྱ་བའི་ཕྱེད་ཀྱིས་ནི་ཡོན་ཏན་དང་ལྡན་པ་དེས་རང་བཞིན་གྱིས་ཉམས་པ་མེད་པ་བསྟན་ཏེ། དེས་ན་ཡང་དེ་བསྲུང་བར་འགྱུར་བ་ཡིན་ཏེ། འདིས་ནི་གསང་ཚིག་གི་ནུས་པ་བསྟན་ཏོ། །རང་གི་ཡུལ་འཁོར་ལ་ནི་རི་ཕུག་སེང་གེས་བསྲུངས་པ་ཞེས་བྱ་བའི་འོག་མ་འདིས་སྟོབས་དང་ལྡན་པས་རྒྱལ་ཕྲན་རྣམས་ཟིལ་གྱིས་གནོན་པ་ཉིད་དུ་བསྟན་ཏེ། འདིས་ནི་སྤྲོ་བའི་ནུས་པ་བསྟན་ཏོ། །མིའི་བདག་པོའི་དཔལ་ཞེས་བྱ་བ་ནི་གཙོ་བོའི་ནུས་པ་སྟེ། མིའི་བདག་པོ་ནི་དཔལ་གྱི་སྒྲས་བརྗོད་དོ།།
ཅིའི་ཕྱིར་རིམ་པས་ཡོངས་སུ་བསྲུང་བ་འདི་ལྟར་སྨོས་ཤེ་ན། གང་གི་ཕྱིར་འདི་ཉིད་ཀྱི་རིམ་པ་ནི་ཡོངས་སུ་སྤེལ་བ་དང༌། བསྲུང་བ་ཡིན་པའི་ཕྱིར་རིགས་པའི་ཚུལ་ཡིན་ནོ། །གཞན་དུ་ལུགས་ཀྱི་བསྟན་བཅོས་ལྟར་ན་ནི་རྣམ་པར་སྤེལ་བ་དང་ཡོངས་སུ་བསྲུང་བ་བཤད་པ་མེད་པར་འགྱུར་རོ། །དཀའ་ཐུབ་རྣམས་དང་རིགས་དང་སྒྱུ་རྩལ་ཞེས་བྱ་བའི་ཚིགས་བཅད་འདིས་ནི་མུ་སྟེགས་ཀྱིས་རབ་ཏུ་བསྒྲུབས་པའི་དབང་དུ་བྱས་ན་དཀའ་ཐུབ་ལ་སོགས་པ་འདི་གསུམ་སྨོས་པ་ནི་ལུས་དང༌། ངག་དང༌། ཡིད་ཀྱི་ལས་ཁྱད་པར་ཅན་བཟུང་བའི་ཕྱིར་རོ། །འོངས་ན་རིམ་གྲོ་ལྷག་པ་ཆེ་བ་ཞེས་བྱ་བ་ནི་དཀའ་ཐུབ་ལ་སོགས་པ་གསུམ་ཆེ་བར་གྱུར་པས་རིམ་གྲོ་ལྷག་པ་སྟེ། ཁྱད་པར་དུ་ཇི་ལྟར་འོས་པ་བཞིན་དུ་བྱེད་པར་འགྱུར་བའོ། །བཀུར་སྟི་བྱས་ནས་ཞེས་བྱ་བས་ནི་སྦྱིན་པ་ལ་སོགས་པས་སོ། །གཙོ་བོར་སྣང་ངོ་ཞེས་བྱ་བ་ལ་མཆོད་པས་ཕན་པ་ཁྱད་པར་དུ་གྱུར་པ་སྟེ། དཀའ་ཐུབ་ལ་སོགས་པའི་ཕན་པ་ཁྱད་པར་དུ་གྱུར་པའི་སྣང་བ་ཡིན་ནོ། །རིམ་གྲོ་དང་བཀུར་སྟི་ཞེས་བྱ་བ་གཉིས་ཀྱིས་ནི་རྙེད་པ་དང་བཀུར་སྟི་གོ་རིམས་བཞིན་དུ་བསྟན་ཏོ། །རྒྱལ་སྲིད་ཐོབ་མ་ཐག་ཏུ་ཞེས་བྱ་བས་ནི་རྒྱལ་པོའི་སྲིད་དེ། དེ་མ་ཐག་ཏུ་ནི་རྒྱལ་པོའི་སྲིད་ཐོབ་པ་ཡིན་ཏེ། རྒྱལ་པོ་དང་མཉམ་ཞིང་རྒྱལ་པོའི་སྲིད་བྱེད་པར་འོས་པའི་ཕྱིར་རོ། །ཡོན་ཏན་མང་པོ་རྟག་ཏུ་གྲགས་པ་ཞེས་བྱ་བ་ནི་ཡོན་ཏན་གྱི་གྲགས་པ་ཐམས་ཅད་དུ་ཁྱབ་པ་ཞེས་བྱ་བའི་དོན་ཏོ། །གཞོན་ཡང་རྒན་པའི་ཞེས་བྱ་བའི་ཚིགས་བཅད་འདིའི་བསྡུས་བའི་དོན་ནི་བསོད་ནམས་དང་ཡེ་ཤེས་ཀྱི་ཚོགས་ཀྱི་འབྲས་བུ་ལ་གནས་ཀྱང་བསོད་ནམས་དང་ཡེ་ཤེས་ཀྱི་ཚོགས་ལ་བག་ཡོད་པ་ཡིན་ནོ་ཞེས་བྱ་བའི་དོན་ཏོ། །གཞོན་ཡང་ཞེས་བྱ་བ་འདིས་ནི་ཚུལ་ཁྲིམས་ཀྱི་བསོད་ནམས་ཀྱི་ཚོགས་ཀྱི་འབྲས་བུ་ལ་གནས་པ་བསྟན་ཏོ། །གཞོན་པ་ཞེས་བྱ་བ་འདིས་ནི་བདག་གི་ཕུན་སུམ་ཚོགས་པའི་ཚིག་གིས་ཚུལ་ཁྲིམས་ཀྱི་འབྲས་བུ་བསྟན་པ་ཡིན་ནོ་ཞེས་རྟོགས་ཏེ།
བདག་གི་ཕུན་སུམ་ཚོགས་པ་ནི་ཚུལ་ཁྲིམས་ཡིན་པའི་ཕྱིར་རོ། །རྒན་པ་རྣམས་ཀྱི་ཉེ་བར་ཞི་བ་ཡིན་པས་རྒན་པའི་ཉེ་བར་ཞི་བའོ། །ཡང་ན་རྒན་པ་བཞིན་དུ་ཉེ་བར་ཞེ་བས་རྒན་པའི་ཉེ་བར་ཞི་བའོ། །དེ་ལ་མངོན་པར་དགའ་བ་ནི་རྒན་པའི་ཉེ་བར་ཞི་བ་ལ་མངོན་པར་དགའ་བ་སྟེ། འདིས་ནི་ཚུལ་ཁྲིམས་ལས་བྱུང་བའི་བསོད་ནམས་ཀྱི་ཚོགས་བསགས་པ་ལ་བག་ཡོད་པ་ཉིད་དུ་བསྟན་ཏོ། །གཟི་བརྗིད་ཆེ་ཡང་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་བསོད་ནམས་ཀྱི་ཚོགས་ཀྱི་འབྲས་བུ་ལ་གནས་པ་སྟེ། བཟོད་པའི་ཕ་རོལ་ཏུ་ཕྱིན་པས་ནི་སྐྱེ་བོ་མང་པོའི་གཡོག་འཁོར་གྱི་འབྲས་བུ་ཡིན་ཏེ། དེ་ལ་གནས་པའི་གཟི་བརྗིད་ཆེ་བ་སྟེ། གང་གི་མཐུ་ཆེ་བའི་གཟི་བརྗིད་ཆེ་བ་ཡིན་ནོ། །བཟོད་ཅིང་བདེ་བའི་དང་ཞེས་བྱ་བ་འདིས་ནི་བཟོད་པའི་བསོད་ནམས་ཀྱི་ཚོ་གསལ་བག་ཡོད་པ་ཉིད་དུ་བསྟན་ཏོ། །ཤེས་པར་གྱུར་ཀྱང་ཞེས་བྱ་བས་ནི་ཡེ་ཤེས་ཀྱི་ཚོགས་ཀྱི་འབྲས་བུ་ལ་གནས་པ་བསྟན་ཏོ། །ཤེས་པའི་ང་རྒྱལ་མེད་ཅེས་བྱ་བ་འདིས་ནི་ཡེ་ཤེས་ཀྱི་ཚོགས་བསགས་པ་ལ་བག་ཡོད་པ་ཉིད་བསྟན་ཏོ། །གང་གི་ཕྱིར་ཤེས་པས་ང་རྒྱལ་སྐྱེ་བར་གྱུར་ན་ནི་བདག་ཉིད་ལ་བསྟོད་ཅིང་གཞན་ལ་སྨོད་པར་བྱེད་དེ། བདག་ལ་བསྟོད་ཅིང་གཞན་ལ་སྨོད་པས་ནི་བཅོམ་ལྡན་འདས་ཀྱིས་ཐེག་པ་ཆེན་པོ་དག་ཏུ་ཤེས་རབ་ཉམས་པར་གསུངས་ཏེ། ཡེ་ཤེས་ཀྱི་ཚོགས་ལ་བག་ཡོད་པར་བསྟན་ཏོ། །ཡང་ན་མཁས་པར་གྱུར་ཀྱང་ཤེས་པའི་ང་རྒྱལ་མེད་ཅེས་བྱ་བས་ནི་ཤེས་པས་ངོམས་པ་མེད་པ་བསྟན་ཏོ། །ཡེ་ཤེས་ཀྱི་ཚོགས་ལ་ཡང་དང་ཡང་དུ་སྦྱོར་བར་བྱེད་པ་ཡིན་ནོ། །དཔལ་དང་ལྡན་ཞིང་འབྱོར་ཡང་ཞེས་བྱ་བས་ནི་སྦྱིན་པའི་བསོད་ནམས་ཀྱི་ཚོགས་ཀྱི་འབྲས་བུ་ལ་གནས་པ་ཉིད་དོ།། དྲེགས་པ་མེད་ཅེས་བྱ་བ་ལ་དྲེགས་པ་ནི་དཔལ་གྱི་དྲེགས་པས་དྲེགས་པ་ཉིད་དེ། དེ་བས་ན་དྲགས་པ་དེས་འཇུག་ན་ནི་སྦྱིན་པའི་བསོད་ནམས་ཀྱི་ཚོགས་སོགས་པ་ལ་འཇུག་པར་མི་འགྱུར་རོ། །དྲེགས་པ་མེད་པ་ལ་ཡང་འཇུག་པ་ཡིན་ཏེ། རྒྱ་ཆེ་མཐོང་གྱུར་ཞེས་བྱ་བ་
འདི་དང་སྦྱར་བར་བྱའོ། །གཞོན་ཡང་ཞེས་བྱ་བའི་ཚིགས་སུ་བཅད་པ་འདི་ལ་ནི་ཕ་རོལ་ཏུ་ཕྱིན་པ་དྲུག་དང༌། འཇིག་རྟེན་གསུམ་དུ་རབ་ཏུ་ལྡན་བ་རྒྱུ་དང་འབྲས་བུའི་གནས་སྐབས་སུ་བསྟན་པ་དེ་གཉི་གའི་ཡོན་ཏན་ལྡན་པ་དེས་གྲགས་པའི་ཁྱད་པར་གྱིས་ཁྱབ་པ་ཡིན་ནོ། །མཐོང་བར་འགྱུར་པ་ནི་རིགས་པའོ། །རྒྱ་ཆེ་བ་ནི་ཡངས་པའི་ཕྱོགས་གང་ཡིན་པ་མཐོང་བ་སྟེ་རྒྱ་ཆེན་མཐོང་གྱུར་པའོ། །ཁྱབ་པ་ནི་མཐའ་ཡས་པར་གྲགས་པས་ཁྱབ་པར་བསྟན་ཏོ། །འཇིག་རྟེན་གསུམ་ནི་སའི་སྟེང་དང༌། ནམ་མཁའ་དང༌། མཐོ་རིས་ཏེ། སྟེང་དུ་གྲགས་པ་འཇུག་པར་བསྟན་ཏོ། །དེ་ཡི་གྲགས་པས་འཇིག་རྟེན་གསུམ་ཁྱབ་པས། །ཞེས་བྱ་བ་འདིས་ནི་གྲགས་པ་ཅུང་ཟད་ཡོད་པ་ཞེས་སྨོས་ཏེ། ཤིན་ཏུ་ཆུང་བ་མངོན་པར་བཟུང་བའི་ཕྱིར་ཏེ། དེ་ལས་གཞན་པའི་ཡོན་ཏན་ནི་ཅུང་ཟད་ཉིད་དེ། སྦྱིན་པའི་མདའ་རྣམས་ཆར་བཞིན་འབེབས་པ་ཞེས་བྱ་བས་ནི་སྦྱིན་པའི་མདའ་ཉིད་དེ། དབུལ་བའི་སྡུག་བསྔལ་འབྱུང་བ་རྣམ་པར་འཇིག་པའོ། །སྙིང་རྗེའི་གཞུ་དྲག་པ་ཉིད་ཀྱིས་ནི་སྦྱིན་པ་འཕེན་པར་བྱེད་པའི་ཕྱིར་རོ། །དེ་དང་ཞེས་བྱ་བ་ནི་འགྲོ་བ་རྣམས་ཀྱི་དབུལ་བའི་སྡུག་བསྔལ་འབྱུང་བ་དང་ངོ༌། །བསླང་ས་པ་བས་ལྷག་པ་ནི་འདོད་པས་ལྷག་པ་སྟེ་འདིས་ནི་སྦྱིན་པའི་དངོས་པོ་མང་དུ་གཏོང་བར་བསྟན་ཏོ། །ཉོན་མ་མོངས་པར་ཞེས་བྱ་བ་འདིས་ནི་བསམ་པ་ཕུན་སུམ་ཚོགས་པར་བསྟན་ཏེ། བདག་ནི་འཁོར་བའི་ཕུན་སུམ་ཚོགས་པའི་བདག་ཉིད་མྱ་ངན་ལས་འདས་པར་ཡོངས་སུ་བསྔོ་བས་སོ། །ཚིག་འཇམ་པོ་དང༌། གུས་པ་དང་ཡིད་དུ་འོང་བ་ཞེས་བྱ་བས་ནི་སྦྱོར་བ་ཕུན་སུམ་ཚོགས་པ་བསྟན་ཏེ། ལུས་དང་ངག་གི་ལས་ཀྱིས་སློང་བ་རྣམས་ཀྱི་ཡིད་དུ་འོང་བའི་ཕྱིར་རོ། །འདིས་ནི་འདས་པའི་དུས་སུ་སྦྱིན་པའི་ཕ་རོལ་ཏུ་ཕྱིན་པ་བསགས་པ་བསྟན་ཏོ། །ད་ནི་དུས་མཚམས་ཀྱི་ཉི་མ་དག་ནས་ཞེས་བྱ་བ་ནས་བརྩམས་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པར་བསྟན་ཏོ། །གངས་རི་འདྲ་བ་ཞེས་སྨོས་པས་ནི་མདོག་
དང་ཚད་ཀྱི་ཡོན་ཏན་བསྟན་ཏོ། །དྲེགས་པའི་རྡུལ་གྱིས་ཞེས་བྱ་བ་འདིས་ནི་དྲེགས་པའི་གནས་སྐབས་སོ། །དུལ་བ་ཞེས་སྨོས་པས་ནི་ལེགས་པར་བསླབ་པ་གཟུང་ང་། །ཅིའི་ཕྱིར་འབྲས་བུ་མ་སྨོས་ཤེ་ན། ཚད་དང་མཚན་ཉིད་སྨོས་པ་ཉིད་ཀྱིས་མ་བསྟན་ཀྱང་གྲུབ་པའི་ཕྱིར་རོ། །སྦྱིན་གཏོང་གི་ཁོང་པ་ཞེས་བྱ་བ་ནི་སྦྱིན་པ་གཏོང་བའི་གནས་སོ། །དེས་ཉུལ་དུ་སོང་སྟེ་དགའ་བའི་ཁྱད་པར་ཞེས་བྱ་བ་སྦྱིན་གཏོང་གི་ཁྱད་པར་མ་མཐོང་བ་ཡིན་ཡང་སྔོན་བཅས་པའི་ཕྱིར་དགའ་བ་ཡོད་པ་ཡིན་ལ། མཐོང་བས་ཀྱང་ཁྱད་པར་དུ་དགའ་བར་གྱུར་པའོ། །དེ་ཙམ་དུ་ཞེས་བྱ་བ་ནི་འབྱོར་པའོ། །བསླུ་བར་ནུས་སོ་ཞེས་བྱ་བ་ནི་སྟེར་བར་བྱེད་ནུས་པའོ། །བཏང་ངོ་ཞེས་བྱ་བ་ནི་བརྫངས་པའོ། །ཁྱོད་ནི་སྦྱིན་ལ་དཔའ་བ་དང་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་རྣམ་པ་གཉིས་ཀྱིས་སླབ་པའི་འདོད་པ་འགྲུབ་པར་གྱུར་པ་སྟེ། བསླངས་པའི་དངོས་པོ་དང་སྦྱིན་པ་པོ་ཕུན་སུམ་ཚོགས་པ་སྟེ། དེ་གཉིས་གང་ཡང་རུང་བས་མ་ཚང་བ་ནི་སློང་བའི་དོན་གྲུབ་པར་མི་འགྱུར་རོ། །རླབས་ཆེ་བའི་སློང་བ་དེས་ཕོད་པ་ནི་རླབས་ཆེར་སློང་ཕོད་པའོ། །ཡང་ན་རླབས་ཆེ་བ་ཡང་ཡིན་པས་རླབས་ཆེར་སློང་བ་དེ་དེས་ཕོད་པའོ། །བརྐམ་པ་དང་ཕྲག་དོག་གི་སྐྱོན་གྱིས་ཡིད་དཀྲུགས་པ་ཞེས་བྱ་བ་ལ། བརྐམ་པ་ནི་གླང་པོ་ཆེ་ལའོ། །ཕྲག་དོག་ནི་བྱང་ཆུབ་སེམས་དཔའི་ཕུན་སུམ་ཚོགས་པ་མི་བཟོད་ཅིང་ཞེ་སྡང་བ་སྟེ། རང་བཞིན་གྱིས་ས་གཞན་དུ་གྱུར་པས་དགྲ་བོར་གྱུར་པའི་ཕྱིར་རོ། །འདོད་ཆེན་གྱིས་སྦྱར་ཏེ་ཞེས་བྱ་བ་ནི་ངན་པའི་སྦྱོར་བས་གྲགས་པ་མ་ཡིན་པ་དང༌། འདོད་ཆེན་གྱི་སྦྱོར་བར་འགྱུར་ཞིང་ལེགས་པའི་སྤྱོད་པ་ཉིད་ཀྱིས་ནི་གྲགས་པར་འགྱུར་རོ། །ཆོས་མ་ཡིན་པ་ནི་བརྐམ་པ་དང༌། ཕྲག་དོག་དང༌། ཞེ་སྡང་གིས་ཡིད་དཀྲུགས་པ་ཉིད་ཀྱིས་གྲུབ་པ་ཉིད་དེ། དེ་བས་ན་གྲགས་པའི་རྒྱུར་གྱུར་པ་དང༌། བྱང་ཆུབ་སེམས་དཔའ་དང་ལྡན་པས་འགའ་ཞིག་འདོད་ཆེན་གྱིས་སྦྱར་བ་ཡིན་ནོ་ཞེས་སེམས་པའོ། །ཅིའི་ཕྱིར་དང་པོའི་ཞེ་ན། ནོར་གྲུབ་ནོར་ནི་ཞེས་བྱ་བའི་
ཚིགས་བཅད་བརྩམས་ཏེ། རྒྱལ་པོའི་གཙུག་ལག་དག་ལ་མཁས་གྱུར་དང༌། །ཆོས་ལ་དགའ་བས་དེ་ནས་གླང་ཆེན་བྱིན། །ཚུལ་དང་འགལ་བས་དེ་ནི་གཡོས་མ་གྱུར། །ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། ནོར་གྲུབ་ནོར་ནི་ཆོས་ལམ་མི་མཐུན་པའི་ཕྱིར་དང༌། གླང་པོ་ཆེ་བྱིན་པ་ནི་ཆོས་ཀྱི་ལམ་ཡིན་པའི་ཕྱིར་རོ་ཞེས་བྱ་བ་འདི་ཉིད་བསྟན་པ་ནི་ཆོས་ལ་དགའ་བ་ཞེས་སྨོས་སོ། །གཡོས་མ་གྱུར་ཞེས་བྱ་བ་ནི་སྦྱིན་པ་ལས་ཞེས་བྱ་བའི་དོན་ཏོ། །དེ་གཉི་ག་སྦྱིན་པ་ཞེས་ངེས་པར་བཟུང་བས་བསྙད་མ་ཡིན་ཏེ། ངེས་པར་བཟུང་བ་ཐ་མལ་པའི་དོན་བསྒྲུབ་པའི་ཕྱིར། གཡོས་མ་གྱུར་ཞེས་བསྟན་པ་ཡིན་ནོ། །གཞན་དུ་ན་ཁྱོད་ཅེས་བྱ་བའི་སྒྲ་བསྟན་ཏོ། །ཀུན་ཏུ་འཁྲུགས་ཤིང་ཁྲོ་བ་དང་རྟབ་རྟབ་པོ་གང་ཡིན་པ་དེ་ནི་ཀུན་ཏུ་འཁྲུགས་ཤིང་ཁྲོ་བའི་རྟབ་རྟབ་པོའོ།། ཁྲོ་བ་ནི་ད་ལྟར་བྱུང་བའི་གནོད་པ་ལ་རྟོག་པའི་སེམས་ཀྱིས་ཁོང་ནས་འཁྲུགས་པའོ། །རྟབ་རྟབ་པོར་གྱུར་པ་ནི་སྐྱོབ་པ་སྟེ། གནོད་པར་བྱེད་པ་དེ་ལ་མི་སྡུག་པར་འདོད་པས་སོ། །རྟབ་རྟབ་པོར་གྱུར་པ་དང༌། མི་བཟོད་པ་ནི་རྟབ་རྟབ་པོར་གྱུར་ཅིང་མི་བཟོད་པ་དང་རྔམ་པའོ། །རྟབ་རྟབ་པོར་གྱུར་པ་ནི་ལུས་ཀྱི་འགྱུར་བའི་རྣམ་པར་གཡོ་བའོ། །མི་བཟོད་པ་ནི་གནོད་པ་བྱེད་པ་ལ་མི་བཟོད་པ་སྟེ། དེ་ཉིད་ཀྱི་རྔམ་པ་གང་ཡིན་པ་དེ་ནི་རྟབ་རྟབ་པོར་གྱུར་ནས་རྔམ་པས་དེ་བས་ནའོ། །ཞེ་སའི་ཚུལ་ནི་ཞེས་བྱ་བའི་རིམ་པས་སོ། །ཞེས་བཏང་ནས་རྐོ་ལོང་དུ་གྱུར་པ་གང་ཡིན་པ་དེ་ནི་ཞེས་བཏང་ནས་རྐོ་ལོང་དུ་སྨྲས་པའོ། །ཟ་བ་དག་ཅེས་བྱ་བ་ནི་དེ་ལྟ་བུའི་རྣམ་པ་གཞན་ཡང་དེའི་རང་བཞིན་ནོ། །ཚུལ་དང་འགལ་བའི་ལམ་ཞེས་བྱ་བ་ལ། ཚུལ་ནི་སྙན་ངག་གི་བསྟན་བཅོས་ཏེ། དེ་ལས་འདས་པའི་ལན་ནི་ཚུལ་དང་འགལ་བའི་ལམ་མོ། །ཇི་ལྟར་འགོ་བར་འགྱུར་ཞེས་བྱ་བ་ནི་ཡུན་རིང་པོ་དེ་ན་གནས་པ་མ་ཡིན་ནོ་ཞེས་བྱ་བའི་དོན་ཏོ། །ཁྱོད་ཀྱི་དགྲ་ནི་མདུན་ནས་དགའ་བར་བྱེད། །ཅེས་བྱ་བ་ནི་འདིས་ནི་ལྷ་རིང་པོ་མི་ཐོགས་པར་ཕྱིར་རྒོལ་བར་བྱེད་དོ་ཞེས་བྱ་བའི་དོན་ཏོ། །
དགོས་པའི་དབང་གིས་ཞེས་བྱ་བ་ནི་དགོས་པ་ལ་རྗེས་སུ་དགའ་བའོ། །སྦྱིན་པ་ལ་ཆགས་ཤིང་ཞུགས་པ་ཞེས་བྱ་བ་ནི་སྦྱིན་པ་ལ་དགའ་བ་ཉིད་དུ་ཞུགས་པ་ཡིན་ཏེ། ཞེན་པ་ཉིད་དུ་ཞུགས་པ་སྟེ། གཏོང་བར་དཀའ་བ་དེས་སེམས་ཟིལ་གྱིས་གནོན་པ་ལ་གནས་པས། སྦྱིན་པ་ལ་ཆགས་ཤིང་ཞུགས་པ་འདི་ལྟར་ཤེས་པའོ། །གང་གི་འགྲམ་པ་བུང་བ་ཞེས་བྱ་བ་ལ་སོགས་པའི་ཚིགས་བཅད་གསུམ་གྱི་ལན་ནི་ཚུལ་གྱི་རིམ་པ་ལ་མི་ལྟ་བ་ཞེས་བྱ་བ་འདི་ཡིན་ནོ། །ཚུལ་དང་འགལ་བའི་ལམ་དུ་སོང་བ་འདིས་ཞེས་བྱ་བའི་ལན་ནི། རྒྱལ་སྲིད་ལ་དབང་བྱེད་དུ་བཅུག་པ་ནི་དེ་ལྟར་བྱ་བ་ཡང་མི་རིགས་སོ་ཞེས་བྱ་བ་ཡིན་ནོ། །རྒྱལ་པོའི་དཔལ་ནི་ཇི་ལྟར་འགོ་བར་འགྱུར། །ཞེས་བྱ་བའི་ལན་ནི། འདིས་ཀྱང་རང་གི་གླང་པོ་ཆེ་བྱིན་ཟིན་པས་སྒྱུགས་པ་འདྲ་བ་ལྟ་སུ་ཞིག་འཕྲོག་པར་བྱེད་ཅེས་བྱ་བ་ཡིན་ནོ། །འདི་ནི་ཡལ་བར་བོར་ན་ཁྱོད་ལ་གནོད། །ཅེས་བྱ་བའི་ལན་ནི་སུ་ཞིག་སླར་འཕྲོག་ཅེས་བྱ་བ་སྟེ། འདི་ལ་རང་གི་གླང་པོ་ཆེ་བྱིན་པ་ནི་སྐྱུགས་པ་དང་འདྲ་བར་ལྟོས་པ་མེད་པར་བཏང་བ་དེ་ལ་གཞན་སུ་ཞིག་འཕྲོག་པར་བྱེད་ཅེས་བྱ་བའི་དོན་ཏོ། །འོན་ཀྱང་ཞེས་བྱ་བ་ལ་སོགས་པ་ནི་བཅོར་མེད་པ་ཉིད་དུ་བརྟགས་ཤིང་བཟུང་ནས་བྱ་བ་གཞན་གྱིས་བསྟན་པའི་ཕྱིར་བརྩམས་སོ། །རྒྱལ་པོ་ཆེན་པོ་ཐམས་ཅད་སྒྲོལ་འདི་ནི་དོན་འདི་ལྟ་བུ་དག་ལ་གཏམས་པ་ཙམ་གྱིས་མཆིས་སུ་འཚལ་བ་མ་ལགས་སོ་ཞེས་བྱ་བ་འདིས་ནི་གླང་པོ་ཆེ་སླར་ཕྲོགས་ན་དེ་རིགས་པ་ཉིད་དུ་མངོན་པར་ཁས་ལེན་པ་ཡིན་ནོ། །སྐྱོན་མ་ཡིན་པ་སྐྱོན་དུ་བཟུང་བའི་སྐྱོན་གང་ཡིན་པ་དེ་ཉིད་ནི་ཡོན་ཏན་ལ་སྨོད་པའོ། །ཡང་ན་ཁྱེད་ཅག་གི་ས་སྐྱོན་དུ་བཟུང་བ་བྱས་པའོ། །བདག་གི་བུ་ཞེས་བྱ་བ་ནི་གཞན་དག་ལ་ཡང་འདི་ལྟ་བུའི་བྱ་བ་སྟེ། གསད་པ་དང༌། བཅིང་བ་དང༌། རྡེག་པ་མི་བྱེད་པ་ཡིན་ན། ཇི་ལྟར་བདག་གི་བུ་ལ་བྱེད་ཅེས་བྱ་བའི་དོན་ཏོ། །བཅིང་ངམ་རྡེག་པར་ཞེས་བྱ་བ་ནི་རྡེག་པ་མ་བསྟན་པའི་ཚིག་གིས་འཁྲུག་པ་བསྐུལ་བ་དེའི་ཚིག་བསྟན་ཏོ། །ཁྱོད་ཀྱི་སྲས་ཞེས་བྱ་བ་ནི་འཁྲུག་པའི་ཚིག་ཉིད་དོ། །
གཟི་ཆེ་ཞེས་བྱ་བས་ནི་སྤྲོ་བ་ཕུན་སུམ་ཚོགས་པ་བསྟན་པ་ཞེས་བྱ་བའི་དོན་ཏོ། །འཁོར་གསུམ་བསྟན་ལ་མཁས་ཤིང་ཞེས་བྱ་བ་འདིས་ནི་གསང་ཚིག་གི་ནུས་པ་བསྟན་པ་སྟེ། ཆོས་དང༌། དོན་དང༌། འདོད་པ་ནི་གཅིག་ལ་གཅིག་འགལ་བ་བསྟན་པར་འཁོར་གསུམ་བསྟན་པ་ལ་མཁས་པར་གྱུར་ཏོ། །ཆོས་ལ་རབ་ཏུ་དགའ་བས་ཞེས་བྱ་བ་ནི་སྤྲོ་བའི་ནུས་པ་མེད་པ་ཉིད་དུ་བསྟན་ཏོ། །ཚུལ་ལ་མི་ལྟ་ཞེས་བྱ་བས་ནི་གསང་ཚིག་གི་ནུས་པ་ཉམས་པར་བསྟན་ཏོ། །གང་གི་ཕྱིར་ཆོས་དང་དོན་དང་འདོད་པ་ལྷག་པར་བསྟན་པས་ནི་རང་བཞིན་གྱིས་གཞན་འགོག་པར་བྱེད་དོ་ཞེས་བྱ་བའི་བསྟན་བཅོས་ཀྱི་ཚིག་གིས་དེའི་ཚིག་དང་འགལ་ལོ། །ཚུལ་ལ་ལྟོས་པ་མེད་པ་དེས། །འདི་ནི་དཀའ་ཐུབ་ནག་ས་ན་གནས་པར་འོས། །ཞེས་བྱ་བ་འདིས་ནི་གཙོ་བོའི་ནུས་པ་མེད་པར་བསྟན་ཏེ། ཚུལ་ལ་ལྟོས་པ་མེད་པའི་ཕྱིར་རོ། །འདི་ལ་ཅིའི་ཕྱིར་སྤྱུགས་པའི་རྒྱུ་བསྟན་པ་འདིའི་དབང་དུ་བྱས་པ་ནི། ས་ཡི་བདག་པོ་རྣམས་ཀྱི་ཚུལ་ཉེས་སྐྱོན། །ཞེས་བྱ་བའོ། །མོད་ཀྱི་ཞེས་བྱ་བ་ནི་དེ་ལྟ་ཡང་ཞེས་བྱ་བའི་དོན་ཏོ། །ཚུལ་ཉེས་སྐྱོན་ཞེས་བྱ་བ་ལ། ཚུལ་ངན་པའི་སྐྱོན་གང་ཡིན་པ་དེ་ནི་ཚུལ་ཉེས་སྐྱོན་ནོ། །དེ་ལ་བརྟེན་པ་རྣམས་ལ་ཞེས་བྱ་བ་ནི་རང་བཞིན་གྱིས་སོ། །བཅོས་སུ་རུང་བ་མཆིས་པ་ནི་བཅོས་སུ་བཟོད་པ་ཞེས་བྱ་བའི་དོན་ཏོ། །བཟོད་པ་གང་དག་གི་ཡིན་ཞེ་ན། དེ་དག་དེ་ལ་བརྟེན་པ་རྣམས་ཞེས་བྱ་བ་སྟེ་ཚུལ་ཉེས་པའི་སྐྱོན་དེ་དག་གོ །དེ་ལ་བརྟེན་པ་ལ་ལྟ་བ་གང་དག་ཡིན་ཞེ་ནས་བདག་རྣམས་སོ། །ཅིའི་ཕྱིར་ཞེ་ན། གཙོ་བོ་ཉམས་ན་ཉམས་པའི་ཕྱིར་རོ། །གང་གི་ཕྱིར་རྩ་བར་གྱུར་པའི་རྒྱལ་པོ་དེ་ཉམས་ནའོ། །འདི་སྐད་སྟོན་པ་ཡིན་ཏེ། རྒྱལ་པོའི་ཚུལ་ཉེས་པའི་སྐྱོན་ནི་དེ་ལ་བརྟེན་པ་རྣམས་ལ་འབྱུང་མོད་ཀྱི། འོན་ཀྱང་བཅོས་སུ་རུང་བར་སྣང་ངོ༌། །གང་གི་ཕྱིར་གཙོ་བོ་ཉམས་ན་ནི་དེའི་ཚུལ་ཉེས་པ་དེའི་སྐྱོན་བཅོས་པར་མི་ནུས་ཞེས་སྟོན་ཏེ། གཙོ་བོ་ཉམས་ན་དེ་ལ་བརྟེན་པ་རྣམས་ཀྱང་ཉམས་པར་འགྱུར་རོ། །དེས་ན་འདི་ཉིད་ཚུལ་ཉེས་པའི་སྐྱོན་
རྒྱལ་པོ་ལ་བྱུང་ན་དེ་ལ་བརྟེན་པ་རྣམས་ཀྱིས་བཅོས་པར་མི་ནུས་པར་སྣང་སྟེ། ཅིའི་ཕྱིར་ཞེ་ན། འདི་ལྟར་རྩ་བར་གྱུར་པའི་གཙོ་བོ་ཉམས་པའི་ཕྱིར་རོ། །དེའི་ཕྱིར་དེ་དག་གི་ནི་གསོ་བ་ཉིད་དུ་འགྱུར་གྱི་གང་གི་ཕྱིར་དེ་ཉམས་ན་ནི་གང་གིས་གསོ་བར་འགྱུར་ཞེས་བྱའོ། །སྲིད་ཉམས་མི་བཟོད་ཅེས་བྱ་བ་ནི་ཁྱོད་ཀྱི་སྲིད་ཉམས་པ་འམ་འཇིག་པར་མི་བཟོད་པ་གང་ཡིན་པ་དེ་ནི་མི་བཟོད་པའོ། །ཡང་ན་མི་བཟོད་པ་གང་ལ་ཡོད་པ་དེ་མི་བཟོད་པ་སྟེ། ཁྱོད་ཀྱི་སྲིད་ཉམས་མི་བཟོད་པའོ། །ཅིའི་ཕྱིར་གཏང་བ་ཡིན་ཞེ་ན། སྨྲས་པ་དཀའ་ཐུབ་འཕེལ་བ་ཞེས་སྨོས་སོ། །ཅིའི་ཕྱིར་དེ་ཉིད་དུ་དཀའ་ཐུབ་འཕེལ་བར་འགྱུར་ན་གྲུབ་པས་བསྟན་པའི་ཕྱིར་རོ། །བྱམས་ཤིང་སྤོབས་པ་དང་ཡིད་གཅུགས་པའི་དབང་གིས་ཞེས་བྱ་བ་ལ། བྱམས་པ་ནི་དགའ་བ་དང་བདག་པོ་དང་འབྲེལ་པ་མེད་པས་བྱམས་པའི་བདག་གིར་བྱེད་བའོ། །ཡིད་གཅུགས་པ་ནི་ཉེས་པར་དོགས་པ་མེད་པས་སོ། །ཚུལ་མ་ཡིན་པས་ཞེས་བྱ་བ་ནི། བྶྟནཾ་ངག་གི་བསྟན་བཅོས་ལམ་ལོག་པ་ཡིན་པའི་ཕྱིར་ཚུལ་མ་ཡིན་པས་སོ། །དེའི་རྒྱུ་ཅན་གྱི་ཕན་པ་མ་ཡིན་པར་འགྱུར་བ་ནི་ཉམས་པར་དོགས་པ་ཞེས་སྨོས་པ་སྟེ། ཕན་པ་མཆོག་ཏུ་བྱེད་པ་དེ་ལའོ། །ལྷ་རྒྱལ་སྲིད་ཀྱི་དཔལ་འདི་ལྟར་ཚབ་བཙལ་ཀྱང་ཞེས་བྱ་བ་ལ་སོགས་པས་ནི་བྱམས་པའི་དབང་གིས་བསྟན་ཏོ། །ལྷ་ཅི་མི་མཁྱེན་ནམ་ཞེས་བྱ་བ་ལ་སོགས་པས་ནི་སྤོབས་པའི་དབང་དུ་བྱས་པའོ། །ཚུལ་དང་འགལ་བའི་ལམ་ཞེས་བྱ་བ་འདི་དང༌། རྒྱལ་པོ་ཆེན་པོ་ཐམས་ཅད་སྒྲོལ་འདི་ནི་དོན་འདི་ལྟ་བུ་དག་ལ་ཞེས་བྱ་བ་འདི་ནི་ཡིད་གཅུགས་པའི་དབང་ཉིད་དུ་བསྟན་ཏོ། །གྲགས་པ་ཐོབ་པ་སེང་གེའི་ཁྲི་ལ་འོས། །ཞེས་བྱ་བའི་ཚིགས་བཅད་འདི་ནི་འདིར་མཐོང་བའི་འབྲས་བུ་བསྐྱེད་པའོ། །ས་ཡི་བདག་པོ་རྣམས་ཀྱི་ཚུལ་ཉེས་སྐྱོན། །ཞེས་བྱ་བ་འདིས་ནི་ཚུལ་མ་ཡིན་པ་བསྟན་ཏོ། །འདི་ལ་མང་དུ་གསོལ་ཀྱང་ཅི་འཚལ་ཏེ། །ཞེས་བྱ་བ་འདིས་ནི་ཉམས་པར་དོགས་པ་བསྟན་ཏོ། །ངོ་བཟློག་ཕོད་པ་ནི་དེ་ཐམས་ཅད་ལ་སྩལ་བ་མེད་པ་ཉིད་དུ་རྒྱལ་
པོ་དེ་མི་འདོད་པ་ཡིན་པའི་ཕྱིར་རོ། །རང་བཞིན་གྱིས་ཁོང་ངས་ཤིང་ངོ་ཚ་བཞིན་དུ་མགོ་སྨད་དེ་ཞེས་བྱ་བ་ལ། རང་བཞིན་གྱིས་ཁོང་ངས་པ་རྒྱུ་དང་བཅས་པར་མངོན་པར་གྱུར་པའི་ཕྱིར་དེ་ལ་སྤྱུགས་པ་ལ་ཁོང་ངས་པ་སྟེ། དེ་སྐྱོན་གྱིས་སྤྱུགས་པར་གྱུར་ཀྱང་བུ་དང་བྲལ་བས་སེམས་ཡོངས་སུ་གདུངས་པར་གྱུར་པའོ། །ཁྱེད་དེ་ལྟར་གལ་གྱིས་འཆུ་ན་ཞེས་བྱ་བ་འདིས་ནི་བུ་དང་བྲལ་བའི་སྡུག་བསྔལ་གྱིས་ཀྱང་ཁོང་ངས་པའི་སྡུག་བསྔལ་དུ་བསྟན་ཏོ། །དེ་ལ་རེ་ཞིག་ཉིན་ཞག་གཅིག་ཙམ་ཞིག་ཅེས་བྱ་བ་འདིས་ནི་བུ་ལ་བྱམས་པར་དམིགས་པ་དང་བཅས་ཏེ། དེ་ལ་རྗེས་སུ་དཔག་པའི་རྒྱུ་ནི་བབ་ཅོལ་དུ་བསྟན་པར་མི་ནུས་པའི་ཕྱིར་རོ། །དེ་ལྟར་བགྱིའོ་ཞེས་བྱ་བ་ནི་དེ་ལྟར་བྱེད་པ་དང་རྗེས་སུ་མཐུན་པ་དེའོ། །མྱ་ངན་གྱི་སྡུག་བསྔལ་གྱི་ཤུགས་ཀྱིས་ཞེས་བྱ་བ་ལ། མྱ་ངན་གྱི་སྡུག་བསྔལ་དང་བྲལ་བས་སྨྲེ་བའི་རྒྱུའི་རྣམ་པར་རྟོག་པ་མྱ་ངན་ནོ། །སྡུག་བསྔལ་ནི་སྡུག་པ་དང་བྲལ་བ་སྟེ། ལུས་ཀྱིས་མི་འདོད་པར་རིག་པར་བྱའོ། །དེ་ཉིད་ཀྱི་ཤུགས་ནི་མྱ་ངན་གྱི་སྡུག་བསྔལ་གྱི་ཤུགས་སོ། །དེ་བས་ན་ཤིན་ཏུ་ཡང་སྐྱོ་བས་མི་དགའ་བར་གྱུར་པའོ། །མི་དཀའ་བ་དང་ཚིག་མི་གསལ་བ་གང་ཡིན་པ་དེ་ནི་ཚིག་མི་གསལ་བ་སྟེ། མི་དགའ་བ་དང་ཚིག་མི་གསལ་བ་ནི་མི་དགའ་བས་ཚིག་མི་གསལ་བའོ། །མཆི་མས་བརྣངས་ཤིང་སྐད་འཛེར་བ་གང་ཡིན་པ་དེ་ནི་དེ་སྟེ། མཆི་མས་བརྣངས་ཤིང་སྐད་འཛེར་བའོ་ཞེས་བསྟན་པ་ཡིན་ནོ། །དབུགས་ཀྱིས་བརྣངས་པ་ནི་གནས་ལས་ཉམས་པའོ། །མི་གསལ་བ་ནི་ཚིག་ནི་འཁྲུགས་པའི་ཚིག་སྟེ། ཚིག་འབྲུ་མི་གསལ་བའི་ཚིག་གང་ཡིན་པ་དེ་ནི་ཚིག་མི་གསལ་བའོ། །འཇམ་པོར་སྩལ་བ་ཞེས་བྱ་བ་ནི་དེ་ལྟར་བྱའོ་ཞེས་བྱ་བ་ལ་སོགས་པས་བསྟན་ཏོ། །ཉེས་པ་སྤྱོད་པ་མ་མཐོང་ན། །ཞེས་བྱ་བ་ལ་སོགས་པས་ནི་རྒྱལ་པོའི་བཀའ་ཞེས་བྱ་བ་ལ་སོགས་པ་བསྟན་ཏོ། །ཡུལ་ནས་འབྱིན་ཞེས་བྱ་བ་ལ་སོགས་པ་འདི་ལ་མང་དུ་གསོལ་ཏེ་ཞེས་བྱ་བ་ལ་སོགས་པས་བསྟན་ཏོ། །འདུལ་དང་འགལ་བའི་ལམ་མི་འགྲོ། །
ཞེས་བྱ་བ་འདིས་ནི་མི་དགེ་བ་ལས་ལྡོག་པ་བསྟན་ཏོ། །བག་མེད་པ་ལའང་ང་མི་དགའ། །ཞེས་བྱ་བ་འདིས་ནི་དགེ་བ་ལ་འཇུག་པ་བསྟན་ཏེ། བག་ཡོད་པ་གང་ཞེ་ན། དགེ་བའི་ཆོས་རྣམས་བསྒོམ་པའོ་ཞེས་བྱ་བའི་ཚིག་གིས་སོ། །ཉེས་པར་བྱས་པ་མ་མཐོང་ན། །ཞེས་བྱ་བ་ནི་དེ་ལ་འཁྲུགས་པ་ཞེས་བྱ་བའི་དོན་ཏོ། །ཁྱོད་ནི་ཆགས་པ་མེད་ལ་དགའ་བར་གྱུར། །ཞེས་བྱ་བ་ལ་ཆགས་པ་མེད་པའི་སེམས་དང་ལྷན་ཅིག་སྐྱེས་པས་སོ། །ཆགས་པ་ལ་དགའ་བ་ཞེས་བྱ་བ་ནི་ལྷག་པར་ཆགས་པའི་སེམས་དང་ལྷན་ཅིག་སྐྱེས་པས་སོ། །རང་གི་ཆོས་ཞེས་བྱ་བ་ནི་རང་གི་གཞུང་ལུགས་ཏེ། མི་འདའ་བ་དང་ཡོངས་སུ་མི་གཏོང་བ་ནི་རང་གི་གཞུང་ལུགས་ལས་མི་འདའ་བ་ཞེས་གཉིས་པའི་ཕྱེད་ཀྱིས་བསྟན་ཏོ། །བྱང་ཆུབ་སེམས་དཔས་སྙིང་བརྩེ་བ་ལ་སོགས་པའི་ཤས་ཆེ་བ་དང། སྐྱེ་བོ་སློང་བ་ལ་བྱམས་པ་དང༌། རང་གི་བསྟན་པ་ཕུན་སུམ་ཚོགས་པ་བསྟན་པའི་ཕྱིར་དང༌། ཡུལ་ཤི་བི་པ་རྣམས་ནི་ཞེས་བྱ་བའི་ཚིག་ཀྱང་ནི། འཇིག་རྟེན་དོན་དུ་ངའི་ལུས་འཛིན་ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་བསྟན་ཏོ། །རང་གི་མིག་དང་མགོ་ཡང་ངས་སྦྱིན་ན། །ཞེས་བྱ་བ་འདིའི་སྒྲུབ་པ་ནི། །འཇིག་རྟེན་དོན་དུ་ངའི་ལུས་འཛིན་ན། །ཞེས་བྱ་བའི་ཚིགས་བཅད་འདིས་བསྟན་པ་ཡིན་ནོ། །མིག་དང་མགོ་སྨོས་པ་ནི་གཙོ་བོ་ཡིན་པའི་ཕྱིར་རོ། །གཉིས་པོ་དེ་ནི་ཡུལ་གྱི་བྱེད་དམ། ཡང་ན་གདོང་ནི་ཐམས་ཅད་ཡིན་ནོ་ཞེས་བརྗོད་དེ། དེ་ཡང་སྣ་ནི་མཆོག་ཏུ་གྱུར་པ་ཡིན་ལ། དེ་བས་ཀྱང་མཆོག་ཏུ་གྱུར་པ་ནི་མིག་གོ་ཞེས་བྱ་བའི་ཚིག་གིས་སོ། །ཡང་ན་མགོ་སྨོས་པས་ནི་རང་གི་སྲོག་གཏོང་བ་བསྟན་ཏོ། །མིག་ཅེས་བྱ་བ་འདིས་ནི་ལུས་ཀྱི་སྦྱིན་པའོ། །ཕྱི་རོལ་ནོར་ལྟ་སྨོས་ཀྱང་ཅི་ཞིག་དགོས། །ཞེས་བྱ་བ་འདི་སྒྲུབ་པ་ནི། ཕྱི་རོལ་ནོར་སྦྱིན་སྨོས་ཀྱང་ཅི་ཞིག་དགོས། །ཞེས་བྱ་བ་འདིས་བསྟན་ཏོ། །རང་གི་ལུས་ཀྱང་ཞེས་བྱ་བ་ནི་བསྟན་མ་ཐག་པར་བཤད་པ་སྟོན་ཏོ། །རང་གི་མིག་དང་མགོ་ཡང་ངས་སྦྱིན་ན། །ཞེས་བྱ་བ་འདིས་ནི། སྐྲག་པར་
བྱས་ན་མི་སྦྱིན་ཞེས་སྨོས་ཏེ། ཕྱི་རོལ་གྱི་དངོས་པོ་ཞེས་བྱ་བའི་དོན་ཏོ། །གང་སྔར་བསྟན་པའི་རང་གི་བསྟན་པ་ཕུན་སུམ་ཚོགས་པ་བསྟན་པའི་ཕྱིར་ཞེས་བྱ་བ་དེའི་དབང་དུ་བྱས་པ་ནི། ཤི་བི་པ་རྣམས་ཐམས་ཅད་ཀྱིས་ཞེས་བྱ་བ་སྨོས་སོ། །ངེས་པ་ནི་བསྐྲད་པར་འདོད་པ་ངེས་པར་བྱས་པའོ། །ཅི་ཐོབ་དང་ཞེས་བྱ་བ་ནི་དེ་ཉིད་ངེས་པར་བྱས་པའི་ཕྱིར་ང་ལས་ཐོབ་པའི་ནོར་ཅི་ཡོད་པའོ། །ཕའི་ནོར་རྣམས་ཞེས་བྱ་བ་ནི་གཉི་ག་བཟུང་སྟེ། གྱོས་པོའི་ནོར་བཟུང་ཚུལ་ཁྲིམས་ལྡན་པ་ཞེས་བྱ་བ་ནི་ལེན་པ་པོ་ཕུན་སུམ་ཚོགས་པའོ། །རྟག་པར་བྱིན་པ་ཞེས་བྱ་བ་ནི་རྟག་ཏུ་སྦྱིན་པར་བྱེད་པའོ། །བཀུར་སྟིས་བརྒྱན་པ་སྦྱིན་ཞེས་བྱ་བ་ནི་གུས་པར་བྱིན་པའོ། །སྦྱིན་པར་བྱེད་པ་ཡིན་པས་སྦྱིན་པ་སྟེ། སྦྱིན་པའི་དངོས་པོའོ། །དབྲོག་ཏུ་མེད་ཅེས་བྱ་བ་ནི་སྔ་མ་དང་ཐུན་མོང་དུ་གྱུར་པའི་ནོར་ལས་ཁྱད་པར་དུ་གྱུར་པ་བསྟན་ཏོ། །རྗེས་སུ་འགྲོ་ཞེས་བྱ་བ་ནི་གཞན་གྱི་རྣམ་པ་ནི་བོར་ནས་འགྲོ་བ་ཡིན་པས་དེའི་མི་མཐུན་པའི་ཕྱོགས་བསྟན་ཏོ། །གྱོས་སྒྱུག་གཉིས་ཞེས་བྱ་བ་ནི་གྱོས་པོ་དང་སྒྱུག་མོ་ནི་གྱོས་སྒྱུག་གཉིས་སོ། །བུ་དང་བུ་མོ་ནི་བུས་པ་གཉིས་སོ། །གྱོས་སྒྱུག་གཉིས་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་ནོར་གྱི་སྒྲུབ་པ་དང༌། ཆོས་ཀྱི་སྒྲུབ་པ་བསྟན་ཏེ། དང་པོའི་ཕྱེད་ཀྱིས་ནི་ནོར་གྱི་སྒྲུབ་པ་སྟེ། དེ་ཉིད་ནི་འཇིག་རྟེན་འདི་སྒྲུབ་པའོ། །ཆོས་ལ་གཅིག་ཏུ་བག་ཡོད་བྱོས། །ཞེས་བྱ་བ་ནི་ཆོས་ཀྱི་སྒྲུབ་པ་སྟེ། དེ་ཉིད་ནི་འཇིག་རྟེན་ཕ་རོལ་གྱི་སྒྲུབ་པའོ། །འདི་ནི་འབྲལ་བ་དང་འདུ་བ་ལས་བརྩམས་ཏེ། ང་མེད་མྱ་ངན་མ་བྱེད་ཅིག །ཅེས་སྨོས་སོ། །དེ་ཐོས་ནས་ཞེས་བྱ་བ་ནི་འབྲལ་བར་བྱ་བ་བསྟན་པའོ། །སྙིང་རབ་ཏུ་གདུངས་ཀྱང་ཞེས་བྱ་བ་ནི་ཐོས་པས་ཡིད་རབ་ཏུ་གདུངས་པར་གྱུར་ཀྱང་ངོ༌། །ཆོས་མ་མཆིས་ཞེས་བྱ་བ་ནི་ཆུང་མ་བོར་ནས་དཀའ་ཐུབ་ཀྱི་ནགས་སུ་གཤེགས་པའོ། །དེ་བས་ཞེས་བྱ་བ་ནི་གཅིག་པུ་གཤེགས་པའི་ཆོས་མེད་པས་སོ། །ངེས་པར་ནགས་སུ་གནས་པ་ཉིད་ནི་སྡུག་བསྔལ་བ་ཡིན་ནོ་ཞེས་ཤེས་ཤིང་ཆོས་མ་ཡིན་པ་ཉིད་དེ། གཅིག་
པུ་ནགས་སུ་འགྲོ་ཞིང་བདག་སྤངས་ནས་གང་དུ་འགྲོ་བར་བྱེད་པའོ་ཞེས་རྟོགས་པའོ། །མི་སྲུན་མི་བྱེད་ཤིང་དང་ཞེས་བྱ་བ་འདིའི་བསྡུས་པའི་དོན་ནི་སྐྱེད་མོས་ཚལ་བས་ཀྱང་ལྷག་པར་དཀའ་ཐུབ་ཀྱི་ནགས་བདེ་བ་སྟེ། ཡོན་ཏན་གང་གིས་སྐྱེད་མོས་ཚལ་བས་དཀའ་ཐུབ་ཀྱི་ནགས་ལྷག་པ་ཡིན་ཞེ་ན། སྐྱེད་མོས་ཚལ་ནི་མི་སྲུན་པའི་སྐྱེ་བོའི་གནོད་པ་ཡོད་ལ་དཀའ་ཐུབ་ཀྱི་ནགས་ན་ནི་དེ་མེད་དེ་ཤིང་དང་ཆུ་ལ་སྤྱོད་པའི་ཕྱིར་རོ། །སྐྱེད་མོས་ཚལ་ནི་མི་གཙང་བ་ཡིན་ལ་དེ་མེད་པས་ན་གཙང་བའོ། །སྐྱེད་མོས་ཚལ་ནི་སྐྱེ་བོའི་སྒྲ་དང་ལྡན་ལ། དཀའ་ཐུབ་ཀྱི་ནགས་ན་ནི་བྱ་རྣམས་སྐད་སྣ་ཚོགས་འབྱིན་པ་ཡིན་ནོ། །སྐྱེད་མོས་ཚལ་ན་ནི་མི་ལ་སོགས་པའི་གནོད་པ་ཡོད་པ་ཡིན་ལ། དཀའ་ཐུབ་ཀྱི་ནགས་ན་ནི་རི་དགས་མང་བ་ཡིན་ནོ། །སྐྱེ་བོ་རྒྱུ་བས་བརྫིས་པའི་ནེའུ་གསིང་ནི་རེག་ན་སྡུག་བསྔལ་བ་ཡིན་ལ། དཀའ་ཐུབ་ཀྱི་ནགས་ན་ནི་ས་གཞི་བཻཌཱུཪྻ་ལྟ་བུའི་རང་བཞིན་ནེའུ་གསིང་སྔོན་པོ་ཡིད་དུ་འོང་བ་དང་སྐྱེ་བོ་རྒྱུ་བ་མེད་པའི་ཕྱིར་རོ། །འདིས་ནི་བདག་ཉིད་ཀྱི་སྡུག་བསྔལ་མེད་པ་བསྟན་ནས། ད་ནི་བྱང་ཆུབ་སེམས་དཔའ་ནགས་ན་གནས་པ་ལ་སྡུག་བསྔལ་མེད་པ་ཉིད་དུ་བསྟན་པའི་ཚིགས་བཅད་དྲུག་གིས་སྤྲོ་བ་བསྐྱེད་པ་ཡིན་ནོ། །ནགས་ཚལ་ལྕུག་མའི་ཁྲོད་དག་ན། །ཞེས་བྱ་བ་འདིས་ནི་གཡོག་འཁོར་ཕུན་སུམ་ཚོགས་པ་ལས་བརྩམས་ཏེ། རྒྱལ་སྲིད་ཡོངས་སུ་སྤངས་ཀྱང་སྡུག་བསྔལ་མེད་ཅིང་རྒྱལ་སྲིད་དྲན་པར་མི་འགྱུར་བ་ཡིན་ཏེ། རྒྱལ་སྲིད་ནི་གཡོག་འཁོར་གྱི་རྣམ་པའི་ཕྱིར་ཏེ། གཡོག་འཁོར་ཕུན་སུམ་ཚོགས་པ་དེས་དྲན་པར་མི་འགྱུར་བའོ། །གཞོན་ནུ་མ་དང་གཞོན་ནུ་ནི་གཞོན་ནུ་གཉིས་སོ། །ནགས་ལ་སྡུག་བསྔལ་མེད་པའི་དབང་དུ་བྱས་ནས། དུས་ཀྱི་དབང་གིས་ཞེས་བྱ་བའི་ཚིགས་བཅད་སྨོས་སོ། །གླུ་དང་གར་དང་རོལ་མོའི་དབང་དུ་བྱས་ཏེ་གསུམ་ཡོངས་སུ་སྤངས་ཀྱང་ཁྱད་པར་དུ་གྱུར་པ་གསུམ་ཡོད་དོ་ཞེས་བསྟན་པའི་ཕྱིར། དགའ་བ་འཚལ་བའི་བྱ་རྣམས་ཞེས་བྱ་བ་སྨོས་སོ། །གང་གི་གནས་མལ་ཡོངས་སུ་སྤངས་ཀྱང་ཁྱད་པར་དུ་གྱུར་པའི་
གནས་མལ་ཡོད་དོ་ཞེས་བསྟན་པའི་དབང་དུ་བྱས་ནས། ནགས་ཚལ་དག་ན་མཚན་མོའི་ཟླ་འོད་ནི། །ཞེས་བྱ་བ་ལ་སོགས་པ་སྨོས་ཏེ། རེག་པ་དང་དྲི་ཞིམ་པ་ཕུན་སུམ་ཚོགས་པའི་གནས་སུ་ཚིགས་བཅད་འདི་གཉིས་ཀྱིས་གོ་རིམས་བཞིན་དུ་བསྟན་ཏོ། །མྱ་ངན་གྱིས་གདུངས་པའི་ཤུགས་ཞེས་བྱ་བ་ལ། མྱ་ངན་དང་གདུངས་པ་གཉིས་ནི་གོང་དུ་བཤད་པའི་དོན་གྱི་རྗེས་སུ་རྟོགས་པར་བྱའོ། །བརྒྱལ་བ་བཞིན་དུ་གྱུར་ཞེས་བྱ་བ་ནི་བརྒྱལ་བར་གྱུར་པ་དང་འདྲ་བ་སྟེ། དྲན་པ་མེད་པར་གྱུར་པ་ལས་ཕྱིས་ཡང་དྲན་པ་དང་ལྡན་པའོ། །སྨྱོ་བླ་ཅན་དུ་གྱུར་པ་ཡིན། །ཞེས་བྱ་བ་ནི་སེམས་རྣམ་པར་འཁྲུགས་པ་ཐོབ་པའོ། །གྲིབ་ཤིང་ལྟ་བུ་ནི་བྱང་ཆུབ་སེམས་དཔའ་སྟེ། ཕོངས་པའི་ཚ་བས་མངོན་པར་གདུངས་ཤིང་འཁོར་བའི་འབྲོག་དགོན་པར་ཡུན་རིང་པོར་ཡོངས་སུ་དུབ་པའི་སེམས་ཅན་རྣམས་ཀྱི་སྡུག་བསྔལ་སེལ་བའི་ཕྱིར་ཏེ། བཞིན་ཁྲོ་གཉེར་མེད་པ་དང་ཚིག་གི་ལན་ལ་སོགས་པས་སོ། །འབྲས་བུ་ཞིམ་པོ་ཡོད་པ་ཞེས་བྱ་བ་ནི་གུས་པར་བྱེད་པས་ཇི་ལྟར་བསམས་པའི་འདོད་པའི་དོན་སྟེར་བར་བྱེད་པའི་ཕྱིར་རོ། །ཤིང་ལྟ་བུ་ནི་གཞན་གྱི་དོན་བྱེད་པ་དང༌། དེའི་འབྲས་བུ་ལ་འཇུག་པའོ། །སྟ་རིས་གཟས་པ་རྣམས་འཛིན་པ་ནི་ཞེས་བྱ་བ་ནི་འཛིན་པར་བྱེད་པའི་འབྲས་བུ་སེམས་པའོ། །ཆུ་གཙང་ཞིམ་པོ་བསིལ་བའི་རྫིང་བུ་ཞེས་བྱ་བ་ནི་མཚོ་ལ་སོགས་པ་གང་འཐུངས་ན་བསིལ་བ་དང༌། དྲི་མ་མེད་པ་དང༌། ཆུ་ཞིམ་པའི་ཆུས་གང་བ་ཡིན་པ་དང༌། བསིལ་བ་ནི་དབུལ་བའི་སྡུག་བསྔལ་སེལ་བའི་ཕྱིར་རོ། །དྲི་མ་མེད་པ་ནི་ཉོན་མོངས་པ་མེད་པའི་ཕྱིར་རོ། །ཞི་བ་ནི་གུས་པར་བྱེད་པའི་སྦྱོར་བ་ལ་སོགས་པའི་ཁྱད་པར་ཅན་གྱིས་ཡིད་དུ་འོང་བའི་ཕྱིར་རོ། །འདྲལ་བ་དག་ཅེས་བྱ་བ་ནི་འཇིག་པ་འདོད་ཅིང་དབུལ་བ་བཟློག་པའོ། །མིང་ལ་ནི་དོན་མེད་ཅེས་བྱ་བ་ནི་འདི་དག་དོན་དང་ལྡན་པ་མ་ཡིན་ཏེ་འདོད་དགའི་མིང་ངོ༌། །ཡང་ན་དོན་དང་ལྡན་པ་ཡིན་དུ་ཟིན་ཀྱང་འོན་ཀྱང་གུད་དུ་སོང་བ་ཞེས་སྨོས་ཏེ། ཡུལ་ཕྱོགས་གཞན་དུ་སོང་ཞིང་ཉེ་བ་དག་ན་མི་གནས་པའོ། །
ཡང་ན་གྲགས་པ་ཟད་ཅེས་བྱ་བ་སྨས་ཏེ་མེད་ཅེས་བྱ་བའི་དོན་ཏོ། །གྲིབ་ཤིང་འབྲས་བུ་ཞིམ་པོ་ཡོད་པ་དག་དང་དྲི་མ་མེད་པ་དང༌། གཙང་ཞིང་ཞིམ་པའི་ཆུས་གང་བའི་རྫིང་བུ་ཞེས་སྨོས་པས་ནི་ངལ་བསོ་བའི་གནས་དང༌། བཟའ་བ་དང་བཏུང་བའི་སྡུག་བསྔལ་གསོ་བའི་ཐུན་མོང་གི་རྒྱུར་གྱུར་པ་དེ་བཞིན་དུ་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ཀྱི་ཐུན་མོང་གི་དགོས་པ་ཡིན་ཏེ། གྲིབ་ཤིང་དང་རྫིང་བུ་ལྟ་བུ་ཡིན་པའི་ཕྱིར་རོ། །དེ་ལྟར་རེ་ཞིག་འབྲས་བུ་ཞིམ་པོ་ཡོད་པ་ཞེས་བྱ་བ་དང༌། ཆུ་གཙང་ཞིམ་པོ་ཞེས་བྱ་བའི་ཚིགས་བཅད་འདི་གཉིས་ཀྱིས་ནི་བྱང་ཆུབ་སེམས་དཔའི་བསྐྲད་པའི་སྒོ་ནས་བདག་གི་སྡུག་བསྔལ་ལས་བརྩམས་ཏེ་སྨྲེ་སྔགས་འདོན་པ་བསྟན་ཏོ། །གང་ན་རྒྱལ་པོ་ཐམས་ཅད་སྒྲོལ་ཞེས་བྱ་བ་འདིས་ནི་བྱང་ཆུབ་སེམས་དཔའ་སྤྱུགས་པའི་དབང་དུ་བྱས་ནས་སྨྲེ་སྔགས་འདོན་པ་བསྟན་ཏོ།། བདག་ཅག་ཕོངས་པ་ཞེས་བྱ་བའི་ཚིགས་བཅད་འདིས་ནི་བདག་ཉིད་སྡུག་བསྔལ་ལས་བརྩམས་སོ། །ནོར་བུ་རིན་པོ་ཆེ་དང་ཞེས་བྱ་བ་ལ་སོགས་པས་ནི་ཐ་སྙད་ཀྱི་དངོས་པོའི་དབང་དུ་བྱས་པའོ། །ནོར་དང་འབྲུ་མང་པོ་ཞེས་བྱ་བ་ལ་སོགས་པས་ནི་ཉེ་བར་དོགས་པའི་དངོས་པོ་བཟུང་བའོ། །ཉེ་འཁོར་སྐྱེད་མོས་ཚལ་བཟང་པོ་ཡིད་དུ་འོང་བ་གང་ཡིན་པ་དེ་ནི་ཉེ་འཁོར་སྐྱེད་མོས་ཚལ་བཟང་པོ་ཡིད་དུ་འོང་བའོ། །མཐར་གྱིས་ཞེས་བྱ་བ་ནི་གྲོང་ཁྱེར་གྱི་མཆོག་ལས་སོ། །འདས་པ་འདི་རིམ་གྱིས་ཞེས་བྱ་བའི་དོན་ཏེ། གྲོང་དང་གྲོང་ཁྱེར་ལས་འདས་པའོ། །གྲིབ་ཤིང་བར་མཚམས་མེད་པའི་དགོན་པ་གང་ཡིན་པ་དེ་ནི་གྲིབ་ཤིང་བར་མཚམས་མེད་པའོ། །རབ་ཏུ་རྒྱུ་བ་ཕྱོགས་གསལ་བ་གང་ཡིན་པ་དེ་ནི་རབ་ཏུ་རྒྱུ་བས་ཕྱོགས་གསལ་བར་སྣང་བའོ། །ཤིང་རྟ་འདྲེན་པའི་རྟ་ནི་གཞན་མ་ཡིན་བ་ཞེས་བྱ་བའི་དོན་ཏོ། །དཔག་ཚད་དུ་མའི་ལམ་དུ་ཞེས་བྱ་བའི་ཚིགས་བཅད་འདིའི་དོན་རྟ་བྱིན་པ་སྟེ། ཅིའི་ཕྱིར་ཞེ་ན། སྦྱིན་པ་ལ་དགའ་བ་སྟེ། དེ་བས་ན་སྒྲུབ་པའི་ཁྱད་པར་མཐའ་དག་འདིར་དཔག་ཚད་དུ་མ་ཞེས་བྱ་བ་ལ་སོགས་པའི་ཚིགས་བཅད་སྨོས་སོ། །
འདི་དག་ལས་གཞན་མེད་པས་དེ་སྒྲུབ་པར་མི་འགྱུར་རོ། །ལམ་དུ་དེ་ལུས་ལ་ཞེས་བྱ་བ་ནི་རྟ་དེ་བྱིན་པའི་སློང་བས་དེ་ཉིད་དུ་བསྟན་ཏོ། །དཔག་ཚད་དུ་མ་ནི་དུས་མང་པོའི་དབང་དུ་བསྟན་ཏོ། །གྲོགས་ནི་མེད་གྱུར་ཀྱང་ཞེས་བྱ་བ་ནི་གཞན་དེ་ན་བྱེད་པ་མེད་པའོ། །བུ་སྨད་བཅས་ཤིང་ཞེས་བྱ་བ་ནི་དོན་གཉེར་བའི་གཞན་གྱི་དོན་ཉིད་དེ། དེ་ཡང་རང་གི་སྐྱོ་བ་བཟོད་པའོ། །ཕྱི་རྗེས་མི་ལྟ་བར་ཞེས་བྱ་བ་ནི་སྡུག་བསྔལ་དེ་བཅོས་པའི་རྒྱུ་ཐོབ་པ་དག་གསལ་བའོ། །རྟ་བཞིན་ནི་ཐམས་ཅད་ལུས་པ་མེད་པར་བྱིན་པའོ། །ཚིག་རྐང་དེ་དག་གིས་ནི་སྦྱིན་པ་ལ་དགའ་བའི་རྒྱུ་ཉིད་དུ་བསྟན་པ་ཡིན་ནོ། །ནགས་ཞེས་བྱ་བ་ནི་དཀའ་ཐུབ་ཀྱི་ནགས་སོ། །གོམས་ཀྱང་ཞེས་བྱ་བ་ནི་ཡུན་རིང་པོར་ཤིན་ཏུ་གོམས་པ་སྟེ་ཡུན་རིང་དུ་རྟག་ཏུ་བྱེད་པ་དང༌། གུས་པར་སྦྱོར་བ་དང་ལྡན་པ་དེས་སོ། །དམ་པ་ནི་བྱང་ཆུབ་སེམས་དཔའ་རྣམས་ཏེ། ཡོན་ཏན་ལ་གོམས་པ་ནི་གཞན་ལ་ཕན་པ་དང་བདེ་བ་བྱེད་པ་ལ་གོམས་པ་སྟེ། གང་ལ་གང་ཞིག་བྱེད་པ་དེ་ཉིད་དེའི་བསོད་ནམས་ཀྱི་སྟོབས་ཡིན་གྱི་བྱེད་པ་པོའི་ཡོན་ཏན་ནི་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་ཕན་ཞིང་བདེ་བ་ལ་འཇུག་པ་ནི་མི་འགྲུབ་པར་སྣང་བས་སོ། །དཔེར་ན་བྱང་ཆུབ་སེམས་དཔའ་ནི་གཞན་ལ་ཕན་ཞིང་བདེ་བར་འཇུག་པར་གྱུར་ན་ཡང༌། ཡི་དགས་དང་དམྱལ་བ་ལ་སོགས་པར་སྐྱེས་པའི་སེམས་ཅན་བདེ་བར་འཇུག་པ་གྲུབ་པ་མེད་པས་སོ། །ཀུ་མུ་ཏའི་ཁ་འབྱེད་པའི་ཟླ་བ་ཡང་གལ་ཏེ་ཟླ་བ་ཁ་འབྱེད་པ་ཡིན་ན་ནི། ཅིའི་ཕྱིར་པདྨ་ཁ་འབྱེད་པར་མི་བྱེད་དེ། ཁྱད་པར་མེད་པར་ལྟོས་ཤིང་ཁ་འབྱེད་རྒྱུར་གྱུར་པས་སོ། །རང་གི་ནུས་པའི་ཁྱད་པར་ཉིད་མ་ཡིན་ནོ་ཞེས་བསྟན་པའི་ཕྱིར་མཚོའི་ནང་ན་ཞེས་བྱ་བའི་ཚིགས་བཅད་ཡིན་ནོ། །སྐར་མ་རྣམས་ཀྱི་གཟུགས་བརྙན་ནི་སྐར་མ་རྣམས་ཀྱི་གཟུགས་བརྙན་ནོ། །དེས་མཛེས་པའི་སྐར་མའི་གཟུགས་བརྙན་རྣམས་ལྷག་པར་མཛེས་པ་སྟེ། ཀུ་མུ་ཏ་རྒྱས་པ་དང་འདྲ་བའི་མཚོའི་ནང་ནས་སྐར་མའི་
གཟུགས་བརྙན་དེ་དག་ལའོ། །ཀུ་མུ་ཏ་རྣམ་པར་དག་པས་ནི་ལྷག་པར་སྐར་མའི་གཟུགས་བརྙན་མཛེས་པ་ཡིན་གྱི་གཞན་དུ་ནི་མ་ཡིན་ཏེ། འདིས་ནི་ཀུ་མུ་ཏ་ཁ་འབྱེད་པ་དག་ཙམ་འདིར་ནི་བརྗོད་ལ་གཞན་གྱི་རྒྱན་གྱི་དོན་དུ་བསྟན་ཏོ། །ཟླ་བའི་འོད་ཟེར་ལྟད་མོ་ལྟ་བ་བཞིན་ཞེས་བྱ་བ་འདིས་ནི་མཚོའི་ནང་ན་སྐར་མའི་གཟུགས་བརྙན་རྣམས་ཀུ་མུ་ཏ་རྒྱས་པ་མཐོང་ན་ལྷག་པར་ལྟད་མོ་ལྟ་བར་བྱེད་པ་ཡིན་ནོ། །རྒྱུར་གྱུར་པ་ཞེས་བྱ་བ་ནི་མཚན་མ་ཙམ་དུ་གྱུར་པ་སྟེ། ཟླ་བས་ཁ་འབྱེད་པར་བྱས་པ་ནི་ཟླ་བ་འཆར་བའི་དུས་སུ་དེ་ཁ་འབྱེད་པར་སྣང་བའི་ཕྱིར་ཏེ། གལ་ཏེ་ཁ་འབྱེད་པའི་ནུས་པ་ཡོད་པར་གྱུར་ན་ནི་པདྨ་ལ་སོགས་པ་ཅིའི་ཕྱིར་ཁ་འབྱེད་པར་མི་བྱེད། དེ་བཞིན་དུ་བདག་གིས་བསམས་ན་རྒྱལ་པོ་ཁྱོད་ཀྱི་མཐུ་སྟོབས་ཡིན་སྙམ་ན། རི་དགས་ཀྱི་མཆོག་དག་ནི་ཐམས་ཅད་དུ་མཉམ་པར་རབ་ཏུ་གནས་པ་དང་བཅས་པ་ཡིན་བའི་ཕྱིར་ཁྱེད་ཉིད་ཀྱིའོ། །གཅིག་ལ་གཅིག་སྙན་པར་སྨྲ་ཞིང་ཞེས་བྱ་བ་ལ། རེ་ཞིག་རིགས་པ་ནི་མད་དྲིས་བྱང་ཆུབ་སེམས་དཔའ་ལ་རིགས་ཀྱི་བྱང་ཆུབ་སེམས་དཔའ་ནི་དེ་ལ་སྙན་པར་སྨྲ་བ་མ་ཡིན་ནོ། །གློ་བུར་དུ་འོངས་པ་ལ་བྱམས་པ་ཞེས་བྱ་བ་འདིས་ནི་གློ་བུར་དུ་འོངས་པ་ཡིད་ལ་བྱེད་པ་བསྟན་ཏེ། གཅིག་ལ་གཅིག་སྙན་པར་སྨྲ་བའོ། །བུ་སྨད་ཅེས་བྱ་བ་ནི་མད་དྲི་དང་གཞོན་ནུ་གཉིས་སོ། །ཕབ་ནས་ནི་བབས་སུ་བཅུག་པའོ། །རྒྱབ་ཏུ་ཞེས་བྱ་བ་འདིས་ནི་འགྲོ་བ་ལ་སྐྱོབ་པ་ཉིད་དུ་བསྟན་ཏོ། །ཅིའི་ཕྱིར་ཞེ་ན། འདི་ནི་འདི་ལྟར་ཁ་ཟས་ཀྱི་དབང་དུ་བྱས་པའོ། །མངོན་དུ་ལྟ་བྱེད་ཅིང་ཞེས་བྱ་བ་ནི་དོན་དུ་གཉེར་བ་ཉིད་ཅེས་བྱ་བའི་དོན་ཏོ། །ཟེ་བ་རྣམས་ཀྱི་རྡུལ་དེ་སྟེ་དེ་ལྷགས་པས་ཁྱབ་ཅིང་གསལ་བར་གྱུར་པའི་སེར་པོ་གང་ཡིན་པ་དེ་ནི་ཟེ་བ་ལྷགས་པས་སེར་པོར་གསལ་བར་གྱུར་པའོ། །ཉི་མའི་འོད་ཟེར་གྱིས་གདུངས་པའི་སྡུག་བསྔལ་གྱིས་འཇིགས་པ་མེད་པའི་དབང་དུ་བྱས་ནས། སྤྲིན་རྣམས་ཀྱིས་ཀྱང་ཞེས་བྱ་བའི་ཚིགས་བཅད་སྨོས་ཏེ། དེའི་ཕྱེད་ཀྱིས་ནི་ལམ་གྱིས་ཡོངས་སུ་དུབ་པའི་སྡུག་བསྔལ་མེད་པའི་དབང་དུ་བྱས་པས་སོ། །ངལ་བའི་སྡུག་བསྔལ་ཞེས་བྱ་
བའི་ཚིགས་བཅད་ཕྱེད་ཀྱིས་མི་འཆག་པའི་འཇིག་པ་མེད་ཅིང་བདེ་བའོ། །འཆག་པ་ཉིད་རྣམ་པར་འཇིག་པ་ཡིན་པས་འཆག་པ་རྣམ་པར་འཇིག་པའོ། །དེ་ཉིད་བདེ་བ་ཡིན་པས་འཆག་པ་རྣམ་པར་འཇིག་པའི་བདེ་བའོ། །ལམ་གྱིས་དུབ་པ་དེའི་སྡུག་བསྔལ་གྱི་ཚོར་བ་ནི་ལམ་དུ་འགྲོ་བའི་སྡུག་བསྔལ་གྱི་ཚོར་བ་སྟེ་དེས་སོ། །མེ་ཏོག་དང༌། འབྲས་བུ་དང༌། ལོ་མས་བརྒྱན་པའི་ཤིང་ལྗོན་པ་ནི་ཤིང་ལྗོན་པའོ། །སྣུམ་པ་ཡང་ཡིན་ལ་རྣམ་པ་སྣ་ཚོགས་པ་ཡིན་པས་སྣུམ་སྣུམ་ལྟར་འདུག་པ་རྣམ་པ་དུ་མའི་ཤིང་ལྗོན་པ་སྟེ། མེ་ཏོག་དང༌། འབྲས་བུ་དང༌། ལོ་མ་རྣམས་ཀྱིས་བརྒྱན་པའི་ཤིང་ལྗོན་པ་སྣུམ་སྣུམ་ལྟར་འདུག་པ་རྣམ་པ་དུ་མའོ། །གང་བ་ནི་མེ་ཏོག་དང༌། འབྲས་བུ་དང༌། ལོ་མ་རྣམས་ཀྱིས་བརྒྱན་པའི་ཤིང་ལྗོན་པ་སྣུམ་སྣུམ་ལྟར་འདུག་པ་དུ་མས་གང་བ་སྟེ་སེམས་མེད་པའི་དགའ་པའོ། །འདོད་པས་མྱོང་བའི་དགའ་བ་ཡང་ཡིན་ལ་བྱ་ཡང་ཡིན་པས་འདོད་པས་དགའ་བའི་བྱའོ། །དུ་མའི་སྒྲ་ནི་མང་པོའི་སྒྲའོ། །དེ་དག་གི་སྒྲོགས་པ་ནི་མང་པོའི་སྒྲ་འབྱིན་པར་རོ། །འདོད་པས་མྱོས་ཤིང་རབ་ཏུ་དགའ་བ་མང་པོ་སྒྲ་འབྱིན་པའི་དཀའ་ཐུབ་ཀྱི་ནགས་ཚལ་གང་ལ་ཡོད་པ་དེ་ནི་བྱ་མང་པོ་འདོད་པས་མྱོས་ཤིང་དགའ་བས་སྒྲ་འབྱིན་པའི་དཀའ་ཐུབ་ཀྱི་ནགས་ཚལ་ལོ། །གང་དུ་རི་དགས་ཀྱི་རྣམ་པ་དུ་མ་རྒྱུ་བ་དེ་ནི་རི་དགས་ཀྱི་རིགས་རྣམ་པ་དུ་མ་རྒྱུ་བའོ། །གར་བྱེད་པ་གང་ཡིན་པ་དེ་ནི་གར་བྱེད་པ་ཉིད་དོ། །གར་བྱེད་པ་ཉིད་རྨ་བྱ་ཡིན་པས་རྨ་བྱ་མང་པོ་གར་བྱེད་པ་སྟེ་དེས་མཛེས་པའོ། །མེ་ཏོག་གི་དྲིས་བསྒོས་པ་ནི་མེ་ཏོག་གི་དྲིས་བསྒོས་པའོ། །དཀའ་ཐུབ་ཀྱི་ནགས་ཚལ་གང་དུ་མེ་ཏོག་གི་དྲིས་བསྒོས་པའི་སེར་བུ་ལྡང་བ་དང་ལྡན་པ་དེ་ནི་ལམ་གྱི་རྡུལ་གྱིས་རྐང་པ་དང་བྱིན་པ་རྩུབ་རྩུབ་ལྟར་འདུག་པའོ། །ངལ་བས་ཉམས་པའི་མདོག་དང་མིག་རྩ་གང་ཡིན་པ་དེ་ནི་ངལ་བས་བཞིན་མདོག་དང་མིག་རྩ་ཉམས་པའོ། །དབྱིག་པ་ལ་བཏགས་ཤིང་ཕྲག་པ་ལ་ཐོགས་པའི་སྤྱི་བླུགས་གང་ཡིན་པ་དེ་ནི་སྤྱི་བླུགས་དབྱིག་པ་ལ་བཏགས་པ་ཕྲག་པ་ལ་ཐོགས་པའོ། །གློ་བུར་དུ་འོངས་པ་ལ་བཀུར་སྟིའི་བྱ་བ་བྱས་པ་གང་ཡིན་པ་དེ་ནི་གློ་བུར་དུ་འོངས་པ་ལ་བཀུར་སྟིའི་བྱ་བ་བྱས་སོ། །འགྲོ་བ་འདི་དག་ནི་ཞེས་བྱ་བ་
ནི་མི་བཟད་པ་སྟེ། མི་བཟད་པའི་སེམས་ཡོད་པའི་ཕྱིར་རོ། །སེར་སྣའི་མོས་པ་ཡིན་པས་སེར་སྣས་བསྒྲིབས་པའི་འགྲོ་བའོ། །འདི་གཉིས་ནི་སེམས་མི་བཟད་པའི་ཕྱིར་འཇིག་རྟེན་སྣང་བ་མེད་པ་ཉིད་དུ་བསྟན་ཏོ། །གཞན་དུ་ཞེས་བྱ་བ་ནི་ཁྱེད་ལས་གཞན་དུ་ཞེས་བྱ་བའི་དོན་ཏོ། །སློང་བ་ཉིད་ནི་སློང་བའོ། །སློང་བ་ཉིད་ཀྱི་ཚིག་ཡིན་པས་སློང་བའི་ཚིག་སྟེ། དོན་དུ་གཉེར་བའི་ཚིག་ཅེས་བྱ་བའི་དོན་ཏོ། །མ་ཕྱིན་པ་ནི་མི་ནུས་པ་ཞེས་བྱ་བའི་དོན་ཏེ། སྣང་བ་མེད་པ་དང༌། མི་མཉམ་པའི་འཇིག་རྟེན་པའོ། །གང་ལས་ཤེ་ན། མི་མཉམ་པའི་ལམ་ལས་འཇིག་རྟེན་འགྲོ་བ་ཉིད་དུ་སྣང་བའི་ཕྱིར་ཏེ། གཞན་ནི་མི་འགྲོ་བ་ཡིན་ནོ་ཞེས་དོན་གྱིས་རྟོགས་པའོ། །དེ་བས་ན་བསྟན་པའི་སྐྱོན་གཉིས་མེད་དེ། མཐོང་བཞིན་དུ་ལམ་མཉམ་པ་ནས་འགྲོ་བར་སྣང་བའི་ཕྱིར་ཁྱོད་ཉིད་ལ་ཕྱིན་པ་ཡིན་ལ། གཞན་པ་མི་སློང་བའི་ཚིག་ཕྱིན་པ་མ་ཡིན་ནོ་ཞེས་སྦྱར་རོ། །དེའི་རྒྱུ་སྐྱོན་གཉིས་དང་བྲལ་བ་མེད་ན་ནི་དེ་ཇི་ལྟར་སློང་བའི་དབང་དུ་བྱས་ནས། སྦྱིན་པ་ལ་དཔའ་བའི་ཞེས་བྱ་བའི་ཚིགས་བཅད་ཡིན་ནོ། །དེའི་ཕྱིར་ཞེས་བྱ་བ་ནི་གྲགས་པ་ཐོས་པའི་ཕྱིར་རོ། །སྩོལ་ཞེས་བྱ་བ་ནི་སློང་མོ་པ་ཉིད་དུ་ཁས་ལེན་པའི་ཕྱིར་རོ། །ཅིའི་ཕྱིར་ཁྱོད་ལ་སློང་ཞེས་དེ་ལྟར་རྟོག་པ་ལ་གཡོག་ཏུ་ཞེས་པས་བསྟན་ཏོ། །ཚམ་ཚོམ་མེད་པར་སྦྱིན་ཞེས་བྱ་བ་ནི་དཔྱད་པ་མེད་པའི་ཕྱིར་རོ་ཞེས་བྱ་བ་སྟེ། དེས་ན་སྨྲས་པ། སྦྱིན་པ་ལ་དགའ་བ་གོམས་པར་བྱས་པའི་རབ་ཏུ་སྡུག་པའི་བུ་བས་ཀྱང་སྦྱིན་པ་ལ་དགའ་བ་སྟེ། ཆེས་གཅེས་པའི་ཕྱིར་ཇི་ལྟར་སྦྱིན་པ་ལ་དགའ་བ་གོམས་པར་བྱས་པ་དེ་ལྟ་བུ་ལ་དགའ་བ་ནི་མ་ཡིན་ཏེ། བུ་ལ་དགའ་བ་ནི་རེས་འགའ་བྱས་པའི་ཕྱིར་དང༌། སྦྱིན་པ་ལ་དགའ་བ་ནི་རྒྱུན་དུ་གོམས་པའི་ཕྱིར་རོ། །དེ་ཡང་བུ་ནི་མི་རྟག་པ་ལ་གོམས་པར་སོ་སོར་བརྟགས་པ་དེས་ལྷག་པར་དགའ་བ་མེད་ལ། སྦྱིན་པ་ནི་ཡོན་ཏན་ཐམས་ཅད་དང་ལྡན་པར་སྣང་བས་སོ། །ཡང་ན་ཐམས་ཅད་པས་སྦྱིན་པ་ནི་ཆེ་བ་ཉིད་དོ། །སྦྱིན་པ་ལས་དགའ་བས་བུ་གཉིས་ཀྱང་ཚམ་ཚོམ་མེད་པར་སྦྱིན་པ་ཞེས་བྱ་བ་
མ་བྱིན་པའི་དངོས་པོ་ཉིད་དུ་བསྟན་ཏོ། །བུ་གཉིས་ཀྱང་ཞེས་བྱ་བའི་སྒྲས་གཅིག་ཏུ་དེ་ལྟར་ཅིའི་ཕྱིར་སྨྲས་ཤེ་ན། སླར་བཟློག་པ་ནི་མ་བསླབས་པས་ཞེས་བྱ་བ་སྨོས་ཏེ། སྦྱིན་པའི་བྱ་བ་མ་ཡིན་པས་ཀྱང་བྱ་བ་མ་ཡིན་པ་མཆོག་ཏུ་གྱུར་པའི་ཕྱིར་རོ། །སླར་བཟློག་པ་ཞེས་བྱ་བ་འདིས་ནི་དཀའ་བའི་སྦྱིན་པ་ཉིད་དུ་བསྟན་ཏེ། སྦྱིན་པ་ཡོན་ཏན་གཉིས་དང་ལྡན་པའོ། །ད་འདི་ན་མཆིས་ཏེ་ཅི་ཞིག་བགྱི་ཞེས་བྱ་བ་ནི་གལ་ཏེ་བྱིན་ན་ཞེས་བྱ་བའི་དོན་ཏོ། །བྱིན་པའི་གཏམ་ཐོས་ནས་མི་དགའ་བ་སྐྱེས་པའི་མིག་རིག་རིག་པོ་གང་ཡིན་པ་དེ་ནི་སྦྱིན་པའི་གཏམ་ཐོས་ནས་སྐྲག་པའི་མིག་རིག་རིག་པོར་གྱུར་པ་དེའོ། །དེ་གཉིས་ཀྱི་སྙིང་གདུངས་པར་གྱུར་པ་གང་ཡིན་པ་དེ་ནི་སྙིང་གདུངས་པར་གྱུར་པའོ། །འདི་ནི་ཞེས་བྱ་བ་དེས་སྨྲས་པ་དེའི་ལན་ནི། ཁྱོད་འདི་གཉིས་ངས་བྱིན་ན་ཞེས་བྱ་བ་ཡིན་ནོ། །ད་ནི་མཆིས་ཏེ་ཅི་བགྱི་ཞེས་བྱ་བ་འདིའི་ལན་ནི། འདི་གཉིས་མ་ནི་སོང་ཞེས་བྱ་བའོ། །གང་དུ་ཅིའི་ཕྱིར་སོང་ཞེས་བྱ་བ་འབྲི་བའི་ཚིག་གི་སྐབས་རྟོགས་པ་ལ་ནགས་ཚལ་དུ་རྩ་བ་འབྲས་བུ་ཚོལ་དུ་སོང་ཞེས་བྱ་བ་ཡིན་ནོ། །དེ་ཡང་དེ་རིང་འདིར་འོང་གིས། །ཞེས་བྱ་བ་འདིས་ནི་རིང་པོ་མི་ཐོགས་པར་འོང་བར་བསྟན་ཏོ། །དེ་འོངས་ནས་ཅི་ཞིག་བྱེད་པ་ཡིན་ཞེས་རྟོགས་པ་ལ་དེ་དང་ཕྲད་ནས་འོ་བྱས་ཞེས་བྱ་བ་སྟེ། འདིས་ནི་མེད་དྲི་ལ་ཕན་འདོགས་པ་ཉིད་དུ་བསྟན་ཏོ། །རྒྱན་གྱིས་བརྒྱན་ཅིང་ཕྲེང་བ་ཅན། །ཞེས་བྱ་བ་ནི་གཞོན་ནུ་གཉིས་སོ། །འདིར་ནི་ཞག་གཅིག་ངལ་སོ་ལ། །ཞེས་བྱ་བ་འདི་ནི་བྲམ་ཟེ་དེ་ལ་ཕན་འདོགས་པ་བསྟན་ཏེ། ལམ་གྱིས་རྔུབ་པ་སེལ་བར་སྣང་བའི་ཕྱིར་རོ། །བུད་མེད་རྣམས་ནི་མི་དྲང་བས་ཞེས་བྱ་བ་འདིས་ནི་མ་ནི་བུ་སྦྱིན་པ་དེ་ལ་འགྱོད་པར་འགྱུར་བ་རྗེས་སུ་ཤེས་ཏེ། དེ་བས་ན་ཁྱོད་ཀྱི་སྦྱིན་པ་ལ་གེགས་བྱས་པར་འགྱུར་བས་ཆོས་མ་ཡིན་པ་དང་ལྡན་པར་འགྱུར་བ་ཡིན་པས་ཞག་གཅིག་འདུག་པའི་སྐྱོན་བསྟན་པའོ། །ཁྱོད་ཀྱི་སྦྱིན་པ་ལ་གེགས་བྱེད་ཀྱིས་ཞེས་བྱ་བ་འདིས་ཀྱང་བྱང་ཆུབ་སེམས་དཔའི་སྐྱོན་བསྟན་ཏོ། །བདག་ཉིད་ཀྱིས་ནི་མ་བསྟན་ཀྱང་གྲུབ་པའི་ཕྱིར་ཏེ། སྦྱིན་པ་མ་བྱིན་པའི་ཉེས་དམིགས་བསྟན་པས་གང་རྙེད་པའི་བར་ཆད་ཀྱི་མཚན་ཉིད་དོ། །
སྦྱིན་པའི་གེགས་སུ་འགྱུར་དུ་མ་དོགས་ཤིག་ཅེས་བྱ་བ་ནི་བདག་ཉིད་ཀྱི་སྦྱིན་པའི་གེགས་མེད་པའོ། །ཅིའི་ཕྱིར་ཞེ་ན། དེ་ངའི་ཆོས་སྤྱོད་པའི་གྲོགས་ཡིན་མོད་ཀྱི་ཞེས་པ་སྨོས་ཏེ། གང་སྔར་བསྟན་པའི་མིང་ནི་གཡོན་ཅན་ཞེས་སུ་བཏགས་ཞེས་བྱ་བ་དེའི་ལན་བཏབ་པ་ཡིན་ནོ། །ད་ནི་ངའི་ཆོས་སྤྱོད་པའི་གྲོགས་ཡིན་མོད་ཅེས་བྱ་བ་ནི་ཇི་ལྟར་ང་སྦྱིན་པ་ལ་དགའ་བ་དེ་ལྟར་དེ་ཡང་དགའ་བ་ཡིན་ཏེ། ཆོས་སྤྱོད་པའི་གྲོགས་ཡིན་པའི་ཕྱིར་རོ། །འོན་ཀྱང་འདི་ལ་ཁྱོད་ཅི་དགར་ཟད་མོད། །ཅེས་བྱ་བ་ནི་གལ་ཏེ་ཁྱོད་ཁྱེར་བར་འདོད་ན་དེ་རིང་ཁྱོད་ཁྱེར་ཅིག་ཅེས་བྱ་བའི་དོན་ཏོ། །རབ་ཏུ་གཞོན་ཞིང་ཞེས་བྱ་བའི་ཚིགས་བཅད་འདིའི་དོན་གྱི་ཡོན་ཏན་རྣམ་པ་གསུམ་དང་ལྡན་ན་ནི་བྲན་གྱི་ལས་སུ་འོས་པ་ཡིན་ཏེ། ལས་ཅི་འདོད་པ་བསྒྲུབས་པས་བདག་པོ་དགའ་བ་སྐྱེད་པ་དང༌། སྡུག་བསྔལ་བཟོད་ཅིང་ལས་བྱེད་པར་ནུས་པ་དང་མཁས་པའོ། །གསུམ་པོ་དེ་དག་ལས་གང་ཞིག་དང་ཡང་མི་ལྡན་པ་མེད་ན་ནི་ཇོ་བོ་ལས་བྱེད་པས་དགའ་བ་བསྐྱེད་པ་ཡིན་ལ། ཚིགས་སུ་བཅད་པ་འདིས་ནི་ཡོན་ཏན་དེ་དག་དང་མི་ལྡན་པར་བསྟན་ཏོ། །དེ་ལ་ཉེས་པ་བསྟན་པ་དང༌། བཏང་བའི་ཡོན་ཏན་བསྟན་པའི་ཕྱིར་ཤི་བི་པའི་རྒྱལ་པོ་ངའི་ཡབ་ཅེས་བྱ་བ་ལ་སོགས་པ་ཚིགས་སུ་བཅད་པ་གཉིས་སོ། །འདི་ལྟར་གྱུར་པ་ནི་བྲན་ཉིད་ཀྱི་དངོས་པོར་གྱུར་པའོ། །ངེས་པར་ནི་གདོན་མི་ཟ་བར་རོ། །དེའི་ཡུལ་ནི་ཞེས་བྱ་བ་ནི་ཤི་བི་པའི་རྒྱལ་པོའི་ཡུལ་ལོ། །དེ་ལྟར་བྱས་ན་ནོར་ཆེན་དང༌། །ཞེས་བྱ་བ་ནི་བུའི་གླུད་ཀྱི་ཕྱིར་ཐོབ་པར་འགྱུར་བའོ། །ཆོས་རྣམས་དང་ཡང་ལྡན་པར་འགྱུར། །ཞེས་བྱ་བ་ནི་ནོར་ཆེན་པོ་དེ་ཉིད་ཀྱིས་ཆོས་བྱེད་ནུས་པའི་ཕྱིར་དང༌། བྱིས་པའི་ཉོན་མོངས་པ་མེད་པའི་ཡང་ཕྱིར་རོ། །སྦྲུལ་གདུག་པ་དང་འདྲ་བའི་དྲུང་དུ་ཞེས་བྱ་བ་ནི་སྦྲུལ་གདུག་པ་ལྟ་བུར་བསྙེན་པར་དཀའ་བས་སོ། །མི་དགའ་བ་ཉིད་ཀྱི་སྐྱེས་པ་ཡིན་པས་མི་དགའ་བའི་སྐྱེས་སོ། །དེ་ལྟ་བུའི་མཚན་ཉིད་དང་ལྡན་པའི་རྒྱལ་པོའི་དྲུང་དུ་འགྲོ་བའི་ཉེས་དམིགས་བསྟན་པའི་ཕྱིར་རྒྱལ་པོས་བདག་ལ་འདི་གཉིས་ཞེས་བྱ་བའི་ཚིགས་བཅད་སྨོས་སོ། །བྲམ་ཟེ་མོའི་གཡོག་ཏུ་བདག་ནི་ཁྲིད་དེ་མཆི་
ཞེས་བྱ་བ་ནི་རྒྱལ་པོའི་གམ་དུ་མི་འགྲོ་བ་ཞེས་བྱ་བའི་དོན་ཏོ། །དོན་ཡོངས་སུ་མ་རྫོགས་པར་ཞེས་བྱ་བ་ནི་ད་ཁྱོད་ཀྱིས་ཇི་ལྟར་དགའ་བ་དེ་དེ་བཞིན་དུ་གྱིས་ཤིག་པ་སྟེ། དེ་ལྟར་དོན་ཡོངས་སུ་མ་རྫོགས་པའོ། །གཡོག་ལེགས་པར་བྱོས་ཞེས་བྱ་བ་ནི་བག་ཡོད་པར་ཡོངས་སུ་སྤྱད་པར་བྱའོ་ཞེས་བྱ་བ་ལ་སོགས་པའོ། །དེའི་བསྒྲིམས་པའི་མཐུ་ཞེས་བྱ་བས་ནི་འབད་པས་རྗེས་སུ་འཇུག་པ་སྟེ། དེས་ན་འབད་པ་ཞེས་བྱ་བའི་དོན་ཏོ། །མདོར་སྨྲས་ནས་ཞེས་བྱ་བ་ནི་རྒྱལ་བར་གྱུར་ཅིག་ཅེས་སོ། །བྲལ་བའི་སྡུག་བསྔལ་ཉིད་ཁུར་ཆེན་པོ་ཡིན་པས་བྲལ་བའི་སྡུག་བསྔལ་གྱི་ཁུར་རོ། །དེས་གདུངས་པའི་སྙིང་གང་ཡིན་པ་དེ་ནི་བྲལ་བའི་སྡུག་བསྔལ་གྱིས་གདུངས་པའོ། །ཡབ་གཅིག་ཡུམ་ཡང་སླད་རོལ་འབྱུང༌། །ཁྱོད་ཀྱང་བདག་ཅག་གཏོང་བར་བཞེད། །ཅེས་བྱ་བ་ནི་གང་གི་ཚེ་མ་སླད་རོལ་དུ་འབྱུང་བ་དེའི་ཚེ་སྦྱིན་པར་བཞེད་ཅེས་བྱ་བའི་དོན་ཏོ། །སྡུག་བསྔལ་གྱི་མྱོང་བ་ནི་སྡུག་བསྔལ་མྱོང་བའོ། །དེ་ཉིད་དང་པོར་སྡུག་བསྔལ་མྱོང་བ་གང་ཡིན་པ་དེ་ནི་སྡུག་བསྔལ་དང་པོ་མྱོང་བ་དེའོ། །དེ་བས་ན་སྐད་ཕྱུང་སྟེ་ཞེས་བྱ་བ་ནི་སྒྲ་དང་བཅས་པའོ། །བྲམ་ཟེ་ཞེས་བསྟན་པ་ལ། གལ་ཏེ་བྲམ་ཟེ་ཡིན་ན་ནི་གང་གི་ཕྱིར་འདི་ནི་བརྩེ་བ་མེད་པ་སྟེ། དེ་བས་ན་འདི་ནི་བྲམ་ཟེ་མ་ཡིན་ཏེ། བྲམ་ཟེའི་མཚན་ཉིད་ནི་ཆོས་དང་ལྡན་པ་ཉིད་དེ་དེ་མེད་པས་སོ། །དེ་ལྟ་ན་འདི་གང་ཞིག་ཡིན་ཞེ་ན་གནོད་སྦྱིན་ཞེས་སྨོས་སོ། །ཅིའི་ཕྱིར་ཞེ་ན། བརྩེ་བ་མེད་པའི་ཕྱིར་རོ། །བྲམ་ཟེར་བསྒྱུར་ནས་ནི་ཞེས་བྱ་བ་ནི་ཆ་བྱད་དོ། །གནོད་སྦྱིན་གྱིས་ཅིའི་ཕྱིར་ཁྲིད་པ་བཞིན་ཞེ་ན་བཟའ་བའི་ཕྱིར་རོ། །བྲམ་ཟེ་བདག་ལ་བརྡེག་པ་འདི། །ཞེས་བྱ་བའི་ཚིགས་བཅད་ཀྱིས་ནི་བདག་ཉིད་དེ་དང་བྲལ་བའི་སྡུག་བསྔལ་གྱི་དབང་དུ་བྱས་པའོ། །དཀའ་ཐུབ་ནགས་ཚལ་སྟོང་པ་ན། །ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་བདག་ཉིད་དང་བྲལ་བའི་སྡུག་བསྔལ་གྱིས་མའི་དབང་དུ་བྱས་པའོ། །གླང་པོ་ཆེ་ལྟ་བུ་ཡིན་པས་གླང་ཆེན་ཏེ། གླང་པོ་ཆེ་བྱས་པ་ཞེས་བྱ་བའི་དོན་ཏོ། །དེ་བཞིན་དུ་ཤིང་རྟ་དང༌། རྟ་པ་དང༌།
རྐང་ཐང་ཡང་ངོ༌། །ཕྱེད་ཙམ་ཡུམ་ལ་ཕུལ་ན་ནི། །ཞེས་བྱ་བས་ནི་ཕྱེད་ནི་ཁྱོད་ཉིད་ལ་ཞེས་བྱ་བ་ཡིན་ནོ། །ཅིའི་ཕྱིར་འདི་སྦྱིན་ཞེ་ན། མྱ་ངན་བསལ་བའི་ཕྱིར་རོ། །འཕྲིན་གྱིས་ཡུམ་ལ་ཕྱག་འཚལ་ཞིང༌། །ཞེས་བྱ་བ་ཅི་ཞེ་ན། ཞལ་ནི་མཐོང་བ་རབ་ཏུ་དཀའ་བ་ཉིད་དེ། ཐུགས་ངན་མཛད་ལས་བཟློག་ཏུ་གསོལ། །ད་ཡང་ཞལ་མཐོང་དཀའ་བའི་ཕྱིར་ཏེ། ཞལ་མཐོང་བ་མི་སྲིད་པ་ལ་མྱ་ངན་དོན་མེད་པའི་ཕྱིར་རོ། །བྲམ་ཟེ་ངན་པ་ངོ་མི་ཚ། །ཞེས་བྱ་བ་ནི་མ་བསྟན་པ་རྗེས་སུ་བསྟན་པ་སྟེ། གཞན་དུ་ན་བྲམ་ཟེ་ཁོ་ན་ཞེས་མི་བརྗོད་ཅིང་ཚིག་དེ་ཡང་སྩལ་བ་མེད་པས་སོ། །ལྷམ་ཡང་མེད་པར་རྐང་གིས་འདོང༌། །ཞེས་བྱ་བ་འདི་ནི་ལམ་གྱི་སྡུག་བསྔལ་གྱི་དབང་དུ་བྱས་པའོ། །ལམ་དེའི་སྡུག་བསྔལ་ཡང་རྒྱུ་གསུམ་གྱིས་འབྱུང་བ་ཡིན་ཏེ། ལམ་གྱིས་དུབ་པ་སོ་བ་མེད་པ་དང༌། གནས་ཀྱི་ཁྱད་པར་དང་གཞན་གྱི་དབང་དུ་བྱས་པས་སོ། །ལྷམ་ཡང་མེད་པར་རྐང་གིས་འདོང༌། །ཞེས་བྱ་བ་འདིས་ནི་ལམ་གྱི་ངལ་སོ་བ་མེད་པ་ཉིད་དུ་བསྟན་ཏོ། །རབ་ཏུ་གཞོན་པས་ངལ་མི་བཟོད། །ཅེས་བྱ་བ་འདིས་ནི་གནས་ཀྱི་ཁྱད་པར་བསྟན་ཏོ། །དེའི་བྲན་གཡོག་བྱེད་པ་ཞེས་བྱ་བ་འདིས་ནི་རང་བཞིན་མེད་པ་ཉིད་དུ་བསྟན་ཏེ། དེ་ལྟར་ཡོངས་སུ་ངལ་སོར་མེད་པའི་དབང་དུ་བྱས་ནས། ལམ་གྱིས་ངལ་ཞིང་དུབ་པ་ལ། །ཞེས་བྱ་བའི་ཚིགས་བཅད་སྨོས་སོ། །དང་པོའི་ཕྱེད་ཀྱིས་ནི་ལམ་གྱིས་དུབ་པའི་ངལ་སོ་བ་མེད་པ་ལས་བརྩམས་སོ། །ཕྱེད་གཉིས་པས་ནི་ལྷན་ཅིག་སྐྱེས་པའི་བཀྲེས་པ་དང་སྐོམ་པའི་སྡུག་བསྔལ་གསོ་བ་མེད་པ་ཉིད་དུ་བསྟན་ཏོ། །བདག་ནི་བརྟན་པར་བྱེད་འདོད་ཀྱང༌། །ཞེས་བྱ་བའི་ཚིགས་བཅད་འདིའི་དོན་ནི་སོ་སོར་རྟོག་པའི་སྟོབས་ཡོད་ཀྱང་ངོ༌། །བུ་ནི་བྱིས་པ་སྟེ་སོ་སོར་རྟོག་པ་མེད་པས་སོ།། རེ་ཞིག་བདག་འདི་ལྟ་བུར་ནི་སྡུག་བསྔལ་ན་ཞེས་བྱ་བ་བསྟན་པ་ལ་དེའི་སྡུག་བསྔལ་བསྟན་པའི་ཕྱིར། ཀྱེ་མའོ་ཞེས་བྱ་བའི་ཚིགས་བཅད་ཕྱེད་འདི་སྨོས་སོ། །བསྟན་པར་བྱེད་འདོད་ཀྱང་ཞེས་བྱ་བ་བསྟན་པ་ལ། །ཇི་ལྟར་བསྟན་པར་བྱེད་པར་འདོད་པ་ཡིན། །ཞེས་པ་དེ་ལས་བརྩམས་ཏེ།
དམ་པ་རྣམས་ཀྱི་ཆོས་ཞེས་བྱ་བའི་ཚིགས་བཅད་ཀྱི་ཕྱེད་འོག་མའོ། །མི་དགའ་འབྱུང་བ་ནི་མི་དགའ་བ་དག་འབྱུང་བའོ། །དེ་བརྟན་པའི་ངང་ཚུལ་གང་ཡིན་པ་དེ་ནི་མི་དགའ་བ་འབྱུང་བའི་ཚུལ་ལོ། །ཡང་དང་ཡང་བོས་ཏེ་དེ་གཉིས་ལན་མེད་པས་ཞེས་བྱ་བ་ནི། མ་ཐོས་པ་སྟེ་བོད་པས་དེ་གཉིས་གཅིག་གིས་ཀྱང་མ་ཐོས་པའོ། །དེ་གཉིས་ནི་དེ་དག་ཅེས་བྱ་བའི་དོན་ཏོ། །རྩེ་རྩེ་ངལ་ནས་ཞེས་བྱ་བའི་ཚིགས་བཅད་འདི་ནི་འཚོ་བའི་གནས་སྐབས་ན་ཡང་མ་མཐོང་བས་བྲལ་བའི་སྡུག་བསྔལ་གྱི་དབང་དུ་བྱས་པའོ། །རྩེ་རྩེ་བ་ལས་བྱུང་བའི་ངལ་བ་ནི་རྩེ་རྩེ་ངལ་བའོ། །དེ་ལས་སྐྱེས་པའི་གཉིད་གང་ཡིན་པ་དེ་ནི་རྩེ་རྩེ་ངལ་ནས་སྐྱེས་པའི་གཉིད་དོ། །བདག་འོངས་མཆིས་པས་ཞེས་བྱ་བའི་ཚིགས་བཅད་འདི་ནི་འཆི་བའི་གནས་སྐབས་ལ་རྣམ་པར་རྟོག་པའི་དབང་དུ་བྱས་པའོ། །གང་གི་ཕྱིར་དེ་གཉིས་ཤི་བ་ནི་མ་ཡིན་ཏེ། དེ་བསད་མཐོང་ན་འདི་ལྟར་སྒྲ་མི་འབྱིན་པའོ། །བྱའི་སྒྲ་མེད་པར་ཡང་འཆི་བ་སྲིད་དོ་ཞེས་རྣམ་པར་རྟོག་པ་ལས་བརྩམས་ནས། འབབ་ཆུ་དྲག་པོ་ཞེས་བྱ་བའི་ཚིགས་བཅད་ཕྱེད་འོག་མའོ། །འདི་ལ་ལྟས་བཟང་པོ་ཡོད་པ་མ་ཡིན་པ་ནི་ལྟས་ངན་པའོ། །ལྟས་ངན་པས་བཟློག་པའི་དགའ་བའི་སེམས་གང་ཡིན་པ་དེ་ནི་སྙིང་འདི་ཡང་ལྟས་ངན་པས་དགའ་བ་ནི་བཟློག་པའོ། །གས་པ་ནི་ཟག་པ་ཞེས་བྱ་བའི་དོན་ཏོ། །དགའ་བར་བྱ་རིགས་ཞེས་བྱ་བ་ནི་དགའ་བར་ཐོས་པར་རིགས་པའོ། །ཆེད་ཀར་ཞེས་བྱ་བ་ནི་མངོན་པར་གནོད་པའི་ཕྱིར་རོ། །ཀྱི་ཧུད་བདག་ནི་བསད་ཀྱིས་མེད། །ཅེས་བྱ་བ་ནི་ཤི་བའི་དོན་ཏོ། །ཟད་པའམ་ཤི་བས་བདག་ཉིད་ཀྱང་ངེས་པར་འཆི་བའི་ཕྱིར་བསད་ཅེས་བསྟན་ཏོ། །བརྟན་པ་མེད་དུ་དོགས་པས་ན། །ཞེས་བྱ་བ་ནི་གལ་ཏེ་བརྟན་པ་མེད་དུ་དོགས་པས་འཆི་པར་འགྱུར་རོ་ཞེས་དོགས་པའི་དོན་ཏོ། །རྒས་པ་དང་དབུལ་བ་ནི་རྒས་ཤིང་དབུལ་བའོ། །དེ་ཉིད་ཀྱི་སྡུག་བསྔལ་ནི་རྒས་ཤིང་དབུལ་བའི་སྡུག་བསྔལ་ཏེ། དེས་སྡུག་བསྔལ་བ་ཞེས་བྱ་བའི་དོན་ཏོ། །འདིས་ནི་སྙིང་རྗེའི་དོན་བསྟན་ཏོ། །བྲམ་ཟེ་ཞེས་བྱ་བ་འདིས་ནི་
ཡོན་ཏན་གྱི་ཞིང་དུ་བསྟན་ཏོ། །ཡང་ན་རྒས་ཤིང་དབུལ་བའི་སྡུག་བསྔལ་གྱིས་ཉེན་པ་ཞེས་བྱ་བ་ནི་སྡུག་བསྔལ་བ་ཉིད་དོ། །བྲམ་ཟེ་ཞེས་བྱ་བ་ནི་སློང་བ་ཉིད་དུ་བསྟན་ཏེ། སློང་བས་འཚོ་བ་དེ་བས་ན་བྲམ་ཟེ་ཞེས་བརྗོད་དོ། །ང་གན་འོངས་ཞེས་བྱ་བ་ནི་རྟེན་མེད་པ་ཉིད་དེ། གང་གཞན་དུ་མི་རྙེད་པར་བྱེད་པའི་གནས་འདི་ན་འོངས་ཤིང་སྤྱོད་པ་སྟེ། གང་གི་ཕྱིར་བདག་ལ་སློང་བ་དེ་བས་ན་དེ་རྟེན་མེད་པས་དེས་རྟོགས་པར་བྱའོ། །བུ་ལ་མ་བལྟས་ན་ཇི་ལྟར་ཁྱོད་ལ་བལྟ་བར་བྱ་ཞེ་ན། སྨྲས་པ། མྱ་ངན་གདུང་བར་མ་བྱེད་ལ། །ཞེས་བྱ་བ་སྨོས་སོ། །དེ་ལྟ་ན་ཅི་ཞིག་བྱ་བ་ཡིན་ཞེ་ན། བུ་ཡི་མྱ་ངན་གདུང་སྙིང་ལ། །མཚོན་གྱིས་འདེབས་པ་ཞེས་སྨོས་ཏེ་མཚོན་དང་འདྲ་བའི་ཕྱིར་རོ། །དེ་ལ་མྱ་ངན་གྱིས་ཡོངས་སུ་གདུངས་ན་ཅིའི་ཕྱིར་བུ་བྱིན་ཞེས་བྱ་བ་ཡིན་ཞེ་ན། ཚིག་གི་སྐབས་ཤེས་པར་བྱས་ནས། བསླངས་པར་གྱུར་ན་ཞེས་བྱ་བའི་ཚིགས་བཅད་སྨོས་སོ། །བུ་ཤིར་དོགས་དེ་སྙིང་བཙོས་པ་ལས་ཞེས་བྱ་བ་ནི་བུ་ཤིར་དོགས་པའི་སྙིང་གི་གདུང་བ་ཞེས་བྱ་བའི་དོན་ཏོ། །འདི་ལྟར་ཞེས་བྱ་བ་ནི་གང་གི་ཕྱིར་ཏེ། གང་གིས་སྐབས་མ་རྙེད་པ་དེ་ནི་སྐབས་མ་རྙེད་པའོ། །དེ་གང་ཞེ་ན་འཇུངས་པའོ། །བྲག་ཅའི་སྒྲའི་ཁྱབ་པའི་སྒྲ་གང་ཡིན་པའི་རྔ་སྒྲ་ཆེན་པོའི་སྒྲ་དེ་ནི་ཁྱབ་པའི་བྲག་ཅ་དང་སྒྲ་བརྙན་ཞེས་བྱ་བའི་དོན་ཏོ། །གསལ་བའི་ཚིག་དང་འབྲུ་གང་ཡིན་པའི་ནམ་མཁའ་དེ་ནི་ཚིག་འབྲུ་གས་ལ་བའི་ནམ་མཁའ་ལའོ། །གཡོ་བ་གང་ལ་ཡོད་པ་དེ་ནི་གཡོ་བ་ཅན་ཏེ་རབ་ཏུ་གཡོ་བ་ཅན་ནོ། །རིའི་ནུ་མ་གཡོ་བ་ཅན་གང་ཡིན་པ་དེ་ནི་རིའི་ནུ་མ་གཡོ་བ་ཅན་ནོ། །ནམ་མཁའ་ནི་མཐོ་རིས་སོ། །གློག་གིས་གསལ་བ་དང་བཅས་པའི་གློག་འགྱུ་བ་ནི་འོད་ཀྱིས་གསལ་བའོ། །དེས་གསལ་བ་དང་བཅས་པ་དེ་ལ་ནི་གློག་འགྱུ་བའི་འོད་ཀྱིས་གསལ་ཞིང་མཐོང་བའོ། །ཡང་ན་བརྩམས་པའོ། །ཡང་ན་འོད་དང་ལྡན་པ་སྟེ། དེས་གསལ་བར་གྱུར་པའོ། །སྩལ་བའི་ཐུགས་ནི་དགྱེས་པར་མཛོད། །ཅེས་བྱ་བ་ནི་འདི་ལྟར་མཇུག་གི་ལས་སྒྲུབ་པ་ཡིན་ནོ། །དེ་ལྟར་སེམས་དད་པའི་ཕན་
ཡོན་གང་ཡིན་ཞེ་ན། འཇིག་རྟེན་རྣམས་ལ་བཏུང་ཆུ་བཞིན། །ཞེས་སྨོས་སོ། །ཇི་ལྟར་བཏུང་ཆུ་བཞིན་དུ་གྱུར་པ་ཡིན་ཞེ་ན། སླན་ཆད་ཀྱང་ནི་སྦྱིན་བདག་མཛོད། །ཅེས་སྨོས་ཏེ། ཅི་ནས་ཀྱང་སྦྱིན་པ་ལས་བཏུང་ཆུ་བཞིན་དུ་གྱུར་པ་ཞེས་བྱ་བའི་དོན་ཏོ། །སྦྱིན་པ་ཉིད་ཆོས་ཡིན་པས་སྦྱིན་པའི་ཆོས་སོ། །ཟད་པ་སྐམས་པའོ། །འདོད་ལྷའི་སེམས་ནི་མྱ་ངན་མེ་ཡིས་ཚིག །ཅེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ་རྫོགས་པའི་ཕྱིར་ཏེ། དེ་བས་ན་ཡང་སངས་རྒྱས་ཉིད་ཐོབ་པ་ལ་ནི་ཐམས་ཅད་ཀྱི་ཐམས་ཅད་དུ་སྦྱིན་པ་ལས་སྙིང་རྗེ་ཁྱད་པར་དུ་གྱུར་པ་ཡིན་ནོ་ཞེས་བྱ་བའི་ཚིག་གིས་སོ། །འོ་ན་མ་དྲི་སྐྱེས་བུ་གཞན་ལ་བྱིན་པས་འཁྲུགས་པར་མ་གྱུར་ཏམ་ཞེ་ན་མ་ཡིན་ཏེ། ཁྱིམ་ཐབ་དང་བྲལ་བའི་མྱ་ངན་གྱི་ཁུར་གྱིས་ནོན་པར་གྱུར་པའི་ཕྱིར་ཏེ། སློང་བ་ལ་མི་བཟློག་པའི་རང་བཞིན་ཡིན་པས་སོ། །དེ་ལ་མིག་ཚུགས་ལྟ་ཞིང་བྲིས་བཞིན་འདུག །ཅེས་བྱ་བ་ཅིའི་ཕྱིར་ཞེ་ན། སྔོན་མེད་པའི་སྡུག་བསྔལ་གྱི་ཁུར་གྱིས་ནོན་པའི་ཕྱིར་རོ། །བྲིས་བཞིན་ཞེས་བྱ་བ་ནི་གཡོ་བ་མེད་པ་དང༌། མིག་འབྱེད་པ་དང་འཛུམས་པ་མེད་པའི་ཕྱིར་རོ། །ཡ་རབས་མ་རབས་ཆོས་གཉིས་ནི། །ཞེས་བྱ་བ་ལ། དམ་པ་དང་དམ་པ་མ་ཡིན་པ་ནི་ཡ་རབས་དང་མ་རབས་སོ། །དེ་གཉིས་ཀྱི་ཆོས་ནི་ཡ་རབས་མ་རབས་ཀྱི་ཆོས་གཉིས་སོ། །མ་རབས་ཀྱི་ཆོས་ནི་གཞན་གྱི་བུད་མེད་ལ་འགྲོ་བའོ། །འདི་ནི་ཡ་རབས་ཀྱི་ཆོས་ཏེ། རང་གི་ཆུང་མ་གཞན་ལ་སྦྱིན་པའོ། །དམ་པ་དང་དམ་པ་མ་ཡིན་པ་ནི་ཡ་རབས་མ་རབས་ཏེ། །ཇི་ལྟར་ཁྱད་པར་རེ་ཆེ་སྙམ་ན། བདག་ཉིད་མ་སྦྱངས་པ་རྣམས་ནི། །སུས་ཀྱང་ཡིད་ཆེས་མི་ནུས་སོ། །ཞེས་སྨོས་ཏེ། འདི་ལྟར་དམ་པ་ཡིན་པས་དེ་ནི་ངེས་པ་ཡིན་པའི་ཕྱིར་རོ། །དེ་ལྟར་མ་རབས་ཀྱི་ཆོས་ཀྱི་རང་གི་ངོ་བོ་བསྟན་ནས། ཡ་རབས་ཀྱི་ཆོས་ཀྱི་སྨྲ་བ་ལས་བརྩམས་པ། འདོད་ཆགས་བྲལ་བར་མ་གྱུར་པས། །ཞེས་བྱ་བའི་ཚིགས་བཅད་སྨོས་ཏེ། རྒྱུ་གསུམ་གྱིས་ནི་ཉོན་མོངས་པ་སྐྱེ་བར་འགྱུར་ཏེ། །ཕྲ་རྒྱས་སྤངས་པར་མ་གྱུར་དང༌། །ཡུལ་ནི་ཉེ་བར་གནས་པ་དང༌། །ཚུལ་བཞིན་
མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་བྱ་བའི་ཚིག་གིས་སོ། །དམ་པ་རྣམས་ནི་སེམས་རྒྱ་ཆེ་བ་ཡིན་པས་ཡུལ་མངོན་དུ་གྱུར་ཀྱང་ཉོན་མོངས་པ་འགོག་ཅིང་ཉོན་མོངས་པ་ཀུན་ཏུ་མི་སྤྱོད་པ་ཡིན་ཏེ། དེ་བས་ན་རྒྱུ་མ་ཚང་བས་ཉོན་མོངས་པ་མི་སྤྱོད་པ་ཡིན་ནོ་ཞེས་བསྟན་ཏོ། །འདོད་ཆགས་དང་མ་བྲལ་བ་ནི་འཇིག་རྟེན་པའི་ལམ་གྱིས་ཉོན་མོངས་པ་འགོག་པའོ། །ཅིག་ཤོས་ནི་འདོད་ཆགས་ཀྱི་ཕྲ་རྒྱས་སྤངས་པ་ཡིན་ཏེ། ད་བུ་དང་ཆུང་མ་ལ་དགའ་བ་ཉིད་ཀྱང་མེད་དེ། དེ་བས་ན་ཉོན་མོངས་པ་འགོག་པ་མེད་པའང་བསྟན་ཏོ། །འདོད་ཆགས་དང་བྲལ་བར་མ་གྱུར་པ་ཞེས་སྨོས་པ་འདིས་ནི་འདོད་ཆགས་སྐྱེ་བའི་རྒྱུ་བསྟན་ཏོ། །བུ་སྨད་རབ་ཏུ་སྡུག་པ་དང༌། །ཅེས་བྱ་བ་འདིས་ནི་རྒྱ་ཆེ་བའི་ཡུལ་དང་ཉེ་བ་ཉིད་དུ་བསྟན་ཏོ། །དེ་ལྟར་མ་ཆགས་སྦྱིན་བྱེད་པ། །ཞེས་བྱ་བ་ལ། འདིར་འདོད་ཆགས་པ་ནི་སྲེད་པའི་འདོད་ཆགས་སམ་ཆགས་པའོ། །ཆགས་པ་དང་བྲལ་བ་ནི་གང་གི་ཕྱིར་མ་ཆགས་པའོ། །དེ་ལྟར་ཞེས་བྱ་བ་ནི་འདི་ལྟར་མངོན་སུམ་ཉིད་དུ་བསྒོམ་པ་བསྟན་ཏེ། འདིས་ནི་ཚུལ་བཞིན་མ་ཡིན་པ་ཡིད་ལ་བྱེད་པ་མེད་པ་ཉིད་དེ། དེ་ལྟར་ཡ་རབས་དང་མ་རབས་ཀྱི་ཆོས་གཉིས་ཤིན་ཏུ་ཁྱད་པར་ཆེ་བ་ཉིད་དུ་བསྟན་ཏོ། །ཉི་མའི་འོད་ཀྱིས་ཞེས་བྱ་བ་ལ་ཉི་མའི་འོད་ནི་ཉི་མའི་གཟི་བརྗིད་དོ། །གཞན་གྱི་འོད་ནི་ཟླ་བ་སོགས་པའི་འོད་དོ། །ཉི་མའི་འོད་ཀྱིས་ཞེས་བྱ་བ་དང༌། བསྒྲགས་པ་ཞེས་བྱ་བར་སྦྱར་རོ། །ཁྱོད་ཀྱི་ཡོན་ཏན་ཆགས་པའི་གཏམ་དག་གིས། །ཞེས་བྱ་བ་ལ་ཆགས་པའི་གཏམ་གང་ཡིན་ཞེ་ན། དེ་བསྟན་པའི་ཕྱིར། ཁྱོད་ཀྱི་སྤྱོད་པ་ཞེས་ཚིགས་བཅད་བརྩམས་སོ། །ཇི་ལྟར་ཆགས་པའི་གཏམ་ཡིན་ཞེ་ན། ཆགས་པའི་གཏམ་ཉིད་དུ་ཚིགས་བཅད་ཕྱེད་འོག་མས་བསྟན་ཏོ། །ཁྱོད་ཀྱི་སྤྱོད་པ་མི་ལས་འདས། །ཞེས་བྱ་བ་གང་ཡིན་ཞེ་ན། ཚིགས་བཅད་ཕྱེད་འོག་མས་བསྟན་ཏོ། །གནོད་སྦྱིན་དྲི་ཟ་ཞེས་བྱ་བ་ལ་སོགས་པས་གཤོལ་མདའ་འཛིན་ལ་སོགས་པའི་རི་དག་གི་བར་ན་གནས་པའོ། །ལྟོས་འགྲོ་ཞེས་བྱ་བ་སྨོས་པས་ནི་སའི་འོག་ན་གནས་པ་
པ་དང། རྒྱ་མཚོན་གནས་པ་གཟུང་ངོ༌། །སུམ་ཅུ་རྩ་གསུམ་པ་བརྒྱ་བྱིན་ཞེས་བྱ་བ་འདི་ནི་རི་རབ་ལ་གནས་པ་སྟེ། འདི་ལྟར་ལྷོ་ཕྱོགས་སུ་ཞེས་བྱ་བ་གང་སྔར་བསྟན་པ་སྟོན་པ་ཡིན་ནོ། །བུ་དང་བྲལ་བར་མ་སེམས་ཤིག །ཅེས་བྱ་བ་ཅིའི་ཕྱིར་ཞེ་ན། ཕ་ནི་བུ་དང་ལྡན་པའི་ཕྱིར་རོ། །རྒྱལ་སྲིད་ཉམས་པའི་མྱ་ངན་མ་བྱེད་ཅིག །ཅེས་བྱ་བ་ནི་གང་གི་ཕྱིར། ཁྱོད་ཀྱིས་མགོན་བྱས་དགོས་བཅས་རྒྱལ་སྲིད་ཅེས་བྱའོ། །འདིར་ཁ་ཅིག་རྒོལ་ཏེ། བྲམ་ཟེ་ལ་ནི་བྱང་ཆུབ་སེམས་དཔའ་སྙིང་བརྩེ་བར་བྱེད་ལ། དམན་པས་དུ་ཞིང་སྡུག་པའི་བུ་གཉིས་ཅིའི་ཕྱིར་གཏོང་ཞེས་གྲུབ་པའི་མཐའ་ཡོངས་སུ་མ་ཤེས་པ་ཉིད་རྒོལ་ལོ། །དེས་མཆོད་པ་ནི་བདག་ཉིད་སྔོན་བྱང་ཆུབ་སེམས་དཔའི་དུས་སུ་བྱང་ཆུབ་སེམས་དཔས་དུས་གཅིག་ཏུ་ཚོགས་བསགས་པར་བྱའོ་ཞེས་འདི་ལྟར་དགོངས་པ་ཡིན་ཏེ། བདག་ཉིད་བཏང་བ་མ་ཡིན་པར་ཇི་ལྟར་ཚོགས་ཡོངས་སུ་རྫོགས་པར་འགྱུར། དེ་ལྟར་བྱང་ཆུབ་སེམས་དཔའ་ནི་ཚོགས་ཆེན་པོ་དེ་དག་ལས་སྐྱེས་པའོ། །དེ་ལྟར་ན་ཅིའི་ཕྱིར་དུ་བར་བྱེད་ཅེ་ན་ཆོས་ནི་གཉིས་ཏེ། དོན་དམ་པར་བསྟན་པ་དང༌། ཀུན་རྫོབ་ཏུ་བསྟན་པའོ། །འདི་ནི་ཀུན་རྫོབ་ཏུ་བསྟན་པ་སྟེ། ཉམ་ང་བ་དག་ཡིད་དང་བ་བསྐྱེད་པར་བྱ་བའི་ཕྱིར་རོ། །སྐྱེས་པའི་རབས་འདི་ཉིད་དུ་ཡང་སློབ་དཔོན་གྱིས་བཤད་པ་སྦྱིན་པའི་གེགས་སུ་འགྱུར་དུ་མ་དོགས་ཤིག །འདི་ནི་ང་ཡི་ཆོས་སྤྱོད་གྲོགས་ཡིན་ནོ། །ཞེས་བྱ་བ་དང༌། སྦྱིན་ལ་དགའ་བ་གོམས་བྱས་ཤིང༌། །ཞེས་བྱ་བའི་ཚིགས་བཅད་འདིས་མི་སྦྱིན་པར་མི་བྱ་བ་ཉིད་དུ་བསྟན་པའི་ཕྱིར་རྩོད་པ་མེད་པ་ཉིད་དོ། །སྤྱོད་པ་དེ་ལ་ཕྱོགས་པ་ཞེས་བྱ་བ་ནི་བྱང་ཆུབ་སེམས་དཔའི་སྤྱོད་པ་དེ་ལ་སོགས་པའི་སེམས་ཅན་ལ་སྟེ། སྨོན་ལམ་བཏབ་པ་ཞེས་བྱ་བའི་དོན་ཏོ། །བརྙས་པ་མི་བྱ་ཞེས་བྱ་བ་ནི་ཟིལ་གྱིས་གནོན་པར་མི་བྱ་བ་སྟེ། མོས་པ་སྤྱོད་པ་ལ་གནས་པ་ལའོ། །གནོད་པ་མི་བྱ་བ་ནི་སར་ཆུད་པའི་སེམས་ཅན་གྱི་ཁྱད་པར་གྱི་ཡོན་ཏན་དང་ལྡན་པར་ཐོས་པས་དེ་ལ་མི་མོས་པར་མི་བྱའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཐམས་ཅད་
སྒྲོལ་གྱི་སྐྱེས་པའི་རབས་སོ།། །།རང་གི་བསོད་ནམས་ཀྱི་མཐུ་ཐོབ་པ་ཞེས་བྱ་བ་འདིས་ནི་སྐལ་བ་ཕུན་སུམ་ཚོགས་པའོ། །རྒྱལ་ཕྲན་ཐམས་ཅད་ཕྱག་འཚལ་བ། །ཞེས་བྱ་བ་འདིས་ནི་སྤྲོ་བ་ཕུན་སུམ་ཚོགས་པ་བསྟན་ཏོ། །བདག་དང་གཞན་གྱི་འཁོར་ལ་སོགས་པའི་གནོད་པ་རབ་ཏུ་ཞི་བས་འཚེ་བ་མེད་པ་ཞེས་བྱ་བ་འདིས་ནི་གསང་ཚིག་གི་ནུས་པ་བསྟན་ཏོ། །གདུགས་ཟླ་མེད་པ་བགོ་སྐལ་གྱི་རིམ་པས་ཐོབ་པ་ཞེས་བྱ་བ་འདིས་ནི་གཙོ་བོའི་ནུས་པ་བསྟན་ཏོ། །ཆོས་ཀྱི་དོན་གཅིག་ཏུ་སྦྱངས་པར་གྱུར་ཏེ། ཇི་ལྟ་བུ་ཞེ་ན། ཐུབ་པ་བཞིན་དུ་ཞེས་སྨོས་སོ། །ཇི་ལྟར་ཆོས་དོན་གཅིག་ཏུ་སྤྱོད་པ་ཡིན་ཞེ་ན། དངོས་པོ་ཀུན་གྱིས་འགྲོ་ལ་ཕན་བྱེད་པ། །ཞེས་སྨོས་ཏེ། དངོས་པོ་ཐམས་ཅད་ཀྱིས་ཕན་པའི་ཕྱིར་རོ། །ཅིའི་ཕྱིར་དེ་ལྟར་གྱུར་པ་ཡིན་ཞེ་ན། དབང་པོ་ཐུལ་བའི་ཕྱིར་དང༌། འབྲས་བུ་སྨད་པ་སྤྱད་པ་ལ་མ་ཆགས་པའི་ཕྱིར་རོ། །ཡང་ན་དངོས་པོ་ཀུན་གྱིས་ཕན་པ་བྱེད་པར་འགྱུར་ཏེ། ཅིའི་ཕྱིར་ཞེ་ན། དབང་པོ་ཐུལ་བའི་ཕྱིར་དང༌། ཆོས་དོན་གཅིག་ཏུ་བྱེད་པས་འབྲས་བུ་སྨད་པ་སྤྱད་པ་ལ་མ་ཆགས་པའི་ཕྱིར་ཏེ། འདིས་ནི་ནོར་གྱི་འདོད་པ་ལ་ཆགས་པ་མེད་པར་བསྟན་ཏེ། འབྲས་བུ་ཞེས་སྨོས་པས་སོ། །ཇི་ལྟ་བུ་ཞེ་ན། ཐུབ་པ་བཞིན་ནོ། །ཆོས་དོན་གཅིག་ཏུ་བྱེད་ཅེས་བྱ་བ་དེའི་རྒྱུ་ཡང་བསྟན་པ་ཡིན་ཏེ། རང་གི་དོན་ལས་བརྩམས་པའོ། །ད་ནི་གཞན་གྱི་རྒྱུ་ལས་ཀྱང་སྨྲས་པ་ཡིན་ཏེ། གཞན་གྱི་མཚན་ཉིད་ལས་བརྩམས་ནས། སྐྱེ་དགུ་རྣམས་ཞེས་བྱ་བའི་ཚིགས་བཅད་སྨོས་སོ། །གཙོ་བོ་རྣམས་ཀྱི་སྤྱོད་པ་ནི་གཙོ་བོའི་སྤྱོད་པའོ། །དེའི་རྗེས་ནི་གཙོ་བོའི་སྤྱོད་པའི་རྗེས་ཏེ། སྒྲུབ་པ་གང་ལ་ཡོད་པའི་རང་བཞིན་ནི་གཙོ་བོའི་རྗེས་སྤྱོད་རང་བཞིན་ནོ། །གཙོ་བོ་ནི་ཁྱད་པར་དུ་གྱུར་པའོ། །སྔར་བསྟན་པའི་ཆོས་དོན་གཅིག་ཏུ་སྤྱོད་པ་དང༌། དངོས་པོ་ཀུན་གྱིས་འགྲོ་ལ་ཕན་བྱེད་པ། །ཞེས་པ་དེ་གཉི་ག་བསྟན་པའི་ཕྱིར། ནོར་ཡང་བྱིན་ཞེས་བྱ་བའི་ཚིགས་བཅད་སྨོས་སོ། །ཚིགས་བཅད་འདིས་ནི་བདག་དང་གཞན་གྱི་དོན་ལས་བརྩམས་ཏེ་ཕ་རོལ་ཏུ་ཕྱིན་པ་དྲུག་
བསྟན་ཏོ། །སྦྱིན་པ་དང༌། ཚུལ་ཁྲིམས་དང༌། བཟོད་པས་ནི་བདག་གི་དོན་ཕུན་སུམ་ཚོགས་པ་སྟེ། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་གསུམ་ནི་ལོངས་སྤྱོད་ཀྱི་བདག་ཉིད་སྲིད་པའི་གཡོག་འཁོར་ཕུན་སུམ་ཚོགས་པའི་རྒྱུར་གྱུར་པའི་ཕྱིར་རོ། །འགྲོ་བའི་དོན་ཡང་སྤྱོད་ཅེས་བྱ་བ་འདིས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་ཏོ། །འགྲོ་ལ་ཕན་སེམས་མཐོང་ན་ཞི་བར་སྣང༌། །ཞེས་བྱ་བ་ནི་སྐྱེ་དགུ་རྣམས་ལ་ཕན་པས་ན་འགྲོ་ལ་ཕན་པའོ། །འགྲོ་བའི་དོན་ལ་ཕན་པའི་ལྷག་པའི་བསམ་པ་ཡོད་པ་ནི་འགྲོ་ལ་ཕན་པའི་སེམས་སོ། །དེ་མཐོང་ན་ཞི་བར་སྣང་བ་གང་ཡིན་པ་དེ་ནི་འགྲོ་ལ་ཕན་སེམས་མཐོང་ན་ཞི་བར་སྣང་བ་སྟེ། འདིས་ནི་བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་ཏོ། །སེམས་ཞེས་བྱ་བ་སྨོས་པས་ནི་ཐབས་ལ་མཁས་པའི་རྣམ་པ་སྟེ། མཁས་པའི་རྣམ་པ་ནི་ཤེས་རབ་སྟེ། དེ་ཡང་སེམས་རྩེ་གཅིག་པས་བྱས་པར་བསྟན་པའི་ཕྱིར་གཉི་ག་སྨོས་སོ། །དོན་ཡང་སྦྱོད་ཅེས་བྱ་བ་འདིས་ནི་སྦྱོར་བ་ཕུན་སུམ་ཚོགས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །འགྲོ་ལ་ཕན་སེམས་ཞེས་བྱ་བ་འདིས་ནི་བསམ་པ་ཕུན་སུམ་ཚོགས་པ་བསྟན་ཏེ། བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གཉིས་ཀྱིས་སོ། །བག་མེད་པའི་དབང་གིས་ཁ་ཅིག་ཏུ་ཐན་པ་འབྱུང་བས་འཁྲུག་ཅིང་གནོད་པར་གྱུར་ཏོ་ཞེས་བྱ་བ་ལ། ཆར་འབབ་མི་མཁས་པས་ཁ་ཅིག་ཏུ་ཐན་པ་འབྱུང་བ་དེས་འཁྲུགས་པའོ། །གང་དག་ཅེ་ན། སེམས་ཅན་རྣམས་སོ། །ཆོས་ལེགས་པར་མ་སྤྱད་པ་ཞེས་བྱ་བ་ལ། ངན་པར་སྤྱད་པ་ནི་ལེགས་པར་མ་སྤྱད་པ་སྟེ། དེ་བས་ན་མ་རུངས་པར་གྱུར་པ་ནི་གོམས་པར་གྱུར་པའོ། །དེའི་སྡུག་བསྔལ་ནི་འགྲོ་བའི་སྡུག་བསྔལ་ལོ། །དེ་ལས་ཐར་པར་བྱ་བའི་ཐབས་ནི་སྐྱེ་དགུ་རྣམས་སྡུག་བསྔལ་ལས་འདོན་པའི་ཐབས་སོ། །རྣམ་པ་དུ་མའི་སྲོག་ཆགས་དག་ནི་སྲོག་ཆགས་དུ་མའོ། །དེ་དག་གསོད་ཅིང་འཇིགས་འཇིགས་སྐད་ཟེར་བའི་སྲོག་ཆགས་དུ་མ་གསོད་པར་རྩོམ་པ་དེ་གང་དུ་གནོད་སྦྱིན་ནོ། །ཡིད་ལ་འབབ་པ་
ཞེས་བྱ་བ་ནི་བསམ་པའོ། །ངོ་ཟློགས་ཕོད་པ་ཉིད་ཚིག་རྩུབ་པ་ཡིན་པས་ངོ་ཟློགས་ཕོད་པའི་ཚིག་རྩུབ་པོ། །ཡང་ན་དོ་ཟློགས་ཕོད་པའམ་ཚིག་རྩུབ་པོ་ནི་ངོ་ཟློགས་ཕོད་པའི་ཚིག་རྩུབ་པའོ། །སེལ་བར་བྱེད་པ་ནི་གཅོད་པར་བྱེད་པའོ། །ཆོས་ཀྱི་གཏམ་ཉིད་ནི་ཆོས་ཀྱི་གཏམ་མོ། །ཆོས་ཀྱི་གཏམ་གྱི་སྐབས་ནི་ཆོས་ཀྱི་གཏམ་བྱ་བའི་སྐབས་ཏེ། དེའི་སྐབས་ཀྱི་གོ་སྐབས་རྙེད་པ་གང་ཡིན་པ་དེ་ནི་ཆོས་ཀྱི་གཏམ་བྱ་བའི་སྐབས་རྙེད་པའོ། །བསམ་པ་ནི་མངོན་པར་སེམས་པའོ། །གང་དུ་དུས་ལས་མི་འདའ་བ་ནི་གང་གི་ཚེ་དམིགས་པ་ཡོངས་སུ་སྲུང་བར་བྱེད་པ་དེའི་ཚེ་སྙིང་རྗེ་བས་སོ། །དེ་དག་ས་གཞི་ལེགས་པར་ཡོངས་སུ་སྐྱོང་བའི་བྱ་བ་གང་ཡིན་པ་དེ་དག་ནི་བགྱི་བ་སྟེ། བགྱི་བ་ལས་མི་འདའ་བའོ། །རིམ་པ་གང་གིས་བྱ་བ་དེ་ནི་དུས་ལས་མི་འདའ་བའོ། །ཆོས་དང་བདེ་བ་བཞིན་ཞེས་བྱ་བ་ནི་དུས་ལས་ཀྱང་མི་འདའ་བ་སྟེ། དེ་དག་གི་ཆོས་དང་བདེ་བ་རྣམས་ལས་མི་འདའ་བ་དེ་བཞིན་ནོ། །འཁོར་གསུམ་བསྟན་ལ་མཁས་པར་གྱུར་པ་དང༌། །ཞེས་བྱ་བ་བསྟན་མ་ཐག་པའི་ཚིགས་བཅད་དུ་ཇི་སྐད་བཤད་པའོ། །དེ་བཞིན་དུ། །འབངས་ལ་ཕན་ཕྱིར་གནམ་རུ་བསྣམས་པ་དེ། །ཞེས་བྱ་བ་ནི། ལྟ་བ་ངན་པས་ཉམས་པའི་སྐྱེ་དགུ་དག །ཅིའི་ཕྱིར་ཡལ་བར་དོར་ཞེས་བྱ་བ་དང་སྦྱར་བར་བྱའོ། །མཐོ་རིས་འདོད་པས་འདི་སྐད་སྟོན་ཏེ། མཐོ་རིས་ཐེམ་སྐས་ཞེས་བྱ་བ་ནི་མཐོ་རིས་ཀྱི་ལམ་མོ། །བག་མེད་པ་ཉིད་ལམ་ཡིན་པས་བག་མེད་པའི་དབང་ངོ༌། །མཐོ་རིས་ཀྱི་ཐེམ་སྐས་དེ་ལ་བག་མེད་པའི་དབང་གིས་ཡུན་རིང་པོར་ལྷན་ཅིག་ཏུ་བག་མེད་པའི་དབང་དུ་གྱུར་པའོ། །བག་མེད་པའི་དབང་གིས་ནི་མཆོད་སྦྱིན་བྱ་བའི་དུས་ལས་འདས་པ་ཉིད་དུ་སྟོན་ཏོ། །ཁྱོད་ཀྱི་བཀའ་ནི་ཞེས་བྱ་བའི་ཚིགས་བཅད་འདི་བརྩམས་པ་ནི་གལ་ཏེ་འདི་ལྟར་ཡང་འགྱུར་ཏེ། མ་ཐོབ་པ་ཐོབ་པར་འདོད་པ་དང་ལྷག་མ་ཡོད་དོ་ཞེས་པ་མེད་པ་དེ་མེད་པར་བསྟན་པའི་ཕྱིར་རོ། །ཡང་ན་སྟོབས་དང་ལྡན་པས་ཀུན་ནས་རྣམ་པར་འགལ་བ་དེ་མེད་པ་སྟེ། མཆོད་སྦྱིན་དང་འགལ་བར་བརྩམས་པར་མི་འགྱུར་རོ་ཞེས་བསྟན་ཏོ། །ཡང་ན་
ཡོངས་སུ་སྲུང་བ་རྣམ་པར་སྤེལ་བའི་སྐབས་ཐོབ་པའི་ངོ་བོ་བསྟན་ཏེ། གང་གི་ཕྱིར་རྒྱལ་ཕྲན་དག་བཀའ་བཞིན་དུ་བྱེད་པ་དེ་དང་ལས་གང་ཐོབ་པ་ལ་སོགས་རྙེད་པའོ། །ཡོངས་སུ་སྲུང་བ་ལས་བྱུང་བ་ཡང་བསྟན་ཏོ། །ད་ནི་སྟེགས་མང་པོ་ལ་སྒྲུབ་པ་ཙམ་གྱིས་ལྷག་མ་དེའི་སྐབས་འདི་ཞེས་བསྟན་ཏོ། །ལེགས་པ་དག་ཅེས་བྱ་བ་ནི་བསོད་ནམས་ཏེ། མངོན་པར་མཐོ་བའི་རྒྱུར་གྱུར་པས་སྟེགས་ལ་རབ་ཏུ་སྒྲུབ་པ་ནི་ལེགས་པ་ཞེས་བརྗོད་དེ། འདིས་ནི་འཇིག་རྟེན་ཕ་རོལ་གྱི་འབྲས་བུ་ཆེན་པོ་ཉིད་དོ། །གྲགས་འབར་ཞེས་བྱ་བ་ནི་མཐོང་བའི་ཆོས་ཀྱི་འབྲས་བུ་ཉིད་དོ། །དུས་ལ་བབ་ཅེས་བྱ་བ་ནི་གང་སྔར་བསྟན་པའི་བག་མེད་དབང་གྱུར་ཞེས་བྱ་བ་དེའི་གཉེན་པོས་དུས་དེ་ལས་མི་འདའ་བས་ལས་ལ་གཟུང་བ་ཡིན་ནོ། །སྦྱིན་པ་མཛད་ཅིང་ཞེས་བྱ་བའི་ཚིགས་བཅད་འདི་ནི་འདི་ལྟར་འགྱུར་ཏེ། རྟག་ཏུ་དབང་བསྐུར་ཞིང་རྒྱུན་དུ་དབང་བསྐུར་བ་ཉིད་དེ། སྦྱིན་པ་དང་ཚུལ་ཁྲིམས་དང་ལྡན་པའི་ཕྱིར་རོ། །འོན་ཀྱང་ཞེས་བྱ་བ་ནི་བྱ་བ་གཞན་དག་བསྟན་པའི་ཕྱིར་རོ། །དབང་བསྐུར་ཀྱང་ཞེས་བྱ་བ་ནི་ཇི་ལྟར་དབང་བསྐུར་བར་གྱུར་ཀྱང་ངོ༌། །ལྷ་ཡི་བུ་ལོན་བྲལ་བར་མཛད་པའི་རིགས།། ཞེས་བྱ་བ་འདིས་ནི་རང་གི་དོན་ཕུན་སུམ་ཚོགས་པ་འགྲུབ་པའི་དབང་དུ་བྱས་ནས་བརྩམས་པའི་ཁྱད་པར་བསྟན་ཏོ། །ད་ནི་སྐྱེ་དགུ་རྣམས་ཀྱི་ཕུན་སུམ་ཚོགས་པ་འགྲུབ་པའི་དབང་དུ་བྱས་ནས་མཆོད་སྦྱིན་ལེགས་པར་བགྱིས་པས་ཞེས་བྱ་བའི་ཚིགས་བཅད་དོ། །དེ་བས་འབངས་ལ་ཕན་པའི་ཕྱིར་ཞེས་བྱ་བ་ནི་མཆོད་སྦྱིན་ལེགས་པར་བྱས་པས་ལྷ་མཉེས་པར་གྱུར་ཏེ་ཆར་གྲུབ་པའི་ཕྱིར་རོ། །བདག་ལ་ཕན་པའི་ཕྱིར་ཞེས་བྱ་བ་ནི་དགྲ་ལས་རྣམ་པར་གྲོལ་བའོ། །གྲགས་པར་འགྱུར་བའི་ཞེས་བྱ་བ་ནི་གཉིས་ཀར་གྲགས་པར་འགྱུར་བ་ཉིད་ཀྱི་མཆོད་སྦྱིན་གྱི་ཆོ་གའོ། །གཞན་གྱི་དྲིང་ལ་འཇོག་པ་ནི་གཞན་གྱི་དྲིང་འཇོག་པའོ། །ཡང་ན་གཞན་གྱིས་བཀྲིར་རུང་བ་ནི་གཞན་གྱི་དྲིང་ལ་འཇོག་པ་སྟེ། དད་པ་སྐྱེ་བ་ལ་རག་ལུས་པའོ། །བློ་ཆུང་བའི་འགྲོ་བ་གང་ཡིན་པ་དེ་ནི་གཞན་གྱི་དྲིང་ལ་འཇོག་ཅིང་བློ་ཆུང་བའི་འགྲོ་
བའོ། །སྤྱོད་མི་ནུས་པ་ནི་རིག་པ་ལ་ཉེ་བར་གནས་པའི་སེམས་མེད་པས་སོ། །ཆོས་ཙམ་ལ་དགའ་བ་ཞེས་བྱ་བ་ནི་བསོད་ནམས་འདོད་པའོ། །ཆོས་ནི་འདིར་ཆོས་ཀྱི་འབྲས་བུ་ལ་རིག་པར་བྱའོ། །འཇིག་རྟེན་དག་ན་ཞེས་བྱ་བའི་ཚིགས་བཅད་འདིས་ནི་ཚད་མར་བྱས་ན་སྐྱེ་བོ་མང་པོ་ལ་ཕན་པ་དང་མི་མཐུན་པ་ཡིན་ཏེ། ལོང་བས་བསྟན་པའི་ལོང་བའི་སྐྱེ་བོ་བཞིན་ནོ། །ངན་སོང་མི་བདེ་དོགས་པའི་ནང་ན་འཁོད། །ཅེས་བྱ་བ་ནི་བསོད་པ་ནི་ཆོས་སུ་སྦྱོར་བའི་བྱེད་པ་པོ་དེ་ཉིད་ཀྱང་ངན་སོང་མི་བདེ་བ་དོགས་པའི་ནང་ན་འཁོད་པར་བསྟན་ཏོ། །ད་ནི་དེ་ཉིད་སྒྲུབ་པའི་ཕྱིར། ཕྱུགས་རྣམས་བསད་པས་ཞེས་བྱ་བ་ལ་སོགས་པའི་ཚིགས་སུ་བཅད་པ་ལྔ་སྨོས་ཏེ། དེ་ལས་ཕྱུགས་རྣམས་བསད་པས་ཞེས་བྱ་བའི་ཚིགས་བཅད་འདི་ནི་དམ་བཅས་པའི་ཚིགས་བཅད་དེ་སྒྲུབ་པའི་རྗེས་སུ་བསྟན་པས་སོ། །འདིའི་བསྡུས་པའི་རྒྱུ་དང་འབྲས་བུའི་མཚན་མའི་རྟགས་ཀྱི་དབང་དུ་བྱས་པ་སྟེ། ཆོས་ཀྱི་རྒྱུ་ནི་ཕྱུགས་རྣམས་གསོད་པའོ། །དེ་ནི་མི་རིགས་པ་ཁས་ལེན་པ་སྟེ་འདིས་ནི་ལྷའི་འཇིག་རྟེན་དུ་སྐྱེ་བ་ཞེས་བྱ་བ་ནི་སྐྱེ་བའི་འབྲས་བུ་དེ་ཡང་མི་རིགས་པ་ཉིད་དུ་དམ་བཅས་པ་ཡིན་ནོ། །ལྷ་མཉེས་པའི་ཆེད་དུ་ཞེས་བྱ་བ་དེ་ཡང་མི་རིགས་པ་ཉིད་དུ་དམ་བཅའ་བ་ཡིན་ཏེ། ཕྱུགས་རྣམས་བསད་པ་ཞེས་བྱ་བའི་ཚིགས་བཅད་འདི་ནི་ཇི་ལྟར་མཆོད་སྦྱིན་པ་དེ་དག་ཕྱུགས་རྣམས་བསད་པ་ཆོས་ཉིད་དུ་རིགས་པར་སྟོན་པར་བྱེད་དེ། དེ་མི་རིགས་པའི་དབང་དུ་བྱས་ནས་ཕྱུགས་རྣམས་བསད་པས་ཞེས་བྱ་བའི་ཚིགས་བཅད་སྨྲས་སོ། །སྔགས་ཀྱི་མཐུས་ཞེས་བྱ་བ་ནི་གང་གི་ཕྱིར་མཆོད་སྦྱིན་པ་དེ་དག་ཕྱུགས་བསད་པ་ཉི་ཚེས་ནི་ཆོས་ཉིད་དུ་མི་སྟོན་ཏེ་འོན་ཀྱང་སྔགས་ཀྱི་མཐུ་དང་ལྡན་པས་བསད་ན་ནི་མཐོ་རིས་སུ་འགྲོ་བ་ཡིན་ཏེ། ཅིའི་ཕྱིར་ཞེན། སྔགས་ཀྱི་མཐུས་བསད་ན་དེ་ཡང་རྒྱུ་སྦྱོར་བ་དང་མངོན་པར་མཐོ་བ་ལ་སྦྱོར་བའི་བྱེད་པ་པོ་དང༌། གསད་པར་བྱ་བ་ཉིད་ཀྱིས་མཐོ་རིས་ཀྱི་རྒྱུ་ཡིན་པས་གཞན་གྱི་ཁ་ན་མ་ཐོ་བ་མེད་ཅིང་བདེ་བ་དང་ཕན་པ་ལ་འཇུག་པའི་ཆོས་ཏེ། ཆོས་དེ་ནི་ལྷའི་འཇིག་རྟེན་དུ་སྐྱེ་བའི་རྒྱུའོ། །སྔགས་ཀྱི་མཐུས་
བསད་པའི་ཕྱུགས་མཐོ་རིས་སུ་འགྲོ་བག་ལས་ཤེ་ན། གཞན་གྱིས་བྱས་པའི་ལས་ཀྱིས་གཞན་གྱི་འབྲས་བུར་སྨིན་ཅིང་སྟེར་བ་མི་རིགས་པ་ཡིན་ཏེ། གཞན་གྱི་རྒྱུད་ཀྱི་སེམས་ཀྱིས་བྱས་པ་ནི་བྱེད་པ་པོ་དེ་ཉིད་ལ་དགེ་བ་དང་མི་དགེ་བར་འགྱུར་བ་ཡིན་གྱི། གཞན་ལ་ནི་མ་ཡིན་ཏེ། ཅིའི་ཕྱིར་ཞེན། བསད་པ་དང་དེ་ཉིད་དུ་འབྲེལ་པ་མེད་པའི་ཕྱིར་རོ། །བསད་པ་དང་དེ་ཆོས་དང་མཐུན་པ་ཡིན་པ་ལ། བསད་པ་འབྲས་བུ་དང་ལྡན་པར་གྱུར་ན་ཡང་བདག་ཉིད་ཀྱི་ལྷའི་འཇིག་རྟེན་དུ་སྐྱེ་བ་དེ་མེད་པས་དེ་ཡང་མེད་དོ། །དོན་འདི་ཉིད་སྒྲུབ་པའི་ཕྱིར་ལོག་པར་སྤྱོད་པས་ཞེས་བྱ་བའི་ཚིགས་བཅད་སྨོས་སོ། །གཞན་གྱིས་བསད་པའི་ཕྱུགས་མཐོ་རིས་སུ་མི་འགྲོ་སྟེ། བསམ་པ་དང་སྦྱོར་བ་གཉིས་ཀྱིས་དགེ་བ་དང་མི་དགེ་བའི་རྟགས་མེད་པའི་ཕྱིར་རོ། །ལོག་པར་སྤྱོད་པས་ཡིད་ནི་མ་བཟློག་ཅིང༌། །ཞེས་བྱ་བ་འདིས་ནི་སྡིག་པ་ལས་ལྡོག་པ་མེད་པ་བསྟན་པ་སྟེ་བསམ་པས་སོ། །དགེ་བའི་ལས་ལ་ངེས་པར་མ་བྱས་པ། །ཞེས་བྱ་བ་འདིས་ནི་བསམ་པ་དང་སྦྱོར་བ་གཉིས་ཀྱིས་དགེ་བ་ལ་འཇུག་པ་མེད་པར་བསྟན་ཏོ། །སེམས་པ་ནི་རྣམ་པ་གསུམ་སྟེ། ཀུན་ཏུ་སྦྱོར་བ་དང༌། ངེས་པར་སེམས་པ་དང་ཚོལ་བའོ། །ཀུན་ཏུ་སྦྱོར་བ་དང༌། ངེས་པར་སེམས་པས་བསྐྱོད་པའི་སེམས་ཀྱིས་ལས་ངེས་པར་བྱེད་པ་ཉིད་ན། འདིས་ནི་དེ་དག་མེད་པས་སྦྱོར་བ་མེད་པར་བསྟན་ཏེ། དགེ་བའི་མཚམས་སྦྱོར་བ་མེད་པར་བསྟན་པའི་ཚུལ་ལོ། །ཡང་ན་ཕྱུགས་ནི་མཐོ་རིས་སུ་མི་འགྲོ་སྟེ། རང་གིས་བྱས་པའི་དགེ་བ་མེད་པའི་ཕྱིར་རོ། །དགེ་བ་ལ་ཡང་རྣམ་པ་གཉིས་ཏེ། ལྡོག་པ་དང༌། འཇུག་པའི་མཚན་ཉིད་དོ། །མི་དགེ་བ་དག་ལས་ལྡོག་པ་ནི་བསམ་པ་དང་སྦྱོར་བ་གཉིས་ཀྱིས་སོ། །དགེ་བ་དག་ལ་འཇུག་པ་ལ་ཡང་བསམ་པ་དང་སྦྱོར་བ་གཉིས་ཀྱིས་སོ། །ཡིད་ངེས་པ་ཞེས་བྱ་བས་ནི་མི་དགེ་བ་ལས་བསམ་པས་ལོག་པ་མེད་པ་དང༌། དགེ་བ་ལ་འཇུག་པའི་བསམ་པ་མེད་པར་བསྟན་ཏོ། །དེ་མེད་བ་ལས་དགེ་བ་ལས་ལྡོག་པའི་སྦྱོར་བ་མེད་པ་དང༌། དགེ་བ་ལ་འཇུག་པའི་སྦྱོར་བ་མེད་པར་བསྟན་ཏོ། །བསམ་པ་སྡོན་
དུ་འགྲོ་བས་དགེ་བ་དང་མི་དགེ་བ་ལ་འཇུག་པ་དང་ལྡོག་པ་ཡིན་ནོ། །ཕྱུགས་མཐོ་རིས་སུ་འགྲོ་བ་དེ་མི་རིགས་པ་ཉིད་དུ་སྒྲུབ་པའི་ཕྱིར། མཆོད་སྦྱིན་ལ་བསད་ཅེས་བྱ་བའི་ཚིགས་བཅད་སྨོས་སོ། །ཕྱུགས་སུ་ཞེས་བྱ་བ་ནི་ཇི་ལྟར་ཕྱུགས་དག་མཆོད་སྦྱིན་དུ་བསད་པ་དེ་བཞིན་དུ་ཁྱེད་བདག་ཉིད་གསོད་པར་བྱེད་པའོ། །མཆོད་སྦྱིན་ལ་ནི་ཚུལ་འདི་ཡིན་ཏེ། བདག་ཉིད་གསོད་པའི་ཚུལ་ལོ། །དེ་ཕྱིར་དེ་དག་ཚིག་ནི་སུ་ཞིག་ཉན། །ཞེས་བྱ་བ་ནི་ཇི་སྐད་སྨྲས་པ་དེ་བཞིན་དུ་ནི་མི་བྱེད་ན་ནི་ཚིག་བཙུན་པར་མི་འགྱུར་རོ་ཞེས་བྱ་བའི་དོན་ཏོ། །དེ་ལྟར་ལྷའི་འཇིག་རྟེན་དུ་སྐྱེ་བ་མི་རིགས་པར་བསྟན་ནས། བསྟན་མ་ཐག་པའི་ཚིགས་བཅད་གཉིས་ཀྱིས་ལྷ་མཉེས་པར་འགྱུར་བ་ཉིད་དུ་མི་རིགས་པར་བསྟན་པའི་ཕྱིར། མཚུངས་མེད་མཐུ་བསུང་ཞེས་བྱ་བའི་ཚིགས་བཅད་སྨོས་སོ། །བསུང་ཉིད་མཐུ་ཡིན་པས་མཐུ་བསུང་ངོ༌། །མཐུ་བསུང་དང༌། རོ་དང༌། གཟི་ནི་མཚུངས་མེད་མཐུ་བསུང་ལྡན་པའོ། །མཚུངས་པ་མེད་པའི་མཐུ་བསུང་དང༌། རོ་དང༌། གཟི་ལྡན་པའི་བདུད་རྩི་གང་ཡིན་པ་དེ་ནི་མཚུངས་པ་མེད་པའི་མཐུ་བསུང་དང༌། རོ་དང༌། གཟི་ལྡན་པའི་བདུད་རྩིའོ། །ཟས་མཆོག་ནི་གཙང་བའོ། །ལྷ་མོས་ཕུལ་བ་ཞེས་བྱ་བ་ནི་ལྷ་མོ་མཆོག་གིས་ཕུལ་བའི་ཡིད་དུ་འོང་བ་ཉིད་དུ་བསྟན་ཏོ། །དེ་ལྟར་གསུམ་གྱི་མི་མཐུན་པའི་ཕྱོགས་གསུམ་གྱིས་བསྟན་ཏོ། །མཚུངས་མེད་མཐུ་བསུང་རོ་དང་གཟི་ལྡན་པ། །ཞེས་བྱ་བ་ནི་ཁྱད་པར་མེད་པའོ། །ཕྱུགས་བསད་ཤ་ཁྲག་ཅེས་བྱ་བ་བསྟན་པ་ལ་མཆོད་སྦྱིན་ལ་ཕྱུགས་ཀྱི་ཤས་རུང་བ་མ་ཡིན་ནོ། །སྩོགས་པ་སྨོས་པ་ནི་གང་དེར་སྦྱིན་པ་གཞན་དག་ཀྱང་གཟུང་ངོ༌། །དེ་ལྟ་བུའི་རྣམ་པའི་ཟས་འདིའི་གཉེན་པོས་ཕྱུགས་བསད་ཤ་ཁྲག་ཅེས་བྱ་བ་བསྟན་པ་དང༌། ལྷ་རྣམས་མགུ་བར་འགྱུར་བ་ཞེས་བྱ་བས་ནི་གང་སྔར་བསྟན་པའི་མཆོད་སྦྱིན་ལེགས་པར་བགྱིས་པས་ལྷ་མཉེས་ན་ཞེས་བྱ་བ་དེ་མི་རིགས་པར་བསྟན་ཏོ། །ཕན་འདོགས་པ་དང་ལྡན་པར་འགྱུར་རོ་ཞེས་བྱ་བ་གང་གི་ཕྱིར། ཁྱེད་ཅག་གིས་ང་ལ་རྗེས་སུ་བཟུང་བ་དང་ལྡན་པ་སྟེ། དེས་ན་རྗེས་སུ་བཟུང་བ་ཡིན་པས་ཕན་འདོགས་པ་དང་ལྡན་པར་འགྱུར་བའོ། །
བག་མེད་པའི་གཉིད་ཀྱིས་ལོག་པ་གང་ཡིན་པ་དེ་ནི་བག་མེད་པའི་གཉིད་ཀྱིས་མ་ལོག་པ་སྟེ། བག་མེད་པའི་གཉིད་ཀྱིས་མ་ལོག་ཅིང་དྲི་མ་མེད་པ་དེས་སོ། །རྟོག་ཆེན་ཉིད་མིག་ཡིན་པས་རྟོག་ཆེན་མིག་གོ །རང་གི་ཡུལ་ཁོ་ན་ལ་མཐུན་པའི་ཆོས་ཀྱིས་ཐོབ་པའི་རྗེས་སུ་དཔག་པའི་ཚུལ་ལོ། །ག་ལ་བགྱིད་ཅེས་བྱ་བ་ནི་རྗེས་སུ་དཔག་པའི་ཚུལ་འདིའི་དོན་ནི་བདག་གིས་མི་ཤེས་སོ་ཞེས་བྱ་བའི་དོན་ཏོ། །དམ་པ་རྣམས་ཀྱི་ཚད་མའི་མཆོག་ནི་ལེགས་པའི་ཚད་མའི་ནང་ན་ཚད་མའི་མཆོག་གོ །སྐྱེ་བོ་མང་པོས་མཐོང་བར་གྱུར་པ་ཞེས་བྱ་བ་ནི་སྐྱེ་བོ་ལ་བསྟན་པར་གྱུར་པའོ། །སྡིག་པ་བྱེད་པའི་མི་རྣམས་འཛིན་པའི་ཕྱིར་ཞེས་བྱ་བ་ནི་སྡིག་པ་བྱེད་པའི་སྐྱེ་པོ་གཟུང་བའི་ཕྱིར་རོ། །བརྟན་ཞིང་གཙང་མ་ཚུལ་ཁྲིམས་ནོར་ལྡན་ཞེས་བྱ་བ་ལ། བརྟན་པའི་ཚུལ་ཁྲིམས་ནི་རྒྱུན་དུ་བསྲུང་བའི་ཕྱིར་རོ། །གཙང་མ་ནི་གུས་པར་བྱེད་པའི་ཕྱིར་རོ། །དེ་ཉིད་ནོར་ཡིན་ཏེ། འདོད་པའི་དོན་སྒྲུབ་པའི་ཕྱིར་རོ། །གང་དེ་ལྟ་བུ་དེ་ཉིད་ནི་མི་མཆོག་ཅེས་བརྗོད་དོ། །སྟོང་གིས་ཞེས་བྱ་བ་ནི་སྟོང་ཕྲག་དུ་མའོ། །ཚུལ་མ་ཡིན་པའི་རྗེས་སུ་སྤྱོད་པ་དེ་བརྙེས་པ་ནི་ཚུལ་མིན་རྗེས་སྤྱོད་བརྙེས་པའོ། །དེ་བས་ན་སྡིག་པ་བྱེད་པའི་མི་བཟུང་བའི་ཕྱིར་རོ་ཞེས་བྱ་བ་ནི་བཟུང་བ་མཆོག་ཏུ་བྱེད་པའོ། །ཚུལ་ཁྲིམས་དང་སྡོམ་པ་ཡང་དག་པར་བླང་བ་ལ་ནི་འབད་ཅེས་བྱ་བ་ནི་ཚུལ་ཁྲིམས་ཉིད་སྡོམ་པ་ཡིན་པས་ཚུལ་ཁྲིམས་ཀྱི་སྡོམ་པའོ། །ཚུལ་ཁྲིམས་ཡོད་པའི་ཕྱིར་ཚུལ་ཁྲིམས་ལྡན་པ་སྟེ། འགྱོད་པ་ལ་སོགས་པ་སེམས་ཀྱི་གདུང་བ་མེད་པའི་ཕྱིར་རོ། །ཚུལ་ཁྲིམས་ཁོ་ན་སྡོམ་པ་སྟེ། མི་དགེ་བའི་ལས་སྤངས་པའི་མཚན་ཉིད་ཡིན་པས་སོ། །ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་ནི་ཚུལ་ཁྲིམས་དང་སྡོམ་པ་ཡང་དག་པར་བླང་བའོ། །དེ་ལ་འབད་ཅིང་མཆོག་ཏུ་བྱེད་པ་དེ་དག་ནི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་ལ་འབད་པ་སྟེ། དེ་ལྟར་ཚུལ་ཁྲིམས་ཀྱི་སྡོམ་པ་ལ་ཡང་དག་པར་འབད་པའི་ཕྱིར་རོ། །ཚུལ་མ་ཡིན་པ་ལ་བྱེད་པར་དགའ་བ་ནི་བཏང་ཞེས་
བསྟན་པ་ཡིན་ཏེ། འདིས་ནི་དགེ་བའི་ལས་ཀྱི་ལམ་བདུན་པོ་ལུས་དང་ངག་གི་མཚན་ཉིད་ཀྱི་ལྡོག་པ་བསྟན་ཏོ། །དགྲར་འཛིན་པ་ལས་ནི་ཕྱིར་ཕྱོགས་ཞེས་བྱ་བ་ནི་ཡིད་ཀྱིས་ཞེ་འགྲས་པ་ལས་ལྡོག་པ་བསྟན་ཏོ། །གཅིག་ལ་གཅིག་དགའ་བ་དང་གུས་པར་ནི་བྱེད་ཅེས་བྱ་བ་འདིས་ནི་ཞེ་སྡང་གི་མི་མཐུན་པའི་ཕྱོགས་ཡོན་ཏན་ཡང་དག་པར་བསྟེན་པ་བསྟན་ཏོ། །འཐབ་པ་དང་རྩོད་པ་ཞེས་བྱ་བ་འདིས་ནི་མི་དགེ་བའི་ལམ་དག་གིས་བསྡུས་པ་ལས་ལྡོག་པ་བསྟན་ཏོ། །བླ་མའི་ངག་ཉན་ཞིང་རྗེས་སུ་མཐུན་པར་ནི་བྱེད་ཅེས་བྱ་བ་འདིས་ནི་གང་ཚུལ་ཁྲིམས་ཀྱི་སྡོམ་པ་བླངས་ཤིང་སྤོང་བ་ལས་སྐྱེས་པའི་དབང་དུ་བྱས་པ་སྟེ། བླ་མས་ནི་མི་དགེ་བ་ལས་ལྡོག་པ་དང༌། དགེ་བ་ལ་འཇུག་པ་བསྟན་ཏོ། །བགོ་བཤའ་བྱེད་པ་ལ་ནི། བག་ཚ་བ་མེད་ཅེས་བྱ་བ་ནི་ནང་གི་ཕ་མ་ལ་སོགས་བའོ། །གློ་བུར་དུ་འོངས་པ་ལ་ནི་དགའ་ཞེས་བྱ་བ་ནི་མགྲོན་ལ་མཉེས་གཤིན་པའོ། །དུལ་བ་དང་གུས་པར་བྱ་བ་ལ་ནི་འབད་པར་གྱུར་ཞེས་བྱ་བ་ལ། དུལ་བ་ནི་ཉོན་མོངས་པ་ཉེ་བར་ཞི་བའོ། །གུས་པར་བྱ་བ་ནི་ལུས་ངག་གི་ཡང་དག་པར་འཇུག་པའོ། །ཚུལ་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་ཐ་མ་དང༌། བར་མ་དང༌། དམ་པའི་ཚུལ་ཁྲིམས་ལ་འཇུག་པའི་རྒྱུ་བསྟན་ཏེ། ཤི་བས་འཇིགས་ཤིང་ཞེས་བྱ་བ་ལ། གང་ཐ་མ་ནི་ཕྱུགས་ལྟར་བསད་པས་འཇིགས་པ་སྟེ། གང་ཐ་མ་ནི་དེས་ཚུལ་ཁྲིམས་སྲུང་བར་བྱེད་དོ། །འཇིག་རྟེན་ཕ་རོལ་སེམས་ཞེས་བྱ་བ་ནི་ངན་འགྲོས་འཇིགས་པ་དང༌། བདེ་འགྲོར་འགྲོ་བ་ལ་སྲེད་པས་སོ། །རིགས་ཀྱིས་ང་རྒྱལ་ཞེས་བྱ་བ་ནི་བདག་གི་རིགས་མཐོ་བས་བསྙེམས་པའི་ཚུལ་ལོ། །གྲགས་པ་བསྲུང་བ་དང་ཞེས་བྱ་བ་ནི་ཁྲེལ་ཡོད་པས་སྐྱོད་པ་སྟེ། གསུམ་ལས་བར་མའི་ཚུལ་ཁྲིམས་ལ་འཇུག་པའི་རྒྱུ་བསྟན་པའོ། །བསམ་པ་དག་ཅིང་ཞེས་བྱ་བ་ནི་སྔོན་དགེ་བ་རྒྱུད་ལ་བསྟན་པ་དེས་སོ། །ངོ་མཚར་ཤེས་པ་ཡིས་ཞེས་བྱ་བ་ནི་བདག་གི་དབང་དུ་བྱས་ནས་ཁ་ན་མ་ཐོ་བ་ལ་འཇིགས་པར་ལྟ་བའོ། །དེ་གཉིས་ཀྱིས་
ནི་དམ་པ་དག་ཚུལ་ཁྲིམས་ཀྱི་རྗེས་སུ་འཇུག་པ་བསྟན་ཏོ། །ཚུལ་ཁྲིམས་དེའི་སེམས་ཀྱི་རྗེས་སུ་འཇུག་པའི་རྒྱུ་བསྟན་པའི་ཕྱིར། ཇི་ལྟ་ཇི་ལྟར་སྐྱེ་བོ་ཆོས་འབད་པ་ཞེས་བྱ་བའི་ཚིགས་བཅད་ཡིན་ནོ། །ཇི་ལྟར་ཆོས་ལ་འབད་པ་ནི་བསྟན་མ་ཐག་པ་ཉིད་ཀྱི་རྒྱུས་སོ། །གཡོས་པར་མ་གྱུར་ཞེས་བྱ་བ་ནི་ཚུལ་ཁྲིམས་ལ་བརྟན་པར་གྱུར་པ་བསྟན་ཏོ། །གྲོགས་དང་ལྡན་ཞིང་ཕུན་སུམ་ཚོགས་པའི་ཡོ་བྱད་གང་ལ་ཡོད་པ་དེ་ནི་གྲོགས་ལྡན་ཡོ་བྱད་ཕུན་སུམ་ཚོགས་པ་སྟེ་དེ་ལའོ། །ཕོངས་པ་ཡང་ཡིན་ལ་རབ་ཏུ་མགུ་བ་ཡང་ཡིན་པས་ཕོངས་པ་རབ་ཏུ་མགུ་བའོ། །དེའི་བསྟོད་པ་དེས་རབ་ཏུ་འཕེལ་བའི་ཚིག་ནི་ཕོངས་པས་རབ་ཏུ་དགའ་བས་བསྟོད་པའི་ཚིག་གོ །སྣ་ཚོགས་པ་ནི་རྣམ་པ་དུ་མའོ། །གོས་དང་རྒྱན་རྣམས་ནི་གོས་དང་རྒྱན་ནོ། །གོས་རྣམ་པ་སྣ་ཚོགས་པ་མང་པོ་དང༌། རྒྱན་རྣམ་པ་སྣ་ཚོགས་བ་སྟེ། གོས་དང་རྒྱན་རྣམ་པ་སྣ་ཚོགས་པས་བརྒྱན་པ་གང་ཡིན་པ་དེ་ནི་རྣམ་མང་གོས་དང་སྣ་ཚོགས་རྒྱན་གྱིས་བརྒྱན་པའོ། །སྐྱེ་བོ་ངེས་པར་ཆོས་སྤྱོད་ཅེས་བྱ་བ་ནི་ལྡོག་པའི་ཚུལ་དང་འཇུག་པའི་ཚུལ་གྱིས་ཚུལ་ཁྲིམས་ལ་འབད་པའོ། །སྐྱེ་བོ་རབ་ཏུ་དགའ་བ་མང་པོས་གང་ཞིང་ཞེས་བྱ་བ་འདིས་ནི་སེམས་ཅན་གྱི་གྲངས་ཕུན་སུམ་ཚོགས་པ་བསྟན་ཏོ། །མངོན་པར་མཐོ་བ་ཉམས་དགའ་བར་སྣང་བ་ཞེས་བྱ་བ་འདིས་ནི་སྐྱེ་བོ་མང་པོའི་འབྱོར་པ་ཕུན་སུམ་ཚོགས་པ་བསྟན་ཏོ། །བརྒྱ་བྱིན་ནི་མཆོད་སྦྱིན་བརྒྱ་བའོ། །གསོད་ཅིང་ཅེས་བྱ་བ་ནི་དེ་ལ་ཕྱུགས་དུ་མ་གསོད་པའི་ཕྱིར་ཏེ། དམན་པ་འབྲས་བུ་འདོད་པ་དེས་འཚེ་བ་ལ་ཞེན་པའོ། །དམན་པ་དེའི་མི་མཐུན་པའི་ཕྱོགས་ཚུལ་ཁྲིམས་ཡིན་ཏེ། དམན་པའི་མི་མཐུན་པའི་ཕྱོགས་གྲགས་པའི་རྒྱན་གྱིས་བརྒྱན་པ་ནི་འབྲས་བུ་ལ་འདོད་པ་མེད་པས་གྲགས་པ་མངོན་པར་འཕེལ་བའོ། །སྐྱེ་དགུ་བུ་བཞིན་དུ་སྐྱོབ་པ་ནི་སྲུང་བའོ། །དེའི་དབང་དུ་གྱུར་པ་ཞེས་བྱ་བ་ནི་འཇིག་རྟེན་འདིར་དབང་དུ་གྱུར་པ་དང༌། འཇིག་རྟེན་ཕ་རོལ་གྱི་ལོངས་སྤྱོད་ཀྱི་དབང་དུ་གྱུར་པའོ། །འཇིག་རྟེན་བདེ་ལ་ཕྱོགས་ཤིང་ཞེས་བྱ་བ་ནི་
འཇིག་རྟེན་གྱི་བདེ་བ་ལ་མངོན་དུ་ཕྱོགས་པ་ནི་ཇི་ལྟར་ཡང་བདག་ལ་དད་པའི་འཇིག་རྟེན་ཚུལ་ཁྲིམས་དང་ལྡན་པར་བྱས་པའོ། །དེ་གཉིས་ཞེས་བྱ་བ་ནི་སྦྱིན་པ་དང་ཚུལ་ཁྲིམས་ཏེ། མཁས་པ་མ་ལགས་པ་ནི་སྦྱིན་པ་དང་ཚུལ་ཁྲིམས་ལ་འཇུག་པ་ཡོངས་མ་མཆིས་པའོ། །གཞན་ལ་ཕན་ཞིང་བདེ་བ་ལ་འཇུག་པ་ཡོན་ཏན་ཡོངས་སུ་ཤེས་པས་ནི་གཞན་གྱི་དོན་དུ་དེ་གཉིས་ལ་འཇུག་པ་ཡིན་ཏེ། མཁས་ཤིང་ཡོངས་སུ་ཤེས་པས་སྙིང་སྟོབས་དང་ལྡན་ན་ནི་བདག་ལ་ཆགས་པ་མེད་པར་སྦྱིན་པ་དང་ཚུལ་ཁྲིམས་དེ་གཉིས་ལ་འཇུག་སྟེ། སྙིང་སྟོབས་མ་ཚང་བ་མེད་པའི་ཕྱིར་རོ། །ལེགས་པར་ཐོབ་པ་ནི་ཚེ་འདིར་ཡང་འཕེལ་བར་འགྱུར་ལ། འཇིག་རྟེན་ཕ་རོལ་དུ་ཡང་བདེ་འགྲོ་ཐོབ་པའོ། །གྲགས་པ་དང་བདེ་བ་ཐོབ་བ་ནི་ཚེ་འདིར་ཡང་བདེ་བ་ཐོབ་ཅིང་འཇིག་རྟེན་ཕ་རོལ་དུ་ཡང་བདེ་བ་འཐོབ་པའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་མཆོད་སྦྱིན་གྱི་སྐྱེས་པའི་རབས་ཏེ་བཅུ་པའོ།། །།བདག་གིས་ནི་འདི་ཙམ་ཞིག་གོ་བར་ཟད་དེ། ལྷག་མ་ནི་གཞན་དག་ཏུ་བལྟ་བར་བྱའོ། །སྡོམ་ལ། སྟག་མོ་ཤི་པི་ཀོ་སལ་བདག །ཚོང་དཔོན་གཉིས་དང་རི་བོང་དང༌། །ཨ་གསྟ་དང་ཤ་བྱིན་དང༌། །ཐམས་ཅད་སྒྲོལ་དང་མཆོད་སྦྱིན་བྱེད། །སྐྱེས་པའི་རབས་ཀྱི་རྒྱུད་ཀྱི་གོ་རིམས་རྣམ་པར་གཞག་པའི་རྒྱུ་ནི་རིམ་པ་གང་གིས་བཀོད་པའི་སྐྱེས་པའི་རབས་བཅུ་པོ་འདི་དག་གི་གོ་རིམས་ལྟར་ནི་བདག་གིས་མ་མཐོང་གི །འདི་ནི་སློབ་དཔོན་དཔའ་བོས་བཀོད་པའི་རིམ་པ་ཡིན་ཏེ། ཅིའི་ཕྱིར་ཞེ་ན། དེའི་གོ་རིམས་ཀྱི་བྱེད་པའི་སྦྱོར་བས་སོ། །བདག་གིས་ནི་གོ་རིམས་ཀྱི་ཚུལ་འདི་ལྟར་རིགས་པར་མཐོང་སྟེ། སྟག་མོ་རི་བོང་ཤི་པི་དང༌། །ཤ་སྦྱིན་ཚོང་དཔོན་ཀོ་ས་ལ་བདག །ཐམས་ཅད་སྒྲོལ་དང་ཟིལ་མི་ནོན། །ཨ་གསྟ་དང་མཆོད་སྦྱིན་བྱེད། །སྦྱིན་པའི་ཕ་རོལ་ཏུ་ཕྱིན་པའི་དབང་དུ་བྱས་ནས་བཅུ་ཚན་དང་པོ་འདི་ཡིན་ཏེ། སྦྱིན་པ་རྣམ་པ་གསུམ་ལ། བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་
ཕྱིན་པས་བརྗོད་དེ། ཟང་ཟིང་གི་སྦྱིན་པ་དང༌། ཆོས་ཀྱི་སྦྱིན་པ་དང༌། མི་འཇིགས་པའི་སྦྱིན་པའོ། །དེ་ལ་ཟང་ཟིང་གི་སྦྱིན་པའི་དབང་དུ་བྱས་ནས་སྐྱེས་པའི་རབས་བརྒྱད་ཡིན་ནོ། །གཞན་གཉིས་ཀྱིས་ནི་ཆོས་ཀྱི་སྦྱིན་པ་དང༌། མི་འཇིགས་པའི་སྦྱིན་པ་བསྟན་ཏོ། །ཟང་ཟིང་གི་སྦྱིན་པ་ལ་ཡང་རྣམ་པ་གཉིས་ཏེ། ནང་གི་སྦྱིན་པ་དང་ཕྱིའི་སྦྱིན་པའོ། །ནང་གི་སྦྱིན་པ་ལས་བརྩམས་ནས་དང་པོ་བཞིའོ། །ཕྱི་རོལ་གྱི་སྦྱིན་པ་ལས་བརྩམས་ནས་འོག་མ་བཞིའོ། །དེ་ལ་ནང་གི་སྦྱིན་པའི་དངོས་པོ་ཡང་གཉིས་ཏེ། ལུས་དང་སྲོག་གོ །སྦྱིན་པ་དེ་ཡང་གཉིས་ཀྱི་དོན་དུ་ཡིན་ཏེ། ཡོངས་སུ་ལོངས་སྤྱོད་པ་དང་ཡོངས་སུ་བསྐྱབ་པའི་ཕྱིར་རོ། །དང་པོ་སྟག་མོའི་སྐྱེས་པའི་རབས་ལ་ནི་བཞི་པོ་འདི་དག་དང་ལྡན་པ་ཡིན་ཏེ། དེ་བས་ན་སྐྱེས་པའི་རབས་དེ་ཐོག་མར་བསྟན་ཏོ། །སྲོག་སྦྱིན་པ་ཡང་བདག་ཉིད་འཆི་བ་མ་གཏོགས་པར་དེའི་ལོངས་སྤྱོད་པ་དང་ལུས་ཀྱི་སྦྱིན་པ་མི་ནུས་པའི་ཕྱིར་རོ། །ལུས་ཀྱི་སྦྱིན་པ་ཡོད་པ་ཉིད་ཀྱིས་རང་གི་ལུས་སྦྱིན་པ་དེས་སྟག་མོ་ལོངས་སྤྱོད་པ་ཡོད་པར་རབ་ཏུ་རིག་པས་སོ། །ཡོངས་སུ་སྐྱོབ་པ་ཡང་ཡོད་དེ་དེ་བས་ན་སྐྱེས་པའི་རབས་དེ་ཉིད་དུ་བཤད་པ་སྟེ། དེ་བས་ལུས་ཀྱིས་བསྲུང་བར་བྱ་བ་ནི། གཡང་སར་ལྟུང་ལ་ཐུག་པའི་སྲོག་ཡོད་པས། །ཕྲུ་གུ་གསད་ལས་གཅན་མོ་བསྲུང་བ་དང༌། །གཅན་མོ་ལས་ཀྱང་དེ་ཡི་ཕྲུ་གུ་བསྲུང༌། །ཞེས་པ་ཡིན་ཏེ། དེ་བས་ལུས་ཀྱིས་བསྲུང་བར་བྱ་བ་ནི་ཞེས་བྱ་བ་འདིས་ནི་ལུས་ཀྱི་སྦྱིན་པ་ཡིན་ནོ། །གཡང་སར་ལྷུང་ལ་ཐུག་པའི་སྲོག་ཡོད་པས། །ཞེས་བྱ་བ་འདིས་ནི་སྲོག་གི་སྦྱིན་པ་ཡིན་ནོ། །ཕྲུ་གུ་གསད་ལས་གཅན་མོ་བསྲུང་བ་དང༌། །ཞེས་བྱ་བ་འདིས་ནི་ཡོངས་སུ་ལོངས་སྤྱོད་པའི་སྦྱིན་པ་ཡིན་ནོ། །གཅན་མོ་ལས་ཀྱང་དེ་ཡི་ཕྲུ་གུ་བསྲུང༌། །ཞེས་བྱ་བ་འདིས་ནི་ཡོངས་སུ་བསྐྱབ་པའི་སྦྱིན་པ་ཡིན་ཏེ། ནང་གི་རྣམ་པ་འདི་བཞི་ཡོད་པས་སྐྱེས་པའི་རབས་འདི་དང་པོར་སྨོས་པ་ཡིན་ནོ། །གཉིས་པ་རི་བོང་གི་སྐྱེས་པའི་རབས་ཀྱིས་ནི་ནང་གི་ལུས་དང་སྲོག་གཉིས་ཀྱི་སྦྱིན་པས་ཡོངས་སུ་ལོངས་སྤྱོད་
པ་ཡིན་ཏེ་ཡོངས་སུ་སྐྱོབ་པ་ནི་མ་ཡིན་ནོ། །གང༌། བདག་གི་ལུས་ནི་མེ་ལ་བསྲེགས་པ་འདི། །སྣོམ་ལ་དེ་རིང་དཀའ་ཐུབ་ནགས་ན་བཞུགས། །ཞེས་བྱ་བའི་ཚིག་གིས་ནང་གི་ལུས་ཀྱི་སྦྱིན་པའོ། །བདག་ལ་ལུས་ལས་ལྷག་པའི་ནོར་ཡང་མེད། །ཅེས་བྱ་བའི་ཚིག་གིས་ནི་སྲོག་གི་སྦྱིན་པའོ། །བདག་ཅག་ལྟ་བུས་གཞན་དག་གི །སྲོག་ཀྱང་གཅོད་པར་མི་བྱེད་ན། །དེ་ལྟར་རབ་ཏུ་བྱམས་བརྟན་པ། །ཁྱོད་ལྟ་བུ་ལ་སྨོས་ཅི་དགོས། །ཞེས་བྱ་བའི་ཚིག་དེ་ཐོས་ནས་མེའི་ནང་དུ་བདག་ཉིད་ཞུགས་སོ། །དེས་ན་སྲོག་གི་སྦྱིན་པ་དེས་ཡོངས་སུ་ལོངས་སྤྱོད་པའི་སྦྱིན་པ་དེ་ཉིད་དུ་བཤད་པ་ཡིན་ནོ། །བདག་གི་ལུས་ནི་མེ་ལ་བསྲེགས་པ་འདི། །སྣོམས་ལ་དེ་རིང་དཀའ་ཐུབ་ནགས་སུ་བཞུགས། །ཞེས་བྱ་བའི་ཚིག་གིས་ནི་དེར་ཡོངས་སུ་བསྐྱབ་པ་ནི་མེད་དེ། བདག་ཉིད་འཆི་བ་དེ་ལས་གཞན་མ་རྙེད་པས་སོ། །སྲམ་དང་ཅེ་སྤྱང་དང༌། སྤྲེའུ་རྣམས་ཀྱིས་ནི་ཟས་རྙེད་པ་ཡིན་ཏེ། དེ་བས་ན་དེ་དག་གིས་དང་པོར་ཟས་བྱིན་པ་ཡིན་ནོ། །ད་ནི་ཤི་པི་པ་དང༌། བྱམས་པའི་སྟོབས་བསྐྱེད་པའི་སྐྱེས་པའི་རབས་གཉིས་ཀྱིས་ནི་ལུས་ཀྱི་སྦྱིན་པ་ཉིད་བསྟན་པ་ཡིན་ཏེ་སྲོག་ནི་མ་ཡིན་ནོ།། ཡོངས་སུ་ལོངས་སྤྱོད་པའི་སྦྱིན་པ་ཉིད་དེ། ཡོངས་སུ་བསྐྱབ་པའི་སྦྱིན་པ་ནི་མ་ཡིན་ནོ། །ལུས་ཀྱི་སྦྱིན་པ་ལ་ཡང་རྣམ་པ་གཉིས་ཏེ། དབང་པོའི་དབྱེ་བས་སྦྱིན་པ་དང༌། དབང་པོའི་དབྱེ་བ་མེད་པས་སྦྱིན་པའོ། །དེ་ལ་དབང་པོའི་དབྱེ་བས་སྦྱིན་པའི་དབང་དུ་བྱས་ནས་ཤི་བི་པའི་སྐྱེས་པའི་རབས་ལས་མིག་གི་སྦྱིན་པ་ཡིན་ནོ། །ཇི་ལྟར་དེ་ཡོངས་སུ་ལོངས་སྤྱོད་པར་འགྱུར་ཞེ་ན། དེའི་མིག་ཡོངས་སུ་ལོངས་སྤྱོད་པ་ནི་ཡུལ་ལ་དམིགས་པ་དེས་ཡུལ་ལ་དམིགས་ཤིང་ཡོངས་སུ་ལོངས་སྤྱོད་པ་ཡིན་ཏེ། དེ་དེ་ཉིད་དུ་བསྟན་པ། པདྨའི་སྤྱན་མངའ་སྤྱན་ནི་གཅིག་པུས་ཀྱང༌། །འཇིག་རྟེན་བདག་པོ་འཇིག་རྟེན་བགྱི་བ་འགྲུབ། །ཅེས་བྱ་བ་དང༌། ཅི་ནས་ཀྱང་མིག་དེ་དེའི་མིག་ཏུ་གནས་པར་གྱུར་པ་དང༌། དེ་ནས་མིག་ཡ་གཅིག་ཕྱེ་སྟེ་ཞེས་བྱ་བའི་ཚིག་གིས་སོ། །དབང་པོས་ནི་ལོངས་སྤྱོད་ཅིང་ཟ་བར་བྱེད་
པ་མ་ཡིན་གྱི། དབང་པོ་དེ་ལ་བརྟེན་ནས་ཡོངས་སུ་ལོངས་སྤྱོད་པ་ཡིན་ཏེ། གཞན་དུ་ན་ལོངས་སྤྱོད་པར་མི་ནུས་ཏེ་དེས་ན་ཡུལ་དམིགས་པ་དེ་ཉིད་ཀྱིས་ལོངས་སྤྱོད་པའོ། །བྱམས་པའི་སྟོབས་བསྐྱེད་པ་ལ་ཡང་ནང་གི་སྦྱིན་པ་དབང་པོའི་དབྱེ་བ་ཤ་དང་ཁྲག་གི་སྦྱིན་པ་ཡིན་ཏེ། སྲོག་གི་སྦྱིན་པ་ནི་མ་ཡིན་པར་དེ་ཉིད་ལས་བསྟན་པ་སྟེ། ལྷ་དང་མིའི་སྨན་གྱི་ཁྱད་པར་རྨ་སར་པ་སོས་པར་བྱེད་ནུས་པ་རྣམས་ཀྱིས་དེའི་ལུས་སྔོན་བཞིན་དུ་སྡུག་བསྔལ་མེད་པར་བྱས་ཞེས་པའི་ཚིག་གིས་སོ། །ཡོངས་སུ་ལོངས་སྤྱོད་པ་ཉིད་དུ་བཤད་པའི་ཕྱིར། ལྷ་ཉིད་ཀྱི་སྐུ་འོ་བརྒྱལ་བར་མཛད་པ་བཏང་དུ་གསོལ། བདག་ཅག་ཀྱང་ཚིམ་པར་བགྱིས་ལགས་ཀྱིས་ཞེས་བྱ་བས་སོ། །སྐྱོབ་པ་མ་ཡིན་ཏེ། གང་དེ་ལས་གཞན་ཡོངས་སུ་བསྐྱབ་པར་བྱ་བ་མེད་པའི་ཕྱིར་རོ། །དེ་ལྟར་རེ་ཞིག་ནང་གི་སྦྱིན་པ་རྣམ་པ་བཞིའི་དབྱེ་བ་ཡིན་ཏེ། དེ་བས་ན་དེ་ལྟར་སྐྱེས་པའི་རབས་རྒྱུ་རྣམ་པ་བཞི་བཀོད་པ་ཡིན་ནོ། །བཞི་པོ་དེའི་ནང་དུ་དེའི་རང་བཞིན་གཞན་ཡང་ཆུད་པ་ཡིན་ཏེ། དེའི་རིགས་དེས་སྐྱེས་པའི་རབས་གཞན་ཡང་རབ་ཏུ་འགྲུབ་བོ། །དེ་གོ་བར་འདོད་པ་རྣམས་ལ་མཐའ་དག་གི་ཐབས་བསྟན་པ་ཡིན་ནོ། །ད་ནི་ཕྱི་རོལ་གྱི་དངོས་པོའི་སྦྱིན་པའི་དབང་དུ་བྱས་ནས་སྐྱེས་པའི་རབས་ཅིག་ཤོས་བཞི་བསྟན་པ་ཡིན་ཏེ། ཇི་ལྟར་ཕྱི་རོལ་གྱི་སྦྱིན་པ་ཡིན་ཞེ་ན། རྣམ་པ་གསུམ་དུ་བརྩམས་པ་ཡིན་ཏེ། སྦྱིན་པ་པོ་ཕུན་སུམ་ཚོགས་པ་དང༌། ལེན་པ་པོ་ཕུན་སུམ་ཚོགས་པ་དང༌། སྦྱིན་པའི་དངོས་པོ་ཕུན་སུམ་ཚོགས་པའོ། །ཕུན་སུམ་ཚོགས་པ་འདི་གསུམ་གྱི་དབང་དུ་བྱས་ན་ཚོང་དཔོན་གྱི་སྐྱེས་པའི་རབས་སུ་ལེན་པ་པོ་ཕུན་སུམ་ཚོགས་པ་ནི་དེ་ཉིད་དུ་རང་སངས་རྒྱས་ཉོན་མོངས་པའི་བུད་ཤིང་ཐམས་ཅད་བསྲེགས་པ་དེའི་བསོད་ནམས་ཀྱི་ཚོགས་རྣམ་པར་འཕེལ་བར་འདོད་པ་ཞིག་དེའི་ཁྱིམ་དུ་བསོད་སྙོམས་ཀྱི་ཕྱིར་འོངས་སོ་ཞེས་པས་སོ། །སྦྱིན་པའི་དངོས་པོ་ཕུན་སུམ་ཚོགས་པ་ཡང་དེ་ཉིད་དུ་བསྟན་ཏེ། དེས་དེའི་ལྟར་མཉན་ཏེ་དེ་བཞིན་དུ་བགྱིའོ་ཞེས་སྨྲས་ནས་བཟའ་བ་དང་བཅའ་བ་བཟང་པོ་ཁྱེར་ཏེ་
ཞེས་བྱ་བའི་ཚིག་གིས་སོ། །སྦྱིན་པ་པོ་ཕུན་སུམ་ཚོགས་པ་ཡང་དེ་ཉིད་དུ་བསྟན་ཏེ། བྱང་ཆུབ་སེམས་དཔའ་དག་གི་སྐལ་པ་དང་བསོད་ནམས་ཀྱི་མཐུ་ལ་བརྟེན་ནས་སྦྱིན་པ་ལ་ཉེས་དམིགས་མེད་པར་ཡང་ཤེས་ཏེ། བུ་སྨད་དང་གཡོག་འཁོར་འགྲོར་མི་སྟེར་བར་འཐེན་པ་རྣམས་བོར་ནས་བློ་ལ་ཚམ་ཚོམ་མེད་ཅིང་སྦྱིན་པ་བྱེད་པར་འདོད་པ་སྐྱེས་ཏེ་དམྱལ་བའི་ནང་ནས་སོང་ངོ་ཞེས་བྱ་བའི་ཚིག་གིས་སོ། །ད་ནི་ཀོ་ས་ལའི་བདག་པོའི་སྐྱེས་པའི་རབས་ལ་ནི་ཕུན་སུམ་ཚོགས་པ་གཉིས་ཡོད་དེ་སྦྱིན་པ་པོ་ཕུན་སུམ་ཚོགས་པ་དང༌། ལེན་པ་པོ་ཕུན་སུམ་ཚོགས་པ་དང་ཀོ་ས་ལའི་བདག་པོ་ལ་ནི་སྦྱིན་པའི་དངོས་པོ་ཕུན་སུམ་ཚོགས་པ་མེད་དོ། །དེ་ལ་སྦྱིན་པ་པོའི་ཕུན་སུམ་ཚོགས་པ་ཡང་དེ་ཉིད་དུ་བསྟན་ཏེ། ཚུལ་དང་ལྡན་ཡང་ནོར་ཙམ་གྱིས་ནི་མཐོ་བ་ལ། །ལས་ཀྱིས་མགུ་བར་བྱས་ནས་སྨན་ཚིས་འཚོ་བའི་ཞེས་བྱ་བ་དང༌། གཞན་ཡང་དང་ཞིང་འཇམ་པའི་ཡིད་ཀྱིས་དེ་ལ་ཕྱག་འཚལ་ནས། །ཞེས་པའི་ཚིག་གིས་སོ། །ལེན་པ་པོ་ཕུན་སུམ་ཚོགས་པ་ཡང་དེ་ཉིད་དུ་བཤད་དེ། དགེ་སྦྱོང་བཞི་ཞིག་བསོད་སྙོམས་ཕྱིར་ནི་ལྷགས་པ་མཐོང༌། །དབང་པོ་དུལ་ཞིང་དགེ་སྦྱོང་དཔལ་གྱི་རྗེས་འབྲང་བ། །ཞེས་བྱ་བ་ཡིན་ཏེ། བཞི་སྨྲོས་པ་ནི་སྦྱིན་པའི་གནས་དགེ་འདུན་དུ་བསྟན་པའི་ཕྱིར་ཏེ། དེ་བས་ན་ལེན་པ་པོ་ཕུན་སུམ་ཚོགས་པར་བསྟན་ཏོ། །སྦྱིན་པའི་དངོས་པོ་ཕུན་སུམ་ཚོགས་པ་ནི་མེད་དེ། དེ་ཡང་དེ་ཉིད་དུ་བསྟན་པ། ཟན་དྲོན་ཁེངས་པ་རྩུབ་པོ་ལེན་ཆ་མེད་པའི་འབྲས་བུ་འབྱོར་པ་ཆེན་པོ་འདི་ལྟར་འགྱུར་ལ་ལྟོས། །ཞེས་བྱ་བ་དང༌། སྐྱེས་པའི་རབས་དེ་ཉིད་དུ་གཅིག་གི་བར་དུ་བྱས་པ་སྟེ། གང་གི་ཚེ་ལེན་པ་པོ་ཕུན་སུམ་ཚོགས་པ་ཉི་ཚེ་བསྟན་པ་ཡིན་ཏེ། ཐུབ་པ་ཟག་པ་ཟད་ལ་གུས་པར་ཕུལ་བ་ཡིས། །ཞེས་བྱ་བའི་ཚིག་གིས་སོ། །སྦྱིན་པར་བྱ་བའི་དངོས་པོ་ཕུན་སུམ་ཚོགས་པ་ནི་མེད་དེ། ཟས་ལས་བགོ་སྐལ་བགོས་པའོ། །སྦྱིན་པ་པོ་ཕུན་སུམ་ཚོགས་པ་ཡང་མེད་དེ། བྲན་མོ་བགྱིད་པའི་ཚེ་ན་ཞེས་པའི་ཚིག་གིས་སོ། །གུས་པར་ཕུལ་བ་ནི་དུས་ཚོད་དེ་ཙམ་ན་གུས་པ་ཡོད་པའོ། །དེའི་ཕྱིར་འབྲས་བུ་
ཆུང་བ་སྟེ་བུད་མེད་དུ་གྱུར་པའོ། །ད་ནི་སྦྱིན་པའི་དངོས་པོ་ཕུན་སུམ་ཚོགས་པ་དང༌། སྦྱིན་པ་པོ་ཕུན་སུམ་ཚོགས་པ་ནི་ཐམས་ཅད་སྒྲོལ་གྱི་སྐྱེས་པའི་རབས་ཡིན་ཏེ། སྦྱིན་པའི་དངོས་པོ་ཕུན་སུམ་ཚོགས་པ་ནི་ཕྱི་རོལ་གྱི་དངོས་པོ་སེམས་ཅན་དང་སེམས་ཅན་མ་ཡིན་པའི་གྲངས་སུ་འགྲོ་བའི་རྣམ་པ་ཐམས་ཅད་དེ། ཕྱི་རོལ་གྱི་སྦྱིན་པའི་དངོས་པོའོ། །སེམས་ཅན་གྱི་གྲངས་སུ་འགྲོ་བའི་ཕྱི་རོལ་གྱི་སྦྱིན་པ་ནི་གླང་པོ་རིན་པོ་ཆེ་དང༌། རྟ་ཆས་དང་བཅས་པ་ལ་སོགས་པ་མཐའ་དག་སྦྱིན་པའོ། །སེམས་ཅན་མ་ཡིན་པ་ནི་བུ་སྨད་དང་བཅས་པ་ཡིན་ཡང་དེ་ལ་མ་ལྟོས་པར་ཤིང་རྟ་སྦྱིན་པའོ། །བུ་སྦྱིན་པ་དང༌། ཆུང་མ་སྦྱིན་པ་ནི་བདག་ཉིད་གྱི་ཕྱི་རོལ་གྱི་སྦྱིན་པའི་དངོས་པོ་ཁྱད་པར་དུ་གྱུར་པའོ། །སྦྱིན་པ་པོ་ཕུན་སུམ་ཚོགས་པའི་ཁྱད་པར་དུ་གྱུར་པ་དེ་ཉིད་དུ་བསྟན་ཏེ། འཇིག་རྟེན་དོན་དུ་ང་ཡི་ལུས་འཛིན་ན། །ཕྱི་རོལ་ནོར་ལྟ་སྨོས་ཀྱང་ཅི་ཞིག་དགོས། །ཤི་བི་པ་རྣམས་ཐམས་ཅད་ཀྱིས། །ང་ནི་བསད་དམ་སྤྱུགས་ཀྱང་རུང༌། །མི་སྦྱིན་པར་ནི་ང་མི་བྱེད། །དཀའ་ཐུབ་ཚལ་དུ་འགྲོར་ཟད་མོད། །ཅེས་བྱ་བའི་ཚིག་གིས་སོ། །གཞན་ཡང༌། སྦྱིན་ལ་དགའ་བ་གོམས་བྱས་ཤིང༌། །སླར་བཟློག་པ་ནི་མ་བསླབས་པས། །རབ་ཏུ་སྡུག་པའི་བུ་གཉིས་ཀྱང༌། །ཚམ་ཚོམ་མེད་པར་སྦྱིན་ཞེས་སྨྲས། །ཞེས་བྱ་བ་དང༌། གཞན་ཡང་ཕྱི་རོལ་གྱི་དངོས་པོ་སྦྱིན་པ་པོ་ཕུན་སུམ་ཚོགས་པའི་དབང་དུ་བྱས་ནས་བཤད་པ་དེ་ཐམས་ཅད་ཀྱང་སྦྱར་བར་བྱའོ། །ད་ནི་ཚོང་དཔོན་ཟིལ་གྱིས་མནོན་པའི་སྐྱེས་པའི་རབས་ཀྱིས་སྦྱིན་པ་པོ་ཕུན་སུམ་ཚོགས་པ་དེའི་དབང་དུ་བྱས་ནས་བསྟན་པ་ཡིན་ནོ། །ཕུན་སུམ་ཚོགས་པ་དེ་ཡང་དེ་ཉིད་དུ་བསྟན་ཏེ། འབྱོར་པ་ཟད་པར་གྱུར་ཀྱང་སྦྱིན་པ་ལས་མི་ལྡོག་པ་ཡིན་ཏེ། བརྒྱ་བྱིན་གྱིས་ནོར་རྣམས་མི་སྡང་བར་བྱས་ཀྱང་ལྟོས་པ་མེད་པས་སོ། །དེ་ལྟར་རེ་ཞིག་གསུམ་གྱིས་ཕུན་སུམ་ཚོགས་པ་ཡིན་ཏེ། སྦྱིན་པ་པོ་དང༌། སྦྱིན་པའི་དངོས་པོ་དང༌། ལེན་པ་པོའོ། །སྦྱིན་པ་པོ་དང་ལེན་པ་པོ་གཉིས་ཀྱིས་ཕུན་སུམ་ཚོགས་པ་ཡང་ལེན་པ་པོའི་ཡིན་གྱི། སྦྱིན་
པ་པོའི་མ་ཡིན་ནོ། །སྦྱིན་པའི་དངོས་པོས་ནི་སྦྱིན་པ་པོ་ཁྱད་པར་དུ་མི་བྱེད་དོ། །སྦྱིན་པ་ནི་སྦྱིན་པ་པོའི་ཡིན་གྱི། ལེན་པ་པོའི་མ་ཡིན་ནོ། །རྣམ་པ་འདིའི་ནང་དུ་ཐམས་ཅད་འདུས་པའི་ཕྱིར་གཞན་གྱི་ཕྱི་རོལ་གྱི་ཟང་ཟིང་སྦྱིན་པར་གཟུང་བ་ཡང་གྲུབ་པར་འགྱུར་རོ། །སྦྱིན་པ་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བསྟན་པའི་ཕྱིར་དེ་ལྟར་བསྟན་ཏོ། །ད་ནི་ཆོས་ཀྱི་སྦྱིན་པའི་དབང་དུ་བྱས་ནས་ཨ་ག་སྟེའི་སྐྱེས་པའི་རབས་སུ་བརྒྱ་བྱིན་གྱིས་མཆོག་སྦྱིན་པར་བྱས་པ་ལས་ཕྱིར་ལེགས་པར་གསུངས་པ་བསྟན་པ་ཡིན་ཏེ། དེ་ཡང་དེ་ཉིད་དུ་བཤད་པ་སྟེ། ལེགས་པར་སྨྲས་པ་རིན་ཆེན་ལ། །རིན་ནི་ཅི་ཡང་ཡོད་མ་ཡིན། །ཞེས་བྱ་བ་ལ་སོགས་པ་དེས་བརྗོད་པ་ཐམས་ཅད་ཀྱིས་སོ། །མི་འཇིགས་པའི་སྦྱིན་པ་ནི་མིའི་མཆོག་ཡིན་ཏེ། བརྟན་ཞིང་གཙང་ལ་ཚུལ་ཁྲིམས་ནོར་ལྡན་མི་མཆོག་ལ། །ཞེས་བྱ་བ་ལ་སོགས་པ་ཚིགས་བཅད་གཉིས་ཀྱིས་དེར་བསྟན་ཏེ་དེ་ནི་མི་འཇིགས་པའི་སྦྱིན་པའོ། །དེ་བས་སྐྱེས་པའི་རབས་འདི་དག་ནི་གོ་རིམས་སུ་རིགས་པ་ཡིན་ཏེ། གོ་རིམས་འདིའི་རིམ་པས་ནི་གསུམ་པོ་བསྟན་པར་འགྱུར་རོ། །སློབ་དཔོན་དཔའ་བོས་ནི་སྐྱེས་པའི་རབས་གོ་རིམས་ཚུལ་བཞིན་མ་བཀོད་པར་ཡི་གེར་བྲིས་ཤིང་བཞག་བ་ཡིན་ཏེ། དེ་ཡང་ཇི་ལྟར་ཞེན་འཇིག་རྟེན་ལས་གྲགས་པའི་གོ་རིམས་ཀྱིས་ཏེ། འཇིག་རྟེན་བརྗོད་པ་བཞིན་དུའོ། །འདི་ནི་ཟང་ཟིང་གི་སྦྱིན་པ་ལ་སོགས་པའི་གོ་རིམས་ཡིན་ཏེ། ཟང་ཟིང་གི་སྦྱིན་པས་ནི་གཟུགས་དང་ལུས་རྗེས་སུ་བཟུང་བ་ཡིན་ནོ། །ཆོས་དང་མི་འཇིགས་པའི་སྦྱིན་པ་གཉིས་ནི་མིང་དང་ལུས་ཀྱི་གོ་རིམས་སོ། །ཡང་ན་ཟང་ཟིང་གི་སྦྱིན་པ་དང་པོར་གཟུང་ངོ༌། །དེའི་འོག་ཏུ་ཆོས་དང་མི་འཇིགས་པའི་སྦྱིན་པ་རྣམ་པ་གཉིས་སོ། །ཆོས་ཀྱི་སྦྱིན་པ་དང་པོར་སྨོས་པ་ནི་མི་འཇིགས་པའི་སྦྱིན་པ་ལས་གཙོ་བོ་ཡིན་པའི་ཕྱིར་རོ། །ཡང་ན་འདི་ལྟར་གོ་རིམས་ཡིན་ཏེ། དང་པོ་ནི་མི་འཇིགས་པའི་སྦྱིན་པ་ལ། དེའི་འོག་ཏུ་ཆོས་ཀྱི་སྦྱིན་པ་ཡིན་ཏེ། ཐོག་མར་འཇིགས་པ་བསལ་ནས་དེའི་འོག་ཏུ་སེམས་བདེ་བ་
དང། ཆོས་ཀྱི་སྦྱིན་པས་འདོད་པའི་དོན་འགྲུབ་པར་བསྟན་པ་ཡིན་ནོ། །བཅུ་ཚན་དང་པོའོ།། །།དབང་ཕྱུག་ཕུན་སུམ་ཚོགས་པ་ཞེས་བྱ་བ་ནི་མཐུ་དང་ནུས་པ་ཕུན་སུམ་ཚོགས་པ་ཞེས་བྱ་བ་ཡིན་ཏེ། མཐོ་བར་གྱུར་པ་དེས་གཞན་དག་ལ་སྙིང་བརྩེ་བ་ལྷོད་པར་མི་འགྱུར་བ་སྟེ་བདག་ཉིད་ཆེན་པོ་དེའོ། །ཡུན་རིང་མོ་ནས་བསོད་ནམས་སྤྱོད་པ་ལ་རབ་ཏུ་གོམས་ཞིང་ཞེས་བྱ་བ་ནི་ཡུན་རིང་མོ་ནས་བསོད་ནམས་ལ་རབ་ཏུ་གོམས་པ་སྟེ། བདག་དང་གཞན་ལ་ཕན་པ་སྒྲུབ་པའི་མཚན་ཉིད་ཀྱི་ལས་གང་ཡིན་པ་དེ་ནི་བསོད་ནམས་ཏེ། ཡུན་རིང་མོ་ནས་བསོད་ནམས་སྤྱོད་པ་ལ་རབ་ཏུ་གོམས་པའོ། །འདིས་ནི་འདས་པའི་དུས་ཀྱི་བསོད་ནམས་ཀྱི་ཚོགས་བསྟན་ཏོ། །སྦྱིན་པ་དང༌། དུལ་བ་དང༌། སྡོམ་པ་དང༌། སྙིང་རྗེ་ལ་འདྲིས་པ་གང་ཡིན་པ་དེ་ནི་སྦྱིན་པ་དང༌། དུལ་བ་དང༌། སྡོམ་པ་དང་སྙིང་རྗེ་ལ་འདྲིས་པར་གྱུར་པ་སྟེ། འདིས་ནི་ད་ལྟར་བྱུང་བའི་དུས་སུ་བདག་དང་གཞན་ལ་ཕན་པ་སྒྲུབ་པའི་མཚན་ཉིད་བསྟན་ཏོ། །གཞན་ལ་ཕན་པར་སྤྱོད་པ་ཁྱད་པར་ཅན་ལ་ངེས་པར་བྱེད་པ་གང་ཡིན་པ་དེ་ནི་གཞན་ལ་ཕན་པར་སྤྱོད་པ་ཁྱད་པར་ཅན་ལ་ངེས་པར་སྤྱོད་པའོ། །འདིས་ནི་རྟག་ཏུ་གུས་པ་དང་སྦྱོར་བ་གཉིས་ཀྱིས་གཞན་ལ་ཕན་པ་སྒྲུབ་པ་བསྟན་ཏོ། །དེ་ལ་རྟེན་བཅས་པ་ཞེས་བྱ་བ་ནི་མཚོན་པ་སྟེ། བདག་དང་གཞན་གྱི་སྒྲུབ་པ་ཁྱད་པར་ཅན་ཡང་དག་པར་བརྟེན་པའོ། །ཡང་ཏོག་རྡོ་ཐལ་གསར་དུ་བསྐུས་པ་ཞེས་བྱ་བ་ལྟ་བུ་ནི་སྔར་བཤད་པའི་བྱང་ཆུབ་སེམས་དཔའོ། །ཟླ་བའི་འོད་ཟེར་ལྟ་བུ་ནི་ལྷའི་དབང་པོའི་དཔལ་ལོ། །དེ་གཉིས་དང་འདྲ་བར་གྱུར་པ་ཡིན་ནོ། །རྟེན་དང་བརྟེན་པར་གྱུར་པ་ཉིད་དོ། །ཚིག་རྐྱང་དང་ཚིགས་བཅད་དེ་དག་གིས་ནི་བྱང་ཆུབ་སེམས་དཔའ་བདག་ཉིད་ཀྱི་རྒྱུ་བསྟན་པའོ། །ད་ནི་གང་གོང་དུ་བསྟན་པའི་དབང་ཕྱུག་ཕུན་སུམ་ཚོགས་པ་དང་རྗེས་སུ་མཐུན་པ་ཡིན་ཡང་སྙིང་རྗེ་ལྷོད་པར་མི་འགྱུར་རོ་ཞེས་བྱ་བ་དེ་ཉིད་སྒྲུབ་པའི་ཕྱིར། གང་གི་ཕྱིར་ལྷ་མ་ཡིན་རྣམས་ཞེས་བྱ་བ་ལ་སོགས་པའི་ཚིགས་བཅད་བརྩམས་པ་ཡིན་ནོ། །སྐལ་བ་
ཆེ་བ་ནི་བསོད་ནམས་ཀྱི་ཚོགས་ཀྱི་ཁྱད་པར་རོ། །དེས་བདེ་བ་ཐོབ་པ་ནི་འབད་པ་མེད་པར་རྙེད་པ་སྟེ། སྐལ་བ་ཆེ་བས་བདེ་བ་ཐོབ་པའོ། །གང་གི་ཕྱིར་གང་ལས་དེའི་སྙིང་དྲེགས་པའི་དྲི་མ་ཅན་བྱེད་པར་གྱུར་པ་ནི་དེའི་ཕྱིར་དབང་ཕྱུག་ཕུན་སུམ་ཚོགས་པར་གྱུར་ཀྱང་སྙིང་བརྩེ་བ་ལྷོད་པར་མི་འགྱུར་རོ། །བཤམས་པ་ཉིད་ཆས་པ་ཡིན་པའི་ཕྱིར་བཤམས་པ་ཆས་པའོ། །དེ་རབ་ཏུ་ཆས་པ་ཡིན་པས་འཇིགས་འཇིགས་ལྟར་སྣང་བ་སྟེ། གླང་བོ་ཆེ་དང༌། ཤིང་རྟ་དང༌། རྟ་དང༌། རྐང་ཐང་ལ་སོགས་པ་གང་གི་དཔུང་གི་ཚོགས་གང་ཡིན་པ་དེ་ནི། གླང་པོ་ཆེ་དང༌། ཤིང་རྟ་དང༌། རྟ་དང༌། རྐང་ཐང་གི་དམག་བཤམས་པ་རབ་ཏུ་འཇིགས་འཇིགས་ལྟར་སྣང་བའོ། །ཆོས་ཀྱི་བདག་ཉིད་ཡིན་ཡང་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། ཆོས་ལ་བདག་ཉིད་སེམས་པ་གང་ཡིན་པ་དེ་ནི་ཆོས་ཀྱི་བདག་ཉིད་དོ། །དེ་ལྟ་ཡིན་ཡང་གཞན་སྔོ་བ་ནི་གཞན་དག་ལ་མངོན་པར་མ་ངེས་པའོ། །རོལ་པའི་བགེགས་སུ་གྱུར་པ་ནི་རོལ་པ་ལ་གནོད་པར་གྱུར་པ་སྟེ། རོལ་པའི་བགེགས་སུ་གྱུར་པ་ལས་ཡིད་བྱུང་བའོ། །རོལ་པའི་བགེགས་གྱུར་ཡིད་འབྱུང་འགྲོ་བ་འཇིགས་པར་འགྱུར། །ཞེས་བྱ་བ་ལ་འགྲོ་བ་ནི་རང་ལ་བརྟེན་པའི་སྐྱེ་བོའོ། །ཚུལ་བཞིན་བྱ་བའི་རིགས་ཞེས་བྱ་བ་ལ་ཚུལ་ནི་ལུགས་ཏེ། ལུགས་ཉིད་རིགས་པ་ཡིན་པས་འདོད་པའི་དོན་ཐོབ་པར་བྱེད་པ་ནི་འདི་ཚུལ་བཞིན་བྱ་བའི་རིགས་པའོ། །འདོད་པའི་དོན་ཐོབ་པར་བྱེད་པའི་རིམ་པ་ནི་འདུམ་པར་བྱ་བ་དང༌། དབྱེ་བ་དང༌། ཆད་པས་སྒྲུབ་པའོ། །ལྷ་མ་ཡིན་དེ་དག་ནི་དེ་དག་ལས་ཆད་པས་བསྒྲུབ་པར་བྱ་བ་ཡིན་པར་མཐོང་སྟེ། ཐབས་གཞན་གྱིས་ནི་དེ་དག་བསྒྲུབ་པར་མ་མཐོང་བར་ཞེས་བྱ་བའི་དོན་ཏོ། །དམག་དྲང་བ་ལ་གཡེངས་པ་ནི་དམག་དྲང་གཡེངས་པའོ། །ཡང་ན་དམག་དྲང་བ་ཉིད་གཡེངས་པ་ཡིན་པས་དམག་དྲང་གཡེངས་པའོ། །དེ་ལ་མངོན་པར་ཕྱོགས་པ་ནི་དམག་དང་གཡེངས་ལ་མངོན་པར་ཕྱོགས་པ་སྟེ། དེ་ལ་མངོན་པར་ཕྱོགས་
པར་གྱུར་པའོ། །དེའི་དོན་ནི་འདི་ཡིན་ཏེ། ཅིའི་ཕྱིར་བྱང་ཆུབ་སེམས་དཔའ་ཆོས་མ་ཡིན་པ་དམག་དྲང་བ་ལ་མངོན་པར་ཕྱོགས་པར་གྱུར་ཞེ་ན། དེ་ལྟར་གྱུར་པ་དེའི་རྒྱུ་བསྟན་པ། དམག་དྲང་བ་ལ་མངོན་པར་ཕྱོགས་པའི་རྒྱུ་ནི་གསུམ་སྟེ། གཞན་གྱི་ཚུལ་མ་ཡིན་པ་ཞི་བར་བྱ་བའི་ཕྱིར་དང་བདག་ཉིད་ལ་བརྟེན་པ་རྣམས་ཀྱི་ཚུལ་མ་ཡིན་པ་ཞི་བར་བྱ་བའི་ཕྱིར་དང༌། བདག་གིས་ཀྱང་དེ་གཉི་གའི་ཞི་བར་བྱེད་ནུས་པར་བདག་ཉིད་ལ་ཤེས་པའོ། །ནུས་པ་དེ་ཡང་རྣམ་པ་གཉིས་ཏེ། གཙོ་བོའི་ནུས་པ་དང༌། སྤྲོ་བའི་ནུས་པ་དང་ལྡན་པའོ། །འོས་པ་ཡང་ཡིན་ལ་བསྒྲེང་བ་ཡང་ཡིན་པས་འོས་པ་བསྒྲེང་བའོ། །ཡང་ན་ཟླ་མེད་པའི་གོས་བཟང་པོ་གང་ལ་ཡོད་པ་དེ་ནི་གོས་བཟང་པོ་འོས་པའོ། །བསྒྲེང་བ་ཡང་ཡིན་ལ་གོས་བཟང་པོ་ཕྱར་བ་ཡང་ཡིན་པས་བསྒྲེང་བའི་གོས་བཟང་པོ་འོས་པར་ཕྱར་བའོ། །བ་དན་ཡང་ཡིན་ལ་མཛེས་པ་ཡང་ཡིན་པས་བ་དན་མཛེས་པའོ། །གོས་བཟང་པོ་འོས་པས་བ་དན་མཛེས་པར་ཕྱར་བའི་ཕྱིར་རྒྱལ་མཚན་བསྒྲེང་བ་གང་ཡིན་པ་དེ་ནི་གོས་བཟང་པོ་འོས་པས་བ་དན་མཛེས་པར་ཕྱར་བའི་རྒྱལ་མཚན་བསྒྲེང་བའོ། །རིན་པོ་ཆེ་སྣ་ཚོགས་པ་ཉིད་ནི་རིན་པོ་ཆེའི་རྣམ་པ་སྣ་ཚོགས་པའོ། །ཡང་ན་ནོར་བུ་དང་འདྲ་བའི་རིན་པོ་ཆེ་ནི་ནོར་བུ་རིན་པོ་ཆེའོ། །རིན་པོ་ཆེ་སྣ་ཚོགས་པ་ནི་རིན་པོ་ཆེ་སྣ་ཚོགས་པ་སྟེ། དེ་རྣམས་ཀྱི་འོད་ནི་ནོར་བུ་རིན་པོ་ཆེ་སྣ་ཚོགས་ཀྱི་འོད་དོ། །དེས་གསལ་བར་གྱུར་པ་ནི་གསལ་བར་སྣང་བའོ། །རྒྱན་གདགས་པའི་གོ་རིམས་སུ་གྱུར་པ་ནི་རྒྱན་གདགས་པའི་གོ་རིམས་སོ། །རྒྱན་གདགས་པའི་གོ་རིམས་དང༌། ངེས་པར་བྱས་པ་དང༌། ངོས་གཉིས་མཚོན་ཆ་རྣོན་པོ་རྣམ་པ་སྣ་ཚོགས་འབར་བས་མཛེས་པ་གང་ཡིན་པ་དེ་ནི་ལྷའི་གོས་དཀར་པོ་ཅན་ནོ། །ཡོངས་སུ་བསྐོར་བ་ནི་ཤིང་རྟ་གོས་དཀར་པོ་ཅན་ཏེ། རྒྱ་མཚོའི་འགྲམ་དུ་ཐུག་པར་ཞེས་བྱ་བ་དེ་ནི་གང་གི་ཕྱིར་དེ་རྣམས་ཀྱི་རྒྱ་མཚོའི་འགྲམ་ན་གནས་ཏེ། དེས་ན་འགྲམ་དུ་ཡོད་པ་ཡིན་ནོ། །ལྷ་མ་ཡིན་རྣམས་ཀྱི་སྔ་མ་ལྟར་འོང་བ་དེ་ཤེས་པ་སྟེ། རོལ་པའི་བགེགས་གྱུར་འགྲོ་བ་
འཇིགས་པར་འགྱུར་བ་སྟེ། ལྷའི་འགྲོ་བའོ། །དེས་ན་རྒྱ་མཚོའི་འགྲམ་ལ་ཐུག་པར་སྔོན་སུ་བར་བྱེད་པ་ཡིན་ནོ། །འདུག་བཞིན་དུ་ཞེས་བྱ་བ་སྟེ་མཚོན་རྡེག་པར་བྱེད་དོ། །ང་ནི་འདི་ན་ཞེས་སྨྲས་ནས་ཀྱང་རབ་ཏུ་རྡེག་པར་བྱེད་དོ། །མཐོང་བཞིན་ཞེས་བྱས་ནས་ཀྱང་གཞན་དག་ལ་རྡེག་པར་བྱེད་དོ། །ད་ནི་ཐར་པར་གལ་འགྱུར་ཞེས་བྱས་ཤིང་ཡང་གཞན་དག་ལ་རབ་ཏུ་སྣུན་པར་བྱེད་དོ། །དེ་ལྟར་སྨྲས་ནས་གཞན་དག་ལ་ཐོབ་ཅིག་ཅེས་སྨྲས་ཏེ་ཕྱིར་ལོག་པ་དང༌། དེ་དག་ལས་གཞན་དག་གིས་ཀྱང་མཚོན་འདེབས་པར་བྱེད་ཅིང༌། ད་ནི་མེད་ཟིན་གྱིས་ཞེས་སྨྲས་ཏེ་མཚོན་འདེབས་པར་བྱེད་དོ། །མཚོན་ཆ་འཁྲུགས་པ་ནི་གཡུལ་དུའོ། །གློག་བཞིན་དུ་འགྱུ་བའི་བ་དན་ཅན་གང་དག་ནི་ཤིང་རྟ་སྟེ། དེ་ནི་གློག་ལྟར་འགྱུ་བའི་བ་དན་ཅན་ནོ། །གདུགས་དང༌། རྒྱལ་མཚན་དང༌། གོ་ཆ་དང༌། མཚོན་ཆ་དང༌། ཅོད་པན་རྣམས་ཏེ། དེ་དག་ལྷུང་བར་གྱུར་པ་ནི་འགྱེལ་བར་གྱུར་པའོ། །ཕོག་པར་གྱུར་པ་ནི་ལམ་དུ་སྟེ་ཕོག་པར་གྱུར་པའི་སྟེང་དུའོ། །དེར་བབ་པ་ནི་ཕོག་པར་གྱུར་པའི་སྟེང་དུ་བབ་པའོ། །ཁ་ལོ་པ་ནི་ཁ་ལོ་སྒྱུར་བའོ། །ཕྲུ་གུ་མ་ཚར་བ་ཞེས་བྱ་བ་ནི་གཤོག་པ་མ་སྐྱེས་པའོ།། མ་ཚར་བ་ཉིད་བྱ་ཡིན་པས་བྱའི་ཕྲུ་གུ་སྟེ། བྱ་ཕྲུག་མ་ཚར་བ་དེའི་ཚང་བཅས་པའོ། །ལྷ་མ་ཡིན་འདི་དག་བཅུང་སླར་མི་ལྡོག་གོ་ཞེས་བྱ་བ་དང༌། ཅི་ཞེས་བྱ་བ་ནི་སྐྱོན་ཅི་ཡོད་ཅེས་བྱ་བའི་དོན་ཏོ། །ཤིང་རྟ་མོ་བཟློག་པར་ནམ་མཁའ་ལྡིང་གི་ཚང་ལས་བཟུར་བར་མི་ནུས་པའི་ཕྱིར་རོ། །ཤིང་རྟ་བཟློག་པ་དེ་ལས་ཉེས་པ་མེད། །ཅེས་པ་དེའི་དབང་དུ་བྱས་ནས་ཤིང་རྟ་འདི་ནི་སླད་དུ་བཟློག་ན་གདོད་ཅེས་བྱ་བའི་ཚིགས་བཅད་བརྩམས་པ་ཡིན་ཏེ། ནམ་མཁའ་ལྡིང་གི་ཚང་འདི་ལས་ཟུར་ཅིག་ཅེས་བྱ་བའི་ལས་ནི། ཤིང་རྟ་འདི་ནི་སླད་དུ་བཟློག་ན་གདོད་ཅེས་བྱ་བའི་ཚིགས་བཅད་ཕྱེད་ཡིན་ནོ། །འོ་ན་ཅི་ཞེས་བྱ་བའི་ལན་ནི་ལྷ་རྣམས་ལ་ནི་ཞེས་བྱ་བ་སྟེ། ཚིགས་བཅད་ཀྱི་ཕྱེད་འོག་མའོ། །དེ་བས་ན་ཞེས་བྱ་བ་ནི་ཤིང་རྟ་བཟློག་པ་ལ་ནི་ཉེས་པ་ཡོད་དོ་ཞེས་གོང་དུ་མ་ཏ་ལིས་སྨྲས་པའི་ཚིག་གོ །ལྷ་རྣམས་ལ་ནི་གནས་ནས་
སྐབས་རྙེད་པ་ཞེས་བྱ་བ་འདིའི་ལན་ནི་མཚོན་གྱིས་ཕོག་སྟེ་ཤི་བ་བླས་ཞེས་བྱ་བ་ཡིན་ཏེ། རང་གི་ལྷག་པའི་བསམ་པ་ཁྱད་པར་ཅན་བསྟན་པའི་ཕྱིར་སྨྲས་པའོ། །ཤི་ཡང་བླས་ཞེས་བྱ་བ་ལ་སོགས་པ་ནི་སྙིང་རྗེའི་དབང་གིས་སྨྲས་པ་སྟེ། དེ་ལྟར་སྤྱོད་པའི་སེམས་ཅན་འཇིགས་པས་ཉེན་པ་འདིའི་ཆེད་དུའོ། །འཇིགས་པས་བརྟབས་ཤིང་རབ་ཏུ་མགྱོགས་པར་གྱུར་པ་གང་ཡིན་པ་དེ་ནི་སྐྲག་ནས་བརྟབས་ཤིང་རབ་ཏུ་མགྱོགས་པར་བྱེད་པའོ། །ཇི་ལྟ་བུར་ཞེ་ན། ཆར་སྤྲིན་ནག་པོ་རླུང་གིས་གཏོར་བ་བཞིན།། །། བདག་གི་དམག་ཚོགས་ཕམ་ཡང་ཞེས་བྱ་བའི་ཚིགས་བཅད་ཡིན་ནོ། །དགའ་བ་དང་ངོ་ཚ་བ་ནི་དགའ་ཞིང་ངོ་ཚ་བའོ། །དགའ་བ་དང་ངོ་ཚ་བ་དང་བཅས་པ་ནི་དགའ་ཞིང་ངོ་ཚ་བཞིན་དུའོ། །ཕོངས་ན་ཞེས་བྱ་བའི་སྒྲ་ནི་ངན་པ་དང་བློ་འབྲིང་པོ་གཉི་ག་ལ་སྦྱར་བར་བྱའོ། །ངན་པ་དང་བློ་འབྲིང་པོ་ནི་སྡིག་པ་སྤྱོད་པའི་ཚེ་ན་མི་མཉམ་པ་སྟེ། སྙིང་རྗེ་དང་བཅས་པས་སོ། །སྐྱེ་བོ་དམ་པ་རྣམས་ཀྱི་ཁྱད་པར་ནི་འདི་ཡིན་ཏེ། རྣམ་པ་ཐམས་ཅད་དུ་སྡིག་པ་མི་བྱེད་དེ། སྙིང་རྗེ་དང་བཅས་པར་གྲུབ་པ་ཡིན་པས་ཡང་མི་བརྗོད་དོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བརྒྱ་བྱིན་གྱི་སྐྱེས་པའི་རབས་སོ།། །།བདག་ངོ་ཚ་བ་ཉིད་ཀྱིས་ཞེས་བྱ་བ་ནི་ངོ་ཚ་བ་ཉིད་ཁྲེལ་ཡོད་པ་ཞེས་བྱ་བའི་དོན་ཏོ། །བདག་དང་ཆོས་ཀྱི་དབང་དུ་བྱས་ཏེ་ཁ་ན་མ་ཐོ་བ་ཞེས་བྱ་བའི་ཚིག་གིས་སོ། །སྤྱོད་ཡུལ་གྱི་དུས་ཞེས་བྱ་བ་ནི་ཚུལ་དང་སྤྱོད་པ་སྟེ་གང་བྱ་བའོ། །རང་གི་ཆོས་ཞེས་བྱ་བ་ནི་འདོན་པ་དང༌། འདོན་དུ་འཇུག་པ་དང༌། མཆོད་སྦྱིན་བྱེད་པ་དང༌། བྱེད་དུ་འཇུག་པ་དང༌། སྦྱིན་པ་དང༌། ལེན་པ་སྟེ། དེ་དག་ནི་རང་གི་ཆོས་སོ། །རང་གི་ཆོས་དེ་དག་གི་རྗེས་སུ་སྤྱོད་པའི་གྲགས་པ་གང་ཡིན་པ་དེ་ནི་རང་གི་ཆོས་ལ་སྤྱོད་པའི་གྲགས་པའོ། །འདུལ་བ་ནི་བྱ་བ་མ་ཡིན་པའི་ལས་ལ་སོགས་པ་ལས་ལྡོག་པ་སྟེ། ཇི་ལྟར་རིགས་པའི་སྒྲུབ་པའོ། །བཙས་པའི་ཆོ་ག་བྱ་བ་ལ་སོགས་པས་ཞེས་སྨོས་པས་ནི་ལྷག་མཆོག་བཅུ་གཉིས་ཀྱང་གཟུང་ངོ༌། །
ལྡོག་པ་དང༌། འཛིན་པ་ནི་ལྡོག་པ་དང་འཛིན་པ་དག་སྟེ། ཐོབ་པ་ལྡོབ་ཅིང་འཛིན་པ་དེ་གཉིས་ལ་གང་གསལ་བར་གྱུར་པ་ནི་ཐོབ་པ་ལྡོབ་ཅིང་འཛིན་པ་གསལ་བའོ། །འདི་དག་ནི་བྱ་བ་ཤེས་པ་དང༌། སློབ་པའི་ཡན་ལག་ཡིན་ནོ། །རྒྱུད་ཉིད་གུས་པ་ཡིན་པས་རྒྱུད་གུས་ཏེ། གུས་པའི་རྒྱུད་ཅེས་བྱ་བའི་དོན་ཏོ། །དུལ་བ་ནི་བྱ་བ་རྣམས་ལ་བླ་མའི་རྗེས་སུ་འཇུག་པ་ཡིན་ཏེ། འདིས་ནི་བསླབ་པའི་ཡན་ལག་དང་ལྡན་པ་བསྟན་ཏོ། །ཞི་ཞིང་ཆོས་བཟང་པོ་གང་ལ་ཡོད་པ་དེ་ནི་ཞི་ཞིང་ཆོས་བཟང་པོའོ། །འདིས་ཀྱང་ཚུལ་ཁྲིམས་ཀྱི་ཡན་ལག་བསྟན་ཏོ། །བྱམས་པ་ནི་ཆགས་པའོ། །དགའ་བ་ནི་དད་པ་འམ་དང་བའོ། །བྱམས་ཤིང་དགའ་བ་གཉིས་སུ་གྱུར་པ་ནི་དེ་གཉིས་ཀྱིས་ཡིན་ཏེ། བྱམས་པར་གྱུར་པ་ནི་ཞི་བས་སོ། །ཆོས་བཟང་བར་གྱུར་པ་ནི་བླ་མ་དགའ་བར་གྱུར་པའོ། །དབང་དུ་བྱེད་པ་ནི་སྔགས་ཀྱི་དོན་གྱིས་སོ། །ཡོན་ཏན་དབང་དུ་བྱེད་པའི་སྔགས་རྟག་ཏུ་ཞེས་བྱ་བ་ལ། སྔགས་ཡོན་ཏན་དབང་དུ་བྱེད་པ་ལས་གཞན་དག་ལས་ཡོན་ཏན་གྱི་མཚན་ཉིད་ཀྱིས་དབང་དུ་བྱེད་པའི་སྔགས་འདི་ནི་ཁྱད་པར་དུ་བསྟན་པ་ཡིན་ཏེ། ཡོན་ཏན་ནི་རྟག་ཏུ་ཡོད་པ་ཡིན་པས་སྔགས་གཞན་ལྟར་མི་རྟག་ཅིང་ཉམས་པ་ནི་མ་ཡིན་ཏེ། ཡོན་ཏན་དབང་དུ་བྱེད་པའི་སྔགས་འདི་ལས་གཞན་པའི་དབང་དུ་བྱེད་པའི་སྔགས་ནི། ཞེ་སྡང་གིས་འཁྲུགས་པ་སྟེ། དབང་དུ་བྱེད་པའི་ནུས་པ་མེད་དོ། །སྔགས་འདིས་ནི་དེ་ལྟ་བུའང་དབང་དུ་བྱེད་པ་ཡིན་ནོ། །སྔགས་ཐ་མལ་པས་ནི་བདག་ཉིད་ཀྱི་སེམས་དབང་དུ་བྱེད་པ་ཡིན་ནོ། །གཞན་དག་ནི་མ་ཡིན་ནོ། །གསང་དུས་དག་ཏུ་ཞེས་བྱ་བ་ནི་མི་འདོད་པའི་དུས་རྟག་ཏུའོ། །དབུལ་བ་འབྲས་བུ་རེ་བ་མེད། །ཅེས་བྱ་བའི་ཚིགས་བཅད་ཀྱི་དོན་ནི་འདི་ཡིན་ཏེ། བདག་དང་གཞན་གྱི་ཕན་པ་དང༌། འཛིན་རྟེན་འདི་དང་ཕ་རོལ་ཏུ་ཕན་པ་མེད་པ་སྟེ། བདག་གིས་མི་ལའང་སྨྲར་མེད་ཅིང༌། །ཅེས་བྱ་བ་འདིས་ནི་གཞན་ལ་ཕན་པ་མི་ནུས་པ་ཉིད་དོ། །དགའ་སྟོན་ཚེ་ན་འད་དགའ་མི་མྱོང༌། །ཞེས་བྱ་བ་འདིས་ནི་བདག་གི་དོན་མི་ནུས་པ་ཉིད་དོ། །ཀྱི་ཧུད་སྦྱིན་པའི་གཏམ་ཡང་གཞན། །ཞེས་བྱ་བ་འདིས་ནི་འཇིག་རྟེན་ཕ་
རོལ་གྱི་ཕན་པ་མི་ནུས་པ་ཉིད་དེ། གང་གི་ཕྱིར་སྦྱིན་པ་ཡོད་ན་ནི་འཇིག་རྟེན་ཕ་རོལ་ཏུ་མངོན་པར་མཐོ་བ་ཐོབ་པར་འགྱུར་རོ། །དབུལ་བ་འབྲས་བུ་རེ་བ་མེད། །ཅེས་བྱ་བ་འདིས་ནི་འཇིག་རྟེན་འདི་ལ་ཕན་པའི་བྱ་བ་མི་ནུས་པ་ཉིད་དོ། །རེ་བ་ནི་མངོན་པར་འདོད་པ་སྟེ། འདི་དང་འདི་བྱའོ་ཞེས་བྱ་བ་དེ་དང་དེའི་འབྲས་བུ་མེད་པ་ཡིན་ཏེ། འབྱོར་པ་མ་ཡིན་པར་ནི་བསམ་པ་འབྲས་བུ་དང་བཅས་པར་མི་འགྱུར་རོ། །སྨ་འབབ་གནས་གྱུར་ཞེས་བྱ་བའི་ཚིགས་བཅད་ཀྱི་དོན་ནི་འདི་ཡིན་ཏེ། བདག་དང་གཞན་གྱི་སྒྲུབ་པའི་རྒྱུ་མེད་པ་དང༌། བདག་ཉིད་ཀྱི་སྡུག་བསྔལ་གྱི་རྒྱུ་དང༌། བདེ་བ་མི་ཐོབ་པའི་རྒྱུ་དང༌། གཞན་ལ་ཡང་དག་པར་སྒྲུབ་པ་མི་འཐོབ་པའི་རྒྱུ་དང་བཞི་པོ་འདི་དག་གོ་རིམས་བཞིན་དུ་སྦྱར་བར་བྱའོ། །ཉམས་ཉེས་བཞིན་དུ་རྟག་ཏུ་མྱ་ངན་བྱེད། །ཅེས་བྱ་བ་ནི་བཞི་པོ་དེ་དག་གི་རྒྱུས་སོ། །བཀྲེས་སྐོམ་ཟན་དང་ཞེས་བྱ་བ་འདིའི་ལུས་ནི་རྣམ་པ་གསུམ་སྟེ། སྡུག་བསྔལ་རྣམ་པ་གསུམ་གྱི་གསོ་བར་བསྟན་པ་ཡིན་ཏེ། བཀྲེས་པ་ལ་ནི་ཟན་ནོ། །སྐོམ་པ་ལ་ནི་ཆུའོ། །འདི་གཉིས་ནི་ལྷན་ཅིག་སྐྱེས་པའི་སྡུག་བསྔལ་གྱི་གསོ་བར་བསྟན་ཏོ། །སྨན་བཅས་སྔགས་ཀྱིས་ནད་སོས་འགྱུར། །ཞེས་བྱ་བ་འདིས་ནི་གློ་བུར་གྱི་སྡུག་བསྔལ་གསོ་བར་བསྟན་ཏོ། །རྒྱུན་གནས་ནོར་གྱིས་དབུལ་པོར་འགྱུར། །ཞེས་བྱ་བ་འདིས་ནི་སྔོན་བྱས་པའི་རྒྱུའི་དབུལ་བའི་སྡུག་བསྔལ་ལས་གསོ་བར་བསྟན་ཏེ། གང་གི་ཕྱིར་དབུལ་པོ་ནི་སྐྱེ་བ་སྔ་མ་ལ་རང་གི་སེར་སྣ་བྱས་པའི་རྒྱུ་ཡིན་ཏེ། ད་གསོ་བ་ནི་ནོར་རོ། །བླང་བའི་ཐབས་རབ་ཏུ་ཆུང་བ་གང་ཡིན་པ་དེ་ནི་བླང་བའི་ཐབས་རབ་ཏུ་ཆུང་བའོ། །བྲམ་ཟེ་རྒུད་ཚེ་རྐུ་བ་ཆོས་སུ་བཤད། །ཅེས་བྱ་བའི་ཚིགས་སུ་བཅད་པ་འདིས་ནི་བྲམ་ཟེ་རྒུད་པར་གྱུར་པའི་ཚེ་ན་ནི་བྲམ་ཟེ་རྒུད་པ་ཉིད་ལ་ཉེས་པ་མེད་པ་ཉིད་དུ་བསྟན་ཏོ། །གལ་ཏེ་བྲམ་ཟེ་རྣམས་ཀྱི་རང་ཉིད་ཀྱི་ནོར་ཡིན་ན་ཅིའི་ཕྱིར་མ་མཐོང་བར་བླང་ཞེ་ན། དེའི་ལན་བསྟན་པའི་ཕྱིར། ངོ་མཐོན་དུ་ནི་ནོར་འཕྲོག་ནུས་གྱུར་ཀྱང༌། །ཞེས་བྱ་བའི་ཚིགས་བཅད་བརྩམས་བ་ཡིན་ནོ། །ཡང་ན་འདིའི་བསྡུས་པའི་དོན་ནི་མངོན་སུམ་དུ་ཡང་བླང་བར་བྱ་བ་ཡིན་ན། ཅིའི་ཕྱིར་
མ་མཐོང་བར་བླང་ཞེ་ན། རྐུ་བ་ལ་ཉེས་པ་ཡིན་ཏེ། དེས་ན། ངོ་མཐོན་དུ་ནི་ནོར་འཕྲོག་ནུས་གྱུར་ཀྱང༌། །ཞེས་བྱ་བ་ལ་སོགས་པའི་ཚིགས་བཅད་བརྩམས་པ་ཡིན་ནོ། །རྗེས་སུ་ཡི་རང་བ་ཡང་མི་བྱེད་དེ། རང་བཞིན་གྱི་དགེ་བ་ཡིན་པས་སོ། །ཆོ་ག་བསྟན་པ་ནི་རྐུ་བའོ། །དགའ་བར་མ་གྱུར་ཞེས་བྱ་བ་ནི་རབ་ཏུ་མི་སྒྲུབ་པ་དང༌། བདག་གིར་མི་བྱེད་པའོ། །སླར་བཟློག་པར་མ་གྱུར་པ་ནི་སླར་མི་སྨྲ་བའོ། །ཡོན་ཏན་ཞིག་ཡོད་པར་བསམས་ནས་ཞེས་བྱ་བ་ནི་སྲིད་པ་གང་ཡིན་པ་དེ་ནི་ཡོན་ཏན་ཞིག་ཡོད་པར་བསམས་པའོ། །རྩོལ་མི་ཕོད་དམ་ཞེས་བྱ་བ་ནི་བདག་ཉིད་ཀྱི་རྩོལ་བ་དང་བྲལ་བ་སྟེ། སྙིང་སྟོབས་མེད་པ་ཞེས་བྱ་བའི་དོན་ཏོ། །ང་རྒུད་པ་ཞེས་བྱ་བ་དེ་ལ་མི་བཟོད་པར་གྱུར་པ་དེ་ནི་ང་རྒུད་མི་བཟོད་པས་སོ། །མི་རྣམས་དཔའ་བོའི་ལམ་ཞེས་བྱ་བ་ནི་དཔའ་བོའི་འདྲོན་པོའོ། །སྤྲོ་བ་དང་བྲལ་བ་ནི་སྤྲོ་བ་མེད་ཅིང་ལེ་ལོ་སྟེ་དེས་བླུན་པའོ། །ཡང་ན་འདི་ལ་སྤྲོ་བ་མེད་པའོ། །སྤྲོ་བ་མེད་པ་གང་ཡིན་པ་དེ་ནི་བླུན་པ་ཡིན་པས་སྤྲོ་བ་མེད་ཅིང་བླུན་པའོ། །རབ་བསྒྲགས་ཤིང་ཞེས་བྱ་བ་ནི་སྐྱེ་བོ་མང་པོ་ལའོ། །མ་བཅབས་རྒྱ་ཆེར་ཞེས་བྱ་བ་ནི་འདི་མི་མངོན་པ་མ་ཡིན་ཞིང་རྒྱ་ཆེར་རོ། །བསྟན་པ་ནི་ཐམས་ཅད་ལ་ཞེས་བྱ་བའི་དོན་ཏོ། །ཚིག་དང་ཟུར་ལ་སོགས་ཀྱང་སྟེ། རྒྱུ་འདི་གསུམ་གྱི་སྡུག་བསྔལ་རབ་ཏུ་བསྒྲགས་པ་སྟེ། ཤིན་ཏུ་དཀའ་བར་བསྟན་པ་དེས་ན་ཡང་ཤིན་ཏུ་སྡུག་བསྔལ་ཆེན་པོ་ཉིད་དོ། །བསྒྲིམས་པ་དང་བྲལ་བ་གང་ཡིན་པ་དེ་ནི་མི་སྒྲིམ་པའོ། །མི་སྒྲིམ་པ་གང་ཡིན་པ་བརྟན་པ་ཡང་ཡིན་པས་མི་སྒྲིམ་བརྟན་གྱུར་པའོ། །མི་སྒྲིམ་བརྟན་པར་གྱུར་པའི་ཡིད་གང་ཡིན་པ་དེ་ནི་མི་སྒྲིམ་བརྟན་པར་གྱུར་པའོ། །དེ་ལྟར་ཐ་མལ་བཞིན་དུ་ཞེས་བྱ་བ་ནི་ཅི་ལྟར་སྡུག་བསྔལ་ཐོས་པའི་དུས་དེ་བཞིན་དུ་གདུག་ཅེས་བྱ་བའི་དོན་ཏོ། །བྱམས་པ་དང་བྲལ་བ་ནི་འདི་ལྟར་མི་བྱམས་པའོ།། མི་བྱམས་པ་ཡང་ཡིན་ལ་སྲ་བ་ཡང་ཡིན་པས་མི་བྱམས་ཤིང་སྲ་བའོ། །མི་བྱམས་ཤིང་སྲ་བ་གང་ཡིན་པ་དེ་ནི་མི་བྱམས་ཤིང་སྲ་བ་ཉིད་དེ། དེ་ཡོད་པ་དེའི་ཕྱིར་རོ། །དེ་ལྟར་གང་གོང་དུ་བསྟན་པ་དེ་མི་སྒྲིམ་བརྟན་པར་གྱུར་པའི་ཡིད་དང་ཐ་མལ་བཞིན་དུ་གནས་གྱུར་པ། །ཞེས་བྱ་
བ་དག་དེ་ལྟ་བུའི་དོན་ཏོ། །མཁན་པོས་བསྟན་པའི་རིམ་ལ་ཞེས་བྱ་བ་ནི། །གཞན་ནོར་མ་མཐོང་བླང་བར་གྱིས། །ཞེས་བྱ་བ་ཡིན་ཏེ་དེའི་རིམ་པའོ། །སྡིག་པའི་ལས་རྣམས་བྱེད་པ་ན། །ཞེས་བྱ་བའི་ཚིགས་བཅད་འདིས་བདག་གིས་མི་རིག་པ་ལྷའི་མིག་གི་སྤྱོད་ཡུལ་དུ་བསྟན་ཏོ། །བདག་ཉིད་སྦྱངས་པ་ལྷ་ཡི་སྤྱན། །ཞེས་བྱ་བ་འདིས་ནི་མངོན་པར་ཤེས་པའི་རང་བཞིན་གྱི་ལྷའི་མིག་གི་རང་བཞིན་དུ་བསྟན་ཏོ། །ཉེས་བྱས་གཞན་གྱིས་མཐོང་བ་དང༌། །གང་ཡང་བདག་གིས་མཐོང་བ་ཞེས་བྱ་བ་ནི་གཉི་གས་མཐོང་བ་ལས་སོ།། ལེགས་པར་མཐོང་བ་ཞེས་བྱ་བ་ནི་དེ་ལྟར་དཔྱད་ན་གང་དེ་བདག་གིས་མཐོང་བ་དེ་ནི་ལེགས་པར་མཐོང་བ་ཡིན་ཏེ། བདག་གིས་མཐོང་བའི་ཕྱིར་རོ། །ལེགས་པར་མཐོང་བ་དེ་ཉིད་བསྒྲུབ་པའི་ཕྱིར། །བདག་གི་དགོས་པས་ཞེས་བྱ་བའི་ཚིགས་བཅད་སྨོས་པ་ཡིན་ཏེ། ལེགས་པར་མཐོང་བ་དེ་ནི་མཐོང་བ་ངེས་པར་བསྟན་པས་སོ། །ཆགས་པ་ལ་ཞེན་པ་ནི་ཆགས་པ་ལ་ཞེན་པའོ། །རྩེ་གཅིག་ཏུ་དམིགས་པ་ནི་རྩེ་གཅིག་པའོ། །ཆགས་པས་ཞེན་པ་ཡང་ཡིན་ལ་རྩེ་གཅིག་པ་ཡང་ཡིན་པས་ཆགས་པས་རྩེ་གཅིག་པའོ། །ཆགས་པས་རྩེ་གཅིག་པའི་ཡིད་གང་ལ་ཡོད་པ་དེ་ནི་ཆགས་པས་རྩེ་གཅིག་ཡིད་གྱུར་པ་སྟེ། བདག་གི་དགོས་པ་ལ་ཆགས་པས་རྩེ་གཅིག་པའི་ཡིད་དུ་གྱུར་པ་ཞེས་བྱ་བའི་དོན་ཏོ། །དེ་ལྟར་ནོར་གྱི་ཕྱིར་ཞུགས་ཞེས་བྱ་བ་ནི་རྐུ་བ་ལ་ཞུགས་པའོ། །སྐྱོན་དང་ཡོན་ཏན་ནི་ཡོན་ཏན་དང་ཡོན་ཏན་མ་ཡིན་པའི་ཁྱད་པར་རོ། །ནོར་ཕྱིར་ཡོན་ཏན་ཞེས་བྱ་བ་ནི་ནོར་ལ་བཙོང་བ་ཞེས་བྱ་བའི་དོན་ཏོ། །ལྷའི་དབང་པོར་གྱུར་པའི་ཕྱིར་ནི་ལྷའི་དབང་ཕྱིར་ཏེ། ལྷའི་རྒྱལ་པོར་སྐྱེ་བའི་ཕྱིར་ཞེས་བྱ་བའི་དོན་ཏོ། ཆོས་དང་འགལ་བ་ཞེས་བྱ་བ་ནི་ཆོས་ཉམས་པའོ། །གོས་ངན་པ་གྱོན་པ་ནི་གོས་ངན་པ་འཆང་བའོ། །དགྲ་བོའི་ཁྱིམ་ན་འབྱོར་པ་མཐོང་བ་ཞེས་བྱ་བ་ནི་དེའི་གན་དུ་བསླང་བའི་དོན་དུ་འགྲོ་བ་ཞེས་བྱ་བའི་དོན་ཏོ། །བུ་ལེགས་སོ་ལེགས་སོ་བྲམ་ཟེ་ཆེན་པོ་ལེགས་སོ་ཞེས་བྱ་བ་ནི་གང་གོང་དུ་བསྟན་པའི་རྒྱུ་དགུས་དུལ་བ་ཞེས་བྱ་བ་དང༌། རང་གི་ཆོས་ཉིད་
གྲགས་པ་ཞེས་བྱ་བ་སྟེ། དེ་དང་རྗེས་སུ་མཐུན་པའི་ཕྱིར་རོ། །རབ་ཏུ་ཞི་བས་བརྒྱན་པ་ཞེས་བྱ་བ་ནི་གང་གོང་དུ་བསྟན་པའི་ལང་ཚོའི་ཚེ་ཡང་ཞི་ཞིང་ཆོས་བཟང་བས་ཞེས་བྱ་བ་དེ་དང་རྗེས་སུ་མཐུན་པའི་ཚིག་གོ །ཁྱོད་ཀྱི་ཤེས་རབ་ཅེས་བྱ་བ་ནི་གང་གོང་དུ་བསྟན་པའི། ཐོས་པ་ལྡོབ་ཅིང་འཛིན་གསལ་དང༌། །ཞེས་བྱ་བ་ཡིན་ཏེ། དེ་དང་རྗེས་སུ་མཐུན་པའི་ཚིག་གོ །རང་གི་ཆོས་ཉིད་ལམ་ཡིན་པས་རང་གི་ཆོས་ལམ་སྟེ། རང་གི་ཆོས་ཀྱི་བདེ་འགྲོ་ཐོབ་པར་བྱེད་པ་ནི་ཆོས་ཡིན་ནོ། །དཀའ་ཐུབ་ཅེས་སྨོས་པས་ནི་ངོ་ཚ་ཤེས་པ་དང་ཁྲེལ་ཡོད་པ་གཉིས་གཟུང་ངོ༌། །ཐོས་པ་དང་ཤེས་པ་སྨོས་པས་ནི་སེམས་ལས་བྱུང་བ་ལྷན་ཅིག་སྐྱེས་པའི་ཤེས་རབ་གཟུང་སྟེ། འདི་དག་གིས་ནི་བདག་ལ་ཕན་པའི་ཐབས་བསྟན་ཏོ། །དགེ་བ་རྣམས་ཞེས་བྱ་བ་འདིས་ནི་གཞན་ལ་ཕན་པ་སྒྲུབ་པ་རྣམས་ནི་ཕོངས་པར་གྱུར་ཀྱང་འགྱུར་བ་མེད་པར་བསྟན་ཏོ། །ཡང་ན་ཁྲེལ་ཡོད་པ་ཞེས་བྱ་བ་བསྟན་པ་ལས་ངོ་ཚ་ཤེས་པ་དང་ཁྲེལ་ཡོད་པའི་དབང་དུ་བྱས་པ་ཡིན་པས། དེས་ན་ཁྲེལ་ཡོད་པ་ཡང་མི་བརྗོད་དེ་གྲུབ་ཟིན་པའི་ཕྱིར་རོ། །རྣམ་པར་གྲགས་པ་ནི་མཛེས་པར་སྤྱོད་པ་དང༌། ལེགས་པར་སྦྱོར་བ་སྟེ། ཐོས་པ་དོན་དང་ལྡན་པའོ། །ལེགས་པར་སྤྱོད་པ་སྤྱད་པའི་ཕྱིར་ཐོས་པ་གཟུང་སྟེ། དེ་ལ་ལེགས་པར་སྤྱོད་པ་ཡིན་པས་ཐོས་པ་དོན་དང་ལྡན་པ་སྟེ། དེ་འབྲས་བུ་དང་བཅས་པའོ། །ཐོས་པ་དེ་ཡང་ང་ཡི་འབད་པས་ལེགས་པར་འབྱུང་བ་སྟེ། དེ་ག་ལས་ཤེ་ན། དོན་ཡོད་པ་ལས་ཏེ། དེས་ན་འདི་ལས་འབྱུང་བའོ། །བདེ་བ་འབྱུང་བ་ནི་ལེགས་པར་འབྱུང་བའོ། །དེའི་ཕྱིར་འབད་པའི་དོན་ཡོད་པ་ཡིན་ཏེ། འབྲས་བུ་དང་བཅས་པ་ཉིད་པས་ངལ་བ་དོན་ཡོད་པ་ཉིད་དོ། །བདག་ཉིད་ངོ་ཚ་བ་ཉིད་ཀྱིས་ཞེས་བྱ་བ་གང་གི་ཕྱིར་འཛེམ་པ་ཞེས་བྱ་བའི་དོན་དེ་ཉིད་འཇིག་རྟེན་གྱི་དབང་དུ་བྱས་པ་ཉིད་ཀྱིས་ཁྲེལ་ཡོད་པ་ཡང་དེ་ཉིད་ཡིན་ཏེ། ཁྲེལ་ཡོད་པ་བསྟན་པ་ནི་འདི་ལྟར། སྡིག་པའི་ལས་རྣམས་བྱེད་པ་ལ། །ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་བསྟན་ཏོ། །བདག་ཉིད་ཀྱི་ངོ་ཚ་ཤེས་པ་ཉིད་སྨས་པ། བདག་གིས་གང་
ན་སྟོང་པ་ནི། །ཞེས་བྱ་བ་ལ་སོགས་པ་ཚིགས་བཅད་གསུམ་གྱིས་ཀྱང་དེ་བསྟན་པ་ཡིན་ནོ། །སློབ་དཔོན་དཔའ་བོས་མཛད་པའི་སྐྱེས་རབས་རྒྱ་ཆེར་བཤད་པ་ལས་བྲམ་ཟེའི་སྐྱེས་པའི་རབས་སོ།། །སྡུག་བསྔལ་མི་བཟོད་པས་གདུངས་བས།། ཞེས་བྱ་བ་ལ། འདིར་སྡུག་བསྔལ་ནི་རྣམ་པར་འགྱུར་བའི་སྡུག་བསྔལ་ལ་གསུངས་པར་དགོངས་པ་ཡིན་ཏེ། རྣམ་པར་འགྱུར་བའི་སྡུག་བསྔལ་ཡང་འདོད་ཆགས་ལས་སྐྱེས་པ་སྟེ། འདོད་པའི་འདོད་ཆགས་ཀྱིས་རྣམ་པར་འགྱུར་བའི་སེམས་སོ་ཞེས་བྱ་བའི་ཚིག་གིས་སོ།། ངན་པ་རྣམས་ཀྱི་ལམ་ཡིན་པས་ངན་པའི་ལམ་སྟེ། དེར་འཇུག་པར་མི་འགྱུར་བའོ། །བདེན་པ་དང༌། གཏོང་པ་དང༌། ཉེ་བར་ཞི་བ་དང༌། ཤེས་རབ་ཅེས་སྨོས་པ་ནི་བྱིན་རླབས་བཞི་གཟུང་ངོ༌། དེ་དག་སྨོས་པས་ནི་ཕ་རོལ་ཏུ་ཕྱིན་པ་དྲུག་གཟུང་སྟེ། ཅི་ལྟར་ཞེ་ན། བདེན་པ་སྨོས་པས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གཟུང་སྟེ། བདེན་པ་གཙོ་བོའི་ཕྱིར་རོ། །ཚུལ་ཁྲིམས་གཟུང་ཡང་ཚུལ་ཁྲིམས་ལ་དྲན་པ་ཉམས་པར་གྱུར་ན་དེའི་ཉེས་པས་ལྟུང་བར་འགྱུར་ཏེ། །བདེན་པ་མེད་པས་ཆོས་བཞིན་དུ་གསོ་བར་མི་ནུས་ཏེ། ཚུལ་ཁྲིམས་ཀྱིས་ཕོངས་པར་འགྱུར་རོ། །དེས་ན་དེ་གཙོ་བོ་ཡིན་ནོ། །གཏོང་པ་སྨོས་པས་ནི་སྦྱིན་པའི་ཕ་རོལ་ཏུ་ཕྱིན་པ་གཟུང་ངོ༌། །ཉེས་པར་ཞི་བ་སྨོས་པས་ནི་བཟོད་པ་དང་བསམ་གཏན་གྱི་ཕ་རོལ་ཏུ་ཕྱིན་པ་གཟུང་ངོ༌། །ཤེས་རབ་སྨོས་པས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གཟུང་ངོ༌།། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་ཐམས་ཅད་ཀྱི་རྗེས་སུ་འབྲང་པའི་ཕྱིར་མ་སྨོས་ཀྱང་གཟུང་བར་བྱའོ།། །སོགས་པའི་སྒྲས་ནི་བསྡུ་བའི་དངོས་པོ་ལ་སོགས་པ་ཐེག་པ་ཆེན་པོ་ལས་བཤད་པ་གཞན་དག་ཀྱང་མ་ལུས་པར་གཟུང་ངོ༌། །ཡོན་ཏན་ཁྱད་པར་ཅན་ཞེས་བྱང་ཆུབ་སེམས་དཔའི་ཡོན་ཏན་ཁྱད་པར་ཅན་དག་ཀྱང་བསྟན་ཏོ། །མངོན་སུམ་གྱི་སྒྲ་ནི་ཆོས་དང་འདུལ་བ་གཉིས་དང་སྦྱར་རོ། །སྐྱེ་དགུ་རྣམས་ལ་ཕ་དང་འདྲ་བར་ཕན་འདོགས་པར་བྱེད་དོ་ཞེས་བྱ་བ་དེ་ཡང་ཇི་ལྟར་སྐྱེ་དགུ་རྣམས་ལ་ཕ་དང་འདྲ་བར་ཕན་འདོགས་པར་གྱུར་ཅེ་ན། དེ་ཉིད་བསྟན་
པའི་ཕྱིར། ཉེས་པར་སྤྱོད་ལས་རྣམ་པར་བཟློག་པ་དང༌། །ཞེས་བྱ་བའི་ཚིགས་བཅད་བརྩམས་པ་ཡིན་ནོ། །རྣམ་པར་བཟློག་པ་ནི་རྣམ་པར་འདུལ་བའོ། །འཇིག་རྟེན་གར་ཞེས་བྱ་བ་ནི་འཇིག་རྟེན་འདི་དང་འཇིག་རྟེན་ཕ་རོལ་ཏུ་ཡོན་ཏན་དང་སྐྱོན་ལ་འཇུག་པ་དང་ལྡོག་པའི་རྒྱུར་གྱུར་པ་སྟེ། གཅིག་ན་ཡང་ཕ་དང་འདྲ་པ་སྟེ། ཆོས་མངོན་སུམ་དུ་གྱུར་པ་བཞིན་དུའོ། །སྐྱེ་དགུ་རྣམས་ལ་ཕ་དང་འདྲ་བར་ཕན་འདོགས་པར་གྱུར་ཏེ་ཞེས་བྱ་བའི་དབང་དུ་བྱས་ནས། ནང་གི་མི་དང་འདྲ་བར་སྙོམས་ཞེས་བྱ་བའི་ཚིགས་བཅད་ཡིན་ཏེ། ནང་གི་མི་དང་ཕྱིའི་མི་ལ་ཆོས་དང་རྗེས་སུ་མཐུན་པའི་ཕྱིར་རོ། །བཀའ་ཁྲིམས་ན་ཆོས་མ་ཡིན་པའི་ལམ་གཅོད་པར་བྱེད་པ་ཡང་ཡིན་ཏེ། མངོན་སུམ་དུ་ཆོས་བཞིན་དུ་གྱུར་པ་ཡིན་ནོ། །ཐེམ་སྐས་རིམ་པ་བཞིན་ཞེས་བྱ་བ་ནི། མངོན་པར་མཐོ་བ་ཡང་དག་པར་ཐོབ་པ་ཡིན་ནོ། །ཚིག་སྔ་མ་ནི་མཐོང་བའི་ཆོས་ཀྱི་ཡོན་ཏན་དང་ཉེས་པ་ལས་འཇུག་པ་དང༌། ལྡོག་པའི་རྒྱུས་ཕ་དང་འདྲ་བར་སྟོན་པ་ཡིན་ནོ། །འདིས་ནི་འཇིག་རྟེན་ཕ་རོལ་གྱི་ཆོས་དང་ཆོས་མ་ཡིན་པ་ལ་འཇུག་པ་དང༌། ལྡོག་པའི་རྒྱུས་མངོན་སུམ་ཆོས་དང་འདྲ་བར་བསྟན་པ་ཡིན་ནོ། །མངོན་སུམ་འདུལ་བ་བཞིན་དུ་སྐྱེ་དགུ་རྣམས་ལ་ཕན་འདོགས་པར་གྱུར་ཏོ་ཞེས་བསྟན་པ་དེའི་དབང་དུ་བྱས་ནས། །འཇིག་རྟེན་ཕན་པ་ཆོས་ལྡན་དེ་མཐོང་ནས། །ཞེས་བྱ་བའི་ཚིགས་བཅད་ཡིན་ཏེ། ལྡན་པ་ནི་དེ་དང་ལྡན་བས་ན་ལྡན་པའོ། །ཆོས་དང་ལྡན་པའི་ཕན་པ་གང་ཡིན་པ་དེ་ནི་འཇིག་རྟེན་པའོ། །ཆོས་དང་ལྡན་པ་ནི་རྩེ་གཅིག་ཏུ་སྤྱོད་པ་སྟེ། ཆོས་ཉིད་འབའ་ཞིག་སྤྱོད་ཅེས་པའོ། །ཆོས་ཀྱི་ལམ་ནི་ཆོས་ཀྱི་ལམ་ཉིད་དོ། །ཆོས་ཀྱི་ལམ་འདུལ་བ་སྟེ། དེས་བསྐྱེད་པའི་ཆོས་ཀྱི་ལམ་གང་ཐོབ་པའོ། །ཆོས་དེ་ལ་གནོད་པ་བྱས་པ་ནི་འདུལ་བ་ལ་གནོད་པ་བྱས་པས་ན་ཆོས་ལ་གནོད་པ་བྱས་པའོ། །ཇི་ལྟར་བསྟན་པའི་རིམ་པ་བཞིན་དུ་ངེས་པར་བསྟན་པ་སྟེ། གསུམ་པོ་འདི་དག་གིས་ནི་འཇིག་རྟེན་འདི་དང་ཕ་རོལ་གཉི་ག་ལ་ཕན་པར་འཇུག་པའི་དབང་དུ་བྱས་པ་སྟེ། སྔར་བསྟན་པ་
བཞིན་དུ་རིམ་པས་དགོད་དོ། །དཔལ་མོ་གཟུགས་དང་ལྡན་པ་བཞིན། །ཞེས་བྱ་བ་ནི་གཟུགས་གཟི་མདངས་མཆོག་དང་ལྡན་པས་སོ། །དགའ་བ་མངོན་སུམ་དུ་གྱུར་པ་བཞིན་ཞེས་བྱ་བ་ནི་བལྟ་ན་རབ་ཏུ་སྡུག་པས་སོ། །ལྷ་མོ་བཞིན་དུ་ཞེས་བྱ་བ་ནི་བུད་མེད་རིན་པོ་ཆེར་གྱུར་པས་སོ། །རྒྱུ་འདི་གསུམ་གྱིས་ནི་གཟུགས་མཛེས་ཤིང་བཟང་བར་བལྟའོ། །མཐོང་ན་ཡིད་ནི་འཕྲོག་པ་མིའི་རིགས་ལས་ཡང་དག་པར་འདས་པ་སྟེ། བུད་མེད་རིན་པོ་ཆེར་བཀུར་བ་བཞིན་དུ་གྱུར་པར་བཤད་དོ། །ཇི་སྲིད་ཅེས་བྱ་བ་འདིས་དུས་དང་ཡུལ་གཟུང་སྟེ། ཁྱད་པར་སེམས་དང་འབྲེལ་པར་སྟོན་པ་ཉིད་དེ། དེའི་ལུས་དུས་དང་ཡུལ་གང་ལ་མཐོང་བར་གྱུར་པ་དེ་སྲིད་ཀྱི་དུས་དང༌། དེ་སྲིད་ཀྱི་ཡུལ་ལྟ་བ་ཟློག་པར་ནུས་པ་མེད་པའོ། །དེ་བས་ན་ཞེས་བྱ་བ་ནི་གང་མཐོང་བ་རྣམས་ཀྱི་ལྟ་བཟློག་པར་མི་ནུས་པའི་རྒྱུར་གྱུར་པས་སོ། །མྱོས་པར་བྱེད་པས་ན་མྱོས་བྱེད་མ་ཞེས་བྱ་བར་བཏགས་ཏེ་མིང་གི་ཡོན་ཏན་བསྟན་པའོ། །འདས་པ་ནི་རིགས་པར་གསོལ་བའོ། །ཇི་ལྟར་གསོལ་ཞེ་ན། དེ་ཉིད་བསྟན་པའི་ཕྱིར་ལྷ་ཁྱོད་ཀྱི་ཡུལ་ཞེས་བྱ་བ་ལ་སོགས་པ་ཡིན་ནོ། །ན་ཞེས་བྱ་བ་ནི་བུད་མེད་རིན་པོ་ཆེ་ཡིན་པའི་ཕྱིར་རོ། །མིག་དང་ཡིད་ལ་དབང་ཡང་མེད་པར་གྱུར། །ཞེས་བྱ་བ་ནི་དེའི་གདོང་དུ་མིག་མི་འཛུམས་པར་ལྟ་བས་མིག་ལ་དབང་མེད་པའོ། །ཡིད་ལ་དབང་ཡང་མེད་པར་གྱུར་པ་ནི་ཆོས་ཀྱི་རྗེས་སུ་འབྲང་བའི་བག་ཆགས་ཕྲོགས་པ་ཡིན་ཏེ། མི་བརྟན་པར་གྱུར་པ་ཡིན་པའི་ཕྱིར་རོ། །ཇི་ལྟ་བུ་ཞེ་ན། མིག་ལ་དབང་བྱེད་པས་ལུས་མཐོང་བར་གྱུར་པ་དེ་སྲིད་ཀྱི་དུས་དང་ཡུལ་ཡིད་ལ་དབང་བྱེད་པར་གྱུར་པ་སྟེ། འདོད་པས་མྱོས་ནས་འདུ་ཤེས་ཉམས་པར་གྱུར་པའོ། །མིག་ལམ་དུ་མི་སྣང་བར་གྱུར་པ་ཞེས་བྱ་བ་ནི་སྔར་བཤད་པ་དང་རྗེས་སུ་མཐུན་པ་ཡིན་ཏེ། འདོད་ཆགས་མ་བྲལ་བ་ཡིས་ཞེས་བྱ་བ་དེའི་ཚིགས་བཅད་ཀྱིས་སོ། །ཆོས་དང་སྲིད་ནི་ཆོས་དང་སྲིད་དོ། །སྲིད་ཀྱི་དོན་ཡང་ཡིན་ལ་སྒྲུབ་པ་ཡང་ཡིན་པས་སྲིད་ཀྱི་དོན་སྒྲུབ་པའོ། །ཆོས་དང་སྲིད་དེ་གཉིས་ཀྱི་
དོན་སྒྲུབ་པ་ཞེས་བྱ་བ་ལ། སྲིད་ཀྱི་དོན་སྒྲུབ་པ་ནི་ནོར་བསྒྲུབ་པ་ཞེས་བྱ་བའི་དོན་ཏེ། ནོར་སྒྲུབ་པ་ནི་མ་ཐོབ་པ་ཐོབ་པར་བྱ་བ་དང༌། ཐོབ་པ་ཡོངས་སུ་བསྲུང་བ་དང༌། བསྲུངས་པ་རབ་ཏུ་འཕེལ་བར་བྱའོ། །ཆོས་ཀྱི་དོན་སྒྲུབ་པ་ནི་སྟེགས་ལམ་རབ་ཏུ་བསྒྲུབ་པའོ། །རྒྱལ་པོའི་དོན་སྒྲུབ་པ་རྣམས་ཞེས་བྱ་བ་ནི་རྒྱལ་པོས་སྒྲུབ་པའི་དོན་ཏེ། བཞི་པོ་དེ་དག་ནི་རྒྱལ་པོའི་དོན་སྒྲུབ་པའོ། །སྒྲུབ་པ་དེའི་དུས་ལས་ཡོལ་བ་ནི་འདས་པའོ། །ཕན་པ་དང་བདེ་བ་ནི་ཕན་པ་དང་བདེ་བའོ། །འབྱུང་བ་ནི་སྐྱེ་བ་སྟེ། དེ་ནི་ལམ་ནི་སྐྱེ་བའི་ལམ་ཡིན་པས་ཕན་པ་དང་བདེ་བ་འབྱུང་བའི་ལམ་མོ། །རྒྱལ་པོའི་དོན་སྒྲུབ་པ་ལས་ཡོལ་བ་དེ་ནི་འབངས་རྣམས་ལ་ཕན་པ་དང་བདེ་བའི་ལམ་ཆད་དེ་ཕུང་བར་འགྱུར་ཞེས་བསམས་པའོ། །འདི་ནི་མཐོང་བ་ཙམ་གྱིས་ནི། །ཞེས་བྱ་བ་ནི་གང་ཡུལ་མངོན་སུམ་དུ་གྱུར་པས་ཀྱང་སྟེ། འདིས་ནི་དབང་པོའི་སྒོ་བསྡམས་པ་བསྟན་ཏོ། །དྲང་སྲོང་རྣམས་ཀྱང་ཞེས་བྱ་བ་ནི་ཉོན་མོངས་པ་ཐུབ་པའོ། །ཉོན་མོངས་པའི་བག་ཆགས་མ་སྤངས་པ་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པ་རྒྱུ་གསུམ་པོ་ཚང་བས་ནི་ཉོན་མོངས་པ་རྣམས་དུས་རེས་འགའ་སྐྱེ་བར་འགྱུར་ཏེ། ཡུལ་རྒྱ་ཆེར་མངོན་སུམ་དུ་གྱུར་པ་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་དང༌། བག་ཆགས་མ་སྤངས་པ་སྟེ། དེའི་ཕྱིར་བཤད་པ། ཕྲ་རྒྱས་སྤངས་པ་མ་ཡིན་དང༌། །ཡུལ་འདི་ཉེ་བར་གནས་པ་དང༌། །ཚུལ་བཞིན་མ་ཡིན་ཡིད་བྱེད་པས། །ཉོན་མོངས་རྒྱུ་ནི་ཚང་བ་ཡིན། །ཞེས་གསུངས་སོ། །འདོད་ཆགས་ཅན་གྱི་མིག་ལྟ་ཞེས་བྱ་བའི་ཚིགས་བཅད་ཕྱེད་ཀྱིས་གོང་མ་ལས་བཟློག་པ་བསྟན་ཏོ། །འདོད་ཆགས་ཅན་གྱི་མིག་ཅེས་པས་ནི་དབང་པོའི་སྒོ་མ་བསྡམས་པ་དང༌། བག་ཆགས་ཡང་དག་པར་མ་སྤངས་པ་ཉིད་དོ། །རྒྱལ་པོ་ཞེས་བྱ་བ་འདིས་ཚུལ་བཞིན་ཡིད་ལ་བྱད་པ་ཡིན་ཏེ། རང་དབང་དུ་གྱུར་པས་ཚུལ་བཞིན་ཡིད་ལ་མི་བྱེད་པ་མི་ལྡོག་པའོ། །བདེ་བར་གནས་པ་ཞེས་བྱ་བ་འདིས་ནི་ཡུལ་ཉེ་བར་གནས་པ་ཡིན་ཏེ། དེ་ལྟར་ཉོན་མོངས་པའི་རྒྱུ་ཚང་བར་གྱུར་པས་སོ། །ཉོན་མོངས་
པ་རྣམས་ནི་སེམས་རང་དབང་དུ་གྱུར་པ་ལས་ཀྱང་འབྱུང་སྟེ། སྔར་བསྟན་པ་ཐམས་ཅད་འདི་ལས་འབྱུང་བར་བསྟན་ཏོ། །ཡང་ན་དོན་གཞན་དུ་ན་ཉོན་མོངས་པ་རྣམས་ནི་རྒྱུ་བཞིས་སྐྱེ་བར་འགྱུར་ཏེ། དབང་པོའི་སྒོ་མ་བསྡམས་པ་དང༌། དེ་ནི་ཡུལ་མངོན་དུ་གྱུར་པ་དང༌། ཡིད་ལ་བྱེད་པས་དེ་ལ་ལྟ་བ་དང༌། རྒས་པས་ནི་མི་ནུས་པ་སྟེ། དེ་ལ་ནུས་པ་མ་ཚང་བས་སོ། །ནང་ཡང་གཟུང་སྟེ། དེའི་རང་བཞིན་ཉིད་དོ། །གཞན་དབང་ཡང་རང་ལ་ནུས་པ་མེད་པའི་ཕྱིར་རོ། །དེ་ལ་འདོད་ཆགས་ཅན་གྱི་མིག་གིས་ལྟ་ཞེས་བྱ་བའི་སྐབས་ཀྱིས་ནི་དེ་ལས་བཟློག་པ་ལ་ཡང་མི་འབྱུང་བའི་ཕྱིར་རོ། །སྐབས་ཞིག་ཏུ་ཞེས་བྱ་བ་ནི་གནས་སྐབས་ཀྱི་དབང་དུ་བྱས་པའོ། །གྲགས་པ་མེད་པ་བྱེད་པ་དང༌། རང་གི་དགེ་བ་ལོག་པར་སྤྱོད་པའི་སྐྱོན་གྱིས་འབྱོར་པ་མེད་པར་བྱེད་པ་སྟེ། ཁྱིམ་ཐབ་ཀྱི་དགེ་མཚན་ངན་པས་ཕུན་སུམ་ཚོགས་པའི་བགེགས་སུ་གྱུར་པས་སོ། །སྨད་པ་ནི་མཚན་དང་བྲལ་བའོ། །མཛེས་པ་མེད་པར་བྱེད་པ་ནི་ཟླ་བ་སྤྲིན་རུམ་དུ་ནུབ་པས་གནམ་སའི་བྱེ་བྲག་མི་མཛེས་པར་བྱེད་པ་ཡིན་ཏེ། གནམ་དང་ས་གཉིས་ཀྱི་བྱེ་བྲག་མེད་པར་བྱེད་པའོ། །ངའི་རིགས་དང་མཐུན་པ་མ་ཡིན་ནོ་ཞེས་བྱ་བ་ནི་དེའི་མཚན་ངན་པའི་ཕྱིར་རོ། །རེ་ཞིག་རིགས་དང་མཐུན་པར་འགྱུར་རོ་ཞེས་བསམས་ཏེ་དེ་ཉིད་ཀྱི་ཁྱད་པར་བསྟན་པའི་ཕྱིར་རིམ་གྱིས་ཞེས་བྱ་བ་ནི་དུས་ཕྱི་ཞིག་ན་ཞེས་བྱ་བའི་དོན་ཏེ། བློན་བོ་དེ་ལ་ཕྱིན་མ་ཐག་པ་ནི་མ་ཡིན་ཏེ། དེ་བས་ན་འདི་ལྟར་སྟོན་པ་སྟེ། དེའི་ཆེ་ནི་རྒྱལ་པོས་མཐོང་བའི་ལམ་གྱི་གནས་སྐབས་ཀྱང་མེད་དེ། བག་མ་སར་པར་གྱུར་པའི་ཕྱིར་རོ། །བདག་རང་གི་གྲོང་ཁྱེར་མཆོག་ཅེས་བྱ་བ་ནི་རྒྱལ་པོ་དེའི་ཀུ་མུ་ཏའི་དགའ་སྟོན་ལྟ་བ་ནི་སྐྱོན་མེད་པ་ཡིན་ཏེ། དེ་ལྟ་བའི་ཕྱིར་རོ། །ཀུ་མུ་ཏའི་དགའ་སྟོན་མ་ཡིན་པ་གཞན་དུ་ན་བརྐམ་ཆགས་ཅན་དུ་འགྱུར་ཏེ། དེ་ཡོངས་སུ་བཅད་པའི་ཕྱིར་མཆོག་ཅེས་སྨོས་སོ། །བལྟས་རུང་བའི་ཕྱིར་ནི་ཀུ་མུ་ཏའི་དགའ་སྟོན་བསྟན་ཏོ། །ཕྱག་དར་བྱས་ཤིང་ཆག་ཆག་བཏབ་པ་ཞེས་བྱ་བ་ལ་སོགས་པའི་ཚིག་རྐྱང་པས་ནི་མིག་དང༌། རྣ་བ་
དང། སྣའི་དབང་པོའི་ཡུལ་ཕུན་སུམ་ཚོགས་པ་སྟོན་ཏེ། གྲོང་ཁྱེར་གྱི་མཆོག་དེའི་མེ་ཏོག་ཀུ་མུ་ཏ་དགའ་སྟོན་བྱེད་པ་ལས་ཏེ། ཇི་ལྟར་རིགས་པ་བཞིན་དུ་སྦྱར་བར་བྱའོ། །མཚན་ངན་པ་མཐོང་བ་ནི་མཚན་ངན་པ་མཐོང་བའོ། །དེས་ན་དྲན་པ་རྣམ་པར་གཡོ་བ་གང་ཡིན་པ་དེ་ནི་མཚན་ངན་པ་མཐོང་ན་འདིས་དྲན་པ་རྣམ་པར་གཡོ་བའོ། །ཕོ་བྲང་སླས་གྱི་ནང་ན་ན་ཆུང་བཟང་མོ་ཞེས་བྱ་བ་དང༌། བརྟན་པའི་ཡོན་ཏན་ཆེ་ལ་ངོ་ཚ་ཤེས། །ཞེས་བྱ་བའི་ཚིགས་བཅད་འདི་གཉིས་ཀྱི་བསྡུས་པའི་དོན་ནི་བྱང་ཆུབ་སེམས་དཔའ་དེ་བདག་གི་ཕུན་སུམ་ཚོགས་པ་དང་ལྡན་པ་ཡིན་ཡང་ཕུན་སུམ་ཚོགས་པ་དེ་དག་འཇིག་པའི་རྒྱུ་ཉིད་དུ་དེའི་གཟུགས་ཕུན་སུམ་ཚོགས་པ་བསྟན་ཏོ། །ཚིམ་པར་ཞེས་བྱ་བ་ནི་ཇི་ལྟར་འདོད་པའོ། །ཕོ་བྲང་སླས་ཀྱི་ནང་ནན་ཆུང་བཟང་མོའི་ཞེས་བྱ་བ་འདིས་ནི་འཇིག་རྟེན་པ་རྣམས་ལས་བུད་མེད་དེ་ཁྱད་པར་དུ་བསྟན་ཏོ། །ལུས་བཟང་བ་དང་ཆས་པ་ནི་ལུས་བཟང་ཆས་སོ། །ལུས་བཟང་ཞེས་སྨོས་པས་ནི་མདོག་དང་དབྱིབས་ཕུན་སུམ་ཚོགས་པ་གཟུང་ངོ༌། །ཆས་པ་ཞེས་སྨོས་པས་ནི་སྤྱོད་པ་དང་ཉེ་བར་སྤྱོད་པ་གཟུང་ངོ༌། །ཆགས་པ་ནི་རྣམ་པ་བཞི་སྟེ་ཁ་དོག་གི་ཆགས་པ་དང་དབྱིབས་ཀྱི་ཆགས་པ་དང་ཉེ་བར་སྤྱོད་པའི་ཆགས་པ་དང༌། རག་པའི་ཆགས་པ་སྟེ། འདིར་རེག་པའི་འདོད་ཆགས་མ་སྨོས་པ་ནི་དེར་ཡུལ་དུ་མ་གྱུར་པས་སོ། །ཁ་དོག་དང་དབྱིབས་དང༌། སྤྱོད་ཡུལ་དུ་གྱུར་པའི་ཕྱིར་མཐོང་གྱུར་ཅིང་ཞེས་བྱ་བ་ཡིན་ཏེ། མཐོང་བར་གྱུར་ཀྱང་ཞེས་བྱ་བའི་ཚིགས་བཅད་ཕྱེད་པོ་དེས་ནི་བུད་མེད་ཀྱི་ལོངས་སྤྱོད་འཇིག་རྟེན་པ་ལས་ཁྱད་པར་དུ་གྱུར་པ་དང་ལྡན་པ་ཡིན་ཡང་བརྟན་པ་ཉམས་པར་ནུས་པ་སྟེ། དེ་དང་རྗེས་སུ་མཐུན་པར་བསྟན་པ་ཡིན་ནོ། །མ་འཕྱར་བ་ནི་མི་གཡོ་བ་སྟེ། མ་འཕྱར་བའི་སེམས་ཀྱི་ཡུལ་དུ་གྱུར་པའི་ཕྱིར་མ་འཕྱར་བ་སྟེ། འཕྱར་བ་མེད་པ་ནི་མ་འཕྱར་བའོ། །ཆོས་ཀྱི་ལམ་ནི་ཆོས་ལམ་མོ། །འདིར་ཆོས་ནི་མངོན་པར་མཐོ་བ་སྟེ་དེའི་ལམ་མོ། དབང་པོ་ཐུལ་བ་ནི་འཇིག་རྟེན་པ་སྟེ། འདི་ནི་ཆོས་གཙོ་བོར་བསྟན་ཏོ། །བརྩོན་གྱུར་ཅིང་ཞེས་བྱ་བ་ནི་འབད་བ་དང་ལྡན་པ་
སྟེ། བག་ཡོད་པ་ཞེས་བྱ་བའི་དོན་ཏོ། །དབང་པོ་ཐུལ་བར་གྱུར་པ་ཞེས་བྱ་བ་འདིས་ནི་ལུགས་ཀྱི་བསྟན་བཅོས་ཀྱི་རྗེས་སུ་འཇུག་པའི་ཚུལ་གཅེར་བསྟན་པ་ཡིན་ཏེ། གང་གི་ཕྱིར་བསྟན་བཅོས་ཐམས་ཅད་ཀྱི་ནང་ན་དབང་པོ་ཐུལ་བར་བྱེད་པ་ཞེས་བྱ་བའི་ཚིག་འདིས་སོ། །བསྟན་པའི་ཡོན་ཏན་ཆེ་ལ་ངོ་ཚ་ཤེས། །ཞེས་བྱ་བ་འདིས་ནི་བདག་གི་དབང་དུ་བྱས་ཏེ། ངོ་ཚ་ཤེས་པ་དང་ལྡན་པ་དང༌། གཞན་གྱི་དབང་དུ་བྱས་ནས་ཁྲེལ་ཡོད་པ་སྟེ། དེ་གཉིས་ཀྱིས་ནི་འཇིག་རྟེན་སྐྱོང་བའི་ཆོས་དང་ལྡན་པ་ཡིན་ཏེ། སྔར་བསྟན་པའི་འཁོར་གསུམ་ལས་མི་འདའ་བ་དང༌། ཐེམ་སྐས་སུ་གྱུར་པ་ནི་ཆོས་འདི་གཉིས་སོ། །གཞན་གྱི་བུད་མེད་ལྟ་བ་མ་སྨོས་ཀྱང༌། །ཞེས་བྱ་བ་ནི་སྐྱེ་བ་སྔ་མ་ལ་ཚུལ་ཁྲིམས་ལ་གོམས་པར་བསྟན་ཏེ། འདིས་ནི་རྒྱུ་ཕུན་སུམ་ཚོགས་བར་བསྟན་ཏོ། །འདོད་ཆགས་ལངས་ཤིང་ཡ་མཚན་ཆེ་བར་གྱུར་པ་གང་ཡིན་པ་དེ་ནི་འདོད་ཆགས་ལངས་ཤིང་ཡ་མཚན་ཆེ་བ་སྟེ། འདིས་ནི་ངོ་ཚ་ཉམས་པར་བསྟན་ཏོ། །བུད་མེད་དེ་ལ་ཞེས་བྱ་བ་ནི་ཕོ་བྲང་སླས་ཀྱི་ན་ཆུང་ཞེས་བྱ་བ་དག་ཀྱང་ཡོད་ཅིང་གཞན་གྱི་བུད་མེད་ལྟ་ལ་མ་སྨོས་ཀྱང་ཞེས་བྱ་བ་ལ་སོགས་པ་ཡིན་ཡང་མིག་གིས་རིང་དུ་བལྟས་པ་སྟེ། འདིས་ནི་ཁྲེལ་ཡོད་པ་ཉམས་པར་བསྟན་ཏོ། །འདི་ཅི་ཀུ་མུ་ཏ་ཡིན་ནམ་ཞེས་བྱ་བའི་ཚིགས་བཅད་འདིས་བསྟན་པ་ནི་འདོད་ཆགས་ཀྱི་གནས་སྐབས་བཅུ་ལས་འདོད་ཆགས་ཀྱི་གནས་སྐབས་དང་པོ་བསྟན་པ་ཡིན་ཏེ། མི་ལུས་ལས་འདས་པའི་གཟུགས་ཡོད་པའི་ཕྱིར་རོ། །དེ་ལ་གནས་པའི་རྣམ་པ་དེ་ནི་དེ་ལྟར་གྱུར་པའོ། །སེམས་རྩེ་གཅིག་ཏུ་དམིགས་པ་ནི་རྩེ་གཅིག་པའོ། །དེ་ལ་རྩེ་གཅིག་ཏུ་གྱུར་པའི་སེམས་གང་ཡིན་པ་དེ་ནི་ད་ལ་སེམས་རྩེ་གཅིག་པའོ། །རེ་ཐག་ཆད་པའི་ཡིད་གང་ཡིན་པ་དེ་ནི་རེ་ཐག་བཅད་པའི་སེམས་སོ། །དེ་ལ་སེམས་ཆགས་པ་བཞིན་དུ་ཞེས་བྱ་བ་ནི་རྣམ་པར་ཆགས་པ་ལྡོག་བར་མ་གྱུར་ཏེ། འདོད་བཞིན་དུ་གཞན་གྱི་ཆུང་མ་ཡིན་ནོ་ཞེས་པས་སོ། །དོན་གྱི་རྗེས་སུ་འགྲོ་བ་ནི་དོན་དང་རྗེས་སུ་
མཐུན་པའོ། །སྙན་པ་དེ་དག་ནི་ཚིག་སྟེ་ཚིག་ཀྱང་སྙན་པའོ། །དོན་དང་རྗེས་སུ་མཐུན་པ་ཡིན་ལ་ཚིག་སྙན་པ་ཡང་ཡིན་པས་དོན་དང་རྗེས་སུ་མཐུན་ཞིང་ཚིག་སྙན་པའོ། །དོན་དང་རྗེས་སུ་མཐུན་པའི་ཚིག་གིས་འདི་ལྟར་བཏགས་པའི་མིང་གང་ཡིན་པ་དེ་ནི་དོན་དང་རྗེས་སུ་མཐུན་པའི་ཚིག་སྙན་མིང་དུ་བཏགས་པའོ། །མིང་དེ་གང་ཡིན་ཞེ་ན། མྱོས་བྱེད་མ་ཞེས་པའོ། །དོན་དང་རྗེས་སུ་མཐུན་པའི་ཚིག་ཉིད་བསྟན་པའི་ཕྱིར་སྨྲས་པ། བདག་ནི་མྱོས་པ་བཞིན་དུ་བྱེད། །ཅེས་བྱ་བ་ཡིན་ནོ། །དེ་ནི་བརྗེད་པར་བདག་འདོད་ན། །ཞེས་བྱ་བ་ནི་གཞན་གྱི་ཆུང་མ་ཡིན་པའི་ཕྱིར་རོ། །སེམས་ཀྱིས་མཐོང་བ་བཞིན་དུ་གྱུར། །ཞེས་བྱ་བ་ནི་དེའི་གཟུགས་ཕུན་སུམ་ཚོགས་པ་དང་འདོད་པས་དེ་ནི་བརྗེད་པར་བདག་འདོད་ན་མ་བརྗེད་པས་སོ། །བདག་གི་སེམས་ནི་དེ་ལ་གནས། །ཞེས་བྱ་བ་ནི་སེམས་ཀྱིས་མཐོང་བ་བཞིན་དུ་གྱུར་ཞེས་བྱ་བ་ཡིན་ཏེ། གང་གི་ཕྱིར་ཞེ་ན། སེམས་དེ་དེའི་དབང་དུ་གྱུར་པས་སོ། །དེའི་དབང་དུ་གྱུར་ཞེས་བྱ་བ་ནི་སེམས་དེའི་དབང་དུ་གྱུར་པ་སྟེ། དེ་ལྟར་བརྗེད་པར་འདོད་ཀྱང་མི་བརྗེད་པའི་རྒྱུ་དང༌། མི་མཐོང་བར་འདོད་ཀྱང་མཐོང་བའི་རྒྱུས་ཞེས་ཚིགས་བཅད་འོག་མ་ཕྱེད་ཉིད་བསྟན་ཏོ། །ཆུང་མ་ཡིན་བ་ལ་ཞེས་བྱ་བ་ནི་ཆུང་མའི་ཕྱིར་རོ། །བདག་ཀྱང་ཞེས་བྱ་བ་ནི་སྔར་བཤད་པའི་ཡོན་ཏན་གྱི་མཚན་ཉིད་དང་ལྡན་པར་བསྟན་པའོ། །དེ་ལྟར་མི་བརྟན་པ་ཞེས་བྱ་བ་ནི། །དེ་ནི་བརྗེད་པར་འདོད་པ་ལ། །སེམས་ཀྱིས་མཐོང་བ་བཞིན་དུ་གྱུར། །ཞེས་བྱ་བ་དེ་ཉིད་སྙེན་པར་བྱེད་པ་ཡིན་ནོ། །དེ་བས་ན་གོང་དུ་བཤད་པའི་རྒྱུ་དེ་དག་གིས་ངོ་ཚ་བ་དང་བྲལ་བཞིན་དུ་ཞེས་བྱ་བ་ནི་དེ་མི་བརྟན་པ་ཉིད་ཡིན་ཏེ། བག་ཆག་ས་ཞེན་པ་ཉིད་དུ་སྟོན་ཏོ། །གཉིད་དང་བྲལ་བ་ཞེས་བྱ་བ་ནི་དེའི་མི་བརྟན་པ་ཡིན་ཏེ། ཤས་ཆེར་སྟོན་པའོ། །སེམས་ཀྱིས་མཐོང་བ་བཞིན་དུ་ཞེས་བྱ་བ་ནི་གང་གོང་དུ་བསྟན་པ་ཡིན་ཏེ། ཇི་ལྟར་མཐོང་བ་ཡིན་ཞེ་ན། དེ་ཉིད་བསྟན་པའི་ཕྱིར། དེའི་ལུས་བཟང་ཆས་ཤིང་ཞེས་བྱ་བའི་ཚིགས་བཅད་ཡིན་ན། །ལུས་བཟང་ཞེས་བྱ་བ་སྨོས་པས་ནི་སྔ་མ་བཞིན་དུ་མདོག་དང་དབྱིབས་གཉིས་གཟུང་ངོ༌། །ཆས་ཤིང་འགྲེང་དང་ལྟ་བ་ལ། །ཞེས་བྱ་བ་
ནི་སྔར་བཤད་པའི་ཉེ་བར་སྤྱོད་པའི་དབྱེ་བ་བསྟན་པའི་ཕྱིར་རོ། །ཆགས་པས་མ་གཡོས་པའི་ཡིད་གང་ཡིན་པ་དེ་ནི་ཆགས་པས་རྩེ་གཅིག་པའི་ཡིད་དུ་གྱུར་པའོ། །དེ་བས་ན་གཞན་དོན་སྒྲུབ་པ་དེའི་གོ་རིམས་ནི་རིམ་གྱིས་ཡིན་ཏེ། དེའི་སྦྲོན་པ་ནི་དོན་སྒྲུབ་གོ་རིམས་སྦྲོན་པ་སྟེ། དེ་ལ་སྒྲ་གྲག་པ་གང་ཡིན་པ་དེའོ། །ཞེ་སྡང་ནི་ཁྲོ་བའོ། །སེམས་ལ་སྡང་ཞེས་བྱ་བ་ནི་རབ་ཏུ་སད་པར་བྱེད་པ་སྟེ། རབ་ཏུ་ཉལ་ཏེ་ཞེན་པ་ལས་སད་པར་བྱེད་པའོ། །བརྣགས་ཏེ་བོར་ཡང་ཞེས་བྱ་བ་ནི་འདོད་པས་མྱོས་པའི་མཐུ་ཡིན་པའི་ཕྱིར་རོ། །བརྣགས་ཀྱང་བརྟན་པ་ཉམས་པར་གྱུར་ཏོ། །མདངས་ནི་སེར་སྐྱར་གྱུར་ཅིང་ལུས་ཀྱང་ཤ་བྲི་སྟེ་སྲབ་མོར་གྱུར་ཞེས་བྱ་བ་ནི་འདོད་ཆགས་ཀྱིས་མྱོས་པར་གྱུར་པའི་རྣམ་པ་རབ་ཏུ་མངོན་པར་གྱུར་པའོ། །སེམས་ཁོང་དུ་ཆུད་ཅིང་ཤུགས་ནར་ཞེས་འབྱུང་ལ། གླལ་ཡང་དང་ཡང་དུ་འབྱུང་བ་ཞེས་བྱ་བ་ནི་བྱ་བའི་ཚུལ་ལས་འདོད་ཆགས་ཀྱིས་མྱོས་པར་གྱུར་པ་རབ་ཏུ་མངོན་པའོ། །སྤྱོད་ཡུལ་གྱི་མཚན་ཉིད་ཡིན་པའི་ཕྱིར་ཤིན་ཏུ་གསལ་བའི་དོན་ཏེ། སྤྱོད་ཚུལ་འདིའི་རྣམ་པ་ཡིན་པ་སྟེ། འདོད་པས་མྱོས་པར་གྱུར་པའི་རྣམ་པའོ། །འདོད་ཆགས་ཀྱིས་མྱོས་པར་གྱུར་པའི་རྣམ་པ་རབ་ཏུ་མངོན་པར་གྱུར་པ་གང་ཡིན་པ་དེ་ནི་འདོད་པས་མྱོས་པར་གྱུར་པའི་རྣམ་པ་རབ་ཏུ་མངོན་པ་སྟེ། རྣམ་པའམ་སྤྱོད་ཚུལ་རབ་ཏུ་གསལ་ཞིང་མངོན་པར་གྱུར་པ་ཞེས་བྱ་བའི་དོན་ཏོ། །འདོད་ཆགས་ཀྱིས་མྱོས་པར་གྱུར་པའི་རྣམ་པ་རབ་ཏུ་མངོན་ཞེས་བྱ་བ་འདིའི་དོན་ནི་བསྟན་པ་ཆེན་པོས་ཞེས་བྱ་བའི་ཚིགས་བཅད་འདི་ས་སྟོན་པ་ཡིན་ཏེ། འདིའི་དོན་ནི་བརྣགས་ཤིང་བསྒྲིམས་པ་ནི་རབ་ཏུ་བཀག་པ་བཞིན་དུའོ། །ཡིད་གྱུར་པ་ནི་ལུས་ཀྱི་བྱ་བ་དང་སྤྱོད་པ་གྱུར་པའི་རྣམ་པ་སྣང་བ་ལས་མངོན་པར་གྱུར་པ་ཡིན་ཏེ། ཚིགས་བཅད་འདིས་ནི་བཤད་པའི་དོན་དེ་ཉིད་བསྟན་ཏོ། །ཡིད་གྱུར་པ་ནི་འདོད་ཆགས་ཀྱིས་མྱོས་པར་གྱུར་པའོ། །སེམས་ཁོང་དུ་ཆུད་པའི་མིག་དང༌། བཞིན་དང་མདངས་ཞེས་བྱ་བ་ནི་གང་གོང་དུ་བསྟན་པའི་སེམས་ཁོང་དུ་ཆུད་ཅིང་ཤུགས་ནར་ཞེས་འབྱུང་ལ་གླལ་ཡང་དང་ཡང་དུ་འབྱུང་
ཞེས་བྱ་བ་དེ་ཉིད་སྟོན་ཏོ། །ཤ་བྲི་སྲབ་མོར་གྱུར་ཞེས་བྱ་བ་འདིས་ནི་སེར་སྐྱར་གྱུར་ཅིང་ཤ་བྲི་སྟེ་སྲབ་མོར་གྱུར་ཞེས་བྱ་བ་དེ་ཉིད་བསྟན་པ་ཡིན་ནོ། །དེས་བརྡ་དང་མཚན་མ་ལ་མཁས་པ་ཞེས་བྱ་བ་ལ་བརྡ་ནི་གང་གོང་དུ་བསྟན་པའི་སེམས་ཁོང་དུ་ཆུད་ཅིང་ཤུགས་ནར་ཞེས་འབྱུང་ལ། གླལ་ཡང་དང་ཡང་དུ་འབྱུང་ཞེས་བྱ་བ་དེ་ཉིད་ཀྱིས་བསྟན་པ་ཡིན་ནོ། །མཚན་མ་ནི་གང་གོང་དུ་བསྟན་པའི་སེར་སྐྱར་གྱུར་ཅིང་ལུས་ཀྱང་ཤ་བྲི་སྟེ་སྲབ་མོར་གྱུར་ཞེས་པ་དང༌། འདོད་ཆགས་ཀྱིས་མྱོས་པར་གྱུར་པའི་རྣམ་པ་མངོན་པར་གྱུར་བ་ཞེས་གང་བསྟན་པའོ། །བརྡ་དང་མཚན་མ་ཞེས་བྱ་བ་བསྡུས་པ་ནི་རྣམ་པ་ཞེས་སྨོས་པ་སྟེ་དེ་ཉིད་ཡིན་ཏེ། སྤྱོད་ཚུལ་དུ་རྣམ་པ་དེའི་མཚན་ཉིད་དུ་བྱས་ནས་བརྡ་དང་མཚན་མ་ལ་མཁས་པའི་བློའོ། །གང་ལ་ཡོད་པ་དེ་ནི་བརྡ་དང་མཚན་མ་ལ་མཁས་པའི་བློའོ། །རྒྱལ་པོ་དེ་དེ་ལྟར་གྱུར་ཞེས་བྱ་བ་ནི་སེར་སྐྱར་གྱུར་ཅིང་ལུས་ཀྱང་ཤ་བྲི་སྲབ་མོར་གྱུར་པ་དང༌། སེམས་ཁོང་དུ་ཆུད་ཅིང་ཤུགས་ནར་ཞེས་འབྱུང་ལ་གླལ་ཡང་དང་ཡང་དུ་འབྱུང་བ་སྟེ། དེའི་རྒྱུ་ནི་མྱོས་བྱེད་མ་མཐོང་བའི་རྒྱུས་དེ་རྒྱུ་དང་བཅས་པར་རོ། །དེ་མ་རུང་དུ་གྱུར་པ་ནི་མ་རུང་བར་གྱུར་པ་སྟེ་ཤི་བར་རོ། །དེ་ལ་དོགས་ལ་ཡོད་པ་གང་ཡིན་པ་དེ་ནི་མ་རུང་དུ་དོགས་པའོ། །དེ་མ་རུང་དུ་དོགས་པའི་རྒྱུ་བསྟན་པའི་ཕྱིར་སྨྲས་པ། འདོད་ཆགས་ཀྱང་མཐུ་ཆེ་བར་ཞེས་བྱ་བ་ཡིན་ནོ། །ནང་དུ་མཆི་བར་གནང་བ་ནི་ཞུ་བའི་དོན་ཡོད་དོ་ཞེས་སྨྲས་ནས་གནང་བའོ། །རྟོག་པ་སྐྱེ་བ་ནི་ཅི་བདེན་པ་ཉིད་དམ་བརྫུན་པ་ཞེས་སོ། །དེ་ལྟར་མད་ན་ཞེས་བྱ་བ་ནི་དེ་ཇི་ལྟར་སྨྲ་བ་བཞིན་དུ་སྟེ། མྱོས་བྱེད་མ་དེ་ལ་རྒྱལ་པོའི་ཐུགས་ཆགས་པའོ། །བཀའ་སྩལ་པར་བྱ་བ་དེ་མི་བསྲུང་བ་ནི་བཀའ་མ་སྩལ་པའོ། །བུ་མོ་འདི་ཕྱག་ཏུ་བཞེས་ཞེས་བྱ་བ་ནི་ཅི་ནས་ཀྱང་བསྣམས་པའི་རིགས་སོ་ཞེས་པའོ། །ཡང་ན་བཀའ་སྩལ་པའི་ཕྱིར་རོ། །ལྟས་ཀྱིས་བསྐུལ་བས་ཞེས་བྱ་བ་ནི་གབ་པ་ཡིན་ནའང་འདིའི་དོན་གསལ་བར་བསྟན་པས་སོ། །མི་འདོད་པའི་ཚིག་འབྲུ་གསལ་བ་སྟེ། གང་གི་ཚིག་དེའོ། །དེ་ནི་མི་རིགས་སོ་ཞེས་བྱ་བ་ནི་བུ་མོ་དེ་ཕྱག་ཏུ་བཞེས་ཤིག་ཅེས་གང་སྨྲས་པའི་ཚིག་དེ་མི་རིགས་པར་བཤད་པའོ། །མི་འདོད་པའི་རྒྱུ་བསྟན་པའི་ཕྱིར། བསོད་ནམས་
ཉམས་གྱུར་ཞེས་བྱ་བ་ལ་སོགས་པའི་དང་པོའི་ཚིགས་བཅད་གཉིས་ཡིན་ཏེ། བསོད་ནམས་ཉམས་གྱུར་ཞེས་བྱ་བ་ནི་བགྲོད་པ་མ་ཡིན་པར་བགྲོད་པས་སོ། །དེས་ཅིར་འགྱུར་ཞེ་ན། དེས་སྨྲས་པ། བདག་ཀྱང་མི་འཆི་མིན་ཞེས་བྱ་བ་སྟེ། འདིས་ནི་ཤི་བར་གྱུར་ན་བསོད་ནམས་ཉམས་པར་འགྱུར་བས་བདག་གི་བགྲོད་པའི་ཉེས་དམིགས་བསྟན་པའོ། །བདག་གི་སྡིག་པ་འདི་ཡང་གཞན་གྱིས་ཤེས་པར་འགྱུར། ཞེས་བྱ་བ་ནི་གྲགས་པ་མ་ཡིན་པ་ཐོབ་པའི་ཉེས་དམིགས་ཡིན་ནོ། །དེ་དང་བྲལ་བར་གྱུར་བས་ཞེས་བྱ་བ་འདིས་ནི་འཇིག་རྟེན་འདི་དང་ཕ་རོལ་གཉིག་ལ་གནོད་པ་ཡིན་ཏེ། འཇིག་རྟེན་འདིར་ནི་ཤི་བར་གྱུར་པས་གནོད་པའོ། །ཡིད་འགྱོད་ཅིང་ཤི་བས་འཇིག་རྟེན་ཕ་རོལ་ཏུ་ངན་འགྲོར་འགྲོ་བ་ཡིན་ནོ། །འཇིག་རྟེན་འདི་དང་ཞེས་བྱ་བའི་ཚིགས་བཅད་འདི་ནི་བསོད་ནམས་ཉམས་པ་ཞེས་བྱ་བ་དེའི་རྗེས་སུ་འགྲོ་བའི་ཚིག་ཡིན་ཏེ། གཉི་ག་ལ་གནོད་པར་འགྱུར་བ་ནི་བདག་དང་ཕ་རོལ་གཉིག་ལ་སྟེ། འཇིག་རྟེན་འདིར་བདག་ནི་འགྲོ་བ་མ་ཡིན་པར་འཇུག་པའི་རྒྱུས་ངན་འགྲོར་འགྲོ་བར་འགྱུར་ཞེས་བྱ་བ་ཡིན་ལ། ཕ་རོལ་ནི་འགྱོད་ཅིང་འཆི་བར་གྱུར་པས་ངན་འགྲོར་འགྲོ་བའོ།། དེ་གཅིག་བུར་ཡང་མ་ཟད་དེ། བདག་ཉིད་ལ་ནི་མི་སྙན་པ་ཡང་ཡིན་ལ། ཕ་རོལ་ནི་འཆི་བར་འགྱུར་བ་སྟེ། དེ་ལྟར་བཞི་པོ་དེས་གནོད་པ་ཡིན་ནོ། །དེ་མི་འདོད་པ་ནི་ཚེ་འདི་དང་ཕ་རོལ་གཉི་ག་ལ་གནོད་པའི་ལས་སོ། །གང་ཕྱིར་ཞེས་བྱ་བ་ནི་བདག་གི་རྒྱུ་དེ་ཉིད་དེའི་རྒྱུ་ཞེས་བྱ་བ་ཡིན་ཏེ། བདག་གི་རྒྱུ་ཉིད་ལ་མཁས་པ་སྟེ། དེ་ལྟར་གནོད་པར་གྱུར་པའི་ལས་དེ་ལ་རྟོགས་པར་བྱེད་པ་ལ་མཁས་པའོ། །བསོད་ནམས་ཉམས་ཞེས་བྱ་བའི་ཚིག་གི་ལན་ནི། སྦྱིན་པ་བགྱིད་པའི་གྲོགས་བགྱིས་པས། །ཞེས་བྱ་བའི་ཚིགས་བཅད་འདི་ཡིན་ཏེ། སྦྱིན་པ་བཀག་པས་ཆོས་ཀྱི་བགེགས་སུ་ཇི་ལྟར་འགྱུར་ཞེ་ན། དེ་ཉིད་སྨྲས་པ། དེ་མ་བཞེས་པ་སྟེ། བདག་ལས་སྦྱིན་པ་མ་བཞེས་པས་དེས་ན་དེ་ལྟར་སྦྱིན་པའི་བགེགས་སུ་འགྱུར་བ་ཡིན་ནོ། །བདག་གི་སྡིག་པ་འདི་ཡང་གཞན་གྱིས་ཤེས་པར་འགྱུར། །ཞེས་བྱ་བ་འདིའི་ལན་ནི། འོ་སྐོལ་གཉིས་ལས་མ་
གཏོགས་བ། །ཞེས་བྱ་བའི་ཚིགས་བཅད་ཡིན་ནོ། །དེ་དང་བྲལ་བར་གྱུར་པས་འགྱོད་པའི་མེ། །ཞེས་བྱ་བ་དེའི་ལན་ནི། དེ་ལྟར་བགྱིས་ན་བདག་ལ་སྨན་ཡོན་བཏགས་པར་འགྱུར། །ཞེས་བྱ་བས་དངས་པའི་ཚིགས་བཅད་ཀྱིས་བསྟན་ཏེ། བདག་ལ་སྨན་ཡོན་བཏགས་པར་འགྱུར་གྱི། དེ་དང་བྲལ་བས་འགྱོད་པ་ནི་མེད་དོ་ཞེས་པའོ། །དེ་མེད་པས་འཆི་བ་ཡང་མེད་དེ་དེའི་རྒྱུར་གྱུར་པའི་འཆི་བ་དེ་མེད་པས་ངན་སོང་དུ་འགྲོ་བ་མེད་པའོ། །ཚིགས་བཅད་འདི་གསུམ་གྱིས་ནི་སྔར་བསྟན་པའི་ཉེས་པ་བཞིན་པོའི་ལན་བསྟན་པ་ཡིན་ནོ། །སྤྱིན་པ་བགྱིད་པའི་གྲོགས་བགྱིས་པས། །ཞེས་བྱ་བའི་ཚིགས་བཅད་གང་བསྟན་པ་དེའི་ལན་ནི། ང་ལ་རབ་ཏུ་བྱམས་པའི་ཕྱིར། །ཞེས་བྱ་བའི་ཚིགས་བཅད་ཡིན་ཏེ། སྔར་གྱི་སྦྱིན་པ་ཞེས་བྱ་བ་ནི་སེམས་ཅན་གྱི་སྦྱིན་པ་ནི་རྣམ་པ་བཞི་སྟེ། ཕན་པ་ཡིན་ལ་བདེ་བ་མ་ཡིན་བ་དང༌། བདེ་བ་ཡིན་ལ་ཕན་པ་མ་ཡིན་པ་དང༌། བདེ་བ་ཡང་ཡིན་ལ་ཕན་པ་ཡང་ཡིན་པ་དང༌། བདེ་བ་ཡང་མ་ཡིན་ལ་ཕན་པ་ཡང་མ་ཡིན་པའོ། །བཞི་པོ་དེ་ལས་ཕན་པ་མེད་པར་འགྱུར་བ་ནི་རྣམ་པ་ཐམས་ཅད་དུ་སྦྱིན་པར་མི་བྱ་བ་ཡིན་པས་གང་ཕན་པ་མ་ཡིན་ལ་བདེ་བ་ཡིན་པ་དེ་ཡང་སྦྱིན་པར་བྱ་བ་ཡིན་ནོ། །ཕན་པ་ཡང་མ་ཡིན་ལ་བདེ་བ་ཡང་མ་ཡིན་པ་དེ་ཡང་སྦྱིན་པར་བྱ་བ་མ་ཡིན་ནོ། །གང་ཕན་པ་དང་བདེ་བ་དེ་ནི་སྦྱིན་པ་ཡིན་ནོ། །གང་མི་བདེ་ན་ཡང་ཕན་པ་དེ་ནི་སྦྱིན་པ་ཡིན་ནོ། །དེ་བས་ན་འདི་ནི་བདེ་བ་ཉིད་ཡིན་གྱི་ཕན་པ་ནི་མ་ཡིན་ཏེ། འདི་ལྟ་བུའི་མཚན་ཉིད་ཀྱི་སྦྱིན་པ་ནི་རྣམ་པ་ཐམས་ཅད་དུ་ཆོས་སྒྲུབ་པའི་གྲོགས་མ་ཡིན་ནོ། །བདག་ལ་སྨན་བཏགས་པར་འགྱུར་ཞེས་བྱ་བ་ལ་སོགས་པའི་ཚིགས་བཅད་གང་གོང་དུ་བསྟན་པ་དེའི་ལན་ནི། རབ་ཏུ་བྱམས་པས་ང་ཡི་ཕྱིར། །ཞེས་བྱ་བའི་ཚིགས་བཅད་ཡིན་ཏེ། གྲོགས་པོ་ལས་ཁྱད་པར་དུ་གྱུར་པ་ནི་གཉེན་པས་ལྷག་བ་སྟེ། རྒྱུ་དེས་ན་རབ་ཏུ་བྱམས་པས་ངའི་ཕྱིར། རང་གི་སྲོག་ཀྱང་ཕོངས་པར་མི་ལྟ་བས་སོ། །འོ་སྐོལ་གཉིས་ལས་མ་གཏོགས་པར། །ཞེས་བྱ་བ་གང་གོང་དུ་བསྟན་བའི་ཚིགས་བཅད་དེའི་ལན་ནི། མ་མཐོང་བར་ནི་སྡིག་པ་བྱས་པ་ཞེས་བྱ་བ་ཡིན་ཏེ། ལྐོག་ཏུ་སྡིག་པ་བྱས་པ་
ལ་ཡང་བདེ་བ་མེད་དེ། ལྐོག་ཏུ་སྡིག་པ་སྤྱོད་པ་དེའི་དབང་དུ་བྱས་ནས། རྣམ་དག་མིག་གིས་མི་མཐོང་མི་སྲིད་དོ། །ཞེས་བྱ་བ་ལ་སོགས་པ་ཡིན་ཏེ། ལྷ་ཞེས་སྨོས་པས་ནི་ལས་ལས་གྱུར་པའི་ལྷའི་མིག་གཟུང་ངོ༌། །རྣལ་འབྱོར་ཅན་ཞེས་སྨོས་པས་ནི་མངོན་པར་ཤེས་པ་ལས་བྱུང་བའི་ལྷའི་མིག་གཟུང་ངོ༌། །བདག་ལ་སྨན་ཡོན་བཏགས་པར་འགྱུར། །ཞེས་བྱ་བ་ལ་སོགས་པའི་ལན་ནི། །ད་ནི་ཁྱོད་ལ་མི་ཕངས་སམ། །ཞེས་བྱ་བའི་ཚིགས་བཅད་ཡིན་ཏེ། དེ་ནི་བདག་ཉིད་ཀྱིས་དེའི་ལུས་ལ་སོགས་པའི་ཡོན་ཏན་དང་ལྡན་པར་མཐོང་བ་སྟོན་པ་ཡིན་ནོ། །དེ་ནི་བཏང་བ་ཞེས་བྱ་བ་དེ་དེ་ལྟ་བུའི་མཚན་ཉིད་དང་ལྡན་པ་འོ། །སྡུག་བསྔལ་ཞེས་བྱ་བ་ནི་འགྱོད་པའོ། །ང་ལ་རབ་ཏུ་བྱམས་པའི་ཕྱིར། །ཞེས་བྱ་བ་ལ་སོགས་པའི་ཚིགས་བཅད་གསུམ་གྱི་ལན་ནི། བདག་ནི་བུ་སྨད་ཅེས་བྱ་བའི་ཚིགས་བཅད་འདི་སྨྲས་པ་ཡིན་ཏེ། བྲན་མོ་འདི་སྦྱིན་པ་ནི་ཆོས་སྦྱིན་པའི་གྲོགས་ཉིད་ཡིན་གྱི། གྲོགས་པོ་ཉིད་དུ་ནི་མ་ཡིན་ཏེ། རྗེར་གྱུར་པ་དང་ལྷན་ཅིག་ཡིན་པའི་ཕྱིར་རོ། །མ་མཐོང་བར་ནི་སྡིག་པ་བྱས་པ་ཞེས་བསྟན་པ་དེ་ཡང་སྡིག་པ་མིན་ཏེ་རྒྱུ་དེ་གཉིས་ཀྱི་ཕྱིར་རོ། །དེ་ལྟར་ཚིགས་བཅད་གསུམ་བརྗོད་པ་ལས་གཅིག་གི་ལན་ནི་མ་བསྟན་ཏོ། །དེ་ནི་ཁྱོད་ལ་མི་ཕངས་ཞེའམ་ཞེས་བྱ་བའི་ཚིགས་བཅད་དེའི་ལན་ནི་འདི་བརྩམས་བ་ཡིན་ཏེ། དེ་ནི་བདག་ལ་ཕངས་པ་ལགས་མོད་ཀྱི། །ཞེས་བྱ་བ་ལ་སོགས་པའི་ཚིགས་བཅད་འདི་ཡིན་ནོ། །ཆོས་སྤྱོད་པ་ལས་དཔལ་ནི་ཞེས་བྱ་བའི་ཚིགས་བཅད་འདི་ནི་རང་གི་ངེས་པ་ངེས་པར་གཟུང་བ་དང༌། བདག་ཉིད་ཀྱི་ངོ་ཚ་ཉིད་གཟུང་བའི་ཕྱིར་སྨྲས་པ་སྟེ། ངོ་ཆ་ཡང་གང་ཞེ་ན་བདག་དང་ཆོས་ཀྱི་དབང་དུ་བྱས་ནས་ཁན་མ་ཐོ་བ་ལ་འཛེམ་པའོ་ཞེས་བྱ་བའི་ཚིག་གིས་སོ། །མཚོན་གྱིས་ཏབ་པའམ། མེའི་ནང་དུ་ཞུགས་པ་ཞེས་བྱ་བ་འདི་གཉིས་སྨོས་པས་ནི་ལུས་ཀྱི་དབང་པོ་བདེ་བའི་མཐུན་པ་ཉིད་ཡིན་ཏེ། ཚིག་པ་དང་བཅས་པའི་རྒྱུ་གཉིས་ཀྱིས་སོ། །མེ་དང་མཚོན་གྱིས་ཚིག་པ་དང་ཆད་པས་ནི་འཇིག་རྟེན་ཕ་རོལ་ཏུ་ངན་འགྲོར་འགྲོ་བ་མེད་དེ། དེ་ཉིད་ཀྱིས་བཏབ་པ་དང་ཞུགས་པས་ནི་ཁས་ལེན་
པའོ། །ཆོས་མ་ཡིན་པ་སྤྱོད་པས་ནི་འཇིག་རྟེན་ཕ་རོལ་ཏུ་ངེས་པར་ངན་སོང་དུ་འགྲོ་བའི་ཕྱིར་རོ། །སྐྱོན་མེད་ཆུང་མ་བོར་ན་ནི། །ཞེས་བྱ་བ་ནི་ཆོས་དང་འགལ་བར་བསྟན་ཏེ། དེས་ན་ཆོས་དང་འགལ་བ་ཡིན་བས། ང་ཡིས་ཆད་པས་བཅད་ཏ་རེ། །ཞེས་པའོ། །སྨད་པའི་གནས་སུ་ཁྱོད་གྱུར་ན། །ཞེས་བྱ་བ་ནི་གྲགས་པ་མ་ཡིན་པ་ཐོབ་པར་བསྟན་ཏོ། །ཕ་རོལ་བསྲེག་པར་འགྱུར་ཞེས་བྱ་བ་ནི་སྐྱོན་མེད་ཆུང་མ་བོར་བའི་ཕྱིར་རོ། །ང་ཡིས་ཆད་པས་བཅད་པ་དང་སྨད་པའི་གནས་སུ་གྱུར་པ་ཞེས་བྱ་བ་ནི་འདིར་བསྲེགས་པའོ། །ཆོས་དང་འགལ་བར་གྱུར་པ་ཞེས་བྱ་བ་ནི་སྐྱོན་མེད་ཆུང་མ་བོར་བས་སོ། །སྐྱེ་བོས་སྨད་པ་ནི། སྨད་པའི་གནས་སུ་ཁྱོད་གྱུར་ན། །ཞེས་བྱ་བས་སོ། །བདེ་བ་ཉམས་ཀྱང་རུང་ཞེས་བྱ་བ་ནི་རྒྱལ་པོས་ཆད་པས་བཅད་ཀྱང་རུང་བའོ། །བཟོད་པར་བགྱི་ཞེས་བྱ་བ་ནི་རབ་ཏུ་འདོད་པའོ། །རྣམ་པ་འདི་གསུམ་བཟོད་པར་བྱ་བའི་རྒྱུ་སྨྲས་པ། ཁྱོད་ལ་བདེ་བས་བདག་ཉིད་བདེར་གྱུར་ན། །ཞེས་བྱ་བ་ཡིན་ཏེ། སྔར་བཤད་པའི་ཉེས་པ་རྣམ་པ་གསུམ་གྱི་ཉེས་པ་མེད་པ་དེ་རབ་ཏུ་བསྒྲུབ་པའི་ཕྱིར། ས་བདག་ཆེན་པོ་འཇིག་རྟེན་འདི་ན་ནི། །ཞེས་བྱ་བའི་ཚིགས་བཅད་བརྩམས་པ་ཡིན་ཏེ། ཇི་ལྟར་མཆོད་སྦྱིན་ལ་སྦྱིན་པར་བྱ་བའི་གནས་ཀྱི་སྦྱིན་གནས་དམ་པ་ལ་བྱིན་པས་ནི་ཆོས་མ་ཡིན་པ་མེད་པ་ལྟར་འདིས་ན་ཡང་ཁྱོད་ཀྱིས་ཆད་པས་བཅད་པར་ཡང་མི་འགྱུར་ལ་དེ་ཉིད་ཀྱི་ཕྱིར་གྲགས་པ་མ་ཡིན་པར་ཡང་འབྱུང་བར་མི་འགྱུར་བས་དེ་བས་ན་ཉེས་པ་གསུམ་ཡང་མེད་དེ། བདག་ལ་བརྩེ་བའི་ཕྱིར་ཡང་དེ་བཞེས་སུ་གསོལ་ཞེས་བསྟན་པ་ཡིན་ནོ། །གལ་ཏེ་ཆོས་དང་འགལ་བར་གྱུར་ཀྱང་དེ་ལྟོ་བ་བཟེད་པར་བགྱི་ཞེས་བྱ་བའི་ལན་ནི་ང་ལ་རབ་ཏུ་བྱམས་པའི་ཕྱིར་ཕན་པ་དང་ཞེས་བྱ་བ་ལ་སོགས་པ་ཡིན་ནོ། །སྐྱེ་བོས་སྨད་ཅིང་ཞེས་བྱ་བ་དེའི་ལན་ནི་འཇིག་རྟེན་པས་སྨད་པ་ལ་འཛེམ་པ་མེད་པར་བྱ་བ་མི་རིགས་སོ་ཞེས་བྱ་བ་ཡིན་ནོ། །དེ་བས་ན་འཇིག་རྟེན་པས་སྨད་པར་བྱ་བ་ལ་ཡང་མི་འཛེམ་པར་བྱ་བ་མི་རིགས་ཏེ། དེ་ཡང༌། འཇིག་རྟེན་སྨོད་པས་འཛེམ་པ་མེད་པ་དང༌། །ཞེས་བྱ་བའི་ཚིགས་བཅད་འདིས་
འདིས་སྒྲུབ་པ་སྟེ། སྨོད་པས་འཛེམ་པ་མེད་པ་ནི་ཆོས་ལ་མི་ལྟ་བའི་ཕྱིར་རོ། །ཕྱི་མ་ནི་འཇིག་རྟེན་ཕ་རོལ་གྱི་ཆོས་ཀྱི་འབྲས་བུ་ལ་མི་འཛེམ་པ་སྟེ། ཆོས་ལ་མི་ལྟ་བའི་ཕྱིར་རོ། །དེ་བཞིན་དུ་ལྷག་མ་འཇིག་རྟེན་འདིའི་མཆོག་ཏུ་འཛིན་པ་ཡིན་ནོ་ཞེ་ན། ཡང་འདིའི་དོན་མི་འགྲུབ་པར་བསྟན་པའི་ཕྱིར་སྨྲས་པ། གང་ཡིན་སྐྱེ་བོ་དེ་ལ་ཡིད་མི་ཆེས། །ཞེས་སྨོས་ཏེ། དེ་ལ་ཞེས་བྱ་བ་ནི་སྨད་ཅིང་ཆོས་དང་ཕྱི་མའི་འབྲས་བུ་ལ་མི་ལྟ་བ་སྟེ། ཅི་ནས་ཀྱང་བསམ་པ་ཆོས་དང་འཇིག་རྟེན་ཕ་རོལ་གྱི་འབྲས་བུ་རྣམ་པར་སྤངས་པའོ། །དེ་བཞིན་དུ་མཐོང་བའི་ཆོས་ལ་ཡང་དཔལ་གྱི་འབྲས་བུ་སྤངས་པར་འགྱུར་ཏེ། དཔལ་ནི་སྐྱེ་བོ་ཡིད་ཆེས་པ་རྩ་བར་གྱུར་པ་ཉིད་ལས་སོ། །བདེ་བ་ཉམས་ཀྱང་རུང་ཞེས་བྱ་བ་སྔར་བསྟན་པ་དེའི་ལན་ནི་འདིས་བསྟན་ཏེ། བདེ་བ་མ་ཡིན་པ་ནི་ཆོས་མ་ཡིན་པར་སྤྱོད་པ་གཙོ་བོར་བསྟན་པའི་ཕྱིར་ཁྱོད་ལ་ང་སྨྲའོ་ཞེས་བྱ་བ་ཡིན་ཏེ། སྲོག་གི་ཕྱིར་ཡང་ཞེས་བྱ་བའི་ཚིགས་བཅད་ཡིན་ནོ། །ཆོས་དང་འགལ་བ་ལ་ནི་འགལ་བར་མ་བྱེད་ཅིག་པ་སྟེ། ཅིའི་ཕྱིར་ཞེ་ན། ཉེས་པ་ཆེ་བར་འགྱུར་བར་གདོན་མི་ཟ་བའི་ཕྱིར་རོ། །ངན་སོང་དུ་འགྲོ་བའི་རྒྱུ་ཡིན་པས་སྲོག་གི་ཕྱིར་ཡང་ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། ལེགས་འབྱུང་ཆུང་ལ་དོགས་པ་དང་བཅས་པའི་ཕྱིར་རོ། །དོགས་པ་དང་བཅས་པས་དེའི་སྲོག་ཀྱང་ཡིད་བརྟན་དུ་མི་རུང་བས་སོ། །ལེགས་འབྱུང་ཆུང་ཡང་ཞེས་བྱ་བ་ནི་ཡུན་རིང་དུ་འཚོ་བར་གྱུར་ཀྱང་མཐོང་བའི་ཆོས་ལ་བདེ་བ་ཤིན་ཏུ་ཆུང་བའི་ཕྱིར་རོ། །དེ་ལྟར་དེ་ལ་རང་གི་ཆུང་མ་ཡོངས་སུ་གཏོང་བ་མི་རིགས་པར་བསྟན་ནས། དེ་ནི་བདག་ཉིད་ཀྱིས་བླང་བ་ཉིད་དུ་མི་རིགས་པར་བསྟན་པའི་ཕྱིར་སྨྲས་པ། དམ་པ་རྣམས་ནི་ཕ་རོལ་སྨད་ལ་སོགས། །ཞེས་བྱ་བའི་ཚིགས་བཅད་སྨོས་སོ། །སྨད་པ་ལ་སོགས་པའི་སྡུག་བསྔལ་གང་ཡིན་པ་དེ་ནི་སྨད་པ་ལ་སོགས་པའི་སྡུག་བསྔལ་བྱས་པ་སྟེ། གང་སྔར་བསྟན་པའི་ཆོས་དང་འགལ་བ་དང༌། སྐྱེ་བོས་སྨད་པ་དང༌། བདེ་བ་
ཉམས་པའི་མཚན་ཉིད་ནི་སྨད་པ་ལ་སོགས་པའི་སྡུག་བསྔལ་སྨོས་པ་འདིས་གཟུང་ངོ༌། །མི་གནོད་པར་ཞེས་བྱ་བ་ནི་སྨད་པ་ལ་སོགས་པའི་སྡུག་བསྔལ་བླངས་ནས་སོ། །བདག་གི་དོན་སྒྲུབ་ཅེས་བྱ་བ་ནི་བྱང་ཆུབ་སེམས་དཔའི་སྒྲུབ་པ་སྟེ། བདག་དང་གཞན་གྱི་ཆོས་སུ་བཤད་པའོ། །གཉི་གའི་ཆོས་མ་ཡིན་པ་མེད་པར་བསྟན་པའི་ཕྱིར་རྗེའི་དོན་དུ་ཞེས་བྱ་བ་ལ་སོགས་པའི་ཚིགས་བཅད་འདི་ཡིན་ཏེ། དེའི་སླད་དུ་ལྗོངས་ཀྱི་མི་དང་བཅས་པས་ཞེས་བྱ་བ་འདིས་ནི་གཉི་ག་ལ་ཡང་ཆོས་མ་ཡིན་པ་དང་གྲགས་པ་མ་ཡིན་པ་མེད་པར་བསྟན་ཏོ། །རྒན་པ་བསྙེན་བཀུར་བྱ་བ་བྱས་པ་དང༌། ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་དགེ་བའི་བཤེས་གཉེན་བསྟན་པ་དང༌། ཆོས་ཉན་པ་དང་ཚུལ་བཞིན་ཡིད་ལ་བྱེད་པ་བསྟན་ཏོ། །ཡང་ན་བླ་མ་དང་དམ་པའི་ཚོགས་ལ་བསྙེན་བཀུར་བྱས་པ་དང་ཤེས་རབ་ཕུན་སུམ་ཚོགས་པར་བསྟན་ཏོ། །འཁོར་གསུམ་གྱི་རིག་པ་ནི་འཁོར་གསུམ་རིག་པའོ། །དོན་གྱི་དེ་ཁོ་ན་ཉིད་ནི་དོན་གྱི་དེ་ཉིད་དོ། །ལྷག་པའི་དོན་གྱི་དེ་ཁོ་ན་ཉིད་ནི་ལྷག་པའི་དེ་ཁོ་ན་ཉིད་དེ། འཁོར་གསུམ་རིག་པའི་ལྷག་པའི་དོན་གྱི་དེ་ཁོན་ཉིད་དོ། །འཇིག་རྟེན་པ་ལ་ཕན་དང་གནོད་པ་ནི། །ཞེས་བྱ་བ་ལ་སོགས་པའི་ཚིགས་བཅད་གཉིས་ནི་སྐྱེ་དགུ་རྣམས་ཆོས་དང་འགལ་བར་འགྱུར་བའི་དབང་དུ་བྱས་པའོ། །གལ་ཏེ་རྒྱལ་པོ་རྣམས་ལེགས་པར་སྤྱོད་ན་ནི་འབངས་རྣམས་ལ་ཕན་པ་ཡིན་ལ། ཅི་སྟེ་ལེགས་པ་མ་ཡིན་པ་སྤྱོད་ན་ནི་གནོད་པ་ཡིན་ནོ། །འབངས་རྣམས་སྙིང་ཉེ་བསམས་ནས་ནི། །ཞེས་བྱ་བ་ནི་གཞན་གྱི་སྐྱེ་བོ་བས་ལྷག་པར་བདག་ལ་སྙིང་ཉེ་བ་ཡིན་ཏེ། ཁྱད་པར་དེས་ན་བདག་གིས་ལེགས་པ་དང་ལེགས་པ་མ་ཡིན་པ་སྤྱད་པ་དེ་གཉིས་ཀྱིས་འཇིག་རྟེན་པའི་ཕན་པ་དང༌། གནོད་པའི་རྒྱུར་གྱུར་པ་ཡིན་པར་བསྟན་ཏོ། །གཏམ་སྙན་པ་ནི་གྲགས་པའོ། །ལམ་གྱི་མཆོག་ཉིད་ནི་ཆོས་ཀྱི་ལམ་མོ། །རྒྱལ་པོ་རྣམས་ཀྱི་སྤྱོད་པ་ལ་འབངས་རྣམས་ར་ག་ལུས་པ་ཡིན་ཏེ། ཕན་པ་དང་གནོད་པར་འགྱུར་བ་དེ་ཉིད་བསྒྲུབ་པའི་ཕྱིར་དཔེས་བསྟན་པ་སྟེ། ཁྱུ་
མཆོག་འགྲོ་བ་དྲང་ངམ་ཡོ་བ་བཞིན། །ཞེས་བྱ་བའི་ཚིགས་བཅད་ཡིན་ནོ། །རྒྱལ་པོའི་ལེགས་པ་དང་ལེགས་པ་མ་ཡིན་པའི་སྤྱོད་པ་ལ་སྐྱེ་དགུའི་ཕན་པ་དང་གནོད་པ་རག་ལུས་པ་བདག་ཉིད་ཀྱང་མི་རིགས་པ་ལས་ལྡོག་པར་མི་ནུས་ན་གཞན་དག་ཇི་ལྟར་བཟློག་པར་མི་ནུས་ཞེས་པ་སྟེ། ཇི་ལྟར་འཁྲུལ་པ་མེད་པར་རྗེས་སུ་འབྲང་བའི་སྐྱེ་དགུའོ། །དེ་ལྟར་འབངས་ལ་ཕན་པའི་ཞེས་བྱ་བའི་ཚིགས་བཅད་ནི་འབངས་ལ་ཕན་པར་ལྟ་བའི་ཚིགས་བཅད་ཡིན་ཏེ། འབངས་ལ་ཕན་པ་འོག་ཏུ་བཤད་པ་ནི་མི་རིགས་ཏེ། སྔར་སྨོས་པ་ནི་སྐྱེ་དགུ་ལ་ཕན་པ་གཙོ་བོ་ཡིན་པའི་ཕྱིར་དེ་ལྟར་གོང་དུ་བསྟན་ཏོ། །དེའི་འོག་ཏུ་སྨོས་པའི་ཆོས་དང་གྲགས་པ་ལས་ནི་འགལ་བར་གྱུར་ཀྱང་ཕན་པ་ལས་མི་འདའ་བར་བསྟན་པའི་ཕྱིར་གཙོ་བོ་ཡིན་ཏེ། འབངས་ལ་ཕན་པར་ལྟ་བ་ནི་གཅེས་པའི་ཕྱིར་རོ། །དེ་ལྟར་ཕན་པ་དེ་ལ་ཞུགས་པ་དང༌། དེའི་འོག་ཏུ་ཆོས་དང༌། དེའི་འོག་ཏུ་གྲགས་པའོ། །དེ་བས་ན་རིམ་པ་འདི་ནི་བདག་གིས་དེ་ལྟར་བསྟན་ཏོ། །ཨེ་མའོ་འབངས་རྣམས་སྐལ་བ་ཕུན་སུམ་ཚོགས། །ཞེས་བྱ་བ་ནི་ཅིའི་ཕྱིར་ཞེ་ན། དཔེ་མེད་པའི་ཆོས་ལ་རྗེས་སུ་དགའ་བ་དང༌། བདེ་བ་ལ་མ་ཆགས་པ་དེ་ལྟ་བུས་བསྲུངས་པ་ཐོབ་པས་སོ། །དཔེ་མེད་པ་ནི་དཀའ་ཐུབ་ཀྱི་ནགས་ན་གནས་པ་ལ་ཡང་ཆོས་ལ་དགའ་ཞིང་བདེ་བ་ལ་མ་ཆགས་པ་དེ་ལྟ་བུ་དཀོན་ཏེ། དཀའ་ཐུབ་ནགས་ན་གནས་པའི་ཡོན་ཏན་དག་ལས་ཤིན་ཏུ་ལྷག་པའི་ཕྱིར་རོ། །རྒྱལ་པོ་ཆེན་པོ་ཞེས་བྱ་བ་ནི་ཐ་མལ་པ་མ་ཡིན་པ་སྟེ། དོན་ཇི་ལྟ་བ་བཞིན་གྱི་མིང་བསྟན་པའོ། །ཆེན་པོའི་སྒྲ་ནི་སྔར་སྨོས་པ་དེ་ཉིད་བསྒྲུབ་པའི་ཕྱིར་སྨོས་པ་ཡིན་ཏེ། གང་རྣམས་བསྲུང་བའི་རྒྱལ་པོ་ཁྱོད། །ཅེས་བྱ་བའི་ལས་ཀྱིས་སོ། །དེ་ལ་ངོ་མཚར་ཆེ་བ་ཉིད་མེད་པར་བསྟན་པའི་ཕྱིར། རྒྱ་མཚོ་རིན་ཆེན་འབྱང་གནས་བཞིན། །ཞེས་བྱ་བའི་ཚིགས་བཅད་ཡིན་ཏེ། འདིས་ནི་གཞན་ལ་མེད་པའི་ཡོན་ཏན་སྟོན་ཏོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་
མྱོས་བྱེད་མའི་སྐྱེས་པའི་རབས་སོ།། །།ཆོས་ལ་གནས་ན་ཞེས་བྱ་བ་ནི་བདེན་པའི་ཚིག་གང་གི་གནས་ཆོས་ཡིན་པ་དེ་ནི། བདེན་པའི་ཚིག་ཆོས་ལ་གནས་པའོ། །འདིར་ཆོས་ཞེས་སྨོས་པས་ནི་སྲོག་གཅོད་པ་ལས་ལྡོག་པ་ཡིན་ཏེ། དེ་ལ་གནས་པའི་གང་བདེན་པའི་ཚིག་དེ་ནི་ཆོས་ལ་གནས་པའི་བདེན་པའི་ཚིག་ཡིན་ནོ། །འབྲས་བུ་ནི་དེའི་འབྲས་བུ་ལྟ་སྨོས་ཀྱང་ཅི་དགོས་ཞེས་བྱ་བ་ཡིན་ཏེ། དེ་ཞེས་བྱ་བ་ནི་གང་བདེན་པའི་ཚིག་གི་གནས་སྲོག་ཆགས་ལ་ཕན་འདོགས་པར་འཇུག་པ་དང༌། སྲོག་གཅོད་པ་ལས་ལྡོག་པའོ། །ཡང་ན་བདེན་པའི་ཚིག་དེའི་འབྲས་བུ་དེ་ནི་དེའི་འབྲས་བུ་སྟེ། སྲོག་ཆགས་ལ་ཕན་གདགས་པ་དང༌། རྣམ་པར་འཚེ་བ་ལས་བཟློག་པའོ། །ཆོས་ཀྱི་རྗེས་སུ་འཇུག་པ་ཞེས་བྱ་བ་ནི་བདེན་པའི་ཚིག་གི་འབྲས་བུར་གྱུར་པའི་ཆོས་ཀྱི་རྗེས་སུ་འཇུག་པའོ། །ཡང་ན་ཆོས་ནི་སྲོག་གཅོད་པ་ལས་སླར་ལྡོག་པའོ། །དེ་ལ་གནས་པའི་བདེན་པའི་ཚིག་གང་ཡིན་པ་དེ་ནི་ཆོས་ལ་གནས་པའི་བདེན་པའི་ཚིག་སྟེ། དེའི་འབྲས་བུ་གང་སྲོག་གཅོད་པ་ལས་ལྡོག་པ་ཉིད་དོ། །དེ་བས་ན་ཆོས་ཀྱི་རྗེས་སུ་འཇུག་པར་བྱའོ་ཞེས་བྱ་བ་ཡིན་ཏེ། སྲོག་གཅོད་པ་ལས་ལྡོག་པའི་མཚན་ཉིད་ཀྱི་ཆོས་ཀྱི་རྗེས་སུ་འཇུག་པར་བྱའོ་ཞེས་པའོ། །རང་བཞིན་གྱིས་ཤེས་རབ་རྣོ་བས་ཞེས་བྱ་བ་ནི་ཤེས་རབ་དང་སྙིང་རྗེ་རབ་ཏུ་བསྒོམས་པའི་ཕྱིར་བྱང་ཆུབ་སེམས་དཔའ་ནི་རིགས་ཀྱིས་ཤེས་རབ་ཤས་ཆེ་བ་ཡིན་པས་ཤེས་རབ་རྣོ་བ་ཞེས་སྨོས་སོ། །རང་བཞིན་དང་རིགས་དང༌། རྒྱུ་དང་ས་བོན་ཞེས་བྱ་བ་རྣམ་གྲངས་སོ། །རང་བཞིན་གྱིས་ཤེས་རབ་རྣོ་བ་ནི་རིགས་ཀྱིས་གྲུབ་པའི་ཤེས་རབ་རྣོ་བའོ། །གཙུག་ལག་ཁྱད་པར་ཅན་གང་དང་གང༌། སྒྱུ་རྩལ་ཁྱད་པར་ཅན་གང་དང་གང་ཞེས་བྱ་བ་ལ། ཁྱད་པར་ཅན་སྨོས་པ་ནི་གཙུག་ལག་དང་སྒྱུ་རྩལ་གྱིས་སེམས་ཅན་རྗེས་སུ་བཟུང་བར་བྱེད་པ་ཡིན་ཏེ། སློབ་པར་འདོད་པ་དེ་ཡང་དག་པར་བསྟན་པའི་ཕྱིར་དེ་དང་དེ་དག་ལ་ཞེས་བྱ་བ་ཡིན་ཏེ། སྐྱེ་བོ་གཞན་པས་ལྷག་པར་འགྱུར། །
ཞེས་བྱ་བ་ནི་སྐྱེ་བོ་དྲི་མའི་ཤེས་རབ་ལས་ཀྱང་ལྷག་པར་འགྱུར་རོ་ཞེས་བྱ་བའི་དོན་ཏེ། ཤེས་རབ་རྣོ་ཞིང་སྐྱེ་བོ་གཞན་པས་ཞེས་བྱ་བས་ནི་ལྷན་ཅིག་སྐྱེས་པའི་ཤེས་རབ་ཀྱིས་ཀྱང་ལྷག་པར་འགྱུར་བ་ཡིན་ཏེ། གཞན་དག་གི་ཤེས་རབ་ནི་འབད་པ་ལས་བྱུང་བའི་ཞེས་བྱ་བའི་དོན་ཏོ། །ནར་མ་དང་གློ་བུར་ནི་ནར་མ་དང་གློ་བུར་རོ། །འབྱུང་བར་འགྱུར་བའི་ལྟས་ནི་འབྱུང་བར་འགྱུར་བའི་ལྟས་སོ། །འབྱུང་བའི་ལྟས་དང་མཚན་མ་ནི་འབྱུང་བའི་ལྟས་དང་མཚན་མ་སྟེ། ནར་མ་དང་གློ་བུར་དུ་འབྱུང་བའི་ལྟས་དང་མཚན་མ་གང་གིས་ཤེས་པ་ནི་ནར་མ་དང་གློ་བུར་དུ་འབྱུང་བའི་ལྟས་དད་མཚན་མ་ཤེས་པའོ། །བདག་ཉིད་ཆེན་པོ་དེ་སྐར་མ་རྒྱུ་བ་ལ་མཁས་ཞེས་བྱ་བ་ནས་བརྩམས་ཏེ། ཇི་སྲིད་དུ་རྒྱ་མཚོའི་ཕྱོགས་ནི་ལེགས་པར་རྟོགས་ཞེས་བྱ་བས་ནི་ཤེས་རབ་ཀྱི་ཁྱད་པར་བསྟན་ཏོ། །དྲན་པ་དང་ལྡན་ཞིང་ལེ་ལོ་དང་གཉིད་ནི་ཆུང་ཞེས་བྱ་བས་ནི་བསམ་གཏན་གྱི་ཕ་རོལ་ཏུ་ཕྱིན་པའི་རྟགས་བསྟན་ཏོ། །གྲང་བ་དང་ཚ་བ་དང་ཆར་ལ་སོགས་པ་ལ་ཇི་མི་སྙམ་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་རྟགས་བསྟན་ཏོ། །སོགས་པའི་ཞེས་སྨོས་པས་ནི་བཀྲེས་པ་དང་སྐོམ་པ་ལ་སོགས་པ་ལ་ཇི་མི་སྙམ་པར་གཟུང་ངོ༌། །བག་ཆེ་ལ་ཞེས་བྱ་བས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྟགས་བསྟན་ཏོ། །བརྟན་པ་དང་སྡན་པའི་ཞེས་བྱ་བས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རྟགས་བསྟན་ཏོ། །སྦྱིན་པའི་ཕ་རོལ་ཏུ་ཕྱིན་པ་ནི་ཅི་ཡང་མི་བྱེད་པའི་ཕྱིར་རྟགས་སུ་མ་སྨོས་སོ། །དྲང་བ་ལ་མཁས་པ་ནི་སྔོན་དུ་འགྲོ་བ་ལ་མཁས་པའོ། །ལྡོག་པ་ལ་མཁས་པ་ནི་ཕྱིར་ནུར་བ་ལ་མཁས་པའོ། །སོགས་པ་སྨོས་པས་ནི་ཐད་ཀར་འགྲོ་བ་ལ་སོགས་པ་ལ་མཁས་པའོ། །ཡང་དག་པར་ཕ་རོལ་ཏུ་ཕྱིན་པ་ཡིན་པས་ལེགས་པར་ཕ་རོལ་ཏུ་ཕྱིན་པར་བྱེད་པ་སྟེ། འདོད་པའི་ཡུལ་དུ་ཕྱིན་པར་བྱེད་པ་ཞེས་བྱ་བའི་དོན་ཏོ། །ཡང་ན་དོན་རབ་ཏུ་འགྲུབ་པར་བྱེད་པའོ། །འདོད་པ་ཞེས་བྱ་བ་ནི་གང་ཆས་པར་བརྩམས་པའོ། །རྒས་པའི་དབང་གིས་ལྟ་བ་ཉམས་གྱུར་ཅིང༌། །ཞེས་བྱ་བ་འདིས་ནི་གང་གོང་དུ་བསྟན་པའི་བདག་ཉིད་
ཆེན་པོ་དེ་སྐར་མ་དང་རྒྱུ་སྐར་ལ་མཁས་པ་ཞེས་བྱ་བ་ནས། རྒྱ་མཚོའི་ཕྱོགས་ནི་ལེགས་པར་རྟོགས། །ཞེས་བྱ་བ་དེའི་ནུས་པ་མེད་པར་བསྟན་ཏོ། །དྲན་པ་རབ་ཏུ་ཉམས་ཞེས་བྱ་བ་འདིས་ནི་གང་བསྟན་པའི་དྲན་པ་དང་ལྡན་ཞེས་བྱ་བ་དེ་མེད་པར་བསྟན་པའོ། །བདག་གི་ལུས་ཀྱི་བྱ་བའང་ཉམ་ཆུང་ན། །ཞེས་བྱ་བ་འདིས་ནི་སྔར་བསྟན་པའི་ལེ་ལོ་དང་གཉིད་ནི་ཆུང་ཞེས་བྱ་བ་ལ་སོགས་པ་དེ་མེད་པར་བསྟན་ཏོ། །ཁྱོད་ཀྱི་ལུས་ཀྱི་གནས་སྐབས་དེ་ལྟ་བུའོ། །འཚལ་ཏེ་ཞེས་བྱ་བའི་ཚིག་གིས་ནི་དྲན་པ་དང་བློ་དེའི་གནས་སྐབས་ཉིད་བསྟན་པའི་ཕྱིར་རོ། །བགྲོད་དཀར་ཞེས་བྱ་བ་ནི་ཇི་ལྟ་བུའི་མཚན་ཉིད་ཅན་གྱི་རྒྱ་མཚོ་སྟེ། རབ་ཏུ་ཞེས་བྱ་བ་ནི་ཇི་སྙེད་ཀྱི་མཚན་ཉིད་ཅན་སྟོན་ཏོ། །མཚོ་འཇིང་ནང་དུ་ཞུགས་ཞེས་བྱ་བ་ལ་ཇི་ལྟ་བུར་ཞེ་ན། རྣམ་པ་གསུམ་པའི་མཚན་ཉིད་ཅན་ཏེ། མདོག་དང༌། འགྲམ་བལྟར་མི་སྣང་བ་དང། གཏིང་དཔག་དཀའ་བ་སྟེ། དེ་གསུམ་ཡང་ཨནད་རྙིལ་ཞེས་བྱ་བའི་ཚིགས་བཅད་འདིས་བསྟན་པ་ཡིན་ནོ། །ཉི་མའི་དཀྱིལ་འཁོར་ནི་ཉི་མའི་དཀྱིལ་འཁོར་རོ། །དེའི་འོད་ནི་ཉི་མའི་དཀྱིལ་འཁོར་གྱི་འོད་དོ། །ཆུང་དུ་གྱུར་པ་ནི་ཉི་མའི་དཀྱིལ་འཁོར་གྱི་འོད་དེ། གང་དེ་ཆུང་དུ་གྱུར་པ་དེ་ནི་ཉི་མའི་དཀྱིལ་འཁོར་གྱི་འོད་ཆུང་དུ་གྱུར་པའོ། །དེ་ལ་ལྟས་ངན་ཆེན་པོ་ཞེས་བྱ་བ་ནི་ལྟས་འབྱུང་བ་སྟེ། ཤིན་ཏུ་ཆེ་བ་ཉིད་དུ་བསྟན་པའི་ཕྱིར། རླབས་ནི་རྣམ་པར་འཁྲུག་ཅིང་ཞེས་བྱ་བའི་ཚིགས་བཅད་སྨོས་ཏེ། རྒྱུ་གསུམ་གྱི་ལྟས་ངན་ཆེན་པོ་ཉིད་དུ་སྟོན་ཏོ། །མདོག་དང༌། སྒྲ་དང༌། དབྱིབས་སོ། །དེ་ཡང་དབྱིབས་ནི། ཆུ་ཀུན་ཐ་མལ་འདུག་ལས་རབ་ཏུ་གཡོས། །ཞེས་བྱ་བའི་ཚིགས་བཅད་ཕྱེད་ཀྱིས་བསྟན་ཏོ། །ཆུ་ཀུན་ཐ་མལ་འདུག་ལས་རབ་ཏུ་གཡོས། །ཞེས་བྱ་བ་ཉིད་བསྟན་པའི་ཕྱིར། ལྟས་ངན་གློ་བུར་ལངས་པའི་རླུང་གིས་ཞེས་བྱ་བའི་ཚིགས་བཅད་སྨོས་ཏེ། ཆུ་ཐ་མལ་པར་འདུག་པ་ལས་རབ་ཏུ་བསྐྱེད་པ་ཉིད་ནི་སྒྲ་སྒྲོགས་པ་དང༌། ཚད་དང༌། ཤུགས་དང༌། འགྲོས་ཀྱིས་བསྟན་པ་ཡིན་ཏེ། དཀྲུགས་པ་ནི་འགྲོས་ཏེ། སྣ་ཚོགས་སུ་འགྲོ་བའི་ཕྱིར་རོ།།
འཇིང་ནི་རབ་ཏུ་འཇིགས་སུ་རུང་བ་སྟེ། དེའི་རབ་ཏུ་འཇིགས་སུ་རུང་བ་ནི། གློག་ཕྲན་འགྱུ་བའི་འོད་འབར་ལྕེ་གཡོ་བ། །ཞེས་བྱ་བའི་ཚིགས་བཅད་གསུམ་གྱིས་བསྟན་ཏེ། དེའི་རབ་ཏུ་འཇིགས་སུ་རུང་བ་ནི་སྤྲིན་དང་བ་དང༌། སྣང་བ་ནུབ་པ་དང༌། དེའི་མི་མཐུན་པའི་ཕྱོགས་ཀྱི་ལྟས་ངན་འབྱུང་བ་སྟོན་པས་སོ། །གློག་ཕྲན་འགྱུ་བ་ཞེས་བྱ་བ་འདིའི་བསྡུས་པའི་དོན་ནི་མདོག་དང་ཚད་དང༌། སྒྲ་དང༌། སྤྲིན་གྱི་ཁྱད་པར་ཏེ། གློག་ཕྲན་འགྱུ་བ་འོད་འབར་ལྕེ་གཡོ་བ། །ཞེས་བྱ་བ་དང༌། སྔོ་བ་ཞེས་བྱ་བས་ནི་མདོག་བསྟན་ཏོ། །སྤྲིན་གྱིས་ཉི་མའི་ལམ་ཡང་བསྒྲིབས་པར་འགྱུར། །ཞེས་བྱ་བ་འདིས་ནི་ཚང་བསྟན་ཏོ། །སེམས་སྟོབས་ཡོན་ཏན་བསམ་པ་སྟོན་ཞེས་བྱ་བ་ནི་སྙིང་སྟོབས་ཉིད་ཀྱི་ཡོན་ཏན་གང་ཡིན་པ་དེ་ནི་སེམས་སྟོབས་ཡོན་ཏན་ཏེ། སེམས་སྟོབས་ཀྱི་ཡོན་ཏན་ཇི་ལྟ་བ་བཞིན་དུ་བསམ་པ་ནི་འདོད་པ་སྟེ་སྟོན་ཅིང་སྨྲ་བའོ། །དེ་དག་སྐྲག་ཅིང་སྤ་གོང་མི་སྨྲ་ཞུམ། །ཞེས་བྱ་བ་ནི་སེམས་ཅན་དམན་པའི་དབང་དུ་བྱས་པའོ། །བརྟན་པོ་དག་ནི་ཐར་པའི་ཐབས་ལ་འབད། །ཅེས་བྱ་བ་ནི་སེམས་ཅན་དམན་པའི་དབང་དུ་བྱས་པའོ། །ཁ་ཅིག་རང་གི་ལྷ་ལ་གསོལ་བ་འདེབས། །ཞེས་བྱ་བ་ནི་བར་མའི་དབང་དུ་བྱས་པའོ། །འཇིགས་པ་དང་བག་ཚ་བ་ནི་འཇིགས་ཤིང་བག་ཚ་བ་སྟེ། སེམས་དང་ལུས་ལ་གོ་རིམས་བཞིན་དུའོ། །དེ་གཉིས་ཀྱིས་ཅི་བྱ་གཏོལ་མེད་པ་ནི་འཇིགས་ཤིང་བག་ཚབས་ཅི་བྱ་གཏོལ་མེད་པའོ། །ལྟས་ངན་གློ་བུར་དུ་བྱུང་བ་ནི་ལྟས་ངན་གློ་བུར་དུ་བྱུང་བར་གྱུར་པའོ། །ལྟས་ངན་གློ་བུར་དུ་བྱུང་བ་ཡིན་ལ་འཁྲུགས་པ་ཡང་ཡིན་པས་ལྟས་ངན་གློ་བུར་བྱུང་བས་འཁྲུགས་པའོ། །དེ་ནི་རྒྱུས་ཉོན་མོངས་པར་གྱུར་པ་ནི་ལྟས་ངན་གློ་བུར་དུ་བྱུང་བས་འཁྲུགས་ཤིང་ཉོན་མོངས་པར་གྱུར་པའོ། །འདི་ལྟ་བུས་ཞེས་བྱ་བ་ནི་ངོ་མཚར་མི་ཆེ་བའི་ཕྱིར་རོ། །ཞུམ་པས་ཕོངས་ལས་ཐར་ལ་མི་ཕན་གྱིས། །ཞེས་བྱ་བ་ནི་གང་སྔར་བསྟན་པ་དེ་དག་སྐྲག་ཅིང་མི་སྨྲ་བས་སྤ་གོང་ཞུམ་ཞེས་བྱ་བ་དེའི་དབང་དུ་བྱས་པའོ། །མྱ་ངན་གདུང་བར་མ་བྱེད་པར། །ཞེས་བྱ་བ་ནི་གང་
སྔར་བསྟན་པའི་རང་གི་ལྷ་ལ་གསོལ་བ་འདེབས་ཞེས་བྱ་བ་དེའི་དབང་དུ་བྱས་པ་སྟེ། གང་གི་ཕྱིར་མྱ་ངན་དང་གདུང་བས་ནི་རང་གི་སྐྱེས་བུ་བྱེད་པ་ཉམས་པར་འགྱུར་ཞིང་ལྷ་ལ་གསོལ་བ་མཆོག་ཏུ་འཛིན་པས་ཀྱང་ངོ༌། །བརྟན་བྱས་ནས་ཞེས་བྱ་བ་ནི་གང་སྔར་བསྟན་པའི་བརྟན་པོ་དག་ནི་ཐར་པའི་ཐབས་ལ་འབད། །ཅེས་བྱ་བ་དེའི་དབང་དུ་བྱས་པའོ། །འཇིགས་པ་དང་མི་དགའ་བ་ནི་འཇིགས་ཤིང་མི་དགའ་བའོ། །མཁས་པ་ནི་ཐབས་ཤེས་པའོ། །གཟི་བརྗིད་བརྟན་པས་ཞེས་བྱ་བ་ནི་སྐྱེས་བུ་བྱེད་པའི་གཟི་བརྗིད་ཀྱིས་ཏེ་གཟེངས་བསྟོད། པའོ། །དོན་ཐམས་ཅད་གྲུབ་པ་ལག་པའི་རྩེ་ལ་ཡོད་པ་དེ་ནི་དོན་རྣམས་ཐམས་ཅད་གྲུབ་པ་ལག་ན་ཡོད་པའོ། །སྟེང་དུ་འབྱུང་བ་ནི་གྱེན་དུ་འབྱུང་བའོ། །འཇུག་པ་ནི་ནང་དུ་འཇུག་པའོ། །གཡོ་བ་ནི་ཐད་ཀར་འགྲོ་བ་སྟེ། དེ་དག་གི་ཞར་ནི་ཞར་ཡིན་ཏེ། སྟེང་དུ་འབྱུང་ཞིང་ནང་དུ་འཇུག་པའི་ཞར་པའོ། །དེ་བས་ན་བདག་ཅག་ཡུལ་ནི་གཉིས་ལས་ཞེས་བྱ་བ་ནི་འདི་ལྟར་བདག་ཅག་ཡུལ་གང་ལས་བྱུང་བ་དང༌། གང་དུ་འགྲོ་བར་འདོད་པའི་ཡུལ་ལོ། །འབབ་པ་ནི་ཆུའི་རྒྱུན་ནོ། །ནུབ་ཕྱོགས་ནས་ཞེས་བྱ་བ་ནི་ནུབ་ཕྱོགས་ཀྱི་ཕྱོགས་ནས་སོ། །དངུལ་གྱི་མདོག་ནི་དངུལ་གྱི་ཁ་དོག་སྟེ། དེ་དང་འདྲ་བའི་ཆུ་དཀར་པོ་གང་ཡིན་པ་དེ་ནི་དངུལ་གྱི་མདོག་འདྲ་བའི་ཆུ་དཀར་པོའོ། །དབུ་བ་མང་པོ་འཁྲིགས་ཤིང་སྐྱ་བ་དེ་ནི་དབུ་བ་མང་པོ་འཁྲིགས་ཤིང་སྐྱ་བའོ། །འོ་མའི་རྒྱ་མཚོ་ཞེས་བྱ་བ་དེ་ནི་འཇིག་རྟེན་པ་རྣམས་ཀྱིས་དེ་ལྟར་མིང་དུ་བརྗོད་པ་སྟེ། ཞོའི་ཕྲེང་བ་ཞེས་བརྗོད་དོ། །མི་མཐུན་པའི་རླུང་གིས་ཞེས་བྱ་བ་ནི་འདོད་པའི་ཡུལ་དང་མི་མཐུན་པར་གྱུར་པ་ཞེས་བྱ་བའི་དོན་ཏོ། །གསེར་གྱི་མདོག་འདྲ་བའི་རླབས་ཀྱི་ཕྲེང་བ་རབ་ཏུ་འཁྲུགས་པ་གང་ཡིན་པ་དེ་ནི་རླབས་ཀྱི་ཕྲེང་བ་རབ་ཏུ་འཁྲུགས་པའི་གསེར་གྱི་མདོག་འདྲ་བའོ། །མེ་འབར་བ་ཉིད་སེར་སྐྱ་ཡིན་པས་ཆུའི་མདོག་མེ་འབར་བ་སེར་སྐྱ་སྟེ་ཆུ་དེའོ། །སྔོ་བ་མ་ཡིན་ཏེ་ཞེས་བྱ་བ་ནི་རང་བཞིན་གྱིས་དམར་བ་ཡིན་པས་སྔོན་པོ་དགག་པ་སྟེ། གནས་སྐབས་ཀྱི་དབང་གིས་དེ་དམར་བར་རྟོགས་
པར་བྱའོ། །སྦུར་ལོང་དང་ཨནད་རྙིལ་ནི་སྦུར་ལོང་དང་ཨནད་རྙིལ་ལོ། །དེ་གཉིས་ཀྱི་མདོག་གང་ལ་ཡོད་པ་དེ་ནི་སྦུར་ལོང་དང་ཨནད་རྙིལ་གྱི་མདོག་གོ །དེ་གཉིས་དང་འདྲ་བའི་ཆུ་གང་ཡིན་པ་དེ་ནི་སྦུར་ལོང་དང་ཨནད་རྙིལ་གྱི་མདོག་འདྲ་བའོ། །ཆུ་དེ་ཡོངས་སུ་སྨིན་པའི་ཀུ་ཤ་དང་འདྲ་བའི་ཁ་དོག་ཀྱང་ཡོད་པས་སོ། །སྨྱིག་མའི་མདོག་དང༌། བཻ་ཌཱུཪྻའི་འོད་ནི་སྨྱིག་མའི་མདོག་དང་བཻ་ཌཱུཪྻའི་འོད་དོ། །དེ་དང་འདྲ་བར་ནི་མཐུན་པར་སྣང་བ་སྟེ། སྔོ་བའི་ཆུ་གང་ཡིན་པའོ། །རྒྱ་མཚོ་ཡང་བླ་འོག་བཟློག་པ་འདྲའོ། །ཞིང་ཞེས་བྱ་བ་ནི་ཁས་བུབ་ཏུའོ། །སེར་བ་དྲག་པོ་འབབ་པ་འདྲ་ཞིང་ཞེས་བྱ་བ་ནི་ཤིན་ཏུ་འཇིགས་སུ་རུང་བའོ། །སྨྱིག་མའི་ཚལ་མེས་ཚིག་སྟེ་ཏོག་ཡར་གྱིས་འགེངས་པ་དང་འདྲ་བར་ཐོས་ནས་ཀྱང་རབ་ཏུ་སྐྲག་ཅིང་འདར་བའོ། །གཡངས་བཞིན་དུ་ཞེས་བྱ་བ་ནི་མྱུར་དུ་ལྟུང་བའི་ཕྱིར་རོ། །གཅོད་རོང་བཞིན་དུ་ཞེས་བྱ་བ་ནི་བསྡུས་ནས་ལྟུང་བའི་ཕྱིར་རོ། །བདག་ཅག་རྣ་བ་གས་ཤིང་ཞེས་བྱ་བའི་ཚིག་རྐང་འདིས་ནི་གང་གོང་དུ་བསྟན་པའི་འཇིགས་པ་བྱེད་པ་ཐོས་པར་གྱུར་ཞེས་བྱ་བ་དེ་ཉིད་བསྟན་པ་ཡིན་ནོ། །ཆུའི་བདག་པོ་ཁྲོས་པ་འདྲ་བའི་ཞེས་བྱ་བའི་ཚིག་རྐང་འདིས་ན་གང་དེ་སྔར་བསྟན་པའི་མེའི་ཏོག་ཡར་གྱིས་འགེངས་པ་འདྲ་བའི་སྒྲ་ཆེ་ཞིང་ཞེས་བྱ་བ་ཡིན་ནོ། །འཇིགས་སུ་རུང་བ་ནི་དེའི་སྒྲ་ཤིན་ཏུ་ཆེ་བས་འཇིགས་སུ་རུང་བ་ཉིད་དུ་བསྟན་པ་སྟེ། དེ་ཉིད་འདིས་བསྟན་པའི་ཕྱིར། ཆུ་འདི་ཐམས་ཅད་གཅོང་རོང་འཇིགས་པའི་ཞེས་བྱ་བ་ཡིན་ཏེ། འདི་ནི་གང་དེ་སྔར་བསྟན་པའི་ཆུའི་འཇིང་ཆེན་པོ་སྟེ་གཡང་ས་དང་གཅོང་རོང་གི་ནད་དུ་བབ་པ་ཞེས་བྱ་བ་དེ་ཉིད་སྟོན་ཏོ། །མངོན་སོང་ཞེས་བྱ་བ་དེ་ནི་ཉེ་བར་གྱུར་པ་ཡིན་ཏེ། ཉེ་བར་ཕྱོགས་ཤིང་མངོན་དུ་བལྟས་པའམ་མངོན་དུ་ཕྱོགས་པ་ནི་མངོན་སོང་ངོ༌། །ལྷ་དང་ང་གུས་པས་ཕྱག་འཚལ་ཞེས་བྱ་བ་ལ་ཉི་མ་ཞེས་སྨོས་པས་ལྷ་ཐམས་ཅད་གྲུབ་མོད་ཀྱི། སོ་སོར་སྨོས་པ་ནི་ལྷའི་བདག་པོ་ཡིན་པའི་ཕྱིར་རོ། །ཕོངས་པར་གྱུར་ལ་འཇིགས་པ་མེད་པ་ཞེས་བྱ་བ་ནི་སྦྱོར་བ་ཕུན་སུམ་ཚོགས་པའོ། །གཞན་ལ་ཕན་འདོགས་ཡོན་ཏན་བསགས་
པའི་ཞེས་བྱ་བ་ནི་བསམ་པ་ཕུན་སུམ་ཚོགས་པའོ། །ཡང་ན་ཚིག་རྐང་དང་པོས་ནི་ཡོངས་སུ་སྐྱོབ་པའི་ནུས་པ་བསྟན་ཏོ། །གཉིས་པས་ནི་བྱེད་པར་འདོད་པ་ཉིད་བསྟན་ཏོ། །ཁྱོད་ཀྱི་མཐུ་ཆེན་ཁྱད་པར་ཅན། །ཞེས་བྱ་བ་དེས་ནི་རྣམ་པ་གཉིས་ཏེ། སྦྱོར་བའི་མཚན་ཉིད་ཀྱིས་ནུས་པའམ། བྱེད་པར་འདོད་པའི་མཚན་ཉིད་དོ། །ཉམ་ཐག་པ་ནི་སྡུག་བསྔལ་བ་ཉིད་དོ། །མགོན་མེད་པ་ནི་སྐྱབས་མེད་པར་གྱུར་པའོ། །སྐྱབས་སུ་མཆིས་ཞེས་བྱ་བ་ནི་ཡོངས་སུ་སྐྱབས་པའི་དོན་དུ་སྟེ། རྒྱུ་འདི་གསུམ་གྱིས་ནི་བདག་ཉིད་སྙིང་རྗེའི་གནས་སུ་སྟོན་པ་ཡིན་ནོ། །ད་ནི་བཅོས་པའི་ཆེད་ཉིད་ལས་བརྩམས་ནས། སྐྱེ་བོ་ཆབ་ཀྱི་ནང་དུ་འགུམ་པ་འདི། །ཞེས་བྱ་བའི་ཚིགས་བཅད་ཡིན་ཏེ། དེ་བས་ཞེས་བྱ་བ་ནི་ཁྱོད་ཀྱི་བཀའ་ལས་མི་འདའ་བས་ནའོ། །བསད་པར་བདག་ནི་ཡོངས་མི་དྲན། །ཞེས་བྱ་བ་ནི་དུས་དེ་ཡན་ཆད་དུའོ། །བདག་ནི་ཤེད་བྱེ་ཚུན་ཆད་དུ། །ཞེས་བྱ་བ་ནི་ཤེད་བྱེ་ཞིང་གོ་བ་ནས་བརྩམས་པའོ། །བདག་གི་བསོད་ནམས་མཐུ་དག་གིས། །ཞེས་བྱ་བ་ནི་སྲོག་གཅོད་པ་ལས་ལྡོག་པའི་རྒྱུ་དེའི་བསོད་ནམས་ཀྱི་སྟོབས་སོ། །ཡང་ན་སྐྱེ་བ་དུ་མ་ནས་བསགས་པའི་བསོད་ནམས་དེའི་མཐུས་སོ། །གང་སྔར་བསྟན་པའི་ཆོས་ལ་གནས་ན་བདེན་པའི་ཚིག་ཙམ་གྱིས་ཀྱང་མ་རུང་བར་འགྱུར་བ་ལས་ཐལ་བར་འགྱུར་ན་དེའི་འབྲས་བུ་ལྟ་ཅི་སྨོས་ཞེས་བྱ་བ་དེ་ཡང་གསལ་བར་བྱེད་པ་ཡིན་ནོ། །གཞལ་མེད་ཁང་མཛེས་པའི་ཚུལ་དུ་ཞེས་བྱ་བ་ནི་མཐུན་པའི་རླུང་གིས་འགྲོ་བ་དང་ཆོས་མཐུན་པས་སོ། །ཡང་ན་རང་དགར་ཞེས་བྱ་བ་ནི་རླུང་གི་དབང་མ་ཡིན་པར་ཡང་དེའི་བདེན་པའི་བྱིན་གྱི་བསོད་ནམས་ཀྱིས་ཡོངས་སུ་གཟུང་བས་སོ། །ཉི་མ་ནུབ་བའི་ལམ་ཞེས་བྱ་བ་ནི་ནམ་མཁའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ལེགས་པར་ཕ་རོལ་ཏུ་ཕྱིན་པའི་སྐྱེས་པའི་རབས་སོ།། །།ཚུལ་ཁྲིམས་དང་ལྡན་པ་ཞེས་བྱ་བ་ནི་ཉར་སྐྱེས་པ་འདི་ཉིད་དུ་དེའི་ཚུལ་ཁྲིམས་གཟུང་བ་ཡིན་ཏེ། ཟས་སུ་གྱུར་པའི་ནི་ནང་གི་ཉ་དག་ལས་
སོ། །མིར་གྱུར་པ་གཞན་དག་ལ་ནི་དགེ་བ་དང་མི་དགེ་བའི་ལས་ལ་གོམས་པ་འདི་ལྟ་བུ་མེད་པ་ཡིན་ཏེ། ཚེ་རབས་གཞན་དང་གཞན་དུ་གོམས་པར་བྱས་པའི་ཕྱིར་རོ། །དེ་ལྟ་བུ་དག་ཅེས་བྱ་བ་ནི་དགེ་བ་དང་མི་དགེ་བའི་ལས་རྣམས་སོ། །མ་བསྒྲིབས་ཀྱང་ཞེས་བྱ་བ་ནི་གོམས་པར་བྱས་པའི་ཕྱིར་ཏེ། རྨི་ལམ་གྱི་ནང་བཞིན་དུ་སྟོན་པའི་ཕྱིར་རོ། །བྱམས་པ་ཞེས་བྱ་བ་འདིས་ནི་བསམ་པ་ཕུན་སུམ་ཚོགས་པ་བསྟན་ཏོ། །སྦྱིན་པ་དང༌། ཚིག་འཇམ་པོ་དང༌། དོན་སྤྱོད་པ་ལ་སོགས་པའི་རིམ་པས་རབ་ཏུ་ཕན་འདོགས་པར་འགྱུར་རོ་ཞེས་བྱ་བ་འདིས་ནི་སྦྱོར་བ་ཕུན་སུམ་ཚོགས་པ་བསྟན་ཏོ། །འདིར་ཇི་ལྟར་བསྡུ་བའི་དངོས་པོ་བཞིས་ཕན་འདོགས་པའི་དོན་ཡིན་ཞེ་ན། མཐུན་པར་བདག་དང་གཞན་ལ་ཕན་འདོགས་པར་འཇུག་པ་ནི་འདི་དག་གི་བསྡུས་པའི་དོན་ཏེ། འདིར་ནི་གཞན་ལ་ཕན་འདོགས་པ་རང་འཇུག་པ་འབའ་ཞིག་གི་དབང་དུ་བྱས་པའོ། །རིམ་པ་ཞེས་སྨོས་པ་ནི་འདུལ་བའི་སྐྱེ་བོ་ལ་སྔོན་དུ་སྦྱིན་པར་བྱ་བ་ཡིན་ནོ། །དེ་ནས་ཚིག་འཇམ་པོས་ཡང་དག་པར་བསྟན་ཅིང་ཡང་དག་པར་གཟེངས་བསྟོད་པར་བྱའོ། །དེའི་འོག་ཏུ་རབ་ཏུ་ཞུགས་པར་གྱུར་པ་རྣམས་ལ་དོན་སྤྱོད་པས་གང་དུ་དེ་འཛིན་དུ་བཅུག་ཅིང་དེའི་གྲོགས་བྱེད་པ་ཡིན་ཏེ། བསྡུ་བའི་དངོས་པོ་དེའི་རིམ་པ་ནི་འདི་ཡིན་ནོ། །དེས་ན་བྱང་ཆུབ་སེམས་དཔའི་ཕན་འདོགས་པ་ཁྱད་པར་དུ་གྱུར་པའོ། །ཐབས་ལ་མཁས་པ་ནི་ཤེས་རབ་ཀྱིས་སོ། །རིགས་པས་ཞེས་བྱ་བ་ནི་བརྩོན་འགྲུས་ཀྱིས་སོ། །དེ་གཉིས་ཀྱིས་ནི་རྟག་ཏུ་བྱེད་པ་དང་གུས་པར་བྱེད་པ་བསྟན་ཏོ། །ཉ་རྣམས་ཀྱི་ཆོས་ཀྱི་ཚུལ་ནི་ཉ་ཟ་བར་བྱེད་པའོ། །ཉའི་རིགས་དེས་ལེགས་པར་བསྐྱངས་བས་རབ་ཏུ་དར་ཞིང་རྒྱས་པ་ཡིན་ཏེ། ཅིའི་ཕྱིར་ཞེ་ན། གནོད་པ་མེད་པའི་ཕྱིར་རོ། །ཇི་ལྟ་བུར་ཞེ་ན། མིའི་བདག་པོས་ཚུལ་བཞིན་སྤྱོད་པས་ཡོངས་སུ་བསྐྱངས་པ་ནི་འབངས་རྣམས་གནོད་པ་མེད་པ་བཞིན་ནོ། །སྐལ་བ་མེད་པར་གྱུར་པ་ཞེས་བྱ་བས་ནི་རྒྱུ་མ་ཚང་བར་སྟོན་ཏོ། །ཆར་འབེབས་པའི་ལྷའི་བུ་བག་མེད་པ་ཞེས་བྱ་བས་ནི་
རྐྱེན་མ་ཚང་བར་སྟོན་ཏེ་རྒྱུ་དང་རྐྱེན་རྣམ་པ་གཉིས་ནི་དངོས་པོ་ཐམས་ཅད་འབྱུང་བ་ཡིན་ཏེ་གཞན་དུ་ནི་མ་ཡིན་ནོ། །ངལ་ཞིང་ལེ་ལོའི་དབང་གིས་བུལ་བར་གྱུར་པ་འདྲ་བའི་ཞེས་བྱ་བ་ནི་ཉི་མ་རིང་ཞིང་སོ་གའི་དུས་སུ་འགྲོས་བུལ་བའི་ཕྱིར་རོ། །ཇི་ལྟར་འཇིག་རྟེན་པ་རྣམས་ངལ་བ་དང་ལེ་ལོའི་དབང་དུ་གྱུར་ན་མྱུར་དུ་འདའ་བར་བྱེད་མི་ནུས་སོ། །དེ་བཞིན་དུ་ཉི་མའི་དཀྱིལ་འཁོར་ཡང་དེ་ལྟ་བུས་འཇུག་པའི་ཕྱིར་རོ། །དེས་ན་ཡང་སྐོམ་པའི་དབང་གིས་ཉིན་རེ་བཞིན་འཐུང་བ་བཞིན་དུ་ཞེས་བྱ་བ་ནི་ས་དང་ཀླུང་གཉིས་ལ་ཉི་མའི་འོད་ཀྱིས་གདུངས་པའི་དྲོད་ཀྱིས་སོ། །ཚ་བ་དང་སྐོམ་པའི་དབང་གིས་བསིལ་བ་འདོད་པས་ཉིན་རེ་ཞིང་འཐུངས་པ་བཞིན་དུ་ཞེས་བྱ་བ་དེ་ཉིད་བསྒྲུབ་པའི་ཕྱིར། དཔྱིད་ཀྱི་དུས་ཀྱི་ཉི་མ་འབར་བ་དང༌། །ཞེས་བྱ་བའི་ཚིགས་བཅད་དེ་སྔར་སྨོས་པའི་ཚིག་རྐང་གི་དོན་འདིས་སྟོན་ཏེ། རྒྱུ་འདི་གསུམ་གྱིས་ཆུ་སྐམ་པར་འགྱུར་གྱི་གཞན་དུ་ནི་མ་ཡིན་ནོ། །ཁྭ་རྣམས་ཀྱང་ཞེས་བྱ་བ་ནི་ཆུ་ལས་རིང་དུ་སྤྱོད་པའོ། །ཆུ་ཡང་ཉིན་རེ་ཞིང་ཞེས་བྱ་བ་དང༌། བྲོས་ཏེ་འགྲོ་བའི་ལམ་ཡང་མེད། །ཅེས་བྱ་བའི་ཚིགས་བཅད་ཀྱིས་ནི་ཉ་རྣམས་རྣམ་པར་འཇིགས་པའི་རྒྱུ་མ་ལུས་པར་བསྟན་ཏེ། རྒྱུ་གསུམ་གྱིས་དགྲ་ལས་ཐར་པར་མི་འགྱུར་བ་ཡིན་ཏེ། དགྲ་རྣམས་སྟོབས་ཆེ་ཞིང་དེའི་གནས་ན་འདུག་པ་དང༌། དེ་མེད་ཀྱང་ཡུལ་གཞན་དུ་འགྲོ་བར་མི་ནུས་པ་དང༌། དེ་མེད་ཀྱང་དགྲ་དང་ཉེ་བར་གནས་པ་སྟེ། རྒྱུ་འདི་གསུམ་ཡོད་པས་གདོན་མི་ཟ་བར་ཉ་རྣམས་འཇིགས་པའི་རྒྱུར་སྟོན་ཏོ། །དགྲ་རྣམས་སྟོབས་ཆེ་ཞིང༌། གནས་ན་འདུག་པས་སྐྱབས་མེད་པའི་དབང་དུ་བྱས་ནས། ཆུ་ཡང་ཉིན་རེ་བྲི་བར་གྱུར། །ཞེས་བྱ་བའི་ཚིགས་བཅད་ཡིན་ཏེ། སྔར་གནས་པའི་ཆུ་ཟད་པ་དང། ཆུ་ཕྱི་མ་མ་བྱུང་བས་སོ། །ཚིགས་བཅད་གཉིས་པས་ནི་དེ་ཡུལ་གཞན་དུ་འགྲོ་མི་ནུས་པ་དང༌། དགྲ་དང་ཉེ་བར་གནས་པར་བསྟན་ཏོ། །ཡུལ་གཞན་དུ་འགྲོ་བར་མི་ནུས་པའི་རྒྱུ་ནི་གཉིས་ཏེ། རང་གི་སྐྱེས་བུའི་བྱེད་པའམ། གཞན་གྱི་དཔུང་སྟ་གཉི་ག་
མེད་པའོ། །བདག་ཅག་བརླག་པར་དགའ་བའི་ཞེས་བྱ་བའི་ཚིགས་བཅད་ཕྱེད་ཀྱིས་ནི་དགྲ་དང་ཉེ་བར་གནས་པ་སྟོན་ཏོ། །ནག་པོའི་སྤྲིན་རྣམས་རི་བོའི་གྲིབ་མ་བཞིན། །ཞེས་བྱ་བ་ལ་སོགས་པའི་ཚིགས་བཅད་ལྔ་ནི་ཆར་འབབ་པའི་རྟགས་ཀྱི་དབང་དུ་བྱས་པ་དང༌། ཆར་འབབ་པའི་དབང་དུ་བྱས་པ་སྟེ། ཆར་འབབ་པའི་རྟགས་ཀྱི་དབང་དུ་བྱས་ནས། ནག་པོའི་སྤྲིན་རྣམས་རི་བོའི་གྲིབ་མ་བཞིན། །ཞེས་བྱ་བའི་ཚིགས་བཅད་དང༌། འབྲུག་གི་རྔ་སྒྲས་རབ་ཏུ་དགའ་གྱུར་ནས། །ཞེས་བྱ་བ་དང༌། དེ་ཡིས་ཆར་ཕབ་མུ་ཏིག་གཏོར་བ་ཞེས་བྱ་བ་འདི་དག་ནི་ཆར་ཕབ་པའི་རྟགས་བསྟན་ཏོ། །འབྲུག་གི་རྔ་སྒྲ་བཞིན་དུ་ཞེས་བྱ་བའི་ཚིགས་བཅད་འདི་དག་གོ་རིམས་བཞིན་དུ་གནས་པ་ཡིན་ཏེ། དེའི་གོ་རིམས་ནི་རྨ་བྱ་རབ་དགའ་ཟེ་བ་འབྲེལ་པ་ཞེས་བྱ་བའི་འོག་ཏུ་འདི་བྲི་བར་བྱའོ།། དེའི་ཆར་འབབ་པའི་དུས་ཀྱི་རྟགས་ནི་རྣམ་པ་ལྔ་སྟེ། སྤྲིན་ལངས་པ་དང༌། འབྲུག་ཟེར་བ་དང༌། གློག་དང༌། ཆར་དང༌། རླུང་སྟེ། གོ་རིམས་ཇི་ལྟ་བ་བཞིན་སྦྱར་བར་བྱའོ། །བབ་པའི་དབང་དུ་བྱས་ན་ནི་དཔྱིད་ཀྱི་དུས་ལ་བབ་པར་རྣམ་པར་སྤེལ་ཀྱང༌། དཔྱིད་ཀྱི་དུས་ཀྱི་ཚ་བ་ཉེ་བར་ཞི་བ་སྟེ། ཆར་བབ་པས་སོ། །དཔྱིད་ཀྱི་དུས་ལ་བབ་པས་ཞེས་བྱ་བ་འདིས་ནི་ཆར་བབ་པར་བྱེད་པ་བསྟན་ཏོ། །འདི་ཉིད་སྔར་བསྟན་པའི་རྟགས་ཉིད་ལ་འཇུག་པར་འདོད་པ་ཡིན་ཏེ་དེ་བསྟན་པའི་ཕྱིར། ཆར་སྤྲིན་འབྲུག་སྒྲ་ཟབ་ཅིང་བརྟན།། ཞེས་སྨོས་ཏེ། ཆར་སྤྲིན་འབྲུག་སྒྲ་ཞེས་བྱ་བ་འདིས་ནི་སྤྲིན་དང་འབྲུག་སྒྲ་ཉིད་བསྟན་ཏོ། །ཆར་པའི་རྒྱུན་རྣམས་ཞེས་བྱ་བ་འདིས་ནི་ཆར་བསྟན་ཏོ། །གློག་འགྱུ་འབར་བ་ཞེས་བྱ་བ་འདིས་ནི་གློག་བསྟན་ཏོ། །ཅིའི་ཕྱིར་རླུང་འདིར་མ་སྨོས་ཤེ་ན། རླུང་མེད་པར་ཡང་འབབ་པའི་ཕྱིར་ཏེ། དེ་ནི་དེ་ལ་འཇིགས་པ་མེད་པའི་ཕྱིར་རོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཉའི་སྐྱེས་པའི་རབས་སོ།། །།བརྩོན་པར་བྱ་བ་ནི་གོམས་པར་བྱའོ། །མི་ནུས་པ་ནི་སྤྲོ་བ་མེད་པའོ། །སྒོ་ངའི་སྦུབས་ནས་
བྱུང་ནས་ཞག་གྲངས་མང་པོ་མ་ལོན་པ་གང་ཡིན་པ་སྟེ། འདིས་ན་ཚོད་བསྟན་ཏོ། །སྤུ་སར་པ་གདོད་སྐྱེ་བ་གང་ཡིན་པ་དེས་ནི་འགྲོ་བའི་བྱ་བ་མི་ནུས་པ་བསྟན་ཏོ། །རབ་ཏུ་རིད་པས་ཞེས་བྱ་བ་ཡང་འགྲོ་མི་ནུས་པའི་རྒྱུ་ཉིད་དེ། འདབ་གཤོག་རྣམས་ཀྱང་རྒྱས་ཞེས་བྱ་བ་ནི་འཕུར་དུ་རུང་བའི་གཤོག་པ་ཡོད་པས་སོ། །ཐམས་ཅད་ཟ་ཞིང་ཞེས་བྱ་བ་ནི་ཁ་ཟས་ཅི་ཡང་རུང་བ་ཟ་བ་སྟེ། དེས་ན་མི་འཆི་ཞིང་བརྟས་པར་འགྱུར་ཏེ། བཅོམ་ལྡན་འདས་ཀྱིས་ཀྱང་གསུངས་པ། བརྐམ་ཞིང་བྱ་རོག་ལྟར་དཔའ་བ། །ངོ་ཚ་མེད་པ་ལེགས་པར་འཚོ། །བརྣབ་ཅིང་སྤྱི་བརྟོལ་ཆེ་བ་ཡི། །འཚོ་བ་ཤིན་ཏུ་ཉོན་མོངས་ལྡན། །ཞེས་བྱ་བ་ནི་ཆོས་མ་ཡིན་པ་བྱེད་པའོ། །རྟག་ཏུ་སྐྱོན་མེད་འཚོལ་བ་དང༌། །ཞུམ་ཞིང་བག་དང་ཆས་པ་དང༌། །འཚོ་བ་སྐྱོན་མེད་ལྟ་བ་དང༌། །ངོ་ཚ་ཤེས་པའི་འཚོ་མི་བདེ། །ཆོས་དང་ལྡན་པས་ཆོས་ཤེས་པའི་ཕྱིར་རོ། །གར་གྱི་ཁྱད་པར་མཛེས་པ་ཡིན་པས་གར་མཛེས་པའོ། །མིང་དོན་མེད་པ་གང་ཡིན་པ་དེ་ནི་མིང་དོན་མེད་པའོ། །མིང་དོན་མེད་པའི་རྐང་པ་གང་ཡིན་པ་དེ་ནི་རྐང་པ་མིང་དོན་མེད་པའོ། །རྐང་པ་ནི་འགྲོ་བར་བྱེད་པས་ན་རྐང་པ་སྟེ། དེའི་ནུས་པ་མེད་པའི་ཕྱིར་མིང་དོན་མེད་པ་ཉིད་དེ། འདིས་ནི་འགྲོ་བར་མི་ནུས་པའོ། །བདག་གི་རྐང་པ་མིང་དོན་མེད་པ་དང༌། འདབ་མ་མེད་པ་འདི་གཉིས་ཀྱིས་འགྲོ་བར་མི་ནུས་པར་བསྟན་ཏོ། །ཕ་མ་གཉིས་ཀྱང་ཞེས་བྱ་བ་ནི། ཕ་དང་མ་གཉིས་སོ། །བྱེར་ཞེས་བྱ་བ་ནི་ཡུལ་གཞན་དུ་སོང་བ་སྟེ། འདིས་ནི་བྲལ་བར་སྟོན་ཏོ། །བདག་ཀྱང་རེ་ཞིག་འདི་ལྟ་བུའི་གནས་སུ་གྱུར་པ་སྟེ། ཁྱོད་ལ་མགྲོན་བྱར་རུང་བ་ཅི་ཡང་མེད། །ཅེས་བྱ་བ་འདིས་ནི་ཁྱོད་ཀྱི་འོང་བ་ཡང་རྒྱུ་མེད་པ་ཡིན་ནོ་ཞེས་བསྟན་ཏོ། །དེ་བས་ན་ཞེས་བྱ་བ་ནི་རྒྱུ་དེ་གཉིས་ནའོ། །རྒྱ་མཚོ་ཞེས་བྱ་བ་དང༌། བདག་ལ་ཕན་པར་འདོད་པ་ཞེས་བྱ་བ་གཉིས་ཀྱིས་ནི་དཔེ་སྨོས་པ་ཡིན་ཏེ། སེམས་ཅན་དང་སེམས་ཅན་མ་ཡིན་པའི་དཔེ་རྣམ་པ་གཉིས་བསྟན་ཏེ། དེ་དང་རིགས་མི་མཐུན་པ་དཔེར་རབ་ཏུ་གྲགས་པས་ཆོས་མཐུན་པའི་དཔེ་བསྟན་པའི་ཕྱིར་རོ། །སློབ་དཔོན་དཔའ་བོས་མཛད་པའི་སྐྱེས་པའི་
རབས་རྒྱ་ཆེར་བཤད་པ་ལས་བྱ་སྲེག་པའི་ཕྲུ་གུའི་སྐྱེས་པའི་རབས་སོ།། །།ཉེས་པ་དུ་མ་འབྱུང་བ་ཞེས་བྱ་བ་ནི་ཉེས་པ་དུ་མ་བསྐྱེད་པའི་ཕྱིར་ཞེས་བྱ་བའི་དོན་ཏོ། །ཤིན་ཏུ་མ་རུང་བར་གྱུར་པའི་ཕྱིར་ཞེས་བྱ་བ་ནི་གནོད་པ་སྟེ། གཞན་དག་པས་ཤིན་ཏུ་སྡིག་པར་འབྱུང་བའི་ཕྱིར་རོ། །དགེ་བ་རྣམས་ཞེས་བྱ་བ་ནི་བྱང་ཆུབ་སེམས་དཔའོ། །སྙིང་རྗེ་ཆེན་པོས་ཡོངས་སུ་བསྒོས་པའི་བློ་ཞེས་བྱ་བ་ནི་སྙིང་རྗེ་ཆེན་པོས་སྤགས་པ་སྟེ། འདིས་ནི་བསམ་པ་ཕུན་སུམ་ཚོགས་པ་བསྟན་ཏོ། །གཞན་ལ་ཕན་ཞིང་བདེ་བ་བྱེད་པ་ལ་དགའ་བ་ཞེས་བྱ་བ་འདིས་ནི་སྦྱོར་བ་ཕུན་སུམ་ཚོགས་པ་བསྟན་ཏོ། །བསོད་ནམས་སྤེལ་བ་ཉམས་སུ་ལེན་པ་ཞེས་བྱ་བ་ནི་བསོད་ནམས་ཀྱི་ཚོགས་སྤེལ་ཞིང་སྒྲོགས་པའོ། །སྦྱིན་པ་དང་དུལ་བ་དང་ཞི་བ་ཞེས་བྱ་བས་ནི་ཕ་རོལ་ཏུ་ཕྱིན་པ་གསུམ་བསྟན་ཏེ། སྦྱིན་པས་ནི་སྦྱིན་པའི་ཕ་རོལ་ཏུ་ཕྱིན་པ་བསྟན་ཏོ། །དུལ་བས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་ཏོ། །ཞི་བ་ནི་ཁྲོ་བ་ཉེ་བར་ཞི་བའི་མཚན་ཉིད་དེ། བཟོད་པའི་ཕ་རོལ་ཏུ་ཕྱིན་པ་བསྟན་ཏོ། །སོགས་པ་སྨོས་པས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་ཏེ། བསོད་ནམས་དང་ཡེ་ཤེས་ཀྱི་ཚོགས་གཉི་ག་ལ་འཇུག་པའི་ཕྱིར་རོ། །ཕུན་སུམ་ཚོགས་ཀྱང་ཞེས་བྱ་བ་ནི་ལྷའི་དབང་པོའི་གོ་འཕང་ཐོབ་སྟེ་ལོངས་སྤྱོད་ཅི་འདོད་པ་དང་ལྡན་པར་གྱུར་ཀྱང་ངོ༌། །སྙིང་རྗེའི་དབང་དུ་གྱུར་པས་ཞེས་བྱ་བ་ནི་སྔར་བསྟན་པའི་བསམ་པ་ཕུན་སུམ་ཚོགས་པ་བསྟན་ཏོ། །འཇིག་རྟེན་གྱི་དོན་ལ་བརྩོན་པ་ལྷོད་པར་མ་གྱུར་ཏོ་ཞེས་བྱ་བ་ནི་སྔར་བསྟན་པའི་སྦྱོར་བ་ཕུན་སུམ་ཚོགས་པ་བསྟན་ཏོ། །དཔལ་དང་ལྡན་པ་ཉིད་ཆང་ཡིན་པས་དཔལ་ལྡན་ཆང་གི་ཞེས་པའོ།། དེས་མྱོས་པ་ནི་དཔལ་ལྡན་ཆང་གིས་མྱོས་བཞིན་ནའོ། །དཔལ་དང་ལྡན་པ་ཆང་གིས་སེམས་ཡོངས་སུ་དཀྲུགས་ཏེ་བདག་གི་དོན་ཡང་འདོར་བ་ནི་བག་མེད་པའོ། །བག་ཡོད་རྣམས་ནི་ཞེས་བྱ་བ་ནི་བག་དང་ལྡན་པ་ཡིན་ཏེ། ཚུལ་ཁྲིམས་དང་གཞན་གྱི་དོན་
དུའོ། །བག་ཡོད་པ་ཉིད་དུ་བསྟན་པའི་ཕྱིར། སྡུག་བསྔལ་མང་པོས་གདུངས་པའི་སེམས་ཅན་ལ། །ཞེས་སྨོས་ཏེ། འདིའི་བསྡུས་པའི་དོན་ནི་སྙིང་རྗེ་དང༌། བརྟན་པ་དང་ཤེས་རབ་ཀྱི་ཡོན་ཏན་དང་ལྡན་པའི་ཕྱིར་གཞན་གྱི་དོན་སྤྱོད་པ་ཡོངས་སུ་མི་བརྗེད་པའོ། །སེམས་ཅན་ལ་བརྩེ་ཞིང་རང་གི་བདེ་བ་ལ་མ་ཆགས་པ་དང༌། བརྟན་པ་ལ་གནས་པའི་སྤྱོད་པ་དང༌། ཤེས་རབ་ཀྱི་རང་བཞིན་ཤེས་པས་སོ། །སྙིང་རྗེ་བ་ནི་མི་དགེ་བའི་ལམ་ལས་བཟློག་པ་དོན་དུ་གཉེར་བའོ། །བྱམས་པ་ནི་ཕན་པ་དང་བདེ་བ་ལ་སོགས་པའོ། །མཐུ་ཆེ་བའི་མིག་གིས་ཞེས་བྱ་བ་ནི་ལྷའི་མིག་གིས་སོ། །མི་དགེ་བའི་བཤེས་གཉེན་ལ་བརྟེན་པའི་སྐྱོན་གྱིས་ཞེས་བྱ་བ་ནི་རྐྱེན་གྱིས་འབྱུང་བའི་ཕྱིར་རང་ཉིད་ཀྱིས་ནི་ལྡོག་པར་མི་ནུས་པ་ཉིད་དེ། དེ་བས་ན་སྐྱོན་ཞེས་བསྟན་ཏོ། །བློན་པོ་དང་འབངས་སུ་བཅས་པར་ཞེས་བྱ་བ་ནི་སྐྱེ་བོ་མང་པོ་ལ་གནོད་པ་ཡིན་ཏེ། དེའི་རྐྱེན་གྱིས་སོ། །དེ་ལ་ཞེས་བྱ་བ་ནི་ཆང་འཐུང་བ་ལའོ། །སྐྱོན་དུ་ཡང་མི་ལྟ་བར་གྱུར་པ་ཞེས་བྱ་བ་ནི། སྐྱོན་དུ་ལྟ་བའི་ནུས་པ་ལས་ཉམས་པར་སྟོན་ཏོ། །སྐྱོན་ཆེ་བ་ཞེས་བྱ་བ་འདིས་ནི་དེ་ཉིད་སྟོན་པར་བྱེད་པ་ཡིན་ནོ། །འདི་དག་ཐམས་ཅད་ནི་བསམ་པའི་དོན་གྱི་རྒྱུ་ཡིན་ཏེ། འཐུངས་ན་ཐོག་མར་རབ་ཏུ་ཞིམ་ཞེས་བྱ་བ་འདི་དག་སྨྲས་སོ། །ཐོག་མར་ཞིམ་པ་ནི་སྐྱོན་དུ་ལྟ་བ་ལ་རྨོངས་པ་ཡིན་ཏེ། ཕྱི་ནས་རྗེས་སུ་འབྲེལ་པའི་ཉེས་པ་ལ་ནི་རྨོངས་པར་གྱུར་པས་སོ། །ལེགས་པར་འགྱུར་བ་ཞེས་བྱ་བ་ནི་མངོན་པར་མཐོ་བ་དང༌། ངེས་པར་ལེགས་པ་གཉིས་ལ་གཟུང་ངོ༌། །ཡང་ན་ལོག་པའི་ལམ་བཞིན་ཞེས་བྱ་བ་ནི་ལམ་ངན་པ་བཞིན་དུའོ། །ཅུང་ཟད་རྩུབ་པ་ཞེས་བྱ་བ་ནི་ཅུང་ཟད་རྩུབ་པའོ། །རལ་པའི་ཐོར་ཚུགས་ཡིན་པས་ན་སྐྲའི་ཐོར་ཚུགས་སོ། །གྱེན་དུ་མདུད་པའི་ཕྱིར་འཁྱིལ་བའོ། །ཅུང་ཟད་རྩུབ་པ་ཡང་ཡིན་ལ་འཁྱིལ་པ་ཡིན་པས་ཅུང་ཟད་རྩུབ་ལ་འཁྱིལ་བའོ། །སྐྲའི་ཐོར་ཚུགས་ཅུང་ཟད་རྩུབ་ལ་འཁྱིལ་བ་ག་ལ་ཡོད་པ་དེ་ནི་སྐྲའི་ཐོར་ཚུགས་ཅུང་ཟད་རྩུབ་པ་འཁྱིལ་བ་ཅན་ནོ། །ཤིང་གི་ཤུན་ལྤགས་དང༌། རི་དགས་ཨ་ཛི་ནའི་པགས་པ་
གཉིས་གྱོན་པའོ། །ཆང་གིས་གང་བ་ནི་ཆང་གིས་གང་བ་སྟེ། བུམ་པ་ཡང་མངོན་པར་སྤྲུལ་ལོ། །རིམ་གྲོ་བསྐྱེད་པ་ཞེས་བྱ་བ་ནི་འདྲ་བའི་རིམ་གྲོ་བསྐྱེད་པ་སྟེ། རྗེས་སུ་མཐུན་པའི་རིམ་གྲོ་ཞེས་བྱ་བའི་དོན་ཏོ། །མེ་ཏོག་གི་ཕྲེང་བ་མགུལ་ན་བཀོད་པ་གང་ཡིན་པ་དེ་ནི་མེ་ཏོག་གི་ཕྲེང་བ་མགུལ་ན་བཀོད་པའོ། །རྒྱན་གྱིས་བརྒྱན་པ་ཡིན་ཏེ། གང་གིས་ཤེ་ན། བུམ་པའི་རྒྱན་གྱིས་ཏེ། བུམ་པའི་རྒྱན་ནི་རྣ་བ་ལ་བརྒྱན་པའོ། །ཁྱོད་ཀྱི་སྐུ་ཞེས་བྱ་བ་ནི་ཆ་བྱད་དོ། །དེ་བས་ན་ཞེས་བྱ་བ་ནི་འོག་ནས་བསྟན་པའི་རྒྱུས་སོ། །ཁྱེད་ཅག་འཇིག་རྟེན་གཞན་ལ་མི་འཇིགས་ཤིང་ཞེས་བྱ་བ་ལ་སོགས་པ་ཡིན་པའི་ཕྱིར་རོ། །ངེད་ལ་ཞེས་བྱ་བ་ནི་མི་རྣམས་ལའོ། །ཁྱོད་ལྟ་བུ་ཞེས་བྱ་བ་ནི་ལྷའོ། །འདི་ནི་ཆུ་དང་ཞེས་བྱ་བ་ལ་སོགས་པའི་ཚིགས་བཅད་དེ་ནི་ཆང་འཐུང་བའི་ཕྱིར་གཞན་ལྟུང་བར་བྱ་བ་ལ་ཞོ་ལ་སོགས་པ་མི་འདོད་པ་ཡིན་པས་དེ་དག་གིས་དགའ་བ་མ་ཡིན་པ་བསྟན་པའི་ཕྱིར་དང༌། ཆུ་ལ་སོགས་པ་འཇིག་རྟེན་པ་དག་ལ་རབ་ཏུ་བསྔགས་པ་ཡིན་ཏེ། དེས་ན་འདི་དག་སྨོས་སོ། །གང་གོང་དུ་བསྟན་པ་དེ་ལ་སྐྱོན་དུ་ཡང་མི་ལྟ་བར་འགྱུར་ལ། ཆང་འཐུང་བ་ཡང་སྐྱོན་ཆེ་བར་མཐོང་ནས་ཞེས་བྱ་བ་ནི་ཆང་གི་སྐྱོན་ཆེ་བར་ཡང་དག་པར་བསྟན་པའི་ཕྱིར་ཚིགས་བཅད་བཅུ་བདུན་གྱིས་བསྟན་པ་སྟེ། དེ་ལ་ཆང་གི་སྐྱོན་ཡང་རྣམ་པ་གཉིས་ཏེ། མཐོང་བའི་ཆོས་ཀྱི་དང༌། དེ་ལས་སྐྱེ་པ་གཞན་པའོ། །དེ་ལ་མཐོང་བའི་ཆོས་ཀྱི་ཉེས་དམིགས་ཀྱི་དབང་དུ་བྱས་ནས་ཚིགས་བཅད་བཅུ་གསུམ་ཡིན་ཏེ། མཐོང་བའི་ཆོས་ཀྱི་སྐྱོན་ལ་ཡང་རྣམ་པ་གཉིས་ཏེ། བྱ་བ་མི་འཕེལ་བའི་སྐྱོན་ཤི་བ་ལྟར་གྱུར་པ་དང༌། བྱ་བ་མ་ཡིན་པ་ལ་འཇུག་པ་མྱོས་པ་ལྟར་གྱུར་པའོ། །དེ་ལ་བྱ་བ་མི་འཕེལ་བའི་སྐྱོན་གྱི་དབང་དུ་བྱས་པའི་གོ་རིམས་མདོར་བསྟན་པ་ནི་ཚིགས་བཅད་གཅིག་གོ །འཇིག་རྟེན་ཕ་རོལ་གྱི་ཉེས་དམིགས་ཀྱི་དབང་དུ་བྱས་པའི་གོ་རིམས་མདོར་བསྟན་པ་ཡང་ཚིགས་བཅད་གཅིག་གོ །དེ་ལ་བྱ་བ་མི་
འཕེལ་བའི་དབང་དུ་བྱས་པའི་ཚིགས་བཅད་བདུན་པོ་རྣམས་བསྡུས་པའི་དོན་ནི་འདི་ཡིན་ཏེ། སློབ་དཔོན་བཙུན་པ་གཞན་ལ་ཕན་པའི་དབྱངས་ཀྱིས་མདོ་སྡེ་རྒྱན་གྱི་ནང་དུ་ཆང་འཐུང་བའི་ཉེས་པའི་དབང་དུ་བྱས་ནས་གསུངས་ཏེ། དེ་ནི་ཚིགས་བཅད་འདི་དག་བསྡུས་པའི་དོན་ཡིན་ཏེ། ཇི་སྐད་དུ། གང་ཞིག་འཐུངས་པས་ལུས་རྙོག་དྲན་འཕྲོག་ཚུལ་ལས་འདའ་བ་དང༌། །བློ་རྨོངས་ངོ་ཚའི་ཆོས་གཅོད་འདུ་ཤེས་ཉམས་ཤིང་རིགས་བསླད་འགྱུར། །དགའ་མཆོག་ཉམས་ཤིང་ཞེ་སྡང་སྐྱེད་པར་བྱེད་པ་གང་ཞིག་གིས། །འཐུངས་ན་མྱོས་པར་འགྱུར་ཞིང་དྲན་ཉམས་དེ་ནི་འཆི་བཞིན་གནས། །ཞེས་བཤད་དོ། །དེ་བས་ན་ཚིགས་བཅད་འདིའི་གོ་རིམས་ཀྱིས་མཚོན་པ་འདིས་ནི། གང་ཞིག་འཐུངས་ན་ར་རོ་བློང་ནས་ཞེས་བྱ་བ་ལ་སོགས་པའི་ཚིགས་བཅད་དག་གི་དོན་བསྟན་པ་ཡིན་ནོ། །ལུས་རྙོག་ཅེས་བྱ་བ་དང༌། དྲན་པ་འཕྲོག་པ་དང༌། ཚུལ་ལས་འདའ་བ་ཞེས་བྱ་བ་ནི་གང་གི་ཕྱིར་འཆི་བར་གྱུར་ན་ཡོན་ཏན་འདི་དག་ཉམས་པ་ཡིན་ཏེ། དེ་བཞིན་དུ་ཆང་འདི་འཐུངས་ན་ཡང་ར་རོ་བློང་ནས་གོམ་པ་དབང་མེད་འདོར་ཞིང་འགྲོ་བ་དང༌། ཡུལ་ཕྱོགས་མ་འདྲིས་པར་ཡང་འཁྱམ་ཞིང་རྡེག་འཆོས་ཞེས་བྱ་བ་ཡིན་ཏེ། འདིར་ནི་སྔར་བསྟན་པའི་ལུས་རྙོག་ཅེས་བྱ་བ་དེ་བསྟན་པ་ཡིན་ནོ། །དྲན་པ་ཉམས་པ་ཞེས་བྱ་བ་འདིས་ནི་གོང་དུ་བསྟན་པའི་དྲན་པ་འཕྲོག་ཅིང་ཞེས་བྱ་བ་དེ་ཉིད་སྟོན་ཏོ། །བཟའ་དང་མི་བཟའ་དཔྱད་པ་མེད་པར་དེ་དང་དེ་དག་ཟར་འགྱུར་བ། །ཞེས་བྱ་བ་འདིས་ནི་གང་གོང་དུ་བསྟན་པའི་ཚུལ་ལས་འདའ་བ་ཞེས་བྱ་བ་དེ་སྟོན་ཏོ། །ཚིགས་བཅད་ཀྱི་དོན་གང་སྔར་བསྟན་པའི་ངོ་ཚའི་ཆོས་གཅོད་ཅེས་བྱ་བ་དེའི་དབང་དུ་བྱས་ནས་ཚིགས་བཅད་གཉིས་ཡིན་ཏེ། གང་གིས་བདག་གི་སེམས་ལ་དབང་མེད་ཅེས་བྱ་བ་དང༌། འཐུངས་ན་གང་གིས་བདག་གི་ངོ་ཚ་འོས་པ་འདའ་དོར། །ཞེས་བྱ་བའི་ཚིགས་བཅད་གཉིས་ཏེ། ངོ་ཚའི་ཆོས་ཞེས་བྱ་བ་ནི་ཁྲེལ་ཡོད་པ་ཡང་འདི་ཡིན་ནོ། །སྔར་བསྟན་པའི་བློ་རྨོངས་པར་བྱེད་ཅེས་བྱ་བ་འདི་ནི་ཁྲེལ་
མེད་པའི་དབང་དུ་བྱས་ནས་གསུངས་པ་སྟེ། གང་གིས་བདག་གི་སེམས་ལ་དབང་མེད་བློ་ཉམས་རྣམ་པར་འཁྱམ། །ཞེས་བྱ་བའི་ཚིགས་བཅད་ཡིན་ནོ། །གང་གི་ཕྱིར་ཤི་ན་ནི་བློ་ལ་ཁྲེལ་ཡོད་པ་མེད་དེ། དེས་ན་བདག་གི་སེམས་ལ་དབང་མེད་བློ་ཉམས་རྣམ་པར་འཁྱམ། །ཞེས་ཏེ། འདི་ནི་གང་སྔར་བསྟན་པའི་བློ་རྨོངས་པར་བྱེད་ཅེས་བྱ་བ་དེ་ཉིད་བསྟན་ཏོ། །ཕྱུགས་དང་འདྲ་བར་བླུན་ཞིང་དགྲ་བོས་འཕྱས་ཀྱང་བྱེད་པར་འགྱུར། །གང་གིས་འདུན་སར་གར་བྱེད་འགྱུར་ཞིང་རང་གི་ཁར་རྔ་བརྡུང༌། །ཞེས་བྱ་བའི་ཚིག་འདི་གཉིས་ཀྱིས་ནི་ཁྲེལ་ཡོད་པ་གཅོད་པར་བསྟན་ཏོ། །ངོ་ཚའི་ཆོས་གཅོད་པའི་དབང་དུ་བྱས་ནས་འཐུངས་ན་གང་གིས་བདག་གི་ངོ་ཚ་འདོར་ཞེས་བྱ་བའི་ཚིགས་བཅད་ཡིན་ཏེ། བདག་གི་ངོ་ཚ་བ་ནི་མཛེས་པ་ཡིན་ཏེ། བདག་ཉིད་ལ་ལྟོས་ནས་འཛེམ་པ་ལ་བདག་གི་ངོ་ཚ་བ་ཞེས་བརྗོད་དེ་བདག་གི་དབང་དུ་བྱས་ནས། ཁ་ན་མ་ཐོ་བ་ལ་འཛེམ་པ་ཞེས་བྱ་བའི་ཚིག་གིས་སོ། །གང་འཐུངས་ན་ནི་ཞེས་བྱ་བའི་ཚིགས་བཅད་འདི་ནི་གང་གོང་དུ་བསྟན་པའི་འདུ་ཤེས་ཉམས་པར་འགྱུར་ཞེས་བྱ་བ་དེའི་དབང་དུ་བྱས་པ་སྟེ། འདུ་ཤེས་ཉམས་པར་གྱུར་པ་ནི། །དྲན་པ་མེད་པར་ཞེས་བྱ་བའི་ཚིག་གིས་སོ། །གང་ཞིག་འཐུངས་ན་མྱོས་ཏེ་ཞེས་བྱ་བའི་ཚིགས་བཅད་ཀྱིས་ནི་གང་གོང་དུ་བཤད་པའི་རིགས་བསླད་ཅེས་བྱ་བ་དེའི་དབང་དུ་བྱས་པ་སྟེ། འདི་ལྟར་བུད་མེད་ལ་འཕྱོས་པར་གྱུར་པས་རིགས་བསླད་པར་འགྱུར་རོ། །གང་ཞིག་འཐུངས་ན་མྱོས་པས་དྲན་བརླག་སྟེ། །ཞེས་བྱ་བའི་ཚིགས་བཅད་འདིས་ནི་དགའ་མཆོག་ཉམས་ཞེས་བྱ་བ་དེའི་དབང་དུ་བྱས་པ་སྟེ། མེ་བྱུང་ནས་ཞེས་བྱ་བའི་ཚིག་གིས་སོ། །གང་ལ་ཆགས་ན་དཔལ་གྱི་གཞིར་གྱུར་རིགས། །ཞེས་བྱ་བའི་ཚིགས་བཅད་འདིས་ནི་ཞེ་སྡང་སྐྱེད་པར་བྱེད་པ་དེའི་དབང་དུ་བྱས་པ་སྟེ། གང་གི་ཕྱིར་ཞེ་སྡང་ལས་ནི་རིགས་གཅོད་པར་བྱེད་པས་སོ། །གློ་བུར་དུ་དུ་ཞིང་ཞེས་བྱ་བ་ལ་སོགས་པའི་ཚིགས་བཅད་དྲུག་གིས་ནི། གང་
ཞིག་འཐུངས་ན་བྱ་བ་ཉམས་ཤིང་བག་ཚ་བ་མེད་ཆོས་མི་སྤྱོད། །དོན་མེད་ཕུང་ཁྲོལ་ཤེས་ཤིང་འདུལ་དང་མི་ལྡན་བརྙས་ལ་གནས་མིན་རྡེག །དུ་ལ་རྨོངས་ཤིང་སྨྲ་དང་འདོན་ཟློས་དགོད་བྱེད་སྨྱོ་འགྱུར་ཡོན་ཏན་དག །མ་ལུས་འཕྲོག་བྱེད་ཡ་རབས་ངོ་ཚ་ཅན་དག་སུ་ཞིག་འཐུང་བར་བྱེད། །ཅེས་བྱ་བའི་ཚིགས་བཅད་འདི་ནི་བསྡུས་པའི་དོན་ཡིན་ཏེ། དེ་ལས་གློ་བུར་དུ་དུ་ཞིང་འདུག་ལ་ཞེས་བྱ་བའི་ཚིགས་བཅད་འདི་ནི་བརྙས་པ་ལ་སོགས་པ་དེའི་དབང་དུ་བྱས་པ་ཡིན་ནོ། །རྒས་པར་གྱུར་ཀྱང་གང་གི་སེམས་ཉམས་ཤིང༌། །ཞེས་བྱ་བའི་ཚིགས་བཅད་འདི་ནི་འདུལ་དང་མི་ལྡན་ཞེས་བྱ་བ་དེའི་དབང་དུ་བྱས་པའོ། །གང་གི་ཉེས་པས་སྔོན་གྱི་ལྷ་རྣམས་ཞེས་བྱ་བའི་ཚིགས་བཅད་འདི་ནི་བྱ་བ་ཉམས་ཞེས་བྱ་བ་དེའི་དབང་དུ་བྱས་པ་ཡིན་ནོ། །མི་བདེན་པ་ཡང་བདེན་པ་བཞིན་དུ་ངོ་མཐོན་སྨྲ། །ཞེས་བྱ་བའི་ཚིགས་བཅད་འདིས་ནི་ཆོས་མི་སྤྱོད་ཅེས་བྱ་བ་དང༌། ཕུང་ཁྲོལ་དོན་མེད་ཤེས་ཤིང་ཞེས་བྱ་བ་དེའི་དབང་དུ་བྱས་པའོ། །དེ་ལ་མི་བདེན་པ་ཡང་བདེན་པ་བཞིན་དུ་ངོ་མཐོན་སྨྲ། །ཞེས་བྱ་བ་དང༌། མི་བྱ་བ་ཡང་བྱ་བ་བཞིན་དུ་དགའ་བཞིན་བྱེད། །ཅེས་བྱ་བའི་ཚིགས་བཅད་ཕྱེད་པོ་འདིས་ནི་ཆོས་མི་སྤྱོད་ཅེས་གང་བསྟན་པ་དེ་ཉིད་བསྟན་པ་ཡིན་ནོ། །གང་གི་ལན་གྱིས་ཡོད་མེད་ཕྱིན་ཅི་ལོག་ཏུ་ཤེས། །ཞེས་བྱ་བ་འདིས་ནི་ཕུང་ཁྲོལ་དོན་མེད་ཅེས་བྱ་བ་སྔར་བསྟན་པ་དེ་ཉིད་བསྟན་ཏོ། །མྱོས་གྱུར་རིག་སྔགས་ཞེས་བྱ་བའི་ཚིགས་བཅད་འདིས་ནི་གང་སྔར་བསྟན་པའི་གནས་མིན་རྡེག་ཅིང་མྱོས་འགྱུར་ཡོན་ཏན་འཕྲོག་བྱེད་ཡ་རབས་སུ་ཞིག་འཐུང་བར་བྱེད། །ཅེས་བྱ་བ་དེ་དག་གི་དབང་དུ་བྱས་པའོ། །གང་གིས་བློ་ནི་རབ་ཏུ་ཉམས་གྱུར་ནས། །ཞེས་བྱ་བའི་ཚིགས་བཅད་འདི་ནི་བག་ཚ་བ་མེད་ཅེས་བྱ་བ་གང་བསྟན་པ་དེའི་དབང་དུ་བྱས་པའོ། །འདིར་བག་ཚ་བ་མེད་པ་ནི་མི་འཇིགས་པ་སྟེ། མཚམས་མེད་པ་ལྔའི་ལས་ཀྱིས་ངན་འགྲོར་འགྲོ་བས་ཞེས་བྱ་བའི་དོན་ཏེ། ཚིགས་བཅད་འདི་གཉིས་ཀྱི་དོན་མདོ་སྡེ་རྒྱན་ལས་བླངས་པ་ཡིན་ཏེ། གཞུང་རབ་ཏུ་མངས་
ཀྱིས་དོགས་པས་སྐབས་མ་ཡིན་པ་མང་པོ་ནི་འདིར་མ་བྲིས་སོ། །འདི་དག་གི་གོ་རིམས་ཀྱི་རྒྱུ་ནི་དང་པོར་ལུས་དང་ཟུངས་ནི་གཞི་ཡིན་པའི་ཕྱིར་ལུས་དྲི་མ་ཅན་དུ་བྱེད་པ་ཞེས་བསྟན་པ་དེ་ཉིད་དོ། །དེའི་འོག་ཏུ་ནི་དྲན་པ་གཙོ་བོ་ཡིན་པའི་ཕྱིར་རོ། །ལུས་དང་དྲན་པ་ཉམས་པའི་འོག་ཏུ་ནི་ཚུལ་ཁྲིམས་དང་མཐུན་པའི་རིགས་ཞེས་བྱ་བའི་དབང་དུ་བྱས་ནས་སྨྲས་པའོ། །དེའི་འོག་ཏུ་ཁྲེལ་ཡོད་པ་དང་ངོ་ཚ་ཤེས་པ་ནི་འཇིག་རྟེན་བསྲུངས་པའི་ཕྱིར་རོ། །གཉིས་པོ་དེའི་འོག་ཏུ་ནི་འདུ་ཤེས་ཉམས་པའོ། །དེ་ནས་རིགས་བསླད་པར་གྱུར་པ་ནི་སེམས་ཅན་ཐམས་ཅད་ཀྱི་ཉེས་པའི་རྒྱུ་ཡིན་པའི་ཕྱིར་རོ། །ད་ནི་དགའ་མཆོག་ཉམས་ཞེས་བྱ་བ་དང༌། ཞེ་སྡང་སྐྱེད་པ་ཞེས་བྱ་བ་དེ་གཉིས་སྨོས་པ་ཡིན་ཏེ། སྐྱེ་བོ་ཉེ་དུ་དང་ཉེ་དུ་མ་ཡིན་པ་རྣམས་ཀྱང་གཅིག་ལ་གཅིག་རྣམ་པར་འཇིག་པའི་རྒྱུ་ཡིན་པའི་ཕྱིར་རོ། །དེ་ལྟར་རེ་ཞིག་ཚིགས་བཅད་བདུན་གྱི་གོ་རིམས་ཀྱི་རྒྱུ་བསྟན་ནས། ད་ནི་ཚིགས་བཅད་དྲུག་གི་གོ་རིམས་ཀྱི་རྒྱུ་བསྟན་པར་བྱ་སྟེ། གཞན་དག་ལ་བརྙས་པ་ཡིན་པས་ཡོངས་སུ་བརྙས་པ་སྟེ། དེ་བརྙས་པ་བྱུང་བའི་རྒྱུའོ། །དེའི་འོག་ཏུ་འདུལ་དང་མི་ལྡན་པ་ཡིན་ནོ། །དེའི་འོག་ཏུ་ནི་བྱ་བ་ཉམས་པའོ། །དེའི་འོག་ཏུ་ནི་ཆོས་མི་སྤྱོད་པར་རོ། །དེའི་འོག་ཏུ་ནི་ཚུལ་ཁྲིམས་མི་ཤེས་པ་སྟེ། མིའི་འཇིག་རྟེན་དུ་སྐལ་བ་ཉམས་པ་ཡིན་ན་ཡང་ངན་པར་གྱུར་པ་དང༌། འཇིག་རྟེན་ཕ་རོལ་ཏུ་ཡང་མཚམས་མེད་པའི་ལས་ཀྱི་རྒྱུ་འདི་འབྱུང་བའོ། །དེ་ལྟར་ཚིགས་བཅད་དྲུག་གི་གོ་རིམས་ཀྱི་རྒྱུ་འདི་དག་གོ །དེ་ལྟར་ཚིགས་བཅད་བཅུ་གསུམ་པོ་འདི་རྣམས་ཀྱི་དོན་བསྡུས་པའི་ཚིགས་བཅད་གཅིག་སྟེ། མི་ཡི་བདག་པོ་ཆང་འདི་དེ་འདྲ་ཡང༌། །ཞེས་བྱ་བ་ཡིན་ནོ། །ད་ནི་འཇིག་རྟེན་ཕ་རོལ་གྱི་ཉེས་དམིགས་ཀྱི་དབང་དུ་བྱས་ནས། །གང་ཞིག་བསྟེན་ན་ངན་པ་སྤྱོད་པར་འགྱུར། །ཞེས་བྱ་བ་དང༌། ཆང་དེ་ཉུང་ངུ་འཐུངས་ཀྱང་ཞེས་བྱ་བའི་ཚིགས་བཅད་གཉིས་ཏེ། གང་ཞིག་བསྟེན་ན་རབ་ཏུ་འཇིགས་པར་ལྟུང༌། །ཞེས་བྱ་བ་ནི་གང་སྔར་བསྟན་མ་
ཐག་པའི་གང་ཞིག་བློ་ནི་རབ་ཏུ་ཉམས་གྱུར་ནས། ཞེས་བྱ་བའི་ཚིགས་བཅད་དེའི་མཚམས་མེད་པའི་ལས་ཀྱིས་ངན་སོང་གི་འགྲོ་བར་འཇུག་པ་ཡིན་ཏེ། ལས་དེ་བྱས་ནས་དམྱལ་བ་ལ་སོགས་པའི་ངན་སོང་རྣམ་པ་གསུམ་དུ་འགྲོ་བར་འགྱུར་ཏེ། དེ་ལྟར་འགྲོ་བའི་ལས་ཀྱང་ཆུང་ངུ་དང་འབྲིང་དང་ཆེན་པོའི་དབྱེ་བས་སོ། །བསྟེན་པ་ཞེས་བྱ་བ་ནི་ཆང་བསྟེན་པའོ། །ངན་པ་སྤྱོད་པར་འགྱུར་ཞེས་བྱ་བ་ནི་ལུས་ཀྱི་ལས་ལ་སོགས་པ་རྣམ་པ་གསུམ་ངན་པར་སྤྱོད་པར་འགྱུར་བའོ། །ཡང་ན། གང་ཞིག་བསྟེན་ན་ངན་པར་སྤྱོད་པར་འགྱུར། །ཞེས་བྱ་བ་ནི་ཆང་འཐུང་བ་ཉིད་ངན་པ་སྤྱོད་པར་འགྱུར་བ་ཉིད་དེ། དེ་ཉིད་ཤས་ཆེ་བ་ལ་སོགས་པ་བསྟན་པ་འདིས་ན་ཆང་འཐུང་བ་ཉིད་ཀྱིས་ངན་སོང་གསུམ་དུ་འགྲོ་བ་ཡིན་ནོ། །ཡི་དྭགས་དབུལ་བར་འགྱུར་ཞེས་བྱ་བ་ལ། དབུལ་བ་ཞེས་སྨོས་པ་ནི་ཡི་དགས་རྫུ་འཕྲུལ་ཆེ་བ་དག་མ་ཡིན་པའི་དོན་ཏེ། གང་གི་ཕྱིར་དེ་ནི་ལྷའི་འབྱོར་པ་ལྟ་བུར་རྗེས་སུ་མྱོང་བ་ཡིན་ཏེ། ཆང་འཐུང་བ་ནི་ཉེས་པ་ཆེ་བ་ཡིན་པས་གཅིག་ཏུ་མི་འདོད་པའི་འབྲས་བུ་བསྐྱེད་པ་ཡིན་པའི་ཕྱིར་ཡི་དགས་རྫུ་འཕྲུལ་ཆེ་བ་དག་ཏུ་སྐྱེ་བ་ནི་མི་རིགས་སོ། །ཇི་ལྟར་ཆང་འཐུང་བ་ངན་པ་ལ་སྤྱོད་པ་ཡིན་ཞེ་ན། དེའི་ཕྱིར་སློབ་དཔོན་བཙུན་པ་གཞན་ལ་ཕན་པའི་དབྱངས་ཀྱིས་བཤད་པ། མི་འཚེ་མི་རྐུ་འཁྲིག་པ་མི་སྤྱོད་པ། །ལུས་ཀྱི་དགེ་བ་བྱས་པ་གསུམ་ཡིན་ནོ། །འབྲེལ་མེད་ཕྲ་མ་བརྫུན་དང་ཚིག་རྩུབ་སྤོང༌། །ངག་གི་དགེ་བ་རྣམ་པ་བཞིན་ཡིན་ནོ། །ཆང་འཐུང་སྤོང་བ་འདི་ནི་སྡོམ་པ་བརྒྱད་པ་སྟེ། །གང་ཚེ་ཀུན་དུ་འཚོ་བ་དགེ་བ་ལྡན་གྱུར་པ། །དེ་ཚེ་ཚུལ་ཁྲིམས་ཆོ་ག་གནས་པར་གྱུར་པ་ཡིན། །དེ་ལས་ཚུལ་ཁྲིམས་འཆལ་པར་མཁས་པས་བཤད། །དེ་བས་ན་ཆང་འཐུང་བ་ནི་ངན་པར་སྤྱོད་པ་ཉིད་དོ། །དེ་ལྟར་རེ་ཞིག་འཐུང་བས་ནི་ངན་སོང་གསུམ་དུ་འགྲོ་བའི་རྣམ་པར་སྨིན་པའི་འབྲས་བུ་བཤད་ནས། ད་ནི་རྒྱུ་མཐུན་པའི་འབྲས་བུའི་དབང་དུ་བྱས་ནས། ཆང་དེ་ཉུང་ངུ་འཐུངས་ཀྱང་ཞེས་བྱ་
བའི་ཚིགས་བཅད་ཡིན་ཏེ། ཉུང་ངུ་ཞེས་བྱ་བ་ནི་ཆུང་ངུ་དང་འབྲིང་དང་ཤས་ཆེ་བས་ཆང་འཐུང་བ་གསུམ་གྱི་ལས་ཀྱི་རྣམ་པར་སྨིན་པ་སྟེ། ཤས་ཆེར་འཐུངས་པའི་རྣམ་པར་སྨིན་པས་ནི་སེམས་ཅན་དམྱལ་བར་སྐྱེ་བར་འགྱུར་རོ། །འབྲིང་དུ་འཐུངས་པས་ནི་དུད་འགྲོའོ། །ཆུང་ངུ་འཐུངས་པས་ནི་ཡི་དྭགས་སུ་སྐྱེ་བར་འགྱུར་རོ། །དེ་ཉུང་ངུ་འཐུངས་པའི་རྣམ་པར་སྨིན་པས་མིའི་ནང་དུ་སྐྱེས་ཀྱང་ཞེས་བྱ་བས་ནི་ཆུང་ངུ་འཐུངས་པའི་རྣམ་པར་སྨིན་པས་ཡི་དགས་ཀྱི་འབྲས་བུ་རྗེས་སུ་མྱོང་ནས་གལ་ཏེ་མི་རྣམས་ཀྱི་ནང་དུ་སྐལ་བ་མཉམ་པར་སྐྱེས་ན་ཡང་ཚུལ་ཁྲིམས་ལྟ་བ་ཉམས་ཞེས་སྨོས་པ་ཡིན་ཏེ། ཚུལ་ཁྲིམས་ཀྱིས་ཕོངས་པ་དང༌། ལྟ་བས་ཕོངས་པར་འགྱུར་བ་ཡིན་ནོ། །རྒྱུ་མཐུན་རྒྱུ་དང་འདྲ་བའོ་ཞེས་བྱ་བའི་ཚིག་གིས་ཆང་འཐུངས་པ་ནའོ། །ཚུལ་ཁྲིམས་ཉམས་པར་འགྱུར་བ་དང༌། བློ་ཡང་རྣམ་པར་རྨོངས་པ་ཡིན་ཏེ། དེ་བས་ན་མིར་སྐྱེས་ན་ཡང་ཚུལ་ཁྲིམས་དང་ལྟ་བ་གཉིས་ཀྱིས་ཕོངས་པ་ཡིན་ཏེ། རྒྱུ་དང་འདྲ་བ་ཡིན་པའི་ཕྱིར་འབྲས་བུ་ཡང་ཚུལ་ཁྲིམས་དང་ལྟ་བ་ཉམས་པར་འགྱུར་བ་ཡིན་ཏེ། ཕྱིས་ཀྱང་གསུམ་པོ་གང་ཡང་རུང་བ་དག་ཏུ་སྐྱེ་བར་འགྱུར་རོ། །ད་ནི་ཐམས་ཅད་ཀྱིས་བསྡུས་པའི་དོན་གྱི་ཚིགས་བཅད་ཚུལ་ཁྲིམས་ཉམས་པར་འགྱུར་ཞིང་ཞེས་བྱ་བའི་ཚིགས་བཅད་བསྟན་པ་ཡིན་ཏེ། ཚུལ་ཁྲིམས་ཉམས་པས་ནི་ངན་འགྲོ་དག་ཏུ་ཤིན་ཏུ་ཡུན་རིང་པོར་སྡུག་བསྔལ་བར་འགྱུར་བ་ཡིན་ཏེ། འདིས་ནི་འཇིག་རྟེན་ཕ་རོལ་གྱི་ཉེས་དམིགས་བསྟན་ཏོ། །གཏམ་ངན་ཞེས་བྱ་བ་འདིས་ནི་མཐོང་བའི་ཆོས་ཀྱི་ཉེས་དམིགས་ཡིན་ཏེ། གང་གི་ཕྱིར་གྲགས་པ་ནི་མཐོང་བའི་ཆོས་ཀྱི་ཕུན་སུམ་ཚོགས་པ་ཡིན་ཏེ། གཞན་དང་འབྲེལ་པའི་ཕྱིར་རོ། །འཇིག་རྟེན་འདིའི་ཕུན་སུམ་ཚོགས་པ་ཐམས་ཅད་ཀྱི་རྒྱུ་ནི་གྲགས་པ་ཡིན་ཏེ། མེད་ན་ནི་རྒྱུ་མེད་པའི་ཕྱིར་རོ། །ངོ་ཚ་མེད་ཅིང་བློ་གྲོས་དྲི་མ་ཅན་དུ་འགྱུར། །ཞེས་བྱ་བ་ལ། ངོ་ཚ་ཞེས་སྨོས་པས་ནི་ངོ་ཚ་ཤེས་པ་དང་ཁྲེལ་ཡོད་པ་གཉིས་གཟུང་
ངོ། །བློ་གྲོས་དྲི་མ་ཅན་དུ་འགྱུར། །ཞེས་བྱ་བ་ནི་ལྟ་བས་ཕོངས་པར་འགྱུར་བའི་ཕྱིར་རོ། །འདི་གཉིས་ཀྱིས་ཀྱང་ཚུལ་ཁྲིམས་གྲགས་པ་ཉམས་པར་བྱེད་པ་ཡིན་ནོ། །རྒྱུ་བཞི་པོ་འདི་དག་གིས་ནི་འཇིག་རྟེན་ཕ་རོལ་གྱི་ཕུན་སུམ་ཚོགས་པའི་རྒྱུ་ཉམས་པར་བསྟན་ཏེ། བཞི་པོ་འདིའི་ནང་དུ་ཉེས་པ་ཐམས་ཅད་འདུས་པའི་ཕྱིར་ཡོན་ཏན་ཐམས་ཅད་ཉམས་པར་བསྟན་ཏེ། དེ་ཉིད་ཀྱི་ཕྱིར་སྨྲས་པ། །ཡོན་ཏན་དེ་དང་དེ་དག་ཉམས། །ཞེས་སྨོས་སོ། །དེ་བས་ན་ཞེས་བྱ་བ་ནི་ཆང་འཐུང་བ་ཉིད་སྐྱོན་ཆེན་པོ་ཡིན་པའི་ཕྱིར་རོ། །ཆང་འཐུངས་པའི་ཉེས་པ་ཁོང་དུ་ཆུད་པར་བྱས་པ་ཞེས་བྱ་བ་ནི་གང་སྔར་བསྟན་པའི་དེ་ལ་སྐྱོན་དུ་ཡང་མི་ལྟ་བར་གྱུར་ལ་ཞེས་བྱ་བ་དེ་ཉིད་བསྟན་པ་ཡིན་ཏེ། སྐྱོན་དུ་མི་ལྟ་བ་ཞེས་བྱ་བ་ནི་ཆང་འཐུང་བ་ལ་ཆགས་པའི་སྐྱོན་ཡོངས་སུ་མ་ཤེས་པའི་ཕྱིར་རོ། །ཞེན་པ་མེད་པར་འགྱུར་ཞེས་བྱ་བ་ནི་དེ་ལ་ཞེན་པ་མེད་པའི་རྒྱུ་ཡིན་པ་བྱས་ནས་དེའི་ཉེས་པ་བསྟན་པའི་ཕྱིར་བརྩམས་པ་ནི་ཉེས་པ་དེ་བསྒྲུབས་པ་ཡིན་ནོ། །བྱམས་པའི་ཕ་མ་ཞེས་བྱ་བ་འདིའི་བསྡུས་པའི་དོན་ནི་མིའི་འཇིག་རྟེན་གཉེན་བཤེས་ཕན་པར་སྟོན་པ་ནི་གསུམ་ཞིག་ཡོད་དེ། བདེ་བར་འདོད་པ་དང༌། ཕན་པར་འདོད་པ་དང། ཐབས་སྟོན་པའོ། །གང་དེ་གསུམ་གྱི་ཡོན་ཏན་དང་ལྡན་པར་སྟོན་པ་ཡིན་ཏེ། བདེ་བར་འདོད་པ་ནི་ཕ་མའོ། །ཕན་པར་འདོད་པ་ནི་བླ་མའོ། །ཐབས་སྟོན་པ་ནི་ཐབས་དང་བསམ་པ་དང་བག་ལ་ཉལ་ཤེས་པ་སྟེ་ཐུབ་པའོ། །གསུམ་པོ་དེ་དང་འདྲ་བར་སྟོན་པའི་ཕྱིར་གསུམ་པོ་དེ་དང་མཉམ་པའོ། །ཡུལ་གྲུ་མཆོག་ལ་སོགས་པའི་ནོར་ནི་ང་མི་འདོད་དེ། དེ་ཅིའི་ཕྱིར་ཞེ་ན། ལྷའི་དབང་པོ་ཡིན་པའི་ཕྱིར་རོ། །རྒྱུ་གོང་མ་གཉིས་ཀྱི་ལན་ནི་འདི་ཡིན་ཏེ། ཕན་པར་སྨྲ་ལ་མཆོད་པར་བྱེད། །ཅེས་བྱ་བ་ནི་ཚིགས་བཅད་ཕྱེད་དེས་གྲགས་དང་དཔལ་ཞེས་བྱ་བའི་ཚིག་བཅད་འདི་གཉིས་ཀྱིས་ནི་མཐོང་བའི་ཆོས་ཀྱི་ཕན་ཡོན་བསྟན་ཏོ། །དཔལ་ཞེས་བྱ་བ་ནི་རྙེད་པ་ཡིན་ཏེ་དེའི་བདེ་བའོ། །དེ་ཡང་ཞེས་བྱ་བ་ནི་མཐོང་བའི་ཆོས་དང༌། འཇིག་རྟེན་ཕ་རོལ་གྱི་བདེ་བ་ཡིན་ནོ། །དེ་ཉིད་སྨྲས་པ། ངའི་ལུང་ལ་ཞེས་བྱ་བ་ནི་
མཐོ་རིས་སུ་འགྲོ་བར་བྱེད་པ་སྟེ། འཇིག་རྟེན་ཕ་རོལ་གྱི་བདེ་བ་ཐོབ་པར་བྱེད་པའོ། །ཡང་ན་བདེ་བ་དེ་ཡང་འཐོབ། །ཅེས་བྱ་བ་ནི་མཐོང་བའི་ཆོས་ཉིད་ཀྱི་ཡིན་ནོ། །ང་ཡི་ལུང་ལ་བརྟེན་ཞེས་བྱ་བ་འདི་ནི་འཇིག་རྟེན་ཕ་རོལ་ལ་བདེ་བ་འཐོབ་པའི་ཚིག་གོ །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བུམ་པའི་སྐྱེས་པའི་རབས་སོ།། །།ཚུལ་ཁྲིམས་ཀྱི་གཉེན་པོར་འགྱུར་ཞིང་གནོད་པ་ཞེས་བྱ་བ་ལ་འདིར་གཉེན་པོར་ཞེས་སྨོས་པ་ནི་ཚུལ་ཁྲིམས་ཀྱི་མི་མཐུན་པའི་ཕྱོགས་སུ་གཟུང་སྟེ། ཚུལ་ཁྲིམས་ཀྱི་མི་མཐུན་པ་ཡིན་པས་དེས་ན་གནོད་པ་ཡང་ཡིན་ནོ། །ཕྱུག་པོའི་རིགས་འཚོ་བའི་ཚུལ་དང་སྤྱོད་པ་ཕུན་སུམ་ཚོགས་པ་ཞེས་བྱ་བ་འདིས་ནི་བདག་གི་སྐྱེ་བ་ཆོ་རིགས་ཕུན་སུམ་ཚོགས་པར་བསྟན་ཏོ། །ཆོ་རིགས་མཐོན་པོ་ལ་དགའ་བ་རྣམས་ཀྱིས་གཉེན་བྱ་བར་གསོལ་བ་བཏབ་པ་ཞེས་བྱ་བ་འདི་ནི་འདས་པའི་དུས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུའོ། །དགེ་སྦྱོང་དང་བྲམ་ཟེ་རྣམས་ཀྱི་རེ་བའི་གནས་སུ་གྱུར་པ་ཞེས་བྱ་བ་ལ་སོགས་པ་བཞིས་ནི་མ་འོངས་པའི་ལོངས་སྤྱོད་ཆེན་པོའི་འབྲས་བུའི་རྒྱུར་གྱུར་པ་སྟེ། སྦྱིན་པའི་ཕ་རོལ་ཏུ་ཕྱིན་པ་བསྟན་ཏོ། །མ་འོངས་པའི་སྐྱེ་བར་གཡོག་འཁོར་མང་བའི་འབྲས་བུར་གྱུར་པ་སྟེ། སློང་བ་རྣམས་ཀྱིས་བཟོད་པའི་ཕ་རོལ་ཏུ་ཕྱིན་པ་བསྟན་ཏོ། །དཔལ་གྱི་གཞིར་གྱུར་པ་ཞེས་བྱ་བས་ནི་འདས་པའི་ཚེ་རབས་ཀྱི་སྦྱིན་པའི་ཕ་རོལ་ཏུ་ཕྱིན་པའོ། །རྒྱལ་པོས་བསྐུར་སྟི་བྱ་ཞིང་ཕན་འདོགས་པའི་འོས་སུ་གྱུར་པ་ཞེས་བྱ་བ་ལ། ཕན་བཏགས་པ་ཞེས་བྱ་བ་ནི་གཡོག་འཁོར་གྱི་སྦྱིན་པ་ལ་སོགས་པའོ། །བཀུར་སྟི་ནི་གདུགས་ལ་སོགས་པ་སྦྱིན་པའོ། །འཇིག་རྟེན་པས་མངོན་པར་བཀུར་བ་ཞེས་བྱ་བ་དང་དེ་གཉིས་ཀྱིས་ནི་འདས་པའི་སྐྱེ་བའི་བཟོད་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །དེ་བཞིན་དུ་སྦྱིན་པ་དང༌། ཚུལ་ཁྲིམས་དང༌། བཟོད་པའི་མཚན་ཉིད་དོ། །བསོད་ནམས་ཀྱི་ཚོགས་ཀྱི་འབྲས་
བུ་ཡང་རྣམ་པ་གསུམ་ལས་ལོངས་སྤྱོད་ཆེན་པོའི་བདག་ཉིད་དང༌། འཁོར་བར་གཡོག་འཁོར་ཕུན་སུམ་ཚོགས་པའི་མཚན་ཉིད་ནི་རྒྱལ་པོའི་རིགས་དང༌། ཕྱུག་པོའི་རིགས་ཞེས་བྱ་བས་བསྟན་ཏོ། །འཇིག་རྟེན་པས་བསྔགས་པའི་རིག་པའི་གནས་རྣམས་ལ་ནི་བསླབས། སྒྱུ་རྩལ་གྱི་ཐབས་རྣམ་པ་སྣ་ཚོགས་ལ་ནི་བློ་གསལ་བར་གྱུར་ཞེས་བྱ་བ་འདིས་ནི་ཡེ་ཤེས་ཀྱི་ཚོགས་ཀྱི་འབྲས་བུ་བསྟན་ཏོ། །ལུས་བྱད་བཟང་པོ་སྐྱེ་བོའི་མིག་ཏུ་སྡུག །ཅེས་བྱ་བ་འདིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །ཆོས་དང་མི་འགལ་བར་འཇིག་རྟེན་གྱི་ཚུལ་ལ་མཁས་པས་ཞེས་བྱ་བ་འདིས་ནི་སྦྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་ལ་འཇུག་པའོ། །འཇིག་རྟེན་པ་རྣམས་ཀྱི་ནང་མི་བཞིན་དུ་སྙིང་ལ་ཆགས་པར་གྱུར་ཏོ་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་འབྲས་བུའོ། །གཞན་བསོད་ནམས་ཀྱི་ཚོགས་ཐམས་ཅད་ནི་ཆོ་རིགས་མཐོ་བའི་ཁྱད་པར་ཉིད་ཀྱིས་བསྟན་ཏེ་ཡང་མི་བརྗོད་དོ། །སྐྱོན་དང་ཡོན་ཏན་གཉིས་བརྟག་པ་ནི་སྐྱོན་དང་ཡོན་ཏན་ལ་བརྟགས་པ་སྟེ། སྐྱོན་དང་ཡོན་ཏན་ལ་བརྟན་པ་དང༌། སྐྱོན་དང་ཡོན་ཏན་ལ་སྨྲ་བའོ། །སྐྱོན་དང་ཡོན་ཏན་ལ་བརྟགས་ནས་ནང་མིའམ་ཕྱི་མི་རྣམས་ཀྱིས་བཀུར་སྟིའམ་སྨད་པར་བྱ་བ་ཡིན་ཏེ། སྐྱོན་ལ་བརྟགས་ནས་ནི་ནང་མི་འམ་ཕྱི་མི་གང་ཡང་རུང་བས་བཀུར་བ་མ་ཡིན་པའི་གནས་སུ་འགྱུར་རོ། །དེ་སྔོན་རབ་ཏུ་བྱུང་བ་ལ་གོམས་པར་བྱས་པས་ཞེས་བྱ་བ་ནི་ཚེ་རབས་སྔ་མ་ལ་འདྲིས་པར་བྱས་པའི་ཕྱིར་རོ། །རབ་ཏུ་བྱུང་བ་ལ་གོམས་པར་བྱས་པས་ཞེས་བྱ་བ་འདིས་ནི་རྒྱུའི་འབྲས་བུ་སྟོན་ཏོ། །ཚོལ་བ་ཞེས་བྱ་བ་འདིས་ནི་རྐྱེན་གྱི་འབྲས་བུ་ལས་བརྩམས་པ་ཡིན་ཏེ། ཚུལ་བཞིན་ཡིད་ལ་བྱེད་པའི་རྐྱེན་གྱིས་ཏེ། གཙོ་གཞན་གྱི་སྒྲའི་རྐྱེན་གྱིས་བདག་ཉིད་ཚུལ་བཞིན་ཡིད་ལ་བྱེད་པ་ཞེས་བྱ་བའི་ཚིག་གིས་སོ། །ཚོལ་བའི་སྡུག་བསྔལ་ཞེས་བྱ་བ་འདིས་ནི་མཐོང་བའི་ཆོས་ཀྱི་ཉེས་དམིགས་ཀྱི་དབང་དུ་བྱས་པའོ། །ཆོས་དང་འགལ་བ་ནི་འཇིག་རྟེན་ཕ་རོལ་གྱི་ཡིན་ཏེ། ལོག་པའི་འཚོ་བ་སྟེ། ཁྱིམ་ན་གནས་ཤིང་མི་དགེ་བའི་ལས་ཀྱིས་
བསྐྱེད་པའི་ཕྱིར་རོ། །བདེ་འབྱུང་གནས་ཞེས་བྱ་བ་ནི། འཇིག་རྟེན་གཉི་གར་བདེ་བ་འབྱུང་བ་ཉིད་ཡིན་ཏེ། དཀའ་ཐུབ་ཀྱི་ནགས་ཚལ་ན་ནི་ཚོལ་བ་དང་ཆོས་དང་འགལ་བའི་སྒྲུབ་པ་མེད་པའི་ཕྱིར་རོ། །ཁྱིམ་རྫས་དང་དབྱིག་བརྒྱ་སྟོང་དུ་མ་ཡོད་པ་དེ་ཡང་བཤེས་གཉེན་དང༌། དགེ་སྦྱོང་དང༌། བྲམ་ཟེ་དང༌། ཕོངས་པ་དང༌། སློང་བ་རྣམས་ལ་ཇི་ལྟར་རིགས་པ་ཞེས་བྱ་བ་ནི་ཇི་ལྟར་འོས་པར་བཏང་ཞིང་རབ་ཏུ་བྱུང་བ་སྟེ། ཚིག་འདིས་ནི་ཅི་ཞིག་སྟོན་པ་ཡིན་ཞེ་ན། ཐེག་པ་ཆེན་པོའི་ཡན་ལག་ཉིད་དུ་བསྟན་པ་སྟེ། གང་གི་ཕྱིར་བྱང་ཆུབ་སེམས་དཔའ་ལོག་པར་སྤྱོད་པ་རྣམས་ལ་ཆགས་པ་མེད་པའི་ཕྱིར་ཏེ། དེ་བས་ན་སྦྱིན་པ་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་ཉིད་དོ། །ཕ་རོལ་ཏུ་ཕྱིན་པ་རྣམས་ཀྱང་ཅི་རིགས་པར་ཐེག་པ་ཆེན་པོར་བརྗོད་དོ། །དོན་རྣམ་པ་གཞན་དུ་ན་ཡུལ་རྣམས་ལ་ཆགས་པ་མེད་པའི་ལམ་ནི་སྦྱིན་པ་སྟེ། གཏོང་བ་ལ་གོམས་པས་ཆགས་པ་དང་བྲལ་བའི་ཕྱིར་རོ། །དེ་ལྟར་སྦྱིན་པ་ནི་བྱང་ཆུབ་སེམས་དཔའ་རྣམས་ཀྱི་ལམ་མོ། །དེ་བཞིན་དུ་ཕ་རོལ་ཏུ་ཕྱིན་པ་གཞན་དག་ཀྱང་ཅི་རིགས་པར་བརྗོད་པར་བྱའོ། །བསམ་གཏན་གྱི་ཡོན་ཏན་ལ་གོམས་པས་ཞེས་བྱ་བ་ནི་བསམ་གཏན་ཉིད་ཡོན་ཏན་ཡིན་ཏེ། ཡོན་ཏན་གཞན་ཐམས་ཅད་ཀྱི་རྒྱུར་གྱུར་པའི་ཕྱིར་རོ། །དེ་བས་ན་དེ་ལ་གོམས་པའོ། །རྣ་བ་དང་སྙིང་ཚིམ་པར་བྱེད་པའི་ཚིག་ཡིན་ཏེ། ཚིག་དིའི་དོན་ནི་ཆོས་སྟོན་པ་ན་གྲོང་ཁྱེར་པའི་སྐད་དང༌། སྙན་ཅིང་འཇེབས་པ་དང༌། རྣམ་པར་གསལ་བ་དང༌། རྣམ་པར་རིག་པར་བྱ་བ་དང༌། མཉན་པར་འོས་པ་དང༌། མི་གནས་པ་དང༌། མི་མཐུན་པ་མེད་པ་དང༌། མི་གསལ་བ་མེད་པ་སྟེ། གང་མདོའི་དོན་དེ་ཉིད་འདིར་ཡང་རྣ་བ་དང་སྙིང་ཚིམ་པར་བྱེད་པ་ཡིན་ཏེ། དེ་ཡང་གསུང་རྒྱ་ཆེ་བས་རྣར་སྙན་པས་ཡོངས་སུ་ཚིམ་པར་བྱེད་པ་ཡིན་ནོ། །རྣ་བ་དང་སྙིང་ཚིམ་པར་བྱེད་པ་ཞེས་བྱ་བ་འདིས་ནི་སྙན་པར་སྟོན་པ་ཡིན་ཏེ། སྐད་སྙན་ཅིང་འཁོར་ཡོངས་སུ་ཚིམ་པར་བྱེད་པས་གྲོང་ཁྱེར་པའི་སྙན་པའི་
ཚིག་གིས་བརྗོད་དོ། །དེ་བས་ན་རྣ་བ་དང་སྙིང་ཚིམ་པར་བྱེད་པས་ཞེས་བྱ་བ་འདིས་ནི་འཇེབས་པར་སྟོན་ཏེ། སྙན་ཅིང་འཇེབས་པའོ། །དེས་ན་སྙིང་ཚིམ་པར་བྱེད་པའི་ཚིག་ལ་མཁས་པ་མངོན་པར་སྨྲ་བ་ཡིན་ཏེ། དེས་རྣམ་པར་རིག་པར་བྱ་བ་ཡིན་པར་དེ་བསྟན་ཏེ། གང་གི་ཕྱིར་རྣམ་པར་རིག་པར་བྱ་བ་ནི་བཤད་པའི་དོན་རྣམ་པར་ཤེས་པའི་བྱ་བ་ཡིན་པས་མཁས་པ་ཡིན་པར་མངོན་ནོ། །མ་ཁེངས་པ་ཞེས་བྱ་བས་ནི་མཉན་པར་འོས་པ་བསྟན་ཏེ། མཉན་པའི་དོན་ཉིད་ཡིན་པའི་ཕྱིར་རོ། །མ་ཁེངས་པ་དང༌། རྙེད་པ་ལ་རེ་བའི་བཀྲམ་པ་དང་ཞུམ་པ་མེད་པ་ཞེས་བྱ་བ་འདིས་ནི་མི་གནས་པ་བསྟན་ཏེ། རྙེད་པ་ལ་སོགས་པའི་འདོད་པ་དང་བྲལ་བས་དེ་མི་གནས་པའོ། །དེས་དེ་ཉིད་རྙེད་པ་ལ་སོགས་པ་མེད་པའོ། །དུལ་ཞིང་གཟི་བྱིན་ཆེ་བ་དང༌། །ཇི་ལྟར་རིགས་པར་འཇམ་པོར་སྨྲ་ཞིང་གསལ་བ་ཞེས་བྱ་བ་འདི་གཉིས་ཀྱིས་ནི་མི་མཐུན་པ་མེད་པར་བསྟན་ཏེ། ཇི་ལྟར་གཡོག་འཁོར་འཇུག་པ་དེས་དུལ་ཞིང་གཟི་བྱིན་ཆེ་བ་ཡང་དེས་འཇུག་སྟེ། ཇི་ལྟར་རིགས་པར་འཇམ་པོར་སྨྲ་ཞིང་གསལ་བའི་ཕྱིར་སྙན་པའི་སྐྱེ་བོ་རྣམས་ལ་མི་མཐུན་པ་མེད་པ་ཡིན་ནོ། །དེ་བས་ན་ཇི་ལྟར་གཡོག་འཁོར་གྱི་འཇུག་པ་དེས་ཆོས་དང་ཆོས་མ་ཡིན་པ་རབ་ཏུ་འབྱེད་པ་མཁས་པ་ཞེས་བྱ་བ་ཡིན་ཏེ། འདིས་ནི་མི་གསལ་བ་མེད་པ་བསྟན་ཏེ། དཔག་ཏུ་མེད་པའི་སྤོབས་པ་དང་ལྡན་པའི་ཕྱིར་མི་གསལ་བ་མེད་པ་ཡིན་ཏེ། དེས་ན་ཡང་ཆོས་དང་ཆོས་མ་ཡིན་པ་རབ་ཏུ་འབྱེད་པ་ལ་མཁས་པ་ཉིད་དོ། །དེ་ལྟར་མདོའི་ཚིག་གི་རྗེས་སུ་འབྲང་བ་ཡིན་ཏེ། ཚིག་བརྒྱད་པོ་འདིའི་གོ་རིམས་ཀྱིས་ཡང་དག་པར་བསྟན་ཏེ། འདིས་ནི་ངག་གི་ལས་ཕུན་སུམ་ཚོགས་པ་བསྟན་ཏོ། །རབ་ཏུ་བྱུང་བའི་སྤྱོད་ཚུལ་བཟང་པོ་དང༌། ཡ་རབས་རྣམས་དགའ་བའི་སྤྱོད་པས་ཞེས་བྱ་བ་འདིས་ལུས་ཀྱི་ལས་ཕུན་སུམ་ཚོགས་པ་བསྟན་ཏོ། །ཆོ་རིགས་བཙུན་པ་ལས་རབ་ཏུ་བྱུང་བར་ཤེས་ནས་ཞེས་བྱ་བའི་ཇི་ལྟར་སྔར་བསྟན་པའི་རྒྱལ་རིགས་ཕྱུག་པོའི་རིགས་ཞེས་བྱ་བ་ལ་སོགས་པའི་རིགས་
ཀྱི་ཁྱད་པར་གྱིས་སོ། །རབ་ཏུ་བྱུང་བར་ཤེས་ནས་ཞེས་བྱ་བ་དེ་ཡང་སྔར་བསྟན་པ་ཡིན་ཏེ། དེའི་ཕ་མ་གཉིས་ཚེ་འདས་པས་ཞེས་བྱ་བ་ལ་སོགས་པའི་རིམ་པས་རབ་ཏུ་བྱུང་བར་ཤེས་པར་བྱའོ། །རིགས་དང་གཟུགས་ཀྱི་ཡོན་ཏན་ལས། །ཞེས་བྱ་བ་ལ། རིགས་ཀྱི་ཡོན་ཏན་རྣམས་ནི་སྔར་བཤད་པ་དག་གོ །གཟུགས་ཀྱི་ཡོན་ཏན་ཡང་སྔར་བཞིན་བཤད་པ་ཡིན་ཏེ། ལུས་བྱད་བཟང་པོ་སྐྱེ་བོའི་མིག་ཏུ་སྡུག །ཅེས་བྱབ་ཨཱི་ཚིག་གིས་སོ། །ས་གཞི་བཟང་པོ་ཞེས་བྱ་བ་ནི་ཡང་ཐོག་གི་རྩིག་པ་དཀར་གྱིས་བསྐུས་པ་ལ་ཟླ་བའི་འོད་ཟེར་བབ་པ་བཞིན་ནོ། །ན་ཚོད་འདི་ཙམ་ལ་ཆོ་རིགས་ལ་ཡང་མི་ལྟ་བར་འདི་ལྟར་རབ་ཏུ་བྱུང་ཞེས་བྱ་བ་ནི་བུ་སྐྱེད་ནས་ན་ཚོད་རྒུད་པ་ལ་རབ་ཏུ་འབྱུང་བར་བྱ་བ་ཡིན་ནོ་ཞེས་བྱ་བའི་དོན་ཏོ། །སོང་ཞེས་བྱ་བ་ནི་འགྲོ་བས་འགྱུར་བ་སྟེ། དེས་ན་འདི་ཉིད་ལས་ཆོས་བརྙེས་པར་འགྱུར་བའི་ཕྱིར་རོ། །ཅིའི་ཕྱིར་ཞེས་བྱ་བ་ནི་རྒྱུ་གཞན་གྱི་ཕྱིར་རོ། །གཞན་གྱི་དྲིང་ལ་ལྟོས་ཤིང་སློང་མོ་སྤྱོད། །ཅེས་བྱ་བ་དང༌། གོས་ངན་པ་གྱོན་པ་དང༌། བས་མཐའི་ས་ན་ལུས་ནི་བསྒྱུར་ཏེ་བོར། །ཞེས་བྱ་བ་འདི་དག་གིས་ཟས་བསོད་སྙོམས་དང་གནས་མལ་དང་བྲལ་བར་སྟོན་ཏེ། འདིས་ནི་སྦྱིན་པའི་ཕ་རོལ་ཏུ་ཕྱིན་པའི་འབྲས་བུ་མེད་པར་བྱས་པའི་ཕྱིར་རོ། །དབུལ་པོའི་ལུས་ཞེས་བྱ་བ་དང༌། ངན་པ་བཞིན་དུ་སྐྱེ་བོ་ཀུན་གྱིས་སྨད། །ཅེས་བྱ་བ་འདིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུ་རིགས་ལ་སོགས་པ་ཕུན་སུམ་ཚོགས་པར་འབྱོར་ཀྱང་སྨད་པ་ཉིད་དུ་གྱུར་པ་སྟེ། གསུམ་པོ་འདི་དང་བྲལ་བའི་ཕྱིར་རོ། །གཉེན་གྱི་སྐྱེ་བོ་དང་བྲལ་བ་དང༌། གཉེན་བཤེས་རྣམས་དང་བྲལ་བ་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་འབྲས་བུ་གཡོག་འཁོར་དང་བྲལ་བའི་ཕྱིར་རོ། །བུ་མཆོག་ཡིད་ལ་བསམ་པ་གྲུབ་པར་གྱིས། །ཞེས་བྱ་བ་ནི་དེ་སུའི་ཡིད་ལ་བསམ་པ་འགྲུབ་པ་ཡིན་ཞེ་ན། དབུལ་པོའི་ལུས་སུ་གྱུར་པ་ཉིད་ཀྱིས་ཏེ། རེ་གནས་བཞིན་དུ་བདག་ཉིད་དེ། རེ་གནས་ནི་སྟེགས་སོ། །དབེན་
བས་བྱས་པ་ནི་དབེན་པའི་བདེ་བའོ།། །།དབེན་པ་ནི་རྣམ་པ་གཉིས་ཏེ། ལུས་དབེན་པ་དང༌། སེམས་དཔོན་པའོ། །དེ་ལ་ལུས་དབེན་པ་ནི་གཉིས་སུ་མེད་པར་གནས་པའོ། །སེམས་དབེན་པ་ནི་སེམས་ཀྱི་གཡེང་བ་སྤངས་པའོ། །དབེན་པ་ན་གནས་པའི་བདེ་བ་ཉིད་བདུད་རྩིའི་རོ་ཡིན་ཏེ། དེས་ཡོངས་སུ་བསྒོས་པའི་བྱ་བ་གང་ལ་ཡིད་ལ་དེ་ནི་དབན་པ་ན་གནས་པའི་བདེ་བའི་བདུད་རྩིའི་རོས་བློ་གོམས་པར་བྱས་པ་སྟེ། དེའི་བདེ་བས་ལུས་དང་སེམས་ཚིམ་པར་བྱེད་པའི་ཕྱིར་རོ། །སྙིང་དེ་ལ་གཞོལ་བར་གྱུར་པ་ནི་དབེན་པ་ན་གནས་པའི་བདེ་བ་ལ་གཞོལ་བར་གྱུར་པའོ། །ཁྱིམ་ན་གནས་པ་དང༌། ནགས་ན་གནས་པའི་བྱེ་བྲག་ཤེས་པར་གྱུར་པ་ཞེས་བྱ་བས་ནི་ཁྱིམ་ན་གནས་པའི་བདག་ཉིད་ཀྱིས་མངོན་སུམ་དུ་སྐྱོན་མཐོང་བའི་ཕྱིར་རོ། །ནགས་ན་གནས་པ་ཡང་བདག་ཉིད་ཀྱིས་མངོན་སུམ་དུ་ཡོན་ཏན་མཐོང་བའི་ཕྱིར་རོ། །དེ་བས་ན་ནགས་དང་ཁྱིམ་གྱི་ཁྱད་པར་མི་ཤེས་པ་དག་ནི་སྨྲ་བར་མི་རིགས་ཀྱི། དེ་ནི་འདིར་མཉན་པར་ཡང་རིགས་པ་མ་ཡིན་ཏེ། གཉི་ག་ཡང་ངོ་ཤེས་པར་ཕྱིར་རོ། །བཙོན་ར་འདྲ་བའི་ཁྱིམ་ཞེས་བྱ་བ་ནི་ཁྱིམ་ནི་བཙོན་རར་གྱུར་པ་ཡིན་ཏེ། ངན་སོང་དུ་འགྲོ་བར་བྱེད་པའི་ཕྱིར་རོ། །ཕྱུག་པོ་ནི་ཕལ་ཆེར་གཅིག་ཏུ་སྡུག་བསྔལ་བ་ཡིན་ནོ། །ཅིག་ཤོས་དབུལ་བ་ཡང་ངོ༌། །དགའ་བ་ཉིད་དུ་ཀུན་དུ་རྨོངས་པ་ནི་དགའ་བས་རྨོངས་པ་སྟེ། སྡུག་བསྔལ་ལ་བདེ་བར་ཕྱིན་ཅི་ལོག་པ་ཞེས་བྱ་བའི་དོན་ཏོ། །སྡིག་པའི་འབྲས་བུ་སྨིན་པ་ཉིད། །ཅེས་བྱ་བ་ནི་སྐྱེ་བ་སྔ་མ་དག་ལ་རང་གི་གོམས་པས་སྡུག་བསྔལ་ལ་བདེ་བར་ཕྱིན་ཅི་ལོག་པའི་འབྲས་བུ་སྨིན་པའོ། །འདིར་བྱར་རུང་བོ་ཞེས་བྱ་བ་གལ་ཏེ་དེ་ལྟར་ཆོས་བརྙས་པར་རུང་བ་ཞེས་བྱ་བ་ནི་མ་ཡིན་ནོ། །ཆོས་ཀྱི་གཉེན་པོ་དང་འདོམ་པའི་ཕྱིར་ཏེ་ཆོས་དང་འགལ་བ་དང༌། ཕྱོགས་རྣམ་པར་འཇིག་པའི་ཕྱིར་རོ། །ལས་སུ་བྱ་བ་མང་ཆེས་པས། །ཞེས་བྱ་བ་ནི་ཁྱིམ་གྱི་བདེ་བ་ཡིན་ནོ་སྙམ་ནས་ཁྱིམ་མ་བཏང་བས་ནི་ཆོས་བྱ་བར་འདོད་
ཀྱང་ཁྱིམ་མ་བཏང་བར་ནི་གཞན་དུ་འགྱུར་བས་ཇི་ལྟར་ཆོས་བྱ་བར་མི་རུང་སྟེ། འདི་ནི་ཁྱིམ་གྱི་བདེ་བ་དེ་དང་དེ་ལ་མངོན་པར་ཞེན་པ་དེ་ལ་སྡུག་བསྔལ་ཡིན་པར་བསྟན་པར་བྱ་བའི་ཕྱིར། ལས་སུ་བྱ་བ་མང་ཆེས་པས། །ཞེས་བྱ་བ་འདི་བསྟན་པ་ཡིན་ནོ། །ཆོས་ཀྱི་གཉེན་པོ་དང་འདོམ་པ་ཞེས་བྱ་བའི་དབང་དུ་མཛད་ནས། ཁྱིམ་གྱི་སོ་ནམ་བྱ་ན་ནི། །ཞེས་བྱ་བ་ལ་སོགས་པའི་ཚིགས་བཅད་བཞི་ཡིན་ཏེ། ཆོས་ཀྱི་གཉེན་པོའི་ཆོས་གང་ཡིན་ཞེ་ན། དེ་དང་མི་མཐུན་པར་གྲགས་པ། །ཞེས་བྱ་བའི་དོན་ཏེ། ཁྱིམ་གྱི་སོ་ནམ་བྱ་ན་ནི། །ཞེས་བྱ་བའི་ཚིགས་བཅད་ཡིན་ནོ། །ཁྱིམ་ན་ནོར་མེད་ན་ནི་སོ་ནམ་བྱ་བ་ཡིན་ནོ། །སོ་ནམ་གྱི་བྱ་བ་བྱས་པར་གྱུར་ན་ནི་ཆོས་ཀྱི་དོན་ཉམས་པ་ཡིན་ནོ། །དེ་ལྟར་ལུང་དུ་མ་བསྟན་པའི་ལས་ཀྱང་ཆོས་ཀྱི་གཉེན་པོ་ཡིན་པར་བསྟན་ཏོ། །བརྫུན་དུ་མི་སྨྲ་མི་རུང་ཞིང༌། །ཞེས་བྱ་བ་ནི་མི་དགེ་བ་དེ་ལ་འཇུག་པའི་དབང་དུ་བྱས་ནས་བརྫུན་དུ་སྨྲ་བཞེས་བྱ་བ་སྨོས་ཏེ། ངག་གི་ལས་ཀྱི་ལམ་གྱི་མི་དགེ་བ་བཞི་བཟུང་སྟེ། སྨྲ་བ་ཞེས་སྨོས་པས་དེ་ལ་གཞན་དག་ཀྱང་འགྲུབ་པོ། །ཉེས་པ་བྱེད་པ་ལ་ནན་ཏུར་ནི་ཞེས་བྱ་བ་ནི། སྲོག་གཅོད་པར་ནན་ཏུར་བྱ་བ་ཡིན་ཏེ། མི་དགེ་བའི་ལས་ཀྱི་ལམ་དག་ལས་སྲོག་གཅོད་པ་ཐོག་མར་སྨོས་པ་ཡིན་ཏེ། དེ་དང་པོར་སྨོས་པས་ལུས་ཀྱི་མི་དག་བའི་ལས་དག་ཀྱང་འགྲུབ་པོ། །དེ་བས་ན་གཞན་ལ་ནན་ཏུར་ཞེས་བྱ་བས་མི་དགེ་བའི་ལམ་ལས་བཟློག་སྟེ། རལ་གྲི་དང་ཐལ་ལྕག་ལ་སོགས་པའི་མཚན་ཉིད་ཀྱིས་བཅད་ཅིང་ནན་ཏུར་བྱ་བ་ཡིན་ཏེ། གཞན་སླུ་བས་སྒྲུབ་པ་ལ་སོགས་པ་དེས་གཞན་དག་ལ་གནོད་པར་འགྱུར་བ་ཡིན་ཏེ་དེ་ལ་ནན་ཏན་དུ་བྱ་བའོ། །འདི་དག་གིས་ནི་འདི་ལྟར་སྟོན་ཏེ། ལུང་དུ་མ་བསྟན་པའི་ལས་ཀྱི་སོ་ནམ་གྱིས་ཀྱང་མི་དགེ་བའི་ལས་ཀྱི་ལམ་ཡང་དག་པར་འཛིན་པ་སྟེ། ལུས་དང་ངག་གི་ལས་ཀྱི་ནན་ཏུར་བྱ་བ་སྟེ། ལས་ཀྱི་ལམ་རྣམ་པར་སྤངས་པའི་མི་དགེ་བའི་ལས་བྱེད་པ་ལ་ནན་ཏུར་བྱའོ། །ཡིད་ཀྱི་མི་དགེ་བ་གནོད་སེམས་ལ་
སོགས་པ་ཡང་ཁྱིམ་ན་མེད་པ་མ་ཡིན་ནོ། །སོ་ནམ་བྱ་བ་ལ་སོགས་པ་ལ་འཇུག་པའི་རྒྱུའི་དབང་དུ་བྱས་ནས། དེ་ལྟ་བས་ན་སྐྱེ་བོ་འདི་དག་ཅེས་བྱ་བ་ལ་སོགས་པའི་ཚིག་གོ །དེ་ལྟ་བས་ན་ཞེས་བྱ་བ་ནི་གང་གི་ཕྱིར་ཁྱིམ་གྱི་སོ་ནམ་མ་བྱས་པར་ཁྱིམ་མེད་དོ། །ཁྱིམ་མེད་ན་བདེ་བ་མེད་དོ། །དེ་སྒྲུབ་པ་ལ་འབད་པ་ཞེས་བྱ་བ་ནི་ཁྱིམ་གྱི་བདེ་བ་སྒྲུབ་པ་ལ་འབད་པ་སྟེ། ཁྱིམ་གྱི་བདེ་བ་སྒྲུབ་པའི་སོ་ནམ་ལ་སོགས་པའོ། །ད་ནི་ཁྱིམ་ན་གནས་པས་ནི་ཆོས་དང་ཆོས་མ་ཡིན་པ་ཕན་ཚུན་འགལ་བས་རབ་ཏུ་དཀའ་བ་ཡིན་པའི་ཕྱིར་དེ་སྒྲུབ་པའི་དབང་དུ་བྱས་ནས། གལ་ཏེ་ཆོས་སྤྱོད་ཁྱིམ་གྱི་སོ་ནམ་འཆོར། །ཞེས་བྱ་བ་འདི་ཡིན་ནོ། །གལ་ཏེ་ཆོས་སྤྱོད་པར་གྱུར་ཏེ་སོ་ནམ་ལ་སོགས་པ་མི་བྱེད་ན་ནི་ཁྱིམ་མེད་དེ། སོ་ནམ་འཆོར་བའི་ཕྱིར་ཇི་ལྟར་བསྟན་མ་ཐག་པའི་ཚིགས་སུ་བཅད་པ་བསྟན་པའོ། །གལ་ཏེ་ཁྱིམ་ལ་མངོན་པར་ཕྱོགས་ན་ནི། །ཞེས་བྱ་བ་ནི་སོ་ནམ་ལ་སོགས་པ་བྱས་ནའོ། །དེ་སྒྲུབ་པའི་ཕྱིར་སྨྲས་པ། ཆོས་ཀྱི་ལམ་ནི་རབ་ཏུ་ཞི་བ་ཞེས་བྱ་བའི་ཚིགས་བཅད་ཕྱེད་ཀྱིས་བསྟན་ཏེ། རབ་ཏུ་ཞི་བ་ནི་ཉོན་མོངས་པ་ཉེ་བར་ཞི་པའོ། །ཡང་ན་རབ་ཏུ་ཞི་བ་ནི་སེམས་ཅན་གྱི་རྩོམ་པ་ལས་ལྡོག་པ་སྟེ། ཐར་པ་ནི་དོན་ཐམས་ཅད་ལས་ལྡོག་པ་ཡིན་ནོ་ཞེས་བྱ་བའི་ཚིག་གིས་སོ། །དྲག་ཤུལ་ཅན་ཞེས་བྱ་བ་ནི་སྔར་བཤད་པའི་སོ་ནམ་ལ་སོགས་པའི་རིམ་པའོ། །དེ་བས་ཆོས་དང་འགལ་བའི་སྐྱོན་ཡོད་ཕྱིར། །ཞེས་བྱ་བའི་ཚིགས་བཅད་ཀྱི་དོན་རྣམ་པར་གཞག་པ་ནི་སྔར་བཤད་པའི་དོན་ཁྱིམ་ན་གནས་པའི་བདེ་བ་དང་གཅིག་པ་མ་ཡིན་ནོ་ཞེས་པའོ། །གཉིས་སུ་ན་ཁྱིམ་ནི་བདེ་བ་ཕྱོགས་གཅིག་ཏུ་མ་ངེས་པར་བསྟན་པའི་ཕྱིར་ངེས་པ་ཡོད་པ་མ་ཡིན་ཞེས་སྨོས་ཏེ། གཅིག་ཏུ་བདེ་བ་ཉིད་མ་ངེས་སོ། །དེ་སྒྲུབ་པའི་ཕྱིར། གདོན་མི་ཟ་བར་གྲགས་པ་མེད་པར་འགྱུར། །ཞེས་བྱ་བའི་ཚིགས་བཅད་ཡིན་ཏེ། གྲགས་པ་མེད་པར་འགྱུར་ཞེས་བྱ་བ་ནི་བདེ་བའི་རྒྱུ་འཇིག་རྟེན་པ་རྣམས་དགའ་བ་ལ་སོགས་པ་མེད་པར་བདེ་བ་འགྲུབ་པ་མེད་དོ། །གདུང་པ་སྐྱེ་བ་ཞེས་བྱ་བ་ནི་འཆི་
བའི་དུས་སུ་ཡིད་ལ་གཅགས་བཞིན་དུ་འཆི་བའི་ཕྱིར་རོ། །ཡིད་ལ་གདུང་བ་སྐྱེ་བ་ལས་ནི་ངན་འགྲོ་སྐྱེ་བར་འགྱུར་ཏེ། འཇིག་རྟེན་ཕ་རོལ་དུ་ངན་སོང་གི་སྡུག་བསྔལ་འབྱུང་བའི་ཕྱིར་བདེ་བ་འགྲུབ་པ་མེད་དོ། །བདེ་བའི་ཐབས་ཞེས་བྱ་བ་ནི། གང་གི་ཕྱིར་ཁྱིམ་དང་ཁྱིམ་ལ་གནས་པ་བདེ་བའི་རྒྱུའོ་ཞེས་མངོན་པར་ཞེན་པའི་དབང་དུ་བྱས་པ་ནི་ཁྱིམ་ལ་བདེ་བའི་ཐབས་ཞེས་བརྗོད་དོ། །ངན་འགྲོ་བཞིན་དུ་ཞེས་བྱ་བ་ནི་ངན་འགྲོ་བཞིན་དུའོ། །ཁྱིམ་ན་གནས་པ་བདེ་བར་ནི་ག་ལ་བཤད་དེ། དེ་བས་ན་དད་པས་ཡིད་ཆེས་པར་བྱ་བ་ཡིན་པར་བདག་གིས་མ་མཐོང་ངོ་ཞེས་བཤད་པ་ནི་གཞན་གྱི་ལས་བྱེད་པ་དག་ཀྱང་ཞེས་བྱ་བའི་ཚིགས་བཅད་ཀྱིས་སོ། །བཅིང་བ་དང་གསད་པ་དང་སྡུག་བསྔལ་ནི་བཅིང་ཞིང་གསད་པའི་སྡུག་བསྔལ་ལོ། །དེ་དག་ཉིད་ཀྱི་གཞིར་གྱུར་པ་ཡིན་ཏེ། ཡོད་པར་གྱུར་ན་བཅིང་བ་དང༌། གསད་པའི་སྡུག་བསྔལ་གྱི་གཞིར་གྱུར་བའོ། །འདོད་པ་དེ་དག་གལ་ཏེ་ངོམས་པར་གྱུར་ན་མི་རུང་ན་དེ་ཡང་མེད་དེ། དེ་བསྟན་པའི་ཕྱིར་རྒྱལ་པོ་དག་ཀྱང་ཞེས་བྱ་བའི་ཚིགས་བཅད་ཕྱེད་ཡིན་ནོ། །ཡངས་སུ་རྟོགས་པའི་དབང་དུ་བྱས་པའི་ཚིགས་བཅད་ནི། བསྒྲུབ་ཅིང་བསྲུང་བ་ལ་སོགས་པ་ཞེས་བྱ་བའི་ཚིགས་བཅད་དེའི་དོན་རྣམ་པར་འགྲེལ་ཏེ། འདི་ག་ལ་བདེ་ཞེས་བྱ་བ་ནི་བཅིངས་པ་དང་གསད་པའི་སྡུག་བསྔལ་གྱི་གཞིར་གྱུར་པས་ག་ལ་བདེ་སྟེ། དེ་བས་ན་ག་ལ་བདེའོ། །ཇི་ལྟར་བདེ་ཞེས་བྱ་བ་ནི་རྒྱལ་པོ་དག་ཀྱང་འབྱོར་པས་ཆོག་པ་མེད་དེ། དེས་ན་ཇི་ལྟར་བདེ་བའོ། །ནམ་ཞིག་བདེ་ཞེས་བྱ་བ་ནི་བསྒྲུབ་ཅིང་བསྲུང་ལ་སོགས་པའི་ཚེ་ན་སྡུག་བསྔལ་བའི་ཕྱིར་ནམ་ཞིག་བདེ་བ་ཡིན་ཏེ། དེས་ན་ཡང་རྣམ་པ་གསུམ་གྱིས་བདེ་བ་མེད་དོ། །ཇི་ལྟར་དེ་ལ་འཇིག་རྟེན་པ་རྣམས་བདེ་བའི་བློ་འབྱུང་ཞེ་ན། སྨྲས་པ། ཡོངས་སུ་རྟོགས་པའི་དབང་གིས་བདེ་བ་འབྱུང་བ་ཡིན་གྱི། ངོ་བོ་ཉིད་ཀྱིས་ནི་མ་ཡིན་ནོ། །དེ་ལྟར་རེ་ཞིག་བདེ་བ་ཡིད་ཀྱིས་ཡོངས་སུ་རྟོགས་པའི་མཐུ་ཡིན་པར་བསྟན་ནས། །ཡུལ་
རྣམས་ལ་རྨོངས་པས་ཉེ་བར་སྤྱོད་པ་ཞེས་བྱ་བ་ཡིན་ཏེ། དབང་པོ་ལྔའི་ཡུལ་གྱི་ཉེ་བར་སྤྱོད་པའི་བདེ་བ་ནི་དེ་ལ་རྣམ་པར་རྟོག་པ་མེད་པས་ཇི་ལྟར་བདེ་བར་འགྱུར་ཏེ་དེ་ལ་བདེ་བའི་རྣམ་པར་རྟོག་པ་མེད་པས་སོ། །རྣམ་པར་རྟོག་པ་ཙམ་ཡང་མངོན་པར་ཤེས་པ་ལྔ་དང་ལྡན་པས་ན་དེ་ཉིད་སྨྲས་པ། རྨ་གཡའ་ཕྲུགས་པའི་བདེ་བ་བཞིན་དུ་ཟད། ཅེས་བྱ་བ་ཡིན་ཏེ། རྨ་གཡའ་བ་ལ་ཕྲུགས་པའི་བདེ་བ་འབྱུང་བ་དེ་བཞིན་དུ་ཡུལ་རྣམས་ལ་ཡང་བརྟེན་པས་ཀྱང་བདེ་བ་བཞིན་ནོ། །ཆོས་ཀྱི་ལམ་ནི་རབ་ཏུ་ཞི་བ་ཡིན། །ཞེས་བྱ་བ་གང་སྔར་བཤད་པའི་རབ་ཏུ་ཞི་བ་ཡང་གཉིས་པ་བཤད་པ་ལས། འདིར་ཁྱིམ་ན་གནས་ན་ཉོན་མོངས་པ་རབ་ཏུ་ཞི་བར་མི་འགྱུར་ཞིང་མི་བཟློག་པར་བརྟན་པའི་ཕྱིར། གཞན་ཡང་ཕལ་ཆེར་ཞེས་བྱ་བའི་ཚིགས་བཅད་འདི་བརྩམས་པ་ཡིན་ནོ། །འདིའི་བསྡུས་པའི་དོན་ནི་ཕུན་སུམ་ཚོགས་པའི་གནས་སྐབས་དང༌། རྒུད་པའི་གནས་སྐབས་གཉི་ག་ན་ཡང་ཉོན་མོངས་པ་ཉེ་བར་ཞི་བ་མེད་པར་བསྟན་ཏོ། །ཚིགས་བཅད་ཕྱེད་དང་པོས་ནི་ཕུན་སུམ་ཚོགས་པའི་གནས་སྐབས་སུ་ཉོན་མོངས་པ་ཉེ་བར་མ་ཞི་བར་བསྟན་ཏོ། །གཉིས་པའི་ཕྱེད་ཀྱི་ཚིག་རྐང་དང་པོས་ནི་རྒུད་པའི་གནས་སྐབས་བསྟན་ཏོ། །དེ་ན་ཞེས་བྱ་བ་ནི་ཁྱིམ་དེ་ན་སྟེ་ཕུན་སུམ་ཚོགས་པ་དང༌། རྒུད་པའི་གནས་སྐབས་གཉི་ག་ན་ཡང་ཉེ་བར་ཞི་བ་མེད་དེ། དེ་གཉིས་མ་གཏོགས་པའི་གནས་སྐབས་གསུམ་པ་ནི་མེད་པའི་ཕྱིར། ནམ་ཞིག་རབ་ཏུ་ཞི་བར་འགྱུར། །ཞེས་བསྟན་ཏོ། །དྲེགས་དང་ང་རྒྱལ་ཞེས་བྱ་བའི་ཚིགས་བཅད་འདིས་ནི་སྔར་བཤད་པ་ཐམས་ཅད་ཀྱི་དོན་མཇུག་བསྡུ་བ་ཡིན་ཏེ། དྲེགས་དང་ང་རྒྱལ་གཏི་མུག་སྦྲུལ་གྱི་ཚང༌། །ཞེས་བྱ་བ་ནི་ཕལ་ཆེར་ཁྱིམ་ན་འབྱོར་ན་ཞེས་བྱ་བའི་ཚིགས་བཅད་བསྟན་པ་དེའི་ནམ་ཞིག་རབ་ཏུ་ཞི་བར་འགྱུར་ཞེས་པའི་མཇུག་བསྡུ་བ་ཡིན་ནོ། །དྲེགས་དང་ང་རྒྱལ་གཏི་མུག་སྦྲུལ་གྱི་ཚང་བཞིན་དུ་
གནས་དང་གཞིར་གྱུར་པ་སྟེ། དེ་བསན། རབ་ཏུ་ཞི་ལ་དགའ་བའི་བདེ་འཇིག་པ། །ཞེས་བྱ་བ་ཡིན་ཏེ། དགའ་བའི་བདེ་བ་འཇིག་པ་སྟེ། ཚང་དང་གནས་བཞིན་དུ་སྡུག་བསྔལ་དྲག་པོའི་གཞིར་གྱུར་པའི་ཕྱིར་རོ། །འདིས་ནི་གང་སྔར་བསྟན་པའི་བསྒྲུབ་ཅིང་བསྲུང་ལ་སོགས་པའི་སྡུག་བསྔལ་ཞེས་བྱ་བ་དེའི་མཇུག་བསྡུ་བ་ཡིན་ནོ། །རབ་ཏུ་ཞི་ལ་དགའ་བའི་བདེ་འཇིག་པ། །ཞེས་བྱ་བ་ནི་ཇི་ལྟར་རབ་ཏུ་ཞི་བ་བདེ་བ་ཡིན་ཞེ་ན། བདེ་བ་བསྟན་པའི་ཕྱིར་སྐྱེ་བོ་ཆོག་ཤེས་བྱ་བའི་ཚིགས་བཅད་ཡིན་ཏེ། བདེ་བ་ཡང་རྣམ་པ་གཉིས་ཏེ། ལུས་དང་སེམས་ཀྱི་དབང་དུ་བྱས་པའོ། །སེམས་ཀྱི་བདེ་བའི་དབང་དུ་བྱས་ནས། སྐྱེ་བོ་ཆོག་ཤེས་ཞེས་བྱ་བའི་ཚིགས་བཅད་ཡིན་ནོ། །ཡོ་བྱད་རྣམས་ཀྱིས་ཆོ་ག་ཤེས་པའི་འཚོ་བ་ནི་ཆོས་གོས་ལ་སོགས་པ་ངན་ངོན་ཙམ་གྱིས་ཆོག་ཤེས་པའི་ཕྱིར་རོ། །ཆོག་ཤེས་པའི་སྐྱེ་བོ་ནི་དཀའ་ཐུབ་ཅན་གྱི་སྐྱེ་བོའོ། །ཆོག་ཤེས་པའི་སྐྱེ་བོ་རྣམས་ནི་ཁྱིམ་བཞིན་དུ་ནགས་ན་དེ་བཞིན་ནོ། །རབ་ཏུ་དབེན་པའི་བདེ་བ་ནི་ལུས་དང༌། སེམས་ཀྱི་རབ་ཏུ་དབེན་པའི་བདེ་བ་ཡིན་ཏེ། སེམས་དབེན་པའི་བདེ་བས་སེམས་དགའ་བར་གྱུར་པ་ཡིན་ཏེ། འདིས་ནི་ཡིད་དགའ་བར་བསྟན་ཏོ། །དེ་ཉིད་ཀྱི་ཕྱིར་ཡིད་བདེ་བའི་དབང་དུ་བྱས་ཏེ། དེ་འདྲ་ལྷ་ཡི་ཡུལ་ནའང་མེད། །ཅེས་བྱ་བ་ནི་མིའི་འཇིག་རྟེན་ན་ལྷ་གལ་ཡོད་ཅེས་བྱ་བ་ཡིན་ནོ། །ལུས་ཀྱི་བདེ་བའི་དབང་དུ་བྱས་ནས། དེ་བས་ཚལ་ན་ཞེས་བྱ་བའི་ཚིགས་བཅད་ཡིན་ནོ། །ཚིགས་བཅད་འདིའི་དང་པོའི་ཕྱེད་ཀྱིས་ནི་ཟས་དང༌། གནས་མལ་དང༌། ཆོས་གོས་དམན་པར་བསྟན་པ་ཡིན་ནོ། །འཚོ་བ་སྒྲུབ་པ་ཉིད་ཀྱང་འདི་ལྟར་མི་སྒྲུབ་སྟེ། ཆོས་མིན་འདྲེས་པ་ཞེས་བྱ་བ་སྟེ་སྔར་བསྟན་པའི་བྱ་བས་སོ། །བདེ་བ་ནི་ཁྱིམ་གྱི་བདེ་བའོ། །མི་འདོད་པ་ནི་དུག་དང་འདྲེས་པའི་བཟའ་བ་འདྲ་བ་སྟེ། ཟས་དང་བཏུང་བ་དང་ཁྱིམ་གྱི་འཚོ་བས་བསྒྲུབས་ཤིང་
བསྐྱེད་པའི་ཁྱིམ་གྱི་བདེ་བ་དུག་ཆེན་བོ་དང་འདྲེས་པའི་ཟས་དང་འདྲ་བ་དེ་ནི་ཆོས་མ་ཡིན་པ་དང་འདྲེས་པའི་ཕྱིར་རོ། །བདག་ལ་ཕན་པར་འདོད་པ་ནི་བློ་དང་ལྡན་པའོ། །བཀུར་སྟིའི་བྱ་བ་ཁྱད་པར་ཅན་གྱིས་ཞེས་བྱ་བ་ནི་མངོན་དུ་སྨྲ་བ་དང༌། ཕྱག་ལ་སོགས་པའོ། །འདོད་པ་ལས་སླར་ལྡོག་གོ་ཞེས་བྱ་བ་ནི་ཕྱིས་ཡང་འདོད་པ་ལ་འཇུག་པར་མི་བྱེད་པའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་རྒྱལ་རིགས་ཕྱུག་པོའི་སྐྱེས་པའི་རབས་སོ།། །། འཕྱས་ཀྱི་གནས་ཞེས་བྱ་བ་ནི་རྗེས་སུ་བྱེད་པ་ལྟ་བུའོ། །གནོད་པ་ལྟ་བུར་ཞེས་བྱ་བ་ནི་ཉེ་བར་མཚོན་པ་ལྟ་བུའོ། །དེའི་གཟུགས་དང་ཡོན་ཏན་དང་མཐུན་པ་ཞེས་བྱ་བ་ནི་དེ་དང་མཉམ་པ་སྟེ། རྟག་ཏུ་རྗེས་སུ་འབྲང་བ་ཞེས་བྱ་བའི་དོན་ཏོ། །རིག་བྱེད་ཀྱི་ཡན་ལག་ཅེས་བྱ་བ་ནི་སོ་མ་ནི་བཤད་ཅེས་བྱ་བའི་རིག་བྱེད་དོ། །བདག་ནི་རབ་ཏུ་འབྱུང་བར་འདོད། །ཅེས་བྱ་བ་འགྲོ་བར་འགྱུར་རོ། །ལམ་གང་གིས་ཤེ་ན། དེ་ཉིད་སྨྲས་པ། དེ་བས་ན་ཕན་པའི་ལམ་བཟང་པོས་ཞེས་བྱ་བ་ཡིན་ཏེ། དགེ་བ་དང་ལེགས་པའི་ལམ་ཡིན་པས་ལམ་བཟང་པོ་སྟེ། ལམ་འདིས་ཐམས་ཅད་དུ་འབྱུང་ངོ་ཞེས་བྱ་བའོ། །རིག་བྱེད་སློབ་བ་ལ་ནི་འགྲུས། །ཞེས་བྱ་བ་ནི་རིག་བྱེད་སློབ་པ་ནི་བྲམ་ཟེའི་ལུས་སུ་བཤད་དོ། །མཛའ་བོ་དང་མགྲོན་དང་གཉེན་བཤེས་དང༌། སློང་བ་རྣམས་ནི་རེ་ཐག་མི་གཅོད་ཅེས་བྱ་བ་ནི་སྦྱིན་པའི་ལས་ཀྱིས་སོ། །ཆོས་ལ་གཞོལ་བ་ཞེས་བྱ་བ་ནི་འཚེ་བ་སྤངས་པའི་མཆོད་སྦྱིན་གྱི་ལས་སོ། །འདུལ་བ་ལ་ནི་རྟག་ཏུ་འབད། །ཅེས་བྱ་བ་འདིས་ནི་ཆོས་ལ་གཞོལ་བར་བྱ་བ་ཉིད་བསྟན་ཏེ། འདི་དག་ནི་སླའོ། །དེ་ལྟར་ཞེས་བྱ་བ་ནི། འདུལ་བ་ལ་ནི་རྟག་ཏུ་འབད། །ཅེས་བྱ་བ་ལ་སོགས་པ་གསུམ་ལ་ལེགས་པར་འཇུག་པས་སོ། །རང་གི་ཆོས་ལ་འབད་པས་ནི་གྲགས་པ་དང༌། སྲིད་དང་བདེ་བ་འགྲུབ་སྟེ། གསུམ་གྱི་དོན་ལ་ལེགས་པར་ཞུགས་ན་ནི་དགའ་
བར་བྱེད་པའི་རྒྱུ་ཡིན་པའི་ཕྱིར་རོ། །དེ་ལྟར་རེ་ཞིག་ཚེ་འདིའི་ཕན་ཡོན་བསྟན་ནས། ད་ནི་འཇིག་རྟེན་ཕ་རོལ་གྱི་ཕན་ཡོན་བསྟན་ཏེ། འཇིག་རྟེན་ཕྱི་མ་ལ་ཡང་བདེ་བར་འགྱུར། །ཞེས་བྱ་བ་འདིས་སོ། །ཕ་མ་གཉིས་དང་བྲལ་བ་ནི་ཕ་མ་དང་བྲལ་བའོ། །ཕ་མ་དང་བྲལ་བས་བྱས་པའི་མྱ་ངན་ནི། ཕ་མ་དང་བྲལ་བའི་མྱ་ངན་ནོ། །ཕ་མ་དང་བྲལ་བའི་མྱ་ངན་ཉིད་ཟུག་རྡུའི་རྨ་ཡིན་ཏེ། ཟུག་རྡུ་དེའི་རྨ་གང་ཡིན་པ་དེ་ལ། སྡུག་བསྔལ་གཞན་གྱིས་བསྣན་ཏེ་ཞེས་བྱ་བ་ནི་ཕ་མ་དང་བྲལ་བའི་སྡུག་བསྔལ་གྱི་སྟེང་དུ་བསྣན་པའོ། །ཡང་ན་ཕ་དང་མ་དང་བྲལ་བའི་མྱ་ངན་ཉིད་ཟུག་རྡུ་ཡིན་བས་ཕ་མ་དང་བྲལ་བའི་མྱ་ངན་གྱི་ཟུག་རྡུའོ། །དེས་བྱས་པའི་ཡིད་ཀྱི་རྨ་གང་ཡིན་པ་དེ་ནི་ཕ་མ་དང་བྲལ་བའི་མྱ་ངན་གྱི་ཟུག་རྡུའི་རྨ་སྟེ། དེ་ལ་ཡིད་ཅེས་བྱ་བ་ནི་ཚིག་གི་ལྷག་མའོ།། དེ་བས་བརྟན་པའི་བློ་ཅན་འདི་བཏང་ལེགས། །ཞེས་བྱ་བ་ནི་རབ་ཏུ་བྱུང་བའི་བློའོ། །འདིར་རྨ་ཞེས་བྱ་བ་ལ་ཡིད་ཅེས་བྱ་བ་ཡང་ཚིག་གི་ལམ་བསྟན་ཏོ། །དེ་ལྟར་ཁྱོད་འདོད་ན་ཞེས་བྱ་བ་ནི་རབ་ཏུ་འབྱུང་བར་རོ། །ཀུ་མུ་ཏ་མང་པོ་ཁ་འབུས་པ་ཡོད་པའི་མཚོ་གང་ཡིན་པ་དེ་ནི་ཀུ་མུ་ཏ་མང་པོ་ཁ་འབུས་པའི་མཚོའོ། །བརྟུལ་ཞུགས་དང་སྡོམ་པ་ལ་འབད་ཅེས་བྱ་བས་ནི་ལུས་དང་ངག་གི་ལམ་བསྟན་ཏོ། །ཡིད་བསམ་གཏན་ལ་སྦྱོར་ཞེས་བྱ་བས་ནི་ཡིད་ཀྱི་ལམ་བསྟན་ཏོ། །བསམ་གཏན་གྱི་མན་ངག་ནི་བསམ་གཏན་མན་ངག་གོ །དེའི་ཕྱིར་འཇུག་པ་ནི་བསམ་གཏན་གྱི་མན་ངག་ལ་འཇུག་པའོ། །དེ་ཇི་ལྟར་བསམ་གཏན་གྱི་མན་ངག་ལ་འཇུག་པའི་རྣམ་པས་བསམ་གཏན་བསྟན་པ་ཉིན་ཞེ་ན། འདོད་པའི་ཉེས་དམིགས་ཞེས་བྱ་བ་ལ་སོགས་པ་བརྩམས་པ་ཡིན་ཏེ། དབེན་པ་རྣམ་པར་བསྒོམ་པའི་ཕྱིར་བསམ་གཏན་དང་པོའི་ཉེས་དམིགས་བསྟན་པ་སྟེ། ཇི་ལྟར་མདོ་སྡེ་ཉིད་ལས་རིག་པར་བྱ་སྟེ། གསོག་དང༌། བརྫུན་དང༌། སླུ་བའི་ཆོས་ཅན་དང༌། བྱིས་པ་འདྲིད་པར་བྱེད་པ་ཞེས་བྱ་བ་དང༌། ཤིང་གི་
འབྲས་བུ་ཞེས་བྱ་བ་ལ་སོགས་པའོ། །ཅིའི་ཕྱིར་འདོད་པའི་ཉེས་དམིགས་སྟོན་ཅེ་ན་སྨྲས་པ། འདོད་ཁམས་ལས་སྐྱོ་ཞིང་ཡིད་འབྱུང་བར་འགྱུར་བ་དང༌། རབ་ཏུ་དབེན་པ་དང༌། ཆོག་ཤེས་པའི་བསྔགས་པ་མང་དུ་འབྱུང་ཞེས་བྱ་བ་ཡིན་ཏེ། འདོད་པ་ལས་དབེན་པ་དང༌། ཆོག་ཤེས་པའི་བསྔགས་པའི་ཡོན་ཏན་མང་པོ་བརྗོད་པའོ། །དེའི་གཏམ་མང་པོ་གང་ཡིན་པ་དེ་ནི་རབ་ཏུ་དཔེན་པ་དང་ཆོག་ཤེས་པའི་གཏམ་མང་པོ་འབྱུང་བའོ། །དེ་ལྟར་འདོད་པ་ལས་རབ་ཏུ་དབེན་པའི་ཕན་ཡོན་བསྟན་ནས་ཚུལ་འཆོས་པ་དང་གཅམ་སྒྱུ་ལ་སོགས་པས་ནི་སྡིག་པ་མི་དགེ་བའི་ཆོས་རྣམས་ལས་དབེན་པའི་ཐབས་བསྟན་པ་ཡིན་ཏེ། ཚུལ་འཆོས་པ་ལ་སོགས་པའི་ཉེས་པ་བསྟན་པ་དེ་དག་ལས་རབ་ཏུ་དབེན་པར་གྱུར་པའོ། །དེ་ལྟར་རེ་ཞིག་བསམ་གཏན་དང་པོའི་མན་ངག་ལ་འཇུག་པའི་གཏམ་བསྟན་ཏོ། །ཉེ་བར་ཞི་བ་དང་རབ་ཏུ་ཞི་བ་ནི་ཉེ་བར་ཞི་བ་དང་རབ་ཏུ་ཞི་བའོ། །དེ་གཉིས་ལམ་དུ་གྱུར་པ་ནི་ཉེ་བར་ཞི་བ་དང་རབ་ཏུ་དང་བའི་ལམ་དུ་གྱུར་པའོ། །དེ་ལ་ཉེ་བར་ཞི་བ་ནི་ཉོན་མོངས་པ་ཉེ་བར་ཞི་བའོ། །རབ་ཏུ་དང་བ་ནི་སེམས་ཀྱི་དད་པའོ། །ཉོན་མོངས་པ་དང་ཉེ་པར་ཞི་བ་མངོན་སུམ་དུ་བསྟན་པ་དེས་ནི་བསམ་གཏན་གཉིས་པ་ལ་སོགས་པའི་མན་ངག་ལ་འཇུག་པའི་གཏམ་བསྟན་པ་ཡིན་ནོ། །ཆོས་ཀྱི་གཏམ་དེ་དང་དེ་ཞེས་བྱ་བ་ནི་འདིར་མ་བསྟན་པའི་ལྷག་མའི་ཆོས་ཀྱི་གཏམ་མ་ལུས་པར་བསྟན་ཏོ། །དེ་བཞིན་དུ་གཡོག་བྱེད་ཅེས་བྱ་བ་ནི་ཇི་ལྟར་ཁྱིམ་ན་གནས་པའི་དུས་ལྟ་བུར་རོ། །པདྨའི་ལོ་མ་ཆེན་པོ་ལ། །ཞེས་བྱ་བ་སྨོས་པ་ནི་བསམ་གཏན་གྱི་སྦྱོར་བ་དང་མཐུན་པའི་ཟས་ཙམ་བསྟན་པའི་ཕྱིར་རོ། །སླར་སོང་ངོ་ཞེས་བྱ་བྱ་བའི་ཚིག་གིས་ནི་སྔར་བསྟན་པའི་ཞག་ལྔ་ཞིང་བྱང་ཆུབ་སེམས་དབའི་དྲུང་དུ་ཆོས་མཉན་པའི་ཕྱིར་འདུའོ་ཞེས་བྱ་བ་འདིའི་གནས་སྐབས་ཡོངས་སུ་མི་ཉམས་པར་བྱ་བའི་ཕྱིར་རོ། །དེ་ཉིད་ཀྱི་ཕྱིར་ཡང་རིང་པར་ཡང་ཡོངས་སུ་ཤེས་ནས་ཞེས་བྱ་བ་སྟེ། ཉི་མ་ལྔས་
བར་དུ་ཆོད་པའི་ཕྱིར་རོ། །ཚུལ་ཁྲིམས་དང་སྤྱོད་ཚུལ་དེ་ལྟར་ཞེས་བྱ་བ་ནི་གང་སྔར་བསྟན་པའི་དཀའ་ཐུབ་དང༌། བཟླས་བརྗོད་དང༌། སྦྱིན་སྲེག་གི་ཆོ་ག་དེ་ཉིད་བསྟན་པ་ཡིན་ཏེ། འདིར་ཡང་ཚུལ་ཁྲིམས་དང་བརྟུལ་ཞུགས་ནི་དོན་གཞན་མ་ཡིན་ཏེ། བཟླས་བརྗོད་དང༌། སྦྱིན་སྲེག་ལ་སོགས་པ་བྱས་ནས་དུས་བསྟན་ཏེ། སླར་དོང་བ་ལ་སོགས་པའོ། །རབ་ཏུ་དབེན་པ་ལ་དགའ་བ་ཞེས་བྱ་བ་ནི་ཞག་ལྔ་ཞིང་ལྔ་ཞིང་བྱང་ཆུབ་སེམས་དཔའི་གན་དུ་འོང་བའི་ཕྱིར་རོ། །བསམ་གཏན་ལ་གཞོལ་བས་ཞེས་བྱ་བ་ནི་གང་སྔར་བསྟན་པའི་ཡིད་བསམ་གཏན་ལ་སྦྱོར་བས་གནས་ཞེས་བྱ་བ་དེ་ཉིད་བསྟན་པའོ། །བྱ་བ་ངན་པ་དང་མ་འབྲེལ་ཞིང་ཞེས་བྱ་བ་ནི་གང་སྔར་བསྟན་པའི་བརྟུལ་ཞུགས་དང༌། བཟླས་བརྗོད་དང་སྦྱིན་སྲེག་གི་ཆོ་ག་བྱེད་ཀྱི་ལས་གཞན་མི་བྱེད་པས་སོ། །གདུང་བ་མེད་ལ་ཞེས་བྱ་བ་ནི་བསྟན་པའི་ལམ་ལ་དགའ་བར་སྟོན་ཏོ། །རབ་ཏུ་ཞི་བ་ལ་མངོན་པར་དགའ་ཞིང་འཁོད་པར་ཞེས་བྱ་བ་ནི་སྤྱོད་ཡུལ་ལ་སོགས་པའི་གནས་པའོ། །རྩོལ་བ་མེད་པར་ཞེས་བྱ་བ་འདིས་ནི་བྱ་བ་ངན་པ་མ་འབྲེལ་ཞིང་གདུང་བ་མེད་པ་རབ་ཏུ་ཞི་བ་ཉིད་དུ་བསྟན་ཏོ། །ཡོན་ཏན་རེ་བ་སྙིང་ལ་ཞེས་བྱ་བ་ནི་ཕྱི་རོལ་གྱི་འཇུག་པ་སྟོན་པའི་ཕྱིར་ཏེ། སྙིང་གི་ཡོན་ཏན་ལ་རེ་བ་ཞེས་བྱ་བའི་དོན་ཏོ། །པདྨའི་རྩ་བའི་ཆ་དང་པོ་མི་སྣང་བར་བྱས་སོ་ཞེས་བྱ་བ་ལ། ཅིའི་ཕྱིར་ཞེ་ན། དེ་མི་སྣང་བར་བྱས་པ་བསྟན་པའི་ཕྱིར། །སྡུག་བསྔལ་བྱུང་བར་གྱུར་པ་ལ། །ཞེས་བྱ་བའི་ཚིགས་བཅད་སྨོས་པ་ཡིན་ཏེ། བདེ་བ་སྡུག་བསྔལ་གཉིས་ཡོད་པ་དང་མེད་པར་གྱུར་ཀྱང་བྱང་ཆུབ་སེམས་དཔའ་ལ་ནི་བློ་དང་ལྡན་པའི་ཕྱིར་མི་སྣང་བར་བྱས་ཀྱང་མི་གཡོ་ཞིང་དེ་ལྟར་ཤེས་པར་འགྱུར་བས་སོ། །དེ་ལྟར་མི་སྣང་བར་བྱས་པས་དེ་ལ་སེམས་འཁྲུགས་པས་ཤི་ཡང་སླ་ཞེས་བྱ་བ་ནི་སྐྱེ་བ་དུ་མར་མི་སྡུག་པའི་རྣམ་པར་སྨིན་པའི་རྒྱུར་འགྱུར་བའི་ཕྱིར་རོ། །སེམས་འཁྲུགས་པ་ནི་ཚེ་ཟད་པ་ཡིན་ཏེ། ཚེ་ཟད་པ་དེའི་རྒྱུ་ཡིན་པའི་
ཕྱིར་རོ། །སྲོག་གི་ཕྱིར་ཡང་ཞེས་བྱ་བ་ནི་སྲོག་གི་ཆེད་དུ་ཡང་ངོ༌། །གལ་ཏེ་འཁྲུགས་ཤིང་གསོན་པར་རུང་ངོ་ཞེས་འགའ་ཞིག་སྨྲ་ན་ནི། དེའི་ཚེ་འཁྲུགས་པར་གྱུར་ན་དེ་མ་ཐག་འཆི་བ་ལྟ་བུ་སྟེ། འཆི་བར་ཉེ་བར་འགྲོ་བ་ཡིན་ཏེ། དེས་སེམས་འཁྲུགས་པ་ཡིན་པའི་ཕྱིར་རོ། །དེས་ན་སེམས་འཁྲུགས་བཞིན་དུ་འཚོ་བ་ནི་མ་ཡིན་ནོ་ཞེས་བྱ་བའི་དོན་ཏོ། །འགྲམ་པ་དང་མིག་ནི་ཀོང་ཞེས་བྱ་བས་དབྱིབས་འགྱུར་བ་ཉིད་དོ། །བཞིན་གྱི་མདངས་ནི་ངན་ཞེས་བྱ་བ་ནི་མདོག་འགྱུར་བའོ། །སྐད་ཀྱི་གདངས་ཟབ་མོ་ནི་ཆུང་ཞེས་བྱ་བས་ནི་སྒྲ་འགྱུར་བའོ། །ཉམ་དམས་ཀྱང་བརྟན་པ་དང་རབ་ཏུ་ཞི་བའི་ཡོན་ཏན་ཞེས་བྱ་བ་འདིས་ནི་རྣམ་པར་རིག་བྱེད་མ་འགྱུར་བར་བསྟན་ཏོ། །དེ་ལྟར་ཕྱི་རོལ་གྱི་ཡུལ་གྱིས་མཐོང་བ་སྟེ། མིག་དང་རྣ་བའི་དབང་པོ་གཉིས་ཀྱིས་མདོག་དང་དབྱིབས་རྣམ་པར་རིག་པ་ཡིན་ནོ། །རིད་པར་གྱུར་པའི་རྒྱུ་དེ་ལ་དྲིས་སོ་ཞེས་བྱ་བ་ནི་ཅིའི་ཕྱིར་རིད་པའི་རྒྱུ་དེ་ལ་དྲིས་ཤེ་ན། རིད་པ་དང་འབྲེལ་པར་གྱུར་པའི་ཕྱིར་རོ། །འགྱུར་བ་གཞན་དག་ནི་མི་རིགས་པའི་ཕྱིར་ཏེ། དྲི་བ་གཞན་དག་ནི་མ་བརྗོད་ཀྱང་གྲུབ་པ་ཉིད་དེ། དེ་ལས་གཞན་དུ་འགྱུར་བའི་རྒྱུའོ། །ཇི་ལྟར་གྱུར་པ་ཞེས་བྱ་བ་ནི་དང་པོའི་གནས་ན་པདྨའི་རྩ་བ་ནི་མེད་དེ། པདྨའི་ལོ་མ་ནི་རྒྱན་འཁྲུགས་ཤིང་འདུག་པར་མཐོང་ཞེས་བྱ་བ་དེ་དག་བསྟན་པར་གྱུར་པའོ། །ཆོས་མ་ཡིན་པ་ཞེས་བྱ་བ་ནི་པདྨའི་རྩ་བ་ཁྱེར་བའོ། །ཤེས་པ་འཇུག་པའི་ཡུལ་ཡང་བསྒྲིབས་ཞེས་བྱ་བ་ནི་ཤེས་པ་འཇུག་པ་ཡིན་པས་ཤེས་པ་འཇུག་པའོ། །ཤེས་པ་འཇུག་པར་བྱེད་པའི་ཡུལ་ནི་ཤེས་པ་འཇུག་པའི་ཡུལ་ལོ། །ཤེས་པ་འཇུག་པའི་ཡུལ་བསྒྲིབས་པ་གང་ཡིན་པ་དེ་ནི་ཤེས་པ་འཇུག་པའི་ཡུལ་བསྒྲིབས་པ་སྟེ། མངོན་པར་ཤེས་པ་ལས་བྱུང་བའི་ལྷའི་མིག་གིས་མཐོང་བའི་ཡུལ་དེ་བསྒྲིབས་པའི་ཕྱིར་རོ། །ཅིའི་ཕྱིར་ཞེ་ན། བརྒྱ་བྱིན་གྱི་མཐུ་ལས་བྱུང་བའི་རྫུ་འཕྲུལ་གྱི་ཁྱད་པར་གྱིས་མངོན་པར་ཤེས་
བ་ལས་བྱུང་བའི་མིག་གི་ཡུལ་ཡང་མི་སྣང་བར་བྱེད་ནུས་པས་སོ། །ཅི་ལས་གྱུར་ཞེས་བྱ་བ་ནི་གང་གིས་འདི་ལྟར་བྱས་ཞེས་པའོ། །འདི་ཞེས་བྱ་བ་ནི་པདྨའི་རྩ་བ་མེད་པའོ། །རང་གི་ཡིད་ལ་གཅགས་པ་ཞེས་བྱ་བ་ནི་བྱང་ཆུབ་སེམས་དཔའ་དེ་ཉམ་ཐག་པའི་རྒྱུས་སོ། །བདག་ཉིད་གཙང་བ་ཞེས་བྱ་བ་ནི་བདག་ཉིད་པདྨའི་རྩ་བ་མ་ཁྱེར་བའོ། །འདིར་ཚིགས་བཅད་བཅུ་གཅིག་གིས་མནའ་ཁྱད་པར་ཅན་བོར་བ་སྟེ། རབ་དང༌། འབྲིང་དང༌། ཐ་མ་རྣམས་ཀྱི་འདོད་པའི་ཉེས་དམིགས་བསྟན་པའི་ཕྱིར་ཇི་ལྟར་རིགས་པར་སྦྱར་ཏེ། དང་པོ་གསུམ་གྱིས་མནའ་ཁྱད་པར་ཅན་བོར་བ་ནི་ཐ་མའི་དབང་དུ་བྱས་པའོ། །ཁྱོད་ཀྱི་རྩ་བ་བརྐམ་པས་གང་ཁྱེར་བ། །ཞེས་བྱ་བའི་ཚིགས་བཅད་ནི་རབ་ཀྱི་དབང་དུ་བྱས་པའོ། །ཁྱོད་ལྟའི་རྩ་བ་གང་ཁྱེར་བ། །ཞེས་བྱ་བ་ནས། ཁྱོད་ལྟ་བུ་ཡི་རྩ་བ་ལ་ཆགས་གང༌། །ཞེས་བྱ་བའི་ཚིགས་བཅད་གསུམ་ནི་འབྲིང་གི་དབང་དུ་བྱས་པའོ། །རྩ་བའི་ཕྱིར་ནི་བདག་ཉིད་ཆུད་གསོན་པ། ཞེས་བྱ་བ་དང༌། གང་གིས་རྩ་བ་མཐོང་ལ་ཆོས་མ་མཐོང༌། །ཞེས་བྱ་བའི་ཚིགས་བཅད་གཉིས་ནི་ཐ་མའི་དབང་དུ་བྱས་པའོ། །དམ་པའི་མཆོག་ཏུ་གྱུར་ཞེས་བྱ་བའི་ཚིགས་བཅད་ནི་རབ་ཀྱི་གནས་སྐབས་ཀྱི་དབང་དུ་བྱས་པའོ། །གནོད་སྦྱིན་དང༌། གླང་པོ་ཆེ་དང༌། སྤྲེའུ་རྣམས་ཀྱིས་ཀྱང་འདོད་པའི་ཉེས་དམིགས་བསྟན་པའི་ཕྱིར་ཏེ། དེ་དག་ནི་འདོད་ཆགས་དང་མ་བྲལ་བའི་ཕྱིར་གནས་སྐབས་དང་རྗེས་སུ་མཐུན་པའི་མནའ་གསུམ་བོར་བ་ཡིན་ནོ། །གང་ཞིག་མ་བརླག་པར་ནི་བརླག་ཅའམ། །ཞེས་བྱ་བའི་ཚིགས་བཅད་འདི་ནི་བར་མའི་དབང་དུ་བྱས་པའོ། །གང་དག་ཐོབ་ཕྱིར་ཡིད་ལ་རྩོལ་བྱེད་ཅིང༌། །ཞེས་བྱ་བའི་ཚིགས་བཅད་ཕྱེད་ནི་མཐོང་བའི་ཆོས་ཀྱི་བདེ་བ་འདོད་པའི་དབང་དུ་བྱས་པའོ། །དཀའ་ཐུབ་འབད་པས་གང་དག་ཐོབ་འདོད་པའོ། །ཞེས་བྱ་བའི་ཕྱེད་འོག་མས་ནི་འཇིག་རྟེན་ཕ་རོལ་གྱི་བདེ་བ་འདོད་པའི་དབང་དུ་བྱ་བའོ། །འདོད་པའི་ཕྱིར་ནི་འཇིག་རྟེན་བཅིངས་ཤིང་གསོད་པར་འགྱུར། །ཞེས་བྱ་བ་དང༌། གང་གིས་མཛའ་བོ་
རྣམས་དང་མྱུར་དུ་འཁོན་འབྱུང་འགྱུར། །ཞེས་བྱ་བའི་ཚིགས་བཅད་འདི་གཉིས་དང༌། དེ་བས་རབ་དང་འབྲིང་དང་ཐ་མ་རྣམས། །ཞེས་བྱ་བའི་ཚིགས་བཅད་ཕྱེད་ཀྱིས་ནི་རྣམ་པ་གསུམ་གྱི་འདོད་པའི་ཉེས་དམིགས་མདོར་བསྡུས་ནས་བསྟན་པ་སྟེ། ཐ་མའི་འདོད་པའི་ཉེས་དམིགས་ཀྱི་དབང་དུ་བྱས་པ་ནི། འདོད་པའི་ཕྱིར་ནི་འཇིག་རྟེན་བཅིངས་ཤིང་གསོད་པར་འགྱུར། །ཞེས་བྱ་བ་ཕྱེད་དོ། །རབ་ཀྱི་དབང་དུ་བྱས་པ་ནི། རྒྱལ་པོ་རྣམས་ཀྱང་འདོད་པའི་ཕྱིར། །ཞེས་བྱ་བ་ཕྱེད་འོག་མའོ། །འབྲིང་གི་དབང་དུ་བྱས་པ་ནི། གང་གིས་མཛའ་བོ་རྣམས་དང་མྱུར་དུ་འཁོན་འབྱུང་འགྱུར། །ཞེས་བྱ་བའི་ཚིགས་བཅད་ཕྱེད་འོག་མ་ཡིན་ནོ། །འདི་དང་ཕ་རོལ་དུ་ཡང་འདོད་པས་གསོད་པར་བྱེད། །ཅེས་བྱ་བ་ནི། གྲགས་པ་ཉམས་ཤིང་ཕྱི་མ་ལ་ཡང་སྡུག་བསྔལ་མྱོང༌། །ཞེས་བྱ་བ་ཚིགས་བཅད་དེའི་དབང་དུ་བྱས་པ་སྟེ། གྲགས་པ་ཉམས་པ་ཞེས་བྱ་བ་ནི་མཐོང་བའི་ཆོས་ཀྱི་ཉེས་དམིགས་སོ། །སྡུག་བསྔལ་མྱོང་ཞེས་བྱ་བ་ནི་འཇིག་རྟེན་ཕ་རོལ་གྱི་ཉེས་དམིགས་སོ། །བདག་ལ་ཕན་འདོད་སྦྲུལ་གདུག་ཁྲོས་པ་བཞིན། །ཞེས་བྱ་བ་ནི་དུས་རྟག་ཏུ་ཕུང་ཁྲོལ་གྱི་རྒྱུར་གྱུར་པའི་ཕྱིར་རོ། །བདག་གིས་འདིར་པདྨའི་རྩ་བ་སྦས་པ་ཞེས་བྱ་བ་ཅིའི་ཕྱིར་ཞེ་ན་སྨྲས་པ་བརྟག་པའི་ཕྱིར་རོ། །ཅིའི་ཕྱིར་བརྟག་ཅེ་ན། སྨྲས་པ། ཡོན་ཏན་རྣམས་རེ་བ་བཞིན་པ་རྟོགས་པར་འགྱུར་བའོ། །སྤྱོད་པ་རྣམ་པར་དག་པ་ནི་གང་གི་ཡིད་འཁྲུགས་པ་མ་ཡིན་ཞིང་དོན་གཞན་དུ་མ་གྱུར་པའི་ཕྱིར་རོ། །བརྟན་པའི་སྤྱོད་པ་ནི་བདེ་བ་དང་སྡུག་བསྔལ་ལྡོག་པ་དང་འཇུག་པ་གཉིས་ལ་ཡང་བརྟན་པའི་ཁྱད་པར་གྱིས་གཞན་དུ་མི་འགྱུར་བའི་ཕྱིར་རོ། །ངེད་ཅག་ཁྱོད་ཀྱི་གཉེན་དང་གྲོགས་མ་ཡིན། །ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནི་རྩེད་མོའི་ལམ་འབྱུང་བའི་རྒྱུ་ནི་རྣམ་པ་བཞི་སྟེ། དེའི་དབང་དུ་བྱས་ནས། ངེད་ཅག་ཁྱེད་ཀྱི་གཉེན་དང་ཞེས་བྱ་བ་ནི་གང་གིས་ལྷན་ཅིག་སྐྱེས་པའི་སྤུན་ཟླའོ། །གྲོགས་ནེའུ་ལྡངས་ཏེ། འདི་གཉིས་ཀྱིས་ནི་རང་གི་སྐྱེ་བོ་ཡིན་པའི་ཕྱིར་དང༌། ན་ཚོད་མཉམ་པའི་ཕྱིར་རྩེད་མོའི་ལམ་བཞིན་དུ་བྱ་བར་རིགས་པ་ཡིན་ནོ། །གར་མཁན་ནི་འདྲ་བར་བྱེད་པ་ཡིན་ཏེ། གར་མཁན་དང་འཕྱས་གདགས་པ་ནི་གཅིག་ལ་
གཅིག་རྩེད་མོའི་ལམ་རིགས་པ་ཡིན་ཏེ། དེས་ཀུན་དུ་འཚོ་བའི་ཕྱིར་རོ། །ཅིའི་ཕྱིར་ཁྱད་དུ་བསད་ནས་ཞེས་བྱ་བ་ནི་གཟི་བྱིན་གྱིས་ནོན་པའི་ཚིག་སྟེ། རྩེད་མོའི་ལས་ཞེས་བྱ་བའི་ཚིག་གིས་ནི་སྤྱོད་པ་གླང་པོས་སྤྱོས་སོ་ཞེས་བྱ་བའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་པདྨའི་རྩ་བའི་སྐྱེས་པའི་རབས་སོ།། །།ཐོས་པ་དང༌། དུལ་བ་དང༌། ཆོ་རིགས་བཙུན་པ་ཞེས་བྱ་བ་ལ་ཐོས་པ་ནི་ད་ལྟར་བྱུང་བའི་ཤེས་རབ་ཀྱི་ཚོགས་སོ། །དུལ་བ་དང༌། ཆོ་རིགས་བཙུན་པ་ནི་འདས་པའི་སྐྱེ་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུ་སྟེ། རྣམ་པར་སྨིན་པ་དང༌། རྒྱུ་མཐུན་པའི་འབྲས་བུ་འོ། །མ་འཇུངས་ཤིང་ཁོང་བཟོ་བཞིས་བྱ་བ་ནི་འདས་པའི་སྐྱེ་བའི་ཤེས་རབ་ཀྱི་ཚོགས་དེའི་འབྲས་བུའོ། །འཇིག་རྟེན་གྱི་ཐ་སྙད་དུ་བྱ་བ་ལ་འགལ་བ་མེད་པ་ཞེས་བྱ་བ་ནི་ད་ལྟར་བྱུང་བའི་དུས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གཙུག་ལག་མང་པོ་ལ་གོམས་པས་ཚིག་ལ་མཁས་པར་གྲགས་པ་ཞེས་བྱ་བ་ནི་སྔར་བསྟན་པའི་ཐོས་པ་གསལ་བར་བྱེད་པ་ཡིན་ནོ། །སྙིང་རྗེ་དང་ལྡན་ཞེས་བྱ་བ་ལ་སོགས་པའི་ཚིག་གིས་ནི་ད་ལྟར་བྱུང་བའི་སྐྱེ་བའི་སྦྱིན་པའི་ཕ་རོལ་ཏུ་ཕྱིན་པའོ། །རབ་ཏུ་ཕྱུག་པས་ཞེས་བྱ་བ་ནི་ཚེ་སྔ་མའི་སྦྱིན་པའི་ཕ་རོལ་ཏུ་ཕྱིན་བའི་འབྲས་བུའོ། །དེ་ལྟར་འདི་དག་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུ་དང་འབྲས་བུ་ལ་འཇུག་པ་བསྟན་པའོ། །དེ་ནི་རང་བཞིན་ཆོས་ཀྱི་བདག །ཅེས་བྱ་བ་འདིས་ནི་སྦྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་པ་ཉིད་དུ་བསྟན་ཏོ། །ཐོས་ལ་སོགས་པའི་ཡོན་ཏན་བརྒྱན། །ཅེས་བྱ་བ་འདིས་ནི་ཡེ་ཤེས་ཀྱི་ཚོགས་ཀྱི་ཕ་རོལ་ཏུ་ཕྱིན་པ་ལ་གནས་པ་ཉིད་དུ་བསྟན་ཏོ། །ཚོགས་གཉིས་ཀྱི་གནས་ཉིད་དུ་གྱུར་པས་བཀུར་སྟི་བྱ་བའི་གཞིར་གྱུར་པ་ཡིན་ནོ། །ཕྲད་པའི་ཕྱིར་ཞེས་བྱ་བ་ནི་བལྟ་པའི་ཕྱིར་རོ། །དེའི་ཁྱིམ་དུ་ཞེས་བྱ་བ་ནི་སེམས་དཔའ་ཆེན་པོའོ། །མགྲོན་འོངས་པའི་བཀུར་སྟིའི་བྱ་བ་བྱས་པ་གང་ཡིན་པ་དེ་ནི་མགྲོན་འོངས་པའི་བཀུར་སྟིའི་བྱ་བ་བྱས་པའོ། །གཏམ་སྨྲ་བའི་སྐབས་ལ་བབ་པ་ནི་སྐབས་ལ་བབ་པའི་གཏམ་གླེང་བ་འོ། །
དེ་ལས་འཕྲོས་པའི་གླེང་ལངས་པའོ། །ཁྱོད་ལ་བྱམས་སམ་ཞེས་བྱ་བ་ནི་རྗེས་སུ་བརྩེ་འམ་ཞེས་དྲི་བ་ཡིན་ཏེ། བུད་མེད་གཞན་ལ་ཆགས་པ་མེད་དམ་ཞེས་དྲི་བ་འོ། །ཁྱོད་ཀྱིས་ནི་བཀུར་སྟི་བྱས་པའི་ཡོན་ཏན་དྲིན་དུ་གཟོ་འམ་མི་གཟོ་ཞེས་བྱ་བ་ནི་གསོ་ཞིང་བསྐྱེད་པ་ལ་སོགས་པ་སྟེ། གནོད་ང་མ་བྱས་པ་ཉིད་དང༌། བཀུར་སྟི་བྱས་པའི་ཡོན་ཏན་ཡོངས་སུ་ཤེས་པར་གྱུར་པའོ། །མི་བདེ་བ་ལྟ་ཡོད་དམ་མེད་ཅེས་བྱ་བའི་ཚིགས་བཅད་ལ་སོགས་པ་རྣམ་པ་གཉིས་ཏེ། འདི་གསུམ་གྱིས་ནི་བདག་ཉིད་དང་མཉམ་པར་ལོངས་སྤྱོད་དང་ཉེ་བར་སྤྱོད་པས་རྗེས་སུ་འཛིན་པ་ཡིན་ཏེ། མི་བདེ་བ་མེད་པ་ནི་ཉེ་བར་འཚེ་བ་མེད་པར་བསྟན་ཏོ། །དེ་ལྟར་རེ་ཞིག་བུད་མེད་རྣམས་གཞན་ལ་རག་ལུས་པའི་ཚུལ་ཡིན་པས་འདྲི་བར་བྱེད་པའོ། །དེ་ངོ་ཚ་བས་མགོ་སྨད་དེ་མི་སྤོབས་བཞིན་དུ་ཞེས་བྱ་བས་ནི་གནས་མ་ཡིན་པར་དྲིས་པས་དེ་ངོ་ཚ་སྟེ་མགོ་སྨད་པའོ། །སྤོབས་པ་ནི་དེའི་ལན་དེ་མི་སྤོབས་བཞིན་དུའོ། །དར་ལ་བབ་ཅིང་བྱད་གཟུགས་བཟང༌། །ཞེས་བྱ་བའི་དོན་ནི་བདག་གི་དབང་ངམ་གཞན་གྱི་དབང་གིས་རབ་ཏུ་བྱུང་བར་བྱེད་པའི་རྒྱུ་ཡིན་ན་རབ་ཏུ་བྱུང་བའི་རྒྱུ་དེ་གཉི་ག་མེད་པར་སྟོན་ཏོ། བདག་གི་དབང་ཡང་རྣམ་པ་གཉིས་ཀྱིས་རབ་ཏུ་བྱུང་བ་ཡིན་ཏེ། ལོངས་སྤྱོད་སྤྱོད་པར་མི་ནུས་པ་དང༌། དཀའ་ཐུབ་ཀྱི་ནགས་སུ་གནས་པར་འོས་པ་སྟེ་གཉིས་སོ། །དེ་གཉི་ག་ཡང་མེད་པར་བསྟན་པའི་ཕྱིར་དང་པོའི་ཕྱེད་ཀྱིས་བསྟན་པ་ཡིན་ཏེ། དར་ལ་བབ་ཅིང་བྱད་གཟུགས་བཟང༌། །ཞེས་བྱ་བ་འདི་གཉིས་ཀྱིས་ནི་ཉེ་བར་ལོངས་སྤྱོད་པར་རིགས་པར་བསྟན་ཏེ། དར་ལ་བབ་པས་ནི་རང་ཉིད་ཀྱིས་ལོངས་སྤྱོད་པར་ནུས་པ་དེས་སོ། །བྱད་གཟུགས་བཟང་ཞེས་བྱ་བས་ནི་བུད་མེད་རྣམས་ཀྱིས་ཀྱང་འདོད་པར་བྱ་བ་དེས་སོ། །གཞོན་ཤ་ཅན་དང་བདེ་བར་གསོས། །ཞེས་བྱ་བ་འདི་གཉིས་ནི་ནགས་སུ་གནས་པ་མི་རིགས་པར་བཤད་དེ། ལུས་གཞོན་ཤ་ཅན་ཡིན་པའི་ཕྱིར་དང༌། བདེ་བ་དང་རྗེས་སུ་མཐུན་པའི་རྐྱེན་ཐོབ་པའི་ཕྱིར་རོ། །དེ་ལྟར་བཞི་པོ་འདིས་བདག་གི་དབང་གིས་རབ་ཏུ་བྱུང་བ་མི་རིགས་པར་སྟོན་ཏོ། །གཞན་གྱི་དབང་གིས་ཀྱང་རབ་ཏུ་འབྱུང་བ་མི་རིགས་པར་སྟོན་ཏོ། །དེ་ནི་རྒྱལ་པོའི་གནང་ཆེན་ཡིན། །ཞེས་པ་སྟེ།
གལ་ཏེ་རྒྱལ་པོས་གཞན་དུ་སྤྱུགས་ན་ནི་རབ་ཏུ་འབྱུང་གི །དེ་ནི་གནང་ཆེན་ཡིན་ཞེས་བྱ་བའི་ཚིག་གིས་དེ་མེད་པར་སྟོན་ཏོ། །དེ་ལྟར་ནགས་གནས་སུ་རིག་ནས་ཁྱིམ་ཡོངས་སུ་གཏོང་བའི་རྒྱུ་མེད་དོ། །དེས་ན་ཁྱིམ་ཡོངས་སུ་གཏང་བའི་རྒྱུ་མེད་པར་བསྟན་བའི་ཕྱིར། ནང་མི་དག་དང་ཞེས་བྱ་བའི་ཚིགས་བཅད་བརྩམས་པ་ཡིན་ཏེ། རྒྱུ་གསུམ་གྱིས་ནི་ཁྱིམ་ཡོངས་སུ་གཏང་བར་བྱ་བ་ཡིན་ཏེ། རྣམ་པ་གསུམ་པོ་ཡང་བསོད་ནམས་ཀྱི་འབྲས་བུས་ཕོངས་པར་བསྟན་པའོ། །དེ་མེད་ན་ཇི་ལྟར་བབ་ཅོལ་དུ་ཁྱིམ་ཡོངས་སུ་གཏད་ཞེས་བྱ་བ་ནི་ཚིགས་བཅད་འདིའི་བསྡུས་པའི་དོན་ཏོ། །ནང་མི་དག་དང་འ་ཁོ་ན་མ་བྱུང༌། །ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པས་ཕོངས་པ་མེད་པར་བསྟན་ཏོ། །རྒས་པས་མི་སྡུག་མ་གྱུར་ཅིང༌། །ཞེས་བྱ་བ་དང༌། ནད་མེད་ཅེས་བྱ་བ་འདི་གཉིས་ཀྱིས་ནི་བདག་ཉིད་ཚུལ་ཁྲིམས་ཀྱི་བསོད་ནམས་ཀྱི་ཚོགས་ཀྱི་འབྲས་བུ་ཡོད་པར་བསྟན་ཏོ། །ཁྱིམ་གྱི་ལོངས་སྤྱོད་སྤྱོད་པ་ཞེས་བྱ་བ་འདིས་ནི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་ཕོངས་པ་མེད་པར་བསྟན་ཏོ། །ཚིག་གཅིག་ཅེས་བྱ་བ་ནི་གསུམ་པོ་དེ་དག་མ་ཚང་བ་མེད་ཀྱང་བབ་ཅོལ་དུ་གཏོང་བར་ནུས་ཞེས་པའོ། །དེ་མཆོག་ཏུ་གསལ་བའི་ཕྱིར། མཛངས་ཤིང་དུལ་བའི་རྒྱན་གྱིས་བརྒྱན། །ཞེས་བྱ་བའི་ཚིགས་བཅད་ཡིན་ཏེ། རང་གི་ཆུང་མ་བོར་བ་མི་རིགས་པ་ལས་བརྩམས་པའོ། །འདི་ལྟ་བུ་ཞེས་བྱ་བ་ནི་འདོད་པའི་དོན་དང་ལྡན་པའོ། །ནང་མི་ནི་རང་གི་ཆུང་མའོ། །མི་བརྟན་ནང་མི་སྙིང་རྗེ་མེད་པ་ནི་མི་བརྟེན་སྙིང་རྗེ་མེད་པས་སོ། །ཇི་ལྟར་འདོད་པ་དང་འགལ་བ་ཡིན་ཞེ་ན། སྨྲས་པ། དུལ་བའི་རྒྱན་གྱིས་བརྒྱན་ཞེས་བྱ་བ་སྨོས་ཏེ། བརྒྱལ་འདོད་པའི་དོན་དུ་རང་གི་ཆུང་མ་ཡོངས་སུ་བཏང་སྟེ། བུད་མེད་གཞན་དག་ལ་ཆགས་ན་དེས་ནི་དེ་ལ་སྙིང་ཉེ་བ་མེད་ན་འདི་ནི་དེ་ལྟ་མ་ཡིན་ཏེ། ཅིའི་ཕྱིར་ཞེ་ན། དུལ་བའི་རྒྱན་གྱིས་བརྒྱན་པའི་ཕྱིར་ཏེ། གང་གི་ཕྱིར་མ་དུལ་བ་ནི་བུད་མེད་གཞན་ལ་ཡང་ཆགས་པར་འགྱུར་ན། དེ་མེད་པས་རང་གི་ཆུང་མ་ཡང་ཡོངས་སུ་གཏོང་བ་འདི་ནི་འདོད་བའི་དོན་དང་འགལ་
བའོ། །མཛངས་ཤིང་ཞེས་བྱ་བ་འདིས་ནི་ནོར་དང་འགལ་བར་བསྟན་ཏེ། གང་གི་ཕྱིར་མཛངས་ན་ནི་རིགས་ལ་སོགས་པའི་ཡོན་ཏན་དང༌། ཡོན་ཏན་མ་ཡིན་པའི་བྱ་བྲག་མཐོང་བ་ཡིན་ཏེ། དེའི་ནུས་པ་དང་ལྡན་པའི་ཕྱིར་རོ། །རིགས་ལ་སོགས་པའི་ཡོན་ཏན་གྱིས་ཁྱད་པར་དུ་འཕགས་པ་དང་ལྡན་བ་གཞན་ནི་མ་མཐོང་ལ། དེ་དག་མ་མཐོང་ཡང་རང་གི་ཆུང་མ་ཡོངས་སུ་གཏོང་བས་ནི་ནོར་དང་འགལ་བར་གྱུར་པའོ། །མཉེས་ཀྱང་གཤིན་ཞེས་བྱ་བ་འདིས་ནི་ཆོས་དེ་ལྟ་བུ་དང་ལྡན་ཡང་རང་གི་ཆུང་མ་ཡོངས་སུ་གཏོང་བ་ཉིད་དེ། དེ་ལྟར་རེ་ཞིག་བདག་ལ་ལྟོས་པ་ནང་མི་ཡོངས་སུ་གཏོང་བར་མི་རིགས་པར་བསྟན་ཏེ། ད་ནི་ནང་མི་ལ་ལྟོས་ནས་ནང་མི་ཡོངས་སུ་གཏོང་བར་མི་རིགས་པར་སྟོན་ཏེ། གཞན་ལ་སྙིང་བརྩེ་བ་ཞེས་པས་སོ། །གཞན་གྱི་སྡུག་བསྔལ་ལ་ལྟོས་པས་ཀྱང་གཞན་ལ་སྙིང་བརྩེ་བའི་ཕྱིར་ནང་མི་ཡོངས་སུ་གཏོང་བར་མི་རིགས་པ་ཉིད་དུ་བསྟན་ཏོ། །མཉེས་ཀྱང་གཤིན་ཞེས་བྱ་བ་བཤད་པས་མཉེས་གཤིན་པས་ནི་མཆོག་ཏུ་ནང་མི་ཡོངས་སུ་གཏང་བར་རིགས་ཏེ། ཅིའི་ཕྱིར་ཞེ་ན། རབ་ཏུ་བྱུང་བའི་ཆོས་དང་མཐུན་པར་འདོད་པས་སོ་ཞེས་གང་དག་ཡོངས་སུ་རྟོག་པ་ལ། དེའི་ལན་བརྩམས་པའི་ཕྱིར། དགེ་སྦྱོང་བྲམ་ཟེ་མཛའ་བོའི་རྟེན། །ཞེས་བྱ་བ་དང༌། རྗེས་སུ་མཐུན་ཞིང་ཆོས་གྲོགས་བྱེད། །ཅེས་བྱ་བའི་ཚིག་གཉིས་ཡིན་ཏེ། དགེ་སྦྱོང་བྲམ་ཟེ་ཞེས་བྱ་བའི་ཚིགས་བཅད་ཀྱི་དོན་ནི་རབ་ཏུ་བྱུང་ནས་ནགས་སུ་གང་རྙེད་པའི་ཆོས་དེ་ནི་ཁྱིམ་དུ་ཡང་རྙེད་པ་དང༌། ཁྱད་པར་གྱི་ཆོས་ཀྱང་རྙེད་པ་ཉིད་དུ་བསྟན་པའི་ཕྱིར་སྨྲས་པའོ། །དགེ་སྦྱོང་དང་བྲམ་ཟེ་ཞེས་བྱ་བའི་ཚིགས་བཅད་ཕྱེད་ཀྱིས་ནི་སྦྱིན་པའི་ཞིང་རྙེད་པར་དཀའ་བ་བསྟན་ཏེ། དགེ་སྦྱོང་བྲམ་ཟེ་ཞེས་བྱ་བ་སྨོས་པས་ནི་ཡོན་ཏན་གྱི་ཞིང་ངོ༌། །མཛའ་བོའི་རྟེན་དང་ནང་མི་ཞེས་སྨོས་པས་ནི་ཕན་འདོགས་པའི་ཞིང་ཉིད་དོ། །ཕོངས་པ་ཞེས་སྨོས་པས་ནི་སྙིང་རྗེའི་ཞིང་ཉིད་དོ། །འདི་ནི་རེ་ཞིག་ནགས་ན་གནས་པ་ལས་ཁྱད་པར་དུ་བྱ་བའི་ཆོས་སོ། །གཙང་སྤྲ་ཚུལ་ཁྲིམས་ནོར་ཞེས་བྱ་བ་འདིས་ནི་ནགས་དང་ཁྱིམ་གཉིས་ཀྱི་ཐུན་མོང་གི་ཐོབ་པའི་ཆོས་བསྟན་ཏོ། །ནགས་ཚལ་དགོན་པར་གང་བཙལ་
བ། ཞེས་བྱ་བ་ནི་གང་ནགས་ཀྱི་ཕྱོགས་སུ་འདོད་ཅིང་བཙལ་བ་དེ་ཅི་ཁྱིམ་འདིར་མི་རྙེད་དམ་ཞེས་པའོ། །དེ་ལྟར་ཡང་ནགས་སུ་འཇུག་པ་ལ་ནི་སྐྱོན་དང་འབྲེལ་པའོ་ཞེས་བསྟན་པའི་ཕྱིར། རྗེས་སུ་མཐུན་ཞིང་ཆོས་གྲོགས་བྱེད། །ཅེས་བྱ་བའི་ཚིགས་བཅད་བརྩམས་སོ། །རྒྱུ་གསུམ་གྱིས་བུད་མེད་ཡོངས་སུ་སྤང་བར་བྱ་བ་ཡིན་ཏེ། རྒྱུ་གསུམ་མ་གཏོགས་པར་རང་གི་ཆུང་མ་ཡོངས་སུ་གཏོང་བ་ལས་ནི་ཆོས་མ་ཡིན་པར་འགྱུར་ཏེ། ཅི་ཆོས་མ་ཡིན་པ་ལ་མི་ལྟ། ཞེས་བྱ་བ་ནི་བསྡུས་པའི་དོན་ཏོ། །ཉེས་པ་བའམ། རྗེས་ས་མི་མཐུན་པའམ། རང་དགར་བྱེད་པའི་གཡོག་འཁོར་ནི་ཡོངས་སུ་སྤངས་ཀྱང་ཆོས་མ་ཡིན་པ་ཐོབ་པར་མི་འགྱུར་རོ། །ཡོན་ཏན་གསུམ་དང་ལྡན་ན་ནི་ཆོས་མ་ཡིན་པ་ཐོབ་པར་འགྱུར་རོ། །ཉེས་པ་མ་བྱས་པ་ནི་གུས་པའི་སྐྱེ་བོ་སྤངས་པ་ཉིད་ཡིན་ཏེ། འཁྲུལ་པའི་སྐྱོན་མེད་པས་སོ། །རྗེས་སུ་མཐུན་ཞེས་བྱ་བ་ནི་ཁྱིམ་ཐབ་ལས་མི་འཕྱོ་བའོ། །ཆོས་གྲོགས་བྱེད་ཅེས་བྱ་བ་ནི་བདེན་པའི་ཆུང་མའོ། །བུད་མེད་སྤངས་པའི་རྒྱུ་གཞན་ཡང་ཡོད་དེ་སྔོན་ལས་ངན་བ་བྱས་པའི་རྒྱུ་དང་ལྡན་པ་ཡིན་ཏེ། དེས་ན་ཡིད་ལ་སྙིང་རྗེ་ཅུང་ཟད་མེད། །ཅེས་བྱ་བའི་ཚིགས་བཅད་བརྩམས་སོ། །དེ་ཡོངས་སུ་བཏང་བ་དང་མཐུན་པ་ཉིད་ནི་བཏང་ཞིང་སྙང་རྗེ་སྤངས་པའི་ཕྱིར་ཏེ། འདིས་ནི་ཆོས་དང་མི་ལྡན་པར་སྟོན་ཏེ། སྙིང་རྗེ་ཅུང་ཟད་མེད་ཅེས་བྱ་བས་སོ། །ཀྱེ་མའོ་ཆོས་ནི་ཅུང་ཟད་འགྲུབ་རེ་སྐན། །ཞེས་བྱ་བ་ནི་སྐྱེ་བོ་སྙིང་ཉེ་བ་སྤངས་པའི་ཕྱིར་རོ། །ཁྱིམ་ཐབ་རབ་ཏུ་བྱུང་བའི་སྨྲེ་སྔགས་འདོན་པ་གང་ཡིན་པ་དེ་ནི་དེས་སྨྲེ་སྔགས་འདོན་པའོ། །བདེ་བ་དང་སྡུག་བསྔལ་མཚུངས་ཞེས་བྱ་བའི་ཚིགས་བཅད་ཀྱི་བདེ་བ་སྤྱོད་པ་ནི་བདེ་བའི་རིམ་པའོ། །སྡུག་བསྔལ་སྤྱོད་པ་ནི་སྡུག་བསྔལ་ཀྱི་རིམ་པའོ། །ཐོས་ནས་ནི་སྐྱེ་བོ་འདི་དག་གང་ཞིག་ནས་ཞེས་བྱ་བ་ནི་གང་ལས་རབ་ཏུ་འབྱུང་ངོ་ཞེས་དེ་ཐོས་པའོ། དེ་ཐོས་ནས་བྱམས་པའི་དབང་གིས་དེར་ལྷགས་ཏེ། ཞེས་བྱ་བ་ནི་ཆོ་ངེས་འདེབས་པར་གྱུར་པའོ། །ངོ་ཚ་ཞིང་མི་དགའ་བར་གྱུར་པ་གང་ཡིན་པ་དེ་ནི་པོ་ཚ་ཞིང་མི་དགའ་བར་གྱུར་པའོ། །ངོ་ཚ་ན་ནི་ཡོན་ཏན་དམ་
པ་སྟེ། དམ་པ་དེ་ཡོད་པ་དང༌། མི་དགའ་བ་ནི་རང་གི་ཁྱིམ་ཡོངས་སུ་སྤང་བར་འདོད་པ་སྟེ། དེ་གཉིས་ཀ་བསྒྲུབ་པའི་ཕྱིར། སྐྱེ་བོ་རྣམས་ཀྱི་ཡོན་ཏན་དུ་ཞེས་བྱ་བ་དང༌། དེ་ལྟར་བདག་ནི་སྐྱོན་ལ་དད་གྱུར་ཅིང༌། །ཞེས་བྱ་བའི་ཚིགས་བཅད་གཉིས་ཀྱིས་བསྟན་ཏོ། །དེ་ལ་སྐྱེ་བོ་རྣམས་ཀྱི་ཡོན་ཏན་དུ་ཞེས་བྱ་བའི་ཚིགས་བཅད་ཀྱིས་ནི་ངོ་ཚ་ཞིང་ཞེས་བྱ་བ་དེ་ཉིད་བསྒྲུབ་པ་ཡིན་ཏེ། བདག་ལྟ་མིར་ཡང་གལ་རུང༌། །ཞེས་བྱ་བའི་ཚིག་གིས་སོ། །དེ་ལྟར་བདག་ནི་སྐྱོན་ལ་དད་གྱུར་ཅིང༌། །ཞེས་བྱ་བའི་ཚིགས་བཅད་ཀྱིས་ནི་མི་དགའ་བར་གྱུར་པ་དེ་ཉིད་བསྒྲུབ་པ་ཡིན་ཏེ། དེ་ལྟར་བདག་ནི་ཞེས་བྱ་བ་ནི་ཁྱིམ་ལ་མངོན་པར་ཕྱོགས་པ་ཉིད་དུ་སྟེ། ཡོན་ཏན་ཁྱད་དུ་གསོད་ལ་ཚུལ་ངན་པས་ཡོན་ཏན་གྱི་བསྔགས་པ་བརྗོད་པ་ལས་འཇུག་པའི་བྱ་བས་ལེགས་པར་མ་བསྐྱེད་པའི་ཕྱིར། བརྩི་བར་འགྱུར་ཞེས་བྱ་བ་ཡིན་ཏེ། སྐྱོན་ལ་དད་པར་གྱུར་ཅིང་ཡོན་ཏན་ལ་ནི་ཁྱད་དུ་གསོད་ལ་ཚུལ་ངན་པར་གྱུར་པ་འདི་གཉིས་ཀྱིས་སོ། །དེ་ལྟར་གྱུར་ན་ཞེས་བྱ་བ་ནི་སྐྱེ་བོ་དགེ་བ་ཡང་བརྩི་བར་གྱུར་ན་གསོན་ཡང་ཅི་ཞིག་རུང་ཞེས་བྱ་བ་འདིས་ནི་མི་དགའ་བ་ཉིད་བསྟན་ཏོ། །དེ་བས་སྐྱེ་བོ་རེ་བར་གྱུར་པ་ཞེས་བྱ་བའི་ཚིགས་བཅད་ནི་ཁྱིམ་ལ་མངོན་པར་ཕྱོགས་པའི་ཉེས་དམིགས་བསྟན་པ་དང༌། དེ་དང་མི་མཐུན་ནགས་ན་གནས་པའི་དབང་དུ་བྱས་པ་སྟེ། རེ་བ་ནི་ཡོན་ཏན་ལ་རེ་བར་གྱུར་པའོ། །དེ་བས་ན་ཞེས་བྱ་བ་ནི་ཁྱིམ་ལ་མངོན་པར་ཕྱོགས་ན་ནི་མིར་མི་རུང་བའི་ཕྱིར་རོ། །སྐྱེ་བོ་དགེ་བས་ཡང་དག་པར་བརྩི་བར་འགྱུར་ཏེ། དེའི་འཚོ་བ་ནི་དགོས་པ་ཅི་ཡང་མེད་པའི་ཕྱིར་རོ། །ཡོན་ཏན་ཉམས་སུ་བླངས་ཏེ་བསྐང༌། །ཞེས་བྱ་བ་ནི་བསྒྲུབ་ཅིང་འབད་པས་རེ་བ་ཡོངས་སུ་བསྐང་བར་བྱ་སྟེ་ཉམས་སུ་བླངས་པས་སོ། །ཕན་ཡོན་གྱི་དབང་དུ་བྱས་ནས། སྤྱོད་པ་ངན་པའི་ཉོན་མོངས་ཁྱིམ་སྤངས་ནས། །དཀའ་ཐུབ་ནགས་ན་དགའ་བའི་ཡོན་ཏན་གྱིས། །ཞེས་བྱ་བ་ཡིན་ནོ། །ནོར་དང་ཐབས་ཞེས་བྱ་བ་འདིས་ནི་གཞུང་ལུགས་བསྟན་ཏེ། ནོར་གྱི་བསྡུ་བའམ་དབྱེ་བ་གཉིས་ཀྱིས་སོ། །མཐུ་རྩལ་གང་དག་གིས་ཞེས་བྱ་བ་ནི་བཀའ་ཁྲིམས་ཀྱི་ཚུལ་གྱིས་སོ། །རེ་ཞིག་ཚིགས་བཅད་དེས་ནི་རྒྱལ་
པོ་གཞན་ལས་སྐྱེ་བའི་སྡུག་བསྔལ་གྱི་དབང་དུ་བྱས་པའོ། །ད་ནི་རང་གི་ཡུལ་འཁོར་གྱི་དབང་དུ་བྱས་ནས། གལ་ཏེ་ནོར་འདོད་ཅེས་བྱ་བའི་ཚིགས་བཅད་ཡིན་ཏེ། ནོར་མ་ཚང་བའམ། གནོད་པ་ཐོབ་པས་རང་གི་ཡུལ་ལས་པས་མཐར་འགྲོ་ཞེས་བྱ་བ་དེའི་དབང་དུ་བྱས་ནས། ཅི་ཞིག་འདོད་ཕྱིར་ཞེས་བྱ་བ་ཡིན་ཏེ་རྒྱུ་གཞན་གང་གིས་སོ། །གལ་ཏེ་ནོར་འདོད་ཅེས་བྱ་བ་དེས་ནི་སྡུག་བསྔལ་ལམ་གནོད་པ་སྟེ། སྔར་བསྟན་པའི་སྡུག་བསྔལ་གང་གིས་ཁྱོད་ནི་བས་མཐར་འགྲོ་ཞེས་བྱ་བ་དེ་གསལ་བ་ཡིན་ནོ། །སྐྱེ་བོའི་ཚིག་བསྲུངས་པ་ཙམ་གྱིས་ཞེས་བྱ་བ་ནི་གང་དེ་འཇིག་རྟེན་གྱི་ཚིག་ནི་འཇིག་རྟེན་གྱི་གཏམ་ལ་ཞེན་པའོ། །དེ་ལས་ཞེས་བྱ་བ་ནི་དགེ་བའི་ཆོས་ལས་ཉམས་པར་མི་བགྱི་བ་སྟེ། ཆོས་ཞེས་བྱ་བ་ནི་བདག་ལ་ཕན་པར་འདོད་པ་སྟེ། དེ་ལྟར་བདག་ཉིད་ཀྱི་ཆོས་ལ་ལྟོས་པར་བསྟན་པའོ། །ངོ་ཚའི་ཕྱིར་ཡང་ཞེས་བྱ་བ་ནི་བལྟས་པས་ཀྱང་སྟེ། ངོ་ཚའི་ཕྱིར་ཡང་རབ་ཏུ་འབད་པའི་རིགས། །ཞེས་བྱ་བ་ཡིན་ཏེ། ངོ་ཚའི་ཕྱིར་ཡང་ཆོས་དང་ལྡན་པ་ལ་འབད་པར་བྱ་བའོ། །དེའི་ཕན་ཡོན་བསྟན་པའི་ཕྱིར། ཡོན་ཏན་ཡོད་ཅེས་གྲགས་ཤིང་རེ་བ་དག །ཅེས་བྱ་བའི་ཚིགས་བཅད་ཡིན་ཏེ། ཡོན་ཏན་འབྱུང་བ་ཡིན་པས་ཡོན་ཏན་ཡོད་ཅེས་པའོ། །ཇི་ལྟར་གྱུར་ཀྱང་རུང་སྟེ་ཞེས་བྱ་བ་ནི་ངོ་ཚ་བའི་ཕྱིར་ཡང་གཏམ་སྙན་འཕེལ་བར་འགྱུར་ཏེ། ཅིའི་ཕྱིར་ཞེ་ན། གྲགས་པ་རབ་ཏུ་འགྲུབ་པས་ངོ་ཚའི་ཕྱིར་ཡང་དེ་རབ་ཏུ་འབད་པའི་རིགས་ཏེ། འདི་ལྟར་གྲགས་པས་རབ་ཏུ་འགྱུར་བས་སོ། །གཞན་དུ་བགྱིས་ན་ཞེས་བྱ་བ་ནི་བདག་ཉིད་ཀྱི་ཕུན་སུམ་ཚོགས་པའི་ཡོན་ཏན་ཐམས་ཅད་མེད་བར་བྱས་པ་སྟེ། རེ་བའི་ཚུལ་གྱིས་ལྟ་བ་ན་ཆུ་མིག་སྐམ་པོའི་གནས་དང་འདྲ་བར་འགྱུར་ཏེ། དེ་ལྟར་ཆུ་མིག་སྐམ་པོ་ལ་སྐོམ་ཞིང་ཆུ་འདོད་པ་རྣམས་ཀྱིས་ཆུ་དོན་དུ་གཉེར་ཞིང་རེ་བ་དང་བཅས་པ་ལས་སྐམས་པར་གྱུར་ན་དེ་དག་གི་རེ་བ་ཉམས་པར་འགྱུར་ཏེ། དེ་བཞིན་དུ་འདིར་ཡང་ཡོན་ཏན་ཡོད་པར་རེ་བ་དང་བཅས་པ་རྣམས་ཏེ། ཡོན་ཏན་ལ་སྐོམ་པའི་སྐྱེ་བོ་དགའ་བ་རྣམས་ཀྱིས་རེ་བ་དང་བཅས་པ་ལས་མ་མཐོང་ན་ནི་འཇིག་པ་ཡིན་ཏེ། ཡོན་ཏན་གཉེར་བ་རྣམས་ཀྱིས་ཁྲོན་པ་སྐམ་པོ་བཞིན་དུ་མཐོང་བར་
འགྱུར་རོ། །གཞན་དུ་བགྱིས་ན་ཞེས་བྱ་བས་ཡོན་ཏན་ཡེད་ཅེས་གྲགས་ཤིང་རེ་བ་དག་ལས་མཐོང་ན་མི་མཛེས་པར་འགྱུར་རོ། །ཇི་ལྟར་མི་མཛེས་པར་འགྱུར་ཞེ་ན། དེ་ཉིད་བསྒྲུབ་པའི་ཕྱིར་དོན་བཞིན་མ་ཡིན་ཞེས་བྱ་བའི་ཚིགས་བཅད་སྨོས་སོ། །དོན་བཞིན་མ་ཡིན་ཡོན་ཏན་གྲགས་པ་འཕེལ། །ཞེས་བྱ་བ་ནི་ཡོན་ཏན་གྱི་གནས་སྐབས་མ་ཡིན་པའི་ཡོན་ཏན་གྱི་འཕེལ་བ་སྟེ། གང་གི་རྣམས་ཀྱི་གྲགས་པ་མདུན་ན་བརྗོད་པ་མ་ཡིན་ཏེ། དོན་བཞིན་མ་ཡིན་པ་ཡུན་རིང་དུ་འཕེལ་བའོ། །རྣམ་པར་རྟོག་པའི་རླུང་གིས་བསྐྱོད་པ་ནི་རྟོག་པའི་རླུང་གིས་ཉམས་པར་བྱས་པའོ། །མི་རྣམས་ཀྱི་གྲགས་པ་དེ་ཉམས་པར་གྱུར་ན་ནི་དེ་ཕྱིས་ཡང་གྲགས་པར་འགྱུར་བ་ཞེས་བྱ་བ་ནི་འཕེལ་བར་འགྱུར་བའོ། །སྦྲུལ་ནག་ཅེས་བྱ་བ་འདི་ནི་མཇུག་བསྡུ་བའི་ཚིགས་བཅད་ཡིན་ཏེ། ལྷ་གཅིག་བདག་ནི་བཟློག་པར་མི་རིགས་སོ། །ཞེས་བྱ་བ་ནི་བཟློག་པ་རིགས་པ་ཡང་ཡིན་མོད་ཀྱི་འོན་ཀྱང་བདག་ནི་བཟློག་པར་མ་མཛད་ཅིག་ཅེས་པ་སྟེ། ངེས་པར་གཟུང་བ་མ་ཡིན་བ་དང་ངེས་པར་གཟུང་བའི་རྒྱུ་སྟེ། གུས་པར་མཁྱེན་ནས་ཞེས་བྱ་བའི་ཚིགས་བཅད་སྨོས་ཏེ། གུས་པར་མཁྱེན་ནས་ཞེས་བྱ་བ་ཚིགས་བཅད་ཕྱད་ཀྱིས་ནི་ངེས་པར་གཟུང་བ་མ་ཡིན་པའི་རྒྱུ་བསྟན་ཏེ། །ངེས་པར་གཟུང་བ་ནི། བདག་ནི་སེམས་ཀྱིས་རབ་ཏུ་བྱུང༌། །ཞེས་བྱ་བ་ཕྱེད་འོག་མས་བསྟན་ཏོ། །བྱམས་པ་ཡིས་ཞེས་བྱ་བ་ནི་རྗེ་བོའི་ཡོན་ཏན་ནོ། །གུས་པར་མཁྱེན་ནས་ཞེས་བྱ་བ་ནི་འབངས་ཀྱང་ཡོན་ཏན་གུས་པ་དང་ལྡན་པར་ཁྱོད་ཀྱིས་དེ་མི་ཤེས་པ་ཡང་མ་ཡིན་ཏེ། ཁྱོད་ཀྱིས་འབངས་ཀྱི་སྐྱེ་བོ་ལ་དེ་ལྟར་བགྱི་བ་རིགས་ཏེ། དེ་བས་ན་ཁྱོད་ཀྱིས་བཟློག་པའི་རིགས་སོ། །བདག་ནི་རེ་ཞིག་བཟློག་པར་བྱ་བ་མ་ཡིན་ཏེ། ཅིའི་ཕྱིར་ཞེ་ན། སེམས་ཀྱིས་རབ་བྱུང་ཟིན་པའི་ཕྱིར་རོ། །དེས་ན་རབ་ཏུ་བྱུང་བ་ནི་འདུ་འཛིའི་ཉོན་མོངས་ཅན་འཛིན་པ་མི་རིགས་པའི་ཕྱིར་རོ། དེ་ནས་དེ་ཡི་མཛའ་བོ་དང༌། ཞེས་བྱ་བ་ལ་སོགས་པའི་ཚིག་གིས་ནི་མཛའ་བོ་ལ་སོགས་པ་དམན་པ་དང༌། བར་མ་དང༌། གོང་མ་དག་གིས་བཟློག་པའི་ལུས་དང་ངག་གི་ལས་ཀྱི་བྱ་བ་རྣམས་བསྟན་ཏོ། །དེ་ལ་རྐང་པ་ལ་འཇུས་ཏེ་ཞེས་བྱ་བས་ནི་དམན་པ་རྣམས་ཀྱི་ལུས་ཀྱི་ལས་ཀྱི་བྱ་བ་བསྟན་ཏོ། །ཁ་ཅིག་ཐལ་མོ་སྦྱར་ཏེ་ཞེས་བྱ་བས་
ནི་རབ་དང་མཉམ་པ་བར་མའི་བསྟན་ཏོ། །མགུལ་ནས་འཇུས་ཏེ་ཞེས་བྱ་བས་ནི་གོང་མ་རྣམས་ཀྱི་དབང་དུ་བྱས་པའོ། །འདི་གསུམ་ནི་ལུས་ཀྱི་ལས་ལས་བརྩམས་པའོ། །བཟློག་པར་རྩོམ་པ་བཤད་པའོ། །ཁ་ཅིག་ནི་སྤོབས་པའི་ཚུལ་གྱིས་ཞེས་བྱ་བ་ལ་སོགས་པའི་ངག་གི་ལས་ལས་བརྩམས་ཏེ་བཟློག་པའི་དབང་དུ་བྱས་པ་སྟེ། ཁ་ཅིག་ནི་སྤོབས་པའི་ཚུལ་གྱིས་ཞེས་བྱ་བ་ནི་བར་མའི་དབང་དུ་བྱས་པའོ། །ཁ་ཅིག་ནི་མཛའ་བོ་དང་ནང་མི་ཞེས་བྱ་བ་ནི་དམན་པའི་དབང་དུ་བྱས་པའོ། །ལ་ལ་ནི་ཁྱིམ་ན་གནས་པའི་ཚུལ་གྱིས་ཞེས་བྱ་བ་ལ་སོགས་པས་ནི་གོང་མའི་དབང་དུ་བྱས་པའོ། །མཛའ་བོར་འཐམས་པར་ཞེས་བྱ་བལ་སོགས་པའི་ཚིགས་བཅད་གཉིས་ཀྱིས་ནི་བྱང་ཆུབ་སེམས་དཔའ་ལ་ཕན་པར་འདོད་པ་དེས་ནགས་སུ་འགྲོ་བ་མི་རིགས་སོ་ཞེས་འགོག་པའི་དབང་དུ་བྱས་པའོ། །མཛའ་བོར་འཐམས་པ་ཞེས་བྱ་བའི་ཚིགས་བཅད་འདིའི་དོན་ནི་མཛའ་བོ་བག་མེད་པ་ལས་མཛའ་བོ་རྣམས་ཀྱིས་ཕན་པའི་ཚིག་སྨྲས་པ་སྟེ། ཡུན་རིང་པོར་འཇུག་པའི་ཕྱིར་རོ། །ཕན་པའི་ལམ་འདི་ལ་ནི་ལེགས་པ་དང་ཕན་པ་གཉིས་ལྷན་ཅིག་མི་འཐོབ་སྟེ། རྩུབ་པ་ཡིན་ན་ཡང་ཕན་པར་འགྱུར་བ་སྦྱར་བའི་རིགས་ཏེ། དེ་ལ་མ་སྦྱར་བར་གྱུར་ན་མི་དགེ་བར་འགྱུར་ཏེ། དགེ་བ་དང་མི་དགེ་བ་རྣམས་ལས་དགེ་བའི་ཆོས་མི་སྒོམ་ཞིང༌། མི་དགེ་བའི་ཆོས་ལ་འཇུག་པར་འགྱུར་ཏེ། མི་ཕན་པར་སྒྲུབ་པའི་ཕྱིར་རོ། །ནགས་པས་ཁྱིམ་དགའ་ཞེས་བྱ་བའི་ཚིགས་བཅད་འདིའི་དོན་ནི་ནགས་ན་གནས་པ་ལས་བདག་ལ་ཟློག་པར་བྱེད་དེ། ཇི་ལྟར་ལྡོག་པར་བྱེད་ཅེ་ན། སྡིག་པས་གོས་པ་བཞིན་དུ་སྟེ། དོགས་ཤིང་འཇིགས་པ་མེད་པར་རོ། །ཇི་ལྟར་སྡིག་པས་གོས་པ་ནི་དོགས་ཤིང་འཇིགས་པ་མེད་པར་རྩུབ་པ་ཡིན་ན་ཡང་ཟློག་ཅིང་འགོག་པར་བྱེད་པ་དེ་བཞིན་དུ་འདི་དག་སེམས་ཞེས་བྱ་བ་ཡིན་ཏེ་མཛའ་བོ་ལ་སོགས་པ་རྣམས་སོ། །ཐ་མལ་གནས་པའི་སེམས་ཞེས་བྱ་བ་ནི་ནད་མེད་པ་སྟེ། ནགས་པས་ཁྱིམ་དགའ་སྙམ་དུ་ཇི་ལྟར་སེམས་པའོ། །ཇི་ལྟར་སེམས་པ་དེ་ཉིད་སྒྲུབ་པའི་ཕྱིར་སྨྲས་པ། ནགས་ན་གནས་པ་དོགས་ཤིང་ཞེས་བྱ་བ་དང༌།
སྡིག་པས་གོས་བཞིན་དུ་ཞེས་བྱ་བ་གཉིས་ཀྱིས་བསྟན་ཏོ། །ད་ནི་བྱང་ཆུབ་སེམས་དཔའ་ལ་ཕན་པར་འདོད་པའི་དབང་དུ་བྱས་ནས་དུ་བ་ལ་ནགས་ཚལ་གནས་པ་ལ་ཞེས་བྱ་བ་ནི་ཆོས་བསྒྲུབ་པར་འདོད་པའོ། །གསོན་བཞིན་དུ་ཞེས་བྱ་བ་ནི་ཤི་བ་ཡང་མ་ཡིན། ཤི་བར་འགྱུར་བ་ཡང་མ་ཡིན་པའི་དོན་ཏོ། །ད་ནི་བདག་ཉིད་དང་བྲལ་བའི་མྱ་ངན་གྱི་རྒྱུ་ལ་ཡང༌། ང་དང་བྲལ་བས་དེ་ལྟར་མི་དགའ་ན། །ཞེས་བྱ་བའི་ཚིགས་བཅད་ཡིན་ཏེ། རབ་ཏུ་མི་འབྱུང་བའི་རྒྱུ་ནི་ཁྱིམ་ཡོངས་སུ་གཏང་བར་དཀའ་བའི་ཕྱིར་ང་དང་མི་འབྲལ་ན་ནི་ཞེས་བྱ་བའི་དབང་དུ་བྱས་ནས་ཚིགས་བཅད་ཀྱི་ཕྱེད་འོག་མས་བསྟན་ཏོ། །ནང་མི་ཡོངས་སུ་གཏོང་བ་ཤིན་ཏུ་དཀའ་བ་ཡིན་ཡང་རབ་ཏུ་མི་འབྱུང་བ་ནི་མི་རིགས་སོ། །ཞེས་བསྟན་པའི་ཕྱིར། དེ་སྟེ་བདག་གི་མི་ལ་ཆགས་པའི་ཕྱིར། །ཞེས་བྱ་བའི་ཚིགས་བཅད་སྨོས་སོ། །དེ་ལྟར་ཅིས་མི་བྱེད་ཅེས་བྱ་བ་ནི་ཇི་ལྟར་ངའི་རྗེས་སུ་རབ་ཏུ་འབྱུང་བའི་རང་མི་ལ་ཆགས་པས་བགེགས་སུ་བྱེད་པ་ཡིན་ན་དེ་ལྟར་དགྲ་དང་དམག་འགྱེད་ཅིང་འཇུག་པ་ན་ཡང་རང་མེའི་སྐྱེ་བོ་མང་པོ་ལ་ཆགས་པས་བགེགས་ཅིའི་ཕྱིར་མི་བྱེད་ཅེས་པའོ། །ཕོངས་པར་གྱུར་པའི་ཚེ་ན་མཐོང་བར་གྱུར་པའི་མཛའ་བོའི་རང་བཞིན་གང་ཡིན་པ་དེ་ནི་ཕོངས་པར་གྱུར་པའི་ཚེ་མཐོང་བའོ། །མཛའ་བོའི་རང་བཞིན་ནི་ཕོངས་པའི་ཚེ་རྗེས་སུ་འབྲང་བ་དང་དུ་བའོ། །དེ་ལ་ཕོངས་པའི་ཚེ་མཐོང་བ་ནི་སྔར་དུས་གཞན་གྱི་ཚེ་ན་ཡིན་ཏེ། སྔར་མཐོང་བའི་ཕྱིར་ཕོངས་པའི་རྗེས་སུ་འབྲང་བའོ། །མཛའ་བོ་བརྟེན་པར་གྱུར་ཀྱང་ཞེས་བྱ་བ་ནི་ཡུན་རིང་པོ་ནས་འདྲིས་པར་གྱུར་ཀྱང་ངོ༌། །གཡོ་ཉིད་གཡོ་ཡིན་པས་གཡོ་ཕྱི་བཞིན་མི་འབྲང་བ་ཞེས་བྱ་བ་ནི་རྗེས་སུ་འགྲོ་བ་མེད་པ་སྟེ། མཆི་མས་འཇུ་ཞིང་འོང་བ་ཉི་ཚེར་ཟད་པའོ། །མཛའ་བོའི་རང་བཞིན་ནི་དུ་བ་དང་ཕོངས་པ་རྗེས་སུ་འབྲང་བ་ཡིན་ཏེ། དེ་ལ་དེ་གཉིས་ལས་ཕོངས་པའི་རྗེས་སུ་འབྲང་བ་མེད་དོ། །རབ་ཏུ་འབྱུང་བའི་མཚན་ཉིད་ནི་རབ་དུ་བྱུང་བ་དེ་ཕོངས་པ་ཉིད་ཡིན་ཏེ། དུ་བར་འོས་པའི་ཕྱིར་རོ། །གལ་ཏེ་ཕོངས་པ་མ་ཡིན་ན་ནི་རབ་དུ་བྱུང་བ་ལ་མི་དུ་བ་ཡིན་ཏེ། དེས་ན་དེ་ཕོངས་པ་ཡིན་པས་ཕོངས་པ་དེའི་རྗེས་སུ་འབྲང་བར་བྱ་སྟེ་རྗེས་སུ་རབ་དུ་
འབྱུང་བར་བྱའོ། །ཇི་ལྟར་མཛའ་བོ་མྱ་ངན་གྱིས་གདུངས་ཤིང་དུ་བ་ལ། མཛའ་བོས་མྱ་ངན་བྱ་བ་དང་དུ་བ་ཡིན་ཏེ། དེ་བཞིན་དུ་འདིར་ཡང་འཇིགས་པ་མེད་པར་བྱ་བ་ཡིན་ཏེ། རྒྱུ་གཅིག་ལས་ནི་མཛའ་བོའི་རང་བཞིན་གཡོ་ཉིད་དུ་འགྲོ་བ་སྟེ། ཇི་ལྟར་ཤེས་ཤེ་ན། རྗེས་སུ་འགྲོ་བ་ནི་མེད་དེ། མཆི་མས་འཇུ་བ་ཉི་ཚེའོ། །དེ་ཉིད་བསྟན་པའི་ཕྱིར། སླར་དུ་བཟློག་པའི་ཕྱིར་ནི་སྐད་འཛེར་ཞིང༌། །ཞེས་བྱ་བའི་ཚིགས་བཅད་སྨོས་སོ། །ཇི་ལྟར་སྐད་འཛེར་བ་དང་བཅས་པ་དང༌། མཆི་མ་དང་བཅས་པའི་མིག་དང༌། མགོ་བོ་བཏུད་དེ་མཚུངས་པ་ལ་ཡང་བླ་མ་འདྲ་བ་ཕྱག་འཚལ་ཞིང་ཞེས་བྱ་བ་ཡིན་ཏེ། ཅིའི་ཕྱིར་བྱེད་ཅེ་ན། བཟློག་པ་དེའི་ཕྱིར་ཏེ། དེ་ལྟར་དེ་དག་ཐམས་ཅད་ནི་བཟློག་པའི་ཕྱིར་བྱེད་པ་ཡིན་གྱི། རྗེས་སུ་འགྲོ་བའི་ཕྱིར་ནི་མ་ཡིན་ནོ། །གལ་ཏེ་རྗེས་སུ་འགྲོ་བ་ཡིན་ན་ནི་ཅིའི་ཕྱིར་དེ་དག་ཉི་ཚེ་བྱེད་པ་ཡིན་ཏེ། རྗེས་སུ་འགྲོ་བར་མི་བྱེད་པའོ། །གང་གི་ཕྱིར་རྗེས་སུ་འགྲོ་བར་མི་བྱེད་ཀྱི། བཟློག་པའི་ཕྱིར་བྱེད་པ་ཡིན་པས། དེ་བས་ན་མཛའ་བོའི་རང་བཞིན་ཏེ། གཡོ་དང་ཐབས་སུ་འགྱུར་བའོ། །དེ་ལྟར་རེ་ཞིག་ཚིགས་བཅད་འདིས་ནི་གང་སྔར་བཤད་པའི་མཆི་མས་འཇུ་ཞིང་དུ་བ་ཞེས་བྱ་བ་དེ་ཉིད་བསྒྲུབ་པ་ཡིན་ནོ། །ཕྱི་བཞིན་མི་འབྲང་བ་དེ་བསན་པར་བྱ་བའི་ཕྱིར། རབ་ཏུ་བྱུང་བའི་རྗེས་སུ་ཞེས་བྱ་བའི་ཚིགས་བཅད་ཡིན་ཏེ། འདི་དག་ཅེས་བྱ་བ་ནི་མཆི་མས་འཇུ་བའོ། །ཇི་ལྟར་བྱམས་པས་མཆི་མ་འབྱུང་བར་བྱེད་པ་དེ་བཞིན་དུ་རབ་ཏུ་འབྱུང་བ་ལ་ཡང་བྱ་བའི་རིགས་སོ། །ཅིའི་ཕྱིར་དེ་ལྟར་བྱ་བའི་རིགས་ཤེ་ན། སྨྲས་པ། ངོ་མཚར་བར་འགྱུར་པ་འདི་བཞིན་དུ་མི་འགྱུར་རམ་ཞེས་པ་སྟེ། དམ་པའི་སེམས་ལ་སྤྱོད་པ་དེའོ། །ནགས་སུ་བདག་ཉིད་གཅིག་པུ་འགྲོ་ཡང་གྲོགས་ཤིན་ཏུ་རྙེད་པར་དཀའ་ལ། གཞན་དག་གིས་ནི་རྙེད་པར་སླའོ་ཞེས་བྱ་བ་དེའི་དབང་དུ་བྱས་ནས། ཡོན་ཏན་མེད་པ་ཞེས་བྱ་བ་དེའི་ཚིགས་བཅད་སྨོས་སོ། །ཕོངས་པར་གྱུར་པའི་ཚེ་ཞེས་བྱ་བ་ནི་བསད་པ་དང༌། བཅིང་བ་དང་བརྡེག་པའི་ཕོངས་པར་གྱུར་པའོ། །ཡོན་ཏན་ཡོད་བཞིན་ཞེས་བྱ་བ་ཕོངས་པ་ཉིད་བསྟན་པའི་ཕྱིར། ཡོན་ཏན་ཡོད་བཞིན་དུ་ཞེས་བྱ་བ་ཡིན་ཏེ། ནགས་སུ་འགྲོ་
ཞིང་རབ་ཏུ་བྱུང་བ་དེ་ནི་ཕོངས་པ་བཞིན་དུ་ཕོངས་པར་གྱུར་པ་ཡིན་ནོ། །ཐམས་ཅད་དུ་གྲོགས་ཡོད་ཀྱང་དེ་དག་ཉིད་ནགས་སུ་འགྲོ་ཞིང་རྗེས་སུ་འགྲོ་བ་མེད་པ་ཉིད་ཀྱི་དབང་དུ་བྱས་ནས། གླང་ཆེན་སྨྱོན་པ་ཞེས་བྱ་བའི་ཚིགས་བཅད་ཡིན་ཏེ། གང་ལ་རྗེས་སུ་མི་འགྲོ་བ་དང༌། གང་གི་ཕྱིར་རྗེས་སུ་མི་འགྲོ་བ་ཞེས་བྱ་བའི་དོན་ཏོ། །དེ་དག་མིན་ནམ་ང་ཡང་དེ་མ་ཡིན། །ཞེས་བྱ་བ་ནི་ཐེ་ཚོམ་གྱི་ཚིག་གོ །དེ་ལྟ་མོད་ཀྱི་བདག་གི་བྱམས་པ་མེད་པར་འགྱུར་བའི་རྒྱུ་ཅུང་ཟད་ཅིག་བྱས་ན་ནི། དེ་ལས་རྗེས་སུ་མི་འབྲང་བ་ཡིན་ཏེ། དེ་མེད་པར་བསྟན་པའི་ཕྱིར། དེ་ལྟར་བྱམས་པ་ཉམས་པར་འགྱུར་བའི་རྒྱུ། །ཞེས་བྱ་བའི་ཚིགས་བཅད་སྨོས་སོ། །འདི་ལྟར་འཁོད་བཞིན་དུ་ཞེས་བྱ་བ་ནི་རྒྱབ་ཀྱིས་བལྟས་པར་གནས་པའོ། །འདི་ལྟར་གྱུར་པ་ཞེས་བྱ་བ་ནི་གླང་ཆེན་སྨྱོན་པ་ཞེས་བྱ་བའི་ཚིགས་བཅད་སྔར་བསྟན་པ་དེ་ཉིད་བདག་གི་ཡོན་ཏན་གང་གིས་སྔོན་དུ་འགྲོ་བར་བསྟོད་པ་དག་རུང་བར་འོང་ངམ་ཀྱེ་ཞེས་བྱའོ། །བདག་ནི་ནགས་སུ་འགྲོ་ཕྱིར་ཞེས་བྱ་བ་ནི་བདག་ཉིད་ཀྱི་ཉེས་པ་སྟོན་པ་ཡིན་ནོ། །ཅིའི་ཕྱིར་དེ་ལྟར་རྟོག་ཅེ་ན་དེའི་རྒྱུ་བསྟན་པའི་ཕྱིར། གང་དག་ཁྱིམ་གྱི་ཉེས་པ་ཞེས་བྱ་བའི་ཚིགས་བཅད་སྨོས་སོ། །དེ་གང་ཡིན་ཞེ་ན། ཁྱིམ་གྱི་ཉེས་པ་གསལ་བར་མངོན་པ་དང༌། དཀའ་ཐུབ་ཀྱི་ནགས་ཀྱི་ཡོན་ཏན་གསལ་བར་མངོན་པའོ། །དེ་གསལ་བར་བསྟན་པའི་ཕྱིར། ཕྱི་མའི་ཚེ་དང་ཚེ་འདིའི་སྡུག་བསྔལ་རྒྱུ། །ཞེས་བྱ་བ་སྨོས་སོ། །ཕྱི་མའི་སྡུག་བསྔལ་གྱི་རྒྱུ་ནི་འདོད་པ་དེའི་ཆེད་དུ་ཉེས་པར་སྤྱོད་པ་དེ་ཉེས་པར་སྤྱད་པ་དེའི་རྒྱུ་ངན་འགྲོར་འགྲོ་བའི་ཕྱིར་རོ། །ཚེ་འདིའི་སྡུག་བསྔལ་གྱི་རྒྱུ་ནི། གསད་པ་དང༌། བཅིང་བ་དང༌། བརྡེག་པ་ལ་སོགས་པ་སྡུག་བསྔལ་དུ་མའི་རྒྱུར་གྱུར་པའི་ཕྱིར་རོ། །དཀའ་ཐུབ་ཀྱི་ནགས་ནི་དེ་ལྟར་བཟློག་པ་སྟེ། འཇིག་རྟེན་འདི་དང་ཕ་རོལ་གྱི་བདེ་བའི་རྒྱུར་གྱུར་པའི་ཕྱིར་རོ། །འཇིག་རྟེན་འདིར་བདེ་བའི་རྒྱུ་ནི་འདོད་པ་རྣམས་ལ་ཆེད་ཆེར་མི་འཛིན་པ་སྟེ། རང་གི་དོན་མཐོང་བའི་ཕྱིར་རོ། །འཇིག་རྟེན་ཕ་རོལ་དུ་ནི་བདེ་འགྲོ་དང་མྱ་ངན་ལས་འདས་པ་ཐོབ་པའི་ཕྱིར་རོ། །རང་གི་རྒྱུ་འདོད་པ་སྤོང་བར་མི་འདོད་པ་དེ་ནི་སྡུག་བསྔལ་གྱི་རྒྱུ་ཡིན་ནོ། །དཀའ་ཐུབ་ཀྱི་ནགས་ན་ནི་དེ་རྣམས་ཀྱིས་བཟློག་པ་ཡིན་ཏེ། འདི་དག་སྤོང་བ་ཡིན་ནོ། །དེའི་
རྒྱུ་ཉེས་པ་དག་ལ་བདག་ཉིད་ཀྱི་བསྒྲུབ་པ་བསྟན་པའི་ཕྱིར། བདག་གི་མཛའ་བོ་འདི་རྣམས་ཞེས་བྱ་བའི་ཚིགས་བཅད་སྨྲོས་སོ། །བསླུས་ཞེས་བྱ་བ་ནི་ཕྱིན་ཅི་ལོག་ལ་ཞེན་པའོ། །ཞི་བར་མ་གྱུར་པ་ནི་མྱ་ངན་ལས་འདས་པར་མ་གྱུར་པའོ། །ཉེས་པ་དེ་དག་ཅེས་བྱ་བ་ནི་ཁམས་གསུམ་གྱི་ཉོན་མོངས་པ་ཐམས་ཅད་དོ། །མངོན་དུ་གཞོམ་པར་བྱ་ཞེས་བྱ་བ་ནི་བག་ཆགས་དང་བཅས་པ་གཞོམ་པར་བྱའོ་ཞེས་པའོ། །དེ་ལྟར་གྱུར་པ་ནི་དམ་པ་རྣམས་སུ་དེ་དགེ་སློང་དང་དགེ་བསྙེན་རྣམས་སུ་གྱུར་པས་སོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཚོང་དཔོན་གྱི་སྐྱེས་པའི་རབས་སོ།། །།སྡོམ་ལ། བརྒྱ་བྱིན་བྲམ་ཟེ་མྱོས་བྱེད་མ། །ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཕྱུག་པོའི་བུ། །དཀའ་ཐུབ་ཅན་དང་ཚོང་དཔོན་ནོ། །ཞེས་པ་ལ། འདིར་ཡང་སྐྱེས་པའི་རབས་བཅུ་པོ་འདི་དག་གི་གོ་རིམས་བདག་གིས་འདི་ལྟར་མཐོང་སྟེ། བརྒྱ་བྱིན་བྲམ་ཟེ་མྱོས་བྱེད་མ། །ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཚོང་དཔོན་དང༌། །ཕྱུག་པོའི་བུ་དང་དཀའ་ཐུབ་ཆེན། །སྐྱེས་པའི་རབས་བཅུ་པོ་འདི་དག་གིས་བསྡུས་པའི་དོན་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་དབང་དུ་བྱས་པའོ། །ཚུལ་ཁྲིམས་ཀྱང་རྣམ་པ་གཉིས་ཏེ། ཁྱིམ་པའི་ཕྱོགས་ལ་བརྟེན་པ་དང༌། རབ་ཏུ་བྱུང་བའི་ཕྱོགས་ལ་བརྟེན་པ་དང༌། དེ་ལ་ཁྱིམ་པའི་ཕྱོགས་ལ་བརྟེན་པའི་ཚུལ་ཁྲིམས་ཀྱི་དབང་དུ་བྱས་པ་ནི་བདུན་ནོ། །རབ་ཏུ་བྱུང་བའི་ཕྱོགས་ལ་བརྟེན་པ་ནི་གསུམ་མོ། །དེ་ལ་ཁྱིམ་པའི་ཕྱོགས་ལ་བརྟེན་པའི་ཚུལ་ཁྲིམས་ནི། སྲོག་གཅོད་པ་དང༌། མ་བྱིན་པ་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། འབྲུའི་ཆང་དང༌། བཅོས་པའི་ཆང་མྱོས་པར་འགྱུར་བ་འཐུང་བ་ལས་ལྡོག་པ་སྟེ། འདི་དག་ནི་བསླབ་པའི་གཞི་ལྔའོ། །དེ་ལ་བརྒྱ་བྱིན་གྱི་སྐྱེས་པའི་རབས་སུ་ནི་སྲོག་གཅོད་པ་ལས་ལྡོག་པའི་དབང་དུ་བྱས་ནས། ལྷའི་དབང་པོ་དེ་རང་གི་སྲོག་ལ་མི་ལྟ་བས་དུད་འགྲོའི་སྐྱེ་གནས་སུ་གྱུར་པའི་སྲོག་གཅོད་པར་འཇུག་པ་ལས་ལྡོག་པ་སྟེ། དེ་ནི་སྲོག་གཅོད་པ་སྤངས་པ་ཡིན་ནོ། །བྲམ་ཟེའི་སྐྱེས་པའི་རབས་སུ་རང་གི་བླ་མ་ལ་སོགས་པས་སྦྱོར་བ་
བྱས་ཤིང་ཐོས་པའི་རྗེས་སུ་དཔག་པས་ཡང་དག་པར་བསྟན་ཀྱང་སྐྱེ་བོས་གཞན་དག་ལས་ཉེ་བར་རྟོག་པ་དང༌། བདག་གི་དབང་དུ་བྱས་ནས། ངོ་ཚབ་ཉིད་ཀྱིས་མ་བྱིན་པར་ལེན་པ་ལས་ལོག་བ་དེ་ནི་མ་བྱིན་པར་ལེན་པ་སྤངས་པའོ། །བདག་ཉིད་ལ་རང་དབང་དུ་བྱིན་པར་འགྱུར་ཏེ། སྨད་འཚོང་མའི་གནས་སྐབས་སུ་བྱའོ་ཞེས་པས་བྱིན་ན་ཡང་བགྲོད་པ་མ་ཡིན་པར་འཇུག་པ་སྟེ། འདོད་པ་ལས་ལོག་པར་གཡེམ་པ་སྤོང་བ་ནི་མྱོས་བྱེད་མའི་སྐྱེས་པའི་རབས་སུ་བསྟན་ཏོ། །བརྫུན་རྣམ་པ་གསུམ་གྱི་དབང་དུ་བྱས་ནས་སྐྱེས་པའི་རབས་གསུམ་ཡིན་ཏེ། གནོད་པ་བཟློག་པའི་ཕྱིར་དང༌། གནོད་པ་བདག་གིས་ཐོབ་པ་ལ་འདོད་པའི་དོན་རྙེད་པའི་ཕྱིར་དང༌། བརྫུན་སྨྲ་བ་ལ་གོམས་པར་མ་བྱས་པའོ། །གནོད་པ་བཟློག་པ་ནི་བདེན་པའི་ཚིག་ཉིད་ཀྱིས་འགྱུར་བར་བསྟན་པའི་ཕྱིར། ལེགས་པར་ཕ་རོལ་ཏུ་ཕྱིན་པའི་སྐྱེས་པའི་རབས་སོ། །བདག་ཉིད་ཀྱིས་ཕོངས་པའི་གནས་སྐབས་དང་ཕྲད་པར་གྱུར་ཀྱང༌། བདེན་པའི་ཚིག་ཉིད་ཐར་པར་གྱུར་པ་བསྟན་པ་ནི་ཉའི་སྐྱེས་པའི་རབས་སོ། །བདེན་པའི་ཚིག་ལ་གོམས་པས་ནི་མེའི་འཇིགས་པ་ལས་ཀྱང་ཐར་བར་བྱེད་ནུས་ན། གཞན་ལྟ་སྨོས་ཀྱང་ཅི་དགོས་ཞེས་བསྟན་པའི་ཕྱིར། སྲེག་པའི་ཕྲུ་གུའི་སྐྱེས་པའི་རབས་བསྟན་ཏོ། །བུམ་པའི་སྐྱེས་པའི་རབས་སུ་ནི་ཆང་ལས་ལྡོག་བ་སྟེ། གཞན་ཡང་ལྡོག་པར་བྱེད་ན་བདག་ཉིད་ལྟ་སྨོས་ཀྱང་ཅི་དགོས་ཞེས་བྱ་བའི་ཚིག་གིས་སོ། །ད་ནི་རབ་ཏུ་བྱུང་བའི་ཕྱོགས་ལ་བརྟེན་པ་ལས་བརྩམས་ཏེ་སྐྱེས་པའི་རབས་གསུམ་མོ། །དེ་ལ་དང་པོར་རེ་ཞིག་ཚོང་དཔོན་གྱི་སྐྱེས་པའི་རབས་སུ་རྒྱ་ཆུང་དུས་ཀྱང་སྙིང་སྟོབས་དང་ལྡན་པ་དག་ཁྱིམ་ཡོངས་སུ་གཏང་བ་ཡིན་ཏེ། ཕུན་སུམ་ཚོགས་པ་ཐམས་ཅད་བོར་ཞིང་ནགས་སུ་གནས་པ་སྟེ། ངེས་པར་འབྱུང་བར་འདོད་པས་ནང་མི་དང༌། ཉེ་ངུའི་སྐྱེ་བོ་དང༌། མཛའ་བཤེས་ལ་སོགས་པའི་ཚོགས་ཀྱིས་བཟློག་པར་གྱུར་ཀྱང་མི་འདོད་ན། གཞན་དག་གིས་ལྟ་སྨོས་ཀྱང་ཅི་དགོས་ཞེས་བསྟན་པས་སོ། །རྒྱལ་རིགས་ཕྱུག་པོའི་བུ་སྐྱེས་པའི་རབས་སུ་ནི་མཛའ་བཤེས་ཀྱིས་ལོངས་སྤྱོད་ལ་སོགས་པ་བསྟབས་ཀྱང༌། དེ་ལ་ཆགས་པ་མེད་པ་དེས་རབ་ཏུ་བྱུང་བ་ལ་མངོན་པར་དགའ་བར་གྱུར་
པ་བསྟན་པའི་ཕྱིར་རོ། །དཀའ་ཐུབ་ཅན་གྱི་སྐྱེས་པའི་རབས་སུ་ནི། སྨོན་ལམ་དང༌། ཚངས་པར་སྤྱོད་པ་ལ་དགའ་ཞིང་ཆོག་ཤེས་པ་དང༌། སེམས་འཁྲུགས་པ་མེད་པ་ལ་མངོན་དུ་ཕྱོགས་པའི་དབང་དུ་བྱས་ནས་བརྩམས་པའི་ཕྱིར་རོ། །དེ་ལྟར་སྐྱེས་པའི་རབས་འདི་དག་གི་གོ་རིམས་ཀྱི་རྒྱུ་ནི་རིགས་པར་འགྱུར་ཏེ། གཞན་ལ་ཡང་ཕན་པའི་ཕྱིར་བསྟན་པའོ། །སྡེ་ཚན་གཉིས་པ་སྟེ། བཅུ་ཚན་གཉིས་བ་རྫོགས་སོ།། །།བྲམ་ཟེའི་རིགས་ཆེན་པོ་ཡོན་ཏན་ལ་གོམས་པའི་མཐུས་གྲགས་པ་རྒྱས་པ་ཞེས་བྱ་བ་འདིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་འབྲས་བུ་དང༌། རྒྱུ་ལ་གོམས་པ་ཡང་བསྟན་ཏོ། །འབྱོར་པའི་ཡོན་ཏན་ངེས་པ་ཞེས་བྱ་བ་འདིས་ནི་སྔ་མའི་སྦྱིན་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །རྒྱལ་པོས་བཀུར་སྟི་བྱས་པ་དང༌། འཇིག་རྟེན་པས་ལྷ་བཞིན་དུ་བཀུར་བ་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་འབྲས་བུ་བསྟན་ཏོ། །དེ་ལྟར་འདི་དག་གིས་ནི་བསོད་ནམས་ཀྱི་ཚོགས་བསགས་པ་ཉིད་དུ་བསྟན་པ་ཡིན་ཏེ། འདི་ལྟར་ངེར་སྐྱེས་པ་ཡིན་པས། དེ་བས་ན་དེ་ཡང་དེའི་བསོད་ནམས་ཀྱི་ཚོགས་ཉིད་དུ་བསྟན་ཏོ། །དེ་ལྟར་མང་དུ་ཐོས་པའི་ཡོན་ཏན་ལ་གོམས་པ་ཞེས་བྱ་བ་ལ་སོགས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་བསྟན་ཏོ། །མཁས་པ་རྣམས་ཀྱི་གྲགས་པ་ནི། །མཁས་པ་ཉིད་ཀྱི་ནང་དུ་འཕེལ། །ཞེས་བྱ་བ་ལ། དེའི་ནང་དུ་གྲགས་པ་ཅིའི་ཕྱིར་འཕེལ་ཞེ་ན། མཁས་པ་ནི་ཡོན་ཏན་རྟོག་པ་ལ་མཁས་པའི་ཕྱིར་ཏེ། རིན་ཆེན་ཤེས་ལ་རིན་ཆེན་དང༌། ཞེས་བྱ་བ་ཡིན་ཏེ། མཁས་པ་ཉིད་མཁས་པའི་ནང་དུ་གྲགས་པ་འཕེལ་བའོ། །ཅིའི་ཕྱིར་ཞེ་ན། དེ་ནི་རང་གི་ཡོན་ཏན་སྟོན་པར་ནུས་པའི་ཕྱིར་རོ། །ཅི་ལྟ་བུ་དག་ཅེ་ན། གཡུལ་ངོ་དག་ཏུ་དབའ་བོ་བཞིན། །ཞེས་བྱ་བ་ཡིན་ནོ། །ཚེ་རབས་སྔ་མ་ལ་རབ་དུ་བྱུང་བ་ལ་གོམས་ཤིང་ཞེས་བྱ་བ་འདིས་ནི་རྒྱུ་མཐུན་པ་བསྟན་ཏོ། །ཆོས་ལ་སེམས་པ་ཞེས་བྱ་བ་ནི་ཆོས་དང་ལྷན་ཅིག་པའི་དྲན་པ་ཡོད་པའི་ཕྱིར་རོ། །ཆོས་དང་བཅས་པའི་སེམས་སོ། །དེར་གྱུར་པའི་ཆོས་ལ་སེམས་པ་ཉིད་དེ། དེ་བས་ན་ཆོས་དང་འགལ་བའི་ཕྱིར། ཁྱིམ་སྤངས་
ཞེས་བྱ་བའི་དོན་ཏོ། །བློ་དང་ཤེས་རབ་རབ་ཏུ་གསལ་བའི་ཕྱིར། །ཞེས་བྱ་བ་འདིས་ནི་ཁྱིམ་གྱི་ཉེས་དམིགས་ཡོངས་སུ་ཤེས་པའི་ཕྱིར་རོ། །རྒྱུ་འདི་གསུམ་གྱིས་ཁྱིམ་ལ་དགའ་བ་མེད་པར་འགྱུར་ཞིང༌། དེ་དང་མི་མཐུན་པའི་ཕྱོགས་ནགས་ལ་ནི་མངོན་བར་དགའ་བ་ཡིན་ཏེ། ཁྱིམ་ན་གནས་པ་ཞེས་བྱ་བ་ལ་སོགས་པའོ། །གང་སྔར་བསྟན་པའི་ཆས་པ་སེམས་པ་ཞེས་བྱ་བ་དེ་བསྟན་པའི་ཕྱིར། ཁྱིམ་ཡོངས་སུ་མ་བཏང་ཞིང༌། འདོད་པ་རྣམས་ལ་ཉེ་བར་ལོངས་སྤྱོད་པ་ལས་ནི་ཆོས་དང་འགལ་བ་ཡིན་ཏེ། འཐབ་མོ་ལ་སོགས་པ་མང་བའི་ཕྱིར་རོ། །དེ་ལྟར་ཆོས་ལ་སེམས་པ་ནི་ཁྱིམ་ན་གནས་པ་ན་དགའ་བར་མ་གྱུར་པའོ། །ཤེས་རབ་དང་ལྡན་པའི་ཕྱིར་ཁྱིམ་ན་གནས་པ་ལ་དགའ་བར་མ་གྱུར་པ་དེ་བསྟན་པའི་ཕྱིར། རྒྱལ་པོ་དང༌། རྐུན་པོ་ལ་སོགས་པ་ལྔ་དང་ཐུན་མོང་དུ་གྱུར་པར་ཤེས་པའི་ཕྱིར་དང༌། ཆོག་མི་ཤེས་པར་ཡོངས་སུ་ཤེས་པའི་ཕྱིར་དང༌། ཉེས་པ་དུ་མ་འི་གནས་སུ་གྱུར་པར་ཤེས་པའི་ཕྱིར་ཏེ། བློ་དང་ཤེས་རབ་རབ་ཏུ་གསལ་བའི་ཕྱིར། ཁྱིམ་ན་གནས་པ་ལ་དགའ་བར་མ་གྱུར་ཏོ། །ཁྱིམ་པའི་ཆ་ལུགས་བོར་ནས་ཞེས་བྱ་བ་ལ། ཇི་ལྟར་ཁྱིམ་པའི་ཆ་ལུགས་བོར་ཞེ་ན། སྐྲ་དང་ཁ་སྤུ་བཟང་པོ་བྲེགས་པའི་ཕྱིར་དང༌། གོས་ཁ་དོག་བསྒྱུར་བ་དུར་སྨིག་བགོས་པའི་ཕྱིར་རོ། །ཇི་ལྟར་རབ་ཏུ་བྱུང་བའི་ཆ་ལུགས་བླངས་ཤེ་ན། རབ་ཏུ་བྱུང་བའི་སྡོམ་པའི་དཔལ་ལ་གནས་པར་གྱུར་པའི་ཕྱིར་རོ། །དེ་ཡང་དཀའ་ཐུབ་ཀྱི་ནགས་ཚལ་ན་གནས་མི་ནུས་པར་ཤེས་ནས་སོ། །རབ་ཏུ་དཀའོ་ཞེས་བྱ་བ་ནི་བགྲོད་པར་དཀའ་བ་ཡིན་པའི་ཕྱིར་རོ། །དུར་ཁྲོད་དང༌། ཁོང་སྟོང་སྨོས་པས་ནི། གནས་མལ་གྲོང་དང་ཉེ་བར་སྟོན་པ་ཡིན་ནོ། །དེ་ཡང་གཉིས་ཏེ། བྱམས་པ་དང༌། མི་བྱམས་པའི་བྱེ་བྲག་གིས་སོ། །རི་བོ་དག་ནི་གཅན་གཟན་ཁྲོ་བོས་གང་བའོ། །དེ་གཉིས་སྨོས་པ་ནི་གྲོང་ལས་ཐག་རིང་བར་སྟོན་ཏོ། །དེ་ལྟ་བུའི་གནས་མ་ལ་གྱི་བྱེ་བྲག་མཐུན་པ་དང༌། མི་མཐུན་བ་དག་ཏུ་བསམ་གཏན་བྱེད་ཅིང་ཞེས་བྱ་བའི་ཚིགས་བཅད་སྨོས་སོ། །གྲོགས་མེད་པར་དེས་རབ་ཏུ་དཀའ་བས་བསམ་གཏན་བྱེད་པར་བསྟན་པའི་ཕྱིར། འདི་ས་ནི་སྐྱེས་བུ་གཅིག་པུ་གཉིས་
སུ་མེད་པར་གནས་པ་བསྟན་ཏོ། །བུད་མེད་དག་ནི་ལྟར་ཡང་མེད་པར་བྱེད། །ཅེས་བྱ་བ་འདིས་ནི། བསམ་གཏན་མི་བྱེད་ཀྱང་བུད་མེད་དང་རེག་པར་གནས་པ་དང་ལྷན་ཅིག་ཏུ་འགྲོགས་པར་མི་རུང་བ་ཉིད་དུ་བསྟན་ཏོ། །འཆི་བ་ལ་ཕྱོགས་པའི་གནས་དེ་ལྟ་བུ་གཉི་ག་འགྲོ་བའི་འཇིགས་སུ་རུང་བ་དང༌། གྲོགས་བྱེད་པ་བསྟན་པའི་སྡུག་བསྔལ་དེས་ནི་བདག་སྡུག་ཅིང་དེས་ཁྱོད་ཀྱང་མི་དགྱེས་པ་ཞེས་བྱ་བའི་དོན་ཏོ། །མཆིས་པར་ནུས་པ་ཞེས་བྱ་བ་ནི་འཚོ་བར་རོ། །དཔྱིད་ཀྱི་དུས་ལ་བབ་པའི་ཞེས་བྱ་བ་ལ་སོགས་པས་ནི། མིག་དང༌། རྣ་བ་དང༌། སྣ་དང། ལྕེ་དང༌། ལུས་ཀྱི་དབང་པོས་ཉེ་བར་སྤྱོད་པ་སྤྱད་དུ་རུང་བའི་ནགས་ཚལ་བསྟན་ཏོ། །ཤིང་ལོ་ལྷག་པར་མཛེས་པ་དང་ནི་ལྡན། །ཞེས་བྱ་བ་འདིས་ནི་མིག་གི་དབང་པོས་ཉེ་བར་ལོངས་སྤྱོད་དུ་རུང་བའོ། །བུང་བ་མང་པོ་སྒྲ་དི་རི་རི་ཟེར་ཞེས་པ་ལ་སོགས་པས་ནི་རྣ་བའི་དབང་པོས་ལོངས་སྤྱད་དུ་རུང་བ་བསྟན་ཏོ། །པདྨ་དང༌། ཨུཏྤ་ལ་ཁ་བྱེ་བ་ཞེས་བྱ་བ་འདིས་ནི་ལྕེ་དང༌། ལུས་ཀྱི་དབང་པོས་ལོངས་སྤྱད་དུ་རུང་བ་བསྟན་ཏོ། །མེ་ཏོག་དྲི་ཞིམ་པོ་སྣ་ཚོགས་ཀྱི་བསུང་གིས་ཞེས་བྱ་བ་ལ་སོགས་པ་ནི་སྣའི་དབང་པོ་དང༌། ལུས་ཀྱི་དབང་པོས་ལོངས་སྤྱད་དུ་རུང་བ་བསྟན་ཏོ། །མེ་ཏོག་སྣ་ཚོགས་ཚོམ་བུ་རབ་ཏུ་མཛེས། །ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་ནི་ཚིག་རྐང་གོང་མ་དག་ནི་དོན་ཉིད་བསྟན་ཏོ། །གཡོན་ཅན་དང་ཐུབ་ཆོད་ཅན་རབ་ཏུ་མང་ན་ཞེས་བྱ་བ་ལ། གཡོན་ཅན་ནི་མ་དུལ་བས་བུད་མེད་ལ་སོགས་པ་ཡང་དུལ་བ་མེད་དོ། །ཐུབ་ཆོད་ནི་འཕྲོག་པར་འདོད་པའོ། །དབེན་པ་འདི་ན་ཞེས་བྱ་བ་ནི་རབ་མདའ་བཟློག་ཏུ་མེད་པར་བསྟན་ཏོ། །དཀའ་ཐུབ་ཆུང་བ་ཞེས་བྱ་བ་འདིས་ནི་རང་ཉིད་ནུས་པ་མེད་པར་སྟོན་ཏོ། །ཆོས་དང་བཅས་ཏེ་ཞེས་བྱ་བ་ནི་ཁྱོད་དང་ཁྱོད་ཀྱི་ཆོས་ལ་བརྙས་པ་སྟེ། འདི་དག་གིས་ནི་འཇིག་རྟེན་འདི་དང༌། འཇིག་རྟེན་ཕ་རོལ་ལ་འཇིགས་པ་མེད་པའི་རྒྱུ་ཉིད་དུ་བསྟན་ཏོ། དབེན་པ་འདི་ནི་དཀའ་ཐུབ་ཅེས་བྱ་བའི་ཚིགས་བཅད་འདིས་ནི་ནགས་ན་གནས་པས་བུད་མེད་དེ་ལ་སྟོན་ཏོ། །ཁྲོ་བ་སྐྱེད་ན་ཞེས་བྱ་བའི་ཚིགས་བཅད་འདིས་ནི་ཁྱོད་ཉིད་ལ་ཡང་ཕན་པ་མེད་པར་བསྟན་པའི་ཕྱིར་ཏེ། འཇིག་རྟེན་གཉི་ག་ལ་ཡང་ཕན་པ་མེད་པར་ཁྲོ་བ་སྐྱེད་པ་མི་རིགས་
སོ། །དེ་ཅིའི་ཕྱིར་ཞེ་ན། ཡིད་འཁྲུགས་པ་ཉིད་ཀྱི་ཕྱིར་འདིས་ནི་ཆོས་དང་འགལ་བར་བསྟན་ཏེ། ཆོས་དང་འགལ་བར་གྱུར་པས་ནི་འཇིག་རྟེན་ཕ་རོལ་ཏུ་ཕན་པ་མེད་པ་ཉིད་དོ། །ཆོས་དང་འགལ་བ་ལས་ནི་གྲགས་པའང་མེད་པར་འགྱུར་ཏེ། འདིས་ནི་འཇིག་རྟེན་འདི་ཉིད་ལ་ཕན་པ་མེད་པ་ཉིད་དོ། །དེས་ན་དེ་དང་ཁྱོད་གཉི་ག་ལ་ཕན་པ་མེད་པའི་ཕྱིར། གྲོང་དུ་ཞེས་བྱ་བ་ནི་སྐྱེ་བོའི་ནང་ཉིད་དུ་ཞེས་བྱ་བའི་དོན་ཏོ། །ཅི་སྟེ་སྐྱོན་དེ་གཉི་ག་མེད་ཀྱང་དཀའ་ཐུབ་ཅན་ལ་བུད་མེད་བསྙེན་ཅི་དགོས་ཞེས་བྱ་བ་སྨོས་ཏེ། འདི་ནི་བདག་ཉིད་དང་རྗེས་སུ་མཐུན་པར་སྟོན་ཏོ། རྒྱགས་པར་བསྙེམས་སམ། གལ་ཏེ་མ་བརྟགས་པར་ཞེས་བྱ་བ་འདི་གཉིས་ཀྱིས་ནི། ཞེ་སྡང་གི་ཤས་ཆེ་བ་དང་དམན་པར་སྟོན་ཏོ། །རྒྱགས་པས་བསྙེམས་པས་ཞེས་བྱ་བ་ནི་བརྟགས་པར་བྱས་ཀྱང་སྤྱོད་པ་ཟིལ་གྱིས་མནོན་པའོ། །མ་བརྟགས་པར་ཞེས་བྱ་བ་ནི་དྲན་པ་ཉམས་པ་ལ་སོགས་པས་སོ། །མི་མཐུན་པའི་ཕྱོགས་མི་བསྟན་པའི་ཕྱིར་དགྲ་ཞེ་སྡང་ལ་ཡང་རྒྱགས་པས་བསྙེམས་པ་དང༌། མ་བརྟགས་པ་ཅི་རིགས་པར་བརྗོད་པར་བྱའོ། །དེས་གནོད་པ་བྱས་སུ་ཡང་མི་དོགས་ལ་ཞེས་བྱ་བ་ནི་དེའི་རྒྱུས་གནོད་པས་ན་དེས་གནོད་པ་ནི་དེས་གནོད་པའོ། །དེ་ལ་དོགས་པ་དང་བྲལ་བ་གང་ཡིན་པ་དེ་ནི་དེས་གནོད་པ་བྱས་སུ་མི་དོགས་པའོ། །འདིས་ནི་འཇིག་རྟེན་འདིའི་འཇིགས་པ་མེད་པར་བསྟན་ཏོ། །འདོད་པའི་འདོད་ཆགས་ཀྱི་དབང་དུ་ཡང་གྱུར་པས་ཞེས་བྱ་བ་ནི་འཇིག་རྟེན་ཕ་རོལ་གྱི་འཇིགས་པ་མེད་པར་སྟོན་ཏོ། །འདོད་པའི་འདོད་ཆགས་ཀྱིས་ཟིལ་གྱིས་མནན་པ་དེས་ཆོས་ལ་མི་ལྟ་བས་སོ། །འཇིགས་པ་དང༌། བག་ཚ་བ་ནི་འཇིགས་པ་དང་བག་ཚ་བ་སྟེ། དེ་གཉིས་ཀྱིས་བཞིན་གྱུར་པ་གང་ཡིན་པ་དེ་ནི་འཇིགས་ཤིང་བག་ཚ་བས་ངོ་འཛུམ་འགྱུར་བའོ། །རྒྱལ་པོའི་མཐུས་ཕོ་བྲང་གི་ནང་དུ་ཁྲིད་ཅེས་ཐོས་པས་ནི། གཅན་གཟན་མ་རུངས་པས་དགོ་བ་མོ་གཅེས་པ་བཞིན་དུ་འཇིགས་ཤིང་བག་ཚ་བས་ངོ་འཛུམ་འགྱུར་བའོ། །འདིར་སྐྱོབ་པ་ནི་གཞན་མེད་པའི་ཕྱིར། སྐྱེ་དགུ་སྐྱོང་བའི་རྒྱལ་པོས་ཁྱེར་བར་གྱུར་ན། གཞན་སུ་ཞིག་སྐྱོབ་པར་འགྱུར་ཏེ། ནགས་ཀྱི་དགོ་བ་མོ་བཞིན་ནོ། །དེ་བས་ན་དེ་ཉིད་ཀྱི་ཕྱིར། ནགས་ཞེས་སྨོས་པ་ཡིན་ཏེ།
གང་གི་ཕྱིར་གཞན་དུ་ན་ནི་དགོ་བ་མོ་ཞེས་བྱ་བ་ཉིད་སྟོན་པར་འགྱུར་རོ། །དེ་ཉིད་ཀྱི་ཕྱིར་འཇིགས་ཤིང་བག་ཚ་བས་ངོ་འཛུམ་གྱུར་བ་ཉིད་ཀྱི་རྒྱུ་བསྟན་པའི་ཕྱིར། འཇིག་རྟེན་ཕོངས་ཤིང་ཞེས་བྱ་བའི་ཚིགས་བཅད་བརྩམས་པ་ཡིན་ནོ། །དེ་ཉིད་གང་ལ་མི་རིགས་བྱེད་གྱུར་ན། །ཞེས་བྱ་བ་འདིས་ན་འཇིགས་པ་དང༌། བག་ཚ་བའི་རྒྱུ་བསྟན་ཏོ། །ཡང་ན་དེ་ཉིད་གང་ལ་མི་རིགས་བྱེད་གྱུར་ན། །ཞེས་བྱ་བ་འདིས་ནི་འཇིགས་པའི་རྒྱུ་བསྟན་ཏེ། དེ་ཡིས་སུ་ལ་ཕ་སྐྱབས་བཙལ་བར་བྱ། །ཞེས་བྱ་བ་འདིས་ནི་བག་ཚ་བའི་རྒྱུ་བསྟན་ཏེ། ཕ་སྐྱབས་དེ་མེད་ཀྱང་གང་དག་འཇིག་རྟེན་སྐྱོང་བ་དང༌། གཞན་ཡང་སྐྱེ་བོས་བྱེད་པ་དག །སྐྱབས་བྱེད་པ་མེད་ཅེས་བསྟན་པའི་ཕྱིར། ཀྱེ་མ་འཇིག་རྟེན་སྐྱོང་བའང༌། །ཞེས་བྱ་བའི་ཚིགས་བཅད་བརྩམས་པ་ཡིན་ཏེ། ཚུལ་ལས་ཉམས་ཞེས་བྱ་བ་ནི་འཇིག་རྟེན་སྐྱོང་བ་ཉིད་ཉམས་པའམ། འཇིག་རྟེན་སྐྱོང་བའི་མིང་ཉིད་ཉམས་ནས་མེད་པ་སྟེ། གཞན་གྱི་དོན་མི་བྱེད་པའི་ཕྱིར། དེ་འཇིག་རྟེན་སྐྱོང་བ་དེ་ལས་ཉམས་པའམ་མེད་པའོ། །དེ་ཅིའི་ཕྱིར་ཞེ་ན། ལེགས་པར་མི་སྐྱོང་བས་སོ། །ཤི་བར་གྱུར་ཏམ་ཅི་ཞེས་བྱ་བས་ནི་ལྷའི་འགྲོ་བ་དེ་ལས་ཉམས་པའོ། །དེ་ནས་གལ་ཏེ་ཡོད་ཀྱང་ཚུལ་ལས་ཉམས་པ་དེས་མི་ནུས་པའམ། ཤི་བས་གང་དག་ཕོངས་པ་ལེགས་པར་སྐྱོབ་པར་མི་བྱེད་པའོ། །རང་བཞིན་གྱིས་ཀྱང་ཡོངས་སུ་བསྲུང་བར་ནུས་མོད་ཀྱི། བདག་ལ་མི་བསྲུང་བ་ཡིན་ནོ་ཞེས་བསྟན་པའི་ཕྱིར། ཇོ་བོ་བཞུགས་བཞིན་ལྷ་ཡིས་ཅི་ཞིག་བགྱི། །ཞེས་བྱ་བའི་ཚིགས་བཅད་སྨོས་སོ། །གཞན་ཞིག་ཡིན་ནའང་རྗེས་སུ་བསྲུང་བར་རིགས་ན་བདག་ནི་ཆོས་སྤྱོད་པའི་གྲོགས་ཡིན་པའི་ཕྱིར་རོ། སྙིང་རྗེའི་སྣོད་དུ་མ་གྱུར་ཅེས་བྱ་བ་ནི་སྙིང་རྗེའི་དངོས་པོ་དང་བདག་ཉིད་སྐལ་བར་འགྱུར་བའི་ཕྱིར་གསོ་བའི་དངོས་པོར་མ་གྱུར་པ་སྟོན་ཏོ། །བྱང་ཆུབ་སེམས་དཔའ་དེ་ནི་ཕོངས་པ་རྣམས་ལ་བསྒྲུབ་པ་དང༌། རྗེས་སུ་མཐུན་པར་བསྟན་པའི་ཕྱིར། ཕོངས་ལ་སྙིང་རྗེ་ཅན་གྱིས་ཞེས་བྱ་བའི་ཚིགས་བཅད་འོག་མ་ཡིན་ཏེ། བདག་ནི་སྙིང་རྗེའི་དོན་མ་གྱུར་པ་ཉིད་དོ། །རབ་ཏུ་བྱུང་བ་རྣམས་ནི་ཕོངས་པ་རྣམས་སྒྲུབ་པ་དང་མི་འགལ་བར་བྱེད་མོད་ཀྱི། འོན་ཀྱང་མི་
སྒྲུབ་པའི་རྒྱུ་གཞན་བསྟན་པའི་ཕྱིར། བདག་ནི་སླད་དུ་བཟློག་ཀྱང་མ་ལོག་པར་ཞེས་བྱ་བའི་ཚིགས་བཅད་སྨོས་སོ། །སོ་སོར་བརྟགས་པའི་སྟོབས་ཀྱིས་ཁྲོ་བའི་སྟོབས་བཅིལ་ཞེས་བྱ་བ་ནི་གང་སྔར་བསྟན་པའི་རྒྱགས་པས་བསྙེམས་སམ། གལ་ཏེ་མ་བརྟགས་པར་ཞེས་བྱ་བ་དེ་འདིས་བསྟན་པ་ཡིན་ནོ། །དེ་འཁྲུགས་པ་དང་བྲལ་བ་གང་ཡིན་པ་དེ་ནི་འཁྲུགས་པ་མེད་པའོ། །སེམས་རབ་ཏུ་ཞི་བ་གང་ཡིན་པ་དེ་ནི་སེམས་རབ་ཏུ་ཞི་བའོ། །འཁྲུགས་པ་མེད་པ་དང༌། སེམས་རབ་ཏུ་ཞི་བ་ནི་སེམས་འཁྲུགས་པ་མེད་ཅིང་རབ་ཏུ་ཞི་བའོ། །འཁྲུགས་པ་མེད་བ་ནི་ཁྲོ་བོའི་སྟོབས་ཀྱིས་ཟིལ་གྱིས་མི་ནོན་པའི་ཕྱིར་རོ། །སེམས་རབ་ཏུ་ཞི་བ་ནི་སོ་སོར་བརྟགས་པའི་སྟོབས་ཀྱིས་སོ། །བསྙེངས་ཤིང་གསང་བསྟོད་ཅེས་བྱ་བ་ནི་གང་སྔར་བསྟན་པའི་རྒྱགས་པས་བསྙེམས་པས་ཞེས་བྱ་བའི་ཚིགས་བཅད་དོ། །མཐུ་མེད་པས་ཞུམ་ཞིང་ཞི་བར་གྱུར་པ་གང་ཡིན་པ་དེ་ནི་མཐུ་མེད་པས་ཞུམ་ནས་རབ་ཏུ་ཞི་བ་སྟེ། གང་སྔར་བསྟན་པའི་སེམས་འཁྲུགས་པ་མེད་ཅིང་རབ་ཏུ་ཞི་བ་ཞེས་བྱ་བ་དེ་བསྟན་པའོ། །མཐུ་རྩལ་ཞེས་བྱ་བ་དེ་ལུས་ཀྱི་སྟོབས་སོ། །དཀའ་ཐུབ་གནས་པའི་གཟི་བརྗིད་བསགས་པའང་སྟོན། །ཞེས་བྱ་བ་ནི་དཀའ་ཐུབ་བསྟན་པའི་སྟོབས་ཞེས་བྱ་བའི་དོན་ཏོ། །བདག་གི་ཚོད་དེ་བཟུང་བ་ནི་བདག་གི་ཚོད་བཟུང་བའོ། །དེ་མི་རིགས་པ་ནི་བདག་གི་ཚོད་ཀྱང་བཟུང་བར་མ་ཤེས་པ་སྟེ། བདག་ཉིད་མི་ཤེས་པ་ཞེས་བྱ་བའི་དོན་ཏོ། །གཡོ་བ་བཞིན་དུ་ཡང་བདག་གིས་ཡོངས་སུ་མ་བཏང་བ་ཞེས་བྱ་བ་ནི་གང་སྔར་བསྟན་པའི་རྒྱགས་བས་བསྙེམས་སམ་ཞེས་བྱ་བ་སྟེ་ཁྲོ་བའི་དབང་དུ་བྱས་པའོ། །མངོན་སུམ་དུ་ཡང་ཞི་བར་བགྱིས་ཞེས་བྱ་བ་ནི་གང་སྔར་བསྟན་པའི་མ་བརྟགས་པ་ཞེས་བྱ་བ་ཡིན་ཏེ། ཁྲོ་བའི་སྟོབས་མ་བརྟགས་པ་དེ་ཉིད་བསྟན་པ་ཡིན་ནོ། །རྟོག་པ་སྐྱེས་ནས་ཞེས་བྱ་བ་ནི་དཔྱོད་པ་སྐྱེས་པའོ། །སྐྱེས་ནའང་གང་ཞིག་མི་མངོན་ལ། །ཞེས་བྱ་བའི་ཚིགས་བཅད་ཀྱི་བསྡུས་པའི་དོན་ནི་ཁྲོ་བའི་མཚན་ཉིད་ཀྱི་ངོ་བོ་ཉིད་དང༌། ལས་བསྟན་ཏེ་སྐྱེས་ན་གང་ཞིག་ཅེས་བྱ་བ་ནི་ཁྲོ་བ་སྐྱེས་པ་དེས་སོ། །ཁྲོ་བ་གང་ཞིག་སྐྱེས་ན་མི་མངོན་པ་ནི་ཁྲོ་བའི་ལམ་ཡིན་ཞིང་བཟང་བ་སྟེ་དགེ་བ་ཉིད་དོ། །ཡང་ན་སྐྱེས་
པར་སྣང་བ་དེ་གང་ཡིན་ཞེ་ན། དགེ་བ་སྟེ་མཁས་པའོ། །དེས་ན་སྐྱེས་བུ་ཡང་མི་མངོན་པ་དེ་ནི་དགེ་བ་ཡིན་ཏེ། མཁས་པ་འང་བདག་ཉིད་ལ་ཕན་པའོ། །འདི་ནི་ཁྲོ་བའི་རང་གི་ངོ་བོའོ། །མ་གྱུར་ཏོ་ཞེས་བྱ་བ་ནི་ཤོར་བར་མ་གྱུར་པའོ། །ཇི་ལྟ་རྨ་ཤོར་བ་ཡིན་ཞེ་ན། འདོད་པ་ནི་སྤྱོད་པའི་ཉོན་མོངས་པ་སྤངས་པའི་ཕྱིར། ནན་གྱིས་མ་བཏང་བ་སྟེ་ནང་ཉིད་དུ་དེ་འགག་པའོ། །བདག་ལ་གནོད་པ་ཞེས་བྱ་བ་ནི་ལུས་ལ་གནས་ཤིང་བདག་ལ་གནོད་པ་སྟེ། ཁྲོ་བའི་རང་བཞིན་དང་ལས་ལ་ཚིགས་བཅད་བདུན་གྱིས་བསྟན་པ་ལ། སྐྱེས་ན་གང་ཞིག་མི་མངོན་ལ། །ཞེས་བྱ་བའི་ཕྱེད་འོག་མས་ནི་བདག་ལ་གནོད་པའི་ལས་བསྟན་ཏོ། །ཚིགས་བཅད་གཉིས་པས་ནི་དགྲ་དགའ་བར་འགྱུར་བའི་ལས་བསྟན་ཏོ། །གང་ཞིག་སྐྱེས་པར་གྱུར་ན་ནི། །ཞེས་བྱ་བའི་ཚིགས་བཅད་འདིས་ནི་དགེ་བ་སྔ་ན་མེད་པ་མི་བསྒྲུབ་པར་བསྟན་ཏོ། །གང་གི་ཟིལ་ནོན་དགེ་བ་གཏོང་འགྱུར་བ། །ཞེས་བྱ་བའི་ཚིགས་བཅད་འདིས་སྔར་བསྐྱེད་པའི་དགེ་བ་རྣམས་ཁྲོ་བས་འཇིགས་པར་བསྟན་ཏོ། །གཙུབ་ཤིང་གཙུབས་པས་ཞེས་བྱ་བའི་ཚིགས་བཅད་འདིས་ན་གཙུབ་ཤིང་གཙུབས་པ་བཞིན་དུ་ལོག་པར་རྟོགས་པས་བདག་ཉིད་བཅོམ་པར་གྱུར་པ་ཡིན་ནོ། །གལ་ཏེ་གཞན་དག་ལ་གནོད་པ་བྱེད་པར་ནུས་པ་ཡིན་ན་ཡང་དེའི་གྲགས་པ་ཉམས་པར་འགྱུར་རོ་ཞེས་བསྟན་པ་ནི། བདག་ཉིད་འབར་ཞིང་ཚིག་པའི་མེ་འདྲ་བ། །ཞེས་བྱ་བའི་ཚིགས་བཅད་གཉིས་ཀྱིས་སོ། །ཁྲོ་བའི་ལས་ནི་འདི་དག་ཏུ་བསྟན་ཏེ། བདག་ལ་གནོད་པ་དང༌། སྐྱེས་པར་གྱུར་ན་དགྲ་རྣམས་དགའ་བར་འགྱུར་བ་དང༌། སྐྱེས་པ་ཉིད་ཀྱིས་དགེ་བ་མ་སྐྱེས་པ་རྣམས་ཀྱི་བར་དུ་གཅོད་པར་བྱེད་པ་དང༌། དེ་རབ་ཏུ་འཕེལ་བས་དགེ་བ་བསྒྲུབ་པ་རྣམས་ཡོངས་སུ་ཉམས་པར་བྱེད་པ་དང༌། དེའི་འོག་ཏུ་ལོག་པར་རྟོགས་པ་ལས་འབར་བར་གྱུར་པས་བདག་ཉིད་ཕུང་བར་འགྱུར་བ་དང༌། གཞན་དག་ལ་གནོད་པར་བྱེད་པར་ནུས་ཀྱང་རེ་ཞིག་གྲགས་པ་ཉམས་པའི་རྒྱུར་འགྱུར་བ་ཡང་ཡིན་ཏེ། འདི་དག་གིས་ནི་མཐོང་བའི་ཆོས་ཀྱི་ཉེས་དམིགས་བསྟན་ནོ། །ཁྲོ་བ་ལ་ཉེས་དམིགས་ཆེན་པོ་འདི་
ལྟ་བུ་གཞན་དག་ཀྱང་ཡོད་དོ་ཞེས་བྱ་བ་ལས་བརྩམས་ནས་མཐོང་བའི་ཆོས་དང༌། འཇིག་རྟེན་ཕ་རོལ་གྱི་ཉེས་དམིགས་བསྟན་པའི་ཕྱིར་ཚིགས་བཅད་བཞི་སྨོས་ཏེ། ཁྲོ་བའི་མེ་ཡིས་བཞིན་མདོག་ཅེས་བྱ་བའི་ཚིགས་བཅད་འདིའི་མིང་དང༌། གཟུགས་གཉིས་འགྱུར་བའི་སྡུག་བསྔལ་བ་སྐྱེད་པ་ཡིན་ཏེ། གཉིས་ཀའི་རྒུད་པའི་སྡུག་བསྔལ་བསྟན་པའི་དབང་དུ་བྱས་པའོ། །མཛེས་པར་བྱེད་པའི་རྒྱུ་རྒྱན་གྱིས་བརྒྱན་པར་བྱས་ཀྱང་ལུས་ཀྱི་གཟུགས་མི་མཛེས་པའི་རྒྱུར་གྱུར་པའི་ཕྱིར་དང༌། བདེ་བའི་རྒྱུ་མལ་སྟན་བཟང་པོ་ལ་ཉལ་ཡང་སྡུག་བསྔལ་གྱི་རྒྱུར་གྱུར་པའི་ཕྱིར་རོ། །བདག་ལ་ཕན་པའི་དོན་བསྒྲུབ་ཅེས་བྱ་བའི་ཚིགས་བཅད་འདི་ནི་བདག་ཉིད་ཀྱི་དགེ་བ་སྤངས་ཤིང་མི་དགེ་བའི་རྒྱུ་རྩོམ་པ་ལས་བརྩམས་པ་སྟེ། བདག་གི་ཕན་པ་ནི་བདག་ལ་ཕན་པའོ། །བདག་ལ་ཕན་པ་སྒྲུབ་པ་ནི་བདག་ལ་ཕན་པའི་སྒྲུབ་པའོ། །འདིའི་དོན་ནི་བདག་ལ་ཕན་པ་བསྒྲུབ་པའི་དོན་ནོ། །མི་དགེ་བའི་ལས་ནི་ལམ་ངན་པ་སྟེ། བདག་ལ་ཕན་བསྒྲུབ་པའི་དོན་བརྗེད་པ་ལས་ལམ་ངན་པར་འགྲོ་བའོ། །བདག་ལ་ཕན་སྒྲུབ་པའི་དོན་བརྗེད་ཅིང་ལམ་ངན་པར་འགྲོ་བས་ནི་ཉམས་པར་འགྱུར་ཏེ་ལོག་པའི་ལམ་གྱིས་སོ། །སྒྲུབ་གྲགས་པ་ཉིད་དོན་གྲུབ་པ་ཡིན་པས་གྲགས་པ་དོན་གྲུབ་པའོ། །ཡང་ན་གྲགས་པ་གྲུབ་པ་དང་དོན་གྲུབ་པ་དེ་གཉིས་ནི་གྲགས་པ་དོན་གྲུབ་པའོ། །གྲགས་པ་དང་དོན་གྲུབ་པ་ལས་ཉམས་པ་དེས་ན་མི་དགེ་བའི་ལས་ཀྱི་ལམ་རབ་ཏུ་འཇུག་པ་ཉིད་དོ། །གཞན་གྱིས་བཟློག་བཞིན་དུ་ཡང་དེ་ལ་བརྟེན་ཅིང་གྲོགས་བཤེས་དང༌། འཁོན་དང་བཅས་པར་འགྱུར་བ་ལས་བརྩམས་ནས། མཛའ་བ་ཤེས་དག་གིས་རབ་ཏུ་གཅུགས་ཀྱང་ཞེས་བྱ་བ་ཡིན་ཏེ། འདིས་ནི་རེ་ཞིག་མཐོང་བའི་ཆོས་ཀྱི་ཉེས་དམིགས་བསྟན་ཏོ། །ད་ནི་འཇིག་རྟེན་ཕ་རོལ་གྱི་ཉེས་དམིགས་ཀྱི་དབང་དུ་བྱས་ནས། ཁྲོ་བས་སྡིག་པའི་ལས་ནི་གོམས་བྱས་པས། །ཞེས་བྱ་བའི་ཚིགས་བཅད་སྨོས་ཏེ། སྡིག་པའི་ལས་ནི་གོམས་བྱས་པས། །ཞེས་བྱ་བ་འདིས་ནི་སྡིག་པའི་ལས་བྱས་ཤིང་བསགས་པར་བསྟན་ཏོ། །གནོད་པ་དྲག་པོས་ཤར་གཉེར་གང་ཡིན་པ་དེ་ནི། གནོད་པ་ཆེན་པོ་བྱས་པས་ཤར་གཉེར་
བའོ། །འདིས་ནི་གང་སྔར་བསྟན་པའི་དགྲ་རྣམས་དགའ་བར་འགྱུར་ཞེས་བྱ་བ་དེ་སྒྲུབ་པ་ཡིན་ནོ། །ཁྲོ་བ་འདི་ནི་ནང་གི་དགྲ། །ཞེས་བྱ་བའི་ཚིགས་བཅད་འདིས་ནི་གང་སྔར་བསྟན་པའི་གང་ཞིག་སྐྱེས་ན་མི་མངོན་པ། ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱི་བསྡུས་པའི་དོན་ཡིན་ཏེ། ནང་གི་དགྲར་གྱུར་པ་ནི་སྔར་བཤད་པའི་བདག་ལ་གནོད་པ་ཞེས་བྱ་བའི་རྒྱུར་གྱུར་པས་སོ། །དེ་ཡི་མཐུ་ནི་འཕྲོ་བ་དག །ཅེས་བྱ་བ་ནི་ཕྱི་རོལ་དུ་མི་འཕྲོ་བར་བྱས་པ་སྟེ། དེས་ན་མ་བཏང་བ་ཞེས་བྱ་བའི་ཚིགས་བཅད་དོ། །ཁྲོ་བའི་མེ་ཡིས་བཞིན་མདོག་ཉམས་གྱུར་ན། །ཞེས་བྱ་བའི་ཚིགས་བཅད་བཞིའི་བསྡུས་པའི་དོན་ནི། ཕུང་བར་བྱེད་པའི་དགྲ་བོ་དེ། །ཞེས་བྱ་བའོ། །འདི་ནི་འདིའི་ཚིག་གིས་ནི་ཉེས་དམིགས་ཆེན་པོའི་ཕྱིར་ཚིགས་བཅད་ལྔ་ཡང་ཡིན་ནོ། །ཡང་ན་ཚིགས་བཅད་བཅུ་གཅིག་པོ་ཐམས་ཅད་ལ་བསྡུས་པའི་དོན་གྱི་ཚིགས་བཅད་གཉིས་ཏེ། དང་པོའི་ཚིགས་བཅད་ཀྱི། ཁྲོ་བ་འདི་ནི་ནང་གི་དགྲ། །ཞེས་བྱ་བ་ནི་དེ་ལྟར་ཤེས་ནས་བསྟན་པའོ། །ཁྲོ་བ་དེའི་མཐུ་ནི་འཕྲོ་བ་ཞེས་བྱ་བ་ནི་འཕེལ་བར་མི་གཞུག་ཅིང་ནང་ཉིད་དུ་གནས་པར་བྱ་བ་སྟེ། དེ་བས་ན། ཁྲོ་བ་གཡོས་ཀྱང་མ་ཤོར་ཏོ། །ཞེས་བྱ་བ་ནི་ཕྱི་རོལ་ཏུ་མ་ཤོར་ཏོ། །དེ་བས་ན་ནང་གི་དགྲར་ཤེས་པའི་ཕྱིར། ཕུང་བར་བྱེད་པའི་དགྲ་བོ་དེ། །ཞེས་བྱ་བ་སྨོས་ཏེ། མཐོང་བའི་ཕྱིར་ཆོས་དང་འཇིག་རྟེན་ཕ་རོལ་གྱི་ཕུང་བར་བྱེད་པའི་རྒྱུ་ཡིན་པའི་ཕྱིར་ཏེ། གང་སྔར་བཤད་པ་དག་གོ །ཡལ་བར་འདོར་ཞེས་བྱ་བས་ནི་དེའི་རང་བཞིན་གྱི་རྒྱུ་བསྟན་པ་ཡིན་ནོ། །མ་ཕྲད་པས་ནི་ཁྱོད་ཀྱི་ཡོན་ཏན་མི་ཤེས་བའི་ཕྱིར་རོ། །སློབ་དབོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་གཙུག་ཕུད་བྱང་ཆུབ་ཀྱི་སྐྱེས་པའི་རབས་སོ།། །།བརྒྱ་སྟོང་ཕྲག་དུ་མ་གྲངས་མང་པོའི་ཞེས་བྱ་བ་ནི། སྟོང་ཕྲག་དུ་མས་རྒྱ་ཆེ་བའི་གྲངས་གང་ཡིན་པ་དེ་ནི་དེའི་བརྒྱ་ཕྲག་དུ་མས་གྲངས་མང་པོའོ། །དེ་བས་ན་ངང་པའི་ཁྱུ་ཆེན་པོ་ཡིན་ནོ། །རིགས་པ་དང་མི་རིགས་པ་ཞེས་བྱ་བ་ལ་སོགས་པའི་ཚིག་རྐང་གིས་ནི་སྙན་ངག་གི་གཙུག་ལག་ཏུ་བསྟན་པའི་བློན་པོའི་རང་བཞིན་གྱི་ཡོན་ཏན་ཉི་ཤུ་རྩ་ལྔ་དང་ལྡན་པ་སྟེ།
བདག་ཉིད་ཀྱི་ཕུན་སུམ་ཚོགས་པ་ཡིན་པར་ཅི་རིགས་པར་གཟུང་ངོ༌། །དེ་དག་ལས་ཀྱང་ཁྱད་པར་དུ་གྱུར་པ་སྟེ། དེ་རྣམས་ཀྱི་དཔོན་པོར་གྱུར་པའི་ཕྱིར་རོ། །རིགས་པ་དང་མི་རིགས་པ་ཡོངས་སུ་ཤེས་པར་བྱ་བ་ལ་མཁས་པ་ཞེས་བྱ་བ་འདིས་ནི་ཤེས་རབ་ཅན་དུ་བསྟན་ཏོ། །ཡུན་རིང་པོར་ཡང་དྲན་པའི་མཐུ་དང་ལྡན་པ་ཞེས་བྱ་བ་ནི་ཡུན་རིང་པོར་བྱས་པ་དང༌། ཡུན་རིང་པོར་སྨྲས་པ་དང༌། ཡུན་རིང་དུ་བསམས་པ་དང༌། ཡུན་རིང་དུ་ཐོབ་པ་རྣམས་དྲན་པའོ། །གཞན་དག་ཡུན་རིང་དུ་དྲན་པའི་མཐུ་ཞེས་སྨོས་པས་དྲན་པ་ཀུན་ཏུ་དག་པ་ཉིད་དོ། །རིགས་མཐོན་པོའི་ནང་ན་གཙོ་བོར་གྱུར་པ་ཞེས་བྱ་བ་འདིས་ནི་རིགས་མཐོ་བ་སྔ་ན་མེད་པ་ཁྱད་པར་ཅན་ཉིད་དུ་བསྟན་ཏོ། །མཁས་པ་ནི་ལེ་ལོ་མེད་པའོ། །དེས་པ་ནི་ལེགས་པར་བྱེད་པ་ཉིད་དོ། །དུལ་བ་ནི་ལུས་དང་ངག་གི་ལས་དག་པའོ། །མཁས་པ་དང༌། དེས་པ་དང༌། དུལ་བ་ཉིད་ཀྱི་རྒྱན་གང་ལ་ཡོད་པ་དེ་ནི་མཁས་པ་དང༌། དེས་པ་དང༌། དུལ་བས་བརྒྱན་པའོ། །བརྟན་པ་ནི་རྟག་ཏུ་མི་འགྱུར་བའི་ཕྱིར་ཏེ། བདག་དང་གཞན་གྱི་ཕྱོགས་ལ་ཁྲོ་བ་སྤངས་པར་གྱུར་པའོ། །ཚུལ་ཁྲིམས་ལ་བརྟེན་ནས་སྤྱོད་པ་དང༌། མི་སྤྱོད་པའི་ཚུལ་གང་དང་གང་དག་ལ་ཇི་ལྟ་བ་བཞིན་དུ་འཇུག་པར་བྱ་བ་དེ་དང་དེ་དག་ལ་དེ་བཞིན་དུ་འཇུག་པའོ། །སྤྱོད་ལམ་ཕུན་སུམ་ཚོགས་པ་ཞེས་བྱ་བ་ནི་རིགས་བྱས་པའི་རྒྱུའོ། །ཚུལ་ཁྲིམས་དང༌། སྤྱོད་ཚུལ་དང༌། སྤྱོད་ལམ་ཕུན་སུམ་ཚོགས་པ་ནི་ཚུལ་ཁྲིམས་དང༌། སྤྱོད་ལམ་ཕུན་སུམ་ཚོགས་པའོ། །བརྟན་པ་དང༌། གཙང་བ་དང༌། ཚུལ་ཁྲིམས་དང༌། སྤྱོད་ཚུལ་དང༌། སྤྱོད་ལམ་ཕུན་སུམ་ཚོགས་པ་གང་ལ་ཡོད་པ་དེ་ནི་བརྟན་པ་དང༌། གཙང་བ་དང༌། ཚུལ་ཁྲིམས་དང༌། སྤྱོད་ཚུལ་དང༌། སྤྱོད་ལམ་ཕུན་སུམ་ཚོགས་པའོ། །སྡུག་བསྔལ་བཟོད་ཅིང་ཞེས་བྱ་བ་ནི་ལུས་ཀྱི་ཕུན་སུམ་ཚོགས་པའོ། །བག་ཡོད་པ་ཞེས་བྱ་བ་ནི་བྱ་བ་དང་བྱ་བ་མ་ཡིན་པ་རྗེས་སུ་འབད་པའོ། །གཡུལ་ངོར་འགྱེད་པའི་དགྲ་ཐབས་ལ་མཁས་པ་ཞེས་བྱ་བ་ནི་དམག་གི་དགོད་པའི་རིགས་པ་དང༌། ཡུལ་དང་དུས་དང༌། མདུན་དུ་བསྣུར་བ་དང༌། ཕྱིར་འགྱེད་པ་ལ་སོགས་པ་ལ་མཁས་པའོ། །རྗེ་བོ་ལ་སྙིང་ཉེ་ཞིང་ལེགས་
པར་ལྟ་བ་ཞེས་བྱ་བ་ནི་རྗེ་བོ་ལ་རྗེས་སུ་ཆགས་ཤིང་བརྟེན་པའི་གུས་པ་ཉིད་དོ། །དེ་ཉིད་ཀྱི་ཕྱིར། བཞིན་བཟངས་ཞེས་བྱ་བའི་མིང་དུ་བྱས་པའོ། །སློབ་དཔོན་སློབ་མའི་གཙོ་བོ་བཞིན། །ཞེས་བྱ་བ་ནི་འཇིག་རྟེན་ཕ་རོལ་ལ་ཕན་པའོ། །ཕ་དང་བུ་རབ་ཐུ་བོ་བཞིན། །ཞེས་བྱ་བས་ནི་འཇིག་རྟེན་འདི་ལ་ཕན་པ་ཉིད་དོ། དེ་ལྟར་འཇིག་རྟེན་གཉི་ག་ལ་ཕན་པའོ། །ལྷ་ཞེས་བྱ་བ་ལ་སོགས་པ་སྨོས་པས་ནི་ཡིད་བཞིན་གྱི་མཚོ་སྟེ། བརྟན་པའི་ཡུལ་དུ་བྱས་པའི་ཕྱིར་རོ། །དཀའ་ཐུབ་ཅན་ཞེས་སྨོས་པས་ནི་མངོན་པར་ཤེས་པའི་མཐུ་ཁྱད་པར་ཅན་གཟུང་བའི་ཕྱིར་རོ། །བདེ་བ་ཉིད་ལུས་ཡིན་པས་བདེ་བའི་ལུས་སོ། །དེའི་འདེགས་པ་ནི་བདེ་བའི་ལུས་འདེགས་པ་ཉིད་དོ། །དེ་གཉིས་སྤྱོད་པ་གཅིག་ཏུ་གྱུར་པ་གང་ཡིན་པ་དེ་ནི། བདེ་བའི་ལུས་འདེགས་སྤྱོད་པ་གཅིག་ཏུ་གྱུར་པའོ། །གྲུབ་པ་གང་ཡིན་པ་དེ་དྲང་སྲོང་ཡིན་པས་གྲུབ་པ་དྲང་སྲོང་དག་སྟེ། གང་གི་རྫུ་འཕྲུལ་གྱིས་མི་སྣང་བ་དག་གོ །གྲུབ་པའི་དྲང་སྲོང་དང༌། རིག་འཛིན་དང༌། ལྷ་རྣམས་ནི་གྲུབ་པའི་དྲང་སྲོང་དང༌། རིག་སྔགས་འཆང་དང། ལྷའོ། །དེ་རྣམས་ཀྱི་ཚོགས་ནི་གྲུབ་པ་དང༌། དྲང་སྲོང་དང༌། རིག་སྔགས་འཆང་དང༌། ལྷ་མང་པོའོ། །འདིར་ཅིའི་ཕྱིར་སྔར་བཤད་པའི་ཀླུ་མ་སྨོས་ཤེ་ན། དེ་ནི་དེས་པར་གནས་པ་ཡིན་པ་འཕྱིར་རོ། །གསེར་མཆོག་བཙོ་མའི་ཁ་དོག་འདྲ་བའི་མདོག །ཅེས་བྱ་བའི་ཚིགས་བཅད་འདིའི་བསྡུས་པའི་དོན་ནི་ལུས་དང༌། ངག་དང༌། ཡིད་ལ་བརྟེན་ནས་དེའི་གྲགས་པ་ཁྱད་པར་དུ་སྟོན་པ་ཡིན་ཏེ། གསེར་མཆོག་གཙོ་མའི་ཁ་དོག་འདྲ་བའི་མདོག །དཔལ་ལྡན་ལུས་ཞེས་བྱ་བས་ནི་ལུས་ཁྱད་པར་དུ་བསྟན་ཏོ། །དུལ་ཞིང་རིགས་པ་ཆོས་ཀྱི་ཚུལ་ལས་བྱུང༌། །ཞེས་བྱ་བས་ནི་ཡིད་ཀྱི་ལས་ཁྱད་པར་དུ་བསྟན་ཏོ། །ངེས་པར་གཞན་ཞེས་བྱ་བ་ནི་ལྷ་ལ་སོགས་པར་ཁྱད་པར་ཅན་ཞིག་སྟེ། ངང་པའི་ཚུལ་ཞེས་བྱ་བ་ནི་ནང་པའི་ཆ་ལུགས་ཅན་ནོ། །དེས་ན་ངང་
པའི་ཚུལ་ཅན་འདི་གཉིས་ངེས་པར་གཞན་ཞེས་བྱ་བར་སྟོན་ཏོ། །ཡོན་ཏན་བསྒྲགས་པ་ཞེས་བྱ་བ་ནི་ཡོན་ཏན་ཅན་བསྟན་པ་དང༌། ཡོན་ཏན་གསལ་བར་བྱེད་པ་ཞེས་བྱ་བའི་དོན་ཏེ། དེ་དང་བྲལ་བ་ད་ནི་ཕྲག་དོག་སྟེ། ཕྲག་དོག་མེད་པས་སོ། །རྒྱས་བར་གྱུར་ཞེས་བྱ་བས་ནི་གཞན་དང་གཞན་དེ་དག་གིས་གྲགས་པ་རྒྱ་ཆེར་བྱས་ཤིང་ཡོན་ཏན་བསྟན་པ་སྟེ། གང་གི་ཕྱིར་གྲགས་པ་རྒྱས་པར་གྱུར་པ་དེ་བས་ན་དད་པ་སྐྱེས་པར་གྱུར་བ་སྟེ། ཡོན་ཏན་དང་ལྡན་པའི་ཚིག་ནི་གཟུང་བར་འོས་པའི་ཕྱིར་རོ། །འདི་དག་ནི་སྔར་བསྟན་པ་རྣམས་ཏེ། གྲུབ་པ་དྲང་སྲོང་ལ་སོགས་པ་དང། གང་ཡང་གཞན་དག་ལས་དེའི་གྲགས་པ་ཐོབ་པར་གྱུར་པ་དེས་གཅིག་ལ་གཅིག་བརྒྱུད་དེ་རྒྱས་པར་འགྱུར་ཞེས་བྱ་བའི་དོན་ཏོ། །སྐྱེས་དང་འདྲ་བར་གྱུར་ཞེས་བྱ་བ་ནི་གང་ལས་ཐོས་པའི་གྲགས་པ་དེ་ཡང་གཞན་དག་ལ་སྟོན་ཏེ། དེས་ཀྱང་གཞན་དག་ལ་བརྟེན་པ་ཡིན་པས་ཉེ་བར་བརྒྱུད་པ་དེས་ན་སྐྱེས་དང་མཉམ་པར་གྱུར་པའོ། །བློན་པོ་དང་བྲམ་ཟེ་རྒན་པོ་སྨོས་པ་ནི་ཚོགས་པའི་ནང་དུ་སྨྲ་བར་འོས་པ་དང༌། ཡོན་ཏན་སྒྲོགས་པའི་ཕྱིར་དང༌། ཤེས་རབ་བཀུར་བའི་ཕྱིར་རོ། །གཙུག་ལག་དུ་མ་ལ་གོམས་ཤིང་མཁས་པའི་བློ་གང་ལ་ཡོད་པ་དེ་ནི་གཙུག་ལག་དུ་མ་ལ་གོམས་ཤིང་བློ་དང་ལྡན་པ་རྣམས་སོ། །དེ་ལ་འདིས་ནི་ལྷན་ཅིག་སྐྱེས་པའི་དུལ་བ་དང་ཤེས་རབ་དང་ལྡན་པ་ཡིན་ནོ་ཞེས་བཤད་དོ། །བློན་པོ་བཀའ་ལ་གཏོགས་པ་ཞེས་བྱ་བ་ནི་བློ་ལ་གྲོགས་བྱེད་པའོ། །སྤྱན་སྔར་བྲིམ་དུ་རུང་བ་ཞེས་བྱ་བ་ནི་ལྷན་ཅིག་སྨྲ་བ་དང༌། རབ་ཏུ་དགའ་བར་བྱ་བའི་གཏམ་བྱར་རུང་བའོ། །བདེ་བའི་རྒྱུ་ནི་བདེ་བར་འགྱུར་བའོ། །བདེ་བའི་རྒྱུ་ཉིད་ཡོན་ཏན་ཡིན་པས་བདེ་བར་འགྱུར་བའི་ཡོན་ཏན་ཏོ། །བདེ་བའི་རྒྱུའམ་ཁྱད་པར་དུ་གྱུར་པའི་བདེ་བ་སྐྱེད་པའི་རྐྱེན་ནི་མཆོག་གོ །དེ་བས་ན་སྔར་གྱི་བདེ་བར་འགྱུར་བའི་ཡོན་ཏན་ཉིད་ཁྱད་པར་དུ་གྱུར་པ་དེ་ཐོས་ན་བདེ་བར་འགྱུར་བའི་ཡོན་ཏན་མཆོག་ཐོས་པ་ཡིན་ཏེ། དེ་བས་ན་དེ་གཉིས་མཆི་བ་ལགས་ཏེ། བདེ་བའི་གཞིར་གྱུར་པས་འགུགས་པར་བྱེད་པའི་ཕྱིར་རོ། །བདེ་བ་ལ་གནས་པར་འདོད་པའི་དབང་གིས་ནི་གང་གི་ཕྱིར། ཚངས་བའི་འཇིག་རྟེན་དུ་སྐྱེས་བ་ལས་ཀྱང་རིགས་པར་མཐོང་
བའོ། །བཀའ་མཆིད་གདའ་བ་ཞེས་བྱ་བ་ནི་བདེ་བར་འགྱུར་བའི་ཡོན་ཏན་སྟོན་པ་ཡིན་ནོ། །ཡོན་ཏན་ཁྱད་པར་ཅན་དུ་འཕགས་ཤིང་བཟང་བའི་ཞེས་བྱ་བ་ནི་དེ་ལས་མཆོག་ཏུ་གྱུར་པའོ། །མི་འཇིགས་པ་སྦྱིན་པའི་སྒྲ་བསྒྲགས་པ་ཞེས་བྱ་བ་ཡང་ཅི་ནས་ཀྱང་བྱ་བའི་རིགས་པ་ཡིན་ནོ། །བདེ་བའི་ཡོ་བྱད་ཀྱི་ཡོན་ཏན་ཁྱད་པར་ཅན་ཐོས་ནས་ཞེས་བྱ་བ་ནི་སྔར་བསྟན་པ་བཞིན་དུ་ཤེས་པར་བྱའོ། །ལྷ་གཅིག་སེམས་ཅན་ཕལ་ཆེར་ནི། །ཞེས་བྱ་བ་ནི་ཚིགས་བཅད་འདི་ནི་བདེ་བར་འགྱུར་བའི་ཡོན་ཏན་གྱི་མཆོག་ལ་གཅིག་ཏུ་ཆགས་པ་ཡིན་ཡང་བདེ་བའི་རྒྱུས་འགུགས་པ་ཡིན་པར་བསྟན་ཏེ། དེ་ལ་འདྲེན་པའི་ཕྱིར་རོ། །བདག་ཉིད་ཀྱི་བདེ་བའི་རྒྱུར་གྱུར་པའི་ཡིད་བཞིན་གྱི་མཚོ་དེ་ཡོངས་སུ་སྤངས་ནས། ཇི་ལྟར་མཚོ་དེར་འོང་ཞེས་བྱ་བའི་ཚིག་གི་སྐབས་དེའི་ལན་བསྟན་པའི་ཕྱིར། ཡིད་བཞིན་མཚོའི་ཡོན་ཏན་ལ་འགྲན་དུ་རུང་བ་ཞེས་བྱ་བ་ཡིན་ཏེ། ཡོན་ཏན་རྒྱ་ཆེ་བ་ཞེས་བྱ་བའི་དོན་ཏོ། །ཡོན་ཏན་རྒྱ་ཆེ་བ་དེ་ཡང་མེ་ཏོག་པདྨ་ཞེས་བྱ་བ་ལ་སོགས་པའི་ཚིག་གིས་བསྟན་པ་ཡིན་ནོ། །ལྗོན་ཤིང་མེ་ཏོག་བཟང་ལྡན་ཞེས་བྱ་བ་ལ་སོགས་པའི་ཚིགས་བཅད་དགུས་ནི་མཚོ་དེ་ཀུན་ནས་དགའ་བ་ཉིད་དུ་བསྟན་པའི་ཕྱིར་རོ། །ལྗོན་ཤིང་མེ་ཏོག་བཟང་ལྡན་ཞེས་བྱ་བའི་ཚིགས་བཅད་འདིས་ནི་མཚོའི་མཐའ་མ་མཛེས་པའི་དབང་དུ་བྱས་པ་སྟེ། མཐའ་མ་ཡོངས་སུ་བསྐོར་བ་གང་ཡིན་པ་དེ་མཐའ་མ་ཡོངས་སུ་བསྐོར་བའོ། །ཆུའི་རླབས་རྣམས་འཁྲུགས་པ་ནི་ཆུའི་རླབས་འཁྲུགས་པའོ། །དེས་གཡོ་བར་གྱུར་པ་གང་ཡིན་པ་དེ་ནི་ཆུའི་རླབས་འཁྲུགས་པས་གཡོ་བར་འགྱུར་བའོ། །ཟླ་བའི་འོད་ཀྱིས་ཁ་ཕྱེ་བ། །ཞེས་བྱ་བ་ནི་ཟླ་འོད་ཀྱིས་ཁ་ཕྱེ་བའོ། །ཁ་བྱེ་བ་ནི་བསྐུལ་བ་ལྟ་བུ་ཡིན་ཏེ། ཇི་ལྟར་གང་གིས་གཉིད་ཀྱིས་ལོག་པ་ལ། །བསྐུལ་བར་འགྱུར་བ་དེ་བཞིན་དུ་ཀུ་མུ་ཏ་དག་ཀྱང་ཁ་འབྱེད་པའི་རྒྱུར་གྱུར་པའི་ཕྱིར། ཁ་འབྱེད་པ་ཞེས་བརྗོད་དེ། ཟླ་བའི་འོད་ཀྱིས་ཁ་ཕྱེ་བ་ནི་ཇི་ལྟར་གཉིད་ལོག་པ་ལས་བསླང་བ་ལྟ་བུ་ཡིན་ཏེ། རབ་ཏུ་སད་པར་བྱེད་པ་ཞེས་བྱ་བའི་དོན་ཏོ། །པདྨ་རྣམས་ནི་དགོད་པ་བཞིན། །ཞེས་བྱ་བ་དང༌། ཁ་ཅིག་ན་ནི་ཟླ་འོད་ཀྱིས། །ཞེས་བྱ་
བའི་ཚིགས་བཅད་གཉིས་ཀྱིས་ནི་ཆུའི་ནང་དུ་མེ་ཏོག་ལ་སོགས་པས་མཚོ་མཛེས་པར་བསྟན་པའོ། །པདྨ་ཨུཏྤལ་ཕྱེ་བ་རྣམས། །ཞེས་བྱ་བའི་ཚིགས་བཅད་འདིས་ནི་མཚོའི་མཐའ་མར་གྱུར་པ་མཛེས་པར་ལྡན་པའི་ཕྱིར་རོ། །རླབས་ཉིད་སོར་མོ་ཡིན་པ་སྟེ། དེས་བྲིས་པ་ནི་བཀོད་པའི་ཞེས་བྱ་བའི་དོན་ཏེ། རླབས་ཀྱི་སོར་མོས་བྲིས་པའོ། །ཐམས་ཅད་དུ་ཁྱད་པར་མཛེས་པའི་དབང་དུ་བྱས་ནས། པདྨ་ཨུཏྤ་ལ་འདབ་མ་དག །ཅེས་བྱ་བའི་ཚིགས་བཅད་སྨོས་སོ། །ཆུའི་ནང་ཉིད་དུ་མཛེས་པའི་དབང་དུ་བྱས་ནས། ཆུ་ནི་རབ་གསལ་མི་གཡོ་བས། །ཞེས་བྱ་བའི་ཚིགས་བཅད་ཡིན་ནོ། །མཆོའི་ལྷན་ཅིག་སྐྱེས་པའི་མི་ཟད་པས་མཛེས་པའི་དབང་དུ་བྱས་ནས། ལ་ལར་མུ་ཏིག་ཕྲེང་ཆད་བཞིན། །ཞེས་བྱ་བ་དང༌། རིག་འཛིན་ན་ཆུང་ཞེས་བྱ་བ་དང༌། ཟླ་བའི་ཆུང་མ་སྐར་མ་རྣམས། །ཞེས་བྱ་བའི་ཚིགས་བཅད་གསུམ་ཡིན་ཏེ། དེས་ན་གནས་སུ་རུང་ཞིང་མཛེས་པར་བྱས་པའི་དབང་དུ་བྱས་པའོ། །ཟླ་བའི་ཆུང་མ་སྐར་མ་རྣམས། །ཞེས་བྱ་བའི་ཚིགས་བཅད་ཀྱི་ཕྱེད་ཀྱིས་ནི་མཐོ་རིས་སུ་སྐྱེས་པའི་སེམས་ཅན་གྱི་ཡང་ཉེ་བར་ལོངས་སྤྱོད་དུ་རུང་བ་ལྟ་བུར་ཡོངས་སུ་བརྟགས་ཤིང་རྗེས་སུ་མཐུན་པའོ། །བདེ་བའི་ཡོ་བྱད་དགག་པ་མེད་པ་ཞེས་བྱ་བ་ལ། དགག་པ་མེད་པ་ནི་བྱ་བ་ཐམས་ཅད་ཀྱི་ཐུན་མོང་དུ་གྱུར་པའི་ཕྱིར་ཏེ། བདེ་བའི་ཡོ་བྱད་དང༌། མི་འཇིགས་པ་བྱིན་པས་སོ། །རྒྱལ་པོས་བྱ་རྣམས་ཀུན་ལ་བྱིན། །ཞེས་བྱ་བ་འདིས་ནི་དགག་པ་མེད་པ་ཉིད་བསྟན་ཏོ། །མི་འཇིགས་ཡོན་དང་བཅས་པའི་ཡིད་བཞིན་གྱི་མཚོ་གང་ཡིན་པ་དེ་ནི་མི་འཇིགས་ཡོན་དང་བཅས་པ་སྟེ། འདིས་ནི་བདེ་བའི་ཡོ་བྱད་ཉིད་བསྟན་ཏོ། །སྤྲིན་གྱིས་བྱས་པའི་མུན་པ་ནི་སྤྲིན་གྱི་མུན་པའོ། །སྤྲིན་གྱིས་བསྒྲིབས་པ་ཉིད་ཡོལ་བ་ཡིན་པས་སྤྲིན་གྱི་མུན་པ་ཡོལ་བདག་གོ །སྤྲིན་གྱི་མུན་པ་ཡོལ་བ་ལྟ་བུས་བསྒྲིབས་པ་གང་ཡིན་པ་དེས་ན་ཕྱོགས་རྣམས་ཏེ། མུན་པ་ཡོལ་བ་ལྟར་བསྒྲིབས་པ་མེད་པའི་ཕྱོགས་རྣམས་སོ། །ཁ་བྱེ་བར་གྱུར་པའི་མེ་ཏོག་པདྨ་ནི་མེ་ཏོག་པདྨ་མང་པོ་ཁ་བྱེ་བའོ། །དེས་མཛེས་པར་བྱས་པ་གང་ཡིན་པའི་མཚོ་དེ་ནི་མེ་ཏོག་པདྨ་མང་པོ་ཁ་བྱེ་བས་མཛེས་པར་གྱུར་པའོ། །ཆུ་
རྣམས་རབ་ཏུ་དང་ཞིང་ཡིད་དུ་འོང་བར་གྱུར་པ་ནི་ཆུ་རྣམས་རབ་ཏུ་དང་ཞིང་ཡིད་དུ་འོང་བའོ། །རབ་ཏུ་འཕེལ་བར་ནུས་པ་དང༌། རབ་ཏུ་ཚོགས་པ་དང༌། རྒྱས་པར་གྱུར་པའི་འོད་ཟེར་རབ་ཏུ་འཕེལ་བའོ། །རྣམ་པ་སྣ་ཚོགས་པའི་མེ་ཏོག་ནི་མེ་ཏོག་རྣམ་པ་མང་པོའོ།། མེ་ཏོག་དང་རྣམ་པ་སྣ་ཚོགས་གཉིས་ཀྱི་ཕུན་སུམ་ཚོགས་པ་ནི་མེ་ཏོག་རྣམ་པ་མང་པོ་ཕུན་སུམ་ཚོགས་པའོ། །མེ་ཏོག་རྣམ་པ་མང་པོ་ཕུན་སུམ་ཚོགས་པ་ཉིད་རྒྱན་ཡིན་པས་མེ་ཏོག་རྣམ་པ་མང་པོ་ཕུན་སུམ་ཚོགས་པས་བརྒྱན་པ་དང་ལྡན་པའོ། །བྱའི་ཚོགས་ཀྱི་ཅ་ཅོ་ནི་མང་པོའི་སྒྲའོ། །བྱ་མང་པོའི་སྒྲ་སྒྲོགས་པ་ནི་སྒྲ་འབྱིན་པའོ། །རླབས་རྣམས་ཀྱི་ཕྲེང་བ་བཀོད་པ་ནི་རླབས་ཀྱི་ཕྲེང་བ་འཁྲིགས་པའོ། །དེས་བྱས་བ་གང་ཡིན་པ་དེ་ནི་རླབས་ཀྱི་ཕྲེང་བས་བསིལ་བར་བྱས་པ་སྟེ། སེར་བུ་བསིལ་ཞིང་གྲང་བ་ལྡན་པ་གང་ཡིན་པ་དེས་སོ། །དྲི་ཞིམ་པོ་དང་ངད་ལྡན་པ་གང་ཡིན་པ་དེ་ནི་དྲི་ཞིམ་པོའི་ངང་ལྡན་བའོ། །མེ་ཏོག་པདྨ་དང་ཨུཏྤ་ལ་རྣམས་ཀྱི་དྲི་ཞིམ་པོའི་ངད་ལྡང་བ་ནི་མེ་ཏོག་པདྨ་དང༌། ཨུཏྤ་ལའི་དྲི་ཞིམ་པོའི་ངད་ལྡང་བའོ། །ཁོ་ར་ཁོར་ཡུག་ཏུ་འཕྲོ་བའི་མེ་ཏོག་པདྨ་དང༌། ཨུཏྤ་ལའི་དྲི་ཞིམ་པོའི་ངད་ལྡང་བ་དེ་ནི་ཁོ་ར་ཁོར་ཡུག་ཏུ་མེ་ཏོག་པདྨ་དང༌། ཨུཏྤ་ལའི་དྲི་ཞིམ་པོའི་དང་ལྡང་བའོ། །རང་གི་ངང་པའི་ཚོགས་རྣམས་ཀྱི་རྗེས་སུ་དྲན་པའམ། རང་གི་ངང་པའི་ཚོགས་ལ་རྗེས་སུ་དྲན་པ་ནི་རང་གི་དང་བའི་ཚོགས་རྣམས་རྗེས་སུ་དྲན་པའོ། །ཇི་ལྟར་ན་རང་གི་ངང་བའི་ཚོགས་རྣམས་རྗེས་སུ་དྲན་པར་གྱུར་ཅེ་ན། སྨྲས་པ། ཨེ་མའོ་ཞེས་བྱ་བ་ལ་སོགས་པ་དང༌། འཇིག་རྟེན་པ་ནི་ཕལ་ཆེར་ཞེས་བྱ་བ་ཡིན་ནོ། །ནམ་ཡང་ཕྱིའི་བདེ་བར་ནི་མི་འགྱུར་མོད་ཀྱི། རྒྱུའི་མིང་འབྲས་བུ་ལ་བཏགས་ནས་བདེ་བའི་རྒྱུ་ནི་ཐུན་མོང་ཡིན་ཏེ། གང་སྐྱེ་པོ་ཐམས་ཅད་ཀྱི་ཐུན་མོང་དུ་ལོངས་སྤྱོད་པའོ། །གལ་ཏེ་སྐྱེ་བོ་ཀུན་གྱི་ཐུན་མོང་གི་བདེ་བའི་རྒྱུ་ཡིན་ན་ནི་སེར་སྣ་འབྱུང་བར་འགྱུར་ཏེ། དངོས་པོ་འདི་ཀུན་དུ་འཛིན་པ་ཡིན་ནོ། །དེ་བས་ན་ཐོག་མར་མཛའ་བཤེས་དྲན་པར་འགྱུར་བ་ཡིན་ཏེ། དེའི་རྒྱུ་བསྟན་པའི་ཕྱིར་སྨྲས་པའོ། །
བྱམས་ཤིང་རྗེས་སུ་ཆགས་པའི་ཕྱིར་ཏེ། བྱམས་ཤིང་རྗེས་སུ་ཆགས་པའི་རྒྱུ་དེས་སོ། །སྤྱི་ཡི་བདེ་བ་མྱོང་ནས་ནི། །ཞེས་བྱ་བ་ནི་རྐྱེན་ལས་སྐྱེས་བར་གྱུར་པའི་བད་བ་ནི་སྤྱིའི་ཞེས་བརྗོད་དོ། །ཡང་ན་བདེ་བའི་རྒྱུ་ལ་འབྲས་བུ་བཏགས་བ་སྟེ། རྒྱུ་ལ་འབྲས་བུ་བདེ་བ་བཏགས་ནས་སྤྱི་ཞེས་སྨོས་པས་ནི་བྱེ་བྲག་མེད་པ་སྟེ། ཐམས་ཅད་ཀྱི་ཐུན་མོང་དུ་ལོངས་སྤྱོད་པའི་ཕྱིར་གང་གཅིག་ཉིད་ཀྱི་བདེ་བའི་རྒྱུར་གྱུར་པ་བཞིན་དུ་དེ་ལས་གཞན་དག་གི་ཡང་ངོ༌། །བྱམས་པའི་རྗེས་སུ་འགྲོ་བ་ནི་བྱམས་ཤིང་རྗེས་སུ་ཆགས་པའོ། །དེས་ན་བྱམས་པ་སྟེ། གང་ལ་རྗེས་སུ་ཆགས་པ་དེས་བྱམས་ཤིང་རྗེས་སུ་ཆགས་པའི་རྒྱུས་སོ། །དེ་ན་ཞེས་བྱ་བ་ནི་ཡིད་བཞིན་གྱི་མཚོ་ནའོ། །ཇི་སྲིད་འདོད་པ་ཞེས་བྱ་བ་ནི་ཇི་ཙམ་འདོད་པའོ། །འཁོད་ནས་ཞེས་བྱ་བ་ནི་ལོངས་སྤྱད་ནས་སོ། །དབྱར་གྱི་དུས་ལ་བབས་ཞེས་བྱ་བ་ལས་བརྩམས་ཏེ། གློག་རྣམས་གཡོ་བ་ནི་གློག་འགྱུ་བ་དང༌། གློག་འགྱུ་བའི་མཚོན་ཆ་འདེབས་པ་འདྲ་བ་གང་ཡིན་པ་དེ་ནི་གློག་འགྱུ་བ་མཚོན་ཆ་འདེབས་པ་འདྲ་བའོ། །དེ་ལ་ཡོངས་སུ་རྫོགས་པ་རྨ་བྱའི་མདོངས་ནི་རྨ་བྱའི་མདོངས་རྒྱས་པའོ། །དེས་མཛེས་པ་གང་ཡིན་པ་དེ་ནི་རྨ་བྱའི་མདོངས་མཛེས་པར་གྱུར་པའོ། །དེ་དག་གི་ཅོང་ཅོང་གི་སྒྲ་འབྱིན་པ་ནི་རྨ་བྱའི་སྒྲ་ཅོང་ཅོང་དུ་འབྱིན་པའོ། །དེས་མགུ་བར་བྱེད་པ་ནི་སྒྲ་བསྒྲགས་པས་ཞེས་བྱ་བའི་དོན་ཏོ། །གར་གྱི་བྱེད་པ་ནི་གར་བྱེད་པ་སྟེ། དེ་དག་བྱེད་པའོ། །ཕྲ་མོ་ཉིད་བྱ་ཡིན་པས་བྲན་ནོ། །ཡང་ན་བྱ་དང་བྲན་མང་པོ་ནི་བྱ་བྲན་མང་པོའོ། །མེ་ཏོག་ཀ་དམ་པ་དང༌། སརྫ་དང༌། ཨརྫུ་ན་དང༌། ཀེ་ཏ་ཀའི་དྲི་ཞིམ་པོས་བསྒོས་པ་གང་ཡིན་པ་དེ་ནི་མེ་ཏོག་ཀ་དམ་པ་དང༌། སརྫ་དང༌། ཨརྫུ་ན་དང༌། ཀེ་ཏ་ཀའི་དྲི་ཞིམ་པོས་བསྒོས་པའོ། །གླེང་ལངས་པ་ནི་བརྩམས་པའོ། །ཡུལ་དང་ཕྱོགས་ནི་ཡུལ་དང་ཕྱོགས་སོ། །དེ་རྣམས་ཀྱི་གཏམ་ནི་ཡུལ་དང་ཡུལ་ཕྱོགས་རྣམས་ཀྱི་གཏམ་མོ། །དེས་ཞེས་བྱ་བ་ནི་ངང་པ་ཁྱོ་ཤུག་གཉིས་ཀྱིས་སོ། །བསྔགས་པ་རྨད་དུ་བྱུང་བར་བཟང་པོའི་མཚོ་གང་ཡིན་པ་དེ་ནི་རྨད་དུ་བྱུང་བར་བཟང་བའི་ཡོན་ཏན་རྣམས་སོ། །ཡོན་ཏན་ཆེ་བ་བརྗོད་བར་མི་ནུས་པ་སྟེ། བརྗོད་ཀྱིས་མི་ལང་བའི་ཡོན་
ཏན་གང་ལ་ཡད་པ་དེ་ནི་ཡོན་ཏན་བརྗོད་ཀྱིས་མི་ལང་བའོ། །འཇིགས་པ་དང་བག་ཚ་བ་ནི་འཇིགས་ཤིང་བག་ཚ་བའོ། །འཇིགས་པ་དང་བག་ཚ་བ་མ་མཆིས་པ་གང་ཡིན་པ་དེ་ནི་འཇིགས་པ་དང༌། བག་ཚ་བ་མ་མཆིས་པའོ། །གྲོས་འདྲི་བའི་ཚིག་དང་ཡི་གེ་གསལ་བ་གང་ཡིན་པ་དེ་ནི་གྲོས་འདྲི་བའི་ཚིག་དང་ཡི་གེ་གསལ་བའོ། །ཇི་ལྟར་ཆགས་པའི་གནས་ཡིན་ཞེ་ན་སྨྲས་པ། ཤ་བཟར་རུང་བ་དང༌། བལྟ་ན་སྡུག་པའི་ཕྱིར་ཏེ། བལྟ་ན་སྡུག་པ་ནི་ཡིད་དུ་འོང་བའོ། །ཤ་བཟར་རུང་བ་ནི་བཟའ་བར་བྱ་བ་ཡིན་པའི་ཕྱིར་རོ། །འདི་གཉིས་ཀྱི་རྒྱུས་བདག་ཅག་གཟུང་བ་དང་གསད་པར་འོས་པ་ཉིད་ཡིན་ཏེ། འདིས་ནི་བདག་ཅག་ཉིད་ཀྱི་རང་བཞིན་བསྟན་ཏོ། །འདིས་ནི་ཅིས་ཀྱང་ཕོངས་པ་མ་མཆིས་སོ་ཞེས་བྱ་བ་ནི་ཅི་སྟེ་བདག་ཉིད་ཀྱི་གནས་ཆགས་པར་བྱ་བ་མེད་ན་ནི་གནས་ངན་པའི་ཕྱིར་དེ་ཡོངས་སུ་གཏང་བར་བྱ་བ་ཡིན་ན་དེ་ཡང་མ་ཡིན་ནོ། །གནས་དེར་འགྲོ་བའི་ཉེས་དམིགས་བསྟན་པའི་ཕྱིར། །ཚིག་འཇམ་པོ་བཅོས་མ་ཞེས་བྱ་བ་ལ་སོགས་པ་ཡིན་ཏེ། ཕྱི་བཞག་ཅན་དུ་སྨྲ་བ་ནི་ཕྱི་བཞག་ཅན་དུ་སྨྲ་བའོ། །ཚིག་འཇམ་པོ་བཅོས་མ་ཉིད་ཕྱི་བཞག་ཅན་དུ་སྨྲ་བ་ནི་ཚིག་འཇམ་པོ་བཅོས་མ་ཕྱི་བཞག་ཅན་དུ་སྨྲ་བའོ། །རང་བཞིན་ངན་པའི་དངོས་པོ་ཉིད་གནོད་པར་སེམས་པ་ཉིད་ཡིན་པས་གནོད་པར་སེམས་པའི་རང་བཞིན་ངན་པའོ། །ཚིག་འཇམ་པོ་བཅོས་མ་དང་ཕྱི་བཞག་ཅན་དུ་སྨྲ་བ་གཉིས་ཀྱིས་མི་མངོན་པར་བྱས་པའི་གནོད་པར་སེམས་པའི་རང་བཞིན་གང་ཡིན་པ་པ་དེ་ནི་ཚིག་འཇམ་པོ་བཅོས་མ་ཕྱི་བཞག་ཏུ་སྨྲ་ལ་གནོད་པར་སེམས་པའི་རང་བཞིན་མི་མངོན་པར་བྱེད་པའོ། །ཆུང་བ་དང་དམན་པའི་སྙིང་རྗེ་གང་ལ་ཡོད་པ་དེ་ནི་སྙིང་རྗེ་ཆུང་བའོ། །དོན་གྱི་རྗེས་སུ་འགྲོ་བ་ནི་དོན་མཐུན་པར་བྱེད་པའོ། །སྨྲ་བ་དང་སེམས་པ་མཐུན་པར་བྱེད་པ་གང་ཡིན་པ་དེ་ནི་སྨྲ་བ་དང་སེམས་པ་མཐུན་པའོ། །ཕལ་ཆེར་ཞེས་བྱ་བ་ནི་བྱ་དང་རི་དགས་ཐམས་ཅད་ནི་མ་ཡིན་པ་སྟེ། དེ་ཡང་དེ་དག་ལས་མི་རྣམས་ཀྱིས་བསླབས་པ་ཁ་ཅིག་ནི་སྨྲ་བ་དང༌། སེམས་པ་མཐུན་པར་བྱེད་པ་མ་ཡིན་པས་སོ། །མིའི་ནང་ན་ཁ་ཅིག་ཅེས་བྱ་བ་ནི་དམ་པ་རྣམས་མ་གཏོགས་པར་
ཏེ། དེ་ནི་སྨྲ་བ་དང༌། སེམས་པ་མཐུན་པར་བྱེད་པ་ཉིད་དོ། །དེ་དག་ལས་བཟློག་པ་ནི་དེ་ལས་བཟློག་པའི་ཚུལ་ཏེ། དེ་ལས་མཁས་པ་དེ་ནི་དེ་ལས་བཟློག་པའི་ཚུལ་ལ་མཁས་པ་སྟེ། སྨྲ་བ་དང་སེམས་པ་མཐུན་པར་བྱེད་པའམ། སྨྲ་བ་དང་སེམས་པ་མི་མཐུན་པ་མེད་པ་ལས་སོ། །དེ་ལས་བཟློག་པ་མཁས་པ་ཉིད་བསྟན་པའི་ཕྱིར། འཇམ་ཞིང་སྙན་པའི་ཚིག་སྨྲ་ཡང༌། །ཞེས་བྱ་བའི་ཚིགས་བཅད་ཡིན་ནོ། །ད་ལྟར་ནི་སྙན་ལ་མ་འོངས་པ་ན་ནི་དོན་དང་མཐུན་པ་མེད་ཅིང་སྐྱོན་དང་བཅས་པས་གནོད་པ་ཡིན་ཏེ། འདིར་སྙན་པ་སྨྲ་བ་ཡིན་ན་ཡང་སྐྱོན་དང་བཅས་སོ་ཞེས་བྱ་བར་བསྟན་ཏེ། །ཅིའི་ཕྱིར་དེ་ལྟར་སྨྲ་ཞེ་ན། དེ་ཉིད་སྨྲས་པ། ཁེ་འཚལ་ཕྱིར་ཞེས་བྱ་བ་ཡིན་ཏེ། སྤོགས་འགྲུབ་པ་དེ་ནི་ཁེ་འདོད་པ་སྟེ། དེ་ནི་ཚོང་པ་རྣམས་ཀྱང་རང་གི་ནོར་འགེད་པར་བྱེད་དེ། ཁེ་འདོད་པའི་ཕྱིར་རོ། །དེ་བས་ལྷན་ཅིག་དེ་ཙམ་ཞེས་བྱ་བ་ནི་ཕྱི་བཞག་ཅན་དུ་སྨྲ་བ་ཙམ་གྱིས་སོ། །ཡང་ན་ཚིག་འཇམ་པོ་ལ་སོགས་པའོ། །དགོས་པ་མཆིས་ཀྱང་ཞེས་བྱ་བ་ནི་དེར་སོང་ཞིང་གནས་པས་ཅི་ཞིག་འགྲུབ་པར་གྱུར་ཀྱང་མི་སྨྲ་ན་ནི། དེ་མེད་པ་ལྟ་སྨོས་ཀྱང་ཅི་དགོས་ཏེ། སྐྱོན་དང་བཅས་ཤིང་མི་རིགས་པ་ཉིད་ཀྱི་ཕྱིར་རོ། །སྐྱོན་དང་བཅས་ཤིང་ཚུལ་མ་ཡིན་པ་གང་ཡིན་པ་དེ་ནི་སྐྱོན་དང་བཅས་ཤིང་མི་རིགས་པའོ། །ཟླ་བ་དང་རྒྱུ་སྐར་དང་སྐར་མ་ནི་ཟླ་བ་དང་རྒྱུ་སྐར་དང་སྐར་མ་སྟེ། སྟོན་གྱི་དུས་ལ་བབ་ཅིང་དྲི་མ་མེད་པའི་སྐར་མ་དང་རྒྱུ་སྐར་གྱི་རྒྱན་གང་ལ་ཡོད་པ་ཉིད་དེ་དེ་བས་ནའོ། །ངང་པའི་ཚོགས་མང་པོ་ཞེས་བྱ་བ་ནི་ངང་པའི་ཁྱུ་མང་པོས་མཚོ་དེར་འདོད་པར་བྱ་བའི་གཏམ་བརྗོད་དེ། འདོང་བ་ནི་མཚོ་དེར་འགྲོ་བའི་ཕྱིར་རོ། །ཡིད་དུ་འོང་བའི་བཀོད་པ་ཡིན་བས་ཡིད་དུ་འོང་བའི་བཀོད་པའོ། །ཡོན་ཏན་མཉམ་པ་མེད་པ་ནི་ཡོན་ཏན་མཚུངས་པ་མེད་པར་གྱུར་པའོ། །གསེར་གྱི་འདབ་མ་ལྟར་མཛེས་པའི་འདབ་མ་གང་ལ་ཡོད་པ་དེ་ནི་གསེར་གྱི་འདབ་མ་ལྟར་མཛེས་པའི་འདབ་མའོ། །གདོང་དང་རྐང་པ་གཉིས་མཛེས་པ་ནི་གདོང་དང་རྐང་པ་གཉིས་མཛེས་པ་སྟེ། གསེར་བཙོམ་བས་ཀྱང་ལྷག་པར་མཛེས་སོ། །དེ་ཡང་ཚད་ལྷག་པ་དང་ལེགས་པའི་ལུས་ཅན་གང་ཡིན་པ་དེ་གཉིས་སོ། །
མཁས་པར་གྲགས་པ་གང་ཡིན་པ་དེ་ནི་དེ་གཉིས་གཟུང་བའི་ཕྱིར་རོ། །ངང་པའི་མཆོག་དེ་གནས་དང་སྤྱོད་ཡུལ་ཞེས་བྱ་བ་ནི་གནས་པའི་ཕྱོགས་ས། །ཉེས་སུ་དོགས་པ་མེད་པ་ཡིན་ཏེ། ཅིའི་ཕྱིར་ཞེ་ན། བྲིད་པའི་ཐབས་མཁས་པའི་ཕྱིར་རོ། །བག་མེད་པ་ཉིད་བརླག་པ་ཡིན་པས་བག་མེད་བརླག་པའོ། །དེ་བག་མེད་བརླག་པའི་འབྱུང་གནས་ཡིན་པས་ན་འབྱུང་ཁུང་ངོ༌། །དེ་ལྟ་བུར་ཞེས་བྱ་བ་ནི་བཅིང་བའི་རྣམ་པར་རོ། །འཇིགས་པ་དང་བཅས་པ་ཡིན་ནོ། །ཞེས་བྱ་བ་ནི་བདག་ཉིད་བཅིངས་སོ་ཞེས་བརྗོད་པའི་ཚིག་དེས་གཞན་མི་བདེ་བར་འགྱུར་བས་དེ་ལྟར་སྨྲས་པའོ། །ཡང་ན་ཉམས་ཉེས་པར་གྱུར་པའི་ཚུལ་ཏེ། བདག་ཉིད་བཅིངས་སོ་ཞེས་བསྒྲགས་ན་ཡང་འདིར་ཉེས་པ་མེད་དོ། །འཇིགས་པས་སྐྲག་ལ་བརྟབས་པ་གང་ཡིན་པ་དེ་ནི་འཇིགས་ཤིང་སྐྲག་ལ་བརྟབས་པའོ། །བྱམས་པས་བཅིངས་པའི་ཡིད་ནི་རང་གི་སྲོག་དང་བྲལ་བ་ཡང་མི་སེམས་སོ། །གང་གི་ཕྱིར་ཞེ་ན། རང་གི་སྲོག་དང་བྲལ་བའི་སྡུག་བསྔལ་ནི་ཤིན་ཏུ་ཆེ་བ་ཡིན་མོད་ཀྱང༌། དེ་བས་ཀྱང་ཤིན་ཏུ་ཤས་ཆེ་བའི་སྡུག་བསྔལ་གྱིས་ཞེས་སྦྱར་ཏེ། མྱ་ངན་དང་སྡུག་བསྔལ་ནི་མྱ་ངན་དང་སྡུག་བསྔལ་ལོ། །སྡུག་བསྔལ་ནི་ལུས་ཀྱིའོ། །མྱ་ངན་སེམས་ཀྱི་སྟེ། དེ་དག་ནི་གང་གི་ཕྱིར་ཉམས་ཉེས་པས་བྱས་པའོ། །སོང་ཤིག་སོང་ཤིག་ཅེས་བྱ་བའི་ཚིགས་བཅད་ཀྱི་བསྡུས་པའི་དོན་ནི་དེ་ལ་གནོད་པར་འགྱུར་བའི་ཕྱིར་དང༌། བདག་གི་ཉམས་ཉེས་པའི་གྲོགས་མི་ནུས་པའི་ཕྱིར་རོ། །ཇི་ལྟར་བཤད་པའི་རྒྱུ་དེ་གཉི་གའི་གནས་སྐབས་ཀྱང་མི་རིགས་པར་བསྟན་པའི་ཕྱིར། འདི་ན་མཆིས་ཀྱང་འགུམ་བར་ངེས་མ་མཆིས། །ཞེས་བྱ་བའི་ཚིགས་བཅད་སྨོས་སོ། །སོང་ཤིག་སོང་ཤིག་ཅེས་བྱ་བའི་ཚིགས་བཅད་དེར་གང་བསྟན་པ། དེ་གཉིས་ཀྱི་ལན་བསྟན་པའི་ཕྱིར། འདི་ན་མཆིས་ཀྱང་ཞེས་བྱ་བའི་ཚིགས་བཅད་ཕྱེད་ཀྱིས་བསྟན་ཏེ། འདི་ན་འདུག་པའི་མི་རིགས་སོ་ཞེས་བྱ་བའི་ལན་ནི་འདི་ན་མཆིས་པ་ལས། གལ་ཏེ་གུད་དུ་མཆིས་ཀྱང་རྒ་ཤི་མེད་པར་འགྱུར་ན་འདི་ན་འདུག་པའི་མི་རིགས་ན་དེ་མེད་པས་སོ། །སོང་ཅིག་ཅེས་བྱ་བའི་ལན་ནི་ངེས་མ་མཆིས་ཞེས་
བྱ་བ་ཡིན་ཏེ། གལ་ཏེ་འགྲོ་བར་མི་འགྱུར་ན་གདོན་མི་ཟ་བར་གསོད་པ་ཡིན་ནོ་ཞེ་ན། དེ་ལྟ་ན་ནི་སོང་ཤིག་ཅེས་སྨྲ་བའི་རིགས་ན་དེ་ཡང་མེད་དོ། །གྲོགས་བྱར་ག་ལ་ཡོད་ཅེས་བྱ་བ་དེའི་ལན་ནི་བདེ་བའི་ཚེ་ན་རྟག་ཏུ་ཁྱོད་བཀུར་བ་ཞེས་བྱ་བའི་ཚིག་གིས་སོ། །ང་ནི་འདི་ལྟར་གྱུར་པ་ལ་ཞེས་བྱ་བ་དེའི་ལན་ནི། ཉམས་ཉེས་ཚེ་ན་དོར་དུ་ག་ལ་རུང༌། །ཞེས་བྱ་བའི་ཚིག་གིས་ཏེ། ཐ་མལ་པའི་ཚེ་ཡང་མ་བཏང་ན་འདི་ལྟར་གྱུར་པ་ནི་ལྟ་ཅིའི་ཕྱིར་དོར་ཞེས་པའོ། །གལ་ཏེ་འདི་ན་མ་མཆིས་ཀྱང་འགུམ་པར་ངེས་པ་མ་མཆིས་པ་དང༌། དེ་ལྟར་ཡོངས་སུ་བོར་ཞིང་བཏང་ན་ཡང་གཅིག་ཏུ་འཆི་བ་དང༌། རྒ་བ་མེད་པ་ནི་མ་ཡིན་པར་འགྲོ་བར་ནི་མི་རིགས་པས་འདུག་པ་ནི་རིགས་པ་ཉིད་དེ་དེའི་ཕྱིར་སྨྲས་པ། བདག་གི་སྲོག་བཟུང་ཙམ་གྱི་ཕྱིར། །ཞེས་བྱ་བའི་ཚིགས་བཅད་སྨོས་སོ། །བདག་ཉིད་ཀྱི་སྲོག་ཡིན་པས་བདག་གི་སྲོག་གོ །བདག་གི་སྲོག་ཉིད་གཟུང་བ་ཡིན་པས་བདག་གི་སྲོག་གཟུང་བའོ། །དེ་ཙམ་ཉིད་ཡིན་པས་ན་བདག་གི་སྲོག་གཟུང་བ་ཙམ་མོ། །དེས་ན་བདག་གི་སྲོག་གཟུང་བ་ཙམ་གྱི་ཕྱིར་ཏེ། རང་གི་སྲོག་ཉིད་ཀྱི་ཕྱིར་ཞེས་བྱ་བའི་དོན་ཏོ། །གཏམ་ངན་པ་ཡིན་པའི་ཕྱིར་གཏམ་ངན་ནོ། །གཏམ་ངན་པ་ཉིད་ཆར་ཡིན་པས་གཏམ་ངན་པ་ཆར་བཞིན་དུ་འབབ་པའོ། །དེའི་སྐྱབས་ནི་གཏམ་ངན་ཆར་བཞིན་འབབ་པའི་སྐྱབས་སོ། །འདིར་སྒྲིབ་པར་བྱེད་པ་ཡིན་པས་སྐྱབས་ཏེ། འདིས་ནི་བདག་ཉིད་ཁྲེལ་ཡོད་པར་བསྟན་ཏོ། །རྒྱལ་པོ་ཆེན་པོ་ཉམས་ཉེས་པ། །བོར་ཏེ་མཆི་བའི་ཆོས་མ་མཆིས། །ཞེས་བྱ་བ་ནི་ངོ་ཚ་ཤེས་པའི་དབང་དུ་བྱས་པ་སྟེ། བདག་དང་ཆོས་ཀྱི་དབང་དུ་བྱས་ནས་ཁ་ན་མ་ཐོ་བ་ལ་འཛེམ་ཞེས་བྱ་བའི་ཚིག་གིས་སོ། །བདེ་བའི་ཚེ་ན་རྟག་ཏུ་ཁྱོད་བཀུར་ལ། །ཉམས་ཉེས་ཚེ་ན་ཞེས་བྱ་བ་སྟེ། ཕོངས་པར་གྱུར་བ་ནི་བདག་གིས་བོར་ནག་ལ་ཞིག་རུང་སྟེ། སྨྲས་པ། ཁྱོད་ནི་ཅིར་གྱུར་པ་ཞེས་བྱ་བ་ཡིན་ཏེ། དང་པོ་ཁྱོད་ཇི་ལྟར་གྱུར་པ་དེ་ལྟར་བདག་ཉིད་ཀྱང་འགྱུར་བར་འཚལ་ལོ་ཞེས་བྱ་བའོ། །དེའི་ལན་བྱང་ཆུབ་སེམས་དཔས་སྨྲས་པ། ཚང་མང་ཞེས་བྱ་བས་ནི་ངེས་པར་གསོད་པར་འགྱུར་བའི་དོན་ཏོ། །བདེ་བར་གནས་ཞེས་བྱ་བས་ནི་སེམས་བདེ་བར་གནས་པའོ། །གལ་
ཏེ་སེམས་བདེ་བར་མི་གནས་ཀྱང་གཟུང་བ་ཡིན་ན་ནི། དེར་འགྲོ་བའི་རིགས་ན་གཟུང་བ་མ་ཡིན་པའི་ཕྱིར་རོ། །དེ་ལྟ་མོད་ཀྱི་གལ་ཏེ་མ་བཟུང་ཞིང་བདེ་བར་གནས་ཀྱང་བདག་གི་འགྲོ་བའི་རྗེས་སུ་འགྲོ་བ་ནི་དོན་གཞན་དག་ལས་ལྟོས་པ་ཡིན་ན་གང་ན་ཡང་མེད་དོ་ཞེས་བསྟན་པའི་ཕྱིར། དེ་ལྟར་བྱས་ན་ཅིར་འགྱུར་ལྟོས། །ཞེས་བྱ་བའི་ཚིགས་བཅད་སྨོས་སོ། །འདིའི་འགྲོ་བ་ནི་བདག་དང༌། ཁྱོད་འཆི་བ་དང༌། གཉེན་བཤེས་རྣམས་དང་འདི་གསུམ་གྱི་དོན་མེད་པར་ཚིགས་བཅད་འདིས་བསྟན་པ་ཡིན་ནོ། །གསུམ་པོ་འདི་མེད་པས་འཆི་བ་དམིགས་པ་ཉིད་དུ་བསྟན་པའི་ཕྱིར། བདེ་དང་མི་བདེ་མུན་ཁུང་བཞིན། །ཞེས་བྱ་བའི་ཚིགས་བཅད་སྨོས་སོ། །ཕན་པའི་དོན་ཞེས་བྱ་བ་ནི་སྔར་བཤད་པ་གསུམ་པོའི་འོ། །ཆོས་དོན་ལེགས་པར་བགྱིས་ན་ནི། །ཞེས་བྱ་བའི་ཕྱེད་འོག་མས་ནི་ཆོས་དང༌། དོན་གཉིས་བདག་གི་འདོད་པས་ངེས་པར་བསྒྲུབས་པ་སྟེ། བདག་ཉིད་ཀྱི་དོན་ཉིད་དུ་ཞེས་བསྟན་ཏོ། །རྗེ་བོ་ཡོངས་སུ་མ་བཏང་བར་སྤྱོད་ཅིང༌། ཁྱོད་ལ་གློ་བ་ཉེ་བའི་ཕྱིར། །ཞེས་བྱ་བ་འདིས་ནི། རྗེ་བོའི་དོན་དུ་བདག་ཉིད་སྙིང་ཉེ་བར་སྟོན་ཏེ། དེས་ནི་གཉི་ག་ཡང་བསྟན་པ་ཡིན་ནོ། །དེ་ལྟར་བྱས་ན་ཞེས་བྱ་བའི་ཚིགས་བཅད་འདི་སྨོས་པ་ལ་འཚོ་བར་གྱུར་ན་ནི་དོན་གཞན་འདི་དག་ཡོད་དོ་ཞེས་བསྟན་པ་སྟེ། དོན་གཞན་དེ་ཡོངས་སུ་བསྟན་པའི་ཕྱིར། མཛའ་བཤེས་ང་དང་ཕྲལ་བ་རྣམས། །ཞེས་བྱ་བ་སྨོས་ཏེ། བདག་གིས་བསྲུང་ཞིང་སྦ་བར་བྱ་བ་དེ་བྲལ་བར་གྱུར་ཀྱང་ཁྱོད་ཀྱིས་མཆོག་ཏུ་འབྱོར་པར་བྱེད་པར་འགྱུར་ཏེ། ཇི་ལྟ་བ་བཞིན་དུ་གསོལ་བ་གདབ་ཀྱང་མི་དགོས་པར་བློ་གྲོས་ཕུན་སུམ་ཚོགས་པའི་ཕྱིར་རོ། །དེ་གཉིས་གཅིག་ལ་གཅིག་བྱམས་པ་ཉིད་ཡོན་ཏན་ཡིན་པས་དེ་བས་ན་གཅིག་ལ་གཅིག་བྱམས་པའི་ཡོན་ཏན་ནོ། །དེ་གཟུགས་བཟང་བ་ཡིན་པས། དེའི་གཟུགས་བཟང་བ་སྟེ། དེའི་གཟུགས་བཟང་བ་དེས་སོ། །བདེ་བར་འདུག་བཞིན་དུ་ཞེས་བྱ་བ་ནི་བག་ཚ་བ་མེད་པར་རོ། །ཁྱོད་ནི་མ་ཟིན་བདེ་བར་འདུག །ཅེས་བྱ་བའི་ཚིགས་བཅད་ཀྱི་བསྡུས་པའི་དོན་ནི་རྒྱུ་རྣམ་པ་ལྔས་བྱ་རྣམས་ནམ་མཁའ་ལ་འགྲོ་བར་མི་
ནུས་པ་ཡིན་ཏེ། དེ་མེད་ཀྱང་ཅིའི་ཕྱིར་ནམ་མཁའ་ལ་མི་འགྲོ་ཞེས་བྱ་བར་སྟོན་པ་ཡིན་ནོ། །དེ་དག་ཀྱང་གང་ཞེ་ན། རྙིས་ཟིན་པ་དང༌། རང་གི་དབང་མེད་པས་མི་བདེ་བར་འདུག་པ་དང༌། སྤུ་མ་སྐྱེས་ཤིང་གཤོག་པ་མེད་པ་དང༌། རྩོལ་བ་ཡོད་ཀྱང་སྟོབས་ཆུང་བ་དང༌། འཇིགས་པའི་རྒྱུ་མ་མཐོང་བས་འགྲོ་བར་མི་འགྱུར་བ་སྟེ། ཉེས་པ་འདི་དག་མེད་ཀྱང་འཕུར་བར་མ་གྱུར་པའི་རྒྱུ་འདྲི་བ་ཡིན་ནོ། །ཆིག་དང༌། འབྲུ་དང༌། སྦྲེལ་ལེགས་པ་ནི་ཚིག་འབྲུ་སྦྲེལ་ལེགས་པའོ། །ཚིག་འབྲུ་སྦྲེལ་ལེགས་པའི་སྒྲ་གང་ཡིན་པ་དེ་ནི་ཚིག་འབྲུ་རབ་ཏུ་གསལ་ཞིང་སྦྲེལ་ལེགས་པའོ། །དེ་ལ་འབྲུ་སྨོས་པས་ནི་ཨ་ལ་སོགས་པའི་ཡི་གེ་གཟུང་ངོ། །ཚིག་སྨོས་པས་ནི་ངོ་བོ་ཉིད་ཀྱི་ཚིག་བླ་དགས་སུ་གཟུང་ངོ༌། །ཚིག་སྤྲེལ་ལེགས་པ་ཞེས་བྱ་བ་སྨོས་པས་ནི་ཁྱད་པར་གྱི་ཚིགས་བླ་དགས་སུ་གཟུང་ངོ༌། །ཡིད་དུ་འོང་བ་ཞེས་བྱ་བ་ནི་མཉན་པར་འོས་པའོ། །གང་གི་གཟི་བྱིན་གང་ལ་ཡོད་པ་ནི་གཟི་བྱིན་དང་ལྡན་པའོ། །བརྟན་པའི་ཡོན་ཏན་གྱིས་གཟི་བྱིན་དང་ལྡན་པ་ནི་བརྟན་པའི་ཡོན་ཏན་གྱིས་གཟི་བྱིན་དང་ལྡན་པ་སྟེ། དེས་སྒྲ་སྒྲོགས་ཤིང་སྐད་ཆེར་ཕྱུང་བ་ཡིན་ནོ། །དམ་དུ་ཟིན་ཞེས་བྱ་བ་ནི་ཕྱི་རོལ་གྱི་རྙི་ནི་མཚོན་ལ་སོགས་པས་གཅད་པར་ནུས་ལ། བརྩེ་བའི་ཞགས་པ་ནི་གཅད་པར་མི་ནུས་པའི་ཕྱིར་ཏེ། ཇི་ལྟ་བུ་ཞེ་ན། སྨྲས་པ། རྙིས་ནི་དེ་བས་ཞེས་བྱ་བ་ཡིན་ཏེ། ལུས་ཀྱི་འཆིང་བ་དང༌། རྗེས་སུ་མཐུན་པའི་བརྩེ་བའི་ཞགས་པ་གང་ཡིན་པ་དེས་བཅིངས་པ་སྟེ། འདོད་ཆགས་དང་བྲལ་བ་མ་གཏོགས་པས་གཅོད་པར་མི་ནུས་པའི་ཕྱིར་རོ། །ང་ཡི་རྒྱལ་པོ་སྲོག་དང་འདྲ་བའི་གྲོགས། །ཞེས་བྱ་བའི་ཚིགས་བཅད་ཀྱི་བསྡུས་པའི་དོན་ནི་གང་ཡོངས་སུ་མི་འདོར་བ་དང༌། ཅིའི་ཕྱིར་ཡོངས་སུ་མི་འདོར་བ་སྟེ། དེ་གཉིས་ཚིགས་བཅད་འདིས་སྟོན་པ་ཡིན་ནོ། །གང་ཡོངས་སུ་མི་འདོར་ཞེ་ན། རྗེ་བོའོ། །ཅིའི་ཕྱིར་ཡོངས་སུ་མི་འདོར་ཞེ་ན། བདེ་བར་སྦྱིན་པར་བྱེད་པའི་ཕྱིར་རོ། །གྲོགས་པོ་ཅིའི་ཕྱིར་ཡོངས་སུ་མི་འདོར་ཞེ་ན། ཉམས་ཉེས་པར་གྱུར་པའི་ཕྱིར་རོ། །འདི་གཉིས་ཀྱིས་ནི་ཕན་འདོགས་པ་དང༌། སྙིང་རྗེའི་ཞིང་ཉིད་དུ་སྟོན་ཏེ། ཡོན་ཏན་རེ་རེ་ལས་རེ་རེ་ཙམ་ཡོད་ཀྱང་ཡོངས་སུ་གཏང་བར་བྱ་བ་མ་ཡིན་ན། ཡོན་ཏན་བཞི་དང་ལྡན་པ་ལྟ་སྨོས་ཀྱང་ཅི་དགོས་ཞེས་སྟོན་ཏོ། །
བཟང་པོ་བདག་ཅག་སྨྲས་པ་འདིས་ཞེས་བྱ་བ་ལ། གལ་ཏེ་བདེ་བ་ཞེས་བྱ་བའི་སྒྲ་ནི་དག་ཤིས་སོ། །བདག་ཅག་བཏང་ན་ནི་ཞེས་བྱ་བ་ཡང་འདིར་དགེ་ཤིས་སོ། །སྔར་བཤད་པའི་སྨྲས་པ་འདིས། གལ་ཏེ་བདེ་བ་འབྱུང་འགྱུར་ཞིང༌། །ཞེས་བྱ་བའི་ལན་ནི། ང་ནི་ཁྱོད་ལ་གནོད་མི་བྱེད། །ཅེས་བྱ་བ་ཡིན་ནོ། །བཏང་ན་ནི་ཞེས་བྱ་བ་དེའི་ལན་ནི། ཁྱོད་ནི་ང་ཡིས་གཟུང་བ་མེད། །ཅེས་བྱ་བ་ཡིན་ནོ། །ཆོས་དང་ལྡན་པའི་གྲགས་པ་འཐོབ། །ཅེས་བྱ་བའི་ལན་ནི། དེ་བས་ཁྱོད་ནི་ཅི་བདེར་སོང༌། །ཞེས་བྱ་བའི་ཚིགས་བཅད་ཕྱེད་འོག་མ་ཡིན་ནོ། །ང་ནི་ཁྱོད་ལ་གནོད་མི་བྱེད། །ཅེས་བྱ་བ་དེའི་ལན་ནོ། །བདག་ནི་སྡུག་བསྔལ་མི་བཞེད་ན། །ཞེས་བྱ་བའི་ཚིགས་བཅད་ཀྱི་ཕྱེད་དོ། །དེ་བས་ཁྱོད་ནི་ཅི་བདེར་སོང༌། །ཞེས་བྱ་བའི་ལན་ནི། གལ་ཏེ་གཅིག་གིས་མཉེས་གྱུར་ན། །ཞེས་བྱ་བ་ཕྱེད་འོག་མ་ཡིན་ནོ། །གལ་ཏེ་གཅིག་གིས་མཉེས་གྱུར་ན། །ཞེས་བྱ་བ་ལ། འདི་བློ་དང་ན་ཚོད་ལ་སོགས་པ་མི་མཉམ་པ་དེ་ཁྱད་པར་ཡོད་དོ་ཞེས་རྟོག་པ་ལ། དེ་ཁྱད་པར་མེད་པར་བསྟན་པའི་ཕྱིར། བདག་ཅག་ཆུ་དང་ཞེང་ཡང་མཉམ། །ཞེས་བྱ་བ་སྨོས་སོ། །ཆུ་དང་ཞེང་རྣམ་པ་གཉིས་ཀྱིས་ནི་བྱེ་བྲག་མེད་པ་སྟོན་ཏེ། དེ་ཁྱད་པར་མེད་པས་སེམས་ཀྱང་ཁྱད་པར་མེད་དོ། །གལ་ཏེ་ཚོད་ལ་ཁྱད་པར་ཡོད་ན་ནི་ཤ་ལ་ཁྱད་པར་ཡོད་པར་འགྱུར་ཏེ། དེ་ཁྱད་པར་མེད་པར་བསྟན་པའི་ཕྱིར། ན་ཚོད་ལ་ཡང་རྒན་གཞོན་མེད། །ཅེས་བྱ་བ་འདིས་སོ། །བདག་ལ་ཐུགས་ཆེས་མི་འགྱུར་ན། །ཞེས་བྱ་བར་བཤད་པ་ནི་ཅི་ཞིག་ལྟར་དོགས་ན་དེ་ཡང་ཉེས་པ་མེད་དེ། གལ་ཏེ་སྔར་བྱའི་རྒྱལ་པོ་བཏང་སྟེ། བདག་ཀྱང་མ་བཟུང་བར་བཏང་ན་ནི་གཉི་ག་ལས་ཉམས་པར་འགྱུར་ན། དེའི་ཉེས་པ་མེད་པར་བྱ་བའི་ཕྱིར། ཁྱོད་ཀྱིས་བདག་ནི་སྔར་ཟུང་ལ། །ཞེས་བྱ་བའི་ཚིགས་བཅད་ཕྱེད་འོག་མའོ། །བདག་བཟུང་ཞིང་བྱའི་རྒྱལ་པོ་བཏང་ན་ནི་ཕན་ཡོན་འདི་དག་ཡིན་ཏེ། དེ་བསྟན་པའི་ཕྱིར། ཁྱོད་ཀྱི་རྙེད་པའང་དེ་བཞིན་ལ། །ཞེས་བྱ་བའི་ཚིགས་བཅད་སྨོས་ཏེ། ཁྱོད་ཀྱི་རྙེད་པའང་དེ་བཞིན་ནོ། །དེ་བས་མཛའ་བོའང་དེ་བཞིན་འགྱུར། །ཞེས་བྱ་བ་འདི་གཉིས་ཀྱིས་རྔོན་པའི་ཕན་ཡོན་བསྟན་ཏོ། །བདག་གིས་གསོལ་བ་ཞེས་བྱ་བ་དག་དང༌། ཁྱོད་ཀྱིས་བཏང་ནའང་
ཇི་ལྟར་འགྱུར་བ་གཟིགས། །ཞེས་བྱ་བ་འདིས་ངང་པའི་རྒྱལ་པོའི་ཕན་ཡོན་བསྟན་པའོ། །དེ་རང་གི་སྲོག་ལ་ཡང་མི་ལྟ་བར་ཞེས་བྱ་བས་ནི་གང་སྔར་བཤད་པའི། དེ་བས་བདག་གི་སྲོག་ནི་ཡལ་གྱུར་ཀྱང༌། །འདི་ནི་གཏོང་བར་བདག་གིས་མི་ནུས་སོ། །ཞེས་བྱ་བ་དེ་བསྟན་པ་ཡིན་ནོ། །ཇོ་བོ་ལ་སྙིང་ཉེ་ཞིང་བྱམས་པ་ཞེས་བྱ་བ་འདིས་ནི་གང་སྔར་བསྟན་པའི། ང་ཡི་རྒྱལ་པོ་སྲོག་དང་འདྲ་བའི་གྲོགས། །འདི་ནི་ཉམས་ཉེས་གྱུར་ཅེས་བྱ་བ་དེ་སྟོན་པ་ཡིན་ནོ། །གང་ཆུ་གང་དང་ཁྲེལ་ལྟས་ཆེ་བའི་ཡོན་ཏན་གྱི་གཟི་བྱིན་དང་ཞེས་བྱ་བ་འདིས་ནི་བདེ་བ་སྦྱིན་པ་འདི་ནི་ཉམས་ཉེས་གྱུར་ཞེས་བྱ་བ་དེ་སྟོན་ཏོ། །བརྟན་པའི་རྒྱན་གྱིས་བརྒྱན་ཅེས་བྱ་བ་འདིས་ནི་གང་སྔར་བཤད་པའི། བདག་ནི་སྡུག་བསྔལ་མི་བཞེད་ན། །ཞེས་བྱ་བ་ལ་སོགས་པ་དེ་དག་སྟོན་པ་ཡིན་ནོ། །འཇམ་པའི་རྒྱན་གྱིས་བརྒྱན་ཅེས་བྱ་བ་འདིས་ནི། བཟང་པོ་བདག་ཅག་སྨྲས་པ་འདིས། །ཞེས་བྱ་བའི་ཚིགས་བཅད་ཀྱི་དོན་དེ་སྟོན་ཏོ། །ངོ་མཚར་ཆེ་ཞིང་རབ་ཏུ་གུས་པའི་དབང་གིས་ཞེས་བྱ་བ་ནི་དུད་འགྲོའི་སྐྱེ་གནས་སུ་གྱུར་པ་ཡིན་དུ་ཟིན་ཀྱང༌། དེའི་ཡོན་ཏན་ལ་ངོ་མཚར་ཆེ་བས་གུས་པ་ཡིན་ཏེ། ཡོན་ཏན་ཁྱད་པར་དུ་གྱུར་པ་དང་ལྡན་པའི་ཕྱིར་རོ། །ངོ་མཚར་དང་གུས་པ་གཉིས་བསྟན་པའི་ཕྱིར། ཇོ་བོའི་དོན་དུ་སྲོག་བཏང་བ། །ཞེས་བྱ་བའི་ཚིགས་བཅད་འདི་སྨོས་སོ། །སྙིང་རྗེ་ཅན་ཞེས་བྱ་བ་སྙིང་རྗེ་དང་ལྡན་པ་ཡིན་པས་སྙིང་རྗེ་ཅན་ཏེ། སྡུག་བསྔལ་དང་བྲལ་བ་དེ་དེས་དོན་དུ་གཉེར་བའི་སྙིང་རྗེའི་ཡོན་ཏན་སྟོན་པའོ། །ཁྱོད་ཀྱིས་ལས་བྱས་དོན་མེད་མི་འགྱུར་ཕྱིར། །ཞེས་བྱ་བས་ནི། ཇི་ལྟར་བདག་དགའ་བར་འགྱུར་བར་ལས་བྱས་པ་ནི་ངང་པའི་རྒྱལ་པོ་ཁྱོད་ཀྱིས་བཏང་བ་སྟེ། དེའི་འབྲས་བུ་མེད་པར་མི་འགྱུར་བའོ། །བདེ་བར་ཞེས་བྱ་བ་ནི་བག་ཚ་བ་མེད་པར་རོ། །ཕོ་བྲང་ནང་དུ་རྒྱལ་པོའི་སྤྱན་སྔར་བྲིམས། །ཞེས་བྱ་བ་ནི་དབེན་པར་བསྟན་པ་མི་འདོད་ཅིང་ཕོ་བྲང་གི་ནང་དུ་འོས་པ་སྟེ། བདག་ཉིད་སྐྱེ་བོ་མང་པོའི་མངོན་དུ་བསྟན་པ་ནི་རང་གི་རིགས་པ་དང་མཐུན་པའི་ཕྱིར་རོ། །མིའི་གཡོག་བཞིན་དུ་གཡོག་དང་བཅས་པའི་མཚན་ཉིད་དོ། །མི་རེ་བ་དག་གང་ཡིན་པ་དེ་ནི། རེ་ཡང་མི་རེ་བ་དག་སྟེ་ཆེ་ཞིང་རྒྱ་ཅེ་བ་དག་གོ །མགུ་བར་འགྱུར་བ་ཞེས་བྱ་བ་འདིས་ནི་ཡིད་ལ་ཅི་འདོད་པ་ཉིད་སྟོན་ཏོ། །བདེ་ཞིང་ཞེས་བྱ་བ་འདིས་ནི་
འཇིགས་པ་མེད་པར་རོ། །བྱ་འདི་གཉིས་ནི་ཞེས་བྱ་བས་ནི་ས་ལ་འགྲོ་བའི་སྤྱོད་ཡུལ་མ་ཡིན་པ་ཉིད་དུ་བསྟན་ཏོ། །རབ་ཏུ་དགའ་ཞིང་ངོ་མཚར་ཆེ་བ་ཞེས་བྱ་བ་ནི་དགའ་བ་དང༌། ངོ་མཚར་དུ་གྱུར་པ་གཉིས་ནི་དགའ་བ་དང༌། ངོ་མཚར་རོ། །དེ་ལ་རབ་ཏུ་དགའ་བ་ནི་འདོད་པའི་དོན་འགྲུབ་པས་སོ། །ངོ་མཚར་ཆེར་གྱུར་པ་གཉིས་ནི་ཤིན་ཏུ་རྙེད་པར་དཀའ་བ་རྙེད་པའི་ཕྱིར་རོ། །སྣ་ཚོགས་པའི་རིན་པོ་ཆེ་ནི་རིན་པོ་ཆེ་སྣ་ཚོགས་པའོ། །རིན་པོ་ཆེ་སྣ་ཚོགས་པའི་འོད་ནི་འོད་ཟེར་ཏེ། འོད་ཟེར་འཕྲོ་ཞིང་སྡུག་པའི་རྐང་པ་གང་ཡིན་པའི་སྟན་ནི་སྟན་དེའོ། །སྤྲས་པ་ནི་གསལ་བར་བྱེད་པའོ། །འོད་ཟེར་འཕྲོ་ཞིང་སྡུག་པ་ཞེས་བྱ་བ་ནི་དབྱིབས་སོ། །ལྷའི་གདན་ཡང་ཡིན་པས་ལྷའི་གདན་རིམ་པ་དུ་མའོ། །དེ་བཤམས་པ་ནི་ལྷའི་གདན་རིམ་པ་དུ་མར་བཤམས་པ་སྟེ། དེས་མངོན་པར་དགའ་བར་བྱ་བ་གང་ཡིན་པ་དེ་ནི་ལྷའི་གདན་རིམ་པ་དུ་མར་བཤམས་ཤིང་བཟང་བའོ། །རྒྱབ་རྟེན་དང་བདེ་ཞིང་ཉམས་དགའ་བ་ནི་རྒྱབ་རྟེན་བདེ་ཞིང་ཉམས་དགའ་བའོ། །བརྒྱན་པ་དང་བཅས་པ་ནི་རྒྱབ་རྟེན་བདེ་ཞིང་ཉམས་དགའ་བས་བརྒྱན་པའོ། །བཙུགས་པའི་རྐང་རྟེན་གང་ཡིན་པ་འདི་ནི་རྐང་རྟེན་བཙུགས་པའོ། །དྲིལ་བུ་བཞིན་དུ་སྙན་པ་ནི་དྲིལ་བུ་ལྟར་སྙན་པ་སྟེ་དེས་སོ། །གཟི་བྱིན་ཆེ་ཞིང་མདངས་དང་ལྡན་པའི་སྐུ། །ཞེས་བྱ་བ་ལ་སོགས་པའི་ཚིགས་བཅད་དང་པོ་ལྔས་ནི་དགའ་བར་འགྱུར་བའི་གཏམ་ལས་བརྩམས་པ་སྟེ། འདིའི་བསྡུས་པའི་དོན་ནི་ལུས་ལ་རྣམ་པ་གཉིས་ཀྱིས་བདེའམ་མི་བདེ་ཞེས་དྲི་བ་བསྟན་ཏེ། གཟུགས་ཀྱི་ལུས་ལ་སྙུན་གསོལ་པ་ལས་བརྩམས་ཏེ། གཟི་བྱིན་ཆེ་ཞིང་ཞེས་བྱ་བའི་ཚིགས་བཅད་ཕྱེད་ཀྱིས་བསྟན་ཏོ།། གཟི་བྱིན་དང་མདངས་ནི། གཟི་བྱིན་དང་མདངས་སོ། །གཟི་བྱིན་དང་མདངས་ཀྱི་གནས་སུ་གྱུར་པ་ནི་གཟི་བྱིན་དང་མདངས་ཀྱི་གནས་སོ། །མདངས་སྨོས་པས་ནི་ཁ་དོག་གཟུང་ངོ༌། །གཟི་བྱིན་སྨོས་པས་ནི་དབྱིབས་གཟུང་ངོ༌། །གཉིས་པ་ནི་གང་གི་ཕྱིར། མིག་གི་ཡུལ་གྱིས་བདེའམ་ཞེས་དྲིས་པ་ཡིན་ཏེ། ནད་མེད་པ་ནི་བདེ་བའི་གནས་ཡིན་ཏེ། སྔོན་དགེ་བ་བསགས་པའི་ཕྱིར་བདེ་བའི་གནས་སོ། །ཆོས་ཀྱི་སྐུ་ལ་ཞེས་བྱ་བ་ལ། ཆོས་ཀྱི་སྐུ་ནི་བསོད་ནམས་ཀྱི་ཚོགས་བསགས་པ་སྟེ། ཕ་རོལ་ཏུ་ཕྱིན་པ་བཞི་ནི་ཆོས་ཀྱི་སྐུའོ། །འདིས་ནི་རྒྱལ་པོའི་ཆོས་ཀྱི་ལུས་སྐྱེ་དགུ་སྲུང་ཞིང་སྐྱོབ་པར་བསྟན་ཏོ། །
རྨ་མེད་ཞེས་བྱ་བ་ནི་ཚུལ་ལས་མ་ཉམས་སོ་ཞེས་བྱ་བའི་དོན་ཏོ། །བཀའ་ལུང་སྙན་པས་རྒྱ་ཆེར་དབུགས་ཕྱུང་ངམ་ཞེས་བྱ་བས་ནི་སྦྱིན་པའི་ཕ་རོལ་ཏུ་ཕྱིན་པ་བསྟན་ཏོ། །ད་ནི་རྒྱལ་པོའི་ཆོས་ཀྱི་དབང་དུ་བྱས་པ་སྟེ། ཕན་གདགས་ནན་ཏུར་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་མོ། །དེ་ལ་ཕན་གདགས་ནན་ཏུར་ཞེས་བྱ་བ་དང༌། བློན་པོ་མཛངས་ཤིང་གློ་བ་ཉེ་བ་ཞེས་བྱ་བའི་ཚིགས་བཅད་གཉིས་ནི་རང་གི་ཡུལ་འཁོར་གྱི་དབང་དུ་བྱས་པའི་རྒྱལ་པོའི་ཆོས་སོ། །སྐྱེ་དགུ་བསྲུང་བ་དེ་ཡང་ཚུལ་ཡིན་ཏེ། ཕན་གདགས་ནན་ཏུར་བགྱི་བའི་བཀའ་ཁྲིམས་ཀྱིས། །ཞེས་བྱ་བ་ནི་མངོན་སུམ་དུ་བཏགས་ནས་བསྟན་པ་དང༌། དང་བས་ཇི་ལྟར་རིགས་པར་ཆད་པས་བཅད་པ་དང༌། གློ་བ་ཉེ་བ་ལ་ཕན་གདགས་པར་བྱ་བ་ཉིད་དོ། །ནན་ཏུར་གྱིས་ནི་ཕན་པ་འབྱུང་བ་ཡིན་ཏེ། བསྲུང་བའི་དབང་བསྐུར་བའི་ཕྱིར་རོ། །བདག་གི་གྲགས་པའི་གཏམ་སྙན་རྒྱས་གྱུར་ཏམ། །ཞེས་བྱ་བ་འདི་དག་གིས་ནི་མངོན་སུམ་ཉིད་དུ་རྒྱལ་པོའི་ཆོས་བསྟན་ཏེ། །རྒྱལ་པོའི་ཚུལ་ནི་མངོན་སུམ་དང༌། །ལྐོག་ཏུ་གྱུར་པ་རྗེས་སུ་དཔག་པ་ཡིན་པའི་ཕྱིར་རོ། །དེ་ལ་བདག་གིས་མཐོང་བ་ནི་མངོན་སུམ་མོ། །བློན་པོ་མཛངས་ཤིང་གློ་བ་ཉེ་བ་རྣམས། །བརྟག་པའི་ཐབས་ཀྱིས་ཞེས་བྱ་བ་ནི་ལྐོག་ཏུ་གྱུར་པ་རྗེས་སུ་དཔག་པའི་ཚུལ་ལོ། །ལེགས་པར་ཞེས་བྱ་བ་ནི་རང་བཞིན་མི་དགའ་བའི་ཕྱིར་བརྟག་པའི་ཐབས་ནི་རྣམ་པ་ལྔའོ། །ཉེ་བར་སྩོགས་པ་དང་ཐབས་མཐར་མ་ཕྱིན་པ་ནི་བརྟག་པའི་ཐབས་ཞེས་བརྗོད་དོ། །གློ་བ་ཉེ་བ་ཞེས་བྱ་བ་ནི་བསམ་པ་ཕུན་སུམ་ཚོགས་པའོ། །མཛངས་པ་ནི་སྦྱོར་བ་ཕུན་སུམ་ཚོགས་པའོ། །འབངས་ལ་སྨན་པ་རྟག་ཏུ་དགོངས་ལགས་སམ། །ཞེས་བྱ་བ་ནི་གསུམ་པོ་དེ་ལྐོག་ཏུ་གྱུར་པའི་རྒྱལ་པོའི་ཚུལ་སྟོན་པ་ཡིན་ནོ། །དེ་དག་མི་མཁྱེན་པར་ནི་མི་ཞུགས་གྲང༌། །ཞེས་བྱ་བས་ནི་རྗེས་སུ་དཔག་པ་ཉིད་སྟོན་ཏོ། །དེ་ལྟར་རེ་ཞིག་བྱ་བ་མ་ཡིན་པ་བྱེད་པ་ལས་ལྡོག་པའི་ཚུལ་བསྟན་ཏེ། ཆོས་ཀྱི་སྐུ་ལ་ཞེས་བྱ་བ་ནི་བྱ་བ་མ་ཡིན་པ་ལས་ལྡོག་པའི་ཚུལ་ལོ། །ཕན་གདགས་ནན་ཏུར་ཞེས་བྱ་བ་དང༌། བློན་པོ་མཛངས་ཤིང་ཞེས་བྱ་བ་གཉིས་ཀྱིས་ནི་སྐྱེ་དགུ་སྐྱོང་བ་ལ་འཇུག་པའི་ཚུལ་ལོ། །དཔའ་ཞིང་ཐབས་མཁས་ཞེས་བྱ་བའི་ཚིགས་སུ་བཅད་པ་ནི་
རྒྱལ་པོའི་ཆོས་ཀྱི་དབང་དུ་བྱས་པ་སྟེ། ཡུལ་ཕྱོགས་གཞན་གྱི་དབང་དུ་བྱས་ནས་ཐབས་མཁས་པ་ཞེས་སྨོས་ཏེ། བསྡུམ་པ་དང་དབྱེ་བའི་ཐབས་ཀྱིས་བྱ་བ་ཡིན་པས་ཐབས་མཁས་པ་ཞེས་བརྗོད་དོ། །དཔའ་བས་ཞེས་བྱ་བ་ནི་བཀའི་བཀའ་ཁྲིམས་བསྟན་ཏོ། །ཐུགས་རྗེ་ཆེན་པོའི་མཛད་པ་མ་ཆིས་ལགས་སམ། །ཞེས་བྱ་བ་ནི་བཟོད་པའི་ཕ་རོལ་ཏུ་ཕྱིན་པའོ། །ཐུགས་རྗེ་བག་མེད་པར་ནི་མི་མནལ་གྲང༌། །ཞེས་བྱ་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ། ཆགས་པའི་དབང་དུ་མི་གཏང་བར་སྟོན་པ་ཡིན་ནོ། །ཆོས་དང་བདེ་དང་སྲིད་རྣམས་མཐུན་ལགས་སམ། །ཞེས་བྱ་བ་འདི་ཡང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་དབང་དུ་བྱས་པ་སྟེ། ཆོས་དང་བདེ་དང་སྲིད་རྣམས་མཐུན་ལགས་སམ། །ཞེས་བྱ་བ་ནི་རྒྱལ་པོའི་འཁོར་གསུམ་གཙོ་བོ་ཡིན་པའི་ཕྱིར། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་མཐུན་པར་གྱུར་པའི་སྤྱོད་པ་སྟོན་པ་ཡིན་ནོ། །ཤུགས་འབྱིན་སྨོད་པར་འགྱུར་ལགས་སམ། །ཞེས་བྱ་བ་ནི་དེའི་ཡོན་ཏན་ཐོས་ན་མཁས་པའི་ཕྱིར་རོ། །མི་བཟོད་པ་ཡིན་པས། ཤུགས་འབྱིན་པ་ཡིན་ཏེ་སྨོད་པར་འགྱུར་རོ། །ཞེས་སྟོན་ཏོ། །དེ་རིང་བདག་ཀྱང་བདེ་ཞེས་བྱ་བ་ནི་ཅིའི་ཕྱིར་ཞེ་ན། ཕྲད་པས་ཡུན་རིང་པོར་བསམས་པ་འབྱོར་ཅིང་ཐོབ་པའི་ཕྱིར་རོ། །ཐམས་ཅད་དུ་ཡང་བདེ་ཞེས་བྱ་བ་ཡང་དེ་དང་ཕྲད་པས་གྲུབ་པའི་ཕྱིར་རོ། །དང་པ་དེ་རིང་བདག་ཀྱང་བདེ། །ཞེས་བྱ་བའི་ཚིགས་བཅད་འདི་ནི་སྔར་བཤད་པའི་དྲི་བ་མཐའ་དག་གི་ལན་ཡིན་ནོ། །ཁྱོད་ནི་རྙི་ཡིས་ཟིན་པ་ན། །ཞེས་བྱ་བ་དང༌། དེ་ལྟར་རྔོན་པ་འདི་དག་ནི། །ཞེས་བྱ་བའི་ཚིགས་བཅད་གཉིས་ནི་དགའ་བར་གྱུར་པའི་གཏམ་ལས་བརྩམས་པའོ། །འདི་ཡིས་སྣད་པར་མ་བྱས་སམ། །ཞེས་བྱ་བ་སྨོས་པ་ལ། སྣད་པར་བྱེད་པའི་རྒྱུ་དེ་ཉིད་ཀྱིས་སྒྲུབ་པའི་ཕྱིར་སྨྲས་པ། ཁྱོད་ནི་རྙི་ཡིས་ཟིན་པ་ཡི། །ཞེས་བྱ་བའི་ཚིགས་བཅད་ཀྱིས་ཕྱེ་སྟེ། དགའ་བས་སེམས་གཡེངས་པར་གྱུར་པའི་ཕྱིར་རོ། །དགའ་བས་སེམས་གཡེངས་པ་ཉིད་ཀྱི་རྒྱུ་ཡང་བསྟན་པའི་ཕྱིར། དེ་ལྟར་རྔོན་པ་འདི་དག་གིས། །ཞེས་བྱ་བའི་ཚིགས་བཅད་ཀྱི་ཕྱེད་དོ། །བྱ་རྣམས་ཟིན་ཅིང་སྣང་གྱུར་ན། །ཞེས་བྱ་བ་ནི་བྱ་རྣམས་དབང་དུ་གྱུར་ཅིང་ཐོབ་ན་གནོད་པ་ཉིད་དུ་དགའ་བ་ཡིན་ནོ། །དགའ་
བས་སེམས་ནི་གཡེངས་གྱུར་ནས། །ཞེས་བྱ་བ་ནི་དགའ་བསྙེམས་པས་དེ་ལ་ངན་པ་དག་ཀྱང་སྤྱོད་པར་འགྱུར་ཏེ། བསྙེམས་པའི་དབང་གིས་སོ། །འདི་ལྟ་བུར་ནི་ཉམས་ཉེས་ཀྱང༌། །ཞེས་བྱ་བ་ནི་རྙིའི་དབང་དུ་གྱུར་ཀྱང་ངོ༌། །དགྲ་བཞིན་དུ་ནི་གནོད་པ་མ་བགྱིས་སོ། །ཞེས་བྱ་བ་ནི་དབྱིག་པ་ལ་སོགས་པས་མ་བརྡེགས་པས་སོ། །འོ་སྐོལ་གཉིས་ཀ་དགྱེས་བགྱིས་པས། །ཞེས་བྱ་བ་ནི་སྔར་ངང་པའི་རྒྱལ་པོ་བཏང་བས་བཞིན་བཟངས་ངང་པའི་རྒྱལ་པོ་ཁྱེད་ཀྱང་དགའ་བར་བྱས་ལ། འདིར་ཁྱེར་ཏེ་འོངས་པས་བདག་ཅག་ཀྱང་དགའ་བར་བྱས་ཏེ། དེས་ན་བདག་ངང་པའི་རྒྱལ་པོ་བཞིན་བཟངས་ཀྱང་དགའ་བར་བྱས་པ་སྟེ། དེ་ལྟར་གཉི་ག་དགའ་བར་བྱས་པ་གང་ཡིན་པའོ། །མང་བ་ནི་སྤངས་པའོ། །ནོར་རྒྱ་ཆེར་བྱིན་ཏེ་ཞེས་བྱ་བ་ནི་རེ་རེའི་རྣམ་པ་ཡང་མང་པོ་ཡིན་པར་སྟོན་ཏོ། །ཅི་བཞེད་དེ་དག་ཅེས་བྱ་བ་ནི་དངོས་སུ་སྨོས་པ་བཟུང་སྟེ། ནོར་དེའི་དམིགས་ཀྱིས་དབྱེ་བའི་ཚུལ་མེད་པར་རོ། །ཅི་དང་ཞེས་བྱ་བ་ནི་དེ་དང་འཚམ་པའི་ཐབས་སྟོན་པ་ཡིན་ནོ། །དེ་ཞེས་བྱ་བ་ནི་ལོངས་སྤྱོད་བདོག་པའོ། །དེ་བས་ན་མཛའ་བོའི་ཕན་ཡོན་ཆེ་བའི་སྤོབས་པ་གང་ཡིན་པ་དེ་ནི་སྤོབས་པ་ཕན་ཡོན་ཆེ་བའོ། །བཞིན་བཟངས་སྨྲར་གཞུག་པར་འདོད་པ་གང་ཡིན་པ་དེ་ནི་བཞིན་བཟངས་སྨྲར་གཞུག་པར་འདོད་པའོ། །གསར་དུ་བཤེས་པ་གང་ཡིན་པ་དེ་ནི་གསར་དུ་བཤེས་པའོ། །སུ་དང་གསར་དུ་བཤེས་ཤེ་ན། སྐྱེ་བོ་མ་འདྲིས་པས་ཞེས་བྱ་བ་ཡིན་ཏེ། མ་འདྲིས་པ་དེ་ལ་རབ་ཏུ་སྤོབས་ཤིང་སྨྲ་བ་དང་བག་དབབ་པ་ནི་མི་རུང་བ་ཡིན་པས་སོ། །བཀའ་མཆིད་ཉིད་གསུང་ཡིན་པས་བཀའ་མཆིད་གསུང་བའོ། །ཚུལ་ནི་དེ་མ་ལགས་ཞེས་བྱ་བ་ནི་བཀའ་མཆིད་དེ་ལྟ་བུའི་ནང་དུ་འཇུག་ཅིང་སྤྱི་བརྟོལ་བསྐྱེད་པའི་ཚུལ་དང༌། ལམ་མ་ཡིན་ཏེ། ཚུལ་མ་ཡིན་པའི་ལམ་དེས་སོ། །བཟོད་པར་གསོལ་བ་ནི་མི་སྨྲ་བར་འདུག་པ་དེ་ལའོ། །ཁྱོད་ཀྱི་ཡོན་ཏན་གཏམ་སྙན་མི་རྣམས་ཟེར་བའི་རིགས། །ཞེས་བྱ་བ་ལ། ཅིའི་ཕྱིར་རིགས་ཤེ་ན། སྨྲས་པ། འདི་ལྟ་བུར་ཁྱོད་དུལ་བའི་ཕྱིར་རོ། །ངང་པའི་བདག་པོ་དང་ཡང་གྲོགས་པོར་འཐམས་པའི་རིགས་ཏེ། གྲོགས་པོར་འཐམས་པ་ཅིའི་ཕྱིར་རིགས་ཤེ་ན། འདི་ལྟ་བུར་ཁྱོད་དུལ་བ་དང་ཚུལ་མཁས་པས་སོ།།
རབ་ཏུ་མཛའ་བར་འདོད་པ་ཞེས་བྱ་བ་ནི་རབ་ཏུ་གཅུགས་པར་འདོད་པ་ཞེས་བྱ་བའི་དོན་ཏེ། །ཇི་ལྟར་དེ་བས་བདག་ཅག་མཛའ་བ་འདི། །ཞེས་བྱ་བའི་ཚིགས་བཅད་འདིས་བསྟན་པ་དེ་བཞིན་དུ་གཟུང་ངོ༌། །བྱམས་པའི་འཇུག་པ་ནི་བྱམས་པར་འགྱུར་བའོ། །ཇི་ལྟར་བྱམས་པར་གྱུར་པ་ཡིན་ཞེ་ན། ཇི་སྐད་དུ་སྔར་བཤད་པའི། ཁྱེད་གཉིས་ཁྱེད་དུ་བདག་གི་ཁྱིམ་དུ་བྱོན། །ཞེས་བྱ་བའི་ཚིགས་བཅད་ཀྱིས་བསྟན་ཏོ། །དང་པོ་བཤེས་པར་གྱུར་པ་ནའང༌། །ཞེས་བྱ་བའི་ཚིགས་བཅད་ཀྱིས་ནི་བྱམས་པར་གྱུར་བར་ཤེས་ནས་དེ་ལ་མགུ་བར་བྱེད་པ་དེ་བསྟན་ཏོ། །རབ་ཏུ་མཛའ་བར་འདོད་པ་ཞེས་བྱ་བ་དེ་སྒྲུབ་པའི་ཕྱིར། བཀུར་སྟི་བྱ་བའི་ཆོ་ག་འདིས། །ཞེས་བྱ་བས་བསྟན་ཏོ། །ཅི་དང་ཅི་བཞེད་དེ་དག་བདག་ལ་གསུངས། །ཞེས་བྱ་བ་དེའི་ལན་ནི། བདག་ཉིད་དོན་དུ་མི་གཉེར་བར་བསྟན་པའི་ཕྱིར། དགོས་པ་ལྟ་ཞིག་ཆེད་ཆེ་ཅི་ཞིག་མཆིས། །ཞེས་བྱ་བའི་ཚིགས་བཅད་ཡིན་ནོ། །ཆེད་ཆེ་མཆིས་ཞེས་བྱ་བ་ནི་བདག་ཉིད་ཀྱི་སྲོག་ཅུང་ཟད་ཙམ་གྱི་ཕྱིར་རོ། །ཅི་ཞིག་མཆིས་ཞེས་བྱ་བ་ནི་གཞན་གང་དོན་དུ་མི་གཉེར་བར་འདོད་པའོ། །ཁྱོད་ལ་བདག་བརྟེན་པ་གང་ཡིན་པ་དེ་ལྟ་ཡིན་པས་སོ། །ཅི་དང་ཅི་བཞེད་དེ་དག་བདག་ལ་གསུངས། །ཞེས་བྱ་བ་ཡང་གོམས་པའི་ཡོན་ཏན་ཡིན་ཏེ། གཞན་དག་ཏུ་མགྲོན་དག་ལ་སྤྱོད་པ་ཉིད་ཡིན་པའི་ཕྱིར། མགྲོན་ལ་དགའ་བའི་ཕྱིར་ཞེས་བྱ་བ་བདག་ལ་འདི་ལྟར་གྱུར་པའོ། །ཡོན་ཏན་ལ་དགའ་བ་ནི་ཡོན་ཏན་འདོད་པ་སྟེ་དེ་ཡོན་ཏན་འདོད་པ་གཉིས་ཀྱི་ཡོན་ཏན་ལ་དགའ་བ་ཞེས་བྱ་བའི་དོན་ཏོ། །གང་གི་ཕྱིར་ཡོན་ཏན་འདོད་པ་དེ་བས་ན་མགྲོན་ལ་དགའ་བ་ཡིན་ཏེ། ཡོན་ཏན་དང་མགྲོན་ལ་དགའ་བའོ། །ཡོན་ཏན་ལ་དགའ་བ་ཉིད་བསྟན་པའི་ཕྱིར། འབངས་ལ་ཕན་ཕྱིར་ཞེས་བྱ་བའི་ཚིགས་བཅད་ཡིན་ཏེ། ཁྱོད་ལྟ་ལགས་ཀྱང་མོད་ཅེས་བྱ་བ་ནི་མགྲོན་ལ་དགའ་བའི་ཕྱིར་རོ། །རང་བཞིན་དུལ་བ་ཞེས་བྱ་བ་ནི་ངང་གིས་སེམས་སྦྱངས་པ་གང་ཡིན་པ་དེ་ནི་རང་བཞིན་དུལ་བ་སྟེ། མི་བཟོད་པ་སྤངས་པས་རང་བཞིན་དུལ་བར་གྱུར་པའོ། །གལ་ཏེ་མི་བཟོད་པ་སྤངས་སོ་ཞེས་བསྟན་ན་ཅིའི་ཕྱིར་སའི་བདག་པོ་བྱེད་པར་འགྱུར་ཞེ་ན། སྨྲས་པ། འབངས་ལ་ཕན་ཕྱིར་རྒྱལ་པོའི་
ཚུལ་འཛིན་པ། །ཞེས་བྱ་བ་སྨོས་ཏེ། འདིས་ནི་བདག་ཉིད་ཀྱི་ཉེ་བར་ལོངས་སྤྱོད་པའི་ཕྱིར་མ་ཡིན་པར་སྟོན་ཏོ། །རང་གི་ངང་གིས་ཞེས་བྱ་བ་ནི་འབད་པ་མེད་པར་གོམས་པ་སྟེ། དེ་ལ་ཡོན་ཏན་རྣམས་གནས་པར་སྟོན་ཏོ། །དེ་བས་ཞེས་བྱ་བ་ནི་རྒྱུན་མི་འཆད་པའི་ཚུལ་གྱིས་ཡིན་ཏེ་དེས་ནི་བདག་ཉིད་ཀྱི་ཚུལ་བསྟན་ཏོ། །ཡོན་ཏན་བསྟོད་པར་འོས་པ་ཞེས་བྱ་བ་ལ། འོས་པ་ནི་རིགས་པ་ཞེས་བྱ་བའི་དོན་ཏོ། །བདེ་བའི་རྒྱུ་ཡོན་ཏན་དང་ཕན་ཡོན་རྣམ་པ་གཉིས་བསྟན་ཏེ། །འཇིག་རྟེན་འདིར་བསྟོད་པའི་འོས་སུ་གྱུར་པ་དང༌། འཇིག་རྟེན་ཕ་རོལ་ཏུ་བདེ་བའི་རྒྱུར་གྱུར་པའི་ཕྱིར་རོ། །བསྟོད་པར་འོས་པ་ཞེས་བྱ་བ་དང༌། འབྱུང་པོ་ཉེས་པའི་གཅོང་རོང་མི་འདོང་ངོ༌། །ཞེས་བྱ་བས་ནི་འདི་གཉིས་མེད་པར་སྟོན་ཏོ། །འཇིག་རྟེན་འདིར་གྲགས་པ་མ་ཡིན་པ་དང༌། ཕ་རོལ་ཏུ་ཡང་ངན་སོང་དུ་འགྲོ་བའི་སྡུག་བསྔལ་མེད་པ་ཡིན་ཏེ། ཡོན་ཏན་གྱི་ཆོས་ཀྱི་ཕན་ཡོན་རྣམ་པ་གཉིས་བསྟན་ནས་སྐྱོན་གྱི་ཆོས་ཉིད་ནི་དེའི་མི་མཐུན་ཕྱོགས་ཉེས་དམིགས་ཉིད་དུ་བསྟན་ཏེ། དེ་ཡང༌། སེམས་ཡོད་སུ་ཞིག་མི་ཕན་ལམ་ངན་འགྲོ། །ཞེས་བྱ་བ་ནི་ཉེས་པའི་ལམ་ཡིན་ཏེ། འབྱུང་པོ་ཉེས་པའི་གཅོང་རོང་མི་འདོང་ངོ༌། །ཞེས་བྱ་བ་དེ་ཉིད་སྟོན་པ་ཡིན་ནོ། །ཅིའི་ཕྱིར་འབྱུང་པོའི་གཅོང་རོང་དུ་མི་འདོང་ཞེ་ན། དེའི་རྒྱུ་བསྟན་པའི་ཕྱིར། དཔའ་བས་ཡུལ་འཁོར་ཞེས་བྱ་བ་ལ་སོགས་པའི་ཚིགས་བཅད་གསུམ་ཡིན་ནོ། །ཡུལ་ཞེས་བྱ་བ་ནི་གནས་ཞེས་བྱ་བའི་དོན་ཏེ་ཡུལ་དེར་དཔའ་བས་སོ། །ནོར་གྱི་རྩོལ་ཕོད་པ་ཡིན་པས་ནོར་གྱི་རྩོལ་ཕོད་པ་སྟེ། ནོར་གྱི་མཐུ་ཞེས་བྱ་བའི་དོན་ཏོ། །འདིས་ནི་བདག་པོའི་ནུས་པ་བསྟན་ཏེ། ནོར་དང༌། བཀའ་ཁྲིམས་དང༌། སྟོབས་ནི་བདག་པོའི་ནུས་པ་ཞེས་བྱ་བའི་ཚིག་གིས་སོ། །ཡང་ན་ནོར་དང༌། རྩོལ་ཕོད་པ་ནི་ནོར་རྩོལ་ཕོད་པའོ། །རྩོལ་ཕོད་པ་སྨོས་པས་ནི་བཀའ་ཁྲིམས་གཟུང་ངོ༌། །ཐབས་ཀྱིས་དེ་མི་འཐོབ་ཅེས་བྱ་བ་ནི་ངེས་པ་མེད་པའོ། །ནོར་བཀོད་པ་དང་འབད་པ་ཞེས་བྱ་བ་ནི་ལུས་ཀྱི་ཡོངས་སུ་ངལ་བ་དང༌། ནོར་ཟད་པ་གཉིས་ཏེ། འདིས་ནི་མཐོང་བའི་ཆོས་ཀྱི་ཕན་ཡོན་བསྟན་ཏེ། །རྒྱལ་པོའི་སྲིད་ཐོབ་ཅེས་བྱ་བ་ནི་སྦྱིན་པའི་
ཕ་རོལ་ཏུ་ཕྱིན་པའི་འབྲས་བུ་ཡོན་ཏན་ཉིད་ཀྱིས་ཐོབ་པ་ཡིན་ནོ་ཞེས་བསྟན་ཏོ། །ལྷའི་རྒྱལ་པོའི་དཔལ་ཡང་ཞེས་བྱ་བ་ནི་མི་ལས་ཁྱད་པར་དུ་གྱུར་པའི་རྒྱལ་སྲིད་འཐོབ་པའི་དབང་དུ་བྱས་པ་སྟེ། འདི་ཡང་ཕན་ཡོན་ཉིད་དེ་སྦྱིན་པའི་ཕ་རོལ་ཏུ་ཕྱིན་པའི་འབྲས་བུའོ། །ཡོན་ཏན་ཡོད་ན་རྒྱུད་ཀྱང་རབ་ཏུ་འཕེལ། །ཞེས་བྱ་བ་ཡིན་ཏེ། གཞན་རག་ལུས་པ་ནི་ཕན་ཡོན་ཏེ་ལུས་ཀྱི་འདུད་པའོ། །གྲགས་པ་རྣམས་ཀྱང་ཡོན་ཏན་ཉིད་ལས་འཕྲོ་བ་ཞེས་བྱ་བ་འདིས་ནི་གྲགས་པ་འཕེལ་བ་སྟེ། གཞན་རག་ལུས་པའི་ཕན་ཡོན་ཡིན་ནོ། །ཟླ་བའི་འོད་ལས་གསལ་བའི་ཡོན་ཏན་ནི། །ཞེས་བྱ་བའི་ཚིགས་བཅད་འདི་ནི་གཞན་ཕ་དང་མ་དང་འབྲེལ་བ་ཉིད་དང་བར་བྱེད་པའི་རྒྱུ་ཡིན་ཏེ། ཡིད་ཀྱི་ལས་ཀྱི་དབང་དུ་བྱས་ནས་མི་བཟོད་པ་ཞེས་བྱ་བ་ནི་གཞན་གྱི་ཕུན་སུམ་ཚོགས་པ་ལ་མི་བཟོད་པའོ། །དྲེགས་པ་ཞེས་བྱ་བ་ནི་སྐྱེས་བུའི་སྟོབས་ལ་སོགས་པས་བསྙེམས་པའོ། །མི་བཟོད་པ་དང་དྲེགས་པ་ནི་མི་བཟོད་དྲེགས་པའོ། །དེ་གཉིས་ཀྱི་སྡང་བ་ནི་རྩུབ་པ་སྟེ་མི་བཟོད་དྲེགས་པས་སྡང་བའོ། །འདི་དག་གིས་ནི་སེམས་ལ་ཁྲོ་བའི་ཀུན་ནས་དཀྲིས་པ་ཉིད་དུ་བསྟན་ཏོ། །ཁྲོ་བའི་མཚན་ཉིད་ནི་གནོད་པར་བྱས་པ་དང༌། བརྙས་པ་ལས་སེམས་ཀུན་ནས་མནར་སེམས་པ་ཡིན་ནོ། །འཁོན་རྙིང་གང་ཡིན་པ་དེ་ནི་འཁོན་རྙིང་ཡོད་པ་སྟེ། འཁོན་རྙིང་ཡོད་པ་དེ་གང་ཡིན་པ་དེས་ཕྲག་དོག་ཆེ་བའོ། །འཁོན་རྙིང་ཡོད་པ་དང་ཕྲག་དོག་ཆེ་བ་ནི་འཁོན་རྙིང་ཡོད་ཅིང་ཕྲག་དོག་ཆེ་བའོ། །འདིས་ནི་འཁོན་དུ་འཛིན་པ་བསྟན་ཏེ་འཁོན་དང་རྗེས་སུ་འབྲེལ་པ་ཞེས་བྱ་བའི་དོན་ཏོ། །དགྲ་ནི་རྣམ་པ་གཉིས་ཏེ། ལྷན་ཅིག་སྐྱེས་པ་དང༌། ཀུན་དུ་བརྟགས་པའོ། །དགྲ་བོ་མི་བཟད་ཅེས་བྱ་བ་འདི་ནི་ཀུན་ཏུ་བརྟགས་པའི་དབང་དུ་བྱས་པའོ། །འཁོན་རྙིང་ཡོད་ཅེས་བྱ་བ་འདི་ནི་ལྷན་ཅིག་སྐྱེས་པའི་དབང་དུ་བྱས་པའོ། །དེ་ལྟར་ཞེས་བྱ་བ་ནི་དེ་བས་ན་འཇིག་རྟེན་གཉི་ག་ལ་ཕན་པའི་ཕྱིར་རམ། ཡང་ན་བསྟོད་པར་འོས་པའི་ཕྱིར་དང༌། བདེ་བར་འགྱུར་བའི་ཕྱིར་རོ། །ཡོན་ཏན་གྱིས་རྒྱལ་ཕྲན་གྱི་དྲེགས་པ་བཏུལ་བའི་ཕྱིར་ཕ་རོལ་གྱི་ཚོགས་སྦྱོང་བ་ཡིན་ཏེ། དུལ་བ་ལ་
སོགས་པའི་ཡོན་ཏན་གྱི་ཚོགས་ཡོངས་སུ་སྦྱོང་པའོ། །དུལ་བ་ལ་སོགས་པ་ཞེས་བྱ་བ་ལ། སོགས་པ་སྨོས་པས་ནི་ཚུལ་ཁྲིམས་དང༌། སྦྱིན་པ་དང༌། བཟོད་པ་དང༌། བརྩོན་འགྲུས་ཏེ་བསོད་ནམས་ཀྱི་ཚོགས་ཡོངས་སུ་གཟུང་ངོ༌། །ཡོན་ཏན་བཟང་ཞིང་ཞེས་བྱ་བ་ནི་ཡོན་ཏན་གྱི་ལམ་ལ་རྗེས་སུ་དགའ་བ་སྟེ། དེའི་ཡོན་ཏན་ལ་རྗེས་སུ་དགའ་བར་འབངས་ཀྱང་བསླབས་པའོ། །དེས་ན་རྒྱལ་པོ་ཅི་ཞིག་ཏུ་འགྱུར་ཞེ་ན། དེའི་ཕན་ཡོན་འབངས་ལ་ཕན་གདགས་ཞེས་བྱ་བའི་ཚིགས་བཅད་སྨོས་སོ། །འབངས་ལ་ཕན་གདགས་པ་ནི་རྒྱལ་པོའི་དོན་གྱི་མཆོག་ཡིན་ཏེ། ཅིའི་ཕྱིར་ཞེ་ན། ཚེ་རབས་གཉི་གའི་བདེ་བའི་ཕྱིར་རོ། །འཇིག་རྟེན་འདིར་ནི་གྲགས་པ་ལ་སོགས་པ་འཐོབ་པར་འགྱུར་རོ། །འཇིག་རྟེན་ཕ་རོལ་དུ་ནི་བདེ་འགྲོར་འགྲོ་བས་ཕན་པའོ། །འདི་ཡིན་ཞེས་བྱ་བ་ནི་ཆོས་ལ་དགའ་བ་སྟེ། རྒྱལ་པོའི་ཆོས་ལ་དགའ་བ་དེས་སྐྱེ་དགུ་ལ་ཕན་པར་འགྱུར་ཏེ། ཅིའི་ཕྱིར་ཞེ་ན། རྒྱལ་པོའི་རྗེས་སུ་འབངས་ཀྱང་སྤྱོད་པའི་ཕྱིར་རོ། །དེ་བས་ཆོས་བཞིན་ས་ལ་ཞེས་བྱ་བ་ནི་སྐྱེ་དགུ་ལ་ཕན་པ་དེས་ནི་འཇིག་རྟེན་གཉི་ག་ལ་ཕན་པའི་ཕྱིར་རོ། །གནས་པར་བྱེད་པ་ཡིན་པས་གནས་པར་གྱུར་པ་སྟེ། དེ་བས་ན་འདི་དག་གིས་ནི་དེའི་དྲུང་ན་གནས་པའི་ཕན་ཡོན་བསྟན་ཏོ། །བཀུར་སྟི་དང་ཚིག་སྙན་པ་ནི་བཀུར་སྟི་དང་ཚིག་སྙན་པ་དག་གོ །དེའི་སྦྱོར་བ་ནི་བཀུར་སྟི་དང་ཚིག་སྙན་པའི་སྦྱོར་བའོ། །རལ་གྲི་དང་དྲི་མ་མེད་པ་ནི་རལ་གྲི་དྲི་མ་མེད་པའོ། །དེ་ལྟར་སྔོ་བ་ནི་རལ་གྲི་དྲི་མ་མེད་པ་ལྟར་སྔོ་བའོ། །ཡང་ན་རལ་གྲི་དྲི་མ་མེད་པས་སྔོ་བ་ནི་རལ་གྲི་དྲི་མ་མེད་པ་ལྟར་སྔོ་བའོ། །སྟོན་ཀ་མཛེས་པ་ནི་སྟོན་གྱི་མཛེས་པའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ངང་པའི་སྐྱེས་པའི་རབས་སོ།། །།སྐྱེས་བུ་དམ་པ་རྣམས་ནི་རིམ་གྲོ་མ་བྱས་ཀྱང་སྙིང་བརྩེ་བ་ལྷོད་པར་མི་འགྱུར་ཏེ། ཅིའི་ཕྱིར་ཞེ་ན། བཟོད་པ་ལ་གོམས་པའི་ཕྱིར་རོ། །ཕན་བཏགས་པ་ལ་ཡང་སྙིང་བརྩེ་བ་ལྷོད་པར་མི་འགྱུར་ཏེ། དྲིན་ཏུ་གཟོ་བའི་ཕྱིར་རོ། །འདིར་དེ་གཉིས་ཀྱང་ཇི་ལྟར་རིགས་པ་བཞིན་དུ་སྦྱར་རོ། །རིག་པའི་གནས་རྣམས་ཀྱི་གོ་རིམས་གང་ཡིན་པ་དེ་ནི་རིག་པའི་གནས་རྣམས་ཀྱི་གོ་རིམས་ཏེ། རྒྱུན་
མི་འཆད་པར་ཕ་རོལ་ཏུ་འགྲོ་བ་ཡིན་པའི་ཕྱིར་རིག་པའི་གནས་ཀྱི་རིམ་པའོ། །མཁས་པར་བྱ་བ་རྣམས་ལ་དེ་མཁས་པར་བྱས་པ་སྟེ། སྒྱུ་རྩལ་རྣམས་ལ་ནི་མཁས་པར་བྱ་བ་ཉི་ཚེར་ཟད་ཀྱི། ལས་ཀྱིས་སྒྲུབ་པ་ནི་མ་ཡིན་ནོ། །རབ་ཏུ་བྱུང་ནས་ཀྱང་ཞེས་བྱ་བ་ནི་རབ་ཏུ་བྱུང་བ་ལ་བརྟེན་པ་ཡིན་པས་རབ་ཏུ་བྱུང་བའོ། །རབ་ཏུ་བྱུང་བ་དང་འཇིག་རྟེན་ལ་ཕན་འདོགས་པ་གཉིས་ཀྱིས་ནི་བདག་དང་གཞན་ལ་ཕན་པ་སྒྲུབ་པའི་ཡོན་ཏན་དང་མཐུན་པ་ཉིད་དེ། དེས་ཆོས་ཀྱི་གཙུག་ལག་ལྷག་མ་རྣམས་འཛིན་པའོ། །སློབ་དཔོན་གྱི་གོ་འཕང་ནི་གཞན་གྱིས་ཉེ་བར་འཚོ་བ་ཉིད་དུ་བསྟན་ཏོ། །དེ་བསོད་ནམས་དང་ལྡན་ཞིང་ཞེས་བྱ་བ་འདིས་ནི་སྦྱིན་པ་དང༌། ཚུལ་ཁྲིམས་དང༌། བཟོད་པའི་ཕ་རོལ་ཏུ་ཕྱིན་པ་རབ་ཏུ་བསྒོམ་པ་ཉིད་དུ་སྟོན་ཏེ། འདི་ལྟར་སྦྱིན་པས་ནི་གཟུགས་བཟང་བ་ལ་སོགས་པའི་ཡོན་ཏན་དུ་འགྱུར་རོ། །ཚུལ་ཁྲིམས་ཀྱིས་ནི་མངོན་དུ་བསྡུ་བ་ལ་སོགས་པའི་བཀུར་སྟིའི་བདེ་བ་འབྱུང་ངོ༌། །བཟོད་པས་ནི་སྐྱེ་བོ་མང་པོའི་འཁོར་སྙིང་ཉེ་བ་ཉིད་དུ་འགྱུར་རོ། །ཤེས་རྒྱ་ཆེ་བས་ཞེས་བྱ་བ་ནི་ཡེ་ཤེས་ཀྱི་ཚོགས་ཡོངས་སུ་བསགས་པའི་ཕྱིར་རོ། །འདི་གཉིས་ཀྱིས་ནི་རྒྱུ་དང་འབྲས་བུ་བསྟན་ཏོ། །འཇིག་རྟེན་གྱི་སྤྱོད་ཚུལ་ལ་མཁས་པ་དང་ཡོན་ཏན་དང་ལྡན་པས་ཞེས་བྱ་བ་ནི་བདག་དང་གཞན་ལ་ཕན་པའི་ཡོན་ཏན་ཕུན་སུམ་ཚོགས་པ་དང་ལྡན་པར་བསྟན་ཏོ། །ཡང་ན་གང་གིས་སྣ་ཚོགས་པ་ཉིད་ཀྱི་རྣམ་པའི་རྒྱུ་བསྟན་ཏེ། བསོད་ནམས་དང་ལྡན་པའི་ཕྱིར་རོ། །བསོད་ནམས་ཆེན་པོ་དང་ལྡན་པ་ལ་ནི་རྒྱལ་པོ་དང་རྒྱལ་པོའི་བློན་པོ་རྣམས་བཀུར་སྟི་བྱེད་པ་ཡིན་ནོ། །ཤེས་པ་རྒྱ་ཆེ་བའི་ཕྱིར་ནི་མཁས་པ་རྣམས་ཀྱིས་བཀུར་སྟི་བྱ་བ་ཡིན་ནོ། །འཇིག་རྟེན་གྱི་སྤྱོད་ཚུལ་ལ་མཁས་པས་ནི་བྲམ་ཟེ་དང༌། ཁྱིམ་པ་རྣམས་ཀྱིས་བཀུར་སྟི་བྱ་བ་ཡིན་ནོ། །ནན་ཏན་ཆེ་བའི་ཡོན་ཏན་དང་ལྡན་པས་ནི་གཞན་མུ་སྟེགས་ཅན་རྣམས་དང་རབ་ཏུ་བྱུང་བ་རྣམས་ཀྱིས་བཀུར་སྟི་བྱ་བ་ཡིན་ནོ། །ལས་སུ་དྲན་པར་བྱེད་པ་ཡིན་ཏེ། ཡིད་ཀྱི་ལས་ཀྱིས་སོ། །ཡོན་ཏན་ཞེས་བྱ་བ་ནི་བློ་ཁྱད་པར་དུ་འཕགས་པ་ལས་གྱུར་པའི་ཡོན་ཏན་ནོ། །བསོད་ནམས་ཉིད་གཞི་ཡིན་པས་བསོད་ནམས་གཞིའོ། །བསོད་ནམས་ཀྱི་གཞི་ལས་ཐོབ་
ཅིང་འབར་བ་གང་ཡིན་པ་དེ་ནི་བསོད་ནམས་ཀྱི་གཞི་ལས་འབར་བའོ། །བསོད་ནམས་ཞེས་སྨོས་པས་ནི་གང་སྔར་བསྟན་པའི་བསོད་ནམས་དང་ལྡན་པའི་ཞེས་བྱ་བ་དེ་ཉིད་བསྟན་ཏོ། །ནན་ཏན་སྒྲུབ་པའི་བྱིན་གྱིས་ཞེས་བྱ་བ་ནི་གང་སྔར་བསྟན་པའི་བདག་གི་སྒྲུབ་པ་སྟེ། ནན་ཏན་ཆེ་བའི་ཡོན་ཏན་ཞེས་བྱ་བ་དང༌། གཞན་གྱི་སྒྲུབ་པ་སྟེ་འཇིག་རྟེན་གྱི་ཚུལ་ལ་མཁས་པ་ཞེས་བྱ་བ་དེ་གཉི་ག་ནི་ནན་ཏན་སྒྲུབ་པའི་བྱིན་གྱིས་ཞེས་བྱ་བ་ཡིན་ནོ། །ཡང་ན་ཡོན་ཏན་ཞེས་སྨོས་པས་ནི་འཇིག་རྟེན་གྱི་སྤྱོད་ཡུལ་ལ་མཁས་པ་ཞེས་བྱ་བ་དེ་གཟུང་ངོ༌། །ཡོན་ཏན་སྒྲུབ་པའི་བྱིན་གྱིས་ཞེས་བྱ་བ་ནི་སྔར་བསྟན་པའི་ནན་ཏན་ཆེ་བ་ཡིན་པར་བསྟན་ཏོ། །དགྲ་ཡང་རང་གི་གྲགས་པ་བསྲུང་བའི་ཕྱིར། །ཞེས་བྱ་བ་ནི་ཡོན་ཏན་དང་ལྡན་པ་ལ་བསྙེན་བཀུར་བྱེད་པས་སོ། །ཡོན་ཏན་ཅན་ལ་སྡང་བ་དེ། །ཞེས་པ་ནི་རང་གི་གྲགས་པ་འཇིག་པར་བྱེད་པའི་ཕྱིར། ཡོན་ཏན་ཅན་ལ་བསྙེན་བཀུར་བྱེད། །ཅེས་བྱ་བའི་དོན་ཏོ། །རྒྱ་ཆེ་བ་དང་མཐུ་ནི་རྒྱ་ཆེ་བ་དང་མཐུའོ། །ཡོན་ཏན་རྣམས་ཀྱི་མཐུ་ཆེ་བ་ཐོས་པ་ནི་ཡོན་ཏན་གྱི་མཐུ་ཆེ་བ་དེས་ཐོས་པའོ། །ཡོན་ཏན་འདི་རྣམས་ཇི་སྲིད་དུ་ལྡན་པ་དང༌། ཇི་ལྟར་ལྡན་པ་བསྟན་ཏེ། བསུ་བ་ལ་སོགས་པའི་བཀུར་སྟི་ཆེར་བྱས་ཏེ། ཞེས་བྱ་བ་ལ་སོགས་པ་སྨོས་པས་ནི་མངོན་པར་སྨྲ་བ་ལ་སོགས་པ་གཟུང་ངོ༌། །རིམ་གྲོ་ནི་མཉེས་པའི་ལས་ལ་སོགས་པའོ། །བཀུར་སྟི་ནི་ཉེ་བར་འགྲོ་བ་ལ་སོགས་པའོ། །ཉེ་བར་ལོངས་སྤྱོད་པར་བྱ་བ་ཡིན་པས་ན་ལོངས་སྤྱོད་དོ། །ལོངས་སྤྱོད་ཉིད་ཡོན་ཏན་ཡིན་པས་ན་ལོངས་སྤྱོད་ཡོན་ཏན་ནོ། །ཡོན་ཏན་ཅན་ལ་དགའ་བ་ཉིད་ཀྱིས་ཕན་འདོགས་པར་བྱེད་པའི་རྒྱུ་རབ་ཏུ་ནུས་པ་སྟེ་བསམ་པའི་ཆོ་ག་བསྟན་ཏོ། །གུས་པ་མེད་པ་གང་ཡིན་པ་དེ་དག་ནི་གུས་པ་མེད་པ་རྣམས་སོ། །གང་ལ་ཞེ་ན། ཆོས་དང་ཆོས་སྨྲ་བ་རྣམས་ལའོ། །ཆོས་ལ་གུས་པ་མེད་པ་ལ་ཅིའི་ཕྱིར་ཆོས་སྟོན་པར་བྱེད་ཅེ་ན། ཆོས་ལ་དགའ་བའི་ཕྱིར་རོ། །ཆོས་སྟོན་པ་ལ་མི་གུས་པ་ལ་ཡང་ཅིའི་ཕྱིར་བསྟན་པར་འདོད་ཅེ་ན། གཞན་ལ་སྙིང་བརྩེ་བའི་ཕྱིར་རོ། །ཕན་པར་འདོད་ཅིང་ཡོན་ཏན་དགའ་བ་ཡིན། །སྐྱེ་བོ་གནོད་གཙང་འདྲ་ལ་སྨོས་ཅི་དགོས། །ཞེས་བྱ་བ་སྨོས་ཏེ།
འདི་གསུམ་གྱིས་ནི་ཕྱི་རོལ་གྱི་སྣོད་དང་འདྲ་བར་ཆོས་ཉན་པ་རྣམས་ཀྱི་ཉེས་པ་གསུམ་མེད་པར་སྟོན་ཏེ། གང་གི་ཕྱིར་སྣོད་འདི་གསུམ་ལ་ཆར་བབ་ཀྱང་དོན་མེད་པ་ཉིད་དེ། བསིལ་བ་དང་ཕན་པ་ཡིན་ཡང་ཆུ་མི་འཇུག་པ་དང༌། གང་དུ་ཆུ་འཇུག་ཀྱང་མི་གཙང་བས་མ་རུང་བར་འགྱུར་བ་དང༌། གང་དུ་ཆུ་ཞུགས་ཀྱང་སྣོད་རྡོལ་བས་མི་གནས་པ་སྟེ། དེ་ལྟར་ཉན་པའི་སྐྱེ་བོ་རྣམ་པ་གསུམ་པ་ལ་ནི་ཆོས་བསྟན་ཀྱང་དོན་མེད་ཅིང་ཆུད་ཟོས་པ་ཉིད་ཡིན་ཏེ། གང་དུ་ཐོས་པ་བྱ་བ་གཡེང་བ་དང༌། རྨུགས་པ་རྣམ་པ་གཉིས་ཀྱིས་མི་འཇུག་པ་དང༌། གང་དུ་འཇུག་ཏུ་ཟིན་ཀྱང་ཚུལ་བཞིན་དུ་ཡིད་ལ་མི་བྱེད་པས་མ་རུང་བར་འགྱུར་བ་དང༌། གང་དུ་ཡང་དྲན་པ་མེད་པས་མི་གནས་པའོ། །གང་ཡོན་ཏན་འདོད་པའི་སྐྱེ་བོ་ཞེས་སྨོས་ཏེ། འདིས་ནི་གང་དུ་ཐོས་པ་མི་འཇུག་སྟེ། གཡེང་བ་དང༌། རྨུགས་པ་རྣམ་པ་གཉིས་ཀྱིས་སྐྱོན་མེད་པར་སྟོན་ཏོ། །ཡོན་ཏན་དགའ་བ་ཞེས་བྱ་བ་ལ། ཡོན་ཏན་ལ་དགའ་ཞིང་གཟེངས་བསྟོད་པ་དེ་ནི་ཡོན་ཏན་ལ་དགའ་ཞིང་གཟེངས་བསྟོད་པའོ། །གང་ཟག་གང་གིས་ཡོན་ཏན་ལ་དགའ་བ་དེ་ནི་གཡེང་བ་མེད་པ་ཡིན་ནོ། །ཆོས་ཀྱི་ཡོན་ཏན་ལ་དགའ་བ་དེ་ནི་གཉིད་དང་རྨུགས་པ་མེད་པ་ཡིན་ནོ། །མཁས་པ་རྣམས་ཀྱི་གོ་འཕང་ཡིན་པས་ན་མཁས་པའི་ཐབས་ཏེ། མཁས་པའི་ཐབས་ཐོབ་པ་དེ་དག་དེས་སོ། །ཕྲག་དོག་གི་སེམས་བསྐྱེད་པ་ཞེས་བྱ་བ་ནི་གཞན་གྱི་ཕུན་སུམ་ཚོགས་པ་ལ་ཕྲག་དོག་གི་སེམས་བསྐྱེད་པའི་ཕྱིར་རོ། །ཡོན་ཏན་གྱི་ཁྱད་པར་ཡིན་པས་ན་ཡོན་ཏན་ཁྱད་པར་རོ། །ཡང་ན་ཡོན་ཏན་ཉིད་ཁྱད་པར་ཡིན་པས་ཡོན་ཏན་ཁྱད་པར་རོ། །བདག་ཉིད་ཀྱི་ཡོན་ཏན་གྱི་ཁྱད་པར་ཡིན་པས་རང་གི་ཡོན་ཏན་ཁྱད་པར་རོ། །ཡང་ན་བདག་གི་ཡོན་ཏན་ཉིད་ཁྱད་པར་ཡིན་པས་རང་གི་ཡོན་ཏན་ཁྱད་པར་རོ། །དེ་དང་ལྡན་པ་ཡིན་པས་རང་གི་ཡོན་ཏན་ཁྱད་པར་ཅན་ནོ། །དེས་འགྲོ་བ་མགུ་བར་ནུས་པའི་མཐུ་སྦྱོར་བ་གང་ཡིན་པ་དེ་ནི་འགྲོ་བ་མགུ་བར་ནུས་པའི་མཐུ་ཅན་ནོ། །ཡོན་ཏན་བཅོས་མས་ཞེས་བྱ་བ་ནི་ཡོན་ཏན་བཅོས་མ་ཉིད་ཀྱིས་ཏེ། དེས་བཀུར་སྟི་ཐོབ་པའོ། །དེ་ལ་ཤིན་ཏུ་འབར་བ་ཉིད་ཡིན་ཏེ་འཕེལ་བ་ཉིད་དོ། །ཕྲག་
དོག་གི་མེ་ཞེས་བྱ་བ་ལ། ཕྲག་དོག་ཉིད་མེ་ཡིན་པས་ཕྲག་དོག་གི་མེའོ། །ཕྲག་དོག་གི་མེ་དེས་ནི་མེ་བཞིན་དུ་རང་གི་གནས་སྲེག་པའི་ཕྱིར་རོ། །རྒྱལ་པོ་ཆོས་ལ་བརྟེན་པ་ཞེས་བྱ་བ་ནི་རྒྱལ་པོའི་ཆོས་དང་མི་མཐུན་པའི་ཕྱིར་ཆོས་ལ་བརྟེན་པ་དེའོ། །ཡོན་ཏན་ལ་དགྱེས་པ་ཞེས་བྱ་བ་ནི་ཆོས་ཀྱི་གཏམ་གྱིས་སོ། །ཆོས་ལ་མངོན་འཚལ་ནས་ཞེས་བྱ་བ་ནི་ཆོས་ལ་མངོན་པར་ཕྱོགས་པ་སྟེ་རྗེས་སུ་དགའ་ཞིང་འདོད་པ་ཞེས་བྱ་བའི་དོན་ཏོ། །བརླག་པར་བགྱི་བའི་སླད་དུ་གཡོ་དང་བཅས་པའི་ཚིག་འཇམ་པོར་སྨྲ་ཞིང་སྤྱོད་པ་གང་ཡིན་པ་དེ་ནི་བརླག་པར་བགྱི་བའི་སླད་དུ་གཡོ་དང་བཅས་པའི་ཚིག་འཇམ་པོར་སྨྲ་ཞིང་སྤྱོད་པའོ། །བརླག་པ་ཞེས་བྱ་བ་ནི་དཔལ་གང་ཡིན་པ་དེ་ཉམས་པར་བྱེད་པ་སྟེ། ཆོས་ནན་ཏན་དུ་བྱེད་ཀྱང་རྒྱལ་པོ་ནི་རླག་པར་བྱེད་པ་ཉིད་ཡིན་ཏེ། རྒྱལ་པོའི་ཆོས་དང་འགལ་བའི་ཕྱིར་བརླག་པ་ཞེས་བརྗོད་དོ། །ཉམས་དྲོད་ནི་སྤྱོད་པ་ལ་འཇུག་པ་ཞེས་བྱ་བའི་དོན་ཏོ།། དེའི་རྟེན་དུ་གྱུར་པས་ན་ཉམས་དྲོད་འཛིན་པ་ལགས་ཏེ། ཞེས་བྱ་བའོ། །བྱ་མ་རྟ་ཞེས་བྱ་བ་ནི་ཉན་རྣ་བའོ། །བྱ་མ་རྟ་ཉིད་བཏང་བ་ཡིན་པས་བྱ་མ་རྟ་བཏང་བའོ། །ཐུགས་རྗེ་ཆེ་བ་ཞེས་བྱ་བ་ལ་ཐུགས་རྗེ་ནི་གཞན་སྡུག་བསྔལ་དང་བྲལ་བའི་དོན་དུ་གཉེར་བའོ། །ངོ་ཚ་མཁྱེན་པ་ཉིད་ཀྱི་འཇམ་དེས་ཅན་དུ་གྱུར་ཏེ། དེས་ལས་ལ་སོགས་པ་སྤངས་པའི་ཕྱིར་རོ། །སྲིད་དང་འདོད་པ་དང་མི་མཐུན་པའི་ཚུལ་གང་ལ་ཡོད་པ་དེ་ནི་སྲིད་པ་དང་འདོད་པ་དང་མི་མཐུན་པའོ། །དེ་ཡང་སྙིང་རྗེ་དང་ལྡན་པར་བགྱི་བའི་ཆེད་དུ་བགྱིད་པ་སྟེ། དེ་གཞན་གྱི་བྲན་བཞིན་དུ་བྱེད་པས་དོན་དུ་སྒྲུབ་ཅིང་གང་གཞན་གྱིས་བརྙས་པར་འོས་པ་དེ་བྱེད་པ་ནི་དོན་སྒྲུབ་པ་ཉིད་དུ་ཡིན་ནོ། །ཆེད་ཆེར་བགྱིས་ནས་ཐབས་ཀྱིས་བག་འབེབས་སོ། །ཞེས་བྱ་བ་ནི་སྡུག་བསྔལ་བ་དང༌། ཡིད་མི་བདེ་བ་མེད་པའི་ཐབས་ཀྱིས་སོ། །བཤེས་ཤིང་འདྲུལ་ལ་ཞེས་བྱ་བ་ནི་མཛའ་བར་འབྲེལ་པའོ། །ཡིད་མི་ཆེས་པ་དང༌། བརྩེ་བ་ཆུང་བ་གཉིས་ཀྱིས་སེམས་སྔོན་དང་མི་འདྲ་བར་གྱུར་པ་གང་ཡིན་པ་དེ་ནི་ཡིད་མི་ཆེས་པར་གྱུར་ཏེ། བྱམས་པ་དང་བཀུར་སྟི་ཆུང་ཞེས་སེམས་སྔོན་དང་མི་འདྲ་བར་གྱུར་པའོ། །དབྱེན་གྱི་རྡོ་རྗེ་ཉིད་སེར་བ་ཡིན་ཏེ། དེ་ལྟུང་བ་ནི་དབྱེན་གྱི་
སེར་བ་རྡོ་རྗེ་འབབ་པའོ། །མཛའ་བ་བརྟན་པ་ཞེས་བྱ་བ་ནི་བརྟན་པར་གྱུར་པའི་མཛའ་བ་དེ་ལ་ཕན་པ་མི་འདོད་པས་སྨྲས་པའི་དབྱེན་གྱི་ཚིག་ཡིན་ཏེ། སེམས་ཀྱི་ལོངས་སྤྱོད་མེད་པའི་ཕྱིར་རོ། །ཉམས་ཤིང་ཞིག་པར་མི་འགྱུར་སུ་ཞིག་ཡོད། །ཅེས་བྱ་བ་ནི་གཅིག་ཀྱང་མེད་པས་ཐམས་ཅད་ཀྱང་ཉམས་ཤིང་ཞིག་པར་འགྱུར་བ་ཉིད་དོ། །ཡང་ན་མཛའ་བ་བརྟན་པ་ནི་ཡིད་ཆེས་པའོ། །ཉམས་ཤིང་ཞིག་པ་ནི་སྔོན་ཇི་ལྟ་བ་བཞིན་དུ་མཛའ་བ་བརྟན་པའམ་ཡིད་ཆེས་པ་མེད་པར་འགྱུར་བའི་ཕྱིར་རོ། །བཀུར་སྟི་ཆུང་བར་འགྱུར་བ་ཞེས་བྱ་བ་ནི་བརྩེ་བ་དང་གུས་པ་ཆུང་བའི་ཕྱིར་རོ། །བྱ་བ་མང་པོ་ལ་བྲེལ་བ་གང་ཡིན་པ་དེ་ནི་བྱ་བ་མང་པོས་བྲེལ་བའོ། །དེ་ལྟར་གྱུར་པ་ཡིད་ལའང་མི་བྱེད་ན། །ཞེས་བྱ་བ་ནི་རིམ་གྲོ་མི་བྱེད་པར་གྱུར་པའོ། །དེའི་དྲུང་ན་གནས་པ་ནི་དྲུང་ན་འཁོད་པའོ། །དེའི་དྲུང་ན་འཁོད་ཅིང་འཁོར་བའི་ཚུལ་གང་ལ་ཡོད་པ་དེ་ནི་དེའི་འཁོར་ན་འཁོད་པ་རྣམས་སོ། །གུས་པ་དང་རིམ་གྲོ་ནི་གུས་པ་དང་རིམ་གྲོའོ། །དེ་གཉིས་ཀྱི་ལྷོད་པར་གྱུར་པ་ནི་གཡེལ་བའོ། །དེའི་ཕྱིར་བཤད་པ། སྟོན་པ་དང་བྱེད་པ་གཉིས་ཐ་དད་དོ་ཞེས་བྱ་བ་ཉིད་ཡིན་པའི་ཕྱིར་རོ། །དོགས་པ་འབྱུང་བའི་གནས་ཡིན་པས་དོགས་པ་འབྱུང་བའི་གཞིའོ། །ནོངས་པར་དོགས་པ་འབྱུང་བའི་གཞི་ཞེས་བྱ་བ་ནི་ཉེས་པ་འབྱུང་བའི་གཞི་ཞེས་བྱ་བའི་དོན་ཏོ། །བག་མེད་པ་ཉིད་ཉེས་པ་ཡིན་པས་བག་མེད་ནོངས་པའོ། །ཡང་ན་བག་མེད་པས་ནོངས་པའོ། །འཕྲལ་ལ་འདི་ལྟར་མི་མཆི་བ་ཞེས་བྱ་བ་ནི་རྒྱུ་དང་བཅས་པ་ཉིད་དོ། །བཀུར་སྟི་ཆུང་ཞིང་ཁྲོས་པའི་ཡིད་གང་ཡིན་པ་དེ་ནི་བཀུར་སྟི་ཆུང་བའི་སེམས་ཏེ་དེ་མེད་པའོ། །འོ་ན་རྒྱུ་དེ་གང་ཡིན་ཞེ་ན། སྨྲས་པ། ཁྱོད་ནི་ཆོས་ཀྱི་སྣོད་དུ་ཞེས་བྱ་བ་ལ་སོགས་པ་ཡིན་ནོ། །དེ་ནས་རྒྱལ་པོ་དེའི་ཁྱི་གནང་ཆེན་ཞེས་བྱ་བ་ལ་སོགས་པའི་ཚིག་གིས་ནི་མི་མ་ཡིན་པ་ཁྱི་ཡང་ཟུག་པའི་ཚུལ་གྱིས་རྒྱུ་ཡོད་པ་ཡིན་ཏེ། དབྱེན་གྱི་ཚུལ་ངེས་བསྟན་པའི་ཕྱིར་རོ། །བྲི་བར་གྱུར་པ་ནི་ཡལ་བར་བོར་བའོ། །གསུམ་པོ་འདི་ནི་བདག་གི་འགྲོ་བའི་རྒྱུ་ཡིན་ཏེ། གནས་ལ་ལྷག་པར་ཞེན་པ་དང༌། གཞན་དུ་འགྲོ་བའི་གནས་
མ་མཐོང་བ་དང༌། བསྙེན་བཀུར་ཆུང་བར་ཡོངས་སུ་ཤེས་པའོ། །ཕྱིས་བསྐྲད་པར་འགྱུར་བ་གང་ཡིན་པ་དེ་ནི་སླད་ཀྱིས་བསྐྲད་པར་འགྱུར་བ་སྟེ། རྗེས་སུ་རྒྱལ་པོས་བསྐྲད་པ་དང༌། སྤྱུགས་པར་འགྱུར་ཞེས་པའོ། །མི་དགའ་བ་ནི་བརྩེ་བ་གཅོད་པའོ། །མི་དགའ་བས་གདུངས་པའི་སེམས་གང་ཡིན་པ་དེ་ནི་མི་དགའ་བ་བཞིན་དུའོ། །ལན་ཅིག་ཙམ་ཞིག་སྨ་བབ་གྱུར་པ་ཡིས། །ཞེས་བྱ་བ་ནི་བརྙས་པར་འགྱུར་པའོ། །སྔོན་ཆད་ཕན་བཏགས་ཞེས་བྱ་བ་ནི་ཕན་བཏགས་པ་མང་དུ་བྱས་པ་སྟེ། ག་ལ་མཉམ་ཞེས་བྱ་བ་ནི་མཉམ་པར་མི་བྱའོ་ཞེས་བྱ་བའི་དོན་ཏོ། །དེས་ནི་དེའི་ཕྱིར། མི་དགའ་བཞིན་དུ་མ་ཆིས་སུ་ག་ལ་རུང༌། །ཞེས་བྱ་བ་ཡིན་ནོ། །དེ་ལྟ་བས་ན་འགྲོ་བར་བྱའོ་ཞེས་བྱ་བའི་ཚིག་གི་སྐབས་ཤེས་པར་བྱས་ནས་དེའི་ལན་བསྟན་པའི་ཕྱིར། བྱམས་པའི་རླ་ན་མེད་ཅེས་བྱ་བའི་ཚིགས་བཅད་སྨོས་ཏེ། བྱམས་པའི་རླན་མེད་པ་གང་ཡིན་པ་དེ་ནི་བྱམས་པའི་རླན་མེད་པའོ། །བསྟན་དུ་མི་རུང་བ་ནི་གནས་པར་བྱ་བ་མ་ཡིན་པའོ། །ཅིའི་ཕྱིར་ཞེ་ན། རབ་ཏུ་བསྒྲིམས་ཏེ་དེའི་དོན་བསྒྲུབས་ཀྱང་རྙོག་པ་ཅན་དུ་གྱུར་པའི་ཕྱིར་རོ། །རྙོག་པ་ཅན་དུ་གྱུར་པས་ན་དོན་ཆུང་བ་ཉིད་དེ། བྱམས་པའི་རླན་མེད་པ་དེས་ནའོ། །ཇི་ལྟ་བུ་ཞེ་ན། ཁྲོན་པ་སྐམ་པོ་བཞིན་དུ་བསྟེན་པར་མི་བྱའོ། །ཇི་ལྟར་ཁྲོན་པ་སྐམ་པོ་ལ་ནི་ཆུ་འདོད་པ་དེས་རབ་ཏུ་བསྒྲིབས་ཏེ་བསྒྲུབས་ཀྱང་ཆུང་ཞིང་རྙོག་པ་ཅན་དེ་དང་དེར་འགྱུར་རོ། །རབ་ཏུ་དང་བ་ཉིད་ལ་བསྟེན་པའི་རིགས་ཏེ། ཅིའི་ཕྱིར་ཞེ་ན། དེ་ལས་ནི་དོན་གྲུབ་པ་ཉིད་དེ། འབད་པར་བསྒྲུབས་མི་དགོས་པ་དང། དང་བ་ཉིད་ཡིན་ཏེ། ཇི་ལྟ་བུ་ཞེ་ན། སྟོན་ཀའི་མཚོ་ཆེན་པོའི་ཚུ་གཙང་བ་ལྟ་བུ་སྟེ། དེ་ནི་བསྟེན་པའི་རིགས་སོ། །བདེ་བ་འདོད་ཅིང་ཉོན་མོངས་མི་འདོད་པས། །ཞེས་བྱ་བ་ནི་སེམས་ཀྱིས་སྔར་མྱོང་བ་ཞེས་བྱ་བའི་དོན་ཏོ། །འདིས་ཀྱང་བློ་ཕྱིན་ཅི་ལོག་པར་བསྟན་ཏེ། གང་སྔར་བསྟན་པའི་ངན་ཅིང་བྱིས་པའི་ཆོས་ཞེས་བྱ་བའི་ཚིགས་བཅད་དེའི་གཉེན་པོ་འདིས་བསྟན་ཏོ། །གུས་པར་བྱེད་ཀྱང་གཞན་དུ་ཕྱོགས་པ་དང༌། །ཞེས་བྱ་བའི་ཚིགས་བཅད་འདིས་ནི་སྔར་བསྟན་མ་ཐག་པའི་ཚིགས་བཅད་གསུམ་གྱི་གཉེན་པོ་བསྟན་པའི་ཕྱིར་རོ། །གུས་པར་བྱེད་
པ་གང་ཡིན་པ་དེ་ནི་གུས་པར་བྱེད་པའོ། །དེ་བས་ན་གཞན་དུ་ཕྱོགས་པ་ནི་རྒྱབ་ཀྱིས་བལྟས་པའོ། །འདི་ནི་རབ་ཏུ་བདེ་བ་འདོད་ཅིང་ཉོན་མོངས་མི་འདོད་པས་ཞེས་བྱ་བའི་ཚིགས་བཅད་དེའི་གཉེན་པོ་བསྟན་ཏོ། །གཞན་དུ་ཕྱོགས་ཀྱང་ཞུམ་པས་དེ་ལ་ལྟ། ཞེས་བྱ་བ་འདིས་ནི། བྱམས་པའི་རླན་མེད་ཅེས་བྱ་བའི་ཚིགས་བཅད་དེའི་གཉེན་པོ་བསྟན་ཏོ། །སྔོན་ཆད་ཕན་བཏགས་དྲིན་དུ་མི་གཟོ་བ། །ཞེས་བྱ་བ་འདིས་ནི། ལན་ཅིག་ཙམ་ཞིག་སྨ་བབ་གྱུར་པ་ཡིས། །ཞེས་བྱ་བའི་ཚིགས་བཅད་ཕྱེད་ཀྱི་གཉེན་པོ་བསྟན་ཏོ། བསླང་བ་དྲེགས་ན་ཞེས་བྱ་བ་ནི་བསླང་བ་ཉིད་དྲེགས་པ་ནི་བསླང་དྲེགས་པ་སྟེ། དེས་ནི་བྱམས་པ་མེད་པར་བྱེད་དོ་ཞེས་གཟུང་བར་བྱའོ། །གནས་པའི་སྐྱོན་ཞེས་བྱ་བ་ནི་ལྷན་ཅིག་ཏུ་འདུག་པ་ལ་སོགས་པའི་སྐྱོན་ཡིན་ཏེ། དེས་ན་དེའི་ཉེས་པ་ཡིན་པའི་ཕྱིར་ད་ནི་རེ་ཞིག་འགྲོའོ་ཞེས་བྱ་བའི་དོན་ཏོ། །བར་ཆད་མང་ལ་གནོད་པ་དང་དགྲ་མང་བས་ཞེས་བྱ་བ་ནི་སེམས་ཅན་དང་སེམས་ཅན་མ་ཡིན་པའི་བར་ཆད་གང་ཡིན་པའི་རྒྱུ་བསྟན་ཏོ། །མཆི་བའི་སྐབས་དང་ལྡན་ན་ཞེས་བྱ་བ་ནི་རྐྱེན་ཚོགས་ནའོ། །གལ་ཏེ་ཞེས་བྱ་བ་ནི་དགེ་ཤིས་པའོ། །མངོན་པར་ཤེས་པ་ལྔ་ནི་མངོན་པར་ཤེས་པ་དྲུག་ལས་ཟག་པ་ཟད་པའི་མངོན་པར་ཤེས་པ་མ་གཏོགས་པའོ། །སྙིང་བརྩེ་བས་རྗེས་སུ་འབྲང་བའི་ཚུལ་གང་ལ་ཡོད་པ་དེ་ནི་སྙིང་བརྩེ་བའི་དྲན་པ་བྱུང་བར་གྱུར་པ་སྟེ། སྙིང་བརྩེ་བ་ནི་སྙིང་རྗེ་སྟེ། མི་དགེ་བའི་རྒྱུ་ལས་བཟློག་པར་འདོད་པ་ཉིད་ནི་སྙིང་རྗེའོ།། རྒྱུ་བརྟག་མི་བཟོད་པ་ཞེས་བྱ་བ་ལས་རྒྱུ་བསྟན་པར་མི་ནུས་པའི་ལྟ་བ་གང་ཡིན་པ་དེ་ནི་རྒྱུ་བརྟག་པ་མི་བཟོད་པའི་ལྟ་བའོ། །འདིར་རྒྱུ་ནི་གང་ཡང་མེད་པར་འདོད་པ་སྟེ། མེད་པར་འདོད་པ་ཉི་ཚེ་ཙམ་དུ་ཟད་པར་ལྟ་བའོ། །པདྨའི་སྡོང་བུ་ནི་འཇམ་པའོ། །ལོ་མ་ནི་འཇམ་པའོ། །ཁ་དོག་ནི་སྔོན་པོ་ལ་སོགས་པའོ། །ཟེ་བ་ནི་འཇམ་པའོ། །སྙིང་པོ་ནི་དབྱིབས་སོ། །དེ་བཞིན་དུ་སེམས་ཅན་ལ་རྒྱུ་མེད་པར་ལྟ་བ་ནི་བྱའི་འདབ་མ་ཞེས་བྱ་བས་བསྟན་པ་ཡིན་ནོ། །འགྲོ་བ་འདི་དག་ངོ་བོ་ཉིད་ཀྱིས་ངེས་ཏེ། ཅིའི་ཕྱིར་ཞེ་ན། ཕྱི་དང་ནང་གི་དངོས་པོ་རྣམས་ལ་བྱེད་པ་པོ་མེད་པར་
ཡང་སྣ་ཚོགས་པར་སྣང་བའི་ཕྱིར་རོ། །རྒྱུ་མེད་པར་འབྱུང་བར་མི་རིགས་ཞེས་བྱ་བ་ནི་ངོ་བོ་ཉིད་ཀྱིས་མེད་པར་ཞེས་བྱ་བའི་དོན་ཏོ། །གཅིག་གཅིག་ཡོད་ཅེས་བྱ་བ་ནི་རང་དགས་སྤྲུལ་པར་བྱེད་པ་སྟེ། འཇིག་རྟེན་སྣ་ཚོགས་སོ། །ཕྱིས་ཀྱང་མཉམ་དུ་མེད་པར་བྱེད། །ཅེས་བྱ་བ་ནི། ཅིའི་ཕྱིར་ཞེ་ན། བྱེད་པ་པོ་རང་དགའི་ཁྱད་པར་གྱིས་ཤིང་རྟ་ལ་སོགས་པ་རྣམ་པ་སྣ་ཚོགས་པའི་དངོས་པོ་འབྱིན་པར་སྣང་བའི་ཕྱིར་རོ། །དེའི་ཡང་རང་དགའི་དབང་གིས་མི་སྣང་བར་བྱེད་པ་ལྟ་བུའོ། །འདི་དག་ཐམས་ཅད་ཅེས་བྱ་བ་ནི་སེམས་ཅན་དང་སེམས་ཅན་མ་ཡིན་པ་དག་གོ ། སྔོན་གྱི་ལས་ཀྱིས་བྱས་ཞེས་བྱ་བ་ལ། སྔོན་གྱི་ལས་ཀྱིས་བྱས་པ་ཡིན་པས་ནི་སྔོན་གྱི་ལས་ཀྱིས་བྱས་པ་སྟེ། སྔོན་གྱི་ལས་ལས་བྱས་པའི་རྒྱུས་ཞེས་བྱ་བའི་དོན་ཏོ། །བདེ་བ་དང་མི་བདེ་བ་ཞེས་བྱ་བ་ནི་བདེ་བ་དང་སྡུག་བསྔལ་ཡིན་ཏེ། སྔོན་གྱི་ལས་ཀྱིས་བྱས་པས་ཞེས་བསྟན་ནས་དེའི་འོག་ཏུ་བདེ་བ་དང་མི་བདེ་བ་གཟུང་ངོ༌། །སྐྱེ་བ་སྔ་མར་བྱས་པའི་ལས་ཉིད་ཀྱིས་ནི་སངས་རྒྱས་པ་དང་ཡང་འདྲ་བ་ཉིད་དུ་སྟོན་ཀྱང་གང་བྱས་པ་དེ་ངེས་པར་སྔ་མའི་ལས་གྱིས་བྱས་པ་ཉིད་དུ་སྟོན་པ་ཡིན་པས་དེ་བསྟན་པའི་ཕྱིར། འབད་པའི་མཐུས་བྱས་པ་ནི་མ་ཡིན་ནོ་ཞེས་བྱ་བ་སྨོས་པ་ཡིན་ཏེ། འདིས་ནི་དེ་ལྟར་བྱུང་བའི་སྐྱེས་བུ་བྱེད་པའི་རྐྱེན་འགོག་པ་ཡིན་ནོ། །བདེ་བ་དང་སྡུག་བསྔལ་གྱི་བྱེད་པའི་འགྲོ་བ་རྣམས་ཀྱི་བྱེད་པ་པོ་གཅིག་ཏུ་མི་རིགས་པ་ཉིད་དེ། ཅིའི་ཕྱིར་ཞེ་ན། དུས་གཅིག་ཏུ་གནས་པ་མང་པོ་དུ་མ་སྟེ། མཐའ་ཡས་པའི་དངོས་པོ་བྱེད་པར་མི་རིགས་པའི་ཕྱིར་རོ། །བདེ་བར་བྱེད་པ་ལ་མཁས་པ་ནི་བདེ་བར་བྱེད་པ་ལ་མཁས་པ་སྟེ། དེ་ཡང་སྡུག་བསྔལ་བར་མཐོང་བའི་ཕྱིར་ཏེ། དེ་བས་ཐམས་ཅད་སྔོན་གྱི་ལས་ལས་གྱུར་པ་ཉིད་དུ་གཟུང་ངོ༌། །སྔར་བསྟན་པའི་སྐྱོན་དང༌། དབང་ཕྱུག་རྒྱུར་བྱེད་པའི་སྐྱོན་བསྟན་པ་ཡིན་ཏེ། སྣ་ཚོགས་པའི་ཕྱིར་ལས་ཀྱི་བྱེད་པ་པོ་ལས་དངོས་པོ་སྐྱེ་བའི་རྒྱུ་ཉིད་དུ་ནི་རུང་སྟེ། དུས་གཅིག་ཏུ་སོ་སོར་གནས་པ་མང་པོ་དཔག་ཏུ་མེད་པའི་དངོས་པོ་སྐྱེ་བ་ནི་རིགས་པ་ཉིད་དོ། །ཁ་དོག་ནི་སྔོན་པོ་ལ་སོགས་པའོ། །ཡོན་ཏན་ནི་དྲི་དང༌། རོ་དང༌། རེག་བྱ་ལ་སོགས་པའི་མཚན་
ཉིད་དོ། །ལྡན་པ་ནི་དབྱིབས་ཀྱི་ཁྱད་པར་དང༌། ཁ་དོག་དག་དང༌། ཡོན་ཏན་དང་ལྡན་པའོ། །རྣམ་པ་སྣ་ཚོགས་པའི་ཁ་དོག་དང༌། ཡོན་ཏན་དང་ལྡན་པ་གང་ཡིན་པ་དེ་ནི་རྣམ་པ་སྣ་ཚོགས་ཁ་དོག་ཡོན་ཏན་དང་ལྡན་པའོ། །འགྲོ་བ་རྣམས་ཀྱི་ལས་ཀྱི་རྒྱུ་མེད་པར་བསྟན་ཏེ། དུས་གཅིག་ཏུ་འབྱུང་ཞེས་བྱ་བས་བསྟན་པ་ནི་དུས་གཅིག་ཏུ་སོ་སོར་གནས་པ་མཐའ་ཡས་པ་མང་པོ་རྣམས་དཔག་ཏུ་མེད་པའི་དངོས་པོར་སྐྱེ་བར་མཐོང་བའི་ཕྱིར་ལས་གང་ཡིན་པ་དེ་ནི་མེད་དེ། དེ་ལ་དུས་གཅིག་ཏུ་དངོས་པོ་མཐའ་ཡས་པ་དཔག་ཏུ་མེད་པའི་དངོས་པོ་སྐྱེ་བ་མེད་པར་འགྱུར་ན་ནི་ཤིང་རྣམ་པ་སྣ་ཚོགས་པའི་ཁ་དོག་དང་ལྡན་པ་སྣང་བས་དེ་རྣམས་ཀྱི་ལས་ནི་མེད་དོ། །དེ་བས་ན་རྒྱུ་མེད་པ་ཉིད་དེ་རང་གི་ས་བོན་གྱི་རྒྱུས་སོ། །རྐྱེན་ཡང་མེད་དེ་དབང་ཕྱུག་བྱེད་པ་པོས་འདོད་པ་དེའི་ཉེས་པར་ཐལ་བའི་ཕྱིར་རོ། །སྔོན་གྱི་ལས་གྱུར་འདོད་པ་ཡང་མ་ཡིན་ཏེ། ལས་མེད་པར་ཁ་དོག་དང་ཡོན་ཏན་ལ་སོགས་པ་རྣམ་པ་སྣ་ཚོགས་པའི་དངོས་པོ་སྐྱེ་བར་སྣང་བའི་ཕྱིར་རོ། །འཇིག་རྟེན་ཕ་རོལ་ཡང་མེད་དེ། ཤིང་དེ་དག་ཉིད་ཞིག་པར་གྱུར་ན་ཕྱིས་ཡང་སྐྱེ་བར་མ་མཐོང་བའི་ཕྱིར་ཏེ། དེ་བས་ན་དེ་བཞིན་དུ་འགྲོ་བ་འདི་དག་ཐམས་ཅད་གནས་པར་འདོད་དོ། །རྒྱལ་རིགས་ཀྱི་གཙུག་ལག་ལས་འབྱུང་བ་ཞེས་བྱ་བ་ནི། ལུགས་ཀྱི་བསྟན་བཅོས་ལས་འབྱུང་བའོ། །ལུགས་ཀྱི་བསྟན་བཅོས་ཉིད་གཡོ་བ་དང་དགྲ་ཐབས་ཡིན་པས། ལུགས་ཀྱི་བསྟན་བཅོས་ཀྱི་གཡོ་བ་དང་དགྲ་ཐབས་ཡིན་ནོ། །གཡོ་བ་དང་དགྲ་ཐབས་བསྟེན་པ་ནི་གཡོ་བ་དང་དགྲ་ཐབས་འབྲེལ་པའོ། །སྙིང་རྗེ་མེད་ཅིང་སྐྱོན་དང་བཅས་པ། ཆོས་དང་འགལ་བ་ལ་ཞེས་བྱ་བ་ནི་སྲོག་གཅོད་པ་ལ་སོགས་པ་དང་བཅས་པའོ། །གྲིབ་མ་རྣམས་ཀྱི་ཤིང་ཡིན་པས་གྲིབ་མའི་ལྗོན་ཤིང་ངོ༌། །གྲིབ་མའི་ལྗོན་ཤིང་དག་ལ་བརྟེན་པ་གང་ཡིན་པ་དེ་ནི་གྲིབ་མའི་ལྗོན་ཤིང་ལ་བརྟེན་པའོ། །བྱས་པ་གཟོ་བའི་སྤྱོད་བ་གང་ཡིན་པ་དེ་བྱས་པ་གཟོ་བའོ། །དེས་བསྲུང་བ་ནི་འཐོབ་པར་འདོད་པའོ། །བསྲུང་བ་དེ་ཉིད་སྨས་པ། དེ་དག་ཇི་སྲིད་དགོས་པའི་དུས་ལ་མ་བབ་པ་དེ་སྲིད་དུ་རང་གི་གྲགས་པ་བསྲུང་བའོ། །དགོས་པ་བྱུང་ན་ཞེས་བྱ་བ་ནི་
དགོས་པའི་དུས་ལ་བབ་ན་ཞེས་བྱ་བའི་དོན་ཏོ། །དེ་ལྟ་བ་ལྔ་པོ་འདི་དག་བྱས་པ་འདིའི་བསྡུས་པའི་དོན་ནི་རང་བཞིན་གྱི་དབང་དུ་བྱས་ནས་ལྟ་བ་རྣམ་པ་གཉིས་ཏེ། རྒྱུ་མེད་པར་སྨྲ་བ་དང༌། མི་མཐུན་པའི་རྒྱུར་སྨྲ་བའོ། །རྒྱུ་མེད་པར་སྨྲ་བའི་དབང་དུ་བྱས་པ་ནི་ལྟ་བའི་རྣམ་པ་དང་པོའོ།། དབང་ཕྱུག་རྒྱུར་སྨྲ་བ་ནི་མི་མཐུན་པ་རྒྱུར་སྨྲ་བའོ། །ཐམས་ཅད་སྔོན་གྱི་ལས་ཀྱིས་བྱས་སོ་ཞེས་བྱ་བ་ནི་ད་ལྟར་བྱུང་བའི་ལས་རྣམ་པར་གཅོད་པའོ། །དེ་བཞིན་དུ་མཐོང་བའི་ཆོས་ལ་མྱ་ངན་ལས་འདས་པར་འདོད་པ་ཆད་པར་ལྟ་བ་སྟེ། འཇིག་རྟེན་ཕ་རོལ་རྣམ་པར་གཅོད་པའོ། རྒྱལ་རིགས་ཀྱི་ཆོས་ཀྱི་གཙུག་ལག་ལས་འབྱུང་བར་སྨྲ་བ་ནི་མངོན་པར་མཐོ་བའི་རྒྱུ་མི་མཐུན་པར་སྨྲ་བའོ། །ལྟ་བའི་རྣམ་པ་འདི་དག་ལས་དང་པོ་ལས་བརྩམས་པ་ནི་གཉིས་སོ། །བར་མ་ལས་བརྩམས་པ་ནི་གཅིག་པའོ། །དེ་ལས་གཞན་པ་ལས་བརྩམས་པ་ནི་གཉིས་ཏེ། དེ་ལྟ་བས་ན་ལྟ་བ་འདི་དག་གི་གོ་རིམས་ནི་འདི་ཡིན་ནོ། །སྐྱེ་བོ་སྡིག་པ་ཅན་རྣམས་དང་བསྟེན་པ་ཞེས་བྱ་བ་འདིས་ནི་རྐྱེན་བསྟན་ཏོ། །བློ་གཞན་གྱི་དྲིང་ལ་འཇོག་པས་ཞེས་བྱ་བ་འདིས་ནི་རྒྱུ་བསྟན་ཏོ། །ལྟ་བས་བྱས་པ་ཉིད་གཡང་སར་ལྷུང་བ་ཉིད་ཡིན་པས་ལྟ་བ་ངན་པའི་གཡང་སར་ལྟུང་བ་ཞེས་བརྗོད་དོ། །ངན་སོང་གི་རྒྱུར་གྱུར་པའི་ཕྱིར་རོ། །དེ་ལ་བརྩེ་བར་གྱུར་ཏེ་ཞེས་བྱ་བའི་རྒྱུའི་དབང་དུ་བྱས་ནས། ཡོན་ཏན་གོམས་པས་ཞེས་བྱ་བའི་ཚིགས་བཅད་སྨོས་སོ། །དེ་ལས་བཟློག་པའི་ཐབས་ཞེས་བྱ་བ་ནི་བཟློག་པའི་ཆེད་དུའོ། །དུལ་ཞིང་བརྟན་པ་དང་རྒྱ་ཆེ་བའི་ཆ་བྱད་ཡོད་པའི་སྐྱེ་བོ་གང་ཡིན་པ་དེ་ནི་དུལ་ཞིང་བརྟན་ལ་རྒྱ་ཆེ་བའི་ཆ་བྱད་ཀྱི་སྐྱེ་བོ་སྟེ་ཕྱོགས་ན་འཁོད་པའོ། །སྙན་པར་སྨྲ་བ་དང༌། བསྙེན་བཀུར་བ་དང༌། སྟན་གདིང་བ་བྱས་པ་ནི་སྙན་པར་སྨྲ་བ་དང༌། བསྙེན་བཀུར་བ་དང༌། སྟན་གདིང་བ་བྱས་པའོ། །སྙན་པར་སྨྲ་བ་དང༌། བསྙེན་བཀུར་དང༌། སྟན་གདིང་བ་གང་ཡིན་པ་དེ་ཉིད་ནི། སྙན་པར་སྨྲ་བ་དང༌། བསྙེན་བཀུར་དང༌། སྟན་གདིང་བ་བྱས་པའོ། །ཨེ་མ་འོ་ཁྱོད་ཀྱི་ཆོས་ལ་དགའ་བ་ལ་ལྟོས་ཞེས་བྱ་བ་ཡིན་ཏེ། དགའ་བ་ནི་ཅིའི་ཕྱིར་ཞེ་ན། དཀའ་ཐུབ་ཀྱི་ནགས་ན་འདུག་
བཞིན་དུ་སྤྲེའུ་ཆེན་པོ་མེད་པར་བྱས་པའོ། །ཨེ་མའོ་རྩོལ་ཕོད་ཅེས་བྱ་བ་ནི་སྤྲེའུ་ཆེན་པོ་བསད་པས་སོ། །མཐུ་ཆེ་བ་ཞེས་བྱ་བ་ནི་ནུས་པ་སྟེ། གཅིག་ཏུ་དཀའ་ཐུབ་སྤྱད་པས་ལུས་ཉམ་ཆུང་ཡང་སོང་བའི་ཕྱིར་རོ། །འགྲོ་བའི་ངོ་བོ་ཉིད་ཀྱིས་དེ་བཞིན་ཁྱེད་ཟེར་ན།། ཞེས་བྱ་བའི་ཚིགས་བཅད་ནི་འགྲོ་བ་འདི་དག་ངོ་བོ་ཉིད་ཀྱིས་ཡིན་ན། སྤྲེའུ་བསད་པ་ཡང་ངོ་བོ་ཉིད་ཀྱིས་ཡིན་ནོ། །ཞེས་བྱ་བའི་དབང་དུ་བྱས་ནས། དེ་སྟེ་སྡིག་པ་ཡོད་ན་ནི། །ཞེས་བྱ་བའི་ཚིགས་བཅད་སྨོས་ཏེ། གལ་ཏེ་སྡིག་པ་ཡོད་ན་ནི་འགྲོ་བ་འདི་ཉིད་ལ་རྒྱུ་ཡོད་པ་ཉིད་དུ་བསྟན་ཏེ། གྲུབ་པ་ཉིད་ཀྱི་དབང་དུ་བྱས་ནའོ། །དེ་ལ་རེ་ཞིག་དམ་བཅས་པ་དང༌། སྡིག་པ་ཡོད་དོ་ཞེས་ཟེར་བ་ནི་ཕན་ཚུན་འགལ་བ་ཉིད་དུ་བསྟན་ནས། ད་ནི་དཔེ་མ་གྲུབ་པ་ཉིད་དུ་བསྟན་པའི་ཕྱིར། གལ་ཏེ་པདྨའི་སྡོང་བུ་སྐྱེ་ལ་སོགས་ཞེས་བྱ་བའི་ཚིགས་བཅད་སྨོས་སོ། །པདྨའི་སྡོང་བུ་སྐྱེ་བ་ལ་སོགས་པ་དེ་རྒྱུ་མེད་པ་ཉིད་ཡིན་ན། ཅིའི་ཕྱིར་རྟག་ཏུ་མི་འབྱུང༌། པདྨའི་ལོ་མ་སྐྱེ་བ་ལ་སོགས་པའི་རྒྱུ་ནི་ཅི་ཞིག་ཡིན་ཞེ་ན། ཆུ་ལ་སོགས་པའི་རྐྱེན་ཡོད་པ་དང༌། ས་བོན་གྱི་རྒྱུས་བྱས་པ་ཡིན་ཏེ། ཇི་ལྟར་ཤེས་ཤེ་ན། མེད་པ་ལས་བྱུང་བའི་ཕྱིར་ཏེ། ཆུ་ལ་སོགས་པ་ཡོད་པ་དང༌། པདྨའི་སྡོང་བུ་ལ་སོགས་པ་ཡོད་པར་འགྱུར་ལ། ཆུ་དང༌། ས་བོན་ལ་སོགས་པ་མེད་ན་ནི་མི་འབྱུང་བ་ཡིན་ཏེ། དེ་ནི་གང་གི་ཕྱིར། རྒྱུ་དང་རྒྱུ་ཅན་གྱི་མཚན་ཉིད་གཏན་ཚིགས་ཀྱིས་མཁས་པ་དག་དེ་ལྟར་འདོད་དོ། །གང་ལ་རྒྱུ་མེད་པར་འབྱུང་བ་དང༌། གང་འབྱུང་བ་དང༌། གང་དུ་མི་འབྱུང་བ་དེ་ནི་རྒྱུ་དང་བཅས་པ་དང༌། རྒྱུ་མེད་པ་ཡིན་ཏེ། གང་ཞིག་ཁ་ཅིག་ཏུ་ནི་ཞེས་བྱ་བ་ལ་སོགས་པའི་ཚིགས་བཅད་གསུམ་ཡིན་ཏེ། དེ་ལ་རེ་ཞིག་གང་ཞིག་ཁ་ཅིག་ཏུ་ནི་ཞེས་བྱ་བ་ནི་ཚིགས་བཅད་འདིས་ནི། ཕྱོགས་སྔ་མ་དང་འགལ་བར་བསྟན་ཏོ། །ཚིགས་བཅད་གཉིས་པས་ནི་གྲུབ་པའི་མཐའ་དང་འགལ་བར་བསྟན་ཏོ། །གསུམ་པས་ནི་དཔེ་མ་གྲུབ་པ་བསྟན་ཏེ། རྒྱུ་ཡང་ཡོད་པ་མ་ཡིན་ཞེས་ནི་རྟག་ཏུ་སྨྲ། ཞེས་བྱ་བའི་ཚིགས་བཅད་གསུམ་གྱིས་ནི། རང་གི་གནས་སྐབས་ཀྱི་དབང་དུ་བྱས་པ་སྟེ། མ་མཐོང་བས་ཞེས་བྱ་བ་ནི་མ་ཤེས་
པས་སོ། །དེ་ཉིད་ཀྱིས་ཞེས་བྱ་བ་ནི་རྒྱུ་མ་མཐོང་བ་ཉིད་ཀྱིས་སོ། །ཐམས་ཅད་རྒྱུ་མེད་སྨྲ་ན་ནི། །ཞེས་བྱ་བ་ནི་གང་དག་རྒྱུ་མཐོང་བ་དེ་དག་ལ་ཡང་རྒྱུ་མེད་པར་སྟོན་པ་སྟེ། རྒྱུ་དང་བཅས་པར་མངོན་དུ་མཐོང་བཞིན་དུ། །ཞེས་བྱ་བ་ཡིན་ཏེ། གང་དག་རྒྱུ་ཡོད་པ་དེ་དག་ནི་རྒྱུ་ཡོད་པ་ཉིད་དུ་མངོན་སུམ་དུ་དམིགས་པ་ཡིན་ནོ། །དེ་ལ་སྡང་བས་འགལ་བའི་ཚིག་ངན་སྨྲས་པར་འགྱུར། །ཞེས་བྱ་བ་ནི་འགལ་བས་ཚིག་ངན་སྨྲ་བར་འགྱུར་བ་གང་ཡིན་པ་དེ་ནི་འགལ་བའི་ཚིག་ངན་སྨྲ་བར་འགྱུར་བའོ། །ཚིག་ངན་པ་ནི་འདིར་བདག་གི་དམ་བཅས་པ་ལ་གཟུང་སྟེ། བདག་ཉིད་ཀྱི་དམ་བཅས་པའི་ཚིག་དང་འགལ་ཞེས་བྱ་བའི་དོན་ཏེ། མངོན་སུམ་དང་འགལ་བའོ། །དམ་བཅས་པ་ངན་པ་སྔ་མའི་དོན་རྣམ་པར་བཅད་པའི་ཕྱིར། འགལ་ཞིང་ངན་པ་ཉིད་དུ་བསྟན་ཏོ། །ད་ནི་མངོན་སུམ་དང་འགལ་བ་དམ་བཅས་པ་ངན་པར་བསྟན་ཏོ། །གང་ཞིག་ཁ་ཅིག་ཏུ་ནི་རྒྱུ་རྐྱེན་མ་མཐོང་བས། །ཞེས་བྱ་བ་བསྟན་པ་ལ། ཇི་ལྟར་རྒྱུ་ཡོད་བཞིན་དུ་མ་རྟོགས་པ། །ཞེས་བྱ་བ་ཡིན་ཏེ། རྒྱུ་ཡོད་བཞིན་དུ་མ་རྟོགས་པ་བསྟན་པའི་ཕྱིར། །གལ་ཏེ་གང་ནའང་རྒྱུ་ནི་ཡོད་པར་མ་མཐོང་ན། །ཞེས་བྱ་བའི་ཚིགས་བཅད་སྨོས་ཏེ། གང་གི་རྒྱུ་མ་མཐོང་བ་དེ་ལ་འདིར་རྒྱུ་མེད་ཅེས་སྨྲ་བར་མི་རིགས་ཏེ། ཅིའི་ཕྱིར་ཞེ་ན། ཡོད་བཞིན་དུ་ཡང་རྐྱེན་གཞན་གྱིས་མི་མཐོང་བར་སྣང་སྟེ། ཇི་ལྟར་མཚན་མོ་ཉི་མའི་དཀྱིལ་འཁོར་ཡོད་ཀྱང་ཤིན་ཏུ་སྐལ་བར་གནས་པའི་ཕྱིར། རྐྱེན་གཞན་གྱིས་མ་མཐོང་བ་ཡིན་ཏེ། མི་དམིགས་པའི་རྒྱུ་ཡིན་ནོ། །དེ་དག་རྒྱུ་དང་བཅས་པར་མངོན་དུ་མཐོང་བཞིན་དུ། །ཞེས་བྱ་བ་བསྟན་པ་ལ། ཇི་ལྟར་མངོན་སུམ་དུ་རྒྱུ་དང་བཅས་པ་མཐོང་ཞེས་པ་དེ་བསྟན་པའི་ཕྱིར། ཡིད་དུ་འོང་བའི་ཡུལ་ནི་བདེ་བ་འདོད་པའི་ཕྱིར་ཏེ། རྟེན་ཞེས་བྱ་བའི་ཚིགས་བཅད་སྨོས་སོ། །དེ་དང་འགལ་བ་ལ་ནི་བདེ་བ་དང་འགལ་བ་སྟེ། ཡིད་དུ་མི་འོང་བའི་ཡུལ་ཞེས་བྱ་བའི་དོན་ཏོ། །དེའི་ཕྱིར་ཡང༌། རྒྱལ་པོ་དག་ལ་རྟེན་པར་བྱེད། ཅེས་བྱ་བ་ནི་ཡིད་དུ་འོང་བའི་ཡུལ་ལ་བརྟེན་པའོ། །ཡང་ན་བདེ་བ་འདོད་པའི་ཕྱིར་རོ། །དེའི་ཕྱིར་དེ་ལ་སྡང་བས་འགལ་བའི་ཚིག་ངན་སྨྲས་པར་གྱུར་པའོ། །དེ་བསྟན་
པའི་ཕྱིར། གལ་ཏེ་དངོས་པོ་རྣམས་དེ་ལྟ་ཡིན་ཞེས་བྱ་བའི་ཚིགས་བཅད་སྨོས་ཏེ། དེ་ལྟ་ཡིན་ན་ཞེས་བྱ་བ་ནི་རྒྱུ་དང་ལྡན་པ་ཡིན་ན་ཕྱོགས་མ་གྲུབ་པ་ཡང་ཡིན་པས། དངོས་པོ་རྣམས་ཀྱི་རྒྱུ་ཁས་མི་ལེན་པ་སྟེ། སྤྲེའུ་བསད་པ་ལ་ཉེས་པ་མེད་པའི་མཇུག་བསྡུ་བའི་ཕྱིར། གལ་ཏེ་ཞེས་བྱ་བ་ནི་སྔར་བསྟན་པའི་རྒྱུ་སྟེན་པ་ཡིན་ནོ། །གལ་ཏེ་ཞེས་བྱ་བ་ནི་དངོས་པོ་རྣམས་རྒྱུ་དང་ལྡན་པ་ཉིད་དུ་གྲུབ་ཀྱང༌། ཇི་ལྟར་དངོས་པོ་གཞན་རྒྱུ་མེད་པ་དེ་བཞིན་དུ་སྤྲེའུ་བསད་པ་ལ་ཡང་རྒྱུ་མེད་པ་ཡིན་ཏེ། དེ་ལྟ་ཡིན་ན་ནི་ཅིའི་ཕྱིར་བདག་ལ་སྨོད་པར་བྱེད་ཅེས་པའོ། །ཁྱོད་ནི་ཇི་ལྟར་བདག་ལ་སེམས་མི་དགའ། །ཞེས་བྱ་བ་ལ། སེམས་མི་དགའ་པ་དེ་ཉིད་བསྟན་པའི་ཕྱིར། གཞན་གྱི་ཉེས་པ་བདག་ལ་ཅི་ཕྱིར་བསྒོ། །ཅེས་བྱ་བ་ཡིན་ཏེ། གཞན་གྱི་ཉེས་པ་ནི་དབང་ཕྱུག་གི་ཉེས་པས་སོ། །སྡིག་པ་ཆེན་པོ་མ་ལུས་པ། །ཞེས་བྱ་བའི་ཚིགས་བཅད་འདིས་ནི། སྤྲེའུ་བསད་པས་ནི་སྡིག་པ་ཉིད་དུ་ཁས་ལེན་པའི་ཕྱོགས་སྔ་མ་དང་འགལ་བའི་ཉེས་བ་ཉིད་བསྟན་ཏོ། །དེ་སྟེ་སྤྲ་ཆེན་དཔའ་བོ་དེ་ཤི་བ། །ཞེས་བྱ་བ་འདིས་ནི་གྲུབ་པའི་མཐའི་སྐྱོན་བསྟན་ཏོ། །ཡང་ན་དེ་གཉིས་གཅིག་ལ་གཅིག་འགལ་བའི་སྐྱོན་བསྟན་ཏོ། །དབང་ཕྱུག་འགྲོ་བ་ཐམས་ཅད་ཀྱི་བྱེད་པ་པོ་ཉིད་ཡིན་ན་ནི་སྐྱེས་བུ་བྱེད་པའི་རྩོལ་བ་ཐམས་ཅད་དོན་མེད་པ་ཡིན་ནོ་ཞེས་བྱ་བ་ལས་བརྩམས་ཏེ། དབང་ཕྱུག་ལ་ནི་རེ་བ་ཡིས། །ཞེས་བྱ་བའི་ཚིགས་བཅད་སྨོས་སོ། །ཐམས་ཅད་ཀྱི་བྱེད་པ་པོ་དབང་ཕྱུག་ནི་བྱེད་པའི་རྒྱུ་མ་ཡིན་ཏེ། དབང་ཕྱུག་གིས་བྱེད་པའི་སྐྱོན་བསྟན་པའི་ཕྱིར་རོ། །སྡིག་པ་ཆེན་པོ་མ་ལུས་པ། །ཞེས་བྱ་བའི་ཚིགས་བཅད་སྨོས་སོ། །སྐྱོན་དེ་ཉིད་ཀྱིས་དབང་ཕྱུག་ཉིད་མེད་པར་ཚིགས་བཅད་འདིས་སྟོན་ཏོ། །ཡང་ན་དེས་ལྟུང་བས་མི་བྱེད་ན་ནི་གྲུབ་པའི་མཐའ་དང་འགལ་བར་བསྟན་པའི་ཕྱིར། སྡིག་པས་འཇིགས་ནས་དེ་དག་ཀུན། །ཞེས་བྱ་བའི་ཚིགས་བཅད་སྨོས་སོ། །དབང་ཕྱུག་ཆེན་པོ་ཉིད་དུ་འདོད་པ་དེ་ལ། དབང་ཕྱུག་ཆེན་པོ་མེད་པར་བསྟན་པའི་ཕྱིར། དེ་ཡང་དབང་ཕྱུག་འགྱུར་བ་ནི། །ཞེས་བྱ་བའི་ཚིགས་བཅད་སྨོས་སོ། །དབང་ཕྱུག་ཉིད་
དུ་ནི་རྒྱུ་དང་བཅས་པའམ། རྒྱུ་མེད་པ་ཡིན་གྲང་ན་རྒྱུ་དང་བཅས་པ་ནི་ཆོས་ཀྱི་རྒྱུ་ཉིད་དུ་འགྱུར་བའམ་དེ་ལས་རྒྱུ་གཞན་པའི་རྒྱུ་ཉིད་ཡིན་པ་ཞིག་གོ །དེ་ལ་ཆོས་ཀྱི་རྒྱུ་ཉིད་ཡིན་ན་ནི་ཆོས་ལས་སྔ་རོལ་དུ་དབང་ཕྱུག་མེད་དོ། །དེ་སྟེ་དབང་ཕྱུག་གིས་དབང་ཕྱུག་གཞན་ཉིད་ཕྱུང་ན་ནི་དབང་ཕྱུག་ཀྱང་ཉམས་པ་ཡིན་ཏེ། དེས་ན་དབང་ཕྱུག་མ་ཡིན་པའི་ཕྱིར་རོ། །གཞན་དུ་ན་དབང་ཕྱུག་ཉིད་ཀྱི་རྒྱུ་ཉིད་ཡིན་ན་ནི། བདག་གིས་སྤྲེའུའི་རྒྱལ་པོ་བསད་པ་ལ་སྡིག་པ་ཡིན་ནོ་ཞེས་ཁས་བླངས་པའི་ཕྱོགས་སྔ་མ་དང་འགལ་བའི་ཉེས་པ་མེད་དོ། །གལ་ཏེ་ཐམས་ཅད་སྔོན་གྱི་ལས་ཀྱིས་ཞེས་བྱ་བའི་ཚིགས་བཅད་ནི་སྤྲེའུ་བསད་པ་ལས་སྡིག་པ་ཉིད་དུ་ཁས་ལེན་པའི་ཕྱོགས་སྔ་མ་དང་འགལ་བ་བསྟན་པའི་ཕྱིར། གལ་ཏེ་ཐམས་ཅད་སྔོན་གྱི་ལས་ཀྱིས་བྱས་ན་ནི། །ཞེས་བྱ་བའི་ཚིགས་བཅད་སྨོས་ཏེ། གང་གི་ཕྱིར་བདག་ལ་སྨད་ཅེས་བྱ་བ་ནི་བདག་གི་ཕྱིར་སྡིག་པས་སོ། །དེ་སྟེ་བདག་གིས་སྤྲེའུ་བསད་པའི་སྡིག་ཡོད་ན། །ཞེས་བྱ་བའི་ཚིགས་བཅད་ཕྱེད་ཀྱིས་ནི་གྲུབ་པའི་མཐའ་ཉམས་པ་སྟོན་པའི་ཕྱིར་རོ། །ཅི་སྟེ་ལས་དང་ལས་ཀྱི་རྒྱུ་ཉིད་ཡོད་པར་སྟོན་ཏེ། སྔར་བཤད་པའི་ལས་ཀྱིས་བྱས་པ་སྟེ། ལས་གང་གིས་སྤྲེའུ་དེ་བསད་པའི་ལས་བྱས་པ་ཡིན་ནོ་ཞེས་དེ་ལྟར་འདོད་ན་ནི་ཐར་པ་མེད་པའི་སྐྱོན་དུ་ཐལ་བར་འགྱུར་རོ་ཞེས་བསྟན་པའི་ཕྱིར། གལ་ཏེ་ལས་དང་ལས་ཀྱི་རྒྱུ་ཡོད་ན། །ཞེས་བྱ་བའི་ཚིགས་བཅད་ཕྱེད་ཡིན་ནོ། །སྤྲེའུ་བསད་པའི་ལས་བྱས་པ་དེ་ཡང་སྤྲེའུ་བསད་པའི་ལས་གཞན་གྱི་རྒྱུས་ཡིན་ནོ། །དེ་ཡང་གཞན་དང་གཞན་གྱི་ཡིན་པས་ཐར་པ་མེད་པར་ཐལ་བར་འགྱུར་ཏེ། ལས་རྗེས་སུ་མ་སྤྱད་པའི་ཕྱིར་རོ། །སྔོན་གྱི་ལས་ཀྱིས་བྱས་པ་ངེས་པར་མངོན། །ཞེས་བྱ་བ་ཡིན་ན་ནི། རྒྱུ་དང་རྐྱེན་གཞན་བདེ་བ་དང་སྡུག་བསྔལ་གཉིས་འགག་པར་འགྱུར་ཏེ། དེ་རྒྱུ་དང་རྐྱེན་གཞན་གྱིས་ཀྱང༌། སྡུག་བསྔལ་རྒྱུ་ཡང་གལ་ཏེ་བདེ་བར་འགྱུར། །ཞེས་དང༌། བདེ་དང་སྡུག་བསྔལ་དེ་ལྟར་གྱུར་པའང་མེད། །ཅེས་བྱ་བའི་ཚིགས་བཅད་ཡིན་ཏེ། འདིས་ཀྱང་འགོག་པ་ཡིན་ཏེ། ཉེ་བར་འགྱུར་བའི་རྐྱེན་དང་ད་ལྟར་བྱུང་བའི་སྐྱེས་བུའི་བྱེད་པ་སྟེ། ཡུལ་ཉེ་བར་གྱུར་པའི་ཡུལ་གྱི་རྐྱེན་
དང། ད་ལྟར་བྱུང་བའི་སྐྱེས་བུའི་བྱེད་པའོ། །དེ་ལ་ཡུལ་ཉེ་བར་གྱུར་པ་ཉིད་ཀྱི་བདེ་བ་དང༌། སྡུག་བསྔལ་གཉིས་བསྟན་པའི་ཕྱིར། སྡུག་བསྔལ་རྒྱུ་ཡང་གལ་ཏེ་བདེ་བར་འགྱུར། །ཞེས་བྱ་བའི་ཚིགས་བཅད་སྨོས་སོ། །སྡུག་བསྔལ་གྱི་རྒྱུ་ནི་ཡིད་དུ་མི་འོང་བ་སྟེ། དེས་ན་བདེ་བ་དང་སྡུག་བསྔལ་གཉིས་ནི་ཡིད་དུ་འོང་བ་དང་ཡིད་དུ་མི་འོང་བ་ལས་སྐྱེས་པའི་ཕྱིར་རོ། །ངེས་པ་ཞེས་བྱ་བ་ནི་གདོན་མི་ཟ་བར་ཞེས་པའི་དོན་ཏོ། །སྔོན་གྱི་ལས་ཀྱིས་བྱས་པ་ཞེས་བྱ་བ་ནི། སྔོན་གྱི་ལས་ཉིད་ཀྱིས་བྱས་པ་གང་ཡིན་པ་སྟེ། རྒྱུ་གཞན་མ་ཡིན་པ་ཞེས་བྱ་བའི་དོན་ཏོ། །བདེ་དང་སྡུག་བསྔལ་དེ་ལྟར་གྱུར་པའང་མེད། །ཅེས་བྱ་བ་དང་པོའི་ཕྱེད་ཀྱིས་ནི་བསྟན་མ་ཐག་པའི་དོན་མཇུག་བསྡུ་བའི་ཕྱིར་རོ། །ཚིགས་བཅད་ཕྱེད་འོག་མས་ནི་ད་ལྟར་བྱུང་བའི་སྐྱེས་བུ་བྱེད་པའི་རྐྱེན་གྱིས་དངོས་པོའི་སྐྱོན་བསྟན་པའི་ཕྱིར་ཏེ། དེ་ལྟར་ཞེས་བྱ་བ་ནི་བདེ་བ་དང་སྡུག་བསྔལ་པ་དག་ལ་ཡིད་དུ་འོང་བ་དང་ཡིད་དུ་མི་འོང་བའི་ཡུལ་མངོན་སུམ་དུ་གྱུར་པས་ཡིན་གྱི། སྔོན་གྱི་ལས་ཀྱིས་བདེ་བ་དང་སྡུག་བསྔལ་བྱས་པ་མ་ཡིན་ནོ་ཞེས་བརྒྱ་ལ་དེ་སྨྲ་ན། དེ་ལྟ་མོད་ཀྱི། བདེ་བ་དང་སྡུག་བསྔལ་ཡུལ་གྱི་རྐྱེན་ལས་བྱུང་བ་ཡིན་ནོ་ཞེས་དེ་ལྟར་སྨྲས་པས་ད་ལྟར་བྱུང་བའི་སྐྱེས་བུ་བྱེད་པའི་ལས་བསལ་བ་ཡིན་ཏེ། དེ་མེད་པའི་སྐྱོན་བསྟན་པའི་ཕྱིར་སྨྲས་པ། གསར་དུ་བྱས་པའི་ལས་ཀྱང་ཇི་ལྟར་འགྱུར། །ཞེས་བྱ་བའི་དོན་ཏོ། །གསར་དུ་བྱས་པའི་ལས་མ་གྲུབ་ན་སྐྱོན་ཡོད་ཅེ་ན། དེའི་སྐྱོན་བསྟན་པའི་ཕྱིར་སྨྲས་པ། དེ་མ་གྲུབ་ན་སྔ་མའང་ཇི་ལྟར་འགྲུབ། །ཅེས་བྱ་བ་ཡིན་ཏེ། དེ་མ་གྲུབ་ན་ཞེས་བྱ་བ་ནི་གསར་དུ་བྱས་པའི་ལས་མ་གྲུབ་ནའོ། །ཀུན་ཞེས་བྱ་བ་ནི་སྤྲེའུ་བསད་པ་ལ་སོགས་པའོ། །བདག་གིས་བྱས་པར་ཞེས་བྱ་བ་ནི་སྔོན་གྱི་ལས་ཀྱིས་བྱས་པ་འདི་དག་ལ་བདག་གིས་བྱས་པར་ཡོངས་སུ་བརྟག་པ་ནི་མི་རིགས་ཞེས་བྱ་བའི་དོན་ཏོ། །ཕྱོགས་སྔ་མ་སྤྲེའུ་བསད་པ་ལ་སྡིག་པ་ཡོད་དོ་ཞེས་སྨྲས་པ་དང་འགལ་བར་བསྟན་པའི་ཕྱིར་སྨྲས་པ། གལ་ཏེ་ཆད་པར་ལྟ་བ་དེ་ཁོ་ན་ཉིད་ཡིན་པར་སེམས་ན་ཞེས་བྱ་བའི་ཚིགས་བཅད་སྨོས་སོ། །ཅི་ཞིག་སྤང་ཞེས་བྱ་བ་ནི་ཅིའི་ཕྱིར་
སྤང་བའོ། །ཅི་ཞིག་འབད་དུ་ཡོད་ཅེས་བྱ་བ་ནི་ཅིའི་ཕྱིར་འབད་དུ་ཡོད་པའོ། །ཡང་ན་ཅི་ཞིག་ཅེས་བྱ་བའི་སྒྲ་ནི་དྲི་བའི་ཚིག་གོ །རང་དགར་ཅི་བདེར་སྤྱོད་པར་རིགས་པ་གང་ཡིན་པ་དེ་ནི་རང་དགར་ཅི་བདེར་སྤྱད་པར་རིགས་ཏེ། སྡིག་པ་དང་དགེ་བ་དག་ལ་སྤང་བ་དང༌། བསྟེན་པའི་ཉེས་པ་དང་ཡོན་ཏན་མེད་པས་སོ། །དེ་ལྟ་མོད་ཀྱི་འཇིག་རྟེན་པ་རྣམས་ཀྱི་ཁ་ན་མ་ཐོ་བས་འཇིགས་པར་བྱེད་དོ་ཞེས་དེ་ལྟར་རྟོག་ན་ཡང་སྨྲས་པ། འགྲོ་བས་འཕྱ་བ་དག་གིས་འཇིགས་ནས་སུ། །ཞེས་བྱ་བ་སྨོས་ཏེ། འཇིག་རྟེན་གྱིས་མི་སྨན་པར་སྨྲ་བས་འཇིགས་པའོ། །བདག་གི་ཚིག་དང་མི་མཐུན་སྤྱོད་པ་ཡིན།། ཞེས་བྱ་བ་ནི་སྡིག་པ་བསྟེན་པ་དང༌། དགེ་བ་སྒྲུབ་པ་ལ་སྐྱོན་དང་ཡོན་ཏན་མེད་དོ་ཞེས་སྨྲ་ན་སྡིག་པ་བསྟེན་པ་དང༌། དགེ་བ་བསྟེན་པར་བྱེད་པ་ཡིན་པས་ན་བདག་གི་ཚིག་དང་མི་མཐུན་པར་སྤྱོད་པ་ཡིན་ཏེ། འགྲོ་བས་འཕྱ་བའི་ཉེས་པས་འཇིགས་པས་ནི་རང་གི་ཚིག་དང་མི་འགལ་བར་སྤྱོད་པའོ། །དེ་ཡོད་ན་ནི་དེ་དག་ཀྱང་ཡོད་ཀྱི་ཆད་པར་སྨྲ་བ་འདི་ལ་ནི་འགྲོ་བས་འཕྱ་བའི་ཉེས་པ་མེད་དོ། །འགྲོ་བས་འཕྱ་བའི་སྐྱོན་གཅིག་པུར་མ་ཟད་དེ། འདི་ལྟར་རང་གི་གྲུབ་པའི་མཐའི་ལས་བསྟན་པའི་བདེ་བའང་མི་འཐོབ་པ་ཡིན་ནོ་ཞེས་བསྟན་པའི་ཕྱིར། འཇིག་རྟེན་ཚུལ་ལ་གནས་པར་གྱུར་ན་ནི། །ཞེས་བྱ་བའི་ཚིགས་བཅད་སྨོས་ཏེ། རང་གི་གཞུང་ལུགས་ཞེས་བྱ་བ་ནི་རང་གི་གྲུབ་པའི་མཐའོ། །རང་གི་གྲུབ་པའི་མཐའ་སྨྲ་བ་འཁྲུལ་པས་དོན་མེད་པར་འགྱུར་བ་ནི་བདེ་བ་འཐོབ་པ་སྟེ། དེ་བས་ན་འགྲོ་བས་འཕྱ་བར་འཇིགས་ན་རང་གི་གྲུབ་པའི་མཐའི་འབྲས་བུ་མི་ཐོབ་པས་སྨྲ་བ་དོན་མེད་པ་ནི་འཁྲུལ་པ་ཡིན་པས་སྨྲ་བ་འཁྲུལ་པའོ། །སྨྲ་བའི་འཁྲུལ་པ་ཉིད་ནི་ཕྱིན་ཅི་ལོག་པ་ཡིན་ཏེ། དེའི་སྨྲ་བ་འཁྲུལ་པས་དོན་མེད་པ་གང་ཡིན་པ་དེ་ནི་སྨྲ་བ་འཁྲུལ་པས་དོན་མེད་པ་སྟེ། མཆོག་ཏུ་འབྲས་བུ་མེད་པའི་ཕྱིར་རོ། །དེའི་ཚིག་ནི་བྱིས་པའི་ནང་ན་ཐ་མ་ཉིད་ཡིན་ཏེ། ལྟ་བ་ཐམས་ཅད་ཀྱི་ནང་ན་ཐ་ཆད་བཟུང་ཞིང་འཇུག་པའི་ཕྱིར་རོ། །རྣམ་པ་སྣ་ཚོགས་ཡོན་ཏན་དང་ལྡན་པའི་ཤིང་ཞེས་བྱ་བ་ལ། བདག་གི་ལས་ཀྱིས་བྱ་བ་མ་ཡིན་པར་འབྱུང་བ་དག །འཇིགས་པ་རྣམས་ཀྱང་ཕྱིས་ཡང་མི་སྐྱེའོ་ཞེས་ཁས་ལེན་ཅིང་ཇི་ལྟར་ཡང་ཤིང་གི་
མཚན་ཉིད་འདི་ལྟ་བུར་འཇིག་རྟེན་ཡང་རྒྱུ་གང་ཞིག་ཡོད། དེ་ལྟ་ན་ཡང་འཇིག་རྟེན་ན་ནི་ཤིང་དང་འདྲ་བ་ཡིན་པས་དངོས་པོ་རྣམས་ཀྱི་རྒྱུ་འགྲུབ་པའི་དངོས་པོ་ཡིན་ཡང་དངོས་པོ་མེད་པའོ་ཞེས་སྨྲ་བ་སྟེ། ཆད་པར་སྨྲ་བ་ལ་ནི་འཇིག་རྟེན་ཕ་རོལ་མེད་པས་འབྲས་བུ་ཡིད་དུ་འོང་བ་མེད་དོ། །དེས་ན་སྡིག་པ་ཐམས་ཅད་ཀྱི་ནང་ན་ཁྱད་པར་དུ་གྱུར་པ་ཡིན་ནོ། །བྱས་ནས་སུ་ཞེས་བྱ་བ་ནི་གཞུང་ལུགས་ཀྱི་བསྟན་བཅོས་པའོ། །དེ་གང་ཡིན་ཞེ་ན། དགེ་བའམ་མི་དགེ་བའོ། །ཅིའི་ཕྱིར་ཞེ་ན། སྲིད་ཀྱི་ཕྱིར་རོ། །རྗེས་སུ་འགྲོ་བ་ནི་དུས་ཕྱི་མ་སྟེ། ཕྱི་ནས་གང་ཞིག་ཅེས་བྱ་བ་ལ། དགོས་པ་དག་ནི་བྱུང་བར་གྱུར་པའི་ཚེ། །ཞེས་བྱ་བའི་ཚིགས་བཅད་ཡིན་ཏེ། ཕྱོགས་ཀྱི་ཆོས་དང་འགལ་བར་བསྟན་པའི་དོན་ཏོ། །འོན་ཏེ་སྙིང་རྗེ་མེད་ཕྱིར་སྨད་འགྱུར་རམ། །ཞེས་བྱ་བའི་ཚིགས་བཅད་བསྟན་པ་ལ། གྲུབ་པའི་མཐའི་སྐྱོན་བསྟན་པའི་ཕྱིར། སྨད་འགྱུར་ཞེས་བྱ་བ་སྨོས་པ་ཡིན་ཏེ། མཐོང་བའི་ཆོས་ལ་བདེ་བའི་ལས་མི་སྙན་པར་བསྟན་པ་ཡིན་ནོ། །འབྲས་བུ་སྡུག་བསྔལ་ཞེས་བྱ་བ་ནི་ཕ་རོལ་ཏུ་ངན་སོང་དུ་འགྲོ་བའི་རྒྱུར་གྱུར་པའི་ཕྱིར་རོ། །གཞུང་ལུགས་ཞེས་བྱ་བ་ནི་གཞུང་ལུགས་ཀྱི་བསྟན་བཅོས་སོ། །གང་ན་རིགས་པའི་གཞུང་ལྡན་འདི་འདྲ་བ། །ཞེས་བྱ་བ་ནི་ཚེ་འདིར་སྨད་པར་བྱས་པ་དང༌། འཇིག་རྟེན་ཕ་རོལ་ཏུ་ཡང་སྡུག་བསྔལ་གྱི་འབྲས་བུ་ཡིན་ཏེ། གང་ན་ལས་འདི་ཡོད་པ་དེར་གནོད་བཞིན་དུ་བྱེད་ཅིང་རིགས་པའི་གཞུང་ལུགས་འདིའོ། །འདི་ལྟ་བུར་འཁྲུལ་པ་གང་ཡིན་པ་དེ་ནི་འཁྲུལ་པ་ཅི་འདྲ་བའོ། །འཁྲུལ་པ་ནི་ཕོངས་པའོ། །གཙུག་ལག་གི་ལམ་གྱི་ཞེས་བྱ་བ་ནི་གཙུག་ལག་གི་ཚུལ་གྱིས་ཏེ། གཙུག་ལག་ཅེས་བྱ་བ་ནི་བརྡ་ཙམ་དུ་སྦྱར་བ་ཡིན་ཏེ། གཙུག་ལག་ཉིད་ནི་མ་ཡིན་བསྟན་བཅོས་ཀྱི་ཚུལ་ཙམ་ཉིད་དོ། །གཙུག་ལག་ཉིད་ལམ་ཡིན་པས་ན་གཙུག་ལག་ལམ་སྟེ། ཆོས་མ་ཡིན་པ་སྒྲུབ་པ་ལ་བརྟེན་པའི་ཕྱིར་རོ། །ལམ་ཡང་ཡིན་ལ་གསལ་བ་ཡང་ཡིན་པས་ལམ་ནི་གསལ་བའོ། །དེས་བསྟན་པ་ནི་ལམ་གསལ་བར་བསྟན་པའོ། །དེ་འཁོར་གྱི་ནང་ན་རྒྱལ་བར་གྱུར་པ་གང་ཡིན་པ་དེ་དག་ནི་འཁོར་གྱི་ནང་ན་རྒྱལ་བར་གྱུར་
པའོ། །སྤོབས་པ་ཆེ་བར་གོམས་པ་གང་ཡིན་པ་དེ་དག་ནི་སྤོབས་པ་ཆེ་བར་གོམས་པའོ། །སྲོག་དང་བཅས་པའི་སྤྲེའུ་བཀུམ་པ་ནི་མ་ལགས་ཀྱི་ཞེས་བྱ་བ་འདིས་ནི། སྤྲེའུའི་པགས་པ་ཡོད་པ་ནི་སྤྲེའུ་སྤྲུལ་པ་ཡིན་གྱི་སྲོག་དང་བཅས་པ་ནི་མ་ཡིན་ནོ། །དེ་སྲོག་མེད་པ་ཉིད་ཀྱིས་བསད་པ་ཡང་མེད་དོ། །དེ་བས་ན་བཀུམ་པའང་མ་ལགས་ཞེས་བྱ་བའི་དོན་ཏོ། །རྒྱུ་ལས་གྲུབ་པར་མཐོང་བཞིན་ལ། །ཞེས་བྱ་བ་འདིས་ནི་རྒྱུ་མེད་པར་སྨྲ་བ་དགག་པ་ཡིན་ནོ། །རང་དབང་ཞེས་བྱ་བ་འདིས་ནི། དབང་ཕྱུག་རྒྱུར་སྨྲ་བ་འགོག་པ་ཡིན་ཏེ་གང་གི་ཕྱིར་དབང་ཕྱུག་རྒྱུར་སྨྲ་བ་གཞན་དབང་ཡིན་ཏེ། དབང་ཕྱུག་ལ་རག་ལས་པའི་ཚུལ་ཡིན་པའི་ཕྱིར་རོ། །འཇིག་རྟེན་ཕ་རོལ་ཞེས་བྱ་བ་འདིས་ནི་ཆད་པར་སྨྲ་བ་དགག་པ་ཡིན་ཏེ། གང་གི་ཕྱིར་ཆད་པར་སྨྲ་བ་ནི་འཇིག་རྟེན་ཕ་རོལ་ཤེས་པ་མ་ཡིན་ཏེ། འཇིག་རྟེན་ཕ་རོལ་ཁས་མི་ལེན་པའི་ཕྱིར་རོ། །དགེ་བར་ཁས་ལེན་སྙིང་རྗེ་ཅན། །ཞེས་བྱ་བ་འདིས་ནི་ལུས་ཀྱི་བསྟན་བཅོས་རྗེས་སུ་འཇུག་པ་འགོག་པར་བྱེད་པ་ཡིན་ཏེ། གང་གི་ཕྱིར་དེ་ནི་དགེ་བར་དམ་བཅའ་བ་མ་ཡིན་ཏེ། གཞན་ལ་ཁྲོ་བ་དང་བཅས་པའི་ཕྱིར་རོ། །དེ་སྙིང་རྗེ་ཅན་ཡང་མ་ཡིན་ནོ། །བཞི་པོ་འདི་དག་ནི་སྲོག་གཅོད་པའི་ཉེས་པ་མེད་པར་བསྟན་པའི་ཕྱིར་རོ། །ཐམས་ཅད་སྔོན་གྱི་ལས་ཀྱིས་བྱས་པར་ལྟ་བ་དེ་ཅིའི་ཕྱིར་མ་བསྟན་ཅེ་ན། གང་གི་ཕྱིར་དེ་ནི་ལས་ཀྱི་རྒྱུ་དེ་ཉིད་དུ་སྒྲུབ་པ་ཡིན་ཏེ། འགྲོ་བ་རྣམས་དེ་ལྟར་སྒྲུབ་པ་ནི་སྲོག་ཆགས་གསོད་པར་བྱེད་དེ། དེ་ནི་ད་ལྟར་བྱུང་བའི་སྐྱེས་བུ་བྱེད་པའི་རྐྱེན་ཉི་ཚེར་འགྱུར་རོ།། གཞུང་བྱེད་པ་ཞེས་བྱ་བ་ནི་མ་ཡིན་པའི་སྡིག་པའོ། །ཅིའི་ཕྱིར་ཞེ་ན། གྲགས་པ་ཅུང་ཟད་ཙམ་གྱི་ཕྱིར་རོ། །གཞན་དུ་ན་གཞུང་མི་བྱེད་དེ། སྡིག་པ་ཉིད་ཡིན་པས་སོ། །ཇི་ལྟར་ཁས་བླང་བར་བྱ་ཞེས་བྱ་བ་ནི་ཁས་ལེན་པར་བྱེད་པའོ། །སྡིག་པ་ལ་སྡིག་པ་མ་ཡིན་པའི་ལྟ་བས་གང་དེ་གྲགས་པ་ཅུང་ཟད་ཙམ་གྱི་ཕྱིར་སྡིག་པ་མི་བྱེད་དེ། ཇི་ལྟར་རིགས་པས་སྨྲ་བ་ཁས་ལེན་པར་བྱེད་ཅེས་པ་སྟེ། གྲགས་པ་ཅུང་ཟད་ཙམ་གྱི་ཕྱིར། གཞུང་མི་བྱེད་ཅེས་བྱ་བའི་ཚིག་གིས་སོ། །གཞན་དུ་ན་བྱེད་པ་དེ་ནི་དོན་གྱིས་མི་འགྲུབ་པའོ། །དེས་ན་དེའི་རྒྱུ་བསྟན་པའི་ཕྱིར། མི་ཡི་
བདག་པོ་ལྟ་བ་བཟང་ངམ་ངན། །ཞེས་བྱ་བའི་ཚིགས་བཅད་སྨོས་སོ། །སྐལ་བ་མཉམ་པ་ནི་རིགས་མཐུན་པའོ། །ལས་ཉིད་སྒྲུབ་པ་ཡིན་པས་ལས་ནི་སྒྲུབ་པའོ། །རིགས་མཐུན་པའི་ལས་ཀྱིས་སྒྲུབ་པ་ནི་རིགས་མཐུན་ལས་ནི་སྒྲུབ་པའོ། །དེ་དག་གི་རྒྱུ་ནི་རིགས་མཐུན་པའི་ལས་སྒྲུབ་པའི་རྒྱུའོ། །གལ་ཏེ་ལྟ་བ་བཟང་ན་ནི་དགེ་བའི་ལས་སྒྲུབ་པའི་རྒྱུ་ཡིན་ལ། གལ་ཏེ་ལྟ་བ་ངན་ན་ནི་མི་དགེ་བའི་ལས་སྒྲུབ་པའི་རྒྱུ་ཡིན་ནོ། །ཅིའི་ཕྱིར་ཞེ་ན། བརྟགས་ན་དགེ་བ་དང༌། མི་དགེ་བའི་འཇུག་པའི་ཚིག་དང་སྤྱོད་པ་རྣམས་སྟོན་པའི་ཕྱིར་རོ། །ལྟ་བ་དེ་ཡང་གང་ལས་ཐོབ་པ་ཡིན་ཞེ་ན། དེའི་ཕྱིར་སྨྲས་པ། དམ་པ་རྣམས་ལ་བརྟེན་ན་འདི་ཤེས་འགྱུར། །ཞེས་སྨོས་པ་ཡིན་ཏེ། འདི་ནི་ལྟ་བ་བཟང་པོའི་ཚུལ་ལོ། །འདི་སྐྱེ་བོ་ངན་པ་རྣམས་རིང་དུ་སྤང་བ་ནི་ཐག་རིང་དུ་བྱ་བའོ། །དམ་པ་མ་ཡིན་པ་ལ་བརྟེན་པས་ནི་ཚུལ་འདི་ལྟར་ཐོབ་པ་ཡིན་ཏེ། དེས་ན་དེ་ཉིད་སྨྲས་པ། མི་སྡོམ་པར་ཡང་སྡོམ་པའི་ཚུལ་འཛིན་པ། །ཞེས་བྱ་བའི་ཚིགས་བཅད་སྨོས་ཏེ། མི་སྡོམ་པར་ཡང་ཞེས་བྱ་བ་ནི་སྡོམ་པའི་རྒྱུ་མེད་ཀྱང་མཐོང་བའི་ཡུལ་དུ་བྱེད་པའི་ཕྱིར། མི་སྡོམ་པར་ཡང་སྡོམ་པའི་ཚུལ་འཛིན་པ། །ཞེས་བྱའོ། སྡོམ་བརྩོན་དག་གི་ཆ་བྱད་ཡིན་པས་སྡོམ་པའི་ཚུལ་ལོ། །དེ་འཆང་བའི་ཚུལ་གང་ལ་ཡོད་པ་དེ་ནི་སྡོམ་པའི་ཚུལ་འཛིན་པའོ། །དགེ་སློང་སྲིན་པོ་དེ་རྣམས་ཀྱི་མཚན་ཉིད་ནི་ཅི་ཇི་ལྟར་ནི་དེ་དག་ཤེས་པར་བྱ་ཞེ་ན། དེ་སྨྲས་པ། རྒྱུ་མེད་སྨྲ་ལ་སོགས་པ་ཞེས་བྱ་བའི་ཚིགས་བཅད་འདི་སྨོས་ཏེ། སོགས་པའི་སྒྲས་ནི་དབང་ཕྱུག་རྒྱུར་སྨྲ་བ་དང༌། ཐམས་ཅད་སྔོན་གྱི་ལས་ཀྱིས་བྱས་པར་སྨྲ་བ་དང༌། ཆད་པར་སྨྲ་བ་དང༌། རྒྱལ་པོའི་གཙུག་ལག་གི་གཞུང་སྨྲ་བ་རྣམས་ཀྱང་གཟུང་ངོ༌། །དེ་དག་གི་ཁྱད་པར་གྱི་མཚན་ཉིད་ནི་ཇི་ལྟར་རྩུབ་པོས་བསྒོས་པ་ཞེས་བྱ་བ་ཅེ་སྤྱང་བཞིན་དུ་ཅེ་སྤྱང་གི་ཁྱད་པར་གྱི་མཚན་ཉིད་ཅན་དེས་ན་རླག་པར་བྱེད་པ་ཡིན་ཏེ། གང་གི་ཕྱིར། སྐྱེ་བོ་བྱིས་པ་དེ་རྣམས་དགེ་སློང་སྲིན་བོ་སའི་སྟེང་ན་རྒྱུ་བར་བྱེད་པས་སོ། །དེའི་ཕྱིར་དོན་ནུས་པ་སྤྱད་ཅེས་བྱ་བ་ནི་དགོས་པའི་དོན་ཏོ། །དེའི་ལྟ་བ་ལས་བཟློག་པ་དེ་ནི་དོན་དུ་ནུས་པར་གྱུར་ནའོ།།
དེ་བས་མཁས་པས་དེ་དག་བསྟེན་མི་རིགས། །ཞེས་བྱ་བས་བསྟན་ཏོ། །དེ་ལྟར་ཡང་ཁྱད་པར་དུ་སྐྱེ་བོ་མི་མཐུན་པ་དག་གྲགས་པ་ཆེ་བར་གྱུར་ན་ཡང་མཛའ་བར་ནི་མི་བྱ་བ་ཉིད་དེ། ཁྱད་པར་ཀྱི་བྱ་བ་བསྟན་པའི་ཕྱིར། སྐྱེ་བོ་མི་མཐུན་པ་དག་གྲགས་པ་ཆེར་གྱུར་ཀྱང༌། །ཞེས་བྱ་བའི་ཚིགས་བཅད་སྨོས་སོ། །དགོས་པ་ཡོད་པར་གྱུར་ཀྱང་ཞེས་བྱ་བ་ནི་དགོས་པའི་དབང་གིས་ཞེས་བྱ་བའི་དོན་ཏོ། །རྒྱུ་ལས་གྲུབ་པར་མཐོང་བཞིན་ལ། །ཞེས་བྱ་བ་ལ་སོགས་པའི་ཚིགས་བཅད་བདུན་གྱིས་ནི་ལྟ་བ་བཟང་ངན་བསྟན་པའི་ཕྱིར་ཏེ། དེ་ལས་གྲུབ་པར་མཐོང་བཞིན་ལ། །ཞེས་བྱ་བའི་ཚིགས་བཅད་འདིས་ནི་ལྟ་བ་བཟང་པོའི་ཕན་ཡོན་གྱི་དབང་དུ་བྱས་པ་སྟེ། སྔར་བཤད་པའི་ལྟ་བ་ངན་པ་རྣམ་པ་ལྔའི་མི་མཐུན་པའི་ཕྱོགས་བསྟན་པས་སྲོག་གཅོད་པ་ལ་སོགས་པ་བྱ་བ་མ་ཡིན་པ་མི་བྱེད་པའི་ཕན་ཡོན་ནོ། །རྒྱུ་མེད་སྨྲ་དང་ཞེས་བྱ་བའི་ཚིགས་བཅད་འདིས་ནི། ལྟ་བ་ངན་པའི་བྱ་བ་མ་ཡིན་པ་བྱེད་པའི་རྒྱུའི་ཉེས་དམིགས་བསྟན་པའི་དབང་དུ་བྱས་པ་སྟེ། གལ་ཏེ་བྱ་བ་མ་ཡིན་པ་མི་བྱེད་ཀྱང་གྲགས་པ་ཅུང་ཟད་ཀྱི་ཕྱིར་བྱེད་དོ། །གཞན་དུ་ན་བྱ་བ་བྱེད་པ་ཉིད་སྣང་བའི་ཕྱིར་རོ། །མི་ཡི་བདག་པོ་ལྟ་བ་བཟང་ངམ་ངན། །ཞེས་བྱ་བའི་ཚིགས་བཅད་འདི་ནི་ལྟ་བ་བཟང་པོའམ་ངན་པ་ཡིན་ཏེ། དགེ་བ་དང་མི་དགེ་བའི་ལས་ཀྱི་རྒྱུ་ཉིད་རབ་ཏུ་སྒྲུབ་པའི་ཕྱིར་རོ། །དེ་བས་ན་ལྟ་བ་བཟང་པོ་བསྟན་པའི་རིགས་ཞེས་བྱ་བའི་ཕྱེད་དང་པོས་ནི་སྔར་བསྟན་པའི་དོན་མཇུག་བསྡུ་བ་ཡིན་ནོ། །ལྟ་བ་བཟང་པོ་དང་ངན་པ་གཉིས་སྤོང་བ་དང་བསྟེན་པར་བྱ་བ་བསྟན་པའི་ཕྱིར། སྐྱེ་བོ་ངན་པ་རིང་དུ་སྤོང༌། །ཞེས་བྱ་བ་ཕྱེད་འོག་མ་ཡིན་ཏེ། ལྟ་བ་བཟང་པོ་སྟེ་དམ་པ་ལ་བརྟེན་པས་ནི་དམ་པ་ཡོངས་སུ་ཤེས་པར་འགྱུར་བ་དེ་བསྟན་པ་ནི་དགེ་བའི་བཤེས་གཉེན་གང་ལ་བརྟེན་པའོ། །གང་ཡོངས་སུ་སྤང་བ་ནི་མི་དགེ་བའི་བཤེས་གཉེན་ནི། མི་སྡོམ་པར་ཡང་སྡོམ་པའི་ཚུལ་འཛིན་པ། །ཞེས་བྱ་བའི་ཚིགས་བཅད་འདི་ཡིན་ཏེ། མི་དགེ་བའི་བཤེས་གཉེན་གང་ཡིན་པ་དེ་ཉིད་བསྟན་པའི་ཕྱིར། ས་ཡི་སྟེང་ན་དགེ་སློང་སྲིན་པོ་རྣམས། །ཞེས་བྱ་བ་ཡིན་ནོ། །རྒྱུ་མེད་སྨྲ་ལ་སོགས་པའི་ཚིགས་བཅད་ཕྱེད་ཀྱིས་ནི་མི་དགེ་བའི་བཤེས་
གཉེན་དེའི་མཚན་ཉིད་བསྟན་པའི་དོན་ནོ། །དེ་བས་མཁས་པས་ཞེས་བྱ་བ་འོག་མ་ཕྱེད་ཀྱིས་ནི་དེ་ལ་མི་དགེ་བ་མི་སྒྲུབ་པའི་ཁྱད་པར་བསྟན་པའི་ཕྱིར་རོ། །མི་སྒྲུབ་པ་ཡང་རྣམ་པ་གཉིས་ཏེ། ཡོངས་སུ་སྤང་བ་དང༌། ལྟ་བ་ངན་པ་ལས་བཟློག་པའོ། །སྐྱེ་བོ་མི་མཐུན་པ་དག་གྲགས་པ་ཆེར་གྱུར་ཀྱང༌། །ཞེས་བྱ་བ་སྨོས་པ་ལ། རྣམ་པ་ཐམས་ཅད་དུ་ཡང་བསྟེན་པར་བྱ་བ་མ་ཡིན་པའོ། །དཔེ་བསྟན་པར་བྱ་བའི་ཕྱིར། དགུན་གྱི་དུས་ཀྱི་ཞེས་བྱ་བ་ལ་སོགས་པ་སྟེ། རྣམ་པ་ཐམས་ཅད་དུ་སྐྱེ་བོ་མི་མཐུན་པ་དག་གྲགས་པ་ཐོབ་པར་གྱུར་ཀྱང་དེ་དང་མཛའ་བར་མི་བྱ་བ་ཡིན་ན་ནི་གཞན་དག་དེ་བཞིན་དུ་དགོས་པ་མེད་པར་གྱུར་པ་ལྟ་སྨོས་ཀྱང་ཅི་དགོས་པའོ། །དེ་དཔེ་དང་བཅས་པའི་ཉེས་དམིགས་བསྟན་ནས། སྐྱེ་བོ་ཡོན་ཏན་སྤོང་བ་དེ་དག་སྤང་བ་དང༌། ཞེས་བྱ་བ་ལ་སོགས་པའི་ཚིགས་བཅད་བཅུས་ནི་ཡང་དག་པར་འཛིན་དུ་གཞུག་པའི་དབང་དུ་བྱས་པ་སྟེ། གང་ལ་འཛིན་དུ་འཇུག་པར་བྱེད་ཅེ་ན། བདག་ཉིད་ཀྱི་ཕུན་སུམ་ཚོགས་པའི་རང་བཞིན་སྒྲུབ་པ་འཛིན་དུ་འཇུག་པར་བྱེད་དེ། དེ་ལ་བདག་གི་རང་བཞིན་ནི་སྐྱེ་བོ་ཡོན་ཏན་སྤོང་བ་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས་བསྟན་ཏེ། དེ་དག་ཅེས་བྱ་བ་ནི་ལྟ་བ་བཟང་པོ་ནི་དམ་པ་ལ་བརྟེན་པ་དང༌། དམ་པ་མ་ཡིན་པ་ཡུན་རིང་དུ་སྤངས་པ་ལས། འཐོབ་པའི་ཕྱིར་དམ་པ་དང་དམ་པ་མ་ཡིན་པ་བསྟེན་པ་དང༌། སྤང་བ་གཉིས་ཀྱིས་ལྟ་བ་བཟང་ངན་ཡོངས་སུ་མ་བསྐྱངས་པའི་ཕྱིར། སྨན་རྣམས་ཀུན་དང་འབྲལ་བར་འགྱུར་རོ། །ཞིང་རྨེད་པ་ནི་དཔྱ་དབུལ་བའི་རྩ་བའི་རྒྱུ་ཡིན་པའི་ཕྱིར་རོ། །དེ་དག་ལ་ཚོང་ཟོང་སྣ་ཚོགས་ཞེས་བྱ་བ་འདི་སྨོས་ཏེ། མཁར་དང༌། ནོར་གྱི་རང་བཞིན་ལས་བརྩམས་པ་སྟེ། སྣ་ཚོགས་པའི་ཚོང་ཟོང་གང་ཡིན་པ་དེ་དག་གོ །དེ་དག་གི་ཉོ་བ་དང༌། འཚོང་བ་ནི་ཉོ་ཚོང་ངོ༌། །རྣམ་པ་སྣ་ཚོགས་པའི་ཉོ་ཚོང་བྱེད་པ་ནི་ཚོང་ཟོང་སྣ་ཚོགས་ཉོ་ཚོང་བྱེད་པ་སྟེ། །དེ་ནི་ཚོང་པ་རྣམས་ཡིན་ཏེ། ཡུལ་གཞན་དང༌། ཆུ་དང༌། ཐང་དང༌། ལེན་དུ་འགྲོ་བའི་དབང་དུ་བྱས་པའོ། །ཕོ་བྲང་འཁོར་གྱི་མི་ཞེས་བྱ་བ་ནི། གྲོང་ན་གནས་པའི་དབང་དུ་བྱས་པའོ། །ཤོ་གམ་གཅོད་ཅིང་དཔྱ་དབུལ་བ་ཞེས་བྱ་བ་ནིས་ཀྱེ་བོ་
ཡང་རྣམ་པ་གཉིས་ཏེ། ཤོ་གམ་གཅོད་ཅིང་དཔྱ་དབུལ་བའི་ཐ་མལ་པའི་གྲོང་གི་མི་སྟེ། འདིས་ནི་རྫོང་གི་རང་བཞིན་བསྟན་ཏོ། །ཚོང་པ་རྣམས་ཤོ་གམ་གཅོད་ཅིང་དཔྱ་དབུལ་བ་ཞེས་བྱ་བ་འདིས་ནོར་གྱི་རང་བཞིན་བསྟན་ཏེ། ཚོང་པའི་སྐྱེ་བོ་ཡིན་པའི་ཕྱིར་དེ་བསྲུངས་ན་ནོར་ཡང་བསྲུངས་པར་འགྱུར་ཏེ། ནོར་གྱི་ཚོང་པ་རྣམས་ལ་རག་ལུས་པའི་ཕྱིར་རོ། །དེ་གཉིས་ཀའི་ཕྱོགས་གཅིག་ཏུ་བྱས་ཏེ་ནོར་གྱི་ཕུན་སུམ་ཚོགས་པར་བསྟན་ཏོ། །སྐྱོན་མེད་ཅེས་བྱ་བ་ལ་སོགས་པ་ནི་བཀའ་ཁྲིམས་ཀྱི་རང་བཞིན་གྱི་དབང་དུ་བྱས་པའོ། །མ་བཀུར་ན་ཞེས་བྱ་བ་ནི་བཀའ་ཁྲིམས་ཀྱིས་མ་བཀུར་བ་སྟེ། མ་བསྟན་པའི་སྐྱོན་བསྟན་ཏོ། །ཡོངས་སུ་མ་བསྐྱངས་པ་དག་དེས་ཡོངས་སུ་མ་བསྐྱངས་པའི་ཕྱིར། གཞན་གྱི་རང་བཞིན་ཡུལ་མི་སྔར་བསྐྱངས་པའི་སྒྲུབ་པ་ཉིད་དུ་བསྟན་ཏོ། །ད་ནི་རྗེས་སུ་གཟུང་བ་དང༌། དཔྱ་དབབ་པའི་བསྒྲུབ་པའི་དབང་དུ་བྱས་ནས། དེ་བཞིན་ཚུལ་ལྡན་མཁས་པ་དགེ་བ་དང༌། །ཞེས་བྱ་བའི་ཚིགས་བཅད་གསུམ་སྨོས་སོ། །དེ་ལ་ཕན་གདགས་པ་བསྒྲུབ་པའི་དབང་དུ་བྱས་ནས། དེ་བཞིན་ཚུལ་ལྡན་མཁས་པ་དགེ་བ་དང༌། །ཞེས་བྱ་བའི་ཚིགས་བཅད་ཡིན་ཏེ། རང་གི་སྐྱེ་བོ་གནས་པ་ཡང་རྣམ་པ་གཉིས་ཏེ། གནས་པ་དང༌། རིགས་སོ། །དེ་ལ་གནས་པའི་དབང་དུ་བྱས་པ་ནི་ཚིགས་བཅད་དང་པོ་འདི་ཡིན་ནོ། །ཚུལ་ཁྲིམས་དང༌། ཐོས་པ་དང༌། རྣལ་འབྱོར་དང་ཚུལ་ཁྲིམས་དང༌། ཐོས་པ་དང༌། རྣལ་འབྱོར་ཏེ་དེས་དགེ་བ་རྣམས་སོ། །རྣལ་འབྱོར་ཞེས་སྨོས་པས་ནི་ཞི་གནས་དང༌། ལྷག་མཐོང་གཟུང་ངོ༌། །ཚུལ་ཁྲིམས་ཀྱི་ཞི་གནས་ཀྱི་སྟེང་དུ་བཤད་ཅེས་བྱ་བ་ཞི་གནས་དང་ལྷག་མཐོང་ཉིད་དུ་བསྟན་ཏེ་དེས་དགེ་བ་རྣམས་སོ། །དགེ་བ་དེ་དག་རབ་ཏུ་མཐོང་བ་འདིས་ནི་རང་གི་དོན་སྒྲུབ་པ་ཕུན་སུམ་ཚོགས་པ་བསྟན་ཏོ། །ཡོན་ཏན་ཆེ་བར་གྲགས་པས་དགེ་བ་རྣམས། །ཞེས་བྱ་བ་འདིས་ནི་གཞན་གྱི་དོན་སྒྲུབ་པ་ཕུན་སུམ་ཚོགས་པ་བསྟན་ཏོ། །ཆེ་བར་གྲགས་པ་ཉིད་ནི་ཆེ་བར་གྲགས་པའོ། །ཆེ་བར་གྲགས་པ་དེ་ཉིད་ཡོན་ཏན་ཡིན་པས་དེ་ཉིད་ཀྱི་ཡོན་ཏན་སྒྲོགས་པ་གང་ཡིན་པ་དེ་དག་ནི་ཡོན་ཏན་ཆེ་བར་གྲགས་པའོ། །སྨད་ཅིང་ཡལ་
བར་བོར་ན་ཞེས་བྱ་བ་འདིས་ནི་མངོན་དུ་ལྡང་བ་དང༌། ཕྱག་འཚལ་བ་དང༌། བསྙེན་བཀུར་བ་དང༌། རྗེས་སུ་བསྟན་པ་དང༌། མཉན་པ་ལ་སོགས་པ་སྤང་ཞེས་བྱ་བའི་དོན་ཏོ། །མཐོ་རིས་འགྲོ་བའི་སྒོ་དང་འགྲོལ་བར་འགྱུར། །ཞེས་བྱ་བ་འདིས་ནི་མངོན་པར་མཐོ་བ་དང་ངེས་པར་ལེགས་བའི་རྒྱུ་དེ་སྐྱེས་བུ་དམ་པ་ལ་བརྙས་ཤིང་སྨད་པ་དང༌། མ་བསྐྱངས་པ་དེས་མཐོ་རིས་ཀྱི་སྒོའི་མཚན་ཉིད་དུ་མངོན་པར་མཐོ་བ་དང་འགལ་བ་ཉིད་དོ། །དཔྱད་དབབ་པ་ཞེས་བྱ་བ་དེ་བསྒྲུབ་པའི་དབང་ཏུ་བྱས་ནས། འབྲས་བུ་མ་སྨིན་ཤིང་ལས་གང་འཐོག་པ། །ཞེས་བྱ་བའི་ཚིགས་བཅད་གཉིས་སྨོས་ཏེ་དུས་ལ་མ་བབ་པར་དཔྱ་ཕབ་ཅིང་བླངས་པའི་སྐྱོན་བསྟན་པའི་ཕྱིར། འབྲས་བུ་མ་སྨིན་ཤིང་ལས་གང་འཐོག་པ། །ཞེས་བྱ་བ་ལྟ་བུ་ནི་ཆོས་མ་ཡིན་པས་དཔྱ་ཕབ་པའོ། །ས་བོན་ཆུད་གསོན་ཅེས་བྱ་བ་ལྟ་བུ་ནི་ཡུལ་ཡང་ཕུང་ལ་ཞེས་བྱ་བ་ཡིན་ནོ། །རོ་ཡང་ངེས་མ་མྱོང་ཞེས་བྱ་བ་ལྟ་བུ་ནི་དེས་ཆོས་མ་ཡིན་པས་དཔྱ་ཕབ་པས་ཕན་མི་ཐོགས་པ་ཉིད་དོ། །སྔར་བསྟན་པའི་སྐྱོན་གྱི་མི་མཐུན་པའི་ཕྱོགས་ཆོས་ཀྱིས་བསྲུངས་པའི་ཡོན་ཏན་བསྟན་པའི་ཕྱིར། དེ་ལྟར་ལྗོན་ཤིང་ཡོན་ཏན་ཕུན་སུམ་ཚོགས། །ཞེས་བྱ་བའི་ཚིགས་བཅད་སྨོས་སོ། སྨིན་པའི་བར་དུ་ཡོངས་སུ་བསྐྱངས་ན་སྟེ། ཤིང་ལྟ་བུ་ནི་རྒྱལ་པོས་བསྲུངས་པའི་ཡུལ་ལོ། །ཡོན་ཏན་ཕུན་སུམ་ཚོགས་པའི་འབྲས་བུ་སྟེར་བ་ལྟ་བུ་ནི་ཆོས་དང༌། སྲིད་དང༌། བདེ་བ་འབྱོར་པར་བྱེད་པ་ལྟ་བུར་སྦྱར་རོ། །བློན་པོ་མཛངས་པ་གློ་བ་ཉེ་བ་ཞེས་བྱ་བའི་ཚིགས་བཅད་འདི་ནི་བློན་པོ་དང། མཛའ་བོའི་སྐྱེ་བོའི་དབང་དུ་བྱས་པ་སྟེ། གློ་བ་ཉེ་བ་ཞེས་བྱ་བ་ནི་དེའི་བློ་དང་མཐུན་པར་འདོད་པའོ། །མཛངས་པ་ཞེས་བྱ་བ་ནི་ལྷན་ཅིག་སྐྱེས་པ་དང༌། སྦྱོར་བ་ལས་བྱུང་བའི་ཤེས་རབ་དང་ལྡན་པའོ། །གློ་བ་ཉེ་བ་ཞེས་བྱ་བ་འདིས་ནི་ནུས་པ་བསྟན་ཏོ། །གྲོགས་པོ་སྐྱོན་མེད་ཅེས་བྱ་བ་ནི་འཁྲུལ་པ་མེད་པར་སྤྱོད་པའོ། །བདག་གི་ནང་མི་རྣམས་ཞེས་བྱ་བ་ནི་སྐྱོན་མེད་པ་སྟེ་འཁྲུལ་པ་མེད་པར་སྤྱོད་པའོ། །དགའ་བར་སྨྲ་བས་ཞེས་བྱ་བ་ནི་ཚིག་སྙན་པ་བསྟན་ཏོ། །རིམ་གྲོར་བཅས་པའི་བྱ་དགའ་སྩལ་བ་དང༌། །ཞེས་བྱ་བ་འདིས་ནི་རིམ་གྲོ་དང་བྱ་དགའ་
གཉིས་ཏེ། དེས་ནི་རིམ་གྲོ་དང་འདི་གསུམ་གྱིས་ནི་བསྡུ་བའི་དངོས་པོ་བསྟན་ཏེ། སྦྱིན་པ་དང༌། སྙན་པར་སྨྲ་བ་དང༌། དོན་མཐུན་པ་དང༌། དོན་སྤྱོད་པ་ལས་དོན་སྤྱོད་པ་ནི་རྒྱལ་པོ་ལ་མེད་པའི་ཕྱིར་མ་སྨོས་ཏེ། བསྡུ་བའི་དངོས་པོ་བཞི་པ་མེད་དོ། །དེ་བས་ཞེས་བྱ་བ་ནི། གང་སྔར་བསྟན་པའི། ས་ལ་འཁོད་པ་ཆོས་ཀྱིས་སྐྱོང་ལ་བག་མེད་སྤོངས། །དེ་ལྟར་བྱས་ན་གྲགས་པ་དང་ནི་མཐོ་རིས་འཐོབ། །ཅེས་བྱ་བ་སྟེ། དེ་ལྟར་བསྟན་པ་དང༌། སྤང་བའི་ཕན་ཡོན་ནི་གང་ཡིན་ཞེ་ན། དེའི་ཕན་ཡོན་བསྟན་པའི་ཕྱིར། འབངས་རྣམས་སྐྱོན་ལ་མི་དགའ་ཞེས་བྱ་བ་ཕྱེད་འོག་མའོ། །ཕན་ཡོན་རྣམ་པ་སྣ་ཚོགས་པ་ནི་བདག་ཉིད་ཀྱི་གྲགས་པ་འཐོབ་པ་དང༌། འབངས་རྣམས་ཀྱི་ཡོན་ཏན་དང༌། སྐྱོན་གཉིས་ལ་དགའ་བ་དང༌། མི་འགལ་བར་འགྱུར་བ་སྟེ། དང་པོ་བདག་ཉིད་ཀྱི་ཕུན་སུམ་ཚོགས་པས་ནི་བདག་གི་གྲགས་པ་འཐོབ་པའོ། །ཇི་ལྟར་འབངས་རྣམས་ཀྱི་ཡོན་ཏན་དང༌། སྐྱོན་ལ་ཐོབ་པ་དང་མི་འགལ་བ་ཡིན་ཞེ་ན། དེ་སྒྲུབ་པའི་ཕྱིར། ཁྱོད་ཀྱིས་ཆོས་སྤྱོད་གྱུར་ན་མི་ཡི་འཇིག་རྟེན་ཕལ་ཆེར་ནི། །ཞེས་བྱ་བ་སྨོས་ཏེ། ཕལ་ཆེར་ཞེས་བྱ་བ་ནི་མང་པོར་སྟོན་པ་ཡིན་ཏེ། འདིས་ནི་གཏན་དུ་སྤྱོད་པ་དེ་མ་གཏོགས་པའོ། །ལེགས་པར་སྤྱོད་ལ་ཕྱོགས་ཤིང་ཞེས་བྱ་བ་ནི་མཐོང་བའི་ཆོས་ཀྱི་སྒྲུབ་པའི་ཕན་ཡོན་ནོ། །སྐྱེ་དགུ་རྣམས་ནི་མཐོ་རིས་ལམ་ལ་གནས་པར་འགྱུར། །ཞེས་བྱ་བ་ནི་འཇིག་རྟེན་ཕ་རོལ་གྱི་ཕན་ཡོན་ནོ། །དེ་ལྟར་འབངས་རྣམས་བསྐྱངས་བའི་ཕན་ཡོན་བསྟན་པའི་ཕྱིར། ཁྱོད་ཀྱིས་བརྩོན་འགྲུས་བསྐྱེད་དེ་འགྲོ་བ་འདི་དག་ཅེས་བྱ་བའི་ཕྱེད་འོག་མའོ། །འགྲོ་བ་འདི་དག་ཡོངས་སུ་སྐྱོང་བ་ནི་མཐོང་བའི་ཆོས་ཀྱི་ཕན་ཡོན་ནོ། །དེ་ཡོངས་སུ་བསྐྱང་བར་དམ་བཅས་པའི་ཕྱིར། དམ་བཅས་པས་ཆོས་ལ་བརྟེན་ཞེས་བྱ་བ་ནི་འཇིག་རྟེན་ཕ་རོལ་གྱི་ཕན་ཡོན་ནོ། །ཆོས་ཞེས་སྨོས་པས་ནི་ལེགས་པར་སྤྱད་པའི་འབྲས་བུ་གཟུང་ངོ༌། །ཡང་ན་ལེགས་པར་སྤྱོད་པ་འདི་ཉིད་ཆོས་ཡིན་པས་དེ་ལ་བརྟེན་ཅིག་ཅེས་བསྟན་པ་ཡིན་ནོ། །ཆོས་དེ་གང་ཡིན་ཞེ་ན། དེ་བསྟན་པའི་ཕྱིར་ཚུལ་ཁྲིམས་རྣམ་པར་སྦྱོང་ལ་ཞེས་བྱ་བའི་ཚིགས་བཅད་འདིའི་བསྡུས་པའི་དོན་ནོ།།
བསོད་ནམས་ཀྱི་ཚོགས་ཡོངས་སུ་འབྱུང་སྟེ། ཕ་རོལ་ཏུ་ཕྱིན་པ་དྲུག་པོ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་བར་དུ་བསྟན་ཏོ། །ཚུལ་ཁྲིམས་རྣམ་པར་སྦྱོང་ལ་ཞེས་བྱ་བས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་ཏེ། ཚུལ་ཁྲིམས་རྣམ་པར་སྦྱོང་ལ་ཞེས་བྱ་བས་ནི་སྐྱོན་མེད་པ་དང་མ་ཉམས་པ་ཞེས་བྱ་བ་ལ་སོགས་པ་གང་བཅོམ་ལྡན་འདས་ཀྱིས་གསུངས་པའི་རིམ་པས་སྦྱོང་བའོ། །སྦྱིན་པའི་གྲགས་པ་སྤེལ་ཞེས་བྱ་བ་ནི་འདྲ་བ་མེད་པའི་སྦྱིན་པས་གྲགས་པར་འགྱུར་བ་ཞེས་བྱ་བའི་དོན་ཏོ། །བྱམས་པར་གྱིས་ཞེས་བྱ་བ་ནི་སྐྱེ་བོ་གཞན་དག་གནོད་པ་མེད་པ་ལ་ཡང་ནང་མི་ཇི་ལྟ་བ་བཞིན་དུ་ཞེས་བྱ་བ་ཡིན་ཏེ། ཇི་ལྟར་ཉེ་དུའི་སྐྱེ་བོ་བཞིན་དུའོ། །ས་ལ་འཁོད་པ་ཆོས་ཀྱིས་སྐྱོང་ལ་བག་མེད་སྤོངས། །ཞེས་བྱ་བས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་ཏེ། བརྩོན་འགྲུས་ལ་ཡང་རྣམ་པ་བཞི་སྟེ། དགེ་བའི་ཆོས་མ་སྐྱེས་པ་སྐྱེས་པ་དང༌། དགེ་བའི་ཆོས་སྐྱེས་ཟིན་པ་རྣམ་པར་སྤེལ་བར་བྱ་བའི་ཕྱིར་ཏེ། དེ་གཉིས་ནི་ས་ལ་འཁོད་པ་ཆོས་ཀྱིས་སྐྱོང་ཞེས་བྱ་བ་འདི་བསྟན་པ་ཡིན་ནོ། །སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་དང༌། སྐྱེས་ཟིན་པ་རྣམས་སྤང་བའི་ཕྱིར་ཏེ། དེ་གཉི་ག་ནི་བག་མེད་སྤོངས་ཞེས་བྱ་བ་འདིས་བསྟན་པ་ཡིན་ནོ། །འདི་ནི་བསོད་ནམས་ཀྱི་ཚོགས་ཀྱི་ཆོས་དང༌། རྗེས་སུ་མཐུན་པའི་ཕན་ཡོན་གྱི་དབང་དུ་བྱས་པ་སྟེ། དེ་ལྟར་བྱས་ན་ཞེས་བྱ་བའི་ཚིག་རྐང་གཅིག་གོ །གྲགས་པ་འཐོབ་ཅེས་བྱ་བ་ནི་མཐོང་བའི་ཆོས་ཀྱི་ཕན་ཡོན་ནོ། །མཐོ་རིས་འཐོབ་ཅེས་བྱ་བ་ནི་འཇིག་རྟེན་ཕ་རོལ་གྱི་ཕན་ཡོན་ནོ། །དེ་ལྟར་རེ་ཞིག་རྒྱལ་པོས་སྤང་བ་དང༌། །བླང་བ་ལ་སོགས་པའི་སྒྲུབ་པས་འཛིན་དུ་བཅུག་ནས་ཡུལ་གྱི་མིའི་རང་བཞིན་བསྒྲུབ་པའི་དབང་དུ་བྱས་ནས། ཆུན་པ་རྣམས་དང་ཕྱུགས་ལུག་འཚོ་བ་རྣམས། །ཞེས་བྱ་བའི་ཚིགས་བཅད་སྨོས་སོ། །ཅིའི་ཕྱིར་ལུགས་ཀྱི་བསྟན་བཅོས་ལས་བཤད་པའི་རིམ་པ་ལས་འདའ་བར་བྱ་སྟེ། དང་པོ་ཡུལ་གྱི་མིའི་ཆོས་སྨོས་ཤིང་བློན་པོའི་རང་བཞིན་མ་བསྟན། རྗེ་བོ་དང༌། བློན་པོ་དང༌། ཡུལ་མི་དང༌། མཁར་དང༌། དཀོར་དང༌། བཀའ་ཁྲིམས་དང༌། གྲོགས་
པོ་རྣམས་ཀྱི་རང་བཞིན་རྣམས་ཏེ། འདི་ལྟར་བསྟན་བཅོས་ལས་བརྗོད་པའི་རིམ་པ་འདི་ཉིད་ནི་རིགས་པའི་ཚུལ་ཉིད་དུ་འགྱུར་ཏེ། ལུགས་ཀྱི་བསྟན་བཅོས་ལས་བཤད་པའི་རིམ་པའོ། །འདིར་ཅི་ཞིག་བྱས་ཤེ་ན། བདག་པོས་གང་བསྲུང་བ་དང༌། གང་དང་ལྷན་ཅིག་བསྲུང་བ་ཞེས་བྱ་བ་ཡིན་ཏེ། གང་བསྲུང་བ་ནི་ཡུལ་མི་དང༌། རྫོང་དང༌། ནོར་རོ། གང་དང་ལྷན་ཅིག་བསྲུང་ཞེ་ན། བཀའ་ཁྲིམས་དང༌། བློན་པོ་དང༌། གྲོགས་པོ་རྣམས་ཡིན་ཏེ། དེ་བས་ན་རིམ་པ་འདི་ནི་རིགས་པ་ཉིད་དོ། །དེ་ལ་ཡུལ་མིའི་རང་བཞིན་གྱི་སྒྲུབ་པ་ཡང་རྣམ་པ་གཉིས་ཏེ། སྲུང་བའི་སྒྲུབ་པ་དང༌། རྗེས་སུ་ཕན་གདགས་པ་དང༌། དཔྱ་དབུལ་བའི་སྒྲུབ་པའོ། །དེ་ལས་སྲུང་བའི་སྒྲུབ་པའི་དབང་དུ་བྱས་ནས། ཆུན་པ་རྣམས་ཞེས་བྱ་བའི་ཚིགས་བཅད་འདིའོ། །ཆུན་པ་ཞེས་བྱ་བ་ནི་ཞིང་ལས་གཙོར་བྱེད་པ་ཡིན་ནོ། །ཕྱུགས་ལུག་འཚོ་བ་རྣམས་ཞེས་བྱ་བ་ནི་བ་ལང་ལ་སོགས་པ་བསྐྱང་བ་ལ་འབད་པ་སྟེ། འཚོ་ཚིས་ལ་འཇུག་པའོ། །ཡུལ་མི་ཡོངས་སུ་བསྐྱང་བ་ལ་ཅིའི་ཕྱིར་ཚོང་ལ་འཇུག་པ་སྨོས་ཤེ་ན། འོག་ཏུ་ནོར་གྱི་སྒོ་ནས་རྗོད་པར་བྱེད་པས་སོ། །དང་པོ་གཉིས་ཀྱི་གོ་རིམས་ནི་ཆུན་པ་ནི་མེ་ཏོག་དང་ལྡན་པའི་ལྗོན་ཤིང་ལྟ་བུ་སྟེ། རིམ་གྱིས་འབྲས་བུ་སྟེར་བའི་ཕྱིར་རོ། །ཕྱུགས་ལུག་འཚོ་བ་རྣམས་ཞེས་བྱ་བ་ནི་འབྲས་བུ་ལྡན་པའི་ལྗོན་ཤིང་ལྟ་བུ་སྟེ། དེ་མ་ཐག་ཏུ་འབྲས་བུ་སྟེར་བའི་ཕྱིར་རོ། །སྨན་རྣམས་ཀུན་དང་ཞེས་བྱ་བ་ནི་འབྲས་སཱ་ལུ་ལ་སོགས་པ་དང་ཕྱུགས་ལུག་ལ་སོགས་པ་ཆོས་ཀྱི་འབྲས་བུ་ཆེན་པོ་ཡིན་ཞེས་བྱ་བ་འདིའི་དོན་ཏོ། །བདེ་བ་འདོད་ཕྱིར་འབངས་རྣམས་སེམས་པར་མཛོད། །ཅེས་བྱ་བས་ནི་གང་སྔར་བསྟན་པའི། ཁྱོད་ཀྱིས་ཆོས་སྤྱད་གྱུར་ན་མི་ཡི་འཇིག་རྟེན་ཕལ་ཆེར་ནི། །ཞེས་བྱ་བའི་ཚིགས་བཅད་འདིར་ཡང་སྦྱར་བར་བྱའོ། །ཆགས་དང་ཞེ་སྡང་མེད་པའི་ནན་ཐུར་གྱིས། །ཞེས་བྱ་བ་ནི་གང་སྔར་བསྟན་པའི་རང་བཞིན་དག་ལ་ཇི་ལྟར་སྦྱར་བ་བཞིན་དུ་ཐམས་ཅད་ལ་ཡང་བརྗོད་དོ། །འཇིག་རྟེན་བསྲུངས་ཞེས་བྱ་བ་ནི་བདག་གི་རང་བཞིན་བསྲུང་བ་དང༌། འཇིག་རྟེན་གྱི་མཐོ་རིས་ཀྱི་འདོད་པ་ཐོབ་པའི་ཆེད་དུ་སྤྱད་དོ། །
སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བྱང་ཆུབ་ཆེན་པོའི་སྐྱེས་པའི་རབས་སོ།། །།རྣམ་པ་སྣ་ཚོགས་པའི་འབྱུང་ཁུང་ནི། རྣམ་པ་སྣ་ཚོགས་པའི་འབྱུང་ཁུང་ངོ༌། །རྣམ་པ་སྣ་ཚོགས་པའི་འབྱུང་ཁུང་གི་རྫས་གང་ཡིན་པའི་རིའི་ངོས་དེ་ནི་འབྱུང་ཁུང་གི་རྫས་རྣམ་པ་སྣ་ཚོགས་པའི་གངས་རིའི་ངོས་ཏེ་དེ་ནའོ། །ཀཽ་ཤཱམྦཱིའི་དར་སྔོན་པོས་སྟོད་གཡོགས་སུ་གང་གིས་བྱས་པ་དེ་ནི་ཀཽ་ཤཱམྦཱིའི་དར་སྔོན་པོས་སྟོད་གཡོགས་གང་གིས་བྱས་པ་དེའོ། །རྣམ་པ་དུ་མ་དག་གི་དབྱིབས་ཀྱི་རྣམ་པ་ནི་དབྱིབས་མང་པོའོ། །ཁ་དོག་རྣམ་པ་དུ་མ་དང༌། དབྱིབས་རྣམ་པ་མང་པོ་གང་ཡིན་པའི་ཐེལ་སྡིངས་དང་ཤང་ཤོང་དེ་ནི་རྣམ་པ་དུ་མའི་ཁ་དོག་དང༌། དབྱིབས་རྣམ་པ་མང་པོ་དེའོ། །བང་རིམ་རྣམ་པ་དུ་མ་ནི་བང་རི་མ་རྣམ་པ་སྣ་ཚོགས་པ་སྟེ། ཐེལ་སྡིངས་དང༌། ཤང་ཤོང་གི་བང་རིམ་རྣམ་པ་སྣ་ཚོགས་པ་དེའོ། །གཅོང་རོང་གི་ནང་ནི་གཅོང་རོང་ངོ༌། །གཅོང་རོང་ཡང་ཡིན་ལ་ཟབ་མོ་ཡང་ཡིན་པས་ན་གཅོང་རོང་ཟ་བ་མོའོ། །གཅོང་རོང་ཟབ་མོ་གཡང་ཟབ་ནི་གཅོང་རོང་ཟབ་མོ་གཡང་ཟབ་སྟེ། དེ་མང་པོ་ཡོད་པ་ནི་གཅོང་རོང་ཟབ་མོ་དག་དེར་ཡོད་པའོ། །ཆོས་ཀྱི་འདུ་ཤེས་ནི་མ་ཉམས། བྱས་པ་གཟོ་བ་མ་འཇུངས་པའི་རང་བཞིན་ཅན་བཞིན་དུ་རབ་ཏུ་བརྟན་པ་དང་ལྡན་པ་ཞེས་བྱ་བ་འདི་བཞི་སྨོས་པ་ནི། རྒྱུ་འདི་བཞིས་ནི་སྙིང་རྗེ་གཏོང་བ་ཡིན་ཏེ། འདི་ལྟར་ཆོས་ཀྱི་འདུ་ཤེས་ཉམས་ན་སྟེ། ཆོས་ནི་མི་འཚེ་བའི་མཚན་ཉིད་དེ། དེའི་འདུ་ཤེས་མ་ཉམས་པར་གྱུར་པའོ། །ཆོས་དེ་བསྟན་ན་ནི་ཡུན་རིང་པོར་འདོད་པའི་འབྲས་བུ་འཐོབ་པར་འགྱུར་རོ། །མི་བསྟེན་པ་དེས་ནི་མི་འདོད་པའི་འབྲས་བུ་འཐོབ་པར་འགྱུར་ཏེ། གང་འདིའི་འདུ་ཤེས་ཡོངས་སུ་ཉམས་པར་གྱུར་པའི་ཚེ་ནི་སྙིང་རྗེ་མེད་པ་ཡིན་ནོ། །བདག་ལ་ཆགས་པ་དང་བཅས་པས་བྱས་པ་ནི་ཚོར་བའམ། འཁོར་བའི་ལམ་དག་ཏུ་ད་ལྟར་བྱུང་བ་དང༌། འདས་པའི་དུས་སུ་སེམས་ཅན་རེ་རེ་ལ་ཡང་མཐའ་ཡས་པའི་མི་འདོད་པར་སྦྱར་བར་བྱས་པ་དང༌། མཐའ་ཡས་པའི་མི་འདོད་པ་ལ་ཉེ་བར་སྦྱོར་བ་བྱས་པ་ཡིན་ཏེ། དེ་
བས་ན་དེ་བྱས་པས་བདག་ཉིད་ཀྱིས་ཀྱང་སྙིང་རྗེ་གཏོང་བར་འགྱུར་རོ། །མཐོང་བའི་ཆོས་ལ་འཇུངས་པའི་རང་བཞིན་ཅན་ཡིན་པའི་ཕྱིར། བདེ་བ་ཅུང་ཟད་ཙམ་འཐོབ་པའི་ཆེད་དུ་འཇུངས་པའི་ཕྱིར་སྙིང་རྗེ་གཏོང་བ་ཡིན་ནོ། །མཐོང་བའི་ཆོས་ཉིད་ལ་སེམས་ཅན་རྣམས་དང་བདག་ཉིད་ཀྱི་མི་འདོད་པའི་རྒྱུས་མི་བརྟན་པའི་ཕྱིར། སྙིང་རྗེ་ཡོངས་སུ་གཏོང་བ་ཡིན་ནོ། །བཞི་པོ་དེ་དག་མེད་པར་བསྟན་པའི་ཕྱིར། དེ་ལ་ཞེས་བྱ་བ་ཡིན་ཏེ། ཡོན་ཏན་བཞི་པོ་འདི་དང་ལྡན་པས་སྙིང་རྗེས་མ་བཏང་ངོ་ཞེས་བསྟན་པར་གྱུར་པ་ཡིན་ནོ། །ནགས་ཚལ་ཞེས་བྱ་བས་ནི་ས་ཕྱོགས་ཉེ་བ་དང་མི་ཉེ་བར་གཟུང་ངོ༌། །རི་མཆོག་ཅེས་བྱ་བས་ནི་ཕྱོགས་མཐོན་པོ་གཟུང་ངོ༌། །རྒྱ་མཚོར་བཅས་པའི་ཞེས་བྱ་བ་ནི་བགས་ཀྱིས་གཞོལ་བའི་ཕྱོགས་གཟུང་ངོ༌། །མེས་ནི་བསམ་གཏན་དང་པོའི་བར་དུ་འཇིག་པར་འགྱུར་རོ། །ཆུས་ནི་བསམ་གཏན་གཉིས་པའི་བར་དུའོ། །རླུང་གིས་ནི་བསམ་གཏན་གསུམ་པའི་བར་དུའོ། །ནགས་ཀྱི་ཤིང་གི་ལོ་མ་དང་འབྲས་བུ་ཞེས་སྨོས་པས་ནི་གཞན་གྱིས་མ་གཟུང་བ་དང༌། སྲོག་ཆགས་ལ་གནོད་པ་སྤངས་པའི་ཚུལ་ཉིད་དུ་བསྟན་པའི་ཕྱིར་ཏེ། འདི་ནི་སྲོག་གཅོད་པ་དང༌། མ་བྱིན་པར་ལེན་པ་ལས་ལྡོག་པ་བསྟན་ཏོ། །ས་ཕྱོགས་དེར་འོངས་སོ་ཞེས་བྱ་བ་ནི་གང་བྱང་ཆུབ་སེམས་དཔའ་གནས་པ་དེར་རོ། །བཀྲེས་པ་དང༌། སྐོམ་པ་དང༌། ཚབ་དང༌། ངལ་བས་ལུས་ནི་རྨྱ་ཞེས་བྱ་བ་ལ་བཀྲེས་པ་དང༌། སྐོམ་པ་གཉིས་སྨོས་པས་ནི། ལྷན་ཅིག་སྐྱེས་པའི་སྡུག་བསྔལ་བསྟན་པའི་ཕྱིར། ཚ་བ་སྨོས་པ་ཡང་དེ་བཞིན་དུ་སྡུག་བསྔལ་བའོ། །ངལ་བ་ནི་སྤྱོད་ཡུལ་ལས་གྱུར་པའི་ལུས་ཀྱི་སྡུག་བསྔལ་བའོ། །ཡིད་མི་དགའ་བའི་མེ་ཞེས་བྱ་བ་ནི་སེམས་ཀྱི་སྡུག་བསྔལ་ལོ། །བཀྲེས་པས་ཉེན་པ་དེས་རབ་ཏུ་ཞིམ་པར་རྟོགས་ཏེ། ཞེས་བྱ་བ་ནི་གང་གི་ཕྱིར་ལྟོགས་པས་ཞིམ་པར་བྱེད་པ་ཡིན་གྱི། འབྲས་བུ་དེ་ནི་ཞིམ་པོ་མ་ཡིན་ནོ། ཞེས་པའི་དོན་ཏོ། །འདི་ལས་འབྱུང་བ་ཡིན་པས་དེ་ལས་བྱུང་བ་སྟེ། དེ་ལས་བྱུང་བ་དེ་ཚོལ་བའོ། །དེ་འདོད་པའི་ཕྱིར་ཞེས་བྱ་བ་ནི་ཏིན་དུའི་འབྲས་བུ་འདོད་པའོ། །དེའི་ཞེས་བྱ་བ་ནི་དེའི་ཡལ་གའོ། །ལྗོན་
པའི་ཤིང་ཞེས་བྱ་བ་ནི་ཏིན་དུ་ཀ་ཞེས་བྱ་བ་དེའི་མིང་ཅན་ཏེ། རང་བཞིན་ཉིད་ཀྱིས་ཤིང་ཏིན་དུ་ཀ་ནི་རབ་ཏུ་ཕྲ་བའི་ངོ་བོ་ཉིད་དང༌། ཤུན་ཕྲགས་མེད་པའི་ཕྱིར་ཏེ། དེ་བས་ན་སྨྲས་པ། ལྕི་བའི་ལྕིད་ཀྱིས་ནོན་པ་དང༌། དེ་འཛེགས་པའི་ཕྱིར་དང༌། ཕྲ་བའི་ཕྱིར་དང། ཐོར་ཏོ་ལ་སོང་པའི་ཕྱིར། སྟ་རེས་ཆེད་དུ་རྩ་བ་ནས་བཅད་པ་བཞིན་ཞེས་བྱ་བ་ཡིན་ཏེ། མ་ལུས་པར་ཆད་པ་ཉིད་དུ་སྟོན་ཏོ། །སྒྲ་དང་བཅས་པར་ཆག་ནས་ཞེས་བྱ་བ་ནི་ཤིང་ཏིན་དུ་ཀ་སྲབ་ཉིད་དུ་སྟོན་ཏོ། །དེ་ནས་ལྷན་ཅིག་ཏུ་ལྟུང་བར་གྱུར་ཏོ་ཞེས་བྱ་བ་འདིས་ནི་བར་དུ་འཆི་བ་མེད་པའི་རྒྱུ་བསྟན་ཏོ། །འཆིའོ་སྙམ་སྟེ་གསོན་དུ་རེ་བ་ནི་མེད་ཅེས་བྱ་བ་ནི་འཚོ་བའི་རེ་བ་བཏང་བར་གྱུར་པའོ། །ནགས་ཁུང་བགྲོད་དཀའ་ཞེས་བྱ་བའི་ཚིགས་བཅད་འདིས་ནི་སྐྱེ་བོ་དང་འབྲེལ་པ་མེད་པ་སྟེ། ཡོངས་སུ་སྐྱོབ་པ་མེད་པར་བསྟན་ཏོ། །གཉེན་བཤེས་ཀུན་དང་བྲལ་ནས་ཞེས་བྱ་བ་འདིས་ནི་སྐྱེ་བོ་འདྲིས་པ་དང་བྲལ་བ་ཉིད་ཀྱི་ཕྱིར་ཏེ་དེས་ན་ཡོངས་སུ་སྐྱོབ་པ་མེད་པའོ། །གཅིག་པུར་གྱུར་པ་དང༌། །ཤ་སྦྲང་མང་པོ་འདུན་མ་འདུ་བའི་ས། །ཞེས་བྱ་བ་འདིས་ནི། འཆི་བ་དང་ཉེ་བ་ཉིད་དུ་སྟོན་པའོ། །རི་དགས་འདྲ་བ་ཞེས་བྱ་བ་ནི་སྐྱེ་བོ་མེད་པའི་ཕྱིར་རོ། །བཀྲ་བ་ནོར་བུ་ནི་ནོར་བུ་བཀྲ་བའོ། །བཀྲ་བ་ནི་ནོར་བུ་ཉིད་སྐར་མ་ཡིན་པས། བཀྲ་བའི་ནོར་བུ་རིན་ཆེན་སྐར་མའོ། །དེས་མཛེས་པའི་སྤྲིན་གང་ཡིན་པ་དེ་ནི་ནོར་བུ་རིན་ཆེན་སྐར་མ་བཀྲ་བས་མཛེས་པའོ། །འདིར་འོངས་ཞེས་བྱ་བ་གློ་བུར་དུའོ། །ཅིའི་ཕྱིར་ཞེས་བྱ་བ་ནི་གང་གི་རྒྱུས་སོ། །ལྟ་ཞིང་ཞེས་བྱ་བ་ནི་གྱེན་དུ་ལྟ་བའོ། །སུ་ཞིག་ཡིན་ཞེས་བྱ་བའི་ལན་ནི་བདག་ནི་མི་ཞིག་ལགས་ཞེས་བྱ་བ་ཡིན་ནོ། །འདིར་འོངས་ཞེས་བྱ་བའི་ལན་ནི་ཤིང་འདིའི་འབྲས་བུ་ཚོལ་ཞེས་བྱ་བ་ཡིན་ནོ། །ཅིའི་ཕྱིར་ཞེས་བྱ་བའི་ལེན་ནི་འདི་ལྟ་བུར་ནི་ཉམས་ཉེས་བྱུང་ཞེས་པའོ། །དེ་བས་གཉེན་བཤེས་དང་ཡང་བྲལ། །ཞེས་བྱ་བ་འདིས་ནི་རྗེས་སུ་འབྲང་བ་མེད་པས་སྙིང་རྗེའི་གནས་སུ་སྟོན་ཏོ། །ཉམས་ཉེས་ཆེན་པོ། ཞེས་བྱ་བ་འདིས་ནི་སྡུག་བསྔལ་ཉིད་དུ་སྟོན་ཏོ། །སྤྲེའུ་ཚོགས་མང་པོའི་མགོན་པོ་ཁྱོད། །བདག་གི་སྐྱབས་ཀྱང་མཛད་
དུ་གསོལ། །ཞེས་བྱ་བ་འདིས་ནི་སྐྱབས་སུ་འགྲོ་བར་གསོལ་བ་འདེབས་པའོ། །རྒྱུ་གསུམ་པོ་འདི་ཐམས་ཅད་ཀྱིས་ཀྱང་སྙིང་རྗེའི་གནས་ཉིད་དུ་སྟོན་ཏེ། ཕོངས་པ་དང༌། སྡུག་བསྔལ་བ་དང༌། རྗེས་སུ་འབྲང་བ་མེད་པས་སོ། །སྙིང་རྗེ་ཆེན་པོ་ཞེས་བྱ་བ་ནི་སྔར་བསྟན་པའི་སྙིང་རྗེའི་གནས་ཐམས་ཅད་ཀྱིས་སོ། །ཉམས་ཉེས་གྱུར་ཅིང་ཞེས་བྱ་བའི་ཚིགས་བཅད་འདིས་ཀྱང་སྔར་བསྟན་པའི་སྙིང་རྗེའི་གནས་ཀྱི་རྒྱུ་གསུམ་བསྟན་པ་ཡིན་ནོ། །ཉམས་ཉེས་གྱུར་ཞེས་བྱ་བ་ནི་སྡུག་བསྔལ་དང་ལྡན་པ་ཉིད་དུ་གྱུར་པའོ། །གཉེན་བཤེས་རྣམས་དང་བྲལ་ཞེས་བྱ་བ་འདིས་ནི་རྗེས་སུ་འབྲང་བ་མེད་པ་ཉིད་དོ། །ཐལ་མོ་སྦྱར་ནས་དམན་པས་གསོལ་བ་ནི། ཞེས་བྱ་བས་ནི་སྐྱབས་སུ་འགྲོ་བར་གསོལ་བ་དོན་དུ་གཉེར་བའོ། །བརྩེ་བ་གཡེལ་བར་གྱུར་ཅེས་བྱ་བ་ནི་བརྟན་པ་ཉམས་པར་གྱུར་ཅེས་བྱ་བའི་དོན་ཏོ། །དེ་ལྟ་བུའི་དུས་ན་དཀོན་པ་ཞེས་བྱ་བ་ནི་རྗེས་སུ་འབྲེང་བར་ཐམས་ཅད་ཀྱང་འཆི་བའི་དུས་ན་གན་དུ་འོང་བ་ནི་དཀོན་པའོ། །ཚིག་འཇམ་པོས་ཞེས་བྱ་བ་ནི་བདག་ཉིད་ཀྱིས་ཡོངས་སུ་བསྐྱབ་པའི་ཡོན་ཏན་ཞེས་བྱ་བའི་དོན་ཏོ། །གཡང་སར་ལྷུང་བས་ཞེས་བྱ་བའི་ཚིགས་བཅད་འདིས་ཀྱང་སྔར་བསྟན་པའི་སྙིང་རྗེའི་རྒྱུ་གསུམ་སྟོན་ཏེ། དེ་ཡོངས་སུ་བསྐྱབ་ཅིང་བདེ་བར་འགྱུར་རོ་ཞེས་ཤེས་པར་བྱ་བའི་ཕྱིར་རོ། །གཡང་སར་ལྷུང་བས་བདག་ནི་མཐུ་མེད་ཅིང༌། །ཞེས་བྱ་བ་འདིས་ནི་སྡུག་བསྔལ་ཅན་དུ་བསྟན་ཏོ། །གཉེན་བཤེས་མེད་ཅེས་བྱ་བ་འདིས་ནི་རྗེས་སུ་འབྲང་བ་མེད་པ་ཉིད་དོ། །མ་འཇིགས་ཤིག་ཅེས་བྱ་བ་ནི་སྐྱབས་འདོད་པ་སྟེ་སྐྱབས་སྒྲུབ་པར་བསྟན་ཏོ། །རང་གི་ལུས་ལས་སྙིང་པོ་དག །ཅེས་བྱ་བ་ནི་སྙིང་པོ་མེད་པའི་ལུས་ལས་གཞན་གྱི་དོན་སྒྲུབ་པའི་སྙིང་པོའོ། །དེ་བསྟན་པའི་ཕྱིར། སྒྲུབ་པར་བྱེད་པའི་སྙིང་པོ་དག །ཅེས་བྱ་བ་སྨོས་སོ། །སྙིང་པོ་མེད་པ་ཞེས་བྱ་བ་ནི་ཆུ་ཤིང་གི་ཕུང་པོ་བཞིན་དུའོ། །ཡང་ན་རྟག་པ་དང༌། བདེ་བ་དང༌། བདག་དང༌། གཙང་བ་མེད་པའོ། །རབ་ཏུ་ལྕི་བའི་ཁུར་གྱིས་ནོན་བཞིན་ཡང༌། །ཞེས་བྱ་བ་ནི་སྡུག་བསྔལ་བར་གྱུར་ཀྱང་སྙིང་སྟོབས་ཆེ་བས་བརྟན་པ་མ་ཉམས་པའི་ཕྱིར་སྟེང་དུ་ཕྱིན་ཏོ། །རབ་ཏུ་དགའ་བར་གྱུར་ཅེས་བྱ་བ་
ནི་སེམས་ཀྱི་མི་དགའ་བ་མེད་པར་སྟོན་ཏོ། །འདི་ལྟར་སྙིང་སྟོབས་ཆེ་བས་བརྟན་པ་མ་ཉམས་པར་ཞེས་བྱ་བ་ཡིན་ཏེ། དེ་བས་ན་དེའོ། །ངལ་ཞིང་ཆད་པས་གོམས་པ་འཁྱོར་ཞིང་འདོར། །ཞེས་བྱ་བ་ནི་ལུས་ཀྱི་ཡོངས་སུ་ངལ་བ་ཡོད་པ་ཡིན་ཏེ། གང་གི་ཕྱིར་ཡང་རབ་ཏུ་ལྕི་བའི་ཁུར་གྱིས་ནོན་བཞིན་ཞེས་བྱ་བ་སྟེ་ལྕི་བའི་རྒྱུ་དེས་སོ། །ངལ་བ་སོས་པར་བྱ་ཕྱིར་ཞེས་བྱ་བ་ནི་ལུས་ཀྱི་ངལ་བ་མེད་པར་བྱ་བའི་ཕྱིར་རོ། །རང་བཞིན་ཡོངས་སུ་དག་པ་ཞེས་བྱ་བ་ནི་བདག་གི་རང་བཞིན་ཡོངས་སུ་དག་པས། གཞན་གྱི་བསམ་པ་ཡོངས་སུ་དག་པར་འཛིན་པའི་ཕྱིར་རོ། །དེས་ཞེས་བྱ་བ་ནི་ཕན་གདགས་པའི་ཕྱིར། དོགས་པ་མེད་པའི་རྒྱུ་བསྟན་ཏོ། །མི་ཞེས་བྱ་བ་འདིས་ནི་སྐལ་བ་མི་མཉམ་པ་ཡིན་པས། དོགས་པའི་གནས་ཉིད་དུ་བསྟན་ཏོ། །ཡང་ན་རང་བཞིན་ཡོངས་སུ་དག་པ་དེས། ཉེས་པ་བྱས་པ་དོགས་པ་མེད་པ་སྟེ། ཕན་གདགས་པའི་ཕྱིར་ཡང་བག་ཕབ་པའོ། །གཅན་གཟན་ཁྲོ་བོ་ཐགས་ཐོགས་མེད་པར་འོང༌། །ཞེས་བྱ་བ་ལ། གཅན་གཟན་ཁྲོ་བོ་འོང་བ་ནི་འབྱུང་བ་སྟེ། ནགས་ཀྱི་ཕྱོགས་སུ་འཇུག་པའི་ཕྱིར་རོ། །ཐགས་ཐོགས་མེད་པ་ནི་ཀུན་ནས་ཐར་བའི་ཕྱིར་རོ། །ངལ་བས་གཉིད་ཀྱིས་ལོག་པ་ཞེས་བྱ་བ་ནི་བདག་ཉིད་ངལ་བ་དང་གཉིད་ཀྱིས་ལོག་པ་གཉིས་ཀྱིས་གཅན་གཟན་ཁྲོ་བོ་བཟློག་པར་མི་ནུས་པ་བསྟན་པ་ཡིན་ནོ། །ངལ་ཕན་པ་འབྱུང་བ་ཡིན་པས་ངལ་ཕན་པའོ། །མི་དེ་ལམ་མཚོན་པ་གཞན་མེད་པས། ང་ཤི་བར་གྱུར་ན་ནི་གྲོགས་མེད་པའི་ཕྱིར། འགྲོ་བ་ལ་ཉམས་ཉེས་པར་འགྱུར་ཏེ། དེ་བས་ན་མི་དེ་རང་ལ་ཕན་པར་འགྱུར་བ་ཡིན་ནོ། །དེའི་ཕྱིར་ཞེས་བྱ་བ་ནི་ཀུན་ནས་ཐར་པའི་ནགས་ཀྱི་ས་ཕྱོགས་དེར། གཅན་གཟན་ཁྲོ་བོ་ཐགས་ཐོགས་མེད་པར་འོང༌། །ཞེས་བྱ་བ་ཡིན་ཏེ། ཐགས་ཐོགས་མེད་པར་འོང་བའི་ཕྱིར་རོ། །མིག་ལྟོས་ལ་བསྲུང་བར་གྱིས་ཞེས་བྱ་བ་ནི་གཅན་གཟན་ཁྲོ་བོ་དག་ལས་སོ། །ང་དང་ཁྱོད་བདག་གཉིས་ཞེས་བྱ་བ་ནི་བདག་ལ་ཕན་པ་དང༌། ཁྱོད་བདག་ཉིད་ལ་ཕན་པའི་ཕྱིར་རོ། །ང་ནི་ངལ་ཞིང་ལུས་ཀྱང་རབ་ཏུ་རྨྱ། །ཞེས་བྱ་བ་ནི་སྔར་བསྟན་
པའི་ངལ་བ་ཉིད་དོ། །ང་ནི་ཉལ་བར་འདོད་ཅེས་བྱ་བ་ནི་སྔར་བསྟན་པའི་གཉིད་ལོག་པར་རོ། །དུལ་བ་ལྟར་ཚུལ་འཆོས་པ་ལ་མཁས་པ་དེ་ན་རེ་ཞེས་བྱ་བ་ལ་སོགས་པའི་ཚིག་རྐྱང་པས་ནི་དེའི་ཕྱིན་ཅི་ལོག་པ་ཉིད་བསྟན་ཏེ། རབ་ཏུ་འབད་པས་རྙེད་པའི་རྩ་བ་དང༌། ཞེས་བྱ་བའི་ཚིགས་བཅད་བཞིས་བསྟན་པའོ། །རབ་ཏུ་འབད་པས་རྙེད་པ་ཞེས་བྱ་བ་ནི་བརྐོ་བ་ལ་སོགས་པའི་རབ་ཏུ་འབད་པས་སོ། །ཅི་དགར་རྙེད་པས་ཞེས་བྱ་བ་ནི་འབྲས་བུ་རྙེད་པ་དེ་གཅིག་མ་ཡིན་པ་ཉིད་དུ་བསྟན་ཏེ། རྩ་བ་དང༌། འབྲས་བུ་གཉིས་ཀྱིས་ནི་འཚོ་བ་ཙམ་ཡང་མི་ནུས་པར་བསྟན་ཏོ། །ཕན་པར་བྱས་ཀྱང་བཟའ་བ་ཉིད་དུ་བསྟན་ཏེ། འདིའི་རང་བཞིན་ནི་དེ་འདྲ་བའི་ཕྱིར་རོ། །ཕོངས་པར་གྱུར་ན་ཆོས་ནི་གྲུབ་པ་ཡིན། །ཞེས་བྱ་བ་ནི། དེའི་ཕྱིར་འཇིག་རྟེན་པ་རྣམས་ཀྱི་ཆོས་སྨྲ་བ། དྲག་པོ་དང་ནི་འཇམ་པ་སྟེ། །གང་ཡང་རུང་བའི་ལས་ཀྱིས་ནི། །བདག་ཉིད་ཕོངས་པའི་ཚེ་ན་སྤྱད། །དེ་འོག་ཆོས་ནི་སྤྱད་པར་བྱ། །ཞེས་བྱ་བ་ཡིན་ཏེ། རྒྱུ་དེའི་ཕྱིར་རོ། །ཆགས་པ་ཉིད་སྐྱོན་ཡིན་པས་ཆགས་པའི་སྐྱོན་ནོ། །དེས་རྨོངས་པའི་བློ་གང་ཡིན་པ་དེ་ནི་ཆགས་པའི་སྐྱོན་གྱིས་བློ་རྨོངས་པའོ། །བདག་ཉིད་ངན་པ་ཞེས་བྱ་བ་ནི་གང་སྔར་བསྟན་པའི་སྙིང་རྗེ་མི་གཏོང་བའི་རྒྱུ་བཞི་མེད་པར་བསྟན་ཏེ། བདག་ཉིད་ངན་པ་ཞེས་བྱ་བ་སྨོས་ཏེ། འཇུངས་པ་མེད་པའི་རང་བཞིན་མེད་པར་བསྟན་པ་ནི། ཆགས་པའི་སྐྱོན་གྱིས་བློ་རྨོངས་པ། །ཞེས་བྱ་བ་འདིས་སོ། །རབ་ཏུ་བརྟན་པ་དང་ལྡན་པ་ཞེས་བྱ་བ་ནི་གང་སྔར་བསྟན་པ་སྟེ། སྙིང་རྗེ་མི་གཏོང་བའི་རྒྱུ་དེའི་མི་མཐུན་པའི་ཕྱོགས་སྙིང་རྗེ་དང༌། དེས་པའི་ངོ་བོ་སྤངས་ཞེས་བྱ་བས་བརྟན་པ་མེད་པར་སྟོན་ཏོ། །བྱས་པའི་དྲིན་ནི་བརྗེད་ཅེས་བྱ་བ་འདིར། སྔར་བསྟན་པའི་བྱས་པ་གཟོ་བ་དེའི་མི་མཐུན་པའི་ཕྱོགས་བསྟན་ཏོ། །ཆོས་ཀྱི་འདུ་ཤེས་ནི་ཉམས་ཞེས་བྱ་བ་ནི། སྔར་བསྟན་པའི་ཆོས་ཀྱི་འདུ་ཤེས་ནི་མ་ཉམས་ཞེས་བྱ་བ་དེའི་མི་མཐུན་པའི་ཕྱོགས་བསྟན་ཏོ། །བཞི་པོ་འདི་དག་སྔར་བསྟན་པ་ལྟར་མ་ཡིན་པ་ཅིའི་ཕྱིར་གོ་རིམས་འདི་ལྟར་བཀོད་ཅེ་ན། ད་ལྟར་འདི་ནི་རྐྱེན་གྱི་རྒྱུ་ལས་སྐྱེས་པའི་ཕྱིར།
བྱས་པ་མི་གཟོ་བ་དང༌། ཆོས་ཀྱི་འདུ་ཤེས་ལས་ཉམས་པ་གཉིས་ཀྱི་དང་པོར། བདག་ཉིད་ངན་པ་ཆགས་པའི་སྐྱོན་གྱིས་ནི་བློ་རྨོངས། །ཞེས་བྱ་བ་སྨོས་སོ། །གཞན་ནི་སྔམ་བཞིན་ནོ། །རྒྱུ་བཞི་པོ་འདིས་ཀྱང༌། སྙིང་རྗེ་དང༌། དེས་པའི་ངོ་བོ་ཉིད་རབ་ཏུ་སྤངས་པ་ཡིན་ནོ། །ཉམ་ཆུང་བ་ཡང་ཡིན་ལ་མི་བརྟན་པ་ཡང་ཡིན་པས་ཉམ་ཆུང་མི་བརྟན་ནོ། །ཡང་ན་ཉམ་ཆུང་བས་མི་བརྟན་ཞེས་བྱ་བའི་དོན་ཏོ། །གཉིད་ལས་སངས་པར་བྱ་བའི་ཕྱིར། ཞེས་བྱ་བ་ནི་ཆེད་དུ་སྟེ། དེ་སངས་པར་བྱ་བའི་ཆེད་ལྟ་བུར་རོ། །གཉིད་སངས་པར་བྱ་བ་ནི། སད་པར་གྱུར་པའོ། །མགོ་ལ་རིལ་གྱིས་ཕོག་པར་མ་གྱུར་ཏེ། །ཞེས་བྱ་བ་ནི། དེ་བས་ན་མགོ་བོ་ཕྱེ་མར་མ་གྱུར་ཏོ། །གཞན་དུ་བརྗོད་པ་ནི་མགོ་དེ་ལ་ཕོག་པ་སྟེ། དེ་བས་ན་ཕྱེ་མར་ནི་མ་གྱུར་ཏེ་རྨ་ཕྱུང་བའོ། །མགོ་བོ་མ་ཞོམ་སྟེ་ཞེས་བྱ་བ་ནི། མགོ་ཅུང་ཟད་ཞོམ་པའོ། །སྐྱེངས་བཞིན་ཅན་དུ་ཞེས་བྱ་བ་ནི་བྱ་བ་མ་ཡིན་པ་བྱས་པས་སོ། །སྐྱེངས་པར་གྱུར་པ་ནི་སྐྱེངས་པ་སྟེ། བརྩམས་པའི་ཁ་ན་མ་ཐོ་བའི་བྱ་བ་མ་ཡིན་པ་མ་གྲུབ་པས་སོ། །དེས་གཟི་ཉམས་པ་གང་ཡིན་པ་དེ་ནི་སྐྱེངས་པས་གཟི་ཉམས་སོ། །སྤོབས་པ་མེད་པ་ཞེས་བྱ་བ་ནི། འཇིགས་པ་མེད་པ་མ་ཡིན་པའོ། །དེ་བས་ན་མི་དགའ་བས་ཞུམ་པར་གྱུར་པ་ནི་མི་དགའ་སྤ་གོང་ངོ༌། །མི་དགའ་བ་ནི་གཞན་སྐྱོབ་པ་མེད་པའི་ཕྱིར་ཏེ། དེས་སྤ་གོང་བའོ། །སྐྲག་པ་ནི་བྱང་ཆུབ་སེམས་དཔས་སྐད་ཆེར་ཕྱུང་ཞིང་མཆོངས་པས་སོ། །རྒྱུ་དེས་འཇིགས་པ་དང༌། སྐྲག་པ་སྐྱེས་པ་སྟེ། དེ་བས་ན་སྐྲག་པའོ། །དུག་འབྱིན་པའི་མཚན་མ་གང་ཡིན་པ་ལུགས་ཀྱི་བསྟན་བཅོས་ལས་བརྗོད་པ་འདིར་ཡང་ངེས་པར་འབྱུང་བར་བཤད་དེ། དུག་འབྱིན་པས་ཁ་སྐམ་པ་དང༌། སྐད་འགགས་པ་དང༌། རྡུལ་འབྱུང་བ་སྟེ། མཚན་མ་འདི་དག་གཟུང་བ་ཡིན་ནོ། །སྐྱེངས་པས་གཟི་ཉམས་སྤོབས་པ་མེད་པར་གྱུར། །ཅེས་བྱ་བ་འདིས་ནི། ཁ་སྐམ་པ་བསྟན་ཏོ། །མདོག་ཀྱང་ཉམས་ཞེས་བྱ་བ་འདིས་ནི། བཞིན་མདོག་སྔོ་བར་བསྟན་ཏོ། །སྐད་འགགས་པ་ཞེས་བྱ་བ་འདིས་ནི་སྐད་འགགས་པ་ཉིད་བསྟན་ཏེ། གང་གི་ཕྱིར་གྲེ་བ་འགགས་
ན་ནི་སྐད་འགགས་པར་འགྱུར་རོ། །རྡུལ་གྱིས་གཤེར་ཞིང་ཞེས་བྱ་བ་འདིས་ནི། རྡུལ་ཉིད་བསྟན་ཏོ། །དེ་གང་གིས་ལྟ་ཡང་ཡོང་མ་ནུས། །ཞེས་བྱ་བ་འདིས་ནི་རང་གི་ལས་ཐལ་བར་བསྟན་ཏེ། གང་གི་ཕྱིར་དེའི་ཚེ་ནི་ལྟ་བ་ལ་གནས་པར་ཡང་མི་ནུས་པ་སྟེ། འདིར་ནི་འདིའི་ཁྱད་པར་རོ། །དེ་དག་གི་ནི་ལུགས་ཀྱི་བསྟན་བཅོས་ལས་བཤད་པའི་རྟགས་དག་གི་མཚན་མ་དང་བཅས་པ་ཡིན་ཏེ། འདི་དག་དང་མཚན་མ་དང་བཅས་པ་ནི་སྔར་བསྟན་པའི་རྒྱུ་དག་གོ །བློ་ལ་ངེས་པར་བྱས་ནས་ནི་འཁྲུལ་པ་མེད་པའི་རྟགས་མཐོང་བས་སོ། །བདག་ལ་ཕན་པ་ལ་ཡང་མི་ལྟ་བ་ནི། ངན་པ་དེ་ཡིན་པས་ན། བདག་ལ་ཕན་པ་ལ་མི་ལྟ་བ་ངན་པའོ། །དེ་བས་ན་བདག་ལ་ཕན་པ་ལ་མི་ལྟ་བ་དེས། ཡིད་ཆད་པ་ནི་ངན་པ་ཡིན་པའི་ཕྱིར་དང༌། ངན་འགྲོར་འགྲོ་བའི་ཕྱིར་སྙིང་རྗེ་སྐྱེས་པའོ། །འཁྲུག་པ་ནི་སེམས་ཀྱི་རྣམ་པར་འཁྲུག་པའོ། །ཁྲོ་བ་ནི་ལུས་དང༌། ངག་གི་འགྱུར་བའོ། །ཁྲོ་བ་དང༌། འཁྲུག་པ་ལས་བྱུང་བའི་སྐྱོན་ནི། །ཁྲོ་བ་འཁྲུག་པའི་སྐྱོན་ནོ། །མེད་པ་ནི་ཁྲོ་བ་དང༌། འཁྲུག་པའི་སྐྱོན་གང་གིས་མེད་པ་དེ་ནི་ཁྲོ་བ་དང༌། འཁྲུག་པའི་སྐྱོན་མེད་པ་སྟེ། ཡིད་ཆད་པའི་ཕྱིར་ཁྲོ་བ་དང༌། འཁྲུག་པའི་སྐྱོན་ཡོངས་སུ་སྤངས་པའོ། །སྙིང་རྗེ་སྐྱེས་པའི་ཕྱིར་མིག་མཆིམས་གང་བའོ། །འདི་འདྲ་བ་དག་ཅེས་བྱ་བ་ནི་ལས་འདི་འདྲ་བར་བྱས་པའོ། །ཇི་ལྟར་ཞེས་བྱ་བ་ནི་སེམས་ཀྱིས་བསྐུལ་བར་སྟོན་པ་ཡིན་ནོ། །བྱ་བ་ཇི་ལྟར་ཞེས་བྱ་བ་འདིས་ནི་སེམས་ཀྱིས་ངེས་པར་བྱས་པའོ། །ཇི་ལྟ་བུར་ཡང་བརྩམས་པར་གྱུར། །ཅེས་བྱ་བ་ནི་ཡང་དག་པར་དཔྱད་པའོ། །དེ་ལ་རེ་ཞིག་དང་པོ་ནི་སེམས་སྤྱོད་པ་ལ་འཇུག་པར་བྱ་བ་ཡིན་ཏེ། བྱའམ་མི་བྱ་ཞེས་བྱ་བ་དང༌། འདི་ནི་དེ་བཞིན་དུ་བྱའོ་ཞེས་པ་དང༌། དེའི་འོག་ཏུ་འདི་ནི་ངེས་པར་འདི་ལྟར་བྱའོ་ཞེས་སེམས་པ་ལ་འཇུག་པ་ཡིན་ནོ། །དེའི་འོག་ཏུ་སེམས་པས་ལུས་དང༌། ངག་གི་ལས་ལ་འཇུག་པར་བྱེད་དོ། །འདི་ནི་རིམ་པ་མ་ཡིན་པའི་ཚུལ་དུ་བསྟན་ཏེ། །ཇི་ལྟར་ཞེ་ན། འདི་འདྲ་བདག་ལ་ཁྱོད་ཀྱིས་བྱས། །ཞེས་བྱ་བ་དེའི་ལས་མཐོང་བས་ངོ་མཚར་རྟོགས་ནས་དྲིས་པ་ཡིན་ཏེ། རྒྱུ་ནི་རེ་ཞིག་གཞག་གི་བསམ་པ་ཉིད་ཀྱང་དཀའ་ན་དེ་བྱེད་
པ་ལྟ་སྨོས་ཀྱང་ཅི་དགོས། བསམ་པ་ལྟར་རེ་ཞིག་བཞག་ན་དཔྱད་ཅིང་བྱའོ་ཞེས་བྱ་བ་དེ་ཉིད་ཀྱང་ཤིན་ཏུ་དཀའ་བ་ཡིན་པས་ངོ་མཚར་དུ་རྟོགས་ནས་དྲིས་པ་ཡིན་ཏེ། དེ་བས་ན་འདི་དག་གི་རིམ་པ་ནི་གོ་རིམས་བཞིན་དུ་བསྟན་པའོ། །ཇི་ལྟ་བུར་ཡང་བརྩམས་པར་གྱུར། །ཅེས་བྱ་བ་དེའི་དཀའ་བའི་རྒྱུ་བསྟན་པའི་ཕྱིར། ང་ལ་གནོད་པ་བྱེད་པ་ནི། །ཞེས་བྱ་བ་སྨོས་ཏེ། ང་ལ་གནོད་པ་བྱེད་པ་དེ་དང་འབྲེལ་པ་གཞན་དག་གོ །བརྩོན་འགྲུས་རབ་ཏུ་བསྐྱེད་ནས་ཀྱང༌། །དེའི་མཐུ་རྩལ་གང་ཡིན་བ་དེ་ནི། བརྩོན་འགྲུས་རབ་ཏུ་བསྐྱེད་པའི་མཐུ་རྩལ་ཆེན་པོའོ། །བཟློག་པ་ནི་དགག་བར་རིགས་པའོ། །དེ་བས་ན་ཁྱོད་ཀྱིས་ཁྱད་པར་དུ་ཆེ་བའི་དཀའ་བ་བྱས་སོ་ཞེས་བྱ་བ་སྟོན་པ་ཡིན་ནོ། །བདག་གིས་དཀའ་བ་སྤྱད་དོ་སྙམ། །ཞེས་བྱ་བའི་ཚིགས་བཅད་དོ། །བཟང་པོ་ཁྱོད་ནི་མིར་གྱུར་ཀྱང༌། །ཞེས་བྱ་བའི་ཚིགས་བཅད་གཉིས་ཀྱི་དོན་ཡང་ངོ་མཚར་ཆེ་བར་རྟོགས་པ་དེ་བསྟན་པ་དང༌། དེ་བསྒྲུབ་པའི་ཕྱིར་རོ། །བདག་གིས་དཀའ་བ་སྤྱད་དོ་སྙམ། །ཞེས་བྱ་བའི་ཚིགས་བཅད་དེ་བསྒྲུབ་པའི་ཕྱིར་རོ། །འཆི་བདག་ཁ་ཡི་ནང་འདྲ་བའི། །ཞེས་བྱ་བའི་ཚིགས་བཅད་སྨོས་སོ། །བདག་གིས་དཀའ་བ་སྤྱད་དོ་སྙམ། །ང་ནི་ང་རྒྱལ་སྐྱེས་པར་གྱུར། །ཅེས་བྱ་བ་ཅིའི་ཕྱིར་ཞེ་ན། འདི་ལྟར། འཆི་བདག་ཁ་ཡིན་ང་འདྲ་བ། །འཇིག་རྟེན་གཞན་ནས་བླངས་པ་བཞིན། །ཞེས་བྱ་བ་སྟེ། དེ་བས་ན་ང་རྒྱལ་སྐྱེས་པར་གྱུར་པའོ། །ཧ་ཅང་དཀའ་བ་ཁྱོད་སྤྱོད་ཀྱིས། །དེ་ཡང་རིང་དུ་སྤངས་པར་གྱུར། །ཅེས་བྱ་བ་ནི། ཅིའི་ཕྱིར་ཞེ་ན། འདི་ལྟར། གཡང་ས་འདི་ནས་ངས་ཕྱུང་ན། །ཁྱོད་ནི་གཞན་དུ་ལྷུང་བར་གྱུར། །ཅེས་བྱ་བ་སྨོས་པའོ། །གཡངས་འདི་ནས་ཕྱུང་བ་ནི། །འདིའི་རྩ་བའི་གཡང་ས་ནས་ཕྱུང་བའོ། །གཞན་དུ་ལྷུང་བ་ནི་ངན་སོང་གི་སྐྱེ་བའི་ངོགས་ཀྱི་གཡང་སར་རོ། །དེ་ལྟ་བུའི་དཀའ་བ་སྤྱད་པ་འདིའི་རྒྱུ་གང་ཡིན་ཞེ་ན། དེའི་རྒྱུ་བསྟན་བའི་ཕྱིར། སྤྱོད་པ་ངན་བ་ཁྱོད་ཅི་རུང༌། །ཞེས་བྱ་བའི་ཚིགས་བཅད་སྨོས་སོ། །སྤྱོད་པ་ངན་པ་ནི། འཇུག་པ་ངན་པའི་རྒྱུར་གྱུར་པའི་ཕྱིར་རོ། །སྤྱོད་བ་ངན་པའི་མཚན་ཉིད་ཇི་ལྟ་བུ་ཞེ་ན། དེ་སྨྲས་པ། ཤིན་ཏུ་མི་བཟད་པའི་སྤྱོད་པ་ངན་པའོ། །ཇི་ལྟ་བུ་ཞེ་ན། དེ་བསྒྲུབ་པའི་ཕྱིར། གང་གིས་
སྡུག་བསྔལ་རྣམས་སུ་ལྷུང༌། །ཞེས་བྱ་བ་ཡིན་ནོ། །འགྲོ་བ་གང་ལྷུང་ཞེ་ན། སྨྲས་པ། བདེ་བ་འདོད་པ་རྣམས་ཡིན་ཏེ། མཐོང་བའི་ཆོས་ལ་བདེ་བ་འདོད་པས། །སྡིག་པ་རྣམས་བྱེད་དེ། དེ་ནི་མི་ཤེས་པ་ཞེས་བྱ་བས་བསྟན་ཏོ། །གང་གིས་སྡུག་བསྔལ་རྣམས་སུ་ལྷུང༌། །ཞེས་བསྟན་པ་དེའི་སྡུག་བསྔལ་གྱི་རྣམ་པ་དུ་ཞེ་ན། དེའི་སྡུག་བསྔལ་གྱི་རྣམ་པ་བསྟན་པའི་ཕྱིར། བདག་ཉིད་ངན་འགྲོ་རྣམས་སུ་ལྷུང༌། །ཞེས་བྱ་བའི་ཚིགས་བཅད་སྨོས་སོ། །སྡུག་བསྔལ་ཡང་རྣམ་པ་གཉིས་ཏེ། འཇིག་རྟེན་ཕ་རོལ་གྱི་འགྲོའི་སྡུག་བསྔལ་དང༌། མཐོང་བའི་ཆོས་ལ་བྱས་པའི་སྡུག་བསྔལ་ལོ། །ངན་འགྲོ་རྣམས་སུ་ལྷུང་ཞེས་བྱ་བ་ནི། བདག་ཉིད་ཀྱི་འཇིག་རྟེན་ཕ་རོལ་གྱི་སྡུག་བསྔལ་ལོ། །ད་ནི་མཐོང་བའི་ཆོས་ཀྱི་བདག་གིས་ཉེས་པར་བྱས་པའི་སྡུག་བསྔལ་ཡིན་ཏེ། ང་ལའང་མྱ་ངན་མེ་ཡིས་གཏོར། །ཞེས་བྱ་བ་སྟེ། མཐོང་བའི་ཆོས་ལ་བྱས་པའི་སྡུག་བསྔལ་ལོ། །བདག་ཉིད་ཀྱི་མཐོང་བའི་ཆོས་ཀྱི་སྡུག་བསྔལ་ཡང་རྣམ་པ་གཉིས་ཏེ། གྲགས་པའི་དཔལ་ནི་མེད་པར་བྱས། །ཞེས་བྱ་བ་འདིས་ནི། སྔར་བཤད་པའི་གྲགས་པ་ཉམས་པའི་སྡུག་བསྔལ་བསྟན་ཏོ། །ཡོན་ཏན་ལ་དགའ་བ་ནི་ཡོན་ཏན་ལ་དགའ་བའོ། །འགལ་བར་གྱུར་པ་ནི་ཉམས་པར་བྱས་པའོ། །ཇི་ལྟར་གྲགས་པའི་དཔལ་ཉམས་པར་བྱས་ཤེ་ན། དེ་སྨྲས་པ། ངན་པར་སྨྲ་བའི་གཞིར་ཡང་གྱུར། །ཅེས་བྱ་བ་ཡིན་ཏེ། ངན་པར་སྨྲ་བའི་གཞིར་འགྲོ་བའི་རྒྱུའོ། །ཇི་ལྟར་ཡོན་ཏན་ལ་དགའ་བ་འགལ་བར་གྱུར་ཅེ་ན། སྨྲས་པ། ཡིད་ཀྱང་བརྟན་དུ་མ་རུང་ངོ༌། །ཞེས་བྱ་བ་ཡིན་ཏེ། ཡིད་བརྟན་པ་ཉམས་པའི་རྒྱུས་སོ། །དོན་ནི་ཅི་ཞིག་འགྲུབ་པར་འགྱུར། །ཞེས་བྱ་བ་ནི། དེ་ལྟར་འཇིག་རྟེན་གཉིག་ལ་མི་ཕན་པའི་ལས་བྱས་པས་དོན་ཅེ་ཞིག་འགྲུབ་པར་འགྱུར་བའོ། །ཇི་ལྟར་འདི་ཉིད་ང་ཡི་ཡིད་ལ་གནོད་གྱུར་པ། ཞེས་བྱ་བ་དེ་ཉིད་བསྟན་པའི་ཕྱིར། སྨྲས་པ། སྡིག་པ་ཅན་དུ་གྱུར་པ་ཞེས་བྱ་བ་ཡིན་ཏེ། འདིར་ངན་པར་སྤྱོད་པའོ། །ངན་པར་སྤྱོད་པ་འདི་ནི་ངས་མེད་པར་བྱ་བར་མི་ནུས་ཏེ། འདི་མེད་པར་ཞེས་སྨོས་སོ། །ངན་པར་སྤྱོད་པ་འདི་ཇི་ལྟར་མེད་པར་གྱུར་
ཏེ། དེའི་འབྲས་བུ་རྗེས་སུ་མྱོང་བས་དེའི་འབྲས་བུ་མྱོང་བ་བསལ་བར་མི་ནུས་སོ། །བརྟེན་དུ་མི་རུང་དོགས་པར་གྱུར་ཀྱང་ཞེས་བྱ་བ་དེ་བཤད་པའི་ཕྱིར། ཁྱོད་ནི་གཅིག་པུ་ལུས་ཀྱང་ཉམ་ཆུང་ལ། །ཞེས་བྱ་བའི་ཚིགས་བཅད་འདིའི་ཕྱེད་དང་པོས་བསྟན་ཏོ། །རྒྱུ་བཞིས་དོགས་པར་གྱུར་པ་ཡིན་ཏེ། གྲོགས་མེད་པའི་ཕྱིར་དང༌། བདག་ཉིད་ཉམ་ཆུང་བའི་ཕྱིར་དང༌། ལམ་མི་ཤེས་པའི་ཕྱིར་དང༌། འཇིགས་པ་དང་བཅས་པའི་གནས་སུ་འཁྱམ་པའོ། །གང་དང་ལྷན་ཅིག་འགྲོ་བ་དང༌། གང་འགྲོ་ཞིང་སྟོབས་དང་ལྡན་པ་དང༌། གང་ནས་འགྲོ་བ་ཤེས་པ་དང༌། གང་གནས་སུ་འགྲོ་བ་སྟེ། སྐྱོན་བཞི་པོ་འདི་དག་དང་ལྡན་པའི་ཕྱིར་དོགས་པར་འགྱུར་བ་ཡིན་ཏེ། གང་དོགས་པ་དེ་ལ་བརྟེན་ཏོ། །གང་ལས་དོགས་པ་དེ་ལས་བརྩམས་ཏེ། འགའ་ཞིག་འོངས་ནས་ཞེས་བྱ་བ་སྨོས་ཏེ། འགའ་ཞིག་ཅེས་བྱ་བ་གཅན་གཟན་ཁྲོ་བོ་རྣམས་ལའོ། །དགོན་པ་བགྲོད་དཀའ་འཇིགས་པ་འོང་ལ་ཞེས་བྱ་བ་གྲོང་གི་གན་དུ་ཕྱིན་པའོ། །ཇི་ལྟར་གྲོང་གི་གན་དུ་ཕྱིན་པར་ཤེས་པར་བྱ་ཞེ་ན། དགོན་པ་དང་ནགས་ཀྱི་མཐའ་ཡིན་པའི་ཕྱིར་རོ། །བདེ་བར་སོང་ཞེས་བྱ་བ་འཇིགས་པ་མེད་པར་ཅི་བདེར་དེངས་ཤིག་པའོ། །སྡིག་པའི་ལས་ཀྱང་ཡོངས་སུ་སྤང་བར་འབད་པར་གྱིས། །ཞེས་བྱ་བ་ནི། ཅིའི་ཕྱིར་ཞེ་ན། སྡུག་བསྔལ་གྱི་རྣམ་པར་སྨིན་པ་ནི་ངེས་པའི་ཕྱིར་རོ། །འགྱོད་པའི་མེ་ཞེས་བྱ་བ་དང༌། མཛེའི་ནད་ཅེས་བྱ་བ་འདི་གཉིས་ཀྱིས་ནི་མིང་དང༌། གཟུགས་ལུས་ཀྱི་སྡུག་བསྔལ་བསྟན་ཏེ། དེའི་ལས་དང༌། སྡིག་པ་མཐོང་བའི་ཆོས་ཉིད་ལ་དེ་ལྟར་སྡུག་བསྔལ་བར་འགྱུར་བ་ལས་བརྩམས་ཏེ། དེའི་ལས་ལུས་འཇིག་པ་ལ་ནི་མི་སྤྱོད་པས་སོ། །རྨའི་ཞིགས་བ་ནི་རྨ་ཞིགས་པའོ། །རྨའི་ཆུ་འཛག་པ་ནི་རྨ་ཞིགས་པའི་ཆུ་སེར་རོ། །དེས་གཤེར་བའི་ལུས་གང་ཡིན་པ་དེ་ནི་རྨ་ཞིགས་པའི་ཆུ་སེར་གྱིས་ལུས་གཤེར་བར་གྱུར་པའོ། །སྔངས་ཤིང་ངོ་མཚར་དུ་གྱུར་ཏེ་ཞེས་བྱ་བ་ནི་དེའི་འཇིགས་སུ་རུང་བས་སོ། །ངོ་མཚར་ཆེར་བཟུང་སྟེ་ཞེས་བྱ་བ་ནི་མི་མ་ཡིན་པར་ཡིད་ཆེས་སུ་མི་རུང་བའི་གཟུགས་ཡོད་པས་སོ། །སྐྱ་བསེང་ནི་ཕྱོགས་གང་ན་མཛེ་དང༌། ཤ་བཀྲའི་ནད་མེད་པའི་ཕྱོགས་དེ་ནའོ། །སྐྲ་ནི་རྡུལ་
གྱིས་གང་ཞིང་གཡེངས། །ཞེས་བྱ་བ་ནི་གློ་བུར་གྱི་དྲི་མས་གོས་པ་ཉིད་དུ་བསྟན་ཏོ། །ཅིག་ཤོས་ནི་ལྷན་ཅིག་སྐྱེས་པ་ལས་གྱུར་པའོ། །ཡང་ན་སྡངས་ཤིང་ངོ་མཚར་དུ་བཟུང་སྟེ། དྲིས་པ་ཞེས་བྱ་བ་ནི་སྔངས་པས་ཚུལ་དང་བྲལ་བའི་ཕྱིར། རྨི་ཡིན་པར་ཡིད་མ་ཆེས་པས་ངོ་མཚར་ཆེར་གཟུང་སྟེ། གནས་སྐབས་འདི་ལྟ་བུ་རྟོགས་པར་བྱ་བའི་ཕྱིར་རོ། །དྲི་བའི་སྦྱོར་བའོ། །འབྲས་བུ་གཞན་ནི་སླད་ཀྱིས་མཆི། །ཞེས་བྱ་བ་ནི་ངན་འགྲོར་འགྲོ་བའི་འབྲས་བུ་སྟེ། བྱམས་ལ་སྙིང་རིང་བྱས་པ་ཞེས་བྱ་བའི་ཚིགས་བཅད་ཡིན་ནོ། །བྱམས་ལ་སྙིང་རིང་བས་ནི་འཇིག་རྟེན་གཉི་གར་མི་བཟད་པའི་འབྲས་བུ་བསྟན་པའི་ཕྱིར། དེ་བས་བྱམས་ལ་ཞེས་བྱ་བའི་ཚིགས་བཅད་སྨོས་སོ། །ཡང་དག་པར་འཛིན་དུ་གཞུག་པའི་ཕྱིར། གྲོགས་པོ་གསུམ་དུ་སྒྲུབ་པའི་བྱེ་བྲག་གིས་འཛིན་དུ་གཞུག་པ་ཡིན་ནོ། །མཛའ་བོ་དག་ལ་ལོག་པར་སྒྲུབ་པའི་ཉེས་དམིགས་བསྟན་པའི་ཕྱིར། བྱམས་ཕ་རྣམས་ལ་སྡང་བར་སྤྱོད་པའི་ཚུལ་བཟུང་ན། ཞེས་བྱ་བའི་ཚིགས་བཅད་སྨོས་སོ། །འཇིག་རྟེན་གཉི་ག་ལ་ཕན་པ་ཉིད་དུ་བསྟན་པའི་ཕྱིར། མཛའ་བོ་རྣམས་ལ་སེམས་ཤིང་བྱམས་པས་གྲགས་བ་འཐོབ། །ཅེས་བྱ་བའི་ཚིགས་བཅད་སྨོས་ཏེ། མཛའ་བོ་རྣམས་ལ་ལེགས་པ་སྒྲུབ་པའི་ཕན་ཡོན་བསྟན་པའི་ཕྱིར་ཏེ། ཕན་ཡོན་ཡང་རྣམ་པ་གཉིས་ཏེ། ཚེ་འདིའི་ངང༌། ཚེ་ཕྱི་མའི་འོ། །ཚེ་ཕྱི་མའི་མཐོ་རིས་འཐོབ་པར་འགྱུར་ཞེས་བྱ་བ་ཡིན་ཏེ། འདི་ན་ཕྱི་མའི་ཕན་ཡོན་ནོ། །དང་པོ་ཚེ་འདིའི་ཕན་ཡོན་ལ་ནི་བདག་དང༌། གཞན་གྱི་རྣམ་པ་གཉིས་ཏེ། མཐོང་བའི་ཆོས་ལ་ཡིད་དགའ་བ་ནི་བདག་གི་ཕན་ཡོན་ཏེ། འཆི་བའི་དུས་སུ་ཡིད་ལ་གཅགས་པ་མེད་པས། བདག་ཉིད་ཡིད་དགའ་བར་འགྱུར་རོ། །གཞན་དང་འབྲེལ་པའི་ཕན་ཡོན་ནི་རྣམ་པ་གསུམ་སྟེ། ཐ་མལ་བ་དང༌། མཛའ་བཤེས་དང༌། དགྲའོ། །དེ་ལ་ཐ་མལ་པའི་ཕན་ཡོན་གྱི་དབང་དུ་བྱས་ནས་གྲགས་པ་འཐོབ་པ་དང༌། ཡིད་བརྟན་པ་སྟེ། ཐ་མལ་པ་དག་ལས་མ་བཏང་བ་ནི། །ཡིད་ཀྱི་ལས་ཀྱི་ཕན་ཡོན་ནོ། །རིམ་གྲོ་བྱེད་པའི་བདེ་བ་དང༌། དན་གྲོགས་བྱེད་པའི་ཡོན་ཏན་ནི་མཛའ་ཤེས་ལས་
འཐོབ་པ་སྟེ། ལུས་ཀྱི་ལས་ཀྱི་ཕན་ཡོན་ནོ། །རིམ་གྲོ་བྱེད་ཅིང་བདེ་བ་འདོད་པ་བསྟན་པ་ལ་སོགས་པས་དན་གྲོགས་བྱེད་པའི་ཡོན་ཏན་ནི་གྲོགས་པོ་དམན་པ་དག་ལས། རིམ་གྲོ་ཤས་ཆེར་འཐོབ་པའི་ཕན་ཡོན་ནོ། །དགྲ་རྣམས་ཀུན་གྱིས་མི་ཚུགས་པ་ནི་དགྲའི་ཕན་ཡོན་ནོ། །བྱམས་པའི་ཕྱོགས་ལ་ལེགས་ནོངས་ཅི་བགྱིས་པའི། །ཞེས་བྱ་བའི་ཚིགས་བཅད་འདི་ནི་སྔར་བཤད་པའི་དོན་གྱི་མཇུག་སྡུད་པ་ཡིན་ཏེ། བྱམས་པའི་ཕྱོགས་ཞེས་བྱ་བའི་ཚིགས་བཅད་ཀྱི་དང་པོ་ཕྱེད་ཀྱིས་ནི། ཡིད་ཀྱིས་མཁྱེན་ཅིང་རིག་པར་བྱ་བ་སྟེ། ཡིད་ཀྱི་ལས་ཀྱིས་བསྟེན་ཅིག་པའོ། །སྐྱེ་བོ་དམ་པ་འདོད་པའི་ལམ་ལ་ཞེས་བྱ་བ་ནི། ལུས་དང༌། ངག་གི་སྒྲུབ་པ་ཡིན་ནོ། །ལམ་དེར་སོང་ན་འབྱོར་པ་རྗེས་སུ་འབྲང༌། ཞེས་བྱ་བ་ནི་ལུས་དང༌། ངག་དང༌། ཡིད་ཀྱི་ཕན་ཡོན་ནོ། །ལེགས་ནོངས་ཅི་བགྱིས་པའི་མཐུ་རྣམས་གྲུབ་པ་ཞེས་བྱ་བ་ལ། ནོངས་པ་བགྱིས་པའི་མཐུ་རྣམས་གྲུབ་པ་ཞེས་བྱ་བ་ནི་བྱམས་པ་རྣམས་ལ་སྡང་བར་སྤྱོད་པའི་ཚུལ་བཟུང་ན་ཞེས་བྱ་བའི་ཚིགས་བཅད་དེར་ཉེས་དམིགས་བསྟན་པའོ། །ལེགས་པ་བགྱིས་པའི་མཐུ་རྣམས་གྲུབ་པ་ནི། །མཛའ་བོ་རྣམས་ལ་སེམས་ཤིང་བྱམས་པས་གྲགས་པ་འཐོབ། །ཅེས་བྱ་བ་དེས་ཕན་ཡོན་བསྟན་ཏོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་སྤྲེའུ་ཆེན་པོའི་སྐྱེས་པའི་རབས་སོ།། །།གང་ན་མི་དང་བྲལ་ཞིང་རྒྱུན་ལུགས་མེད་པའི་འབྲོག་དགོན་པའི་ཕྱོགས་ནི་མིའི་རྒྱུན་ལུགས་མེད་པའོ། །གང་གི་ཕྱིར་སྒྲ་མེད་པ་དེ་ནི་སྒྲ་མི་གྲག་པ་སྟེ། མིའི་རྒྱུན་ལུགས་མེད་པའང་ཡིན་པས་མིའི་རྒྱུན་ལུགས་མེད་ཅིང་སྒྲ་མི་གྲག་པའོ། །རྩྭ་སྟུག་པོའི་ནང་དུ་ཤིང་གི་རྩ་བ་ལྡམ་ལྡུམ་ནུབ་པ་གང་ཡིན་པ་དེ་དག་ནི་ཤིང་གི་རྩ་བ་དང༌། ལྡུམ་བུ་མང་པོ་རྩ་སྟུག་པོའི་ནང་དུ་ནུབ་པའོ། །གང་དུ་དེ་མེད་པ་ནི་ཤིང་གི་རྩ་བ་དང༌། ལྡུམ་བུ་ནུབ་པ་དེ་ནའོ། །འགྲོན་པོ་རྣམས་དང༌། ཤིང་རྟ་དང༌། བཞོན་པ་ནི་འགྲོན་པོ་རྣམས་ཀྱི་ཤིང་རྟ་དང་བཞོན་པའོ། །དེ་རྣམས་ཀྱི་རྐང་པ་ནི་འགྲོན་པོ་རྣམས་ཀྱི་ཤིང་རྟ་དང་བཞོན་པའི་རྐང་པ་སྟེ་དེས་སོ། །སྲོལ་གྱི་མཚམས་བཏོད་པ་ནི་སྲོལ་བཏོད་པ་སྟེ། ལམ་སྲོལ་བཏོད་པ་ནི་
ལམ་གྱི་སྲོལ་བཏོད་པའོ། །མ་བཏོད་པའི་ལམ་གྱི་སྲོལ་གང་ཡིན་པའི་ས་ཕྱོགས་ནི་ས་ཕྱོགས་དེ་སྟེ། ས་གཞིའི་ཕྱོགས་དེ་ལམ་གྱི་སྲོལ་མ་བཏོད་པ་དེ་ནའོ། །འབབ་ཆུ་འབབ་པ་དང༌། གྲོག་མཁར་དང༌། གད་ས་རྣམས་ནི་འབབ་ཆུ་དང༌། གྲོག་མཁར་དང༌། གད་པ་དག་གོ །དེ་དག་གི་ས་ཕྱོགས་ནི་མི་བདེ་བ་གང་ཡིན་པའི་དགོན་པའི་ཕྱོགས་དེ་ནི་འབབ་ཆུ་འབབ་པ་དང༌། གྲོག་མཁར་དང༌། གད་པ་དག་གིས་ས་ཕྱོགས་མི་བདེ་བ་ཡོད་པ་དེ་ནའོ། །ལུས་དང་ལྡན་པ་ཞིག་ཏུ་གྱུར་ཏོ་ཞེས་བྱ་བ་ནི་ལུས་དང་བཅས་པར་སྐྱེས་སོ་ཞེས་བྱ་བའི་དོན་ཏོ། །རི་དགས་གཟུགས་ཅན་ཞེས་བྱ་བ་ནི་སྔར་བསྟན་པའི་རི་དགས་ཤར་བྷར་གྱུར་ཏོ་ཞེས་བྱ་བ་ཡིན་ནོ། །རི་དགས་གཅིག་པུར་གྱུར་པ་མ་ཟད་དེ། དེ་གསལ་བར་བྱ་བའི་ཕྱིར་སྔར་བསྟན་པའི་སེམས་ཅན་རྣམས་ལ་གནོད་པ་མི་བྱེད་ཅེས་བྱ་བ་སྟེ། ཇི་ལྟར་མི་བྱེད་ཅེ་ན། དཀའ་ཐུབ་ཅན་བཞིན་སྲོག་ཆགས་རྣམས་ལ་བརྩེ། །ཞེས་བྱ་བ་ཡིན་ཏེ། གཞན་ནི་སྔ་མ་བཞིན་ནོ། །ཡུལ་དེ་ལ་དབང་བའི་རྒྱལ་པོ་ཞེས་བྱ་བ་ནི། དགོན་པའི་ཕྱོགས་གང་ན་བྱང་ཆུབ་སེམས་དཔའ་གནས་པའི་འོ། །རྟ་དང༌། གླང་པོ་ཆེ་དང༌། ཤིང་རྟ་དང༌། རྐང་ཐང་གི་ཚོགས་རྒྱང་རིང་པོར་ལུས་བཞིན་དུ་ཞེས་བྱ་བ་ནི་གླང་པོ་ཆེ་ལ་སོགས་པ་ཐག་རིང་དུ་བོར་ཞེས་བྱ་བའི་དོན་ཏོ། །ཕྱུང་ནས་ཞེས་བྱ་བ་ནི་རལ་ནས་བླངས་པའོ། །གང་གིས་མདའ་མདེའུ་རྣོན་པོ་ཅན་དེ་ཕྱུང་བ་ནི་མདའ་མདེའུ་རྣོན་པོ་ཅན་ཕྱུང་བའོ། །གྱ་ཚོམ་དུ་རྒོལ་བ་སྤང་བ་གང་ཡིན་པ་དེ་ནི་གྱ་ཚོམ་དུ་རྒོལ་བ་སྤངས་པ་སྟེ། རྒོལ་བ་སྤངས་པ་ནི་བདག་ལ་ལྟོས་པ་མེད་པའི་ཕྱིར། རྒོལ་བ་སྤངས་པའོ། །ལམ་ཀ་ན་ཞེས་བྱ་བ་ནི་ཉེ་བ་ན་ཡོད་པའོ། །ཐོག་ནས་ལྷུང་བ་ནི་བསྐྱུར་བའོ། །ཅིའི་ཕྱིར་རྟ་ལས་ལྷུང་ཞེ་ན། དེམ་མཐོང་བ་ཡིན་ཏེ། མ་མཐོང་བ་ཡིན་པ་དེའི་རྒྱུ་བསྟན་པའི་ཕྱིར། མིག་ནི་རི་དགས་དེ་ལ་ཡེངས། །ཞེས་བྱ་བའི་ཚིགས་བཅད་ཀྱི་ཕྱེད་དང་པོས་བསྟན་ཏོ། །ཤིན་ཏུ་བརྟན་པར་རྟ་ལ་ཆགས་ཀྱང་ཅིའི་ཕྱིར་ལྷུང་ཞེ་ན། དེའི་རྒྱུ་བསྟན་པའི་ཕྱིར། ཚིགས་བཅད་ཕྱེད་འོག་མའོ། །སླར་བལྟས་པ་དང་ཞེས་བྱ་བ་ནི། གདོང་ཕྱིར་བསྒྱུར་ཏེ་བལྟས་ན་ཞེས་བྱ་བའི་དོན་ཏོ། །ངལ་
བསོ་བའི་ཆེད་དུ་རྟ་ལས་བབས་ཞེས་བརྟགས་པ་སྟེ། འདིར་ཡང་བབས་པ་བརྟགས་པའི་ཕྱིར། འདི་ན་གབ་ཏུ་རུང་བའི་ཞེས་བྱ་བ་ལ་སོགས་པའི་ཚིག་རྐང་སྨོས་ཏེ། འདི་ན་རྩ་སྟུག་པོ་ཞེས་བྱ་བ་ལ་སོགས་པ་འདིས་ནི་གཞན་གྱི་དགོས་པས་བབས་སོ། །ཞེས་བྱ་བ་དེའི་དགོས་པ་ཡང་མེད་དེ། མ་མཐོང་བས་སོ། །དེ་ལྟར་ངེས་པར་བྱས་ནས་སྙིང་རྗེ་སྐྱེས་པར་གྱུར་ཏོ། །དེ་ཉིད་རྒྱལ་མཚན་བཟང་པོའི་ཞེས་བྱ་བ་ལ་སོགས་པའི་ཚིགས་བཅད་བཞིས་ནི་ཕུན་སུམ་ཚོགས་པ་དང་བྲལ་བ་དང༌། སྡུག་བསྔལ་དང་ཕྲད་པའི་དབང་དུ་བྱས་པ་སྟེ། དེ་ནས་ཚིགས་བཅད་གཉིས་ཀྱིས་ནི་ཕུན་སུམ་ཚོགས་པ་དང་བྲལ་བའི་དབང་དུ་བྱས་པའོ། །ཕུན་སུམ་ཚོགས་པ་ཡང་བསོད་ནམས་ཀྱི་འབྲས་བུས་དབྱེ་བས་གསུམ་དུ་སྦྱར་ཏེ། བཟོད་པ་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་དང་བྲལ་བའི་དབང་དུ་བྱས་ནས། དེ་ཉིད་རྒྱལ་མཚན་བཟང་པོའི་ཞེས་བྱ་བའི་ཚིགས་བཅད་འདི་ཡིན་ཏེ། ཕྱི་བཞིན་བསྐྱལ་ཞིང་ཞེས་བྱ་བ་འདིས་ནི། གཡོག་འཁོར་ཕུན་སུམ་ཚོགས་པར་གཟུང་ངོ༌། །མཛེས་པའི་གདུགས་ཀྱིས་བསྐྱབས་ཞེས་བྱ་བ་དང༌། གཡག་རྔའི་བསིལ་ཡབ་གཡོབ་པས་མཛེས་པར་བྱས། ཞེས་བྱ་བས་ནི། སྦྱིན་པ་ལས་བྱུང་བའི་བསོད་ནམས་ཚོགས་ཀྱི་འབྲས་བུ་དང་བྲལ་བའི་དབང་དུ་བྱས་པའོ། །སྐྱེ་བོ་མང་པོས་བཀུར་བའི་ལྷ་ཡི་དབང་པོ་བཞིན། །ཞེས་བྱ་བའི་ཚིགས་བཅད་ཕྱེད་ཀྱིས་ནི། ཚུལ་ཁྲིམས་ལས་བྱུང་བའི་བསོད་ནམས་ཀྱི་ཚོགས་ཀྱི་འབྲས་བུ་དང་བྲལ་བའི་དབང་དུ་བྱས་པའོ། །དེ་རིང་ཁོ་ནར་གཡང་ས་ཆེན་པོར་ལྷུང༌། །ཞེས་བྱ་བ་ནི་སྡུག་བསྔལ་དང་ཕྲད་པའི་དབང་དུ་བྱས་པའོ། །ཡན་ལག་གྲུགས་པར་གྱུར་ཅེས་བྱ་བ་ནི། ཡན་ལག་གྲུགས་པ་དེ་མེད་ཀྱང་བརྒྱལ་བར་གྱུར་པའམ། དེ་མེད་ཀྱང་མྱ་ངན་བྱེད་པ་སྟེ། དེ་བས་ན་གཡང་ས་འདི་ལས་བདག་ཉིད་ཀྱིས་ཐར་བར་མི་ནུས་པའི་ཕྱིར་རོ། །མྱ་ངན་བྱེད་དོ་ཞེས་བསྟན་པ་ལ། ཇི་ལྟར་དེ་མྱ་ངན་བྱེད་པར་འགྱུར་ཞེན། དེ་བསྟན་པའི་ཕྱིར། སྡུག་བསྔལ་མ་མྱོང་རབ་ཏུ་གཞོན་ཤ་ཅན། །ཞེས་བྱ་བའི་ཚིགས་བཅད་སྨོས་སོ། །
མ་རབས་རྣམས་ལ་རྨ་རྙིང་སོས་འདྲ་བར། །ཞེས་བྱ་བས་ནི་སྡུག་བསྔལ་སྐྱེས་པ་ཡིན་ནོ། །སྲོག་གི་ལྷག་མ་ཙམ་ཞིག་ལུས་སུ་ཟིན་ཀྱང་ཞེས་བྱ་བ་ནི་ངེས་པར་འཆི་བ་ཉིད་དེ། གཡང་ས་ཟབ་པའི་ཕྱིར་རོ། །སྙིང་རྗེས་སེམས་དྲངས་ནས་ཞེས་བྱ་བ་ནི་ཕུན་སུམ་ཚོགས་བ་དང་བྲལ་བ་དང། སྡུག་བསྔལ་གྱི་རྒྱུས་སྙིང་རྗེ་བའོ། །དེ་ནི་འཐབ་བེར་ནི་རྡུལ་གྱིས་གཡོགས་ཐོད་བཅིངས་པ་ནི་ཞིག་ཅེས་བྱ་བ་འདིས་ནི། ལུས་ལ་གྱོན་པའི་གོས་དག་འགྱུར་བར་སྟོན་ཏོ། །གཡངས་ནས་ལྷུང་སྟེ་སྣད་པའི་ཚོར་བ་མྱོང་བ་ནི་སེམས་ལ་ཁྱབ་པར་གྱུར་ཅེས་བྱ་བ་འདིས་ནི་ལུས་ཀྱི་སྡུག་བསྔལ་དེས་བྱས་པའི་སེམས་ཀྱི་སྡུག་བསྔལ་ལོ། །འདུག་པ་ཞེས་བྱ་བ་ནི་དེ་ལྟར་གྱུར་པས་འགྲོ་བའི་སྐབས་མེད་དོ། །ཞེས་བྱ་བའི་དོན་ཏོ། །འགྲོ་བ་ནི་འགྱུར་ལྡོག་ཉེ་བར་བྱེད་པའོ། །དེའི་སྡུག་བསྔལ་ཡིན་པས་དེའི་སྡུག་བསྔལ་ཏེ། རྒྱལ་པོ་དེའི་སྡུག་བསྔལ་ཞེས་བྱ་བའི་དོན་ཏོ། །དེའི་སྡུག་བསྔལ་ཐུན་མོང་ཉིད་དུ་གྱུར་པ་ནི། དེའི་སྡུག་བསྔལ་གྱི་རྒྱུས་ཐུན་མོང་དུ་གྱུར་པའོ། །ཡ་རབས་ཀྱི་ཚུལ་བཞིན་དུ་སྐྱེ་བོ་དགེ་བའི་རང་བཞིན་སྟོན་པར་བྱེད་པའི་ཚིག་དེ་བསྒྲུབ་པའི་ཕྱིར། རྒྱལ་པོ་ཆེན་པོ་སྣད་པར་མ་གྱུར་ཏམ། །ཞེས་ཚིགས་བཅད་སྨོས་སོ། །དེ་ལ་ཡ་རབས་ཚུལ་བཞིན་ཞེས་བྱ་བ་ཉིད་ནི་རྒྱལ་པོ་ཆེན་པོ་ཞེས་བྱ་བའི་ཚིག་གིས་སོ། །སྐྱེ་བོ་དགེ་བའི་རང་བཞིན་སྟོན་བྱེད་ཅིང༌། །ཞེས་བྱ་བའི་ཚིག་གིས་ནི་སྣད་པར་མ་གྱུར་ཏམ་ཞེས་བྱ་བ་ལ་སོགས་པའི་ཚིག་གིས་སོ། །འདི་ནི་སྐྱེ་བོ་དགེ་བའི་རང་བཞིན་ཏེ། གཞན་སྡུག་བསྔལ་བ་ལ་རང་བཞིན་གྱིས་བརྩེ་བ་ཡིན་ཏེ། སྣད་པར་མ་གྱུར་ཏམ་ཞེས་བྱ་བ་ནི། ལུས་སྣད་པར་མ་གྱུར་ཏམ་ཞེས་བྱ་བའི་དབང་དུ་བྱས་པའོ། །ལུས་ལ་ཆག་གྲུགས་བྱུང་བར་མ་གྱུར་ཏམ། །ཞེས་བྱ་བ་ནི་ཡན་ལག་རྣམས་ཆག་པར་མ་གྱུར་ཏམ་ཞེས་བྱ་བའི་དབང་དུ་བྱས་པའོ། །ཁྱོད་ཀྱི་ནད་རྣམས་རྒྱས་པར་མ་གྱུར་ཏམ། །ཞེས་བྱ་བ་ནི། དེ་གཉི་ག་ལ་གནོང་པར་མ་གྱུར་ཏམ་ཞེས་བྱ་བའི་དབང་དུ་བྱས་པའོ། །དབུགས་འབྱིན་འགྱུར་བ་འཇམ་པ་ཞེས་བྱ་བའི་དབང་དུ་བྱས་ནས། །མིའི་རྒྱལ་པོ་བདག་ནི་གཞན་མ་ལགས། །ཞེས་བྱ་བའི་ཚིགས་བཅད་སྨོས་སོ། །ཡིད་ཆེས་པར་མི་འགྱུར་བ་ནི་རྣམ་པ་གཉིས་ཏེ། རི་དགས་
མིའི་ཚིག་ཏུ་སྨྲ་བ་ཐོས་ཤིང་མི་མ་ཡིན་པར་ཤེས་པ་དང༌། བདག་ཉིད་ཀྱིས་གནོད་པ་བྱས་པས་སོ། །དེས་ནི་ཡིད་མི་ཆེས་པར་འགྱུར་བའི་རྒྱུ་གཉིས་པ་དེ་མེད་པར་སྟོན་ཏོ། །ཚིགས་བཅད་གཉིས་ཀྱི་ཕྱེད་ཕྱེད་ཀྱིས་གོ་རིམས་བཞིན་དུ་གཅིག་ལ་གཅིག་ཕན་པ་བྱེད་པར་སྟོན་པའི་མཚན་ཉིད་འཇམ་པ་ནི་གཉེན་དུ་འབྲེལ་པ་ལྟ་བུའི་ཚིག་གི་མཚན་ཉིད་ཡིན་པའོ། །ཡང་ན། ཞེ་སར་བཅས་ཤིང་ཡིད་དུ་འོང་བ་ཡིས། །ཞེས་བྱ་བ་འཇམ་པའི་དབང་དུ་བྱས་པ་སྟེ། གཡང་སར་ལྷུང་བས་མི་དགེས་མ་མཛད་ཅིག །ཅེས་བྱ་བའི་ཚིགས་བཅད་སྨོས་ཏེ། ཕན་པ་བྱེད་པའི་མཚན་ཉིད་ནི་འཇམ་པར་སྟོན་པ་ཡིན་ནོ། །བདག་ལ་ཐུགས་ཆེས་རུང་བར་དགོངས་ནས་ནི། །ཞེས་བྱ་བ་ནི་ཞེ་སར་བཅས་པ་ཉིད་དོ། །བདག་ནི་མཆི་ཡིས་མྱུར་དུ་བཀའ་སྩོལ་ཅིག །ཅེས་བྱ་བ་ནི་ཡིད་དུ་འོང་བ་སྟེ་འཇམ་པའོ། །ངོ་མཚར་ཆེ་བ་དེས་ཞེས་བྱ་བ་ནི། སྨྲས་པའི་མཚན་ཉིད་དག་གིས་སོ། །ཡ་མཚན་དུ་གྱུར་ཅིང་སེམས་མགུ་ཞེས་བྱ་པ་ལ། དེའི་རྒྱུ་བསྟན་པའི་ཕྱིར། དགྲ་ལ་བརྒལ་བར་ནུས་བཞིན་དུ། །ཞེས་བྱ་བའི་ཚིགས་བཅད་ཀྱི་ཕྱེད་ཀྱིས་བསྟན་ཏོ། །བདག་ལ་ཇི་ལྟར་སྙིང་རྗེ་སྐྱེས། །ཞེས་བྱ་བ་དེ་བསྒྲུབ་པའི་ཕྱིར། བདག་གིས་གནོད་པ་བྱས་པའང་ཤེས། །ཞེས་བྱ་བ་ཕྱེད་འོག་མ་ཡིན་ནོ། །ཚིགས་བཅད་འདི་བསྒྲུབ་པའི་ཕྱིར། ཨེ་མའོ་འཇམ་ཞིང་རྣོ་བ་ཞེས་བྱ་བའི་ཚིགས་བཅད་འདི་སྨོས་ཏེ། སྔར་བཤད་པ་ནི་བསྒྲུབ་པར་བྱ་བ་ཡིན་ཏེ། སྔར་བཤད་པའི་ཚིགས་བཅད་ཀྱི་ཕྱེད་དང་པོ་ནི་འདིའི་དང་པོ་ཕྱེད་ཀྱིས་སྒྲུབ་པ་ཡིན་ནོ། །དེའི་གཉིས་པ་ནི་གཉིས་པའི་འོ། །འཇམ་ཞིང་རྣོ་བ་ཞེས་བྱ་བ་ནི་འཇམ་པའི་ལས་ནི་སྙིང་རྗེས་སྒྲུབ་པའོ། །རྣོ་བའི་ལས་ནི། དགྲ་ལ་བརྒལ་བར་ནུས་བཞིན་དུ། །ཞེས་བྱ་བ་སྟེ། བདག་ལ་ཡང་དག་པར་ལྡན་པའི་ཕྱིར་རམ། བདག་གི་སྙིང་ལ་ཕྱི་ནས་འགྱོད་པའི་ཕྱིར་རོ། །བདག་ཉིད་ནི་ཕྱུགས་སམ་རི་དགས་ཡིན་ཏེ། ཅིའི་ཕྱིར་ཞེ་ན། སྐྱོན་མེད་པ་ལ་གནོད་པ་བྱས་པས་སོ། །རི་དགས་གཟུགས་ཅན་འདི་ནི་གཞན། །ཞེས་བྱ་བ་ནི་དགྲ་ལ་བརྒལ་བར་ནུས་བཞིན་དུ་སྙིང་རྗེས་སྒྲུབ་པ་སྟེ། དེ་ནི་དགྲ་ལ་བརྒལ་བར་ནུས་བཞིན་དུ་བདག་ལ་སྙིང་རྗེ་སྒྲུབ་པས་སོ། །འཐབ་བོར་སྟུག་པོ་བགོས་
པས་ན། །ཞེས་བྱ་བའི་ཚིགས་བཅད་འདི་ནི་རྒྱལ་པོ་ཆེན་པོ་སྣད་པར་མ་གྱུར་ཏམ། །ཞེས་བྱ་བ་དེའི་ལན་ཡིན་ནོ། །གཡང་ས་ནས་ནི་ལྷུང་བ་ཡིས། །ཞེས་བྱ་བ་ནི་འདི་ལྷག་པར་མི་ཆེའོ་ཞེས་བྱ་བའི་དོན་ཏོ། །སྡུག་བསྔལ་གཞན་དག་ནི་བཟོད་པ་ཉིད་དུ་བསྟན་པའི་ཕྱིར། གཡང་ས་ནས་ནི་ལྷུང་བ་ཡིས། །ཞེས་བྱ་བའི་ཚིགས་བཅད་སྨོས་སོ། །ཁྱོད་དེ་ལྟར་དགེ་བར་སེམས་པ་ཞེས་བྱ་བ་ནི་བརྒལ་བར་ནུས་ཀྱང༌། སྙིང་རྗེ་དང་ལྡན་པའི་ཕྱིར་དགེ་བར་སེམས་པའོ། །ཉེས་པའི་རྒྱུ་བསྟན་པའི་ཕྱིར། གཟུགས་ཀྱི་རྐྱེན་གྱིས་རི་དགས་ལྟར། །ཞེས་བྱ་བའི་ཚིགས་བཅད་སྨོས་སོ། །གཟུགས་ཀྱི་རྐྱེན་གྱིས་ཞེས་བྱ་བ་ནི་གཟུགས་ཉིད་ཀྱི་རྐྱེན་ནོ། །དེའི་དྲུང་དུ་འོངས་ཏེ་བྱ་བ་ནི་ཐད་དུ་ལྷགས་པའོ། །དེ་བས་ན་རང་བཞིན་གྱིས་དེ་ལྟར་དགེ་བའི་བློ་དང༌། བསམ་པ་ཁྱད་པར་ཅན་ཉིད་ཡིན་ནོ། །དགྱེས་པ་ཞེས་བྱ་བ་ནི་མངོན་པར་འདོད་པའི་དོན་གྲུབ་པའོ། །དང་བ་ནི་དེའི་ཚེ་བདག་གིས་ཕྱུང་བར་རོ། །དགྱེས་པ་དང༌། དང་བ་དག་ནི། དགྱེས་པ་དང་དང་བ་དག་གོ །དེ་གཉིས་ཀྱིས་ཞལ་མངོན་དུ་ཕྱོགས་པ་ནི། དགྱེས་བཞིན་དང་བའི་ཞལ་གྱིས་མངོན་དུ་ཕྱོགས་པའོ། །ཡང་ན་དགྱེས་ཤིང་དགའ་བས་ཞལ་མངོན་དུ་ཕྱོགས་པ་ནི། དགྱེས་ཤིང་དགའ་བས་ཞལ་མངོན་དུ་ཕྱོགས་པའོ། །བདག་གི་སྲོག་ཀྱང་རི་དགས་ཁྱོད་དབང་ན། །ཞེས་བྱ་བའི་ཚིགས་བཅད་ནི་གང་དུ་འགྲོ་བར་བྱ་བ་དེའི་ཕན་ཡོན་བསྟན་པའི་ཕྱིར་རོ། །ནགས་ཚལ་རྔོན་པས་གང་ཞིང་ཞེས་བྱ་བ་ནི་འདི་དག་ཏུ་གནས་པ་དེའི་ཉེས་དམིགས་བསྟན་པའི་ཕྱིར་རོ། །ཉེས་དམིགས་ཀྱང་རྣམ་པ་གཉིས་ཏེ། ལུས་དང་སེམས་ཀྱིའོ། །དེ་ལ་སེམས་ཀྱི་ཉེས་དམིགས་ནི་འཇིགས་པ་དང་བཅས་པ་སྟེ། ཅིའི་ཕྱིར་འཇིགས་པ་དང་བཅས་པ་ཡིན་ཞེ་ན། ནགས་ཚལ་དེ་དག་རྔོན་པས་གང་བའི་ཕྱིར་རོ། །ལུས་ཀྱི་ཉེས་དམིགས་ནི་གྲང་བ་དང༌། ཚ་བ་དང༌། ཆར་འབབ་པའི་སྡུག་བསྔལ་དང་ལྡན་པའི་ཕྱིར་ཏེ། གྲང་བ་དང༌། ཚ་བ་དང༌། ཆར་སྨོས་པས་ནི་དུས་ལས་བྱུང་བའི་ཉེས་དམིགས་སོ། །སྩོགས་པ་སྨོས་པས་ནི་བཀྲེས་པ་དང༌། སྐོམ་པ་ཡིན་ཏེ། ལྷན་ཅིག་སྐྱེས་པའི་སྡུག་བསྔལ་གཟུང་
ངོ། །བདག་གིས་ཁྱོད་བོར་ནས་ཞེས་བྱ་བ་ནི་ཕན་གདགས་པར་བྱས་པས་སོ། །ཁྱིམ་གྱི་གནས་ཡིན་པས་ཁྱིམ་ན་གནས་པ་སྟེ། ཁྱིམ་དེས་མི་གནས་པའོ། །ཅིའི་ཕྱིར་མི་གནས་ཤེ་ན། དེ་བསྟན་པའི་ཕྱིར། དེ་བས་མི་རྣམས་བདེ་བའང་གཞན་ལ་གསལ།། ཞེས་བྱ་བ་སྨོས་ཏེ། གཞན་ནི་རིགས་མི་མཐུན་པ་སྟེ། །རི་དགས་རིགས་དང་མཐུན་པའི་བདེ་བའང་གཞན། །ཞེས་བྱ་བའོ། །དུད་འགྲོ་ལ་སྙིང་རྗེ་བྱ་བ་བསྟན་པ་སྟེ། དུད་འགྲོའི་རང་བཞིན་ཞེས་བྱ་བ་འདིས་ནི་དུད་འགྲོའི་ཉི་ཚེ་ལ་སྙིང་རྗེ་བྱ་བར་བསྟན་ཏོ། །ཐམས་ཅད་ལ་སྙིང་རྗེ་བྱ་བར་བསྟན་པའི་ཕྱིར། བདེ་ལ་གནས་དང་སྡུག་བསྔལ་འབྲལ་འདོད་པ། །ཞེས་བྱ་བའི་ཚིགས་བཅད་བཞི་སྨོས་སོ། །བདེ་བའི་གནས་ཡིན་པས་བདེ་ལ་གནས་པ་སྟེ། དེ་ལ་སྡུག་བསྔལ་དང་མི་ལྡན་པ་ནི་བདེ་བ་ལ་གནས་པའོ། །མེད་པར་བྱ་བའི་བློ་ནི་འབྲལ་བར་འདོད་པ་སྟེ། སྡུག་བསྔལ་དང་འབྲལ་བར་འདོད་པ་ཉིད་སྡུག་བསྔལ་བསལ་བར་འདོད་པ་ཞེས་བྱ་བའི་དོན་ཏོ། །དེས་ན་དེའི་ཕྱིར་གང་ལ་བདག་ཉིད་གནས་པ་དང༌། སྡུག་བསྔལ་དང་འབྲལ་བར་འདོད་པ་དེ་ལ་བློ་མཚུངས་པའི་ཕྱིར་རོ། །ཅིའི་ཕྱིར་སྡུག་བསྔལ་དང་འབྲལ་བར་འདོད་པ་ཕྱིས་བཤད་ཅིང་སྔར་མ་བསྟན། སྡུག་བསྔལ་བསལ་བར་ཡང་དག་པར་འཛིན་དུ་འཇུག་པ་སྔར་བསྟན་ནས་ཕྱིས་བདེ་བ་ལ་གནས་པ་ལ་ཡང་དག་པར་འཛིན་དུ་འཇུག་པར་རིགས་སོ་ཞེ་ན། ཚུལ་ངེས་རྗེས་སུ་བསྟན་པ་ནི་མ་ཡིན་ཏེ། འདི་ལྟར་བསྟན་པ་ནི་དང་བོ་དོན་དུ་གཉེར་བའི་དུས་སུ་ནི་བདེ་བ་ཐོག་མར་དོན་དུ་གཉེར་བ་ཡིན་ཏེ། དེའི་འོག་ཏུ་སྡུག་བསྔལ་མེད་པ་ཡིན་པས་བདེ་བ་ལ་གནས་པ་ཞེས་བྱ་བ་སྔར་བསྟན་ཏེ། སྡུག་བསྔལ་དང་བྲལ་བ་ཞེས་བྱ་བ་འོག་ཏུ་བསྟན་ཏོ། །ཚིགས་བཅད་འདིའི་དང་པོ་ཕྱེད་ཀྱིས་ནི་ཡང་དག་པར་བསྟན་པའི་ཕྱིར་རོ། །ཕྱེད་འོག་མས་ནི་ཡང་དག་པར་འཛིན་དུ་གཞུག་པའི་ཕྱིར་རོ། །བདེ་བ་ལ་གནས་པ་ཞེས་བྱ་བ་འདི་བསྟན་པའི་ཕྱིར། གྲགས་པ་མེད་ཅིང་ཞེས་བྱ་བའི་ཚིགས་བཅད་སྨོས་སོ། །གཞན་ངག་མི་འདོད་པར་བྱེད་པའི་ཉེས་དམིགས་དང༌། དེ་སྤང་བར་བསྒྲུབ་པའི་དབང་དུ་བྱས་ནས་ཚིགས་བཅད་འདི་གཉིས་ཀྱིས་གོ་རིམས་བཞིན་དུ་སྦྱར་རོ། །ཉེས་དམིགས་ཀྱང་རྣམ་པ་གཉིས་ཏེ། གྲགས་
པ་མེད་པ་དང༌། སྐྱེ་བོ་དམ་པས་སྨད་པ་སྟེ། འདི་ནི་མཐོང་བའི་ཆོས་ཀྱི་ཉེས་དམིགས་སོ། །སྡུག་བསྔལ་སྡིག་ལས་འབྱུང་བར་ཞེས་བྱ་བས་འཇིག་རྟེན་ཕ་རོལ་གྱི་ཉེས་དམིགས་བསྟན་ཏེ། སྡིག་པ་དེའི་རྒྱུས་ངན་སོང་གི་སྡུག་བསྔལ་འབྱུང་བའི་ཕྱིར་རོ། །དགྲ་བོའི་ཕྱོགས་བཞིན་སྡིག་པ་སྤང་བར་མན་ཅེས་བྱ་བ་ནི་དེ་སྤང་བར་བསྒྲུབ་པའི་དབང་དུ་བྱས་པ་སྟེ། དེ་ཡང་དགྲ་དང་འགྲོགས་པའོ། །དགྲ་དག་ལས་གྲུབ་པ་ཡང་རྣམ་པ་གཉིས་ཏེ། གསད་པ་དང༌། གཞོམ་པར་བྱ་བའོ། །གཞོམ་པ་ནི་གནོད་པའི་ནང་དུ་འདུས་པ་ཡིན་ནོ། །གྲོགས་པོ་ལ་ཡང་རྣམ་པ་གཉིས་ཏེ། སྒྲུབ་པ་དང༌། གཞག་བའོ། །དེ་ལས་སྡིག་པ་ལ་ཇི་ལྟར་བསྒྲུབ་བར་བྱ་ཞེ་ན། སྨྲས་པ། ཇི་ལྟར་དགྲ་ཆེན་པོ་ལས་ཐར་ཅིང་དེ་སྤང་བར་བྱ་ཞེས་བྱ་བའི་དོན་ཏོ། །དེ་ནི་ནད་བཞིན་ཡལ་བར་དོར་མི་རིགས། །ཞེས་བྱ་བ་ནི་གྲོགས་པོ་ངན་པ་ལ་སྒྲུབ་པ་ཡིན་ཏེ། དེ་ཡང་སྡིག་པ་བྱེད་དུ་མི་གཞུག་སྟེ། དེ་གང་ཡིན་ཞེ་ན། གཞག་པར་བྱའོ། །ཡལ་བར་མི་དོར་བ་ནི་དེའི་གནས་ལ་གཞག་པའི་དོན་ཏོ། །འདི་སྐད་སྟོན་པ་ཡིན་ཏེ། གསད་པར་མ་ནུས་ཀྱང་གཞོམ་པར་བྱ་བ་དང༌། ཇི་ལྟར་འཕགས་པ་རྣམས་ཀྱིས་གྲོགས་པོ་ལ་གཞག་པར་བྱ་བ་བཞིན་ཞེས་བྱ་བའི་དོན་ཏོ། །གང་སྔར་བསྟན་པའི་བདེ་བ་ལ་གནས་པ་དང་སྡུག་བསྔལ་འབྲལ་བར་འདོད་པ། སེམས་ཅན་ཐམས་ཅད་མཚུངས་པ་མེད་པར་འདོད། །ཅེས་བྱ་བ་དེ་ལ་བསྒྲུབ་པར་བྱ་བ། དེ་བས་བདག་ཉིད་མི་འདོད་གང་ཡིན་པ། །དེ་དག་གཞན་ལའང་བགྱི་བར་མི་རིགས་སོ། །ཞེས་བྱ་བ་ཡིན་ཏེ། དེ་བས་ན་དོན་ལ་འཇུག་པར་འགྱུར་བ་ཡིན་ནོ། །དེ་བས་བདག་ཉིད་མི་འདོད་གང་ཡིན་པ། །དེ་དག་གཞན་ལའང་བགྱི་བར་མི་རིགས་སོ། །ཞེས་བྱ་བ་དེ་ལ། དེ་མི་འདོད་པ་ནི་ཅི། ཇི་ལྟར་བསྒྲུབ་པར་བྱ་ཞེ་ན། དེ་བསྟན་པའི་ཕྱིར། གང་ལ་བརྟེན་ནས་དཔལ་གྱི་གནས་གྱུར་པ། །ཞེས་བྱ་བའི་ཚིགས་བཅད་སྨོས་ཏེ། དཔལ་གྱི་གནས་སུ་གྱུར་ཅེས་བྱ་བ་འདིས་ནི་སྦྱིན་པའི་འབྲས་བུ་བསྟན་ཏེ། གང་གི་ཕྱིར་སྦྱིན་པས་ནི་འབྲས་བུ་ལོངས་སྤྱོད་ཆེན་པོ་འཐོབ་པར་འགྱུར་ཏེ། གཞན་དག་གི་དབུལ་བ་བསལ་བས་བདག་ལ་ཡང་དབུལ་བའི་གཉེན་པོ་ལོངས་སྤྱོད་འབྱུང་བ་ཡིན་ཏེ། དེ་བས་ན་བདག་ཉིད་འདོད་པ་གཞན་
ལ་སྤྱད་པ་ཡིན་ནོ། །གང་ལ་བརྟེན་ནས་ཞེས་བྱ་བ་ནི་སྦྱིན་པ་གང་ལ་བརྟེན་ནས་སོ། །འཇིག་རྟེན་བསྔགས་པ་ཞེས་བྱ་བ་འདིས་ནི་བཟོད་པའི་ཕ་རོལ་ཏུ་ཕྱིན་པའི་འབྲས་བུ་བསྟན་པ་ཡིན་ཏེ། གང་གི་ཕྱིར་འཇིག་རྟེན་པ་རྣམས་ལ་བཟོད་པ་བྱས་ནས་ནི་སྐྱེ་བོ་མང་པོ་དག་དགའ་བར་འགྱུར་ཏེ། གཡོག་འཁོར་མང་བར་ཡང་འགྱུར་རོ། །གང་ལ་བརྟེན་ནས་ཞེས་བྱ་བ་ནི་བཟོད་པ་གང་ལ་བརྟེན་ནས་སོ། །རྒྱལ་སྲིད་འཐོབ་འགྱུར་ཞེས་བྱ་བས་ནི་ཚུལ་ཁྲིམས་ཀྱི་འབྲས་བུ་བསྟན་ཏེ། གང་གི་ཕྱིར་རིགས་ལ་སོགས་པ་ཕུན་སུམ་ཚོགས་པ་ཁྱད་པར་དུ་གྱུར་བ་ལ་ནི་རྒྱལ་སྲིད་ཅེས་བརྗོད་དེ། རྒྱལ་སྲིད་ཐོབ་པ་དེ་ཡང་ཚུལ་ཁྲིམས་ཀྱི་འབྲས་བུའོ། །གང་ལ་བརྟེན་ནས་ཞེས་བྱ་བ་ནི་ཚུལ་ཁྲིམས་གང་ལ་བརྟེན་ནས་སོ། །བསོད་ནམས་ཉིད་ཅེས་བྱ་བ་ནི་སྦྱིན་པ་དང༌། བཟོད་པ་དང༌། ཚུལ་ཁྲིམས་རྣམས་ནི་བསོད་ནམས་ཏེ། བསོད་ནམས་ཀྱི་ཚོགས་ཡོངས་སུ་བཟུང་བའི་ཕྱིར། གསུམ་པོ་འདི་ཐོབ་བ་ཡིན་ནོ། །དེ་བས་ན་མང་པོའི་ཚིག་ཏུ་བསྟན་ཏེ། རྒྱལ་སྲིད་ཐོབ་པར་འགྱུར་བའི་བསོད་ནམས་ཀྱི་ཚོགས་དེ་འཕེལ་བར་མཛོད་ཅིག་པའོ། །གྲོགས་པོ་རབ་ལ་གང་བྱས་པ་ནི། དེས་སྦྱར་བ་ཡིན་ཏེ། སྤང་བའི་ཡང་མི་རིགས་པའོ། །གནོད་པ་ཆུང་དུ་བྱེད་པ་ཡིན་ན་ཡང་གྲོགས་པོ་ལ་ཇི་ལྟར་བྱ་བ་དེ་ལྟར་ནི་བསྒྲུབ་པར་བྱའི་གཞོམ་པར་ནི་མི་བྱ་ཞེས་བྱ་བའི་དོན་ཏོ། །འདིར་ཡང་ཕན་འདོགས་ཕྱོགས་ནི་ཞེས་བྱ་བ་ལ། ཕན་འདོགས་པའི་ཚུལ་གང་ལ་ཡོད་པ་དེ་ནི་ཕན་འདོགས་ཕྱོགས་སོ། །གྲོགས་པོའི་ཕྱོགས་ནི་ཕན་འདོགས་པའི་ཕྱོགས་ཏེ། གྲོགས་པོའི་དོན་ཉིད་དུ་བསྟན་པར་འགྱུར་རོ། །དོན་མ་ནུས་ཀྱང་གཞག་པར་བྱ་བ་ནི་ཡིན་ཏེ། ཇི་ལྟར་གྲོགས་པོ་དམན་པ་ལ་བསྒྲུབ་པར་བྱ་བ་དེ་ལྟར་རོ། །བསོད་ནམས་ཀྱི་ཚོགས་རྣམ་པ་གསུམ་བྱ་བ་དེའི་དབང་དུ་བྱས་ནས། དུས་སུ་རིམ་གྲོ་བྱས་པའི་སྦྱིན་པ་རྒྱ་ཆེན་དང༌། །ཞེས་བྱ་བའི་ཚིགས་བཅད་སྨོས་སོ། །དུས་སུ་རིམ་གྲོ་བྱས་པའི་སྦྱིན་པ་རྒྱ་ཆེན་དང༌། །ཞེས་བྱ་བ་ལ་གང་རབ་ཏུ་སྦྱིན་པ་དེ་ནི་སྦྱིན་པའོ། །རྒྱུ་འདི་གསུམ་གྱིས་ཏེ། དུས་སུ་སྦྱིན་པ་དང༌། རིམ་གྲོ་བྱས་ཏེ། སྦྱིན་པ་དང༌། རྒྱ་ཆེན་པོའི་སྦྱིན་པ་བསྟན་ཏོ། །དུས་སུ་སྦྱིན་པས་ནི་ལོངས་སྤྱོད་དུས་སུ་འཐོབ་པར་འགྱུར་རོ། །
རིམ་གྲོ་བྱས་བ་སྦྱིན་པས་ནི་གུས་བའི་སྦྱིན་པ་འཐོབ་བོ། །རྒྱ་ཆེན་པོ་བྱིན་པས་ནི་ལོངས་སྤྱོད་རྒྱ་ཆེན་པོ་འཐོབ་པ་ཡིན་ནོ། །སྐྱེ་བོ་དམ་པ་དང་འབྲེལ་བ་ནི་སྐྱེ་བོ་དགེ་བ་དང་མཐུན་པའོ། །སྐྱེ་བོ་དགེ་བ་དང་མཐུན་པའི་བརྟན་པ་ནི་དུས་རྟག་ཏུ་ཉམས་པར་མི་འགྱུར་ཞེས་བྱ་བའི་དོན་ཏེ། སྐྱོན་མེད་པ་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །བདག་དང་འདྲ་བར་གཞན་ལ་ཕན་པ་སྒྲུབ་པའི་བློས། །ཞེས་བྱ་བ་ལ་ཕན་པའི་བློ་ནི་ཕན་པ་བསྒྲུབ་པ་དེས་སོ། །འདིས་ནི་བསམ་པ་དང་སྦྱོར་བ་ཕུན་སུམ་ཚོགས་པ་བསྟན་ཏེ། བློ་ཞེས་སྨོས་བས་ནི་བསམ་པ་ཕུན་སུམ་ཚོགས་པའོ། །སྒྲུབ་པ་སྨོས་བས་ནི་སྦྱོར་བ་ཕུན་སུམ་ཚོགས་པའོ། །སྩོགས་ཞེས་སྨོས་པས་ནི་བསོད་ནམས་ཀྱི་ཚོགས་འདི་གསུམ་གཟུང་བར་བྱའོ་ཞེས་བྱ་བའི་དོན་ཏོ། །གྲོགས་དང་བདེ་བ་བསྒྲུབ་པ་ཞེས་བྱ་བ་ནི་མཐོང་བའི་ཆོས་དང༌། འཇིག་རྟེན་ཕ་རོལ་གྱི་ཕན་ཡོན་བསྟན་ཏེ། མཐོང་བའི་ཆོས་དང་འཇིག་རྟེན་ཕ་རོལ་ལ་ཇི་ལྟར་སྔར་བཤད་པ་བཞིན་དུ་སྦྱར་རོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་རི་དགས་ཤ་ར་བྷའི་སྐྱེས་པའི་རབས་སོ།། །།དེ་མི་བཟོད་ཀྱི་ཞེས་བྱ་བ་ནི་གཞན་གྱི་སྡུག་བསྔལ་ཡིན་གྱི། བདག་གི་སྡུག་བསྔལ་མི་བཟོད་པ་ནི་མ་ཡིན་ཏེ། དེ་བས་ན་མི་བཟོད་ཅེས་བྱ་བའི་དོན་ཏོ། །གང་ན་ཤིང་སཱ་ལ་ལ་སོགས་བ་མང་པོ་ཡོད་པའི་དགོན་པའི་ཕྱོགས་དེ་ནི་ཤིང་སཱ་ལ་ལ་སོགས་པ་ཡོད་པའི་དགོན་པའི་ཕྱོགས་ཏེ་དེ་ནའོ། །རྣམ་པ་སྣ་ཚོགས་པའི་ཤིང་ལྗོན་པའི་ལྡུམ་བུའི་འཁྲི་ཤིང་གིས་དཀྲིས་པ་གང་ན་ཡོད་པ་དེ་ནི་ཤིང་ལྗོན་པའི་ལྡུམ་བུ་མང་པོའི་འཁྲི་ཤིང་སྣ་ཚོགས་ཀྱིས་དཀྲིས་པའོ། །གསེར་བཙོ་མའི་ཁ་དོག་གསལ་བ་འདྲ་བའི་སྤུ་རབ་ཏུ་འཇམ་པ་གང་ཡིན་པ་ནི། གསེར་བཙོ་མའི་ཁ་དོག་གསལ་བ་འདྲ་བ་སྤུ་རབ་ཏུ་འཇམ་པའོ། །ལུས་ཀྱི་མདོག་རིན་པོ་ཆེ་ཨནད་རྙིལ་དང༌། མརྒད་དང༌། བཻ་ཌཱུཪྻའི་ཁ་དོག་འདྲ་བའི་ཚོན་སྣ་ཚོགས་ཀྱི་ཐིག་ལེས་བརྒྱན་པ་གང་ཡིན་པ་དེ་ནི་ལུས་ཀྱི་མདོག་རིན་པོ་ཆེ་ཨནད་རྙིལ་དང༌། མརྒད་དང༌། བཻ་ཌཱུཪྻའི་ཁ་དོག་འདྲ་བའི་ཚོན་སྣ་ཚོགས་ཀྱི་ཐིག་ལེས་བརྒྱན་པའོ། །སློབ་པ་ཞེས་བྱ་བ་ནི་འཁྲུལ་འཁོར་ལ་སོགས་པའོ། །རི་དགས་རྣམས་ཀྱི་བདག་པོ་བྱེད་ཅིང་ཞེས་བྱ་བ་ཅིའི་ཕྱིར་བདག་བོ་བྱེད་ཅེ་ན། སྔར་བསྟན་པའི་དོན་མདོར་
བསྡུས་ཏེ་བསྟན་པའི་ཕྱིར། གཟུགས་དང་ཤེས་པ་ཕུན་སུམ་ཚོགས། །ཞེས་བྱ་བའི་ཚིགས་བཅད་སྨོས་ཏེ། ཚིགས་བཅད་འདིའི་བསྡུས་པའི་དོན་ནི་བདག་ཉིད་ཕུན་སུམ་ཚོགས་པ་དང༌། གཞན་ལ་ཕན་པ་སྒྲུབ་པའི་ཕུན་སུམ་ཚོགས་པ་བསྟན་ཏེ། ཚིགས་བཅད་དང་པོ་ཕྱེད་ཀྱིས་ནི་བདག་ཉིད་ཕན་པ་ཕུན་སུམ་ཚོགས་པའོ། །བདག་ལ་ཕན་འདོགས་ཞེས་བྱ་བ་ནི་གཞན་ལ་ཕན་པ་སྒྲུབ་པ་ཕུན་སུམ་ཚོགས་པའོ། །བདག་གི་ཕུན་སུམ་ཚོགས་པ་ཡང་རྣམ་པ་གསུམ་སྟེ། གཟུགས་ཀྱི་ལུས་ཕུན་སུམ་ཚོགས་པ་དང༌། མིང་གི་ལུས་ཕུན་སུམ་ཚོགས་པ་དང༌། བྱ་བ་ཕུན་སུམ་ཚོགས་པའོ། །གསེར་བཙོ་མའི་ཁ་དོག་གསལ་བ་འདྲ་བ་ཞེས་བྱ་བ་ལ་སོགས་པས་ནི་གཟུགས་ཕུན་སུམ་ཚོགས་པ་བསྟན་ཏོ། །དེ་སེམས་རྣོ་བ་ཞེས་བྱ་བས་ནི་ཤེས་པ་ཕུན་སུམ་ཚོགས་པ་བསྟན་ཏོ། །འཁྲུལ་འཁོར་དང་གཏོར་ཞེས་བྱ་བ་དག་གིས་ནི་བྱ་བ་ཕུན་སུམ་ཚོགས་པ་བསྟན་ཏོ། །རི་དགས་མང་པོ་རྗེས་སུ་འབྲང་བ་རྣམས་ལ་ཡང་སློབ་ཅེས་བྱ་བ་ལ་སོགས་པས་ནི་བདག་ལ་ཕན་འདོགས་ཞེས་བྱ་བ་བསྟན་ཏོ། །རི་དགས་ཀྱི་བདག་པོ་ཞེས་བྱ་བས་ནི་མཆོད་པ་ཞེས་བྱ་བ་བསྟན་ཏོ། །ཆུ་ཆེན་འབྲུབ་པ་རབ་ཏུ་དྲག་པོ་ཡིས། །ཞེས་བྱ་བ་འདིའི་བསྡུས་པའི་དོན་ནི། བདག་ཉིད་ཀྱི་སྙིང་རྗེའི་གནས་སུ་གྱུར་པ་ཐམས་ཅད་བསྒྲགས་པ་ཡིན་ཏེ། སྙིང་རྗེའི་ཞིང་ནི་གསུམ་སྟེ། ཕོངས་པ་དང༌། སྡུག་བསྔལ་བ་ཉིད་དང༌། རྗེས་སུ་འབྲང་བ་མེད་པའོ། །ཆུ་ཆེན་འབྲུབ་པ་རབ་ཏུ་དྲག་པོ་ཡིས། །ཁྱེར་ནས་ཞེས་བྱ་བ་འདིས་ནི་སྡུག་བསྔལ་བ་ཉིད་བསྟན་ཏོ། །མགོན་མེད་གཟིངས་ཀྱང་ཡོད་མ་ཡིན། །ཞེས་བྱ་བས་ནི་སེམས་ཅན་དང༌། སེམས་ཅན་མ་ཡིན་པའི་བར་དུ་བགྲང་བ་མེད་པའོ། །ཕོངས་ཤིང་ཉམ་ཐག་ཅེས་བྱ་བ་དང༌། མྱུར་དུ་བརྒྱུགས་ཏེ་ཟུང་ཞེས་བྱ་བས་ནི་བདག་ཉིད་ཕོངས་པ་ཉིད་དོ། །སྡུག་བསྔལ་བྱམས་པས་ཞེས་བྱ་བ་ནི་ཐུགས་རྗེ་ཅན་ནོ། །མྱུར་བ་ནི་མགྱོགས་པའོ། །མྱུར་དུ་རྒྱུག་པའི་རྒྱུ་བསྟན་པའི་ཕྱིར། ད་ནི་བཤོལ་དུ་རུང་བ་མ་ཡིན་ཏེ། །ཞེས་བྱ་བའི་ཚིགས་བཅད་སྨོས་སོ། །མྱུར་བས་རྒྱུག་པ་ཅིའི་ཕྱིར་ཞེ་ན། སྡོད་པར་མི་ཚུགས་པའི་ཕྱིར་རོ། །ཅིའི་ཕྱིར་བཤོལ་དུ་མི་རུང་ཞེ་ན། དཔུང་པ་དང་རྐང་པ་དག་གིས་བཤོལ་དུ་མི་རུང་
བའི་ཕྱིར་ཏེ། དེ་གཉི་གས་སྡོད་པར་མི་ནུས་པའི་ཕྱིར་རོ། །ཅིའི་ཕྱིར་དཔུང་པས་བཤོལ་དུ་མི་རུང་བར་འགྱུར་ཞེ་ན། ངལ་ཞིང་དུབ་པས་དཔུང་པ་ཡང་འགྱུར་བར་མི་ནུས་ཞེས་པས་སོ། །ཅིའི་ཕྱིར་རྐང་པས་བཤོལ་དུ་མི་རུང་བར་འགྱུར་ཞེ་ན། ཟུག་ཅིང་འབོག་ཏུ་རུང་བའང་ཅུང་ཟད་མེད། །ཅེས་པས་སོ། །དུས་ལ་བབ་ཅེས་བྱ་བས་ནི་དུས་ལས་འདས་ན་རྒལ་བར་མི་ནུས་པར་བསྟན་ཏོ། །འཇིགས་པ་དང༌། མི་དགའ་བ་དང༌། ངལ་བ་དང༌། དུབ་པ་མེད་པར་བྱེད་པ་ཞེས་བྱ་བ་ལ། འཇིགས་པ་ནི་འཆི་བས་སོ། །མི་དགའ་པ་ནི་རྗེས་སུ་འབྲང་བ་མེད་པས་སོ། །ངལ་བ་ནི་ངལ་ཞིང་དུབ་པས་དཔུང་པ་འགྱུར་མི་ནུས་པ་དང༌། ཟུག་ཅིང་འབོག་ཏུ་རུང་བ་ཅུང་ཟད་མེད་པས་སོ། །སྙིང་རྗེ་ཞེས་བྱ་བ་ནི་ལྷག་པར་སྙིང་རྗེ་བར་གྱུར་པའོ། །དེས་གདུངས་པའི་གསལ་བའི་ཚིག་གང་ཡིན་པ་དེ་ནི་གསལ་བའི་ཚིག་སྙིང་རྗེས་གདུངས་པའོ། །འབབ་ཆུ་དྲག་པོའི་འཇིང་དེར་ཞུགས། །ཞེས་བྱ་བ་ཅིའི་ཕྱིར་ཞེ་ན། བསྒྲལ་བར་ངེས་པར་བྱས་པའི་ཕྱིར་ཏེ། འདིས་ནི་གཞན་ལ་སྙིང་རྗེ་ཆེ་བར་བསྟན་ཏོ། །བདག་སྲོག་ཡལ་བར་བོར་ཡང་མི་སེམས་པར། །ཞེས་བྱ་བ་འདིས་ནི་བདག་ལ་ཆགས་པ་མེད་པར་བསྟན་ཏོ། །གཞན་མ་ཚང་པས་ནི་ཆུ་དྲག་པོ་དེར་ཞུགས་པར་མི་ནུས་པའི་ཕྱིར་རོ། །ཇི་ལྟར་བུར་ཞུགས་ཤེ་ན། དགྲ་དཔུང་ལྟ་བུར་རོ། །ཇི་ལྟར་ཞེ་ན། དགྲའི་དཔུང་རྣམ་པར་འཇོམས་པའི་དཔའ་བོ་བཞིན་ནོ། །དེའི་རྒྱབ་ཏུ་ཞོན་པར་གྱུར་ཅེས་བྱ་བ་ནི་ཅིའི་ཕྱིར་ཞེ་ན། སྐྲག་པས་ཉེན་པ་ཡིན་ཏེ། འཆི་བས་སྐྲག་པའི་ཕྱིར་དང༌། ཡན་ལག་འཁུམས་པའི་ཕྱིར་རོ། །ཡིད་ཏུ་འོང་བའི་འགྲམ་དུ་མ་ཉམས་ཕྱིན་པ་ནི་ལྗིད་ཀྱིས་རབ་ཏུ་ནོན་པ་དང༌། འབབ་ཆུ་དྲག་པོའི་ཤུགས་ཀྱིས་བདས་པར་གྱུར་ཀྱང་དཔའ་སྙིང་བརྟན་ལ་རྩོལ་བ་དྲག་པོའི་ཕྱིར་རོ། །ཉེ་དུ་དང་གྲོགས་པོ་དག་ནི་ཉེ་དུ་དང་གྲོགས་པོའོ། །དེ་དག་ཉིད་མཛའ་བོ་ཡིན་པས་ཉེ་དུ་དང་གྲོགས་བོ་མཛའ་བོའོ། །གྲོགས་བྱ་ཞིང་ཕན་འདོགས་པ་ཡང་ཡིན་ལ། ཉེ་དུ་དང༌། གྲོགས་པོ་དང༌། མཛའ་བོ་ཡང་ཡིན་པས་གྲོགས་བྱས་ཤིང་ཕན་བཏགས་པའི་ཉེ་དུ་དང་གྲོགས་པོ་དང་མཛའ་བོའོ། །དེ་དག་ལ་འང་རྙེད་པར་དཀའ་བ་ཡིན་པས། གྲོགས་བྱས་ཤིང་ཕན་བཏགས་པ་དེ་ལྟ་བུ་ཉེ་དུ་དང་གྲོགས་
པོ་དང་མཛའ་བོ་སུ་ལའང་མེད་པ་ཉིད་དེ། །ངོ་མཚར་ཆེ་བ་དེས་མགུ་བར་གྱུར་པ་ནི་ངོ་མཚར་ཆེ་བ་དེས་སེམས་མགུ་བར་གྱུར་པའོ། །དེས་ཕྱག་འཚལ་ཏེ་ཞེས་བྱ་བ་ལ། ཕྱག་འཚལ་བའི་རྒྱུ་བསྟན་པའི་ཕྱིར་ངོ་མཚར་ཆེ་བར་གྱུར་པ་དེས་སེམས་རབ་ཏུ་མགུ་བར་གྱུར་པ་དང༌། དེའི་གཟུགས་བཟང་པོ་དེས་ཀྱང་ཡ་མཚན་དང་ཞེས་སྐྱེས་པར་གྱུར་པས་དེ་ལ་ཕྱག་འཚལ་བའོ། །འདི་ལྟ་བུ་དག་བྱར་མི་ནུས། །ཞེས་བྱ་བ་ནི་གཉེན་བཤེས་དང༌། བྱམས་པར་གྱུར་པ་དག་གིས་ཀྱང་བདག་ལ་སྐྱོབ་པར་མི་ནུས་པའི་ཕྱིར་རོ། །དེ་བས་ཅི་བགྱིའི་བཀའ་སྩལ་པས། །ཞེས་བྱ་བས་ནི་ཤིན་ཏུ་རྗེས་སུ་གཟུང་བའི་ཕྱིར་རོ། །གང་དུ་ཞེས་བྱ་བ་ནི་ལས་སོ། །རང་བཞིན་གྲུབ་པ་ཞེས་བྱ་བ་ནི་དེའི་ཆོས་ཉིད་རང་བཞིན་གྱིས་གྲུབ་པའི་ཕྱིར་རོ། །འགྱུར་བ་ཞེས་བྱ་བ་ནི་དྲིན་གཟོ་བ་ཞེས་བྱ་བའི་དོན་ཏོ། །དེའི་ཞེས་བྱ་བ་ནི་སྐྱེ་བོ་དམ་པ་འདིའི་དོན་ཏེ། དོན་འདི་གང་ཡིན་ཞེ་ན། སེམས་ཅན་འདི་ལྟ་བུ་ཞིག་གིས་ཞེས་བྱ་བ་ལ་སོགས་པ་གང་བསྟན་པའོ། །ཤ་བཟའ་བར་རུང་བས་ནི་བཟར་རུང་བའོ། །རབ་ཏུ་ཆགས་པར་འགྱུར་བ་ཞེས་བྱ་བ་ནི་སྔར་བསྟན་པའི་གཟུགས་ཀྱི་ཡོན་ཏན་དང་ལྡན་པའི་ཕྱིར་རོ། །དེ་གཉི་གས་ཉམས་པར་འགྱུར་བ་ནི། སྙིང་རྗེ་ཆུང་བ་ཡིན་ཏེ། ངའི་ལུས་ནི་ཤ་བཟར་རུང་བ་དང་རབ་ཏུ་ཆགས་པར་འགྱུར་བ་ཡིན་ལ། མི་རྣམས་ཀྱི་སྙིང་ནི་རབ་ཏུ་ཆགས་པར་བྱེད་པའི་གཟུགས་ཡོད་པས་སོ། །དེ་བས་ཞེས་བྱ་བ་ནི་ལུས་དང༌། མི་རྣམས་ཀྱི་སྙིང་ཤེས་པར་བྱས་ནས་སོ། །བདག་གི་ཡོན་ཏན་ཞེས་བྱ་བ་ནི་དྲིན་གཟོ་བ་ལ་སོགས་པའོ། །འདིར་དེ་ལྟར་གནོད་པ་བྱེད་ན་དེའི་ཉེས་དམིགས་བསྟན་པའི་དབང་དུ་བྱས་ནས། མཛའ་བོ་དག་ལ་སྙིང་རིང་བ། །ཞེས་བྱ་བའི་ཚིགས་བཅད་ཀྱི་ཕྱེད་དེ། དེ་ལྟར་བྱས་ན་ཁྱོད་ཀྱི་ཡོན་ཏན་དང༌། ང་ཡང་མ་བསྲུངས་པ་དེའི་ཉེས་དམིགས་སོ། །ཁྱོད་ཀྱིས་བདག་མ་བསྲུངས་སོ་ཞེས་བརྗོད་པ་ན་འཁོན་དུ་གཟུང་བས་ནི་མི་དགའ་བར་སེམས་པའི་སྙིང་གང་ཡིན་པ་དེ་ནི་འཁོན་དུ་འཛིན་པའམ་སྙིང་མི་དགའ་བར་སེམས་པའོ། །གཡོ་སྒྱུ་ཉེད་ཀྱི་ཕྱི་བཞག་ཡིན་པས། གཡོ་སྒྱུ་དང་ཕྱི་བཞག་སྟེ། མི་རྣམས་ཅི་ལ་གོམས་པ་མེད་པས་སོ། །མི་རྣམས་ཀྱི་གཡོ་སྒྱུའི་ཕྱི་བཞག་ལ་མ་གོམས་པ་གང་ཡིན་པ་དེ་ནི་མིའི་
གཡོ་སྒྱུ་དང་ཕྱི་བཞག་ལ་མ་གོམས་པའོ། །གང་ན་གཡོ་སྒྱུ་དང༌། ཕྱི་བཞག་ནི་གཡོ་སྒྱུ་དང་ཕྱི་བཞག་གོ །ཕྱི་བཞག་ནི་ལུས་དང༌། ངག་གི་ལས་ཀྱི་མཚན་ཉིད་དོ། །གཡོ་སྒྱུ་ནི་སེམས་གྱ་གྱུ་བའོ། །ཚུལ་འཆོས་མཁས་པ་ཞེས་བྱ་བ་དང༌། དེ་ལྟའི་གཡོ་དག་བྱས་པའི་ཕྱིར། །ཞེས་བྱ་བ་ནི་ཕྱི་བཞག་བཅོས་མ་ལ་མཁས་པ་སྟེ། གང་གིས་བསམ་པ་མ་དག་པའོ། །རང་བཞིན་གྱིས་ནི་དུལ་བའི་སྐྱེ་བོ་རྣམས། །ཞེས་བྱ་བ་ནི་བསམ་པ་དག་སྤྱོད་པ་དང་ལྡན་པ་ཡིན་ཡང་ཞེས་བྱ་བའི་དོན་ཏོ། །རང་བཞིན་ནི་བསམ་པའོ། །དུལ་བ་ནི་ལུས་དང་ངག་གི་ལས་དུལ་བའི་སྤྱོད་པ་ཉིད་དེ། བསམ་པ་དུལ་བར་གྱུར་པ་ནི་བསམ་པ་དུལ་བའོ། །དོགས་པ་སྐྱེ་ཞེས་བྱ་བ་ནི་ཚུལ་འཆོས་དང༌། ཕྱི་བཞག་སྤྱོད་པ་དེས་དོགས་པ་སྐྱེ་བའོ། །ཡང་ན་གཡོ་སྒྱུ་དང་ཕྱི་བཞག་སྤྱོད་པ་དེས་སོ། །ཐོ་རངས་ཀྱི་རྨི་ལམ་ཞེས་བྱ་བ་སྨོས་པས་ནི་དེའི་ཚེ་རྨི་ལམ་ངེས་པར་མཐོང་བའི་ཕྱིར་རོ། །ཚིག་གསལ་ཞིང་སྡེབ་ལེགས་པ་གང་ཡིན་པ་དེ་ནི།། ཚིག་གསལ་ཞིང་སྡེབ་ལེགས་པའོ། །མིག་ཉིད་དཔལ་དང་ལྡན་པ་ཡིན་པས་མིག་དཔལ་ལྡན་ནོ། །ངོ་མཚར་ཆེ་བས་བགྲད་པའི་མིག་གི་དཔལ་དང་ལྡན་པ་གང་ཡིན་པ་དེ་ནི་ངོ་མཚར་ཆེ་བས་མིག་བགྲད་དཔལ་ལྡན་ནོ། །མཁུར་ཚོས་མཛེས་པའི་གཡོ་བ་གང་ཡིན་པ་དེ་ནི་མཁུར་ཚོས་མཛེས་པ་གཡོ་བཞིན་པའོ། །དེས་ཞེས་བྱ་བ་ནི་རྨི་ལམ་མཐོང་བའི་ཕྱིར་རོ། །དེའི་ཞེས་བྱ་བ་ནི་དེའི་སྙིང་དགའ་བར་བྱ་བ་དང༌། བདག་ཀྱང་རི་དགས་རིན་པོ་ཆེ་རྙེད་པར་འདོད་པའོ། །མཐོང་ཞེས་བྱ་བ་ནི་སྔོན་མཐོང་བའོ། །བརྐམ་པ་དང་ནི་དེ་ཡིས་ཕན་བཏགས་པ། །ཞེས་བྱ་བ་ནི་དབུལ་བའི་སྡུག་བསྔལ་གྱིས་ཡོངས་སུ་སྐྱོ་བ་དང༌། བརྐམ་པ་དེ་ཡིས་དྲངས་པས་སོ། །ཡོན་ཏན་ལ་ལྟ་ཞེས་བྱ་བ་ནི་བྱས་པ་གཟོ་བ་ལ་སོགས་པ་སྟེ་རི་དགས་མི་བསྟན་པའོ། །འོན་ཏེ་འབྱོར་པ་ལ་ལྟ་ཞེས་བྱ་བ་ནི་རི་དགས་བསྟན་པས་སོ། །དཔུང་ཐམས་ཅད་ཀྱིས་ཞེས་བྱ་བ་ནི་དམག་གི་ཚོགས་པ་ཐམས་ཅད་ཀྱིས་སོ། །ནགས་ཚལ་སྟུག་པོ་དེའི་ནང་དུ་ཞུགས་སོ་ཞེས་བྱ་བ་ནི་གནོད་པ་དང་བཅས་པའི་ཆེད་དུའོ། །དེའི་གནོད་པ་དེ་མེད་པའི་དབང་དུ་བྱས་ནས། ནགས་ཚལ་སྟུག་པོ་དེ་ཡང་དམག་གི་དཔུང་ཐམས་ཅད་ཀྱིས་ཞེས་བྱ་བ་ལ་སོགས་
པ་སྨོས་པ་ཡིན་ནོ། །དངོས་པོ་དེ་ལྟ་བུ་ལ་བརྟེན་པ་ཞེས་བྱ་བ་ནི་དེ་འདྲ་བ་ལ་སྟེ། འདིས་ནི་ཡོན་ཏན་གྱི་ཞིང་དུ་བསྟན་ཏོ། །བྱ་བའི་ཁྱད་པར་དག་གིས་བཏང་ན་ནི། །ཞེས་བྱ་བ་ནི་ཕན་འདོགས་པ་ཉིད་དུ་བསྟན་ཏོ། །གཉེན་པོ་ཆུང་ན་ཞེས་བྱ་བ་ནི་གལ་ཏེ་དགེ་བའི་ལས་ཡིན་ན་དེའི་གཉེན་པོ་ནི་ཉོན་མོངས་པ་ཡིན་ཏེ་དེ་ཚུང་བའོ། །གལ་ཏེ་མི་དགེ་བའི་ལས་ཡིན་ན་ནི་དེའི་གཉེན་པོ་དགེ་བ་ཡིན་ནོ། །འདིར་གཉེན་པོ་ཞེས་དགོངས་པ་ནི་དགེ་བའི་ལས་ཉམ་ཆུང་བ་ལ་བྱའོ། །དགེ་བ་དང་མི་དགེ་བ་འཕྲལ་དུ་འབྲས་བུ་སྨིན་པ་ཞེས་བྱ་བ་ནི། དེ་ཉིད་དུ་སྨིན་པར་འགྱུར་ཞིང་ལུས་འཇིག་པ་ལ་མི་སྡོད་དེ། དེ་རབ་ཏུ་རྒྱས་པར་གྱུར་པའི་ཕྱིར་རོ། །གཉེན་པོ་ཆུང་བས་ན་འབྲས་བུ་དེ་ཅམ་དུ་མྱང་བར་མ་ཟད་དེ། དེ་ནི་མེ་ཏོག་ཙམ་དུ་ཟད་དེ། འབྲས་བུ་གཞན་ཡང་འབྱུང་བར་འགྱུར་རོ། །ཆར་སྤྲིན་འདྲ་བའི་སྔོན་པོ་ནི་ཆར་སྤྲིན་སྔོན་པོ་འདྲ་བའོ། །ལྟོང་དུ་བཅུག་ཅིང་གཞུ་བཀང་བ་ནི་འཕེན་པར་འདོད་པ་སྟེ། ད་ཅུང་འཕངས་པ་ཉིད་ནི་མ་ཡིན་ནོ། །དེ་བཟུང་འདོད་པ་ཡིས་ཞེས་བྱ་བ་ནི་རི་དགས་རུ་རུ་དང་ཉེ་བར་གནས་པ་ཞེས་བྱ་བའི་དོན་ཏོ། །རེ་ཞིག་གཞེས་ཞེས་བྱ་བ་ནི་ཉེ་བར་བསྙན་ནས་སྨྲས་པ་ཡིན་ཏེ། འདི་གཉི་གཅིའི་ཕྱིར་ཐོབ་པར་འགྱུར་ཅེས་པ་སྟེ། དེ་ཉིད་སྨྲས་པ། ངོ་མཚར་ཆེན་པོ་བསལ་བའི་ཕྱིར་ཏེ། ཕྱེ་ནས་སྨྲའོ་ཞེས་བྱ་བའི་དོན་ཏོ། །སྐྱེ་བོ་རྒྱུན་ལུགས་མེད་པ་ན། །ཞེས་བྱ་བ་ནི་འདིར་གང་ཡང་འོང་བ་མ་མཐོང་ངོ་ཞེས་བྱ་བའི་དོན་ཏོ། །ནགས་ཚལ་སྟུག་པོ་འདི་ལྟ་བུ། །ཞེས་བྱ་བ་ནི་བདག་ཀྱང་གཞན་དུ་མ་སོང་སྟེ། དེས་ན་ཡང་བདག་མཐོང་བ་མེད་དོ་ཞེས་བྱ་བ་ཡིན་ནོ། །དེ་ལྟར་རྣམ་པ་གཉི་གས་ཀྱང་མཐོང་བ་མེད་ན་སུ་ཡིས་བདག་མཆིས་པར་གསོལ་བ་ཞེས་བྱ་བ་ཡིན་ཏེ། འདི་ལྟར་སྔར་ཆུའི་རྒྱུན་ལས་བསྒྲལ་བའི་མི་དེས་གསོལ་བ་ཡིན་ནོ་ཞེས་དོགས་པ་སྐྱེས་པ་སྟེ། ཅིའི་ཕྱིར་ཞེ་ན་བྱས་པ་གཟོ་བ་མི་སྲིད་པའི་ཚུལ་ཡིན་ཏེ། དེ་བས་ན་སྨྲས་པ། སུ་ཡིས་བདག་མཆིས་གསོལ་ཞེས་བྱ་བ་ཡིན་ནོ། །སྔར་རྨི་ལམ་དུ་ཐོས་པ་བས་ཀྱང་ལྷག་པར་དུལ་བར་གྱུར་པ་དེ་བས་ན་རབ་ཏུ་ཞེས་བྱའོ། །ངན་པ་ཞེས་བྱ་བ་ནི་འཇིག་རྟེན་གྱིས་སྨད་པའོ། །བདག་ལ་ཕན་གདགས་པ་དང༌། ཁྱོད་ལ་ཕན་པ་དེ་གཉི་ག་ལ་ལྟོས་པ་མེད་པའི་དབང་དུ་བྱས་ནས། དེ་ལྟར་འབད་པ་
དེ་ཡི་ལན། །ཞེས་བྱ་བའི་ཚིགས་བཅད་སྨོས་སོ། །དེ་གཉི་ག་ལ་སྟོས་པ་མེད་པ་ཉིད་ནི་ཁྲེལ་མེད་མི་དག་ཅེས་བྱ་བ་བསྒྲུབས་པ་ཡིན་ནོ། །དམིགས་ཀྱིས་མ་ཕྱེ་བའི་དོན་གང་ཡིན་པ་དེ་ནི་དམིགས་ཀྱིས་མ་ཕྱེ་བའི་དོན་ནོ། །དམིགས་ཀྱིས་མ་ཕྱེ་བའི་དོན་ཡང་ཡིན་ལ་ཟབ་པ་ཡང་ཡིན་པས་དམིགས་ཀྱེས་མ་ཕྱེ་བའི་དོན་ཟབ་བའོ། །སྨད་པ་ཞེས་བྱ་བ་ནི་བཤུད་པའོ། །མི་མ་ཡིན་ཞེས་བྱ་བ་ནི་ཤ་ཟ་ཞེས་བྱ་བའི་དོན་ཏོ། །མི་འམ་འོན་ཏེ་མི་མ་ཡིན། །ཞེས་བྱ་བ་ལ་སོགས་པ་སྨོས་པས་ནི་དེ་དག་དེ་ན་ཡོད་པའི་ཕྱིར་རོ། །འདི་ནི་གཞན་ལ་སྨད་པ་ལགས། །ཞེས་བྱ་བ་ནི་དགོས་པ་མེད་པར་སྨད་པ་མ་ཡིན་ཏེ། འོན་ཀྱང་དོགས་པ་དང་བཅས་པ་མ་ཡིན་ནོ། །དགོས་པ་དེ་གང་ཡིན་ཞེ་ན། སྨྲས་པ། ལས་འདི་སྨད་པར་འོས་པའི་ཞེས་བྱ་བ་ལ་སོགས་པ་སྟེ། ལས་འདི་སྨད་པར་འོས་པའི་རྒྱུ་ཉིད་དོ། །འཁྱམས་པ་ལ་ཚིག་རྩུབ་པོ་ཞེས་བྱ་བ་དེའི་དཔེའི་དབང་དུ་བྱས་ནས། སྨད་བའི་རྨ་ལ་སུ་ཞིག་ཞིགས་པར་བགྱིས། །ཞེས་བྱ་བའི་ཚིགས་བཅད་སྨོས་སོ། །འདིའི་ཚིགས་བཅད་ཕྱེད་ཀྱིས་གོ་རིམས་བཞིན་དུ་འདི་ནི་གཞན་ལ་སྨད་པ་མ་ལགས་ཞེས་བྱ་བ་དང་སྦྱར་རོ། །ཅིའི་ཕྱིར་ཞེ་ན། འཁྱམས་པ་དག་ལ་ཚིག་རྩུབ་པོས་བྱ་བ་མི་རིགས་པའི་ཕྱིར་རོ། །ཚིག་དེའི་དགོས་བ་ཡོད་པའི་ཕྱིར་དཔེའི་དབང་དུ་བྱས་ནས། སྡུག་པའི་བུ་ལ་སྨན་དཔྱད་ལ་འཇུག་པ་བཞིན་དུའོ། །འབབ་ཆུ་དྲག་པོས་ཁྱེར་ཏེ་སོང་བ་ཞེས་བྱ་བ་ནི། སྙིང་རྗེའི་གནས་ཀྱི་དབང་དུ་བྱས་པའོ། །སྙིང་རྗེའི་དབང་གིས་ཞེས་བྱ་བ་ནི་བསམ་པ་དག་པའི་དབང་དུ་བྱས་པའོ། །དབང་གིས་ཕྱུང་བ་ཞེས་བྱ་བ་ནི་སྦྱོར་བ་ཕུན་སུམ་ཚོགས་པ་ལ་འཇུག་པའི་རྒྱུ་ཡིན་གྱི། གཞན་གྱི་རྒྱུ་མ་ཡིན་པར་ཤེས་པར་བྱའོ། །མི་དེ་འཇིགས་ཤིང་སྐྲག་ལ་རྡུལ་གྱིས་མདོག་ཉམས་ཤིང་གཅོམ་བསྐྱུངས་ཏེ་ཞེས་བྱ་བ་ནི། དེ་ལྟར་བྱ་བ་མ་ཡིན་པ་བྱས་པའི་མཚན་མའོ། །མཚུངས་པའི་ནང་ཞེས་བྱ་བ་ནི། དམ་པ་མི་རྣམས་དང་འདྲ་བའི་དོན་ཏོ། །དེ་གཉིས་ཀྱི་བར་ཞེས་བྱ་བ་ནི་མི་དང་མཚམས་སུའོ། །མཐོང་བའི་ཆོས་ལ་ཇི་ལྟར་བསོད་ནམས་ཟད་པ་ཡིན་ཞེ་ན། བསོད་ནམས་ཟད་པའི་ཉེས་པ་བསྟན་པའི་ཕྱིར། །སྡུག་བསྔལ་བཟོད་པར་དཀའ་བས་ཞེས་བྱ་བའི་ཚིགས་བཅད་སྨོས་སོ། །འདི་ལྟ་དུར་ནི་བརླག་པར་འགྱུར། །ཞེས་
བྱ་བ་ནི་བྱ་བ་མ་ཡིན་པ་བྱེད་པས་ལྟུང་བ་སྟེ། བྱ་བ་མ་ཡིན་པ་བྱས་པས་བརླག་པ་ནི་ངན་སོང་གི་སྡུག་བསྔལ་ཡིན་ཏེ། བརླག་པའི་རྒྱུར་གྱུར་པའི་ཕྱིར་རོ། །འབྲས་བུ་ཕུན་སུམ་ཚོགས་པ་འདོད་པས་བསླུས། །ཞེས་བྱ་བ་ནི། ངན་འགྲོར་འགྲོ་བའི་ལས་དེ་འབྲས་བུ་ཕུན་སུམ་ཚོགས་པ་འདོད་པ་ལ་བསླུས་པའི་ཕྱིར་རོ། །ཕྱེ་མ་ལེབ་བྲིད་པ་དང་འདྲ་བ་ནི་ངན་འགྲོར་འགྲོ་ཞིང་བརླག་པའི་རྒྱུར་གྱུར་པའི་ལས་ཀྱི་ལྟུང་བའོ། །དེ་བས་སྙིང་རྗེ་ཞེས་བྱ་བ་ལ་འདིར་དེ་བས་ཞེས་བྱ་བ་ནི། འཇིག་རྟེན་གཉིག་ལ་ཕན་པའི་ཕྱིར་རོ། །འདིར་གྲགས་པ་དང༌། ཕ་རོལ་དུ་ཡང་སྙིང་རྗེ་ནི་ཕན་བ་ཡིན་ཏེ། བཀྱོན་པར་མ་མཛད་ཅིག་པའོ། །འདི་ནི་ཅུང་ཟད་ཅེ་དང་ཅི་འཚལ་བ། །ཞེས་བྱ་བ་ནི་རྙེད་བ་ལ་སོགས་པའོ། །དེ་དག་ཅེས་བྱ་བ་ནི་བྱ་བ་མ་ཡིན་པ་བྱས་པ་དེའི་ཅི་འཚལ་བ་དེ་དང༌། དེ་རྙེད་པ་ལ་སོགས་པས་སོ། །ཐུབ་ཆོད་དོན་ཡོད་ཅེས་བྱ་བ་ནི་འབྲས་བུ་ཡོད་བར་རོ། །ད་ནི་ཁྱོད་ཀྱིས་བཀའ་སྩོལ་སྤྱི་བོས་ནོད། །ཅེས་བྱ་བ་འདིས་ནི་གང་སྔར་བསྟན་པའི་རྒྱལ་པོ་ཆེན་པོ་རེ་ཞིག་གཞེས་ཤིག །བདག་ལ་མ་འཕེན་བར་ཞེས་བྱ་བ་དེའི་མི་མཐུན་པའི་ཕྱོགས་བདག་གི་ཤུགས་ཁས་ལེན་པར་སྟོན་པ་ཡིན་ནོ། །སྙིང་རྗེ་དང་བཅས་པར་སྟོན་པ་ཞེས་བྱ་བ་ནི། གང་སྔར་བསྟན་པའི་རྒྱལ་པོ་ཆེན་པོ་གུམ་ལགས་པ་བཀུམ་སྟེ་ཅི་བགྱི་ཞེས་པ་དང༌། དེ་བས་སྙིང་རྗེ་མཛོད་ལ་མ་བཀྱོན་པར་ཞེས་བྱ་བ་དེ་དག་གིས་བསྟན་པ་ཡིན་ནོ། །གཡོ་མེད་པར་དེ་ལ་ཕན་འདོགས་པར་བྱེད་པ་དེ་ཞེས་བྱ་བ་ནི། གང་སྔར་བསྟན་པ་འདི་ནི་ཅུང་ཟད་ཅི་འཚལ་བ། །ཞེས་བྱ་བ་ལ་སོགས་པ་བསྟན་ཏོ། །གསོད་དང་རྐུན་ལ་སོགས་པ་སྤོངས། །ཞེས་བྱ་བ་ལ་སོགས་པ་སྨོས་པས་ནི་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། དག་འཁྱལ་བ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ལས་ལྡོག་པའོ། །རྣམ་པ་གསུམ་དུ་དབྱེ་བ་གང་ཡིན་པ་དེ་ནི། རྣམ་པ་གསུམ་དུ་གྱེས་པའི་བྱེད་པའོ། །རྣམ་པ་གསུམ་དུ་བྱེད་པ་ནི། ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ལས་དང་རྣམ་པ་གསུམ་མོ། །གསུམ་དང༌། བཞི་དང༌། གསུམ་ནི་ལས་ཀྱི་ལམ་མོ། །ཇི་ལྟར་སྙིང་རྗེ་བསྐྱེད་པ་ཡིན་ཞེ་ན། གང་གི་ཕྱིར་
སྙིང་རྗེ་ཡོད་ན་ནི། གསོད་པ་ལ་སོགས་པ་ལས་སྡིག་པའི་མཚན་ཉིད་ཀྱི་ཆོས་སུ་འགྱུར་བའི་ཕྱིར་རོ། །རྣམ་པ་གསུམ་དུ་གྱེས་པ་བྱེད་པ་དེ་བསྟན་པའི་ཕྱིར། བདག་རང་ཉིད་དམ། ནད་མི་ལ་ཞེས་བྱ་བའི་ཚིགས་བཅད་སྨོས་ཏེ། ཇི་ལྟར་བདག་དང་ནད་མི་དག་ལ་བརྩེ་བ་དེ་བཞིན་དུ་གཞན་ལ་ཡང་ངོ། །དེ་ཡིས་སེམས་ནི་ཆོས་མིན་ལ། །འཇུག་པའི་མི་དགེ་ག་ལ་འབྱུང༌། །ཞེས་བྱ་བ་སྟེ། འདིས་ནི་མི་དགེ་པ་བཅུའི་ལས་ཀྱི་ལམ་ལས་ལོག་པར་བསྟན་ཏོ། །སྐྱེ་བོ་སྙིང་རྗེ་མེད་པར་གྱུར་ན་ནི། །མི་དགེ་བ་བཅུའི་ལམ་ལ་འཇུག་པར་འགྱུར་བ་དེའི་དབང་དུ་བྱས་ནས། སྐྱེ་བོ་སྙིང་རྗེ་མེད་པས་ན། །ཞེས་བྱ་བའི་ཚིགས་བཅད་སྨོས་སོ། །དེ་བས་ཆོས་ལ་ངང་པ་ཡིས། །ཞེས་བྱ་པའི་ཚིགས་བཅད་ནི་བསྡུས་པ་ཡིན་ཏེ། དེ་ལས་ཡོན་ཏན་འཕེལ་བར་འགྱུར། །ཞེས་བྱ་བ་ལ། ཡོན་ཏན་གང་ཡིན་པ་དེ་དག་བསྟན་པའི་ཕྱིར། སྙིང་རྗེས་ནོན་པའི་སེམས་ནི་གཞན་ལ་ཞེས་བྱ་བའི་ཚིགས་བཅད་སྨོས་སོ། །གནོད་པ་བྱེད་མི་འགྱུར་ཞེས་བྱ་བ་ནི་ཡིད་ཀྱི་མི་དགེ་བའི་ལས་ཀྱི་ལམ་མེད་པར་བསྟན་ཏོ། །ངག་ཀྱང་གཞན་དུ་འགྱུར་བ་མེད། །ཅེས་བྱ་བ་ནི་ངག་གི་མི་དགེ་བའི་ལས་ཀྱི་ལམ་མེད་པར་བསྟན་ཏོ། །ལུས་ཀྱང་གཞན་དུ་འགྱུར་བ་མེད། །ཅེས་བྱ་བ་འདིས་ནི་ལུས་ཀྱི་མི་དགེ་བའི་ལམ་གྱི་ལམ་མེད་པར་བསྟན་ཏོ། །དེ་ལྟར་མི་དགེ་བ་ལས་ལྡོག་པའི་ཚུལ་བསྟན་ནས། ད་ནི་དགེ་བལ་འཇུག་པའི་ཚུལ་གྱི་དབང་དུ་བྱས་ནས། སྦྱིན་དང་བཟོད་ལ་སོགས་ཞེས་བྱ་བ་སྨོས་ཏེ། སོགས་པའི་སྒྲས་ནི་བརྩོན་འགྲུས་དང༌། བསམ་གཏན་དང༌། ཤེས་རང་དང། བསྡུ་བའི་དངོས་པོ་རྣམས་གཟུང་ངོ༌། །ཚུལ་ཁྲིམས་མ་སྨོས་པ་ནི། སྡོམ་པའི་ཚུལ་ཁྲིམས་ནི་སྡར་བཤད་པའི་ཕྱིར་རོ། །དགེ་བའི་ཆོས་སྡུད་པ་དང༌། སེམས་ཅན་གྱི་དོན་བྱེད་པ་ནི་སྩོགས་པའི་སྒྲས་སྒྲུབ་པའོ། །གཞན་དག་ཀྱང་སྩོགས་པའི་སྒྲས་གཟུང་བར་བྱ་སྟེ། ཡོན་ཏན་རྣམས་བསྟན་པའི་ཕྱིར། སྙིང་རྗེ་ཅན་ནི་ཉེ་བར་ཞི་བས་ཞེས་བྱ་བའི་ཚིག་རྐང་འདི་བསྟན་པ་ཡིན་ཏེ། འདིས་ནི་བདག་དང་གཞན་ལ་ཡིད་འབྱུང་བར་མི་བྱེད་པས་ཡོན་ཏན་ནོ། །ཡིད་འབྱུང་བ་མེད་པ་ནི་ཉི་ཚེར་མ་ཟད་དེ། དེ་བཞིན་དུ་ཡིད་བརྟན་པར་ཡང་བྱེད་པ་ཡིན་ནོ། །ཡོན་ཏན་འདི་གཉིས་ནི་
གཞན་དང་འབྲེལ་པའོ། །འཐབ་མོའི་འཁྲུག་པ་ཡོང་མི་འབྱུང༌། །ཞེས་བྱ་བ་འདིས་ནི། ལུས་དང༌། དག་གི་ལས་ཀྱི་སྤྱོར་པས་བདག་དང་གཞན་ལ་གནོད་པ་མེད་པར་སྟོན་ཏོ། །འཁྲུག་པའི་མེ་འབར་ཡོང་མི་འགྱུར། །ཞེས་བྱ་བ་འདིས་ནི། བདག་གི་བསམ་པ་ལ་གནོད་པ་མེད་པར་བསྟན་ཏོ། །མདོར་ན་ཞེས་བྱ་བ་ནི། སྔར་བསྟན་པའི་དོན་བསྡུ་བའི་ཚིགས་སུ་བཅད་པ་ཡིན་ཏེ། མཁས་པའི་ཆོས་ལ་ལྟ་ཞེས་བྱ་བ་འདིས་ནི། སེམས་ཅན་རྣམས་ལ་སྙིང་རྗེ་སྐྱེད། །ཅེས་བྱ་བའི་ཚིགས་བཅད་སྔར་བསྟན་པ་དེ་སྟོན་པ་ཡིན་ནོ། །དགའ་བའི་ཡོན་ཏན་བརྩེ་ལ་མི་བརྟེན་གང་ཞིག་ཡོད། །ཅེས་བྱ་བ་འདིས་ནི། གསོད་དང་རྐུ་ལ་སོགས་པ་སྤོངས། །ཞེས་གང་བསྟན་པ་དེ་དག་ཉིད་བསྟན་ཏོ། །དེ་བས་བདག་དང་བུ་བཞིན་ཞེས་བྱ་བའི་ཚིགས་བཅད་འདིས་ནི། བདག་རང་ཉིད་དམ་ནང་མི་ལ་ཞེས་བྱ་བའི་ཚིགས་བཅད་དུ་གང་བསྟན་པ་ད་ཉིད་བསྟན་ཏོ། །དམ་པའི་ཚུལ་ཞེས་བྱ་བ་འཇུག་པ་དང༌། ལྡོག་པའི་ཚུལ་གྱིས་སོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་རི་དགས་རུ་རུའི་སྐྱེས་པའི་རབས་སོ།། །།དམ་པ་རྣམས་ཀྱི་ཚུལ་ནི་དམ་པའི་ཚུལ་ལོ། །ཡང་ན་དམ་པ་ཉིད་ཚུལ་ཡིན་པས་དམ་པའི་ཚུལ་ལོ། །དམ་པའི་རྗེས་སུ་འབྲང་བའི་ཚུལ་གང་ལ་ཡོད་པ་དེ་དག་ནི་དམ་པའི་ཚུལ་གྱི་རྗེས་སུ་འབྲང་པ་རྣམས་སོ། །རོ་དང༌། མཐུ་དང༌། རྣམ་པར་སྨིན་པའི་ཡོན་ཏན་ནི་རོ་དང༌། མཐུ་དང༌། རྣམ་པར་སྨིན་པའི་ཡོན་ཏན་རྣམས་ཏེ། ཡོན་ཏན་རྣམ་པ་མང་བོ་གང་ཡིན་པ་དེ་དག་གི་ནི། རོ་དང༌། མཐུ་དང༌། རྣམ་པར་སྨིན་པའི་ཡོན་ཏན་རྣམ་པ་མང་པོ་དང་ལྡན་པའོ། །རོ་ནི་མངར་བ་ལ་སོགས་པ་དྲུག་གོ །མཐུ་ནི་རྣམ་པ་གཉིས་ཏེ། དྲོ་བའི་ནུས་པ་དང༌། བསིལ་བའི་ནུས་པའོ། །རྣམ་པར་སྨིན་པ་ཡང་རྣམ་པ་གཉིས་སོ། །གཞན་ཡང་རྣམ་པ་སྣ་ཚོགས་པའི་མེ་ཏོག་དང༌། འབྲས་བུ་དང༌། ལོ་མ་དང༌། འདབ་མ་དང། ལྡུམ་བུ་དེ་དག་གིས་བརྒྱན་པའོ། །གཞན་ནི་སྔ་མ་བཞིན་ནོ། །གང་དུ་འབབ་ཆུ་ཤེལ་སྒོང་ལྟར་དང་ཞིང་གསལ་བ་འབབ་པ་གང་ཡིན་བ་དེ་ནི་འབབ་ཆུ་ཤེལ་སྒོང་ལྟར་དང་ཞིང་གསལ་བ་འབབ་པའོ། །གཏོང་བ་དང༌། སྙིང་རྗེ་ནི། གཏོང་བ་དང༌། སྙིང་རྗེའོ། །དེ་གཉིས་ལ་གོམས་
པ་སྟེ་དེ་བས་ནའོ། །གཏོང་བས་ནི་སྦྱིན་པའི་ཕ་རོལ་ཏུ་ཕྱིན་པ་གཟུང་ངོ༌། །སྙིང་རྗེས་ནི་ཚུལ་ཁྲིམས་དང༌། བཟོད་པའི་ཕ་རོལ་ཏུ་ཕྱིན་པ་གཉིས་གཟུང་ངོ༌། །གཏོང་བ་ལ་གོམས་པ་ནི། ཕྲག་དོག་དང༌། འཇུངས་པ་ཉེ་བར་འོང་བར་མ་གྱུར་ཏེ། གཞན་གྱི་ཕུན་སུམ་ཚོགས་པ་ལ་སེམས་འཁྲུག་པའི་མཚན་ཉིད་ནི་ཕྲག་དོག་གོ །སེར་སྣ་ནི་སྦྱིན་པ་དང་མི་མཐུན་པའི་ཡིད་ཀྱིས་ཀུན་དུ་འཛིན་པ་སྟེ། དེ་གཉི་གའི་མི་མཐུན་པའི་ཕྱོགས་ནི་གཏོང་བ་ལ་གོམས་པའོ། །གང་གི་ཕྱིར་སྙིང་རྗེ་བསྒོམས་པས་ནི། ཁྲོ་བ་ཉེ་བར་མ་གྱུར་ཏེ། ཁྲོ་བ་བཟློག་པས་ནི་ཚུལ་ཁྲིམས་དང༌། བཟོད་པའི་ཕ་རོལ་ཏུ་ཕྱིན་པ་སྐྱེ་བར་འགྱུར་བའི་ཕྱིར་དེ་ལྟར་བསོད་ནམས་ཀྱི་ཚོགས་རྣམ་པ་གསུམ་བསྟན་ཏོ། །དུད་འགྲོར་སྐྱེས་གྱུར་ཀྱང་ཞེས་བྱ་བ་ནི་བསམས་བཞིན་དུ་དུད་འགྲོའི་སྐྱེ་གནས་ཡོངས་སུ་བཟུང་བ་ཡིན་ནོ། །དབང་ཐང་ལྷག་མས་ཞེས་བྱ་བ་ནི་གང་བདེ་འགྲོ་དག་ཏུ་སྤྱོད་པའི་ལྷག་མ་སྟེ། ལས་ལ་དབང་པ་དེས་དྲངས་པའོ། །དམ་པ་རྣམས་ཞེས་བྱ་བ་ནི་དབང་ཐོབ་པའི་བྱང་ཆུབ་སེམས་དཔའ་རྣམས་སོ། །ཕན་གདགས་འབྲེལ་པའི་མཛའ་བཤེས་ཀྱི་སྐྱེ་བོ་གང་ཡིན་པ་དེ་དག་ནི་ཕན་གདགས་འབྲེལ་པའི་མཛའ་བཤེས་ཀྱི་སྐྱེ་པོ་རྣམས་སོ། །འདིས་ནི་འདི་སྐད་སྟོན་པ་ཡིན་ཏེ། འབྲེལ་པའི་མཛའ་བཤེས་སྐྱེ་བོ་དེ་དང་བྲལ་བ་རྣམས། །ཞེས་སྦྱར་རོ། །བྱེས་ཡུལ་དུ་དོང་བ་ལྟ་བུ་ནི་དུད་འགྲོའི་སྐྱེ་གནས་སུ་བྱང་ཆུབ་སེམས་དཔའ་སྐྱེས་པའོ། །ཕན་གདགས་འབྲེལ་བའི་མཛའ་བཤེས་ཀྱི་སྐྱེ་བོ་དང་བྲལ་བ་ལྟ་བུ་ནི་བདེ་འགྲོ་ལས་ཉམས་ཏེ། དུད་འགྲོའི་སྐྱེ་གནས་སུ་སྐྱེས་པའོ། །ནོར་གྱི་ལྷག་མ་ལྟ་བུ་ནི་དབང་ཐོང་གི་ལྷག་མའོ། །དེའི་དྲུང་ནས་ཞེས་བྱ་བ་ནི་ནགས་ཚལ་གྱི་བདག་པོ་དེའི་དྲུང་ནས་སོ། །ཆུའི་ནང་ན་རྩེ་བའི་མཐའ་རྒྱ་མོས་བསྐོར་བའི་ངོས་ཤིག་ལ་ཆགས་སོ་ཞེས་བྱ་བའི་ཚིག་གིས་ནི་ཆུ་བོ་རྒལ་བ་ཉིད་དེ། ལུགས་ཀྱི་བསྟན་བཅོས་ལས་འབྱུང་བའི་ཚུལ་དུ་བདག་ཉིད་བསྲུང་བ་བསྟན་པའི་ཕྱིར་རོ། །ཁྲུས་རྩིས་བསྒོས་པ་ཡིན་ཏེ། དེ་གང་ཡིན་ཞེན། ན་ཆུང་ངོ༌། །རྨད་དུ་བྱུང་བ་ཞེས་བྱ་བ་ནི་འབྲས་བུ་དེ་སྔར་མ་སྤྱད་པའི་ཕྱིར་རོ། །དེ་ག་ལས་བྱུང་བ་ནི་དེ་ག་ལས་བྱུང་བ་སྟེ། གང་ལས་བྱུང་བའོ། །དེ་བཙལ་བར་བསམས་པ་གང་ཡིན་པ་དེ་ནི། དེ་གང་ལས་བྱུང་བ་བསམས་
པའོ། །རང་གི་བློས་བརྟགས་ཏེ་ཞེས་བྱ་བ་ནི། བཀའ་ལ་གཏོགས་པ་དང་བཅས་པས་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། གལ་ཏེ་དེ་ལ་གནོད་པ་མཐོང་བར་གྱུར་ནི། རོ་ལ་སྲེད་པ་དང༌། སྟོབས་དང་ལྡན་པ་ཉིད་དུ་གྱུར་ཀྱང་ངོ༌། །མི་རིང་བ་ནི་ཉེ་བའོ། །ཅིའི་ཕྱིར་ཞེ་ན། ཁ་དོག་དང༌། དྲི་མ་ཉམས་པའི་ཕྱིར་ཏེ། དེ་ཡང་འབབ་ཆུའི་འགྲམ་མི་རིང་བ་ཞིག་ན་ཡོད་པ་ཉིད་དུ་ངེས་ཏེ། ཅིའི་ཕྱིར་ཞེ་ན། རྨ་མེད་ཅིང་མ་སྣད་པའི་ཕྱིར་རོ། །གལ་ཏེ་ཡུན་རིང་བོར་ཆུའི་ནང་དུ་ལྷུང་ན་ནི། འདི་ག་ལས་འབྱུང་བའི་གནས་ཤེས་པར་མི་ནུས་པ་སྟེ། འདི་ལྟར་འབབ་ཆུའི་འགྲམ་མི་རིང་བ་ཞིག་ན་ཞེས་སྨོས་པས་ཉེ་བར་གྱུར་པའི་ཕྱིར་དང་མི་རིང་བའི་ཕྱིར་ཤེས་པར་ནུས་ཏེ། འབབ་ཆུའི་འགྲམ་ན་འདུག་པར་ངེས་པའི་ཕྱིར། འབབ་ཆུ་དེའི་འགྲམ་ཐོག་ཐག་ཏུ་སོང་ན་དེ་ག་ལས་བྱུང་བ་ཤེས་པར་ནུས་པ་ཉིད་དོ། །རིང་ནས་མཐོང་བ་ཡིན་ཏེ། ཇི་ལྟར་མཐོང་བ་ཡིན་ཞེ་ན། ཆུའི་ལྗིད་ཀྱིས་ནོན་པ་འདྲ་བ་ཞེས་བྱ་བ་དང༌། རི་དང་ཉེ་ཡང་ཞེས་བྱ་བ་སྟེ། སྤྲིན་གྱི་མདོག་འདྲ་བའི་ཕྱིར་དང༌། རི་ལྟར་མཐོ་བའི་ཕྱིར་རོ། །ཤིང་ཨམྲའི་འབྲས་བུ་ས་ཧ་ཀ་ར་སྨིན་པའི་དེ་བས་ཀྱང་ལྷག་པ་དེ་ནི་ཨ་མྲའི་འབྲས་བུ་ས་ཧ་ཀ་ར་སྨིན་པའི་དྲི་བས་ཀྱང་ལྷག་པའོ། །གང་གིས་འཇིགས་ཤིང་སྐྲག་པ་དང༌། མྱ་ངན་ཡོངས་སུ་སྤངས་པ་དེ་ནི་འཇིགས་ཤིང་སྐྲག་པ་དང༌། །མྱ་ངན་ཡོངས་སུ་བཏང་བའོ། །འཇིགས་པ་སྤངས་པ་ནི་བཟློག་པའི་ཐབས་སྒུབ་པས་སོ། །མྱ་ངན་སྤངས་པ་དེ་ནི། དེའི་སྐྱབས་སུ་འགྲོ་བར་མི་བྱེད་པའི་ཕྱིར་རོ། །སྐྲག་པ་སྤངས་པ་ནི་མི་འབྲོས་པའམ། མི་བྱེད་པས་སོ། །ཡང་ན་སྤྲེའུ་འཁོར་དེ་དག་དབུགས་དབྱུང་བའི་ཕྱིར་འཇིགས་པ་མེད་པའོ། །ཡོངས་སུ་སྐྱབས་པའི་བློ་བསྐྱེད་པའི་ཕྱིར། སྐྲག་པ་དང༌། མྱ་ངན་སྤངས་པའོ། །བྱ་འཕུར་བ་བཞིན་དུ་མཆོངས་པ་གཅིག་གིས་ལེགས་པར་མཆོངས་པར་གྱུར་ཏེ། ཅིའི་ཕྱིར་ཞེ་ན། མཆོངས་པའི་མཐུ་རྩ་ལ་ཆེ་བའི་ཕྱིར་རོ། །དེས་ནི་སྙིང་རྗེ་རྣམ་པར་བསྐྱེད་པ་དང༌། །ཞེས་བྱ་བའི་ཚིགས་བཅད་འདི་ནི་མཆོངས་པའི་མཐུ་རྩལ་ཅན་ནོ་ཞེས་བསྟན་པ་དེ་ནི་མཐུ་རྩལ་གྱི་རྒྱུ་བསྟན་པའི་ཕྱིར་ཏེ། སྙིང་རྗེ་དང༌། དཔའ་བའི་ཤུགས་ཀྱི་རྩོལ་བ་གང་ཡིན་པའི་རྒྱུས་སོ། །རྩོལ་བ་དྲག་པ་ནི་འབད་པའི་ཁྱད་པར་དེས་ཏེ། དེའི་ཕྱིར་ཡིད་ལ་བསམས་པ་
བཞིན་དུ་ཕྱིན་པར་གྱུར་ཏོ། །དེ་གཉིས་ཀྱི་པར་ནི་དེའི་བར་དེ་ཤིང་དང་རི་གཉིས་ཀྱིའོ། །མཐོ་བའི་འགྲམ་ནི་དེའོ། །ས་ཁྱོན་དེའི་བར་བས་ཀྱང་དཀྱུས་རིང་བ་གང་ཡིན་པའི་སྤ་ཐག་དེ་ནི་ས་ཁྱོན་དེ་བས་རིང་བ་སྟེ། དེ་སྨིན་པར་སྐྱེས་ལ་རྩ་བ་བརྟན་ཞིང་ཕྲ་བ་གང་ཡིན་པ་དེའོ། །དེ་གཉིས་ཀྱི་བར་ཐག་རིང་ཞིང་ཞེས་བྱ་བ་ནི་ཤིང་ཆེན་པོ་དེ་དང༌། རིའི་རྩེ་མོ་མཐོན་པོ་དེའི་འགྲམ་མོ། །རྐང་པ་གཉིས་བཅིངས་པ་ནི། རྐང་པ་གཉིས་བཅིངས་པ་སྟེ། དེས་ཟོ་མདོག་མི་བདེ་པའི་ཕྱིར་རོ། །བརྒྱངས་ཞེས་བྱ་བ་ནི་དྲངས་པའོ། །བདག་གི་ལུས་ཀྱི་ཤ་དང་བྲལ་བ་ཅིའི་ཕྱིར་ཞེ་ན། སྤྲེའུའི་ཚོགས་དེ་དག་འཇིགས་པས་ལུས་བརྫིས་པའི་ཕྱིར་རོ། །དེ་ལྟར་ན་ཡང་བརྟན་པ་ཉིད་ནི་མ་ཉམས་པར་སྟོན་ཏོ། །འདི་ལྟར་དཔའ་བ་ཕུན་སུམ་ཚོགས་པས་ནི་སྔར་བསྟན་པའི་འབད་བའི་ཁྱད་པར་བསྟན་ཏོ། །བློ་ཕུན་སུམ་ཚོགས་བ་ནི་རྐང་པ་གཉིས་སྤ་ཐག་གིས་བཅིངས་པའི་ཕྱིར་རོ། །བདག་ལའང་མི་ལྟ་ཞེས་བྱ་བ་ནི་སྤྲེའུའི་ཚོགས་རྣམས་འདི་ལས་མྱུར་དུ་དེང་ཞེས་བྱ་བའི་ཚིག་གིས་སོ། །གཞན་ལ་སྙིང་བརྩེ་ཞེས་བྱ་བ་ནི་བདག་གིས་སྐད་ཀྱིས་སྤྲན་ཞེས་བྱ་བའི་ཚིག་གིས་སོ། །སྤྲེའུའི་བདག་པོ་འདི་སྤྲེའུ་མང་པོ་འཇིགས་ཏེ་བྲོས་པའི་རྐང་ལག་གིས་སྣད་པའི་ལུས་གང་ཡིན་པ་དེ་ནི་སྤྲེའུའི་བདག་པོ་འདི་སྤྲེའུ་མང་པོ་འཇིགས་ཏེ་བྲོས་པའི་རྐང་ལག་གིས་སྣད་པའི་ལུས་སོ། །རྨས་བྱས་པའི་སྡུག་བསྔལ་དང༌། སེམས་མི་དྲན་པ་ནི་ལུས་ཀྱི་རྨའི་སྡུག་བསྔལ་གྱིས་བརྒྱལ་བར་གྱུར་ཏེ་སེམས་མི་དྲན་བའོ། །དེ་གཉིས་ལས་བྱུང་བ་ནི་རྨ་བྱུང་བའི་སྡུག་བསྔལ་གྱིས་བརྒྱལ་བར་གྱུར་ཏེ་སེམས་མི་དྲན་པ་ཉིད་དོ། །རྨའི་སྡུག་བསྔལ་དེ་ཡང་སྤྲེའུ་མང་པོ་འཇིགས་ཏེ་བྲོས་པའི་རྐང་ལག་གིས་བརྫིས་པས་ལུས་སྣད་པའི་ཕྱིར་རོ། །དུབ་པ་ཡང་སྤྲེའུའི་ཚོགས་ཀྱིས་རྐང་པས་བརྫིས་པའི་ཕྱིར་ཏེ། གནས་སྐབས་དེ་ལྟ་བུར་ཡུན་རིང་དུ་དུབ་པས་སོ། །ཡ་མཚན་ཆེ་བ་ཞེས་བྱ་བ་ནི་ལྟད་མོར་ཆེ་བའི་ཕྱིར་རོ། །ཁྱོད་ཀྱི་ཅི་འོང་ཁྱོད་ཀྱང་ཁོང་གི་ཅི། །ཞེས་དྲིས་པ་ཡིན་ཏེ། ངོ་མཚར་ཆེ་བ་ནི་རང་གི་སྲོག་གཏོང་བ་དང༌། སྙིང་རྗེ་དང༌། གུས་པས་སྤྲེའུའི་ཚོགས་བསྒྲལ་བའི་ཕྱིར་ཏེ། དེ་ཉིད་ཀྱི་ཕྱིར། དེ་གཙོ་བོ་ཡིན་པས་ཡ་མཚན་ཆེ་བ་དང་པོར་བརྗོད་པ་ཡིན་ནོ། །ཚིགས་བཅད་འོག་མ་སྨོས་པ་ཡང་དེའི་ཁྱད་པར་དེ་འདིས་འབྲེལ་པ་ཡིན་
པས་རྒྱུ་འབྲེལ་ལོ། །རབ་ཏུ་འབྲེལ་པའི་རྒྱུ་འབྲེལ་ཆུང་གང་ཡིན་པ་དེ་ནི་རབ་ཏུ་མཛའ་བའི་རྒྱུ་འབྲེལ་ཆུང་དུའོ། །ཁུར་དེ་བསྐུར་བ་ཞེས་བྱ་བ་ནི་བདག་པོ་ཉིད་ཀྱི་དངོས་པོའོ། །ཉེ་དུ་ཡིན་པས་གཉེན་ནོ། །དེ་དང་འདྲ་བ་ཡིན་པས། གཉེན་དང་འདྲ་བར་གྱུར་པའོ། །བློན་པོ་ལ་སོགས་པ་གང་ཡིན་པ་དེ་དག་ནི་བློན་པོ་ལ་སོགས་པའོ། །གཉེན་དང་མཛའ་བོ་ཞེས་བྱ་བ་འདིས་ནི་བྱམས་པ་བསྟན་ཏོ། །ཉམས་ཉེས་རབ་ཏུ་ཆེ་བ་དང༌། །ཕོངས་ནས་མྱ་ངན་བྱེད་པ་ཞེས་བྱ་བ་ལ་ཉམས་ཉེས་པ་རབ་ཏུ་ཆེ་བ་ནི་རྒྱལ་པོའི་དཔུང་གི་ཚོགས་ཀྱིས་ཟིལ་གྱིས་མནན་པས་སོ། །དེས་བྱས་པའི་ཕོངས་པ་ནི་ཉམས་ཉེས་རབ་ཏུ་ཆེར་བྱུང་བས་ཕོངས་པའོ། །ཉམས་ཉེས་རབ་ཏུ་ཆེར་བྱུང་ཞིང་ཕོངས་པས་བྱས་པའི་མྱ་ངན་ནི་ཉམས་ཉེས་རབ་ཏུ་ཆེར་བྱུང་ཞིང༌། ཕོངས་ནས་མྱ་ངན་བྱེད་པའོ། །ཉམས་ཉེས་རབ་ཏུ་ཆེར་བྱུང་ཞིང་ཕོངས་ནས་མྱ་ངན་བྱེད་པ་དེ་ཉིད་ཀྱི་རྒྱུ་བསྟན་པའི་ཕྱིར། དེ་བས་གཞུ་རྣམས་བཀང་ནས་ཞེས་བྱ་བའི་ཚིགས་བཅད་སྨོས་ཏེ། དེ་བས་ཞེས་བྱ་བ་ནི་གང་གི་ཕྱིར། སྡུག་བསྔལ་རབ་ཏུ་བྱུང་བ་ཉིད་དེ། དེའི་ཕྱིར། མདེའུ་རྩེ་མོ་རྣོན་པོ་དག་འཕེན་པ་རྣམས་ཀྱིས་འཇིགས་པ་གང་ཡིན་པ་དེ་དག་ལས་འཇིགས་པའི་སྒྲ་གང་ཡིན་པ་དེ་ནི་སྒྲ་འཇིགས་པའོ། །སྒྲ་འཇིགས་པའི་གཞུ་རྒྱུད་གང་ཡིན་པ་དེ་ནི། གཞུ་རྒྱུད་སྒྲ་འཇིགས་སོ། །ཕོངས་པ་དང༌། མྱ་ངན་བྱེད་པ་དེ་བསྟན་པའི་ཕྱིར། བདག་གི་འཁོར་ནི་ཞེས་བྱ་བ་ལ་སོགས་པའི་ཚིགས་བཅད་སྨོས་སོ། །རབ་ཏུ་སྐྲག་པའི་སེམས་ཡིན་པས་ཕོངས་པའོ། །དུ་ཞིང་འབོད་པས་ཞེས་བྱ་བ་འདིས་ནི་མྱ་ངན་བྱེད་པའོ། །ས་ཁྱོན་ལེགས་པར་བརྟགས་པ་གང་ཡིན་པ་དེ་ནི་ས་ཁྱོན་ཚད་ནི་ལེགས་པར་བརྟགས་པའོ། །རྩ་བཅས་ཞེས་བྱ་བས་ནི་སྔར་བཤད་པའི་རྩ་བ་དང་ལྡན་པའོ། །བདག་གི་བདེ་བ་ཁྱད་དུ་བསད་པ་དེ་ལ་ཁྱོད་ཀྱིས་ཡོན་ཏན་ཅི་ཞིག་འཐོབ་ཅེས་བཤད་པ་ལ། དེའི་ཡོན་ཏན་བསྟན་པའི་ཕྱིར། གང་རྣམས་རྒྱལ་པོ་བདག་གིས་ཡུན་རིང་བྱས། །ཞེས་བྱ་བའི་ཚིགས་བཅད་སྨོས་སོ། །བདག་གི་ལུས་ལྟ་སྣད་པར་གྱུར་ཀྱང་རུང༌། །ཞེས་བྱ་བ་ནི་བདག་གི་ལུས་འདི་ལ་རྨ་ཡོད་པར་གྱུར་ཀྱང་རུང་ཞེས་བྱ་བ་ཡིན་ཏེ། འདིས་ནི་བདེ་བ་ཁྱད་དུ་གསོད་པར་སྟོན་ཏོ། །དེ་བས་སེམས་ནི་རབ་ཏུ་དགའ་བར་གྱུར། །ཅེས་བྱ་བ་ནི། ཡིད་
གྱི་བདེ་བ་འཐོབ་པ་སྟེ། །ཡོན་ཏན་འདི་ཐོབ་པ་ཡིན་ནོ། །དེ་བས་ན་ཡིད་དགའ་བ་ཐོབ་བ་དེའི་རྒྱུ་བསྟན་པའི་ཕྱིར་སྨྲས་པ། བདག་གིས་དེ་དག་སྡུག་བསྔལ་རྣམ་པར་བཟློག །ཅེས་བྱ་བ་ཉིད་ཀྱིས་སོ། །དེ་བས་ན་དེའི་ཕྱིར་དྲེགས་པའི་དགྲ་རྣམས་གཡུལ་ངོར་ཞེས་བྱ་བའི་ཚིགས་བཅད་སྨོས་པ་ཡིན་ཏེ། འདིས་ནི་ལུས་ཀྱི་སྡུག་བསྔལ་བ་ཡང་མེད་པར་བསྟན་ཏོ། །རྨ་ཙམ་ཉི་ཚེ་འམ། རྨ་ལས་བྱུང་བའི་སྡུག་བསྔལ་ཙམ་ཡིན་ཏེ། ཅིའི་ཕྱིར་ཞེ་ན། ཇི་ལྟར་དཔའ་བོ་རྣམས་ཀྱིས་རྨ་བྱུང་བ་ཡང༌། དགྲ་ཕམ་བར་བྱས་པའི་ཕྱིར་བཟོད་པ་ཡིན་ཏེ། མངོན་པར་འདོད་པའི་དོན་བསྒྲུབ་པའི་ཕྱིར། དགའ་བཞིན་དུ་རྨ་ལ་བཟོད་བའི་ཕྱིར་རོ། །དེ་བས་ན་རྨ་ལས་བྱུང་བའི་སྡུག་བསྔལ་བ་ཡང་མེད་དེ། བདེ་བ་འབའ་ཞིག་ཡིན་ནོ། །ལུས་སྣད་པ་དེའི་སྡུག་བསྔལ་མེད་དེ། བདེ་བ་ཉིད་དུ་བསྟན་ན། དཔའ་བོ་རྣམས་རྨའི་སྡུག་བསྔལ་དགའ་བཞིན་དུ་བཟོད་པ་ལྟར་བདག་ཉིད་རྨ་དེ་ལ་དེ་ཇི་ལྟར་དགའ་བཞིན་དུ་བཟོད་ཅེ་ན། དེའི་རྒྱུ་བསྟན་པའི་ཕྱིར། རིགས་མཐུན་རྣམས་ཀྱིས་རབ་ཏུ་གུས་བྱས་ནས། །ཞེས་བྱ་བའི་ཚིགས་བཅད་སྨོས་སོ། །དབང་ཕྱུག་བདེ་བ་ཐོབ་པར་འགྱུར་པའི་བུ་ལོན་འཁོར་བར་གྱུར་པའི་ཕྱིར་ཏེ། དེས་ན་དེའི་ཕྱིར་དགའ་བཞིན་བཟོད་བར་བྱ་བའོ། །དེ་བས་ན་བདག་ཉིད་མཛའ་བ་དང་བྲལ་བའམ་ཞེས་བྱ་བའི་ཚགས་བཅད་འདི་ནི་སྔར་བཤད་བའི་དོན་གྱི་མཇུག་སྡུད་བ་ཡིན་ཏེ། དེ་བས་ན་ཞེས་བྱ་བ་ནི་བུ་ལོན་འཁོར་བའི་ཕྱིར་རོ། །དེ་ཙམ་ཉི་ཚེར་ཡང་མ་ཟད་དེ། འདི་ལྟར་ཡོན་ཏན་ཁྱད་པར་ཅན་འཐོབ་པའི་ཕྱིར་རོ། །དེ་ཡོན་ཏན་དེ་གང་ཡིན་ཞེ་ན། དེ་ཉིད་སྨྲས་པ། སྔོན་དུ་ཕན་བཏགས་བུ་ལོན་འཁོར་བས་མགུ། ཞེས་བྱ་བའི་ཚིགས་བཅད་སྨོས་ཏེ། འཁོར་གྱི་སྔོན་དུ་ཕན་བཏགས་པ་ལ་ཡང་དག་སྒྲུབ་པའི་ཕན་ཡོན་ཏེ། བདག་ཉིད་མགུ་བ་དང༌། མྱ་ངན་ཞི་བ་ནི་བདག་དང་འབྲེལ་པའི་ཕན་ཡོན། །ད་ལྟར་བྱུང་བའི་གྲགས་པ་དྲི་མ་མེད་པ་འཐོབ་པ་དང༌། རྒྱལ་པོས་མཆོད་པ་བྱས་ཞེས་བྱ་བ་འངས་གཉིས་ནི། གཞན་དང་འབྲེལ་བའི་ལུས་དང༌། ངག་གི་ཕན་ཡོན་ནོ། །འཆི་ལ་འཇིགས་པ་མེད་ཅེས་བྱ་བ་ནི། དུས་གཞན་གྱི་ཕན་ཡོན་ནོ། །དེ་དང་མི་མཐུན་པའི་ཕྱོགས་ཞེས་བྱ་བ་ནི། བུ་ལོན་འཁོར་བ་ལ་སོགས་པ་མེད་པ། དམ་པས་ཕན་བཏགས་དྲིན་ཡང་དྲན་པར་གྱུར། །ཞེས་བྱ་བ་ནི། དེ་དག་གཞན་དང་འབྲེལ་བའི་ཡིད་ཀྱི་ཕན་
ཡོན་ནོ། །དེ་དང་མི་མཐུན་པའི་ཕྱོགས་ཞེས་བྱ་བ་ནི་བུ་ལོན་འཁོར་བ་ལ་སོགས་པ་མེད་པ་ཉིད་ནི་དེ་དང་མི་མཐུན་པའི་ཕྱོགས་ཏེ་སྐྱོན་ནོ། །ཡོན་ཏན་མེད་པ་ནི་བུ་ལོན་འཁོར་བ་ལ་སོགས་པའི་ཡོན་ཏན་མེད་པའོ། །གྲགས་པ་མེད་པར་གྱུར་པ་ནི། །སྔར་ཐོབ་པའི་གྲགས་པ་རྣམས་ཉམས་བའོ། །ཉེས་པ་འབྱུང་བའི་གནས་སུ་གྱུར་པ་རྣམས། །ཞེས་བྱ་བ་ནི་ཡོན་ཏན་གྱི་མི་མཐུན་པའི་ཕྱོགས་སྔར་བཤད་པ་དག་སྟེ། ཡོན་ཏན་མེད་པའོ། །བརྟན་པ་ཞེས་བྱ་བ་ནི་སྔོན་དུ་ཕན་བཏགས་བུ་ལོན་ཞེས་བྱ་བའི་ཚིགས་བཅད་ཀྱིས་སོ། །སྐྱོན་གྱི་མཐུ་ཞེས་བྱ་བ་ནི། བདག་པོ་སྙིང་རྗེ་མེད་ལ་རྟེན་བཅས་ནས། །ཞེས་བྱ་བའི་ཚིགས་བཅད་ཕྱེད་འོག་མ་དང༌། ཡོན་ཏན་མེད་ཅིང་ཞེས་བྱ་བའི་ཚིགས་བཅད་འདིས་སོ། །གཞོན་པའི་དཔུང་དང༌། ལྗོངས་དང༌། བློན་པོ་དང་ཞེས་བྱ་བ་ཡིན་ཏེ། བདེ་བ་དང་ལྡན་པར་དོན་སྒྲུབས་ཤིག་བའོ། །མགོན་མེད་འབངས་དང༌། དགེ་སྦྱོང་བྲམ་ཟེ་རྣམས་ཀྱང་བདེ་བ་དང་ལྡན་པར་མཛོད་ཅིག་པའོ། །ཆོས་འཕེལ་བར་བྱས་ན་ནི། བདེ་བ་གཉིས་དང་ལྡན་པར་འགྱུར་ཏེ། གྲགས་པ་འཕེལ་བ་དང༌། སྲིད་འཕེལ་བའོ། །འདི་ནི་འདིར་བདེ་བའོ། །ཡང་ན་གཉི་ག་ལ་ཡང་བདེ་བར་འགྱུར་བའོ། །སློབ་དཔོན་དཔའ་བོ་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་སྤྲེའུའི་རྒྱལ་པོའི་སྐྱེས་པའི་རབས་སོ།། །།བཟོད་པ་ལ་གོམས་པ་ཞེས་བྱ་བ་ནི། སྐུ་ཚེ་སྔ་མ་དག་ཏུ་བཟོད་པའི་རྒྱུ་བསྒོམས་པར་བསྟན་ཏོ། །སྨྲས་པ། སོ་སོར་བརྟགས་ཏེ་ཞེས་བྱ་བ་སྨོས་ཏེ། སོ་སོར་བརྟགས་པའི་རྐྱེན་གྱིས་སོ། །ཡང་ན་བཟོད་པ་ལ་གོམས་པ་ཞེས་བྱ་བ་ན། བསྒོམས་པ་ལས་བྱུང་བའི་བཟོད་པ་ཉིད་དུ་བསྟན་པའི་ཕྱིར་སྨྲས་པའོ། །ཁྱིམ་ན་གནས་པ་ནི་ཉེས་པ་མང་པོ་ཞེས་བྱ་བ་ལ་སོགས་པའི་ཚིག་རྐང་གིས་བསྟན་ཏོ། །ཁྱིམ་ན་གནས་པ་ནི་སྐྱེ་བའི་ཀུན་ནས་ཉོན་མོངས་པ་དང༌། ལས་ཀྱི་ཀུན་ནས་ཉོན་མོངས་པ་དང༌། ཉོན་མོངས་པའི་ཀུན་ནས་ཉོན་མོངས་པ་ཉིད་དང་ལྡན་པར་བསྟན་པ་སྟེ། དེ་ལས་ཉེས་པ་མང་པོའི་སྡུག་བསྔལ་དང་ལྡན་ཞེས་བྱ་བ་འདིས་ནི། མཐོང་བའི་ཆོས་ལ་སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །སྲིད་དང་འདོད་བ་ལྷུར་ལེན་པས་ཉེ་བར་མ་ཞི་བ་ཞེས་བྱ་བ་འདིས་ནི། ཡུན་རིང་བོར་ཡང་སྐྱེ་
བའི་ཀུན་ནས་ཉོན་མོངས་པས་ཉོན་མོངས་བ་ཉིད་དུ་བསྟན་ཏོ། །འདོད་ཆགས་དང༌། ཞེ་སྡང་ལ་སོགས་པས་ནི་ཉོན་མོངས་པའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །ཉོན་མོངས་པ་ཡང་རྣམ་པ་གཉིས་ཏེ། མཐོང་བས་སྤང་བར་བྱ་བ་དང་བསྒོམ་པས་སྤང་པར་བྱ་བ་སྟེ། དེས་ཀུན་ནས་ཉོན་མོངས་པ་ཉིད་དུ་ཅི་རིགས་པར་སྦྱར་རོ། །བྱ་བ་ངན་པའི་སྐལ་བས་ཆོས་བྱ་བའི་གོ་སྐབས་མེད་པར་ཤེས་པ་ཞེས་བྱ་བ་འདིས་ནི་ལས་ཀྱི་ཀུན་ནས་ཉོན་མོངས་པ་ཉིད་དུ་བསྟན་ཏོ། །ཉེས་པ་དེ་ལྟ་བུ་མེད་པའི་བདེ་བ་ཅན་དུ་ཞེས་བྱ་བ་ནི་ཀུན་ནས་ཉོན་མོངས་པ་དེ་ལྟ་བུ་མེད་པའི་བར་རོ། །ཚུལ་ཁྲིམས་ཞེས་སྨོས་པས་ནི། ལྷག་པའི་ཚུལ་ཁྲིམས་ཀྱི་བསླབ་པ་བསྟན་ཏོ། །མང་དུ་ཐོས་པ་ཞེས་སྨོས་པས་ནི་ལྷག་པའི་ཤེས་རབ་བསྟན་ཏོ། །རབ་ཏུ་ཞི་བ་སྨོས་པས་ལྷག་པའི་སེམས་སོ། །རྒྱུ་གསུམ་གྱིས་བཟོད་པ་སྨྲ་བ་ཞེས་བྱ་བར་མིང་དུ་བཏགས་ཏེ། དེ་བཟོད་པར་བྱ་བའི་ཡིད་དམ་མ་ཉམས་ཤིང་ཞེས་བྱ་བ་ལ་སོགས་པ་སྨོས་ཏེ། ཡིད་དམ་བཅས་པ་ཡང་ཚིག་གིས་བཅད་པ་ཡིན་པའི་ཕྱིར་དེ་བས་ན་བཟོད་པ་སྨྲ་བ་ཞེས་བྱའོ། །དེའི་བསྔགས་པ་བརྗོད་པ་དང༌། གཞན་དག་ལ་དེ་དང་མཐུན་བའི་ཆོས་འཆད་པ་ཡང་དེ་ཉིད་དེ། བཟོད་པ་སྨྲ་བར་བདག་ཉིད་ཀྱིས་ཁས་བླངས་པ་དང༌། བཟོད་པའི་ཡོན་ཏན་བརྗོད་པ་དང༌། གཞན་ལ་བཟོད་པ་སྨྲ་བ་ཞེས་བྱ་བའི་དོན་ཏོ། །དེ་ལ་དཀའ་ཐུབ་ཕུན་སུམ་ཚོགས། །ཞེས་བྱ་བའི་མིང་ནི་བཟོད་བ་བྱ་བར་ཡིད་དམ་བཅས་པ་མ་ཉམས་པའི་ཕྱིར་རོ། །མཐུ་རྩལ་ཅན་ཞེས་བྱ་བ་ནི་བཟོད་པའི་བསྔགས་པ་བརྗོད་པ་དང༌། གཞན་དག་ལ་དེ་དང་མཐུན་བའི་ཆོས་འཆད་པའི་ཕྱིར་རོ། །དེ་ལ་རེ་ཞིག་བདག་ནི་བཟོད་པའི་ཡིད་དམ་བཅས་བ་མ་ཉམས་པས་བཟོད་པ་སྨྲ་བ་ཞེས་བྱ་བ་ནི་རིགས་ན། ཅིའི་ཕྱིར་བཟོད་པའི་བསྔགས་བརྗོད་པར་བྱེད་པ་དང༌། དེ་དང་རྗེས་སུ་མཐུན་པའི་ཆོས་འཆད་པ་ཡིན་ཞེ་ན། དེའི་ཕྱིར་སྨྲས་པ། དེ་ནི་བཟོད་བའི་ཡོན་ཏན་མཐུ་ཤེས་ནས། །ཞེས་བྱ་བའི་ཚིགས་བཅད་སྨོས་ཏེ། དེ་ནི་བཟོད་པའི་ཡོན་ཏན་མཐུ་ཤེས་ནས། །ཞེས་བྱ་བ་ནི་བཟོད་པའི་བསྔགས་པ་བརྗོད་པའི་རྒྱུས་སོ། །དེ་ཡིས་བདག་བཞིན་འཇིག་རྟེན་རབ་ཏུ་བརྒྱན། །ཞེས་བྱ་བ་ནི། དེ་དང་རྗེས་སུ་མཐུན་པའི་ཆོས་གོ་རིམས་བཞིན་དུ་འཆད། །ཞེས་བྱ་བའི་རྒྱུས་
སོ། །བཟོད་པའི་གཏམ་ཡང་རྒྱུན་དུ་བྱེད་པར་གྱུར། །ཅེས་བྱ་བ་ལ་གཏམ་རྒྱུན་དུ་བྱེད་པ་ནི་རྣམས་པ་གཉིས་སོ། །བཟོད་པ་ཆེན་པོ་རང་གི་ངང་དུ་གྱུར། །ཅེས་བྱ་བའི་ཚིགས་བཅད་སྨོས་ཏེ། སྔར་བསྟན་པའི་དོན་འདིས་བསྡུ་ཞིང་རིག་པར་བསྟན་པའི་ཕྱིར་ཏེ། བཟོད་བ་ཆེན་པོ་རང་གི་ངང་དུ་གྱུར། །ཅེས་བྱ་བ་འདིས་ནི། གང་སྔར་བསྟན་པའི་བཟོད་པར་བྱ་བའི་ཡིད་དམ་མ་ཉམས་པ་ཞེས་བྱ་བ་དེ་ཉིད་བསྟན་ཏོ། །དེ་ཡི་དོན་དང་མཐུན་པའི་གཏམ་དག་གིས། །ཞེས་བྱ་བ་ནི་སྔར་བསྟན་པའི་བཟོད་པའི་བསྔགས་པ་རྗོད་པར་བྱེད་ལ། དེ་ལ་མཐུན་པའི་ཆོས་ཀྱང་རྒྱུན་དུ་འཆད། །ཅེས་བྱ་བ་དེ་སྟོན་ཏོ། །རབ་ཏུ་དབེན་པ་དང༌། ཉམས་དགའ་བ་ནི་རབ་ཏུ་དབེན་ཞིང་ཉམས་དགའ་བའོ། །དུས་ཐམས་ཅད་དུ་རྙེད་པར་སླ་བའི་མེ་ཏོག་དང༌། འབྲས་བུ་གང་ན་ཡོད་པ་དེ་ནི། མེ་ཏོག་དང༌། འབྲས་བུ་དུས་ཐམས་ཅད་དུ་རྙེད་སླ་བའོ། །སྐྱེད་མོས་ཚལ་ཉིད་དགའ་ཞིང་མཛེས་པ་གང་ཡིན་པ་དེ་ནི་སྐྱེད་མོས་ཚལ་ཉམས་དགའ་བ་ཤིན་ཏུ་མཛེས་པ་དེའོ། །བཀྲ་ཤིས་པ་ནི་ཐོས་པའི་ཆོས་ལ་འདོད་པའི་འབྲས་བུ་སྟེར་བའི་ཕྱིར་རོ། །ཡིད་དུ་འོང་བ་ནི་མཐོང་བའི་ཆོས་ཀྱི་ཡིད་ཀྱི་དྲི་མ་སེལ་བའི་ཕྱིར་རོ། །རྟེན་ནི་འཇིག་རྟེན་ཕ་རོལ་གྱི་མི་འདོད་པའི་འབྲས་བུ་སྨིན་པར་བྱེད་པའི་སྡིག་པ་འཁྲུ་བའི་ཕྱིར་རོ། །དཀའ་ཐུབ་ཀྱི་ཚལ་ནི་འཇིག་རྟེན་ཕ་རོལ་གྱི་ཡིད་དུ་འོང་བའི་འབྲས་བུའི་རྒྱུ་དགེ་བ་སྐྱེ་བའི་གཞི་ཡིན་པའི་ཕྱིར་རོ། །སྐྱེད་མོས་ཚལ་གྱི་ཡོན་ཏན་པས་ཁྱད་པར་དུ་གྱུར་པ་ནི། སྐྱེད་མོས་ཚལ་གྱི་ཡོན་ཏན་བས་ལྷག་བའོ། །དེའི་གནས་སུ་གྱུར་པ་ནི་སྐྱེད་མོས་ཚལ་གྱི་ཡོན་ཏན་བས་ཀྱང་ལྷག་པའི་གནས་སུ་གྱུར་པའོ། །འཁྲིད་ཤིང་འཁྱིལ་པས་གཏིབས་པ་ཞེས་བྱ་བ་ནི། གྲང་ཕ་སེལ་བར་བྱེད་པ་སྟེ། ལྡིང་ཁང་ནི་བསིལ་བའོ། །མེ་ཏོག་རྒྱས་པའི་ལྗོན་ཤིང་དགོད་པ་བཞིན། །པདྨ་རབ་ཏུ་རྒྱས་པའི་མཚོ་འགྲམ་ན། །ཞེས་བྱ་བས་ནི་ཚ་བ་བཙལ་བས་སོ། །གཞལ་མེད་ཁང་ལ་ལྟ་བས་ཆགས་གྱུར་བ།། ཞེས་བྱ་བ་ནི་དུས་དྲོ་བའི་ཕྱིར་དང༌། གཞལ་མེད་ཁང་རབ་ཏུ་མཛེས་པའི་ཕྱིར་རོ། །པདྨའི་མཚོ་ཞེས་བྱ་བ་ལ་པདྨའི་མཚོ་ནི་གྲང་པའི་ཕྱིར་ཏེ། དུས་ནི་དྲོ་བ་ཉིད་ཀྱིས་བུང་བ་དང་རད་པ་བཞིན་དུ་མེ་ཏོག་ཤིང་ལ་ཞེས་པ་ནི་མེ་ཏོག་ལ་ལྷག་པར་ཆགས་པའི་ཕྱིར་རོ། །སྐབས་ནི་མཚམས་ཏེ། དུས་ལ་བས་བར་
ཤེས་པ་སྟེ། གཉིད་ཀྱི་དབང་དུ་གྱུར་པའི་ཕྱིར་རོ། །ཇི་ལྟར་དགའ་བའི་ཚན་ཚན་དུ་ཆད་པ་དེ་ནི་དགའ་སྟེ། དགའ་སྡེར་ཆད་པའོ། །དེས་ན་དཀའ་ཐུབ་ཀྱི་གནས་སུ་ཕྱིན་པར་གྱུར་ཏོ། །བསྙེན་དཀའ་བའི་རྒྱུས་རབ་ཏུ་ཟབ་པའོ། །དཀའ་ཐུབ་ཀྱི་དཔལ་འབར་བ་དང༌། བསམ་གཏན་ལ་གོམས་པར་བྱས་ཞེས་བྱ་བ་ནི་ཉོན་མོངས་པ་བཀག་པའི་ཕྱིར་རོ། །གཡེང་བ་དང༌། འཛེམ་པ་དང༌། འཕྱར་བ་གང་གིས་བཏང་བ་དེ་ནི། གཡེང་བ་དང༌། འཛེམ་པ་དང༌། འཕྱར་བ་བཏང་བའོ། །དྲི་བ་ནི་དེ་དག་ལ་ནང་དྲི་བའོ། །དེ་དག་ལ་ནད་དྲི་བའི་སྐབས་ནས་གླེང་བསླང་བ་གང་ཡིན་པའི་གཏམ་དོན་དེ་དག་ལ་ནང་དྲི་པའི་སྐབས་ནས་གླེང་བསླང་བའོ། །གོ་བར་སླ་བའི་དོན་གང་ཡིན་པ་དེ་ནི་གོ་བར་སླ་བའོ། །བུད་མེད་ཀྱི་སྐྱེ་བོ་དག་གིས་གོ་བར་སླ་བའི་དོན་གང་ཡིན་པ་དེ་ནི། བུད་མེད་ཀྱིས་གོ་བར་སླ་བའོ། །ཡང་ན་གཟུང་བར་བྱ་བ་ཡིན་པས་གཟུང་བའོ། །བདེ་བར་གཟུང་བའི་དོན་གང་ཡིན་པ་དེ་ནི་བདེ་བར་ཟིན་པའོ། །ལྷག་མ་ནི་སྔ་མ་བཞིན་ནོ། །ནད་དྲི་བའི་སྐབས་ནས་གླེང་བསླང་བ་ཞེས་བྱ་བ་ལ་སོགས་པ་གསུམ་གྱི་དམ་བཅའ་བ་དང༌། གཏན་ཚིགས་དང༌། དཔེ་སྟེ། གོ་རིམས་བཞིན་དུ་སྦྱར་རོ། །མ་སྨད་ཅེས་བྱ་བ་ནི་ཡ་རབས་ཉིད་དུ་སྐྱེས་པ་ཞེས་བྱ་བའི་དོན་ཏོ། །མིའི་ལུས་སུ་སྐྱེས་པ་ཞེས་བྱ་བ་ནི་མི་ཉིད་དུ་ཞེས་བྱ་བ་ཡིན་ནོ། །དེ་བཞིན་དབང་པོ་རྣམས་ཀྱང་མ་ཉམས་རྣོ་དང་ལྡན། །ཞེས་བྱ་བ་ལ་དབང་པོ་ཐམས་ཅད་མ་ཉམས་པ་ནི། མ་ཚང་བ་མེད་པ་དང༌། རྣོ་བ་དང་ལྡན་པའོ། །དེས་པར་འཆི་བདག་ཅེས་བྱ་བ་ནི་འཆི་བའི་ཆོས་སོ། །བག་མེད་པར་གྱུར་བ་ཞེས་བྱ་བ་ནི་དགེ་བའི་ཆོས་རྣམས་མི་བསྟེན་པའོ། །དགེ་བའི་ཆོས་དེ་ཡང་སྦྱིན་པ་དང༌། ཚུལ་ཁྲིམས་ལ་སོགས་པ་སྟེ། དེ་དག་ལ་མ་བརྟེན་ཅིང༌། མ་བསྒོམས་པས་ནི་བསླུས་པར་གྱུར་པ་ཡིན་ཏེ། དགེ་བའི་ཆོས་མ་བསྒོམས་ན་ནི་ཡང་དེའི་འབྲས་བུ་འཐོབ་པར་མི་འགྱུར་རོ། །དེ་ཡང་ཚེ་སྐད་ཅིག་མ་གཅིག་གིས་ཟད་པ་དང༌། ཚེ་ཐུང་བའི་ཕྱིར་དང༌། འདས་ནས་ཀྱང་ལྡོག་པ་མེད་པའི་ཕྱིར་རོ། །འདི་ནི་རེ་ཞིག་དམ་བཅའ་བའོ། །ཅིའི་ཕྱིར་སླུ་བ་ཡིན་ཞེ་ན། དགེ་བ་མི་བྱེད་བས་སོ། །འདི་ནི་གཏན་ཚིགས་སོ། །དེའི་རྒྱུ་རབ་ཏུ་མི་འབྱུང་ཞིང་ཟད་པ་དང༌། དེའི་རྒྱུ་འབྱུང་བར་བསྟན་པའི་ཕྱིར་ཚིགས་བཅད་གཉིས་སྨོས་ཏེ། རབ་ཏུ་
སྦྱིན་དང་ཞེས་བྱ་བ་དང༌། རིགས་ལ་སོགས་པ་དམན་ཡང་ཞེས་བྱ་བའི་ཚིགས་བཅད་དོ། །རིགས་ནི་ཚུལ་ཁྲིམས་ཀྱི་འབྲས་བུའོ། །གཟུགས་དང༌། ལང་ཚོའི་ཡོན་ཏན་དང༌། སྟོབས་རབ་ཏུ་ཆེ་བ་དང༌། ནོར་ལ་སོགས་པ་ནི་སྦྱིན་བའི་འབྲས་བུའོ། །དེ་ཡང་ཁ་དོག་ཕུན་སུམ་ཚོགས་བར་བྱིན་པས་ནི། གཟུགས་བཟང་བའོ། །ཡང་ན་གོས་བྱིན་པས་སོ། །ལང་ཚོའི་ཡོན་ཏན་རྣམས་དང༌། སྟོབས་རབ་ཏུ་ཆེ་བ་ནི། ཉམས་བརྟས་པའི་བཟའ་བ་དང༌། བཏུང་བ་བྱིན་པའི་འབྲས་བུའོ། །ནོར་གྱིས་ཕྱུག་པར་གྱུར་པ་ནི་ནོར་བྱིན་པའི་འབྲས་བུའོ། །ཕྱི་མ་ལ་ཡང་བདེ་བ་འཐོབ་མི་འགྱུར། །ཞེས་བྱ་བ་ནི་འཇིག་རྟེན་ཕ་རོལ་དུ་སྟེ། འཇིག་རྟེན་འདིའི་བདེ་བའི་རྒྱུས་ཏེ། བདེ་བ་ནི་དགེ་བ་ལ་སོགས་པ་ཡིན་པས་སོ། །རབ་ཏུ་སྦྱིན་དང་ཚུལ་ཁྲིམས་ལ་སོགས་པ་ཞེས་བྱ་བ་ལ་སོགས་པ་སྨོས་པས་ནི་བཟོད་པ་དང༌། བརྩོན་འགྲུས་ཀྱང་གཟུང་ངོ༌། །དགེ་བ་དེ་ནི་ཐམས་ཅད་ཀྱི་རྒྱུ་ཡིན་པའི་ཕྱིར། འདི་ལས་བྱུང་ཞེས་བྱ་བས་བསྟན་བ་ཡིན་ནོ། །ད་ནི་འབྲས་བུ་དེ་མེད་པར་ཡང་སྦྱིན་པ་ལ་སོགས་པ་དང་ལྡན་ན་འབྲས་བུ་སྐྱེ་བའི་དབང་དུ་བྱས་ནས། དེ་མེད་ཀྱང་དེའི་དངོས་པོའི་རྒྱུ་མཚན་ཉིད་བསྟན་པའི་ཕྱིར་སྨྲས་པ། རིགས་ལ་སོགས་པ་དམན་ཡང་ཞེས་བྱ་བའི་ཚིགས་བཅད་སྨོས་སོ།། སྡིག་པ་ལ་མ་ཆགས་ཤིང་ཞེས་བྱ་བས་ནི། སྡིག་པ་ལས་ལྡོག་པར་སྟེན་ཏེ། མི་དགེ་བའི་ལས་ཀྱི་ལམ་ལས་ལྡོག་པ་ཞེས་བྱ་བའི་དོན་ཏོ། །རབ་ཏུ་སྦྱིན་དང་ཚུལ་ཁྲིམས་ལ་སོགས་ཡོན་ཏན་ལྡན། །ཞེས་བྱ་བ་ནི། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའོ། །ཕྱི་མའི་ཚེ་ལའང་བདེ་བ་ཞེས་བྱ་བ་ནི། འཇིག་རྟེན་ཕ་རོལ་དུ་ཡང་བདེ་བའི་རྒྱུ་དགེ་བ་ལ་སོགས་པའོ། །ཚུལ་ཁྲིམས་ལ་སོགས་པའི་འབྲས་བུ་ཇི་ལྟ་བུ་ཞེ་ན། དབྱར་གྱི་དུས་ན་འབབ་ཆུས་རྒྱ་མཚོ་གང་བ་བཞིན། །ཞེས་བྱ་བ་ཡིན་ནོ། །འཇིག་རྟེན་དུ་བདེ་བ་རྒྱས་པར་འགྱུར་བར་མ་ཟད་དེ། མཐོང་བའི་ཆོས་འདི་ལ་ཡང་ཚུལ་ཁྲིམས་ཀྱི་ཕན་ཡོན་རིགས་ལ་སོགས་པའི་རྒྱན་དུ་ཡང་འགྱུར་ཏེ། ཚུལ་ཁྲིམས་ལ་སོགས་པ་དང་ལྡན་པ་དེ་བསྟན་པའི་ཕྱིར། རིགས་དང་གཟུགས་དང་ལུས་ཀྱི་ཡོན་ཏན་རྣམས་ཀྱང་རུང༌། །ཞེས་བྱ་བའི་ཚིགས་བཅད་སྨོས་སོ། །འདིའི་བསྡུས་
པའི་དོན་ནི་ཚུལ་ཁྲིམས་དང༌། བཟོད་པ་དང༌། སྦྱིན་པའི་འབྲས་བུ་བདག་ཉིད་ཆེ་བ་དང༌། འབྱོར་པ་དང༌། གཡོག་འཁོར་ཕུན་སུམ་ཚོགས་པ་ལ་གནས་པའོ། །དེ་ལྟར་བྱུང་བའི་བདག་ཉིད་ཆེ་བ་དང༌། གཡོག་འཁོར་འབྱོར་པའི་རྒྱུ་དེ་བས་ཁྱད་པར་དུ་གྱུར་ཅིང༌། དེ་དག་གི་རྒྱན་དུ་གྱུར་པ་ཡིན་ཏེ། ཇི་ལྟར་ཤིང་དང༌། ཆར་སྤྲིན་དང༌། མཚོ་དག་ལ་མེ་ཏོག་དང༌། གློག་ཕྲན་འགྱུ་བ་དང༌། བུང་བ་མྱོས་པ་འདུ་བའི་པདྨ་ལྟ་བུ་སྟེ། དེ་ལ་ཤིང་ལྟ་བུ་ནི་ཚུལ་ཁྲིམས་ཀྱི་འབྲས་བུ་སྟེ། ད་ལྟར་བྱུང་བའི་བདག་ཉིད་ཆེན་པོའི་མཐོ་བ་ཉིད་དེ་ལ་རྒྱན་དུ་གྱུར་བར་བྱེད་དེ། དེ་ལས་ཀྱང་ཁྱད་པར་དུ་གྱུར་པའི་མཐོ་བ་ཕུན་སུམ་ཚོགས་པའི་རྒྱུ་ད་ལྟར་བྱུང་བའི་ཚུལ་ཁྲིམས་ཏེ། ཇི་ལྟར་ཤིང་རྣམས་མཐོ་བ་ཉིད་ལ་གཞན་མེ་ཏོག་གིས་བརྒྱན་པའི་རྒྱུས་སོ། །ཆར་སྤྲིན་ལྟ་བུ་ནི་ད་ལྟར་བྱུང་བའི་སྦྱིན་པའི་འབྲས་བུ་ལོངས་སྤྱོད་ཕུན་སུམ་ཚོགས་པའོ། །ཆང་གྱི་རྟགས་གློག་ཕྲན་འགྱུ་བ་ལྟ་བུ་ནི་སྦྱིན་པ་པོའི་རྟགས་མ་འོངས་པ་ན་ཁྱད་པར་དུ་གྱུར་པའི་བདག་ཉིད་ཀྱི་ཕུན་སུམ་ཚོགས་པ་མཐོང་བ། སྦྱིན་པའི་འབྲས་བུ་ད་ལྟར་བྱུང་བ་ལ་བྱས་པ་ནི་ཆར་གྱི་རྟགས་གློག་ཕྲན་འགྱུ་བ་དང་འདྲ་བར་སྦྱིན་པ་པོའི་རྟགས་མ་འོངས་པ་ན། དེ་ལས་ཁྱད་པར་དུ་གྱུར་པའི་ལོངས་སྤྱོད་ཀྱི་རྒྱུ་དག་གིས་བརྒྱན་པར་གྱུར་པ་ཡིན་ནོ། །མཚོ་ལྟ་བུ་ནི་ད་ལྟར་བྱུང་བའི་བཟོད་པའི་འབྲས་བུ་བཀུར་སྟི་དང༌། གཡོག་འཁོར་ཕུན་སུམ་ཚོགས་པའོ། །བུང་བ་མྱོས་པའི་པདྨ་ལྟ་བུ་ནི་གཞན་དེ་ལས་ཁྱད་དུ་གྱུར་པའི་གཡོག་འཁོར་ཕུན་སུམ་ཚོགས་པའི་རྒྱུ་བཟོད་པ་ད་ལྟར་བྱུང་བའི་རྒྱན་དུ་གྱུར་བ་ཡིན་ནོ། །ཡོན་ཏན་ཁྱད་པར་འཕགས་པ་ལུས་ཅན་དག་གི་རྒྱན། །ཞེས་བྱ་བ་ལ། ཚུལ་ཁྲིམས་དང༌། སྦྱིན་པ་དང༌། བཟོད་པ་རྣམས་ཀྱི་ཁྱད་བར་དུ་གྱུར་པའི་དབང་དུ་བྱས་པ་ནི་དེ་ལས་ཁྱད་པར་དུ་གྱུར་པ་རྣམས་ཀྱིས་སོ། །ཚུལ་ཁྲིམས་ལ་སོགས་པས་རིགས་ལ་སོགས་པ་འཐོབ་པར་འགྱུར་ཞིང༌། གཞན་དུ་མི་འགྱུར་བར་ཇི་ལྟར་ཤེས་པར་བྱ་ཞེ་ན། དེ་བསྒྲུབ་པའི་ཕྱིར། ནད་མེད་ཚེ་རིང་ནོར་དར་ཞེས་བྱ་བའི་ཚིགས་བཅད་སྨོས་སོ། །ནད་མེད་པ་དང༌། ཚེ་རིང་བ་དང༌། རིགས་ནི་ཚུལ་ཁྲིམས་ཀྱིའོ། །ནོར་ནི་སྦྱིན་པའི་འོ། །གཟུགས་ནི་བཟོད་པའོ། །རབ་དང༌། འབྲིང་དང༌། ཐ་མ་ནི་རབ་འབྲིང་ཐ་མའོ། །དེ་ཉིད་ཀྱི་བྱེ་བྲག་དག་ནི་རབ་འབྲིང་ཐ་མའི་བྱེ་བྲག་གོ །དེ་དག་སྣ་
ཚོགས་པ་ནི་རབ་འབྲིང་ཐ་མའི་བྱེ་བྲག་སྣ་ཚོགས་པའོ། །ཡང་ན་རབ་འབྲིང་ཐ་མ་དག་ནི་བྱེ་བྲག་སྟེ། ལྷག་མ་ནི་སྔ་མ་བཞིན་ནོ། །ངོ་བོ་ཉིད་ལས་གྱུར་པ་ནི་མ་ཡིན་ཏེ། ཅིའི་ཕྱིར་ཞེ་ན། རྒྱུ་མེད་པ་ཉིད་ཀྱི་བྱེ་བྲག་ལས་བྱུང་བའི་དངོས་པོ་མེད་དེ། འདིས་ནི་རྒྱུ་མེད་པར་སྣ་བ་བསལ་ཏོ། །སེམས་ཅན་སྣ་ཚོགས་པ་ནི་གཞན་གྱིས་བསྐྱེད་པ་མ་ཡིན་ཏེ། དབང་ཕྱུག་ལ་སོགས་པས་སོ། །གལ་ཏེ་རྒྱུ་གཅིག་གིས་བསྐྱེད་པ་ཡིན་ན། འགྲོ་བ་རྣམས་བྱེ་བྲག་མེད་པར་འགྱུར་ཏེ། འདིས་ནི་མི་མཐུན་པ་རྒྱུར་སྨྲ་བ་བསལ་ཏེ། དེ་ལྟ་མོད་ཀྱི་རབ་ལ་སོགས་པའི་བྱེ་བྲག་ནི་སེམས་ལས་བྱུང་བ་ཡིན་ཏེ། དེའི་ཕྱིར་སྨྲས་པ། ལས་ནི་རྣམ་པ་གསུམ་ལས་གྱུར། །ཅེས་བྱ་བ་སྟེ། རྣམ་བ་གསུམ་ནི་ལུས་དང༌། ངག་དང༌། ཡིད་རྣམ་བ་གསུམ་གྱི་དབྱེ་བའོ། །དེ་ནི་སོ་སོའི་དབང་གིས་མཐའ་ཡས་པ་སྟེ་འགྲོ་བ་སྣ་ཚོགས་ཀྱི་དབྱེ་བ་མཐའ་ཡས་པར་རིགས་བ་ཉིད་དོ། །འདི་དག་ལས་རྣམ་པ་གསུམ་ལས་གྱུར་པར་ཤེས་པ་ཡིན་པའི་ཕྱིར། འདི་ལྟར་འཇུག་པར་བྱ་སྟེ། མི་བརྟན་པ་ཞེས་བྱ་བ་ནི་སྐད་ཅིག་གིས་འཇིག་པ་སྟེ། མི་རྟག་པ་ཉིད་དུ་སྟོན་ཏོ། །འཆི་བ་དང་ཉེ་བ་ཞེས་བྱ་བ་སྐལ་བ་མཐུན་པའི་རིས་ལས་མི་རྟག་པ་ཉིད་དུ་སྟོན་ཏོ། །སྡིག་པ་སྤང་བར་གྱིས་ཞེས་བྱ་བ་ནི་མི་དགེ་བའི་ལས་ཀྱི་ལམ་མོ། །དགེ་བའི་ཕྱོགས་ལ་བརྟེན་པ་ནི། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་བརྟེན་པའོ། །ཅིའི་ཕྱིར་ག་ལས་ཤེ་ན། ལམ་ནི་འདི་ཡིན་ནོ་ཞེས་བྱ་བ་སྟེ། དགེ་བའི་ཕྱོགས་ལ་བརྟེན་པ་དང༌། སྡིག་པ་སྤང་བའོ། །གྲགས་པ་ནི་ཚེ་འདིའི་ཕན་ཡོན་བསྟན་པ་ཡིན་ནོ། །བདེ་བ་འཐོབ་པ་ནི་འཇིག་རྟེན་ཕ་རོལ་གྱི་ཡིན་ཏེ། བདེ་བ་འདོད་པ་དག་ཏུ་བདེ་བ་འཐོབ་པའོ། །འགྲོ་བ་དག་ལ་འདས་པའི་དུས་ཀྱི་བཟོད་པ་ནི་མ་བསྟན་ཏེ། བསོད་ནམས་ཀྱི་ཚོགས་ཀྱི་མཚན་ཉིད་དང༌། བསོད་ནམས་ཀྱི་ཚོགས་ཀྱི་འབྲས་བུའི་དབང་དུ་བྱས་ནས་ཐ་དད་པར་རྗེས་སུ་བསྟན་པའོ། །དེས་ན་ད་ནི་བཟོད་པ་ལས་བརྩམས་ནས། ཡིད་ལ་ཞེ་སྡང་ཡོད་ན་ཡང༌། །ཞེས་བྱ་བ་ལ་སོགས་པའི་ཚིགས་བཅད་བརྒྱད་ཀྱིས་བསྟན་ཏེ། ཡིད་ལ་ཞེ་སྡང་ཡོད་ན་ཡང༌། །ཞེས་བྱ་བ་ནི། བཟོད་པ་མེད་ན་ཞེས་བྱ་བའི་དོན་ཏོ། །གཞན་ལ་ཕན་པ་མ་ཡིན་པས་མི་བཟོད་པར་
བྱེད་པ་སྟེ། གཞན་མི་འདོད་པར་བྱེད་པའི་ཕྱིར་རོ། །བདག་ལ་ཡང་སྐྱེ་བ་གཞན་ལ་ཕན་པར་འགྱུར་བ་མེད་ཅིང༌། རབ་ཏུ་སྡིག་པར་བྱེད་དེ། བདག་དང་གཞན་གྱི་ངན་སོང་གི་རྒྱུར་གྱུར་པའི་ཕྱིར་རོ། །དེ་དག་གིས་ཞེས་བྱ་བ་ནི་ཡིད་ལ་ཞེ་སྡང་ཡོད་པའོ། །སྡིག་ལ་འཛེམ་པ་ནི་མི་འདོད་པའི་འབྲས་བུ་ལ་འཇིགས་པས་སོ། །གཉེན་པོ་རྣམས་ལ་བརྟེན་ནས་ཞེས་བྱ་བ་ནི། བཟོད་པ་ལ་བརྟེན་པའོ། །ཡིད་ལ་ཞེ་སྡང་ཡོད་པའི་གཉེན་པོ་ཉིད་དུ་བསྟན་པའི་ཕྱིར། དགོན་པའི་མེ་ནི་ཞེས་བྱ་བའི་ཚིགས་བཅད་སྨོས་སོ། །མ་དང་འདྲ་བ་ནི་ཡིད་ལ་ཞེ་སྡང་ཡོད་པ་སྟེ། བདག་དང་གཞན་ལ་གནོད་ཅིང་སྲེག་པའི་ཕྱིར་རོ། །ཆུ་ཀླུང་ཆེན་པོ་དང་འདྲ་བ་ནི་བཟོད་པ་སྟེ། ཡིད་ལ་ཡོད་པའི་ཞེ་སྡང་གི་མེ་རབ་ཏུ་ཞི་བར་བྱེད་པའི་ཕྱིར་རོ། །བཟོད་པ་བསྟེན་ན་ཞི་བར་འགྱུར། །ཞེས་བྱ་བ་ལ། ཇི་ལྟར་བཟོད་པ་བསྟེན་ན་ཞི་བར་འགྱུར་བ་ཉིད་བསྟན་པའི་ཕྱིར། དེ་བས་དེའི་རྒྱུ་ཟིལ་གྱིས་མནན་པས་བཟོད་པ་སྡིག་པ་སྤོང༌། །ཞེས་བྱ་བའི་ཚིགས་བཅད་ཡིན་ཏེ། སྡིག་པ་ཞེས་བྱ་བ་ནི་མི་དགེ་བའི་ལས་སོ། །དེའི་རྒྱུ་ཟིལ་གྱིས་མནན་པས་ཞེས་བྱ་བ་ནི་སྡིག་པ་དེའི་རྒྱུ་སྟེ། དེའི་རྒྱུ་ནི་ཡིད་ལ་ཞེ་སྡང་ཡོད་པའོ། །དེ་ཟིལ་གྱིས་མནན་པ་ནི་དེའི་གཉེན་པོ་བཟོད་བ་ལ་བརྟེན་པས་སོ། །དེའི་ཕྱིར་ཞེས་བྱ་བས་ནི་སྡིག་པ་ཡོངས་སུ་སྤངས་པས་སོ། །དགྲ་ཡང་འཕེལ་མི་འགྱུར་ཞེས་བྱ་བ་ནི་སྔར་སྐྱེས་པ་ཞི་བར་བྱེད་པ་དང༌། སྔར་མ་སྐྱེས་པ་ཡིད་ལ་གནས་པའི་མི་དགེ་བ་ལ་འཇུག་པ་མེད་པ་སྟེ། མི་དགེ་བའི་བདག་ཉིད་གནོད་བ་ཉིད་དོ། །འགའ་ཞིག་ཅེས་བྱ་བ་ནི་དགྲ་སྟེ། མི་མཐུན་པའི་ཕྱོགས་མགུ་བ་བསྐྱེད་བ་སྟེ། བདག་ཉིད་ལ་ཡིད་ཀྱིས་སོ། །མཆོད་པར་འོས་པ་ནི་ལུས་དང༌། ངག་གི་ལས་ཀྱིས་མཆོད་པ་ཐོབ་པར་བསྟན་ཏོ། །བདེ་བའི་སྐལ་བ་དང་ལྡན་པར་འགྱུར་ཞེས་བྱ་བ་ནི། མཐོང་བའི་ཆོས་ཀྱི་གཞན་དང་འབྲེལ་པའི་བདེ་བ་སྟེ། མཆོད་པ་དང༌། དགའ་བ་གཉིས་ཀྱིས་བདེ་བའི་སྐལ་བ་དང་ལྡན་པར་འགྱུར་བའོ། །མཐོ་རིས་འགྲོ་བར་འགྱུར་ཞེས་བྱ་བ་ནི། འཇིག་རྟེན་ཕ་རོལ་དུ་བདེ་བ་འཐོབ་པ་ཡིན་ཏེ། དེ་བས་ན་སྐྱོན་འདི་མེད་པ་ཡིན་པས། བཟོད་པ་བསྟེན་ན་དེ་དག་གི་མཐུ་ཉིད་དུ་འགྱུར་རོ། །གཞན་ཡང་ཀྱེ་བཙུན་མོ་ཞེས་བྱ་བ་ནི་བཟོད་པའི་རྣམ་པ་གཞན་བསྟན་པའི་ཕྱིར། དགེ་བའི་རང་
བཞིན་ཅན་དུ་རབ་ཏུ་གྲགས། །ཞེས་བྱ་བའི་ཚིགས་བཅད་ལྔ་སྨོས་ཏེ། དེ་ལ་དགེ་བའི་རང་བཞིན་ཞེས་བྱ་བའི་ཚིགས་བཅད་ནི་བཟོད་པའི་འབྲས་བུའི་རང་བཞིན་གྱི་གཉེན་པོ་དང་རྗེས་སུ་མཐུན་པའི་ཡོན་ཏན་གྱི་དབང་དུ་བྱས་པ་སྟེ། དགེ་བ་ཞེས་བྱ་བ་ལ་དགེ་བའི་རང་བཞིན་ནི་ཇི་ལྟ་བུ་ཡིན། ཇི་ལྟར་མ་ཆགས་པ་དང༌། ཞེ་སྡང་མེད་པ་དང༌། གཏི་མུག་མེད་པ་ཡིན་ནམ། འོན་ཏེ་མཚུངས་པར་ལྡན་པ་སྟེ། ཇི་ལྟར་ཚོར་བ་ལ་སོགས་པ་ཐམས་ཅད་དུ་འགྲོ་བ་རྣམས་དང་བཅས་པ་ཡིན་ནམ། འོན་ཏེ་ཀུན་ནས་བསླང་བ་སྟེ། ཇི་ལྟར་ལས་རྣམས་དང་བཅས་པ་ཡིན་ནམ། འོན་ཏེ་དོན་དམ་པའི་ཆོས་ཏེ། ཇི་ལྟར་མྱ་ངན་ལས་འདས་པ་ཡིན་ནམ་སྙམ་ན། ཇི་ལྟར་རང་བཞིན་གྱི་དགེ་བ་སྟེ། ཞེ་སྡང་མེད་པའི་མཚན་ཉིད་ཀྱི་ཕྱིར་རོ། །རང་བཞིན་ཡང་ཡིན་ལ་ཁྱད་པར་ཡང་ཡིན་པས་རང་བཞིན་ཁྱད་པར་ཅན་ནོ། །དེའི་རབ་ཏུ་གྲགས་པ་ནི་རབ་ཏུ་གྲགས་བ་ཁྱད་པར་ཅན་ནོ། །འདིས་ནི་རང་བཞིན་གྱི་དགེ་བ་ཉིད་དུ་བསྟན་ཏེ། འདི་ནི་རེ་ཞིག་རང་བཞིན་གྱི་བཟོད་པ་ཡིན་ནོ། །བསོད་ནམས་གྲགས་པ་དག་ཀྱང་རབ་ཏུ་འཕེལ། །ཞེས་བྱ་བ་བསོད་ནམས་རབ་ཏུ་འཕེལ་བ་ནི། འཇིག་རྟེན་ཕ་རོལ་དུ་འབྲས་བུ་བདེ་འགྲོར་འགྲོ་བའོ། །གྲགས་པ་རབ་ཏུ་འཕེལ་བ་ནི། །མཐོང་བའི་ཆོས་ཀྱི་འབྲས་བུའོ། །ཆུ་ཡིས་མ་བཀྲུས་པར་ཡང་དག་པར་འགྱུར། །ཞེས་བྱ་བ་འདིས་ནི། མི་དགེ་བ་ཐམས་ཅད་ཀྱི་གཉེན་པོ་ཉིད་དོ། །ཡོན་ཏན་དེ་དང་དེ་དག་ཕུན་སུམ་ཚོགས། །ཞེས་བྱ་བ་འདིས་ནི་ཡོན་ཏན་ཐམས་ཅད་དང་རྗེས་སུ་མཐུན་པ་ཉིད་དོ། །དགེ་བའི་རང་བཞིན་ཅན་དུ་རབ་ཏུ་གྲགས།། ཞེས་བྱ་བ་བསྟན་པ་ལ་དགེ་བའི་རང་བཞིན་ཉིད་དུ་བསྟན་པར་འདོད་པའི་ཕྱིར། གཞན་ལ་གནོད་པ་རྟག་ཏུ་ཡོང་མི་ཤེས། །ཞེས་བྱ་བའི་ཚིགས་བཅད་སྨོས་སོ། །ཆོས་ཉིད་ཅེས་བྱ་བ་ནི་རྟག་པའོ། །ཡང་ན་ཆོས་ཉིད་ཀྱི་མཚན་ཉིད་ཇི་ལྟ་བུ་ཉིད་ཡིན་པ་དེ་ཉིད་བསྟན་པའི་ཕྱིར་སྨྲས་པ། གཞན་དག་ལ་ཉེ་བར་གནོད་པ་ནི་གནོད་བ་སྟེ། སྲོག་གཅོད་པ་ལ་སོགས་པ་མི་དགེ་བ་བཅུའི་ལས་ལ་མི་འཇུག་པའི་མཚན་ཉིད་ཅེས་བྱ་བའི་དོན་ཏོ། །གང་དག་གི་ཆོས་ཉིད་ཡིན་ཞེ་ན། སྙིང་སྟོབས་ཅན་ཏེ་བྱང་ཆུབ་སེམས་དཔའ་རྣམས་ཀྱིའོ། །ཆོས་ཉིད་ཇི་ལྟ་བུ་ཡིན་ཞེ་ན། ཡིད་དུ་འོང་ཞེས་བྱ་བ་སྨོས་སོ། །
དེའི་མིང་ཇི་སྐད་དུ་བཏགས་ཤེ་ན། བཟོད་པ་ཞེས་བྱ་བའི་མིང་ཡིན་ཏེ། དེའི་མིང་ཡོན་ཏན་དང་ལྡན་པ་ཉིད་དུ་བསྟན་པའི་ཕྱིར་སྨྲས་པ། ཡོན་ཏན་གྱིས་མངོན་པར་བསྒྲུབས་པ་ཉིད་དུ་མཛེས་པའི་མིང་གང་ཡིན་པ་དེ་ནི་ཡོན་ཏན་མངོན་བསྒྲུབས་བཟོད་པ་སྟེ། མཛེས་པའི་མིང་བདག་དང༌། གཞན་གཉི་གལ་མཛེས་པའི་ཕྱིར་བཟོད་པའོ། །འཇིག་རྟེན་གྱི་དོན་བྱེད་པ་ནི། འཇིག་རྟེན་ལ་ཕན་པར་བྱེད་པ་སྟེ། འདིས་ནི་གཞན་ལ་ཕན་པའི་རྒྱུ་ཉིད་དུ་བསྟན་ཏོ། །སྙིང་རྗེས་བཀའ་སྩལ་ཅེས་བྱ་བ་ནི། སྙིང་རྗེ་ཅན་གྱི་བཀའ་ཡིན་པས་སྙིང་རྗེས་བཀའ་སྩལ་པའོ། །འདོད་ཆགས་མེད་པའི་རང་བཞིན་དང༌། འདོད་ཆགས་མེད་པའི་མཚན་ཉིད་བཟོད་པ་གཞན་གྱི་དོན་བྱེད་པར་འཇུག་པ་ཡིན་ཏེ། ཇི་ལྟར་བཟོད་པའི་རྒྱུ་བསྟན་ཏོ། །བསོད་ནམས་གྲགས་པ་དག་ཀྱང་རབ་ཏུ་འཕེལ། །ཞེས་བྱ་བ་དེའི་དོན་རྗེས་སུ་བསྟན་པ་ནི་མ་བཤད་དེ། དེ་བས་དེའི་རྒྱུ་ཟིལ་གྱིས་མནན་པས་བཟོད་པས་སྡིག་པ་སྤོང་བ་ཞེས་བྱ་བའི་ཚིགས་བཅད་དེར་བསྟན་ཟིན་པའི་ཕྱིར་རོ། །ཆུ་ཡིས་མ་བཀྲུས་པར་ཡང་དག་པར་འགྱུར། །ཞེས་བྱ་བ་འདིའི་རྗེས་སུ་བསྟན་པ་ནི། མཐུ་དང་ལྡན་པ་རྣམས་ཀྱི་རྒྱན་ཡང་ཡིན། །ཞེས་བྱ་བའི་ཚིགས་བཅད་འདིས་བསྟན་ཏེ། གང་དག་འདི་རྣམ་པར་དག་པར་བྱེད་པ་ཡིན་ཞེ་ན། དེ་བསྟན་པའི་ཕྱིར་ཚིགས་བཅད་འདི་སྨོས་ཏེ། ཁྱིམ་པ་དང༌། རབ་ཏུ་བྱུང་བ་རྣམས་ཀྱིའོ། །ཁྱིམ་པ་རྣམས་ཀྱི་ནི། མཐུ་དང་ལྡན་པ་རྣམས་ཀྱི་རྒྱན་ཡང་ཡིན། །ཞེས་བྱ་བ་ཡིན་ཏེ། གནོད་སེམས་ཀྱིས་དགོན་པའི་མེ་ལ་ཆུ་རྒྱུན་འབེབས་པའོ། །དཀའ་ཐུབ་ཅན་གྱི་སྟོབས་མཆོག་ཕུན་སུམ་ཚོགས་པ་ཡོད་ན་ནི། གནོད་སེམས་དགོན་པའི་མེ་ལ་ཆུའི་རྒྱུན་འབེབས་པ་ཡིན་ཏེ། གནོད་སེམས་ཀྱི་དགོན་པའི་མེ་ལ་ཆུའི་རྒྱུན་འབེབས་ཞེས་བྱ་བ་ཡིན་ཏེ། གནོད་སེམས་ཀྱི་དགོན་པའི་མེ་ལ་ཆུའི་རྒྱུན་དང་འདྲ་བར་དེ་ཉེ་བར་ཞི་བ་སྟེ། དེ་བས་ན་གནོད་སེམས་དགོན་པའི་མེ་ལ་ཆུ་རྒྱུན་འབེབས་ཞེས་བྱ་བ་ཡིན་ནོ། །དེའི་ཕྱིར། གཉི་གའི་ཚེ་ལ་དོན་མེད་ཞི་བར་བྱེད། །ཅེས་བྱ་བ་སྨོས་ཏེ། དེ་བས་ན་ཆུ་ཡིས་མ་བཀྲུས་པར་ཡང་དག་པར་བྱེད་དེ། དོན་མེད་པར་ཉེ་བར་ཞི་བར་བྱེད་པའི་ཕྱིར་རོ། །ཡོན་ཏན་དེ་དང་དེ་དག་ཕུན་སུམ་ཚོགས། །ཞེས་བྱ་བ་དེའི་རྗེས་སུ་བསྟན་པ་ནི།
དམ་པ་རྣམས་ཀྱི་གོ་ཆ་བཟོད་པ་ཡིན། །ཞེས་བྱ་བའི་ཚིགས་བཅད་དེ་བསྔགས་པའི་མེ་ཏོག་གི་རྒྱུར་གྱུར་པའི་ཕྱིར། བཟོད་པའི་ཡོན་ཏན་གྱི་ཚོགས་རྗེས་སུ་འཕེལ་བར་འགྱུར་རོ། །དེ་ལྟ་བུལ་སྦྱར་བའི་ཕྱིར། ཆོས་ཀྱི་མི་མཐུན་པའི་ཕྱོགས་རྣམས་ཞེས་བྱ་བའི་ཚིགས་བཅད་འདི་སྨོས་པ་ཡིན་ནོ། །ཆོས་ཀྱི་བགེགས་མི་མཐུན་པའི་ཕྱོགས་ནི་མི་མཐུན་པའི་ཕྱོགས་སོ། །ཆོས་ཀྱི་མི་མཐུན་པའི་ཕྱོགས་ཀྱང་ཡིན་ལ། བཟོད་པ་ཡང་ཡིན་པས་ཆོས་ཀྱི་མི་མཐུན་པའི་ཕྱོགས་རྣམས་བཟོད་པའོ། །དེས་འཇོམས་པ་ཡིན་པས་གང་དེས་སྨྲས་པའོ། །བཟོད་པ་ཕན་པར་འགྱུར་ཞེས་བྱ་བ་ལ་བཟོད་པའི་ཕན་པ་ནི། བཟོད་པ་ཕན་པར་འགྱུར་བ་སྟེ། ཕན་པ་དང་མཐུན་པ་ཞེས་བྱ་བའི་དོན་ཏོ། །འདོད་ཆགས་ཀྱང་ཡིན་ལ། ལྷག་མ་ལུས་པ་ཡང་ཡིན་པས། འདོད་ཆགས་ཀྱི་ལྷག་མ་ལུས་པའོ། །དེས་ལྕི་བར་གྱུར་བའི་མིག་གང་ཡིན་པ་དེ་ནི། འདོད་ཆགས་ཀྱི་ལྷག་མ་ལུས་པས་མིག་ལྕི་བར་གྱུར་པའོ། །བཙུན་མོ་རྣམས་ཀྱི་སྦོབས་པས་བསྲུང་བ་དང་བྲལ་བའི་བག་ཡངས་སུ་དགོད་ཅིང༌། རྩེ་བ་དང༌། ལྟ་འདོད་པ་གང་ཡིན་པ་དེ་ནི་བཙུན་མོ་རྣམས་ཀྱི་སྦོབས་པས་བསྲུང་བ་དང་བྲལ་བའི་བག་ཡངས་སུ་དགོད་ཅིང༌། ཅེ་བ་དང༌། ལྟ་འདོད་པའོ། །མེ་ཏོག་དང༌། ལོ་མ་སྣ་ཚོགས་ཀྱིས་གཏོར་བ་གང་ཡིན་པ་དེ་ནི། མེ་ཏོག་དང༌། ལོ་མ་རྣམས་ཀྱིས་གཏོར་བའོ། །མེ་ཏོག་དང་ལོ་མ་སྣ་ཚོགས་ཀྱིས་གཏོར་བའི་ནགས་ཀྱི་ལམ་ནི་ལམ་སྟེ། མེ་ཏོག་དང་ལོ་མ་སྣ་ཚོགས་ཀྱིས་གཏོར་བའོ། །ཡང་ན་ལམ་མེ་ཏོག་དང༌། ལོ་མ་སྣ་ཚོགས་ཀྱིས་གཏོར་བ་དང་ལྡན་པའོ། །འཁོན་སྙིང་ཡོད་པ་ཞེས་བྱ་བ་ནི། དེའི་ཁྲོ་བའི་རྒྱུས་བྱས་བ་ཉིད་དུ་སྟོན་ཏོ། །འདོད་ཆགས་ཀྱིས་དྲན་པ་ཉམས་ཞེས་བྱ་བ་ནི་ད་ལྟར་བྱུང་བའི་དྲན་པ་འཇིག་པའི་རྒྱུ་ཡིན་ཏེ། འདིས་ནི་ཁྲོ་བའི་གཉེན་པོ་མེད་པར་བསྟན་ཏོ། །ཕྲག་དོག་གིས་ཟིལ་གྱིས་ནོན་པའི་ཕྱིར་ཞེས་བྱ་བ་ནི་ཉོན་མོངས་བ་ཀུན་དུ་སྤྱོད་པས་ད་ལྟར་བྱུང་བའི་རྐྱེན་དུ་བསྟན་ཏོ། །དུལ་བ་དང༌། དེས་པ་ནི་དུལ་བ་དང་དེས་པའོ། །དེ་གཉིས་ཀྱི་སྤྱོད་པ་ནི་དུལ་བ་དང༌། ངེས་པར་སྤྱོད་པའོ། །ཉམས་པའི་དུལ་བ་དང༌། ངེས་པ་སྤྱོད་པ་གང་ཡིན་པ་དེ་ནི། དུལ་བ་དང༌། ངེས་པར་
སྤྱོད་པ་ཉམས་པའོ། །འཐབ་མོ་དང༌། རྒོལ་བར་འདོད་པ་དེའི་ཤུགས་ནི་འཐབ་མོ་རྒོལ་བར་འདོད་པའི་ཤུགས་ཏེ་དེ་ལས་སོ། །རྡུལ་དང༌། མདོག་འགྱུར་བ་དང༌། འདར་བ་ནི་རྡུལ་དང༌། མདོག་འགྱུར་བ་དང༌། འདར་བ་དག་གོ །རྡུལ་དང༌། མདོག་འགྱུར་བ་དང༌། ལུས་འདར་བ་འབྱུང༌། བ་གང་ཡིན་པ་དེ་ནི། རྡུལ་དང༌། མདོག་འགྱུར་པ་དང༌། ལུས་འདར་བར་གྱུར་པའོ། །སྨིན་མ་བཙུམས་པས་མིག་རྩ་དམར་པོ་བགྲད་པ་གང་ཡིན་པ་དེ་ནི། ཚུལ་འཆོས་ཞེས་བྱ་བའི་བྱ་བ་པའོ། །ཚུལ་འཆོས་ཀྱི་གཡོ་སྒྱུའི་རང་བཞིན་གང་ཡིན་པ་དེ་ནི་དེའོ། །དེ་དག་གི་སྤྱོད་ཚུལ་དང༌། མཛེས་པ་དང། དུལ་བ་ནི་སྤྱོད་ཚུལ་མཛེས་པ་དུལ་བའོ། །དེ་དག་གི་གུས་པ་དང༌། མཁས་པའི་སྤྱོད་ཚུལ་མཛེས་པ་དང༌། དུལ་བ་ནི་གུས་ཤིང་འོས་པ་མཁས་པའོ། །རབ་ཏུ་ཁྲོས་ཤིང་བཞིན་གྱུར་ལ། །ཞེས་བྱ་བ་འདི་ནི། སོ་སོར་བརྟགས་ཏེ་བརྣག་པའི་མཐུ་ཆུང་བས། །ཞེས་བྱ་བ་ལ་སོགས་པ་སྟོན་པ་ཡིན་ནོ། །ཡང་ན་འཐབ་མོ་རྒོལ་འདོད་པའི་ཤུགས་ལས་རྡུལ་ནི་བྱུང་ལུས་འདར་བ་ཞེས་བྱ་བ་དེ་ཉིད་སྟོན་ཏོ། །སྤྱོད་པ་ཉམས་ཤིང་རྩུབ་པར་མངོན་ལ་ཞེས་བྱ་བ་ནི་གང་སྔར་བསྟན་པའི། ང་ཡི་གཟི་བརྗིད་ཟིལ་མནན་ནས། །ཞེས་བྱ་བ་དེ་སྟོན་པ་ཡིན་ནོ། །མཚོན་ཆ་ཐོགས་ཏེ་ཞེས་བྱ་བ་ནི་གང་སྔར་བསྟན་པའི་གསོལ་ཀ་བའི་ལག་ན་རལ་གྲི་འདུག་པ་བླངས་ཏེ་ཞེས་བྱ་བ་དེ་ཉིད་སྟོན་ཏོ། །དེས་མགུ་པར་བྱས་ཟིན་ཏོ་ཞེས་བྱ་བ་ནི་སེམས་དབང་དུ་བྱས་པའོ། །དེ་ཡང་ཉམས་སུ་མི་ལེན་ཏེ། དེ་ཅིའི་ཕྱིར་ཞེ་ན། བུད་མེད་བསྟན་པར་སྣང་བ་ལས་བཟོད་པ་མེད་དོ། །འཆོས་པའི་ཚུལ་ཡིན་པས་འཆོས་པའི་ཚུལ་ལོ། །འཆོས་པའི་ཚུལ་ཉིད་འདྲིད་པ་ཡིན་པས་ཚུལ་འཆོས་འདྲིད་པའོ། །དེས་བརྟན་པ་འདུག་པའི་ཚུལ་ནི་བཟོད་པ་སྨྲ་བ་ཡིན་ནོ། །ཞེས་བྱ་བའི་སྒྲ་སྨྲ་ཞིང་འདུག་པའོ། །ཡིད་མི་དགའ་བ་ཞེས་བྱ་བ་ནི་བྱང་ཆུབ་སེམས་དཔའ་ནོངས་ཀྱིས་དོགས་པའོ། །མྱ་ངན་ནི་བཤུགས་པར་མ་ནུས་པའོ། །དེ་གཉིས་ཀྱིས་གདུངས་བའི་ཡིད་གང་ཡིན་པ་དེ་ནི་ཡིད་མི་དགའ་ཞིང་མྱ་ངན་གྱིས་གདུངས་པའོ། །འཇིགས་པ་ནི་རྒྱལ་པོའི་ཆད་པས་སོ། །སྐྲག་པ་ནི་དེ་བཅོས་བའི་ཐབས་ལ་མ་ཤེས་པས་སོ། །དེ་གཉིས་ཀྱིས་གཡེན་སྦྱོ་བ་ནི། འཇིགས་ཤིང་སྐྲག་པས་འཁྲུགས་
པའོ། །དྲང་སྲོང་མཆོག་དེའི་མྱ་ངན་བྱེད་ཅིང་ཞེས་བྱ་བ་ལ། ཅིའི་རྒྱུས་མྱ་ངན་བྱེད་བ་ཡིན་ཞེ་ན། དེའི་ཕྱིར་སྨྲས་པ། བདག་ཅག་རྣམས་ཀྱི་དོན་ནི་བདག་ཅག་རྣམས་ཀྱི་ཕྱིར་རོ། །ཉེས་པ་ཡོང་མེད་པར་ཞེས་བྱ་བ་ནི་གང་ལ་རྒྱལ་པོ་ཉེས་པར་བྱས་པས་དོགས་པའི་ཉེས་པ་དེ་མེད་ཅིང་མ་ཡིན་པས་སོ། །དུལ་བ་ཞེས་བྱ་བ་ནི་ལུས་དང་ངག་གི་དུལ་བ་དག་གོ །དཀའ་ཐུབ་ཆེན་པོ་ཞེས་བྱ་བ་ནི་རབ་ཏུ་བྱུང་བའོ། །ཡོན་ཏན་གྲགས་པ་ཞེས་བྱ་བ་ནི། ཡོན་ཏན་འཇིག་རྟེན་གྱིས་བརྗོད་པའོ། །ལམ་དུ་ཞུགས་ཞེས་བྱ་བ་ནི་མངོན་པར་འགྲོ་བ་ཞེས་བྱ་བའི་དོན་ཏོ། །བྱེད་པ་ནི་ལུས་དང༌། ངག་གི་འགྱུར་བའོ། །ཅི་ཞིག་གྱུར་ནས་སུ་ཞེས་བྱ་བ་ནི་བརྡེག་པ་དང༌། བཅིངས་པ་ལ་སོགས་པའི་ལས་ཀྱི་ལམ་གྱིས་ཞེས་བྱ་བའི་དོན་ཏོ། །གྲགས་པ་ཐོབ་པ་ཞེས་བྱ་བ་ནི་ཐུབ་པའི་ལུས་བཅད་པས། རང་གི་ཆོས་ཀྱི་ལུས་བཅད་ཅིང་འཆི་བ་ལ་སོགས་པས་སོ། །ཨ་ཛིན་དང་དབྱིག་པ་གང་ཡིན་པ་དེ་ནི་ཨ་ཛིན་དང་དབྱིག་པའོ། །དེ་ཡོད་པ་ནི་ཨ་ཛི་ན་དང་དབྱིག་པ་ཐོགས་པའོ། །གཡོ་སྒྱུ་ནི་སླུ་བའོ། །གཡོ་སྒྱུ་ཉིད་བརྗིད་བག་ཏུ་འཆོས་པ་ཡིན་པས་གཡོ་སྒྱུ་བརྗིད་བག་འཆོས་པའོ། །ཁྲོས་པ་དང༌། རྔམ་པ་ཞེས་བྱ་བ་ལ། ཁྲོས་པ་ནི་ཞེ་སྡང་ངོ༌། །རྔམ་པ་ནི་དེ་ལ་མངོན་པར་འཇུག་པའོ། །དེ་གཉིས་ཀྱི་སྤྱོད་པའི་ཚུལ་མི་སྡུག་བར་གྱུར་པ་དེ་ནི་དེའོ། །འདིས་ནི་མཐོང་བའི་ཆོས་བདག་ཉིད་བླ་མེད་པ་ཉིད་དུ་བསྟན་ཏོ། །དུལ་བར་སྦོད་པའི་དཔལ་ནི་ཉམས། །ཞེས་བྱ་བ་འདིས་ནི། བྱང་ཆུབ་སེམས་དཔའ་ལ་ཟླ་མེད་པའི་འཇུག་པ་བསྟན་ཏོ། །དེ་ལྟར་དེ་གཉིས་ནི་མཐོང་བའི་ཆོས་ལ་བདག་དང༌། བྱང་ཆུབ་སེམས་དཔའ་ལ་སྒྲུབ་པ་བསྟན་ཏོ། །བདག་ལ་ཕན་པ་དང༌། གནོད་པའི་ལམ་ནི་བརྗེད་པར་གྱུར། །ཅེས་བྱ་བ་འདིས་ནི་སྐྱེ་བ་གཞན་གྱི་མི་འདོད་པའི་འབྲས་བུ་བསྟན་ཏོ། །སྐལ་བ་མེད་ལས་གྱུར་པ་ཞེས་བྱ་བ་འདིས་ནི། སྔར་བྱས་བའི་ལས་ངན་པ་ལས་གྱུར་བའོ། །སེམས་ལ་གཅགས་པ་ནི་ཚིག་ཙམ་གྱིས་ཀྱང་མ་བྱས་ན་གཞན་ལྟ་ཅི་སྨོས་ཞེས་བྱ་བ་ཡིན་ཏེ། འདིས་ནི་སྔར་དྲིས་བའི་རྒྱུའོ། །དམ་པ་མ་ཡིན་པའི་སྤྱོད་པ་ནི་ཉེས་པའི་ལམ་སྟེ། རང་གི་ཆོས་ཀྱི་ལམ་མ་ཡིན་བའོ། །འགྲོ་བའི་དོན་བྱེད་ཅེས་བྱ་བ་ནི་ཉེས་པ་མི་བྱེད་
པ་དག་ལ་ཕན་འདོགས་པར་འཇུག་པའོ། །རྣམ་པར་བརྟག་པའི་ལམ་ཞེས་བྱ་བ་ནི་ཡང་དག་པའི་ལམ་མོ། །ཅིའི་ཕྱིར་ལམ་རྣམ་པར་བརྟག་ཅེ་ན། དེའི་ཕྱིར་སྨྲས་པ། ལེགས་པ་དག་ཀྱང་ཅུང་ཟད་མི་རིགས་མཐོང༌། །ཞེས་བྱ་བའི་ཚིགས་བཅད་སྨོས་ཏེ། མི་རིགས་པ་ཞེས་བྱ་བ་ནི་ཉེས་པ་ཞེས་བྱ་བའི་དོན་ཏོ། །ལེགས་པ་དག་ཀྱང་ཞེས་བྱ་བ་ནི་ཉེས་པ་མེད་པའོ། །ཁ་ཅིག་ནི་ཉེས་ཀྱང་ལེགས་པར་མཐོང་ཞེས་བྱ་བ་སྟེ། དེས་ན་དེའི་ཕྱིར་མ་བརྟགས་ཞེས་བྱ་བ་ཡིན་ནོ། །ཡུལ་ཅི་ཞིག་ལ་མ་བརྟགས་པ་ཡིན་ཞེ་ན། དེའི་ཕྱིར་སྨྲས་པ། གཏན་ཚིགས་ཁྱད་པར་ཅན་ལ་སྟེ། ཁྱད་པར་གྱི་གཏན་ཚིགས་དག་ནི་གཏན་ཚིགས་ཁྱད་པར་ཅན་དག་སྟེ་དེ་ལའོ། །དགོས་པའི་དོན་ཉིད་ཅེས་བྱ་བ་ནི། དེའི་དངོས་པོ་ཉིད་ཡིན་པས་དགོས་པའི་དོན་ཉིད་དོ། །དགོས་པའི་དོན་ཡོད་པར་བརྟགས་པ་ཉིད། གཏན་ཚིགས་ཁྱད་པར་གྱིས་ཏེ། དེ་ལྟར་བརྟག་པ་བྱས་ན་ནི། དགོས་པའི་དོན་རྟོགས་པ་ཉིད་དུ་འགྱུར་ཞིང་ཉེས་པ་ཡང་ཉེས་པ་ཉིད་དུ་རྟོགས་སོ། །ལེགས་པར་ཞུགས་ནས་ནི་ཞེས་བྱ་བ་ནི་ཆོས་ཁྲིམས་ལས་བཤད་པ་བཞིན་དུའོ། །བསྟན་ངག་ལམ་དུ་ཞེས་བྱ་བ་ནི་ལུགས་ཀྱི་བསྟན་བཅོས་ཀྱི་ཚུལ་ཀྱིས་སོ། །ཆོས་ཁྲིམས་དང་ལུགས་ཀྱི་བསྟན་བཅོས་ཀྱི་ཚུལ་གྱིས་བཀའ་ཁྲིམས་ཀྱི་བྱ་བས་ནན་ཏུར་བྱ་བ་དང༌། ཕན་གདགས་པར་བྱ་བ་ལ་རྗེས་སུ་གཟུང་བར་བྱས་ན་དེ་དག་ཉིད་ཀྱི་ཆོས་དང༌། སྲིད་དང༌། བདེ་བར་འགྱུར་རོ། །བཏུལ་ནས་ཞེས་བྱ་བ་ནི་གང་གི་ཕྱིར། དེ་ལྟར་བྱ་བ་དག་ལེགས་བར་བརྟགས་པའི་རྒྱུས་ཆོས་དང༌། སྲིད་དང༌། བདེ་བའི་དོན་ཉམས་པར་མི་འགྱུར་བས་དེའི་ཕྱིར་རོ། །གྲགས་བར་གྱུར་པ་ཞེས་བྱ་བ་ནི། ཉེས་བ་མེད་པའི་རིགས་པ་སྟེ། གྲགས་པ་མ་ཡིན་པའི་རྒྱུས་སོ། །ཉེས་པ་ཅིར་འགྱུར་ཞེ་ན། དེའི་ཕྱིར་སྨྲས་པ། ནགས་ཚལ་ན་གཏམ་ངན་པ་འཕེལ་ཞེས་བསྟན་པ་ཡིན་ཏེ། རང་གི་སྐྱེས་བུ་བྱེད་པའི་བསྲུང་བ་ཉམས་པར་སྟོན་ཏོ། །ཁྱོད་ཀྱི་མཐུ་ཡིས་བསྲུང་བ་ཞེས་བྱ་བ་ནི། བདག་པོ་གཞན་མ་ཡིན་པ་ཉིད་དུ་སྟོན་ཏོ། །ཕན་པའི་ཚུལ་མེད་ཅེས་བྱ་བ་ནི། འཇིག་རྟེན་ཕ་རོལ་བ་ལ་ཕན་པའོ། །དམ་པས་སྨད་པ་ནི་འཇིག་རྟེན་འདིའི་གྲགས་པ་མ་ཡིན་པའོ། །དེ་བས་རྣམ་པར་བརྟགས་པའི་ལམ་དུ་འཇུག་
པའི་རིགས། །ཞེས་གང་བཤད་པ་ལ། ཇི་ལྟར་རྣམ་པར་བརྟགས་པའི་ལམ་དུ་འཇུག་པར་བྱ་ཞེ་ན། སྨྲས་པ། སྲུང་མ་ཉུག་རུམ་བཅས་པ་ཞེས་བྱ་བའི་ཚིགས་བཅད་ཡིན་ཏེ། ལྷགས་པ་ལ་ཞེས་བྱ་བ་འདིས་ནི། བདག་ཉིད་བུད་མེད་ལ་འགྲོ་བ་བསལ་ཏོ། །བདག་གི་ཞེས་བྱ་བ་ནི་རབ་ཏུ་བྱུང་པའོ། །གནས་ཞེས་བྱ་བ་ནི་སེམས་ཅན་ཐམས་ཅད་ཀྱི་ཐུན་མོང་དུ་སྟོན་ཏེ། སྔོན་མ་མཐོང་བར་ཡང་འོང་བས་སོ། །སྲུང་མ་ཉུག་རུམ་ཞེས་བྱ་བ་ནི་དབེན་པ་མ་ཡིན་པ་ཉིད་དུ་བསྟན་ཏོ། །བདག་གིས་ནོངས་པ་ཅུང་ཟད་ཅེས་བྱ་བ་འདིས་ནི། བུད་མེད་ལ་འགལ་བར་གྱུར་པའོ། །དེ་ནི་བདག་ལ་མེད་པ་ཉིད་མོད་ཀྱི། །དེ་སྟེ་བུད་མེད་རྣམས་བདག་གི་གནས་སུ་འོངས་པ་ཙམ་གྱིས། གལ་ཏེ་ནོངས་པར་གྱུར་ཀྱང་རྒྱན་གྱི་མཆོག །ཅེས་བསྟན་པ་ཡིན་ནོ། །རྒྱན་གྱི་མཆོག་གི་བཟོད་པ་དེ་ཉིད་བསྟན་པའི་ཕྱིར། སྨྲས་པ། བཟོད་པས་བརྒྱན་ན་ཇི་ལྟར་མཛེས་པ་བཞིན། །ཞེས་བྱ་བའི་ཚིགས་བཅད་སྨོས་ཏེ། བཟོད་པ་ལ་བརྟེན་ཅིག་པའོ། །བཟོད་པའི་མན་ངག་བསྟན་པ་ཡིན་པས་བཟོད་པའི་མན་ངག་གོ །བཟོད་པའི་མན་ངག་བསྟན་པ་ཉིད་སྙད་བཏགས་པ་ཡིན་པས། བཟོད་པའི་མན་ངག་བསྟན་པར་སྙད་བཏགས་པའོ། །ཉེས་པ་མེད་པ་ནི་སྐྱོན་མེད་པའོ། །བྲམ་ཟེ་ལས་རབ་ཏུ་བྱུང་བ་ནི་ཡོན་ཏན་གྱི་ཞིང་ཉིད་དུ་སྟོན་ཏོ། །བསོད་པར་བྱེད་པ་རྣམས་ཡོངས་སུ་སྲུང་བ་པོ་ནི། རྒྱལ་པོ་ཡིན་ན་འདི་ལྟར་ཅིའི་ཕྱིར་འཇུག་ཅེས་བྱ་བའོ། །བཟོད་པའི་མན་ངག་བསྟན་པའི་རྩོལ་བ་དེ་ཉིད། བདག་འཇིགས་ནས་གསོལ་བ་ནི་མ་ཡིན་ཏེ། ཅིའི་ཕྱིར་འཇིགས་ནས་མི་གསོལ་ཞེ་ན། མི་འཇིགས་པའི་རྒྱུ་བསྟན་པའི་ཕྱིར། སེམས་ཅན་རྣམས་ནི་འཆི་འགྱུར་བའི། །ཞེས་བྱ་བ་སྨོས་ཏེ། འདི་གཉིས་ཀྱི་རྒྱུས་འཆི་བས་འཇིགས་པ་ཡིན་ཏེ། དེ་གཉི་ག་ཡང་མེད་པ་ཉིད་དུ་བསྟན་པའི་ཕྱིར་སྨྲས་པ། འཇིག་རྟེན་གྱི་རང་བཞིན་ཡོངས་སུ་མ་ཤེས་ནས་བསོད་ནམས་མ་བྱས་པ་དང༌། ངན་འགྲོར་འགྲོ་བའི་དགོས་པ་ཡོད་པའོ། །དེ་གཉི་ག་ཡང་མེད་པ་སྟེ། སེམས་ཅན་རྣམས་ནི་འཆི་བར་འགྱུར་བའི་ཚུལ་འདིས་ངེས་པ་ཉིད་དུ་གནས། །ཞེས་བྱ་བ་ཡོངས་སུ་ཤེས་པའི་ཕྱིར། རྒྱུ་དང་པོ་མེད་དོ། །བདག་གི་ཚུལ་ལའང་རྗེས་བལྟས་
ན། །ཞེས་བྱ་བ་འདིས་ནི། བསོད་ནམས་བྱས་པའི་ཕྱིར། གཉིས་པ་ཡང་མེད་པས་སོ། །ཅི་སྡེ་དེ་གཉི་ག་མེད་ན་ཅིའི་ཕྱིར། དེ་ལྟར་བཟོད་པའི་མན་ངག་བསྟན་པར་ཐ་སྙད་བཏགས་ཤེ་ན། ཕྱི་ནས་ཆོས་ཀྱི་བདེ་བ་ལ། །ཞེས་བྱ་བའི་ཚིགས་བཅད་བརྩམས་སོ། །ཕྱི་ནས་ཆོས་ཀྱི་བདེ་བ་ལ་གནོད་པ་ཞེས་བྱ་བ་ལ། གནོད་དུ་དོགས་པ་ནི་ཆོས་མ་ཡིན་པར་མ་གྱུར་ཅིག་པའི་དོན་ཏོ། །བདེ་བ་འཐོབ་ལ་ཕན་པའི་ཞེས་བྱ་བ་ནི། བདེ་བ་འཐོབ་པ་གཅིག་པུར་མ་ཟད་དེ། ཆོས་མ་ཡིན་པ་འཐོབ་ཅིང་གནོད་པའོ། །དེ་ལྟ་མོད་ཀྱི་ཡོན་ཏན་རྣམས་ཀྱི་འབྱུང་གནས་སུ་གྱུར་པ་དང༌། ཉེས་པ་རྣམས་ཀྱང་ཟློག་པར་བྱེད་པའི་ཕྱིར། རབ་ཏུ་བཟང་པོའི་སྐྱེས་བཞིན་དུ། །དགའ་བས་བདག་ནི་བཟོད་པ་སྨྲ། །ཞེས་བྱ་བ་སྟེ། དེ་ཉིད་བསྟན་པ་ནི་བཟོད་པ་ཡོན་ཏན་འབྱུང་གནས་ཞེས་བྱ་བའི་ཚིག་གོ །ཚུལ་འཆོས་ཀྱི་བརྟུལ་ཞུགས་ནི་གཡོའི་བརྟུལ་ཞུགས་སོ། །མྱ་ངན་མི་བྱེད་དེ་བདག་ཉིད་ཆེན་པོའི་ཉམས་པའི་རྒྱུ་ཡིན་པའི་ཕྱིར་རོ། །བདག་ལ་གནོད་པ་བྱེད་པའི་རྒྱལ་པོ་ལ་ཡང་འཁྲུགས་པར་མི་བྱེད་དོ། །ཅིའི་ཕྱིར་མྱ་ངན་མི་བྱེད་ཅེ་ན། ལུས་ཀྱི་ཕུང་པོ་གནས་པའི་མཐའ་ཤེས་པའི་ཕྱིར་རོ། །ཅིའི་ཕྱིར་འཁྲུགས་པར་མི་བྱེད་ཅེ་ན། སྐྱེ་བོ་རྣམས་ལ་བཟོད་པ་གོམས་ཤིང་འདྲིས་པའི་ཕྱིར་རོ། །དེའི་སེམས་ཞེས་བྱ་བ་ནི་རང་གི་སེམས་སོ། །དེའི་ཕྱིར། དགའ་བའི་ཚུལ་གྱིས་ཡོངས་སུ་ཉམས་བར་མ་གྱུར་ཏོ། །སོ་སོར་བརྟགས་བ་ནི། བདག་གི་སྡུག་བསྔལ་ཆེན་པོ་པའོ། །སྙིང་རྗེ་ཅན་ནི་གནོད་པ་བྱེད་པ་ལའོ། །དཀའ་ཐུབ་ཀྱི་ནགས་སུ་བདག་ཉིད་ལ་སྡུག་བསྔལ་ཆེན་བོ་འབྱུང་བ་ནི་བཟོད་པ་ཆེན་པོ་དང་ལྡན་པའི་ཕྱིར་རོ། །དེ་ཉིད་ཀྱི་སྡུག་བསྔལ་གྱིས་གནོད་པར་གྱུར་པ་ནི། སྙིང་རྗེའི་བདག་ཉིད་ཡིན་པའི་ཕྱིར་རོ། །དེ་མ་ཐག་ཏུ་རིམས་ནད་ཅེས་བྱ་བ་ནི། བྱང་ཆུབ་སེམས་དཔའ་ཡན་ལག་བཅད་མ་ཐག་ཉིད་དུའོ། །ནགས་ཚལ་ཉེ་བའི་ནང་ནས་ཐ་མར་བྱུང༌། །ཞེས་བྱ་བ་ནི་བྱང་ཆུབ་སེམས་དཔའ་བདག་ཉིད་ཆེན་པོ་དེའི་མངོན་སུམ་ནས་ཏེ། དེ་མ་ཐག་ཏུ་སོང་ཞེས་བྱ་བའི་དོན་ཏོ། །བླུན་ཞིང་ཞེས་བྱ་བ་ནི་གཏི་མུག་གི་རྒྱུས་སོ། །ལྷག་པར་མི་བརྟན་པ་གང་ཡིན་པ་དེ་ནི། རབ་ཏུ་མི་བརྟན་པ་སྟེ་དེས་ན་མི་བརྟན་པ་དེས་སོ། །བུད་མེད་དང་བྱིས་པ་ཞེས་
བྱ་བ་ལ་སོགས་པ་སྨོས་པས་ནི་སྙིང་རྗེའི་གནས་སོ། །བྲམ་ཟེ་ཡོན་ཏན་གྱི་ཞིང་ཡིན་པའི་ཕྱིར་རོ། །འཆི་བ་དང༌། ན་བའི་སྡུག་བསྔལ་ཅན་ཞེས་བྱ་བ་འདིའི་བསྡུས་པའི་དོན་ནི་སྐྱེ་བའི་ཀུན་ནས་ཉོན་མོངས་པ་དང༌། ལས་ཀྱི་ཀུན་ནས་ཉོན་མོངས་པ་དང༌། ཉོན་མོངས་པའི་ཀུན་ནས་ཉོན་མོངས་པ་ལ་མྱ་ངན་བྱེད་མོད། ག་ལ་ཁྲོ་ཞེས་བྱ་བ་ཡིན་ཏེ། འཆི་བ་དང༌། ན་བའི་སྡུག་བསྔལ་ཞེས་བྱ་བས་ནི། སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །འདོད་ཆགས་ཞེ་སྡང་དབང་དུ་གྱུར། །ཞེས་བྱ་བས་ནི་ཉོན་མོངས་པའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །ཉེས་པར་སྤྱོད་པས་ཚིག་པ་ལ། །ཞེས་བྱ་བ་འདིས་ནི་ལས་ཀྱི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏོ། །བདག་ལ་རྣམ་པར་སྨིན་པར་གྱུར་ཀྱང་རུང་སྟེ། དེ་ལ་ནི་མ་ཡིན་ནོ། །ཅིའི་ཕྱིར་ཞེ་ན། དེ་བསྒྲུབ་པའི་ཕྱིར། བདེ་བ་ཅན་ལ་སྡུག་བསྔལ་རྗེས་འབྲང་བ། །ཞེས་བྱ་བའི་ཚིགས་བཅད་འོག་མ་སྨོས་སོ། །སྐྱོབ་པར་མ་ནུས་པ་ཞེས་བྱ་བ་ནི་ལས་བདག་གིར་བྱ་བའི་ཕྱིར་རོ། །རྒྱལ་པོ་གྲོངས་ནའང་ཞེས་བྱ་བ་ནི་རྒྱལ་པོ་ཉི་ཚེར་མ་ཟད་དེ་ཞེས་བྱ་བའི་དོན་ཏོ། །སྐྱེས་ན་ཞེས་བྱ་བ་ནི་སྐྱེ་བ་ཡོད་ན་ཞེས་བྱ་བའོ། །དེ་བས་ཞེས་བྱ་བ་ནི་སྐྱེ་བ་ཡོད་ན་སྡུག་བསྔལ་ཡོད་བའི་ཕྱིར་ཏེ། སྐྱེ་བ་ནི་སྡུག་བསྔལ་གྱི་རྩ་བ་ཡིན་པའི་ཕྱིར། སྐྱེ་བ་ཉིད་ལ་འཁོན་དུ་གཟུང་བའི་རིགས་ཏེ། སྐྱེ་བ་མེད་ན་སྡུག་བསྔལ་མེད་པའི་ཕྱིར་རོ། །སྐྱེ་བ་ཡོད་ན་ནི་སྡུག་བསྔལ་མྱོང་བ་ཡིན་ཏེ། བཟོད་པ་མི་བྱེད་པ་མ་ཡིན་པའི་རྒྱུའི་དབང་དུ་བྱས་ནས། ནགས་ན་གནས་ཤིང་ཞེས་བྱ་བའི་ཚིགས་བཅད་སྨོས་ཏེ། ནགས་ན་གནས་ཞེས་བྱ་བས་ནི་ཡོངས་སུ་བཟུང་བ་ཐམས་ཅད་སྤངས་པར་སྟོན་ཏོ། །རབ་ཏུ་འབྱུང་བར་ཤེས་ཞེས་བྱ་བ་འདིས་ནི་བཟོད་པ་ལ་དམ་བཅས་པ་ཉིད་དུ་སྟོན་ཏོ། །རབ་ཏུ་བྱུང་བ་རྣམས་ནི་བཟོད་པའི་སྟོབས་ཡོད་པའི་ཕྱིར་དང༌། བཟོད་པ་སྨྲ་ལ་ཞེས་གཞན་དག་ལ་བཟོད་པའི་མན་ངག་སྟོན་པ་ཉིད་དེ། འདི་གཉིས་ཀྱིས་རབ་ཏུ་བྱུང་བ་རྣམས་ནི་བཟོད་པའོ། །ངོ་ཚ་ཤེས་པ་དང༌། ཁྲེལ་ཡོད་པས་ཀྱང་མི་བཟོད་པའི་རྣམ་པ་མེད་པར་སྟོན་ཏོ། །རིང་པོར་མི་ཐོགས་འཆི་ཞེས་བྱ་བ་འདིས་ནི། འཇིག་རྟེན་ཕ་རོལ་དང་ཉེ་བ་ཉིད་པས་མི་བཟོད་པའི་
འབྲས་བུའི་རྐྱེན་བྱུང་བར་ཉེ་བའི་ཕྱིར་རོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བཟོད་པར་སྨྲ་བའི་སྐྱེས་པའི་རབས་སོ།། །།ཁ་ན་མ་ཐོ་བ་ནི་རབ་ཏུ་སྨད་པར་བྱ་བའོ། །ཡུལ་གྱི་བདེ་བ་ཙམ་གྱི་ཚོད་ཀྱིས་ཀྱང༌། །ཞེས་བྱ་བས་ནི་ངན་དོན་ཙམ་ཡིན་པའི་ཕྱིར་རོ། །ཡུལ་གྱི་བདེ་བ་ནི་བསགས་པ་དང༌། བསྲུང་བ་ལ་སོགས་པའི་སྡུག་བསྔལ་མོང་བོའི་དབེན་དུ་གྱུར་པའི་ཕྱིར། ཡུལ་གྱི་བདེ་བ་ཙམ་ཞེས་བྱའོ། །འཇིག་རྟེན་རྣམས་ནི་བག་མེད་དབང་དུ་གྱུར། །ཅེས་བྱ་བ་ནི་རང་གི་བདེ་བ་ཡང་མི་སྒྲུབ་པས་སོ། །བསམ་གཏན་བདེ་པས་ཀྱང་ཞེས་བྱ་བས་ཀྱང་བསམ་གཏན་གྱི་བདེ་བ་ཁྱད་པར་དུ་འཕགས་པ་དེས་ཀྱང་ངོ༌། །དེའི་ཁྱད་པར་དུ་འཕགས་པ་དེས་ནི་ཅིག་ཤོས་རྣམ་པར་བཅད་པ་ཡིན་ཏེ། བསགས་པ་ལ་སོགས་པའི་ཉེས་པ་དང་བྲལ་བའི་ཕྱིར་དང༌། མཐར་ཡང་བདེ་འགྲོར་འགྲོ་བའི་རྒྱུར་གྱུར་པའི་ཕྱིར་རོ། །གང་ན་གནོད་སེམས་མང་བའི་ཁམས་དང༌། རྣམ་པར་འཚེ་བ་མང་བའི་ཁམས་དང༌། འདོད་པ་མང་པའི་ཁམས་དེ་ནི། གནོད་སེམས་དང༌། འཚེ་བ་མང་བ་འདོད་པའི་ཁམས་ཏེ། དེ་ལ་བལྟས་ནའོ། །བཤེས་གཉེན་ངན་པ་ལ་བརྟེན་པའི་སྐྱོན་གྱིས་ཞེས་བྱ་བས་ནི། གཞན་གྱི་སྒྲའི་དྲིང་ལ་འཇོག་པར་བསྟན་ཏོ། །ཡང་དག་པ་མ་ཡིན་པ་ཡིད་ལ་བྱེད་པ་ལ་འདྲིས་པས་ཞེས་བྱ་བས་ནི་སྐྱོན་ཚུལ་བཞིན་མ་ཡིན་པ་ཡིད་ལ་བྱེད་པ་ཉིད་སྟོན་ཏོ། །ལོག་པར་ལྟ་བ་སྟུག་པོའི་ཞེས་བྱ་བ་ནི་ལོག་པར་ལྟ་བ་ཡོངས་སུ་མ་བརྟགས་པའི་ཕྱིར། གཉི་གའི་རྐྱེན་ཅན་ཉིད་དུ་བསྟན་ཏོ། །དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་ནི། འཇིག་རྟེན་ཕ་རོལ་གྱི་བླ་ན་མེད་པའི་ཕྱིར། དགེ་བ་དང༌། མི་དགེ་བའི་འབྲས་བུ་རྣམ་པར་སྨིན་པ་ག་ལ་ཡོད་དེ། འཇིག་རྟེན་ཕ་རོལ་ཡང་མེད་པའི་ཕྱིར་རོ། །ཆོས་ལ་སྤྱོད་པའི་སྤྲོ་བ་མེད་པ་གང་ཡིན་པ་དེ་ནི་དེའོ། །འདི་ནི་ལྷ་ཁང་དང༌། གཙུག་ལག་ཁང་དང༌། ཀུན་དགའ་ར་བ་དང། རྫིང་བུ་ལ་སོགས་པ་བྱེད་པའི་སྤྲོ་བ་མེད་པའོ། །ཡང་ན་སྦྱིན་པ་ལ་སོགས་པ་ཉིད་ཆོས་ཡིན་ཏེ། དེ་དག་གིས་བསམ་པ་ལས་ལྡོག་པ་ཉིད་དུ་སྟོན་ཏོ། །སྦྱིན་པ་དང༌། ཚུལ་ཁྲིམས་ལ་སོགས་པའི་ལེགས་པར་སྤྱད་པ་གང་ཡིན་པ་དེ་ནི། སྦྱིན་པ་དང༌། ཚུལ་ཁྲིམས་ལ་སོགས་པའི་
ལེགས་པར་སྤྱད་པ་སྟེ། དེ་སྒྲུབ་པ་ལ་རྒྱབ་ཀྱིས་ཕྱོགས་པའོ། །འདིས་ནི་སྤྱིན་པ་ལ་སོགས་པར་སྦྱོར་བའི་བྱེད་པ་དང་བྲལ་བ་ཉིད་དུ་བསྟན་ཏོ། །ཅིའི་ཕྱིར་དེ་དེ་ལྟར་གནས་ཤེ་ན། དེའི་རྒྱུ་བསྟན་པའི་ཕྱིར། དགེ་དང་མི་དགེའི་ལས་ལས་ཞེས་བྱ་བའི་ཚིགས་བཅད་སྨོས་སོ། །དགེ་བའི་ལས་ལས་ནི་བདེ་བ་བཅུ་འབྱུང་ངོ༌། །མི་དགེ་བའི་ལས་ལས་ནི་སྡུག་བསྔལ་འབྱུང་བ་ཡིན་ནོ། །ཕ་རོལ་ཞེས་བྱ་བ་འདིས་ནི་འཇིག་རྟེན་ཕ་རོལ་ཉིད་དུ་བསྟན་ཏོ། །སྡིག་པ་སྤངས་ཏེ་ཞེས་བྱ་བ་སྡིག་པས་ནི་སྡུག་བསྔལ་འབྱུང་བའི་ཕྱིར་ཏེ། སྡུག་བསྔལ་འབྱུང་བ་ནི་མི་འདོད་པ་ཉིད་ཀྱི་ཕྱིར་རོ། །དགེ་བའི་གནས་ལ་རབ་ཏུ་འབད་པ་ནི་བདེ་བ་འབྱུང་བའི་ཕྱིར་ཏེ། བདེ་བ་ནི་འདོད་པ་ཉིད་འབྱུང་བའི་ཕྱིར་རོ། །དད་པ་མེད་པ་དག་ནི་ཞེས་བྱ་བ་ནི་དགེ་བ་ལ་སོགས་པ་ལའོ། །ངན་སོང་དུ་ལྟུང་བར་འགྱུར་བ་ནི་བདག་ཉིད་དོ། །བདག་ཉིད་གཅིག་པུར་མ་ཟད་དེ། དེ་བཞིན་དུ་འདི་ལྟར་འཇིག་རྟེན་རྣམས་དོན་མེད་པར་བྱེད་པ་སྟེ། སྦྱིན་པ་དང༌། ཚུལ་ཁྲིམས་ལ་སོགས་པ་ལས་བཟློག་པའི་ཕྱིར་རོ། །བཟང་པོ་ཞེས་བྱ་བ་ནི་ཡིད་དུ་འོང་བའོ། །རབ་ཏུ་དབེན་པ་ཞེས་སྨོས་པས་ནི་བག་ཡངས་སུ་དེ་སྟོན་པའི་ཕྱིར་རོ། །གཞལ་མེད་ཁང་ཞེས་སྨོས་པས་ནི་བདག་ཉིད་ཕྱོགས་དེ་ན་འདུག་པའོ། །གཞལ་མེད་ཁང་ལ་ཡང་ཐོགས་པ་མེད་པར་འགྲོ་བས། རྫུ་འཕྲུལ་དང་ལྡན་པ་ཉིད་དུ་བསྟན་པའི་ཕྱིར། ཁྱོད་ཀྱི་ཞབས་དང་ཕྱག་མཛེས་ཞེས་བྱ་བ་ལ་སོགས་པའི་ཚིགས་བཅད་སྨོས་ཏེ། འདིའི་བསྡུས་པའི་དོན་ནི་རྫུ་འཕྲུལ་གྱི་མཐུས། བདག་ཉིད་ཀྱི་གཟུགས་ཀྱང་ཐུན་མོང་མ་ཡིན་པ་ཉིད་དུ་སྟོན་ཏོ། །འདོད་ཆགས་དང༌། ཞེ་སྡང་གཉིས་སྨོས་པས་ནི། འདོད་ཆགས་དང༌། ཞེ་སྡང་གཉིས་པོ་འདོད་པ་ན་སྤྱོད་པའི་བསྒོམ་པས་སྤང་བར་བྱ་བ་གཉིས་གཟུང་སྟེ། ཚངས་པའི་འཇིག་རྟེན་དུ་སྐྱེ་བས་སོ། །ཁང་བཟངས་རྩིག་པ་དག་ལ་འང་ཐོགས་པ་མེད། །ཅེས་བྱ་བ་ནི། རྫུ་འཕྲུལ་གྱིས་ཐོགས་པ་དང་བཅས་པ་ལ་ཡང་ཐོགས་པ་མེད་པར་འགྲོ་བའོ། །ས་ལ་འགྲོ་བ་བཞིན་དུ་མཁའ་ལ་འཆག །ཅེས་བྱ་བ་ནི་སའི་འོག་དང༌། ནམ་མཁའ་ལ་འཕུར་བ་སྟེ། འདི་གཉིས་ཀྱིས་ནི་འགྲོ་བའི་རྫུ་འཕྲུལ་བསྟན་ཏོ། །གློག་གི་འོད་བཞིན་གཟི་བརྗིད་ཕུན་སུམ་ཚོགས།།
ཞེས་བྱ་བ་འདིས་ནི། རྫུ་འཕྲུལ་གྱི་ཆོ་འཕྲུལ་གྱི་སྤྲུལ་པའོ། །བསམ་གཏན་ཞེས་བྱ་བ་ནི་ལྷག་པའི་སེམས་སོ། །ཚུལ་ཁྲིམས་ནི་སྡོམ་པའི་ཚུལ་ཁྲིམས་སོ། །དབང་པོ་རྣམས་ནི་རབ་ཏུ་བསྡམས། །ཞེས་བྱ་བ་ནི། དབང་པོའི་སྒོ་བསྡམས་པའོ། །གོམས་པར་བྱས་པ་ནི་བསྒོམས་པའོ།། འབྲས་བུ་གྲུབ་པ་འདི་འདྲའོ། །ཞེས་བྱ་བ་ནི་གྲུབ་པ་ཕུན་སུམ་ཚོགས་པའོ། །འདི་ཇི་ལྟར་ཞེས་བྱ་བ་ནི་འཇིག་རྟེན་ཕ་རོལ་ཡོད་པ་ཉིད་དུའོ། །འདི་ནི་རབ་ཏུ་གསལ་ཏེ་ཞེས་བྱ་བ་ནི་འཇིག་རྟེན་ཕ་རོལ་ཡོད་པ་ཉིད་དོ། །མངོན་སུམ་ལ་སོགས་པའི་ཚད་མ་གང་ཡིན་པ་དང༌། གང་གི་མངོན་སུམ་ལ་སོགས་པའི་ཚད་མའོ། །དེ་ཉིད་རིགས་པ་ཡིན་པས་མངོན་སུམ་ལ་སོགས་པ་རིགས་པའི་ཚད་མའོ། །དེས་གཟུང་དུ་འོས་པའི་ཕྱིར་མངོན་སུམ་ལ་སོགས་པ་རིགས་པའི་ཚད་མས་གཟུང་དུ་རུང་བ་སྟེ། འཇིག་རྟེན་ཕ་རོལ་ལོ། །འཇིག་རྟེན་ཕ་རོལ་ཡང་རྣམ་པ་གཉིས་ཏེ། མིའི་འཇིག་རྟེན་འདི་ལས་གཞན་པའི་འཇིག་རྟེན་ཕ་རོལ་ལོ། །དེ་རབ་ཏུ་གྲུབ་པ་ནི་མངོན་སུམ་ལ་སོགས་པའི་རིགས་པའི་ཚད་མ་དག་གིས་སོ། །སྐྱེ་བ་འདི་ལས་གཞན་པའི་སྐྱེ་བ་དེ་ཡང་འཇིག་རྟེན་ཕ་རོལ་ཞེས་བརྗོད་དོ། །དེ་ཡོད་པར་ནི་ལུང་གི་ཚིག་གིས་བསྟན་པ་དང༌། བརྟག་པའི་རིམ་པ་སྟེ། བརྟག་པའི་རིམ་པ་ནི། རིགས་པས་ཡིད་ཆེས་པར་བྱའོ་ཞེས་བྱ་བའི་དོན་ཏོ། །དེ་ལས་མིའི་འཇིག་རྟེན་ལས་གཞན་པའི་འཇིག་རྟེན་ཡོད་པར་བསྟན་པའི་ཕྱིར་ཏེ། ཉི་ཟླ་སྐར་མས་བརྒྱན་པའི་ནམ་མཁའ་དང༌། །ཞེས་བྱ་བའི་ཚིགས་བཅད་སྨོས་སོ། །ཉི་ཟླ་སྐར་མས་བརྒྱན་པའི་ནམ་མཁའ་དང༌། །ཞེས་བྱ་བ་འདིས་ནི་མིའི་འཇིག་རྟེན་འདི་ལས་གཞན་པའི་འཇིག་རྟེན་ཉིད་མངོན་སུམ་གྱི་རིགས་པའི་ཚད་མས་གཟུང་དུ་རུང་བ་ཉིད་དུ་བསྟན་ཏོ། །དུད་འགྲོ་བརྟག་པ་ནི། དུད་འགྲོ་བརྟག་པ་སྟེ། གླང་པོ་ཆེ་དང༌། རྟ་དང་བོང་བུ་རྔ་མོ་དང༌། །བྱ་ལ་སོགས་པའི་མཚན་ཉིད་དོ། །རྣམ་པ་མང་པོ་ཞེས་བྱ་བ་ནི། རིགས་གཅིག་ལ་རྣམ་པ་མང་པོ་མཐའ་ཡས་སོ། །འདི་ལྟར་འབུ་སྲིན་ལ་སོགས་པ་གཞན་དག་ཀྱང༌། དེ་བཞིན་ཉིད་དུ་སྦྱར་ཏེ། འདིས་ནི་མིའི་འཇིག་རྟེན་ལས་གཞན་དུ་དུད་འགྲོ་མངོན་སུམ་གྱིས་ཡོད་པ་ཉིད་དུ་སྟོན་ཏོ། །མངོན་སུམ་དུ་གསལ་བར་སྣང་བ་ནི་མངོན་སུམ་བཞིན་དུའོ། །འདི་ལ་ཞེས་
བྱ་བ་ནི་འཇིག་རྟེན་ཕ་རོལ་ལོ། །སྩོགས་པ་སྨོས་པས་གཟུང་བའི་ལུང་དང༌། རྗེས་སུ་དཔག་པ་ནི་འདིར་མི་གཟུང་ངོ༌། །འདིར་ད་ལྟར་བྱུང་བ་སྐྱེ་བ་ལ། འདས་པའི་སྐྱེ་བ་ཡོད་པ་ཉིད་དུ་རིགས་པས་བསྟན་པ་ཉིད་དོ། །མིའི་སྐྱེ་བ་ཡོད་པར་སྒྲུབ་པ་ཡིན་ནོ། །ལུང་གི་ཚིག་ནི་ཕྱོགས་གཉི་ག་ལ་ཡང་གྲུབ་པའི་ཕྱིར། ལུང་གི་ཚིག་གཉི་གར་ཡང་ངོ༌། །བསམ་གཏན་གོམས་བྱས་ཞེས་བྱ་བ་ལ་སོགས་པའི་ཚིགས་བཅད་དྲུག་སྨོས་ཏེ། སྐྱེ་བ་འདི་ལས་འདས་པའི་སྐྱེ་བ་རྗེས་སུ་དཔག་པས་ཡོད་པ་ཉིད་དུ་སྒྲུབ་པའི་ཕྱིར། བསམ་གཏན་གོམས་བྱས་ཞེས་བྱ་བའི་ཚིགས་བཅད་འདི་སྨོས་ཏེ། ད་ལྟར་བྱུང་བའི་སྐྱེ་བ་ལས་འདས་པའི་སྐྱེ་བ་དམིགས་ཏེ་དྲན་པར་སྣང་བའི་ཕྱིར་རོ། །འཇིག་རྟེན་ཕ་རོལ་ཡོད་དོ་ཞེས་བྱ་བ་ལ། འཇིག་རྟེན་ཕ་རོལ་ཡོད་པ་ཉིད་དུ་སྒྲུབ་པའི་ཕྱིར། འཇིག་རྟེན་ཕ་རོལ་ཡོད་པ་ནི་འདས་པའི་སྐྱེ་བ་ཡོད་དོ་ཞེས་བྱ་བའི་དོན་ཏོ། །བསམ་གཏན་ལ་གོམས་པ་དང༌། དྲན་པ་གསལ་བ་ཉིད་ཀྱིས་ནི་སྐྱེ་བར་སྣང་བའི་ཕྱིར་རོ། །ང་བདག་ལས་ཀྱང་མངོན་པར་མི་འགྱུར་རམ། །ཞེས་བྱ་བ་ནི། བདག་ཉིད་དཔེ་ཉིད་དུ་བྱའོ་ཞེས་བྱ་བའི་དོན་ཏོ། །བསམ་གཏན་གོམས་བྱས་ཞེས་བྱ་བ་ནི་བསམ་གཏན་ལ་བརྟེན་ནས། སྔོན་གྱི་གནས་རྗེས་སུ་དྲན་པའི་ཤེས་པའི་མངོན་པར་ཤེས་པ་སྟོན་ཏོ། །དྲན་པ་གསལ་བ་ཞེས་བྱ་བ་ནི་བསམ་གཏན་ཐོབ་ན། ཚེ་རབས་དྲན་པའི་རྒྱུ་ཉིད་དུ་སྟོན་ཏོ། །དེ་ལས་ཞེས་བྱ་བ་ནི་ཚེ་རབས་དྲན་པར་སྣང་བ་དང༌། ཚེ་རབས་དྲན་པའི་ཕྱིར་རོ། །ལྷག་མ་ཐམས་ཅད་ཀྱང་འཇིག་རྟེན་ཕ་རོལ་ཡོད་པ་ཉིད་དུ་བསྟན་པའི་ཕྱིར་ཚིགས་བཅད་ལྔ་སྨོས་སོ། །བློ་གཞན་སོང་བ་ལས་བློ་གཞན་སྐྱེ་བ་ཡིན་ཏེ། དེ་བས་ན་འཇིག་རྟེན་ཕ་རོལ་ཡོད་དོ་ཞེས་སྒྲུབ་པའི་ཕྱིར། སྔ་མའི་བློ་ལས་ཕྱི་མའི་བློ་འགྲུབ་ན། །ཞེས་བྱ་བའི་ཚིགས་བཅད་སྨོས་ཏེ། མངལ་ན་འདུག་པའི་སྔོན་རོལ་བློ། །ཞེས་བྱ་བ་ནི་བློ་སྔོན་དུ་བྱས་པ་ལས་ཐམས་ཅད་འགྱུར་ཏེ། བློ་སྔོན་དུ་འགྲོ་བར་སྣང་བས། དཔེར་ན་ད་ལྟར་བྱུང་བའི་མངལ་གྱི་སྔ་རོལ་དུ་བློ་འབྱུང་བ་ནི་སྔ་མའི་བློ་ཡིན་ཏེ། དེ་ནི་འཇིག་རྟེན་ཕ་རོལ་ལོ། །དེ་བས་ན་འཇིག་རྟེན་ཕ་རོལ་ཡོད་པ་ཉིད་དོ། །དང་པོའི་བློ་ནི་ཡུལ་ཡོད་པར་གྱུར་པའི་ཕྱིར། འཇིག་རྟེན་ཕ་རོལ་ཡོད་པ་ཡིན་ནོ་
ཞེས་སྒྲུབ་པའི་ཕྱིར། ཤེས་བྱ་རྟོགས་པར་བྱེད་པ་བློ་ཡིན་ཟེར། །ཞེས་བྱ་བའི་ཚིགས་བཅད་སྨོས་སོ། །དང་པོའི་སྐྱེ་བའི་བློ་ནི་ཡུལ་ཡོད་པ་ཉིད་དོ། །ཡུལ་མེད་པར་ནི་བདག་ཉིད་ཀྱིས་རྟོགས་པར་མི་སྣང་བའི་ཕྱིར་ཏེ། ད་ལྟར་བྱུང་བའི་བློ་ལྟ་བུར་རོ། །དང་པོའི་བློའི་ཡུལ་དུ་གྱུར་པ་དེ་ནི་འཇིག་རྟེན་ཕ་རོལ་ཏེ། དེ་བས་ན་འཇིག་རྟེན་ཕ་རོལ་ཡོད་དོ། །དང་པོའི་བློ་ནི་འདས་པའི་ཡུལ་གྱི་ཡིན་ཏེ། ཅིའི་ཕྱིར་ཞེ་ན། མིག་ལ་སོགས་པའི་དབང་པོ་ལྔ་དག་མེད་ཅིང་ཡིད་ཀྱི་རྣམ་པར་ཤེས་པ་ཡང་མིག་ལ་སོགས་པའི་དབང་པོ་གང་ལ་བརྟེན་ནས་སྐྱེ་བ་ཡང་མེད་པའི་ཕྱིར་རོ། །ཁ་ཅིག་འདི་སྐད་བརྗོད་དེ། ཇི་ལྟར་ཤིང་ལ་སོགས་པ་སེམས་ཅན་མ་ཡིན་པ་སྟོན་པ་རྣམས་རང་གི་ས་བོན་གྱི་བྱེ་བྲག་གིས་སྣ་ཚོགས་པའི་ངོ་བོ་ཡང་ཡོད་དེ། དེ་དག་ལ་འཇིག་རྟེན་ཕ་རོལ་མེད་པ་དེ་བཞིན་དུ་སེམས་ཅན་དུ་བསྟན་པའི་དངོས་པོ་རྣམས་ཀྱང་ཕ་མའི་ཁུ་ཁྲག་གི་ས་བོན་གྱི་བྱེ་བྲག་གིས་དེ་དེ་དང་མཐུན་པར་སྣ་ཚོགས་པའི་ངོ་བོ་ཉིད་ཡོད་དེ། འཇིག་རྟེན་ཕ་རོལ་ན་ནི་མེད་དོ་ཞེས་དེ་ལྟར་སྨྲས་པ་དེའི་དབང་དུ་བྱས་ནས། སྐྱེ་དགུའི་ཚུལ་ཁྲིམས་ལ་སོགས་ཞེས་བྱ་བའི་ཚིགས་བཅད་སྨོས་སོ། །ཕ་མ་གཉིས་ཀྱི་ཡིན་པས་ཕ་མ་གཉིས་ཀྱིའོ། །དེའི་རང་བཞིན་དག་དང་མི་མཐུན་པ་ནི་འདས་པའམ་ཐ་དད་པའོ། །ཚུལ་ཁྲིམས་ལ་སོགས་ཞེས་བྱ་བ་ལ་སོགས་པ་སྨོས་པས་ནི་གཟུགས་བཟང་བ་དང༌། གཟུགས་ངན་པ་དང༌། ཕྱུག་བོ་དང༌། དབུལ་པོ་ལ་སོགས་པའི་མཚན་ཉིད་ཀྱི་དབྱེ་བའོ། །གློ་བུར་དུ་གྱུར་པ་མེད་དེ་ཞེས་བྱ་བས་ནི། རྒྱུ་མེད་པའི་སྨྲ་བའི་རྒྱུ་མེད་པའི་དབྱེ་བའི་སྦྱོར་བས་སོ།། ཡང་ན་རྒྱུ་མེད་པའི་གང་ཡང་འབྱུང་བ་མེད་པའི་ཕྱིར་རོ། །གལ་ཏེ་དེ་ལྟ་ཡིན་ན་ནི་ཕ་མ་ལ་སོགས་པའི་ས་བོན་གྱི་བྱེ་བྲག་ལས་སེམས་ཅན་རྣམས་ཀྱི་ཁྱད་པར་དེ་ལྟར་འཇུག་པ་མེད་དམ་ཞེ་ན། མེད་དེ་ཅིའི་ཕྱིར་ཞེ་ན། ཚུལ་ཁྲིམས་ལ་སོགས་པའི་བྱེ་བྲག་ཕ་མའི་རང་བཞིན་དག་དང་མི་མཐུན་པར་སྣང་བའི་ཕྱིར་རོ། །འཇིག་རྟེན་རྒྱང་ཕན་པ་ལ་སོགས་པ་ཁ་ཅིག་འདི་སྐད་དུ་གློ་བུར་དུ་སྒྲུབ་པ་ཡིན་ནོ་ཞེས་སྨྲས་ཏེ། གློ་བུར་འབྱུང་བ་ནི་ཞེས་མི་སྣང་བའི་ཕྱིར། འཇིག་རྟེན་ཕ་རོལ་ནི་ཡོད་དེ། ཐམས་ཅད་ཀྱང་རྒྱུ་དང་བཅས་པས་སྣང་བའི་ཕྱིར་རོ། །འདི་ལྟར་བུམ་པ་ལ་སོགས་པ་ལ་གློ་བུར་གྱི་དབྱེ་
བ་མ་མཐོང་བའི་ཕྱིར། ཇི་ལྟར་ནམ་མཁའ་ལྟ་བུའོ། །འོན་ཀྱང་ལྷག་མ་ནི་སྐྱེ་བ་གཞན་ལ་གོམས་པའི་ཁྱད་པར་ཡིན་ཏེ། དེ་བས་ན་འཇིག་རྟེན་ཕ་རོལ་ཡོད་དོ། །སྐྱེས་མ་ཐག་ཏུ་སེམས་ཅན་གྱི་སྐྱེ་བའི་རྒྱུ་སྲེད་པས་བྱས་པའི་བྱ་བ་ལ་འཇུག་པར་སྣང་བ་ལས་བརྩམས་ཏེ། བློའི་མཐུ་སྟོབས་ཞེས་བྱ་བའི་ཚིགས་བཅད་སྨོས་སོ། །བློའི་མཐུ་སྟོབས་ཞེས་བྱ་བ་ནི། ཡིད་ཀྱི་རྣམ་པར་ཤེས་པའི་དབང་དུ་བྱས་པའོ། །བླུན་པའི་དབང་པོ་རྣམས་ཀྱང་ཞེས་བྱ་བ་ནི་དབང་པོ་ལྔའི་རྣམ་པར་ཤེས་པའོ། །མ་བསྟན་པར་ཞེས་བྱ་བ་ནི་གཞན་གྱིས་བསྟན་པ་མེད་པར་རོ། །བཙས་མ་ཐག་ཏུ་ཞེས་བྱ་བ་ནི་སྐྱེས་མ་ཐག་ཏུའོ། །བློའི་མཐུ་སྟོབས་གསལ་བ་མེད་ཅེས་བྱ་བ་དེ་བསྒྲུབ་པའི་ཕྱིར། ཁ་ཟས་ཟ་བར་རྩོལ་བར་ཞེས་བྱ་བའི་ཚིགས་བཅད་ཡིན་ཏེ། དང་པོའི་ཆོས་བསྒྲུབ་པར་བྱའོ། །སྲིད་པ་གཞན་ལ་ཁ་ཟས་ཟ་བར་རྩོལ་བར་བྱས་པ་ཡིན་ཏེ། ཅིའི་ཕྱིར་ཞེ་ན། གཞན་གྱིས་བསྟན་པ་མེད་པར་སྐྱེས་མ་ཐག་ཏུ་ནུ་ཞོ་འཐུང་བར་རྩོལ་བར་སྣང་བའི་ཕྱིར་ཏེ། གོམས་པའི་ཆོས་རྣམས་ལ་འབད་པ་མེད་པར་འཇུག་པ་བཞིན་ནོ། །གལ་ཏེ་རྩོལ་བ་མེད་པར་བྱ་བ་ལ་འཇུག་པ་མེད་དེ། སྲིད་པ་གཞན་ལ་གོམས་པའི་བྱ་བ་མེད་པར་མི་འབྱུང་བ་ཡིན་ནོ་ཞེ་ན་ནི་པདྨ་རྣམས་ཀྱང་ཁ་བྱེ་བ་དང། ཟུམས་པ་དག་སྲིད་པ་གཞན་ལ་གོམས་པའི་རྒྱུ་དང་བཅས་པར་ཁྱེད་ཀྱི་གཞུང་ལ་གྲུབ་པར་འགྱུར་རོ། །འོན་ཏེ་དེ་ལྟར་མི་འདོད་ན་ནི་ཞེས་བྱ་བ་ནི་དེ་དག་དེ་ལྟ་མ་ཡིན་པ་ལྟ་ན་ནི་སྲིད་པ་གཞན་ལ་གོམས་པར་བྱས་པའི་རྟགས་ཀྱིས་སྐྱེས་མ་ཐག་ཏུ་ཡང་ནུ་ཞོ་འཐུང་བ་རྩོལ་བ་མི་འགྲུབ་པའོ། །ལན་དུ་དུས་ངེས་པ་དང༌། མ་ངེས་པ་ལས་འགྱུར་བར་སྣང་སྟེ། ནུབ་མོ་ཁ་འབྱེ་བ་མ་ཡིན་ཏེ། ནུབ་མོ་ཁ་ཟུམས་ཤིང་ཉིན་པར་ནི་སྦ་བ་ཡིན་ཏེ། དེ་བས་ན་པདྨ་ཁ་བྱེ་བ་དང༌། ཟུམས་པ་ནི་དུས་ངེས་པར་སྣང་ལ། དེ་ལྟར་བྱིས་པའི་རྩོལ་བ་ནི་མི་སྣང་ངོ༌། །པདྨ་ལ་ནི་ཉི་མའི་འོད་ཟེར་འབབ་པའི་རྒྱུས་པདྨ་ཁ་འབྱེ་བ་ཡིན་གྱི། བྱིས་པ་ནུ་ཞོ་འཐུང་བའི་རྩོལ་བ་ནི། རང་གིས་བྱས་པར་སྣང་བ་ཡིན་ཏེ། དེ་བས་ན་མི་འདྲ་བ་ཉིད་དོ། །ལོག་པར་ལྟ་བ་ལ་བློ་ཞེན་ཅིང་ཞེས་བྱ་བ་འདིས་ནི། བསམ་པ་ཉམས་པ་ཉིད་དུ་སྟོན་ཏོ། །སྡིག་ཆེ་བས་ཞེས་བྱ་བ་ནི་སྦྱོར་བ་ཉམས་པ་ཉིད་དུ་སྟོན་ཏོ། །སྤྱི་བརྟོལ་ཆེ་བ་
ལ་གོམས་ཤིང་འཛེམ་དོགས་མེད་ལ་ཞེས་བྱ་བ་ནི་སྦྱོར་བ་ཉམས་པ་དེ་ཉིད་སྟོན་པ་ཡིན་ནོ། །ལོག་པར་ལྟ་བའི་དུག་གི་སྒྲེགས་པ་དང་འདྲ་བར། །ཞེས་བྱ་བ་ནི་བསམ་པ་ཉམས་པའི་རྒྱུ་ཉིད་དོ་ཞེས་བསྟན་པ་དེ་ཉིད་དོ། །བཞི་པོ་འདི་དག་དང་ལྡན་པའི་བསམ་པ་ཉམས་པ་ལ་ནི་སྦྱིན་པའི་དངོས་པོ་མ་ཚང་བ་ཉིད་དེ། བདག་ཉིད་ངན་པ་ཞེས་བྱ་བ་འདིས་ནི་བསམ་པ་ཉམས་བ་ཉིད་དུ་སྟོན་ཏོ། །གང་གི་ཕྱིར་བསམ་པ་ཉམས་ན་ནི། སྦྱིན་པའི་དངོས་པོ་ཡོད་ཀྱང་བུ་ལོན་སྦྱིན་པར་མི་བྱེད་པའོ། །རྒྱུ་གསུམ་གྱིས་ཀྱང་སྦྱིན་པ་སྦྱིན་པར་མི་བྱེད་དེ། སྐྱེས་ཤིང་སྐྱེས་ཤིང་ནོར་ཟ་བ་དང༌། ནོར་བསྐྱེད་པ་ལ་མཁས་པ་དང༌། མཁས་པ་ཡིན་ཡང་ལེ་ལོ་དང་ལྡན་པའོ། །དེ་ཉིད་ཟད་པའི་མཐའ་ཞེས་བྱ་བ་ནི་ཕྱིས་མི་འཐོབ་ཅེས་བྱ་བའི་དོན་ཏོ། །ངོ་ཚ་ཤེས་པ་ཞེས་བྱ་བ་ནི་ཁྲེལ་ཡོད་པ་སྟེ། འཇིག་རྟེན་གྱི་ཁ་ན་མ་ཐོ་བས་འཇིགས་པས་བུ་ལོན་འཇལ་བར་བྱེད་པའོ། །རིགས་བཙུན་ཞིང་ཡོན་ཏན་དང་ལྡན་པ་གང་ཡིན་པ་དེ་ནི་རིགས་བཙུན་ཞིང་ཡོན་ཏན་དང་ལྡན་པའོ། །རིགས་བཙུན་ཞེས་སྨོས་པས་ནི་བརྐམ་པའི་ཉེས་པ་མེད་པར་སྟོན་ཏེ། ཆེ་བ་ཉིད་དང་མཐུན་པར་སྤྱོད་པའི་ཕྱིར་རོ། །ཡོན་ཏན་དང་ལྡན་པ་ཞེས་བྱ་བ་ནི་ལེ་ལོའི་གཉེན་པོ་སྟེ། ལེ་ལོ་མེད་པའོ། །མཁས་པ་ལ་ནི་མི་མཁས་པའི་གཉེན་པོའོ། །དབེན་ཡང་ཞེས་བྱ་བ་ནི་མངོན་སུམ་མ་ཡིན་པར་ཡང་དེ་ལ་འཇལ་བར་བྱེད་དེ། དེ་ལ་དབུལ་བ་ཡིན་པས་འཇལ་བ་སྟེ། གང་གི་ནོར་གང་ཡིན་པ་དེའི་ནོར་འཇལ་བ་དེ་ནི་དབུལ་པོའོ། །ལྟ་བ་ངན་པ་སྤྱོད་པ་ཞེས་བྱ་བ་འདིས་ནི་བསམ་པ་དང༌། སྦྱོར་བ་རྒུད་པ་ཉིད་དུ་སྟོན་ཏེ། འདིས་ནི་རང་བཞིན་ངན་པ་ཞེས་བྱ་བ་དེ་བསྟན་ཏོ། །མི་བཟད་པའི་བདག་གི་ལས་ཞེས་བྱ་བ་ནི་མི་དགེ་བའི་ལས་ཀྱི་ལམ་མོ། །སེམས་ཉམས་ཞེས་བྱ་བ་ནི་ཡིད་སྡུག་བསྔལ་གྱིས་ཉེན་པའོ། །ནད་ཀྱིས་གདུངས་པ་ཞེས་བྱ་བ་ནི་ལུས་ཀྱི་སྡུག་བསྔལ་ཀྱིས་གདུངས་པའོ། །དེ་ལ་ཉི་ཟླའི་འོད་ཟེར་ཞེས་བྱ་བ་དང། མེད་པར་ལྟ་བ་ཚེ་རབས་ཕྱི་མ་ལ། །ཞེས་བྱ་བའི་ཚིགས་བཅད་གཉིས་ནི་གྲང་བའི་དམྱལ་བའི་དབང་དུ་བྱས་པའོ། །མུན་ནག་ཅེས་བྱ་བ་ནི་མུན་ནག་འཁྲིགས་པ་ཉིད་ཀྱིས་གཡོགས་པས་སོ། །དེ་ངེས་པར་གཟུང་བའི་ཕྱིར་མུན་ནག་ཐིབས་པོ་དུ་བ་དགུ་བའི་ཞེས་བྱ་བའི་ཚིགས་བཅད་
སྨོས་སོ། །ཡང་སོས་ཞེས་བྱ་བ་ཚ་བའི་དམྱལ་བའི་དབང་དུ་བྱས་པའོ། །མེ་མུར་འབར་བ་དམྱལ་བའི་ནང་ན་གཞན་དག་ནི། །ཞེས་བྱ་བའི་ཚིགས་བཅད་སྨོས་ཏེ། མེ་མར་མུར་ཞེས་བྱ་བ་ནི་ཉེ་འཁོར་བ་ཡིན་ཏེ། སྔར་གཙོ་བོའི་དམྱལ་བ་བཤད་ནས། ཕྱིས་ཕྱི་རོལ་གྱི་ཉེ་འཁོར་གྱི་དམྱལ་བ་བསྟན་པའོ། །ཉེ་འཁོར་བ་དེ་ཡང་རྣམ་པ་བཞི་སྟེ། །མེ་མར་མུར་དང༌། རོ་མྱགས་ཀྱི་འདམ་དང༌། སྤུ་གྲིའི་ལམ་དང༌། ཆུ་བོ་རབ་མེད་དེ་བཞི་པོ་དེ་ལས་ཉེ་འཁོར་བའི་དམྱལ་བ་མེ་མར་མུར་ཞེས་བྱ་བ་ཡིན་ནོ། །དེ་ལས་ཐར་པར་འདོད་པ་ནི་དེ་འདོད་པའོ། །དེས་ན་ཐིག་ནག་ཅེས་བྱ་བའི་དམྱལ་བ་དེའི་དབང་དུ་བྱས་ནས། ལ་ལ་གཤིན་རྗེའི་གཤེད་མ་མ་རུངས་པས། །ཞེས་བྱ་བ་ལ་སོགས་པའི་ཚིགས་བཅད་གསུམ་སྨོས་སོ། །འབར་བའི་མེ་འདྲ་བའི་གླང་དང༌། ལྕགས་དེ་གཉིས་ཀྱིས་དབང་མེད་པར་བྱས་པ་ནི། གླང་ལྕགས་མེ་ལྟར་འབར་བས་དབང་མེད་བྱས་པའོ། །བསྡུས་འཇོམས་རི་ཡིས་ཞེས་བྱ་བའི་ཚིགས་བཅད་འདིས་ནི་དམྱལ་བ་བསྡུས་འཇོམས་ཞེས་བྱ་བའི་དབང་དུ་བྱས་པ་སྟེ། བསྡུས་འཇོམས་ཞེས་བྱ་བ་རི་གཉིས་ཕྲད་པ་ནི་བསྡུས་འཇོམས་རིའོ། །དེར་ལུས་གཟིར་བ་གང་ཡིན་པ་དེ་ནི་བསྡུས་འཇོམས་རི་ཡིས་ཁ་ཅིག་ལུས་ཀྱང་གཟིར་པའོ། །དེ་ཡིས་བརྫིས་པ་སྟེ། བསྡུས་འཇོམས་རི་བོས་བརྫིས་པའོ། །དེས་ལུས་ཕྱེ་མར་བྱས་པ་གང་ཡིན་པ་དེ་ནི་དེ་ཡིས་བརྫིས་པས་ཕྱེ་མར་ལུས་གྱུར་པའོ། །ལྕགས་གཏུན་རབ་ཏུ་འབར་བའི་ནང་དག་ཏུ། །ཞེས་བྱ་བའི་ཚིགས་བཅད་གཉིས་ནི་སེམས་ཅན་དམྱལ་བ་དུ་འབོད་དག་གི་དབང་དུ་བྱས་པའོ། །རྣོ་བ་ཡང་ཡིན་ལ་ལྕགས་ཀྱང་ཡིན་པས་ལྕགས་རྣོ་བའོ། །ལྕགས་རྣོ་ཞིང་འབར་བའི་ཚེར་མ་ནི་ལྕགས་ཀྱི་ཚེར་མ་རྣོ་ཞིང་འབར་བའོ། །དེ་རྩུབ་པ་ནི་ལྕགས་ཀྱི་ཚེར་མ་རྣོ་ཞིང་རྩུབ་པའོ། །ལ་ལ་མེ་མདག་ཕུང་པོ་ཞེས་བྱ་བའི་ཚིགས་བཅད་འདི་ནི་སེམས་ཅན་དམྱལ་བ་ཚ་བ་ཞེས་བྱ་བའི་དབང་དུ་བྱས་པའོ། །འགྲེ་ལྡོག་པའི་དུ་འབོད་ནི་འགྲོ་ལྡོག་དུ་འབོད་དོ། །འགྲེ་ལྡོག་དུ་འབོད་ཉིད་ཙམ་ནི་འགྲེ་ལྡོག་དུ་འབོད་ཙམ་མོ། །དེ་ཉིད་ཀྱི་མཐུ་ལ་བརྟེན་པ་གང་ཡིན་པ་དེ་ནི་འགྲེ་ལྡོག་དུ་འབོད་ཙམ་གྱི་མཐུ་ལ་བརྟེན་པའོ། །ཁ་ཅིག་ས་གཞི་རབ་ཏུ་འབར་བ་ལ། །
ཞེས་བྱ་བ་དང༌། ལྕགས་ཀྱི་ལེབ་མ་དག་གིས་ཁ་ཅིག་དཀྲིས། །ཞེས་བྱ་བའི་ཚིགས་བཅད་གཉིས་ནི། རབ་ཏུ་ཚ་བའི་དབང་དུ་བྱས་པའོ། །བརྒྱངས་ཤིང་བརྐྱང་བའི་ལྕེ་གང་ཡིན་པ་དེ་ནི་ལྕེ་ཡང་རབ་ཏུ་བརྒྱངས་པའོ། །གཅན་གཟན་ཁྲོ་བོ་ཞེས་བྱ་བ་ནི་གཅན་གཟན་གདུག་པ་དག་གི་ཚོགས་སོ། །ཁ་ཅིག་མེ་འབར་ཚ་བས་གདུངས་གྱུར་ནས། །ཞེས་བྱ་བའི་ཚིགས་བཅད་འདིས་ནི། ཉེ་འཁོར་བ་ཆུ་བོ་རབ་མེད་ཅེས་བྱ་བའི་དབང་དུ་བྱས་པའོ། །མི་གཙང་རོ་མྱགས་ཁུང་ལ་མཚོ་སྙམ་སྟེ། །ཞེས་བྱ་བའི་ཚིགས་བཅད་འདིས་ནི། ཉེ་འཁོར་པ་རོ་མྱགས་ཞེས་བྱ་བའི་དབང་དུ་བྱས་པའོ། །ཁ་ཅིག་མེ་ཡི་ནང་ན་ལུས་འབར་ཞིང༌། །ཞེས་བྱ་བ་ལ་སོགས་པའི་ཚིགས་བཅད་གསུམ་ནི་སེམས་ཅན་དམྱལ་བ་མནར་མེད་པ་ཞེས་བྱ་བའི་དབང་དུ་བྱས་པའོ། །ལྕགས་ཀྱི་རྣམ་པར་གྱུར་ཏེ། ཀུན་དུ་འབར་ཞིང་ཚ་བར་གྱུར་པ་དེ་ནི་མེ་འབར་ལྕགས་བསྲེགས་སོ། །དེ་དང་མཉམ་པ་ནི་མེ་འབར་ནང་ན་ལྕགས་བསྲེགས་འདྲར་གྱུར་པའོ། །རང་གི་ལས་ཀྱིས་བཟུང་ཞེས་བྱ་བ་ནི་མི་དགེ་བའི་ལས་ཀྱིས་བཟུང་པའོ། །སྒྲ་འབྱིན་ཞེས་བྱ་བ་ནི་སྒྲ་སྣ་ཚོགས་འབྱིན་པའོ། །བུ་ལོན་དེ་ད་དུ་མི་རུང་བ་ཉིད་ཀྱི་དབང་དུ་བྱས་ནས་དམྱལ་བ་མི་བཟད་ཅེས་བྱ་བ་ལ་སོགས་པའི་ཚིགས་བཅད་ལྔ་སྨོས་སོ། །དེ་ལ་ལྕགས་ཀྱི་རྫ་ཆེན་ཞེས་བྱ་བའི་ཚིགས་བཅད་འདིས་ནི་རྫ་མ་ཆེན་པོར་ཆུད་པའི་ཕྱིར་རང་དབང་མེད་པ་ཉིད་དུ་བསྟན་ཏེ། དེ་ཇི་ལྟར་ཁྱོད་ལ་བུ་ལོན་དེད་དུ་འགྲོ་བའོ། །ས་གཞིར་མེ་འབར་དུ་བ་མེད་པ་ཞེས་བྱ་བའི་ཚིགས་བཅད་འདི་ནི་ལྕགས་ཀྱི་ཕུར་བ་མེ་འབར་བ་ལྔ་བརྒྱས་ལུས་བརྒྱངས་པ་དེས་རང་དབང་མེད་པ་ཉིད་དུ་སྟོན་ཏོ། །དེར་ཇི་ལྟར་བུ་ལོན་དེད་དུ་འགྲོ་ཞེས་པའོ། །རབ་ཏུ་མནར་བ་ནི་ཡོངས་སུ་གདུངས་པའོ། །སྡུག་བསྔལ་ཆེན་པོ་མྱོང་པ་ནི་སྡུག་བསྔལ་གྱི་ཚོར་བ་ཉམས་སུ་མྱོང་བ་སྟེ། འདིར་ཁྱོད་རང་དབང་མེད་པའོ། །གྲང་བའི་དམྱལ་བ་ལས་བརྩམས་ཏེ། བུ་ཡུག་རླུང་གིས་ཞེས་བྱ་བའི་ཚིགས་བཅད་སྨོས་ཏེ། རུས་པ་དུམ་བུ་བརྒྱར་ཞིགས་པ་དེས་ཕོངས་ཤིང་སྒྲ་འབྱིན་པ་ག་ལ་ཡོད་པ་དེ་ནི་རུས་པ་བརྒྱར་ཞིགས་ཕོངས་པའི་སྒྲ་འབྱིན་པའོ། །གཤིན་རྗེའི་གཤེད་པོས་བསད་པར་གྱུར་པ་ཞེས་བྱ་བའི་ཚིགས་བཅད་
འདི་ནི་དམྱལ་བ་ཐམས་ཅད་ཀྱི་སྡུག་བསྔལ་བསྡུ་ན་རྣམ་པ་བདུན་དུ་འགྱུར་ཏེ། དེ་བསྟན་པའི་ཕྱིར་གཤིན་རྗེའི་གཤེད་པ་པོས་གསད་པར་གྱུར་པ་ཞེས་བྱ་བའི་ཚིགས་བཅད་ཡིན་ཏེ། ཇི་ལྟར་བསད་པ་ཞེ་ན། དེ་བསད་པའི་རྣམ་པ་བསྟན་པའི་ཕྱིར། གསད་དང་བཅད་དང་གཤགས་དང་བརྡེག་པ་དང༌། །ཞེས་བྱ་བའི་ཚིགས་བཅད་སྨོས་སོ། །བསད་པ་ནི་རྡོ་ལ་སོགས་པས་སོ། །བཅད་པ་ནི་རལ་གྲི་ལ་སོགས་པས་སོ། །གཤགས་པ་ནི་སོག་ལེ་ལ་སོགས་པས་སོ། །བསྲེགས་པ་ནི་མེ་འམ། རྫ་མ་ཆེན་པོའི་ནང་དུ་བཅུག་སྟེ། བཙོ་བ་ལ་སོགས་པས་སོ། །གཞོག་པ་ནི་སྟེའུ་ལ་སོགས་པས་སོ། །བརྡུང་བ་ནི་བན་གླང་ལ་སོགས་པ་དང༌། བསྡུས་འཇོམས་ཀྱི་རི་བོ་ལ་སོགས་པས་སོ། །གཞིག་པ་ནི་མདུང་ཐུང་ལ་སོགས་པས་སོ། །གནོད་པ་མང་པོས་སྡུག་བསྔལ་བ་སྟེ། དེ་ལྟར་བཤད་པ་དག་ལས་མ་གྲོལ་བ་ཡིན་ན། ཇི་ལྟར་ངལ་བུ་ལོན་གཞལ་བའོ། །དེ་དག་བདག་གིས་ཞེས་བྱ་བས་ནི་བསད་པ་ལ་སོགས་པས་སོ། །དགེ་བ་དག་གི་གནས་ནི་དགེ་བའི་གནས་སོ། །ཡང་ན་དགེ་བའི་གནས་གང་ཡིན་པ་དེ་ནི་དགེ་བའི་གནས་སོ། །གནོད་པ་མང་པོས་ཡིད་མི་དགའ་བར་འགྱུར་ཏེ་ཞེས་བྱ་བ་ནི་དམྱལ་བའི་གཏམ་ཐོས་པས་སོ། །ལྟ་བ་དྲང་པོར་གྱུར་ནས་ཞེས་བྱ་བ་ནི་དེ་སྨད་པར་བྱ་བའི་ལོག་པའི་ལྟ་བ་ཡོངས་སུ་བཏང་བས་སོ། །ཆོས་སྒྲུབ་པའི་སྣོད་ཅེས་བྱ་བ་ནི་མྱ་ངན་ལས་འདས་པའི་ལམ་སྒྲུབ་པའི་སྣོད་དོ། །ཡང་ན་ཆོས་ནི་བསོད་ནམས་ཀྱི་ཆོགས་ཏེ། དེ་སྒྲུབ་པའི་སྣོད་དོ། །སྔོན་གྱི་རྒྱལ་པོ་ཡོན་ཏན་དགའ་བ་རྣམས། །ཞེས་བྱ་བ་ཕྱེད་དང་པོ་འདིས་ནི་ཡོན་ཏན་གྱི་ཞིང་སྒྲུབ་པ་ཉིད་བསྟན་ཏོ། །འབངས་ལ་ངང་ཚུལ་སྙིང་རྗེ་ལྡན་བརྟན་པ། །ཞེས་བྱ་བ་འདིས་ནི་སྙིང་རྗེའི་ཞིང་སྒྲུབ་པ་ཉིད་བསྟན་ཏོ། །གྲགས་ལྡན་ཞེས་བྱ་བས་ནི་མཐོང་བའི་ཆོས་ཀྱི་ཕན་ཡོན་ཡིན་ནོ། །མཐོ་རིས་འགྲོ་ཞེས་བྱ་བ་འདི་ནི། འཇིག་རྟེན་ཕ་རོལ་གྱི་ཡོན་ཏན་ནོ། །དེ་བས་ན་ཆོས་མིན་ཐུབ་དཀའ་ཐུབ་བྱེད་ཅིང་ཞེས་བྱ་བ་འདིས་ནི་ཚུལ་ཁྲིམས་ཀྱི་བསོད་ནམས་ཀྱི་ཚོགས་བསྟན་ཏེ། ཆོས་མ་ཡིན་པའི་མི་མཐུན་པའི་ཕྱོགས་ལས་ཆོས་ཀྱིས་རྒྱལ་བར་བྱེད་དོ་ཞེས་བྱ་བའི་ཚིག་གིས་སོ། །སེར་སྣ་ནི་ཆགས་
པ་སྟེ། དེ་མེད་པ་ནི་སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཏེ་གཉེན་པོ་ཡིན་ནོ། །དེ་རིང་དུ་སྤངས་པ་ནི་གཉེན་པོ་ཡིན་པའི་ཕྱིར། སྦྱིན་པ་ལས་བྱུང་བའི་བསོད་ནམས་ཀྱི་ཚོགས་ཉིད་དུ་བསྟན་ཏོ། །རིན་ཆེན་མཆོག་འབར་ཞེས་བྱ་བ་དེས་འགྲོ་བས་སོ། །ཡང་དག་པའི་ལྟ་བ་ལ་འདྲིས་པ་ནི་གོམས་པའོ། །གནས་པ་ནི་བརྟེན་པའོ། །བློ་ནི་འདོད་པའོ། །བྱིས་པ་དག་ཆགས་པར་བྱེད་པས་ནི་བྱིས་པ་དགའ་བར་བྱེད་པ་སྟེ། བྱིས་པ་དགའ་བར་བྱེད་པ་ངེས་སོ། །ཆོས་ཉིད་ངེས་པ་ཞེས་བྱ་བ་ནི་ཆོས་ལ་ངེས་པའོ། །ཡང་དག་པའི་ལྟ་བ་ཡང་ཡིན་ལ། དགེ་པ་ཡང་ཡིན་བས་ཡང་དག་ལྟ་བ་དགེ་བའོ། །ཡང་དག་པའི་ལྟ་བ་དགེ་བ་དེས། ད་ནི་ཞེས་བྱ་བ་ནི་ཕྱིན་ཆད་དོ། །འགྲོ་བར་སྤྲོ་བ་ནི་འགྲོ་བར་འདོད་པའོ། །ཡོན་ཏན་དག་ལ་རྩུབ་པ་ནི། ཡོན་ཏན་དག་ལ་མི་དགའ་བ་སྟེ། མི་དགའ་བ་ནི་སྐྱོ་བའོ། །ལམ་དུ་གྱུར་པའི་གོ་འཕང་དེས། ལམ་དུ་བྱས་པ་ཡིན་པས་ལམ་དུ་གྱུར་པའོ། །གོ་འཕང་ནི་ལམ་དུ་གྱུར་པའི་རབ་ཏུ་གནས་པའོ། །ཡོན་ཏན་སྒྲུབ་པ་དབྱིག་ཏུ་བྱོས། །ཞེས་བྱ་བ་འདིས་ནི། སྦྱིན་པའི་ཕ་རོལ་ཏུ་ཕྱིན་པ་བསྟན་ཏོ། །བདག་དང་གཞན་ལ་ཕན་འདོགས་ཞེས་བྱ་བ་འདིས་ནི། བཟོད་པའི་ཕ་རོལ་ཏུ་ཕྱིན་པ་བསྟན་ཏོ། །ཚུལ་ཁྲིམས་བརྟན་ཞིང་དབང་པོ་རབ་ཏུ་སྡོམས། །ཞེས་བྱ་བ་འདིས་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་ཏོ། །རབ་གསལ་ཞེས་བྱ་བ་ནི་ནུས་པ་ཆེ་བས་སོ། །ཡིད་དུ་འོང་བས་ནི་ཡིད་ཀྱི་ནུས་པ་ཉིད་དོ། །གྲགས་པ་ནི་སྙན་པའི་ཕན་པ་དང་ལྡན་པའི་འགྲོ་བའི་སྡུག་བསྔལ་བསལ་བའོ། །དེ་ཡང་ཤིང་རྟ་ཡོད་པ་དེ་ནི་ཤིང་རྟ་དག་གོ །བཀུར་སྟི་ཉིད་སྦྱིན་པའི་ཤིང་རྟ་གང་ཡིན་པ་དེ་ནི་བཀུར་སྟི་སྦྱིན་པའི་ཤིང་རྟ་སྟེ། ཚུལ་བཞིན་ཡིད་ལ་བྱེད་པའི་ཤིང་རྟ་དག་གོ །ཡོན་ཏན་འབྱུང་བ་ཞེས་བྱ་བ་ནི་ཡོན་ཏན་སྐྱེ་བ་ཡིན་པས་ཡོན་ཏན་འབྱུང་བ་སྟེ། དེ་ནི་ཤིང་རྟ་ཉིད་དེ་རང་གི་ལུས་སོ། །མི་རྩུབ་པའི་མིག་དང་ལྡན་པ་གང་ཡིན་པ་དེ་ནི་མི་རྩུབ་མིག་ལྡན་ཏེ། མི་རྩུབ་པའི་བྱམས་པའོ། །སྦྱིན་པ་དང་དུལ་བ་ནི་སྦྱིན་དུལ་ལོ། །དེ་གཉིས་ཀྱི་འཁོར་ལོ་གང་ལ་ཡོད་པ་དེ་ནི་སྦྱིན་དུལ་འཁོར་ལོ་ཅན་ནོ། །སྦྱིན་པ་དང༌། ཚུལ་ཁྲིམས་དང་བསོད་ནམས་ཉིད་འདོད་པའི་བསོད་ནམས་པ་ཞེས་བྱ་
བའི་དོན་ཏོ། །དབང་པོ་དུལ་བ་ནི་དབང་པོ་བསྡམས་པའོ། །དྲན་པ་ཉིད་སྲབ་སྐྱོགས་ཡིན་པས་དྲན་པའི་སྲབ་སྐྱོགས་ཅན་ནོ། །བློ་གྲོས་དང་ལྡན་པ་ཉིད་ལྕག་ཡིན་པས་ཤེས་རབ་ཀྱི་སྐུལ་མའོ། །ཐོས་པ་རྒྱ་ཆེ་བ་ཉིད་ཀྱི་མཚོན་གང་ལ་ཡོད་པ་དེ་ནི། ཐོས་པ་རྒྱ་ཆེན་མཚོན་ནོ། །ངོ་ཚ་ཉིད་ཡོ་བྱད་ཡིན་པས་ངོ་ཚ་ཡོ་བྱད་དོ། །བཅིངས་པ་མཛེས་པའི་གྲོགས་གང་ཡིན་པ་དེ་ནི་གྲོགས་མཛེས་པས་བཅིངས་པའོ། །བཟོད་པ་ཉིད་ཀྱི་གཉའ་ཤིང་གང་ལ་ཡོད་པ་དེ་ནི་བཟོད་པའི་གཉའ་ཤིང་ངོ༌། །འགྲོ་བ་བརྟན་པ་གང་ཡིན་པ་དེ་ནི་འགྲོ་བ་བརྟན་པའོ། །ཚིག་ཉིད་ངན་པ་ཡིན་པས་ཚིག་ངན་ནོ། །དེ་བསྡམས་པ་ནི་ཚིག་ངན་བསྡམས་པའོ། །ཚིག་ངན་པ་ནི་བརྫུན་དུ་སྨྲ་བ་ལ་སོགས་པ་ངག་གི་སྐྱོན་རྣམ་པ་བཞིའོ། །ཡིད་འོང་ཚིག་ཙམ་སྨྲ་བས་ཟབ་པའི་སྒྲ། །ཞེས་བྱ་བ་ནི་ཚིག་ངན་པའི་མི་མཐུན་པའི་ཕྱོགས་དགེ་བའི་ལས་ཀྱི་ལམ་གཟུང་ངོ༌། །བསྡམས་པ་མ་ཞིག་པས་ན་མཚམས་མ་བྱེ་ཞེས་བྱ་བ་འདིས་ནི་ཡང་དག་པའི་འཚོ་བ་བསྟན་ཏོ། །སྤྱོད་པ་ངན་པའི་གྱ་གྱུ་སྤངས་པས་དྲང༌། །ཞེས་བྱ་བ་འདིས་ནི་ཡང་དག་པའི་ལས་ཀྱི་མཐའ་བསྟན་ཏོ། །རྒྱལ་མཚན་མཐོ་ཞེས་བྱ་བ་ནི་ཉོན་མོངས་པ་ཉེ་བར་ཞི་བ་མཐོ་པའོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་ཚངས་པའི་སྐྱེས་པའི་རབས་སོ།། །།གཞན་དག་ལ་ཕན་པ་ཡིན་པའི་ཕྱིར་གཞན་ལ་ཕན་པའོ། །དེ་ཉིད་ཤས་ཆེ་བའི་སྡུག་བསྔལ་གང་ཡིན་པ་དེ་ནི་གཞན་ལ་ཕན་པར་བྱེད་པའི་སྡུག་བསྔལ་ལོ།། ཡུལ་ལྗོངས་ཐག་རིང་དུ་གྱུར་པ་ཞེས་བྱ་བ་ནི། གྲོང་གི་སྐྱེ་བོ་དང་ཐག་བསྲིངས་པའོ། །ཞི་བ་ཞེས་བྱ་བ་ནི་ཚུལ་ཁྲིམས་ཡིན་ཏེ། ལུས་ཀྱི་ལས་ཀྱི་མཚན་ཉིད་དོ། །སྤྱུགས་པ་ཞེས་བྱ་བ་ནི་ཡུལ་གྱི་སྐྱེ་བོ་དང་བྲལ་བར་བྱས་པའོ། །ཁྲོས་པ་ཞེས་བྱ་བ་ནི་ཉེས་པ་ཡོད་པས་ཞེས་བྱ་བའི་དོན་ཏོ། །དེ་དག་གིས་མི་རིགས་པ་བྱས་པ་ནི་ཉེས་པ་ཡོད་པས་རྒྱལ་པོས་སྤྱུགས་པའོ། །གཅོམ་ཆུང་བ་ནི་གཟི་བརྗིད་ཆུང་བའོ། །ཉམ་ཐག་ཅིང་ཕོངས་པའི་སྒྲ་འབའ་ཞིག་གང་ཡིན་པ་དེ་ནི་ཉམ་ཐག་ཕོངས་པའི་སྒྲ་འབའ་ཞིག་གོ །ནགས་ཚལ་དེ་ལོགས་སུ་འོང་བ་ནི་ནགས་ཚལ་དེ་ལ་མངོན་དུ་
ཕྱོགས་ཏེ་འོང་བའོ། །གངས་རིའི་རྩེ་མོ་འགྲོ་ཤེས་པ་འདྲ་བཞེས་བྱ་བས་ནི་མདོག་དང་མཚན་ཉིད་བསྟན་ཏོ། །སྟོན་ཀའི་སྤྲིན་ནམ། ན་བུན་གྱི་ཚོགས་རླུང་གིས་བསྐྱོད་པ་བཞིན་ཞེས་བྱ་བ་ནི། འགྲོས་དང༌། མདོག་དང༌། ཚང་མཐུན་པ་བསྟན་ཏོ། །མདོག་ཅུང་ཟད་དམར་ཞིང་སྣུམ་པ་གང་ཡིན་པ་དེ་ནི། སྣ་མདོག་ཅུང་ཟད་དམར་ཞིང་སྣུམ་པའོ། །རྡུལ་དང་ཉི་མའི་འོད་ཟེར་ནི། །རྡུལ་དང་ཉི་མའི་འོད་ཟེར་རོ། །དེས་རེག་པ་ནི་རྡུལ་དང་ཉི་མའི་འོད་ཟེར་གྱིས་རེག་པ་སྟེ་དེ་བས་ནའོ། །ཁ་དོག་མ་རུད་པ་གང་ཡིན་པ་དེ་ནི་ཁ་དོག་ཉམས་པའོ། །རིད་པ་སྟེ། ཅིའི་ཕྱིར་རིད་པ་ཡིན་ཞེ་ན། དེ་ཉིད་སྨྲས་པ། མྱ་ངན་གདུངས་ཕོངས་ཞེས་བྱ་བ་ལ་མྱ་ངན་ནི་སེམས་ཀྱི་སྡུག་བསྔལ་ལོ། །གདུངས་ཕོངས་ཞེས་བྱ་བ་ནི་ལུས་ཀྱི་སྡུག་བསྔལ་ཏེ། དེ་གཉིས་ཀྱིས་རིད་པར་གྱུར་པའོ། །མིའི་སྐད་དུ་སྨྲ་ཞིང་ཞེས་བྱ་བ་ནི། ཨ་ལ་སོགས་པའི་ཡི་གེའི་ཁྱད་པར་གྱིས་སོ། །མི་འཇིགས་པའི་སྦྱིན་པར་ཁས་ལེན་པ་ཞེས་བྱ་བ་ནི་ང་ལས་ཁྱེད་འཇིགས་པ་མི་འབྱུང་གི་མ་འཇིགས་ཤིག་མ་འཇིགས་ཤིག་ཅེས་བྱ་བའི་ཚིག་གོ །དགའ་བར་བྱེད་པ་ཞེས་བྱ་བ་ནི་ཁྱེད་ཅག་སུ་ཞིག །ཅིའི་ཕྱིར་འདི་ལྟར་གྱུར་ཅིང་འདི་ན་འཁོད། །ཅེས་བྱ་བ་ལ་སོགས་པ་གང་ཡིན་པ་དེ་ཉིད་དེ། ཚིག་འདི་གཉིས་ཀྱིས་དོན་བསྟན་པའོ། །ཁྲོས་པའི་རླུང་ཡངས་ཞེས་བྱ་བ་ནི་བདག་ཉིད་ལ་སྐྱོན་མེད་པར་རྒྱལ་པོས་སྤྱུགས་པ་ཉིད་དུ་བསྟན་ཏོ། །སྐལ་པ་ལྷག་མ་ཞེས་བྱ་བ་འདིས་ནི་བདག་ཉིད་འཚོ་བ་ཉིད་དུ་རེ་བའོ། །ལྷ་དཔལ་མངོན་དུ་ཞེས་བྱ་བ་ནི་དེ་མཐོང་བས་བདག་ཉིད་དགའ་བ་ཉིད་དུ་སྟོན་ཏོ།། བཤེས་བས་ཀྱང་ལྷག་པ་མཐོང་བའི་ཕྱིར། སྐལ་བ་ལྷག་མ་ཡོད་པའོ། །གཉེན་བས་ཀྱང་ལྷག་པ་མཐོང་བའི་ཕྱིར་ནི། ལྷ་དཔལ་མངོན་དུ་གྱུར་པའོ། །ཕོངས་པ་འདི་ལས་ཞེས་བྱ་བ་ནི་འབྲོག་དགོན་པ་ན་སྡུག་བསྔལ་ཞིང་ཕོངས་པའོ། །སྙིང་རྗེ་མེད་ཅིང་ཞེས་བྱ་བ་ནི་སྙིང་རྗེ་དང་མི་ལྡན་པའོ། །འཛེམ་པ་མེད་པ་ནི་ཁྲེལ་མེད་པ་སྟེ། འཇིག་རྟེན་གྱི་བརྗོད་པ་ལ་མི་ལྟ་བའོ། །ཕྱི་ཚེ་མི་སེམས་ཤིང་ཞེས་བྱ་བ་འདིས་ནི་བདག་ཉིད་ལ་ལྟོས་པ་ཉིད་དུ་སྟོན་པའོ། །ངན་སོང་དུ་འགྲོ་བར་མི་སེམས་པའི་ཕྱིར། རང་ལ་ཕན་པ་ལ་མི་ལྟ་བ་སྟེ། འདིས་ནི་མངོན་པར་མཐོ་བ་དང༌། ངེས་པར་
ལེགས་པ་ཡོད་པའི་མཚན་ཉིད་དག་ལ་ཕན་པ་ལ་མི་སེམས་པ་ཉིད་དུ་སྟོན་ཏོ། །བདག་ལ་ཕན་པ་ལ་མི་ལྟ་ཞིང༌། ཚེ་ཕྱི་མ་ལ་མི་སེམས་པའི་རྒྱུའི་དབང་དུ་བྱས་ནས། སྨྲས་པ། རྒྱལ་པོའི་དཔལ་གློག་ལྟར་མི་བརྟན་པ་དང་དབང་པོ་ཕྲོགས་པའི་ཕྱིར་རོ། །ཡང་ན་སྙིང་རྗེ་མེད་ཅིང་ཞེས་བྱ་བ་ལ་སོགས་པ་བཞིའི་རྒྱུ་བསྟན་པ་ཡིན་ཏེ། རྒྱལ་བའི་དཔལ་མི་བརྟན་པ་དང༌། དབང་པོ་ཕྲོགས་པའི་ཕྱིར་རོ། །ཡང་ན་རང་ལ་ཕན་པ་ལ་ལྟོས་པ་མེད་ཀྱི་རྒྱུ་ནི་རྒྱལ་པོའི་དཔལ་མི་བརྟན་པས་དབང་པོ་ཕྲོགས་པའི་ཕྱིར་རོ། །གཞན་གསུམ་ནི་སྙིང་རྗེ་མེད་ཅིང་མི་འཛེམ་པ་དང༌། ཚེ་ཕྱི་མ་མི་སེམས་པ་ལ་སོགས་པའོ། །འཆི་བདག་དེའུ་རེ་འོང་བར་དེ་མི་སེམས་ཞེས་བྱ་བ་ལ་སོགས་པའི་ཚིགས་བཅད་གཉིས་ཀྱིས་བསྟན་ཏེ། འཆི་བདག་དེའུ་རེ་འོང་བར་དེ་མི་སེམས་ཞེས་བྱ་བ་འདི་ཚིགས་བཅད་ཀྱི་དང་པོ་ཕྱེད་ཀྱིས་ནི། ཚེ་ཕྱི་མ་ལ་མི་སེམས་པའི་རྒྱུ་གཉིས་ཡིན་ཏེ། ཚེ་ཕྱི་མ་མི་སེམས་པའི་བློ་ཡོད་པར་མི་འགྱུར་བ་ནི། འཆི་བ་ཉེ་བར་གནས་པ་མཐོང་བའི་ཕྱིར་དང༌། འཆི་བ་ཡོད་ཀྱང་སྡིག་པ་ཡོད་པར་མི་ཤེས་པའམ། མ་ཐོས་པའོ། །འཛེམ་པ་མེད་པའི་རྒྱུ་བསྟན་པ་ནི་ཚིགས་བཅད་ཕྱེད་འོག་མ་ཡིན་ཏེ། གཉི་གའི་རྒྱུས་ཀྱང་འཛེམ་པ་མེད་པ་སྟེ། ཕན་པར་སྟོན་པའི་དགེ་བའི་བཤེས་གཉེན་མེད་པའི་ཕྱིར། རྣམ་རྟོག་ཞེན་བས་གདམས་སུ་མེད་པའམ། མགོན་མེད་པར་གྱུར་པས་སོ། །སྙིང་རྗེ་མེད་པའི་རྒྱུ་བསྟན་པའི་ཕྱིར། ནད་ཀྱི་གཞིར་གྱུར་ཅེས་བྱ་བ་སྨོས་ཏེ། ལུས་ཞེས་བྱ་བ་འདིས་ནི་མི་གཙང་བ་ཉིད་དུ་བསྟན་ཏོ། །གཅིག་པུ་ཞེས་བྱ་བ་འདིས་ནི་བདག་པོ་དང་བྲལ་བའི་ཕྱིར་བདག་མེད་པ་ཉིད་དུ་བསྟན་ཏོ། །ནད་ཅེས་བྱ་བ་ནི་སྡུག་བསྔལ་ཉིད་དུ་བསྟན་ཏོ། །ཆུད་ཟ་བའི་ཞེས་བྱ་བ་འདིས་ནི་མི་རྟག་པ་ཉིད་དུ་བསྟན་ཏོ། །ཀྱི་ཧུད་གཏི་མུག་ཅེས་བྱ་བ་འདིས་ནི་མ་རིག་པས་ཉེ་བར་བཅོམ་པ་སྟེ། ཟིལ་གྱིས་མནན་པ་ཉིད་དུ་སྟོན་ཏེ། སེམས་ཅན་རྣམས་ནི་ཕྱིན་ཅི་ལོག་རྣམ་པ་བཞིས་ཕྱིན་ཅི་ལོག་པ་ཉིད་དུ་བསྟན་ཏོ། །ནད་མང་བརྒྱའི་གནས་ཞེས་བྱ་བས་ནི་གང་གི་སྡུག་བསྔལ་དང་ལྡན་པ་བསྟན་ཏོ། །ལུས་འདི་སྡུག་བསྔལ་ཉམ་ཐག་པ། །ཞེས་བྱ་བ་ནི་སྡུག་བསྔལ་གྱིས་ཉམ་ཐག་པ་གཞན་དག་གོ །འདི་རྣམས་ཕོངས་ལས་བསྒྲལ་བའི་གཟེངས་གྱུར་པ།།
ཞེས་བྱ་བ་ནི་སྡུག་བསྔལ་ལས་བསྒྲལ་པའི་གཟིངས་ཏེ། སྡུག་བསྔལ་གྱི་ལུས་ཀྱི་རྒྱུས་གཞན་སྡུག་བསྔལ་ལས་བསྒྲལ་བས་འབྲས་བུ་དང་བཅས་པ་ཉིད་དུ་བྱའོ་ཞེས་བྱ་སྟེ། དེས་ན་བྱང་ཆུབ་སེམས་དཔའི་ལུས་སྡུག་བསྔལ་མང་པོའི་གནས་ཡིན་པ་དེ་བཞིན་དུ་འདི་དག་གི་ལུས་ཀྱང་ཡིན་ནོ། །ཅིའི་ཕྱིར་ལུས་འདི་བསྒྲལ་བའི་གཟིངས་སུ་གྱུར་པ་ཞེས་བྱ་བའི་རྒོལ་བའི་སྐབས་ཤེས་པར་བྱས་ནས། རང་དང་གཞན་གྱི་ལུས་ཀྱི་ཁྱད་པར་བརྫུན་པའི་ཕྱིར། མི་ཡི་ལུས་སུ་སྐྱེས་པ་ཡིས། །ཞེས་བྱ་བའི་ཚིགས་བཅད་སྨོས་སོ། །མཐོ་རིས་ཐར་པའི་བདེ་བ་ཐོབ་པར་ནུས་པ་ཞེས་བྱ་བ་འདིས་ནི་མིའི་ལུས་ཀྱིས་མངོན་པར་མཐོ་བ་དང༌། ངེས་པར་ལེགས་པ་ཐོབ་པར་ནུས་པ་ཉིད་དུ་སྟོན་ཏོ། །བདག་གི་མཐོང་བའི་ཆོས་ཀྱི་ལུས་ཀྱིས་ནི་མི་ནུས་པ་ཉིད་དུ་སྟོན་ཏོ། །འདི་ལྟར་གྱུར་པ་ལ་ཕན་འདོགས་པ་ཡང་ཤིན་ཏུ་དཀོན་ཞེས་བྱ་བ་ལ་འདི་དག་ཅེས་བྱ་བ་ནི་མི་སྐྱེ་བའོ། །འདི་ལྟར་ཞེས་བྱ་བ་ནི་ད་ལྟར་བྱུང་བའི་དགེ་བ་དེས་མེད་པ་ཉིད་དུ་སྟོན་ཏོ། །བདག་ནི་རྙེད་པར་བླ་བ་སྟེ། མིའི་སྐྱེ་བ་ལ་བསོད་ནམས་ཀྱི་ཚོགས་ལ་གོམས་པར་བྱས་པས་སྐྱེ་བ་གཞན་གྱི་རྒྱུ་བསྟན་པའི་ཕྱིར། བདག་གི་སྤྱོད་ཡུལ་གནས་སུ་ལྷགས་པར་གྱུར། །ཅེས་བྱ་བའི་ཚིགས་བཅད་སྨོས་སོ། །འདི་འདྲའི་མགྲོན་ཀྱང་བསོད་ནམས་བྱས་པས་འཐོབ། །ཅེས་བྱའོ། །གལ་ཏེ་བདག་གིས་བོས་ཏེ། འདིར་འོངས་པ་མ་ཡིན་ན་ཡང་བསོད་ནམས་བྱས་པས་འཐོབ་ཅེས་བྱ་བ་ཡིན་ཏེ། ཅིའི་ཕྱིར་ཞེ་ན། སྤྱོད་ཡུལ་གནས་སུ་ལྷག་པར་གྱུར་པའི་ཕྱིར་ཏེ། རང་གིས་དོན་དུ་གཉེར་བ་ཉིད་བསྟན་ཏོ། །ཕོངས་ཤིང་ཉམ་ཐག་གྱུར་ཞེས་བྱ་བ་ནི་སྡུག་བསྔལ་བ་ཉིད་དོ། །གཉེན་དང་བྲལ་བ་ཞེས་བྱ་བ་ནི་རྗེས་སུ་འབྲང་བ་མེད་པ་བསྟན་ཏོ། །རྒྱུ་འདི་གསུམ་གྱིས་ནི་དེ་སྙིང་རྗེའི་གནས་སུ་བསྟན་ཏེ། དོན་དུ་གཉེར་བ་དང༌། སྡུག་བསྔལ་བ་དང༌། རྗེས་སུ་འབྲང་བ་མེད་པ་སྟེ། དེ་བས་ན་བསྐྱབ་པའི་རིགས་ཞེས་བྱ་བའི་དོན་ཏོ། །སྡུག་བསྔལ་མང་པོའི་གནས་ཞེས་བྱ་བ་ལ་ཅིའི་ཕྱིར་ཞེ་ན། རྟག་ཏུ་ན་བའི་ཕྱིར་ཏེ། ལྷན་ཅིག་སྐྱེས་པའི་སྡུག་བསྔལ་གྱིས་སོ། །ཉོན་མོངས་པ་མང་པོའི་གཞི་ཞེས་བྱ་བ་ནི། གནོད་པ་སྣ་ཚོགས་སྐྱེ་བའི་ཉོན་མོངས་པའི་གཞི་ཡིན་པའི་ཕྱིར་རོ། །དེ་ནས་དེ་དག་ལ་ཁ་ཅིག་ནི་ཞེས་བྱ་བའི་ཚིག་གིས་ནི། སེམས་མི་བརྟན་པའི་
དབང་དུ་བྱས་པའོ། །བདག་ཅག་མགོན་མེད་རྣམས་ཀྱི་མགོན། །ཞེས་བྱ་བའི་ཚིགས་བཅད་ནི། སེམས་སྟོབས་བར་མའི་དབང་དུ་བྱས་པའོ། །གཞན་ནི་སེམས་རབ་ཏུ་བརྟན་པས་ཞེས་བྱ་བ་ལ་སོགས་པ་ནི་སེམས་བརྟན་པའི་དབང་དུ་བྱས་པའོ། །བདེ་འགྲོ་ཐོབ་ཕྱིར་ཞེས་བྱ་བ་ནི་མི་ཉིད་དུ་སྐྱེ་བའི་ཕྱིར་རོ། །མི་དབང་རྒྱལ་སྲིད་གདུགས་གཅིག་དཔའ་ཕྱིར་ཞེས་བྱ་བ་ནི། རྒྱལ་སྲིད་ཀྱི་ཕྱིར་ཡང་མ་ཡིན་ཞེས་བྱ་བའི་དོན་ཏོ། །མཐོ་རིས་བདེ་མཆོག་མྱོང་བའི་ཕྱིར་མ་ཡིན། །ཞེས་བྱ་བ་ནི་འདོད་པ་ན་སྤྱོད་པའི་མངོན་པར་མཐོ་བ་ཐོབ་པའི་ཕྱིར་ཡང་མ་ཡིན་ནོ། །ཚངས་པའི་གནས་ཕྱིར་མ་ཡིན་ཞེས་བྱ་བ་ནི། གཟུགས་དང༌། གཟུགས་མེད་པ་ནི་གཡང་སར་མངོན་པར་མཐོ་བ་ཐོབ་པའི་ཕྱིར་ཡང་མ་ཡིན་པའོ། །ཐར་པའི་བདེ་ཕྱིར་མིན་ཞེས་བྱ་བ་ནི། ཉན་ཐོས་དང༌། རང་སངས་རྒྱས་ཀྱི་ཕྱིར་ཡང་མ་ཡིན་པའོ། །གཡང་སར་ལྟུང་སྟེ་ཞིག་ན་ནི་འཆི་བའོ། །དེ་གཉིས་ཀྱིས་བྱས་པའི་སྡུག་བསྔལ་ནི་གཡང་སར་ལྟུང་སྟེ་ཞིག་ནས་འཆི་བའི་སྡུག་བསྔལ་ལོ། །དེ་ལ་མི་ལྟ་བ་གང་ཡིན་པ་དེ་ནི་གཡང་སར་ལྟུང་སྟེ་ཞིག་ནས་འཆི་བའི་སྡུག་བསྔལ་ལ་མི་ལྟ་བའོ། །ས་ཕྱོགས་དེ་ཞེས་བྱ་བ་ནི་དེ་དག་ལ་སྔར་ཕྱོགས་གང་བསྟན་པའི་ཕྱོགས་དེར་ཞེས་བྱ་བའི་དོན་ཏོ། །གངས་རིའི་རྩེ་མོ་ཞེས་བྱ་བ་ནི་གངས་རི་ནས་ལྷུང་བ་དེའི་གངས་རི་དེའི་རྩེ་མོ་ཉིད་དོ། །གནམ་གྲུམ་པའི་སྒྲ་གང་ལ་ཡོད་པ་དེ་ནི། གནམ་གྲུམ་སྒྲ་བཞིན་ནོ། །མ་བཏགས་ཞེས་བྱ་བ་ནི་དཔག་བསམ་གྱི་ཤིང་ལས་བྱུང་བ་ཞེས་བྱ་བའི་དོན་ཏོ། །མེ་ཏོག་ཀུ་མུད་སྤུངས་ལྟར་མཛེས། །ཟླ་བའི་འོད་ཟེར་སྤུངས་པ་བཞིན། །ཞེས་བྱ་བ་དེ་དེ་གཉིས་ཀྱིས་མདོག་བསྟན་ཏོ། །འདི་ནི་དེ་ཡི་གཟུགས་བརྙན་ཞིག །ཅེས་བྱ་བ་འདིས་ནི་ཁ་དོག་དང༌། དབྱིབས་གཉིས་མཉམ་པར་བསྟན་ཏོ། །བདག་ཅག་རྣམས་ཀྱི་ཆོ་རིགས་དང༌། ཚུལ་དང༌། དད་པ་ཅི་འདྲ་ཞེས་བྱ་བ་འདིས་ནི་ཡོན་ཏན་དང༌། ཕན་གདགས་པའི་ཞིང་ཉིད་མ་ཡིན་པ་ཞེས་བྱ་བའི་དོན་ཏོ། །ཡང་ན་ཡོན་ཏན་གྱི་ཞིང་ཉིད་མ་ཡིན་པའོ། །ཆོ་རིགས་ཞེས་སྨོས་པས་ནི་བྲམ་ཟེའི་རིགས་ནི་འཇིག་རྟེན་པ་རྣམས་ཀྱིས་བཀུར་བའི་གནས་ཡིན་པའི་ཕྱིར་དེ་ཡང་མ་མཐོང་བའོ། །ངང་ཚུལ་གྱི་ཞེས་བྱ་བ་ནི་ཡོན་ཏན་གྱི་ཞིང་ཉིད་དུ་བསྟན་ཏོ། །དད་པ་ཞེས་བྱ་བ་ནི་ཕན་འདོགས་པའི་ཞིང་ཉིད་དུ་བསྟན་ཏོ། །སྐལ་མཉམ་ཞེས་
བྱ་བ་ནི་སྙིང་རྗེའི་ཞིང་ཉིད་དུ་བསྟན་ཏོ། །མ་ཐོས་པར་ཞེས་བྱ་བ་ནི་མ་འདྲིས་པར་ཞེས་བྱ་བའི་དོན་ཏོ། །ཕོངས་ཤིང་ཉམ་ཐག་ཅེས་བྱ་བ་ནི་སྡུག་བསྔལ་བ་ཉིད་དོ། །འཇིགས་ལ་མྱ་ངན་གདུངས་ཞེས་བྱ་བ་ནི་རྗེས་སུ་འབྲང་བ་མེད་པའོ། །སྤྱོད་བཟང་འདི་འདྲ་གང་དུ་བསླབས་ཞིག་གུ། །ཞེས་བྱ་བ་ནི་མཁན་པོ་གང་ཡིན་པའི་དོན་ཏོ། །བླ་མ་གང་ལ་གནས་ནས་བསྙེན་བཀུར་བྱས། །ཞེས་བྱ་བ་ནི་དཔོན་གང་ལ་བསྙེན་བཀུར་བྱས་པའོ། །དེ་ནི་འདི་ལས་མངོན་ཞེས་བྱ་བ་ནི་གཟུགས་དང་རྗེས་སུ་མཐུན་པ་ཉིད་ཀྱིས་ཡོན་ཏན་མངོན་པའི་དོན་ཏོ། །གཟུགས་དང་རྗེས་སུ་མཐུན་པའི་ཡོན་ཏན་གང་ཡིན་པ་སྨྲས་པ། དེ་འདིར་དེ་ཉིད་མངོན་སུམ་དུ་མཐོང་བ་ཡིན་ཏེ། ཡོན་ཏན་དང་ལྡན་པ་དེ་ནི་གང་དུ་བསླབས་ཞེས་བྱ་བ་དང་སྦྱར་རོ། །རང་བཞིན་ཡང་ཡིན་ལ་འཕགས་པ་ཡང་ཡིན་པས་རང་བཞིན་འཕགས་པའོ། །དེའི་ཕུན་སུམ་ཚོགས་པ་དེ་ནི་རང་བཞིན་དུ་འཕགས་པ་ཕུན་སུམ་ཚོགས་པའོ། །ཡང་ན་རང་བཞིན་འཕགས་པ་ཉིད་ཕུན་སུམ་ཚོགས་པ་ཡིན་པས་རང་བཞིན་འཕགས་པ་ཕུན་སུམ་ཚོགས་པའོ། །རང་བཞིན་ཕུན་སུམ་ཚོགས་པ་དེས་དོན་བཞིན་བསྒྲུབ་པའི་དོན་དང་མཐུན་པ་ཡིན་པས་དོན་བཞིན་ནོ། །དེ་བསྒྲུབས་པ་ཞེས་བྱ་བ་ནི་བཟང་པོ་ཞེས་བྱ་བ་གླང་པོ་ཆེ་བདག་ཉིད་གང་ཡིན་པ་དེ་ནི་དོན་བཞིན་བསྒྲུབས་ཞེས་བྱ་བ་འདིས་ནི་བསྟན་ཏོ། །གང་གི་རང་བཞིན་ཕུན་སུམ་ཚོགས་པ་ཡིན་པ་དང༌། ཇི་ལྟར་རང་བཞིན་ཕུན་སུམ་ཚོགས་པ་ཡིན་པར་ཤེས་པར་བྱ་ཞེ་ན། དེ་ཉིད་ཀྱི་ཕྱིར་སྨྲས་པ། འདི་ལྟར་ཤི་བར་འགྱུར་ན་ནི་དགོན་པ་བཞིན་དུ་ཤེས་པའོ། །སྤྱོད་བཟང་འདི་འདྲ་གང་དུ་བསླབས་ཞིག་གུ། །ཞེས་བྱ་བ་འདི་བསྟན་པ་དེ་ལ་དེའི་སྤྱོད་པ་བཟང་པོ་བསྒྲུབ་པའི་ཕྱིར། ཀྱེ་མའོ་རང་བཞིན་འཕགས་པ་ཕུན་སུམ་ཚོགས། །ཞེས་བྱ་བའི་ཚིགས་བཅད་སྨོས་པ་ཡིན་ནོ། །གཉེན་དང་བཤེས་ནི་གཉེན་བཤེས་སོ། །དེ་ཉིད་བྱམས་པ་ཡིན་པས་གཉེན་བཤེས་བྱམས་པའོ། །དེ་དག་ལས་ཁྱད་པར་དུ་གཉེན་བཤེས་གང་མིན་པ་དེ་ནི་གཉེན་བཤེས་བྱམས་པ་བས་ཀྱང་ལྷག་པ་སྟེ། འདིས་ནི་བསམ་པ་ཕུན་སུམ་ཚོགས་པ་བསྟན་ཏོ། །ཕན་འདོགས་པ་བདག་ཅག་ལ་ཕན་པའི་ཕྱིར་ཞེས་བྱ་བ་ནི་སྔར་བསྟན་པའི་དབུགས་ཕྱུང་ཞེས་བྱ་བ་དེ་ཉིད་བསྟན་ཏོ། །རང་གི་སྲོག་གི་གསལ་ཏེ་རབ་ཏུ་ལེགས་པར་བྱེད་བྱེད་པ་ཞེས་བྱ་བ་ནི་
གང་དེ་བདག་ཉིད་ཡོངས་སུ་བཏང་བ་དེ་ཉིད་བསྟན་ཏོ། །དེ་ལྟར་མཆོད་པར་མི་འགྱུར་རོ་ཞེས་བྱ་བ་ནི་གང་སྔར་བསྟན་པ་འདི་ལ་མཆོད་པར་བྱ་སྟེ་ཞེས་བྱ་བ་དེ་ཉིད་ཡིན་ནོ། །བཀུར་སྟི་བྱས་པར་མི་འགྱུར་གྱི། །ཞེས་བྱ་བ་ནི་གང་སྔར་བསྟན་པའི་མེར་སྲེག་པའི་ཞལ་ཏ་བྱོས་ཞེས་བྱ་བ་དེ་ཉིད་བསྟན་པ་ཡིན་ནོ། །འདི་ཡི་བསམ་པ་རྫོགས་པར་བྱ། །ཞེས་བྱ་བ་ནི་གང་གི་བསམ་པ་ཡིན་ཞེ་ན། བདག་ཡོངས་སུ་བཏང་བའི་བསམ་པ་རྫོགས་པར་བྱའོ། །མཆོད་པར་བྱས་པར་འགྱུར་རོ་ཞེས་བྱ་བ་ནི་མཆོད་པ་བསྒྲུབས་པར་འགྱུར་རོ་ཞེས་བྱ་བའི་དོན་ཏོ། །འདི་བསམ་པ་རྫོགས་པར་བྱའོ་ཞེས་བསྟན་པ་ལ། བསམ་པ་གང་ཡིན་པ་དེ་བསྟན་པའི་ཕྱིར། བདག་ཅག་རྣམས་ནི་བསྒྲལ་བའི་ཕྱིར། །ཞེས་བྱ་བའི་ཚིགས་བཅད་སྨོས་སོ། །བདག་ཅག་རྣམས་ཀྱི་བསྒྲལ་བ་ནི་བདག་ཅག་རྣམས་བསྒྲལ་བའོ། །དེའི་ཆེད་དུ་གཏོང་བའི་ཚུལ་གང་ལ་ཡོད་པ་དེ་ནི་བདག་ཅག་བསྒྲལ་བའི་ཕྱིར་རོ། །རབ་ཏུ་ཕོངས་པའི་ལུས་བཏང་བ། །ཞེས་བྱ་བ་ཡིན་ཏེ། ཅིའི་ཕྱིར་ཞེ་ན། རབ་ཏུ་གཅེས་པའི་མགྲོན་བྱ་བའི་ཕྱིར་རོ། །དེ་བས་དེ་ཡི་བསམ་པ་རྫོགས་པར་བྱ། །ཞེས་བྱ་བ་ནི་བདག་བསྒྲལ་བའི་བསམ་པ་སྟེ། དགོན་པ་ལས་བསྒྲལ་བའི་ཕྱིར་རོ། །བདག་ཅག་རྣམས་ཀྱིས་བྱ་བའི་རིགས་སོ། །ཞེས་བྱ་བ་ནི་རིགས་པ་ཡིན་པའི་ཕྱིར། དེ་བས་ན་བསམ་པ་ཉིད་བདག་ཅག་རྣམས་ཀྱིས་བྱ་བའི་རིགས་ཏེ་དགོན་པ་འདི་ལས་བརྒལ་བར་བྱའོ་ཞེས་བྱ་བའི་དོན་ཏོ། །གཞན་དུ་བྱས་ནས་ཞེས་བྱ་བ་ནི་གང་སྔར་བསྟན་པའི་མཆོད་པ་བྱས་ཏེ། མེར་སྲེག་པའི་ཞལ་ཏ་བྱས་ལ་ཞེས་བྱ་བ་དེ་ཡིན་ཏེ། འདི་ནས་བསྒྲལ་བའི་ཕྱིར་ལུས་བཏང་བ་ཡིན་ནོ། །ཅིའི་ཕྱིར་ཞེ་ན། མ་འདྲིས་པའི་ཕྱིར་རོ། །འདྲིས་པ་དག་ལ་ནི་འདྲིས་པ་ལ་ལྟོས་པས་ཕན་འདོགས་པར་བྱེད་པ་ཡིན་ཏེ། དེ་བས་ན་འདྲིས་པའང་མེད་དོ། །བདག་ཅག་རྣམས་བསྒྲལ་བ་འདི་ལ་ཡོན་ཏན་ཅི་ཡོད་ཅེ་ན། སྨྲས་པ། དེས་ན་ལུས་ཤིན་ཏུ་གཅེས་པ་ཡིན་ཡང་བཏང་བ་ནི་རབ་ཏུ་གཅེས་པའི་མགྲོན་ཡིན་པའི་ཕྱིར་ཏེ། ལུས་པས་ཀྱང་རབ་ཏུ་གཅེས་པ་ནི་གང་གི་ཕྱིར་མགྲོན་ཡིན་པའི་ཕྱིར་ཏེ་ལུས་བཏང་བའོ། །བསམ་པ་ནི་བདག་ཅག་བསྒྲལ་བའི་བསམ་པ་སྟེ། རབ་ཏུ་གཅེས་པའི་མགྲོན་ཡིན་པའི་ཕྱིར་ལུས་བཏང་བ་ཡིན་ནོ། །དེ་བས་ན་གཞན་དུ་ན་
ཞེས་བྱ་བ་སྟེ། དེའི་བསམ་པ་མ་བྱས་པར་གྱུར་ན་ནི་བྱས་པ་དོན་མེད་པར་འགྱུར་རོ། །རབ་ཏུ་གཅེས་པའི་མགྲོན་ལ་རབ་ཏུ་ཕངས་པའི་ལུས་བཏང་བ་བྱས་པའི་འབད་པའོ། །དེ་ལྟར་རེ་ཞིག་བྱང་ཆུབ་སེམས་དཔའ་ལས་རྗེས་སུ་མ་བླངས་ན་རིགས་པ་མ་ཡིན་པ་ཉིད་དུ་བསྟན་ནས། ད་ནི་བདག་ཅག་ཉིད་ཀྱིས་མ་བླངས་པ་མི་མཐུན་པ་ཉིད་དུ་བསྟན་པའི་ཕྱིར། འདི་ཡིས་བྱས་ཏེ་ཅི་བདོག་པ། །ཞེས་བྱ་བའི་ཚིགས་ཅད་སྨོས་ཏེ། གཞན་དུ་བྱས་ན་དོན་མེད་འགྱུར། །ཞེས་བྱ་བ་འདི་དོན་མེད་པ་ཉིད་དུ་བསྒྲུབ་པའི་ཕྱིར། བྱམས་པ་ཞེས་བྱ་བ་ནི་བསམ་པ་ཕུན་སུམ་ཚོགས་པའོ། །ཅི་བདོག་པ་ཞེས་བྱ་བ་ནི་སྦྱོར་བ་ཕུན་སུམ་ཚོགས་པའོ། །བདོག་པ་ཐམས་ཅད་ཅེས་བྱ་བ་ནི་སྦྱིན་པར་བྱ་བའི་དངོས་པོ་ཕུན་སུམ་ཚོགས་པའོ། །བདག་ཅག་རྣམས་ཀྱིས་མ་བླངས་ན་དོན་མེད་པར་འགྱུར་བའི་ཕྱིར། བདག་ཅག་རྣམས་ཀྱིས་མ་བླངས་ནའོ། །དེ་གང་ཡིན་ཞེ་ན། དེ་ནི་མགྲོན་ནོ། །དེ་ལས་ཅི་ཞིག་བཀུར་སྟི་བྱ། །ཞེས་བྱ་བ་ནི་སྔར་བསྟན་པའི་མེ་ལ་སྦྱང་བ་དེས་བུ་ལོན་མེད་པ་སྟེ། དེས་མེས་མ་བསྲེགས་པ་ཉིད་དུ་སྟོན་ཏོ། །གལ་ཏེ་མ་བླངས་པ་དང༌། མེ་ལ་སྦྱངས་པས་མ་བསྲེགས་ན། །དེ་ལྟར་ན་བཀུར་སྟི་ཅི་ཞིག་བྱས་པ་ཡིན་ཞེ་ན། དེ་བསྟན་པའི་ཕྱིར། དེ་བས་དེ་ལ་བླ་མ་བཞིན། །ཞེས་བྱ་བའི་ཚིགས་བཅད་སྨོས་སོ།། དེ་བས་ན་ཞེས་བྱ་བ་ནི་མ་བླངས་ཤིང་དོན་མེད་པ་དེས་མགྲོན་གྱི་བསྙེན་བཀུར་མེད་པའི་ཕྱིར། དེ་ལས་གཞན་པ་དེའི་ཚིག་ཉན་པར་བྱས་ན་བཀུར་སྟི་ཉིད་དུ་བསྟན་པར་འགྱུར་རོ། །བཀུར་སྟི་ཆེན་པོ་བྱ་བ་ཙམ་དུ་མ་ཟད་དེ། དེ་བདག་ལ་ཕན་པར་འགྱུར་བའི་ཕྱིར་ཡང་བཀུར་སྟི་ཆེན་པོ་བྱ་བའི་རིགས་ཏེ། དེའི་ཚིག་མཉན་པར་བྱ་བས་སོ། །གལ་ཏེ་ཁྱེད་ཅག་གིས་དེ་ལ་བྱས་པ་གཟོ་བའི་ཕྱིར། དེ་ལ་མཆོད་པ་བྱས་ན་ཡང་དེ་བཞིན་དུ་བྱ་ཞིང་མངོན་པར་མཆོད་པའི་ཆོ་གའི་ཐབས་བསྟན་པའི་ཕྱིར། སྡུག་བསྔལ་འདི་ལས་ཐར་ནས་ཞེས་བྱ་བའི་ཚིགས་བཅད་སྨོས་ཏེ། སྡུག་བསྔལ་འདི་ལས་ཐར་པ་ཞེས་བྱ་བ་ནི་འབྲོག་དགོན་པ་འདིའི་སྡུག་བསྔལ་ལས་ཐར་པའོ། །ཚོགས་པ་ནི་འདུས་པར་གྱུར་པའོ། །དེ་དག་གི་ཚིག་ནི་དེ་དག་གི་ཚིག་གོ །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་གླང་པོ་ཆེའི་སྐྱེས་པའི་རབས་སོ།། །།སྡོམ་ལ། བྱང་ཆུབ་ངང་པ་བྱང་ཆུབ་
ཆེ། །སྤྲེའུ་དང་རི་དྭགས་ཤ་ར་བྷ། །རུ་རུ་སྤྲེའུ་རྒྱལ་བཟོད་པ་སྨྲ། །ཚངས་དང་གླང་ཆེན་དེ་དག་བཅུ། །སྡོམ་འདི་ནི་འཇིག་རྟེན་དུ་གྲགས་པ་ཡིན་ཏེ། སྐྱེས་པའི་རབས་བཅུ་པོ་འདི་དག་གི་གོ་རིམས་བདག་གིས་ནི་འདི་ལྟར་མཐོང་ངོ༌། །བྱང་ཆུབ་ངང་པ་བྱང་ཆུབ་ཆེ། །ཤ་ར་རུ་རུ་སྤྲེའུ་དང༌། །བཟོད་པ་སྨྲ་དང་སྤྲེའུ་རྒྱལ་དང༌། །གླང་ཆེན་ཚངས་པ་དེ་དག་བཅུ། །འདིར་སྐྱེས་པའི་རབས་བཅུ་པོ་འདི་དག་གི་གོ་རིམས་ཀྱི་རྒྱུ་ཡང་བཟོད་པའི་ཕ་རོལ་ཏུ་ཕྱིན་པའི་དབང་དུ་བྱས་པ་སྟེ། གཞན་གྱིས་གནོད་པ་བྱས་པ་ལ་མི་མེད་པའི་བཟོད་པ་དང༌། སྡུག་བསྔལ་ལ་ཇི་མི་སྙམ་པའི་བཟོད་པ་དང༌། ཆོས་ལ་ངེས་པར་སེམས་པའི་བཟོད་པའོ། །དེ་ལ་ཆོས་ལ་ངེས་པར་སེམས་པའི་བཟོད་པའི་དབང་དུ་བྱས་ནས། ཚངས་པའི་སྐྱེས་པའི་རབས་ཡིན་ཏེ། ཆོས་ལ་ངེས་པར་སེམས་པའི་བཟོད་པ་ནི་ཟབ་ཅིང་རྒྱ་ཆེ་བའི་ཆོས་དག་ལ་འདོད་ཅིང་མི་སྐྲག་པའོ། །བཟོད་པ་དེ་ཡང་བྱང་ཆུབ་སེམས་དཔའ་ལ་ཡོད་པ་ཡིན་ནོ་ཞེས་ཇི་ལྟར་ཤེས་པར་བྱ་ཞེ་ན། བདག་ཉིད་མངོན་པར་འདོད་པའི་ལྟ་བ་དེ་ལ་གཞན་ཡང་རབ་ཏུ་འགོད་པ་ཡིན་པའི་ཕྱིར། ཆོས་ལ་ངེས་པར་སེམས་པའི་བཟོད་པ་དེ་ནི་ཚངས་པའི་སྐྱེས་པའི་རབས་ཀྱིས་བརྗོད་པ་ཡིན་ནོ། །གཞན་དུ་ན་ཇི་ལྟར་སྐྱེས་པའི་རབས་འདི་བཟོད་པའི་ཕ་རོལ་ཏུ་ཕྱིན་པའི་སྐྱེས་པའི་རབས་སུ་བཤད། གལ་ཏེ་འདི་ལྟར་བློ་སྐྱེ་བར་འགྱུར་ཏེ། སྐྱེས་པའི་རབས་དེ་ཉིད་དུ་བསྟན་པའི་བཟོད་པའི་ཕ་རོལ་ཏུ་ཕྱིན་པ་སྟེ། མཚན་ཉིད་དུ་བཤད་པའི་སྐྱེས་པའི་རབས་འདི་ནི་རིགས་པ་ཡིན་ནོ་ཞེ་ན། དེ་ཡང་མི་རིགས་པ་ཉིད་དེ། ཅིའི་ཕྱིར་ཞེ་ན། བཟོད་པ་གོང་ནས་གོང་དུ་ཁྱད་པར་དུ་བསྟན་པའི་སྐྱེས་པའི་རབས་ཀྱི་གོ་རིམས་རྣམ་པར་གཞག་པའི་ཕྱིར་ཏེ། བཟོད་པའི་ཚིག་དེ་ནི་ཞར་ལས་བྱུང་བའི་ཕྱིར་རོ། །གཙོར་ནི་རང་བཞིན་གྱིས་ལྟ་བ་ངན་པ་ལ་ཞེན་པར་གྱུར་པ་ལ་ལྷག་པར་སྙིང་བརྩེ་བ་ཡིན་ཏེ། དེ་བས་ན་ཚངས་པའི་སྐྱེས་པའི་རབས་ནི་ཆོས་ལ་ངེས་པར་སེམས་པའི་དབང་དུ་བྱས་པ་ཉིད་ངོ། །སྤྲེའུའི་རྒྱལ་པོ་དང༌། གླང་པོ་ཆེའི་སྐྱེས་པའི་རབས་སུ་ནི་སྡུག་བསྔལ་ལ་ཇི་མི་སྙམ་པའི་བཟོད་པའི་དབང་དུ་བྱས་པའོ། །གཉིས་པོ་དེ་དག་ལས་ཀྱང་གནོད་པར་གྱུར་པའི་སྡུག་བསྔལ་ལ་ཇི་མི་སྙམ་པའི་བཟོད་པའི་ཕ་རོལ་ཏུ་ཕྱིན་པའི་དབང་དུ་བྱས་པ་ནི་སྤྲེའུ་རྒྱལ་པོའི་སྐྱེས་པའི་རབས་སུ་བསྟན་ཏེ་
མི་བཟོད་པ་མེད་པའི་ཕྱིར་བཟོད་པའི་དབང་དུ་བྱས་པ་སྟེ། གནོད་པར་བྱེད་པའི་རྒྱལ་པོ་ལ་བཟོད་པར་བྱ་བ་ནི། འབྲེལ་པ་མེད་པའི་ཕྱིར་དང༌། རྒྱལ་པོ་ཉིད་ཀྱང་ཕན་པ་བྱེད་པར་འཇུག་པའི་ཕྱིར་རོ། །གླང་པོ་ཆེའི་སྐྱེས་པའི་རབས་སུ་ནི་གཡང་ས་ནས་ལྟུང་བའི་སྡུག་བསྔལ་དང༌། འཆི་བའི་སྡུག་བསྔལ་ལ་ཇི་མི་སྙམ་པའི་དབང་དུ་བྱས་པ་སྟེ། མ་འདྲིས་པའི་སྐྱེ་བོ་ལ་རྗེས་སུ་བརྩེ་བའི་ཕྱིར་རོ། །དེ་ལས་གཞན་པ་སྐྱེས་པའི་རབས་བདུན་གྱིས་ནི་གནོད་པ་བྱས་པ་ལ་མི་མཇེད་པའི་བཟོད་པའི་དབང་དུ་བྱས་པའོ། །གནོད་པ་བྱེད་པ་ལ་ཡང་རྣམ་པ་གཉིས་ཏེ། བདག་དང་འབྲེལ་པ་དང༌། བདག་ལ་གནོད་པ་བྱས་པའོ། །བདག་དང་འབྲེལ་པ་ལ་གནོད་པ་བྱེད་པའི་དབང་དུ་བྱས་ནས། གཙུག་ཕུད་བྱང་ཆུབ་ཀྱི་སྐྱེས་པའི་རབས་སུ་རྒྱལ་པོ་དེས་རང་གི་ཆུང་མ་འཕྲོག་པར་བྱེད་པའི་གནོད་པས་འཇུག་པའི་ཕྱིར་རོ། །བདག་ལ་གནོད་པ་བྱེད་པ་ལ་ཡང་རྣམ་པ་གཉིས་ཏེ། རྣམ་པར་འཚོ་བའི་གནོད་པ་དང༌། གསོད་པའི་གནོད་པ་བྱེད་པའོ། །དེ་ལས་རྣམ་པར་འཚེ་བའི་གནོད་པའི་དབང་དུ་བྱས་ནས། ངང་པ་དང༌། བྱང་ཆུབ་ཆེན་པོའི་སྐྱེས་པའི་རབས་སུ་བསྟན་ཏེ། ལུས་དང༌། སེམས་ལ་ཉེ་བར་གནོད་པའི་རང་བཞིན་ཡིན་པའི་ཕྱིར་རོ། །ངང་པའི་སྐྱེས་པའི་རབས་སུ་ནི་རྙིས་བཟུང་བས་ལུས་ཀྱི་འཚེ་བ་ལ་འཇུག་པའི་གནོད་པ་ལས་བཟོད་པའོ། །བྱང་ཆུབ་ཆེན་པོའི་སྐྱེས་པའི་རབས་སུ་ནི་སེམས་ལ་གནོད་པ་ཡིན་ཏེ། བརྙས་པས་ཉེ་བར་གཙེས་པས་འཇུག་པའི་གནོད་པ་ལ་བཟོད་པའོ། །གསོད་པའི་གནོད་པར་བྱེད་པའི་དབང་དུ་བྱས་ནས་སྐྱེས་པའི་རབས་ལྷག་མ་བཞི་ཡིན་ཏེ། གསོད་པའི་གནོད་པ་བྱེད་པ་ལ་ཡང་རྣམ་པ་གཉིས་ཏེ། གསོད་པའི་གནོད་པ་བྱེད་པར་སྦྱོར་བ་དང༌། གསོད་པའི་གནོད་པར་སྦྱོར་བའོ། །དེ་ལས་གསོད་པར་སྦྱོར་བའི་གནོད་པ་བྱེད་པའི་དབང་དུ་བྱས་ནས། ཤ་ར་བྷ་དང༌། རུ་རུ་དང༌། སྤྲེའུའི་སྐྱེས་པའི་རབས་སོ། །དེ་ལ་ཤ་ར་བྷའི་སྐྱེས་པའི་རབས་སུ་ནི་བདག་ཉིད་ཀྱིས་མདའ་འཕེན་པ་དང༌། གནོད་པ་མ་བྱས་ཏེ། ཕན་བཏགས་ཤིང་རྒྱལ་པོ་ལ་བཟོད་པ་སྟེ། སྦྱོར་བ་བྱེད་པ་ལ་བཟོད་པ་པ་བྱེད་པའི་དབང་དུ་བྱས་པའོ། །རུ་རུ་དང༌། སྤྲེའུའི་སྐྱེས་པའི་རབས་སུ་ནི་བྱང་ཆུབ་སེམས་དཔས་དེ་གཉིས་ལ་ཕན་བཏགས་པ་ཡིན་དུ་ཟིན་ཀྱང་གནོད་པ་བྱེད་པར་འཇུག་པ་དེ་
གཉིས་ལ་བཟོད་པའི་ཕྱིར་རོ། །འདི་གཉིས་ལ་ཁྱད་པར་ནི་འདི་ཡོད་དེ། རུ་རུའི་སྐྱེས་པའི་རབས་སུ་ནི་རྒྱལ་པོ་བྱང་ཆུབ་སེམས་དཔའ་ལ་གསོད་པར་སྦྱོར་བས་སྦྱོར་དུ་བཅུག་པར་བསྟན་ཏེ། བདག་ཉིད་ཀྱིས་ནི་གསོད་པར་སྦྱོར་བ་མ་བརྩམས་སོ། །སྤྲེའུའི་སྐྱེས་པའི་རབས་སུ་ནི་བྱང་ཆུབ་སེམས་དཔས་ཕན་བཏགས་པ་བྱས་པ་གང་ཡིན་པ་དེ་ལ་བདག་ཉིད་ཀྱིས་གསོད་པར་སྦྱོར་བ་རྩོམ་པའོ། །དེ་ཉིད་ཀྱི་ཕྱིར་རུ་རུའི་སྐྱེས་པའི་རབས་སུ་མཐོང་བའི་ཆོས་ཉིད་ལ་ལག་པ་ཆད་པར་སྟོན་པ་ཡིན་ནོ། །དེ་བཞིན་དུ་སྤྲེའུའི་སྐྱེས་པའི་རབས་སུ་ཡང་བདག་ཉིད་གསོད་པར་རྩོམ་པ་ཡིན་པས་མཛེའི་ནད་ཀྱིས་དེ་མ་ཐག་ཏུ་ཟིལ་གྱིས་མནན་ཏོ། །ད་ནི་བཟོད་པ་སྨྲ་བའི་སྐྱེས་པའི་རབས་སུ་ནི་བདག་ཉིད་གསོད་པར་རྩོམ་པ་ཡིན་པའི་ཕྱིར། དེ་མ་ཐག་ཏུ་རིམས་ནད་མེ་བཞིན་འབར་ཞེས་བྱ་བ་དང༌། ས་གས་ནང་དུ་ཞུགས་ཞེས་བྱ་བའོ། །གཙུག་ཕུད་བྱང་ཆུབ་ཀྱི་སྐྱེས་པའི་རབས་སུ་ནི་བྱང་ཆུབ་སེམས་དཔའ་ལ་གནོད་པ་བྱེད་པའི་རྒྱལ་པོ་མཐོང་བའི་ཆོས་ཉིད་ལ་མི་སྡུག་པའི་རྣམ་པར་སྨིན་པ་མ་ཐོབ་པ་སྟེ། བྱང་ཆུབ་སེམས་དཔའ་ལ་ཞེ་སྡང་བ་མེད་པའི་ཕྱིར་དང༌། ཁྱིམ་ཐབ་དང་ཆུང་མ་ཕལ་པ་མེད་པའི་ཕྱིར་རོ། །ངང་པའི་སྐྱེས་པའི་རབས་སུ་ཡང་སྡིག་པའི་བསམ་པ་མེད་པའི་ཕྱིར་དང༌། བྱང་ཆུབ་སེམས་དཔའི་ཡོན་ཏན་བརྗོད་པས་ཕྲད་པར་འདོད་པ་དེས་བྱང་ཆུབ་སེམས་དཔའ་ལ་གནོད་པ་བྱས་ཀྱང་མི་འདོད་པའི་འབྲས་བུམ་ཐོབ་པའོ། །བྱང་ཆུབ་ཆེན་པོའི་སྐྱེས་པའི་རབས་སུ་ནི་རྒྱལ་པོ་ལ་སྡིག་པའི་བསམ་པ་མེད་པའི་ཕྱིར་དང༌། མ་གུས་པ་ཉི་ཚེ་ཙམ་དུ་ཟད་པའི་ཕྱིར་དང༌། མི་འདོད་པའི་འབྲས་བུ་མེད་དོ། །ཤ་ར་བྷའི་སྐྱེས་པའི་རབས་སུ་ཡང་རྒྱལ་པོ་ལ་སྡིག་པའི་བསམ་པ་མེད་པ་དང༌། གནོད་པའི་སྦྱོར་བ་ཉི་ཚེ་ཙམ་ཡོད་པའི་ཕྱིར་དང༌། བྱང་ཆུབ་སེམས་དཔའ་ལ་གནོད་པ་བྱེད་པར་སྦྱོར་བ་ཡང་བྱང་ཆུབ་སེམས་དཔའ་ཡིན་པར་སྔར་མ་ཤེས་པ་དང༌། རྒྱལ་པོས་གནོད་པ་མ་བྱས་པའི་ཕྱིར་མི་འདོད་པའི་འབྲས་བུ་མེད་དོ། །དེ་ཉིད་ཀྱིས་འདི་དག་ནི་བཟོད་པ་ཆུང་བ་ཡིན་པའི་ཕྱིར་དང་པོར་སྨོས་པ་ཡིན་ནོ། །སྐྱེས་པའི་རབས་འདི་དག་ལས་གཞན་དུ་རུ་རུ་དང༌། སྤྲེའུ་དང༌། བཟོད་པ་སྨྲ་བ་སྐྱེས་པའི་རབས་ཕྱིས་བཀོད་པ་ནི་གོ་རིམས་བཞིན་དུ་ཁྱད་པར་དུ་གྱུར་བའི་ཕྱིར་ཏེ། བྱང་ཆུབ་སེམས་དཔའ་ཕན་
བཏགས་པ་ལ་གནོད་པ་བྱེད་པ་ལ་ཕྱི་མ་གསུམ་ཡིན་ཏེ། མི་འདོད་པའི་འབྲས་བུ་རྣམ་པར་སྨིན་པ་ཡིན་ཏེ། སེམས་ཀྱི་གོ་སྐབས་མེད་པ་ཉིད་དོ། །བྱང་ཆུབ་སེམས་དཔའ་ལ་ནི་གནོད་པ་མེད་པའི་ཕྱིར་དང༌། བསམ་པ་ངན་པ་མེད་པས་སྤྲེའུའི་ཚོགས་དེ་དག་གིས་བྱང་ཆུབ་སེམས་དཔའ་ལ་བརྫིས་པ་ཡིན་ན་ཡང་བྱང་ཆུབ་སེམས་དཔས་གནང་བ་ཉིད་ཡིན་གྱི། གཞན་དུ་མ་ཡིན་པས་མི་འདོད་པའི་འབྲས་བུ་མེད་པ་ཉིད་དོ། །སྐྱེས་པའི་རབས་གཞན་དག་ཀྱང་སེམས་ཀྱི་གོ་སྐབས་མེད་པ་ཉིད་དོ། །གོ་རིམས་དེ་ལྟར་བཀོད་པར་གྱུར་ན་ནི་བཟོད་པ་བསྒོམས་པ་ལ་འཇུག་པ་རྣམས་ཀྱི་བཟོད་པའི་རྣམ་པ་གོ་རིམས་བཞིན་དུ་བསྟན་པར་འགྱུར་ཏེ། དེ་སྒྲུབ་པའི་ཐབས་བསྟན་པར་རིགས་པ་ཡིན་ནོ། །སྐྱེས་པའི་རབས་འདི་དག་གི་གོ་རིམས་འདི་བཞིན་དུ་རིག་པར་བྱ་སྟེ། གལ་ཏེ་ཕྱོགས་སུ་མི་འཛིན་པ་དག་ཡོད་ན་ཡང་འདི་བཞིན་དུ་གླེགས་བམ་དག་ཏུ་བྲི་བར་བྱའོ། །བཟོད་པའི་ཚོམས་ཏེ་སྡེ་ཚན་གསུམ་པ་རྫོགས་སོ།། །།ཇི་ལྟར་ཕྲད་ཀྱང་རུང་སྟེ་ཞེས་བྱ་བ་ནི་མི་དགེ་བ་མངོན་པར་འདོད་པའམ། དགེ་བ་མངོན་པར་འདོད་པ་ཞེས་བྱ་བའི་དོན་ཏོ། །རབ་ཏུ་གྲགས་པའི་རིགས་དང༌། དཔལ་དང་ལྡན་པ་ཞེས་བྱ་བ་འདི་གཉིས་ཀྱིས་ནི་གཙོ་བོའི་ནུས་པ་བསྟན་ཏོ། །ཡོན་ཏན་ཡོངས་སུ་འཛིན་པར་བྱེད་པས་འབངས་རྣམས་ནི་གློ་བ་ཉེ་བ་ཞེས་བྱ་བ་འདིས་ནི་གསང་ཚིག་གི་ནུས་པ་བསྟན་ཏོ། །གཟི་བྱིན་ཆེ་བས་རྒྱལ་ཕྲན་དྲེགས་པ་རྣམས་ཕྱག་འཚལ་བར་གྱུར་པ་ཞེས་བྱ་བས་ནི་སྤྲོ་བའི་ནུས་པ་བསྟན་ཏོ། །ཡོན་ཏན་བརྒྱའི་འོད་ཟེར་གྱི་ཕྲེང་པ་ནི་ཡོན་ཏན་བརྒྱའི་འོད་ཟེར་གྱི་ཕྲེང་བའོ། །འོད་ཟེར་བརྒྱ་དང་ལྡན་པ་གང་ལ་ཡོད་པ་དེ་ནི་ཡོན་ཏན་གྱི་འོད་ཟེར་བརྒྱ་དང་ལྡན་པའོ། །ཟླ་བ་བཞིན་དུ་མཐོང་ན་དགའ་བ་གང་ཡིན་པ་དེ་ནི། ཟླ་བ་དང་འདྲ་བར་མཐོང་ན་དགའ་བའོ། །དེ་ཉིད་ཀྱི་ཕྱིར། བུ་ཟླ་བ་ཞེས་བྱ་བ་ཡིན་ཏེ། ཟླ་བ་དང་འདྲ་བའི་ཕྱིར་བུ་ཟླ་བ་ཞེས་བཏགས་ཏེ། དེའི་མིང་ཡོན་ཏན་དང་ལྡན་པ་ཉིད་དུ་སྟོན་ཏོ། །ལེགས་པར་ཕན་འདོགས་པ་ཞེས་བྱ་བས་ནི་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་དང༌། མི་དགེ་བའི་ཆོས་སྐྱེས་པ་རྣམས་སྡང་བ་ཉིད་དུ་སྟོན་ཏོ། །སྡུད་པ་ལ་མཁས་པ་དང༌། གུས་པ་ཇེ་ཆེ་ཇེ་ཆེར་གྱུར་པ་དང༌། །ཞེས་བྱ་བས་ནི་དགེ་བའི་ཆོས་སྐྱེད་པ་དང༌། སྐྱེས་ཟིན་པ་རྣམས་ཕྱིར་ཞིང་
བསྒོམས་པ་ཉིད་དུ་བསྟན་པ་ཡིན་ནོ། །ཡོངས་སུ་བསྐྱངས་པ་ལ་ངེས་པར་བྱེད་པའི་ཕྱིར་ཞེས་བྱ་བ་ནི་དགེ་བའི་ཆོས་རྣམས་བསྒོམ་པར་བྱའོ་ཞེས་བསྟན་ཏོ། །དེ་ཉིད་ཀྱི་ཕྱིར་སྐྱེས་པའི་རབས་འདི་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་པའི་ཕྱིར་ཡིན་ཏེ། མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་དང༌། སྐྱེས་ཟིན་པ་རྣམས་སྤངས་པ་ཉིད་དུ་སྟོན་ཏོ། །མི་དགེ་བའི་ཆོས་སྤངས་པ་མེད་པར་ནི་དགེ་བའི་ཆོས་སྐྱེད་པ་དང༌། འཕེལ་བ་དང༌། གནས་པ་མེད་པའི་ཕྱིར་རོ། །ཡོན་ཏན་གཉེན་དང་འདྲ་བར་གྱུར་ཏོ་ཞེས་བྱ་བ་བསྟན་པ་ལ། འགྲོ་བ་རྣམས་ཀྱི་གཉེན་དེ་གང་ཡིན་ཞེ་ན། གཉེན་དང་འདྲ་བ་དེ་ཉིད་བསྟན་པའི་ཕྱིར། ཚུལ་ཁྲིམས་ཐོས་དང་ཞེས་བྱ་བའི་ཚིགས་བཅད་སྨོས་སོ། །ཡང་ན་གཞན་དང་མངོན་པར་འབྲེལ་པས་ཡོན་ཏན་གྱི་འོད་ཟེར་བརྒྱ་དང་ལྡན་པ་ཞེས་བཤད་པའི་ཡོན་ཏན་གང་དག་ཡིན་ཞེ་ན། ཚུལ་ཁྲིམས་ཐོས་དང་གཏོང་དང་སྙིང་རྗེ་དུལ། །ཞེས་བྱ་བའི་ཚིགས་བཅད་སྨོས་སོ། །དེ་དང་དེ་དག་ཅེས་བྱ་བ་ནི་ཡོན་ཏན་གཞན་དག་ཡང་ལྡན་པ་ཉིད་དུ་སྟོན་ཏོ། །ཡོན་ཏན་ཡོད་པ་ནི་ཞེས་བྱ་བ་ནི་ཡོན་ཏན་ཉིད་ཡོད་པ་ཡིན་ཏེ། དེའི་ཡོན་ཏན་མང་པོ་ཞེས་བྱ་བའི་དོན་ཏོ། །ལང་ཚོར་གྱུར་པའི་རྒྱན་གྱིས་བརྒྱན་པ་བཞིན། །ཞེས་བྱ་བ་ནི། བྱང་ཆུབ་སེམས་དཔའི་རྒྱན་གྱིས་བརྒྱན་པའི་ལང་ཚོ་བཞིན་དུ་ཞེས་བྱ་བའི་དོན་ཏེ། ལང་ཚོ་ནི་ད་ལྟར་བྱུང་བའི་ཡོན་ཏན་གྱིས་མཛེས་པ་ཡིན་ཏེ། དེ་བས་ན་ཡོན་ཏན་ལང་ཚོའི་རྒྱན་གྱིས་བརྒྱན་པ་ཉིད་དོ། །ཡང་ན་ལང་ཚོར་གྱུར་པའི་རྒྱན་གྱིས་བརྒྱན་པ་བཞིན་དུ་ཡོན་ཏན་གསར་པ་དག་གིས་རབ་ཏུ་བརྒྱན་པ་སྟེ། དེ་བས་ན་ལང་ཚོར་གྱུར་པའི་རྒྱན་གྱིས་བརྒྱན་པ་ཞེས་བརྗོད་དོ། །རྣམ་པར་དག་པ་ཡང་ཡིན་ལ་རྒྱ་ཆེ་བ་ཡང་ཡིན་པས་རྣམ་པར་དག་ཅིང་རྒྱ་ཆེ་བའོ། །རྣམ་པར་དག་པ་དང༌། རྒྱ་ཆེ་བ་གཉིས་ཀྱིས་ཡིད་དུ་འོང་བ་དེ་ནི་རྣམ་པར་དག་ཅིང་རྒྱ་ཆེ་ཡིད་དུ་འོང་བ་སྟེ། དེ་བཞིན་དུ་དེའི་ཡོན་ཏན་རྣམས་སོ། །གནས་སུ་གྱུར་ཅེས་བྱ་བ་འདིས་ནི་ཡོན་ཏན་གྱི་འོད་ཟེར་བརྒྱ་དང་ལྡན་པའི་གནས་སུ་གྱུར་པའི་ཕྱིར་ཏེ། འདིས་ནི་གསང་ཚིག་གི་ནུས་པ་བསྟན་ཏོ། །འབངས་རྣམས་སྐྱོང་ནུས་པ་དང་ཞེས་བྱ་བ་འདིས་ནི་སྤྲོ་བའི་ནུས་པ་བསྟན་ཏོ། །མ་འཇུངས་ཤིང་རང་བཞིན་བཟང་བའི་ཕྱིར་ཞེས་བྱ་བ་
འདིས་ནི་རྒྱུ་ཕུན་སུམ་ཚོགས་པ་བསྟན་ཏོ། །རང་བཞིན་དང་རྒྱུ་དང་ས་བོན་ཞེས་བྱ་བ་ནི་དོན་གཞན་མ་ཡིན་ཏེ། འདིས་ནི་དེ་ཉིད་ཀྱི་ཕུན་སུམ་ཚོགས་པ་བསྟན་ཏོ། །དང་པོ་འདི་གཉིས་ཀྱིས་ནི་སྐྱེས་བུའི་བྱེད་པ་ཕུན་སུམ་ཚོགས་པའོ། །རྒྱལ་ཚབ་ཀྱི་ལོངས་སྤྱོད་ཅེས་བྱ་བ་ནི་བདག་པོའི་ནུས་པ་བྱེད་དུ་བཅུག་ཅེས་བྱ་བའི་དོན་ཏོ། །རབ་ཏུ་མཁས་པས་ཞེས་བྱ་བ་ནི་སྔར་བསྟན་པའི་ཐོས་པ་དང༌། ཤེས་རབ་དང༌། ཡིད་གཞུངས་ཤིང་མངོན་པར་བརྩོན་པའི་སྦྱོར་བས་སོ། །མཁས་པས་ཆོས་ལྡན་ཞེས་བྱ་བ་ནི་དོན་དང་འདོད་པ་དང་ཡང་ལྡན་པ་ཡིན་ནོ། །ལེགས་པར་སྨྲ་བ་ལ་ཇི་ལྟར་བྱེད་ཅེ་ན། མཆོད་པ་ཁྱད་པར་ཅན་གྱིས་ཞེས་བྱ་བ་ཡིན་ཏེ། དེས་ན་དེ་ཉིད་ཀྱི་ཕྱིར་ཏེ། ལེགས་པར་བཤད་པ་ལ་དགའ་བའི་ཕྱིར་རོ། །དཔྱིད་ཟླའི་དུས་ལ་བབ་པ་ཞེས་བྱ་བ་ནི་མེ་ཏོག་འབྱུང་བའི་དུས་ཀྱི་ཟླ་བ་ལ་བབ་པའོ། །ཤིང་ལོ་རྣམས་མཛེས་ཤིང་འཇམ་པོར་གྱུར་པ་གང་ཡིན་པ་དེ་དག་ནི་དཔྱིད་ཟླའི་དུས་ལ་བབ་པའི་མཐུས་ཤིང་ལོ་རྣམས་མཛེས་ཤིང་འཇམ་པོར་གྱུར་པའོ། །མེ་ཏོག་ཉིད་ཁ་འབུས་པས་སྡུག་ཅིང༌། དགོད་པ་ལྟར་གྱུར་པ་གང་ཡིན་པ་དེ་ནི་མེ་ཏོག་སྡུག་གུ་ཁ་འབུས་པ་རྣམས་ནི་དགོད་པ་བཞིན་ནོ། །ནེའུ་གསིང་སྔོན་པོ་ནི་ནེའུ་གསིང་སྔོན་པོའོ། །དེ་ཉིད་ཀྱི་རི་མོ་བཀྲམ་པ་ལྟ་བུ་ཡིན་པས་ནེའུ་གསིང་སྔོན་པོ་གསར་པ་རྣམས་ཀྱིས་རི་མོ་བཀྲམ་པའོ། །དེས་ས་གཞི་མཛེས་པར་བྱས་པ་གང་ཡིན་པ་དེ་ནི། ས་གཞི་ནེའུ་གསིང་སྔོན་པོ་གསར་བུ་རྣམས་ཀྱིས་རི་མོ་བཀྲམ་པ་བཞིན་དུ་མཛེས་པར་བྱས་པའོ། །ཡིད་དགའ་བ་འབྱུང་བ་ཡིན་པས་ཡིད་དགའ་བ་སྐྱེས་པའོ། །སྐྱེད་མོས་ཚལ་ན་ལྡིང་ཁང་ཡོད་པ་དེ་ནི་ལྡིང་ཁང་སྐྱེད་མོས་ཚལ་ལོ། །ཡིད་དུ་འོང་བའི་ལྡིང་ཁང་གི་རྒྱན་སྐྱེད་མོས་ཚལ་གང་ལ་ཡོད་པ་དེ་ནི་ལྡིང་ཁང་རྒྱན་ཅན་སྐྱེད་མོས་ཚལ་ལོ། །བུད་མེད་རྣམས་ཀྱི་གླུ་སྒྲ་སྙན་དང་འབྲེལ། །ཞེས་བྱ་བ་ནི་རྣ་བའི་ཡུལ་གྱི་ལོངས་སྤྱོད་ཀྱི་དབང་དུ་བྱས་པའོ། །འཛུམ་ལ་མཁས་པ་ཞེས་བྱ་བ་ནི་མིག་གི་ཡུལ་གྱི་ལོངས་སྤྱོད་ཀྱི་དབང་དུ་བྱས་པའོ། །ཡན་ལག་མཛེས་པར་བསྒྱུར་བའི་ཞེས་བྱ་བ་ནི་རེག་བྱའི་ལོངས་སྤྱོད་ཀྱི་དབང་དུ་བྱས་པའོ། །བཟང་མོ་མཛེས་པར་ཞེས་བྱ་བ་ནི་ལོངས་སྤྱོད་ཀྱི་དབང་དུ་བྱས་པ་སྟེ། དེ་ལྟར་འདི་དག་གིས་ནི་སེམས་ཅན་གྱི་ལོངས་སྤྱོད་ཀྱི་རྐྱེན་བསྟན་པའོ། །ད་ནི་སེམས་
ཅན་མ་ཡིན་པའི་ལོངས་སྤྱོད་ཀྱི་དབང་དུ་བྱས་ནས། སྐྱེད་མོས་ཚལ་བཟང་དེ་ན་དེ་ནི་དགའ་བར་གནས། །ཞེས་བྱ་བ་སྨོས་ཏེ། མིག་དང༌། རྣ་བ་དང༌། སྣའི་ལོངས་སྤྱོད་ཀྱི་དབང་དུ་བྱས་པའོ། །ལང་ཚོ་ལ་བབ་པ་ནི་ཞེས་བྱ་བ་ནི་འདིའི་འདོད་པའི་ཡུལ་ལ་ཆགས་པ་ཉིད་དུ་སྟོན་ཏོ། །བསོད་ནམས་ཕུན་སུམ་ཚོགས་པའི་མཐུ་ལས་བྱུང་བ་ཞེས་བྱ་བ་ནི་སྦྱིན་པ་དང༌། ཚུལ་ཁྲིམས་ལ་སོགས་པའི་བསོད་ནམས་ཕུན་སུམ་ཚོགས་པའི་ཁྱད་པར་དུ་གྱུར་པ་སྟེ། དེའི་མཐུ་ནི་བསོད་ནམས་ཕུན་སུམ་ཚོགས་པའི་མཐུའོ། །དེ་ལས་བྱུང་བ་ནི་བསོད་ནམས་ཕུན་སུམ་ཚོགས་པའི་མཐུ་ལས་བྱུང་བ་སྟེ། འདིས་ནི་འབད་པ་མེད་པར་བྱུང་བ་ཉིད་དེ་རྒྱུའི་སྟོབས་ལས་བྱུང་བ་ཉིད་དུ་སྟོན་ཏོ། །རོལ་མོའི་དགའ་བ་ལ་གནོད་པ་ཞེས་བྱ་བ་ནི་སྔར་སྐྱེས་པའི་དགའ་བ་ཉམས་པ་ཡིན་ཏེ། བུད་མེད་དང་སྐྱེས་པ་རྣམས་ཀྱི་བསྟན་ནས། ད་ནི་བུད་མེད་ཀྱི་དབང་དུ་བྱས་ནས། བུད་མེད་གཞོན་ནུ་རྣམས་འཇིགས་ཤིང་བག་འཁུམས་པར་བྱེད་པ་ཞེས་བྱ་བས་བསྟན་ཏོ། །མིའི་སྟོབས་དང༌། མཐུ་རྩལ་ལ་སོགས་པ་ལས་འདས་པ་གང་ལ་ཡོད་པ་དེ་ནི་སྟོབས་དང༌། མཐུ་རྩལ་ལ་སོགས་པ་མི་པས་ལྷག་པའོ། །སྲིན་པོ་དག་པས་ཀྱང་ལྷག་པར་མི་བཟད་པའི་གཟུགས་གང་ལ་ཡོད་པ་དེ་ནི། སྲིན་པོ་བས་ཀྱང་ལྷག་པར་མི་བཟད་པའི་གཟུགས་ཅན་ནོ། ཤིང་རྟ་དང༌། རྟ་དང༌། གླང་པོ་ཆེ་དང༌། དམག་མི་བརྟན་པ་ཉམས་པར་གྱུར་པ་གང་ཡིན་པ་དེ་ནི། ཤིང་རྟ་དང༌། རྟ་དང༌། གླང་པོ་ཆེ་དང༌། དམག་མི་བརྟན་པ་ཉམས་པར་གྱུར་པའོ། །ཅི་ལེགས་མཛད་པ་ནི་གོ་ཆ་བགོ་བ་ལ་སོགས་པའོ། །ངང་ཚུལ་གྱི་སྐྱོན་ཤེས་པ་གང་ཡིན་པ་དེ་ནི་དེ་སྟེ། ངང་ཚུལ་གྱི་སྐྱོན་ནི་མ་བསྔགས་པའི་དངོས་པོ་ཡིན་ནོ། །སྔར་ཆབ་སྒོ་པས་བསྟེན་པའི་སྟེ། ལྷ་དེ་ལས་ཅི་ལེགས་པར་མཛད་ཅིང་བཀའ་གྲོས་མཛད་པའི་དུས་ལ་བབ་པོ་ཞེས་གསོལ་ཏོ་ཞེས་བྱ་བ་དེ་གཉི་ག་དུས་ལ་བབ་པ་ཉིད་དུ་བསྟན་པ་དེའི་དེ་ལྟར་མི་བྱ་བའི་རྒྱུ་ཉིད་དུ་བསྟན་པའི་ཕྱིར། མི་ཤ་འདོད་པ་ཞེས་བྱ་བ་དང༌། བདག་གིས་བརྒལ་བའི་གོ་སྐབས་ཞེས་བྱ་བའི་ཚིགས་བཅད་གཉིས་སྨོས་སོ། །མི་ཤ་འདོད་པས་རྒྱལ་སྲིད་ཉམས་པར་གྱུར། །ཞེས་བྱ་བས་ནི་འདོད་པ་ཉམས་པ་ཉིད་དུ་སྟོན་ཏོ། །སྨྱོས་པ་ལྟ་བུར་གྱུར་པ་ནི་སྨྱོས་པ་བཞིན་དུ་གྱུར་པ་སྟེ། སྨྱོས་པ་
ཞེས་བྱ་བ་འདིས་ནི་དོན་ཉམས་པ་ཉིད་དུ་སྟོན་ཏོ། །རང་གི་ཆོས་བཏང་ཞེས་བྱ་བས་ནི་ཆོས་ཡོངས་སུ་སྤངས་པ་ཉིད་དུ་སྟོན་ཏོ། །རང་གི་ཆོས་བཏང་བ་ཉིད་ཀྱིས་བསོད་ནམས་དང་གྲགས་པ་ཡང་ཉམས་པ་ཉིད་དོ། །འདིར་བསོད་ནམས་ཞེས་སྨོས་པ་ནི་བསོད་ནམས་ཀྱི་ཚོགས་ཀྱི་འབྲས་བུ་ལ་དགོངས་ཏེ། འདིས་ནི་འཇིག་རྟེན་ཕ་རོལ་གྱི་མངོན་པར་མཐོ་བའི་འབྲས་བུ་ཉམས་པ་ཉིད་དུ་སྟོན་ཏོ། །གྲགས་པ་ཞེས་སྨོས་པས་ནི་མཐོང་བའི་ཆོས་ཀྱི་འབྲས་བུ་ཉམས་པ་ཉིད་དུ་སྟོན་ཏོ། །མྱ་ངན་བྱ་བའི་གནས་སྐབས་གནས་པ་ལ། །ཞེས་བྱ་བའི་རྒྱུ་བཞི་པོ་དེ་དག་ཉིད་ཀྱིས་སོ། །བདག་གིས་བརྒལ་བའི་སྒོ་སྐབས་གལ་ཡོད། །ཅེས་བྱ་བས་ནི་ལྷ་དེ་ལ་ཅི་ལེགས་པར་མཛད་པར་གསོལ་ཞེས་བྱ་བ་དེའི་ལན་ནོ། །དེ་ལྟ་བུ་ལ་འཇིགས་སུ་ག་ལ་རུང༌། །ཞེས་བྱ་བ་ནི་གང་སྔར་བསྟན་པའི་བཀའ་གྲོས་མཛད་པའི་དུས་ལ་བབ་པོ་ཞེས་བྱ་བ་དེའི་ལན་བསྟན་པ་ཡིན་ནོ། །འཐབ་མོ་མེད་པས་ན་འཐབ་མོ་མེད་པའོ།། འཐབ་མོ་ཡང་ཡིན་ལ་བརྒལ་བ་ཡང་ཡིན་པས་འཐབ་མོ་བརྒལ་བ་སྟེ་དེས་སོ། །མངོན་དུ་ཞེས་བྱ་བ་ནི་རྩ་བ་ལས་སོ། །རྗེས་སུ་གཟུང་བ་ཞེས་བྱ་བ་ནི་སྡིག་པ་གཞོམ་པ་ལའོ། །དེ་ལས་ཞེས་བྱ་བ་ནི་བདག་གི་དྲུང་དུ་ཁོ་དག་འོངས་པའི་ཕྱིར་རོ། །དམ་པ་རྣམས་ནི་དེ་ལྟར་མགྲོན་ཡང་བྱེད། །ཅེས་བྱ་བ་སྙིང་རྗེ་དང་ལྡན་པ་རྣམས་མགྲོན་བྱེད་པའི་ངང་ཚུལ་ཅན་ཡིན་ནོ། །མི་དགའ་ཞིང་ཡིད་བློང་བས་མིག་མཆི་མས་གང་བ་དེ་ནི་མི་དགའ་ཞིང་ཡིད་བློང་བས་མིག་མཆི་མས་གང་བའོ། །དྲི་མ་ཅན་གྱི་གོས་བསྲིངས་ཏེ། རྐེད་པ་བཅིངས་པ་གང་ཡིན་པ་དེ་ནི་གོས་དྲི་མ་ཅན་བསྲིངས་ཏེ་རྐེད་པ་བཅིངས་པའོ།། རྡུལ་གྱིས་གོས་ཤིང་རིང་ལ་ཡེགས་པ་དེ་ལ་ཤིང་ཤུན་གྱི་ཐོད་ཀྱིས་བཅིངས་པ་སྟེ། རྡུལ་གྱིས་གོས་ཤིང་རྩུབ་པས་རིང་ཞིང་ཡེགས་པའི་སྐྲ་གང་ཡིན་པ་དེ་ཤིང་ཤུན་གྱི་ཐོད་ཀྱིས་བཅིངས་པའོ། །ཁ་སྤུ་རིང་པོ་འཛིངས་པ་དེས་གདོང་ངམས་གང་པར་གྱུར་པ་གང་ཡིན་པ་དེ་ནི་གདོང་གི་ཁ་སྤུ་རིང་པོས་ངམས་གནག་པར་གྱུར་པའོ། །ཁྲོས་པ་དང་རྔམ་པ་ནི་ཁྲོས་ཤིང་རྔམ་པའོ། །བགྲད་པ་དང་འཇིགས་འཇིགས་ལྟར་འདུག་པ་ནི་བགྲད་པ་དང་འཇིགས་འཇིགས་ལྟར་འདུག་པ་སྟེ། ཁྲོས་ཤིང་རྔམ་པ་གཉིས་ཀྱིས་བགྲད་པའི་མིག་གང་ལ་ཡོད་པ་དེ་ནི་ཁྲོས་ཤིང་རྔམ་པས་མིག་བགྲད་པའོ། །
གཅིག་པུ་ཕུབ་དང་མཚོན་མེད་ཅེས་བྱ་བས་ནི་སུ་དཱ་སའི་བུ་ལ་སྔར་བསྟན་པའི་བརྒལ་བ་མེད་པ་ཉིད་དུ་བསྟན་པའོ། །རང་བཞིན་གྱིས་ཞི་བར་སྣང་བ་ཞེས་བྱ་བས་ནི་སྔར་བསྟན་པ་འདི་ལྟ་བུ་ལ་འཇིགས་སུ་ག་ལ་རུང་ཞེས་བྱ་བ་དེ་སྟོན་པ་སྟེ། འཇིགས་པ་མེད་པའི་ཕྱིར་རོ། །རྔམ་པ་དང་དྲེགས་པ་གཉིས་ཀྱིས་གཡེངས་པའི་སེམས་གང་ཡིན་པ་དེ་ནི་སེམས་རྔམ་ཞིང་དྲེགས་པས་གཡེངས་པའོ། །སྲིན་པོ་དང་ཡི་དགས་གར་བྱེད་པ་བཞིན་དུ་འཇིགས་པ་ནི། སྲིན་པོ་དང་ཡི་དགས་གར་བྱེད་པ་བཞིན་དུ་འཇིགས་པའོ། །འདོད་པ་ནི་ནོར་ལ་སོགས་པ་ལ་ཆགས་པའོ། །ཤིར་དོགས་པ་ནི་སྲོག་གི་འཇིགས་པའོ། །ཡ་རབས་ནི་བདེན་པ་ལ་སོགས་དང་འདྲ་བ་ཞེས་བྱ་བ་ནི་དེ་བས་ན་འདོད་པ་ལ་སོགས་པའི་ཕྱིར་ཡོངས་སུ་མི་གཏོང་བས་སོ། །དམ་པ་རྣམས་ནི་བདེན་པ་སྲོག་གི་ཕྱིར་ཡང་མི་གཏོང་སྟེ། ཇི་ལྟར་མི་གཏོང་ཞེ་ན། དེའི་ཕྱིར་བདེན་པ་དང་འབྱོར་པའི་དོན་དེ་བདེ་བའོ། །བདེན་པ་ཉམས་ན་ནི་ངན་འགྲོ་དག་ལས་སྲུན་མི་ནུས་པ་ཡིན་ཏེ། ཇི་ལྟར་དམ་པ་རྣམས་ཀྱི་བདེན་པ་སྲོག་དང་འདྲ་བ་ཡིན་ཞེ་ན། སྨྲས་པ། གསོན་ཞིང་བདེན་པ་ཉམས་པ་ནི་ངན་འགྲོ་ལས་སྲུན་མི་ནུས་པའི་ཕྱིར་ཏེ། དེའི་ཕྱིར་ནོར་དང་སྲོག་དག་ལས་མི་ནུས་ཤིང༌། འཆི་བའི་དུས་སུ་ཡིད་ལ་གཅགས་ཏེ་འཆི་བའི་ཕྱིར་རོ། །གྲགས་པ་ནི་མཐོང་བའི་ཆོས་ཀྱི་བདེན་པའོ། །བདེ་བ་ནི་མཐོ་རིས་སུ་འགྲོ་བའོ། །གྱ་གྱུ་ཚུལ་ཞིག་པ་མཐོང་བ་གང་ཡིན་པ་དེ་ནི་གྱ་གྱུ་ཚུལ་ཞིག་གལ་ཏེ་མཐོང་གྱུར་པའོ། །སྔ་མ་དང་ཕྱི་མ་གཉིས་འགལ་བ་ཡིན་པས་སྔ་མ་དང་ཕྱི་མ་གཉིས་འཁྲུལ་པར་སྣང་བའི་ཕྱིར་རོ། །གང་དུ་ལེགས་པར་སྤྱོད་པ་མ་མཐོང་བ་དེ་ནི་ལེགས་པར་སྤྱོད་པ་གལ་ཏེ་མ་མཐོང་བ་སྟེ། དགེ་བའི་ཆོས་མ་མཐོང་བ་ཞེས་བྱ་བའི་དོན་ཏོ། །རྒྱུ་གསུམ་གྱིས་ནི་སླར་བཟློག་པར་མི་འགྱུར་ཏེ། ཁྱོད་ལ་འཇིགས་པར་འགྱུར་བའམ། བདེ་བ་ལ་ཆགས་པའམ་ཁྱོད་ལ་སྙིང་རྗེ་མེད་པར་གྱུར་པ་སྟེ། རྒྱུ་གསུམ་པོ་འདི་དག་ནི་ཡོད་པར་གྱུར་ན་ནི་ཕུབ་དང༌། མཚོན་ཆ་མེད་པར་ཁྱོད་ཀྱི་གན་དུ་འོངས་པ་ཡང་མ་ཡིན་ཏེ། དེ་བས་ན་གང་གི་ཕྱིར་སྔར་ཉིད་མི་འོང་བ་ཉིད་དོ་དེ་བས་ན་དེ་ཉིད་དུ་འོང་བའི་རྒྱུ་ཉིད་དུ་རྟོགས་པར་བྱའོ། །བྲམ་ཟེ་དེའི་དོན་བྱས་ནས་སླར་ཡང་ང་བདག་ཁྱོད་ཀྱི་དྲུང་དུ་འོང་ངོ༌། །ཅིའི་ཕྱིར་ཞེ་ན། ཁྱོད་དང་ལྷན་ཅིག་
བཤེས་ཤིང་འདྲིས་པའི་ཕྱིར་དང༌། གང་གི་ཕྱིར་བདག་ཅག་ལྟ་བུ་ནི་དེ་ལྟ་བུའི་བརྫུན་གྱི་ཚིག་མི་སྨྲ་བ་དེའི་ཕྱིར་རོ། །དེ་ལ་མགུ་བར་བྱ་བ་ནི་ལེགས་པར་སྨྲ་བ་དེ་ལ་ལེགས་པར་སྦྱིན་པའོ། །ཚིག་སྙན་པ་ནི་ལེགས་པར་གསུངས་པའི་སྦྱིན་པ་ལ་གང་གིས་མཆོད་པའོ། །བཀུར་སྟི་ནི་ལེགས་པར་བཤད་པ་སྟོན་པ་ལ་ལུས་ཀྱིས་མཆོད་པའོ། །ཚིགས་བཅད་གཅིག་ལ་སྲང་སྟོང་དུ་བྱས་པར་སྟོན་ཏེ། དེའི་ཐད་དུ་བརྩིས་པ་ཞེས་སྨོས་པ་ནི་དེ་དང་ཚད་མཉམ་པའི་ནོར་བཞག་སྟེ། གསེར་ལ་སོགས་པ་གལ་ཏེ་འདོད་པས་དེ་ལ་མཆོད་པར་བྱས་སོ། །དེ་ཉིད་བསྟན་པའི་ཕྱིར། གནས་མ་ཡིན་པ་ལ་ལྷག་པར་གོད་པ་ནི་གནས་མ་ཡིན་པ་གོང་ཚབས་ཆེ་བའོ། །དེ་ལས་བཟློག་པ་ནི་གནས་མ་ཡིན་པར་གོང་ཚངས་ཆེ་བ་དེ་ལ་དགག་པར་རྩོལ་བའི་སེམས་ཏེ། གནས་མ་ཡིན་པར་གོད་ཚབས་ཆེ་བ་དགག་པའི་བསམ་པའོ། །ལེགས་པར་ཤེས་པར་བྱ་བའི་རིགས་ཏེ། ཅིའི་ཕྱིར་ཞེ་ན། འབངས་མང་པོ་གསོ་དགོས་པའི་ཕྱིར་རོ། །རྒྱལ་པོའི་དཔལ་ཡང་ནོར་ཕུན་སུམ་ཚོགས་པ་ལ་ལྟོས་པའི་ཕྱིར་གོད་པ་ཚད་དང་ལྡན་པར་བྱ་བ་ཡིན་ཏེ། འདི་ལྟར་ཚིགས་བཅད་གཅིག་ལ་སྲང་སྟོང་དུ་བྱས་ཏེ་བྱིན་པས་ནོར་གྱི་དབང་ཕྱུག་གི་ནོར་ཡང་ཟད་པར་འགྱུར་རོ། །འབངས་མང་པོ་གསོ་དགོས་སོ་ཞེས་བསྟན་པ་ལ། དེ་ནི་མི་ནུས་པ་ཉིད་དུ་བསྟན་པའི་ཕྱིར། སྦྱིན་པ་དྲགས་ན་ཞེས་བྱ་བའི་ཕྱེད་དང་པོ་སྨོས་ཏེ། ནོར་གྱི་དབང་ཕྱུག་གི་ནོར་ཡོད་པ་ཡང་ཇི་སྲིད་ཅིག་ཏུ་ཐུག་པར་འགྱུར་ཞེས་བྱ་བ་བསྟན་པ་འདིས་ནི་ནོར་མེད་པ་ཉིད་དུ་བསྟན་ཏོ། ནོར་མེད་ན་ནི་འབངས་མང་པོ་གསོ་བར་བྱ་བ་དེ་མི་ནུས་པ་ཉིད་དུ་སྟོན་ཏོ། །རྒྱལ་པོའི་དཔལ་ཡང་ནོར་ཕུན་སུམ་ཚོགས་པ་ལ་ལྟོས་སོ་ཞེས་བྱ་བ་དེ་བསྒྲུབ་པའི་ཕྱིར། ནོར་དང་རབ་ཏུ་ལྡན་ན་བསྒྲུབ་པར་ནུས། །ཞེས་བྱ་བའི་ཚིགས་བཅད་སྨོས་སོ། །རྒྱལ་པོའི་དཔལ་ནོར་ཕུན་སུམ་ཚོགས་པ་ལ་ལྟོས་པ་ཅིའི་ཕྱིར་ཞེ་ན། ནོར་དང་རབ་ཏུ་ལྡན་ན་བསྒྲུབ་པར་ནུས་པའི་ཕྱིར་ཏེ། གང་ལ་ནོར་ཡོད་པ་དེ་ལ་རྒྱལ་པོའི་དཔལ་ཡོད་དེ། དེ་ལྟར་ན་ནོར་ཡོད་པ་ཉིད་ཀྱིས་རྒྱལ་པོའི་དཔལ་ཡོད་པ་ཉིད་དུ་བསྟན་ཏོ། །ནོར་མེད་ན་ནི་རྒྱལ་པོའི་དཔལ་མེད་པའི་དབང་དུ་བྱས་ནས། ནོར་མེད་ན་ནི་རྒྱལ་པོའི་དཔལ་དེ་ཡང་ཞེས་བྱ་བའི་ཚིགས་བཅད་ཕྱེད་འོག་མའོ། །དེ་ལྟར་འདི་གཉིས་ཀྱིས་དེ་ཡོད་ན་ནི་ཡོད་ལ་མེད་ན་ནི་མེད་པའི་ཕྱིར་རྒྱུ་དང་རྒྱུན་ཅན་གྱི་མཚན་
ཉིད་དུ་བསྟན་ཏོ། །ལེགས་པར་སྨྲས་པའི་མཆོད་པ་མང་ན་བརྒྱ། །དེ་ལས་མང་ན་ནུས་པར་མི་འགྱུར་ཏེ། །ཞེས་བྱ་བ་རྒྱལ་པོས་སྨྲས་པ་དེའི་ལན་ལས་བརྩམས་ཏེ། ལེགས་པར་སྨྲས་པ་རྣམས་ཀྱི་རིན་ཐང་ཞིག །ཅེས་བྱ་བའི་ཚིགས་བཅད་སྨོས་སོ། །རིན་ཐང་གི་ཚད་ནི་རིན་ཐང་ངེས་པ་སྟེ། རིན་ཐང་གི་ཚད་ཅེས་བྱ་བའི་དོན་ཏོ། །ཁྱོད་ཀྱང་དམའ་བར་ག་ལ་འགྱུར། །ཞེས་བྱ་བ་ཡིན་ཏེ། ཅིའི་ཕྱིར་ཞེ་ན། ལེགས་པར་བཤད་པ་ལ་མཆོད་པ་སྦྱིན་པར་བྱ་བའི་དོན་དུ་ནི་རྒྱལ་སྲིད་ཀྱང་རིང་དུ་མཆོད་པ་མ་ཡིན་པའི་ཕྱིར་རོ། །རིན་ཐང་བཅད་པར་མི་ནུས་པའི་གཏན་ཚིགས་བསྟན་པའི་ཕྱིར། གང་ཞིག་ཐོས་ནས་ཡིད་ནི་ཞེས་བྱ་བའི་ཚིགས་བཅད་སྨོས་སོ། །འདིའི་བསྡུས་པའི་དོན་ནི་ཐོག་མ་དང༌། བར་མ་དང༌། ཐ་མ་དགེ་བའི་ཕྱིར། ལེགས་པར་བཤད་པའི་རིན་ངེས་པར་བཅད་དུ་མི་རུང་ངོ་ཞེས་སྟོན་ཏོ། །ཐོག་མར་དགེ་བ་གང་ཞེ་ན། ཐོས་ཤིང་ཉན་པའི་ཚེ་ན་ཡིད་དགའ་བར་འགྱུར་བ་ཡིན་ཏེ། དེ་ཡང༌། གང་ཞིག་ཐོས་ནས་ཡིད་ནི་དད་འགྱུར་བ། །ཞེས་བྱ་བ་འདིས་བསྟན་ཏོ། །བར་དུ་དགེ་བ་གང་ཞེ་ན། བསམ་པ་དང་ལྡན་ཞིང་ཉེ་བར་གནས་པ་སྟེ། བསམ་པས་བསམས་པ་དེ་ནི་ལེགས་པར་དགའ་ལ་བརྟེན་པར་འགྱུར་བའོ། །ཐ་མར་དགེ་བ་གང་ཞེ་ན། བསྒོམས་པ་དེས་ཤེས་རབ་སྐྱེ་ཞིང་གཏི་མུག་མེད་པར་འགྱུར་བ་སྟེ། གཏི་མུག་ནི་མ་རིག་པ་སྤངས་པ་སྟེ། དེ་སྤངས་པའི་ཕྱིར་ཡང་བྱ་བ་བྱས་པའི་ཕྱིར་རོ། །རང་གི་ཤས་ཀྱང་དེ་ནི་ཉོ་བའི་རིགས། །ཞེས་བྱ་བ་ནི་ནང་གི་ལུས་ཀྱིས་ཀྱང་ཉོ་བར་བྱ་བ་ཡིན་ན། ཕྱི་རོལ་གྱི་དངོས་པོ་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཐོས་པ་གཏི་མུག་ཅེས་བྱ་བའི་ཚིགས་བཅད་འདི་ནི་འཇིག་རྟེན་ལས་འདས་པའི་ཡོན་ཏན་དང་རྗེས་སུ་མཐུན་པའི་དབང་དུ་བྱས་པ་སྟེ། གཏི་མུག་མུན་སེལ་ཞེས་བྱ་བས་ནི་མཐོང་བའི་ལམ་གྱི་རྒྱུས་མཐོང་བའི་ལམ་གྱི་མི་མཐུན་པ་མ་རིག་པ་སྤོང་བའི་གཉེན་པོ་ཐོས་པ་མ་ཡིན་པའི་ཕྱིར་རོ། །ཐོས་པ་ནི་སྒྲོན་མའོ། །ཐོས་པ་ནི་ནོར་གྱི་མཆོག་སྟེ། འཇིག་རྟེན་ལས་འདས་པའི་འཕགས་པའི་ནོར་གྱི་རྒྱུས་དེའི་ཚེ་དང་བཤེས་པའོ། །ཐོས་པ་ནི་ཀུན་དུ་རྨོངས་པའི་སྒྲ་འཇོམས་པའི་མཚོན་ཆ་ཡིན་ཏེ། བསྒོམ་པའི་ལམ་གང་གི་བག་ཆགས་དང་བཅས་པ་སྤོང་བར་བྱེད་པའི་ཕྱིར་
རོ། །ཐོས་པ་ནི། ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཅེས་བྱ་བ་ཡིན་ཏེ། དེ་ལ་ལྷག་པར་བསྒོམ་པས་སྤང་བར་བྱ་བའི་ཉོན་མོངས་པ་སྤོང་བར་སྒྲུབ་པ་ནི་གཞན་གྱིས་བསྟན་པ་མེད་པར་ཐོས་པའི་འབྲས་བུ་ཉིད་ཀྱིས་བསྒོམ་པའི་ལམ་བསྒྲུབ་པའི་ཐབས་སྟོན་པའི་ཕྱིར་རོ། །ད་ནི་མཐོང་བའི་ཆོས་ཉིད་ལ་ཕན་འདོགས་པའི་དབང་དུ་བྱས་ནས་ཕོངས་པར་གྱུར་ཀྱང་ཞེས་བྱ་བའི་ཚིགས་བཅད་སྨོས་སོ། །མཐོང་བའི་ཆོས་ལ་ཕན་འདོགས་པ་ཡང་རྣམ་པ་གཉིས་ཏེ། ཕོངས་པ་ལས་བཟློག་པའི་ཕན་འདོགས་པ་དང༌། ཕན་ཡོན་སྐྱེད་པར་བྱེད་པའི་ཕན་འདོགས་པའོ། །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །ཞེས་བྱ་བ་ནི། བཅིང་བ་ལ་སོགས་པའི་ཕོངས་པ་སེལ་པའི་ཕྱིར་རོ། །སེམས་ཀྱི་ནད་མྱ་ངན་གྱི་མཚན་ཉིད་ལ་ཐོས་པ་ནི་སྨན་ཡིན་ཏེ། མྱ་ངན་སེལ་བར་བྱེད་པའི་ཕྱིར་རོ། །ཐོས་པ་ནི་དཔུང་ཡིན་ཏེ་སོ་སོར་བརྟགས་ཏེ་ཡང་དག་པར་བླངས་ནས་འདོད་ཆགས་ལ་སོགས་པ་ཉེས་པ་རྣམས་ཀྱི་དཔུང་འཇིག་པར་བྱེད་པའི་རྒྱུར་གྱུར་པ་སྟེ། དེ་ཡང་འདོད་ཆགས་ལ་སོགས་པའི་ཉེས་པ་སོ་སོར་བརྟགས་པའི་སྟོབས་ཀྱི་ཟིལ་གྱིས་མནན་པ་ཡིན་པའི་ཕྱིར་ཉེས་པ་འཇོམས་པས་དཔུང་གི་མཆོག་གོ །ཐོས་པ་ནི་གྲགས་པ་དང་དཔལ་གྱི་གཏེར་གྱི་མཆོག་ཀྱང་ཡིན་ཏེ། ཐོས་པ་ལ་ཉེ་བར་གནས་པས་ན་མི་བཟད་པའི་གྲགས་པ་དང་དཔལ་ཐོབ་པ་ཡིན་ནོ། །ད་ནི་ཐོས་པ་སྨྲ་བར་བྱེད་པ་རྣམས་ཀྱི་ཕན་གདགས་པ་ཆེན་པོ་ཉིད་དུ་བསྟན་པའི་ཕྱིར། ཡ་རབས་རྣམས་དང་ཕྲད་ན་སྐྱེས་ཀྱི་མཆོག །ཅེས་བྱ་བ་ལ་སོགས་པའི་ཚིགས་བཅད་སྨོས་སོ། །དེ་ལ་སྨྲ་བ་རྣམས་ལ་ཐོས་པ་ཕན་འདོགས་པ་ཉིད་དུ་བསྟན་པའི་ཕྱིར། ཡ་རབས་རྣམས་དང་ཕྲད་ན་ཞེས་བྱ་བ་ལ་སོགས་པའི་ཚིགས་བཅད་བཞི་སྨོས་སོ། །དེ་ལ་ཚིག་བཟང་པོར་གྱུར་པ་ནི་རྣམ་པ་བཞི་སྟེ། རང་གི་ཕྱོགས་གནས་པར་བྱེད་པ་ཉིད་དུ་སྨྲ་བའི་ཚིག་ལ་མཁས་པར་འགྱུར་བ་དང༌། ལེགས་པར་བཤད་པའི་སྙན་དངགས་བྱེད་པའི་ཚིག་ལ་མཁས་པར་འགྱུར་བ་དང༌། ཆོས་སྟོན་པའི་ཚིག་ལ་མཁས་པར་འགྱུར་བ་དང༌། བསྟན་བཅོས་ཀྱི་རིམ་པ་བཞིན་དུ་ཤེས་པ་སྟེ། ཚིགས་བཅད་བཞི་དང་གོ་རིམས་བཞིན་དུ་སྦྱར་རོ། །ཡ་རབས་རྣམས་དང་ཕྲད་ན་ཞེས་བྱ་བའི་ཚིགས་བཅད་འདི་ནི་རང་གི་ཕྱོགས་གནས་པར་བྱེད་པ་སྨྲ་བའི་
ཚིག་ལ་མཁས་པར་གྱུར་པའི་དབང་དུ་བྱས་པ་སྟེ། གང་གི་ཕྱིར་དེའི་ཚིག་ནི་ཡ་རབས་རྣམས་དང་ཕྲད་ན་སྐྱེས་བཞིན་དུ་འགྱུར་ཏེ། ཡན་ལག་སྐྱོན་མེད་པ་དེས་འདོད་པའི་དོན་སྒྲུབ་ནུས་པའི་ཕྱིར་རོ། །ཚོགས་ཀྱི་ནང་ན་མཁས་པ་དགའ་བར་འགྱུར། །ཞེས་བྱ་བ་ནི་བརྗོད་པ་དང་བརྗོད་པར་བྱ་བའི་དོན་རིགས་པར་ལྡན་པ་དེས་སོ། །ཕས་ཀྱི་རྒོལ་བ་ཉིད་འོད་ཡིན་པས་ཕས་ཀྱི་རྒོལ་བ་འོད་དོ། །དེ་རྣམས་ཀྱི་ཇི་ལྟར་ཉི་མ་ལྟ་བུ་ཡིན་ཏེ། ཉི་མས་ནི་ཟླ་བ་ལ་སོགས་པའི་འོད་ཟེར་ཟིལ་གྱིས་གནོན་པ་བཞིན་དུ་རང་གི་ཕྱོགས་གནས་པར་བྱེད་པའི་ཚིག་ལ་མཁས་པ་ཡིན་ཏེ། རང་གི་ཕྱོགས་གནས་པ་ཉིད་ཀྱིས་ཕས་ཀྱི་རྒོལ་བའི་འོད་ཟིལ་གྱིས་མནན་པར་འགྱུར་རོ། །འགྲན་པ་རྣམས་ཀྱི་ཞེས་བྱ་བ་ནི་གང་དག་དེ་ལ་འགྲན་ཞིང་རྒོལ་བར་འདོད་པའོ། །དེ་རྣམས་ཀྱི་གྲགས་པ་དང༌། དྲགས་སེལ་བ་ཡིན་ཏེ། འགྲན་པ་རྣམས་ཀྱིས་འདོད་པའི་དོན་སྒྲུབ་པར་མི་ནུས་པའི་ཕྱིར་རོ། །མིག་དང་བཞིན་མདངས་རབ་ཏུ་གསལ་གྱུར་ཅིང༌། །ཞེས་བྱ་བའི་ཚིགས་བཅད་ནི་ལེགས་པར་བཤད་པའི་ཚིག་ལ་མཁས་པར་འགྱུར་བའི་དབང་དུ་བྱས་པ་སྟེ། མིག་དང་བཞིན་ནི་མིག་དང་བཞིན་ནོ། །མདངས་དང་རབ་ཏུ་གསལ་བ་ནི་མདངས་དང་རབ་ཏུ་གསལ་བར་གྱུར་པའོ། །མིག་དང་བཞིན་མདངས་རབ་ཏུ་གསལ་བར་གྱུར་པ་གང་ཡིན་པ་དེ་ནི་མིག་དང་བཞིན་མདངས་རབ་ཏུ་གསལ་བར་གྱུར་པའོ། །མིག་དང་བཞིན་མདངས་རབ་ཏུ་གསལ་བ་དང༌། མདངས་རབ་ཏུ་གསལ་བར་གྱུར་པ་དེས་རབ་ཏུ་དགའ་བ་ནི་རབ་ཏུ་དགའ་བར་གྱུར་ནས་སོ། །ཡང་ན་མིག་དང་བཞིན་ནི་མིག་དང་བཞིན་ནོ། །མདངས་ཉིད་རབ་ཏུ་གསལ་བ་ཡིན་པས་མདངས་རབ་ཏུ་གསལ་བ་སྟེ། མིག་དང་བཞིན་མདངས་ཀྱང་ཡིན་ལ་རབ་ཏུ་གསལ་བ་ཡང་ཡིན་པས་རབ་ཏུ་གསལ་བར་གྱུར་པའོ། །ལྷག་པར་ཚིམ་པ་ཡིན་པས་ལྷག་པར་དགའ་བ་སྟེ། རབ་ཏུ་དགའ་བར་གྱུར་པའོ། །རབ་ཏུ་དགའ་བར་གྱུར་པ་དེ་གང་ཡིན་ཞེ་ན། མིག་དང་བཞིན་མདངས་རབ་ཏུ་གསལ་བར་གྱུར་པའོ། །མི་བཤེས་པ་ནི་མ་འདྲིས་པ་སྟེ་སྔར་མ་མཐོང་བའོ། །ལག་པའི་སེ་གོལ་རྔོབ་པས་མགུ་བར་བྱེད་པ་གང་ཡིན་པ་དེ་ནི་ལག་པའི་སེ་གོལ་མགུ་བྱེད་རྔོབ་པའོ། །ཆོས་བསྟན་པའི་ཚིག་ལ་མཁས་པར་འགྱུར་བའི་དབང་དུ་བྱས་ནས། གཏན་ཚིགས་དོན་རྣམས་རབ་ཏུ་གསལ་བར་སྟོན། །ཞེས་བྱ་བའི་ཚིགས་བཅད་སྨོས་སོ། །གཏན་
ཚིགས་ཀྱང་ཡིན་ལ་གསལ་བ་ཡང་ཡིན་པས་གཏན་ཚིགས་གསལ་བའོ། །དེས་དོན་སྟོན་པ་ཞེས་བྱ་བ་ནི་གཏན་ཚིགས་རབ་ཏུ་གསལ་བས་དོན་རབ་ཏུ་སྟོན་པའོ། །གཙུག་ལག་དང་ལུང་རྣམ་པ་སྣ་ཚོགས་པ་ནི་གཙུག་ལག་ལུང་རྣམས་སྣ་ཚོགས་སོ། །ལུང་ནི་མན་ངག་སྟེ། གཙུག་ལག་དང༌། ལུང་སྣ་ཚོགས་སྟོན་པ་དང་མཐུན་པའོ། །དེ་ལྟར་རེ་ཞིག་ཆོས་སྟོན་པས་དོན་ཕུན་སུམ་ཚོགས་པ་བསྟན་ཏོ། །མཉེན་ཞིང་སྦྱངས་པས་ཡིད་དུ་འོང་བའི་ཕྱིར། །ཞེས་བྱ་བ་ལ། མཉེན་པ་ནི་སྒྲ་སྙན་པའོ། །སྦྱངས་པ་ནི་སྒྲའི་མཚན་ཉིད་དང་ལྡན་པ་སྟེ། སྒྲ་སྙན་པ་དང༌། ལེགས་པར་སྦྱར་བ་གཉིས་ཀྱིས་ཡིད་དུ་འོང་བ་ནི་མཉེན་ཞིང་སྦྱངས་པ་ཡིད་དུ་འོང་བ་ཉིད་དོ། །དེ་བས་ན་འདིས་ནི་བརྗོད་པ་ཕུན་སུམ་ཚོགས་པ་བསྟན་ཏོ། །མེ་ཏོག་ཕྲེང་བ་མ་རྙེས་བཀྲམ་པ་བཞིན། །ཞེས་བྱ་བ་ནི་མེ་ཏོག་མ་རྙིས་ཕུང་པོ་བཞིན་ནོ། །བསྟན་བཅོས་ཀྱི་རིམ་པ་བཞིན་དུ་ཚིག་ལ་མཁས་པར་གྱུར་པའི་དབང་དུ་བྱས་ནས། དུལ་ཞིང་རབ་ཏུ་གསལ་བའི་ཞེས་བྱ་བའི་ཚིགས་བཅད་སྨོས་སོ། །དུལ་བ་དང་རབ་ཏུ་གསལ་བ་ནི་དུལ་ཞིང་རབ་ཏུ་གསལ་བའོ། །དུལ་ཞིང་རབ་ཏུ་གསལ་བ་དེས་སྤོབས་པ་ནི་དུལ་ཞིང་རབ་ཏུ་གསལ་བའི་སྤོབས་པའོ། །དེ་གཉིས་འབར་བ་དེ་ནི་དུལ་ཞིང་རབ་ཏུ་གསལ་བའི་སྤོབས་པ་སྐྱེ་བའོ། །དུལ་བ་ནི་ཉོན་མོངས་པ་མེད་པའི་ཕྱིར་རོ། །རབ་ཏུ་གསལ་བ་ནི་གནོད་པ་མེད་པའི་ཕྱིར་རོ། །འཕྲལ་དུ་ཞེས་བྱ་བ་ནི་ཟིལ་གྱིས་གནོན་པའོ། །སྨྲ་བ་ལེགས་པ་ནི་ལྕེ་བདེ་བར་གྱུར་པ་སྟེ་གང་བཟང་པོའོ། །ང་ལ་གོམས་པ་ནི་ལྡན་པའོ། །ཐོས་པ་ཉིད་དཔལ་ཡིན་པས་ཐོས་པའི་དཔལ་ལོ། །དོན་གསལ་བར་རྟོགས་པར་གྱུར་པ་གང་ལ་ཡོད་པ་དེ་ནི་དོན་གསལ་བར་རྟོགས་པར་འགྱུར་བའོ། །དེ་ཉིད་ཐོས་པའི་དཔལ་ཡིན་པས་དོན་གསལ་རྟོགས་འགྱུར་ཐོས་པའི་དཔལ་ལོ། །བསྒྲུབ་པའི་རྒྱུའི་དབང་དུ་བྱས་ནས། ཐོས་དང་ལྡན་ན་འགལ་བ་མེད་པའི་ཞེས་བྱ་བའི་ཚིགས་བཅད་སྨོས་སོ། །འགལ་བའི་དངོས་པོ་ཡིན་པས་འགལ་ལོ། །འགལ་བ་ཡིན་ལ་ཉེས་པ་ཡང་ཡིན་པས་འགལ་བའི་ཉེས་པའོ། །ད་སྤངས་པ་ནི་འགལ་བའི་ཉེས་པ་མེད་པའོ། །འཁོར་གསུམ་ལམ་ལ་ཞེས་བྱ་བ་ནི་མངོན་པར་མཐོ་བདེ་འགྲོའོ། །སྒྲུབ་པའི་རྒྱུ་ལ་རབ་ཏུ་གནས་པ་ཞེས་བྱ་བའི་དོན་ཏོ། །ཇི་ལྟར་རབ་ཏུ་གནས་པ་ཡིན་
ཞེ་ན། ཐོས་པའི་རྗེས་སུ་འཇུག་པས་བསྒྲུབ་པ་ཡིན་པས་ཐོས་པའི་རྗེས་སྒྲུབ་པའོ། །དེ་སྙིང་པོར་བྱེད་པ་གང་ཡིན་པ་དེ་ནི་ཐོས་པའི་རྗེས་འཇུག་སྒྲུབ་པ་སྙིང་པོར་བྱེད་པའོ། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །ཞེས་བྱ་བ་ནི་ངེས་པར་ལེགས་པའི་དབང་དུ་བྱས་པ་སྟེ། ཐོས་པའི་རྗེས་འཇུག་སྒྲུབ་པ་སྙིང་པོར་བྱེད་པ་དེ་ཉིད་ཀྱིས་ཐར་བའོ། །ཡོན་ཏན་དུ་མ་ཅན་ཞེས་བྱ་བ་ནི་གོང་དུ་བསྟན་པའི་ཡོན་ཏན་ལས་གཞན་དག་ཀྱང་གཟུང་སྟེ་བདག་གིས་ནུས་བཞིན་དུ་ཇི་ལྟར་ཐོས་པ་དེ་ལ་མཆོད་པ་མི་བྱ་བའོ། །ཁྱོད་ཀྱི་བཀའ་ཡང་ཅི་ཕྱིར་བཅག་པར་འགྱུར། །ཞེས་བྱ་བ་འདི་ཡིན་ཏེ། ལེགས་པར་སྨྲ་བ་སྟོན་པ་ལ་ཡང་མཆོད་པ་བྱ་བ་མཆོག་ཏུ་ཚད་མ་ཡིན་ཏེ། དེ་ལས་མཆོག་ཏུ་གྱུར་པ་མེད་པའི་ཕྱིར་དོགས་པ་མེད་པའི་ཡོན་ཏན་ཉམས་པར་འགྱུར། སྐྱོན་གྱི་ལམ་དུ་ཞུགས་པས་འཐོབ་འགྱུར་བའི། རྒྱལ་སྲིད་སྤྱོད་པ་ཡིན་ཏེ། དེ་བས་ན་རྒྱལ་སྲིད་སྤྱོད་པ་བདག་ལ་དགོས་པ་མེད་པའོ།། སུ་དཱ་སའི་བུའི་དྲུང་དུ་འགྲོ་ཞེས་བསྟན་པ་དེ་རྒྱུ་གཉིས་ཀྱིས་བསྟན་པ་ཡིན་ནོ། །ལེགས་པར་བཤད་པ་ལ་མཆོད་པའི་ཚད་ཀྱི་ཚིག་དང༌། བདག་ཉིད་འབྱོར་བའི་དོན་ལས་ལྡོག་པའོ། །མི་དགའ་བ་ལས་བརྩལ་བའི་ཕྱིར། ཅི་སྟེ་བདེན་པ་བསྲུང་བའི་ཕྱིར། བདག་ཉིད་ལ་མི་དགའ་བ་མི་བྱ་བའི་དབང་དུ་བྱས་ནས་བུ་ཁྱོད་ཉིད་ལ་ཕན་པའི་ཕྱིར་ཞས་བྱ་བ་ལ་སོགས་པ་སྨོས་སོ། །བདེན་པ་བསྲུང་བའི་དབང་དུ་བྱས་ནས། འོན་ཏེ་དེའི་དྲུང་དུ་འགྲོ་བར་ཁྱོད་ཀྱིས་ཁས་བླངས་ཏེ། །ཞེས་བྱ་བ་ལ་སོགས་པའོ། །གཞུང་ལུགས་ཀྱི་ཆོས་དང་འགལ་བ་ཞེས་བྱ་བ་ནི་དྲང་སྲོང་གི་ཆོས་ཡིན་པས་གཞུང་ལུགས་ཀྱི་ཆོས་སོ། །དེ་དང་འགལ་བའི་ཆོས་གང་ལ་ཡོད་པ་དེ་ནི་གཞུང་ལུགས་ཀྱི་ཆོས་དང་འགལ་བའོ། །སྡུག་བསྔལ་གྱི་འདམ་དུ་བྱིང་བཞེས་བྱ་བ་ནི། མིའི་ཤ་ཟ་བའི་སྡུག་བསྔལ་བ་ཉིད་དུ་བྱིང་བའོ། །སེམས་ཅན་དམྱལ་བ་ལ་མངོན་དུ་ཕྱོགས་པ་ཞེས་བྱ་བ་ནི། དམྱལ་བར་སྐྱེ་བ་ལ་མངོན་དུ་ཕྱོགས་པ་སྟེ། དེ་བས་ན། དེ་ཉིད་ཀྱིས་སྡུག་བསྔལ་གྱི་འདམ་དུ་བྱིང་བའི་ཕྱིར་ཏེ། དེ་ལྟར་འདི་གཉིས་ཀྱིས་སྡུག་བསྔལ་བ་ཉིད་དུ་བསྟན་ཏོ། མཛའ་བོ་དང་གཉེན་བཤེས་ཀྱིས་ཡོངས་སུ་སྤངས་པ་ཞེས་བྱ་བ་ནི། བཟོད་པའི་འབྲས་བུ་གཡོག་འཁོར་གྱིས་ཡོངས་སུ་སྤངས་པའོ། །མགོན་མ་མཆིས་པ་ཞེས་བྱ་བ་ནི་གཞན་ཡང་སྡང་མ་མཐོང་
བའི་སྐྱེ་བོ་རྣམས་ཀྱིས་ཡོངས་སུ་སྤངས་པ་སྟེ་དོན་མེད་པའི་ཕྱིར་རོ། །དེའི་དྲིན་གྱིས་ཞེས་བྱ་བ་ནི་བཏང་བའི་རྒྱུས་སོ། །ཡུན་རིང་དུ་གོམས་པ་དེས་སེམས་ཤིན་ཏུ་རྩུབ་ཅིང་དྲི་མ་ཤས་ཆེར་ཡོག་པ་གང་ལ་ཡོད་པ་དེ་ནི་སེམས་རྩུབ་པ་ཡུན་རིང་དུ་གོམས་པའི་དྲི་མས་ཤས་ཆེར་ཡོག་པའོ། །འཇིགས་པ་དང་སྐྲག་པ་ཅུང་ཟད་ཀྱང་མེད་པའི་ཕྱིར་བརྟན་པས་བདག་རང་འདིར་འོངས་པ་ཡིན་ཏེ། དེ་བས་ན་བདེན་པ་སྨྲ་ཞིང་དགེ་བའོ། །བདེན་པ་སྨྲ་ཞེས་གྲགས་པ་དེ་ཇི་ལྟ་བུའི་བདེན་པ་ལ་གནས་པ་ཡིན་ཞེ་ན། དེའི་ཕྱིར་སྨྲས་པ། འདི་ལྟར་བདེན་པ་བསྲུང་བའི་ཕྱིར། །སྲོག་དང་རྒྱལ་སྲིད་གང་གཏོང་བ། །ཞེས་བྱ་བ་སྨོས་ཏེ། གཟི་བྱིན་རབ་ཏུ་ཉམས་ཞེས་བྱ་བ་འདིས་ནི་འཇིག་རྟེན་ཕ་རོལ་གྱི་སྡུག་བསྔལ་གྱི་འབྲས་བུ་ཉིད་དུ་བསྟན་ཏོ། །འཕྲལ་གྱི་བདེན་པ་མི་འགྲུབ་པ། །ཞེས་བྱ་བ་ནི་མཐོང་བའི་ཆོས་ཀྱི་བདེན་པ་ཡང་མི་འགྲུབ་པ་ཉིད་དུ་བསྟན་ཏོ། །འོན་ཀྱང་ཁྱོད་ནི་འཇིག་རྟེན་གཉི་ག་ལ་ཕན་བ་སྒྲུབ་པ་མ་ཡིན་ཏེ། གཞུང་ལུགས་ཀྱི་ཚུལ་ལ་ནི་ང་ཉིད་མཁས་སོ། །ཆོས་ཀྱི་གཟི་ཕྱིན་རབ་ཏུ་ཉམས་སོ་ཞེས་བྱ་བ་དེས་ནི་ཅི་ཞིག་ཏུ་འགྱུར་ཞེ་ན། དེའི་ཕྱིར་སྨྲས་པ། གཞུང་ལུགས་ཚུལ་སྤྱོད་ཅེས་བྱ་བའི་ཚིགས་བཅད་བརྩམས་སོ། །ཤི་ནས་ནི་ངན་སོང་དུ་ལྟུང་བ་ཡིན་ཏེ། ཅིའི་ཕྱིར་ཞེ་ན། ཆོས་ཀྱི་གཟི་བྱིན་ཉམས་པའི་ཕྱིར་རོ། །བརྫུན་སྨྲ་བཏང་ནས་བདེན་པ་ང་སྨྲ་སྟེ། །ཞེས་བྱ་བའི་ཚིགས་བཅད་ནི་སྔར་བསྟན་པའི་དོན་སྡུད་པ་ཡིན་ཏེ། དེ་བས་ཤེས་ཞེས་བྱ་བ་སྤྱོད་པར་གྱུར་ན་ནི། ཆོས་ཀྱི་གཟི་བྱིན་ཉམས་པ་དང༌། འཕྲལ་གྱི་བདེ་བ་མི་འགྲུབ་པ་དང༌། ཤི་ནས་ངན་སོང་དུ་འགྲོ་བ་སྟེ། དེ་བས་ན་ཉེས་བ་དག་གིས་མི་རུང་བའི་ཚུལ་ཡིན་པའི་ཕྱིར། ཡོངས་སུ་དོར་བར་བྱའོ། །མཁས་སྨྲ་བ་ཞེས་བྱ་བ་ནི་ལུགས་ཀྱི་བསྟན་བཅོས་ལ་མཁས་པའོ། །གྲགས་དང་བདེ་བའི་དོན་དང་འགལ་བ་གང༌། །ཞེས་བྱ་བ་ལ་གྲགས་པ་སྨོས་པས་ནི་མཁས་པ་ནི་མཆོད་པར་འོས་པའི་ཕྱིར་རོ། །བདེ་བ་སྨོས་པས་ནི་འདོད་པ་རྣམས་གཟུང་ངོ༌། །རེ་ཞིག་འདིས་ཅི་དང་འགལ་བ་ཡིན་ཞེ་ན། མཐུན་པ་དྲུག་གང་བསྟན་པ་དེ་སྟོན་པ་ཡིན་ཏེ། འགལ་བའི་དོན་དང༌། གནོད་པ་དང༌། མཐུན་པའི་དོན་དང༌། འགལ་བའི་གནོད་པ་དང༌། དོན་དང་མཐུན་པའི་གནོད་པ་དང༌། འདི་བཞི་ནི་གཞུང་བཟང་པོ་ཞེས་མཁས་པ་མི་སྨྲ་སྟེ། དེ་ལྟར་དོན་དང་རྗེས་སུ་མཐུན་པ་དང༌།
གནོད་པ་དོན་དང་རྗེས་སུ་མཐུན་པར་བྱའོ་ཞེས་བྱ་བ་དང༌། དང་དུ་ལེན་པར་གྱུར་པ་ཡིན་ཏེ། དེས་ན་ཕངས་པའི་སྲོག་དང་ཞེས་བྱ་བ་ལ་སོགས་པ་བརྩམས་པ་ཡིན་ཏེ། ཕངས་པའི་སྲོག་ཅེས་བྱ་བ་འདིས་ནི་ཚུལ་ཁྲིམས་ཀྱི་འབྲས་བུ་ཡོངས་སུ་སྤངས་པ་ཉིད་དུ་བསྟན་ཏོ། །ནང་མི་མཆི་མས་འཇུ་བ་ཞེས་བྱ་བས་ནི་བཟོད་པའི་འབྲས་བུ་སྤངས་པ་ཉིད་དུ་བསྟན་ཏོ། །རྒྱལ་སྲིད་བདེ་བ་ཡིད་དུ་འོང་བ་ཞེས་བྱ་བ་འདིས་ནི་སྦྱིན་པའི་འབྲས་བུ་སྤངས་པ་ཉིད་དུ་བསྟན་ཏོ། །དེ་ལྟར་བསོད་ནམས་ཀྱི་ཚོགས་ཀྱི་འབྲས་བུ་གསུམ་པོ་ཡོངས་སུ་སྤངས་པ་ཡིན་ཏེ་ཞེས་བསྟན་ཏོ། །དོན་འདི་ཇི་ལྟར་དོན་དང་མཐུན་པར་འགྱུར། །ཞེས་འདྲི་བ་ཡིན་ཏེ། དོན་དུ་འགྱུར་བ་ཅི་མཐོང་ན། །ཞེས་བྱ་བ་འདིས་ནི་ཇི་ལྟར་མཁས་པས་སྲོག་ཡོངས་སུ་གཏོང་བའོ། །བདེན་པའི་ཚིག་ཅེས་བྱ་བ་དེ་ཉིད་བསྒྲུབ་པའི་ཕྱིར། དེ་བསྲུང་ཕྱིར་ནི་ཞེས་བྱ་བ་ལ་སོགས་པ་སྨོས་ཏེ། དེ་བསྲུང་ཕྱིར་ནི་ཞེས་བྱ་བ་ནི་བདེན་པ་བསྲུང་བའི་ཕྱིར་རོ། །དྲུང་དུ་འོངས་ཞེས་བྱ་བ་ནི། དེ་ལྟར་གཅིག་པུ་ཕུབ་དང་མཚོན་ཆ་མེད་པར་རོ། །ངའི་ཞེས་བྱ་བ་ནི་གསད་པར་བྱ་བ་བཏང་བ་ལ་སོགས་པའོ། །ཕྲེང་བ་མཛེས་པ་ཞེས་བྱ་བའི་ཚིགས་བཅད་ཀྱི་ཕྱེད་ནི་ལོངས་སྤྱོད་པ་རྣམས་ཀྱི་ཡིད་དུ་འོང་བའི་དབང་དུ་བྱས་པའོ། །བསོད་ནམས་ཀྱི་ཡོན་ཏན་ཡིན་པས་བསོད་ནམས་ཡོན་ཏན་ནོ། །དེ་འགྲུབ་པ་ནི་བསོད་ནམས་ཡོན་ཏན་འགྲུབ་པ་སྟེ། བསོད་ནམས་ཡོན་ཏན་འགྲུབ་པ་དེས་ཁྱད་པར་དུ་འཕགས་པའོ། །ཉོན་མོངས་པ་མེད་པར་ཞེས་བྱ་བ་ནི་ལུས་ཀྱི་ངལ་བ་མེད་པར་ཞེས་བྱ་བའི་དོན་ཏོ། །དཀའ་ཐུབ་ནི་གང་གི་ཕྱིར་ཡོན་ཏན་འཕེལ་བའི་མཚན་ཉིད་དོ། །མུ་སྟེགས་འགྲོ་བ་ཞེས་བྱ་བ་ནི་སྟེགས་ལ་བརྟེན་ནས་བསོད་ནམས་རབ་ཏུ་འགྲུབ་ཅིང༌། ངན་པར་སྤྱོད་པ་དག་ལ་ཡིན་ཏེ། སྟེགས་དག་ཏུ་འགྲོ་བའི་ཉོན་མོངས་མེད་པར་བསོད་ནམས་ཐོབ་པ་ཡིན་པའི་ཕྱིར། འདིས་ནི་སྔར་བསགས་པའི་སྡིག་པ་བདེན་པ་ཉིད་ཀྱིས་དག་པར་བསྟན་ཏེ། དཀའ་ཐུབ་སྤྱོད་པ་དང༌། མུ་སྟེགས་སུ་སྤྱོད་པ་འདི་གཉིས་ཀྱིས་བསོད་ནམས་དང་ཡོན་ཏན་འགྲུབ་པ་ཉིད་དུ་བསྟན་པ་ཡིན་ནོ། །འགྲོ་བ་མཐའ་དག་ཁྱབ་པའི་ཞེས་བྱ་བའི་ཚིགས་བཅད་འདི་ནི་མཐོང་བའི་ཆོས་ཀྱི་འབྲས་བུ་དང༌། མངོན་པར་མཐོ་བ་དང༌། ངེས་པར་ལེགས་པའི་དབང་དུ་བྱས་པའོ། །འགྲོ་བ་མཐའ་དག་ཁྱད་པར་འཕེལ་བ་ནི་འགྲོ་བ་མཐའ་དག་ཁྱད་པར་འཕེལ་བའོ། །འཇིག་རྟེན་གསུམ་ལས་
འདའ་བའི་ཞེས་བྱ་བ་ནི་སའི་སྟེང་དང༌། ནམ་མཁའ་དང༌། མཐོ་རིས་ཏེ། དེ་ལྟ་བུའི་མཚན་ཉིད་ཀྱི་འཇིག་རྟེན་གསུམ་ལས་འདའ་བའི་ལམ་ནི་བདེ་བ་སྟེ། འདིས་ནི་མཐོང་བའི་ཆོས་ཀྱི་འབྲས་བུ་བསྟན་ཏོ། །ལྷའི་གནས་སུ་འཛུག་པའི་སྒོ་ཡང་ཡིན། །ཞེས་བྱ་བ་འདིས་ནི་བདེན་པ་མངོན་པར་མཐོ་བའི་ལམ་ཉིད་དུ་བསྟན་ཏོ། །འཁོར་བའི་རྫོང་ལས་ཐར་བའི་ཟམ་པ་ཡིན། །ཞེས་བྱ་བ་འདིས་ནི་ངེས་པར་ལེགས་པའི་ལམ་ཉིད་དུ་བསྟན་ཏོ། །ལྷ་ཡིས་རབ་ཏུ་བསྒྲིབས་ཀྱང་གནས་མི་ནུས། །ཞེས་བྱ་བའི་ཚིགས་བཅད་ནི་བཅོས་སུ་མི་ནུས་པའི་ཕྱིར། འཆི་བས་འཇིགས་པ་མེད་དོ་ཞེས་བྱ་བ་དེ་ཉིད་ཀྱི་དབང་དུ་བྱས་པའོ། །དེ་ལྟར་ཞེས་བྱ་བ་ནི་འཆི་བ་བཅོས་སུ་མེད་པ་ཉིད་ཀྱིས་སོ། །འཇིག་རྟེན་གྱི་ཆོས་ཀྱི་ཆོས་ཉིད་ལ་བརྟགས་ན་ཞེས་བྱ་བ་ཡིན་ཏེ། སྡིག་པ་བྱས་པས་རྗེས་སུ་འགྱོད་པར་འགྱུར། །ཞེས་བྱ་བའི་ཚིགས་བཅད་འདིས་ནི་ལྡོག་པ་མེད་པ་དང་འཇུག་པའི་ཚུལ་གྱི་དབང་དུ་བྱས་པའོ། །སྡིག་པ་བྱས་ན་རྗེས་སུ་འགྱོད་པར་འགྱུར། །ཞེས་བྱ་བ་འདིས་ནི་ལྡོག་པའི་ཚུལ་མེད་པ་ཉིད་དུ་བསྟན་ཏོ། །དགེ་བའི་ལས་ཀྱང་ལེགས་པར་ཡོངས་མ་བྱས། །ཞེས་བྱ་བ་འདིས་ནི་འཇུག་པའི་ཚུལ་མེད་པ་ཉིད་དུ་བསྟན་ཏོ། །ཕྱི་མའི་ཚེ་ལ་སྡུག་བསྔལ་འབྱུང་དུ་དོགས། །ཞེས་བྱ་བ་ནི་དེ་གཉིས་ཀའི་ཚུལ་མེད་པའི་ཕྱིར་རོ། །གང་ལས་བདག་གི་ཡིད་ནི་འགྱོད་འགྱུར་བ། །ཞེས་བྱ་བའི་ཚིགས་བཅད་ཀྱིས་བདག་ནི་དེ་གཉི་གའི་དོན་གྱི་ཚུལ་མེད་པ་ཡིན་ཏེ། དེས་ན་འཆི་བའི་འཇིགས་པ་མེད་དོ་ཞེས་པའོ། །ཕོངས་པ་རྣམས་ནི་སློང་དུ་འོངས་པ་ལ། །ཞེས་བྱ་བའི་ཚིགས་བཅད་འདིས་ནི་བསྟན་མ་ཐག་པ། དཀར་པོའི་ལས་ཀྱང་རབ་ཏུ་གོམས་བྱས་པ། །ཞེས་བྱ་བ་སྟེ། དཀར་པོའི་ཆོས་བྱས་པའི་ཕྱིར་རོ། །ཆོས་ལ་གནས་པ་ཞེས་བྱ་བ་དེ་བསྟན་པའི་ཕྱིར། མགུ་བ་རྙེད་པར་འགྱུར་ཞེས་བྱ་བ་སྟེ། སློང་དུ་འོངས་པ་ལ་ནོར་ཐོབ་པས་མགུ་བ་ཡིན་ཏེ། ཕོངས་པ་རྣམས་མི་མགུ་བར་བྱས་པ་ནི་མེད་དེ་མ་དྲན་པའོ། །བདག་གིས་བྱས་པར་ཡང་མི་དྲན་ཞེས་བྱ་བ་དེ་གང་ཡིན་ཞེ་ན་དེ་ཉིད་བསྟན་པའི་ཕྱིར། རིང་དུ་བརྟགས་ཏེ་བསམས་ཀྱང་ཞེས་བྱ་བའི་ཚིགས་བཅད་སྨོས་སོ། །སྡིག་པ་བྱས་པར་ཡོངས་མི་དྲན། །ཞེས་བྱ་བ་ནི་སྲོག་གཅོད་པ་ལ་སོགས་པའོ། །ཡིད་ལ་བསམས་བ་ཙམ་ཡང་ཞེས་བྱ་བ་ནི་ཡོད་པར་བཀོད་པ་ཡིན་པས་ཡིད་ལ་བསམས་པའོ། །ཡང་ན་ཡིད་ཉིད་
བསམས་པ་ཡིན་པས་ཡིད་ལ་བསམས་པ་སྟེ། སེམས་བསྐྱེད་པ་ཙམ་ཡང་མ་དྲན་ནོ་ཞེས་བྱ་བའི་དོན་ཏེ། དེ་ལྟར་རྣམ་པ་གཉིས་ཀྱིས་མཐོ་རིས་ཀྱི་ལམ་སྦྱངས་པ་གང་ཡིན་པ་དེ་ནི་མཐོ་རིས་ལམ་སྦྱངས་སོ། །དེ་ལྟར་དེ་གཉིས་ཀྱིས་ཆོས་ལ་འཇུག་པ་དང༌། སྡིག་པ་ལས་ལྡོག་པའི་ཚུལ་ལོ། །ཕོངས་པ་རྣམས་ནི་སློང་དུ་འོངས་པ་ལ། མགུ་བར་མ་བྱས་པ་ནི་ཡོངས་མི་དྲན། །ཞེས་བསྟན་པ་ལ། ཕོངས་པ་དེ་དག་གང་ཡིན་ཞེ་ན། དེའི་ཕྱིར་སྨྲས་པ། བྲམ་ཟེ་རྣམས་དང་གཉེན་དང་ཞེས་བྱ་བའི་ཚིགས་བཅད་སྨོས་སོ། །དེ་ལ་བྲམ་ཟེ་ཞེས་བྱ་བ་ནི་ཡོན་ཏན་གྱི་ཞིང་ངོ༌། །གཉེན་དང་མཛའ་བོ་ཞེས་བྱ་བ་ནི་ཕན་འདོགས་པའི་ཞིང་ངོ༌། །བརྟེན་པ་དང་ཕོངས་པ་ཞེས་བྱ་བ་ནི་སྙིང་རྗེའི་ཞིང་ངོ༌། །ཇི་ལྟར་བྱང་ཆུབ་སེམས་དཔའ་ཕན་འདོགས་མགུ་བར་བྱེད་པ་ཡིན་ཞེ་ན། དེའི་ཕྱིར་སྨྲས་པ། དེ་དག་ལ་ནོར་མང་པོ་བཞག་ཅིང་ཇི་ལྟར་འོས་པའི་སྦྱིན་པས་ཕོངས་པ་རྣམས་མགུ་བའི་ཕྱིར་རོ། །ཡང་ན་ནོར་ཤིན་ཏུ་མང་པོ་ཅི་རིགས་པར་སྦྱིན་པ་ཡིན་ཏེ། བྱང་ཆུབ་སེམས་དཔའ་དང་གཉི་ག་ཡང་དགའ་བའི་ཕྱིར་རོ། །གང་གི་བྱ་བ་ཅི་ཡོད་དེ་ཡང་བདག་གིས་བྱས་པ་ཞེས་བྱ་བ་ནི་གཞན་དག་ཀྱང་རྗེས་སུ་བསྟན་པའོ། །ང་མི་འཇིགས་ཞེས་བྱ་བ་ནི་ཆོས་ལ་གནས་པའི་ཕྱིར་དང༌། མཐོ་རིས་ཀྱི་ལམ་སྦྱངས་པའི་ཕྱིར་རོ། །དེ་བྱས་དགའ་བར་གྱུར་པས་ཞེས་བྱ་བ་ནི་ཆོས་ལ་གནས་པ་དགའ་བ་ཐོབ་པའི་ཕྱིར་དང༌། མཐོ་རིས་ཀྱི་ལམ་སྦྱངས་པའི་ཕྱིར་རོ། །ཡང་ན་བྲམ་ཟེ་ལ་སོགས་པ་ནོར་མང་པོ་བཞག་པའི་ཕྱིར་དགའ་བར་འགྱུར་བ་སྟེ། རྒྱུ་རྣམ་པ་གཉིས་ཀྱིས་དགའ་བ་ཡིན་ནོ། །བདག་གི་སྤྱོད་པ་ནི་བདག་གི་སྤྱོད་པའོ། །བདག་གི་སྤྱོད་པ་ཉིད་གཟུགས་ཡིན་པས་བདག་གི་སྤྱོད་པའི་གཟུགས་ཏེ་ངན་པའོ། །དེ་ནི་དེ་ལྟ་བུའི་ཆོས་ཀྱི་མེ་ལོང་ལའོ། །དགའ་དང་ལྡན་པའི་མིག་གིས་ལྟ། །ཞེས་བྱ་བ་འདིས་ནི་ཆོས་འཆད་པ་ལ་གུས་པ་དང་ལྡན་པ་ཉིད་དུ་བསྟན་ཏོ། །ཚིག་གི་བདུད་རྩི་འཐུང་བ་བཞིན། །ཞེས་བྱ་བ་འདིས་ནི་ཚིག་ལ་རྣ་གཏོད་པ་ཉིད་དོ། །གུས་པ་བསྐྱེད་ཅིང་རྩེ་གཅིག་བཏུད། །རབ་ཏུ་དང་ལ་དྲི་མེད་ཡིད། །ཅེས་བྱ་བ་འདིས་ནི་དོན་ལ་རྣ་གཏོད་པ་ཉིད་ཀྱིས་དམ་པའི་ཆོས་མཉན་པར་བྱའོ་ཞེས་བྱ་བ་ཡིན་ཏེ། འདི་དག་གིས་ནི་དམ་པའི་ཆོས་མཉན་པར་བྱའོ་ཞེས་བྱ་བའི་དོན་ཏོ། །ཇི་ལྟར་འདོད་པར་ཕྲད་ཀྱང་རུང༌། །ཞེས་བྱ་བ་ནི་དམ་པ་དག་དང་འགྲོགས་པ་ལ་དགོངས་པ་ཡིན་ཏེ། བསྙེན་བཀུར་མ་བྱས་པ་ཉིད་དུ་སྟོན་ཏོ། །ལན་ཅིག་ཙམ་ཞེས་བྱ་བ་འདིས་ནི་རྟག་ཏུ་བྱེད་པ་མེད་པ་ཉིད་དོ། །བསྙེན་བཀུར་བྱས་པ་
མེད་ཀྱང་སྐྱེ་བོ་དམ་པ་དང་འགྲོགས་པ་བརྟེན་པ་ཉིད་དུ་བསྟན་ཏོ། །རབ་ཏུ་བརྟན་པ་ཉིད་དུ་འགྱུར། །ཞེས་བྱ་བ་འདིས་ནི་དེ་ལ་རྟག་ཏུ་བྱས་པ་མེད་ཀྱང་དུས་ཡུན་རིང་དུ་གནས་པ་ཐོབ་པ་ཉིད་དུ་སྟོན་ཏོ། །འདྲིས་པ་དང་བྱ་བ་ནི་འདྲིས་པར་བྱ་བའོ། །འདྲེས་པར་བྱ་བ་དེ་ལ་མི་ལྟོས་པ་ནི་འདྲིས་པར་བྱ་བ་ནི་མི་དགོས་པར་རོ། །བསྙེན་བཀུར་བྱས་པའི་བྱ་བ་ཡང་མི་དགོས་ཏེ། ཇི་ལྟར་ཕྲད་ཀྱང་རུང་བའི་ཕྱིར་རོ། །ཇི་ལྟར་ཕྲད་ཀྱང་རུང་སྟེ། དམ་པ་དག་དང་འགྲོགས་པ་ནི་བརྟན་པར་འགྱུར་ཏེ། དེ་ཅིའི་ཕྱིར་ཞེ་ན། བྱ་བ་མི་དགོས་པ་སྟེ། སྐྱེ་བོ་དམ་པ་དག་དང་འགྲོགས་པ་ལ་བྱ་བ་མི་དགོས་པའི་ཕྱིར་རོ། །འདི་ལྟར་འདྲིས་པ་ལ་ལྟོས་པ་ཡིན་ན་ནི་ལན་ཅིག་ཕྲད་པས་གཏན་དུ་མི་འགྱུར་ཏེ་ཅིའི་ཕྱིར་ཞེ་ན། འདྲིས་པ་ལ་ལྟོས་པའི་ཕྱིར་རོ། །མགོ་བསྒྱུར་བ་དང༌། སེ་གོལ་གཏོགས་པ་གཉིས་ནི་མགོ་བསྒྱུར་སེ་གོལ་གཏོགས་པའོ། །དམ་པ་རྣམས་ནི་སུས་ཀྱང་མི་བསྲིང་ངོ༌། །ཞེས་བྱ་བ་ལ་སོགས་པའི་ཚིགས་བཅད་གསུམ་ནི། དམ་པ་དག་དང་ལྷན་ཅིག་ཙམ། །ཞེས་བྱ་བའི་ཚིགས་བཅད་དེའི་རྗེས་སུ་བསྟན་པའོ། །སྔར་བསྟན་པའི་ཇི་ལྟར་འདོད་པར་ཕྲད་པར་རུང་སྟེ་ཞེས་བྱ་བའམ། གུས་པར་བྱེད་པ་དང༌། རྟག་ཏུ་སྦྱོར་བ་གཉིས་དང་བྲལ་བ་ལ་ཡང་དམ་པ་དག་དང་འགྲོགས་པ་དང་བརྟན་པ་དང༌། གཏན་དུ་བ་ཉིད་བསྟན་ཏོ། །ད་ནི་གུས་པ་དང་རྟག་ཏུ་བྱ་བའི་སྦྱོར་བས་དམ་པ་དག་དང་འགྲོགས་པར་འདོད་པ་དང་སྒྱར་བའི་ཕན་ཡོན་བསྟན་པར་འདོད་པས། དམ་པ་རྣམས་ནི་སུས་ཀྱང་ཞེས་བྱ་བའི་ཚིགས་བཅད་འདི་བརྩམས་སོ། །དམ་པ་རྣམས་ནི་སུས་ཀྱང་མི་བསྲིང་ངོ༌། །ཞེས་བྱ་བ་ནི་སྔར་བསྟན་པའི་དམ་པ་དག་དང་འགྲོགས་ན་གཏན་དུ་བ་ཡིན་པའི་ཕྱིར་རོ། །དུལ་བའི་ཚུལ་གྱིས་དགེ་ལ་བསྟན་པར་བྱ། །ཞེས་བྱ་བ་ནི་སྔར་བསྟན་པའི་ཇི་ལྟར་འདོད་ཀྱང་རུང་སྟེ་ཞེས་བྱ་བ་ཡིན་ཏེ། དམ་པ་དག་དང་འགྲོགས་པ་ནི་བརྟན་པའི་ཕྱིར་རོ། །དགེ་བདག་ལ་བསྟེན་པ་ཇི་ལྟར་བྱ་ཞེ་ན། སྨྲས་པ། དུལ་བའི་ཚུལ་དུ་བྱ་ཞེས་བྱ་བ་ཡིན་ཏེ། འདིས་ནི་གུས་པར་བྱེད་པའི་སྦྱོར་བ་ཉིད་དུ་སྦྱོར་བ་ཡིན་ནོ། །དམ་པ་དག་དང་འགྲོགས་པ་ལ་དེ་གཉི་གའི་ཕན་ཡོན་བསྟན་པའི་ཕྱིར་སྨྲས་པ། དེ་དང་ཉེ་ན་ཞེས་བྱ་བའི་ཚིགས་བཅད་ཕྱེད་འོག་མ་ཡིན་ན། །ཆེད་དུ་མ་བསྒྲུབས་པར་ཡང་ཞེས་བྱ་བ་ནི་བསྟན་བཅོས་ཉན་པ་ལ་སོགས་པའི་བྱ་བ་མ་བྱས་པར་ཡང་སྟེ། མ་བསྲིངས་པ་དེ་ཙམ་སྟེ། མ་བསྲིངས་པ་དང་དུལ་བའི་ཚུལ་ཙམ་གྱིས་སོ། །དེ་དང་ཉེན་ཞེས་བྱ་བ་ནི་དགེ་བ་དེ་དང་ཉེ་ནའོ། །སྐྱེ་བོ་དམ་པ་དེའི་ཡོན་ཏན་ནི་དེའི་ཡོན་ཏན་ནོ། །དེའི་ཡོན་ཏན་ཉིད་མེ་ཏོག་ཡིན་པས་ཡོན་ཏན་མེ་
ཏོག་གོ །དེའི་རྡུལ་ནི་ཡོན་ཏན་གྱི་རྡུལ་ཏེ། འདི་ནི་དམ་པ་དང་འཕྲོགས་པའི་ཕན་ཡོན་ནོ། །དེ་ལྟར་རེ་ཞིག་ཇི་ལྟར་འདོད་པར་ཕྲད་ཀྱང་རུང་སྟེ། དམ་པ་དག་དང་ལན་ཅིག་ཙམ། །ཞེས་བྱ་བ་འདི་ནི་རྗེས་སུ་བསྟན་པ་སྟེ། དམ་པ་རྣམས་ཀྱི་ཕན་ཡོན་ནོ། །ཡང་ན་སྐྱེ་བོ་དམ་པ་ནི་བདག་ཉིད་ལ་ཕན་པར་ཞུགས་པ་ཡིན་ཏེ། དེ་བས་ན་སུས་ཀྱང་མི་བསྲིང་ངོ༌། །དགེ་བ་ལ་བསྟེན་པར་བྱ་ཞེས་བྱ་བ་ནི་གཞན་ལ་ཕན་པར་འཇུག་པའོ། །ད་ནི་རབ་ཏུ་བརྟན་པ་ཉིད་དུ་འགྱུར། །ཞེས་བྱ་བ་དེ་རྗེས་སུ་བསྟན་པ་ལས་བརྩམས་ཏེ། རྒྱལ་པོའི་ཤིང་རྟ་རིན་ཆེན་གསེར་གྱིས་བརྒྱན། །ཞེས་བྱ་བའི་ཚིགས་བཅད་ཡིན་ཏེ། ལུས་ཀྱང་རྒས་པས་མི་སྡུག་པར་ཡང་འགྱུར། །ཞེས་བྱ་བ་འདིས་ནི་ཕྱི་རོལ་གྱི་དངོས་པོར་འགྱུར་བ་ཉིད་དུ་བསྟན་ཏོ། །ནོར་བུ་གསེར་གྱིས་བརྒྱན་ཞེས་སྨོས་པ་ནི་གཟུགས་གནས་པ་ཉིད་དུ་རིགས་པ་ཡིན་ན་ཡང་ཕྱིས་རྒས་པས་མི་སྡུག་པར་འགྱུར་བ་ཡིན་ན་གཞན་དག་ལྟ་སྨོས་ཀྱང་ཅི་དགོས་པའོ། །རྒྱལ་པོ་ཞེས་སྨོས་པས་ནི་མངོན་པར་སྦྱར་བའི་ཁྱད་པར་དང་ལྡན་པའི་ཤེས་པ་ཡིན་ཏེ། དེའི་ཤིང་རྟ་བསྟན་པའི་ཕྱིར་རོ། །རྒྱལ་པོའི་ལུས་རིན་པོ་ཆེ་གསེར་གྱིས་བརྒྱན་པ་ཡང་རྒས་པས་མི་སྡུག་པར་འགྱུར་རོ་ཞེས་བྱ་བ་ནི་ནང་གི་དངོས་པོ་ཡང་རྣམ་པར་འགྱུར་བ་ཉིད་དུ་སྟོན་ཏོ། །དམ་པ་རྣམས་ཀྱི་ཆོས་ནི་རྒས་མི་འགྱུར། །ཞེས་བྱ་བ་འདིས་ནི་གང་སྔར་བསྟན་པའི་རབ་ཏུ་བསྟན་པ་ཉིད་དུ་འགྱུར་ཞེས་བྱ་བ་དེའི་རྒྱུ་ཉིད་བསྟན་ཏོ། །ཅིའི་ཕྱིར་དམ་པ་རྣམས་ཀྱི་ཆོས་རྒས་པར་མི་འགྱུར་ཞེ་ན། དེའི་ཕྱིར་སྨྲས་པ། དགེ་བ་རྣམས་ནི་གང་གི་ཕྱིར་ཡོན་ཏན་ལ་རྗེས་སུ་ཆགས་པ་བརྟན་པར་འགྱུར་བས་དམ་པ་རྣམས་ཀྱི་ཆོས་ནི་རྒས་པར་མི་འགྱུར་བ་སྟེ། ཡོན་ཏན་ལ་གོམས་པར་བྱ་བའི་ཕྱིར། སྐྱེ་བོ་འགྲོགས་པ་དེ་དག་ལ་ཡོན་ཏན་གཞན་དུ་མི་འགྱུར་ཏེ། དེ་གོམས་པར་བྱས་པས་ཇི་ལྟར་གཞན་དུ་འགྱུར་ཞེས་བྱ་བའི་དོན་ཏོ། །འདྲིས་པར་བྱ་བ་མི་དགོས་པར། །ཞེས་བྱ་བ་དེ་རྗེས་སུ་བསྟན་པ་ལས་བརྩམས་ཏེ། ནམ་མཁའ་དང་ནི་ས་གཞིའི་བར་ཡང་རིང༌། །ཞེས་བྱ་བའི་ཚིགས་བཅད་འདི་ཡིན་ཏེ། ནམ་མཁའ་པར་རབ་ཏུ་རིང་བ་ཡིན་ཏེ། གང་ལས་ཤེ་ན་ས་ལས་སོ། །ས་ཡང་རབ་ཏུ་རིང་བ་ཡིན་ཏེ། གང་ལས་ཤེ་ན་ནམ་མཁའ་དང་ངོ༌། །ཕ་རོལ་ཚུ་རོལ་འགྲམ་ཡང་རིང་བ་ཡིན་ཏེ། ཕ་རོལ་དང་ཕ་རོལ་མ་ཡིན་པའོ། །ཡང་ན་ས་དང་ནམ་མཁའ་གཅིག་རིང་བ་ཡིན་ནོ། །དེ་བཞིན་དུ་ཕ་རོལ་དང་ཚུ་རོལ་གྱི་འགྲམ་ཡང་ཕ་རོལ་དང་ཚུ་རོལ་གྱི་འགྲམ་
ཉིད་དོ། །ཤར་ནུབ་གཉིས་ཀྱི་རི་བར་དེ་བས་རིང༌། །ཕལ་དང་དམ་པའི་ཆོས་ཀྱང་དེ་བས་རིང༌། །ཞེས་བྱ་བ་ནི་ཕན་ཚུན་དེ་བས་རིང་བའོ། །ཅིའི་ཕྱིར་ནམ་མཁའ་དང་སའི་བར་རབ་ཏུ་རིང་བ་དང༌། རྒྱ་མཚོའི་ཕ་རོལ་དང་ཚུ་རོལ་རབ་ཏུ་རིང་བ་དང༌། ཤར་ནུབ་གཉིས་ཀྱི་རི་རབ་ཏུ་རིང་བ་སྟེ། ཅིའི་ཕྱིར་དཔེ་གསུམ་པོ་འདི་དག་ཉིད་གཟུང་གི །གཞན་མ་ཡིན་ཞེ་ན། ཆོས་འདི་ནི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་ཀྱི་མཚན་ཉིད་ཡིན་ཏེ། ནམ་མཁའ་དང་རིང་བ་ཉིད་ཀྱིས་ནི་ཚུལ་ཁྲིམས་ལས་བརྩམས་པ་ཡིན་ཏེ། ནམ་མཁའ་ལྟ་བུ་ནི་དམ་པ་རྣམས་ཀྱི་ཆོས་ཏེ། ཚུལ་ཁྲིམས་ཀྱི་མཚན་ཉིད་དོ། །མི་དགེ་བ་ཐམས་ཅད་ཀྱིས་གོས་པའམ། སྦགས་པ་དེས་ན་ས་ལྟ་བུ་ནི་དམ་པ་མ་ཡིན་པའི་ཆོས་ཏེ། མི་གཙང་བ་ཐམས་ཅད་ཀྱིས་གོས་པ་དེས་སོ། །ཏིང་ངེ་འཛིན་ནི་རྒྱ་མཚོའི་ཕ་རོལ་དང་ཚུ་རོལ་ལྟ་བུ་ཡིན་ཏེ། རྒྱ་མཚོའི་ཕ་རོལ་ལྟ་བུ་ནི་དམ་པ་རྣམས་ཀྱི་ཏིང་ངེ་འཛིན་གྱི་མཚན་ཉིད་ཀྱི་ཆོས་ཏེ། བསྟེན་པ་དག་ལ་རྗེས་སུ་འཛིན་པ་དང་སྦྱོར་བ་ནི་ཆུ་དང་འདྲ་བ་ཉིད་ཀྱི་ཕྱིར་དང༌། སྤྱོད་པའི་ཚད་ཏིང་ངེ་འཛིན་ནི་སྤྱོད་པའི་མཐར་ཐུག་པ་ཡིན་པའི་ཕྱིར་རོ། །ཚུ་རོལ་གྱི་འགྲམ་ལྟ་བུ་ནི་དམ་པ་མ་ཡིན་པའི་ཆོས་ཏེ། དེ་གཉི་གའི་མེད་པའི་ཕྱིར་རོ། །ཤེས་རབ་ལས་བརྩམས་ཏེ། ཤར་ནུབ་གཉིས་ཀྱི་རི་བར་དེ་བས་རིང༌། །ཞེས་བྱ་བ་ཡིན་ཏེ། ཤར་གྱི་རི་ལྟ་བུ་ནི་དམ་པ་རྣམས་ཀྱི་མཚན་ཉིད་ཀྱི་ཆོས་ཏེ། ཇི་ལྟར་ཉི་མ་ཤར་བ་ལ་བརྟེན་པ་དེ་བཞིན་དུ་དམ་པ་རྣམས་ཀྱི་ཆོས་ཤེས་རབ་ཀྱི་ཉི་མ་འཆར་བའི་གནས་ཡིན་ནོ། །ནུབ་པའི་རི་ལྟ་བུ་ནི་དམ་པ་མ་ཡིན་པ་རྣམས་ཀྱི་ཆོས་ཏེ། ཤེས་རབ་ཀྱི་ཉི་མ་ནུབ་པ་ལ་བརྟེན་པའོ། །ཚིགས་བཅད་འདི་བཞི་ཐོས་པས། སུ་དཱ་སའི་བུ་དུལ་བར་གྱུར་ཏེ། བདག་ཉིད་ཀྱི་གནས་སྐབས་དང༌། རྗེས་སུ་མཐུན་པའི་ཚིགས་བཅད་ཡིན་ཏེ། དེ་དག་གིས་སོ། །ཇི་ལྟར་ཕྲད་ཀྱང་རུང་སྟེ། དགེ་བའི་བཤེས་གཉེན་དང་ཕྲད་ཅིང་བསྙེན་བཀུར་བྱས་ན་སྡུག་བསྔལ་ལས་ཐར་པ་དང༌། དམ་པ་དག་དང་འགྲོགས་པའི་སྟོབས་ཡིན་པའི་ཕྱིར་ཡང་ངོ༌། །དམ་བ་དང་དམ་པ་མ་ཡིན་པའི་ཆོས་འདི་གཉིས་ནི་རབ་ཏུ་བསྐལ་པ་ཡང་ཡིན་ཏེ། ནམ་མཁའ་དང་ནི་ས་གཞིའི་བར་ཡང་རིང༌། །ཞེས་བྱ་བའི་ཚིགས་བཅད་འདི་དང་སྦྱར་རོ། །འདྲིས་པར་བྱ་བ་མི་དགོས་པར། །ཞེས་གོང་དུ་བསྟན་པ་ལ་འདི་སྐད་སྨྲས་ཏེ། དམ་པ་མ་ཡིན་པ་དང་འགྲོགས་པ་ལ་ཡང་འདྲིས་པར་བྱ་བ་
མི་དགོས་པ་ཉིད་དུ་སྟོན་ཏེ། ཅིའི་ཕྱིར་དམ་པ་མ་ཡིན་པ་དང་འདྲིས་པར་བྱ་བ་མི་དགོས་པས་དམ་པ་མ་ཡིན་པ་དང་མི་འགྲོགས་པ་ཡིན་ཞེ་ན། དེས་ན་དམ་པ་དང་དམ་པ་མ་ཡིན་པའི་ཆོས་ནི་རབ་ཏུ་རིང་བ་ཡིན་ནོ་ཞེས་བྱ་བ་བརྩམས་ཏེ། དམ་པ་དང་དམ་པ་མ་ཡིན་པའི་ཆོས་ཐག་རིང་བ་ནི། དམ་པ་དང་འགྲོགས་པ་ཡིན་ཡང་བསྐལ་པ་ཡིན་ནོ་ཞེས་བསྟན་པའི་ཕྱིར་ཁྱོད་ཀྱི་ཚིགས་སུ་བཅད་པ་སྙན་པ་དང་ཞེས་བྱ་བའི་ཚིགས་བཅད་སྨོས་སོ། །རབ་ཏུ་གསལ་བར་འཕགས་པའི་དོན་གྱི་ཚིག་གང་ཡིན་པ་དེ་ནི་ཚིག་དོན་ཀྱང་རབ་ཏུ་གསལ་བར་འཕགས་པའོ། །ཚིག་ཅེས་བྱ་བ་ནི་ལུས་སོ། །དོན་རབ་ཏུ་གསལ་བར་འཕགས་པ་ནི་སྲོག་གོ །ཚིགས་སུ་བཅད་པ་ནི་ང་རྒྱལ་ལོ། །སྙན་པ་ནི་རྒྱན་ཏེ། དེ་དེ་ལྟར་རྣམ་པ་བཞི་དང་ལྡན་པའི་སྙན་དང་གས་བསྟན་པ་ཡིན་ནོ། །གང་ལ་མཉན་པ་དང༌། གང་མཉན་པ་དང༌། མཉན་པ་དེའི་འབྲས་བུ་དང་བཅས་པ་དེའི་དབང་དུ་བྱས་ནས། ཁྱོད་ཀྱི་ཚིགས་སུ་བཅད་པ་སྙན་པ་ཞེས་བྱ་བའི་ཚིགས་བཅད་སྨོས་སོ། །གང་ལས་མཉན་པ་ནི་བྱང་ཆུབ་སེམས་དཔའ་ལས་སོ། །གང་མཉན་པ་ཡིན་ཞེ་ན། ཡོན་ཏན་བཞི་དང་ལྡན་པའི་སྙན་དངགས་སོ། །གང་ཉན་པ་ཡིན་ཞེ་ན། སུ་དཱ་སའི་བུའོ། །མཉན་པ་དེའི་འབྲས་བུ་གང་ཡིན་ཞེ་ན། དེ་ཐོས་དགའ་བར་གྱུར་པའོ། །དེའི་འབྲས་བུ་དང་བཅས་པ་ནི་མཆོག་སྦྱིན་པ་སྟེ། མཆོག་སློངས་ཤིག་པའོ། །གང་གི་ཕྱིར་བདག་ལ་དགའ་བར་གྱུར་པ་དེ་ཙམ་གྱིས་མཆོག་སྦྱིན་པར་མི་ནུས་ཏེ། དེ་ཅིའི་ཕྱིར་ཞེ་ན། བདག་ལ་ཡང་རང་དབང་མེད་པར་གྱུར་པའི་ཕྱིར་རོ། །ཇི་ལྟར་རང་དབང་མེད་པ་ཡིན་ཞེ་ན། མི་རིགས་པ་བྱེད་པ་ལས་དགའ་བས་ཕམ་པའི་ཕྱིར་དང༌། མི་དགེ་བ་སྤྱོད་པ་ལ་འཇུག་པའི་ཕྱིར་རོ། །སྐྱོན་ནི་ཉེས་པའོ། །དེ་སྐད་རེ་ཞི་གང་ང་ལ་མ་སྨྲ་ཞིག །ཅེས་བྱ་བ་གང་བསྟན་པ་ནི། སྦྱིན་པར་བྱ་བ་ཉིད་རེ་ཞིག་ཐོང་ཤིག་པ་སྟེ། ང་ནི་བདག་ལའོ། །གང་གི་ཕྱིར་སྐྱོན་དང་བཅས་པའི་ཕྱིར་དང༌། བདེན་པ་དང་ལྡན་པའི་བརྟུལ་ཞུགས་ཀྱི་མཆོག་སློང་བ་སྟེ། བདེན་པ་སྔོན་དུ་འགྲོ་བ་ཡིན་ན་ནི། མཆོག་གཞན་ཡང་སྦྱིན་པར་ནུས་པ་ཡིན་ཏེ། མཆོག་གཞན་ཡང་སྦྱིན་པར་ངེས་པར་གཟུང་བའི་ཕྱིར་རོ། །སེམས་ཅན་རྣམས་ལ་གསོད་པར་སྤོངས། །ཞེས་བྱ་བ་ནི་སྲོག་གཅོད་པ་ལས་སླར་ཟློག་པའོ། །བཙོན་དུ་གཟུང་བ་འདི་རྣམས་མ་ལུས་ཐོང༌། །ཞེས་བྱ་
བ་འདིས་ནི་མ་བྱིན་པར་ལེན་པ་ལས་སླར་ཟློག་པ་སྟེ། གང་གི་ཕྱིར། དེ་དག་མ་བྱིན་པར་ལེན་པ་ནི་ནན་གྱིས་ཁྱེར་བ་སྟེ། དེ་རྣམས་ཐོང་ཤིག་པའོ། །གཞན་ཡང་སྦྱིན་པར་ནུས་པའི་མཆོག་སྦྱིན་པར་བྱ་སྟེ། མཆོག་སྦྱིན་གཞན་གསུམ་པོ་ཡང་ངེས་པར་སྦྱིན་པར་བྱས་པའི་ཕྱིར་རོ། །བཙོན་དུ་གཟུང་བ་འདི་ཐོང་ཤིག་ཅེས་བྱ་བ་ནི་དགག་པ་དེར་ཟད་ཀྱི། དམ་པ་སྔ་མ་གསུམ་ནི་ཁྱོད་ལ་འབུལ། །ཞེས་སྔར་སུ་དཱ་སའི་བུས་སྨྲས་པ་དེ་དག་ལས་མཆོག་གསུམ་ཡང་མེད་པ་ཉིད་དུ་བསྟན་པའི་ཕྱིར་སྨྲས་པ། མི་ཤ་ཟ་བ་མ་བཏང་ན། །ཞེས་བྱ་བའི་ཚིགས་བཅད་སྨོས་སོ། །བདེན་པ་སྨྲ་བ་ཇི་ལྟར་མི་འགྱུར་ཞེ་ན། མིའི་ཤ་ཟ་བ་ཡོངས་སུ་མ་བཏང་ན་འདི་ལྟར་ཡང་མཆོག་གསུམ་སྦྱིན་པར་བྱའོ་ཞེས་དམ་བཅས་པ་སྟེ། དེ་ལྟར་མཆོག་སྦྱིན་པ་ཉིད་དུ་ཁས་བླངས་པ་ཇི་ལྟར་བདེན་པ་སྨྲ་བར་འགྱུར་ཞེས་བྱ་བ་ཡིན་ནོ། །བདེན་པའི་བརྟུལ་ཞུགས་ཞེས་སྨོས་པས་ནི་སྔ་མ་ཉིད་དུ་བསྟན་པས་ངེ་བས་ན་ཉེས་པ་མེད་དེ། ཡང་ན་དམ་པ་སྔ་མ་གསུམ་ནི་ཁྱོད་ལ་སྦྱིན་ཞེས་བྱ་བ་ཡིན་ཏེ། མཆོག་གསུམ་ཉིད་ཀྱི་དོན་ཡིན་གྱི། འདིའི་དོན་ནི་མ་ཡིན་ཏེ། དེ་ལྟར་ཉེས་པ་མེད་དོ་ཞེ་ན། དེའི་ཚིག་གིས་ཇི་ལྟར་སྲོག་གཅོད་པ་སྤོང་བར་འགྱུར་ཏེ། སྲོག་གཅོད་པ་མ་ཡིན་པར་ནི་མིའི་ཤ་མེད་པའི་ཕྱིར་རོ། །བདག་གི་སྲོག་ཀྱང་ཡོངས་སྤངས་ནས། །ཞེས་བྱ་བའི་ཚིགས་བཅད་འདིས་ཀྱང་གང་སྔར་ལྟར་བསྟན་པའི་མཆོག་སྦྱིན་པར་བྱའོ་ཞེས་བྱ་བ་དེའི་ཚིག་ལོག་པ་ཉིད་དུ་སྒྲུབ་པ་ཡིན་ཏེ། བདེན་པའི་བརྟུལ་ཞུགས་སུ་ཇི་ལྟར་འགྱུར་ཞེས་བྱ་བ་དེའི་རྗེས་སུ་བསྟན་པ་སྟེ། གལ་ཏེ་དེ་ལྟར་སྔར་གྱི་ཉེས་པ་དེ་ཡོངས་སུ་སྤོང་བར་ཇི་ལྟར་འགྱུར་ཞེས་པའོ། །རྒྱལ་པོ་ཁྱེད་ཀྱིས་སྲོག་ཆགས་རྣམས། །མི་གསོད་པར་ཡང་ག་ལ་ནུས། །ཞེས་བྱ་བ་དེའི་རྗེས་སུ་བསྟན་པ་ནི་འདི་ཡིན་ཏེ། ཤ་ཡི་ཕྱིར་ནི་མི་བསད་ན། །ཞེས་བྱ་བའི་ཚིགས་བཅད་དོ། །དེ་ལྟར་གྱུར་ན་ཞེས་བྱ་བ་ནི་བརྫུན་སྨྲ་བ་ལས་ལྡོག་པ་དང༌། སྲོག་གཅོད་པ་ལས་ལྡོག་པ་སྟེ། དེ་བས་ན་དེ་གཉིས་ཀྱང་མ་བྱིན་པར་ཇི་ལྟར་མཆོག་གསུམ་པོ་དེ་དག་བྱིན་པ་ཡིན། མཆོག་གཅིག་པོ་སྐྱེ་བོ་བཙོན་དུ་བཟུང་བ་བཏང་བ་དེ་ཉིད་བྱིན་པ་ཡིན་ཏེ། མཆོག་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །རྒྱལ་སྲིད་ཉམས་ཞེས་བྱ་བ་འདིས་ནི་དོན་ལས་ཉམས་པ་ཉིད་དུ་བསྟན་ཏོ། །ནགས་ཚལ་ཞེས་བྱ་བ་འདིས་ནི་འདོད་པ་ཡོངས་སུ་ཉམས་པ་
བསྟན་ཏོ། །ཆོས་ལས་ཉམས་ཞེས་བྱ་བ་འདིས་ནི་ཆོས་ཡོངས་སུ་སྤངས་པའོ། །མི་བསད་པ་དང༌། བཟའ་བ་མ་ཟོས་པའི་ཕྱིར་གཏམ་ངན་ཐོབ་པའོ། །དེ་ཉིད་ཀྱིས་ཆོས་ཉམས་པ་ཡིན་ཏེ། འདིས་ནི་འཇིག་རྟེན་ཕ་རོལ་ལ་གནོད་པ་ཐོབ་པ་ཉིད་དུ་སྟོན་ཏོ། །གཏམ་ངན་ཐོབ་ཅེས་བྱ་བ་འདིས་ནི་མཐོང་བའི་ཆོས་ཀྱི་གནོད་པ་ཐོབ་པ་ཉིད་དུ་བསྟན་ཏོ། །གང་གི་ཕྱིར་ནི་རྒྱལ་སྲིད་ཉམས། །ཞེས་བྱ་བའི་ཚིགས་བཅད་སུ་དཱ་སའི་བུས་སྨྲས་པ། དེའི་རྗེས་སུ་བསྟན་པ་ནི་ཚིགས་བཅད་འདི་ཡིན་ཏེ། ཆོས་ལས་ཉམས་པར་འགྱུར་བ་ཞེས་བྱ་བ་ནི་གང་སྔར་བསྟན་པའི་ཆོས་ལས་ཉམས་ཞེས་བྱ་བ་དེ་ཉིད་བསྟན་ཏོ། །སྲིད་ལས་ཉམས་ཞེས་བྱ་བ་ནི་གང་སྔར་བསྟན་པའི་རྒྱལ་སྲིད་ལས་ཉམས་ཞེས་བྱ་བ་དེ་ཉིད་བསྟན་ཏོ། །བདེ་བ་ལས་ཉམས་པར་འགྱུར་བ་ཞེས་བྱ་བ་ནི་གང་སྔར་བསྟན་པའི། ནགས་ཚལ་སྡུག་བསྔལ་བདག་གིས་མྱོང༌། །ཞེས་བྱ་བ་དེ་ཉིད་བསྟན་ཏོ། །གྲགས་པ་ཉམས་པར་འགྱུར་བ་ཞེས་བྱ་བ་ནི་གང་སྔར་བསྟན་པའི་གཏམ་ངན་པ་ཐོབ་པ་ཞེས་བྱ་བ་དེ་བསྟན་ཏོ། །ཕུང་བར་གྱུར་པའི་འབྱུང་གནས་དེ། །ཞེས་བྱ་བའི་རྒྱུ་བཞི་པོ་དེ་དག་ཉིད་ཕུང་བའི་འབྱུང་གནས་སོ། །བྱིན་ནས་འགྱོད་པ་སྐྱེ་བ་ཞེས་བྱ་བ་ནི། འགྱོད་པ་ཡོད་ན་ནི་འགྱོད་པ་སྐྱེ་བའོ། །གལ་ཏེ་ཤ་མེད་ན་འཚོ་བར་མི་ནུས་ན་ནི་ཤའི་ཚུལ་བསྟན་པའི་ཕྱིར། སྨན་པ་མཁས་པས་བརྟགས་ཏེ་ཞེས་བྱ་བའི་ཚིགས་བཅད་སྨོས་སོ། །སྨན་པས་བརྟགས་པ་ནི་ཕན་པའོ། །ལེགས་པར་སྦྱར་བའི་ཤ་ཞེས་བྱ་བ་ནི་སྨན་པས་ལེགས་པར་བརྟགས་པ་སྟེ། འདིས་ནི་གཡོས་ཀྱི་ཁྱད་པར་བསྟན་ཏོ། །གནས་རྣམས་བཞི་ལས་སྐྱེས་པའི་ཤ་བསྟན་པ་ཡིན་ཏེ། དུས་ཇི་ལྟ་བ་དང༌། ནད་གཞི་ཇི་ལྟ་བ་བཞིན་དུ་སྨན་པས་ན་བ་ཉིད་དུ་སྦྱར་རོ། །དེ་ལྟར་རེ་ཞིག་ཡིད་དུ་འོང་ཞིང་འདོད་པའི་ཤ་རྙེད་ཅིང་འགྲུབ་པ་ཉིད་དུ་བསྟན་ནས། གཞན་ཡང་བདེ་བ་ཐོབ་པ་ཡིན་ནོ་ཞེས་བསྟན་པའི་ཕྱིར། རྔ་སྒྲ་སྙན་པ་དབྱར་གྱི་འབྲུག་སྒྲ་བཞིན་དུ་སྒྲོགས། །ཞེས་བྱ་བའི་ཚིགས་བཅད་སྨོས་སོ། །རྔ་སྒྲ་སྙན་པ་ཞེས་བྱ་བའི་ཚིགས་བཅད་ཕྱེད་དང་པོས་ནི། སྦྱིན་པའི་འབྲས་བུ་ལོངས་སྤྱོད་ཆེན་པོའི་ཕན་ཡོན་ཡོངས་སུ་བཏང་བ་ཉིད་དུ་བསྟན་ཏོ། །གཉེན་དང༌། བུ་དང༌། ནང་མི་ཞེས་བྱེ་བ་ཕྱེད་འོག་མས་ནི། བཟོད་པའི་འབྲས་བུ་གཡོག་འཁོར་མང་པོས་ཕན་ཡོན་ཡོངས་སུ་བཏང་བ་བསྟན་ཏོ། །དགག་པར་བྱ་བ་དང༌། དགག་པ་ལ་སྦྱར་
ཞིང་དབང་བྱ་བ་དེ་གཉིས་ཀྱི་རྒྱུའི་དབང་དུ་བྱས་ནས། རྒྱལ་པོའི་སེམས་ཀྱི་དབང་དུ་བྱས་པ་སྟེ། རྒྱལ་པོའི་སེམས་ཀྱི་དབང་དུ་འགྲོ་བ་ནི་མི་རིགས་ཏེ། ཅིའི་ཕྱིར་ཞེ་ན། ཕྱི་རོལ་གྱི་སྟོབས་དང་ལྡན་པ་ལས་ཀྱང་རྒྱལ་བར་ནུས་པ་ཡིན་པའི་ཕྱིར། ནང་གི་བདེ་བ་ནི་ཚར་བཅད་ཅིང་རྒྱལ་བར་བྱ་བ་དེ་ལ་སྡང་བར་བྱ་བ་མི་རིགས་སོ། །ཆོས་དང༌། སྲིད་ལ་མི་གནོད་པའི་ལམ་དུ་འཇུག་པར་རིགས་ཏེ། ཅིའི་ཕྱིར་ཞེ་ན། དེའི་རྒྱུ་བསྟན་པའི་ཕྱིར། མི་ཡི་བདག་པོ་འཇིག་རྟེན་ཕྱི་མའང༌། །ཞེས་བྱ་བའི་ཚིགས་བཅད་སྨོས་སོ། །ཆོས་དང་སྲིད་ལ་མི་གནོད་ལམ་ལ་འཇུག་པ་ཞེས་བྱ་བ་ཅིའི་ཕྱིར་ཞེ་ན། འཇིག་རྟེན་ཕ་རོལ་ལ་ལྟོས་པའི་ཕྱིར་རོ། །ཆོས་དང༌། སྲིད་ལ་མི་གནོད་པ་དེ་གང་ཡིན་ཞེ་ན། དེའི་ཕྱིར་སྨྲས་པ། ཆོས་དང་སྲིད་ལ་གནོད་པའི་དབང་དུ་བྱས་ནས། དེ་བས་འགའ་ཡང་ཕན་བ་མ་ཡིན་བསྟན་མི་རིགས། །ཞེས་བྱ་བ་ཡིན་ནོ། །གང་ཆོས་དང༌། སྲིད་ལ་གནོད་པ་མ་ཡིན་པའི་ལམ་དེ་ཉིད་སྨྲས་པ། ལམ་གང་ཡིད་དུ་འོང་ལ་ཞེས་བྱ་བའི་ཚིགས་བཅད་བྱེད་འོག་མའོ། །གྲགས་དང་མི་འགལ་བ་ཞེས་བྱ་བའི་གྲགས་པ་དང་མི་འགལ་བའི་མཚན་ཉིད་ཇི་ལྟ་བུ་ཡིན་ཞེ་ན། དེ་ཉིད་སྨྲས་པ། ལམ་གང་ཡིད་དུ་འོང་ལ་ཞེས་བྱ་བ་སྟེ། དམ་པ་རྣམས་བཞེད་པ་ཞེས་བྱ་བའི་དོན་ཏོ། །ཇི་ལྟར་མི་དགའ་བ་ཡིན་ན་ཡང་ཕན་པའི་སྨན་ནི་ནད་པས་བཏུང་བར་བྱ་བ་དེ་བཞིན་དུ་བསྟེན་པའི་རིགས་སོ། །རྒྱུའི་སྐབས་སུ་གནས་པ་སྟེ། ཇི་ལྟར་ཞེ་ན། གྲགས་པའི་རྒྱུ་ཡིས་འགྲོ་བ་འདི་དག་ཁྱབ། །ཅེས་བྱ་བ་ཡིན་ཏེ། དེ་ཉིད་བསྟན་པའོ། །འདི་ལྟར་གང་གིས་སྡིག་པ་སྤྱོད་པ་དེ་ནི་འདི་ལྟར་སྡིག་པ་སྤྱོད་པ་དེའོ། །སྡིག་པ་སྤྱོད་པའི་འཆི་བདག་གི་ཕོ་ཉ་གང་ཡིན་པ་དེ་ནི་འཆི་བདག་ཕོ་ཉར་གྱུར་པ་སྟེ། སྡིག་པ་སྤྱོད་པའི་ཁྱད་པར་འདིས་སོ། །བདག་ལ་ཇི་ལྟར་བཀའ་སྩལ་དེ་བཞིན་བགྱི། །ཞེས་བྱ་བ་ནི་བཀའ་སྩལ་པ་གཞན་ཡང་དེ་བཞིན་དུ་བགྱིའོ་ཞེས་པའོ། །བཙོན་རར་སྩལ་བས་མི་དགའ་ཞིང༌། །ཞེས་བྱ་བ་ནི་སྡུག་བསྔལ་བ་ཉིད་དོ། །བཞིན་མདངས་ཉམས་ལ་ཞེས་བྱ་བ་ནི་གཟུགས་ཀྱི་ལུས་ཀྱི་གཟི་མདངས་ཉམས་པར་བསྟན་ཏོ། །མྱ་ངན་གདུངས་པའི་ཡིད་ཅེས་བྱ་བ་ནི། མིག་གི་སྡུག་བསྔལ་བ་ཉིད་དུ་བསྟན་ཏོ། །སློབ་དཔོན་དཔའ་བོས་མཛད་པའི་སྐྱེས་པའི་རབས་རྒྱ་ཆེར་བཤད་པ་ལས་བུ་ཟླ་བའི་སྐྱེས་པའི་རབས་སོ།། །།
ལེགས་པའི་ལམ་ནི་ཐར་པའི་ལམ་མོ། །རྒ་བ་དང༌། ན་བ་དང༌། འཆི་བ་དང༌། སྡུག་པ་དང་བྲལ་བ་ཞེས་བྱ་བ་ལ་འདིར་སྩོགས་པ་སྨོས་པས་ནི། མི་སྡུག་པ་དང་ཕྲད་པ་གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་ལོ་ཞེས་བྱ་བ་ལ་སོགས་པ་གཟུང་ངོ༌། །མགོན་མེད་པ་རྣམས་ཞེས་བྱ་བ་ནི་བདག་ཉིད་སྡུག་བསྔལ་ཞིང་འདོད་པས་འཇུག་པ་སྟེ། དེ་མེད་པའོ། །སྐྱབས་མེད་པ་ཞེས་བྱ་བ་ནི་སྐྱོབ་པར་བྱེད་པ་བདག་ཉིད་ལ་མེད་པ་སྟེ། འདི་ནི་སྐྱབས་མེད་པའོ། །དཔུང་གཉེན་མེད་པ་ཞེས་བྱ་བ་ནི་བདེ་ལེགས་སུ་ཡུལ་དག་ཏུ་ཕྱིན་པར་བྱེད་པ། བྱང་ཆུབ་སེམས་ལས་གཞན་མེད་པ་སྟེ། རྒྱུ་དེ་གསུམ་མེད་པར་བསྟན་ཏོ། །སྙིང་རྗེས་བསྐུལ་ཏེ་ཞེས་བྱ་བ་ནི་དེ་ལྟར་མགོན་མེད་པ་ལ་བདག་ཉིད་མགོན་དུ་ཁས་ལེན་པ་བསྟན་ཏོ། །དེ་དག་བསྐྱབ་པར་སེམས་བ་ཞེས་བྱ་བ་ནི། དེ་ལྟར་སྐྱབས་མེད་པ་དག་ལ་བདག་ཉིད་བསྐྱབ་པར་སེམས་པ་ཉིད་དུ་སྟོན་ཏོ། །རབ་ཏུ་དགེ་བའི་རང་བཞིན་ཅན་དེ་བསྒྲུབ་པར་འདོད་པའི་ཡིད་ཅེས་བྱ་བ་ནི་དཔུང་གཉེན་མེད་པའི་འཇིག་རྟེན་ལ་བདག་ཉིད་དཔུང་གཉེན་བྱེད་པ་ཉིད་དུ་སྟོན་ཏོ། །འདིས་ནི་གསུམ་པོ་དེ་དག་གི་ཁྱད་པར་བསྟན་པ་ཡིན་ཏེ། མགོན་མེད་པ་དང༌། སྐྱབས་མེད་པ་དང༌། དཔུང་གཉེན་མེད་པ་དག་གི་ཁྱད་པར་དུ་གཏོགས་པར་བྱ་སྟེ། སྙིང་རྗེས་བསྐུལ་བའི་ཕྱིར་མགོན་ནོ། །དེ་དག་བསྐྱབ་པར་སེམས་པའི་ཕྱིར་སྐྱབས་སོ། །རབ་ཏུ་དགེ་པའི་རང་བཞིན་ཅན་དེ་ཕན་པ་དང༌། བདེ་བའི་ཁྱད་པར་ཅན་ཞེས་བྱ་བ་འདིས་ནི་དཔུང་གཉེན་ནོ། །རྒྱུ་འདི་གསུམ་དང་ལྡན་པའི་ཕྱིར། སྡུག་བསྔལ་ལས་སྐྱོབ་པ་ཉིད་ཀྱིས་ཕན་པ་དང་བདེ་བ་བསྒྲུབ་པ་ཉིད་དུ་སྟོན་ཏོ། །དེ་བཞིན་དུ་གཞན་འདས་པ་གང་དང་གང་དག་ཏུ་ཚིག་གསུམ་པོ་འདི་བསྟན་པ་དེ་དང་དེ་དག་ཏུ་ཡང་འདི་བཞིན་དུ་རྟོགས་པར་བྱའོ། །འབངས་རྣམས་གློ་བ་ཉེ་པའི་བདེ་བ་དང་འཁྲུག་པ་མེད་པའི་དར་བ་ཕུན་སུམ་ཚོགས་པ་ཞེས་བྱ་བ་འདིས་ནི་རང་གི་ཡུལ་གྱི་ཕུན་སུམ་ཚོགས་པ་བསྟན་ཏོ། །རྒྱལ་ཕྲན་ཐམས་ཅད་ཀྱི་དྲེགས་པ་གང་ཡིན་པ་དེ་ནི་རྒྱལ་ཕྲན་ཐམས་ཅད་ཀྱི་དྲེགས་པའོ། །དེ་རྣམས་ཕྱག་འཚལ་བ་ནི་རྒྱལ་ཕྲན་དྲེགས་པ་རྣམས་ཕྱག་འཚལ་བའོ། །འདིས་ནི་ཡུལ་གཞན་དུ་གྱུར་བའི་ཕུན་སུམ་ཚོགས་པ་བསྟན་ཏོ། །དུལ་བ་ལ་དགའ་བས་ཞེས་བྱ་བས་མ་འོངས་
པའི་འབྲས་བུ་རྒྱུ་ཕུན་སུམ་ཚོགས་པ་བསྟན་ཏོ། །རྒྱལ་པོའི་རིགས་དེ་དང་དེ་དག་བདེ་བ་དང་སྡུག་བསྔལ་འདྲ་བར་འགྱུར་བ་སྟེ། དེའི་བདེ་བ་སྡུག་བསྔལ་མཉམ་པའོ། །སྦྱིན་པ་ཐོབ་པས་བྲམ་ཟེ་མགུ་ཞིང་གཡེངས། །ཞེས་བྱ་བ་ནི་ཕོངས་པའི་སྐྱེ་བོ་མགུ་བ་ཕུན་སུམ་ཚོགས་པའི་དབང་དུ་བྱས་པའོ།། འབངས་རྣམས་དྲེགས་པས་ཞེས་བྱ་བ་ནས་བརྩམས་ཏེ། གླུ་སྒྲ་སྙན་པ་དགོད་པས་ཞེས་བྱ་བའི་བར་གྱིས་ནི་ཉེ་བར་ལོངས་སྤྱོད་པ་ཕུན་སུམ་ཚོགས་པ་བསྟན་ཏོ། །གཅིག་ལ་གཅིག་འཇུས་དགའ་བ་རྣམས་པར་འཕེལ། །ཞེས་བྱ་བ་ནི་སྡུག་པ་དང་ཕྲད་པའི་བདེ་བ་ཕུན་སུམ་ཚོགས་པའོ། །གཏམ་སྙན་སྐྱེལ་བ་ཞེས་བྱ་བའི་ཚིགས་བཅད་འོག་མ་ཕྱེད་འདིས་ནི་གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བའོ་ཞེས་བྱ་བ་དེའི་གཉེན་པོ་བདེ་བའི་ཕྱོགས་ཀྱི་དབང་དུ་བྱས་པའོ། །སྒོ་རྣམས་ཕྱེ་ཞིང་བཙོན་དུ་བཟུང་བ་མེད། །ཅེས་བྱ་བས་ནི་བདེ་བ་ཉིད་དུ་བསྟན་ཏོ། །སྲང་གི་བཞི་མདོ་རྒྱལ་མཚན་ཞེས་བྱ་བ་ལ་སོགས་པ་སྨོས་པ་ནི་གྲོང་ཁྱེར་གྱི་རྒྱན་ཕུན་སུམ་ཚོགས་པའོ། །ཁང་པ་ཆེན་པོའི་སྟེང་ནས་ཞེས་བྱ་བའི་ཚིགས་བཅད་འདི་ནི་སྐྱེ་བོ་སྦྱིན་པ་པོའི་སྒྲུབ་པ་ཕུན་སུམ་ཚོགས་པའི་དབང་དུ་བྱས་པའོ། །སྙིང་སྟོབས་དང་ལྡན་པ་དང༌། བསོད་ནམས་བསགས་པའི་ཁྱད་པར་འདི་གཉིས་ཀྱིས་ནི་རྒྱུ་ཕུན་སུམ་ཚོགས་པ་བསྟན་ཏེ། ཡེ་ཤེས་དང༌། བསོད་ནམས་ཀྱི་ཚོགས་ཀྱི་རྒྱུ་ཡོངས་སུ་གཟུང་བའི་ཕྱིར། བསྲུང་བ་ལེགས་པར་བྱས་པས་ཞེས་བྱ་བ་ཡིན་ཏེ། ཡོངས་སུ་གཟུང་བའི་ཕྱིར་རེ། །རབ་ཏུ་ཞི་བ་ཞེས་བྱ་བ་ནི་ལུས་དང་ངག་གི་རབ་ཏུ་ཞི་བའོ། །དུལ་བ་ནི་བྱ་བ་མ་ཡིན་པ་ལས་ལྡོག་པའོ། །ཡིད་གཞུངས་པའི་ཡོན་ཏན་ནི་ཤེས་རབ་ཀྱི་ཡོན་ཏན་ཏེ། སྲི་ཞུ་ཆེ་བ་དང༌། མཉན་པ་ཟིན་པ་དང༌། འཛིན་པ་དང༌། རྣམ་པར་ཤེས་པ་དང༌། རྟོག་པ་དང༌། སེལ་ནུས་པས་མངོན་པར་འཇུག་པའི་མཚན་ཉིད་དོ། །རབ་ཏུ་ཞི་བ་དང༌། དུལ་བ་དང༌། ཤེས་རབ་ཀྱི་ཡོན་ཏན་དེ་དག་དང་ལྡན་པ་ནི་རབ་ཏུ་ཞི་བ་དང༌། དུལ་བ་དང༌། ཤེས་རབ་ཀྱི་ཡོན་ཏན་དང་ལྡན་པའོ། །མ་དྲིས་པ་ནི་མ་ཤེས་པའོ། །གཉེན་དུ་མ་འབྲེལ་པའི་ཞེས་བྱ་བ་ནི་གང་དེ་ལ་རིགས་ལ་སོགས་པའི་མཚན་ཉིད་ཀྱིས་ན་གཉེན་དུ་འབྲེལ་བ་སྟེ། གཉེན་དུ་འབྲེལ་པ་དེ་མེད་པའི་ཕྱིར་རོ། །དམ་པའི་རིང་
དུ་གནས་གྱུར་ཀྱང༌། །ཞེས་བྱ་བ་ནི་རབ་ཏུ་བསྐལ་པའོ། །རྒྱུ་གསུམ་གྱིས་ནི་བྱམས་པར་འགྱུར་ཏེ། ཡོངས་སུ་འདྲིས་པ་དང༌། གཉེན་དུ་འབྲེལ་བ་དང༌། ཉེ་བ་ན་གནས་པ་སྟེ། གསུམ་པོ་འདིའི་དབང་དུ་བྱས་པའོ། །སྡུག་པ་དང་བྲལ་བས་སྡུག་བསྔལ་ཉིད་ཀྱི་ཕྱིར་ཏེ། དར་བ་ཞེས་བྱ་བ་ནི་བདག་གི་ཡོ་བྱད་ཕུན་སུམ་ཚོགས་པའོ། །རྒུད་པ་ཞེས་བྱ་བ་ནི་འཇིག་ཅིང་གཞན་དུ་འགྱུར་བས་དེ་མི་རྟག་པའོ། །བདག་ལ་ཕན་པ་བགྱི་བར་འཚལ། །ཞེས་བྱ་བ་ནི་དེར་གནས་ནའོ། །ཐུགས་དཔག་མཛད་དུ་གསོལ་ཞེས་བྱ་བ་ནི་རྗེས་སུ་གཟུང་བར་གསོལ་བའོ། །གླང་པོ་ཆེ་མདའ་དུག་ཅན་གྱིས་ཚབས་ཆེར་ཕོག་པ་བཞིན་དུ་དེའི་མྱ་ངན་གྱིས་སེམས་གདུངས་པ་དང༌། རྒྱ་མཚོ་རབ་ཏུ་ཟབ་པ་རླུང་གིས་སློངས་པ་བཞིན་དུ་འཁམས་ཏེ་འདར་བར་གྱུར་པ་ཞེས་དེ་ལྟར་སྤྱར་རོ། །བདག་ཉིད་བུང་བར་བྱེད་པ་ཞེས་བྱ་བའི་ཚིགས་བཅད་ཕྱེད་པོ་འདིས་ནི་སུས་དེ་ལྟར་གནོད་པ་བྱས་ཞེས་པའོ། །སུ་ཡིས་ང་ཡི་མི་ཞེས་བྱ་བ་ཕྱེད་འོག་མས་ནི། སུ་ཞིག་གསད་པར་བྱ་ཞེས་བསྟན་པའོ། །དང་པོ་མངལ་དུ་ཞུགས་པའི་ནུབ་མོ་ནས། །ཞེས་བྱ་བའི་ཚིགས་བཅད་འདིས་ནི། སྐད་ཅིག་མས་འཇིག་ཅིང་མི་རྟག་པ་ཉིད་དུ་བསྟན་ཏོ། །ཡང་ན་སྐྱེ་བ་དང་གནས་པ་བསྟན་ཏོ། །དང་པོ་མངལ་དུ་ཞུགས་པའི་ནུབ་མོ་ཞེས་བྱ་བ་འདིས་ནི་སྐྱེ་བའོ། །དེ་ནས་བརྩམས་ཏེ་གཞན་དུ་མ་གོལ་བར། །ཞེས་བྱ་བ་འདིས་ནི་གནས་པ་བསྟན་ཏོ། །གནས་པ་ཞེས་བྱ་བ་ནི་སྐྱེ་བའི་གནས་ཏེ། སྐད་ཅིག་མའི་རེ་རེས་འཆི་བདག་གི་དྲུང་དུ་ཉེ་བར་འགྲོ་བའོ། །ཐབས་དང་རབ་ཏུ་ལྡན་པ་ཞེས་བྱ་བའི་ཚིགས་བཅད་འདིས་ནི། རྒ་བ་དང༌། མི་རྟག་པ་ཉིད་བསྟན་ཏེ། ཐབས་དང་ལྡན་ཡང་སུ་ཡང་ཐང་པ་མེད། །ཅེས་བྱ་བས་ནི་མཛངས་པས་ཀྱང་དགའ་བ་དང༌། འཆི་བ་བཟློག་པར་མི་ནུས་པ་ཉིད་དུ་བསྟན་ཏོ། །མཐུ་ཡོད་ཀྱང་ཞེས་བྱ་བ་འདིས་ནི་གཟུགས་ཀྱི་ལུས་ཀྱི་སྟོབས་ཀྱིས་བཟློག་པར་མི་ནུས་པ་ཉིད་དུ་བསྟན་ཏོ། །དེ་ལྟར་ཚིགས་བཅད་དེ་གཉིས་ཀྱིས་ནི་འདུས་བྱས་ཀྱི་མཚན་ཉིད་བཞི་དང་ལྡན་པའི་ཕྱིར། འདུས་བྱས་རྣམས་ཡོངས་སུ་དོར་བ་ཉིད་དུ་སྟོན་ཏོ། །འདུས་བྱས་ཀྱི་མཚན་ཉིད་བཞི་ནི་སྐྱེ་བ་དང༌། གནས་པ་དང༌། རྒ་བ་དང་མི་རྟག་པའོ། །མི་རྟ་གླང་ཆེན་ཤིང་རྟ་
མང་པོ་ཞེས་བྱ་བ་ནས་བརྩམས་པའི་ཚིགས་བཅད་ཐམས་ཅད་ཀྱིས་ནི་འཆི་བ་མི་ཟློགས་པ་ཉིད་ལས་བརྩམས་ནས་སོ། །ཚིགས་བཅད་འདི་དག་གི་དོན་ནི་འདི་ཡིན་ཏེ། མི་དང༌། དུད་འགྲོ་དང༌། ལྷ་དང༌། ལྷ་མ་ཡིན་གྱི་འགྲོ་བ་ལ་གནས་པས་ཀྱང་འཆི་བ་ལས་མི་ཟློགས་པ་ཉིད་དུ་བསྟན་ཏོ། །དམྱལ་བ་རྣམས་སུ་ནི་དེའི་བས་མ་པའི་སྐབས་མེད་པའི་ཕྱིར། དམྱལ་བ་འདིར་མ་སྨོས་སོ། །དེ་ལྟར་རེ་ཞིག་ཚིགས་བཅད་འདི་དག་གི་ཁྱད་པར་ནི་འདི་ལྟར་སྣང་སྟེ། ཁྱད་པར་གཞན་ནི་གང་ཡང་མེད་དོ། །མི་རྟ་གླང་ཆེན་ཤིང་རྟ་ཞེས་བྱ་བའི་ཚིགས་བཅད་ཀྱིས་ནི་དགྲ་གཞན་དག་ནི་ཐུབ་པར་ནུས་ཀྱི། འཆི་བདག་གི་དགྲ་ལས་ནི་རྒྱལ་བར་མི་ནུས་སོ་ཞེས་པའི་དོན་ཏོ། །རྟ་དང་གླང་ཆེན་རྐང་ཐང་ཞེས་བྱ་བའི་ཚིགས་བཅད་ཀྱིས་ནི་དམག་གིས་ཡོངས་སུ་བསྲུངས་ན། དགྲ་དག་ལས་ནི་ཐར་པར་འགྱུར་གྱི། འཆི་བདག་གི་དགྲ་ལས་ནི་དམག་གིས་ཐར་བར་མི་འགྱུར་ར་ཞེས་པའི་དོན་ཏེ། དེ་བཞིན་དུ་ཚིགས་བཅད་གཞན་དག་ལ་ཡང་བྱེ་བྲག་དེ་ལྟར་བརྗོད་པར་བྱའོ། །གད་པ་ཆེན་པོའི་ངོས་དྲལ་རྒྱལ་བར་གྱུར་པ་ཡི། །ཞེས་བྱ་བ་ནི་ཆུ་བོའི་དོགས་ཀྱི་གད་པ་ལས་རྒྱལ་བའོ། །རྩེ་མེ་ཉིད་འབར་བ་ཡིན་པས་རྩེ་མེ་འབར་བའོ། །ཁྲོས་པའི་རླུང་གིས་རྩེ་མེ་འབར་བ་དེ་ནི་ཁྲོས་པའི་རླུང་གིས་རྩེ་མེ་འབར་བའོ། །འབྲུག་སྒྲ་དྲག་པོས་དཀྲུགས་པ་གང་ཡིན་པ་དེ་ནི་འབྲུག་སྒྲ་དྲག་པོས་དཀྲུགས་པའོ། །ནད་དང་དགའ་བའི་མཆེ་བ་གཙིགས་པའི་ཁ་གདངས་པ་གང་ཡིན་པ་དེ་ནི་ཁ་གདངས་ནད་དང་རྒ་བའི་མཆེ་བ་གཙིགས་པ་ཉིད་དོ། །མི་སྡུག་པ་དང༌། འཇིགས་པའི་གདོན་གང་ཡིན་པ་དེ་ནི་མི་སྡུག་པ་དང་འཇིགས་པའི་གདོན་ནོ། །དམ་དུ་འཛིན་པ་གང་ཡིན་པ་དེ་ནི་དམ་དུ་འཛིན་པའོ། །སྙེམས་པའི་མཐུ་རྩལ་ནི་རབ་ཏུ་སྙེམས་པའི་མཐུ་རྩལ་ཏེ། རབ་ཏུ་སྙེམས་པའི་མཐུ་རྩལ་རྒུད་པ་གང་ཡིན་པ་དེ་དག་ནི་རབ་ཏུ་སྙེམས་པའི་མཐུ་རྩལ་ཉམས་པར་འགྱུར་བའོ། །མཆོད་པར་འདོད་པ་དང༌། གནོད་པ་ནི་མཆོད་འདོད་གནོད་པའོ། །དེ་དག་མཆོད་འདོད་གནོད་བྱེད་ནི། མཆོད་པར་བྱ་བ་དང༌། གནོད་པ་བྱེད་པའི་ཆེད་དུ་འོངས་ཤིང་ལྷགས་པ་ཞེས་བྱ་བའི་དོན་ཏོ། །ཞི་བར་ནུས་པ་ནི་དེ་སེལ་བར་བྱེད་པའོ། །དཀའ་
ཐུབ་བདེ་ལེགས་ཞེས་བྱ་བ་ལ། དང་གི་སྒྲ་ནི་རིགས་པ་ཡང་བསྡུ་བའོ། །སྒྱུ་མ་མཁན་ཞེས་བྱ་བ་ནི་མིག་འཕྲུལ་ལ་མཁས་པའོ། །མང་པོ་འདུས་པ་ནི་སྐྱེ་བོ་མང་པོའི་ཚོགས་སོ། །སླུ་བར་ནུས་ཞེས་བྱ་བ་ནི་གང་གིས་རྨོངས་པར་བྱེད་པ་ཡིན་པས་སླུ་བར་ནུས་པ་སྟེ། རྟ་དང་གླང་པོ་ཆེ་ལ་སོགས་པ་སྐྱེ་བོ་རྣམས་ཀྱིས་མཐོང་བའི་སྒྱུ་མ་བྱས་པའོ། །དཀའ་ཐུབ་ཉིད་མཐུ་ཡིན་པས་དཀའ་ཐུབ་མཐུའོ། །གྲུབ་པ་རྣམས་ཀྱི་གསང་སྔགས་ནི་གསང་སྔགས་གྲུབ་པའོ། །དཀའ་ཐུབ་ཀྱི་མཐུ་དང་གསང་སྔགས་གྲུབ་པ་ནི་དཀའ་ཐུབ་ཀྱི་མཐུའོ། །ཁ་ཅིག་ཏུ་ནི་གསང་སྔགས་གྲུབ་པས་ཞེས་ཀྱང་བརྗོད་དེ། དཀའ་ཐུབ་ཀྱི་མཐུ་གྲུབ་པ་ནི། དཀའ་ཐུབ་ཀྱི་མཐུ་གྲུབ་པ་སྟེ། དཀའ་ཐུབ་ཀྱི་མཐུས་གསང་སྔགས་གྲུབ་པ་ནི་དཀའ་ཐུབ་ཀྱི་མཐུའོ། །ཆོས་ཕྱིར་བདག་བློ་བསམ་མཐར་ཞེས་བྱ་བ་ནི་ཆོས་ཀྱི་བློས་སོ། །མངོན་དུ་བྱུང་ནས་ཞེས་བྱ་བ་ནི་གསལ་བར་སྟོན་པའོ། །སླར་ཡང་མི་སྣང་འགྱུར་ཞེས་བྱ་བ་ནི་མིག་ལམ་དུ་མི་སྣང་བར་གྱུར་པའོ། །བར་བར་མཁའ་ལ་འགྲོ་ཞིང་ཞེས་བྱ་བ་ནི། མི་སྣང་བར་འགྲོ་བ་ལས་ཀྱང་ནམ་མཁའ་ལ་འགྲོ་བའོ། །ས་འོག་ནུབ་པ་ཞེས་བྱ་བ་ནི། ཐོགས་པ་དང་བཅས་པ་ལ་ཐོགས་བ་མེད་པར་འགྲོ་བའོ། །མངོན་དུ་བྱུང་ནས་སླར་ཡང་མི་སྣང་འགྱུར། །ཞེས་བྱ་བ་འདིས་ནི་སྤྲུལ་པའི་རྫུ་འཕྲུལ་བསྟན་ཏོ། །བར་བར་མཁའ་ལ་འགྲོ་ཞིང་བར་བར་ས་འོག་ནུབ། །ཅེས་བྱ་བ་འདིས་ནི་འགྲོ་བའི་རྫུ་འཕྲུལ་བསྟན་ཏོ། །གསང་སྔགས་རྣམས་ཀྱི་མཐུ་ནི་གསང་སྔགས་ཀྱི་མཐུའོ། །གསང་སྔགས་ཀྱི་མཐུས་བྱས་པའི་སྟོབས་ནི་གསང་སྔགས་ཀྱི་མཐུ་སྟོབས་སོ། །རྣམ་པ་སྣ་ཚོགས་པའི་གསང་སྔགས་ཀྱི་མཐུ་སྟོབས་གང་ཡིན་པ་དེ་དག་ནི་གསང་སྔགས་ཀྱི་མཐུ་སྟོབས་རྣམས་སོ། །ང་རྒྱལ་བདོ་བའི་བློ་ཅན་ཞེས་བྱ་བ་ནི་ལྷ་དང་ལྷ་མ་ཡིན་གྱི་དམག་ཚོགས་སོ། །ཁྲོས་པ་མ་མཆིས་ཞེས་བྱ་བ་འདིས་ནི་གང་སྔར་བསྟན་པའི་བདག་ཉིད་ཕུང་བྱེད་པ་སུ་ཞིག་གིས་ཞེས་བྱ་བའི་ཚིགས་བཅད་དེའི་དོན་མ་ཡིན་པ་ཉིད་དུ་བསྟན་ཏོ། །བྱམས་པ་མ་མཆིས་ཞེས་བྱ་བ་འདིས་ནི་གང་སྔར་བསྟན་པའི་ད་ལ་ཅུང་ཟད་དོགས་པའམ་ཞེས་བྱ་བའི་ཚིགས་བཅད་དོན་དེ་མེད་པ་ཉིད་དུ་སྟོན་ཏེ། དེ་ལྟར་ན་ཅིའི་ཕྱིར་འགྲོ་ཞེ་ན། སྨྲས་པ། ཆོས་ཀྱི་དོན་དུ་
འགྲོ་ཞེས་བྱ་བ་ཡིན་ཏེ། གང་དུ་འགྲོ་ཞེ་ན། ནགས་སུའོ། ཇི་ལྟར་འགྲོ་ཞེ་ན། ངེས་པར་རོ། །གལ་ཏེ་འཆི་བདག་འོང་བར་གྱུར་ན་ཡང༌། ཇི་ལྟར་ལོག་པར་སྤྱོད་པ་ནི་ཆོས་མ་ཡིན་པའི་བདག་ཉིད་དེ། རྗེས་སུ་གདུངས་པའི་རྒྱུ་ཡིན་པའི་ཕྱིར་རོ། །དེ་ལྟ་མོད་ཀྱི། ཅིའི་ཕྱིར། ཆོས་ཀྱི་དོན་རྟོགས་པར་བྱ་བའི་ཕྱིར་རྒྱུར་འགྱུར་ཞེ་ན། སྨྲས་པ། ཆོས་ཀྱི་ནགས་ཚལ་དག་ན་བདེ་བར་སྒྲུབ་དུ་མཆིས། །ཞེས་བྱ་བ་སྨོས་སོ། །བག་མེད་དྲེགས་དང་འདོད་ཆགས་ཞེས་བྱ་བའི་ཚིགས་བཅད་འདིས་ནི། ཁྱིམ་ནི་ཉོན་མོངས་པའི་ཀུན་ནས་ཉོན་མོངས་པས་ཉོན་མོངས་པའི་ཕྱིར། ཉོན་མོངས་པའི་ཀུན་ནས་ཉོན་མོངས་པ་ནི། ཆོས་ཀྱི་དགྲ་ཡིན་པའི་ཕྱིར་དེ་དང་མི་མཐུན་པ་ཉིད་དུ་བསྟན་ཏོ། །ལས་རྣམས་མང་པོ་ཞེས་བྱ་བའི་ཚིགས་བཅད་ནི། ལས་དང་སྐྱེ་བའི་ཀུན་ནས་ཉོན་མོངས་པས་ཉོན་མོངས་པ་ཉིད་དུ་བསྟན་ཏེ། སྡུག་བསྔལ་འབྱུང་བའི་གནས་ཞེས་བྱ་བ་འདིས་ནི་སྐྱེ་བའི་ཀུན་ནས་ཉོན་མོངས་པ་ཉོན་མོངས་པ་ཉིད་དུ་བསྟན་ཏོ། །ཞི་བའི་ལམ་ནི་ཐར་པའི་ལམ་མོ། །དེ་ལྟར་ཀུན་ནས་ཉོན་མོངས་པ་གསུམ་གྱིས་ཉོན་མོངས་པའི་ཕྱིར་ཆོས་དང་འགལ་བ་ཉིད་དོ། །ནགས་ན་ནི་ཀུན་ནས་ཉོན་མོངས་པ་གསུམ་པོ་དེ་དག་མེད་པའི་ཕྱིར། ནགས་ན་བྱ་བ་ངན་པ་ཞེས་བྱ་བའི་ཚིགས་བཅད་སྨོས་སོ། །ནགས་ན་བྱ་བ་ངན་པ་མང་པོ་བཏང༌། །ཞེས་བྱ་བ་འདིས་ནི་ལས་ཀྱི་ཀུན་ནས་ཉོན་མོངས་པ་ནགས་ན་མེད་པ་ཉིད་དུ་བསྟན་ཏོ། །བསོད་ནམས་འཐོབ་ཅིང་ཡོངས་སུ་བཟུང་བའི་སྡུག་བསྔལ་སྤངས་ལ་གཙང་ཞེས་བྱ་བ་འདིས་ནི་སྐྱེ་བའི་ཀུན་ནས་ཉོན་མོངས་པ་མེད་པར་བསྟན་ཏོ། །དེ་མེད་པ་ཉིད་ཀྱིས། གཙང་ལ་ཞི་བ་འབའ་ཞིག་བྱེད། །ཅེས་བྱ་བ་འདིས་ནི་བྱ་བ་ངན་པ་མང་པོ་བཏང་བ་དེའི་གཉེན་པོ་ཉོན་མོངས་པ་ཉེ་བར་ཞི་བ་འབའ་ཞིག་བྱེད་པའི་ཕྱིར་ཡང་ཆོས་ཡོངས་སུ་བཟུང་བ་ནི་ཉོན་མོངས་པའི་ཕྱོགས་ཡོངས་སུ་སྤངས་པའོ། །མགུ་བ་དང༌། གྲགས་པ་དེ་གཉིས་ནི་མཐོང་བའི་ཆོས་ཉིད་ཀྱིའོ། །མི་རྣམས་ཆོས་ཀྱིས་བསྲུངས་ཀྱིས་ནོར་དང་དཔུང་གིས་མིན། །ཞེས་བྱ་བ་འདིས་ནི་དོན་བཟློག་པའི་རྒྱུ་ཉིད་དུ་ཆོས་སྟོན་ཏེ། ནོར་དང་དཔུང་ནི་མ་ཡིན་ནོ། །ཞེས་བྱ་བ་སྟེ། སེམས་
ཅན་དང༌། སེམས་ཅན་མ་ཡིན་པས་མི་བསྲུང་ངོ་ཞེས་པའོ། །ཆོས་ཀྱི་བདེ་བ་ཞེས་བྱ་བ་ནི། ཆོས་ཉིད་ཀྱིས་འདོད་པའི་དོན་སྒྲུབ་པ་ཉིད་དུ་སྟོན་ཏོ། །འཐོབ་ཅེས་བྱ་བ་ནི་སེམས་ཅན་དང་སེམས་ཅན་མ་ཡིན་པའི་དབང་ཕྱུག་གོ །ཆོས་ཀྱི་བདག་ཉིད་ཅན་ནི་ཤི་ནའང་དགའ་བར་འགྱུར། །ཞེས་བྱ་བ་འདིས་ནི་འཆི་བའི་འཇིགས་པ་མེད་པ་ཉིད་དུ་སྟོན་ཏོ། །ངན་འགྲོའི་འཇིགས་པ་མེད་པར་འགྱུར། །ཞེས་བྱ་བ་འདིས་ནི་ངན་སོང་དུ་འགྲོ་བའི་འཇིགས་པ་མེད་པར་སྟོན་ཏོ། །འཆི་བའི་དུས་སུ་ངན་སོང་གི་འཇིགས་པ་མེད་པ་ནི་ཆོས་ལ་གནས་པའི་ཕྱིར་རོ། །ད་ནི་དེའི་རྒྱུ་བསྟན་པའི་ཕྱིར། ལས་ཀྱི་ཁྱད་པར་དག་ཀྱང་ཞེས་བྱ་བའི་ཚིགས་བཅད་སྨོས་སོ། །དགེ་བའི་མཚན་ཉིད་ཐ་དད་པ་ནི། སྲོག་གཅོད་པ་ལ་སོགས་པ་ལས་ལྡོག་པའི་མཚན་ཉིད་ཀྱི་ལས་ཀྱི་ཁྱད་པར་རོ། །སྡིག་པའི་ལས་ཀྱི་མཚན་ཉིད་ནི། སྲོག་གཅོད་པ་ལ་སོགས་པའི་མཚན་ཉིད་དང༌། སྦྱིན་པ་ལ་སོགས་པ་མེད་པའི་མཚན་ཉིད་དོ། །ཇི་ལྟར་དགེ་བ་དང་མི་དགེ་བའི་ལས་ཀྱི་ཁྱད་པར་ཐ་དད་པ་དེ་བཞིན་དུ། རྣམ་པར་སྨིན་པ་ཡང་ཐ་དད་པ་ཡིན་ཏེ། ཇི་ལྟར་ཞེ་ན་སྨྲས་པ། མི་དགེ་བས་ནི་ངན་སོང་དུ་ལྟུང་བ་ཡིན་ལ། བསོད་ནམས་བསགས་པས་ནི་བདེ་བའི་གནས་སུ་འགྱུར་ཏེ། བདེ་བའི་གནས་སུ་འགྲོ་བ་གང་ཡིན་བ་དེ་ནི་བདེ་བའི་གནས་སུ་འགྲོ་བའོ། །རྒྱལ་སྲིད་དཔལ་ཡང་རྩྭ་དང་འདྲ་བར་བོར། །ཞེས་བྱ་བ་ནི་ཕུན་སུམ་ཚོགས་པ་ཆེན་པོ་ལ་ཡང་མ་ཆགས་པ་སྟེ། དེས་ནི་བསམ་པ་ཕུན་སུམ་ཚོགས་པ་བསྟན་ཏོ། །དཀའ་ཐུབ་ཀྱི་ནགས་ཚལ་དུ་གནས་པར་གྱུར་ཏོ་ཞེས་བྱ་བས་ནི་སྦྱོར་པ་ཕུན་སུམ་ཚོགས་པ་བསྟན་ཏོ། །བསམ་གཏན་ནི་བསམ་གཏན་བཞིའོ། །ཚད་མེད་པ་ནི་བྱམས་པ་ལ་སོགས་པ་བཞིའོ། །སློབ་དཔོན་དཔའ་བོས་མཛད་པའི་སྐྱས་པའི་རབས་རྒྱ་ཆེར་བཤད་པ་ལས། ལྕགས་ཀྱི་ཁྱིམ་ནས་བསྐྱེད་པའི་སྐྱེས་པའི་རབས་སོ། །སྐྱེས་པའི་རབས་ཀྱི་རྒྱ་ཆེར་བཤད་པ་སློབ་དཔོན་དྷརྨ་ཀཱིརྟིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏཛ་ནཱར་དྷ་ན་དང༌། ཞུ་ཆེན་གྱི་ལོ་ཙཱ་བ་ཨི་བུ་དགེ་སློང་ཤཱཀྱ་བློ་གྲོས་ཀྱིས་བསྒྱུར་བའོ།། །།