ཚད་མ་རྣམ་པར་ངེས་པའི་འགྲེལ་བཤད།
ཆོས་མཆོག།
རྒྱ་གར་སྐད་དུ། ཕྲ་མཱ་ཎ་བི་ནི་ཤྩ་ཡ་ཊཱི་ཀཱ། བོད་སྐད་དུ། ཚད་མ་རྣམ་པར་ངེས་པའི་འགྲེལ་བཤད། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་ཆགས་པ་སྤངས་ཀྱང་དཔལ་ལྡན་ཐམས་ཅད་དོན་གྲུབ་དོན་དུ་གཉེར་བའི་གཞན་དབང་གྱུར། །གང་ཞིག་འཁྲུག་པ་ཟད་ཀྱང་སྣ་ཚོགས་བསམ་པ་འགོག་ལ་བར་ཆད་མེད་པར་བརྩོན་མཛད་པ། །གང་ཞིག་བདག་ལྟ་སྤངས་པ་ལས་ཀྱང་བདག་གི་དེ་ཉིད་ལེགས་པར་ཟད་པར་ཐུགས་སུའང་ཆུད། །སྟོན་པ་དེ་ཡིད་གསུང་རབ་རིགས་པའི་མཐུ་ཡིས་གཞུང་ལུགས་ངན་པ་རྣམ་པར་འཇོམས་པར་མཛད་པ་རྒྱལ། །གང་ཞིག་ཤར་ན་ཕུར་བུ་ལ་སོགས་སྐར་མ་རྣམས་ནི་རྩིས་མེད་ཅིང༌། །མངོན་དུ་གྱུར་ནའང་དངོས་པོའི་ཡུལ་ལ་ལྟ་འཇུག་མཐའ་དག་ཉམས་འགྱུར་དང༌། །རྟག་ཏུ་ལྟ་བརྩོན་རབ་རིབ་ཟད་ཅིང་ཡང་དག་དངོས་མཐོང་སྐྱེས་གྱུར་པ། །ཆོས་ཀྱི་གྲགས་པ་མི་ཕམ་དེ་ནི་ཉི་མ་ཟླ་བ་སྣང་བའང་ཡིན། །གཞན་གྱིས་བྱས་པའི་འགྲེལ་དང་འགྲེལ་བཤད་དག །
དེ་ཡི་བཞེད་དང་འགལ་བར་མཐོང་ནས་ནི། །བླ་མའི་མན་ངག་ལས་ནི་ཚིག་རྣམས་ཅི་ཙམ་པའི། །དངོས་པོ་རྣམ་པར་དཔྱད་པ་ཙམ་ཞིག་བདག་གིས་བྱ། །ཤིན་ཏུ་སྤྲོས་པས་འཇིགས་པའི་ཕྱིར། །གཞན་གྱིས་བཤད་པ་མི་དགོད་དེ། །ལམ་ངན་སྤོང་བར་འདོད་པས་ནི། །སླར་ཡང་དེར་འཇུག་བྱེད་མ་ཡིན། །གང་ཕྱིར་ཆེན་པོ་རྣམས་ཀྱིས་འགྲེལ་བཤད་མཛད་གྱུར་པ། །དེ་ཉིད་ཕྱིར་ན་ཁོ་བོའང་རྩོལ་བར་རིགས་པ་ཡིན། །མཁའ་ལྡིང་ནམ་མཁའ་ལ་ནི་འཕུར་བར་བྱེད་པ་ན། །དེ་ཡི་ཕྲུ་གུ་མ་ཚར་བར་ཡང་སློབ་པ་བཞིན། །བདག་ཉིད་ཤེས་པ་ཡིན་པས་གལ་ཏེ་སྐྱེ་བོ་སྐྱོན་བརྗོད་སྨྲ་བར་བྱེད་ན་ཡང༌། །བདག་ལ་ཅི་ཆད་གང་འདི་རྩོམ་པར་བྱེད་པའང་དེ་ཉིད་རྟོགས་པར་བྱ་ཕྱིར་ཡིན། །མང་ལ་གྲགས་ན་དགེ་ཞེས་འཇིག་རྟེན་ན་ཡང་རབ་ཏུ་སྨྲ་བ་འདི་ཡོད་དེ། །དེ་ཡང་མེད་པ་ཉིད་དུ་གསལ་བར་རྟོགས་ནས་སྨྲ་བ་སྨད་པའི་གནས་ཉིད་ཡིན། །ཕྲག་དོག་ཀྱང་ནི་ལྟ་རྗེས་འབྲངས་ནས་བརྟན་ལྡན་ཞིང༌། །གནོད་མེད་བརྟག་འོས་དོན་ལའང་ཁྱབ་པར་བྱེད་ཕྱིར་དང༌། །དུག་འཇོམས་ལེགས་བཤད་འོ་མ་ལས་ཀྱང་འཕེལ་འགྱུར་ཕྱིར། །དེ་དང་ལྡན་པ་མིག་དུག་ཡིན་པར་ཁོ་བོས་མཐོང༌། །ཅི་སྟེ་ཡང་དག་པའི་
ཤེས་པ་བསྟན་པར་བྱ་བ་ལ། སྒྲུབ་པར་བྱེད་པ་དང་བསྒྲུབ་པར་བྱ་བ་དག་ཚད་མ་ཀུན་ལས་བཏུས་པའི་མདོའི་བརྒལ་བ་དང༌། ལན་དང་བཤད་པའི་ཁྱད་པར་ལ་གུས་པར་འགྱུར་བའི་ཕྱིར་མངོན་པར་འདོད་པའི་ཚད་མ་བསྟན་པའི་གགས་སུ་འགྱུར་བ་མ་ཡིན་ནམ། ཅིའི་ཕྱིར་ཁྱོད་ཚད་མ་རྣམ་པར་ངེས་པ་རྣམ་འགྲེལ་དུ་བྱེད་ཅེས་རྒོལ་ཞིང་རྟོག་པ་ལ། སློབ་དཔོན་གྱིས་གང་ལ་ཞེས་བྱ་བ་ལ་སོགས་པས་རྣམ་པར་ངེས་པ་རྣམ་འགྲེལ་དུ་བྱེད་པའི་རྒྱུ་གསུངས་སོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་བསྒྲལ་བར་འདོད་པའི་སྙིང་རྗེ་དེ་ནི་བརྩེ་བ་སྟེ། དེ་རྒྱུར་གྱུར་པས་གང་ལ་འཕགས་པས་རྗེས་སུ་གཟུང་བ་དེའི་གཞུང་ཁོ་བོས་དགྲོལ་བར་བྱས་ཏེ། དེའི་མདོའི་རྣམ་འགྲེལ་བྱའོ། །གང་གི་ཕྱིར་འབྲས་བུའི་མཚན་ཉིད་ནི་འདོད་པ་ཡིན་ལ་འགྲོ་བ་སྡུག་བསྔལ་དང་བྲལ་བ་ཡང་ཁོ་བོ་འདོད་པ་ཡིན་ནོ། །དེ་ཉིད་ཀྱི་ཕྱིར་ཅི་ལྟར་ལོག་པའི་ཤེས་པ་ལས་འཇུག་པ་སྡུག་བསྔལ་གྱི་རྒྱུ་སྤང་བའི་ཕྱིར་ཡང་དག་པའི་ཤེས་པ་བསྟན་པ་དེ་བཞིན་དུ། འཇིག་རྟེན་སློབ་དཔོན་ལ་སྨོད་པའི་སྡུག་བསྔལ་གྱི་རྒྱུ་ལས་བསྒྲལ་བའི་དོན་དུ་དེའི་གཞུང་འཆད་པ་ཡིན་ནོ། །རྣམ་པར་ངེས་པ་རང་དབང་དུ་བྱས་ན་ནི་ཕྱོགས་ཀྱི་གླང་པོའི་ཞལ་སྔ་ནས་ལ་རྟོག་གེ་མི་ཤེས་སོ་ཞེས་སྐྱེ་བོ་མི་མཁས་པ་དག་སློབ་དཔོན་ལ་སྨོད་པར་འགྱུར་ལ། དེ་ཡང་ཉེ་བར་བསྟེན་ཏེ་བསྙེན་པར་བྱས་པ་ཡང་དེ་ཡིན་ལ་འཇིག་རྟེན་ཡང་ཡིན་པ་དེ་རྒྱས་མཛད་དེ། །རྒྱས་པར་བྱེད་པའི་ངང་ཚུལ་ཅན་ནོ། །ཉེ་བར་བསྟན་པའི་བྱ་བ་ལ་ཡང་ཉེ་བའི་ཕྱིར་རྒྱས་མཛད་ཉིད་བྱེད་པ་པོ་ཡིན་ནོ། །བྱང་ཆུབ་སེམས་དཔའ་ནི་རྒྱུ་མེད་པར་བྱམས་པའི་ཕྱིར། འཇིག་རྟེན་གྱི་དོན་དུ་མ་གཉེར་ཡང་སྦྱིན་པ་ལ་སོགས་པས་འཇིག་རྟེན་བསྟེན་ཅིང་རྣམ་པར་གྲོལ་བའི་སྐལ་བ་ཅན་དུ་བྱས་པས་རྒྱས་པར་བྱེད་པ་ཡིན་ནོ། །གཞན་གྱི་དོན་ལ་འཇུག་པའི་བདག་ཉིད་ཆེན་པོ་དེ་ལ་ཅུང་ཟད་སྨད་ན་ཡང་སྡུག་བསྔལ་གྱི་རྒྱུ་ཡིན་ན། ཆེན་པོ་ལྟ་ཅི་སྨོས། །འདི་ལས་དོན་མ་ཡིན་པ་སྐྱེ་བ་ཞེས་གང་བཤད་པ་ཡིན་ནོ། །རྨོངས་པས་ཏེ་མི་ཤེས་པས་སྒྲོ་བཏགས་ནས་སྨོད་པའོ། །ཚད་མ་རྣམ་པར་ངེས་པ་ལས་དོན་ངེས་པའི་ཕྱིར་ཀུན་ལས་བཏུས་མ་
བཤད་ཀྱང་རྟོགས་པ་མ་ཡིན་ནམ། ཀུན་དུ་རྨོངས་པ་དེའི་གོ་སྐབས་ཇི་ལྟར་ཡོད་ཅེ་ན། འཇིག་རྟེན་ཞེས་བྱ་བ་ལ་སོགས་པ་གསུངས་ཏེ། གསལ་བ་ནི་ངེས་པའོ། །འཇིག་རྟེན་བློ་གྲོས་བླུན་པོ་སྟེ་བློ་གྲོས་དམན་པའོ། །འཕགས་པས་རྗེས་སུ་གཟུང་བ་དེའི་དོན་ནི་ཀུན་ལས་བཏུས་པའི་མདོའི་མངོན་པར་འདོད་པའི་བརྗོད་པར་བྱ་བའི་དོན་གྱི་དེ་ཁོ་ན་སྟེ། དེའི་གཞུང་འཇིག་རྟེན་འདིས་མི་ཤེས་པའོ། །གང་གི་ཕྱིར་ཚིག་འབྲེལ་པར་དཀའ་ཞིང་མཚམས་སྦྱོར་གྱི་ཚིག་ཉུང་བས་བཤད་ཀྱང་རྟོགས་པར་དཀའ་བ་ནི་བརླིང་བའོ།། ཡང་ཞེས་ཕྱི་དང་ནང་གི་མི་ཤེས་པའི་རྒྱུ་བརྗོད་པའོ། །གལ་ཏེ་འཆད་པ་པོ་བརྒྱུད་པའི་མན་དག་ཀྱང་མེད་ལ། །གཞུང་གཞན་ལས་དོན་འདི་ལྟ་བུ་རྟོགས་ཀྱང་གཞུང་དེ་ལ་གཞན་པར་མི་ནུས་ན། འོ་ན་ནི་བཤད་ཀྱང་དོན་འདི་དེའི་འདོད་པ་མ་ཡིན་པས་ཅི་ལྟར་མུ་སྟེགས་ཅན་ལ་འདི་དག་ནི་རྟོག་གེ་ཤེས་བ་མ་ཡིན་ནོ་ཞེས་དེ་ཁོ་ན་ཉིད་ཁོང་དུ་ཆུད་པ་དོན་མ་ཡིན་པའི་རྒྱུར་མི་འགྱུར་བ་བཞིན་དུ་སློབ་དཔོན་ལ་ཡང་སྟེ། དོན་མ་ཡིན་པའི་རྒྱུ་ནི་རྨོངས་པས་མི་ཤེས་པར་སྒྲོ་འདོགས་པ་ཉིད་ཡིན་པའི་ཕྱིར་རོ་ཞེས་དོགས་པ་ལ། གང་ལ་ཞེས་བྱ་བ་ལ་སོགས་པ་གསུངས་ཏེ། གང་ལ་དཔལ་ཕུན་སུམ་ཚོགས་པའི་རྒྱུ་བསོད་ནམས་ཀྱི་ཚོགས་ཡོད་པ་དང༌། དྲི་མེད་བློ་མངའ་སྟེ་དྲི་མ་དང་བྲལ་བའི་བློ་ཡོད་པ་དེ་ཇི་ལྟར་ན་དོན་ཕྱིན་ཅི་ལོག་ཏུ་ཤེས་པའམ་ཚོན་པར་འགྱུར་ཏེ། གང་ལ་འཁྲུལ་པར་འགྱུར་བ་དེ་དག་ནི་སྐལ་དང་བྲལ་བ་དང༌། བློ་གྲོས་དྲི་མ་ཅན་དག་ཁོ་ན་ཡིན་པའི་ཕྱིར་རོ། །དེ་ཡང་གང་ཡིན་ཞེ་ན། སྡིག་པ་མི་དགེ་བའི་ཆོས་རྣམས་ལས་རིང་དུ་སོང་བའི་ཕྱིར་འཕགས་པ་སྟེ། བཅོམ་ལྡན་འདས་འཇམ་དཔལ་གྱིས་གང་ལ་རྗེས་སུ་གཟུང་བ་དེ་འདི་ལྟ་བུའི་ཡོན་ཏན་དང་ལྡན་པ་ཡིན་ནོ། །ཉིད་ཅེས་བྱ་བ་ནི་སྤྲུལ་པ་དང་འཁོར་བཏང་བསམ་ཡིན་པའོ། །བྱོན་ཞེས་བྱ་བ་ནི་དོན་དུ་མ་གཉེར་བར་རོ། །སློབ་དཔོན་ཕྱོགས་ཀྱི་གླང་པོ་རི་ཕུག་དབེན་པ་ཞིག་ན་སྒོམ་པ་ལ་བརྩོན་པས་གནས་པ་ན། གནས་སྐབས་འགའ་ཞིག་ཏུ་འཁོར་བ་ལས་ཡིད་བྱུང་ནས་སེམས་ཅན་གྱི་དོན་ལས་གཞན་དུ་ཕྱོགས་ཏེ། གཅིག་པུ་
གྲོལ་བར་འདོད་པ་ན། སྐད་ཅིག་དེ་ལ་འཕགས་པ་འཇམ་དཔལ་བྱོན་ནས། བུ་སྐྱེ་བོ་ངན་པ་དང་རྗེས་སུ་མཐུན་པར་སེམས་སྔར་བའི་གཞན་གྱི་དབང་དུ་གྱུར་ཏེ། སེམས་ཅན་ཀུན་ལ་ཕན་པར་ནུས་པའི་སེམས་ཡོད་བཞིན་དུ་ཅིའི་ཕྱིར་བཏང་སྙོམས་སུ་བྱེད་ཅེས་གསུངས་པ་དང༌། ལན་དུ་བཅོམ་ལྡན་འདས་འཁོར་བ་ནི་བཟོད་པར་དཀའ་བའི་སྡུག་བསྔལ་དུ་མ་དང་ལྡན་པས་བསྲན་བར་མི་ནུས་ལ། སེམས་ཀྱང་དམ་པ་མ་ཡིན་པའི་སྐྱེ་བོ་ལ་དགའ་བས་གཡོ་བར་སྤྱོད་ཅིང༌། ཁྱོད་མཐོང་ཡང་བདག་ལ་བྱིན་གྱིས་དད་མ་བརླབས་ན། དེ་ལ་ཅི་ཞིག་བགྱིར་མཆིས་ཞེས་གསུངས་པ་དང༌། ལན་དུ་ཅི་སྲིད་ས་མ་ཐོབ་ཀྱི་བར་དུ་ཁྱོད་ཀྱི་དགེ་བའི་བཤེད་གཉེན་ནི་ང་ཉིད་དོ་ཞེས་གསུངས་ཏེ། མི་སྣང་བར་གྱུར་ཏོ། །དེ་ལྟར་ན་བྱང་ཆུབ་ལ་ཞུགས་པ་དང༌། སེམས་དཔའ་ཆེན་པོས་བྱིན་གྱིས་བརླབས་པས་ན། དེ་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པར་ངེས་པར་བྱའོ། །དེ་ལྟར་ཚིགས་སུ་བཅད་པ་འདིས་རྣམ་འགྲེལ་དུ་བྱེད་པའི་རྒྱུ་བསྒྲུབས་པས་རྣམ་པར་ངེས་པ་ཚད་མ་ཀུན་ལས་བཏུས་པའི་བཤད་པའི་ཆ་གཟུང་བར་བསྒྲུབས་པ་ཡིན་ཏེ། ཇི་ལྟར་སློབ་དཔོན་གྱིས་གཞན་དག་གི་སྡུག་བསྔལ་གྱི་རྒྱུ་སྤངས་བར་བཞེད་ནས་ཚད་མ་ཀུན་ལས་བཏུས་པའི་མདོའི་ཆ་བཤད་པ་དེ་བཞིན་དུ། །གཞན་དགག་གིས་ལོག་པའི་ཤེས་པ་བཞིན་དུ་སྡུག་བསྔལ་གྱི་རྒྱུ་སྤང་བར་འདོད་པ་ཤེས་པར་བྱ་བའི་ཕྱིར་རོ། །ཁ་ཅིག་ན་རེ་ཕྱེད་གོང་མས་རྣམ་པར་ངེས་པར་ཟློས་པའི་ཉེས་པ་སྤངས་ཏེ། གང་གི་ཕྱིར་བློ་གྲོས་བླུན་པོས་དོན་བརླིང་བ་ངེས་པར་ནུས་པ་དེས་ན་བཟློས་པའི་སྐྱོན་མེད་པའི་ཕྱིར་རོ། །ཕྱེད་འོག་མས་ཀྱང་རང་རྒྱུད་ཉིད་སྤངས་སོ་ཞེས་ཟེར་བ་དེ་ནི་ཤིན་ཏུ་མ་འབྲེལ་ཏེ། བརྩེ་བས་ཀྱང་ཞེས་བསྡུ་བ་མེད་པའི་ཕྱིར་དང༌། རྣམ་འགྲེལ་དུ་བྱ་བར་བསྒྲུབས་པས་ཀྱང་ཟློས་བའི་ཉེས་པ་སྤངས་བ་ཉིད་ཀྱི་ཕྱིར་རོ། །གང་ཡང་འདི་ནི་རྣམ་པར་ངེས་པའི་དགོས་པ་ཡིན་ནོ་ཞེས་ཟེར་བ་དེ་ནི་སྡིགས་པ་བས་ཀྱང་སྡིག་པ་ཡིན་ཏེ། རྣམ་པར་ངེས་པའི་དགོས་པ་ནི་གང་གི་དབང་དུ་བྱས་ནས་འདི་བྱེད་པས། བརྗོད་པར་བྱ་བ་རྟོགས་པ་ཉིད་ཡིན་ལ། དེ་ཡང་གཞན་གྱིས་བསྒྲུབ་ཟིན་པ་དེ་མ་ན་དེའི་དོན་དུ་དེས་
ཡང་དེ་བྱ་བ་མ་ཡིན་ནོ་ཞེས་དགོས་པ་མེད་པ་ཉིད་དུ་དགོས་པར་འགྱུར་བ་དེ་ཡང་རྣམ་འགྲེལ་དུ་བྱེད་པའི་རྒྱུ་བསྟན་པ་ཉིད་ཀྱིས་སྤངས་པ་ཡིན་ནོ། །ཅི་སྟེ་རང་རྒྱུད་བརྙས་པའི་རྒྱུ་ཡིན་པས་ཀུན་ལས་བཏུས་པས་བཤད་པར་བྱེད་པ་རྣམ་པར་ངེས་པ་བརྩམ་པར་བྱ་བ་ཉིད་ཀྱི་དགོས་པ་ཅི་ཞིག་ཡིན། ཚིགས་ཚད་མ་མ་ཡིན་པས་དགོས་དད་པ་བསྟན་ཀྱང་བསྟན་བཅོས་མཉན་པ་ཉིད་ལས་ངེས་པར་བྱ་བ་མ་ཡིན་ནམ། འདིར་དགོས་པ་སྟོན་པའི་ངག་གིས་ཅི་ཞིག་བྱ་ཞེ་ན། བདེན་ཏེ་དེ་ལྟར་ན་ཡང་ཚིགས་ལས་རྟོག་པ་དང་ལྡན་པ་རྣམས་ཐེ་ཚོམ་སྐྱེ་ཞིང༌། དེས་ན་དོན་དུ་གཉེར་ལ། དེ་ལས་ཀྱང་འཇུག་པར་འགྱུར་བའི་ཕྱིར་རོ། །བརྗོད་པར་བྱ་བ་ལ་སོགས་པའི་ངག་མེད་ན་ནི་འདེའི་བརྗོད་པར་བྱ་བ་ནི་བྱ་རོག་གི་སོ་བསྟན་པ་བཞིན་དུ་འབྲས་བུ་མེད་པར་དོགས་པའམ། མཐའ་ཡས་ཀྱི་གཙུག་གི་ནད་ཐམས་ཅད་སེལ་བའི་རིན་པོ་ཆེའི་རྒྱན་གྱི་མན་ངག་བཞིན་དུ་ཡོད་ཀྱང་བསྒྲུབ་པར་མི་ནུས་པའམ། །མ་བག་མར་ལེན་པའི་མན་ང་བཞིན་དུ་འདི་ཉན་པའི་དགོས་པ་ནི་མངོན་པར་འདོད་པ་མ་ཡིན་ནོ་ཞེས་སོགས་པའམ། བསྟན་བཅོས་མཉན་པ་དེ་བས་ཀྱང་དགོས་པ་དེ་འགྲུབ་པའི་ཐབས་སླ་བ་གཞན་ཡོད་དོ་ཞེས་དོན་མེད་པའི་ཐེ་ཚོམ་གང་ཡང་རུང་བས་ཀྱང་དོན་དུ་གཉེར་བར་མི་འགྱུར་ཏེ། དེས་ན་མཉན་པ་ལ་འཇུག་པར་མི་འགྱུར་རོ། །འབྲེལ་པ་ལ་སོགས་པ་བརྗོད་ན་ནི་དོན་ལ་ཐེ་ཚོམ་བྱ་བར་རིགས་ཏེ། བསྟན་བཅོས་བྱེད་པས་བསྟན་བཅོས་ཀྱི་དང་པོར་བརྗོད་པར་བྱ་བ་ལ་སོགས་པ་ཕྱིན་ཅི་ལོག་ཏུ་སྟོན་བ་ལ་དགོས་པ་ཅུང་ཟད་ཀྱང་མེད་པའི་ཕྱིར་རོ། །དེའི་ཕྱིར་དགོས་པའི་ངག་བཀོད་པ་ཡིན་ནོ། །འཆད་པ་པོ་རྣམ་ནི་བརྩེ་བ་ལ་སོགས་པའི་དོན་དུ་ལོག་པར་སྟོན་པ་སྲིད་ཀྱི། །བསྟན་བཅོས་བྱེད་པ་ནི་མ་ཡིན་ནོ། །དེའི་ཕྱིར་འཇུག་པའི་ཡན་ལག་ཏུ་དོན་དུ་འགྱུར་བ་ཉིད་ཀྱི་ཐེ་ཚོམ་བསྐྱེད་པའི་ཕྱིར། ཕན་པ་དང་ཞེས་བྱ་བ་ལ་སོགས་པས་དང་པོར་བརྗོད་པར་བྱ་བ་ལ་སོགས་པའི་ངག་གསུངས་སོ། །གང་འདིས་ཀྱང་བརྗོད་པར་བྱ་བའི་དགོས་པ་ཉིད་སྟོན་ཏོ། །དག་གི་རང་བཞིན་འདི་ཐམས་ཅད་ནི་སྒྲའི་ལུས་དང་དོན་གྱི་ལུས་སོ། །དེ་ལ་སྒྲའི་ཆ་ནི་དོན་རྟོགས་
པ་ཉིད་དགོས་པ་ཡིན་པས། འགའ་ཞིག་ཏུ་ཡང་འབྲས་བུ་མེད་པ་མ་ཡིན་པར་རང་ཉིད་ཀྱིས་འགྱུར་རོ། །དོན་གྱི་ཆ་ལ་ནི་དོན་དང་མི་ལྡན་པ་ཉིད་མཐོང་ལ། དེ་ལྟ་བུའི་དོན་ཀྱང་བརྩམ་པར་བྱ་བ་མ་ཡིན་ཏེ། རྟོག་པ་དང་ལྡན་པའི་རྩོམ་པ་ཐམས་ཅད་ནི་དགོས་པས་ཁྱབ་པའི་ཕྱིར་དང། སྐྱེས་བུའི་དོན་ལ་ཉེ་བར་མཁོ་བའི་དོན་ཀྱང་མེད་པའི་ཕྱིར་རོ། །དེའི་ཕྱིར་བསྟན་བཅོས་བརྩམས་པ་འབྲས་བུ་དང་བཅས་པ་སྟོན་པར་བྱེད་པས། །བརྗོད་པར་བྱ་བའི་དགོས་པ་ཉིད་བཤད་པར་བྱ་བ་ཡིན་ནོ། །གང་གི་ཕྱིར་ཕན་པ་དང་མི་ཕན་པ་ཐོབ་པ་དང་སྤང་བ་ནི་ཡང་དག་པའི་ཤེས་པའི་འབྲས་བུ་ཡིན་པའི་ཕྱིར་དེ་བསྟན་པའི་དོན་དུ་འདི་བརྩམ་མོ་ཞེས་བྱ་བ་ལ། །འདིར་ཡང་དོན་གྱིས་བརྗོད་པས་བརྗོད་པར་བྱ་བ་དང༌། བྱེད་པ་དང་ཉན་པའི་བྱ་བའི་དགོས་པ་དང་འབྲེལ་པ་དག་ཀྱང་བརྗོད་པ་ཡིན་ནོ། །དོན་གྱིས་བརྗོད་པ་དེ་ཡང་དག་གི་ཆའི་དབྱེ་བ་བརྟགས་པ་འབའ་ཞིག་གིས་སྟོན་ཏེ། དེ་ཞེས་བྱ་བས་ནི་བརྗོད་པར་བྱ་བ་བསྟན་ཏོ། །བསྟན་པ་ཞས་བྱ་བ་ནི་དགོས་བ་སྟེ། ངག་གཅིག་གིས་དོན་དུ་མ་རང་དབང་དུ་མ་རང་དབང་དུ་འཇོག་མི་ནུས་པའི་ཕྱིར་རོ། །ཕན་པ་ནི་འདོད་པ་སྒྲུབ་པར་བྱེད་པའོ། །དེ་ལས་བཟློག་པ་ནི་མི་ཕན་པ་སྟེ། འདོད་པ་སྒྲུབ་པར་བྱེད་པ་མ་ཡིན་པ་དང༌། མི་འདོད་པ་སྒྲུབ་པར་བྱེད་པའོ། །དེ་དག་ཉིད་བླང་བ་དང་སྤངས་བར་བྱ་བ་ཡིན་ལ། བཏང་སྙོམས་སུ་བྱ་བ་ཡང་དོར་བར་བྱ་བ་ཉིད་ཀྱིས་སྤང་བར་བྱ་བ་ཁོ་ན་ཡིན་པའི་ཕྱིར་མི་ཕན་པ་ཡིན་ཏེ། དེའི་ཕྱིར་འདི་དག་ལས་རྣམ་པ་གཞན་ཡོད་པ་མ་ཡིན་ནོ། །འདི་དག་ཉིད་དོན་དུ་གཉེར་བའི་སྐྱེས་བུས་སྤོང་བ་དང་བླང་བར་བྱ་བའི་ཕྱིར་སྐྱེས་བུའི་དོན་ཏེ། འདོད་པ་དང་མི་འདོད་པ་ཡང་ཡིན་ནོ། །འོན་ཀྱང་འཇིག་རྟེན་ན་གལ་ཏེ་འདོད་པ་སྒྲུབ་པར་བྱེད་པ་ལ་ཡང་མི་ཕན་པར་གྲགས་པ་དེ་ལྟ་ན་ཡང༌། འདིར་ནི་འདི་ལྟ་བུ་ཉིད་ལ་ཕན་པ་དང་མི་ཕན་པར་འདོད་དོ། །གང་གི་ཕྱིར་འབྲས་བུ་འདོད་པས་དེའི་སྒྲུབ་པར་བྱེད་པ་ལ་ཤེས་ནས་འཇུག་ལ། འབྲས་བུ་ཡང་འདོད་པ་ཉིད་ཡིན་ཏེ་འབྲས་བུའི་མཚན་ཉིད་ནི་འདོད་པ་ཡིན་ནོ་ཞེས་གང་འཆད་པར་འགྱུར་རོ། །སྒྲུབ་པར་བྱེད་པ་དེ་ཡང་
ངེས་པ་ཡིན་ཏེ། དེའི་ཕྱིར་སྒྲུབ་པར་བྱེད་པ་ལེན་པར་འདོད་པ་དོན་དུ་གཉེར་བས་སྒྲུབ་པར་བྱེད་པ་དང་སྒྲུབ་པར་བྱེད་པ་མ་ཡིན་པ་ཤེས་ནས་སྒྲུབ་པར་བྱེད་པ་ལེན་པ་དང༌། །སྒྲུབ་པར་བྱེད་པ་མ་ཡིན་པ་སྤོང་བ་ལ་འཇུག་གོ །དེའི་ཕྱིར་དོན་དུ་གཉེར་བ་རྣམས་ཀྱིས་སྤང་བ་དང་བླང་བའི་དོན་དུ་ཤེས་པ་སྔོན་དུ་འགྲོ་བའི་འཇུག་པ་དང་གང་ཡིན་པ་དེ་དག་ནི་ཤེས་པར་བྱས་ནས་སྤང་བ་དང་བླང་བའི་དངོས་པོ་ལ་འཇུག་པའི་ཕྱིར། འདིར་ནི་འདོད་པ་བསྒྲུབ་པར་བྱེད་པ་དང༌། །སྒྲུབ་པར་བྱེད་པ་མ་ཡིན་པ་ཙམ་ཞིག་ཕན་པ་དང་མི་ཕན་པ་ཡིན་ནོ། །དེས་ན་འདི་སྐད་དུ་སྒྲུབ་པར་བྱེད་པ་མ་ངེས་པས་འཛིན་པར་མི་འགྱུར་རོ་ཞེས་བྱ་བ་ལ་སོགས་པས་འདོད་པ་དང་མི་འདོད་པ། བདེ་བ་དང་སྡུག་བསྔལ་གྱི་སྒྲུབ་པར་བྱེད་པ་ཐོབ་པ་དང་སྤང་བར་བྱ་བ་ནི་ཡང་དག་པའི་ཤེས་པ་ལས་སོ་ཞེས་འཆད་པར་འགྱུར་རོ། །དེ་དག་ལས་ཐོབ་པ་ནི་ཕན་བ་ལེན་པའོ། །སྤོང་བ་ནི་མི་ཕན་པ་སྤོང་བའོ། །ཡང་དག་པའི་ཤེས་པ་སྔོན་དུ་འགྲོ་བ་ནི་རྒྱུ་ཡིན་པས་ཤེས་པ་འབྲས་བུའི་སྔོན་དུ་འགྲོ་བ་ཡིན་ནོ། །སྔོན་དུ་འགྲོ་བ་བརྗོད་པས་ནི་བསྟན་པར་འོས་པ་ཉིད་བརྗོད་དོ། །ཡང་དག་པའི་ཤེས་པ་ནི་གཉིས་ཏེ། གཅིག་ནི་འདོད་པ་ཐོབ་པའི་རང་བཞིན་དོན་བྱེད་པར་སྣང་བ་ཡིན་ལ། དེ་ཡང་དབྱེད་པར་བྱ་བ་མ་ཡིན་ཏེ། འདི་ལྟར་ཅུང་ཟད་རྣམ་པར་དཔྱོད་པ་ནི་འདི་ནི་སྤང་བར་བྱ་བའོ། །འདི་ནི་བླང་བར་བྱ་བའོ། །ཞེས་བསྟན་པའི་དོན་དུ་ཡིན་ན་དེ་ལྟ་བུ་ནི་ཐམས་ཅད་ཀྱང་དོན་དུ་གཉེར་བ་རྣམས་ཀྱིས་བླང་བར་བྱ་བ་ཁོ་ན་ཡིན་ནོ། །གཞན་ནི་སྒྲུབ་པར་བྱེད་པར་སྣང་བའོ། །གང་གི་ཡུལ་ལ་འཇུག་པར་འདོད་པ་སླུ་བར་དོགས་པ་རྣམས་ཀྱིས་དེ་ལ་ཚད་མའམ་ཚད་མ་ཡིན་པར་དཔྱད་པར་བྱ་བ་ཡིན་པའི་ཕྱིར། །བསྟན་བཅོས་ལས་བསྟན་པར་བྱ་བ་ཡིན་ནོ། །གང་གི་ཕྱིར་འཇུག་པར་བྱེད་པ་ཐམས་ཅད་ནི་བར་དུ་ཆོད་པའི་རྒྱུ་ཡིན་པས་གགས་བྱེད་པ་སྲིད་པ་ཡིན་ནོ།། དེ་བས་ན་འཇུག་པའི་ཡན་ལག་ཡིན་པའི་ཕྱིར། །སྔོན་དུ་འགྲོ་བ་ཙམ་ཡིན་གྱི་དེ་མ་ཐག་པའི་རྒྱུ་ནི་མ་ཡིན་ནོ་ཞེས་བརྗོད་པ་ཡིན་ནོ། །ཅི་ལྟར་སྦྱང་ན་གནས་པའི་ས་བོན་དེ་ནི་བུམ་པ་བཞིན་དུ་ཐམས་ཅད་དུ་མྱུ་གུའི་རྒྱུ་ཉིད་
མ་ཡིན་ནོ་ཞེས་ནུས་པ་མེད་པ་ཉིད་བཟློག་པ་དེ་བཞིན་དུ་ཡང་དག་པའི་ཤེས་པའི་ནི་ལོག་པའི་ཤེས་པ་བཞིན་དུ་དོན་ཐོབ་པའི་རྒྱུ་མ་ཡིན་པས་རྒྱུར་བརྗོད་པ་ཡིན་ནོ། །གལ་ཏེ་ཕན་པ་ཐོབ་པ་དང་སྤོང་བ་ནི་གཞན་ལ་སྐྱང་འགྱུར་བ་མ་ཡིན་ནམ། །ཡང་དག་པའི་ཤེས་པ་དེ་ལ་སུ་ཞིག་གུས་པར་བྱེད་ཅེས་དོགས་པ་ལས་གཞན་ལས་གཞན་ལས་ཐོབ་པ་དང་སྤོང་བ་དགག་པའི་ཕྱིར་ངེས་པར་ཞེས་གསུངས་ཏེ། ཡང་དག་པའི་ཤེས་པ་ཁོ་ན་ལས་འགྱུར་གྱི་གཞན་ལས་ནི་མ་ཡིན་ནོ། །དོན་ཐོབ་པར་བྱེད་པ་ནི་ངེས་པ་ཁོ་ན་སྟེ། །གཞན་ནི་མ་ཡིན་ལ། དོན་ཐོབ་པར་བྱེད་པའི་ངེས་པ་ཉིད་ཀྱང་ཡང་དག་པའི་ཤེས་པ་ཁོ་ན་ཡིན་ནོ། །ཐེ་ཚོམ་གྱི་ཤེས་པ་ཡང་ཡོད་དམ་མེད། བུམ་པའམ་སྣམ་བུ་ཞེས་གཉི་གའི་ཆ་ལ་དམིགས་པ་ཡིན་ལ། གང་ཞིག་ཐོབ་པར་བྱ་བ་གཉི་གའི་བདག་ཉིད་ཀྱི་དངོས་པོ་ཡང་ཡོད་པ་མ་ཡིན་ནོ། །ཁྱིམ་ན་འདུག་པ་ན་ཁྲོད་པ་ན་ཆུ་ཡོད་དོ་ཞེས་གཅིག་གི་ཆར་ཞེན་པར་བྱེད་ཀྱང༌། ངེས་པར་བྱེད་པའི་རྒྱུ་མེད་པས་ཆུ་མེད་པའི་དོགས་པ་མ་བཟློག་པའི་ཕྱིར་ཤེས་པ་དེ་ནི་ཐེ་ཚོམ་ཁོ་ནའོ། །གང་ཡང་རྒྱུ་མཚན་མེད་པར་མེའི་སྟེང་དུ་སྦྲང་བུའི་ཚོགས་འདུས་པ་ལ་དུ་བར་ངེས་པ་ལས་ཡང་དག་པའི་མེ་ངེས་པ་དེ་ཡང་ངོ༌། །སྦྲང་བུའི་ཚོགས་མཐོང་བ་ལྟ་ཞོག་སྟེ། བདེན་པའི་དུ་བ་མཐོང་ཡང་རྗེས་སུ་དཔག་པའི་དུས་ཀྱི་སྔ་རོལ་དུ་སྦྲང་བུའི་ཚོགས་ལ་སོགས་པ་ལས་ལོག་པའི་དུ་བའི་རང་བཞིན་ངེས་པ་མ་རྟོགས་ཤིང༌། ཅི་སྲིད་རྣམས་པར་མ་ཕྱེ་བ་དེ་སྲིད་དུ་མེའི་འབྲས་བུར་ཐེ་ཚོམ་ཟ་བའི་ཕྱིར། ཐེ་ཚོམ་དུ་གྱུར་པ་ཉིད་ཡིན་ནོ། །དུ་བའི་བྱེ་བྲག་གི་རང་བཞིན་ངེས་པ་རྣམ་པར་ཕྱིར་ཟིན་ཀྱང་དེའི་དུས་ན་མི་དྲན་པ་ཡིན་ཏེ། དྲན་ན་འཁྲུལ་པར་མི་རིགས་པའི་ཕྱིར་རོ། །མེའི་འབྲས་བུར་ངེས་པའི་རང་བཞིན་མི་དྲན་ན་ཡང་དགོས་པའི་རྒྱུ་མ་ལོག་པས་སེམས་དང་ལྡན་ན་ཅི་ལྟར་ཐེ་ཚོམ་ཟ་བར་མི་འགྱུར། དེའི་ཕྱིར་རང་བཞིན་ངེས་པ་གཏན་ལ་ཕེབས་པའི་དུ་བ་ཁོ་ན་ལས་མེ་རྟོགས་པར་འགྱུར་རོ། །གཞན་ལས་ནི་ཆ་གཅིག་གཏུ་གཟུང་ཡང༌། །ཐེ་ཚོམ་གྱི་རྒྱུ་མ་ལོག་པས་ཐེ་ཚོམ་ཉིད་ཡིན་ནོ། །དེས་ན་ཐོབ་པ་དང་སྤོང་བ་ནི་ཡང་དག་པའི་ཤེས་པ་ཁོ་ན་ལས་
ཡིན་ནོ། །ཚད་མའི་མཚན་ཉིད་ཡོད་ན་ཡང༌། རབ་ཏུ་འཇུག་པར་བྱེད་པའི་ཤེས་པ་ལ། དེ་ལས་བཤད་པའི་ཚད་མ་ནི་འདི་ཡིན་ནོ་ཞེས་བྱ་བར། དོན་བྱེད་པའི་ཤེས་པ་ལ་སོགས་པ་ཐ་སྙད་ཁོ་ན་ལས་ངེས་པར་བྱ་བ་མ་ཡིན་ནམ། དེ་ལྟར་ན་ཡང་མཚན་ཉིད་མེད་ཀྱང་ཐ་སྙད་ཁོ་ན་ལས་རྟོགས་པར་འགྱུར་བ་ཡིན་ཏེ། ཐ་སྙད་ལས་ནི་ཚད་མ་ཉིད་ཅེས་གང་བཤད་པ་ཡིན་ནོ། །ཐ་སྙད་ལས་མི་འགྲུབ་པ་དོན་དམ་པའི་ཚད་མ་ནི་བཤད་པར་བྱ་བའི་གཙོ་བོ་མ་ཡིན་ཏེ། འདི་ནི་ཀུན་དུ་ཐ་སྙད་བའི་ཆད་མའི་རང་བཞིན་བརྗོད་པ་ཡིན་ནོ་ཞེས་འཆད་པར་འགྱུར་བའི་ཕྱིར་རོ་ཞེས་དོགས་པ་ལ། མི་མཁས་པ་རྣམས་ལ་ཞེས་སྨོས་ཏེ། མི་མཁས་པ་དེ་དག་ནི་ཉམས་སུ་མྱོང་བའི་དོན་ལ་ཡང་གཞན་དུ་ཞེན་པར་མཐོང་སྟེ། ཇི་སྐད་དུ། ཁྱབ་པ་མེད་དང་ལྡོག་པ་དག །སྤོང་བའི་དོན་དུ་ཞེས་བཤད་པ་ལྟ་བུའོ། །བསྟན་བཅོས་ནི་དེ་དག་ལ་ཡིན་གྱི་མཁས་པ་ལ་མ་ཡིན་ཏེ། དེ་དག་ནི་ཐ་སྙད་ཁོ་ནས་ངེས་པའི་ཕྱིར་རོ། །དེ་ལྟ་ན་ཡང་མཚན་ཉིད་མི་ཤེས་པའི་ཤིང་རྟ་འདྲེན་པ་ཡང་བསྟན་བཅོས་ཤེས་པ་དང་མཚུངས་པར་དོན་བྱེད་པ་གྲུབ་པ་ཉམས་པ་མེད་པ་མ་ཡིན་ནམ། དེ་དག་ལ་ཡང་བསྟན་པས་ཅི་ཞིག་བྱ་ཞེ་ན། དོན་ཐོབ་པ་བྱེ་བྲག་མེད་པ་བདེན་ན་ཡང་མཐོང་བའི་ཚད་མ་ལ་རྨོངས་པས་མ་མཐོང་བ་ལ་ཡང་འཕེལ་བར་བྱེད་པ་དེ་བས་ན་བསྟན་བཅོས་ནི་རྨོངས་པ་བཟློག་པ་ཡིན་ནོ། །མཐོང་བ་ལ་ཡང་ཚད་མ་ལ་རྨོངས་པས་ཚད་མ་མ་ཡིན་པ་ལ་འཇུག་ན་བསླུས་པར་འགྱུར་བ་ཡིན་ཏེ་དཔེར་ན་འདི་ནི་སྔོ་བསངས་ཡིན་ཏེ། དེའི་བུ་ཡིན་པའི་ཕྱིར་ཞེས་བྱ་བ་ལྟ་བུ་སྟེ། དེས་ན་བསྟན་བཅོས་ནི་མཐོང་བའི་རྨོངས་པ་ཡང་ཟློག་པར་བྱེད་པ་ཡིན་ནོ། །དེ་ཞེས་བྱ་བ་ནི་ཡང་དག་པའི་ཤེས་པའོ། །བསྡུ་བའི་དོན་ལ་གཙོར་གྱུར་པ་མ་ཡིན་པས་གཟུང་བར་མི་ནུས་པ་དེ་ལྟར་ན་ཡང་བསྟན་བཅོས་ལ་གཙོ་བོ་ཡིན་པའི་ཕྱིར། བློ་གཞན་གྱིས་རང་དབང་དུ་རྟོགས་པས་འཛིན་པ་ཡིན་ཏེ། དཔེར་ན་འདི་གང་གི་ཁྱིམ་ཡིན་པ་དེ་ཁྲིད་དེ་ཤོག་ཅིག་ཅེས་བྱ་བ་ལྟ་བུའོ། །བསྟན་པའི་དོན་དེ་དགོས་པ་གང་ལ་ཡོད་པ་དེ་ནི་དེའི་དོན་ཏོ། །དེ་ཡང་གང་ཞེ་ན།
བྱེད་པ་པོ་ལ་ལྟོས་ནས་ནི་བྱེད་པར་རྩོམ་ལ། ཉན་པ་པོ་ལ་ལྟོས་ནས་ནི་ཉན་པར་རྩོམ་ཞེས་བྱ་བར་སྦྱར་རོ། །ཡང་དག་བའི་ཤེས་པ་ཁོང་དུ་ཆུད་པར་བྱ་བའི་ཕྱིར། བདག་གིས་ཡང་དག་པའི་ཤེས་པ་བསྟན་པར་བྱའོ་ཞེས་བསྟན་བཅོས་བྱེད་ལ། སློབ་མ་རྣམས་ཀྱིས་སློབ་དཔོན་གྱིས་བདག་ཅག་རྟོགས་པར་བྱ་བའི་ཕྱིར་རོ་ཞེས་དེས་བྱས་པའི་བསྟན་བཅོས་ཉན་པར་བྱེད་དེ། དེ་ལྟར་ན་ཡང་བྱེད་པ་པོ་བྱེད་པའི་དགོས་པ་དང༌། ཉན་པ་པོ་རྣམས་ཀྱི་ཉན་པའི་དགོས་པ་བཤད་པ་ཡིན་ནོ། །ཤེས་པ་ལ་གནས་པའི་དོན་གཞན་ལ་སྟོན་པར་འདོད་པས། གཞན་དུ་ན་དོན་དེ་ཕ་རོལ་ལ་བསྒྲུབ་པར་མི་ནུས་པའི་ཕྱིར་དེ་བསྙད་པར་བྱ་བ་མ་ཡིན་ནམ། དེ་ལྟར་ན་འདིར་མཚན་ཉིད་བྱེད་པ་ཉིད་སྟོན་པ་པོའི་བྱ་བ་ཡིན་ནོ། །དེའི་ཕྱིར་བསྟན་པ་ནི་བསྟན་བཅོས་བྱེད་པ་ཡིན་པ་དེས་ན་འདི་ཉིད་བྱ་བའི་དོན་དུ་འདི་བརྩམ་མོ་ཞེས་བྱ་བར་འགྱུར་ན། དེའང་རིགས་པ་མ་ཡིན་ཏེ། འདི་བྱེད་པ་དང་ཉན་པ་ནི་ཚད་མ་རྟོགས་པར་བྱ་བའི་ཕྱིར་ཡིན་གྱི། འདི་ཉིད་བྱེད་པའི་དོན་དུ་ནི་མ་ཡིན་ནོ་ཞེ་ན། སྒྲའི་བྱ་བ་གཙོར་བྱ་བ་ལ་ལྟོས་ན་ནི་སྐྱོན་འདི་ཡོད་པ་བདེན་ཏེ། གང་གི་ཕྱིར་སྒྲའི་བརྗོད་པར་བྱ་བའི་གཙོ་བོ་ནི་རྟོགས་པའི་ཡུལ་ཅན་གྱི་སྟོན་པ་པོའི་བྱ་བ་ཡིན་པ་དེས་ན་དེ་ལྟར་རྟོགས་པར་འགྱུར་རོ། །དོན་གཙོ་བོར་བྱས་ན་སྐྱོན་ཡོད་པ་མ་ཡིན་ཏེ། གང་གི་ཕྱིར་སྟོན་པ་པོའི་རྩོམ་པ་འདི་ཐམས་ཅད་ནི་བསྟན་པར་བྱ་བའི་དོན་དུ་ཡིན་ཏེ། འཚེད་པའི་སྒྲ་ལ་འཚེད་པའི་བྱ་བ་གཙོ་བོ་མ་ཡིན་ཞིང་ཚོས་པ་གཙོ་བོ་ཡིན་ནོ་ཞེས་བཤད་པ་ལྟ་བུའོ། །དེའི་ཕྱིར་འཆད་པའི་བྱ་བ་དང་ལྡན་པ་ལས་རྟོགས་པ་ཡོད་པ་ཡིན་ནོ་ཞེས་བརྗོད་པ་ཡིན་ནོ། །དེ་རྟོགས་པའི་དོན་དུ་ཞེས་བརྗོད་ན་ནི་ཟས་ལ་སོགས་པའི་གནས་སྐབས་ཀྱི་དེའི་དོན་གཞན་དང་ཐུན་མོང་བ་དེའི་དན་ཙམ་ཞེས་བརྗོད་པར་འགྱུར་རོ། །ད་ལྟར་ནི་དོན་འདི་ལྟར་རྟོགས་པར་འགྱུར་ཏེ། འདི་བྱས་པ་ལས་ན་སློབ་དཔོན་ནི་སྟོན་པ་པོ་ཡིན་ལ། ཉན་པར་བྱེད་པ་རྟོགས་པ་པོ་ནི་བསྟན་པར་བྱ་བ་ཡིན་ནོ། །དེ་ལྟར་འདི་བྱས་པ་དང་ཉན་པ་ནི་སྟོན་པ་པོའི་བྱ་བས་བྱིན་གྱིས་བརླབས་ནས་དོན་རྟོགས་པ་ཡིན་ཏེ། གཞན་དུ་ནི་མ་ཡིན་ནོ།།
དེའི་ཕྱིར་འདོམས་པར་བྱེད་པ་ནི་སྟོན་པ་པོ་ཡིན་ནོ་ཞེས་བྱ་བར་འགྱུར་རོ། །འདི་ཞེས་བྱ་བ་ནི་ནང་གི་དེ་ཁོ་ན་ཉིད་དུ་ཡོངས་སུ་རྫོགས་པ་དོན་གྱི་བདག་ཉིད་ཀྱི་བསྟན་བཅོས་གཟུང་ངོ༌། །དེ་ཉིད་ཀྱི་ཕྱིར་དགོས་པ་འདི་ནི་རྣམ་པར་ངེས་པ་ཁོ་ནའི་ཡིན་ཏེ། ཀུན་ལས་བཏུས་པའི་ནི་དངོས་སུ་མ་ཡིན་ནོ། །མདོ་དང་རྣམ་འགྲེལ་དག་དགོས་པ་གཅིག་པའི་ཕྱིར་དེའི་ཡང་དགོས་པ་འདི་ཡིན་པར་དོན་གྱིས་བརྗོད་པ་ཡིན་ནོ། །ཕྱི་རོལ་གྱི་དེ་ཁོ་ན་ཉིད་སྒྲའི་བདག་ཉིད་ཀྱིས་ནི་བྱེད་པར་རྩོམ་ལ། ཐམས་ཅད་ཀྱི་བདག་ཉིད་ཡོངས་སུ་རྫོགས་པ་ལས་ནི་ཉན་པར་རྩོམ་པ་ཡིན་ནོ། །བརྩམ་མོ་ཞེས་བྱ་བ་ནི་ད་ལྟར་གྱི་དུས་ཏེ། ཉན་པ་དང་འཆད་པར་རྩོམ་པ་ནི་ཡོངས་སུ་རྫོགས་པའི་བར་གྱི་ཡུལ་ལོ། །འདིར་ཡང་དེ་ཞེས་བྱ་བས་བརྗོད་པར་བྱ་བ་བསྟན་ཏེ། དེའི་ཕྱིར་བསྒྲུབ་པར་མི་ནུས་པར་དོགས་པ་སྤངས་སོ། །བསྟན་པ་ཞེས་བྱ་བ་ནི་དགོས་པ་སྟེ། དེའི་ཕྱིར་མངོན་པར་འདོད་པ་མ་ཡིན་པར་དོགས་པ་བསལ་ཏོ། །དེའི་དོན་དུ་འདི་བརྩམ་མོ་ཞེས་བྱ་བས་ཀྱང་སྒྲའི་བདག་ཉིད་ཀྱི་བསྟན་བཅོས་འདི་དང་དགོས་པ་ཐབས་དང་ཐབས་ལས་བྱུང་བའི་མཚན་ཉིད་ཀྱི་འབྲེལ་པ་བརྗོད་དེ། དེའི་ཕྱིར་ཐབས་གཞན་ཡོད་པར་དོགས་པ་བསལ་ཏེ། གལ་ཏེ་འདི་བས་ཀྱང་སླ་བའི་ཐབས་གཞན་ཡོད་ན་ནི་འདི་བརྩམ་པར་བྱ་བ་མ་ཡིན་པའི་ཕྱིར་རོ། །དེ་ལྟར་རྟོག་པ་དང་ལྡན་པར་འཇུག་པའི་ཡན་ལག་ཏུ་དོན་ཡོད་པར་ཐེ་ཚོམ་ཟ་བའི་རྒྱུར་བརྗོད་པར་བྱ་བ་ལ་སོགས་པ་བསྟན་ནས། ཡང་དག་པའི་ཤེས་པ་དེ་ནི་ཞེས་བྱ་བ་ལ་སོགས་པ་སྐབས་རྩོམ་པར་བྱེད་པ་ཡིན་ནོ། །ལོག་པར་རྟོགས་པ་བསལ་ནས་དེ་ཁོ་ན་ཉིད་བརྗོད་པ་བསྟན་པའོ། །ལོག་པར་རྟོགས་པ་ཡང༌། ཡང་དག་པའི་ཤེས་པའི་གྲངས་དང་མཚན་ཉིད་དང༌། སྤྱོད་ཡུལ་དང་འབྲས་བུའི་ཡུལ་ལོ། །དེ་ལ་རེ་ཞིག་གྲངས་ལ་ལོག་བར་རྟོགས་པ་བསལ་བ་ནི། དེ་ནི་རྣམ་པ་གཉིས་ཏེ་ཞེས་བྱ་བའོ། །གང་ཞིག་ཐོབ་པ་དང་སྤངས་པའི་རྒྱུ་མཚན་རྣམ་པར་དཔྱད་པའི་སྐབས་ཀྱི། འཇུག་པར་བྱེད་པའི་ཡང་དག་པའི་ཤེས་པ་དེ་རྣམ་པ་གཉིས་ཡིན་གྱི། དོན་བྱེད་པར་སྣང་བ་ནི་
མ་ཡིན་ཏེ། དེ་ནི་མངོན་སུམ་ཙམ་དུ་ཟད་པའི་ཕྱིར་རོ་ཞེས་བསྟན་པའི་དོན་དུ་དེ་ཞེས་སྨོས་སོ། །རྣམ་པ་གཉིས་ནི་འདིའི་དབྱེ་བའོ། །གལ་ཏེ་མངོན་སུམ་དང་ནི་རྗེས་སུ་དཔག །ཅེས་བརྗོད་པས་རྣམ་པ་གཉིས་འཐོབ་པ་དེ་ལྟར་ན་ཡང༌། འཇིག་རྟེན་ན་དོན་རྟོགས་པ་ལ་ཡང་གྲངས་ཀྱི་ཚིག་སྦྱོར་ཏེ། དཔེར་ན་སྣམ་ཁུར་དག་ནི་གཉིས་སོ་ཞེས་བྱ་བ་བཞིན་ནོ། །རྣམ་པ་གཉིས་ཞེས་བྱ་བའི་སྒྲ་ཡང་གྲངས་ཀྱི་དོན་དུ་ཡིན་ནོ། །ཡང་ན་ནི་ངེས་པར་བྱ་བའི་དོན་ཏེ། རྣམ་པ་འདི་གཉིས་ཁོ་ན་ཡང་དག་པའི་ཤེས་པ་ཡིན་ཏེ། འདིར་ནི་རེ་ཞིག་འདི་ཙམ་ཞིག་བརྗོད་པར་ཟད་ཀྱི། གཞན་ཡང་ཡོད་པ་ཉིད་དོ་ཞེས་དོགས་པར་མི་བྱའོ། །ཡང་དག་པའི་ཤེས་པའི་མཚན་ཉིད་ཁོ་ན་བྱེ་བྲག་ཏུ་བསྟན་པར་བྱ་བ་མ་ཡིན་ནམ། དེའི་གྲངས་ཀྱིས་ཅི་ཞིག་བྱ་ཞེ་ན། བདེན་ཏེ་མཚན་ཉིད་དེ་ཉིད་ནི་གསལ་བ་ཐ་དད་པའི་མཐར་ཐུག་པས། གསལ་བའི་དབྱེ་བས་མ་བསྟན་ན་མཚན་ཉིད་ཁྱད་པར་དུ་བསྟན་པར་མི་ནུས་ཏེ། དེའི་ཕྱིར་མཚན་ཉིད་བསྟན་པའི་ཡན་ལག་ཡིན་པས་གྲངས་ཀྱི་སྒོ་ནས་རྣམ་པའི་རབ་ཏུ་དབྱེ་བ་བརྗོད་དོ། །མཚན་ཉིད་ཀྱི་ཡན་ལག་ཡིན་པ་ཉིད་ཀྱིས་གྲངས་དང་པོར་བསྟན་ཏོ། །མི་འདོད་པ་བཟློག་པའི་དོན་དུ་མངོན་པར་འདོད་པ་རྣམ་པ་གཉིས་སྟོན་ཏེ། དབང་པོ་ལ་བརྟེན་པའི་དོན་ནི་མངོན་སུམ་མོ། །དབང་པོ་ལ་བརྟེན་པ་ཉིད་ནི་སྒྲ་བཤད་པའི་རྒྱུ་མཚན་ཡིན་ཏེ། སྒྲ་འཇུག་པའི་རྒྱུ་མཚན་ནི་དོན་གྱི་རང་བཞིན་མངོན་སུམ་དུ་བྱེད་པ་ཉིད་ཡིན་ཏེ། དོན་མངོན་སུམ་དུ་བྱེད་པའི་ཤེས་པ་ཉིད་ནི་མངོན་སུམ་དུ་གྲགས་པ་ཡིན་ནོ། །དེ་ནི་ཤེས་པའི་གསལ་བ་གཅིག་ལ་འདུ་བའི་ཕྱིར་དབང་པོ་ལ་བརྟེན་པ་ཉིད་དེས་མཚོན་ནས་འཇུག་པའི་རྒྱུ་མཚན་དུ་ཤེས་པར་བྱེད་དེ། དེའི་ཕྱིར་མངོན་སུམ་བཞི་ཀ་ལ་ཡང་མངོན་སུམ་གྱི་ཐ་སྙད་དུ་གྲུབ་བོ། །དཔེར་ན་འགྲོ་བའི་ཕྱིར་བ་ལང་ངོ་ཞེས་བྱ་བ་ལ། དོན་གཅིག་ལ་འདུ་བའི་འགྲོ་བའི་བྱ་བས་བ་ལང་ཉིད་མཚོན་པས་འཇུག་པའི་རྒྱུ་མཚན་དུ་ཤེས་པར་བྱེད་དེ། དེས་ན་འགྲོ་བས་སྟོང་བའི་གོང་བུ་ལ་ཡང་དེའི་རྒྱུ་མཚན་གྱིས་བ་ལང་གི་སྒྲར་གྲུབ་པ་བཞིན་ནོ། །གང་
གིས་རྟགས་གཟུང་ཞིང་འབྲེལ་བ་དྲན་པའི་རྗེས་ལ་དཔོག་པ་དེ་ནི་རྗེས་སུ་དཔག་པའོ། །དང་ཞེས་བྱ་བ་ནི་སྟོབས་མཚུངས་པ་ཉིད་དེ། ཡང་དག་པའི་ཤེས་པ་ཉིད་ཀྱིས་རྗེས་སུ་དཔག་བསྡུད་པའོ། །གང་གི་ཚེ་རྣམ་པ་གཉིས་ཞེས་བྱ་བའི་སྒྲ་ངེས་པར་བྱ་བའི་དོན་ཡིན་པ་དེའི་ཚེ་ཞེས་བྱའོ་ཞེས་བྱ་བའི་སྒྲ་དེ་ལྟར་གྱི་དོན་ཏེ། དེ་ནི་དེ་ལྟར་རྣམ་པ་གཉིས་ཡིན་ཏེ། སྒྲ་དང་ཉེ་བར་འཇལ་བ་ལ་སོགས་པའི་སྒོ་ནས་ནི་མ་ཡིན་ནོ། །ཅི་སྟེ་འཇིག་རྟེན་གྱི་དོན་རྟོགས་པ་ལ་གྲངས་ཀྱི་ཚིག་ཉིད་ཡིན་པ་དེའི་ཚེ་ཞེས་བྱའོ། །ཡོངས་སུ་རྫོགས་པའི་ཚིག་སྟེ། ཡང་དག་པའི་ཤེས་པ་ནི་འདི་གཉིས་ཁོ་ནར་ཟད་ཀྱི་གཞན་ནི་མེད་དོ་ཞེས་བྱ་བའོ། །གལ་ཏེ་དངོས་པོའི་དེ་ཁོ་ན་འཛིན་པ་ཉིད་ཡང་དག་པའི་ཤེས་པ་ཉིད་ཡིན་ནམ། འོན་ཏེ་གཟུང་བའི་དངོས་པོ་ཐོབ་པར་བྱེད་པ་ཡིན། གཉི་ག་ལྟར་ཡང་རྗེས་སུ་དཔག་པ་དངོས་པོ་མི་འཛིན་པའི་ཕྱིར་ཡང་དག་པའི་ཤེས་པ་མ་ཡིན་པར་འགྱུར་རོ། །མ་བཟུང་བ་ཐོབ་པར་བྱེད་པ་ཉིད་ཀྱང་ཡང་དག་པའི་ཤེས་པ་ཡིན་ན་ནི། ཆུའི་ཤེས་པ་ལས་ཀྱང་མ་བཟུང་བའི་སྨིག་རྒྱུ་ཐོབ་པས་འགའ་ཡང་ཡང་དག་པའི་ཤེས་པ་མ་ཡིན་པར་མི་འགྱུར་རོ་ཞེས་དོགས་པ་ལ། འདོད་པའི་ཡང་དག་པའི་ཤེས་པ་ཉིད་བསྟན་པའི་ཕྱིར་འདི་དག་གིས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་འདི་དག་གིས་སླུ་བ་མེད་དེ། དགག་པ་གཉིས་ཀྱིས་མི་སླུ་བ་ཞེས་བྱ་བའི་དོན་ཏོ། །དེའི་ཕྱིར་འདི་དག་ནི་ཡང་དག་པའི་ཤེས་པ་སྟེ། མི་སླུ་བར་བྱེད་པ་ཉིད་ཡང་དག་པའི་ཤེས་པ་ཡིན་ནོ། །ཇི་ལྟར་འཇིག་རྟེན་ན་ཁས་བླངས་པའི་དོན་དང་ཕྲད་པར་བྱེད་པ་མི་སླུ་བ་ཡིན་པ་དེ་བཞིན་དུ་ཤེས་པ་ཡང་བསྟན་པའི་དོན་དང་ཕྲད་པར་བྱེད་པས་མི་སླུ་བར་བལྟ་བར་བྱའོ། །དེའི་དོན་ནི་འདི་ཡིན་ཏེ། དངོས་པོ་འཛིན་པར་བྱེད་པས་ནི་ཡང་དག་པའི་ཤེས་པ་ཉིད་མ་ཡིན་གྱི་འོན་ཀྱང་དངོས་པོ་ཐོབ་པར་བྱེད་པ་ཉིད་ཡིན་ནོ། །དེ་གང་ལས་ཤེ་ན། དོན་བྱ་བ་ལ་ཞེས་གསུངས་ཏེ། དེ་ལ་དོན་ནི་གཙོ་བོ་ལ་སོགས་པ་བསྒྲུབ་པར་བྱ་བའོ། །དེའི་བྱ་བ་ནི་བྱེད་པ་སྟེ། སྒྲུབ་པར་བྱེད་པའི་བྱ་བའོ། །འདིར་
བྱེད་པ་པོ་ཉིད་ལ་བརྗོད་དོ། །དེས་ན་དོན་འདི་ཡིན་ཏེ། བསྒྲུབ་བྱ་སྒྲུབ་པའི་ནུས་པའི་ཡུལ་ལ་མི་སླུ་བ་དེ་ནི་དེ་ལ་ལྟོས་ནས་ཐོབ་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །གང་གི་ཕྱིར་རྟོག་པ་དང་ལྡན་པ་དོན་དུ་གཉེར་བ་རྣམས་ཀྱིས། ཡང་དག་པའི་ཤེས་པ་ཅི་འདྲ་བ་ཞིག་དོན་དུ་གཉེར་བ་དེ་འདྲ་བ་ཉིད་ཁོ་བོ་ཅག་གིས་ཀྱང་བརྟག་པར་བྱ་བ་ཉིད་ཡིན་ལ། དེ་དག་ཀྱང་དོན་བྱེད་པ་བསྒྲུབ་པ་ལ་འཇུག་པ་ན། དེ་ཐོབ་པར་རུང་བ་འཇུག་པར་བྱེད་པའི་ཤེས་པ་ཉིད་ཚོལ་གྱི་དངོས་པོ་འཛིན་པ་ཙམ་ནི་མ་ཡིན་ཏེ། དོན་བྱེད་པ་སྒྲུབ་པར་བྱེད་པ་མ་ཡིན་པའི་ཕྱིར་དང། དེ་ཐོབ་པ་ཡང་མ་ཡིན་ལ། དེ་ཐོབ་པའི་ཐབས་ཀྱང་མ་ཡིན་པའི་ཕྱིར་དང༌། རྣམ་པར་རྟོག་པ་རྗེས་སུ་དཔག་པ་ལས་ཀྱང་ཐོབ་པ་ཡོད་པའི་ཕྱིར་རོ། །དོན་བྱེད་པ་ཐོབ་པའི་རང་བཞིན་དོན་བྱེད་པར་སྣང་བའི་ཤེས་པ་གང་ཡིན་པ་དེ་ཡང་དོན་བྱས་ཟིན་པ་ཉིད་ཀྱིས་རྟོག་པ་དང་ལྡན་པ་དོན་དུ་གཉེར་བ་རྣམས་ཀྱིས་བརྟག་པར་བྱ་བ་མ་ཡིན་པའི་ཕྱིར་བསྟན་བཅོས་ལས་ཀྱང་ཞར་ཙམ་དུ་དཔྱོད་པ་ཡིན་གྱི་དེའི་དོན་དུ་ནི་བསྟན་བཅོས་མ་ཡིན་ནོ། །དེའི་ཕྱིར་དངོས་པོ་འཛིན་པ་ཉིད་ནི་ཡང་དག་པའི་ཤེས་པ་མ་ཡིན་ཏེ། འོན་ཀྱང་དེ་ཐོབ་པར་བྱེད་པ་ཡིན་ནོ། །གལ་ཏེ་དེ་ལྟར་ན་ཡང་མངོན་སུམ་གྱིས་གཟུང་བའི་དོན་ནི་ཐོབ་པར་རུང་བ་མ་ཡིན་ཏེ། སྐད་ཅིག་མ་ཉིད་ཡི་པའི་ཕྱིར་རོ། །རྗེས་སུ་དཔག་པས་གཟུང་བ་ཡང་མ་ཡིན་ཏེ། དངོས་པོ་མེད་པའི་ཕྱིར་རོ། །འདི་ལྟར་རྣམ་པར་རྟོག་པ་ནི་རང་གི་སྣང་བ་དོན་མེད་པ་ལ་དོན་དུ་ཞེ་ན་ཡིན་ལ། རྣམ་པ་རྟོག་པ་རྣམས་ཀྱི་ཡུལ་ཡང་ཞེན་པར་བྱས་པ་ཉིད་ཡིན་ཏེ། རྣམ་འགྲེལ་ལས། ངེས་པ་རྣམས་ཀྱིས་མ་ངེས་གང༌། །དེ་ནི་ཇི་ལྟར་དེ་དག་ཡུལ། །ཞེས་གང་བཤད་པ་ཡིན་ནོ། །སྒྲོ་བཏགས་པ་ཡང་ཕྱི་རོལ་གྱི་དངོས་པོར་ཡོད་པ་མ་ཡིན་ཏེ། དེའི་ཕྱིར་ཚད་མ་གཉིས་ཀྱིས་དོན་བྱེད་པ་གང་ཞིག་ཐོབ་པར་བྱེད་ཅེ་ན། འཇུག་པ་ན་ཞེས་གསུངས་སོ། །ཚད་མའི་ཡུལ་ནི་རྣམ་པ་གཉིས་ཏེ། གཟུང་བ་སྟེ་སོ་སོར་སྣང་བའི་དོན་དམ་པའམ། སྒྲོ་བཏགས་པ་དང་ཞེན་པའི་ཡུལ་ལོ། །དེ་དག་ལས་ཤེས་
བས་གང་ལ་འཇུག་པའི་ཡུལ་དེ་ལ། ཐོབ་པས་མི་སླུ་བ་ཡིན་གྱི་གཟུང་བ་ལ་ནི་མ་ཡིན་ནོ། །གཉི་གས་ཀྱང་དངོས་པོ་ཉིད་ལ་འཇུག་པར་བྱེད་དེ། རྣམ་པར་རྟོག་པ་དེ་ལས་ནི་དངོས་པོ་ཉིད་ལ་འཇུག་གོ་ཞེས་གང་བཤད་པ་ཡིན་ནོ། །དེའི་ཕྱིར་འཇུག་པའི་ཡུལ་གྱི་དངོས་པོ་ཐོབ་པར་གཉི་ག་ཁྱད་པར་མེད་པ་ཡིན་ཏེ། ཚད་མ་གཉི་ག་དངོས་པོའི་ཡུལ་ཅན་ཞེས་འཆད་པར་འགྱུར་རོ། །མ་བཟུང་བ་འཇུག་པའི་ཡུལ་ཡིན་ན་ཧ་ཅང་ཐལ་བར་འགྱུར་རོ་ཞེས་བརྗོད་པ་སྤང་བའི་ཕྱིར། དོན་ཡོངས་སུ་བཅད་ནས་ཞེས་གསུངས་ཏེ། འདིས་སྔར་ཡོངས་སུ་བཅད་པ་ལ་ལྟོས་ནས་འཇུག་པའི་ཕྱིར། ངེས་པ་དང་འཇུག་པ་དག་རྒྱུ་དང་འབྲས་བུ་ཉིད་དུ་བསྟན་ཏོ། །དེས་ན་དོན་ཡོངས་སུ་གཅོད་པར་བྱེད་པའི་ཤེས་པ་ཉིད་ལ་འཇུག་པར་བྱེད་པར་བརྗོད་དོ། །གལ་ཏེ་ཡོངས་སུ་བཅད་པའི་དོན་ཉིད་འཇུག་པའི་ཡུལ་ཡིན་གྱི་གང་ཡང་རུང་བ་མ་ཡིན་པ་དེ་ལྟར་ན་དེ་རིགས་པ་ཡིན་ཏེ། དེའི་ཕྱིར་ཡོངས་སུ་བཅད་པ་ནི་འཇུག་པའི་ཡུལ་ཡིན་ལ། ཡོངས་སུ་གཅོད་པར་བྱེད་པ་ནི་འཇུག་པར་བྱེད་པ་ཉིད་ཡིན་ནོ་ཞེས་བསྟན་པར་འགྱུར་རོ། །གང་གི་ཕྱིར་ཤེས་པས་སྐྱེས་བུ་ལ་གནས་བཟུང་སྟེ། འགའ་ཞིག་ཏུ་འཇུག་པར་བྱེད་པ་ནི་མ་ཡིན་གྱི། འོན་ཀྱང་འཇུག་པའི་ཡུལ་སྟོན་པར་བྱེད་པ་ཡིན་ནོ། །དེའི་ཕྱིར་ཡོངས་སུ་གཅོད་པར་བྱེད་པ་ཉིད་འཇུག་པར་བྱེད་པ་ཡིན་པར་རིགས་སོ། །ཡོངས་སུ་གཅོད་པ་ཙམ་འཇུག་པར་བྱེད་པ་ཡིན་པ་ན་ཡང༌། གང་གིས་དང་པོ་འཇུག་པའི་ཡུལ་བསྟན་པ་དེ་ཉིད་ཀྱིས་གཞན་ལ་ལྟོས་པ་མེད་པར་སྐྱེས་བུ་བཅུག་པའི་ཕྱིར་རྟོགས་པའི་དོན་ལ་ཚད་མ་ཡོད་པ་མ་ཡིན་ནོ། །གལ་ཏེ་ཁོང་དུ་ཆུད་པ་ལས་འཇུག་པར་བྱེད་པ་ཉིད་གཞན་ཡིན་ན་ནི་གཞན་གྱིས་ཁོང་དུ་ཆུད་པ་ལ་ཡང་འཇུག་པར་བྱེད་པ་གཞན་ཚད་མ་ཉིད་དུ་འགྱུར་བ་ཡིན་ནོ། །ཐོབ་པར་བྱེད་པ་ཉིད་ནི་འཇུག་པར་བྱེད་པ་ལས་གཞན་མ་ཡིན་ཏེ། གང་གི་ཕྱིར་ཐོབ་པར་བྱེད་པའི་ཤེས་པས་དོན་གྱི་ཡུལ་དུ་སྐྱེས་བུ་གཏོང་བར་བྱེད་པའམ། སྐྱེས་བུའི་ཡུལ་དུ་དོན་འགུགས་པ་ནི་མ་ཡིན་ཏེ། འོན་ཀྱང་སྐྱེས་བུ་འཇུག་པར་བྱེད་
པ་ཡིན་ནོ། །གང་གི་ཕྱིར་ཤེས་པ་ལ་འཇུག་པར་བྱེད་པ་ལས་ཐོབ་པར་བྱེད་པའི་བྱ་བ་གཞན་མེད་ལ། འཇུག་པ་ཡང་ཁོང་དུ་ཆུད་པ་ལས་གཞན་མ་ཡིན་ཏེ། དེའི་ཕྱིར་ཚད་མ་ཐམས་ཅད་ནི་མ་རྟོགས་པའི་དོན་ཅན་ཁོ་ན་ཡིན་ནོ། །དེ་ཉིད་ཀྱི་ཕྱིར་དང་པོའི་མངོན་སུམ་དང་རྗེས་སུ་དཔག་པའི་སྐད་ཅིག་མ་ཉིད་ཀྱིས་དོན་བྱེད་པར་ནུས་པའི་དངོས་པོའི་རྒྱུ་ན་ངེས་པས་འཇུག་པའི་ཡུལ་དུ་བྱེད་པར་ནུས་པའི་ཕྱིར། དེའི་རྒྱུན་དུ་གྱུར་པ་གྲུབ་པ་དང་བདེ་བ་ཐ་མི་དད་བ་ཕྱི་མ་རྣམས་ཚད་མ་ཡིན་པས་སྤངས་པ་ཡིན་ནོ། །ཡོངས་སུ་བཅད་པའི་དོན་འདུག་པའི་ཡུལ་ཐོབ་པར་བྱེད་པ་ནི་ཚད་མ་ཡིན་ནོ་ཞེས་སྨྲས་པ་ན། དུང་ལ་སེར་པོར་ཤེས་པ་དང༌། ནོར་བུའི་འོད་ལ་ནོར་བུར་ཤེས་པ་དང༌། ཤེས་པའི་རྣམ་པ་དེ་ལྟ་བུ་གཞན་དག་ཀྱང་ཚད་མ་མ་ཡིན་པར་བརྗོད་པ་ཡིན་ནོ། །དེ་ངེས་པས་གཞན་ངེས་སོ་ཞེས་བྱ་བ་ནི་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །ཡུལ་དང་དུས་དང་རྣམ་པ་ཐ་དད་པ་ཡང་གཞན་ཁོ་ནའོ། །དེ་དག་ཀྱང་ཐ་དད་པར་བྱེད་པ་ཡིན་པའི་ཕྱིར་ཏེ། གཞན་དུ་ན་ཐ་དད་པ་མེད་པར་ཐལ་བའི་ཕྱིར་རོ། །དཀར་པོ་ཡང་སེར་པོ་ལས་ཐ་དད་པ་ཡིན་ནོ། །རྗེས་སུ་འགྲོ་བ་དང་ལྡོག་པ་དག་ལས་དོན་བྱེད་པར་ནུས་པ་ཡང་སྔོན་པོ་ལ་སོགས་པའི་ཁྱད་པར་ཁོ་ན་ཡིན་པར་མཐོང་ངོ༌། །ལྡོག་པའི་རྒྱུ་མཚན་གྱིས་ངོ་བོ་ཉིད་དེ་ཉིད་དེ་ཉིད་ནི་སྤྱིའི་ཆོས་སུ་གནས་པ་ཡིན་ལ། དོན་བྱེད་པའི་རྒྱུ་མཚན་གྱི་ཕྱིར་ནི་ཡོད་པ་ཉིད་ཡིན་ཏེ། གཞན་དུ་ན་དོན་བྱེད་པ་མི་སྲིད་པའི་ཕྱིར་རོ། །དེ་གཟུང་བ་ན་གཟུང་བར་གྱུར་པ་འཁྲུལ་པས་མ་ངེས་པ་ནི་ཚད་མ་གཞན་གྱིས་ངེས་པར་བྱེད་པ་ཡིན་ཏེ། དཔེར་ན་དངོས་པོའི་སྐད་ཅིག་མ་ཉིད་ལ་སོགས་པ་བཞིན་ནོ། །མང་པོ་རྣམས་ཤེས་པ་གཅིག་ལ་སྣང་བ་ན་རིང་པོ་ལ་སོགས་པའི་དབྱིབས་ཚོགས་པའི་ཡུལ་ལ་རྣམ་པར་གནས་པ་ནི་སོ་སོར་སྣང་བའི་ཆོས་ཡིན་གྱི་དངོས་པོའི་ཆོས་མ་ཡིན་པའི་ཕྱིར་དཀར་པོ་མ་བཟུང་ན་དེའི་ཆོས་སམ་གཞན་གྱི་ཆོས་ཀྱི་དབྱིབས་མ་བཟུང་བས་ན་སླུ་བ་ཡིན་པའི་ཕྱིར་སེར་པོར་ཤེས་པ་ནི་ཚད་མ་མ་ཡིན་ནོ། །དོན་ཐོབ་པ་ནི་འཇུག་པ་གཞན་ལས་ཡིན་པར་སྨྲའོ། །འཇུག་པར་བྱེད་
པའི་ཤེས་པས་ཉེ་བར་བསྟན་པའི་དོན་ཐོབ་པར་འདོད་པའི་བྱ་བ་དང་ལྷན་ཅིག་པའི་བློ་ནི་འཇུག་པ་ཡིན་ལ། དེ་ནི་ཡོད་དམ་མེད་ཀྱང་རུང་སྟེ་ངེས་པར་བྱས་པའི་དངོས་པོ་དེ་ཉིད་ལ་མཐར་ཐུག་པའི་ཕྱིར་སྔོན་པོའི་ཤེས་པ་ནི་སྔོན་དུ་འགྲོ་བའི་འཇུག་པ་ནི་རྣམ་པ་གཞན་ཐོབ་པའི་རྒྱུ་མཚན་མ་ཡིན་ནོ། །འཐོབ་པ་ནི་ཤེས་པ་གཞན་ཁོ་ན་ལས་ཡིན་ཏེ། ཐ་ན་རེག་བྱ་འཛིན་པར་བྱེད་པའོ། །ངེས་པ་འཐོབ་པ་ནི་ངེས་པའི་ཡུལ་ལ་འཁྲུལ་པ་ཡིན་པའི་ཕྱིར་ཏེ། དཔེར་ན་ཆུའི་ཤེས་པ་ལས་སྨིག་རྒྱུའི་ཤེས་པ་ཡིན་ཞིང༌། དེས་ན་དེ་ཉིད་ངེས་པར་འཐོབ་པ་བཞིན་ནོ། །དེ་བཞིན་དུ་ཡུལ་ཐ་དད་པའི་ནོར་བུ་ཐོབ་པ་ནི་འཇུག་པ་གཞན་ཁོ་ན་ལས་ཡིན་པར་ཤེས་པར་བྱའོ། །འདི་རྒྱས་པར་ནི་ཚད་མ་བརྟག་པར་བལྟ་བར་བྱའོ། །དེ་ལྟར་ན་ཡོངས་སུ་བཅད་པའི་འཇུག་པའི་ཡུལ་ཐོབ་པར་བྱེད་པས་ཡང་དག་པའི་ཤེས་པ་ཉིད་དུ་འདི་གཉི་ག་བྱེ་བྲག་མེད་དོ། །དེ་ལྟར་ན་ནི་ཅི་ཞིག་ལྟར་འཇུག་པའི་ཡུལ་ཐོབ་པར་མི་བྱེད་པ་གང་ཡིན་པ་དེ་ཚད་མ་ཡིན་པར་འགྱུར་ན། དེ་ཡང་རིགས་པ་མ་ཡིན་པས་གང་གི་ཕྱིར་ཚད་མའི་བྱ་བ་ནི་འཇུག་པའི་ཡུལ་སྟོན་པ་ཙམ་ཡིན་ནོ་ཞེ་ན། བདེན་ཏེ་ངོ་བོ་མ་ཡིན་པའི་ཕྱིར་གཅིག་ཏུ་དོན་ཐོབ་པའི་རང་བཞིན་གྱི་ཤེས་པ་ཕྱི་མ་ནི་སྔ་མའི་ཡང་དག་པའི་ཤེས་པ་ཉིད་མ་ཡིན་ཏེ། འོན་ཀྱང་ཐོབ་པར་ནུས་པ་ཉིད་དོ། །དེའང་ཐོབ་པར་བྱ་བའི་དོན་ལས་བདག་ཉིད་ཐོབ་པའི་རྒྱུ་མཚན་གྱིས་ཡིན་པའི་ཕྱིར་འཇུག་པར་བྱེད་པ་མ་ཡིན་པ་གང་ཡིན་པ་དེ་ལ་ཡང་དོན་ཐོབ་པར་རུང་བ་ཡོད་བས་ན་དེ་ལའང་ཚད་མ་ཁོ་ནའོ། །ནུས་པ་ངེས་པ་ཡང་རྗེས་སུ་དཔག་པ་དང་དོན་བྱེད་པར་སྣང་བའི་མངོན་སུམ་ནི་རང་ཁོ་ན་ལས་འགྱུར་རོ། །འཇུག་པར་བྱེད་པའི་མངོན་སུམ་ཡང་ལ་ལ་ནི་རང་ཁོ་ན་ལས་ཏེ། འཁྲུལ་པའི་དོགས་པ་མཐའ་དག་བསལ་ནས་རང་བཞིན་གྱི་ཁྱད་པར་ཁོང་དུ་ཆུད་པ་གང་ཡིན་པའོ། །འདི་ལྟར་སྒྲོན་མས་གསལ་བར་བྱས་པ་ན་སྔོན་པོ་ཡང་དམར་པོ་ཉིད་དང༌། མིག་སེར་གྱིས་ཉམས་པས་དཀར་པོ་ཡང་སེར་པོ་དང༌། ཐག་རིང་པོ་ནས་ཆུང་དུ་ཡང་ཆེན་པོ་དང༌། གཉིད་ཀྱིས་ཐམས་ཅད་ཀྱང་ཕྱིན་ཅི་ལོག་ཏུ་
མཐོང་སྟེ། དེའི་ཕྱིར་གང་ཞིག་རྨི་ལམ་ལ་སོགས་པས་ཤེས་པ་མ་བསྙད་པ་དང༌། ཡུལ་ཉེ་བ་དང༌། གསལ་བྱེད་མི་མཐུན་པ་མ་ཡིན་པས་དངོས་པོ་གཟུང་བ་ནི་དེའི་རང་བཞིན་མྱོང་བ་ཉིད་ཀྱིས་དོན་བདེན་པར་ངེས་པར་འགྱུར་ཏེ། དེ་ལྟ་བུར་གྱུར་བ་ནི་འཁྲུལ་པ་མེད་པར་ལན་ཅིག་མ་ཡིན་པར་མཐོང་ནས་ཐ་སྙད་གོམས་པ་ལ་མཚོན་པའི་ཕྱིར་རོ། །དེས་ན་རང་གི་ངོ་བོ་ལས་དོན་མེད་ན་མི་འབྱུང་བར་གྲུབ་པའོ། །སྔ་མའི་རང་བཞིན་དང་ཆོས་མཐུན་པ་ལས་དེ་ལྟར་རྟོགས་པ་རྗེས་སུ་དཔག་པ་ནི་མ་ཡིན་ཏེ། དོན་ལྐོག་ཏུ་མ་གྱུར་པའི་ཕྱིར། ནོར་བུ་དང་དངུལ་ལ་སོགས་པའི་གཟུགས་རྟོགས་པ་བཞིན་ནོ། །དེ་བཞིན་དུ་མེ་དང་འབྲེལ་པ་ཤེས་པའི་མེ་མ་མཐོང་བར་དུ་བ་ལ་མེའི་འབྲས་བུར་རྟོགས་པ་ཡང་རྗེས་སུ་དཔག་པ་མ་ཡིན་ནོ། །གང་ཡང་རྗེས་སུ་དཔག་པར་བྱ་བ་ལས་མ་འདས་སོ་ཞེས་བྱ་བ་དེ་ནི་རང་དང་གཞན་གྱི་རྒྱུད་ལ་ཡོད་པ་ཉམས་སུ་མྱོང་བ་མ་ཡིན་པའི་བློའི་དབང་དུ་བྱས་ནས་བརྗོད་པ་ཡིན་ཏེ། ཡུལ་ཉམས་སུ་མྱོང་བ་ལས་མ་རྟོགས་པ་ཞེས་གསུངས་པའི་ཕྱིར་རོ། །གང་ཡང་རྣམ་འགྲེལ་ལས། རྣམ་པ་མཚུངས་པ་ལས་ཐེ་ཚོམ་དུ་འགྱུར་རོ་ཞེས་བརྗོད་པ་དེ་ནི་དོགས་པར་འགྱུར་བའི་ཡུལ་གྱི་ཤེས་པའི་དབང་དུ་བྱས་ནས་བཤད་པ་ཡིན་གྱི་ཐམས་ཅད་ལ་ནི་མ་ཡིན་ནོ། །ལ་ལ་ནི་དོན་མེད་ན་མི་འབྱུང་བ་གཞན་ལས་ངེས་པར་བྱེད་དོ། །གང་གིས་ན་མེད་ན་མི་འབྱུང་བར་ཐེ་ཚོམ་ཟ་བ། དོན་མི་ངེས་པའི་ཕྱིར་ཚད་མ་མ་ཡིན་པར་འགྱུར་བ། ཇི་ལྟར་རྗེས་སུ་དཔག་པ་མེད་ན་མི་འབྱུང་བའི་དོན་མཐོང་བས་ངེས་པ་ཚད་མ་ཡིན་པ་བཞིན་དུ། མངོན་སུམ་གྱི་ཚད་མ་ཉིད་ཀྱང་བདག་ཉིད་དོན་མེད་ན་མི་འབྱུང་བར་ངེས་པར་བྱེད་པ་ལས་ནི་མ་ཡིན་ཏེ། འོན་ཀྱང་སྣང་བ་ངེས་པར་བྱེད་པ་ལས་ཡིན་ནོ། །དོན་ཐོབ་པར་བྱེད་པ་ནི་ཚད་མ་ཡིན་ལ། དེ་ཡང་འཇུག་པར་བྱེད་པ་ཉིད་ཡིན་གྱི་གཞན་ནི་མ་ཡིན་ནོ། །འཇུག་པར་བྱེད་པ་ཡང་འཇུག་པའི་ཡུལ་སྟོན་པ་ཉིད་ཡིན་པར་བརྗོད་དོ། དེས་ན་སྣང་བ་ངེས་པར་བྱས་པ་ནི་བསྟན་པ་ཡིན་པའི་ཕྱིར་འཇུག་པའི་ཡུལ་ལ་ཚད་མའི་བྱ་བ་ཡོངས་
སུ་རྫོགས་པ་ཡིན་ནོ། །གང་ཡང་སྣང་བ་དང་འགལ་བའི་རྣམ་པ་ངེས་པས་གནོད་པ་བསྐྱེད་པ་དེ་ནི་ཚད་མའི་བྱ་བ་མ་རྫོགས་པའི་ཕྱིར་ཚད་མ་མ་ཡིན་ཏེ། དཔེར་ན་སྨིག་རྒྱུ་འཛིན་པའི་ཤེས་པ་ལ་ཆུར་ངེས་པས་འཇུག་པ་བཞིན་ནོ། །མེད་ན་མི་འབྱུང་བར་ཐེ་ཚོམ་ཟ་བས་ནི་ནམ་ཡང་མངོན་སུམ་གྱི་བྱ་བ་ལ་གནོད་པ་མ་ཡིན་ནོ། །འགའ་ཞིག་ཡོད་པར་ཞེན་པར་བྱས་པའི་ཡུལ་ཅན་ཅི་མེ་འདི་བ་བདེན་ནམ་འོན་ཏེ་མ་ཡིན་ཞེས་མེད་ན་མི་འབྱུང་བར་ཐེ་ཚོམ་ཟ་བ་འདི་ལ་ཡང༌། བདག་ཉིད་ཐམས་ཅད་གཞན་ལས་ཚད་མ་ཡིན་ནོ། །ཡང་འགའ་ཞིག་ལོ་མ་ལ་སོགས་པ་དང་ལྡན་བ་ལ་སོགས་པའི་སྤྱི་ཤེས་པ་ལ་ཁྱད་པར་གྱི་ཡུལ་ལ་ཐེ་ཚོམ་ཟ་བ་དཔེར་ན་ཅི་འདི་དྷ་བའམ་འོན་ཏེ་པ་ལ་ཤ་ཞེས་བྱ་བ་ལྟ་བུ་དེ་ལ་ཡང་སྤྱི་ནི་རང་ལས་ཡིན་ལ། ཁྱད་པར་ནི་གཞན་ལས་ཡིན་ཏེ། གང་གི་ཕྱིར་མངོན་སུམ་གྱིས་དོན་བྱེད་པའི་དངོས་པོ་བཟུང་ནས་ཤིང་ངོ་ཞེས་ངེས་པ་ཡིན་ལ། དོན་བྱེད་པར་ནུས་པ་ཡང་ཁྱད་པར་ཡིན་ཏེ། དེས་ན་འཇུག་པའི་ཡུལ་དུ་གྱུར་པའི་ཤིང་གི་རང་བཞིན་ནི་ཁྱད་པར་ཉིད་ཡིན་པས། དེ་ལ་ཡང་འཇུག་པར་བྱེད་པ་ནི་དེ་ཉིད་ཡིན་ནོ། །དེའི་ཤིང་ཤ་བ་ཉིད་ཀྱི་ཁྱད་པར་མེད་ན་མི་འབྱུང་བ་ངེས་པ་ནི་གཞན་ལས་ཡིན་ནོ། །ཇི་ལྟར་ཐུན་མོང་དུ་གྱུར་པའི་ཤིང་ཉིད་ནི་ཁྱད་པར་གྱི་བདག་ཉིད་ཁོ་ནས་དོན་བྱེད་པ་ཡིན་པ་དེ་བཞིན་དུ་སྔོན་པོ་ལ་སོགས་པའི་ཐུན་མོང་བ་སྐད་ཅིག་མ་ཉིད་ཀྱང༌། སྔོན་པོ་ལ་སོགས་པ་ཉིད་ཀྱི་རང་བཞིན་གྱིས་དོན་བྱེད་པ་ཡིན་ནོ། །དེ་ནས་གལ་ཏེ་མངོན་སུམ་གྱིས་སྐད་ཅིག་མ་ཉིད་གཟུང་བ་མ་ཡིན་ན་ནི་སྔོན་པོ་ལ་སོགས་པ་ཉིད་ཀྱི་མཐར་ཐུག་བས་དེ་ལ་ཚད་མར་འགྱུར་ཏེ། སྔོན་པོ་ལ་སོགས་པ་ཉིད་ཀྱིས་དོན་བྱེད་པའི་ཕྱིར་རོ། །ཁྱད་པར་འཛིན་པ་ནི་སྔོན་པོ་ལ་སོགས་པ་དོན་བྱེད་པ་མཐོང་བ་ན་ཐུན་མོང་དུ་གྱུར་པ་སྐད་ཅིག་མ་ཉིད་ལ་སོགས་པ་ངེས་པ་མ་ཡིན་པ་དེའི་མཐར་ཐུག་པས་ཚད་མ་མ་ཡིན་ཏེ། མཐོང་བའི་དངོས་པོ་ལ་སོགས་པ་ཁོ་ནས་དོན་བྱེད་པ་རྫོགས་པའི་ཕྱིར་རོ། །དེའི་ཕྱིར་སྤྱིའི་ངོ་བོས་དོན་བྱ་བ་བྱེད་པ་གཟུང་བ་ནས་ཁྱད་པར་གྱི་མཐར་ཐུག་པ་ནི་ཚད་མ་ཉིད་གཞན་ལས་ངེས་པར་བྱ་བ་ཡིན་ནོ། །
ཁྱད་པར་གཟུང་བ་ན་ཡང་སོ་སོར་སྣང་བའི་སྟོབས་ཀྱིས་སྤྱི་ངེས་ན་ནི་དེ་ལ་ཚད་མ་ཡིན་ཏེ། དཔེར་ན་ཤིང་ཉིད་ལ་ཤིང་ཤ་པ་འཛིན་པ་བཞིན་ཏེ། གཞན་དུ་ནི་ཚད་མ་མ་ཡིན་ནོ། །སྐད་ཅིག་མ་ཉིད་ནི་དེ་ལྟར་ཁྱད་པར་མ་ཡིན་ཞིང༌། ཁྱད་པར་སྣང་བ་ལས་ངེས་པ་ཡང་མ་ཡིན་ཏེ། དེའི་ཕྱིར་དེ་འདྲ་བ་ནི་ཚད་མ་གཞན་ཁོ་ནས་སྒྲུབ་པར་བྱེད་དོ། །དེ་བཞིན་དུ་རེག་པ་ལ་སོགས་པ་ལྷན་ཅིག་རྒྱུ་བ་ཐ་དད་པ་ལ་ཡང་བལྟ་བར་བྱའོ། །དོན་བྱེད་པའི་ཤེས་པ་འབའ་ཞིག་ལས་ངེས་པ་ནི་མ་ཡིན་ཏེ། འོན་ཀྱང་མེད་ན་མི་འབྱུང་བའི་དོན་འགའ་ཞིག་མཐོང་བ་ལས་ཀྱང་ཡིན་ནོ། །རྣམ་པ་འདི་ལྟ་བུའི་ཐེ་ཚོམ་ནི་ཐམས་ཅད་ཀྱང་སྣང་བའི་རང་བཞིན་ངེས་པའི་འོག་རོལ་དུ་ཡིན་ཏེ། དེ་མ་ངེས་ན་ཡུལ་དེ་ལ་འཛིན་པ་མི་རིགས་པའི་ཕྱིར་རོ། །དེའི་ཕྱིར་ཐེ་ཚོམ་ནི་མངོན་སུམ་གྱི་བྱ་བ་ངེས་པ་ལ་ཡིན་ཏེ། རྣམ་འགྲེལ་ལས། མངོན་སུམ་གྱི་བཟུང་བ་དང་མ་བཟུང་བ་ནི་སྣང་བའི་དབང་གིས་ཡིན་ནོ་ཞེས་བཤད་དོ། །སྣང་བ་ཡང་རང་ཉིད་ངེས་པའི་རང་བཞིན་དེ་ཁོ་ན་བཞིན་དུ་ངེས་པའི་ཕྱིར་མེད་ན་མི་འབྱུང་བའི་ཐེ་ཚོམ་ནི་ཕྱི་ནས་འབྱུང་བས་མངོན་སུམ་གྱི་བྱ་བ་མི་འགོག་གོ །དེ་ཉིད་ཀྱི་ཕྱིར་དོན་བཞིན་དུ་རང་ཉིད་ལས་ཉམས་སུ་མྱོང་བ་ངེས་པའི་དོན་མེད་ན་མི་འབྱུང་བ་ཞེས་བྱ་བའི་རང་གི་ངོ་བོ་ལ་ཡང་མངོན་སུམ་དེ་ཉིད་ཚད་མ་ཡིན་ནོ། །གཞན་ལས་ནི་ཕྱིས་འབྱུང་བའི་ཐེ་ཚོམ་སེལ་བ་འབའ་ཞིག་ཏུ་ཟད་དོ། །འདི་ལྟར་ཤེས་པ་ཕྱི་མ་གང་ཡིན་པ་དེས་ནི་ཤེས་པ་སྔ་མ་འཛིན་པ་མ་ཡིན་ནོ། །རྟགས་ཀྱང་མ་ཡིན་ཏེ། དེ་སྐྱེས་པ་ཙམ་གྱིས་ཐེ་ཚོམ་སེལ་བའི་ཕྱིར་དང༌། ཁྱབ་པ་དྲན་པ་མེད་པའི་ཕྱིར་རོ། །གཞན་དུ་ན་ཉམས་སུ་མྱོང་བའི་ཡུལ་གྱི་ཤེས་པའི་གསལ་བ་ཤེས་པ་ཕྱི་མས་ཚད་མར་རྗེས་སུ་དཔག་བའི་ཕྱིར་ཡུལ་ཉམས་སུ་མྱོང་བ་ལས་མ་གཏོགས་པ་ཞེས་མི་གསུང་བར་འགྱུར་རོ། །དེའི་ཕྱིར་སྣང་བ་ངེས་པས་མངོན་སུམ་གྱི་བྱ་བ་རྫོགས་པ་ཡིན་ནོ། །རྣམ་པར་རྟོག་པ་ནི་སྣང་བའི་དབང་གིས་ཡུལ་རྣམ་པར་འཇོག་པ་མ་ཡིན་ཏེ། འོན་ཀྱང་ངེས་པའི་དབང་གིས་ཏེ། རྣམ་འགྲེལ་ལས། ངེས་པ་རྣམས་ཀྱིས་མ་ངེས་གང༌། །ཞེས་
བསྟན་ཏོ། །དེ་ལ་རྟགས་མེད་པའི་རྣམ་པར་རྟོག་པ་ཐམས་ཅད་ནི། ངེས་པར་བྱེད་པ་མེད་པའི་ཕྱིར་གཞན་དུ་དོགས་པ་མ་བཟློག་པས་ཐེ་ཚོམ་ཟ་བ་ཡིན་ནོ། །དེ་ཡང་མ་ངེས་པར་དོན་ཡོད་པར་ཞེན་པ་ཡིན་ལ། དེ་འདྲ་བའི་དོན་ཡང་མེད་པས་ཐོབ་པར་བྱེད་པ་མ་ཡིན་ནོ། །རྟགས་ལས་སྐྱེས་པ་ནི་དངོས་པོའམ་དངོས་པོ་མེད་པ་གཅིག་ཏུ་ངེས་པར་སྟོན་པ་ཡིན་ལ། དེ་ཡང་ཐོབ་པར་ནུས་པ་ཡིན་པའི་ཕྱིར་རྣམ་པར་རྟོག་པའི་ཚད་མའི་བྱ་བ་ནི་མེད་ན་མི་འབྱུང་བ་མཐོང་བ་ལས་ཐོབ་པར་བྱ་བའི་དོན་བསྟན་པ་ཡིན་ཞིང་མངོན་སུམ་གྱི་བྱ་བ་ནི་སྣང་བ་ངེས་པར་བྱེད་པ་ཉིད་ཡིན་ནོ། །ཐེ་ཚོམ་ནི་དེའི་བྱ་བ་དང་འགལ་བ་མ་ཡིན་གྱི། འོན་ཀྱང་སྒྲོ་འདོགས་པ་ཡིན་ནོ། །རྣམ་འགྲེལ་ལས། གལ་ཏེ་འཁྲུལ་པའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །ཞེས་གང་བཤད་པ་ཡིན་ནོ། །དེས་ན་གོམས་པ་མ་ཡིན་པ་ནི་ཚད་མ་མ་ཡིན་པ་ལ་འཇུག་པ་ཡིན་ནོ་ཞེས་གང་བཤད་པ་དེ་ནི་མ་འབྲེལ་བ་ཡིན་ཏེ། ཚད་མར་མ་ངེས་པ་ལས་ཞེས་བརྗོད་པར་བྱ་བ་ཡིན་ནོ། །གང་དུ་གཞན་ལས་ཚད་མ་ཡིན་པ་དེ་ལ་འཇུག་པ་དང་གཉིས་ཕན་ཚུན་བསྟན་པའི་ཉེས་པ་ནི་ཡོད་པ་མ་ཡིན་ཏེ། ཐེ་ཚོམ་ལས་ཀྱང་འཇུག་པའི་ཕྱིར་རོ། །གང་ཡང་ཉེ་བའི་དངོས་པ་ལ་མི་སླུ་བ་ལས་དབང་པོ་སྐྱོན་མེད་པར་ངེས་ཤིང༌། །དེས་ན་ཚད་མ་ཉིད་དུ་ངེས་པ་ཁོ་ན་འཇུག་པ་ཡིན་ནོ་ཞེས་བརྗོད་པ་དེ་ནི་ཡང་དག་པ་ཉིད་མ་ཡིན་ཏེ། ཟླ་བ་གཉིས་སུ་སྣང་བའི་དུས་ན་ཡང་ནམ་མཁའ་དྲི་མ་མེད་པ་ལ་སོགས་པ་ལ་མི་སླུ་བའི་ཕྱིར་ཏེ། ཡུལ་ངེས་པ་ལ་འཁྲུལ་པའི་ཕྱིར་རོ། །གང་ཡང་འཇིག་རྟེན་རྒྱང་འཕེན་པ་ལ་རྗེས་སུ་དཔག་པ་ཚད་མ་ཉིད་དང༌། ཕ་རོལ་དང་རྣམ་པར་ཤེས་པར་སྨྲ་བ་དག་ལ་ཡང་ཚད་མ་ཁྱད་པར་མེད་པར་བརྗོད་བའི་དོན་དུ། འདི་དག་གིས་དོན་ཡོངས་སུ་བཅད་ནས་ཞེས་བྱ་བ་འདི་བརྗོད་པ་ཡིན་ནོ་ཞེས་ཟེར་བ་དེ་དག་གཉི་ག་ཡང་མ་འབྲེལ་པ་ཡིན་ཏེ། འཇིག་རྟེན་རྒྱང་འཕེན་པ་དང་རྣམ་པར་ཤེས་པར་སྨྲ་བའི་དབང་དུ་བྱས་པ་ནི་འཆད་པར་འགྱུར་བའི་ཕྱིར་རོ། །རབ་ཏུ་བྱེད་བ་འདིར་གང་ཅུང་ཟད་བཤད་པ་དེ་ཐམས་ཅད་རྣམ་པར་ཤེས་པར་
སྨྲ་བ་ལ་ཡང་སྦྱར་བར་བྱ་བ་མ་ཡིན་ཏེ། དོན་གྱི་མཐུ་ཡིས་ནི། ཡང་དག་སྐྱེ་བ་ཡིན་ཕྱིར་རོ། །ཞེས་བྱ་བ་དེ་ལྟ་བུ་ལ་སོགས་པ་རྣམ་པར་ཤེས་པར་སྨྲ་བའི་ཚུལ་དང་མཐུན་པ་མ་ཡིན་པའི་ཕྱིར་རོ། །རྣམ་པ་གཉིས་ཞེས་གྲངས་ངེས་པ་མ་བཟོད་ནས་གལ་ཏེ་ཞེས་སྨྲས་ཏེ། མངོན་སུམ་དང་རྗེས་སུ་དཔག་པ་དག་ལས་གཞན་པའི་ཚད་མ་ཡང་ཁས་བླང་བའོ། །སྒྲས་བསྐྱེད་པ་ལྐོག་ཏུ་གྱུར་པའི་དོན་གྱི་ཡུལ་ཅན་གྱི་ཤེས་པ་ནི་སྒྲའི་ཚད་མ་སྟེ། མངོན་སུམ་དོན་མིན་དངོས་པོ་ལ། སྒྲ་ལས་སྐྱེས་པའི་ཤེས་པ་གང༌། །ཞེས་གང་བརྗོད་པ་ཡིན་ནོ། །ལྐོག་ཏུ་གྱུར་པ་ལ་འདྲ་བར་ཡོངས་སུ་གཅོད་པ་ཡང་ཉེ་བར་འཇལ་བ་སྟེ། དཔེར་ན་བ་མན་མཐོང་བ་ལས་སྲོག་ཆགས་འདི་དང་འདྲ་བ་ནི་བ་ལང་ངོ་ཞེས་ལྐོག་ཏུ་གྱུར་པའི་བ་ལང་ལ་འདྲ་བར་འཛིན་པའོ། །སོགས་པ་སྨོས་པས་ནི་དོན་གྱིས་གོ་བ་དང༌། དངོས་པོ་མེད་པ་ཡང་གཟུང་ངོ༌། །སྒྲ་ལ་སོགས་པ་འདི་དག་ནི་གཞལ་དུ་ཁོང་དུ་ཆུད་པའི་ཕྱིར་ཚད་མ་ཉིད་ཡིན་ན། ངེས་པ་དེ་གང་ལས་ཤེ་ན། ཚད་མ་ཞེས་སྨོས་ཏེ། ཁོ་བོ་ཅག་སྒྲའམ་ཉེ་བར་འཇལ་བ་ཞེས་བྱ་བའི་མིང་ལ་ནི་རྩོད་བར་མི་བྱེད་དོ། །འདི་དག་གི་ནང་ན་ཡང་ཚད་མ་ཡིན་པ་ནི་འདི་གཉིས་ཁོ་ནའི་ནང་དུ་འདུ་ལ། གང་ཡང་ནང་དུ་མི་འདུ་བ་དེ་ནི་ཚད་མ་མ་ཡིན་ཏེ། དེས་ན་ཚད་མ་རྣམ་གཉིས་ཁོ་ནའོ། །ཅི་ལྟར་བསྟན་པའི་དོན་ཐོབ་པར་བྱེད་པའི་སྐྱེས་བུ་མི་སླུ་བར་བྱེད་པ་ནི་ཚད་མ་ཞེས་གྲགས་པ་དེ་བཞིན་དུ། ཤེས་པ་ཡང་བསྟན་པའི་དོན་ཐོབ་པར་བྱེད་པ་མི་སླུ་བ་ནི་ཚད་མ་ཡིན་ནོ། །ཡང་དག་པའི་ཤེས་པ་ཡང་མི་སླུ་བ་ཉིད་ལ་བརྗོད་དེ། དེས་ན་ཐ་དད་པ་མེད་པས་ཡང་དག་པའི་ཤེས་པའི་སྐབས་སུ་ཚད་མ་ཞེས་བཤད་དོ། །དེ་ནི་འདི་ལྟར་གཞན་ཡིན་ན་ནི་ཚད་མ་མ་ཡིན་ལ། ཚད་མ་ཡིན་ན་ཡང་གཞན་མ་ཡིན་ནོ་ཞེས་དམ་བཅས་པ་ཡིན་ནོ། །གཞལ་བྱའི་རང་བཞིན་ཡོངས་སུ་བཅད་པའི་དངོས་པོ་ཐོབ་པར་བྱེད་པ་ནི་ཚད་མར་བརྗོད་ལ། གཞལ་བྱ་ཡང་ཚད་མའི་ཡུལ་ཡིན་པའི་ཕྱིར་ཚད་མ་ལ་ཡུལ་དང་ལྡན་པས་ཁྱབ་པོ། །དེས་ན་གང་ཡུལ་དང་ལྡན་པ་མ་ཡིན་པ་དེ་ནི་ཚད་མ་མ་
ཡིན་ཏེ། དཔེར་ན་ནམ་མཁའི་ཨུཏྤལ་བཞིན་ནོ། །མངོན་སུམ་དང་རྗེས་སུ་དཔག་པ་དག་ལས་གཞན་པའི་ཤེས་པ་ཡང་ཡུལ་དང་ལྡན་པ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མེད་པའོ། །དེ་བཞིན་དུ་ཚད་མའི་དབྱེ་བ་ནི་ཡུལ་གྱི་དབྱེ་བ་ལས་ཡིན་ཏེ། གང་གི་ཕྱིར་ཚད་མའི་དབྱེ་བ་ནི་རྒྱུ་མཚན་དང་ལྡན་པ་ཡིན་ཏེ། རྒྱུ་མཚན་མེད་པ་ཉིད་ན་ཧ་ཅང་ཐལ་བར་འགྱུར་བའི་ཕྱིར་རོ། །རྒྱུ་མཚན་གཞན་ཡང་མི་འཐད་པའི་ཕྱིར་ཕ་རོལ་གྱིས་ཀྱང་ཚད་མ་རྣམས་ནི་ཡུལ་གྱི་དབྱེ་བ་ལས་བརྟེན་པ་ཡིན་ནོ། །ཡུལ་ལ་ལྟོས་ནས་ཀྱང་ཚད་མའམ་ཚད་མ་མ་ཡིན་པའི་ཕྱིར། ཡུལ་ལ་ལྟོས་པ་ཁོ་ནས་དེ་དབྱེ་བར་བྱ་བ་ཡིན་ནོ། །དེའི་ཕྱིར་ཚད་མའི་དབྱེ་བའི་རྒྱུ་མཚན་ནི་ཡུལ་གྱི་དབྱེ་བ་ཙམ་ཡིན་པའི་ཕྱིར་དེའི་དབྱེ་བས་ཁྱབ་པ་ཡིན་ནོ། །དེས་ན་གང་ཞིག་མངོན་སུམ་དང་རྗེས་སུ་དཔག་པའི་དོན་ལས་ཐ་དད་པའི་ཡུལ་ཅན་མ་ཡིན་པ་དེ་ནི་དེ་དག་ལས་གཞན་པའི་ཚད་མ་མ་ཡིན་ཏེ། དཔེར་ན་མངོན་སུམ་དང་རྗེས་སུ་དཔག་པ་དེ་དག་ཉིད་མངོན་སུམ་དང་རྗེས་སུ་དཔག་པ་གཞན་ལས་སམ། དཔེར་ན་འཁྲུལ་པའི་ཤེས་པ་བཞིན་ནོ། །ཚད་མ་ལ་ཡང་མངོན་སུམ་དང་རྗེས་སུ་དཔག་པར་བྱ་བའི་དོན་ལས་ཐ་དད་པའི་གཞལ་བྱ་ཡོད་བ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པ་ཉིད་དོ། །གཏན་ཚིགས་མ་གྲུབ་པ་ནི་མ་ཡིན་ཏེ། གང་གི་ཕྱིར་འདིར་གཟུང་བའི་ཡུལ་གྱི་དབང་དུ་བྱས་པ་ནི་མ་ཡིན་ཏེ། རྗེས་སུ་དཔག་པའི་ཡུལ་མེད་པའི་ཕྱིར་རོ། །འཇུག་པའི་ཡུལ་ཡང་ཡོད་པ་དང་མེད་པའོ། །དེ་ལས་གང་ཐོབ་བར་ནུས་པའི་ཡོད་པ་དེ་ཉིད་ཚད་མའི་ཁྱབ་པར་བྱེད་པར་ཉེ་བར་གནས་པའི་ཡུལ་དུ་འདོད་དོ། །མི་དམིགས་པ་ཡང་མེད་པ་སྒྲུབ་པར་བྱེད་པ་ནི་དགག་པར་བྱ་བས་སྟོང་བའི་ས་ཕྱོགས་ལ་སོགས་པས་བསྡུས་པ་ཐོབ་པར་བྱ་བ་ཉིད་སྟོན་པར་བྱེད་དོ། །མེད་པའི་ཐ་སྙད་སྒྲུབ་པར་བྱེད་པ་ཡང་ཐ་སྙད་དུ་རུང་བ་ཡིན་པའི་ཕྱིར་ཐོབ་པར་བྱ་བའི་ཡུལ་ཉིད་དོ། །གང་ཡང་མངོན་སུམ་མ་ཡིན་པ་སྟེ། ཐོབ་པར་ནུས་པའི་ཡུལ་མངོན་སུམ་མ་ཡིན་པའི་དོན་དེ་ནི་འདྲ་བའི་བདག་ཏུ་སྟེ། དཔེ་ལ་མཐོང་བ་
དང་ཐུན་མོང་དུ་རྟགས་ཀྱིས་རྗེས་སུ་འགྲོ་བའི་ཚུལ་གྱིས་རྟོགས་ལ་དེ་ཡང་འགྲེལ་པ་གཞན་ལས་འགྱུར་བ་ཡིན་ནོ། །རྟོགས་ཕྱིར་རོ་ཞེས་བྱ་བ་ནི་གཏན་ཚིགས་ཏེ། གང་གི་ཕྱིར་མངོན་སུམ་མ་ཡིན་པའི་དོན་དེ་རྣམ་པ་གཅིག་ཉིད་དུ་སྤྱིའི་ཚུལ་ཉིད་ཀྱིས་རྟོགས་ལ། དེ་ཡང་རྗེས་སུ་དཔག་པ་ཡིན་ཏེ། དེའི་ཕྱིར་ཡུལ་གཞན་མེད་པས་ཡུལ་ཅན་གྱི་ཚད་མ་ཡང་གཞན་མེད་དེ། དེས་ན་གཏན་ཚིགས་གྲུབ་པའི་ཕྱིར་ཚད་མ་གཉིས་ཁོ་ནའོ། །གལ་ཏེ་འདི་སྙམ་དུ་དེ་ལྟ་ན་ཡང་དོན་གང་ཞིག་རྣམ་པ་དུ་མར་རྟོགས་པར་འགྱུར་བ་དེ་ནི་ཡུལ་གཞན་ཡིན་ལ། གཞན་གྱི་ཡུལ་ཅན་ཡང་ཚད་མ་ཉིད་ཡིན་ནོ་ཞེས་དོགས་ན། དོན་ནི་རྣམ་པ་གཉིས་ཉིད་དེ་མངོན་སུམ་དང་ལྐོག་ཏུ་གྱུར་པའོ་ཞེས་སྨོས་སོ། །འདིས་ནི་འདི་སྐད་དུ་མངོན་སུམ་དང་མངོན་སུམ་མ་ཡིན་པ་དག་ནི་ཕན་ཚུན་སྤངས་ཏེ་གནས་པའི་ཕྱིར་མངོན་སུམ་མ་ཡིན་པ་ལས་གཞན་པའི་དོན་ནི་མངོན་སུམ་ཉིད་དོ་ཞེས་སྟོན་པར་བྱེད་དོ། །གང་ཅུང་ཟད་མངོན་སུམ་མ་ཡིན་པ་དེ་ཁོ་ན་ཚད་མའི་ཡུལ་ཉིད་ནི་མ་ཡིན་གྱི། འོན་ཀྱང་དོན་བྱེད་པར་ནུས་པའི་ལྐོག་ཏུ་གྱུར་པ་ཡིན་ནོ་ཞེས་བསྟན་པའི་དོན་དུ་མངོན་སུམ་མ་ཡིན་པའི་སྒྲའི་དོན་ལྐོག་ཏུ་གྱུར་པར་བརྗོད་དོ། །མདོ་ལས་ནི་གང་མངོན་སུམ་མ་ཡིན་པ་དེ་ནི་མངོན་སུམ་ཉིད་དོ་ཞེས་ཕན་ཚུན་སྤངས་ཏེ་གནས་པར་བརྗོད་པའི་དོན་དུ་མངོན་སུམ་མ་ཡིན་པ་ཞེས་སྨོས་སོ། །འདི་སྙམ་དུ་རྣམ་པ་དུ་མར་རྟོགས་པར་འགྱུར་བ། མངོན་སུམ་གང་ཡིན་པ་ཉིད་ལ་ཚད་མ་གཞན་གྱི་གོ་སྐབས་ཡོད་པར་འགྱུར་རོ་ཞེས་དོགས་པ་ལ། མངོན་སུམ་གྱི་འཛིན་པའི་རྣམ་པ་ངེས་པར་བསྟན་པའི་ཕྱིར་དེ་ལ་ཞེས་སྨོས་ཏེ། ཤེས་པའི་སྣང་བ་བདག་ཉིད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་མཐུན་པ་རྟོགས་པར་བྱེད་པའི་དོན་གང་ཡིན་པ་དེ་ནི་མངོན་སུམ་མོ་ཞེས་སྦྱར་རོ། །འདིར་ཡང་རྒྱུ་དང་འབྲས་བུའི་དངོས་པོ་ཙམ་ནི་ཤེས་པའི་སྣང་བ་གང་ཞིག་ཡོད་པ་དང༌། མེད་བ་དག་གི་རྗེས་སུ་མཐུན་པ་ཞེས་བྱ་བ་དེ་ཙམ་གྱིས་རྟོགས་པར་འགྱུར་རོ། །རྗེས་སུ་མཐུན་པར་བྱེད་པ་ཞེས་སྦྱོར་བར་བྱེད་པ་པོའི་དོན་བརྗོད་པ་ནི་རྒྱུ་དུ་མ་ཉིད་ན་ཡང་སོ་སོར་སྣང་བ་གང་གི་གཞན་གྱི་དབང་དུ་གྱུར་པ་
དེ་མངོན་སུམ་ཡིན་ནོ་ཞེས་ཅི་ནས་ཀྱང་རྟོགས་པར་བྱ་བའི་ཕྱིར་རོ། །གཞན་གྱི་དབང་དུ་གྱུར་པའི་སྦྱར་བར་བྱ་བ་ནི་དབང་པོ་ལ་སོགས་པ་ཡོད་ཀྱང་མི་འབྱུང་ལ། དོན་ཡོད་ན་འབྱུང་བ་ཉིད་ཀྱི་ཕྱིར་དེ་ཡོད་པ་ཙམ་གྱིས་འབྱུང་བ་ཉིད་སོ་སོར་སྣང་བ་དེ་ལ་རག་ལས་པ་ཡིན་གྱི། དབང་པོ་ལ་སོགས་པ་ལ་ནི་མ་ཡིན་ནོ། །དེ་ཉིད་ཀྱི་ཕྱིར་དོན་ལས་ནི་དེ་དང་འདྲ་བ་ཉིད་ཅེས་དེ་དོན་གྱིས་བྱས་པར་བརྗོད་དོ། །དོན་གྱི་བདག་ཉིད་དུ་ཞེན་པས་དོན་གྱི་ཕྱོགས་སུ་གཞག་པའི་ཕྱིར་ཡང་དེ་དང་འབྲེལ་བ་ཡིན་ཏེ། དེས་ན་དོན་མངོན་སུམ་ཡིན་གྱི། གང་ལ་སོ་སོར་སྣང་བ་རྣམ་པ་གཉིས་མ་འབྲེལ་པའི་དབང་པོ་ལ་སོགས་པ་ལ་ནི་མ་ཡིན་ནོ། །སྔོན་པོ་མ་ཡིན་པ་ལས་ལྡོག་པའི་རང་བཞིན་ནི་མངོན་སུམ་ཡིན་གྱི་སྐད་ཅིག་མ་ཉིད་ནི་མ་ཡིན་ནོ། །རང་བཞིན་གང་གིས་སྣང་བ་ངེས་པའི་དོན་གྱི་རང་བཞིན་དེ་ནི་མངོན་སུམ་ཡིན་ཏེ། ངེས་པ་ནི་དེ་དང་འབྲེལ་པའི་ཕྱིར་རོ། །སྐད་ཅིག་མ་ཉིད་ཀྱིས་ནི་སྣང་བ་ངེས་པ་མ་ཡིན་ནོ། །ཐོབ་པར་བྱ་བ་ཡང་འདིར་འཇུག་པའི་ཡུལ་ཉིད་ལ་ངེས་པར་བརྟག་པར་བྱ་བ་ཡིན་ལ་འཇུག་པའི་ཡུལ་ཡང་ངེས་པ་ཉིད་ཡིན་ནོ། །སྐད་ཅིག་མ་ཉིད་ནི་དངོས་པོ་ལ་སྣང་དུ་ཟིན་ཀྱང་ངེས་པ་མ་ཡིན་ནོ། །དེས་ན་ཚད་མ་གཞན་གྱིས་ངེས་པར་བྱ་བ་ཡིན་ནོ། །སྨིག་རྒྱུའི་རང་བཞིན་མཚན་ཉིད་གཟུང་དུ་ཟིན་ཀྱང་ཤེས་པའི་སྣང་བ་ལ་སྨིག་རྒྱུའི་རང་བཞིན་དུ་མ་ངེས་པའི་ཕྱིར་སྨིག་རྒྱུའི་མངོན་སུམ་མ་ཡིན་ཏེ། རྣམ་པ་དེ་ལྟ་བུ་གཞན་དག་ཀྱང་ཤེས་པར་བྱའོ། །སྣང་བ་རྗེས་སུ་འགྲོ་བ་དང་ལྡོག་པའི་རྗེས་སུ་འཇུག་པའི་མངོན་སུམ་འདི་ཉིད་ཀྱང་རྟོགས་པར་བྱེད་པ་ལ་ལྟོས་པ་ཡིན་ལ། ཤེས་པའི་རང་བཞིན་གྱིས་རྟོགས་པར་བྱེད་པའི་སྣང་བ་གང་གི་རྗེས་སུ་འགྲོ་བ་དང་ལྡོག་པའི་རྗེས་སུ་འཇུག་པའི་དོན་དེ་རྟོགས་པའི་རྣམ་པ་ནི་འདི་ཡིན་གྱི་གཞན་ནི་མེད་དོ། །སྣང་བ་དོན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་འཇུག་པའི་ཤེས་པ་ལ་ཡང་ཐམས་ཅད་མངོན་སུམ་ཡིན་ཏེ། གཞལ་བྱ་མངོན་སུམ་པ་ཉིད་ཀྱི་ཕྱིར་རོ། །དེའི་ཕྱིར་གང་ཞིག་ཚད་མ་དུ་མའི་ཡུལ་དུ་འགྱུར་བ་མངོན་སུམ་གྱི་དོན་ལ་རྣམ་པ་དུ་མར་རྟོགས་པ་མ་ཡིན་ནོ། །སྣང་བ་སྨོས་པ་ནི་ཤེས་པའི་རྒྱུ་
ཐམས་ཅད་མངོན་སུམ་ཡིན་པ་བཟློག་པའི་དོན་དུའོ། །སྣང་བ་མ་སྨོས་ན་ནི་ཤེས་པ་གང་གི་རྗེས་སུ་འགྲོ་བ་དང་ལྡོག་པའི་རྗེས་སུ་འཇུག་པ་དེ་མངོན་སུམ་ཡིན་པའི་ཕྱིར། དབང་པོ་ལ་སོགས་པ་མངོན་སུམ་ཉིད་དུ་ཐལ་བར་འགྱུར་རོ། །སྣང་བ་སྨོས་ན་ནི་ཤེས་པའི་ཁྱད་པར་ལ་བརྟེན་པར་འགྱུར་ལ། ཁྱད་པར་ཡང་ཤེས་པ་ལ་བརྟེན་པའི་ལྷན་ཅིག་བྱེད་པ་སོ་སོ་ལ་ཐ་དད་པ་ཡིན་ནོ། །སྣང་བའི་མཚན་ཉིད་ཀྱི་ཁྱད་པར་དེ་ཡང་ཡུལ་ཁོ་ན་ལས་ཡིན་གྱི། དབང་པོ་དང་དེ་མ་ཐག་པ་ལས་ནི་མ་ཡིན་ནོ། །དེ་བཞིན་དུ་ཤེས་པ་མ་སྨོས་ན་ཡང༌། གང་ཅུང་ཟད་འདྲ་བར་བརྟགས་པའི་རྒྱུ་མཚན་དེ་ཉིད་མངོན་སུམ་དུ་བརྗོད་པར་འགྱུར་ལ། ཤེས་པ་ལ་གནས་པའི་འདྲ་བའི་རྒྱུ་མཚན་ཅན་ཡང་མངོན་སུམ་ཡིན་པར་འདོད་པ་ཡིན་ནོ། །གལ་ཏེ་དངོས་པོ་ལོག་ཏུ་ཟིན་ཀྱང་རྣམ་པར་རྟོག་པའི་གནས་སྐབས་ཀྱི་དངོས་པོར་སྣང་བ་མི་ལྡོག་པའི་ཕྱིར། ལྡོག་པ་དང་རྗེས་སུ་འགྲོ་བའི་རྗེས་སུ་བྱེད་པའི་ཤེས་པའི་སྣང་བ་འགའ་ཡང་མེད་པ་ཉིད་མ་ཡིན་ནམ། །དངོས་པོ་ཉེ་ན་རྟོག་པ་མེད་པའི་ཤེས་པ་ལ་གནས་པའི་སྣང་བ་མཐོང་བ་ལ་འདི་ནི་སྔོན་པོའི་ཞེས་ཞེ་ན་པར་བྱེད་པ་གང་ཡིན་པའི་རྣམ་པའི་གནས་སྐབས་དེ་ཉིད་ན། སྔོན་པོ་ཉིད་དུ་ངེས་པར་ཉམས་སུ་མྱོང་སྟེ་དེའི་ཕྱིར་རྟོག་པ་མེད་པ་དང་རྟོག་པ་དང་བཅས་པའི་ཤེས་པ་ལ་གནས་པའི་རྣམ་པ་སྔོན་པོ་ཉིད་དུ་ངེས་པར་བྱས་པ་དག་ནི་གཅིག་པ་ཡིན་ལ། གཅིག་པས་ཀྱང་དངོས་པོ་ལ་འཁྲུལ་པའི་ཕྱིར། ཇི་ལྟར་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་ལས་དངོས་པོའམ་ཤེས་པ་མངོན་སུམ་ཉིད་ཡིན་ཞེས་དོགས་པ་ལ། དེ་ནི་ཐུན་མོང་མ་ཡིན་པའི་དངོས་པོའི་རང་བཞིན་ཏེ་ཞེས་གསུངས་སོ། །དོན་འདི་ཡིན་ཏེ་དེ་དག་ཐ་མི་དད་པ་ཞེན་པར་བྱས་པས་ནི་གཅིག་པ་མ་ཡིན་ཏེ། གང་གི་ཕྱིར་རྣམ་པར་རྟོག་པ་མེད་པའི་ཤེས་པ་ལ་གནས་པའི་སྣང་བ་ནི་ཐུན་མོང་མ་ཡིན་པའི་རང་བཞིན་དུ་ཉམས་སུ་མྱོང་སྟེ། འདི་ལྟར་བུམ་བཞི་དག་ཏུ་བུམ་པ་ཉིད་དུ་ཁྱད་པར་མེད་དེ། བུམ་པ་སོ་སོ་ལ་སྣང་བ་ཁྱད་པར་ཅན་དུ་ཡང་དག་པར་རིག་པའི་ཕྱིར་རོ། །རྣམ་པར་རྟོག་པའི་ཡུལ་གྱི་སྣང་བ་ནི་དངོས་པོ་དུ་མ་ལ་ཐུན་མོང་ཉིད་དུ་ངེས་བར་བྱེད་དེ། སྔོས་པོ་གཅིག་ལ་ཡང་བུམ་པ་ལ་སོགས་པར་བརྟགས་པ་ན། རྣམ་པར་རྟོག་པའི་སྣང་བ་
ནས་སྐབས་དུ་མའི་ཐུན་མོང་ཉིད་ཡིན་ནོ། །མངོན་སུམ་གྱི་སྣང་བ་ནི་ཐུན་མོང་མ་ཡིན་པ་སྟེ། ཕྱིར་ཐུན་མོང་དང་ཐུན་མོང་མ་ཡིན་པའི་ཡུལ་ཉིད་ཀྱིས་དེ་དག་ཐ་དད་པ་ཡིན་ནོ། །ཐུན་མོང་མ་ཡིན་པའི་ཡུལ་དུ་སྣང་བས་ལྡོག་པ་དང་རྗེས་སུ་འགྲོ་བའི་རྗེས་སུ་འཇུག་པའི་དངོས་པོ་ནི་མངོན་སུམ་མོ། །ཡུལ་དེའི་རང་བཞིན་མ་ཡིན་པ་ཐུན་མོང་དུ་སྣག་བས་ངོས་པོའི་རྗེས་སུ་འགྲོ་བ་དང༌། །ལྡོག་པའི་རྗེས་སུ་མི་འཇུག་པའི་ཕྱིར་སྣང་བ་གཞན་དག་ཏུ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མེད་པར་རྟོགས་པ་ནི་མ་ཡིན་ནོ། །ཐུན་མོང་མ་ཡིན་པའི་དངོས་པོའི་རང་བཞིན་ཡང་མངོན་སུམ་དུ་འདོད་དོ། །ཐུན་མོང་མ་ཡིན་པ་བརྟགས་པ་ནི་མ་ཡིན་ནོ། །འདི་སྙམ་དུ་གལ་ཏེ་ཐུན་མོང་དང་ཐུན་མོང་མ་ཡིན་པ་ཉིད་ཀྱིས། སྣང་བ་ཐ་དད་པ་དག་ཏུ་རྟོག་ན། དངོས་པོ་གཅིག་ཉིད་ལ་ཉེ་བ་དང་རིང་བའི་བྱེ་བྲག་གིས་ལྟ་བ་པོ་གཉིས་ཀྱི་ཤེས་པ་དག་གསལ་བ་དང་མི་གསལ་བ་ཉིད་དུ་ཐ་དད་པར་སྣང་བ་ཡང་ཡུལ་དངོས་པོ་གཅིག་ཉིད་དུ་མི་འགྱུར་རོ། །ཅི་སྟེ་དེ་ལ་དངོས་པོ་གཅིག་ཏུ་ལྷག་པར་ཞེན་པ་ལས་ཡུལ་གཅིག་པ་ཉིད་ཡིན་ན་ནི་འདི་ལ་ཡང་ཡུལ་གཅིག་པ་ཉིད་ཡོད་པ་ཡིན་ཏེ། དངོས་པོ་གཅིག་ཏུ་ལྷག་པར་ཞེན་པའི་ཕྱིར་རོ་ཞེས་དོགས་པ་ལ། ཐུན་མོང་དང་ཐུན་མོང་མ་ཡིན་པར་སྣང་བ་དག་དོན་བྱེད་ནུས་པ་དང༌། མི་ནུས་པ་དག་གིས་ཐ་དད་པར་བསྟན་པའི་ཕྱིར་རང་གི་མཚན་ཉིད་དོ་ཞེས་གསུངས་ཏེ། ཐུན་མོང་མ་ཡིན་པའི་དངོས་པོའི་རང་བཞིན་གང་ཡིན་པ་དེ་ནི་རང་གི་མཚན་ཉིད་དེ། རང་བཞིན་གང་གིས་བདག་ཉིད་མཚོན་པ་དེ་ནི་རང་གི་མཚན་ཉིད་ལ། དངོས་པོའི་བདག་ཉིད་ནི་དོན་བྱེད་ནུས་པའི་རང་བཞིན་གྱིས་མཚོན་པའི་ཕྱིར་དེ་ལ་རང་གི་མཚན་ཉིད་ཅེས་བརྗོད་དོ། །དེ་ཉིད་དེ་དོན་དམ་པར་ཡོད་པའི་དངོས་པོའི་རང་བཞིན་ཡིན་ནོ། །དེས་ན་དོན་འདི་ཡིན་ཏེ། དེ་དག་སྣང་བ་ནི་དོན་བྱེད་ནུས་པ་དང་མི་ནུས་བ་དག་གིས་ཐ་དད་པ་ཡིན་ཏེ། ཐུང་མོང་དང་ཐུན་མོང་མ་ཡིན་པ་ཉིད་ཙམ་གྱིས་ནི་མ་ཡིན་ནོ། །ཐུང་མོང་གི་ཡུལ་དུ་སྣང་བ་ནི་དོན་བྱེད་ནུས་པ་དང་བྲལ་བའི་ཡུལ་ཅན་ཡིན་ལ། གཅིག་ཤིག་ནི་དེ་ལས་བཟློག་པ་ཡིན་ནོ། །དེ་ནས་དེ་དག་ནི་ཡུལ་གཅིག་ཉིད་མ་ཡིན་ཏེ། གཅིག་མ་ཡིན་པ་ཉིད་ཀྱི་རྒྱུ་མཚན་ནི་འདི་ཙམ་དུ་ཟད་པའི་
ཕྱིར་རོ། །གསལ་བ་དང་མི་གསལ་བར་སྣང་བ་དག་ནི་ཡུལ་གཅིག་པ་ཉིད་དེ། དོན་བྱེད་ནུས་པར་ཁྱད་པར་མེད་པའི་ཕྱིར་རོ། །དེའི་ཕྱིར་ཡུལ་དེ་སྣང་བ་མ་ཡིན་པ་འཁྲུལ་པས་ཡུལ་དེའི་རང་བཞིན་དུ་སྣང་བའི་འཁྲུལ་པ་མ་ཡིན་པའི་ཕྱིར་མངོན་སུམ་ཉིད་དུ་རྣམ་པར་གནས་པ་ཡིན་ནོ། །ལྐོག་ཏུ་གྱུར་པའི་དོན་ཡང་རྣམ་པ་གཅིག་ཉིད་དུ་རྟོགས་པ་བསྟན་པའི་ཕྱིར། རབ་ཏུ་བྱེད་པའི་འགྲེལ་པ་གཞན་ནི་ཞེས་གསུངས་སོ། །འདི་ནི་འདི་ལྟ་བུར་གྱུར་བའི་དོན་ནི་རེ་ཞིག་མངོན་སུམ་ལ། དེའི་རང་བཞིན་དང་བྲལ་བ་གཞན་ནི་ལྐོག་ཏུ་གྱུར་པ་ཡིན་ནོ་ཞེས་ལྐོག་ཏུ་གྱུར་པའི་དོན་ནི། མངོན་སུམ་སྤངས་པས་ཡོད་པ་ཉིད་ཡིན་པར་བསྟན་ཏོ། །མངོན་སུམ་དང་མངོན་སུམ་མ་ཡིན་པ་དེ་འདི་ཉིད་ཀྱང་རྟོགས་པ་པོ་གཅིག་ལ་ལྟོས་པའི་ཕྱིར་འཆོལ་པ་མ་ཡིན་ནོ། །གཞན་དེ་ཡང་རྟོགས་པར་མི་འཐད་པ་ཡིན་ཏེ། གང་གི་ཕྱིར་མངོན་སུམ་སྣང་བའི་ཤེས་པ་བསྐྱེད་པའི་ཕྱིར་སྒོ་ནས་དེ་ལ་རང་གི་ངོ་བོ་གང་ཡིན་པ་འཇོག་པ་སྟེ། གཏོང་བའི་ནུས་པ་དེ་ལ་ཡོད་པ་མ་ཡིན་ཏེ། དེའི་ཕྱིར་འདིའི་རང་གི་ངོ་བོ་རྟོགས་པར་རིགས་པ་མ་ཡིན་ནོ། །གལ་ཏེ་ལྐོག་ཏུ་གྱུར་པ་ཉམས་སུ་མྱོང་པར་བྱ་བ་མ་ཡིན་དུ་ཆུག་ན་ཡང༌། གཞན་མཐོང་བ་ན་མ་མཐོང་བ་ཡང་རྟོགས་པར་འགྱུར་རོ་ཞེ་ན། གཞན་མཐོང་བ་ན་གཞན་མ་མཐོང་བ་ཡང་རྟོགས་པར་རིགས་པ་མ་ཡིན་ནོ། །ག་ལས་ཤེ་ན། ཧ་ཅང་ཐལ་བར་འགྱུར་བའི་ཕྱིར་རོ། །གང་ཅུང་ཟད་ཅིག་མཐོང་བ་ལ་མཐོང་བ་ཐམས་ཅད་བརྟགས་པར་བྱ་བ་ཉིད་དུ་འགྱུར་རོ་ཞེས་བྱ་བ་ནི་ཧ་ཅང་ཐལ་བར་འགྱུར་བའོ། །གལ་ཏེ་གཞན་མཐོང་བ་ན་ལྐོག་ཏུ་གྱུར་པ་བརྟག་པར་མི་རིགས་པ་ཡིན་ནོ། །འོ་ན་ནི་རྗེས་སུ་དཔག་པ་ཡང་ཚད་མ་ཉིད་དུ་མི་འགྱུར་ཏེ། དེ་ཡང་ལྐོག་ཏུ་གྱུར་པ་རྟོགས་པའི་རང་བཞིན་ཡིན་པའི་ཕྱིར་རོ་ཞེས་དོགས་ན། དེ་ཞེས་བྱ་བ་ལ་སོགས་པ་གསུངས་ཏེ། མཐོང་བ་གཞན་དེ་མེད་ན་མི་འབྱུང་བ་ཉིད་ཡིན་ན་སྟེ། མི་འཁྲུལ་པ་ཉིད་ཡིན་ནའོ། །སྐབས་ཀྱི་རྟོགས་པར་བྱ་བ་ལྐོག་ཏུ་གྱུར་པའི་དོན་ནི་འབྲེལ་པ་ཅན་དུ་ཤེས་པར་བྱས་ཏེ། རྟོགས་པར་བྱ་བ་ལྐོག་ཏུ་གྱུར་པའི་དོན་ལ་མི་འཁྲུལ་པའི་དོན་མཐོང་བ་ལས་ནི་རྟོགས་པར་རིགས་པ་ཡིན་ནོ། །
ཁྱད་པར་འདི་ཉིད་བསྟན་པའི་དོན་དུ་ཡང་ཞེས་སྨོས་སོ། །གལ་ཏེ་མེད་ན་མི་འབྱུང་བ་མཐོང་བ་ལས་ཀྱང་ལྐོག་ཏུ་གྱུར་པའི་དོན་རྟོགས་པ་ཡོད་པ་མ་ཡིན་ཏེ། དངོས་པོ་འདི་ཐམས་ཅད་ནི་དངོས་པོ་གཞན་གྱི་འབྲས་བུ་ཡིན་ལ། རྒྱུ་དང་འབྲས་བུའི་དངོས་པོར་མ་གྲུབ་པ་ལ་ལྐོག་ཏུ་གྱུར་པའི་དོན་དུ་རྟོགས་པ་ནི་ཡོད་པ་མ་ཡིན་ནོ་ཞེ་ན། དེ་ནི་ཞེས་བྱ་བ་ལ་སོགས་པ་གསུངས་སོ། །གང་གི་ཕྱིར་མཐོང་བའི་དོན་གཞན་དེ། བཙོ་བ་དང་བསྲེག་པ་ལ་སོགས་པའི་དོན་བྱེད་པ་ཇི་ལྟ་བུའི་རྣམ་པ་དང་འབྲེལ་པ་གྲུབ་པ་སྟེ། རབ་ཏུ་གྲུབ་པ་དེ་ལྟ་བུའི་རྣམ་པ་ཉིད་དཔེ་ལ་མཐོང་བ་དང་འདྲ་བར་ཕྱོགས་གང་དུ་དངོས་པོ་གཞན་དེ་མཐོང་བའི་ཕྱོགས་དེར་ཉེ་བ་ཉིད་དུ་གོ་བར་བྱེད་དེ། ཁོང་དུ་ཆུད་པར་བྱེད་ཀྱི་རང་གི་ངོ་བོ་མཐོང་བར་བྱེད་པ་ནི་མ་ཡིན་ནོ། །རྣམ་པ་འདིས་ཀྱང་ཚུལ་གསུམ་བསྟན་ཏེ། རྟགས་སུ་གྱུར་པའི་དངོས་པོ་དེ་གང་དུ་མཐོང་ཞིང་ཚད་མས་ཡུལ་དུ་བྱས་པ་དེར་བསྒྲུབ་པར་བྱ་བའི་དོན་ཉེ་བ་ཉིད་དུ་གོ་བར་བྱ་བ་དེ་ཉིད་དེ་དག་གི་ཆོས་ཅན་ཡིན་ནོ། །གྲུབ་པ་སྨོས་པས་ཀྱང་རྗེས་སུ་འགྲོ་བ་དང་ལྡོག་པའི་རང་བཞིན་འབྲེལ་པ་ངེས་པ་ཉིད་དུ་བརྗོད་པ་ཡིན་ནོ། །དེས་ན་མེད་ན་མི་འབྱུང་བ་ནི་སྒྲོན་མ་ལ་སོགས་པ་བཞིན་དུ་རང་གི་ངོ་བོ་ཉིད་ཀྱིས་གོ་བར་བྱེད་པ་ནི་མ་ཡིན་གྱི། འོན་ཀྱང་མེད་ན་མི་འབྱུང་བ་ངེས་པར་བྱེད་པ་ཉིད་ཀྱིས་དེ་སྒྲུབ་པར་བྱེད་པའི་ཡན་ལག་ཏུ་བརྗོད་ལ། དཔེ་ལ་མཐོང་བའི་དངོས་པོ་དང་འདྲ་བར་ལྐོག་ཏུ་གྱུར་པའི་དོན་ངེས་པ་ནི་སྤྱིའི་བདག་ཉིད་དུ་ཞེན་པ་ཡིན་ནོ། །གཞན་ཡང་གལ་ཏེ་འཇུག་པའི་ཡུལ་ནི་ངེས་པར་བྱས་པ་ཉིད་དུ་བརྗོད་ལ། ངེས་པའི་ཡང་སྤྱིའི་ཡུལ་ཅན་ཡིན་པའི་ཕྱིར། མངོན་སུམ་ཡང་འཇུག་པའི་ཡུལ་ལ་ལྟོས་ན་སྤྱིའི་ཡུལ་ཅན་ཉིད་ཡིན་པ་དེ་ལྟ་ན་ཡང་མངོན་སུམ་གྱི་རྗེས་ལ་བྱུང་བའི་ཞེན་པར་བྱེད་པས་དོན་དེ་རྒྱུད་གཞན་གྱིས་རང་བཞིན་གྱི་དབེན་པར་ཡུལ་དུ་བྱེད་ལ། རྗེས་སུ་དཔག་པའི་ངེས་པས་ནི་འཇུག་པའི་ཡུལ་དུ་གྱུར་པའི་རང་གི་མཚན་ཉིད་རྒྱུད་གཞན་ལས་ལོག་པའི་ཐ་དད་པའི་བདག་ཉིད་ཁྱད་པར་ཅན་རྣམ་པར་འཇོག་པར་མི་ནུས་ཏེ། འབྲེལ་པ་འཛིན་པའི་དུས་ན་མཐོང་བའི་དངོས་པོ་དང་མཚུངས་པའི་རང་བཞིན་ལ་བརྟེན་ནས་འཇུག་པའི་ཕྱིར་རོ། །དེས་ན་རང་གི་མཚན་ཉིད་ཀྱང་
འཇུག་པའི་ཡུལ་དུ་ཉེ་བར་གཞག་པ་ན། ངེས་པར་ཐ་དད་པ་རྒྱུད་གཞན་དང་ཐུན་མོང་མ་ཡིན་པ་རྣམ་པར་མི་འཇོག་པའི་ཕྱིར། རྗེས་སུ་དཔག་པ་ནི་འཇུག་པའི་ཡུལ་ལ་ལྟོས་ནས་ཀྱང་སྤྱིའི་ཡུལ་ཅན་ཡིན་ནོ། །མངོན་སུམ་ནི་ངེས་པ་ལ་ལྟོས་ནས་ཀྱང་ཁྱད་པར་གྱི་ཡུལ་ཅན་ཡིན་ནོ། །རྒྱུད་གཞན་མེད་པའི་ཁྱད་པར་ཉིད་དུ་ཡུལ་ངེས་བར་བྱེད་པ་ཡིན་པའི་ཕྱིར་རོ། །འདིར་གཟུང་བར་བྱ་བ་ལ་ལྟོས་ནས་སྤྱིའི་ཡུལ་ཅན་ཉིད་དམ་ཁྱད་པར་གྱི་ཡུལ་ཅན་ཉིད་མ་ཡིན་ཏེ། དེ་ནི་སྐབས་མ་ཡིན་པའི་ཕྱིར་རོ། །རང་གི་མཚན་ཉིད་ཡུལ་ཡིན་ན་ཡང་རྟགས་ནི་སྤྱིའི་ཡུལ་ཅན་དུ་བརྗོད་དེ། ཐ་དད་གནས་པ་མེད་པའི་ཕྱིར། །ཞེས་འཆད་པར་འགྱུར་བའི་ཕྱིར་རོ། །འདི་འདྲ་བའི་སྤྱིའི་ཚུལ་དུ་ལྐོག་ཏུ་གྱུར་པའི་དོན་རྟོགས་པའི་རྗེས་སུ་དཔག་པ་ཡིན་ཏེ་དེས་ན་ཚད་མ་གཞན་སྲིད་པ་ཡོད་པ་མ་ཡིན་ནོ་ཞེས་བྱ་བ་ནི་སྤྱིའི་ཚུལ་དུ་དོན་རྟོགས་པ་ཡང་རྗེས་སུ་དཔག་པ་ཉིད་ཡིན་པའི་ཕྱིར་ཞེས་བྱ་བས་བཤད་དོ། །དེའི་ཕྱིར་ཚད་མ་གཉིས་ཁོ་ནའི་ཚད་མ་ཡིན་ནོ། །གལ་ཏེ་འདི་སྙམ་དུ་འདི་འདྲ་བའི་རྟོགས་པ་རྗེས་སུ་དཔག་པ་ཡིན་དུ་ཆུག་ན་ཡང༌། རྣམ་པ་གཞན་ནི་ཚད་མ་གཞན་དུ་འགྱུར་རོ་ཞེ་ན། གཞན་དུ་ན་རྟོགས་པར་མི་རིགས་པའི་ཕྱིར་རོ་ཞེས་གསུངས་ཏེ། རྣམ་པ་གཞན་དུ་ནི་ལྐོག་ཏུ་གྱུར་པའི་དོན་མི་འཁྲུལ་པར་རྟོགས་པ་མེད་པའི་ཕྱིར་རོ། །དོན་འདི་ཡིན་ཏེ། གང་གི་ཕྱིར་དོན་ནི་རྣམ་པ་གཉིས་ཁོ་ན་སྟེ། མངོན་སུམ་དང་ལྐོག་ཏུ་གྱུར་པའོ། །མངོན་སུམ་ནི་དེ་སྣང་བ་ཉིད་ཀྱིས་རྟོགས་པར་འགྱུར་གྱི་རྣམ་པ་གཞན་དུ་མ་ཡིན་ལ། དེ་ཡང་མངོན་སུམ་གྱི་ཚད་མ་མ་ཡིན་ནོ། །ལྐོག་ཏུ་གྱུར་པ་ཡང་རྟགས་ཀྱི་རྗེས་སུ་འགྲོ་བའི་ཚུལ་གྱིས་རྟོགས་པར་འགྱུར་ཏེ། རྟགས་ལ་མི་ལྟོས་པའི་རྣམ་པར་རྟོག་པ་ནི་ཐེ་ཚོམ་ཉིད་ཡིན་པས་དེའི་ཡུལ་ཡང་ཐོབ་པར་མི་ནུས་ཏེ། གཉི་གའི་བདག་ཉིད་ཀྱང་མེད་པའི་ཕྱིར་ཞེས་བཤད་ཟིན་ཏོ། །རྗེས་སུ་འགྲོ་བའི་ཚུལ་དུ་རྟོགས་པ་ཡང་རྗེས་སུ་དཔག་པ་ཡིན་ནོ། །དེས་ན་ཤེས་པ་གཞན་ལ་ནི་ཐོབ་པར་བྱ་བའི་ཡུལ་འགའ་ཡང་ཡོད་པ་མ་ཡིན་ལ། ཚད་མ་ཡིན་ན་ཡང་ཡུལ་གཞན་ཡོད་པ་མ་ཡིན་པའི་ཕྱིར་གཏན་ཚིགས་མ་གྲུབ་པ་ཉིད་མ་ཡིན་ལ། མངོན་སུམ་དང་རྗེས་སུ་དཔག་པའི་ཡུལ་ཅན་ཉིད་ཀྱང༌། དེའི་མཚན་ཉིད་
ཁོ་ན་ཡིན་པའི་ཕྱིར། ཇི་ལྟར་ན་ཚད་མ་གཞན་སྲིད་པར་འགྱུར། སྒྲ་ལས་བྱུང་བ་ལ་སོགས་པ་དག་ལས་རྣམ་པ་གཞན་དུ་རྟོགས་པ་གང་ཡིན་པ་ཡང་ཡོད་པ་མ་ཡིན་ནམ། ཅི་སྟེ་སྒྲ་ལས་རྟོགས་པ་ཡང་རྗེས་སུ་དཔག་པའི་ནང་དུ་འདུའོ་ཞེ་ན། དེ་ནི་མི་རིགས་ཏེ། གང་གི་ཕྱིར་རྗེས་སུ་དཔག་པ་ནི་ཚུལ་གསུམ་པའི་རྟགས་ལ་བརྟེན་པ་ཡིན་ལ། རྗེས་སུ་འགྲོ་བ་དང་ལྡོག་པའི་རྗེས་སུ་འགྲོ་བ་དང་ལྡན་པའི་སྒྲ་དག་ལས་ལྐོག་ཏུ་གྱུར་པའི་དོན་ལ་འཁྲུལ་པ་མེད་པར་རྟོགས་པ་ནི་ཚད་མ་གཞན་ཡིན་ནོ་ཞེས་བསྟན་པའི་ཕྱིར། དེའི་ཞེས་བྱ་བ་ལ་སོགས་པ་སྨོས་སོ། །དེའི་ཞེས་བྱ་བ་ནི་མི་བཟོད་པའི་ཚིག་སྟེ། སྒྲའི་རྟོགས་པ་རྗེས་སུ་དཔག་པའི་ནང་དུ་འདུའོ་ཞེས་བྱ་བ་གང་ཡིན་པ་འདི་མ་བཟོད་པའོ། །གང་གི་ཕྱིར་རྗེས་སུ་འགྲོ་བ་དང་ལྡོག་པའི་བདག་ཉིད་ཀྱི་འབྲེལ་པ་ཁོ་ན་ནི་རྟགས་ཀྱི་མཚན་ཉིད་དེ། རང་བཞིན་མ་ཡིན་གྱི་འོན་ཀྱང་ཚུལ་གཞན་ཡང་ཡོད་དོ་ཞེས་ངེས་པ་འགོག་པ་ཡིན་གྱི་འབྲེལ་པ་རྟགས་ཀྱི་མཚན་ཉིད་མ་ཡིན་ནོ་ཞེས་བརྗོད་པ་ནི་མ་ཡིན་ནོ། །རང་བཞིན་གཞན་དེ་ཡང་གང་ཞེ་ན། གཟུང་བའི་ཆོས་དང་ལྡན་པའི་ཆོས་ཅན་ཞེས་སྨོས་ཏེ། བསྒྲུབ་པར་བྱ་བ་དང་སྒྲུབ་པར་བྱེད་པའི་ཆོས་དག་གི་རྟེན་དུ་གྱུར་པའི་ཆོས་ཅན་ལ་རྟགས་ཡོད་པ་གང་ཡིན་པའོ། །མཐོང་བ་ཞེས་བྱ་བ་ནི་མཐོང་བའི་ཡུལ་ཅན་གྱིས་ཡུལ་ཡོད་པ་སྟོན་པར་བྱེད་དོ། །མཐོང་བ་སྟེ་ཚད་མས་ཡུལ་དུ་བྱས་པའི་ཡོད་པ་ཉིད་ནི་སྒྲུབ་པའི་ཡན་ལག་ཡིན་ནོ་ཞེས་ཅི་ནས་ཀྱང་རྟོགས་པར་བྱ་བའི་ཕྱིར་རོ། །དེ་ནི་སྒྲ་རྣམས་ལ་མེད་པའི་ཕྱིར་ལྡོག་ཏུ་ཟིན་ཀྱང་ཚུལ་གཉིས་པོ་འདི་ལས་རྟོགས་པ་ཉིད་དོ་ཞེས་བྱ་བའི་དོན་ཏོ། །ཡང་ཇི་ལྟར་ན་ཕྱོགས་ཀྱི་ཆོས་ཉིད་མེད་ཅེ་ན། གང་གི་ཕྱིར་སྐྱེས་བུ་ཆོས་ཅན་ཡིན་ན་ནི་དེ་ལ་སྒྲ་འབའ་ཞིག་ཡོད་ཀྱི་དོན་ནི་མ་ཡིན་ཏེ། གཉི་གའི་རྟེན་ཡང་ཆོས་ཅན་ཡིན་པའི་ཕྱིར་རོ། །སྒྲའི་བྱེ་བྲག་ཆོས་ཅན་ལ་སྒྲའི་སྤྱི་གཏན་ཚིགས་ཀྱང་མ་ཡིན་ཏེ། དེ་དོན་དང་ལྷན་ཅིག་འབྲེལ་པ་མེད་པའི་ཕྱིར་ཏེ། སྒྲ་དོན་གྱི་འབྲེལ་པ་ནི་བརྗོད་པར་བྱ་བ་དང་རྗོད་པར་བྱེད་བ་ཡིན་ལ། ཁྱད་པར་ཡང་རྗོད་པར་བྱེད་པ་མ་ཡིན་པའི་ཕྱིར་རོ། །སྒྲའི་སྤྱིའི་ཆོས་ཅན་ལ་སྒྲའི་ཁྱད་པར་གཏན་ཚིགས་ཀྱང་མ་ཡིན་ཏེ། དེ་ཡང་སྔ་
མ་བཞིན་དུ་བསྒྲུབ་པར་བྱ་བའི་དོན་དང་མ་འབྲེལ་པའི་ཕྱིར་རོ། །ཅི་སྟེ་ཡང་དོན་གྱི་ཁྱད་པར་ཆོས་ཅན་ལ་དོན་གྱི་སྤྱི་བསྒྲུབ་བྱར་རྟོགས་པ་དེ་ལྟ་ན་ཡང༌། དོན་གྱི་ཁྱད་པར་དང་སྒྲ་ལྷན་ཅིག་བརྗོད་པར་བྱ་བ་དང༌། རྗོད་པར་བྱེད་པའི་དངོས་པོ་མེད་པའི་ཕྱིར་ཕྱོགས་ཀྱི་ཆོས་ཉིད་དུ་རིགས་པ་མ་ཡིན་ནོ། །དོན་གྱི་ཁྱད་པར་གྲུབ་ན་ཡང་དོན་གྱི་སྤྱི་གྲུབ་པའི་ཕྱིར་རྟགས་ཉེ་བར་བླངས་པ་དོན་མེད་པ་ཡིན་ནོ། །དོན་གྱི་སྤྱི་ཆོས་ཅན་ཡིན་ན་ཡང་བསྒྲུབ་པར་བྱ་བ་ཁྱད་པར་དང༌། རྟགས་སྒྲ་འབྲེལ་པ་མེད་པའི་ཕྱིར་རྟགས་མ་ཡིན་པ་ཉིད་དོ། །ཆོས་ཅན་ཡང་རྟགས་ཀྱི་བྱ་བའི་སྔོན་རོལ་དུ་གྲུབ་པ་ཡིན་པའི་ཕྱིར་སྒྲ་སྦྱོར་བའི་སྔོན་རོལ་དུ་དོན་གྲུབ་ན་སྒྲ་སྦྱར་བས་ཅི་ཞིག་བྱ། མ་གྲུབ་པ་ཉིད་ཡིན་ན་ཡང་ཇི་ལྟར་ཆོས་ཅན་ཉིད་ཡིན་ན། དེའི་ཕྱིར་སྒྲ་རྣམས་ལ་ཕྱོགས་ཀྱི་ཆོས་ཡོད་པ་མ་ཡིན་ཏེ། དེས་ན་ཚུལ་གཉིས་ཀྱི་སྒྲ་ལས་དོན་འཁྲུལ་པ་མེད་པར་རྟོགས་པ་ནི་ཚད་མ་གཞན་ཡིན་ནོ་ཞེས་བྱ་བ་ནི་གཞན་གྱིའོ། །འདིར་དཔྱད་པར་བྱ་སྟེ། འཇུག་པའི་ཡུལ་རྣམ་པར་འཇོག་པར་བྱེད་པ་ནི་ཚད་མར་འདོད་དོ། །དེ་ལ་བརྗོད་པར་བྱ་བར་འགྱུར་བའི་ཕྱི་རོལ་གྱི་དོན་དང་འབྲེལ་པ་ཡོད་དུ་ཆུག་ཀྱང་ཚིག་ལས་དོན་རྟོགས་པའི་ཤེས་པ་སྐྱེས་པ་གང་ཡིན་པ་དེས་ནི། གང་གིས་བུམ་པ་དོན་དུ་གཉེར་བ་འགའ་ཞིག་སྤངས་ནས་འགའ་ཞིག་ལ་འཇུག་པར་འགྱུར་བ་འཇུག་པའི་ཡུལ་འགའ་ཞིག་བཞག་པ་ནི་ཡོད་པ་མ་ཡིན་ནོ། །འདི་ལྟར་ཡུལ་གྱི་ཁྱད་པར་དང་འབྲེལ་པའི་འཇུག་པའི་ཡུལ་གྱི་དངོས་པོ་དག་ནི་སྐྱེས་བུ་འཇུག་པར་སྤྲོའི། བུམ་པའི་སྒྲས་ནི་ཡུལ་འགའ་ཞིག་གིས་ཁྱད་པར་དུ་བྱས་པའི་བུམ་པ་མ་བསྟན་པའི་ཕྱིར། ཇི་ལྟར་ན་དེ་ལ་འཇུག་པར་འགྱུར་ཞེས་བསྟན་པའི་དོན་དུ་དེ་དག་དེ་ལ་མ་མཐོང་ན་ཞེས་བྱ་བ་ལ་སོགས་པ་གསུངས་ཏེ། སྒྲ་དེ་དག་བསྒྲུབ་པར་བྱ་བའི་དངོས་པོ་དང་འབྲེལ་པར་རུང་བའི་ཕྱོགས་ཀྱི་ཁྱད་པར་ཆོས་ཅན་དེ་ལ་མཐོང་བ་མ་ཡིན་ན། གང་ལ་སྐྱེས་བུ་འཇུག་པར་འགྱུར་བ་དོན་ཅི་ཞིག་བསྒྲུབ་པའི་ཚུལ་གྱིས་ཉེ་བར་འཇོག་པར་བྱེད། འགའ་ཞིག་ཏུ་རང་གི་དངོས་པོ་མཐོང་བ་ན་དེར་མེད་ན་མི་འབྱུང་བའི་དངོས་པོ་ཉེ་བ་ཡིན་པར་སྟོན་པ་ནི་འཇུག་པའི་ཡན་ལག་ཏུ་བྱེད་པ་ཡིན་ན། སྐྱེས་བུ་གང་ལ་སྒྲ་མཐོང་བ་དེ་ལ་ནི་དོན་ཉེ་བར་བསྡུ་བར་ནུས་པ་
མ་ཡིན་ལ། ཕྱོགས་ལ་སོགས་པ་གང་དུ་བུམ་པ་གནས་པ་དེར་ནི་སྒྲ་མ་མཐོང་སྟེ། དེས་ན་སྒྲ་ནི་རང་གི་ཡུལ་དུ་བསྒྲུབ་པར་བྱ་བའི་དོན་ཉེ་བར་སྡུད་པ་མ་ཡིན་པའི་ཕྱིར་འཇུག་པའམ་ལྡོག་པར་བྱེད་བ་མ་ཡིན་ནོ། །དེ་བཞིན་དུ་གང་ཞིག་སྤོང་བའི་བདག་ཉིད་ཀྱི་འཇུག་པའི་ཡུལ་དུ་འགྱུར་བ་སྒྲུབ་པར་བྱེད་པའི་དོན་གྱིས་དབེན་པའི་ཕྱོགས་འགའ་ཞིག་སྟོན་པར་བྱེད་པ་ཡང་མ་ཡིན་ནོ། །འོ་ན་ཞེས་བྱ་བ་ནི་མི་བཟོད་པའི་ཚིག་སྟེ། སྒྲ་གང་ཞིག་ཕྱོགས་ཀྱི་ཆོས་དང་བྲལ་བས་ན་ཕྱོགས་འགའ་ཞིག་མི་བསྒྲུབ་ཅིང༌། འགའ་ཞིག་ཏུ་འགའ་ཞིག་འགོག་པ་མ་ཡིན་པའི་ཕྱིར་འཇུག་པ་དང་ལྡོག་པའི་ཡན་ལག་སྡུད་པ་མ་ཡིན་པ་ཚད་མ་ཉིད་དུ་བདག་གིར་བྱེད་ཅེས་བྱ་བ་དེ་མི་བཟོད་པའོ། །ཅིག་ཤོས་ཀྱིས་ཀྱང་སྒྲ་རྣམས་རྗེས་སུ་དཔག་པ་དང་མཚུངས་པར་མཐོང་ནས་གང་ཞེས་བྱ་བ་ལ་སོགས་པ་སྨོས་ཏེ། གང་ཞིག་དང་སྒྲ་སྔར་འབྲེལ་པར་མཐོང་བ་དེ་ལ་དྲན་པར་བྱེད་དེ། དེས་ན་དེ་དག་ཚད་མ་ཡིན་ནོ། །གལ་ཏེ་དྲན་པར་བྱེད་པ་ཡིན་པའི་ཕྱིར་ཚད་མ་མ་ཡིན་ན་ནི་རྗེས་སུ་དཔག་པ་ཡང་ཚད་མ་མ་ཡིན་པར་ཐལ་བར་འགྱུར་ཏེ། དེ་ཡང་སྔར་མཐོང་བའི་ཡུལ་ཅན་ཉིད་ཡིན་པའི་ཕྱིར་རོ། །ཅི་སྟེ་ཡང་དྲན་པར་བྱ་བ་དེ་ལ་ཡུལ་གྱི་ཁྱད་པར་དང་འབྲེལ་པ་སྔ་ན་མེད་པ་རྟོགས་པར་བྱེད་དོ་ཞེ་ན། སྒྲ་ལས་བྱུང་བའི་རྟོགས་པ་ཡང་ཡུལ་གྱི་ཁྱད་པར་དང་འབྲེལ་པ་ཡོད་དོ། །དྲན་པར་བྱ་བའི་ཡུལ་ངེས་པ་མ་ཡིན་པའི་ཕྱིར་རོ་ཞེ་ན་མ་ཡིན་ཏེ་དེར་ཡང་དྲན་པའི་ཡུལ་དང་དུས་ཀྱི་ཁྱད་པར་དང་འབྲེལ་པའི་ཕྱིར་རོ། །དངོས་པོ་ལ་བརྟེན་པའི་ཡུལ་གྱི་ཁྱད་པར་དང་འབྲེལ་པ་ཡང་དྲན་པ་ལ་བརྟེན་པའི་ཡུལ་གྱི་ཁྱད་པར་དང་འབྲེལ་པ་ལས་བྱེ་བྲག་ཅུང་ཟད་ཡོད་པ་ཡིན་ནོ། །ཐམས་ཅད་དུ་རྟགས་ཀྱི་བསྒྲུབ་བྱ་ལས་སྔ་ན་མེད་པ་ཅུང་ཟད་ཅིག་རྟོགས་པར་བྱ་བར་བརྗོད་པར་བྱ་བ་ཡིན་ལ། དེ་ཡང་གཉི་ག་ལ་ཁྱད་པར་ཡོད་པ་མ་ཡིན་པའི་ཕྱིར་རོ། །གང་གི་ཕྱིར་སྒྲ་དང་རྟགས་དག་མཐོང་བ་ཙམ་ལ་དྲན་པ་བསྐྱེད་པའི་བྱ་བ་ལ་ནི་བྱེ་བྲག་ཡོད་པ་མ་ཡིན་ནོ། །ཡུལ་དང་དུས་ཀྱི་ཁྱད་པར་ཡང་དོན་གྱི་ཤུགས་ལས་ཡིན་པའི་ཡུལ་དང་དུས་གཞན་ན་གནས་པའི་མེས་ནི་ཡུལ་དེ་ན་གནས་པའི་དུ་བསྐྱེད་པར་མི་བྱེད་
པའི་ཕྱིར། དོན་གྱི་ཤུགས་ཀྱིས་ཁྱད་པར་རྟོག་པ་དེ་བཞིན་དུ་འདི་ལ་ཡང་ཡུལ་གྱི་ཁྱད་པར་དུས་ཀྱི་ཁྱད་པར་ན་གནས་པའི་སྒྲ་ལས་དྲན་བཞིན་པའི་དོན་དེ་ཡུལ་གྱི་ཁྱད་པར་དང་དུས་ཀྱི་ཁྱད་པར་དུ་དྲན་པའི་སྤྱོད་ཡུལ་དུ་འགྱུར་བའི་ཕྱིར། ཁྱད་པར་འགའ་ཡང་ཡོད་པ་མ་ཡིན་ནོ། །སྒྲའི་ཡུལ་དང་དུས་ན་གནས་པར་བྱ་བ་དྲན་པར་བྱ་བ་ཡིན་པའི་ཕྱིར། ཡུལ་དང་དུས་གཞན་དུ་མཐོང་བ་དྲན་པའི་ཡུལ་དང་དུས་ཀྱི་ཁྱད་པར་དང་འབྲེལ་པར་འགྱུར་རོ། །དེ་ཉིད་ཀྱི་ཕྱིར་དྲན་པའི་རང་བཞིན་གཉི་ག་སྔ་ན་མེད་པར་རྟོགས་པ་ཡང་བྱེ་བྲག་མེད་པའི་ཕྱིར་གཉི་ག་ཡང་ཚད་མའམ་ཚད་མ་མ་ཡིན་པར་འགྱུར་རོ་ཞེ་ན། སློབ་དཔོན་གྱིས་སྒྲ་དང་རྟས་མེད་པར་ཡང་དྲན་པ་འདི་འདྲ་བ་བསྟན་པའི་སྒྲོ་ནས་སྒྲ་རྣམ་ཚད་མ་མ་ཡིན་པར་བསྟན་པའི་ཕྱིར། སྒྲ་དང་རྟགས་མེད་པར་ཞེས་བྱ་བ་ལ་སོགས་པ་གསུངས་ཏེ། ཅི་ཞིག་ལྟར་ཞེས་བྱ་བ་ནི་འགའ་ཞིག་ཏུ་བསྒྲིམ་པ་ལ་སོགས་པའོ། །རང་ཉིད་ཅེས་བྱ་བ་ནི་སྒྲ་དང་རྟགས་མེད་པར་དྲན་པའོ། །མི་འགྱུར་རམ་ཅི་སྐད་དུ་བཤད་པའི་ཁྱད་པར་དང་ལྡན་པར་འགྱུར་བ་ཉིད་དོ། །བསམ་པ་ནི་འདི་ཡིན་ཏེ། ཇི་ལྟར་དེ་ཚད་མ་མ་ཡིན་པ་བཞིན་དུ་སྒྲ་ལས་སྐྱེས་པ་ཡང་ངོ་ཞེས་བྱ་བའོ། །འདིར་བརྒྱ་ལ་གཞན་དག་སྙོམས་པར་བྱེད་དེ། རེ་ཞིག་དྲན་པ་འདི་འདྲ་བ་ནི་རྗེས་སུ་དཔག་པའི་དྲན་པ་ལས་ཁྱད་པར་ཡོད་པ་མ་ཡིན་ནོ། ཇི་ལྟར་དྲན་པ་འདི་འཁྲུལ་པ་དེ་ལྟར་ནི་རྗེས་སུ་དཔག་པའི་དྲན་པ་ལ་ཡང་འཁྲུལ་པ་ཡོད་པ་ཉིད་དེ། རང་ཉིད་དྲན་པར་བྱེད་པ་ཡང་འབད་རྩོལ་ལ་སོགས་པ་ལས་དུ་བ་མེད་པར་དྲན་པར་འགྱུར་བ་ཁོ་ནའོ། །དེ་ཡང་སྒྲའི་དྲན་པ་བཞིན་དུ་རྗེས་སུ་དཔག་པ་དང་མཚུངས་པ་ཡིན་ཏེ། དེས་ན་དེ་ཡང་ཚད་མར་ཁས་བླང་བར་བྱ་བའམ། རྗེས་སུ་དཔག་པ་ཡང་ཚད་མ་མ་ཡིན་པར་འགྱུར་རོ་ཞེས་སློབ་དཔོན་རང་ཉིད་ཀྱིས་དོགས་པ་བསུ་ནས། གནས་སྐབས་འདི་གཉིས་ལ་ཞེས་གསུངས་ཏེ། སྒྲ་དང་འབད་རྩོལ་ལ་སོགས་པས་དྲན་པའི་གནས་སྐབས་འདི་གཉིས་ལ་བྱེ་བྲག་ཀྱང་ཡོད་དམ་ཅི། འདི་སྐད་དུ་སྨྲས་པ་ཡིན་ཏེ། དྲན་པའི་གནས་སྐབས་འདི་གཉི་ག་ཡང་དྲན་པར་བྱ་བའི་དངོས་པོ་ལ་བརྟེན་པའི་ཁྱད་པར་ཅུང་ཟད་ཀྱང་ཡོད་པ་མ་
ཡིན་ནོ། །དེས་ན་གཉི་ག་ཡང་བྱེ་བྲག་མེད་པར་ཚད་མའམ་མ་མ་ཡིན་པར་འགྱུར་གྱི། ཁོ་བོ་ཅག་གི་ནི་དྲན་པར་བྱ་བའི་དངོས་པོ་ལ་བརྟེན་པའི་ཁྱད་པར་ཆེ་སྟེ། གང་གི་ཕྱིར་གང་དུ་དུ་བ་མཐོང་བ་དེར་རང་སྐྱེད་པར་བྱེད་པའི་མེ་མི་ལྡན་པ་རྣམ་པར་བཅད་ནས་འཇོག་པ་ནས་འཇུག་པའི་ཡན་ལག་ཏུ་བྱེད་པ་ཡིན་ཏེ། ཡུལ་གཞན་ན་གནས་པའི་མེས་ཡུལ་དེ་ན་གནས་པའི་དུ་བ་མི་སྐྱེད་པའི་ཕྱིར་རོ། །དེས་ན་རང་སྐྱེད་པར་བྱེད་པ་སྟོན་པ་ན། ཡུལ་དེ་ན་གནས་པའི་མེ་སྟོན་པར་བྱེད་པ་ཡིན་ལ། དེ་ཡང་འཇུག་པའི་ཡན་ལག་ཡིན་གྱི་འབད་རྩོལ་ལས་མེ་དྲན་པ་ནི་སྔ་ན་མེད་པའི་ཡུལ་དང་དུས་ཀྱི་ཁྱད་པར་དང་འབྲེལ་པའི་མེ་འཇུག་པའི་ཡུལ་དུ་བྱེད་པ་མ་ཡིན་ནོ། །དེས་ན་སྔ་ན་མེད་པའི་ཡུལ་དང་དུས་ཀྱི་ཁྱད་པར་དང་འབྲེལ་པ་མ་ངེས་པ་ནི་སྒྲུབ་པར་བྱེད་པ་མ་ཡིན་པའི་ཕྱིར་རོ། །ཚད་མ་མ་ཡིན་པས་སྒྲ་དག་ཁོ་ན་ཚད་མ་མ་ཡིན་ནོ་ཞེས་མཇུག་བསྡུ་བའི་ཕྱིར། དེའི་ཕྱིར་འདི་དག་ཡུལ་ལམ་དུས་འགའ་ཞིག་ཏུ་ཞེས་གསུངས་ཏེ། སྒྲུབ་པའམ་འགོག་པ་མི་བྱེད་བ་སྟེ་དངོས་པོ་དང་དངོས་པོ་མེད་པ་དག་མ་འབྲེལ་པ་རྣམ་པར་མི་གཅོད་པ། ཇི་ལྟར་འགའ་ཞིག་གི་ཚད་མ་མ་ཡིན་ཏེ། འཇུག་པའི་ཡུལ་སྟོན་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །འདི་སྙམ་དུ་ངག་གི་ཁྱད་པར་ནི་འཇུག་པའི་ཡུལ་རྣམ་པར་འཇོག་པའི་ཕྱིར་ཚད་མ་ཡིན་ཏེ། འདི་ལྟར་ཕྱོགས་ག་གེ་མོ་ཞིག་ན་བུམ་པ་ཡོད་དོ་ཞེས་ཡུལ་གྱི་ཁྱད་པར་མ་འབྲེལ་པ་རྣམ་པར་བཅད་ནས་བུམ་པ་འཇུག་པའི་ཡུལ་དུ་རྟོགས་པར་བྱེད་དོ་ཞེས་དོགས་པ་ལ་དེ་དག་ལས་ཞེས་སྨོས་ཏེ། ངག་ཏུ་གྱུར་པ་དེ་དག་ལས་སྤངས་བ་དང་བླང་བའི་མཚན་ཉིད་ཀྱི་དོན་འཇུག་པའི་ཡུལ་དུ་གྱུར་པ་འགྲུབ་པ་མ་ཡིན་ནོ། །འདི་ལྟར་དེ་དག་གི་མངོན་སུམ་བཞིན་དུ་དོན་གྱི་རང་གི་ངོ་བོ་ཉིད་མཐོང་བ་ནི་མ་ཡིན་ན་གང་ཞིག་འཇུག་པའི་ཡུལ་དུ་འགྱུར། དེས་ན་དོགས་པ་མ་བསལ་བའི་སྒྲ་འདི་དག་པས་ཡོད་དམ་འོ་ན་ཏེ་མེད་ཅེས་དོན་གཅིག་ཏུ་ངེས་པར་རྟོགས་ལ་ཐོབ་པར་བྱ་བའི་དངོས་པོ་མ་ངེས་པའི་དོན་ཀྱང་ཡོད་པ་མ་ཡིན་ཏེ། དེས་སྒྲ་ཉེ་བར་གཞག་པ་བརྟགས་པའི་དོན་ལ་སྤང་བའམ་སྤང་བར་བྱ་བ་ཡོད་པ་མ་ཡིན་པའི་ཕྱིར། དེ་དག་ལས་དོན་འགྲུབ་པར་
ག་ལ་འགྱུར། འཇུག་པ་ན་སྤང་བ་ལ་མི་འཛུལ་བས་ན་གདོན་མི་ཟ་བར་གང་ལས་ཅུང་ཟད་ཅིག་ཐོབ་པར་འགྱུར་བ་འཐོབ་པའི་རྒྱུ་མཚན་གྱི་ཤེས་པ་གཞན་སྐྱེ་བ་ཡིན་ནོ། །འདི་སྙམ་དུ་གལ་ཏེ་རང་གི་ངོ་བོ་སྣང་བ་མ་ཡིན་དུ་ཆུག་ཀྱང་ཅི་དུ་བ་ལ་སོགས་པས་མེ་བཞིན་དུ་ཡུལ་དེ་ལ་ངེས་པ་ཙམ་ཡང་སྐྱེད་པར་མི་བྱེད་དམ་ཞེ་ན། དེ་དག་དེར་འབྲེལ་པ་མ་གྲུབ་པའི་ཕྱིར་རོ་ཞེས་སྨོས་ཏེ། སྒྲ་དེ་དག་ཕྱི་རོལ་གྱི་དངོས་པོ་དེར་དེའི་བདག་ཉིད་དང་དེ་ལས་བྱུང་བའི་མཚན་ཉིད་འབྲེལ་པ་མ་གྲུབ་པའི་ཕྱིར་རོ། །འབྲེལ་པ་མེད་པའི་དངོས་པོ་གཞན་མཐོང་བ་ནང་གི་ངོ་བོ་སྣང་བ་མ་ཡིན་པའི་དངོས་པོ་གཞན་ངེས་པར་རིགས་པ་མ་ཡིན་ཏེ། དོགས་པ་མ་བཟློག་པའི་ཕྱི་རོལ་གྱི་དོན་མེད་ཀྱང་དོན་དེ་ལ་ངག་སྦྱོར་བ་མ་མཐོང་སྟེ། དཔེར་ན་ཆུ་ཀླུང་གི་ངོགས་ན་བུ་རམ་གྱི་ཤིང་རྟ་བདལ་བ་ཡོད་དོ་ཞེས་བྱ་བ་འབྲལ་པ་མེད་པ་བཞིན་ནོ། །ངག་གི་སྐབས་ཀྱི་སྐྱོན་འདི་ནི་ཚིག་ལ་ཡང་མཚུངས་པ་ཡིན་ཏེ། དཱི་ལྟར་དོན་དེ་ཡོད་པ་མ་ཡིན་ཡང་དེའི་ཚིག་སྦྱོར་བར་མཐོང་བའི་ཕྱིར་རོ། །ཚིག་གི་དོན་རྣམ་པ་ཐམས་ཅད་དུ་མེད་པ་མ་ཡིན་ནོ་ཞེ་ན། དེ་དེ་ལྟར་བདེན་ན་ཡང་དཔེར་ན་མེད་དང་དུ་བ་བཞིན་དུ་སྒྲ་རྣམས་བློའི་བར་ཆད་ལ་མི་ལྟོས་པར་དངོས་པོ་དང་ལྷན་ཅིག་འབྲེལ་པ་ནི་མ་ཡིན་ཏེ། འོན་ཀྱང་བློས་བར་དུ་ཆོད་པ་ཉིད་དོ། །འདི་ལྟར་དོན་ཡོད་ན་དེ་མཐོང་བ་ཡིན་ལ། དེ་ལས་དེ་བསྟན་པའི་བསམ་འབྱུང་ཞིང༌། དེ་ལས་བརྗོད་པར་འདོད་པ་དེ་ལས་ནི་སྒྲ་འབྱུང་བ་ཡིན་ནོ། །དེའི་ཕྱིར་གང་གི་ཚེ་མངོན་པར་འདོད་པའི་དོན་མཐོང་བའམ། རྟོགས་པའི་བསམ་པ་མེད་པར་ཚིག་སྦྱོར་བ་དེའི་ཚེ་འཁྲུལ་པ་ཡིན་ལ་དོན་གཞན་བསྟན་པར་བསམ་པ་ན་ཡང་གསལ་བར་འཁྲུལ་པ་ཡིན་ནོ། །སྔར་ནི་དེ་ལྟར་སྒྲ་རྣམས་བསྒྲུབ་པར་བྱ་བ་དང་འབྲེལ་པ་ཁས་བླངས་ནས་ཕྱོགས་ཀྱི་ཆོས་ཉིད་མེད་པས་ཚད་མ་ཡིན་པ་སྤངས་པ་ཡིན་ལ། ད་ལྟ་ནི་མེད་ན་མི་འབྱུང་བ་དེ་ཉིད་རྩ་བ་དང་བཅས་ཏེ་སུན་ཕྱུང་བ་ཡིན་ནོ། འོ་ན་རྗེས་སུ་དཔག་པའི་ནང་དུ་ཇི་ལྟར་འདུ་བར་འགྱུར་ཞིང་གང་ཞིག་ལ་འདི་དག་ཚད་མ་ཡིན་ཞེ་ན། སྨྲ་བ་པོ་ཞེས་བྱ་བ་ལ་སོགས་པ་སྨོས་ཏེ། སྨྲ་བ་བོའི་འདོད་པའི་དོན་ནི་འདོད་པས་ཡུལ་དུ་བྱས་པ་ཡིན་ལ། དེ་ཡང་སྣང་བ་དང་བརྟགས་པ་
གཅིག་ཏུ་བྱས་པའི་ཕྱིར་རང་གི་མཚན་ཉིད་ཀྱང་ཡིན་མོད་ཀྱི་དེ་ལ་ནི་ཚད་མ་ཡིན་པ་སྔར་བདག་པས་ལྷག་པར་གྱུར་པའི་ཕྱི་རོལ་དུ་ཞེན་པར་བྱས་པའི་རྣམ་པར་རྟོག་པའི་སྣང་བ་ཉིད་ལ་མངོན་པར་འདོད་པའི་དོན་དུ་བརྗོད་པ་ཡིན་ནོ། །སྣང་བ་དེ་ཡང་ཤེས་པ་ལས་ཐ་དད་པ་མ་ཡིན་ཏེ། དེས་ན་བསྟན་པར་བྱ་བའི་དོན་དུ་སྣང་བ། བརྗོད་པར་འདོད་པ་ཀུན་ནས་སློང་བར་བྱེད་པའི་རྣམ་པར་རྟོག་པའི་རྣམ་པར་ཤེས་པ་ཉིད་ལ་དེ་སྐད་དུ་བརྗོད་པ་ཡིན་ནོ། བསྟན་པར་བྱ་བའི་དོན་དུ་སྣང་བ་དེ་ཉིད་རྗེས་སུ་དཔག་པར་བྱ་བ་ཡིན་གྱི་བརྗོད་པར་འདོད་པ་ཙམ་ནི་མ་ཡིན་ནོ་ཞེས་བསྟན་པའི་དོན་དུ་འདོད་པའི་དོན་ཞེས་བརྗོད་དོ། །གཞན་དུ་བརྗོད་པར་འདོད་པ་ཞེས་སྨྲ་བར་འགྱུར་བའི་ཕྱིར་རོ། །གོ་བར་རུང་བའི་ཕྱིར་ཞེས་བྱ་བ་འདི་ནི་སྲིད་པའི་ཚིག་སྟེ། སྒྲ་རྣམས་ཀྱིས་ནི་དོན་སྟོན་པའི་བསམ་པ་རྗེས་སུ་དཔག་པར་ནུས་སྲིད་ཀྱི་ཕྱི་རོལ་མ་ཡིན་ནོ་ཞེས་བྱ་བའི་དོན་ཏོ། །ཡང་ན་ནུས་པའི་དོན་ཏེ། འདོད་པའི་དོན་གོ་བར་ནུས་ཞེས་བྱ་བའི་དོན་ཏོ། དེ་དག་ལས་ཤེ་ན། སྨྲས་པ་བུམ་པ་ཁྱེར་ཤོག་ཅེས་བྱ་བའི་ངག་གི་དོན་སྣང་བའི་སེམས་པ་ལས་ནི་བརྗོད་པར་འདོད་པ་འབྱུང་ལ། དེ་ལས་གནས་དང་བྱེད་པ་ཕྲད་ཅིང་དེ་ལས་སྒྲ་སྐྱེ་བ་ཡིན་ནོ། །དེ་ལས་སྒྲ་བརྗོད་པར་འདོད་པ་དེ་སྲིད་དུ་གནས་དང་བྱེད་པ་ཕྲད་པའི་སྒྲུབ་པར་བྱེད་པའི་རྒྱུ་འཁྲུལ་པ་མེད་པ་ཡིན་ནོ། །ངག་བརྗོད་པར་འདོད་པ་མེད་པར་ངག་སོ་སོ་དང༌། ཚིག་དང་ཡི་གེ་སོ་སོའི་གནས་དང༌། བྱེད་པ་ཕྲད་པ་ནི་མ་ཡིན་ཏེ། འོན་ཀྱང་ངག་བརྗོད་པར་འདོད་པ་གོམས་པའི་རྗེས་སུ་མཐུན་པ་ལས་འགའ་ཞིག་ལ་གནས་དང་བྱེད་པ་ཚོགས་པའི་རྒྱུ་མཚན་གྱིས་ཤེས་པའི་རྒྱུན་འཕེན་པར་བྱེད་པ་འབའ་ཞིག་ཏུ་ཟད་དོ། །གང་གི་ཕྱིར་གཞུང་གོམས་པ་འདོན་པར་རྩོམ་པ་ན། གཉིད་ཀྱི་རྩོམ་པས་ཡིད་ནོན་ཀྱང་བསྒྲིམ་པ་མེད་པར་ཡོངས་སུ་མ་རྫོགས་པ་འདོན་པ་ཉིད་ཀྱི་ཕྱིར་རོ། །འཁྲུལ་པ་མེད་པའི་བརྗོད་པར་འདོད་པ་དེ་རྗེས་སུ་དཔག་པའི་འབྲས་བུ་ནི་སྲོག་ཆགས་ཙམ་དུ་རྟོགས་པ་ཡིན་ལ། དེ་ཡང་འདིར་སློབ་དཔོན་གྱི་བཞེད་པ་མ་ཡིན་གྱི་དེའི་སྒྲུབ་པར་བྱེད་པ་དོན་དུ་སྣང་བའི་བསམ་པ་དེ་ནི་འདིར་རྗེས་སུ་དཔག་པར་བྱ་བར་བཞེད་པ་ཡིན་ནོ། །བརྗོད་པར་འདོད་པའི་བསམ་པ་དེ་
ཡང་སྤྱོས་པ་དང༌། གོམས་པ་དང་ལུང་འདོན་པར་འདོད་པ་ལས་ཀྱང་འཇུག་ལ། དོན་གཞན་བསྟན་པར་འདོད་པས་ཀྱང་འཇུག་པས་དེ་ལ་སྒྲུབ་པར་བྱེད་པ་མཁས་པས། འདི་ནི་མྱོས་པ་དང་གོམས་པར་འདོད་པས་འདོན་མེད་པར་སྨྲ་བ་ཡང་མ་ཡིན་ལ། ལུང་འདོན་པར་འདོད་པས་ཚིག་གི་དངོས་པོའི་ངོ་བོ་ཙམ་སྨྲ་བ་ཡང་མ་ཡིན་གྱི། འོན་ཀྱང་དོན་སྟོན་པར་འདོད་པ་ཁོ་ནས་ཡིན་ནོ་ཞེས་ཚད་མ་གཞན་ལས་ངེས་པར་བྱས་ཏེ། གཞན་དུ་རྗེས་སུ་དཔོག་པ་མེད་པའི་ཕྱིར་རོ། །མཁས་པས་བརྡ་གཅིག་ལ་གནས་པའི་སྨྲ་བ་པོ་རྣམ་པ་འགའ་ཞིག་ལས་ཤེས་པར་བྱ་ཞིང་དོན་གཞན་བསྟན་པར་བསམ་པ་ལས་སྐྱེས་པའི་སྒྲ་ཡང་ཤེས་པར་བྱ་བ་ཡིན་ནོ། །དེ་ཡང་སྨྲ་བ་པོའི་རང་བཞིན་ཡོངས་སུ་ཤེས་པས་མི་གསལ་བ་དང༌། མྱུར་བ་དང་དམན་པར་བརྗོད་པ་ལས་ཤེས་པར་འགྱུར་ཏེ། གཞན་བསྟན་པར་འདོད་པ་ལས་ནི་སྒྲ་མི་གསལ་བའམ། དམན་པའམ་མྱུར་བར་བརྗོད་པའི་ཕྱིར་རོ། །སྨྲ་བ་པོའི་གནས་སྐབས་ཀྱི་ཁྱད་པར་དེ་ཚད་མ་གཞན་ལས་ཤེས་ཤིང་མངོན་པར་འདོད་པ་དང་མངོན་པར་འདོད་པ་མ་ཡིན་པའི་དོན་བསྟན་པར་བསམ་པ་ལས་སྐྱེས་པའི་སྒྲ་ཡང་ཤེས་པ་ལས། བསམ་པ་ཁྱད་པར་ཅན་གྱི་དོན་གྱི་རྣམ་པ་གསལ་བ་ཁོ་ནར་རྗེས་སུ་དཔོག་པའི་ཕྱིར་རོ། །གཞན་དུ་ན་རྗེས་སུ་དཔག་པར་མི་ནུས་ཏེ། ཇི་སྐད་དུ་ཤིན་ཏུ་རྣམ་པར་ཕྱེ་བའི་རྣམ་པ་ཅན་གྱི་འབྲས་བུས་ནི་རྒྱུ་འཁྲུལ་པ་མེད་དོ་ཞེས་བཤད་པ་ཡིན་ནོ། །གང་ཡང་བསམ་པ་གཞན་ལས་སྐྱེས་པའི་སྐྱེས་པའི་སྒྲ་ནི་འགའ་ཡང་ཡོད་པ་མ་ཡིན་ཏེ། རྒྱུ་ལས་འབྲས་བུ་འཁྲུལ་པ་མེད་པའི་ཕྱིར་རོ། །འོན་ཀྱང་དོན་དེ་ཉིད་བསྟན་པར་བསམ་པ་ཁོ་ན་ལས་ཡིན་ལ། བསམ་པ་དེ་ཡང་ཡང་དག་པར་རིག་ཀྱང་མཚོན་པ་མ་ཡིན་པའི་ཕྱིར་རོ་ཞེས་ཟེད་པ་དེ་ནི་རིགས་པ་མ་ཡིན་ཏེ། འདི་ལྟར་བུམ་པ་བསྟན་པར་བསམ་པ་ལས་དེའི་འོག་ཏུ་འཁྲུལ་པའི་རྒྱུ་མཚན་འགའ་ཞིག་ལས་སྣམ་བུ་བསྟན་པར་འདོད་པ་བྱུང་ཞིང་དེ་ལས་སྒྲ་འབྱུང་བ་ན། བར་དུ་སྐྱེས་པའི་བསམ་པ་དེ་ཇི་ལྟར་ན་ཉེ་བར་མི་མཚོན་ཞེས་བྱ། གང་གི་ཕྱིར་རྣམ་པར་རྟོག་པ་འདི་དག་ནི། ཡང་དག་པར་རིག་པ་མ་ཡིན་པ་ནི་མ་ཡིན་ཏེ་ཞེས་གསུངས་པ་ཡིན་ནོ། །གལ་ཏེ་
འབྲས་བུ་གཅིག་ཉིད་དུ་ངེས་པ་ཡིན་ན། དོན་དུ་མ་བསྟན་པར་བསམ་པ་ལས་སྐྱེས་པའི་སྒྲ་ཡང་ཡོད་པར་ཇི་ལྟར་འགྱུར། གང་ཡང་བསམ་པ་གཉིས་ལས་སྐྱེས་པའི་བུམ་པའི་སྒྲ་ནི་ཐ་དད་པ་ཁོ་ན་སྟེ། དཔེར་ན་ས་བོན་དང་སྡོང་བུ་ལས་སྐྱེས་པའི་ཆུ་ཤིང་བཞིན་ནོ་ཞེས་ཟེར་བ་དེ་ཡང་རིགས་པ་མ་ཡིན་ནོ། །དངོས་ཀྱི་རྒྱུ་ཐ་དད་ན་ནི་འདི་དག་ཐ་དད་པར་འགྱུར་བ་ཡིན་ཏེ། དཔེར་ན་ཆུ་ཤིང་དེ་དག་ཉིད་བཞིན་ནོ། །སྒྲའི་དངོས་ཀྱི་རྒྱུ་ནི་གནས་དང་བྱེད་པ་ཕྲད་པ་ཡིན་ལ། དེའི་རྒྱུ་ནི་བརྗོད་པར་འདོད་པ་དེའི་ཡང་རྒྱུ་བསྟན་པར་སེམས་པ་ཡིན་ནོ། །དོན་དང་ལྡན་པ་དག་ལས་དོན་དང་མི་ལྡན་པའི་སྒྲ་ལ་ཡང་ཐ་དད་པ་ཅུང་ཟད་ཀྱང་མ་མཐོང་ངོ༌། །དེའི་ཕྱིར་བརྗོད་པར་འདོད་པ་ཐ་དད་པ་ལས་ནི་གནས་དང་བྱེད་པ་ཕྲད་པ་ཐ་དད་ལ། དེ་ལས་སྒྲ་ཐ་དད་པ་ཡིན་ནོ་ཞེས་བྱ་བ་གང་ཡིན་པ་འདི་ཉིད་འདིར་རིགས་པ་ཡིན་གྱི། བརྗོད་པར་འདོད་པ་ནི་གང་གི་ཚེ་བསམ་པའི་རིམ་པས་སྦྱར་བ་དེའི་ཚེ་དོན་ཡོད་དམ་མེད་ཀྱང་བླ་སྟེ། སྟོན་པར་སེམས་པ་དག་ལས་སྒྲ་མཚུངས་པ་ཡིན་ཞིང༌། དོན་གཞན་བསྟན་པའི་བསམ་པ་ལ་གནས་པ་ན་ཡང་འཁྲུལ་པའི་རྒྱུ་མཚན་འགའ་ཞིག་ལས་གོ་རིམས་བཏང་ནས་འདོད་པར་བྱ་བ་མ་ཡིན་པ་ཡང་བརྗོད་པར་འདོད་པ་འབྱུང་ངོ༌། །དེས་ན་སྒྲ་ཐ་དད་པ་ནི་གནས་དང་བྱེད་པའི་ཚོགས་པ་ཐ་དད་པས་ཡིན་པའི་ཕྱིར་བཤད་པ་སྔ་མ་ཉིད་ལེགས་པ་ཡིན་ནོ། །གན་ཡང་བྱེད་པའི་ཡོན་ཏན་དང་བརྗོད་པར་འདོད་པ་ཉིད་དག་རྗེས་སུ་དཔོག་པར་བྱེད་དོ་ཞེས་བཤད་པ་དེ་ནི་འདོད་ཆགས་ནི་རྒྱུ་མ་ཡིན་གྱི་འོན་ཀྱང་བརྗོད་པར་འདོད་པ་ཡིན་ནོ་ཞེས་བསྟན་པའི་ཕྱིར་གྱི། དོན་རྟོགས་པའི་བསམ་པ་འགོག་པ་ནི་མ་ཡིན་ནོ། །དེས་ན་བར་ཏི་ཀ་ལས་འདི་སྐད་ཅེས། དོན་གང་བློ་ལ་རབ་གསལ་བ། །དེ་ལ་སྒྲ་ནི་ཚད་མ་ཉིད། །ཅེས་གང་བཤད་པ་ཡིན་ནོ། །སྒྲ་བསམ་པའི་འབྲས་བུ་ཡིན་པ་ཉིད་ཀྱིས་རྗེས་སུ་དཔོགས་པ་ཡིན་གྱི། རྗོད་པར་བྱེད་པ་ཉིད་ཀྱི་ཕྱིར་ནི་མ་ཡིན་ཏེ། སྒྲ་ལས་ཤེས་པ་བརྗོད་པར་བྱ་བའི་ཚུལ་ཉིད་ཀྱིས་རྟོགས་པའམ། དེ་ལ་བརྡར་བྱས་པ་མ་ཡིན་པའི་ཕྱིར་རོ། །འོ་ན་རྗོད་པར་བྱེད་པ་ཉིད་དུ་ཇི་ལྟར་འགྱུར་ཞེ་ན། འདི་ལ་ཇི་ལྟར་མེད་པ་དང་དུ་བ་མེད་ན་
མི་འབྱུང་བ་ཉིད་དུ་དངོས་པོ་ལ་གནས་པ་བཞིན་དུ་དེ་ལྟ་བུའི་དངོས་པོ་མེད་ཀྱང་བརྡའི་དུས་ན་དེ་དག་གིས་སྒྲ་དོན་མེད་མི་འབྱུང་བར་རང་གི་མངོན་པའི་ང་རྒྱལ་གྱིས་བཟུང་བ་ཡིན་ནོ། །དེ་ལ་སྒྲ་རང་གི་མཚན་ཉིད་ཐོས་པ་ལས་སྒྲོ་བཏགས་པ་ཡིན་ཡང༌། སྒྲ་རྣམས་དོན་དམ་པར་མེད་ན་མི་འབྱུང་བ་ཉིད་དུ་རྟོགས་ལ་དེ་དག་ཀྱང་མཐོང་བ་དང་བརྟགས་པའི་དོན་དག་གཅིག་ཏུ་བྱས་ནས་ཕྱི་རོལ་གྱི་དོན་ལ་མེད་ན་མི་འབྱུང་བ་ཉིད་དུ་སྒྲོ་བཏགས་ན་བརྗོད་པར་བྱ་བ་ཉིད་དུ་རློམ་པར་བྱེད་དོ། །དེས་ན་སྒྲོ་བཏགས་པའི་རང་བཞིན་གྱི་རྗོད་པར་བྱེད་པ་ལས། སྒྲོ་བཏགས་པའི་རང་བཞིན་གྱི་བརྗོད་པར་བྱ་བ་རྟོགས་པ་ཡིན་གྱི། དོན་དམ་པར་རང་གི་མཚན་ཉིད་དག་བརྗོད་པར་བྱ་བ་དང་རྗོད་པར་བྱེད་པའི་དངོས་པོ་མ་ཡིན་ནོ། །དེས་ན་བརྡ་དང་ལྷན་ཅིག་པའི་སྒྲ་ལས་སྒྲོ་བཏགས་པའི་རྗོད་པར་བྱེད་པ་རྟོགས་ལ། དེ་ལས་ཀྱང་སྒྲོ་བཏགས་པའི་རང་བཞིན་གྱི་བརྗོད་པར་བྱ་བ་རྟོགས་ཏེ། དེ་རྟོགས་པས་ཀྱང་སྒྲའི་རྗོད་པར་བྱེད་པའི་བྱ་བ་ཡོངས་སུ་རྫོགས་པ་ཡིན་ནོ། །བཤད་པའི་དོན་གྱི་སྒྲའི་རྣམ་པ་སྨྲ་བ་པོའི་བསམ་པས་བསྡུས་པ་བརྡའི་དབང་གིས་སྐྱེད་པར་བྱེད་པ་ཉིད་དུ་ངེས་པར་བྱས་པ་ནི་སྒྲ་ཐོས་པ་ལས་རྟོགས་པར་འགྱུར་རོ། །དེའི་ཕྱིར་སྔར་ནི་སྒྲོ་བཏགས་པ་ལས་བརྟེན་ནས་བརྗོད་པར་བྱ་བ་དང་རྗོད་པར་བྱེད་པ་ཡིན་ལ། ཕྱིས་ནི་རང་གི་མཚན་ཉིད་ཁོ་ན་ལས་སྐྱེད་པར་བྱེད་པའི་བསམ་པ་རྗེས་སུ་དཔོག་པའི་ཕྱིར་རོ། །དེ་ལྟར་ཞེས་བྱ་བ་དོན་ཁྱད་པར་ཅང་ཡི་བསམ་པ་དང་ལྡན་པ་ཉིད་དུ་རྟོགས་པར་བྱ་བའི་ཆོས་ཅན་སྨྲ་བ་པོ་དེ་ཉིད་ཡིན་ཞིང་བསམ་པའི་ཁྱད་པར་བསྒྲུབ་པར་བྱ་བ་ཡིན་ལ། སྒྲ་ནི་སྒྲུབ་པར་བྱེད་པ་ཡིན་པའི་ཕྱིར་བསམ་པ་རྗེས་སུ་སུ་དཔག་པར་བྱ་བ་ལ་ལྟོས་ནས་རྗེས་སུ་དཔག་པའི་ནང་དུ་འདུ་བ་ཡིན་གྱི་བསྟན་པར་བྱ་བ་ལྟོས་ན་ནི་སྒྲ་རྣམས་ཚད་མ་མ་ཡིན་ནོ་ཞེས་བྱ་བར་གནས་སོ། །དེ་ཡོད་ན་ཡོད་པ་དང་མི་དམིགས་པ་ཞེས་བྱ་བ་ལ། དེ་ཡོད་པ་ཉིད་ན་ཡོད་པ་ཞེས་ངེས་པ་ཁོང་ནས་འབྱུང་བའི་བསྡུ་བ་ཡིན་པའི་ཕྱིར་རྗེས་སུ་འགྲོ་བ་དང་ལྡོག་པ་སྨོས་པ་ཡིན་ཏེ། དེས་ན་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་བཤད་པ་ཡིན་ནོ། །དེ་ཡོད་ན་ཡོད་པ་དང་མི་དམིགས་པ་སྟེ། མི་དམིགས་པ་ནི་
དམིགས་པ་མེད་པའམ་གཞན་དམིགས་པའོ། །དེ་ཡང་རྗེས་སུ་དཔག་པ་མ་ཡིན་ཏེ་ཞེས་བྱ་བར་འབྲེལ་ཏོ། །གང་ལ་རྗེས་སུ་དཔག་པ་མ་ཡིན་ཞེ་ན། རབ་ཏུ་སྐྱེ་བ་ཞེས་བུ་ལ་སོགས་པས་ཡུལ་སྟོན་ཏོ། །རབ་ཏུ་སྐྱེ་བ་ནི་སྐྱེ་བ་སྟེ་འབྲས་བུ་ཉིད་དོ། །འདི་གང་གི་ཚེ་སྒྲུབ་པར་བྱེད་ཅེ་ན། གང་གི་ཚེ་དངོས་པོ་དེ་འབྲས་བུ་ཉིད་དུ་ནི་ཤེས་ལ་ཁྱད་པར་ཅང་ཡི་འབྲས་བུ་ཉིད་དུ་ནི་ངེས་པར་མ་རྟོགས་པ་དེའི་ཚེའོ། །དེས་ན་དེ་དོན་ཁྱད་པར་ཅན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ལས་དེའི་འབྲས་བུ་ཉིད་དུ་ཤེས་པར་བྱེད་དེ། དེའི་འབྲས་བུ་ཉིད་དུ་བསྒྲུབ་པ་དང་དངོས་པོ་མེད་པར་བསྒྲུབ་པར་བྱ་བ་དེ་ལ་རྗེས་སུ་དཔག་པ་མ་ཡིན་ནོ། །དོན་འདི་ཡིན་ཏེ། མི་དམིགས་པ་ལས་དངོས་པོ་མེད་པ་ཐེངས་པ་དང༌། དེ་ཡང་ན་ཡོད་པ་ལས་དེའི་འབྲས་བུ་ཉིད་དུ་ངེས་པ་ནི་ཡོད་པ་ཡིན་ལ། ངེས་པ་ཡང་ཚད་མ་ཉིད་དུ་འགྱུར་དགོས་ན། འདིའི་རྗེས་སུ་དཔག་པའི་ནང་དུ་ཡང་འདུ་བ་མ་ཡིན་ནོ་ཞེས་བྱ་བ་ཡིན་ནོ། །དེ་ཉིད་ཀྱི་ཕྱིར་རྗེས་སུ་འགྲོ་བ་མེད་པའི་ཕྱིར་རོ་ཞེས་སྨོས་ཏེ། རྗེས་སུ་འགྲོ་བ་དང་མི་ལྡན་པའི་ཕྱིར་རོ་ཞེས་བྱ་བའི་དོན་ཏོ། །རྗེས་སུ་དཔག་པ་ནི་རྗེས་སུ་འགྲོ་བ་གྲུབ་པའི་གཏན་ཚིགས་ལ་ལྟོས་པར་ཡིན་ན། དེ་ཡོད་ན་ཡོད་པ་དང་མི་དམིགས་པ་ལ་ནི་རྗེས་སུ་འགྲོ་བ་གྲུབ་པ་མ་ཡིན་ནོ། །གང་གི་ཕྱིར་རྗེས་སུ་འགྲོ་བ་ནི་གནོད་པར་བྱེད་པའི་ཚད་མ་གཞན་གྱིས་སྒྲུབ་པ་ཡིན་ཏེ། དཔེར་ན་ཁྱབ་པར་བྱེད་པ་རིམ་དང་ཅིག་ཅར་མི་དམིགས་པས་ཡོད་པ་ཉིད་ལ་སྐད་ཅིག་མས་ཁྱབ་པ་བསྒྲུབས་ལ། ཁྱབ་པ་རབ་ཏུ་གྲུབ་པའི་ཡོད་པ་ཉིད་ལས་ཀྱང་སྐད་ཅིག་མ་ཉིད་དུ་སྒྲུབ་པར་བྱེད་པ་བཞིན་ནོ། །གནོད་པར་བྱེད་པའི་ཚད་མ་སྲིད་པའི་ཡུལ་ལ་ཡང་དཔེ་ཞེས་བརྗོད་པ་ཡིན་ཏེ། དེ་ཉིད་ཀྱི་ཕྱིར་འདི་ལ་དཔེ་ཡོད་པ་མ་ཡིན་ཏེ་ཞེས་སྨོས་སོ། །གང་གི་ཕྱིར་གནོད་པར་བྱེད་པའི་ཚད་མ་སྲིད་ན་ནི་དེ་རབ་ཏུ་སྟོན་པའི་ཡུལ་དཔེ་ཉིད་དུ་འགྱུར་རོ། །ཁྱབ་པ་སྒྲུབ་པར་བྱེད་པའི་ཚད་མ་མེད་པའི་ཕྱིར་དཔེ་འགའ་ཡང་ཡོད་པ་མ་ཡིན་ནོ། །དེ་ཉིད་བསྟན་པའི་དོན་དུ་སྒྲུབ་པར་བྱེད་པ་གཞན་མེད་པའི་ཕྱིར་ཞེས་སྨོས་སོ། །དོན་འདི་ཡིན་ཏེ། གཏན་ཚིགས་དེ་ཉིད་ཀྱིས་ནི་གཏན་ཚིགས་དེ་
ཉིད་ཀྱི་ཁྱབ་པ་བསྒྲུབ་པ་མ་ཡིན་གྱི། འོན་ཀྱང་ཚད་མ་གཞན་གྱིས་ཡིན་པས་ཚད་མ་གཞན་ཡོད་ན་ནི་དེ་རབ་ཏུ་སྟོན་པའི་ཡུལ་དཔེ་ཡང་ཡོད་པར་འགྱུར་གྱི། དེ་མེད་ན་ནི་དེ་ཡང་མེད་པར་འགྱུར་རོ་ཞེས་བྱ་བའོ། །གལ་ཏེ་འདི་ལྟར་དཔེ་ནི་རྗེས་སུ་འགྲོ་བའི་སྒྲུབ་པར་བྱེད་པ་ཉེ་བར་སྟོན་པ་ཙམ་ལ་ཉེ་བར་མཁོ་བ་ཡིན་པའི་ཕྱིར་སྒྲུབ་པར་བྱེད་པ་གཞན་མེད་པར་བཤད་པ་ཉིད་ཀྱིས་དེ་མེད་པར་བརྗོད་པ་མ་ཡིན་ནམ། དེ་ཇི་ལྟར་ན་འདི་ལ་དཔེ་ཡོད་པ་མ་ཡིན་ཏེ་ཞེས་ཟློས་སུ་སྨྲ་ཞེ་ན། རྗེས་སུ་འགྲོ་བ་སྒྲུབ་པའི་ཚད་མ་ནི་དཔེའི་ཆོས་ཅན་ཁོ་ན་ལ་བསྟན་པར་བྱ་བ་ཡིན་གྱི། བསྒྲུབ་པར་བྱ་བའི་ཆོས་ཅན་ལ་ནི་མ་ཡིན་ནོ་ཞེས་བསྟན་པའི་དོན་དུ་སྟེ། འདིའི་འབྲས་བུ་ནི་མཉན་བྱ་དཔྱད་པར་འཆད་པར་འགྱུར་རོ། །གལ་ཏེ་སྙམ་དུ་ཚད་མ་འདི་ཉིད་ཀྱི་རྗེས་སུ་འགྲོ་བ་སྒྲུབ་སྟེ། འདི་ལྟར་འདི་མྱུ་གུ་ལ་སོགས་པ་འགའ་ཞིག་བསྒྲུབ་བྱར་འདོད་པ་ན་དཔེ་གཞན་གྲུབ་པ་ཡིན་ལ། དེ་བཞིན་དུ་བུམ་པ་ལ་སོགས་པ་དང་བྲལ་བའི་ཕྱོགས་འགའ་ཞིག་བསྒྲུབ་པར་བྱ་བ་ལ། གཞན་གྲུབ་པའི་ཕྱིར་ཚད་མ་འདི་ཉིད་ལ་ལྟོས་ན་དཔེ་ཡོད་པ་ཡིན་ནོ་ཞེས་དོགས་པ་ལ། དེ་ཉིད་སྒྲུབ་པར་བྱེད་པ་ཡིན་ན་ཡང་ཞེས་བྱ་བ་སྨོས་ཏེ། དཔེའིའོ། །གང་གིས་རྗེས་སུ་འགྲོ་བ་ངེས་པའི་རྒྱུ་མཚན་གྱི་ཚད་མ་སྟོན་པར་བྱེད་པ་དེ་ནི་དཔེ་སྟེ། དེ་ཐུག་པ་མེད་པར་ཐལ་བར་འགྱུར་བའི་ཕྱིར་རོ། །དོན་འདི་ཡིན་ཏེ། གང་ལ་གཏན་ཚིགས་ལ་བསྒྲུབ་པར་བྱ་བས་རྗེས་སུ་འགྲོ་བ་དང་ལྡན་པས་རྟོགས་པར་བྱ་བའི་དཔེ་དེ་ལ་ཡང་ཅི་གཏན་ཚིགས་འདི་རྗེས་སུ་འགྲོ་བ་གྲུབ་ནས་གོ་བར་བྱེད་པ་ཡིན་ནམ། འོན་ཏེ་རྗེས་སུ་འགྲོ་བ་མ་གྲུབ་པར་ཡིན། རྗེས་སུ་འགྲོ་བ་མ་གྲུབ་པར་ཡང་གོ་བར་བྱེད་པ་ཉིད་ཡིན་ན་ནི་ཚད་མ་གཞན་ཉིད་དུ་ཐལ་བར་འགྱུར་རོ། །རྗེས་སུ་འགྲོ་བ་གྲུབ་པ་ཉིད་ཡིན་ན་ཡང་དེ་ལ་ཡང་རྗེས་སུ་འགྲོ་བའི་ཡུལ་གྱི་དཔེ་གཞན་བཙལ་དགོས་ཏེ། དེས་ནི་ཇི་སྲིད་དུ་ཚད་མ་གཞན་གྱིས་རྗེས་སུ་འགྲོ་བ་མ་གྲུབ་པ་དེ་སྲིད་དུ་དཔེ་གཞན་ཚོལ་བས་མཐའ་ཐུག་པ་མེད་པར་འགྱུར་ལ། དེ་ལྟར་ན་ཡང་རྗེས་སུ་འགྲོ་བ་མ་ངེས་པའི་ཕྱིར། ཇི་ལྟར་རྗེས་སུ་དཔག་པའི་ནང་དུ་འདུ་བར་འགྱུར། དེའི་ཕྱིར་དེ་ལྟར་
འབྲེལ་པ་མ་ངེས་པས་ཕྱོགས་ཀྱི་ཆོས་ཙམ་གྱིས་འཁྲུལ་པ་མེད་པར་རྟོགས་པའི་ཚད་མ་གཞན་ཡིན་ནོ་ཞེ་ན། མ་ཡིན་ཏེ་ཞེས་བྱ་བ་རྗེས་སུ་དཔག་པ་མ་ཡིན་པ་འགོག་པར་བྱེད་པའོ། །འདི་ལྟར་གལ་ཏེ་རྗེས་སུ་འགྲོ་བ་ངེས་པའི་རྒྱུ་གནོད་པར་བྱེད་པའི་ཚད་མ་མེད་པའི་ཕྱིར་དཔེ་མེད་པ་དེ་ལྟ་ན་ནི་རྗེས་སུ་དཔག་པར་མི་འགྱུར་བ་ཞིག་ན། གནོད་པར་བྱེད་པའི་ཚད་མ་ཡང་ཡོད་པས་དེའི་ཡུལ་གྱི་དཔེ་ཡོད་པ་ཡིན་ནོ། །ཇི་ལྟར་ཡོད་ཅེ་ན། དེ་ལ་ཡུལ་བསྟན་པས་ཞེས་བྱ་བ་ལ་སོགས་པ་གསུངས་ཏེ། ཡུལ་དེ་ཡོད་ན་ཡོད་པར་འགྱུར་བའི་མྱུ་གུ་དང༌། དེ་བཞིན་དུ་བུམ་པས་དབེན་པའི་ས་ཕྱོགས་མི་དམིགས་པའི་བདག་ཉིད་དུ་གྱུར་བ་བསྟན་པས་ཏེ། བསྙད་པས་སོ། །འདིར་དོན་གྱིས་རྒྱུ་མཚན་བསྟན་པ་ཡང་བལྟ་བར་བྱ་སྟེ། འདི་ལྟར་མེད་པའི་ཐ་སྙད་དང༌། འབྲས་བུའི་ཐ་སྙད་དག་གིས་རྒྱུ་མཚན་དང་ཡུལ་བསྟན་པར་བྱ་བ་ཡིན་ནོ།། དེ་ལ་མེད་པའི་ཐ་སྙད་ཀྱི་ཡུལ་ནི་བུམ་པས་དབེན་པའི་ཕྱོགས་ཡིན་ལ། དེའི་ཤེས་པ་ནི་རྒྱུ་ཡིན་ཏེ། གཉི་ག་ཡང་ཁྱད་པར་མེད་པར་མི་དམིགས་པའི་ཐ་སྙད་དུ་སྟོན་པར་འགྱུར་རོ། །འབྲས་བུའི་ཐ་སྙད་ཀྱི་ཡུལ་ནི་དེ་ཡོད་པ་ཉིད་ཡིན་ལ། དེ་འཛིན་པའི་མངོན་སུམ་དང་མི་དམིགས་པ་ནི་རྒྱུ་ཡིན་ནོ། །དེ་བཞིན་དུ་གཞན་དག་ཏུ་ཡང་ཡུལ་གྱི་སྒྲས་རྒྱུ་འཕེན་ལ་རྒྱུའི་སྒྲས་ཀྱང་ཡུལ་འཕེན་པ་ཡིན་ཏེ། ཐམས་ཅད་དུ་སློབ་དཔོན་གྱི་ཐ་སྙད་ནི་འདི་ལྟ་བུ་ཡིན་ནོ། །དེས་ན་ཡུལ་དང་རྒྱུ་འདིས་ཐ་སྙད་འདི་ལ་ཁྱོད་ཀྱིས་སྔོན་ཞུགས་པ་ཡིན་ནོ་ཞེས་རྒྱུ་དང་བཅས་པའི་ཡུལ་བསྟན་པས་ཕ་རོལ་པོ་རྨོངས་པ་ལ་རྒྱུ་མཚན་དང་བཅས་པའི་མེད་པའི་ཐ་སྙད་དྲན་པར་བྱེད་དོ། །དེ་ལྟ་ན་ཡང་དྲན་པར་བྱས་པའི་ཚུལ་གྱིས་ཞུགས་པའི་འབྲེལ་པ་ཉིད་བསྒྲུབ་པ་ཡིན་ནོ། །དེའི་ཕྱིར་ཐ་སྙད་ཀྱི་འབྲེལ་པ་དྲན་པ་ལ་རྗེས་སུ་འགྲོ་བ་ངེས་པའི་རྒྱུ་མཚན་གྱི་ཚད་མའི་ཡུལ་དུ་གྱུར་པའི་དཔེ་ཡོད་པའི་ཕྱིར་རྗེས་སུ་དཔག་པ་ཉིད་དོ་ཞེས་དོན་གྱི་མཇུག་བསྡུ་བའོ། །གང་གི་ཕྱིར་ཐ་སྙད་འདི་ལ་ཕ་རོལ་པོ་ཉིད་ཀྱིས་སྔར་ཞུགས་པ་ཡིན་ལ། རྒྱུ་མཚན་མེད་པ་ཅན་ཉིད་ཡིན་ན་ནི་ཐ་སྙད་ངེས་པ་ཅན་ཉིད་དུ་འགྱུར་རོ། །རྒྱུ་མཚན་གཞན་མི་འཐད་པ་ཉིད་ཀྱང་རྒྱུ་དང་འབྲས་བུའི་ཐ་སྙད་ལ་ནི་
འཇིག་རྟེན་ཉིད་ལས་འགྱུར་ལ། མེད་པའི་ཐ་སྙད་ལ་ནི་རྩོད་པའི་རིགས་པའི་རྗེས་སུ་འབྲང་བར་བྱའོ། །དེ་ཙམ་གྱི་རྒྱུ་མཚན་ཅན་ཉིད་དུ་ནི་ལན་ཅིག་ཞུགས་པ་ཉིད་ལས་ངེས་ལ། དེ་ཡོད་ཀྱང་ཐ་སྙད་འཇུག་པར་མི་བྱེད་ན་ནི་རྒྱུ་མཚན་གཞན་ཉིད་དུ་ཐལ་བར་འགྱུར་རོ། །དེའི་ཕྱིར་དེ་ལྟར་ཡོད་ཀྱང་ཐ་སྙད་མི་འཇུག་ན་ནི་རྒྱུ་མཚན་གཞན་ཉིད་ཡིན་ལ། ལན་ཅིག་ཞུགས་པ་ལས་ཐ་སྙད་གང་ཞིག་གིས་རྒྱུ་མཚན་གང་ཁོ་ན་ཡིན་པར་མཐོང་ན་ནི་དེ་དང་འགལ་བ་ཡིན་ཏེ། དེས་ན་རང་བཞིན་འགལ་བ་དམིགས་པས་རྗེས་སུ་འགྲོ་བ་གྲུབ་བོ། །འདིར་གཏན་ཚིགས་ནི་འདི་ལྟར་བལྟ་སྟེ། གང་ཞིག་གང་ཁོ་ནའི་རྒྱུ་མཚན་ཅན་ཡིན་པ་དེ་ནི་ཡོད་པ་ན་ཡོད་པ་ཉིད་ཡིན་ཏེ། མེད་པ་ལ་ནི་རྒྱུ་མཚན་གཞན་ལ་ལྟོས་པས་ཁྱབ་ལ། དེ་དང་འགལ་བ་ཡང་དེ་ཙམ་གྱི་རྒྱུ་མཚན་ཅན་ཡིན་ནོ། །དེས་ན་འདིར་རྒྱུ་མཚན་དེ་ཡོད་པ་ཙམ་གྱིས་ཐ་སྙད་འཇུག་པར་བྱ་བ་ཡིན་ནོ། །མི་དམིགས་པ་ཙམ་རྒྱུ་མཚན་ཡིན་ཞིང་རྒྱུ་མཚན་གཞན་ཡོད་པར་མི་འཐད་པ་ཡང་ལན་ཅིག་ཐ་སྙད་དུ་ཞུགས་པ་ལས་ཤེས་པ་ཡིན་ནོ། །མཚན་ཉིད་ཀྱི་གཏན་ཚིགས་ཐམས་ཅད་ཀྱི་ཁྱབ་པ་འགྲུབ་པའི་ཚུལ་ནི་འདི་ལྟ་བུ་ཁོ་ནར་བལྟའོ། །གཏན་ཚིགས་ནི་རྣམ་པ་གཉིས་ཏེ། ཐ་སྙད་ཀྱི་ཡུལ་ཅན་མཚན་ཉིད་ཀྱི་གཏན་ཚིགས་དེ་ནི་ལན་ཅིག་ཐ་སྙད་ཞུགས་པ་ཉིད་ལས་ཐ་སྙད་དང་འབྲེལ་པར་ཤེས་པར་འགྱུར་བ་ཡིན་ཏེ། དཔེར་ན་བ་ལང་གི་ཐ་སྙད་ཀྱི་རྒྱུ་མཚན་ལྐོག་ཤལ་ལ་སོགས་པ་དང་ལྡན་པའི་མཚན་ཉིད་ཀྱི་ཡུལ་ལ་ལན་ཅིག་ཐ་སྙད་ཞུགས་པ་ལས་ཀྱང་འབྲེལ་བས་ཤེས་པར་འགྱུར་བ་ལྟ་བུ་སྟེ། འདི་ནི་མཚན་ཉིད་པའི་གཏན་ཚིགས་སོ། །གཞན་ནི་དངོས་པོའི་སྟེ། གང་ཞིག་དངོས་པོའི་ཆོས་སྒྲུབ་པར་བྱེད་པའོ། །ཐ་སྙད་དུ་རུང་བ་ཉིད་ཀྱང་བརྟགས་པ་ཡིན་གྱི་དངོས་པོ་ནི་མ་ཡིན་ནོ། །གལ་ཏེ་འདི་སྙམ་དུ་ཇི་ལྟར་རྒྱུ་དང་འབྲས་བུའི་ངོ་བོ་ཉིད་དམ་དངོས་པོ་མེད་པ་ཉིད་སྒྲུབ་པར་མི་བྱེད་ཀྱི། འོན་ཀྱང་ཐ་སྙད་ཡིན་ཞེ་ན། རྒྱུ་དང་འབྲས་བུ་དག་གི་དེའི་ངོ་བོ་ནི་རྗེས་སུ་འགྲོ་བ་དང་ལྡོག་པ་དག་ལས་གཞན་མ་ཡིན་ནོ་ཞེས་བྱ་བ་ལ་སོགས་པ་སྨོས་ཏེ། རྒྱུ་དང་འབྲས་བུ་དག་གི་རྒྱུ་འབྲས་ཀྱི་ངོ་བོ་ཉིད་ནི་རྗེས་སུ་འགྲོ་བ་དང་ལྡོག་པ་དག་ལས་ཏེ། དངོས་པོ་དང་དངོས་པོ་མེད་པ་དག་
ལས་གཞན་མ་ཡིན་ནོ། །དེའི་ཕྱིར་མཚན་ཉིད་དུ་གྱུར་པ་དེ་ཡོད་ན་ཡོད་པ་ཉིད་གྲུབ་པ་ཁོ་ནའི་ཕྱིར་ཅི་ཞིག་བསྒྲུབ་ཏུ་ཡོད། ཐ་སྙད་ཀྱི་རྨོངས་པ་ལ་སྒྲུབ་པར་བྱེད་པ་ཉིད་ཡིན་ནོ། །དེ་བཞིན་དུ་ཞེས་བྱ་བ་ནི་ཇི་ལྟར་དེ་ཡོད་ན་ཡོད་པ་ཉིད་རྒྱུ་དང་འབྲས་བུའི་ངོ་བོ་ཡིན་པ་དེ་བཞིན་དུ། དམིགས་པར་རིགས་པ་མི་དམིགས་པ་ཉིད་དོན་གྱི་དངོས་པོ་མེད་པ་སྟེ། མེད་པའི་ཐ་སྙད་དུ་བྱ་བ་བསྒྲུབ་པའི་ཡན་ལག་ཡིན་པའི་ཕྱིར་དངོས་པོ་མེད་པ་ཡིན་ནོ། །འདི་ལྟར་དངོས་པོ་མེད་པ་ཞེས་བྱ་བ་མངོན་སུམ་གྱིས་ཤེས་པར་བྱ་བ་ནི་མ་ཡིན་ཏེ། ངོ་བོ་ཉིད་མེད་པའི་ཕྱིར་རོ། །འོན་ཀྱང་ཐ་སྙད་དུ་བྱ་བ་ཡིན་ནོ། །བུམ་པས་དབེན་པའི་ཕྱོགས་སུ་སྣང་བ་རང་གི་དོན་ངེས་པ་དང་ལྡན་པའི་མངོན་སུམ་སྐྱེས་པ་ཉིད་ཀྱིས་སྣང་བའི་དངོས་པོ་མེད་པར་ངེས་པ་ནང་དུ་འདུ་བར་འགྱུར་ཏེ། སྣང་བའི་དངོས་པོ་གཞན་ཡོད་པར་དོགས་ན། དེས་དབེན་པའི་ཕྱོགས་བདག་གིས་མཐོང་ངོ་ཞེས་ངེས་པར་མི་ནུས་པའི་ཕྱིར་རོ། དེའི་ཕྱིར་དེ་ལྟར་ངེས་པར་བྱས་པས་ཡུལ་དེའི་དོན་གྱི་སྣང་བའི་དངོས་པོ་གཞན་མེད་པར་ངེས་པར་བྱས་པ་ཉིད་དོ། །དེ་ཉིད་ཀྱི་ཕྱིར་མངོན་སུམ་གྱི་དོན་དང་དེའི་ཤེས་པ་ལ་དངོས་པོ་མེད་པར་བརྗོད་པ་ཡིན་ནོ། །དེའི་ཕྱིར་མངོན་སུམ་གྱི་བདག་ཉིད་དུ་གྱུར་བའི་མི་དམིགས་པས་དངོས་པོ་མེད་པ་གྲུབ་པས་དེའི་རྒྱུ་མཚན་ཅན་གྱི་མེད་པའི་ཐ་སྙད་སྒྲུབ་པར་བྱེད་དོ་ཞེས་བྱ་བ་ནི་དམིགས་པར་རིགས་པ་ཞེས་བྱ་བ་ལ་སོགས་པ་འཆད་དོ། །དམིགས་པར་རིགས་པ་གང་ལ་ཡོད་པ་དེ་ནི་དམིགས་པར་རིགས་པའོ། །མི་དམིགས་པ་ན་སྟེ། དམིགས་པའི་མཚན་ཉིད་ཀྱིར་གྱུར་པ་ལས་དེ་མ་དམིགས་པའི་ཕྱིར་མེད་དོ་ཞེས་བརྗོད་དོ། །ངེས་པ་སྔོན་དུ་འགྲོ་བ་ཅན་གྱི་ཐ་སྙད་འདོགས་སོ། །འདིས་ནི་མེད་པའི་ཐ་སྙད་ཀྱི་རྒྱུ་མཚན་ནི་མི་དམིགས་པ་ཉིད་ཡིན་པར་སྟོན་ཏོ། །དེའི་ཕྱིར་ཞེས་བྱ་བ་ནི་གང་གི་ཕྱིར་དེ་མེད་པའི་ཐ་སྙད་ཀྱི་རྒྱུ་མི་དམིགས་པ་ཡིན་པ་དེའི་ཕྱིར་རོ། །རྒྱུ་མཚན་ཉེ་བར་བསྟན་པས་ཞེས་བྱ་བ་ནི་མི་དམིགས་པ་འདི་ལ་ལྟོས་པ་འདིའི་རྒྱུ་མཚན་གྱིས་མེད་དོ་ཞེས་བྱ་བའི་ཐ་སྙད་གང་ཡིན་པ་དེ་ནི་རྒྱུ་མཚན་བསྟན་པས་བསྒྲུབ་བོ་ཞེས་བྱ་བའི་དོན་ཏོ། །འདི་སྙམ་དུ་ཐ་སྙད་གང་ཞིག་གང་གི་རྒྱུ་མཚན་ཅན་ཡིན་
པ་དེ་ནི་རྒྱུ་མཚན་དེ་མཐོང་བས་ན་ལོ་མ་ལ་སོགས་པ་དང་ལྡན་པ་ལ་ཤིང་ཉིད་ལ་སོགས་པའི་ཐ་སྙད་བཞིན་དུ་རང་ཉིད་འཇུག་པ་མ་ཡིན་ནམ། དེ་ཇི་ལྟར་རྒྱུ་མཚན་ཐ་སྙད་ཀྱི་སྒྲུབ་པར་བྱེད་པར་འགྱུར་ཞེ་ན། རྨོངས་པ་ལ་ཞེས་བྱ་བ་སྨོས་ཏེ། རྒྱུ་མཚན་མཐོང་དུ་ཟིན་ཀྱང་རྒྱུ་མཚན་ཅན་གྱི་ཐ་སྙད་འཇུག་པར་མི་ནུས་པའི་རྨོངས་པ་གང་ཡིན་པ་དེ་ཉིད་རྟོགས་པར་བྱ་བའི་དོན་དུ་མི་དམིགས་པར་སྦྱར་བ་ཡིན་ལ། དེ་ཡོད་ན་ཡོད་པ་ཉིད་ཀྱང་དེའི་འབྲས་བུ་ཉིད་ཀྱི་ཐ་སྙད་དུ་མི་བྱེད་པ་ལ་སྦྱོར་བ་ཡིན་ནོ། །གང་ཡང་ལོ་མ་ལ་སོགས་པ་དང་ལྡན་པ་ལ་ཤིང་གི་ཐ་སྙད་དུ་ཞུགས་པ་ལས་བླུན་པས་ཕྱིས་བརྗོད་པ་དེ་ལ་ནི་ལོ་མ་ལ་སོགས་པ་དང་ལྡན་པའི་ཕྱིར་ཤིང་ངོ་ཞེས་སྦྱོར་བ་ཁོ་ན་སྟེ། དཔེར་ན་འདི་ནི་བ་ལང་སྟེ་ལྐོག་ཤལ་ལ་སོགས་པ་དང་ལྡན་པའི་ཕྱིར་རོ་ཞེས་བྱ་བ་ལྟ་བུའོ། །སྐྱེད་པར་བྱེད་པར་བརྗོད་པ་ལ་ཕ་ཉིད་བཞིན་ནོ་ཞེས་བྱ་བས་ནི། མི་དམིགས་པ་དང་རྗེས་སུ་མཐུན་པ་ཉིད་ཀྱི་དཔེར་ཐ་སྙད་སྒྲུབ་པར་བྱེད་པའི་རྗེས་སུ་དཔག་པར་སྟོན་པར་བྱེད་དོ། །སྐྱེད་པར་བྱེད་པའི་རྒྱུ་མཚན་ཅན་གྱི་པའི་ཐ་སྙད་ལ་ཞུགས་སུ་ཟིན་ཀྱང་འགའ་ཞིག་ཏུ་བརྗོད་པ་ན་ཕའི་ཐ་སྙད་ཀྱི་རྒྱུ་མཚན་ནི་འདི་ཙམ་ཡིན་ནོ་ཞེས་རབ་ཏུ་གྲུབ་པའི་ཡུལ་དྲན་ནས་དེ་བདག་ཉིད་རྟོགས་པར་འགྱུར་བའམ། གཞན་གྱིས་སྒྲུབ་པར་བྱེད་པ་བཞིན་ནོ། །ཅི་སྟེ་གང་ཞིག་ལ་རྨོངས་པ་མེད་པ་དེ་གང་ལས་དེར་མེད་པའི་ཐ་དད་པ་འགོག་པ་ནི་སྣང་བ་ཁོ་ན་ལ་ཞེས་སྨྲའོ། །སྣང་བ་ཡོད་པ་ནི་ཤེས་པ་ལ་འཁྲུལ་པ་མེད་པའི་པ་མི་དམིགས་པ་ལས་སོ་ཞེས་སྨྲའོ། །སྣང་བ་ཡོད་པ་ནི་ཤེས་པ་ལ་འཁྲུལ་པ་མེད་པའི་ཕྱིར་ཤེས་པའི་ཡུལ་གྱི་ངོ་བོ་ཉིད་ཀྱིས་ཁྱབ་པ་ཡིན་ལ། ཤེས་པ་མེད་པ་ནི་ཁྱབ་པར་བྱེད་པའི་ཤེས་པའི་ཡུལ་དེ་ཉིད་མི་དམིགས་པ་ཡིན་ཏེ། རྩོད་པའི་རིགས་པ་ལས་དེའི་ངོ་བོ་ཡོད་པ་ལ་ནི་དེའི་ཚད་མས་ཁྱབ་པ་ཡིན་ནོ་ཞེས་བཤད་པའི་ཕྱིར་རོ། །ཐ་སྙད་འདོགས་པ་པོ་ཡང་གང་གི་ཕྱིར་འདི་ན་སྣང་བའི་དངོས་པོ་མི་དམིགས་ཏེ། དེའི་ཕྱིར་མེད་དོ་ཞེས་དམིགས་པ་མེད་པ་ཉིད་ཀྱིས་ཉེ་བར་མཚོན་ནས། དེའི་ཁྱབ་པར་བྱེད་པ་དམིགས་པར་བྱ་བ་མེད་པའི་རྗེས་སུ་འབྲངས་ཏེ། དོན་མེད་པ་ཉིད་དུ་རྟོགས་པར་བྱེད་དོ། །དེས་ན་གཏན་ཚིགས་ཐིགས་པ་ལས། གང་ཞིག་དེ་ཡོངས་སུ་གཅོད་པ་ན་ཞེས་བྱ་བ་ལ་སོགས་པ་
དང། གང་ཡང་རྣམ་པར་ངེས་པ་ལས་ཤེས་པ་ནི་བདག་ཉིད་ཤེས་པ་གཞན་ལས་གཅོད་ཅིང་དོན་གྱིས་དོན་གཅོད་པ་ཞེས་བྱ་བ་ལ་སོགས་པ་གཞན་རྣམ་པར་གཅོད་པ་བཤད་པ་དེ་ཐམས་ཅད་ནི་ཁྱབ་པར་བྱེད་པ་མེད་པ་ཉིད་ཀྱི་རྒྱུ་མཚན་ཡིན་ནོ། །དཔེར་ན་འདི་ནི་སྔོན་པོ་ཡིན་གྱི་སེར་པོ་ནི་མ་ཡིན་ནོ་ཞེས་བྱ་བ་ལྟ་བུ་འགའ་ཞིག་སྣང་བའི་བདག་ཉིད་ཡིན་པ་འགོག་པ་ན་འདིར་འཇིག་རྟེན་ན་སེར་པོ་ཞེས་བྱ་བ་ཡོད་པ་མ་ཡིན་ནོ་ཞེས་ནི་མི་འདོད་ཀྱི། འོན་ཀྱང་སྣང་བ་འདིའི་རང་བཞིན་དུ་མེད་དོ་ཞེས་བྱ་བ་མིན་ཏེ། དེས་ན་སེར་པོ་སྣང་བར་ཁས་བླངས་ནས་འགོག་པ་ཡིན་ནོ། །གང་གི་ཕྱིར་ཇི་སྲིད་དུ་གཅིག་སྣང་བ་ན་དེའི་བདག་ཉིད་འགོག་པ་དེ་ཐམས་ཅད་ནི་སྣང་བ་ཉིད་དུ་ཁས་བླངས་པ་ཡིན་པའི་ཕྱིར་སྣང་བ་མ་དམིགས་པ་ཉིད་ཡིན་ཏེ། གཏན་ཚིགས་ཐིགས་པ་ལས་ཁྱད་པར་ཡང་བརྗོད་པར་མི་བྱའོ་ཞེས་བཤད་དོ། །དེའི་ཕྱིར་ཇི་སྲིད་དུ་ཤེས་པ་དང་སྣང་བའི་དོན་ལ་དེའི་བདག་ཉིད་འགོག་པ་དེ་ལ་སྣང་བ་མི་དམིགས་པ་ཉིད་ཡོད་པས་ཁྱབ་པར་བྱེད་པ་མི་དམིགས་པ་ཉིད་ཡོད་པ་མ་ཡིན་ནོ། །ཐ་དད་པ་འགོག་པ་ནི་སྣང་བ་ཁོ་ན་ལ་ཁྱབ་པར་བྱེད་པ་མི་དམིགས་པ་ཡིན་ཏེ། དེ་ཉིད་ཀྱི་ཕྱིར་དམིགས་པའི་མཚན་ཉིད་ཀྱིར་གྱུར་པ་ཞེས་ཁྱད་པར་དུ་བྱས་སོ། །དེའི་ཕྱིར་ཁྱབ་པར་བྱེད་པ་མི་དམིགས་པ་ཁོ་ནས་འགོག་པ་ཡིན་ནོ། །ཤེས་པ་དང་ཤེས་བྱ་དམིགས་པ་མེད་པ་ནི་རྣམ་པ་གཅིག་ཏུ་ངེས་པའི་ཤེས་པ་ཡང་དག་པར་རིག་པ་ཉིད་ཀྱིས་ངེས་པར་འགྱུར་ཏེ། ཡོད་པ་བཞིན་དུ་ཤེས་པ་ཙམ་ལ་ནི་ཐེ་ཚོམ་ཡོད་པ་མ་ཡིན་པའི་ཕྱིར་རོ། །དེའི་ཕྱིར་ཤེས་པ་གཅིག་མྱོང་བ་ཉིད་ལས་འདི་ནི་དམིགས་སོ། །འདི་ནི་མ་དམིགས་སོ་ཞེས་ཤེས་པ་དང་ཤེས་བྱ་དག་དམིགས་པ་དང་མ་དམིགས་པར་ངེས་པར་བརྗོད་པ་ཡིན་ནོ། །འདི་ནི་དམིགས་སོ་འདི་ནི་མ་དམིགས་སོ་ཞེས་བྱ་བ་དེ་ལྟ་བུའི་རྣམ་པ་ཅན་ཡུལ་དང་ཤེས་པ་འགོག་པ་དང༌། བསྒྲུབ་པའི་རྣམ་པར་རྟོག་པ་དག་གིས་མངོན་སུམ་འབྲས་བུ་དང་བཅས་པ་ཡིན་གྱི། འདི་ནི་ཡོད་དོ་འདི་ནི་མེད་དོ་ཞེས་བྱ་བ་དེ་ལྟ་བུའི་རྣམ་པར་དངོས་པོ་ཡོད་པ་དང་མེད་པའི་རྣམ་པར་རྟོག་པ་དག་གིས་ཀྱང་འབྲས་བུ་དང་བཅས་པ་ཉིད་ནི་མ་ཡིན་ཏེ། འདི་ནི་མ་ཡིན་ནོ་ཞེའམ་མེད་
དོ་ཞེས་བྱ་བ་དེ་ལྟ་བུ་ཡོད་པ་འགོག་པའི་ཐ་སྙད་ཀྱི་རྣམ་པར་རྟོག་པ་ནི་མི་དམིགས་པས་སྒྲུབ་པར་བྱེད་པ་ཡིན་གྱི། མངོན་སུམ་གྱིས་ནི་སྒྲུབ་པར་བྱེད་པ་མ་ཡིན་པའི་ཕྱིར་རོ། །དེའི་ཕྱིར་དམིགས་པའི་ཤེས་པ་དང་ཤེས་བྱ་ཉིད་ཤེས་བྱ་མི་དམིགས་པ་ངེས་པའི་རྒྱུ་ཕྱིར་མི་དམིགས་པར་བརྗོད་པ་ཡིན་ནོ། །དེ་ལ་མི་སྣང་བ་དམིགས་པ་མེད་པར་ངེས་པས་ནི་མི་སྣང་བ་དངོས་པོ་མེད་པར་ངེས་པ་ནང་དུ་སྡུད་པར་བྱེད་པ་མ་ཡིན་ཏེ། དེ་ནི་དངོས་པོ་མེད་པ་ལ་འཁྲུལ་པའི་ཕྱིར་རོ། །སྣང་བ་དམིགས་པ་མེད་པར་ངེས་པས་ནི་ཤུགས་ཀྱིས་སྣང་བ་དངོས་པོ་མེད་པར་འཕངས་པ་ཡིན་ཏེ། སྣང་བའི་དངོས་པོ་གཞན་ཡོད་ན་དེ་མི་དམིགས་པར་མི་རིགས་པའི་ཕྱིར་ཞེས་བྱ་བ་ནི་ཤུགས་ཡིན་ནོ། །དེའི་ཕྱིར་གཅིག་ཏུ་ངེས་པའི་ཤེས་པ་ངེས་པར་བྱེད་པའི་མངོན་སུམ་ཉིད་ཀྱིས་སྣང་བའི་དངོས་པོ་མེད་པར་ངེས་པར་བྱས་པ་ཡིན་ནོ། །གང་གི་ཕྱིར་དངོས་པོ་མེད་པ་མངོན་སུམ་དུ་བྱ་བ་ལུས་དང་ལྡན་པ་ནི་མ་ཡིན་ཏེ། དེས་ན་དངོས་པོ་མེད་པ་འཛིན་པར་བྱེད་པ་ནི་ངེས་པ་གང་ཡིན་པ་འདི་ཉིད་ཡིན་ནོ། །ཡང་གང་གི་ཕྱིར་རང་གི་ངོ་བོ་མེད་པའི་ཕྱིར་དངོས་པོ་མེད་པ་མངོན་སུམ་དུ་སྣང་བ་མ་ཡིན་པ་དང༌། མ་དམིགས་ཀྱང་ཡོད་པའི་ཕྱིར་མི་དམིགས་པ་འཁྲུལ་པར་དོགས་པ་དེའི་ཕྱིར་ཤུགས་ཀྱིས་དངོས་པོ་མེད་པ་གཟུང་དུ་ཟིན་ཀྱང་མངོན་སུམ་གྱི་ཐ་སྙད་དུ་བྱེད་ནུས་པ་མ་ཡིན་ནོ། །སྣང་བ་མི་དམིགས་པས་ནི་ནུས་ཏེ། དེ་ཡང་གང་གི་ཕྱིར་མངོན་སུམ་གྱིས་ཕྱོགས་འགའ་ཞིག་དམིགས་པ་དེའི་ཕྱིར་མངོན་སུམ་ཉིད་ཀྱི་བྱེད་པའི་རྗེས་སུ་འབྲངས་ནས་འདི་ན་དེ་ཡོད་པ་མ་ཡིན་ནོ་ཞེས་ཐ་སྙད་དུ་ཕྱེད་པ་ཡིན་པས་སྔ་ན་མེད་པ་ངེས་པ་མ་ཡིན་པའི་ཕྱིར་ཐ་སྙད་སྒྲུབ་པར་བྱེད་པར་འདོད་ཀྱི་དངོས་པོ་མེད་པ་སྒྲུབ་པར་བྱེད་པ་ནི་མ་ཡིན་ནོ། །གང་དུ་ཁྱབ་པར་བྱ་བ་མེད་པ་མངོན་སུམ་གྱིས་མི་རྟོགས་པ་དེར་ནི་ཁྱབ་པར་བྱེད་པ་མི་དམིགས་པས་དངོས་པོ་མེད་པ་བསྒྲུབ་སྟེ། དཔེར་ན་ཤིང་མེད་པའི་ཕྱིར་ཤིང་ཤ་པ་མེད་དོ་ཞེས་བྱ་བ་ལྟ་བུའོ། །འདིར་གྲུབ་པའི་ཕྱིར་ཐ་སྙད་སྒྲུབ་པ་ཡིན་ནོ། །མངོན་སུམ་གྱིས་དངོས་པོ་མེད་པ་གྲུབ་པ་དེའི་ཕྱིར། ཚད་མ་གཅིག་གི་བྱ་བ་ནི་དེ་ཡོངས་སུ་གཅོད་ཅིང་ཞེས་བྱ་བ་ལ་སོགས་པ་དང༌། དབང་པོའི་བློ་རྟོག་པ་དང་བྲལ་བར་སྒྲུབ་པར་
བྱེད་པ་ནི་མངོན་སུམ་ཉིད་དོ་ཞེས་བྱ་བ་དང༌། དངོས་པོ་མེད་པ་ནི་བུམ་པ་དང་བྲལ་བའི་ཕྱོགས་དང་དེའི་ཤེས་པ་ཉིད་ཡིན་ནོ་ཞེས་དེ་དང་དེར་བཤད་པ་ཡིན་ནོ། །གང་ཞིག་ཐ་སྙད་ལ་ཞུགས་ཀྱང་རྟོག་གི་ངན་པ་འབའ་ཞིག་གོམས་པ་ལས་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ལ་རྨོངས་ཏེ་དངོས་པོ་མེད་པའི་ཐ་སྙད་ཀྱི་རྒྱུ་གཞན་ཡིན་པར་རྟོགས་པ་དེ་ནི་རྨོངས་བ་ཡིན་པར་བརྗོད་དེ། གཞན་དུ་ན་ཡོད་པ་ཉིད་ཀྱིས་ཁྱབ་པར་བྱེད་པ་མེད་པ་ལས་དངོས་པོ་མེད་པའི་ཐ་སྙད་བྱེད་པ་ཇི་ལྟར་ན་རྨོངས་པ་ཡིན་པར་འགྱུར། དེ་ཡང་གང་གི་ཚེ་རབ་ཏུ་གྲུབ་པའི་ཡུལ་གྱི་རྗེས་སུ་འབྲངས་ཏེ། དངོས་པོ་མེད་པའི་ཐ་སྙད་ཀྱི་རྒྱུ་ནི་མི་དམིགས་པ་ཉིད་ཙམ་ཡིན་ནོ་ཞེས་རྟོགས་པར་བྱས་ཏེ། ཤེས་པར་འདོད་པའི་ཡུལ་ལ་དངོས་པོ་མེད་པའི་ཐ་སྙད་དུ་རང་ཉིད་ཀྱིས་རྟོགས་སམ་གཞན་གྱིས་བསྟན་ཀྱང་རུང་སྟེ། དེའི་ཚེ་ནི་མི་དམིགས་པ་རང་བཞིན་གྱི་གཏན་ཚིགས་ཉིད་ཡིན་ནོ། །དམིགས་པ་ནི་སྣང་བ་ཉིད་ཀྱིས་ཁྱབ་པར་བྱེད་པ་ཡིན་ལ། སྣང་བ་ཡང་ཤེས་པ་གཅིག་ལ་འདྲེ་བའི་དངོས་པོ་འཛིན་པ་སྔོན་དུ་སོང་བ་ལས་དེའི་ཡུལ་ཅན་གྱི་ཤེས་པའི་རྒྱུ་མ་ཚང་བ་མེད་པར་ངེས་པ་ལས་ངེས་པར་བྱེད་དེ། དེའི་ཕྱིར་སྣང་བའི་དངོས་པོ་གཞན་དང་དེའི་མཐོང་བ་ཤེས་པ་དང་ཤེས་བྱའི་ངོ་བོ་ཉིད་ནི་མི་དམིགས་པ་ཡིན་ལ། དེས་ནི་དངོས་པོ་མེད་པའི་ཐ་སྙད་དུ་རུང་བ་ཉིད་བསྒྲུབ་པར་བྱ་བ་ཡིན་ནོ། །རབ་ཏུ་གྲུབ་པའི་ཡུལ་ནི་དཔེ་ཡིན་ཏེ། དེ་ཉིད་ཀྱི་ཕྱིར། ཡུལ་ཡོད་ན་ཡང་རྨོངས་པའི་ཕྱིར། །གཞན་དག་རྗེས་སུ་མི་བརྗོད་པ། །གྲུབ་པ་དང་ནི་ཆོས་མཐུན་ལས། །བརྡ་དྲན་བྱེད་པ་འབའ་ཞིག་གོ །ཞེས་བཤད་པ་ཡིན་ནོ། །དེའི་ཕྱིར་གང་ཞིག་གང་ལ་མ་རྨོངས་པ་དེ་ནི་དེ་ལ་ཁྱབ་པར་བྱེད་པ་མི་དམིགས་པ་ལས་མེད་པའི་ཐ་སྙད་དུ་བྱེད་ལ། གང་ཞིག་གང་ལ་རྨོངས་པ་དེ་ནི་དེ་ལ་མི་དམིགས་པ་དེ་ཉིད་རང་བཞིན་གྱི་གཏན་ཚིགས་ཡིན་ལ། མེད་པའི་ཐ་སྙད་ཀྱི་ཡུལ་དུ་རབ་ཏུ་གྲུབ་པ་ཉིད་ཀྱང་དཔེ་ཡིན་ཏེ། དེ་ཙམ་གྱི་རྒྱུ་མཚན་ཉིད་དུ་རབ་ཏུ་འགྲུབ་པའི་རྒྱུ་ཡིན་པའི་ཕྱིར་རོ། །མངོན་སུམ་སྔོན་དུ་འགྲོ་བ་ཅན་གྱི་མེད་པའི་ཐ་སྙད་ནི་འགའ་ཡང་ཡོད་པ་མ་ཡིན་ཏེ། དེ་ཉིད་ཀྱི་ཕྱིར་འདི་འགའ་ཞིག་ཏུ་འགོག་པར་བྱེད་པ་ཡང་
མངོན་སུམ་གྱིས་ནི་བྱ་བར་རིགས་པ་མ་ཡིན་ཏེ་ཞེས་འཆད་པར་འགྱུར་བ་དང༌། དགག་པ་གང་ཇི་སྙེད་པ་དེ་ཐམས་ཅད་ནི་མི་དམིགས་པ་ལས་ཡིན་ནོ་ཞེས་དེ་དང་དེ་དག་ཏུ་བཤད་པ་ཡིན་ནོ། །མངོན་སུམ་དུ་སྣང་བའི་ཡུལ་གྱི་དངོས་པོ་ལ་ཡང༌། རྨོངས་པ་ལ་ནི་མཚན་ཉིད་པའི་རྗེས་སུ་དཔག་པ་ལས་ཐ་སྙད་དུ་འགྱུར། རྨོངས་པ་མ་ཡིན་པ་ནི་མངོན་སུམ་ཉིད་ལས་སོ། །ཁྱད་པར་ཅན་གྱི་ཤིང་གི་རྣམ་པ་འགའ་ཞིག་ལས་ཤིང་གི་ཐ་སྙད་ཞུགས་སུ་ཟིན་ཀྱང་ལོ་མ་ལ་སོགས་པ་དང་ལྡན་པ་ཙམ་ཉིད་ཐ་སྙད་ཀྱི་རྒྱུ་མཚན་ཡིན་པར་ནི་མ་ངེས་ཏེ་མཐོང་བའི་རྣམ་པ་དེ་ཉིད་ལ་ཡང་རྒྱུ་མཚན་ཉིད་ཡིན་པར་ཐེ་ཚོམ་ཟ་བ་གང་ཡིན་པ་དེ་ནི། དེའི་རྣམ་པ་དང་བྲལ་བ་མཐོང་བ་གང་ཡིན་པ་དེ་ཉིད་ལ་ཐ་སྙད་ཀྱི་ཡུལ་ཉིད་དུ་མི་དྲན་པ་ཡིན་ཏེ། དཔེར་ན་བ་ལང་ཆུང་དུ་དགལ་བ་ལང་གི་ཐ་སྙད་ཞུགས་ཀྱང་བ་ལང་ཆེན་པོ་ལ་མི་དྲན་པ་བཞིན་ནོ། །རྨོངས་པ་དེ་ཡང་ཅི་ཞིག་ལྟར་རབ་ཏུ་གྲུབ་པའི་ཡུལ་གྱི་རྗེས་སུ་འབྲངས་ནས། དེ་ཙམ་ཉིད་རྒྱུ་མཚན་ཡིན་པར་རིག་པར་བྱས་ཏེ། འདོད་པའི་དོན་ལ་ཐ་སྙད་དུ་རང་ཉིད་ཀྱིས་ཁོང་དུ་ཆུད་དམ་གཞན་གྱིས་དེ་ལ་རྟོགས་པར་བྱས་ཀྱང་རུང་སྟེ། རྗེས་སུ་དཔག་པ་ལས་ཐ་སྙད་དུ་བྱེད་པ་ཡིན་ནོ། །རྒྱུ་མཚན་ངེས་པ་གང་ཡིན་པ་དེ་ནི་མངོན་སུམ་ཁོ་ནས་འགྱུར་རོ། །དོན་གཞན་གྱི་རྗེས་སུ་འབྲང་བ་མེད་པར་རྣམ་པར་རྟོག་པ་ལ་སྣང་བའི་ཐ་སྙད་དུ་རུང་བ་ཉིད་མཐོང་བའི་དོན་དུ་ཞེན་པར་བྱས་པ་དེའི་ཐ་སྙད་ནི་མངོན་སུམ་དུ་འགྲོ་བ་ཡིན་གྱི་དངོས་པོ་མེད་པའི་ཐ་སྙད་ནི་དེ་ལྟར་ནམ་ཡང་མངོན་སུམ་སྔོན་དུ་འགྲོ་བ་ཅན་མ་ཡིན་ནོ། །མ་དམིགས་ཀྱང་ཡོད་པའི་ཕྱིར་མི་དམིགས་པ་ལ་རྟག་ཏུ་འཁྲུལ་པར་དོགས་པས། སྣང་བ་མི་དམིགས་པས་དངོས་པོ་མེད་པར་ཐ་སྙད་དུ་བྱ་བ་ཡིན་གྱི་མངོན་སུམ་གྱིས་ནི་མ་ཡིན་ནོ་ཞེས་བཤད་ཟིན་ཏོ། །ཤེས་པ་དང་ཤེས་བྱ་དམིགས་པ་མེད་པ་ལ་ནི་རྨོངས་པ་མེད་པའི་ཕྱིར། རྣམ་པ་གཅིག་ཏུ་ངེས་པའི་ཤེས་པ་ཡང་དག་པར་རིགས་པ་ཉིད་ཀྱིས་ངེས་པ་དེས་ན་མངོན་སུམ་གྱིས་ཐ་སྙད་དུ་བྱེད་པ་ཡིན་ཏེ། དེས་ན་མངོན་སུམ་དེ་ཉིད་ལ་མི་དམིགས་པ་ཞེས་བྱའོ་ཞེས་ཀྱང་བཤད་ཟིན་ཏོ། །དེ་བཞིན་དུ་ཡོད་པའི་ཐ་སྙད་ཀྱི་རྒྱུ་ནི་དམིགས་པ་ཡིན་ཏེ། དེས་ན་རྒྱུ་མེད་པའི་ཕྱིར་
མ་དམིགས་ཀྱང་དེ་ལ་འཇུག་པར་བྱེད་པ་བཟློག་པ་ཡིན་ནོ། །དམིགས་པ་ཉིད་དོན་རྣམས་ཀྱི་ཡོད་པ་ཡིན་པས་དེ་མེད་ན་ཡོད་པའི་ཐ་སྙད་ལ་འཇུག་པར་བྱ་བ་མ་ཡིན་ནོ་ཞེས་བསྒྲུབ་པ་ཡིན་ཏེ། ཕ་མ་ཡིན་པ་འགའ་ཞིག་ལ་སྐྱེད་བྱེད་མ་ཡིན་པར་སྨྲ་བས་ཕའི་ཐ་སྙད་འཇུག་པ་ཟློག་པར་བྱེད་པ་བཞིན་ནོ། །མཇུག་བསྡུ་བ་ནི་དེའི་ཕྱིར་རང་གིས་གྲུབ་པ་མ་ཡིན་པ་སྟེ། མངོན་སུམ་གྱི་ཤེས་པ་ལ་བརྟན་ནས་རང་གི་ངོ་བོས་མ་གྲུབ་པ་མ་ངེས་པ་ནི་བདག་ཉིད་དང་འབྲེལ་པའི་སྒྲུབ་པར་བྱེད་པ་སྟེ་གོ་བར་བྱེད་པ་ལ་ལྟོས་པ་ཡིན་ནོ། །གོ་བར་བྱེད་པ་དེ་ཡང་ཇི་ལྟ་བུའི་ཁྱད་པར་ཅན་ཞིག་ཡིན་ཞེ་ན། མི་འཁྲུལ་པ་ཞེས་བྱ་བས་གོ་བར་བྱེད་པའི་རང་གི་ངོ་བོ་བཤད་དེ། གོ་བར་བྱ་བའི་དོན་ལ་འཁྲུལ་པ་མེད་པ་གང་ཡིན་པ་དེ་ནི་གོ་བར་བྱེད་པའོ། །དེ་ཡང་དེ་ལྟ་བུར་གྱུར་པའི་བདག་ཉིད་དང་འབྲེལ་པ་ཡིན་ཏེ། དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་པའི་བདག་ཉིད་དག་གིས་མ་འབྲེལ་པ་ལ་ནི་མི་འཁྲུལ་པ་ཉིད་མེད་པའི་ཕྱིར་རོ། །ཕྱིར་ཞེས་བྱ་བ་ནི་གཏན་ཚིགས་ཀྱི་དོན་ཏེ། གང་གི་ཕྱིར་མངོན་སུམ་མ་ཡིན་པའི་དངོས་པོ་ནི་བདག་དང་འབྲེལ་པ་ཅན་ཁོ་ན་ལས་རྟོགས་པར་བྱ་བ་ཡིན་ལ། འབྲེལ་པ་ལ་བརྟེན་ནས་ལྐོག་ཏུ་གྱུར་པའི་དོན་རྟོགས་པ་ཡང་རྗེས་སུ་དཔག་པ་ཡིན་ནོ། །དེའི་ཕྱིར་མངོན་སུམ་མ་ཡིན་པ་སྟེ། ཚད་མ་གང་ཞིག་མངོན་སུམ་ལས་ཐ་དད་པ་དེ་ནི་རྗེས་སུ་དཔག་པ་ལས་གཞན་མ་ཡིན་གྱི། འོན་ཀྱང་རྗེས་སུ་དཔག་པ་ཉིད་ཡིན་ནོ། །གང་ཞིག་མངོན་སུམ་ལས་ཐ་དད་ཅིང་རྗེས་སུ་དཔག་པ་ལས་ཀྱང་གཞན་དུ་གྱུར་པ་དེ་ནི་ཚད་མ་མ་ཡིན་པ་ཁོ་ནའོ། །ཚུ་རོལ་མཛེས་པ་གསུམ་ལ་སོགས་པའི་གྲངས་བསལ་བ་ཉིད་སྟོངས་བཏབ་པ་ཉིད་དུ་བསམས་ནས་གྲངས་གཉིས་ཉིད་ཀྱང་དགག་པའི་ཕྱིར་རྗེས་སུ་དཔག་པ་སྤང་བར་འདོད་ནས་སྨྲས་པ། མངོན་སུམ་མ་ཡིན་པ་མངོན་སུམ་ལས་གཞན་པའི་ཚད་མ་ཡོད་པ་མ་ཡིན་ནོ། །གང་གི་ཕྱིར་དེ་ནི་དངོས་པོའི་རང་གི་ངོ་པོ་ལ་ཕྱིན་ཅི་ལོག་གི་རྣམ་པ་ཅན་ཡིན་ལ། ཕྱིན་ཅི་ལོག་ཀྱང་ཚད་མ་ཉིད་ཡིན་ན་ནི་ཚད་མ་རྣམས་ཀྱི་ངེས་པ་གང་ལས་ཡིན། དེ་བཞིན་དུ་འབྲས་བུའི་གཏན་ཚིགས་ནི་མི་གནས་པ་ཉིད་དེ། ཨུཏྤལ་ལས་སྐྱེས་པའི་ཨུཏྤལ་ནི་བ་ལང་གི་ལྕི་བ་ལས་ཀྱང་མཐོང་ལ། དེ་
བཞིན་དུ་མེ་དང་གཙུབ་ཤིང་གཙུབས་པ་ལས་ཀྱང་མེ་ཡིན་ནོ། །རང་བཞིན་གྱི་གཏན་ཚིགས་ཀྱང་དེའི་བདག་ཉིད་དུ་ཁྱད་པར་མེད་ཀྱང་བརྩལ་མ་ཐག་ཏུ་འབྱུང་བ་ནི་མི་རྟག་པ་ཉིད་ཀྱི་གོ་བར་བྱེད་པ་ཡིན་གྱི། མི་རྟག་པ་ཉིད་ནི་འདིའི་མ་ཡིན་ནོ། །དེ་ཡང་རིགས་པ་མ་ཡིན་ཏེ། རྒྱུ་མཚན་ཁྱད་པར་མེད་པའི་ཕྱིར་རོ། །བརྩལ་མ་ཐག་ཏུ་བྱུང་བ་ཉིད་ཁོ་ན་དེའི་བདག་ཉིད་ནི་མ་ཡིན་ཏེ། འབྲེལ་པ་ནི་གཉིས་ལ་གནས་པའི་ཕྱིར་རོ། །དེའི་ཕྱིར་འབྲས་བུ་དང་རང་བཞིན་གྱི་གཏན་ཚིགས་འདི་གཉིས་ངེས་པར་མི་གནས་པ་དེས་ནི་རྗེས་སུ་དཔག་པ་ཚད་མ་མ་ཡིན་ནོ་ཞེས་གང་བརྗོད་པ་དེ་ནི་རིགས་པ་མ་ཡིན་ཏེ། གང་གི་ཕྱིར་མངོན་སུམ་གྱིས་ཀྱང་གཟུང་བའི་དངོས་པོ་གང་ཡིན་པ་དེ་ཉིད་ནི་ཐོབ་པར་ནུས་པ་མ་ཡིན་ཏེ། སྐད་ཅིག་མ་ཉིད་ཀྱི་ཕྱིར་རོ། །འོན་ཀྱང་ཐ་དད་པ་མེད་པར་ལྷག་པར་ཞེན་པར་བྱས་པ་དངོས་པོ་དེ་ཉིད་ཀྱི་རྒྱུ་འཇུག་པའི་ཡུལ་ཡིན་ལ། ལྷག་པར་ཞེན་པར་བྱས་པའི་འཇུག་པའི་ཡུལ་ཐོབ་པར་བྱེད་པ་ནི་རྗེས་སུ་དཔག་པ་ཡང་བྱེ་བྲག་ཡོད་པ་མ་ཡིན་ནོ། །འདི་ལྟར་མངོན་སུམ་གྱི་དེ་ཐོབ་པར་ནུས་པ་ཉིད་ཀྱི་རྒྱུ་མཚན་ཡང་དེ་མེད་ན་མི་འབྱུང་བ་ཁོ་ན་ཡིན་ལ། དེ་ནི་རྗེས་སུ་དཔག་པ་ལ་ཡང་ཁྱད་པར་ཡོད་པ་མ་ཡིན་ནོ་ཞེས་འཆད་པར་འགྱུར་རོ། །དེའི་ཕྱིར་དངོས་པོ་སྣང་བའི་དབང་གིས་ནི་འགའ་ཞིག་ཀྱང་ཚད་མར་རྣམ་པར་འཇོག་པ་མ་ཡིན་ནོ། །འབྲས་བུའི་གཏན་ཚིགས་ཀྱང་རྣམ་པར་གནས་པ་ཡིན་ཏེ། རྒྱུ་ཐ་དད་པ་ཐམས་ཅད་ལ་འབྲས་བུ་ཐ་དད་པ་ཉིད་དུ་མཐོང་བའི་ཕྱིར་རོ། །དེའི་ཕྱིར་འཁྲུལ་པ་མེད་པ་ཉིད་དོ། །དེ་བཞིན་དུ་ངེས་པའི་དོན་ནི་གོ་བར་བྱེད་པ་ཡིན་ལ། ངེས་པ་ཡང་དོན་འགའ་ཞིག་ནི་སོ་སོར་ངེས་པའི་རང་གི་ངོ་བོར་ངེས་པར་བྱེད་དེ། དཔེར་ན་ཤིང་ཤ་པ་ལ་ཤིང་གི་ངོ་བོར་ངེས་པ་བཞིན་ནོ། །ཡང་འགའ་ཞིག་ནི་ངེས་པ་ན་དེ་དང་དེ་མ་ཡིན་པའི་ངོ་བོར་ངེས་པར་བྱེད་དེ། དཔེར་ན་ཤིང་ཉིད་ལ་ཤིང་ཤ་བ་དང་ཤིང་ཤ་པ་མ་ཡིན་བའི་ངོ་བོར་ངེས་པ་བཞིན་ནོ། །དེ་ལ་མི་རྟག་པ་ཙམ་གྱི་ངོ་བོར་ངེས་པའི་བརྩལ་མ་ཐག་ཏུ་བྱུང་བ་ནི་དེའི་གོ་བར་བྱེད་པ་ཡིན་གྱི། འཁྲུལ་པའི་ཕྱིར་གཉི་གའི་ངོ་བོར་ངེས་པའི་མི་རྟག་པ་ཉིད་ནི་བརྩལ་མ་ཐག་ཏུ་བྱུང་བ་ཉིད་ཀྱིས་གོ་བར་བྱེད་པ་མ་ཡིན་ནོ། །བརྩལ་མ་ཐག་ཏུ་བྱུང་བའི་ངོ་བོའི་ཁྱད་པར་གྱི་
མི་རྟག་པ་གང་ཡིན་པ་དེ་ནི་རྟགས་མེད་པར་ངེས་པར་མི་ནུས་ལ། ངེས་ངེས་ན་ཡང་རྟགས་ཉེ་བར་བླངས་པ་དོན་མེད་པ་ཡིན་ཏེ། དེས་ན་རང་བཞིན་གྱི་གཏན་ཚིགས་ངེས་པར་ནུས་པ་ཡིན་ནོ། །གཞན་ཡང་དེ་སྤོང་བར་བྱེད་པས་དེ་ཉིད་ཁས་བླངས་པར་མི་རིགས་པའི་ཕྱིར་རྗེས་སུ་དཔག་པ་ལ་སྐུར་པ་འདེབས་པ་ཁྱོད་ཀྱིས་རྗེས་སུ་དཔག་པ་ཁས་ལེན་པ་འདི་ནི་མི་རིགས་སོ། །ཇི་ལྟར་ཞེ་ན། གང་གི་ཕྱིར་ཞེས་བྱ་བ་ལ་སོགས་པ་སྟོན་པར་བྱེད་དོ། །ཚད་མ་དང་ཅིག་ཤོས་དེ་དག་སྤྱིའི་ཚུལ་དུ་བཞག་པ་གནས་པར་བྱེད་པ་ནི་སྤྱི་བཞག་སྟེ་དེའི་ཕྱིར་རོ། །སྤྱི་སྨོས་པ་ཅིའི་ཕྱིར་ཞེ་ན། འདི་ལ་ཤེས་པའི་གསལ་བ་འགའ་ཞིག་གི་ཡུལ་ནི་ཉམས་སུ་མྱོང་བ་ཡིན་ནོ། །ཉམས་སུ་མྱོང་བ་འགའ་ཞིག་ནི་ཡུལ་ཉམས་སུ་མྱོང་བ་མེད་ཀྱང་ཡུལ་དང་དུས་དང་གསལ་བྱེད་ཀྱི་ཁྱད་པར་དང༌། གོམས་པའི་དབང་གིས་སྐྱེ་བའི་དུས་ཉིད་ནི་མངོན་སུམ་ཉིད་ཀྱིས་ཚད་མའམ་ཚད་མ་མ་ཡིན་པར་ངེས་པར་ནུས་པ་ཉིད་ཡིན་ཏེ། འཁྲུལ་པར་དོགས་པ་ནི་ཡུལ་ཐག་རིང་པོའི་ཤེས་པའི་གསལ་བ་ཉིད་ལ་འགྱུར་གྱི་ཐམས་ཅད་ལ་ནི་མ་ཡིན་ནོ་ཞེས་བྱ་བ་འདི་ཡང་དང་པོ་ཉིད་དུ་བརྗོད་ཟིན་ཏོ། །དེས་ན་རྗེས་སུ་དཔག་པ་མེད་པར་ནི་ཉམས་སུ་མྱོང་བ་དང་མ་མྱོང་བ་རང་དང་གཞན་གྱི་རྒྱུད་ལ་ཡོད་པ་རྣམས་ལ་ཚད་མའམ་ཚད་མ་མ་ཡིན་པའི་སྤྱི་དང་ལྡན་པར་མི་འགྱུར་རོ་ཞེས་བསྟན་པའི་དོན་དུའོ། །གཞན་གྱི་བློ་ཤེས་པར་བྱེད་པའི་ཡང་ཕྱིར་ཏེ། ལུས་ལས་ཐ་དད་པ་ནི་མངོན་སུམ་གྱིས་ཤེས་པར་མི་ནུས་སོ་སྙམ་དུ་དགོངས་པའོ། །འགོག་པར་ཞེས་བྱ་བ་ནི་འགག་པའི་ཐ་སྙད་ལ་བརྗོད་པར་བྱ་བ་ཡིན་ཏེ། དེའི་ཕྱིར་ཡང་ཚད་མ་གཞན་སྲིད་པར་ཁྱོད་ཉིད་ཀྱིས་ཁས་བླངས་པ་ཡིན་ནོ། །འདི་ལྟར་རྗེས་སུ་དཔག་པ་མེད་པར་ནི་དགག་པའི་ཐ་སྙད་དུ་བྱ་བར་མི་ནུས་སོ་ཞེས་བཤད་ཟིན་ཏོ། །དེ་ཤེས་པའི་ཞེས་བྱ་བ་ལ་སོགས་པས་ཚད་མ་གཞན་སྲིད་པའི་གཏན་ཚིགས་དང་པོ་འཆད་དོ། །ཚུ་རོལ་མཛེས་པ་པ་དེ་མངོན་སུམ་ཚད་མ་སྟེ་སླུ་བ་མེད་པ་ཅན་ཡིན་ལ། རྗེས་སུ་དཔག་པ་ནི་མ་ཡིན་ནོ་ཞེས་བྱ་བ་འདིས་ནི་ཉེ་བར་སྟོན་པ་སྨ་བའི་རྣམ་པ་སྟོན་ཏེ། འདིས་ནི་ཚུ་རོལ་མཛེས་པ་ལ་སྤྱིའི་ཚུལ་དུ་ཁྱད་པར་ཅན་གྱི་ཉེ་བར་བསྟན་པའི་རྣམ་པར་ཚད་མ་དང་ཅིག་ཤོས་འཇོག་
པར་བསྟན་ཏོ། །ད་ནི་འདི་ལྟར་ཉེ་བར་སྟོན་པ་ལས་ནི་ཅི་ནས་ཀྱང་རྗེས་སུ་དཔག་པ་ངེས་པར་ཁས་བླང་བར་བྱའོ་ཞེས་དེ་ལྟར་སྟོན་པ་ཉེ་བར་སྟོན་པ་ན་ཉེ་བར་སྟོན་པའི་རྒྱུ་དང་དགོས་པ་འཆད་པར་བྱེད་དོ། །དབང་པོ་ལ་བརྟེན་པའི་ཤེས་པའི་གསལ་བ་འགའ་ཞིག་མི་སླུ་བ་སྟེ། དོན་ཡོད་པ་ཐོབ་པར་ནུས་པ་དང༌། ཡིད་ཀྱིས་ཤེས་པའི་གསལ་བ་འགའ་ཞིག་སླུ་བར་དམིགས་ནས་ཏེ། ཤེས་ནས་སྨྲ་བ་ཞེས་བྱ་བ་འདིས་ནི་ཚད་མའི་མཚན་ཉིད་ཤེས་པའི་རྒྱུ་སྟོན་ཏོ། །སླུ་བ་དང་མི་སླུ་བ་ཡོངས་སུ་མ་ཤེས་པར་ནི་དེའི་མཚན་ཉིད་ཤེས་པར་མི་ནུས་ལ། སླུ་བ་དང་མི་སླུ་བ་ཅན་ཤེས་ན་ནི་མཚན་ཉིད་གང་ཡིན་པ་དེ་ཤེས་ཏེ། ཡོངས་སུ་མ་ཤེས་ན་མཚན་ཉིད་མ་ཡིན་པའི་ཕྱིར་ཤེས་པ་མཚན་ཉིད་དུ་འདུས་པ་དེས་ན་རང་གི་སྒྲས་མ་བརྗོད་དོ། །དེའི་མཚན་ཉིད་ལ་ཁྱབ་པ་ནི་གསལ་བ་མ་ལུས་པ་ཡོངས་སུ་ཟིན་པ་སྟེ། དེ་རྒྱུར་འགྱུར་བས་སོ། །འདི་སྐད་དུ་རེ་ཞིག་ཤེས་པའི་གསལ་བ་འགའ་ཞིག་ལ་སླུ་བ་དང་མི་སླུ་བའི་མཚན་ཉིད་གང་ཡིན་པ་དེ་ཤེས་ནས་རང་དང་གཞན་གྱི་རྒྱུད་ལ་ཡོད་པ་དེའི་མཚན་ཉིད་ཅན་གྱི་ཤེས་པ་མ་ལུས་པ་ལ་ཐོབ་བར་ནུས་པའི་མི་སླུ་བ་དང༌། ཅིག་ཤོས་ལ་དེ་ལས་བཟློག་པར་ཤེས་པར་བྱས་ཏེ། དེས་ན་ཡུལ་མ་ལུས་པ་ལ་ཉེ་བར་སྟོན་པར་བྱེད་དོ་ཞེས་བརྗོད་པར་འགྱུར་བ་ཡིན་ནོ། །འདིས་ནི་ཉེ་བར་སྟོན་པའི་རྒྱུ་བརྗོད་དོ། །གལ་ཏེ་འདི་སྙམ་དུ་ཇི་ལྟར་ཉམས་སུ་མྱོང་བའི་ཡུལ་གྱི་ཤེས་པ་ཉིད་ཉེ་བར་སྟོན་པར་བྱེད་དོ་སྙམ་ན་བཤད་པ། ཇི་ལྟར་ཉེ་བར་བསྟན་པ་སྟེ། ཉེ་བར་བསྟན་པ་ལས་མ་འདས་པར་སློབ་མ་འཇུག་པ་ན་མི་འཁྲུལ་པ་སྟེ། མི་སླུ་བར་བྱ་བའི་དོན་དགོས་པ་སྨྲ་བའི་རང་བཞིན་གང་ལ་ཡོད་པ་དེ་ནི་དེ་ལྟ་བུའོ། །འདིས་ནི་སྨྲས་པའི་དགོས་པ་བསྟན་ཏོ། །འདི་སྐད་དུ་སྟོན་པ་པོ་གང་ཡིན་པ་དེ་ནི་ཉེ་བར་སྟོན་པ་གང་གིས་དོན་བྱེད་པ་དོན་དུ་གཉེར་བ་གཞན་དག་སླུ་བར་མི་འགྱུར་བ་དེ་ཉིད་བསྟན་པར་བྱ་བ་ཡིན་ན། སྟོན་པ་པོ་རང་གི་རྒྱུད་ལ་ཡོད་པའི་ཚད་མའམ་ཚད་མ་མ་ཡིན་པ་ལས་ནི་གཞན་དག་མི་འཇུག་པའི་ཕྱིར། དེ་དག་ལ་འཇུག་པ་ན་སླུ་བ་དང་མི་སླུ་བ་ཐོབ་པ་དང་སྤང་བའི་དོན་དུ། རང་གི་རྒྱུད་ལ་ཡོད་པའི་ཚད་མའམ་ཚད་མ་མ་ཡིན་པ་ཉེ་བར་བསྟན་པས་ཅི་ཞིག་བྱ། དེའི་
ཕྱིར་རང་དང་གཞན་གྱི་རྒྱུད་ལ་ཡོད་པ་སྤྱིར་ཚད་མའམ་ཚད་མ་མ་ཡིན་པར་བསྟན་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །ཇི་ལྟ་བ་ཞེས་བྱ་བ་ནི་ཇི་ལྟར་ཉེ་བར་བསྟན་པར་བྱ་བ་དེ་ལྟར་བསྒྲུབས་པ་སྟེ་ངེས་པའོ། །བསྒྲུབས་པ་སྐྱེས་བུ་རང་གི་ཤེས་པའི་ཡུལ་དུ་ཉེ་བར་སོན་ཅིང་ངེས་པར་སྟོན་པར་བྱེད་པ་ཡིན་པའི་ཕྱིར་ངེས་པ་ཉིད་ལ་བསྒྲུབས་པར་བརྗོད་པ་ཡིན་ནོ། །མ་ངེས་པ་ནི་སྟོན་པར་བྱེད་མི་ནུས་པའི་ཕྱིར་ཇི་ལྟར་ཉེ་བར་སྟོན་པ་རང་གིས་ཤེས་པར་བྱ་བ་ཡིན་ནོ། །དེ་ཡང་ཇི་ལྟར་རྟོགས་ཤེ་ན། ཆོས་མཐུན་པ་མཐོང་བ་ལས་སོ། །དེ་ནི་ཞེས་བྱ་བ་ནི་ཚད་མའམ་ཚད་མ་མ་ཡིན་པའོ། །གང་གི་ཕྱིར་གསལ་བ་འགའ་ཞིག་ཏུ་མཚན་ཉིད་དེ་ལ་མི་སླུ་བ་ཉིད་ཀྱིས་ཁྱབ་པར་ངེས་ཏེ། དེས་ན་ཁྱབ་པར་བྱ་བ་སྲིད་པའི་གསལ་བ་ཐམས་ཅད་ལ་ཁྱབ་པར་བྱེད་པ་ཡང་སྲིད་བར་བྱེད་པ་ཡིན་ནོ། །འགའ་ཞིག་ཏུ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ངེས་པར་བྱས་ཏེ་ཁྱབ་པར་བྱ་བ་ངེས་པ་སྔོན་དུ་སོང་བ་ཅན་གྱི་ཡོད་པ་ནི་རྗེས་སུ་དཔག་པར་བྱ་བ་ལས་མ་འདས་པ་ཡིན་ལ། རྗེས་སུ་དཔག་པར་བྱ་བ་ཡང་རྗེས་སུ་དཔག་པའི་ཡུལ་ཡིན་ནོ། །རྗེས་སུ་དཔག་པ་དེ་ཡང་ཚད་མ་ཉིད་དུ་མ་གྲུབ་པའི་ཕྱིར་ཏེ། དེས་ན་ཚད་མ་མ་ཡིན་པས་ཡུལ་དུ་བྱས་པ་གང་ཡིན་པ་དེ་ཡང་བདེན་པ་མ་ཡིན་པའི་ཕྱིར་ཉེ་བར་བསྟན་པས་ཅི་ཞིག་བྱ། སྨིག་རྒྱུའི་ཤེས་པའི་ཡུལ་ནི་བདེན་པ་ཉིད་དུ་ཉེ་བར་བསྟན་པར་འོས་པ་མ་ཡིན་ནོ། །འདི་ལ་ནི་དངོས་པོའི་སྟོབས་ཀྱིས་ཞུགས་པ་རང་གི་དོན་གྱི་རྗེས་སུ་དཔག་པ་ཡོད་པ་ཡིན་ནོ་ཞེས་བསྟན་པ་ཡིན་ནོ། །འདིར་མི་སླུ་བས་ཁྱབ་པའི་མཚན་ཉིད་དེ་ཡང་གང་ཡིན་ཞེ་ན། དེ་ལ་ཚུ་རོལ་མཛེས་པ་པས་ནི་དོན་འཛིན་པ་དེའི་མཚན་ཉིད་དུ་འདོད་ལ། ཁོ་བོ་ཅག་ནི་དོན་མེད་ན་མི་འབྱུང་བ་ཉིད་དུའོ། །ཁོ་བོ་ཅག་གི་ལྟར་ན་དོན་མེད་ན་མི་འབྱུང་བ་ཙམ་ཉིད་དོན་ཐོབ་པར་ནུས་པའི་རྒྱུ་མཚན་ཡིན་ལ། གཞན་གྱི་ལྟར་ན་དོན་འཛིན་པ་ཙམ་རྒྱུ་མཚན་ཡིན་ནོ། །དེའི་ཕྱིར་ཁོ་བོ་ཅག་གིས་འདོད་པའི་དོན་མེད་ན་མི་འབྱུང་བ་དང༌། ཕ་རོལ་གྱི་དོན་འཛིན་པ་ཉིད་ལ་གཞན་ལ་ལྟོས་པ་མེད་པ་ཉིད་ཀྱིས་ཁྱབ་བོ། །གལ་ཏེ་དེ་ཡོད་ན་ཡང་ཐོབ་པར་ནུས་པ་མེད་ན་ནི། གཞན་ལ་ལྟོས་པར་འགྱུར་བས་ལྟོས་པ་མེད་
པ་ཉིད་དེ་དང་འགལ་བར་འགྱུར་རོ། །དེའི་ཕྱིར་ཁྱབ་པར་བྱེད་པ་འགལ་བ་དམིགས་པས་མི་མཐུན་པའི་ཕྱོགས་ལས་ལྡོག་པ་ན་རྗེས་སུ་འགྲོ་བ་གྲུབ་པས། ཁྱབ་པར་བྱ་བ་དོན་མེད་ན་མི་འབྱུང་བ་ཉིད་དང་དོན་འཛིན་པ་ཉིད་ཡོད་པ་ན་ཁྱབ་པར་བྱེད་པ་ཚད་མ་ཉིད་ཡོད་པ་ཡིན་ནོ་ཞེས་བྱ་བ་འདི་ནི་ཁོ་བོ་ཅག་གཉིས་ཀྱི་རང་བཞིན་གྱི་གཏན་ཚིགས་སོ། །ཚད་མ་མ་ཡིན་པའི་ཡུལ་ལ་ཡང་རྒྱུ་མཚན་མེད་པ་ཉིད་ཀྱི་ཕྱིར། དེ་ཙམ་ཉིད་ལ་ལྟོས་པའི་ཚད་མ་མེད་པ་ཉིད་ཀྱིས་སོ། །དེའི་ཕྱིར་དེ་ལྟར་རྗེས་སུ་དཔག་པ་ཁོ་ནས་ཚད་མ་མ་ཡིན་པ་རྟོགས་ནས་ཉེ་བར་སྟོན་པ་ཡིན་ལ། དེ་ཡང་མ་གྲུབ་པའི་ཕྱིར་ཚད་མ་དང་ཚད་མ་མ་ཡིན་པ་ཅུང་ཟད་ཀྱང་ཉེ་བར་བསྟན་པར་མི་བྱའོ། །གལ་ཏེ་རང་གི་རྒྱུད་ལ་ཡོད་པ་ཉེ་བར་བསྟན་པར་བྱ་བ་ཡོད་པ་མ་ཡིན་ནམ་ཞེས་དོགས་པ་ལ། ཡུལ་ཉམས་སུ་མྱོང་བ་ཞེས་བྱ་བ་ལ་སོགས་པ་སྨོས་ཏེ། ཉམས་སུ་མྱོང་བའི་ཡུལ་ཅན་གང་ཡིན་པ་དག་གོ །རྣམ་པ་གཉིས་ཀྱིས་ཡུལ་ཉམས་སུ་མྱོང་སྟེ། དོན་ཐོབ་པ་དང་གོམས་པའི་དབང་གིས་དོན་མེད་ན་མི་འབྱུང་བར་ངེས་པའི་ཤེས་པ་ནི་ཡུལ་ཉམས་སུ་མྱོང་བ་ཞེས་བརྗོད་པ་ཡིན་ནོ། །ཡུལ་ཉམས་སུ་མྱོང་བ་མ་གཏོགས་པ་ཞེས་སྨྲས་པ་ན་ཡུལ་ཉམས་སུ་མྱོང་བའི་ཤེས་པའི་གསལ་བ་རྣམས་ནི་མངོན་སུམ་གྱི་ཚད་མའམ་ཚད་མ་མ་ཡིན་པར་གྲུབ་པར་སྨྲས་པ་སྟེ། དེ་དག་ཀྱང་རྗེས་སུ་དཔག་པ་ལས་ཚད་མའམ་ཚད་མ་མ་ཡིན་པར་ཁོང་དུ་ཆུད་པ་ཡིན་ན་ནི་མ་གཏོགས་པ་ཞེས་བྱ་བའི་ཚིག་མི་འཐད་པའི་ཕྱིར་རོ། །དེ་ལ་མངོན་སུམ་དེ་ཉིད་ཀྱིས་དོན་མེད་ན་མི་འབྱུང་བ་གཟུང་བ་ངེས་པ་ཉིད་འདི་ཙམ་ཞིག་ནི་མངོན་སུམ་གྱི་བྱ་བ་ཡིན་ལ། དུས་ཕྱིས་འབྱུང་བའི་ཤེས་པ་གཞན་གྱིས་ནི་ཐེ་ཚོམ་སེལ་བ་ཡིན་ནོ་ཞེས་བརྗོད་ཟིན་ཏོ། །བརྫུན་པའི་དོན་ཅན་གྱི་མཚན་ཉིད་ཚད་མ་མ་ཡིན་པ་ཉིད་ཀྱང་ཤེས་པ་སྔ་མའི་ཡུལ་ལ་གནོད་པར་བྱེད་པའི་ཤེས་པ་ཕྱི་མས་ངེས་པར་བྱེད་པའི་ཕྱིར་མངོན་སུམ་གྱིས་ངེས་པ་ཡིན་གྱི་རྗེས་སུ་དཔག་པས་ནི་མ་ཡིན་ནོ། །གང་ཞིག་རྟོགས་པའི་དུས་ཉིད་ན་གང་རྟོགས་པ་དེ་དག་ནི་རྟགས་དང་རྟགས་ཅན་མ་ཡིན་ཏེ། དཔེར་ན་ས་ཕྱོགས་དང་བུམ་པ་མེད་པ་དག་རྟོགས་པ་ཐ་མི་དད་པའི་ཕྱིར་གོ་བྱ་གོ་བྱེད་མ་ཡིན་པ་བཞིན་ནོ། །དེ་བཞིན་དུ་གནོད་པར་བྱེད་
པའི་ཡུལ་ཡོད་པར་རྟོགས་པ་ཉིད་ཀྱི་ཚེ་སྔ་མས་དོན་མི་བདེན་པ་ཉིད་དུ་རྟོགས་པའི་ཕྱིར་ཚད་མ་མ་ཡིན་པ་མངོན་སུམ་གྱིས་ཁོར་དུ་ཆུད་པ་ཡིན་ནོ། །དེ་དག་ནི་གསལ་བ་ལས་ཡོད་པ་ཡིན་ལ་དེ་ཡང་བསྟན་པར་ནུས་པ་མ་ཡིན་ནོ་ཞེས་བསྟན་པའི་ཕྱིར་བསྟན་དུ་མེད་པ་ཞེས་སྨོས་ཏེ། བསྟན་པར་མི་ནུས་པའི་མཚན་ཉིད་གང་ཡིན་པ་དག་གོ །རྗེས་སུ་དཔག་པ་སྤངས་པས་ཁྱབ་པར་བྱ་བ་དང་ཁྱབ་པར་བྱེད་པ་ཉིད་ཀྱི་ཆོས་མེད་པའི་ཕྱིར་མི་སླུ་བས་ཁྱབ་པའི་མཚན་ཉིད་དང་ཅིག་ཤོས་གང་ཡིན་པ་དག་བསྟན་པར་མི་ནུས་པའི་ཕྱིར། ཇི་ལྟར་དེ་ཉེ་བར་སྟོན་པར་བྱེད། ཅི་སྟེ་ཡུལ་ཉམས་སུ་མྱོང་བའི་གསལ་བ་ཅུང་ཟད་ཅིག་ཉེ་བར་བསྟན་པའི་རྒྱུ་མཚན་དུ་བརྟགས་པ་དེ་ལྟ་ན་ཡང༌། ཉེ་བར་བསྟན་པ་དེ་དག་ནི་ཅུང་ཟད་ཀྱང་ཉེ་བར་མཁོ་བ་མ་ཡིན་ནོ་ཞེས་བཤད་པ་ནི་རང་གི་རྒྱུད་ལ་ཞེས་བྱ་བ་ལ་སོགས་པའོ། །དེ་དག་གིས་ཀྱང་འདི་གཞན་ལས་ཐ་སྙད་བྱ་བར་མི་དབང་སྟེ། གཞན་ལ་ཐ་སྙད་རྗེས་སུ་རྟོགས་པར་མི་ནུས་པའོ། །གང་གི་ཕྱིར་དེ་དག་ནི་མཚོན་པར་བྱ་བ་མ་ཡིན་པ་སྟེ་འཇུག་པར་བྱེད་པ་ཉིད་དུ་གཞན་གྱིས་རིག་པ་མ་ཡིན་པའི་ཕྱིར་རོ། །ཅིའི་ཕྱིར་མཚོན་པར་བྱ་བ་མ་ཡིན་ཞེ་ན། གང་གི་ཕྱིར་སྟོན་པ་པོ་རང་གི་རྒྱུད་ལ་ཡོད་པ་དེ་ནི་ཤེས་པར་བྱ་བ་མ་ཡིན་པ་དེའི་ཕྱིར་གཞན་གྱིས་འཇུག་པར་བྱེད་པ་ཉིད་དུ་མཚོན་པར་ནུས་པ་མ་ཡིན་ནོ། །ཉེ་བར་བསྟན་པར་བྱ་བ་ནི་འཇུག་པའི་ཡན་ལག་ཉིད་ཡིན་ཏེ། དེས་ན་འཇུག་པའི་ཡན་ལག་མ་ཡིན་པ་དེ་དག་ནི་ཉེ་བར་བསྟན་པར་བྱ་བ་མ་ཡིན་པ་ཉིད་དོ་ཞེས་བྱ་བ་ནི་ཚད་མའི་འབྲས་བུ་ཉིད་ཡིན་ནོ། །དེའི་ཕྱིར་ཕ་རོལ་པོས་གཞན་འཇུག་པའི་ཡན་ལག་ཚད་མ་དང་ཚད་མ་མ་ཡིན་པ་ཉེ་བར་སྟོན་པའི་བསྟན་བཅོས་བྱ་བ་ཉིད་མ་ཡིན་ནོ། །བྱེད་ན་ཡང་ཞེས་བྱ་བ་ནི་ཚད་མ་དང་ཚད་མ་མ་ཡིན་པ་ཉེ་བར་སྟོན་པའི་བསྟན་བཅོས་བྱེད་ན་ཡང༌། རང་ཉིད་ཀྱི་ཚད་མ་དང་ཅིག་ཤོས་ཉེ་བར་སྟོན་པའི་འཇུག་པ་ལ་ཅོ་འདྲི་བར་བྱེད་པ་ཡིན་ཏེ། བཞད་གང་དུ་བྱེད་པ་ཡིན་ནོ། །འདི་ལྟར་ཉེ་བར་སྟོན་པའི་དགོས་པ་ནི་གང་ཞིག་ཉེ་བར་བསྟན་པ་ལས་མངོན་སུམ་ཚད་མ་ཡིན་ལ། ཅིག་ཤོས་ནི་མ་ཡིན་ནོ་ཞེས་ཕ་རོལ་པོས་རྟོགས་པ་འདི་ཉིད་ཡིན་ན། དེ་ཡང་རྗེས་སུ་དཔག་པ་ཚད་མ་མ་ཡིན་ནོ་ཞེས་སྨྲས་པ་ན་རྗེས་སུ་དཔག་པ་ཚད་མ་མ་ཡིན་པར་བྱ་བས། གཞན་རྟོགས་པར་
བྱ་བའི་དོན་དུ་མངོན་སུམ་ཚད་མ་ཡིན་གྱི། རྗེས་སུ་དཔག་པ་ནི་མ་ཡིན་ནོ་ཞེས་བརྗོད་པ་དེ་ཉིད་རང་ཉིད་ཀྱིས་བཀག་པར་འགྱུར་རོ། །གང་གི་ཕྱིར་རྗེས་སུ་དཔག་པས་རྟོགས་ནས་དེ་སྐད་བརྗོད་པ་ཡིན་པ་དེས་ན་དེ་ཚད་མ་མ་ཡིན་ན་དེ་ཡང་མེད་པར་བརྗོད་པར་འགྱུར་རོ། །དེའི་ཕྱིར་རྗེས་སུ་དཔག་པ་ཚད་མ་མ་ཡིན་ནོ་ཞེས་སྨྲས་པ་ནི་གང་བདག་གིས་བརྗོད་པ་དེ་ནི་དེ་ལྟ་མ་ཡིན་ནོ་ཞེས་བྱ་བར་འགྱུར་ལ། དེ་ལྟ་ན་ཡང་རང་གི་འཇུག་པ་ལ་ཅོ་དྲིས་པར་འགྱུར་རོ། །དེའི་ཕྱིར་དེ་ལྟར་ཚད་དང་ཅིག་ཤོས་ཞེས་བྱ་བ་ལ་སོགས་པས་དང་པོ་ཉེ་བར་བཀོད་པའི་གཏན་ཚིགས་གཞུང་བཙུགས་ནས། གཏན་ཚིགས་གཉིས་པ་གཞུང་གཟུགས་པའི་ཕྱིར་བཤད་པ། གཞན་དེ་བློ་དང་ལྡན་པ་ཁོང་དུ་ཆུད་པ་ནི་སྐབས་ཀྱི་བསྟན་བཅོས་ཀྱི་དོན་རྟོགས་པའོ། །དེའི་དོན་ནི། དེའི་ཆེད་དམ་དེ་གྲུབ་པར་བྱ་བའི་ཕྱིར་བསྟན་བཅོས་བྱེད་པ་སྟེ་འགོད་པས་ཇི་ལྟར་རྗེས་སུ་དཔག་པ་སྤངས་པ་ཡིན། ཇི་ལྟར་མི་རིགས་ཤེ་ན། སྨྲས་པ། རྗེས་སུ་དཔག་པ་དེ་སྤོང་ན་བསྟན་བཅོས་བྱེད་པ་ལ་འཇུག་པ་འབྲས་བུ་མེད་པའི་ཕྱིར་རོ། །རྗེས་སུ་དཔག་པ་སྤངས་པའི་ཕྱིར་དེས་ངེས་པར་བྱས་པ་གཞན་གྱི་སེམས་ཀྱང་མེད་པར་བརྗོད་པར་འགྱུར་རོ། །གཞན་གྱི་སེམས་མེད་པར་དོགས་ཀྱང་གཞན་བསྟན་བཅོས་ཀྱི་དོན་ཁོང་དུ་ཆུད་པར་ཐེ་ཚོམ་ཟ་བ་ལས་བསྟན་བཅོས་བྱེད་པ་ལ་འཇུག་པར་ཡང་རིགས་པ་མ་ཡིན་ཏེ། སྨིག་རྒྱུའི་ཤེས་པ་བཞིན་དུ་རྗེས་སུ་དཔག་པས་ངེས་པའི་དོན་ནི་དོན་མེད་པར་ངེས་པའི་ཕྱིར་དོན་དུ་མི་འགྱུར་བར་ཐེ་ཚོམ་ཟ་བ་མ་ཡིན་གྱི། དོན་ཡོད་པར་ཐེ་ཚོམ་ཟ་བ་ནི་མ་ཡིན་པའི་ཕྱིར་རྗེས་སུ་དཔག་པ་ལ་བསྙོན་པས་འབྲས་བུ་མེད་པའི་བསྟན་བཅོས་བྱེད་པ་ལ་འཇུག་པར་རིགས་པ་མ་ཡིན་ནོ། །མི་སྤོང་ན་ནི་རྗེས་སུ་དཔག་པ་མེད་དུ་ཟིན་ཀྱང་དོན་ཡོད་པར་ཐེ་ཚོམ་ཟ་བ་ལས་འཇུག་པ་ཡིན་ཏེ་ཞིང་རྨོ་བ་བཞིན་ནོ། །དེའི་ཕྱིར་བསྟན་བཅོས་བྱེད་པའི་རྗེས་སུ་དཔག་པས་སྤང་བར་རིགས་པ་མ་ཡིན་ནོ། །གལ་ཏེ་འདི་སྙམ་དུ་བློ་ནི་ལུས་ལས་ཐ་དད་པ་མེད་པ་ཡིན། མཐོང་བ་ན་ཡང་ལུས་འཛིན་པར་བྱེད་པའི་མངོན་སུམ་དེ་ཉིད་དེ་ཉིད་ཀྱིས་འཛིན་པའི་ཕྱིར་འདི་ལ་རྗེས་སུ་དཔག་པས་ཅི་ཞིག་བྱ་སྙམ་དུ་དོགས་པ་ལ། སྨྲས་པ། ལུས་ཉིད་ནི་བློ་མ་ཡིན་ཏེ། ལུས་དེ་གྲུབ་སྟེ་མངོན་
སུམ་གྱིས་ངེས་ཀྱང༌། བློའི་རྣམ་པར་བརྟག་པ་ཞེས་བྱ་བ། བློ་ཉིད་འདོད་ཆགས་ལ་སོགས་པའི་རྣམ་པས་བློ་གཞན་ལས་རྣམ་པར་བརྟག་པར་བྱ་ཞིང་ཁྱད་པར་དུ་བྱ་བ་ཡིན་པས་བློའི་རྣམ་པར་བརྟག་པ་ནི་བློའི་ཁྱད་པར་ཏེ། དེ་ལ་ཐེ་ཚོམ་ཟ་བའི་ཕྱིར་རོ། །མངོན་སུམ་གྱིས་རྟོགས་པར་བྱ་བ་ནི་ཁྱད་པར་ཡིན་ཏེ། སྤྱི་དངོས་པོ་མེད་པའི་ཕྱིར་རོ། །བློ་ཡང་མངོན་སུམ་གྱིས་རྟོགས་ན་ནི་ཁྱད་པར་ཉིད་ངེས་པར་འགྱུར་ན་ཁྱད་པར་ངེས་པ་ཡང་མ་ཡིན་ཏེ། དེ་དང་འགལ་བའི་ཐེ་ཚོམ་ཉིད་མཐོང་བའི་ཕྱིར་རོ། །སྤྱིར་རྟོགས་པ་ཡང་རྗེས་སུ་དཔག་པ་ཡིན་ནོ། །གལ་ཏེ་ཤིང་གྲུབ་ཀྱང་དེ་ཉིད་ལས་ཐ་དད་པ་མེད་པའི་ཤིང་ཤ་པ་ཉིད་ལ་ཐེ་ཚོམ་ཟ་ལ། སྔོན་པོ་ངེས་ཀྱང་སྔོན་པོ་ལས་ཐ་དད་པ་མེད་པའི་སྐད་ཅིག་མ་ཉིད་མ་གྲུབ་པ་མ་ཡིན་ནམ་ཞེ་ན། དེ་ཉིད་ཀྱི་ཕྱིར་ཁྱད་པར་གྱི་རྣམ་གྲངས་རྣམ་པར་བརྟག་པར་བྱ་བའི་སྒྲ་སྦྱར་བ་ཡིན་ཏེ། གང་ཞིག་གང་ལས་ཐ་དད་པ་མེད་པ་དེ་གྲུབ་པ་ན་ཁྱད་པར་ཅིག་ཤོས་གྲུབ་པ་ཁོ་ནའོ། །གང་གི་ཕྱིར་སྐད་ཅིག་མ་ཉིད་དང་ཤིང་ཤ་པའི་ཁྱད་པར་གྱི་མཚན་ཉིད་ནི་མཐོང་བའི་རང་བཞིན་དེ་ཉིད་ཡིན་ལ་དེ་ཡང་ངེས་པ་ཁོ་ནའོ། །འོན་ཀྱང་སྐད་ཅིག་མ་ཉིད་དུ་མ་ངེས་པ་ཡིན་ལ་མ་ངེས་པ་ཡང་སྤྱིའི་རྣམ་པ་ཡིན་པའི་ཕྱིར་སྤྱིའི་རྣམ་པའི་སྐད་ཅིག་མ་ཉིད་མ་གྲུབ་པ་ཡིན་གྱི་ཁྱད་པར་གྱི་རྣམ་པ་ནི་མ་ཡིན་ཏེ། མཐོང་བ་སྔོན་པོའི་རང་བཞིན་ལས་ཐ་དད་པའི་སྐད་ཅིག་མ་ཉིད་ཀྱི་ཁྱད་པར་མེད་པའི་ཕྱིར་རོ། །འགའ་ཞིག་གྲུབ་པ་ན་ཁྱད་པར་གང་ཞིག་མ་གྲུབ་ཅིང་མ་མཐོང་བ་དེ་ནི་འགལ་བའི་ཆོས་དང་ལྡན་པ་ཡིན་པའི་ཕྱིར་མཐོང་བ་དེ་ལས་གཞན་ཉིད་ཡིན་པས་གཅིག་པ་ཉིད་ཀྱི་ཐ་སྙད་ལ་ནི་དེ་གྲུབ་ན་གྲུབ་པ་ཉིད་ཀྱིས་ཁྱབ་པ་ཡིན་ལ། ཁྱབ་པར་བྱེད་པ་དེ་མེད་པ་ཉིད་ནི་གཏན་ཚིགས་སོ། །གང་ཞིག་གྲུབ་པ་ན། གང་གི་ཁྱད་པར་མ་གྲུབ་པ་དེ་དག་ནི་གཅིག་ཉིད་མ་ཡིན་ཏེ། དཔེར་ན་དྲོ་བ་དང་སྲ་བ་དག་བཞིན་ནོ། །ལུས་གྲུབ་པ་ན་བློའི་ཁྱད་པར་གྲུབ་པ་མ་ཡིན་ནོ། །གཏན་ཚིགས་མ་གྲུབ་པ་ནི་མ་ཡིན་ཏེ། གང་གི་ཕྱིར་ཆགས་པ་ལ་སོགས་པའི་བློའི་རྣམ་པར་ངེས་པ་དང་འགལ་བ་ནི་ཐེ་ཚོམ་ཡིན་ལ། ཤེས་པའི་རང་བཞིན་གྱི་ཁྱད་པར་ཡང་ཆགས་པ་ལ་སོགས་པའི་རྣམ་པ་དང༌། འགལ་བ་ལ་སོགས་
པའི་རྣམ་པ་ཡིན་པར་ཉམས་སུ་མྱོང་བས་གྲུབ་པའི་ཕྱིར་རྩོད་པ་ཡོད་པ་མ་ཡིན་པས་ལུས་གྲུབ་ཀྱང་སྲ་བ་ལ་སོགས་པ་བཞིན་དུ་ཐེ་ཚོམ་ཟ་བའི་ཕྱིར་ཇི་ལྟར་ན་གཏན་ཚིགས་མ་གྲུབ་པ་ཉིད་ཡིན། དེའི་ཕྱིར་སེམས་པ་ནི་ཆང་གི་ནུས་པ་དང་འདྲ་བ་མ་ཡིན་ཏེ། ནུས་པ་ཅན་དག་ལས་ནུས་པ་ཐ་དད་པ་མེད་པའི་ཕྱིར། ཆང་ལས་ནུས་པ་ཐ་དད་པ་མ་ཡིན་ལ། ཤེས་པ་ཡོད་པ་ནི་ལུས་ལས་ཐ་དད་པའི་ཁྱད་པར་ཅན་གྱི་རྣམ་པར་གྲུབ་པའི་ཕྱིར་རོ། །ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ཉིད་ཡང་གྲུབ་པ་ཉིད་དོ། །ཐམས་ཅད་ནི་རྣམ་པ་གཉིས་ཏེ། འགལ་བའི་ཆོས་དང་བྲལ་བ་དང་དེ་དང་ལྡན་པའོ། །དེ་ལ་གཅིག་ཉིད་ཀྱི་ཐ་སྙད་ནི་དེ་དང་བྲལ་བ་ལ་མཐོང་ངོ༌། །གལ་ཏེ་དེ་དང་ལྡན་པ་ལ་འཇུག་ན་ནི་ཡུལ་ངེས་པ་མེད་པར་འགྱུར་བས། ཡུལ་ངེས་པ་ཉིད་ཀྱིས་ཀྱང་ཁྱབ་སྟེ། དེས་ན་ཁྱབ་པར་བྱེད་པ་མི་དམིགས་པས་འགལ་བའི་ཆོས་དང་ལྡན་པའི་རང་བཞིན་ལས་ལྡོག་པ་ན། དེ་དང་བྲལ་བའི་ཡུལ་གྱི་རང་བཞིན་གྱིས་ཁྱབ་པའི་ཕྱིར་ཁྱབ་པ་གྲུབ་བོ། །གང་གྲུབ་ཀྱང་གང་མ་གྲུབ་པ་དེ་ལ་ནི་འགལ་བའི་ཆོས་དང་ལྡན་པ་ལས་ཁྱབ་པར་བྱེད་པ་དེ་དང་བྲལ་བའི་ཡུལ་ཉིད་མེད་པའི་ཕྱིར་རོ། །གལ་ཏེ་འདི་སྙམ་དུ་རྗེས་སུ་དཔག་པ་ལ་བསྙོན་པ་ལ་རྗེས་སུ་དཔག་པའི་སྦྱར་བ་འཐད་པ་མ་ཡིན་ནོ་སྙམ་ན་དེ་ནི་རིགས་པ་མ་ཡིན་ཏེ། ཚུ་རོལ་མཛེས་པ་པ་དེའི་འབྱུང་བ་རྣམས་ལ་ཐ་དད་པའི་ཐ་སྙད་ཀྱི་ནི་འགལ་བའི་ཆོས་དང་ལྡན་པའི་རྒྱུ་མཚན་ཅན་ཉིད་ཡིན་ལ། གཅིག་སྣང་བ་ན་མཐོང་བ་གཞན་སྣང་བ་མེད་པ་འདི་ལ་ཡང་འགལ་བའི་ཆོས་དང་ལྡན་པ་ཉིད་ཡོད་པ་དེས་ན་རྒྱུ་མཚན་སྲིད་པ་ནི་ཐ་སྙད་འཇུག་པར་བྱ་བ་ཡིན་ལ། མ་ཡིན་ན་ནི་གཞན་ལ་ཡང་འཇུག་པར་མི་བྱའོ་ཞེས་གཞན་དག་ཐ་དད་པའི་ཐ་སྙད་ལ་འཇུག་པར་བྱེད་པ་ཡིན་ནོ། །གལ་ཏེ་ཡང་འདི་རྗེས་སུ་དཔག་པ་ཡིན་པ་དེ་ལྟ་ན་ཡང་ཕ་རོལ་གྱིས་སྤངས་པ་ཉིད་ནི་མ་ཡིན་གྱི། འོན་ཀྱང་ཕ་རོལ་རྗེས་སུ་དཔག་པ་ཉིད་མ་ཡིན་པར་འདོད་པ་འབའ་ཞིག་ཏུ་ཟད་དོ། །འདི་སྙམ་དུ་དེ་ལྟ་ན་ཡང་གཏན་ཚིགས་མ་གྲུབ་སྟེ། གང་གི་ཕྱིར་རང་གི་ལུས་གྲུབ་ན་རང་གི་བློ་གྲུབ་པ་ཡོད་པ་ཡིན་ལ། ཁྱད་པར་དུ་འཕགས་པའི་སྐྱེས་བུས་ནི་གཞན་གྱི་ལུས་གྲུབ་པ་
ན་ཡང་གཞན་གྱི་བློ་ངེས་པའི་ཕྱིར་རོ་ཞེས་དོགས་པ་ལ། དེ་ཞེས་བྱ་བ་སྨོས་ཏེ། ཐེ་ཚོམ་དུ་གྱུར་པའི་བློའི་རྣམ་པར་བརྟག་པ་དེ་བཞིན་དང་འབྲེལ་པ་གཞན་གྱི་རྒྱུད་ལ་གནས་པ་ནི་སྐྱེས་བུ་ཐ་མལ་པ་སྐྱེས་བུ་ཙམ་དེའི་མངོན་སུམ་གྱིས་མི་རྟོགས་སོ། །འདི་སྐད་དུ་བརྗོད་པ་ཡིན་ཏེ། གང་གི་ཕྱིར་གཞན་གྱི་རྒྱུད་ལ་ཡོད་པའི་བློའི་རྣམ་པར་བརྟག་པ་ནི་རྟག་ཏུ་ཐེ་ཚོམ་གྱི་ཡུལ་ཡིན་པ་དེའི་ཕྱིར་ཕལ་པའི་མངོན་སུམ་གྱིས་འཛིན་པ་མ་ཡིན་ཏེ། མངོན་སུམ་གྱིས་བཟུང་བ་ནི་ཁྱད་པར་ཡིན་ལ། ཁྱད་པར་བཟུང་ན་ཐེ་ཚོམ་མེད་པ་ཉིད་ཀྱི་ཕྱིར་རོ། །གང་ཡང་སྐྱེས་བུ་ཁྱད་པར་དུ་འཕགས་པ་འགའ་ཞིག་གི་ཤེས་པས་གཞན་གྱི་ལུས་དང་བློ་བཟུང་བ་དེ་ལྟ་ན་ཡང་ལུས་འཛིན་པའི་མངོན་སུམ་གཅིག་གིས་མ་བཟུང་བས་ཀྱང་ཐ་དད་པར་འགྱུར་བ་ཡིན་ཏེ། ཐ་དད་པའི་རྒྱུ་མཚན་ནི་འགལ་བའི་ཆོས་དང་ལྡན་པ་ཡིན་ལ། འགལ་བའི་ཆོས་དང་ལྡན་པ་དེ་ནི་གཅིག་གིས་མ་བཟུང་ན་ཡང་གྲུབ་པའི་ཕྱིར། ཡང་འགའ་ཞིག་གིས་གཅིག་ཏུ་བཟུང་བས་ལྡོག་པ་མ་ཡིན་པའི་ཕྱིར་རོ་ཞེས་བྱ་བ་ནི་རིགས་པའོ། །དགག་པ་བྱེད་ཕྱིར་ཡང་ཞེས་བྱ་བའི་གཏན་ཚིགས་གསུམ་བ་གཞུང་གཟུགས་པའི་ཕྱིར་བཤད་པ། དགག་པ་སྟེ་དགག་པའི་ཐ་སྙད་མངོན་སུམ་གྱིས་ནི་བྱ་བར་འོས་པ་མ་ཡིན་ནོ། །འགའ་ཞིག་ཏུ་ཞེས་བྱ་བ་ནི་མཐོང་བ་དང་མ་མཐོང་བ་འགའ་ཞིག་གང་ཡིན་པར་དགག་པའི་ཐ་སྙད་བྱེད་པ་གང་ཡིན་པ་དེ་ཐམས་ཅད་མངོན་སུམ་སྔོན་དུ་འགྲོ་བ་ཅན་མ་ཡིན་ཏེ། དངོས་པོ་སོ་སོར་སྣང་བ་ཉིད་ངེས་པ་ཉིད་ཀྱིས་དངོས་པོ་འཛིན་པའི་ཕྱིར་མེད་པ་ནི་མངོན་སུམ་དེའི་ཡུལ་ཉིད་དུ་འགལ་བའི་ཕྱིར་རོ། །གང་ཞིག་མངོན་སུམ་གྱིས་དེ་སྣང་བ་ཉིད་ཀྱིས་གཟུང་བ་དེ་ལ་ནི་མངོན་སུམ་གྱིས་ཐ་སྙད་དུ་བྱེད་པ་ཡིན་ན་དངོས་པོ་མེད་པ་ནི་དེའི་གཟུང་བ་མ་ཡིན་པ་དེས་ནི་དེ་ལ་མངོན་སུམ་གྱིས་ཐ་སྙད་དུ་བྱེད་པ་མ་ཡིན་ནོ་ཞེས་ལན་མང་དུ་བཤད་ཟིན་ཏོ། །མེད་པ་ཡུལ་ཡིན་པར་འགལ་བ་ཉིད་བསྟན་པའི་ཕྱིར་བཤད་པ། དེ་ནི་དོན་ཏེ་ཡུལ་གྱི་ནུས་པ་ལ་ལྟོས་པས་སོ། །འདི་སྐད་བསྟན་པ་ཡིན་ཏེ། གང་གི་ཕྱིར་མངོན་སུམ་ནི་གཟུང་བའི་དོན་གྱིས་བསྐྱེད་པ་ཡིན་ལ་དེའི་ཕྱིར་མེད་
པ་འཛིན་པ་མ་ཡིན་ནོ། །གང་ཞིག་མངོན་སུམ་གྱི་ཡུལ་ཡིན་པ་དེ་ནི་དེ་བསྐྱེད་པར་ནུས་པ་ཡིན་ན། མེད་པ་ནི་ནུས་པ་ཐམས་ཅད་དང་བྲལ་བས་ཇི་ལྟར་དེའི་ཡུལ་དུ་འགྱུར། ཅི་སྟེ་ཡང་མངོན་སུམ་དོན་གྱི་ནུས་པ་ལ་མི་ལྟོས་པར་འགྱུར་ན་ནི་དེའི་ཚེ་འདི་དོན་ལ་མི་ལྟོས་ན་ནི་ཆོད་པ་ལ་སོགས་པའི་དོན་གང་ཡིན་པ་སྟེ། རྒྱང་རིང་པོ་ན་གནས་པ་དང་ཤིན་ཏུ་ཉེ་བ་ན་གནས་པ་ལ་སོགས་པའི་དངོས་པོ་དེ་དེ་ལ་ཡང་སྐྱེ་བར་ཐལ་བར་འགྱུར་བའི་ཕྱིར་རོ། །འདི་སྐད་བཤད་པ་ཡིན་ཏེ། རང་གི་རྒྱུད་དང་འབྲེལ་པའི་མངོན་སུམ་གྱིས་གལ་ཏེ་དངོས་པོ་ཡོད་པ་ཙམ་ཉིད་འཛིན་པར་བྱེད་པ་ཡིན་ན་ནི། དེའི་ཚེ་དངོས་པོ་ཉིད་དུ་ཁྱད་པར་མེད་པའི་ཕྱིར་ཆོད་པ་དང་ཐག་རིང་པོ་ལ་སོགས་པ་ཐམས་ཅད་འཛིན་པར་འགྱུར་ན་གཟུང་བ་ཡང་མ་ཡིན་ནོ། །དེས་ན་མངོན་སུམ་རུང་བའི་ཡུལ་ན་གནས་པའི་དོན་ལ་ལྟོས་པ་ནི་དེ་ལས་སྐྱེས་པ་ཡིན་པར་ཁོང་དུ་ཆུད་པ་ཡིན་ནོ། །གཞན་དུ་ན་མྱུ་གུ་ནི་ས་བོན་དང་འབྲེལ་པར་རྣམ་པར་གཞག་མི་ནུས་པར་འགྱུར་རོ། །མངོན་སུམ་ངོ་བོ་ཉིད་ཀྱིས་ཉེ་བའི་དོན་འཛིན་པ་ཡིན་ནོ་ཞེ་ན། ཞིང་ཡང་ངོ་བོ་ཉིད་ཀྱིས་ས་བོན་དང་ཉེ་བའི་མྱུ་གུ་བསྐྱེད་པ་ཡིན་པའི་ཕྱིར་ས་བོན་རྒྱུ་ཉིད་དུ་མི་འགྱུར་རོ། །དེའི་ཕྱིར་གང་ཞིག་གང་གི་གནས་སྐབས་ཀྱི་ཁྱད་པར་རམ་ཡོད་པའི་རྗེས་སུ་བྱེད་པའི་དངོས་པོ་དེ་ནི་དེའི་འབྲས་བུ་ཡིན་ནོ་ཞེས་བྱ་བ་འདི་ནི་གཅིག་ཏུ་ངེས་པ་ཡིན་ནོ། །དེས་ན་དོན་ཉེ་བ་ལ་ལྟོས་པ་ནི་དོན་གྱིས་བསྐྱེད་པ་ཡིན་པ་དེས་ན་མེད་བ་ནི་ཡུལ་ཉིད་དུ་འགལ་ལོ། །དེའི་ཕྱིར་གང་ལས་དགག་པ་རྟོགས་པ་དེ་ནི་ཚད་མ་གཞན་ཡིན་ནོ། །གལ་ཏེ་ཡང་མངོན་སུམ་དངོས་པོ་མེད་པ་མི་འཛིན་པ་དེ་ལྟ་ན་ཡང་ཐ་སྙད་བྱེད་པར་ནུས་པ་ཡིན་ནོ་ཞེས་གཞན་དག་དོགས་པ་བསུ་ནས་དགག་པའི་ཕྱིར་སྨྲས་པ། མངོན་སུམ་ཉིད་ཀྱིས་དངོས་པོ་མེད་པར་ངེས་པ་ཞེས་བྱ་བ་ནི་མེད་པར་ངེས་པའི་བྱེད་པ་པོ་ཉིད་ནི་མངོན་སུམ་ཡིན་ཏེ། མངོན་སུམ་ཉིད་ཀྱིས་མེད་པར་ངེས་པ་ཡིན་ནོ་ཞེས་བྱ་བའི་དོན་ཏོ། ལོག་པ་ལས་ཞེས་བྱ་བ་ནི་ལོག་པ་ཉིད་ལས་སོ། །འདི་སྐད་བཤད་པར་འགྱུར་ཏེ། མངོན་སུམ་གྱི་ཤེས་པ་དེ་ཉིད་འགའ་ཞིག་ཏུ་འཇུག་པ་དང་འགའ་ཞིག་ལས་ལྡོག་པ་ཡིན་ལ། འཇུག་པའི་ཡུལ་ནི་བསྒྲུབ་པའི་ཐ་སྙད་དང༌། ལྡོག་
པའི་ཡུལ་ལ་ནི་དགག་པའི་ཐ་སྙད་འཇུག་པར་བྱེད་པ་ཡིན་ནོ། །དེས་ན་འདིར་དོན་ནི་མངོན་སུམ་ཐམས་ཅད་ནི་གཉིས་ཀའི་བདག་ཉིད་ཡིན་ལ་འཇུག་པ་དང་ལྡོག་པ་དག་གི་སྒོ་ནས་འཇིག་རྟེན་གྱི་ཐ་སྙད་འཇུག་པར་བྱེད་པ་ཡིན་ནོ་ཞེས་བྱ་བ་འདི་ཡིན་ནོ། །གལ་ཏེ་ཡང་མངོན་སུམ་ལྡོག་པ་ལ་ལྟོས་ནས་དངོས་པོ་མེད་པར་ངེས་པ་ཡིན་ནོ་ཞེས་བྱ་བའི་དོན་དུ་འདོད་ན། དེ་མེད་པ་ཡང་ཡིན་ལ་དེས་རྟོགས་པ་ཡང་ཡིན་ནོ་ཞེས་བྱ་བ་ནི་མི་རིགས་སོ། །ཕ་རོལ་གྱིས་རྟོགས་པར་དམ་བཅའ་བ་ནི་མ་ཡིན་གྱི། འོན་ཀྱང་དེ་ལྡོག་པས་ཡིན་ནོ། །ལྡོག་པ་ལས་མེད་པ་ངེས་པར་སྨྲས་པ་ན་མངོན་སུམ་གྱི་བྱ་བའི་ཁྱད་པར་མ་ཡིན་པར་བརྗོད་པར་འགྱུར་བའི་ཕྱིར་དོན་འདི་ནི་མ་ཡིན་ནོ། །ཉམས་སུ་ལེན་པ་ནི་འགལ་བའོ། །འགལ་བ་ཉིད་སྟོན་པ་ནི་དེ་མེད་པ་ཡང་ཡིན་ལ་ཞེས་བྱ་བ་ནི་ཡུལ་གང་ལ་མངོན་སུམ་ལྡོག་པ་ཉིད་ཀྱིས་མངོན་དུ་གནས་པའི་ཡུལ་དེ་ལ་ནི་མངོན་སུམ་དེ་ཡོད་པ་མ་ཡིན་ལ། མེད་ན་ཡང་ཇི་ལྟར་འགའ་ཞིག་ངེས་པའི་རྒྱུ་ཉིད་དམ་འཛིན་པར་བྱེད་པ་ཡིན་པར་འགྱུར། ངེས་པའི་བྱེད་པ་པོ་དོན་འཛིན་པར་བྱེད་པའམ། སྐྱེད་པར་བྱེད་པ་ཡིན་པར་འགྱུར་ན། མངོན་སུམ་མེད་པ་གང་ཡིན་པ་དེ་ནི་དངོས་པོའམ་དངོས་པོ་མེད་པ་འཛིན་པར་བྱེད་པ་མ་ཡིན་ལ། ངེས་པ་བསྐྱེད་པར་ནུས་པ་ཡང་མ་ཡིན་ནོ། །གང་ཞིག་འཛིན་པར་བྱེད་པའམ་ངེས་པ་བསྐྱེད་པའི་སྒོ་ནས་ངེས་པར་བྱ་བའི་དོན་ངེས་པའི་རྒྱུ་མ་ཡིན་པ་དེ་ལས་ཇི་ལྟར་ན་ངེས་པ་ཡིན་པར་རྗོད་པར་བྱེད། འདི་ཉིད་སྟོན་པར་བྱེད་པ་ནི་བྱེད་པ་པོར་འགྱུར་བའམ་འགའ་ཞིག་གིར་རྒྱུར་གྱུར་པ་དེས་རྟོགས་པ་སྟེ་ཡོངས་སུ་ཤེས་པའོ། །འདི་སྙམ་དུ་མངོན་སུམ་ལྡོག་པ་འཛིན་པར་བྱེད་པ་ཉིད་དམ་སྐྱེད་བར་བྱེད་པ་ཉིད་ཀྱིས་ངེས་པའི་རྒྱུ་ནི་མ་ཡིན་གྱི་འོན་ཀྱང་མཐོང་བ་མེད་པར་ངེས་པ་ན་དངོས་པོ་མེད་པའི་ཐ་སྙད་དུ་བྱེད་པ་འབའ་ཞིག་ཏུ་ཟད་དོ། །གང་གི་ཕྱིར་དེ་འཇུག་པ་ན་ཡོད་པའི་ཐ་སྙད་དང༌། ལྡོག་པ་ན་མེད་པའི་ཐ་སྙད་དུ་བྱེད་པ་དེའི་ཕྱིར་ཐ་སྙད་ཐམས་ཅད་དེ་དང་འབྲེལ་པར་བརྗོད་པ་ཡིན་གྱི་ལྡོག་པ་མངོན་སུམ་དུ་བྱ་བ་འགའ་ཞིག་གི་ཐ་སྙད་བྱེད་པ་པོ་ཉིད་དམ་སྐྱེད་པར་བྱེད་པ་ནི་མ་ཡིན་ནོ། །དེ་ལྟར་མེད་པར་ངེས་པ་ནི་མངོན་སུམ་ལྡོག་པར་ངེས་པ་སྔོན་དུ་
འགྲོ་བ་ཅན་ཡིན་ནོ་ཞེས་དོགས་པ་ལ། བཤད་པ་འདི་ལྡོག་ན་ནི་སྟེ་མངོན་སུམ་ལོག་པའི་ཕྱིར་གང་ལས་མེད་དོ་ཞེས་བྱ་བར་ངེས་པར་འགྱུར། གལ་ཏེ་དེ་ལས་མངོན་སུམ་ལོག་ཏུ་ཟིན་ཀྱང་དེ་ལྟ་ན་ཡང་དངོས་པོ་ཡོད་པ་ཡང་སྲིད་པ་ཡིན་ནོ། །མངོན་སུམ་ལོག་པས་དངོས་པོ་མེད་པ་མཐོང་བ་ནི་མ་ཡིན་ཏེ། དེ་ནི་མཐོང་བ་མེད་པའི་བདག་ཉིད་ཡིན་པའི་ཕྱིར་རོ། །དེས་ན་ངེས་པ་མེད་པའི་ཕྱིར་ཚད་མ་དང་མི་ལྡན་པར་མེད་པར་རྟོགས་པ་འབའ་ཞིག་ཏུ་ཟད་དོ། །མཐོང་བ་ནི་རང་གི་ཡུལ་ལ་ཚད་མ་མ་ཡིན་པའི་ཕྱིར་ངེས་པ་ཡིན་གྱི། མ་མཐོང་བ་ནི་ཚད་མ་མ་ཡིན་པ་དེའི་ཕྱིར་དངོས་པོ་མེད་པར་ངེས་པ་མ་ཡིན་པ་ཉིད་དོ། །ཅི་སྟེ་ཡང་ངེས་པ་ཡོད་དོ་ཞེ་ན། ཡོད་ན་ནི་ངེས་པ་སྲིད་པ་དེ་ཉིད་འཁྲུལ་པ་མེད་པ་མེད་ན་མི་འབྱུང་བའི་མི་དམིགས་པ་ཡིན་ནོ། །འདི་སྐད་བཤད་པ་ཡིན་ཏེ། མཐོང་བ་ལོག་པས་དངོས་པོ་མེད་པ་མ་བཟུང་ཡང༌། ངེས་པ་ཡིན་ན་ནི་འཁྲུལ་པ་མེད་པ་ཉིད་དུ་གཏན་ལ་ཕབ་པས་མེད་པར་ངེས་པར་བྱེད་པ་ཡིན་ཏེ། དེས་ན་འཁྲུལ་པ་མེད་པའི་ཕྱིར་ཚད་མ་ཡིན་ལ། མངོན་སུམ་ཡང་མ་ཡིན་པས་རྗེས་སུ་དཔག་པ་ཉིད་ཡིན་པའི་ཕྱིར་ཇི་ལྟར་རྗེས་སུ་དཔག་པ་མེད་པར་མེད་པའི་ཐ་སྙད་དུ་འགྱུར་བའམ། མངོན་སུམ་ཉིད་དངོས་པོ་མེད་པ་ངེས་པར་འབྱེད་པ་ཡང་ཇི་ལྟར་འགྱུར། དེ་ཉིད་བསྟན་པའི་ཕྱིར་བཤད་པ། དེ་ནི་དེས་ཞེས་བྱ་བ་ནི་མི་འཁྲུལ་པའི་ངེས་པ་མ་ཡིན་གྱི་མངོན་སུམ་གྱིས་ནི་མ་ཡིན་ནོ་སྙམ་དུ་དགོངས་པའོ། །མེད་པ་གྲུབ་པར་བྱེད་པ་ནི་རང་གི་ངོ་བོ་ངེས་པ་ཉིད་ཀྱིས་མེད་པའི་ཐ་སྙད་དུ་བྱེད་པའི་རྟགས་ཉིད་ཡིན་ནོ། །འདི་སྐད་བརྗོད་པར་འགྱུར་བ་ཡིན་ཏེ། མངོན་སུམ་ལོག་པ་ནི་མེད་ན་མི་འབྱུང་བར་གཏན་ལ་ཕེབས་པ་ནས་དངོས་པོ་མེད་པའི་ཐ་སྙད་དུ་བྱེད་པ་ཡིན་གྱི། དེ་མངོན་སུམ་གྱི་རྣམ་པ་ཉིད་ཀྱིས་དངོས་པོ་མེད་པར་འཛིན་པར་བྱེད་པ་ནི་མ་ཡིན་ནོ། །དེའི་ཕྱིར་དེ་སྔོན་དུ་འགྲོ་བ་ཅན་དངོས་པོ་མེད་པའི་ཐ་སྙད་ནི་རྟགས་ཅན་ཡིན་གྱི་མངོན་སུམ་གྱིས་བྱས་པ་ནི་མ་ཡིན་ནོ། །མངོན་སུམ་ལོག་པ་རང་གི་ངོ་བོས་ནི་ཅུང་ཟད་བྱེད་པ་མ་ཡིན་ལ་ལྡོག་པ་ཡང་མཐོང་བ་མེད་པའི་བདག་ཉིད་ཡིན་པས་མེད་ན་མི་འབྱུང་བ་ཡོད་ན་ནི་མེད་པར་ངེས་པའི་རྟགས་ཡིན་ལ། མེད་ན་ནི་ཐེ་ཚོམ་ཟ་བ་ཉིད་ཀྱི་ཕྱིར་རོ། །དེ་ལྟར་
བདེན་ཏེ་རྗེས་སུ་དཔག་པ་འགའ་ཞིག་ཁས་བླང་བར་བྱ་བ་ཉིད་དོ། །འགའ་ཞིག་ལས་ཞུགས་པ་ནི་མི་སླུ་བས་རྗེས་སུ་དཔག་པ་འགའ་ཞིག་མི་སླུར་ཟིན་ཀྱང་སྟེ། མངོན་པར་འདོད་པའི་དོན་ཐབ་པར་ནུས་སུ་ཟིན་ཀྱང་དེ་ལྟ་མོད་ཀྱི་དེའི་རང་བཞིན་ཅན་ཏེ་ཚུལ་གསུམ་པའི་རྟགས་ལས་སྐྱེས་པ་མི་སླུ་བ་ལས་འཁྲུལ་པ་མཐོང་བ་དེའི་ཕྱིར་ཐམས་ཅད་དུ་དེ་ཙམ་གྱི་མཚན་ཉིད་དང་ལྡན་པ་ལ་ཡིད་བརྟན་དུ་མེད་དེ། ཚད་མ་མ་ཡིན་པར་དོགས་སོ། །གང་གི་ཕྱིར་དེ་འདྲ་བ་ཉིད་འཁྲུལ་པ་ཡིན་པ་དེའི་ཕྱིར་དེ་ཚད་མ་ནི་མ་ཡིན་གྱི། འོན་ཀྱང་འགའ་ཞིག་གིས་ཞུགས་པ་ན་ཐོབ་པའི་མི་སླུ་བ་གང་ཡིན་པ་དེ་ནི་བྱ་རོག་དང་ཏ་ལའི་ཚུལ་དུ་རྒྱུ་མཚན་འགའ་ཞིག་ལས་མི་སླུ་བ་ཡིན་གྱི་གཞན་ལ་ཡིད་བརྟན་དུ་མེད་པ་ཉིད་དོ་ཞེ་ན་མ་ཡིན་ཏེ་ཞེས་བྱ་བ་ནི་ཡིད་བརྟན་དུ་མེད་པའི་རྒྱུ་ཟློག་པར་བྱེད་པ་སྟེ། དེའི་མཚན་ཉིད་ལ་ནི་འཁྲུལ་པ་ཡོད་པ་ཉིད་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེའི་བུ་ཉིད་ལ་སོགས་པ་ལ་འཁྲུལ་པར་མཐོང་ལ་དེ་ལ་ཡང་ཚུལ་གསུམ་མཐོང་བ་ཉིད་མ་ཡིན་ནམ་དེ་ཇི་ལྟར་ན་འཁྲུལ་པ་མེད་པ་ཉིད་ཡིན་ཞེ་ན། གང་ཞིག་འཁྲུལ་པ་དེ་ལ་ནི་ཚུལ་གསུམ་ཉིད་ཡོད་པ་མ་ཡིན་ནོ། །མཐོང་བ་ནོར་བ་ནི་དེའི་རང་བཞིན་ཏེ་རྟགས་དེའི་རང་བཞིན་མ་མཚོན་པ་ལས་ཡིན་ལ། ནོར་བ་ལས་ཀྱང་ཁྱོད་འཁྲུལ་པ་ཉིད་དུ་དོགས་པ་ཡིན་ནོ། །གང་གི་ཕྱིར་ཡང་དག་པའི་རྟགས་ཀྱི་མཚན་ཉིད་མཚོན་པ་དེའི་ཕྱིར་དེ་ཉིད་མེད་ཀྱང་ཡོད་པར་རྟོགས་ནས་འཁྲུལ་པ་སྲིད་པར་དོགས་པ་ཡིན་ནོ། །དེའི་བུ་ཉིད་ལ་སོགས་པ་ལ་གང་ཞིག་མེད་ཀྱང་འཁྲུལ་པར་དོགས་པའི་རྟགས་ཀྱི་མཚན་ཉིད་དེ་ཡང་གང་ཞེ་ན། རང་བཞིན་འབྲེལ་པ་ནི་རང་བཞིན་གྱིས་འབྲེལ་པ་ཉིད་དེ་འབྲེལ་པའི་རང་བཞིན་འབྲེལ་པའོ། །འདིས་ནི་དེའི་བདག་ཉིད་དང་དེ་ལས་བྱུང་བ་བརྗོད་ལ་དེ་ཉིད་ནི་རྟགས་ཀྱི་མཚན་ཉིད་དེ་ཚུལ་ཡིན་ནོ། །མཚན་ཉིད་འདིས་མཚོན་པའི་རྟགས་དེ་ལ་ནི་འཁྲུལ་པ་མེད་དོ། །གང་ཞིག་གང་དུ་དེའི་བདག་ཉིད་དང་དེ་ལས་བྱུང་བས་འབྲེལ་པ་དེ་ནི་དེ་ལ་འཁྲུལ་པ་ཡོད་པ་མ་ཡིན་ནོ། །མི་འཁྲུལ་པ་ཡང་གང་ལས་ཤེ་ན། བཤད་པ། དེ་ཞེས་བྱ་བ་ནི་ཡུལ་གང་ལ་རྟགས་འབྲེལ་པ་དེ་ནི་ཤུགས་ཀྱིས་ཉེ་བར་གཞག་པའི་
རྟགས་ཅན་ནི་ཞེས་བྱ་བས་སྨོས་སོ། །དེ་མེད་ན་རྟགས་ཀྱི་རང་གི་ངོ་བོ་མེད་པར་འགྱུར་བའི་ཕྱིར་རོ། །དེའི་བདག་ཉིད་དང་དེས་བསྐྱེད་པ་དེ་ཇི་ལྟར་ན་དེ་མེད་པར་ཡོད་པར་འགྱུར། དེའི་ཕྱིར་འཁྲུལ་པ་གང་ཡིན་པ་དེ་ནི་ཚུལ་གསུམ་ལས་སྐྱེས་པ་མ་ཡིན་ལ། དེས་བསྐྱེད་པ་ནི་འཁྲུལ་པ་མེད་པ་ཉིད་པས་རྟགས་ཀྱི་མཚན་ཉིད་རྟོགས་པར་བྱ་བ་ལ་འབད་པར་བྱ་བ་ཡིན་པའི་ཕྱིར་ཡིད་བརྟན་དུ་མེད་པ་མ་ཡིན་ནོ། །དེའི་ཕྱིར་སྔར་བསྟན་པའི་ཚུལ་གྱིས་ཁྱོད་ཀྱིས་རྗེས་སུ་དཔག་པ་ཁས་བླང་བར་བྱ་བ་ཡིན་གྱི་ཡིད་བརྟན་པར་བྱ་བ་མ་ཡིན་པ་ནི་མ་ཡིན་ནོ་ཞེས་བྱ་བར་གནས་སོ། །གཞན་ཡང་མངོན་སུམ་ཚད་མར་ཁས་ལེན་པས་རྗེས་སུ་དཔག་པ་གདོན་མི་ཟ་བར་ཚད་མར་ཁས་བླང་བར་བྱས་ཏེ། རྗེས་སུ་དཔག་པ་མངོན་སུམ་ལས་ཚད་མའི་རྒྱུ་མཚན་ཁྱད་པར་མེད་པའི་ཕྱིར་རོ། །གང་གི་ཕྱིར་མངོན་སུམ་ནི་དོན་ཏེ་ཆད་མའི་འཇུག་པའི་ཡུལ་མེད་ན་མི་སྲིད་ན་མི་འབྱུང་བ་ལས་ཏེ་འདིས་ནི་ལྡོག་པ་བསྟན་ཏོ། །དེ་ཡོད་ན་ཡོད་པ་ཉིད་ཀྱང་ཤུགས་ཀྱིས་བརྗོད་དེ། མངོན་སུམ་ཡོད་པ་ནི་དེ་མེད་པར་ཡོད་པ་མ་ཡིན་ནོ་ཞེས་བྱ་བའི་ཤུགས་ཀྱིས་དེ་ཡོད་པ་ཉིད་ན་ཡོད་པ་ཉིད་ཡིན་ནོ་ཞེས་དེ་ཡོད་ན་ཡོད་པ་བརྗོད་པ་ཡིན་ནོ། །དེའི་ཕྱིར་དེ་ལྟར་མངོན་སུམ་ཡང་དེའི་འབྲས་བུ་ཉིད་ཡིན་པའི་ཕྱིར་འཇུག་པའི་ཡུལ་ཐོབ་པར་ནུས་པར་གནས་པ་མ་ཚད་མ་ཞེས་བརྗོད་པ་ཡིན་ལ། དེའི་འབྲས་བུ་ཉིད་ནི་རྗེས་སུ་དཔག་པ་ལ་ཡང་ཁྱད་པར་ཡོད་པ་མ་ཡིན་ནོ། །ཁྱད་པར་མེད་པ་དེ་ཉིད་སྟོན་པར་བྱེད་དོ། །བསྒྲུབ་པར་བྱ་བའི་དོན་དང་འབྲེལ་པའི་རང་བཞིན་གྱི་རྟགས་གང་ཡིན་པ་དེ་རྗེས་སུ་དཔག་པ་དེའི་རྒྱུ་ཉིད་ཡིན་པར་གྱུར་པ་ན་མངོན་སུམ་དང་རྗེས་སུ་དཔག་པ་གཉིས་མཚུངས་སོ། །འདི་ལྟར་མངོན་སུམ་དོན་ལས་སྐྱེ་བ་ཡིན་པ་དེ་བཞིན་དུ་རྗེས་སུ་དཔག་པ་ཡང་འབྲེལ་པའི་རང་བཞིན་གྱི་རྟགས་ཤེས་པ་ལས་ཡིན་ཞིང་ཤེས་པ་དེ་ཡང་རྟགས་ལས་ཏེ། རྟགས་ཀྱང་ཁ་ཅིག་ནི་བསྒྲུབ་པར་བྱ་བའི་རང་བཞིན་ཡིན་ལ། ཁ་ཅིག་ནི་བསྒྲུབ་པར་བྱ་བའི་འབྲས་བུ་ཡིན་པའི་ཕྱིར་གཉི་ག་ཡང་དེའི་འབྲས་བུར་ཁྱད་པར་མེད་པས། ཁྱད་པར་མེད་པ་དེ་ཐོབ་པར་ནུས་པར་བྱས་པ་ཡིན་ནོ། །ཚིགས་སུ་བཅད་པ་འདི་ཉིད་ཀྱི་དོན་འབྲེལ་པ་ནི་མངོན་སུམ་ཡང་དོན་ལ་མི་
སླུ་བ་སྟེ་ཐོབ་པར་ནུས་པ་ཉིད་ལས་ཚད་མ་ཡིན་ནོ། །ཡང་གི་སྒྲས་ནི་ཁོ་བོ་ཅག་འབའ་ཞིག་རྗེས་སུ་དཔག་པ་དོན་མེད་ན་མི་འབྱུང་བ་ལས་ཚད་མར་འདོད་པར་མ་ཟད་ཀྱི་ཁྱོད་ཀྱིས་ཀྱང་འདི་ཉིད་ཀྱི་མངོན་སུམ་ཚད་མ་ཡིན་པར་འདོད་པ་ཡིན་ནོ་ཞེས་བྱ་བ་འདི་བསྟན་པ་ཡིན་ནོ། །མི་སླུ་བ་དེ་ནི་དོན་དེ་ལས་བདག་ཉིད་རང་གི་ངོ་བོ་ཐོབ་པའི་ཕྱིར་ཏེ། གང་གི་ཕྱིར་མངོན་སུམ་གང་ཡིན་པ་དེ་དོན་དེས་བསྐྱེད་པ་ཡིན་པ་དེ་ཐོབ་པར་བྱེད་པ་ཡིན་ནོ། །ཡང་ཇི་ལྟར་གཞན་ལས་སྐྱེས་པས་ཀྱང་དེ་ཐོབ་པར་མི་ནུས་ཤེ་ན། བཤད་པ། གཞན་ལས་བྱུང་བ་སྟེ་སྐྱེས་བའི་ཡོད་བ་སྟེ། ལྡོག་པ་ནི་དེ་ལ་མི་སླུ་བ་མི་རིགས་པའི་ཕྱིར་རོ། །དེའི་བདག་ཉིད་ཀྱང་རྒྱུར་གྱུར་པ་མ་ཡིན་པ་ལྟོས་པ་མེད་པ་གང་ཡིན་པ་ལ། གཞན་ལས་སྐྱེས་པ་གང་ཡིན་པ་དེ་འཁྲུལ་པ་མེད་པར་ཇི་ལྟར་གྱུར་ཏེ། དཔེར་ན་རབ་རིབ་ཅན་གྱི་ཤེས་པ་ངེས་པར་བྱས་པའི་དོན་ལ་འཁྲུལ་པ་བཞིན་ནོ། །འདིས་ནི་ལྡོག་པ་མེད་པ་ལ་མི་སླུ་བ་མེད་པར་བཤད་པ་ཡིན་ནོ། །མ་བྱུང་བ་ནི་དེ་ལས་ཤེས་པར་བྱ་བ་ལས་ལྟོས་པར་བྱ་བ་ཡིན་ནོ། །གང་ཞིག་གང་ལས་མ་བྱུང་བ་དེ་ནི་དེ་དང་འབྲེལ་པ་མེད་པ་ཡིན་ལ། དེ་ཉིད་ཀྱི་ཕྱིར་འཁྲུལ་པ་མ་ཡིན་ནོ། །འདིས་ནི་རྗེས་སུ་འགྲོ་བ་མེད་པ་ལ་མི་སླུ་བ་མེད་པར་བཤད་པ་ཡིན་ནོ། །རྣམ་པ་འདིས་ནི་འབྲེལ་པས་མི་འཁྲུལ་པ་ཡིན་ལ། མི་འཁྲུལ་པས་ན་དེ་ཐོབ་པར་ནུས་ཞེས་བསྒྲུབ་པ་ཡིན་ནོ། །ངེས་པར་ཞེས་བྱ་བ་འདི་ནི་མི་རིགས་པའི་ཁྱད་པར་ཏེ་མི་སླུ་བ་མི་རིགས་པར་ངེས་པའོ། །འབྲེལ་པ་མེད་པའི་ཤེས་པ་ལས་ནི་བྱ་རོག་དང་ཏ་ལ་ཙམ་ཡང་ཡོད་པ་མ་ཡིན་ནོ་ཞེས་བྱ་བ་འདི་ནི་བསྟན་ཟིན་ཏོ། །འདི་མི་སླུ་བའི་རྒྱུ་མཚན་ཉིད་ཡིན་པ་སྤང་བའི་ཕྱིར་སྨྲས་པ། མངོན་སུམ་ནི་དོན་མེད་ན་མི་འབྱུང་བའི་ཕྱིར། དོན་གྱི་འབྲས་བུ་ཉིད་ཡིན་པས་དོན་ལ་མི་སླུ་བར་བྱེད་པ་ནི་མ་ཡིན་ནོ། །འོ་ན་མི་སླུ་བ་གང་ལས་ཡིན་ཞེ་ན། འོན་ཀྱང་ཞེས་བྱ་བ་སྨྲས་ཏེ། འོན་ཀྱང་དོན་མཐོང་བ་ལས་ཡིན་ནོ། །གང་གི་ཕྱིར་དོན་གྱི་རང་བཞིན་མངོན་སུམ་དུ་མཐོང་བ་དེའི་ཕྱིར་དོན་ཐོབ་པར་བྱེད་པ་ཡིན་ནོ། རྗེས་སུ་དཔག་པས་ནི་དོན་ཅུང་ཟད་ཀྱང་མ་མཐོང་སྟེ། དེས་ན་ཇི་ལྟར་ཐོབ་པར་བྱེད་པ་ཡིན། ཐོབ་པར་བྱེད་པ་མ་ཡིན་པ་དེ་ཉིད་ཀྱི་ཕྱིར་ཚད་
མ་མ་ཡིན་ནོ། །དེའི་ཕྱིར་དེ་ལྟར་གཞན་གྱིས་དོན་གྱི་རང་བཞིན་མཐོང་བ་དང་མ་མཐོང་བ་དག་ལས་ཚད་མ་དང་ཚད་མ་མ་ཡིན་པ་རྣམ་པར་གཞག་པ་ན། སློབ་དཔོན་གྱིས་དོན་མཐོང་བ་དེ་ཡང་ཞེས་བྱ་བ་ལ་སོགས་པས་མཐོང་བ་ཉིད་རྟོག་པར་མཛད་དོ། །མཐོང་བའི་སྒྲས་མཐོང་བར་བྱ་བ་སྟེ་མཐོང་བའི་དོན་ན་མ་མཐོང་བར་བྱེད་པ་སྟེ་མཐོང་བ་པོ་ཉིད་ཡོད་པ་གཏན་ཚིགས་སུ་ལེན་གྲང༌། དེས་ན་གཏན་ཚིགས་ཀྱི་དོན་ནི་མཐོང་བའི་དོན་ཡོད་པའི་ཕྱིར་ཞེས་བྱ་བ་འདི་ཡིན་ཏེ། དེའི་ངོ་བོར་གྱུར་པ་མཐོང་ཞེས་བྱ་བའི་ཆོས་གང་ཡིན་པ་དེའི་ཡོད་པ་ནི་དངོས་སུ་ན་དེ་ཉིད་ཀྱི་ཡོད་པ་ཡིན་ལ་དེ་ཡང་གཏན་ཚིགས་སུ་ཉེ་བར་བླངས་པ་ཡིན་ནོ། །དེ་བཞིན་དུ་ལྟ་བའི་ཤེས་པ་ཡང་ལྟ་བ་པོ་ཉིད་དུ་ཡོད་པ་གཏན་ཚིགས་ཡིན་ནོ། །འདི་འདྲ་བའི་དོན་ཅན་གྱི་ངག་སྦྱར་བ་གཞན་དག་ཏུ་ཡང་རྣམ་པར་རྟོག་པ་འདི་ཉིད་བལྟ་བར་བྱའོ། །དཔེར་ན་གང་གི་ཕྱིར་མངོན་སུམ་དོན་མཐོང་བ་དང་འཛིན་པ་དང་ཤེས་པ་དེའི་ཕྱིར་ཚད་མ་ཡིན་ནོ་ཞེས་བྱ་བ་དེ་ལྟ་བུ་ལ་སོགས་པར་མཐོང་བ་ལ་སོགས་པ་ཡང་བྱ་བ་དང་བྱེད་པ་དོན་དང་ཤེས་པ་དག་གི་ཆོས་ཡིན་ནོ། །རྒྱུ་དང་འབྲས་བུའི་དངོས་པོ་ནི་ཡོད་དུ་ཟིན་ཀྱང་རྗེས་སུ་དཔག་པ་ཚད་མར་ཐལ་པས་འཇིགས་ནས། ཕ་རོལ་གྱི་མངོན་སུམ་པ་ཚད་མའི་རྒྱུ་མཚན་ཏུ་བསྟན་པར་བྱ་བ་མ་ཡིན་ནོ། །ལྷག་མར་གྱུར་པ་གཉི་ག་འབྲེལ་པའི་བྱ་བ་གང་ཡིན་པ་བླང་བར་བྱ་བ་ཡིན་ལ་དེ་ནི་སྔར་བརྗོད་པ་ཉིད་ཀྱི་རྣམ་པར་རྟོག་པ་ལས་མ་འདས་སོ། །ཕྱིན་ཅི་མ་ལོག་པ་ཡང་གཟུང་བར་བྱ་བ་དངོས་པོ་ཡིན་པའམ། འཛིན་པར་བྱེད་པ་ཤེས་པ་ཡིན་ཞེས་གཉི་གའི་ཆོས་ལས་འདས་པ་མ་ཡིན་ནོ། །དོན་ཡིན་ནོ་ཞེ་ན། དེའི་ཚེ་ངག་གི་དོན་འདི་ཡིན་ཏེ། གང་གི་ཕྱིར་མཐོང་བའི་དོན་ཡོད་པ་ཡིན་པ་དེའི་ཕྱིར་དེ་མངོན་སུམ་གྱིས་ཐོབ་པར་བྱེད་དོ་ཞེས་བྱ་བ་ཡིན་ལ། དོན་འདི་བསྟན་པ་ན་ཡང་རྣམ་པར་བརྟག་པར་བྱ་བ་ལྐོག་ཏུ་གྱུར་པའི་དོན་ནི་ཡོད་པ་མ་ཡིན་ཏེ། དེས་ན་དེ་རྗེས་སུ་དཔག་པས་ཐོབ་པ་མ་ཡིན་ནོ་ཞེས་བརྗོད་པར་འགྱུར་ཞིང་དེ་ལས་ཀྱང་དོན་གང་ཞིག་མངོན་སུམ་གྱུར་པ་དེ་ཁོ་ན་ཡོད་པ་ཡིན་པའི་ཕྱིར་དོན་ཐམས་ཅད་མངོན་སུམ་དུ་འགྱུར་ལ། དེའི་ཕྱིར་ཐམས་ཅད་ཐམས་ཅད་ཀྱིས་མཐོང་བར་འགྱུར་རོ། །འདི་ལྟར་ནི་ཕ་རོལ་གྱིས་འདོད་
པའམ་རིགས་པ་མ་ཡིན་ཏེ། གཞན་གྱིས་ལྐོག་ཏུ་གྱུར་པའི་དོན་ཁས་བླང་བའི་ཕྱིར་དང༌། རིགས་པ་འཐད་པ་ཉིད་ཀྱི་ཕྱིར་རོ། །མཐོང་བ་ཉིད་ནི་དོན་ཐམས་ཅད་ཀྱི་བྱེད་བ་པོ་ཉིད་དུ་རིགས་པ་མ་ཡིན་ཏེ། མཐོང་བ་མེད་ཀྱང་རང་གི་རྒྱུ་དང་འབྲེལ་པ་ཡོད་པ་ཉིད་ཀྱི་ཕྱིར། གང་ལས་ལྐོག་ཏུ་གྱུར་པ་སེལ་བར་བྱེད། ཤེས་པ་ཡིན་ནོ་ཞེ་ན། གལ་ཏེ་མཐོང་བར་བྱེད་པའི་ཤེས་པ་ཡོད་པ་ཉིད་ལ་མཐོང་བའི་སྒྲར་བརྗོད་ན་དེ་ལྟ་ན་ཡང་གང་གི་ཕྱིར་མཐོང་བ་ཤེས་པ་ཡོད་པ་དེའི་ཕྱིར་མཐོང་བར་བྱ་བ་ཞེས་བྱ་བའི་དོན་ཐོབ་པ་ཡིན་ནོ་ཞེས་བྱ་བའི་དོན་འདི་ཡིན་ནོ། །གཞན་ཡོད་པ་ན་འབྲེལ་པ་མེད་པ་གཞན་ཡོད་པ་སྟེ། འབྱུང་བར་ངེས་པ་མ་ཡིན་ཏེ། གང་གིས་ཐོབ་པར་འགྱུར་པ་གཞན་ཡོད་པ་ན་འབྲེལ་པ་མེད་པ་གཞན་གདོན་མི་ཟ་བར་ཡོད་པ་མ་ཡིན་ནོ། །འདི་སྙམ་དུ་གཞན་གང་ཡང་རུང་བ་འགའ་ཞིག་ཡོད་པ་ན་གཞན་ངེས་པར་ཡོད་པ་ནི་མ་ཡིན་ཏེ། འོན་ཀྱང་ཤེས་པའི་བདག་ཉིད་ཡོད་པ་ན་འབྲེལ་པ་མེད་ཀྱང་མཐོང་བའི་ཤེས་བྱ་ཡོད་པར་རྣམ་པར་འཇོག་སྟེ། དེས་ན་ཤེས་པས་དོན་བཟུང་བ་ལས་ཡོད་པར་རྣམ་པར་འཇོག་གོ་ཞེ་ན། དགོས་པ་དེ་ཉིད་བསྟན་པའི་དོན་དུ་བཤད་པ། མཐོང་བའི་ཕྱིར་ཏེ་གང་གི་ཕྱིར་མཐོང་བ་དེའི་ཕྱིར་ཡོད་པ་དེ་དངོས་པོར་གྲུབ་པར་ཁས་ལེན་ནོ་ཞེ་ན། དེ་ནི་མི་རིགས་ཏེ། གང་གི་ཕྱིར་མཐོང་བ་ཉིད་སྔར་བརྒལ་ཞིང་བརྟགས་པའི་ཕྱིར་རོ་ཞེས་མ་ཡིན་ནམ་ཞེས་བྱ་བའི་འདྲི་བས་སྟོན་པར་བྱེད་དོ། །སྔར་བརྒལ་ཞིང་བརྟགས་པའི་མཐོང་བ་གང་ཡིན་པ་དེ་ཉིད་ནི་འདིར་ལན་དུ་བཏབ་པ་ཡིན་ནོ། །བརྒལ་ཞིང་བརྟག་པ་དེ་ཉིད་ཀྱིས་རང་གི་ངོ་བོ་སྟོན་པར་བྱེད་པ་ནི་མཐོང་བ་ཞེས་བྱ་བ་འདི་ཅི་ཞིག་ཅེས་བྱ་བ་ཡིན་ནོ། །ཇི་སྐད་བརྗོད་པ་བཞིན་ཏེ་མཐོང་བ་ལ་སོགས་པ་རྒྱུ་དང་འབྲས་བུའི་ངོ་བོ་ལས་ཐ་དད་པའི་ཆོས་སུ་ཁས་བླངས་པ་ན་འཛིན་པ་ལ་སོགས་པའི་རྣམ་པར་ཤེས་པའི་རང་བཞིན་ནམ་ཤེས་བྱའི་རང་བཞིན་དུ་འགྱུར་གྲང་ན། དེ་ལ་ཡང་སྐྱོན་བརྗོད་ཟིན་ཏོ། །དེའི་ཕྱིར་ཞེས་བྱ་བ་ནི་མཇུག་སྡུད་པ་སྟེ། གང་གི་ཕྱིར་རྒྱུ་དང་འབྲས་བུའི་འབྲེལ་པ་སྤངས་ན་དོན་གཞན་དུ་གྱུར་པའི་ཤེས་པས་དོན་གཞན་དུ་གྱུར་པའི་དངོས་པོ་ངེས་པ་མ་ཡིན་པའི་ཕྱིར་ཇི་ལྟར་འཐོབ་པར་འགྱུར་ཏེ། དེའི་ཕྱིར་དོན་
གཞན་དུ་གྱུར་པའི་ཤེས་པ་ཡོད་པ་ལས་དོན་གཞན་དུ་གྱུར་པའི་ཡུལ་ཞེས་བྱ་བ་ཡོད་པར་ངེས་པ་དང་ལྡན་པར་འདོད་པས་གཞག་པར་བྱ་བ་དང་འཇོག་བར་བྱེད་པ་དག་འབྲེལ་པར་ཁས་བླང་བར་བྱའོ། །འདི་སྐད་བརྗོད་པ་ཡིན་ཏེ། དངོས་པོའི་རང་གི་ངོ་བོ་འཛིན་པ་དེ་ཉིད་ཀྱང་དེ་ལས་སྐྱེས་པ་ཉིད་ཀྱིས་རྣམ་པར་གཞག་པར་བྱ་བ་ཡིན་ཏེ། སྐྱེས་པ་སྤངས་ནས་ནི་གཟུང་བ་ཐ་དད་པ་ལ་ངེས་པར་འཛིན་པ་ཞེས་པ་འདི་ཉིད་རྣམ་པར་གནས་པ་མ་ཡིན་ནོ། །དེའི་ཕྱིར་དེའི་རང་བཞིན་འཛིན་པ་ཉིད་ཀྱང་དེའི་འབྲས་བུ་ཡིན་པ་དེའི་ཕྱིར་ཇི་ལྟར་དེ་སྤོང་བར་བྱེད། དེའི་ཕྱིར་མངོན་སུམ་གྱིས་ངེས་པར་བྱས་པའི་དོན་ཐོབ་པར་ནུས་པའི་རྒྱུ་མཚན་ནི་དེའི་འབྲས་བུ་ཉིད་ཡིན་ནོ། །གང་ཡང་མངོན་སུམ་འབྲེལ་པ་ཞེས་བྱ་བ་དེའི་འབྲས་བུ་ཉིད་ཀྱི་རྒྱུ་མཚན་གྱིས་ཚད་མ་ཡིན་པ་དེ་ནི་རྗེས་སུ་དཔག་པ་ལ་ཡང་མཚུངས་སོ་ཞེས་འབྲེལ་ཏོ། །གང་གི་ཕྱིར་རྗེས་སུ་དཔག་པ་ལ་ཡང་དེའི་འབྲས་བུ་ཉིད་ཡོད་པ་ཉིད་དོ། །འབྲས་བུ་དང་རང་བཞིན་གྱི་རྟགས་དག་ལས་ཞེས་བྱ་བ་འདི་ནི་རྒྱུ་མཚན་གྱི་བདུན་པ་སྟེ། འབྲས་བུའི་རྟགས་དང་རང་བཞིན་གྱི་རྟགས་ཀྱི་རྒྱུ་མཚན་ལས་རྗེས་སུ་དཔོག་པ་གང་ཡིན་པ་དེ་ལ་ཡང་འབྲེལ་པ་དེ་མཚུངས་པ་ཡིན་ནོ། །འདིས་ནི་འདི་སྐད་དུ་གང་གི་ཕྱིར་འབྲས་བུ་དང་རང་བཞིན་གྱི་རྟགས་རྗེས་སུ་དཔག་པའི་རྒྱུ་ཡིན་པ་དེའི་ཕྱིར་མངོན་སུམ་བཞིན་དུ་དོན་གྱི་འབྲས་བུ་ཡིན་ཏེ། འབྲས་བུ་དང་རང་བཞིན་གྱི་རྟགས་དོན་མེད་ན་མི་འབྱུང་བའི་ཕྱིར་རོ་ཞེས་སྟོན་པར་བྱེད་དོ། །འདིས་ནི་འབྲེལ་པའི་ངོ་བོ་ཉིད་དེ་རྒྱུ་ཡིན་ཕྱིར་ཞེས་བྱ་བ་དེ་རྣམ་པར་འགྲེལ་པ་ཡིན་ནོ། །རྟགས་སྨོས་པ་ནི་འདི་སྐད་སྟོན་ཏེ་རྟགས་ཉིད་དུ་ངེས་པའི་འབྲས་བུ་དང་རང་བཞིན་རྗེས་སུ་དཔག་པའི་རྒྱུ་ཡིན་ནོ། །རྟགས་ཉིད་ངེས་པ་ཡང་འབྲས་བུ་ཡི་ནི་རྒྱུ་དང་འབྲས་བུའི་དངོས་པོར་ངེས་པ་ཡིན་ཞིང༌། རང་བཞིན་གྱི་ནི་བསྒྲུབ་པར་བྱ་བའི་རང་བཞིན་གྱིས་ཁྱབ་པར་ངེས་པ་ཡིན་ནོ། །དེས་ན་ཕྱོགས་ཀྱི་ཆོས་རང་གིས་བསྒྲུབ་པར་བྱ་བས་ཁྱབ་པར་སྒྲུབ་པར་བྱེད་པའི་ཚད་མས་ཤེས་པའི་རྟགས་ཉིད་དུ་ངེས་པ་དེ་ལས་རྗེས་སུ་དཔག་པའི་ཤེས་པ་སྐྱེ་པ་ཡིན་ནོ་ཞེས་བརྗོད་པ་ཡིན་ནོ། །ཤེས་པར་བྱེད་པའི་ཚད་མ་དེ་ཡང་བསྒྲུབ་པར་བྱ་བའི་དོན་མེད་ན་མི་འབྱུང་བ་ཡིན་པ་དེའི་ཕྱིར་རྗེས་སུ་དཔག་
པ་ནི་རྟགས་ཀྱི་ཤེས་པས་བར་ཆོད་པའི་བསྒྲུབ་པར་བྱ་བའི་དོན་ཉིད་ལས་འབྱུང་པ་ཡིན་ནོ་ཞེས་བྱ་བར་གནས་སོ། །གང་གི་ཕྱིར་ཕ་རོལ་པོས་དེའི་འབྲས་བུ་ཉིད་ཀྱི་རྒྱུ་མཚན་གྱིས་མངོན་སུམ་ཚད་མར་ཁས་བླང་བར་བྱ་བ་ཡིན་ལ་དེའི་འབྲས་བུ་ནི་རྗེས་སུ་དཔག་པ་ལ་ཡང་ཁྱད་པར་མེད་དེ། དེས་ན་དེ་ཡང་ཚད་མར་ཁས་བླང་བར་བྱའོ། །གང་ཞིག་གང་ལས་གང་གི་ནུས་པའི་རྒྱུ་ཁྱད་པར་མེད་པ་དེ་ནི་དེ་ལས་དེའི་ནུས་པ་ཁྱད་པར་མེད་པ་ཅན་ཡིན་ཏེ། དཔེར་ན་ཐ་མར་གྱུར་པ་མྱུ་གུ་བསྐྱེད་པར་ནུས་པ་ཚོགས་པ་གཅིག་གིས་ས་བོན་ལས་རྒྱུ་ཁྱད་པར་མེད་པ་ཅན་ཐ་མར་གྱུར་ཅིང་ཐ་མའི་གནས་སྐབས་ཐོབ་པ་མྱུ་གུ་བསྐྱེད་པའི་ནུས་པ་དང་ལྡན་པ་ཚོགས་པ་གཉིས་པའི་ས་བོན་བཞིན་ནོ། །གང་གི་ཕྱིར་གྱུ་ཁྱད་པར་མེད་པ་ཉིད་ནི་རྒྱུ་ཚོགས་པ་བརྗོད་ལ། དེ་ལ་ནི་ལྟོས་པ་མེད་པ་ཉིད་ཀྱིས་ཁྱབ་པ་ཡིན་ནོ། །གལ་ཏེ་དེ་ཡོད་ཀྱང་ནུས་པ་དང་ལྡན་པ་མ་ཡིན་ན་ནི་ལྟོས་པ་མེད་པ་རྒྱུ་ཚོགས་པ་ཉིད་དང་འགལ་བ་གཞན་ལ་ལྟོས་པ་དང་བཅས་པར་ཐལ་བར་འགྱུར་ཏེ། དེས་ན་ཁྱབ་པར་བྱེད་པ་ནི་དམིགས་པས་རྒྱུ་ཁྱད་པར་མེད་པ་ཉིད་མི་མཐུན་པའི་ཕྱོགས་ལས་ལྡོག་པ་ན་ནུས་པ་ཁྱད་པར་མེད་པ་དང་ལྡན་པས་ཁྱབ་པ་ཡིན་ལ། རྗེས་སུ་དཔག་པ་ལ་ཡང་དོན་གྱིས་འབྲས་བུ་ཞེས་བྱ་བ་མངོན་སུམ་ལས་དོན་ཐོབ་པར་ནུས་པའི་རྒྱུ་ཁྱད་པར་མེད་པ་དང་ལྡན་པ་ཡིན་ནོ་ཞེས་བྱ་བའི་རང་བཞིན་ནོ། །མ་གྲུབ་པ་ཉིད་ཀྱང་སྤངས་མ་ཐག་པ་ཡིན་ནོ། །དེའི་ཕྱིར་མངོན་སུམ་བཞིན་དུ་ལས་སུ་གྱུར་པའི་རྗེས་སུ་དཔག་པ་ཡང་བྱེད་པ་པོར་གྱུར་པའི་ཚད་མའི་མཚན་ཉིད་ཀྱིས་ཁྱབ་པ་ཡིན་པའི་ཕྱིར་རྗེས་སུ་དཔག་པ་ཡང་ཚད་མ་ཉིད་ཡིན་ལ། དེ་དག་ལས་གཞན་ནི་ཡོད་པ་མ་ཡིན་ནོ་ཞེས་གནས་སོ། །དེ་ནི་ཇི་སྐད་བསྟན་པའི་མངོན་སུམ་དང་རྗེས་སུ་དཔག་པ་དག་ལས་མངོན་སུམ་གྱི་མཚན་ཉིད་བསྟན་པའི་དོན་དུ་བཤད་པ། དེ་ལ་ཞེས་བྱ་བ་ནི་མངོན་སུམ་དང་རྗེས་སུ་དཔག་པ་ཞེས་བྱ་བ་དེ་དག་གི་ཚོགས་ལས་མཚན་ཉིད་བསྟན་པའི་ཕྱིར་མངོན་སུམ་གྱི་རིགས་དམིགས་ཀྱིས་དགར་བའོ། །མཚན་ཉིད་བསྟན་པའི་ཕྱིར་སྨྲས་པ། མངོན་སུམ་ཞེས་བྱ་བ་ནི་མཚན་གཞི་རྗེས་སུ་བརྗོད་པ་སྟེ་མངོན་སུམ་གྱིས་བརྗོད་པར་བྱ་བ་མངོན་སུམ་དུ་བྱེད་པའི་
ཤེས་པ་རབ་ཏུ་གྲགས་པ་དེ་ནི་རྟོགས་པ་དང་བྲལ་ཞིང་མ་འཁྲུལ་པའོ་ཞེས་དེ་ལྟར་མངོན་སུམ་རྗེས་སུ་བརྗོད་ནས་རྟོག་པ་དང་བྲལ་བ་ཉིད་ལ་སོགས་པའི་མཚན་ཉིད་སྒྲུབ་པར་བྱེད་པ་ཡིན་ནོ། །གང་གི་ཕྱིར་མངོན་སུམ་དུ་བྱེད་པའི་ཤེས་པ་རབ་ཏུ་གྲུབ་པ་ལོག་པར་རྟོགས་པས་མ་ཤེས་པའི་རྟོག་པ་དང་བྲལ་བ་ལ་སོགས་པ་ཤེས་པར་བྱེད་པ་ཡིན་ཏེ། དེས་ན་ཤེས་པར་འགྱུར་བའི་མངོན་དུ་བྱེད་པ་ཉིད་ནི་མངོན་སུམ་གྱི་སྒྲས་རྗེས་སུ་བརྗོད་པ་ཡིན་ལ། མི་ཤེས་པའི་མཚན་ཉིད་ནི་ཤེས་པར་བསྒྲུབ་པ་ཡིན་ནོ། །མཚན་གཞི་དང་མཚན་ཉིད་གྲུབ་པ་ལ་ནི་མཚན་ཉིད་རྗེས་སུ་བརྗོད་ནས་མཚན་གཞི་ཉིད་ཤེས་པར་བྱེད་ལ། མཚན་གཞི་དང་མཚན་ཉིད་ཀྱི་དངོས་པོ་མ་གྲུབ་པའི་ངག་ལ་ནི་མཚན་ཉིད་སྒྲུབ་པར་བྱེད་དོ། །དཔེར་ན་ཀུན་དུ་རྒྱུའི་རྟགས་ནི་གཙུག་ཕུད་ཡིན་ནོ་ཞེས་བྱ་བའི་ངག་ལ་ཀུན་དུ་རྒྱུ་རྗེས་སུ་བརྗོད་པ་དང་གཙུག་ཕུད་བསྒྲུབ་པ་དེ་བཞིན་དུ་འདིར་ཡང་མངོན་སུམ་དུ་བྱེད་པའི་ཤེས་པ་ཤེས་པར་གྱུར་པའི་མཚན་ཉིད་མ་ཤེས་པ་བསྒྲུབ་པ་ཡིན་ནོ། །མཚན་གཞི་དང་མཚན་ཉིད་ཤེས་པ་ལས་ནི་མངོན་སུམ་ནི་རྟོག་པ་མེད་པ་ཡིན་ལ། འདི་ནི་རྟོག་པ་མེད་པ་མ་ཡིན་ནོ་ཞེས་དེ་དང་དེར་བརྗོད་པ་ཡིན་ནོ། །མིང་དང་མིང་ཅན་གྱི་འབྲེལ་པ་ཡང་སྐབས་སུ་བབ་པ་མ་ཡི་པ་ཉིད་དེ། གྲངས་ལ་སོགས་པ་བརྗོད་པའི་སྐབས་ཡིན་པའི་ཕྱིར་རོ། །དགོས་པ་ཅུང་ཟད་ཡོད་པ་ཡང་མ་ཡིན་ཏེ། མཚན་ཉིད་ནི་ལོག་པར་རྟོགས་པ་བསལ་བའི་དོན་ཡིན་ནོ། །རང་གི་འདོད་པས་མིང་བཏགས་ན་ཡང་མངོན་སུམ་གྱི་སྒྲས་བརྗོད་པའི་དོན་ལ་གཞན་གྱིས་ལོག་པར་རྟོགས་པ་མ་བསལ་བར་འགྱུར་རོ། །ཅི་སྟེ་དངོས་པོ་དེ་ལ་རྣམ་པ་འདིས་ཕ་རོལ་པོས་མིང་ཉིད་གཞན་དུ་བྱ་བ་ཡིན་པ་དེ་ལྟ་ན་ཡང་འདི་དག་ཉིད་ནི་མངོན་སུམ་གྱི་སྒྲས་བརྗོད་པར་བྱ་བའི་དོན་མ་ཡིན་ཏེ། གང་གི་ཕྱིར་མངོན་དུ་བྱེད་པའི་ཤེས་པ་ནི་མངོན་སུམ་གྱི་སྒྲའི་བརྗོད་པར་བྱ་བ་ཡིན་ལ། རྟོག་པ་དང་བྲལ་བ་དང་མ་འཁྲུལ་པ་ཉིད་ནི་དེའི་ཁྱད་པར་ཡིན་ཏེ། དཔེར་ན་སྒྲ་རྣམས་གཟུང་བར་བྱ་བའི་བདག་ཉིད་རབ་ཏུ་གྲུབ་པ་སྒྲའི་སྒྲས་བརྗོད་པར་བྱ་བ་དེ་ལ་སྔར་མ་གྲུབ་པའི་མི་རྟག་པ་ཉིད་བསྒྲུབ་པ་ཡིན་གྱི་མིང་དང་མིང་ཅན་གྱི་འབྲེལ་པ་སྔར་མ་གྲུབ་
པ་བྱེད་པ་མ་ཡིན་པ་དེ་བཞིན་དུ། མངོན་སུམ་གྱི་ཤེས་པ་ཉིད་དང༌། གསལ་བར་སྣང་བ་ཉིད་དང༌། མངོན་དུ་བྱེད་པ་ཉིད་དང༌། དབང་པོ་ལ་བརྟེན་པ་ཉིད་དུ་རབ་ཏུ་གྲགས་པར་གྱུར་པ་མངོན་སུམ་དུ་བརྗོད་པར་བྱ་བ་དེ་རྗེས་སུ་བརྗོད་ནས་ཁྱད་པར་རྟོག་པ་དང་བྲལ་ཞིང་མ་འཁྲུལ་པ་ཉིད་ཅེས་བྱ་བ་སྒྲུབ་པ་ཡིན་གྱི་སྔ་ན་མེད་པའི་མིང་དང་མིང་ཅན་གྱི་འབྲེལ་པ་བྱ་བ་ནི་མ་ཡིན་ནོ། །གང་ཡང་ཕྱོགས་གཞན་དུ་རབ་ཏུ་གྲུབ་པ་འདི་དག་རྗེས་སུ་བརྗོད་པར་བརྟགས་ནས། མངོན་སུམ་སྒྲུབ་པ་རྟོགས་པ་དེ་དག་གིས་ཀྱང་མཚན་གཞི་དང་མཚན་ཉིད་བསྒྲུབ་པའི་ངག་ཕྱིན་ཅི་ལོག་ཏུ་བསྟན་པར་འགྱུར་པ་ཡིན་ཏེ། སྒྲ་དང་མཚན་ཉིད་སྒྲུབ་པར་བྱེད་པའི་ངག་ནི་འཇིག་རྟེན་ན་དེ་ལྟར་མ་མཐོང་ངོ་ཞེས་བསྟན་ཟིན་ཏོ། །དེ་ལྟར་བརྟག་པར་རིགས་པ་ཡང་མ་ཡིན་ཏེ། ཕྱོགས་གཞན་དུ་ཁྱད་པར་དེ་དག་མངོན་སུམ་ཉིད་ཀྱི་གཞི་ལ་རབ་ཏུ་གྲུབ་པའམ། གཞི་མེད་པར་གྲུབ་པ་ཅིག་རྗེས་སུ་བརྗོད་གྲང༌། དེ་ལ་རེ་ཞིག་གཞི་མེད་པར་ནི་གྲུབ་པ་མི་སྲིད་དོ། །མངོན་སུམ་ཉིད་ཀྱི་གཞི་ལ་གྲུབ་ན་ནི་ངག་འདིས་འདིར་སྔ་ན་མེད་པ་ཅི་ཞིག་བསྒྲུབ་པར་འདོད། ཁོ་བོ་ཅག་གིས་ནི་ངག་འདི་ཉིད་ཀྱིས་བརྗོད་པའི་ཁྱད་པར་རྒྱུན་ཕྱི་མས་འཐད་པར་བརྗོད་པ་ཡིན་ནོ། །དེའི་ཕྱིར་བསྒྲུབ་པ་དང་རྗེས་སུ་བརྗོད་པའི་ཚུལ་འདི་ཉིད་རིགས་པ་ཡིན་ནོ། །འདིར་ཡང་མཚན་ཉིད་གཞན་རྣམ་པར་བཅད་པ་ནི་མ་ཡིན་གྱི་འོན་ཀྱང་ལོག་པར་རྟོགས་པ་བསལ་བའི་དོན་ཡིན་ནོ། །དེས་ན་རྟོག་བ་དང་བྲལ་བ་སྨོས་པ་ཉིད་ཀྱིས་རྗེས་སུ་དཔག་པ་ཐ་དད་པར་བྱས་མོད་ཀྱི། མ་འཁྲུལ་པ་སྨོས་པ་ནི་དབང་པོ་མིག་སེར་ལ་སོགས་པས་ཉམས་པར་བྱས་པའི་ཤེས་པ་གཟུང་བར་བྱ་བ་ལ་ཕྱིན་ཅི་ལོག་པ་ནི་རྟོག་པ་དང་བྲལ་པ་ཡང་དགག་པའི་དོན་དུ་སྟེ་འདི་ལྟར་དོན་བྱེད་ནུས་པའི་རང་བཞིན་ལ་མ་འཁྲུལ་པ་གང་ཡིན་པ་དེ་ནི་མ་འཁྲུལ་པ་ཡིན་ན་ནི། རབ་རིབ་ལ་སོགས་པས་ཉམས་པའི་ཤེས་པ་ནི་གཟུང་བར་བྱ་བ་དོན་མེད་པར་བཟོད་པ་ལ་འཁྲུལ་པ་ཁོ་ན་ཡིན་ནོ། །དེ་བཞིན་དུ་རྗེས་སུ་དཔག་པ་ཡང་དེ་མ་ཡིན་པ་ལ་དེར་འཛིན་པའི་ཕྱིར་འཁྲུལ་པ་ཡིན་པ་དེའི་ཕྱིར་མ་འཁྲུལ་པ་སྨོས་པས་རྗེས་སུ་དཔག་པ་བསལ་མོད་ཀྱི། རྟོག་པ་དང་བྲལ་བ་ཉིད་ནི་ལོག་པར་རྟོགས་པ་བསལ་བའི་ཕྱིར་རོ། །དེས་ན་མཚན་ཉིད་རེ་རེས་ཀྱང་རྗེས་
སུ་དཔག་པ་རྣམ་པར་བཅད་པ་གྲུབ་མོད་ཀྱི། གཉི་ག་སྨོས་པ་ནི་ལོག་པར་རྟོགས་པ་བསལ་པའི་དོན་དུའོ། །འདི་ལྟར་མ་འཁྲུལ་པ་སྨོས་པ་ལས་མིག་སེར་གྱིས་ཉམས་པའི་མིག་གི་རྣམ་པར་ཤེས་པ་ནི་དོན་བྱ་བ་མེད་པའི་གཟུང་བ་ལ་ཕྱིན་ཅི་ལོག་པའི་ཕྱིར་མངོན་སུམ་མ་ཡིན་པར་ཤེས་ལ། ཚུལ་གསུམ་པའི་རྟགས་ལས་སྐྱེས་པ་མ་ཡིན་པའི་ཕྱིར་རྗེས་སུ་དཔག་པ་ཡང་མ་ཡིན་ནོ། །ཚད་མ་གཞན་ཡང་མ་ཡིན་ཏེ། ཇི་ལྟར་སྣང་བ་ལ་མི་སླུ་བས་ཚད་མར་འགྱུར་བའམ། ཇི་ལྟར་ཞེན་པ་ལས་ཡིན་གྲང་ན། འདི་ལ་ནི་སྣང་བ་དང་ཞེན་པ་དག་ལ་མི་སླུ་བ་མེད་པའི་ཕྱིར་ཚད་མ་མ་ཡིན་ནོ། །མ་འཁྲུལ་བ་སྨོས་པ་མེད་ན་ནི་ཁ་ཅིག་རྣམ་པ་འདི་ལྟ་བུའི་ཤེས་པ་རྣམ་པར་རྟོག་པ་ཅན་གྱི་ཡིད་དུ་ལྷག་པར་ཞེན་ནས་ཚད་མ་མ་ཡིན་པའམ། དོན་ཙམ་ལ་མི་སླུ་བ་དང་རྟོག་པ་མེད་པ་ཉིད་དུ་ལྷག་པར་ཞེན་པས་མངོན་སུམ་ཉིད་དུ་རྣམ་པར་འཇོག་པར་འགྱུར་རོ། །མ་འཁྲུལ་པ་སྨོས་པ་ནི་ཐམས་ཅད་སྤངས་པ་ཡིན་ནོ། །གཞན་དག་མདོ་སྡེ་པ་བཞིན་དུ་རྣལ་འབྱོར་སྤྱོད་པའི་གཞུང་བསྡུ་བའི་དོན་དུ་མི་སླུ་པར་བྱེད་པ་ལ་མ་འཁྲུལ་པར་ཤེས་པ་དེ་ནི་མི་རིགས་སོ། །གང་གི་ཕྱིར་སློབ་དཔོན་གྱིས་མ་འཁྲུལ་པའི་སྒྲའི་དོན་དེ་ལྟ་བུར་གྱུར་པ་ཡིན་པ་ནི་མི་བཞེད་དེ། འཁྲུལ་པའི་མཚན་ཉིད་ནི་ཕྱིན་ཅི་ལོག་ཏུ་སྣང་བ་བཞིན་ནོ་ཞེས་དེ་དང་དེར་གསུངས་པའི་ཕྱིར་རོ། །དངོས་པོ་མི་སྣང་བའི་ཕྱིར་རྣམ་པར་རྟོག་པ་ནི་མངོན་སུམ་ལྟར་སྣང་བའོ་ཞེས་གསུངས་ན་ཡང༌། མངོན་སུམ་ནི་དངོས་པོ་སྣང་བ་དོན་བྱེད་པའི་དངོས་པོའི་རང་བཞིན་ལ་མི་འཁྲུལ་པ་ཡིན་པར་བརྗོད་པ་ཡིན་ནོ། །གང་ཡང་རྗེས་སུ་དཔག་པ་ནི་དེ་མ་ཡིན་པ་ལ་དེར་འཛིན་པའི་ཕྱིར་འཁྲུལ་པར་འགྱུར་པ་ན། གལ་ཏེ་མངོན་སུམ་དེ་ལས་བཟློག་པ་མི་བཞེད་ན་རྗེས་སུ་དཔག་པ་འཁྲུལ་པ་ཉིད་དུ་བརྗོད་པས་ཅི་ཞིག་བྱ། བཟློག་པར་བཞེད་དོ་ཞེ་ན། འོ་ན་དེ་ནི་གཟུང་བ་ལ་ཕྱིན་ཅི་ལོག་པས་འཁྲུལ་པ་ཡིན་ལ། དེ་ལས་བཟློག་པས་མངོན་སུམ་མ་འཁྲུལ་པ་ཡིན་པའི་ཕྱིར་མངོན་སུམ་བཟུང་བ་ལས་ཕྱིན་ཅི་མ་ལོག་པས་མ་འཁྲུལ་ལོ་ཞེས་བྱ་བར་གྲུབ་བོ། །གཞན་ཡང་མངོན་སུམ་ནི་ཡང་དག་པའི་ཤེས་པའི་དབྱེ་བ་ཉིད་ཡིན་ནོ། །དེ་ལ་ཡང་དག་པའི་ཤེས་པ་རྟོག་པ་དང་བྲལ་ཞིང་མ་འཁྲུལ་པ་ཞེས་བྱ་བའི་
ངག་ལ་མ་འཁྲུལ་པའི་སྒྲས་ཡང་དག་པའི་ཤེས་པའི་རྣམ་གྲངས་མི་སླུ་བའི་དོན་ཉེ་བར་ལེན་པ་ནི་དོན་མེད་པ་ཉིད་དོ། །གལ་ཏེ་རྣལ་འབྱོར་སྤྱོད་པའི་གཞུང་ཡང་ཐམས་ཅད་དུ་རྗེས་སུ་འཇུག་པར་བྱེད་པ་ཡིན་ནོ། །སློབ་དཔོན་གྱིས་རྗེས་སུ་དཔག་པ་ཉིད་གཟུང་བ་ལ་ཕྱིན་ཅི་ལོག་པ་ཉིད་ཡིན་ནོ་ཞེས་བྱ་བ་དང༌། དོན་གྱི་མཐུ་སྟོབས་ཀྱིས་སྐྱེ་པས་རྟོག་པ་མེད་པ་ཉིད་དུ་གསུངས་པར་ཅིའི་ཕྱིར་རྗེས་སུ་འཇུག་པར་མི་བྱེད། དེའི་ཕྱིར་རྣམ་རིག་ཙམ་དུ་སྨྲ་བ་ནི་སློབ་དཔོན་བག་ཆགས་བརྟན་པ་དང་མི་བརྟན་པ་དག་གིས་རྣམ་པར་འཇོག་པ་མཐོང་ལ། འདི་ནི་དོན་མེད་ན་མི་འབྱུང་བ་ལས་ཞེས་དེ་ལྟ་བུ་ལ་སོགས་པ་གསུངས་པ་ན། ཕྱི་རོལ་གྱི་དོན་གྱི་ཚུལ་ཉིད་བཞེད་པ་ཡིན་ནོ། །དེའི་ཕྱིར་སྔར་བཤད་པ་ཉིད་མ་འཁྲུལ་པའི་དོན་ཡིན་ནོ། །ཁ་ཅིག་ཟླ་བ་གཉིས་པ་ལ་སོགས་པའི་ཤེས་པ་ཡང་ཆ་འགའ་ཞིག་ལ་མི་སླུ་པ་དེས་ན་ཚད་མ་ཡིན་པ་དེའི་ཕྱིར་དེ་བཟློག་པའི་དོན་དུ་མ་འཁྲུལ་པ་སྨོས་པ་ནི་རིགས་པ་མ་ཡིན་ཏེ། དེ་ཉིད་ཀྱི་ཕྱིར་སློབ་དཔོན་ཕྱོགས་ཀྱི་གླང་པོས་ཀྱང་མ་མཛད་པ་ཡིན་ནོ། །ཅི་སྟེ་ཤེས་པ་འགའ་ཞིག་ངེས་པའི་དངོས་པོའི་བདག་ཉིད་ཐམས་ཅད་ལ་མི་སླུ་བ་དེ་ཚད་མ་ཉིད་ཡིན་པའི་དོན་དུ་མི་སླུ་བ་སྨོས་ན་དེ་ཡང་རིགས་པ་མ་ཡིན་ཏེ། གང་གི་ཕྱིར་དོན་གྱི་བདག་ཉིད་ཐམས་ཅད་ལ་མི་སླུ་བའི་རྣམ་པར་ཤེས་པ་ནི་འགའ་ཡང་ཡོད་པ་མ་ཡིན་ནོ་ཞེས་འཛེར་ཏོ། །གལ་ཏེ་དེ་ལྟར་ན་སློབ་དཔོན་ཕྱོགས་ཀྱི་གླང་པོས་མངོན་སུམ་དང་རྗེས་སུ་དཔག་པ་ཚད་མར་གསུངས་པ་ཇི་ལྟར་འགྱུར་ཏེ། ཐ་ན་བྱིས་པ་ལ་སོགས་པའི་རྟོག་པ་ཡན་ཆད་ཀྱང་ཆ་འགའ་ཞིག་ཐ་ན་དངོས་པོ་ཙམ་ལ་མི་སླུ་བ་མ་ཡིན་པའི་ཤེས་པ་ནི་འགའ་ཡང་ཡོད་པ་མ་ཡིན་ལ། བདག་ཉིད་ཐམས་ཅད་ལ་མི་སླུ་བར་བྱེད་པ་ཡང་འགའ་ཡང་མེད་པའི་ཕྱིར་རོ། །དེས་ན་ཚད་མ་ངེས་པར་བསྟན་པའི་ཕྱིར་རྣམ་པར་རྟོག་པ་ཅན་གྱི་ཤེས་པ་འགའ་ཞིག་གཏན་ནས་མི་སླུ་བ་མ་ཡིན་པར་བཤད་པ་ཡིན་ནོ། །སྔར་བཤད་པའི་ཚུལ་གྱིས་ནི་ཐམས་ཅད་ལ་ཡང་མི་སླུ་བར་སྦྱར་བར་ནུས་པ་ཡིན་ནོ། །དེའི་ཕྱིར་དགོངས་པ་ནི་འདི་ཡིན་ཏེ། དོན་བྱ་བ་བྱེད་པའི་དོན་གང་ཞིག་མདུན་དུ་བྱས་ནས་རྟོག་བ་དང་ལྡན་པ་དོན་དུ་གཉེར་བ་ཉིད་ཀྱིས་འཇུག་པའི་ཆ་
དེ་ཐོབ་པ་ལ་བརྟེན་ནས་མི་སླུ་བར་འཇོག་ལ་མངོན་པར་འདོད་པ་ཐོབ་ན་ཡང་བདག་ཉིད་ཐམས་ཅད་ལ་མི་སླུ་བ་ཡིན་ནོ། །འདི་ལྟར་ཐུན་མོང་གི་ཆོས་གང་ཅུང་ཟད་བརྟག་པ་དེ་ཐམས་ཅད་ནི་ཁྱད་པར་གྱི་རང་བཞིན་གྱིས་དོན་བྱེད་བར་ནུས་པ་ཡིན་ཏེ། ཁྱད་པར་རྣམས་ཉིད་དོན་བྱེད་པར་ནུས་པ་ཡིན་པའི་ཕྱིར་རོ། །དེ་ནི་དོན་བྱ་བ་བྱེད་པ་ཉིད་ཀྱིས་ཡོད་པ་ཡིན་ན་ངེས་པའི་ཁྱད་པར་ལ་བསླུས་པ་ན་ཡང་སྤྱི་ལ་མ་བསླུས་པ་ཞེས་བྱ་བ་ཡོད་པ་མ་ཡིན་ནོ། །དེས་ན་དོན་བྱེད་པར་ནུས་པའི་ཁྱད་པར་སྤངས་པ་ན་བདག་ཉིད་ཐམས་ཅད་ལ་བསླུས་པ་ཡིན་ནོ། །ཁྱད་པར་ལ་ནི་སྨིག་རྒྱུ་ལ་ནི་ཆུའི་རང་བཞིན་སྤངས་པ་ཡིན་ནོ། །ནོར་བུའི་འོད་ལ་ནི་ནོར་བུའི་ཡུལ་སྤངས་པ་ཡིན་ནོ། །རྨི་ལམ་བདེན་པའི་ཤེས་པ་ནི་དུས་སྤངས་པ་ཡིན་ཏེ། ཡུལ་དང་དུས་དང་རྣམ་པ་གཞན་པས་དངོས་པོ་གཞན་ཉིད་དུ་འགྱུར་བའི་ཕྱིར། །དེས་ན་ཡུལ་དང་དུས་དང་རྣམ་པ་གཞན་དུ་གནས་པའི་དངོས་པོ་ལ་དེ་ལས་བཟློག་པ་ཤེས་པ་ནི་ཕན་ཚུན་སྤངས་པ་ཡིན་པས་འགལ་བའི་དངོས་པོ་མ་བཟུང་བ་ཡིན་ནོ། །དེས་ན་འགལ་བ་རྣམ་པ་གསུམ་གྱི་རང་བཞིན་འཛིན་པ་ན་བདག་ཉིད་ཐམས་ཅད་བསླུས་པ་ཡིན་ནོ། །དེས་ན་ཕྱིས་པ་ལ་སོགས་པའི་ཡོངས་སུ་སྤངས་ནས་རྣམ་པར་རྟོག་པ་རྣམས་ལ་རྗེས་སུ་དཔག་པ་འབའ་ཞིག་ཚད་མར་བཤད་དོ། །དེ་བཞིན་དུ་སེར་པོར་ཤེས་བ་ནི་དོན་བྱེད་པར་བཟོད་པའི་རྣམ་པ་སྤངས་པ་ཡིན་ནོ། །ལྗོན་ཤིང་འགྲོ་བར་མཐོང་བ་ནི་དེའི་ཡུལ་མ་ཡིན་པ་ཉིད་དོ། །ཟླ་བ་གཉིས་སུ་ཤེས་པ་ནི་ཡུལ་དང་རྣམ་པ་སྤངས་པ་ཡིན་ནོ། །རྟ་རྨིས་ན་དུས་སྤངས་པ་ཡིན་ཏེ། དེས་ན་འགལ་བའི་རང་བཞིན་འཛིན་པའི་ཕྱིར། ཇི་ལྟར་ན་འདི་དག་ཆ་ཤས་ལ་ཡང་མི་སླུ་བ་ཡིན། དེའི་ཕྱིར་རྗེས་སུ་དཔག་པ་ལས་ཐ་དད་པའི་རྣམ་པར་རྟོག་པ་སྤངས་པ་བཞིན་དུ་སློབ་དཔོན་འདི་དག་ཀྱང་སྤངས་པར་བཞེད་པ་ཡིན་ཏེ། དེའི་དོན་དུ་མཚན་ཉིད་ལྷག་མ་མ་འཁྲུལ་པ་སྨོས་པ་ཡིན་ནོ། །གལ་ཏེ་རང་བཞིན་འགལ་བ་འཛིན་པ་འཁྲུལ་པའི་ཕྱིར་ཚད་མ་མ་ཡིན་པར་འགྱུར། སྔོན་པོ་ལ་སོགས་པར་སྣང་བ་ཡང་འཁྲུལ་པར་ཐལ་པར་འགྱུར་ཏེ། རྡུལ་ཕྲ་རབ་མ་འདྲེས་པ་རྣམས་ལ་འདྲེས་པ་ཉིད་དུ་འགལ་བར་འཛིན་པའི་
ཕྱིར་རོ་ཞེ་ན། སྨྲས་པ། འདིར་རེ་ཞིག་ཕྱི་རོལ་གྱི་ཚུལ་གྱིས་རྣམ་པར་ཤེས་པ་དེ་ན་འཛིན་པར་བྱེད་པ་དང་རྡུལ་ཕྲ་རབ་རྣམས་ཕྱོགས་ཆ་ཐ་དད་པས་བྱས་པའི་འགལ་བ་དང་མི་ལྡན་པར་ཁས་བླངས་ནས་མཚན་ཉིད་བརྗོད་པར་བྱའོ། །དེ་ལ་སྔོན་པོའི་རྣམ་པ་ཅན་གྱི་རྣམ་པར་ཤེས་པ་ནི་དངོས་པོ་ཇི་ལྟར་གནས་པ་དང་འགལ་བར་སྣང་བ་མ་ཡིན་ནོ། །གང་གི་ཕྱིར་རྡུལ་ཕྲ་རབ་རྣམས་ཀྱི་མ་འདྲེས་པ་ཉིད་རང་བཞིན་ཐ་དད་པའམ། རང་བཞིན་གཞན་གྱི་ཡུལ་སྤངས་པའམ། ནམ་མཁའ་སྟོང་པའི་ཡུལ་དང་ལྡན་པའམ། དབང་པོ་ཐ་དད་པའི་གཟུང་བས་བར་དུ་བཅད་པ་དང་ལྡན་པ་ཡིན་གྲང་ན། དེ་ལ་སྣང་བ་ན་རང་བཞིན་ཐ་དད་པ་མེད་པར་ནི་མི་སྣང་སྟེ། གོང་དུ་རྡུལ་ཕྲ་རབ་ཙམ་དུ་སྣང་བར་ཐལ་བའི་ཕྱིར་རོ། །དེ་ཉིད་ཀྱི་ཕྱིར་རང་བཞིན་གཞན་གྱི་ཡུལ་སྤངས་པར་སྣང་པ་ཡང་གྲུབ་བོ། །ནམ་མཁའ་སྟོང་པའི་ཕྱོགས་ཀྱང་དངོས་པོ་མེད་པས་དབང་པོའི་ཤེས་པའི་སྤྱོད་ཡུལ་མ་ཡིན་ནོ། །དབང་པོ་གཞན་གྱིས་གཟུང་བས་བར་དུ་ཆོད་པ་ཉིད་ནི་རིག་པ་ལ་སོགས་པའི་རང་བཞིན་ལྷན་ཅིག་ཏུ་རྒྱུ་བ་ཡོད་པ་ཉིད་ཡིན་ལ་དེ་ཡང་མིག་གི་རྣམ་པར་ཤེས་པ་ལ་སྣང་བ་མ་ཡིན་ནོ། །དེ་ལ་གལ་ཏེ་རེག་པ་ལ་སོགས་པས་སྟོང་པར་སྣང་བ་ཉིད་ལ་འདྲེས་པར་སྣང་བ་ཉིད་དུ་བརྗོད་ན། དེ་ནི་འདོད་པ་ཉིད་དེ། དེ་ལ་རེག་པ་ལ་སོགས་པ་སྣང་བ་མེད་པའི་ཕྱིར་རོ། །རེག་པ་ལ་སོགས་པ་མི་སྣང་བ་ཡང་མིག་གིས་གཟུང་པར་བྱ་བའི་རང་བཞིན་ནི་འགལ་བ་མ་ཡིན་ནོ། །ཅི་སྟེ་བར་ཆད་མེད་པར་སྣང་པའི་ཕྱིར་གཟུགས་རེག་པའི་ཡུལ་ན་གནས་པར་མཐོང་བ་ཡིན་ལ། དེའི་ཕྱིར་ཡུལ་ལ་འཁྲུལ་པ་ཡིན་ནོ་སྙམ་ན། དེ་ཡང་རིགས་པ་མ་ཡིན་ཏེ། རེག་པ་ལས་ཐ་དད་པའི་ཡུལ་འགའ་ཡང་མེད་དོ། །དེ་མི་སྣང་ན་ཇི་ལྟར་ན་དེའི་ཡུལ་ན་གཟུགས་ཡོད་པར་སྣང་བར་འགྱུར། དེའི་ཕྱིར་འདྲེས་པར་འཁྲུལ་པ་འདི་ནི་རེག་པའི་རྡུལ་ཕྲ་རབ་དང་བྲལ་བའི་གཟུངས་ཀྱི་རྡུལ་ཕྲ་རབ་རྣམས་རང་གི་ཡུལ་དུ་ཤེས་པ་གཅིག་ལ་སྣང་བ་ལ་བརྟེན་པའི་ཡིད་ཡིན་ནོ། །དབང་པོའི་རྣམ་པར་ཤེས་པ་ནི་རང་གི་ཡུལ་ན་གནས་པའི་གཟུགས་སྣང་བ་ཡིན་ཏེ། ཡུལ་དང་དུས་དང་རྣམ་པ་ལ་འཁྲུལ་པ་མ་ཡིན་པ་དེའི་ཕྱིར་ཇི་ལྟར་མ་འདྲེས་
པ་རྣམས་ལ་འདྲེས་པར་སྣང་བ་ཡིན། ཡུལ་གཞན་དུ་འཛིན་ན་ནི་འདྲེས་པར་འཛིན་པར་འགྱུར་ན་དེ་ཡང་ཡོད་པ་མ་ཡིན་ནོ་ཞེས་སྔར་བསྒྲུབས་ཟིན་ཏོ། །རགས་པ་ཉིད་དང་ཕྱོགས་ཆ་ཐ་དད་པའི་མང་པོ་ནི་འགལ་བ་ཡོད་པ་མ་ཡིན་ནོ། །དེའི་ཕྱིར་ཡོད་པ་ཉིད་ཀྱི་རྒྱུ་ནི་དོན་བྱ་བ་བྱེད་པ་ཡིན་ལ་དོན་བྱ་བ་བྱེད་པ་ཡང་ཁྱད་པར་ཡིན་ནོ། །དེའི་ཕྱིར་གནོད་པར་བྱེད་པ་མེད་ན་ཁྱད་པར་དུ་སྣང་བར་དམིགས་པ་གང་ཇི་སྙེད་པ་དེ་ཐམས་ཅད་ཡོད་པར་ཁས་བླང་བར་བྱ་བར་རིགས་པ་ཡིན་ནོ། །དོན་བྱ་བ་བྱེད་པར་ནུས་པའི་ཡུལ་ལ་གནོད་པར་བྱེད་པ་ཡོད་ན་ནི་དངོས་པོའི་བདག་ཉིད་ཐམས་ཅད་བཏང་བ་ཡིན་ནོ། །དོན་བྱེད་པར་ནུས་པ་དམིགས་ན་ནི་ངེས་པར་གྱིས་དོན་བྱེད་པ་ལ་བྱེ་བར་མཁོ་བ་ཅན་གྱིན་ལ། དེ་དེ་ལ་ཚད་མ་མ་ཡིན་གྱི། གནོད་པ་མེད་པའི་ཆ་དོན་བྱ་བ་བྱེད་པ་ནི་ཚད་མའི་ཡུལ་ཡིན་པས་ཆོས་ཅན་དེ་ལ་མ་གནས་པའི་རང་བཞིན་ཡང་ཚད་མ་གཞན་གྱིས་སྒྲུབ་པ་ཡིན་ནོ། །སྔོན་པོ་མ་ཡིན་པ་ལས་ལོག་པའི་དོན་ཡང་གནས་པའི་ཁྱད་པར་གྱིས་དོན་བྱེད་པ་ལ་ཉེ་བར་མཁོ་བ་ཅན་ཡིན་ལ། དེ་དང་འགལ་བ་མེད་པ་དུ་མ་ཉིད་དང་མ་འདྲེས་པ་ཉིད་དང་སྐད་ཅིག་མ་ཉིད་ནི་མཐོང་བ་ལ་ཚད་མ་གཞན་ལས་ཁོང་དུ་ཆུད་པ་ཡིན་ནོ། །ཡུལ་དང་དུས་དང་རྣམ་པ་གཞན་ཉིད་ནི་གཞན་ལ་འགལ་བ་ཡིན་ཏེ། དེས་ན་དེ་ལྟ་བུར་གྱུར་པ་འཛིན་པའི་ཤེས་པ་ནི་ཆ་ཐམས་ཅད་ལ་འཁྲུལ་པ་ཡིན་པའི་ཕྱིར་མ་འཁྲུལ་པ་སྨོས་པར་བྱ་བ་ཡིན་ནོ། །གཞན་དག་མ་འཁྲུལ་པ་སྨོས་པར་བྱ་བ་ཁོ་ན་སྟེ་འོན་ཀྱང་དུང་གཅིག་ལ་སེར་པོར་ཤེས་པ་དབྱིབས་ཀྱི་ཆ་ལ་མི་སླུ་བའི་ཕྱིར་ཚད་མ་ཡིན་ལ། ཁ་དོག་གི་ཆ་ལ་ཕྱིན་ཅི་ལོག་ཏུ་གྱུར་པས་ཚད་མ་མ་ཡིན་པ་འབའ་ཞིག་ཏུ་ཟད་དོ། །དེས་ན་མ་འཁྲུལ་པ་སྨོས་པ་ནི་འདི་ཆ་དེ་ལ་ཚད་མ་ཡིན་གྱི་གཞན་ལ་ནི་མ་ཡིན་ཞེས་སྟོན་པར་བྱེད་པ་ཡིན་ནོ་ཞེས་སྨྲ་བ་དེ་ནི་རིགས་པ་མ་ཡིན་ཏེ། གང་གི་ཕྱིར་ཆ་གཅིག་ལ་འཇུག་པའི་ཡན་ལག་གི་ཚད་མ་ཡིན་ན་ནི་ཆ་གཞན་ལ་ཚད་མ་མ་ཡིན་པར་བསྒྲུབས་པ་ལ་ཅུང་ཟད་ཀྱང་འབྲས་བུ་ཡོད་པ་མ་ཡིན་ནོ། །ཚད་མ་མ་ཡིན་པ་ནི་འཇུག་པའི་ཡན་ལག་མ་ཡིན་པར་བསྒྲུབ་པའི་དོན་དུ་ཡིན་ན། དེ་ནི་འཇུག་པའི་ཡན་ལག་ཉིད་ཡིན་ནོ། །འཇུག་པ་ཡིན་པ་དེ་ལྟར་ན་ཡང་ཡུལ་
དེ་ལ་ཚད་མར་འཁྲུལ་པར་མི་འགྱུར་བར་བྱ་བའི་ཕྱིར་རོ་ཞེ་ན། ཐ་སྙད་ཉིད་ལས་ཚད་མ་མ་ཡིན་པར་རང་ཁོ་ནས་རྟོགས་པར་འགྱུར་བ་མ་ཡིན་ནམ། དེའི་ཕྱིར་ཆ་འདི་ལ་ཚད་མ་མ་ཡིན་ནོ་ཞེས་བརྗོད་པ་འདིས་ཅི་ཞིག་བྱ། དེའི་ཕྱིར་རྣམ་པ་འདི་ལྟ་བུའི་ཤེས་པ་ཐམས་ཅད་མ་འཁྲུལ་པར་སྨོས་པས་སྤང་བར་བྱ་བ་ཡིན་ནོ། །དབྱིབས་ནི་ཁ་དོག་ལས་ཐ་དད་པར་དོན་བྱེད་ནུས་པ་མ་ཡིན་པས་ནུས་པའི་ཁ་དོག་དེ་ལ་འཁྲུལ་པ་ན་དེ་ལ་མ་འཁྲུལ་པར་ག་ལ་འགྱུར། དོན་བྱ་བ་ནུས་པ་བརྗོད་པའི་དུང་གི་སྒྲ་ཡང་དབྱིབས་ཀྱི་ཁྱད་པར་ཅན་གྱི་ཁ་དོག་ལ་འཇུག་ལ། ཁ་དོག་རྣམས་ཀྱང་རབ་ཏུ་དབྱེ་བ་དུ་མ་ཡོད་པ་ཉིད་ཀྱིས་ན་ཁྱད་པར་དོན་དུ་གཉེར་བས། དཀར་པོ་སེར་པོ་གསེར་པོ་གསེར་དངུལ་ཞེས་ཁྱད་པར་དུ་བརྗོད་པར་བྱའོ། །དོན་བྱེད་པ་ཐོབ་པ་ནི་ཤེས་པ་གཞན་ཁོ་ན་ལས་ཡིན་གྱི་སེར་པོའི་རང་བཞིན་འཛིན་པས་ནི་མ་ཡིན་ནོ། །དེའི་ཕྱིར་མ་འཁྲུལ་པ་སྨོས་པ་ནི་འགལ་བའི་རང་བཞིན་འཛིན་པར་བྱེད་པའི་རྟོག་པ་དང་བྲལ་བ་བཟློག་པའི་དོན་དུ་ཡིན་ལ། འགལ་བའི་རང་བཞིན་འཛིན་པར་བྱེད་པ་དེ་ཡང་བདག་ཉིད་ཐམས་ཅད་ལ་སླུ་བར་བྱེད་པ་ཡིན་ནོ་ཞེས་གནས་སོ། །ཕྱི་ནས་བརྗོད་ཀྱང་བརྗོད་པར་བྱ་བ་ཉུང་བས་མ་འཁྲུལ་བ་ཉིད་དང་པོར་བཤད་པར་བྱ་བའི་ཕྱིར། རབ་རིབ་དང་ཞེས་བྱ་བ་ལ་སོགས་པ་སྨོས་ཏེ། རབ་རིབ་མིག་ལ་གནས་པ་དབང་པོ་ཉམས་པར་བྱེད་པའི་རྒྱུ་སྟེ། འདིས་ནི་མིག་ལ་གནས་པའི་དབང་པོ་ཉམས་པར་བྱེད་པའི་རྒྱུར་གྱུར་པ། མིག་སེར་ལ་སོགས་པ་མཚོན་པ་ཡིན་ནོ། །མྱུར་དུ་བསྐོར་བ་ནི་དབང་པོ་ཉམས་པར་བྱེད་པའི་རྒྱུ་ཡུལ་ལ་གནས་པའི་བྱ་བའི་ཁྱད་པར་རོ། །མྱུར་བ་སྨོས་པ་ནི་དལ་བུས་བསྐོར་བར་བཟློག་པའི་ཕྱིར་ཏེ། དེ་ནི་འཁྲུལ་པའི་རྒྱུ་མ་ཡིན་ནོ། །མགལ་མེ་ཉུང་ངུ་བསྐོར་བས་རྗེས་སུ་འགྲོ་བའི་མིག་གི་འབྲས་བུར་འགྱུར་བ་ན། མིག་ཉམས་པས་མིག་གི་རྣམ་པར་ཤེས་པ་འཁྲུལ་པར་འགྱུར་བ་ཡིན་ནོ། །འདིས་ནི་མགལ་མེ་ཡན་མན་དུ་གཡུགས་པ་ལ་སོགས་པ་དབང་པོ་ཉམས་པར་བྱེད་པའི་རྒྱུ་ཡུལ་ལ་གནས་པ་རྣམས་མཚོན་པ་ཡིན་ཏེ། མགལ་མེ་ཕྱོགས་གཅིག་ཏུ་མངོན་དུ་ཕྱོགས་ཏེ། མྱུར་དུ་གཡུགས་པ་ན་དབྱུག་པའི་རྣམ་པར་འཁྲུལ་པ་སྐྱེ་བ་ཡིན་ནོ། །གྲུར་ཞུགས་པ་ནི་
གྲུས་འགྲོ་བ་སྟེ། འདུག་པའི་གྲུར་འཁྲུལ་པར་མི་འགྱུར་བ་དེས་ནི་བྱ་བའི་ཁྱད་པར་ཁོ་ནས་འཁྲུལ་བའི་རྒྱུ་ཡིན་ནོ། །འདི་ནི་ཕྱི་རོལ་གྱི་རྟེན་ལ་གནས་པ་དབང་པོ་ཉམས་པར་བྱེད་པའི་རྒྱུ་སྟེ། གྲུ་འགྲོ་བས་ལུས་བསྐྱོད་པ་ན་དབང་པོ་ཉམས་པར་འགྱུར་རོ། །འདིས་ཀྱང་རྟའི་བཞོན་པ་དང་ལྡན་པ་དང༌། རླུང་ལ་སོགས་པས་འཁྲུགས་པ་དང༌། གནད་མི་བཟད་པར་བསྣུན་པ་དང༌། འཁྲུས་པ་དང༌། བསྐོར་གར་ལ་སོགས་པ་རྟེན་ལ་གནས་པའི་འཁྲུལ་པའི་རྒྱུ་རྣམས་ཉེ་བར་མཚོན་པ་ཡིན་ནོ། །རབ་རིབ་དང་མྱུར་དུ་བསྐོར་བ་དང་གྲུར་ཞུགས་པ་རྣམས་ཀྱིས་བྱས་པའི་དབང་པོའི་འགྱུར་བ་ནི་འཁྲུགས་པ་སྟེ། ཇི་སྲིད་དབང་པོའི་རྣམ་པར་འགྱུར་བ་མ་བྱས་པ་དེ་སྲིད་དུ་དབང་པོ་ལས་སྐྱེས་པ་རྣམ་པར་བསླད་པར་མི་འགྱུར་རོ། །དེ་དག་གིས་བྱས་པ་གང་ཡིན་པ་དེ་ནི་དེ་དག་གིས་འཁྲུགས་པ་ཡིན་ནོ། །དེ་ལ་སོགས་པ་དབང་པོའི་ཡུལ་ན་གནས་པ་དང༌། ཕྱི་རོལ་གྱི་ཡུལ་ན་གནས་པ་དང༌། རྟེན་ལ་གནས་པའི་འཁྲུལ་པའི་རྒྱུ་རྣམས་ཀྱིས་བྱས་པའི་འཁྲུགས་པ་གཞན་གང་ཡིན་པ་སྟེ། དེ་ལ་སོགས་པས་གང་དུ་འཁྲུལ་པ་མ་བསྐྱེད་པ་སྟེ། སོགས་པའི་སྒྲའི་མཐའི་འབྲུ་མང་པོ་བས་དྲུག་པའི་བསྡུ་བ་ཡིན་པ་དེ་བས་ན་ལ་འཁྲུགས་པས་འཁྲུལ་པ་མ་བསྐྱེད་པའི་ཤེས་པ་དེ་དང་འབྲེལ་པ་ཡིན་ནོ། །འདི་དག་ནི་གསལ་བར་སྣང་བས་རྟོག་པ་མེད་པ་ཉིད་ཡིན་པ་ཡང་དངོས་པོའི་རང་བཞིན་ཡོངས་སུ་བཏང་བའི་ཕྱིར་མི་སླུ་བ་ཉིད་མེད་པས་ཚད་མ་མ་ཡིན་ཏེ། རང་དགའ་བ་ལ་སོགས་པའི་རྣམ་པར་རྟོག་པ་བཞིན་ནོ། །དངོས་པོའི་རང་བཞིན་ཡོངས་སུ་བཏང་བ་ཉིད་ཀྱང་ཡུལ་དང་དུས་དང་རྣམ་པ་ཐ་དད་པའི་ཕྱིར་རོ། །འདིར་ཟླ་བ་གཉིས་སུ་སྣང་བའི་ཤེས་པ་ནི་རེ་ཞིག་ཡུལ་ལ་འཁྲུལ་པ་ཡིན་ཏེ། ཟླ་བ་གཉིས་སུ་མི་གནས་པའི་ཕྱིར་རོ། །དེས་ན་རང་བཞིན་ལ་འཁྲུལ་པ་ཡིན་ཏེ། གཉིས་ཀྱི་རང་བཞིན་དུ་སྣང་བ་ནི་གཅིག་གི་རང་བཞིན་དང་འགལ་བའི་ཕྱིར་རོ། །འགལ་བའི་རང་བཞིན་འཛིན་པས་ནི། རང་བཞིན་གཞན་གཟུང་བ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །འཁོར་ལོར་སྣང་བ་ནི་དོན་བྱེད་པའི་རང་བཞིན་ལ་འཁྲུལ་པ་ཡིན་ཏེ། བཀོད་པ་དང་བྲལ་བའི་ཁ་དོག་ནི་དོན་བྱེད་པ་དང་ལྡན་པ་མ་ཡིན་ལ། བཀོད་
པ་ཡང་མ་བཟུང་བའི་ཕྱིར་རོ། །བཀོད་པ་བཏང་བའི་ཕྱིར་དེ་དང་ལྷན་ཅིག་པའི་རང་བཞིན་ཡོངས་སུ་བཏང་བ་ཡིན་ནོ། །ཡུལ་ལ་འཁྲུལ་པར་ནི་གསལ་བ་ཡིན་ཏེ། ཡུལ་གཅིག་ན་གནས་པའི་མགལ་མེ་ལ་ཡུལ་དུ་མ་ན་གནས་པར་འཛིན་པའི་ཕྱིར་རོ། །དེ་བཞིན་དུ་ལྗོན་ཤིང་འགྲོ་བར་སྣང་བ་ནི་ཡུལ་ལ་འཁྲུལ་པ་ཡིན་ལ་དེས་ན་རང་བཞིན་ལ་ཡང་འཁྲུལ་པ་ཡིན་ནོ། །དེ་བཞིན་དུ་འགའ་ཞིག་ཏུ་ཁ་དོག་ལ་འཁྲུལ་བ། དཔེར་ན་དུང་ལ་སེར་པོར་སྣང་བར་ཤེས་པ་ལྟ་བུ་ནི་དོན་བྱེད་པའི་རྣམ་པ་ལ་འཁྲུལ་པ་ཡིན་ནོ། །ཁ་དོག་ནི་རང་བཞིན་ཉིད་དོ།། ཐམས་ཅད་དུ་ཡང་དོན་ཐོབ་པ་ནི་འཇུག་པའི་རྒྱུ་མཚན་གྱི་ཤེས་པ་གཞན་ལ་རག་ལས་པ་ཡིན་ནོ་ཞེས་མང་དུ་བཤད་ཟིན་ཏོ། །རྣམ་པ་དེ་ལྟ་བུའི་འཁྲུལ་པའི་ཤེས་པ་དངོས་པོའི་རང་བཞིན་ཡོངས་སུ་བཏང་བ་ནི་མ་འཁྲུལ་པ་སྨོས་པས་བཟློག་པ་ཡིན་ནོ། །དེའི་ཕྱིར་དེ་ལྟ་བུར་གྱུར་པའི་འཁྲུལ་པ་མེད་ཅིང་རྣམ་པར་མི་རྟོག་པ་ཞེས་འཆད་པར་འགྱུར་བའི་མཚན་ཉིད་སྡུད་པ་ཡིན་ནོ། །གལ་ཏེ་མ་འཁྲུལ་པ་ཞེས་དེ་སྐད་བརྗོད་ན་ནི་མཚན་ཉིད་འདི་དག་གང་ཡང་རུང་བས་མཚོན་པ་མངོན་སུམ་ཉིད་དུ་དོགས་པར་འགྱུར་རོ། །དེས་ན་འཁྲུལ་པ་མེད་ཅིང་རྟོག་པ་དང་བྲལ་བ་གང་ཡིན་པ་དེ་མངོན་སུམ་ཡིན་ནོ་ཞེས་བརྗོད་པ་ཡིན་ནོ། །མངོན་སུམ་ནི་རྟོག་པ་དང་བྲལ་བ་ཡིན་ལ། དེ་ཡང་ཅི་འདྲ་བ་ཞིག་ཡིན་པར་འདོད་པ་བསྟན་པའི་དོན་དུ་མངོན་པར་བརྗོད་པ་ཅན་ཞེས་སྨོས་ཏེ། འདི་ལ་བརྗོད་པ་ཡོད་པས་ན་བརྗོད་པ་ཅན་ནོ། །འདི་ཉིད་རྣམ་པར་འགྲེལ་པར་བཤད་པ་འདིས་དོན་བརྗོད་པའི་ཕྱིར་བརྗོད་པ་ནི་སྒྲ་ལ་བྱའོ། །དེ་དང་འདྲེ་བ་ནི་ཤེས་པའི་བདག་ཉིད་གཅིག་ལ་ཚོགས་པ་སྟེ། རྗོད་པར་བྱེད་པའི་སྒྲ་དང༌། བརྗོད་པར་བྱ་བའི་དོན་དུ་སྣང་བའི་ཤེས་པ་གཅིག་གི་གཟུང་བའི་བདག་ཉིད་དུ་གནས་སོ། །དོན་གྱི་རྣམ་པ་རྗོད་པར་བྱེད་པའི་སྒྲའི་རྣམ་པ་དང་ལྷན་ཅིག་ཏུ་ཤེས་པ་གཅིག་ལ་སྣང་བར་འགྱུར་ན་ནི། དེའི་ཚེ་བ་བརྗོད་པར་བྱ་བ་དང་རྗོད་པར་བྱེད་པ་དག་འདྲེས་པ་ཡིན་ནོ། །འདྲི་བའི་ཕྱིར་རུང་བ་ཞེས་དོན་སྟོན་པ་ཡིན་པའི་ཕྱིར་དྲུག་པའི་བསྡུ་བའོ། །དེ་ལྟ་བུར་གྱུར་པའི་དོན་གྱི་སྣང་བ་གཟུང་བའི་རྣམ་པ་རྗོད་པར་བྱེད་པའི་སྒྲ་དང་ལྷན་ཅིག་
པའི་གཟུང་བའི་རྣམ་པ་དེ་ནི་དེ་སྐད་ཅེས་བརྗོད་པ་ཡིན་ནོ། །རྟོག་པ་ནི་སྦྱོར་བར་བྱེད་པ་ཡིན་པར་བསྟན་ལ། སྦྱོར་བར་བྱེད་པ་ཡང་སྒྲ་དང་དོན་བསྡུས་ནས་འཛིན་པ་ཡིན་ནོ། །གལ་ཏེ་དེ་ལྟར་ན་འདྲེས་པར་སྣང་བ་ཞེས་བརྗོད་པར་བྱ་བ་མ་ཡིན་ནམ། ཅིའི་ཕྱིར་རུང་བ་ཞེས་སྨོས་ཤེ་ན་བརྡ་ལ་མ་བྱང་བ་ལ་རྗོད་པར་བྱེད་པའི་སྒྲ་དང་འདྲེས་པའི་དོན་སྣང་བའི་རྟོག་པ་ནི་ཅུང་ཟད་ཀྱང་མེད་ལ། དེ་ལ་རྟོག་པ་ནི་ཡོད་པ་ཡིན་པས་རུང་བ་སྨོས་པ་ནི་དེ་སྡུད་པ་ཡིན་ནོ། །དེང་སྐྱེས་པའི་བྱིས་པ་རྣམ་པར་རྟོག་པའི་ཤེས་པ་ནི་དོན་ཉེ་བ་ལ་ལྟོས་པ་མེད་པ་དེའི་ཕྱིར་སྣང་བ་ངེས་པ་མེད་པ་ཡིན་ལ། སྣང་བ་ངེས་པ་མེད་པ་ཉིད་ཀྱིས་ཀྱང་རུང་བ་ཡིན་ནོ། །རྣམ་པར་རྟོག་པའི་ཤེས་པ་དེ་ནི་ནུ་མ་ལ་སྔོན་མཐོང་བའི་བཀྲེས་པ་ཟློག་པར་བྱེད་པ་ཉིད་དུ་རྟོགས་པ་ན་བྱིས་པ་འཇུག་པར་བྱེད་པ་ཡིན་ལ། སྔ་མ་དང་ཕྱི་མ་དག་ཐ་དད་པ་མེད་པར་འཛིན་པ་ནི་དོན་ཉེ་བ་ལ་ལྟོས་པ་མེད་པར་གྲུབ་པོ། །སྒྲའི་སྣང་བ་ཡང་དེ་ལ་ཡོད་པ་ཡིན་ནོ་ཞེ་ན། དེ་ལ་སྐྱེ་བ་གཞན་དུ་གོམས་པ་ལས་སྒྲའི་རྣམ་པ་མི་གསལ་བ་ཡོད་དམ་མེད་ཀྱང་རུང་སྟེ། ཕྱིས་གོམས་པས་བྱས་པའི་ཁྱེད་པར་ཅན་གྱི་སྒྲ་དང་འབྲེལ་པའི་དོན་སྣང་བ་ནི་ཐམས་ཅད་དུ་ཡོད་པ་མ་ཡིན་ནོ། །རྣམ་པར་རྟོག་པའི་རྟོགས་པ་དེ་ནི་ཡུལ་གྱི་བྱེད་པ་ལ་ནི་མི་ལྟོས་པ་ཉིད་ཀྱིས་སྣང་བ་ངེས་པ་མེད་པ་ཡིན་ལ། དེ་ལས་ཀྱང་སྒྲ་དང་འདྲེར་རུང་བ་སྣང་བ་བཞིན་ནོ། །དེ་ཞེས་བྱ་བ་རྟོག་པ་འདི་དབང་པོའི་ཤེས་པ་ལ་སྲིད་པ་མ་ཡིན་ནོ། །དེ་ཞེས་བྱ་བ་ནི་ཆོས་ཅན་གྱིས་སྣང་བ་ཞེས་བྱ་བའི་ཆོས་བསྟན་པ་སྟེ། བརྗོད་པ་དང་འདྲེར་རུང་བའི་སྣང་བ་ནི་དབང་པོའི་ཤེས་པ་ལ་སྲིད་པ་མ་ཡིན་ཞིང༌། དབང་པོའི་རྣམ་པར་ཤེས་པ་ལ་ནི་དེ་ལྟ་བུར་གྱུར་པའི་སྣང་བ་མེད་དོ་ཞེས་བྱ་བའི་དོན་ཏོ། །གཞན་དུ་ཡང་ཆོས་ཅན་གྱིས་ཆོས་བསྟན་པ་ནི་ཡོད་པ་ཡིན་ཏེ། དཔེར་ནར་ཅན་ཞོག་དང་ལྡན་པ་མཐའ་ན་མཇུག་མ་ཡོད་པ་ཞེས་རྭ་ལ་སོགས་པ་དང་ལྡན་པ་བ་ལང་ཉིད་ཀྱི་རྟགས་སུ་གྱུར་པ་རྭ་ལ་སོགས་པ་ཉིད་སྟོན་པར་བྱེད་པ་ཉིད་ཡིན་ཏེ། དེ་བཞིན་ནོ། །གཞན་དུ་ན་རྣམ་པར་རྟོག་པའི་ཤེས་པ་གཞན་དང་བྲལ་བ་དབང་པོའི་ཤེས་པར་བརྗོད་པར་འགྱུར་རོ། །དེ་ལྟ་ན་ཡང་མ་བརྗོད་པ་དང་མཚུངས་པར་འགྱུར་
རོ། །རྣམ་པར་རྟོག་པའི་ཤེས་པ་ཡང་རྣམ་པར་རྟོག་པའི་ཤེས་པ་གཞན་གྱིས་སྟོང་བ་ཡིན་ཏེ། དེ་ནི་རྣམ་པར་རྟོག་པ་མེད་པ་མ་ཡིན་ནོ། །དེའི་ཕྱིར་དེས་སྟོང་བའི་རང་གི་ངོ་བོ་བརྗོད་པ་ཡིན་ནོ། །ཡང་དེ་དག་ལས་ཞེས་དོགས་པ་ལ་གཏན་ཚིགས་སྟོན་ཏེ། དོན་དེ་བརྗོད་པར་བྱ་བ་མངོན་པར་འདོད་པའི་རང་གི་མཚན་ཉིད་གཟུགས་ལ་སོགས་པའི་མཐུས་ཏེ། བྱེད་པ་ལས་ཡང་དག་སྐྱེ་བ་སྟེ་འབྱུང་བ་ཡིན་པའི་ཕྱིར་རོ། །གང་གི་ཕྱིར་དོན་གྱི་སྟོབས་ཀྱིས་སྐྱེས་པ་ཡིན་གྱི་རྗོད་པར་བྱེད་པའི་སྒྲའི་སྟོབས་ཀྱིས་མ་ཡིན་པ་དེའི་ཕྱིར། དབང་པོའི་རྣམ་པར་ཤེས་པ་སྒྲར་སྣང་བ་མ་ཡིན་ནོ་ཞེས་བརྗོད་པར་འགྱུར་རོ། །འདི་སྙམ་དུ་གལ་ཏེ་དོན་གྱི་ནུས་པས་བསྐྱེད་པ་དེ་ལྟ་ན་ཡང་སྒྲར་སྣང་བར་ཅིའི་ཕྱིར་མི་འགྱུར་ཞེས་དོགས་པ་ལ། གང་གི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་དབང་པོའི་རྣམ་པར་ཤེས་པ་དེ་དོན་གྱི་ནུས་པ་ལས་སྐྱེ་བའི་ཕྱིར་དེའི་རང་བཞིན་ཁོ་ནའི་རྗེས་སུ་བྱེད་པའི་ཕྱིར་ཞེས་བྱ་བ་ནི་རྗེས་སུ་བྱེད་པ་སྲིད་པ་ཡིན་ནོ། །དེའི་ཕྱིར་སྒྲར་སྣང་བ་མ་ཡིན་ནོ། །བསམ་པ་འདི་ཡིན་ཏེ་རྒྱུ་མ་ཡིན་པ་ཡུལ་མ་ཡིན་པ་ཞེས་བྱ་བའི་རིགས་པས་ཁྱད་པར་ཅན་གྱི་དོན་སྣང་བའི་དབང་པོའི་རྣམ་པར་ཤེས་པ་ལ་དེའི་སྟོབས་ལས་སྐྱེས་པས་ཁྱབ་པ་ཡིན་པ་དེའི་ཕྱིར་སྐྱེད་པའི་དོན་དེའི་རྗེས་སུ་བྱེད་པ་སྲིད་པ་ཡིན་ནོ། །གལ་ཏེ་སྒྲ་ཡང་སྣང་བར་གྱུར་ན་ནི། ཁྱབ་བྱ་སྒྲའི་རྗེས་སུ་བྱེད་པ་གྲུབ་པས་ཁྱབ་བྱེད་དེའི་སྟོབས་ལས་སྐྱེས་པ་ཡང་མ་ཡིན་ནོ། །དེའི་ཕྱིར་སྣང་བ་མ་ཡིན་ནོ། །འདི་སྙམ་དུ་གལ་ཏེ་དབང་པོའི་ཤེས་པ་དོན་གྱི་འབྲས་བུ་ཡིན་ན་སྒྲའི་འབྲས་བུ་ཡང་ཡིན་པ་ཁོ་ནའོ། །འདི་ལྟར་སྒྲ་ཐམས་ཅད་དུ་ཁྱབ་པ་ཡིན་ནོ། །དེ་བས་ན་དོན་གྱི་ཡུལ་ན་ཡང་དེ་རྗོད་པར་བྱེད་པའི་སྒྲ་ཉེ་བ་ཁོ་ནའོ། །དེའི་ཕྱིར་རྣམ་པར་ཤེས་པ་དོན་བཞིན་དུ་སྒྲའི་ཡང་ཡོད་པ་དང་མེད་པའི་རྗེས་སུ་བྱེད་པ་ཡིན་ནོ། །ཡང་ན་བརྡ་སྤྲོད་པ་རྣམས་ཀྱི་རྣམ་པར་འགྱུར་བའི་དོན་ནི་སྒྲ་ཉིད་ཀྱི་བདག་ཉིད་ཡིན་པའམ། ཡང་གྲངས་ཅན་རྣམས་ཀྱི་སྣ་ཚོགས་ནི་སྒྲ་ལ་སོགས་པ་ལྔའི་རྣམ་པར་འགྱུར་བ་ཡིན་པ་དེས་ན་དོན་སྒྲའི་བདག་ཉིད་ཅན་ཡིན་ནོ། །དེའི་ཕྱིར་དོན་སྒྲའི་རང་བཞིན་ཉིད་ཡིན་ལ། དེ་ལས་ཀྱང་སྒྲ་དང་དོན་དག་གི་རྗེས་སུ་འགྲོ་
བའི་རྗེས་སུ་བྱེད་པར་མཚུངས་པ་དེའི་ཕྱིར་འདི་ལ་ཁྱབ་པར་བྱེད་པ་དེའི་སྟོབས་ལས་སྐྱེས་པ་མེད་པ་མ་ཡིན་ནོ་ཞེས་དོགས་ན། བཤད་པ་གང་གི་ཕྱིར་དོན་ལ་སྒྲ་ཡོད་མ་ཡིན་ནོ། །འདི་ལྟར་ཡོད་པ་ཉིད་ནི་དོན་བྱེད་པའི་རྒྱུ་མཚན་གྱིས་ཡིན་ལ། དོན་བྱེད་པའི་ཁྱད་པར་གྱིས་ཀྱང་ཡོད་པའི་ཁྱད་པར་ཡིན་ཞིང༌། དེ་ཡང་རྗེས་སུ་འགྲོ་བ་དང་ལྡོག་པ་དག་ལས་ཁྱད་པར་ཅན་གྱི་རྣམ་པ་དང་འབྲེལ་པ་ན་ཁྱད་པར་དང་ལྡན་པར་རྟོགས་པར་བྱ་བ་ཡིན་ནོ། །སྒྲ་ཡང་དོན་བྱེད་པ་གང་ཡིན་པ་དེ་ལས་ཡོད་པར་འདོད་པ་ཡིན་ནོ། །དོན་བྱེད་པར་ནུས་པ་དེ་ནི་རང་གི་རྣམ་པ་ཉིད་ཀྱིས་ཡིན་པར་མངོན་སུམ་དུ་ཁོང་དུ་ཆུད་ལ་དོན་ཀྱང་ཡིན་ན། དོན་ལ་ནི་སྒྲ་དམིགས་པ་མ་ཡིན་ནོ། །ཇི་ལྟར་གཞན་དུ་དམིགས་པ་ལ་གཞན་ཡོད་པར་བརྗོད་དེ། ཧ་ཅང་ཐལ་ཆེས་པར་འགྱུར་བའི་ཕྱིར་རོ། །དེ་ཉིད་ཀྱིས་ན་དེའི་བདག་ཉིད་ཀྱང་མ་ཡིན་ནོ། །དེའི་བདག་ཉིད་དམ་དེ་ཉིད་གང་དག་གིས་བདག་ཉིད་ཡིན་པའོ། །དོན་བྱ་བ་ནུས་པའི་སྒྲ་ནི་དོན་གྱི་རང་བཞིན་སྤངས་པར་ཚད་མས་དམིགས་པ་ཡིན་ལ། དོན་ཀྱང་སྒྲའི་རང་བཞིན་སྤང་བར་དམིགས་པ་ཡིན་ན་དེ་ཇི་ལྟར་ཚད་མས་དམིགས་བཞིན་དུ་བདག་ཉིད་སླུ་བར་བྱེད། དེའི་ཕྱིར་སྒྲ་རྣམས་དེའི་ཡུལ་ན་གནས་པ་མ་ཡིན་ལ་དེའི་བདག་ཉིད་ཀྱང་མ་ཡིན་ན། གང་གིས་དེའི་ཡུལ་ན་གནས་པ་དང་དེའི་བདག་ཉིད་ཡིན་པའི་སྒོ་ནས་དོན་བཞིན་དུ་སྒྲའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་འགྱུར་ཞིང༌། དོན་དེ་རང་གི་འབྲས་བུ་ལ་སྣང་བ་ན་དེ་དག་ཀྱང་རྒྱུར་གྱུར་བས་སྣང་བར་འགྱུར་བ། དེའི་བདག་ཉིད་དང་དེའི་ཡུལ་ན་གནས་པ་ནི་མེད་ལ། ལོགས་ཤིག་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཡང་མ་ཡིན་པ་དེས་ན་དེའི་སྟོབས་ཀྱིས་སྐྱེས་པ་ཉིད་མེད་པའི་ཕྱིར་དེ་སྣང་བ་ཉིད་མ་ཡིན་ནོ། །གལ་ཏེ་ཤེས་པའི་ཆོས་འགའ་ཞིག་ནི་ཕྱི་རོལ་ལ་རག་ལས་པ་ཡིན་ཏེ། དཔེར་ན་སྔོན་པོ་ལ་སོགས་པའི་སྣང་བ་བཞིན་ནོ། །ཁ་ཅིག་ནི་དེ་ལས་བཟློག་པ་ཡིན་ཏེ། དཔེར་ན་རྟོགས་པའི་རང་བཞིན་ལྟ་བུ་མ་ཡིན་ནམ། དོན་གྱི་སྣང་བ་ནི་རེས་འགའ་བ་ཡིན་པའི་ཕྱིར་ཕྱི་རོལ་དང་འབྲེལ་པ་ཡིན་ལ། རྟོགས་པའི་རང་བཞིན་ནི་ཕྱི་རོལ་ལ་ལྟོས་པ་མེད་པའི་ཕྱིར་རང་གི་ཉེ་བར་ལེན་པ་དང་འབྲེལ་
པ་ཡིན་པ་དེ་བཞིན་དུ། སྒྲའི་སྣང་བ་འདི་རང་གི་ཉེ་བར་ལེན་པ་ཙམ་ལ་རག་ལས་པ་ཡིན་ནོ། །དེ་ཉིད་ཀྱི་ཕྱིར་ཤེས་པ་མཐའ་དག་ལ་རྗེས་སུ་འབྲང་བ་དེས་ན་ཕྱི་རོལ་གྱི་སྣང་བ་ཉིད་དེ་མེད་ན་མི་འབྱུང་བ་ཡིན་གྱི་གང་འདི་སྒྲའི་རྣམ་པར་ཞེས་བྱ་བ་ཤེས་པའི་ཆོས་དེ་ནི་དེའི་ཉེ་བར་སྦྱོར་བ་མེད་ཀྱང་ཉེ་བར་ལེན་པ་ཙམ་ལས་འབྱུང་བ་དེས་ན་ཁྱབ་པ་མ་གྲུབ་པ་ཡིན་ནོ་སྙམ་དུ་དོགས་པ་ལ། རིག་པའི་ཆོས་འདི་ཞེས་བྱ་བ་ལ་སོགས་པ་སྨོས་ཏེ། རིག་པ་སྟེ་ཤེས་པའི་ཆོས་སྒྲའི་རྣམ་པ་ཞེས་བྱ་བ་འདི་ཕྱི་རོལ་གྱིས་མ་བྱས་པ་མ་ཡིན་ཏེ། འོན་ཀྱང་འདི་ཕྱི་རོལ་གྱིས་བྱས་པ་ཉིད་དུ་ཁས་བླང་བར་བྱའོ། །རེག་པ་ནི་རྒྱུའི་དངོས་པོར་འཛིན་པའོ། །དེ་གང་ལ་ཡོད་པ་དེ་ནི་རེག་པ་དང་ལྡན་པའོ། །རེག་པ་དང་ལྡན་པ་མེད་པ་ནི་རེག་པ་དང་མི་ལྡན་པའོ། །དོན་ལ་ཞེས་བྱ་བ་ནི་དོན་ལ་མ་རེག་པའི་ཆོས་མ་ཡིན་ནོ་ཞེས་བྱ་བའི་དོན་ཏོ། །འདི་གང་ལས་ཤེ་ན། སྒྲའི་སྣང་བ་དེ་དོན་དག་ཏུ་ངེས་པར་སྦྱོར་བ་ནི་ངེས་པར་འབྲེལ་པར་བྱེད་ཅིང་དེར་གནས་པ་ཐོབ་པ་སྟེ་དེའི་རང་བཞིན་དུ་སྣང་བ་ཞེས་བྱ་བའི་དོན་ཏོ། །འདི་སྐད་དུ་བརྗོད་པ་ཡིན་ཏེ། གང་གི་ཕྱིར་དབང་པོའི་རྣམ་པར་ཤེས་པ་ལ་སྣང་བའི་སྒྲའི་རྣམ་པ་ཕྱི་རོལ་གྱི་དོན་ཡིན་པར་རྟོགས་ཤིང་ཕྱི་རོལ་ཉིད་དུ་ཞེན་པར་བྱས་པ་དེའི་ཕྱི་རོལ་གྱིས་བྱས་པར་ཁས་བླང་བར་བྱ་བ་ཡིན་ལ། འཛིན་པའི་རྣམ་པར་ནང་དུ་ཡོངས་སུ་གསལ་བ་ཕྱི་རོལ་ཉིད་དུ་ལྷག་པར་ཞེན་པ་མ་ཡིན་པ་གང་ཡིན་པ་དེ་ནི་ཕྱི་རོལ་གྱིས་མ་བྱས་པར་རིགས་པ་ཡིན་ནོ། །ཤེས་པའི་ཆོས་གང་ཞིག་ཕྱི་རོལ་གྱི་དོན་ཉིད་དུ་ཞེན་པར་བྱས་པ་དེ་ནི་ཕྱི་རོལ་གྱིས་བྱས་པ་ཡིན་ཏེ། དཔེར་ན་སྔོན་པོའི་སྣང་བ་བཞིན་ནོ། །སྒྲའི་སྣང་བ་ཡང་དོན་ཉིད་དུ་ཞེན་པར་བྱས་པ་ཡིན་ནོ། །དེ་ག་ལས་ཞེས་དོགས་ན། ཕྱི་རོལ་ཉིད་དུ་ཞེན་པར་བྱས་པའི་རྣམ་པ་དེ་ལས་གཟུགས་ལ་སོགས་པའི་དོན་རྣམས་མི་རྟོགས་པར་ཐལ་བའི་ཕྱིར་རོ། །འདི་སྐད་བཤད་པར་འགྱུར་བ་ཡིན་ཏེ། ཕྱི་རོལ་གྱི་རང་བཞིན་དུ་ལྷག་པར་ཞེན་པར་བྱས་པ་དབང་པོའི་ཤེས་པའི་སྣང་བ་ལས་ནི། གཞན་ཕྱི་རོལ་གྱི་དོན་རྟོགས་པར་བྱེད་པ་དེའི་ཕྱི་རོལ་གྱིས་བྱས་པ་ཡིན་པར་བལྟའོ། །གལ་ཏེ་ཕྱི་རོལ་དུ་ལྷག་པར་ཞེན་པར་བྱས་པ་
ཡང་སྒྲའི་སྣང་བ་ལས་ཕྱི་རོལ་གྱི་སྒྲ་མི་རྟོགས་ཤིང་རྣམ་པར་གཞག་པར་བྱ་བ་མ་ཡིན་པ་དེའི་ཕྱི་རོལ་གྱིས་བྱས་པར་མ་གྱུར་ན་ནི་སྔོན་པོ་ལ་སོགས་པའི་སྣང་བ་ལས་ཀྱང་སྤྱིར་རྣམ་པར་གཞག་པ་དང༌། དེ་ལས་ཀྱང་ཕྱི་རོལ་གྱིས་བྱས་པ་ནི་འགྲུབ་པ་འབའ་ཞིག་གོ །སྔོན་པོ་ལ་སོགས་པ་ཡང་ཕྱི་རོལ་གྱིས་བྱས་པར་འདོད་པ་དེའི་ཕྱིར། ཇི་ལྟར་སྔོན་པོ་ལ་སོགས་པའི་སྣང་བ་དག་ལས་ཕྱི་རོལ་གྱི་སྔོན་པོ་ལ་སོགས་པ་རྣམ་པར་གཞག་པར་བྱས་པ་ལས་སྣང་བ་དེ་དག་གི་ཕྱི་རོལ་གྱིས་བྱས་པར་འདོད་པ་དེ་བཞིན་དུ། དབང་པོའི་ཤེས་པ་ལ་གནས་པའི་ཕྱི་རོལ་གྱི་རང་བཞིན་དུ་ཞེན་པར་བྱས་པའི་སྒྲའི་སྣང་བ་ལས་སྒྲ་རྣམ་པར་གཞག་པར་བྱ་བ་ཡིན་ལ། དེ་ལས་ཀྱང་དེ་ཕྱི་རོལ་གྱིས་བྱས་པར་ཁས་བླང་བར་བྱ་བ་ཡིན་ཏེ། སྒྲའི་སྣང་བ་དེ་དང་སྔོན་པོ་ལ་སོགས་པའི་སྣང་བ་ཁྱད་པར་མེད་པའི་ཕྱིར་རོ། །དེའི་ཕྱིར་ཕྱི་རོལ་གྱི་སྨྲ་བ་རྣམས་ཀྱི་ཕྱི་རོལ་དུ་ལྷག་པར་ཞེན་པར་བྱས་པའི་རྣམ་པར་ཕྱི་རོལ་རྣམ་པར་འཇོག་པའི་རྒྱུར་གྱུར་པའི་ཁྱབ་པར་བྱེད་པ་ནི་ཕྱི་རོལ་གྱིས་བྱས་པ་ཉིད་ཡིན་ནོ། །གཞན་དུ་ན་སྣང་བ་གང་ལས་ཀྱང་དོན་རྟོགས་པར་མི་འགྱུར་རོ། །རབ་རིབ་ཅན་ལ་སོགས་པའི་ཤེས་པའི་རྣམ་པ་ནི་ཕྱི་རོལ་དུ་ལྷག་པར་ཞེན་པར་བྱས་པ་ཡིན་ཡང་སླུ་བའི་ཕྱིར་ཕྱི་རོལ་རྟོགས་པར་བྱེད་པ་མ་ཡིན་ལ། དེའི་ཕྱི་རོལ་གྱིས་མ་བྱས་པས་འཁྲུལ་པ་མེད་དོ། །དེའི་ཕྱིར་ཞེས་བྱ་བ་ནི་གང་གི་ཕྱིར་དོན་སྒྲའི་བདག་ཉིད་ཀྱང་མ་ཡིན་སྒྲའི་རྟེན་ཀྱང་མ་ཡིན་ལ། སྒྲའི་རྣམ་པ་འདི་ཡང་ཕྱི་རོལ་གྱི་སྒྲ་ལ་མི་ལྟོས་པ་ཉིད་མ་ཡིན་པ་དེའི་ཕྱིར་འདི་ཉེ་བ་སྟེ། ཐག་ཉེ་བ་ཉིད་དུ་གྱུར་པས་ཤེས་པ་སྐྱེད་པ་ནའོ། །འདིས་ནི་ཤེས་པ་དོན་ཉེ་བ་ལ་ལྟོས་པ་ན་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་བརྗོད་པ་ཡིན་ནོ། །བདག་ཉིད་དུ་མ་གྱུར་བ་ནི་བདག་ཉིད་མ་ཡིན་པ་སྟེ་གཞན་ནོ། །དེ་མེད་ན་མི་འབྱུང་བ་ནི་བར་ཚད་མེད་པའོ། །མེད་ན་མི་འབྱུང་བ་དེ་ལ་ཡོད་པ་ནི་མེད་ན་མི་འབྱུང་བ་སྟེ། བར་ཆད་མེད་པ་ཅན་ནོ། །གང་ཞིག་གང་ལ་མི་འཁྲུལ་པ་དེ་ནི་དེ་ལ་ཆོད་པ་མེད་པར་བརྗོད་པ་ཡིན་ནོ། །དེའི་བདག་ཉིད་མ་ཡིན་པ་མེད་ན་མི་འབྱུང་བ་ནི་གཞན་གྱི་འབྲས་བུ་ལ་བྱའོ། །གཞན་གྱི་འབྲས་བུའི་སྣང་
བ་དེ་མདུན་དུ་བྱེད་པ་སྟེ། གཞག་པར་འཐད་པ་མ་ཡིན་ཏེ། གཞན་གྱི་འབྲས་བུར་གྱུར་པའི་སྣང་བ་ནི་གཞན་ལས་སྐྱེ་བར་རིགས་པ་མ་ཡིན་པའི་ཕྱིར་རོ། །བྱེད་ན་ནི་འཇོག་པར་བྱེད་པ་མེད་པའི་ཕྱིར་སྣང་བ་མ་ལུས་པ་རྒྱུ་མེད་པ་ཅན་དུ་ཐལ་བར་འགྱུར་བའི་ཕྱིར་རོ།། རོ་ལ་སོགས་པ་ཕན་ཚུན་བཞིན་ནོ་ཞེས་བྱ་བ་ནི་ཇི་ལྟར་ཕན་ཚུན་གྱི་སྣང་བ་མི་བྱེད་པ་དེ་བཞིན་ནོ། །དོན་གང་ཞིག་ཤེས་པའི་སྣང་བ་གང་གི་རྒྱུ་ཡིན་པ་དེ་ནི། དེ་ལ་དོན་གཞན་གྱི་འབྲས་བུར་གྱུར་པའི་སྣང་བ་མི་འཇོག་སྟེ། དཔེར་ན་ལྕེའི་རྣམ་པར་ཤེས་པའི་སྣང་བའི་རྒྱུར་གྱུར་པའི་རོ་གཟུགས་ལ་སོགས་པའི་འབྲས་བུའི་སྣང་བ་མི་འཇོག་པ་བཞིན་ནོ། །དེ་བཞིན་དུ་གཟུང་བའི་དོན་ཐམས་ཅད་ཀྱང་དབང་པོའི་རྣམ་པར་ཤེས་པའི་སྣང་བའི་རྒྱུ་ཉིད་ཡིན་པ་དེས་ན་སྒྲའི་འབྲས་བུ་སྒྲའི་རྣམ་པར་འཇོག་པར་བྱེད་པ་མ་ཡིན་ནོ། །གང་གི་ཕྱིར་སྐྱེད་པར་བྱེད་པ་ཉིད་ལ་ནི་ཐ་དད་པར་བྱེད་པས་ཁྱབ་སྟེ། རྒྱུ་ཐ་དད་ཀྱང་ཐ་དད་པ་མེད་པ་ཡིན་ན་ནི་སྣ་ཚོགས་ཀྱི་རྒྱུ་མེད་པ་ཅན་དུ་ཐལ་བའི་ཕྱིར་རོ། །དེས་ན་ཕྱི་རོལ་སྣང་བའི་རྒྱུ་ཡིན་ན་ཐ་དད་པར་བྱེད་པ་ཡིན་པར་འགྱུར་ཏེ། གཞན་དུ་ན་སྣང་བ་ཕྱི་རོལ་གྱི་རྒྱུ་ཅན་དུ་མི་འགྱུར་ལ། ཕྱི་རོལ་ཡང་དེའི་རྒྱུར་མི་འགྱུར་རོ། །དེས་ན་ཕྱི་རོལ་སྣང་བའི་རྒྱུ་ཉིད་ལ་ཐ་དད་པར་བྱེད་པ་ཉིད་ཀྱིས་ཁྱབ་པ་ཡིན་ལ། དོན་གཞན་གྱི་འབྲས་བུའི་སྣང་བ་འཇོག་པར་བྱེད་ན་ནི་ཐ་དད་པར་བྱེད་པ་ཉིད་མ་ཡིན་པར་འགྱུར་བ་དེས་ན་འགལ་བས་ཁྱབ་པ་དམིགས་པས་དོན་གཞན་གྱི་འབྲས་བུའི་སྣང་བ་འཇོག་པར་བྱེད་པ་འགོག་པའི་ཕྱིར་དོན་ལ་ལྟོས་པའི་ཚད་མའོ། །ཤེས་པ་ལ་ལྟོས་ནས་ཀྱང་བསྟན་པའི་དོན་དུ་དེའི་ཞེས་བྱ་བ་ལ་སོགས་པ་སྨོས་སོ། །དེ་ཞེས་བྱ་བ་ནི་དོན་ཉེ་བ་དེའི་སྟོབས་ཀྱིས་འབྱུང་བ་ཞེས་བྱ་བ་ནི་གཏན་ཚིགས་ཀྱི་དོན་ཏོ། །དོན་གཞན་གྱི་རྗེས་སུ་འབྲང་བར་ཏེ་རྗེས་སུ་འགྲོ་བར་རིགས་པ་མ་ཡིན་ཏེ་ཞེས་བྱ་བ་ནི་བསྒྲུབ་པར་བྱ་བ་ངེས་པར་བསྟན་པའོ། །རྣམ་པར་ཤེས་པ་ཞེས་བྱ་བ་ནི་ཆོས་ཅན་ནོ། །རོ་ལ་སོགས་པའི་ཤེས་པ་བཞིན་ནོ་ཞེས་བྱ་བ་ནི་ཁྱབ་པའི་ཡུལ་ལོ། །རྣམ་པར་ཤེས་པ་གང་ཞིག་སྣང་བའི་རྒྱུའི་དོན་ལས་སྐྱེས་པ་དེ་ནི་སྐྱེད་པར་བྱེད་པ་མ་ཡིན་པའི་རྗེས་སུ་བྱེ་པ་མ་ཡིན་ཏེ། དཔེར་
ན་སྣང་བའི་རྒྱུ་རོ་ལས་སྐྱེས་པ་ལྕེའི་རྣམ་པར་ཤེས་པ་སྐྱེད་པར་བྱེད་པ་མ་ཡིན་པ་གཟུགས་ལ་སོགས་པའི་རྣམ་པའི་རྗེས་སུ་མི་བྱེ་པ་བཞིན་ནོ། །དེ་བཞིན་དུ་དབང་པོའི་རྣམ་པར་ཤེས་པའི་ཚོགས་ཀྱང་སྔོན་པོ་ལ་སོགས་པའི་སྣང་བའི་རྒྱུ་དག་གིས་བསྐྱེད་པ་ཡིན་ཏེ། དེས་ན་སྐྱེད་པར་བྱེད་པ་མ་ཡིན་པ་སྒྲའི་རྣམ་པའི་རྣམ་པའི་རྗེས་སུ་བྱེ་པ་མ་ཡིན་ནོ། །སྔར་བཤད་པའི་རྣམ་པར་སོ་སོར་སྣང་བ་ནི་འཇོག་པར་བྱེ་པས་ཕྱི་རོལ་ཐ་དད་པའི་རྗེས་སུ་བྱེ་པ་ཉིད་ཀྱིས། དེས་བསྐྱེད་པར་འགྱུར་གྱི་གཞན་དུ་ནི་མ་ཡིན་ནོ། །དོན་འདིས་ནི་སྣང་བའི་རྒྱུ་ནི་པ་ཉིད་ཀྱིས་ཤེས་པའི་རྒྱུར་འགྱུར་གྱི། སྣང་བའི་རྒྱུ་ལས་གཞན་དུ་ནི་ཕྱི་རོལ་ཤེས་པའི་རྒྱུར་བརྟག་པར་ནུས་པ་མ་ཡིན་ནོ། །དེས་ན་ཕྱི་རོལ་སྣང་བའི་རྒྱུ་ལས་སྐྱེས་པའི་ཤེས་པ་ལས་སྣང་བ་ཕྱི་རོལ་གྱིས་བསྐྱེད་པར་བྱ་བ་ཉིད་ཀྱིས་ཁྱབ་སྟེ། གལ་ཏེ་དེ་ལ་རྣམ་པ་འགའ་ཞིག་གི་ཕྱི་རོལ་གྱིས་མ་བྱས་ན་ནི་ཁྱད་པར་མེད་པའི་ཕྱིར་གཞན་ཡང་ཕྱི་རོལ་གྱིས་མ་བྱས་པར་འགྱུར་རོ། །དེས་ན་སྣང་བ་མ་ལུས་པ་ཕྱི་རོལ་གྱིས་བསྐྱེད་པར་བྱ་བ་ཉིད་ལ་ཉམས་པར་འགྱུར་རོ། །ཇི་སྟེ་དོན་གཞན་གྱིས་བསྐྱེད་པར་བྱ་བའི་རྣམ་པར་འཇོག་པ་དེ་ལྟར་ན་འཇོག་པར་བྱད་པ་ཐ་དད་པ་ནི་སྣང་བ་ཐ་དད་པ་བྱེད་པ་པོ་མ་ཡིན་པ་དེས་ན་ཕྱི་རོལ་བསྐྱེད་པར་བྱ་བ་ཉིད་བཏང་བ་ཡིན་ལ། དེ་ལྟ་ན་ཡང་ཤེས་པ་ལ་སྣང་བའི་རྒྱུ་ལས་སྐྱེས་པར་མི་འགྱུར་བའི་ཕྱིར། ཁྱབ་པར་བྱེད་པ་མི་དམིགས་པས་གཏན་ཚིགས་སྐྱེད་པར་བྱེད་པ་མ་ཡིན་པའི་རྣམ་པར་འཛིན་པ་ལས་ལྡོག་པ་ན། སྐྱེད་པར་བྱེད་པ་ཙམ་སྣང་བས་ཁྱབ་ལ། སྐྱེ་པར་བྱེད་པ་མ་ཡིན་པའི་རྣམ་པའི་རྗེས་སུ་བྱེད་པ་ཡང་དེ་དང་འགལ་བ་ཡིན་ཏེ། དེ་སྣ་ཤེས་པ་ལ་ལྟོས་ནས་ཀྱང་འགལ་བས་ཁྱབ་པ་དམིགས་པ་ཉིད་དོ། །ཕྱི་རོལ་སྣང་བའི་རྒྱུ་སྐྱེད་པར་བྱེད་པ་ཉིད་དང༌། དབང་པོའི་རྣམ་པར་ཤེས་པ་སྐྱེད་པར་བྱེད་པ་ཉིད་དུ་ཡང་ཕྱི་རོལ་གྱི་དོན་དུ་སྨྲ་བ་རྣམས་ལ་གྲུན་པའི་ཕྱིར་གཏན་ཚིགས་གཉི་ག་ཡང་མ་གྲུབ་པ་ཡིན་ནོ། །དེ་ལྟར་ན་གང་གི་ཕྱིར་སྒྲ་དོན་གྱི་བདག་ཉིད་དམ་དོན་གྱི་ཡུལ་ན་ཡོད་པ་མ་ཡིན་པ་དེས་ན་སྐྱེད་པར་བྱེད་པ་ཉིད་མེད་པའི་ཕྱིར་དབང་པོའི་རྣམ་པར་ཤེས་པ་དེའི་རྗེས་སུ་བྱེད་པ་མ་ཡིན་ནོ། །ཅི་སྟེ་སྒྲ་དོན་གྱི་བ་གཉིད་དམ་
དོན་གྱི་ཡུལ་ན་ཡོད་པ་ཡིན་ནོ་ཞེ་ན། དེ་དེའི་བདག་ཉིད་ཡིན་དུ་ཆུག་ཀྱང་སྟེ། སྐབས་ཀྱིས་དེའི་ཡུལ་ན་གནས་པ་ཡང་བལྟ་བར་བྱའོ། །གལ་ཏེ་སྒྲ་དོན་གང་ལས་དབང་པོའི་རྣམ་པར་ཤེས་པ་སྐྱེས་པའི་དོན་དེའི་བདག་ཉིད་གང་ཡིན་པ་དེ་ནི་དེའི་བདག་ཉིད་དོ།། དེའི་བདག་ཉིད་དམ་དེའི་ཡུལ་ན་གནས་པ་ཡིན་པ་དེ་ལྟ་ན་ཡང་དེའི་སྣང་བའི་རྗེས་སུ་བྱེད་པ་མ་ཡིན་ནོ། །ག་ལས་ཤེ་ན། སྨྲས་པ། སྒྲས་ནི་སྒྲ་འཛིན་པའི་དབང་པོ་ལས་གཞན་དུ་གྱུར་པའི་དབང་པོའི་ཤེས་པ་སྐྱེད་པར་མི་ནུས་པའི་ཕྱིར་རོ། །འདི་སྐད་བརྗོད་པར་འགྱུར་ཏེ། གྲངས་ཅན་རྣམས་ཀྱི་སྣ་ཚོགས་དེ་ཙམ་ལྔ་བཀོད་པའི་གནས་པའི་བདག་ཉིད་ཡིན་པ་དེ་ལྟ་ན་ཡང་སྒྲའི་རྣམ་པར་འགྱུར་བ་ནི་ཉན་པའི་འཇུག་པ་ཉིད་ཀྱི་ཡུལ་ཡིན་ནོ། །དེ་བཞིན་དུ་གལ་ཏེ་བརྡ་སྤྲོད་པ་རྣམས་ཀྱི་དོན་སྒྲའི་རྣམ་པར་འགྱུར་བ་ཉིད་ཡིན་པ་དེ་ལྟ་ན་ཡང་སྒྲར་རྣམ་པར་གྱུར་པ་ནི་ཉན་པའི་དབང་པོའི་རྣམ་པར་ཤེས་པའི་རྣམ་པར་གྱུར་བ་ཉིད་ཀྱི་ཡུལ་ཡིན་གྱི་གཞན་གྱི་མ་ཡིན་ནོ། །དེའི་ཡུལ་ན་ཡོད་པ་ཉིད་ཡིན་ཡང༌། རང་གི་དབང་པོའི་ཤེས་པའི་ཡུལ་ཡིན་པའི་ཕྱིར་དེ་ཉིད་ཀྱིས་སྐྱེད་པར་བྱེད་པ་ཡིན་ནོ། །ཧ་ཅང་ཐལ་བར་འགྱུར་བའི་ཡང་ཕྱིར་རོ་ཞེས་བྱ་བ་ལ་གང་ཡང་རུང་བ་གཅིག་ཉིད་ཀྱིས་དོན་ཐམས་ཅད་འཛིན་པའི་ཕྱིར་རྒོལ་བ་ཐམས་ཅད་ཀྱིས་ཉམས་སུ་མྱོང་བའི་རྗེས་སུ་འབྲངས་ནས་དབང་པོ་ལྔར་བརྟག་པར་བྱས་པ་གང་ཡིན་པ་དེ་དོར་བར་འགྱུར་རོ་ཞེས་བྱ་བ་འདི་ནི་ཧ་ཅང་ཐལ་བའོ། །གང་གི་ཕྱིར་ཧ་ཅང་ཐལ་བ་དེའི་ཕྱིར་ནུས་པ་མ་ཡིན་ནོ། །རང་གི་སྒྲ་ནི་ནུས་པ་མེད་པ་དེའི་ཕྱིར་འཛིན་པ་མ་ཡིན་ལ། ཧ་ཅང་ཐལ་བའི་ཕྱིར་ཡང་ནུས་པ་མེད་པ་ཡིན་ནོ་ཞེས་ནུས་པ་མེད་པ་སྒྲུབ་པའི་གཏན་ཚིགས་གཞན་བསྡུ་བའི་དོན་ཏོ། །གལ་ཏེ་རྣ་བའི་དབང་པོའི་རྣམ་པར་ཤེས་པ་སྒྲའི་ནུས་པ་ལས་སྐྱེས་པ་ལ་སྒྲའི་སྣང་བ་ཡོད་པ་མ་ཡིན་ནམ། དེ་ནས་དབང་པོའི་རྣམ་པར་ཤེས་པ་དོན་གྱི་ནུས་པ་ལས་སྐྱེས་པའི་ཕྱིར་སྒྲ་སྣང་བ་མ་ཡིན་ལ། དེས་ན་རྣམ་པར་རྟོག་པ་མེད་པ་ཡིན་ནོ་ཞེས་ཅིའི་ཕྱིར་སྨྲ་ཞེ་ན། བདེན་ཏེ། དེ་ལྟ་ན་ཡང༌། སྒྲ་ཅི་འདྲ་བ་ཞིག་བཟུང་བས་རྣམ་པར་ཤེས་པ་རྣམ་པར་རྟོག་པ་དང་བཅས་བར་འགྱུར་བ་དེ་
འདྲ་བ་ནི་ཉན་པའི་རྣམ་པར་ཤེས་པས་མ་བཟུང་ལ། དེ་འདྲ་བས་བསྐྱེད་པ་ཡང་མ་ཡིན་ནོ། །བརྗོད་པར་བྱ་བ་དང་འབྲེལ་པའི་སྒྲ་གཟུང་བ་ན་འཛིན་པར་བྱེད་པ་རྣམ་པར་རྟོག་པ་དང་བཅས་པར་འགྱུར་ཏེ། དོན་འགའ་ཞིག་དོན་གཞན་དང་སྦྲེལ་བའི་རྣམ་པར་སྐྱེས་པ་ནི་སྦྱོར་བར་བྱེད་པ་ཡིན་པས་རྣམ་པར་རྟོག་པ་ཅན་དུ་བརྗོད་པའི་ཕྱིར་རོ། །དེས་ན་ཕན་ཚུན་འབྲེལ་པའི་དོན་འཛིན་པ་ཉིད་རྣམ་པར་རྟོག་པ་ཅན་ཡིན་ནོ། །གཅིག་གིས་དུ་མ་འཛིན་པ་ཙམ་ནི་འབྲེལ་པ་ཉིད་དུ་འཛིན་པ་མ་ཡིན་ཏེ། བུམ་པ་དང་སྣམ་བུ་ལ་སོགས་པ་ཤེས་པ་གཅིག་ལ་སྣང་ཡང་སྦྱར་ནས་འཛིན་པ་མ་ཡིན་པའི་ཕྱིར་རོ། །གཞན་ཡང་ཁྱད་པར་དུ་བྱ་བ་དང་ཁྱད་པར་དུ་བྱེད་པའི་དངོས་པོར་འཛིན་པ་ནི་སྦྱར་ནས་འཛིན་པ་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་ཤེས་པ་ཐམས་ཅད་བདག་ཉིད་དོན་གཞན་དང་སྦྱར་ནས་མི་འཛིན་པའི་ཕྱིར་བདག་ཉིད་ལ་རྟོག་པ་མེད་པ་ཡིན་ནོ། །དོན་ལ་འགའ་ཞིག་སྦྱར་ནས་འཛིན་པ་དེ་ནི་རྣམ་པར་རྟོག་པ་དང་བཅས་པ་ཡིན་ལ། གཞན་ནི་རྣམ་པར་རྟོག་པ་མེད་པ་ཡིན་ནོ། །དེའི་ཕྱིར་རྣམ་པར་ཤེས་པ་གང་ཞིག་སྒྲ་ལས་དོན་དང་སྦྱར་ནས་རྗོད་པར་བྱེད་པ་ཉིད་དུ་འཛིན་པ་དེ་ཉིད་རྣམ་པར་རྟོག་པ་དང་བཅས་པ་ཡིན་ནོ། །དོན་དང་འབྲེལ་པའི་སྒྲ་ཡང་བརྡ་དང་ལྡན་པ་ཉིད་ཡིན་ཏེ། དེས་ན་བརྡའི་དུས་སུ་མཐོང་བ་དེ་ཉིད་ནི་འདི་ཉིད་ཡིན་ནོ་ཞེས་སྔོན་མཐོང་བ་ཉིད་དུ་གཟུང་བ་ན་སྒྲ་དོན་དང་འབྲེལ་པར་གཟུང་བར་འགྱུར་གྱི་གཞན་དུ་ནི་མ་ཡིན་ནོ། །སྔོན་མཐོང་བ་ཡང་སྔོན་སྐྱེས་པའི་ཤེས་པའི་ཡུལ་ཉིད་ཡིན་ལ། དེ་ཡང་སྔོན་གྱི་ཤེས་པ་དང་ལྷན་ཅིག་ཏུ་འདས་པ་ཡིན་ཏེ། ཕྱིས་ནི་ཡོད་པ་མ་ཡིན་ནོ། །རང་བཞིན་ཡོད་པའི་སྒྲ་ནི་སྐྱེད་པར་བྱེད་པ་ཡིན་ལ། མངོན་སུམ་ཡང་རང་བཞིན་ཡོད་པའི་ཡུལ་ཅན་ཡིན་ནོ། །དེས་ན་རྣམ་པར་ཤེས་པ་ནི་རྗོད་པར་བྱེད་པ་བརྡའི་ཡུལ་ཉིད་ཀྱིས་བསྐྱེད་པ་མ་ཡིན་ལ། དེ་སྣང་བ་ཡང་མ་ཡིན་པའི་ཕྱིར། རྣ་བའི་རྣམ་པར་ཤེས་པ་ནི་དོན་གྱི་མཐུས་བསྐྱེད་པ་དང་དོན་ཙམ་སྣང་བ་ཡིན་ནོ། །དེའི་ཕྱིར་རྣལ་འབྱོར་པའི་ཤེས་བ་ལ་སྒྲ་དོན་དུ་མ་སྣང་དུ་ཟིན་ཀྱང་རྣམ་པར་རྟོག་པ་མེད་པ་ཉིད་དེ། རྗོད་པར་བྱེད་པ་སྔོན་གྱི་ཤེས་པའི་ཡུལ་ཉིད་ཀྱིས་མ་བསྐྱེད་ཅིང་དེ་སྣང་བ་ཡང་མ་ཡིན་པའི་ཕྱིར་ཏེ། དེ་
ནི་དེའི་ཚེ་འདས་པས་མེད་པའི་ཕྱིར་རོ། །དེས་ན་གལ་ཏེ་སྒྲ་རང་གི་མཚན་ཉིད་རྗོད་པར་བྱེད་པ་ཡིན་པ་དེ་ལྟ་ན་ཡང༌། རྗོད་པར་བྱེད་པའི་ཚུལ་གྱིས་འགའ་ཞིག་གིས་སྐྱེད་པར་བྱེད་པའམ་གཟུང་བར་བྱ་བ་ཆ་ཡིན་ནོ། །དེའི་ཕྱིར་རྣ་བའི་རྣམ་པར་ཤེས་པ་དང༌། རྣལ་འབྱོར་པའི་ཤེས་པ་དང༌། ཡིད་ཀྱི་ཤེས་པའི་མངོན་སུམ་ཐམས་ཅད་སྒྲ་འཛིན་པར་བྱེད་པ་ཡིན་ཡང་སྔོན་གྱི་ཤེས་པར་ཡུལ་རྗོད་པར་བྱེད་པའི་ཚུལ་གྱིས་བསྐྱེད་པ་མ་ཡིན་ལ། དེའི་རྣམ་པ་དང་ལྡན་པ་ཡང་མ་ཡིན་ཏེ། དེས་ན་དོན་གྱི་མཐུ་ལས་སྐྱེས་པ་དང་དེ་ཙམ་སྣང་བར་བརྗོད་པ་ཡིན་ནོ། །དེས་ན་སྒྲ་ལ་རག་མ་ལས་པའི་ཕྱིར་རྣམ་པར་རྟོག་པ་མེད་པ་ཡིན་ནོ། །དབང་པོ་ལས་སྐྱེས་པའི་མངོན་སུམ་དོན་གཞན་གྱི་ཡུལ་ཅན་ནི་ཐམས་ཅད་དུ་སྒྲའི་སྐྱེད་བྱེད་དང༌། གཟུང་བ་ཅན་མ་ཡིན་ཏེ། དེས་ན་རྟོག་པ་མེད་པ་ཉིད་ཡིན་ནོ། །དེའི་ཕྱིར་སྒྲའི་རྣམ་པ་ཅན་དང་མངོན་སུམ་གཞན་རྣམ་པར་རྟོག་པའི་རྒྱུ་རྗོད་པར་བྱེད་པའི་རང་བཞིན་གྱིས་མ་བསྐྱེད་པ་དང༌། དེ་སྣང་བ་མེད་པར་ཁྱད་པར་མེད་དོ། །འདིར་ནི་གང་གི་ཕྱིར་ཐ་སྙད་འདོགས་པ་པོ་སྣང་བ་རྣམ་པར་བརྟག་པར་བྱ་བའི་དོན་དག་གཅིག་ཏུ་བྱས་ནས་སྒྲ་རང་གི་མཚན་ཉིད་ཁོ་ན་རྗོད་པར་བྱེད་པར་ལྷག་པར་ཞེ་ན་པ་དེའི་ཕྱིར་རང་གི་མཚན་ཉིད་ཁོ་ན་རྗོད་པར་བྱེད་པར་ཁས་བླངས་ནས། དེའི་རྣམ་པ་དང་བྲལ་བས་མངོན་སུམ་རྣམ་པར་རྟོག་པ་མེད་པར་བསྒྲུབས་པ་ཡིན་ནོ། །གང་དག་རྗོད་པར་བྱེད་པ་ནི་སྒྲའི་སྤྱི་ཡིན་ལ། དེ་ཡང་དབང་པོའི་ཤེས་པ་ལ་མི་སྣང་བ་ཡིན་པར་སྣང་བ་དེ་དག་གི་ལྟར་ན་དབང་པོའི་བྱེད་པ་མེད་པ་ལ་ཞེས་བྱ་བ་ལ་སོགས་པ་དེ་དང་རྟོག་པ་མེད་པར་བསྒྲུབས་པའི་སྐབས་འདི་ཁྱད་པར་མེད་པར་བརྗོད་པ་ཡིན་ཏེ། ཡུལ་བརྗོད་པའི་སྒོ་ནས་དེ་རྟོག་པ་མེད་པ་གྲུབ་པའི་ཕྱིར་རོ། །གཞན་ཡང་འདིར་ཡི་གེ་ལ་དེ་ལྟ་བུའི་དོན་མེད་པས་ཡི་གེའི་དོན་དུ་མི་སྣང་བར་བཤད་པར་འགྱུར་རོ། །གལ་ཏེ་སྣང་བའི་རྒྱུ་དོན་ལས་སྐྱེས་པ་གང་ཡིན་པ་དེ་སྣང་བ་ངེས་པའི་ཕྱིར་རྟོག་པ་མེད་པ་ཡིན་ན། འོ་ན་གཞན་གང་ཞིག་རྣམ་པར་རྟོག་པ་དང་བཅས་པར་འགྱུར་བ་སྣང་བ་ངེས་པ་མེད་པའི་རྣམ་པར་ཤེས་པ་གང་ཡིན་ཞེ་ན། རྣམ་པར་རྟོག་པ་ཅན་ཞེས་སྨོས་སོ། །ནིའི་སྒྲ་ནི་ཡིད་ཀྱི་
རྣམ་པར་ཤེས་པ་མངོན་སུམ་ལས་ཁྱད་པར་དུ་བསྟན་པའི་དོན་ཏོ། །ཁྱད་པར་དེ་ཉིད་བསྟན་པའི་དོན་དུ་བཤད་པ་དོན་གྱི་ནུས་པ་ནི་མཐུའོ། །དེ་ཉེ་བ་ནི་བྱེད་པ་དང་བཅས་པའོ། །དེ་ལ་མི་ལྟོས་པ་ནི་དེ་ལ་ལྟོས་པ་མེད་པ་སྟེ། ཇི་ལྟར་དབང་པོའི་ཤེས་པ་བཞིན་དུ་སྣང་བ་དོན་ལ་རག་ལས་པ་མ་ཡིན་པ་ཞེས་བྱ་བའི་དོན་ཏོ། །དེས་ན་སྣང་བ་དོན་ལ་རག་མ་ལས་པ་ཡིན་པའི་ཕྱིར་དབང་པོའི་དོན་ཡང་དེ་ཡིན་ལ་མ་ངེས་པ་ཡང་ཡིན་པ་དེ་འཛིན་པ་སྟེ་སྣང་བ་ངེས་པ་མེད་པ་ཡིན་ནོ་ཞེས་བྱ་བའི་དོན་ཏོ། །སྣང་བ་དང་རྣམ་པར་བརྟག་པའི་དོན་དག་གཅིག་ཏུ་བྱས་པའི་ཕྱིར་ཡིད་ཀྱི་རྣམ་པར་ཤེས་བ་ལ་དབང་པོའི་དོན་འཛིན་པར་བརྗོད་པ་ཡིན་ཏེ། དེ་ཉིད་ཀྱི་ཕྱིར་འདིར་རང་གི་མཚན་ཉིད་ཁོ་ན་རྗོད་པར་བྱེད་པར་བཟུང་ནས་རྟོག་པ་མེད་པར་སྒྲུབ་པར་འདོད་དོ་ཞེས་ཁོང་དུ་ཆུད་པ་ཡིན་ནོ། །སྣང་བ་ངེས་པ་མེད་པ་ཉིད་ཀྱི་ཕྱིར་ཡིད་ཀྱི་རྣམ་པར་ཤེས་པ་དང་དངོས་པོ་ལ་སྔོན་གྱི་ཤེས་པའི་ཡུལ་དུ་གྱུར་པ་ཉིད་དུ་འཛིན་པར་བྱེད་དེ། སྔོན་མཐོང་བ་གང་ཡིན་པ་དེ་ཉིད་ནི་དེ་ཡིན་ནོ་ཞེས་གཅིག་ཏུ་བྱས་ནས་འཇུག་པའི་ཕྱིར་རོ། །དེ་ཉིད་སྨྲས་པ་ནི་རྣམ་པར་རྟོག་པ་ཅན་ཞེས་བྱ་བ་ཡིན་ནོ། །རྣམ་པར་རྟོག་པ་ནི་འདི་ཉིད་དེ། འདི་ལྟ་སྟེ་སྔ་མ་དང་ཕྱི་མ་མཐོང་བའི་དོན་དག་གཅིག་ཏུ་བྱེད་པའོ་ཞེས་བརྡ་དྲན་པའི་ཐབས་ཀྱིས་སུ་ཞེས་བྱ་བ་འདིའི་ནང་དུ་འཆད་པར་འགྱུར་རོ། །འོ་ན་ཡིད་ཀྱི་རྣམ་པར་ཤེས་པ་དེ་གང་ལས་སྐྱེ་ཞེ་ན། སྨྲས་པ། རྣམ་པར་རྟོག་པས་རིགས་མཐུན་པའི་རྣམ་པར་རྟོག་པ་སྐྱེད་པའི་ནུས་པ་རྒྱུན་ལས་གཞག་པ་གང་ཡིན་པ་དེ་ནི་བག་ཆགས་སོ། །དེས་ཀུན་ནས་བསླང་བ་ནི་བསྐྱེད་པ་སྟེ། འདིས་ནི་རྣམ་པར་རྟོག་པའི་ལོག་པར་འཛིན་པའི་རྒྱུ་བརྗོད་དོ། །གལ་ཏེ་ཡིད་ཀྱི་རྣམ་པར་ཤེས་པ་ལོག་པར་འཛིན་པའི་བག་ཆགས་ཀྱིས་བསྐྱེད་པ་ཡིན་ན། དེ་ལྟ་ན་འོ་ན་དེ་ལ་དོན་གྱི་རྣམ་པ་སྣང་བ་དེ་ག་ལས་ཤེ་ན། ཉམས་སུ་མྱོང་བ་དང་འབྲེལ་བ་ལས་ཞེས་བྱ་བ་སྨོས་སོ། །དོན་དེ་དང་དེ་ཉམས་སུ་མྱོང་བ་ལས་དོན་དེ་དང་དེའི་རྣམ་པར་སྣང་བ་ཡིན་ནོ་ཞེས་བྱ་བའི་དོན་འདི་ཡིན་ནོ། །གལ་ཏེ་དེ་ལྟ་ན་དོན་ངེས་པ་མེད་པར་སྣང་བའི་ཡིད་ཀྱི་རྣམ་པར་ཤེས་པ་ལོག་པར་གོམས་པ་དང༌། ཉམས་སུ་མྱོང་བའི་བག་ཆགས་ཀྱིས་བསྐྱེད་པ་དེའི་ཚེ་ཐམས་ཅད་ལ་དོན་
ཐམས་ཅད་སྣང་བར་འགྱུར་ཏེ། དོན་ཐམས་ཅད་ཉམས་སུ་མྱོང་བའི་བག་ཆགས་དང་ལོག་པའི་བག་ཆགས་ཉ་བ་ཉིད་ཀྱི་ཕྱིར་རོ་ཞེས་དོགས་པ་ལ། འགའ་ཞིག་དང་ཞེས་སྨོས་སོ། །འདིར་ཡང་ཉམས་སུ་མྱོང་བ་དང་འབྲེལ་པ་ལས་ཞེས་དེ་ལྟར་སྦྲེལ་བར་བྱའོ། །སྔར་ནི་ཉམས་སུ་མྱོང་བ་ཙམ་ལས་སྣང་བ་བསྐྱེད་པར་བརྗོད་པ་ཡིན་ལ། དེ་ལྟར་ནི་ཁྱད་པར་འགའ་ཞིག་གིས་ཁྱད་པར་དུ་བྱས་པ་ལས་བརྗོད་པ་ཡིན་ནོ། །དེ་སྨྲས་པ་ནི་ལྷན་ཅིག་གམ་སོ་སོར་འཛིན་པར་བྱེད་དོ་ཞེས་བྱ་བའོ། །དོན་འབྲེལ་པ་ཉམས་སུ་མྱོང་བ་ལ་ནི་འབྲེལ་པར་དྲན་ཞིང་གཞན་དུ་མྱོང་ན་ནི་གཞན་དུ་སྟེ། དེས་ན་ཉམས་སུ་མྱོང་བའི་ཁྱད་པར་ལས་ཡིད་ཀྱི་རྣམ་པར་ཤེས་པ་འགའ་ཞིག་ཉིད་འགའ་ཞིག་ལྟར་འགྱུར་བ་ཡིན་ནོ། །འདི་ལྟར་སྒྲ་དང་དོན་དག་ལྷན་ཅིག་རྒྱུ་བ་གོམས་པ་ནི་ལྷན་ཅིག་ཏུ་འཛིན་ལ། ལྷན་ཅིག་རྒྱུ་བར་མ་གོམས་པ་ནི་སོ་སོར་འཛིན་ཏོ། །དམན་པ་ལ་སོགས་པའི་ཁྱད་པར་གྱིས་བར་དུ་གཅོད་པའི་ཉམས་སུ་མྱོང་བ་ལ་ཡང་སོ་སོ་ཉིད་དུ་འཛིན་ཏེ། བག་ཆགས་སད་པའི་རྐྱེན་མ་ཚང་བའི་ཕྱིར་རོ། །དེའི་ཕྱིར་དེ་ལྟར་དོན་ལ་མི་ལྟོས་པའི་ཕྱིར་དོན་ངེས་པ་མེད་པར་སྣང་བས་རྣམ་པར་རྟོག་པ་དང་བཅས་པའི་ཤེས་པ་ཉིད་བརྗོད་པ་དང་འདྲེ་བ་ཡིན་གྱི་དབང་པོའི་རྣམ་པར་ཤེས་པ་ནི་མ་ཡིན་ནོ། །གལ་ཏེ་འདི་སྙམ་དུ་སྒྲ་དང་འབྲེལ་པའི་སྣང་བ་དོན་གཞན་གྱིས་བཞག་པ་ཡིན་ན་ནི་ཕྱི་རོལ་ཐ་དད་པར་བྱེད་པ་མ་ཡིན་པའི་ཕྱིར་སྣང་བ་ཐམས་ཅད་ཀྱི་ཕྱི་རོལ་གྱིས་བྱས་པ་མ་ཡིན་པར་འགྱུར་ན་སྒྲའི་སྣང་བ་ནི་རྣམ་པ་གཉིས་ཏེ། རང་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཅན་ཉན་པའི་རྣམ་པར་ཤེས་པ་དང༌། སྤྱིའི་རྣམ་པ་ཅན་གང་ཡིན་པ་སྟེ། ཡིད་ཀྱི་རྣམ་པར་ཤེས་པས་གང་རྟོགས་པ་ཡིན་ནོ། །དེ་ལ་སྤྱིའི་རྣམ་པ་སྒྲ་ལ་མི་ལྟོས་པས་དབང་པོའི་ཤེས་པ་ལ་གནོད་པ་ཅི་ཡོད། དོན་གྱིས་བྱས་པ་དོན་ལ་མི་ལྟོས་པ་ཉིད་ན་སྐྱོན་དུ་འགྱུར་ན། འདི་ནི་དོན་གྱིས་བྱས་པ་ཡང་མ་ཡིན། སྒྲ་ནི་དེ་ཉིད་ཀྱི་ངོ་བོས་རྗོད་པར་བྱེད་པ་ཡིན། ཁྱོད་ཀྱིས་ནི་སྒྲ་རང་གི་མཚན་ཉིད་རྗོད་པར་བྱེད་པར་བརྟགས་ནས་དབང་པོའི་རྣམ་པར་ཤེས་པ་གཞན་ལ་དེ་སྣང་བ་མི་འཐད་པར་བརྗོད་དོ། །དེས་ན་དབང་པོའི་རྣམ་པར་ཤེས་པ་དོན་གྱི་ནུས་པས་བསྐྱེད་པ་ཡང་ཡིན་
ལ། གང་ལས་རྣམ་པར་རྟོག་པ་དང་བཅས་པར་འགྱུར་བ་སྒྲའི་རྣམ་པ་ཅན་དུ་ཡང་འགྱུར་རོ་ཞེས་དོགས་པ་ལ། སྒྲའི་སྤྱིའི་རྣམ་པ་ཅན་ཉིད་ལ་དོན་གྱི་ནུས་པས་བསྐྱེད་པ་ཉིད་མི་འཐད་པ་རྣམ་པ་གཞན་གྱི་སྒོ་ནས་བསྟན་པའི་ཕྱིར། དོན་ནི་ཉེ་བར་སྦྱོར་བ་ཡིན་ཞེས་བྱ་བ་ལ་སོགས་པ་སྨོས་སོ། །ཚིག་ལེའུར་བྱས་པ་གཉིས་པོ་འདིའི་དོན་ནི་འདི་ཡིན་ཏེ། གལ་ཏེ་དབང་པོའི་རྣམ་པར་ཤེས་པ་སྒྲའི་སྤྱིའི་རྣམ་པ་ཅན་དུ་འགྱུར་ན་ཡང་དོན་གྱི་མཐུས་བསྐྱེད་པར་མི་འགྱུར་ཏེ། དོན་དྲན་པ་བསྐྱེད་པས་བར་ཆད་ལ་ཉེ་བར་སྦྱོར་བའི་ཕྱིར་རོ། །སྔར་ཐ་དད་པར་བྱེད་པ་མ་ཡིན་པར་ཐལ་བར་འགྱུར་བའི་ཕྱིར་སྐྱེད་པར་བྱེད་པ་མ་ཡིན་པར་བརྗོད་པ་གང་ཡིན་པ་དེ་ནི་སྤྱིའི་རྣམ་པར་འཛིན་པ་ལ་ཡང་ཁྱད་པར་མེད་པར་བལྟ་བར་བྱ་ལ། འདི་ཡང་སྐྱོན་ལྷག་པ་གཞན་ཡིན་ནོ། །དོན་དབང་པོའི་རྣམ་པར་ཤེས་པ་བསྐྱེད་པ་ལ་ཉེ་བར་སྦྱོར་བ་ནའང་སྟེ། བྱེད་པ་དང་ལྡན་པར་ཁས་བླངས་པ་ན། གཞན་ཡང་སྟེ་ཡང་ལྷག་པར་དྲན་པ་ཞེས་བྱ་བ་བརྡའི་དུས་ན་ཡོད་པའི་སྒྲ་སྦྱར་བ་དྲན་པའི་རང་བཞིན་ལའོ། །གལ་ཏེ་ཞེས་བྱ་བ་ནི་གལ་ཏེ་དེ་ལྟར་ལྟོས་ན་ཞེས་ཁས་བླང་བ་སྟོན་པར་བྱེད་པའོ། །དེ་ཉིད་ཀྱི་ཕྱིར་ཅི་དེ་ལྟར་ལྟོས་པར་ཁས་ལེན་ནམ་ཞེས་འདྲི་བ་ནི་ལྟོས་ན་ཞེས་བྱ་བ་ཡིན་ནོ། །ཅི་ཞིག་དེ་ལྟར་ལྟོས་པར་ཁས་བླངས་ཤེ་ན། དབང་པོའི་བློ་སྟེ་དབང་པོའི་རྣམ་པར་ཤེས་པའོ། །དེ་ལྟར་ཁས་བླངས་པ་ལ་སྐྱོན་ཅི་ཡོད་ཅེ་ན། བཤད་པ། སྐྱེད་པར་བྱེད་པ་ཉིད་དུ་འདོད་པའི་དོན་དེ་ཆོད་པ་སྟེ། འབྲས་བུ་དབང་པོའི་རྣམ་པར་ཤེས་པ་ལ་དྲན་པས་ཆོད་པར་འགྱུར་ཏེ། དྲན་པ་ཉིད་ལ་ཉེ་བར་སྦྱོར་བའི་ཕྱིར་དངོས་སུ་སྐྱེད་པར་བྱེད་པ་མ་ཡིན་པར་འགྱུར་རོ་ཞེས་བྱ་བའི་དོན་ཏོ། །གལ་ཏེ་འདི་སྙམ་དུ་དབང་པོའི་ཤེས་པ་སྤྱིའི་རྣམ་པ་དང་ལྡན་དུ་ཆུག་པ་དེ་ལྟ་ན་ཡང་སྒྲ་དྲན་པ་ལ་ལྟོས་པར་ཅི་ལྟར་འགྱུར་སྙམ་ན། བརྡའི་དུས་ཞེས་བྱ་བ་སྨོས་ཏེ། གང་གི་ཕྱིར་བརྡའི་སྟེ་སྒྲ་རྗོད་པར་བྱེད་པ་ཉིད་དུ་སྦྱོར་བ་དེའི་དུས་སུ་དོན་གང་ལ་དེ་བརྡ་སྦྱར་བ་དེ་ལ་གོམས་པ་སྟེ་འདྲིས་པར་བྱས་པའོ། །རྗོད་པ་ཡང་དེ་ཡིན་ལ་སྤྱི་ཡང་དེ་ཡིན་པས་བརྗོད་པའི་སྤྱི་སྟེ། དེ་མ་དྲན་བར་རོ། །འདི་སྐད་བརྗོད་པ་ཡིན་ཏེ། སྒྲ་ནི་སྤྱིའི་ངོ་བོ་ཉིད་ཀྱིས་རྗོད་པར་བྱེད་པ་ཡིན་གྱི་ཁྱད་པར་ནི་མ་ཡིན་ནོ་ཞེས་བྱ་བའོ། །དེ་མ་དྲན་པའི་སྐྱེས་བུ་ནི་དོན་
ལ་དེ་སྦྱོར་མི་སྲིད་དེ། དྲན་པ་ཉིད་ཀྱིས་དོན་ཁྱད་པར་ཅན་དུ་འཛིན་གྱི་གཞན་གྱིས་ནི་མ་ཡིན་ནོ། །སྒྲ་གཞན་བཞིན་ནོ་ཞེས་བྱ་བ་ནི་ཇི་ལྟར་སྒྲ་གཞན་ལ་བརྡའི་དུས་ན་གོམས་པའི་སྤྱིའི་གནས་པ་གང་ཡིན་པ་དེ་མི་དྲན་པར་ནི་སྦྱོར་བར་མི་སྲིད་པ་དེ་བཞིན་དུ་འདི་ལ་ཡང་ངོ་ཞེས་བྱ་བ་ཡིན་ནོ། །སྒྲ་གཞན་ཞེས་པ་འདི་ནི་སྤྱིའི་དབང་དུ་བྱས་པའི་བདུན་པའོ། །འདི་སྐད་དུ་བརྗོད་པར་འགྱུར་ཏེ། བརྡ་དང་ལྡན་པའི་སྒྲ་ཉིད་ཀྱིས་འགའ་ཞིག་ཁྱད་པར་ཅན་དུ་འཛིན་གྱི་དངོས་པོ་ལ་ནི་མ་ཡིན་ནོ། །དེས་ན་བརྡའི་དུས་ན་གོམས་པ་ཉིད་དང༌། དྲན་པ་ནི་ཁྱབ་པར་བྱེད་པ་ཡིན་ལ། དོན་ལ་སྒྲ་ཁྱད་པར་ཅན་དུ་འཛིན་པ་ནི་ཁྱབ་པར་བྱ་བ་ཡིན་ནོ། །འདི་ལྟར་བརྡ་དང་འབྲེལ་པ་མེད་ན་ནི་སྒྲས་ཁྱད་པར་དུ་བྱས་པའི་དོན་འཛིན་པ་མ་ཡིན་ནོ། །གཞན་དུ་ན་བརྡ་རིག་པ་དང་གཞན་ཐམས་ཅད་སྒྲ་ཐམས་ཅད་ཀྱིས་དོན་ཐམས་ཅད་ཁྱད་པར་ཅན་དུ་འཛིན་པར་འགྱུར་ན་འཛིན་པ་ཡང་མ་ཡིན་ནོ།། དེས་ན་ལྡོག་པ་དང་རྗེས་སུ་འགྲོ་བ་དག་ལས་ངེས་པ་དང་ལྡན་པ་ཉིད་ཀྱིས་ཁྱད་པར་ཅན་དུ་འཛིན་པ་ལ་ནི་བརྡ་གོམས་པ་དང་དྲན་པ་དག་གིས་ཁྱབ་པ་ཡིན་ཏེ། ཁྱབ་པར་བྱེད་པ་མེད་པ་ན་ཁྱབ་པར་བྱ་བ་ལྡོག་པ་ཡང་སྒྲ་གཞན་ལ་མཐོང་བའི་ཕྱིར་རོ། །ཁྱད་པར་ཅན་དུ་འཛིན་པ་དང་བརྡ་གོམས་པ་དང་དྲན་པའི་ཁྱབ་པར་བྱ་བ་དང་ཁྱབ་པར་བྱེད་པའི་ངོ་བོ་ཉིད་ཀྱང་དངོས་པོ་མ་ཡིན་པའི་ཕྱིར་གྲགས་པས་བྱས་པ་ཡིན་པར་བསྟན་པའི་དོན་དུ་སྒྲ་གཞན་ནོ་ཞེས་བྱ་བ་སྨོས་སོ། །འདི་སྙམ་དུ་གལ་ཏེ་དྲན་པ་ཉིད་ཀྱིས་ཁྱད་པར་ཅན་དུ་འཛིན་པ་དེ་ལྟར་ན་ཡང་དོན་ཆོད་པར་ནི་མི་འགྱུར་རོ་སྙམ་ན། དོན་ཞེས་བྱ་བ་སྨོས་ཏེ། དོན་དེ་སྟེ་ཡུལ་གྱི་ཉེ་བར་སྦྱོར་བ་རུང་བའི་ཡུལ་ན་གནས་པ་སྟེ། གང་དུ་གནས་པས་དབང་པོའི་ཤེས་པ་སྐྱེད་པར་བྱེད་པའོ། །དེས་བྱས་པའི་ནང་གི་དངོས་པོ་ནི་ནང་གི་རྣམ་པར་འགྱུར་བ་སྟེ། སྒྲ་དྲན་པའི་བག་ཆགས་སད་པ་དེ་ལ་མེད་ནའོ། །སྒྲ་ཉིད་དེ་ལས་གཞན་པ་ལས་བྱེ་བྲག་ཏུ་གྱུར་པ་ཡིན་པས་ན་ཁྱད་པར་ཏེ། ཁྱད་པར་ཅན་གྱི་རྗོད་པར་བྱེད་པའི་སྒྲ་དེ་ལ་དྲན་པར་མི་རིགས་སོ། །ངེས་པ་ཉིད་དུ་ཞེས་དགོངས་པའོ། །འདི་སྐད་བརྗོད་པར་འགྱུར་ཏེ། རྟག་ཏུ་སྐྱེ་བར་ཐལ་བའི་ཕྱིར་དྲན་པ་དེ་ཉིད་མེད་པ་ཅན་ནི་མ་ཡིན་ནོ། །རྒྱུ་དེ་ཡང་དོན་ལས་གཞན་ཡིན་ན་ནི་ངེས་པ་
འགར་ཡང་མི་འགྱུར་ལ། རུང་བ་མ་ཡིན་པའི་ཡུལ་ན་གནས་པའི་དོན་ཀྱང་རྒྱུ་མ་ཡིན་ཏེ། རྟག་ཏུ་དྲན་པར་ཐལ་བའི་ཕྱིར་རོ། །དེའི་ཕྱིར་དྲན་པའི་ནུས་པ་སད་པའི་རྒྱུ་ནི་རུང་བའི་ཡུལ་ན་གནས་པ་ཉིད་ཡིན་ནོ། །ཡང་གི་སྒྲས་ནི་སྒྲའི་སྤྱི་དྲན་པ་དང༌། རུང་བའི་ཡུལ་ན་གནས་པའི་དོན་གྱིས་བྱས་པ་འདི་གཉི་ག་ལ་གདོན་མི་ཟ་བར་བརྟེན་པར་བྱ་བ་ཡིན་ནོ་ཞེས་བྱ་བ་འདི་སྟོན་པར་བྱེད་དོ། །དེས་བྱས་པ་ཉིད་ལ་གདོན་མི་ཟ་བར་ལྟོས་པ་ཞེས་བྱ་བ་འདི་ག་ལས་ཤེ་ན། དེ་ངེས་བྱས་པ་མ་ཡིན་ན་ཞེས་བྱ་བ་གསུངས་ཏེ། དོན་གཞན་གང་ཡང་རུང་བ་འགའ་ཞིག་གིས་དྲན་པ་ཡིན་ན་ནི་མཐོང་བའི་དོན་གྱི་མིང་གང་ཡིན་པ་དེ་ངེས་པ་ཉིད་དུ་འཛིན་པར་མི་འགྱུར་ཏེ། མ་བཟུང་བ་ཉིད་དུ་ཐལ་བར་འགྱུར་ན་ངེས་པ་ཉིད་དུ་དེ་བཟུང་ནས་སྦྱོར་བ་དེའི་ཕྱིར་ངེས་པ་ཉིད་ཀྱིས་དེའི་མིང་དྲན་པ་ནི་དེས་བྱས་པ་ཡིན་ནོ་ཞེས་བྱ་བར་གནས་སོ། །གང་གི་ཕྱིར་དབང་པོའི་བློ་ནི་དྲན་པ་ལ་ལྟོས་ལ། དྲན་པའི་བག་ཆགས་སད་པ་ཡང་རུང་བའི་ཡུལ་ན་འདུག་པའི་དོན་ཁོ་ནས་བྱས་པ་ཡིན་པ་དེའི་ཕྱིར་དོན་གྱི་ཉེ་བར་སྦྱོར་བ་ནི་བྱེད་པ་དང་བཅས་པ་སྟེ་བྱེད་པ་དང་བཅས་པ་ཉིད་ལ་ཉེ་བར་སྦྱོར་བར་བརྗོད་པའི་ཕྱིར་རོ། །ཇི་ལྟ་བུར་གནས་པའི་དོན་འགའ་ཞིག་རྒྱུ་ཡིན་པར་མཐོང་བ་དེ་ལྟ་བུའི་གནས་ལུགས་འཛིན་པ་དེ་ཉིད་རང་གི་འབྲས་བུ་ལ་ཉེ་བར་སྦྱོར་བ་ཡིན་ལ། རྗེས་སུ་འགྲོ་བ་དང་ལྡོག་པ་དག་ལས་རུང་བའི་ཡུལ་ན་འདུག་པའི་དོན་ཡང་དབང་པོའི་ཤེས་པ་སྐྱེ་བར་མཐོང་བ་ཡིན་པ་དེའི་ཕྱིར་དེའི་ཡུལ་འཛིན་པ་ཉིད་ཤེས་པ་དེ་ལ་སྦྱོར་བ་ཡིན་ནོ། །ཉེ་བར་སྦྱོར་བ་དེའི་དེ་མ་ཐག་པ་སྟེ་བར་མ་ཆོད་པའི་བྱེད་པའི་འབྲས་བུ་གང་ཡིན་པ་དེ་ལྟར་མི་འགྱུར་རོ། །འདི་བྱེད་པ་དང་ལྡན་པ་ནི་ཡིན་ན་བྱེད་པའི་འབྲས་བུ་བར་དུ་མ་ཆོད་པ་ནི་མ་ཡིན་ནོ། །དྲན་པ་སྟེ་དྲན་པར་བྱེད་པའི་ཤེས་པས་དེ་བར་དུ་ཆོད་ཅིང་བསྐལ་པ་སྟེ། དོན་དེ་ནི་དྲན་པ་བསྐྱེད་པ་ཉིད་ལ་དངོས་སུ་སྦྱོར་བ་དེས་ན་དབང་པོའི་ཤེས་པ་དེས་བར་དུ་བཅད་པའི་ཕྱིར་རོ། །གལ་ཏེ་དེ་ལྟར་གྱུར་དུ་ཟིན་ན་ཅིར་འགྱུར་ཞེ་ན། དེའི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་དོན་དེ་དྲན་པས་བར་དུ་ཆོད་པ་དེའི་ཕྱིར་ཏེ། །བར་དུ་ཆོད་པའི་རྒྱུས་གང་སྔོན་ཏེ་སྔར་སྐྱེད་པར་བྱེད་པ་མ་ཡིན་པ་དེ་ནི་ཕྱིས་ཀྱང་འགྱུར་རོ་ཞེས་བྱ་བར་སྦྱར་རོ། །གལ་ཏེ་སྐད་ཅིག་སོ་
སོ་ཐ་དད་པའི་ཕྱིར་སྔ་མ་ཡང་གཞན་ལ། ཕྱི་མ་ཡང་གཞན་མ་ཡིན་ནམ། དེའི་ཕྱིར་དེ་དག་གྲུབ་བ་དང་བདེ་བ་གཅིག་པར་ཇི་ལྟར་འགྱུར་ཞེ་ན། ཉེར་སྦྱོར་ཁྱད་པར་མེད་པའི་ཕྱིར་ཞེས་བྱ་བ་སྨྲས་ཏེ། ཐ་དད་པ་མེད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་སྐད་ཅིག་རྣམས་ཐ་དད་པ་དེ་ལྟ་ན་ཡང་རུང་བའི་ཡུལ་ན་གནས་པ་ཉིད་ཀྱིས་དེ་དག་སྐྱེད་པར་བྱེད་པ་ཡིན་ལ། རུང་བའི་ཡུལ་ན་གནས་པ་ཉིད་ཀྱང་ཐམས་ཅད་ལ་ཁྱད་པར་ཡོད་པ་མ་ཡིན་པས་སྐད་ཅིག་མ་སྔ་མ་བཞིན་དུ་རང་བཞིན་དེས་དྲན་པའི་རྒྱུར་ཉེ་བར་སྦྱོར་བ་ཡིན་ནོ། །གཏན་ཚིགས་འདིས་ཐམས་ཅད་ཀྱང་སྐྱེད་པར་བྱེད་པ་ཉིད་དུ་གྲུབ་པ་དང་བདེ་བ་གཅིག་པ་ཡིན་ནོ། །གལ་ཏེ་འདི་སྙམ་དུ་སྔ་མ་དང་ཕྱི་མའི་སྐད་ཅིག་རྣམས་སྐྱེད་པར་བྱེད་པ་དང་མི་བྱེད་པས་ཁྱད་པར་ཡོད་ན་འགལ་བ་ཅི་ཡོད་སྙམ་ན་བཤད་པ། སྐད་ཅིག་མ་ཐམས་ཅད་བདག་ཉིད་ཐ་དད་པ་མེད་བས་སོ། །རྗེས་སུ་འགྲོ་བ་དང་ལྡོག་པ་དག་ལས་དབང་པོའི་ཤེས་པ་སྐྱེད་པར་ནུས་པ་ནི་རུང་བའི་ཡུལ་ན་གནས་པའི་བདག་ཉིད་ཡིན་པར་མཐོང་ལ། དེ་ཡང་ཚོགས་པར་བྱེད་པའི་རྒྱུ་རྣམས་ཀྱིས་ཡུལ་དེར་བསྐྱེད་པ་ཡིན་ཏེ། དེ་ལྟ་བུར་གྱུར་པའི་བདག་ཉིད་ཀྱིས་སྐྱེད་པར་བྱེད་པ་ནི་རྒྱུ་དང་རང་གི་ངོ་བོ་ལ་ཁྱད་པར་མེད་པ་ཡིན་ནོ། །དེས་ན་ཕན་ཚུན་ཉེ་བར་ཚོགས་པའི་རྟེན་དུ་གྱུར་པ་རྐྱེན་གྱི་ཁྱད་པར་རྣམས་ཀྱིས་ཇི་ལྟར་སྐད་ཅིག་མ་སྔ་མ་དབང་པོའི་ཤེས་པ་བསྐྱེད་པར་བྱ་བ་ལ་དངོས་སུ་སྐྱེད་པར་བྱེད་པ་ཉིད་དམ། དྲན་པའི་བར་ཆད་བྱས་པས་བརྒྱུད་པས་སྐྱེད་པར་བྱེད་པར་བྱས་ཀྱང་རུང་སྟེ། དེ་བཞིན་དུ་སྐད་ཅིག་མ་ཐམས་ཅད་ཀྱང་ཡིན་ནོ། །འདི་ལ་འབྲས་བུ་སྐྱེད་པ་ལ་ཇི་སྙེད་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་རྟོགས་པ་དེ་སྲིད་ཀྱི་ཚོགས་པ་ཉིད་རྒྱུ་ཡིན་གྱི་སོ་སོ་ནི་མ་ཡིན་ནོ། །ཚོགས་པ་ཡང་ཚོགས་པ་ཅན་དག་ལས་གཞན་མ་ཡིན་པའི་ཕྱིར་དེ་དག་སོ་སོ་ལ་ནུས་པར་བརྗོད་པ་ཡིན་ཏེ། དཔེར་ན་མིག་གི་རྣམ་པར་ཤེས་པ་ལ་མིག་ལ་སོགས་པ་བཞིན་ནོ། །དེ་ལ་རེ་ཞིག་མིག་གི་ཤེས་བ་བསྐྱེད་པར་ནུས་པའི་རང་གི་ངོ་བོ་རེས་འགའ་བ་ནི་རང་གི་རྒྱུན་ཙམ་ལས་སྐྱེས་པར་མི་རིགས་སོ། །གང་གི་ཕྱིར་ཇི་ལྟར་སྒྲོན་མ་ལ་སོགས་པའི་མེ་ལྕེ་ཙམ་ལ་རག་ལས་ནས་འོད་འབྱུང་བ་
བཞིན་དུ། མིག་ཙམ་ལ་རག་ལས་ནས་མིག་གི་རྣམ་པར་ཤེས་པ་སྐྱེ་བར་འགྱུར་བའམ། ཇི་ལྟར་ས་བོན་ཁྱད་པར་ལ་རག་ལས་ནས་མྱུ་གུ་སྐྱེ་བ་ལྟར་མིག་གི་ཁྱད་པར་ལ་རག་ལས་པ་ཡིན་གྲང༌། མིག་ཙམ་ལ་རག་ལས་པ་ཡིན་ན་ནི་དུས་ཐམས་ཅད་དུ་དེའི་ཤེས་པ་སྐྱེ་བར་ཐལ་བར་འགྱུར་ཏེ། མེ་ལྕེ་ལ་རག་ལས་ནས་འབྱུང་བའི་འོད་ཀྱི་དཀྱིལ་འཁོར་བཞིན་ནོ། །མིག་གི་ཁྱད་པར་ལ་རག་ལས་པ་ཡིན་ཡང་ཁྱད་པར་དེ་གང་ལས་འབྱུང་བར་བརྗོད་པར་བྱ། གལ་ཏེ་རང་གི་རྒྱུན་ཙམ་ལས་ཡིན་ན་ནི་རྒྱུ་དེ་ལས་བྱུང་བར་ཁྱད་པར་མེད་པའི་ཕྱིར་སྔ་མའི་སྐད་ཅིག་མ་རྣམས་ཀྱང་དེ་སྐྱེད་པར་བྱེད་པའི་རང་བཞིན་དུ་ཐལ་བར་འགྱུར་ཏེ། སྐྱེད་པར་བྱེད་པར་འདོད་པའི་སྐད་ཅིག་མ་དེའི་ཁྱད་པར་དེ་ཡང་རྒྱུ་མེད་པ་ཅན་ནི་མ་ཡིན་པའི་ཕྱིར་ཏེ། འོན་ཀྱང་རང་གི་རྒྱུད་ལས་བྱུང་བ་ཡིན་ནོ། །འདི་སྙམ་དུ་འབྲས་བུ་འགའ་ཞིག་ལ་འགའ་ཞིག་ནི་དངོས་སུ་ནུས་པ་ཡིན་ལ། ཁ་ཅིག་ནི་བརྒྱུད་པས་ཡིན་ནོ། །དེ་ལ་འདོད་པའི་སྐད་ཅིག་མ་ནི་དངོས་སུ་ནུས་པ་ཡིན་ཞིང༌། སྐད་ཅིག་མ་སྔ་མ་རྣམས་ནི་བརྒྱུད་པས་ཡིན་ནོ་སྙམ་ན། །དེ་ནི་རིགས་པ་མ་ཡིན་ཏེ། གང་གི་ཕྱིར་རྒྱུད་གཅིག་ལས་བྱུང་བ་ཉིད་དུ་ཁྱད་པར་མེད་པའི་ཕྱིར་ཐ་མ་བཞིན་དུ་ཐམས་ཅད་ཀྱང་དངོས་སུ་སྐྱེད་བར་ནུས་པར་ཐལ་བར་འགྱུར་བའམ། ཐ་མ་ཡང་སྔ་མ་རྣམས་བཞིན་དུ་དངོས་སུ་སྐྱེད་པའི་ནུས་པ་མེད་པར་ཐལ་བར་འགྱུར་རོ། །རྒྱུད་གཅིག་ལས་བྱུང་བ་ཡིན་ཡང་སྐད་ཅིག་གི་དབྱེ་བ་ལས་འབྲས་བུའི་དབྱེ་བ་ཡིན་པར་ཡང་མི་རིགས་ཏེ། གང་གི་ཕྱིར་རྒྱུན་ཆགས་པ་ཅན་གྱི་མིག་གི་རྣམ་པར་ཤེས་པ་སྐྱེ་བ་ན་མིག་གི་སྐད་ཅིག་རྣམས་ཕན་ཚུན་ཐ་དད་པ་ཡིན་ཡང༌། རྒྱུ་དང་རྐྱེན་གྱི་རྒྱུན་ཁྱད་པར་མེད་པས་འབྲས་བུ་གཅིག་བྱེད་པར་མཐོང་ངོ༌། །དེ་བཞིན་དུ་ཚོགས་པ་ཁྱད་པར་མེད་པ་ཉིད་ཀྱིས་ས་བོན་ཐ་དད་པ་ཡིན་ཡང་འབྲས་བུ་མཚུངས་པ་མེད་པར་མཐོང་ངོ༌། །དེའི་ཕྱིར་གང་ཞིག་ཐ་དད་ཀྱང་ཐ་དད་པར་མི་འགྱུར་བ་དེ་ནི་དེས་བྱས་པ་མ་ཡིན་པའམ། གཞན་ལ་ལྟོས་པ་ཡིན་ཏེ། དཔེར་ན་ས་བོན་ཐ་དད་ཀྱང་དུ་བ་ཐ་དད་པར་མི་འགྱུར་བ་བཞིན་ནོ། །སྐད་ཅིག་ཐ་དད་ཀྱང་འབྲས་བུ་ཐ་དད་པར་མི་འགྱུར་ཏེ། དེས་ན་ཐ་དད་པ་ནི་སྐད་ཅིག་ཐ་དད་པའི་རྗེས་སུ་བྱེད་པ་མ་ཡིན་
ནོ། །འབྲས་བུ་རྒྱུད་ཐ་དད་པའི་རྗེས་སུ་བྱེད་བ་ལ་ནི་ནམ་ཡང་འཁྲུལ་པ་ཡོད་བ་མ་ཡིན་ནོ། །གལ་ཏེ་དེ་ལྟར་ན་སྐྱེས་བུའི་རྒྱུད་ལ་འཕོས་པའི་བྱི་བའི་དུག་ལ་ཡང་སྐད་ཅིག་དང་པོ་འཆི་བའི་ནུས་པ་ཡོད་པར་འགྱུར་བའམ་ཡང་ན་ཕྱིས་དུས་ཡོངས་སུ་གཏུགས་པ་ལ་ལྟོས་པར་ཡང་མི་འགྱུར་རོ་སྙམ་ན། དེ་ནི་རིགས་པ་མ་ཡིན་ཏེ། དུག་དེས་ནི་སྐྱེས་བུའི་རྒྱུད་ལ་ནུས་པ་བསྐྱེད་པ་ཡིན་ཞིང་དེ་ཡང་སྐྱེས་བུའི་རྒྱུད་ཙམ་ལ་ལྟོས་ནས་དེའི་འབྲས་བུ་ལ་ནུས་པ་ནི་མ་ཡིན་གྱི་འོན་ཀྱང་དུས་ཀྱི་མིང་ཅན་འབྱུང་བ་ཆེན་པོའི་ཁྱད་པར་གྱིས་ཡོངས་སུ་སྨིན་པར་བྱས་བ་ཡིན་ནོ། །དེས་ན་སྔར་ན་སྐྱེས་བུའི་རྒྱུད་དངོས་སུ་ནུས་པ་མེད་པ་ལས་ཕྱིས་ནི་ནུས་བའི་སྐད་ཅིག་རྣམས་འབྱུང་བ་ཆེན་པོའི་ལྷན་ཅིག་བྱེད་པ་ལ་ལྟོས་པ་དང་བཅས་པའི་རྒྱུན་དེ་ལས་སྐྱེས་པ་ཡིན་གྱི། འབའ་ཞིག་ལས་ནི་མ་ཡིན་ནོ། །འདིས་ནི་སེམས་ཀྱི་ཁྱད་པར་ལ་ལྟོས་པའི་དགོས་པའི་དུག་གིས་སྐྱེས་བུའི་ལུས་གཟུང་བ་ཡང་བཤད་ལ། ཉི་མའི་འོད་ལ་ལྟོས་པའི་འབྲུ་མར་དག་ལས་དྲིའི་ཁྱད་པར་འབྱུང་བ་ཡང་བཤད་པ་ཡིན་ནོ། །འགའ་ཞིག་ཏུ་རྒྱུད་གཞན་གྱིས་རྒྱུད་གཞན་ལ་དུས་ལ་ལྟོས་པའི་དུས་འབའ་ཞིག་སྐྱེད་ན་ཡང༌། དེར་ཡང་དང་པོའི་སྐད་ཅིག་ནུས་པ་མེད་པ་ཡིན་ན་བཞི་པ་ཡང་ནུས་པ་དང་ལྡན་པར་མི་འགྱུར་རོ་ཞེས་བརྒལ་ཞིང་བརྟག་པ་འདི་བྱ་བ་མ་ཡིན་ཏེ། གང་གི་ཕྱིར་རྒྱུད་གཞན་ཁོ་ནས་རྒྱུད་གཞན་ལ་སྐད་ཅིག་མ་བཞི་ཙམ་གྱི་བར་དུ་ཆོད་པའི་འབྲས་བུ་སྐྱེད་པའི་ནུས་པ་བཞག་པའི་ཕྱིར་རོ། །རྒྱུད་གཞན་དེ་ནི་རང་གིས་དངོས་སུ་ནུས་པ་མ་ཡིན་ཞིང༌། དངོས་སུ་ནུས་པའི་རྒྱུད་གཞན་སྐྱེད་པར་བྱེད་པ་ཡང་མ་ཡིན་གྱི་འོན་ཀྱང་སྐད་ཅིག་གསུམ་བཞིར་སྡོད་པ་ལ་ལྟོས་པ་ཉིད་དོ། །རྒྱུད་གཅིག་དང་འབྲེལ་པའི་ནུས་པ་ལ་ནི་འཇོག་པར་བྱེད་པ་ངེས་པར་བྱེད་པ་པོའི་རྒྱུད་གཞན་མེད་པའི་ཕྱིར་སྐྱོན་ཡིན་པར་བརྗོད་དོ། །ཡང་དོན་འགའ་ཞིག་ནི་རྒྱུད་གཞན་གྱིས་ཕན་པར་བྱས་པའི་རྒྱུན་ལས་འབྲས་བུ་འབའ་ཞིག་བྱེད་པར་ནུས་པ་ཡིན་ཏེ། དཔེར་ན་ས་བོན་བཞིན་ནོ། །དེའི་ཕྱིར་འབྲས་བུ་བསྐྱེད་པར་བྱ་བ་ལ་རྒྱུད་གཅིག་ཏུ་གཏོགས་པ་གཞན་རྣམས་ནི་ནུས་པ་མེད་ལ། སྐད་ཅིག་མ་འགའ་ཞིག་དངོས་སུ་ནུས་པ་ནི་རྒྱུད་གཞན་ལ་ལྟོས་པར་
རིགས་པ་ཡིན་གྱི། རང་གི་རྒྱུད་ཙམ་ལ་ལྟོས་པ་ནི་མ་ཡིན་ཏེ། རྒྱུ་ཐ་དད་པ་ལ་འབྲས་བུ་ཐ་དད་པ་མེད་པར་ཐལ་བའི་ཕྱིར་དང༌། སྐད་ཅིག་ཐ་དད་པ་ཙམ་ཡང་ཐ་དད་པར་བྱེད་པ་མ་ཡིན་པའི་ཕྱིར་རོ། །ཧ་ཅང་ཐལ་བར་མ་གྱུར་ཅིག་ཅེས་མ་མཐོང་བ་ཡང་རང་གི་འདོད་པས་རྒྱུ་ཉིད་དུ་བརྟག་པར་ནུས་བ་མ་ཡིན་ནོ། །དེས་ན་གང་གི་ཚེ་དང་པོ་ཚོགས་པའི་དུས་ཉིད་ན་མིག་ལ་སོགས་པའི་ནུས་བ་སྐྱེད་པ་དེའི་ཚེ་ནི་ཕན་ཚུན་ཚོགས་པར་བྱེད་པའི་རྐྱེན་དུ་གྱུར་པའི་རྐྱེན་རྣམས་ཀྱིས་དངོས་སུ་སྐྱེད་པར་ནུས་པ་ཉིད་དུ་སྐྱེད་པ་ཡིན་ལ། ཡང་གང་གི་ཚེ་ཕན་ཚུན་ཚོགས་པར་གྱུར་ཀྱང་ནུས་པ་མེད་པ་དེའི་ཚེ་ནི་ཕན་ཚུན་ནུས་པ་བཞག་པའི་རིམ་གྱིས་ནུས་པར་འགྱུར་བ་ཡིན་ཏེ། སྐྱེས་བུ་སྣང་བ་ནས་མུན་པར་ཞུགས་པ་བཞིན་ནོ། །དེ་དག་ཕན་ཚུན་ཕན་འདོགས་པར་ནུས་པ་ཡང་གནས་སྐབས་གང་ཞིག་མིག་གི་རྣམ་པར་ཤེས་པ་སྐྱེད་པར་ནུས་པའི་གནས་སྐབས་དེ་ཉིད་ཡིན་པར་བརྟག་པར་བྱ་བ་ཡིན་ཏེ། གནས་སྐབས་གཞན་དང་ལྡན་པ་རྣམས་ལ་ནི་དངོས་སུ་སྐྱེད་པར་ནུས་པའི་རྒྱུ་ཉིད་མཐོང་བའི་ཕྱིར་རོ། །འདི་ལྟར་རུང་བའི་ཡུལ་ན་གནས་བ་ནུས་པ་སད་པའི་རྒྱུ་དེ་དག་ནི་སྔར་མིག་གི་རྣམ་པར་ཤེས་པ་སྐྱེད་པར་བྱེད་པ་མ་ཡིན་དུ་ཟིན་ཀྱང༌། ཕྱིས་སྐྱེད་པར་བྱེད་པ་ཡིན་ཏེ། དེ་ལ་ནུས་པ་སད་པའི་རྒྱུ་གཞན་ནི་བརྟག་པར་ནུས་པ་མ་ཡིན་ནོ། །དེའི་ཕྱིར་རུང་བའི་ཡུལ་ན་འདུག་པ་དེ་ཉིད་ནུས་པ་སད་པའི་རྒྱུ་ཡིན་ནོ། །ཤིན་ཏུ་རིང་བ་ན་འདུག་པ་ནི་རྗེས་སུ་འགྲོ་བ་དང་ལྡོག་པ་དང་ལྡན་པས་ཕན་ཚུན་ཕན་འདོགས་པ་མ་ཡིན་ཏེ། ཇི་སྐད་དུ་ཡུལ་བར་ཆོད་པ་དེ་དག་ནི་ལྷན་ཅིག་བྱེད་པར་མི་རུང་བའི་ཕྱིར་རོ་ཞེས་འཆད་པར་འགྱུར་རོ། །གང་གི་ཚེ་དོན་ཉེ་བ་ཉིད་དམ་སྣང་བ་ནས་འོངས་པའི་དབང་པོ་ལ་སོགས་པ་ལེགས་པར་བྱས་པ་དྲན་པ་སྐྱེད་པ་ལ་ཉེ་བར་སྦྱོར་བ་དེའི་ཚེ་ཉེ་བར་ཚོགས་པའི་རྐྱེན་དེ་དག་ཉིད་དམ། གྲིབ་མའི་ནང་དུ་ཞུགས་པ་མིག་ལ་སོགས་པས་དྲན་པས་བར་དུ་ཆོད་པའི་རྣམ་པར་ཤེས་པ་སྐྱེད་པར་ནུས་པའི་རྒྱུ་ཉེ་བར་གྱུར་བའི་དོན་བསྐྱེད་པ་དེ་དག་གིས་མི་འདྲ་བ་སྐྱེད་པར་རིགས་པ་མ་ཡིན་ནོ། །གང་གིས་ན་དེའི་རང་བཞིན་གྱི་རྒྱུ་དག་གིས་ནི་ཤེས་པ་སྐྱེད་པར་རུང་བ་སྐྱེད་པར་བྱེད་ལ། རང་བཞིན་གཞན་དུ་གྱུར་པའི་རྒྱུ་
དག་གིས་ནི་དྲན་པ་སྐྱེད་པར་རྟོག་པ་རང་བཞིན་གཞན་དུ་གྱུར་པའི་དོན་ནི་ཤེས་པ་སྐྱེད་པར་བྱེད་པ་མ་མཐོང་ངོ༌། །དེའི་ཕྱིར་ཇི་ལྟར་རྟགས་རྗེས་སུ་དཔག་པའི་ཤེས་པ་སྐྱེད་པར་བྱེད་པ་དེ་བཞིན་དུ། དྲན་པས་བར་དུ་ཆོད་བ་ཅན་གྱི་དོན་དབང་པོའི་ཤེས་པ་བསྐྱེད་པར་བྱ་བ་ལ་དངོས་སུ་ཉེ་བར་མི་སྦྱོར་བར་འགྱུར་ཞིང༌། དེ་ལས་ཀྱང་ཉེ་བར་ཚོགས་པའི་སྐད་ཅིག་མ་ཐམས་ཅད་འཚོགས་པའི་རྒྱུ་ཉིད་དམ་གྲིབ་མར་ཞུགས་པའི་དབང་པོ་ལ་སོགས་པ་དག་ལས་དྲན་པའི་འདུ་བྱེད་སད་པའམ། ཤེས་པ་བསྐྱེད་པར་བྱ་བ་ལ་མཚུངས་པར་ནུས་པའམ་མི་ནུས་པར་འགྱུར་བ་དེའི་ཕྱིར་ནུས་པ་ཁྱད་པར་མེད་པས་རང་བཞིན་དང་རྒྱུ་འདྲ་བ་ཅན་གྱི་སྐད་ཅིག་མ་རྣམས་ལ་གཅིག་དངོས་སུ་ནུས་པར་ཁས་བླངས་ན་ཐམས་ཅད་ཀྱང་ཐལ་བར་འགྱུར་བའམ། གཅིག་དངོས་སུ་ནུས་པ་མེད་པར་ཁས་བླངས་ན་ཡང་ཐམས་ཅད་སྐྱེད་བར་བྱེད་པ་མ་ཡིན་པར་ཁས་བླངས་པར་འགྱུར་རོ། །དེ་ལྟ་ན་ཡང་སྐད་ཅིག་མ་གཅིག་དབང་པོའི་ཤེས་པ་གཅིག་ཉིད་ལ་སྐྱེད་པར་བྱེད་པ་དང་སྐྱེད་པར་བྱེད་པ་མ་ཡིན་པ་ཕན་ཚུན་འགལ་བར་འགྱུར་ལ་དེ་ཡང་རིགས་པ་མ་ཡིན་ནོ། །དེ་ཉིད་བཤད་པ་ནི། གཅིག་ཉིད་ཅེས་བྱ་བ་ཡིན་ནོ། །ཐ་དད་པར་གྱུར་པ་རྣམས་ནི་གཅིག་ལ་བྱེད་པ་དང་བྱེད་པ་མ་ཡིན་པ་མི་འགལ་བས་གཅིག་ཉིད་ཅེས་བྱ་བ་སྨོས་སོ། །ཐ་དད་པ་རྣམས་ལ་མི་འགལ་བས་གཅིག་ལ་ཞེས་སྨོས་སོ། །སྐད་ཅིག་མ་རེ་རེ་ལ་ཡང་སྔར་བཤད་པའི་རིགས་པས་ཐལ་བར་འགྱུར་ན། རིགས་པ་མ་ཡིན་བ་དེའི་ཕྱིར་གང་ཞིག་དྲན་པས་བར་དུ་ཆོད་པས་སྐྱེད་པར་བྱེད་པ་མ་ཡིན་པ་དེ་དང་ཁྱད་པར་མེད་པའི་ཕྱིར་ཐམས་ཅད་ཀྱང་སྐྱེད་པར་བྱེད་པ་མ་ཡིན་པ་ཁོ་ནའོ། །གལ་ཏེ་སྐད་ཅིག་མ་སྔ་མ་ཉིད་ཀྱིས་དྲན་པ་སད་པར་བྱས་པའི་ཕྱིར་དེ་ལ་གཉིས་པ་ལ་སོགས་པ་ཅི་དགོས་ཤེ་ན། སྨྲས་པ། རུང་བའི་ཡུལ་ན་གནས་པའི་རང་བཞིན་ནི་རང་གི་རྒྱུད་དག་གིས་དབང་པོའི་ཤེས་པ་སྐྱེད་པར་བྱེད་པའི་དྲན་པ་སད་པར་བྱེད་པའི་རང་བཞིན་དུ་གྱུར་པ་ཡིན་ལ། སྐད་ཅིག་གཉིས་པ་ལ་སོགས་པ་ཡང་ཉེ་བར་ཚོགས་པའི་རྟེན་དུ་གྱུར་པ་རང་གི་རྒྱུ་ངག་གིས་དེ་འདྲ་བའི་ངོ་བོར་བསྐྱེད་པ་དེས་ན་སྐད་ཅིག་སོ་སོར་དྲན་པ་སད་པའི་རྒྱུ་ཡིན་གྱི་དགོས་པས་ནི་མ་ཡིན་ནོ། །
དེ་དག་ནི་རྟག་པར་བྱེད་པ་མ་ཡིན་ཏེ། འོན་ཀྱང་རྒྱུ་དང་འབྲེལ་པའི་རང་གི་ངོ་བོ་ཉིད་ཡིན་ནོ། །གང་གི་ཕྱིར་དབང་པོ་དང་ཡིད་ལ་བྱེད་པ་ཚོགས་པར་འགྱུར་བའི་དོན་ཉིད་དྲན་པ་སྐྱེད་པར་ནུས་པ་དང༌། མི་ནུས་པར་འགྱུར་བ་དོན་གང་གི་རང་བཞིན་ཇི་ལྟ་བུ་ཞིག་གིས་གང་དུ་ནུས་པར་མཐོང་བའི་རང་བཞིན་དེ་ཉིད་དེ་ལ་ནུས་པ་མེད་པར་ནི་འོས་པ་མ་ཡིན་ནོ། །དྲན་པ་ལ་ལྟོས་པའི་སྐད་ཅིག་ཕྱི་མ་རྣམས་དྲན་པ་སྐྱེད་པར་བྱེད་པ་མ་ཡིན་པ་ཡང་མ་ཡིན་ཏེ། གང་གི་ཕྱིར་དྲན་པ་ལས་ཐ་དད་པའི་རྒྱུའི་ཚོགས་པ་དེ་ནི་སྐད་ཅིག་མ་སྔ་མ་དང་མཚུངས་པ་ཡིན་ནོ། །རུང་བའི་ཡུལ་ན་གནས་པའི་རང་བཞིན་གྱིས་སད་པའི་དྲན་པ་དེ་ཉིད་ཀྱིས་དེ་ཉིད་ཀྱི་བདག་ཉིད་དུ་གྱུར་པ་སད་པའི་ནུས་པ་ཉམས་པར་བྱེད་པ་ཡང་མ་ཡིན་ཏེ། དུ་བས་མེའི་རང་བཞིན་བསྐྱེད་བའི་ནུས་པ་བཞིན་ནོ། །དེའི་ཕྱིར་རུང་བའི་ཡུལ་ན་གནས་པ་རྣམས་དྲན་པ་སྐྱེད་པའི་ནུས་པ་ཁྱད་པར་མེད་པའི་ཕྱིར་དངོས་སུ་སྐྱེད་པར་བྱེད་པ་མ་ཡིན་ནོ། །གཏན་ཚིགས་དེས་ན་དོན་མེད་ན་ཡང་འགྱུར་རོ། །ཡང་གི་སྒྲས་ནི་རེས་འགའ་ཡོད་ཀྱང་ངོ༌། །ཐམས་ཅད་དུ་ནི་མིག་གི་བློ་དེའི་ནུས་པ་ལ་མི་ལྟོས་པར་སྐྱེ་བར་འགྱུར་རོ། །མིག་གི་རྣམ་པར་ཤེས་པ་དོན་མེད་ཀྱང་སྐྱེ་བ་ལ་གཏན་ཚིགས་སྔ་མ་མཇུག་སྡུད་དེ། དོན་དབང་པོ་ལ་བརྟེན་པའི་བློ་ལ་དངོས་སུ་མི་སྦྱོར་བའི་ཕྱིར་དང་རུང་བའི་ཡུལ་ན་གནས་པ་ནི་དབང་པོའི་ཤེས་པའི་རྒྱུ་དྲན་པ་སད་པ་ལས་ཉེ་བར་སྦྱོར་བའི་ཕྱིར་རོ། །འདི་སྙམ་དུ་དྲན་པ་སད་པར་བྱ་བའི་དོན་དུ་དོན་ལ་ལྟོས་པར་བྱ་བ་མ་ཡིན་ནམ། དེས་ན་དོན་མེད་ཀྱང་ཞེས་ཅིའི་ཕྱིར་བརྗོད་ཅེ་ན། དྲན་པ་སད་པར་བྱེད་པ་ལ་ཉེ་བར་སྦྱོར་བའི་ཕྱིར་ཞེས་བྱ་བ་སྨོས་ཏེ། ཉེ་བར་སྦྱོར་བ་གཞན་མེད་པའི་ཕྱིར་སྔར་ཉིད་དུ་དྲན་པ་སད་པར་བྱས་ནས་ལོག་པར་གྱུར་པ་ཡིན་ལ། དབང་པོའི་ཤེས་པ་ནི་ཕྱི་ནང་རིམ་གྱིས་དྲན་པའི་རྒྱུན་གྱིས་སྐྱེད་པ་ཡིན་ནོ། །དྲན་པ་སད་པའི་དུས་ན་ཡང་དོན་གཞན་ལ་ཆགས་པས་དབང་པོའི་ཤེས་པ་གགས་བྱས་པ་ཡིན་ཏེ། དེས་ན་ཕན་པ་མེད་པ་ཉིད་ཀྱིས་དོན་དེ་ཡོད་པ་ལ་བློ་མི་ལྟོས་པ་ཉིད་དོ། །ཅི་སྟེ་ཡང་དོན་གྱི་ཉེ་བར་སྦྱོར་བས་དབང་པོའི་བློ་བསྐྱེད་པར་བྱས་པ་ཡིན་ན་ནི་དེས་ན་རྗོད་པ་དྲན་པས་བར་ཆད་དེ་གེགས་བྱས་པའམ། རྗོད་
པ་དྲན་པ་ཉིད་བར་དུ་གཅོད་པའི་གེགས་ཡིན་ཏེ་དེ་མེད་པའི་ཕྱིར་རོ། །འདི་སྐད་བརྗོད་བར་འགྱུར་ཏེ། མངོན་པར་བརྗོད་པར་དྲན་པ་མེད་ན་ནི་རུང་བའི་ཡུལ་ན་གནས་པའི་དོན་ཙམ་ལས་དབང་པོའི་ཤེས་པ་སྐྱེས་བ་དེས་ན་དེ་ཙམ་ཞིག་སྣང་བའི་ཕྱིར་རྣམ་པར་རྟོག་པ་མེད་པ་ཡིན་ནོ། །འདི་ལ་ལྟོས་པ་ཉིད་ལ་ནི་དངོས་སུ་སྐྱེད་པས་ཁྱབ་པ་ཡིན་ཏེ། གཅིག་ནས་གཅིག་ཏུ་བརྒྱུད་པས་འདས་པ་ལ་ཡང་བྱེད་པ་མཐོང་བའི་ཕྱིར་རོ། །གང་གི་ཕྱིར་ལྟོས་པ་ནི་དེ་ཡོད་ན་ཡོད་པ་ཡིན་ལ། དངོས་སུ་སྐྱེད་པ་མ་ཡིན་པ་ལ་ཡང་དེ་ཡོད་ན་ཡོད་པ་ཉིད་མེད་པའི་ཕྱིར་རང་བཞིན་འགལ་བ་དམིགས་པས་ཁྱབ་བར་བྱ་བ་དང་ཁྱབ་པར་བྱེད་པའི་དངོས་པོ་གྲུབ་བོ། །དེས་ན་ཁྱབ་པར་བྱེད་པ་མི་དམིགས་པར་འདོད་དོ། །དངོས་སུ་སྐྱེད་པར་བྱེད་པ་མ་ཡིན་པ་ཉིད་ཀྱང་རུང་པའི་ཡུལ་ན་གནས་པ་དྲན་པས་བར་དུ་ཆོད་པས་ཤེས་པ་སྐྱེད་པའི་ངོ་བོ་ཡིན་པའི་ཕྱིར་དང༌། དེ་ལྟ་བུར་གྱུར་པ་ལ་དེའི་རང་བཞིན་དང་དེའི་རང་བཞིན་མ་ཡིན་པ་འགལ་བའི་ཕྱིར་རོ། །དེས་ན་དྲན་པ་ལ་ལྟོས་པ་དང་བཅས་པ་ཉིད་ཡིན་ན་དོན་ལས་སྐྱེ་བར་མི་འཐད་ལ། རུང་བའི་ཡུལ་ན་གནས་པའི་དོན་གྱིས་སྐྱེད་པ་ཡིན་ན་ནི་རྗོད་པའི་སྤྱི་དྲན་པ་ལ་ལྟོས་པ་མེད་པའི་ཕྱིར་རྣམ་པར་རྟོག་པ་མེད་པ་ཉིད་ཡིན་ནོ། །དེ་ལྟར་མིང་སྦྱོར་བའི་བདག་ཉིད་ཀྱི་རྟོག་པ་བསལ་ནས། དོན་སྦྱོར་བའི་བདག་ཉིད་ཀྱི་རྟོག་པ་བསལ་བའི་དོན་དུ་བཤད་པ། ཁྱད་པར་ནི་ཕལ་པ་སྟེ་གཞན་ལ་ཕན་འདོགས་པའོ། །ཁྱད་པར་ཅན་ནི་གཙོ་བོ་སྟེ་ཕན་གདགས་པར་བྱ་བའོ། །འབྲེལ་པ་ནི་ཁྱད་པར་དང་ཁྱད་པར་ཅན་དེ་དག་གི་སྟེ་རྭ་དང་རྭ་ཅན་དང༌། རིགས་དང་རིགས་དང་ལྡན་པ་དག་འདུ་བའི་མཚན་ཉིད་དམ། དབྱུག་པ་དང་དབྱུག་པ་ཅན་གྱི་ལྡན་པའི་མཚན་ཉིད་དོ། །འཇིག་རྟེན་ཆོས་ལུགས་ནི་འཇིག་རྟེན་གྱི་གཙུག་ལག་སྟེ། འགའ་ཞིག་གི་ཁྱད་པར་རམ་ཁྱད་པར་ཅན་ཉིད་དུ་སོ་སོར་ངེས་པའི་སྒྲའི་ཐ་སྙད་ཀྱི་ཡུལ་ལོ། །ཐལ་ཟིན་པ་དེ་ཐམས་ཅད་སྡོམ་པ་ནི་གཅིག་ཏུ་བྱེད་པ་སྟེ། དག་པ་འཛིན་པ་སྔོན་དུ་འགྲོ་བ་ཅན་གྱི་ཕན་ཚུན་འབྲེལ་པར་བྱེད་པའོ། །དེ་ལ་ཁྱད་པར་ལ་སོགས་པ་འཇིག་རྟེན་གྱི་ཆོས་ལུགས་ཀྱི་མཐར་ཐུག་པ་དེ་དག་སོ་སོར་བཟུང་ནས། སོ་སོར་གཟུང་བ་དེ་དག་ཀྱང་སོ་སོར་
འཛིན་པ་ལ་ལྟོས་ནས་བསྲེ་བར་བྱས་ནས་དེ་ལྟར་རྟོགས་ཏེ། ཁྱད་པར་དང་ཁྱད་པར་ཅན་དུ་ཤེས་པར་འགྱུར་རོ། །སྔར་བརྗོད་པའི་རིམ་པ་མེད་པར་ནི་མ་ཡིན་ནོ་ཞེས་བཤད་པ་ནི། གཞན་དུ་མིང་ཞེས་བྱ་བ་ཡིན་ནོ། །ཚིག་ལེའུར་བྱས་བའི་དོན་ཉིད་རྣམ་པར་འགྲེལ་པ་བཤད་པ་ནི། ཁྱད་པར་དང་ཁྱད་པར་གྱི་གཞི་དང་དེ་དག་གི་འབྲེལ་པ་དང༌། འཇིག་རྟེན་གྱི་རྣམ་པར་གཞག་པ་སྟེ་ཁྱད་པར་དང་ཁྱད་པར་ཅན་གྱི་དངོས་པོ་རྣམ་པ་གཞག་པ་ནི་འཇིག་རྟེན་པའི་རྣམ་བར་གཞག་པ་ཡིན་ནོ། །ཁྱད་པར་དང་ཁྱད་པར་ཅན་གྱི་དངོས་པོ་སྒྲ་ལས་བྱུང་པ་ནི་འཇིག་རྟེན་ཉིད་ལས་རྟོགས་པར་བྱ་བ་ཡིན་གྱི་དངོས་པོ་ནི་མ་ཡིན་ནོ། །དངོས་པོའི་རང་གི་ངོ་བོ་ཉིད་ཀྱིས་ནི་འགའ་ཞིག་གི་ཁྱད་པར་དང༌། ཕན་པར་བྱེད་པ་དང་ལེགས་པར་བྱེད་པ་ཞེས་བྱ་བ་ཡོད་པ་མ་ཡིན་ཏེ། ལེགས་པར་བྱ་བ་དང་ལེགས་པར་བྱེད་པའི་རྒྱུ་དང་འབྲས་བུའི་དངོས་པོ་ལས་ཡིན་ལ། དེ་ཡང་སྔ་མ་དང་ཕྱི་མར་གྱུར་པ་དག་ཉིད་ཡིན་པས་དེ་དག་དུས་གཅིག་ཏུ་ཡོད་པ་མ་ཡིན་ལ། ཁྱད་པར་དང་ཁྱད་པར་ཅན་གྱི་ངོ་བོ་ཡང་ཡོད་པ་དག་ཡིན་ནོ། །དེའི་ཕྱིར་འདི་ནི་དུས་གཅིག་བདག་ཉིད་ལ་ཡིན་གྱི་རིམ་པ་དང་ལྡན་པ་དག་ལ་ནི་མ་ཡིན་ལ་ཅིག་ཅར་བའི་དངོས་པོ་དག་ལ་ཡང་ཕན་པར་བྱེད་པ་དང་ཕན་པར་བྱ་བ་ཡོད་པ་མ་ཡིན་ནོ། །འབྲེལ་པ་ལས་ཕན་པར་གྲུབ་བོ་ཞེ་ན། འབྲེལ་པ་ཅན་དག་ལས་འབྲེལ་པ་ཐ་མི་དད་ན་ནི་ཕན་པར་བྱ་བ་དང་ཕན་པར་བྱེད་པའི་རྒྱུ་མ་ཡིན་ཏེ། འབྲེལ་པ་ཅན་གྱི་རང་གི་ངོ་བོ་བཞིན་ནོ། །ཐ་དད་པ་ན་ཡང་རང་གི་བདག་ཉིད་ལ་རྣམ་པར་གནས་པའི་དངོས་པོ་གསུམ་པོ་རྣམས་ཕན་ཚུན་དུ་གཙོ་བོ་དང་ཕལ་བ་ཅུང་ཟད་ཀྱང་ཡོད་པ་མ་ཡིན་ནོ། །དེའི་ཕྱིར་གང་འགའ་ཞིག་འགའ་ཞིག་གིས་ཁྱད་པར་ཅན་དུ་རྟོགས་པ་འདི་ནི་སྒྲ་ཁོ་ནའི་བྱེད་པ་ཡིན་གྱི། དངོས་པོའི་རྣམ་པ་ནི་མ་ཡིན་ནོ། །དེ་ཉིད་ཀྱི་ཕྱིར་དབང་པོའི་ཤེས་པ་ལ་སྒྲའི་རྣམ་པ་བཟློག་པ་ཉིད་ལས་སྒྲས་ཉེ་བར་བཞག་པའི་ཁྱད་པར་དང་ཁྱད་པར་ཅན་བཟློག་པ་ཡིན་ཡང་རྣམ་པ་གཞན་གྱི་སྒོ་ནས་ཡང་ཟློག་པར་བྱེད་པ་ཡིན་ནོ་ཞེས་བལྟ་བར་བྱའོ། །དེའི་ཕྱིར་འདི་ནི་འདི་ལྟར་ཁྱད་པར་ཡིན་ལ། འདི་ནི་ཁྱད་པར་ཡིན་ནོ། །ཁྱད་པར་ཅན་ནི་འདི་ཁོ་ན་ཡིན་ལ། ཁྱད་པར་ཡང་འདི་ཁོ་
ན་ཡིན་ནོ་ཞེས་ཁྱད་པར་དང་ཁྱད་པར་ཅན་གྱི་རང་བཞིན་ཡོངས་སུ་ཤེས་པ་དང་ངེས་པ་ལ་ནི་འཇིག་རྟེན་གྱི་རྣམ་གཞག་རྗེས་སུ་རྟོགས་པར་བྱ་བ་ཡིན་ནོ། །འདི་ལྟར་སྐྱེས་བུ་དབྱུག་པ་ཅན་ཡིན་གྱི་དབྱུག་པ་སྐྱེས་བུ་ཅན་ནི་མ་ཡིན་ནོ་ཞེས་བྱ་བའི་ཐ་སྙད་ཡིན་ནོ། །འཇིག་རྟེན་ན་ནོར་དང་བདག་པོའི་དངོས་པོ་ནི་དབྱུག་པ་ཁྱད་པར་དུ་བརྟགས་པ་མ་ཡིན་ཏེ། འོན་ཀྱང་ལྡན་བས་ཡིན་ནོ། །དེ་བཞིན་དུ་རྭ་ནི་འདུ་བས་ཡིན་ཏེ། རྭ་སྐེར་བཏགས་པ་ནི་རྭ་ཅན་གྱི་སྒྲའི་རྒྱུ་མཚན་གྱི་ཁྱད་པར་མ་ཡིན་པའི་ཕྱིར་རོ། །འདི་དག་རྟོགས་པ་ན་ཁྱད་པར་ཅན་འགའ་ཞིག་ཁྱད་པར་འགའ་ཞིག་གིས་ཁྱད་པར་ཅན་དུ་འཛིན་པ་ཡིན་ནོ། །ཁྱད་པར་ལ་སོགས་པ་དེ་བསྡམས་པ་ནི་ཕན་ཚུན་བསྲེས་པ་སྟེ། གཅིག་གཙོ་བོར་འཛིན་པའི་ཚུལ་གྱིས་གཟུང་བའི་དོན་ཐམས་ཅད་བསྲེས་པའོ། །འདི་འདྲ་བའི་གཅིག་ཏུ་བྱེད་པ་ནི་ཁྱད་པར་དང་བྲལ་བའི་གནས་སྐབས་འཛིན་པའི་རྗེས་སུ་འཇུག་པ་དང་འབྲེལ་པ་ཡིན་ནོ། །དག་པའི་རང་བཞིན་སྔར་གཟུང་བ་མེད་པར་ནི་ཁྱད་པར་དང་ལྡན་པ་འཛིན་པ་མ་མཐོང་ངོ༌། །དེས་ན་དག་པའི་གནས་སྐབས་ཉིད་དུ་གཟུང་པའི་ཁྱད་པར་ཅན་དང་ཁྱད་པར་དག་ཁྱད་པར་དང་ལྡན་པའི་རང་བཞིན་དུ་གཟུང་བ་སྟེ་བཞི་པོ་དང་བསྡོམས་ཏེ་གཅིག་ཏུ་བྱས་ནས། ཤེས་པར་ནུས་བའི་ཤེས་པ་གང་ཡིན་པ་དེ་ཉིད་ཁྱད་པར་ཅན་དུ་འཛིན་པ་ཡིན་ནོ། །ཇི་སྲིད་དུ་ཁྱད་པར་གྱིས་ཉེ་བར་མ་བསྒྲུབས་པའི་རང་བཞིན་ཤེས་པ་མེད་པ་དེ་སྲིད་དུ་ཉེ་བར་བསྒྲུབས་པ་ཡང་རྟོགས་པར་མི་འགྱུར་ཏེ། ཉེ་བར་བསྒྲུབས་པའི་རང་བཞིན་འཛིན་པ་ནི་ཉེ་བར་མ་བསྒྲུབས་པ་འཛིན་པའི་ལྷན་ཅིག་བྱེད་པ་ཅན་ཡིན་པའི་ཕྱིར་རོ། །འདི་ལྟར་ཁྱད་པར་འབྲེལ་པ་རྟོགས་པ་ནི་འདི་ལྟར་སྦྱིན་ཏེ། མཐོང་བའི་ལྷ་སྦྱིན་གང་ཡིན་པ་དེ་ནི་དབྱུག་པ་ཅན་ཡིན་ལ། གོང་བུ་གང་ཡིན་པ་དེ་རྭ་ཅན་ཡིན་ནོ་ཞེས་ཁྱད་པར་དང་བྲལ་བ་གཟུང་ནས་དེའི་འོག་ཏུ་ཁྱད་པར་དང་བཅས་པ་འཛིན་པ་ཡིན་ནོ། །དེས་ན་བསྡོམས་པ་ནི་རྣམ་པ་གཉིས་ཏེ། ཁྱད་པར་དང་བྲལ་བར་མཐོང་བ་དང༌། ཁྱད་པར་དང་བཅས་པའི་རང་བཞིན་གཅིག་ཏུ་འཛིན་པ་གང་ཡིན་པ་དང་གང་ཡང་བཞི་པོ་རྣམས་ལ་ཡང་ཕན་ཚུན་ཕན་པར་བྱེད་པའི་དངོས་པོར་བསྲེ་བ་སྟེ། ཁྱད་པར་ཅན་དུ་འཛིན་པ་འདི་
ཉིད་ཡིན་ནོ། །དེ་བསྡོམས་པས་ཞེས་དེ་ལྟ་བུར་གྱུར་པའི་མཚན་ཉིད་ཀྱི་གསུམ་པ་ཡིན་ནོ། །འདི་སྐད་དུ་བསྡོམས་པ་རྣམ་པ་གཉིས་པོ་དེ་ཉིད་ཁྱད་པར་ཅན་དུ་འཛིན་པ་ཡིན་ནོ་ཞེས་བརྗོད་པ་ཡིན་ནོ། །ཚིག་ལེའུར་བྱས་པ་ལ་བསྡོམས་བྱས་ནས་ཞེས་བྱ་བ་སྨོས་པ་ནི་དུས་སྔ་མར་བསྡོམས་ཏེ་རྟོགས་པ་ལ་ལྟོས་ནས་ཐ་སྙད་ཀྱི་ཡུལ་དུ་འགྱུར་བ་ལས་བལྟ་བར་བྱ་སྟེ། བསྡོམས་པར་གྱུར་ན་ནི་ཁྱད་པར་ཅན་དུ་རྟོགས་པའི་ཐ་སྙད་དུ་འགྱུར་བ་ཡིན་ནོ་ཞེས་བྱ་བའི་དོན་ཏོ། །རིམ་པ་འདི་ཉིད་ཀྱང་དབྱུག་པ་ལ་སོགས་པ་ལ་གྲུབ་པ་ཡིན་ནོ་ཞེས་དབྱུག་པ་ཅན་ལ་སོགས་པ་བཞིན་ནོ་ཞེས་བྱ་བས་བཤད་པ་ཡིན་ནོ། །གཞན་དུ་ནི་ཁྱད་པར་ཅན་དུ་རྟོགས་པ་ཡིན་ནོ། །དེ་ག་ལས་ཤེ་ན། ཁྱད་པར་དང་ཁྱད་པར་ཅན་གྱི་དོན་དེ་དག་གི་འབྲེལ་པ་དང་བཤད་མ་ཐག་པའི་རྗོད་པར་བྱེད་པའི་རྣམ་པར་གཞག་པ་དེ་དག་མ་རྟོགས་ན་ནི་ཁྱད་པར་ཅན་དུ་རྟོགས་པར་མི་རིགས་པའི་ཕྱིར་རོ། །རིགས་པ་བསྟན་ན་སད་ནི་རིགས་ཞེས་བྱ་བ་ལ་སོགས་པས་ཡུལ་སྟོན་པར་བྱེད་དེ། འདི་སྐད་བཤད་པ་ཡིན་ནོ། །དོན་སྣང་བའི་རྣམ་པར་ཤེས་པ་ལ་བརྗོད་པའི་རྣམ་པ་མེད་པ་དེའི་ཕྱིར་དབང་པོའི་ཤེས་པ་ལ་མིང་སྦྱོར་བ་སྲིད་པ་མ་ཡིན་ནོ། །དོན་རྣམས་ཤེས་པ་གཅིག་ལ་སྣང་བ་ཡིན་པ་དེ་ལྟ་ན་ཡང་དེ་དག་ལ་ཁྱད་པར་དུ་འཛིན་པ་ཡོད་པ་མ་ཡིན་ནོ་ཞེས་མིང་བསྲེ་བ་བཟློག་ནས་དོན་བསྲེ་བའི་ཁྱད་པར་འདི་ཉིད་ཀྱིས་ལོགས་ཤིག་ཏུ་གསལ་བ་ཡིན་ནོ། །རིགས་དང་ཡོན་ཏན་དང་བྱ་བ་དེ་དག་གང་ལ་ཡོད་པའི་རྫས་ལ་སོགས་པ་དེ་དག་ལ་ནི་འདི་ལྟར་འཛིན་པ་མེད་དོ། །གང་ལས་ཤེ་ན། བཤད་པ། རང་བཞིན་ཐ་དད་པ་དང་འབྲེལ་པ་དེ་དག་མི་སྣང་བ་སྟེ། རྣམ་པར་ཤེས་བའི་བདག་ཉིད་ལ་མ་ཤར་བས་སྦྱོར་བར་མི་འཐད་པའི་ཕྱིར་རོ། །རང་བཞིན་ཐ་དད་པ་དང་འབྲེལ་པ་བཟུང་ན་ནི་སྦྱོར་བར་འགྱུར་གྱི་གཞན་དུ་ནི་མ་ཡིན་ནོ་ཞེས་བྱ་བའི་ཁྱད་པའི་ཡུལ་བསྟན་པའི་ཕྱིར་འོ་མ་དང་ཆུ་བཞིན་ནོ་ཞེས་བརྗོད་དེ། འབྲེལ་པ་དང་ཐ་དད་པ་སྣང་བ་མེད་པ་ན་སྦྱོར་བ་མེད་པ་བཞིན་ནོ། །ཡང་དེ་དག་ལ་ཅི་ཞིག་ཏུ་མི་སྣང་ཞེན། ཆུ་དང་འོ་མ་དེ་དག་ལ་རིག་པ་ནི་འོ་མ་དང་ཆུ་ད་དག་གི་འབྲེལ་པ་དང་རང་བཞིན་ཐ་དད་པ་རིག་པ་གང་ཡིན་པ་དེ་ལ་བྱ་སྟེ། དེ་དེ་ལ་རིགས་པ་མ་ཡིན་ནོ།།
ཇི་ལྟར་ཐ་དད་པ་དང་འབྲེལ་པ་མི་སྣང་བའི་ཕྱིར་འོ་མ་དང་ཆུ་རྣམ་པར་རྟོག་པས་སྦྱོར་པ་བྱེད་པ་མ་ཡིན་པ་བཞིན་ནོ། །གང་གིས་གང་དག་གི་རང་བཞིན་ཐ་དད་པ་མ་བཟུང་བ་དེས་ནི་དེ་དག་སྦྱོར་བར་བྱེད་པ་མ་ཡིན་ཏེ། དཔེར་ན་དེ་མི་ཤེས་པའི་ཆུ་དང་འོ་མ་བཞིན་ནོ། །རིགས་དང་རིགས་དང་ལྡན་པའི་རང་བཞིན་ཐ་དད་པ་ཡང་སྐྱེས་བུས་གཟུང་བ་མ་ཡིན་ནོ། །རང་བཞིན་འཛིན་པ་སྔོན་དུ་འགྲོ་བ་ཅན་གྱི་རང་བཞིན་གྱི་ཡུལ་ལ་སྦྱོར་བ་ལ་ནི་རང་བཞིན་འཛིན་པས་ཁྱབ་བ་ཡིན་ལ། ཁྱད་པར་བྱེད་པ་ཐ་དད་པའི་རང་བཞིན་དུ་རང་བཞིན་འཛིན་པར་བྱེད་པ་མེད་པའི་ཕྱིར་སྦྱོར་བ་ཡོད་པ་ཡིན་ནོ། །དེ་བཞིན་དུ་འབྲེལ་པ་ལ་ལྟོས་བའི་སྦྱོར་བ་ལ་ཡང་ཁྱབ་པ་གྲུབ་པར་བལྟ་བར་བྱའོ། །འོ་ན་ཇི་ལྟར་དབྱིག་པ་དང་དབྱིག་པ་ཅན་དང༌། རྭ་དང་རྭ་ཅན་ལྟ་བུ་ཤེས་པ་གཅིག་ལ་སྣང་བ་སྒྲ་དང་དོན་བཞིན་དུ་ཤེས་པ་ཐ་དད་པའི་ཡུལ་མ་ཡིན་ལ། རང་བཞིན་ཐ་དད་པ་དང་འབྲེལ་པ་ཡང་རྟོགས་པ་གང་ཡིན་པ་དེའི་ཡུལ་ཅན་གྱི་མངོན་སུམ་གྱི་ཤེས་པ་ནི་ཁྱད་པར་དང་ཁྱད་པར་ཅན་གྱི་དངོས་པོར་སྣང་བས་རྣམ་པར་རྟོག་པ་དང་བཅས་པ་ཡིན་ནོ་ཞེས་དགོས་ན། བཤད་པ། ཡང་གང་ལ་རང་བཞིན་ཐ་དད་པ་དང་འབྲེལ་པ་དག་རྟོགས་པ་སྟེ། ཤེས་པ་གཅིག་ལ་སྣང་བ་ཡོད་པ་དེ་དག་ལ་ཡང༌། ཁྱད་པར་དང་ཁྱད་པར་ཅན་གྱི་དངོས་པོ་འཛིན་པ་ནིའོ། །བརྡ་ནི་སྒྲ་ངེས་པར་སྦྱོར་བ་སྟེ། སྐབས་ཀྱིས་འདིར་ཁྱད་པར་དང་ཁྱད་པར་ཅན་བརྗོད་པའི་ཡུལ་ཅན་ཡིན་པར་གཟུང་ངོ༌། །སྔར་བཤད་པའི་ཚུལ་གྱིས་དངོས་པོ་རྣམས་ཀྱི་ཁྱད་པར་དང་ཁྱད་པར་ཅན་ཉིད་དངོས་པོ་རྣམས་ཀྱི་ཁྱད་པར་དང་ཁྱད་པར་ཉིད་དངོས་པོ་ནི་མ་ཡིན་ཏེ། འོན་ཀྱང་སྒྲས་སྦྲུལ་པ་ཡིན་ནོ། །དེས་ན་ཁྱད་པར་དང་ཁྱད་པར་ཅན་དེ་དག་གི་རང་གི་ངོ་བོ་དང་ངེས་པ་ཉིད་ཤེས་པར་བྱ་བའི་དོན་དུ་སྒྲའི་ཐ་སྙད་རྗེས་སུ་རྟོགས་པར་བྱའོ། །དེའི་ཕྱིར་བརྡ་འཛིན་པ་དང་དེ་དྲན་པ་ནི་ཁྱད་པར་ཅན་འཛིན་པའི་རྒྱུ་ཡིན་ཏེ། བརྡ་འཛིན་པའི་དུས་སུ་སྦྱར་བའི་ཁྱད་པར་དང་ཁྱད་པར་ཅན་དྲན་པ་ལས་ཁྱད་པར་ཅན་དུ་འཛིན་པའི་ཤེས་པར་འགྱུར་བའི་ཕྱིར་རོ། །དེ་ཉིད་ནི་འདི་ཡིན་ནོ་ཞེས་བརྡའི་དུས་སུ་མཐོང་བ་དང་ད་ལྟར་མཐོང་བ་གཅིག་ཏུ་བྱེད་བ་འདི་ནི་སྡུད་པ་ཡིན་ནོ། །བརྡའི་དུས་སུ་
མཐོང་བ་དང་ད་ལྟར་མཐོང་བ་གཅིག་ཏུ་མ་རྟོགས་པར་ནི་བརྡའི་དུས་སུ་གོམས་པའི་ཁྱད་པར་དང་ཁྱད་པར་ཅན་གྱི་དངོས་པོ་རྟོགས་པ་མ་ཡིན་ནོ། །དེས་ན་ཐ་སྙད་ཀྱི་ཚེ་ན་དག་པའི་དངོས་པོ་མཐོང་ནས་དེ་ཉིད་ནི་འདི་ཡིན་ནོ་ཞེས་བརྡའི་མཐོང་བ་དང་གཅིག་ཏུ་བྱེད་པ་ནི་ཁྱད་པར་ཅན་དུ་འཛིན་པ་ཡིན་ནོ། །དེ་ཉིད་ཀྱི་ཕྱིར་སྨྲས་པ། སྡུད་པའི་བདག་ཅན་ཏེ་རང་གི་ངོ་བོ་གང་ལ་ཡོད་པ་དེ་ལ་དེ་སྐད་ཅེས་བྱས་ཏེ། དེ་སྟེ་དེ་འདྲ་བར་འཛིན་པའོ། །མིག་ཅེས་བྱ་བ་འདི་ནི་ཉེ་བར་མཚོན་པ་སྟེ། མངོན་སུམ་གྱི་ཤེས་པ་ལ་ནི་མི་སྲིད་དོ་ཞེས་བྱ་བའི་དོན་ཏོ། །འདི་ལྟར་ཁྱད་པར་དང་ཁྱད་པར་ཅན་དུ་དྲན་པའི་ཤེས་པ་བརྡའི་མཐོང་བ་དང་ད་ལྟར་གྱི་མཐོང་བ་གཅིག་ཏུ་བྱེད་པ་གང་ཡིན་པ་འདི་ཉིད་ནི་ཁྱད་པར་ཅན་དུ་འཛིན་པ་ཡིན་ནོ། །སྔོན་མཐོང་བ་དང་ད་ལྟར་མཐོང་ཏུ་འཛིན་པ་ཡོད་ཀྱང་ཁྱད་པར་དང་ཁྱད་པར་ཅན་གྱི་བརྡ་མ་དྲན་ན་ཁྱད་པར་ཅན་དུ་འཛིན་པ་ཡོད་པ་མ་ཡིན་ནོ།། འདི་ལྟར་དེ་ཉིད་འདི་ཡིན་ནོ་ཞེས་ལོ་མ་ལ་སོགས་པ་དང་ལྡན་པ་ད་ལྟར་མཐོང་བ་ལ་སྔོན་མཐོང་བ་དང་གཅིག་ཏུ་བྱེད་ཀྱང་ཤིང་གི་སྒྲ་མ་དྲན་ན་ཤིང་གི་སྦྲས་ཁྱད་པར་ཅན་དུ་འཛིན་པ་མ་ཡིན་ནོ། །དེས་ན་ཁྱད་པར་ཅན་ལ་སོགས་པའི་བརྡ་དྲན་པའི་རྒྱུ་ཉིད་ལས་བསྡོམ་སྟེ་ཁྱད་པར་ཅན་དུ་འཛིན་པ་ཡིན་ནོ། །དེ་ལྟར་བསྡོམ་པ་ཡང་གང་ཞིག་ཁྱད་པར་ཅན་དུ་བཟུང་བའི་དེ་མ་ཐག་ཏུ་མཐོང་བའི་ཁྱད་པར་དང་བྲལ་བའི་ཡུལ་དང༌། བརྡའི་ཚེ་མཐོང་བའི་ཡུལ་འཛིན་པར་ནུས་པའི་ཤེས་པ་གང་ཡིན་པ་དེ་ཉིད་ཀྱིས་བྱེད་པར་ནུས་པ་ཡིན་ནོ། །དེས་ན་བརྡའི་དུས་སུ་གོམས་པ་ཁྱད་པར་ཅན་ལ་སོགས་པ་དྲན་པ་དང༌། སྔར་མཐོང་བའི་ཡུལ་དང་གཅིག་ཏུ་བྱེད་པ་ན་ཁྱད་པར་ཅན་དུ་འཛིན་པ་ཡིན་གྱི་གཞན་དུ་ནི་མ་ཡིན་ནོ། །དེ་ལྟར་ན་སྔར་མཐོང་བ་དང་ད་ལྟར་མཐོང་བ་གཅིག་ཏུ་འཛིན་པ་ཡིན་ནོ། །སྔར་ཞེས་བྱ་བ་ནི་སྔར་མཐོང་བའོ། །ཕྱིས་ཞེས་བྱ་བ་ནི་ད་ལྟར་གྱི་མཐོང་བའོ། །འཛིན་པ་ཞེས་བྱ་བ་ནི་སྔར་མཐོང་བ་དང་ཕྱིས་མཐོང་བ་དག་ལ་ཅི་དེ་ཉིད་འདི་ཡིན་ནམ། འོན་ཏེ་གཞན་ཞེས་ལྷག་པར་འཛིན་པ་ནི་འཛིན་པའོ། །དབང་པོའི་ཤེས་པ་ནི་འདིས་སྟོང་པ་ཡིན་ནོ། །འདི་ནི་གཏན་ཚིགས་ཀྱི་ཚིག་དེ་གང་གི་ཕྱིར་སྔོན་དང་ཕྱི་མར་འཛིན་པས་སྟོང་པ་དེའི་ཕྱིར་འདི་ལ་སྡོམ་པའི་བདག་
ཉིད་དུ་འཛིན་པ་ཡོད་པ་མ་ཡིན་ནོ། །ཚིག་ལེའུར་བྱས་པ་འདི་ཉིད་ཀྱི་དོན་རྣམ་པར་འགྲེལ་པ་ན། འདི་ལ་ཞེས་བྱ་བ་ལ་སོགས་པས་བསྒྲུབ་པར་བྱ་བ་འཆད་དེ། སྔ་མ་ཁྱད་པར་དང་བྲལ་བ་འཛིན་པ་དང༌། བརྡའི་དུས་ཀྱི་མཐོང་བ་ཉིད་དུ་ཕྱི་མ་འཛིན་པ་དང༌། ཁྱད་པར་ཅན་ལ་སོགས་པའི་བརྡ་དྲན་བ་ནི་བྱེད་པ་སྟེ། འདི་རྣམས་གཅིག་མེད་ན་ཡང་ཁྱད་པར་ཅན་དུ་འཛིན་པ་མི་འཐད་པའི་ཕྱིར་འདི་དག་གདོན་མི་ཟ་བར་བྱ་བ་ཡིན་ནོ། །དབང་པོའི་ཤེས་པ་ནི་བྱ་བ་འདི་དག་བྱེད་པར་ནུས་པ་མ་ཡིན་ནོ། །ག་ལས་ཤེ་ན། དཔྱོད་པ་མེད་པའི་ཕྱིར་རོ་ཞེས་བྱ་བ་སྨོས་ཏེ། གང་ཞིག་སྔ་ཕྱིར་འཛིན་པས་སྟོང་བ་དེ་ཉིད་ནི་དཔྱོད་པ་མེད་པ་ཡིན་ནོ། །འདི་ནི་ཁྱད་པར་བསྒྲུབ་པར་བྱ་བ་བསྟན་པའི་གཏན་ཚིགས་ཏེ། གང་གི་ཕྱིར་དཔྱོད་པ་དང་བྲལ་བ་དེའི་ཕྱིར་འདི་ཙམ་གྱི་བྱ་བ་བྱེད་པ་ཡོད་པ་མ་ཡིན་ནོ། །འདི་ནི་སྔར་མཐོང་བའི་ཡུལ་གྱི་དངོས་པོ་དང་ད་ལྟར་མཐོང་བ་ལ་དེ་ཉིད་དང་གཞན་ཉིད་དུ་དཔྱོད་པར་ནུས་པ་མ་ཡིན་ནོ། །དཔྱོད་པ་མེད་པ་ཉིད་འདི་ལ་ཡང་གཏན་ཚིགས་ཡོད་པ་ཡིན་ནོ་ཞེས་བཤད་པ་ན། ཉེ་བ་རུང་བའི་ཡུལ་ན་གནས་པའི་ཡུལ་གྱི་སྟོབས་ཏེ། མཐུས་བསྐྱེད་པའི་རྒྱུའི་ཕྱིར་དཔྱོད་པ་མེད་པ་ཉིད་དོ། །ཡུལ་ཉེ་བའི་སྟོབས་ཀྱིས་སྐྱེས་པ་ནི་དེའི་རང་བཞིན་ཁོ་ནའི་འཛིན་པར་བྱེད་པ་ཡིན་གྱི། གང་དེ་ལ་ཡོད་པ་མ་ཡིན་བ་བརྡའི་དུས་སུ་གོམས་པས་སྒྲོ་བཏགས་པ་ཁྱད་པར་དང་ཁྱད་པར་ཅན་ཉིད་ནི་མ་ཡིན་ནོ། །སྔོན་མཐོང་བའི་དངོས་པོ་དེ་ཡང་སྔོན་མཐོང་བའི་ཤེས་པའི་ཡུལ་ལ་བརྗོད་ལ། དེ་ཡང་དེ་ལྟར་མཐོང་བ་ལ་ཡོད་བ་མ་ཡིན་པ་ཉིད་དེ། སྔར་གྱི་མཐོང་བ་ལོག་ན་དེའི་ཡུལ་ཡང་ལྡོག་པའི་ཕྱིར་རོ། །དེས་ན་གཟུང་བར་ནུས་པ་མ་ཡིན་ནོ། །གང་ཞིག་སྔར་མཐོང་བ་ཉིད་དུ་དངོས་པོ་དཔྱོད་པར་མི་ནུས་པ་དེ་ཇི་ལྟར་ན་ཁྱད་པར་ལ་སོགས་པ་སྐྱེད་པར་བྱེད་པའི་དོན་གྱི་རང་བཞིན་མ་ཡིན་པ་སྒྲོ་བཏགས་པར་འཛིན་པར་བྱེད། དེའི་ཕྱིར་ཁྱད་པར་ལ་སོགས་པ་བཏགས་པར་འཛིན་པའི་རང་བཞིན་ཁྱད་པར་ཅན་གྱི་དངོས་པོར་རྣམ་པར་རྟོག་པ་ནི་དེ་ལ་འཐད་པ་མ་ཡིན་ནོ། །དཔྱོད་པ་ཉིད་དུ་ཁས་ལེན་ན་ནི་དབང་པོའི་ཤེས་པ་དང་ཡིད་ཀྱི་ཤེས་པ་ཉེ་བ་མ་ཡིན་པའི་དོན་འཛིན་པ་ཉིད་དུ་ཁྱད་པར་མེད་པར་ཐལ་བར་
འགྱུར་ཏེ། སྔར་མཐོང་བ་དང་ཕྱིས་མཐོང་བ་དག་ཤེས་པ་གཅིག་གིས་གཟུང་བ་ནི་ཉེ་བ་མ་ཡིན་པའི་དོན་འཛིན་པ་ཉིད་དུ་ཐལ་བར་འགྱུར་རོ། །དེས་ན་གཟུགས་འཛིན་པར་སོ་སོར་ངེས་པ་དབང་པོས་བྱས་པ་ཡིན་ཡང་ཐ་དད་པ་མེད་པར་འགྱུར་ལ། ཐ་དད་པ་མེད་པར་ཐལ་བའི་ཕྱིར་དབང་པོའི་ཤེས་པ་དཔྱོད་པ་མེད་པ་ཡིན་ནོ། །ཉེ་བ་མ་ཡིན་པའི་དོན་འཛིན་པར་ཁྱད་པར་མེད་ན་ནི། འདས་པ་དང་མ་འོངས་པ་དང་དངོས་པོའི་རབ་ཏུ་དབྱེ་བ་སྟེ། མི་རྟག་པ་དང་སྡུག་བསྔལ་བ་ལ་སོགས་པ་ལྡོག་པའི་རྒྱུ་མཚན་ཅན་གྱི་ཐ་དད་པའི་རང་གི་ངོ་བོ་དེ་དབང་པོའི་ཤེས་པས་ཀྱང་འཛིན་པ་དང༌། ཡིད་ཀྱི་ཤེས་པས་ཀྱང་མི་འཛིན་པ་སྟེ། དེ་དག་དང་དཔོག་པ་སྟེ་དབང་པོའི་ཤེས་པས་ཀྱང་གཞན་དུ་མི་འཐད་པ་མཐོང་བ་ལས་མ་མཐོང་བ་རྟོགས་པར་འགྱུར་ལ། མི་དཔོག་པ་སྟེ་ཡིད་ཀྱི་རྣམ་པར་ཤེས་པ་ཡང་དེ་ལས་བཟློག་པར་འགྱུར་རོ། །དེ་དག་དང་དོན་ཡོད་པ་ནི་བདོག་པའོ། །དེ་ལ་ལྟོས་པ་ནི་དེ་དང་འབྲེལ་པ་སྟེ། ཡིད་ཀྱི་ཤེས་པའོ། །དེ་ལས་བཟློག་པ་ནི་མི་ལྟོས་པ་སྟེ་དབང་པོའི་ཤེས་པའོ། །དེ་དག་དང་ཞེས་བཟླ་བར་དབྱེ་བའོ། །དེ་དག་ལ་སོགས་པ་འདོད་པ་ཙམ་ལ་རག་ལས་བ་ལ་སོགས་པ་དེ་དག་ཏུ་ཐལ་བར་འགྱུར་རོ། །འདི་ལ་ཤེས་པའི་ཆོས་འདས་པ་ལ་སོགས་པ་འཛིན་པར་ཤེས་པར་བྱེད་པ་པོ་ཉིད་ནི་ཉེ་བ་མ་ཡིན་པའི་ཡུལ་འཛིན་པ་ཙམ་ལ་རག་ལས་པ་ཡིན་ལ། དཔྱོད་པར་བྱེད་པའི་ཕྱིར་དབང་པོའི་ཤེས་པ་ལ་ཡང་ཉེ་བ་མ་ཡིན་པའི་ཡུལ་ཅན་ཉིད་ཡོད་པ་དེའི་ཕྱིར་དེའི་རྒྱུ་མཚན་ཙམ་གྱི་ཆོས་སུ་ཡང་ཐལ་བར་འགྱུར་རོ། །དེ་ལ་ཡོད་ཀྱང་དཔོག་པ་ལ་སོགས་པ་མ་ཡིན་ན་ནི་ཡིད་ཀྱི་ཤེས་པ་ཡང་མི་འགྱུར་ཏེ། དེ་ལ་ཡང་ཡུལ་ཉེ་བ་མ་ཡིན་པ་ཉིད་ལས་འདས་པ་ལ་སོགས་པའི་རྒྱུ་འཛིན་པ་ལ་སོགས་པའི་རྒྱུ་ལྷག་པ་གཞན་མ་མཐོང་བའི་ཕྱིར་རོ། །དེ་བཞིན་དུ་དབང་པོའི་ཤེས་པའི་ཡུལ་མི་ཉེ་བ་ཅན་ཡིན་ཡང་གལ་ཏེ་དོན་ཡོད་པ་ལ་ལྟོས་པ་ཡིན་ན་ནི་ཡིད་ཀྱི་རྣམ་པར་ཤེས་པ་ཡང་ཐལ་བར་འགྱུར་རོ། །དབང་པོའི་ཤེས་པ་དེའི་རྣམ་པར་འཛིན་པ་ཉིད་ཀྱིས་དོན་ལ་ལྟོས་པ་ཞེས་བྱ་བར་གནས་བ་ནི་མ་ཡིན་ཏེ། ལྟོས་པ་མེད་པ་འདས་པ་ལ་སོགས་པའི་རྣམ་པར་ཡང་འཛིན་པའི་ཕྱིར་རོ། །འོན་
ཀྱང་ཤེས་པ་ཉིད་ལས་ཡིན་ལ་དེ་ནི་ཡིད་ཀྱི་རྣམ་པར་ཤེས་པ་ལ་ཡང་བྱེ་བྲག་ཡོད་པ་མ་ཡིན་ནོ། །ཡང་ན་དབང་པོའི་རྣམ་པར་ཤེས་པ་ཡང་ལྟོས་པ་མེད་པར་ཐལ་བར་འགྱུར་ཏེ། བྱེ་བྲག་མེད་པའི་ཕྱིར་རོ། །དེ་བཞིན་དུ་ཡུལ་ཉེ་བ་ཅན་མ་ཡིན་པ་ཉིད་ཀྱིས་འདོད་པ་ཙམ་གྱི་འཇུག་པ་ལ་ཡང་སྦྱར་བར་བྱའོ། །དེའི་ཕྱིར་ཉེ་བ་མ་ཡིན་པ་འཛིན་པ་ཉིད་བཏང་ན་དཔྱོད་པ་མེད་པའི་ཕྱིར་མངོན་སུམ་རྟོག་པ་མེད་པར་གྲུབ་པ་ཡིན་ནོ། །ཡིད་ཀྱི་རྣམ་པར་ཤེས་པས་མངོན་བར་འདུས་བྱས་པ་སྟེ་བརྡའི་ཚེ་གོམས་པའི་ཁྱད་པར་ཅན་ལ་སོགས་པས་སྦྱར་བ་བྱས་པ་ལ་དབང་པོའི་ཤེས་པས་འཛིན་པར་བྱེད་པ་དེས་ན་དབང་པོའི་ཤེས་པས་འདས་པ་ལ་སོགས་པ་དྲན་པ་ལ་སོགས་པར་བྱ་བར་མ་ཡིན་ཏེ། ཡིད་ཀྱི་རྣམ་པར་ཤེས་པ་ཉིད་ཀྱིས་བྱས་པའི་ཕྱིར་རོ། །དབང་པོའི་ཤེས་པ་ཁྱད་པར་ཅན་དུ་འཛིན་པ་ཡང་ཡིན་ནོ་ཞེས་བྱ་བ་ནི་དེ་ལྟར་ཁས་བླངས་པ་སྟོན་པར་བྱེད་པ་ཡིན་ནོ། །མ་ཡིན་ཏེ་ཞེས་བྱ་བ་ནི་གཞན་གྱིས་སྨྲས་པ་ཟློག་པར་བྱེད་དོ། །གཏན་ཚིགས་བཤད་པ་ཇི་སྐད་བཤད་པའི་ཁྱད་པར་ལ་སོགས་པ་རྣམས་འཛིན་པར་བྱེད་པ་མ་ཡིན་པས་ན་དེ་ལྟར་ཁྱད་པར་ཅན་ཉིད་དུ་རྟོགས་པ་སྟེ། ཡོངས་སུ་གཅོད་པར་མི་རིགས་པའི་ཕྱིར་རོ། །འདི་སྙམ་དུ་ཡིད་ཀྱི་རྣམ་པར་ཤེས་པ་ཉིད་ཀྱིས་ཉེ་བ་མ་ཡིན་པ་མངོན་པར་འདུས་བྱས་པའི་ཁྱད་པར་ཅན་དེ་ལ་དབང་པོའི་ཤེས་པས་རྟོགས་པ་དེས་ན་ཇི་ལྟར་རྟོགས་པར་མི་རིགས་པ་ཡིན་ཞེ་ན། བཤད་པ་ཡུལ་མ་ཡིན་པ་ཁྱད་པར་ཅན་དང༌། སྔར་མཐོང་བ་ལ་མི་འཇུག་པའི་རྒྱུའི་ཕྱིར་རོ། །གང་གི་ཕྱིར་ཡུལ་མ་ཡིན་པ་ཉིད་ཀྱི་ཕྱིར་ཁྱད་པར་ལ་སོགས་པ་ཡིད་ཀྱི་རྣམ་པར་ཤེས་པས་བཀོད་ཀྱང་དབང་པོའི་ཤེས་པ་འཇུག་པ་མ་མ་ཡིན་ཏེ། ཉེ་བ་མ་ཡིན་པ་ཡིད་ཀྱི་རྣམ་པར་ཤེས་པས་ཁྱད་པར་ཅན་དུ་ཟིན་ཀྱང་ཉེ་བ་མ་ཡིན་པ་ཉིད་སྤོང་བ་མ་ཡིན་པའི་ཕྱིར་རོ། །དེས་ན་ཡུལ་མ་ཡིན་ཏེ། རྣ་བའི་རྣམ་པར་ཤེས་པས་གཞག་པའི་སྒྲ་ནི་མིག་གི་རྣམ་པར་ཤེས་པའི་ཡུལ་མ་ཡིན་པ་བཞིན་ནོ། །འདི་ཉིད་བསྟན་པའི་ཕྱིར་རིགས་ལ་སོགས་པ་དང་ཞེས་བྱ་བ་སྨོས་སོ། །སོགས་པ་ཞེས་བྱ་བས་ནི་བྱ་བ་དང་ཡོན་ཏན་བསྡུ་བའོ། །དེའི་འབྲེལ་པ་དང་འདས་པ་དང་སྒྲའི་ཐ་སྙད་དེ་ཁྱད་པར་
ལ་སོགས་པ་གང་ཞིག་སྒྲས་ཐ་སྙད་དུ་བྱ་བ་ནི་སྒྲའི་ཐ་སྙད་དོ། །སོགས་པ་སྨོས་པས་ནི་མ་འོངས་པ་དང་དངོས་པོའི་རབ་ཏུ་དབྱེ་བ་བསྡུ་སྟེ། དེ་དག་ནི་དབང་པོའི་ཤེས་པའི་ཕྱིར་རོ། །དེས་ན་ཡིད་ཀྱི་རྣམ་པར་ཤེས་པ་ཉེ་བར་གཞག་པ་ལ་ཡང་འཛིན་པ་མ་ཡིན་པ་དེའི་ཕྱིར་དབང་པོའི་ཤེས་པས་དོན་དང་དོན་གཞན་དུ་སྦྱོར་བའི་སྦྱོར་བ་དེ་ཉིད་ནི་རྟོགས་པའོ། །དེར་མ་གཏོགས་པ་ནི་བདག་ཉིད་དུ་གྱུར་པ་མ་ཡིན་པའོ། །དེ་ལྟར་ཚིགས་སུ་བཅད་པ་གཉིས་ཀྱིས་ཤེས་པ་གཅིག་ལ་སྣང་བ་ཉིད་ལ་བརྟེན་ནས་རིགས་ལ་སོགས་པ་སྦྱོར་བའི་རྟོགས་པ་བསལ་བ་ཡིན་ནོ། །དབང་པོ་ལས་སྐྱེས་བ་དེ་ན་རྣམ་པར་རྟོག་པས་ཀུན་ནས་བསླང་བ་སྟེ་བཅུག་པ་ཡིན་ནའོ། །ཡང་ཞེས་བྱ་བ་ནི་སྐྱོན་སོགས་པར་བྱེད་པའོ། །འདོད་པས་ལྡོག་དང་ཞེས་བྱ་བ་འདིས་ནི་ཐལ་བར་འགྱུར་བ་བསྟན་ཏོ། །ཐལ་བ་གཞན་ཡང་སྟོན་པར་བྱེད་པ་ནི་ཉེ་བའི་དོན་ཏེ་རུང་བའི་ཡུལ་ན་གནས་པ་ཉིད་ལ་དབང་པོ་ལས་སྐྱེས་པའི་བློ་རྒྱུའི་དངོས་པོར་མི་ལྟོས་པར་འགྱུར་རོ། །ཚིག་ལེའུར་བྱས་པས་བསྟན་པའི་ཐལ་བར་འགྱུར་བ་གཉིས་པོ་ཉིད་རིམ་པ་བཞིན་དགྲོལ་བའི་ཕྱིར་བཤད་པ། གཞན་ཡང་ཞེས་བྱ་བ་ནི་ཉེས་པ་བ་སོགས་པའི་དོན་ཏོ། རེ་ཞིག་ཡུལ་མ་ཡིན་པ་ལ་མི་འཇུག་པའི་ཕྱིར་ཡིད་ཀྱི་ཤེས་པས་མངོན་པར་འདུས་བྱས་པའི་དོན་ལ་དབང་པོའི་ཤེས་པ་མི་འཇུག་གོ་ཞེས་བརྗོད་ཟིན་པ་ཡིན་ལ། དེ་འཛིན་ན་ཡང་འདོད་པས་ལྡོག་པ་ཉིད་དང་དོན་ལ་ལྟོས་པ་མེད་པར་འགྱུར་རོ་ཞེས་སྐྱོན་བསགས་པའོ། །འདི་ཞེས་བྱ་བ་ནི་དབང་པོ་ལས་སྐྱེས་པའི་བློའོ། །ཁྱད་པར་ནི་རྣམ་པར་གཅོད་པར་བྱེད་པ་སྟེ། དབྱིག་པ་ལ་སོགས་པའི་དོན་རྣམ་སྒྲའོ། །དེ་ལ་སོགས་པ་ཁྱད་པར་ཅན་དང་འབྲེལ་པ་དང་འདས་པ་དང་སྒྲའི་ཐ་སྙད་དང་དེ་ལྟ་བུ་ལ་སོགས་པའི་རྟོག་པ་གཞན་གང་ཡིན་པ་དག་གོ །དེས་ཀུན་ནས་བསླང་བ་ནི་བཅུག་བ་སྟེ་བཅུག་བ་ཉིད་ཀྱང་རྣམ་པར་རྟོག་པའི་ཡུལ་དབྱིག་པ་ལ་སོགས་པའི་ཁྱད་པར་གྱིས་ཁྱད་པར་དུ་བྱས་པའི་དོན་འཛིན་པར་བྱེད་པ་སྟེ། རྣམ་པར་བརྟགས་པའི་དོན་འཛིན་པར་བྱེད་པ་ཉིད་ཡིན་ནོ། །གང་གི་ཕྱིར་དེ་རྣམ་པར་བརྟགས་པའི་དོན་འཛིན་པར་བྱེད་པ་དེའི་ཕྱིར་དེས་ཀུན་ནས་བསླང་བ་ཡིན་ནོ། །ཡུལ་ལ་གཏོད་
བར་བྱེད་པའི་རྣམ་པར་རྟོག་པ་དེ་ཡང་དོན་གྱིས་སྐྱེད་པར་བྱེད་པར་འགྱུར་བ་ཡིན་གྱི་འདིར་ཀུན་ནས་སློང་བ་པོ་སྐྱེད་པར་བྱེད་པ་པོ་ལ་ནི་འདོད་པ་མ་ཡིན་ཏེ། རྣམ་པར་རྟོག་པ་ནི་རྟོག་པ་མེད་པ་དང་ཐུན་མོང་བའི་སྐྱེད་པར་བྱེད་པ་ཡིན་པ་དེས་ན་དེ་ལ་སྐྱོན་མེད་པར་འགྱུར་བའི་ཕྱིར་རོ། །ཡིན་ན་ཞེས་བྱ་བ་ནི་རྟོག་པས་ཀུན་ནས་བསླང་བ་གཏན་ཚིགས་ཡིན་པར་སྟོན་པ་སྟེ། དེ་ཡིན་པར་གྱུར་ན་ཞེས་པའི་དོན་ཏོ། །འཇུག་པ་ཡང་ཞེས་བྱ་བ་ནི་རྒྱུན་འཇུག་པར་བསྟན་པས་རྒྱུ་ཚང་བ་ཉིད་དུ་སྟོན་པར་བྱེད་པའོ། །དེ་རྒྱུ་དང་ལྡན་པ་ཡང་འདོད་པས་ལྡོག་པར་འགྱུར་རོ་ཞེས་འབྲེལ་ཏོ། །རྣམ་པར་རྟོག་པ་སྐྱེད་པའི་ཚོགས་པ་ཚང་བ་ཅན་གྱི་སྐྱེས་བུ་གང་ཡིན་པ་དེའིའོ། །འདི་ཉིད་བཤད་པ་ནི། འཇུག་པ་ཡང་ཞེས་བྱ་བ་ཡིན་ནོ། །རྒྱུ་མ་ཚང་ན་ནི་རང་ཉིད་ལྡོག་པར་འགྱུར་བའི་ཕྱིར་རྒྱུ་མ་ཚང་བ་མེད་པ་ཉིད་ལ་འདོད་བས་ལྡོག་པའི་བྱེད་པ་རྟོགས་པར་འགྱུར་གྱི་གཞན་དུ་ནི་མ་ཡིན་ནོ། །རྒྱུ་མ་ཚང་བ་མེད་པ་ཡིན་ན་ཇི་ལྟར་ལྡོག་ཅེ་ན། རྒྱུ་དེ་ཉིད་མ་ཚང་བའི་ཕྱིར་རོ། །ཡང་ནི་ཕྱི་ནས་སོ། །དབང་པོའི་ཤེས་པའི་རྣམ་རྟོག་ལས་གཞན་པའི་རྣམ་པར་རྟོག་པ་གང་ཡིན་པ་དེ་ཇི་ལྟར་འདོད་པས་ལྡོག་པ་དེ་བཞིན་དུ་དེ་ཡང་ལྡོག་པར་འགྱུར་རོ། །འདི་ནི་ཆོས་གཉིས་ཀྱི་ཁྱད་པར་སྟོན་པའོ། །རྣམ་པར་བརྟགས་པའི་དོན་འཛིན་པ་ཉིད་ལ་ནི་འདོད་པས་ལྡོག་པ་ཉིད་ཀྱིས་ཁྱབ་པ་ཡིན་ཏེ། འདི་ལྟར་སྒྲོ་བཏགས་པའི་དོན་འབད་པས་ཉེ་བར་གཞག་པ་ནི་སྒྲོ་འདོགས་པར་འདོད་པ་ལོག་པར་འགྱུར་བ་ཉིད་ལ། དེ་ལྡོག་པ་ན་དེའི་ཡུལ་ཅན་གྱི་རྣམ་པར་རྟོག་པ་ཡང་ལྡོག་པ་ཡིན་ནོ། །དེས་ན་འདོད་པས་ལྡོག་པ་ཉིད་ཀྱི་རྒྱུ་མཚན་ནི་བརྟགས་པའི་དོན་འཛིན་པ་ཙམ་ཉིད་ཡིན་པས་དེའི་ཁྱབ་པར་བྱེད་པ་ཡིན་ནོ། །གལ་ཏེ་རྣམ་པར་བརྟགས་པ་འཛིན་པ་ཉིད་ཡིན་ཡང་འདོད་པས་ལྡོག་པ་ཉིད་དུ་མི་འགྱུར་ན་ནི་རྒྱུ་མཚན་དང་བཅས་པ་རྒྱུ་མཚན་གཞན་ལ་ལྟོས་པར་འགྱུར་ན་རྒྱུ་མཚན་གཞན་ནི་རྟོགས་པ་མེད་དོ། །དེའི་ཕྱིར་བརྟགས་པའི་དངོས་པོ་འཛིན་པ་ནི། འདོད་པས་ལྡོག་པ་ཉིད་ཀྱི་གཞན་ལ་ལྟོས་པ་མེད་པའི་རྒྱུ་ཡིན་ནོ། །གལ་ཏེ་འདི་ཡོད་ན་ཡང་འདོད་པས་ལྡོག་པ་ཉིད་དུ་མི་འགྱུར་ན་ནི་དེའི་ཚེ་
ཁྱབ་པར་བྱེད་པ་ལྟོས་པ་མེད་བ་ཉིད་ཉམས་པར་འགྱུར་བའི་ཕྱིར་འདོད་པས་ལྡོག་པ་ནི་བརྟགས་པའི་དོན་འཛིན་པའི་ཁྱབ་པར་བྱེད་པ་ཡིན་ནོ། །དེས་ན་དབང་པོའི་ཤེས་པ་ལ་ཁྱབ་པར་བྱ་བ་བརྟགས་པའི་དོན་འཛིན་པ་ཉིད་ཡོད་ན། ངེས་པར་ཁྱད་པར་བྱེད་པའི་ཆོས་དང་ལྡན་པར་འགྱུར་རོ། །ཁྱབ་པར་བྱེད་པ་ལྡོག་ན་ཁྱབ་པར་བྱ་བ་ཡང་ལྡོག་པའི་ཕྱིར་རོ། །ཐལ་བ་དང་ཐལ་བ་བཟློག་པ་དག་ཉིད་བསྟན་པར་བྱ་བའི་དོན་དུ་བཤད་པ་རྣམ་པར་རྟོག་པའི་ཤེས་པ་ནི་སོ་སོར་བརྟགས་པ་སྟེ། འཇུག་པའི་རྣམ་པར་རྟོག་པའི་ཡུལ་དང་མི་མཐུན་པའི་བརྟགས་པ་ལས་བཟློག་པར་ནུས་པ་ཡིན་ནོ། །དབང་པོའི་ཤེས་པའི་རྗེས་སུ་བྱུང་བ་སྔོན་པོ་ལ་སོགས་པའི་རྣམ་པར་རྟོག་པ་འགའ་ཞིག་བཟློག་པར་ནུས་པ་མ་ཡིན་ལ་བུམ་པ་ལ་སོགས་པ་ལ་གཅིག་པ་ལ་སོགས་པར་རྣམ་པར་རྟོག་པའི་ཀུན་རྫོབ་ཀྱི་ཡུལ་ཅན་གཞན་ཡང་ཡོད་པ་མ་ཡིན་ནམ། དེའི་ཕྱིར་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ཇི་ལྟར་འགྲུབ་པར་འགྱུར་ཞེས་དོགས་པ་ལ། འདི་ཉེ་བར་བཀོད་དེ་རྒྱུན་དུ་འཇུག་པའི་རྣམ་པར་རྟོག་པ་གང་ཡིན་པ་རྣམས་ནི་དེ་ལྟར་ནི་འདི་བརྟག་པར་མི་བྱའོ་ཞེས་རང་གི་ངོ་བོས་བཟློག་པར་ནུས་པ་ཡིན་གྱི། རྣམ་པར་བརྟགས་པའི་དོན་ཡོད་པ་མ་ཡིན་ནོ་ཞེས་ཡུལ་བཀག་པས་ནི་མ་ཡིན་ནོ། །དེས་ན་གཅིག་ལ་སོགས་པ་ཀུན་རྫོབ་ཀྱི་རྣམ་པར་རྟོག་པ་ཡང་དེ་སྲིད་ཀྱི་དུས་སུ་འདོད་པས་བཟློག་པར་ནུས་པ་ཡིན་པ་དེའི་ཕྱིར་འཁྲུལ་པ་ཡོད་པ་མ་ཡིན་ནོ། །འདི་སྙམ་དུ་དབང་པོའི་ཤེས་པ་ཡང་འདོད་པས་མིག་འཛུམས་པ་ན་ལྡོག་པ་ནི་ངེས་པར་འདོད་པ་ཉིད་ཀྱིས་ལྡོག་པར་འགྱུར་བ་ཡིན་པས་ན་འདོད་པས་ལྡོག་པ་ནི་ཧ་ཅང་ཐལ་བར་འགྱུར་བ་མ་ཡིན་ནོ་སྙམ་ན། དབང་པོའི་བློ་ནི་མ་ཡིན་ཏེ་ཞེས་བྱ་བ་གསུངས་སོ། །དོན་ནི་འདི་ཡིན་ཏེ་རྒྱུ་བྱེད་པ་དང་ལྡན་པ་ཉིད་ལ་འདོད་པས་རྒྱུའི་ནུས་པ་ཉམས་པར་བྱས་པས་འབྲས་བུ་ལྡོག་པ་ན་བྱེད་པ་ངེས་པར་འགྱུར་བ་ཡིན་ན་འདི་ལ་ནི་རྒྱུ་དབང་པོ་ཉིད་འདོད་པས་འཇུག་པ་དང་ལྡོག་པར་བྱེད་པ་ཡིན་གྱི་རྣམ་པར་ཤེས་པ་ལ་ནི་མ་ཡིན་ནོ། །དེའི་ཕྱིར་འདི་ལྟར་མངོན་དུ་གནས་པའི་ཡུལ་ལ་དབང་པོ་འཇུག་པ་ན་མཐོང་བར་མི་འདོད་ཀྱང་མཐོང་བ་ཡིན་ནོ། །དེ་
བཤད་པ་ནི། བ་ལང་གི་བློ་བཟློག་ཅིང་ཞེས་བྱ་བའོ། །འདིས་ནི་བ་ལང་གི་བློ་ལ་འདོད་པ་མེད་པར་བསྟན་པའོ། །རྟར་རྣམ་པར་བརྟགས་ཀྱང་ཞེས་བྱ་བ་འདིས་ནི་འགལ་བའི་རྣམ་པར་རྟོག་པ་ལ་འདོད་པ་བསྟན་ཏེ། དེས་ན་བ་ལང་གི་བློ་ལ་འདོད་པ་མེད་ཅིང་འགལ་བར་འདོད་པའི་རྣམ་པར་རྟོག་པ་རྒྱུན་དུ་འཇུག་ཀྱང་མིག་ལ་སོགས་པའི་རྒྱུ་མཚན་བ་ལང་ཉིད་དུ་མཐོང་བར་འགྱུར་བ་ཡིན་ནོ། །དེས་ན་དེའི་ཡུལ་གྱི་རྣམ་པར་རྟོག་པ་བཟློག་ཅིང་ཟློག་པར་བྱེད་ལ་འགལ་བའི་རྣམ་པར་རྟོག་པ་གཞན་ཉེ་བར་བྱས་ཀྱང་མི་འདོད་པའི་མཐོང་བ་བཟློག་པར་ནུས་པ་མ་ཡིན་པ་ཉིད་དོ་ཞེས་བརྗོད་པར་འགྱུར་རོ། །དེའི་ཕྱིར་དབང་པོའི་ཤེས་པ་འདོད་པས་མི་ལྡོག་པས་ན་བརྟགས་པའི་དོན་འཛིན་པ་མ་ཡིན་ནོ་ཞེས་བྱ་བར་གྲུབ་བོ། །ཐལ་བ་གཉིས་པ་བསྟན་པའི་དོན་དུ་སྨྲས་པ། དོན་ཉེ་བ་རུང་བའི་ཡུལ་ན་གནས་པ་ལ་རྒྱུའི་དངོས་པོར་མི་ལྟོས་པ་ཉིད་དོ། །རྣམ་པར་རྟོག་པ་རྣམས་ཀྱི་དོན་ཉེ་བ་ལ་མི་ལྟོས་པས་ནི་བརྟགས་པའི་དོན་འཛིན་པ་ལས་འགྱུར་བ་ཡིན་ཏེ། འདི་ལྟར་རྣམ་པར་བརྟག་པའི་དངོས་པོ་དེ་ནི་མེད་པ་ཡིན་ལ། དེའི་འཛིན་པས་ན་དོན་ཉེ་བ་ལ་ལྟོས་པ་ཉམས་པར་འགྱུར་བ་ཡིན་ནོ། །དབང་པོའི་རྣམ་པར་ཤེས་པ་ཡང་རྣམ་པར་བརྟགས་པ་འཛིན་པ་ཡིན་ན་ནི་དེས་ན་ཉེ་བ་མ་ཡིན་པ་འཛིན་པས་ན་དེ་ཡང་དོན་ཉེ་བ་ལ་ལྟོས་པ་མེད་པར་འགྱུར་རོ། །ཡུལ་ཉེ་བ་ལ་ལྟོས་པ་མེད་པ་ཉིད་ནི་བརྟགས་པའི་དོན་ཉེ་བ་མ་ཡིན་པ་འཛིན་པ་ཙམ་ལ་ལྟོས་པ་ཡིན་ལ་དེ་ཡང་ཁྱབ་པར་བྱེད་པ་ཡིན་པ་དེ་བས་ན་སྔ་མ་བཞིན་དུ་ཐལ་བར་འགྱུར་བའི་རང་བཞིན་གྱི་གཏན་ཚིགས་སོ། །ཆོས་གཉིས་ཀྱིས་ཁྱབ་པར་བསྟན་པའི་དོན་དུ་སྨྲས་པ། གང་གི་ཕྱིར་བ་ལང་ཞེས་བྱ་བ་དེ་ལྟ་བུ་ལ་སོགས་པའི་རྣམ་པ་ཅན་གྱི་བ་ལང་གི་རྣམ་པར་རྟོག་པ་ནི་བ་ལང་ལ་སོགས་པའི་དོན་ཉེ་བ་ཉིད་ལས་འགྱུར་བ་མ་ཡིན་ནོ། །འདིས་ནི་ཉེ་བ་ལས་གཞན་དུ་ཡང་འགྱུར་བ་མ་ཡིན་པ་དེ་ལ་ལྟོས་པ་མ་ཡིན་ནོ་ཞེས་ངེས་བ་འགོག་པར་བྱེད་པ་ཡིན་ནོ། །ཅིག་ཤོས་ཀྱིས་ནི་འདི་ཡང་གཞན་དུ་མིན་ཞེས་བྱ་བ་སྨྲས་ཏེ། རྣམ་པར་རྟོག་པ་འགའ་ཞིག་ནི་དོན་ཉེ་བ་ལ་མི་ལྟོས་པ་མ་ཡིན་ནོ། །ཇི་ལྟ་བུ་མ་ཡིན་ན། འདི་ཉིད་ཅེས་བྱ་
བས་འཇུག་པ་ཞེས་བྱ་བ་ནི་ཚིག་གི་ལྷག་མའོ། །འདིའི་དངོས་པོ་སྟེ། འདིའི་སྒྲས་བརྗོད་པར་བྱ་བའི་དོན་གྱི་དངོས་པོ་ནི་འདི་ཉིད་དོ། །དེ་ལྟ་བུར་གྱུར་པའི་མཚན་ཉིད་ཀྱང་གསུམ་པའོ། །འདི་ཁྱད་པར་ཅན་གྱི་དོན་སྣང་བའི་རྣམ་པར་རྟོག་པ་གང་ཡིན་པ་དེ་ནི་དོན་ཉེ་བ་ལ་ལྟོས་པ་ཡིན་ནོ། །ག་ལས་ཤེ་ན། གང་གི་ཕྱིར་འདི་ལ་བ་ལང་ངོ་ཞེས་བྱ་བའི་རྣམ་པར་རྟོག་པ་ནི་བ་ལང་ཉེ་བ་ཡིན་ན་མི་འགྱུར་རོ། །འདིས་ནི་ལྡོག་པ་བསྟན་ཏོ། །ཤུགས་ཀྱིས་དོན་ཡོད་ན་ནི་འགྱུར་རོ་ཞེས་རྗེས་སུ་འགྲོ་བ་འཕངས་ཏེ། རྗེས་སུ་འགྲོ་བ་དང་ལྡོག་པ་དག་གིས་ཀྱང་ལྟོས་པ་དང་བཅས་པ་གྲུབ་པ་ཡིན་ནོ། །གལ་ཏེ་དེ་ལྟ་ན་ཡང་རྣམ་པར་རྟོག་པ་རྣམ་པ་གཉིས་ཏེ། ལྟོས་པ་དང་བཅས་པ་དང་ལྟོས་པ་མེད་པའོ། །དེ་ལ་མངོན་སུམ་ལྟོས་པ་མེད་པར་ཐལ་བ་མ་ཡིན་ནམ་ཞེས་དོགས་པ་ལ། ཁོ་བོ་ཅག་གི་ཞེས་སྨོས་ཏེ། བདག་ཅག་གི་མངོན་སུམ་ཡང་འདི་ཉིད་ཡིན་གྱི་གཞན་ནི་མ་ཡིན་ནོ། །དེས་ན་རྣམ་པར་རྟོག་པ་འགའ་ཞིག་དོན་ལ་མི་ལྟོས་པ་ཡིན་ཡང་མངོན་སུམ་ལ་མི་ལྟོས་པར་དོགས་པར་མི་འགྱུར་རོ། །དེ་ལྟར་ན་འདིས་ནི་རྣམ་པར་རྟོག་པ་རྣམ་པ་གཉིས་ཡིན་ཡང་འདིའི་དོན་གྱི་ཡུལ་ཅན་ཡིན་པའི་ཕྱིར་མངོན་སུམ་དོན་ཉེ་བ་ལ་ལྟོས་པ་དང་བཅས་པ་ཉིད་དུ་བསྟན་ཏོ། །མངོན་སུམ་གྱི་མཚན་ཉིད་སྦྱར་བའི་ཕྱིར་སྨྲས་པ། ཉེ་བ་ཡང་དེ་ཡིན་ལ་དོན་ཀྱང་ཡིན་པ་དེ་ངེས་པའི་མཚན་ཉིད་ངོ་བོ་ཉིད་གང་ལ་ཡོད་པ་དངོས་པོ་སྟེ་དེའི་ཕྱིར་རོ། །གཞན་དག་གི་དོན་ཉེ་བ་སྣང་བ་ཡིན་ལ་བདག་ཅག་གི་དོན་ཉེ་བ་ངེས་པ་མངོན་སུམ་གྱི་མཚན་ཉིད་ཡིན་ནོ། །གང་གི་ཕྱིར་ངེས་པ་འདི་ནི་དབང་པོའི་བྱེད་པ་ཡོད་ན་འགྱུར་བ་དེའི་ཕྱིར་འདི་ཉིད་མངོན་སུམ་ཡིན་ནོ། །དོན་ཉེ་བ་ལ་ལྟོས་པ་ཉིད་དེ་ནི་འདིའི་དོན་གྱི་ཁྱད་པར་ཅན་གྱི་དངོས་པོར་རྣམ་པར་རྟོག་པ་ལ་ཡོད་པ་མ་ཡིན་ནོ། །ཅིའི་ཕྱིར་ཞེ་ན། བཤད་པ། གང་གི་ཕྱིར་འདིའི་དོན་དུ་སྣང་བའི་བློ་མིག་གི་བྱེད་པ་ཡོད་པ་ལ་མཐོང་བ་གང་ཡིན་པ་དེ་ནི་དབང་པོའི་བྱེད་པ་མེད་པར་ངེས་པ་ལས་ཀྱང་འགྱུར་བར་མཐོང་སྟེ། མིག་གི་བྱ་བ་བྱེད་པར་ཡང་འདི་བུམ་པ་ཞེས་མཐོང་བའི་ཡུལ་དུ་རྟོག་པ་ཡོད་པ་ཡིན་ནོ། །གལ་ཏེ་དབང་པོའི་བྱེད་པ་ཡོད་དམ་མེད་ཀྱང་
རུང་སྟེ་རེག་པ་ལས་འདིའི་དོན་དུ་སྣང་བ་ནི་ཉེ་བའི་བུམ་པ་ཉིད་ལ་འདི་བུམ་པའོ་ཞེས་རྟོག་པ་མ་ཡིན་ནམ། ཅིའི་ཕྱིར་རྣམ་པར་རྟོག་པ་འདི་དོན་ཉེ་བ་ལ་ལྟོས་པ་མེད་པ་ཡིན་ཞེས་བརྗོད་ཅེ་ན། མེད་དང་ཐ་དད་པ་མེད་པའང༌། །ཞེས་གསུངས་ཏེ། རྣམ་པར་བརྟག་པར་བྱ་བའི་དོན་གང་ཞིག་ཡོད་པ་ཡིན་ཡང་རྣམ་པར་རྟོག་པ་དེ་བསྐྱེད་པ་ལ་དོན་དེ་མེད་པ་ལས་ཐ་དད་པ་མེད་བ་ཉིད་ཡིན་ནོ། །གང་ཞིག་གང་བསྐྱེད་པའི་ནུས་པ་མེད་པ་དེ་ནི་དེ་ལ་ལྟོས་ནས་མེད་པར་བརྗོད་པ་ཡིན་ནོ། །གཏན་ཚིགས་ཅིའི་ཕྱིར་མེད་པ་དང་ཐ་དད་པ་མེད་ཅེ་ན། བཤད་པ། གཟུགས་ལ་སོགས་པའི་དོན་དེ་དབང་པོའི་སྤྱོད་ཡུལ་མ་ཡིན་པ་སྟེ། རང་གི་དབང་པོའི་སྤྱོད་ཡུལ་མ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །གང་གི་ཕྱིར་དབང་པོའི་ཡུལ་གྱི་དོན་ནི་བྱེད་པ་དང་བཅས་པའི་དབང་པོ་དང་ལྷན་ཅིག་ཏུ་རང་གི་ཤེས་བ་སྐྱེད་པར་བྱེད་པ་ཡིན་ན། སྤྱོད་ཡུལ་མ་ཡིན་པ་དེ་ལ་ནི་དབང་པོའི་བྱེད་པ་མེད་པ་ཡིན་ནོ། །དེའི་ཕྱིར་རང་གི་ཡུལ་ཅན་གྱི་ཤེས་པ་བ་སྐྱེད་པ་ལ་མེད་པ་དང་ཐ་དད་པ་མེད་པ་ཡིན་ནོ། །དེའི་ཚེ་གཟུགས་ཡོད་པ་ཉིད་མ་ཡིན་ནམ། དེའི་ཕྱིར་མེད་པ་ལས་ཐ་དད་པ་མེད་པར་ཇི་ལྟར་འགྱུར་ཞེས་དོགས་པ་ལ། དབང་པོའི་ཡུལ་མ་ཡིན་པའི་ཞེས་གསུངས་ཏེ། གང་གི་ཕྱིར་དོན་གང་ཞིག་དབང་པོའི་ཡུལ་མ་ཡིན་པ་དེ་རི་བོང་གི་རྭ་ལ་སོགས་པ་མེད་པ་ལས་ཐ་དད་ཅི་ཡོད་དེ། ཅུང་ཟད་ཀྱང་ཡོད་པ་མ་ཡིན་ཏེ། ཡུལ་མ་ཡིན་པའི་དོན་དེ་ཉིད་ཀྱི་དབང་པོ་གང་ཡིན་པ་དེ་ཤེས་པར་ཕ་རོལ་པོས་འདོད་པ་གང་ཡིན་པ་དེ་སྐྱེད་པ་སྟེ་ཡུལ་ཉིད་དུ་འགྱུར་བ་ལ་ཐ་དད་པ་ཅུང་ཟད་ཀྱང་ཡོད་པ་མ་ཡིན་ནོ། །འདི་སྐད་བརྗོད་པ་ཡིན་ནོ། །གལ་ཏེ་ཡོད་པ་ཡིན་པའི་ཕྱིར་རང་གི་ངོ་བོས་ཐ་དད་པ་ཡིན་ཡང་ཡུལ་མ་ཡིན་པས་བྱེད་པ་མེད་པའི་ཕྱིར་དབང་པོའི་དེའི་ཤེས་པ་བསྐྱེད་པར་བྱ་བ་ལ་རི་བོང་གི་རྭ་ལ་སོགས་པ་དང་ཁྱད་པར་མེད་པ་ཁོ་ནའོ། །ཉེ་བའི་རང་བཞིན་ཤེས་པ་སྐྱེད་པར་བྱེད་པ་ཡིན་ཡང་མེད་པ་ལས་ཐ་དད་པ་མེད་པར་འགྱུར་བ་ཇི་ལྟར་ཡིན་ཞེ་ན། བཤད་པ། ཡུལ་མ་ཡིན་པའི་དོན་དེའི་ནུས་པ་སྟེ་བྱེད་པ་གང་ཡིན་པ་དེ་ནི་རང་བཞིན་འཛིན་པའི་རང་གི་དབང་པོའི་ཤེས་པ་དེ་ལས་དངོས་སུ་སྟེ་བར་དུ་མཆོད་པ་ལྡོག་པའི་ཕྱིར་རོ། །ཡུལ་མ་ཡིན་པའི་
དོན་དངོས་སུ་རང་གི་ཡུལ་གྱི་དབང་པོའི་ཤེས་པ་སྐྱེད་པར་མི་བྱེད་པས་ནུས་པ་མེད་པ་དེའི་ཕྱིར་དེ་ལ་ལྟོས་ཏེ་མེད་པ་དང་འདྲ་བ་ཡིན་ནོ། །གལ་ཏེ་དེ་ལྟར་ན་ཡང་མེད་པ་ནི་བརྒྱུད་པས་ཀྱང་ཉེ་བར་སྦྱོར་བ་མེད་པའི་ཕྱིར་མི་ཉེ་བ་ཉིད་ཡིན་ལ་ཡོད་པ་ནི་དེ་ལས་བཟློག་པ་མ་ཡིན་ནམ། ངེས་ན་ཇི་ལྟར་ཁྱད་བར་མེད་པ་ཡིན། འདི་ལ་བརྒྱུད་པས་ཕན་འདོགས་པ་ནི་ཡོད་པ་ཡིན་ཏེ། གཟུགས་མེད་ན་ནི་རེག་པ་མེད་པར་འགྱུར་ལ། དེ་མེད་ན་དེའི་ཤེས་པ་དེ་མེད་ན་འདི་ཉིད་ཀྱི་ཡུལ་ཅན་གྱི་མཐོང་བའི་རྣམ་པར་རྟོག་པ་མེད་པར་འགྱུར་བ་དེས་ན་ཐ་དད་པ་མེད་པར་རིགས་པ་མ་ཡིན་ནོ་ཞེས་དོགས་པ་ལ། བརྒྱུད་པས་ཉེ་བར་སྦྱོར་བ་དེ་ནི་འདས་པ་ལས་ཀྱང་མཐོང་བའི་ཕྱིར་རོ་ཞེས་གསུངས་ཏེ། ཀྱང་གི་སྒྲ་ནི་འདས་པ་ལས་ད་ལྟར་བྱུང་བ་ཁྱད་པར་མེད་པར་བསྟན་པའི་དོན་དུའོ། །གང་གི་ཕྱིར་དེ་འདས་པ་ལ་ཡང་མཐོང་བ་དེའི་ཕྱིར་དེ་མཐོང་བ་ལས་དོན་གྱི་བྱེད་པ་རྣམ་པར་གནས་པར་ག་ལ་འགྱུར། གང་གི་ཕྱིར་འདས་པ་ནི་འབྲས་བུ་བསྐྱེད་པའི་དུས་ན་རི་བོང་གི་རྭ་དང་འདྲ་བ་ཡིན་ཏེ། དེའི་ཕྱིར་དེ་ལས་བྱེད་པ་མེད་དོ། །ཉེ་བར་སྦྱོར་བ་ཇི་ལྟར་ཞེ་ན། དེའི་རྒྱུ་སྐྱེད་པར་བྱེད་པ་ཡིན་པའི་ཕྱིར་ཕན་འདོགས་པར་ཉེ་བར་གདགས་ཏེ། དོན་དམ་པར་ནི་དེ་ལ་བྱེད་པ་ཡོད་པ་མ་ཡིན་ནོ། །དེ་བཞིན་དུ་གཞན་དུ་ཡང་གང་བརྒྱུད་པས་ཉེ་བར་སྦྱོར་བ་དེ་ནི་དོན་དམ་པར་ནི་རྒྱུ་མ་ཡིན་ཏེ། དེ་རྒྱུའི་རྒྱུ་ཡིན་པའི་ཕྱིར་དེ་ལྟར་ཉེ་བར་བསྟན་པ་ཡིན་ནོ། །དེའི་ཕྱིར་དེ་ལྟར་དབང་པོའི་སྤྱོད་ཡུལ་མ་ཡིན་པ་ལ་བལྟ་བར་བྱ་བའི་དངོས་པོར་ཡིན་ན་ཡང་རི་བོང་གི་རྭ་དང་འདྲ་བར་རང་གི་དབང་པོའི་ཤེས་པ་སྐྱེས་བ་ལ་ནུས་པ་མེད་པར་བསྒྲུབས་ནས་དབང་པོའི་ཡུལ་མ་ཡིན་པ་འཛིན་པའི་ཕྱིར། དེ་ལ་འཛིན་པའི་ཤེས་པ་མངོན་སུམ་མ་ཡིན་པ་མཇུག་བསྡུ་བ་བཤད་པ་ནི། དེའི་ཕྱིར་རེག་པའི་དབང་པོ་བྱེད་པ་དང་བཅས་པ་ཅན་གྱི་སྐྱེས་བུ་འདི་མངོན་སུམ་དང་ལྡན་པ་མངོན་སུམ་ཅན་དུ་བརྟག་པར་རིགས་པ་མ་ཡིན་ནོ། །རེག་པ་ཡིན་ཡང་ཡུལ་གང་ལ་མངོན་སུམ་དང་ལྡན་པ་མ་ཡིན་ཞེ་ན། བྱེད་པའི་སྒོ་ནས་ཡུལ་སྟོན་པར་བྱེད་པ་ནི་མེད་པ་ལས་ཁྱད་པར་མེད་པ་ལ་རྟོགས་པ་སྟེ་ཤེས་པའོ། །འདི་སྐད་དུ་མེད་པ་ལས་ཁྱད་པར་དུ་མ་གྱུར་པའི་ཡུལ་ལ་རྟོགས་པས་ནི་མངོན་སུམ་དང་ལྡན་པ་མ་ཡིན་ནོ། །
འདི་བུམ་པ་ཞེས་བྱ་བ་ནི་རྟོགས་པའི་རྣམ་པར་བརྗོད་པའོ། །ཇི་ལྟར་ན་དེ་མེད་པ་དང་ཁྱད་པར་མེད་པ་ཡིན་ཞེ་ན། ཡུལ་མ་ཡིན་པ་ཉིད་ཀྱིས་ཞེས་སྨོས་ཏེ། གང་གི་ཕྱིར་དབང་པོའི་ཡུལ་མ་ཡིན་པ་དེའི་ཕྱིར་རང་གི་ཡུལ་ཅན་གྱི་དབང་པོའི་ཤེས་པ་ལ་མེད་པ་དང་ཁྱད་པར་མེད་པ་ཡིན་ནོ། །འདི་ཅི་ཞིག་བྱས་པས་རྟོགས་ཤེ་ན། རེག་པ་ལས་ཞེས་སྨོས་ཏེ། མུན་པའི་གནས་སྐབས་སུ་མིག་གི་བྱེད་པ་མེད་པ་ན་རེག་པའི་རྣམ་པར་ཤེས་པའི་འོག་རོལ་དུ་དེ་རྟོགས་པའི་ཕྱིར་རོ། །དེའི་ཚེ་རེག་པར་བྱ་བའི་དངོས་པོ་ཉིད་རེག་པའི་དབང་པོ་ལས་སྐྱེས་པའི་དོན་གྱི་ཁྱད་པར་ཅན་གྱི་དངོས་པོར་རྟོག་པས་གཟུང་བ་མ་ཡིན་ནམ། རེག་བྱ་དེ་ཡང་རེག་པའི་དབང་པོའི་ཡུལ་མ་ཡིན་ན་གང་གིས་ན་དེ་ལ་བརྟེན་པའི་རྣམ་པར་ཤེས་པ་བསྐྱེད་པ་ལ་མེད་པ་དང་མཚུངས་པར་འགྱུར། དེས་ན་དབང་པོའི་ཡུལ་འཛིན་པའི་ཕྱིར་དབང་པོ་ལས་སྐྱེས་བ་དང་དོན་ཉེ་བ་ལ་ལྟོས་པ་ཡིན་ནོ། །ཅི་སྟེ་རེག་པ་ནི་རེག་བྱ་ཡིན་ལ་དེའི་ཚེ་གཟུང་བའི་བུམ་པ་ནི་བལྟ་བར་བྱ་བ་ཡིན་ནོ་ཞེས་བྱ་བར་ཕ་རོལ་གྱི་འདོད་པ་ཡིན་ན། དེ་ནི་མི་རིགས་ཏེ། གང་གི་ཕྱིར་རེག་པའི་དངོས་པོར་གྱུར་པས་ན་རེག་པ་སྟེ། རེག་བྱ་གང་ཡིན་པ་དེ་ཉིད་ནི་མཐོང་བའི་རྫས་ཡིན་ནོ། །དེས་ན་མཐོང་བ་གང་ཡིན་པ་དེ་ཉིད་ལ་རེག་ནས་འདིའི་དོན་གྱི་ཁྱད་པར་ཅན་དུ་རྟོགས་པ་ཡིན་ནོ། །གལ་ཏེ་ཞེས་བྱ་བ་ནི་འདི་ནི་གཞན་གྱི་ཁས་བླངས་པའོ་ཞེས་སྟོན་པའོ། །འདི་ཉིད་རྣམ་པར་འགྲེལ་པ་བཤད་པ་ནི་དབང་པོའི་ཡུལ་མ་ཡིན་པའི་ཕྱིར་མེད་པ་དང་འདྲ་བ་ཡིན་ནོ་ཞེས་ཁྱེད་ཀྱིས་གང་བརྗོད་པ་དེ་ནི་མ་ཡིན་ཏེ། གང་གི་ཕྱིར་རེག་པ་ནི་རེག་བྱའོ། །ཡང་གི་སྒྲ་ནི་མཐོང་བ་མ་ཡང་ཡིན་པ་དེ་རྟོགས་ནས་འདི་ནི་བུམ་པའོ་ཞེས་རྟོགས་པ་ཡིན་ནོ། །དེའི་ཕྱིར་དེ་ལྟར་ཤེས་པ་དེ་ནི་རེག་པའི་དབང་པོ་ལས་སྐྱེས་པ་ཡིན་ནོ་ཞེ་ན་ཞེས་བྱ་བ་ནི་གལ་ཏེ་དེའི་དོན་ཏོ། །མ་ཡིན་ཞེས་བྱ་བ་ནི་རྣམ་པར་རྟོག་པའི་ཤེས་པ་འདི་ནི་རེག་པའི་དབང་པོའི་ཡུལ་འཛིན་པ་མ་ཡིན་ཏེ། འདིར་འདི་ནི་བུམ་པའོ་ཞེས་བྱ་བ་དེ་ལྟ་བུའི་རྣམ་པ་ཅན་གྱི་ཤེས་པ་ལ་ཁ་དོག་སྣང་བའི་ཕྱིར་རོ། །འདི་ཉིད་ཀྱི་རྣམ་པར་འགྲེལ་པ་བཤད་པ་ནི། ཤེས་པ་འདི་ནི་རེག་པའི་དབང་པོ་དེ་ཉིད་ལས་སྐྱེས་པར་མི་རིགས་ཏེའོ། །འདི་བུམ་པའོ་སྙམ་པ་
ཞེས་བྱ་བ་ནི་ཤེས་པའི་རྣམ་པར་སྟོན་པ་སྟ། འདི་ལྟ་བུའི་རྣམ་པ་ཞེས་བྱ་བའི་དོན་ཏོ། །རེག་པའི་དབང་པོའི་བྱེད་པའི་གནས་སྐབས་སུ་བུམ་པ་དེ་ཁ་དོག་གི་ཁྱད་པར་ཅན་དུ་སྔོན་ཇི་ལྟར་མཐོང་བ་དེ་ལྟར་རྣམ་པ་དེ་ཉིད་ཀྱིས་དེ་ཉིད་འདི་ཡིན་ནོ་ཞེས་མཐོང་བ་དང་རེག་པ་གཅིག་ཏུ་མཚམས་སྦྱར་ནས་སེམས་པ་ན། ཚོགས་པ་ལས་སྐྱེས་པའམ་སྐྱེས་དེ་ལས་གཞན་བཅོས་སུ་ཡང་རུང་སྟེ་ཁ་དོག་སྣང་བའི་ཕྱིར་རོ། །དབང་པོའི་སྤྱོད་ཡུལ་མ་ཡིན་པའོ། །ཁ་དོག་ནི་དེའི་ཚེ་རང་གི་ཡུལ་ཅན་གྱི་དབང་པོའི་ཤེས་པ་བསྐྱེད་པར་བྱ་བ་ལ། མེད་པ་དང་འདྲ་བ་ཡིན་ནོ་ཞེས་གནས་སོ། །དེ་བཞིན་དུ་མཐོང་དུ་ཟིན་ཀྱང་རེག་པའི་གནས་སྐབས་དྲན་པ་ན་འདི་བུམ་པའོ་སྙམ་པའི་ཤེས་པ་ནི་དོན་ཉེ་བ་ལ་མི་ལྟོས་པ་ཡང་ཡིན་པར་བལྟའོ། །འོ་ན་རྣམ་པར་རྟོག་པ་འདི་ཅི་ཞིག་ཡིན་སྙམ་དུ་དོགས་པ་བསུ་ནས་མཇུག་བསྡུ་བར་འདོད་པས་བཤད་པ། ངེས་ན་དྲན་པ་སྟེ་དྲན་པའི་རང་བཞིན་གྱི་རྣམ་པར་རྟོག་པ་འདི་ནི་དོན་ཉེ་བ་ལ་ལྟོས་པ་མ་ཡིན་ནོ། །འོ་ན་དབང་པོའི་བྱེད་པའི་མཇུག་ཐོགས་སུ་འབྱུང་བར་ཇི་ལྟར་འགྱུར་ཞེ་ན། བཤད་པ། གཟུགས་དང་རེག་པ་དེ་དག་གི་རྣམ་པར་ཤེས་པའི་རྒྱུ་དེ་ཉིད་གང་ལ་ཡོད་པ་ཤེས་པ་གཉི་གའི་རྒྱུ་དང་ལྡན་པ་ཡིན་གྱི་དབང་པོ་ལས་སྐྱེས་པ་ནི་མ་ཡིན་ནོ། །དེ་ཉིད་བསྟན་པ་ནི་ཡིད་ཅེས་བྱ་བ་ཡིན་ནོ། །ཡིད་ཀྱི་རྣམ་པར་ཤེས་པ་ལས་ཐ་མི་དད་པར་ཐལ་བའི་སྒོ་ནས་དོན་ཉེ་བ་ལ་མི་ལྟོས་པ་དང༌། སོགས་པ་སྨོས་པས་འཕངས་པ་འདོད་པ་དང་འབྲེལ་བ་ཉིད་དུ་དབང་པོའི་ཤེས་པ་བརྗོད་དུ་ཟིན་ཀྱང་དབང་པོའི་ཤེས་པ་ཡིད་ཀྱི་ཤེས་པས་མངོན་པར་འདུས་བྱས་པའི་དོན་འཛིན་པར་དོགས་པ་ལ་ཡང་བརྗོད་པ་ཡིན་ཏེ། དབང་པོའི་ཤེས་པ་ཡང་འདོད་པ་ལ་རག་ལས་པར་དོགས་པ་བསལ་བའི་དོན་དུ་བ་ལང་གི་བློ་བཟློག་ཅིང་ཞེས་བྱ་བ་ལ་སོགས་པས་བཀག་པ་ཡིན་ལ། རྣམ་པར་རྟོག་པ་འགའ་ཞིག་འདིའི་དོན་དུ་འཛིན་པ་ནི་དོན་ཉེ་བ་ལ་ལྟོས་པ་ཡིན་གྱི་གཞན་དུ་ནི་མ་ཡིན་ནོ་སྙམ་དུ་དོགས་པ་དགག་པའི་ཕྱིར་མ་ཡིན་འདི་ནི་བུམ་པ་ཞེས་བྱ་བ་ལ་སོགས་པས་བཀག་པ་ཡིན་ནོ། །དེའི་ཕྱིར་གང་ཟློས་པའི་ཉེས་པར་འགྱུར་བ་སྔར་སྤྱིར་བརྗོད་པ་ཉིད་ཡང་བཤད་པ་དོན་མེད་པ་མ་ཡིན་ནོ། །གང་གི་ཕྱིར་སྔར་ནི་ཉེ་བ་མ་ཡིན་པའི་དོན་འཛིན་པ་ཉིད་ཀྱིས་དབང་པོའི་ཤེས་པ་དང་ཡིད་ཀྱི་ཤེས་པ་དག་ཁྱད་པར་མེད་པར་
ཐལ་བར་བརྗོད་པ་ཡིན་ལ། ད་ལྟ་ནི་ཡིད་ཀྱིས་ཉེ་བར་གཏད་པ་བརྟགས་པའི་དངོས་པོ་འཛིན་པས་དོན་ཉེ་བ་ལ་མི་ལྟོས་པ་དང༌། འདོད་པ་ཙམ་ལ་རག་ལས་བར་བརྗོད་པ་ཡིན་ནོ། །བརྟགས་པའི་དངོས་པོ་འཛིན་པ་ཉིད་ནི་བརྟགས་པ་འཛིན་པ་ཡིན་ལ། དེ་ཉིད་ཀྱང་ཉེ་བ་མ་ཡིན་པའི་དོན་འཛིན་པ་ཡིན་པ་དེས་ན་འདི་ཉིད་ཀྱིས་འདོད་པ་ལྡོག་པ་དང་དོན་ཉེ་བ་ལ་མི་ལྟོས་པར་བརྗོད་པའི་ཕྱིར་ཟློས་པར་དོགས་པར་འགྱུར་རོ། །དེའི་ཕྱིར་དེ་ལྟར་དབང་པོའི་རྣམ་པར་ཤེས་པ་ཡིད་ཀྱི་རྣམ་པར་ཤེས་པས་མངོན་པར་འདུས་བྱས་པའི་དོན་གྱིས་ཁྱད་པར་དུ་བྱ་བའི་དོན་འཛིན་པ་མ་ཡིན་པར་བསྒྲུབས་ནས་སྒྲའི་ཁྱད་པར་ཡིད་ཀྱིས་སྦྱར་བ་ལ་ཡང་འཛིན་པ་མ་ཡིན་པར་བསྒྲུབ་པའི་ཕྱིར། གཞན་ཡང་ཞེས་བྱ་བ་སྨོས་ཏེ། བརྡའི་དུས་སུ་དོན་གང་ཞིག་ཡོད་པ་སྟེ་སྣང་བའི་རང་བཞིན་ལ་སྒྲ་གང་མཐོང་ནས་ཡང་དུས་གཞན་དུ་ལྷན་ཅིག་སྤྱོད་པ་གྲུབ་པའི་དོན་དེ་མཐོང་བའི་རྒྱུ་ལས། བརྡའི་དུས་སུ་མཐོང་བའི་སྒྲ་དེ་དྲན་པར་རིགས་པ་ཡིན་ནོ། །བརྡའི་ཡུལ་དུ་གྱུར་པའི་དོན་དེ་རྟོགས་པ་སྟེ། མཐོང་བ་མེད་ན་ནི་དུས་གཞན་དུ་སྒྲའི་ཁྱད་པར་ཏེ་སྒྲའི་བྱེ་བྲག་ཇི་ལྟར་དྲན། ངེས་པ་ཉིད་ཀྱིས་མ་ཡིན་ནོ་སྙམ་དུ་དགོངས་པའོ། །སྒྲ་དེ་མ་དྲན་ན་སྒྲ་དེ་དང་དོན་ཡིད་ཀྱི་རྣམ་པར་ཤེས་པས་སྦྱར་ཞིང་བསྲེས་པའི་དོན་ཇི་ལྟར་དབང་པོའི་རྣམ་པར་ཤེས་པས་རྟོགས། གལ་ཏེ་ཞེས་བྱ་བ་ལ་སོགས་པས་ནི་གང་ཞིག་ཁས་བླངས་པས་ཉེས་པ་འདིའི་སྐབས་སུ་འགྱུར་བའི་ཁས་བླངས་པ་དེ་སྟོན་ཏོ། །རང་གིས་རྗོད་པར་བྱེད་པ་ནི་རང་རྗོད་བྱེད་དེ་སྨྲ་བར་བྱེད་པའི་སྒྲའོ། །དེ་ཉིད་ནི་ཁྱད་པར་ཏེ་དེ་ལ་ལྟོས་པའི་དོན་དེ་ཉིད་དོ། །ཤེས་པས་ཞེས་བྱ་བ་ནི་དབང་པོ་ལ་བརྟེན་པ་སྟེ་ཡིད་ལ་ནི་རྣམ་པར་རྟོག་པ་ཅན་ཉིད་ལ་རྩོད་པ་མེད་པའི་ཕྱིར་རོ། །བརྡ་བྱང་བས་ཀྱང་ཞེས་བྱ་བ་འདི་ནི་ཁྱད་པར་ཡིན་ཏེ། གཞན་དག་གིས་ནི་རྗོད་པར་བྱེད་པའི་སྒྲས་ཁྱད་པར་ཅན་དུ་སྦྱོར་མི་སྲིད་པའི་ཕྱིར་རོ། །གལ་ཏེ་དེ་ལྟར་ངེས་པར་ཁས་ལེན་པ་ཡིན་ན་ད་ནི་དེ་ལྟར་ཁས་བླངས་པ་ན་དབང་པོའི་ཤེས་པའི་བརྗོད་པ་དབང་པོའི་ཤེས་པ་ཡོད་དོ་ཞེས་ཐོས་པ་གང་ཡིན་པ་དེ་ཡང་ལྡོག་པར་འགྱུར་ན། ཉམས་སུ་མྱོང་བ་ལྟ་ཅི་སྨོས་ཞེས་སྨྲ་བའི་ཚུལ་གྱིས་སྟོན་པར་བྱེད་པའོ། །རྗོད་པར་བྱེད་པ་ཉིད་ཁྱད་པར་ཏེ་དེ་ལས་གཞན་
ལས་ཁྱད་པར་དུ་གྱུར་པའི་ཕྱིར་རོ། །དེ་ལ་དྲན་པ་མི་རིགས་པའི་ཕྱིར་རོ། །ཇི་ལྟར་དྲན་པ་མི་རིགས་ཤེ་ན། བཤད་པ་གང་གི་ཕྱིར་བརྡའི་དུས་སུ་གོམས་པའི་དོན་མཐོང་བ་ཡོད་ན་ནི་དོན་མཐོང་བ་དེ་ལས་བརྡའི་དུས་སུ་དོན་ཉེ་བ་ལ་མཐོང་བ་སྒྲ་དྲན་པར་འགྱུར་བའི་ཕྱིར། ཇི་ལྟར་མེ་དང་དུ་བ་དེ་དག་གི་འབྲེལ་པ་གྲུབ་པ་ནི་མེ་མཐོང་བ་ན་ངེས་པ་དང་ལྡན་པའི་དུ་བའི་དྲན་པ་སྐྱེ་བར་འགྱུར་བ་དེ་བཞིན་དུ། སྒྲ་དང་དོན་དག་ཀྱང་ལྷན་ཅིག་སྤྱོད་པ་གྲུབ་པ་ཅིག་མཐོང་ན་ངེས་པ་ཅན་གྱི་དྲན་པར་འགྱུར་གྱི་གཞན་དུ་ནི་མ་ཡིན་ནོ། །འོ་ན་དོན་མཐོང་ནས་སྒྲ་ངེས་པར་དྲན་པ་ཡིན་ནོ་ཞེས་དོགས་པ་ལ་བཤད་པ་བརྡ་གོམས་པ་འདིས་དོན་གང་ལ་སྒྲ་མེད་པ་དེ་མི་མཐོང་བ་ལ་མཐོང་ན་ཡང་སྟེ་མཐོང་བ་མེད་པའི་ཕྱིར་ངེས་པའི་ཚུལ་གྱིས་སྒྲ་དེ་མི་དྲན་ལ་མ་དྲན་ན་སྟེ་མ་དྲན་པའི་ཕྱིར་དོན་ལ་སྒྲ་སྦྱོར་བར་མི་བྱེད་དོ། །ཡིད་ཀྱིས་དོན་ལ་སྒྲ་མ་སྦྱར་ན་རྟོགས་པར་མི་འགྱུར་ཏེ་མི་མཐོང་ངོ༌། །དོན་འདི་ཡིན་ཏེ། ངེས་པ་ཅན་དུ་དྲན་པ་ལས་ནི་དོན་མཐོང་བ་ཡིན་ལ། དོན་མཐོང་བ་ལས་ཀྱང་ངེས་པ་ཅན་དུ་དྲན་པ་ཡིན་པའི་ཕྱིར་ཕན་ཚུན་བརྟེན་པའི་ཉེས་པས་འགྲོ་བ་མ་ལུས་པ་ལོང་བ་སྟེ་མཐོང་བ་དང་བྲལ་བར་འགྱུར་རོ། །གང་གི་ཕྱིར་ཐམས་ཅད་ཀྱི་ཚུལ་ནི་འདི་ཉིད་ཡིན་པར་འདོད་དེ། དེས་ན་མ་ལུས་པ་ཞེས་གསུངས་སོ། །ཉེ་བ་ནི་མངོན་སུམ་དུ་གྱུར་པ་སྟེ། རུང་བའི་ཡུལ་ན་གནས་པ་ཅན་ཡིན་ནོ། །ནང་གི་སྟེ་ནང་ན་ཡོད་པའི་འདུ་བྱེད་སྒྲ་དྲན་པའི་བག་ཆགས་སད་པས་བྱས་པ་ནི་རང་གི་འབྲས་བུ་སྐྱེད་པ་ལ་མངོན་དུ་ཕྱོགས་པར་བྱས་པ་སྟེ། བག་ཆགས་སད་པ་དེ་སྒྲ་དྲན་པར་འགྱུར་ཏེ། ཇི་ལྟར་མཐོང་བས་ངེས་པ་ཅན་དུ་དྲན་པ་ལྟར་དོན་ཉེ་བས་དྲན་པའི་བག་ཆགས་སད་པར་འགྱུར་བ་དེའི་ཕྱིར་མ་མཐོང་ཡང་དྲན་པ་ཡིན་ནོ། །ཐག་རིང་པོ་ན་གནས་པ་ཉིད་ཀྱང་དྲན་པའི་རྒྱུ་ཡིན་ན་ནི་རྟག་ཏུ་དྲན་པར་ཐལ་བའི་ཕྱིར་ཉེ་བ་ཉིད་ལས་དྲན་པའི་རྒྱུར་བརྗོད་པ་ཡིན་ནོ། །དོགས་པ་བསུ་ནས་མ་ཡིན་ཏེ་ཞེས་སྨོས་ཏེ་དེ་ནི་ཡོད་པ་མ་ཡིན་ནོ། །ཅིའི་ཕྱིར་ཞེ་ན། བཤད་པ་སྒྲ་དང་དོན་དག་གི་འབྲེལ་པའི་རང་བཞིན་གང་ཡིན་པ་དེ་ནི་ངོ་བོ་མེད་པའི་ཕྱིར་ཏེ། དངོས་པོ་མ་ཡིན་པའི་ཕྱིར་རོ། །གང་ལ་དངོས་པོའི་འབྲེལ་པ་ཡོད་པ་དེ་ལ་ནི་རང་གི་ཡུལ་ཅན་གྱི་ཤེས་པ་ལ་མ་ལྟོས་པར་བསྐྱེད་པར་བྱ་བ་དང༌། སྐྱེད་པར་བྱེད་པ་ཡོད་པ་
ཡིན་ཏེ། ས་བོན་དང་མྱུ་གུ་བཞིན་ནོ། །གལ་ཏེ་སྒྲ་དང་དོན་དག་ཀྱང་ངོ་བོ་ཉིད་ཀྱིས་འབྲེལ་པ་ཡིན་ན་ནི་དེའི་ཚེ་ངོ་བོ་ཉིད་ཀྱིས་དོན་རང་གི་སྒྲའི་དྲན་པ་སད་པའི་རྒྱུ་ཉིད་དུ་ཡང་འགྱུར་བ་ཡིན་ན་དོན་གྱི་རང་བཞིན་ནི་སྒྲའི་བརྗོད་བྱ་མ་ཡིན་པ་དེས་ན་འབྲེལ་པ་མེད་པས་དེ་དེས་ཡུལ་ཅན་གྱི་དྲན་པ་སད་པར་བྱེད་པ་མ་ཡིན་ནོ། །དེ་ནི་སྒྲ་དང་འབྲེལ་པས་དྲན་པར་བྱེད་པ་ཡིན་གྱི་ཉེ་བ་མེད་པར་ནི་མ་ཡིན་ལ། འབྲེལ་པ་དེ་ཡང་ཡོད་པ་མ་ཡིན་ནོ། །སྔར་དོན་ཉེ་བས་བྱས་པའི་ནང་གི་རྣམ་པར་འགྱུར་བ་མེད་ན་སྒྲའི་བྱེད་བྲག་དྲན་པར་རིགས་པ་མ་ཡིན་ནོ་ཞེས་བྱ་བ་དེར་ནི་རང་གི་ངོ་བོས་འབྲེལ་པ་ཁས་བླངས་ནས་དྲན་པ་སད་པའི་རྒྱུ་ཉིད་ཡིན་ན་དབང་པོའི་ཤེས་པའི་རྒྱུ་ཉིད་བཀག་པ་ཡིན་ལ། ད་ལྟར་ནི་དེ་ཉིད་ཡོད་པ་མ་ཡིན་པའི་ཕྱིར་མཐོང་བ་ལ་ལྟོས་པ་ཉིད་ཀྱིས་དྲན་པར་འགྱུར་བ་ཡིན་ནོ་ཞེས་ཁྱད་པར་ཅན་དུ་བརྗོད་པ་ཡིན་ནོ། །འདི་ལྟར་སྐྱེས་བུའི་བློས་སྦྱར་བའི་འབྲེལ་པ་ནི་རྣམ་པར་རྟོག་པའི་སྣང་བའི་རང་བཞིན་ལ་ཡོད་པ་ཡིན་ལ། རྣམ་པར་རྟོག་པ་ལ་སྣང་བའི་རང་བཞི་དེ་ཡང་མཐོང་བ་སྔོན་དུ་འགྲོ་བ་ཅན་ཡིན་པ་དེས་ན་མཐོང་བ་ཡོད་ན་རྣམ་པར་རྟོག་པ་ལ་སྣང་བའི་རང་བཞིན་འབྲེལ་པའི་ཡུལ་ཉམས་སུ་མྱོང་བར་འགྱུར་ཞིང༌། དེ་ལ་ཡང་དེའི་སྒྲ་ངེས་པར་དྲན་པ་ཡིན་ནོ། །མེ་དང་དུ་བ་དག་ངོ་བོ་ཉིད་ཀྱིས་འབྲེལ་པ་ཡིན་ཡང་གཅིག་ཉེ་བ་ཙམ་གྱིས་གཞན་དྲན་པ་བག་ཆགས་སད་པའི་རྒྱུ་མ་ཡིན་ནམ། དེས་ན་ཅིའི་ཕྱིར་སྒྲ་དང་དོན་གྱི་འབྲེལ་པ་རང་གི་ངོ་བོ་ཡོད་པ་མ་ཡིན་པའི་ཕྱིར་དོན་ཉེ་བ་སྒྲ་དྲན་པའི་བག་ཆགས་སད་པའི་རྒྱུ་མ་ཡིན་ཞེས་བརྗོད་ཅེ་ན། འདིར་སྨྲས་པ། མེ་དང་དུ་བ་ནི་ཤེས་པ་ལ་མ་ལྟོས་པར་ངོ་བོ་ཉིད་ཀྱིས་བསྐྱེད་བྱ་སྐྱེད་བྱེད་དུ་གནས་པ་ཡིན་ཏེ། དེས་ན་ཕན་ཚུན་དྲན་པ་སད་པའི་རྒྱུ་ནི་མ་ཡིན་ནོ། །རང་གི་ངོ་བོར་གྲུབ་པའི་སྒྲ་དང་དོན་དག་གི་འབྲེལ་པ་ནི་ཤེས་པའི་ཡུལ་གྱི་རང་བཞིན་ཡིན་ཏེ། དེས་ན་རྟོགས་པ་པོའི་རྒྱུད་ལ་ཕན་འདོགས་པའི་སྒོ་ནས་དོན་སྒྲ་རྣམས་དང་འབྲེལ་བ་ཡང༌། གལ་ཏེ་རང་གི་ངོ་བོས་འབྲེལ་པ་ཡིན་ན་འགྱུར་བ་ཡིན་ན་དེ་ཡང་ཡོད་པ་མ་ཡིན་ནོ། །དེས་ན་ཕ་རོལ་པོས་སད་པའི་རྒྱུར་བརྗོད་པ་ནི་མི་འཐད་དོ་ཞེས་བཤད་པ་ཡིན་ནོ། །ཡང་ཅིའི་ཕྱིར་རྔོ་བོ་ཉིད་ཀྱི་འབྲེལ་པ་ཡོད་པ་མ་ཡིན་ཞེ་ན།
བརྡ་སྟེ་བརྡར་བཏགས་པ་ཉམས་སུ་མ་མྱོང་བ་ལ་སྒྲ་དང་དོན་གྱི་འབྲེལ་པ་མེད་པས་སོ། །འབྲེལ་བ་མེད་པ་ཡང་བརྡ་མེད་པའི་སྒྲ་ལས་དོན་མི་རྟོགས་པ་དང༌། དོན་ཉེ་བས་སྒྲ་དྲན་པར་མི་འགྱུར་བ་ལས་ཁོང་དུ་ཆུད་པ་ཡིན་ནོ། །འདི་སྙམ་དུ་བརྡ་མཐོང་བའི་ལྷན་ཅིག་བྱེད་པ་དང་རང་གི་ཉེ་བར་ལེན་པ་ལས་དོན་བརྗོད་པར་བྱ་བའི་ངོ་བོར་སྐྱེ་བ་ཡིན་ནོ་ཞེས་དོགས་པ་ལས་བཤད་པ། བརྡའི་དུས་སུ་སྐྱེས་པའི་རང་གི་ངོ་བོ་ནི་ཡོད་པར་མི་འཐད་དོ། །དེ་ལྟ་ན་ནི་གང་ཞིག་སྐྱེས་བུས་བརྗོད་པར་བྱ་བའི་ངོ་བོར་འདོད་པ་དེ་ཁོ་ན་བརྗོད་པར་བྱ་བ་ཡིན་ནོ་ཞེས་ཁས་བླངས་པར་འགྱུར་ལ། དེ་ཡང་འཐད་པ་མ་ཡིན་ཏེ། སྐྱེས་བུའི་འདོད་པས་དངོས་པོ་རྣམས་ཀྱི་རང་གི་ངོ་བོ་ཡོངས་སུ་འགྱུར་བ་སྟེ། གཞན་དུ་འགྱུར་བ་མ་ཡིན་པའི་ཕྱིར་རོ། །ཡོངས་སུ་འགྱུར་བ་ཡིན་ན་ནི་གཞན་བརྡ་མ་མཐོང་བ་སྟེ། བརྡ་མཐོང་བ་དང་མི་ལྡན་པ་རྣམས་ལ་ཡང་འབྲེལ་པ་རྟོགས་པ་ཡོད་པར་འགྱུར་རོ། །ཅིའི་ཕྱིར་སྙམ་ན་སྨྲས་པ། དོན་དེ་དེའི་བདག་ཉིད་ཡིན་པའི་ཕྱིར་ཏེ། འབྲེལ་པའི་རང་བཞིན་ཡིན་པའི་ཕྱིར་རོ། །དོན་དེ་རྟོགས་པར་བྱེད་པ་གཅིག་ལ་ལྟོས་ནས་སྒྲ་དང་འབྲེལ་པའི་ངོ་བོར་སྐྱེས་བའི་ཕྱིར་གཞན་དག་གིས་ཀྱང་འབྲེལ་པར་རྟོགས་པར་འགྱུར་རོ། །གང་གིས་བརྡ་མ་བྱས་པ་དེ་ལ་ནི་དེའི་ངོ་བོ་དེ་འདྲ་བ་མ་ཡིན་ནོ་ཞེ་ན། སྐྱེས་བུ་སོ་སོ་ལ་ཞེས་གསུངས་ཏེ། གང་གི་ཕྱིར་སྐྱེས་བུ་དང་སྐྱེས་བུ་ལས་བརྗོད་པར་བྱ་བའི་དོན་རྣམས་བདག་ཉིད་ཐ་དད་པ་མ་ཡིན་པ་དེའི་ཕྱིར་གཞན་བརྡ་རིག་པ་མ་ཡིན་པ་ཐམས་ཅད་ལ་འབྲེལ་པ་ཡོད་པར་འགྱུར་རོ། །ཇི་ལྟར་བ་བཞིན་བདག་ཉིད་ཐ་དད་པ་མ་ཡིན་པ་འདི་ཉིད་ཀྱང་ཅིའི་ཕྱིར་ཞེ་ན། བཤད་པ། བདག་ཉིད་གང་ལས་ཉམས་པ་དེ་ནི་བདག་མེད་པ་སྟེ་དེར་ཐལ་བར་འགྱུར་བའི་ཕྱིར་རོ། །གལ་ཏེ་སྐྱེས་བུ་སོ་སོ་ལ་བརྡའི་དུས་ན་བདག་ཉིད་གཞན་དང་གཞན་དུ་གྲུབ་པ་ཡིན་ན་ནི་དེས་ན་བདག་མེད་པར་ཐལ་བར་འགྱུར་རོ། །དེའི་ཕྱིར་བདག་ཉིད་གཅིག་ཡིན་ལ་དེ་ཡང་འབྲེལ་པ་ཡིན་ནོ། །དུ་མ་ཉིད་དུ་ཐལ་བར་འགྱུར་བ་མ་ཡིན་ནམ། བདག་མེད་པར་ཐལ་བ་མ་ཡིན་ནོ་སྙམ་པ་ལ། དེ་ཉིད་བསྟན་པར་བྱ་བའི་དོན་དུ་བཤད་པ། བདག་ཉིད་གནས་པ་སྟེ་རང་བཞིན་དུ་རྣམ་པར་གནས་པ་ཡིན་པའི་ཕྱིར་རོ། །གང་གི་ཕྱིར་བདག་
ཉིད་འགའ་ཡང་གནས་པ་མེད་དེ། ཐམས་ཅད་ལྡོག་པ་མེད་པ་དེའི་ཕྱིར་བདག་མེད་པར་ཐལ་བ་ཡིན་ནོ། །འདི་ལྟར་བརྡ་ཤེས་པ་དང་དེ་ལས་བཟློག་པ་གཉིས་པོ་དག་གིས་མཐོང་བའི་དོན་གཅིག་པོ་དེའི་རང་བཞིན་གང་ཞིག་བརྡ་ཤེས་པའི་མཐོང་བའི་ཡུལ་དེ་ནི། ཅིག་ཤོས་ཀྱི་མཐོང་བའི་ཡུལ་དུ་མེད་པ་ཡིན་ཞིང་གང་བརྡ་མི་རིག་པས་མཐོང་བ་དེ་ཡང་གཞན་ལ་མེད་པ་ཡིན་ནོ། །དེས་ན་གང་ཞིག་བརྡ་མཐོང་བའི་ཡུལ་དུ་གྱུར་པའི་བདག་ཉིད་དེ་ནི་ཅིག་ཤོས་ལ་མེད་པ་ཡིན་ཏེ། དེས་དེ་དང་འགལ་བའི་རང་བཞིན་དུ་མཐོང་བའི་ཕྱིར་རོ། །ཅིག་ཤོས་ཀྱི་གང་ཡིན་པ་དེ་ཡང་བརྡ་རིག་པ་ལ་ལྟོས་ན་གནས་པ་མ་ཡིན་ནོ། །དེའི་ཕྱིར་ཕན་ཚུན་ལྟོས་ནས་ངོ་བོ་གཉི་ག་ཡང་གནས་པ་མེད་པའི་ཕྱིར་བདག་མེད་པར་འགྱུར་ཏེ། རྣམ་པར་ཤེས་པ་ཙམ་ཞིག་ལུས་པར་འགྱུར་གྱི་ཕྱི་རོལ་ནི་མ་ཡིན་ནོ། །བདག་ཉིད་དུ་མ་ཡང་ཡིན་ལ་གཅིག་ཀྱང་ཡིན་ནོ་ཞེས་བྱ་བ་འདི་ཉམས་པ་ཡིན་ཏེ། དངོས་པོ་ཐ་དད་པ་ནི་ངོ་བོ་ཉིད་ཐ་དད་པའི་མཚན་ཉིད་ཡིན་པའི་ཕྱིར་རོ། །དེའི་ཕྱིར་དེ་ལྟར་བརྡ་རིག་པའི་འགྲོ་བ་མ་ལུས་པ་ལོང་བར་ཐལ་བར་བསྟན་ནས་མཇུག་བསྡུ་བའི་ཐབས་ཀྱིས་ཐལ་བ་ལས་བསྟན་པའི་དོན་དུ་དེའི་ཕྱིར་ཞེས་བྱ་བ་སྨོས་སོ། །སྒྲ་སྦྱར་བ་ནི་སྒྲ་དང་སྦྱར་བའོ། །དོན་གང་ལ་སྒྲ་སྦྱར་བ་མེད་པའི་དོན་དེ་མཐོང་བ་ཡིན་ནོ། །མཐོང་བས་ན་ཞེས་བྱ་བ་ནི་གཏན་ཚིགས་ཀྱི་དོན་ཏོ། །དེ་ལ་ཐལ་བ་ལས་བཟློག་པའི་གཏན་ཚིགས་ནི་འདི་ཡིན་ཏེ། གང་ཞིག་མཐོང་བ་དེ་ནི་སྒྲ་དང་འདྲེས་པ་མེད་པ་ཡིན་ལ། ཉམས་སུ་མྱོང་བ་འདི་ཡང་མཐོང་བ་ཡིན་ནོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །འདི་ལ་སྒྲ་དང་འདྲེས་པར་འཛིན་པ་ལ་ནི་ངེས་པ་དང་ལྡན་པར་སྒྲ་དྲན་པས་ཁྱབ་པ་ཡིན་ཏེ། མ་དྲན་ན་ནི་ཉེ་བ་མ་ཡིན་པའི་སྒྲས་ཁྱད་པར་དུ་བྱས་པ་འཛིན་པ་མི་འཐད་པའི་ཕྱིར་རོ། །མཐོང་བ་ལ་ཡང་སྒྲ་ངེས་པ་དྲན་པ་དང་བྲལ་བའི་རང་བཞིན་གྱིས་ཁྱབ་པ་ཡིན་ཏེ། དེའི་ཕྱིར་ཁྱབ་པར་བྱེད་པ་མི་དམིགས་པས་མི་མཐུན་པའི་ཕྱོགས་ལས་ལྡོག་པ་ན་སྒྲ་དང་མ་འབྲེལ་པའི་དོན་འཛིན་པས་ཁྱབ་པར་འགྱུར་རོ། །མཐོང་བའི་སྤྱིའི་གཏན་ཚིགས་ཡིན་ཞིང་མཐོང་བའི་ཁྱད་པར་ཆོས་ཅན་ཡིན་པ་དེ་བས་ན་དམ་བཅས་པའི་
དོན་གྱི་ཕྱོགས་གཅིག་གཏན་ཚིགས་སུ་མི་འགྱུར་རོ། །རྣམ་པ་གཞན་གྱི་སྒོ་ནས་ཀྱང་རྟོག་པ་མེད་པ་ཉིད་དུ་བསྟན་པའི་ཕྱིར་ཡང་ན་ཞེས་སྨོས་ཏེ། རྟོག་པ་དང་བྲལ་བ་སྟེ་རྟོག་པས་དབེན་པ་གང་ཡིན་པ་དེ་སྒྲུབ་པར་བྱེད་པ་ནི་མངོན་སུམ་ཡིན་ནོ། །གང་དུ་མངོན་སུམ་གྱི་ཚད་མ་ཉིད་ཀྱིས་སྣང་བའི་རྣམ་པར་རྟོག་པ་མེད་པ་ངེས་པ་ལ་སྣང་བ་མི་དམིགས་པས་ཐ་སྙད་འབའ་ཞིག་བྱེད་པ་དེ་ལ་ནི་མངོན་སུམ་ཉིད་དངོས་པོ་མེད་པའི་སྒྲུབ་པར་བྱེད་པ་བརྗོད་པ་ཡིན་ནོ། །གལ་ཏེ་སྣང་བའི་བུམ་པས་དཔེན་པའི་ས་ཕྱོགས་དམིགས་པ་དེ་བཞིན་དུ་སྣང་བའི་རྣམ་པར་རྟོག་པས་དབེན་པའི་ཤེས་པའི་གནས་སྐབས་འགའ་ཡང་དམིགས་པ་མེད་པ་ཡིན་ནམ་ཞེས་དགོངས་པ་ལ། བཤད་པ། གཡོ་མེད་པ་སྟེ་དོན་གཅིག་ལ་ཆགས་ཤིང་འགྱུར་བ་མེད་པའི་སེམས་ཀྱི་གནས་སྐབས་ཀྱི་ཁྱད་པར་གྱི་གནས་པ་དང་ལྡན་པ་ནའོ། །ཅི་ཞིག་བྱས་ནས་དེ་ལྟར་གནས་ཤེ་ན། ཐམས་ཅད་ལས་ཏེ། རྣམ་པར་བརྟག་པར་བྱ་བའི་དོན་ཐམས་ཅད་ལས་སེམས་ཏེ་ཡུལ་ཅན་གྱི་རྟོགས་པ་བསྡུས་ནས་ཏེ་བཟློག་ནས་གནས་པའོ། །གནས་པ་ཡང་རྒྱུན་འཇུག་པ་ཡིན་པར་བལྟའོ། །སེམས་བསྡུས་པའི་རྒྱུས་གཡོ་བ་མེད་པ་ཉིད་དང་འགྱུར་བ་མེད་པ་ཡིན་གྱི། གཡོ་བ་མེད་པའི་རྒྱུ་ལས་ནི་སེམས་བསྡུས་པ་མ་ཡིན་པའི་ཕྱིར་ཏེ། དེས་ན་སེམས་བསྡུས་པ་ལས་གཡོ་བ་མེད་པ་དང་གནས་པར་གསུངས་སོ། །དེ་ལྟར་གནས་པ་ན་གང་ཞིག་མིག་རྒྱུར་གྱུར་པས་གཟུགས་མཐོང་བ་སྟེ་ལྟ་བའི་མིག་གིས་གཟུགས་མཐོང་བ་གང་ཡིན་པ་དེ་འདྲ་བ་དེ་ནི་སྣང་བའི་རྣམ་པར་རྟོག་པས་དབེན་པ་མངོན་སུམ་གྱིས་དམིགས་པའི་དབང་པོ་ལས་སྐྱེས་པའི་བློ་ཡིན་ནོ། །འདི་ཉིད་ལེགས་པར་བསྒྲུབ་པའི་ཕྱིར་བཤད་པ། བརྗོད་པ་རྣམ་པར་རྟོག་པའི་སྣང་བ་མེད་པའི་སྣང་བ་གང་ཡིན་པ་དེ་ནི་སྲོག་ཆགས་ཐམས་ཅད་ཀྱིས་མངོན་སུམ་ཉིད་དུ་མྱོང་ཞིང་ངེས་པ་ཡིན་ནོ། །ཐམས་ཅད་སྨོས་པ་ནི་སྲོག་ཆགས་ཐམས་ཅད་ཀྱི་རྒྱུ་མངོན་སུམ་མ་ཡིན་ཡང་འདི་འདྲ་བའི་རང་བཞིན་འཛིན་པའི་མངོན་སུམ་གང་ལ་ཡོད་པ་དེ་ཐམས་ཅད་གཅིག་ལ་ཐ་དད་པ་མེད་པའི་ཕྱིར་རང་གི་རྒྱུད་བཞིན་དུ་ཐམས་ཅད་ལ་ཁྱད་པར་མེད་པར་བསྟན་པའི་
ཕྱིར་རོ། །གཞན་གྱི་རྒྱུད་གཞན་གྱི་མངོན་སུམ་དུ་འདོད་པ་མ་ཡིན་པ་དེ་ལྟ་ན་ཡང་སྣང་བའི་རང་བཞིན་འཛིན་པ་དང་ལྡན་པའི་སྐྱེས་བུའི་འཛིན་པའི་གནས་སྐབས་ཅི་འདྲ་བ་སྟེ་དེའི་རང་བཞིན་འཛིན་པ་གཞན་ཐམས་ཅད་ཀྱང་དེ་འདྲ་བ་ལས་མི་ལྡོག་པའི་ཕྱིར་ཐམས་ཅད་ཀྱང་གཅིག་བཞིན་དུ་གྲུབ་བོ། །དངོས་པོ་གང་མངོན་སུམ་གྱི་གྲུབ་པ་དེ་ལ་ནི་ཚད་མ་གཞན་གྱི་བྱེད་པ་དོན་མེད་པ་ཡིན་ནོ་ཞེས་བསྟན་པའི་ཕྱིར། འདི་ལ་སྒྲུབ་པར་བྱེད་པ་གཞན་གྱིས་ཅི་ཞིག་བྱ་ཞེས་སྨོས་སོ། །འདི་སྙམ་དུ་གང་གི་ཕྱིར་དེའི་ཚེ་རྣམ་པར་རྟོག་པ་ཡོད་ཀྱང་མི་རྟོགས་པའི་ཕྱིར་གཡོ་བ་མེད་པར་འདོད་པ་ན་མཐོང་བའི་གནས་སྐབས་སུ་སྣང་བའི་རྣམ་པར་རྟོག་པས་དབེན་པར་མ་གྲུབ་པ་ཡིན་ནམ་ཞེས་བྱ་བ་དེ་བསལ་བའི་ཕྱིར་གང་གིས་ཡོད་ཀྱང་ཞེས་བྱ་བ་ལ་སོགས་པ་སྨོས་སོ། །གང་གིས་དེ་རིག་པར་མི་འགྱུར་བ་ཉིད་ཀྱིས་ཡོད་པ་བདོག་པ་རྟོགས་པར་མི་འགྱུར་བ་ཚོར་བར་མི་འགྱུར་བའོ། །འདི་དག་སྨོས་པ་ནི་རྣམ་པར་རྟོག་པ་ནི་མངོན་སུམ་ཉིད་ཡིན་པར་བསྟན་པའི་དོན་ཏོ། །རིག་པར་མི་འགྱུར་བ་མ་ཡིན་པ་ནི་ཉམས་སུ་མྱོང་བ་མ་ངེས་པ་མ་ཡིན་པ་སྟེ། དགག་པ་གཉིས་ཀྱིས་ཉམས་སུ་མྱོང་བ་ངེས་པ་ཡིན་ནོ་ཞེས་བྱ་བའི་དོན་འདི་བསྟན་པར་འགྱུར་རོ། །སྐྱེ་བ་དང་འགག་པ་དག་གིས་ནི་རྣམ་པར་རྟོག་པའི་རྒྱུ་ཡོད་པ་དང་མེད་པ་དག་སྟོན་ཏོ། །འདིར་དོན་འདི་ཡིན་ཏེ། གང་གི་ཕྱིར་སྐྱེ་བའི་གནས་སྐབས་རྟོགས་པ་དེས་ན་ལྡོག་པའི་རང་བཞིན་ཡང་རྟོགས་པ་ཡིན་ཏེ། ལྡོག་པ་ཉིད་དུ་ངེས་པ་ཡིན་ནོ་ཞེས་བྱ་བའི་དོན་ཏོ། །འདིར་དོན་ནི་འདི་ཡིན་པར་འདོད་དེ། ཉམས་སུ་མྱོང་བས་མ་རྟོགས་པ་ཡིན་ན་ནི་དེ་རིགས་པ་མ་ཡིན་ཏེ། རང་རིག་པ་བསྒྲུབ་པར་འགྱུར་བའི་ཕྱིར་རོ། །དཔེར་ན་སྐད་ཅིག་བཞིན་དུ་ཉམས་སུ་མྱོང་ཡང་མ་ངེས་པས་མ་རྟོགས་པ་ཡིན་ན་ཡང་རིགས་པ་མ་ཡིན་ཏེ། གང་གི་ཕྱིར་རྣམ་པར་རྟོག་པ་རྣམས་ཀྱི་རང་གི་དོན་འཛིན་པ་ནི་འདི་ཉིད་ཡིན་ཏེ། འདི་ལྟ་སྟེ་ཡུལ་ཡོངས་སུ་གཅོད་པའོ། །བདག་ཉིད་བྱེད་པ་པོར་གྱུར་པས་ཡུལ་ཡོངས་སུ་གཅོད་པ་ན་ཡང༌། བདག་ཉིད་ཀྱང་དེའི་ཁྱད་པར་དུ་གྱུར་པས་ཡོངས་སུ་བཅད་པར་འགྱུར་རོ། །དཔེར་ན་རྣམ་
པར་རྟོག་པ་མེད་པའི་ཤེས་པས་དོན་མཐོང་བ་ན་རང་གི་བདག་ཉིད་ཀྱང་ཉམས་སུ་མྱོང་བའི་ཕྱིར་མཐུ་ལས་དེའི་འོག་ཏུ་འདི་བདག་གིས་མཐོང་ངོ་ཞེས་དེའི་བྱེད་པས་ཁྱད་པར་དུ་བྱས་པའི་དོན་ངེས་པ་སྐྱེ་བ་དེ་བཞིན་དུ་རྣམ་པར་རྟོག་པའི་བྱེད་པའི་ཁྱད་པར་ཅན་གྱི་རྣམ་པར་བརྟག་པར་བྱ་བ་ལ་བདག་གིས་འདི་ལྟར་བརྟགས་སོ་ཞེས་ངེས་པ་སྐྱེ་བ་ཡིན་ནོ། །དྲན་བའི་ས་བོན་འཇོག་པའི་ནུས་པ་མེད་པའི་ཕྱིར་ཉམས་སུ་མྱོང་བ་ངེས་པ་ཡིན་ཡང་ཕྱིས་མི་དྲན་པ་ཡིན་ནོ་ཞེ་ན་ཡང་དེ་ལྟ་ན་ཡང་རིགས་པ་མ་ཡིན་ཏེ། གང་གི་ཕྱིར་བརྒྱལ་བ་ལ་སོགས་པས་ཉམས་པའི་ཡིད་ནི་ནུས་པ་མེད་པར་མཐོང་གི །རང་བཞིན་དུ་གནས་པ་ནི་མ་ཡིན་ནོ། །འདི་སྙམ་དུ་ཆགས་པའི་ཡུལ་མཐོང་བའི་དོན་གཞན་གྱིས་ཡུལ་གཞན་ལ་རྣམ་པར་རྟོག་པ་བསྐལ་པ་ཡིན་པ་དེས་ན་རྣམ་པར་བརྟགས་པའི་དངོས་པོ་ཡང་དྲན་པར་འགྱུར་བའི་ཕྱིར་རྣམ་པར་རྟོག་པ་ཡོད་ཀྱང་མ་རྟོགས་པ་ཡིན་ནོ་ཞེ་ན། དེ་ཡང་རིགས་པ་མ་ཡིན་ཏེ། གང་གི་ཕྱིར་གཟུགས་མཐོང་བའི་རང་བཞིན་རྒྱུན་མི་འཆད་པར་འཇུག་པ་ན་ཆགས་པ་ཁྱད་པར་མེད་ཀྱང༌། གནས་སྐབས་ཀྱི་ཆ་འགའ་ཞིག་ཏུ་ནི་རྣམ་པར་རྟོག་པ་དྲན་པ་མ་ཡིན་ཏེ། བརྟན་པར་བརྗོད་པའོ། །ཁ་ཅིག་ཏུ་ནི་དྲན་པ་ཉིད་བསྡུས་པ་ལས་ལངས་པའི་གནས་སྐབས་གང་ཡིན་པར་རོ། །དེའི་ཕྱིར་མཐོང་བའི་དོན་ངེས་པར་བྱེད་ནུས་པའི་མཐོང་བའམ། རྣམ་པར་བརྟག་པར་བྱ་བ་ཡོངས་སུ་གཅོད་པའི་རྣམ་པ་ཅན་གྱི་རྣམ་པར་རྟོག་པ་ཡང་རུང་སྟེ། དེའི་རྒྱུན་གྱིས་འཇུག་པ་ནི་དེ་འཆད་པའི་ཚེ་བདག་ཉིད་ཀྱི་ཡུལ་ཅན་གྱི་ཞེན་པ་སྐྱེད་ནུས་པར་མཐོང་ངོ༌། །དུས་གཞན་དུ་དྲན་པར་འགྱུར་རམ། རྒྱུ་གཞན་འགའ་ཞིག་ལས་མ་གྱུར་ཀྱང་རུང་སྟེ། རྒྱུན་གྱི་མཐར་བྱུང་བའི་ཞེན་པ་ནི་མངོན་སུམ་གྱིས་ཤེས་པ་ཙམ་གྱི་རྒྱུ་ཅན་ཡིན་ནོ། །རྒྱུན་ཆད་པ་ན་ཡང་ཡོངས་སུ་གཅོད་པར་བྱེད་པར་ཉམས་སུ་མྱོང་བར་འགྱུར་བའི་མྱོང་བ་ཞེན་པར་བྱེད་པ་ཉིད་དོ། །འདིར་གཟུགས་གཅིག་ལྟ་བའི་སྐབས་ཡིན་ཡང་དུས་ཅི་ཙམ་གནས་ནས་རང་གི་རྒྱུད་ལ་ཞེན་པར་བྱེད་ཀྱང་རྣམ་པར་རྟོག་པར་ནི་ཞེན་པར་མི་བྱེད་ལ། ཕྱིས་ནི་རང་གི་རྒྱུད་ལ་ཞེན་པ་དང་རྣམ་པར་རྟོག་པ་ཡང་སྡོམ་པར་བྱེད་པ་ཡིན་ནོ། །དེས་ན་མངོན་དུ་
བྱས་པའི་རྣམ་པར་རྟོག་པ་ཙམ་ལས་བྱུང་བའི་ཞེན་པ་མེད་པའི་ཕྱིར་རྣམ་པར་རྟོག་པ་མེད་པ་ཡིན་ནོ། །འདི་ཉིད་བསྟན་པའི་ཕྱིར་འདི་ལྟར་ཞེས་གསུངས་སོ། །ཡང་ཞེས་བྱ་བ་དེ་ནི་རེ་ཞིག་གཟུགས་རྒྱུན་དུ་མཐོང་ནས་དེའི་འོག་ཏུ་བདག་གིས་དུས་འདི་ཙམ་འདས་ཀྱི་བར་ཅི་ཞིག་མཐོང་བར་འགྱུར་ཞེས་བྱ་བ་ལ་སོགས་པ་རྟོག་པར་བྱེད་པའོ། །རྣམ་པར་བརྟག་པ་ཡང་གང་གི་ཚེ་བདག་གིས་ཅི་ཞིག་རྣམ་པར་བརྟགས་ཞེས་རྣམ་པར་རྟོག་པའི་རྒྱུད་སྡོམ་པ་དེའི་ཚེ། སྔར་ནི་ཁོ་བོ་རྣམ་རྟོག་འདི་འདྲར་གྱུར། །ཅེས་རིག་པ་ཡིན་ཏེ། ཁོ་བོས་གཟུགས་འདི་མཐོང་ཞིང་དེ་ལ་ཡང་འདི་ལྟར་བརྟགས་སོ་ཞེས་བྱ་བར་རོ། །སྔར་བཤད་རང་བཞིན་ཏེ། རྣམ་པར་རྟོག་པ་ཐམས་ཅད་བསྡུས་པར་འདོད་པ་གང་ཡིན་པ་དེའི་གནས་སྐབས་ཀྱི་དབང་པོ་ལས་རྟོགས་པ་སྟེ། དབང་པོ་ལ་བརྟེན་པའི་ཤེས་པ་ལ་ནི་དེ་ལྟ་མ་ཡིན་ཏེ། རང་གི་རྒྱུད་ལ་ལྟ་བར་བྱེད་ཀྱང་རྣམ་པར་རྟོག་པ་ནི་ཅུང་ཟད་ཀྱང་རྟོགས་པ་མེད་དོ། །འདི་སྐད་བརྗོད་པ་ཡིན་ཏེ། རྒྱུན་དུ་མཐོང་བའི་གཟུགས་དེ་ཉིད་ལ་རྟོགས་པ་པོ་བར་དུ་རྟོགས་པར་བྱེད་པ་ན། རྣམ་པར་རྟོག་པ་ཞེན་པ་མེད་ལ། ཕྱིས་མཐོང་བའི་གཟུགས་དེ་ཉིད་ལ་ཇི་ལྟར་ཡང་བརྟགས་ནས་རྣམ་པར་རྟོག་པ་རྣམ་པར་ཆད་པའི་དུས་སུ་སྔར་གྱི་གནས་སྐབས་ལ་བརྟགས་ན། ཁོ་བོས་ནི་འདི་ལྟར་བརྟགས་སོ་ཞེས་རྣམ་པར་རྟོག་པ་ངེས་པ་ཡིན་ནོ། །དེས་ན་གལ་ཏེ་གནས་སྐབས་དེ་གཉིས་སུ་རྣམ་པར་རྟོག་པ་ཡོད་པ་དང་མེད་པ་མ་ཡིན་ན་གཟུགས་མཐོང་བར་མཚུངས་པ་ལ་དུས་ཅུང་ཟད་ཅིག་ནི་རྟོག་པ་མེད་པར་མཐོང་བར་ཞེན་ཅིང༌། ཡང་ཅུང་ཞིག་ནི་རྣམ་པར་རྟོག་པ་ཅན་དུ་ཞེན་པ་ཅིའི་ཕྱིར་དོན་འདི་དག་ཉིད་རྣམ་པར་དགྲོལ་བའི་ཕྱིར་བཤད་པ་དེ་ཞེས་བྱ་བ་ནི་གཟུགས་ལྟ་བའོ། །བསྡུས་པ་ནི་མངོན་སུམ་རྣམ་པར་རྟོག་པ་ཅན་དུ་སྨྲ་བའི་ལྟར་ན་ནི་རྣམ་པར་རྟོག་པ་ཤས་ཆུང་བར་གྱུར་པ་ཡིན་ལ། ངེད་ཀྱི་ལྟར་ན་ནི་ཐམས་ཅད་དུ་ལོག་པའོ། །དེ་ལྟ་བུར་གྱུར་པའི་བསྡུས་པ་དེ་ལས་ལངས་ཏེ་ལོག་སེམས་གང་ལ་ཡོད་པའོ། །ཅུང་ཟད་ཅེས་བྱ་བ་ནི་མཐོང་བ་ཆགས་པར་གྱུར་པའམ། གཞན་ལ་རྟོགས་པར་བྱེད་པའོ། །ཡང་ཞེས་བྱ་བ་ནི་ཕྱིས་ཏེ་རྣམ་པར་
རྟོག་པའི་རྒྱུན་ཆད་པའི་དུས་ཞེས་བྱ་བའི་དོན་ཏོ། །སྔར་གྱི་རྣམ་པར་རྟོག་པའི་རྒྱུན་ནི་རིགས་མི་མཐུན་པའི་རྣམ་པར་རྟོག་པ་སྐྱེས་པས་ན་ཆད་པ་ཡིན་ལ། རིགས་མི་མཐུན་པ་ཉིད་ཀྱང་སྔར་དངོས་པོ་རྣམ་པར་རྟོག་པ་ལས་ཕྱིས་རྣམ་པར་རྟོག་པའི་ཕྱིར་རོ། །རང་གི་སེམས་ཀྱི་རྒྱུན་ནི་རྒྱུད་དོ། །རིགས་དུ་མའི་བདག་ཉིད་ཀྱི་རྣམ་པར་རྟོག་པ་སྡོམ་པར་བྱེད་ཅིང་གཅིག་ཏུ་བྱས་ནས་འཛིན་པར་བྱེད་དོ། །རིལ་པོར་བྱེད་ཅེས་བྱ་བའི་དོན་ཏོ། །འདི་འདྲ་བའི་ཞེས་བྱ་བ་ལ་སོགས་པ་ནི་སྡོམ་པའི་རྣམ་པ་ཉིད་སྟོན་ཏོ། །འདི་འདྲ་བ་ཞེས་བྱ་བ་ནི་འདི་ལྟ་བུའི་རྣམ་པར་རོ། །རྣམ་པར་བརྟགས་པའི་དངོས་པོ་ཐ་དད་པ་ལས་དེའི་རྣམ་པ་ཅན་གྱི་རྣམ་པར་རྟོག་པ་ཐ་དད་པ་ཡིན་ལ། འདི་དང་འདི་འདྲ་བ་ཞེས་བྱ་བས་ཀྱང་བསྡོམས་པའི་རྣམ་པར་རྟོག་པའི་སྣང་བ་ཐ་དད་པ་སྟོན་པ་ཡིན་ནོ། །བསྡུས་པའི་གནས་སྐབས་མཐར་ཐུག་པ་ན་རང་གི་སེམས་ཀྱི་རྒྱུད་སྡོམ་པར་བྱེད་ཀྱང་རྣམ་པར་རྟོག་པའི་ཞེན་པ་མེད་དོ་ཞེས་སྔར་ཉིད་དུ་བཤད་པ་དེའི་ཕྱིར་ན་འདི་དག་མངོན་སུམ་ཡིན་ན་རྣམ་པར་རྟོག་པ་ལོག་པའི་མཐོང་བ་ལ་ཅིའི་ཕྱིར་རྟོགས་པར་མི་འགྱུར་ཏེ། སྡོམ་པའི་ཤེས་པས་ཇི་ལྟར་མི་འཛིན་ཞེས་འདི་ཚད་མའི་འབྲས་བུ་བསྡུས་པ་ཡིན་ནོ། །རྒྱུན་གང་ཞིག་མངོན་སུམ་དུ་བྱས་པ་དེ་ནི་རྒྱུན་ཆད་པའི་ཚེ་ན་སྡོམ་པའི་ཤེས་པས་འཛིན་པར་ནུས་པ་ཡིན་ཏེ། དཔེར་ན་མཐོང་བའི་གཟུགས་ཀྱི་རྒྱུན་གང་ཡིན་པ་དེ་ཉིད་བཞིན་ནོ། །དེ་བཞིན་དུ་རྟོག་པ་ཡང་མངོན་སུམ་དུ་བྱས་པ་ཡིན་ནོ། །རྒྱུན་མཐར་ཐུག་པ་ན་འཇུག་པའི་ངེས་པར་འཛིན་པའི་ཤེས་པས་གཟུང་བའི་རྒྱུ་མཚན་ནི་མངོན་སུམ་ཙམ་ཡིན་ཏེ། གང་གི་ཕྱིར་དེ་རྒྱུ་མེད་པ་ཅན་མ་ཡིན་ལ། མངོན་སུམ་གྱི་བྱེད་པ་ལས་རྒྱུན་གཞན་ཡང་མེད་པའི་ཕྱིར་རོ། །མངོན་སུམ་ཡོད་པ་ཉིད་ཡིན་ཡང་དེ་མེད་ན་ནི་དེ་དེའི་རྒྱུ་མ་ཡིན་པར་འགྱུར་ན། འོན་ཀྱང་མངོན་སུམ་རྒྱུ་ཡིན་པར་མཐོང་བ་ཡིན་ནོ། །དེས་ན་ཁྱབ་པར་བྱེད་པ་མེད་པས་མི་མཐུན་པའི་ཕྱོགས་ལ་གཏན་ཚིགས་མི་འཇུག་པས་རང་གི་བསྒྲུབ་པར་བྱ་བས་ཁྱབ་པའི་ཕྱིར་རང་བཞིན་གྱི་གཏན་ཚིགས་སོ། །མངོན་སུམ་དུ་གྱུར་ཀྱང་རྒྱུན་ཆད་པའི་མཐར་འབྱུང་བའི་ཞེན་པར་བྱེད་པའི་ཤེས་པས་དེ་ལ་
གཟུང་བ་མེད་པ་དེའི་ཕྱིར་དེའི་ཚེ་དེ་དམིགས་པ་མེད་པ་ཡིན་ནོ། །བལྟར་རུང་བ་མ་དམིགས་པ་ལས་ཀྱང་མེད་པའི་ཐ་སྙད་དུ་གྲུབ་པ་ཡིན་ནོ་ཞེས་བསྟན་པའི་ཕྱིར་མཇུག་བསྡུ་བ་བསྟན་པ་དེས་ན་དེའི་ཕྱིར་མཐོང་བའི་བདག་ཉིད་འདི་མངོན་སུམ་ཞེས་བྱ་བ་ནི་རང་རིག་པའི་མངོན་སུམ་གྱིས་གཟུང་བའོ། །མ་འདྲེས་པ་ནི་རྟོགས་པ་དང་དེའི་བདག་ཉིད་དང་མི་ལྡན་པ་གང་ཡིན་པའོ། །འམ་སྨོས་པ་ནི་འཆད་པར་འགྱུར་བའི་རྣམ་པར་རྟོག་པ་ལ་ལྟོས་པའོ། །འདིས་ནི་བདག་ཉིད་གཅིག་པ་འགོག་པ་ལ་ཁྱད་པར་མེད་པའི་མི་དམིགས་པ་གཏན་ཚིགས་ཉིད་དུ་ཉེ་བར་བཀོད་པ་ཡིན་ནོ། །དེ་རྣམ་པར་རྟོག་པ་དེའི་བདག་ཉིད་དུ་མ་དམིགས་པའི་ཕྱིར་མངོན་སུམ་གྱི་ཤེས་པ་འདི་ནི་རྣམ་པར་རྟོག་པའི་བདག་ཉིད་མ་ཡིན་ནོ། །བདག་ཉིད་གཅིག་པ་འགོག་པ་ལ་ནི་སྣང་བའི་བདག་ཉིད་ཀྱིས་ཁྱད་པར་དུ་བྱས་པ་ལ་དགོས་པ་འགའ་ཡང་ཡོད་པ་མ་ཡིན་གྱི་གཞན་འགོག་པ་ལ་ནི་དགོས་པ་ཡོད་པ་ཡིན་ནོ། །འདི་ལྟར་མི་སྣང་བ་ཤ་ཟ་ལ་སོགས་པ་སྣང་བའི་སྔོན་པོ་ལས་རྣམ་པ་ཐ་དད་པར་དམ་བཅས་པ་རྣམས་ཀྱང་ཇི་སྲིད་དུ་སྣང་བའི་རང་བཞིན་དེ་ལ་དེའི་བདག་ཉིད་ཡིན་པ་འགོག་པར་བྱེད་པ་དེ་ཇི་སྲིད་དུ་དམིགས་པའི་མཚན་ཉིད་དུ་གྱུར་པ་ཁས་བླངས་པ་ཉིད་ལས་ཡིན་ཏེ། གལ་ཏེ་སྣང་བའི་དོན་འདི་ཤ་ཟ་ཡིན་ན་ནི་རང་གི་རྣམ་པ་ཁོ་ན་དམིགས་པར་འགྱུར་བ་ཡིན་ནོ། །དེས་ན་སྣང་བའི་རང་བཞིན་ལ་ཤ་ཟ་འགོག་པ་ནི་སྣང་བ་ཉིད་ཀྱིས་བྱེད་པ་ཡིན་ནོ། །འདིར་ནི་གཅིག་མངོན་སུམ་དུ་བྱེད་པས་དེ་ལས་གཞན་འགོག་པ་ཡིན་ལ། ཐ་སྙད་ནི་འཁྲུལ་པ་མེད་པའི་ཕྱིར་མི་དམིགས་པ་ཁྱད་པར་མེད་པས་བྱེད་པ་ཡིན་ནོ་ཞེས་བྱ་བ་ནི་དོན་དམ་པའོ། །ཡང་ན་མཐོང་བ་གཞིར་གྱུར་པ་ལ་སྣང་བའི་བདག་ཉིད་ཀྱིས་ཏེ། དམིགས་པའི་མཚན་ཉིད་དུ་གྱུར་པའི་རྣམ་པར་རྟོག་པ་མི་སྣང་བས་ཏེ་མ་དམིགས་པས་ནི་སྤངས་པ་ཡིན་ནོ་ཞེས་འབྲེལ་ཏེ། དབང་པོའི་ཤེས་པ་ལ་གཞན་གྱིས་རྣམ་པར་རྟོག་པ་སྟེ་རྟོག་པ་ཡོད་པའི་ཐ་སྙད་གང་བྱས་པ་དེ་བཟློག་པ་ཡིན་ནོ། །འདིས་ཀྱང་དབང་པོའི་ཤེས་པ་ལས་ཐ་དད་པའི་རྣམ་པར་རྟོག་པ་ཡོད་པར་དམ་བཅས་པ་ལ་མི་དམིགས་པ་ཁྱད་པར་ཅན་འགོག་པའི་གཏན་ཚིགས་སུ་
བཀོད་པ་ཡིན་ནོ། །གཅིག་པ་འགོག་པ་ལ་ནི་ཁྱད་པར་མེད་པས་བྱེད་པ་ཡིན་ནོ། །ཐ་དད་པའི་བདག་ཉིད་ལ་ནི་རྣམ་པར་རྟོག་པ་མཐོང་བའི་བདག་ཉིད་ཅན་དུ་མི་འགྱུར་གྱི། དེ་ལ་ཡོད་པར་ནི་འགྱུར་བ་ཡིན་ཏེ། དཔེར་ན་བལྟར་མི་རུང་བ་འགའ་ཞིག་ས་ཕྱོགས་ལ་བརྟེན་པར་འགྱུར་བ་བཞིན་ནོ། །དེས་ན་ཐ་དད་པ་འགོག་པ་ལ་དམིགས་པའི་མཚན་ཉིད་ཀྱིར་གྱུར་པ་མ་དམིགས་པ་གཏན་ཚིགས་སུ་བསྟན་པ་ཡིན་ནོ། །ཇི་ལྟར་བུམ་པ་དང་ས་ཕྱོགས་དག་དབང་པོ་གཅིག་གིས་གཟུང་བ་ཡིན་པས་ཕན་ཚུན་འཁྲུལ་པ་མེད་པར་དམིགས་པ་ནི་ཤེས་པ་གཅིག་ལ་འདྲེ་བ་ཉིད་ཡིན་པ་དེ་བཞིན་དུ་འདི་ལ་ཡང་མཐོང་བ་དང་རྣམ་པར་རྟོག་པ་དག་རྒྱུད་གཅིག་ལ་ཡོད་པའི་རང་རིག་ལ་འཁྲུལ་པ་མེད་པར་དམིགས་པ་ན་ཤེས་པ་གཅིག་ལ་ཚོགས་པ་ཡིན་ནོ། །ཡིད་ལ་བརྟེན་ནས་སྐྱེས་པ་རྒྱུད་གཅིག་ལ་ཡོད་པ་དེ་དག་ནི་ཉམས་སུ་མྱོང་བར་བྱེད་པ་གཅིག་གིས་ལྷན་ཅིག་ཉིད་དུ་ཉམས་སུ་མྱོང་བ་ཡིན་ཏེ། གཅིག་ཉམས་སུ་མྱོང་ན་གཉིས་པ་ཡང་མྱོང་བར་འགྱུར་བའི་ཕྱིར་རོ། །དེའི་ཕྱིར་དེ་ལྟར་གཡོ་བ་མེད་པར་མཐོང་བའི་གནས་སྐབས་སུ་རྣམ་པར་རྟོག་པ་ལ་མི་དམིགས་པ་ནི་གཅིག་ཡིན་པ་ཉིད་ནི་མི་དམིགས་པ་ཙམ་གྱིས་བཀག་པ་ཡིན་ལ། ཐ་དད་པ་ཉིད་ཀྱང་ཁྱད་པར་ཅན་གྱི་མི་དམིགས་པས་བཀག་པ་ཡིན་ནོ། །སྐབས་སུ་བབས་པ་མི་སྣང་བའི་གཞི་མཐོང་བ་སྤངས་ནས་དབང་པོའི་ཤེས་པ་ཞེས་བྱ་བའི་གཞི་གཞན་དགོད་པ་ནི་དབང་པོའི་ཤེས་པ་མཐའ་དག་ཡུལ་ཉིད་དུ་བསྟན་པའི་དོན་ཏེ། འདི་ལྟར་མི་དམིགས་པས་རང་གི་ཡུལ་དུ་གྱུར་པའི་ཕྱོགས་གཅིག་ལ་རྣམ་པར་རྟོག་པས་སྟོན་པར་བསྟན་པས་ཀྱང༌། རྒྱུ་འདྲ་བ་ཅན་གྱི་དབང་པོའི་ཤེས་པ་ཐམས་ཅད་རྣམ་པར་རྟོག་པ་མེད་པ་ཡིན་ནོ་ཞེས་དོན་གྱིས་བསྟན་ནོ། །དེས་ན་ཕྱོགས་གཅིག་ལ་འཇུག་པ་དེ་ཉིད་ནི་དབང་པོའི་ཤེས་པ་ཐམས་ཅད་ལ་རྟོག་པ་སྤོང་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་སློབ་དཔོན་ཕྱོགས་ཀྱི་གླང་པོས་རྣམ་པར་རྟོག་པ་མེད་པ་སྒྲུབ་པའི་འཐད་པ་མ་བཀོད་དེ། དེ་ནི་མངོན་སུམ་གྱིས་གྲུབ་པ་ཡིན་ནོ་ཞེས་ཀྱང་གསུངས་སོ། །གཞན་དུ་ན་ཕྱོགས་གཅིག་ལ་སྤངས་པས་ཐམས་ཅད་དེའི་རང་བཞིན་དུ་ཇི་ལྟར་འགྱུར།
ཤེས་པ་ཉམས་སུ་མྱོང་བར་ངེས་པས་ཤེས་པ་གཞན་མེད་པའི་ཐ་སྙད་དུ་བྱེད་པའི་ཕྱིར་མི་དམིགས་པས་བསྒྲུབ་བྱར་མེད་པ་མ་ཡིན་ནམ་ཞེ་ན། བདེན་ཏེ། ཡུལ་ཐ་དད་པས་ཐ་དད་པའི་རིག་པ་རྣམས་ནི་གཅིག་རིག་པའི་ཐ་སྙད་ཀྱིས་གཞན་མེད་པར་ཐ་སྙད་དུ་བྱེད་པ་ཡིན་ནོ། །གཡོ་བ་མེད་པའི་མཐོང་བ་ལ་ནི་རྣམ་པར་རྟོག་པའི་བདག་ཉིད་དམ། རྣམ་པར་རྟོག་པ་གཞན་དང་ཡུལ་གཅིག་པ་ཉིད་དུ་ཕ་རོལ་གྱིས་བརྟགས་པ་ཡིན་པ་དེས་ན་རྣམ་པར་རྟོག་པ་མ་དམིགས་ཀྱང་ཐེ་ཚོམ་ཟ་བས་འབད་པས་སྒྲུབ་པ་དང་མེད་པའི་ཐ་སྙད་དུ་ཡང་བྱ་བ་ཡིན་ནོ། །གང་གིས་ཞེས་བྱ་བ་ལ་སོགས་པས་ནི་དཔྱོད་པ་པོའི་དོགས་པ་བསུ་བར་བྱེད་དོ། །གང་གི་ཕྱིར་དེ་རྣམ་པར་རྟོག་པ་སྣང་བ་མི་དམིགས་པ་མ་བཟོད་ནས་སྨྲས་པ། བློ་མངོན་སུམ་དུ་གྱུར་པ་མ་ཡིན་ཏེ། དེ་དོན་མངོན་སུམ་དུ་བྱེད་པ་ཉིད་ཡིན་ཡང་བློ་ནི་མངོན་སུམ་དུ་ཡང་བྱ་བ་མ་ཡིན་ནོ། །གལ་ཏེ་བློ་མངོན་སུམ་ཡིན་ན་ཅིར་འགྱུར་ཞེས་དོགས་པ་ལ་སྨྲས་པ། བློ་མངོན་སུམ་ཉིད་ཡིན་པ་གང་གིས་དབང་པོའི་ཤེས་པ་རྣམ་པར་རྟོག་པས་ན་རྣམ་པར་རྟོག་པ་སྟེ་རྣམ་པར་རྟོག་པ་ཅན་ནོ། །དེས་ཁས་བླངས་པར་གྱུར་པ་ལ་གནོད་པ་འགལ་བར་འགྱུར་བའོ།། འདི་སྐད་དུ་བརྗོད་པར་འགྱུར་ཏེ། གལ་ཏེ་བློ་མངོན་སུམ་ཡིན་ན་ནི་དེའི་ཚེ་རྣམ་པར་རྟོག་པ་དང་མཐོང་བ་མངོན་སུམ་ཡིན་པའི་ཕྱིར་ཆོས་ཅན་གྲུབ་ཅིང་གཏན་ཚིགས་སྣང་བ་མི་དམིགས་པ་ཉིད་ཀྱང་འགྱུར་བ་ཡིན་ན། དེ་ཉིད་ནི་མངོན་སུམ་དུ་གྱུར་པ་མ་ཡིན་ཏེ། དེས་ན་མངོན་སུམ་རྣམ་པར་རྟོག་པ་ཅན་དུ་ཁས་བླངས་ཀྱང་སྣང་བ་མི་དམིགས་པས་ཅུང་ཟད་ཀྱང་གནོད་པ་མ་ཡིན་ནོ་ཞེས་བྱ་བ་ཡིན་ནོ། །དེ་ནི་སློབ་དཔོན་དེ་ལ་བརྒལ་ཞིང་བརྟག་པ་མཛད་དེ། འདི་ཞེས་བྱ་བ་མིང་ཐམས་ཅད་པ་མངོན་སུམ་གྱི་ཚིག་གིས་ནི་རྣམ་པར་རྟོག་པ་བཟུང་བ་ཡིན་ཏེ། དེ་ཉིད་ཀྱི་ཕྱིར་རིག་པའི་རྣམ་པར་རྟོག་པ་ཞེས་བཤད་པ་ཡིན་ནོ། །རྣམ་པར་བརྟགས་པའི་དོན་གསལ་བ་ན་རང་ཉིད་གསལ་བར་གྱུར་པ་ནི་རིག་པ་ཞེས་བརྗོད་པ་ཡིན་ནོ། །དོན་ཀྱང་བཀག་པར་ཐལ་བར་མ་གྱུར་ཅིག་ཅེས་གསལ་བའི་རང་བཞིན་འདི་མེད་དོ་ཞེས་ནི་བརྗོད་པར་ནུས་པ་མ་ཡིན་ནོ། །དེ་ཉིད་ཀྱི་ཕྱིར་
ནང་དུ་འདུ་བ་ལ་བརྟག་པར་མཛད་པ་ཡིན་ནོ། །སྐྱེ་བ་ནི་འབྱུང་བའོ། །འགག་པ་ནི་ལྡོག་པ་སྟ་ལྡོག་པའི་རང་བཞིན་དུ་ངེས་པ་ལ་རིག་པ་ཞེས་བརྗོད་པ་ཡིན་ནོ། །རེ་ཞིག་ཅེས་བྱ་བ་ནི་རིམ་པ་སྟོན་པར་བྱེད་པ་སྟེ། བློ་མངོན་སུམ་ཉིད་མ་ཡིན་ན་ཉམས་སུ་མྱོང་བའི་རྣམ་པར་རྟོག་པ་མེད་པ་ཉིད་དུ་ཐལ་བ་ནི་རེ་ཞིག་སྤང་དཀའ་བ་ཡིན་ལ་སྐྱོན་གཞན་ཡང་འཆད་པར་འགྱུར་རོ་ཞེས་བྱའོ། །རྣམ་པར་རྟོག་པ་གང་ཡིན་པ་འདི་གང་ཞེས་བྱ་བ་ནི་གཞི་འདྲི་བ་སྟེ་དངོས་པོ་གང་ཞིག་ལ་འདི་བདག་ཉིད་དུ་རྣམ་པར་གནས་ཞེས་བྱ་བའི་དོན་ཏོ། །དོན་ནི་འདི་ཡིན་ཏེ་རེ་ཞིག་འདི་ཡོད་པ་ནི་བཟློག་པར་ནུས་པ་མ་ཡིན་ལ། ཉམས་སུ་མྱོང་བར་ཡོད་པ་འདི་ཡང་ཤེས་བྱའི་བདག་ཉིད་དུ་འགྱུར་རམ། ཤེས་བྱའི་བདག་ཉིད་འགྱུར་ཞེས་གང་སྟོན་པ་ནི་དོན་ནམ་བློ་ཞེས་བྱ་བའོ། །དོན་ནི་མ་ཡིན་ཏེ་ཞེས་བྱ་བ་ནི་རང་གིས་བརྟགས་པ་བདག་ཉིད་འགོག་པར་བྱེད་དོ། །བདག་ཏུ་གནས་པ་ནི་ནང་སྟེ་ཕྱི་རོལ་གྱི་དོན་ལས་ཐ་དད་པར་བདག་ཏུ་འཛིན་པའི་གནས་ཉིད་དུ་ཡོངས་སུ་གསལ་བའི་ཕྱིར་རོ། །ཡོངས་སུ་གསལ་བ་ནི་སྣང་བ་སྟེ་རང་གི་ངོ་བོར་གསལ་བ་ཞེས་བྱ་བའི་དོན་ཏོ། །རྣམ་པར་རྟོག་པ་གང་ཡིན་པ་དེ་ནི་བདག་ཏུ་འཛིན་པའི་གནས་སུ་ཡོད་པ་ཡིན་ལ། རྣམ་པར་བརྟགས་པའི་དོན་ནི་བདག་ཏུ་འཛིན་པའི་གཞི་མ་ཡིན་པར་སྣང་ངོ༌། །གང་གི་ཕྱིར་རྣམ་པར་བརྟག་པར་བྱ་བའི་དོན་ནི་ཡུལ་གྱི་ཁྱད་པར་དང་འབྲེལ་པར་སྣང་ལ། རྣམ་པར་རྟོག་པ་ནི་དེའི་ཡུལ་ཅན་མ་ཡིན་པ་ནང་དུ་ཉེ་བར་གནས་པ་ཡིན་ནོ། །དེ་བཞིན་དུ་རྣམ་བར་རྟོག་པ་ནི་ད་ལྟར་གྱི་དུས་སུ་བདག་རྣམ་པར་རྟོག་པར་བྱེད་དོ་ཞེས་འཛིན་པ་ཡིན་ལ། རྣམ་པར་བརྟགས་པའི་དོན་ནི་འདས་པའམ་མ་འོངས་པར་རྣམ་པར་རྟོག་པ་ལས་ཐ་དད་པ་ཉིད་དུ་འཛིན་པ་ཡིན་ནོ། །གཏན་ཚིགས་གཞན་བཤད་པ། འདོད་པ་ནི་བསམ་པའོ། །དེའི་དབང་ནི་མཐུ་སྟེ་དེས་སྐྱེ་བ་དང་འགག་པ་དེ་དག་རིགས་པ་མ་ཡིན་པའི་ཡང་ཕྱིར་རོ། །ཕྱི་རོལ་གྱི་དོན་ནི་འདོད་པའི་སྟོབས་ཀྱིས་སྐྱེ་བ་དང་འགག་པར་རིགས་པ་མ་ཡིན་ལ། རྣམ་པར་རྟོག་པ་འདི་ནི་འདོད་པའི་རྒྱུ་མཚན་གྱིས་སྐྱེ་བ་དང་འགག་པ་ཡིན་པའི་ཕྱིར་ཇི་ལྟར་ཕྱི་རོལ་གྱི་རང་བཞིན་དུ་འགྱུར་
ཏེ། འགལ་བའི་ཆོས་དང་ལྡན་པའི་ཕྱིར་ཐ་དད་པ་ཡིན་ནོ། །དེ་ལྟར་གྱི་དོན་དང་འདས་པ་དང་མ་འོངས་པ་གང་ཡིན་པ་དེ་ནི་འདོད་པའི་དབང་གིས་སྐྱེད་པའམ་འགག་པར་བྱར་ནུས་པ་མ་ཡིན་ཏེ། འདས་པ་དང་མ་འོངས་པ་དག་ནི་མེད་པའི་ཕྱིར་ལ། ད་ལྟར་བྱུང་བ་ལ་ཡང་འདོད་པའི་རྗེས་སུ་བྱེད་པ་དེའི་ཕྱིར་རོ། །དེའི་ཕྱིར་དེ་ལྟར་ནང་དུ་ཡོངས་སུ་གསལ་བ་དང་འདོད་པའི་དབང་གིས་འབྱུང་བ་དང་འཇིག་པ་དང་ལྡན་པའི་ཕྱིར་ཕྱི་རོལ་གཟུང་བའི་རང་བཞིན་མ་ཡིན་པ་ཉིད་དོ། །དེའི་ཕྱིར་འདིར་ཏེ་ནང་དུ་ཡོངས་སུ་གསལ་བ་དང་འདོད་པའི་དབང་གིས་སྐྱེ་བ་དང་འགག་པ་དག་ཏུའོ། །གལ་ཏེ་ཡང་མི་རིགས་པའི་སྒྲ་མཐར་གནས་པའི་བསྡུ་བ་ཡིན་པ་དེ་ལྟ་ན་ཡང་དོན་གྱི་ཤུགས་ཀྱིས་སྐྱེ་བ་དང་འགག་པ་ཉིད་ཀྱི་དབང་དུ་བྱས་པ་ཡིན་ནོ། །ཡང་ན་འདོད་པའི་རྗེས་སུ་འགྲོ་བ་འདིར་ཞེས་འབྲེལ་ཏོ། །དོན་འདི་ཡིན་ཏེ། ཡོངས་སུ་གསལ་བའི་རྒྱུར་ཡོངས་སུ་གསལ་བར་བྱ་བའི་ཕྱིར་ནང་དུ་ཡོངས་སུ་གསལ་བ་ཉམས་སུ་མྱོང་བར་བྱ་བའི་ཆེད་དུ། དེའི་བྱེད་པ་དང་ལྡན་པར་བློ་ཉིད་འགྱུར་བའམ། འདོད་པའི་རྗེས་སུ་འགྲོ་བ་དང་ལྡན་པའམ་དེའི་རྒྱུ་མཚན་ཅན་སྐྱེ་བ་དང་འགག་པ་དང་ལྡན་པར་འགྱུར་བ་ཡིན་ནོ་ཞེས་བྱ་བའོ། །གང་གི་ཕྱིར་དེའི་རང་བཞིན་འཛིན་པ་ནི་འགྱུར་བར་བརྗོད་པ་ཡིན་ཏེ། ནང་དུ་ཡོངས་སུ་གསལ་བ་དང་འདོད་པ་ལ་རག་ལས་པས་སྐྱེ་བ་དང་འགག་པའི་རང་བཞིན་འཛིན་པ་ནི་བློ་ཉིད་ལ་རིགས་པ་ཡིན་ནོ། །དེ་ནི་ཡོངས་སུ་གསལ་བ་ལ་སོགས་པ་སྔར་བཤད་པ་དང་ལྡན་པར་འཇུག་ཀྱང་གསལ་བ་མ་ཡིན་ཞིང་ཉམས་སུ་མྱོང་བ་མ་ཡིན་ཏེ། དེ་ནི་ལྐོག་ཏུ་གྱུར་པ་ཡིན་པའི་ཕྱིར་རོ། །འདི་སྙམ་དུ་གལ་ཏེ་བློ་ལྐོག་ཏུ་གྱུར་པ་ཡིན་པ་དེ་ལྟ་ན་ཡང་གསལ་བའི་དོན་དེའི་ཆོས་རྗེས་སུ་འབྲེལ་པ་དང་ལྡན་པར་རྟོགས་པ་ཡིན་ནོ། །གསལ་བར་བྱེད་པའི་ཆོས་གསལ་བར་བྱ་བའི་དོན་ལ་བཞག་པ་དེས་ན་དེ་ཉིད་དུ་ནང་དུ་གསལ་བར་གྱུར་པ་དང༌། འདོད་པ་དང་འབྲེལ་པས་སྐྱེ་བ་དང་འགག་པ་དང་ལྡན་པར་དེའི་རང་བཞིན་མ་ཡིན་པར་ཡང་རྟོགས་པ་ཡིན་ནོ་ཞེ་ན། དེ་ནི་དེ་ལྟ་མི་རིགས་ཏེ། གང་གི་ཕྱིར་དབང་པོའི་གཟུང་བ་གསལ་བ་ན་གསལ་བར་བྱེད་པའི་རྗེས་སུ་འགྲོ་བས་ནང་དུ་ཡོངས་
སུ་གསལ་བའམ་འདོད་པའི་དབང་གིས་སྐྱེ་བ་དང་འཇིག་པ་ཉིད་དུ་རྟོགས་པ་མེད་པ་ཡིན་ནོ། །དེ་ཉིད་བསྟན་པའི་ཕྱིར་གསལ་བའི་དོན་ཀྱང་ཞེས་སྨོས་སོ། །དེ་ལྟར་ན་ནང་དུ་ཡོངས་སུ་གསལ་བ་ལ་སོགས་པའི་རྣམ་པར་གྱུར་བ་གང་ཡིན་པ་དེ་ལྟ་བུར་འགྱུར་བར་འཐད་པ་མ་ཡིན་ནོ། །འདི་སྙམ་དུ་གསལ་བར་གྱུར་པའི་དོན་ཡང་མ་ཡིན་ལ་ལྐོག་ཏུ་གྱུར་པའི་ཤེས་པ་ཡང་མ་ཡིན་ཏེ། འོན་ཀྱང་གཞན་ཉིད་ཡིན་ནོ་སྙམ་ན་འདི་ཉམས་སུ་མྱོང་བར་གྱུར་པའི་དོན་གྱི་ཚོགས་འགའ་ཞིག་དང་རྗེས་སུ་འབྲེལ་པ་སྟེ། འབྲེལ་པ་ཡོད་པ་མ་ཡིན་ལ། ཉམས་སུ་མྱོང་བར་བྱེད་པ་དང་ཉམས་སུ་མྱོང་བར་བྱ་བ་དག་ལས་གཞན་དུ་གྱུར་པ་ཉམས་སུ་མྱོང་བ་ལ་ཡང་འདི་འདྲ་བའི་ཆོས་ཡོད་པ་མ་ཡིན་ནོ། །ཉམས་སུ་མྱོང་བ་འདི་ལྟ་བུའི་ཆོས་དང་ལྡན་པ་ཡིན་ཡང་ལྐོག་ཏུ་གྱུར་པ་ཡིན་པའི་ཕྱིར་མེད་པར་འགྱུར་རོ། །དོན་དང་རྗོད་པ་དེ་དག་གི་རྗེས་སུ་བྱེད་པའི་ངང་ཚུལ་གང་ལ་ཡོད་པའི་རྣམ་པར་རྟོག་པ་སྟེ་བརྗོད་པ་དང་འདྲེས་པའི་རྣམ་པ་ཅན་ཞེས་བྱ་བའི་དོན་ཏེ། ཉམས་སུ་མྱོང་བའི་བདག་ཉིད་གང་ཡིན་པའོ། །ཉམས་སུ་མྱོང་བ་ནི་མྱོང་བ་སྟེ་མྱོང་བར་བྱེད་པ་དང་མྱོང་བར་བྱེད་པའི་བདག་ཉིད་དོ། །རྣམ་པར་རྟོག་པ་ནི་གཉི་གའི་བདག་ཉིད་ཡིན་ཏེ། དེས་ན་ཉམས་སུ་མྱོང་བར་བྱ་བ་ཞེས་བྱ་བའམ། ཉམས་སུ་མྱོང་བ་ཞེས་བྱ་བའམ། ཉམས་སུ་མྱོང་བར་བྱེད་པ་ཞེས་བྱ་བར་བརྗོད་པའི་རྣམ་པར་རྟོག་པ་མེད་པར་ཐལ་བར་བསྟན་ཏོ། །ཐལ་བ་ལས་བཟློག་པ་ཡང་དོན་གྱིས་བལྟ་བར་བྱ་སྟེ། ཉམས་སུ་མྱོང་བའི་རྣམ་པར་རྟོག་པ་འདི་ཡོད་པ་ཉིད་ཡིན་ཞིང་འདི་དོན་ཀྱང་མ་ཡིན་པ་དེའི་ཕྱིར་མངོན་སུམ་དུ་གྱུར་པ་འདི་ནི་བློ་ཡིན་ནོ། །གཟུང་བའི་དོན་ཡོད་པའི་ཕྱིར་དབང་པོའི་ཤེས་པ་ལ་ནི་ཐལ་བ་འདིར་མི་འགྱུར་རོ། །རྣམ་པར་རྟོག་པའི་ཤེས་པ་ལ་ནི་དེའི་ཚེ་དོན་ཉེ་བར་ཡང་ཡོད་པ་མ་ཡིན་པའི་ཕྱིར་དང༌། དོན་ནི་སྟོན་པར་བྱེད་པའི་མངོན་སུམ་འགའ་ཞིག་གིས་འགྱུར་བ་ཡིན་པའི་ཕྱིར་ཐལ་བར་བྱས་པ་ཡིན་ནོ། །གཞན་ཡང་བདེ་བ་ལ་སོགས་པ་གང་ཡིན་པ་སྡུག་བསྔལ་ལ་སོགས་པ་དེའི་མྱོང་བ་ནི་བློ་ཉིད་ཡིན་ཏེ། མྱོང་བ་ནི་བློའི་ངོ་བོ་ཡིན་པའི་ཕྱིར་རོ། །བློ་དེ་ཡང་ལྐོག་ཏུ་གྱུར་པ་དེའི་ཕྱིར་
དེའི་བདག་ཉིད་བདེ་བ་ལ་སོགས་པ་མྱོང་བ་ཡང་སྐྱེས་བུའི་ལྐོག་ཏུ་གྱུར་པར་སྐྱེས་པ་ཡིན་ནོ། །ཕན་པར་འདོད་པ་ཉམས་སུ་མྱོང་བ་དང་གནོད་པ་མི་འདོད་པར་མི་འགྱུར་རོ། །དེ་ལས་ཞེས་བྱ་བ་ནི་བདེ་བ་དང་སྡུག་བསྔལ་ལས་སོ། །འདི་སྐད་བརྗོད་པར་འགྱུར་ཏེ། བདེ་བ་དང་སྡུག་བསྔལ་དག་གིས་སྐྱེས་བུ་ལ་ཕན་པ་དང་གནོད་པ་ནི་མྱོང་བའི་རང་བཞིན་ཁོ་ནས་ཡིན་ནོ། །མྱོང་བ་དེའང་ལྐོག་ཏུ་གྱུར་པའི་ཕྱིར་ལྐོག་ཏུ་གྱུར་པ་ལས་ཕན་པ་དང་གནོད་པ་དག་ཏུ་ཡང་མི་འགྱུར་རོ་ཞེས་བྱ་བ་ཡིན་ནོ། །དཔེར་ན་སྐྱེས་བུ་གཞན་གྱི་བདེ་བ་དང་སྡུག་བསྔལ་མྱོང་བ་སྐྱེས་བུ་གཞན་གྱི་ལྐོག་ཏུ་གྱུར་པ་དེའི་ཕྱིར་ཕ་རོལ་པོའི་རྒྱུད་ལ་ཡོད་པ། གཞན་གྱིས་ཡང་དག་པར་མྱོང་བའི་བདག་ཉིད་དེ་དག་གིས་ཕན་པ་དང་གནོད་པར་མི་འགྱུར་བ་བཞིན་ནོ། །བུ་ལ་སོགས་པ་ལ་བདེ་བར་ཡོད་པར་ཤེས་པ་ལས་ཕན་འདོགས་པ་ལ་སོགས་པའི་བདག་ཉིད་རང་གི་རྒྱུད་ལ་ཡོད་པའི་བདེ་བ་གཞན་ཁོ་ན་ཞིག་སྐྱེ་བ་ཡིན་གྱི་རྒྱུད་ལ་ཡོད་པ་ཉིད་ལས་ནི་ཕན་པ་དང་གནོད་པ་མ་ཡིན་ཏེ། དེའི་བདག་ཉིད་དུ་ཁྱད་པར་མེད་པའི་ཕྱིར་དགྲ་ལ་སོགས་པའི་བདེ་བ་ཤེས་པ་ལས་ཀྱང་ཕན་པ་དང༌། སྡུག་བསྔལ་ཤེས་པ་ལས་གནོད་པར་ཡང་ཐལ་བའི་ཕྱིར་རོ། །དེས་ན་གཞན་གྱི་བདེ་བ་དང་སྡུག་བསྔལ་ཤེས་པས་ནི་གཞན་ལ་ཕན་པ་དང་གནོད་པར་འགྱུར་བ་མ་ཡིན་པར་བལྟ་བར་བྱའོ། །གལ་ཏེ་ཕན་པ་དང་གནོད་པ་ནི་རང་གི་རྒྱུད་ལ་ཡོད་པའི་བདེ་བ་དང་སྡུག་བསྔལ་དེས་བྱས་པ་ཡིན་གྱི། དེ་མྱོང་བ་མངོན་དུ་བྱས་པས་ནི་མ་ཡིན་པ་མ་ཡིན་ནམ། དེའི་ཕྱིར་འདི་ལྟར་གང་གཞན་གྱི་བདེ་བ་ལ་སོགས་པ་རིག་པའི་རྣལ་འབྱོར་པ་རྣམས་གཞན་གྱི་བདེ་བ་དང་སྡུག་བསྔལ་དག་གིས་བདེ་བ་དང་སྡུག་བསྔལ་པར་མི་འགྱུར་རོ། །དེ་ལྟ་ཡིན་ན་ཡང་གཞན་གྱི་རྒྱུད་ལ་ཡོད་པའི་བདེ་བ་དང་སྡུག་བསྔལ་དག་གིས་ཕན་པ་དང་གནོད་པར་ནུས་པ་མ་ཡིན་ལ། རང་གི་རྒྱུད་ལ་ཡོད་པ་ནི་ཉམས་སུ་མ་མྱོང་ཡང་ཕན་པ་དང་གནོད་པར་འགྱུར་བ་ཡིན་ནོ་ཞེ་ན། འདིར་སྨྲས་པ། འདི་ལ་ཟས་ཟོས་པ་དང་མ་ཟོས་པ་དག་གིས་ལུས་རྒྱས་པ་དང་ཞུམ་པའི་མཚན་ཉིད་ཀྱིས་ཕན་པ་དང་གནོད་པ་གང་ཡིན་པ་དེ་དག་ནི་ཉམས་སུ་མ་མྱོང་བ་ལས་ཀྱང་འགྱུར་བ་ཡིན་གྱི་
བདེ་བ་དང་སྡུག་བསྔལ་གྱིས་བྱས་པ་ནི་དེ་ལྟ་མ་ཡིན་ནོ། །འདི་ལྟར་འདོད་པ་དང་མི་འདོད་པ་ཉམས་སུ་མྱོང་བ་དག་གིས་གསལ་བ་ཉིད་ནི་བསྙོན་པར་ནུས་པ་མ་ཡིན་པའི་ཕྱིར་རོ། །བདེ་བ་དང་སྡུག་བསྔལ་གྱིས་བྱས་པའི་ཕན་པ་དང་གནོད་པ་ནི་གསལ་བ་ལས་གཞན་མ་ཡིན་ལ། གསལ་བ་ཡང་མངོན་སུམ་དུ་བྱས་པ་ཡིན་ནོ། །མྱོང་བའི་མཚན་ཉིད་ཀྱི་བློ་ལྡོག་ཏུ་གྱུར་བ་ཉིད་ཡིན་ན་ནི་གསལ་བ་མ་ཡིན་པའི་ཕྱིར་འདོད་པ་དང༌། མི་འདོད་པའི་མྱོང་བ་གསལ་བའི་རང་བཞིན་ངན་པ་དང་གནོད་པ་དག་ཏུ་མི་འགྱུར་རོ། །དེའི་ཕྱིར་བདེ་བ་དང་སྡུག་བསྔལ་མངོན་སུམ་དུ་བྱས་པས་དེ་ལ་རག་ལས་པའི་ཕན་པ་དང་གནོད་པར་འགྱུར་བ་ཡིན་ནོ། །གང་ཡང་རྣལ་འབྱོར་པ་རྣམས་གཞན་གྱི་བདེ་བས་བདེ་བར་མི་འགྱུར་བ་དེ་ལ་ཡང་བརྗོད་པར་བྱ་སྟེ། བདག་ཏུ་འཛིན་པའི་གཞི་ཡིན་པའི་ཕྱིར། མྱོང་བར་བྱེད་པའི་རྣམ་པའི་འདོད་པའི་རང་བཞིན་ནི་སྐྱེས་བུ་ལ་ཕན་པའི་བདག་ཉིད་ཡིན་གྱི་མྱོང་བར་བྱ་བའི་རྣམ་པ་ནི་མ་ཡིན་ཏེ། བདག་ཏུ་འཛིན་པའི་གཞི་ལས་ཕྱི་རོལ་དུ་གྱུར་པའི་རང་བཞིན་དུ་སྣང་བའི་ཕྱིར་རོ། །དེས་ན་རྣལ་འབྱོར་པ་རྣམས་མྱོང་བར་བྱ་བའི་རྣམ་པའི་བདེ་བ་དང་སྡུག་བསྔལ་དག་གིས་བདེ་བ་དང་སྡུག་བསྔལ་བར་འགྱུར་བ་ཡིན་ནོ། །བདེ་བ་ནི་ཕན་པ་ཙམ་གྱི་བདག་ཉིད་ཡིན་ཞིང་ཕན་པའི་བདག་ཉིད་ཀྱང་འཛིན་པའི་རྣམ་པར་འགྱུར་བའི་སིམ་པའི་རང་བཞིན་ཡིན་ཏེ། དེའི་ཕྱིར་སྐྱེས་བུའི་བདེ་བ་ནི་དེ་ཙམ་ཉིད་ཡིན་གྱི་གཟུང་བའི་རྣམ་པ་ནི་མ་ཡིན་ནོ། །ཁོ་བོ་ཅག་གི་བདེ་བ་ནི་འདི་ཙམ་ཉིད་ཡིན་ཏེ། གང་མྱོང་བ་ཞེས་འཆད་པར་འགྱུར་བ་ཡིན་ནོ། །དེའི་ཕྱིར་བདེ་བ་ལ་སོགས་པ་སྐྱེས་པ་ཙམ་དང་གཟུང་བའི་རྣམ་པ་ཉིད་དུ་མངོན་སུམ་དུ་བྱས་པ་ཙམ་ནི་ཕན་པ་དང་གནོད་པ་མ་ཡིན་གྱི་འོན་ཀྱང་འཛིན་པ་རྣམ་པའི་རང་བཞིན་དུ་གསལ་བ་ཡིན་ནོ་ཞེས་བལྟ་བར་བྱའོ། །ཉེས་པ་གཞན་བསགས་པའི་དོན་དུ་འདི་དག་ཅེས་བྱ་བ་ལ་སོགས་པ་གསུངས་ཏེ། བློ་འདི་དག་མངོན་སུམ་རྒྱུར་གྱུར་པའི་ཤེས་པ་མ་ཡིན་ཏེ། མ་ངེས་ན་བདག་ཉིད་གཞིར་གྱུར་པ་ལ་རྟོགས་པར་ཡང་སྟེ་ཤེས་པར་རོ། །འདི་དག་ཅེས་བྱ་བར་འབྲེལ་ཏོ། །ཇི་ལྟར་ཞེས་བྱ་བ་ནི་མི་སྲིད་པའོ། །འཆད་པར་འགྱུར་
བའི་ཚུལ་གྱིས་སྒྲུབ་པར་བྱེད་པའི་ཐབས་གཞན་མེད་པའི་ཕྱིར་བློ་མངོན་སུམ་གྱིས་རིག་པ་མ་ཡིན་ནོ། །བདག་ཉིད་གཞིར་གྱུར་པ་ལ་ཤེས་པར་མི་འགྱུར་རོ། །བློ་བདག་ཉིད་ལ་བརྟེན་པར་མ་ཤེས་ན་ཡང་དོན་ཤེས་པ་ཙམ་དུ་འདོད་པར་འགྱུར་གྱི་བདག་གིས་དོན་འདི་ཤེས་སོ་ཞེས་བདག་ཉིད་ཉམས་སུ་མྱོང་བ་པོར་ནི་ཤེས་པར་མི་འགྱུར་རོ། །དོན་དམ་པར་ནི་ཤེས་པར་བྱེད་པ་པོ་འདིས་དོན་འདི་ཤེས་སོ་ཞེས་ཤེས་པ་པོ་ཤེས་པ་ན་དོན་ཤེས་པར་འགྱུར་བ་ཡིན་གྱི་ཤེས་པ་པོ་ཤེས་པ་མེད་པར་ནི་དོན་ཤེས་པ་མེད་པའི་ཕྱིར་ཤེས་པ་པོ་བདག་ཉིད་མ་ངེས་ན་དངོས་པོ་ཡང་ངེས་པར་མི་འགྱུར་རོ། །རྟགས་སུ་གྱུར་པའི་དོན་གང་ཡིན་པ་དེ་ཤེས་པར་འགྱུར་བ་ན་རྟགས་ཅན་གྱི་བློ་རྗེས་སུ་དཔོག་པ་འབྱུང་བ་ཡིན་ལ་རྗེས་སུ་དཔག་པ་དེ་ལས་རྟོགས་པ་པོས་བློ་ཁོང་དུ་ཆུད་པ་ཡིན་ནོ། །གང་གི་ཕྱིར་དོན་དམ་པར་ཁོང་དུ་ཆུད་པ་རྗེས་སུ་དཔག་པ་ལས་ཐ་དད་པ་མ་ཡིན་ཡང་ཚད་མ་དང་དེའི་འབྲས་བུའི་རང་བཞིན་དག་ལས་ཐ་དད་བར་བལྟའོ། །ཡང་ཇི་ལྟར་ན་དོན་ཤེས་པ་ལ་བློ་རྗེས་སུ་དཔོག་པའི་རྟགས་ཡིན་ཞེ་ན། དོན་མ་ཤེས་པར་ཞེས་སྨྲས་ཏེ། གང་གི་ཕྱིར་ཇི་སྲིད་དོན་ཤེས་པར་མ་གྱུར་པ་དེ་ཇི་སྲིད་དུ་བློ་ངེས་པ་ནི་མ་ཡིན་པ་དེའི་ཕྱིར་བློ་གྲུབ་པ་ནི་དོན་ཤེས་པའི་རྒྱུ་མཚན་ལས་ཡིན་ནོ། །འདིས་ནི་མེད་ན་མི་འབྱུང་བ་དང༌། དོན་ཤེས་པ་དང་བློ་གྲུབ་པ་སྔ་ཕྱིར་བསྟན་པ་ཡིན་ནོ། །བློ་ངེས་པ་ནི་སྔར་མ་ཡིན་ཞིང་དུས་མཉམ་པར་ཡང་མ་ཡིན་ལ་ཕྱིས་ཀྱང་འདིའོ་ཞེས་ངེས་པར་ནུས་པ་མ་ཡིན་གྱི། འོན་ཀྱང་ཡུལ་རྣམ་པར་འཆད་པར་དོན་རགས་པ་མཐོང་བ་ལས་གོར་མ་ཆག་པར་བློ་ཡོད་དོ་ཞེས་བྱ་བར་ཁོང་དུ་ཆུད་པར་འགྱུར་ཏེ། དོན་ཤེས་པ་ནི་དེའི་རྒྱུ་མཚན་ཅན་ཡིན་པའི་ཕྱིར་རོ་ཞེ་ན་ཞེས་བྱ་བ་ནི་ཁས་བླངས་པའི་དོན་ཏོ། །གཞན་དག་དེ་ལྟར་དོགས་ནས་བཤད་པ། བླུན་པོ་ནི་རང་གི་སྨྲས་པ་ཡང་དོན་གོ་བར་མི་ནུས་པའོ། །རྒྱལ་བ་ཡིན་ནོ་ཞེས་བྱ་བ་ནི་རྒྱལ་བ་ཐོབ་པའོ། །ཅི་ཞིག་བྱས་པས་རྒྱལ་ཞེ་ན། འཇིག་རྟེན་གྱི་མདུན་དུ་ཁོ་བོ་རྒྱལ་ལོ་ཁོ་བོ་རྒྱལ་ལོ་ཞེས་རྒྱལ་བའི་སྒྲ་དམ་བཅས་པའི་སྒྲ་དེ་བསྒྲགས་པ་སྟེ། གསལ་བར་བྱས་སོ། །གལ་ཏེ་དེས་དེ་ལྟར་གསལ་བར་བྱས་པ་
དེ་ལྟ་ན་ཡང་ཇི་ལྟར་རྣམ་པར་ཤེས་པའི་འཇིག་རྟེན་ལས་རྒྱལ་བ་ཐོབ་ཅེ་ན། བཤད་པ། གང་གིས་འདི་སྐད་འགལ་བའི་ཆོས་སྨྲ་བའི་ཚིག་ལས་ཡང་འཇིག་རྟེན་ན་མཉན་པར་འོས་པར་བྱེད་པས་སོ། །གལ་ཏེ་མཁས་པ་འགའ་ཞིག་ཡོད་ན་ནི་འདི་ལྟ་བུའི་ཚིག་བཟློག་པར་འགྱུར་གྱི་ཚིག་འདི་ལ་རྣ་གཏོད་པར་མི་འགྱུར་བ་ཞིག་ན་མ་བཟློག་པ་ཉིད་ཀྱིས་རྒྱལ་བར་བསྒྲགས་བས་འཇིག་རྟེན་ལས་རྒྱལ་བ་ཡིན་ནོ། །འགལ་བ་ཅི་ཞིག་སྨྲས་ཤེ་ན། བཤད་པ། དོན་ཤེས་པ་བློའི་སྒྲུབ་པར་བྱེད་པའི་གཏན་ཚིགས་ནི་རྟོགས་པ་ཡིན་ལ། རྟགས་ཡོངས་སུ་ཤེས་པ་ན་མ་རྟོགས་པས་རྟགས་ཅན་དུ་འགྱུར་བའི་བློ་ནི་མ་ཡིན་ནོ་ཞེས་ཟེར་བའོ། །བསམ་པ་ནི་འདི་ཡིན་ཏེ། ཤེས་པ་དང་བློ་དང་རྟོགས་པ་ཞེས་བྱ་བ་ནི་རྣམ་གྲངས་ཡིན་ལ། སྒྲ་ཐ་དད་པས་དོན་ཐ་དད་པའི་གྲུབ་པ་དང་མ་གྲུབ་པར་འགྱུར་བ་ནི་མི་འཐད་དོ། །དེ་སྐད་དུ་སྨྲ་བའི་ཚིག་ལ་རྣ་ནི་མི་གཏོད་པ་ན་ཡང་སྔར་བཤད་པའི་སྐྱོན་དུ་འགྱུར་རོ། །གང་གི་ཕྱིར་དེ་སྐད་སྨྲ་བ་ན་ལྷ་རྣམས་དགའ་བ་འཇིག་རྟེན་ན་བསྔགས་པར་འོས་པའི་ཤེས་རབ་ཅན་དུ་གྱུར་པ་ཡིན་ཏེ། བསྔགས་པར་བྱ་ཞིང་བསྟོད་པར་བྱ་བ་ཡིན་ནོ་ཞེས་བྱ་བར་རོ། །དེའི་ཕྱིར་བླུན་པོ་རྒྱལ་བ་ཡིན་ནོ་ཞེས་བྱ་བ་མཇུག་བསྡུ་བའོ། །ཡང་གཞན་གྱི་དོགས་པ་སྨྲས་པ། བློ་དང་ཤེས་པ་དག་ནི་རྣམ་གྲངས་ཀྱི་སྒྲ་ཡིན་པའི་ཕྱིར་རྟགས་དང་རྟགས་ཅན་གྱི་དོན་དུ་རྣམ་པར་གནས་པ་མ་ཡིན་གྱི། འོན་ཀྱང་དབང་པོ་དང་དོན་འདི་དག་བློ་རྗེས་སུ་དཔོག་པའི་རྟགས་ཡིན་ནོ། །གང་གི་ཕྱིར་དབང་པོ་དང་དོན་ཡོད་པ་དེའི་ཕྱིར་དབང་པོ་ལ་བརྟེན་པས་དོན་གྱི་ཡུལ་ཅན་གྱི་བློར་འགྱུར་བ་ཡིན་ནོ་ཞེ་ན། སློབ་དཔོན་གྱིས་མི་འཁྲུལ་ན་གཏན་ཚིགས་ཡིན་ནོ་ཞེས་གསུངས་སོ། །དོན་འདི་ཡིན་ཏེ། གང་ཞིག་གང་ལ་མི་འཁྲུལ་པ་དེ་ནི་དེའི་རྟགས་ཡིན་ནོ། དབང་པོ་ནི་ཤེས་པ་ལ་འཁྲུལ་པ་ཡིན་ནོ། །དབང་པོ་དེ་ཡོད་པ་ཡིན་ཡང་དེའི་ཤེས་པ་མི་འཇུག་པའི་ཕྱིར་ཏེ། གཞན་དུ་ན་དབང་པོ་ཡོད་པའི་ཕྱིར་དབང་པོ་ཐམས་ཅད་ཀྱི་ཤེས་པ་གཏན་དུ་ཡོད་པར་ཐལ་བར་འགྱུར་ན་དེ་ལྟར་ནི་མཐོང་བའམ་འདོད་པ་མ་ཡིན་ནོ། །དེ་བཞིན་དུ་དོན་གཏན་ཚིགས་ཡིན་བ་ལ་ཡང་ཡོད་པ་ཙམ་གཏན་ཚིགས་ཡིན་
ན་ནི། དེའི་ཚེ་ཐམས་ཅད་དུ་རིག་པར་ཐལ་བར་འགྱུར་རོ། །ཉེ་བར་གཏན་ཚིགས་ཡིན་ན་ཉེ་བ་མ་ལུས་པ་དུས་གཅིག་ཏུ་འཛིན་པར་ཐལ་བ་ལས་དེ་ལྟར་རིགས་པའམ་འདོད་པ་མ་ཡིན་ཏེ། རྣམ་པར་ཤེས་པ་དུས་གཅིག་ཏུ་འཇུག་པར་ཁས་མ་བླངས་པའི་ཕྱིར་རོ། །དེའི་ཕྱིར་དབང་པོ་དང་དོན་དག་ནི་ཤེས་པ་ལ་འཁྲུལ་པ་ཡིན་ནོ་ཞེས་བྱ་བར་གྲུབ་བོ། །གང་དག་འདི་ནི་དབང་པོ་དང་དོན་དག་ཐུན་མོང་བ་ཡིན་པའི་ཕྱིར་འཁྲུལ་པར་བརྗོད་པ་ཡིན་ནོ་ཞེས་ཟེར་བ་དེ་ལ་འདི་སྐད་དུ་ཐུན་མོང་བ་ཡིན་པའི་ཕྱིར་ཞེས་འཆད་པར་འགྱུར་བའི་སྐྱོན་འདིའི་ཡུལ་གང་ཡིན་ཞེས་འདྲི་བར་བྱའོ། །གཞན་ཡང་དབང་པོ་དང་དོན་ལྷན་ཅིག་པ་ཉིད་གཏན་ཚིགས་ཡིན་པ་དེ་ནི་དབང་པོ་འཁྲུལ་པ་མེད་པའི་ཕྱིར་ཚོགས་པ་ཡང་འཁྲུལ་པ་མེད་པར་འགྱུར་རོ། །དབང་པོ་ནི་སྐྱེས་བུ་སོ་སོ་ལ་ངེས་པའི་ཕྱིར་ཇི་ལྟར་ན་ཐུན་མོང་བའི་སྐྱོན་དུ་འགྱུར། གང་ཡང་གཞུང་འདིས་ཤེས་པ་མ་གྲུབ་ན་དབང་པོ་དང་དོན་དག་ཀྱང་མི་འགྲུབ་བའི་ཕྱིར་འཁྲུལ་པ་མ་གྲུབ་པ་ཡིན་ནོ་ཞེས་བསྟན་པར་བརྗོད་པ་དེ་ཡང་རིགས་པ་མ་ཡིན་ཏེ། གང་གི་ཕྱིར་འདིར་དོན་གྲུབ་པར་ཁས་བླངས་ནས་ཤེས་པ་ལྐོག་ཏུ་གྱུར་པ་ཡིན་ན་ངེས་པར་ཇི་ལྟར་འགྱུར་ཞེས་སྟོན་པའི་སྐབས་ཡིན་ཏེ། དེ་ཉིད་ཀྱི་ཕྱིར་དེ་མ་ཐག་ཏུ་མ་གྲུབ་པའི་སྐྱོན་ནི་ཡིད་ལ་བརྗོད་པར་འགྱུར་བ་ཡིན་ནོ། །འབྲེལ་པ་མ་གྲུབ་པའི་སྐྱོན་ནི་འདི་ཉིད་ཀྱི་མཐར་འཆད་པར་འགྱུར་རོ། །དེའི་ཕྱིར་བཤད་པ་སྔ་མ་ཉིད་ལེགས་པ་ཡིན་ནོ། །ཡིད་ཡིན་ནོ་ཞེ་ན་ཞེས་བྱ་བ་ནི་ཡིད་རྟགས་ཡིན་པར་དོགས་པའོ། །སུན་དབྱུང་བའི་ཕྱིར་དེ་ཡང་ཞེས་གསུངས་སོ། །དགོངས་པ་ནི་འདི་ཡིན་ཏེ། གཞན་གྱི་འདོད་པའི་ཡིད་གང་ཡིན་པ་དེ་ཡང་གྲུབ་པའི་ཤེས་པའི་ཅིག་ཅང་མི་སྐྱེ་བ་གྲུབ་པས་རྗེས་སུ་དཔག་པར་བྱ་བ་ཡིན་ཏེ། དེས་ན་ཤེས་པ་མ་གྲུབ་པར་དེ་མི་འགྲུབ་བོ། །སྐྱོན་འདི་ནི་རྣམ་པར་ཤེས་པའི་བདག་ཉིད་ཅན་གྱི་ཡིད་ལ་ཡང་མཚུངས་པ་ཡིན་ནོ། །ཤེས་པ་གཅིག་གི་རྒྱུ་ཡིན་པའི་ཕྱིར་ན་རྣམ་པར་ཤེས་པ་འདི་ཉིད་ཡིད་ཡིན་པར་རིགས་ཀྱི། སྔ་ན་མེད་པར་བརྟགས་པའི་ཡིད་ནི་མ་ཡིན་ནོ། །དེ་ཉིད་སྟོན་པ་ནི་ཡིད་དེ་ཡང་རྣམ་པར་ཤེས་པ་ཡིན་པར་རིགས་པ་ཡིན་གྱི་གཞན་ནི་
མ་ཡིན་ནོ་ཞེས་བྱ་བའོ། །བར་དུ་མ་ཆོད་པ་བར་ཆད་མེད་པའི་ཤེས་པའི་རྒྱུར་གྱུར་པ་སྔ་མ་ཡིན་ཏེ། འདི་ཉིད་ཡིད་ཀྱི་བྱ་བ་དང་ལྡན་པའི་ཕྱིར་རོ། །བྱ་བ་དེ་ཉིད་སྟོན་པ་ནི་ཤེས་པ་སྔ་མ་དེ་ཤེས་པ་མི་སྐྱེ་བའི་ཡུལ་དུ་འདོད་པ་ལས་གཞན་དུ་གྱུར་པའི་ཡུལ་གཞན་དེ་ལ་སེམས་གཏད་ཅིང་ཆགས་པ་དང་ནུས་པ་ཉམས་པ་སྟེ་གཉིད་ལ་སོགས་པས་ཉམས་པའོ། །དེའི་ཕྱིར་དེ་ལྟར་གཉི་ག་ཡང་གཟུང་བ་ཡིན་ནོ། །ཁ་ཅིག་སེམས་གཏད་པ་ཉིད་ཀྱིས་ནུས་པ་ཉམས་པ་ཡིན་པར་ཤེས་པ་དེ་ནི་ཐམས་ཅད་བསྡུས་པར་མི་འགྱུར་བས་ཧ་ཅང་འབྱོར་པ་ཡིན་ནོ། །ཡུལ་གཞན་དེ་ཡོད་ཀྱང་ཤེས་པ་མི་སྐྱེ་བའི་རྒྱུའི་ཕྱིར་དེ་ཉིད་ཡིད་ཡིན་པར་རིགས་ཏེ་ཡིད་ཀྱི་དགོས་པ་ནི་དེ་ཅམ་དུ་ཟད་པའི་ཕྱིར་རོ། །དེ་ལྟར་སྐྱོན་ནི་ཅི་ཡོད་ཅེ་ན། དེ་ཡང་མ་གྲུབ་བོ་ཞེས་གསུངས་ཏེ། རྣམ་པར་ཤེས་པ་ཉིད་ཡིན་པའི་ཕྱིར་རོ། །མ་གྲུབ་པ་དེ་ཉིད་ཀྱིས་མ་གྲུབ་པ་དེ་ཉིད་སྒྲུབ་པར་ནུས་པ་མ་ཡིན་ནོ། །ཡུལ་གསལ་བ་ཞེས་བྱ་བ་འདིས་ཡུལ་གསལ་བ་རྟགས་ཡིན་པར་དོགས་པ་བསྟན་ནས་བཟློག་པའི་ཕྱིར་གསལ་བ་དེ་ཉིད་ཅེས་བྱ་བ་ལ་སོགས་པ་གསུངས་སོ། །གང་གི་ཕྱིར་ཡུལ་གསལ་བ་ཤེས་པའི་བདག་ཉིད་ཡིན་པའམ། ཤེས་པའི་ཡུལ་གྱི་རང་བཞིན་ཙམ་དུ་གྱུར་པའི་དོན་ཡིན་པར་འགྱུར། དེ་ལས་གལ་ཏེ་གསལ་བ་ཤེས་པ་ཡིན་པར་གཟུང་བར་བྱ་བ་དེའི་ཚེ་དེ་མ་གྲུབ་པའི་ཕྱིར་དེའི་ཁྱད་པར་ཅན་གྱི་དོན་གཏན་ཚིགས་ཉིད་དུ་མ་གྲུབ་བོ་ཞེས་སྟོན་པར་བྱེད་པ་ནི། ཤེས་པ་དེའི་ཁྱད་པར་ཅན་གྱི་དོན་གང་ཡིན་པ་དེ་ཡང་མ་གྲུབ་བོ། །དབྱིག་པ་མ་གྲུབ་པར་དབྱིག་པ་ཅན་དུ་གྲུབ་པ་ནི་མེད་དོ། །གསལ་བ་ནི་ཞེས་བྱ་བ་ལ་སོགས་པས་ཕྱོགས་གཉིས་པའི་དོགས་པ་སྤོང་སྟེ། དོན་གྱི་བདག་ཉིད་ཤེས་པའི་ཡུལ་གྱི་རང་བཞིན་རྟགས་ཡིན་གྱི་ཤེས་པ་ནི་མ་ཡིན་ནོ་ཞེས་བྱ་བ་འདི་ལ་དོན་གྱི་བདག་ཉིད་ཀྱི་གསལ་བ་ཡང་ཤེས་པའི་ཡུལ་དུ་མ་གྲུབ་པའི་ཕྱིར་མ་གྲུབ་པ་ཡིན་ནོ་ཞེས་བརྗོད་པར་བྱ་བ་ཡིན་མོད་ཀྱི་འོན་ཀྱང་སྐབས་འདིར་དོན་གྲུབ་པར་ཁས་བླངས་པ་ཡིན་པའི་ཕྱིར་ན་སྐྱོན་གཞན་སྟོན་ཏོ། །དེ་ཇི་ལྟར་ཏེ་ཅིའི་ཕྱིར་རོ། །བློས་བསྐྱེད་པ་ནི་བློས་བསྐྱེད་པའོ། །བློས་བསྐྱེད་པ་མེད་པ་གང་ཡིན་པ་དེ་ཇི་ལྟར་བློ་གོ་བར་བྱེད་པ་ཡིན་ཏེ། མ་ཡིན་
པ་ཉིད་དོ་སྙམ་དུ་དགོངས་པའོ། །ཅིའི་ཕྱིར་ཞེ་ན། འབྲེལ་པ་མེད་པའི་ཕྱིར་རོ་ཞེས་གསུངས་ཏེ། དེའི་བདག་ཉིད་ལས་གཞན་པའི་འབྲེལ་པ་ནི་དེ་ལས་བྱུང་བ་ཉིད་ཡིན་ཞིང་དེ་ཡང་མེད་པ་དེའི་ཕྱིར་ཇི་ལྟར་དེ་གོ་བར་བྱེད་པ་ཡིན་གཞན་ཡང་དོན་གྱི་བདག་ཉིད་ཀྱི་གསལ་བ་ནི་བློ་ཐམས་ཅད་ཀྱི་ཐུན་མོང་བ་ཡིན་པ་དེས་ན་བདག་ཉིད་ཀྱི་བློ་ཉིད་ཇི་ལྟར་རྗེས་སུ་དཔོག་པར་བྱེད། དེའི་ཕྱིར་དོན་ཐུན་མོང་བ་ཡིན་བའི་ཕྱིར་བློ་ཙམ་དུ་རྗེས་སུ་དཔོག་པ་ན་གཞན་གྱི་བློ་ཡང་རྗེས་སུ་དཔོག་པར་ཐལ་ལོ། །སྐྱོན་གཞན་ཡང་བརྗོད་པའི་ཕྱིར། རྟགས་གྲུབ་ཀྱང་ཞེས་སྨོས་ཏེ། ཀྱང་གི་སྒྲས་ནི་འདི་སྐད་ཅེས་རེ་ཞིག་རྟགས་ཉིད་དུ་ཉེ་བར་དགོད་པར་བྱ་བ་ནི་འགའ་ཡང་མ་གྲུབ་པའམ། ཡང་ན་ཤེས་པ་མ་གྲུབ་པའི་ཕྱིར་རྟགས་ཀྱི་དངོས་པོ་ཐམས་ཅད་མ་གྲུབ་པ་ཡིན་ནོ་ཞེས་བརྗོད་པ་ཡིན་ནོ། །རྟགས་འགའ་ཞིག་གྲུབ་ཀྱང་བློ་རྗེས་སུ་དཔོག་པ་མ་ཡིན་ནོ་ཞེས་འབྲེལ་ཏོ། །གཏན་ཚིགས་སྨྲས་པ། གྲུབ་པའི་རྟགས་དེ་བློ་དང་འབྲེལ་པ་མེད་པའི་ཕྱིར་རོ། །དངོས་པོ་གྲུབ་ཀྱང་ཇི་སྲིད་རྟགས་ཅན་དང་ལྷན་ཅིག་འབྲེལ་པ་གྲུབ་པར་མ་གྱུར་པ་དེ་སྲིད་དུ་རྟོགས་པར་བྱེད་པ་མ་ཡིན་ནོ། །ཇི་ལྟར་འབྲེལ་པ་མ་གྲུབ་ཅེ་ན། མ་གྲུབ་པས་ན་ཞེས་གསུངས་ཏེ་བློ་ནི་དུས་ཐམས་ཅད་དུ་ལྐོག་ཏུ་གྱུར་པ་ཉིད་ཀྱིས་མ་གྲུབ་པ་ཡིན་པས་མ་གྲུབ་པ་དང་ཇི་ལྟར་ཡང་འབྲེལ་པ་ངེས་པར་ནུས་པ་མ་ཡིན་ནོ། །དེའི་ཕྱིར་བརྗོད་པ་མེད་པ་བརྗོད་པ་དང་བྲལ་བ་མངོན་སུམ་ཉིད་དུ་སྣང་བ་ཡིན་ནོ། །དེས་ནི་གཡོ་བ་མེད་པར་གནས་པ་ནི། གཅིག་གི་བདག་ཉིད་དགག་པ་ལ་ནི་མཐོང་བའི་བདག་ཉིད་ཀྱི་མངོན་སུམ་ཉིད་གོ་བར་བྱེད་པ་ཡིན་ལ། མཐོང་བ་ལ་རྣམ་པར་རྟོག་པ་ཐ་དད་པ་དགག་པ་ལ་ནི་སྣང་བ་མི་དམིགས་པ་ཚད་མ་ཡིན་ནོ། །དེ་ལྟར་མཚན་ཉིད་ལ་ལོག་པར་རྟོགས་པ་བསལ་ནས་སྤྱོད་ཡུལ་ལ་ལོག་པར་རྟོགས་པ་བསལ་བའི་ཕྱིར། དབང་པོའི་བྱ་བ་མེད་པ་ལ་ཞེས་བྱ་བ་ལ་སོགས་པ་སྨོས་སོ། །མངོན་སུམ་རྣམ་པ་བཞི་ཡང་མ་བརྗོད་པར་དབང་པོའི་མངོན་སུམ་ཉིད་ཀྱི་དབང་དུ་བྱས་ནས་ཡུལ་ལ་ལོག་པར་རྟོགས་པ་བསལ་བ་གང་ཡིན་པ་དེ་ནི་གང་གི་ཕྱིར་དབང་པོའི་ཤེས་པ་བརྗོད་པར་བྱ་བ་མ་ཡིན་པའི་ཡུལ་ཅན་ཡིན་པ་དེའི་ཕྱིར་ཡང་
རྣམ་པར་རྟོག་པ་མེད་པར་སྒྲུབ་པའི་དབང་དུ་བྱས་ནས་འཐད་པ་གཞན་བསགས་པའི་ཕྱིར་རམ། མདོ་མཛད་པའི་གོ་རིམས་རྗེས་སུ་བསྐྱང་བའི་ཕྱིར་རོ། །དབང་པོའི་ཤེས་པ་དེ་ནི་བརྗོད་མེད་དེ། །བརྗོད་པར་བྱ་བ་མ་ཡིན་པའི་རྟོགས་པར་བྱེད་པ་ཡིན་ནོ་ཞེས་བྱ་བ་ནི་དམ་བཅས་པའི་དོན་ཏོ། །གཏན་ཚིགས་བཤད་པ། སྒྲས་ལྷན་ཅིག་འདྲེས་པའི་དོན་ནི་དབང་པོའི་ཤེས་པས་མཐོང་བ་བཞིན་དུ་བློ་ལ་སྣང་བ་མེད་པའི་ཕྱིར་ཏེ། རྣམ་པར་གནས་པ་མེད་པའི་ཕྱིར་རོ། །འཁྲུལ་པ་བསལ་བའི་ཕྱིར་ཁྱད་པར་བཤད་པ། དབང་པོའི་བྱ་བ་མེད་པ་གང་ཡིན་པ་དེ་ལའོ། །འདི་ཉིད་ཀྱི་རྣམ་པར་འགྲེལ་པ་བཤད་པ་ནི་མཚན་ཉིད་བཤད་མ་ཐག་པའི་མངོན་སུམ་དེ་ནིའོ། །ཡང་གི་སྒྲ་བརྗོད་པ་ནི་ལོག་པར་རྟོགས་པ་གཞན་སེལ་བ་བསགས་པའོ། །བརྗོད་དུ་མེད་པ་ནི་བསྟན་པར་བྱ་བ་མ་ཡིན་པའི་ཡུལ་ཅན་གང་ཡིན་པའོ། །དབང་པོའི་བྱ་བ་མེད་པ་གང་ཡིན་པ་ལ་སྟེ། བྱ་བ་མེད་པ་ཉིད་ནི་མིག་ལ་སོགས་པ་བརྗོད་པར་བྱ་བའི་ཡུལ་ཅན་གྱི་དབང་པོ་ལ་བལྟ་བར་བྱའི་རྗོད་པར་བྱེད་པའི་ཡུལ་ཅན་གྱི་དབང་པོ་ལ་ནི་མ་ཡིན་ནོ། །སྣང་བའི་དངོས་པོ་ཉིད་ཉན་པ་པོས་སྒྲ་ལས་རྟོགས་པ་ཡིན་ནོ་ཞེས་དོགས་པ་བཟློག་པའི་ཕྱིར་བྱ་བ་མེད་པ་ཞེས་སོ། །མཐོང་བ་བཞིན་དུ་བུམ་པ་ལ་སོགས་པའི་དོན་སྐྱེས་བུ་དེའི་བློ་ལ་སྒྲ་དང་ལྷན་ཅིག་སྣང་བ་མེད་པའི་ཕྱིར་རོ། །མི་སྣང་བ་དེའི་ཕྱིར་བརྗོད་པར་བྱ་བ་འཛིན་པ་མ་ཡིན་ནོ། །གལ་ཏེ་དབང་པོའི་ཤེས་པ་ལ་སྣང་བའི་དོན་རྣམ་པ་གཞན་ཡིན་ཞིང་སྒྲའི་ཤེས་པ་ལ་སྣང་བ་སྒྲ་དང་འདྲེས་པ་ཡང་རྣམ་པ་གཞན་ཡིན་དུ་བཅུག་པ་དེ་ལྟ་ན་ཡང༌། དབང་པོས་རྟོགས་པར་བྱ་བ་ཉིད་བརྗོད་པར་བྱ་བ་མ་ཡིན་པར་ཇི་ལྟར་འགྱུར་ཞེས་བཤད་པ། གང་གི་ཕྱིར་སྒྲའི་རྒྱུ་ཅན་གྱི་ཤེས་པ་ལ་སྒྲ་དང་འདྲེས་པར་མི་སྣང་བ་གང་ཡིན་པ་དེ་ནི་སྒྲའི་བརྗོད་པར་བྱ་བའི་དོན་མ་ཡིན་ནོ། །གང་ཞིག་སྒྲ་གང་གི་དོན་ཡིན་པ་དེ་ནི་དེ་དང་འབྲེལ་པར་བློ་ལ་སྣང་བ་ཡིན་ཏེ། དཔེར་ན་བ་ལང་གི་གཟུགས་རིང་པོ་བ་ལང་གི་སྒྲ་དང་འདྲེས་པར་སྣང་བ་བཞིན་ཏེ། བརྗོད་པར་བྱ་བ་ཉིད་ཀྱི་རྒྱུ་མཚན་ཉིད་ནི་འདི་ཙམ་དུ་ཟད་པའི་ཕྱིར་རོ། །གང་ཞིག་སྒྲ་གང་དང་བློ་ལ་སྣང་བ་ཉིད་མ་ཡིན་པ་དེ་ནི་དེའི་དོན་མ་ཡིན་ཏེ།
དཔེར་ན་རྟ་བ་ལང་གི་སྒྲ་དང་འདྲེས་པར་མི་སྣང་བ་བཞིན་ནོ། །དབང་པོའི་ཤེས་པས་རྟོགས་པར་བྱ་བའི་དོན་གྱི་རྣམ་པ་ཡང་སྒྲའི་ཤེས་པ་ལ་སྒྲ་དང་འདྲེས་པར་སྣང་བ་མ་ཡིན་ཏེ། དེའི་ཕྱིར་སྒྲའི་དོན་མ་ཡིན་ནོ། །གལ་ཏེ་ཡང་སྣང་བ་དང་སྒྲའི་དོན་དག་གསལ་བ་དང་མི་གསལ་བ་ཡིན་པ་དེ་ལྟར་ན་ཡང་སྒྲ་དང་འབྲེལ་པའི་དོན་སྣང་བ་ན་ནི། མཐོང་བའི་བདག་ཉིད་དུ་ཞེན་པར་བྱས་པ་མ་ཡིན་ནམ། དཔེར་ན་ཉེ་བ་དང་རིང་པ་ན་གནས་པའི་རྟོགས་པ་པོ་དག་གི་ཤེས་པའི་གསལ་བ་དང་མི་གསལ་བར་སྣང་བ་ཡིན་ཡང་བལྟ་བར་བྱ་བའི་དོན་ཐ་དད་པ་མ་ཡིན་པ་དེ་བཞིན་དུ་འདིར་ཡང་དངོས་པོ་གཅིག་ཉིད་ལ་ཤེས་པ་གསལ་བ་དང་མི་གསལ་བར་སྣང་བ་ཡིན་ཏེ། དེའི་ཕྱིར་སྒྲའི་ཡུལ་ཇི་ལྟར་ཞེན་པ་བཞིན་དུ་སྣང་བའི་བདག་ཉིད་ཡིན་པ་ན་སྒྲ་དང་ལྷན་ཅིག་ཏུ་སྣང་བ་མ་ཡིན་པར་མ་གྲུབ་བོ། །ཅི་སྟེ་ཞེན་པའི་དོན་ནི་བདེན་པ་མ་ཡིན་ནོ་ཞེ་ན། དེ་ལྟ་ན་ཡང་ཉམས་སུ་མྱོང་བ་ཉིད་དུ་མངོན་པར་ཞེན་པ་ལ་གནོད་པར་བྱེད་པ་བརྗོད་དགོས་ཏེ། གནོད་པར་བྱེད་པ་མེད་པར་ནི་ཉམས་སུ་མྱོང་བར་མངོན་པར་ཞེན་པར་ནུས་པ་མ་ཡིན་ནོ་ཞེས་དོགས་པ་ལ། སྒྲའི་ཡུལ་ཉིད་ནི་ཞེས་སྨོས་ཏེ། སྒྲའི་ཡུལ་ནི་གང་ཞིག་སྒྲ་བརྗོད་པ་ལས་སྒྲ་དང་འདྲེས་པའི་དོན་སྣང་བའོ། །དེ་ཉིད་ནི་དངོས་པོ་མ་ཡིན་ཏེ་ཞེས་བྱ་བ་ནི་དོན་བྱེད་ནུས་པ་མ་ཡིན་པའོ། །གལ་ཏེ་སྒྲའི་ཡུལ་ཇི་ལྟར་ཞེ་ན་པ་ཉིད་མཐོང་བའི་བདག་ཉིད་ཡིན་ན་ནི་དེ་ཉིད་དངོས་པོར་འགྱུར་ཏེ། མཐོང་བ་ནི་དངོས་པོ་ཡིན་པའི་ཕྱིར་རོ། །སྒྲའི་ཡུལ་ནི་དངོས་པོ་མ་ཡིན་ནོ། །ཅིའི་ཕྱིར་ཞེ་ན། བཤད་པ། དངོས་པོ་དེ་ནི་དབང་པོ་ལས་སྐྱེས་པའི་མཐོང་བ་ལ་སྒྲ་ལས་བྱུང་བའི་རྣམ་པ་མི་གསལ་བ་ལས་རྣམ་པ་གཞན་དུ་གསལ་བར་སྣང་བའི་ཕྱིར་ཏེ་གསལ་བའི་ཕྱིར་རོ། །དབང་པོའི་ཤེས་པ་ལ་སྣང་བའི་གསལ་བར་སྣང་བ་གང་ཡིན་པ་དེས་ནི་དོན་བྱེད་པ་ཡིན་གྱི། སྒྲ་ལས་བྱུང་བའི་སྣང་བ་ལས་ནི་མ་ཡིན་ནོ། །དེའི་ཕྱིར་འདི་ནི་དངོས་པོ་མ་ཡིན་གྱི་འོན་ཀྱང་དབང་པོའི་དོན་ཉིད་ཡིན་ནོ། །འོན་ཏེ་དབང་པོའི་ཡུལ་གསལ་བར་སྣང་བ་ནི་དངོས་པོ་ཡིན་ཞིང༌། སྒྲ་ལས་བྱུང་བའི་ཡུལ་མི་གསལ་བར་སྣང་བ་དངོས་པོ་མ་ཡིན་དུ་ཆུད་པ་དེ་ལྟན་ཡང་ཐ་མི་དད་
པར་ཞེན་པ་ལས་ཅིའི་ཕྱིར་གཅིག་པ་མ་ཡིན་ཞེ་ན། དེ་ཉིད་མ་ཡིན་པའི་ཞེས་བྱ་བ་སྨོས་ཏེ། དོན་བྱེད་ནུས་པ་ཡོད་པ་དང་མེད་པ་འགལ་བའི་ཆོས་དག་གིས་ཁྱད་པར་དུ་བྱས་པའི་སྣང་བ་ཐ་དད་པ་ཙམ་ནི་དེ་ཉིད་མ་ཡིན་པ་གང་ཡིན་པའི་རྒྱུ་མཚན་ཡིན་ནོ། །དེ་ཉིད་ནི་དེའི་ངོ་བོ་སྟེ་དེ་དང་ལྷན་ཅིག་པ་ཉིད་དོ། །དེ་ཉིད་ཀྱིས་མེད་པ་ནི་དེ་ཉིད་མ་ཡིན་པ་སྟེ། ཁ་ཅིག་བཀག་པ་དེ་ཉིད་མ་ཡིན་པ་ཡིན་གྱི་ཐ་དད་པ་ཉིད་ནི་མ་ཡིན་ནོ། །དངོས་པོ་གཉིས་ལ་ནི་ནུས་པ་རྗེས་སུ་འགྲོ་བའི་སྣང་བ་ཐ་དད་པ་ལས་ཐ་དད་པར་འགྱུར་བ་ཡིན་གྱི་དངོས་པོ་གཅིག་ཉིད་ལ་ནི་མ་ཡིན་ཏེ། རི་བོང་གི་རྭ་ལས་བུམ་པ་ཐ་དད་པར་སྣང་བ་ན་བུམ་པ་ཉིད་ནི་རི་བོང་གི་རྭ་མ་ཡིན་ནོ་ཞེས་གཅིག་ཉིད་མེད་པར་འགྱུར་བ་ཡིན་གྱི། དེ་ཙམ་གྱིས་བུམ་པ་ལས་རི་བོང་གི་རྭ་ཐ་དད་པ་ནི་མ་ཡིན་ནོ། །ཐ་དད་པ་ནི་འགལ་བའི་ཆོས་དང་ལྡན་པ་ཙམ་གྱི་རྒྱུ་ལས་ཡིན་ཞིང༌། ནུས་པ་ཡོད་པ་དང་མེད་པ་ཡང་འགལ་བའི་ཆོས་ཡིན་ལ། དེ་དག་ཀྱང་གསལ་བ་དང་མི་གསལ་བའི་དོན་ལ་ཡོད་པ་ཡིན་ཏེ། དེའི་ཕྱིར་གཅིག་མ་ཡིན་པའི་ཐ་སྙད་ཀྱི་རྒྱུ་འགལ་བའི་ཆོས་དང་ལྡན་པ་ནི་གཅིག་ཉིད་དུ་ཞེན་པ་ལ་གནོད་པར་བྱེད་པ་ཡིན་ནོ། །ཡང་གང་དུ་སྣང་བ་འབའ་ཞིག་ཐ་དད་པ་དེར་ནི་གཅིག་མེད་པར་འགྱུར་བ་མ་ཡིན་གྱི། འོན་ཀྱང་དོན་བྱེད་ནུས་པ་ཡོད་པ་དང་མེད་པའི་ཁྱད་པར་ཅན་གྱི་སྣང་བ་ཐ་དད་པ་ཉིད་ལ་ཡིན་ནོ། །འདི་ལྟར་དངོས་པོ་རྣམས་ཀྱི་ཡོད་པ་ཉིད་ནི་དོན་བྱེད་ནུས་པ་ལས་ཡིན་ལ་ཡོད་པ་ཉིད་ཀྱང་དེ་ཉིད་ཡིན་ཞིང་ཡོད་པ་ཡང་དེ་ཉིད་མ་ཡིན་པ་ཡིན་ནོ།། སྣང་བ་ནི་ཤེས་པའི་རང་བཞིན་ཡིན་གྱི་དངོས་པོ་ནི་མ་ཡིན་ལ། དེ་ཡོད་པ་ལས་ངེས་པར་དངོས་པོ་ཡོད་པ་ཡང་མ་ཡིན་ཏེ། དཔེར་ན་རབ་རིབ་ཅན་གྱི་ཤེས་པའི་སྣང་བ་བཞིན་ནོ། །དེ་བཞིན་དུ་གྱུར་པས་དངོས་པོ་གཞན་དུ་གྱུར་པ་ཡང་མ་ཡིན་ཏེ། གང་གི་ཕྱིར་ཤེས་པའི་ཆོས་ནི་རྐྱེན་གཞན་འགའ་ཞིག་ལས་དོན་ཐ་དད་པ་མ་ཡིན་ཡང་ཐ་དད་པར་འགྱུར་རོ་ཞེས་བར་ཏི་ཀ་ལས་བཤད་པ་ཡིན་ནོ། །འོ་ན་ནི་སྣང་བ་ཐ་དད་པའི་རྒྱུ་མཚན་དུ་ཇི་ལྟར་བརྗོད་ཅེ་ན། གང་གི་ཕྱིར་དངོས་པོའི་རང་བཞིན་ལ་སོ་སོར་ངེས་པའི་ནུས་པ་དེ་ནི་སྣང་བའི་མཐར་ཐུག་པར་དམིགས་པ་
དེའི་ཕྱིར་ནུས་པ་ལ་འཁྲུལ་པ་མེད་པའི་སྣང་བ་ལས་ཡོད་པ་དང་མེད་པ་ཉིད་དེ། དེ་ཐ་དད་པ་ཉིད་ལས་ཀྱང་དེ་ཉིད་དང་གཞན་དུ་རྣམ་པར་འཇོག་པར་བྱེད་དོ། །དེ་ཉིད་ཀྱི་ཕྱིར་ནུས་པ་ཐ་དད་པའི་ཁྱད་པར་ཅན་གྱི་སྣང་བ་ཐ་དད་པ་ནི་ཐ་དད་པའི་རྒྱུ་མཚན་དུ་བརྗོད་པར་བལྟའོ།། རྟོགས་པ་པོ་ཉེ་བ་དང་རིང་བ་ན་གནས་པ་ལ་ནི་སྣང་བ་འགའ་ཞིག་ཐ་དད་པར་ཟད་ཀྱི། ནུས་པ་ཐ་དད་པའི་རྗེས་སུ་འགྲོ་བ་ནི་མ་ཡིན་ཏེ། དེའི་ཕྱིར་དངོས་པོ་ཐ་དད་པ་མ་ཡིན་ནོ། །ཡང་ན་ཞེས་བྱ་བ་ནི་གཏན་ཚིགས་གཞན་བསགས་པའི་ཕྱིར་རོ། །གང་གི་ཕྱིར་ནུས་པ་ལ་འཁྲུལ་པ་མེད་པའི་སྣང་བ་ཐ་དད་པ་དང༌། རྒྱུ་མཚན་དེ་ཙམ་གྱིས་ཀྱང་གཅིག་ཉིད་མ་ཡིན་པ་དེའི་ཕྱིར་སྒྲའི་ཡུལ་ཉིད་ནི་དངོས་པོ་མ་ཡིན་ལ། དེ་ལས་ཀྱང་སྣང་བ་དང་རྣམ་པར་བརྟག་པ་དག་གཅིག་ཉིད་མ་ཡིན་པར་འགྱུར་རོ། །གལ་ཏེ་མཐོང་བའི་གཟུགས་གསལ་བར་སྣང་བའི་དངོས་པོ་མེད་ན་ནི་སྒྲའི་སྣང་བ་གང་ཞིག་ཡོད་པ་ཉིད་དུ་ཞེན་པ་ཡིན་ཡང༌། མཐོང་བའི་བདག་ཉིད་མ་ཡིན་ཏེ། ནུས་པ་མེད་པའི་རྣམ་པ་གཞན་དང་ལྡན་པའི་ཕྱིར་རོ། །ཡང་གང་ཞིག་མཐོང་བ་ལ་སྣང་བ་གསལ་བར་སྣང་བའི་དངོས་པོ་ལ་དེའི་བདག་ཉིད་དུ་ཞེན་པར་བྱས་པ་དེ་ནི་སྣང་བའི་དངོས་པོ་ཉིད་དུ་འགྱུར་པ་མ་ཡིན་ནམ། དེས་ན་དབང་པོའི་དོན་སྒྲ་མི་སྣང་བ་མ་གྲུབ་པ་ཉིད་སོ་ན་འདུག་པ་ཡིན་ནོ་ཞེ་ན་ཡོད་ཀྱང་ཞེས་གསུངས་སོ། །དངོས་པོ་མེད་པ་འབའ་ཞིག་ལ་ནི་མ་ཡིན་གྱི། ཡོད་ཀྱང་སྒྲ་ལས་བྱུང་བའི་ཤེས་པ་གང་ཡིན་པ་དེ་ནི་ཡོད་པ་དེའི་བལྟ་བར་བྱ་བའི་བདག་ཉིད་འཛིན་པ་མ་ཡིན་ཏེ། བལྟ་བར་བྱ་བ་སྣང་བ་མ་ཡིན་ནོ། །སྣང་བ་དེ་མཐོང་བའི་བདག་ཉིད་དུ་ཞེན་པ་མ་ཡིན་ནམ་ཞེ་ན། ཞེན་པ་བདེན་ན་ཡང་ཇི་ལྟར་མེད་པའི་དངོས་པོ་ལ་དེའི་བདག་ཉིད་དུ་ཞེན་ཀྱང་དེའི་བདག་ཉིད་མ་ཡིན་པ་བཞིན་དུ་ཡོད་པ་ལ་ཡང་ཡིན་ནོ། །ཅིའི་ཕྱིར་ཞེ་ན། སྨྲས་པ། སྒྲ་ལས་བྱུང་བའི་ཤེས་པ་ནི་ཤེས་པ་གང་ལ་མེད་པའི་དོན་སྣང་བའི་ཤེས་པ་དེ་དང་ཁྱད་པར་མེད་པའི་ཕྱིར་རོ། །གང་གི་ཕྱིར་འདིའི་སྣང་བ་ནི་མེད་པའི་དོན་སྣང་བ་དང་ཁྱད་པར་མེད་པ་དེའི་ཕྱིར་མཐོང་བ་སྣང་བ་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཁྱད་པར་མེད་ཅེ་ན། བཤད་པ་དངོས་པོ་མེད་ཀྱང་སྒྲ་ལས་བྱུང་བའི་སྣང་བ་
མི་ཉམས་པ་སྟེ། མི་ལྡོག་པའི་ཕྱིར་རོ། །གང་གི་ཕྱིར་གང་ཞིག་སྒྲ་ལས་བྱུང་བའི་སྣང་བ་ཡིན་པ་དེ་ནི་སྒྲ་དང་འདྲེས་པ་ཡིན་ལ། གང་སྒྲ་དང་འདྲེས་པ་དེ་ཡང་སྒྲ་དང་འབྲེལ་པར་མཐོང་བ་ཡིན་ཞིང༌། སྒྲ་དང་འབྲེལ་བར་མཐོང་བ་གང་ཡིན་པ་དེ་ཡང་སྒྲ་བརྗོད་པ་ལས་སྣང་བར་འགྱུར་རོ། །སྒྲ་ལས་བྱུང་བའི་སྣང་བ་སྒྲ་བརྗོད་པའི་སྟོབས་ཀྱིས་རྗེས་སུ་འཇུག་པ་ན་དངོས་པོ་མེད་པ་ལ་ཡང་འབྱུང་བས་ཉམས་པ་མེད་པ་ཡིན་པ་དེའི་ཕྱིར་དངོས་པོ་ཡོད་པ་ལ་འབྱུང་ཡང་སྒྲ་ཙམ་ལ་རག་ལས་པ་ཡོད་པ་མ་ཡིན་པ་སྣང་བ་དེ་ལྟ་བུ་གཞན་དང་ཁྱད་པར་མེད་པར་ནི་མཐོང་བའི་བདག་ཉིད་མ་ཡིན་ནོ། །ཁྱད་པར་མེད་པར་སྣང་བ་ཡིན་པར་འདོད་པ་དེ་ལྟ་ན་ཡང་དེ་ཙམ་གྱིས་དངོས་པོ་ཡོད་པ་ལ་འབྱུང་བ་དང་དེའི་བདག་ཉིད་དུ་ཞེན་པའི་ཤེས་པ་ཅིའི་ཕྱིར་དངོས་པོ་འཛིན་པ་མ་ཡིན་ཞེན་བཤད་པ། དེ་ཡོད་པ་དང་མེད་པའི་རྗེས་སུ་མི་བྱེད་པའི་ཕྱིར་དེ་འཛིན་པ་མ་ཡིན་ནོ། །གང་གི་ཕྱིར་སྣང་བ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཤེས་པ་གང་ཡིན་པ་དེ་ནི་འཛིན་པར་བྱེད་པ་ཡིན་ནོ། །མེད་པར་སྣང་བ་དང་ཁྱད་པར་མེད་པའི་རྣམ་པ་ནི་དངོས་པོའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་པ་དེས་ན་དེའི་འཛིན་པར་བྱེད་པ་མ་ཡིན་ནོ། །དོན་འདི་ཉིད་ལྡོག་པ་དང་རྗེས་སུ་འགྲོ་བའི་སྒོ་ནས་བསྟན་པའི་ཕྱིར། དཔེ་གཉིས་དྲི་ལ་རོའི་བློ་བཞིན་དང་ཞེས་བྱ་བ་ལ་སོགས་པ་བཤད་དོ། །རོའི་བློ་ནི་དྲི་འཛིན་པར་བྱེད་པ་མ་ཡིན་ནོ། །དེའི་ཕྱིར་སྣང་བ་དྲིའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་ཕྱིར་རོ། །ཡང་གང་གི་སྣང་བ་གང་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེ་ནི་དེའི་འཛིན་པར་བྱེད་པ་ཡིན་ཏེ། དཔེར་ན་གཟུགས་ལ་མིག་གི་བློ་བཞིན་ནོ། །གལ་ཏེ་རོའི་བློ་ནི་སྣང་བའི་དྲིའི་བདག་ཉིད་དུ་ཞེན་པ་མེད་པའི་ཕྱིར་དྲི་སྣང་བ་མ་ཡིན་གྱི་སྒྲ་ལས་བྱུང་བའི་རྟོགས་པ་ནི་དེའི་སྣང་བ་མཐོང་བའི་བདག་ཉིད་དུ་ཞེན་པའི་ཕྱིར་མཐོང་བ་ཉིད་སྣང་བ་མ་ཡིན་ནམ། དེའི་ཕྱིར་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་ཕྱིར་མཐོང་བ་ལས་བྱུང་བའི་ཤེས་པའི་རྒྱུར་མ་གྱུར་ཀྱང༌། ད་སྣང་བས་ན་མཐོང་བའི་འདིའི་ཡུལ་དུ་ཅིའི་ཕྱིར་མི་འགྱུར་ཞེ་ན། བཤད་པ། བདག་ཉིད་ཀྱི་རྣམ་པ་སེམས་ལ་གཏོད་པ་ཉེ་བར་
འཇོག་པ་དེར་ནུས་པ་གང་ཡིན་པ་དེ་ནི་ཡུལ་ཡིན་ཞིང་དེ་ཉིད་ཀྱང་རྒྱུ་ཁོ་ནའོ། །ཕྱིར་ཞེས་བྱ་བ་ནི་གཏན་ཚིགས་སོ། །དེའི་ཕྱིར་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པས་རྒྱུ་མ་ཡིན་པ་ནི་ཡུལ་མ་ཡིན་ནོ། །དེ་སྣང་བ་ཉིད་ཀྱིས་དོན་ཤེས་པའི་རྒྱུ་མ་ཡིན་ནམ། དེས་ན་རྗེས་སུ་འགྲོ་བ་དང་ལྡོག་པ་དག་གིས་ནི་ཅི་ཞིག་བྱ་ཞེ་ན། བཤད་པ་གང་ཞིག་གང་གིས་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པ་དེ་ནི་དེའི་རྒྱུ་མ་ཡིན་ནོ། །རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་ཀྱིས་འགའ་ཞིག་གི་རྒྱུ་ཡིན་གྱི། དེ་སྣང་བ་ཉིད་ཀྱིས་ནི་མ་ཡིན་ནོ། །འདི་ལྟར་སྣང་བའི་རྒྱུའི་དངོས་པོ་གང་ཡིན་པ་དེ་ནི་སྣང་བའི་འབྲེལ་བ་ཅན་ཡིན་གྱི། གང་གི་ཕྱིར་རང་བཞིན་དུ་ཞེན་པ་དེ་ནི་འབྲེལ་པ་ཅན་མ་ཡིན་ནོ། །གང་གི་ཕྱིར་རབ་རིབ་ལ་སོགས་བའི་སྣང་བ་དང༌། འདས་པ་ལ་སོགས་པའི་རྣམ་པར་རྟོག་པའི་སྣང་བ་ཉིད་སྐྲ་ཤད་ལ་སོགས་པའི་རང་བཞིན་དང༌། འདས་པ་ལ་སོགས་པའི་རང་བཞིན་དུ་ཞེན་པར་བྱས་པ་ན་དེ་ལྟར་མངོན་པར་ཞེན་པར་བྱེད་པའི་སྣང་བ་གང་ཡིན་པ་དེའི་འབྲེལ་པ་ཅན་ནམ་བྱ་བར་འགྱུར་བ་སྐྲ་ཤད་ལ་སོགས་པ་དང་འདས་པ་ལ་སོགས་པ་དེ་ནི་ཅུང་ཟད་ཀྱང་ཡོད་པ་མ་ཡིན་ནོ། །དེའི་ཕྱིར་དེ་སྣང་བ་ཉིད་ཀྱི་ཕྱིར་ན་དོན་རྒྱུ་མ་ཡིན་གྱི། འོན་ཀྱང་རྒྱུ་ཉིད་ཀྱི་ཕྱིར་དེ་སྣང་བ་ཉིད་དོ། །གང་གི་ཕྱིར་དེ་སྣང་བ་ཉིད་ལ་རག་ལས་ནས་རྒྱུ་ཉིད་དུ་འགྱུར་བ་ནི་མ་ཡིན་གྱི། འོན་ཀྱང་རྒྱུ་ཉིད་ལ་རག་ལས་པས་དེ་སྣང་བ་ཉིད་དུ་འགྱུར་རོ། །དེའི་ཕྱིར་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པ་ལ་རྣམ་པ་གཞན་གྱིས་འགའ་ཞིག་འགའ་ཞིག་གི་རྒྱུར་འགྱུར་བ་ཞེས་བྱ་བ་ནི་མ་ཡིན་ནོ། །གང་གི་ཕྱིར་ཤེས་པ་ལ་སྣང་བ་གང་ཡིན་པ་དེ་ནི་ཡུལ་ཡིན་ལ། སྣང་བ་ཉིད་དང་འབྲེལ་པ་ཅན་ཉིད་ཀྱང་རྒྱུ་ཡིན་པ་ཉིད་ལས་འགྱུར་བ་དེའི་ཕྱིར་རྒྱུ་མ་ཡིན་པ་ནི་ཡུལ་ཉིད་དུ་མི་འགྱུར་རོ། །དེས་ན་དངོས་པོ་དེ་རྒྱུ་མ་ཡིན་ཡང་དེ་སྣང་བའི་ཕྱིར་ཤེས་པའི་ཡུལ་དུ་འགྱུར་བ་ཡིན་ནོ་ཞེས་གང་བརྗོད་པ་དེ་གསལ་བ་ཡིན་ཏེ། དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མེད་པར་ནི་དེ་སྣང་བ་འདི་ཉིད་མི་འཐད་པའི་ཕྱིར་རོ། །དེའི་ཕྱིར་དངོས་པོ་ཡོད་པ་
ལ་འབྱུང་བ་ཡིན་ཡང་སྣང་བ་དངོས་པོའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ལ་མི་ལྟོས་པ་སྒྲ་ལས་བྱུང་བའི་ཤེས་པ་ནི་དེའི་བདག་ཉིད་འཛིན་པ་མ་ཡིན་ནོ། །དེ་ཉིད་སྣང་བ་མ་ཡིན་ཡང་མེད་པ་སྣང་བ་དང་ཁྱད་པར་མེད་པར་སྣང་བ་འདི་ཉིད་ལས་ཡིན་ནོ་ཞེས་བལྟ་བར་བྱའོ། །དེའི་ཕྱིར་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ལས་དེའི་སྣང་བ་ཉིད་དུ་འགྱུར་ཞིང་དེ་སྣང་བ་ཉིད་ཀྱིས་ཀྱང༌། ཡུལ་དང་ཡུལ་ཅན་དུ་འགྱུར་བ་ཡིན་ནོ་ཞེས་བྱ་བར་གནས་སོ། །དེས་ན་ཤེས་པ་གང་ཞིག་གང་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་པ་དེ་ནི་དེ་སྣང་བ་མ་ཡིན་ཏེ། དཔེར་ན་གཟུགས་ཀྱི་ཤེས་པ་རོ་སྣང་བ་མ་ཡིན་པ་བཞིན་ནོ། །སྒྲ་ལས་བྱུང་བའི་ཤེས་པ་ཡང་དབང་པོས་རྟོགས་པར་བྱ་བའི་དོན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །ངེས་པའི་དངོས་པོ་སྣང་བ་ལ་ནི་རྒྱུ་མཚན་དང་བཅས་པ་ཉིད་ཀྱིས་ཁྱབ་པ་ཡིན་ལ། རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མེད་ན་ཡང་རྒྱུ་མཚན་མེད་པར་འགྱུར་ཏེ། རྒྱུ་མཚན་གཞན་མི་འཐད་པའི་ཕྱིར་རོ། །དེས་ན་ཁྱབ་པར་བྱེད་པ་མི་དམིགས་པས་རྒྱུ་མཚན་དང་བཅས་པ་ངེས་པའི་དངོས་པོ་སྣང་བ་ཉིད་ཆོས་གཞན་ལས་ལྡོག་པ་ན། དོན་གྱི་དངོས་པོ་དེའི་རྗེས་སུ་བྱེད་པ་ཉིད་ཀྱིས་ཁྱབ་པའི་ཕྱིར་འབྲེལ་པ་གྲུབ་བོ། །དེས་ན་དེ་ལྟར་དངོས་པོ་ཡོད་པ་ལ་ཡང་སྒྲ་ལས་བྱུང་བའི་ཤེས་པ་དེ་སྣང་བ་མ་ཡིན་པར་བསྒྲུབས་ནས། དངོས་པོ་ཡོད་དམ་མེད་ན་ཡང་རུང་སྟེ། སྒྲ་ལས་བྱུང་བའི་རྣམ་པར་རྟོག་པའི་དངོས་པོའི་ཡུལ་ཅན་མ་ཡིན་པར་མཇུག་བསྡུ་བའི་ཕྱིར་བཤད་པ། གང་གི་ཕྱིར་ཡུལ་ནི་རྒྱུ་ཡིན་ལ་དབང་པོའི་དོན་ནི་སྒྲ་ལས་བྱུང་བའི་རྣམ་པར་རྟོག་པའི་རྒྱུ་མ་ཡིན་པ་དེའི་ཕྱིར་དངོས་པོ་ལ་ལྟོས་པ་མེད་པ་སྒྲ་ལས་བྱུང་བའི་རྣམ་པར་རྟོག་པ་གང་ཡིན་པ་དག་ནི་དངོས་པོའི་ཡུལ་ཅན་མ་ཡིན་ནོ། །དེས་ན་སྒྲའི་ཤེས་པ་ལས་གཞན་དུ་སྣང་བར་གྲུབ་པ་ཡིན་ལ། དེ་ལས་ཀྱང་དབང་པོའི་ཤེས་པ་བརྗོད་པར་བྱ་བ་མ་ཡིན་པ་རིག་པར་བྱེད་པར་འཐད་པ་ཡིན་ནོ། །ཚུལ་འདིས་རྟོག་པ་མེད་པ་ཉིད་དུ་ཡང་བསྒྲུབས་པ་ཡིན་ནོ། །རྣམ་འགྲེལ་དུ་ནི་རྟོག་པ་མེད་
པར་བསྒྲུབ་པའི་འཐད་པ་འདིར་རང་རྒྱུད་དུ་བཀོད་པ་ཡིན་ནོ། །རྟོག་པ་མེད་པར་བསྒྲུབ་པ་དང༌། ཐུན་མོང་བ་ཉིད་ཀྱིས་བརྗོད་པར་བྱ་བ་མ་ཡིན་པའི་ཡུལ་ཅན་གྱི་འཐད་པ་གཞན་བསྟན་པའི་ཕྱིར། སྒྲ་སྦྱོར་བ་ཡང་ཞེས་བྱ་བ་ལ་སོགས་པ་སྨོས་ཏེ། སྒྲ་སྦྱར་བ་ནི་བརྡའི་དུས་སུ་མཐོང་བའི་དོན་བསྟན་པར་བྱ་བ་ལ་རྟོགས་པར་བྱ་བའི་ཕྱིར་རྟོགས་པར་བྱ་བའི་དོན་དུ་སྟེ་དོན་རྟོགས་པའི་དགོས་པ་ཞེས་བྱ་བའི་དོན་ཏོ། །ཡང་གི་སྒྲས་ནི་འཆད་པར་འགྱུར་བའི་རྗེས་སུ་འགྲོ་བ་ཅན་མ་ཡིན་པ་བསྡུ་བའི་ཕྱིར་རོ། །སྦྱོར་བའི་དགོས་པ་དེའི་ཡང་སྒྲ་ངེས་པར་བཀོད་པ་སྔོན་དུ་འགྲོ་བ་ཅན་ཡིན་ཏེ། ངེས་པར་བཀོད་པ་མེད་པར་ནི་སྦྱར་བ་ཙམ་ལས་དགོས་པ་དེ་མ་མཐོང་བའི་ཕྱིར་རོ། །དེའི་ཕྱིར་བརྡ་བྱས་པ་ནི་སྒྲ་སྦྱར་བ་སྔོན་དུ་འགྲོ་བ་ཅན་གྱི་དོན་རྟོགས་པར་བྱ་བའི་ཕྱིར་ཡིན་ན། དབང་པོའི་དོན་ལ་ནི་དེའི་འབྲས་བུ་མེད་པ་ཉིད་དོ། །འདི་ལྟར་བརྡའི་དུས་སུ་མཐོང་བ་གང་ཡིན་པ་དེ་ནི་གཞན་གྱི་ཚེའམ་གཞན་དུ་མཐོང་བ་མེད་པའི་ཕྱིར་རོ། །དེ་ལ་བརྡར་བྱས་པ་ནི་དོན་མེད་པ་ཡིན་ནོ། །བརྡ་བྱས་པ་ལ་དགོས་པ་མེད་པའི་རྒྱུ་མཚན་རྗེས་སུ་འགྲོ་བ་མེད་པ་འདི་ཉིད་བསྟན་པའི་ཕྱིར་བསྡུ་བར་བྱ་བ་གཞན་ཡང་བཤད་པ་ནི་དབང་པོའི་དོན་ནི་རྗེས་སུ་འགྲོ་བ་དང་ལྡན་པ་ཡང་མ་ཡིན་ཏེ། རྗེས་སུ་འགྲོ་བ་ཅན་མ་ཡིན་ནོ། །ཡང་གི་སྒྲ་ནི་བསྡུ་བ་ཉིད་ཡིན་ནོ། །དེས་ན་དོན་གང་ལ་བརྡ་བྱས་པའི་དོན་དེ་ནི་རྗེས་སུ་འགྲོ་བ་དང་ལྡན་པ་ལ་རིག་པ་ཡིན་ནོ་ཞེས་བྱ་བའི་དོན་འདིར་འགྱུར་རོ། །ཡང་གང་ཞིག་དགག་པར་བྱ་བ་རྗེས་སུ་འགྲོ་བ་དང་ལྡན་པ་དེ་ལ་དགོས་པ་ཅི་ཞིག་ཡོད་ཅེ་ན། གང་ལས་ཏེ་གང་གི་ཕྱིར་རྗེས་སུ་འགྲོ་བ་དང་ལྡན་པའི་ཕྱིར་བརྡའི་དུས་སུ་སྒྲ་དང་ལྷན་ཅིག་བརྗོད་པར་བྱ་བ་དང་རྗོད་པར་བྱེད་པའི་འབྲེལ་པར་མཐོང་བ་གང་ཡིན་པ་དེ་ལ་དེ་སྐད་ཅེས་བྱའོ། །དོན་དེ་ཐ་སྙད་ཀྱི་ཚེ་སྟེ་དོན་རྟོགས་པར་བྱེད་པའི་དུས་སུ་རྟོག་པར་འགྱུར་བའོ། །འདི་སྐད་བརྗོད་པར་འགྱུར་ཏེ། རྗེས་སུ་འགྲོ་བ་དང་ལྡན་པ་ཉིད་ཀྱིས་དུས་གཞན་དུ་རྟོགས་པར་བྱ་བའི་ཕྱིར་དོན་དེ་ལ་སྒྲ་སྦྱོར་བ་ཡིན་ན་དབང་པོའི་དོན་ལ་ནི་རྗེས་སུ་འགྲོ་བ་དང་ལྡན་པ་དེ་ཉིད་ཡོད་པ་མ་ཡིན་ནོ། །རྗེས་སུ་འགྲོ་བ་དང་ལྡན་པ་ཉིད་དུ་མཐོང་བ་ཡིན་
ན་ནི་དགོས་པ་དང་ལྡན་པའི་བརྡ་བྱེད་པ་དེ་ལས་སྒྲའི་ཁྱད་པར་ཅན་གྱི་དོན་རྟོགས་པ་ན། བརྗོད་པར་བྱ་བ་རྟོགས་པར་བྱེད་པར་འགྱུར་བ་ཡིན་ན། རྗེས་སུ་འགྲོ་བ་དང་ལྡན་པ་དེ་ཡང་ཡོད་པ་མ་ཡིན་ནོ། །ཅིའི་ཕྱིར་ཞེ་ན། བཤད་པ་གང་གི་ཕྱིར་འདི་ལྟར་ཡུལ་ལམ་དུས་གཅིག་ཏུ་མཐོང་བའི་ཁྱད་པར་བྱེ་བྲག་དེ་ནི། ཡུལ་ལམ་དུས་གཞན་དུ་མ་མཐོང་ངོ༌། །འགའ་ཞིག་ཏུ་ཞེས་བྱ་བ་ནི་གཏན་དགག་པའི་དོན་དུའོ། །ཕྱིར་གྱི་སྒྲ་ནི་གང་གི་ཕྱིར་ཐ་དད་པའི་སྤྱི་ཡང་མཐོང་བ་མེད་པ་དེའི་ཕྱིར་དབང་པོའི་ཤེས་པའི་དོན་ནི་རྗེས་སུ་འགྲོ་བ་དང་ལྡན་པ་མ་ཡིན་ནོ་ཞེས་རིམ་པ་གཞན་དུ་སྦྱར་བའོ། །ཡང་གསལ་བ་འདི་དག་ཡུལ་དང་གཞན་དུ་མཐོང་བ་མ་ཡིན་ན་ཡུལ་དང་དུས་གཞན་དུ་ཞེན་པ་གང་ཡིན་པ་འདི་ཇི་ལྟར་ཞེ་ན། བཤད་པ། གང་གི་ཕྱིར་གསལ་བའི་བདག་ཉིད་རྣམས་ཏེ། རང་གི་ངོ་བོ་ངེས་པ་རྣམས་ཕན་ཚུན་དུ་རྗེས་སུ་འགྲོ་བ་སྟེ། རྗེས་སུ་འཇུག་ཅིང་གཅིག་ཏུ་འགྱུར་བ་མ་ཡིན་ནོ། །འདི་སྐད་དུ་གཅིག་ཏུ་ཞེན་པ་བདེན་པ་གང་གསལ་བ་རྣམས་ནི་རྗེས་སུ་འགྲོ་བ་དང་ལྡན་བ་མ་ཡིན་ཏེ། གཅིག་གི་རང་བཞིན་དུ་མཐོང་བ་མ་ཡིན་ནོ་ཞེས་བསྟན་བ་ཡིན་ནོ། །ཇི་ལྟར་ན་གཅིག་ཉིད་དུ་ཞེན་ཀྱང་གཅིག་མ་ཡིན་ཞེ་ན། བཤད་པ། ནུས་པ་ནི་གསལ་བ་རྣམས་ཀྱི་བསྲེག་པ་ལ་སོགས་པའི་དོན་བྱེད་བར་ནུས་པའོ། །འདིས་ནི་ཡོད་པ་ཉིད་བརྗོད་པ་ཡིན་ཏེ། དོན་བྱེད་ནུས་པ་ཉིད་ནི་ཡོད་པ་རྣམས་ཀྱི་ཡོད་པ་ཉིད་ཡིན་པའི་ཕྱིར་རོ། །སྣང་བ་ནི་ཤེས་པ་ལ་ཡོད་པའི་དོན་གྱི་རྣམ་པ་སྟེ། འདི་ནི་ཡོད་པ་རྣམ་པར་འཇོག་པའི་ཚད་མ་ཡིན་ཏེ། གང་གི་ཕྱིར་སྣང་བ་དེ་ལས་འགའ་ཞིག་འགའ་ཞིག་ཏུ་འགའ་ཞིག་གི་ཚེ་ཡོད་པར་ཤེས་པ་ཡིན་གྱི། གཞན་ལས་ནི་མ་ཡིན་པའི་ཕྱིར་ཏེ། ཡོད་ཀྱང་མེད་པ་དང་ཁྱད་པར་མེད་པའི་ཕྱིར་རོ་ཞེས་གང་འཆད་པར་འགྱུར་རོ། །དེ་ལ་སོགས་པ་གང་དག་ཡིན་པ་སྟེ། སོགས་པ་སྨོས་པས་ནི་སྐྱེ་བ་དང་གནས་པ་དང་འགག་པ་གཟུང་ངོ༌། །དེ་དག་ཐ་དད་པ་དེའི་ཕྱིར་གསལ་བ་རྣམས་གཅིག་མ་ཡིན་ནོ། །དེ་ལ་དབྱེ་བར་བྱ་བའི་དངོས་པར་ཡང་ནུས་པ་ཡོད་པ་དང་མེད་པ་དག་ཉིད་ལས་ཐ་དད་པར་འགྱུར་བ་ཡིན་གྱི། འབྲས་བུ་ཐ་དད་པས་ནི་མ་
ཡིན་ནོ། །གང་གི་ཕྱིར་ཐ་དད་པ་ནི་འགལ་བའི་ཆོས་དང་ལྡན་པའི་རྒྱུ་མཚན་ཅན་ཡིན་ལ། ཕན་ཚུན་སྤངས་ཏེ་གནས་པའི་གསལ་བ་ཡང་དངོས་པོ་དང་དངོས་པོ་མེད་པ་ཡིན་གྱི་དངོས་པོ་ནི་མ་ཡིན་ནོ། །ཇི་ལྟར་དངོས་པོ་འགའ་ཞིག་རང་གི་དངོས་པོ་མེད་པ་དང་འགལ་བ་དེ་བཞིན་དུ་རུང་བ་མེད་པར་ངེས་པའི་དངོས་པོ་གཞན་དང་ཡིན་ཏེ། དཔེར་ན་སྔོན་པོ་སྔོན་པོ་མེད་པར་ངེས་པའི་སྔོན་པོ་མ་ཡིན་པ་དང་འགལ་བ་བཞིན་ནོ། །དེ་མེད་བ་ལ་འཁྲུལ་བ་མེད་པ་ཉིད་བཏང་ན་ནི་དངོས་པོ་དངོས་པོ་གཞན་དང་ཕན་ཚུན་སྤངས་པས་འགལ་བ་ཞེས་བྱ་བ་མ་ཡིན་ནོ། །ཕན་ཚུན་སྤངས་པའི་འགལ་བ་ནི་དངོས་པོ་དང་དངོས་པོ་མེད་པ་ཉིད་ཀྱི་རྒྱུ་མཚན་ཅན་ཡིན་ནོ་ཞེས་བསྟན་པའི་ཕྱིར་དངོས་པོ་དང་དངོས་པོ་མེད་པ་བཞིན་ནོ་ཞེས་དེ་དང་དེར་གསུངས་པ་ཡིན་ནོ། །གལ་ཏེ་ཡང་མར་མེའི་མེ་ལྕེའི་རང་སྣང་བའི་ཤེས་པ་བསྐྱེད་པའི་ནུས་པ་མེད་པ་ལ་མི་འཁྲུལ་པ་ཡིན་ན་ནི། དེ་དག་འགལ་བ་ཁོ་ནར་འགྱུར་བ་ཡིན་ན་དེ་ནི་ནུས་པ་གཞན་ཡོད་པ་དང་མེད་པ་ལ་ལྟོས་པ་མེད་པ་ཡང་ཡིན་ཏེ། དེའི་ཕྱིར་འབྲས་བུ་དུ་མའི་ནུས་པ་ནི་འགལ་བ་མ་ཡིན་ནོ། །འདིའི་ཐ་དད་པ་འཛིན་པ་ནི་ནུས་པ་དང་ལྡན་པའི་རང་བཞིན་འཛིན་པར་བྱེད་པའི་མངོན་སུམ་ཉིད་ཡིན་ལ། འཛིན་པར་བྱེད་པ་ཉིད་ནི་སྣང་བ་དང་ལྡན་པས་ཡིན་པ་དེའི་ཕྱིར་ཐ་དད་པར་འཛིན་པ་ནི་སྣང་བ་ཐ་དད་པ་དང་ལྡན་པ་ཡིན་ནོ། །དེས་ན་སྣང་བ་ཐ་དད་པ་བརྗོད་པ་ནི་དངོས་པོ་ཐ་དད་པ་རྟོགས་པའི་རྒྱུ་མཚན་དུ་བསྟན་པའི་དོན་དུ་ཡིན་གྱི། སྣང་བ་ཐ་དད་པ་ཉིད་ནི་དངོས་པོ་ཐ་དད་པ་མ་ཡིན་ནོ། །གང་གི་ཕྱིར་དངོས་པོ་ཐ་དད་པ་ནི་རང་གི་ངོ་བོ་ཐ་དད་པ་ཡིན་ན་སྣང་བ་ནི་དངོས་པོའི་ངོ་བོ་མ་ཡིན་གྱི་འོན་ཀྱང་ཤེས་པ་ཡིན་ནོ། །འོ་ན་མངོན་སུམ་དངོས་པོའི་རང་གི་ངོ་བོ་འཛིན་པ་ཡིན་ནོ། །ཐ་དད་པའི་རང་གི་ངོ་བོ་ཇི་ལྟར་འཛིན་པ་གང་གི་གཅིག་གི་ངོ་བོ་གཞན་ལ་མེད་པར་གཟུང་ན་ནི་དོན་དེ་དེས་སྟོན་པར་བཟུང་བའི་ཕྱིར་ཐ་དད་པ་གཟུང་བར་འགྱུར་ན་མངོན་སུམ་ནི་མེད་པ་འཛིན་པ་མ་ཡིན་ནོ་ཞེ་ན། འདིར་བརྗོད་པ་དོན་བྱེད་པ་ལ་ཉེ་བར་སྦྱོར་བར་མཐོང་བའི་རང་བཞིན་གང་ཡིན་པ་དེ་ཉིད་དེ་ལ་ནུས་པ་ཡིན་ཏེ། མ་མཐོང་བ་བརྟག་ན་ནི་ཧ་ཅང་ཐལ་བའི་ཕྱིར་
རོ། །དོན་བྱེད་ནུས་པའི་རང་བཞིན་གང་ཡིན་པ་དེ་ཉིད་ཀྱང་དངོས་པོ་ཡིན་ཏེ། དངོས་པོའི་མཚན་ཉིད་ནི་དོན་བྱེད་ནུས་པའི་ཕྱིར་རོ། །དོན་བྱེད་པར་བཟོད་པའི་རང་བཞིན་གང་དེ་དེ་སྣང་བ་ཉིད་ལས་མངོན་སུམ་གྱིས་ངེས་པར་བྱེད་པ་ན་ཡང་དེ་ཉམས་པ་རྣམ་པར་གཅོད་པ་ཡིན་ཏེ། ཉམས་པར་དོགས་ན་ནི་རང་བཞིན་དུ་ཡོངས་སུ་མི་གཅོད་པའི་ཕྱིར་རོ། །དེའི་ཕྱིར་གཟུང་བའི་རང་བཞིན་ངེས་པ་ཉིད་ཀྱི་ཤུགས་ཀྱིས་རང་བཞིན་ཉམས་པ་མེད་པར་ངེས་པ་ཡིན་ནོ། །གང་ལས་དེའི་རྣམ་པར་མངོན་སུམ་དུ་གཟུང་བར་བྱ་བར་འགྱུར་བ་དངོས་པོ་མེད་པ་ལུས་དང་ལྡན་པ་ནི་མ་ཡིན་གྱི། འོན་ཀྱང་རང་བཞིན་མེད་པ་ཉིད་ཀྱིས་ཐ་སྙད་དུ་བྱ་བ་འབའ་ཞིག་ཏུ་ཟད་དོ། །དེའི་ཕྱིར་དངོས་པོ་མེད་པའི་འཛིན་པ་ནི་འདི་ཉིད་ཡིན་ཏེ་དེ་ངེས་པ་གང་ཡིན་པའོ། །རང་གི་རྣམ་པར་ངེས་པར་བྱས་པ་ཉིད་ལས་དེའི་དངོས་པོ་མེད་པ་ཡང་མེད་པ་ཉིད་དུ་ངེས་པར་འགྱུར་བ་རྣམ་པར་གཅོད་པ་ཡིན་ནོ། །ཉམས་པ་བཞིན་དུ་ཉམས་པ་དང་ལྡན་པ་ཐམས་ཅད་ཀྱང་རྣམ་པར་བཅད་པ་ཡིན་ཏེ། གང་གི་ཕྱིར་སེར་པོ་ལ་སོགས་པ་ནི་སྔོན་པོ་ཉམས་པ་དང་ལྡན་པ་ཡིན་ཏེ། སྣང་བར་གྱུར་པ་དེ་དག་ལ་སྔོན་པོ་མ་མཐོང་བའི་ཕྱིར་རོ། །དེའི་ཕྱིར་ཐམས་ཅད་དུ་མངོན་པར་ཞེན་པ་ཉིད་ཀྱིས་ངེས་པའི་རང་བཞིན་སྣང་བ་ལས་གཅིག་གི་རང་བཞིན་དུ་ཡོངས་སུ་བཅད་པ་ན་ཉམས་པ་དང་ལྡན་པ་རྣམ་པར་བཅད་པ་ཡིན་ལ། སྣང་བ་མི་དམིགས་པས་ནི་གང་གི་ཕྱིར་འདི་སྔོན་པོའི་རང་བཞིན་དུ་མ་དམིགས་པ་དེའི་ཕྱིར་སྔོན་པོ་མ་ཡིན་ནོ་ཞེས་ཐ་སྙད་དུ་བྱེད་པ་ཡིན་ནོ། །དེའི་ཕྱིར་དངོས་པོ་མེད་པའི་ངེས་པས་མངོན་སུམ་ཉིད་ཀྱིས་དངོས་པོ་དངོས་པོ་གཞན་ལས་ཐ་དད་པར་བྱེད་པ་མ་ཡིན་ཞིང་ཐ་སྙད་དུ་བྱེད་པ་ནི་མི་དམིགས་པ་ཡིན་ནོ། །རང་བཞིན་ངེས་པར་བྱེད་པའི་མངོན་སུམ་འདི་ཉིད་ཀྱིས་རྣམ་པ་གཞན་མེད་པར་རྟོགས་པ་ཡིན་ཏེ། དེ་སྲིད་པར་དོགས་ན་ནི་སྔོན་པོའི་རང་བཞིན་ངེས་པར་ཡོངས་སུ་མ་བཅད་པར་ཐལ་བའི་ཕྱིར་རོ། །གང་གི་ཕྱིར་སྔོན་པོའི་རང་བཞིན་ཉམས་པ་རྣམ་པར་བཅད་པས་ཉམས་པ་དང་ལྡན་པའི་དངོས་པོ་རྣམ་པར་བཅད་པའི་ཕྱིར་རོ། །སྔོན་པོ་དང་སྔོན་པོ་མ་ཡིན་པ་གཉི་གའི་བདག་ཉིད་ཀྱི་རྣམ་པ་
གསུམ་པ་ལས་སྔོན་པོའི་རང་བཞིན་མ་ལོག་པའི་ཕྱིར་དེ་རྣམ་པར་མ་བཅད་ན་ནི་སྔོན་པོ་ཉིད་ཡོངས་སུ་གཅོད་པར་མི་འགྱུར་ཏེ། གཉི་གའི་བདག་ཉིད་དུ་ཐེ་ཚོམ་ཟ་བའི་ཕྱིར་རོ། །གང་གི་ཕྱིར་གཉི་གའི་བདག་ཉིད་གང་ཡིན་པ་དེ་ཡང་འདི་འདྲ་བའི་རང་བཞིན་དག་ཁོ་ནས་གཉི་གའི་རང་བཞིན་དུ་འགྱུར་བ་ཡིན་ནོ། །དེའི་ཕྱིར་མཐོང་བ་ཡང་གཉི་གའི་བདག་ཉིད་དུ་བརྟག་པར་བྱ་བ་ཡིན་པའི་ཕྱིར་དོན་བྱེད་པ་གཅིག་འཛིན་པ་ནི་མི་སླུ་བ་དང་བཅས་པར་མི་འགྱུར་ན་འགྱུར་བ་ཡང་ཡིན་ནོ། །དེའི་ཕྱིར་གལ་ཏེ་གཉི་གའི་བདག་ཉིད་ཀྱི་རྣམ་པ་གསུམ་ཡོད་ན་ནི་མཐོང་བའི་དོན་འདི་གཉི་གའི་བདག་ཉིད་དུ་འགྱུར་ན། འདི་ནི་གཉི་གའི་བདག་ཉིད་དུ་ཡང་དམིགས་པ་མ་ཡིན་ནོ། །དེའི་ཕྱིར་རྣམ་པ་གཞན་མངོན་སུམ་ཉིད་ཀྱིས་སྤངས་པ་ལ་སྣང་བ་མི་དམིགས་པས་ཐ་སྙད་དུ་བྱེད་པ་ཡིན་ནོ། །དེ་བཞིན་དུ་རིམ་ཅན་ལ་སོགས་པའི་ཡུལ་ཅན་གྱི་མངོན་སུམ་ཉིད་རྣམ་པ་གསུམ་པའི་གཅོད་བྱེད་དུ་བལྟའོ། །རྣམ་གྲངས་འདིས་མཐོང་བའམ་བརྟགས་པའི་གཉིས་འདུས་པའི་བདག་ཉིད་ཅེས་བྱ་བའི་རྣམ་པ་གསུམ་པ་སྲིད་པ་མ་ཡིན་ནོ་ཞེས་བྱ་བར་ཤེས་པར་བྱའོ། །སྔོན་པོ་ལ་སོགས་ཉམས་པ་དང་ལྡན་པ་ཡང་སྔོན་པོ་མ་ཡིན་པ་ཉིད་ཡིན་པའི་ཕྱིར་རོ། །སྔོན་པོ་དང་སྔོན་པོ་མ་ཡིན་པ་དང་བྲལ་བའི་རྣམ་པ་གཞན་མེད་པ་ཞེས་བྱ་བ་འདི་ལ་ཡང་མངོན་སུམ་ཉིད་ཚད་མ་ཡིན་ནོ། །དེའི་ཕྱིར་རང་བཞིན་གཅིག་འཛིན་པའི་ཚད་མ་གང་ཡིན་པ་དེ་ནི་དེ་གཞན་ལས་ཐ་དད་པར་བྱེད་པ་དང༌། རྣམ་པ་གཞན་སེལ་བར་བྱེད་པ་ཡིན་ནོ། །དེའི་ཕྱིར་འདི་ལྟར་ནུས་པ་ཐ་དད་པ་ནི་དངོས་པོ་ཐ་དད་པ་ཡིན་ལ། སྣང་བ་ཐ་དད་པ་ཡང་དེ་འཛིན་པའི་ཚད་མ་ཡིན་ཏེ། རྣམ་འགྲེལ་ལས། གཅིག་ཡིན་ན་ནི་བློའི་སྣང་བ་ཐ་དད་པ་དང་འགལ་བའི་ཆོས་གནས་པ་གང་ཡིན་པ་དེར་མི་འགྱུར་རོ་ཞེས་གང་བཤད་པ་ཡིན་ནོ། །གལ་ཏེ་ནུས་པ་དང་སྣང་བ་ལ་སོགས་པ་ཐ་དད་པ་ཡུལ་དང་དུས་ཐ་དད་པའི་གསལ་བ་རྣམས་གཅིག་ཉིད་མ་ཡིན་པའི་གཏན་ཚིགས་སུ་བརྗོད་པ་མ་ཡིན་ནམ། ཡུལ་དང་དུས་ཐ་དད་པ་ཡང་འགལ་བའི་ཆོས་དང་ལྡན་པ་ཉིད་ཡིན་ཏེ། དེའི་ཕྱིར་འགལ་བའི་ཐ་དད་པར་འདོད་པ་ན་ཡུལ་དང་
དུས་ཐ་དད་པ་ལས་འགལ་བའི་ཆོས་གཞན་བསྟན་པ་ནི་མི་འཐད་དོ། །མི་འདོད་ན་ཡང་འགལ་བའི་ཆོས་དང་ལྡན་པ་གཞན་ཐ་དད་པའི་རྒྱུ་མ་ཡིན་ནོ་ཞེ་ན། འདིར་བཤད་པ། ཕན་ཚུན་སྤངས་པས་འགལ་བ་ནི་དངོས་པོ་དང་དངོས་པོ་མེད་པ་ཉིད་ཡིན་ལ། དངོས་པོའི་ཆ་དག་ནི་ཕན་ཚུན་མེད་པ་མེད་པ་མི་འཁྲུལ་པ་ཉིད་ལས་འགལ་བ་ཡིན་ཏེ། འཁྲུལ་ན་ནི་འབྲས་བུ་དུ་མ་བསྒྲུབ་པའི་ནུས་པ་བཞིན་དུ་གཅིག་ཏུ་འགྱུར་བ་ཡིན་ནོ་ཞེས་བརྗོད་པ་ཡིན་ནོ། །དེ་ལ་ནི་ཡུལ་དང་དུས་གཅིག་ཡོངས་སུ་སྤངས་ནས་ཡུལ་དང་དུས་གཞན་དང་འབྲེལ་པ་ནི་མ་ཡིན་གྱི། འོན་ཀྱང་གཅིག་པ་ཉིད་ཀྱིས་ཏེ། དངོས་པོ་དེ་ཉིད་ཡུལ་དང་དུས་དེར་ཡང་ཡོད་པ་ཡུལ་དང་དུས་གཞན་ན་ཡང་ཡོད་པ་ཡིན་ནོ་ཞེས་དོགས་པ་བསལ་བའི་ཕྱིར་སློབ་དཔོན་ཡུལ་ལ་སོགས་པ་ཐ་དད་ན། ནུས་པ་དང་ལྡན་པའི་རང་བཞིན་ཐ་དད་པར་སྟོན་པ་ན་ཡུལ་དང་དུས་གཞན་དང་འབྲེལ་པ་ནི་ཡུལ་དང་དུས་གཞན་སྤངས་པ་ཡིན་ནོ་ཞེས་སྟོན་པར་མཛད་དོ། །འདི་ལྟར་ཡུལ་ལམ་དུས་གཅིག་འཛིན་པའི་ཤེས་པས་དེའི་རང་བཞིན་ཉམས་པ་རྣམ་པར་གཅད་པའི་ཕྱིར་ཉམས་པ་དང་ལྡན་པའི་ཡུལ་དང་དུས་གཞན་རྣམ་པར་གཅད་པ་ཡིན་ནོ། །ཇི་ལྟར་ཡུལ་དང་དུས་གཞན་བཅད་པ་དེ་བཞིན་དུ་མཐོང་བའི་ཡུལ་ལ་སོགས་པ་དང་འབྲེལ་པའི་རང་བཞིན་རྣམ་པར་བཅད་པའི་ཡུལ་ལ་སོགས་པ་ན་ཡོད་པ་རྣམ་པར་གཅད་པ་ཡིན་ཏེ། མ་བཀག་པའི་རང་བཞིན་ནི་བཀག་པའི་ཡུལ་ལ་སོགས་པ་དང་འབྲེལ་པ་མི་འཐད་པའི་ཕྱིར་རོ། །གནས་པའི་རང་བཞིན་ཡོད་པ་ཡིན་ན་ནི་ཡུལ་གཞན་ཡང་ཡོད་པར་ཐལ་བའི་ཕྱིར་ཏེ། མཐོང་བའི་ཡུལ་ཉིད་བཞིན་ནོ། །དེས་ན་ཡུལ་གཞན་ན་གནས་པའི་རང་བཞིན་ནི་ཡུལ་གཅིག་ན་ཡོད་པའི་རང་བཞིན་ཡོངས་སུ་སྤངས་ནས་གནས་པ་ཡིན་པ་དེའི་ཕྱིར་ཡུལ་གཞན་དང་འབྲེལ་པའི་རང་བཞིན་ནི་ཡུལ་དང་དུས་དེའི་རང་བཞིན་དངོས་པོ་མེད་པ་ལ་མི་འཁྲུལ་པ་ཡིན་ནོ། །དེའི་ཕྱིར་དེའི་ཡུལ་ཉིད་དང་གཞན་གྱི་ཡུལ་ཉིད་གཅིག་ལ་འགལ་ལོ། །དེ་བཞིན་དུ་སྐྱེ་བ་ལ་སོགས་པ་དུས་ཐ་དད་ན་ཐ་དད་པ་ཡིན་ཏེ། སྐྱེས་པ་དང་མ་སྐྱེས་པ་དང་ཞིག་པ་དང་མ་ཞིག་པ་དང༌། རྒྱུན་གྱིས་གནས་
པ་དང་མི་གནས་པ་དག་ཕན་ཚུན་མེད་པ་མི་འཁྲུལ་པའི་ཕྱིར་ཐ་དད་པ་ཡིན་ནོ། །དེའི་ཕྱིར་ཡུལ་དང་དུས་ཐ་དད་པ་ན་ཡོད་པ་ནི་ནུས་པ་དང་ལྡན་པའི་རང་བཞིན་ཐ་དད་པ་དང༌། སྐྱེ་བ་ལ་སོགས་པ་ཐ་དད་པའི་ཕྱིར་འགལ་བའི་ཆོས་དང་ལྡན་པའི་རང་བཞིན་ཡིན་ནོ། །སྣང་བ་ཐ་དད་པ་ཡང་དེ་དག་རྣམ་པར་འཇོག་པའི་ཚད་མ་ཡིན་ནོ། །དེའི་ཕྱིར་ཡུལ་དང་དུས་ཐ་དད་པའི་གསལ་བ་རྣམ་པར་གཅིག་པ་ཉིད་མ་ཡིན་ནོ། །འདི་སྙམ་དུ་དབང་པོའི་རྟོགས་པར་བྱ་བ་གསལ་བ་རྣམས་ཐ་དད་པར་འདོད་པ་ཡིན་ཡང་ཐ་དད་པ་མེད་པ་དབང་པོའི་རྟོགས་པར་བྱ་བའི་སྤྱི་གཞན་ཡོད་པ་མ་ཡིན་ནམ་ཞེ་ན། བཤད་པ། ཐ་དད་པའི་རང་བཞིན་གྱི་ལྡོག་པ་དེ་ལས་ཐ་དད་པ་འཇུག་པའི་རང་བཞིན་གྱི་སྤྱི་གཞན་ནི་ཡོད་པ་མ་ཡིན་ཏེ། ཐ་མི་དད་པའི་སྤྱི་ནི་བཀག་པ་ཡིན་ལ། ཐ་དད་པ་ཡང་ཡོད་པ་མ་ཡིན་ནོ་ཞེས་འདིས་སྤྱི་ཐ་དད་པར་སྨྲ་བ་འགོག་པ་ཡིན་ཏེ། དབང་པོ་ལས་སྐྱེས་པའི་བློ་ཐ་དད་པ་མེད་པའི་ཕྱིར་རོ། །བློ་ཐ་དད་པ་མེད་པ་ཉིད་གཏན་ཚིགས་སུ་དགོད་པ་རྣམ་པར་དགྲོལ་བའི་ཕྱིར་མ་མཐོང་བའི་ཕྱིར་རོ་ཞེས་གསུངས་ཏེ། གསལ་བའི་བདག་ཉིད་རྣམས་ལས་ཐ་དད་པའོ། །ཇི་ལྟ་བུའི་ཁྱད་པར་ཅན་ཞིག་ཅེ་ན། རྗེས་སུ་འགྲོ་བ་མེད་པའི་གསལ་བ་རྣམས་ལ་རྗེས་སུ་འགྲོ་བའོ། །མ་མཐོང་བ་ནི་དབང་པོའི་རྣམ་པར་ཤེས་པས་ཡུལ་དུ་མ་བྱས་པའོ། །ཕྱིར་ཞེས་བྱ་བ་ནི་གཏན་ཚིགས་ཏེ། གང་གི་ཕྱིར་མ་མཐོང་བ་དེའི་ཕྱིར་མེད་དོ་ཞེས་བྱ་བའོ། །དོན་དེ་ནི་རྗེས་སུ་འགྲོ་བའི་རྣམ་པ་ཅན་གྱི་ཤེས་པ་གཅིག་དང་དེའི་རྗེས་སུ་འཇུག་པའི་སྒྲའི་ཡུལ་དུ་འགྱུར་བར་བརྟགས་པ་ཡིན་ལ། སྒྲ་དང་བློ་དག་གི་ཡུལ་དེ་ཡང་སྣང་བ་ཡིན་ན་སྣང་བ་ཡང་མ་ཡིན་ནོ། །དེའི་ཕྱིར་གང་ལ་རྣམ་པ་གཅིག་ཏུ་རྟོག་པའི་རྒྱུར་གྱུར་པའི་སྒྲ་འཇུག་པར་འགྱུར་བ་བློ་དང་སྒྲ་རྗེས་སུ་འགྲོ་བར་རུང་བ་དེ་ནི་མེད་དོ། །བློས་ཡུལ་དུ་བྱས་པའི་དོན་ཉིད་ལ་སྒྲ་འཇུག་པའི་ཕྱིར་རོ། །འདིས་ནི་ཤུགས་ཀྱིས་སྒྲ་དང་བློ་དག་བསྟན་ཏོ། །འདི་སྙམ་དུ་མ་མཐོང་བ་ལས་དོན་ཐ་དད་པ་མེད་པར་ཇི་ལྟར་འགྱུར་སྙམ་ན་བཤད་པ། གང་གི་ཕྱིར་སྣང་བའི་དོན་ཐ་དད་པ་ཉིད་ལ་ནི་བློ་ཐ་དད་པ་སྣ་ཚོགས་པ་མཐོང་སྟེ། གང་གི་ཕྱིར་སྣང་བའི་དོན་
ཡོད་པ་ཉིད་དང༌། གཅིག་གི་གཅིག་ཉིད་དང༌། ཐ་དད་པར་གྱུར་པའི་ཐ་དད་པ་ཉིད་ལ་ནི་བློ་ཡོད་པ་ཉིད་དང༌། གཅིག་ཉིད་དང༌། ཐ་དད་པ་ཉིད་ཀྱིས་ཁྱབ་པ་ཡིན་ནོ། །འབྱུང་པོ་དང་མགུལ་ཆིངས་བཞིན་ནོ་ཞེས་བྱ་བ་ནི་ཁྱབ་པའི་ཡུལ་སྟོན་པའོ། །འབྱུང་པོ་ནི་གཟའ་རྣམས་སམ་མ་མོའི་ཚོགས་སོ། །མགུལ་ཆིངས་ནི་མེ་རྟོག་གི་ཕྲེང་བ་དཔྱངས་པའི་ཐ་གུའོ། །དེ་ཐ་དད་པ་ནི་བལྟར་རུང་བ་ཉིད་ཀྱིས་རང་གི་ཡུལ་ཅན་གྱི་ཤེས་པ་ཐ་དད་པས་ཁྱབ་པ་ཡིན་ནོ། །འདིར་ཡང་སྣང་བའི་རང་གི་མཚན་ཉིད་རྣམས་ལ་སྣང་བའི་སྤྱི་ཡོད་ན་ནི་དེའི་ཕྱིར་བློ་ཐ་དད་པ་ཉིད་དུ་ཐལ་བ་དེ་མེད་པའི་ཕྱིར་དོན་ཐ་དད་པ་མེད་པ་ཡིན་ནོ་ཞེས་བྱ་བ་ནི་རང་བཞིན་མི་དམིགས་པ་ཡིན་ནོ། །ཅི་སྟེ་ཡང་བློ་ཐ་དད་པ་མེད་པར་མཐོང་བའི་དོན་ཐ་དད་པར་ཁས་ལེན་ན་ནི་དེའི་ཚེ་ཤེས་པ་དེ་ཐ་དད་པ་མེད་ཀྱང་ཐ་དད་པར་རྟོགས་ན་ཧ་ཅང་ཐལ་བར་འགྱུར་རོ། །གང་ཅུང་ཟད་ཐ་དད་པར་མ་མཐོང་བ་དེ་ཉིད་ལ་ཇི་ལྟར་འདོད་པ་བཞིན་དུ་བརྟག་པའི་ཕྱིར་འདོད་པའི་ཡུལ་ལས་འདས་པར་ཐལ་བར་འགྱུར་ཏེ། གཅིག་དང་དུ་མའི་ཐ་སྙད་ཉམས་པར་ཐལ་བའི་ཕྱིར་རོ། །འདི་ཉིད་སྟོན་པ་ནི་གཅིག་ཀྱང་དེ་ཡིན་ལ་དུ་མ་ཡང་དེ་ཡིན་པས་གཅིག་དང་དུ་མའོ། །དེ་ལྟར་མ་ཡིན་པ་ནི་གཅིག་དང་དུ་མར་མི་འགྱུར་བའོ། །འགྲོ་བ་གཅིག་དང་དུ་མའི་ངེས་པ་དང་བྲལ་བར་འགྱུར་རོ་ཞེས་བྱ་བ་འདི་ནི་ཧ་ཅང་ཐལ་བའོ། །ཐམས་ཅད་ལ་དུ་མ་ཉིད་དུ་ཐལ་བའི་ཕྱིར་གཅིག་པ་ཉིད་མེད་པ་མ་ཡིན་ནམ། དུ་མ་ཉིད་དུ་ངེས་པ་མེད་པ་ཇི་ལྟར་ཞེ་ན། བཤད་པ། དེ་ལ་ཐ་དད་པར་མ་རྟོགས་པ་སྟེ་དེའི་ཕྱིར་རོ། །གང་གི་ཕྱིར་ཐ་དད་པ་ཉིད་དུ་མ་རྟོགས་པ་དེའི་ཕྱིར་ཐ་དད་པ་ཉིད་ཀྱི་ཐ་སྙད་མེད་པ་ཡིན་ནོ། །ཐ་དད་པ་ཉིད་དུ་མ་རྟོགས་པ་ཅིའི་ཕྱིར་ཞེ་ན། བཤད་པ། ཐམས་ཅད་ཀྱི་ངོ་བོ་ཉིད་ལ་གཅིག་ཏུ་ངེས་པ་མེད་པའི་ཕྱིར་རོ། །གང་གི་ཕྱིར་འགའ་ཞིག་ཏུ་གཅིག་ཏུ་མ་ངེས་ན་དེའི་ཕྱིར་དུ་མ་ཉིད་དུ་རྟོགས་པར་མི་འགྱུར་རོ། །འདི་ལྟར་གང་ལས་བཟློག་ན་ཐ་དད་པ་མེད་པའི་ཐ་སྙད་ཀྱི་ཡུལ་དུ་འགྱུར་བ་དེ་ནི་ཐ་དད་པའི་ཐ་སྙད་ཀྱི་ཡུལ་ཡིན་ནོ། །ཇི་ལྟར་སྣ་ཚོགས་སུ་སྣང་བ་ལ་ཐ་དད་པའི་ཐ་སྙད་ཡིན་པ་དེ་བཞིན་དུ་དེ་ལས་བཟློག་པ་སྣ་ཚོགས་མ་ཡིན་པ་ལ་ཡང་ཡིན་
ཏེ། དེའི་ཕྱིར་འགའ་ཞིག་ཏུ་ཐ་དད་པ་ལས་བཟློག་པ་གནས་པ་མེད་པའི་ཕྱིར་ཐ་དད་པ་ཉིད་གནས་པར་མི་འགྱུར་རོ། །འགལ་བའི་ཆོས་འདི་ནི་དངོས་པོ་ཉིད་ཀྱི་ཡིན་ནོ། །དེའི་ཕྱིར་གཅིག་མི་གནས་ན་གཉི་ག་ཡང་གནས་པར་མི་འགྱུར་རོ། །གང་གི་ཕྱིར་ངེས་པའི་ཐ་སྙད་དག་ལ་ནི་ཡུལ་ངེས་པས་ཁྱབ་པ་ཡིན་ལ། ངེས་བྱེད་མེད་ན་ཡང་ཁྱབ་པར་བྱེད་པ་ཡུལ་ངེས་པ་མེད་པར་འགྱུར་བ་དེའི་ཕྱིར་འགྲོ་བ་གཅིག་དང་དུ་མར་མི་འགྱུར་ན་དེ་ལྟར་ཡང་རིགས་པ་མ་ཡིན་ནོ། །གང་གི་ཕྱིར་སྣ་ཚོགས་པ་ལས་སྣ་ཚོགས་པའི་དོན་བྱེད་པ་ཅི་འདྲ་བ་དེ་འདྲ་བ་ནི་གཅིག་ལ་མ་ཡིན་ནོ། །གང་གི་དོན་བྱེད་པའི་རྒྱུ་མཚན་ཅན་གྱི་ཡོད་པ་ཉིད་གང་ལས་ལོག་པ་དེ་ནི་དེའི་བདག་ཉིད་མ་ཡིན་ལ། དངོས་པོ་ཡང་ཡིན་ཏེ་དེས་ན་གཞན་དུ་གྲུབ་བོ། །གཅིག་ཉིད་དམ་དུ་མ་དོན་དུ་གཉེར་བས་ཀྱང་ཡུལ་འགའ་ཞིག་སྤངས་ནས་འགའ་ཞིག་ལ་འཇུག་པ་ཡིན་ལ། ངེས་པར་ཞུགས་པ་ན་ཡང་གཅིག་དང་དུ་མའི་ཡུལ་གྱི་བསྒྲུབ་པར་བྱ་བ་ཐོབ་པར་འགྱུར་རོ། །ངེས་པ་དང་ལྡན་པའི་འབྲས་བུ་ཐོབ་པ་ནི་ངེས་པ་དང་ལྡན་པའི་འཇུག་པ་ལས་ཡིན་གྱི། ཚད་མ་སྔོན་དུ་འགྲོ་བའི་ངེས་པས་བསྐྱེད་པའི་འཇུག་པ་མེད་པར་ནི་མ་ཡིན་ནོ། །གཅིག་དང་དུ་མ་དག་གི་ཚད་མ་སྔོན་དུ་འགྲོ་བ་ཅན་གྱི་ངེས་པ་གང་ཡིན་པ་ཡང་ད་ལྟར་རུང་བའི་ཡུལ་ལ་མཐོང་བའི་སྣང་བ་ཐ་དད་པ་དང༌། ཐ་མི་དད་པ་སྔོན་དུ་འགྲོ་བ་ཅན་དུ་གྲུབ་བོ། །དེ་ལྟ་མོད་ཀྱི་ཞེས་བྱ་བ་ལ་སོགས་པས་སྤྱི་རང་བཞིན་གཞན་གྱིས་དམིགས་པའི་མཚན་ཉིད་ཀྱི་གྱུར་པ་མ་ཡིན་པར་དོགས་པ་བསུ་བའོ། །སྤྱི་སྣང་དུ་ཟིན་ཀྱང་སྟེ་དབང་པོའི་ཤེས་པ་ལ་རྣམ་པར་འཇོག་ཀྱང་ཐ་དད་པར་བྱེ་བྲག་ཏུ་གསལ་བར་ཁོང་དུ་ཆུད་པར་མི་འགྱུར་རོ། །མ་རྟོགས་པའི་ཕྱིར་ཏེ། གསལ་བར་དང་སྤྱི་དག་པར་རྟོགས་པའི་རྒྱུ་ཡུལ་དང་དུས་ཐ་དད་པ་མེད་པའི་ཕྱིར་རོ། །མ་རྟོགས་པ་ནི་རང་བཞིན་ངེས་པར་མ་ཟིན་པ་སྟེ། ངེས་པར་མ་ཟིན་པ་དེའི་ཕྱིར་རོ། །འདི་སྐད་བརྗོད་པ་ཡིན་ནོ། །རང་བཞིན་རྟོགས་པས་རྒྱུ་ཡོད་ན་ནི་རྟོགས་ཤིང་ངེས་པར་ཟིན་པ་ན་ཐ་དད་པར་ངེས་པར་འགྱུར་བ་ཡིན་ན་དེ་ལྟར་ཡང་མ་ཡིན་ཏེ། དེའི་ཕྱིར་མ་ངེས་པ་ཡིན་ནོ། །དེ་ནི་མི་རིགས་ཏེ་ཞེས་
བྱ་བ་ནི་དེ་ཟློག་པར་བྱེད་པའོ། །བསམ་པ་ནི་སྤྱི་དེ་ཅི་འདྲ་བར་ཁས་ལེན་པ་དེ་ནི་མི་རྟོགས་པར་མི་རིགས་སོ་ཞེས་བྱ་བ་འདི་ཡིན་ནོ། །གཏན་ཚིགས་སྟོན་པ་ནི་སྤྱི་དེ་ལ་ཡུལ་གཞན་ལ་བློ་དང་དེ་ནི་སྒྲ་དེ་དག་འཇུག་པ་དེའི་ཕྱིར་ཏེ། གཏན་ཚིགས་དེའི་ཕྱིར་ན་དེ་མི་རྟོགས་ཤིང་ངེས་པར་མི་ཟིན་པ་མི་རིགས་སོ། །འདི་ཉིད་འབྲེལ་པ་བཤད་པ་ནི་བློ་དང་སྒྲ་དེ་དག་རྗེས་སུ་འགྲོ་བ་དེ་ལ་བརྟེན་པ་གང་ཡིན་པ་དེ་དག་ནི་དེ་ལ་བརྟེན་པ་སྟེ་ཐ་དད་པའི་ཁྱད་པར་དེ་ནི་དེ་ལྟ་མ་ཡིན་ནོ། །རྗེས་སུ་འགྲོ་བ་ན་དེ་རྣམ་པ་གཅིག་ཏུ་རྟོགས་པས་པར་བྱ་བ་ན་ཇི་ལྟར་སྤྱི་མི་རྟོགས་ཞེས་བྱ། རྣམ་པར་མ་ཕྱེད་ཅེས་བྱ། རྟོགས་པ་ཉིད་དུ་རིགས་སོ་ཞེས་བྱ་བའི་དོན་ཏོ། །སྤྱི་མཐོང་བ་ནི་རྣམ་པར་འཛིན་པ་སྟེ། དེའི་མཐུས་སོ། །འདི་སྐད་བརྗོད་པ་ཡིན་ཏེ། ཕན་ཚུན་ཐ་དད་པའི་ཁྱད་པར་རྣམས་ནི་རྗེས་སུ་འགྲོ་བ་གཅིག་པོ་གང་ཡིན་པའི་རྣམ་པ་འཛིན་པའི་ཤེས་པ་ཐ་དད་པ་མེད་པར་གཟུང་བ་ཡིན་ན། སྤྱི་གཅིག་པོ་དེ་ཡང་ཁྱད་པར་དེ་དག་ལས་ཐ་དད་པའི་དངོས་པོར་མ་རྟོགས་སོ་ཞེ་ན་ནི་དེའི་ཕྱིར་ཁྱད་པར་རྣམས་ཀྱི་རང་བཞིན་ལྟར་དེ་ཡང་ཐ་དད་པ་ཉིད་དུ་རྟོགས་པར་འགྱུར་ཞིང༌། དེ་ལས་ཀྱང་རང་ཉིད་གཅིག་ཉིད་དུ་ཁྱད་པར་རྣམས་ལས་ཐ་དད་པར་མ་ངེས་པ་ན་ཇི་ལྟར་ཁྱད་པར་དེ་དག་ལ་རང་གི་རྣམ་པ་ཅན་དང་བསྲེས་ནས་རང་བཞིན་གཅིག་ཏུ་སྟོན་པར་བྱེད། དེ་གཅིག་ཏུ་ངེས་ན་ནི་དེ་དང་བསྲེས་ནས་རང་བཞིན་གཅིག་ཏུ་ངེས་པར་འགྱུར་རོ། །གང་ལས་ཤེས་པར་བྱ་བ་ནི་འདི་ཉིད་སྟོན་པའོ། །ཁྱད་པར་གྱི་དོན་གང་ལས། ཁྱད་པར་ཅན་གང་ལ་སྒྲ་དང་བློ་དག་འཇུག་པ་སྟེ། སྒྲ་དང་ཤེས་པ་དག་དེའི་རྣམ་པ་དང་ལྡན་པ་ཉིད་ཀྱིས་དེའི་རྗེས་སུ་འགྲོ་བ་ནི་འཇུག་པ་ཡིན་ནོ། །ཁྱད་པར་དེ་མ་རྟོགས་པར་ནི་ཁྱད་པར་ཅན་གྱི་དོན་ཏེ། དེ་ལྟར་རྟོགས་པར་མི་འགྱུར་ཏེ། དབྱིག་པ་ཅན་བཞིན་ནོ། །གང་གི་ཕྱིར་རྒྱུ་མཚན་དབྱིག་པའི་ཁྱད་པར་གྱི་རྣམ་པ་མ་རྟོགས་པར་ནི་ལྷ་སྦྱིན་དབྱིག་པའི་རྣམ་པའི་ཁྱད་པར་ཅན་དུ་འཛིན་པར་མི་འགྱུར་བའི་ཕྱིར་རོ། །འདིས་ནི་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་བསྟན་ཏོ། །དོན་གཞན་དང་འབྲེལ་པར་འཛིན་པ་ལ་ནི་དོན་གཞན་རྟོགས་པས་ཁྱབ་པ་ཡིན་ཏེ། དོན་གཞན་མ་རྟོགས་ན་ནི་དེ་དང་ལྷན་
ཅིག་གཟུང་བར་མི་འགྱུར་བའི་ཕྱིར་རོ། །རྣམ་པར་ཕྱེ་ནས་གཟུང་བ་ཡང་མེད་དེ། དེའི་ཕྱིར་ཁྱབ་པར་བྱད་པ་མེད་པས་ཁྱབ་པར་བྱ་བ་ཡོད་པ་མ་ཡིན་ནོ། །གང་གི་ཕྱིར་སྤྱི་མི་རྟོགས་པ་མི་རིགས་པ་དེའི་ཕྱིར་དེ་ཐ་དད་པར་སྣང་བར་ཁས་བླང་བར་བྱ་བ་ཡིན་ན་སྣང་བ་ཡང་མ་ཡིན་ཏེ། དེའི་ཕྱིར་དབང་པོ་ལས་སྐྱེས་བློ། །ཐམས་ཅད་ཁྱད་པར་ཡུལ་ཅན་ཉིད། །ཚིག་ལེའུར་བྱས་པའི་དོན་བསྒྲུབ་པར་བྱ་བའི་ཕྱིར་གཏན་ཚིགས་བཤད་པ། དབང་པོ་ཤེས་པ་ལ་རང་གི་མཚན་ཉིད་ལས་ཐ་དད་པར་ངེས་པའི་རང་བཞིན་གྱི་སྤྱི་མི་སྣང་བའི་ཕྱིར་རོ། །འདི་སྙམ་དུ་རྗེས་སུ་འགྲོ་བའི་རང་གི་མཚན་ཉིད་ཁོ་ན་སྒྲའི་བརྗོད་བྱར་འགྱུར་རོ་སྙམ་ན། སྣང་བ་རྣམས་ཀྱང་ཞེས་བྱ་བ་གསུངས་ཏེ། རང་གི་མཚན་ཉིད་ངེས་པར་སྣང་བ་རྣམས་ནི་ཡུལ་ལ་སོགས་པ་ཐ་དད་པས་རྗེས་སུ་མི་འགྲོ་བའི་ཕྱིར་ཏེ། རྒྱུ་དེའི་ཕྱིར་རོ། །ཁྱད་པར་ཅན་ཞེས་བྱ་བ་ནི་གཏན་ཚིགས་ཀྱི་ཚིག་སྟེ། གང་གི་ཕྱིར་ཁྱད་པར་ཅན་ཡིན་པའི་ཕྱིར་དབང་པོའི་བློ་ནི་བརྗོད་དུ་མེད་པ་བསྙད་པར་མི་ནུས་པའི་དོན་མངོན་དུ་བྱེད་པ་ཡིན་ནོ་ཞེས་བྱ་བ་ཡིན་ནོ། །དེའི་ཕྱིར་འདི་ཐམས་ཅད་ཀྱི་དོན་བསྡུས་པ་ནི་འདི་ཡིན་ཏེ། དོན་གང་ཞིག་བརྡའི་དུས་སུ་སྒྲ་གང་དང་འབྲེལ་པར་མཐོང་བ་མ་ཡིན་པ་དེ་ནི་དེས་ཁྱད་པར་ཅན་དུ་གཟུང་བ་མ་ཡིན་ཏེ། དཔེར་ན་བ་ལང་གི་སྒྲས་རྟ་བཞིན་ནོ། །དབང་པོའི་དོན་ཐམས་ཅད་ཀྱང་སྒྲ་ཐམས་ཅད་དང་འབྲེལ་པ་མཐོང་བ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །སྒྲས་ཁྱད་པར་ཅན་དུ་གཟུང་བའི་དོན་ནི་རང་གི་ངོ་བོ་མེད་པས་ཁྱབ་པ་ཡིན་ལ་བརྡ་མ་བྱས་པའི་སྒྲས་དོན་ཁྱད་པར་ཅན་དུ་བཟུང་ན་ནི། སྒྲ་དོན་གྱི་འབྲེལ་པའི་ངོ་བོ་ཅན་དུ་ཐལ་བ་དེའི་ཕྱིར་ཆོས་གཞན་ལ་ཁྱབ་པར་བྱེད་པ་མེད་པའི་ཕྱིར་བཅོས་བུ་དེས་ཁྱད་པར་ཅན་དུ་འཛིན་པ་ལ་ནི་འབྲེལ་པ་ལ་མཐོང་བ་ཉིད་ཀྱིས་ཁྱབ་པའི་ཕྱིར་འབྲེལ་པ་གྲུབ་བོ། །གཏན་ཚིགས་མ་གྲུབ་པ་ཡང་མ་ཡིན་ཏེ། གང་གི་ཕྱིར་སྐད་ཅིག་མ་ཉིད་ཀྱིས་བརྡ་གཟོ་བ་ན་དོན་འགགས་པའི་ཕྱིར་དབང་པོས་རྟོགས་པར་བྱ་བའི་དོན་ལ་བརྡ་བྱ་བར་མི་ནུས་པ་ཡིན་ལ་ནུས་པ་ཉིད་ཡིན་ཡང་རྗེས་སུ་འགྲོ་བ་མེད་པའི་ཕྱིར་རྟོགས་པ་དང་ལྡན་པ་དགོས་པ་མེད་པའི་བརྡ་བྱེད་པ་ལ་མི་
འཇུག་གོ །འཇུག་ན་ཡང་གང་ལ་བརྡ་བྱས་པ་དེ་ནི་འདས་པ་ཡིན་ལ། གང་ཡང་ཐ་སྙད་ཀྱི་དུས་ན་རྟོགས་པ་དེ་ཐམས་ཅད་སྔོན་མ་མཐོང་བ་ཡིན་པའི་ཕྱིར་དེ་ལ་བརྡ་མེད་པ་ཡིན་ནོ། །འདིར་ནི་བསྟན་བཅོས་མཛད་པས་སྒྲ་སྦྱོར་བ་ཡང་ཞེས་བྱ་བ་ལ་སོགས་པས་དགོས་པ་མེད་པ་བརྡ་མི་བྱེད་པའི་རྒྱུར་བརྗོད་པ་ཡིན་གྱི་མི་ནུས་པ་ཉིད་ནི་མ་ཡིན་ནོ། །རྣམ་འགྲེལ་དུ་ནི་མི་ནུས་པ་ཡང་བརྗོད་དོ། །མངོན་སུམ་རྣམ་པར་རྟོག་པ་མེད་པ་དང་བརྗོད་དུ་མེད་པའི་ཡུལ་ཅན་དུ་རྣམ་པར་གནས་པ་ལ་གཞན་གྱིས་སྨྲས་པ། མངོན་སུམ་ལས་ཇི་ལྟར་ཐ་སྙད་དུ་འགྱུར་ཞེས་འབྲེལ་ཏོ།། རྣམ་པ་ཅན་གང་གིས་ཏེ་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཞེས་བྱ་བ་ནི་མ་བཟོད་པ་སྟེ། གང་གི་ཕྱིར་འཇུག་པའི་ཡན་ལག་ནི་ཚད་མར་བརྗོད་པ་ཡིན་ན་འཇུག་པའི་ཡན་ལག་མ་ཡིན་པའི་ཕྱིར་མངོན་སུམ་ཡང་ཚད་མར་གྱུར་པ་ནི་མི་བཟོད་དོ་སྙམ་དུ་བསམས་པའོ། །ད་ནི་ཞེས་བྱ་བ་ནི་མངོན་སུམ་རྟོག་པ་མེད་པར་ཁས་ལེན་པའི་དུས་ནའོ། །ངེས་པ་ནི་གཏན་ལ་ཕེབས་པ་སྟེ། དེ་གང་ལ་མེད་པ་དེ་ལྟ་བུའི་བདག་ཉིད་གང་ཡིན་པའི་མངོན་སུམ་དེ་ལས་ཐ་སྙད་དེ། བདེ་བ་བསྒྲུབ་པའི་དངོས་པོའི་ཡུལ་ལ་འཇུག་པ་དང༌། སྡུག་བསྔལ་སྒྲུབ་པའི་ཡུལ་ལ་ལྡོག་པར་མི་འགྱུར་རོ། །བསམ་པ་ནི་འདི་ཡིན་ཏེ། གང་གི་ཕྱིར་མངོན་སུམ་ནི་མ་ངེས་པའི་བདག་ཉིད་དོན་ཉེ་བར་སྣང་བ་འགའ་ཞིག་ཏུ་ཟད་ལ། ངེས་པ་མ་ཡིན་ན་ཡང་སྐད་ཅིག་མ་ཉིད་བཞིན་དུ་འདི་འཇུག་པའི་ཡུལ་མ་ཡིན་ནོ། །གཞན་ཡང་སྒྲུབ་པར་བྱེད་པའི་དངོས་པོ་སྣང་བ་ཙམ་འཛིན་པའི་མངོན་སུམ་གྱིས་འབྲས་བུ་ཉེ་བ་མ་ཡིན་པ་ལ། མངོན་པར་འདོད་པའི་འབྲས་བུ་བསྒྲུབ་པས་དེ་དང་འབྲེལ་པ་ཉིད་དུ་འཛིན་པར་ནུས་པ་མ་ཡིན་ཏེ། རྣམ་པར་རྟོག་པ་མེད་པའི་མངོན་སུམ་དངོས་པོ་ཉེ་བར་འགྱུར་བ་དག་གི་འབྲེལ་པ་ཡང་འཛིན་པར་མི་ནུས་པ་གང་ཡིན་པ་དེས་དངོས་པོ་ཉེ་བ་མ་ཡིན་པ་བྱེད་པ་ཉིད་ཇི་ལྟར་འཛིན་པར་འགྱུར། བདེ་བ་སྒྲུབ་པར་བྱེད་པར་དངོས་པོ་མ་ངེས་ན་ཡང༌། རྟོག་པ་དང་ལྡན་པ་འཇུག་པར་མི་འགྱུར་རོ། །དེའི་ཕྱིར་འཇུག་པའི་ཡུལ་དུ་བྱེད་པ་ནི་བདེ་བ་སྒྲུབ་པར་བྱེད་པའི་དངོས་པོ་ལ་དེའི་རང་བཞིན་དུ་གཏན་ལ་ཕེབས་པ་དང་
ལྡན་པ་ངེས་པའི་ཤེས་པ་ཡིན་གྱི་གཞན་ནི་མ་ཡིན་ནོ། །ཡང་ཅིའི་ཕྱིར་ངེས་པའི་བདག་ཉིད་ཀྱི་མངོན་སུམ་ཉིད་ལས་ཐ་སྙད་དུ་འགྱུར་ཞེ་ན། སྨྲས་པ། འདི་ནི་བདེ་བ་སྒྲུབ་པའོ། །འདི་ནི་སྡུག་བསྔལ་སྒྲུབ་པའོ་ཞེས་འདིའོ་ཞེས་མངོན་སུམ་ཉིད་དུ་ངེས་ཏེ། ཡོངས་སུ་བཅད་ན་ནི་ཐ་སྙད་དུ་བྱེད་པའི་སྐྱེས་བུ་བདེ་བ་སྒྲུབ་པར་བྱེད་པ་ཉིད་དུ་ཉེ་བའི་དོན་ཡོངས་སུ་གཅོད་པ་ཡིན་ནོ། །བདེ་བ་དང་སྡུག་བསྔལ་གྱི་སྒྲུབ་པར་བྱེད་པ་དག་ཅེས་བྱ་བ་ནི་འཇུག་པའི་ཡུལ་སྟོན་པའོ། །བདེ་བ་སྒྲུབ་པ་དང་སྡུག་བསྔལ་སྒྲུབ་པ་ལ་ཇི་ལྟར་རིགས་པར་ཐོབ་པ་དང་སྤང་བའི་དོན་དུ་འཇུག་པར་བྱེད་དོ། །ཕྱིར་ཞེས་བྱ་བ་ནི་གཏན་ཚིགས་ཀྱི་དོན་ཏེ། གང་གི་ཕྱིར་དེ་ལྟར་ངེས་པས་འཇུག་པ་ཡིན་པ་དེའི་ཕྱིར་ངེས་པ་མ་ཡིན་པའི་ཤེས་པ་ནི་ཐ་སྙད་ཀྱི་ཡན་ལག་མ་ཡིན་ལ། གང་གི་ཕྱིར་ངེས་པ་འཇུག་པའི་ཡུལ་ཡིན་པ་དེའི་ཕྱིར་ངེས་པ་མེད་པའི་བདག་ཉིད་ཀྱི་དངོས་པོ་ནི་འཇུག་པའི་ཡུལ་དུ་བྱ་བ་མ་ཡིན་ཞིང་དེ་ལས་ཀྱང་འཇུག་པའི་ཡན་ལག་མ་ཡིན་པ་ཉིད་དོ། །གང་གི་ཕྱིར་ལག་ནས་བཟུང་བ་ལ་སོགས་པ་བྱས་པས་ནི་འཇུག་པར་བྱེད་པ་མ་ཡིན་པའི་ཕྱིར་ཤེས་པའི་འཇུག་པར་བྱེད་པ་ནི་འཇུག་པའི་ཡུལ་དུ་བྱེད་པ་ལས་གཞན་མ་ཡིན་ནོ། །འཇུག་པར་བྱེད་པ་འདི་ལ་ཡང་ངེས་པར་བྱེད་པ་ཉིད་ཀྱིས་ཁྱབ་པ་ཡིན་ནོ། །མངོན་སུམ་ལ་ནི་དེ་ཡོད་པ་མ་ཡིན་པའི་ཕྱིར་འཇུག་པར་བྱེད་པ་ཉིད་མ་ཡིན་ནོ་ཞེས་བྱ་བ་ནི་ཕ་རོལ་པོའི་བསམ་པའོ། །སློབ་དཔོན་གྱིས་ཀྱང་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་དེ་བདེན་ན་ཡང༌། རྟོག་པ་མེད་པ་དང་རྟོག་པ་དང་བཅས་པའི་མངོན་སུམ་དག་འཇུག་པའི་ཡན་ལག་ཉིད་དུ་ཁྱད་པར་མེད་པར་བསྟན་པའི་ཕྱིར་སྐྱོན་འདི་མེད་དེ་ཞེས་བྱ་བ་གསུངས་སོ། །འདི་ལ་འཇུག་པའི་ཡུལ་མིག་ནས་པ་ནི་རྣམ་པར་གཉིས་ཏེ། དེའི་དུས་ན་ཉེ་བའི་རང་བཞིན་མ་ངེས་པའི་ཕྱིར་མངོན་སུམ་གྱིས་འཇུག་པའི་ཡུལ་དུ་བྱེད་པར་མི་ནུས་པའམ། གལ་ཏེ་ཡང་བྱ་བ་བྱེད་པ་ཉིད་སྔར་མཐོང་བ་ཉེ་བ་མ་ཡིན་པའི་ཕྱིར་རྣམ་པར་རྟོག་པ་མེད་པའི་མངོན་སུམ་གྱིས་མ་ངེས་པས་འཇུག་པའི་ཡུལ་དུ་མི་བྱེད། དེ་ལ་རྣམ་པར་རྟོག་པ་སྔ་མ་ནི་རྒོལ་བ་གཉི་ག་ལ་ཡང་ཁྱད་པར་ཡོད་པ་མ་ཡིན་ཏེ་འདི་ལྟར་རྣམ་པར་
རྟོག་པ་དང་བཅས་པའི་མངོན་སུམ་གྱིས་ཡུལ་དང་དུས་དང་རྣམ་པ་སོ་སོར་ངེས་པ་གཏན་ལ་ཕེབས་པ་ཡིན་ལ། རྣམ་པར་རྟོག་པ་མེད་པ་ཡང་དེའི་རྗེས་སུ་བྱེད་པ་དེའི་སྟོབས་ཀྱིས་སྐྱེས་པའི་གཏན་ལ་ཕེབས་པའི་ཤེས་པས་མངོན་སུམ་གྱིས་གཟུང་བ་ངེས་པར་བྱེད་པ་ཡིན་ནོ། །གང་ཡང་མཐོང་བའི་རྣམ་ཤེས་ཀྱི་གཟུང་བའི་རང་བཞིན་དེ་དང་དེ་ལས་ལོག་པ་དེ་ཉིད་དེའི་སྟོབས་ཀྱིས་སྐྱེས་པའི་རྣམ་པར་རྟོག་པས་སྒྲ་དང་བསྲེས་ནས་དེ་ཁོ་ན་ལྟར་ཞེན་པར་བྱེད་པ་ཡིན་གྱི། རྣམ་པར་རྟོག་པས་དེ་ལ་ཕྱི་ནས་དོན་བྱེད་པར་བཟོད་པའི་རང་བཞིན་ལྷག་པར་བཟུང་བ་ནི་མ་ཡིན་ནོ། །དེ་ལ་དེ་ཉིད་ཀྱིས་དེས་སམ་དེའི་སྟོབས་ཀྱིས་བསྐྱེད་པས་ཀྱང་རུང་སྟེ། རྣམ་པར་རྟོག་པས་དངོས་པོ་འཇུག་པའི་ཡུལ་དུ་བྱས་པ་ལ་ནི་ཁྱད་པར་ཅི་ཡང་ཡོད་པ་མ་ཡིན་ནོ། །ཅི་སྟེ་ཡང་རྣམ་པར་རྟོག་པ་མེད་པ་ལ་ནི་མ་ཡིན། རྣམ་པར་རྟོག་པས་བར་དུ་ཆོད་པས་འཇུག་པའི་ཡན་ལག་ཡིན་ནོ་ཞེས་བྱ་བར་འདོད་ན། རྣམ་པར་རྟོག་པས་བར་དུ་ཆོད་པས་ཞེས་བརྗོད་པ་འདི་ནི་ཤིན་ཏུ་ཆུང་སྟེ་རྒོལ་བ་གཉི་གའི་ལྟར་ན་ཡང་ཤེས་པའི་རྒྱུན་ཆེན་པོས་བར་དུ་ཆོད་པས་ཁྱད་པར་མེད་པ་ཉིད་དུ་དེ་མ་ཐག་ཉིད་དུ་སྟོན་པར་འགྱུར་རོ། །ཅི་སྟེ་ཕྱོགས་གཉིས་པ་ལྟར་ན་དེ་ལྟ་ན་ཡང་ཉེ་བའི་དངོས་པོ་དེ་ལ་སྔོན་མཐོང་བའི་བདེ་བ་སྒྲུབ་པར་བྱེད་པ་ཉིད་དྲན་པར་བྱ་བ་ཡིན་གྱི། མངོན་སུམ་དུ་བྱ་བ་ནི་མ་ཡིན་ལ། དྲན་པ་ལ་ནིའོ་སྐོལ་གཉི་ག་ཡང་ཁྱད་པར་ཡོད་པ་མ་ཡིན་ནོ། །དེའི་ཕྱིར་མངོན་སུམ་གྱི་ཉེ་བའི་དངོས་པོ་འཇུག་པའི་ཡུལ་དུ་བྱེད་པའི་བྱ་བ་ལ་ནི་གཉི་ག་ཡང་མཚུངས་པ་ཡིན་ལ་དྲན་པའི་བྱ་བ་ལྷག་པས་བར་དུ་ཆོད་པར་ཡང་མཚུངས་པ་ཉིད་དོ། །དེའི་ཕྱིར་ཉེ་བའི་དངོས་པོ་འཇུག་པའི་ཡུལ་ཉིད་དུ་བྱེད་པའི་ཕྱིར་མངོན་སུམ་རྣམ་པ་གཉི་ག་ཡང་འཇུག་པའི་ཡན་ལག་ཡིན་ལ་ཤེས་པ་གཞན་གྱིས་བར་དུ་ཆོད་པའི་འཇུག་པ་ཡང་དེ་ལས་སྐྱེ་བས་ན་བརྒྱུད་པས་རྒྱུ་ཡིན་པར་ཡང་ཁྱད་པར་ཡོད་པ་མ་ཡིན་ནོ། །ཡང་ཇི་ལྟར་ན་མངོན་སུམ་གཉི་ག་ཡང་བདེ་བའི་སྒྲུབ་པར་བྱེད་པ་ཉིད་དུ་ངེས་པ་དྲན་པ་ཉིད་ཀྱིས་བྱ་བ་ཡིན་ཞེ་ན། རིམ་པ་བསྟན་པའི་ཕྱིར་བཤད་པ། གང་ལ་སྔོན་ཞུགས་པའི་ཉེ་བ་མངོན་སུམ་གྱི་ཡུལ་དུ་གྱུར་པ་དེ་
མཐོང་སྟེ་ཡོད་པ་ན། ཉིད་ཅེས་བྱ་བའི་ཚིག་ནི་རྒྱུ་དང་འབྲས་བུ་ངེས་པར་སྟོན་པའོ། །མཐོང་བའི་དགོས་པ་གང་ཡིན་པ་དེ་མཐོང་བ་ཉིད་ན་མཐོང་བའི་འབྲས་བུ་དེ་རྣམས་ལ་དྲན་པར་བྱེད་པའི་དྲན་པ་གང་ཡིན་པ་དེ་ལས་སོ། །ཇི་ལྟར་གྱུར་པ་ཞིག་ལས་ཤེ་ན། །ཇི་ལྟར་གྱུར་པ་ཞིག་ལས་ཤེ་ན། མྱོང་བའི་ཞེས་བྱ་བ་གསུངས་ཏེ། སྔོན་ཞུགས་པའི་ཤིང་ལ་སོགས་པ་འབྲས་བུ་ཁྱད་པར་ཅན་གྱི་རྒྱུ་ཡིན་པར་མྱོང་བ་གང་ཡིན་པ་དང༌། གང་ཡང་རྒྱུ་དང་འབྲས་བུའི་དངོས་པོ་གཏན་ལ་ཕབས་པའི་འོག་རོལ་དུ་འཇུག་པའི་དུས་སུ་འཇུག་པ་གཉི་ག་ཡང་མཚུངས་པར་གཟུང་བ་ཡིན་ཏེ། གཅིག་ནི་དྲན་པའི་འདུ་བྱེད་སྐྱེད་པར་བྱེད་པ་ཡིན་ལ། ཕྱི་མས་ནི་སད་པར་བྱེད་པའི་ཕྱིར་རོ། །དྲན་པའི་འདུ་བྱེད་འཇོག་པ་དང༌། །སད་པར་བྱ་བ་ལ་དེའི་མཐུ་ཡོད་པ་དེ་ལས་བྱུང་བའི་ངང་ཚུལ་གང་ཡིན་པའོ། །དྲན་པ་དེ་ལས་མངོན་པར་འདོད་པ་སྟེ། མངོན་པར་འདོད་པ་ཡང་འཇུག་པའི་ཡུལ་ཅན་དང་ལྡོག་པའི་ཡུལ་ཅན་དག་ཁྱད་པར་མེད་པར་གཟུང་ངོ༌། །མངོན་པར་འདོད་པ་དེའི་རྒྱུས་ཀྱང་འཇུག་པ་དང་ལྡོག་པའི་མཚན་ཉིད་ཀྱི་ཐ་སྙད་དུ་འགྱུར་བ་ཡིན་ནོ། །མངོན་སུམ་ཉིད་ལས་དངོས་སུ་ཐ་སྙད་དུ་འགྱུར་པ་མ་ཡིན་པའི་ཕྱིར་མངོན་སུམ་རྣམ་པ་གཉི་ག་ལ་ཡང་འདི་ནི་འཇུག་པའི་རྒྱུ་ལྷག་པ་ཡིན་ཏེ། བདེ་བ་སྒྲུབ་པར་བྱེད་པ་ཉིད་དུ་འཛིན་པའི་དྲན་པ་འདི་བར་དུ་ཞུགས་པ་ཡིན་ནོ་ཞེས་དགོངས་པ་ཡིན་ནོ། །འདི་ཉིད་རྣམ་པར་འབྲེལ་པ་བཤད་པ་ནི། མངོན་སུམ་དོན་ཏེ་ཡུལ་ལ་ལྟ་བ་རྣམ་པར་འཛིན་པ་དེ་ཙམ་མམ། དེ་ཁོ་ན་ཉིད་གང་ཡིན་པའོ། །ཙམ་སྨོས་པ་ནི་ངེས་པ་བཟློག་པའི་དོན་དུའོ། །མངོན་སུམ་དེ་ལྟ་བུར་གྱུར་པ་ཡིན་ཡང་ཐ་སྙད་དུ་འགྱུར་བ་ཡིན་ནོ། །ཡང་གི་སྒྲས་ནི་མངོན་སུམ་རྣམ་པར་རྟག་པ་དང་བཅས་པ་ཡིན་ཡང་ཐ་སྙད་དུ་འཇུག་པའི་རིམ་པ་ནི་འདི་ཉིད་ཡིན་ནོ་ཞེས་བྱ་བའོ། །ཉམས་སུ་མྱོང་བ་ཞེས་བྱ་བ་ནི་སྔ་མ་བཞིན་དུ་སྔ་མ་དང་ཕྱི་མར་འཇུག་པའི་ཉམས་སུ་མྱོང་བ་གཉིས་ཁྱད་པར་མེད་པར་གཟུང་བ་ཡིན་ནོ། །དེའི་མཐུ་ནི་ཉམས་སུ་མྱོང་བར་འགྱུར་བའི་ཡུལ་འཛིན་པའི་དྲན་པའི་འདུ་བྱེད་འཇོག་པ་དང་སད་པར་བྱེད་པ་དག་སྟེ། མཐུ་དེ་ལས་འདུ་བྱེད་གཞག་པ་ལས་བརྒྱུད་པས་དྲན་པ་འབྱུང་
བ་ཡིན་ནོ། །དྲན་པའི་བྱེད་པ་སྟོན་པ་ནི་ཁྱད་པར་ཅན་གྱི་འབྲས་བུ་བྱེད་པ་ཉིད་དུ་མྱོང་བའི་དོན་ལ་ད་ལྟར་མཐོང་བའི་དོན་དང་མཚམས་སྦྱོར་བ་གཅིག་ཏུ་བྱེད་པ་སྟེ། ཁྱད་པར་ཅན་གྱི་འབྲས་བུ་སྒྲུབ་པར་མཐོང་བའི་བདག་གང་ཡིན་པ་དེ་ཉིད་ནི་འདི་ཡིན་ནོ་ཞེས་དེ་ལྟར་མྱོང་བ་གཉིས་མཚམས་སྦྱོར་བར་བྱེད་པའི་དྲན་པ་མངོན་སུམ་ལས་སྐྱེ་བ་ཡིན་ལ་དྲན་པ་དེ་ཉིད་ཀྱིས་ཀྱང་ཁྱད་པར་ཅན་གྱི་སྒྲུབ་པར་བྱེད་པའི་དོན་སྔོན་མྱོང་བར་གྱུར་པ་ཉིད་དངོས་པོ་དེ་ལ་མཚམས་སྦྱོར་བར་བྱེད་ཀྱི་རྣམ་པར་རྟོག་པ་དང་བཅས་པ་ཡིན་ཡང་འདིའི་ཞེས་འཇུག་པའི་མངོན་སུམ་ལས་ནི་སྔོན་མྱོང་བ་དྲན་པའི་བྱེད་པ་ཡོད་པ་མ་ཡིན་ནོ། །འོན་ཀྱང་སྔར་ཉམས་སུ་མྱོང་བས་བསྐྱེད་པའི་བག་ཆགས་སད་པར་བྱེད་པ་འབའ་ཞིག་ཏུ་ཟད་པ་ལ། དེ་ནི་རྣམ་པར་རྟོག་པ་མེད་པ་ལ་ཡང་ཁྱད་པར་ཡོད་པ་མ་ཡིན་ནོ། །ཁྱད་པར་ཅན་བྱེད་པ་ཉིད་དུ་མཚམས་སྦྱོར་བའི་དྲན་པ་དེ་ལས་ཀྱང་མངོན་པར་འདོད་པ་སྐྱེ་བ་ཡིན་ནོ། །འདོད་པའི་ཡུལ་བསྟན་པའི་ཕྱིར་བཤད་པ་དུས་སྔ་མར་གྱུར་པའི་ཉེ་བ་མངོན་སུམ་གྱི་ཡུལ་དུ་གྱུར་པ་མཐོང་བ་ཉིད་ན་མཐོང་བའི་འབྲས་བུ་གང་ཡིན་པ་དེ་རྣམས་ལ་མངོན་པར་འདོད་པ་ཡིན་ནོ། །ཚིག་ལེའུར་བྱས་པར་ཡང་འདི་མངོན་པར་འདོད་པའི་ཡུལ་དུ་བསྟན་པ་ཡིན་ནོ། །མངོན་པར་འདོད་པའི་རྒྱུ་ནི་དྲན་པ་ཡིན་ནོ། །དོན་ནི་འདི་ཡིན་ཏེ། གང་དོན་བྱ་བ་བྱེད་པར་མཐོང་བའི་དོན་ནི་དྲན་པ་མཚམས་སྦྱོར་བ་ཡིན་ལ། མཚམས་སྦྱར་མ་ཐག་པ་ཉིད་དུ་དོན་དེ་དག་ལ་མངོན་པར་འདོད་པ་དང་མི་འདོད་པ་འཇུག་པར་འགྱུར་ཏེ། མི་འདོད་པ་ནི་སྡུག་བསྔལ་གྱི་སྒྲུབ་པར་བྱེད་པ་ཡོངས་སུ་དོར་བར་སེམས་པའོ། །མངོན་པར་འདོད་པ་དང་མི་འདོད་པ་དེ་ལས་ཀྱང་ཐ་སྙད་འཇུག་པར་འགྱུར་བ་ཡིན་ནོ། །གཞུང་གི་ཚོགས་འདིས་ནི་མངོན་སུམ་གཉི་གའི་ཡུལ་ལ་ཡང་བདེ་བ་སྒྲུབ་པར་བྱེད་པ་ཉིད་དུ་ནི་དྲན་པས་ཡུལ་དུ་བྱས་པ་ཡིན་ཞིང་དྲན་པ་ལ་སོགས་པའི་རྒྱུན་གྱིས་ཐ་སྙད་བར་དུ་བཅད་པ་ནི་གཉི་ག་ལ་ཡང་ཁྱད་པར་མེད་དོ་ཞེས་བྱ་བ་ཡིན་ནོ། །གལ་ཏེ་མངོན་སུམ་དེ་ལ་བྱེད་པ་མ་ཡིན་ན་འོ་ན་ནི་དེ་ལྟར་ཉམས་སུ་མྱོང་བར་འགྱུར་བར་དྲན་པའི་རྒྱུར་ཡང་ཇི་ལྟར་འགྱུར་ཞེ་ན། རིམ་པ་
བསྟན་པའི་ཕྱིར་བཤད་པ། དངོས་པོའི་ངོ་བོ་ནི་དངོས་པོའི་ཆོས་སོ། །དོན་འདི་ཡིན་ཏེ། འདི་ནི་ཉམས་སུ་མྱོང་བའི་རང་བཞིན་ཉིད་ཡིན་ཏེ། འདི་ལ་འཐད་པ་ནི་ཅུང་ཟད་ཀྱང་དགོས་པ་ཡོད་པ་མ་ཡིན་ནོ། །དོན་འདི་ནི་འབྲས་བུ་མཐོང་བ་ལས་གྲུབ་པ་ཡིན་ཏེ། རྒྱུ་མེད་པ་ཅན་མ་ཡིན་ཞིང་རྒྱུ་མ་ངེས་པ་ཅན་ཡང་མ་ཡིན་པ་དེའི་ཕྱིར་འདི་ལ་འཐད་པས་ཅི་ཞིག་བྱ། ཡང་དེ་གང་ཡིན་ཞེ་ན། བཤད་པ། གསལ་བར་ཉམས་སུ་མྱོང་བ་ལས་ཏེ་ཆེས་གསལ་བའོ། །འདིས་ནི་འདི་སྐད་བཤད་པ་ཡིན་ཏེ། ཉམས་སུ་མྱོང་བ་ཙམ་གང་ཡིན་པ་དེ་ཉིད་ཀྱིས་ན་དྲན་པའི་ནུས་པ་འཇོག་པ་མ་ཡིན་གྱི། འོན་ཀྱང་གསལ་བར་ཉམས་སུ་མྱོང་བས་དྲན་པའི་ནུས་པ་བསྐྱེད་པ་ཡིན་ནོ། །དྲན་པ་བསྐྱེད་པར་ནུས་པའི་ས་བོན་འཇོག་པ་སྟེ་དྲན་པའི་ས་བོན་འཇོག་པ་གང་ཡིན་པ་དེ་ནི་གསལ་བར་ཉམས་སུ་མྱོང་བའི་ཆོས་ཡིན་ནོ། །རེ་ཞིག་ཉམས་སུ་མྱོང་བའི་མཐུ་ལས་བག་ཆགས་དང་རྗེས་སུ་འབྲེལ་པ་གང་ཡིན་པ་དེ་ནི་ཡོད་པ་ཡིན་ལ། རྒྱུ་དང་འབྲས་བུའི་དུས་སུ་འབྱུང་བའི་ཉམས་སུ་མྱོང་བས་ཅི་འདྲ་བའི་འབྲས་བུ་དང་འབྲེལ་པའི་དོན་དྲན་པའི་བག་ཆགས་བསྐྱེད་པ་དེ་དང་འདྲ་བའི་དངོས་པོ་མཐོང་བ་ལས་དྲན་པའི་ས་བོན་འདིས་སད་པ་ཡིན་ཏེ། དྲན་པ་སྐྱེད་པ་དང་རྗེས་སུ་མཐུན་པའི་ཕྱིར་རོ། །དྲན་པ་སད་པ་དེ་ལས་མངོན་པར་འདོད་པ་སྐྱེད་པར་ནུས་པའི་བག་ཆགས་གང་ཡིན་པ་དེ་འཇུག་སྟེ། འབྲས་བུ་བསྐྱེད་པ་ལ་མངོན་དུ་ཕྱོགས་པར་འགྱུར་རོ། །ས་བོན་སད་པ་ལས་དྲན་པ་ཡིན་ཞིང་དེ་ལས་མངོན་པར་འདོད་པའི་བག་ཆགས་མ་ཡིན་ནམ་ཞེ་ན། དྲན་པའི་དུས་ཉིད་མངོན་པར་འདོད་པའི་བག་ཆགས་སད་པའི་དུས་ཡིན་ཏེ། དྲན་པ་དེ་ཉིད་བག་ཆགས་སད་པའི་བདག་ཉིད་ཡིན་ནོ་ཞེས་བྱ་བའི་དོན་ཏོ། །མངོན་པར་འདོད་པའི་བག་ཆགས་སད་པ་དེ་ལས་ཀྱང་འཇུག་པ་སྟེ་རབ་ཏུ་འཇུག་པ་ཡིན་ནོ། །མངོན་པར་འདོད་པ་ཉིད་ལས་འཇུག་པ་མ་ཡིན་ནམ་ཞེ་ན། མངོན་པར་འདོད་པ་ཡང་འཇུག་པ་ཐམས་ཅད་ཀྱི་སྔོན་དུ་འགྲོ་བ་ཉིད་ཀྱིས་འཇུག་པ་ཡིན་ལ། དེ་ཡང་མངོན་པར་འདོད་པའི་བག་ཆགས་ལས་འཇུག་པ་ཉིད་ཡིན་པའི་ཕྱིར་འགལ་བ་མེད་དོ། །དེའི་ཕྱིར་དེ་ལྟར་མངོན་སུམ་གཉི་གའི་འཇུག་
པའི་ཡང་མངོན་སུམ་གྱི་རྗེས་སུ་བྱུང་བའི་དྲན་པའི་བྱེད་པས་བར་དུ་ཆོད་པ་དང་ལྡན་པ་ཡིན་ལ་ཡུལ་དང་དུས་དང་རྣམ་པ་སོ་སོར་ངེས་པའི་དངོས་པོ་འཇུག་པའི་ཡུལ་དུ་བྱེད་པའི་ཕྱིར་མངོན་སུམ་རང་ཉིད་འཇུག་པར་བྱེད་པ་ཉིད་ཡིན་པ་ལ་ཡང་རྣམ་པར་རྟོག་པ་མེད་པ་དང་གཞན་ཁྱད་པར་ཡོད་པ་མ་ཡིན་ནོ། །དེ་ལྟར་ན་ཡང་འཇུག་པའི་ཡུལ་ནི་ངེས་པར་བྱས་པ་ཡིན་ལ། ངེས་པར་བྱས་པ་ཡང་རྟོག་པ་མེད་པའི་ཕྱིར་མངོན་སུམ་མ་ཡིན་གྱི། འོན་ཀྱང་དེའི་སྟོབས་ཀྱིས་བསྐྱེད་པའི་རྣམ་པར་རྟོག་པ་ཡིན་ནོ། །དེའི་ཕྱིར་མངོན་སུམ་དང་རྣམ་པར་རྟོག་པ་དག་བསྡོམས་པས་ཚད་མ་གཅིག་ཏུ་འགྱུར་བ་ཡིན་གྱི། མངོན་སུམ་གཅིག་པུ་ཉིད་ནི་མ་ཡིན་ནོ་ཞེ་ན། མ་ཡིན་ཏེ། གང་མངོན་སུམ་ཚད་མར་མི་འགྱུར་བ་ཞེན་པར་བྱེད་པས་ནི་ཚད་མ་མ་ཡིན་གྱི། འོན་ཀྱང་ཐོབ་པར་བྱེད་པས་ཡིན་ནོ། །ཐོབ་པར་བྱེད་པ་ཉིད་ཀྱང་འཇུག་པར་བྱེད་པ་ལས་འཇུག་པར་བྱེད་པ་ཡང་འཇུག་པའི་ཡུལ་རབ་ཏུ་སྟོན་པ་ལས་ཡིན་ནོ། །འཇུག་པའི་ཡུལ་ཡང་ངེས་པར་བྱས་པ་ཡིན་ཏེ། དེའི་ཕྱིར་ཐོབ་པའི་ཡན་ལག་འཇུག་པའི་ཡུལ་ཞེན་པར་བྱེད་པ་ནི་ཚད་མ་ཡིན་ནོ། །དེ་ནི་རྣམ་པར་རྟོག་པ་དང་བཅས་པའི་མངོན་སུམ་ལ་ཡང་བསམ་པར་བྱ་བ་ཡིན་ཏེ། སྐད་ཅིག་མ་ཉིད་ཡིན་པའི་ཕྱིར་མངོན་སུམ་ལྡོག་པ་ན་དེས་བྱས་པའི་ཞེན་པ་ལྡོག་པ་ཡིན་ནོ། །དེའི་ཕྱིར་ཞེན་པར་མ་བྱས་པ་འཇུག་པའི་ཡུལ་མ་ཡིན་པས་ཐོབ་པར་བྱ་བ་མ་ཡིན་པའི་ཕྱིར་གང་ལས་ཐོབ་པའི་ཡན་ལག་འཇུག་པའི་ཡུལ་ཞེན་པར་བྱེད། ཅི་སྟེ་མངོན་སུམ་སྔ་མ་ལས་ཞེན་པར་བྱེད་པ་གཞན་སྐྱེ་བ་ཡིན་ནོ་ཞེ་ན། དེ་ལྟར་ན་ཡང་རྩོམ་པ་དང་མཐར་ཕྱིན་པའི་འདུས་ཁྱབ་པའི་ཞེན་པ་བསྡོམས་ནས་ཚད་མ་གཅིག་ཡིན་པར་འགྱུར་ན་དང་པོ་ཉིད་ནི་འདོད་པ་ཡིན་ནོ། །དེའི་ཕྱིར་ཇི་སྲིད་མངོན་སུམ་གྱི་བྱ་བའི་རྗེས་སུ་འཇུག་པ་དེ་སྲིད་དུ་དེ་ཉིད་ཚད་མ་ཡིན་ནོ། །མངོན་སུམ་གྱི་བྱ་བ་ནི་མཐོང་བ་ཡིན་ལ། རྣམ་པར་རྟོག་པའི་བྱ་བ་ནི་རྟོག་པ་ཡིན་ཏེ། ཁོ་བོ་རྟོགས་པར་བྱེད་ཀྱི་མཐོང་བ་ནི་མ་ཡིན་ནོ་ཞེས་རྣམ་པར་རྟོག་པར་བྱེད་པ་ནི་ཉམས་སུ་མྱོང་བ་ཉིད་ལས་ངེས་པའི་ཕྱིར་རོ། །མངོན་སུམ་གྱི་རྗེས་སུ་བྱུང་བའི་རྣམ་པར་རྟོག་པ་རྣམས་ཀྱི་ནི་རང་གི་བྱ་བ་རྟོགས་པར་བྱེད་པ་སྤངས་ནས་
འདི་མཐོང་བའི་བྱ་བ་ཉིད་ཀྱི་རྣམ་པའི་རྗེས་སུ་འབྲང་བར་བྱེད་དེ། དེའི་ཕྱིར་ཇི་སྲིད་ཞེན་པའི་ཤེས་པ་རྣམས་ལ་མཐོང་བ་ཞེས་བྱ་བའི་བྱེད་པ་རྗེས་སུ་འགྲོ་བ་དེ་སྲིད་དུ་མངོན་སུམ་གྱི་མཐོང་བའི་འདུ་བྱེད་མ་སྤངས་པར་བལྟའོ། །དེ་ཉིད་ཀྱི་ཕྱིར་དེ་དག་གིས་གང་ཞེ་ན་པར་བྱས་པ་དེ་ནི་མངོན་སུམ་ཉིད་ཀྱིས་ཞེན་པར་བྱས་པ་ཡིན་ལ། ཞེན་པར་བྱས་པ་ལ་ཡང་མངོན་སུམ་ཉིད་ཚད་མ་ཡིན་གྱི་རྣམ་པར་རྟོག་པ་དེ་ནི་མ་ཡིན་ནོ། །ཞེན་པ་རྣམས་རང་གི་བྱེད་པ་ལ་འགོད་པས་ན་མངོན་སུམ་རྟོག་པ་མེད་པ་ལ་ཡང་ཐོབ་པར་བྱེད་པའི་ཡན་ལག་ཞེན་པར་བྱེད་པ་ཁྱད་པར་མེད་པར་ཤེས་པར་བྱའོ། །དབང་པོའི་མངོན་སུམ་བཤད་ནས་གཞན་གྱིས་བྱས་པའི་རྩོད་པ་སྤང་བར་བཞེད་ནས་རྒྱུ་དང་ཡུལ་གྱི་བྱེ་བྲག་གིས་ཡིད་ཀྱི་མངོན་སུམ་གྱི་རང་བཞིན་སྟོན་པར་བྱེད་དོ། །ཡིད་ཅེས་བྱ་བ་ནི་ཡིད་ཙམ་ལ་བརྟེན་པ་གཟུང་བར་བྱ་སྟེ། རྣམ་པར་ཤེས་པ་ཐམས་ཅད་ཡིད་ཉིད་ཡིན་པའི་ཕྱིར་རོ། །ཀྱང་ཞེས་བྱ་བ་ནི་མངོན་སུམ་ཉིད་དུ་བསྡུ་བའོ། །དབང་པོའི་ཤེས་པ་དེ་ཉིད་ནི་དེ་མ་ཐག་པ་ཡང་ཡིན་ལ། རྐྱེན་ཀྱང་ཡིན་ཏེ། དེ་ལས་བྱུང་བ་གང་ཡིན་པའོ། །འདིས་ནི་རྒྱུའི་ཁྱད་པར་བསྟན་ཏོ། །དབང་པོའི་རྣམ་པར་ཤེས་པ་དེའི་དོན་དེ་མ་ཐག་པ་སྟེ། གང་ལས་བར་ཆད་མེད་པ་དེ་འཛིན་པར་བྱེད་པ་སྟེ། འདིས་ནི་ཡུལ་གྱི་ཁྱད་པར་བསྟན་ཏེ། དེ་ལྟ་བུར་གྱུར་པའི་ཡིད་ནི་མངོན་སུམ་དུ་འདོད་དོ། །མངོན་སུམ་སྨོས་པ་མེད་པའི་ཕྱིར་དེ་ལྟར་མ་ཡིན་ནམ་ཞེ་ན། མངོན་སུམ་ཞེས་བྱ་བ་སྨོས་ཏེ། འདི་ནི་སྐབས་ཡིན་ནོ། །སྦྱར་རོ་ཞེས་བྱ་བ་ནི་ལྟོས་ཏེ་དེ་ལ་ལྟོས་པ་ཉིད་སྦྱར་བ་ཡིན་ནོ། །མདོ་ཉིད་དགྲོལ་བ་བཤད་པ་ནི། དབང་པོའི་ཤེས་པའམ་འབའ་ཞིག་མངོན་སུམ་ཡིན་པར་མ་ཟད་ཀྱི། ཡིད་ཀྱང་མངོན་སུམ་ཡིན་ནོ། །དེའི་ཁྱད་པར་ཇི་ལྟ་བུ་ཞིག་ཅེ་ན། བཤད་པ། གང་ཞིག་དབང་པོའི་རྣམ་པར་ཤེས་པས་བསྐྱེད་པའོ། །དབང་པོའི་ཤེས་པ་ཉིད་ཁྱད་པར་དུ་བྱེད་པ་འདིས་ནི་ཤེས་པའི་རང་བཞིན་དུ་མཚུངས་པ་ཡང་ཡིན་ལ་བར་ཆད་དང་བྲལ་བ་ཡང་ཡིན་ཏེ། བར་མ་ཆོད་པའི་ཕྱིར་རོ། །དེ་ཉིད་ནི་རྐྱེན་ཀྱང་ཡིན་ཏེ་རྐྱེན་གྱི་དོན་ནི་རྒྱུའི་དོན་ཏོ། །གྲུབ་པའི་མཐའ་ལས་གྲགས་པའི་
མིང་གིས་ཐ་སྙད་དུ་བྱས་པ་ནི་ཡིད་ཀྱི་མངོན་སུམ་གྲུབ་པའི་མཐའ་ལས་གྲགས་པར་སྟོན་པར་བྱེད་པ་སྟེ། ཡིད་ཀྱི་མངོན་སུམ་སྒྲུབ་པ་ལ་ཚད་མ་གཞན་ནི་བཙལ་བར་བྱ་བ་མ་ཡིན་ནོ་ཞེས་བསྟན་པ་ཡིན་ནོ། །འོ་ན་ཅིའི་ཕྱིར་མངོན་སུམ་གྱི་དབྱེ་བར་བཀོད་ཅེ་ན། གལ་ཏེ་ཡིད་ཀྱི་མངོན་སུམ་ཡོད་ན་དེའི་མཚན་ཉིད་ནི་འདི་ལྟ་བུ་ཡིན་ནོ་ཞེས་མདོ་མཛད་པས་གྲུབ་པའི་མཐའ་ལས་གྲགས་པའི་ཡིད་ཀྱི་མངོན་སུམ་ཁས་བླངས་པ་ལ་རྩོད་པ་བྱས་པ་བཟློག་པའི་དོན་དུའོ། །དམིགས་པའི་རྐྱེན་བསལ་བའི་ཕྱིར་ཡང་དེ་མ་ཐག་པའི་རྐྱེན་སྨོས་ཏེ། འདི་ལྟར་རང་གི་ཡུལ་གྱི་དེ་མ་ཐག་པའི་སྐད་ཅིག་དང་ལྷན་ཅིག་པས་རང་གི་རྒྱུད་ལ་ཡོད་པ་རིགས་མཚུངས་པ་ཕྱི་མ་སྐྱེད་པ་དབང་པོའི་ཤེས་པ་དེ་ནི་འགའ་ཞིག་གི་ཚེ་གཞན་གྱི་རྒྱུད་ལ་ཡོད་པ་དབང་པོའི་ཤེས་པ་ལ་དམིགས་པའི་རྣལ་འབྱོར་པ་རྣམས་ཀྱི་གཞན་གྱི་སེམས་ཤེས་པ་སྐྱེད་པར་བྱེད་པས་དེ་ནི་མཚུངས་པ་དེ་མ་ཐག་པའི་རྐྱེན་སྨོས་པས་བསལ་བ་ཡིན་ནོ། །རང་གི་ནི་བདག་ཉིད་ཀྱི་སྟེ་དབང་པོའི་རྣམ་པར་ཤེས་པའི་ཡུལ་ལོ། །དེའི་ཞེས་དྲུག་པས་ནི་སྔ་མ་དང་ཕྱི་མའི་སྐད་ཅིག་དག་ཉེ་བར་ལེན་པ་དང་ཉེ་བར་ལེན་པ་ལས་བྱུང་བའི་དངོས་པོར་བསྟན་པ་ཡིན་ཏེ། དེས་ན་དབང་པོའི་ཤེས་པའི་ཡུལ་རྒྱུར་བྱས་པའི་སྐད་ཅིག་མ་བཟུང་བ་ཡིན་ནོ། །དེ་མ་ཐག་པ་ཞེས་བྱ་བ་ནི་བར་མ་ཆོད་པའོ། །སྐད་ཅིག་མ་ཞེས་བྱ་བ་འདིས་ནི་ཡུལ་སྐད་ཅིག་མ་ཡིན་པའི་ཕྱིར་ཡང་སྐད་ཅིག་མ་ཉིད་དུ་བསྟན་ཏོ། །དབང་པོའི་ཤེས་པ་གང་ཡིན་པ་ནི། དོན་གཅིག་པས་དེའི་ལྷན་ཅིག་བྱེད་པ་ཅན་ཡིན་གྱི་བོགས་འབྱིན་པར་བྱེད་པ་ནི་མ་ཡིན་ཏེ། སྐད་ཅིག་གི་རྫས་ལ་བོགས་འབྱིན་པ་ནི་མི་འཐད་པའི་ཕྱིར་རོ། །དེ་དག་ཀྱང་བྱ་བ་གཅིག་པས་ནི་ལྷན་ཅིག་བྱེད་པ་ཡིན་ནོ། །དེ་ལྟ་བུར་གྱུར་པ་དེས་བསྐྱེད་པ་ཡིད་ཀྱི་རྣམ་པར་ཤེས་པ་གང་ཡིན་པ་དེ་ནི་མངོན་སུམ་ཡིན་ནོ། །ཁྱད་པར་གཉིས་པ་འདིས་ཀྱང་དེའི་ཡུལ་བསྟན་པ་ཡིན་ནོ། །གང་གི་ཕྱིར་ཡིད་དེ་ལྟ་བུ་ཡིན་པ་དེ་ཉིད་ཀྱི་རྒྱུའི་ཕྱིར་དབང་པོ་མེད་པར་མཐོང་བ་མ་ཡིན་ཏེ། གང་ལ་དེའི་ཡུལ་ཅན་གྱི་དབང་པོ་མེད་པ་དེ་ལ་དེའི་ཡུལ་ཅན་གྱི་ཡིད་ཀྱིས་མཐོང་བ་ཡོད་པ་མ་ཡིན་ནོ། །དབང་པོ་མེད་པ་ཉིད་ནི་དབང་པོའི་
བྱ་བ་མེད་པ་ཉིད་དོ། །འདི་སྐད་བརྗོད་པ་ཡིན་ཏེ། རྣམ་པར་རྟོག་པའི་གནས་སྐབས་སུ་ནི་ཡིད་མཐོང་བ་འཇུག་པ་མ་ཡིན་ཏེ། མཚུངས་པ་དེ་མ་ཐག་པའི་རྐྱེན་དབང་པོའི་ཤེས་པ་མེད་པའི་ཕྱིར་རོ། །ཡུལ་གཞན་པ་ཉིད་ཀྱང་མ་ཡིན་ཏེ། གང་གི་ཕྱིར་དབང་པོའི་ཤེས་པའི་གཟུང་བའི་དོན་གྱི་ནང་དུ་གཏོགས་པའི་སྐད་ཅིག་མ་འཛིན་པ་དེའི་ཕྱིར་དོན་གཞན་ནི་ཐ་ན་རྒྱུད་ཐ་མི་དད་པ་ཡང་འཛིན་པ་མ་ཡིན་ནོ། །དེས་ན་ཕ་རོལ་པོ་དག་གིས་དབང་པོའི་བྱེད་པ་མེད་པར་ཡང་དོན་མཐོང་བར་ཐལ་བ་དང༌། དེ་བཞིན་དུ་ཡིད་ཀྱིས་ཀྱང་མཐོང་བའི་ཕྱིར་ལོང་བ་དང་འོན་པ་ལ་སོགས་པ་མེད་པར་ཐལ་བར་གང་བརྗོད་པ་དེ་སྤངས་པ་ཡིན་ཏེ། རྣམ་པར་རྟོག་པའི་གནས་སྐབས་ན་རྒྱུ་མེད་པའི་ཕྱིར་དང༌། ལོང་བ་ལ་སོགས་པ་ལ་ཡང་གཟུང་བ་མཐོང་བ་ལ་རང་གི་ཡུལ་གྱི་དེ་མ་ཐག་པས་ལྷན་ཅིག་བྱས་པའི་དབང་པོའི་རྣམ་པར་ཤེས་པ་མེད་པའི་ཕྱིར་རོ། །གང་ཡང་གཟུང་བ་འཛིན་པའི་ཕྱིར་ཚད་མ་མ་ཡིན་པར་ཐལ་བར་བརྗོད་པ་དེ་ཡང་འདི་ཉིད་ཀྱིས་སྤངས་པ་ཡིན་ནོ། །བྱེད་པ་ནི་བྱ་བ་དང་སྤྱོད་པའོ། །དེའི་དུས་ནི་དོན་ཡོད་པའི་དུས་ཏེ། ཡོད་པའི་དངོས་པོ་ཉིད་བྱེད་པ་ཡིན་ནོ། །བྱེད་པའི་དུས་མི་མཚུངས་པ་གང་ཡིན་པ་དེ་ལ་དེ་སྐད་ཅེས་བྱའོ། །ཡིད་ཀྱི་རྣམ་པར་ཤེས་པའི་ཡུལ་དེ་ནི་ཡིད་ཀྱི་རྣམ་ཤེས་ཀྱི་རྒྱུ་དབང་པོའི་ཤེས་པ་དེ་དང་བྱེད་པའི་དུས་མཚུངས་པ་མ་ཡིན་ནོ། །དུས་ཐ་དད་པ་ཉིད་ཀྱི་གཏན་ཚིགས་སྨྲས་པ། རང་སྟེ་བདག་ཉིད་ཀྱི་ཤེས་པ་དེའི་དུས་དེ་ན་ཡོད་པའི་ངང་ཚུལ་གང་ཡིན་པའོ། །གང་གི་ཕྱིར་ཡིད་ཀྱི་ཤེས་པའི་ཡུལ་ནི་དེའི་དུས་ན་ཡོད་པ་ཡིན་ལ། དབང་པོའི་ཤེས་པ་ནི་ཡིད་ཀྱི་རྣམ་པར་ཤེས་པ་ལས་སྔ་མ་ཡིན་ཏེ། དེས་ན་དེ་དག་སྔ་ཕྱི་ཡིན་པ་དེའི་ཕྱིར་ལྷན་ཅིག་བྱེད་པ་ཉིད་མ་ཡིན་ནོ། །གལ་ཏེ་སྔར་སྐྱེས་པ་ཉིད་འབྲས་བུ་སྒྲུབ་པར་བྱེད་པ་ཡིན་ན་ནི་ཕྱི་མ་དེ་ལ་བྱེད་པ་མ་ཡིན་ལ་ཅི་སྟེ་ཕྱིས་འབྱུང་བས་འབྲས་བུ་སྐྱེད་ན་ནི་སྔ་མ་ཞིག་ཟིན་པའི་ཕྱིར་དེ་ལ་བྱེད་པ་མ་ཡིན་པའི་ཕྱིར་ཇི་ལྟར་དུས་ཐ་དད་པ་དག་དོན་གཅིག་བྱེད་པ་ཉིད་ཡིན། དེའི་ཕྱིར་དོན་ནི་ལྷན་ཅིག་བྱེད་པ་མ་ཡིན་ནོ། །དེ་ལྟར་ཡུལ་དང་ཤེས་པ་དུས་
མཉམ་པར་ཁས་བླངས་ནས་རྒོལ་ཞིང་རྟོག་པར་ཐལ་བར་དོགས་པས་ཤེ་ན་ཞེས་བྱ་བ་སྨོས་སོ། །མ་ཡིན་ཏེ། གཉི་གཡང་ཞེས་བྱ་བ་ལ། གཉི་ག་ནི་དབང་པོའི་ཤེས་པ་དང་ཡིད་ཀྱི་ཡུལ་ལོ། །དུས་མཚུངས་པ་ནི་གཅིག་པ་ཉིད་དོ། །དེའི་ཕྱིར་ལྷན་ཅིག་བྱེད་པ་མ་ཡིན་པ་མ་ཡིན་ནོ། །དུས་མཚུངས་པ་ཉིད་སྒྲུབ་པའི་ཕྱིར་བཤད་པ། ཤེས་པའི་རྒྱུ་སྐྱེད་པར་བྱེད་པའི་ཡུལ་ཏེ། འདི་ལྟར་རྒྱུ་མ་ཡིན་པ་ནི་ཡུལ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་ཞེས་བཤད་ཟིན་ཏོ། །དེ་ནི་རང་གི་ཤེས་པ་དང་ལྷན་ཅིག་འབྱུང་བར་ཏེ། དུས་གཅིག་པར་འགལ་བ་ཡིན་ལ། གང་གི་ཕྱིར་འགལ་བ་དེའི་ཕྱིར་དུས་མཚུངས་པ་མ་ཡིན་ནོ། །གང་གི་ཕྱིར་ལྷན་ཅིག་པ་ཡིན་པ་ལན་ནུས་པ་མེད་པས་ཁྱབ་པ་ཡིན་ལ། དེས་ན་འགལ་བ་ཁྱབ་པ་ཉིད་ཀྱིས་སྐྱེད་པར་བྱེད་པ་ཉིད་དུ་འགལ་བ་ཡིན་ནོ། །ཡང་ལྷན་ཅིག་ཏུ་ཡོད་པ་ལ་ནུས་པ་མེད་པ་ཅིའི་ཕྱིར་ཞེ་ན། འབྲས་བུ་སྐྱེད་པའི་སྔ་རོལ་དུ་ནི་ལྷན་ཅིག་ཏུ་ཡོད་པའི་སྐད་ཅིག་མ་མེད་པ་ཡིན་ལ། མེད་པ་ཡང་ནུས་པ་ཐམས་ཅད་དང་བྲལ་བའི་མཚན་ཉིད་ནུས་པ་མེད་པའི་ཕྱིར་འབྲས་བུ་སྐྱེ་བ་ལ་ཉེ་བར་སྦྱོར་བ་འགའ་ཡང་མེད་པས་སྔར་སྐྱེད་པར་བྱེད་པ་མ་ཡིན་ནོ། །ནུས་པ་ཡོད་པའི་དུས་ན་སྟེ་རྒྱུ་ཡོངས་སུ་རྫོགས་པ་ན་ཡང་ཉེ་བར་སྦྱོར་བ་མེད་པ་ཉིད་དེ། འབྲས་བུ་བདག་ཉིད་ཐམས་ཅད་རྫོགས་ཟིན་པའི་ཕྱིར་རོ། །དེའི་དོན་འདི་ཡིན་ཏེ། སྔར་ནི་ནུས་པ་མེད་པས་ཉེ་བར་སྦྱོར་བ་མེད་པ་ཡིན་ལ། ནུས་པ་ཡོད་པའི་དུས་ན་ཡང་འབྲས་བུ་རྫོགས་ཟིན་པས་ཕན་འདོགས་པ་མེད་པའི་ཕྱིར་ཏེ། རྒྱུ་དེས་ན་སྐྱེད་པར་བྱེད་པ་ཉིད་ནི་ལྷན་ཅིག་པ་ཉིད་ཡིན་པར་འགལ་ལོ། །ལག་པ་དང་སྐྱུ་རུ་ར་གཉིས་བཞིན་ཡོད་པ་ཉིད་གཟུང་བ་དང་འཛིན་པའི་དངོས་པོ་མ་ཡིན་ནམ། དུས་ཐ་དད་པ་ཉིད་ལ་ནི་གཟུང་བའི་དུས་སུ་འཛིན་པ་མེད་ལ། འཛིན་པའི་དུས་ན་ཡང་གཟུང་བ་མེད་པའི་ཕྱིར་འཛིན་པར་བྱེད་པ་མེད་པས་དུས་ཐ་དད་པ་ཇི་ལྟར་གཟུང་ཞེ་ན་ཞེས་བྱ་བ་ནི་ཁས་བླངས་པ་སྟོན་པའོ། །རྒྱུ་ཉིད་ལ་གཟུང་བར་འཐད་པ་ཤེས་པས་རིག་སྟེ། རིག་པའི་རྗེས་སུ་འབྲངས་པས་སོ། །ཁྱད་པར་ཇི་ལྟ་བུའི་རྒྱུ་ཉིད་ལ་ཞེ་ན།
ཤེས་པ་ལ་རྣམ་པ་ནི་སྣང་བ་ལ་འཇོག་པ་ནི་འགོང་པ་སྟེ། དེ་ལ་ནུས་པ་སྟེ་མཐུ་ཡོད་པའོ། །དོན་འདི་ཡིན་ཏེ། རང་གི་རྣམ་པ་ཅན་གྱི་ཤེས་པ་སྐྱེད་པར་ནུས་པའི་རྒྱུ་ཉིད་ལ་གཟུང་བ་ཡིན་པར་བརྗོད་པར་བྱ་བ་ཡིན་གྱི། སྐམ་པ་དང་ལྕགས་སྦྲམ་གཉིས་བཞིན་དུ་གཟུང་བ་དང་འཛིན་པའི་དངོས་པོ་མ་ཡིན་ནོ། །སྐམ་པ་ལ་སོགས་པ་དང་ལྕགས་ཀྱི་སྦྲམ་བུ་ལ་སོགས་པ་ཡང་གཟུང་བ་དང་འཛིན་པའི་དངོས་པོ་ནི་ཐམས་ཅད་དུ་རྒྱུ་དང་འབྲས་བུར་གྱུར་པའི་བྱེ་བྲག་ཁོ་ན་ལས་ཡིན་ནོ། །དབང་པོ་ལ་སོགས་པ་ཡོད་ཀྱང་སྔོན་པོར་སྣང་བ་མི་སྐྱེ་ལ། ཡུལ་སྔོན་པོ་ཡོད་ན་ནི་སྐྱེ་བའི་ཕྱིར་རྣམ་པ་ནི་ཡུལ་གྱིས་བྱས་པ་ཡིན་གྱི། མིག་ལ་སོགས་པས་བྱས་པ་ནི་མ་ཡིན་ནོ། །དེས་ན་རྣམ་པར་འཇོག་པར་ནུས་པ་ནི་ཡུལ་ཉིད་ཡིན་པར་བརྗོད་པ་ཡིན་ནོ། །ཚིག་ལེའུར་བྱས་པས་མ་བཟུང་བའི་དོན་བརྗོད་པའི་ཕྱིར་ན་བར་སྐབས་སུ་སྦྱར་བའི་ཚིགས་སུ་བཅད་པ་ཡིན་ནོ། །དེའི་ཕྱིར་དེ་ལྟར་མངོན་པར་འདོད་པའི་རྣམ་པར་ཤེས་པའི་ཡུལ་བསྒྲུབས་ཤིང་གཞན་གྱིས་བཀོད་པའི་སྐྱོན་ཡང་བསལ་ནས། འདོད་པ་མ་ཡིན་པའི་ཡུལ་བཟློག་པའི་ཕྱིར་བཤད་པ། ཡིད་ཀྱི་རྣམ་པར་ཤེས་པ་འདི་ཚད་མ་སྔ་མའི་ཡུལ་འཛིན་པ་ཡང་མ་ཡིན་ནོ། །འདི་སྐད་བརྗོད་པ་ཡིན་ཏེ། ཚད་མ་ཞལ་གྱིས་བཞེས་པའི་ཕྱིར་སློབ་དཔོན་ཕྱོགས་ཀྱི་གླང་པོས་ཀྱང་ཡིད་ཀྱི་རྣམ་པར་ཤེས་པའི་ཡུལ་གཞན་ཉིད་ཡིན་པར་བཤད་ཀྱི། འདིར་རང་གི་ཡིད་ཀྱིས་བརྟགས་པ་ནི་མ་ཡིན་ནོ། །ཚད་མ་ཡིན་ཡང་ཚད་མ་སྔ་མའི་ཡུལ་ཅན་ཅིའི་ཕྱིར་མ་ཡིན་ཞེ་ན། བཤད་པ། ཤེས་པ་གཞན་གྱིས་མ་རྟོགས་པའི་ཡུལ་གང་ལ་ཡོད་པ་དེའི་དངོས་པོ་ནི་ཉིད་དེ། དེའི་ཕྱིར་ཚད་མ་སྔ་མས་གཟུང་བ་འཛིན་པ་མ་ཡིན་ནོ། །གཞན་དུ་ན་གལ་ཏེ་དེ་གཟུང་བ་འཛིན་པ་ཡིན་ན་ནི་དེའི་ཚེ་ཧ་ཅང་ཐལ་བར་འགྱུར་རོ། །ཚད་མ་ནི་འདི་ཙམ་མོ་ཞེས་ཡོངས་སུ་ཆད་པ་མེད་པ་ནི་ཧ་ཅང་ཐལ་བའོ། །གང་ཅུང་ཟད་ཕྱིན་ཅི་མ་ལོག་པའི་ཡུལ་ཅན་གྱི་ཤེས་པ་དེ་ཐམས་ཅད་ཚད་མར་གྱུར་པས་དྲན་པའམ་ཅིག་ཤོས་དག་འགྱུར་རོ། །གཏན་ཚིགས་དེའི་ཕྱིར་ན་མ་རྟོགས་པའི་ཡུལ་ཅན་ཉིད་ཡིན་ནོ། །གལ་ཏེ་ངེས་པའི་འབྲས་བུ་ཅན་
གྱི་ཚད་མས་ངེས་པར་བྱས་པའི་ཡུལ་འཇུག་པ་གང་ཡིན་པ་དེ་ནི་དྲན་པ་ཡིན་ལ། དེ་ལྟར་གྱུར་པ་ཡང་ཚད་མ་ཡིན་ན་ནི་ཧ་ཅང་ཐལ་བར་འགྱུར་བ་མ་ཡིན་ནམ། ཡིད་ཀྱི་རྣམ་པར་ཤེས་པ་ནི་མིག་གི་རྣམ་པར་ཤེས་པས་མ་ངེས་པའི་ཡུལ་ལ་འཇུག་པས་ན་དེ་ནི་རྟོགས་ཟིན་པའི་ཡུལ་ཅན་ཡིན་ཡང་ཚད་མ་ཡིན་ཏེ། དྲན་པས་ཧ་ཅང་ཐལ་བ་ནི་མ་ཡིན་ནོ་ཞེ་ན། བཤད་པ། གང་ལ་དྲན་པ་བསྐྱེད་པའི་ནུས་པ་འབྲས་བུ་བསྐྱེད་པ་དང་རྗེས་སུ་མཐུན་པ་མཐོང་བས་བསྐྱེད་པའི་དྲན་པའི་འདུ་བྱེད་མ་ཉམས་པ་མ་ཞིག་པ་ཡོད་པ་དེ་ལྟ་བུར་གྱུར་པ་སྟེ། གང་གི་ཕྱིར་དེ་ལྟ་བུར་གྱུར་པའི་གཟུང་བའི་དངོས་པོ་འཛིན་པ་དེ་ནི་དྲན་པ་ལས་ཁྱད་པར་མེད་པ་དེའི་ཕྱིར་ཧ་ཅང་ཐལ་བ་ཡིན་ནོ། །བསམ་པ་ནི་འདི་ཡིན་ཏེ། གལ་ཏེ་ཡང་ཚད་མ་ཐམས་ཅད་ངེས་པའི་འབྲས་བུ་ཅན་ཡིན་པ་དེ་ལྟ་ན་ཡང་རྣམ་པར་རྟོག་པ་མེད་པ་ངེས་པ་མེད་པའི་བདག་ཉིད་ཀྱང་གཟུང་བའི་དངོས་པོ་ལ་ངེས་བར་སྐྱེད་པར་བྱེད་པ་ཡིན་ན་ནི་ཚད་མ་ཡིན་ནོ། །གང་གི་ཕྱིར་དེ་དང་དེ་ལས་ལྡོག་པའི་དངོས་པོ་དེ་ཉིད་ལྡོག་པའི་རྒྱུ་མཚན་ཅན་གྱི་ངེས་པས་ཡུལ་དུ་བྱ་བ་ཡིན་གྱི་གཞན་མ་ཡིན་ལ། དེ་ཡང་བདག་ཉིད་ཐམས་ཅད་མངོན་སུམ་གྱིས་བཟུང་ནས་རང་གི་མཐུས་ངེས་པའི་ཡུལ་ཉིད་དུ་བྱས་པ་དེ་སྲིད་དུ་དེ་ཚད་མ་ཡིན་ནོ། །དེའི་ཕྱིར་དེ་ལྟར་ངེས་པར་བྱེད་པར་ནུས་པའི་མངོན་སུམ་ནི་ངེས་པ་སྐྱེས་པའི་སྔོན་རོལ་དུ་ཚད་མ་ཉིད་དུ་གནས་པ་ཡིན་ཏེ། གཞན་དུ་ན་སྔར་ཚད་མ་མ་ཡིན་པའི་ཕྱིར་ཚད་མར་ཇི་ལྟར་འགྱུར་དེ་ལྟ་ཡིན་ན་ཡང་གང་ལ་ངེས་པར་བྱེད་ནུས་པའི་དངོས་པོ་འཛིན་པར་བྱེད་པའི་མངོན་སུམ་སྐྱེས་པ་ལ་ནི་དོན་དེའི་ཡུལ་ཅན་ཉིད་ཀྱི་དབང་པོའི་ཤེས་པའམ་ཡིད་ཀྱི་ཤེས་པ་ཡང་རུང་སྟེ། དྲན་པ་ལས་ཁྱད་པར་ཡོད་པ་མ་ཡིན་ནོ། །ཇི་ལྟར་ངེས་པ་དང་ལྡན་པའི་མངོན་སུམ་སྐྱེས་པ་ན། ངེས་པ་ཉིད་དྲན་པ་ཡིན་པ་དེ་བཞིན་ཉིད་དུ་གཞན་དག་ཏུ་ཡང་ཡིན་ཏེ། འོན་ཀྱང་ངེས་པའི་ཡུལ་ལ་དྲན་པར་ཐ་སྙད་དུ་བྱས་པ་འབའ་ཞིག་ཏུ་ཟད་དོ། །ངེས་པ་མ་སྐྱེས་ཀྱང་ངེས་པར་ནུས་པས་རྟོགས་པའི་དོན་འཛིན་པ་ནི་སྔར་མེད་པའི་ཁྱད་པར་བྱེད་པ་མེད་པས་ན་དྲན་པ་ཉིད་ཡིན་ཏེ། མངོན་སུམ་
གྱི་སྟོབས་ཀྱིས་བསྐྱེད་པའི་ངེས་པ་བཞིན་ནོ། །གཏན་ཚིགས་ཚིགས་པ་ལས་མངོན་སུམ་གྱི་སྐད་ཅིག་མ་ཕྱི་མ་རྣམས་ནི་གྲུབ་པ་དང་བདེ་བ་ཐ་དད་པ་མེད་པའི་ཕྱིར་རོ་ཞེས་བཤད་དོ། །དེ་ལྟར་ན་ཡང་ཡིད་མ་བཟུང་བ་འཛིན་པ་ཡིན་ཡང་དབང་པོ་ལས་སྐྱེས་པའི་སྐད་ཅིག་མ་ཕྱི་མ་བཞིན་དུ་རྒྱུན་གྱིས་བསྒྲུབ་པར་བྱ་བའི་དོན་ལ་ཚད་མ་ཡིན་ལ། རྣལ་འབྱོར་བ་རྣམས་ཀྱི་ནི་སྐད་ཅིག་མའི་ཁྱད་པར་བསྒྲུབ་པར་འདོད་པ་ལ་ཚད་མ་མ་ཡིན་པར་རིགས་པ་ཡིན་ནོ། །མཐོང་བའི་འདུ་བྱེད་བརྗོད་པ་ལ་ནི་ཤེས་པ་གཞན་གང་ཡིན་པ་དེ་ཉིད་ཚད་མ་ཡིན་པ་ཉིད་དོ། །འཁྲུལ་པའི་རྒྱུ་འགའ་ཞིག་ལས་ངེས་པར་བྱེད་པའི་ནུས་པ་མེད་པ་ཡང་ཚད་མ་མ་ཡིན་པ་ཉིད་དེ། ཆུར་འཁྲུལ་པའི་དུས་ནི་སྨིག་རྒྱུའི་རང་གི་མཚན་ཉིད་འཛིན་པའི་ཤེས་པ་བཞིན་དུ་ངེས་པ་མེད་པས་འཇུག་པའི་ཡུལ་འཇོག་པར་བྱེད་པ་མ་ཡིན་པའི་ཕྱིར་རོ། །སྐྱོན་གཞན་དག་ཀྱང་བསྟན་པའི་ཕྱིར་བཤད་པ། བྱ་བ་རྫོགས་པའི་ལས་གང་ཡིན་པ་དེ་ལ་ཁྱད་པར་དུ་བསྒྲུབ་པའི་ཕྱིར་ཁྱད་པར་བྱེད་པ་དེ་ལྟ་མ་ཡིན་པའོ། །ཤིང་ལ་རྣམ་པ་གཉིས་ཀྱི་དངོས་པོར་གྲུབ་ཀྱང་ཕྱོགས་གཞན་དུ་རྣམ་པ་གཉིས་སུ་གྱུར་པའི་རྒྱུ་སྟ་རེ་ནི་སྒྲུབ་པར་བྱེད་པ་ཉིད་ཡིན་པས་ན་ཁྱད་པར་དུ་བྱེད་པ་མ་ཡིན་པ་ཞེས་བྱེ་བྲག་ཏུ་བྱས་ཏེ། དེ་ལྟ་བུར་གྱུར་པ་དེ་སྒྲུབ་པར་བྱེད་པ་ཡིན་བའོ། །ཡིན་ནོ་ཞེས་བྱ་བ་ནི་དོན་དེ་ལྟ་བུ་ཡིན་ནོ་ཞེས་ངག་གི་དོན་འཛིན་པ་ཡིན་ནོ། །ཡང་གི་སྒྲ་ནི་ཉེས་པ་གཞན་སོགས་པ་སྟེ་ཞེས་བྱ་བའི་སྒྲས་གཟུང་བའི་དོན་འདས་པ་ཡིན་ནོ་ཞེས་བྱ་བས་བརྗོད་པའོ། །སྒྲུབ་པར་བྱེད་པའི་ཚུལ་ནི་ལུགས་ཏེ། གང་གིས་དེ་སྒྲུབ་བྱེད་དུ་འགྱུར་བར་བྱ་བ་སྒྲུབ་པར་བྱེད་པའི་དངོས་པོའི་བདག་ཉིད་དོ། །དེ་ལས་འདས་པ་ནི་རྒལ་བ་སྟེ། སྤངས་པ་ཞེས་བྱ་བའི་དོན་ཏོ། །སྒྲུབ་པར་བྱེད་པ་ཡིན་ན་ཇི་ལྟར་ཅུང་ཟད་མི་བྱེད་པ་ཡིན་ལ། ཅུང་ཟད་མི་བྱེད་ན་ཡང་ཇི་ལྟར་སྒྲུབ་པར་བྱེད་པ་ཡིན། དེ་ཡང་སྒྲུབ་པར་བྱེད་པ་ཡིན་ན་ནི་ཚུལ་ལས་འདས་པ་ཡིན་ནོ། །གང་གི་ཕྱིར་གང་གིས་སྔར་འཇུག་པའི་ཡུལ་སྟོན་པ་དེ་ཉིད་ནི་སྒྲུབ་པར་བྱེད་པ་ཡིན་ལ་ཚད་མའི་སྒྲ་འདི་ཡང་སྒྲུབ་པར་བྱེད་པའི་ཡུལ་ཅན་ཡིན་ཏེ། དེས་ན་དེ་ལྟ་བུ་ཡིན་པར་མ་སྨྲས་པ་ཡིན་ནོ། །དེ་
ལྟར་ན་ཧ་ཅང་ཐལ་བ་དང༌། སྒྲུབ་པར་བྱེད་པའི་དངོས་པོ་ཉིད་དུ་མི་འཐད་པའི་ཕྱིར་གཟུང་བ་འཛིན་པ་དེ་ཚད་མ་མ་ཡིན་ནོ། །དེའི་ཕྱིར་འགའ་ཞིག་ཏུ་ཚད་མར་བརྗོད་པ་གང་ཡིན་པ་དེ་ནི་མ་བཟུང་བའི་ཡུལ་ཅན་ཡིན་ནོ་ཞེས་བལྟ་བའོ། །སྔར་གཟུང་བའི་དངོས་པོ་འཛིན་པའི་ཚད་མ་ནི་སྲིད་པ་ཡང་མ་ཡིན་ནོ་ཞེས་བསྟན་པའི་ཕྱིར་བཤད་པ། དེ་ནི་རིམ་གྱིས་འབྱུང་བ་འགལ་བ་ཡིན་ནོ། །ཡང་གི་སྒྲ་ནི་གཏན་ཚིགས་འདིའི་ཕྱིར་ཡང་གཟུང་བ་འཛིན་པ་མ་ཡིན་ནོ་ཞེས་མི་སྲིད་པ་གཏན་ཚིགས་ཀྱི་དངོས་པོ་ཉིད་དུ་སོགས་པ་ཡིན་ནོ། །དོན་གཅིག་པོ་དེ་རྒྱུར་གྱུར་པ་གང་ལ་ཡོད་པ་དེ་དག་ལ་དེ་སྐད་ཅེས་བྱའོ། །གང་གི་ཕྱིར་རང་བཞིན་གང་གིས་སྐད་ཅིག་གཉིས་པར་བློ་བྱེད་པའི་ངོ་བོ་དེ་ཉིད་སྐད་ཅིག་མ་སྔ་མ་ན་ཡང་ཡོད་པའི་ཕྱིར་དང༌། དངོས་པོ་ཡང་རང་གི་ངོ་བོ་ཁོ་ནས་བྱེད་པ་ཉིད་ཡིན་པའི་ཕྱིར་རང་གི་བསྒྲུབ་པར་བྱ་བ་ཐམས་ཅད་སྔ་མ་ཁོ་ནར་བྱེད་པར་འགྱུར་རོ། །འདི་སྙམ་དུ་ལྷན་ཅིག་བྱེད་པ་ལ་ལྟོས་ནས་རིམ་གྱིས་འབྲས་བུ་བྱེད་པའི་ཕྱིར་འགལ་བ་མེད་དོ་སྙམ་པ་བཤད་པ་གཞན་དག་གིས་ཁྱད་པར་ཏེ་བོགས་དབྱུང་བར་བྱར་མེད་པ་སྒྲུབ་ཏུ་མེད་པ་གང་ཡིན་པ་དེ་ནི་ལྟོས་པར་མི་འཐད་དོ། །དེའི་ཕྱིར་འགལ་བ་ཁོ་ནའོ། །ཁྱད་པར་དུ་བྱར་མེད་པ་ཡང་ཁྱད་པར་རང་གི་ངོ་བོར་འགྱུར་བའི་ཕྱིར་དང༌། རང་གི་ངོ་བོ་ཡང་སྔར་ཉིད་དུ་གྲུབ་ཟིན་པའི་ཕྱིར་རོ་འདི་སྙམ་དུ་རང་གི་ངོ་བོ་ཉིད་དུ་གྱུར་པའི་ཁྱད་པར་ལྟོས་པ་མེད་པ་ཁོ་ན་ལས་འབྲས་བུ་རིམ་དང་ལྡན་པ་སྐྱེ་བ་ཡིན་ནོ་སྙམ་ན། བཤད་པ། ལྟོས་པ་མེད་ན་ཡང་རིམ་གྱིས་སྐྱེ་བར་མི་འཐད་པའི་ཕྱིར་འགལ་བ་ཁོ་ནའོ། །ཡང་ཞེས་བྱ་བ་ནི་འགལ་བ་ཞེས་བྱ་བའི་བསྒྲུབ་བྱ་གཅིག་ལ་གཏན་ཚིགས་ལ་སོགས་པའོ། །ཅི་སྟེ་ཡང་ལྟོས་པ་དང་བཅས་པ་ཉིད་ཀྱིས་ཁྱད་པར་དུ་བྱ་བ་ཉིད་ཡིན་ན་དེའི་ཚེ་ཐ་དད་པ་ཉིད་དུ་ཐལ་བ་ཡིན་ནོ་ཞེས་བཤད་པ་ནི་ཁྱད་པར་དུ་བྱ་བའི་དངོས་པོ་གང་ཡིན་པ་དེ་ཉིད་དེ། དེ་ཡིན་ན་ནི་གཞན་ཉིད་ཡིན་ནོ། །གང་གི་ཕྱིར་ལྟོས་བྱར་གྱུར་པའི་ལྷན་ཅིག་བྱེད་པས་རང་གི་ངོ་བོར་གྱུར་པའི་ཁྱད་པར་བསྒྲུབ་པར་བྱ་བ་ཡིན་ན་ནི་ཡིད་ཀྱི་རྣམ་པར་ཤེས་པའི་ཡུལ་དངོས་པོའི་སྔ་མ་ལས་ཐ་དད་པར་འགྱུར་བའི་ཕྱིར་སྐབས་
གྱི་དོན་ཡིད་ཀྱི་རྣམ་པར་ཤེས་པའི་ཡུལ་གཅིག་པ་ཉིད་ཉམས་པ་ཡིན་ནོ། །གཞན་ཡང་སྐད་ཅིག་མ་ཉིད་མ་ཡིན་ན་རྣམ་པར་ཤེས་པ་སྔ་མས་གཟུང་བ་འཛིན་པར་ཡང་འགྱུར་བ་ཞིག་ན། དབང་པོའི་ཤེས་པའི་ཡུལ་གྱི་དོན་རྣམས་ནི་སྐད་ཅིག་མ་ཉིད་ཀྱིས་མེད་ན་དབང་པོའི་རྣམ་པར་ཤེས་པའི་རྒྱུ་ཅན་ཡིད་ཀྱི་རྣམ་པར་ཤེས་པས་འཛིན་པ་མ་ཡིན་ནོ། །མེད་པ་ཉིད་ཀྱང་འདས་པའི་ཕྱིར་ཏེ། ཞིག་པའི་ཕྱིར་རོ། །འདས་པ་ཡང་སྐད་ཅིག་མ་ཉིད་ཀྱིས་སོ། །དེའི་ཕྱིར་དེ་ལྟར་མེད་པས་ན་དབང་པོའི་ཤེས་པའི་ཡུལ་སྐད་ཅིག་མ་ནི་དབང་པོའི་ཤེས་པའི་འབྲས་བུ་ཡིད་ཀྱི་རྣམ་པར་ཤེས་པས་མི་འཛིན་ལ། སྐད་ཅིག་མ་ཉིད་མ་ཡིན་ན་ཡང་རིམ་པ་འགལ་བའི་ཕྱིར་རོ་ཞེས་བསྒྲུབས་ནས་མཇུག་སྡུད་པ་ནི་དེའི་ཕྱིར་དབང་པོའི་རྣམ་པར་ཤེས་པའི་ཡུལ་ལས་དོན་གཞན་ཉིད་ཡིད་ཀྱིས་རྟོགས་པ་ཡིན་ནོ། །རྐྱེན་ནི་རྒྱུའོ། །དེ་ཉིད་ནི་ཁྱད་པར་ཏེ་ཁྱད་པར་དུ་བྱས་ཏེ་ཞེས་བྱ་བས་སོ། །དེས་བསྐྱེད་པས་ནི་རྒྱུ་དེའི་ཕྱིར་རོ། །འདི་སྐད་བརྗོད་པ་ཡིན་ཏེ། གང་གི་ཕྱིར་དབང་པོའི་རྣམ་པར་ཤེས་པའི་ཡུལ་གྱི་དོན་ལས་ནི་རིམ་གྱིས་འབྱུང་བའི་ཡིད་ཀྱི་རྣམ་པར་ཤེས་པ་སྐྱེ་བ་མ་ཡིན་ཏེ། འོན་ཀྱང་དམིགས་པ་བརྗོད་པའི་རྐྱེན་གཞན་ལས་སྐྱེ་བ་དེའི་ཕྱིར་དོན་གཞན་རྟོགས་པ་མ་ཡིན་ནོ། །དེ་བཞིན་དུ་གལ་ཏེ་ཡིད་ཀྱི་རྣམ་པར་ཤེས་པ་མིག་ལ་ལྟོས་པ་མ་ཡིན་ནོ། །ཕྱི་རོལ་གྱི་དོན་འཛིན་པ་ཡིན་ཡང་དེའི་གཟུགས་འཛིན་པར་སོ་སོར་ངེས་པ་ཅིའི་ཕྱིར་ཞེས་དོགས་པ་ལ་རྐྱེན་གྱི་ཁྱད་པར་གྱིས་བསྐྱེད་པའི་ཕྱིར་ཞེས་གསུངས་སོ། །མིག་གི་རྣམ་པར་ཤེས་པ་ཡང་ཅིའི་ཕྱིར་གཟུགས་འཛིན་པར་སོ་སོར་ངེས་པ་ཡིན་ཞེས་དྲིས་པ་ན། རྒྱུའི་ཁྱད་པར་ཉིད་བསྟན་པར་བྱ་བ་ཡིན་པ་དེ་ནི་འདི་ལ་ཡང་ཡོད་པ་ཡིན་ཏེ། གང་གི་ཕྱིར་གཟུགས་འཛིན་པའི་མཚུངས་པ་དེ་མ་ཐག་པའི་རྐྱེན་ལས་སྐྱེས་པ་དེའི་ཕྱིར་གཟུགས་འཛིན་པར་སོ་སོར་ངེས་པ་ཡིན་ནོ། །དེ་ཉིད་ཀྱི་ཕྱིར་རྒྱུ་དེ་ལྟ་བུར་གྱུར་པ་མ་ཡིན་པའི་ཡིད་གང་ཡིན་པ་དེ་ནི་གཟུགས་འཛིན་པ་མ་ཡིན་ནོ་ཞེས་བྱ་བར་གྲུབ་བོ། །གཉིས་པོ་འདི་ནི་རྐྱེན་གྱི་ཁྱད་པར་གྱིས་བསྐྱེད་པའི་ཕྱིར་ཞེས་བྱ་བ་འདི་ཉིད་ཀྱིས་བརྗོད་པ་ཡིན་ནོ། །གལ་ཏེ་འོ་ན་དབང་
བོའི་རྣམ་པར་ཤེས་པ་དང་དེའི་ཡུལ་གྱི་དེ་མ་ཐག་པའི་ཡུལ་ལས་ཡིད་ཀྱི་མངོན་སུམ་སྐྱེ་བ་ཡིན་ལ། རྒྱུ་ཉེ་བའི་ཕྱིར་དབང་པོའི་རྣམ་པར་ཤེས་པ་འཇུག་པ་ན་ཡང་དབང་པོའི་སྐད་ཅིག་མ་དང་པོའི་འོག་ཏུ་ཡིད་ཀྱི་མངོན་སུམ་སྐྱེ་བ་ཡིན་ནོ་ཞེས་ཁ་ཅིག་འཛེར་ཏོ། །དེ་ལ་འདི་སྐད་ཅེས་མིག་གི་དབང་པོའི་ཡུལ་གྱི་དོན་ལ་འཇུག་པ་ན་སྐྱེས་པའི་རྣམ་པར་ཤེས་པ་གང་ཡིན་པ་དེ་མིག་ལས་བྱུང་བ་མ་ཡིན་ན། འོ་ན་མིག་ལས་བྱུང་བ་གཞན་ཅི་འདྲ་བ་ཞིག་ཡིན་ཞེས་དྲི་བར་བྱའོ། །དོན་དེ་ལ་རྣམ་པར་ཤེས་པ་སྐྱེད་པར་རུང་བའི་དབང་པོ་ཡང་ཅིའི་ཕྱིར་རྒྱུད་གཅིག་པོ་དེ་ཉིད་ཀྱིས་སྐད་ཅིག་གཅིག་ལ་དོན་དེ་འཛིན་པའི་རྣམ་པར་ཤེས་པ་ཁ་ཅིག་གི་ནི་སྐྱེད་བའི་རྒྱུ་ཡིན་པ་ཁ་ཅིག་གི་ནི་རྒྱུ་མ་ཡིན་ཁྱད་པར་མེད་པས་གཉི་གའི་རྒྱུའམ་གཞན་དུ་ཁྱད་པར་མེད་པར་འགྱུར་རོ། །དེའི་ཕྱིར་ཡིད་ཀྱི་མངོན་སུམ་ནི་མིག་གི་བྱ་བ་མེད་པ་ལས་གཞན་དུ་མི་འགྱུར་རོ་ཞེས་བྱ་བར་གནས་སོ། །ཡིད་ཀྱི་མངོན་སུམ་བཤད་ནས། རང་རིག་པའི་མངོན་སུམ་བཤད་པར་བཞེད་པའི་ཕྱིར་བདེ་བ་ལ་སོགས་པ་ཞེས་གསུངས་ཏེ། བདེ་བ་ལ་སོགས་པ་སྡུག་བསྔལ་ལ་སོགས་པ་གང་ཡིན་པ་དེ་དག་གོ །རང་བདག་ཉིད་འདིས་རིག་པར་བྱེད་པའི་ཕྱིར་རིག་པ་སྟེ། རིག་པར་རུང་བ་ཉིད་བརྗོད་པ་ཡིན་ཏེ། དེ་ནི་མངོན་སུམ་ཡིན་ནོ། །འདི་ཉིད་རྣམ་པར་འགྲེལ་པ་བཤད་པ་ནི་བདེ་བ་ལ་སོགས་པ་རྣམས་ཀྱང་ཞེས་རིམས་པ་གཞན་དུ་སྦྱར་རོ། །ཀྱང་གི་སྒྲ་ནི་སྔར་བཤད་པར་ཡང་མངོན་སུམ་ཡིན་ལ་བདེ་བ་ལ་སོགས་པའི་རང་བཞིན་གང་ཞིག་བདག་ཉིད་ཡང་དག་པར་རིག་པར་རུང་བ་གང་ཡིན་པ་དེ་ཡང་མངོན་སུམ་གྱི་ཚད་མ་ཡིན་ནོ་ཞེས་བྱའོ། །བདག་ཉིད་ནི་གཞལ་བྱ་ཡིན་ལ་དེ་ཡོངས་སུ་གཅོད་པར་རུང་བའི་འཛིན་པར་བྱེད་པ་ཉིད་ནི་མངོན་སུམ་གྱི་ཚད་མ་ཡིན་ནོ། །སེམས་དང་སེམས་ལས་བྱུང་བ་ཐམས་ཅད་རང་རིག་པའི་མངོན་སུམ་མ་ཡིན་ནམ། དེ་ཅིའི་ཕྱིར་བདེ་བ་ལ་སོགས་པ་ཉིད་ཉེ་བར་བླང་ཞེ་ན། བཤད་པ། བདེ་བ་ལ་སོགས་པ་སྨོས་པ་ནི་གསལ་བའང་ཡིན་ལ་ཉམས་སུ་མྱོང་བའང་ཡིན་པ་དེ་བསྟན་པ་སྟེ། བསྒྲུབས་པ་དེ་ཉིད་ཀྱི་དོན་གང་ལ་ཡོད་པའོ། །གང་གི་ཕྱིར་རྩོད་པ་མེད་པའི་གསལ་བར་ཉམས་སུ་མྱོང་བ་བསྟན་ན་
དེའི་རྗེས་སུ་འབྲངས་ན་གཞན་ལ་ཡང་ཉམས་སུ་མྱོང་བ་ཉིད་དུ་ཁོང་དུ་ཆུད་དོ། །བདེ་བ་ལ་སོགས་པ་ཡང་དག་པར་རིག་པ་ནི་གསལ་བ་ཉིད་དོ་ཞེས་བྱ་བ་དེ་ལྟ་བུའི་སློབ་དཔོན་ཕྱོགས་ཀྱི་གླང་པོའི་གཞུང་ཡང་བཤད་པ་ཡིན་པར་བལྟ་བར་བྱའོ། །ཡང་ཅིའི་ཕྱིར་འདིར་རབ་ཏུ་བསྟན་པ་ཙམ་ཡིན་གྱི། འདི་ཡུལ་ཡོངས་སུ་རྫོགས་པར་བཟུང་བ་མ་ཡིན་ཞེ་ན། བཤད་པ་གང་གི་ཕྱིར་ཤེས་པ་ཐམས་ཅད་ཀྱི་བདག་ཉིད་རིག་པ་གང་ཡིན་པ་དེ་ནི་མངོན་སུམ་ཡིན་པའི་ཕྱིར་རོ། །ཡང་དེ་ཇི་ལྟར་མངོན་སུམ་མ་ཡིན་ཞེ་ན། བདེ་བ་ལ་སོགས་པ་ཞེས་གསུངས་ཏེ། གང་གི་ཕྱིར་བདེ་བ་ལ་སོགས་པ་རྣམས་ཀྱི་བདག་ཉིད་རིག་པ་སྟེ་རིག་པར་རུང་བའི་རང་བཞིན་ལ་རྣམ་པར་རྟོག་པ་སྟེ་རྣམ་པར་རྟོག་པ་ནི་སྒྲ་དང་བསྲེས་ནས་འཛིན་པ་སྟེ། དེ་སྲིད་པ་མ་ཡིན་ནོ། །འདི་ལྟར་རང་གི་རང་བཞིན་འཛིན་པ་ནི་དངོས་སུ་ཡིན་ཏེ། བདག་ཉིད་ནི་བདག་ཉིད་རིག་པའི་ལྐོག་ཏུ་གྱུར་པ་མ་ཡིན་པའི་ཕྱིར་རོ། །བདག་ཉིད་རིག་པར་བྱེད་པ་ནི་བདག་ཉིད་ལ་མ་འཁྲུལ་པ་དང་རྟོག་པ་མེད་པ་ཡང་ཡིན་ནོ། །རྟོག་པ་མེད་པ་ཉིད་ཅིའི་ཕྱིར་ཞེ་ན། བཤད་པ། གང་གི་ཕྱིར་བདེ་བ་ལ་སོགས་པའི་བདག་ཉིད་གང་ལ་བརྡ་ནུས་པ་མ་ཡིན་པ་དེའི་ཕྱིར་དེ་ལ་རྟོག་པ་མེད་པ་ཡིན་ནོ། །བརྡ་མི་ནུས་པ་ཅིའི་ཕྱིར་ཞེ་ན། ཕྱིར་ཞེས་བྱ་བ་ནི་གང་གི་ཕྱིར་དེ་དག་གི་བདག་ཉིད་གཞན་ལ་བརྟེན་པ་མ་ཡིན་པའི་ཕྱིར་བརྡ་ནུས་པ་མ་ཡིན་ནོ། །འདི་ལྟར་གང་ཞིག་རང་རིག་པས་གཟུང་པ་སྐད་ཅིག་མའི་བདག་ཉིད་དེ་དག་ནི་ཐུན་མོང་མ་ཡིན་པ་ཡིན་ལ། སྒྲ་དགོད་པ་ཡང་ཡུལ་དུ་བྱས་པ་ལ་བརྗོད་པར་གཟོ་བ་སྔོན་དུ་འགྲོ་བ་ཅན་ཡིན་ན་སྐད་ཅིག་མ་གཅིག་པ་ནི་རིམ་པ་དང་ལྡན་པ་ཡུལ་དུ་བྱེད་པ་དང༌། བརྗོད་པར་གཟོ་བ་དང༌། འགོད་པ་རྣམས་མི་སྲིད་དོ། །དེའི་ཕྱིར་མ་སྐྱེས་པ་ཉིད་དུ་ཡུལ་དུ་བྱས་ཏེ། བརྗོད་པར་གཟོ་བ་སྔོན་དུ་འགྲོ་བ་ཅན་གྱི་སྒྲ་བཀོད་པ་བྱས་ནས་སྐྱེས་པ་ན། སྒྲའི་ཁྱད་པར་ཅན་དུ་འཛིན་པ་ཡིན་གྲང་ན། ཚུལ་འདི་ཡང་མི་སྲིད་དོ། །གང་གི་ཕྱིར་རིག་པ་དེ་ཉིད་ཀྱིས་བདག་ཉིད་ལ་སྒྲ་བཀོད་པའམ་ཤེས་པ་གཞན་གྱིས་ཡིན། རིག་པ་ཉིད་ཀྱིས་ཡིན་ན་ཡང་སྒྲ་འགོད་པ་ན་སྐྱེས་
པའམ་མ་སྐྱེས་པ་མ་ཡིན། རེ་ཞིག་མ་སྐྱེས་པ་ལ་བཀོད་པར་མི་ནུས་ཏེ། གང་གི་ཕྱིར་མ་སྐྱེས་པ་ནི་མ་བྱུང་བ་ཡིན་ནོ། །མ་སྐྱེས་ཀྱང་སྤྱི་ཡུལ་དུ་བྱེད་པའི་ཕྱིར་སོ་སོར་ངེས་པ་ཞེས་ཁྱད་པར་བརྗོད་དོ། །བདེ་བ་ལ་སོགས་པའི་བདག་ཉིད་ནི་ཡུལ་དུ་བྱེད་པ་མ་ཡིན་ཏེ། ཡུལ་ཅན་རང་རིག་པས་སོ། །འདིར་དངོས་པོ་སྒྲུབ་པ་རིག་པའི་སྒྲས་ནི་རིག་པར་རུང་བའི་བདག་ཉིད་ཚད་མར་གྱུར་པ་བཟུང་གི་འབྲས་བུའི་རང་བཞིན་ནི་མ་ཡིན་ཏེ། དེ་ལ་ཚད་མ་བྱེད་པ་མེད་པའི་ཕྱིར་རོ། །ཅིའི་ཕྱིར་ཡུལ་དུ་མི་བྱེད་ཅེ་ན། བཤད་པ་བདག་རིག་པ་དེ་ནི་བདེ་བ་ལ་སོགས་པ་དེའི་བདག་ཉིད་ཀྱི་རང་བཞིན་གང་ཡིན་པ་དེའི་དངོས་པོ་ནི་དེ་ཉིད་དེའི་ཕྱིར་རོ། །གང་གི་ཕྱིར་རང་རིག་པ་འདི་ནི་བདེ་བ་ལ་སོགས་པའི་བདག་ཉིད་རང་གི་ངོ་བོ་ཡིན་པས་དེ་མ་གྲུབ་ན། དེ་ཡང་མ་གྲུབ་པ་དེའི་ཕྱིར་བདེ་བ་ལ་སོགས་པའི་བདག་ཉིད་མ་སྐྱེས་པ་ན་ཡུལ་དང་ཡུལ་ཅན་གཉི་ག་མེད་པའི་ཕྱིར་གང་ཞིག་གང་གིས་ཡུལ་དུ་བྱེད། ཡུལ་དུ་མ་བྱས་ན་ཡང་བརྗོད་པ་གཟོ་བ་དང་སྒྲ་བཀོད་པ་མེད་དོ། །དེས་ན་ཇི་ལྟར་བརྡ་ངེས་པར་སྦྱོར་བ་ནི་སྒྲའི་བརྗོད་བྱར་འཛིན་པ་ཡིན་ལ་ཡུལ་དུ་བྱེད་པ་ནི་འཛིན་པ་ཙམ་ཡིན་ནོ། །འཛིན་པའི་ཁྱད་པར་ཡང་འཛིན་པའི་སྤྱིས་ཁྱབ་པ་ཡིན་ཏེ། དེས་ན་གང་ཞིག་གང་གིས་ཡུལ་དུ་མ་བྱས་པ་དེས་ནི་དེས་སྒྲ་འགའ་ཞིག་གི་བརྗོད་པར་བྱེད་པ་མ་ཡིན་ཏེ། དཔེར་ན་བ་ལང་གི་ཤེས་པས་རྟ་བཞིན་ནོ། །ངེས་པའི་བདག་ཉིད་མ་སྐྱེས་པ་ཡང་རང་རིག་པས་ཡུལ་དུ་བྱས་པ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །འདི་སྙམ་དུ་འོ་ན་ནི་ཡུལ་དུ་བྱས་པའི་ཕྱིར་ན་བདེ་བ་ལ་སོགས་པའི་བདག་ཉིད་སྐྱེས་པ་ལ་སྒྲ་འགོད་པར་འགྱུར་རོ་སྙམ་ན་བཤད་པ། བདེ་བ་ལ་སོགས་པ་སྐྱེས་པའི་བདག་ཉིད་ཡུལ་དུ་བྱས་པ་འདི་དག་ལ། རིག་པ་འདི་རྗོད་པར་བྱེད་པ་སྟེ། སྨྲས་པར་བྱེད་པའི་སྒྲ་དང་སྦྱོར་བ་སྟེ། འགོད་པ་ནི་མ་ཡིན་ནོ། །བསམ་པ་འདི་ཡིན་ཏེ་གལ་ཏེ་སྐྱེས་པའི་བདེ་བ་ལ་སོགས་པའི་བདག་ཉིད་རིག་པས་ཡུལ་དུ་བྱས་པ་དེ་ལྟ་ན་རྗོད་པར་བྱེད་པ་དང་སྦྱར་བར་མི་ནུས་སོ་ཞེས་བྱའོ། །གཏན་ཚིགས་བཤད་པ། བདག་ཉིད་ལ་དེ་ལྟར་
ཏེ་རྣམ་པ་དེས་འཇུག་པ་ནི་སྦྱོར་བ་སྟེ། རྗོད་པར་བྱེད་པ་དང་སྲེ་བའི་རྣམ་པ་ཅན་གྱི་བྱེད་པའོ། །དེ་འགལ་བའི་ཕྱིར་རོ། །གང་གི་ཕྱིར་སྒྲ་སྦྱོར་བར་བྱེད་པ་ལས་ཐ་དད་པར་གཟུང་བའི་ཆར་གནས་པར་སྣང་བ་ལ་ནུས་པ་ཡིན་ཏེ། གང་ཞིག་བྱ་བར་འདོད་པ་དེ་ནི་འདོད་པའི་རང་བཞིན་གྲུབ་པ་ལས་བྱ་བ་ཐ་དད་པ་ཉིད་དུ་མཐོང་ན་རྩོམ་པར་བྱེད་པ་ཡིན་གྱི། འདོད་པའི་རང་བཞིན་ཉིད་ལ་ནི་མ་ཡིན་ནོ། །དེའི་ཕྱིར་འགའ་ཞིག་བརྗོད་པར་བྱ་བ་ཉིད་དམ་རྣམ་པ་གཞན་ཉིད་དུ་ངེས་པར་སྟོན་པ་ལ་ནི། ངེས་པར་སྟོན་པ་པོ་ལས་ཐ་དད་པར་སྣང་བ་ཉིད་ཀྱིས་ཁྱབ་པ་ཡིན་ནོ། །གཟུང་བའི་ཆར་གནས་པར་བདག་ཉིད་ནི་རང་རིག་པ་ལས་ཐ་དད་པར་བྱ་བ་ཉིད་དུ་མི་སྣང་ངོ༌། །དེའི་ཕྱིར་བརྗོད་པར་བྱ་བ་ཉིད་དུ་དགོད་པའི་ཁྱབ་པར་བྱེད་པ་ཐ་དད་པར་སྣང་བ་དང་འགལ་བ་ཐ་དད་པ་མེད་པར་སྣང་བ་ནི་བདག་ལ་ཡོད་པ་ཉིད་དོ། །གང་གི་ཚེ་ཡང་བདག་ནི་འདི་ལྟ་བུའོ་ཞེས་བ་དག་ལ་སོ་སོར་རྟོག་པ་དེའི་ཚེ། སོ་སོར་རྟོག་པར་བྱེད་པ་འཛིན་པ་པོ་ལས་བདག་ཐ་དད་པར་གཟུང་བར་བྱ་བ་ཉིད་དུ་སྣང་བ་ན་སོ་སོར་རྟོག་པར་བྱེད་པ་ཡིན་ནོ། །གཞན་ཡང་བརྡ་བྱེད་པ་ནི་འདི་ནི་བུམ་པའོ་ཞེས་གཟུང་བར་བྱ་བའི་ཆར་གནས་པའི་སྒྲ་དང་ཐ་མི་ངད་པར་བྱེད་པ་ཡིན་ན། ཤེས་པའི་བདག་ཉིད་ནི་གང་སྒྲ་དང་ཐ་དད་པ་མེད་པར་བྱ་བ་གཟུང་བར་བྱ་བའི་ཆང་གནས་པར་སྣང་བ་མ་ཡིན་ནོ། །དེ་ཉིད་ཀྱི་ཕྱིར་བདག་ཉིད་ནི་རྣམ་པར་རྟོག་པའི་ཤེས་པ་ལ་སྣང་བའི་སྒྲ་དང་འདྲེས་པར་སྣང་བ་མ་ཡིན་པའི་ཕྱིར་རྣམ་པར་རྟོག་པའི་ཤེས་པ་དག་པ་རྣམ་པར་མི་རྟོག་པ་ཁོ་ནའོ། །དེའི་ཕྱིར་དེ་ལྟར་གལ་ཏེ་ངེས་པར་སྦྱོར་བ་པོ་ལས་ཐ་དད་པ་སྣང་བ་ལས་ངེས་པར་སྦྱོར་རམ། ཅི་སྟེ་ཡང་གཟུང་བར་བྱ་བའི་ཆར་གནས་པའི་སྒྲ་དང་གཅིག་ཏུ་བྱེད་པ་སྒྲ་ངེས་པར་སྦྱོར་བ་ཡིན་ཡང་བླ་སྟེ། ངེས་པར་སྦྱོར་བ་ལ་ནི་ཐམས་ཅད་དུ་གཟུང་བར་བྱ་བ་ཉིད་དུ་སྣང་བས་ཁྱབ་པ་ཡིན་ནོ། །དེའི་ཕྱིར་གང་ཞིག་གང་ལ་གཟུང་བའི་ཆ་ཉིད་དུ་སྣང་བ་མ་ཡིན་པ་དེ་ནི་ངེས་སྒྲ་དང་སྦྱར་ནས་འཛིན་པ་མ་ཡིན་ཏེ། དཔེར་ན་བ་ལང་གི་ཤེས་པ་ལ་རྟ་བཞིན་ནོ། །དེ་བཞིན་དུ་རང་གི་བདག་ཉིད་ཀྱང་རིག་པ་ལ་གཟུང་བར་བྱ་བ་ཉིད་དུ་སྣང་བ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ།།
དེའི་ཕྱིར་ཐ་དད་པ་མེད་པར་སྣང་བ་དེའི་བདག་ཉིད་ལ་དེ་ལྟར་གཟུང་བར་བྱ་བའི་ཆ་ཉིད་དུ་བརྟེན་ནས་འཇུག་པ་ནི་འགལ་བ་ཡིན་ནོ། །གཞན་ཡང་བརྡ་གང་ལ་གཟུང་བ་དང་འཛིན་པ་མེད་པ་དེ་ནི་གཟུང་བ་དང་འཛིན་པ་མེད་པ་སྟེ་དེ་མེད་པའི་ཕྱིར་རོ། །ཡང་ཞེས་བྱ་བ་ནི་འདི་དག་ལ་འདི་ཞེས་བྱ་བ་ལ་སོགས་པའི་བསྒྲུབ་པར་བྱ་བ་ལ་གཏན་ཚིགས་གཞན་འདི་སོགས་པའོ། །རིག་པ་བདག་ཉིད་ལ་བརྡ་སྦྱོར་ན་ནི་གཟུང་བ་དང་འཛིན་པ་མེད་པའི་བརྡར་འགྱུར་རོ། །ཅིའི་ཕྱིར་ཞེ་ན། བདེ་བ་ལ་སོགས་པ་དེའི་བདག་ཉིད་ཀྱི་རང་བཞིན་དེ་ནི་སྔོན་མ་མཐོང་སྟེ་མ་དམིགས་པའི་ཕྱིར་རོ། །གལ་ཏེ་རིག་པ་ཡོད་པ་ལས་སྔོན་རོལ་དུ་དེའི་རང་བཞིན་མཐོང་བ་ཡིན་ན་ནི་དེའི་ཚེ་བརྗོད་པར་གཟོ་བ་དང་སྒྲ་དགོད་པ་སྔོན་ཉིད་དུ་བྱས་པར་འགྱུར་ན་མ་མཐོང་ན་ནི་ཐམས་ཅད་བྱས་པར་མི་འགྱུར་རོ། །འདི་སྙམ་དུའོ་ན་གང་གི་ཚེ་དེའི་རང་བཞིན་མཐོང་བ་དེའི་ཚེ་བྱེད་དོ་སྙམ་ན་བཤད་པ། བརྗོད་པ་ནི་སྨྲ་བར་བྱེད་པའི་སྒྲའོ། །གཟོ་བ་ནི་མངོན་དུ་ཕྱོགས་པའོ། །དེ་ལྟར་གྱུར་པ་ན་བརྡ་དང་འབྲེལ་པར་བྱ་བའི་ཡུལ་འགགས་པའི་ཕྱིར་དང༌། དེ་དང་ཐ་དད་པ་མེད་པས་ཏེ་ཁྱད་པར་མེད་པའི་གཏན་ཚིགས་ཀྱིས་རིག་པ་ཡང་འགགས་པ་སྟེ་ལོག་པའི་ཕྱིར་རོ། །དོན་འདི་ཡིན་ཏེ་གང་གི་ཚེ་དེའི་རང་བཞིན་མཐོང་བ་དེ་ཉིད་ཀྱི་ཚེ་དུས་མ་མཉམ་དུ་བརྡ་གྲུབ་པ་ནི་མ་ཡིན་གྱི། འོན་ཀྱང་མཐོང་བ་ལས་རྗོད་པར་བྱེད་པའི་སྒྲ་གཟོ་ལ་ཕྱིས་བརྡ་བྱེད་པ་ཡིན་ནོ། །དེ་ལ་ཇི་སྲིད་ཡུལ་མཐོང་བ་ལ་བརྡ་གཟོ་ཞིང་བྱེད་པར་འདོད་པ་དེ་སྲིད་དུ་ཡུལ་ལྡོག་སྟེ་སྐད་ཅིག་མ་ཡིན་པའི་ཕྱིར་རོ། །དེ་དང་ཐ་དད་པ་མེད་པས་ཡུལ་ཅན་རིག་པ་ཡང་ལྡོག་པ་ཡིན་ནོ། །དེས་ན་བརྡའི་དུས་ན་ཡུལ་དང་ཡུལ་ཅན་དག་མེད་པའི་ཕྱིར་གཟུང་བ་དང་འཛིན་པ་མེད་པའི་བརྡར་ཐལ་ལོ། །འདིའི་དོན་ནི་འདི་ཡིན་ཏེ། གཟུང་བ་དང་འཛིན་པ་གང་དང་སྒྲ་གང་འགོད་པའི་དུས་ན་ཞིག་པ་གང་ཡིན་པ་དེ་དག་གིས་ནི་བརྡ་བྱེད་པ་མ་ཡིན་ཏེ། དཔེར་ན་བ་ལང་གི་སྒྲ་འགོད་པའི་དུས་ལས་སྔར་འགགས་ནས་ཡུན་རིང་དུ་ལོང་པའི་བ་ལང་དང་ལྷ་སྦྱིན་དག་བཞིན་ནོ། །བདེ་བ་ལ་སོགས་པའི་རང་བཞིན་དང་རིག་པ་དག་ཀྱང་མཐོང་བའི་བདེ་བ་ལ་སོགས་པའི་སྒྲ་འགོད་པའི་དུས་ན་ཞིག་པ་ཡིན་ནོ། །
རང་གི་ངོ་བོ་མཐོང་བ་ཡོད་ན་སྒྲ་གཟོ་བ་ཡིན་ལ། དེ་ཡོད་ན་ཡང་སྒྲ་འགོད་པ་ཡིན་ན་རང་གི་ངོ་བོ་དང་རིག་པ་དག་ནི་མཐོང་མ་ཐག་པ་ཉིད་དུ་ཞིག་པའི་ཕྱིར་ཕྱིས་བྱ་བརྡའི་དུས་ན་མེད་པ་ཡིན་ནོ། །བརྡ་ནི་སྒྲའི་ཁྱད་པར་ཅན་དུ་འཛིན་པ་ཡིན་ལ་དེ་ཡང་གཟུང་བ་དང་འཛིན་པ་ཡོད་པ་དག་གིས་ཁྱབ་པའི་ཕྱིར་ཁྱབ་པར་བྱེད་པ་མེད་པ་ཡིན་ནོ། །འདི་སྙམ་དུ་ཞིག་པའི་རང་རིག་པས་བརྡ་ངེས་པར་སྦྱོར་བ་མ་ཡིན་དུ་ཟིན་ཀྱང་སྒྲ་གཟོ་བའི་འོག་རོལ་གྱི་དུས་སུ་བྱུང་བའི་ཤེས་པ་གཞན་གྱིས་ཡུལ་དུ་བྱས་པ་ལ་བརྡ་བྱེད་པ་ཡིན་ནོ་སྙམ་ན། གཞན་གྱིས་ཀྱང་ཞེས་གསུངས་ཏེ། སྒྲ་གཟོ་བའི་དུས་ཉིད་ན་ཞིག་པའི་དོན་གང་ཡིན་པ་དེ་སྒྲ་གཟོ་བའི་འོག་ཏུ་བྱུང་བའི་ཤེས་པས་རིག་པ་ཇི་ལྟར་འགྱུར། རིག་པ་མ་ཡིན་པའི་ཕྱིར་ཡུལ་དུ་བྱས་པ་འདི་དག་ནི་གཞན་གྱིས་ཀྱང་རྗོད་པར་བྱེད་པ་དང་སྦྱོར་བ་མ་ཡིན་ནོ། །ཡང་ན་འདི་ནི་དོན་གཞན་ཡིན་ཏེ། འདི་སྙམ་དུ་རིག་པས་ནི་སྒྲ་འགོད་པ་མ་ཡིན་གྱི་འོན་ཀྱང་ཤེས་པ་གཞན་གྱིས་སོ་ཞེས་དོགས་པ་ལ། གཞན་གྱིས་ཀྱང་ཞེས་གསུངས་སོ། །འདི་སྐད་བརྗོད་པ་ཡིན་ཏེ། རེ་ཞིག་དུས་མཉམ་པར་འབྱུང་བ་གཞན་གྱིས་ནི་ཡུལ་དུ་བྱེད་པ་མ་ཡིན་ཏེ། དུས་གཅིག་པ་དག་ལ་ཕན་པར་བྱེད་པ་བྱ་བ་མེད་པའི་ཕྱིར་རོ། །དུས་ཐ་དད་པ་ཉིད་ཡིན་ན་ཡང་ཤེས་པ་གཞན་གྱིས་དུས་ན་བདེ་བ་ལ་སོགས་པའི་བདག་ཉིད་ལོག་པའི་ཕྱིར་རིག་པ་མ་ཡིན་ནོ། །རྣམ་པ་དང་བཅས་པའི་ཕྱོགས་ལ་ནི་ཤེས་པ་འབའ་ཞིག་ཁོ་ན་ཉིད་རིག་པར་བྱ་བ་ཡིན་གྱི་དོན་ནི་མ་ཡིན་པའི་ཕྱིར་རོ། །དེའི་ཕྱིར་ཤེས་པ་གཞན་གྱིས་ཀྱང་སྔར་ཞིག་པའི་རང་བཞིན་དེ་ནི་ཡུལ་དུ་བྱེད་པ་མ་ཡིན་གྱི། འོན་ཀྱང་བདག་གི་རང་བཞིན་ཉིད་ཡིན་ནོ། །རིག་པར་བྱ་བ་རང་གི་རྣམ་པ་ཡོད་པ་ལ་ཤེས་པས་སྒྲ་འགོང་ན་ཡང་བདེ་བ་ལ་སོགས་པའི་བདག་ཉིད་རིག་པར་བྱ་བ་མ་ཡིན་པ་མེད་པ་ལ་ནི་མ་ཡིན་ནོ། །ཤེས་པའི་རྣམ་པ་ལ་དེའི་རང་བཞིན་དུ་ཞེན་པའི་ཕྱིར་དམིགས་པ་དེ་ལ་ཡང་ཐ་སྙད་དུ་སྒྲ་འགོད་པར་འདོད་པར་འགྱུར་གྱི། དོན་དམ་པར་བཀོད་པ་ནི་མ་ཡིན་ནོ། །དེའི་ཕྱིར་འདས་པའི་བདེ་བ་ལ་སོགས་པ་ལ་དམིགས་པ་ཉིད་ཀྱིས་ཤེས་པ་སྒྲ་དང་འདྲེས་པར་
སྣང་བ་ནི་རྣམ་པར་རྟོག་པ་དང་བཅས་པར་འདོད་པར་འགྱུར་བ་ཡིན་ཏེ། རྣམ་པར་རྟོག་པ་ཅན་གྱིས་རྒྱུ་མཚན་ནི་སྒྲ་དང་འདྲེས་པར་འཛིན་པ་ཡིན་པ་ཉིད་ཀྱི་ཕྱིར་རོ། །རང་རིག་པ་ནི་སྒྲ་དང་མ་འདྲེས་པའི་དོན་རིག་པའི་ཕྱིར་རྣམ་པར་རྟོག་པ་མེད་པ་ཉིད་ཡིན་ནོ། །བརྡ་མི་ནུས་པ་འདི་ཉིད་ནི་རང་རིག་པར་རྟོག་པ་མེད་པར་སྒྲུབ་པར་ཉིད་ཀྱི་དོན་དུ་བཀོད་པ་ཡིན་ཏེ། བརྡ་མི་ནུས་པའི་རྣམ་པ་འདིས་ཀྱང་རང་རིག་པ་རྣམ་པར་རྟོག་པ་མེད་པར་བསྒྲུབས་པ་ཡིན་ནོ། །དེའི་ཕྱིར་ཞིག་ནས་རིང་དུ་ལོང་པའམ། ཤེས་པའི་དུས་ན་ཡོད་པ་ཡང་རུང་སྟེ་བདེ་བ་ལ་སོགས་པའི་རང་བཞིན་རང་རིག་པའི་ཡུལ་སྒྲ་དགོད་པར་རུང་བ་ན་ཤེས་པ་གཞན་གྱིས་རིག་པ་མ་ཡིན་ནོ་ཞེས་བྱ་བའི་དོན་འདིར་བཞེད་པ་ཡིན་གྱི། བདེ་བ་ལ་སོགས་པ་ལ་དམིགས་པའི་ཤེས་པ་མེད་པའི་ཕྱིར་རོ་ཞེས་བྱ་བའི་དོན་འདི་ནི་མ་ཡིན་ཏེ། དེ་ལྟར་གྱུར་ན་ནི་འདས་པའི་རང་བཞིན་ཞེས་སྨྲས་པ་དོན་མེད་པར་འགྱུར་རོ། །གཞན་གྱིས་ཀྱང་རིག་པ་མ་ཡིན་པའི་ཕྱིར་རོ་ཞེས་བྱ་བ་འདི་ཙམ་ཞིག་བརྗོད་པར་བྱ་བ་ཡིན་ནོ། །དེའི་ཕྱིར་བརྗོད་པ་དང་སྦྱོར་བར་ནུས་པ་མ་ཡིན་ནོ། །དེའི་ཕྱིར་དེ་ལྟར་རང་རིག་པའམ་ཤེས་པ་གཞན་གྱིས་བདེ་བ་ལ་སོགས་པའི་བདག་ཉིད་སོ་སོར་ངེས་པ་ལ་སྒྲ་དགོད་པ་མ་ཡིན་ནོ། །དེ་བཞིན་དུ་དགོས་པ་མེད་པའི་ཕྱིར་ཡང་དེ་ལ་སྒྲ་འགོད་པ་མ་ཡིན་ནོ་ཞེས་འཆད་པ་ནི་ཡང་འབྱུང་བ་མ་ཡིན་པ་རྗེས་སུ་འཇུག་པ་མ་ཡིན་པ་ཐུན་མོང་མ་ཡིན་པ་ལ་བརྡ་སྟེ། སྒྲ་ངེས་པར་སྦྱོར་བ་དོན་མེད་པ་སྟེ། དགོས་པ་མེད་པའི་ཕྱིར་རོ། །ཡང་ཞེས་བྱ་བ་འདི་ནི་རང་རིག་པ་ལ་བརྗོད་པ་སྲིད་པ་མ་ཡིན་པ་ཞེས་བྱ་བ་འདི་ཉིད་ལ་གཏན་ཚིགས་བསགས་པའོ། །ཚིག་ལེའུར་བྱས་པ་ལས་ནི་བརྗོད་པ་མེད་པར་བསྒྲུབ་པར་བྱ་བ་ལ་བརྡར་མི་ནུས་པ་གཏན་ཚིགས་སུ་བཀོད་པ་ཡིན་ལ་གཞན་འདི་ཡང་འབྲེལ་པ་ལས་བརྗོད་པ་ཡིན་ནོ། །བརྡ་མི་ནུས་པ་ཉིད་བསྒྲུབས་ནས་རྣམ་པར་རྟོག་པ་མེད་པ་ཉིད་དུ་དཀྱུས་མ་མཇུག་བསྡུ་བའི་ཕྱིར་བཤད་པ། དེའི་ཕྱིར་ཏེ་བརྡ་བྱ་བར་མི་ནུས་པའི་གཏན་ཚིགས་ཀྱི་ཕྱིར་བདེ་བ་ལ་སོགས་པ་དེ་དག་གི་བདག་རིག་པ་རིག་པར་བྱེད་པ་ཉིད་ནིའོ། །བརྗོད་པ་ནི་སྨྲ་བར་བྱེད་པའི་སྒྲ་ཡིན་གྱི། བསྟན་བཅོས་གཞན་ལས་གྲགས་
པ་ནི་མ་ཡིན་ཏེ། ཇི་སྐད་དུ། དོན་དང་ལྷན་ཅིག་ཏུ་བྱས་པའི་སྒྲ་རྣམ་བརྗོད་པའོ་ཞེས་བཤད་པ་ཡིན་ནོ། །དེ་དང་རྗེས་སུ་འབྲེལ་བའི་སྣང་བའོ། །དེ་གང་ལ་ཡོད་པ་ནི་ཅན་ཏེ་རིག་པ་ནི་དེ་ལྟ་བུར་གྱུར་པ་མ་ཡིན་ནོ། །དེ་ཉིད་རྣམ་པར་འབྲེལ་པ་བཤད་པ་ལ། བརྡར་མི་ནུས་པའི་ཕྱིར་ན་ཞེས་བྱ་བ་ནི་དེའི་ཕྱིར་གྱི་སྒྲའི་འབྲེལ་པའོ། །དེས་ན་སྦྱོར་བ་ནི་གང་ཞིག་སྨྲ་བ་གང་གིས་བརྗོད་པར་བྱ་བ་བརྡ་ངེས་པར་མ་སྦྱར་བ་དེ་ནི་དེས་ཁྱད་པར་ཅན་དུ་གཟུང་བར་བྱས་པ་མ་ཡིན་ཏེ། དཔེར་ན་བ་ལང་གི་སྒྲས་རྟ་བཞིན་ནོ། །བདེ་བ་ལ་སོགས་པའི་བདག་ཉིད་ཀྱང་སྒྲ་ཐམས་ཅད་ཀྱིས་བརྗོད་པར་བྱ་བ་ཉིད་དུ་བརྡ་ངེས་པར་མ་སྦྱར་བ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མེད་པའོ། །འདི་ལྟར་བརྡའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཕྱིར་སྒྲའི་ཁྱད་པར་ཅན་དུ་འཛིན་པ་ནི་རང་གི་ངོ་བོ་ཉིད་མ་ཡིན་ཏེ། དེའི་ཕྱིར་བརྡ་འཛིན་པས་ཁྱབ་པ་ཡིན་པའི་ཕྱིར་འབྲེལ་པ་གྲུབ་བོ་ཞེས་ལན་མང་དུ་གཏན་ལ་ཕབ་ཟིན་ཏོ། །གང་དང་གང་ལ་བརྗོད་པ་དང་མ་འབྲེལ་པ་དེ་ལ་འདི་སྐད་ཅེས་བྱའོ། །རིག་པ་ཅན་རྣམས་ན་རེ་འདིས་རིག་པར་བྱེད་པའི་ཕྱིར་རིག་པའི་རང་བཞིན་གང་ལ་ཡོད་པ་དེ་དག་སྟེ། དེ་ལྟར་གྱུར་པ་མ་ཡིན་པའོ་ཞེས་ཟེར་བའོ། །འདི་སྐད་དུ་གཞན་རིག་པར་བྱེད་པ་ཡིན་ན་ནི་ཤུགས་ཀྱིས་བདག་ཉིད་རིག་པར་འགྱུར་བ་ཡིན་ན། འདི་དག་ནི་རིག་པའི་རང་བཞིན་མ་ཡིན་ནོ་ཞེས་བརྗོད་པ་ཡིན་ནོ། །འོ་ན་སིམ་པ་ལ་སོགས་པ་རིག་པར་འགྱུར་བ་ཇི་ལྟར་ཞེ་ན། སྨྲས་པ་ཤེས་པ་གཞན་གྱིས་རིག་པར་བྱ་བ་ཡིན་ནོ། །དེས་ན་བུམ་པ་ལ་སོགས་པ་ལྟར་གཟུང་བ་ནི་ཡིན་གྱི་འཛིན་པ་ནི་མ་ཡིན་ནོ། །དེ་དག་བུམ་པ་ལ་སོགས་པ་བཞིན་དུ་ཕྱི་རོལ་གྱི་རང་བཞིན་ཉིད་དུ་སྣང་བར་ཐལ་ལོ་ཞེ་ན། དེ་ནི་མི་རིགས་ཏེ། རང་གི་ཕྱིར་བདེ་བ་ལ་སོགས་པ་དང་ཤེས་པ་བདག་ཉིད་གཅིག་ལ་འདུ་བ་ཡིན་པ་དེས་ན་ཐ་དད་པ་མེད་པར་སྣང་བའི་ཕྱིར་རོ། །འདི་ཉིད་བསྟན་པའི་ཕྱིར་ཤེས་པ་ཁྱད་པར་དུ་བྱེད་དེ། གཅིག་ཀྱང་དེ་ཡིན་ལ་དོན་ཀྱང་ཡིན་པ་དེར་འབྲེལ་པའི་ངང་ཚུལ་གང་ཡིན་པ་སྟེ་ཤེས་པ་དེས་སོ། །དེ་དག་གིས་ཞེས་བྱ་བ་ནི་རྣམ་པར་འཇོག་པ་པོ་ཉིད་ཡིས་འབྲེལ་
པ་ཅན་ཉིད་དོ། །གང་གི་ཕྱིར་དེ་དག་གིས་དངོས་པོ་དེ་དག་རྣམ་པར་གཞག་པས་ན་རང་གི་བདག་ཉིད་དང་རྣམ་པར་འབྲེལ་པ་བྱེད་པ་ཡིན་ཏེ། དེས་ན་དེ་དང་དེ་མ་ཡིན་པའི་རང་བཞིན་ཅན་གྱི་དངོས་པོ་ནི་དེ་དག་གི་ཡིན་ནོ་ཞེས་འབྲེལ་པ་ཅན་གྱི་དངོས་པོ་ལ་ལྟོས་ནས་འབྲེལ་པ་ཅན་ཉིད་སྟོན་པ་ཡིན་ནོ། །དེ་ཞེས་བྱ་བ་ནི་སཱ་ལུའི་མྱུ་གུའོ། །དེ་མིན་ཞེས་བྱ་བ་ནི་ནས་ཀྱི་མྱུ་གུའོ། །དེ་དང་དེ་མིན་བདག་གིས་རང་བཞིན་སཱ་ལུའི་མྱུ་གུ་དང་ནས་ཀྱིས་མྱུ་གུ་དག་སྟེ། དེ་གང་དག་ལ་ཡོད་པ་དེ་དག་ནི་དེ་དང་དེ་མིན་རང་བཞིན་ཅན་ནོ། །སཱ་ལུའི་མྱུ་གུ་གཅིག་དང་རང་བཞིན་འདྲ་བའི་སཱ་ལུའི་མྱུ་གུ་གཞན་བརྗོད་པ་ཡིན་ནོ། །དེ་བཞིན་དུ་སཱ་ལུའི་མྱུ་གུ་གཅིག་དང་རང་བཞིན་མི་འདྲ་བར་གནས་ཀྱི་མྱུ་གུ་གཞན་ནི་དེ་མིན་རང་བཞིན་ཅན་དུ་བརྗོད་པ་ཡིན་ནོ། །སཱ་ལུའི་མྱུ་གུ་གཅིག་ལས་ཐ་དད་པར་མཚུངས་པ་ལས་སཱ་ལའི་མྱུ་གུ་ནི་རང་བཞིན་དང་བཅས་པ་ཡིན་ལ་ནས་ཀྱི་མྱུ་གུ་ནི་རང་བཞིན་མེད་པ་ཡིན་ནོ། །དེ་དང་དེ་མ་ཡིན་པ་ནི་དེ་དེ་མིན་ནོ། །དེ་དག་གི་རང་བཞིན་གང་ཡིན་པ་དེ་དག་ནི་དེ་དེ་མིན་དངོས་ཏེ། སཱ་ལུའི་མྱུ་གུ་དང་ནས་ཀྱི་མྱུ་གུ་ལ་སོགས་པ་གང་ཡིན་པའོ། །དེ་དག་གི་རྒྱུ་ནི་སཱ་ལུའི་དང་ནས་ཀྱི་ས་བོན་ལ་སོགས་པ་གང་ཡིན་པའོ། །དེ་དག་ལས་སྐྱེས་པ་ནི་དེ་དེ་མིན་དངོས་རྒྱུ་ལས་སྐྱེས་སོ། །དེའི་རང་བཞིན་གཅིག་གི་རྒྱུ་གང་ཡིན་པ་དེ་དང་འདྲ་བ་ལས་སྐྱེས་པ་ནི་དེའི་རྒྱུ་ལས་སྐྱེས་པ་ཡིན་ཏེ། དེ་བཞིན་དུ་དེའི་རང་བཞིན་མ་ཡིན་པ་ལ་ཡང་སྦྱར་བར་བྱའོ། །དེ་ལ་དོན་ནི་གང་གི་ཕྱིར་དེ་དག་གི་དངོས་པོ་ཡང་དེ་དང་དེ་མ་ཡིན་པའི་རང་བཞིན་གྱི་རྒྱུ་ལས་སྐྱེས་པར་འགྱུར་བ་ངེས་ན་དེ་དང་དེ་མ་ཡིན་པའི་རང་བཞིན་དུ་འདོད་པ་ཡིན་ནོ་ཞེས་བྱ་བ་འདི་ཡིན་ནོ། །དེས་ན་ཞེས་བྱ་བ་ནི་གང་གི་ཕྱིར་དེའི་ཕྱིར་རོ། །བདེ་བ་ལ་སོགས་པ་ཅིའི་ཕྱིར་ཏེ་རྒྱུ་ཅིས་ཤེས་མ་ཡིན་ཏེ། བློའི་རང་བཞིན་མ་ཡིན། གང་གི་ཕྱིར་རྣམ་པར་ཤེས་པ་ལས་ཐ་དད་པ་མེད་པའི་རྒྱུས་བསྐྱེད་པ་གང་ཡིན་པ་དེ་ནི་བློའི་རང་བཞིན་དུ་རིགས་ཏེ། དཔེར་ན་དེ་དག་གི་དངོས་པོ་རྣམ་པར་གཞག་པ་བཞིན་ནོ་ཞེས་དགོངས་པའོ། །ཚིག་ལེའུར་བྱས་པའི་དོན་ཉིད་རྣམ་པར་འགྲེལ་པར་བཤད་པ། དེ་དག་ཀྱང་ཞེས་བྱ་བ་ནི་རིག་པ་ཅན་དག་གོ །དེ་དང་དེ་མ་ཡིན་
པ་ནི་དེ་དང་དེ་མ་ཡིན་པ་དག་སྟེ། སཱ་ལུའི་མྱུ་གུ་དང་ནས་ཀྱི་མྱུ་གུ་དག་གོ །དེ་དག་ཉིད་ཀྱིའམ་རང་གི་ངོ་བོ་དེ་དག་ཉིད་ག་ལ་ཡོད་པ་དེ་རྣམས་ཀྱིའོ། །དེ་རང་བཞིན་ཏེ་ཡོད་པས་ན་དེའི་རང་བཞིན་ཅན་ནོ། །དེ་བཞིན་དུ་དེ་མ་ཡིན་པའི་རང་བཞིན་ཅན་ཡང་ངོ༌། །དངོས་པོ་རྣམས་ཀྱི་དེའི་རང་བཞིན་ཅན་དང་དེའི་རང་བཞིན་ཅན་མ་ཡིན་པ་ཅན་དེ་ལ་བརྒལ་ཞིང་བརྟགས་པ་ན་སྟེ་བརྩད་ཅིང་དྲིས་ནའོ། །རྒྱུའི་རང་བཞིན་ནི་ངོ་བོ་ཉིད་དེ་འབྲས་བུ་ངེས་པ་སྐྱེད་པར་རུང་བའི་མཚན་ཉིད་ལ་བརྟེན་ཏེ། འབྲས་བུ་ངེས་པར་བསྐྱེད་པའི་རྒྱུ་ཉིད་དུ་ཉེ་བར་རྟེན་ཏོ། །ཡང་ཇི་ལྟར་རྟེན་ཞེ་ན། ངག་གི་དོན་གྱི་བདག་ཉིད་རྟེན་པའི་རྣམ་པ་བསྟན་པའི་ཕྱིར་བཤད་པ། དེའི་རང་བཞིན་གང་ཡིན་པ་དེའི་རྒྱུ་དེ་ལས་སྐྱེས་པ་ནི་དེ་ཉིད་ཀྱིའམ་རང་བཞིན་དེ་ཉིད་གང་ཡིན་པ་དེ་དག་ནི་དེའི་རང་བཞིན་ནོ། །དེ་བཞིན་དུ་དེའི་རང་བཞིན་མ་ཡིན་པའི་རྒྱུ་ལས་སྐྱེས་པ་ནི་དེའི་རང་བཞིན་མ་ཡིན་པ་ཞེས་བྱ་བ་འདི་ལ་ཡང་སྦྱར་བར་བྱའོ་ཞེས་བྱ་བ་ལྟ་བུ་ཞེས་བྱ་བའི་སྒྲ་ནི་འདིར་ཡང་སྦྱར་ཏེ་ངེས་ན་དོན་གྱི་འདི་ཡིན་ཏེ་ཞེས་བྱ་བ་དེ་ལྟར་སྤྱིར་རྒྱུ་ལས་འབྲས་བུའི་རང་གི་ངོ་བོ་ངེས་པར་སྨྲ་བ་ཡིན་ནོ། །དེ་ལྟར་རྒྱུའི་རང་བཞིན་ལ་རྟེན་པ་སྤྱིའི་རྣམ་པས་བརྗོད་ནས་ཁྱད་པར་དུ་བསྟན་པའི་ཕྱིར་དཔེར་ན་ཞེས་གསུངས་སོ། །འདིས་ནི་སྤྱིར་བརྗོད་པའི་དོན་གྱི་ཡུལ་ཉེ་བར་བསྟན་པ་ཡིན་ཏེ། སྤྱིར་བརྗོད་པའི་དོན་ལྟ་བུར་ཇི་ལྟར་བལྟ་བར་བྱ་ཞེས་འདྲ་བའི་སྐབས་སུ་དཔེར་ན་ཞེས་ཉེ་བར་བླངས་པ་ཡིན་ཏེ། དོན་འདི་ལ་འདི་ལྟ་བུ་ནི་དེ་ཡིན་ནོ་ཞེས་བྱའོ། །སཱ་ལུའི་ས་བོན་ལ་སོགས་པ་གང་ཡིན་པ་དེ་དག་ལས་སོ། །དེ་ལས་སྐྱེས་པ་གང་དག་ཡིན་པ་དེ་དག་ནི་དེས་བསྐྱེད་པ་སྟེ་སཱ་ལུའི་ས་བོན་ལ་སོགས་པས་བསྐྱེད་པའི་རང་བཞིན་ནོ། །སཱ་ལུའི་ས་བོན་ལ་སོགས་པ་དེ་དག་ལས་གཞན་དུ་གྱུར་པ་གང་ཡིན་པ་དེ་དག་ལས་ནི་གཞན་ཏེ། རང་བཞིན་མི་འདྲ་བ་སྐྱེ་བ་ཡིན་ནོ། །དཔེར་ན་ནའི་སྒྲ་ནི་ཇི་ལྟར་འདིར་བསྟན་པ་དེ་བཞིན་དུ་ཐམས་ཅད་དུ་བལྟ་བར་བྱའོ་ཞེས་ཉེ་བར་སྟོན་པར་བྱེད་པའི་དོན་ཏོ། །ལྟ་བུའི་སྒྲ་ནི་དེ་ལྟར་གྱི་དོན་ཏེ། །སྤྱིར་བརྗོད་པ་ནི་དེ་ལྟར་མཐོང་པའི་ཁྱད་པར་ཕ་རོལ་ལ་སྟོན་པའོ། །དེ་ལྟར་དེའི་ཕྱིར་དེ་དག་རྒྱུའི་རང་བཞིན་ལ་བརྟེན་པ་ཡིན་ནོ། །ཡང་ཇི་ལྟར་ན་རྒྱུའི་རང་བཞིན་ལ་བརྟེན་
ནས་འབྲས་བུ་རྣམ་པར་འཇོག་ཅེ་ན། གློ་བུར་བ་ཞེས་བྱ་བ་ལ་སོགས་པ་སྨོས་སོ། །གལ་ཏེ་འབྲས་བུའི་དབྱེ་བ་རྒྱུའི་རང་བཞིན་གྱིས་བྱས་པར་མ་གྱུ་རྣ་ནི་ཚིག་ལོ་བུར་འབྱུང་བ་ནི་གློ་བུར་བ་སྟེ། གློ་བུར་གྱི་སྒྲའི་ཚིག་ཕྲད་ནི་རྒྱུ་མཚན་མེད་པར་འབྱུང་བའི་དོན་ཏེ། རྒྱུ་མེད་པའོ། །དེའི་དངོས་པོ་ནི་དེ་ཉིད་དེ། དེར་ཐལ་བར་འགྱུར་རོ། །དངོས་པོ་དེ་དང་གཞན་ལས་ཀྱང་སྐྱེ་བ་ཡིན་ན་རྒྱུ་ངེས་པ་མེད་པ་ཅན་དུ་འགྱུར་གྱི་རྒྱུ་མེད་པ་ཅན་དུ་ནི་མི་འགྱུར་བ་མ་ཡིན་ནམ། དེས་ན་རྒྱུའི་དབྱེ་བ་ལས་འབྲས་བུའི་དབྱེ་བ་ཁས་མི་ལེན་ན་རྒྱུ་མེད་པ་ཉིད་དུ་ཐལ་བར་འགྱུར་ཞེས་ཅིའི་ཕྱིར་བརྗོད་ཅེ་ན། སྨྲས་པ། རྒྱུ་ངེས་པ་ཅན་ཉིད་ནི་རྒྱུ་མེད་པ་ཉིད་ཡིན་ཏེ། འདི་ལྟར་གང་ཞིག་གང་མེད་པར་འབྱུང་བ་དེ་ནི་དེའི་རྒྱུ་ཅན་མ་ཡིན་ཏེ། དཔེར་ན་དུ་བ་ཆུའི་རྒྱུ་ཅན་མ་ཡིན་པ་བཞིན་ནོ། །དེ་བཞིན་དུ་དུ་བ་མེད་དང་དངོས་པོ་གཞན་དེ་མེད་ཀྱང་འབྱུང་བའི་ཕྱིར་རྒྱུ་མེད་པ་ཅན་ཉིད་དོ། །གཞན་ཡང་ཐ་དད་པ་དང་ཐ་དད་པ་མེད་པ་ལས་ལྡོག་པའི་དངོས་པོའི་རང་བཞིན་ངོ་བོ་ནི་ཅུང་ཟད་ཀྱང་མེད་པའི་ཕྱིར་དེ་དག་རྒྱུ་མེད་པ་ཅན་ཉིད་ན་སྣ་ཚོགས་རྒྱུ་མེད་པ་ཅན་ཉིད་དུ་འགྱུར་བ་དེས་ན་རྒྱུ་མེད་པ་ཉིད་དུ་ཐལ་བར་འགྱུར་ལ། དེ་ལྟར་གྱུར་ན་ཡང་ཡུལ་དང་དུས་དང་རང་བཞིན་དང་དེ་དག་རྣམས་ཀྱི་ངེས་པར་དེ་མེད་པར་འགྱུར་བ་དེའི་ཕྱིར་ན་རྒྱུའི་རང་བཞིན་བརྟེན་པར་བྱའོ་ཞེས་འབྲེལ་ཏེ་གང་གི་ཕྱིར་དངོས་པོ་རྒྱུ་མེད་པ་ཅན་ཉིད་ཡིན་ན་ནི་ཡུལ་དང་དུས་ལ་ལྟོས་པར་ཡང་མི་འགྱུར་ཏེ། རྒྱུའི་རང་བཞིན་ནི་ལྟོས་པར་བྱ་བ་ཉིད་ཡིན་པའི་ཕྱིར་རོ། །གལ་ཏེ་མངོན་པར་འདོད་པའི་ཡུལ་དང་དུས་དག་སྤངས་ནས་གཞན་དག་ཏུ་ཡང་འདུག་པ་ཡིན་ན་དེ་ལྟ་ན་ནི་དེར་ངེས་པ་མེད་པས་དེ་ལ་མི་ལྟོས་པར་འགྱུར་བ་ཡིན་ན། ད་ལྟ་ནི་ཡུལ་དང་དུས་གཞན་སྤངས་ནས་མངོན་པར་འདོད་པའི་ཡུལ་དང་དུས་སུ་ངེས་པས་དེ་ལ་ལྟོས་པ་དང་བཅས་པ་ཡིན་ལ་དེ་ལ་ལྟོས་པ་དང་བཅས་པ་ཉིད་ཀྱང་དེའི་རྒྱུ་ཅན་ཉིད་ཡིན་ནོ། །ཁ་ཅིག་གལ་ཏེ་དངོས་པོ་རྒྱུ་མེད་པ་ཡིན་ན་དེའི་ཚེ་ཆུ་མེའི་རང་བཞིན་ནམ་མེ་ཆུའི་རང་བཞིན་དུ་ཅིའི་ཕྱིར་མི་འགྱུར་ཞེས་རང་བཞིན་ངེས་པ་མེད་པར་སྟོན་པར་བྱེད་པ་དེ་ནི་རིགས་པ་མ་ཡིན་ཏེ། དེ་ལྟར་གྱུར་ན་ནི་ཆུའི་རང་བཞིན་གྱི་མེ་ནི་ཆུ་
ཉིད་ཡིན་པར་འགྱུར་རོ། །དེས་ན་བརྒལ་ཞིང་བརྟག་པའི་དོན་ནི་མེའི་ཕྱོགས་སུ་ཆུ་ཉིད་སྐྱེ་བར་ཅིའི་ཕྱིར་མི་འགྱུར་ཞེས་བྱ་བར་འདིར་འགྱུར་ལ་དོན་འདི་ཡང་ཡུལ་ངེས་པ་མེད་པ་ཉིད་ཀྱིས་རྟོགས་པ་ཡིན་ནོ། །གལ་ཏེ་གཅིག་ཉིད་སྣ་ཚོགས་སུ་ཅིའི་ཕྱིར་མི་འགྱུར་ཞེས་བྱ་བའི་དོན་འདི་ཡིན་ན་ཡང་འདྲི་བ་འདི་ཡང་དུ་མའི་དངོས་པོ་རྒྱུ་མེད་པར་སྨྲ་བ་ལ་མི་འཐད་དེ། གང་གི་ཕྱིར་དེ་འདི་སྐད་དུ་དུ་མ་ཉིད་ནི་རྒྱུ་མེད་པ་ཡིན་གྱི། གཅིག་ནི་མ་ཡིན་ནོ་ཞེས་སྨྲ་བ་དེ་ལ་བརྒལ་ཤིང་བརྟག་པ་འདི་ཇི་སྐད་ཅེས་བྱ་བ་ཡིན། དེས་ན་འདིར་དོན་འདི་ཡིན་ཏེ། ཐ་སྙད་དུ་བྱ་བའི་དངོས་པོ་ཁ་དོག་དང་དབྱིབས་ཀྱི་ཁྱད་པར་ཅན་ཉིད་ཚོགས་པ་གཞན་ལ་གནས་པའི་ཡོན་ཏན་དང་འབྲེལ་པར་འགྱུར་ཏེ། དཔེར་ན་ཁབ་ལོང་དང་ཨ་རུ་ར་ལ་སོགས་པ་རྣམས་ལྕགས་ལེན་པ་དང་འཁྲུ་བར་བྱེད་ནུས་པ་དེ་བཞིན་དུ་བུམ་པ་ལ་སོགས་པ་རྣམས་ཀྱང་ཅིའི་ཕྱིར་མི་འགྱུར་ཡང་དཔེར་ན་མིག་གི་ཤེས་པས་གཟུགས་ཤེས་པར་བྱ་བ་དེ་བཞིན་དུ་སྒྲ་འཛིན་པའི་རྣ་བའི་ཤེས་པས་ཀྱང་གཟུང་བར་འགྱུར་ལ། དེ་བཞིན་དུ་སྒྲ་ཡང་རང་གི་རང་བཞིན་དུ་རྣམ་པར་གནས་པའི་མིག་གི་ཤེས་པས་གཟུང་བར་འགྱུར་ཏེ། དེ་ལྟ་ན་རྣམ་པར་ཤེས་པ་རྣམས་ཀྱི་ཡུལ་སོ་སོར་ངེས་པར་འཛིན་པ་ཡང་འཐད་པར་མི་འགྱུར་བ་ཉིད་དོ། །དེ་བཞིན་དུ་ལྷན་ཅིག་སྤྱོད་པའི་རྫས་གཞན་དང་འབྲེལ་པ་ངེས་པ་ཡང་མི་འཐད་དེ། ཇི་ལྟར་ཙནྡན་དུ་མངོན་པར་འདོད་པའི་ཁ་དོག་དང་དབྱིབས་ཉིད་དྲོ་བའི་རེག་པ་དང་ལྷན་ཅིག་རྒྱུ་བར་འགྱུར་ལ་མེ་ཡང་གྲང་བ་དང༌། འོ་ཐུག་རོ་མེད་པ་དང༌། ཆུ་མངར་བ་དང་རྗེས་སུ་འབྲེལ་པར་འགྱུར་རོ་ཞེས་དེ་ལྟར་རང་བཞིན་ངེས་པ་རྣམ་པ་གསུམ་འཐད་པར་མི་འགྱུར་རོ། །དེའི་ཕྱིར་གཞན་གྱིས་ཀྱང་འབྲས་བུའི་རབ་ཏུ་དབྱེ་བ་འདི་རྒྱུའི་རང་བཞིན་ཁོ་ནས་བྱས་པར་ཁས་བླང་དོགས་སོ། །ཚིགས་སུ་བཅད་པ་ཕྱེད་གོང་མ་བཤད་ནས་ཕྱེད་འོག་མ་བཤད་པར་བཞེད་པས་བདེ་བ་ལ་སོགས་པ་དང་ཤེས་པ་རྒྱུ་ཐ་མི་དད་པར་སྦྱར་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་སོ། །འདི་ལ་ཡང་རྒྱུ་ཐ་དད་པའི་རྒྱུ་ནི་ཉེ་བར་ལེན་པའི་རྒྱུ་ཡིན་ཏེ། དེས་ན་བློ་དང་བློ་མ་ཡིན་པའི་རྒྱུད་རྣམ་པར་གནས་པའི་རྒྱུ་ཉེ་བར་ལེན་པའི་རྒྱུ་
ཉིད་ཐ་མི་དད་པར་བསྟན་པར་བྱ་བ་ཡིན་མོད་ཀྱི། འོན་ཀྱང་བདེ་བ་ལ་སོགས་པ་དང་ཤེས་པའི་ཉེ་བར་ལེན་པ་གཅིག་པ་ཉིད་ལ་དང་པོར་རྩོད་པ་དེ་ནས་འཆད་པར་འགྱུར་བ་ཁྱད་པར་མེད་པར་རྒྱུ་མཚུངས་པར་བསྒྲུབས་པའི་ཤུགས་ཉིད་ཀྱིས་ཉེ་བར་ལེན་བ་དང་ཐ་དད་པ་མེད་པར་བསྟན་པ་བྱས་པར་འགྱུར་རོ་སྙམ་དུ་བསམས་ནས། ཚོགས་པ་ཉིད་ཐ་མི་དད་པར་སྟོན་པ་ཡིན་ནོ། །བདེ་བ་ལ་སོགས་པ་གང་ལ་ཡུལ་མེད་པར་མི་སྐྱེ་བ་གང་ཡིན་པ་དེ་དག་སྟེ། ཡུལ་མེད་ན་མི་འབྱུང་བ་ཞེས་བྱ་བའི་དོན་ཏོ། །ཡིད་ཀྱི་བདེ་བ་ལ་སོགས་པ་ཡུལ་མེད་ཀྱང་སྐྱེ་བ་ཉིད་མ་ཡིན་ནམ་ཞེས་དོགས་པ་ལ། བདག་ཉིད་ཇི་ལྟ་བའི་ཞེས་བྱས་པས་ཁྱད་པར་ཅན་གྱི་བདེ་བ་ལ་སོགས་པ་ཉིད་ལྡོག་པའི་སྒོ་ནས་འབྲས་བུ་ཉིད་དུ་སྟོན་པར་བྱེད་དོ། །གང་ཞིག་གང་གི་བདག་ཉིད་ཡིན་པ་ནི་བདག་ཉིད་ཇི་ལྟ་བུའོ། །འདི་སྐད་བརྗོད་པ་ཡིན་ཏེ། ཁྱད་པར་ཅན་གྱི་གཟུགས་ལ་སོགས་པ་ལ་སོ་སོར་ངེས་པའི་བདེ་བ་ལ་སོགས་པ་རྣམས་ཀྱི་ཡུལ་དེ་དང་དེ་དག་ནི་རྒྱུར་གྱུར་པའི་བདག་ཉིད་ཡིན་ཏེ། དཔེར་ན་པི་ཝང་གི་སྒྲ་ཐོས་པ་ལས་བྱུང་བའི་ཡུལ་ནི་པི་ཝང་གི་སྒྲ་ཡིན་པ་བཞིན་ནོ། །དེ་ལ་བདག་ཉིད་ཇི་ལྟ་བའི་ཡུལ་དང་རྗེས་སུ་འབྲེལ་བའི་བདེ་བ་ལ་སོགས་པ་གང་ཡིན་པ་རྣམས་བདག་ཉིད་ཀྱི་ཡུལ་དེ་ཚོགས་པ་མེད་པ་སྟེ། རུང་བའི་ཡུལ་དུ་མི་གནས་ན་མི་འབྱུང་བའི་རྒྱུའི་ཕྱིར་རོ། །དེའི་ཕྱིར་དེ་ལྟར་ཁྱད་པར་ཅན་གྱི་ཡུལ་ཅན་དུ་རབ་ཏུ་གྲུབ་པའི་བདེ་བ་ལ་སོགས་པ་རྣམས་ལྡོག་པའི་སྒོ་ནས་དེའི་འབྲས་བུ་ཉིད་དུ་བསྟན་པ་ཡིན་ནོ། །གང་ལ་དབང་པོ་ཡོད་པ་མ་ཡིན་པ་དེ་དག་སྟེ། དེ་ལྟ་བུར་གྱུར་པ་ལ་ཡང་འབྱུང་བ་མ་ཡིན་ནོ། །ཡང་ཞེས་བྱ་བ་ནི་བསགས་པའོ། །གཟུགས་ལ་སོགས་པ་ལ་འབྲས་བུའི་དངོས་པོར་རྗེས་སུ་འབྲེལ་པ་རྗེས་སུ་འཇུག་པ་དེ་གང་དག་ལ་ཡོད་པ་དེ་དག་ལ་དེ་སྐད་ཅེས་བྱའོ། །དེ་རྣམས་ནི་བདེ་བ་ལ་སོགས་པའི་རྒྱུ་གཟུགས་ལ་སོགས་པ་དེའི་ཡུལ་ཅན་གྱི་དབང་པོ་གང་ཡིན་པ་དེ་དག་སྟེ། དེ་ཡང་ཡིན་ལ་དབང་པོ་ཡང་ཡིན་པ་དག་སྟེ། དེ་དག་དང་བྲལ་བ་སྟེ་མེད་པ་ལ་ཞེས་མེད་པའི་ཕྱིར་རོ། །འདི་ནི་དབང་པོ་མེད་པ་ཉིད་ལ་འགོག་པའི་གཏན་ཚིགས་སོ། །དབང་པོ་ཡང་དེ་ཡིན་ལ་ཉམས་པ་མེད་
པ་ཡང་ཡིན་པ་དེ་ཉེ་བར་གནས་པ་ནི་ཡོད་པ་དང་མངོན་དུ་ཕྱོགས་པ་སྟེ། མངོན་དུ་ཕྱོགས་པར་མ་གྱུར་ན་ནི་ལྟ་བར་འདོད་ཀྱང་མིག་གིས་གཟུགས་མི་མཐོང་བའི་ཕྱིར་རོ། །དེས་ན་མངོན་དུ་ཕྱོགས་ལ་ཡང་ཉེ་བར་གྱུར་པ་ཡིན་ནོ། །དེ་ལྟར་གྱུར་པ་ན་སྔར་དབང་པོ་མེད་པ་ན་མ་མཐོང་བ་ལས་ཡང་སྟེ་ཕྱིས་མཐོང་བའི་ཕྱིར་རོ། །དེས་ན་གཏན་ཚོགས་འདི་གཉིས་ཀྱིས་ནི་གཟུགས་ལ་སོགས་པ་ལ་བརྟེན་པའི་བདེ་བ་ལ་སོགས་པ་མིག་གི་རྗེས་སུ་འགྲོ་ལྡོག་གི་རྗེས་སུ་བྱེད་པར་བསྟན་ཏོ། །རྗེས་སུ་འགྲོ་བའི་ཚིག་འདི་ནི་སྔ་མ་དང་ཕྱི་མའི་རྒྱུ་ཉིད་སྟོན་པར་ཡང་སྦྱར་བར་བྱ་སྟེ། ལྡོག་པ་ཙམ་ཉིད་བསྟན་པའི་ཕྱིར་རོ། །ཡང་ན་མ་མཐོང་བའི་མིག་གི་རང་བཞིན་དེའི་ཤེས་པ་གཞན་དུ་མི་འཐད་པས་རྣམ་པར་འཇོག་པ་ཡིན་གྱི་བདེ་བ་ལ་སོགས་པ་རྣམས་དེ་མེད་ན་མི་འབྱུང་བར་གོ་ཇི་ལྟར་ཞེས་དོགས་པ་ལ། རྗེས་སུ་འགྲོ་བ་བརྗོད་པ་ཡིན་ཏེ། ཇི་ལྟར་དཔེར་ན་ཡུལ་དང་ཡིད་ལ་བྱེད་པ་དག་ལས་ཐ་དད་པའི་མིག་ཤེས་པའི་རྒྱུ་ཉིད་དུ་རྣམ་པར་གཞག་པ་དེ་བཞིན་དུ་བདེ་བ་ལ་སོགས་པའི་རྒྱུར་ཡང་གཞག་པར་ནུས་པ་ཡིན་ཏེ། གང་གི་ཕྱིར་བདེ་བ་ལ་སོགས་པ་རྣམས་དེ་ཡོད་ན་ཡོད་པ་དང༌། མེད་ན་མེད་པ་དེའི་ཕྱིར་དེ་དག་རྒྱུ་ཡང་མིག་ཡིན་ནོ་ཞེས་གཉི་ག་བསྟན་ཏོ། །བདེ་བ་ལ་སོགས་པ་གང་དག་སྐྱེ་བ་ལ་ཡིད་ལ་བྱེད་པ་མེད་པ་སྟེ་ཡིད་ལ་བྱེད་པ་ཡོད་པ་མ་ཡིན་པ་མ་ཡིན་པའོ། །གཉི་ག་ནི་ཡུལ་དང་དབང་པོའོ། །ཚོགས་པ་ནི་ཡུལ་རུང་བའི་ཡུལ་ན་གནས་པ་དང་ཉམས་པ་མེད་པའི་དབང་པོ་མངོན་དུ་ཕྱོགས་པའོ། །གལ་ཏེ་གཉིད་ལོག་པའི་མིག་གི་དབང་པོ་མངོན་དུ་ཕྱོགས་པ་མ་ཡིན་ཡང་དབང་པོ་གཞན་དག་ནི་མངོན་དུ་ཕྱོགས་པ་ཁོ་ནའོ། །ཡང་འགའ་ཞིག་གི་ནི་མིག་ཀྱང་མངོན་དུ་ཕྱོགས་པ་ཉིད་ཡིན་ཏེ། འགའ་ཞིག་མིག་གི་འབྲས་བུ་གཡོ་བ་མེད་པར་མངོན་དུ་གྱུར་པའི་ཡུལ་ལ་འཇུག་བཞིན་དུ་གཉིད་ལོག་པའི་ཕྱིར་རོ། །དེ་ལ་གཉི་ག་ཚོགས་ཀྱང་ངོ༌། །གཉིད་ནི་གཉིད་དོ། །དེ་ལ་སོགས་པ་མྱོས་པ་དང་བརྒྱལ་བ་ལ་སོགས་པ་གང་ཡིན་པ་དེས་བསླད་པ་སྟེ། འཁྲུལ་པར་གྱུར་ཅིང་དབང་པོའི་ཤེས་པ་བསྐྱེད་པའི་ནུས་པ་ཉམས་པའི་བློ་གང་ལ་ཡོད་བ་དེ་ལ་དབང་པོ་ལས་སྐྱེས་པའི་
བདེ་བ་ལ་སོགས་པ་མེད་པའི་ཕྱིར་རོ། །དེས་ན་བདེ་བ་ལ་སོགས་པ་ཡིད་ལ་བྱེད་པ་ལ་ལྟོས་པ་ཅན་ཞེས་ཁོང་དུ་ཆུད་པ་ཡིན་ནོ། །གང་ཡང་དབང་པོ་ལས་སྐྱེས་པའི་བདེ་བ་ལ་སོགས་པ་ལ་བརྗོད་པའི་རྒྱུའི་ཚོགས་པ་འདི་ནི། རྣམ་པར་ཤེས་པ་སྟེ་སྐབས་ཀྱི་དབང་པོ་ལ་བརྟེན་པའོ། །དེ་སྐྱེས་པ་ལ་ཡང་རྒྱུ་སྟེ་སྐྱེད་པར་བྱེད་པའི་ཚོགས་པ་སྟེ་འདུས་པ་འདི་དག་ཙམ་དུ་ཟད་དེ། རྫས་ཀྱི་གྲངས་འདི་ཙམ་དུ་ཆད་པའོ། །གང་གི་ཕྱིར་འདིར་ཡང་སྔ་མ་བཞིན་དུ་རྗེས་སུ་འགྲོ་བ་དང་ལྡོག་པའི་རྗེས་སུ་འགྲོ་བ་ཡོད་པ་ཡིན་ནོ། །གང་གི་ཕྱིར་རྣམ་པར་ཤེས་པ་དང་བདེ་བ་ལ་སོགས་པ་རྒྱུ་ཐ་དད་པ་མེད་པ་དེས་ན་སྟེ། དེའི་ཕྱིར་བདེ་བ་ལ་སོགས་པ་དམིགས་པ་མེད་པའི་རང་གི་ངོ་བོ་ཉིད་མ་ཡིན་ནོ། །ཇི་ལྟར་གྱུར་པ་ཞེ་ན། བཤད་པ་རང་གི་ངོ་བོ་སྟེ་ཉེ་བར་ལེན་པའི་རྒྱུ་དེ་དང་འབྲེལ་པའི་འབྲས་བུ་ནི་དེའི་འབྲས་བུ་སྟེ། དེའི་རང་གི་ངོ་བོ་ཡུལ་དང་དུས་དང་ཡོན་ཏན་གྱི་ཁྱད་པར་སོ་སོར་ངེས་པ་དེ་ལྟར་གྱུར་པ་ནའོ། །དམིགས་པ་མེད་པའི་བདག་ཉིད་གང་དག་ཡིན་པ་དེ་དག་སྟེ། དེ་ལྟར་གྱུར་པ་མ་ཡིན་ནོ། །འདི་སྙམ་དུ་འདུས་བྱས་པའི་ཞེས་བྱ་བའི་བདག་གི་ཡོན་ཏན་ཡོད་དེ། དེ་ནི་རྣམ་པར་ཤེས་པ་ཉིད་ཀྱིས་བདག་དེ་ལ་སྐྱེད་པར་བྱེད་པ་ཡིན་ལ། དུས་གཞན་དུ་ཡང་དེ་ལས་རྣམ་པར་ཤེས་པ་སྐྱེ་བར་འགྱུར་བ་ཡིན་ཏེ། ཇི་སྐད་དུ་ཤེས་པ་ལས་སྐྱེས་པ་དང༌། ཤེས་པའི་རྒྱུ་ནི་འདུས་པ་ཡིན་ནོ་ཞེས་བརྗོད་པ་ཡིན་ནོ། །དེ་ནི་ཤེས་པ་ཉིད་ཀྱི་རྒྱུ་ཡིན་གྱི་བདེ་བ་ལ་སོགས་པའི་མ་ཡིན་པ་དེས་ན་རྣམ་པར་ཤེས་པ་ཉིད་བློའི་རང་བཞིན་གྱི་བདེ་བ་ལ་སོགས་པ་ནི་མ་ཡིན་ནོ་ཞེས་སེམས་སོ། །དོགས་པ་དེ་ཉིད་བསྡུ་བའི་ཕྱིར་འདུས་བྱས་པ་ལས་ངེས་པ་ཡིན་ནོ་ཞེ་ན་ཞེས་སྨྲས་པ་ཡིན་ནོ། །ལན་བཤད་པ། དེ་ནི་རིགས་པ་མ་ཡིན་ཏེ། འདུས་བྱས་པ་དེའི་ནུས་པ་ཡོད་པ་དང་མེད་པ་དེའི་རྗེས་སུ་བྱེད་པ་དེ་མ་མཐོང་བའི་ཕྱིར་རོ། །གང་གི་ཕྱིར་འདུས་བྱས་པ་ལ་ནི་ཡུལ་གཞན་དུ་རྗེས་སུ་འགྲོ་བ་དང་ལྡོག་པ་དག་གིས་སམ། དབང་པོ་བཞིན་དུ་ལྡོག་པའི་སྒོ་ནས་ཤེས་པ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ནོ། །ཤེས་པས་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་ཅིང་དེ་སྐྱེ་བ་ལ་ནུས་པ་མ་མཐོང་བ་དེ་ཇི་ལྟར་དེའི་སྐྱེད་པར་
བྱེད་པ་ཡིན། གང་ཞིག་དེ་ཙམ་ཉིད་ལ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་མཐོང་བ་ནི་དེ་དག་ལས་བྱུང་བ་ཡིན་ནོ། །དེ་ཙམ་ལས་འབྱུང་བ་ལ་དེ་ལས་གཞན་ཡོད་པ་དང་མེད་པའི་རྗེས་སུ་བྱེད་པ་མ་ཡིན་པའི་ཡུལ་རྒྱུ་ཉིད་དུ་བརྟགས་ན་ནི་འགྲོ་བ་མ་ལུས་པ་ཐམས་ཅད་རྒྱུ་ཉིད་དུ་ཐལ་བར་འགྱུར་རོ། །དེའི་ཕྱིར་ཐམས་ཅད་ཚོགས་ན་འབྲས་བུ་སྐྱེ་བར་འགྱུར་གྱི་གཞན་དུ་ནི་མ་ཡིན་ནོ། །ཐག་རིང་པོ་ན་གནས་པ་རྣམས་ཀྱི་རྒྱུ་ཡིན་ན་ཡང་རྡུལ་གཅིག་ཉམས་ན་ཡང་འབྲས་བུ་སྐྱེད་པར་མི་འགྱུར་ཏེ། གཞན་དུ་ན་ཐམས་ཅད་རྒྱུ་ཡིན་ནོ་ཞེས་བྱ་བ་འདི་རྒྱུའི་མིང་ཙམ་དུ་འགྱུར་རོ། །འདུས་བྱས་པ་ཞེས་བྱ་བ་ཡང་ཞེས་བྱ་བ་ལ་ཡང་གི་སྒྲ་ནི་བསགས་པའོ། །དེ་ལྟར་ན་རེ་ཞིག་གཞན་གྱིས་བརྟགས་པའི་འདུས་བྱས་པ་ནི་འདིའི་རྒྱུ་མ་ཡིན་ནོ། །གཞན་ཡང་རྣམ་པར་ཤེས་པ་ཉིད་ལ་འདུས་བྱས་པར་ཕ་རོལ་འདོད་པ་མ་ཡིན་པ་དེ་ལྟ་ན་ཡང་འདུས་བྱས་པའི་ཡོན་ཏན་ཅི་འདྲ་བར་མངོན་པར་འདོད་པ་དེ་ནི་རྣམ་པར་ཤེས་པ་ཉིད་ཡིན་ཏེ། གང་གི་ཕྱིར་དེ་ནི་རྣམ་པར་ཤེས་པ་ལས་སྐྱེས་པ་དང་ཤེས་པ་གཞན་གྱི་རྒྱུ་ཡིན་ལ་འདུས་བྱས་པའི་ཆོས་ཀྱང་འདི་ཁོ་ན་ཡིན་པ་དེའི་ཕྱིར་གཞན་གྱིས་རྣམ་པར་ཤེས་པ་ཉིད་ལ་འདུས་བྱས་པའི་སྒྲར་བརྗོད་པ་ཡིན་ནོ་ཞེས་སྟོན་པར་བྱེད་དོ། །འདུས་བྱས་པ་ཞེས་བྱ་བར་ཞེས་པ་ལ་ཞེས་བྱ་བའི་སྒྲས་ནི་འདུས་བྱས་པ་སྒྲའི་དོན་དུ་བྱེད་པའོ། །འདུས་པ་ཞེས་བྱ་བའི་སྒྲ་འདིས་ནི་རྣམ་པ་ཉིད་བརྗོད་པ་ཡིན་ནོ། །ཇི་ལྟ་བུའི་ཁྱད་པར་ཅན་ཞིག་ཅེ་ན། སྔ་མ་ཞེས་སྨོས་ཏེ། འདིས་ནི་ཤེས་པ་གཞན་གྱི་རྒྱུའི་རང་བཞིན་དུ་བསྟན་པ་ཡིན་ནོ། །རུང་བ་ཞེས་བྱ་བ་འདིས་ཀྱང་ཤེས་པ་གང་ལས་གང་སྐྱེས་པ་དེ་ནི་དེའི་འདུས་བྱས་པ་ཡིན་པར་བསྟན་པ་ཡིན་ནོ། །རུང་བའི་ཤེས་པ་ནི་འདུས་བྱས་པ་ཡིན་ལ། དེ་ཡང་ཁ་ཅིག་ནི་བར་དུ་ཆོད་པ་ཡིན་ཡང་རུང་བ་ཉིད་ཡིན་ཏེ། དཔེར་ན་གོམས་པའི་ཤེས་པ་བཞིན། གོམས་པ་ཇི་ལྟ་བ་བཞིན་དུ་ཤེས་པ་ཕྱི་མ་གསལ་བར་སྐྱེ་བ་ཡིན་ནོ། །ཁ་ཅིག་ནི་བར་དུ་མ་ཆོད་པ་ཉིད་དུ་ཤེས་པ་གསལ་བར་སྐྱེ་བའི་རྒྱུ་ཉིད་ཡིན་ནོ། །དེའི་ཕྱིར་དེ་ལྟར་ཆོད་དམ་མ་ཆོད་ཀྱང་རུང་སྟེ་ཕྱིས་འབྱུང་བའི་ཤེས་པ་ཁྱད་པར་ཅན་གྱི་རྒྱུའི་ཤེས་པ་ནི་འདུས་བྱས་པ་
ཞེས་བརྗོད་པ་ཡིན་ནོ། །ཡིད་ནི་བག་ཆགས་སད་པ་ན་བར་དུ་མ་ཆོད་པ་ཉིད་ཀྱིས་ཤེས་པ་ཕྱི་མའི་རྒྱུ་ཡིན་ཏེ། དེས་ན་གང་ལས་ཤེས་པ་གང་སྐྱེས་པ་དེ་ནི་དེའི་ཡིད་ཡིན་ལ། ཡང་གང་ལས་ཁྱད་པར་ཅན་དུ་འབྱུང་བ་དེ་ནི་འདུས་བྱས་པ་ཡིན་པར་ཁོ་བོས་རྟོགས་ཏེ། བདག་གི་རིག་པ་ཡིན་ནོ། །འདི་སྐད་བརྗོད་པར་འགྱུར་ཏེ། བར་དུ་ཆོད་དམ་མ་ཆོད་ཀྱང་རུང་སྟེ། རྣམ་པར་ཤེས་པའི་རང་གི་ངོ་བོ་དང་ཁྱད་པར་དུ་འཕགས་པའི་རྒྱུ་ནི་རྣམ་པར་ཤེས་པ་ཉིད་ཡིན་ལ་དེ་ནི་བདེ་བ་ལ་སོགས་པ་ལ་ཡང་ཁྱད་པར་མེད་པར་སྔར་ཉིད་བསྒྲུབས་ཟིན་ཏེ། དབང་པོའི་བདེ་བ་དང་བདེ་བ་མ་ཡིན་པ་ཉིད་རྣམ་པར་ཤེས་པ་སྔོན་དུ་འགྲོ་བ་ཅན་དུ་བརྗོད་པ་མ་ཡིན་ནམ། དེས་ན་ཡིད་ཀྱི་བདེ་བ་ལ་སོགས་པའི་རྒྱུ་རྣམ་པར་ཤེས་པ་ཇི་ལྟར་ཡིན། རྣམ་པར་ཤེས་པ་ཉིད་འདུས་བྱས་པར་ཡང་ཇི་ལྟར་འགྱུར་ཞེ་ན། དོན་གཉི་གའི་གཏན་ཚིགས་སྨྲས་པ། ནང་གི་བྱེད་པ་ནི་ཡིད་དེ། དེ་ལས་བྱུང་བའི་ངང་ཚུལ་གང་ཡིན་པ་རྣམས་སོ། །བདེ་བ་ལ་སོགས་ཐམས་ཅད་ནང་གི་བྱེད་པ་ལས་བྱུང་བར་ཁྱད་པར་མེད་ཀྱང་མིག་ལ་སོགས་པའི་རྒྱུ་གཞན་མེད་པ་གང་དག་ཡིན་པ་དེ་ཉིད་ནི་ཡིད་ཀྱི་ཁྱད་པར་ཡིན་ནོ། །དེ་རྣམས་རྗེས་སུ་བྱེད་པའི་ཕྱིར་རོ་ཞེས་འབྲེལ་ཏོ། །རྣམ་པར་ཤེས་པར་གཟུང་བར་བྱ་བ་གཅིག་ལ་ཡང་ནས་ཡང་དུ་འཇུག་ཅིང་བྱང་བར་བྱས་པ་ནི་གོམས་པའོ། །གཡེར་བའི་ཁྱད་པར་དང་ཞན་པ་དེ་དག་གི་དངོས་པོ་ནི་གཡེར་བ་དང་ཞན་པའི་ཡིད། །དེ་ལ་སོགས་པ་ནི་ཕྱིན་ཅི་ལོག་ཏུ་གསལ་བ་ཉིད་ལ་སོགས་པ་གང་ཡིན་པའོ། །གཡེར་བ་དང་ཞན་པ་ལ་སོགས་པ་ཡང་དེ་ཡིན་ལ། ཁྱད་པར་ཡང་ཡིན་པ་དེ་ནི་གོམས་པའི་གཡེར་བ་དང་ཞན་པ་ལ་སོགས་པའི་ཁྱད་པར་ཏེ། དེའི་རྗེས་སུ་ཕྱེད་པ་རྗེས་སུ་འགྲོ་བའི་ཕྱིར་རོ། །དོན་འདི་ཡིན་ཏེ། རྣམ་པར་ཤེས་པས་སྔར་རྗེས་སུ་མཐུན་པའམ་མི་མཐུན་པ་ཉིད་དུ་ཇི་ལྟ་ཇི་ལྟར་དོན་ལ་གོམས་པར་བྱ་བའི་གོམས་པ་དེ་དང་རྗེས་སུ་མཐུན་པར་དངོས་པོ་དེ་ལ་ཡིད་ཀྱི་བདེ་བ་དང་བདེ་བ་མ་ཡིན་པ་སྐྱེ་བར་འགྱུར་རོ། །བར་ཆད་མེད་པར་གཡེར་བར་གོམས་པ་ལ་ནི་ཤིན་ཏུ་གཡེར་བའི་བདེ་བ་འབྱུང་ཞིང་ཞན་པ་ལ་ནི་ཞན་པར་ཕྱིན་
ཅི་ལོག་ལ་ནི་རྗེས་སུ་མཐུན་པར་གོམས་པར་བྱས་པའི་དངོས་པོ་ལ་ཡང་མི་མཐུན་པར་གོམས་པར་བྱས་པར་གྱུར་ན་དེ་དང་རྗེས་སུ་མཐུན་པར་ཡིད་བདེ་བའམ། སྡུག་བསྔལ་སྐྱེ་བར་འགྱུར་ཞིང༌། སྔར་སྐྱེས་པ་ཡང་ལྡོག་པར་འགྱུར་རོ། །དེས་ན་ཇི་ལྟར་རྣམ་པར་ཤེས་པ་རྣམ་པར་ཤེས་པ་སྔ་མའི་ཁྱད་པར་གྱི་རྗེས་སུ་བྱེད་པ་དེ་བཞིན་དུ་ཡིད་ཀྱི་བདེ་བ་ལ་སོགས་པ་ཡིན་ལ། ཁྱད་པར་དུ་བྱེད་པའི་རྒྱུ་ལ་ཡང་འདུས་བྱས་པ་ཞེས་བརྗོད་པ་ཡིན་ནོ། །དེས་ན་འདུས་བྱས་པ་རྣམ་པར་ཤེས་པའི་བདག་ཉིད་ཅན་ནི་ཁྱད་པར་མེད་པ་གཉི་གའི་ཡང་རྒྱུར་བསྒྲུབས་པ་ཡིན་ནོ། །གང་གི་ཕྱིར་ཁྱད་པར་དུ་བྱེད་པའི་རྒྱུ་ཉིད་འདུས་བྱས་པ་ཡིན་པ་དེས་ན་གོམས་པ་ཞེས་བྱ་བས་བག་ཆགས་བརྗོད་པ་མ་ཡིན་ཏེ། དེ་ནི་དེ་མ་ཐག་པའི་རྐྱེན་གྱི་རང་བཞིན་གྱིས་རྣམ་པར་ཤེས་པའི་རྒྱུ་ཡིན་པའི་ཕྱིར་རོ། །དེའི་ཁྱད་པར་ལས་ཤེས་པ་ཁྱད་པར་དུ་འགྱུར་བ་ཡང་མ་ཡིན་གྱི། འོན་ཀྱང་དེ་འཇོག་པར་བྱེད་པ་གོམས་པར་བྱེད་པའི་ཤེས་པའི་ཁྱད་པར་ལས་ཤེས་པ་ཕྱི་མ་ཁྱད་པར་དུ་འགྱུར་བ་ཡིན་ནོ། །ཁྱད་པར་དུ་བྱེད་པ་དེ་བཞིན་དུ་ཟིན་ཀྱང་དེའི་བག་ཆགས་འབྲས་བུར་གྱུར་པའི་རྣམ་པར་ཤེས་པའི་རང་བཞིན་ནི་ཤེས་པ་ཕྱི་མ་ཁྱད་པར་ཅན་དུ་འགྱུར་བའི་རྒྱུ་ཡིན་པར་བརྗོད་དེ། དེས་ན་བག་ཆགས་འཇོག་པར་བྱེད་པའི་སྒོ་ནས་ཁྱད་པར་ཅན་གྱི་ཤེས་པ་ཕྱི་མའི་ཁྱད་པར་དུ་བྱེད་པ་པོ་ནི་གོམས་པར་བྱེད་པའི་ཤེས་པ་སྔ་མ་ཡིན་ནོ། །དེ་མ་ཐག་པའི་ཡིད་ཀྱང་བློའི་རང་བཞིན་གྱི་རྒྱུ་ཡིན་ལ། འདུས་བྱས་པ་ཉིད་ནི་གཞན་གྱིས་སྔ་མའི་ཁྱད་པར་གྱི་རྗེས་སུ་འཇུག་པའི་རྒྱུ་ཉིད་ཡིན་པར་འདོད་དེ་དཔེར་ན་བལྟས་ནས་གཞག་པའི་སྣམ་ཡུག་ཕྱིས་བཤིག་ནས་བཀྲམ་པ་ན་འབད་པ་མེད་པར་སྔ་མ་ཉིད་ཀྱི་གནས་ཐབས་ཀྱི་རྗེས་སུ་འཇུག་པའི་རྒྱུ་འདུས་བྱས་པ་ཡིན་པ་དེ་བཞིན་དུ་སྔ་མ་དང་རྗེས་སུ་མཐུན་པར་འགྱུར་བའི་ཤེས་པའི་རྒྱུ་ནི་འདུས་བྱས་པར་འདོད་དོ། །དེ་མ་ཐག་པའི་རྐྱེན་ལས་ནི་བློའི་རང་བཞིན་ཉིད་ཡིན་གྱི། གཡེར་བག་ཅན་དུ་འཛིན་པ་ནི་མ་ཡིན་ནོ། །དེའི་ཕྱིར་གཡེར་བའི་རྒྱུ་ནི་དངོས་སམ་བརྒྱུད་ནས་ཀྱང་རུང་སྟེ་གོམས་པར་བྱེད་པའི་ཤེས་པ་སྔ་མ་ཡིན་པར་
འདོད་དོ། །དེས་ན་གོམས་པས་ནི་གོམས་པར་བྱེད་པ་བརྗོད་ཀྱི་བག་ཆགས་ནི་མ་ཡིན་ནོ། །གཏན་ཚིགས་འདིས་ནི་བདེ་བ་ལ་སོགས་པ་རྣམས་རྣམ་པར་ཤེས་པའི་བདག་ཉིད་དུ་གྱུར་པའི་འདུས་བྱས་པའི་རྒྱུ་ཅན་ཉིད་དང༌། འདུས་བྱས་པ་ཡང་རྣམ་པར་ཤེས་པའི་རང་བཞིན་ཡིན་པར་བསྒྲུབས་པ་ཡིན་ནོ། །འདི་ཉིད་ཀྱིས་རྣམ་པར་ཤེས་པ་གོམས་པའི་གཡེར་བ་དང་ཞན་པ་ལ་སོགས་པ་རྗེས་སུ་བྱེད་པའི་ཕྱིར་དབང་པོའི་བདེ་བ་ལ་སོགས་པ་རྗེས་སུ་བྱེད་པའི་སྦ་ཡང་རྣམ་པར་ཤེས་པའི་བདག་ཉིད་ཀྱི་འདུས་བྱས་པའི་རྒྱུ་ཅན་དུ་བརྗོད་པ་ཡིན་ཏེ་ནི་མ་པ་ལ་སོགས་པའི་རོ་སྔར་མི་འདོད་ཀྱང་གོམས་པ་ལས་ཀྱང་ཕྱིས་དབང་པོའི་བདེ་བའི་རྒྱུར་འགྱུར་རོ། །དེས་ན་ད་ལྟར་ཡིད་དང་དབང་པོ་པ་དག་རྒྱུ་གཅིག་ཉིད་ཀྱིས་བློའི་རང་བཞིན་ཉིད་དུ་བསྒྲུབས་པ་ལ། ཕ་རོལ་པོ་རང་བཞིན་གཅིག་པའི་རྒྱུ་མཚན་རྒྱུ་གཅིག་པ་ཉིད་ཡིན་པ་བཟློག་པའི་དོན་དུ་ཧ་ཅང་ཐལ་བརྗོད་པར་བྱེད་དོ། །ཚོགས་པའི་མཚན་ཉིད་ཀྱི་རྒྱུ་མཚུངས་པའི་ཕྱིར་ཏེ། ཐ་དད་པ་མེད་པའི་ཕྱིར་རོ། །བདེ་བ་ལ་སོགས་པ་སྡུག་བསྔལ་ལ་སོགས་པ་གང་ཡིན་པ་དེ་དག་གི་ཁྱད་པར་ནི་ཕན་ཚུན་ཉིད་དེ། ཁྱད་པར་དེ་མེད་པར་ཐལ་བར་འགྱུར་རོ། །འདི་ལྟར་མིག་དང་གཟུགས་དང་སྣང་བ་དང་ཡིད་ལ་བྱེད་པའི་ཡུལ་དང་འབྲེལ་པར་ཁྱད་པར་མེད་པ་དེས་ན་ཅིའི་ཕྱིར་རེས་འགའ་ནི་ཤེས་པ་བདེ་བའི་རང་བཞིན་དུ་རེས་འགའ་ནི་སྡུག་བསྔལ་དང་ལྡན་པར་རེས་འགའ་ནི་གཉི་ག་ལས་བཟློག་པ་དང་ལྡན་པར་འགྱུར་ཞེས་བྱ་བ་ནི་དྲི་བའི་དོན་ཡིན་གྱི་ཅིག་ཅར་དུ་ནི་མ་ཡིན་ཏེ། གང་གིས་བདེ་བ་ལ་སོགས་པ་སྲིད་པར་འགྱུར་བ་འགལ་བ་ཉེ་བར་ལེན་པ་མཚུངས་པ་རྣམས་ཅིག་ཅར་མི་འབྱུང་བའི་ཕྱིར་རོ། །རྣམ་འགྲེལ་ལས་འགལ་བའི་ཉེ་བར་ལེན་པ་ནི་མ་ཡིན་ནོ་ཞེས་བཤད་པ་ཡིན་ན། །གཞན་དག་དེ་ལྟར་དོགས་པ་ལ་བཤད་པ། ཁྱད་པར་མེད་པར་ཐལ་བ་མ་ཡིན་ཏེ། །གང་གི་ཕྱིར་བདེ་བ་ལ་སོགས་པའི་ཁྱད་པར་ནི་དེའི་ཚོགས་པ་ཉིད་ཀྱི་ཚོགས་པའི་ནང་དུ་འདུས་པ་ན་སྟེ། ཐ་དད་པ་མེད་པའི་རྫས་ཀྱིས་བསྐྱེད་པའོ། །དེ་ཡང་ཡིན་ལ་ཁྱད་པར་ཡང་ཡིན་པ་དེས་བྱས་པའི་དེའི་ངོ་བོ་ནི་ཉིད་
དེ་དེའི་ཕྱིར་རོ། །འདི་སྐད་བརྗོད་བ་ཡིན་ཏེ། འབྲས་བུའི་ཁྱད་པར་ཐམས་ཅད་ནི་རྫས་གཞན་དང་འབྲེལ་བས་བྱས་པ་མ་ཡིན་ཏེ། འོན་ཀྱང་དེ་ཉིད་ཀྱི་ཚོགས་པའི་རྫས་ཡོངས་སུ་གྱུར་པས་བྱས་པ་ཡིན་ནོ། །འདི་ལྟར་ལུས་ཀྱི་གནས་སྐབས་གང་དང་ཡུལ་གང་དང་སྔར་གྱི་གོམས་བ་གང་ཐོབ་ནས་བདེ་བ་སྐྱེ་བ་དེ་ཉེ་བར་གནས་ན་ནི་འབྲས་བུ་གཞན་དུ་མི་འགྱུར་ལ། སྡུག་བསྔལ་མྱོང་བར་འགྱུར་བའི་ཡུལ་གཞན་ཉེ་བར་གནས་སམ། སྔར་གྱི་བདེ་བ་མྱོང་བར་འགྱུར་བ་དེ་ཉིད་གོམས་པས་སྡུག་བསྔལ་མྱོང་བར་འགྱུར་བ་ཉིད་དུ་འགྱུར་ཏེ། ཉེ་བར་གནས་སམ་ལུས་ཀྱི་གནས་སྐབས་ཡོངས་སུ་གྱུར་པ་ལ་ནི་སྡུག་བསྔལ་སྐྱེ་སྟེ། དེས་ན་བདེ་བའི་རྒྱུར་འགྱུར་བའི་གོམས་པ་དང༌། སྣང་བ་དང་མིག་དང་གཟུགས་དང་ཡིད་ལ་བྱེད་པའི་ཚོགས་པ་ནི་གཞན་དུ་མཐོང་ལ། སྡུག་བསྔལ་གྱི་རྒྱུ་ཡང་གཞན་དུ་མཐོང་ངོ༌། །དེའི་ཕྱིར་བདེ་བ་ལ་སོགས་པ་ཁྱད་པར་མེད་པར་ཐལ་བ་མེད་དོ། །ཡང་ནང་གི་ཁྱད་པར་འདི་འདྲ་བ་གང་ལས་ཤེ་ན། བརྗོད་པ། གང་གི་ཕྱིར་སྡུག་བསྔལ་གྱི་རྒྱུ་ནི་བདེ་བའི་རྒྱུར་གྱུར་པའི་མིག་ལ་སོགས་པ་ཉིད་ཀྱི་ཁྱད་པར་ཡིན་གྱི་དེ་དག་ལས་གཞན་པའི་རྒྱུ་ནི་མ་ཡིན་ཏེ། དེའི་ཕྱིར་ནང་ཞེས་བྱ་བ་འདི་ཁྱད་པར་དུ་བརྗོད་པ་ཡིན་ནོ། །གདོན་མི་ཟ་པར་འདི་ལྟར་ཁས་བླང་བར་བྱ་སྟེ། མིག་གི་རྣམ་པར་ཤེས་པ་ཐམས་ཅད་མིག་དང་གཟུགས་དང་སྣང་བ་དང་ཡིད་ལ་བྱེད་པ་རྣམས་ལས་སྐྱེ་བ་ན་ཚོགས་པའི་ཁྱད་པར་ལས་རྣམ་པ་ཁྱད་པར་ཅན་དུ་འགྱུར་ཏེ། སྔོན་པོ་དང་ལྡན་པའི་ཚོགས་པས་ནི་དེའི་རྣམ་པ་རང་བཞིན་གཞན་དང་འབྲེལ་པར་གྱུར་པ་ལས་ནི་རྣམ་པ་གཞན་དུ་མིག་སྐྱོན་དང་བཅས་པ་ལས་ནི་མཐོང་བ་མི་གསལ་ལ། ཕྱིན་ཅི་ལོག་ཏུ་གྱུར་ན་ནི་ཕྱིན་ཅི་ལོག་ཅེས་བྱ་བ་ལ་སོགས་པ་ནི་གང་གི་ཕྱིར་རིག་པས་མཐོང་བའི་ཕྱིར་རོ། །ཡང་ཇི་ལྟར་ཁྱེད་བདག་དང་ཡིད་དང་འདུས་བྱས་པ་ལ་སོགས་པ་ཤེས་པའི་རྒྱུ་མཚུངས་པ་རྣམས་ལ། གཟུང་བར་བྱ་བ་ལ་སོགས་པ་གཅིག་ལ་རིང་བ་དང་རིང་བ་མ་ཡིན་པའི་རྒྱུས་ཐེ་ཚོམ་དང་གཏན་ལ་ཕེབས་པ་དང༌། ཡང་དག་པའི་ཤེས་པ་དང་ལོག་པའི་ཤེས་པ་ལ་སོགས་པའི་ཁྱད་
བར་ཤེས་པ་ཉིད་ལས་འདས་པ་མ་ཡིན་པ་བཞིན་དུ་ཤེས་པའི་བདག་ཉིད་དུ་གྱུར་པའི་བདེ་བ་ལ་སོགས་པའི་ཁྱད་པར་ཡང་ནང་གི་དགའ་བ་ལ་སོགས་པར་གོམས་པའི་བག་ཆགས་ཀྱིས་བྱས་པ་ཡིན་ནོ། །གང་ཞིག་བློའི་རང་བཞིན་གཅིག་ལས་ཚོར་བ་དང་སེམས་པ་དང་འདུ་ཤེས་པ་ལ་སོགས་པ་བློའི་རང་བཞིན་དུ་མ་སྐྱེས་པར་ཇི་ལྟར་འགྱུར་ཞེས་བྱ་བ་ནི་དྲི་བའི་དོན་ཡིན་ནོ་ཞེས་ཟེར་བ་དེ་ནི་ཆེར་མ་འབྲེལ་པ་ཡིན་ཏེ། གང་གི་ཕྱིར་ཆུང་དུ་ཆེན་པོར་བྱེད་པ་སྐྱོན་དུ་འགྱུར་ན། ནྱ་གྲོ་དྷའི་ས་བོན་ལས་མྱུ་གུ་ཆེན་པོའམ། རིམ་གྱིས་ཕུང་པོ་སྐྱེད་པར་ཇི་ལྟར་འགྱུར། མེ་སྟག་ཙམ་ཉེ་བར་ལེན་པའི་རྒྱུར་གྱུར་པས་རྒྱུར་བྱས་པ་མེ་ལྕེ་འོད་རྒྱ་ཆེན་པོ་དང་ལྡན་པ་འབྱུང་བར་ཡང་ཇི་ལྟར་འགྱུར། ཁོ་བོ་ཅག་གིས་ཚད་ཡོངས་སུ་བགྲང་བར་མི་ནུས་ཏེ། འོན་ཀྱང་འདི་ནི་རྟོག་གི་པའི་ཚིག་མ་ཡིན་ནོ་ཞེས་བྱ་བ་འདི་ཙམ་ཞིག་བརྗོད་དོ། །རྟོག་གེ་པས་སྨྲས་པ་ནི་ཆུང་དུའམ་ཆེན་པོ་ཡིན་ཡང་བླ་སྟེ་ཉེ་བར་ལེན་པའི་རྒྱུ་འདྲ་བས་བསྐྱེད་པ་ནི་རིགས་མཐུན་པ་ཉིད་དུ་སྐྱེ་བར་འགྱུར་ལ། གཞན་ལས་ནི་རིགས་མི་མཐུན་པར་སྐྱེ་བར་འགྱུར་རོ། །དེ་ནི་འདི་འདྲ་བར་ཐ་དད་པ་བྱེད་པ་པོ་ཡིན་གྱི་གཅིག་ལས་དུ་མ་ཉིད་དམ། དུ་མ་ལས་ཀྱང་གཅིག་སྐྱེ་བ་མ་ཡིན་ནོ་ཞེས་བྱ་བ་ནི་ཐ་དད་པའི་དོན་མ་ཡིན་ཏེ། ནས་གང་ཞིག་ལས་སཱ་ལུ་དང་ནས་དག་ཐ་དད་པར་ཁྱད་པར་མེད་པ་ལ་གནས་གཞན་གཅིག་པུ་འདྲ་བ་ཡིན་ལ་གཞན་ནི་མ་ཡིན་ཞེས་དྲིས་པ་ན་གཏན་ཚིགས་ནི་རྒྱུ་འདྲ་བ་དང་མི་འདྲ་བ་ལ་རྟེན་པར་བྱེད་ཀྱི་གཅིག་དང་དུ་མ་ཉིད་ལ་ནི་མ་ཡིན་ནོ། །དེའི་ཕྱིར་བློའི་རང་བཞིན་གཅིག་ལས་རྣམ་པར་ཤེས་པ་སྟོང་ཕྲག་སྐྱེ་ཡང་ཐམས་ཅད་དུ་དེའི་ཉེ་བར་ལེན་པ་ལས་བྱུང་བ་ནི་རིགས་མི་མཐུན་པ་འགོག་པ་ཡིན་ཏེ། གཞན་ཡང་སྐྱོན་བརྗོད་པས་ཆོག་གོ །དཀྱུས་མའི་དོན་ནི་འཐད་པ་མ་ཡིན་ཏེ། འདི་ལྟར་སྣང་བ་ནས་ཁྱིམ་ཕུགས་སུ་ཞུགས་པ་ལ་ཕན་ཚུན་ཁྱད་པར་སྒྲུབ་པའི་མིག་ལ་སོགས་པ་རྣམས་བརྒྱུད་ནས་རྣམ་པར་ཤེས་པ་སྐྱེད་པར་བྱེད་པ་ཡིན་ནོ། །དེ་ལས་མིག་ལ་སོགས་པ་ནི་སོ་སོར་འདུས་པ་ལས་སྐྱེས་པ་ཡིན་པ་དེས་ན་ཚོགས་པ་གཅིག་འབྲེལ་པའི་ཕྱིར་གཅིག་གི་རང་བཞིན་དུ་ཐལ་བར་འགྱུར་ཏེ། བདེ་སོགས་ཅི་ཕྱིར་ཤེས་མ་ཡིན། །ཞེས་
གང་སྨྲས་པ་དེ་ལ་ཁྱད་པར་བསྟན་ཏེ། ཚིག་ལེའུར་བྱས་པ་གཞན་དུ་བྱའོ། །འདི་སྙམ་དུ་ཡུལ་ལ་སོགས་པ་གཅིག་གིས་བསྐྱེད་པ་ཡིན་པ་དེ་ལྟ་ན་ཡང་ཉེ་བར་ལེན་པ་ཐ་དད་པ་ཡོད་པའི་ཕྱིར་དེ་དག་གི་ཐ་དད་པ་ནི་ཉེ་བར་ལེན་པ་ཐ་དད་པ་ལས་ཡིན་ནོ་ཞེ་ན་དེ་ནི་རིགས་པ་མ་ཡིན་ཏེ། འདུ་བྱེད་སྐད་ཅིག་མ་ལྷན་ཅིག་བྱེད་པ་སོ་སོར་འབྲས་བུ་སྐྱེད་པར་ནུས་པ་རྣམས་ལ། ཉེ་བར་ལེན་པ་དང་གཞན་ཞེས་བྱ་བར་ནི་རྟོགས་པ་མེད་དོ། །ཉེ་བར་ལེན་པའི་རྣམ་པར་དབྱེ་བ་ཡོད་པ་ཡིན་ཡང་དེ་ལྟ་ན་ཡང་བདེ་བ་ལ་སོགས་པ་རྣམ་པར་ཤེས་པ་དང་རྒྱུ་གཅིག་པ་ཉིད་དུ་ཐེ་ཚོམ་ཟ་སྟེ། གང་གི་ཕྱིར་འབྲས་བུའི་ཐ་དད་པ་རྒྱུ་ཐ་དད་པར་བྱས་པར་འདོད་ལ་ཤེས་པ་དང་བདེ་བ་ལ་སོགས་པ་ཉེ་བར་ལེན་པ་གཅིག་པར་ཡང་འདོད་པ་གང་ཡིན་པ་དེ་དེ་དག་རང་བཞིན་འདྲ་བར་འདོད་པར་ཇི་ལྟར་མི་འགྱུར། དེས་ན་རང་བཞིན་འདྲ་བ་བཀག་པ་ཉིད་ཀྱིས་འདི་དག་ཉེ་བར་ལེན་པ་འདྲ་བར་ཕ་རོལ་པོས་མི་འདོད་པ་ཡིན་ནོ། །དེ་ལས་ཀྱང་དེས་ཉེ་བར་ལེན་པ་གཅིག་པ་འབའ་ཞིག་བསྟན་པར་བྱ་བ་ཡིན་པ་ལས་བསྟན་བཅོས་མཛད་པས་ཚོགས་པ་ཐ་མི་དད་པར་བསྟན་པའི་འབད་པ་ནི་འབྲས་བུ་མེད་པར་རྟོགས་སོ་ཞེ་ན། རེ་ཞིག་ཉེ་བར་ལེན་པའི་རྒྱུའི་རང་བཞིན་རྣམ་པར་ཤེས་པ་མེད་དོ་ཞེས་གང་བརྗོད་པ་དེ་ལ། འདི་ནི་ཉེ་བར་ལེན་པའི་རྒྱུའི་མཚན་ཉིད་དུ་བརྗོད་དེ། གང་སྐྱེ་བ་ནི་གང་གི་རྒྱུན་ལྡོག་པར་འགྱུར་བའི་རྒྱུན་ལྡོག་པའི་ཆོས་ཅན་དེ་ནི་ཅིག་ཤོས་ཀྱི་ཉེ་བར་ལེན་པ་ཡིན་ནོ། །དཔེར་ན་འཇིམ་པ་ལོག་བ་ན་སྐྱེ་བའི་འཁར་གཞོང་གི་ཉེ་བར་ལེན་པ་ནི་འཇིམ་པ་ཡིན་པ་བཞིན་ནོ། །མྱུ་གུའི་ཉེ་བར་ལེན་པས་བོན་ཡིན་ཡང་དབུས་ཀྱི་ཆ་ལས་མྱུ་གུ་སྐྱེ་བར་མཐོང་བའི་ཕྱིར་ཐམས་ཅད་མི་ལྡོག་པ་མ་ཡིན་ནམ་ཞེ་ན་མ་ཡིན་ཏེ། ས་བོན་ནི་རྫས་གཅིག་མ་ཡིན་གྱི། འོན་ཀྱང་རྡུལ་ཕྲ་རབ་འདུས་པ་ཡིན་པས་དེའི་པགས་པ་དང་སྦུན་པ་དང་སྙིང་པོའི་ཆ་རྣམས་རྒྱུ་ཐ་དད་པ་ཡིན་ཞིང༌། མྱུ་གུ་ནི་སྙིང་པོའི་ཆ་ལས་འབྱུང་བ་ཡིན་ནོ། །དེ་བཞིན་དུ་གཙུབ་ཤིང་གི་ཆ་གང་ལས་མེ་འབྱུང་བའི་རྒྱུན་དེ་ཡང་འཆད་པ་ཡིན་ནོ། །དེ་བཞིན་དུ་ན་ག་ར་གའི་འབྲས་བུ་གཅིག་གི་པགས་པ་དང༌། ཤ་དང༌། ཁུ་
བའི་གནས་དང༌། ས་བོན་གྱི་ཆ་རྣམས་འབྲེལ་པའི་ཕྱོགས་ནས་བཟུང་སྟེ་མེ་ཏོག་ལ་སོགས་པ་རྒྱུ་ཐ་དད་པ་ཡིན་ནོ། །དེ་བཞིན་དུ་མེ་རྡོའི་མེའི་སྐྱེ་གནས་ཀྱི་ཟུར་ལྕགས་མག་གིས་བཅག་པ་ན་ཆག་པའི་འཛེལ་མ་ལས་མེ་འབྱུང་བའི་རང་གི་སྐྱེ་གནས་ལྡོག་པ་ཡིན་ནོ། །མེ་སྐྱེ་བ་ན་བུད་ཤིང་གི་སྙིང་པོའི་ཆ་འགའ་ཞིག་ནི་མེའི་དངོས་པོར་འགྱུར་ལ། གསེར་དུ་ཞུགས་པའི་རྡུལ་གྱི་ཚོགས་ཀྱི་ཆ་འགའ་ཞིག་ནི་དུ་བར་འགྱུར་རོ། །མེར་གྱུར་པ་ཡང་ཆ་འགའ་ཞིག་ནི་སོལ་བར་འགྱུར་ལ། ཤུན་པའི་ཆ་འགའ་ཞིག་ནི་ཐལ་བར་འགྱུར་བ་ཡིན་ཏེ། དེའི་ཕྱིར་དེ་ལྟར་རྡུལ་ཕྲ་རབ་འདུས་པའི་རྫས་རྣམས་ལ་ཉེ་བར་ལེན་པའི་མཚན་ཉིད་འཁྲུལ་པ་ཡོད་པ་མ་ཡིན་ནོ། དེ་ལྟར་ན་ཡང་ཆུ་ཤེལ་རྣམ་པར་འགྱུར་བ་མེད་པ་ཉིད་ལས་ཆུའི་རྒྱུན་དང༌། མེ་ཤེལ་ལས་མེ་དང༌། གཉིས་བརྡབས་པ་ལས་ཕྲད་པ་ལས་སྐྱེས་པའི་སྒྲ་དང། བ་སིལ་ཡབ་ལས་རླུང་གི་ཚོགས་རབ་ཏུ་འབྱུང་བ་དང༌། འོ་མ་ལས་ཞོ་དང་སྤྲིས་མ་དག་དང༌། ཞོ་ལས་དར་བ་དང་མར་དང༌། གསེར་རྡོ་ལས་སོ་ཐོག་དང་གསེར་དག་འབྱུང་པའི་ཕྱིར་ཁ་ཅིག་ནི་ཉེ་པར་ལེན་པ་མེད་པར་འགྱུར་ལ། ཞོ་ལ་སོགས་པ་ཡང་ཉེ་བར་ལེན་པ་མཚུངས་པར་འགྱུར་ན་དེ་ཡང་རིགས་པ་མ་ཡིན་ཏེ། གང་གི་ཕྱིར་ལྷན་ཅིག་བྱེད་པ་ལ་ལྟོས་སམ་མི་ལྟོས་ཀྱང་བླ་སྟེ། ཉེ་བར་ལེན་པའི་རྒྱུ་གཅིག་ལས་རང་བཞིན་ཐ་དད་པ་དག་སྐྱེས་ན་ནི་ཐ་དད་པ་དང་ཐ་དད་པ་མེད་པ་དག་རྒྱུ་མེད་པའི་ཕྱིར། སྣ་ཚོགས་རྒྱུ་མེད་པར་འགྱུར་བ་ན་ཐམས་ཅད་དུ་ཉེ་བར་ལེན་པ་ཐ་དད་པ་ལ་བརྟེན་པར་བྱ་བ་ཡིན་ནོ་ཞེ་ན་དེ་ལ་ཆུའི་ས་བོན་དུ་གྱུར་པ་ཟླ་བའི་འོད་ཀྱི་ཟེར་ཆུ་ཤེལ་དང་རེག་པས་ནུས་པ་སད་པར་གྱུར་པ་ཁོ་ན་དག་ལས་ཆུ་འབྱུང་བ་ཡིན་ནོ། །རིགས་མི་མཐུན་པ་ལས་ཇི་ལྟར་སྐྱེ་ཞེ་ན། བདག་གིས་དུས་འདི་སྲིད་ཀྱི་བར་དུ་རིགས་མཐུན་པ་དང་མི་མཐུན་པའི་རྣམ་པར་དབྱེ་བ་མི་ཤེས་སམ། གང་ལས་གང་སྐྱེ་བར་མཐོང་པ་དེ་ནི་དེ་དང་རིགས་མཐུན་པ་ཡིན་ལ་ཅིག་ཤོས་ནི་རིགས་མི་མཐུན་པ་ཡིན་ནོ། །གཟུགས་དང་རོ་དང་ནུས་པ་དང་ཡོན་ཏན་ཐ་དད་པ་ཆུ་དང་ཆུ་ཤེལ་དག་ལས་སྐྱེས་པའི་ཆུ་དག་ཐ་དད་པ་དང་བྲལ་བ་ཡིན་ནོ་ཞེས་སེམས་དང་
ལྡན་པ་སུ་ཞིག་དོགས་པར་བྱེད། ཆུའི་ཉེ་བར་ལེན་པར་གྱུར་པ་སྐྱེད་པར་བྱེད་པའི་འོད་ཀྱི་ཚོགས་ནི་སད་པ་ཡིན་ཡང་མཐོང་བ་གང་ཡིན་པ་དེ་ནི་སྔ་ན་མེད་པ་ཉིད་དོ། །དེས་ན་ལྡོག་པའི་ཆོས་ཅན་སྐྱེད་པར་བྱེད་པ་ནི་གཞན་ཡིན་པ་ལ་མཐོང་བ་ཡང་གཞན་ཡིན་ནོ། །མེ་ཤེལ་དང་རིག་པས་ནུས་པ་ཡོངས་སུ་བརྟགས་པས་བྱས་པའི་ཉི་མའི་འོད་ཟེར་གྱི་ཚོགས་ལས་མེ་འབྱུང་བ་ལ་ཡང་ཚུལ་འདི་ཉིད་རྗེས་སུ་འཇུག་པ་ཡིན་ནོ། །རླུང་ལ་ཡང་བླ་གབ་དང་བཅས་པའི་ཁར་བཟངས་ཀྱི་རླུང་མེད་པའི་བར་སྣང་གི་ཕྱོགས་སུ་སྲིན་དང་རས་བལ་ལ་སོགས་པ་གྱེན་དུ་འགྲོ་བ་དང་ཐུར་དུ་འོང་བ་རྩོམ་པ་ལས་ཡོད་པར་རྗེས་སུ་དཔག་པ་དམིགས་པར་མི་འགྱུར་བའི་ཚོགས་པ་ཕྲ་མོ་ཡོད་པ་བསིལ་ཡབ་ཤུགས་དང་ལྡན་པར་གཡབས་པའི་ལྷན་ཅིག་བྱེད་པ་ལས་འཕེལ་བ་དང་ལྡན་པའི་རླུང་གི་ཚོགས་དམིགས་པའི་སྤྱོད་ཡུལ་དུ་འགྱུར་བར་རྩོམ་པ་གང་ཡིན་པ་དེ་ཉེ་བར་ལེན་པ་ཡིན་གྱི་བསིལ་ཡབ་ནི་མ་ཡིན་ནོ། །དེ་དག་ཉིད་རྩིག་ངོས་ཀྱི་བུ་གའི་གསེང་དུ་ཞུགས་པ་བརྡབས་པའི་ལྷན་ཅིག་བྱེད་པ་ཅན་དག་ལས་སྒྲ་འབྱུང་བ་ཡིན་ཏེ། སྐྱེད་པར་བྱེད་པའི་ཆ་ནི་ཟད་པའི་ཆོས་སུ་འགྱུར་ལ་ལྷག་མ་ནི་འཕྱོ་བ་ཡིན་ནོ། །མཐོང་བའི་སྒྲ་བསྐྱེད་པའི་ནུས་པ་གནས་ཐམས་ཅད་ཁྱབ་པ་ཤུགས་དང་ལྡན་པར་བརྡབས་པའི་ལྷན་ཅིག་བྱེད་པ་ཅན་ལྡོག་པའི་ཆོས་སུ་གྱུར་པའི་ཉེ་བར་ལེན་པ་དེ་ཉིད་ལས་སྒྲ་འབྱུང་བ་ཡིན་ནོ། །ཁ་ཅིག་ན་རེ་བརྡབས་པའི་རྫས་དེ་དག་དུས་ཀྱི་མཐར་ཐུག་པ་ལ་ལྟོས་ནས་ཅུང་ཞིག་འགའ་ཞིག་ཏུ་ཉམས་བར་མཐོང་བའི་ཕྱིར་ལྡོག་པར་རྗེས་སུ་དཔག་པས་དེ་ཉིད་ལས་སྒྲ་འབྱུང་བ་ཡིན་ནོ་ཞེས་སྨྲས་པ་དེ་ནི་ལྟར་ཁྱབ་པ་མ་ཡིན་ཏེ། གང་གི་ཕྱིར་རིམ་གྱིས་སྐྱེ་བའི་ཆོས་ཅན་ན་ཆོད་གཞོན་ནུའི་གནས་ཕྲད་པ་དང༌། རླུང་གིས་འཐབ་བར་བྱས་པའི་ལོ་མ་དག་ལས་ཀྱང་སྒྲ་འབྱུང་བ་དེ་ལ་འགའ་ཞིག་ཏུ་ཅུང་ཟད་ཉམས་པ་ནི་རྟོགས་པ་མེད་བ་དེའི་ཕྱིར་སྔ་མ་ཉིད་རིགས་སོ། །གཞན་ནི་ནམ་མཁའ་ཁྱབ་པར་གནས་པ་བརྡབས་པའི་ལྷན་ཅིག་བྱེད་པ་ཅན་སྒྲ་ཕྲ་མོར་གྱུར་པ་ཉིད་ཉེ་བར་ལེན་པ་ཡིན་པར་སེམས་ཏེ། དེ་ཡང་ཡོད་པར་དམིགས་པའི་རྒྱུ་མཚན་ཅུང་ཟད་ཀྱང་མེད་པས་མི་འཐད་པའི་ཕྱིར་སྔ་མ་ཉིད་
ཁ་ན་མ་ཐོ་བ་མེད་པ་ཡིན་ནོ། །འོ་མ་ཡང་འོ་མ་དང་ཆུའི་ཆ་གཉིས་ཏེ། དཔེར་ན་ཞོའི་སྟེང་གི་སྤྲིས་མའམ་སྙིང་པོའི་ཆ་ནི་མར་གྱི་རྒྱུ་ཡིན་པ་བཞིན་ནོ། །ཡང་ན་འོ་མའི་མགྲིན་པ་དང་འོ་མའི་ཆ་ཡིན་ནོ། །དེ་ལ་ཆུའི་ཆ་ལས་ནི་ཞོག་ཆུར་འགྱུར་རོ། །དེ་བཞིན་དུ་ཞོ་ལས་མར་དང་མར་མ་ཡིན་པའི་ཆར་འགྱུར་བ་ཡང་རྫས་ཀྱི་རྒྱུ་ཐ་དད་པ་ཁོ་ན་ལས་ཡིན་ནོ། །མར་ལས་སྙིང་པོ་དང་སྙིང་པོ་མ་ཡིན་པར་འགྱུར་བ་ཡང་དེ་ཉིད་ལས་ཡིན་ནོ། །གསེར་རྡོ་ལས་སོ་ཐོག་དང་རྫས་ཀྱི་ཆར་འགྱུར་བ་ཡང་དེ་བཞིན་ཏེ་ཕྱོགས་འདིས་གཞན་ཡང་ཁོང་དུ་ཆུད་པར་བྱའོ། །གཞན་ཡང་སྐྱེད་པར་བྱེད་པས་ཁྱད་པར་དུ་བསྒྲུབ་པར་བྱ་བའི་འབྲས་བུའི་ཁྱད་པར་ཐམས་ཅད་ནང་དུ་སྡུད་པར་ནུས་པའི་བདག་ཉིད་གང་ལས་སྐྱེ་བ་དེ་ནི་ཉེ་བར་ལེན་པ་ཡིན་ཏེ། དཔེར་ན་མིག་གི་རྣམ་པར་ཤེས་པའི་དམིགས་པ་ལ་སོགས་པས་ཕན་པར་བྱ་བའི་རང་བཞིན་ཐམས་ཅད་ནི་བློའི་རང་བཞིན་ཉིད། དེ་མ་ཐག་པའི་རྐྱེན་ལས་སྐྱེ་བའི་ཕྱིར་ཏེ་ཉེ་བར་ལེན་པ་བཞིན་ནོ། །གང་ཡང་སོ་སོར་ནུས་པ་རྣམས་ལ་ཉེ་བར་ལེན་པའི་དོན་གང་ཞིག་ཡིན་ཞེས་སྨྲས་པ་དེ་ལ་བརྗོད་པར་བྱ་སྟེ། རྣམ་པ་གཅིག་པ་ཉིད་ཀྱིས་གཅིག་ཏུ་རྟོགས་པའི་ཡུལ་དུ་གྱུར་པ་དོན་བྱ་བ་བྱེད་པ་གཅིག་པ་རྣམས་ལ་རྒྱུ་དང་འབྲས་བུའི་དངོས་པོ་ཉིད་དུ་ངེས་པར་བྱ་བ་ཡིན་གྱི། སྐད་ཅིག་མ་གཅིག་ལ་ནི་རྒྱུ་དང་འབྲས་བུའི་དངོས་པོར་ངེས་པར་བྱ་བ་མ་ཡིན་ཏེ། ཚུ་རོལ་མཐོང་བ་འམ་གཞན་གྱིས་ཀྱང་རུང་སྟེ་རྗེས་སུ་འགྲོ་བ་དང་ལྡོག་པ་ཁོང་དུ་མི་ཆུད་པའི་ཕྱིར་རོ། །གང་གིས་ན་འདུས་པའི་ཡུལ་ཅན་གྱི་རྒྱུ་དང་འབྲས་བུའི་དངོས་པོ་དངོས་པོའི་ཡུལ་ཅན་མ་ཡིན་པར་འགྱུར་བ་འདུས་པ་གཅིག་པ་ཉིད་བཀག་པ་ན་འདུས་པ་ཅན་རྣམས་ཀྱང་བཀག་པར་འགྱུར་བ་ནི་མ་ཡིན་ནོ། །རྒྱུ་དང་འབྲས་བུའི་དངོས་པོ་འདུས་པའི་ཡུལ་ཅན་ལ་ནི་ཇི་སྐད་བརྗོད་པའི་ལྡོག་བའི་ཆོས་སུ་གྱུར་པའི་ཉེ་བར་ལེན་པ་སྐྱེད་པར་བྱེད་པའི་རང་བཞིན་གྱི་ཁྱད་པར་ཡིན་པར་རིགས་པ་ཡིན་ནོ། །ཉེ་བར་ལེན་པ་གཅིག་པ་ཉིད་མ་གྲུབ་བོ་ཞེས་བྱ་བ་གང་བརྗོད་པ་དེ་ཡང་རྣམ་པ་འདིས་བསྒྲུབས་པར་བལྟ་སྟེ། འདི་ལྟར་ཡུལ་གྱི་རྒྱུན་མ་ལོག་པ་ཉིད་ལས་བདེ་བ་ལ་སོགས་པ་སྐྱེ་བ་ན་དེ་ནི་ཉེ་བར་ལེན་པ་མ་ཡིན་ནོ། །ཡུལ་གྱི་ཕྱོགས་གཅིག་
ལོག་པ་ཡང་མ་ཡིན་ཏེ། མ་མཐོང་བའི་ཕྱིར་རོ། །འཐད་པ་ཡང་མ་ཡིན་ཏེ། ཡུལ་གཅིག་རྒྱུར་གྱུར་པའི་བདེ་བ་དང་སྡུག་བསྔལ་དག་རྒྱུད་ཐ་དད་པར་སྐྱེ་བའི་ཕྱིར་རོ། །དབང་པོ་ཡང་མ་ཡིན་ཏེ། དེ་ལོག་ན་ཕྱིས་མིག་གི་རྣམ་ཤེས་མི་སྐྱེ་བར་འགྱུར་བའི་ཕྱིར་རོ། །ཕྱོགས་གཅིག་ཀྱང་མ་ཡིན་ཏེ། དེའི་འབྲས་བུ་རྣམ་པར་ཤེས་པར་རྣམ་པར་འགྱུར་བ་ཐལ་བའི་ཕྱིར་རོ། །དེས་ན་ལྷག་མར་གྱུར་པ་རྣམ་པར་ཤེས་པ་ལྡོག་པའི་ཆོས་སུ་གྱུར་པ་ན་བདེ་བ་ལ་སོགས་པ་སྐྱེ་བའི་ཕྱིར་དེ་ནི་ཉེ་བར་ལེན་པ་ཡིན་ནོ། །འདི་ཉིད་བསྒྲུབ་པར་བྱ་བའི་དོན་དུ་སློབ་དཔོན་གྱིས་དབང་པོ་ལ་སོགས་པ་ཐམས་ཅད་རྒྱུའི་མཚན་ཉིད་དུ་སྦྱར་བར་མཛད་དོ། །དབང་པོ་དང་ཡུལ་དག་རྒྱུན་མ་ལོག་པ་ལས་བདེ་བ་ལ་སོགས་པ་བསྐྱེད་པ་ན་རྒྱུན་ལོག་པ་གང་ཡིན་པ་དེ་ཉེ་བར་ལེན་པར་ཇི་ལྟར་འགྲུབ་ཅེ་ན། ཉེ་བར་ལེན་པའི་མཚན་ཉིད་གཉིས་སོ། །བདེ་བ་ལ་སོགས་པ་རྣམ་པར་ཤེས་པ་དང་ཉེ་བར་ལན་པ་མཚུངས་པའི་ཕྱིར་བློའི་རང་བཞིན་གྲུབ་པ་ན། བདེ་བ་ལ་སོགས་པ་ཉིད་རྣམ་པར་ཤེས་པ་ཡིན་པར་གྲུབ་པ་ཡིན་ཏེ། མྱོང་བའི་རང་བཞིན་ནི་འདི་གཅིག་ཉིད་དེ་ཞེས་གང་འཆད་པར་འགྱུར་རོ། །ལྷན་ཅིག་བྱེད་པའི་རྣམ་པ་ཐ་མི་དང་ཀྱང་ཉེ་བར་ལེན་པ་ཐ་དད་པ་ལས་ནི་འབྲས་བུ་ཐ་དད་པ་ཡིན་པས་རྒྱུ་ཐ་དད་པ་ཉིད་ནི་ཉེ་བར་ལེན་པ་ཐ་དད་པ་ཁོ་ན་ལས་ཡིན་ལ། ལྷན་ཅིག་བྱེད་པ་རྣམས་ལས་ནི་ཁྱད་པར་སྐྱེ་བ་ཡིན་ནོ། །དེས་ན་ཐམས་ཅད་དུ་ཐ་དད་པར་བྱེད་པའི་གཙོ་བོ་ནི་ཉེ་བར་ལེན་པ་ཐ་དད་པ་ཉིད་ཡིན་པར་བསམ་པར་བྱའོ། །གང་ཞིག་གང་དང་རྒྱུ་ཐ་མི་དད་པ་དེ་ནི་དེ་ལས་རང་བཞིན་ཐ་དད་པ་མ་ཡིན་ལ། དཔེར་ན་སཱ་ལུའི་མྱུ་གུ་གཅིག་ལས་གཞན་པ་ཡིན་ནོ། །བདེ་བ་ལ་སོགས་པ་ཡང་རྣམ་པར་ཤེས་པ་ལས་རྒྱུ་ཐ་མི་དད་པ་ཡིན་ནོ། །ཁྱད་པར་རྒྱུའི་ཐ་མི་དད་པ་ཉིད་ལ་ནི་རྒྱུ་དང་ལྡན་པ་སྤྱིའི་རང་བཞིན་གྱིས་ཁྱབ་པ་ཡིན་ལ། རྒྱུ་ཐ་དད་པ་མེད་པར་འབྲས་བུ་ཐ་དད་པར་འགྱུར་ན་ཡང་སྣ་ཚོགས་རྒྱུ་མེད་པ་ཅན་དུ་འགྱུར་བའི་ཕྱིར། ཁྱབ་པར་བྱེད་པ་མེད་པས་རྒྱུ་ཐ་མི་དད་པ་ཉིད་དེ་ལས་ལྡོག་པ་ན་རང་བཞིན་ཐ་མི་དད་པས་ཁྱབ་པའི་ཕྱིར་ན་རང་བཞིན་ཡིན་ནོ། །གལ་ཏེ་བདེ་བ་ལ་སོགས་པ་
བདག་ཏུ་འཛིན་པའི་གཞི་ནང་དུ་འགྱུར་བ་ཡིན་ན་ནི། །རྣམ་པར་ཤེས་པ་དང་ཉེ་བར་ལེན་པ་གཅིག་པར་དོགས་པ་མ་ཡིན་ནམ། གང་གི་ཕྱིར་ནང་སྟེ་བདག་ཏུ་འཛིན་པའི་གཞིར་འགྱུར་བ་དེའི་རང་གི་ངོ་བོ་ནི་མ་ཡིན་ཏེ། འོན་ཀྱང་སྒྲ་ལ་སོགས་པ་ཕྱི་རོལ་བཞིན་ཡིན་ནོ། །དེས་ན་ཁྱོད་ཀྱིས་ཀྱང་དེ་དག་བཞིན་དུ་འདི་དག་ཀྱང་རྣམ་པར་ཤེས་པ་དང་རྒྱུ་གཅིག་བར་དོགས་པར་བྱ་བ་མ་ཡིན་ནོ། །ཁོ་བོ་ཅག་ལ་ནི་རྟག་པའི་རང་བཞིན་ནམ་མི་རྟག་པའི་ཡོངས་སུ་འགྱུར་བ་སྐྱེས་བུ་རྟག་པའི་ཤེས་པ་ཡོད་པ་དང་རྒྱུ་མཚུངས་པ་ཉིད་དུ་གལ་འགྱུར། གལ་ཏེ་ཡང་ན་ནང་གི་བདག་ཉིད་ཀྱི་བློ་ཡོན་ཏན་གསུམ་གྱི་བདག་ཉིད་ཡིན་པ་ལ་དེ་ལྟ་ན་ཡང་དེའི་རང་བཞིན་ནི་སྐྱེས་བུས་སྤྱད་པར་བྱ་བ་མ་ཡིན་གྱི། འོན་ཀྱང་དེ་ལ་གནས་པའི་ཡུལ་གྱི་སྣང་བ་ཡིན་ཏེ། བློ་ལ་ཤར་བའི་དོན་ནི་སྐྱེས་བུས་ཤེས་པར་བྱེད་དོ་ཞེས་གང་སྨྲས་པ་ཡིན་ནོ། །ཐ་དད་པ་མེད་པའི་ཕྱིར་ན་དོན་བཞིན་དུ་བདག་ཉིད་ཀྱི་གཟུགས་བརྙན་ནི་བློ་ལ་ཡོད་པ་མ་ཡིན་ནོ། །དེས་ན་ཉམས་སུ་མྱོང་བཞིན་པའི་བདེ་བ་ལ་སོགས་པ་ནི་ཕྱི་རོལ་ཁོ་ན་ཡིན་ནོ། །དེ་ལྟར་ན་བཀག་པ་ཉིད་ཀྱིས་བདེ་བ་ལ་སོགས་པ་སེམས་པ་ཅན་ཡིན་པ་བཀག་པ་ཡིན་མོད་ཀྱི། ཉམས་སུ་མྱོང་བ་བདེ་བ་ལ་སོགས་པའི་རྣམ་པའི་བདག་ཉིད་དུ་འགྱུར་བ་དེས་ན་བདེ་བ་ལ་སོགས་པ་མྱོང་བའི་རང་བཞིན་ཡང་ཡིན་ལ། ཕྱི་རོལ་དུ་ཡང་འགྱུར་རོ་ཞེས་གཞན་གྱི་ཚིག་གི་གོ་སྐབས་དོག་པར་བྱས་ནས། སེམས་པ་ཅན་ཡང་མ་ཡིན་གྱི་ཞེས་སྨྲས་ཏེ། ཡོངས་སུ་འགྱུར་བ་ཉིད་དུ་ཐལ་བའི་ཕྱིར་སྐྱེས་བུ་ནི་བདེ་བ་ལ་སོགས་པའི་རྣམ་པ་འཛིན་པ་མ་ཡིན་བ་དེས་ན་བདེ་བ་ལ་སོགས་པ་སེམས་པའི་རང་བཞིན་དུ་གལ་འགྱུར། དེའི་རྣམ་པ་འཛིན་པ་ནི་ཡུལ་ལ་ལོངས་སྤྱོད་པ་མ་ཡིན་ཏེ། འོན་ཀྱང་སྐྱེས་བུ་དང་ཡུལ་དག་གིས་གཟུགས་བརྙན་བློ་གཅིག་འདྲེས་པ་ཡིན་ནོ། །འོ་ན་ནང་དུ་རྟེན་པར་གསལ་བ་ཇི་ལྟར་ཞེ་ན་སྨྲས་པ། བདེ་བ་ལ་སོགས་པ་དེ་དག་གིས་བདག་ཉིད་དུ་གྱུར་པ་གང་དག་ཡིན་པ་བདེ་བ་ལ་སོགས་པའི་རྣམ་པར་འགྱུར་བ་སྒྲ་དང་གཟུགས་ལ་སོགས་པ་དེ་དག་སྟེ། རང་བཞིན་ནི་རྣམ་པར་འགྱུར་བ་རྣམས་ཀྱི་རྗེས་སུ་འགྲོ་བའི་ཕྱིར་རོ། །དེ་དག་ཉམས་སུ་
མྱོང་བ་ལས་བདེ་བ་ལ་སོགས་པ་མྱོང་བར་འགྱུར་བ་ཡིན་ལ་དེ་ལས་དེ་ཉམས་སུ་མྱོང་བར་རྟོགས་པ་སྟེ་ཤེས་ཤིང་ངེས་པ་ཡིན་ནོ། །འདི་སྐད་བསྟན་པ་ཡིན་ཏེ། བདེ་བ་ལ་སོགས་པ་ནང་དུ་མྱོང་བར་ངེས་བ་ནི། ཡུལ་སྣང་བའི་མཐར་ཐུག་པའི་ཕྱིར་ཡིན་གྱི་ཉམས་སུ་མྱོང་བའི་བདག་ཉིད་དུ་འགྱུར་བའི་ཕྱིར་ནི་མ་ཡིན་ནོ་ཞེས་བྱ་བའོ། །གཞན་ནི་གྲངས་ཅན་ནོ། །སྔ་མའི་འདོད་པ་འབའ་ཞིག་མི་རིགས་པར་མ་ཟད་ཀྱི། བདེ་བ་ལ་སོགས་པ་དོན་གྱི་བདག་ཉིད་དུ་འདོད་བ་དེའི་ལྟར་ན་ཡང་རིགས་པ་མ་ཡིན་ནོ། །ག་ལས་ཤེ་ན། བཤད་པ། ཕྱི་རོལ་སྒྲ་ལ་སོགས་པ་ཁྱད་པར་མེད་ན་ཡང་སྟེ། རྣམ་པ་གཅིག་ཡིན་ཡང་དགའ་བ་སྟེ། བདེ་བའི་རྣམ་པ་དང་ཡོངས་སུ་གདུང་བ་སྡུག་བསྔལ་གྱི་རྣམ་པ་དག་གོམས་པ་ལས་ཏེ། བསྒོམས་པའི་ཁྱད་པར་ལས་ཁྱད་པར་འགྱུར་བའི་ཕྱིར་ཏེ། ཐ་དད་པར་འགྱུར་བའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །དོན་གྱི་རང་བཞིན་མ་ཡིན་པ་དག་སྟེ་ཚད་མའི་འབྲས་བུའོ། །གལ་ཏེ་གོམས་པས་ཁྱད་པར་དུ་འགྱུར་བ་དེ་ལྟ་ན་ཡང་དོན་གྱི་རང་བཞིན་མ་ཡིན་པར་ཇི་ལྟར་འགྱུར་ཞེ་ན། བཤད་པ། གང་གི་ཕྱིར་ཞེས་བྱ་བ་ནི་གཏན་ཚིགས་ཀྱི་དོན་ཏོ། །སྒྲ་ལ་སོགས་པའི་བདག་ཉིད་གང་ལ་ཡོད་པ་སྟེ། གལ་ཏེ་བདེ་བ་ལ་སོགས་པ་སྒྲ་ལ་སོགས་པའི་རང་བཞིན་ཉིད་ཀྱི་ཁྱད་པར་སྣང་བ་ཡིན་ན་ཞེས་བྱ་བའི་དོན་ཏོ། །གཟུགས་བརྙན་དང་ཡུལ་ཐ་དད་པ་མེད་པར་ཞེན་པའི་ཕྱིར་བདག་ཉིད་སྨོས་པ་བྱས་སོ། །དོན་ནི་གལ་ཏེ་སྒྲ་ལ་སོགས་པའི་རང་བཞིན་སྣང་བ་ཡིན་ན་ཞེས་བྱ་བ་འདི་ཡིན་ནོ། །དེའི་ཚེ་སྒྲ་ལ་སོགས་པ་ཁྱད་པར་མེད་པ་ལ་སྟེ་གཅིག་ཉིད་ལའོ། །གོམས་པའི་ཁྱད་པར་ལས་ཞེས་བྱ་བ་ནི་ཕན་པ་དང་གནོད་པ་དང་བཏང་སྙོམས་ལ་བརྟེན་པར་གོམས་པར་བྱ་བའི་ཕྱི་རོལ་ལའོ། །དགའ་བ་དང་ཡོངས་སུ་གདུང་བ་ནི་བདེ་བ་དང་མི་བདེ་བའི་སྣང་བའོ། །ཁྱད་པར་ནི་གཞན་ཉིད་དུ་འགྱུར་བའམ་འཕེལ་པ་སྟེ། རྟོགས་པར་བྱེད་པ་གཅིག་ལ་རིམ་གྱིས་སམ་མང་པོ་རྣམས་ལ་ཅིག་ཅར་དུ་མི་འགྱུར་རོ། །སྔོན་པོ་ལ་སོགས་པའི་དོན་གྱི་སྣང་བ་ནི་རྣམ་པའོ། །དེ་ཉིད་ཁྱད་པར་དུ་འགྱུར་བས་ཁྱད་པར་ཏེ་མངོན་སུམ་གྱིས་བཟུང་བའོ། །
སྔོན་པོ་ལ་སོགས་པས་བསྐྱེད་པ་དེ་གོམས་པས་འཕེལ་བ་དང་འགྲིབ་པ་མ་ཡིན་པ་དང༌། སེར་པོ་ལ་སོགས་པའི་རང་བཞིན་མ་ཡིན་པ་དེ་བཞིན་དུ་འདི་ཡང་དེས་བྱས་པ་ཡིན་ན་གོམས་པས་ཁྱད་པར་དུ་མི་འགྱུར་གྱི་འོན་ཀྱང་དངོས་པོ་ཉིད་ཀྱི་ཕྱིར་འགྱུར་རོ། །གང་ཡང་དབང་པོ་གསལ་བ་དང་མི་གསལ་བའམ། ཐག་ཉེ་བ་དང་རིང་བ་ན་གནས་པས་བྱས་པའི་ཁྱད་པར་དེ་ནི་སྔོན་པོའི་རྣམ་པ་ལས་མ་འདས་པ་དེའི་ཕྱིར་སྣང་བ་དེ་སྔོན་པོའི་དོན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་བ་ཡིན་ཏེ། འོན་ཀྱང་རྡུལ་དང་འབྲེལ་པའི་སྔོན་པོ་ཐག་རིང་པོ་ནས་བཟུང་བའམ། དབང་པོའི་ཁྱད་པར་གྱིས་གསལ་བར་མི་སྣང་བ་འབའ་ཞིག་གོ །སྒྲ་ལ་ནི་གོམས་པ་ལས་འདོད་པའི་བདག་ཉིད་ཐམས་ཅད་ལྡོག་ཅིང་བཟློག་པར་ཡང་འཇུག་པའི་ཕྱིར་དེ་ཡོད་པ་དང་མེད་པའི་རྗེས་སུ་བྱེད་པ་མ་ཡིན་ཏེ། འདིར་ཁྱད་པར་ནི་འདི་འདྲ་བར་འདོད་པ་ཡིན་ནོ། །དེའི་ཕྱིར་གང་ཞིག་གང་གི་བདག་ཉིད་སྣང་བ་དེ་ནི་གོམས་པ་ལ་ལྟོས་པ་མེད་པར་དེའི་རང་བཞིན་གྱི་ཁྱད་པར་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་འཇུག་པ་ཡིན་ཏེ། དཔེར་ན་སྔོན་པོ་ལ་སོགས་པའི་སྣང་བ་བཞིན་ནོ། །གང་གི་ཕྱིར་དེ་སྣང་བའི་ཐ་སྙད་ལ་ནི་ཡུལ་ངེས་པ་ཉིད་ཀྱིས་ཁྱབ་པ་ཡིན་ཏེ། འདི་ནི་སྔོན་པོ་ཡིན་གྱི་གཞན་ནི་མ་ཡིན་ནོ་ཞེས་ཐ་སྙད་ངེས་པའི་ཕྱིར་རོ། །དེའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པ་ཡང་དེ་སྣང་བ་ནི་ཐམས་ཅད་ལ་སྣང་བར་འགྱུར་བའི་ཕྱིར་ངེས་པ་སྤངས་པར་འགྱུར་རོ། །དེའི་ཕྱིར་ཁྱབ་བར་བྱེད་པ་མི་དམིགས་པས་མི་མཐུན་པའི་ཕྱོགས་ལས་ལྡོག་པ་ན་དེའི་བདག་ཉིད་སྣང་བའི་ཐ་སྙད་ལ་དེའི་ཁྱད་པར་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པས་ཁྱབ་བོ། །དེས་ན་འགལ་བ་ཁྱབ་པ་དམིགས་པས་ཕྱི་རོལ་ལ་མི་ལྟོས་པར་གོམས་པའི་ཁྱད་པར་གྱི་རྗེས་སུ་བྱེད་པ་འགོག་པ་ཐལ་བར་བྱེད་པ་ཡིན་ནོ། །ཐལ་བ་བཟློག་པའི་ཁྱབ་པ་སྒྲུབ་པ་ཡང་ཐལ་བའི་གཏན་ཚིགས་ཀྱི་ཁྱབ་པ་སྒྲུབ་པ་གནག་ཡིན་པ་དེ་ཉིད་ཡིན་ནོ། །གང་གི་ཕྱིར་ཐལ་བ་ལས་བཟློག་བའི་གཏན་ཚིགས་ནི་གང་དག་ཕྱི་རོལ་ལ་མི་ལྟོས་པར་གོམས་པའི་ཁྱད་པར་གྱི་རྗེས་སུ་བྱེད་པ་དེ་དག་ནི་ཕྱི་རོལ་གྱི་བདག་ཉིད་སྣང་བ་མ་ཡིན་ཏེ་ཞེས་ཁྱབ་པར་
བྱེད་པ་འགལ་བ་དམིགས་པའམ། ཡང་བ་བློ་ཉིད་ཅེས་སློབ་དཔོན་གྱིས་ཇི་ལྟར་བཀོད་པ་བཞིན་དུ་རང་བཞིན་གྱི་གཏན་ཚིགས་ཡིན་ནོ། །ཕྱི་རོལ་གྱི་ཁྱད་པར་གྱི་རྗེས་སུ་བྱེད་པ་ཉིད་ཀྱིས་དེའི་བདག་ཉིད་སྣང་བ་ལ་ཁྱབ་པར་གྲུབ་པ་ན་གཉི་ག་ལ་ཡང་འབྲེལ་པ་གྲུབ་པ་ཡིན་ཏེ། རང་བཞིན་ལ་ནི་ཁྱབ་པར་བྱེད་པ་དང་འགལ་བའི་ཆོས་ལ་ཁྱབ་པར་བྱ་བ་དང་འགལ་བས་ཁྱབ་པ་གྲུབ་པའི་ཕྱིར་དང༌། ཕྱི་རོལ་སྣང་བ་དགག་པ་ཉིད་ལ་ཡང་དེའི་ཁྱད་པར་གྱི་རྗེས་སུ་མི་བྱེད་པ་ཁྱབ་པར་བྱེད་པ་དང་འགལ་བ་ཡིན་པའི་ཕྱིར་རོ། །དེའི་ཁྱད་པར་ལས་ཞེས་བྱ་བ་ནི་ཐལ་བ་བཟློག་པ་འཆད་དེ། གང་དག་སྒྲ་ལ་སོགས་པ་དེའི་བདག་ཉིད་ཀྱི་ཁྱད་པར་ལ་མི་ལྟོས་པར་གོམས་པར་བྱ་བའི་ཁྱད་པར་གྱི་རྗེས་སུ་མཐུན་པ་དེ་དག་ནི་ནང་ན་གནས་པའི་བློ་ཉིད་ཡིན་ནོ་ཞེས་བྱ་བ་ནི་གཏན་ཚིགས་ཀྱི་བསྒྲུབ་བྱ་བསྡུས་པའོ། །གང་དག་གང་གང་གི་རང་བཞིན་གྱི་ཁྱད་པར་མི་ལྟོས་པར་གོམས་པའི་ཁྱད་པར་ཡོད་པ་དང་མེད་པའི་རྗེས་སུ་འབྲེལ་བ་དེ་དག་ནི་ནང་ཉིད་ཡིན་ཏེ། ཤེས་རབ་ལ་སོགས་པ་བཞིན་ནོ། །ཤེས་རབ་ནི་ཤེས་པར་བྱ་བ་རྣམ་པར་འབྱེད་པའོ། །སོགས་པ་ཞེས་བྱ་བ་བརྩེ་བ་དང་ཡིད་བྱུང་བ་ལ་སོགས་པ་སྟེ། གང་གི་ཕྱིར་དེ་དག་ནི་དམིགས་པར་བྱ་བའི་དངོས་པོ་ཁྱད་པར་མེད་ཀྱང་གོམས་པའི་ཁྱད་བར་གྱི་རྗེས་སུ་བྱེད་བས་ཤེས་བྱའི་རང་བཞིན་སྣང་བ་མ་ཡིན་གྱི་འོན་ཀྱང་ནང་ཉིད་ཡིན་ཞིང་ཕྱི་རོལ་གྱི་བདག་ཉིད་སྣང་བ་ནི་མ་ཡིན་ནོ། །དེ་བཞིན་དུ་བདེ་བ་ལ་སོགས་པ་ཡང་ཡིན་ནོ་ཞེས་བྱ་བ་ནི་རང་བཞིན་ནོ། །འབྲེལ་པ་གྲུབ་པ་ནི་བརྗོད་ཟིན་ཏོ། །དེ་ལྟར་ན་ནང་ཉིད་ཡིན་པར་བསྒྲུབས་ནས་ཕྱི་རོལ་ལ་ཡིན་ཡང་སེམས་ཅན་དུ་ཁས་བླང་བར་བྱ་བ་ཡིན་ནོ་ཞེས་བསྟན་པའི་ཕྱིར་བཤད་པ། ནང་ཡིན་པ་འབའ་ཞིག་ཏུ་མ་ཟད་ཀྱི་སེམས་པའང་ཡིན་ནོ། །འང་ཞེས་བྱ་བའི་ཚིག་ཕྲད་ནི་བསགས་པའོ། །གཏན་ཚིགས་བཤད་བ་མྱོང་ཕྱིར་ཏེ། གང་གི་ཕྱིར་བདེ་བ་ལ་སོགས་པ་མྱོང་བར་བྱ་བ་ཡིན་པའི་ཕྱིར་རོ། །གལ་ཏེ་མྱོང་བར་བྱ་བ་ཡིན་དུ་ཟད་མོད། དེ་ལྟ་ན་ཡང་སེམས་པ་ཅན་དུ་ཇི་ལྟར་འགྱུར་ཞེ་ན། བཤད་པ། དེ་ཉིད་ཀྱི་རང་བཞིན་གང་ཡིན་པ་དེ་ནི་དེ་ལྟ་བུ་སྟེ། དེ་ལྟར་མ་གྱུར་པའོ། །དེས་ན་དོན་
མྱོང་བ་མ་ཡིན་པའི་ཕྱིར་རོ། །གང་ཞིག་དོན་གང་གི་རང་བཞིན་མ་ཡིན་པ་དེ་ནི་དེའི་མྱོང་བར་བྱེད་པ་མ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །ཐ་མའི་ཚིག་དགྲོལ་བའི་ཕྱིར་བཤད་པ། གང་གི་ཕྱིར་ཞེས་བྱ་བ་ནི་གཏན་ཚིགས་ཀྱི་དོན་ཏེ། ཡུལ་ཅན་གང་ཞིག་ཡུལ་གང་གི་སྟེ། དེ་ཉིད་ཀྱི་རྣམ་པ་གང་ཡིན་པ་དེ་ལྟ་བུར་གྱུར་པ་མྱོང་བ་མ་ཡིན་ནོ་ཞེ་ནའོ། །དེ་ནི་ཞེས་བྱ་བ་ནི་གང་ཞིག་ཅེས་སྨོས་པ་དེ་ཉིད་ཡང་སྨོས་པའོ། །འདི་སྐད་དུ་མྱོང་བ་གང་ཞིག་ཡུལ་གྱི་རྣམ་པ་མི་འཛིན་པ་དེ་ནི་དེའི་མྱོང་བར་བྱེད་པ་མ་ཡིན་ནོ་ཞེས་བརྗོད་པར་འགྱུར་རོ། །དཔེར་བརྗོད་པ་ཕན་ཚུན་གྱི་རང་བཞིན་ཏེ། བདེ་བ་ལ་སོགས་པ་མྱོང་བ་གང་ལ་སྣང་བ་མེད་པའི་མྱོང་བ་དེ་ནི་གཞན་མྱོང་བར་བྱེད་པ་མ་ཡིན་ཏེ། སྡུག་བསྔལ་མྱོང་བ་ལ་བདེ་བའི་རྣམ་པ་མེད་པའི་ཕྱིར་དེའི་མྱོང་བར་བྱེད་པ་མ་ཡིན་ནོ། །ལྡོག་པའི་སྒོ་ནས་ཀྱང་དོན་འདི་བསྟན་པ་ཡིན་ཏེ། གང་ཞིག་གང་གི་མྱོང་བར་བྱེད་པ་ནི་དེའི་རྣམ་པ་ཡིན་ནོ་ཞེས་བྱ་བའོ། །གྲངས་ཅན་ལ་དཔེ་འགའ་ཡང་ཡོད་པ་མ་ཡིན་ནོ་ཞེ་ན། དཔེ་མེད་ཀྱང་གནོད་པར་བྱེད་པའི་ཚད་མ་ཉིད་དཔེར་བྱེད་པ་ཡིན་ཏེ། སྒྲུབ་པར་བྱེད་པ་ལ་དཔེས་ནི་དགོས་ཅུང་ཟད་ཀྱང་ཡོད་པ་མ་ཡིན་ནོ། །དེ་ལ་མྱོང་བར་བྱེད་པ་ལ་ངེས་པའི་ཡུལ་ཅན་ཉིད་ཀྱིས་ཁྱབ་པ་ནི་ཉམས་སུ་མྱོང་བས་གྲུབ་པ་ཡིན་ནོ། །འདྲ་བ་མེད་ན་ནི་ཁྱབ་པར་བྱེད་པ་དེས་པ་མེད་པའི་ཕྱིར་མྱོང་བར་བྱེད་པ་མེད་པས་ཁྱབ་པར་བྱེད་པ་མི་དམིགས་པས་འབྲེལ་པ་གྲུབ་བོ། །མྱོང་བར་བྱེད་པ་ཉིད་འདྲ་བའི་རྒྱུ་མཚན་ཅན་དུ་རྣམ་པར་གཞག་པའི་དོན་དུ་གཞན་གྱི་དོགས་པ་བཟློག་པའི་ཕྱིར་འདི་ནི་འདིའི་མྱོང་བར་བྱེད་པ་ཞེས་གསུངས་ཏེ། དེ་ལྟ་བུའི་རང་བཞིན་ཅན་གྱི་མྱོང་བར་བྱེད་པ་དང་མྱོང་བར་བྱེད་པ་ངེས་པའི་འབྲེལ་པའི་རྒྱུ་མཚན་ནི་མངོན་པར་ལ་བ་གསལ་བར་གྱུར་པ་ཉིད་དོ། །གལ་ཏེ་ཡང་གྲངས་ཅན་གྱི་རྟག་ཏུ་གསལ་བའི་བདག་ཉིད་ཀྱི་སྐྱེས་བུ་མངོན་པར་མི་གསལ་བ་ལས་མངོན་པར་གསལ་བར་བྱ་བ་མ་ཡིན་པ་དེ་ལྟ་ན་ཡང་ཡུལ་ལ་ཆགས་པའི་ཉེ་བར་བསླད་པ་ནི་གསལ་བའི་དངོས་པོ་ཐ་སྙད་དུ་བྱ་བར་གཟུང་བ་ཡིན་ལ་ཐ་སྙད་དུ་བྱ་བའི་གནས་སྐབས་ཀྱི་དོན་གྱི་དབང་གིས་ཡིན་ཏེ། དོན་ཡོད་པ་ལ་
སེམས་པའི་རང་བཞིན་ངེས་པ་ནི་གསལ་བ་ཡིན་པའི་ཕྱིར་རོ། །དེས་ན་དོན་གང་ལ་སེམས་པའི་ཐ་སྙད་དུ་འགྱུར་བ་དེ་ལས་དེ་མངོན་པར་གསལ་པ་ཡིན་པའི་ཕྱིར་རོ། །མངོན་པར་གསལ་བར་ཡོད་པ་ཡིན་ནོ། །འདི་འདིའི་ཞེས་བྱ་བའི་འབྲེལ་པ་ཡང་མངོན་པར་གསལ་བའི་རྒྱུ་ཅན་ཡིན་པར་བརྗོད་པ་ཡིན་ནོ། །འདིར་འདི་ནི་སྔོན་པོ་ཡིན་གྱི་སེར་པོ་ནི་མ་ཡིན་ནོ་ཞེས་དོན་གྱི་ཁྱད་པར་དང་འབྲེལ་པས་མྱོང་བའི་ཐ་སྙད་དུ་གྱུར་པ་གང་ཡིན་པ་དེ་ནི་བསྒྲུབ་པར་བྱ་བ་ཡིན་ལ། བསྒྲུབ་པར་བྱ་བའི་དོན་ཉིད་ནི་སྒྲུབ་པར་བྱེད་པ་མ་ཡིན་ནོ། །དོན་གྱི་ཁྱད་པར་གྱི་འབྲེལ་པ་ལས་གཞན་དུ་གྱུར་པ་འདི་ནི་མྱོང་པའོ་ཞེས་བྱ་བ་གསལ་པའི་རང་བཞིན་ཙམ་འདི་ནི་རྒྱུ་མཚན་ཉིད་དུ་ཉེ་བར་ལེན་པ་ཡིན་ནོ། །མངོན་པར་གསལ་བ་འདི་ནི་དབང་པོ་རྣམས་དང༌། ཡིད་དང་བློ་དང་ཡུལ་རྣམས་ལ་ཡང་རག་ལས་པ་ཡིན་ཏེ། དབང་པོ་དང་བློ་ལ་སོགས་པ་མེད་པར་ནི་དེ་ལ་མྱོང་བར་བྱེད་པ་ཉིད་དུ་ཐ་སྙད་དུ་རྟོགས་པར་བྱ་བ་མ་ཡིན་པའི་ཕྱིར་རོ། །དེ་བས་ན་འབྲེལ་པའི་རྒྱུ་མཚན་རང་བཞིན་ཙམ་མངོན་པར་གསལ་བ་ཡིན་པས་དབང་པོ་ལ་སོགས་པ་ལ་ཡང་ཐལ་བར་འགྱུར་རོ། །རྒྱུ་དེའི་ཕྱིར་འདྲ་བ་ཉིད་ཡིན་ནོ། །དེའི་མྱོང་བ་ནི་དེ་མྱོང་བ་སྟེ། དེའི་མཚན་ཉིད་དོ། །ཡུལ་གྱི་འབྲེལ་པ་ངེས་པའི་རྒྱུ་ནི་འདྲ་བ་ཉིད་ཡིན་ནོ། །ད་ནི་གུད་ན་གནས་པ་འགའ་ཞིག་སློབ་དཔོན་གྱིས། གྲངས་ཅན་ལ་ཡང་འདྲ་བ་བསྒྲུབ་པ་མི་འཐད་པར་མཐོང་བ་ནས་དེ་དང་འདྲ་བར་ཡང་སེམས་པ་ཅན་ལ་ཇི་ལྟར་ཞེ་ན་ཞེས་སྨོས་ཏེ། གལ་ཏེ་འདྲ་བ་མེད་ན་མྱོང་བར་བྱེད་པ་ཉིད་མི་འཐད་པ་དེ་ལྟར་ན་ཡང་གྲངས་ཅན་གྱི་ཤེས་པ་ཡོད་པ་ལ་འདྲ་བ་ནི་འཐད་པ་མ་ཡིན་ནོ། །གང་གི་ཕྱིར་ཉམས་སུ་མྱོང་བའི་དུས་ལས་སྔར་འདྲ་བ་དེའི་བདག་ཉིད་མ་ཡིན་པ་གང་ཡིན་པ་དེ་ནི་ཕྱིས་ཀྱང་དེ་ཉམས་སུ་མྱོང་བའི་དུས་སུ་སྔ་མ་ཡང་སྔ་མའི་རང་བཞིན་ལས་ཉམས་པ་མེད་པ་སྟེ། ལྡོག་པ་མེད་པའི་རྒྱུའི་ཕྱིར་རོ། །གང་གི་ཕྱིར་འདྲ་བ་དེ་ནི་སེམས་པ་ཡོད་པའི་རང་བཞིན་ཡིན་ལ། དེ་སྔར་མ་གྱུར་ན་ནི་ཐམས་ཅད་དུ་དོན་ཏེ་མི་མྱོང་བར་ཐལ་ལོ། །མྱོང་བའི་དུས་ན་སྐྱེ་བ་ཡིན་ན་ནི་སྐྱེས་བུའི་རང་བཞིན་གཞན་དུ་འགྱུར་བས་མི་རྟག་པར་འགྱུར་ན་རྟག་པར་ཡང་
འདོད་པ་ཡིན་ནོ། །དེའི་ཕྱིར་གྲངས་ཅན་ལ་མྱོང་བར་བྱེད་པ་ཉིད་འདྲ་བའི་རྒྱུ་མཚན་ཅན་དུ་རྣམ་པར་གཞག་པར་མི་ནུས་སོ་ཞེ་ན། འདི་ནི་འདིའི་ཉེས་པ་གཞན་ཡིན་ཏེ་ཞེས་བྱ་བ་ལ་བསམ་པ་ནི་འདི་ཡིན་ཏེ། འདིར་གྲངས་ཅན་གྱི་ལྟ་བ་སྒྲུབ་པའི་སྐབས་ནི་མ་ཡིན་གྱི། འོན་ཀྱང་མྱོང་བར་བྱེད་པ་ཉིད་བརྟག་པའི་སྐབས་ཡིན་ནོ། །འདྲ་བ་དེའི་རྒྱུ་མཚན་དུ་རྣམ་པར་གཞག་པ་ན་རང་གི་ནུས་པས་ཇི་སྙེད་གྲངས་ཅན་ལ་ཉེས་པ་གཞན་གྲུབ་པ་དེ་ཡང་ཁོ་བོ་ཅག་གི་བསམ་པ་གྲུབ་པའི་ཕྱིར་འདོད་པ་ཡིན་གྱི། སྐབས་ཀྱི་དོན་བཏང་བ་ནི་མ་ཡིན་ནོ་ཞེས་སྟོན་པ་ནི་འདྲ་བ་མེད་པར་ནི་མྱོང་བར་བྱེད་པ་མ་ཡིན་ནོ་ཞེས་བྱ་བ་ཡིན་ནོ། །འདི་སྙམ་དུ་རྟག་ཏུ་ཡོད་པའི་སྐྱེས་བུ་ནི་རང་གི་ངོ་བོ་ཉིད་ཁོ་ནས། དེ་དོན་དེ་ལ་སེམས་པ་མ་ཡིན་ནམ་ཞེས་དོགས་པ་ལ། སྔ་མ་ཉིད་བསྒྲུབ་པའི་དོན་དུ་བཤད་པ། གང་གི་ཕྱིར་ཞེས་བྱ་བ་ནི་གཏན་ཚིགས་ཀྱི་དོན་ཏོ། །གང་གི་ཕྱིར་རིག་པ་སྟེ། མྱོང་བ་ཡོད་པ་ཉིད་ནི་ངེས་པའི་དོན་དེ་མྱོང་པར་ཏེ། ཉམས་སུ་མྱོང་བར་རོ། །གང་གི་ཕྱིར་དེ་དོན་ཐམས་ཅད་ལ་ཁྱད་པར་མེད་པ་ཡིན་ཏེ། དེས་ན་ཐམས་ཅད་ལ་སྟེ་དོན་ཐམས་ཅད་ལ་ཁྱད་པར་ཏེ། ཐ་དད་པར་བྱ་བ་མེད་པས་ན། དོན་ཐམས་ཅད་རིག་པར་ཐལ་བའི་ཕྱིར་འདྲ་བ་ཉིད་དེའི་རྒྱུ་མཚན་ཡིན་ནོ་ཞེས་མཇུག་བསྡུ་བའོ། །གང་གི་ཕྱིར་ཡུལ་སོ་སོ་ལ་ཁྱད་པར་དུ་མ་གྱུར་པའི་རིག་པ་ཙམ་པོ་འབའ་ཞིག་ནི། ཁྱད་པར་ཅན་དུ་མྱོང་བར་བྱ་བའི་དོན་གྱི་མྱོང་བ་མ་ཡིན་ཞིང་རང་གི་རང་བཞིན་མྱོང་བ་ལས་དོན་གཞན་མྱོང་བ་ཞེས་བྱ་བ་ཡང་མ་ཡིན་ཏེ། དེའི་རང་གི་རང་བཞིན་ཉམས་སུ་མྱོང་བའི་བདག་ཉིད་དུ་དོན་ཉམས་སུ་མྱོང་བ་ཡིན་ན་དེའི་རང་གི་རང་བཞིན་ཁྱད་པར་མེད་པའི་ཕྱིར་དང༌། དོན་མྱོང་བ་ཡང་དེའི་བདག་ཉིད་ཅན་ཡིན་པའི་ཕྱིར་ཁྱད་པར་མེད་པ་ཁོ་ནར་འགྱུར་རོ། །འདི་ལྟར་ནི་རིགས་པ་ཡིན་ཏེ། ཤེས་པ་ཡོད་པ་གང་ཡིན་པ་དེ་ལ་འདྲ་བ་ཡོད་དེ། དེའི་བདག་ཉིད་ཡོད་པ་ཡིན་ན་ནི་འདྲ་བར་བྱེད་པ་པོའི་དོན་ལ་སྦྱོར་ཞིང་འབྲེལ་པར་བྱེད་པ་ཡིན་ནོ། །ཇི་ལྟར་འབྲེལ་པ་འདིའི་རྒྱུ་ནི་འདྲ་བ་ཉིད་ཡིན་པར་རིགས་པ་དེ་ལྟར་ནི་འབྲས་བུ་བསམ་
པར་འཆད་པར་འགྱུར་རོ། །ཉམས་སུ་མྱོང་བ་ནི་འདྲ་བ་དང་བཅས་པ་ཡིན་ལ། འདྲ་བ་ཡང་དེ་ལས་ཐ་དད་པ་མ་ཡིན་པའི་ཕྱིར་བདེ་བ་ལ་སོགས་པའི་མྱོང་བའི་བདག་ཉིད་དུ་གྲུབ་པ་ཡིན་ནོ་ཞེས་བཤད་པ་ནི། སེམས་པ་ཅན་ཡིན་པར་གྲུབ་བོ་ཞེས་བྱ་བ་ཡིན་ནོ། །འདི་སྙམ་དུ་འོ་ན་ནི་སྔོན་པོ་ལ་སོགས་པ་རྣམས་ཀྱང་སེམས་པ་ཉིད་དུ་ཐལ་བར་འགྱུར་ཏེ། གང་གི་ཕྱིར་དེ་ལ་ཡང་རྣམ་པར་ཤེས་པ་སེམས་པར་བྱེད་པ་ན་དེའི་རང་བཞིན་ཉིད་དུ་སྐྱེ་པར་འགྱུར་ཏེ། དེའི་ཕྱིར་འདྲ་བའི་བདག་ཉིད་ཅན་གྱི་སྔོན་པོ་ལ་སོགས་པ་རྣམས་སེམས་པར་ཐལ་བར་འགྱུར་ན་དེ་ལྟར་ཁས་བླངས་པ་ནི་མ་ཡིན་ནོ། །ཅི་སྟེ་རྣམ་པ་འདིས་རྣམ་པར་ཤེས་པར་སྨྲ་བ་ལ་བརྟེན་པ་ཡིན་ན་དེ་ལྟ་ན་ཡང་ངལ་བ་འབྲས་བུ་མེད་པ་ཡིན་ཏེ། གཞན་དག་ཀྱང་ཕྱི་རོལ་ཡིན་པ་འགོག་པའི་ཕྱིར་བདེ་བ་ལ་སོགས་པ་དམིགས་ཀྱིས་གཟུང་བས་ཅི་བྱ་ཞེས་དོགས་པ་ལ་འདི་ཉིད་ཀྱང་ཁོ་བོ་ཅག་གི་བདེ་བ་ཞེས་གསུངས་ཏེ། བསྡུས་པས་ནི་འདི་ལྟར་བསྟན་པ་ཡིན་ཏེ། འདྲ་བ་གཅིག་པུ་ནི་བདེ་བ་ལ་སོགས་པ་སེམས་པ་ཅན་གྱི་རྒྱུ་མ་ཡིན་གྱི། འོན་ཀྱང་རང་བཞིན་གྱི་ཁྱད་པར་ཡང་ཡིན་ནོ། །དེ་ཡང་གང་ཞེ་ན་བཤད་པ། གང་སིམ་པར་འདོད་པ་དང་རྗེས་སུ་མཐུན་པར་མྱོང་བ་སྟེ་ཉམས་སུ་མྱོང་བའོ། །འདི་ནི་སྡུག་བསྔལ་དང་གཉི་ག་ལས་བཟློག་པ་མཚོན་པ་ཡིན་ཏེ། གང་གི་ཕྱིར་དེ་དག་ལ་ཡང་ཇི་ལྟར་ཇི་ལྟ་བ་བཞིན་དུ་རྟོགས་པར་བྱའོ། །དོན་འདི་ལྟར་འདོད་པ་ཡིན་ཏེ། བདེ་བ་ལ་སོགས་པ་རྣམས་ཀྱི་རང་གི་དོན་བྱ་བ་ནི་འདོད་པ་ལ་སོགས་པའི་རྣམ་པར་གསལ་བ་ཕན་འདོགས་པ་ལ་སོགས་པའི་བདག་ཉིད་ཅན་ཡིན་ལ། དངོས་པོ་རྣམས་ཀྱི་ཡོད་པ་ཡང་དོན་བྱེད་པའི་རྒྱུ་མཚན་ཅན་ཡིན་ནོ། །དེ་ནི་སིམ་པ་ལ་སོགས་པ་རྣམ་པར་ཤེས་པའི་རྣམ་པ་ལས་ཀྱང་འཐོབ་སྟེ། དེས་ན་ཤེས་པ་ལ་གནས་པའི་སིམ་པ་ལ་སོགས་པའི་རྣམ་པ་དེ་ཉིད་བདེ་བས་བསྒྲུབ་པར་བྱ་བ་བསྒྲུབ་པའི་ཕྱིར་བདེ་བར་རིགས་སོ། །ཕྱི་རོལ་གྱི་བདེ་བ་ལ་སོགས་པ་རྣམས་ཀྱི་ཡོད་པར་རྣམ་པར་གཞག་པ་ཡང་འདི་ཉིད་ལས་ཡིན་ནོ། །སྔོན་པོ་ལ་སོགས་པར་ཡོད་པའི་རྒྱུ་མཚན་གྱི་འབྲས་བུ་ནི་སྔོན་
པོའི་རྣམ་པར་གསལ་བ་ཉིད་མ་ཡིན་ཏེ། རྣམ་པ་དེ་སྐྱེས་ཀྱང་སྔོན་པོ་ལ་སོགས་པས་བསྒྲུབ་པར་བྱ་བའི་དོན་གྱི་བྱ་བའི་དོན་དུ་གཉེར་བ་རྣམས་འཇུག་པ་མཐོང་བའི་ཕྱིར་རོ། །སྔོན་པོ་ལ་སོགས་པ་ནི་གང་གི་དོན་དུ་དེ་དག་འཇུག་པའི་དོན་བྱ་བའི་དེ་ཉིད་ཀྱིས་ཡོད་པ་ཡིན་ལ། དེ་ཡང་བློ་ལ་གནས་པའི་སྔོན་པོ་དང་འདྲ་བ་ལས་མི་འགྲུབ་པའི་ཕྱིར་དེ་དང་འདྲ་བ་སྔོན་པོ་མ་ཡིན་པས་སྔོན་པོ་ལ་སོགས་པས་སེམས་པ་མ་ཡིན་ནོ། །སེམས་པ་ཅན་ཡིན་པར་གྲུབ་པོ་ཞེས་བྱ་བ་ནི་སིམ་པ་ལ་སོགས་པ་མྱོང་བ་ཙམ་གྱི་འབྲས་བུས་ཡོད་པར་རྣམ་པར་གཞག་པའི་བདེ་བ་ལ་སོགས་པ་ནི་འདྲ་བའི་བདག་ཉིད་ལ་ཡང་འཐད་པ་ཡིན་ནོ་ཞེས་མཇུག་སྡུད་པར་བྱེད་དོ། །ཡུལ་དང་འདྲ་བའི་ཕྱིར་ཏེ། ཡུལ་དང་འདྲ་བ་ཡིན་པ་དེའི་ཕྱིར་མྱོང་བ་རིག་པ་བདེ་བ་ལ་སོགས་པའི་བདག་ཉིད་དུ་ཁས་ལེན་ནའོ། །རང་བཞིན་གང་གིས་མྱོང་བའི་རང་བཞིན་དེ་ནི་མྱོང་བའོ། །གང་དག་ལ་དེ་ཡོད་པ་མ་ཡིན་པ་དེ་དག་སྟེ་དེ་ལྟར་འགྱུར་རོ། །འདི་སྐད་བརྗོད་པ་ཡིན་ཏེ། གལ་ཏེ་བདེ་བ་ལ་སོགས་པ་དང་འདྲ་བའི་ཕྱིར། མྱོང་བ་དེའི་བདག་ཉིད་དུ་འདོད་ན་དེའི་ཚེ་འདྲ་བར་བྱེད་པའི་བདེ་བ་ལ་སོགས་པ་རྣམས་ཕྱི་རོལ་དུ་འགྱུར་ཏེ། དཔེར་ན་ཕྱི་རོལ་གྱི་སྔོན་པོ་བློའི་རྣམ་པའི་འདྲ་བར་བྱེད་པ་ཡིན་པ་བཞིན་ནོ། །དེས་ན་བདེ་བ་ལ་སོགས་པ་མྱོང་བའི་རང་བཞེན་དང༌། མྱོང་བའི་རང་བཞིན་མ་ཡིན་པ་རྣམ་པ་གཉིས་སུ་འགྱུར་རོ། །ཡང་གི་སྒྲ་མེད་ཀྱང་འདྲ་བ་ལས་སེམས་པ་བདེ་བ་ལ་སོགས་པ་གྲུབ་པའི་ཕྱིར། ཕྱི་རོལ་ནི་མྱོང་བ་མ་ཡིན་པར་ཡང་ཞེས་བྱ་བ་འདི། དོན་གྱིས་གོ་བའི་ཕྱིར་ཡང་གི་སྒྲ་མ་བཀོད་དོ། །གཞན་གྱི་དོགས་པ་ཟློག་པར་བྱེད་པ་ནི་དེ་ནི་དེ་ལྟ་མ་ཡིན་ཏེ། ཁོ་བོ་ལ་ཕྱི་རོལ་དུ་ཐལ་བར་མི་འགྱུར་རོ། །གང་གི་ཕྱིར་ཁྱེད་ཀྱི་ལྟ་བ་ལ་ཡང་བདེ་བའི་རང་བཞིན་མྱོང་བ་བདེ་བའི་བདག་ཉིད་ཅན་ཡོད་པ་ཡིན་ནོ་ཞེས་དེ་ལྟར་བསྟན་པ་གང་ཡིན་པའི་དོན་དེ་ཉིད་ཀྱི་དོན་དུ་བཀོད་པ་ནི་ཉེ་བར་གཞག་སྟེ། ཇི་ལྟར་ཁྱེད་ཀྱི་ལྟ་བ་ལ་ཡང་མྱོང་བའི་རང་བཞིན་གྱི་བདེ་བ་ཁས་བླང་བར་བྱའོ་ཞེས་དེའི་དོན་དུ་བཀོད་པ་བྱས་པ་ཡིན་ནོ། །འོ་ན་ཁྱེད་རང་གི་ཕྱོགས་ལ་དེ་ཁོ་ནར་དོན་ཇི་ལྟ་བུ་ཞིག་
ཡིན་ཞེ་ན། བཤད་པ་མྱོང་བ་བདེ་བ་ལ་སོགས་པའི་བདག་ཉིད་ཡིན་པ་དེ་ལ་ཡང་ངོ༌། །འདི་སྐད་དུ་ཁོ་བོ་ཅག་མྱོང་བ་བདེ་བ་ལ་སོགས་པའི་བདག་ཉིད་ཡིན་པ་སྤོང་བ་ནི་མ་ཡིན་གྱི་འོན་ཀྱང་མྱོང་བ་བདེ་བ་ལ་སོགས་པའི་བདག་ཉིད་ཁོ་ན་ལ་ཉམས་སུ་མྱོང་བའི་མཚན་ཉིད་ཀྱི་ཚད་མ་ཤིན་ཏུ་གསལ་བས་འདི་ལྟར་མཐོང་ཞིང་ཤེས་སོ། །དགའ་བ་ནི་སིམ་པར་མྱོང་བའོ། །ཡོངས་སུ་གདུང་བ་ནི་དེ་ལས་བཟློག་པའོ། །དེ་དག་གི་རང་བཞིན་གང་ཡིན་པ་དེ་ལྟ་བུར་གྱུར་པ་དེ་ནི་གཅིག་ཏུ་རྟོགས་པར་མཐོང་ངོ༌། །གཅིག་ཏུ་ཞེས་བྱ་བ་འདིས་ནི་ཕྱི་རོལ་གྱི་བྱས་པ་འགོག་པར་བརྗོད་པའོ། །འདི་ལྟར་གང་གིས་ཕྱི་རོལ་གྱི་རང་བཞིན་ཉིད་ཀྱིས་འཛིན་པའི་རྣམ་པ་ལས་རྣམ་པར་ཆད་པའི་བདེ་བ་ལ་སོགས་པ་ལ་ཕྱི་རོལ་གྱིས་བྱས་པ་ཉིད་དུ་རིག་པར་འགྱུར་བ་མྱོང་བར་བྱེད་པ་འཛིན་པའི་རང་བཞིན་ཡང་གཞན་ལ། བདེ་བ་ལ་སོགས་པའི་རྣམ་པ་གཟུང་བའི་རང་བཞིན་ཡང་གཞན་དུ་སྣང་བ་ནི་མེད་པའི་ཕྱིར་རོ། །གང་གི་ཕྱིར་རྣམ་པ་གང་ཞིག་ཕྱི་རོལ་གྱི་རང་བཞིན་གཟུང་བར་བྱ་བ་ཉིད་དུ་སྣང་བ་མ་ཡིན་པ་དེ་ནི་ཕྱི་རོལ་གྱིས་བྱས་པ་མ་ཡིན་ཏེ། དཔེར་ན་སེམས་པའི་རྣམ་པ་བཞིན་ནོ། །བདེ་བ་ལ་སོགས་པའི་རྣམ་པ་ཡང་དེ་བཞིན་ནོ། །འདི་ཉིད་བསྟན་པའི་དོན་དུ་ནང་དུ་ཞེས་གསུངས་སོ། །བདེ་བ་ལ་སོགས་པའི་རང་བཞིན་མྱོང་བ་ལ་གནས་པ་ནི་ནང་དུ་བདག་ཏུ་འཛིན་པའི་གཞི་འཛིན་པའི་རྣམ་པར་མཐོང་གི་ཕྱི་རོལ་གཟུང་བའི་རྣམ་པར་ནི་མ་ཡིན་ཏེ། དྲི་ཞིམ་པོ་དང་རྩུབ་མོ་ལ་སོགས་པ་ཉམས་སུ་མྱོང་བ་ན་ཕྱི་རོལ་གྱི་དངོས་པོ་དེ་ཉིད་བདེ་བའམ་སྡུག་བསྔལ་བའམ། འདོད་པའམ་སྡང་བར་སྣང་བ་ནི་མེད་ཀྱི་འོན་ཀྱང་འདོད་པ་དང་སྡང་བ་ནི་དེ་ལས་རྣམ་པར་ཆད་པ་བདག་ཏུ་འཛིན་པའི་གཞི་ནང་གི་འཛིན་པའི་རྣམ་པའི་རང་བཞིན་དུ་སྣང་བའི་ཕྱིར་རོ། །དེའི་ཕྱིར་དེ་ལྟར་འཛིན་པའི་རང་བཞིན་དུ་གནས་པའི་བདེ་བ་ལ་སོགས་པ་ལ་ཕྱི་རོལ་དུ་ལྷག་པར་ཞེན་པ་མེད་པའི་ཕྱིར་ཕྱི་རོལ་གྱི་བྱས་པ་མ་ཡིན་ཏེ། དེའི་ཕྱིར་ཁོ་བོ་ཅག་ལ་བདེ་བ་ལ་སོགས་པའི་ཕྱི་རོལ་ཡིན་པར་མི་འགྱུར་རོ། །དེ་ཉིད་ཀྱི་ཕྱིར་གཞན་གྱི་རྒྱུད་ལ་ཡོད་
པའི་བདེ་བ་ལ་སོགས་པ་དང༌། ཆགས་པ་ལ་སོགས་པ་ལ་དམིགས་པའི་རྣལ་འབྱོར་པ་རྣམས་ཕྱི་རོལ་གྱི་ཀ་བ་ལ་སོགས་པ་བཞིན་དུ་བདག་ཏུ་འཛིན་པའི་གཞི་མ་ཡིན་པ་གཟུང་བའི་རྣམ་པར་བདེ་བའམ་ཆགས་པའམ་སྡང་བས་བདེ་བ་དང་ཆགས་པ་ལ་སོགས་པ་རྣམས་སུ་ཐལ་བ་མེད་དོ། །རྣལ་འབྱོར་པས་ནི་ཆགས་པའམ་སྡང་བ་གང་ཡིན་པ་དེ་ནི་ང་མ་ཡིན་ཞེས་བྱ་བའམ། འཛིན་པའི་རྣམ་པ་ལ་བརྟེན་པའི་སྡུག་བསྔལ་ལ་སོགས་པ་ཡང་མེད་པའི་ཕྱིར་ན། བདག་ནི་སྡུག་བསྔལ་བའམ། བདེ་བའམ་སྡང་བ་མ་ཡིན་ནོ་ཞེས་འཛིན་པའི་རྣམ་པ་མཐོང་བ་དེས་ན། ཁོ་བོ་ཅག་གི་ལྟར་ན་བདེ་བ་ལ་སོགས་པ་ཕྱི་རོལ་དུ་ཐལ་བ་མེད་དོ། །འདི་ནི་རེ་ཞིག་ཉམས་སུ་མྱོང་བ་ཡིན་ལ། འདི་ཕྱི་རོལ་གྱི་སྒྲ་ལ་སོགས་པའི་བདག་ཉིད་ཅན་གྱི་བདེ་བ་ལ་སོགས་པས་བྱས་པ་ནི་རིགས་པས་ཀྱང་ཡིད་ལ་འབབ་པ་མ་ཡིན་ནོ་ཞེས་བསྡུ་བའི་སྒོ་ནས་བསྟན་པའི་ཕྱིར་ཡང་མ་ཡིན་ཏེ་ཞེས་གསུངས་སོ། །མྱོང་བའི་རང་བཞིན་འདིའི་བདེ་བ་ལ་སོགས་པའི་བདག་ཉིད་འདི་འཇོག་པར་བྱེད་པ་འདྲ་བར་བྱེད་པ་གཞན་གང་ཡིན་པ་དེ་སྟེ་དེ་ལྟར་ནི་མ་ཡིན་ནོ། །འདིའི་བདག་ཉིད་ལ་འདྲ་བར་བྱེད་པ་གཞན་ནི་འགའ་ཡང་འཐད་པ་མ་ཡིན་ནོ་ཞེས་བྱ་བ་ནི་བསྒྲུབ་པར་བྱ་བའོ། །གཏན་ཚིགས་བཤད་པ། བདེ་བ་ལ་སོགས་པའི་བདག་ཉིད་ཀྱི་སྒྲ་ལ་སོགས་པ་དེ་ཁྱད་པར་མེད་དེ། སྣ་ཚོགས་མེད་ཀྱང་སྟེ་སྒྲ་ལ་སོགས་པ་གཅིག་ལ་ཡང་ཞེས་བྱ་བའི་དོན་ཏོ། །རང་བཞིན་གྱི་ཁྱད་པར་ལས་ཏེ་སྲོག་ཆགས་ཀྱི་རང་བཞིན་ཐ་དད་པའི་ཁྱད་པར་བྱེ་བྲག་ལས་ཅིག་ཅར་དུ་གཅིག་ཉིད་ལ་བདེ་བ་ལ་སོགས་པ་སྐྱེ་སྟེ། དཔེར་ན་ཚྭའི་རྫས་གཅིག་ཉིད་ལས་རྔ་མོ་ལ་སོགས་པ་བཞིན་ནོ། །གོམས་པའི་ཁྱད་པར་ལས་ཀྱང་གཅིག་ལ་མང་པོ་རྣམས་ཅིག་ཅར་རམ། གཅིག་རིམ་གྱིས་བདེ་བ་ལ་སོགས་པ་དེའི་བདག་ཉིད་ཁྱད་པར་དུ་གྲུབ་པ་ནི་མྱོང་བ་སྟེ་ངེས་པ་ཞེས་བྱ་བའི་དོན་ཏོ། །རྒྱུ་དེའི་ཕྱིར་འཇོག་པར་བྱེད་པ་གཞན་ཡིན་པར་རིགས་པ་མ་ཡིན་པར་གྲུབ་པ་ཡིན་ནོ་ཞེས་མཇུག་བསྡུ་བ་སྟེ། ཚད་མའི་དོན་ནི་སྔར་གཏན་ལ་ཕབ་ཟིན་ཏོ། །འདི་སྙམ་དུ་བདེ་བ་ལ་སོགས་པའི་ཁྱད་པར་དང་རྗེས་སུ་
འབྲེལ་པ་ནི་བློ་ཡིན་གྱི། མྱོང་བ་ནི་བདེ་བ་ལ་སོགས་པའི་ངོ་བོའམ་དེའི་ཁྱད་པར་དང་ལྡན་པ་མ་ཡིན་ནོ། །འདི་ལྟར་བློ་ནི་ཕྱི་རོལ་གྱི་བདེ་པ་ལ་སོགས་པའི་རྣམ་པ་དང༌། རང་ཉིད་ཀྱང་བདེ་བ་ལ་སོགས་པའི་བདག་ཉིད་ཅན་ཡིན་ནོ། །དེ་ལ་ཕྱི་རོལ་ཁྱད་པར་མེད་ཀྱང་བློ་ལ་གནས་པ་ནང་གི་བདེ་བ་ལ་སོགས་པ་ཉིད་ཁྱད་པར་ཅན་དུ་འགྱུར་བ་ཡིན་ཏེ། དེ་ཉིད་ཀྱི་ཕྱིར་བདེ་བ་ལ་སོགས་པའི་རྣམ་པ་གཞན་གྱིས་འཇོག་པ་ཡང་ཡིན་ལ། གཞན་ཁྱད་པར་མེད་པ་ཡང་ནང་གི་ཁྱད་པར་ཉིད་ལས་ཁྱད་པར་དུ་ཡང་འགྱུར་རོ་ཞེས་གཞན་དོགས་པ་ལ། སུན་དབྱུང་བའི་ཕྱིར་འདི་ཅི་ཞིག་ཅེས་འདྲི་བར་མཛད་དོ། །འདིར་བའི་བསམ་པ་ནི་འདི་ཡིན་ཏེ། བློ་དང་རིག་པའི་ཁྱད་པར་ལུང་ལས་གྲུབ་པའམ་ཉམས་སུ་མྱོང་བས་གྲུབ་པ་ཡིན་གྲང༌། དེ་ལ་ལུང་གིས་གྲུབ་པ་ལ་ནི་རྩོད་པ་མ་ཡིན་ནོ། །ཉམས་སུ་མྱོང་བས་གྲུབ་པ་འདི་གཉིས་ལ་ནི་ཁྱད་པར་མ་མཐོང་སྟེ། དེས་ན་འདི་ཞེས་མངོན་སུམ་གྱི་ཚུལ་དུ་བཟུང་ནས་འདྲི་པར་མཛད་དོ། །འདྲི་བའི་དོན་ནི་ཉམས་སུ་མྱོང་བས་གྲུབ་པའི་དངོས་པོ་གང་ལ་འཇིག་རྟེན་པ་བློའི་ཐ་སྙད་དུ་བྱེད་ཅེས་བྱ་བ་ཡིན་ནོ། །ཅིག་ཤོས་ཀྱིས་ཀྱང་ཞེན་པའོ་ཞེས་བྱ་བས་ཉམས་སུ་མྱོང་བས་གྲུབ་པ་ཉིད་བསྟན་པའི་དོན་དུ་མཚན་ཉིད་མ་བརྗོད་པར་རྣམ་གྲངས་གཞན་གྱི་སྒོ་ནས་སྟོན་པར་བྱེད་དེ། གང་ལ་འཇིག་རྟེན་ཞེན་པའི་ཐ་སྙད་དུ་བྱེད་པ་ཞེས་བྱ་བའི་དོན་ཏོ། །དེ་བཞིན་དུ་མྱོང་བའི་འདྲི་བ་དང་ལན་ལ་ཡང་བལྟ་བར་བྱའོ། །སློབ་དཔོན་གྱིས་ཀྱང་རྣམ་གྲངས་བཞི་ཀ་འཇིག་རྟེན་པས་ཉམས་སུ་མྱོང་བས་གྲུབ་པའི་དངོས་པོ་གཅིག་ཉིད་ལ་སྦྱོར་བར་གཟིགས་ནས་བློ་དང་རིག་པ་འདི་གཉིས་ལ་ཁྱད་པར་ཅི་ཡོད་ཅེས་གསུངས་ཏེ། ཅུང་ཟད་ཀྱང་མེད་དོ་ཞེས་བྱ་བའི་དོན་ཏོ། །ཅིག་ཤོས་ཀྱིས་ཀྱང་འདིས་བདག་ལ་མཚན་ཉིད་དྲིས་སོ་སྙམ་དུ་བསམས་ནས། འདི་གཉིས་ཀྱི་མཚན་ཉིད་ཐ་དད་པར་རྗོད་པར་བྱེད་དེ། ཡུལ་གྱི་རྣམ་པ་གང་ལ་ཡོད་པ་དེ་ནི་ཡུལ་གྱི་རྣམ་པ་སྟེ། དེ་ལྟ་བུར་འགྱུར་བའི་དོན་ཏོ། །འདི་མྱོང་བ་མ་ཡིན་པ་ནི་མྱོང་བ་མེད་པའོ། །བློ་ནི་ཡུལ་གྱི་རྣམ་པ་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །གཞན་ཏེ་ཡུལ་གྱི་རྣམ་པ་དང་བྲལ་བ་ནི་མྱོང་བ་ཡིན་ནོ། །འདི་ནི་འདི་གཉིས་ནི་རང་
བཞིན་ཏེ། གང་གི་ཕྱིར་སྐྱེས་བུ་སྣ་ཚོགས་ཀྱི་རང་བཞིན་གྱི་རྣམ་པར་གཏོང་བ་དང་ལེན་པ་དག་གིས་ཡོངས་སུ་འགྱུར་བ་ཅན་དུ་མ་གྱུར་ཅིག་ཅེས་རྣམ་པ་མེད་པར་འདོད་པ་ཡིན་ནོ། །མྱོང་བ་ཡོད་པ་མ་ཡིན་པ་སྟེ། སེམས་པ་དང་བྲལ་བའི་འདྲ་བ་གང་ཡིན་པ་དེ་བློའི་མཚན་ཉིད་ཡིན་ན་ནི་སྟེ་རང་གི་རང་བཞིན་རྣམ་པར་འཇོག་པའི་གོ་བར་བྱེད་པའི་རྒྱུ་ཡིན་ནོ་ཞེ་ན་ནི་མེ་ལོང་དང་ཤེལ་དང་རྡོ་བ་ལ་སོགས་པ་འདྲ་བ་དང་ལྡན་པ་གཞན་ཡང་བློ་དེར་འགྱུར་རོ། །ཧ་ཅང་ཐལ་བ་སྤངས་པའི་དོན་དུ་ཁྱད་པར་འགའ་ཞིག་ཡོད་ན་ཡང་བརྗོད་པར་བྱའོ། །རང་ཉིད་ཀྱིས་གཞན་གྱི་ཁྱད་པར་དོགས་པར་བྱེད་ནས་དགག་པར་མཛད་པ་ནི་ནང་གི་བྱེད་པ་ཞེས་སྨྲས་ཏེ། ནང་གི་སྐྱེས་བུ་དོན་ལ་ཉེ་བར་སྤྱོད་པ་ན་བྱེད་པར་གྱུར་པ་ནི་ནང་གི་བྱེད་པའོ། །དེ་ཉིད་ལ་སོགས་པ་ཤིན་ཏུ་དང་བ་ཉིད་དང༌། ནང་ཉིད་དང༌། སྐྱེས་བུའི་ལོངས་སྤྱོད་པར་ཉེ་བར་གནས་པའི་རྒྱུ་ཉིད་ལ་སོགས་པ་གང་ཡིན་པ་དེ་དག་ལ་དེ་སྐད་ཅེས་བརྗོད་དོ། །འགའ་ཞིག་གི་ཚེ་འདི་དག་ཉིད་གཞན་གྱིས་ཁྱད་པར་དུ་བཞག་པ་ཡིན་ནོ། །འདི་དག་ཀྱང་ཁ་ཅང་ཐུན་མོང་མ་ཡིན་པ་དང་ཐུན་མོང་དུ་བཟུང་བ་ཡིན་ནོ། །རེ་ཞིག་ཐུན་མོང་མ་ཡིན་པ་ནི་ནང་གི་བྱེད་པ་གང་ཞིག་སྐྱེས་བུ་ལ་ཐ་དད་པ་མེད་པར་སྣང་བ་ན་སྐྱེས་བུ་དོན་ལ་ཉེ་བར་སྤྱོད་པར་འགྱུར་བ་དེ་འདྲ་བའི་ནང་གི་དེ་བྱེད་པ་དེ་ནི་བློ་ཉིད་ཡིན་ནོ། །དེ་བཞིན་དུ་ཤིན་ཏུ་དང་བ་ལ་སོགས་པའི་ཁྱད་པར་ཐམས་ཅད་ལ་སྦྱར་བར་བྱའོ། །ཐུན་མོང་བ་ནི་ནང་གི་བྱེད་པ་ལ་སོགས་པ་ཁྱད་པར་དང་བྲལ་བའི་རང་བཞིན་ཡིན་ནོ། །དེ་ལ་ཐུན་མོང་མ་ཡིན་པ་ནི་མ་གྲུབ་སྟེ་འདི་ལྟར་དེ་འདྲ་བའི་ནང་གི་བྱེད་པ་དེ་ཡང་འདྲ་བ་ཇི་ལྟ་བུ་ཞིག་ཅེས་ཐེ་ཚོམ་ཟ་བ་ལ། འདྲ་བ་ཉིད་མཚན་ཉིད་དུ་གཞག་པར་བྱ་བ་ཡིན་པས་ཇི་ལྟར་འདྲ་བས་མཚོན་པའི་བློ་མ་གྲུབ་པ་དེ་བཞིན་དུ་འདྲ་བ་དང་ལྡན་པའི་ནང་གི་བྱེད་པ་འདི་ལ་ཡང་ཐེ་ཚོམ་ཟ་བ་ཉིད་ཡིན་པའི་ཕྱིར་འདི་འདྲ་བའི་ནང་གི་བྱེད་པ་ནི་བློ་གྲུབ་པ་ཉིད་ན་གྲུབ་པ་ཡིན་ནོ། །དེས་ན་དེའི་རྒྱུ་མཚན་ཅན་ཡིན་ཏེ། གང་དག་ལ་རྒྱུ་མཚན་བློ་དེ་ཡོད་པའོ། །འདིས་ནི་ཕན་ཚུན་བསྟེན་པའི་ཉེས་པ་བརྗོད་པ་ཡིན་ཏེ། དེ་འདྲ་བའི་ནང་གི་བྱེད་པ་ནི་བློ་གྲུབ་ན་འགྲུབ་པའི་ཕྱིར་རོ། །གང་གི་ཕྱིར་ནང་གི་བྱེད་པ་འདི་ནི་བློའི་
རང་གི་ངོ་བོ་ཡིན་པས་ད་ལ་ཐེ་ཚོམ་ཟ་ན་འདི་ལ་ཡང་ཐེ་ཚོམ་ཟ་བ་ཉིད་ཡིན་པའི་ཕྱིར་བསྒྲག་པར་བྱ་བ་མ་ཡིན་ནོ། །ཐུན་མོང་བ་ལ་ལྟོས་ནས་བཤད་པ། བློ་བྱེ་བྲག་ཏུ་རྟོགས་པའི་ཡན་ལག་སྟེ་གོ་བར་བྱེད་པ་ཉིད་མ་ཡིན་ཏེ། ཐུན་མོང་དུ་གྱུར་པས་ཁྱད་པར་དུ་མེད་པའི་ཕྱིར་རོ། །དེའི་ཕྱིར་དེས་ན་བསྒྲག་པར་བྱ་བ་མ་ཡིན་ཏེ། བློ་རྟོགས་པའི་ཡན་ལག་ཏུ་དགོང་པར་བྱ་བ་མ་ཡིན་ནོ། །ཐུན་མོང་བ་དེ་ཉིད་བསྟན་པའི་ཕྱིར་རྣམ་པ་དེ་ལྟ་བུ་ནི་ཞེས་སྨོས་ཏེ་ཁྱད་པར་མེད་པའོ། །ཤིན་ཏུ་དང་བ་ལ་སོགས་པ་གཞན་ལ་ཡང་སྟེ། མེ་ལོང་ལ་སོགས་པ་དང་མིག་ལ་སོགས་པ་ལ་ཡང་ཡོད་པའི་ཕྱིར་རོ། །དེ་ལྟར་ན་ནང་གི་བྱེད་པ་ཙམ་ནི་མིག་ལ་སོགས་པ་ལ་ཡང་ཡོད་པ་ཡིན་ནོ། །ནང་ཉིད་དང་སྐྱེས་བུའི་ལོངས་སྤྱོད་དུ་ཉེ་བར་གནས་པའི་རྒྱུ་ཉིད་ཀྱང་དོན་གཞན་ལ་ལྟོས་པ་ཉིད་ཀྱིས་ཇི་ལྟར་རིགས་པར་མིག་ངང་ཤེལ་ལ་སོགས་པ་ཡང་བློ་ཉིད་དུ་ཐལ་བའི་ཕྱིར་བློའི་མཚན་ཉིད་མ་གྲུབ་བོ། །སྒྲ་ལ་སོགས་པའི་ཡུལ་རྣམ་པར་འཇོག་པ་ནི་ཡུལ་དང་དུས་དང་རང་བཞིན་ཐ་དད་པ་རྣམས་ཐ་སྙད་དུ་བྱེད་པའོ། །རྣམ་པར་འཇོག་པ་ནི་རང་གི་རང་བཞིན་ངེས་པ་སྒྲུབ་པའམ་ཐ་སྙད་དུ་བྱེད་པ་ལས་འདིར་ནི་ཐ་སྙད་དུ་བྱེད་པ་གཟུང་ངོ༌། །ཡང་གི་སྒྲ་ནི་འདྲ་བ་བློའི་མཚན་ཉིད་མ་ཡིན་པ་འབའ་ཞིག་ཏུ་མ་ཟད་ཀྱི། བློ་འདྲ་བ་དང་བཅས་པ་ཡིན་ཡང་བློ་དང་རྣམ་པ་མེད་པའི་སེམས་པ་ཅན་དུ་ཡུལ་གྱི་དོན་རྣམ་པར་འཇོག་པ་མ་ཡིན་པར་འགྱུར་རོ་ཞེས་བསྟན་པའི་ཕྱིར་རོ། །མྱོང་བ་ཡིན་ཏེ་མྱོང་བར་བྱེད་པའོ། །མཐར་ཐུག་པ་སྟེ། མཐར་གཏུགས་པ་གང་ཡིན་པ་དག་གོ །གང་གི་ཕྱིར་མྱོང་བ་ཞེས་བྱ་བ་གཞན་བརྗོད་པ་ནི་མ་ཡིན་གྱི་འོན་ཀྱང་བལྟ་བར་བྱ་བའི་ངེས་པ་དང་རྗེས་སུ་འབྲེལ་པའི་མཐོང་བ་རྣམ་པར་བརྟག་པར་བྱ་བའི་རྣམ་པར་རྟོག་པ་ཉིད་མྱོང་བ་ཡིན་པར་ཉམས་སུ་མྱོང་བས་གྲུབ་པ་ཡིན་ནོ། །སྣང་བ་དང་རྣམ་པར་བརྟགས་པ་དག་གི་ཐ་སྙད་དུ་བྱེད་པ་ནི་མཐོང་བ་དང་རྣམ་པར་རྟོག་པ་ཉིད་ཡིན་ཏེ། དེའི་ཕྱིར་མྱོང་བའི་མཐར་ཐུག་པ་མྱོང་བའི་ངོ་བོ་ཅན་མྱོང་བ་གང་ཡིན་པ་དེ་ཉིད་དོན་རྣམ་པར་འཇོག་པ་ཡིན་གྱི་གཞན་ནི་མ་ཡིན་ནོ། །མཐོང་བ་དང་རྣམ་པར་རྟོག་པའི་རང་བཞིན་གྱི་ཐ་སྙད་འདི་ནི་ཐ་དད་པ་དང་ལྡན་པ་ཡིན་ལ། མྱོང་བ་
ཡང་རྣམ་པ་མེད་པ་ཉིད་ཀྱི་དོན་སོ་སོ་ལ་ཁྱད་པར་དུ་འདོད་པ་མ་ཡིན་ན། དེ་ཇི་ལྟར་དོན་རྣམ་པར་འཇོག་པར་བྱེད་པར་འགྱུར། འདི་སྙམ་དུ་དོན་ཐ་དད་པ་དང་འབྲེལ་པའི་མྱོང་བ་ཐ་དད་པར་སྣང་བ་དེའི་ཕྱིར་བདག་ཉིད་ཐ་དད་ཅི་དགོས་ཤེ་ན། གལ་ཏེ་དོན་ཐ་དད་པ་མི་གསལ་བར་མྱོང་བ་ཐ་དད་པར་བྱེད་པ་ཡིན་ན་ནི་དེ་དེ་ལྟར་འཐད་པ་ཞིག་ན། གང་གི་ཕྱིར་དེ་ཡང་གསལ་བཞིན་པ་ཁོ་ན་ཐ་དད་པར་བྱེད་པ་ཡིན་ཞིང་གསལ་བ་དེ་ཡང་མྱོང་བ་ཉིད་ཡིན་ལ། དེ་ཡང་ཐ་དད་པ་མེད་པ་དེས་ན། དོན་ཐ་དད་པས་ནི་མྱོང་བ་ཐ་དད་པར་མི་འགྱུར་གྱི། འོན་ཀྱང་རང་གི་ངོ་བོ་ཐ་དད་པས་ཡིན་ནོ། །དེའི་ཕྱིར་དོན་ངེས་པ་ཡོད་དམ་མེད་ཀྱང་རུང་སྟེ་གསལ་བའི་རང་བཞིན་རིག་པ་ནི་དོན་སོ་སོ་ལ་ངེས་པར་འདོད་པར་བྱ་བ་ཡིན་ལ། གསལ་བ་ངེས་པ་ཡང་དོན་རྣམས་ཀྱི་རྣམ་པར་འཇོག་པར་བྱེད་པ་ཡིན་ནོ། །སྐྱེས་བུ་ཡང་རྣམ་པར་མེད་པ་ཉིད་ཀྱིས་དོན་ཐམས་ཅད་ལ་ཁྱད་པར་མེད་པའི་ཕྱིར། འདི་ནི་འདིའི་གསལ་བ་ཡིན་གྱི་གཞན་གྱི་ནི་མ་ཡིན་ནོ་ཞེས་བརྟག་པར་མི་ནུས་པས་མ་ངེས་པར་རིག་པའི་ཕྱིར་དེ་ལ་ནི་ཡུལ་ངེས་པའི་ཐ་སྙད་ཡོངས་སུ་རྫོགས་པ་ཡོད་པ་མ་ཡིན་ནོ། །དེའི་ཕྱིར་ན་དོན་རྣམ་པར་འཇོག་པར་བྱེད་པ་ནི་ཡུལ་གྱི་རྣམ་པ་ཅན་གྱི་བློས་བྱེད་པ་ཡིན་ནོ་ཞེ་ན། བཤད་པ། སེམས་པ་མེད་པ་དེ་དོན་གྱི་རྣམ་པ་དང་ལྡན་ཡང་ཡུལ་གྱི་རྣམ་པར་གནས་པ་རྣམ་པར་འཇོག་པར་བྱེད་པར་ཇི་ལྟར་འགྱུར། ཐ་སྙད་དུ་བྱེད་པ་ནི་གསལ་བ་ཡིན་ལ། དེ་ནི་མི་གསལ་བའི་བདག་ཉིད་ཡིན་པའི་ཕྱིར་རྣམ་པར་འཇོག་པ་མ་ཡིན་ནོ། །གལ་ཏེ་དོན་དང་འདྲ་བ་ཙམ་ཉིད་ཡུལ་རྣམ་པར་འཇོག་པར་བྱེད་པ་ཡིན་ན་ནི་དེའི་ཚེ་མེ་ལོང་ལ་སོགས་པ་ཡང་རྣམ་པར་འཇོག་པར་བྱེད་པར་ཐལ་ན། མེ་ལོང་ནི་འདྲ་བར་མཐོང་ཡང་རྣམ་པ་འཇོག་པར་བྱེད་པར་ངེས་པ་མ་ཡིན་ཏེ། དེའི་ཕྱིར་རྣམ་པར་འཇོག་པར་བྱེད་པ་མ་ཡིན་ནོ། །མིག་ཕྱེ་ནས་དོན་གྱི་གཟུགས་བརྙན་དང་ལྡན་བཞིན་དུ་གཉིད་ལོག་པའི་སྐྱེས་བུ་ཡག་དོན་རྣམ་པར་འཇོག་པར་འགྱུར་ན་དེ་ལྟར་ནི་མ་ཡིན་ཏེ། དེས་ན་ཉམས་སུ་མྱོང་བ་དང་འགལ་བར་ཐལ་བའི་ཕྱིར་འདྲ་བ་ཙམ་ནི་རྣམ་པར་འཇོག་པར་བྱེད་པ་མ་ཡིན་ནོ་ཞེས་བྱ་བར་གནས་པར་ཡིན་ནོ། །གང་ཞིག་དོན་རྣམ་པར་འཇོག་པ་དེ་ནི་གསལ་བའི་བདག་ཉིད་
ཡིན་ཏེ། གང་གི་ཕྱིར་ཡུལ་རྣམ་པར་འཇོག་བ་དེ་ནི་མེ་ལོང་ལ་སོགས་པ་རྣམས་ལས་བཟློག་ནས་ངེས་པའི་རང་བཞིན་དུ་ཉམས་སུ་མྱོང་བ་ཡིན་ནོ། །གསལ་བའི་བདག་ཉིད་མ་ཡིན་པ་ཡང་རྣམ་པར་འཇོག་པར་བྱེད་པ་ཡིན་ན་ནི་ངེས་པ་མེད་པ་ཉིད་དུ་འགྱུར་བས། གསལ་བ་ལས་གཞན་ནི་རྣམ་པར་འཇོག་པ་མ་ཡིན་ནོ་ཞེས་མི་མཐུན་པའི་ཕྱོགས་ལ་ཁྱབ་པར་བྱེད་པ་མེད་པས་དེའི་བདག་ཉིད་དུ་གྲུབ་བོ། །དེས་ན་ཁྱབ་པར་བྱེད་པ་གསལ་བ་ཉིད་མེད་པའི་ཕྱིར་གསལ་བའི་བདག་ཉིད་མ་ཡིན་པའི་བློ་ནི་རྣམ་པ་དང་ལྡན་པ་ཡིན་ཡང་རྣམ་པར་འཇོག་པར་བྱེད་པ་མ་ཡིན་ལ། སྐྱེས་བུ་ཡང་སེམས་པ་ཅན་ཡིན་ཡང་འདྲ་བ་དང་བྲལ་བས་ངེས་པ་མེད་པའི་ཕྱིར་ཡུལ་རྣམ་པར་འཇོག་པ་ཞེས་བྱ་བ་ནི་མེད་པར་འགྱུར་རོ། །སྒྲ་ལ་སོགས་པའི་བདག་ཉིད་བློ་ལ་ཡོད་པའི་བདེ་བའི་འདྲ་བར་བྱེད་པའི་ཕྱི་རོལ་གྱི་བདེ་བ་ལ་ཁྱད་པར་ཡོད་པ་མ་ཡིན་ཡང་བློར་གཏོགས་པའི་བདེ་བ་བློའི་བདེ་བ་ནི་བསྒོམས་པས་བྱས་པའི་བྱེ་བྲག་གི་ཁྱད་པར་དེ་དང་ལྡན་པ་ཡིན་ནོ་ཞེས་གང་བརྗོད་པ་དེ་ནི་ཚིག་ཙམ་ལས་འོངས་པ་ཡིན་གྱི། ཚད་མ་ལས་ནི་མ་ཡིན་ཏེ། དེས་ན་རིགས་པ་མ་ཡིན་ནོ། །ཡང་གི་སྒྲ་ནི་བློ་ཐ་དད་པ་མི་རིགས་པ་དང་ཡུལ་རྣམ་པར་གཞག་པ་མེད་པའི་ཉེས་པ་འབའ་ཞིག་ཏུ་མ་ཟད་ཀྱི་ཕྱི་རོལ་གྱི་ཁྱད་བར་མེད་ན་དེ་ལ་གནས་པའི་བདེ་བ་ཡང་གོམས་པས་ཁྱད་པར་དུ་འགྱུར་བར་རིགས་པ་མ་ཡིན་ནོ་ཞེས་སྟོན་པར་བྱེད་པ་ཡིན་ནོ། །ཕྱི་རོལ་གྱིས་བསྐྱེད་པའི་བདེ་བའི་གཟུགས་བརྙན་ཉིད་སྐྱེས་བུས་ཤེས་པ་ཡིན་གྱི། བློའི་བདག་ཉིད་དུ་གྱུར་པ་ནི་མ་ཡིན་ནོ། །འདྲ་བར་བྱེད་པ་དེ་ཡང་ཉམས་སུ་མྱོང་བ་ཅི་འདྲ་བ་དེ་འདྲ་བ་ཁོ་ན་ཡིན་ཏེ། གཞན་དུ་ན་དེ་དེས་མ་བྱས་པ་ཉིད་དུ་འགྱུར་རོ། །དེས་བྱས་པ་ཉིད་ཡིན་ཡང་ཧ་ཅང་ཐལ་བར་འགྱུར་རོ། །དེས་ན་དེའི་ཁྱད་པར་གྱིས་འདྲ་བར་བྱེད་པ་ཁྱད་པར་ཅན་དུ་གོ་བར་བྱེད་པ་ཡིན་ལ། ཕྱི་རོལ་ལ་ཁྱད་པར་ཡོད་པ་ཡང་མ་ཡིན་ནོ། །གཟུགས་བརྙན་གྱི་དབང་གིས་ནི་ཁྱད་པར་དང་བཅས་པར་གནས་པ་ཡིན་ལ། ཉམས་སུ་མྱོང་བ་ནི་ཁྱད་པར་མེད་པས་ཐ་དད་པའི་ཐ་སྙད་ཀྱི་རྒྱུ་ཕན་ཚུན་འགལ་བ་འདི་ནི་གཅིག་ལ་རིགས་པ་མ་ཡིན་པ་དེའི་ཕྱིར་བཤད་པ་གཅིག་ལ་སྟེ་སྣ་ཚོགས་པར་མ་གྱུར་བའོ། །ཅིག་ཅར་ཞེས་བྱ་བ་ཡང་རྒྱུན་གཅིག་
ལ་ཁྱད་པར་སྒྲུབ་པ་མི་འགོག་པའི་ཕྱིར་རོ། །འགལ་བའི་ཕྱིར་ཞེས་བྱ་བ་ནི་གནོད་པའི་ཕྱིར་ཕྱི་རོལ་ལ་མ་ལྟོས་པར་བློ་ཁྱད་པར་དང་ལྡན་པར་རིགས་པ་མ་ཡིན་ནོ། །གང་གི་ཕྱིར་སེམས་པ་ལས་ཐ་དད་པ་རྣམ་པ་དང་ལྡན་པའི་ཞེན་པ་ལས་མཚན་ཉིད་མེད་པ་དང༌། ཡུལ་རྣམ་པར་གཞག་པ་མེད་པར་འགྱུར་བ་དང་གང་གི་དོན་དུ་བློ་ཁས་བླངས་པ་ཕྱི་རོལ་གྱིས་མ་བཞག་པའི་བློའི་བདེ་བ་ཁྱད་པར་ཅན་ཡང་གནས་པ་མེད་པ་ལས། ཡུལ་རྣམ་པར་གནས་པ་དང་ཕྱི་རོལ་ཁྱད་པར་མེད་ཀྱང་གོམས་པས་བྱས་པའི་བདེ་བ་ལ་སོགས་པའི་ཁྱད་པར་ཉམས་སུ་མྱོང་བ་ཡང་ཡོད་པ་དེའི་ཕྱིར་བདེ་བ་ལ་སོགས་པའི་རྣམ་པ་ཅན་གྱི་བློ་ཕྱི་རོལ་གྱིས་བྱས་པ་མ་ཡིན་པ་དེ་སེམས་པ་ལས་ཐ་དད་པ་ཡང་མ་ཡིན་ཏེ། འོན་ཀྱང་དེའི་རང་བཞིན་དུ་ཉམས་སུ་མྱོང་བས་གྲུབ་པ་ཡིན་ནོ། །སེམས་པ་ཡོད་པ་ལས་ལྡོག་པ་ཐ་དད་པའི་བློ་ནི་རྟོགས་པ་མེད་པའི་ཕྱིར་ཏེ། མཚན་པ་མེད་པའི་ཕྱིར་རོ། །སྔར་བཤད་པའི་ཚུལ་གྱིས་ཡུལ་དང་འདྲ་བའི་སེམས་པ་ཡོད་པ་ཉིད་དོན་རྣམ་པར་འཇོག་པ་པོ་ཡིན་ལ། བདེ་བ་ལ་སོགས་པ་ཉམས་སུ་མྱོང་བའི་རང་བཞིན་ཡང་དེ་ཉིད་ཡིན་ནོ། །བློ་ཡང་བདེ་བ་ལ་སོགས་པའི་ཁྱད་པར་ལྡན་པ་དང༌། ཡུལ་གྱི་རྣམ་པ་དང་ལྡན་པར་འདོད་པ་ཡིན་ཏེ། དེས་ན་དེ་འདྲ་བའི་བློ་ནི་སེམས་པ་ཡོད་པའི་རང་བཞིན་ཉིད་ཡིན་ནོ། །དེ་ཉིད་བསྟན་པའི་ཕྱིར་འདི་ནི་ཞེས་གསུངས་ཏེ། འདི་ནི་ཞེས་བྱ་བ་ནི་ཉམས་སུ་མྱོང་བས་གྲུབ་པའོ། །དགའ་བ་དང་ཞུམ་པ་ལ་སོགས་པའི་རྣམ་པར་འགྱུར་བ་ཡོངས་སུ་འགྱུར་བ་རྣམ་པ་དུ་མ་གང་ཡིན་པ་དེར་གཅིག་ཏུ་སྟེ། མྱོང་བ་མ་ཡིན་པའི་ཆ་དང་བྲལ་བར་མྱོང་བའི་རང་བཞིན་ཡུལ་འཛིན་པའི་རང་བཞིན་དུ་སྟེ་རྣམ་པ་འདི་དག་གིས་འཛིན་པར་བྱེད་པ་རྣམ་པར་འཇོག་པ་པོ་ཡང་དག་པར་རིག་པར་བྱེད་པར་ཉམས་སུ་མྱོང་ངོ༌། །ཐ་དད་པ་དང་བྲལ་བར་ཉམས་སུ་མྱོང་བས་གྲུབ་པའི་ཡང་དག་པར་རིག་པ་དེ་ལ་མི་ནི་ཇི་ལྟར་འདོད་པ་དེ་ལྟར་བྱེད་ལ་རག་སྟེ། མིང་ཐ་དད་པས་ནི་དོན་གཞན་དུ་འགྱུར་བ་མ་ཡིན་ནོ་སྙམ་དུ་དགོངས་པའོ། །སེམས་པ་ཅན་ཉིད་བློའི་རང་བཞིན་ཡིན་པར་ཉམས་སུ་མྱོང་ངོ་ཞེས་བྱ་བ་འདི་མི་རིགས་པ་མ་ཡིན་ནམ། གང་གི་ཕྱིར་རང་བཞིན་ཕྲ་མ་ཉིད་ཀྱིས་མྱོང་བ་ནི་མངོན་སུམ་མ་ཡིན་ལ། བློའི་རྣམ་པར་འགྱུར་བ་ཡུལ་གྱི་རྣམ་པ་ཡོངས་
སུ་འཛིན་པ་ནི་མངོན་སུམ་དུ་གསལ་བ་ཡིན་ནོ་ཞེས་གཞན་དག་དོགས་པ་ལ། བཤད་པ། བློའི་རྣམ་པར་འགྱུར་བ་མངོན་སུམ་པའི་མངོན་སུམ་དུ་བྱེད་པ་གང་ཡིན་པ་ཡུལ་དམིགས་པའི་མཚན་ཉིད་ཡུལ་ལས་ལོངས་སྤྱོད་པ་འདི་ནི་ལོངས་སྤྱོད་པར་བྱ་བ་བཞིན་དུ་མངོན་སུམ་ཡིན་ཏེ། འདི་ནི་གསལ་བའི་རང་བཞིན་དུ་ཁས་བླང་བར་བྱ་བ་ཡིན་ནོ། །སེམས་པ་ཡོད་པའི་རང་བཞིན་ལོངས་སྤྱོད་པ་ནི་མངོན་སུམ་མ་ཡིན་པ་ཉིད་ཡིན་ལ། ཡུལ་གྱི་རང་གི་ངོ་བོ་ཡང་དེ་དང་འདྲ་བར་མངོན་སུམ་ཉིད་མ་ཡིན་ནམ། དེའི་ཕྱིར་རྣམ་པར་རྟོགས་པ་འདི་གོ་སྐབས་སུ་ཇི་ལྟར་འགྱུར་ཞེ་ན། བརྗོད་པ་རེ་ཞིག་འདི་ཐམས་ཅད་ཀྱི་ཐུན་མོང་དུ་གྱུར་པའི་ཡུལ་གྱི་ཆོས་ནི་མ་ཡིན་ཏེ། གཅིག་གིས་ཉེ་བར་སྤྱོད་པ་ན་ཡང་ཐམས་ཅད་ཀྱིས་སྤྱད་པར་ཐལ་བའི་ཕྱིར་རོ། །འདི་སྐྱེས་བུའི་ངོ་བོ་རྟག་ཏུ་གནས་པ་ཡང་མ་ཡིན་ཏེ། རྟག་ཏུ་ཉེ་བར་ལོངས་སྤྱོད་པར་ཐལ་བའི་ཕྱིར་རོ། །དེའི་ཕྱིར་རེས་འགའ་བའི་ཡུལ་ལ་ཉེ་བར་ལོངས་སྤྱོད་པ་འདི་ནི། གསལ་བ་སྐྱེས་བུའི་ཆོས་བྱ་བའི་བདག་ཉིད་ཅན་ཡིན་པར་རིགས་པ་ཡིན་ལ། ལོངས་སྤྱོད་པ་དེ་མངོན་སུམ་མ་ཡིན་ན་ནི་ལོངས་སྤྱད་པར་བྱ་བ་དང་ལོངས་སྤྱོད་པ་ཐམས་ཅད་མངོན་སུམ་མ་ཡིན་པར་འགྱུར་ཏེ། དཔེར་ན་གཞན་གྱི་མངོན་སུམ་གཞན་གྱིས་མངོན་སུམ་དུ་བྱས་པའི་ལོངས་སྤྱོད་པ་དེ་མངོན་སུམ་མ་ཡིན་པ་བཞིན་དུ་བདག་ཉིད་ཀྱི་ཡང་འགྱུར་ན། མངོན་སུམ་ཡང་ཡིན་ཏེ། དེས་ན་ཉམས་སུ་མྱོང་བ་དང་འགལ་བ་ཐམས་ཅད་མངོན་སུམ་མ་ཡིན་པར་ཐལ་བར་འགྱུར་བའི་ཕྱིར་ཉེ་བར་ལོངས་སྤྱོད་པ་ནི་མངོན་སུམ་ཡིན་ནོ། །ལས་ཞེས་བྱ་བ་ནི་དེའི་ཕྱིར་གྱི་དོན་ཏེ། གང་གི་ཕྱིར་ཡུལ་ཡོད་པ་དེའི་ཕྱིར་ཡུལ་ལོངས་སྤྱོད་པར་ཐལ་བར་འགྱུར་ཏེ། ཡུལ་ལོངས་སྤྱོད་པར་འགྱུར་ཏེ། ཡང་གིས་ནི་སྐྱོན་གཞན་སྡུད་པའོ། །གང་གི་ཕྱིར་ཡུལ་མངོན་སུམ་པ་ཉེ་བར་སྤྱོད་པ་ཡིན་གྱི་གཞན་ནི་མ་ཡིན་ཏེ། དེས་ན་རིག་བར་བྱས་པའི་ཕྱིར་ན་སྤྱོད་པའི་ཡུལ་ཡོད་པ་ཙམ་ཉིད་ཉམས་སུ་མྱོང་བར་གྲུབ་པའི་ལོངས་སྤྱོད་པར་འགྱུར་རོ། །འདི་ལྟར་ལོངས་སྤྱད་པའི་ཡུལ་ནི་ཤེས་པར་བྱས་སོ་ཞེས་སྐྱེས་བུས་ཤེས་པར་བྱ་བ་ཡིན་ཏེ། དེ་ལྟ་མ་ཡིན་ཏེ། དམིགས་པར་གྱུར་པའི་རང་བཞིན་དུ་ཡོངས་སུ་མ་ཤེས་ན་ནི་
ལོངས་སྤྱད་པར་བྱ་བ་ལ་ལོངས་སྤྱད་པ་ཉིད་དུ་མི་འགྱུར་རོ། །ལོངས་སྤྱོད་པ་ནི་དམིགས་པ་ཉིད་ཡིན་པས་དམིགས་པ་མ་ཤེས་ན་ནི་དེའི་ཁྱད་པར་ཅན་གྱི་དོན་ཡང་ཤེས་པར་མི་འགྱུར་ཏེ། དབྱིག་པ་མ་ཤེས་ན་དབྱིག་པ་ཅན་བཞིན་ནོ། །ལོངས་སྤྱོད་པ་ཤེས་པར་བྱེད་པའི་ཆོས་ཐ་དད་པར་ཡང་ཤེས་པ་མེད་དོ། །དེས་ན་ལོངས་སྤྱད་བཞིན་པར་ཤེས་པའི་ཡུལ་ཉིད་ལོངས་སྤྱད་པ་ལོངས་སྤྱོད་པའི་རང་བཞིན་དུ་ཤེས་པར་འགྱུར་བས་ན། རིག་བཞིན་པའི་ཡུལ་ཡོད་པ་ཉིད་ལོངས་སྤྱོད་པ་རིག་པ་ཡིན་པར་འགྱུར་ན། དེ་ལྟར་ཡང་རིགས་པ་མ་ཡིན་ནོ། །འདི་ལྟར་ལོངས་སྤྱོད་པའི་བདག་ཉིད་དུ་ཤེས་པའི་ཡུལ་ཙམ་ནི་ཐུན་མོང་བ་ཡིན་པའི་ཕྱིར་ཏེ། ཇི་ལྟར་གཟུགས་ལ་འདི་ནི་དེ་ཁོ་ནའི་ཡིན་ནོ་ཞེས་བདག་ཉིད་ལ་ངེས་པར་མི་ཤེས་པ་དེ་བཞིན་དུ་ལོངས་སྤྱོད་པ་ཡང་བདག་གིས་མཐོང་ངོ་ཞེས་ཁྱད་པར་ཅན་དུ་ངེས་པར་མི་འགྱུར་ཏེ། ཇི་ལྟར་ཡུལ་ཡོད་པ་ཙམ་གྱིས་བདག་ཉིད་སོ་སོ་ལ་ཁྱད་པར་མེད་པ་དེ་བཞིན་དུ་ལོངས་སྤྱོད་པའི་བདག་ཉིད་ཀྱང་ཁྱད་པར་མེད་པར་འགྱུར་རོ། །གཞན་ཡང་དམིགས་པར་བྱ་བ་ཉིད་དམིགས་པ་ཡིན་པར་སྐྱེས་བུས་རྟོགས་པར་འགྱུར་ན། ལོངས་སྤྱོད་པར་བྱ་བ་ཉིད་ལ་ལོངས་སྤྱོད་པར་ངེས་པ་ནི་འགའ་ཡང་ཡོད་པ་མ་ཡིན་ནོ། །དེའི་ཕྱིར་ལོངས་སྤྱོད་པར་ནི་བདག་ཉིད་སོ་སོ་ལ་ཐ་དད་པར་དམིགས་པར་བྱ་བ་ལས་གཞན་དམིགས་པའི་རང་བཞིན་དུ་ཁས་བླང་བར་བྱ་སྟེ། གཞན་དུ་ན་བདག་ཉིད་སོ་སོ་ལ་ཐ་དད་པའི་ལོངས་སྤྱོད་པ་དམིགས་པར་བྱ་བ་ལས་གཞན་གྱི་ཁྱད་པར་གྱིས་དེ་དང་ལྡན་པའི་ཡུལ་རིག་པར་མི་འགྱུར་རོ།། འདི་སྙམ་དུ་ཡུལ་ལས་ཐ་དད་པའི་ལོངས་སྤྱོད་པ་མངོན་སུམ་མ་ཡིན་པ་ཡང་རང་གི་རྒྱུད་ལ་ཡོད་པ་ཡིན་ལ། ལོངས་སྤྱོད་པ་དེ་ཉིད་ནི་སྐྱེས་བུ་སོ་སོ་ལ་དེས་པ་དང༌། ལོངས་སྤྱད་པར་བྱ་བ་ལས་ཐ་དད་པ་ཡང་ཡིན་པ་དེའི་ཕྱིར་ཡུལ་ཡོད་པ་ཉིད་ལོངས་སྤྱོད་པར་འགྱུར་ཞེས་ཅིའི་ཕྱིར་བརྗོད་ཅེ་ན། བཤད་པ། ལོངས་སྤྱོད་པ་ཐ་དད་པ་ཡོད་ཀྱང་མེད་པ་དང་ཁྱད་པར་མེད་དེ། ཇི་ལྟར་མེད་པའི་ལོངས་སྤྱོད་པ་ནི་ངེས་པར་ལོངས་སྤྱོད་པ་མ་ཡིན་པ་དེ་བཞིན་དུ་ཡོད་ཀྱང་ངོ༌། །དེས་ན་ཁྱད་པར་མེད་པ་དེའི་ཕྱིར་ཡུལ་ཡོད་པ་ཉིད་ལོངས་སྤྱོད་པ་རིག་པ་ཡིན་པར་འགྱུར་རོ། །གང་ཞིག་མེད་པ་དེ་ནི་རང་གི་བསྒྲུབ་པར་
བྱ་བའི་དོན་བྱེད་པར་མི་ནུས་པ་ཡིན་ལ། ཡོད་པ་ནི་ནུས་པ་མ་ཡིན་ནམ། དེས་ན་ཅིའི་ཕྱིར་ཁྱད་པར་མེད་ཅེ་ན། བཤད་པ། ཡུལ་དེའི་ལོངས་སྤྱོད་པ་དེ་ལས་ཐ་དད་པ་གང་ཡིན་པ་དེ་མ་གྲུབ་པ་མ་ཤེས་པའི་ཕྱིར་ཏེ། མི་སྣང་བའི་ཕྱིར་རོ་ཞེས་བྱ་བའི་དོན་ཏོ། །འདིར་ཤེས་པར་བྱས་པའི་དོན་ནི་ལོངས་སྤྱད་པ་ཡིན་ལ། ལོངས་སྤྱད་པར་ཡང་ལོངས་སྤྱོད་པའི་གནས་སྐབས་ཡིན་ཏེ། དེའི་ཕྱིར་ཤེས་པར་གྱུར་བའི་དོན་གྱི་གནས་སྐབས་འགའ་ཞིག་ཉིད་ལོངས་སྤྱད་པའི་ཁྱད་པར་དུ་གྱུར་པའི་ལོངས་སྤྱོད་པར་འཐད་པ་ཡིན་ནོ། །ཐ་དད་པར་གྱུར་པའི་ལོངས་སྤྱོད་པ་ཤེས་པ་ཡང་མ་ཡིན་ཏེ། དེས་ན་གཞན་གྱི་ལོངས་སྤྱོད་པ་བཞིན་དུ་ལོངས་སྤྱད་པའི་དོན་གྱི་ཁྱད་པར་དངོས་པོ་ལ་ཡོད་ཀྱང་མེད་པ་དང་ཁྱད་པར་མེད་དོ། །དེའི་ཕྱིར་ཡུལ་ཡོད་པ་ཙམ་ཤེས་པར་གྱུར་པའི་ཡུལ་ཡོད་པ་ཙམ་ལོངས་སྤྱོད་པར་འགྱུར་རོ། །ཤེས་པ་མ་ཤེས་ཀྱང་ཡུལ་ཤེས་པ་ཡིན་ནོ་ཞེས་ཕ་རོལ་གྱི་འདོད་པ་སུན་དབྱུང་བའི་ཕྱིར་ཁས་བླངས་ནས་ཤེས་པར་འགྱུར་བའི་ཡོད་པ་ཉིད་ཙམ་ཞེས་བརྗོད་པ་ཡིན་ནོ། །མ་གྲུབ་བ་ཉིད་ཅིའི་ཕྱིར་ཞེ་ན། བཤད་པ། ལོངས་སྤྱོད་པ་མངོན་སུམ་མ་ཡིན་པས་སོ། །འོ་ན་ནི་ལྐོག་ཏུ་གྱུར་པའི་ལོངས་སྤྱོད་པ་རྟགས་ལས་ཤེས་པ་ཡིན་ནོ་ཞེ་ན། བཤད་པ། རྟགས་ཅན་ནི་རྟགས་ཀྱིས་རབ་ཏུ་སྦྱར་བ་སྟེ། རྟགས་ཀྱི་རྒྱུ་མཚན་ཅན་གྱི་ཉེ་བར་ལོངས་སྤྱོད་པ་དེ་ནི་ལོངས་སྤྱོད་པ་མ་ཡིན་པའི་ཕྱིར་ཏེ། ལོངས་སྤྱོད་ཀྱི་རང་བཞིན་མ་ཡིན་པའི་ཕྱིར་རོ། །ཡང་ནི་གཏན་ཚིགས་བསགས་པ་སྟེ། གཏན་ཚིགས་འདིས་ཀྱང་རྟགས་གྲུབ་པ་ཡིན་ཡང་ཡུལ་ཡོད་པ་ཉིད་ལོངས་སྤྱོད་པར་འགྱུར་རོ། །ཇི་ལྟར་ན་གཞན་གྱི་ལོངས་སྤྱོད་བཞིན་དུ་འགྱུར་ཞིང༌། ཇི་ལྟར་རྟགས་ཅན་གྱི་ལོངས་སྤྱོད་མ་ཡིན་ཞེ་ན། སྨྲས་པ། ལོངས་སྤྱོད་པ་ནི་མངོན་སུམ་དུ་གྱུར་པའི་དོན་ཡིན་གྱི་ལྐོག་ཏུ་གྱུར་པ་ནི་མ་ཡིན་ཏེ། དེའི་ཕྱིར་ལོངས་སྤྱོད་ན་ནི་དོན་གྱི་མངོན་སུམ་གྱི་གནས་སྐབས་ཡིན་ན། ལྐོག་ཏུ་གྱུར་པའི་ཤེས་པ་ནི་མངོན་སུམ་དུ་གྱུར་པའི་གནས་སྐབས་མ་ཡིན་ཏེ། དེས་ན་དོན་གྱི་མངོན་སུམ་དུ་གྱུར་པ་ཡོང་པ་ཉིད་ལོངས་སྤྱོད་པར་འགྱུར་ལ། དེ་ལ་ཡང་ཉེས་པ་བརྗོད་ཟིན་ཏོ། །གལ་ཏེ་དོན་གྱི་མངོན་སུམ་དུ་གྱུར་པའི་གནས་
སྐབས་ལོངས་སྤྱོད་པ་ཡིན་ན། འོ་ན་ནི་ཤེས་པ་མངོན་སུམ་ཡིན་ཡང་ལོངས་སྤྱོད་པར་མི་འགྱུར་ཏེ། དེ་ནི་དོན་གྱི་མངོན་སུམ་གྱི་གནས་སྐབས་མ་ཡིན་པའི་ཕྱིར་རོ་ཞེ་ན། འོ་ན་དེའི་རང་བཞིན་འཛིན་པའི་ཤེས་པའི་མངོན་སུམ་གྱི་རང་བཞིན་སྤངས་ནས་དོན་གྱི་མངོན་སུམ་གྱི་གནས་སྐབས་གཞན་གང་ཡིན་པར་བརྟག་པར་ནུས། དེ་ལྟར་ན་འོ་ན་མངོན་སུམ་དུ་གྱུར་པའི་གནས་སྐབས་ཀྱི་བདག་ཉིད་ཅན་ཡུལ་ཡོད་པ་ཉིད་ལོངས་སྤྱོད་པ་ཡིན་པར་འགྱུར་གྱི། ལྐོག་ཏུ་གྱུར་པའི་ཤེས་པ་ནི་མ་ཡིན་ནོ་ཞེས་ཇི་ལྟར་བརྗོད་ཅེ་ན། འདིར་སྨྲས་པ། ལོངས་སྤྱོད་པ་མངོན་སུམ་མ་ཡིན་ན་ནི་ལོངས་སྤྱོད་པར་བྱ་བ་མངོན་སུམ་དུ་མི་འགྱུར་བས་ཐམས་ཅད་མངོན་སུམ་མ་ཡིན་པར་ཐལ་བར་འགྱུར་རོ་ཞེས་འདི་ཉིད་དུ་སྔར་བརྗོད་ཟིན་ཏོ། །ད་ལྟར་ནི་ལོངས་སྤྱོད་པ་མེད་པར་ལོངས་སྤྱོད་པར་བྱ་བ་མངོན་སུམ་དུ་ཁས་བླངས་ནས་ཡུལ་ཡོད་པ་ཉིད་ལོངས་སྤྱོད་པར་ཐལ་ལོ་ཞེས་ཉེས་པ་གཞན་འགོད་པ་ཡིན་ཏེ། དེའི་ཕྱིར་མངོན་སུམ་གྱི་ཤེས་པ་ལ་མ་གཏོགས་པ་མངོན་སུམ་གྱི་རང་བཞིན་དུ་འགྱུར་བའི་དོན་ནི་གཞན་གྱི་ངོར་ཉེས་པ་བརྗོད་པར་འདོད་པ་ཡིན་གྱི་དེ་ཁོ་ནར་ནི་མ་ཡིན་པས་ཉེས་པ་མེད་དོ། །དེ་བཞིན་དུ་སྔར་ཡང་དོན་གྱི་ཤེས་པའི་གནས་སྐབས་ནི་ཤེས་པ་ཉིད་ཡིན་ཏེ། ཡོད་པ་ཉིད་འབའ་ཞིག་ནི་སྐྱོན་བརྗོད་པའི་དོན་དུ་གཞན་གྱི་དོར་ཁས་བླངས་པ་ཡིན་ནོ། །ལོངས་སྤྱོད་པའི་རྟགས་གྲུབ་པར་ཁས་བླངས་ནས་འདི་སྐད་བརྗོད་པ་ཡིན་ཏེ། རྟགས་མི་རིགས་པའི་ཕྱིར་རོ། །དེ་ལས་ཀྱང་ཞེས་བྱ་བ་ནི་རྟགས་ལས་ཀྱང་ཤེས་པ་ཞེས་བྱ་བའི་ལོངས་སྤྱོད་པ་མི་འགྲུབ་པ་ཉིད་དེ། སྔར་སྤྱོད་པའི་རྟག་པར་བྱ་བ་རྟགས་མི་འཐད་པ་ཉིད་ཇི་སྐད་བཤད་པ་བཞིན་ནོ། །གལ་ཏེ་ཡུལ་ལོངས་སྤྱོད་པ་མངོན་སུམ་མ་ཡིན་ན་ཐམས་ཅད་མངོན་སུམ་མ་ཡིན་པ་ཉིད་དོ། །ལོངས་སྤྱོད་བར་བྱ་བ་མངོན་སུམ་ཡིན་ན་ཡང་ཡུལ་ཡོད་པ་ཉིད་ལོངས་སྤྱོད་པར་འགྱུར་ལ་དེ་ཡང་ཉེས་པ་སྔར་བརྗོད་ཟིན་ན་འོ་ན་ནི་ཡུལ་ལོངས་སྤྱོད་པ་ནི་མངོན་སུམ་ཡིན་ཏེ། གང་གི་ཕྱིར་བློའི་མེ་ལོང་ལ་སྐྱེས་བུའི་གཟུགས་བརྙན་དང་ཡུལ་གྱི་གཟུགས་བརྙན་ཚོགས་པའི་ལོངས་སྤྱོད་པ་དེ་ནི་མངོན་སུམ་ཡིན་ལ། སྐྱེས་བུ་ནི་མངོན་སུམ་མ་ཡིན་པ་ཉིད་དོ་ཞེ་ན། དེ་ལྟར་ན་ཞེས་གསུངས་ཏེ། སྐྱོན་དེར་གྱུར་པ་ནའོ། །གང་ཡང་དངོས་པོས་དངོས་པོ་
མཚོན་པས་ཞེས་བྱ་བས་འདུན་པ་ཡིན་ནོ། །སྐྱོན་གྱི་དངོས་པོས་ཡུལ་ལོངས་སྤྱོད་པ་མངོན་སུམ་གྱིས་དངོས་པོར་མཚོན་པ་ཡིན་ཏེ། གང་གི་ཕྱིར་སྐྱོན་དུ་ཐལ་བ་ན་ཡུལ་དམིགས་པ་ལོངས་སྤྱོད་ཀྱི་བདག་ཉིད་མངོན་སུམ་གྱིས་གཟུང་བར་བྱ་བ་ཡིན་པ་དེ་ལྟར་གྱུར་ན་ལོངས་སྤྱད་པར་བྱ་བ་དང༌། ལོངས་སྤྱོད་པར་བྱེད་པ་དང༌། ལོངས་སྤྱོད་པར་བྱེད་པ་པོ་ཡོད་པའི་ཐ་སྙད་རྫོགས་པ་ཡིན་ནོ། །ཕྱིར་ཞེས་བྱ་བ་ནི་དེའི་ཕྱིར་ཏེ། གང་གི་ཕྱིར་རྫོགས་པ་དེའི་ཕྱིར་སེམས་པ་ཡོད་པ་གཞན་བརྟགས་པ་ནི་དོན་མེད་དེ། །དགོས་པ་དང་བྲལ་བ་ཡིན་ནོ། །གང་གི་ཕྱིར་ལོངས་སྤྱད་པར་བྱ་བ་ལས་ཐ་དད་པའི་ལོངས་སྤྱོད་པར་བྱེད་པ་གང་ཡིན་པ་དེ་ཉིད་ནི་དེའི་རྣམ་པ་ཉིད་ཀྱིས་ལོངས་སྤྱད་པར་བྱ་བར་གསལ་བར་སྣང་བ་ཡིན་ནོ། །དེས་ན་བདག་ཏུ་འཛིན་པའི་གཞིར་གྱུར་བའི་དམིགས་པར་བྱེད་པ་དེ་ཉིད་བྱེ་བ་པོར་སྣང་བ་ནི་ལོངས་སྤྱོད་པར་བྱེད་པ་པོར་ཞེན་པ་ཡིན་ནོ། །དེ་མངོན་སུམ་དུ་གྱུར་པ་ཉིད་ཀྱང་ཡུལ་མངོན་སུམ་དུ་གྱུར་པ་ཡིན་ལ། ལོངས་སྤྱོད་པར་བྱེད་པ་ཡང་དེ་ཉིད་ཡིན་ཏེ། མངོན་སུམ་ཉིད་རང་གི་ངོ་བོ་ལས་ཐ་དད་པ་ནི་མ་ཡིན་ནོ། །དེས་ན་ལོངས་སྤྱོད་པ་པོ་ཉིད་ལོངས་སྤྱོད་པར་བྱེད་པ་ཡིན་པའི་ཕྱིར་ཐ་སྙད་རྫོགས་པར་ལོངས་སྤྱོད་པར་བྱེད་པ་མ་ཡིན་ལ་ལོངས་སྤྱོད་པ་པོ་ཡང་མ་ཡིན་ལ། ལོངས་སྤྱད་པར་བྱ་བ་ཡང་མ་ཡིན་པའི་ལྐོག་ཏུ་གྱུར་པ་སེམས་པ་ཅན་གཞན་མངོན་སུམ་དང་འཐད་པས་སྟོང་པ་དང་ཞིག་བློ་ལ་གཟུགས་བརྙན་འཇོག་པར་བྱེད་པར་བརྟགས་པ་དེ་ནི་མངོན་སུམ་དང་འཐད་པས་སྟོང་པ་དང་དགོས་པ་མེད་པས་དེ་ནི་རི་བོང་གི་རྭ་དང་འདྲ་བ་ཡིན་ནོ། །གང་སྐྱེས་བུ་སོ་སོ་ལ་ཐ་དད་པ་དང༌། ལོངས་སྤྱད་པར་བྱ་བ་ལས་གཞན་དུ་གྱུར་བའི་ལོངས་སྤྱོད་པར་བྱེད་པ་དེ་ནི་གདོན་མི་ཟ་བར་སྣང་བར་ཁས་བླང་བར་བྱ་བ་ཡིན་ལ། དེ་ལྟར་གྱུར་བ་ན་ཡང་ཐ་སྙད་རྫོགས་པའི་ཕྱིར་སེམས་པ་ཅན་གཞན་ནམ། གཟུགས་བརྙན་འཇོག་པར་བྱེད་པ་དེས་ཅི་ཞིག་བྱ། འདི་སྙམ་དུ་གལ་ཏེ་སེམས་པ་ཡོད་པ་ལྐོག་ཏུ་གྱུར་པ་མ་ཡིན་དུ་ཆུག་པ་དེ་ལྟ་ན་ཡང་ཉམས་སུ་མྱོང་བས་གྲུབ་པའི་དམིགས་པ་ནི་བློ་ལས་གཞན་ཡིན་ནོ་སྙམ་ན་དེ་ཡང་ཞེས་སྨོས་ཏེ། རེ་ཞིག་ཐ་སྙད་རྫོགས་པའི་ཡུལ་ལ་སེམས་པའི་བདག་
ཉིད་ཅན་གྱི་དམིགས་པ་དེ་ནི་བློ་དང་རང་བཞིན་གཅིག་ཏུ་མཐོང་ཞིང་གང་གིས་ཐ་དད་པར་བརྟག་པར་བྱ་བ་མཐོང་བ་འདི་ལ་ནི་རབ་རིབ་ཅན་གྱིས་མཐོང་བ་བཞིན་དུ་གནོད་པར་བྱེད་པ་ཡང་མ་མཐོང་ངོ༌། །གནོད་པར་བྱེད་བ་མེད་པར་ནི་གཞན་དུ་ཉམས་སུ་མྱོང་བ་ལ་གཞན་དུ་བརྟགས་པ་མི་རིགས་ཏེ། གནོད་པར་བྱེད་པ་མེད་པའི་ཕྱིར་འཁྲུལ་པར་མི་འགྲུབ་བོ་ཞེས་གང་འཆད་པར་འགྱུར་བ་ཡིན་ནོ། རྣམ་འགྲེལ་ལས་ཀྱང་གནོད་པར་བྱེད་པའི་རིགས་པ་མེད་པར་ནི་ཉམས་སུ་མྱོང་བ་སྤང་བར་རིགས་པ་མ་ཡིན་ནོ་ཞེས་བཤད་དོ། །འདི་ལ་ཉམས་སུམ་མྱོང་བ་ཐ་དད་པའི་ཐ་སྙད་དུ་ཡང་འཐད་པ་མ་ཡིན་ནོ། །ཕྱིར་ཞེས་བྱ་བ་ནི་གཏན་ཚིགས་སོ། །ཐ་སྙད་ཀྱི་ཡན་ལག་རྣམ་པ་དང་ལྡན་པའི་བློ་གང་ཡིན་པ་དང༌། གང་ཡང་མྱོང་བ་དེ་དག་ཐ་དད་པ་མ་ཡིན་པ་ཉིད་དུ་གཞན་པ་ནི་མ་ཡིན་ནོ་ཞེས་གང་བརྗོད་པ་ཡིན་ནོ། །དེའི་ཕྱིར་དེ་ལྟར་ཡུལ་དམིགས་པ་ཞེས་བྱ་བ་ལོངས་སྤྱོད་པ་པོའི་བྱ་བའི་བདག་ཉིད་ལོངས་སྤྱོད་པར་བྱེད་པ་མངོན་སུམ་ཡིན་པ་ན་ཉམས་སུ་མྱོང་བའི་རྗེས་སུ་འབྲང་བའི་ལོངས་སྤྱོད་པ་པོ་དང་ལོངས་སྤྱོད་པར་བྱེད་པ་དང༌། ལོངས་སྤྱད་པར་བྱ་བའི་ཐ་སྙད་རྫོགས་པའི་ཕྱིར་ཐ་དད་པའི་སེམས་པ་ཡོད་པ་བཀག་པ་ལ་ཉམས་སུ་མྱོང་བ་ཉིད་སེམས་པ་ཅན་དུ་གནས་པར་རྟོགས་ནས་གཞན་རྩོད་པར་བྱེད་དེ། ལྕགས་ཀྱི་གོང་བུ་ལས་མེ་བཞིན་དུ་བློ་དང་སེམས་པ་ཅན་དག་འདྲེས་པས་རྣམ་པར་དབྱེར་མེད་དེ། རྣམ་པར་དབྱེ་བའི་རྟོགས་པ་མེད་དོ། །སེམས་པ་དང་ཞེས་བྱ་བ་ནི་འདི་ཉིད་སྟོན་པར་བྱེད་པའོ། །སེམས་པ་ནི་སྐྱེས་བུའོ། །ཞེན་པ་ནི་བློ་སྟེ། འདི་ལྟར་དམིགས་པར་བྱ་བའི་ཡུལ་སྣང་བ་ན་བློ་དང་སྐྱེས་བུའི་རང་བཞིན་དམིགས་པར་གྱུར་པ་དེའི་ཚེ་བློའི་བདག་ཉིད་ལ་སྐྱེས་བུའི་གྲིབ་མ་བབས་པའི་ཕྱིར་དེ་དག་ནི་རྣམ་པར་དབྱེ་བ་དམིགས་པར་འགྱུར་ཏེ། གང་གི་ཕྱིར་སྐྱེས་བུ་ནི་གཟུགས་བརྙན་འཇོག་པར་བྱེད་པ་ཡིན་ལ། གཟུགས་བརྙན་དང་ལྡན་པའི་བློ་ཡང་ལོངས་སྤྱོད་པ་པོ་དང་འདྲ་བའི་ཕྱིར་རོ། །ལོངས་སྤྱོད་པ་པོ་ནི་དེ་ཉིད་ཡིན་ཏེ་འདི་ལྟ་སྟེ་གཟུགས་བརྙན་གཏོད་པར་བྱེད་པའོ། །དེའི་ཕྱིར་ལོངས་སྤྱོད་པའི་བདག་ཉིད་ཀྱིས་དེ་གཉིས་འདྲེས་པས་ན་རྣམ་པར་དབྱེ་བ་མེད་པ་ཡིན་ནོ། །ལོངས་སྤྱོད་པའི་གནས་སྐབས་ཀྱི་བདག་ཉིད་ཅན་འདྲེས་བ་དེས་བསླུས་པའི་རྟོགས་པ་པོ་ནི་ལོངས་སྤྱོད་པ་པོའི་སྐྱེས་
བུ་དང་དེའི་གཟུགས་བརྙན་ཅན་གྱི་བློ་ལོངས་སྤྱོད་པ་པོ་དང་འདྲ་བའི་ཕྱིར་ལོངས་སྤྱོད་པ་པོ་ཉིད་དུ་སྣང་བ་ཐ་དད་པར་མི་རྟོག་སྟེ། དཔེར་ན་འདྲེས་པས་བསླུས་པའི་ལྟ་བ་པོས་ལྕགས་ཀྱི་གོང་བུ་མེ་ལས་ཐ་དད་པར་མི་རྟོགས་པ་བཞིན་ནོ། །གང་གི་ཕྱིར་ཐ་དད་པ་མི་ཕྱེད་པར་འགྱུར་བ་ལྕགས་ཀྱི་གོང་བུ་དང་མེ་དག་གཅིག་ལ་ཇི་ལྟར་ཡོད་ཅེ་ན། སྨྲས་པ། མེ་དང་ལྕགས་གོང་དེ་གཉིས་ཀྱི་གཟུགས་དང་རེག་པ་ནི་ངེས་བའི་ཕྱིར་རོ། །ལྕགས་གོང་གི་སྲ་བ་དང་དབྱི་བས་དང༌། མེའི་གཟུགས་དམར་པོ་དང་དྲོ་བའི་རེག་པ་ཡང་རྟོགས་པ་ཡིན་ཏེ། དེས་ན་ཇི་ལྟ་གཉི་ག་ཡོད་པ་ལ་ཕན་ཚུན་ཞུགས་པའི་མཚན་ཉིད་ཀྱི་འདྲེས་པར་ཐ་དད་པར་མི་རྟོགས་པ་དེ་བཞིན་དུ་གཟུགས་བརྙན་འཇོག་པར་བྱེད་པའི་སྐྱེས་བུ་དང་གཟུགས་བརྙན་ཅན་གྱི་བློ་རྣམ་པ་གཅིག་པ་ཉིད་ཀྱིས་འདྲེས་པའི་ཕྱིར་རྣམ་པར་དབྱེ་བ་རྟོགས་པ་མེད་པ་ཡིན་ནོ་ཞེ་དེ་ལྟར་གཞན་དག་དོགས་པ་ལ། ལན་གདབ་པའི་ཕྱིར་བཤད་པ། དེ་ལྟ་ཡིན་ན་སྟེ། རྒྱུ་མཚན་འཆོལ་པར་འགྱུར་བ་ན། དངོས་པོ་ཀུན་ལ་ཐ་དད་པ་དང་ཐ་དད་པ་མེད་པ་དེ་དག་གི་རྣམ་གཞག་དེས་པའི་རྣམ་པར་དབྱེ་བ་འདི་ནི་ཐ་དད་པའོ། །འདི་ནི་ཐ་དད་པ་མེད་པའོ་ཞེས་བྱ་བའི་རྣམ་པར་གཞག་པ་དེ་ནི་ཉམས་པར་འགྱུར་ཏེ། འགའ་ཞིག་ཏུ་ཡང་ཐ་དད་པ་དང་ཐ་མི་དད་པ་རྣམ་པར་གཞག་པར་མི་འགྱུར་རོ། །འདི་ཉིད་རྣམ་པར་འགྲེལ་པ་ན་ཇི་ལྟར་ཐ་དད་པ་མེད་པ་དེ་སྟོན་པར་བྱེད་དེ། དོན་དམིགས་པ་ཐམས་ཅད་ལ་ཇི་ལྟར་སྐྱེས་བུ་དང་བློ་ཐ་དད་པ་མེད་པར་སྣང་ཡང་ཐ་དད་པ་དེ་བཞིན་དུ་འདི་ཡང་ཐ་དད་པ་ཡིན་ནོ་ཞེས་འདྲེས་པར་དགོས་པར་འགྱུར་ལ། འདྲེས་པར་དོགས་པ་དེས་ཀྱང་གཅིག་ཏུ་ངེས་པ་མེད་པར་འགྱུར་ལ། གཅིག་ཉིད་དུ་མ་རྟོགས་པ་ལས་ཀྱང་ཐ་དད་པ་མེད་པའི་རྣམ་པར་གཞག་པ་ཉམས་པ་ཡིན་ནོ། འདི་ཙམ་ཞིག་ནི་ཐ་དད་པའི་རྣམ་པར་གཞག་པ་ཉམས་པ་ལ་ཡང་དགོང་པར་ནུས་པ་ཡིན་ཏེ། འདི་ལྟར་སྣ་ཚོགས་པའི་རང་བཞིན་རྣམ་པ་ཐ་དད་བ་རྣམས་ལ་ནི་ཕན་ཚུན་རང་བཞིན་རྗེས་སུ་འབྲེལ་པ་ཡོད་པ་མ་ཡིན་ཏེ། དཔེར་ན་བུམ་པ་སྣམ་བུ་མ་ཡིན་ལ། སྣམ་བུ་ཡང་བུམ་པའི་རང་བཞིན་མེད་པ་དེའི་ཕྱིར་དུ་མ་ཉིད་དུ་དེས་པར་བྱེད་པ་བཞིན་ནོ། །གང་གི་ཚེ་རྣམ་པ་གཅིག་ལ་ཡང་དུ་མ་ཉིད་དུ་དགོས་པ་དེའི་ཚེ་མ་དམིགས་
ཁྱད་བུམ་པ་ཡང་སྣམ་བུའི་རང་བཞིན་དུ་དགོས་པར་འགྱུར་ཞིང༌། དེ་བཞིན་དུ་མ་དམིགས་ཀྱང་ཐམས་ཅད་ལ་ཐམས་ཅད་ཀྱི་རང་བཞིན་རྗེས་སུ་འཇུག་པའི་ཕྱིར་འགའ་ཡང་གང་ལས་ཀྱང་ཐ་དད་པར་མི་འགྱུར་རོ། །གང་གི་ཚེ་དམིགས་པའི་ཕྱིར་གཞན་མེད་པར་དེས་བ་ཡིན་ན་ནི་གཅིག་གི་ཐ་སྙད་དུ་འགྱུར་བས་དེའི་ཚེ་འདས་པ་ཉིད་ཀྱང་རྣམ་པར་གནས་པར་འགྱུར་རོ། །དེའི་ཕྱིར་དེ་ལྟར་གཅིག་གི་ཐ་སྙད་ཡོད་ན་ནི་དུ་མའི་ཐ་སྙད་དུ་འགྱུར་གྱི་དེ་མེད་ན་ནི་དུ་མ་ཉིད་དུ་མི་འགྱུར་བ་དེའི་ཕྱིར་ག་ཉམས་པ་ཡིན་མོད་ཀྱི་འོན་ཀྱང་རང་གིས་ཁས་བླངས་པ་ཉིད་ཀྱིས་ཐ་དད་པའི་ཐ་སྙད་མེད་པར་བསྟན་པའི་ཕྱིར་བཤད་པ། བདེ་བ་དང་དཀར་པོ་ལ་སོགས་པའི་རྣམ་པ་ཐ་དད་པར་དམིགས་པ་ཐ་དད་པར་རིག་པ་དག་ཀྱང་གཅིག་ཏུ་ཁས་བླངས་བའི་ཕྱིར་ཏོ། བདེ་བ་ལ་སོགས་པ་ནི་སྒྲ་ལ་སོགས་པའི་བདག་ཉིད་ཡིན་ནོ་ཞེས་གང་སྨྲས་པ་ཡིན་ནོ། །དེའི་ཕྱིར་ཐ་དད་པར་རྣམ་པར་གཞག་པ་ཡང་ཉམས་པ་ཡིན་ནོ། །དེས་ན་གྲངས་ཅན་ལ་ཐ་དད་པར་དམིགས་པ་ནི་ཐ་དད་པའི་རྒྱུ་མཚན་མ་ཡིན་ཐ་དད་པ་ཐ་དད་པ་མེད་པར་དམིགས་པ་ཡང་ཐ་དད་པ་མ་ཡིན་པའི་རྒྱུ་མ་ཡིན་ཏེ། དེའི་ཕྱིར་འདི་དག་རྒྱུ་ཅི་ལ་བརྟེན་ནས་རྣམ་པར་འཇོག་ཅེས་གསུངས་ཏེ། ངེས་བ་དང་ལྡན་པའི་ཐ་དད་པ་དང་ཐ་དད་པ་མེད་པའི་ཐ་སྙད་རྒྱུ་མེད་པ་ཅན་དུ་ནི་འཐད་པ་མ་ཡིན་ལ། ཐ་དད་པ་དང་ཐ་དད་པ་མེད་པར་དམིགས་པ་ལས་གཞན་པའི་རྒྱུ་ཡང་ཡོད་པ་མ་ཡིན་ནོ། །ཐ་དད་པ་ཐ་དད་པ་མེད་པ་འདི་དག་ནི་ཐ་སྙད་མེད་ན་ཡང་ཆུ་དོན་དུ་གཉེར་བ་མེ་ལ་འཇུག་པར་སྡུག་བསྔལ་བས་འཚོ་བའི་ཕྱིར་ཨེ་མ་ཞེས་རྗེས་སུ་བརྩེ་བ་སྟེ། ཐ་དད་པ་དང་ཐ་དད་པ་མེད་པ་འགའ་ཞིག་ཀྱང་ཡོད་པར་མི་འགྱུར་རོ་ཞེས་བྱ་བའི་དོན་ཏོ། །ཐ་དད་པ་མེད་པ་རྣམ་པ་ཐ་དད་པ་མེད་པར་རིག་པ་གང་ཡིན་པ་དེ་གཅིག་སྟེ། གཅིག་གི་ཐ་སྙད་དུ་རུང་བ་ཉིད་ཡིན་ཏེ། གཅིག་གི་རྣམ་པ་ཅན་གྱི་ཤེས་པ་རྒྱུ་ཡིན་ན་ཞེས་བྱ་བའི་དོན་ཏོ། །དེ་ལྟར་གང་གང་མིན་ཞེས་བྱ་བ་ནི་རྣམ་པ་ཐ་དད་པར་རིག་པ་སྟེ། གང་གི་ཕྱིར་དེ་ཐ་དད་པ་དང་ལྡན་པར་ཐ་དད་པར་འགྲུབ་པར་འགྱུར་རོ། །ཐ་དད་པའི་རྒྱུ་ནི་དེ་སྤངས་པས་གནས་པ་ཡིན་ནོ་སྙམ་དུ་དགོངས་པའོ། །རྣམ་པ་ཐ་དད་པར་མེད་པར་རིག་པ་དེ་གཅིག་ཉིད་ཀྱི་ཐ་སྙད་ལ་སྒྲུབ་པར་བྱེད་པ་མ་ཡིན་པ་ཉིད་ན་ནི་ཐ་དད་དེ་
གཅིག་གི་ཐ་སྙད་དང་འགལ་བ་དུ་མའི་ཐ་སྙད་ལ་ཡང་ཤེས་པའི་རྣམ་པ་ཐ་དད་པ་སྒྲུབ་བྱེད་དུ་འགྲུབ་པར་མི་འགྱུར་ཏེ། གང་གི་ཕྱིར་གཅིག་གི་ཐ་སྙད་ཀྱི་སྒྲུབ་པར་བྱེད་པ་གང་ཡིན་པ་དེ་དང་འགལ་བ་དུ་མའི་ཐ་སྙད་ཀྱི་སྒྲུབ་པར་བྱེད་པ་ཡིན་ན། དེ་མ་གྲུབ་ན་ནི་འདི་ཡང་མ་གྲུབ་པའི་ཕྱིར་རོ། །འདིས་ནི་ཐ་དད་པ་དང་ཐ་དད་པ་མེད་པའི་ཐ་སྙད་དག་གི་རྒྱུ་འགལ་བ་ཡིན་པར་བསྟན་ནས། ད་ནི་གྲངས་ཅན་གྱི་རྒྱུ་འདི་གཉིས་སྤངས་པར་བསྟན་པའི་ཕྱིར་བཤད་པ། གྲངས་ཅན་གྱི་དཀར་སྡུག་ལ་སོགས་ཏེ་སྔོན་པོ་དང་བདེ་བ་ལ་སོགས་པ་གང་ཡིན་པ་ཐ་དད་སྣང་སྟེ་སྣང་བ་ནི་ཤེས་པའི་རང་བཞིན་ཏེ། ཤེས་པ་གང་ཡིན་པའོ། །དེ་ནི་ཐ་དད་པ་མ་ཡིན་ཏེ། དཀར་པོ་དང་བདེ་བ་ལ་སོགས་པ་རྣམ་པ་ཐ་དད་པར་སྣང་བའི་ཤེས་པས་གཟུང་བར་བྱ་བ་ཡིན་ཡང་གཅིག་ཏུ་འདོད་པ་ཡིན། བློ་མྱོང་ན་ནི་ཐ་དད་མེད་སྣང་སྟེ་སྣང་བ་ཁོང་དུ་ཆུད་པ་གང་ཡིན་པ་དེ་དག་སྟེ། རྣམ་པ་ཐ་དད་པ་མེད་པའི་ཤེས་པའི་གཟུང་བ་ཡང་ཐ་དད་དེ་བཞིན་ཉིད་ཡིན་ནོ། །དེས་ན་ཤེས་པའི་རྣམ་པ་ཐ་དད་པ་དང་ཐ་དད་པ་མེད་པ། ཐ་དད་པ་དང་ཐ་དད་པ་མེད་པའི་རྒྱུ་མ་ཡིན་པ་གང་ཡིན་པ་དེ་ལ། ཐ་དད་པ་དང་ཐ་དད་པ་མ་ཡིན་པའི་རྟེན་ཅི་ཞིག་ཡིན་ཏེ། འགའ་ཡང་མ་ཡིན་ནོ་ཞེས་བྱ་བའི་དོན་ཏོ། །ཚིག་ལེའུར་བྱས་པར་སྤྱིར་བཀོད་པ་ཞེས་འགྲེལ་པས་ཀྱང་རྣམ་པར་བཀྲལ་བའི་དོན་སྦྲེལ་ཅིང་ལེགས་པར་བསྡེབས་ནས་ཡང་དག་པར་བསྡུ་བ་དེའི་དོན་གྱི་ཕྱིར་ཚིགས་སུ་བཅད་པ་འདི་གཉིས་ཏེ། བདེ་བླག་ཏུ་དོན་བསྡུས་ནས་རྟོགས་པར་བྱ་བའི་ཕྱིར་ཚིགས་སུ་བཅད་པའོ། །གལ་ཏེ་སྣང་བ་ཐ་དད་པ་མེད་པ་གཅིག་གི་རྒྱུ་ཡིན་ན་འོ་ན་སྣང་བ་ཐ་དད་པ་མེད་པའི་མེ་དང་ལྕགས་གོང་དག་ཐ་དད་པར་ཇི་ལྟར་འགྱུར་ཞེ་ན། ཐ་དད་པ་ཡིན་ནོ་ཞེས་སུ་ཞིག་སྨྲ། གང་གི་ཕྱིར་བློ་དང་སྐྱེས་བུ་འབའ་ཞིག་ཐ་མི་དད་པར་མ་ཟད་ཀྱི་དཔེ་ལྕགས་ཀྱི་གོང་བུ་ལ་ཡང་ངོ༌། །དེ་ཉིད་སྟོན་པར་བྱེད་པ་ནི་ཉེ་བར་ལེན་པའི་རྒྱུར་གྱུར་པ་ལྕགས་ཀྱི་གོང་བུ་ལ་མེ་ལྷན་ཅིག་བྱེད་པ་དང་འབྲེལ་པ་ལས་ཏེ། དེ་དག་ལས་དེ་ལྟར་ཁྱད་པར་ཅན་གྱི་གཟུགས་དང་རེག་པ་སྐྱེས་པའི་དོན་གཞན་གཅིག་ཉིད་ཅེས་བྱ་བ་གཉིས་འབྲེལ་བ་མ་ཡིན་པ་མཐོང་བ་ཡིན་ཏེ། དེས་ན་དེ་ལ་མཐོང་བ་ཉིད་ཚད་མ་ཡིན་ནོ། །འདི་སྐད་དུ་རིགས་པ་སྨྲས་བས་
ཉམས་སུ་མྱོང་བ་སྤོང་བ་ནི་དཀའ་བ་བྱེད་པ་ཡིན་ནོ་ཞེས་བསྟན་པར་འགྱུར་རོ། །ཐ་དད་པར་གྱུར་པའི་མེ་དང་ལྕགས་གོང་དག་འདྲེས་པའི་ཕྱིར་རྣམ་པར་དབྱེ་བ་མ་མཐོང་བ་ནི་མ་ཡིན་ནོ། །ཉམས་སུ་མྱོང་བའི་དངོས་པོ་ལ་ཐ་དད་པའི་ཐ་སྙད་དུ་བྱེད་པ་ནི་རྟོགས་པར་སླ་བ་ལས་སྣང་བ་ཐ་དད་ལས་སམ། རྟོགས་པར་དཀའ་བ་ཡིན་ནའང་འཐད་པས་སྒྲུབ་པར་བྱེད་པ་ཡིན་ཏེ། དཔེར་ན་སྔོན་པོ་དང་སྔོན་པོ་མ་ཡིན་པ་དག་གམ། གསེར་གྱི་ཆ་ཕལ་ཆེ་བ་ལ་དངུལ་གྱི་ཆ་ཅུང་ཟད་འདྲེས་པ་བཞིན་ནོ། །སེར་པོ་རོ་གཅིག་ཏུ་སྣང་ཡང་ཐ་དད་པར་ཁོང་དུ་ཆུད་པ་ཡིན་ཏེ། རྫས་དེ་དག་ཉིད་ལྷན་ཅིག་བྱེད་པའི་རྒྱུ་དང་བཅས་བ་ལས་གསེར་དང་དངུལ་གྱི་ཆ་དག་སྐྱེས་པར་སྣང་བའི་ཕྱིར་ཏེ། འབའ་ཞིག་གམ་ལྷན་ཅིག་བྱེད་པ་ལ་ལྟོས་ཀྱང་བླ་སྟེ་ཉེ་བར་ལེན་པའི་རྒྱུ་གཅིག་ལས་འགལ་བ་སྐྱེས་པ་ནི་མེད་དོ་ཞེས་སྔར་ལན་མང་དུ་བཤད་ཟིན་ཏོ། །དངུལ་གྱི་ཆ་དང་འདྲེས་པའི་གསེར་ལ་སྣང་བ་ཐ་དད་པ་མེད་པའི་ཕྱིར་ཐ་མི་དད་པ་ཉིད་དུ་རིགས་ཀྱི་ཐ་དད་པ་ནི་མ་ཡིན་པ་མ་ཡིན་ནམ་ཞེ་ན། མ་ཡིན་ཏེ་གནོད་པར་བྱེད་པ་མཐོང་བའི་ཕྱིར་རོ། །འདི་ལ་དངོས་པོ་རྣམས་ཀྱི་ཡོད་པ་ཉིད་དུ་རྣམ་པར་གཞག་པ་ནི་དེར་སྣང་བའི་ཤེས་པ་སླུ་བ་མེད་པ་ཅན་ནམ་རྗེས་སུ་དཔག་པ་ལས་ཡིན་ཞིང༌། དངོས་པོ་ཐ་དད་པ་དང་ཐ་མི་དད་པ་ཡང་མི་སླུ་བ་ཅན་གྱི་སྣང་བ་ཐ་དད་པ་དག་གམ་རྗེས་སུ་དཔག་པ་ལས་ཡིན་ན། ཐ་མི་དད་པར་སྣང་བ་འདི་ལ་ནི་མི་སླུ་བ་ཡོད་པ་མ་ཡིན་ཏེ། ཉེ་བར་ལེན་པ་ལས་བྱུང་བ་ཐ་དད་པར་མཐོང་བ་ལས་ཐ་དད་པར་རྗེས་སུ་དཔོག་པ་གནོད་པར་བྱེད་པ་འཇུག་པའི་ཕྱིར་རོ། །ལྕགས་ཀྱི་གོང་བུ་ལ་ནི་མེའི་མདོག་ཏུ་ཐ་མི་དད་པར་སྣང་བ་སླུ་བ་མེད་པ་ཅན་ཡིན་པའི་ཕྱིར་ཐ་མི་དད་པར་རིགས་པ་ཡིན་ནོ། །གལ་ཏེ་རྫས་གཞན་ཉིད་སྐྱེས་པ་ཡིན་ན། འོ་ན་རྫས་དེ་གློ་བུར་དུ་ལྡོག་པར་ཇི་ལྟར་འགྱུར་ཞེ་ན། ཇི་ལྟར་གློ་བུར་ཡིན། གང་གི་ཕྱིར་ཇི་སྲིད་གནས་པའི་རྒྱུ་ཡོད་པ་དེ་སྲིད་དུ་ནི་དེ་ཡོད་པ་ཉིད་ཡིན་ལ། ཕྱིས་རྫས་དེའི་རྒྱུ་རྣམ་པར་གནས་པའི་རྒྱུ་མེ་གང་ཡིན་པ་དེ་རྒྱུན་ཆད་དེ་ལོག་པའི་ཕྱིར་དེ་ཡང་ལྡོག་པར་འགྱུར་ཏེ། ཏིལ་མར་ཟད་ན་སྒྲོན་མ་ལྡོག་པ་ཡིན་ནོ། །གལ་ཏེ་དེ་ལ་ལྕགས་ཀྱི་རྫས་མེད་ན་ཇི་ལྟར་གློ་བུར་དུ་སྐྱེ་བར་འགྱུར་ཞེ་ན། ཅིའི་ཕྱིར་གློ་བུར་བ་ཡིན། གང་གི་ཕྱིར་དེའི་ཉེ་བར་ལེན་པའི་རྒྱུ་ལ་ལྟོས་པ་
ཅན་གྲང་བའི་རེག་པ་ལ་སོགས་པ་སྨོས་པས་ནི་ཡུལ་གྱི་ཁྱད་པར་དང༌། ཆུ་བཏབ་པ་ལ་སོགས་པ་སྟེ། གྲང་བའི་རེག་པ་ལ་སོགས་པ་དེ་དག་ལས་སོ། །ཀྱང་གི་སྒྲས་ནི་ཆུ་རྒྱུན་ཆད་པའི་ཕྱིར་སྔ་མ་ལྡོག་པ་ཡང་འཐད་པ་ཡིན་ལ། རྒྱུ་ཡོད་པའི་ཕྱིར་རྫས་གཞན་སྐྱེས་པ་ཡང་ངོ་ཞེས་བྱ་བ་འདི་བསྟན་པ་ཡིན་ནོ། །གང་གི་ཕྱིར་ཕྱི་རོལ་ཁྱད་པར་མེད་ཀྱང་ཁྱད་པར་དུ་འགྱུར་བ་དེའི་ཕྱིར་བདེ་བ་ལ་སོགས་པ་ནང་ཡིན་ཞིང༌། གང་གི་ཕྱིར་ཉམས་སུ་མྱོང་བར་བྱ་བ་ཡིན་ལ། ཉམས་སུ་མྱོང་བར་བྱེད་པ་དེ་དག་ཀྱང་བདེ་བའི་འབྲས་བུ་སིམ་པའི་རྣམ་པར་བསྒྲུབ་པར་ནུས་པ་དེའི་ཕྱིར་གཞན་གྱི་ལྟ་བ་ལ་ཡང་བདེ་བ་ལ་སོགས་པ་སེམས་པ་ཅན་དུ་གྲུབ་པ་ཡིན་ན། ཁོ་བོ་ཅག་གི་ལྟ་བ་འཛིན་པའི་རྣམ་པར་གནས་པ་དེ་གྲུབ་པ་ནི་སྨོས་སུ་ཅི་ཡོད། རང་རིག་པའི་མངོན་སུམ་བཤད་ནས། རྣལ་འབྱོར་བའི་མངོན་སུམ་བཤད་པའི་ཕྱིར། འཇིགས་སོགས་བཞིན་དུ་ཞེས་གསུངས་ཏེ། གསལ་བར་སྣང་བ་དོན་བྱེད་པར་བཟོད་པའི་དངོས་པོའི་རང་བཞིན་ལ་མ་འཁྲུལ་པ་དང༌། རྟོག་པ་མེད་པའི་ཤེས་པ་ནི་མངོན་སུམ་ཡིན་ནོ། །དེ་ལ་ཡིད་ཀྱི་ཤེས་པ་ལ་གསལ་བར་སྣང་བ་ཉིད་འཐད་པར་དཀའ་བས་རེ་ཞིག་སྟོན་པར་བྱེད་དོ། །ཤེས་པ་འབའ་ཞིག་གསལ་བ་སྟེ་གཟུང་བར་སྣང་བ་གང་ཡིན་པ་དེ་ནི་མངོན་སུམ་མོ། །གསལ་བར་སྣང་བ་ཉིད་གང་ལས་ཤེ་ན། བཤད་པ་བསྒོམས་པའི་སྟོབས་ནི་མཐུ་ཡིན་ལ། བསྒོམས་པའི་མཐུ་ཡང་རབ་ཏུ་གྱུར་པ་ཡིན་པས། བསྒོམས་པ་རབ་ཏུ་གྱུར་པ་དེ་ལས་ཡིད་ཀྱི་རྣམ་པར་ཤེས་པ་གསལ་བར་སྣང་བ་ཡིན་ནོ། །འཇིགས་སོགས་བཞིན་ཞེས་བྱ་བ་ནི་བསྒོམས་པའི་རྒྱུ་ཅན་དུ་རབ་ཏུ་གྲགས་པའི་གསལ་བར་སྣང་བ་དཔེ་ཉིད་དུ་སྟོན་པའོ། །གསལ་བར་སྣང་བ་ཡང་སླུ་བ་མེད་པ་ཅན་མ་འཁྲུལ་པའོ། །འདི་ལྟར་རྣམ་པར་རྟོག་པའི་རང་བཞིན་ཡིད་ཀྱི་རྣམ་པར་ཤེས་པ་ནི་བསྒོམས་པ་ན་བདེན་པ་དང་མི་བདེན་པའི་དངོས་པོ་གསལ་བར་སྣང་བར་འགྱུར་ལ་མི་བདེན་པ་གསལ་བར་སྣང་བ་ཡང་མངོན་སུམ་མ་ཡིན་པ་དེས་ན་དེ་བཟློག་པར་བྱ་བའི་ཕྱིར་མ་འཁྲུལ་པ་སྨོས་པ་ཡིན་ནོ། །གསལ་བར་སྣང་བ་དེ་ནི་རྟོག་པ་མེད་པ་ཡིན་ལ། དེས་ན་མངོན་སུམ་ཡིན་ཏེ། བསྒོམས་པས་གསལ་བར་སྣང་ཞིང༌། གསལ་བར་སྣང་བའི་ཕྱིར་རྣམ་
པར་རྟོག་པ་མེད་པར་གྲུབ་པ་ཡིན་ལ། ཚད་མས་ཡོངས་སུ་དག་པའི་དངོས་པོའི་ཡུལ་ཅན་ཡིན་པའི་ཕྱིར་མ་འཁྲུལ་པ་ཡིན་པས་ཅིའི་ཕྱིར་མངོན་སུམ་ཉིད་དུ་མི་འགྱུར། མངོན་སུམ་གཞན་ཡང་གསལ་བར་སྣང་བ་དང་རྟོག་པ་དང་བྲལ་ཞིང་མ་འཁྲུལ་པ་ཡིན་ནོ། །འདི་ཉིད་རྣམ་པར་འགྲེལ་པ་ན་གསལ་བར་སྣང་བ་ཉིད་ཀྱི་རྒྱུ་བསྒོམ་པའི་གོ་རིམས་སྟོན་པར་བྱེད་དོ། །འཇིག་རྟེན་ན་ནི་མཉམ་པར་གཞག་པ་ལ་རྣལ་འབྱོར་པ་ཡིན་ལ། བསྟན་བཅོས་ལས་ནི་ཏིང་ངེ་འཛིན་དང་ཤེས་རབ་ཀྱི་བདག་ཉིད་ཞི་གནས་དང་ལྷག་མཐོང་ལ་ཡིན་ཏེ། རྣལ་འབྱོར་བ་དེ་དག་ལ་ཡོད་པ་དེ་དག་ནི་རྣལ་འབྱོར་པས་ཏེ། རྟག་ཏུ་མཉམ་པར་གཞག་པ་དང༌། དེ་ཁོ་ན་རྣམ་པར་འབྱེད་པ་ལ་བརྩོན་པའོ། །དེ་དག་རྣམས་ཀྱི་གསལ་བར་སྣང་བ་གང་ཡིན་པ་ཞེས་བྱ་བར་འབྲེལ་ཏོ། །དེ་དག་རྣམས་ཀྱི་བསྒོམ་པའི་རིམ་པ་ཅི་འདྲ་བར་དེ་སྟོན་པར་བྱེད་དེ། ཐོས་པ་ལས་བྱུང་བས་བསྒོམས་པ་དང་རྗེས་སུ་མཐུན་པའི་བསྟན་བཅོས་མཉན་པའི་རྒྱུ་ཅན་གྱིས་བཟུང་བ་ངེས་པའི་དོན་བསྒོམ་པར་བྱ་བ། རིགས་པས་ཏེ་ཚད་མས་སེམས་ཤིང་ངེས་པར་རྟོག་པ་ནི་རིགས་པ་སེམས་པའོ། །དེའི་རྒྱུ་ཅན་གྱི་ཤེས་པས་དོན་དེ་ཁྱད་པར་དུ་རྣམ་པར་ཕྱེ་བར་བློ་ལ་བཀོད་ཅིང་བཞག་ནས་སྒོམ་པར་བྱེད་པའི་སྒོམ་པར་བྱེད་པ་དེ་རྣམས་ཀྱི་སྒོམ་པ་རྫོགས་ཤིང་དོན་རྣམས་ལ་གསལ་བའི་རྣམ་པ་ཅན་གྱི་ཤེས་པ་སྐྱེད་པར་ནུས་པའི་རྒྱུར་གྱུར་པའི་མཐུ་སྟེ་ཡོད་པ་ན་གསལ་བར་སྣང་བ་གང་ཡིན་པའོ། །གསལ་བར་སྣང་བའི་ཤུགས་ཀྱིས་ཤེས་པ་ཡིན་པར་གཟུང་བ་ཡིན་ནོ། །དཔེར་ན་འཇིགས་པ་དང་མྱ་ངན་ལ་སོགས་པ་གསལ་བ་ཉིད་དུ་སྣང་བ་བཞིན་ནའོ། །འདིས་ནི་གསལ་བར་སྣང་བ་ཉིད་དང་བསྒོམས་པའི་རྒྱུ་དང་འབྲས་བུའི་དངོས་པོར་ཚད་མར་མཐོང་བའི་ཡུལ་བསྟན་ཏེ། རྒྱུ་དང་འབྲས་བུའི་དངོས་པོ་ནི་དེར་ངེས་པ་ཡིན་ནོ་ཞེས་བྱ་བའི་དོན་ཏོ། །གང་ཞིག་གསལ་བར་སྣང་བ་དེ་ནི་རྣམ་པར་རྟོག་པ་མེད་པ་ཡིན་ནོ་ཞེས་གསལ་བར་སྣང་བ་ཉིད་རྣམ་པར་རྟོག་པ་མེད་པའི་རྒྱུར་བརྗོད་པ་ཡིན་ནོ། །ཕྱིན་ཅི་མ་ལོག་པ་སྟེ་བདེན་པའི་ཡུལ་ཅན་གང་ཡིན་པའོ། །འདིས་ནི་ཚིག་ལེའུར་བྱས་པ་ལས་གང་ཞིག་སླུ་བ་མེད་པ་ཅན་གྱི་སྒྲར་བརྗོད་པ་མ་འཁྲུལ་པ་ཉིད་བརྗོད་པ་ཡིན་ནོ། །དེས་ན་བསྒོམས་པ་ལས་གསལ་བར་སྣང་བ་ཉིད་ཡིན་
ལ། དེས་ན་རྣམ་པར་མི་རྟོག་པ་ཡིན་ཞིང་ཚད་མའི་ཡུལ་བསྒོམས་པས་ཀྱང་འཁྲུལ་པ་མེད་པ་ཉིད་ནི་རྣལ་འབྱོར་པའི་མངོན་སུམ་དུ་བསྟན་པ་ཡིན་ཏེ། མངོན་སུམ་གཞན་བཞིན་ནོ། །མངོན་སུམ་གཞན་ཡང་འདི་ལྟ་བུར་གྱུར་པ་ཁོ་ན་ཡིན་ནོ། །ཡང་འདི་འདྲ་བའི་མངོན་སུམ་དེ་གང་ཞིག་ཡིན་ཞེ་ན། བཤད་པ། འཕགས་པ་རྣམས་ཀྱི་བདེན་པ་བཞི་ལ། འབྲས་བུར་གྱུར་པ་ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་ལོ། །དེ་དག་ཉིད་སྲེད་པ་དང་ལྷན་ཅིག་པས་རྒྱུར་གྱུར་པ་ནི་ཀུན་འབྱུང་ངོ༌། །ངེས་པར་ལེགས་པའི་རང་བཞིན་དུ་གྱུར་པའི་སེམས་ནི་འགོག་པའོ། །རང་བཞིན་དེ་ཉིད་ཐོབ་པའི་རྒྱུར་གྱུར་བ་བདག་མེད་པ་ལ་སོགས་པའི་རྣམ་པ་ཅན་གྱི་སེམས་ཀྱི་ཁྱད་པར་ནི་ལམ་མོ། །འདི་དག་མཐོང་བར་མངོན་སུམ་དུ་བྱེད་པའི་ཤེས་པ་གང་ཡིན་པ་དེ་མངོན་སུམ་ཡིན་པ་དེ་བཞིན་དུ་དེ་དང་འདྲ་བའི་དོན་ཅན་གྱི་རྣལ་འབྱོར་པའི་ཤེས་པ་མཐའ་དག་མངོན་སུམ་གྱི་ཚད་མ་ཉིད་དོ། །འཕགས་པའི་བདེན་པ་བཞི་པོ་རྣམས་ཇི་ལྟར་ཚད་མས་རྣམ་པར་དག་པ་དང༌། མི་རྟག་པ་ལ་སོགས་པ་དེ་དག་རྣམ་པ་ཇི་ལྟ་བུ་ཞིག་བསྒོམ་པར་བྱ་བ་དང༌། སྐྱེ་བ་བརྒྱུད་པ་དུ་མས་དུས་ཇི་སྲིད་ཀྱི་མཐར་ཐུག་པར་གོམས་པར་བྱ་བ་དང༌། རྒྱུ་གང་ལ་གོམས་པར་བྱེད་པ་བྱང་ཆུས་སེམས་དཔའ་རྣམས་ཀྱི་ནི་སྙིང་རྗེ་ལས་ཡིན་ལ། དེ་ལ་གཞན་རྣམས་ནི་འཁོར་བ་ལས་ཡིད་བྱུང་བ་ཞེས་བྱ་བ་གང་ཡིན་པ་དེ་ཐམས་ཅད་ནི། ཇི་ལྟར་ཚད་མ་རྣམ་འགྲེལ་དུ་གཏན་ལ་ཕབ་པའི་རྣམ་པ་དེ་ཉིད་ཀྱིས་འཕགས་པའི་བདེན་པ་མཐོང་བ་ཐབས་དང་བཅས། ཡུལ་དང་བཅས། རྣམ་པ་དང་བཅས་པར་ཁོང་དུ་ཆུད་པར་བྱས་ཏེ། འདིར་ནི་ཡང་དག་པའི་ཡུལ་ཅན་གྱི་རྣམ་པར་རྟོག་པ་གོམས་པ་ལས་དེའི་དོན་ལ་དམིགས་པའི་མངོན་སུམ་སྐྱེ་བ་ཉིད་དོ་ཞེས་བྱ་བ་དེ་ཙམ་ཞིག་བསྒྲུབས་པར་འདོད་པ་འབའ་ཞིག་ཏུ་ཟད་དོ། །འདི་སྙམ་དུ་གང་གིས་འཇིགས་སོགས་བཞིན་དུ་ཞེས་དེ་སྐད་བརྗོད་པར་འགྱུར་བ་བསྒོམས་པ་སྔོན་དུ་འགྲོ་བ་ཅན་གྱི་ཡིད་ཀྱི་ཤེས་པ་འཇིགས་པ་ལ་སོགས་པ་གསལ་བར་སྣང་བ་གང་དུ་མཐོང་ཞེ་ན། བཤད་པ། འདོད་པ་དང་འཇིགས་པ་དང་མྱ་ངན་དང་དེ་དག་གིས་བརླམས་པ་གང་ཡིན་པ་དེ་ནི་དེ་དག་གིས་བརླམས་པ་སྟེ། དེ་དང་ཆོམ་
རྐུན་གྱི་རྨི་ལམ་མོ། །རྨི་ལམ་གང་དུ་ཆོམ་རྐུན་མངོན་དུ་ལྷགས་པར་མཐོང་བ་དེ་ནི་ཆོམ་རྐུན་རྨི་ལམ་མོ། །དེ་ལ་སོགས་པ་རྣམ་པ་གཞན་གང་ཡིན་པ་དེ་ནི་ཆོམ་རྐུན་རྨི་སོགས་ཏེ། དེས་བསླད་པའོ། །ཡོད་པ་མ་ཡིན་ཡང་མདུན་ན་ནི་སྟེ་སྔོན་ན་གནས་པ་བཞིན་དུའོ། །འདིས་ནི་མཐོང་བ་དེ་གསལ་བར་སྣང་བ་བཤད་པ་ཡིན་ནོ། །འདིར་ནི་འདོད་པ་ལ་སོགས་པས་བརླམས་པའི་གནས་སྐབས་སུ་དམག་ནང་ན་གནས་པའམ། དུས་པ་ལ་སོགས་པའི་མྱ་ངན་གྱིས་མདོངས་པར་གྱུར་པའི་གསལ་བར་སྣང་བའི་ཤེས་པ་སྐྱེས་པ་གང་ཡིན་པ་དེ། ཡིད་ཀྱི་རྣམ་པར་ཤེས་པ་ཡིན་པར་ངེས་ནུས་ཀྱི་གཞན་དུ་ན་སྣང་བ་དང་བཅས་པར་མིག་གདངས་པའི་དབང་པོའི་འཁྲུལ་པ་ཡང་སྲིད་པ་ཡིན་ནོ། །འདིར་ནི་བསྒོམས་པའི་རྒྱུ་ལས་བྱུང་བའི་ཡིད་གསལ་བར་སྣང་བ་ཉིད་དུ་བསྒྲུབ་པར་བྱ་བ་ཡིན་གྱི་དབང་པོ་ལས་སྐྱེས་བ་ནི་མ་ཡིན་ཏེ། དབང་པོ་ལས་སྐྱེས་པ་གསལ་བར་སྣང་བ་ལ་ནི་རྩོད་པ་མེད་པའི་ཕྱིར་རོ། །བསྟན་དུ་ཟིན་ཀྱང་དེས་ནི་རྣལ་འབྱོར་པའི་ཡིད་ཀྱི་ཤེས་པ་གསལ་བར་སྣང་བར་བརྗོད་པར་ནུས་པ་མ་ཡིན་ནོ། །འདི་སྙམ་དུ་དབང་པོ་ཉམས་པ་གང་ཡིན་པ་དེ་ལ་ནི་རབ་རིབ་ཅན་བཞིན་དུ་དབང་པོ་ལས་སྐྱེས་པ་འགའ་ཞིག་ལ་འཁྲུལ་པར་འགྱུར་བ་ཡིན་གྱི་དངོས་པོ་གཞན་ལ་ནི་མི་གསལ་བར་མཐོང་བ་ཡིན་ན་འདོད་པས་བརླམས་པ་ནི་འགའ་ཞིག་ཏུ་ཡང་ཞན་པར་མཐོང་བ་ཡོད་པ་མ་ཡིན་པས། དེ་ནི་དབང་པོའི་འཁྲུལ་པ་མ་ཡིན་ནོ་སྙམ་ན། དེ་ནི་དེ་ལྟར་སྙིང་པོ་ཡོད་པ་མ་ཡིན་ཏེ། བརླམས་པའི་དབང་གིས་མི་བདེན་པ་བསྒོམས་པའི་དངོས་པོ་གཅིག་པུ་ཉིད་དབང་པོ་ལས་གསལ་བར་འགྱུར་བའི་ཕྱིར་སྔ་མ་ཁོ་ན་ཁ་ན་མ་ཐོ་བ་མེད་པ་ཡིན་ནོ། །ཆོམ་རྐུན་གྱི་རྨི་ལམ་གྱིས་བསླད་པ་ནི་གཉིད་ལས་ལངས་པ་ཉིད་ལ་འདོད་པ་ཡིན་ཏེ། གཉིད་ལོག་པའི་གནས་སྐབས་ན་ནི་གསལ་བར་སྣང་བ་རྣམ་པ་དུ་མ་ཡང་ཡོད་པ་ཡིན་ཏེ། དེའི་ཕྱིར་ཁྱད་པར་དུ་བརྗོད་པས་ཅི་ཞིག་བྱ། གཉིད་ཀྱིས་ཉམས་པའི་རྒྱུས་ཡིད་གསལ་བར་སྣང་བར་གྱུར་དུ་ཟིན་ཀྱང་བསྒོམས་པའི་རྒྱུ་ལས་གསལ་བར་སྣང་བར་བརྗོད་པར་མི་འགྱུར་ཏེ། སྣང་བའི་ཁྱད་པར་དེ་ནི་བསླད་པའི་རྒྱུ་ཅན་ཡིན་གྱི་བསྒོམས་པའི་རྒྱུ་ཅན་ནི་མ་ཡིན་པའི་ཕྱིར་རོ། །དེས་ན་ཆོམ་རྐུན་གྱི་རྨི་ལམ་ལས་ལངས་མ་ཐག་པ་ཉིད་དུ་མིག་མི་
གསལ་བར་ཕྱེ་བའམ། མུན་པའི་ནང་དུ་བསླད་པ་གང་ཡིན་པ་ད་འདིར་གཟུང་བ་ཡིན་ནོ། །ཡང་དེ་དག་གིས་དེ་མདུན་ན་གནས་པ་བཞིན་དུ་མཐོང་བ་ཞེས་བྱ་བ་འདི་གང་ལས་ཤེ་ན། བཤད་པ། བསླད་པ་ཇི་བཞིན་ཏེ། འདོད་པ་ལ་སོགས་པ་ལས་མ་འདས་པར་རོ། །གུས་པས་ནི་གྲིམས་པ་སྟེ། སྤྲོ་བའི་དབང་གིས་འདར་བའི་མཚན་ཉིད་ཅན་ནམ། བ་སྤུ་ལངས་པའི་མཚན་ཉིད་ཀྱི་ལུས་ཀྱི་གནས་སྐབས་སོ། །བསྒྲུབ་པ་ནི་མཐོང་བ་དང་རྗེས་སུ་མཐུན་པར་ནན་ཏན་དུ་བྱེད་པ་སྟེ། སྡུག་པ་ལ་སོགས་པ་འདྲེན་པ་དང༌། འདི་ན་སུ་སུ་ཞེས་སྨྲ་བ་དང༌། ང་རྒྱལ་དང་བཅས་པ་རལ་གྲི་ལ་སོགས་པ་ལ་འཇུ་བ་སྟེ། འདི་དག་མཐོང་བའི་རྒྱུའི་ཕྱིར་རོ། །འདི་སྙམ་དུ་གུས་པས་བསྒྲུབ་པ་མཐོང་དུ་ཟིན་ཀྱང༌། མངོན་སུམ་བཞིན་དུ་དེ་དག་གསལ་བར་སྣང་བ་ཡིན་པར་ཇི་ལྟར་ངེས་ཤེ་ན། ལྐོག་ཏུ་གྱུར་པ་རྟོགས་པ་ནི་ཤེས་པའོ། །དེའི་འདུ་ཤེས་སམ་ནི་ངེས་པ་སྟེ། བདག་གིས་ལྐོག་ཏུ་གྱུར་པའི་དོན་ཤེས་སོ་སྙམ་ནས་ངེས་པར་འགྱུར་བ་དེ་ལ་ནི་དེ་ལྟའི་སྟེ། བྱ་བའི་རང་བཞིན་གུས་པའི་རང་བཞིན་གྱི་རྣམ་པ་དེས་འཇུག་པ་མ་མཐོང་བའི་ཕྱིར་རོ། །འདི་སྐད་བརྗོད་པ་ཡིན་ཏེ། དཔེར་ན་ལུས་ངག་གི་བྱ་བ་འདོད་པ་སྔོན་དུ་འགྲོ་བ་ཅན་ཡིན་པ་བཞིན་དུ་རྗེས་སུ་འགྲོ་བ་དང་ལྡོག་པ་དག་ལས་གུས་པས་བསྒྲུབ་པ་ནི་དངོས་སུ་མཐོང་བའི་རྒྱུ་ཅན་དུ་གཏན་ལ་ཕེབས་པ་ཡིན་ཏེ། དེ་མཐོང་བའི་ཕྱིར་དེ་དག་དངོས་སུ་མཐོང་བར་ངེས་པ་ཡིན་པར་རྗེས་སུ་དཔོག་པ་ཡིན་ནོ་ཞེས་བྱ་བའོ། །གང་གི་ཕྱིར་འདོད་པས་བརླམས་པ་ལ་སོགས་པས་བསླད་པ་ལས་བསྒོམས་པ་སྔོན་དུ་འགྲོ་བ་ཅན་གྱིས་ཡིད་ཀྱི་ཤེས་པ། གསལ་བར་སྣང་བ་ཉིད་དུ་མཐོང་བ་དེའི་ཕྱིར་ཡང་དག་པ་སྟེ། བདེན་པའམ་ཡང་དག་པ་མ་ཡིན་པར་ཡང་རུང་སྟེ། གང་ཁོ་ན་ཤིན་ཏུ་བསྒོམས་པ་དེ་ཉིད་བསྒོམས་པ་མཐར་ཕྱིན་པ་ནི་གསལ་ཞིང་མི་རྟོག་པའི་བློའི་རྒྱུར་འགྱུར་རོ། །གང་ཞིག་མི་བདེན་པ་དེ་ལ་ནི་རྣམ་པར་ཤེས་པ་སྔ་མ་ལ་སྣང་བ་དེ་ལས་ཐ་དད་པ་མེད་པར་ཤེས་པ་ཕྱི་མའི་རྒྱུར་བརྗོད་ལ། བདེན་པ་གང་ཡིན་པ་དེ་ལ་ནི་རྣམ་པར་རྟོག་པའི་རྣམ་པར་ཤེས་པས་བསྒོམ་པར་བྱ་བ་རང་གི་ངོ་བོ་ཉིད་ཀྱིས་གསལ་བའི་རྒྱུར་གྱུར་པ་ཡིན་གྱི་ཤེས་པ་ལ་སྣང་བ་ནི་མ་ཡིན་ནོ། །བསྒོམས་པའི་འབྲས་བུ་ཤེས་པ་ནི་དེའི་འབྲས་བུར་འགྱུར་ཏེ་སྣང་བ་དེའི་
རྗེས་སུ་བྱེད་པའི་ཕྱིར་རོ། །ཚིགས་སུ་བཅད་པས་མ་བརྗོད་པའི་དོན་ཅན་བར་སྐབས་སུ་གནས་པའི་ཚིགས་སུ་བཅད་པའོ། །འདོད་པ་གོམས་པས་ཉམས་པ་ལ་མི་བདེན་པའི་དོན་གསལ་བར་སྣང་དུ་ཆུག་ཀྱང༌། བསྒོམས་པའི་འབྲས་བུའི་ཤེས་པ་གསལ་བར་སྣང་བ་གང་ཡིན་པ་དེ་ཡང་མི་བདེན་པའི་དོན་ཅན་དུ་འགྱུར་རོ་ཞེས་བྱ་བ་ཇི་ལྟར་ཞེས་རང་གི་ཕྱོགས་པ་དག་ཟེར་བ་དེ་བཟློག་པའི་ཕྱིར་བཤད་པ། གདོན་མི་ཟ་བར་འདི་ཁས་བླང་བར་བྱ་སྟེ། གང་གི་ཕྱིར་མི་སྡུག་པ་ཞེས་བྱ་བ་ནི་རུས་པ་འབྲེལ་པའི་རྣམ་པ་ཅན་གྱི་ཏིང་ངེ་འཛིན་ཏོ། །ཟད་པར་ས་ནི་དངོས་པོ་མཐའ་དག་པར་སྣང་བའི་ཏིང་ངེ་འཛིན་ནོ། །སོགས་པ་སྨོས་པ་ནི་ཟད་པར་ཆུ་ལ་སོགས་པའོ། །ཡང་དག་པ་མ་ཡིན་པའི་ཡུལ་ཅན་གང་ཡིན་པ་དེ་ཡང་སྟེ། ཡང་གི་སྒྲས་ནི་བདེན་པའི་དོན་འབའ་ཞིག་གཟུང་བའི་རྣམ་པ་གསལ་བར་མ་ཟད་པའོ། །དེ་ཉིད་ཀྱི་ཕྱིར་བསྒོམས་པའི་སྟོབས་ཀྱིས་རྣམ་པར་རྟོག་པ་མེད་པ་གསལ་བ་སྣང་བར་ནི་ཁྱོད་འདོད་པ་ཡིན་ལ། དེ་ལྟར་མོས་པས་བྱས་པ་རྣལ་འབྱོར་པའི་སྤྱོད་ཡུལ་དུ་འགྱུར་བ་རུས་པ་ལ་སོགས་པ་རྣམས་ཀྱིས་དེའི་བསྒྲུབ་པར་བྱ་བ་ནི་འགའ་ཡང་མི་འགྲུབ་པའི་ཕྱིར་རོ། །དེའི་ཕྱིར་འདིས་ནི་མི་བདེན་པའི་དོན་གསལ་བར་སྣང་བར་མི་འདོད་པར་བཟློག་པ་ཡིན་ནོ། །གལ་ཏེ་བསྒོམས་པ་དང་ཡིད་ཀྱི་རྣམ་པར་ཤེས་པ་གསལ་བར་སྣང་བ་རྒྱུ་དང་འབྲས་བུའི་དངོས་པོར་མཐོང་བའི་ཕྱིར། བསྒོམས་པའི་མཐུ་ལས་གསལ་བར་སྣང་བ་ཡིན་དུ་ཟིན་ཀྱང་ཞེས་བྱ་བ་ནི་སྲིད་པ་སྟེ། རྟོགས་པ་མེད་པར་ཇི་ལྟར་ཏེ་མི་འཐད་པ་ཉིད་དོ། །འདི་ལྟར་གང་ཞིག་ཇི་ལྟར་གོམས་པར་བྱས་པ་དེ་ཉིད་གཟུང་བ་གསལ་བར་འགྱུར་ལ་གོམས་པར་བྱས་པ་ཡང་སྒྲ་དང་འདྲེས་པའི་དོན་ཡིན་པ་དེས་ན་དེ་ལྟར་གྱུར་པ་ཉིད་དུ་གསལ་བ་ན་རྣལ་འབྱོར་པའི་ཤེས་པ་ནི་རྣམ་པར་རྟོག་པ་ཅན་ཉིད་དུ་འཐད་པ་ཡིན་ནོ་ཞེ་ན། གལ་ཏེ་རྣམ་པར་རྟོག་པ་གསལ་བར་སྣང་བར་འགྱུར་ན་ནི་དེ་ལྟར་འགྱུར་བ་ན་གང་གི་ཕྱིར་སྒྲའི་རྣམ་པ་ཅན་གྱི་རྣམ་པར་རྟོག་པ་དང་རྗེས་སུ་འབྲེལ་པ་རྗེས་སུ་ཞུགས་པའི་ཤེས་པ་ལ་དོན་ཀྱང་དེ་ཡིན་ལ་གསལ་བ་ཡང་ཡིན་པ་དེ་སྣང་བ་དེ་གང་ལ་ཡོད་པ་དེའི་དངོས་པོ་སྟེ། དེ་ཡོད་པ་མ་ཡིན་ནོ། །དེ་དེ་ལྟར་ག་ལས་ཤེ་ན། གང་གི་ཕྱིར་བརྗོད་པ་སྟེ། སྒྲའི་རྣམ་པ་དང་འདྲེས་པའི་ཤེས་པ་གང་ཡིན་པའོ། །དེའི་རང་བཞིན་ཅན་གྱི་རྣམ་པར་
རྟོག་པ་གང་ཡིན་པ་ཐམས་ཅད་ལ་དོན་ཏེ། གཟུང་བར་བྱ་བ་གསལ་བ་སྟེ། གསལ་བར་སྣང་བ་ཉིད་ལྡོག་པ་སྟེ་མེད་པའི་ཕྱིར་རོ། །ཐམས་ཅད་སྨོས་པ་ནི་ཁྱད་པར་བརྗོད་པ་ཡིན་ནོ། །ཁྱབ་པ་དེ་ཉིད་བསྟན་པའི་ཕྱིར་རྣམ་པར་བསླད་པའི་བློ་ཡང་རུང་སྟེ་ཞེས་གསུངས་སོ། །ཡང་གི་སྒྲས་ནི་མ་བསླད་པའི་བློ་ཡང་ངོ༌། །འདི་སྐད་དུ་འཁྲུལ་པ་དང་མ་འཁྲུལ་པའི་རང་བཞིན་གྱི་རྣམ་པར་རྟོག་པ་དང་བཅས་པའི་ཤེས་པ་གང་ཡིན་པ་དེ་ཐམས་ཅད་ནི། གསལ་བར་སྣང་བ་མ་ཡིན་ནི་ཞེས་བསྟན་པ་ཡིན་ནོ། །འདི་ཉིད་མཇུག་སྡུད་པ་ནི་དེས་ན་རྣམ་པར་རྟོག་པའི་ཤེས་པ་འདི་ནི་འགའ་ཞིག་ཏུ་ཡང་དོན་གྱི་རྣམ་པ་གསལ་བ་ཡོད་པ་མ་ཡིན་ནོ། །དེའི་ཕྱིར་དམ་བཅས་པ་ཙམ་གྱིས་ནི་དོན་གྲུབ་པ་མ་ཡིན་ནོ་ཞེ་ན། འོ་ན་ནི་རིགས་པ་གང་གི་ཕྱིར་རྨི་ལམ་ན་ཡང་དྲན་པའི་རྣམ་པར་ཤེས་པ་དྲན་པ་ཡིན་ནོ། །ཡང་གི་སྒྲས་ནི་ཁྱད་པར་དུའོ། །རྨི་ལམ་དུ་ཡང་ཇི་སྙེད་དྲན་པ་ནི་ཇི་ལྟར་དེ་ཉིད་དུ་གཞན་གསལ་བར་སྣང་བ་དེ་འདྲ་བ་མ་ཡིན་ནོ། །འདི་ག་ལས་ཤེ་ན། གང་གི་ཕྱིར་དེ་འདྲ་བའི་དོན་ལྡན་མིན་པར་དྲན་ཏེ། ཇི་ལྟར་གསལ་བར་སྣང་བ་གཞན་བཞིན་དུའོ། །འདི་ཉིད་རྣམ་པར་འགྲེལ་པ་ཤད་པ། རྨི་ལམ་དུ་ཡང་ཉམས་སུ་མྱོང་བ་དྲན་པ་དེ་ཉིད་ཀྱི་རྣམ་པར་ཅན་གང་དག་ཡིན་པ་སྟེ། དེ་དག་ནི་ཇི་ལྟར་དེ་ཉིད་དུ་གཞན་ད་ལྟར་བྱུང་བར་འཛིན་པའི་རྣམ་པ་གསལ་བར་སྣང་བ་ཅན། ད་ལྟར་སྣང་བའི་ངང་ཚུལ་གང་ལ་ཡོད་པ་དེ་དག་སྟེ། དེ་ལྟར་སྣང་བ་མ་ཡིན་ནོ་ཞེས་འདི་ཉིད་དུ་བཅད་དོ། །དེའི་ཕྱིར་འདི་ནི་བསྒྲུབ་པར་བྱ་བ་བསྟན་ཏོ། །དེ་ནས་དེ་ལྟར་དྲན་པ་མེད་དོ་ཞེས་བྱ་བ་ནི་གཏན་ཚིགས་བསྟན་པ་སྟེ། གང་གི་ཕྱིར་གསལ་བའི་རྣམ་པ་ཅན་དུ་མ་དྲན་པ་དེའི་ཕྱིར་གསལ་བའི་རྣམ་པ་ཅན་དུ་མྱོང་བ་མ་ཡིན་ནོ་ཞེས་བྱ་བའི་དོན་ཏོ། །དྲན་པ་མེད་པར་ནི་རྨི་ལམ་གྱི་གནས་སྐབས་སད་པའི་དུས་སུ་ཐ་སྙད་དུ་ནུས་པ་མ་ཡིན་པའི་ཕྱིར་རོ། །འདི་ནི་ཇི་ལྟ་བ་བཞིན་དུ་དྲན་པ་ཡིན་ནོ་ཞེས་བྱ་བ་འདི་ག་ལས་ཏེ། རྣམ་པར་རྟོག་པའི་བདག་ཉིད་ཀྱི་དྲན་པ་ནི་དོན་ཇི་ལྟ་བ་བཞིན་མ་ཡིན་པ་ཡང་སྲིད་པའི་ཕྱིར་རོ་ཞེ་ན། དེ་ནི་མི་རིགས་ཏེ་རྗེས་སུ་འགྲོ་བ་དང་ལྡོག་པ་དག་ལས་དྲན་པ་ནི་ཉམས་སུ་མྱོང་བའི་རྗེས་སུ་འབྲང་བར་ངེས་པར་ཤེས་པའི་ཕྱིར་རོ། །འཁྲུལ་པའི་རྒྱུ་མཚན་འགའ་ཞིག་ལས་ཀྱང་ཉམས་སུ་
མྱོང་བ་ཇི་ལྟ་བ་བཞིན་མ་ཡིན་པ་ཡང་ཡོད་མོད་ཀྱི། དེ་དེ་ལ་ནི་གནོད་པར་བྱེད་པའི་ཚད་མ་ལས་ཕྱིན་ཅི་ལོག་གི་ཡུལ་ཅན་ཉིད་དུ་ཁོང་དུ་ཆུད་པར་བྱ་བ་ཡིན་ལ། གང་ལ་གནོད་བར་བྱེད་པ་མེད་པ་དེ་ལ་ནི་དོན་ཇི་ལྟ་བ་བཞིན་དྲན་པ་ཡིན་ནོ། །གཞན་ཡང་གཉིད་སད་པའི་གནས་སྐབས་ཀྱི་གསལ་བར་ཉམས་སུ་མྱོང་བའི་ཡུལ་གྱི་དྲན་པ་ཡང་ཡོད་པ་ཡིན་ཏེ། གལ་ཏེ་རྨི་ལམ་གྱི་གནས་སྐབས་ཀྱི་དྲན་པའི་རྣམ་ཤེས་དེ་གསལ་བར་སྣང་བར་གྱུར་ན། དེ་ཅིའི་ཕྱིར་ཕྱིན་ཅི་ལོག་ཏུ་དྲན་པར་འགྱུར་བ་བསླད་པའི་གནས་སྐབས་སུ་མྱོང་བ་ཡིན་པ་དེས་ན་མི་གསལ་བར་དྲན་པ་ཡིན་ནོ་ཞེས་བརྗོད་པར་ཡང་མི་ནུས་ཏེ། གང་གི་ཕྱིར་རྨི་ལམ་གྱི་ཤེས་པ་གསལ་བར་སྣང་བ་དག་ཀྱང་དྲན་པའི་ཕྱིར་རོ། །དུས་རིང་པོས་བར་དུ་ཆོད་པ་དེའི་ཕྱིར་ཡང་མ་ཡིན་ཏེ། དྲན་པའི་རྣམ་པར་ཤེས་པ་དང་ལྡན་པའི་རྨི་ལམ་ལས་མོད་ལ་སད་པ་ན་སྔར་སྐྱེས་པའི་རྨི་ལམ་གྱི་ཤེས་པ་ནི་གསལ་བར་སྣང་བར་དྲན་ལ། དེ་མ་ཐག་ཏུ་སྐྱེས་པའི་དྲན་པ་ནི་མི་གསལ་བར་རེ། །དེའི་ཕྱིར་གནོད་པར་བྱེད་པའི་ཚད་མ་དང་ལྡན་པའི་འཁྲུལ་པའི་རྒྱུ་མཚན་མེད་པས་ན། གང་ཞིག་ཇི་ལྟ་བུའི་དོན་གྱི་རྣམ་པ་ཉམས་སུ་མྱོང་བར་དྲན་པ་དེ་ནི་དེ་ལྟ་བུའི་དོན་མྱོང་བ་སྔོན་དུ་འགྲོ་བ་ཅན་ཡིན་ཏེ། དཔེར་ན་མངོན་པར་འདོད་པ་སད་པའི་གནས་སྐབས་ཀྱི་ཉམས་སུ་མྱོང་བ་འགའ་ཞིག་གི་དྲན་པ་བཞིན་ནོ། །དེ་བཞིན་དུ་རྨི་ལམ་གྱི་དྲན་པའི་ཤེས་པ་ལ་དམིགས་པས་ཀྱང་མི་གསལ་བར་དྲན་པ་ཡིན་ནོ། །ཕྱི་རོལ་གྱི་དོན་གྱི་ཚུལ་ལ་ཤེས་པ་ཐམས་ཅད་ཀྱི་ཕྱིན་ཅི་ལོག་པ་ཉིད་ནི། གནོད་པར་བྱེད་པའི་ཚད་མས་ཉེ་བར་བསྒྲུབས་པའི་མི་སླུ་བ་མ་ཡིན་པ་ཉིད་ཀྱིས་ཁྱབ་པ་ཡིན་ཏེ། བར་ཏི་ཀ་ལས་གནོད་པར་བྱེད་པའི་རིགས་པ་དམ་པ་མེད་ན་ཞེས་བྱ་བ་དང༌། རྣམ་པར་ངེས་པ་ལས་ཀྱང་གནོད་པར་བྱེད་པ་མེད་པའི་ཕྱིར་འཁྲུལ་པར་མི་འགྲུབ་བོ་ཞེས་བཤད་དོ། །མངོན་སུམ་དང་རྗེས་སུ་དཔག་པ་འགའ་ཞིག་དོན་ཡོད་པར་མཐོང་བའི་ཕྱིར་དང༌། ཞེན་པར་བྱ་བའི་དོན་ལ་ལྟོས་ནས་མི་སླུ་བའི་རྒྱུ་ཡང་དོན་ཡོད་པ་ཉིད་ཡིན་པའི་ཕྱིར་མི་སླུ་བ་ནི་དོན་ཡོད་པ་ཉིད་ཀྱིས་ཁྱབ་པ་ཡིན་ནོ། །གནོད་པར་བྱེད་པ་ཡོད་ན་ནི་མི་སླུ་བ་མེད་པའི་ཕྱིར་གནོད་པར་བྱེད་པ་མེད་པ་ཉིད་ནི་མི་སླུ་བ་ཁོ་ནར་ངེས་པར་བྱ་བ་ཡིན་ལ། དྲན་
པ་ལས་ཡང་གནོད་པར་བྱེད་པའི་ཚད་མ་མེད་པས་མི་སླུ་བ་ཡིན་ནོ། །ཉམས་སུ་མྱོང་བའི་འབྲས་བུ་ཉིད་དུ་ནི་མཐོང་བའི་ཕྱིར་ཏེ། ཕྱིན་ཅི་ལོག་གི་དོན་ཅན་ཉིད་ཡིན་ན་ནི་རྗེས་སུ་འབྲེལ་བར་དྲན་བར་མི་འགྱུར་ན། རྨི་ལམ་གྱི་དྲན་པ་ནི་ཐམས་ཅད་ཀྱང་མི་གསལ་བར་སྣང་བར་དྲན་ནོ། །རྗེས་སུ་འབྲེལ་པ་ཞེས་བྱ་བ་ནི་རྨི་ལམ་གྱི་དྲན་བ་ཐམས་ཅད་ལ་ཁྱབ་པར་ཡོད་པར་དྲན་པ་ཡིན་ལ། འདི་འདྲ་བའི་དྲན་པ་ནི་ཉམས་སུ་མྱོང་བའི་འབྲས་བུར་གྲུབ་བོ། །དེས་ན་འདི་ལས་གནོད་པར་བྱེད་པ་ཡོད་པ་མ་ཡིན་ཏེ། དུ་བ་མེའི་འབྲས་བུ་ཡིན་པ་ལ་ནི་གནོད་པར་བྱེད་བ་མེད་པ་བཞིན་ནོ། །དེའི་ཕྱིར་དེ་ལྟར་ཁྱབ་པར་བྱེད་པ་མི་དམིགས་པས་རྨི་ལམ་གྱི་དྲན་པ་དྲན་པ་ལ་ཕྱིན་ཅི་ལོག་ཉིད་བཀག་བའམ། རང་བཞིན་གྱི་གཏན་ཚིགས་ཀྱིས་ཇི་ལྟར་ཞེན་པ་བཞིན་དུ་མི་གསལ་བར་སྣང་བའི་དྲན་པ་སྔོན་དུ་འགྲོ་བ་ཅན་ཉིད་ཡིན་པ་དེས་ན་རྨི་ལམ་གྱི་དྲན་པ་མི་གསལ་བར་སྣང་བ་ཡིན་ནོ་ཞེས་གནས་སོ། །དེ་ལྟ་ན་ཡང་ཇི་ལྟར་རྣམ་པར་རྟོག་པ་གསལ་བར་སྣང་བར་མི་འགྱུར་ཞེ་ན། སྨྲས་པ། འདི་ལ་དབང་པོའི་རྣམ་པར་ཤེས་པ་ནི་རང་གི་ཉེ་བར་ལེན་པ་ལས་སྐྱེས་པ་ན་དབང་པོ་ལས་གསལ་བར་སྣང་བ་ཡིན་ཏེ། དབང་པོ་ལས་སྐྱེས་པ་འཁྲུལ་པ་རྣམས་ཀྱང་གསལ་བར་སྣང་བའི་ཕྱིར་རོ། །ཡིད་ཀྱི་མངོན་སུམ་ནི་དོན་ལས་སོ། །ཡིད་ཀྱི་རྣམ་པར་ཤེས་པ་གསལ་བར་སྣང་བ་མ་ཡིན་པ་གསལ་བར་སྣང་བར་བྱེད་པར་ནུས་པ་ཉིད་ཅེས་བྱ་བའི་རྣམ་པར་བསླད་པ་ཡིན་ན་རྣམ་པར་རྟོག་པ་ནི་གསལ་བར་བྱེད་ནུས་པ་མ་ཡིན་ཏེ། རྗེས་སུ་འགྲོ་བ་དང་ལྡོག་པ་དག་གིས་དེར་སྒྲའི་རྣམ་པ་དང་འབྲེལ་པ་ལས་གཞན་གཉིད་ཀྱིས་གསལ་བར་སྣང་བར་བྱེད་པའི་ནུས་པའི་གེགས་བྱེད་པའི་རྒྱུ་ནི་མ་མཐོང་ངོ༌། །དེའི་ཕྱིར་སྒྲའི་རྣམ་པ་དང་འབྲེལ་པ་ཉིད་ནི་གསལ་བར་སྣང་བ་དང་འགལ་བར་ཁོང་དུ་ཆུད་དོ། །དེ་ནི་དེ་ཁོ་ན་ལྟར་ཡིན་ཏེ། གང་གི་ཕྱིར་རྨི་ལམ་དང་སད་པའི་སྒྲ་དང་འདྲེས་པར་འཛིན་པ་ནི་གཉིད་ཀྱིས་བརླམས་པ་ལ་སོགས་པའི་རྒྱུ་ཅན་མ་ཡིན་གྱི། འོན་ཀྱང་ལྡོག་པ་དང་རྗེས་སུ་འགྲོ་བ་དག་ལས་བརྡའི་རྒྱུ་ཅན་ཉིད་ཡིན་པར་མཐོང་ངོ༌། །དེའི་ཕྱིར་བརྡའི་དུས་སུ་མཐོང་བའི་དངོས་པོ་ཡུལ་ཅན་ཡིན་པའི་ཕྱིར་སྔར་མཐོང་བའི་ཡུལ་གྱི་རང་བཞིན་སྡོམ་པའི་རྒྱུ་ཅན་ཡིན་ལ། སྔོན་མཐོང་
པའི་ཡུལ་ཉིད་དུ་འཛིན་པས་དོན་ཉེ་བ་མ་ཡིན་པའི་རང་བཞིན་དུ་སྣང་བ་ན་ཡང་གསལ་བར་མི་འགྱུར་རོ། །གང་གི་ཕྱིར་ཉེ་བ་ཉིད་དུ་སྣང་ན་ནི་གསལ་བར་སྣང་བར་འགྱུར་ན། སྔོན་ཞུགས་བའི་མཐོང་བའི་ཡུལ་ཉིད་ཀྱིས་སྔོན་བྱུང་བའི་དངོས་པོར་གཟུང་བ་ནི་ཉེ་བའི་རང་བཞིན་དུ་སྣང་བ་མ་ཡིན་ཏེ། དེས་ན་གསལ་བར་སྣང་བ་མ་ཡིན་ནོ། །རབ་རིབ་ཅན་གྱིས་མཐོང་བ་ནི་ཉེ་བ་མ་ཡིན་པའི་རང་བཞིན་དུ་མི་སྣང་བ་དེའི་ཕྱིར་སྒྲའི་ཚོགས་གསལ་བར་སྣང་བ་ཡིན་ནོ། །དེ་ལྟ་བུར་གྱུར་པ་ཡང་རེས་འགའ་གསལ་བར་སྣང་བའི་རྒྱུ་འགའ་ཞིག་གིས་གསལ་བར་བྱེད། སྲིད་པ་རྣམ་པར་རྟོག་པ་ནི་ཡིད་ཀྱི་རྣམ་པར་ཤེས་པ་གསལ་བར་སྣང་བའི་རྒྱུ་ཁྱད་པར་ཅན་དོན་རྣམ་པ་སྣ་ཚོགས་སྟོན་པར་བྱེད་ནུས་པ་གཉིད་ཅེས་བྱ་བའི་རྣམ་པར་བསླད་པ་དེས་ཀྱང་གསལ་བར་སྣང་བར་བྱེད་པ་མ་ཡིན་ནོ། །དེའི་ཕྱིར་རྣམ་པར་རྟོག་པ་ནི་ཡིད་ཀྱི་རྣམ་པར་ཤེས་པ་གསལ་བར་སྣང་བའི་རྒྱུ་གང་གིས་ཀྱང་གསལ་བར་སྣང་བར་བྱེད་མི་ནུས་སོ། །དེ་ཉིད་ཀྱི་ཕྱིར་བསླད་པའམ་གཞན་གྱིས་ཀྱང་རྣམ་པར་རྟོག་པ་ནི་གསལ་བར་བྱེད་པ་མ་ཡིན་གྱི་ཞེས་གསུངས་སོ། །གང་ཞིག་བརྡའི་དུས་སུ་མཐོང་བ་ཉིད་ཀྱིས་དངོས་པོ་ལ་རེག་པ་ཅན་གྱི་ཤེས་པ་དེ་ནི་གང་གིས་ཀྱང་གསལ་བར་བྱ་བར་ནུས་པ་མ་ཡིན་ཏེ། དཔེར་ན་མཐོང་བ་འགགས་ནས་ཡུན་རིང་དུ་ལོན་པའི་རྣམ་པར་རྟོག་པ་བཞིན་ནོ། །རྨི་ལམ་གྱི་རྣམ་པར་རྟོག་པ་ཡང་བརྡའི་དུས་སུ་མཐོང་བ་ཉིད་ཀྱིས་དངོས་པོ་ལས་རེག་པར་བྱེད་པ་ཅན་ཡིན་ནོ། །གསལ་བར་སྣང་བ་ཉིད་ནི་ཉེ་བའི་རང་བཞིན་དུ་སྣང་བ་ཡིན་ལ། སྔོན་མཐོང་བ་ཉིད་དུ་འཛིན་པ་ལ་ནི་ཉེ་བ་མ་ཡིན་པའི་རང་བཞིན་གྱི་དངོས་པོར་སྣང་བས་ཁྱབ་པ་ཡིན་ནོ། །སྔོན་གྱི་ཤེས་པའི་ཡུལ་གྱི་དངོས་པོ་ཉིད་ནི་སྔོན་གྱི་ཤེས་པ་ལོག་པའི་ཚེ་ན་ཡོད་པ་མ་ཡིན་ཏེ། དེའི་ཕྱིར་ཕྱིས་འབྱུང་བའི་ཤེས་པས་སྔོན་གྱི་ཤེས་པའི་ཡུལ་ཉེ་བ་མ་ཡིན་པ་ཉིད་ཀྱིས་དངོས་པོ་ལ་རེག་པ་ཡིན་ལ། བརྡའི་དུས་སུ་མཐོང་བའི་སྒྲས་ཁྱད་པར་དུ་འཛིན་པ་ཡང་སྔོན་གྱི་ཤེས་པའི་ཡུལ་འཛིན་པ་ཉིད་ཡིན་ཏེ། དེས་ན་འདི་ནི་འགལ་བས་ཁྱབ་པ་དམིགས་པའོ། །གལ་ཏེ་འོ་ན་གསལ་བར་སྣང་བ་དང་འགལ་བས་ཁྱབ་པ་ཉིད་ཀྱིས་སྔོན་མཐོང་བ་འཛིན་པའི་མཚན་ཉིད་ཀྱི་རྣམ་པར་རྟོག་པ་གང་གིས་ཀྱང་གསལ་བར་སྣང་བ་ཅན་དུ་བྱེད་མི་
ནུས་ན་འོ་ན་ནི་ཉེ་བ་མ་ཡིན་པ་སྔོན་མཐོང་བ་འཛིན་པའི་ཕྱིར་ན་གསལ་བར་སྣང་བ་མ་ཡིན་ནོ་ཞེས་བྱ་བ་འདི་ཉིད་གཏན་ཚིགས་སུ་བརྗོད་པར་བྱ་བ་ལས། ཅིའི་ཕྱིར་རྨི་ལམ་གྱིས་ཀྱང་གསལ་བར་བྱེད་པ་མ་ཡིན་པའི་ཕྱིར་རྣམ་པར་རྟོག་པ་གསལ་བར་བྱ་ནུས་པ་མ་ཡིན་ནོ་ཞེས་བརྗོད་ཅེ་ན། བདེན་ཏེ། འོན་ཀྱང་ཁ་ཅིག་འདི་སྙམ་དུ་ཇི་ལྟར་ཡིད་ཀྱི་རྣམ་ཤེས་གསལ་བར་སྣང་བ་མ་ཡིན་པ་བསྒོམས་པས་གསལ་བར་བྱེད་པ་དེ་བཞིན་དུ་རྣམ་པར་རྟོག་པ་ཡང་ཡིན་ནོ་ཞེས་དོགས་པར་འགྱུར་བ་དེ་བཟློག་པའི་དོན་དུ་ཡིད་ཀྱི་རྣམ་པར་ཤེས་པ་གསལ་བར་སྣང་བའི་རྒྱུ་ནི་རྣམ་པར་རྟོག་པ་གསལ་བར་སྣང་བར་བྱ་བ་ལ་མཐུ་རྡུགས་པར་བསྟན་པ་ཡིན་ནོ། །དེའི་དོན་འདི་ཡིན་ཏེ། ཡིད་ཀྱི་རྣམ་ཤེས་གསལ་བར་སྣང་བའི་རྒྱུ་ཡིན་ནོ་ཞེས་ཏེ། དེ་ལྟར་རྣམ་པར་རྟོག་པ་ཡང་གསལ་བར་བྱེད་པ་མ་ཡིན་ཏེ། སྒྲ་དང་འདྲེས་པ་ལ་གསལ་བར་སྣང་བ་ཉིད་འགལ་བའི་ཕྱིར་རོ། །དེ་ཉིད་ཀྱི་ཕྱིར་གཉིད་ཀྱིས་ཀྱང་གསལ་བར་བྱེད་པ་མ་ཡིན་ཏེ། འགལ་བ་ཉེ་བར་གནས་པའི་ཕྱིར་རོ། །བསྒོམ་པར་བྱ་བའི་དོན་ནི་གསལ་བར་སྣང་བར་འགྱུར་བ་ཡིན་ན་སྒྲ་ནི་བསྒོམ་པར་བྱ་བ་མ་ཡིན་ནོ། །སྒྲ་དང་དོན་བསྒོམ་པར་བྱ་བ་ཡིན་དུ་ཟིན་ཀྱང༌། ཇི་སྲིད་སྔར་མཐོང་བ་ཉིད་དུ་སྣང་བ་དེ་སྲིད་དུ་རྣམ་པར་རྟོག་པ་ཅན་གྱི་ཤེས་པ་ཡིན་ཞིང་དེ་སྲིད་དུ་ཡང་དེ་དག་གསལ་བར་སྣང་བ་མ་ཡིན་ཏེ། ཉེ་བ་མ་ཡིན་པ་ཉིད་དུ་སྣང་བའི་ཕྱིར་རོ། །ཡང་གང་གི་ཚེ་སྔར་མཐོང་བ་ཉིད་དུ་མི་འཛིན་པ་དེའི་ཚེ་ཡང་ཕན་ཚུན་གཙོ་བོ་དང་ཕལ་པའི་དངོས་པོར་སྣང་བ་མེད་པ་ནི་འབྲེལ་པར་སྣང་བ་མ་ཡིན་ནོ། །ཕལ་པ་དང་གཙོ་བོའི་དངོས་པོ་དང་བྲལ་བས་འབྲེལ་པས་སྟོང་པར་འཛིན་པར་བྱེད་པ་ནི་རྣམ་པར་རྟོག་པ་དང་བཅས་པའི་ཤེས་པ་མ་ཡིན་ཏེ། དཔེར་ན་བུམ་པ་གཉིས་འཛིན་པར་བྱེད་པ་རྣམ་པར་རྟོག་པ་དང་བཅས་པ་མ་ཡིན་པ་བཞིན་ནོ། །དེ་ཉིད་ཀྱི་ཕྱིར་རྣལ་འབྱོར་པའི་ཤེས་པ་སྒྲ་ལ་སོགས་པའི་སྤྱོད་ཡུལ་དུ་མི་འཛིན་པར་བྱེད་པ་ཡིན་ཡང༌། ཁྱད་པར་ཅན་གྱི་དངོས་པོའི་མཚན་ཉིད་ཕལ་པ་དང་གཙོ་བོར་འཛིན་བ་མེད་པའི་ཕྱིར་རྣམ་པར་རྟོག་པ་ཅན་ཡིན་ནོ་ཞེས་ལན་མང་དུ་བཤད་ཟིན་ཏོ། །དེ་ལྟར་གནས་པ་ན་སྐབས་ཀྱི་དོན་ནི་འདི་ཡིན་ཏེ། ཁྱད་པར་ཅན་གྱི་དོན་ཅན་གྱི་ཡིད་ཀྱི་རྣམ་པར་ཤེས་པ་གང་ཞིག་བསྒོམས་པས་ཁྱད་པར་དུ་འགྱུར་བར་སྲིད་པ་དེ་ནི་གསལ་བར་སྣང་བར་འགྱུར་
བ་ཡིན་ཏེ། དཔེར་ན་འཇིགས་པ་ལ་སོགས་པའི་དངོས་བོའི་ཁྱད་པར་དུ་སྣང་བའི་ཡིད་ཀྱི་རྣམ་པར་ཤེས་པ་བཞིན་ནོ། །བསྒོམས་པས་ཁྱད་པར་དུ་འགྱུར་བ་ལ་ནི་གསལ་བར་སྣང་བར་བྱེད་ནུས་པས་ཁྱབ་པ་ཡིན་ལ། གལ་ཏེ་དེ་ཡོད་དུ་ཟིན་ཀྱང་གསལ་བར་སྣང་བར་མི་འགྱུར་ན་ནི་བསྒོམས་བའི་ནུས་པ་ཉིད་སྤངས་པར་འགྱུར་བ་ཡིན་པས་དེའི་ཕྱིར་ལན་ཅིག་ཀྱང་གསལ་བར་མི་འགྱུར་བ་ལས་འཇིགས་བ་ལ་སོགས་པ་ལ་མཐོང་བ་ཡང་ཡིན་ནོ། །གང་གིས་ནུས་པ་མེད་པ་ཉིད་དུ་དོགས་པར་འགྱུར་བ་དེ་ལ་རྒྱུ་གཞན་ནི་ཡོད་པ་མ་ཡིན་ནོ། །དེས་ན་ཁྱབ་པར་བྱེད་བ་མི་དམིགས་བས་མི་མཐུན་བའི་ཕྱོགས་ལས་ལྡོག་པ་ན་གཏན་ཚིགས་རང་བཞིན་ཉིད་དོ། །བདག་ཅག་ལ་སོགས་པའི་མི་རྟག་པ་ལ་སོགས་པའི་རྣམ་པ་ཅན་གྱི་ཡིད་ཀྱི་རྣམ་པར་ཤེས་པ་ལ་ཡང་བསྒོམས་པ་ཁྱད་པར་དུ་འགྲོ་བ་སྲིད་པ་ཡིན་ནོ། །གཏན་ཚིགས་མ་གྲུབ་པ་ཡང་མ་ཡིན་ཏེ། འདི་ལྟར་ར་ཞིག་མི་རྟག་བ་ལ་སོགས་པའི་རྣམ་པ་ཅན་གྱི་རྣམ་པར་ཤེས་པ་དངོས་པོ་ཐམས་ཅད་ཀྱི་ཡུལ་ཅན་ནི་སྲིད་པ་ཉིད་ཡིན་པར་ཁོ་བོ་ཅག་ལ་སོགས་པའི་ཉམས་སུ་མྱོང་བས་གྲུབ་པ་ཡིན་ལ། དེ་སྒོམ་པར་བྱེད་པ་ན་རྒྱུན་གྱིས་བསྒྲུབ་པར་ནུས་པ་ཉིད་ཀྱང་ཉམས་སུ་མྱོང་བས་ཁོང་དུ་ཆུད་པ་ཡིན་ནོ། །བསྒོམས་པའི་རྒྱུ་སྙིང་རྗེ་ཡང་འགའ་ཞིག་ལ་སྲིད་པ་ལ། འཇིག་རྟེན་ཕ་རོལ་ཡང་གཞན་དུ་བསྒྲུབས་པ་དེའི་ཕྱིར་བསྒོམས་པའི་དུས་ཀྱང་ཡོད་པས་མི་སྲིད་པ་མ་ཡིན་ནོ། །དེའི་ཕྱིར་དེ་ལྟར་ཕུལ་དུ་ཕྱིན་པའི་དུས་སུ་གོམས་པར་བྱས་པ་དང་ལྷན་ཅིག་པའི་རྣམ་པར་ཤེས་པ་ནི་ཡིད་ཀྱི་རྣམ་པར་ཤེས་པ་གསལ་བར་སྣང་བ་སྐྱེ་བའི་རྒྱུ་མ་ཚང་བ་མེད་པའི་ཡིན་པར་བསྟན་པ་ཡིན་ཏེ། རྒྱུ་མཚན་བ་མེད་པ་བསྟན་པ་ཉིད་འགའ་ཞིག་གི་སྲིད་པའི་ཚད་མར་བརྗོད་པ་ཡིན་ནོ། །འདི་ལྟར་རྒྱུའི་ཚོགས་པ་འདི་ཡོད་ལ་གེགས་བྱེད་པ་མེད་ན་ནི་ངེས་པར་འབྲས་བུ་དེ་འབྱུང་བ་ཡིན་ནོ་ཞེས་བྱ་བ་འདི་སྲིད་པའི་དོན་ཡིན་གྱི། དེ་འགོག་པའི་གཏན་ཚིགས་མེད་པ་དེའི་ཕྱིར་སྲིད་པར་ཡང་འགྱུར་རོ་ཞེས་བྱ་བ་འདི་ནི་སྲིད་པའི་དོན་མ་ཡིན་ཏེ། རྒྱུ་རྣམས་ཚོགས་བས་འབྲས་བུ་སྐྱེ་བར་རྗེས་སུ་དཔོག་པ་ནི་སྲིད་པའི་ཚད་མ་ཡིན་པའི་ཕྱིར་རོ། །ཇི་ལྟར་འདི་རང་བཞིན་གྱི་གཏན་ཚིགས་ཀྱི་ཁོངས་སུ་འདུ་བ་དེ་ལྟར་ནི་རྒྱུ་ཚོགས་པ་ལས་འབྲས་བུ་སྐྱེ་བ་ཞེས་འདི་ཉིད་དུ་སྟོན་པར་འགྱུར་རོ། །དེ་ལྟ་ན་ཡང་ཁ་ཅིག་ན་རེ་ཡིད་
ཀྱི་རྣམ་པར་ཤེས་པ་ནི་མ་རིག་པའི་རང་བཞིན་ཉིད་ཡིན་པས་དེ་ཇི་ལྟར་དག་པར་བྱེད་ནུས་ཤིང་གང་གིས་ན་མངོན་སུམ་དུ་འགྱུར་ཞེས་གང་སྨྲས་པ་དེ་ལ་ཡང་གསལ་བ་ཡིན་ཏེ། བསྒོམས་བས་གསལ་བར་སྣང་བ་ཉིད་ཡིན་པ་དེའི་ཕྱིར་རྣམ་པར་རྟོག་བ་མེད་པ་ཡིན་ལ། ཚད་མས་ཡོངས་སུ་དཔག་པའི་དོན་ཅན་ཉིད་ཀྱིས་ཀྱང་མི་སླུ་བ་ཉིད་ཡིན་ཏེ། དེའི་ཕྱིར་བསྒོམས་པས་མངོན་སུམ་ཉིད་དུ་འགྱུར་བ་གང་ཡིན་པ་དེའི་ཇི་ལྟར་མ་རིག་པའི་རང་བཞིན་དོན་མེད་པ་འཛིན་པར་འགྱུར། གཞན་ཡང་རྣམ་པར་ཤེས་པ་ནི་དོན་འཛིན་པར་ངེས་པ་མ་ཡིན་ཏེ། དོན་མེད་པ་ཡང་འཛིན་པའི་ཕྱིར་རོ། །དོན་མེད་པར་འཛིན་པར་ངེས་པ་ཡང་མ་ཡིན་ཏེ། དབང་པོའི་རྣམ་པར་ཤེས་པས་དོན་ཡང་འཛིན་པའི་ཕྱིར་རོ། །དེའི་ཕྱིར་རྣམ་པར་ཤེས་པ་བདག་ཉིད་དུ་མ་གྱུར་བ་གསལ་བར་བྱེད་པའི་ནུས་པ་དང་ལྡན་པའི་ཕྱིར་ཡོད་པ་དང་མེད་པ་ཁྱད་པར་མེད་པར་གསལ་བར་བྱེད་པ་ཡིན་ནོ། །རྣམ་པའི་ཁྱད་པར་དང་ལྡན་པའི་ཤེས་བྱ་འཛིན་པར་བྱེད་པ་ཉིད་ཡིན་པའི་ཕྱིར་ཡོད་པ་ནི་ངོ་བོ་ཉིད་ལས་འཛིན་པ་ཡིན་ཏེ། གང་གི་ཕྱིར་གཟུང་བར་བྱ་བའི་རང་བཞིན་དེ་དང་འཛིན་པར་བྱེད་པའི་རང་བཞིན་གྱི་ཤེས་པ་ཡོད་པས་དེ་ཅིའི་ཕྱིར་མི་འཛིན། འཛིན་པར་བྱེད་པ་ཡོད་ཅིང་དངོས་པོ་ཡང་ཡོད་པ་ན་ཡོད་པའི་དོན་མི་འཛིན་པ་ནི་རྒྱུ་ལས་ངེས་པའི་ཕྱིར་ཏེ། དཔེར་ན་གསལ་བའི་བདག་ཉིད་དུ་ཡོད་པའི་སྒྲོན་མ་ནི་རྒྱུའི་སྟོབས་ཀྱིས་ཉེ་བ་ན་འདུག་བ་ཉིད་གསལ་བར་བྱེད་པ་བཞིན་ནོ། །དེའི་ཕྱིར་རང་བཞིན་དང་བཅས་པའི་དངོས་པོ་འཛིན་པ་ནི་རང་གི་ངོ་བོ་ཁོ་ན་ལས་ཡིན་པའི་ཕྱིར་ངོ་བོ་ཉིད་དང་བཅས་པའི་རྣམ་པར་ཤེས་པའི་རང་གི་ངོ་བོ་ཡིན་པར་གྲུབ་བོ། །མེད་པ་ནི་རྣམ་པ་དང་བཅས་པའི་རང་བཞིན་གྱིས་སྟོང་པའི་ཕྱིར་རང་གི་ངོ་བོ་འཛིན་པ་མ་ཡིན་ནོ། །རྒྱུ་མཚན་གཞན་གྱིས་ཀྱང་མ་ཡིན་ཏེ། རྒྱུ་མཚན་གཞན་མ་མཐོང་བའི་ཕྱིར་རོ། །འོན་ཀྱང་ཉམས་སུ་མྱོང་བའི་དངོས་པོ་དང་འདྲ་བའི་མེ་ཏོག་དོན་གྱི་རྣམ་པ་ནི་ལོག་པར་འཛིན་པ་གོམས་པ་ལས་རྣམ་པར་ཤེས་པས་བདག་ཉིད་ལ་སྟོན་པར་བྱེད་པ་ཡིན་ནོ། །གང་གི་ཕྱིར་དེ་སྔོན་དུ་འགྲོ་བ་ཅན་གྱི་མེད་པའི་དོན་འཛིན་པའི་ཐོག་མ་དང་བཅས་པར་འགྱུར་བ་དོན་ཉམས་སུ་མྱོང་བ་དང་ལོག་པར་འཛིན་པའི་བག་ཆགས་ལ་ཐོག་མ་ཡོད་པ་ནི་མ་ཡིན་ནོ། །དེའི་ཕྱིར་དོན་འཛིན་པ་ལ་
ལྟོས་པའི་ལོག་པར་འཛིན་པ་གོམས་པ་ནི་རྒྱུ་ཡིན་ནོ། །དེ་ཁོ་ན་ཉིད་ངེས་པར་རྟོགས་པ་ན་ལྡོག་པའི་ཆོས་ཅན་ཡིན་པ་ཉིད་ཀྱིས་རང་གི་རང་བཞིན་མ་ཡིན་པའི་དོན་མེད་པ་འཛིན་པ་ནི་རྣམ་པར་ཤེས་པའི་ངོ་བོ་ཉིད་མ་ཡིན་ཏེ། དེའི་ཕྱིར་མ་རིག་པའི་རང་བཞིན་ནི་གློ་བུར་བ་ཡིན་ནོ། །དངོས་པོའི་རང་བཞིན་འཛིན་པ་ནི་རང་གི་དངོས་པོ་ཙམ་ལ་ལྟོས་པ་དང༌། དངོས་པོ་རྣམས་ཀྱི་ད་ཁོ་ནའི་རང་བཞིན་ཡང་ལྡོག་པ་མེད་པས་མི་ལྡོག་པའི་ཆོས་ཅན་ཡིན་པའི་ཕྱིར་རྣམ་པར་ཤེས་པའི་རང་གི་རང་བཞིན་ཡིན་ན། དེ་ཇི་ལྟར་ཡིད་ཀྱི་རྣམ་པར་ཤེས་པ་དོན་མེད་པར་འཛིན་པར་འགྱུར་ཏེ། རྣམ་འགྲེལ་ལས། རྣམ་ཤེས་ཡུལ་འཛིན་པ་ཡི་ཆོས། །དེ་ནི་ཇི་ལྟར་ཡོད་པ་བཞིན། །ཞེས་ཤེས་པ་ནི་དངོས་པོ་འཛིན་པའི་རང་བཞིན་དུ་བཤད་པ་ཡིན་ནོ། །དེ་ཉིད་ཀྱི་ཕྱིར་མ་རིག་པ་ལ་སོགས་པ་གློ་བུར་གྱི་དྲི་མ་རྣམས་ལོག་པ་ལས་ཀྱང་སྐྱེས་པར་མི་འགྱུར་ཏེ། རྒྱུ་དྲུངས་ཕྱུང་བའི་ཕྱིར་དང༌། དེ་དག་ཤེས་པའི་རང་བཞིན་མ་ཡིན་པའི་ཕྱིར་རོ། །རྣམ་འགྲེལ་ལས། འཚེ་བ་མེད་དང་ཡང་དག་དོན། །ངོ་བོ་ཉིད་ལ་ཞེས་བདག་མེད་པ་མཐོང་བའི་བདག་ཉིད་ཀྱི་རྣམ་པར་ཤེས་པ་ལྡོག་པ་མེད་པའི་ཆོས་སུ་བཤད་དོ། །དེའི་ཕྱིར་དེ་ལྟར་ཐམས་ཅད་མཁྱེན་པ་དང༌། འདོད་ཆགས་དང་བྲལ་བ་གྲུབ་པ་ལ་གསལ་བར་སྣང་བ་ཉིད་བསྒོམས་པའི་རྒྱུ་ཅན་ཡིན་པར་འབད་པས་བསྒྲུབ་པར་བྱ་བ་ཡིན་ཏེ། ཐམས་ཅད་མཁྱེན་པའི་མཁྱེན་པ་དང༌། བདག་མེད་པ་མཐོང་བ་ཡིན། མངོན་སུམ་ཉིད་ཡིན་པའི་ཕྱིར་རོ། །གསལ་བར་སྣང་བ་དང་རྣམ་པར་རྟོག་པ་དག་འགལ་བར་བརྗོད་པར་བྱ་བ་ཡིན་ནོ་ཞེས་བྱ་བ་ཡང་དོན་དམ་པ་ཡིན་ནོ། །དེ་ལྟར་ན་གང་གི་ཕྱིར་བྱེ་བྲག་ཏུ་སྨྲ་བ་རྣམས་ཀྱི་དབང་པོ་ཉིད་ལྟ་བ་པོ་ཡིན་པ་དང༌། སློབ་དཔོན་གྱིས་ལུང་ལ་བརྟེན་བའི་ཡིད་ཀྱི་མངོན་སུམ་བཀོད་པ་ལ་གཞན་གྱིས་སྐྱོན་བརྗོད་པ་དང༌། ཁ་ཅིག་རང་རིག་པ་དང་རྣལ་འབྱོར་པའི་ཤེས་པ་ཁས་མི་ལེན་པ་དེའི་ཕྱིར་རོ། །ལོག་པར་རྟོགས་པ་འདི་ཐམས་ཅད་བསལ་བའི་དོན་དུ་མངོན་སུམ་རྣམ་པ་བཞི་རྟོག་པ་དང་བྲལ་ཞིང་མ་འཁྲུལ་བའི་མཚན་ཉིད་དང་བཅས་པར་བཤད་ནས། སློབ་དཔོན་ཕྱོགས་ཀྱི་གླང་པོ་དང་བདག་ཉིད་ལྷན་ཅིག་འདོད་པ་གཅིག་ཏུ་བསྟན་པའི་ཕྱིར། མ་འཁྲུལ་པའི་རྣམ་པར་གཅད་པར་བྱ་བ་སྟེན་པ་ན། སློབ་
དཔོན་ཕྱོགས་ཀྱི་གླང་པོའི་རྗེས་སུ་འབྲང་བ་རྟོག་པ་དང་བྲལ་བ་ཙམ་ཞིག་ཐོས་པ་དང་ལྡན་བས་མ་འཁྲུལ་པ་སྨོས་པ་ལ། སྨད་པ་དང་བཅས་པའི་གུད་ན་གནས་པ་སློང་བར་བྱེད་དེ། གལ་ཏེ་གསལ་བར་སྣང་བ་ཐམས་ཅད་རྣམ་པར་རྟོག་པ་མེད་པ་ཡིན་ལ། རྟོག་པ་མེད་པ་ཡང་མངོན་སུམ་དུ་བརྗོད་པ་དེ་ལྟ་ན་འོ་ན་ནི་རྨི་ལམ་གྱི་ཤེས་པ་གསལ་བར་སྣང་བའི་ཕྱིར་རྟོག་པ་མེད་པ་ཡིན་ལ། དེའི་ཕྱིར་མངོན་སུམ་དུ་འགྱུར་རོ་ཞེ་ན། དེ་ནི་རིགས་པ་མ་ཡིན་ཏེ། མ་འཁྲུལ་པ་ཞེས་བསྟན་པའི་ཕྱིར་རོ། །གང་ཞིག་རྟོག་པ་དང་བྲལ་ཞིང་མ་འཁྲུལ་པ་དེ་ནི་མངོན་སུམ་མོ་ཞེས་ཁོ་བོས་བརྗོད་ཟིན་པའི་ཕྱིར་དང༌། ཇི་ལྟར་སློབ་དཔོན་གྱི་དགོངས་པ་ཡང་འདི་ཡིན་པ་དེ་ལྟར་ནི་དེ་མ་ཐག་པ་ཉིད་དུ་སྟོན་པར་འགྱུར་རོ། །དེས་ན་རྨི་ལམ་གྱི་ཤེས་པ་གསལ་བར་སྣང་བ་ཡང་གང་གིས་འཁྲུལ་པ་དེའི་ཕྱིར་མངོན་སུམ་མ་ཡིན་ནོ། །གང་གི་ཕྱིར་རྨི་ལམ་གྱི་ཤེས་པ་གསལ་བར་སྣང་ཡང་མངོན་སུམ་མ་ཡིན་པ་དེ་ཉིད་ཀྱི་ཕྱིར་མངོན་སུམ་ལྟར་སྣང་བ་རྣམ་པ་གཉིས་སུ་བདག་གིས་བརྗོད་ལ། སློབ་དཔོན་གྱིས་ཀྱང་ཇི་ལྟར་བརྗོད་པ་དེ་ལྟར་འཆད་པར་འགྱུར་རོ། །རེ་ཞིག་གཅིག་ནི་རྣམ་པར་རྟོག་པ་སྟེ། དེ་ཡང་དངོས་པོ་མི་སྣང་བའི་ཕྱིར་དངོས་པོ་སྣང་བ་དང་བྲལ་བའི་ཕྱིར་མངོན་སུམ་ལྟར་སྣང་བའོ། །ཉེ་བར་བསླད་པ་ནི་ཕྱིན་ཅི་ལོག་གི་དོན་ཅན་གྱི་ཤེས་པའོ། །སླུ་བའི་ཕྱིར་ཏེ་དོན་མི་འཐོབ་པའི་ཕྱིར་མངོན་སུམ་ལྟར་སྣང་བའོ། །ཚིག་ལེའུར་བྱས་པ་ལས་དོན་གྱིས་ཐོབ་པའི་རྣམ་པ་གཉིས་པོ་འགྲེལ་པར་དངོས་སུ་ཁ་བསྐངས་ནས་རྣམ་པ་གཉིས་ཀྱི་སྒྲས་བསྟན་ཏོ། །འདི་སྐད་བསྟན་པ་ཡིན་ཏེ། གལ་ཏེ་རྣམ་པར་རྟོག་བ་ཅན་གྱི་ཤེས་པ་ཐམས་ཅད་མི་བདེན་པའི་དོན་ཅན་ཡིན་པ་དེ་ལྟ་ན་ཡང་ཐ་སྙད་ཀྱི་དབང་གིས་འགའ་ཞིག་མི་སླུ་བ་ཉིད་དུ་འདོད་པ་ཡིན་ལ། དེ་ཡང་དངོས་པོའི་རྣམ་པ་དང་བྲལ་བའི་ཕྱིར་མངོན་སུམ་ལྟར་སྣང་བའོ། །ལོག་པར་སྣང་བའི་རྣམ་པར་ཤེས་པ་ཡང་མངོན་པར་འདོད་པ་གང་ཡིན་པ་དེ་ལ་སླུ་བ་ཉིད་ཀྱིས་དོན་སྣང་བ་དང་བྲལ་བ་དེས་ན་འཁྲུལ་པ་ཡིན་ནོ། །འདི་གཉིས་ཀ་ཡང་མ་འཁྲུལ་པ་སྨོས་པ་ཉིད་ཀྱིས་བསལ་ཏོ། །མ་འཁྲུལ་བ་སྨོས་པས་ནི་བསླད་པ་བསལ་བ་ཡིན་ལ་རྣམ་པར་རྟོག་པ་མེད་པས་ནི་རྣམ་པར་རྟོག་པ་ཞེས་དེ་སྐད་ནི་བརྗོད་པར་མི་
ནུས་ཏེ། འདི་ལྟར་མཚན་ཉིད་བསྟན་པའི་ཕྱིར་འདི་བརྗོད་པ་ནི་མ་ཡིན་ཏེ། གཞན་དུ་ན་ནི་རྟོག་པ་དང་བྲལ་བ་སྨོས་པས་ནི་རྣམ་པར་རྟོག་པ་བསལ་ལ། བསླད་པ་ནི་ལོག་པའི་ཤེས་པ་ཡིན་བ་ན་ཧ་ཅང་ཐལ་བར་མི་འགྱུར་བས་མ་འཁྲུལ་པ་སྨོས་པར་ལྷག་པར་འགྱུར་རོ། །གཞན་ཡང་དེ་མ་ཐག་ཏུ་བརྗོད་པའི་གང་གི་ཕྱིར་མངོན་སུམ་ནི་དངོས་པོ་སྣང་བ་ཡིན་ཏེ་ཞེས་བྱ་བ་དེ་མཚན་ཉིད་གང་གིས་བསྡུས། གལ་ཏེ་མཚན་ཉིད་ལས་ཕྱི་རོལ་དུ་གྱུར་པར་བརྗོད་ན་ནི། དེའི་ཚེ་མཚན་ཉིད་གཉིས་ཀྱིས་གཉིས་བསལ་བར་བྱ་བ་ལས་སྔ་ན་མེད་པའི་མཚན་ཉིད་ཀྱིས་མ་བསྡུས་པའི་གཞན་གྱིས་བསལ་བར་རྩོམ་པས་ཅི་ཞིག་བྱ། དེའི་ཕྱིར་མངོན་སུམ་ལྟར་སྣང་བའི་ཤེས་པ་ནི་འདི་དག་ཙམ་ཞིག་སྲིད་དེ། འདི་དག་སྟེ། རྟོག་པ་དང་བཅས་པ་དང་རྟོག་པ་མེད་པའོ་ཞེས་བྱ་བ་འདི་བརྗོད་པར་བཞེད་པ་ཡིན་ལ། དེ་གཉི་ག་ཡང་མ་འཁྲུལ་པ་སྨོས་པ་ཉིད་ཀྱིས་བསྡུས་པ་ཡིན་ནོ། །མ་འཁྲུལ་པ་སྨོས་པ་མེད་པར་རྣམ་པར་རྟོག་པ་མེད་པ་སྨོས་པས་ནི་རྣམ་པར་རྟོག་པ་ཁོ་ན་བསལ་བར་འགྱུར་ལ། མི་འཁྲུལ་པ་སྨོས་པ་ཡོད་ན་ཡང་གཉི་ག་བསལ་བའི་ཕྱིར་རྣམ་པར་རྟོག་པ་མེད་པ་སྨོས་པ་ནི་ལོག་པར་རྟོགས་པ་བསལ་བའི་དོན་ཉིད་དོ། །ཡང་དག་པའི་ཤེས་པའི་དབང་དུ་བྱས་པའི་ཕྱིར་རྨི་ལམ་གྱི་ཤེས་པ་གཅོད་པ་གྲུབ་ཀྱང༌། མི་སླུ་བར་མངོན་པར་འདོད་པའི་གསལ་བར་སྣང་བ་གཞན་བཅད་པའི་དོན་དུ་མ་འཁྲུལ་པ་སྨོས་པར་བྱ་བ་ཡིན་ནོ་ཞེས་མཚན་ཉིད་གསལ་བར་བརྗོད་ཟིན་ཏོ། །རྨི་ལམ་གྱི་ཤེས་པ་ཞེས་བརྗོད་པ་གང་ཡིན་པ་དེ་ནི་རྨི་ལམ་གྱི་ཤེས་པའི་སྐབས་ཡིན་པའི་ཕྱིར་ཏེ། མ་འཁྲུལ་པ་སྨོས་པ་ནི་ཇི་ལྟར་ཡང་རུང་བའི་དགོས་པ་དང་ལྡན་པ་ཡིན་ནོ་ཞེས་བསྟན་པའི་དོན་དུའོ། །ཡང་ཇི་ལྟར་ན་དངོས་པོ་མི་སྣང་བའི་ཕྱིར་རྣམ་པར་རྟོག་པ་མངོན་སུམ་ལྟར་སྣང་བ་ཡིན་ཞེ་ན། བཤད་པ། གང་གི་ཕྱིར་མངོན་སུམ་གང་ལ་དངོས་པོ་སྣང་བ་ཡོད་པ་དེ་ནི་དེ་ལྟ་བུ་སྟེ་ཁོ་བོ་དང་སློབ་དཔོན་གྱིས་བརྗོད་ཟིན་ཏོ། །དེ་ག་ལས་ཤེ་ན། དེ་མེད་ན་ཞེས་གསུངས་ཏེ། དངོས་པོ་དེ་མེད་ན་མངོན་སུམ་དེའི་རྣམ་པ་གཟུང་བའི་རྣམ་པ་དེ་ཉམས་པ་སྟེ་ལྡོག་པའི་ཕྱིར་རོ། །གང་གི་ཕྱིར་འདིས་མངོན་སུམ་གྱི་སྣང་བ་ནི་དོན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཡིན་ནོ་ཞེས་བྱ་བ་དང༌། གང་ཞིག་ཤེས་པའི་སྣང་
བ་ཞེས་བྱ་བ་ལ་སོགས་པ་དང༌། ཡང་དེ་བཞིན་དུ་ལྡོག་པ་དང་རྗེས་སུ་འགྲོ་བའི་རྗེས་སུ་མི་བྱེད་པ་ནི་རྒྱུ་མ་ཡིན་ཞིང༌། རྣམ་པར་གཏོད་པར་ནུས་པའི་རྒྱུ་ནི་ཡུལ་ཡིན་ནོ་ཞེས་བྱ་བ་འདིས་བརྗོད་ཟིན་ཏོ། །རྣམ་པར་རྟོག་པ་ནི་དེ་ལྟར་དངོས་པོ་སྣང་བ་མ་ཡིན་ཏེ། དེའི་སྟེ་རྣམ་པར་རྟོག་པའི་སྣང་བ་དངོས་པོ་སྟེ་རང་གི་མཚན་ཉིད་དང་མཐུན་པ་མ་ཡིན་ཏེ། ཡོད་པ་དང་མེད་པའི་རྗེས་སུ་མི་འགྲོ་བའི་ཕྱིར་རོ། །འདི་ག་ལས་ཤེ་ན། དངོས་པོ་མེད་ཀྱང་རྣམ་པར་རྟོག་པའི་རྣམ་པ་མི་ཉམས་པའི་ཕྱིར་རོ། །འདི་ཡང༌། འདི་ནི་བརྗོད་མེད་རྟོགས་བྱེད་ཡིན། །ཞེས་བྱ་བ་དེའི་ནང་དུ་རྒྱས་པར་བསྟན་ཟིན་ཏོ། །དངོས་པོ་དང་མཐུན་པ་མ་ཡིན་པའི་ཕྱིར་རྣམ་པར་རྟོག་པ་མངོན་སུམ་ལྟར་སྣང་བ་ཡིན་པར་མ་ཟད་ཀྱི། ཉེ་བར་བསླད་པ་ཡང་མངོན་སུམ་ལྟར་སྣང་བ་ཡིན་ཏེ། དབང་པོ་ལས་སྐྱེས་པ་ཡིན་དུ་ཟིན་ཀྱང་ངོ༌། །དབང་པོ་ལས་སྐྱེས་པའི་གཏན་ཚིགས་བཤད་པ། དབང་པོ་ལས་སྐྱེས་པ་གཞན་ལས་བསླད་པ་དེ་ཁྱད་པར་མེད་པའི་ཕྱིར་རོ། །བསླད་པ་ནི་ཡིད་འབའ་ཞིག་ཏུ་མ་ཟད་ཀྱི་ཉེ་བར་བསླད་པ་གང་ཡིན་པ་འགའ་ཞིག་ནི་དབང་པོ་ལས་སྐྱེས་པ་ཡང་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཏོ། །ཅིའི་ཕྱིར་དབང་པོ་ལས་སྐྱེས་པ་ཡིན་ཞེ་ན། བཤད་པ། རྣམ་པར་བསླད་པ་ཞེས་བརྗོད་པ་དེ་ལས་གཞན་པའི་དབང་པོ་ལས་སྐྱེས་པའི་ཤེས་པ་དེ་དང་ཁྱད་པར་མེད་པའི་ཕྱིར་རོ། །ཁྱད་པར་ཡོད་པ་མ་ཡིན་པའི་ཕྱིར་བསླད་པ་དབང་པོ་ལས་སྐྱེས་པ་འདི་ཡང་མངོན་སུམ་ལྟར་སྣང་བ་སྟེ། གང་གི་ཕྱིར་དངོས་པོ་དང་མཐུན་པ་མ་ཡིན་པའི་ཕྱིར་ཏེ། རྣམ་པར་བསླད་བ་འདི་སྣང་བ་དངོས་པོ་དང་མཐུན་པ་ཅན་མ་ཡིན་པ་དེའི་ཕྱིར་སྣང་བ་དངོས་པོ་ལ་མི་ལྟོས་པས་མངོན་སུམ་ལྟར་སྣང་བ་ཡིན་ཏེ། རྣམ་པར་རྟོག་པ་བཞིན་ནོ། །སྐྲ་ཤད་དུ་སྣང་བ་དངོས་པོ་དང་མཐུན་པར་སྣང་བ་མ་ཡིན་དུ་ཟིན་ཀྱང་དབང་པོ་ལས་སྐྱེས་པའི་བསླད་པའི་ཤེས་པ་འགའ་ཞིག་ཟླ་བ་ལ་སོགས་པ་འགའ་ཞིག་ཡོད་པ་ཉིད་ལ་སྐྱེ་བར་འདོད་པ་མ་ཡིན་ནམ། དེའི་ཕྱིར་སྣང་བ་ཐམས་ཅད་དངོས་པོ་དང་མཐུན་པ་མ་ཡིན་པར་བརྗོད་ཅེ་ན། སླུ་བའི་ཕྱིར་ཞེས་བཤད་པ་དེ། དཔེར་ན་ཇི་ལྟར་སྣང་བ་བཞིན་དུ་ཕྱི་རོལ་ན་དངོས་པོ་མེད་པའི་ཕྱིར་སྐྲ་ཤད་དུ་སྣང་བའི་ཤེས་པ་ལ་ཡུལ་འགའ་ཡང་ཡོད་པ་མ་ཡིན་པ་དེ་བཞིན་དུ་ཟླ་བ་
གཉིས་ལ་སོགས་པར་སྣང་བ་ལ་ཡང་ཡུལ་ཡོད་པ་མ་ཡིན་ཏེ། ཇི་ལྟར་སྣང་བ་བཞིན་དུ་ཟླ་བ་གཉིས་དང་འགྲོ་བ་ལྗོན་ཤིང་ཕྱི་རོལ་ན་མེད་པའི་ཕྱིར་རོ། །དེའི་ཕྱིར་རྣམ་པར་བསླད་པའི་སྣང་བ་སླུ་ཞིང་འདྲིད་པ་ཡིན་ལ་དེ་ལས་ཀྱང་དངོས་པོ་དང་མཐུན་པ་མ་ཡིན་པ་དེའི་ཕྱིར་མངོན་སུམ་ལྟར་སྣང་བའོ། །སླུ་བའི་ཕྱིར་དངོས་པོ་སྣང་བ་མ་ཡིན་པར་བརྗོད་པ་འདིས་རྨི་ལམ་གྱི་ཤེས་པ་ཞེས་བྱ་བའི་ཡིད་ཀྱི་རྣམ་པར་བསླད་པ་ཡང་སླུ་བའི་ཕྱིར་དངོས་པོ་སྣང་བ་མ་ཡིན་པར་བཤད་པ་ཡིན་ནོ། །དེའི་དོན་ནི་འདི་ཡིན་ཏེ། མ་འཁྲུལ་པ་སྨོས་པས་རྟོག་པ་དང་བཅས་པ་དང་བ་སླད་པ་བསལ་བ་ན་ཧ་ཅང་ཐལ་བ་མེད་ཀྱང༌། རྟོག་པ་དང་བྲལ་བ་སྨོས་པ་ནི་ལོག་པར་རྟོགས་པ་བསལ་བའི་དོན་དུ་བྱས་པ་ཡིན་ཏེ། དངོས་སུ་རྣམ་པར་རྟོག་པ་བཟློག་པར་འགྱུར་བའི་ཕྱིར་རོ། །ཟླ་བ་གཉིས་ལ་སོགས་པར་འཁྲུལ་པ་ནི་ཇི་ལྟར་ཡང་དབང་པོས་བསྐྱེད་བ་མ་ཡིན་པ་ཉིད་དེ། འོན་ཀྱང་འདི་ནི་ཡིད་ཡིན་ནོ། །ཟླ་བའི་ཡུལ་ལ་ནི་གྲངས་འཁྲུལ་པ་ཡིན་ཞིང༌། མགལ་མེ་ལ་ནི་དབྱིབས་འཁྲུལ་པ་ལྗོན་ཤིང་ལ་ནི་བྱ་བ་འཁྲུལ་པ་ཡིན་ལ། གྲངས་ལ་སོགས་པ་འདི་དག་ཀྱང་སྒྲོ་བཏགས་ཀྱི་སྤྱོད་ཡུལ་ཁོ་ནའོ། །ཡང་འདི་དག་གི་གསལ་བར་སྣང་བ་ཉིད་ནི་དཔེར་ན་སྨིག་རྒྱུ་ལ་ཆུར་འཁྲུལ་པ་དེ་བཞིན་དུ་བལྟ་བར་བྱའོ་ཞེས་ཁ་ཅིག་གིས་རྟོགས་སོ། །དེ་ནི་དེ་ལྟར་རིགས་པ་མ་ཡིན་ཏ། དབང་པོ་ལས་བྱུང་བ་དབང་པོ་ལས་སྐྱེས་པ་ལ་ནི་ཡོད་པ་དང་མེད་པའི་རྗེས་སུ་བྱེད་ཅིང་རྗེས་སུ་འགྲོ་བ་གང་ཡིན་པ་སྟེ། དབང་པོའི་ཤེས་པའི་སྐབས་ཡིན་པའི་ཕྱིར་དབང་པོ་ཡོད་པ་དང་མེད་པ་དག་གི་རྗེས་སུ་འགྲོ་བ་གང་ཡིན་པ་དེ་ནི་དབང་པོ་ལས་བྱུང་བ་ཉིད་དེ་ཉིད་ཀྱི་མཚན་ཉིད་དེ་ངོ་བོ་ཉིད་དུ་གནས་པ་ཡིན་ལ། གང་གི་ཕྱིར་དེ་ནི་ཟླ་བ་གཉིས་པ་ལ་སོགས་པའི་ཤེས་པ་འདི་ལ་ཡང་མཚུངས་པ་ཡིན་པ་དེའི་ཕྱིར་ཡིད་ཉིད་དུ་རིགས་པ་མ་ཡིན་ནོ། །གང་ལ་གང་གི་ཐ་སྙད་ཀྱི་རྒྱུ་མཚན་ཡོད་པ་དེ་ལ་ནི་དེའི་ཐ་སྙད་དུ་བྱ་བ་ཡིན་ཏེ། དཔེར་ན་དབྱིབས་ཀྱི་ཁྱད་པར་དང་ལྡན་པའི་རྫས་ཆུ་ལ་སོགས་པ་འཛིན་པའི་ནུས་པའི་བུམ་པ་ལ་བུམ་བའི་ཐ་སྙད་དུ་བྱེད་པ་བཞིན་ནོ། །ཟླ་བ་གཉིས་ལ་སོགས་པར་སྣང་བའི་ཤེས་པ་ལ་ཡང་དབང་པོ་ལས་སྐྱེས་པའི་ཐ་སྙད་དུ་བྱ་བའི་རྒྱུ་མཚན་དབང་པོ་ཡོད་པ་དང་མེད་པའི་
རྗེས་སུ་བྱེད་པ་ཡོད་པ་ཡིན་ནོ། །རྒྱུ་མཚན་མེད་པར་མི་འཐད་པའི་ཕྱིར་ཐ་སྙད་འཇུག་པར་བྱ་བ་ཉིད་ལ་ནི་རྒྱུ་མཚན་ཡོད་པ་དང་ལྡན་པས་ཁྱབ་པ་ཡིན་ནོ། །འཇུག་པར་བྱ་བ་མ་ཡིན་ན་ནི་རྒྱུ་མཚན་གཞན་ལ་ལྟོས་པར་འགྱུར་བས་དེ་ཙམ་གྱི་རྒྱུ་མཚན་ཅན་དུ་མཐོང་བར་མི་འགྱུར་ཏེ། དེའི་ཕྱིར་མི་མཐུན་པའི་ཕྱོགས་ལ་ཁྱབ་པར་བྱེད་པ་ལྟོས་པ་མེད་པ་ཉིད་མི་དམིགས་པས། དེ་ཙམ་གྱི་རྒྱུ་མཚན་ཉིད་དེ་ལས་ལྡོག་པ་ན་ཡོད་ན་འཇུག་པར་བྱ་བ་ཉིད་ཀྱིས་ཁྱབ་པའི་ཕྱིར་རང་བཞིན་གྱི་གཏན་ཚིགས་སོ། །གལ་ཏེ་གཞན་དབང་པོ་ལས་སྐྱེས་པར་མི་འདོད་ན་དབང་པོ་ཡོད་པ་དང་མེད་པའི་རྗེས་སུ་བྱེད་པར་འདོད་པར་ཇི་ལྟར་འགྱུར། དབང་པོའི་བྱེད་པ་ཡོད་པ་ན་མཐོང་བ་ཇི་ལྟར་ཞེ་ན། རེ་ཞིག་དབང་པོ་ལས་ནི་མ་འཁྲུལ་པ་ཟླ་བ་གཅིག་ཏུ་སྣང་བའི་ཤེས་པ་དངོས་སུ་འབྱུང་ལ། དེ་ལས་ཟླ་བ་གཉིས་སུ་སྣང་བའི་རྣམ་པར་རྟོག་པ་སྐྱེ་བ་ན་དབང་པོ་ཡོད་པ་དང་མེད་པའི་རྗེས་སུ་བྱེད་པར་ཞེན་པར་འགྱུར་རོ་ཞེ་ན། འོ་ན་ཟླ་བ་གཅིག་ཏུ་སྣང་བའི་ཤེས་པ་དེ་ཅིའི་ཕྱིར་ཉམས་སུ་མ་མྱོང༌། ཅི་སྟེ་ཉམས་སུ་མྱོང་ན་ནི་ཇི་ལྟར་མ་ངེས། མ་ངེས་པར་ཁས་ལེན་ན་ནི་དབང་པོའི་ཤེས་པ་ཐམས་ཅད་ལ་ཉམས་སུ་མྱོང་བའི་ཤེས་པ་འགའ་ཞིག་ཀྱང་ཡོད་པར་ཁས་བླང་བར་བྱ་བ་ཡིན་པ་དེའི་ཕྱིར་ཉམས་སུ་མྱོང་བའི་ཐ་སྙད་ངེས་པར་འཇིག་པར་འགྱུར་བའམ། ཟླ་བ་གཉིས་སུ་སྣང་བའི་ཤེས་པ་དབང་པོའི་བྱེད་པའི་དེ་མ་ཐག་པ་ཉིད་ཡིན་པར་ཉམས་སུ་མྱོང་བས་གྲུབ་པ་གནོད་པར་བྱེད་པ་མེད་པས་བར་དུ་ཆོད་པ་ཡིན་ནོ་ཞེས་བརྗོད་པར་ཇི་ལྟར་ནུས། གང་གི་ཕྱིར་གནོད་པར་བྱེད་པ་མེད་པར་ནི་མི་སླུ་བ་དང་བཅས་པར་ཉམས་སུ་མྱོང་བས་ངེས་པ་ཚད་མ་མ་ཡིན་ནོ་ཞེས་བྱ་བར་བརྗོད་པ་འཐད་པ་མ་ཡིན་ཏེ། གནོད་པར་བྱེད་པ་མེད་པའི་ཕྱིར་འཁྲུལ་པར་མི་འགྲུབ་བོ་ཞེས་གང་འཆད་པར་འགྱུར་རོ། །རྣམ་འགྲེལ་ལས་ཀྱང་གནོད་པར་བྱེད་པའི་རིགས་པ་དམ་པ་མེད་པར་ནི་ཤེས་པ་དུས་ཅིག་ཅར་བར་ཉམས་སུ་མྱོང་བས་གྲུབ་པ་སྤང་བར་ནུས་པ་མ་ཡིན་ནོ་ཞེས་བཤད་དོ། །འདི་སྙམ་དུ་ཟླ་བ་གཅིག་ཏུ་སྣང་བའི་ཤེས་པ་ཉིད་ལ་དེའི་དེ་མ་ཐག་ཏུ་བྱུང་བའི་རྣམ་པར་རྟོག་པའི་ཤེས་པས་གཉིས་སུ་སྒྲོ་བཏགས་པ་ཡིན་ཏེ། དེའི་ཕྱིར་ཟླ་བ་གཅིག་ཉིད་གསལ་བར་ཉམས་སུ་མྱོང་
བ་ན་གྲངས་གཞན་དུ་སྒྲོ་བཏགས་པའི་ཕྱིར་ཟླ་བ་གཉིས་སུ་སྣང་བར་ཞེན་པ་ཡིན་ནོ་ཞེ་ན། དེ་ནི་དེ་ལྟར་ཤིན་ཏུ་མ་འབྲེལ་ཏེ། བུམ་པ་གཅིག་མཐོང་བ་ལ་སྐྱེས་བུས་བཅུར་ཡོངས་སུ་བཏགས་པ་ན་ཡུལ་ཐ་དད་པར་བུམ་པ་བཅུའི་རང་བཞིན་དུ་སྣང་བ་ནི་མེད་ཀྱི། འོན་ཀྱང་གཅིག་ཉིད་གསལ་བའི་རང་བཞིན་དུ་སྣང་བ་ན་བཅུར་ཞེན་པ་ཉིད་དོ། །འདིར་ནི་ཡུལ་གཅིག་པ་སྤངས་ནས་ཡུལ་གཞན་དུ་ཁ་དོག་དང་དབྱིབས་མཚུངས་པའི་ཟླ་བའི་དཀྱིལ་འཁོར་གཞན་ཉིད་དུ་གཟུང་བར་སྣང་བ་ཡིན་པ་དེའི་ཕྱིར་འདི་ནི་གཅིག་སྣང་བ་ན་གྲངས་བཏགས་པ་མ་ཡིན་གྱི། འོན་ཀྱང་རྣམ་པར་ཤེས་པ་འདི་ནི་ཟླ་བ་གཉིས་སུ་སྣང་བ་ཉིད་ཡིན་ནོ། །དེ་ཡང་དབང་པོ་ལས་སྐྱེས་པ་མ་ཡིན་ལ། དབང་པོ་ལས་སྐྱེས་པ་གང་ཡིན་པ་དེ་ནི་ཉམས་སུ་མ་མྱོང་བའི་ཕྱིར་ཐལ་བ་སྔ་མ་ཉིད་དུ་འགྱུར་རོ། །གཞན་ཡང་ཉམས་སུ་མྱོང་བའི་ཐ་སྙད་ཐམས་ཅད་ལ་ཡིད་བརྟན་དུ་མེད་པར་མ་གྱུར་ཅིག་ཅེས་གཞན་ལ་གཞན་དུ་ཉམས་སུ་མྱོང་བ་ལ་ནི་རྣམ་པར་རྟོག་པ་གཞན་དུ་སྐྱེ་བ་མ་ཡིན་ནོ། །འདིར་དབང་པོ་འཁྲུལ་པའི་ཕྱིར་རྣམ་པར་རྟོག་པ་གཞན་དུ་འགྱུར་བ་ཡིན་ནོ་ཞེ་ན། དབང་པོའི་རྣམ་པར་འགྱུར་བ་དངོས་སུ་སྐྱེད་པར་བྱེད་པའི་ཤེས་པ་གང་ཡིན་པ་དེའི་རྣམ་པར་འགྱུར་བའི་རྒྱུ་མ་ཡིན་ན། བར་དུ་ཆོད་པ་ཡིན་པར་ཇི་ལྟར་འགྱུར། རྣམ་པར་འགྱུར་བའི་ཤེས་པ་སྐྱེད་པར་ནུས་ན་ནི་དེའི་དངོས་སུ་སྐྱེད་པར་བྱེད་ལ། མི་ནུས་ན་ཡང་བར་དུ་ཆོད་ནས་ཀྱང་སྐྱེད་པར་མི་བྱེད་དོ། །བར་དུ་ཆོད་པ་འགགས་པ་ནི་འགའ་ཞིག་གི་རྒྱུ་མ་ཡིན་ནོ། །དབང་པོའི་རྣམ་པར་ཤེས་པ་རྣམ་པར་རྟོག་པའི་དངོས་སུ་སྐྱེད་པའི་རྒྱུ་ཡིན་ན་ཡང་ཉམས་སུ་མྱོང་བའི་དངོས་པོ་ལ་རྣམ་པར་རྟོག་པ་སྐྱེད་པར་བྱེད་པའམ། གསལ་བ་མེད་པའི་ཕྱིར་ཉམས་སུ་མྱོང་བ་དང་འདྲ་བ་ལ་ཡིན་ཏེ། དཔེར་ན་སྨིག་རྒྱུའི་རང་གི་མཚན་ཉིད་གཟུང་བ་ལས་དེ་དང་འདྲ་བའི་ཆུའི་རྣམ་པར་རྟོག་པ་བཞིན་ནོ། །རང་གི་མཚན་ཉིད་འཛིན་པ་འདིས་ནི་ཇི་ལྟར་ཉམས་སུ་མྱོང་བའམ། ཉམས་སུ་མྱོང་བ་དང་འདྲ་བའི་ངེས་པ་སྐྱེད་པ་མེད་དེ། ཟླ་བ་གཅིག་བ་ཉམས་སུ་མྱོང་བའི་ཕྱིར་དང༌། མི་འདྲ་བའི་ཕྱིར་རོ། །དེའི་ཕྱིར་དབང་པོའི་རྣམ་པར་ཤེས་པའི་རྣམ་པར་རྟོག་པ་སྐྱེད་པའི་རྣམ་པ་འདི་ཅི་ཞིག་ཡིན། གཞན་ཡང་སྔར་བཤད་པའི་ཚུལ་གྱིས་རྣམ་པར་རྟོག་པའི་རྣམ་
པར་ཤེས་པ་ནི་གསལ་བར་སྣང་བ་མ་ཡིན་ལ། ཟླ་བ་གཉིས་ཀྱི་ཤེས་པ་གང་ཡིན་པ་དེ་ནི་རྟག་ཏུ་གསལ་བར་སྣང་བས་དེ་ཇི་ལྟར་ན་རྣམ་པར་རྟོག་པ་ཅན་དུ་འགྱུར། འོ་ན་སྨིག་རྒྱུ་ལ་ཆུའི་རྣམ་པར་རྟོག་པ་གསལ་བར་སྣང་བར་ཇི་ལྟར་འགྱུར་ཞེ་ན། གསལ་བར་སྣང་བ་ནི་མ་ཡིན་གྱི་སྨིག་རྒྱུའི་རང་གི་མཚན་ཉིད་འཛིན་པར་བྱེད་པ་གསལ་བར་སྣང་བའི་ཤེས་པ་དང་དངོས་པོ་འདྲ་བའི་ཡུལ་ཅན་གྱི་རྣམ་པར་རྟོག་པའི་ཤེས་པ་ཅིག་ཅར་འཇུག་པ་ན་སྣང་བ་དང་རྣམ་པར་བརྟགས་པའི་དོན་དག་གཅིག་ཏུ་བྱས་ནས་གསལ་བར་སྣང་བར་འཁྲུལ་པ་ཡིན་ནོ། །འདིས་ནི་ནོར་བུའི་འོད་ལ་ནོར་བུར་རྣམ་པར་རྟོག་པ་ཡང་བཤད་པ་ཡིན་ནོ། །དེ་ལྟར་འདིར་ནི་ཁྱེད་ལ་དབང་པོ་ལས་སྐྱེས་པ་ཟླ་བ་གཉིས་ཀྱི་ཤེས་པ་གསལ་བར་སྣང་བ་ཡོད་པ་མ་ཡིན་པས་ན་གང་གིས་ན་ལྷན་ཅིག་ཏུ་འཇུག་པའི་རྣམ་པར་རྟོག་པའི་ཤེས་པ་ལ་དོན་ཐ་དད་པ་མེད་པར་སྒྲོ་འདོགས་པ་གསལ་བ་ཉིད་དུ་འཁྲུལ་པར་འགྱུར། དེའི་ཕྱིར་དབང་པོའི་བྱེད་པའི་དེ་མ་ཐག་པ་ཉིད་དུ་བྱུང་བར་ཉམས་སུ་མྱོང་བ་གསལ་བར་སྣང་བའི་ཟླ་བ་གཉིས་ལ་སོགས་པའི་ཤེས་པ་ནི་དབང་པོ་ལས་སྐྱེས་པ་ཉིད་དོ་ཞེས་བྱ་བ་གནས་སོ། །གཞན་ཡང་ཟླ་བ་གཉིས་པ་ལ་སོགས་པའི་ཤེས་པ་ནི་དབང་པོར་འགྱུར་ན་འགྱུར་བར་མཐོང་སྟེ། དེས་ན་འགྱུར་བའི་ཕྱིར་དེ་དབང་པོ་ལས་སྐྱེས་པ་མ་ཡིན་པར་མི་འཐད་དོ། །གལ་ཏེ་དབང་པོར་འགྱུར་བའི་རྗེས་སུ་བྱེད་པ་ཡིན་ཡང་དབང་པོ་ལས་སྐྱེས་པ་མ་ཡིན་ནོ་ཞེས་བྱ་བ་ལ་མི་འཐད་པ་ཅི་ཡོད་ཅེ་ན། འགྱུར་བའི་རྗེས་སུ་བྱེད་པ་གང་གི་རྒྱུ་མཚན་ཡིན་པ་སྟེ། གང་གི་ཞེ་ན། རྟེན་ཏེ་བརྟེན་པར་འཇོག་པ་སྟེ། རྣམ་པར་འཇོག་ཅིང་ཐ་སྙད་དུ་བྱེད་པ་གང་ཡིན་པ་དེའི་རྟེན་དེའི་རྒྱུ་མཚན་ནི་དེ་ཡིན་ནོ། །གང་གི་ཕྱིར་དབང་པོ་ལས་སྐྱེས་པའི་ཤེས་པ་གཞན་ལ་ཡང་བརྟེན་པ་ཉིད་ཀྱི་ཐ་སྙད་ཀྱི་རྒྱུ་ནི་དེ་ཉིད་ཡིན་པ་དེའི་ཕྱིར་འདིར་ཡང་རྒྱུ་ཡོད་པ་ན་ཐ་སྙད་འཇུག་པར་བྱ་བ་ཡིན་ནོ། །དེའི་སྦྱོར་བའི་ཚུལ་ནི་སྔར་བརྗོད་ཟིན་ཏོ། །སྦྲུལ་ལ་སོགས་པའི་འཁྲུལ་པ་དེ་བཞིན་དུ་དབང་པོའི་རྣམ་པར་འགྱུར་བ་དབང་པོའི་འགྱུར་པ་ཡོད་ཀྱང་ལྡོག་པར་ཟླ་པར་འགྱུར་ཏེ། ཐལ་བར་འགྱུར་བ་དེའི་ཕྱིར་དང༌། དེ་བཞིན་དུ་དབང་པོའི་རྣམ་པར་འགྱུར་བ་ལོག་ཀྱང་སྟེ། མེད་ཀྱང་མི་ལྡོག་པར་ཐལ་ཏེ་ཐལ་བ་
འདིས་ཀྱང་ཡིད་ལས་སྐྱེས་པ་ཉིད་དུ་མི་རིགས་སོ། །གང་ཞིག་ཡིད་ལས་སྐྱེས་པ་དེ་ནི་དབང་པོར་འགྱུར་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ཏེ། དཔེར་ན་སྦྲུལ་དུ་འཁྲུལ་པ་བཞིན་ནོ། །ཟླ་བ་གཉིས་ལ་སོགས་པའི་ཤེས་པ་ཡང་ཡིད་ལས་སྐྱེས་པ་ཡིན་ནོ། །དེ་རྣམ་པར་འགྱུར་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་ལ་ནི་དབང་པོ་ལས་སྐྱེས་པའི་ཐ་སྙད་དུ་རུང་བས་ཁྱབ་པ་ཡིན་ཏེ། ཐ་སྙད་ཀྱི་རྒྱུ་མཚན་ནི་དེ་ཙམ་དུ་ཟད་པའི་ཕྱིར་རོ། །ཡིད་ལས་སྐྱེས་པ་ཉིད་ཀྱང་དེ་དང་འགལ་བ་ཡིན་པའི་ཕྱིར་ཁྱབ་པར་བྱེད་པ་འགལ་བ་དམིགས་པ་ཐལ་བའི་གཏན་ཚིགས་སོ། །ཐལ་བ་བཟློག་པ་ནི་གང་ཞིག་དབང་པོའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེ་ནི་ཡིད་ལས་སྐྱེས་པ་མ་ཡིན་ཏེ། དཔེར་ན་སྔོན་པོ་ལ་སོགས་པར་སྣང་བ་བཞིན་ནོ། །ཟླ་བ་གཉིས་པ་ལ་སོགས་པའི་ཤེས་པ་ཡང་དེ་བཞིན་ཏེ། སྦྱོར་བ་འདི་ནི་འགལ་བས་ཁྱབ་པ་ཡིན་ནོ། །སྦྱོར་བ་གཉི་གའི་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ནི་དབང་པོ་ལས་བྱུང་བའི་ཐ་སྙད་སྒྲུབ་པར་གཏན་ལ་ཕབ་མ་ཐག་པ་ཡིན་ནོ། །ཡན་ལག་ཅན་གཅིག་ཉིད་དེ་དང༌། ནམ་མཁའ་དམའ་བ་ལ་སོགས་པའི་རྣམ་པར་རྟོག་པ་རྣམ་པར་དཔྱད་པས་ཀྱང་མི་ལྡོག་པ་མ་ཡིན་ནམ་ཞེ་ན། བདེན་མོད་ཀྱི་འོན་ཀྱང་ཡིད་ཀྱི་ཤེས་པ་འཁྲུལ་པ་ནི་རྣམ་པར་དཔྱད་པས་ལྡོག་པར་འུ་རོ་ཞེས་བྱ་བའི་སློབ་དཔོན་གྱིས་བཞེད་པའི་དོན་འདི་ཡོངས་སུ་བཟུང་ནས་སྐྱོན་འདི་སྤང་ངོ༌། །འདི་ལ་ཡིད་ཀྱི་འཁྲུལ་པ་འགའ་ཞིག་ནི་མཐོང་བའི་རྣམ་པའི་རྗེས་སུ་འབྲང་བ་ཡིན་ཏེ། དཔེར་ན་གྲུ་བཞི་ལ་སོགས་པའི་དབྱིབས་ཀྱི་འཁྲུལ་པ་བཞིན་ནོ། །ཁ་ཅིག་ནི་མཐོང་བ་ལ་མི་ལྟོས་པ་ཡིན་ཏེ། དཔེར་ན་སྦྲུལ་ལ་སོགས་པར་འཁྲུལ་བ་བཞིན་ནོ། །སྦྲུལ་དུ་འཁྲུལ་པ་ནི་ཐག་པ་མཐོང་བའི་རྗེས་སུ་འབྲང་བ་མ་ཡིན་གྱི། འོན་ཀྱང་མཐོང་བའི་རྒྱུ་རྣམས་མི་གསལ་བ་ན་དེ་འབྱུང་བ་ཡིན་ནོ། །དེ་ལས་གང་ཞིག་རྟག་ཏུ་མཐོང་བའི་རྗེས་སུ་འགྲོ་བ་དེ་ནི་རྣམ་པར་དཔྱད་པས་མི་ལྡོག་ལ། ནམ་མཁའ་དམའ་བ་དང་ཡན་ལག་ཅན་གྱི་རྫས་ལ་སོགས་པའི་རྣམ་པར་རྟོག་པ་ཡང་དེ་ལྟ་བུའི་རང་བཞིན་ཅན་ཡིན་ནོ། །གང་ཡང་བལྟ་བར་བྱ་བའི་དངོས་པོ་སྣང་བ་ནི་མི་གསལ་བ་འགའ་ཞིག་ལས་མ་ངེས་པ་ན་འདྲ་བའི་དངོས་པོར་སྒྲོ་འདོགས་པ་འཇུག་པ་དེ་ནི་མཐོང་
བའི་དངོས་པོ་ལ་ཇི་ཞིག་ལྟར་དཔྱད་པ་ལས་ངེས་པ་ན་ལྡོག་པ་ཡིན་ནོ། །ཟླ་བ་གཉིས་ལ་སོགས་པའི་ཤེས་པ་ཡང་ཟླ་བ་གཉིས་མཐོང་བའི་རྗེས་སུ་རྟག་ཏུ་འབྲང་བ་ནི་མ་ཡིན་གྱི། འོན་ཀྱང་རྣམ་པ་གཞན་དུ་མཐོང་བའི་ཟླ་བ་ལ་རྒྱུ་མཚན་འགའ་ཞིག་ལས་གཞན་དུ་འཇུག་པ་ཡིན་ལ། དེ་ལ་རྣམ་པར་དཔྱད་པ་ལས་ཟླ་བ་གཅིག་ཏུ་ངེས་པར་གཏན་ལ་ཕེབས་པ་ན་ངེས་པར་ལྡོག་པ་ཡིན་ན། མ་ལོག་པ་དེའི་ཕྱིར་འདི་ནི་ཡིད་ལས་བྱུང་བ་མ་ཡིན་ནོ། །གང་ཞིག་ཟླ་བ་གཉིས་པ་ལ་སོགས་པ་དབང་པོ་ལས་སྐྱེས་པ་མ་ཡིན་ཡང་རྣམ་པར་མི་རྟོག་ཅིང་གསལ་བར་སྣང་བའི་རྨི་ལམ་གྱི་ཤེས་པ་བཟློག་པའི་དོན་དུ་མ་འཁྲུལ་པ་སྨོས་པར་བྱ་བ་ཉིད་དོ་ཞེས་ཟེར་བ་དེ་ནི་མི་རིགས་ཏེ། རྨི་ལམ་གྱི་ཤེས་པ་ལ་ནི་ཡང་དག་པའི་ཤེས་པ་ཉིད་མེད་པ་དེའི་ཕྱིར་དེའི་དབང་དུ་བྱས་པ་ཉིད་ཀྱིས་དེ་བསལ་བའི་ཕྱིར་རོ། །གང་ཞིག་ཡང་དག་པའི་ཤེས་པར་འདོད་པ་དང་རྟོག་པ་མེད་པ་དེ་ལ་ནི་མ་འཁྲུལ་པ་སྨོས་པ་མེད་ན་མངོན་སུམ་ཉིད་དུ་དོགས་པ་ཡོད་པའི་ཕྱིར་མ་འཁྲུལ་པ་ནི་དེའི་དོན་དུ་སྨོས་པར་བྱ་བ་ཡིན་ཏེ། དཔེར་ན་དུང་ལ་སེར་པོར་ཤེས་པ་བཟློག་པའི་དོན་ཡིན་པ་ལྟ་བུའོ། །འོ་ན་ཇི་ལྟར་འོ་ན་ནི་རྨི་ལམ་གྱི་ཤེས་པ་ཞེས་བརྗོད་ཅེ་ན། སྨྲས་པ། རྩོད་པ་པོས་རྨི་ལམ་གྱི་ཤེས་པ་རྟོག་པ་མེད་པ་ལོག་པའི་ཤེས་པ་དང༌། ཟླ་བ་གཉིས་ལ་སོགས་པའི་ཤེས་པ་རྣམས་ཡང་དག་པའི་ཤེས་པ་ཉིད་མཐོང་ཞིང་གཉི་ག་ཡང་བཟློག་པའི་དོན་དུ་མ་འཁྲུལ་པ་སྨོས་པར་མི་རིགས་པས་ན་དེ་ཅིའི་དོན་དུ་བྱས་སྙམ་དུ་སེམས་པ་ན། གང་ཞིག་མ་འཁྲུལ་པས་བཟློག་པ་དེ་ཉིད་འདྲི་བ་ཡིན་ལ་སློབ་དཔོན་གྱིས་ནི་ཡང་དག་པའི་ཤེས་པར་འདོད་པའི་དབང་པོ་ལས་སྐྱེས་པ་འགའ་ཞིག་ལོག་པའི་ཤེས་པ་ཉིད་དང༌། དེ་བཟློག་པའི་དོན་དུ་མ་འཁྲུལ་པ་སྨོས་པ་ཡང་གདོན་མི་ཟ་བར་བྱ་དགོས་པར་གཟིགས་ནས་མ་འཁྲུལ་ཞེས་བསྟན་པའི་ཕྱིར་རོ་ཞེས་གསུངས་སོ། །དེའི་ཕྱིར་དེ་ལྟར་དབང་པོ་ལས་སྐྱེས་པར་འཐད་པས་བསྒྲུབས་པ་མཇུག་སྡུད་དེ། དེའི་ཕྱིར་འཁྲུལ་པ་ཉིད་ཀྱིས་མ་འཁྲུལ་པ་སྨོས་པས་བསལ་བའི་འཁྲུལ་པ་འདི་ལ་ནི་དབང་པོ་ལས་སྐྱེས་ཀྱང་མངོན་སུམ་ལྟར་སྣང་བ་ཡིན་ནོ། །གང་གི་ཕྱིར་འཁྲུལ་པ་ནི་དབང་པོ་ལས་སྐྱེས་ཀྱང་མངོན་སུམ་ལྟར་སྣང་བ་ཡིན་པ་དེ་ཉིད་ཀྱི་ཕྱིར་ཏེ། རྒྱུ་དེས་ན། དྲན་དང་འདོད་པར་བྱེད་པའོ། །
ཞེས་བྱ་བ་ཡོངས་སུ་རྫོགས་པའི་ཚིག་འདིས། འཁྲུལ་དང་ཀུན་རྫོབ་ཤེས་པ་དང༌། །ཞེས་བྱ་བ་ལ་སོགས་པ་རྣམ་པར་རྟོག་པ་རྣམས་ཀྱི་སྡེ་ཚན་ཏེ། ཚོམས་ལས་ལོགས་ཤིག་ཏུ་སྟེ། ཐ་དད་པར་རྣམ་པར་གཅད་དེ་སོ་སོར་བྱས་ནས་སོ། །རབ་རིབ་ཀྱི་རྒྱུ་མཚན་གྱིས་མཚོན་པ་རྒྱུ་མཚན་གཞན་ལས་སྐྱེས་པའི་མངོན་སུམ་ལྟར་སྣང་བ་ཡང་ཡོད་པ་དེའི་ཕྱིར་རབ་རིབ་སྨོས་པ་ནི་ཉེ་བར་མཚོན་པ་ཡིན་ཏེ། རབ་རིབ་བཅས་ཞེས་བྱ་བའི་ཚིག་འདིས་ནི་རབ་རིབ་ཀྱིས་མཚོན་པ་མངོན་སུམ་ལྟར་སྣང་བར་སློབ་དཔོན་ཕྱོགས་ཀྱི་བླང་པོས་གསུངས་སོ། །གཞན་དུ་ན་རབ་རིབ་ལས་བྱུང་བ་ཡང་རྣམ་པར་རྟོག་པ་ཡིན་ན་ནི་འཁྲུལ་པ་སྨོས་པ་ཁོ་ནས་བསྡུས་པའི་ཕྱིར་ལོགས་ཤིག་ཏུ་བྱས་པ་དོན་མེད་པར་འགྱུར་རོ། །ཇི་ལྟར་ཇི་ལྟར་ཡང་རུང་བར་ལོགས་ཤིག་ཏུ་བྱེད་ན་ནི་སྨྲ་བ་བོ་མི་མཁས་པར་འགྱུར་ལ། དབྱེ་བ་བརྗོད་པར་ཁས་ལེན་ན་ཡང་ཐུག་པ་མེད་པར་ཐལ་ལོ། །དེའི་ཕྱིར་རབ་རིབ་ནི་རྣམ་པར་རྟོག་པ་མེད་པའི་མངོན་སུམ་ལྟར་སྣང་བ་གཞན་རྣམས་ཀྱིས་ཉེ་བར་མཚོན་བྱེད་ཡིན་ནོ། །མངོན་སུམ་ནི་རྟོག་པ་དང་བྲལ་བའོ་ཞེས་བྱ་བའི་མཚན་ཉིད་འདི་ལ། འདི་ནི་དམིགས་ཀྱིས་བསལ་བ་ཡིན་ཏེ། འདིར་དམིགས་ཀྱིས་བསལ་བ་ཞེས་བྱ་བས་སོ། །རབ་རིབ་ལ་སོགས་པ་ལས་བྱུང་བ་ལ་སོགས་པ་མ་གཏོགས་པའི་རྣམ་པར་རྟོག་པ་མེད་པ་ནི་མངོན་སུམ་མོ་ཞེས་རབ་རིབ་ལས་སྐྱེས་པ་ལ་སོགས་པ་དམིགས་ཀྱིས་བསལ་བར་བསྟན་པའི་དོན་དུ་སྟེ། དེས་ན་རབ་རིབ་ལས་སྐྱེས་པ་ལྟར་འཁྲུལ་པར་མ་གྱུར་པའི་རྟོག་པ་མེད་པ་གང་ཡིན་པ་དེ་ནི་མངོན་སུམ་མོ་ཞེས་ཡུལ་འདིས་སྤང་བའི་དོན་དུ་མཚན་ཉིད་ཀྱི་ལྷག་མ་དཔག་པར་བྱའོ། །དེའི་ཕྱིར་ཇི་ལྟ་ཇི་ལྟར་ཡང་རུང་བས་རྣམ་པར་རྟོག་པའི་སྡེ་ཚན་ལས་རབ་རིབ་ལས་བྱུང་བ་ལ་སོགས་པ་ལོགས་སུ་བྱས་པ་ནི་མ་ཡིན་ནོ། །ཚད་མ་ཀུན་ལས་བཏུས་པར་མངོན་སུམ་གྱི་མཚན་ཉིད་བསྒྲུབ་པ་ལས་གཞན་རྩོད་པ་བསྒྲུབ་པར་ཡང་མིག་ལ་སོགས་པའི་རྡུལ་ཕྲ་རབ་དེ་དག་རྣམས་ཟླ་བ་གཉིས་དང༌། སྔོན་པོ་ལ་སོགས་པ་དེ་དག་གང་ལ་སྣང་བའི་ཤེས་པ་དེའི་རྒྱུ་ཡིན་པར་གསུངས་སོ། །དེ་ལས་ནི་གལ་ཏེ་ཇི་ལྟར་ཡོད་པ་རྣམ་པ་གཞན་དུ་སྣང་བའི་ཤེས་པའི་ཡང་རྒྱུ་ཡིན་པ་དེ་ལྟར་དེ་དག་ཡུལ་ཡིན་ན་དེ་ལྟ་ན་ནི་འོ་ན་མིག་ལ་སོགས་པའི་རྡུལ་ཕྲ་རབ་རྣམས་ཀྱང་ཟླ་བ་གཉིས་སུ་སྣང་བ་
དང། སྔོན་པོ་ལ་སོགས་པར་སྣང་བའི་ཡུལ་ཉིད་དུ་ཐལ་པར་འགྱུར་ཏེ། རྒྱུ་ཡིན་པའི་ཕྱིར་རོ་ཞེས་གསུངས་སོ། །མངོན་སུམ་གྱི་ཡུལ་བརྟག་པ་ནི་མིག་ལ་སོགས་པའི་རྡུལ་ཕྲ་རབ་རྣམས་དེ་ཉིད་ལ་ཡུལ་གྱི་དངོས་པོར་ཧ་ཅང་ཐལ་བར་འཐད་པ་ཡིན་གྱི། ཡིད་ཀྱི་ཤེས་པའི་ཡུལ་གྱི་དངོས་པོར་ནི་མ་ཡིན་པའི་ཕྱིར་ན་ཡིད་ཀྱི་ཤེས་པ་ལ་ལྟོས་ནས་དེ་སྐད་བརྗོད་དོ་ཞེས་ནི་ནུས་པ་མ་ཡིན་ནོ། །དེས་ན་དེ་ལྟར་མངོན་སུམ་གྱི་དབྱེ་བ་དང་མཚན་ཉིད་དང༌། སྤྱོད་ཡུལ་ལ་ལོག་པར་རྟོགས་པ་བསལ་ནས། འབྲས་བུ་ཚད་མ་ལས་ཐ་དད་དོ་ཞེས་འབྲས་བུ་ལས་ལོག་པར་རྟོགས་པ་བསལ་བར་བཞེད་ནས་གང་ཡིན་ཞེས་འདྲི་བར་རྩོམ་མོ། །འདིའི་ནི་བཤད་མ་ཐག་པའོ། །ཐོབ་པར་བྱེད་པ་ནི་ཚད་མ་ཡིན་ལ། གདོན་མི་ཟ་བར་བྱ་དགོས་པའི་དོན་ཐོབ་པར་བྱེད་པ་ནི་དེའི་འབྲས་བུ་ཡིན་ནོ། །དེ་ཡང་རང་བཞིན་གང་ཡིན་ཞེ་ན། གཞལ་བྱ་ཞེས་བྱ་བ་ལ་སོགས་པ་སྨོས་སོ། །དོན་རྟོགས་ན་འཇུག་ལ་དེས་ལས་ཀྱང་ཐོབ་པ་དེའི་ཕྱིར་དོན་རྟོགས་པའི་བྱ་བ་ནི་དོན་ཐོབ་པའི་བྱ་བ་ཡིན་པས་གདོན་མི་ཟ་བར་བྱ་དགོས་པའི་ཚད་མའི་འབྲས་བུ་ནི་དེ་ཉིད་ཡིན་གྱི་གཞན་ནི་མ་ཡིན་ནོ། །གཞན་གྱིས་སྨྲས་བ་ནི་བྱེད་པ་པོའི་ངོ་བོར་གྱུར་པའི་དངོས་པོ་ལ་ནི་ཚད་མང་བརྗོད་པ་ཡིན་ལ། བྱེད་པ་ཡང་བྱ་བའི་སྒྲུབ་པར་བྱེད་པ་དམ་པ་ཡིན་ཏེ། དེའི་ཕྱིར་གང་ལ་ལྟོས་ནས་དེ་དེའི་བྱེད་པར་འགྱུར་བ་འབྲས་བུར་གྱུར་པའི་བྱ་བ་འགའ་ཞིག་གདོན་མི་ཟ་བར་ཡོད་དགོས་སོ་ཞེས་བྱ་བ་ཡིན་ལ། ཅིག་ཤོས་ཀྱིས་ཀྱང་འཇལ་བའི་བྱ་བ་བྱེད་པ་ཚད་མ་ཡིན་པ་དེའི་ཕྱིར། དེ་ཉིད་འབྲས་བུ་ཡིན་ལ་ཚད་མའི་འབྲས་བུ་དེ་ཡང་ལས་ངེས་པར་གཅོད་པ་ཡིན་ནོ་ཞེས་བསྟན་པའི་ཕྱིར་གཞལ་བྱ་རྟོགས་པའོ་ཞེས་གསུངས་པ་ཡིན་ནོ། །གང་གི་ཕྱིར་གཞལ་བྱ་རྟོགས་པ་དེ་ནི་ཤེས་པ་ཡིན་ལ་དེ་ཡང་འབྲས་བུ་ཡིན་པ་དེས་ན་ཤེས་པ་ཉིད་འབྲས་བུར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ད་ནི་སྟེ། ད་ལྟར་ཤེས་པ་འབྲས་བུའི་དངོས་པོར་ཁས་བླངས་ན། ཇི་ལྟར་མངོན་པར་འདོད་པའི་ཚད་མ་ལུས་པ་གང་ཞིག་ཡིན་ཏེ། ཅུང་ཟད་ཀྱང་མ་ཡིན་ནོ། །གང་གི་ཕྱིར་བྱེད་ནི་ཤེས་པ་ཚད་མར་འདོད་པ་ཡིན་ན། ད་ལྟ་ན་ནི་ཤེས་པ་ཡང་ཚད་མའི་འབྲས་བུར་བརྗོད་པས། འབྲས་བུ་ལས་ཐ་དད་པས་ཚད་མ་ཤེས་པ་མ་ཡིན་པའི་
བདག་ཉིད་དུ་ངེས་པར་འགྱུར་དགོས་པ་དེས་ན་འབྲས་བུ་ཐ་དད་པར་སྨྲ་བ་ལ་མི་འདོད་པ་ཐོག་ཏུ་བབ་པོ་ཞེ་ན། སློབ་དཔོན་གྱིས་ཤེས་པ་གཅིག་ལ་རྣམ་པར་གཞག་པར་བྱ་བ་དང༌། རྣམ་པར་འཇོག་པར་བྱེད་པའི་དངོས་པོས་ཚད་མ་དང་འབྲས་བུའི་དངོས་པོ་མི་འགལ་བར་དགོངས་ནས་བཤད་པ། གང་ལས་ཏེ་བྱེད་པ་པོ་གང་གཞལ་བྱ་རྟོགས་པ་འདིའི་དེ་ཉིད་དེ། གཞལ་བྱ་རྟོགས་པ་ཉིད་རྣམ་པར་གཞག་པ་གྲུབ་པའོ། །རང་གི་བྱེད་བྲག་གིས་བྱ་བའི་བྱེ་བྲག་ཏུ་བྱེད་པ་པོ་ནི་བྱེད་པ་ཡིན་ཏེ། བྱེད་པ་པོ་ཐམས་ཅད་བྱེ་བྲག་ཏུ་བྱེད་པ་པོ་ཉིད་ཡིན་ཡང༌། གང་ཞིག་བྱེད་པ་པོ་གཞན་ལ་ལྟོས་པ་མེད་པར་བྱ་བ་བྱེ་བྲག་ཏུ་བྱེད་པ་པོ་དེ་ནི་བྱེད་པ་ཡིན་ནོ། །དེ་བཞིན་དུ་འདིར་ཡང་རང་གི་བྱེ་བྲག་གིས་རྣམ་པར་གཞག་པར་བྱ་བ་དོན་རྟོགས་པ་བྱེ་བྲག་ཏུ་སྒྲུབ་པའི་བྱེད་པ་ནི་གང་ཞིག་རྣམ་པར་འཇོག་པའི་རྒྱུ་མཚན་ལྟོས་པར་བྱ་བའི་བྱེད་པ་པོ་གཞན་གྱིས་མཆོད་པ་ཉིད་ཡིན་ནོ། །འདི་ལྟར་གང་ལ་ལྟོས་ཀྱང་དོན་རྟོགས་པ་རྣམ་པར་མི་གནས་ན་ནི་རྣམ་པར་འཇོག་པའི་རྒྱུ་མཚན་དེ་ལས་གཞན་ལ་ལྟོས་པར་བྱ་བ་ཡིན་ཏེ། དེས་ན་སྔ་མ་དེ་བར་དུ་ཆོད་པ་ན་རང་གི་བྱེ་བྲག་གིས་བྱ་བའི་བྱེ་བྲག་ཏུ་བྱེད་པ་པོར་མི་འགྱུར་གྱི། འོན་ཀྱང་ལྟོས་པར་བྱ་བ་གཞན་གང་ཡིན་པ་དེ་ཉིད་པར་དུ་མ་ཆོད་པར་རང་གི་བྱེ་བྲག་གིས་བྱེ་བྲག་ཏུ་བྱེད་པ་པོར་འགྱུར་རོ། །དེ་སྟོན་པ་ནི་བར་ཆད་མེད་པར་ཞེས་བྱ་བ་ཡིན་ནོ། །གང་ལས་འདི་ལ་བར་ཆད་པར་དུ་གཅོད་པ་པོ་ལྟོས་པར་བྱ་བ་གཞན་མེད་པ་སྟེ། གཞན་གྱིས་པར་དུ་མཆོད་པར་གྱུར་པ་ན་འདིའི་དེ་ཉིད་འགྲུབ་པར་བྱེད་པ་གང་ཡིན་པ་དེ་ནི་བྱེད་པ་ཡིན་ནོ། །དེ་ལ་སྟེ་ཚུལ་དེ་ལྟར་གནས་པ་ནའོ། །ལྟོས་པར་བྱ་བ་གཞན་གྱིས་བར་དུ་མ་ཆོད་པར་རང་གི་བྱེ་བྲག་གིས་བྱེ་བྲག་ཏུ་བྱེད་པ་པོ་བྱེད་པ་ཡིན་པ་དང༌། དོན་གྱི་ཁྱད་པར་རྟོགས་པ་ནི་ཚད་མའི་འབྲས་བུ་ཡིན་ནོ་ཞེས་ཚུལ་དེ་ལྟ་ཡིན་པ་ནའོ། །དོན་དང་འབྲེལ་པར་བྱས་པ་རྟོགས་པ་འདིའི་དོན་དང་འབྲེལ་པར་བྱེད་པ་ནི་དོན་ལྟ་བུའི་རང་བཞིན་གང་ཡིན་པ་དེའི་དངོས་པོ་དོན་གྱི་རང་བཞིན་ཉིད་མིན་པ་གཞན་ནི་འགའ་ཡང་མེད་དོ། །འབྲེལ་པར་བྱེད་པ་ཡང་སྒྲུབ་བྱེད་ཡིན་ལ། འབྲེལ་པར་བྱས་པ་རྟོགས་པ་ཡང་འབྲས་བུ་སྟེ། དེའི་ཕྱིར་གཞལ་བྱ་རྟོགས་པ་གཞལ་བྱ་དང་འབྲེལ་པར་བྱས་པ་རྣམ་པར་གཞག་
པར་བྱ་བའི་ཚད་མ་སྟེ། རྣམ་པར་འཇོག་པར་བྱེད་པ་ཉིད་ཀྱིས་སྒྲུབ་བྱེད་དམ་པར་གྱུར་པ་ནི་གཞལ་བྱའི་རང་བཞིན་ཉིད་དེ། དོན་དང་འདྲ་བ་ཉིད་ཡིན་ནོ། །སྐྱེད་པར་བྱེད་པའི་རྒྱུ་དེ་ཉིད་རྣམ་པར་འཇོག་པར་བྱེད་པ་ཡིན་པའི་ཕྱིར་དོན་དང་འདྲ་བ་ཉིད་སྒྲུབ་པར་བྱེད་པར་ཅིའི་ཕྱིར་བརྗོད། གང་གི་ཕྱིར་དེ་རྟོགས་པའི་བྱ་བ་སྐྱེད་པར་ནུས་ན་རྣམ་པར་འཇོག་པ་ཡང་ཇི་ལྟར་མི་ནུས། རྣམ་པར་འཇོག་པ་པོ་ཡིན་ན་ཡང་ཇི་ལྟར་དེའི་སྐྱེད་པར་བྱེད་པ་པོར་མི་འགྱུར་ཞེ་ན། གང་གི་ཕྱིར་བསྒྲུབ་པར་བྱ་བ་ཡིན་པ་ཉིད་ཀྱི་ཕྱིར་ཐམས་ཅད་ཐམས་ཅད་ཀྱི་བསྒྲུབ་པར་བྱ་བ་མ་ཡིན་ལ། གང་གི་ཕྱིར་སྒྲུབ་པར་བྱེད་པ་ཡིན་པ་དེའི་ཕྱིར་ཐམས་ཅད་གང་ཅུང་ཟད་བྱ་བ་ཡིན་པ་དེའི་སྒྲུབ་པར་བྱེད་པ་ཡང་མ་ཡིན་ནོ། །འོ་ན་ཇི་ལྟར་ཡིན་ཞེ་ན། བཤད་པ། འོན་ཀྱང་ཞེས་བྱ་བ་ནི་ཁྱད་པར་སྟོན་པའོ། །སྒྲུབ་པར་བྱེད་པ་གང་ལས་བྱ་བ་གང་འགྲུབ་པ་དེ་ནི་དེའི་སྒྲུབ་པར་བྱེད་པ་ཡིན་ནོ། །དེས་ན་འགའ་ཞིག་ནི་རྣམ་པར་ཤེས་པ་བསྐྱེད་པའི་བྱ་བའི་སྒྲུབ་པར་བྱེད་པ་ཡིན་ཏེ། གང་ཞིག་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་རྟོགས་པའོ། །འགའ་ཞིག་གིས་ལ་སོ་སོར་ངེས་པ་རྣམ་པ་འཇོག་པའི་སྒྲུབ་པར་བྱེད་པ་ཡིན་ཏེ། གང་ལས་ཤེས་པ་དེ་སྔོན་པོ་ལ་སོགས་པའི་ལས་ལ་ངེས་པར་རྣམ་པར་འཇོག་ནུས་པའོ། །དེས་ན་འདི་ནི་དོན་དམ་པ་ཡིན་ཏེ། འགའ་ཞིག་གིས་འགའ་ཞིག་བསྐྱེད་པའི་བྱ་བ་བྱེད་པ་ན། བྱེད་པ་པོ་ཡིན་པའི་ཕྱིར་རྣམ་པར་འཇོག་པ་ཡང་དེ་ཉིད་ཀྱིས་བྱེད་པའམ། རྣམ་པར་འཇོག་པར་བྱེད་པ་ན་ཡང་དེའི་སྐྱེད་པར་བྱེད་པ་ཡིན་ནོ་ཞེས་དེ་ལྟར་རྣམ་པར་གཞག་པར་ནི་ནུས་པ་མ་ཡིན་ནོ། །གང་གི་ཕྱིར་བསྐྱེད་བྱ་སྐྱེད་བྱེད་ཀྱི་དངོས་པོར་རྣམ་པར་གཞག་པའམ། རྣམ་པར་གཞག་འཇོག་གི་དངོས་པོ་ཕོངས་པས་རྣམ་པར་བརྟགས་པ་ནི་མ་ཡིན་གྱི། འོན་ཀྱང་རེག་བས་ངེས་པར་བརྟགས་པ་ན་གང་ཞིག་ཇི་ལྟར་འབྱོར་པ་སྟེ། དེ་ལྟར་རྣམ་པར་གཞག་པར་བྱ་བ་ཡིན་ནོ།། འགའ་ཞིག་ནི་སྐྱེ་བའི་སྒྲུབ་པར་བྱེད་པ་ཡིན་ལ། འགའ་ཞིག་ནི་རྣམ་པར་གཞག་པའི་ཡིན་ཏེ། གང་ལས་སྐྱེས་པ་དང་གང་ལས་རྣམ་པར་གཞག་པར་རིག་པའོ། །གང་གི་ཕྱིར་སྐྱེད་པར་བྱེད་པ་དག་ལས་ནི་དོན་རྟོགས་པར་རྣམ་པར་གཞག་པ་མི་འཐད་པ་དེའི་ཕྱིར་སྒྲུབ་པར་བྱེད་པ་གཞན་ཚོལ་བ་
ཡིན་ནོ། །དེ་ལ་ཞེས་བྱ་བ་ནི་གང་གི་སྒྲུབ་པར་བྱེད་པའི་དངོས་པོར་འཐད་པ་དེ་ནི་དེའི་སྒྲུབ་པར་རྣམ་པར་གཞག་པར་བྱ་བ་ཡིན་ནོ་ཞེས་བྱ་བའི་ཚུལ་འདི་རྣམ་པར་གནས་པ་ནའོ། །ཉམས་སུ་མྱོང་བ་ནི་འཛིན་པར་བྱེད་པ་ཉིད་དེ། འཛིན་པའི་རྣམ་པ་དེ་ཁོ་ནའམ། དེ་ཙམ་མོ། །འཛིན་པར་བྱེད་པའི་རང་བཞིན་དེ་འདྲ་བའི་བདག་ཉིད་དང་འདྲ་བའི་རང་བཞིན་གྱི་རྣམ་པར་ཤེས་པ་ནིའོ། །འདིས་ནི་རྣམ་པར་དབྱེ་བ་མི་ནུས་པ་ཉིད་ཀྱི་རྒྱུ་བསྟན་ཏེ། ཉམས་སུ་མྱོང་བ་རང་བཞིན་ཁྱད་པར་མེད་པ་ལ་ཁྱད་པར་དུ་རྣམ་པར་གཞག་པ་མི་ནུས་པའི་ཕྱིར་རོ། །གང་གི་ཕྱིར་སྔོན་པོའི་དོན་དམིགས་པ་ནི་ཤེས་པའི་རང་གི་རང་བཞིན་དམིགས་པའི་བདག་ཉིད་ཁོ་ན་སྟེ། གཅིག་ནི་དོན་གྱི་ཡིན་ལ། གཞན་ནི་བདག་ཉིད་ཀྱི་ཡིན་པ་དམིགས་པ་གཉིས་ནི་མེད་པའི་ཕྱིར་རོ། །ཡུལ་དམིགས་པ་བདག་ཉིད་དམིགས་པའི་བདག་ཉིད་ཡིན་ན་ཡང་རྣམ་པར་ཤེས་པའི་བདག་ཉིད་ལ་ཁྱད་པར་མེད་པའི་ཕྱིར་ཤེས་པ་ཐམས་ཅད་ཀྱི་བདག་ཉིད་དམིགས་པ་ཁྱད་པར་མེད་པ་དང༌། དེ་དང་ཐ་དད་པ་མེད་པས་དོན་དམིགས་པ་ཡང་ཁྱད་པར་མེད་པར་འགྱུར་ཏེ། དེའི་ཕྱིར་ན་སྔོན་པོ་དམིགས་ཀྱི་སེར་པོ་ནི་མ་ཡིན་ནོ་ཞེས་ཤེས་པའི་ཡུལ་སོ་སོ་ལ་འབྲེལ་པ་ངེས་པ་འདིར་མི་འགྱུར་ལ། འབྲེལ་པ་ངེས་པ་མེད་ན་ཡང་དོན་ངེས་པར་མྱོང་བར་རབ་ཏུ་གྲགས་པ་ཉམས་པར་འགྱུར་རོ། །དེས་ན་ཉམས་སུ་མྱོང་བའི་རང་བཞིན་དུ་བྱེ་བྲག་མེད་པ་འདི་ནི་གང་གིས་ལས་སོ་སོ་ལ་སྟེ། ལས་དང་ལས་ལ་རྣམ་པར་འབྱིད་པ་ཞེས་བྱ་བ་གཞན་དང་གཞན་དུ་རྣམ་པར་གནས་པ་ཡུལ་།ངེས་པ་དེའི་བདག་ཉིད་དུ་འགྱུར་བར་བྱ་དགོས་སོ། །གང་གི་ཕྱིར་ལས་ཀྱི་གནས་སུ་གྱུར་པའི་ཡོངས་སུ་གཅད་པའི་ཡུལ་ནི་ལས་སུ་བརྗོད་དོ། །རྣམ་པར་གནས་པའི་རྣམ་པ་སྟོན་པ་ནི་འདི་ནི་སྔོན་པོའི་ཡིན་ལ། འདི་ནི་གཞན་གྱི་ཡིན་ནོ་ཞེས་བྱ་བའོ། །གང་གི་ཕྱིར་བདག་ཉིད་ཀྱི་ཁྱད་པར་རམ་འབྲེལ་པ་ཅན་གྱི་ཁྱད་པར་ལས་འགྱུར་ཏེ། འབྲེལ་པ་ཅན་གྱི་ཁྱད་པར་གང་གིས་ཁྱད་པར་མེད་པའི་ཤེས་པ་དེ་ཁྱད་པར་ཅན་དུ་རྣམ་པར་འཇོག་པའི་ཕྱིར་དེའི་བདག་ཉིད་དུ་འགྱུར་པར་བྱ་དགོས་སོ་ཞེས་ཅིའི་ཕྱིར་བརྗོད་པར་བྱེད། །ཤེལ་གྱི་རང་བཞིན་ཁྱད་པར་མེད་ཀྱང་ཉེ་བར་གཞག་པ་དེ་དག་འབྲེལ་པས་ཁྱད་པར་ཅན་དུ་རྟོགས་
པ་དེ་བཞིན་དུ་ཤེས་པ་ཡང་འབྲེལ་པ་ཅན་གྱི་དབང་གིས་རྣམ་པར་འབྱེད་པ་ཡིན་ནོ་ཞེ་ན་དེའི་ཕྱིར་དེའི་བདག་ཉིད་མ་ཡིན་པ་ཞེས་སྨོས་སོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་བདག་ཉིད་མ་ཡིན་པ་ངེས་པར་བྱེད་པ་མ་ཡིན་པ་དེའི་ཕྱིར་ཞེས་རྒྱང་རིང་པོར་བརྗོད་པ་དང་འབྲེལ་པར་བྱའོ། །བདག་ཉིད་དུ་མ་གྱུར་པ་གང་ཡིན་པ་དེ་ཡོད་པ་ནི་དབང་པོ་ལ་སོགས་པ་འབྲེལ་པ་ཅན་རྣམས་ལ་ཡོད་པར་འགྱུར་ཏེ། དེ་དག་ནི་རྒྱུའི་དངོས་པོས་ཉེ་བ་ཡིན་གྱི་གཞན་ནི་མ་ཡིན་པའི་ཕྱིར་རོ། །དབང་པོ་དང་དོན་དང་ཕྲད་པ་ཞེས་བྱ་བ་དབང་པོ་དང་དོན་དག་གི་འབྲེལ་པ་དང༌། དེ་དག་ལ་སོགས་པ་ནི་ཡིད་ལ་སོགས་པ་གང་ཡིན་པ་དེ་དག་སྟེ། ཤེས་པའི་རྒྱུ་དེ་རྣམས་ལ་ཡོད་ཀྱང་སྟེ། རེ་ཞིག་བྱེ་བྲག་ནི་མེད་མོད་ཀྱི་འགའ་ཞིག་ལ་བྱེ་བྲག་ཡོད་ཀྱང་ཡུལ་ཞེས་བྱ་བའི་ལས་ཀྱི་བྱེ་བྲག་ཐ་དད་པར་གྱུར་བ་ལ་བདག་ཉིད་ཐ་དད་པ་མེད་པའི་ཁྱད་པར་མེད་ཅིང་མཚུངས་པའི་རང་བཞིན་གྱི་བདག་ཉིད་ཀྱི་ཤེས་པ་དེའི་ངེས་པར་བྱེད་པ་པོ་མ་ཡིན་པ་དེའི་ཕྱིར་བྱེད་པ་མ་ཡིན་ནོ། །གང་གི་ཕྱིར་ཤེས་པ་ཡུལ་ཐ་དད་པ་ལ་ངེས་པ་ཉིད་ཡིན་ན་ནི་ཕྱི་རོལ་གྱི་བྱེ་བྲག་ཀྱང་ཤེས་པར་གཏོགས་པའི་བྱེ་བྲག་གི་རྒྱུ་ཉིད་ཀྱིས་ཤེས་པར་གཏོགས་པའི་བྱེ་བྲག་ངེས་པའི་རྒྱུར་འགྱུར་བ་ཡིན་ན་དབང་པོ་ལ་སོགས་པར་གཏོགས་པའི་ཐ་དད་པ་ནི་ཤེས་པ་བྱེ་བྲག་ཏུ་བྱེད་པ་མ་ཡིན་ཏེ། ཤེས་པའི་བྱེ་བྲག་དེ་ཉིད་བྱེད་པར་ཐལ་བའི་ཕྱིར་དང༌། ཕྱི་རོལ་ནི་བརྟགས་པར་བྱ་བ་ཡིན་པའི་ཕྱིར་ཏེ། བདག་ཉིད་ཐ་དད་པ་མེད་པ་ཞེས་གང་བརྗོད་པ་ཡིན་ནོ། །དེའི་ཕྱིར་ཤེས་པ་དང་ཤེས་བྱ་དག་མི་འབྲེལ་ལ། ཤེས་པ་དང་དོན་མ་འབྲེལ་ན་ཡང་བྱེ་བྲག་འདི་གཞལ་བྱ་རྟོགས་པའི་སྒྲུབ་པར་བྱེད་པར་མི་འགྱུར་རོ། །གལ་ཏེ་བྱེད་པར་གྱུར་པའི་བྱེ་བྲག་ནི་རང་གི་ངོ་བོ་ཉིད་ཀྱིས་འདི་ལྟར་གྱུར་པ་ཡིན་ཏེ། གང་གིས་རྣམ་པར་ཤེས་པའི་བྱེ་བྲག་མ་བྱས་ཀྱང་ངེས་པར་བྱེད་པ་པོར་འགྱུར་བ་དེའི་ཕྱིར་དོན་ལ་སོ་སོར་ངེས་བ་ནི་ཤེས་པའི་བྱེ་བྲག་སྔོན་དུ་འགྲོ་བ་ཅན་མ་ཡིན་ནོ་ཞེ་ན་དེ་ནི་དེ་ལྟར་མི་རིགས་ཏེ། གང་གི་ཕྱིར་གང་ཞིག་གི་མཐུས་རང་བཞིན་ཁྱད་པར་མེད་ཀྱང་རང་གི་ངོ་བོས་བྱ་བ་བྱེ་བྲག་ཏུ་འགྱུར་བ་རང་བཞིན་གྱིས་བྱེད་པ་ཞེས་བྱ་བར་གནས་པ་ནི་འགའ་ཡང་མེད་ཀྱི། འོན་ཀྱང་བྱེད་པའི་དེ་ཉིད་ནི་བྱེ་བྲག་ཏུ་བྱེད་པ་པོ་ཉིད་ཅེས་བྱ་བའི་
དོན་ནོ། །བསྒྲུབ་བར་བྱ་བའི་རྒྱུ་མཚན་ནི་བྱེ་བྲག་གི་རྒྱུའོ། །རང་གི་བྱེ་བྲག་གིས་བྱ་བའི་བྱེ་བྲག་བྱེད་པ་ན་སྒྲུབ་པར་བྱེད་པ་འགའ་ཞིག་བྱེད་པར་འགྱུར་བ་ཡིན་གྱི། བྱ་བའི་བྱེ་བྲག་བྱེད་པ་མེད་པར་ནི་འགའ་ཡང་བྱེད་པ་ཞེས་བྱ་བ་མ་ཡིན་ནོ། །གང་གི་ཕྱིར་བྱེད་པའི་བྱེད་པ་ཉིད་ནི་བྱེ་བྲག་གི་རྒྱུ་ཉིད་ཡིན་པ་དེས་ན་དེ་བྱ་བའི་རྒྱུ་ཡིན་པའི་ཕྱིར་དབང་པོ་ལ་སོགས་པ་རྣམས་ལ་བྱེ་བྲག་རྣམ་པར་གནས་ཀྱང་ཤེས་པའི་མཚན་ཉིད་ཀྱི་བྱ་བ་བྱེ་བྲག་ཏུ་མི་བྱེད་ན། ངེས་པར་བྱེད་པ་མ་ཡིན་པ་ནི་བྱེད་པ་མ་ཡིན་ནོ། །འདི་སྙམ་དུ་འོ་ན་ནི་འབྲེལ་པ་ཅན་ཉིད་ཀྱིས་ཤེས་པ་བྱེ་བྲག་ཏུ་བྱེད་པར་འགྱུར་གྱི་གང་ལས་རྣམ་པ་དང་བཅས་པར་ཐལ་བར་འགྱུར་བ་རང་བཞིན་གྱི་ཁྱད་པར་འཇོག་པས་ནི་མ་ཡིན་ནོ། །འབྲེལ་པ་བ་ཡང་བྱེ་བྲག་ཏུ་བྱེད་པ་པོ་ཡིན་པ་དེས་ན་ངེས་པར་བྱེད་པར་འགྱུར་རོ་སྙམ་ན། བཤད་པ། བྱེད་པར་འདོད་པའི་བྱེ་བྲག་དེ་ཁྱད་པར་མེད་ན། རང་ཉིད་ལ་བྱེ་བྲག་མེད་ན་བྱ་བ་དེའི་ཁྱད་པར་ཡང་མི་འགྲུབ་བོ། །དེས་ན་དེ་ངེས་པར་བྱེད་པ་མ་ཡིན་ནོ། །གང་གི་ཕྱིར་དབང་པོ་ལ་གནས་པའི་ཁྱད་པར་འབྲེལ་པ་ཅན་གྱིས་ཀྱང་རང་བཞིན་བྱེ་བྲག་མེད་པའི་བྱ་བ་ཡང་ཁྱད་པར་དུ་བྱས་པ་ཡིན་ལ། བྱེད་པར་འདོད་པའི་ཁྱད་པར་འབྲེལ་པ་ཅན་དེ་ཡང་དོན་རྣམས་ལ་ཐུན་མོང་དུ་ཁྱད་པར་མེད་པའི་ཕྱིར་འབྲེལ་པ་ཅན་དེས་བྱ་བ་ཁྱད་པར་དུ་བྱེད་པར་ག་ལ་འགྱུར། འདི་སྙམ་དུ་དོན་ལ་གནས་པའི་རྣམ་པའི་ཁྱད་པར་ནི་འབྲེལ་པ་ཅན་ཡིན་ལ། འབྲེལ་པ་ཅན་དེས་ནི་ཤེས་པའི་དོན་སོ་སོ་ལ་ངེས་པ་རྣམ་པར་འཇོག་པའི་ཕྱིར་ངེས་པར་བྱེད་པ་ཡིན་ཏེ། དོན་ལ་གནས་པའི་རྣམ་པ་ནི་ཐུན་མོང་མ་ཡིན་ནོ་སྙམ་ན། དོན་ལ་གནས་པའི་སྔོན་པོ་ལ་སོགས་པའི་རྣམ་པའི་ཁྱད་པར་ཡོད་ཀྱང་བྱ་བའི་ཁྱད་པར་དེའི་ཡང་ལག་མ་ཡིན་པས་བྱེད་པ་མ་ཡིན་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་དོན་ལ་གནས་པའི་མཚན་ཉིད་ཀྱི་རྣམ་པར་བྱེ་བྲག་དོན་སོ་སོ་ལ་ཐ་དད་པ་ཡིན་པ་དེ་ལྟ་ན་ཡང༌། འདི་ཤེས་པའི་ཁྱད་པར་རྣམ་པར་འཇོག་པའི་ཡན་ལག་ནི་མ་ཡིན་ཏེ། གང་གི་ཕྱིར་དེ་ནི་ཉམས་སུ་མ་མྱོང་བ་ཁོ་ན་ཡིན་ལ། རྟོགས་པ་ཉམས་སུ་མྱོང་བ་ན་ཡང་མ་ཤེས་པ་ད་དང་འབྲེལ་པ་ཉིད་དུ་ཤེས་པར་ནུས་པ་མ་ཡིན་པས་ན་དེ་དང་འབྲེལ་བ་ཉིད་ཀྱིས་ཁྱད་པར་དུ་རྣམ་པར་གཞག་ལྟ་ཅི་སྨོས། འདི་ལྟར་འདི་སྔོན་པོ་དང་
འབྲལ་ལམ་འོན་ཏེ་གཞན་དང་འབྲེལ་པ་ཞེས་རང་བཞིན་ཁྱད་པར་མེད་པའི་ཕྱིར་རྣམ་པར་ཤེས་པ་ལ་ཐེ་ཚོམ་ཟ་བས་ཇི་ལྟར་ན་ཐེ་ཚོམ་ཟ་བའི་རང་བཞིན་གྱི་སྔོན་པོ་དང་འབྲེལ་པ་ཅན་དེས་ཐེ་ཚོམ་ཟ་བའི་རང་བཞིན་དེ་ཉིད་ངེས་པར་བྱེད། གཞན་ལ་གནས་པའི་ཁྱད་པར་ཡང་མ་ངེས་པ་ཁོ་ན་ཡིན་ནོ། །དེ་ངེས་པ་ནི་ཤེས་པ་ཁོ་ནས་བྱས་པ་ཡིན་ན་ཁྱད་པར་མ་ཤེས་པ་དེ་ཡང་ཇི་ལྟར་ཁྱད་པར་ཅན་འཛིན་པར་བྱེད་པ་འགྱུར་ཤིང་ཁྱད་པར་གང་གིས་དེ་ཁྱད་པར་ཅན་དུ་རྣམ་པར་གཞག །དེའི་ཕྱིར་ཇི་སྲིད་དུ་རྣམ་པར་ཤེས་པ་ལས་ཐ་དད་པའི་ཁྱད་པར་འབྲེལ་པ་ཅན་ཤེས་པའི་བྱེ་བྲག་རྣམ་པར་གནས་པའི་རྒྱུ་བརྟགས་པ་དེ་ནི་རྣམ་པ་གཉིས་ཀྱིས་འབྲེལ་པ་མ་ཡིན་ཏེ། ཐུན་མོང་བའི་ཕྱིར་དང་ཐུན་མོང་མ་ཡིན་པ་ཉིད་ཀྱང་མ་ཤེས་པའི་ཕྱིར་རོ། །དེ་ཤེས་ན་ནི་དེ་དང་འབྲེལ་པ་ཁྱད་པར་ཅན་ཡང་ཤེས་པར་འགྱུ་རྣ། ཤེས་པ་ལས་ཐ་དད་པ་དེ་ནི་རང་གི་ངོ་བོས་ཤེས་པར་བྱ་བ་མ་ཡིན་ནོ། །ད་ལྟར་ནི་འཛིན་པར་བྱེད་པའི་ཤེས་པ་ཡང་འགའ་ཞིག་འཐད་པ་མ་ཡིན་ཏེ། དེ་ཉིད་དཔྱོད་པ་ཡིན་པའི་ཕྱིར་རོ། །དེའི་ཕྱིར་ཐ་དད་པའི་ཁྱད་པར་ཉམས་སུ་མྱོང་བའི་ཕྱིར་མེད་པ་དང་འདྲ་བ་ནི་ཁྱད་པར་རྣམ་པར་གནས་པའི་ཡན་ལག་མ་ཡིན་ཞིང༌། ཡན་ལག་མ་ཡིན་པའི་ཕྱིར་ཡང་ངེས་པར་བྱེད་པ་མ་ཡིན་ལ། དེས་ན་བྱེད་པ་མ་ཡིན་ནོ། །དེ་ལྟར་ན་གང་གི་ཕྱིར་བདག་ཉིད་ཐ་དད་པ་མེད་པའི་ཤེས་པའི་རྒྱུར་གྱུར་པའི་བྱེ་བྲག་ངེས་པར་བྱེད་པ་མ་ཡིན་པ་དང༌། རང་གི་ངོ་བོ་ཁྱད་པར་མེད་པ་དང༌། ཁ་ཅིག་མ་ཤེས་པའི་ཕྱིར་འབྲེལ་པ་ཅན་ཉིད་ཀྱི་སྒོ་ནས་བྱེ་བྲག་ཏུ་བྱེད་པ་པོ་ཉིད་མ་ཡིན་པའི་ཕྱིར་ན་གཞན་བྱེ་བྲག་ཏུ་བྱེད་པ་པོ་མ་ཡིན་པ་དེའི་ཕྱིར། ཤེས་པ་འདིའི་བདག་ཉིད་ཀྱི་བྱེ་བྲག་ནི་རང་བཞིན་གྱི་ཁྱད་པར་རོ། །གང་ལས་ཏེ་བདག་ཉིད་ཀྱི་ཁྱད་པར་གང་གི་ཕྱིར་ཡུལ་ཞེས་བྱ་བའི་ལམ་མ་ངེས་པའོ། །ངེས་པ་ཅི་འདྲ་བ་ཞིག་ཅེ་ན། བཤད་པ། སྔོན་པོ་འདེའི་རྟོག་པ་ནི་འདི་ཡིན་ནོ་ཞེས་འདི་འདྲ་བའི་དོན་གཞན་རྣམ་པར་བཅད་ནས་རྟོགས་པ་འདིའི་དོན་གཅིག་ལ་ངེས་པ་སྟེ། ངེས་པ་འདི་ཉིད་ནི་དོན་དང་འབྲེལ་པར་བརྗོད་པ་ཡིན་ནོ། །དེ་ནི་ཞེས་བྱ་བ་ནི་བདག་ཉིད་ཀྱི་བྱེ་བྲག་གང་ལས་འགྱུར་བའི་བདག་ཉིད་ཀྱི་བྱེ་བྲག་དེ་ནི་སྒྲུབ་པར་བྱེད་པ་ཡིན་
ནོ། །དེ་ནི་ཞེས་བྱ་བ་ནི་སྒྲུབ་པར་བྱེད་པའི་སྒྲ་དང་གཞི་མཐུན་པའི་ཕྱིར་ན་ནིང་ངོ༌། །འདི་སྙམ་དུ་བདག་ཉིད་ཀྱི་བྱེ་བྲག་ཁོ་ན་ལས་དོན་དང་འབྲེལ་པ་ཡིན་དུ་ཆུག་ཀྱང༌། དོན་དང་འདྲ་བས་བྱས་པ་ཡིན་ནོ་ཞེས་བྱ་བ་འདི་ག་ལས་ཤེ་ན། ཤེས་པའི་ཞེས་གསུངས་ཏེ། གལ་ཏེ་འདྲ་བ་ལས་གཞན་ལས་ཀྱང་སྲིད་ན་ནི་འདྲ་བས་བྱས་པར་གཟུང་བར་མི་བྱ་བ་ཞིག་ན་ཤེས་པའི་དོན་དང་འབྲེལ་པ་འདི་ལྟ་བུ་ནི་དོན་དང་འདྲ་བ་ལས་གཞན་ལས་ནི་སྲིད་པ་མ་ཡིན་ནོ། །ཤེས་པ་ལས་ཐ་དད་པའི་དབང་པོ་ལ་སོགས་པ་ལ་གནས་པའི་བྱེ་བྲག་ནི་མི་ཤེས་པའི་ཕྱིར་འབྲེལ་པར་བྱེད་པར་མི་འགྱུར་གྱི། དབང་པོ་ལ་སོགས་པས་བྱས་པ་ཤེས་པ་ལ་གནས་པའི་བྱེ་བྲག་ནི་རྣམ་པར་ཤེས་པའི་སྤྱིར་འབྲེལ་བར་བྱེད་པ་པོར་འགྱུར་བར་དེའི་ཕྱིར་གཞན་ལས་ནི་སྲིད་པ་ནི་མ་ཡིན་ནོ་ཞེས་ཅིའི་ཕྱིར་བརྗོད་ཅེ་ན། དབང་པོ་ལ་སོགས་པ་ཞེས་སྨོས་སོ། །དབང་པོ་དེ་གསལ་བ་དང་མི་གསལ་བ་དེའི་དངོས་པོ་ནི་གསལ་བ་དང་མི་གསལ་བ་ཉིད་དོ། །དེ་ལ་སོགས་པ་གང་དག་ཡིན་པ་སྟེ། སོགས་པ་སྨོས་པས་ནི་གོམས་པ་བོགས་པ་དང༌། མ་བོགས་པ་དང་ཡུལ་ཉེ་བ་དང་མི་ཉེ་བ་ལ་སོགས་པ་གཟུང་ངོ༌། །འདི་དག་གི་རང་གི་བྱེ་བྲག་གིས་དབང་པོའི་རྣམ་པར་ཤེས་པ་ལ་སོགས་པ་བྱེ་བྲག་ཏུ་འགྱུར་ཏེ། ཟས་ཟོས་པ་དང་མ་ཟོས་པ་ལ་སོགས་པས་གནོད་པར་བྱས་པས་མི་གསལ་བ་དང༌། ཕན་བཏོགས་པས་གསལ་བར་གྱུར་པའི་དབང་པོས་ནི་རྣམ་པར་ཤེས་པ་གསལ་བ་དང་མི་གསལ་བ་འཛིན་པར་བྱེད་པ་དང༌། སྔོན་གོམས་པས་འདུས་བྱ་སད་པའི་ཡིད་ལ་བྱེད་པ་ཡང་འདོད་པ་དང་མི་འདོད་པའི་ཤེས་པའི་རྒྱུ་འགྱུར་ཏེ། འདི་ཡང་སྐབས་ཇི་ལྟ་བ་བཞིན་དུ་སྒྲུབ་པར་འགྱུར་རོ་། །ཡུལ་ཉེ་ན་གསལ་ལ་ཉེ་བ་མ་ཡིན་ན་མི་གསལ་བ་ཞེས་བྱ་བ་ལ་སོགས་པའི་རྗེས་སུ་འབྲངས་ནས་རྟོགས་པར་བྱ་བའོ། །དེ་ལྟར་དབང་པོ་དང་ཡིད་ལ་བྱེད་པ་དང་ཡུལ་གྱི་བྱེ་བྲག་རྣམས་རང་གི་བྱེ་བྲག་གིས་བྱེ་བྲག་ཏུ་གྱུར་པ་ན་དེ་ལྟར་ཤེས་པ་དགའ་བ་ལ་སོགས་པའི་བྱེ་བྲག་རྣམས་དང་སྦྱོར་བར་བྱེད་པ་ཡིན་ཡང་དོན་དང་སྦྱོར་བར་བྱེད་པ་ནི་མ་ཡིན་ནོ། །ཅིའི་ཕྱིར་ཞེ་ན། དེ་ལས་ཞེས་སྨོས་ཏེ། དབང་པོ་ལ་སོགས་བ་བྱེ་བྲག་ཏུ་བྱེད་པར་གྱུར་བ་ལ་ཉེ་བ་སྟེ། འབྲེལ་པའི་རྒྱུ་གང་ཡིན་པ་དེ་མེད་པའི་ཕྱིར་རོ། །དབང་པོ་ལ་སོགས་པའི་བྱེ་བྲག་ཏུ་བྱེད་པའི་དངོས་པོས་འབྲེལ་པའི་
རྒྱུ་མེད་པ་མཚོན་པར་བྱས་པའོ། །དབང་པོ་ལ་སོགས་པའི་བྱེ་བྲག་ལ་ནི་ཤེས་པ་དང་ཉེ་བའི་རྒྱུ་ཡོད་པ་མ་ཡིན་ཏེ། འདི་ལྟར་ཉམས་སུ་མྱོང་བ་ཞེས་བྱ་བ་དབང་པོས་བྱས་པའི་ཤེས་པའི་བྱེ་བྲག་ཡོད་ཀྱང་དོན་ཐམས་ཅད་ལ་ཐུན་མོང་བ་ཡིན་པ་ཉིད་ཀྱིས་ངེས་པ་མ་ཡིན་པའི་དང་ཉེ་བའི་རྒྱུ་མ་ཡིན་ནོ། །ཇི་ལྟར་དབང་པོས་བྱས་པའི་གསལ་བ་ནི་སྔོན་པོ་ལ་ཇི་ལྟ་བར་སེར་པོ་ལ་ཡང་དེ་བཞིན་ནོ་ཞེས་བྱ་བ་ལ་སོགས་པ་ཐུན་མོང་བར་སྦྱར་བར་བྱའོ། །དོན་གྱིས་བྱས་པའི་བྱེ་བྲག་དོན་དང་འདྲ་བ་ཞེས་གྲགས་པ་ཉིད་ནི་ཉེ་བའི་རྒྱུ་ཡིན་ཏེ། དོན་སོ་སོ་ལ་ཐ་དད་པའི་ཕྱིར་རོ། །དེས་ན་དབང་པོ་ལ་སོགས་པ་ཞེས་སྨོས་པས་ཡུལ་མ་བཟུང་བ་ཡིན་ནོ། །གང་གི་ཕྱིར་ཡུལ་ཐ་དད་པར་བྱེད་པ་ཡིན་ན་ནི་ཤེས་པ་ལ་ཡུལ་གྱིས་བསྐྱེད་པའི་འདྲ་བ་ཉིད་ཉེ་བའི་རྒྱུར་འགྱུར་རོ། །གལ་ཏེ་དབང་པོ་ལ་སོགས་པས་བྱས་པའི་བྱེ་བྲག་བྱེ་བྲག་ཏུ་བྱེད་པ་པོ་ཡིན་པ་དེ་ལྟ་ན། འོ་ན་ནི་དོང་ཡིས་བྱས་པའི་ཉམས་སུ་མྱོང་བའི་བྱེ་བྲག་སྟེ། ཉམ་སུ་མྱོང་བའི་ཁྱད་པར་གང་ལས་དོན་ངེས་པར་རྟོགས་པའི་རྟོགས་པར་འགྱུར་བ་ཡིན་གྱི་དོན་དང་འདྲ་བ་ལས་ནི་མ་ཡིན་ནོ་ཞེ་ན། དེ་ལྟར་འདོད་ན་ད་ནི་སྟེ་དེ་ལྟར་ཁས་བླངས་པ་ན་ཡོད་པ་དོན་བྱེད་པའི་རང་བཞིན་གྱི་ཁྱད་པར་དོན་དང་འདྲ་བ་མི་བཟོད་པས་ཁས་བླངས་པ་དེའི་རང་བཞིན་ཏེ་དེ་ཁོ་ན་ཇི་ལྟར་མི་བརྗོད། ཡོད་པར་ཐ་སྙད་དུ་བྱ་བའི་ཡུལ་ནི་ཚད་མས་རྟོགས་པའི་རང་བཞིན་ཡིན་ལ། ཚད་མས་རྟོགས་པ་ཡང་ངེས་པ་ལ་གནས་པའི་དོན་བསྟན་པར་ནུས་པ་ཁོ་ན་ཡིན་ཏེ། རྣམ་པར་རྟོག་པ་ལ་གནས་པ་ནི་སྒྲའི་དོན་ཡིན་པའི་ཕྱིར་རོ། །ཅིག་ཤོས་ཀྱིས་ཀྱང་ཉམས་སུ་མྱོང་བ་ཐམས་ཅད་འདིའོ་ཞེས་བྱ་བར་བསྟན་པར་ནུས་པ་མ་ཡིན་ཏེ། དཔེར་ན་ནོར་བུ་དང་ལྕགས་ལ་སོགས་པའི་གཟུགས་རྣམས་མི་མཁས་པས་མཐོང་དུ་ཟིན་ཀྱང་ཁྱད་པར་བརྗོད་པར་མི་ནུས་པ་བཞིན་ནོ། །ཚད་མས་ཡུལ་དུ་བྱས་པ་ཐམས་ཅད་ཀྱང་འདིའོ་ཞེས་བསྟན་པར་ནུས་པ་མ་ཡིན་ཏེ། དཔེར་ན་རྗེས་སུ་དཔག་པའི་མིག་བཞིན་ནོ། །དེའི་ཕྱིར་བརྒལ་བ་འདི་ཅི་ཞིག་ཡིན་ཞེས་སྨྲས་པ་ནི། དེ་ནི་ཞེས་བྱ་བ་དོན་གྱིས་བྱས་པའི་ཁྱད་པར་གྱི་རང་བཞིན་ནོ། །འདིའི་དངོས་པོ་ནི་འདི་ཉིད་དེ་མངོན་སུམ་ཉིད་དོ། །དེ་བྱེད་པར་གྱུར་པས་མངོན་སུམ་ཉིད་དུ་རྭ་ནས་བཟུང་ནས་བསྟན་པར་མི་ནུས་ཀྱི། དོན་ངེས་པར་
རྟོགས་པའི་རྟོགས་པ་མཐོང་བའི་ཕྱིར། དེའི་རྒྱུ་མཚན་དུ་གྱུར་པ་དོན་གྱིས་བྱས་པའི་ཉམས་སུ་མྱོང་བའི་ཁྱད་པར་ཡོད་དོ་ཞེས་ནི་སྨྲ་བར་ནུས་པ་ཡིན་ནོ་ཞེ་ན། ཅིག་ཤོས་ཀྱིས་སྨྲས་པ། རིགས་པ་སྨྲ་བ་འདི་རྟོགས་པ་མེད་པ་མཚོན་པ་མེད་པ་འདིའོ་ཞེས་ངེས་པ་མེད་པས་དངོས་པོ་སྟེ་ཤེས་པའི་རང་བཞིན་རྣམ་པར་འཇོག་པར་བྱེད་པ་སྟེ། ངེས་པའི་རང་བཞིན་དུ་རྟོགས་པར་བྱེད་པོའི་ཞེས་བྱ་བའི་དོན་ནི་གཞན་གྱི་འདི་ནི་མི་སྲིད་དོ་ཞེས་བྱ་བའོ། །ཇི་ལྟར་རྣམ་པར་འཇོག་ཅེ་ན། བཤད་པ་མྱོང་བའི་རང་བཞིན་འདི་ནི་སྔོན་པོ་འདི་ཡིན་གྱི་གཞན་སེར་པོའི་ནི་མ་ཡིན་ནོ་ཞེས་བྱ་བར་ཏེ། དེའི་ཕྱིར་ལེགས་པར་རྣམ་པར་གཞག་པ་ཡིན་ནོ། །འདི་ནི་བསྟིང་ཚིག་སྟེ་གཞན་གྱིས་བཞག་པ་འགོག་པའོ། །འདིའོ་ཞེས་བྱ་བར་ངེས་པར་རྟོགས་པ་མེད་ཀྱི་མིག་ལ་སོགས་པའི་རང་བཞིན་གྱི་བྱེ་བྲག་རྣམ་པར་འཇོག་པ་མ་ཡིན་ནམ་ཞེ་ན། བདེན་ཏེ། དེ་ལས་ནི་ངེས་པར་རྟོགས་པའི་རང་བཞིན་མིག་གི་རྣམ་པར་ཤེས་པ་ཞེས་བྱ་བ་འབྲས་བུ་རྣམ་པར་འཇོག་པ་ཡོད་པས་འདི་དབང་གིས་མིག་ལ་སོགས་པ་ངེས་པར་རྟོགས་པ་མེད་པའི་རང་བཞིན་ཡང་རྣམ་པར་གཞག་པ་ཡིན་ན། རྣམ་པར་ཤེས་པ་ནི་ངེས་པར་རྟོགས་པའི་རང་བཞིན་གཞན་གྱིས་རྣམ་པར་གཞག་པ་མ་ཡིན་གྱི། འོན་ཀྱང་བདག་ཉིད་ཁོ་ནས་ཡིན་ནོ། །དེའི་ཕྱིར་དེ་ངེས་པར་མ་རྟོགས་ན་ནི་རྟོགས་པ་ངེས་པར་རྣམ་པར་གཞག་པ་ཡོད་པ་མ་ཡིན་ནོ། །ནོར་བུ་དང་དངུལ་ལ་སོགས་པ་བྱེ་བྲག་ཏུ་རྣམ་པར་གཞག་པའི་རྒྱུ་ངེས་པར་མ་ཟིན་པ་གང་ཡིན་པ་དེ་དག་ཀྱང་བྱེ་བྲག་མེད་པའི་ཐ་སྙད་དུ་བྱའོ། །འདི་སྐད་དུ་འབྲས་བུ་བྱེ་བྲག་ཏུ་རྟོགས་པ་མཐོང་བའི་ཕྱིར་བྱེ་བྲག་ཏུ་རྣམ་པར་འཇོག་གོ་ཞེས་ནི་བརྗོད་པར་མི་ནུས་ཏེ། སྔོན་པོ་ལ་སོགས་པའི་དོན་གྱིས་བྱས་པའི་མྱོང་བའི་བྱེ་བྲག་ངེས་པ་ཡིན་ན་ནི་སྔོན་པོ་རྟོགས་པའི་ངེས་པར་ཡོངས་སུ་བཅད་པར་འགྱུར་བ་ཡིན་ཏེ། དོན་ངེས་པར་རྟོགས་པར་ཡོངས་སུ་གནོད་པ་ནི་དོན་གྱིས་བྱས་པའི་ཁྱད་པར་ཡོངས་སུ་གཅོད་པ་ཉིད་ཡིན་གྱི་གཞན་ནི་མ་ཡིན་པའི་ཕྱིར་རོ། །གང་གི་རང་བཞིན་ངེས་པ་ཉིད་ཤེས་པའི་ལས་ལ་ངེས་པར་འགྱུར་པ་ན་དེ་མ་ངེས་ན་དེའི་བདག་ཉིད་ལས་ལ་ངེས་པའི་རྟོགས་པ་ཇི་ལྟར་འགྱུར། དེའི་ཕྱིར་བྱེ་བྲག་གི་རྟོགས་པ་མཐོང་བའི་ཕྱིར་བྱེ་བྲག་རྣམ་པར་འཇོག་གོ་ཞེས་གང་སྨྲས་པ་དེ་ལ་དོན་འདིར་འགྱུར་ཏེ། བྱེ་བྲག་རྟོགས་པའི་
ཕྱིར་བྱེ་བྲག་རྟོགས་སོ་ཞེས་བྱ་བ་ཡིན་ན་དེ་ལྟར་ནི་རིགས་པ་མ་ཡིན་ནོ། །དེ་ཉིད་ཀྱི་ཕྱིར་བདག་ཉིད་ངེས་པར་རྟོགས་པ་མེད་པ་ཞེས་གསུངས་ཏེ། གང་གི་བདག་ཉིད་དུ་དངོས་པོ་ལ་ངེས་པར་རྟོགས་པར་བྱ་བ་དེ་ཉིད་ངེས་པར་རྟོགས་པ་མེད་པ་ཞེས་བྱ་བར་ཇི་ལྟར་འགྱུར། དེ་ངེས་པར་མ་རྟོགས་ན་ཡང་དངོས་པོ་དེའི་རང་བཞིན་ཅི་འདྲ་བ་ཞིག་ཏུ་རྣམ་པར་འཇོག །རང་བཞིན་གང་ཞིག་མ་རྟོགས་ན་ནི་དངོས་པོ་དེའི་རང་བཞིན་དུ་རྟོགས་པར་མི་འགྱུར་ཏེ། དཔེར་ན་སྐད་ཅིག་མ་ཉིད་ངེས་པར་མ་རྟོགས་པར་སྔོན་པོ་ལ་སོགས་པ་དེའི་རང་བཞིན་དུ་ངེས་པ་མི་རྟོགས་པ་བཞིན་ནོ། །ཤེས་པའི་དོན་གྱིས་བྱས་པའི་བྱེ་བྲག་ཀྱང་ངེས་པར་རྟོགས་པ་མ་ཡིན་ཏེ། དེས་ན་ཤེས་པ་དེའི་རང་བཞིན་དུ་ངེས་པར་རྟོགས་པར་མི་འགྱུར་བའི་ཕྱིར། དོན་ངེས་པར་རྟོགས་པའི་རྟོག་པར་མི་འགྱུར་རོ། །དངོས་པོ་འདི་རང་བཞིན་དུ་རྟོགས་པ་ནི་རང་བཞིན་རྟོགས་པའི་སྔོན་དུ་འགྲོ་བ་ཅན་ཡིན་ཏེ། འདི་ལྟར་འགའ་ཞིག་ལ་ལྟོས་པས་རང་བཞིན་འགའ་ཞིག་བརྟགས་པ་ཡིན་ལ། དངོས་པོ་ཡང་ལྡོག་པ་གཞན་ལས་བརྟགས་པ་ཡིན་ནོ། །དེ་ལ་ལྡོག་པ་གཞན་དང་ལྡན་པའི་ལྡོག་པ་གཞན་གྱི་རྟོགས་པ་ཁྱད་པར་དུ་གྱུར་པའི་རང་བཞིན་རྟོགས་པའི་ཕྱོགས་གཅིག་ཏུ་གྱུར་པ་གང་ཡིན་པ་འདི་ལ་ནི་དེའི་རྟོགས་པའི་ཕྱོགས་གཅིག་ཏུ་གྱུར་པ་གང་ཡིན་པ་འདི་ལ་ནི་དེའི་རྟོགས་པས་ཁྱབ་པ་ཡིན་ཏེ། དཔེར་ན་དབྱིག་པ་རྟོག་པའི་ཕྱོགས་གཅིག་ཏུ་གྱུར་པ་དབྱིག་པ་ཅན་རྟོགས་པ་ནི་དབྱིག་པ་རྟོགས་པས་ཁྱབ་པ་ཡིན་པ་བཞིན་ཡིན་པས་ན་ཁྱབ་པར་བྱེད་པ་མི་དམིགས་པའོ། །འདྲ་བ་ཡང་རྟོགས་པ་མེད་པ་མ་ཡིན་ནམ། གཟུང་བའི་རྣམ་པ་ཉམས་སུ་མྱོང་བའི་ཕྱིར་མ་རྟོགས་པས་སོ་ཞེས་ཅིའི་ཕྱིར་བརྗོད་ཅེ་ན། བདེན་ཏེ། ཉམས་སུ་མྱོང་ཡང་འདྲ་བའི་བདག་ཉིད་དུ་ནི་མ་ཡིན་ཏེ། གང་གི་ཕྱིར་ཉམས་སུ་མྱོང་བ་ནི་རྟོགས་ཀྱིས་འདི་ནི་འདྲ་བའི་ཞེས་ཞེན་པ་མེད་ཀྱི་འོན་ཀྱང་དོན་ཡིན་ནོ་ཞེས་སོ། །དེ་ལྟ་ན་འོ་ན་ནི་རྗེས་སུ་དཔག་པས་འདྲ་བའི་བདག་ཉིད་དུ་ངེས་པར་བྱེད་དེ། རང་བཞིན་ནི་གསལ་བ་ཉིད་དུ་མངོན་སུམ་དུ་གྱུར་པས་མ་རྟོགས་པ་མ་ཡིན་པ་དེའི་ཕྱིར་དེ་ནི་སྒྲུབ་པར་བྱེད་པར་འཐད་པ་ཡིན་ནོ། །གང་གི་ཕྱིར་འདྲ་བ་ལས་གཞན་དོན་དང་འབྲེལ་པར་བྱེད་པ་མ་ཡིན་པ་དེའི་ཕྱིར་གཞལ་བྱ་རྟོགས་པ་སྟེ། གཞལ་བྱ་རྟོགས་པར་རྣམ་པར་གཞལ་བའི་སྒྲུབ་བྱེད་དེ་བྱེད་པ་ནི་གཞལ་
བྱའི་རང་བཞིན་ལྟ་བུ་གང་ཡིན་པ་དེའི་དངོས་པོ་ནི་གཞལ་བྱའི་རང་བཞིན་ཉིད་དེ། རྣམ་པར་ཤེས་པའི་གཞལ་བྱ་དང་འདྲ་བ་ཉིད་དོ། །སྒྲུབ་བྱེད་འདྲ་བ་ལས་གཞན་ཤེས་པ་ལས་ཕྱི་རོལ་དུ་གྱུར་པ་འམ། རང་བཞིན་དུ་གྱུར་ཀྱང་དབང་པོ་ལ་སོགས་པས་བྱ་བ་ཡིན་ན་ནི་ཤེས་པ་དེའི་ལས་དང་འབྲེལ་པ་ངེས་པ་འདི་ནོ་སྔོན་པོ་མྱོང་བ་ཡིན་གྱི་སེར་པོ་ནི་མ་ཡིན་ནོ་ཞེས་བྱ་བ་དེ་ལྟ་བུར་གྱུར་པ་མི་འགྲུབ་སྟེ། རྟོགས་པ་མ་ཡིན་ནོ། །གལ་ཏེ་སྒྲུབ་པར་བྱེད་པ་དོན་དང་འདྲ་བ་དེ་ཉིད་ཀྱང་འབྲས་བུ་ལས་གཞན་དུ་འགྱུར་གོ་ཞེ་ན། བཤད་པ་གཞལ་བྱའི་རང་བཞིན་དེ་ཡང་ཤེས་པ་དེའི་བདག་ཉིད་དུ་གྱུར་པ་ཡིན་ནོ། །གང་གི་ཕྱིར་བདག་ཉིད་ཡིན་པ་དེས་ན་འབྲས་བུ་ཚད་མ་ལས་གཞན་ཐ་དད་པ་མ་ཡིན་ནོ། །བྱེད་པ་ཐམས་ཅད་ནི་བྱེད་པ་པོའི་གཞན་གྱི་དབང་དང་རང་གི་བྱ་བ་དང་ལྡན་པ་དང༌། གཙེར་གྱུར་པའི་བསྒྲུབ་པར་བྱ་བ་ལ་ཉེ་བར་སྦྱོར་བར་མཐོང་སྟེ། དཔེར་ན་ཤིང་སྐྱེས་བུས་བྱིན་གྱིས་བརླབས་ཤིང་འབར་བའི་བྱ་བ་དང་ལྡན་པ་ཚོགས་པའི་བསྒྲུབ་པར་བྱ་བ་ལ་ཉེ་བར་སྦྱོར་བ་མཐོང་བ་བཞིན་ནོ། །འདྲ་བ་ནི་བྱེད་པ་པོའི་གཞན་གྱི་དབང་དང་བྱ་བ་དང་ལྡན་པ་དང༌། གཙོར་གྱུར་པའི་བསྒྲུབ་པར་བྱ་བ་ལ་ཉེ་བར་སྦྱོར་བར་མ་མཐོང་ཞིང༌། བྱེད་པ་པོ་འགའ་ཞིག་ཀྱང་མཐོང་བ་མེད་པས་དེ་ཇི་ལྟར་ན་དོན་དང་འདྲ་བར་བྱེད་པར་འགྱུར་ཞེ་ན། སྨྲས་པ། ཅུང་ཟད་ཀྱང་ཕོངས་པས་བྱེད་པས་རྟོག་པ་ནི་མ་ཡིན་གྱི་འོན་ཀྱང་འདི་དངོས་པོ་ལ་གནས་པ་ཡིན་ཏེ། བྱེད་པ་འགའ་ཞིག་ལ་མ་བརྟེན་པར་ནི་བསྒྲུབ་པར་བྱ་བ་སྒྲུབ་པར་མི་བྱེད་པའི་ཕྱིར་རོ། །འདི་ཙམ་ཞིག་ནི་ཁྱད་པར་ཡིན་ཏེ། བྱེད་པ་འགའ་ཞིག་ནི་རང་ལས་ངེས་པ་ཡིན་ཏེ། དཔེར་ན་གཅོད་པ་ལ་སྟེའུ་བཞིན་ནོ། །གཞན་ལ་ནི་བསྒྲུབ་པར་བྱ་བ་དང་ལྡན་པའི་བྱེད་པ་པོ་མཐོང་བ་ལས་བྱེད་པ་པོ་རྣམ་པར་འཇོག་པ་ཡིན་ནོ། །བྱེད་པ་མེད་པར་ནི་བསྒྲུབ་པར་བྱ་བ་འགྲུབ་པ་མི་འཐད་པའི་ཕྱིར་རོ། །འདིར་དོན་དམ་པར་ནི་བྱེད་པ་པོ་འགའ་ཡང་ཡོད་པ་མ། ཡིན་གྱི་འོན་ཀྱང་ཐ་སྙད་པ་ཁོ་ནའོ། །བྱེད་པ་ཡང་ཐ་སྙད་ཀྱི་རྒྱུ་མཚན་ཡིན་གྱི་འདིར་སྐྱེད་པ་པོར་འདོད་པ་ལ་ནི་མ་ཡིན་ནོ། །དེ་ལ་ཤེས་པའི་འཛིན་པའི་རྣམ་པ་གཟུང་བའི་རྣམ་པ་ལས་ཐ་དད་པར་བདག་ཏུ་འཛིན་པའི་གཞིག་གྱུར་པ་དགའ་བ་ལ་སོགས་པའི་རང་བཞིན་གྱིས་འཛིན་པ་ལ་ནི་ངས་མཐོང་ངོ་ཞེས་
བྱེད་པ་པོར་ཞེན་པ་ཡིན་ཞིང༌། དེ་ཡང་དོན་རྟོགས་པའི་རང་བཞིན་དུ་ཞེན་པ་ན་བསྒྲུབ་པར་བྱ་བའི་རང་བཞིན་དུ་ཞེན་པར་འགྱུར་པ་ཡིན་ནོ། །དེས་ན་བསྒྲུབ་པར་བྱ་བ་དང་ལྡན་པའི་བྱེད་པ་པོ་དེའི་བསྒྲུབ་པར་བྱ་བའི་བྱེ་བྲག་འདིའི་རྒྱུ་བྱེད་པ་འགའ་ཞིག་ཏུ་འགྱུར་དགོས་ལ་དེ་ཡང་ཐ་སྙད་པར་བརྟག་པའི་ནི་མི་འཐད་དོ། །གང་གི་ཕྱིར་ཁྱད་པར་དང་ལྡན་པ་མ་ཡིན་རང་བཞིན་གྱི་ཉམས་སུ་མྱོང་བ་ན་ཁྱད་པར་ཅན་གྱི་དོན་རྟོགས་པར་རྣམ་པར་གཞག་པ་ནི་རིགས་པ་དང་ལྡན་པ་མ་ཡིན་པ་དེའི་ཕྱིར་རྣམ་པར་འཇོག་པའི་རྒྱུ་ཤེས་པའི་རང་བཞིན་གྱི་བྱེ་བྲག་ཉམས་སུ་མྱོང་བར་གྱུར་པ་ནི་བྱེད་པར་འགྱུར་དགོས་སོ། །འདིར་བྱེད་པ་དེ་ཤེས་པ་ལས་ཐ་དད་པ་མེད་པ་ཉིད་ནི་བྱེད་པ་པོའི་དབང་དུ་གྱུར་པ་ཉིད་ཡིན་ལ། ཉམས་སུ་མྱོང་བར་གྱུར་པ་ཉིད་ཀྱང་བྱ་བ་དང་ལྡན་པ་ཞེས་བྱ་བ་ཡིན་གྱི་གཞན་ནི་མ་ཡིན་ནོ། །གང་ཞིག་བྱེད་པར་འགྱུར་པ་འཛིན་པའི་རྣམ་པའི་ཁྱད་པར་ཅན་གྱི་རང་བཞིན་ནི་ཉམས་སུ་མྱོང་བ་མེད་པ་དེས་ན། གལ་ཏེ་གཟུང་བའི་རྣམ་པ་ངར་འཛིན་པས་ལས་ཕྱི་རོལ་དང་བདེ་བའི་རྣམ་པ་དང་བྲལ་བ་མི་ཤེས་པའི་བདག་ཉིད་དུ་ཞེན་པ་དེ་ལྟ་ན་ཡང་གཞན་དུ་མི་འཐད་པས་ན་རྗེས་སུ་དཔག་པ་ལས་ཤེས་པའི་ངོ་བོ་དེ་དང་འདྲ་བའི་རང་བཞིན་དུ་བཞག་པ་ཡིན་གྱི་མངོན་སུམ་ལས་ནི་མ་ཡིན་ནོ། །གཟུང་བའི་རྣམ་པ་འདྲ་བའི་བདག་ཉིད་ཅན་ཤེས་པའི་རང་བཞིན་དུ་མངོན་སུམ་གྱིས་ནི་ངེས་པ་མ་ཡིན་གྱི། འོན་ཀྱང་དོན་གྱི་ཁྱད་པར་རྟོགས་པ་གཞན་དུ་ནུ་འཐད་པས་རྗེས་སུ་དཔག་པ་ཡིན་ནོ། །རིག་བཞིན་པའི་འདྲ་བ་དེ་ཡང་ཤེས་པ་ལས་ཐ་མི་དད་པ་ཡིན་ན་ཤེས་པ་དོན་ངེས་པ་འཛིན་པར་འཇོག་པར་བྱེད་པ་ཡིན་ནོ། །དེའི་ཕྱིར་འདིར་རང་གི་ངོ་བོ་ཉིད་ཀྱིས་བྱེད་པ་ཉིད་དུ་ཤེས་པའི་བྱེད་པ་ནི་མེད་ཀྱི་འོན་ཀྱང་བྱེད་པ་པོའི་བྱ་བའི་ཁྱད་པར་ཅན་མཐོང་བ་ལས་རྗེས་སུ་དཔག་པ་ཡིན་ཞིང་དེ་ལས་ཀྱང་གཙོར་གྱུར་པའི་བསྒྲུབ་པར་བྱ་བ་ལ་འདིའི་བྱ་བ་རྗེས་སུ་དཔག་པ་ཡིན་ནོ། །བྱེད་པ་པོའི་བདག་ཉིད་ཀྱང་ཤེས་པའི་བདག་ཉིད་ཀྱི་ཕྱིར་དང༌། ཤེས་པའི་བདག་ཉིད་དུ་ཉམས་སུ་མྱོང་བའི་བྱ་བ་ལྡན་པ་ཞེས་བྱ་བ་ཡང་རྗེས་སུ་དཔག་པར་བྱ་བ་ཡིན་ཏེ། མངོན་སུམ་གྱིས་ནི་གཟུང་བའི་རྣམ་པར་ཤེས་པའི་ངོ་བོར་ངེས་པ་མ་ཡིན་པའི་ཕྱིར་རོ། །བྱེ་བྲག་ཏུ་
རྣམ་པར་འཇོག་པའི་རྒྱུ་ནི་དེའི་བདག་ཉིད་དུ་ཉམས་སུ་མྱོང་བ་ཡིན་གྱི་གཞན་གྱི་རང་བཞིན་དུ་ནི་མ་ཡིན་པས་ན་དེ་ཅིའི་ཕྱིར་གང་གི་ཕྱིར་སྒྲུབ་པར་བྱེད་པ་ཉིད་དུ་མ་མཐོང་བ་འདི་ཇི་ལྟར་སྒྲུབ་པར་བྱེད་པ་ཡིན་ཞེས་བརྗོད། བྱེད་པ་པོའི་བྱ་བ་མཐོང་བའི་ཕྱིར་ན་འདི་ཉིད་གཙོར་གྱུར་བའི་སྒྲུབ་པར་བྱ་བའི་ཡན་ལག་ཏུ་རྗེས་སུ་དཔག་པ་ཡིན་ལ། བྱེད་པ་པོའི་རང་བཞིན་ཉིད་ཀྱང་བྱེད་པ་པོའི་གཞན་གྱི་དབང་དང༌། དེའི་བདག་ཉིད་དུ་ཉམས་སུ་མྱོང་བ་ཡང་བྱ་བ་དང་ལྡན་པ་ཡིན་པར་བསྟན་པའི་ཕྱིར། དེ་ཡི་བདག་ཉིད་འཛིན་དེ་ནི། །ཞེས་སྨོས་ཏེ། དོན་དང་འདྲ་བ་ཉིད་འཛིན་པའི་ཤེས་པ་བྱེད་པ་པོར་འགྱུར་པ་དེའོ། །འདིས་ནི་བྱ་བ་དང་ལྡན་པ་དང་བྱེད་པ་པོའི་དབང་དུ་གྱུར་པ་བརྗོད་པ་ཡིན་ནོ། །ངེས་པའི་དོན་རྟོགས་པ་དེ་ཉིད་ཀྱི་བདག་ཉིད་ཀྱི་བྱ་བ་གང་ཡིན་པའི་བྱ་བ་དེས་བྱ་བ་དང་བཅས་པར་གཙོར་གྱུར་པའི་བསྒྲུབ་པར་བྱ་བ་དང་ལྡན་པར་སྣང་ངོ༌། །དེའི་དོན་ནི་འདི་ཡིན་ཏེ། གང་གི་ཕྱིར་འདྲ་བའི་དབང་གིས་བྱེད་པ་པོ་ཤེས་པའི་དོན་ངེས་པར་འཛིན་པ་བཞིན་དུ་སྣང་བ་དེའི་ཕྱིར། དེ་བྱེད་པ་པོར་ཤེས་པ་ཡིན་གྱི་མངོན་སུམ་གྱིས་ནི་མ་ཡིན་ནོ། །རང་གི་ལས་ཏེ་ཡུལ་ཞེས་བྱ་བའི་ལས་ལའོ། །དེ་ལྟ་བུའི་སྒྲ་སྦྱར་བ་ནི་ཆོས་ཐམས་ཅད་བྱེད་པ་མེད་པའི་ཕྱིར་རོ། །བསྒྲུབ་པར་བྱ་བ་དང་བྱེད་པ་དག་ཐ་དད་པ་མེད་ན་འདྲ་བ་བྱེད་པ་ཉིད་ཇི་ལྟར་ཡིན་ཞེ་ན། དེའི་ཞེས་སྨོས་ཏེ་འདྲ་བའི་དབང་གིས་ཏེ་ཉམས་སུ་མྱོང་བས་སོ། །གང་གི་ཕྱིར་ཤེས་པ་ལ་གནས་པའི་འདྲ་བ་མྱོང་བ་དེའི་ཕྱིར་ཤེས་པ་དེ་སྔོན་པོའི་དོན་རྟོགས་པར་ངེས་པ་ཡིན་ནམ་དེའི་ཕྱིར་འདྲ་བའི་ནི་རྣམ་པར་འཇོག་པར་བྱེད་པ་ནི་བྱེད་པ་ཡིན་ནོ། །ངེས་པའི་ཤེས་པས་རྣམ་པར་གཞག་པ་ན་ཡང་ཤེས་པ་དེ་ཉིད་འབྲས་བུ་ཡིན་པ་དེའི་ཕྱིར་རྟོགས་པའི་ཆ་ནི་འབྲས་བུ་ཡིན་ལ། འདྲ་བའི་ཆ་ནི་སྒྲུབ་པར་བྱེད་པ་ཡིན་ནོ། །སྔ་ན་མེད་པའི་དཔོན་བརྗོད་པའི་ཕྱིར་བར་སྐབས་པར་མ་དོར་འཕྲོས་པའི་ཚིགས་སུ་བཅད་པའོ། །འདིས་ནི་ཞེས་བྱ་བ་ནི་འབྲེལ་པའི་རྒྱུ་མཚན་སྒྲུབ་པར་བྱེད་པ་གཞན་མེད་པར་བརྗོད་པས་སོ། །དབང་པོ་དང་ཕྲད་པ་དང་དོན་ལ་ལྟ་བ་དང་ཁྱད་པར་གྱི་ཤེས་པ་དེ་རྣམས་ཚད་མ་ཡིན་པ་སྤངས་པ་ཡིན་ནོ། །དེ་ལས་ཏེ་དབང་པོ་ལ་སོགས་པ་དེ་དག་ལས་ཤེས་པའི་སྔོན་པོ་དང་སེར་པོ་ལ་སོགས་པའི་ངེས་པའི་ལས་དང་འབྲེལ་པ་མྱོང་བ་
འདི་ནི་སྔོན་པོ་ཉིད་ཀྱི་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་དེ་མི་འགྲུབ་སྟེ། རྣམ་པར་མི་གནས་པའི་ཕྱིར་རོ། །དེས་ན་གང་གི་ཕྱིར་དེ་དག་ལས་ངེས་པ་དང་འབྲེལ་པའི་རྒྱུ་མ་ཡིན་པ་དེའི་ཕྱིར་ཚད་མ་མ་ཡིན་ནོ། །དོན་འདིར་སྔར་དེའི་བདག་ཉིད་མ་ཡིན་པ་ཞེས་བྱ་བ་འདིའི་ནང་དུ་བརྗོད་ཟིན་པ་མ་ཡིན་ནམ། ཡང་ཅིའི་ཕྱིར་འདིས་དབང་པོ་ལ་སོགས་པ་བརྗོད། སྨྲས་པ། སྔར་ནི་དབང་པོ་ལ་སོགས་པ་ཐ་དད་པའི་བྱེད་བྲག་དོན་ཐམས་ཅད་ཀྱི་ཐུན་མོང་བ་ཉིད་ཡིན་ནམ་མ་ཡིན་ཡང་རུང་སྟེ། ཤེས་པའི་བདག་ཉིད་དུ་གྱུར་པ་མ་ཡིན་ན་མི་ཤེས་པ་ཉིད་ཡིན་པ་དེའི་ཕྱིར་བྱེད་པ་མ་ཡིན་པ་དེས་ན་བདག་ཉིད་དུ་གྱུར་པ་ཁོ་ན་བྱེད་པ་ཡིན་པར་འགྱུར་ཞེས་བརྗོད་ལ། ད་ལྟར་ནི་གལ་ཏེ་དབང་པོ་ཐུན་མོང་བ་ཉིད་དང༌། ཁྱད་པར་དང་ཁྱད་པར་ཅན་གྱི་ཤེས་པ་དག་ཀྱང་བྱེ་བྲག་ཏུ་མི་འགྲུབ་པ་དང་འཆད་པར་འགྱུར་བའི་ཉེས་པ་གཞན་དུ་ཡང་མི་འགྱུར་ན་ནི་ཐ་དད་པ་ཡང་ཇི་ཞིག་ལྟར་བྱེད་པར་འགྱུར་བ་ཡིན་ནོ་ཞེས་བྱ་བ་ཡིན་པའི་ཕྱིར་ཟློས་པ་མ་ཡིན་ནོ། །འདི་དག་སྐྱེད་པར་བྱེད་པ་ཡིན་ན་ཇི་ལྟར་རྣམ་པར་འཇོག་པ་ཉིད་མ་ཡིན་ཏེ། འབྲས་བུར་གྱུར་པ་སྐྱེད་པར་ནུས་ན་རྣམ་པར་འཇོག་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། བར་དུ་མ་ཆོད་པ་མ་ཡིན་པའི་ཕྱིར་ཞེས་བྱ་བས་གཏན་ཚིགས་བརྗོད་དོ། །འདིའི་དོན་ནི་འདི་ཡིན་ཏེ། གང་གི་ཕྱིར་དོན་རྟོགས་པ་རྣམ་པར་གཞག་པ་ནི་སྐྱེད་པར་བྱེད་པ་འདི་དག་ལས་རྣམ་པར་འཇོག་པ་པོ་གཞན་ལ་ལྟོས་པ་ཡིན་ནོ། །དེས་ན་ལྟོས་པར་བྱེད་པ་གཞན་དེས་འདི་དག་བར་དུ་གཅོད་པ་དེའི་ཕྱིར། དེའི་ལྟོས་པར་བྱ་བ་གང་ཡིན་པ་དེ་ཉིད་རྣམ་པར་འཇོག་པ་པོ་ཡིན་གྱི་འདི་དག་ནི་མ་ཡིན་པ་དེས་ན་ཚད་མ་མ་ཡིན་ནོ། །འདི་སྙམ་དུ་བར་དུ་ཆོད་པ་ཡིན་དུ་ཆུག་པ་དེ་ལྟ་ན་ཡང་ཇི་ལྟར་ཚད་མས་མ་ཡིན་ཞེ་ན། བཤད་པ། བྱེད་པ་པོ་ཁྱད་པར་དུ་འཕགས་པ་ཁྱད་པར་ཅན་དེ་མི་འགྲུབ་པའི་ཕྱིར་རོ། །འདི་སྐད་བརྗོད་པ་ཡིན་ཏེ། བྱེད་པ་པོ་ཐམས་ཅད་ནི་ཚད་མ་མ་ཡིན་གྱི། འོན་ཀྱང་ཁྱད་པར་དུ་འཕགས་པ་ཡིན་ན། འདི་དག་ནི་ལྟོས་པར་བྱ་བ་གཞན་གྱིས་བར་ཆོད་པས་བྱེད་པ་པོ་གཞན་ལས་ཅུང་ཟད་ཀྱང་ཁྱད་པར་དུ་གྱུར་པ་མ་ཡིན་པས་དེ་ཇི་ལྟར་ཚད་མར་འགྱུར། ཚད་མས་ནི་སྒྲུབ་པར་བྱེད་པ་ཡིན་ལ་འདི་དག་ཀྱང་སྒྲུབ་པར་བྱེད་པ་ཉིད་
ཡིན་པ་དེའི་ཕྱིར་ཁྱད་པར་དུ་འཕགས་པས་ཅི་ཞིག་བྱ་ཞེ་ན། བཤད་པ། བྱེད་པ་པོ་རྣམས་ཐམས་ཅད་བསྒྲུབ་པར་བྱ་བ་ལ་ཉེ་བར་སྦྱོར་ཡང་ཐ་མའི་བྱེ་བྲག་ཏུ་བྱེད་པ་པོ་འདི་ཉིད་ཅེས་བྱ་བ་ལ་གང་ཞིག་ཐ་དད་པས་བྱ་བ་ཐ་དད་པར་འགྱུར་བ་དེ་ནི་ཐ་མའི་བྱེ་བྲག་ཏུ་བྱེད་པ་པོར་བརྗོད་པ་ཡིན་ཏེ། བྱེད་པ་པོ་རྣམས་ཐམས་ཅད་བྱེ་བྲག་ཏུ་བྱེད་པ་པོ་ཡིན་ཡང་ལྟོས་པར་བྱ་བ་བྱེ་བྲག་ཏུ་བྱེད་པ་པོ་གཞན་གྱིས་བྱེ་བྲག་ཏུ་བྱེད་པ་གང་ཞིག་བསྒྲུབ་པར་བྱ་བའི་བར་དུ་མ་ཆོད་པ་དེ་ཐ་དད་པས་བསྒྲུབ་པར་བྱ་བ་ཐ་དད་པར་འགྱུར་བ་ཡིན་ལ། དེ་ཡང་ཐ་མའི་བྱེ་བྲག་ཏུ་བྱེད་པ་པོ་ཉིད་ཡིན་པས་བྱེད་པས་བརྗོད་དོ། །དེ་ལྟ་བུར་གྱུར་པ་དེ་ཉིད་སྒྲུབ་པར་བྱེད་པ་དེ་དམ་པ་ཡིན་པའི་ཕྱིར་རོ། །དོན་འདི་ཡིན་ཏེ། གལ་ཏེ་བྱེད་པ་པོ་ཐམས་ཅད་བྱེ་བྲག་ཏུ་བྱེད་པ་པོ་ཡིན་ཡང༌། དེ་ལྟ་ན་ཡང་ཐ་མའི་བྱེ་བྲག་ཏུ་བྱེད་པ་པོ་གང་ཡིན་པ་དེ་ཉིད་སྒྲུབ་པར་བྱེད་པ་དམ་པ་ཡིན་ལ། སྒྲུབ་པར་བྱེད་པ་དམ་པ་གང་ཡིན་པ་དེ་ནི་བྱེད་པ་ཡིན་ཞིང་བྱེད་པ་ཡང་ཚད་མ་ཡིན་ནོ། །དེས་ན་དབང་པོ་ལ་སོགས་པ་ཡོད་ཀྱང་ཡུལ་དང་ཡུལ་ལ་ཁྱད་པར་མེད་ན་ཤེས་པ་འདིའི་བྱེ་བྲག་ཏུ་བྱེད་པ་པོ་གཞན་གང་ཡིན་པ་དེ་ཉིད་ནི་བྱེད་པ་པོ་ཡིན་གྱི། བར་དུ་ཆོད་པའི་དབང་པོ་ལ་སོགས་པ་ནི་མ་ཡིན་ནོ། །ཡང་ཇི་ལྟར་ན་ཐ་མའི་བྱེ་བྲག་ཏུ་བྱེད་པ་པོ་ལ་ལྟོས་ན་དབང་པོ་ལ་སོགས་པ་ཡོད་ཀྱང་ཞེས་སྨྲ་ཞེ་ན། བཤད་པ། གང་གི་ཕྱིར་དབང་པོ་ནི་བྱེ་བྲག་ཏུ་བྱེད་པ་པོ་མ་ཡིན་ཏེ། དེའི་ཕྱིར་ཐ་མ་ལ་ལྟོས་སོ། །སྔོན་པོ་དང་སེར་པོ་ལ་སོགས་པར་སྣང་བའི་རྣམ་པར་ཤེས་པ་ཐམས་ཅད་རྣམ་པར་རྟོག་པའི་རྒྱུ་ཡིན་པའི་གཏན་ཚིགས་ཀྱི་ཕྱིར་དབང་པོ་རྣམས་ནི་བྱེ་བྲག་ཏུ་བྱེད་པ་པོ་མ་ཡིན་ནོ། །གང་དཔྱོད་པ་པོས་ཁས་བླངས་པའི་དོན་ལ་ལྟ་བ་ཡང་ཚད་མ་མ་ཡིན་ཏེ། རྣམ་པར་རྟོག་པའི་ཤེས་པའི་རྒྱུ་རྣམ་པར་རྟོག་པ་མེད་པ་དང་པོར་ལྟ་བའི་ཤེས་པ་ནི་ཆད་མ་ཡིན་ནོ་ཞེའོ། །ལྟ་བའི་ཤས་པ་ལ་སོགས་པ་ཐོབ་པའི་ཤེས་པ་མཐར་ཐུག་པ་དེ་དག་གི་སྔ་མ་སྔ་མ་ནི་ཚད་མ་ཡིན་ལ། ཕྱི་མ་ཕྱི་མ་ནི་འབྲས་བུ་ཡིན་ནོ་ཞེ་ན། དེ་ཡང་ཚད་མ་མ་ཡིན་ཏེ། དེའི་རང་བཞིན་ལྟ་བུ་གང་ཡིན་པ་དེ་མ་ཡིན་ན་ཤེས་བ་དེའི་དོན་ལ་ལྟ་བ་དེ་ཉིད་མི་འགྲུབ་པའི་རྒྱུ་དེའི་ཕྱིར་རོ། །གལ་ཏེ་འདི་ནི་དོན་སྔོན་པོའི་ལྟ་བ་ཡིན་ན་ཞེས་གྲུབ་ན་ནི་དེའི་ཚེ་དེ་ཕྱིས་འབྱུང་བའི་ཁྱད་
པར་གྱི་རྣམ་པར་རྟོག་པ་ལ་ལྟོས་ནས་ཚད་མར་གྲུབ་པ་ཡིན། གང་གི་ཕྱིར་འདྲ་བ་མེད་པའི་ཕྱིར། དོན་ལ་ལྟ་བ་ཉིད་མ་གྲུབ་བོ། །དེ་བཞིན་དུ་ཞེས་བྱ་བ་ནི་ཁྱད་པར་གྱི་ཤེས་པ་ཚད་མ་མ་ཡིན་པའོ། །རིགས་པ་པ་དང་བྱེ་བྲག་པས་ཁྱད་པར་གྱི་ཤེས་པ་ནི་ཚད་མ་ཡིན་ལ། ཁྱད་པར་ཅན་གྱི་ཤེས་པ་ནི་འབྲས་བུ་ཞེས་བྱ་བར་རྟོགས་ཏེ། ཇི་ལྟར་དུ་ཁྱད་པར་མ་བཟུང་བར་ཁྱད་པར་ཅན་གྱི་བློར་མི་འགྱུར་རོ་ཞེས་སྨྲས་པ་ཡིན་ནོ། །ཡུལ་གྱིས་ཁྱད་པར་དུ་མ་བྱས་པའི་ཁྱད་པར་གྱི་ཤེས་པ་རྣམ་པ་མེད་པ་གང་ཡིན་པ་དེའི་ཁྱད་པར་ཅན་འཛིན་པའི་ཤེས་པ་རྣམ་པ་མེད་པ་ལས་ཁྱད་པར་མེད་པའི་ཕྱིར། འདི་ནི་ཁྱད་པར་ཅན་གྱི་ཤེས་པ་ལ། འདི་ནི་ཁྱད་པར་གྱི་ཤེས་པའོ་ཞེས་རྣམ་པར་གཞག་པ་མི་འགྲུབ་སྟེ། འགྲུབ་པ་མ་ཡིན་པའི་རྒྱུའི་ཕྱིར་རོ། །གལ་ཏེ་ཁྱད་པར་ཅན་དང་ཁྱད་པར་གྱི་ཤེས་པ་དག་རྣམ་པར་དབྱེ་ནུས་ན་ནི་ཆད་མར་ཡང་འགྱུར་བ་ཡིན་གྱི། གལ་ཏེ་རྣམ་པ་མེད་པ་ཉིད་ཀྱིས་རྣམ་པར་དབྱེ་བར་བྱ་མི་ནུས་པ་དེའི་ཚེ་ནི་ཁྱད་པར་གྱི་ཤེས་པ་ཚད་མར་མི་འགྱུར་རོ། །གཞན་ཡང་བསྒྲུབ་པར་བྱ་བ་དང་སྒྲུབ་པར་བྱེད་པ་ཡུལ་ཐ་དད་པ་དུ་མ་ཉིད་འགལ་བ་ཡང་ཡིན་ནོ། །འདི་ལྟར་འདེགས་པ་དང་འབབ་པའི་བྱ་བ་དང་ལྡན་པའི་སྟེའུ་དེ་ནི་དྷ་བ་ལ་སོགས་པ་ཡོད་ལ། ཚད་མའི་བསྒྲུབ་པར་བྱ་བ་ནི་དེ་ལས་གཞན་ལ་འགྲུབ་པ་མ་ཡིན་པ་དེ་བཞིན་དུ་འདིར་ཁྱད་པར་གཞན་ཉིད་ནི་དེའི་ཤེས་པས་གཟུང་བ་ཡིན་ལ། ཁྱད་པར་ཅན་གྱི་ཤེས་པས་གཟུང་བ་ཡང་གཞན་ཉིད་ཡིན་པའི་ཕྱིར་ན་འདི་ནི་ཉམས་པ་ཡིན་ཏེ། རྒྱུ་དེས་ན་ཁྱད་པར་གྱི་ཤེས་པ་ནི་ཚད་མ་མ་ཡིན་ནོ། །ཅི་སྟེ་ཉེས་པ་འདིར་མ་གྱུར་ཅིག་ཅེས་ཁྱད་པར་དང་ཁྱད་པར་ཅན་གྱི་ཤེས་པ་དག་ཡུལ་ཐ་དད་པ་ཉིད་དུ་ཁས་ལེན་ཏེ། དེ་ཡུལ་ཐ་དད་པ་མེད་པ་གང་ཡིན་པ་དེ་ཉིད་དུ་ཁས་ལེན་ན་ནི་གཉིས་དོན་མེད་དོ། །དོན་དང་བྲལ་བ་ཡིན་ནོ། །ཁྱད་པར་གྱི་ཤེས་པ་ཉིད་ཀྱིས་དོན་རྟོགས་པ་འགྲུབ་པའི་ཕྱིར་ཁྱད་པར་ཅན་གྱི་ཤེས་པ་ནི་ཅུང་ཟད་ཀྱང་བྱེད་པར་འགྱུར་བ་མ་ཡིན་ནོ། །འདིས་ནི་ལྟ་བ་དང་ཁྱད་པར་ཅན་གྱི་རྣམ་པར་རྟོག་པ་དག་ཀྱང་ཡུལ་གཅིག་པ་ཉིད་ཡིན་ན་གཉིས་དོན་མེད་པ་
ཡིན་ནོ་ཞེས་བརྗོད་པ་ཡིན་ནོ། །གཞན་ཡང་རྒྱུ་ཐ་དད་པ་མེད་པ་དག་ནི་རིམ་གྱིས་འབྱུང་བ་དེ་བཀག་པ་ཡིན་ནོ། །ཁྱད་པར་ཅན་དང་ཁྱད་པར་གྱི་ཤེས་པའི་རྒྱུ་ནི་ཡུལ་ཡིན་ན། རྒྱུ་གཅིག་ལས་ནི་རིམ་པ་ཅན་གཉིས་འབྱུང་བར་རིགས་པ་མ་ཡིན་ཏེ། འབྲས་བུ་མེད་པར་ནུས་པ་ནི་སྡོད་པར་མི་རིགས་པའི་ཕྱིར་དང༌། མི་ནུས་ན་ཡང་ལྷན་ཅིག་བྱེད་པ་ལ་མ་ལྟོས་པ་འབྲས་བུ་བྱེད་པར་མི་འཐད་པའི་ཕྱིར་རོ། །འདི་སྙམ་དུ་ཁྱད་པར་ཅན་དང་ཁྱད་པར་ཅན་གྱི་ཤེས་པ་དག་ཅིག་ཅར་འབྱུང་བ་དེས་ན་རྒྱུ་ཐ་དད་པ་མེད་ཀྱང་ཉེས་པ་མེད་དོ་སྙམ་ན། དེ་ལྟར་ན་ནི་འོ་ན་ཅིག་ཅར་འབྱུང་བ་ལ་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་ཉིད་མི་འཐད་དོ། །ཅིག་ཅར་སྐྱེ་བ་དག་ལ་ནི་ཕན་གདགས་བྱ་འདོགས་བྱེད་ཀྱི་དངོས་པོ་མེད་པའི་ཕྱིར་གཡས་ཕྱོགས་དང་ཅིག་ཤོས་ཀྱི་རྭ་བཞིན་དུ་རྒྱུ་དང་འབྲས་བུ་ཡོད་པ་མ་ཡིན་ནོ། །དེའི་ཕྱིར་དེ་ལྟ་བུར་ཡུལ་ཐ་དད་པའི་ཤེས་པ་གཉིས་ལ་ནི་བསྒྲུབ་པར་བྱ་བ་དང་བྱེད་པ་མེད་ལ་ཡུལ་གཅིག་ཉིད་ཡིན་ན་ནི་གཉིས་པ་དོན་མེད་པ་དང་རིམ་གྱིས་འབྱུང་བར་མི་འཐད་པ་དང༌། ཅིག་ཅར་ལ་བསྒྲུབ་བྱ་སྒྲུབ་བྱེད་ཀྱི་དངོས་པོ་མེད་པའི་ཕྱིར་ཇི་ལྟར་རིགས་པར་རིག་པ་ཅན་རྣམས་ཀྱི་ཁྱད་པར་ཅན་དང་ཁྱད་པར་གྱི་ཤེས་པ་དང་དཔྱོད་པ་པོ་རྣམས་ཀྱི་དོན་ལ་ལྟ་བ་དང༌། ཁྱད་པར་གྱི་རྣམ་པར་རྟོག་པ་དག་ལ་ཡང་སྦྱར་བར་བྱའོ། །ཇི་སྟེ་གལ་ཏེ་ཁོ་བོ་ཅག་ལ་དུས་གཅིག་པའི་ཕྱིར་བསྒྲུབ་པར་བྱ་བ་དང་སྒྲུབ་པར་བྱེད་པར་མི་འགྱུར་ན། འོ་ན་ཁྱེད་ཀྱི་ཅིག་ཅར་བ་དང་ཐ་དད་མ་མེད་པ་དེ་ལྟ་ཇི་ལྟར་བསྒྲུབ་བྱ་སྒྲུབ་བྱེད་ཀྱི་དངོས་པོར་འགྱུར་ཞེ་ན། སྨྲས་པ། ཤེས་པའི་ཆ་མི་འདྲ་བ་ལས་ལོག་པ་དང་བློའི་རང་བཞིན་མ་ཡིན་པ་ལས་ལོག་པས་འདྲ་བ་དང་བློའི་རང་བཞིན་ཉིད་དུ་རྣམ་པར་གཞག་པའི་མཚན་ཉིད་དེ་དག་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོར་འཐད་པ་ཡིན་ནོ་ཞེས་བྱ་བ་ནི་ལྷག་མའོ། །རྣམ་པར་གཞག་པས་རྣམ་པར་གཞག་པ་སྟེ། རྣམ་པར་འཇོག་པར་བྱེད་པ་དང༌། རྣམ་པར་གཞག་པར་བྱ་བའོ། །རྣམ་པར་གཞག་པ་དེ་གཉིས་ལ་བརྟེན་པ་དེའི་དངོས་པོ་ནི་དེ་ཉིད་དེ་དེའི་ཕྱིར་རོ། །དོན་ནི་འདི་ཡིན་ཏེ། ཁོ་བོ་ཅག་གི་བསྒྲུབ་པར་བྱ་བ་དང་སྒྲུབ་པར་བྱེད་པ་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་ནི་མ་ཡིན་གྱི་འོན་ཀྱང་རྣམ་པར་གཞག་འཇོག་
གི་དངོས་པོ་ཡིན་ནོ། །དེའི་ཕྱིར་ན་ཆ་འགའ་ཞིག་རྒྱུ་མཚན་དུ་བྱེད་ནས་འདི་ནི་སྔོན་པོ་མྱོང་བའོ་ཞེས་ཤེས་པ་ལ་ཐ་སྙད་དུ་བྱེད་པའི་ཐ་སྙད་ཀྱི་རྒྱུ་མཚན་གྱི་ཆ་གཅིག་པོ་དེ་ནི་ཚད་མ་ཡིན་ལ། གཞན་ཐ་སྙད་དུ་བྱ་བའི་ཆ་ནི་འབྲས་བུ་ཡིན་ནོ། །བསྒྲུབ་པར་བྱ་བ་དང་བྱེད་པ་གང་ཡིན་པ་གཅིག་པས་སོ། །ཅིའི་ཕྱིར་ཞེ་ན། སྨྲས་པ། དངོས་པོ་སྟེ་དོན་དམ་པའི་རང་བཞིན་ཐ་དད་པ་མེད་པ་སྟེ་གཅིག་པའི་ཕྱིར་རོ། །དོན་འདི་ཡིན་ཏེ། ཤེས་པའི་ཆ་དག་ནི་གཅིག་ཡིན་པའི་ཕྱིར་བསྒྲུབ་པར་བྱ་བ་དང༌། བྱེད་པ་བདག་ཉིད་གཅིག་པར་ཐལ་བར་དེ་ཡང་འགལ་བ་ཡིན་ནོ། །བསྒྲུབ་པར་བྱ་བ་གང་ཡིན་པ་དེ་ཉིད་ནི་གྲུབ་པ་ཡང་མ་ཡིན་ན། གང་གི་སྒྲུབ་པར་བྱེད་པ་འགྱུར་ཞེས་གཞན་དག་དེ་ལྟར་དོགས་པ་ལ། བཤད་པ། དེ་ནི་དེ་ལྟར་མ་ཡིན་ཏེ། དེ་དག་ནི་གཅིག་མ་ཡིན་ནོ་ཞེས་བྱ་བའི་དོན་ཏོ། །གཏན་ཚིགས་བཤད་པ། ཕན་ཚུན་ལྡོག་པར་བརྟགས་པའི་ངོ་བོ་ཉིད་ཀྱི་ཆོས་ཐ་དད་པ་སྣ་ཚོགས་པ་དེ་ཁས་བླངས་པའི་གཏན་ཚིགས་ཀྱི་ཕྱིར་རོ། །གལ་ཏེ་ཤེས་པའི་ཆ་དེ་དག་དོན་དམ་པའི་ཐ་དད་པ་མེད་པ་དེ་ལྟ་ན་ཡང་འདྲ་བ་དང་དོན་རྟོགས་པའི་རང་བཞིན་ལྡོག་པ་གཞན་ལ་ལྟོས་ནས་བརྟགས་པའི་ཐ་དད་པར་འགྱུར་རོ། །བསྒྲུབ་པར་བྱ་བ་དང་སྒྲུབ་པར་བྱེད་པའི་ཐ་སྙད་ནི་དོན་དམ་པ་པ་ལ་བརྟེན་པ་མ་ཡིན་གྱི། འོན་ཀྱང་བརྟགས་པའི་རང་བཞིན་ལ་བརྟེན་པ་ཡིན་ནོ། །དེས་ན་གང་ལ་ཐ་དད་པ་མེད་པ་དེ་ལ་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་ཡོད་པ་མ་ཡིན་ལ། གང་ལ་བརྟགས་པའི་རང་བཞིན་གྱི་བསྒྲུབ་པར་བྱ་བ་དང་སྒྲུབ་པར་བྱེད་པ་ཡོད་པ་དེ་ལ་ནི་ཐ་དད་པ་ཉིད་ཡིན་པའི་ཕྱིར་མི་འགལ་ལོ། །འདི་སྙམ་དུ་འོ་ན་ནི་ཁྱེད་ཀྱིས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་བརྟགས་པ་ཡིན་པར་ཐལ་ལ། འཇིག་རྟེན་ན་དོན་དམ་པ་མཐོང་བ་ཡང་ཡིན་ནོ་ཞེས་དོགས་པ་ལ་བཤད་པ། བསྒྲུབ་པར་བྱ་བ་དང་སྒྲུབ་པར་བྱེད་པའི་ཐ་སྙད་འདི་དངོས་པོ་ལ་གནས་པ་ནི་མ་ཡིན་ཏེ། འདི་ལྟར་ལྷ་སྦྱིན་འཚེད་དོ་ཞེས་བྱ་བ་ལ་ཕྲུ་བ་འཛུགས་པའི་བྱ་བ་འཚེད་པ་ཞེས་བྱ་བ་བྱེད་པ་པོ་ལས་ལྡོག་པ་ནི་ཅུང་ཟད་ཀྱང་ཡོད་པ་མ་ཡིན་གྱི། བྱ་བ་དེ་ལྟ་བུའི་བདག་ཉིད་ཅན་གྱི་ལྷ་སྦྱིན་གྱི་རང་བཞིན་ཉིད་ལ་འཚེད་པ་ཞེས་བྱ་བར་བསྟན་ཏོ། །དེ་བཞིན་
དུ་སྟ་རེས་གཅོད་ཅེས་བྱ་བ་ཡང་ཤིང་ལ་འཇུག་པ་ལྷུར་ལེན་པའི་སྟ་རེའི་རང་བཞིན་ལ་བསྟན་ཏོ། །འདི་སྙམ་དུ་དེ་ལྟ་ན་ཡང་དོན་དམ་པར་བྱ་བ་དང་བྱེད་པ་དག་ཐ་དད་པ་ཡང་མཐོང་བ་ཉིད་ཡིན་ན། ཁྱེད་ཀྱིས་ནི་ཐ་མི་དད་པ་ཁོ་ནའོ་སྙད་དུ་དོགས་པ་ལ། འཁྲུལ་པར་བསྟན་པའི་ཕྱིར་རྣོན་དུ་དངོས་པོ་ཐ་དད་པ་མེད་ཀྱང་ཞེས་བྱ་བ་སྨོས་སོ། །ཇི་ལྟར་བུད་ཤིང་དང་འབྲས་ཆན་ཚོས་པ་དོན་དམ་པར་ཐ་དད་པར་དེ་ལྟར་ཐམས་ཅད་དུ་ནི་མ་ཡིན་ཏེ། འདི་ལྟར་དངོས་པོ་ཐ་དད་པ་མེད་དེ་གཅིག་ཀྱང་ནུས་པ་བསྒྲུབ་པར་བྱ་བའི་རྒྱུ་མཚན་གྱི་བྱེ་བྲག་གིས་ཏེ། ཐ་དད་པར་བསྒྲུབ་པར་བྱ་བ་དང་སྒྲུབ་བར་བྱེད་པའི་ཡུལ་གྱི་རྣམ་པར་གཞག་པ་ཐ་དད་པའི་གཏན་ཚིགས་ཀྱི་ཕྱིར་རོ། །དངོས་པོ་གཅིག་ལ་ཡང་དེ་དང་དེའི་ནུས་པ་དང་ལྡན་པ་ལས་བྱེད་པ་པོ་དང་ལས་དང་བྱེད་པ་པོའི་དངོས་པོ་དང་བསྒྲུབ་པར་བྱ་བའི་རང་བཞིན་རྣམས་རྣམ་པར་འཇོག་ལ། བསྒྲུབ་པར་བྱ་བ་དེ་སྒྲུབ་པར་བྱེད་པ་རྣམས་ལས་སམ། སྒྲུབ་པ་པོར་བྱེད་པ་པོ་རྣམས་ཕན་ཚུན་ཐ་དད་པ་ནི་ཅུང་ཟད་ཀྱང་མེད་དེ། དཔེར་ན་བདག་གིས་བདག་འཚོག་གོ་ཞེས་བྱ་བ་འདི་ལ་ལས་ལ་སོགས་པའི་ནུས་བ་དང་ལྡན་པའི་ཕྱིར་དང༌། བསྒྲུབ་བྱའི་རང་བཞིན་གྱི་རྗེས་སུ་འགྲོ་བའི་ནུས་པ་དང་ལྡན་པའི་ཕྱིར་དེ་ཉིད་ལ་འཚོག་པ་པོ་དང༌། བརྩོག་པར་བྱ་བ་དང་སྒྲུབ་པར་བྱེད་པར་སྨྲས་པ་བཞིན་ནོ། །དེའི་ཕྱིར་བུད་ཤིང་དང་འབྲས་ཆན་ཚོས་པ་བཞིན་དུ་ཐམས་ཅད་དུ་བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་ནི་མ་ཡིན་ནོ། །དེ་བཞིན་དུ་རྣམ་པར་ཤེས་པ་གཅིག་ལ་ཡང་རང་བཞིན་གྱི་ཁྱད་པར་གྱིས་བྱེད་པ་དང་བསྒྲུབ་པར་བྱ་བར་འགྱུར་རོ། །འདི་ནི་སྐབས་དང་རྗེས་སུ་མཐུན་པར་སྨྲས་པ་ཡིན་ཏེ། བྱེད་པ་པོ་ཡང་རྣམ་པར་ཤེས་པ་ཉིད་ཡིན་ནོ། །དེའི་ཕྱིར་དེ་ལྟར་ཐ་སྙད་ལ་བརྟེན་པའི་རྣམ་པར་གཞག་འཇོག་གི་དངོས་པོ་ལ་དོན་དམ་པར་ཐ་དད་མེད་ཀྱང་འགལ་བ་ཡོད་པ་མ་ཡིན་ནོ། །ཕྲད་པ་ནི་དོན་སོ་སོ་ལ་ཐ་དད་པ་ནི་སྣང་བ་དང་འདྲ་བར་བྱེ་བྲག་ཏུ་བྱེད་པ་པོ་ཡིན་པ་དེས་ན། ཐ་ན་དེ་ཡང་བསལ་ནས་སྣང་བ་ཁོ་ན་བྱེ་བྲག་ཏུ་བྱེད་པ་པོར་ངེས་པར་གཞག་པའི་ཕྱིར་བསྟན་པའི་རིམ་པ་ལས་བཟློག་ནས་ཕྲད་པ་ཡང་ཞེས་སྨོས་པས་རྣམ་པར་དཔྱོད་པར་མཛད་དོ། །མིག་ལ་སོགས་པ་འབའ་ཞིག་ཚད་མ་མ་ཡིན་པར་མ་ཟད་ཀྱི། སྣང་བ་དང་
འདྲ་བར་དོན་སོ་སོ་ལ་ཐ་དད་པའི་ཕྲད་པ་ཡང་ཚད་མ་མ་ཡིན་ནོ། །བདག་ཉིད་ཐམས་ཅད་ཀྱིས་དོན་དེ་གང་དང་གང་ལས་ལྡོག་པའི་བདག་ཉིད་ཀྱི་དོན་དེ་དང་དེ་ལས་ལྡོག་པའི་རང་བཞིན་གྱི་བདག་ཉིད་ཀྱིས་ཕྲད་པ་སྟེ། དོན་དེ་དབང་པོ་དང་འབྲེལ་པའོ། །གང་གི་ཕྱིར་ཕྲད་པ་ནི་དབང་པོ་དང་དོན་དག་འབྲེལ་པ་ཡིན་ལ། ཕྲད་པར་གྱུར་པ་དེའི་ཆོས་ཏེ་ལྡོག་པའི་རྒྱུ་མཚན་ཅན་འགའ་ཞིག་ཁོ་ནའི་ངོ་བོ་རྟོགས་པ་སྟེ་དེས་པའི་ཕྱིར་རོ། །འདི་ལྟར་ཚད་མ་ནི་དོན་རྟོགས་པའི་རྒྱུ་མཚན་ཡིན་ནོ། །ཕྲད་པ་དོན་རྟོགས་པའི་རྒྱུ་མཚན་ཡིན་ན་ནི་ཐམས་ཅད་ལས་ལྡོག་པའི་དངོས་པོ་དང་ཕྲད་པ་ན། ལྡོག་པ་ཐམས་ཅད་ཀྱི་ཡུལ་ཅན་གྱི་རྟོགས་པ་སྐྱེ་བར་འགྱུར་ན། དེ་ལྟ་ཡང་མ་ཡིན་ནོ། །དེའི་ཕྱིར་རྒྱུ་མཚན་གང་ལས་ཕྲད་པ་བྱེད་བྲག་མེད་ཀྱང་ངེས་པའི་ཆོས་ངེས་པར་འགྱུར་བ་དེ་ཉིད་ཚད་མར་རིགས་ཏེ། ལྡོག་པར་བྱ་བའི་རྒྱུ་མཚན་གཞན་གྱིས་མ་ཆོད་པར་བྱེ་བྲག་ཏུ་བྱེད་པ་པོ་ནི་སྒྲུབ་པར་བྱེད་པ་ཡིན་པའི་ཕྱིར་དང༌། ཕྲད་པ་དེ་ཡུལ་གྱི་བདག་ཉིད་ཐམས་ཅད་ལ་ཁྱད་པར་མེད་ན་ཡང་ཡུལ་ངེས་པའི་བདག་ཉིད་རྟོགས་པའི་ཁྱད་པར་འདི་ནི་འདིའོ་ཞེས་བྱ་བ་ཉམས་སུ་མྱོང་བས་གྲུབ་པ་ནི་བློའི་སྣང་བ་དོན་དང་འདྲ་བས་བྱས་པ་དེས་ན་རྣམ་པར་འཇོག་བར་བྱེད་པ་གཞན་གྱི་བྱ་བས་བར་དུ་མཆོད་པ་དེ་ཉིད་ཚད་མར་རིགས་སོ། །ཇི་ལྟར་དངོས་པོའི་རང་བཞིན་ལ་བརྟེན་པའི་ཕྲད་པ་བདག་ཉིད་ཐམས་ཅད་ལ་ཁྱད་པར་མེད་པ་དེ་ལྟར་མངོན་སུམ་གྱི་སྣང་བ་ཡང་དངོས་པོ་དེ་ལ་བརྟེན་པའི་ཕྱིར་བདག་ཉིད་ཐམས་ཅད་ལ་ཐུང་མོང་དུ་འགྱུར་པ་མ་ཡིན་ནམ། །འདི་ལྟར་དཔེར་ན་མངོན་སུམ་དོན་དེའི་སྔོན་པོ་ཉིད་ཀྱི་རྗེས་སུ་བྱེད་པ་དེ་བཞིན་དུ་སྐད་ཅིག་མ་ཉིད་ཀྱི་ཡང་ཡིན་བ་དེས་ན་ཐུན་མོང་ཡིན་པའི་ཕྱིར་ལྡོག་པའི་ཁྱད་པར་ངེས་བར་ཤེས་པའི་རྒྱུ་མ་ཡིན་པའི་ཕྱིར་བློའི་རྣམ་པས་བྱས་ཞེས་ཅིའི་ཕྱིར་བརྗོད་ཅེ་ན། བདེན་མོད་ཀྱི་འོན་ཀྱང་ངས་པ་ནི་ཉམས་སུ་མྱོང་བའི་ཡུལ་ཅན་ཡིན་པ་དེས་ན། སྔོན་པོ་ཉམས་སུ་མྱོང་བ་ལས་སེར་པོ་ཉམས་སུ་མྱོང་བ་རང་བཞིན་ཁྱད་པར་མེད་ན་ཉམས་སུ་མྱོང་བ་ཁྱད་པར་དུ་ངེས་པར་མི་འགྱུར་རོ་ཞེས་བྱ་བ་འདི་ཅིག་ཏུ་ངེས་པ་ཡིན་གྱི། ཉམས་སུ་མྱོང་བའི་ཁྱད་པར་ཐམས་ཅད་དེས་པ་ཡིན་ནོ་ཞེས་བྱ་བ་འདི་ནི་ཅིག་ཏུ་ངེས་པ་མ་ཡིན་ཏེ། རྐྱེན་གཞན་ལས་ཉམས་སུ་མྱོང་
བ་ངེས་པར་འགྱུར་བའམ་མི་འགྱུར་བ་ཡང་སྲིད་པའི་ཕྱིར་རོ། །དེ་ལ་སྣང་བ་ཉམས་སུ་མྱོང་བ་ནི་གསལ་བ་ལ་སོགས་པའི་རྐྱེན་ལ་ལྟོས་ནས་བདག་ཉིད་ལ་ངེས་པ་སྐྱེད་པར་བྱེད་ལ། སྣང་བ་ངེས་པ་ཉིད་ཀྱང་དོན་གྱི་ཁྱད་པར་རྟོགས་པར་རྣམ་པར་གཞག་པ་ཡིན་ཏེ། མཐོང་བ་འདི་ནི་སྔོན་པོའོ་ཞེས་གཟུང་བའི་རྣམ་པ་རྣམ་པར་ཆད་པར་ངེས་པ་གང་ཡིན་པ་འདི་ཉིད་སྔོན་པོའི་དོན་རྟོགས་པ་ཡིན་པའི་ཕྱིར་རོ། །དེས་ན་སྣང་བ་ཉམས་སུ་མྱོང་བ་ནི་ངེས་པའི་རྐྱེན་པ་ལྟོས་ནས་ངེས་པའི་དོན་ལ་རྟོགས་པ་རྣམ་པར་གནས་པའི་རྒྱུ་ཡིན་ནོ། །གང་གིས་ངེས་པའི་རྐྱེན་དང་ལྷན་ཅིག་པའི་ཕྲད་པ་ཚད་མར་འགྱུར་བ་ཕྲད་པ་ངེས་པ་ཉིད་ནི་དེ་ལྟར་དོན་རྟོགས་པར་རྣམ་པར་གཞག་པ་མ་ཡིན་ནོ། །ཕྲད་པས་ངེས་པ་ནི་དོན་ངེས་པ་མ་ཡིན་ཏེ། ཕྲད་པ་ནི་ལྟན་པ་ཡིན་པས་ལྡན་པ་པོ་མ་བཟུང་ན་ཇི་ལྟར་འཛིན། འཁར་བ་མ་བཟུང་བར་འཁར་བ་ཅན་མི་འཛིན་པ་དེ་བཞིན་དུ་ལྡན་པ་པོས་ཁྱད་པར་དུ་བྱས་པའི་ལྡན་པ་ནི། ལྡན་པ་པོས་མེད་པར་མི་འཛིན་པ་དེས་ན་ལྡན་པ་ངེས་པ་ནི་ལྡན་པ་ངེས་པ་ནི་ལྡན་པ་པོ་སྔོན་དུ་བཟུང་བ་ལ་ལྟོས་པ་ཡིན་ནོ། །ལྡན་པ་པོ་ངེས་པ་ཡང་རྒྱུ་མེད་པར་མི་འཐད་པས་དེ་མ་དེས་ན་དེའི་ཁྱད་པར་ཅན་ལྡན་པ་ངེས་པ་མ་ཡིན་ནོ། །དོན་གྱི་སྤྱི་དང་ཕྲད་པ་ཡོད་པ་དེ་ལྟ་ན་ཡང་སྤྱིའི་རང་བཞིན་གྱི་ཡུལ་དང་ཕྲད་པར་ངེས་པ་ན། རྒྱུ་མཚན་གཞན་འགའ་ཞིག་ལས་ཁྱད་པར་ཅན་གྱི་དོན་དང་ཕྲད་པར་ངེས་པ་དེ་ཉིད་བྱེད་པ་ཡིན་གྱི་ཕྲད་པ་ནི་མ་ཡིན་ནོ། །དོན་རྣམ་པར་གནས་པ་ཕྲད་པ་ངེས་པ་ཉིད་མ་ཡིན་པ་འབའ་ཞིག་ཏུ་མ་ཟད་ཀྱི། ཕྲད་པ་དེས་པའི་རྒྱུ་ཅན་དུ་ཡང་འཐད་པ་མ་ཡིན་ཏེ། སྤྱིའི་རང་བཞིན་དང་ཕྲད་པར་ངེས་པ་ན་ཁྱད་པར་རྟོགས་པར་མི་འཐད་པའི་ཕྱིར་དང༌། ཁྱད་པར་ཕྲད་པར་ངེས་པ་ཡང་དོན་གྱི་ཁྱད་པར་རྟོགས་པ་སྔོན་དུ་འགྲོ་བ་ཅན་ཡིན་པའི་ཕྱིར་དང༌། དོན་གྱི་ཁྱད་པར་རྟོགས་པ་ཡང་རྒྱུ་མཚན་མེད་པར་མི་འཐད་པའི་ཕྱིར་རོ། །གང་ཞིག་ངེས་པས་དོན་ངེས་པར་འགྱུར་བ་དེ་ཉིད་ནི་ཉམས་སུ་མྱོང་བར་གྱུར་པ་ན། ངེས་པའི་རྐྱེན་ལ་ལྟོས་ནས་རྣམ་པར་འཇོག་པའི་རྒྱུར་བརྗོད་པ་ཡིན་ཏེ། དེའི་ཕྱིར་ཕྲད་པ་ནི་ངེས་པའི་རྐྱེན་ལ་ལྟོས་ནས་ཁྱད་པར་ཅན་གྱི་དོན་རྟོགས་པ་རྣམ་པར་འཇོག་པའི་ཚད་མ་མ་ཡིན་ནོ། །ཡང་ཇི་ལྟར་ཕྲད་པ་དོན་ངེས་པ་ལ་ལྟོས་ནས་རྟོགས་པ་དེ་བཞིན་དུ་སྣང་བ་ནི་དོན་ངེས་པ་ལ་ལྟོས་ནས་རྟོགས་པར་འགྱུར་བ་མ་
ཡིན་གྱི། འོན་ཀྱང་སྔོན་པོར་སྣང་བ་ཉིད་ལ་སྔོན་པོ་ཉིད་དུ་ངེད་པར་བྱེད་དོ། །སྔོན་པོར་སྣང་བ་ངེས་པ་དེ་ཉིད་ནི་དོན་རྣམ་པར་གཞག་པ་ཡིན་ཏེ། དེས་ན་རྣམ་པར་འཇོག་པའི་རྒྱུ་ནི་སྣང་བ་ཉིད་དོ། །ཕྲད་པ་ནི་རང་ཉིད་ངེས་པར་ཤེས་པའི་དབང་གིས་རྣམ་པར་འཇོག་པར་བྱེད་པའི་ཚད་མར་ཕ་རོལ་གྱིས་ཁས་བླངས་པ་མ་ཡིན་གྱི། འོན་ཀྱང་ཤེས་པའི་རྒྱུ་ཡིན་པ་ཉིད་ཀྱིས་སོ། །བདག་ཉིད་ཐམས་ཅད་ཀྱིས་ཉེ་ཡང་ཆོས་འགའ་ཞིག་ཁོ་ན་རྟོགས་པས་རྒྱུ་གཞན་ལ་ལྟོས་པའི་ཕྱིར། འདྲ་བ་ཁོ་ན་ངེས་པའི་རྐྱེན་ལ་ལྟོས་ནས་རྣམ་པར་འཇོག་པའི་རྒྱུ་ཡིན་པས་དེས་ན་དེ་ཁོ་ན་ཚད་མར་རིགས་སོ། །དེ་ལྟར་ཕྱི་རོལ་གྱི་དོན་དུ་སྨྲ་བ་ལ། རྣམ་པར་ཤེས་པ་དོན་དང་འདྲ་བ་ཚད་མ་ཡིན་ལ། དོན་རྟོགས་པའི་རང་བཞིན་དུ་རྣམ་པར་གཞག་པ་ནི་འབྲས་བུའི་ཞེས་ཚད་མ་དང་དེའི་འབྲས་བུ་རྣམ་པར་གཞག་པ་མཛད་ནས། དེ་ཉིད་བཟློག་པའི་ཕྱིར་དང༌། རྣམ་པར་ཤེས་པར་སྨྲ་བ་ལ་ཚད་མའི་འབྲས་བུའི་ཚུལ་གཞན་དུ་རྣམ་པར་གཞག་པའི་ཕྱིར་འདྲི་བ་རྩོམ་མོ། །དེ་ནས་ཞེས་བྱ་བ་ནི་དེ་མ་ཐག་ཏུ་སྟེ། ཚད་མའི་འབྲས་བུ་རྣམ་པར་གཞག་པའི་དེ་མ་ཐག་ཏུ་ཐེ་ཚོམ་འདིར་འགྱུར་ཏེ། གང་ཁྱེད་ཚད་མའི་འབྲས་བུ་འདོད་པའི་ཕྱི་རོལ་གྱི། དོན་རིག་པ་དེ་འདི་གང་ཞིག་སྟེ། ངོ་བོ་ཉིད་ཅི་ཞིག །ཇི་ལྟར་ཉམས་སུ་མྱོང་བཞིན་པ་ཉིད་འདིའི་ངོ་བོ་ཡིན་ནམ། ཉམས་སུ་མྱོང་བ་ནི་འཁྲུལ་པ་མིན་ལ་རང་གི་ངོ་བོ་གཞན་ཉིད་ཡིན། ཅིག་ཤོས་ཀྱིས་ནི་ཉམས་སུ་མྱོང་བར་འགྱུར་བའི་རིག་པའི་ངོ་བོ་ཉིད་ལ་ནི་འདྲི་བ་མི་འཐད་དེ། རང་གི་རང་བཞིན་གྱི་ཐབས་ཀྱིས་འདི་ཚད་མ་འདྲི་བ་ཡིན་ནོ་སྙམ་ནས་སྨྲས་པ། མངོན་སུམ་དུ་གྱུར་པ་མངོན་དུ་གྲུབ་པའི་རིག་པ་གང་ཡིན་པ་འདི་ཉིད་དོ། །འདི་སྐད་དུ་གང་ཁོ་བོ་ཅག་གིས་ཚད་མའི་འབྲས་བུར་རྣམ་པར་གཞག་པ་མྱོང་བ་འདི་ནི་མངོན་སུམ་གྱི་ཚད་མས་གྲུབ་པ་དེས་ན་འདི་ལ་ཚད་མ་འདྲི་བས་ཅི་ཞིག་བྱ་ཞེས་བརྗོད་པ་ཡིན་ནོ། །ཅིག་ཤོས་ཀྱིས་ནི་དངོས་པོ་རྣམས་ཀྱི་ཡོད་པ་ཉིད་ནི་ཚད་མ་སྔོན་དུ་འགྲོ་བ་ཅན་ཡིན་པའི་ཕྱིར། དེའི་ཚད་མ་དྲིས་ན་ནི་ཡོད་པ་ཉིད་དྲིས་པར་འགྱུར་ལ་འདི་ཞེས་བྱ་བས་ཀྱང་དངོས་པོ་མངོན་སུམ་དུ་བསྟན་པ་ན། འདྲི་བ་ཡོད་པའི་ཡུལ་ཅན་དུ་ནི་རིགས་པ་མ་ཡིན་ནོ། །དེས་ན་ཚད་མའི་ཡུལ་ཅན་ནི་མ་ཡིན་གྱི། འོན་
ཀྱང་རྣམ་པའི་ཁྱད་པར་གྱི་ཡུལ་ཅན་ཡིན་ནོ་ཞེས་འཆད་པ་ནི་མངོན་སུམ་དུ་གྱུར་བའི་མྱོང་བ་ཡོད་པ་འདིའོ། །འདི་སྐད་དུ་ཁྱོད་ལ་ཡོད་པའི་ཚད་མ་དྲིས་པ་ནི་མ་ཡིན་གྱི། འོན་ཀྱང་དོན་དང་འབྲེལ་པ་ཞེས་བྱ་བའི་རྣམ་པའི་ཁྱད་པར་དྲིས་པ་ཡིན་ལ། གལ་ཏེ་དེ་མ་རྟོགས་ན་ནི་ཡང་གསལ་བར་དྲི་བར་བྱའོ་ཞེས་བརྗོད་པ་ཡིན་ནོ། །ཉམས་སུ་མྱོང་བར་གྱུར་པའི་རིགས་པ་འདི་ཐ་དད་པར་གྱུར་པའི་དོན་དེ་རིག་པ་ཡིན་པར་རྒྱུ་གང་གིས་རྣམ་པར་གཞག །ཅིག་ཤོས་ཀྱིས་སྐྱེས་པ་དང་འདྲ་བས་དག་གིས་སོ་ཞེས་སྨྲས་ཏེ། སྐྱེས་པ་དང་འདྲ་བས་ཀྱང་ངོ་ཞེས་གསུངས་པའོ། །འཇིག་རྟེན་པ་རྣམས་རྣམ་པར་ཤེས་པ་འདི་སྔོན་པོའི་དོན་ལས་སྐྱེས་སོ་ཞེས་བྱ་བར་རྟོགས་པར་ནི་མི་བྱེད་དེ། དེའི་ཕྱིར་སྐྱེས་པ་ནི་ཐ་སྙད་ཀྱི་རྒྱུ་མཚན་མ་ཡིན་གྱི། འོན་ཀྱང་རྒྱུ་མཚན་ནི་འདྲ་བ་ཡིན་ནོ། །གང་གི་ཕྱིར་རྣམ་པར་ཤེས་པ་འདྲ་བར་ཉམས་སུ་མྱོང་བ་ནི་དོན་མྱོང་བར་རྣམ་པར་འཇོག་པར་བྱེད་པ་ཡིན་པའི་ཕྱིར་འདྲ་བ་ཐ་སྙད་ཀྱི་རྒྱུ་མཚན་ཡིན་ནོ། །སྐྱེས་པ་དང་འདྲ་བ་དག་གིས་ཞེས་བྱེ་བྲག་མེད་པར་བརྗོད་པ་གང་ཡིན་པ་དེ་ནི་གཉི་ག་ཡང་ཐ་སྙད་ཀྱི་ཡན་ལག་ཉིད་དུ་བསྟན་པའི་དོན་དུའོ། །འདི་དག་ཅི་ཟིག་ཇི་ལྟར་ཐ་སྙད་ལ་ཉེ་བར་མཁོ་ཞེས་ངེས་པར་རྟོག་པ་ལས་འདི་བརྗོད་དོ། །འདྲ་བ་ལས་ནི་ཐ་སྙད་གྲུབ་བ་ལ། འདྲ་བ་ཡང་སྐྱེས་པ་ལས་ཡིན་ནོ། །ད་ནི་རྣམ་པར་འཇོག་པའི་རྒྱུ་ཧ་ཅང་ཁྱབ་ཆེས་པར་བསྟན་པའི་ཕྱིར་འོ་ན་ནི་ཞེས་སྨོས་ཏེ། ཡུལ་མཚུངས་པ་ཞེས་བྱ་བ་ནི་གལ་ཏེ་ཤེས་པ་ཕྱི་མའི་སྔོན་པོར་འཛིན་ལ་སྔ་མ་ཡང་ཡིན་ན་དེའི་ཚེ་ཐལ་བ་འདིར་འགྱུར་རོ། །དེ་མ་ཐག་པ་ཉིད་ཀྱིས་ནི་དངོས་སུ་སྐྱེད་པར་བྱེད་པའི་དོན་ནི་ཡུལ་ཡིན་ནོ་ཞེས་དངོས་སུ་སྐྱེད་པར་བྱེད་པ་ཉིད་མཚོན་ཏོ། །འདི་ལྟར་རེ་ཞིག་སྔོན་པོ་འཛིན་པའི་ཤེས་པ་སྔ་མ་སྔོན་པོར་སྣང་བ་ཡིན་ལ། གཉིས་པ་མཚུངས་པ་དེ་མ་ཐག་པའི་རྐྱེན་དེས་བསྐྱེད་པ་གང་ཡིན་པ་དེ་ཡང་སྔོན་པོའི་དོན་འཛིན་པ་ཉིད་ཀྱིས་སྔོན་པོར་སྣང་བ་ཁོ་ནའོ། །དེ་ཡང་སྐྱེད་པར་བྱེད་པ་མཚུངས་པ་དེ་མ་ཐག་པའི་རྣམ་པར་ཤེས་པའི་སྔོན་པོར་སྣང་བ་ཡུལ་ཡིན་ནམ། འོན་ཏེ་དོན་སྔོན་པོའམ་དེ་སྟེ་གཉི་ག་ཞེས་མི་ཤེས་སོ། །ཡུལ་ཉིད་དུ་བརྟགས་པར་ནི་ཤེས་པ་ཉིད་འཐད་པ་ཡིན་ཏེ། དེ་ནི་དེ་མ་ཐག་པའི་ཡན་ལག་ཡིན་པའི་ཕྱིར་དང་འདྲ་བར་ཉམས་སུ་མྱོང་བའི་ཕྱིར་རོ། །དོན་
ནི་མ་ཡིན་ཏེ། དེ་མ་མཐོང་བ་ཉིད་ཀྱིས་འདྲ་བར་མ་མཐོང་བའི་ཕྱིར་རོ། །ཡང་ཇི་ལྟར་ཤེས་པ་ཕྱི་མ་ལ་བཟུང་བའི་རྣམ་པ་ཕྱི་རོལ་གྱི་རང་བཞིན་ལྟ་བུར་རྣམ་པར་ཆད་པར་སྣང་བ་དེ་བཞིན་དུ་ཤེས་པ་སྔ་མ་ཡང་ཕྱི་རོལ་གྱི་རང་བཞིན་ལྟར་གཟུང་བའི་རྣམ་པ་རྣམ་པར་ཆད་པར་སྣང་སྟེ། དེས་ན་དེ་ཇི་ལྟར་ཕྱི་རོལ་གྱི་ཡུལ་དང་འདྲ་བ་དེ་བཞིན་དུ་རྣམ་པར་ཤེས་པ་སྔ་མའི་རྣམ་པ་དང་ཡང་འདྲ་བ་ཡིན་ནོ། །དེའི་ཕྱིར་འདྲ་བ་ཡོད་པ་ཙམ་གྱིས་ནི་མ་ཡིན་གྱི་གཟུང་བའི་རྣམ་པ་ལ་ཡང་ལྟོས་པ་ཡིན་ན་དེ་མ་ཐག་པའི་ཤེས་པ་ན་ཤེས་པ་ལ་གཟུང་བ་ཉིད་དུ་སྣང་བ་མ་ཡིན་ནོ་ཞེས་གང་བརྗོད་པ་དེ་སྤངས་པ་ཡིན་ཏེ། གང་གི་ཕྱིར་དེ་མ་ཐག་པའི་ཤེས་པ་འཛིན་པའི་རྣམ་པ་ཉིད་དུ་ནི་སྣང་བ་མ་ཡིན་ཏེ། སྣང་བ་དེ་དེའི་རང་བཞིན་དུ་མ་ངེས་པའི་ཕྱིར་རོ། །གཟུང་བའི་རྣམ་པར་ནི་སྣང་བ་ཁོ་ན་སྟེ། སྣང་བ་དེ་ཤེས་པ་སྔ་མའི་སྣང་བ་དང་འདྲ་བར་ངེས་པའི་ཕྱིར་རོ། །བདག་ཉིད་ཐམས་ཅད་ངེས་པ་ན་གཟུང་བ་ཉིད་དུ་རྣམ་པར་འཇོག་པ་ནི་མ་ཡིན་ཏེ། གང་གི་ཕྱིར་ཤེས་པའི་སྣང་བ་སྐད་ཅིག་མ་སྔོན་པོའི་རང་བཞིན་དུ་ངེས་པ་མ་ཡིན་པ་དེ་ལྟ་ན་ཡང་སྐད་ཅིག་མའི་སྔོན་པོ་དང་འདྲ་བར་བརྟགས་པ་དེ་བཞིན་དུ་སྔོན་པོར་སྣང་བ་ཤེས་པ་ཉིད་དུ་ནི་ངེས་པ་མ་ཡིན་མོད་ཀྱི། འོན་ཀྱང་རྣམ་པར་ཤེས་པ་ཕྱི་མའི་སྣང་བ་ཤེས་པ་སྔ་མའི་སྣང་བ་དང་འདྲ་བར་ངེས་པ་ཡིན་པའི་ཕྱིར་ཡུལ་ངེས་པ་མེད་པར་ཐལ་ལོ། །གལ་ཏེ་ཤེས་པ་འདིའི་ཉམས་སུ་མྱོང་བར་བྱ་བའི་དོན་འགའ་ཡང་མེད་ན། འོ་ན་ནི་དེ་ལ་ལྟོས་པའི་ཕྱིར་ཉམས་སུ་མྱོང་བར་ཡང་མི་འགྱུར་ཏེ། གཅད་པར་བྱ་བ་མེད་ན་ནི་འགའ་ཞིག་གཅོད་པར་བྱེད་པ་མ་ཡིན་ནོ་ཞེས་ཞེ་ལ་བཞག་ནས། འོ་ན་ད་འདིས་ཞེས་སྨྲས་སོ། །ད་ལྟར་ཡུལ་ངེས་པ་ཁྱོད་ཀྱིས་བཤིག་པ་ན་འདིས་ཡུལ་གང་ཞིག་ཉམས་སུ་མྱོང་བས་གྲུབ་པ་འདི་ནི་བཟློག་པར་ནུས་པ་ཡང་མ་ཡིན་ནོ། །རིགས་པ་མེད་པར་བཟློག་ན་རྟོག་པ་སྔོན་དུ་གཏོང་བ་ཉིད་དུ་ཡང་ཇི་ལྟར་འགྱུར། དེ་མི་བཟློགས་ན་ཡང་ཉམས་སུ་མྱོང་བའི་དོན་ངེས་པར་འགྱུར་བས། ཁྱོད་ཀྱིས་ཀྱང་ཡུལ་རྣམ་པར་གཞག་དགོས་པ་དེས་ན་ཁོ་བོ་ཅག་གིས་ཡུལ་རྣམ་པར་གཞག་པ་ཡང་དེ་ཉིད་ཀྱིས་བསྒྲུབ་པར་བྱའོ། །ཅིག་ཤོས་ཀྱིས་ནི་ཉམས་སུ་མྱོང་བ་ཡོད་ཀྱང་ཉམས་སུ་མྱོང་བར་བྱ་བ་བཟློག་པ་ན་འཛིན་པར་བྱེད་པའི་རང་བཞིན་འགའ་ཞིག་ཡོད་
པ་ནི་མ་ཡིན་གྱི། འོན་ཀྱང་གཟུང་བ་དང་འཛིན་པའི་རྣམ་པ་འདི་ནི་ཉེ་བར་བསླད་པ་ཡིན་ནོ། །འདི་གཉིས་བཀག་ཀྱང་ཉམས་སུ་མྱོང་བ་གྲུབ་པ་དགའ་བ་དང་ཞུམ་པ་ལ་སོགས་པ་མྱོང་བའི་རྣམ་པར་བཀག་པ་ནི་མ་ཡིན་ནོ། །དེའི་ཕྱིར་གཟུང་བའི་རྣམ་པ་དང་འཛིན་པའི་རྣམ་པ་ཉེ་བར་སླད་པ་ཡིན་པས་ཁོ་བོ་ཅག་ལ་ཡུལ་རྣམ་པར་གཞག་པ་འགའ་ཞིག་ཡོད་པ་མ་ཡིན་ལ། ཉམས་སུ་མྱོང་བས་གྲུབ་པའི་མྱོང་བའི་འགོག་པ་ཡང་མ་ཡིན་ནོ་ཞེས་ཁོ་བོ་ཅག་ཀྱང་སྨོས་སོ། །ཁོ་བོ་ཅག་ཀྱང་ཉམས་སུ་མྱོང་བའི་ཚུལ་གཞན་ལ་ལྟོས་ནས་ཉམས་སུ་མྱོང་བར་བྱེད་པ་པོ་ཞེས་བྱ་བ་འདི་ཉིད་རྗེས་སུ་ཞེས་བྱ་བའི་ཕྱི་ནས་ཏེ། སྔར་གཞན་གྱིས་རྣམ་པར་གཞག་པ་ལས་ཕྱིས་ཁོ་བོ་ཅག་རྟོགས་པར་འདོད་པ་ཡིན་གྱི། ཁོ་བོ་ཅག་གིས་རྣམ་པར་གཞག་པར་བྱ་བ་ནི་མ་ཡིན་ལ། རིགས་པས་ཀྱང་རྣམ་པར་གཞག་པར་ནུས་པ་མ་ཡིན་ནོ། །དེས་ན་ཁོ་བོ་ཅག་ཤེས་པར་འདོད་པ་ཡིན་ན་རིགས་པ་མེད་པའི་ཕྱིར་ཤེས་པར་ནུས་པ་ནི་མ་ཡིན་ནོ། །ད་ནི་སྔོན་པོ་འདི་བལྟས་པའམ་སྐྱེ་བོ་ངན་པའི་སྒྲ་མཉན་ནོ་ཞེས་འདིས་ནི་ངེས་པའི་རྣམ་པ་བསྟན་ཏོ། །གང་ལས་ཏེ་འདྲ་བར་བྱེད་པ་པོའི་སྐྱེད་བྱེད་གང་ལ་ངེས་པའི་ཤེས་པ་སྟེ། ཞེན་པའི་རྟོགས་པ་སྔར་བཤད་པའི་རྣམ་པ་ཅན་སྐྱེ་བར་འགྱུར་བ་མཐོང་བ་དང་ཐོས་པ་ངེས་པའི་རྒྱུར་གྱུར་པ་དེ་དག་ནི་ངེས་པའི་ཡུལ་གྱི་དོན་དེའི་ཉམས་སུ་མྱོང་བ་ཡིན་ནོ། །བསམ་པ་འདི་ཡིན་ཏེ། སྐྱེས་པ་དང་འདྲ་བ་དག་ལས་ནི་དེ་འབྲེལ་པར་གྱུར་ལ། དེ་ངེས་པས་ཀྱང་ཤེས་པ་དོན་གྱི་འཛིན་པ་པོར་རྣམ་པར་འཇོག་པ་དེས་ན་སྐྱེས་པའི་ཕྱིར་དང་འདྲ་བའི་ཕྱིར་དང་དེ་དང་འབྲེལ་པ་ངེས་པའི་ཕྱིར་དེ་འཛིན་པ་ནི་འདི་ཡིན་ནོ་ཞེས་བྱ་བའོ། །ཞེ་ན་ཞེས་བྱ་བ་ནི་གཞན་གྱི་དོགས་པའོ། །བཟློག་པའི་ཕྱིར་འདྲ་བར་བྱེད་དེ། ཀྱེ་ཡུལ་དང་ཤེས་པ་གང་གིས་ཉེ་བ་དེ་ཉིད་དེ་འབྲེལ་པ་དེ་ཉིད་ངེས་པས་ཡུལ་དུ་བྱས་པ་དེ་དཔྱོད་པ་མ་ཡིན་ནམ། ཇི་ལྟར་གང་གིས་དེ་ནི་དེའི་མཐོང་བ་ཡིན་ཞེས་བྱ་བ་འདི་ནི་དཔྱོད་པའོ། །དགོངས་པ་ནི་འདི་ཡིན་ཏེ། འདི་མཐོང་བའམ་ཐོས་པ་ཞེས་བྱ་བ་འདི་ཉིད་ནི་ཉམས་སུ་མྱོང་བའི་ཡུལ་ངེས་པར་རྣམ་པར་གཞག་པ་ཡིན་གྱི་གཞན་ནི་མ་ཡིན་ལ། རྣམ་པར་འཇོག་པར་བྱེད་པ་ཡང་ངེས་པ་ཉིད་དེ་གཞན་ནི་མ་ཡིན་ནོ། །རྣམ་པར་གཞག་པ་དང་རྣམ་པར་འཇོག་པར་བྱེད་
ལས་རྣམ་པར་འཇོག་པའི་རྒྱུ་ནི་གཞན་དུ་རིགས་པ་ཡིན་ཏེ། དེ་ཉིད་ནི་དེ་ཉིད་ཀྱི་རྒྱུ་མཚན་མ་ཡིན་ནོ། །དེ་ཡང་ཉམས་སུ་མྱོང་བར་གྱུར་པ་ཡིན་ཏེ། ངེས་པ་རྣམས་ནི་ཉམས་སུ་མྱང་བའི་རྗེས་སུ་འབྲང་བའི་ཕྱིར་རོ། །དེས་ན་མཐོང་བའི་ཡུལ་ངེས་པར་ཉམས་སུ་མྱོང་བ་ཉིད་འདི་ལྟར་ངེས་པའི་རྒྱུ་མཚན་དུ་བརྗོད་པར་བྱའི། ངེས་པ་འདི་ཉིད་ནི་མ་ཡིན་ནོ། །འདི་སྙམ་དུ་ཉམས་སུ་མྱོང་བར་གྱུར་པའི་ཡུལ་དང་ལྷན་ཅིག་ཏུ་འབྲེལ་བ་འགའ་ཞིག་ལ་ལྟོས་ནས་ངེས་པ་སྐྱེད་པར་བྱེད་པ་ནི་མ་ཡིན་གྱི། འོན་ཀྱང་ཉམས་སུ་མྱོང་བའི་རྣམ་པར་ཤེས་པའི་ངོ་བོ་ཉིད་ཀྱིས་ཁྱད་པར་ཁོ་ན་ལས་འདི་ལྟ་བུའི་ངེས་པ་སྐྱེ་བར་འགྱུར་ན། དེ་ཅིའི་ཕྱིར་ཤེས་པའི་ཡུལ་དང་ལྷན་ཅིག་ཉེ་བ་ཉམས་སུ་མྱོང་པ་གང་ཞིག་ལ་བརྟེན་ནས་ངེས་པ་ཉེ་བར་སྐྱེད་པར་བྱེད་ཅེས་བརྗོད་ཅེས་དོགས་པ་ལ། བཤད་པ། ལྟ་བ་པོ་སྟེ་ཉམས་སུ་མྱོང་པ་པོའི་ངེས་པ་འདི་ཡུལ་དང་ཤེས་པ་དེ་དག་གི་འབྲེལ་པ་ཉམས་སུ་མྱོང་བ་ལ་བརྟེན་ནས་ཏེ། ཡུལ་དུ་བྱས་ནས་སྐྱེ་བར་འགྱུར་བ་ཡིན་ཏེའོ། །འདི་སྐད་བརྗོད་པ་ཡིན་ཏེ། ངེས་པ་སྐྱེ་བ་ན་སྐྱེད་པར་བྱེད་པ་ལ་ནི་འདྲི་བ་འདི་མ་ཡིན་གྱི་འོན་ཀྱང་ཡུལ་འདྲི་བ་ཡིན་ནོ། །དེ་ལ་གལ་ཏེ་ཉམས་སུ་མ་མྱོང་བའི་ཡུལ་ལ་ངེས་པ་སྐྱེ་ན་ནི་འགྲོ་བའི་ཚད་མས་རྟོགས་པའི་ཉམས་སུ་མྱོང་བའི་ཐ་སྙད་ཉམས་པར་འགྱུར་རོ། །དོན་ཉམས་སུ་མྱོང་བ་ཞེས་བྱ་བ་ཡང་དེའི་ཡུལ་ཅན་གྱི་ཤེས་པ་ཉམས་སུ་མྱོང་བ་ཡིན་ལ་ཤེས་པ་དེ་ཉམས་སུ་མྱོང་བ་ན་ཡང་གཉིས་ལས་སྐྱེས་པ་ཡིན་ཞིང་གཉི་ག་ཡང་འདྲ་བ་ཡིན་ཏེ། དེའི་ཕྱིར་ཁྱད་པར་གང་གིས་ཉམས་སུ་མྱོང་བའི་རྗེས་སུ་འབྲངས་ནས་ངེས་པ་སྐྱེ་བན་སྔོན་པོའི་ཡུལ་དུ་ངེས་པར་འགྱུར་ལ། དེ་མ་ཐག་པའི་རྐྱེན་ནི་མ་ཡིན་ཏེ། དེའི་ཕྱིར་འདྲ་བའི་དོན་ནི་ཉམས་སུ་མྱོང་བའི་དོན་གྱི་ཡུལ་ཅན་ངེས་པ་ཐ་དད་མ་མཐོང་བར་ཇི་ལྟར་རྣམ་པར་ཤེས་པ་ངེས་པར་བྱེད་ཅེས་བྱ་བ་ཡིན་གྱི། གང་གིས་རྣམ་པར་ཤེས་པ་སྔ་མ་དེ་སྐྱེད་པ་ལ་ངོ་བོ་ཉིད་ཀྱི་ནུས་པར་བརྗོད་པ་ཇི་ལྟར་སྐྱེ་བར་འགྱུར་ཞེས་བྱ་བ་ནི་མ་ཡིན་ནོ། །དེའི་ཕྱིར་འབྲེལ་པ་ཉམས་སུ་མྱོང་བ་ཞེས་བྱ་བ་ངེས་པའི་ཡུལ་ངེས་པར་རྟོགས་པ་ཡིན་གྱི་སྐྱེ་བའི་རྒྱུ་ནི་མ་ཡིན་ནོ་ཞེས་བྱ་བ་འདི་གནས་སོ། །ཕྱིས་འབྱུང་བ་དེའི་དུས་ན་ཡོད་པ་མ་ཡིན་པ་དང་ཉམས་སུ་མྱོང་བ་མ་ཡིན་པའི་ངེས་པ་
རང་ཉིད་ཞུགས་པ་ཙམ་གྱིས་ནི་ཁྱད་པར་ཅན་གྱི་ཡུལ་ཉམས་སུ་མྱོང་བར་ངེས་པ་མ་ཡིན་གྱི། འོན་ཀྱང་ཉམས་སུ་མྱོང་བ་ཉིད་ཀྱི་ཁྱད་པར་ཉམས་སུ་མྱོང་བ་ལས་ཡིན་ལ། ཁྱད་པར་ཅན་ཉམས་སུ་མྱོང་བ་དེ་ཡང་ཡོད་པ་མ་ཡིན་པའི་ཕྱིར་ཇི་ལྟར་ངེས་པ་ཡིན། དེ་བཤད་པ་ནི་དེ་ཞེས་བྱ་བ་འབྲེལ་པའི་རང་བཞིན་ཉམས་སུ་མྱོང་བ་མེད་ན་ནི་ངེས་པ་དེར་མི་འགྱུར་རོ། །དེས་ན་དེ་ལྟར་མཚན་ཉིད་སྲིད་པ་ལ་བརྟེན་ནས་ཧ་ཅང་ཁྱབ་ཆེས་པའི་ཉེས་པ་བརྗོད་ནས་ད་ནི་བསྡུ་བའི་སྒོ་ནས་མཚན་ཉིད་མི་སྲིད་པ་ཉིད་སྟོན་པར་བྱེད་དོ། །རེ་ཞིག་སྲིད་ཀྱང་ཉེས་བ་འདིར་འགྱུར་ལ་དེ་ནི་སྲིད་པ་ཡང་མ་ཡིན་ནོ་ཞེས་གང་བརྗོད་པ་ནི། རྣམ་པར་ཤེས་པ་ལ་ནི་ཡུལ་དང་འདྲ་བ་སྲིད་པ་ཡང་མ་ཡིན་ཏེ། དབང་པོའི་རྣམ་པར་ཤེས་པ་དེ་ལ་སྣང་བའི་དང་ཚུལ་གང་ཡིན་པ་རགས་པའི་རྣམ་བ་ཆ་ཤས་དང་བཅས་པ་ནི་རྡུལ་ཕྲ་རབ་སོ་སོ་སྟེ་གཅིག་ལ་མེད་པའི་ཕྱིར་རོ། །དགོངས་པ་འདི་ཡིན་ཏེ། དབང་པོའི་རྣམ་པར་ཤེས་པ་ལ་གནས་པའི་རྣམ་པ་གང་ཡིན་པ་དེ་ནི་ཆ་ཤས་དང་བཅས་པ་དང༌། རྡུལ་ཕྲ་རབ་གཅིག་ལ་ནི་ཆ་ཤས་ཡོད་པ་མ་ཡིན་པ་དེས་ན་རྡུལ་ཕྲ་རབ་ཀྱི་རང་བཞིན་དང༌། ཤེས་པ་ལ་གནས་པའི་སྣང་བ་འདི་འགལ་བའི་ཕྱིར་རྣམ་པ་འདི་དེའི་ཡིན་ནོ་ཞེས་བརྗོད་པར་ནུས་པ་མ་ཡིན་ནོ། །གང་ལ་རང་བཞིན་དང་དེས་སྐྱེད་པའི་རྣམ་པ་མི་འགལ་བ་གཅིག་ཏུ་ཞེན་པའི་རྒྱུ་མཚན་ཡོད་པའི་རྣམ་པ་དེ་ཉིད་དེས་སྐྱེད་པ་དང༌། ཕྱི་རོལ་གྱི་རང་བཞིན་དེར་ཐ་སྙད་དུ་འདོགས་པ་པོས་ཐ་སྙད་དུ་བྱ་བ་ཡིན་ནོ། །འདྲ་བ་དང་འདྲ་བར་བྱེད་པ་པོ་དག་འགལ་བའི་ཆོས་དང་ལྡན་པ་ལ་ནི་འགལ་བ་དག་བཞིན་དུ་ཐ་མི་དད་པར་ཞེན་པར་མི་འཐད་པ་དེས་ན་རྣམ་པ་འདི་དེས་བསྐྱེད་པ་ཉིད་དུ་མི་འགྱུར་རོ། །ཅི་སྟེ་ཡང་རྣམ་པ་འདི་དེས་བསྐྱེད་པར་ནན་ཁོ་ནས་རྟོག་ན། འོ་ན་ནི་འགལ་བའི་ཆོས་དང་ལྡན་པར་ཁྱད་པར་མེད་པས་ཐམས་ཅད་ཐམས་ཅད་ཀྱི་རྣམ་པར་འགྱུར་རོ། །ཡང་ཅི་སྟེ་འདི་རྡུལ་ཕྲ་རབ་གཅིག་གི་རྣམ་པ་ནི་མ་ཡིན་གྱི་འོན་ཀྱང་རྣམ་པ་འདི་ནི་རྡུལ་ཕྲ་རབ་ཀྱི་ལུས་མང་པོ་ཕན་ཚུན་རང་བཞིན་དང་ཡུལ་ཡོངས་སུ་སྤངས་པར་སྐྱེས་པ་རྣམས་ཀྱི་ཡིན་ནོ། །ཆ་ཤས་མེད་པ་མང་པོ་རྣམས་ཀྱི་སྣང་བ་ཚོགས་པའི་ཡུལ་ཅན་ནི་ཆ་ཤས་སུ་སྣང་བར་འགྱུར་ཏེ། འདི་ལྟར་རྡུལ་ཕྲ་རབ་ཀྱི་རང་བཞིན་གཅིག་ཆ་ཤས་མེད་པ་ཡིན་གྱི་
དུ་མ་ནི་མ་ཡིན་ནོ། །ཡུལ་ལ་བཀྲམ་པ་ཉིད་དུ་སྣང་བར་འགྱུར་བ་མང་པོ་རྣམས་ཀྱི་ཤེས་པ་གཅིག་ལ་གནས་པའི་སྣང་བ་ཡུལ་ལ་བཀྲ་མ་པ་ཉིད་ནི་ཆ་ཤས་དང་བཅས་པར་འགྱུར་བའི་ཕྱིར་མི་འགལ་ལོ་ཞེས་དོགས་པ་ལ། རང་བཞིན་མང་པོ་ཚོགས་པ་རྣམས་ལ་ཡང་ཞེས་སྨོས་ཏེ། རྡུལ་ཕྲ་རབ་གཅིག་གི་རྣམ་པ་མ་ཡིན་པ་འབའ་ཞིག་ཏུ་མ་ཟད་ཀྱི། མང་པོ་རྣམས་ཀྱི་ཡང་འཐད་པ་མ་ཡིན་ནོ་ཞེས་བསྡུ་བའི་དོན་དུའོ། །རྡུལ་ཕྲ་རབ་ཀྱི་རྫས་ཚོགས་པ་ཞེས་བྱ་བ་རིགས་མི་མཐུན་པས་མ་ཆོད་པ་རྣམས་ལ་དེ་ལྟར་རགས་པའི་རྣམ་པར་སྣང་བ་ཡིན་ནོ་ཞེས་བྱ་བར་རིགས་པ་མ་ཡིན་ནོ། །ཅིའི་ཕྱིར་ཞེ་ན། གཅིག་ཡིན་པའི་ཕྱིར་ཏེ། གང་འདི་ཤེས་པ་ལ་བཀོད་པ་བྱས་པ་རགས་པའི་རྣམ་པར་ཉམས་སུ་མྱོང་བ་དེ་འདི་ནི་གཅིག་ཡིན་ནོ། །ཕྱོགས་ཀྱི་ཆ་ལ་སོགས་པས་དོན་གྱི་སྣང་བ་འདི་ཐ་དད་པར་རྟོགས་པ་མ་ཡིན་ནམ། འགལ་བའི་ཆོས་དང་ལྡན་པ་འདི་ལྟ་བུ་ནི་གཅིག་ལམ་ཡིན་ནམ། དེའི་ཕྱིར་ཤེས་པའི་གནས་པ་འདི་ཡང་ཞེས་བརྗོད་ཅེ་ན། ཤེས་པའི་སྣང་བ་མཐའ་དག་གཅིག་ཏུ་ནི་མི་བརྗོད་ཀྱི། འོན་ཀྱང་དུས་འཛིན་པ་ལ་ནི་གཅིག་ཏུ་འཛིན་པ་གདོན་མི་ཟ་བར་འདོད་པར་བྱ་དགོས་ཏེ། གཞན་དུ་ན་དུ་མར་འཛིན་པ་མི་འཐད་པའི་ཕྱིར་ཏེ། ཆ་ཤས་མེད་པའི་གཅིག་པ་མ་བཟུང་བར་ནི། དེ་ལྟར་ངེས་པ་མི་འཐད་པའི་ཕྱིར་རོ། །དེས་ན་མཐར་ཐུག་པའི་གཅིག་པ་ནི་གདོན་མི་ཟ་བར་གཟུང་བར་བྱ་དགོས་སོ། །ཆ་ཤས་མེད་པ་གཟུང་བའི་ཕྱིར་རྡུལ་ཕྲ་རབ་དུ་མའི་རང་བཞིན་གྱི་དོན་མ་བཟུང་བར་བརྗོད་པ་ཡིན་ནོ། །གལ་ཏེ་འདི་འདྲ་བའི་གཅིག་བཟུང་བ་ཡིན་དུ་ཆུག་པ་དེ་ལྟ་ན་ཡང་ཇི་ལྟར་མི་རིགས་ཤེ་ན། བཤད་པ། གཅིག་ནི་དུ་མ་དང་སྟེ། མང་པོ་དང་འགལ་བའི་ཕྱིར་རོ། །འགལ་བ་གང་ཡིན་པ་དག་ནི་སྔོན་པོ་དང་སྔོན་པོ་མ་ཡིན་པ་བཞིན་དུ་རྣམ་པར་འཇོག་པར་བྱེད་པ་དང༌། གཞག་པར་བྱ་བར་མི་འཐད་དེ་ཧ་ཅང་ཐལ་པའི་ཕྱིར་རོ། །གང་གི་ཕྱིར་འགལ་བ་དག་ཀྱང་འཇོག་པར་བྱེད་པ་དང༌། གཞག་པར་བྱ་བ་ཉིད་ཡིན་ན་ནི་ཁྱད་པར་མེད་པའི་ཕྱིར་སྣང་བ་ཐམས་ཅད་ཀྱིས་བྱས་པར་ཐལ་བའི་ཕྱིར་ཡུལ་ངེས་པ་ཉམས་པར་འགྱུར་རོ། །འདི་སྙམ་དུ་རགས་པའི་རང་བཞིན་གཅིག་མང་པོ་རྣམས་ལ་ཐུན་མོང་དུ་ཡོད་པ་དེས་ན་འདྲ་བར་འགྱུར་
རོ་སྙམ་ན་བཤད་པ། རྡུལ་ཕྲ་རབ་མང་པོ་རྣམས་ལ་ཡང་རྣམ་པ་དེ་ལྟ་བུར་རགས་པ་གཅིག་གི་ངོ་བོ་ཡོད་པ་མ་ཡིན་ནོ། །ཇི་ལྟར་ཕྱོགས་ཀྱི་གོས་ཅན་རྣམས་ཀྱིས་རྡུལ་ཕྲ་རབ་ཐ་དད་པ་རྣམས་ལ་ཡང་ཐུན་མོང་གི་རང་བཞིན་ཅིག་ཡོད་པར་བརྟགས་པ་དེ་ལྟ་བུ་ནི་ཅུང་ཟད་ཀྱང་མེད་ན་གང་གིས་རྣམ་པ་འདི་སྐྱེད་པར་འགྱུར། ཅིའི་ཕྱིར་ཞེ་ན། ཡན་ལག་ཅན་འགོག་པའི་ཉེས་པ་གང་ཡིན་པ་དེ་ཉིད་ནི་དུ་མའི་ཐུན་མོང་གཅིག་གི་རང་བཞིན་གྱི་ཉེས་པར་ཡང་བལྟ་བར་བྱའོ། །འདི་སྙམ་དུ་ཁོ་བོ་ཅག་གི་ལྟར་ན་ནི་རྡུལ་ཕྲ་རབ་ཡུལ་མ་ཡིན་ལ། གང་ཞིག་ཡུལ་དུ་འགྱུར་བ་དེ་དག་གི་རགས་པའི་རང་བཞིན་གཞན་མ་ཡིན་པ་ཡང་མེད་དེ། འོན་ཀྱང་རྡུལ་ཕྲ་རབ་རྣམས་ཉིད་ཀྱིས་རྡུལ་ཕྲ་རབ་གཉིས་ལ་སོགས་པའི་རིམ་པས་བརྩམས་པའི་ཡན་ལག་ཅན་གྱི་རྫས་རགས་པ་གཅིག་པོ་གང་ཡིན་པ་དེ་ཡུལ་ཡིན་ནོ་ཞེས་དོགས་པ་ལ་ཡུལ་ཞེས་སྨོས་ཏེ། ཡུལ་རགས་པ་གཅིག་ནི་མི་འཐད་དོ། །ཇི་ལྟར་ཞེ་ན་བཤད་པ་ལག་པ་ལ་སོགས་པ་གང་ཡིན་པའི་ཆ་ཤས་གཅིག་གཡོ་བ་སྟེ་བསྐྱོད་ན་ཡང་ལུས་ཐམས་ཅད་གཡོ་བར་ཐལ་བའི་ཕྱིར་རོ། །འདི་ལྟར་གང་ཞིག་ལག་པ་ལ་སོགས་པ་ལ་འདུ་བའི་ཡན་ལག་ཅན་གྱི་རྫས་གཡོ་བ་དང་བཅས་པའི་ཡན་ལག་ཅན་གྱི་རྫས་དེ་ཉིད་ནི་ལག་པ་གཞན་ལ་འདུ་བ་ཡིན་པ་དེས་ན་གཡོ་བ་དེའི་རང་བཞིན་ལས་མི་གཡོ་བའི་རང་བཞིན་ཐ་མི་དད་པའི་ཕྱིར་གཡོ་བར་ཐལ་ལོ། །འདི་ལྟར་གཅིག་ཡིན་ན་ནི་གཡོ་བ་དང་བཅས་པའི་རང་བཞིན་དེ་ཉིད་འདི་ཡིན་པའི་ཕྱིར་གཡོ་བར་སྣང་བར་འགྱུར་རོ། །སྣང་བའི་གཡོ་བ་དང་བཅས་པའི་རང་བཞིན་ཡན་ལག་གཉིས་པ་ལ་མ་དམིགས་པ་ནི་ཡོད་པ་ཉིད་མ་ཡིན་ཞིང༌། གང་ལས་གང་མེད་པ་དེ་ཉིད་འདི་ཡིན་ནོ་ཞེས་ཀྱང་བརྗོད་པར་མི་ནུས་སོ། །ཡོད་པ་ཉིད་ཀྱི་རྒྱུ་མཚན་ནི་དོན་བྱ་བ་བྱེད་པ་ཡིན་ལ། དོན་བྱ་བ་བྱེད་པའི་རང་བཞིན་ཡང་གང་ལ་མངོན་སུམ་གྱིས་རབ་ཏུ་གྲུབ་པ་དེ་ལ་དེ་ཁོ་ནང་ཡོད་པ་ཡིན་ཏེ། དེ་ཉིད་འདི་ཡིན་ན་མཚན་ཉིད་གཅིག་པ་ཉིད་དུ་ཐ་སྙད་དུ་བྱ་བ་ཡིན་ནོ། །ཡང་གང་གི་ཚེ་གཡོ་བ་དང་བཅས་པའི་རང་བཞིན་དོན་བྱ་བ་བྱེད་པ་དེ་ཉིད་གོ་སྐབས་གཞན་དུ་མེད་ན་དོན་བྱ་བ་བྱེད་པའི་རང་བཞིན་ཡང་གང་ལ་དེ་མེད་པའི་ཕྱིར་གོ་སྐབས་གཞན་དུ་ཡོད་པ་ཉིད་མ་ཡིན་ལ། ཡོད་པ་མ་ཡིན་པའི་ཕྱིར་ཡང་
དེའི་རང་བཞིན་དང་བྲལ་བ་དང༌། དེའི་རང་བཞིན་ཐ་དད་པར་རིགས་པ་ཡིན་ནོ་ཞེས་འཆད་པ་ནི། མིག་གཡོ་ན་ཡང་གཡོ་བ་དང་མི་གཡོ་བ་བསྐྱེད་པ་དག་གཅིག་ལ་གཅིག་མེད་པའི་ཕྱིར་གཞན་དག་དང་གཞན་དུ་ཡང་ཐ་དད་པར་ཐལ་ཏེ། ཐ་དད་པའི་ཐ་སྙད་ཀྱི་ཡུལ་ནི་དེ་ཙམ་དུ་ཟད་པའི་ཕྱིར་རོ། །དཔེར་ན་ཆུ་ཚགས་ཞེས་བྱ་བའི་ངས་དབྱི་གུ་གསུམ་ལ་དབྱངས་པ་མི་གཡོ་ལ་ཆུ་ནི་གཡོ་བ་དེས་ན་ཐ་དད་པ་དེ་བཞིན་དུ་འདིར་ཡང་ཐ་དད་པར་བལྟ་བར་བྱའོ། །འདིར་ཡན་ལག་བྱ་བ་དང་ལྡན་པ་ནི་མ་ཡིན་ཏེ། གང་གི་ཕྱིར་བྱ་བ་དང་ལྡན་པའི་ཡན་ལག་རྣམས་ལ་ནི་རྣམ་པར་དབྱེ་བ་སྐྱེ་ལ། དེས་ཀྱང་ལྡན་པ་འདུ་བ་མེད་པའི་རྒྱུ་ལྡོག་པ་ན་རྫས་འཇིག་པར་ཐལ་བའི་ཕྱིར་རོ། །རྫ་མཁན་ལ་སོགས་པའི་རྒྱུ་མཚན་རྒྱུ་ལྡོག་པ་ན་ནི་འབྲས་བུ་ལྡོག་པར་བྱེད་པ་མ་ཡིན་གྱི། འདུ་བ་མེད་པའི་རྒྱུ་ལྡན་པ་དང་འདུ་བ་དང་འདུ་བ་ཅན་གྱི་རྒྱུ་སྣལ་མ་ལ་སོགས་པ་ལྡོག་པ་ནི་སྣམ་བུ་ལ་སོགས་པའི་འབྲས་བུ་ལྡོག་པར་བྱེད་པ་ཡིན་ནོ། །དེ་བཞིན་དུ་འགལ་བའི་ཆོས་གཞན་དང་ལྡན་པར་ཡང་སྟོན་པར་བྱེད་དེ། འདི་ལ་མཐོང་བའི་རང་བཞིན་གང་ཡིན་པ་དེ་ཉིད་ཀྱིས་དེའི་ཚེ་མ་མཐོང་བར་ནི་མི་འཐད་དེ། དེའི་ཕྱིར་གཅིག་སྟེ་ལག་པ་ལ་སོགས་པ་བསྒྲིབས་པ་མཐོང་བའི་གེགས་བྱས་པའི་ཕྱིར་དེ་ལ་གནས་པའི་ཡན་ལག་ཅན་གྱི་རྫས་ཀྱང་བསྒྲིབས་པར་འགྱུར་ཞིང༌། དེ་ཉིད་ཀྱང་ཡན་ལག་ཐམས་ཅད་ལ་ཁྱབ་པ་ཡིན་པ་དེས་ན་བསྒྲིབས་པའི་ཡན་ལག་གཅིག་ལ་གནས་པའི་ཡན་ལག་ཅན་གྱི་རང་བཞིན་ལས་ཐ་དད་པ་མེད་པའི་ཡན་ལག་གཞན་ལ་གནས་པའི་རང་བཞིན་བསྒྲིབས་པར་འགྱུར་བ་དེས་ན་མི་མཐོང་བར་འགྱུར་ཏེ། ཐ་དད་པ་མེད་པའི་ཕྱིར་རོ་ཞེས་གང་བརྗོད་པ་ཡིན་ནོ། །ཅི་སྟེ་ཡང་མ་བསྒྲིབས་པའི་ཡན་ལག་ལ་གནས་པའི་ཡན་ལག་ཅན་གྱི་རང་བཞིན་མ་བསྒྲིབས་པའི་ཕྱིར་མཐོང་ན་ནི། མཐོང་བ་དེ་ལས་ཐ་དད་པ་མེད་པའི་ཕྱིར། བསྒྲིབས་པའི་ཡན་ལག་ཅན་ཡང་མཐོང་བར་འགྱུར་བ་དེས་ན་ཚང་བར་བཟུང་བར་ཐལ་ལོ། །དེར་ནི་ཡན་ལག་བསྒྲིབས་པར་བྱས་ཀྱི་ཡན་ལག་ཅན་ནི་མ་ཡིན་ཏེ། དེས་ན་ཐམས་ཅད་བསྒྲིབས་པར་ཐལ་ཞེས་ཅིའི་ཕྱིར་བརྗོད་ཅེས་གལ་ཏེ་གཞན་དག་སེམས་ན། དེ་ཡང་རིགས་པ་མ་ཡིན་ཏེ། ཡན་ལག་རྣམས་ཀྱི་
ཕྱེད་གོང་ཡིན་པའི་ཕྱེད་པོ་དེ་ཇི་སྲིད་དུ་བསྒྲིབས་སུ་ཟིན་ཀྱང་མཐོང་བར་འགྱུར་ཏེ། ཡན་ལག་ཅུང་ཞིག་བསྒྲིབས་པ་ལ་ལྟ་ཅི་སྨོས་ཞེས་བྱ་བ་ནི་ཀྱང་གི་སྒྲའོ། །ཅིའི་ཕྱིར་ཞེ་ན། མ་བསྒྲིབས་པའི་ཕྱིར་རོ། །ཇི་ལྟར་ཞེ་ན། སྔ་མ་ཁོ་ན་བཞིན་དུ་སྟེ། མ་བསྒྲིབས་པའི་གནས་སྐབས་བཞིན་དུ་ཡུལ་མ་ཚང་བ་མེད་པར་མཐོང་བར་ཐལ་ལོ། །ཅི་སྟེ་ཡན་ལག་མ་མཐོང་བ་གང་ཡིན་པ་ལ་ཡན་ལག་ཅན་དེ་རྟོགས་པར་མི་འགྱུར་ཏེ་མཐོང་བ་མ་ཡིན་ནོ། །ཇི་ལྟར་ཞེ་ན། སྨྲས་པ། སྣང་བའི་ཡན་ལག་གི་སྒོ་ནི་ཐབས་ཏེ། ཚོགས་པ་མཐོང་བའི་སྒོ་དེ་ནས་ཡན་ལག་ཅན་དེ་མཐོང་བའི་རྒྱུའི་ཕྱིར་རོ་ཞེས་གཞན་དག་དོགས་པ་ལ་མ་ཡིན་ཏེ་ཞེས་གསུངས་ཏེ། ཡན་ལག་ཅུང་ཟད་ཅིག་མ་མཐོང་བས་ནི་འདིར་ཡན་ལག་ཅན་མི་མཐོང་བར་རིགས་པ་མ་ཡིན་ནོ། །འདི་ལྟར་གང་ཞིག་བསྒྲིབས་པའི་ཡན་ལག་ཅན་གྱི་རང་བཞིན་དང༌། གང་ཡང་མ་བསྒྲིབས་པའི་ཡན་ལག་ཅན་གྱི་རང་བཞིན་དེ་ནི་ཐ་དད་པ་མེད་བ་ཡིན་ཏེ། ཐ་དད་པ་མེད་པ་དེས་ན་རྣམ་པར་ཐམས་ཅད་དུ་བསྒྲིབས་པའི་ཡན་ལག་དང་འབྲེལ་པ་དང༌། མ་བསྒྲིབས་པའི་ཡན་ལག་དང་འབྲེལ་པའི་རང་བཞིན་དུ་ཡན་ལག་ཅན་མ་རྟོགས་པར་ཐལ་པའི་ཕྱིར་རོ། །མ་རྟོགས་པ་ཡང་མ་ཡིན་ཏེ། ཡན་ལག་ཅན་གྱི་ངེས་པ་སྐྱེ་བ་ཡོད་པའི་ཕྱིར་རོ། །གལ་ཏེ་ཡན་ལག་འབའ་ཞིག་མཐོང་གི་ཡན་ལག་ཅན་མ་ཡིན་ན་ནི་དེའི་ཚེ་ཡན་ལག་ཅན་མཐོང་བའི་ངེས་བ་མི་སྐྱེ་བར་འགྱུར་རོ། །གཞན་ཡང་གལ་ཏེ་ཡན་ལག་ཅུང་ཟད་ཅིག་བསྒྲིབས་པའི་དུས་དེའི་ཚེ་ཡན་ལག་ཉིད་མཐོང་ན་ནི། ཐམས་ཅད་ཀྱི་ཚེ་ཡན་ལག་ཅན་མཐོང་བར་མི་འགྱུར་ཏེ། ཚུ་རོལ་དང་ཕ་རོལ་དང་དབུས་ཀྱི་ཆའི་ཡན་ལག་ཐམས་ཅད་ཚུ་རོལ་མཐོང་བ་གཅིག་གིས་ཅིག་ཅར་ཏེ་དུས་གཅིག་ཏུ་མཐོང་བར་མི་ནུས་པའི་ཕྱིར་ཡན་ལག་མཐོང་བ་འཇིག་པར་འགྱུར་ན་ཡན་ལག་ནི་མཐོང་བའི་ཡུལ་དུ་བརྟགས་པ་ཡིན་ནོ། །ཅི་སྟེ་ཡན་ལག་ཅུང་ཟད་ཅིག་མཐོང་བ་ན་ཡང༌། ཡན་ལག་ཅན་མཐོང་བ་ཡོད་པ་ཡིན་ན་ནི་དེའི་ཚེ་ཡན་ལག་ཅུང་ཟད་མཐོང་བས་ཀྱང་ཡན་ལག་ཅན་མཐོང་བར་འགྱུར་ཞིང་དེ་ལས་ཀྱང་མ་བསྒྲིབས་པའི་གནས་སྐབས་བཞིན་དུ་ཡན་ལག་ཐམས་ཅད་ཁྱབ་པའི་ཡན་ལག་ཅན་རགས་པ་གཅིག་མཐོང་བར་འགྱུར་ན་ཡོད་པ་ཡང་མ་ཡིན་ནོ། །རྣམ་པ་གཞན་གྱི་སྒོ་ནས་ཀྱང་
འགལ་བའི་ཆོས་དང་ལྡན་པ་སྟོན་ཏེ། གང་གི་ཕྱིར་དངོས་པོ་དེ་ཉིད་ནི་དུས་དེ་ཉིད་ཀྱི་ཚེ་འབྲེལ་པ་ཅན་གྱི་དངོས་པོ་གཞན་དེས་ཁྱབ་པ་དང་མ་ཁྱབ་པར་འཐད་པ་མ་ཡིན་ཏེ། དེས་ན་ཡན་ལག་གཅིག་ཁ་བསྒྱུར་ཏེ། ཚོན་གྱི་རྫས་དང་འབྲེལ་ན་དེ་ལ་གནས་པའི་ཡན་ལག་ཅན་ཚོན་དང་འདྲེས་པས་སོ་ཞེ་ན་ནི། ཡན་ལག་གཞན་དང་འབྲེལ་པ་ཡང་དེ་ཉིད་ཡིན་པའི་ཕྱིར་ཁ་བསྒྱུར་བར་ཐལ་ལོ། །ཡོད་བ་ཡང་མ་ཡིན་ཏེ་མ་མཐོང་བའི་ཕྱིར་རོ། །ཅི་སྟེ་ཕྱོགས་གཅིག་ཁ་མ་བསྒྱུར་རོ་ཞེ་ན། དེ་ལས་ཐ་དད་པ་མེད་པའི་ཕྱིར་དེ་ཡང་ཁ་མ་བསྒྱུར་ཏེ། གཅིག་བོ་དེའི་རང་བཞིན་ཡུལ་ཐམས་ཅད་ལ་ཁྱད་པར་ཡོད་པའི་ཕྱིར་དེ་ཁོ་ན་ལྟར་རྟོགས་པར་འགྱུར་རོ། །ཅི་སྟེ་ཡང་ཡན་ལག་ཁ་བསྒྱུར་གྱི་ཡན་ལག་ཅན་མ་ཡིན་ན། དེ་ལྟ་ན་འོ་ན་ཡང་ལག་ཅན་ཁ་མ་བསྒྱུར་བ་དེའི་ཕྱིར་ཡན་ལག་བསྒྱུར་བ་དང༌། ཡན་ལག་ཅན་མ་བསྒྱུར་བར་སྣང་བར་འགྱུར་ན་སྣང་བ་ཡང་མ་ཡིན་ནོ། །དེ་ལྟར་འདིས་འགལ་བ་འདུ་བ་རྣམ་པ་གསུམ་བསྟན་ཏོ། །སྣང་བའི་ཡུལ་ཅན་ནི་གཉིས་ཏེ་བྱ་བ་ནི་རང་བཞིན་གྱི་རྣམ་པར་འགྱུར་བར་གྱུར་པ་ཡིན་ལ། དེ་ཡང་དངོས་པོ་དང་དངོས་པོ་མེད་པ་དག་གིས་ཐ་དད་པར་འགྱུར་ལ་དོན་གཞན་དང་འབྲེལ་པ་ཡང་ཐ་དད་པར་འགྱུར་རོ། །མཐོང་བའི་ཡུལ་ཅན་ཡང་སྒྲིབ་པའི་ཐ་དད་པས་ཐ་དད་པ་ཡིན་ནོ། །འགལ་བའི་ཆོས་དང་ལྡན་པ་འདི་ཙམ་དུ་ཟད་པ་ནི་མ་ཡིན་ཏེ། འདི་ལྟར་རྫས་གྲུབ་བཞིའི་མཐའ་གཅིག་ཡུལ་གང་དུ་དམིགས་པའི་ཡུལ་དེ་ནི་ཡན་ལག་གཞན་དང་འབྲེལ་པའི་ཡུལ་ལས་ལྡོག་པ་ཡིན་ཏེ། དེ་ཚད་མས་ཡོངས་སུ་བཅད་པས་དེའི་རང་བཞིན་ཉམས་པར་རྣམ་པར་གཅད་པ་ན་དེའི་རང་བཞིན་ཉམས་པ་དང་ལྡན་པ་ཡང་ལག་གཞན་དང་འབྲེལ་པའི་ཡུལ་གཞན་ཡང་རྣམ་པར་གཅད་པར་འགྱུར་རོ། །དེ་རྣམ་པར་བཅད་ན་ཡང་ཡོངས་སུ་བཅད་པའི་ཡུལ་ཁྱབ་པའི་རང་བཞིན་དེ་དང་འབྲེལ་བ་ལས་རྣམ་པར་བཅད་པར་འགྱུར་ཏེ། གང་གི་ཕྱིར་དེའི་རང་བཞིན་ཁྱབ་པའི་ཡུལ་ནི་ཡུལ་གཞན་གྱི་རང་བཞིན་དང་བྲལ་བ་དེས་ན་དེས་ཁྱབ་པ་ནི་དེ་མེད་པས་ཁྱབ་པར་འགྱུར་ལ། གང་ཞིག་དེ་མེད་པའི་ཁྱབ་པ་དེ་ཉིད་ནི་དེ་ཡོད་པས་ཁྱབ་པ་མ་ཡིན་པ་དེས་ན་རང་བཞིན་གང་ཞིག་ཡུལ་གང་མེད་པས་ཁྱབ་པ་དེ་ནི་དེ་དང་འབྲེལ་པ་མ་ཡིན་ལ། གང་ཞིག་གང་དང་འབྲེལ་པ་མ་ཡིན་པ་དེ་ཉིད་ནི་དེ་དང་འབྲེལ་
པ་མ་ཡིན་ཏེ། གཅིག་ལ་ཅིག་ཅར་རང་བཞིན་གཅིག་བསྒྲུབ་པ་དང་དགག་པ་ནི་འགལ་བའི་ཕྱིར་རོ། །དེས་ན་རང་བཞི་ན་གཅིག་གི་ཡུལ་དང་ཕྱོགས་དང་དུས་གཅིག་དང་འབྲེལ་པའི་སྒྲུབ་པ་དང་དགག་པ་དག་ནི་མེད་ན་མི་འབྱུང་བ་ཡིན་པའི་ཕྱིར། ཕྱོགས་དེ་དང་ཕྱོགས་གཞན་དང༌། ཡུལ་དེ་དང་ཡུལ་གཞན་ཉིད་ནི་ཕན་ཚུན་སྤངས་པས་འགལ་བ་ཡིན་ནོ་ཞེས་མང་དུ་བཤད་པ་ཡིན་ནོ། །དེས་ན་འདིར་རང་བཞིན་དུ་གྱུར་བའི་བྱ་བ་ཐ་དད་པས་ནི་རང་བཞིན་དུ་གྱུར་པའི་ནུས་པ་ལ་སོགས་པ་ཡོད་པ་དང་མེད་པའི་བདག་ཉིད་ཀྱི་ཐ་དད་པ་ཐམས་ཅད་དང་འབྲེལ་པ་ཅན་ཚོན་ཐ་དད་པས་ནི་འབྲེལ་པ་ཅན་གྱི་རྒྱུ་མཚན་ཅན་གྱི་ཐ་དད་པ་ཐམས་ཅད་ཉེ་བར་མཚོན་པ་ཡིན་ལ། བསྒྲིབས་པའི་སྒོ་ནས་ཀྱང་ཤེས་པའི་ཡུལ་དང་ཡུལ་མ་ཡིན་པ་ཉིད་ཀྱིས་བྱས་པའི་དུ་མ་ཉིད་ཉེ་བར་མཚོན་པ་ཡིན་ནོ། །དེའི་ཕྱིར་དེ་ལྟར་ཡང་འགལ་བའི་ཆོས་དང་ལྡན་པ་དེ་ནི་གཅིག་མ་ཡིན་ཏེ། དཔེར་ན་ཐ་དད་པའི་བུམ་པ་ལ་སོགས་པ་བཞིན་ནོ། །གཅིག་ཏུ་མངོན་པར་འདོད་པའི་དོན་ཡང་འགལ་བའི་ཆོས་དང་ལྡན་པར་མཐོང་བ་ཡིན་ནོ། །འགའ་ཞིག་འགའ་ཞིག་ལས་ཐ་མི་དད་པ་ནི་དེ་ལ་ཡོད་པ་ཡིན་བས་དེས་ན་ཡོད་པའི་ཡུལ་ཅན་གྱི་གཅིག་ཉིད་ཀྱིས་ཐ་སྙད་ལ་ནི་དངོས་པོ་ཡོད་པས་ཁྱབ་ལ། འགལ་བའི་ཆོས་དང་ལྡན་པ་ནི་གཅིག་གི་ཐ་སྙད་ཀྱིས་ཁྱབ་པར་བྱེད་པ་ཡོད་པ་ཉིད་དང་འགལ་བ་མེད་པ་ཡིན་པའི་ཕྱིར་ཁྱབ་པར་བྱེད་པ་འགལ་བ་དམིགས་པའི། །གཅིག་ཉིད་བཀག་པ་ན་ཡང་དངོས་པོ་ཉིད་ཡིན་པའི་ཕྱིར་དུ་མ་ཉིད་དུ་གྲུབ་པར་འགྱུར་གྱི། གཅིག་བཀག་པ་ཙམ་གྱིས་ནི་དུ་མ་ཉིད་དུ་འགྲུབ་པ་མ་ཡིན་ཏེ། དངོས་པོ་མེད་པ་ཡང་དངོས་པོ་དང་ལྷན་ཅིག་གཅིག་ཉིད་ཡིན་པ་བཀག་པའི་ཕྱིར་རོ། །འདིར་ནི་གཅིག་པ་ཉིད་འགོག་པའམ་དུ་མ་ཉིད་དུ་སྒྲུབ་པ་མ་ཡིན་ཏེ། མངོན་སུམ་གྱིས་ཐ་དད་པར་གྲུབ་པའི་ཕྱིར་ཡུལ་མེད་པས་བློ་གྲོས་རྨོངས་པ་ལ་དེ་ཙམ་གྱི་ཡུལ་ཅན་གཅིག་གི་ཐ་སྙད་མེད་པར་བསྒྲུབ་པར་བྱ་བ་ཡིན་ནོ། །དེས་ན་དོན་འདི་ཡིན་ཏེ། གང་ཡོད་པ་དེ་ནི་ཆ་མེད་པ་ཡིན་ཏེ། དཔེར་ན་ཤེས་པ་བཞིན་ནོ། །སྣང་བའི་དངོས་པོ་ཡང་ཡོད་པ་མ་ཡིན་ནོ། །ཆ་ཤད་དང་བཅས་པ་ཉིད་ཡིན་ན་ནི་ཕྱོགས་ཐ་དད་པའི་རྒྱུ་མཚན་ཅན་ཡོད་པའི་འགལ་ཟླ་མེད་པ་ཞེས་བྱ་བར་འགྱུར་ཏེ། དེས་ན་རང་བཞིན་འགལ་
བ་དམིགས་པས་ཡོད་པ་ཉིད་ཆ་དང་བཅས་པ་ཉིད་ལས་ལྡོག་པ་ན་ཆ་མེད་ཀྱིས་ཁྱབ་པའི་ཕྱིར་རང་བཞིན་ཡིན་ནོ། །འགལ་བའི་ཆོས་དང་ལྡན་པ་དེའི་ཕྱིར་གང་ཞིག་ཤེས་པ་ལ་འདྲ་བར་བྱེད་པ་འདྲ་བའི་བདག་ཉིད་དུ་བྱེད་པ་དོན་གཅིག་བུ་ནི་འགའ་ཡང་ཡོད་པ་མ་ཡིན་ནོ། །གང་གི་ཕྱིར་འདྲ་བ་མི་འཐད་པ་དང་འདྲ་བ་ཡོད་དུ་ཆུག་ཀྱང་གཟུང་བ་དང་འཛིན་པའི་མཚན་ཉིད་ལ་འཁྲུལ་བ་དེ་ཉིད་ཀྱི་ཕྱིར། བློ་ཡིས་ཐ་དད་པའི་ཉམས་སུ་མྱོང་བར་བྱ་བ་གཞན་མེད་དེ། དེ་རྣམ་པར་མི་གནས་པའི་ཕྱིར་རོ། །བློའི་དིའི་མྱོང་བ་ཡང་གཞན་མ་ཡིན་ཏེ། གང་གི་ཕྱིར་དེ་ལ་ཡང་གཟུང་བ་དང་འཛིན་པའི་མཚན་ཉིད་གཉིས་པ་དང་འདྲ་བའི་ངོ་བོ་ཉིད་མ་ཚང་བ་དེའི་གནས་སྐབས་ཉིད་ཡིན་ཏེ། དེ་ལ་ཡང་དེ་མ་ཐག་པའི་རྐྱེན་གྱིས་འཁྲུལ་པ་ལྡོག་པ་མེད་དོ། །འོ་ན་ཇི་ལྟར་ཤེས་པ་དང་ཤེས་བྱའི་རྣམ་པ་གཟུང་བར་འགྱུར་ཞེ་ན། བཤད་པ། དེ་ནི་དེ་ལྟར་ཏེ་རང་ཉིད་ཁྱད་པར་གཞན་མེད་པར་ཁོ་ནར་བསལ་བ་ཡིན་ནོ། །འདི་སྐད་བརྗོད་པ་ཡིན་ཏེ། ཤེས་པ་གཞན་གྱིས་ནི་བློ་དེ་ད་ལྟར་གསལ་བ་མ་ཡིན་ཏེ། བློའི་རང་བཞིན་ཉིད་ཀྱིས་དེའི་རང་བཞིན་ཁོ་ནས་གསལ་བ་ཡིན་ནོ། །དེས་ཀྱང་དོན་འགའ་ཞིག་གསལ་བ་མ་ཡིན་གྱི། འོན་ཀྱང་མ་རིག་པའི་རྗེས་སུ་ཞུགས་པའི་ཕྱིར་མི་བདེན་པའི་དོན་སྟོན་པར་བྱེད་པ་དེའི་རང་གི་ངོ་བོ་ཁོ་ན་གསལ་བ་ཡིན་ནོ། །འདི་ཉིད་རྣམ་པར་དགྲོལ་བ་བཤད་པ་ནི། གང་གི་ཕྱིར་འཁྲུལ་པ་དང་མི་སྲིད་པའི་ཕྱིར་ཡུལ་གྱི་མཚན་ཉིད་རྣམ་པར་འཇོག་པའི་རྒྱུས་སྐྱེས་པ་དང་འདྲ་བ་བཀག་པའི་ཕྱིར་ཏེ། དེང་ན་ཐ་དད་པའི་དོན་འགའ་ཡང་ཉམས་སུ་མྱོང་བ་མ་ཡིན་ལ། ཉམས་སུ་མྱོང་བ་འདིའི་ཉམས་སུ་མྱོང་བ་ཡང་གཞན་འགའ་ཞིག་མ་ཡིན་ཏེ། དེ་ལ་ཡང་ཉམས་སུ་མྱོང་བ་གཞན་གྱིས་ཉམས་སུ་མྱོང་བ་ལ་གཟུང་བར་བྱ་བའི་མཚན་ཉིད་མེད་པའི་ཕྱིར་རོ། །དེ་ལྟར་གང་གི་ཕྱིར་ཤེས་པའམ་གཞན་ཉམས་སུ་མྱོང་བའི་འབྲེལ་པ་ཅན་གཞན་འགའ་ཡང་ཡོད་པ་མ་ཡིན་པ་དེའི་ཕྱིར་ཉམས་སུ་མྱོང་བ་གང་གི་ཡིན་པ་དེ་ནི་རྣམ་པར་ཤེས་པའི་བདག་ཉིད་ཁོ་ན་ཡིན་གྱི། ཇི་ལྟར་ཕྱི་རོལ་གྱི་དོན་དུ་སྨྲ་བ་རྣམས་ཀྱིས་ཉེ་བར་བརྟགས་པ་བཞིན་དུ་ཉམས་སུ་མྱོང་བར་བྱ་བའི་དངོས་པོ་ལ་ལྟོས་པ་ནི་མ་ཡིན་ནོ། །དེ་ཉིད་ཀྱིས་ན་ཉམས་སུ་མྱོང་བ་དེ་ཡང་
གཞན་འགའ་ཞིག་གི་རང་གི་ངོ་བོ་ནི་མ་ཡིན་ཏེ། རྣམ་པར་ཤེས་པའི་བདག་ཉིད་གཞན་གྱིར་ཇི་ལྟར་འགྱུར། གཞན་གྱི་བདག་ཉིད་ནི་གཞན་མ་ཡིན་པའི་ཕྱིར་རོ། །གལ་ཏེ་འོ་ན་བློ་གཞན་གྱིས་གཟུང་བར་བྱ་བ་མ་ཡིན་ན། འོ་ན་ཇི་ལྟར་འདི་མངོན་སུམ་གྱིས་སོ་སོར་རིག་པར་བྱ་བ་ཡང་དག་པར་མྱོང་བར་བྱ་བ་ཉིད་ཡིན་ཞེ་ན། དེ་ཡང་འདིའི་དེའི་བདག་ཉིད་ཁོ་ན་སྟེ་མངོན་སུམ་གྱི་བདག་ཉིད་གང་ཡིན་པའོ། །འདི་སྐད་བརྗོད་པ་ཡིན་ཏེ། དེ་ཉིད་བདག་ཉིད་ལ་མངོན་སུམ་གྱི་ཚད་མ་ཡིན་གྱི་གཞན་ལ་ནི་མ་ཡིན་ཏེ། དེ་ནི་མྱོང་བའི་ངོ་བོར་སྐྱེ་བ་ན་རང་གི་བདག་ཉིད་ལ་མངོན་སུམ་གྱི་ཚད་མ་ཡིན་ནོ། །གང་གི་ཕྱིར་མངོན་སུམ་དེ་ནི་རིག་པའི་རང་བཞིན་ཉིད་ཀྱིས་རང་ཉིད་རབ་ཏུ་གསལ་བ་ཉིད་ཡིན་གྱི་སྔོན་པོ་ལ་སོགས་པ་བཞིན་དུ་གཞན་ལ་ལྟོས་ནས་གསལ་བ་ཡིན་པའི་རྒྱུ་དེས་ན་དེ་བདག་ཉིད་གསལ་བར་བྱེད་པ་བསྟན་པ་ཡིན་ཏེ་གསལ་བ་བཞིན་ནོ། །གང་གི་ཕྱིར་སྣང་བ་ནི་རང་ཉིད་རབ་ཏུ་གསལ་བ་ན་བདག་ཉིད་གསལ་བར་བྱེད་པ་ཞེས་བརྗོད་པ་ཡིན་ནོ། །འདི་སྐད་བརྗོད་པ་ཡིན་ཏེ་རང་རིག་པ་འདི་ལ་གཟུང་བ་དང་འཛིན་པ་ཐ་དད་པ་ནི་ཡོད་པ་མ་ཡིན་གྱི། འོན་ཀྱང་བདག་ཉིད་རབ་ཏུ་གསལ་བ་ན་བདག་ཉིད་འཛིན་པའི་མངོན་སུམ་གྱི་ཚད་མའི་རང་བཞིན་དུ་བསྟན་པ་ཡིན་ནོ།། འོ་ན་སྔོན་པོ་ལ་སོགས་པ་གསལ་བ་ཇི་ལྟར་དེ་དག་གི་མྱོང་བ་ཡིན་ཞེ་ན། བཤད་པ། སྔོན་པོ་ལ་སོགས་པ་ཉམས་སུ་མྱོང་བ་ཞེས་བྱ་བ་ཡང་སྟེ། ཐ་སྙད་འདིས་ཀྱང་ཐ་དད་པ་བརྗོད་པ་ནི་མ་ཡིན་གྱི། འོན་ཀྱང་སྔོན་པོ་ལ་སོགས་པའི་རང་གི་ངོ་བོ་ཉིད་དུ་གྱུར་པའི་ཉམས་སུ་མྱོང་བ་གང་ཡིན་པའོ། །གཟུང་བའི་རྣམ་པ་འཁྲུལ་པ་མ་ཡིན་ནམ། དེ་ལྟར་ཉམས་སུ་མྱོང་བའི་རང་གི་ངོ་བོར་འགྱུར། བདེན་ཏེ་དངོས་པོ་གཞན་དགག་པ་ལྷུར་བརྗོད་པ་ཡིན་ནོ། །དེས་ན་དོན་འདི་ཡིན་ཏེ་གང་རྣམ་པར་ཤེས་པས་གསལ་བར་གྱུར་པ། སྔོན་པོ་ལ་སོགས་པའི་དངོས་པོ་གཞན་ནི་ཡོད་པ་མ་ཡིན་གྱི། ཉེ་བར་བསླད་པའི་རྣམ་པར་ཤེས་པ་དེ་ཉིད་ནི་འདི་འདྲ་བ་ཡིན་ཏེ། ཡོད་པ་མ་ཡིན་པའི་རྣམ་པ་ཉེ་བར་སྟོན་པ་གང་ཡིན་པའོ། །རྣམ་པར་ཤེས་པའི་རང་གི་ངོ་བོས་བསྟན་པའི་རྣམ་པ་ནི་རང་ལས་འགྱུར་ཞིང་གསལ་བ་ཡིན་ཏེ། རང་ཁོ་ནས་གསལ་བ་ན་རང་གི་ངོ་བོ་ཞེས་བརྗོད་པ་ཡིན་ནོ། །རགས་པ་དང་
རྣམ་པར་ཆད་པ་མྱོང་བར་འགྱུར་བའི་གཟུང་བའི་རྣམ་པ་གང་ཡིན་པ་འདི་དང༌། གང་ཡང་དགའ་བ་ལ་སོགས་པའི་རང་བཞིན་འཛིན་པའི་རྣམ་པ་དང་དེའི་མྱོང་བ་གང་ཡིན་པ་དེ་རྣམས་ཇི་ལྟར་ཉམས་སུ་མྱོང་བ་བཞིན་དེ་ཁོ་ན་ཉིད་ཡིན་ན་རྣམ་པ་དེ་གཉིས་དང་འཛིན་པའི་རང་བཞིན་མྱོང་བ་སྟེ་འདོད་པ་མ་ཡིན་པའི་དངོས་པོ་གསུམ་དུ་ཐལ་བར་འགྱུར་བ་མ་ཡིན་ནམ། གང་གི་ཕྱིར་གཟུང་བ་ནི་གཟུང་བར་བྱ་བ་ཡིན་ལ། འཛིན་པའི་རྣམ་པར་ཡང་མྱོང་བར་བྱ་བ་ཡིན་ཏེ། ནང་གི་ཡོངས་སུ་གཅོད་པ་ཡང་རང་རིག་པའི་རང་བཞིན་ཡིན་ནོ་ཞེས་གང་འཆད་པར་འགྱུར་རོ། །འདི་ལ་རྣམ་པར་ཕྱེ་བ་ན་རང་བཞིན་གསུམ་དུ་འགྱུར་ལ། རང་གི་རང་བཞིན་མྱོང་བ་ནི་རྣམ་པ་གསུམ་པར་བརྗོད་པ་ཡིན་ནོ། །དེས་ན་སྔོན་པོ་ལ་སོགས་པ་ནི་བཟུང་བའི་རྣམ་པ་ཡིན་ལ་དེའི་འཛིན་པའི་བྱ་བ་ནང་གི་རྣམ་པ་ནི་གཉིས་པ་དེའི་སིམ་པ་ལ་སོགས་པའི་རང་བཞིན་མྱོང་བ་ནི་གསུམ་པ་ཡིན་ཏེ། རྣམ་འགྲེལ་ལས། གཟུང་བའི་རྣམ་པ་རྣམ་པར་ཆད་པར་སྣང་བ་ལ་ནི་ཤེས་པ་རྣམ་པར་ཆད་པར་འཛིན་པར་སྣང་གི་རང་གི་རང་བཞིན་ལ་ནི། རྣམ་པར་མ་ཆད་པར་ཉམས་སུ་མྱོང་བར་སྣང་ངོ་ཞེས་ཏེ། དེར་ནི་བཟུང་བ་དམིགས་པ་དང་རང་གི་རང་བཞིན་ཉམས་སུ་མྱོང་བ་གཉིས་ཐ་དད་པར་སྣང་བར་བརྗོད་པ་ཡིན་ནོ། །ཐ་མི་དད་ཀྱང་འོན་ཀྱང་གཟུང་དང་འཛིན་པའི་རྣམ་པ་ཅན་གྱི་ཤེས་པ་ནི་དོན་དམ་པ་ཡིན་པའི་ཕྱིར་གཉིས་སུ་མེད་པར་མི་འགྱུར་རོ། །དངོས་པོར་གྱུར་པ་མ་ཡིན་པ་དག་ནི་གསལ་བར་སྣང་བར་མི་འགྱུར་ཏེ། རི་བོང་གི་རྭ་བཞིན་ནོ་ཞེས་དོགས་པ་ལ། བཤད་པ། གང་ལ་རིག་བྱ་དང་རིག་བྱེད་ཀྱི་རྣམ་པ་ནི་ཡོད་པ་མ་ཡིན་པའོ། །གལ་ཏེ་དེ་དག་མེད་ན་དེ་ལྟ་ན་འོ་ན་དེ་དག་ཇི་ལྟར་སྣང་ཞེ་ན། བཤད་པ་གང་གི་ཚེ་སྟེ་གང་གི་ཕྱིར་ཇི་ལྟར་ཏེ་རྣམ་པ་གང་གིས་མ་རིག་པའི་བག་ཆགས་ཀྱིས་ཉེ་བར་བསླད་པའི་འཁྲུལ་པས་མཐོང་ཞིང་རྟོགས་པར་གྱུར་པ་དེ་ལྟར་འདི་རྣམ་པར་གཞག་པར་བྱས་པ་ཡིན་ནོ། །དགོངས་པ་ནི་འདི་ཡིན་ཏེ། མ་རིག་པ་རྣམས་ཀྱི་མ་རིག་པ་འདི་ཉིད་དེ། མི་བདེན་པའི་རང་བཞིན་རབ་ཏུ་སྟོན་པའོ། །དེའི་ཕྱིར་རྣམ་པར་ཤེས་པ་མེད་པའི་རང་བཞིན་སྟོན་པའི་ནུས་པ་ནི་མ་རིག་པའི་བག་ཆགས་ཡིན་ལ། དེ་དང་ལྡན་པ་ལས་ཀྱང་ཤེས་པ་བདག་ཉིད་རབ་ཏུ་སྟོན་པ་
ཉིད་ན་ཡོད་པ་མ་ཡིན་པའི་གཟུང་བའི་རྣམ་པ་དང༌། དེ་ལ་བརྟེན་པའི་འཛིན་པ་ཉིད་དུ་བདག་ཉིད་སྟོན་པར་བྱེད་པ་ཡིན་ནོ། །དེས་ན་གཟུང་འཛིན་རྣམ་ཕྱེ་བའི་མཚན་ཉིད་དེ་རྣམ་པར་ཕྱེ་བའི་རང་བཞིན་དུ་ཉམས་སུ་མྱོང་བར་གྱུར་བ་གང་ཡིན་པ་དེ་ནི། རྣམ་པར་བསླད་པ་ཅན་ཏེ། མ་རིག་པས་རབ་ཏུ་བསྟན་པ་ན་དེ་ལྟར་མཐོང་བ་ཡིན་ལ། ཇི་ལྟར་མཐོང་བ་བཞིན་དུ་ཡང་གཟུང་བ་དང་འཛིན་པ་དང་མྱོང་བའི་རབ་ཏུ་དབྱེ་བ་རྣམ་པར་གཞག་པ་ཡིན་ཏེ། དཔེར་ན་རབ་རིབ་ཀྱིས་ཉེ་བར་བསླད་པས་ཤེས་པའི་སྐྲ་ཤད་པ་ལ་སོགས་པ་གཟུང་བ་དང་འཛིན་པའི་ཆའི་མཚན་ཉིད་ཐ་དད་བ་དང༌། འཛིན་པའི་རྣམ་པའི་མྱོང་བ་ཐ་དད་པ་དོན་དམ་པ་མ་ཡིན་པ་དེ་བཞིན་ནོ། །དེ་ཚེ་སྟེ་དེ་ལྟ་ཡིན་པ་དེའི་ཕྱིར་གཟུང་བ་དང་འཛིན་པ་དག་གི་མཚན་ཉིད་རང་གི་ངོ་བོ་གང་ཡིན་པ་སྟེ། རྣམ་པར་ཤེས་པ་སྨྲ་བའི་བློའི་རབ་ཏུ་དབྱེ་བས་གསུམ་གང་ཡིན་པ་འདི་ལ་བརྩད་པར་བྱ་བ་མ་ཡིན་ནོ། །གང་ཡང་གལ་ཏེ་མེད་པ་གསལ་ན་རི་བོང་གི་རྭ་ཡང་ཅིའི་ཕྱིར་སྣང་བར་མི་འགྱུར་ཞེས་བརྗོད་པ་དེ་ནི་མ་ཡིན་ཏེ། དེ་ལ་མེད་པའི་རི་བོང་གི་རྭ་ཉེ་བར་སྟོན་པའི་རྣམ་པར་ཤེས་པ་སྐྱེད་པར་བྱེད་པའི་ནུས་པ་མ་རིག་པའི་ངོ་བོར་གྱུར་བ་ནི་རྒྱུད་ལ་མེད་ཀྱི། སྔོན་པོ་ལ་སོགས་པ་སྟོན་པའི་ནུས་པ་ནི་ཡོད་པའི་ཕྱིར་ཧ་ཅང་ཐལ་བར་མི་འགྱུར་བས་ཁ་ན་མཐོ་བ་མེད་དོ། །འདི་ཡང་ཚད་མའི་འབྲས་བུ་རྣམ་པར་གཞག་པའི་ཕྱིར་བཤད་པ། གང་གི་ཚེ་ཕྱིའི་དོན་མེད་པ་དེའི་ཚེ་ཤེས་པ་ལས་གཞན་རིག་པའི་རིག་པ་མེད་པའི་བདག་ཉིད་ཁོ་ན་རིག་པར་བྱ་བ་ཡིན་ཞིང་དེ་རིག་པ་རང་རིག་པ་ནི་འབྲས་བུར་འགྱུར་རོ། །འདི་ཉིད་ཀྱི་རྣམ་པར་འགྲེལ་པ་བཤད་པ། རྣམ་པར་ཤེས་པར་སྨྲ་བ་གང་དག་གི་ཡོད་པ་མ་ཡིན་ཡང་གང་གིས་གཟུང་བ་དང་འཛིན་པའི་རྣམ་པར་ཉེ་བར་སྟོན་པ་སྟེ། གང་གི་ཕྱིར་དེ་ནི་མ་རིག་པས་ཉེ་བར་བསླད་པས་མེད་པའི་རྣམ་པ་ཡང་ཉེ་བར་སྟོན་པར་བྱེད་པ་དང༌། བདག་ཉིད་རྣམ་པ་དེའི་འཛིན་པར་བྱེད་པ་མ་ཡིན་ཡང་འཛིན་པར་བྱེད་པ་ཉིད་དུ་སྟོན་པར་བྱེད་པར་སྐྱེ་བ་དེ་དག་ལ་ནི་རིག་པར་བྱ་བ་གཞན་མེད་པའི་ཕྱིར་ཕྱིན་ཅི་ལོག་གི་རང་བཞིན་དུ་ཉེ་བར་སྟོན་པའི་བདག་ཉིད་རིག་པར་བྱ་བ་ཡིན་པའི་ཕྱིར། དེ་རིག་པ་འབྲས་བུ་ཡིན་ནོ། །བདག་གིས་ཕྱི་རོལ་གྱི་དོན་རིག་གོ་ཞེས་ངེས་ཀྱི། བདག་ཉིད་དོ་ཞེས་བྱ་བར་ནི་མ་ཡིན་པ་
མ་ཡིན་ནམ། རིག་པ་ཡང་ངེས་པ་ལ་ལྟོས་ནས་འབྲས་བུར་བརྗོད་ཀྱི་རང་ཉིད་ནི་མ་ཡིན་ནོ་ཞེ་ན། བདེན་ཏེ་འོན་ཀྱང་བདག་ཉིད་ཡུལ་དུ་རིག་པར་ངེས་པའི་ཕྱིར་ནི་རང་རིག་པ་འབྲས་བུར་བརྗོད་པ་མ་ཡིན་གྱི། འོན་ཀྱང་དོན་རྟོགས་པ་གང་ཡིན་པ་དེ་ནི་རང་རིག་པ་དེའི་ངོ་བོ་ཡིན་པའི་ཕྱིར་རོ། །གང་གི་ཕྱིར་དོན་རྟོགས་པ་དོན་རིག་པ་ནི་དོན་དམ་པར་རང་རིག་པ་དོན་ཡིན་པ་དེའི་ཕྱིར་གང་ཞིག་དེའི་བདག་ཉིད་དུ་གྱུར་པའི་རིག་པ་དེ་ཉིད་དངོས་པོ་ལ་གནས་པའི་འབྲས་བུ་ཡིན་ནོ། །དེ་ཡང་དོན་རིག་པའི་རང་བཞིན་དུ་ཞེན་པ་ན་དོན་རིག་པར་འགྱུར་བ་ཡིན་ཏེ། རིག་པ་དེ་ཕྱི་རོལ་གྱི་ཡུལ་ཅན་དུ་ངེས་པ་ཉིད་ཀྱང་རང་རིག་པ་ཉིད་ཀྱི་རྗེས་སུ་འགྲོ་བ་ཡིན་ནོ། །གང་གི་ཕྱིར་གལ་ཏེ་འཛིན་པའི་རྣམ་པའི་ཡུལ་ཅན་ཉམས་སུ་མྱོང་བའི་ཉམས་སུ་མྱོང་བ་དེ་འདོད་པའི་རྣམ་པ་སྟེ། སིམ་པའི་རྣམ་པ་ཅན་གྱི་འཛིན་པའི་ཡུལ་ཅན་ནམ། གང་གི་ཚེ་ཕྱིན་ཅི་ལོག་ཏུ་གྱུར་པ་དེའི་ཚེ་ཡུལ་དུ་འདོད་པའི་གཟུང་བའི་རྣམ་པ་ཡང་འདོད་པ་ཞེས་བྱ་བ་ནི་རྗེས་སུ་མཐུན་པ་སྟེ། བདེ་བའི་རྒྱུ་དང་མི་འདོད་པ་སྡུག་བསྔལ་གྱི་རྒྱུར་སོ་སོར་རིག་ཅིང་རྣམ་པར་འཇོག་གོ །དེའི་ཕྱིར་དོན་རྟོགས་པར་མངོན་པར་རློམ་ཡང་བདེ་བ་ལ་སོགས་པ་འཛིན་པའི་ཆོས་ཀྱི་རྗེས་སུ་འབྲངས་ནས། དེ་དང་རྗེས་སུ་མཐུན་པར་ཡུལ་རྣམ་པར་འཇོག་པའི་ཕྱིར་དོན་རིག་པར་ངེས་ཀྱང་རིག་པ་ནི་རང་གི་ཡུལ་ཅན་ཁོ་ནར་རིགས་སོ། །དེའི་ཕྱིར་དེ་ལྟར་རྣམ་པར་ཤེས་པར་སྨྲ་བ་ལ་གཟུང་བའི་རྣམ་པ་དོན་དུ་ཞེན་པར་བྱས་པ་ནི་གཞལ་བྱ་འཛིན་པའི་རྣམ་པ་ནི་ཚད་མ་གཟུང་བའི་རྣམ་པ་རིག་པར་རང་གི་རང་བཞིན་རིག་པའི་བདག་ཉིད་ཡིན་ཡང་གཟུང་བ་རིག་པ་ཉིད་དུ་ངེས་པ་ནི་འབྲས་བུ་ཡིན་ནོ། །ཇི་ལྟར་འཛིན་པའི་རྣམ་པར་ཉམས་སུ་མྱོང་བའི་དབང་གིས་དོན་རིག་པ་རྣམ་པར་འཇོག་པ་དེས་ན་རྣམ་པར་ཤེས་པ་སྨྲ་བ་ལ་རང་རིག་པ་ཁོ་ན་འབྲས་བུ་ཡིན་པ་དེ་བཞིན་དུ་ཕྱི་རོལ་གྱི་དོན་ཡོད་ཀྱང་རང་རིག་པ་ཇི་ལྟ་བ་བཞིན་ཞེས་བྱ་བ་དེ་ལ་སོགས་པའི་རྣམ་པ་རང་རིག་པ་ལས་མ་འདས་པར་དོན་གྲུབ་པ་སྟེ། རྟོགས་པར་རྣམ་པར་འཇོག་པའི་ཕྱིར་རང་རིག་པ་དེ་ཉིད་འབྲས་བུར་རིགས་སོ། །ཕྱི་རོལ་གྱི་དོན་གཞན་ཡོད་པ་མ་ཡིན་ནམ། དེའི་ཕྱིར་དེ་རིག་པ་ཉིད་འབྲས་བུ་ཡིན་ནོ་ཞེ་ན་བཤད་པ། ཕྱི་རོལ་གྱི་དོན་ཡོད་ཀྱང་དོན་གྱི་རང་གི་ངོ་བོ་
ལས་མ་འདས་པར་རྣམ་པར་གཞག་པ་ནི་མ་ཡིན་ནོ། །ཤེས་པ་ཐམས་ཅད་ཅེས་བྱ་བ་ནི་གལ་ཏེ་དོན་ཇི་ལྟ་བ་བཞིན་དུ་དོན་རྣམ་པར་འཇོག་པར་འགྱུར་ན་དེའི་ཚེ་ཕྱི་རོལ་གྱི་ཡུལ་ངོ་བོ་ཉིད་གཅིག་ཉིད་ཡིན་པའི་ཕྱིར་འཛིན་པའི་རྣམ་པས་གནས་པའི་བདེ་བ་དང་སྡུག་བསྔལ་སྐྱེ་བ་ན་ཇི་ལྟར་རྟོགས་པར་བྱེད་པ་རྣམས་དངོས་པོ་གཅིག་འཛིན་པའི་རྣམ་པར་ཤེས་པ་ལ་དུ་མའི་རང་བཞིན་འཛིན་པ་ཉིད་དུ་ངེས་པ་འདི་ལྟར་ངེས་པ་ནི་བདེ་བའི་རྒྱུར་འགྱུར་བའི་ཡུལ་ཡོངས་སུ་བཅད་དོ་ཞེས་ཁ་ཅིག་གིས་ངེས་ལ། ཁ་ཅིག་ནི་ཕྱིན་ཅི་ལོག་ཏུ་ཡིན་ནོ། །དེ་དག་གིས་ནི་བདེ་བའི་རྒྱུའམ་སྡུག་བསྔལ་གྱི་རྒྱུའི་ཡུལ་ཡོངས་སུ་བཅད་པ་མ་ཡིན་ནོ། །འཛིན་པའི་རྣམ་པའི་རྣམ་གྲངས་བདེ་བ་ལ་སོགས་པ་རྣམས་ལ་ནི་གཟུང་བའི་ཡུལ་གྱི་རང་བཞིན་ངེས་པ་ཡོད་པ་མ་ཡིན་ཏེ། བདེ་བ་ལ་སོགས་པ་ནི་གོམས་པའི་རྗེས་སུ་བྱེད་པ་དེས་ན་ཡུལ་ངེས་པར་ག་ལ་འགྱུར། དེའི་ཕྱིར་གལ་ཏེ་དོན་ཇི་ལྟ་བ་བཞིན་དུ་ཡུལ་རྣམ་པར་འཇོག་ན་ནི་དེའི་ཚེ་ཡུལ་ངེས་པའི་ཕྱིར་རང་བཞིན་གཅིག་འཛིན་པར་ངེས་པའི་རྣམ་པར་ཤེས་པ་ཐམས་ཅད་རྣམ་པ་གཅིག་ཏུ་འགྱུར་རོ། དེ་ལྟ་ནི་མ་ཡིན་ཏེ། གང་གི་ཕྱིར་ཡུལ་དེ་བདེ་བའི་རྒྱུ་ཉིད་དུ་ངེས་པ་དང༌། དེ་ལས་བཟློག་པའི་རང་བཞིན་དུ་སོ་སོར་ཤེས་པ་དེ་དག་གིས་གཟུང་བར་ངེས་པ་དེའི་ཕྱིར། ངེས་པའི་དོན་གཅིག་ཡུལ་ཡིན་པར་ལྷག་པར་ཞེན་ཀྱང་བདེ་བ་ལ་སོགས་པའི་རྒྱུར་ངེས་པའི་ཡུལ་ཅན་གྱི་ཤེས་པ་རྣམ་པ་དུ་མར་བརྗོད་པ་ཡིན་ནོ། །འདི་ཉིད་བཤད་པ་ནི། རྣམ་པ་ནི་དུ་མར་རྣམ་པར་རིག་སྟེ། གང་གི་ཕྱིར་རང་བཞིན་གཅིག་ཉིད་ལ། གཅིག་གི་ནི་ཡིད་ལ་འབབ་བས་ཡིད་དུ་འོང་བ་སྟེ། འདོད་པ་ཞེས་བྱ་བའི་དོན་ཏོ། །གཞན་གྱི་ནི་ཡིད་དུ་མི་འོང་བར་དེ་ལས་བཟློག་པར་མཐོང་བ་སྟེ་ངེས་པའི་ཕྱིར་རོ། །དགོངས་པ་ནི་འདི་ཡིན་ཏེ། སྣང་བའི་རང་བཞིན་ནི་གོམས་པའི་རྗེས་སུ་འཇུག་པའི་བདེ་བ་ལ་སོགས་པ་འགའ་ཞིག་གི་ཡང་ངེས་པར་བྱེད་པའི་རྒྱུ་མ་ཡིན་ཏེ། འོན་ཀྱང་གོམས་པ་སད་པའི་ལྷན་ཅིག་བྱེད་པའི་རྒྱུ་ཡིན་པའི་ཕྱིར་བདེ་བ་ལ་སོགས་པ་ལ་མ་ངེས་པ་ཡིན་ནོ། །དོན་དེ་ལ་རྟོགས་པར་བྱེད་པ་གང་གིས་གོམས་པ་ཅི་འདྲ་བར་འགྱུར་བ་དེའི་གོམས་པ་དེ་འདྲ་བ་སད་པའི་རྒྱུ་ཡིན་གྱི། བདེ་བ་ལ་སོགས་པའི་རྒྱུ་ནི་མ་ཡིན་ནོ། །
དེ་ནི་དེ་ཁོ་ན་ལྟར་གཟུང་བ་ངེས་པར་བྱས་པ་ཡིན་ན་དེ་ལྟར་ངེས་པ་ནི་མེད་དེ། བདེ་བ་དང་བདེ་བ་མ་ཡིན་པ་ལ་སོགས་པ་ཤེས་པའི་འཛིན་པའི་རྣམ་པ་ཐ་དད་པའི་ཕྱིར་དང༌། དེ་ཡང་འཛིན་པའི་རྣམ་པ་ཅི་ལྟ་བ་བཞིན་རྒྱུ་ཉིད་དུ་རྣམ་པར་གཞག་པའི་ཕྱིར་རོ། །དེའི་ཕྱིར་ཕྱི་རོལ་གྱི་དོན་དུ་སྨྲ་བ་ལ་ཡང་རང་རིག་པའི་རྗེས་སུ་འབྲངས་ནས་དོན་རྣམ་པར་འཇོག་པའི་ཕྱིར་རང་རིག་པའི་རང་བཞིན་ཁོ་ནར་རིགས་སོ། །འདོད་པའམ་མི་འདོད་པར་སྣང་བའི་ངང་ཚུལ་ཅན་གང་ཡིན་པ་དེ་དག་ནི་རྟོག་པ་ཡིན་ནོ། །འདི་སྐད་བརྗོད་པ་ཡིན་ཏེ། དངོས་པོ་གཅིག་ལ་འདོད་པ་དང་མི་འདོད་པའི་རྣམ་པར་འཇུག་པ་ནི་རྟོག་པ་ཉིད་ཡིན་གྱི། དབང་པོའི་རྣམ་པར་ཤེས་པ་ནི་མ་ཡིན་ནོ། །དེའི་ཕྱིར་དབང་པོའི་རྣམ་པར་ཤེས་པའི་ཡུལ་བསམ་པ་ན་རང་རིག་པ་ཇི་ལྟ་བ་བཞིན་དུ་དོན་རྣམ་པར་འཇོག་གོ་ཞེས་བྱ་བ་མི་རིགས་སོ་སྙམ་དུ་དོགས་པ་ལ་མ་ཡིན་ཏེ་ཞེས་གསུངས་ཏེ། དབང་པོའི་རྣམ་པར་ཤེས་པ་དེ་ལ་ཡང་འཆི་ལྟས་ལ་སོགས་པའི་དུས་སུ་བདེ་བ་ལ་སོགས་པའི་རྣམ་པ་མཚམས་སྦྱོར་བ་མེད་པ་སྟེ། རྗེས་སུ་འཇུག་པ་མེད་པའོ། །སོགས་པ་སྨོས་པ་ནི་ནད་ཀྱི་བྱེ་བྲག་གིས་ཐེབས་པའི་དུས་ན་ཡང་ངོ༌། །འགའ་ཞིག་འདོད་པ་མངོན་པར་དགའ་བར་བྱ་བའི་གནས་སུ་ལན་ཅིག་མ་ཡིན་པར་ཉམས་སུ་མྱོང་བ་ཡང་དམིགས་པ་དེ་ཉིད་ལ་ལྟ་བ་འཇུག་པ་ན་དེ་མ་ཐག་ཏུ་མིག་གི་རྣམ་པར་ཤེས་པ་མི་འདོད་པའི་རྣམ་པར་སྐྱེ་བར་འགྱུར་རོ། །དེ་བཞིན་དུ་ནད་ཀྱི་བྱེ་བྲག་གིས་ཐེབས་པའི་ཚེ་ཡང་ཡུལ་གང་ལ་སྔོན་བདེ་བའི་རྣམ་པ་ཅན་གྱི་རྣམ་པར་ཤེས་པ་སྐྱེ་བར་འགྱུར་བའི་དམིགས་པ་དེ་ཉིད་ལ། མོད་ལ་སྡུག་བསྔལ་གྱི་རྣམ་པ་ཅན་རྣམ་པར་ཤེས་པ་སྐྱེ་ཞིང་གང་ལས་སུན་བྱུང་བར་འགྱུར་བ་ཡིན་ནོ། །ཁ་ཅིག་ན་རེ་འཆི་ལྟས་ཀྱི་ཚེ་ན་གོས་དཀར་པོ་སྔོན་པོར་སྣང་ངོ་ཞེས་ཟེར་བ་དེ་ནི་དེ་ལྟར་མི་རིགས་ཏེ་བདེན་པའི་དོན་ཅན་དུ་འདོད་པའི་རྣམ་པར་ཤེས་པ་ཉིད་རིག་པ་ཇི་ལྟ་བ་བཞིན་དུ་དོན་རྣམ་པར་འཇོག་པའི་དཔེར་བྱ་བ་ཡིན་གྱི། ལོག་པའི་ཤེས་པ་ནི་མ་ཡིན་ནོ། །དཀར་པོ་སྔོན་པོར་སྣང་བ་ནི་ལོག་པའི་ཤེས་པ་ཡིན་ཏེ། དེའི་ཕྱིར་སྔ་མ་ཉིད་སྐྱོན་མེད་དོ། །རེ་ཞིག་མཚམས་སྦྱོར་བ་མེད་པར་རིམ་པ་དང་ལྡན་པའི་རྣམ་པ་འདི་ནི་རྒྱུད་གཅིག་གི་ཡུལ་མ་ཡིན་ནོ། །གཞན་ལ་ཡང་
ཞེས་བྱ་བ་རྒྱུད་ཐ་དད་པ་རྣམས་ལ་ཅིག་ཅར་ཐ་དད་པ་མེད་པའི་གླུའི་སྒྲས་རི་དགས་དགའ་བར་བྱེད་པའི་སྒྲ་དེ་ཉིད་ཀྱིས་སྲོག་ཆགས་ཀྱི་བྱེ་བྲག་གཞན་གྱིས་ཐོས་པ་ལས་སྡུག་བསྔལ་བར་འགྱུར་ཞིང༌། དེ་བཞིན་དུ་དྲི་དེ་ཉིད་ཀྱིས་མི་དང་ཕག་དང༌། དེ་བཞིན་དུ་ལན་ཚྭ་ཞེས་བྱ་བའི་རོའི་བྱེ་བྲག་གིས་རྔ་མོ་དང་མི་དང༌། དེ་བཞིན་དུ་བད་ཀན་གྱི་རང་བཞིན་དང༌། མཁྲིས་པའི་རང་བཞིན་ཅན་དག་ཅི་རིགས་པར་བདེ་བ་དང་སྡུག་བསྔལ་བར་འགྱུར་རོ། །དེའི་ཕྱིར་ཏེ་ཐ་དད་པ་མེད་ཀྱང་དེ་དག་གིས་སྲོག་ཆགས་ཀྱི་བྱེ་བྲག་རྣམས་ཀྱི་དབང་པོ་དང་མཚུངས་པར་ལྡན་པའི་བདེ་བ་དང་མི་བདེ་བའི་སྐྱེད་པའི་རྒྱུའི་ཕྱིར་དོན་རྟོགས་པ་ནི་རང་རིག་པའི་ངོ་བོ་ཁོ་ནའོ། །གཞན་དག་ནི་དཔེར་ན་སྔོན་པོ་དང་སྔོན་པོ་མ་ཡིན་པ་དག་འགལ་བའི་ཕྱིར། དོན་གཅིག་སྔོན་པོ་དང་སྔོན་པོ་མ་ཡིན་པའི་རང་བཞིན་དུ་མི་འགྱུར་བ་དེ་བཞིན་དུ། དོན་གཅིག་འདོད་པ་དང་མི་འདོད་པར་མི་འགྱུར་ཏེ། དེ་དག་འགལ་བ་ཉིད་ཀྱི་ཕྱིར་རོ། །དོན་གཅིག་ལ་རྟོགས་པར་བྱེད་པ་མང་པོ་རྣམས་ཀྱི་འདོད་པ་ལ་སོགས་པར་སྣང་བའི་ཤེས་པ་གཅིག་ཅར་སྐྱེ་བ་ཡིན་ཏེ། དེའི་ཕྱིར་མྱོང་བ་ཇི་ལྟ་བ་བཞིན་དུ་དོན་རྣམ་པར་གནས་པ་ཡིན་ནོ་ཞེས་ཟེར་རོ། །དེ་ནི་དེ་ལྟར་མི་རིགས་ཏེ། གང་གི་ཕྱིར་འཛིན་པའི་རྣམ་པ་ཉིད་སིམ་པ་དང་སིམ་པ་མ་ཡིན་པ་བདེ་བ་དང་སྡུག་བསྔལ་བར་རིག་གི །གཟུང་བའི་རྣམ་པར་རྟོག་པ་ནི་མ་ཡིན་ནོ། །དེ་ལ་ཡང་དགའ་བ་དང་ཡོངས་སུ་གཟུང་བའི་རྣམ་པའི་རང་བཞིན་དུ་གཅིག་ཏུ་ན་མྱོང་བ་ཉིད་དུ་མཐོང་ངོ༌། །འདིའི་བདག་ཉིད་ནི་འཇོག་པར་བྱེད་པ་གཞན་ཡིན་པར་ནི་རིགས་པ་མ་ཡིན་ནོ་ཞེས་བཤད་ཟིན་པ་ཡིན་ནོ། །དེ་ལྟ་ན་ཡང་གལ་ཏེ་བདེ་བ་ལ་སོགས་པའི་རང་བཞིན་འཛིན་པའི་རྣམ་པར་གྱུར་པ་ནི་ཕྱི་རོལ་གྱིས་བྱས་པ་མ་ཡིན་ཏེ། གཟུང་བའི་རྣམ་པར་རྟོག་པའི་རང་བཞིན་དེ་ཉིད་ཕྱི་རོལ་གྱིས་བྱས་པ་ཡིན་ནོ། །འདི་ལ་ཚད་མ་ནི་ཉམས་སུ་མྱོང་བ་ཡིན་ཏེ། གང་གི་ཕྱིར་གཟུང་བའི་རྣམ་པ་བདེ་བའམ་སྡུག་བསྔལ་བར་ངེས་པ་ནི་འགའ་ཡང་མེད་ཀྱི། འོན་ཀྱང་གཟུང་བའི་རྣམ་པ་ལས་རྣམ་པར་ཆད་པ་ཉིད་དུ་གཟུང་བའི་རྣམ་པའི་འཛིན་པ་བདག་ཏུ་འཛིན་པའི་གཞི་ཉིད་བདེ་བ་དང་སྡུག་བསྔལ་བར་མཐོང་ངོ༌། །འདི་ཡང་སྐབས་ཇི་ལྟ་བ་བཞིན་དུ་རབ་ཏུ་བྱེད་པ་འདི་ཉིད་དུ་འཆད་པར་འགྱུར་
རོ། །དེས་ན་ཇི་ལྟར་སློབ་དཔོན་གྱིས་བདེ་བ་ལ་སོགས་པ་ཕྱི་རོལ་གྱིས་བྱས་པ་མ་ཡིན་པར་དགོངས་ནས་བཤད་པ་དང༌། ཇི་ལྟར་ཉམས་སུ་མྱོང་བ་བཞིན་དུ་འདོད་པ་དང་མི་འདོད་པ་ནི་འཛིན་པའི་རྣམ་པར་རྟོག་པ་ཡིན་གྱི་གཟུང་བའི་རྣམ་པར་རྟོག་པ་ནི་མ་ཡིན་ནོ། །འདིར་འདོད་པར་བྱ་བ་འདོད་པར་བཞེད་པ་ནི་མ་ཡིན་ཏེ། འདོད་པ་ནི་རྣམ་པར་རྟོག་པའི་བདག་ཉིད་ཡིན་པའི་ཕྱིར་དང༌། དབང་པོའི་ཤེས་པར་རྟོགས་པའི་འདོད་པ་ལ་སོགས་པ་སེམས་པའི་ཕྱིར་ཏེ། ཇི་ལྟར་དབང་པོ་བ་ཉིད་ཀྱི་བདེ་བ་ཞེས་བྱ་བ་ལྟ་བུའོ། །སིམ་པར་བྱ་བ་ཉམས་སུ་མྱོང་བ་ཡང་དབང་པོའི་རྣམ་པར་ཤེས་པར་གྱུར་པ་ཉིད་ཡིན་གྱི་མངོན་པར་འདོད་པ་ནི་མ་ཡིན་ནོ། །གང་གི་ཕྱིར་དངོས་པོ་ཐ་དད་པ་མེད་ཀྱང་དེ་ཐ་དད་པའི་ཕྱིར་མྱོང་བ་ཇི་ལྟ་བ་བཞིན་ཐ་དད་པར་རྣམ་པར་གཞག་པ་འཛིན་པའི་རྣམ་པར་གྱུར་པའི་རང་བཞིན་ནི་དོན་དང་འདྲ་བ་མ་ཡིན་གྱི། འོན་ཀྱང་དོན་དང་འདྲ་བ་ནི་གཟུང་བའི་རྣམ་པའི་རང་བཞིན་ཡིན་པས། གལ་ཏེ་དེ་ཉིད་དངོས་པོ་ཐ་དད་པ་མེད་པ་ལ་ཡང་ཐ་དད་པ་མ་འགྱུར་ན་ནི་དོན་རྣམ་པར་གཞག་པ་མྱོང་མྱོང་བ་ལ་རག་ལས་ཀྱི་དངོས་པོ་ལ་ལྟོས་པ་ནི་མ་ཡིན་པར་འགྱུར་རོ། །འདི་སྐད་དུ་འཛིན་པའི་རྣམ་པས་བསྡུས་པའི་འདོད་པའམ་མི་འདོད་པ་དང་འདྲ་བ་དངོས་པོ་མ་ཡིན་དུ་ཆུག་ཀྱང་དངོས་པོའི་རྒྱུ་ཅན་དུ་ནི་འགྱུར་བ་ཁོ་ནས་སོ། །དངོས་པོ་གཅིག་ལས་ནི་གྲང་བ་དང་ཚ་བ་བཞིན་དུ་ཕན་ཚུན་འགལ་བའི་རང་བཞིན་གྱི་འབྲས་བུ་མི་འབྱུང་བའི་ཕྱིར་རོ་ཞེས་ཐ་དད་པ་ཡིན་ནོ། །གང་གི་ཕྱིར་རང་རིག་པ་ཇི་ལྟ་བ་བཞིན་དོན་རྣམ་པ་བར་ལེན་པ་ལས་བྱུང་བ་ཐ་དད་པ་འགལ་བ་ཡིན་གྱི། ལྷན་ཅིག་བྱེད་པའི་རྒྱུ་འབྲས་བུ་དུ་མ་བྱེད་པ་ནི། འགལ་བ་ཡོད་པ་མ་ཡིན་ཏེ། རྣམ་འགྲེལ་ལས། ཉེར་ལེན་ཤེས་པ་ནང་ན་ནི། །ཡོད་ཀྱང་སྡུག་བསྔལ་ལ་སོགས་འབྱུང༌། །ཞེས་བཤད་དོ། །འདིས་ནི་བདེ་བ་ལ་སོགས་པ་ནི་མཚུངས་པ་དེ་མ་ཐག་པའི་ནང་དུ་གཏོགས་པ་སྔོན་གོམས་པ་ལ་སོགས་པའི་རྒྱུ་ཅན་དུ་བརྗོད་པ་ཡིན་ནོ། །དེ་ལས་ཀྱང་བདེ་བ་ལ་སོགས་པ་མཚུངས་པ་དེ་མ་ཐག་པའི་རྐྱེན་སྔོན་གོམས་པ་ལ་སོགས་པ་སད་པར་བྱེད་པའི་རྐྱེན་ལ་ལྟོས་པ་ཅན་རྒྱུ་ཐ་དད་པ་ལས་སྐྱེ་བ་ན་ལྷན་ཅིག་བྱེད་པ་གཅིག་ལ་ལྟོས་པ་མི་འགལ་ལོ། །འདི་ལྟར་སྐྱེ་བ་དེ་ཉིད་ལ་མ་གོམས་པའི་
ཁར་རོ་ཁ་མོ་བཅུག་མ་ཐག་ཏུ་བཞིན་གྱི་རྣམ་པར་འགྱུར་བ་ལས་རྗེས་སུ་དཔག་པས་དབང་པོའི་སྡུག་བསྔལ་བསྐྱེད་པར་མཐོང་ལ། ཕྱིས་གོམས་པ་ལས་བཞིན་གསལ་བ་ལས་རྗེས་སུ་དཔག་པས་སྡུག་བསྔལ་ལོག་ནས་བདེ་བ་ཉིད་བྱེད་པར་མཐོང་བ་ཡིན་ནོ། །དེ་བཞིན་དུ་སྐྱེ་བ་གཞན་དུ་གོམས་པའམ། སྐྱེ་བ་འདི་ལ་གོམས་པ་ལས་ཀྱང་བདེ་བ་ལ་སོགས་པ་རྒྱུད་སོ་སོ་ལ་ཐ་དད་པ་སྐྱེ་བ་ན་དོན་གཅིག་ཉེ་བར་ལེན་པའི་རྒྱུའི་ལྷན་ཅིག་བྱེད་པར་འགྱུར་བ་ཡིན་ནོ། །དེའི་ཕྱིར་བཤད་པ་འདི་ཉིད་ཡིན་ཏེ། གང་གི་ཕྱིར་ཕྱི་རོལ་གྱི་དོན་རྟོགས་པར་བྱེད་པ་མང་པོ་རྣམས་ཀྱིས་རང་གི་རྣམ་པའི་དབང་གིས་བདེ་བའི་རྒྱུ་དང་སྡུག་བསྔལ་གྱི་རྒྱུར་ངེས་པར་འགྱུར་བ་དང༌། དོན་དེ་ཡང་མ་ངེས་པའི་ཕྱིར་མྱོང་བ་ཇི་ལྟ་བ་བཞིན་དོན་རྣམ་པར་གནས་པ་ཡིན་ནོ། །འདིར་འཐད་པ་འདིས་ཕྱི་རོལ་གྱི་དོན་བཟློག་པར་འདོད་པ་ནི་མ་ཡིན་གྱི། འོན་ཀྱང་ཕྱི་རོལ་གྱི་དོན་ཡོད་ཀྱང་རང་རིག་པ་ཉིད་འབྲས་བུར་རིགས་ཀྱི་དོན་རིག་པ་ནི་མ་ཡིན་ནོ། །འདི་ལྟར་ཕྱི་རོལ་གྱི་དོན་ཚུལ་ལ་དོན་ནི་གཞལ་བྱ། གཟུང་བའི་རྣམ་པ་ཚད་མ། དོན་རིག་པ་ནི་འབྲས་བུ་ཡིན་ལ། རྣམ་པར་ཤེས་པར་སྨྲ་བ་ལ་ནི་བདག་ཉིད་གཞལ་བྱ། འཛིན་པའི་རྣམ་པ་ནི་ཚད་མ། བདག་ཉིད་རིག་པ་ནི་འབྲས་བུ་ཡིན་ནོ། །ཡང་ཕྱི་རོལ་གྱི་དོན་གྱི་ཚུལ་ལ་འབྲས་བུ་རྣམ་པར་གཞག་པ་གཉིས་པ་དོན་ནི་གཞལ་བྱ། གཟུང་བའི་རྣམ་པ་ཚད་མ། རང་རིག་པ་ནི་འབྲས་བུའོ་ཞེས་འདི་ན་འབྲས་བུ་འདི་ལྟར་རྣམ་པར་གཞག་པའི་འཐད་པ་ཡིན་ནོ། །གང་གི་ཕྱིར་རང་རིག་པ་ཇི་ལྟ་བ་བཞིན་དོན་རྣམ་པར་འཇོག་པ་དེའི་ཕྱིར་རོལ་གྱི་དོན་ཡོད་ཀྱང་འབྲས་བུ་ནི་རང་རིག་པ་ཡིན་ནོ། །གལ་ཏེ་འོ་ན་རང་རིག་པ་འབྲས་བུ་ཡིན་ལ་དེ་ལྟར་ན་ཚད་མ་འཛིན་པའི་རྣམ་པ་ཡིན་ནོ་ཞེ་ན། བཤད་པ། རང་རིག་པའི་རང་བཞིན་དུ་གྱུར་པ་དོན་རྟོགས་པ་འདིའི་སྒྲུབ་པར་བྱེད་པ་སྟེ། ཚད་མ་ནི་འདིའི་ཡུལ་ལྟ་བུའི་རྣམ་པ་སྟེ། ཡུལ་གྱི་རྣམ་པ་ཉིད་ཡིན་ནོ། །འཛིན་པའི་རྣམ་པ་ཇི་ལྟར་ཉམས་སུ་མྱོང་བ་དེ་ལྟར་དོན་ཉམས་སུ་མྱོང་བར་རྣམ་པར་འཇོག་པ་མ་ཡིན་ནམ། དེས་ན་འཛིན་པའི་རྣམ་པ་ཉིད་ཚད་མར་རིགས་སོ་ཞེ་ན། བདེན་ཏེ་རང་ཉིད་ཀྱི་ཡུལ་ལ་འཛིན་པའི་རྣམ་པའི་རྗེས་སུ་འབྲངས་ཏེ་ཡུལ་རྣམ་པར་འཇོག་ན་ནི་འགྱུར་རོ། །
ཡང་གང་གི་ཚ་ཕྱི་རོལ་གྱི་དོན་ཡུལ་ཡིན་པ་དེའི་ཚེ་ཕྱི་རོལ་གྱི་དོན་ཁོང་དུ་ཆུད་པའི་རྒྱུ་མཚན་གང་ཡིན་པ་དེ་ཉིད་ཚད་མ་ཡིན་ལ། རྒྱུ་མཚན་ཡང་སྔོན་པོའི་རྣམ་པ་ཡིན་ནོ། །འདི་ཉིད་བཤད་པའི་ཕྱིར་གསུངས་པ་ནི་རྣམ་པ་ཇི་ལྟ་བ་བཞིན་དུ་རྣམ་པ་ལས་མ་འདས་པར་རང་རིག་པ་འདི་སྣང་བ་བསལ་བའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་སྔོན་པོའི་རྣམ་པ་སྣང་ན་ནི་དེའི་ཚེ་འདོད་པའི་རྣམ་པ་ཅན་གྱི་མྱོང་བ་འདི་སྔོན་པོའི་ཡུལ་ཅན་དུ་བརྟགས་པ་ཡིན་ཏེ། དེ་བཞིན་དུ་རྣམ་པ་གཞན་ལ་ཡང་སྦྱར་རོ། །དེའི་ཕྱིར་ཤེས་པ་རྣམ་པ་དང་བཅས་པ་ལ་འདོད་པ་ལ་སོགས་པའི་རང་བཞིན་ཉམས་སུ་མྱོང་བའི་གཟུང་བའི་རྣམ་པའི་དབང་གིས་དོན་གྱི་ཡུལ་ཅན་དུ་རྣམ་པར་འཇོག་པ་ཡིན་པ་དེས་ན་དེ་ཉིད་ཚད་མ་ཡིན་ནོ། །གལ་ཏེ་འོ་ན་ཕྱི་རོལ་ལ་རང་རིག་པ་ཉིད་འབྲས་བུ་ཡིན་ནའོ་ན་ཇི་ལྟར་འབྲས་བུ་རྣམ་པར་གཞག་པར་དོན་རིག་པར་འབྲས་བུ་ཡིན་པར་བརྗོད་ཅེ་ན། བཤད་པ། རང་རིག་པ་ཡིན་ཡང་འབྲས་བུ་ལས་ཏེ། ཞེན་པ་ལས་འདི་ནི་དོན་རིག་པ་ཡིན་པར་བལྟའོ། །རིག་པ་ནི་ཇི་ལྟར་ལྷག་པར་ཞེན་པ། དེ་ལྟར་འབྲས་བུ་བརྗོད་པ་ཡིན་ལ། དོན་དང་འབྲེལ་པར་ཡང་ཞེན་པ་དེའི་ཕྱིར་དོན་རིག་པ་ཉིད་འབྲས་བུ་ཡིན་ནོ། །འོ་ན་ཇི་ལྟར་རང་རིག་པ་ཡིན་ཞེ་ན། བཤད་པ། དོན་གནས་པ་ཡུལ་རྣམ་པར་གཞག་པ་གང་ཡིན་པ་ནི་རང་རིག་པའི་རང་བཞིན་ཡིན་ཏེ། དོན་རྣམ་པར་གནས་པ་ནི་མྱོང་བའི་རང་བཞིན་ཡིན་པའི་ཕྱིར་རོ། །འདི་ལྟར་ཇི་ལྟར་གཟུང་བའི་རྣམ་པ་དཀར་པོ་དང་དཀར་པོ་མ་ཡིན་པ་ལ་སོགས་པ་ཉམས་སུ་མྱོང་བ་དང༌། དེ་བཞིན་དུ་འཛིན་པའི་རྣམ་པ་བདེ་བ་དང་སྡུག་བསྔལ་བ་ཅི་འདྲ་བ་ཡང་དག་པར་རིག་པ་དེ་ལྟར་སྔོན་པོའམ་སྔོན་པོ་མ་ཡིན་པ་བདེ་བ་ལ་སོགས་པའི་རྒྱུར་རྣམ་པར་འཇོག་ཅིང་རིག་པ་དེའི་ཕྱིར་དོན་རིག་པ་ནི་རང་རིག་པའི་ངོ་བོ་ཡིན་ནོ། །དེའི་ཕྱིར་དེ་ལྟར་ཐ་སྙད་ཀྱི་འབྲས་བུའི་དབང་གིས་རང་རིག་པ་ཡིན་ཡང་དོན་རིག་པར་བརྗོད་པ་ཡིན་ནོ། །དེ་ཉིད་ཀྱི་ཕྱིར་ཏེ་ཡུལ་ཉིད་ཚད་མའི་བྱ་བ་ཡིན་པ་དང༌། དེ་ཉིད་ཀྱི་རིག་པ་འབྲས་བུ་ཡིན་པ་དེའི་ཕྱིར་ཚད་མ་དང་འབྲས་བུ་དག་ཡུལ་ཐ་དད་པ་ཡང་མ་ཡིན་ནོ། །གལ་ཏེ་བདག་རིག་པ་འབྲས་བུ་དང་ཡུལ་གཞལ་བྱ་ཡིན་ན་ནི། དེའི་ཚེ་ཚད་མ་དང་
འབྲས་བུ་ཡུལ་ཐ་དད་པ་ཁོ་ནར་འགྱུར་བ་ན། ད་ལྟར་ནི་ཅུང་ཞིག་ཀྱང་ཐ་དད་པ་ཡོད་པ་མ་ཡིན་ནོ། །འོ་ན་ཇི་ལྟར་རང་རིག་པ་འབྲས་བུར་བརྗོད་ཅི་ན། བཤད་པ། དོན་རིག་པའི་རང་བཞིན་གང་ཞིག་ཅེས་རང་བཞིན་སེམས་པ་ན་ནི། རང་ཉིད་རིག་པ་འབྲས་བུར་བཤད་དེ། དོན་རིག་པ་ནི་དེའི་བདག་ཉིད་ཡིན་པའི་ཕྱིར་ཏེ། རང་རིག་པའི་རང་བཞིན་ཡིན་པའི་ཕྱིར་རོ། །དེ་ལ་སྐབས་ཀྱི་དོན་ནི་འདི་ཡིན་ཏེ། གཟུང་བའི་རྣམ་པ་ཡོངས་སུ་གཅོད་པར་སྣང་བའི་འཛིན་པའི་རྣམ་པ་ནི་བདག་ཉིད་ཀྱི་ཡུལ་ཅན་ཡིན་པའི་ཕྱིར་ཕྱི་རོལ་གྱི་དོན་ལ་ཚད་མ་མ་ཡིན་ཏེ། རྣམ་འགྲེལ་ལས། འཛིན་པའི་བདག་ཉིད་ནི་ཡོངས་སུ་ཟིན་ཀྱང་དོན་གཞན་མ་ཡིན་པའི་ཕྱིར། ཕྱི་རོལ་གྱི་དོན་རྣམས་ལ་ལྟོས་པ་མ་ཡིན་ནོ་ཞེས་བཤད་དོ། །གཟུང་བའི་རྣམ་པ་ནི་ཕྱི་རོལ་ཚད་མ་ཡིན་ཏེ། དེ་ཉིད་ནི་ཇི་ལྟར་རིགས་པ་དེ་ལྟར་དོན་རིག་པར་འགྱུར་བ་ཡིན་ནོ། །ཕྱི་རོལ་གྱི་དོན་རིག་པ་ནི་གཞན་ལ་གཟུང་བའི་རྣམ་པ་རིག་པ་ཡང་གཞན་ཉིད་ནི་མ་ཡིན་ཏེ། ཕྱི་རོལ་གྱི་དོན་ནི་རང་གི་ངོ་བོས་མཐོང་བ་མ་ཡིན་པའི་ཕྱིར་རོ། །དེའི་ཕྱིར་བདག་རིག་པ་དོན་རིག་པར་སྟོན་པའི་གཟུང་བའི་རྣམ་པ་དེ་ཉིད་དོན་ལ་ཚད་མ་ཡིན་ལ། རང་རིག་པ་ཡིན་ཡང་དོན་རིག་པའི་རང་བཞིན་དུ་ལྷག་པར་ཞེན་པ་ན་ཞེན་པའི་འབྲས་བུའི་དབང་གིས་དོན་རིག་པར་བརྗོད་པ་ཡིན་ནོ། །དེས་ན་ཚད་མ་དང་འབྲས་བུ་དག་ཡུལ་ཐ་མི་དད་དོ། །གང་གི་ཕྱིར་གཟུང་བའི་རྣམ་པའི་དབང་གིས་དེ་དང་དེའི་རིག་པར་གནས་པ་དེས་ན་ཡུལ་ཐ་དད་པ་མ་ཡིན་ནོ། །གལ་ཏེ་དོན་ཡོད་ཀྱང་རྣམ་པ་དང་བཅས་པའི་ཕྱོགས་ལ་རང་གི་ངོ་བོ་ཉིད་ཀྱིས་ཕྱི་རོལ་གྱི་དོན་ལ་སྣང་བ་ནི་མ་ཡིན་གྱི། འོན་ཀྱང་ཉམས་སུ་མྱོང་བའི་དབང་གིས་སྔོན་པོ་ལ་སོགས་པ་མཐོང་བ་དང༌། བདེ་བ་ལ་སོགས་པའི་རྒྱུ་ཉིད་རྣམ་པར་གནས་པ་ཡིན་ན། འོ་ན་ནི་ཕྱི་རོལ་གྱི་དོན་དུ་སྨྲ་བ་རྣམས་འདྲ་བའི་སྐྱེད་པར་བྱེད་པ་གཞལ་བྱར་འདོད་པར་མི་འགྱུར་གྱི། འོན་ཀྱང་དེ་དང་འབྲས་བུའམ་གཞན་འདྲ་ཡང་རུང་སྟ། འདྲ་བའམ་མི་འདྲ་ཡང་བླ། དེ་ལྟར་ཞེས་བྱ་བ་སྔོན་པོ་ལ་སོགས་པ་གཟུང་བའི་རྣམ་པ་དང༌། བདེ་བ་ལ་སོགས་པ་འཛིན་པའི་རྣམ་པར་རབ་ཏུ་སྣང་བ་སྟེ། གསལ་བའི་ཤེས་པའི་རྒྱུ་གང་གི་ཕྱིར་དོན་ཡང་ཡིན་ནོ། །ཡིན་པས་
ན་ཞེས་བྱ་བ་ནི་དེའི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་དོན་རྒྱུ་ཡིན་པ་དེའི་ཕྱིར་དོན་དེ་གཞལ་བྱ་ཡིན་པར་འདོད་པར་འགྱུར་རོ། །དགོངས་པ་ནི་འདི་ཡིན་ཏེ། འདྲ་བར་ངེས་པ་ནི་གཉི་ག་མཐོང་བ་ལ་རག་ལས་བ་ཡིན་ལ། རྣམ་པ་དང་བཅས་པའི་ཕྱོགས་ལ་དོན་ནི་སྔར་གང་གིས་ཀྱང་མཐོང་བ་མ་ཡིན་ན། དེ་ཅི་འདྲ་བར་བརྟག །རང་ཉིད་ཀྱིས་ཀྱང་ཇི་ལྟར་ཉམས་སུ་མྱོང་བ་དེའི་བདག་ཉིད་མ་ཡིན་ཡང་བདེ་བ་ལ་སོགས་པའི་རྒྱུ་ཉིད་དུ་ངེས་པར་འདོད་པ་དེས་ན་འདྲ་བ་མ་ཡིན་ནོ། །ཅིག་ཤོས་ལོགས་ན་གནས་པས་ཕྱི་རོལ་གྱི་དོན་དུ་སྨྲ་བ་ལ་ཡུལ་འདི་ལྟ་བུ་ཉིད་ཡིན་ན་ཧ་ཅང་ཐལ་བར་མཐོང་ནས་སློབ་དཔོན་ལ་སྨྲས་པ། ཇི་ལྟར་རྣམ་པ་འགའ་ཞིག་ལྟར་ཏེ། རྒྱུ་འགའ་ཞིག་ལས་དོན་དངོས་ཏེ་འདྲ་བ་སྤངས་ནས་སྔོན་པོའི་རྣམ་པར་སྣང་ན་ཇི་ལྟར་དོན་འཛིན། ཤེས་པ་དེ་ལས་སྐྱེས་པ་དང་དེ་དང་འདྲ་བ་ལས་ནི་དོན་འཛིན་པར་འགྱུར་བ་ཡིན་ན། སྐྱེད་པར་བྱེད་པ་ཙམ་ནི་ཡུལ་དུ་སྲིད་པ་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ་ཞེ་ན། དེ་ཉིད་སློབ་དཔོན་གྱིས་གསུངས་པ། ངས་ཀྱང་དེ་འདྲ་བའི་ཡུལ་ནི་མི་ཤེས་སོ། །ཕྱིའི་དོན་དུ་སྨྲ་བ་ཉིད་ལ་འདྲི་བར་བྱ་བ་ཡིན་ཏེ། གང་ཞིག་ཕྱིའི་དོན་ཁས་ལེན་པ་དེ་ཐལ་བ་འདིར་འགྱུར་རོ། །གང་མི་སྣང་བ་དང་བདེ་བ་ལ་སོགས་པའི་རྒྱུར་ངེས་པའི་དོན་དང་དབང་པོའི་ཡུལ་དུ་འདོད་པ་ལ་ཡིན་གྱི། ཁོ་བོ་ནི་ད་ལྟར་མི་འདོད་དོ། །ཚིག་ལེའུར་བྱས་པར་མ་བརྗོད་པའི་དོན་འགྲེལ་པ་ལས་བར་སྐབས་སུ་ཚིགས་སུ་བཅད་པའོ། །གལ་ཏེ་ཕྱི་རོལ་གྱི་དོན་མེད་ན་འོ་ན་ཚད་མ་དང་གཞལ་བྱ་དང་འབྲས་བུ་རྣམ་པར་གཞག་པ་དེའི་ཁོ་ན་ཉིད་དུ་མི་འགྱུར་རོ་སྙམ་དུ་བསམས་ནས། ཕྱི་རོལ་གྱི་དོན་མེད་ནའོ་ན་ཞེས་བྱ་བ་ལ་སོགས་པ་སྨོས་སོ། །འདི་ལ་བཤད་ཟིན་ཏོ་ཞེས་བྱ་བ་ནི། དེ་ལྟར་འཁྲུལ་པས་མཐོང་འགྱུར་བ། །ཞེས་བྱ་བ་འདིའི་ནང་དུ་དེ་ཁོ་ན་ཉིད་ལས་མ་འདས་པར་རྣམ་པར་གཞག་པ་ནི་མ་ཡིན་གྱི། འོན་ཀྱང་འཁྲུལ་པ་ལས་སོ་ཞེས་བྱ་བར་རོ། །འདི་ལྟར་ཡུལ་ལྟ་བུའི་རྣམ་པ་གང་ཡིན་པ་དང༌། ནང་དུ་ཞེས་བྱ་བ་བདག་ཏུ་འཛིན་པའི་གཞི་མ་ཡིན་པར་རྣམ་པར་ཆད་པ་ལས་བདག་ཏུ་འཛིན་པའི་གཞིར་རྣམ་པར་ཆད་པའོ། །འདིའི་ནང་དུ་ཡོངས་སུ་གཅོད་པ་ནི་ཡུལ་གྱི་རྣམ་པ་འཛིན་པ་སྟེ། འདིས་
ཡོངས་སུ་གཅོད་པའི་ཕྱིར་རོ། །དེ་ནི་རང་རིག་པར་བྱ་བའི་རང་བཞིན་དུ་སྐྱེ་བ་ཉིད་ན་དེ་ལྟར་མཚོན་པར་འགྱུར་ཏེ་འཁྲུལ་པའི་ཕྱིར་རོ། །རང་རིག་པའི་རང་བཞིན་གྱི་ཤེས་པ་དེ་ཉིད་ནི་མི་བདེན་པའི་གཟུང་བ་དང་འཛིན་པའི་རྣམ་པ་རང་ལ་མེད་པ་ཀུན་དུ་སྟོན་པ་སྐྱེའོ་ཞེས་བྱ་བའི་དོན་ཏོ། །དེ་ལྟར་གྱུར་པའི་བདག་ཉིད་ཀྱི་རྣམ་པར་ཤེས་པ་དེ་ལ་གཞལ་བྱ་ལ་སོགས་པའི་རྣམ་པར་གཞག་པ་ནི་ཇི་ལྟར་འཁྲུལ་པས་མཚོན་པ་ལྟར་བྱེད་པ་ཡིན་ནོ། །ཡོངས་སུ་གཅོད་པ་འཛིན་པའི་རྣམ་པའི་བདག་ཉིད་གཟུང་བའི་ཆ་ཡོངས་སུ་གཅོད་པར་ལྷག་པར་ཞེན་པ་མ་ཡིན་ནམ། གཟུང་བའི་ཆ་ནི་ཉེ་བར་བསླད་པ་ཡིན་གྱི། བདག་ཉིད་ནི་མ་ཡིན་ནོ། །དེས་ན་འཛིན་པའི་རྣམ་པ་ནི་དེ་རྟོགས་པའི་ཚད་མ་ཡིན་གྱི། བདག་ཉིད་ལ་ནི་མ་ཡིན་ནོ། །གང་གི་ཕྱིར་དེས་བདག་ཉིད་ཡོངས་སུ་བཅད་པར་ངེས་པ་ནི་མེད་ཀྱི། འོན་ཀྱང་གཟུང་བའི་ཆ་ཉིད་དོ། །དེ་བཞིན་དུ་འཛིན་པའི་རྣམ་པ་ཡང་བརྟག་པ་ཡིན་ལ། བདག་ཉིད་ཡོངས་སུ་གཅོད་པར་རུང་བའི་ཚད་མ་ནི་དངོས་པོར་འདོད་པ་ཡིན་གྱི། བརྟག་པ་ནི་མ་ཡིན་ནོ་ཞེ་ན། འདིར་སྨྲས་པ། རྣམ་པར་ཤེས་པ་ནི་བདེན་པ་གསལ་བར་ནུས་པ་མ་རིག་པའི་བདག་ཉིད་ཅན་ནི་དངོས་པོ་ཡིན་གྱི་བརྟག་པ་ནི་མ་ཡིན་ནོ། །རྣམ་པར་ཤེས་པ་བདག་མ་གསལ་བར་ནི་མི་བདེན་པ་གསལ་བར་ནུས་པ་མ་ཡིན་ཏེ། དེས་ན་མི་བདེན་པ་གསལ་བར་ནུས་པ་འཛིན་པའི་རྣམ་པ་ཞེས་བྱ་བ་ནི་བདེན་པ་གསལ་བར་ནུས་པ་དང་ཐ་མི་དད་པ་ཡིན་པ་དེས་ན། བདག་དང་བདག་མ་ཡིན་པ་གསལ་བར་ནུས་པ། དགའ་བ་ལ་སོགས་པའི་རང་བཞིན་གྱི་ཚད་མ་ནི་དངོས་པོ་ཉིད་ཡིན་ནོ། །གང་ཡང་འཛིན་པའི་རྣམ་པ་མི་བདེན་པ་གཉིས་བརྗོད་པ་དེ་ནི་ཐ་དད་པའི་དོན་ཤེས་པ་ལས་སྣང་བར་ཆད་ནས་མེད་པའི་ཕྱིར་ཐ་དད་པའི་དོན་ན་འཛིན་པ་ལ་ལྟོས་ནས་མི་བདེན་པ་ཉིད་ཡིན་གྱི། མི་བདེན་པ་གསལ་བར་བྱེད་པའི་རང་བཞིན་ཡང་བརྫུན་པ་ནི་མ་ཡིན་ནོ། །ཇི་ལྟར་མི་བདེན་པ་གསལ་བར་བྱེད་བར་ནུས་པ་གདོན་མི་ཟ་བ་ཉིད་དུ་ཁས་བླང་བར་བྱ་བ་དེ་ལྟར་ནི་མདུན་ཉིད་དུ་སྟོན་པར་འགྱུར་རོ། །གཞལ་བྱ་ནི་སྒྲོ་བཏགས་པའི་དོན་དང་ལྷན་ཅིག་པའི་སྒྲོ་མ་བཏགས་པའི་རང་བཞིན་ཡིན་ནོ། །བདག་ཉིད་དུ་གྱུར་བ་མ་ཡིན་པ་སྒྲོ་བཏགས་པ་གཞལ་བྱ་ཡིན་
པར་གྱུར་ན་བདག་ཉིད་གཞལ་བྱ་ཞེས་བྱ་བ་དང་འགལ་བ་མ་ཡིན་ནམ། འགལ་བ་ཡོད་པ་མ་ཡིན་ཏེ། གང་གི་ཕྱིར་བདག་གི་སྒྲས་ནི་རང་བཞིན་གཞན་འགོག་པར་འདོད་པ་ཡིན་ཏེ། འཛིན་པའི་རྣམ་པའི་རང་བཞིན་དེ་ལས་ཐ་དད་པ་མེད་པའི་རང་བཞིན་ལྷན་ཅིག་ཏུ་རིག་པར་གྱུར་པ་ན་བདག་ཉིད་གཞལ་བྱར་བརྗོད་པ་ཡིན་ནོ། །རང་བཞིན་ཐ་དད་པ་ནི་རྣམ་པ་དང་བཅས་པའམ། རྣམ་པ་མེད་པའི་ཤེས་པར་རིག་པ་མ་ཡིན་ཏེ། ངེས་པར་བྱེད་པ་མེད་པའི་ཕྱིར་རོ། །མ་རིག་པའི་ནུས་པས་ཡོངས་སུ་ཟིན་པའི་ཤེས་པ་མི་བདེན་པ་གསལ་བར་བྱེད་པ་སྐྱེ་བའི་ཕྱིར་འགལ་བ་ཅི་ཡོད། ཡོངས་སུ་གཅོད་པའི་ནུས་པ་དེ་ཉིད་ལས་བདེ་བ་ལ་སོགས་པའི་རང་བཞིན་ནང་དུ་གསལ་བ་ཡིན་ཏེ། གསལ་བར་བྱེད་པའི་ཆ་གསལ་བར་ཉིད་ནི་གསལ་བར་བྱ་བའི་རང་བཞིན་གསལ་བ་ཡིན་པ་དེས་ན་རང་རིག་པའི་ཆ་གསལ་བ་ཉིད་འབྲས་བུ་ཡིན་ནོ། །དེ་བཤད་པ་ནི་རང་ཉིད་འབའ་ཞིག་རིག་པའི་རང་བཞིན་དུ་གསལ་བ་སྟེ། ཡོངས་སུ་གཅོད་པ་ཡིན་ནོ། །དེའི་ཕྱིར་དེ་ལྟར་ཤེས་པའི་ཆ་གསུམ་དུ་སྣང་བ་ཡིན་ཏེ། གཟུང་བའི་ཆ་དང༌། འཛིན་པའི་ཆ་དང༌། འཛིན་པའི་རང་རིག་པའོ། །དེ་ལ་གཞལ་བྱ་དོན་ཐ་དད་པ་ཡིན་ན་ནི། གཟུང་བའི་རྣམ་པ་ཚད་མ་འཛིན་པའི་རྣམ་པར་གཞག་པ་ནི་ཚད་མའི་འབྲས་བུ་ཡིན་ནོ། །ཡོངས་སུ་གཅད་པར་བྱ་བ་གཞན་མེད་ན་ནི། །ཇི་ལྟར་སྣང་བཞིན་པའི་གཟུང་བའི་རྣམ་པ་ནི་གཞལ་བྱ། འཛིན་པའི་རྣམ་པའི་འཛིན་པ་ཉིད་ནི་ཚད་མ་སིམ་པ་ལ་སོགས་པའི་རང་བཞིན་དུ་མྱོང་བ་ནི་འབྲས་བུ་ཡིན་གྱི། དེའི་དབང་གིས་དོན་རྣམ་པར་གཞག་པའི་ཕྱིར་རོ་ཞེས་བཤད་ཟིན་ཏོ། །སྔོན་པོར་སྣང་བ་རགས་པ་གཅིག་པུའི་རྣམ་པར་རྟོགས་ལ། སྔོན་པོའི་རྣམ་པ་ཉམས་སུ་མྱོང་བ་དེ་ལ་ལྡོག་པའི་དབྱེ་བས་གཟུང་བ་དང་འཛིན་པ་དང་རིག་བའི་ཆར་བརྟགས་པ་ཡིན་ཏེ། དཔེར་ན་སྔོན་པོ་དེ་ཉིད་ཀྱི་སྐད་ཅིག་མ་ཉིད་དང༌། བདག་ཉིད་མེད་པ་ཉིད་དང༌། དངོས་པོ་ཉིད་ལྡོག་པའི་དབྱེ་བས་བརྟགས་པ་ལྟ་བུ་མ་ཡིན་ནམ། དེའི་ཕྱིར་རྣམ་པ་གསུམ་སྣང་བ་ཡིན་ཏེ་ཞེས་བརྗོད་ཅེ་ན། འདི་ལ་བཤད་པ། ཅི་སྣང་བའི་དངོས་པོ་ཡོད་པ་ན་སིམ་བར་རིག་པ་དུས་མཚུངས་པར་ཉམས་སུ་མྱོང་བ་ཡོད་དམ། འོན་ཏེ་མེད། དེ་བསྙོན་ན་ནི་མི་བསྙོན་པ་ཞེས་བྱ་བ་
དེ་འགའ་ཞིག་ཀྱང་ཡོད་པ་མ་ཡིན་ནོ། །དུས་ཐ་དད་པ་ཡང་མ་ཡིན་ཏེ། ཅིག་ཅར་ཉམས་སུ་མྱོང་བའི་ཕྱིར་རོ། །མྱུར་དུ་འཇུག་པ་ལས་ཅིག་ཅར་སྣང་བར་འཁྲུལ་པ་ཡང་མ་ཡིན་ཏེ། ཤེས་པ་ཐམས་ཅད་སྐད་ཅིག་མ་ཉིད་ཀྱིས་མྱུར་བར་ཁྱད་པར་མེད་པའི་ཕྱིར་རིམ་གྱིས་སྣང་བ་མེད་པར་ཐལ་བའི་ཕྱིར་རོ། །སྣང་བའི་དོན་དང་ལྷན་ཅིག་དུས་གཅིག་ཏུ་ཉམས་སུ་མྱོང་བ་དབང་པོ་ལ་བརྟེན་པའི་བདེ་བ་དེ་ཡང་སྣང་བའི་སྔོན་པོ་ཉིད་ཡིན་ནོ་ཞེས་བྱ་བར་ནི་བརྗོད་པར་མི་ནུས་ཏེ། སྣང་བ་རྣམས་ནི་མི་སྣང་བའི་ཕྱིར་རོ། །མཐོང་བ་ཐ་དད་པ་མེད་པར་སྣང་ན་ནི་བདེ་བའི་རྣམ་པ་ཉིད་དུ་སྣང་བར་འགྱུར་ན། སྣང་བ་ནི་མ་ཡིན་ནོ། །འདི་བདེ་བའི་བདག་ཉིད་དུ་སྣང་བ་ནི་མ་ཡིན་ནོ་ཞེས་བྱ་བ་དེ་ག་ལས་ཤེ་ན། མཐོང་བའི་སྔོན་པོའི་བདེ་བའི་བདག་ཉིད་དུ་མ་ངེས་པའི་ཕྱིར་རོ། །རྣམ་པར་ཆད་པའི་རང་བཞིན་འདི་ཉིད་བདེ་བའམ་སྡུག་བསྔལ་བར་གྱུར་རོ་ཞེས་སྣང་བ་བདེ་བ་ལ་སོགས་པའི་རང་བཞིན་དུ་ངེས་པ་འདི་ནི་འགའ་ཡང་ཡོད་པ་མ་ཡིན་པ་དེས་ན། མཐོང་བ་བདེ་བ་ལ་སོགས་པར་གསལ་བར་སྣང་བ་ཉིད་དུ་ཞེན་པ་མ་ཡིན་ནོ། །འདི་ལྟར་འདི་ནི་འདི་ལྟར་སྣང་ངོ་ཞེས་བྱ་བའི་ཐ་སྙད་འདིའི་རྒྱུ་ནི་སྣང་བ་ཉིད་དུ་ངེས་པ་ཁོ་ན་ཡིན་པར་མཐོང་གི་གཞན་ནི་མ་ཡིན་ནོ། །འདི་ནི་ཁོ་བོའི་མངོན་སུམ་ཡིན་ནོ་ཞེས་ཁས་ལེན་པ་འདིའི་རྒྱུ་མངོན་སུམ་ཉིད་དུ་ངེས་པ་དེ་ལས་གཞན་གང་ཡང་ཡིན་བར་ཁྱེད་ཀྱིས་མཐོང༌། དེ་ཉིད་ཀྱི་ཕྱིར་མངོན་སུམ་གྱི་ཚད་མ་ནི་ངེས་པ་ལ་ལྟོས་པ་ཡིན་ནོ། །དེའི་ཕྱིར་མངོན་སུམ་གྱི་བྱེད་པའི་རྗེས་སུ་འབྲང་བས་ནི་ཞེན་པ་ཉིད་རྒྱུ་ཡིན་པར་ཁས་བླང་ངོ༌། །མངོན་སུམ་སྔོན་དུ་འགྲོ་བ་ཅན་གྱི་ཞེན་པས་ཡུལ་དུ་མ་བྱས་པ་ལ་མངོན་སུམ་མ་ཡིན་པ་ཉིད་ཀྱི་ཕྱིར་ཞེས་ཏེ་འདི་ཚད་མ་གཞན་ནི་མ་ཡིན་ནོ། །དེའི་ཕྱིར་སྣང་བ་ནི་བདེ་བའི་རྣམ་པར་སྣང་བ་མ་ཡིན་ནོ་ཞེས་བྱ་བར་ངེས་པ་ཡིན་ལ། དེ་ལྟར་ངེས་པས་ཀྱང་སྔོན་པོ་བདེ་བའི་རྣམ་པས་སྟོང་བས་མངོན་སུམ་གྱིས་མཐོང་བ་སྟེ། རྗེས་སུ་དཔག་པས་ནི་ཐ་སྙད་དུ་བྱེད་པ་ཡིན་ནོ། །སྣང་བའི་སྔོན་པོ་ལས་ཐ་དད་པ་མེད་པར་ཡོད་པ་ལ་ནི་སྣང་བ་ཉིད་ཀྱིས་ཁྱབ་པ་ཡིན་ན། འདི་ལ་ནི་ཁྱབ་པར་བྱེད་པ་སྣང་བ་ཉིད་ཡོད་པ་མ་ཡིན་ནོ། །མི་དམིགས་པ་ཐ་སྙད་བསྒྲུབ་པར་བྱ་བ་ལ་ནི་རང་བཞིན་གྱི་རྟགས་ཡིན་ནོ་ཞེས་རྒྱ་ཆེར་གཏན་ལ་ཕབ་ཟིན་ཏོ། །སྣང་བ་གང་ཞིག་གང་དུ་
མ་དམིགས་པ་དེ་ནི་དེ་ན་མེད་དེ། དཔེར་ན་ས་ཕྱོགས་ལ་བུམ་བ་བཞིན་ནོ། །སྣང་བའི་སྔོན་པོ་ལ་ཡང་སྣང་བའི་བདེ་བའི་རང་བཞིན་མ་དམིགས་སོ། །གང་གི་ཕྱིར་སྣང་བ་ལས་ཐ་དད་པ་འགའ་ཞིག་ནི་སྣང་བ་མ་ཡིན་ཏེ། བུམ་པ་ལ་སོགས་པ་བཞིན་ནོ། །ཤ་ཟ་ལ་སོགས་པ་འགའ་ཞིག་ནི་མི་སྣང་བ་ཡིན་ནོ་ཞེས་བྱ་བ་ལྟར་བརྟག་པར་ནུས་པ་སྣང་བ་ཉིད་ནི་མ་གྲུབ་པ་ཡིན་ནོ། །དེ་ཉིད་ཀྱི་ཕྱིར་ཐ་དད་པའི་ཡུལ་ཅན་གྱི་མི་དམིགས་པ་ལ་དམིགས་པའི་མཚན་ཉིད་ཀྱིར་གྱུར་པ་ཞེས་ཁྱད་པར་དུ་བྱས་པ་ཡིན་ནོ། །སྣང་བ་ལས་ཐ་དད་པ་མེད་པར་བརྟགས་པ་གང་ཡིན་པ་དེ་ནི་སྣང་བ་ཁོ་ན་སྟེ། དེས་ན་ཁྱད་པར་དུ་མ་བརྗོད་དོ་ཞེས་གསུངས་སོ། །སྣང་བ་ལས་ཐ་མི་དད་པ་གང་ཡིན་པ་དེ་ཐམས་ཅད་ནི་སྣང་བར་བརྗོད་མི་ནུས་པ་མ་ཡིན་ནམ། དཔེར་ན་སྐད་ཅིག་མ་བཞིན་ནོ་ཞེ་ན། དེ་ནི་མི་རིགས་ཏེ། གང་གི་ཕྱིར་སྐད་ཅིག་མ་ཉིད་ཀྱི་རྣམ་པ་ནི་སྣང་བ་ཁོ་ན་ཡིན་གྱི་གཞན་ནི་མ་ཡིན་ནོ། །སྔོན་པོའི་སྐད་ཅིག་མ་ཉིད་ནི་སྣང་བའི་སྔོན་པོ་ལས་རྣམ་པ་གཞན་འཛིན་པ་མ་ཡིན་གྱི། འོན་ཀྱང་འཁྲུལ་པའི་དབང་གིས་རྣམ་པ་དེ་སྐད་ཅིག་མ་ཉིད་དུ་མ་ངེས་པ་འབའ་ཞིག་ཏུ་ཟད་དེ། དེས་ན་རྗེས་སུ་དཔག་པས་ངེས་པ་ཡིན་ནོ། །བདེ་བར་མྱོང་བ་ལན་ཅིག་མ་ཡིན་པར་ཉམས་སུ་མྱོང་བར་ངེས་པའི་རྣམ་པ་ནི་གང་དུ་མཐོང་བ་དེར་དེ་རང་གི་ངོ་བོ་ཉིད་ཀྱིས་སྣང་བར་འགྱུར་བ་ཡིན་ནོ། །དེའི་ཕྱིར་འགའ་ཞིག་བདེ་བ་ལ་སོགས་པ་བཞིན་དུ་སྣང་བའམ། ཤ་ཟ་ལ་སོགས་པ་བཞིན་དུ་བརྟགས་པའི་སྒོ་ནས་རྣམ་པ་ངེས་པ་གང་ཡིན་པ་དེ་ནི་སྣང་བ་གཞན་ལ་དེའི་བདག་ཉིད་དུ་ཁས་བླངས་ན་སྣང་བར་ཁས་བླངས་པར་འགྱུར་བ་ཡིན་ཏེ། དེ་མ་དམིགས་ན་སྣང་བ་མི་དམིགས་པ་ཡིན་ནོ། །སྐད་ཅིག་མ་ཉིད་ནི་བདེ་བ་ལ་སོགས་པ་ལྟར་ཐ་དད་པར་སྣང་བའམ། ཤ་ཟ་ལ་སོགས་པ་བཞིན་དུ་བརྟགས་པ་མ་ཡིན་གྱི། འོན་ཀྱང་དངོས་པོ་ཐམས་ཅད་ཀྱི་ཉམས་སུ་མྱོང་བར་གྱུར་པའི་རང་བཞིན་མི་གནས་པ་ཉིད་དུ་སྐད་ཅིག་མར་བརྗོད་པ་ཡིན་ནོ། །དེའི་ཕྱིར་དེ་ལྟར་མཐོང་བ་གང་ཡིན་པ་དེ་ཉིད་སྐད་ཅིག་མ་ཡིན་གྱི། སྐད་ཅིག་མ་ཞེས་བྱ་བ་ངེས་པ་ནི་འགའ་ཡང་ཡོད་པ་མ་ཡིན་ཏེ་མཐའ་དག་སྐད་ཅིག་མ་ཉིད་ཡིན་པའི་ཕྱིར་རོ། །དེས་ན་ཁ་ཅིག་ན་རེ་གལ་ཏེ་བདེ་བའི་རང་བཞིན་དུ་སྣང་བ་མེད་པས་
སྔོན་པོ་བདེ་བ་མ་ཡིན་ན། དེ་ལྟ་ན་ནི་འོ་ན་སྐད་ཅིག་མ་མ་ཡིན་པ་ཉིད་དུ་ངེས་པའི་ཕྱིར་སྐད་ཅིག་མ་ཡིན་པར་སྣང་བ་ནི་སྐད་ཅིག་མ་མ་ཡིན་པར་འགྱུར་རོ་ཞེས་གང་སྨྲས་པ་དེ་ཡང་གསལ་བ་ཡིན་ཏེ། གང་གི་ཕྱིར་སྔོན་པོ་སྐད་ཅིག་མ་མ་ཡིན་པར་ནི་འགའ་ཞིག་གིས་ཀྱང་ངེས་པ་མ་ཡིན་ཏེ། སྐད་ཅིག་མ་ཉིད་ནི་རང་བཞིན་ངེས་པ་ཅན་མ་ཡིན་པའི་ཕྱིར་རོ། །གལ་ཏེ་བདེ་བ་ལ་སོགས་པ་བཞིན་དུ་སྐད་ཅིག་མ་ཉིད་ལ་རྣམ་པར་ངེས་པ་ཅུང་ཟད་ཅིག་ཡོད་ན་ནི་བལྟ་བར་བྱ་བ་དེ་ཡོངས་སུ་སྤངས་པར་སྣང་བ་ན་སྐད་ཅིག་མ་མ་ཡིན་པར་ངེས་པར་འགྱུར་བ་ཡིན་ན། སྐད་ཅིག་མ་ཉིད་ལ་ནི་རྣམ་པར་ངེས་པ་འགའ་ཞིག་ཀྱང་ཡོད་པ་མ་ཡིན་ནོ། །དེས་ན་སྔོན་པོ་དེ་ཉིད་སྣང་བ་ན་སྐད་ཅིག་མ་ཉིད་ཡིན་ནམ་འོན་ཏེ་མ་ཡིན་ཞེས་སྣང་བའི་རང་བཞིན་སྐད་ཅིག་མ་ཉིད་དམ་སྐད་ཅིག་མ་མ་ཡིན་པ་ཉིད་དུ་ཐེ་ཚོམ་ཟའོ། །འཁྲུལ་པའི་རྒྱུ་འགའ་ལས་ནི་གཉི་གའི་ཐུན་མོང་གི་རང་བཞིན་དེ་ཉིད་ལ་སྐད་ཅིག་མ་མ་ཡིན་པར་སྒྲོ་འདོགས་སོ། །དེའི་ཕྱིར་གང་དག་རྣམ་པར་གནས་པ་དེ་དག་ཉིད་གཅིག་སྣང་བ་ན་རང་བཞིན་གཞན་གྱིས་སྟོང་པར་ངེས་པ་ཡིན་ནོ། །སྐད་ཅིག་མ་ཉིད་ལ་ནི་རྣམ་པ་འགའ་ཞིག་གི་ཡོད་པ་མ་ཡིན་པ་དེས་ན་དེ་ཡོངས་སུ་སྤངས་པ་དང་ལྡན་པར་སྣང་བར་ངེས་བ་མ་ཡིན་ནོ། །སྔོན་པོའི་སྣང་བ་ནི་ཤེས་པས་བདེ་བའི་རྣམ་པ་ཡོངས་སུ་སྤངས་པར་ཤེས་ཀྱི། བདེ་བའི་རྣམ་པ་ནི་མ་ཡིན་ནོ། །རང་བཞིན་གང་ཞིག་ཤེས་པས་རང་བཞིན་གང་སྤངས་པར་ཉམས་སུ་མྱོང་བ་དེ་ནི་ཕན་ཚུན་སྤངས་པས་དེ་ལས་གཞན་ཡིན་ནོ། །དེས་ན་གཟུང་བའི་རྣམ་པ་བདག་ཏུ་འཛིན་པའི་གཞི་ལས་ཕྱི་རོལ་དུ་གྱུར་པ་ལས་གཞན་དུ་ཉམས་སུ་མྱོང་བར་གྱུར་པའི་བདེ་བ་གང་ཡིན་པ་དེ་ནི་སྔོན་པོ་ཉིད་དང་དབྱིབས་དང་བདག་ཏུ་འཛིན་པ་ལས་ཕྱི་རོལ་དུ་གྱུར་པའི་གཟུང་བའི་རྣམ་པས་སྟོང་པ་ཡིན་ནོ། །དེ་ལྟར་ན་ཡང་བདེ་བ་ནི་ནང་གི་བདག་ཏུ་འཛིན་པའི་གནས་དབྱིབས་མེད་པ་དེར་གྱུར་པའི་སྔོན་པོས་སྟོང་པར་ཉམས་སུ་མྱོང་ངོ་ཞེས་བྱ་བར་ངེས་པ་ཡིན་ནོ། །གཟུང་བའི་རྣམ་པ་ལས་གཞན་དུ་ཉམས་སུ་མྱོང་བའི་བདེ་བ་ནི་འཛིན་པའི་རྣམ་པ་ལས་གཞན་དུ་མི་འཐད་དེ། གཟུང་བའམ་ཡང་ན་འཛིན་པར་གསལ་བ་ལས་དེ་ནི་གཟུང་བ་མ་ཡིན་པ་དེས་ན་འཛིན་པ་ཉིད་ཡིན་ནོ། །དེས་ན་འདི་ལྟར་བདེ་བའི་རྣམ་པ་གང་ཡིན་པ་དེ་ནི་
གཟུང་བ་དེའི་འཛིན་པར་བྱེད་པར་ངེས་པ་ཡིན་ནོ། །དེའི་ཕྱིར་གང་དག་འགལ་བའི་རང་བཞིན་གྱི་ཡུལ་ཅན་གྱི་མྱོང་བ་དེ་དག་ནི་རང་བཞིན་གཅིག་ལ་བརྟེན་པ་མ་ཡིན་ཏེ། དཔེར་ན་བདེ་བ་དང་སྡུག་བསྔལ་གྱི་ཡུལ་ཅན་བཞིན་ནོ། །སྔོན་པོ་དང་བདེ་བ་དག་ཀྱང་ཕན་ཚུན་སྤངས་ནས་དུས་གཅིག་ཏུ་འགལ་བར་ཉམས་སུ་མྱོང་བ་ཡིན་ནོ། །གཅིག་གི་ཡུལ་ཅན་གྱི་ཉམས་སུ་མྱོང་བའི་ཐ་སྙད་ནི་འགལ་བའི་ཆོས་འདུ་བ་དང་བྲལ་བའི་རང་བཞིན་གྱི་ཡུལ་ཅན་ཙམ་གྱི་རྒྱུ་ཅན་དེས་ཁྱབ་པ་ཡིན་ལ། འགལ་བའི་ཆོས་དང་ལྡན་པའི་ཡུལ་ཅན་ནི་ཁྱབ་པར་བྱེད་པ་དང་འགལ་བ་ཡིན་ནོ། །བདེ་བ་ལ་སོགས་པའི་རང་བཞིན་འཛིན་པའི་རྣམ་པ་གཟུང་བའི་རྣམ་པ་ལས་ཐ་དད་པར་ནི་ཉམས་སུ་མྱོང་བ་ཉིད་ཀྱི་དབང་གིས་གྲུབ་པས་ཐ་སྙད་བསྒྲུབ་པར་བྱ་བ་ཡིན་ནོ། །གལ་ཏེ་དེ་གཉི་ག་དངོས་པོ་ཡིན་པ་དེ་ལྟ་ན་ནི་དུ་མ་ཉིད་བསྒྲུབ་པར་བྱ་བ་ཡིན་ལ། ཅི་སྟེ་གཅིག་དངོས་པོ་མ་ཡིན་པ་དེ་ལྟ་ན་ནི་གཅིག་མེད་པ་ཉིད་ཡིན་ནོ། །འཛིན་པའི་རྣམ་པ་དེའི་གཟུང་བའི་རྣམ་པ་འཛིན་པ་བདེ་བ་ལ་སོགས་པའི་རང་བཞིན་རིག་པ་རྣམ་པར་ཤེས་པར་སྨྲ་བས་འབྲས་བུར་བརྗོད་པ་གང་ཡིན་པ་དེ་ཡང་སྣང་བ་ཡིན་ཏེ། དེས་ན་གཟུང་བ་དང་འཛིན་པའི་རྣམ་པ་དང་བདེ་བ་ལ་སོགས་པའི་རང་བཞིན་རིག་པ་ནི་གསུམ་པ་ཡིན་ནོ། །ལྡོག་པའི་རྒྱུ་མཚན་ཅན་ནི་སྣང་བ་གང་ཡིན་པའི་རང་བཞིན་ཉིད་ཡིན་གྱི་རྣམ་པ་གཞན་ནི་མ་ཡིན་ཏེ། སྐད་ཅིག་མ་བཞིན་ནོ། །ཡང་གང་ཞིག་གང་ཡོངས་སུ་སྤངས་ནས་རིག་པར་གྱུར་པ་དེ་དོན་དམ་པར་དེ་ལས་ཐ་དད་པ་ཡིན་ལ། ལྡོག་པའི་རྒྱུ་མཚན་གྱིས་ཐ་དད་པར་གྱུར་ན་ནི་འོ་ན་ནི་སྔོན་པོ་ལ་སོགས་པ་གང་ཞིག་འགའ་ལས་ཀྱང་ཐ་དད་པར་མི་འགྱུར་ཏེ། ཐ་དད་པའི་རྒྱུ་གཞན་མེད་པའི་ཕྱིར་རོ། །གང་གི་ཚེ་ཕྱིའི་དོན་གྱི་ཚུལ་ལ་རྣམ་པ་མེད་པའི་ཕྱོགས་བཀག་ནས་རྣམ་པ་དང་བཅས་པའི་ཕྱོགས་རྣམ་པར་འཇོག་པ་དེའི་ཚེ་ནི་རྗེས་སུ་དཔག་པའི་ཐ་མི་དད་པ་ལ་བརྟེན་ནས་འདི་སྐད་དུ་མ་རྟོགས་པ་ལས་བཟློག་པ་དང༌། སྔོན་པོ་མ་ཡིན་པ་ལས་བཟློག་པ་ནི་རྣམ་པར་ཤེས་པ་གཅིག་ཡིན་ནོ་ཞེས་བརྗོད་པ་ཡིན་གྱི། ཉམས་སུ་མྱོང་བས་གྲུབ་པ་ནི་མ་ཡིན་ནོ། །དེ་ཇི་ལྟར་ན་ལྡོག་པའི་རྒྱུ་མཚན་ཅན་གྱི་རང་བཞིན་ཡང་གཞན་གྱིས་མ་ཤེས་ཏེ། རང་བཞིན་གསུམ་ནི་
གྲུབ་པ་ཡིན་ནོ། །དེ་ཉིད་ཀྱི་ཕྱིར། དངོས་མཐོང་མེད་ཕྱིར་གཅིག་མ་ཡིན། །ཞེས་བཤད་པ་ཡིན་ནོ། །འདི་ཉིད་ཚིག་ལེའུར་བྱས་པ་དག་གིས་སྟོན་པར་བྱེད་དེ་བློའི་བདག་ཉིད་རྣམ་པར་དབྱེ་བ་ཡོད་པ་མ་ཡིན་པ་གང་ཡིན་པའོ། །མ་རིག་པས་མཐོང་བ་ཕྱིན་ཅི་ལོག་ཏུ་གྱུར་ཅིང་རྣམ་པར་བསླད་པར་གྱུར་པ་གང་ཡིན་པ་དེ་དག་རྣམས་ཀྱིས་བློའི་བདག་ཉིད་ལ་གཟུང་བ་དང་འཛིན་པ་དང༌། རིག་པ་རྣམས་ཐ་དད་པ་གང་ཡིན་པ་དེ་དང་བཅས་པར་རྟོགས་པར་འགྱུར་ཏེ། དཔེར་ན་སྔགས་གྲུབ་པ་དང་སྨན་ལ་སོགས་པས་མིག་བསླད་པ་སྟེ། ཉམས་པར་བྱས་པ་གང་ཡིན་པ་དེ་རྣམས་ལ་འཇིམ་དུ་མ་ནི་འཇི་པའི་འཛེལ་མ་སྟེ། དེ་ལ་སོགས་པའི་དངོས་པོ་གང་ཡིན་པར་ཤེས་པའི་བདག་ཉིད་ལ་རྣམ་པ་གཞན་ཉིད་དུ་སྣང་བ་བཞིན་ནོ། །འདི་སྐད་དུ་འཁྲུལ་པའི་དབང་གིས་གཞན་དུ་རྣམ་པར་གནས་པ་ཡང་གཞན་དུ་མཐོང་བ་ཡིན་ནོ་ཞེས་བརྗོད་པ་ཡིན་ནོ། །སྔགས་དང་སྨན་ལ་སོགས་པའི་དབང་གིས་འཇིམ་པའི་དུམ་བུ་ལ་སོགས་པ་རྣམས་ཀྱི་ངོ་བོ་ཉིད་གཞན་སྐྱེས་པ་ཡིན་ནོ་ཞེས་དོགས་པ་བཟློག་པའི་ཕྱིར་བཤད་པ། མིག་མ་བསླད་པ་སྟེ་མིག་བསླད་པ་མེད་པའི་མིག་འཁྲུལ་མཁན་རྣམས་ཀྱི་ཟུར་ན་འཇུག་པའི་ལྟ་བ་པོ་རྣམས་ཀྱིས་ཇི་ལྟར་མཐོང་བའི་རང་བཞིན་དེ་ལྟར་མ་མཐོང་བའི་ཕྱིར་རོ། །ཡན་ན་གལ་ཏེ་དེར་དོགས་པ་འདིར་འགྱུར་བ་ཡིན་ཡང་གང་མྱ་ངམ་དག་ན་དངོས་པོ་ཆུང་དུ་ཆེན་པོར་སྣང་བ་ཞེས་བྱ་བ་འདི་ལ་ནི་དོགས་པ་ཡོད་པ་མ་ཡིན་ནོ། །མྱ་ངམ་ཤིང་དང་ཆུ་མེད་པའི་ཕྱོགས་ཏེ། དེ་ལྕི་བའི་དུམ་བུ་ཡང་རྒྱང་རིང་པོ་ནས་རིའི་ཚད་ཙམ་དུ་མཐོང་བར་འགྱུར་རོ། །དོན་དམ་པར་གཟུང་བ་གཞལ་བྱ་འཛིན་པ་ཚད་མ་དང༌། རིག་པ་འབྲས་བུ་ཉིད་ཐ་དད་པ་དང་ལྡན་པ་རྣམས་ཡོད་པ་མ་ཡིན་ཡང༌། གཞལ་བྱ་དང༌། འཇལ་བྱེད་དང༌། འབྲས་བུ་གནས་པ་འདི་ནི་ཇི་ལྟར་མ་རིག་པའི་རྗེས་སུ་འགྲོ་བའི་འཁྲུལ་པའི་སྣང་བ་དེ་ལས་མ་འདས་བར་བྱས་པ་ཡིན་ནོ། །གཞན་དུ་ན་གལ་ཏེ་ཤེས་པ་གཅིག་ལ་རང་བཞིན་དུ་མར་སྣང་བའི་གཟུང་བ་ལ་སོགས་པའི་རྣམ་པ་དེ་ཁོ་ན་ཉིད་དུ་རྣམ་པར་འཇོག་ན་དེའི་གཅིག་པ་ཉིད་དེ་ཉམས་པར་འགྱུར་རོ། །དེས་ན་གཅིག་ཉིད་ཉམས་པར་འགྱུར་བའི་ཕྱིར་རོ། །ཇི་ལྟར་ཞེས་བྱ་བ་ནི་རྣམ་པ་རྣམས་ནི་དེ་ཁོ་ན་ཉིད་དུ་རིགས་པ་མ་ཡིན་པ་ཉིད་དོ། །དེ་ལྟ་ན་འོ་ན་ནི་
རྣམ་པ་གསུམ་པོ་རྣམས་གཅིག་ཉིད་ཡིན་པས་གཅིག་ལས་ཐ་དད་པ་མེད་པར་འགྱུར་རོ་ཞེ་ན། བཤད་པ། གཞན་གྱི་སྟེ་དུ་མ་རྣམས་ཀྱི་དུ་མ་ཉིད་ལྡོག་པར་ཐལ་བའི་ཕྱིར་རོ། །དུ་བ་ཉིད་ཀྱི་ཐ་སྙད་ཡུལ་མེད་པར་འགྱུར་རོ་ཞེས་བྱ་བའི་དོན་ཏོ། །གསུམ་པོ་དེ་རྣམས་ནི་ཐ་དད་པ་མེད་པ་གཅིག་པ་ཉིད་དུ་བརྟག་པར་མི་ནུས་ཏེ། དངོས་མཐོང་མེད་པའི་ཕྱིར་ཏེ། གཅིག་གིས་དངོས་པོ་མཐོང་བ་མེད་པའི་ཕྱིར་རོ་ཞེས་བྱ་བའི་དོན་ཏོ། །བློས་དངོས་པོ་ཐ་དད་པ་མེད་པ་འགལ་བའི་ཆོས་འདུ་བས་སྟོང་བའི་རང་བཞིན་མཐོང་ན་ནི་ཐ་དད་པ་མེད་པར་ངེས་པར་འགྱུར་བ་ཡིན་ན་འདི་ལ་ནི་ཐ་དད་པ་མེད་པ་མཐོང་བ་ཡོད་པ་མ་ཡིན་ནོ། །དེའི་ཕྱིར་སྣང་བའི་དངོས་པོ་གཅིག་དང་དུ་མའི་བདག་ཉིད་གང་གིས་རྣམ་པར་དཔྱད་པ་དེའི་རང་བཞིན་ནི་དེ་ཁོ་ནར་ཡོད་པ་མ་ཡིན་ནོ་ཞེས་བྱ་བ་འདི་འོངས་པ་ཡིན་ནོ། །དེ་ཉིད་སྟོན་པ་ནི་གང་གི་ཕྱིར་ན་ཞེས་བྱ་བ་ལ་སོགས་པའོ། །འདི་སྐད་བརྗོད་པ་ཡིན་ཏེ་ཕྱི་རོལ་གྱི་དོན་མེད་པའི་ཕྱིར་རྣམ་པར་ཤེས་པ་གཅིག་དང་དུ་མའི་ཁོ་ན་སྣང་བས་འདི་གཅིག་ཉིད་དུ་སྣང་བས་རིགས་པ་ཡིན་ན་དུ་མར་སྣང་བ་དེའི་ཕྱིར་འདི་ནི་གཅིག་གི་རང་བཞིན་མ་ཡིན་ནོ། །དེའི་ཕྱིར་སྣང་བ་འདི་ནི་གཅིག་མ་ཡིན་ལ་དུ་མ་ཡང་མ་ཡིན་ཏེ། གཟུང་འཛིན་གྱི་རྣམ་པ་དག་དངོས་པོ་མ་ཡིན་པའི་ཕྱིར་རོ། །གལ་ཏེ་ཆོས་མཐུན་པ་འདྲ་བའི་མཐོང་བ་དེའི་ཕྱིར་འཁྲུལ་པ་སྐྱེ་བ་ཞེས་བྱ་བ་འདི་ནི་འཇིག་རྟེན་ན་སྲིད་པ་ཡིན་ཏེ། དེ་ལྟར་མཐོང་བའི་ཕྱིར་རོ། །འཁྲུལ་པ་ཇི་ལྟ་བུ་ཞིག་ཅེ་ན། སྨྲས་པ། དེ་བདག་མིན་ལ་དེ་བདག་ཏུ་ཞེན་པའི་ངོ་བོའོ། །ཞེན་པ་ཡིས་ཞེས་བྱ་བ་ནི་དེ་ལྟ་བུར་གྱུར་པའི་མཚན་ཉིད་ཀྱི་གསུམ་པའོ། །རྣམ་པར་ཤེས་པ་སྨྲ་བ་འདིར་ནི་ཆོས་མཐུན་པར་མཐོང་བ་དེ་ཡོད་པ་མ་ཡིན་ནོ། །གཏན་ཚིགས་སྨྲས་པ། འགྲོ་བ་འདི་ལ་ནི་འདྲ་བ་དེའི་བདག་ཉིད་གཅིག་ཀྱང་མཐོང་བ་མེད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་ཚུ་རོལ་མཐོང་བས་གཟུང་པ་དང་འཛིན་པ་དང༌། རིག་པའི་དབྱེ་བས་ཐ་དད་པ་དང་ལྡན་པར་དོན་དམ་པ་འགའ་ཞིག་ཉམས་སུ་མྱོང་བར་གྱུར་ལ། ཕྱིས་དེ་དང་འདྲ་བའི་རྣམ་པར་ཤེས་པ་ཡང་ཉམས་སུ་མྱོང་བ་ཡིན་ན་ནི་དེའི་ཚེ་གཉིས་མཚམས་སྦྱར་བས་འཁྲུལ་པར་འཐད་པར་འགྱུར་ན་རྣམ་པར་ཤེས་པར་སྨྲ་བ་ལ་ནི་གང་ལ་
གང་གི་རང་བཞིན་སྒྲོ་གདགས་པར་བྱ་བ་འདྲ་བའི་དོན་གཉི་ག་ཡང་མཐོང་བ་མེད་པ་ཡིན་ནོ། །ཅིག་ཤོས་ཀྱིས་ཀྱང་ཕ་རོལ་པོའི་རྗེས་སུ་བརྗོད་པ་སྨྲས་པ་ནི། འཁྲུལ་པ་དེ་ཡང་ཡོད་ན་སྟེ། ཡང་གི་སྒྲས་ནི་གཞན་ཡང་ཡོད་དོ་ཞེས་བྱ་བའོ། །ཆོས་མཚུངས་པའི་རྒྱུ་མཚན་ལ་ལྟོས་ནས་སྒྲོ་འདོགས་པར་བྱེད་པའི་འཁྲུལ་པར་འགྱུར་བ་ནི་རྟོག་པ་ཉིད་ཡིན་གྱི། གཞན་རྟོག་པ་མེད་པ་གང་ཡིན་པ་དེ་ཡང་ཆོས་མཐུན་པ་ལ་ལྟོས་པ་ནི་མ་ཡིན་ཏེ། ནང་ན་གནས་པའི་བསླད་པ་ལས་བྱུང་བ་གང་ཡིན་པ་དེ་ནི་རང་བཞིན་གྱིས་ཏེ། རང་གི་ངོ་བོ་ཁོ་ནས་ཕྱིན་ཅི་ལོག་ཏུ་སྣང་བར་འགྱུར་ཏེ་ཉེས་པས་སྐྱེད་པའི་རྒྱུའི་ཕྱིར་རོ། །གང་གི་ཕྱིར་ཉེས་པ་དང་འབྲེལ་པ་དེ་ནི་མི་བདེན་པའི་དོན་སྟོན་པར་བྱེད་དེ། མི་བདེན་པའི་དོན་གྱི་ངོ་བོ་ཉིད་དུ་སྐྱེ་བར་འགྱུར་རོ། །ཆོས་མཐུན་མཐོང་བ་ནི་སྣང་བའོ། །སོགས་པ་སྨོས་པས་ནི་འདྲ་བར་མཐོང་བ་སྟེ། གང་གི་ཕྱིར་སྔར་ནི་སྒྲོ་འདོགས་པའི་རང་བཞིན་མཐོང་བར་འགྱུར་ལ། ཕྱིས་སྒྲོ་འདོགས་པའི་ཡུལ་ཡིན་ཞིང་དེས་ན་དེ་འདྲ་བ་ཡིན་ལ། དེས་ན་ཐ་དད་པ་མེད་པར་སྒྲོ་འདོགས་པ་ཡིན་ནོ་ཞེས་སོགས་པ་སྨོས་པས་རིམ་གྱིས་མཚོན་པར་འགྱུར་བ་ཡིན་ནོ། །ཆོས་མཐུན་པ་མཐོང་བ་ལ་སོགས་པ་ལ་ལྟོས་པ་མེད་པ་གང་ཡིན་པ་སྟེ། འདི་ལྟར་དཔེར་ན་རབ་རིབ་ལས་སྐྱེས་པའི་རྣམ་པར་ཤེས་པ་སྐྲ་ཤད་དང་སྦྲང་བུ་ལ་སོགས་པ་འདྲ་བའི་དངོས་པོ་མཐོང་ནས་སྒྲོ་འདོགས་པར་བྱེད་པ་ནི་མ་ཡིན་གྱི། འོན་ཀྱང་དེ་ལྟ་བུར་འགྱུར་བའི་རང་གི་ངོ་བོར་རབ་ཏུ་སྟོན་པ་ཉིད་དུ་སྐྱེད་པ་དེ་བཞིན་དུ་ལོག་པར་འཛིན་པའི་བག་ཆགས་ཀྱིས་བསླད་པའི་རྣམ་པར་ཤེས་པ་མི་བདེན་པའི་གཟུང་བ་དང་འཛིན་པའི་རྣམ་པ་སྟོན་པ་སྐྱེ་བ་ནི་ཆོས་མཐུན་པ་ལ་སོགས་པ་ལ་ལྟོས་པ་མེད་པ་ཁོ་ནའོ། །རྣམ་པར་ཕྱེ་བའི་རང་བཞིན་དུ་རབ་ཏུ་གསལ་བ་དེ་ཡང་གཅིག་ནི་མ་ཡིན་ཏེ། དེ་ལྟར་ཉམས་སུ་མྱོང་བ་མེད་པའི་ཕྱིར་རོ། །དུ་མ་ཡང་མ་ཡིན་ཏེ། རྣམ་པར་ཤེས་པ་ལས་ཐ་དད་པ་འགའ་ཡང་མེད་པའི་ཕྱིར་རོ། །དེ་ནི་བསླད་པ་ཡིན་ལ་བསླད་པའི་རང་བཞིན་དང་བྲལ་བ་དགའ་བ་དང་ཞུམ་པ་ལ་སོགས་པའི་རང་བཞིན་རིག་པ་ཙམ་ནི་བདེན་པ་མ་ཡིན་ནོ། །ཞ་ར་ལ་འོངས་པའི་དོན་ཚིག་ལེའུར་བྱས་པས་མ་བཟུང་བ་འཆད་པར་བྱེད་པ་བར་མ་སྐབས་སུ་གནས་པའི་ཚིགས་སུ་བཅད་པའོ། །འདི་རྣམ་པར་རིག་པ་ཙམ་
ཞེས་བྱ་བ་ནི་གལ་ཏེ་ཕྱི་རོལ་གྱི་དོན་བཟློག་ནས་རྣམ་པར་རིག་པ་ཙམ་ཉིད་དུ་རྣམ་པར་གནས་པ་ཡིན་ན་ནི། འཁྲུལ་པའི་རྗེས་སུ་འབྲངས་ནས་ཚད་མ་ལ་སོགས་པ་རྣམ་པར་གཞག་པ་ཡིན་པར་འགྱུར་ན། དེ་ཉིད་ད་རུང་ཡང་རྣམ་པར་གནས་པ་མ་ཡིན་ནོ། །དེ་ཉིད་ཀྱི་ཕྱིར་ཇི་ལྟར་ཞེས་སྨྲས་པ་ཡིན་ནོ། །སློབ་དཔོན་གྱིས་ཀྱང་རྣམ་པ་མེད་པའི་ཕྱོགས་ལ་ཤེས་པ་འཛིན་པ་ཉིད་དང༌། དོན་གཟུང་བ་ཉིད་སྔར་གསལ་ལ། རྣམ་པ་དང་བཅས་པའི་ཕྱོགས་ལ་ཡང་རྣམ་པར་རིག་པ་སྨྲ་བ་རྩོམ་པ་ཉིད་ཀྱི་ཚེ་གཟུང་བའི་མཚན་ཉིད་གསལ་བ་ཡིན་ནོ་ཞེས་གསུངས་བ་ནི། བཤད་ཟིན་ཏོ་ཞེས་བྱ་བ་ཡིན་ཏེ། གཟུང་བའི་མཚན་ཉིད་དེ་དང་མི་ལྡན་པའི་ཕྱིར་རོ་ཞེས་སྨོས་སོ། །རྣམ་པ་མེད་པའི་ཕྱོགས་ལ་འཐད་པ་གཞན་ཡང་ཡོད་པས་དེ་ཉིད་བསྟན་པའི་དོན་དུ་གཞན་ཡང་ཞེས་བསྡུ་བ་གསུངས་ཏེ། ལྷན་ཅིག་ཅེས་བྱ་བ་ནི་ལྷན་ཅིག་ཏུ་དམིགས་པ་དེ་ངེས་པ་སྟེ་དེའི་ཕྱིར་རོ། །སྡོ་དང་དེ་ཡི་བློ་དག་གཞན་མ་ཡིན། ཞེས་བྱ་བ་ནི་ཐ་དད་པ་མེད་པའོ། །བསྒྲུབ་པར་བྱ་བའི་ཆ་ཉིད་བསྟན་པའི་ཕྱིར་གསུངས་པ་ནི། གང་གི་ཕྱིར་ཞེས་བྱ་བའོ། །གལ་ཏེ་སྔོན་པོ་དང་དེ་དམིགས་པ་དག་ཐ་དད་པ་མེད་ན་ཇི་ལྟར་གཟུང་བ་དང་འཛིན་པའི་རྣམ་པ་དག་ཐ་དད་པར་སྣང་ཞེ་ན། གང་ལ་ཐ་དད་པར་སྣང་བའི་ངང་ཚུལ་ཡོད་པ་ཞེས་རྗེས་སུ་བརྗོད་པའོ། །གང་གི་ཕྱིར་གང་ཇི་སྙེད་སྣང་བ་དེ་ཁོ་ན་ལྟར་ཐམས་ཅད་བདེན་པ་ནི་མ་ཡིན་ཏེ། འཁྲུལ་པས་མེད་པ་ཡང་སྣང་བའི་ཕྱིར་རོ། །དོན་གཞན་པའི་རང་བཞིན་ཉིད་མ་ཡིན་ཏེ་ཞེས་བྱ་བ་ནི་བསྒྲུབ་པར་བྱ་བ་སྟོན་པའོ། །འདི་སྐད་དུ་འདི་དག་གཅིག་པར་ནི་བསྒྲུབ་པར་བྱ་བ་མ་ཡིན་གྱི། འོན་ཀྱང་ཐ་དད་པ་དག་དགག་པ་ཙམ་ཡིན་ནོ་ཞེས་སྟོན་པ་ཡིན་ནོ། །ཅིའི་ཕྱིར་ཐ་དད་པ་དགག་པ་ཙམ་བསྒྲུབ་པར་བྱ་བ་ཡིན་གྱི། གཅིག་ཉིད་དུ་ནི་བསྒྲུབ་པ་མ་ཡིན་ནོ་ཞེས་སྨྲ། གཅིག་ཏུ་ནི་འཐད་པ་ཡིན་ཏེ། གང་གི་ཕྱིར་གལ་ཏེ་གཟུང་བའི་རྣམ་པ་གསལ་བ་ཡང་མི་བདེན་ན། རིག་པ་ཡང་བདེན་པ་ཉིད་དུ་གང་གིས་རྟོག་པར་བྱེད། ཡང་གལ་ཏེ་རྣམ་པར་ཤེས་པ་མི་བདེན་པ་གསལ་བར་བྱེད་ན་བདེན་པ་ཡང་གསལ་བར་བྱེད་དེ། བདེན་པས་ནི་ཉེས་པ་ཅུང་ཟད་ཀྱང་བྱས་པ་མེད་པའི་ཕྱིར་རོ། །གལ་ཏེ་དེ་ལྟར་གཟུང་བའི་རྣམ་པ་དེ་གལ་ཏེ་གཅིག་གི་ངོ་བོ་ཡིན་ན་ནི་ཕྱོགས་ཆས་བྱས་པའི་འགལ་བའི་ཆོས་དང་ལྡན་པ་མི་འཐད་དོ། །
ཕྱོགས་ཆ་ཐ་དད་པ་དེ་ཡང་གཅིག་ཉིད་ཡིན་ན་ནི་ཡན་ལག་ཅན་གྱི་རྫས་གཅིག་ཅིའི་ཕྱིར་མི་འདོད་དེ་ཁྱད་པར་ཅི་ཡོད། ཡན་ལག་ཅན་གྱི་རྫས་ལ་ནི་ཁ་བསྒྱུར་བ་དང་མ་བསྒྱུར་བ་ཡོད་པའི་ཕྱིར་འགལ་གྱི། བློ་ལ་ནི་མ་ཡིན་པའི་ཕྱིར་འདི་ཉིད་ཁྱད་པར་ཡིན་ནོ་ཞེ་ན། ཤེས་པ་མ་ཡིན་པའི་རགས་པ་གཅིག་མ་ཤེས་པ་ཡང་རུང་སྟེ་ཁྱད་པར་ཅི་ཡོད་དེ། བློའི་རང་བཞིན་ཉིད་ནི་རགས་པའི་ཉེས་པ་ཉམས་པ་མ་ཡིན་ནོ། །གཞན་ཡང་ཁ་བསྒྱུར་བ་དང་མ་བསྒྱུར་བ་ལ་སོགས་པ་དང་ལྡན་པ་ཁོ་ན་ནི་འགལ་བ་མ་ཡིན་གྱི། འོན་ཀྱང་ཕྱོགས་ཆ་ཐ་དད་པ་ཡང་ཡིན་ནོ་ཞེས་མང་དུ་བཤད་ཟིན་ཏོ། །དེའི་ཕྱོགས་ཆ་ཐ་དད་པའི་རྒྱུ་མཚན་གྱིས་ཀྱང་འགལ་བ་ན། གལ་ཏེ་རྣམ་པར་ཤེས་པ་གཅིག་ཡིན་ན་ནི་ཡན་ལག་ཅན་ཡང་གཅིག་ཉིད་ཡིན་ལ། འདི་དུ་མ་ཉིད་ཡིན་ན་ནི་ཁྱད་པར་མེད་པའི་ཕྱིར་ཤེས་པའི་རགས་པ་ཡང་དུ་མ་ཉིད་དོ། །གཞན་ཡང་རྒྱུ་ཅན་ཞེས་བྱ་བ་ནི་དོན་དམ་པར་ཡོད་པ་མ་ཡིན་ནོ། །སྐད་ཅིག་མའི་རྫས་ལ་ནི་གང་དུ་ཁ་བསྒྱུར་བ་དང༌། གཡོ་བ་དང་བསྒྲིབས་པ་ཡོད་པ་དང་མེད་པས་བྱས་པའི་ཐ་དད་པ་མ་མཐོང་བ་དེ་ཉིད་རྫས་གཅིག་ཏུ་འགྱུར་རོ། །གཡོ་བ་ལ་སོགས་པས་བྱས་པའི་ཐ་དད་པའི་གནས་སྐབས་སུ་ཐ་དད་པ་མཐོང་བས་གཞན་དུ་ཡང་རྗེས་སུ་འཇུག་པར་བྱས་པ་ནི་མ་ཡིན་པས་ཚད་མ་འགའ་ཞིག་ཡོད་པ་ཡིན་ནོ། །དེའི་ཕྱིར་རགས་པ་ཐམས་ཅད་ལ་ཕྱོགས་གཞན་དང་འབྲེལ་པས་ཆ་ཤས་ཡོངས་སུ་བཅད་པ་ལས་གྱུར་པའི་འགལ་བའི་ཆོས་འདུ་བར་མཐོང་བས་ཐ་དད་པ་མེད་པ་སྤང་པར་བྱ་བ་ཡིན་ནོ་ཞེས་རིག་པ་ཡིན་ནོ། །གལ་ཏེ་དེ་ལྟ་ན་གཟུང་བའི་རྣམ་པའི་རང་བཞིན་དུ་མ་ཡིན་ན་ཞེ་ན། འདི་ལ་ཡང་ཇི་ལྟར་རྡུལ་ཕྲ་རབ་རྣམས་དྲུག་གི་ཅིག་ཅར་སྦྱར་བས་དངོས་པོ་མེད་པ་དེ་བཞིན་དུ་ཤེས་པའི་རྡུལ་ཕྲ་རབ་རྣམས་ལ་ཡང་ཐལ་བར་འགྱུར་རོ། །ལུས་ཅན་ཉིད་ལ་སྐྱོན་འདིར་འགྱུར་གྱི་ལུས་ཅན་མ་ཡིན་པ་ལ་ནི་མ་ཡིན་པ་མ་ཡིན་ནམ། ལུས་ཅན་ཞེས་བྱ་བར་རྭ་ཟེད་དེ་བ་ནི་མེད་ཀྱི། འོན་ཀྱང་ཚད་ཆུང་དུ་མང་པོ་རྣམས་ཕན་ཚུན་གྱི་རང་བཞིན་གྱི་ཡུལ་ཡོངས་སུ་སྤངས་ནས་སྐྱེས་པའི་ཕྱིར་ཡུལ་རྒྱས་པ་དང་ལྡན་པར་འགྱུར་བ་ནི་ལུས་ཅན་ཡིན་ལ། དེ་ནི་རྣམ་པར་ཤེས་པ་ལ་ཡང་བྱེ་བྲག་མེད་པའི་ཕྱིར་ཀུན་རྫོབ་ཏུ་ཡོད་པར་མཚུངས་པར་ཐལ་བས་དེ་ནི་དུ་མར་ཡང་རིགས་པ་མ་ཡིན་ནོ། །གཞན་ཡང་
རྣམ་པར་ཤེས་པའི་རྡུལ་ཕྲ་རབ་ཉམས་སུ་མྱོང་བར་གྱུར་པ་རྣམས་ལ། རགས་པའི་རྣམ་པ་ཉམས་སུ་མྱོང་བ་ནི་བཟློག་པར་ནུས་པ་མ་ཡིན་ནོ། །རྣམ་པར་ཤེས་པའི་བདག་ཉིད་གཅིག་ལ་ནི་རགས་པ་ཡོད་པ་མ་ཡིན་ཞིག །རྣམ་པར་ཤེས་པའི་རྡུལ་ཕྲ་རབ་མང་པོ་རྣམས་ཀྱང་སོ་སོར་རགས་པའི་རང་བཞིན་མ་ཡིན་ནོ། །ཇི་ལྟར་ཕྱི་རོལ་གྱི་རྡུལ་ཕྲ་རབ་ཤེས་པ་གཅིག་ལ་སྣང་བ་རྣམས་ཀྱི་སོ་སོར་སྣང་བའི་ཆོས་རགས་པ་ཡིན་པ་དེ་བཞིན་དུ། འདིར་ཡང་ཤེས་པ་གཅིག་ལ་སྣང་བའི་ཕྱིར་རགས་པ་ཉིད་དུ་སྣང་བར་འགྱུར་བ་ཡང་མ་ཡིན་ཏེ། དུ་མ་རྣམས་གཞན་འགའ་ཞིག་གིས་ཀྱང་མ་བཟུང་བའི་ཕྱིར་རོ། །དེའི་ཕྱིར་ཉམས་སུ་མྱོང་བའི་རྗེས་སུ་འབྲངས་བ་ན་རགས་པ་གསལ་བར་སྣང་བར་ཉམས་སུ་མྱོང་བར་མི་འགྱུར་བ་ཞིག་ན་ཉམས་སུ་མྱོང་སྟེ། དེའི་ཕྱིར་གང་དང་ལྡན་པས་ཡོད་པ་མ་ཡིན་པའི་རགས་པའི་བདག་ཉིད་ལ་སྟོན་པར་བྱེད་པ་ཤེས་པའི་མེད་པ་གསལ་བར་བྱེད་ནུས་པ་ཡང་ཡོད་པ་ཉིད་དོ། །རགས་པའི་རྣམ་པ་མེད་ན་ནི་རྣམ་པར་ཤེས་པའི་རྡུལ་ཕྲ་རབ་གཞན་ཅི་ཞིག་ལུས་ལ་དེ་བརྟགས་པས་ཀྱང་ཅི་ཞིག་བྱ་སྟེ། གང་གི་ཕྱིར་རགས་པའི་རྣམ་པ་འདི་ཉིད་དེ་ཁོ་ན་ཉིད་མ་ཡིན་པར་མི་འགྱུར་བ་དང༌། རྣམ་པར་ཤེས་པ་ཡང་མེད་པ་གསལ་བར་བྱེད་པའི་ནུས་པ་དང་ལྡན་པར་མི་འགྱུར་བར་བྱ་བའི་ཕྱིར་གཟུང་བའི་རྣམ་པ་རྣམ་པར་ཤེས་པའི་བདག་ཉིད་དུ་བརྟགས་པ་ཡིན་ན་གཟུང་བའི་རྣམ་པ་མི་བདེན་པ་དང་རྣམ་པར་ཤེས་པ་ཡང་མེད་པ་གསལ་བར་བྱེད་པའི་ནུས་པ་དང་ལྡན་པར་ཁས་བླངས་ན། རྣམ་པར་ཤེས་པའི་རྡུལ་ཕྲ་རབ་རྟོག་པ་ནི་དོན་དམ་པ་ཡིན་ནོ། །དགས་པར་སྣང་བ་རྣམ་པར་རྟོག་པས་སྤྲུལ་པ་ཡང་རིགས་པ་མ་ཡིན་ཏེ། གསལ་བར་སྣང་བའི་ཕྱིར་དང༌། རྣམ་པར་རྟོག་པ་རྣམས་ནི་གསལ་བར་སྣང་བ་མ་ཡིན་པའི་ཕྱིར་རོ། །ཇི་ལྟར་སྨིག་རྒྱུ་དག་ལ་ཆུར་རྣམ་པར་རྟོག་པ་གསལ་བར་སྣང་བ་དེ་བཞིན་དུ་རགས་པར་རྣམ་པར་རྟོག་པ་ཡང་ཡིན་ནོ་ཞེས་ནི་བརྗོད་པར་མི་ནུས་ཏེ། གང་གི་ཕྱིར་སྨིག་རྒྱུའི་རང་གི་མཚན་ཉིད་འཛིན་པའི་རྣམ་པར་ཤེས་པ་དང་དུས་གཅིག་ཏུ་འཇུག་པའི་ཆུའི་རྣམ་པར་རྟོག་པ་སྣང་བ་དང་རྣམ་པར་བརྟག་པ་དག་གཅིག་ཏུ་བྱེད་པའི་ཕྱིར་གསལ་བར་སྣང་བར་ངེས་པར་འགྱུར་ན། འདིར་ནི་གང་ཞིག་དང་ལྷན་ཅིག་རྒྱུ་བ་ལས་རགས་པའི་རྣམ་པར་རྟོག་པ་
གསལ་བར་སྣང་བར་རྟོགས་པར་འགྱུར་བ་རགས་པ་ཉམས་སུ་མྱོང་བ་གསལ་བར་སྣང་བ་ནི་འགའ་ཡང་ཡོད་པ་མ་ཡིན་ནོ། །གཞན་ཡང་རྣམ་པར་རྟོག་པའི་རྣམ་པར་ཤེས་པ་ཡང་བདག་ཉིད་ཀྱི་རང་བཞིན་གང་ཡིན་པ་དེ་ཁོ་ན་ཉམས་སུ་མྱོང་བར་འགྱུར་བ་ཡིན་ན། དེ་ལ་ནི་རགས་པ་ཡོད་པ་མ་ཡིན་ཏེ། དེའི་ཕྱིར་སྣང་བར་མི་འགྱུར་རོ། །རྣམ་པར་རྟོག་པའི་རྣམ་པར་ཤེས་པ་ནི་རང་གི་བདག་ཉིད་དོན་མེད་པ་ལ་དོན་དུ་ལྷག་པར་ཞེན་ནས་འཇུག་པ་ཡིན་ནོ་ཞེ་ན། དོན་མེད་པ་སྟོན་པ་ནི་ངེས་པར་བརྟགས་པ་ན་མེད་པ་གསལ་བར་བྱེད་པ་ཉིད་དུ་གནས་པ་ཡིན་ཏེ། གང་གི་ཕྱིར་དོན་མེད་པ་གསལ་བ་ན་བདག་ཉིད་གསལ་བར་བྱེད་པའམ། གཞན་གསལ་བར་བྱེད་པར་འགྱུར་ཏེ། རྣམ་པ་གཞན་ནི་མི་སྲིད་པའི་ཕྱིར་རོ། །རེ་ཞིག་བདག་ཉིད་ནི་གསལ་བར་བྱེད་པ་མ་ཡིན་ཏེ། རྣམ་པར་ཤེས་པ་ཉིད་གསལ་བའི་རང་བཞིན་ཡིན་པའི་ཕྱིར་དང༌། དོན་མེད་པ་ནི་དངོས་པོ་མ་ཡིན་པའི་ཡང་ཕྱིར་རོ། །གཞན་གྱིས་གསལ་བར་བྱེད་ན་ཡང་དེ་གསལ་བར་བྱེད་པ་ནི་ཤེས་པའི་བདག་ཉིད་དེ་ཉིད་མི་བདེན་པ་གསལ་བར་བྱེད་པར་སྐྱེས་པ་ཡིན་ནོ། །འདི་སྙམ་དུ་མ་རིག་པའི་དབང་གིས་དེ་ལྟར་གསལ་བ་ཡིན་ནོ་སྙམ་ན། གལ་ཏེ་མ་རིག་པ་དེ་དངོས་པོ་མེད་པ་ཡིན་ན་དངོས་པོ་མེད་པས་དངོས་པོ་མེད་པ་གསལ་བར་བྱེད་དོ་ཞེས་བྱ་བའི་ཚིག་གི་ཚུལ་འདི་ཅིར་ཡང་མི་རུང་ངོ༌། །ཅི་སྟེ་དངོས་པོ་ཡིན་པ་དེ་ལྟ་ན་ཡང་དེ་ནི་རྣམ་པར་ཤེས་པའི་རང་བཞིན་ཉིད་ཡིན་ན་དེ་ལས་ཀྱང་དངོས་པོ་མེད་པ་ཇི་ལྟར་གསལ་ཏེ། དངོས་པོ་དང་དངོས་པོ་མེད་པ་དག་ལ་ནི་འབྲེལ་པ་འགའ་ཡང་ཡོད་པ་མ་ཡིན་ནོ། །དེའི་ཕྱིར་མ་རིག་པའི་ནུས་པ་དང་ལྡན་པའི་ཤེས་པ་མི་བདེན་པའི་རང་བཞིན་གསལ་བའི་བྱེད་པ་ཡིན་པའི་ཕྱིར་མ་རིག་པའི་དབང་གིས་གསལ་བ་ཡིན་ནོ་ཞེས་བརྗོད་པ་ལ་ནི་ཁ་ན་མ་ཐོ་བ་ཡོང་པ་མ་ཡིན་ནོ། །དེའི་ཕྱིར་དེ་ལྟར་དོན་མེད་པར་འཛིན་པའི་ཤེས་པ་ཐམས་ཅད་མི་བདེན་པ་གསལ་བར་བྱེད་པའི་མ་རིག་པའི་བདག་ཉིད་དུ་བལྟ་བར་བྱའོ། །ཐམས་ཅད་དུ་གལ་ཏེ་སྣང་བ་གང་ཡིན་པ་དེ་ཐམས་ཅད་ཡོད་པ་ཡིན་ན་ཚངས་པས་ཀྱང་ཤེས་པ་འབའ་ཞིག་ཀྱང་འཁྲུལ་པར་བརྟག་པར་མི་ནུས་སོ། །ཅི་སྟེ་མི་བདེན་པ་ཡང་ཡོད་ན་ནི་བརྒྱ་བྱིན་གྱིས་ཀྱང༌། ཤེས་པ་མི་བདེན་པ་གསལ་བར་བྱེད་པའི་ནུས་པ་བསྙོན་པར་མི་ནུས་སོ། །འདོད་དུ་
ཟིན་ཀྱང་ཉམས་སུ་མྱོང་བ་ཐམས་ཅད་བདེན་པ་ཡིན་པར་ནི་སུས་ཀྱང་གཞག་པར་ནུས་པ་མ་ཡིན་པའི་ཕྱིར་ཤེས་པའི་མི་བདེན་པ་གསལ་བའི་ནུས་པ་ལས་འདའ་བར་བྱ་བ་མ་ཡིན་ནོ། །མི་བདེན་པའི་རང་བཞིན་ཉིད་མ་རིག་པའི་དབང་གིས་སྟོན་པར་བྱེད་པའི་བདེན་པ་ནི་མ་ཡིན་ཏེ། བདེན་པ་དང་ལྷན་ཅིག་འབྲེལ་པ་ངེས་པ་མེད་པའི་ཕྱིར་རོ། །ཉམས་སུ་མྱོང་བ་ངེས་པའི་རང་བཞིན་མི་སླུ་བ་ནི་སྤང་བར་ནུས་པ་མ་ཡིན་ཏེ། དེ་ནི་ཁས་བླང་བར་བྱ་བ་ཡིན་པའི་ཕྱིར་རོ། །ཡང་གང་ཉམས་སུ་མྱོང་ཡང་གནོད་པར་བྱེད་པ་མཐོང་བའི་ཕྱིར་སླུ་བ་དེ་ནི་སྤང་བར་བྱ་བ་ཡིན་ཏེ། དཔེར་ན་ཟླ་བ་གཉིས་ཀྱི་རང་བཞིན་ལྟ་བུའོ། །གནོད་པར་བྱེད་པ་མེད་པའི་ཕྱིར་འཁྲུལ་པ་མི་འགྲུབ་བོ་ཞེས་གང་འཆད་པར་འགྱུར་རོ། །དེ་བཞིན་དུ་རྣམ་འགྲེལ་ལས་ཀྱང༌། གནོད་བྱེད་རིག་པ་དམ་པ་ནི། །མེད་ན་ཉམས་མྱོང་ཡང་བྱ་མིན། །ཞེས་སོ། །དགའ་བ་ལ་སོགས་པའི་རང་བཞིན་ཡང་དག་པར་རིག་པ་ནི་སྤང་པར་བྱ་བ་མ་ཡིན་ཏེ། གནོད་པར་བྱེད་པ་མེད་པའི་ཕྱིར་རོ། །དེས་ན་གཅིག་མ་ཡིན་ནོ་ཞེས་བྱ་བར་གནས་སོ། །དེ་ཉིད་ཀྱི་ཕྱིར་འཁྲུལ་པའི་ཤེས་པ་དཔེར་བརྗོད་དོ། །གཞན་དུ་ན་སྔོན་པོ་དང་སྔོན་པོའི་རང་བཞིན་དག་ལྷན་ཅིག་དམིགས་པས་ངེས་པ་ན་ཐ་དད་པ་ཡོད་པ་མ་ཡིན་གྱི། འོན་ཀྱང་གཅིག་ཉིད་ཡིན་པ་དེ་བཞིན་དུ། སྔོན་པོ་དང་དེའི་བློ་དག་ཀྱང་ཞེས་བྱ་བ་ཉིད་བརྗོད་པར་བྱ་བར་འགྱུར་རོ། །སྔོན་པོ་དང་འབྲེལ་པའི་རང་བཞིན་གང་ཡིན་པ་དེ་ནི་ཉམས་སུ་མྱོང་བ་ལས་དོན་གཞན་པ་སྟེ། གཞན་དུ་གྱུར་པ་ཉིད་མ་ཡིན་ནོ། །གཏན་ཚིགས་ཀྱི་དོན་སྦྱོར་བར་བྱེད་པ་ནི་དེ་དག་ལྷན་ཅིག་པ་ཉིད་དུ་དམིགས་པ་ངེས་པའི་ཕྱིར་ཟླ་བ་གཉིས་ལ་སོགས་པ་བཞིན་ནོ། །ཇི་ལྟར་འཁྲུལ་པའི་ཤེས་པ་གཅིག་ལ་སྣང་བའི་ཟླ་བ་གཉིས་དག་ལྷན་ཅིག་པ་ཉིད་དུ་ངེས་པར་དམིགས་པའི་ཕྱིར་ཕན་ཚུན་དང་ཤེས་པ་ལས་ཐ་དད་པ་ཡོད་པ་མ་ཡིན་པ་དེ་བཞིན་དུ་འདི་དག་ལ་ཡང་བལྟ་བར་བྱའོ། །གཏན་ཚིགས་ཀྱི་དོན་རང་ཉིད་སྟོན་པར་བྱེད་པ་ནི་འདི་དག་ལས་ཞེས་བྱ་བ་ཡིན་ཏེ། ཤེས་པ་དང་ཤེས་བྱ་འདི་དག་ལས་ཤེས་པའམ་ཤེས་བྱའི་རྣམ་པ་སྟེ། རང་བཞིན་གཅིག་མ་དམིགས་ན་གཞན་ཏེ་གཉིས་པ་དམིགས་པ་མེད་དོ། །དེས་ན་འདི་ནི་ངེས་པའི་དོན་དུ་བསྟན་པ་མ་ཡིན་ཏེ། ཤེས་བྱ་དམིགས་
པ་ནི་ཤེས་པ་དམིགས་པའི་བདག་ཉིད་ཅན་ཉིད་ཡིན་གྱི་གཞན་དུ་མ་ཡིན་ལ། ཤེས་པ་དམིགས་པ་ཡང་ཤེས་བྱ་དམིགས་པའི་བདག་ཉིད་ཡིན་ནོ་ཞེས་གཞན་དུ་གྱུར་པ་ཉིད་བཟློག་པ་ཡིན་ནོ། །གར་དང་གྱད་ལ་ལྟ་བ་ལ་སོགས་པ་རྣམས་ལ་གང་ཤེས་བྱ་དམིགས་པར་མི་འགྱུར་བའི་ཤེས་པ་ནི་འགའ་ཡང་ཡོད་པ་མ་ཡིན་ནོ། །དེ་བས་ན་ཤེས་བྱ་མི་དམིགས་པའམ། ཤེས་པ་མི་དམིགས་པར་ཤེས་བྱ་དམིགས་པ་ནི་འགའ་ཡང་ཡོད་པ་མ་ཡིན་ནོ་ཞེས་རྣམ་པ་གཞན་ཉིད་འགོག་པ་ཡིན་གྱི། དམིགས་པ་ཐམས་ཅད་ལ་ཐ་དད་པ་ཉིད་འགོག་པ་ནི་མ་ཡིན་ནོ། །གང་ཡང་བཅོམ་ལྡན་འདས་ཀྱིས་ཤེས་བྱ་དང་ཐུགས་ལ་ལྷན་ཅིག་དམིགས་པ་ངེས་པ་ཡོད་ཀྱང༌། ཐ་དད་པ་མེད་པ་ནི་མ་ཡིན་ནོ་ཞེས་སྨྲས་པ་དེ་ནི་མི་རིགས་ཏེ། གང་གི་ཕྱིར་དེ་ལ་ནི་ལྷན་ཅིག་དམིགས་པ་ངེས་པ་ཉིད་མེད་དེ། ཐ་དད་པ་ཉིད་དུ་རྒྱུད་གཞན་གྱིས་རང་གི་སེམས་དམིགས་པའི་ཕྱིར་རོ། །དེ་ཉིད་ཀྱི་ཕྱིར་སེམས་དང་སེམས་ལས་བྱུང་བས་ཀྱང་འཁྲུལ་པར་འགྱུར་བ་མ་ཡིན་ཏེ། དེ་དག་རྣམས་ཀྱང་སོ་སོར་བདག་ཉིད་ཡང་དག་པར་རིག་པའི་ཕྱིར་རོ། །གང་ཞིག་གཅིག་དམིགས་པ་ན་ཅིག་ཤོས་མི་དམིགས་པ་གང་ཡིན་པ་དེ་དག་ལ་ནི་འཁྲུལ་པ་ཡོད་པ་མ་ཡིན་ནོ། །དེ་བཞིན་གཤེགས་པའི་ཐུགས་དམིགས་པ་ཉིད་ནི་ཤེས་བྱ་དམིགས་པ་མ་ཡིན་གྱི། འོན་ཀྱང་གཞན་ཡང་ཡོད་པ་ཡིན་ནོ། །གཅིག་གིས་སམ་གཅིག་ཅེས་བྱ་བའི་ཕྱོགས་ནི་ཁས་མ་བླངས་པའི་ཕྱིར། དེ་ལ་བརྗོད་པའི་སྐྱོན་མི་སྲིད་པ་ཉིད་དོ། །རང་བཞིན་ཐ་དད་པ་སྟེ། རང་བཞིན་ཕན་ཚུན་དབེན་པ་ལ་ནི་ངེས་པར་ལྷན་ཅིག་ཏུ་འཛིན་པ་འདི་འཐད་པ་མ་ཡིན་ཏེ། འབྲེལ་པ་ཉིད་དུ་གྱུར་པའི་རྒྱུ་མཚན་དེ་མེད་པའི་ཕྱིར་རོ། །འདི་སྐད་དུ་བརྗོད་པ་ཡིན་ཏེ། ཕན་ཚུན་འབྲེལ་པ་མེད་པར་ནི་ཐ་དད་པ་དག་ལྷན་ཅིག་དམིགས་པ་ངེས་པ་མ་ཡིན་ལ། དེ་ཡང་རེ་ཞིག་ནི་བདག་ཉིད་ཀྱི་རྒྱུ་མཚན་ཅན་དུ་ནི་རང་ཉིད་མི་འདོད་དོ། །དེ་ལས་བྱུང་བ་ཡང་མེ་དང་དུ་བདག་བཞིན་དུ་ལྷན་ཅིག་དམིགས་པར་མ་ངེས་སོ། །ཡུལ་དང་ཡུལ་ཅན་གྱི་མཚན་ཉིད་ཀྱང་རྣམ་པ་དང་བཅས་པའི་ཕྱོགས་ལ་ནི་བཀག་ཟིན་ཏོ། །རྣམ་པ་མེད་པའི་ཕྱོགས་ལ་ཡང་ཁྱད་པར་མེད་པའི་ཤེས་པ་འབའ་ཞིག་ཉམས་སུ་མྱོང་བ་ན་ཁྱད་པར་དང་ལྡན་པར་བསྟན་པར་མི་ནུས་སོ། །ཡུལ་ཡང་ཤེས་པ་དམིགས་པ་ལས་ཐ་དད་པར་
དམིགས་པ་མ་ཡིན་ལ། ཤེས་པ་དམིགས་པ་དེ་ལ་ཡང་ཁྱད་པར་ཡོད་པ་མ་ཡིན་ནོ། །འཛིན་པའི་རྣམ་པ་ཉམས་སུ་མྱོང་བ་གྲུབ་པ་ནི་ཟློག་པ་མ་ཡིན་གྱི། འབའ་ཞིག་པོ་དེ་ལ་ཡུལ་སོ་སོ་ལས་ཁྱད་པར་ཡོད་པ་མ་ཡིན་ལ། མ་དམིགས་པའི་ཁྱད་པར་ཡང་ཁྱད་པར་དུ་རྣམ་པར་འཇོག་པའི་རྒྱུ་མ་ཡིན་ནོ་ཞེས་བཤད་ཟིན་ཏོ། །དེས་ན་མངོན་སུམ་ཡང་དག་པར་རིག་པ་ལ་ནི་ཁྱད་པར་ཡོད་པ་མ་ཡིན་ཏེ། ཁྱད་པར་གྱི་ཐ་སྙད་ནི་ཉམས་སུ་མྱོང་བར་གྱུར་པའི་དོན་ལ་བརྟེན་པ་ཡིན་ནོ་ཞེས་གང་སྨྲས་པ་དེ་བསལ་བ་ཡིན་ཏེ། གང་གི་ཕྱིར་དོན་ཉམས་སུ་མྱོང་བར་གྲུབ་ན་ནི་རྣམ་པར་ཤེས་པའི་ཁྱད་པར་གྱི་ཐ་སྙད་ཉམས་སུ་མྱོང་བར་གྱུར་པ་ལ་བརྟེན་པར་གྱུར་ན་དེ་ཉིད་མ་གྲུབ་པའི་ཕྱིར་རོ། །འདི་དག་ཇི་ལྟར་སྣང་བ་བཞིན་དུ་བརྟགས་པའི་ཐ་དད་པ་ནི་ཁོ་ན་ཉིད་མ་ཡིན་ནོ་ཞེས་བརྗོད་པ་ཡིན་ནོ། །དེས་ན་བརྟགས་པའི་ཐ་དད་པའི་རྒྱུ་མཚན་ཅན་ལྷན་ཅིག་པའི་སྒྲ་སྦྱར་བའི་ཕྱིར་འགལ་བ་ཅི་ཡོད། ད་ནི་འབྲེལ་པ་གཞན་བསལ་བ་ན་འབྲེལ་པ་མེད་པར་ལྷན་ཅིག་དམིགས་པ་ངེས་པ་གང་ཡིན་པ་ཞེས་དེ་ལྟར་གཏན་ཚིགས་ཁྱད་པར་དུ་བྱས་ཀྱང་མ་གྲུབ་པ་མ་ཡིན་པའམ། ཡང་ན་གཟུངས་དང་སྣང་བ་དག་འཁྲུལ་པའི་ཡུལ་ཉིད་དུ་མི་གནས་པའི་ཕྱིར་ཁྱད་པར་འདོད་པ་མ་ཡིན་ཏེ། དེ་དག་གནས་ན་ནི་ཁྱད་པར་ལ་ལྟོས་པར་འགྱུར་རོ། །དེས་ན་ཁྱད་པར་མེད་པ་གཏན་ཚིགས་ཡིན་ནོ། །གཟུགས་དང་སྣང་བ་དག་གིས་འཁྲུལ་པར་དོགས་པ་ལ། བཤད་པ། གཟུགས་དང་སྣང་བ་དག་ལ་ནི་དེའི་ཤེས་པ་སྐྱེད་པར་རུང་བ་གང་ཡིན་པ་དེ་ཐོབ་པའི་མཚན་ཉིད་དམ། ངོ་བོ་གང་ཡིན་པའོ། །གང་གི་ཕྱིར་གཟུགས་ཀྱིས་ཤེས་པ་སྐྱེ་བར་རུང་བ་ཉིད་ནི་སྣང་བ་ལས་ཐོབ་པའི་ཕྱིར་སྣང་བ་དང་འབྲེལ་པ་ཡིན་ནོ། །དབང་པོ་རུང་བ་བསྐྱེད་པའི་མཚན་ཉིད་ཀྱི་འབྲེལ་པ་ཡོད་པ་ཡིན་ཏེ། ཡུལ་ལ་ཤེས་པ་སྐྱེད་པར་རུང་བ་ཉིད་སྣང་བ་ལས་ཐོབ་པ་དེའི་ཕྱིར་དབང་པོ་ཉིད་རང་གི་ཡུལ་གྱི་ཤེས་པ་སྐྱེད་པར་བྱེད་པ་སྣང་བ་དང་འབྲེལ་པ་ཡིན་ནོ། །དེའི་ཕྱིར་གཟུགས་ནི་སྣང་བ་དང་ལྷན་ཅིག་ཏུ་དམིགས་པ་ངེས་པ་ཡིན་ནོ། །གཏན་ཚིགས་བཤད་པ་འབྲས་བུ་གཟུགས་སམ། སྨིག་རྒྱུ་སྣང་བ་འཁྲུལ་པ་མེད་པའི་ཕྱིར་རོ། །འབྲས་བུ་རྒྱུའི་རྗེས་སུ་འགྲོ་བ་ཡོད་ཀྱང་མེ་དང་དུ་བ་དག་ལ་
ལྷན་ཅིག་དམིགས་པ་ངེས་པ་འཁྲུལ་པར་མཐོང་བ་མ་ཡིན་ནམ་ཞེ་ན། གཟུགས་དང་ལྷན་ཅིག་གཟུང་བའི་སྣང་བ་ནི་གདོན་མི་ཟ་བར་གཟུང་བར་བྱ་བ་ཡིན་གྱི། མེ་དང་དུ་བ་དག་ནི་གདོན་མི་ཟ་བར་གཟུང་བར་བྱ་བ་མ་ཡིན་ནོ། །ཅིའི་ཕྱིར་ཞེ་ན། སྣང་བ་བར་ཆད་མེད་པས་ཞེས་གསུངས་ཏེ། གཟུགས་ཀྱི་ཤེས་པ་སྐྱེད་པར་རུང་བ་ནི་བར་དུ་ཆོད་ཅིང་བར་མཚམས་མེད་པའི་སྣང་བ་མེད་པར་མི་འགྱུར་བ་ཡིན་ཏེ། འདི་ལྟར་བུམ་པ་ནི་སྣང་བ་མང་པོའི་བར་དུ་ཞུགས་པར་སྐྱེ་བ་ཉིད་ཡིན་ན། སྣང་བས་ཤེས་པ་སྐྱེད་པར་རུང་བ་སྐྱེད་པ་ཡིན་ཏེ། སྣང་བས་ཁྱབ་པའི་གཟུགས་ཉིད་མཐོང་བའི་ཕྱིར་རོ། །གལ་ཏེ་མིག་གིས་གཟུང་བར་བྱ་བའི་རང་བཞིན་མ་ཡིན་ན་ནི་སྣང་བ་བར་ཆད་མེད་པ་ཉིད་ཡིན་ཡང་ལྷན་ཅིག་སྤྱོད་པའི་རེག་པ་ལ་སོགས་པ་ལྟར་གཟུང་བར་མི་འགྱུར་ན། གཟུང་བའི་མཚན་ཉིད་ཀྱི་རང་བཞིན་ཡིན་པ་དེས་ན་གཟུགས་དང་ལྷན་ཅིག་གདོན་མི་ཟ་བར་གཟུང་བར་བྱ་བ་ཡིན་ནོ། །དམིགས་པའི་སྤྱོད་ཡུལ་དུ་གྱུར་པ་དག་ལས་གཅིག་འཛིན་པར་ངེས་པར་བྱེད་པའི་རྒྱུ་ནི་འགའ་ཡང་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་དུས་མཚུངས་པའི་གཟུགས་དང་སྣང་བ་དག་ཁོ་ན་གསལ་བར་བྱ་བ་དང་གསལ་བར་བྱེད་པའི་དངོས་པོ་ཡིན་ནོ། །དེ་ཡང་སྣང་བ་གཟུགས་ཀྱི་རྒྱུ་ལས་གཞན་དུ་འཐད་པ་མ་ཡིན་པ་དེའི་ཕྱིར་རྒྱུའི་དངོས་པོ་རྒྱུ་མཚན་དུ་འདོད་པ་ཡིན་གྱི། རྒྱུ་དངོས་པོ་ཉིད་ནི་གསལ་བར་བྱེད་པའི་ངོ་བོ་མ་ཡིན་ནོ། །དེ་བཞིན་དུ་གཟུགས་ཀྱི་ཡུལ་ན་གནས་པ་ཉིད་ཀྱི་སྣང་བ་ནི་མིག་དང་རང་གི་རྒྱུན་སྐྱེད་པར་བྱེད་པ། དེ་ལས་ཀྱང་གཟུགས་སྣང་བ་དང་བར་ཆད་མེད་པ་དེའི་ཕྱིར་སྣང་བ་དང་ཡུལ་ལྷན་ཅིག་ཏུ་མཐོང་བ་ཉིད་དོ། །སྣང་བའི་རང་བཞིན་དུ་གྱུར་པ་ཉིད་ཀྱི་མེ་ནི་དུ་བའི་སྐྱེད་པར་བྱེད་པ་མ་ཡིན་པ་དེས་དེ་དག་ལ་ལྷན་ཅིག་དམིགས་པ་ངེས་པ་མེད་པ་ཡིན་ནོ། །དེ་ལྟར་ན་ཡང་གཟུགས་དང་སྣང་བ་དག་ནི་ཤེས་པ་གཅིག་གི་ཡུལ་གྱི་དངོས་པོ་ལ་ཕན་ཚུན་འབྲེལ་པ་ཡིན་གྱི། ཤེས་པ་དང་ཤེས་བྱ་དག་ནི་དེ་ལྟ་མ་ཡིན་ནོ། །ཡང་ན་གཟུགས་དང་སྣང་བ་དག་ལ་ནི་ལྷན་ཅིག་དམིགས་པ་ངེས་པ་ཡོད་པ་མ་ཡིན་ཏེ། གཟུགས་དང་བྲལ་བའི་སྣང་བ་འབའ་ཞིག་ཀྱང་མཐོང་བའི་ཕྱིར་དང༌། སྣང་བ་མེད་པའི་གཟུགས་ཀྱང་བྱི་བ་ལ་སོགས་པའི་སྲོག་ཆགས་ཀྱི་བྱེ་བྲག་འགའ་
ཞིག་གིས་མཐོང་པའི་ཕྱིར་རོ། །སྔོན་བོའི་དམ་བ་དང་རིག་པ་དག་ནི་ལྷན་ཅིག་དམིགས་པ་ངེས་པ་ཉིད་དོ། །རང་བཞིན་ཐ་དད་པ་སྟེ་བྲལ་བ་ལ་ནི་དེ་རིགས་པ་མ་ཡིན་ཏེ། སྔོན་པོ་དང་སེར་པོ་དག་བཞིན་ནོ། །གང་གི་ཕྱིར་དེ་དག་ནི་ཕན་ཚུན་ཐ་དད་པ་དང་འབྲེལ་པ་ཡང་འགའ་ཡང་མེད་དེ། དེས་ན་ལྷན་ཅིག་དམིགས་པ་ངེས་པ་མ་ཡིན་ནོ། །ཤེས་པ་དང་ཤེས་བྱ་དམིགས་པ་གཅིག་ཉིད་དོ་ཞེས་ཇི་ལྟར་བརྗོད་དེ། གང་གི་ཕྱིར་ཡུལ་ནི་སྔར་དམིགས་ཏེ་ཤེས་པའི་རྒྱུ་ཡིན་པས་དེ་ནི་སྔར་ཉེ་བའི་ཕྱིར་རོ། །དེའི་འབྲས་བུ་ཤེས་པ་ནི་ཕྱིས་ཉེ་བ་ཡིན་ལ། ཉེ་བ་དེའི་འབྲས་བུར་གྱུར་པའི་འཛིན་པའི་གཞན་སྐྱེ་པ་དེས་ན། ཡུལ་གྱི་ཤེས་པ་ནི་རང་གི་འབྲས་བུའི་དུས་ན་དམིགས་ལ། ཡུལ་ནི་རང་གི་འབྲས་བུ་ཤེས་པའི་དུས་ན་ཡིན་ནོ། །དུས་ཐ་དད་ན་ཡང་མྱོང་བ་ཐ་དད་པར་ངེས་པར་འགྱུར་ཏེ། དུས་ཐ་དད་པ་ཡང་དངོས་པོ་ཐ་དད་པའི་རྒྱུ་མཚན་ཡིན་པའི་ཕྱིར་རོ། །སློབ་དཔོན་གྱིས་ཤེས་པ་དང་ཤེས་བྱ་དག་གི་མྱོང་བ་དུས་ཐ་དད་པ་དགག་པའི་ཕྱིར་གཞི་འདིངས་པར་མཛད་པ་ནི། དམིགས་པ་མངོན་སུམ་མ་ཡིན་པ་གང་ཡིན་པ་དེའི་དོན་མཐོང་བ་ལྟ་བའི་མཐོང་བ་ཉིད་རབ་ཏུ་གྲུབ་པར་མི་འགྱུར་རོ། །འདི་སྙམ་དུ་དམིགས་པ་མངོན་སུམ་ཡིན་ནམ་མ་ཡིན་ཡང་བླ་སྟེ། དེས་ཡུལ་ཡོད་པ་མངོན་སུམ་དུ་བྱས་པ་དེས་ན། དོན་མཐོང་རབ་ཏུ་འགྲུབ་མི་འགྱུར།། ཞེས་ཅིའི་ཕྱིར་བརྗོད་ཅེ་ན་ནི་ཞེས་བྱ་བ་ནི་གཏན་ཚིགས་ཏེ། ཡུལ་ཡོད་པས་ནི་ཡུལ་དམིགས་པ་རྣམ་པར་གནས་པ་མ་ཡིན་ནོ། །འོ་ན་ཇི་ལྟར་ཞེ་ན་སྨྲས་པ། ཡུལ་དེའི་དམིགས་པ་དེ་ཡོད་པས་སོ། །བསམ་པ་ནི་འདི་ཡིན་ཏེ་ཤེས་པས་ཡུལ་དུ་བྱས་པའི་དོན་བདག་ཉིད་ཀྱི་རང་བཞིན་ནི་མྱོང་བ་མ་ཡིན་གྱི། འོན་ཀྱང་ཤེས་པ་ཉིད་ཡིན་ན་དེ་ཡང་མ་གྲུབ་པོ། །འདི་སྙམ་དུ་ཤེས་པས་དོན་ཉམས་སུ་མྱོང་བ་དེས་ན་ཤེས་པ་ཉམས་སུ་མྱོང་ཅི་དགོས་སྙམ་ན། གལ་ཏེ་དོན་ཉམས་སུ་མྱོང་བ་ཤེས་པ་ཉམས་སུ་མྱོང་བ་ལས་གཞན་ཡིན་ན་ནི་དེ་ལྟར་འགྱུར་ན་གཞན་ནི་མ་ཡིན་ནོ། །འདི་ལྟར་བདག་ཉིད་གསལ་ཞིང་ཉམས་སུ་མྱོང་བ་ན་ཤེས་པ་དོན་རིག་བར་འགྱུར་གྱི། གསལ་བ་མ་རིག་ན་ནི་གསལ་བའི་ཁྱད་པར་ཅན་གྱི་གསལ་བར་བྱ་བའི་དོན་རིག་པར་མི་འགྱུར་ཏེ། དབྱིག་པ་མ་རྟོགས་པར་དབྱིག་པ་ཅན་དུ་མི་རྟོགས་པ་བཞིན་ནོ། །དེ་ན་དོན་བཞིན་དུ་དོན་རིག་པ་ཉམས་སུ་མྱོང་བ་ནི་ཡོད་དོ། །དོན་གྱི་རང་བཞིན་ཉིད་ནི་གསལ་བ་མ་ཡིན་གྱི་
འོན་ཀྱང་ཤེས་པ་ཁོ་ན་ཡིན་ནོ། །དེའི་ཕྱིར་བདག་ཉིད་དོན་གསལ་བར་བྱེད་པའི་བདག་ཉིད་དུ་མཐོང་ན་ནི། ཤེས་པས་དོན་ཉམས་སུ་མྱོང་བར་འགྱུར་བ་ཡིན་གྱི། གཞན་དུ་ནི་མ་ཡིན་ནོ། །དེས་ན་ཤེས་པ་ཉམས་སུ་མྱོང་བ་ཉིད་དོན་མྱོང་བ་ཡིན་པ་དེའི་ཕྱིར་ཏེ། དེ་ཤེས་པ་ཡོད་པར་མ་གྲུབ་པར་གཟུང་བར་མི་འགྱུར་རོ། །ཤེས་པ་མེད་པར་དོན་གྱི་རང་བཞིན་འབའ་ཞིག་ཉམས་སུ་མྱོང་བར་ངེས་ན་ནི་ཡུལ་ཡོངས་སུ་རྫོགས་པ་ཡང་མ་ཡིན་ཏེ། འདི་ལྟར་རང་གི་ངོ་བོ་བདག་ཉིད་སོ་སོ་ལ་ཁྱད་པར་མེད་པའི་ཕྱིར་བདག་གིས་རིག་གོ་ཞེས་ཁྱད་པར་གྱི་ཐ་སྙད་མེད་པར་ཐལ་བར་འགྱུར་རོ། །གང་ཉམས་སུ་མྱོང་བར་འགྱུར་བ་དེ་ཉིད་ཉམས་སུ་མྱོང་བ་ལས་ཐ་སྙད་དུ་བྱ་བ་ཞེས་བྱ་བ་ཡིན་ན་ནི། དོན་གྱི་རང་བཞིན་འབའ་ཞིག་ཉམས་སུ་མྱོང་ལ། དེ་ཡང་ཁྱད་པར་མེད་པ་ཡིན་པའི་ཕྱིར་ཁྱད་པར་གྱི་ཐ་སྙད་གང་ལས་འགྱུར། དོན་ཉམས་སུ་མྱོང་བར་གྱུར་པའི་ཐ་སྙད་ཐམས་ཅད་ནི་མྱོང་བ་བོའི་ཁྱད་པར་ངེས་པ་ལ་བརྟེན་པ་ཡིན་ཏེ། དེའི་ཕྱིར་གང་ཞིག་རྒྱུར་གྱུར་བས་དོན་རིག་པའི་ཐ་སྙད་འདི་ཁྱད་པར་ལ་བརྟེན་པར་གསལ་བར་འགྱུར་བ་རིག་པ་དེ་ཡང་ཉམས་སུ་མྱོང་བ་ཡིན་ནོ། །བྱ་བའི་ཁྱད་པར་འགའ་ཞིག་རིག་པ་བྱེད་པ་པོ་ལ་མི་བརྟེན་པར་འགྱུར་བ་མྱོང་བའི་ཐ་སྙད་གཞན་ནི་ཡོད་པ་མ་ཡིན་ནོ། །དམིགས་པ་ཡོད་པ་དེ་ཡང་ཚད་མ་དང་མི་ལྡན་པ་མངོན་སུམ་གྱི་རིག་པ་མ་ཡིན་པས་མངོན་སུམ་གྱི་ཡུལ་མ་ཡིན་པའི་ཤེས་པ་ཡོད་པའི་རྒྱུ་མཚན་ཅན་གྱི་ཐ་སྙད་གང་དག་ཡིན་པ་སྟེ། ཡུལ་ཡོད་པའི་ཐ་སྙད་འདི་རིག་གོ་ཞེས་རིག་པའི་ཐ་སྙད་དམ། བདག་གིས་རིག་གོ་ཞེས་བདག་ཉིད་བྱེད་པ་པོར་གྱུར་པའི་རིག་པའི་ཐ་སྙད་དོ། །མི་དམིགས་པའི་རང་བཞིན་ཅན་གྱི་ཤེས་པ་ཡོད་པའི་རྒྱུ་མཚན་ཅན་གྱི་ཐ་སྙད་འཇུག་པར་མི་འགྱུར་ཏེ། ལྡོག་པར་འགྱུར་རོ། །ཤེས་པ་ཡོད་པ་ནི་མི་དམིགས་པ་ཡིན་ལ། དེ་ལས་ཀྱང་དེའི་དམིགས་པ་མ་གྲུབ་ན་སྔར་བཤད་པའི་ཐ་སྙད་ཅན་གྱི་ཡུལ་ཡང་ཡོད་པའི་ཐ་སྙད་དུ་རུང་བ་ཉིད་རབ་ཏུ་མི་འགྲུབ་པའི་ཕྱིར་ཤེས་པ་དང་ཤེས་བྱ་ཐམས་ཅད་ཀྱི་རང་བཞིན་ནུབ་པ་སྟེ། ཡོད་པའི་ཐ་སྙད་ལས་འདས་པར་འགྱུར་རོ་ཞེས་བྱ་བ་ནི་ཧ་ཅང་ཐལ་བའོ། །འདི་སྙམ་དུ་གལ་ཏེ་ཤེས་པ་མི་དམིགས་པ་དེ་ལྟ་ན་ཡང་དོན་གྱི་ཡུལ་ཅན་གྱིས་དམིགས་པའི་ཐ་སྙད་དུ་བྱེད་པ་ཡིན་ཏེ། དཔེར་ན་མིག་མ་དམིགས་ཀྱང་གཟུགས་འཛིན་པ་བཞིན་ནོ་ཞེ་ན། ཡོད་ཀྱང་ཞེས་སྨོས་ཏེ། མདོག་ཏུ་ཟིན་ཀྱང་མ་གྲུབ་སྟེ། མ་དམིགས་པ་ལ་དམིགས་བར་ཡོད་པ་
དེའི་ཐ་སྙད་དེ་ལ་མི་རིགས་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གཟུགས་ལ་ནི་ཉམས་སུ་མྱོང་བས་མིག་གི་ཁྱད་པར་ཅན་གྱི་ཐ་སྙད་བྱ་བ་མ་ཡིན་གྱི། འོན་ཀྱང་མིག་གིས་དབེན་པར་ཡུལ་ཉམས་སུ་མྱོང་བ་ལས་རིག་པའི་ཁྱད་པར་ཅན་ཉིད་ཀྱི་ཐ་སྙད་བྱ་བ་ཡིན་ནོ། །རིག་པ་མ་དམིགས་ན་དེའི་ཁྱད་པར་ཅན་གྱི་དོན་ཡང་ཡིན་པས་ཇི་ལྟར་རིག་པའི་ཐ་སྙད་བྱེད། ཚིག་ལེའུར་བྱས་པའི་དོན་མཇུག་སྡུད་པ་ནི་དེའི་ཕྱིར་རིག་པ་འགའ་ཡང་མ་དམིགས་ན་དེ་མ་དམིགས་པའི་རྟོགས་པ་པོ་འགའ་ཡང་རིག་པར་བྱེད་པ་མ་ཡིན་ཏེ། ཤེས་པའི་ཁྱད་པར་དང་བྲལ་བའི་རིག་པ་མི་འཐད་པའི་ཕྱིར་རོ། །རང་རིག་པ་མ་ཡིན་ཡང་དམིགས་པ་གཞན་གྱིས་དམིགས་པའི་ཤེས་པ་ཡུལ་བཞིན་དུ་མངོན་སུམ་ཉིད་མ་ཡིན་ནམ་ཞེས་དོགས་པ་ལ་རྟོགས་པ་འདི་ལ་ཕ་རོལ་པོའི་དོན་ཇི་ལྟ་བུར་འགྱུར་བ་དེ་བསྟན་པའི་དོན་དུ་བཤད་པ། ཡུལ་དེ་རང་གི་ཡུལ་ཅན་གྱི་ཤེས་པའི་དུས་སུ་ནི་གྲུབ་པའི་རྒྱུ་མཚན་དུ་གྱུར་པ་མ་གྲུབ་པ་སྟེ། མ་གྲུབ་པའི་ཕྱིར་མ་གྲུབ་པའོ། །གང་གི་ཕྱིར་དོན་གྲུབ་པ་ནི་གྲུབ་པའི་ཁྱད་པར་ཅན་དུ་བརྗོད་པ་ཡིན་ན་དེ་མ་གྲུབ་པའི་ཕྱིར་སྔར་བཤད་པའི་ཚུལ་གྱིས་དེའི་ཁྱད་པར་ཅན་དེ་ཡང་མི་འགྲུབ་བོ། །གཞན་ཏེ་རང་ལ་དམིགས་པའི་ཤེས་པའི་དུས་སུ་ནི་གྲུབ་པ་ཡིན་ཏེ། དེའི་ཚེ་རང་གི་ཤེས་པ་གྲུབ་པའི་ཕྱིར་ཞེས་བྱ་བ་གཞན་གྱི་དོན་འདི་ཡིན་ཏེ། དོན་འདི་ལ་ཇི་ལྟ་བུར་གནས་པ་དེ་སྟོན་པ་ན་ཕ་རོལ་པོ་ལ་བཞད་གང་དུ་བྱེད་པ་ནི་དམིགས་པར་གྱུར་ཀྱང་དམིགས་པ་ཡོད་པའི་དུས་དེའི་ཚེ་ནི་མ་གྲུབ་ལ། གཞན་གྱི་ཚེ་དམིགས་པ་མེད་པའི་དུས་སུ་ནི་གྲུབ་པོ་ཞེས་འབྲེལ་ཏོ། །ཕྱིན་ཅི་ལོག་ཏུ་ཤེས་པ་མེད་པའི་དུས་སུ་གྲུབ་པོ་ཞེས་ལེགས་པར་ཐ་སྙད་བྱས་སོ། །མ་འབྲེལ་པའི་དོན་བརྗོད་ཅེས་དཔྱད་པའོ། །ཤེས་པ་ཡོད་པའི་དུས་ཤེས་པ་ཡོད་པ་ན་ནི་དོན་མ་ཤེས་ལ། ཤེས་པ་མེད་པའི་དུས་དེ་ལོག་པ་ན་ནི་ཤེས་སོ་ཞེས་བཞད་གད་ཀྱི་ཚིག་གོ །གཞན་ཡང་ཡུལ་དམིགས་པའི་རིག་པ་ཡང་དམིགས་པ་ཐ་དད་པ་གཞན་གྱི་དམིགས་པར་རྟོག་ན་ནི། ཡུལ་གྱི་ཤེས་པ་མ་གྲུབ་པར་ཡུལ་གྲུབ་པར་ཐ་སྙད་བྱར་མི་འདོད་པ་འབའ་ཞིག་ཏུ་མ་ཟད་ཀྱི། ཡུལ་དམིགས་པའི་དམིགས་པ་དེ་ཡང་རང་ཉིད་མ་གྲུབ་པ་རིག་པ་གྲུབ་པའི་ཐ་སྙད་དུ་བྱེད་པ་མ་ཡིན་ནོ། །དེའི་ཕྱིར་ཤེས་པའི་ཤེས་པ་ཡང་གཞན་གྱིས་ཁོང་དུ་ཆུད་པར་བྱའོ། །དེའི་ཕྱིར་ཞེས་བྱ་བ་ནི་གཏན་ཚིགས་སོ། །རེ་ཞིག་ཞེས་བྱ་བ་ནི་དང་པོར་ཏེ། འདི་ནི་རིམ་པ་བརྗོད་པའི་ཕྱིར་རོ། །
དམིགས་པ་མཐར་ཐུག་པ་སྟེ་ཡོངས་སུ་གཏུགས་པ་ལ་སྡོད་པའི་སྐྱེས་བུ་འདིས་དོན་ཅུང་ཟད་ཀྱང་དམིགས་པར་མི་འགྱུར་རོ། །འདི་སྐད་དུ་ཇི་སྲིད་དམིགས་པ་མཐར་མ་ཕྱིན་པ་དེ་སྲིད་དུ་དམིགས་པ་ཕྱི་མ་ཕྱི་མ་ལ་སྡོད་པས་ན་རང་གི་དམིགས་པ་མ་གྲུབ་པའི་རྒྱུའི་ཕྱིར། ཡུལ་སྔ་མ་སྔ་མ་མི་འགྲུབ་པོ་ཞེས་བརྗོད་བ་ཡིན་ནོ། །འདི་སྙམ་དུ་ཤེས་པ་ཕྱི་མ་མ་སྐྱེས་ན་ནི་ཤེས་པ་སྔ་མ་མི་འགྲུབ་ན། སྔ་མས་བསྐྱེད་པ་དེས་ན་སྔ་མ་དང་ཕྱི་མའི་ཡུལ་གྲུབ་པ་ཉིད་པས་ཅིའི་ཕྱིར་དོན་འགལ་ཡང་རྟོགས་པར་མི་འགྱུར་ཞེས་བརྗོད་ཅེས་དོགས་པ་ལ། བཤད་པ། ཤེས་པ་གཅིག་མ་གྲུབ་ན་ཡང་ཐམས་ཅད་མི་འགྲུབ་པའི་ཕྱིར་རོ། །གལ་ཏེ་ཤེས་པ་སྔ་མ་ཡོད་པས་དོན་འགའ་ཞིག་དམིགས་པར་གྱུར་ན་ནི་ཤེས་པའི་ཤེས་པ་ཅུང་ཟད་ཀྱང་མི་རྟོག་པ་ཞིག་ན། གང་གི་ཕྱིར་ཤེས་པ་མ་གྲུབ་པར་དོན་མི་འགྲུབ་པ་དེའི་ཕྱིར་ཤེས་པའི་ཤེས་པ་ཚོལ་བ་ཡིན་ནོ། །དེས་ན་གཅིག་མ་གྲུབ་ན་ཐམས་ཅད་མི་འགྲུབ་པས་འགའ་ཡང་རྟོགས་པར་མི་འགྱུར་རོ་ཞེས་བརྗོད་དོ། །འདི་སྙམ་དུ་གང་གི་ཚེ་དམིགས་པས་མཐར་ཐུག་པ་དེའི་ཚེ་ཐམས་ཅད་དམིགས་སོ་ཞེ་ན། དེ་སྐྱེ་བ་ལ་ཡང་མཐར་ཐུག་པ་ཞེས་བྱ་བ་སྨོས་ཏེ། ཐམས་ཅད་རང་ལ་དམིགས་པའི་ཤེས་པ་སྐྱེད་པར་རུང་བའི་ཕྱིར་རོ། །གལ་ཏེ་ཤེས་པ་གཅིག་རང་གི་ཡུལ་ཅན་གྱི་ཤེས་པ་གཞན་སྐྱེད་མི་ནུས་ན་ནི་ཐམས་ཅད་མི་འགྱུར་ཏེ། རང་རིག་པ་མེད་པས་ཐམས་ཅད་ལ་ཁྱད་པར་མེད་པའི་ཕྱིར་རོ། །གལ་ཏེ་འགའ་ཞིག་རང་རིག་པ་ཡིན་ན་ནི། །མཐར་ཐུག་པར་ཡང་འགྱུར་གྱི། །གཞན་དུ་ནི་མ་ཡིན་ནོ། །མཐར་པ་མེད་ན་ཡང་འགྲོ་བ་ལོང་བ་དང་ལྐུགས་པར་འགྱུར་རོ་ཞེས་ཉམས་སུ་མྱོང་བ་དང་འགལ་བར་ཐལ་ལོ། །འགའ་ཞིག་ཏུ་དམིགས་པ་མཐར་ཐུག་པར་ཁས་ལེན་ན་ནི་མཐར་ཐུག་པའི་དམིགས་པ་དེ་རང་གི་བདག་ཉིད་ཅེས་བྱ་བ་གཞན་མེད་པར་བདག་དང་ཡུལ་གྱི་རྣམ་པ་དམིགས་པར་འགྱུར་ཞིང༌། གཞན་ཏེ་དམིགས་པ་སྔ་མ་ཡང་རང་དང་གཞན་གྱི་རིག་པའི་རང་བཞིན་ཅན་དུ་འགྱུར་རོ། །གང་གི་ཕྱིར་བྱེ་བྲག་གི་རྒྱུ་མེད་པར་ནི་གཅིག་དེ་ཉིད་དང་གཞན་རང་རིག་པའི་རང་བཞིན་དང་བྲལ་བ་ཉིད་དུ་རིགས་པ་མ་ཡིན་ནོ། །དེའི་ཕྱིར་གཏན་ཚིགས་གྲུབ་པོ། །གང་གི་ཕྱིར་ཐ་དད་པ་ནི་རིམ་པའི་རྒྱུ་མཚན་དུ་བཞག་གོ །གཅིག་ཉིད་ཀྱིས་གཉིས་དམིགས་པ་ན་ནི་གཅིག་གི་བྱ་བ་ལ་རིམ་པ་མི་འཐད་དེ། གཅིག་པོ་དེ་སྐད་ཅིག་མ་ཡིན་ན་གཉིས་པའི་བྱེད་པའི་དུས་སུ་མི་གནས་པའི་ཕྱིར་རོ། །སྐད་ཅིག་མ་མ་ཡིན་པ་
ཉིད་ན་ཡང་དེ་ལ་ཁྱད་པར་མེད་པའི་ཕྱིར་ཏེ། བོགས་དབྱུང་དུ་མེད་པའི་ཕྱིར་རང་གི་རང་བཞིན་དང་འབྲེལ་པའི་བྱ་བ་ཐམས་ཅད་ཅིག་ཅར་འགྱུར་རོ། །དེའི་ཕྱིར་གཏན་ཚིགས་འགྲུབ་པོ། །གང་ཞིག་གང་དང་ལྷན་ཅིག་དམིགས་པ་ངེས་པ་དེ་ནི་དེ་ལས་ཐ་དད་པ་མ་ཡིན་ཏེ། དཔེར་ན་ཟླ་བ་གཅིག་ལས་གཉིས་པ་བཞིན་ནོ། །སྔོན་པོ་ལ་སོགས་པའི་གཟུང་བའི་རྣམ་པ་ཡང་ཤེས་པ་དང་ལྷན་ཅིག་དམིགས་པ་ངེས་པ་ཡིན་ནོ། །ཐ་དད་པ་ནི་ལྷན་ཅིག་དམིགས་པ་མ་ངེས་པས་ཁྱབ་པ་ཡིན་ཏེ། འབྲེལ་པ་མེད་པའི་ཕྱིར་རོ། །དེ་དང་འགལ་བ་ནི་ལྷན་ཅིག་དམིགས་པ་ངེས་པ་ཡིན་ཏེ། དེས་ན་ཁྱབ་པར་བྱེད་པ་འགལ་བ་དམིགས་པས་ཐ་དད་པ་བཀག་པ་ཡིན་ནོ། །ཡང་གི་སྒྲ་ནི་གཏན་ཚིགས་གཞན་གསལ་བ་སྟོན་པ་ནི་རིག་པ་ཞེས་བྱ་བ་ཡང་ཞེས་བྱ་བའོ། །ཞེས་བྱ་བའི་སྒྲ་ནི་རིག་པའི་སྒྲ་འཛིན་པའོ། །རིག་པ་ཞེས་བྱ་བའི་སྒྲ་འདིའི་དོན་ནི་དེ་ལྟར་གསལ་བའོ། །རིག་པ་ནི་དེ་ལྟར་ཏེ་རིག་པའི་རང་བཞིན་དུ་གསལ་བར་རབ་ཏུ་སྣང་བ་ཡིན་གྱི་གཞན་མ་ཡིན་ནོ། །ཡང་ཇི་ལྟར་ན་རིག་པ་རིག་པའི་རང་བཞིན་དུ་གསལ་བ་ཡིན་ཞེ་ན། དེ་ཞེས་སྨོས་ཏེ། རིག་པ་དེ་ནི་དེའི་བདག་ཉིད་ཡིན་པའི་ཕྱིར་ཏེ། གསལ་བའི་བདག་ཉིད་ཡིན་པའི་ཕྱིར་རོ། །འདི་སྐད་དུ་གང་གི་ཕྱིར་རིག་བ་ནི་གསལ་བའི་བདག་ཉིད་ཅན་ཡིན་གྱི། གཞན་མ་ཡིན་པ་དེའི་ཕྱིར་རིག་པ་ནི་རིག་པའི་བདག་ཉིད་དུ་གསལ་བ་ཡིན་ནོ། །རིག་པ་གསལ་བའི་བདག་ཉིད་ཡིན་དུ་ཆུག་མོད། རིག་པ་མྱོང་བའི་བདག་ཉིད་ཁོ་ནར་གསལ་གྱི་གཞན་དུ་ནི་མ་ཡིན་ནོ་ཞེས་བྱ་བ་དེ་དག་ཉིད་ག་ལས་ཤེ་ན། དེ་གཞན་འགའ་ཞིག་ནི་མ་ཡིན་ཏེ་ཞེས་སྨོས་སོ། །གང་གི་ཕྱིར་གསལ་བའི་བདག་ཉིད་ཅན་ཞེས་བྱ་བའི་རིག་པ་དེ་གཞན་འགའ་ཞིག་གི་ངོ་བོ་ནི་མ་ཡིན་གྱི། འོན་ཀྱང་ཤེས་པ་ཉིད་ཡིན་པ་དེས་ན་རིག་པ་ནི་མྱོང་བའི་བདག་ཉིད་ཁོ་ནར་གསལ་བ་ཡིན་ནོ། །གལ་ཏེ་གསལ་བ་ཞེས་བྱ་བ་གསལ་བར་བྱེད་པ་ལས་གཞན་དུ་གྱུར་པའི་དངོས་པོའི་རང་བཞིན་ཡིན་ན་ནི་གསལ་བ་གསལ་བར་བྱེད་པའི་རང་བཞིན་ཉིད་དུ་གསལ་བར་མི་འགྱུར་ཏེ། དཔེར་ན་སྒྲོན་མ་དང་ལྷན་ཅིག་ཤེས་པ་གཅིག་གི་ཡུལ་དུ་གྱུར་པ་ཞེས་བྱ་བའི་གསལ་བའི་གསལ་བར་བྱེད་པ་སྒྲོན་མ་ལས་གཞན་གྱི་ངོ་བོ་ཡིན་པ་དེས་ན། བུམ་པའི་གསལ་བ་སྒྲོན་མའི་བདག་ཉིད་དུ་གསལ་བ་ཡིན་གྱི། འོན་ཀྱང་སྒྲོན་མ་ལས་གཞན་གྱི་རང་བཞིན་ཡིན་པ་བཞིན་ནོ། །ཤེས་པས་དོན་གསལ་
བར་བྱས་པ་གང་ཡིན་པ་དེ་ནི་ཤེས་པ་ལས་གཞན་གྱི་རང་བཞིན་མ་ཡིན་གྱི། འོན་ཀྱང་ཤེས་པ་ཁོ་ནའོ། །བདག་རིག་པ་བཞིན་ནོ་ཞེས་བྱ་བ་ནི་དཔེར་ན་བདག་ཉིད་གསལ་བ་ནི་གསལ་བར་བྱེད་པ་ལས་རང་བཞིན་གཞན་མ་ཡིན་པ་དེས་ན། བདག་ཉིད་གསལ་བར་བྱེད་པའི་རང་བཞིན་ཁོ་ནར་གསལ་བ་དེ་བཞིན་དུ་རིག་པར་བྱ་བའི་གསལ་བ་གང་ཡིན་པ་དེ་ཡང་རིག་པར་བྱེད་པ་ལས། རང་བཞིན་གཞན་མ་ཡིན་ཏེ། དེས་ན་རིག་པར་བྱ་བའི་རིག་པ་ནི་རིག་པར་བྱེད་པའི་རང་བཞིན་ཁོ་ནར་གསལ་ལོ་ཞེས་བྱ་བར་གནས་སོ། །གང་གི་ཕྱིར་རིག་པ་ནི་རིག་པའི་རང་བཞིན་ཁོ་ནར་གསལ་བ་དེའི་ཕྱིར་ཡང་ངོ༌། །ལྷན་ཅིག་དམིགས་པ་ངེས་པ་འབའ་ཞིག་ལས་མ་ཡིན་གྱི། གཏན་ཚིགས་དེའི་ཕྱིར་ཡང་མྱོང་བའི་བདག་ཉིད་དུ་གསལ་བཀའི་ཞེས་བྱ་བའི་རིག་པ་ནི་དོན་གཞན་དུ་མི་འཐད་དོ། །རིག་པར་བྱ་བ་རིག་པའི་རང་བཞིན་དུ་གསལ་བ་གང་ཡིན་པ་དེ་ནི་གསལ་བ་རིག་པའི་རང་བཞིན་ལས་རང་བཞིན་གཞན་མ་ཡིན་པ་ཁོ་ན་ཡིན་ལ། གསལ་བ་ནི་ཤེས་པའི་རང་བཞིན་དུ་བརྗོད་པ་ཡིན་ནོ། །གཞན་གྱིས་ནི་དེ་གཞན་འགའ་ཞིག་ནི་མ་ཡིན་ཏེ་ཞེས་བྱ་བ་དང༌། དེའི་དོན་གཞན་དུ་རིག་པ་མ་ཡིན་ནོ་ཞེས་བྱ་བའི་ངག་འདི་གཉིས་ཀྱི་དོན་ཐ་དད་པར་བསྟན་པར་མི་ནུས་སོ། །བདག་ཉིད་རིག་པ་བཞིན་ནོ་ཞེས་བྱ་བ་འདིའི་བར་གྱི་གཞུང་སྔར་གྱི་ཚིག་ལེའུར་བྱས་པ་ཉིད་ཀྱི་ལྷག་མར་བྱས་ནས་འདིའི་དོན་འདི་ལྟར་འཆད་དོ། །གལ་ཏེ་ལྷན་ཅིག་དམིགས་པའི་ངེས་པའི་ཕྱིར་ཐ་དད་པ་མེད་ན་ཇི་ལྟར་སྔོན་པོའི་རིག་པ་ཞེས་ཐ་དད་པའི་ཐ་སྙད་དུ་འགྱུར་ཞེས་དོགས་པ་བསུ་ནས་རིག་པ་ཞེས་བྱ་བ་ཡང་ཞེས་བྱ་བའི་གཞུང་འགོད་དེ། མྱོང་བའི་བདག་ཉིད་དུ་གསལ་བ་ནི་སྔོན་པོའི་རིག་པ་ཡིན་གྱི། ཐ་དད་པ་མཐོང་བ་ནི་མ་ཡིན་ནོ་ཞེས་སོ། །དོན་འདི་ནི་སྔོན་པོ་ལ་སོགས་པ་ཉམས་སུ་མྱོང་བ་ཞེས་བྱ་བ་ཡང་དེའི་རང་བཞིན་ཉམས་སུ་མྱོང་བའོ་ཞེས་བྱ་བ་འདིའི་ནང་དུ་བརྗོད་ཟིན་པས་ཟློས་བུ་འདིས་ཅི་ཞིག་བྱ། གཞན་ཡང་དེའི་ཕྱིར་ཡང་ཞེས་བྱ་བ་འདིས་བཤད་མ་ཐག་པའི་དོན་གཟུང་བ་ཡིན་ན། བཤད་མ་ཐག་པའི་དོན་དེ་ཡང་ཕྱིའི་དོན་བཟློག་ནས་གནས་པ་ཡིན་པས་དེ་ཇི་ལྟར་དེའི་ཕྱིར་ཡང་དེའི་དོན་གཞན་དུ་རིག་པ་མ་ཡིན་ཞེས་དེ་ཉིད་ཀྱི་ཕྱིར་དོན་སེལ་བར་འགྱུར། ངག་འདི་གཉིས་ནི་དོན་ཐ་དད་པར་བསྟན་པ་ཉིད་དེ། དག་སྔ་མའི་དོན་གང་ཡིན་པ་དེ་ནི་ཕྱིའི་དོན་སྨྲས་པས་ཀྱང་འདོད་པ་ཉིད་དོ། །རིག་པར་བྱ་བ་གསལ་བ་ནི་ཕ་རོལ་གྱི་རྣམ་པར་ཤེས་པ་ལས་གཞན་དུ་མི་འདོད་ལ། ཕ་རོལ་གྱི་འདོད་པའི་
དོན་དེ་ཉིད་ལ་བརྟེན་ནས་དེའི་ཕྱིར་ཡང་ཞེས་གཏན་ཚིགས་འདི་འགོད་དེ། གང་གི་ཕྱིར་གསལ་བ་ཞེས་བྱ་བ་ནི་གསལ་བྱེད་ཤེས་པ་ལས་རང་བཞིན་གཞན་དུ་ཁྱེད་མི་འདོད་པ་དེའི་ཕྱིར་དོན་གསལ་བྱ་ནི་རིག་པ་ལས་གཞན་མ་ཡིན་ནོ་ཞེས་སོ། །གལ་ཏེ་མྱོང་བའི་བདག་ཉིད་མ་ཡིན་པ་གང་ཡིན་པ་དེ་ལས་མྱོང་བའི་བདག་ཉིད་དུ་གསལ་བའི་རིག་པ་མེད་པ་དེའི་ཕྱིར་ཤེས་པ་ལས་ཐ་དད་པའི་དོན་མི་རིག་ན། དེ་ལྟ་ན་འོ་ན་མྱོང་བའི་རང་བཞིན་མ་ཡིན་པའི་བརྫུན་པ་ཡང་རིག་པར་ཇི་ལྟར་འགྱུར་ཞེ་ན། དོན་གཞན་མ་ཡིན་ན་ཞེས་སྨོས་ཏེ། དོན་གཞན་ཡིན་ན་སྐྱོན་འདིར་འགྱུར་གྱི། དོན་གཞན་མ་ཡིན་པ་ལ་ནི་མ་ཡིན་ནོ། །གང་གི་ཕྱིར་སྔོན་པོ་དང་དཀར་པོ་ལ་སོགས་པ་མྱོང་བ་ལས་གཞན་མ་ཡིན་པ་ཉིད་ན་སྔོན་པོ་ལ་སོགས་པ་ནི་ཉམས་སུ་མྱོང་བ་དེའི་བདག་ཉིད་དུ་གྱུར་པ་སྟེ། བདག་ཉིད་དུ་གྱུར་པ་ལྟ་བུ་དེ་ལྟར་ཏེ། མྱོང་བའི་བདག་ཉིད་དུ་རང་གསལ་ཏེ། རབ་ཏུ་སྣང་བའི་ཕྱིར་ཐ་དད་པ་མ་ཡིན་པའི་སྔོན་པོ་ལ་སོགས་པ་ཉམས་སུ་མྱོང་བར་འགྱུར་རོ། །ཉམས་སུ་མྱོང་བ་དེ་ཡང་དེའི་བདག་ཉིད་དེ་སྔོན་པོ་ལ་སོགས་པ་གསལ་བའི་རང་བཞིན་ཡིན་པའི་ཕྱིར་དེ་ལྟར་ཏེ་སྔོན་པོ་ལ་སོགས་པའི་རང་བཞིན་དུ་སྣང་བ་གསལ་བ་ན་ཡང་ངོ༌། །བྱ་བ་གཞན་འཛིན་པ་ནི་མ་ཡིན་གྱི། འོན་ཀྱང་དེ་ལྟར་གསལ་བ་ན་རང་དང་གཞན་གསལ་བར་བརྗོད་པ་འབའ་ཞིག་ཏུ་ཟད་དོ། །དཔེར་ན་སྒྲོན་མ་ལ་སོགས་པའི་གསལ་བ་རང་བཞིན་གཞན་དང་འབྲེལ་པའི་བདག་ཉིད་ཁོ་ན་གསལ་བ་ན་རང་དང་གཞན་གསལ་བར་བརྗོད་ཀྱི། རང་སལ་བ་ན་རང་དང་གཞན་གསལ་བར་བརྗོད་ཀྱི། རང་གསལ་བར་བྱེད་པ་ལས་གཞན་ནི་གསལ་བའི་བྱ་བ་ཡོད་པ་མ་ཡིན་ལ། གང་གི་ཕྱིར་གསལ་བའི་རང་བཞིན་དེ་དམིགས་པ་ན་གཞན་ཡང་དམིགས་པ་དེའི་ཕྱིར་ཡུལ་གཉིག་གསལ་བའི་བྱ་བ་དང་ལྡན་པར་བརྟགས་པ་ཡིན་ནོ། །གང་གི་ཕྱིར་དུས་མཚུངས་པའི་སྒྲོན་མ་དང་གཟུགས་དག་ནི་གསལ་བྱ་གསལ་བྱེད་ཀྱི་དངོས་པོ་ཡིན་ཞིང༌། དེ་ཡང་རྒྱུ་དང་འབྲས་བུ་སྔོན་དུ་སོང་བ་ཅན་ཡིན་ནོ་ཞེས་བརྗོད་དོ། །རྣམ་འགྲེལ་ལས་ཀྱང༌། རང་ཉིད་ཤེས་པས་གཞན་བློ་ཡི། །རྒྱུ་ནི་གསལ་བྱེད་ཅེས་བཤད་དོ། །དེ་བཞིན་དུ་རྣམ་པར་ཤེས་པའི་བདག་ཉིད་མྱོང་ཡང་མ་རིག་པས་བསླད་པ་ལ་རྣམ་པར་ཕྱེ་བ་ལྟ་བུར་གཟུང་བའི་རྣམ་པ་ཡོད་པ་ཉིད་མ་ཡིན་ཡང་དམིགས་པར་འགྱུར་རོ། །མི་བདེན་པའི་དོན་གསལ་བའི་ནུས་པའི་རང་བཞིན་མ་རིག་པ་ནི་བདེན་པ་མ་ཡིན་པའི་རྣམ་པ་ཡང་སྟོན་པར་བྱེད་པ་ཡིན་ནོ། །དེའི་ཕྱིར་
དེའི་དབང་གིས་ཤེས་པ་རང་དང་གཞན་རིག་པར་བྱེད་པར་བརྗོད་ཀྱི། དོན་དམ་པར་ནི་རིག་པའི་རང་བཞིན་དུ་མ་གྱུར་པའི་དོན་འགའ་ཞིག་རིག་པར་བྱ་བ་ཡོད་པ་མ་ཡིན་ནོ། །དེས་ན་ཇི་ལྟར་སྒྲོན་མ་བདག་ཉིད་གསལ་བའི་བྱ་བ་དང་ལྡན་ན་ཡང་གཉི་ག་གསལ་བའི་བྱ་བ་བརྗོད་པ་དེ་བཞིན་དུ་ཤེས་པ་ཡང་བདག་གཅིག་པུ་གསལ་བའི་བྱ་བ་བྱེད་པ་ན་མ་རིག་པས་བསླད་པས་གཉི་ག་གསལ་བར་བྱེད་པར་སྣང་བ་ཡིན་ནོ། །ཡང་འདི་ལ་དོན་དམ་པ་གང་ཡིན་ཞེ་ན། ཁ་ཅིག་ན་རེ་རེ་ཞིག་ཤེས་པའི་བདག་ཉིད་རང་གསལ་བ་ལ་ནི་གདོན་མི་ཟ་སྟེ་དེ་མེད་ན་མྱོང་བ་ཐམས་ཅད་མེད་པར་ཐལ་བའི་ཕྱིར་རོ། །བདག་ཉིད་མྱོང་བ་གང་ཡིན་པ་དེ་ཡང་ཇི་ལྟར་གཞན་གྱི་ཡིན་ཏེ། བདག་དང་བདག་མ་ཡིན་པ་ནི་ཕན་ཚུན་སྤངས་ནས་གནས་པའི་ཕྱིར་དེ་དག་ནི་ཉམས་སུ་མྱོང་བ་ཡང་ཕན་ཚུན་འགལ་བར་རིགས་ཏེ། ཡུལ་ཐ་དད་ཀྱང་ཡུལ་ཅན་ཐ་མི་དད་པར་ནི་རིགས་པ་མ་ཡིན་ནོ་ཞེས་ཟེར་རོ། །གལ་ཏེ་དེ་ལྟར་ན་མི་བདེན་པའི་རྣམ་པ་དང་ཤས་པའི་རང་བཞིན་འགལ་བ་ཡིན་ཏེ། དངོས་པོ་དང་དངོས་པོ་མེད་པ་ཕན་ཚུན་སྤངས་ནས་གནས་པའི་ཕྱིར་ཡོད་པ་དང་མེད་པ་བཞིན་ནོ། །དེའི་ཕྱིར་འདི་ལ་དེ་ཡང་སྣང་བར་མི་འགྱུར་ན། ཇི་ལྟར་འཁྲུལ་པས་མཐོང་འགྱུར་བ། །ཞེས་གསུངས་པ་ན་སློབ་དཔོན་ཉིད་ཀྱིས་སྣང་བ་ནི་གསུངས་པ་ཡིན་ནོ། །གཞན་ཡང་རང་དང་གཞན་རིག་པ་གཉིས་ཀྱི་འགལ་བ་ཇི་ལྟ་བུ་ཞིག་ཡིན། རིག་པ་དེ་གཉིས་གཞན་དུ་བདག་དང་བདག་མ་ཡིན་པའི་རང་བཞིན་ཡིན་ན་གཅིག་པར་གསལ་བར་འགྱུར་ན། རིག་པ་ནི་གཉི་གའི་རང་བཞིན་མ་ཡིན་གྱི་འོན་ཀྱང་ཤེས་པའི་རང་བཞིན་ཉིད་དོ། །གང་ཡང་གང་ཞིག་གསལ་བར་བྱེད་པའི་རང་བཞིན་མ་ཡིན་པ་དེ་ནི་གསལ་བ་མ་ཡིན་ནོ་ཞེས་བྱ་བའི་དོན་འདི་བཞེད་པ་ཡིན་པར་སྨྲ་བ་དེ་ལ་ཡང་མི་བདེན་པའི་རྣམ་པར་མི་གསལ་བར་ཐལ་བར་འགྱུར་རོ། །དེའི་ཕྱིར་འདི་ནི་དོན་གཞན་ཡིན་ནོ་ཞེས་རིག་པར་བྱ་སྟེ། རིག་པར་བྱ་བ་གང་ཡིན་པའི་རིག་པ་གང་ཞིག་གང་དང་འབྲེལ་པར་སྣང་བའི་རིག་པ་དེ་ནི་དེ་ལས་ཐ་དད་པ་མ་ཡིན་ཏེ། དཔེར་ན་བདག་ཉིད་བཞིན་ནོ། །གཞན་དང་འབྲེལ་པར་སྣང་བའི་རིག་པ་ཉིད་ལ་ནི་དེ་དང་འབྲེལ་པས་ཁྱབ་སྟེ། འབྲེལ་པ་མེད་པ་དེ་ལྟར་སྣང་ན་ཧ་ཅང་ཐལ་བའི་ཕྱིར་རོ། །ཐ་དད་པ་ཉིད་ཡིན་ན་དུས་མཚུངས་པར་སྣང་བ་དེ་གཉིས་ལ་རྒྱུ་དང་འབྲས་བུའི་དངོས་པོ་མེད་ལ། ཡོད་ཀྱང་དེ་ནི་འབྲེལ་པར་སྣང་བའི་རྒྱུ་མཚན་ཡང་མ་ཡིན་ཏེ། མེད་དང་དུ་བ་བཞིན་ནོ། །ཡུལ་
དང་ཡུལ་ཅན་གྱི་དངོས་པོར་འབྲེལ་པ་ཡང་མ་ཡིན་ཏེ། གང་གི་ཕྱིར་རྣམ་པ་མེད་པའི་ཕྱོགས་ལ་འབྲེལ་པར་སྣང་བ་ཉིད་ཡུལ་དང་ཡུལ་ཅན་གྱི་དངོས་པོ་ཡིན་ལ། དེ་ཉིད་ལ་ཡང་རྒྱུ་མཚན་དུ་འབྲེལ་པ་ཚོལ་བ་ཡིན་ཏེ། འབྲེལ་པ་མེད་ན་རིག་པ་ཐམས་ཅད་དང་འབྲེལ་པར་སྣང་བར་ཐལ་བའི་ཕྱིར་རོ། །དེས་ན་འདིར་ཐ་དད་པ་ལ་ནི་འདྲེས་པར་སྣང་བའི་རྒྱུ་འབྲེལ་པར་མི་འཐད་པའི་ཕྱིར་ཁྱབ་པར་བྱེད་པ་མི་དམིགས་པས་མི་མཐུན་པའི་ཕྱོགས་ལས་ལྡོག་པ་ན། འདྲེས་པར་སྣང་བ་ལ་ཐ་མི་དད་པས་ཁྱབ་ལ། ཐ་མི་དད་པ་དང་ཐ་དད་པ་འགལ་བས་ཁྱབ་པ་དམིགས་པའོ། །མི་བདེན་པའི་རྣམ་པ་ཡང་རིག་པ་དང་ལྷན་ཅིག་འབྲེལ་པ་མེད་པ་ཡིན་ནམ་ཞེ་ན། མེད་མོད་དངོས་པོ་ལ་མེད་པའི་འབྲེལ་པ་བསམས་པས་ཅི་ཞིག་བྱ། ཇི་ལྟར་གསལ་བར་འགྱུར་ཞེ་ན། མ་རིག་པའི་དབང་གིས་སོ་ཞེས་བཤད་ཟིན་ཏོ། །དེ་ཉིད་ཀྱི་ཕྱིར་སྔོན་པོ་ལ་སོགས་པ་སྣང་བ་ལ་རང་བཞིན་ཐ་དད་པ་མེད་པའི་ཕྱིར་སྔོན་པོ་ལ་སོགས་པ་དེ་དེའི་བདག་ཉིད་དུ་ཡིན་པའི་ཕྱིར་ཞེས་སྣང་བའི་རང་བཞིན་ཉིད་དུ་ཐ་སྙད་དུ་བྱས་སོ། །རྣ་པ་མེད་པའི་ཕྱོགས་ལ་དམིགས་པའི་དོན་ནི་འདྲེས་པར་སྣང་བའི་དོན་ཡིན་ཞིང༌། དེ་ཡང་དེ་ལྟར་གསལ་བ་ཡིན་ནོ། །དེས་ན་དམིགས་པའི་དོན་གཞན་ཡིན་ལ། རིག་པའི་དོན་ཀྱང་གཞན་ཡིན་ནོ་ཞེས་གང་བརྗོད་པ་དེ་གསལ་བ་ཡིན་ནོ། །དེའི་ཕྱིར་དེ་ལྟར་རྣམ་པ་མེད་པའི་ཕྱོགས་ལ་དུས་མཉམ་པར་སྣང་བའི་དོན་གསལ་བའི་དོན་དུ་ལྷན་ཅིག་དམིགས་པ་ངེས་པ་དང༌། རིག་པ་གཏན་ཚིགས་སུ་བརྗོད་པ་ཡིན་ནོ། །རྣམ་པ་དང་བཅས་པའི་ཕྱོགས་ལ་ནི་གཟུང་བའི་རྣམ་པར་སྣང་བ་ཐ་དད་པར་མི་འདོད་དེ། དེའི་ཕྱིར་རྣམ་པ་དང་བཅས་པར་སྨྲས་པ་ལ་ཡང༌། སློབ་དཔོན་གྱིས། དེའི་ཕྱིར་སྣང་དོན་དེ་བློ་དག །ཅེས་བྱ་བ་ལ་སོགས་པས་རྣམ་པ་མེད་པའི་ཕྱོགས་སེལ་བ་གཉིས་པོ་འདི་ཉིད་སྟོན་པར་འགྱུར་རོ། །དེའི་ཕྱིར་རྣམ་པར་ཤེས་པའི་སྨྲ་བའི་ཚུལ་ལ་འཛིན་པའི་རྣམ་པར་རྟོག་པའི་རང་བཞིན་ནི་རང་རང་རིག་པའི་སྒྲུབ་པར་བྱེད་པར་འདོད་དེ། རྟོག་པའི་རང་བཞིན་དེ་ལས་བདག་ཉིད་རིག་པ་འདི་བདག་ཉིད་རིག་པའི་རང་བཞིན་དེའི་དངོས་པོ་རྣམ་པར་འཇོག་པའི་ཕྱིར་རོ། །འདི་སྐད་བརྗོད་པ་ཡིན་ཏེ། རྣམ་པར་གཞག་འཇོག་གི་དངོས་པོ་ལས་བསྒྲུབ་བྱ་དང་བསྒྲུབ་བྱེད་ཀྱི་ཐ་སྙད་ཡིན་ཏེ། གང་གི་ཕྱིར་རྣམ་པར་ཤེས་པ་རྟོགས་པའི་རང་བཞིན་ཡིན་པ་དེའི་ཕྱིར་ཁྱད་པར་ཅན་གྱི་བདག་ཉིད་
རིག་པའི་ཐ་སྙད་དུ་བྱེད་པ་ཡིན་ནོ། །དེས་ན་རྣམ་པར་ཤེས་པར་སྨྲ་ལ་འཛིན་པའི་རྣམ་པ་ནི་བདག་ཉིད་རིག་པ་རྣམ་པར་འཇོག་པའི་རྒྱུའི་ཚད་མ་ཡིན་ནོ། །ཕྱི་རོལ་གྱི་དོན་ལ་འདྲ་བ་ཚད་མ་ཡིན་ལ། དེ་ཡང་འཁྲུལ་པས་ཐ་དད་པ་ཉིད་དུ་ངེས་པ་ཡིན་ནོ། །དགའ་བ་ལ་སོགས་པའི་རང་བཞིན་དུ་སྣང་བ་རིག་པའི་རང་བཞིན་ཡང་འབྲས་བུ་ཡིན་པ་དེས་ན་དེ་ལ་ཚད་མ་དང་འབྲས་བུ་རྣམ་པར་གཞག་པར་འགྱུར་གྱི། རྣམ་པར་ཤེས་པར་སྨྲ་བ་ལ་ནི་འབྲས་བུ་དང་ཚད་མ་དག་གི་རྣམ་པར་དབྱེ་བར་མི་འགྲུབ་པོ་ཞེ་ན། བཤད་པ་དཔེར་ན་འདོད་ཆགས་ལ་སོགས་པ་རྣམས་ཀྱི་འདིས་རིག་པས་ན་ཚོར་བ་སྟེ། ཚོར་བར་བྱེད་པ་རྟོགས་པའི་རང་བཞིན་ཉིད་དོ། །ཕྱི་རོལ་གྱི་དོན་དེར་རོ། །བདག་ཡུལ་དུ་ཞེས་བྱ་བ་ནི་རང་གི་རང་བཞིན་ཡུལ་ཡིན་པར་རོ། །གཞག་པ་ནི་རིག་པའི་མཚན་ཉིད་ཀྱི་འབྲས་བུར་གཞག་པར་བྱ་ནའོ། །འདི་སྐད་བརྗོད་པ་ཡིན་ཏེ། སེམས་དང་སེམས་ལས་བྱུང་བ་རྣམས་ཀྱི་རང་རིག་པའི་མངོན་སུམ་ལ། བདག་ཉིད་རིག་པར་བྱ་བ་རིག་པར་བྱེད་པ་རྟོགས་པའི་རང་བཞིན་ཉིད་ནི་ཚད་མ། བདག་ཉིད་རྟོགས་པར་བྱེད་པའི་རང་བཞིན་ཉིད་ནི་འབྲས་བུ་ཡིན་ཞིང་དེར་ཆད་མ་དང་འབྲས་བུ་དག་ཐ་དད་པར་སྣང་བ་ཡང་མ་ཡིན་པ་དེ་བཞིན་དུ། རྣམ་པར་ཤེས་པར་སྨྲ་བ་ལ་ཤེས་པ་ཐམས་ཅད་ལ་གཞལ་བྱ་དང༌། འཇལ་བྱེད་དང༌། འབྲས་བུ་གནས་པ་འདི་ནི་ཀུན་ལ་སྦྱར་བར་བྱའོ། །ཕྱི་རོལ་གྱི་དོན་གྱི་ཚུལ་དེ་ཉིད་གསལ་བར་བྱ་བའི་དོན་དུ་བཤད་པ། ཕྱིའི་དོན་དེ་ལས་ཉམས་སུ་མྱོང་བ་བདག་ཉིད་དེ། རྟོགས་པའི་བདག་ཉིད་ཡིན་པའི་ཕྱིར་འདོད་ཆགས་ལ་སོགས་པ་དེ་དག་རང་བཞིན་མྱོང་བ་སྟེ། མྱོང་བར་བྱེད་ནུས་པ་ཡིན་ནོ། །གཏན་ཚིགས་དེའི་ཕྱིར་དེ་དག་གི་རུང་བ་ཉིད་དེ་ནི་ཚད་མ། བདག་ཉིད་གཞལ་བྱ། རང་རིག་པ་འབྲས་བུ་ཡིན་པ་དེ་བཞིན་དུ། །རྣམ་པ་ཤེས་པར་སྨྲ་བ་ལ་ཡང་ངོ༌། །དེ་ཡང་ན་དེ་ལ་ཡང་ཞེས་བྱ་བ་རྣམ་པར་ཤེས་པར་སྨྲས་པ་ལའོ། །ཚིག་ལེའུར་བྱས་པ་སྔ་མས་གཞག་པའི་ཚིག་ལེའུར་བྱས་པ་འདིས་བསྟན་པ་ཡིན་གྱི། །ཕྱིར་རོལ་གྱི་དོན་གྱི་ཚུལ་གསལ་བར་བྱས་བ་ནི་མ་ཡིན་ནོ། །རྣམ་པར་ཤེས་པར་སྨྲ་བ་ལ་ཚད་མའི་སྒྲའི་རྣམ་གྲངས་བསྟན་པའི་ཕྱིར་བཤད་པ། ཡོངས་སུ་གཅོད་པའི་བདག་ཉིད་གང་ཡིན་པ་དེ་ནི་འཛིན་པའི་རྣམ་པ་ཞེས་བརྗོད་ཅིང་བསྙད་ལ། བདག་ཉིད་ལ་རུང་བ་ཞེས་ཀྱང་བརྗོད་པ་ནི་རྣམ་པར་ཤེས་པར་སྨྲ་བ་ལ་ཚད་མར་བརྗོད་པ་ཡིན་ཏེ། རང་བདག་ཉིད་རིག་པ་ནི་ཚད་མ་ཡིན་ནོ། །
འདིས་རིག་པས་རིག་པ་སྟེ། རྟོགས་པའི་རང་བཞིན་ཞེས་བྱ་བའི་རང་བཞིན་ཁྱད་པར་ཅན་གང་ཞིག་བྱེད་པར་འགྱུར་བས་རང་གི་བདག་ཉིད་པ་བྱེད་པར་འགྱུར་བ་དེ་ཉིད་རིག་པའི་སྒྲས་བརྗོད་དོ། །རིག་པས་རིག་པ་ཞེས་དེ་ལྟར་དངོས་པོ་བསྒྲུབ་པའི་ཕྱོགས་ཡོངས་སུ་བཟུང་ན་ནི་འབྲས་བུ་ཉིད་བརྗོད་པར་འགྱུར་རོ། །སློབ་དཔོན་ཕྱོགས་ཀྱི་གླང་པོས་རང་གི་བདག་ཉིད་རིག་པ་ཚད་མའོ་ཞེས་གསུངས་པ་དེ་ལ། རིག་པའི་སྒྲ་དངོས་པོ་སྒྲུབ་པར་བསམས་ནས་དོག་པར་འགྱུར་རོ། །རིག་པས་རིག་པ་སྟེ་འབྲས་བུ་ལ་བརྗོད་པ་རྣམས་ཡིན་ནམ། གལ་ཏེ་དེ་ཉིད་ཚད་མ་ཡིན་ལ། འོ་ན་ནི་འབྲས་བུ་དང་ཚད་མ་དག་ཐ་དད་པ་མེད་པར་འགྱུར་རོ་ཞེས་དོགས་པ་བཟློག་པའི་ཕྱིར་ཡོངས་སུ་གཅོད་པའི་ཕྱིར་བདག་ཉིད་ཁོ་ན་ཆད་མ་ཡིན་ལ། དེ་ཉིད་ཀྱི་རང་རིག་པར་བརྗོད་དོ་ཞེས་བཤད་པ་ཡིན་ནོ། །ཚིག་ལེའུར་བྱས་པ་སྔ་མས་མ་བཞག་པ་རིག་པས་ཐོབ་པའི་དོན་སྟོན་པའི་ཚིགས་སུ་བཅད་པའོ། །ལྷན་ཅིག་དམིགས་པ་དང་རིག་པ་དག་གིས་རྣམ་པ་མེད་པའི་ཕྱོགས་ལ་ཕྱི་རོལ་གྱི་དོན་བཀག་པ་ཉིད་དོ། །དེ་ཉིད་ཀྱི་ཕྱིར་ཕྱི་རོལ་གྱི་དོན་ཡོད་ཀྱང་སྣང་བའི་དོན་དང་དེའི་བློ་དག་ཐ་དད་པ་མེད་པར་བལྟ་བར་བྱའོ། །འདི་ཉིད་རྣམ་པར་འགྲེལ་པ་ནི། ལྷན་ཅིག་དམིགས་པ་དང་རིག་པ་དག་གིས་སྔོན་པོ་ལ་སོགས་པ་གཟུང་བ་དང་དེ་རིག་པ་ཐ་དད་པ་མེད་པར་གྲུབ་པར་བལྟའོ། །རིག་པ་ནི་མྱོང་བའི་རང་བཞིན་ཉིད་ཡིན་ལ། ལྷན་ཅིག་དམིགས་པ་ཡང་ཐ་དད་པ་མེད་པ་ཉིད་དོ། །འདིས་ནི་འདིར་ལྷག་པའི་དོན་གཞན་ཉིད་དོ། །ཕན་འདོགས་པ་དང་ཕན་གདགས་པའི་དངོས་པོ་མེད་པའི་ཕྱིར་དུས་གཅིག་ཏུ་ལྷན་ཅིག་དམིགས་པ་གཉིས་པོ་དག་ནི་ཡོངས་སུ་གཅོད་པ་དང་ཡོངས་སུ་གཅོད་པ་མེད་པ་ཉིད་དོ། །དེས་ན་སྟེ་དེའི་ཕྱིར་བློ་ནི་ཚུལ་གཉིས་ཏེ་ཡུལ་གྱི་རང་བཞིན་གཟུང་བ་དང༌། ཤེས་པའི་རང་བཞིན་འཛིན་པ་དག་གིས་གཟུང་བ་དང་འཛིན་པའི་རང་བཞིན་གྱིས་ཚུལ་གཉིས་སུ་གྲུབ་པ་ཡིན་ནོ། །ཅིག་ཤོས་ཀྱིས་སྣང་བ་ཤེས་པ་ལས་ཐ་མི་དད་ན་ཕྱི་རོལ་མི་འགྲུབ་པར་རྟོགས་པས་ག་ལས་ཤེས་སྨྲ་སྟེ། མངོན་སུམ་དུ་གྲུབ་པ་དེ་ཐ་དད་པའི་དངོས་པོ་མ་ཡིན་ནོ་ཞེ་ན། འོ་ན་དེ་ཡོད་པར་ངེས་པར་ཇི་ལྟར་འགྱུར་ཞེ་ན། སློབ་དཔོན་གཟུ་བོར་གནས་པར་གྱུར་ནས་སྨྲས་པ། ཕྱི་རོལ་ནི་འབྲས་བུ་ལྡོག་པ་ལ་སྟེ། དངོས་པོ་མེད་པ་ལས་འགྲུབ་སྟེ་ངེས་པར་འགྱུར་རོ། །དཔེར་ན་རྒྱུ་གཞན་ཡོད་ཀྱང་མིག་གི་རྣམ་པར་ཤེས་པ་རེས་འགའ་འགྱུར་བ་ལས་མིག་རྗེས་སུ་དཔོག་ལ།
དེ་བཞིན་དུ་ནུས་པའི་རྒྱུ་གཞན་དབང་པོ་དང་ཡིད་ཀྱི་རྣམ་པར་ཤེས་པའི་མཚན་ཉིད་ཡོད་ཀྱང་འབྲས་བུ་རྩིག་པ་ལ་སོགས་པར་སྣང་བའི་རྣམ་པར་ཤེས་པ་མེད་པའི་ཕྱིར་རྗེས་སུ་དཔོག་ལ་རྒྱུ་གཞན་གང་ཡིན་པ་དེ་ཡང་ཕྱི་རོལ་གྱི་དོན་ཡིན་པར་འགྱུར་རོ། །གལ་ཏེ་རྩོད་པ་འདིར་རྣམ་པར་ཤེས་པར་སྨྲ་འབའ་ཞིག་ཉེ་བར་ལེན་པ་སྟེ་བག་ཆགས་ཡོངས་སུ་སྨིན་པ་དེ་ཉིད་ནི་ཁྱད་པར་ཡིན་ཏེ། ཕྱི་རོལ་གྱི་ལྷན་ཅིག་བྱེད་པའི་རྐྱེན་གཞན་ལས་ཁྱད་པར་དུ་གྱུར་པ་དེ་མེད་པས་འབྲས་བུ་ལྡོག་པ་སྟེ། མེད་པར་མི་སྨྲ་ན་ནི། ལྡོག་པའི་སྒོ་ནས་འགྱུར་རོ། །གལ་ཏེ་རིག་པར་སྨྲ་བ་དེ་ཡང་ཁོ་བོ་དག་ལ་སྨྲ་བ་ན་རང་གི་ཕྱོགས་ལ་ཚད་མ་དང་ཅིག་ཤོས་ཇི་ལྟར་སྨྲ་ཅི་ཞིག་བྱེད་པ་ན་ཞེ་ན། སྨྲས་པ་ཤེས་པ་ཐམས་ཅད་ཀྱི་ཡུལ་བཟློག་པ་ནའོ། །དེ་ལྟར་བྱེད་པས་ཚད་མ་དང་ཅིག་ཤོས་རྣམ་པར་གཞག་པར་ཇི་ལྟར་འགྱུར་ཞེ་ན་སྨྲས་པ། བསླད་པ་དང་ཅིག་ཤོས་ཏེ། ཚད་མ་དང་ཚད་མ་མ་ཡིན་པ་དེ་ཉིད་ནི་དེ་དག་དང་འབྲེལ་པ་ཡིན་ལ། གང་ཞིག་ཐམས་ཅད་བསླད་པར་སྨྲ་བ་དེས་ཇི་ལྟར་བསླད་པ་དང་མ་བསླད་པ་དང་འབྲེལ་པ་ཚད་མ་དང་ཅིག་ཤོས་རྣམ་པར་འཇོག་ཏེ། མི་བཞག་པ་ཉིད་དོ། །གཏན་ཚིགས་སྨྲས་པ། ཤེས་པ་ཐམས་ཅད་ཉེ་བར་བསླད་པར་ཆད་པར་མེད་པའི་ཕྱིར་ཞེ་ན། སློབ་དཔོན་གྱིས་དེ་ལ་ཡང་རྣམ་པར་གཞག་པ་བསྟན་པའི་ཕྱིར་སྨྲས་པ། ཉེ་བར་བསླད་པའི་མ་རིག་པའི་བག་ཆགས་དེ་འཚམས་སྦྱོར་བ་མེད་པ་ནི་རྗེས་སུ་མི་སྦྱོར་བ་སྟེ། རྗེས་སུ་མཐུན་པའི་འབྲས་བུ་བྱེད་པ་མེད་བའོ། །དེ་ཉིད་ནི་སྐྱོན་ཏེ་སྐྱོན་དེས་ན་ཤེས་པ་དེས་བཅུག་པའི་ཐ་སྙད་ལ་ཡིད་བརྟན་མེད་པ་སྟེ། ཡིད་ཆེས་པ་བྱར་མེད་པར་མཐོང་བས་རྟོགས་པ་གཅིག་ནི་ཚད་མ་མ་ཡིན་པར་བརྗོད་དོ། །གལ་ཏེ་དོན་དམ་པའི་རིག་པ་ཐ་སྙད་ཐམས་ཅད་ལ་ཡིད་བརྟན་པ་མེད་པ་མ་ཡིན་ནམ་ཞེ་ན། བདེན་ཏེ། མི་མཁས་པས་ཀྱང་སྟེ་ཐ་སྙད་གང་ཞིག་བྱིས་པས་ཀྱང་ཡིད་བརྟན་དུ་མེད་པ་དེས་ན་ཚད་མ་མ་ཡིན་པར་རྣམ་པར་འཇོག་གོ །མཚམས་སྦྱོར་བ་མེད་པའི་བག་ཆགས་དེས་ནི་སྔོན་པོར་སྣང་བའི་བློ་འབའ་ཞིག་བསྐྱེད་དེ། དེའི་དོན་བྱེད་པར་སྣང་བ་རྣམ་པར་རིག་པས་བག་ཆགས་རྒྱས་པར་མི་བྱེད་དོ། །དེས་ན་སྔོན་པོར་སྣང་བའི་ཤེས་པ་འབའ་ཞིག་སྐྱེད་ཀྱི། སྣང་བ་དེའི་བསྒྲུབ་པར་བྱ་བའི་དོན་དུ་སྣང་བའི་ཤེས་པ་ནི་སྐྱེད་པ་མ་ཡིན་ནོ། །ཡང་དག་པའི་ཆུའི་འབྲས་བུ་ནི་དུས་ཇི་སྲིད་པར་གོས་དང་ལུས་བངས་པའི་གནས་སྐབས་དང༌། དེ་བཞིན་དུ་དུས་དང་ལུས་ལ་ལྟོས་
ནས་དུས་ཇི་སྲིད་ཁྱབ་ཀྱི་བར་དུ་གྲང་བའི་རིག་པའི་གནས་སྐབས་དང༌། ལུས་རྒྱས་པ་དང༌། ལྕི་བའི་གནས་སྐབས་ཀྱི་མཚན་ཉིད་རང་བཞིན་ཡོངས་སུ་འགྱུར་བ་ཡིན་ན། དེའི་གནས་སྐབས་སུ་ནི་བདེན་པའི་ཆུ་དང་འབྲེལ་པའི་དོན་བྱ་བ་འདི་དག་གི་རང་གི་ངོ་བོར་འཛིན་པའི་རྣམ་པར་ཤེས་པ་མ་སྐྱེད་པ་དེས་ན། ཆུར་སྣང་བའི་རྣམ་པར་ཤེས་པ་སླུ་བ་ཡིན་ཏེ། དེས་ན་ཚད་མ་མ་ཡིན་ནོ། །ཡང་རྣམ་པར་ཤེས་པར་གཞན་འཁོར་བ་ཇི་སྲིད་པར་ཞེས་བྱ་བས་ངས་རྒྱས་ཀྱི་གོ་འཕང་ཐོབ་ཀྱི་བར་དུ་མཐོང་བའི་དོན་གྱི་འབྲས་བུར་སྣང་བའི་ཤེས་པའི་ཆོགས་མི་འབྲལ་བར་རྗེས་སུ་འབྲེལ་པ་གང་ཡིན་པ་དེ་ནི་ཚད་མར་བརྗོད་དོ་ཞེས་འབྲེལ་ཏོ། །ཅིའི་ཕྱིར་འབྲས་བུའི་ཤེས་པ་དང་མི་འབུལ་ཞེ་ན། བག་ཆགས་བརྟན་པའི་ཕྱིར་རོ། །ཆུར་སྣང་བའི་ཤེས་པའི་བག་ཆགས་ནི་ཆུར་སྣང་བའི་ཤེས་པ་སྐྱེད་པར་བྱེད་ཅིང༌། ཆུའི་བསྒྲུབ་པར་བྱ་བར་སྣང་བའི་ཤེས་པའི་བག་ཆགས་ཀྱང་རྒྱས་པར་བྱེད་དོ། །དེས་ན་བག་ཆགས་དེ་ལས་ཆུར་སྣང་བའི་ཤེས་པ་དང༌། བག་ཆགས་ཡོངས་སུ་སྨིན་པ་དང་ལྡན་པའི་ཆུའི་འབྲས་བུ་སྣང་བའི་ཤེས་པ་རིམ་གྱིས་སྐྱེ་བའི་ཕྱི་མི་འབྲལ་བར་རྗེས་སུ་འཇུག་པ་ཡིན་ནོ། །ཡང་དཔེར་ན་ཕྱི་རོལ་གྱི་དོན་སྨྲ་བ་ལ་ཡིད་ཀྱི་རྣམ་པར་ཤེས་པ་ཉིད་ལས་ཡིད་ཀྱི་རྣམ་པར་ཤེས་པ་འགའ་ཞིག་སྐྱེས་པ་ནི། འགག་པའི་རྣམ་པར་ཤེས་པའི་རྒྱུད་ལས་བག་ཆགས་གཞག་པ་དེ་དུས་མཐར་ཕྱིན་པས་ཡོངས་སུ་སྨིན་པར་བྱས་པ་ན་ཡང་སྔ་མ་དང་འདྲ་བའི་རྣམ་པར་ཤེས་པ་སྐྱེད་པར་བྱེད་པ་དེ་བཞིན་དུ། རྣམ་པར་ཤེས་པར་སྨྲ་བ་ལས་ཡང་ཡིན་པས་ཕ་རོལ་པོའི་ཉེས་པའི་སྐབས་ཡོད་པ་མ་ཡིན་ནོ། །གལ་ཏེ་ཐམས་ཅད་མཁྱེན་པའི་མཁྱེན་པ་ལ་ལྟོས་ན། ཤེས་པ་འདི་ཐམས་ཅད་སླུ་བ་ཡིན་པ་དེ་ལྟར་ན་ཡང་འཁོར་བ་འདི་ན་ཐར་པའི་སྔ་རོལ་དུ་བྱིས་པའི་སྐྱེ་བོས་བྱས་པའི་ཐ་སྙད་གང་ཡིན་པ་དེ་ལ་མི་སླུ་བ་དེ་ལ་ལྟོས་ནས་ཚད་མ་ཡིན་གྱི། སངས་རྒྱས་པ་ཉིད་ཀྱི་གནས་སྐབས་ལ་ལྟོས་པ་ནི་མ་ཡིན་ནོ། །དོན་དམ་པའི་ཚུལ་ལ་ལྟོས་ནས་མི་སླུ་བ་གང་ཡིན་པ་དེ་ཚད་མར་བརྗོད་པ་ཡིན་གྱི། ཐ་སྙད་ལ་ལྟོས་པས་ནི་མ་ཡིན་པ་ཡིན་ནམ་ཞེ་ན། འདི་ནི་ཐ་སྙད་ཀྱི་དགོས་པ་ཅན་ཐ་སྙད་ཀྱི་འབྲས་བུ་ཅན། ཀུན་ཏུ་ཐ་སྙད་པའི་ཚད་མའི་རང་བཞིན་ཏེ། མཚན་ཉིད་བརྗོད་པ་ཡིན་ནོ། །དེས་ན་ཀུན་དུ་ཐ་སྙད་པའི་ཡུལ་ཅན་ཉིད་ཚད་མ་དང་ཆད་མ་མ་ཡིན་པ་
ཡིན་ནོ། །དོན་དམ་པ་ལ་འཇུག་པའི་དོན་དུ་ཚད་མའི་མཚན་ཉིད་བཤད་པ་ཡིན་གྱི། མི་བདེན་པའི་ཡུལ་ཅན་ནི་མ་ཡིན་པ་མ་ཡིན་ནམ། འདི་ལྟར་བདག་དང་གཞན་མི་བདེན་པའི་རང་བཞིན་སྤངས་པ་དང༌། བདེན་པའི་རང་བཞིན་ཐོབ་པར་བྱ་བའི་ཕྱིར་མཁས་པ་རྩོལ་པར་རིག་པ་ཡིན་ནོ་ཞེ་ན། འདི་ལ་ཡང་ཞེས་སྨོས་ཏེ། གལ་ཏེ་ཐ་སྙད་ལ་རབ་ཏུ་སྦྱོར་བའི་ཤེས་པ་འདི་ལ་ཡང་འཇིག་རྟེན་རྨོངས་པར་མ་གྱུར་ན་ནི་དོན་དམ་པའི་ཤེས་པ་འབའ་ཞིག་གི་མཚན་ཉིད་བཤད་པར་རིགས་པ་ཡིན་ན། གང་གི་ཚེ་འདི་ལ་ཡང་གཞན་དག་བདག་ཉིད་རྨོངས་ཤིང༌། གཞན་ཡང་རྨོངས་པར་བྱེད་པ་དེའི་ཚེ་དེ་དག་དོན་དམ་པའི་ཚུལ་ལ་འཇུག་པའི་སྐབས་ག་ལ་ཡོད། དོན་དམ་པའི་ཚུལ་ལ་འཇུག་པར་བྱ་བ་ཁོ་ནའི་ཕྱིར་ཀུན་དུ་ཐ་སྙད་པའི་ཤེས་པ་བཤད་པ་ཡིན་ནོ། །བསམས་པ་ལས་བྱུང་བ་ཞེས་བྱ་བ་ནི་ཚུལ་འདིས་ཀྱང་སྐྱེ་བོ་དོན་དམ་པའི་ཚུལ་ལ་གཞུག་པར་ནུས་པ་ཡིན་ནོ་ཞེས་སྟོན་པ་ཡིན་ནོ། །འདི་ལ་ཀུན་དུ་ཐ་སྙད་པའི་ཚད་མའི་དེ་ཁོ་ན་བཤད་ན་རིགས་པའི་ཚུལ་དེ་ཉིད་ཀྱིས་དོན་སེམས་པ་ལ་ཞུགས་པ་ན། དེའི་རྒྱུ་ལས་བྱུང་བའི་ཤེས་རབ་ཁྱད་པར་དུ་འཕགས་པའི་དོན་སྣང་བའི་བློ་གོམས་པར་བྱས། འདྲིས་པར་བྱས་པས་རྣམ་པར་འཁྲུལ་པས་དབེན་ཞིང་བྲལ་བ་དྲི་མ་མེད་པ་ཡོངས་སུ་དག་པའི་ཕྱིར་ཕྱོགས་པས་ན་ལྡོག་པ་སྟེ་དོན་དམ་པར་ལས་ཕྱིར་ལྡོག་པའོ།། དེ་ལ་ལྡོག་པ་ནི་ལྡོག་པ་མེད་པ་སྟེ། ཕྱིར་མི་ལྡོག་པའི་ཞེས་བྱ་བའི་དོན་ཏོ། །ཡང་ན་ལྡོག་པ་ནི་སྐྱོན་ཡིན་ལ། འཁོར་བར་སླར་ལྡོག་པ་ཡང་སྐྱོན་ཡིན་ནོ། །དེ་གང་ལ་མེད་པ་དེ་ནི་ལྡོག་པ་མེད་པའོ། །དོན་དམ་པར་ནི་དེ་ཁོ་ན་ཉིད་ཀྱི་ཡུལ་ལམ་དགོངས་པ་དམ་པའོ། །དེ་ལ་རབ་ཏུ་སྦྱོར་བ་ནི་དོན་དམ་པའོ། །མངོན་དུ་བྱེད་པ་ནི་སྐྱེད་པའོ། །བསམ་པ་ནི་འདི་ཡིན་ཏེ། དོན་དམ་པའི་ཚད་མ་ཡང་རྒྱུ་མེད་པར་ནི་མ་ཡིན་ལ། རྒྱུ་ཡང་གོམས་པ་ལས་གཞན་མ་ཡིན་ནོ། །གོམས་པའི་ཡུལ་ཡང་ཀུན་དུ་ཐ་སྙད་པའི་ཚད་མས་དཔྱད་པའི་དོན་ཡིན་པ་དེའི་ཕྱིར་ཀུན་དུ་ཐ་སྙད་པའི་ཚད་མ་དེ་ཡང་དག་པར་རྟོགས་པ་ནི་དོན་དམ་པ་པའི་ཤེས་པའི་རྒྱུར་འགྱུར་རོ། །དེ་ནས་དེའི་ཡུལ་ཅན་གྱི་འབད་པ་ནི་དོན་དམ་པའི་ཡུལ་ཅན་ཉིད་དོ། །ལོག་པའི་ཤེས་པས་ཡུལ་དུ་བྱས་པའི་དངོས་པོ་རྟག་པ་ལ་སོགས་པའི་རྣམ་པ་བསྒོམས་པ་ནི་དོན་དམ་པའི་ཤེས་པའི་རྒྱུར་མི་འགྱུར་ལ། མི་རྟག་པ་ལ་སོགས་པའི་རྣམ་པ་བསྒོམས་ན་ནི་འགྱུར་བ་ཉིད་ཡིན་པ་དེས་ན། སྐྱེ་བོ་དེ་ལས་རྨོངས་
པ་བཟློག་ནས་དོན་དམ་པ་པའི་ཤེས་པ་ལ་འཇུག་པར་བྱ་བ་ཡིན་ཏེ། རྨོངས་པ་འདིའི་ཡུལ་ནི་རགས་པ་ཡིན་པའི་ཕྱིར་རོ། །དོན་དམ་པ་ཐོབ་པ་ཡང་རྨོངས་པ་འདི་ལོག་པ་སྔོན་དུ་འགྲོ་བ་ཅན་ཡིན་པའི་ཕྱིར་འདི་ཉིད་ལ་འབད་པར་རིགས་སོ། །དེ་ཕྱིར་ཡང་དག་ཡང་དག་མིན། །ཞེས་བྱ་བ་ལ་སོགས་པས་རྣམ་པར་ངེས་པ་འདིར་ནི་ཇི་ལྟར་ཀུན་དུ་ཐ་སྙད་པའི་ཤེས་པའི་རིམ་གྱིས། དོན་དམ་པ་པའི་ཤེས་པ་དེའི་ཚེ་སྟེ། བག་ཙམ་ཞིག་བསྟན་པ་ཡིན་ལ། དེ་ཅི་འདྲ་བའི་ཚད་མ་ཡིན་པ་དེའི་ཡང་ཆ་ཙམ་ཞིག་བསྟན་པ་ཡིན་ཏེ། དེ་ནི་མངོན་སུམ་གྱི་རང་བཞིན་གྱི་ཚད་མ་ཡིན་ནོ། །གལ་ཏེ་དོན་དམ་པའི་ཤེས་པ་དེ་ནི་གཟུང་བ་དང། འཛིན་པའི་རྣམ་པ་དང་བྲལ་བའམ། དོན་ཐམས་ཅད་ཀྱང་འཛིན་པ་ཡིན་ཡང་བླ་སྟེ། གཉི་ག་ལྟར་ན་ཡང་དེ་ནི་མངོན་སུམ་ཉིད་ཡིན་ནོ། །ཚད་མ་རྣམ་པར་ངེས་པའི་འགྲེལ་བཤད། སློབ་དཔོན་ཆོས་མཆོག་གིས་སྦྱར་བ་ལས་ལེའུ་དང་པོའོ།། །།སྟོང་ཕྲག་བཞི་དང་གསུམ་དང་བཞི། །བརྒྱ་ཕྲག་ལྔ་དང་དྲུག་དང་གསུམ། །ཉི་ཤུ་གཉིས་དང་སུམ་ཅུ་སྟེ། །དེ་ནི་གཉིས་དྲུག་གསུམ་བཅས་སོ། །ལེའུ་དང་པོ་འདི་ལ་ཚིགས་སུ་བཅད་པ་བཞི་སྟོང་ལྔ་བརྒྱ་ཉི་ཤུ་རྩ་གཉིས་ཡོད་དོ།། །།མངོན་སུམ་དང་རྗེས་སུ་དཔག་པའི་བྱེ་བྲག་གིས་ཚད་མ་གཉིས་སུ་བསྟན་པ་ལས་ལོག་པར་རྟོགས་པ་རྣམ་པ་བཞི་བསལ་བའི་སྒོ་ནས་མངོན་སུམ་བཤད་ཟིན་ནས། ཇི་ལྟར་བསྟན་པ་བཞིན་དུ་སྐབས་སུ་སོ། །ཇི་ལྟར་ཤེས་པའི་མཚན་ཉིད་ཀྱི་མངོན་སུམ་བཞི་ཆར་ལ་རྟོགས་པ་བསལ་བའི་དོན་དུ། རྗེས་དཔག་རྣམས་གཉིས་ཞེས་གསུངས་སོ། །ཇི་ལྟར་ཤེས་པའི་མཚན་ཉིད་ཀྱི་མངོན་སུམ་བཞི་ཆར་ལ་ཡང་མཚན་ཉིད་ཐུན་མོང་བ་གཅིག་ཡོད་པ་དེ་བཞིན་དུ། རྗེས་སུ་དཔག་པ་རྣམ་པ་གཉིས་ལ་ནི་མཚན་ཉིད་གཅིག་ཡོད་པ་མ་ཡིན་ཏེ། རང་བཞིན་ཤིན་ཏུ་ཐ་དད་པའི་ཕྱིར་རོ། །དེ་ལ་གཅིག་ནི་ཤེས་པ་ཡིན་ལ། གཞན་ནི་བརྗོད་པ་ཡིན་ནོ། །རྣམ་པའི་དབྱེ་བ་བརྗོད་ན་ནི་རྣམ་པའི་མཚན་ཉིད་ཐ་དད་པར་བསྟན་པར་ནུས་པ་ཡིན་ནོ། །དེ་ཉིད་ཀྱི་ཕྱིར་འདིར་མཚན་ཉིད་ཙམ་བསྟན་ན། ཁྱད་པར་གྱི་མཚན་ཉིད་གཅིག་གམ་དུ་མར་འགྱུར་བ་ཡིན་ཏེ། དེའི་གྲངས་བསྟན་པས་ཅི་ཞིག་བྱ་ཞེས་གང་བརྩད་པ་དེ་སྤངས་པ་ཡིན་ནོ། །འདི་ལྟར་གསལ་བའི་ཁྱད་པར་ཉེ་བར་བསྟན་པ་མེད་པར་ནི་གསལ་བ་སོ་སོར་ངེས་པའི་མཚན་ཉིད་བསྟན་པར་མི་ནུས་སོ། །དེས་ན་གསལ་བའི་
དབྱེ་བ་ནི་བསྟན་པར་བྱ་བ་ཉིད་དོ། །རྣམ་པའི་དབྱེ་བ་ཡང་གསལ་བའི་དབྱེ་བ་ཉིད་ཡིན་པ་དེས་ན། རྣམ་པའི་དབྱེ་བ་བརྗོད་པ་ནི་མཚན་ཉིད་རྟོགས་པར་བྱ་བའི་དོན་ཁོ་ན་ཡིན་ནོ། །འདི་རང་གི་ཆེད་ཡིན་པས་ན་རང་གི་དོན་ལ། གཞན་གྱི་ཆེད་དུ་ཡིན་པས་ན་གཞན་གྱི་དོན་ཏོ། །རང་ལ་དོགས་པ་དང་གཞན་ལ་དགོས་པའོ། །རྗེས་སུ་དཔག་པ་གང་ཞིག་རྒྱུར་གྱུར་པས་རང་རྟོགས་པར་འགྱུར་བ་དེ་ནི་རང་གི་དོན་ཏེ་ཤེས་པ་ཡིན་ནོ། །གལ་ཏེ་རྟོགས་པ་ནི་ཤེས་པ་ཉིད་ཡིན་པ་དེ་ལྟ་ན་ཡང་གཅིག་ཉིད་ལ་ཡང་བྱ་བ་དང་བྱེད་པ་ལས་ཐ་དད་པར་བསྟན་པ་ཡིན་ཏེ། དེས་ན་རྗེས་སུ་དཔག་པ་ནི་བྱེད་པ་ཡིན་ལ། ཁོང་དུ་ཆུད་པའི་རང་བཞིན་འབྲས་བུའི་གནས་སྐབས་ནི་རྟོགས་པ་ཡིན་ནོ། །གལ་ཏེ་སྐྱེས་བུ་ལ་ངེས་པའི་ཚུལ་གསུམ་པའི་རྟགས་ཡོད་པ་མ་ཡིན་གྱི། དེ་ལས་སྐྱེས་པའི་ཤེས་པ་ཡང་མེད་ལ། ཚུལ་གསུམ་པའི་རྟགས་བརྗོད་པ་ཡང་མེད་པ་ཡིན་ཏེ། དེས་ན་རྗེས་སུ་དཔག་པ་གང་ཞིག་བདག་ཉིད་ཀྱི་ཡིན་ལ། གཞན་གྱི་མ་ཡིན་པའམ། གཞན་གྱི་ཡིན་ལ་བདག་ཉིད་ཀྱི་མ་ཡིན་པ་དེ་ཡོད་དམ་ཅི་གང༌། འདི་ལྟར་སྒྲས་ཀྱང་རེས་འགའ་སྨྲ་བ་པོ་འདི་རྟོགས་པར་བྱེད་པ་ཡིན་ལ། རེས་འགའི་ཚེ་ནི་གཞན་ལ་སྒྲས་རྟོགས་པར་བྱ་བ་ཡིན་ནོ། །དེ་ལས་ཀྱང་ཅི་སྲིད་དུ་སྒྲ་ཡང་གཞན་དོན་ཡིན་པར་མ་ངེས་པ་མ་ཡིན་ནམ་ཞེས་དགོས་པ་ལ། བཤད་པ་ཤེས་པ་དང་བརྗོད་པའི་གོ་རིམས་བཞིན་དུ་རང་བཞིན་གང་དག་ཡིན་པ་དེ་དག་གི་ངོ་བོ་དེ་རྒྱུར་གྱུར་པའི་ལས། གཞན་དེ་ཕ་རོལ་དང་གཞན་མ་ཡིན་པ་དེ་ཉིད་ཏེ། གཞན་དག་གཞན་མ་ཡིན་པ་དེ་དག་གི་རྟོགས་པའི་རྒྱུ་རྒྱུ་མཚན་ནི་རྗེས་སུ་དཔག་པ་དེ་དག་མ་ཡིན་ནོ། །དེས་ན་དོན་འདི་ཡིན་ཏེ། ཚུལ་གསུམ་པའི་རྟགས་ལས་སྐྱེས་པའི་ཤེས་པ་གང་གི་རྒྱུད་ལ་སྐྱེས་པ་དེ་ནི་དེའི་དོན་དེ་ཉིད་དེ། དེས་ན་གཞན་རྟོགས་པ་མ་ཡིན་པའི་ཕྱིར་རོ། །དེའི་ཕྱིར་རང་བཞིན་དོན་དུ་བརྗོད་པ་ཡིན་གྱི་གང་ལ་ལྟོས་ནས་རང་གི་དོན་དུ་བརྗོད་པར་འགྱུར་བ་ཤེས་པ་འགའ་ཡང་སྐྱེས་བུ་འགའ་ལ་ངེས་པ་ཡོད་པ་ནི་མ་ཡིན་ནོ། །དེ་བཞིན་དུ་བརྗོད་པའི་རང་བཞིན་གྱི་རྗེས་སུ་དཔག་པ་སྐྱེས་བུ་ལ་ངེས་པ་ཡོད་པ་མ་ཡིན་པ་དེ་ལྟ་ན་ཡང་གཞན་གྱི་དོན་ཉིད་ཡིན་ནོ། །འདི་ལྟར་གང་ཞིག་གང་གི་དབང་དུ་བྱས་ནས་འཇུག་པ་དེ་ནི་དོན་ཡིན་པར་བརྗོད་དོ། །སྒྲ་ནི་གཞན་གྱི་དབང་དུ་བྱས་ནས་སྦྱོར་བ་ཡིན་གྱི། བདག་ཉིད་ཀྱི་ནི་མ་ཡིན་གྱི། དེས་ན་སྒྲ་གཞན་གྱི་དོན་དུ་མ་ངེས་པ་མ་ཡིན་
ནོ། །གང་གི་ཕྱིར་སྦྱོར་བ་པོ་མངོན་པར་འདོད་པའི་ཡུལ་གྱི་དོན་ལ་སྦྱོར་བར་བྱེད་པ་གཞན་ཉིད་ཡིན་པའི་ཕྱིར་རོ། །གལ་ཏེ་སྒྲ་གཞན་གྱི་དོན་ཡིན་པ་དེ་ལྟ་ན་ཡང་རྗེས་སུ་དཔག་པ་ཡིན་པ་ཉིད་ཀྱིས་རང་གི་དོན་ལས་སྒྲ་ལ་ལོགས་ཤིག་ཏུ་བརྗོད་པ་སྨྲ་བར་ནི་མི་རིགས་ཏེ། ཁྱད་པར་མེད་པའི་ཕྱིར་རོ། །དེ་ལ་དགོས་པའི་མཚན་ཉིད་ཀྱི་ཁྱད་པར་ཡོད་གྲང་ན། དེ་ལ་གནག་ཞིག་བརྗོད་པར་བྱ་བའི་རྟགས་དེས་བསྒྲུབ་པར་བྱ་བའི་དེ་ཉིད་སྒྲའི་དོན་ཀྱང་ཡིན་པའི་ཕྱིར་ཡུལ་ཁྱད་པར་ཡོད་པ་མ་ཡིན་ནོ། །འདི་ལ་རང་གི་ངོ་བོར་འགྱུར་བའི་མཚན་ཉིད་ཀྱང་ཅུང་ཟད་ཡོད་པ་མ་ཡིན་ནོ། །སྒྲ་ནི་རྗོད་པར་བྱེད་པ་ཙམ་ཡིན་པའི་ཕྱིར་འདི་ལ་མཚན་ཉིད་གཞན་ཅི་ཞིག་བརྗོད་པར་བྱ་བར་འགྱུར་རོ། །བརྗོད་པར་བྱ་བ་ལ་ལྟོས་ནས་ནི་མཚན་ཉིད་བརྗོད་པར་བྱ་བར་འགྱུར་རོ་།ཚུལ་གསུམ་པའི་རྟགས་འཆད་པ་ནི་གཞན་གྱི་དོན་གྱི་རྗེས་སུ་དཔག་པ་ཡིན་པའི་ཕྱིར་བརྗོད་པར་བྱ་བ་ཡང་རང་གི་དོན་གྱི་རྗེས་སུ་དཔག་པ་གང་ཡིན་པ་དེ་ཉིད་འབའ་ཞིག་ཏུ་ཟད་དོ། །རང་གི་དོན་གྱི་རྗེས་སུ་དཔག་པ་ནི་ཤེས་པའི་བདག་ཉིད་ཡིན་པའི་ཕྱིར་བརྗོད་པར་ནུས་པ་མ་ཡིན་གྱི་ཚུལ་གསུམ་པའི་རྟགས་ཉིད་བསྙད་པར་བྱ་བ་ཡིན་ནོ། །དེས་ན་བརྗོད་པར་བྱ་བའི་མཚན་ཉིད་ལ་ཡང་ཁྱད་པར་ཡོད་པ་མ་ཡིན་ནོ་ཞེས་ཕ་རོལ་པོ་དོགས་པ་ལ། ལན་དུ་མ་ཡིན་ཏེ་ཞེས་གསུངས་ཏེ། ཁྱད་པར་མེད་པའི་ཕྱིར་ལོགས་ཤིག་ཏུ་བརྗོད་པར་མི་བྱའོ་ཞེས་གང་སྨྲས་པ་དེ་ནི་མ་ཡིན་ཏེ། འཇུག་པ་ཐ་དད་པའི་ཕྱིར། བྱ་བའི་ཁྱད་པར་ཡོད་པའི་ཕྱིར་རོ། །བརྒྱུད་པས་ཡུལ་ཁྱད་པར་མེད་པ་ཡིན་ཡང་དངོས་ཀྱིས་འདི་དག་གི་བྱ་བ་ནི་ཐ་དད་ཡོད་པ་ཡིན་ནོ། །ཁྱད་པར་དེ་ཉིད་སྟོན་པར་བྱེད་དེ། དོན་ཏེ་ཚུལ་གསུམ་པའི་རྟགས་བརྗོད་པའི་བརྗོད་བྱ་རང་གི་དོན་གྱི་རྗེས་སུ་དཔག་པ་ཞེས་བྱ་བ་ནི་རྟགས་ཅན་བསྒྲུབ་པར་བྱ་བའི་དོན་རྟོགས་པར་བྱེད་པ་ཡིན་ལ་བསྒྲུབ་པར་བྱ་བའི་དོན་དེའི་གོ་བར་བྱེད་པའི་རྟགས་ནི་ཚུལ་གསུམ་པའི་རྟགས་བརྗོད་པར་གྲགས་པའི་སྒྲས་ཡིན་ནོ། །ཅིག་ཤོས་ནི་ཁྱད་པར་འདིས་ཐ་དད་པ་བརྗོད་པར་མི་རིགས་ཏེ། འདི་ལྟར་བསྒྲུབ་བྱའི་དབྱེ་བས་རང་བཞིན་གྱི་གཏན་ཚིགས་ཉིད་རྣམ་པ་དུ་མ་ཡིན་ཡང༌། དེ་ཙམ་གྱིས་ནི་གཏན་ཚིགས་ཀྱི་མཚན་ཉིད་ཐ་དད་པར་འགྱུར་བ་མ་ཡིན་ནོ། །དེ་ལྟར་གྱུར་ན་རྗོད་པར་བྱེད་པའི་བྱ་བའི་ཁྱད་པར་ཡོད་ཀྱང་བརྗོད་པར་བྱ་བའི་སྒོ་ནས་མཚན་ཉིད་གཞན་བརྗོད་པར་བྱར་
མེད་པའི་ཕྱིར་ལོགས་ཤིག་ཏུ་བརྗོད་པར་མི་རིགས་སོ། །འདི་སྙམ་དུ་ཚུལ་གསུམ་པའི་རྟགས་བཤད་པས་ནི་རྟོགས་པར་བྱ་བ་རྟགས་ཤེས་པར་འགྱུར་གྱི། ཚིག་ཤེས་པར་མི་འགྱུར་བ་མ་ཡིན་ནམ། དེའི་ཕྱིར་ཚིག་གི་ནི་རིམ་པ་བསྟན་པར་བྱ་བ་ཉིད་ཡིན་ནོ་ཞེས་དོགས་ན། ཅི་ལྟར་མཚན་ཉིད་བརྗོད་པ་ཉིད་ཀྱིས་ཚིག་གི་རིམ་པ་ཡང་བསྟན་པར་འགྱུར་བ་དེ་བསྟན་པའི་ཕྱིར་གོ་བར་བྱེད་པའི་མཚན་ཉིད་སྟོན་པར་བྱེད་དེ། །དུ་བ་དང་བྱས་པ་ལ་སོགས་པའི་དངོས་པོ་གང་ཕྱོགས་སམ་སྒྲ་འགའ་ཞིག་ཏུ་མངོན་སུམ་མམ་རྗེས་སུ་དཔག་པ་འགའ་ཞིག་གིས་མཐོང་བ་ངེས་པ་སྟེ། འདིས་ནི་ཕྱོགས་ཀྱི་ཆོས་ཉིད་བརྗོད་དོ། །མཐོང་བའི་དུ་བ་ལ་སོགས་པ་དེ་མེ་དང་མི་རྟག་པ་ལ་སོགས་པ་བསྒྲུབ་པར་བྱ་བ་གང་དང་དེའི་བདག་ཉིད་དང་དེ་ལས་བྱུང་བ་དག་གིས་འབྲེལ་པའོ། །འབྲེལ་པ་ཤེས་པ་ནི་དེ་ཤེས་པ་སྟེ། རྟོགས་པར་བྱེད་པའོ། །འདིས་ནི་གནོད་པར་བྱེད་པའི་ཚད་མའི་སྟོབས་ཀྱི་རྗེས་སུ་འགྲོ་ལྡོག་དག་ངེས་པ་དང༌། རྗེས་སུ་དཔག་པའི་དུས་སུ་དེ་གཉིས་དྲན་པ་ཡང་བཤད་པར་ལྟའོ། །འདི་ཐམས་ཅད་ཀྱིས་ནི་རྟོགས་པ་པོའི་གོ་བར་བྱེད་པའི་མཚན་ཉིད་ཤེས་པ་དང༌། རྗེས་སུ་དཔག་པའི་དུས་ཀྱི་དྲན་པ་བཤད་པ་ཡིན་ནོ། །འབྲེལ་པ་ཤེས་ཤིང་དྲན་པའི་རྟགས་ཆོས་ཅན་ལ་མཐོང་བ་དང་ལྡན་པའི་རྟོགས་པ་པོ་དེ་ལ་འབྲེལ་པའི་ཡུལ་གྱི་བསྒྲུབ་བྱ་དེ། རྟགས་ངེས་གང་དུ་མཐོང་བ་དེ་ཉིད་དུ་གོ་བར་བྱེད་པ་ཡིན་གྱི། ཆོས་ཅན་གཞན་དུ་ནི་མ་ཡིན་ནོ་ཞེས་དེ་ལྟར་མཚན་ཉིད་བརྗོད་པ་ལས་བརྗོད་པར་བྱ་བའི་རྟགས་ཀྱི་དངོས་པོ་རྟོགས་ཏེ། ངེས་པ་ཡིན་ནོ། །དེ་ལ་དངོས་པོ་དེ་རྟོགས་པ་ཡིན་ན་གོ་བར་བྱེད་པའི་མཚན་ཉིད་བརྗོད་པས་རྟོགས་པར་འདོད་པའི་རྗོད་བྱེད་ཀྱི་རིམ་པ་སྟེ་ཚུལ་བསྟན་པར་འགྱུར་བ་ཡིན་ནོ། །འདི་སྐད་བཤད་པ་ཡིན་ཏེ། རང་གི་བསྒྲུབ་བྱ་དང་འབྲེལ་པ་ཤེས་པའི་དོན་གང་དུ་མཐོང་བ་དེར་རྟོགས་པར་བྱེད་པ་ལ། དེ་གོ་བར་བྱེད་པ་ཡིན་ནོ་ཞེས་དེ་ལྟར་ཤེས་པ་ལ། དོན་འདི་གཞན་ལ་ཉེ་བར་སྟོན་པ་ན་རང་གི་བསྒྲུབ་བྱ་དང་འབྲེལ་པ་དང༌། ཕྱོགས་འགའ་ཞིག་དང་འབྲེལ་པའི་རང་བཞིན་ཉེ་བར་བསྟན་པར་བྱ་བ་ཡིན་ནོ་ཞེས་བྱ་བའི་ངེས་པ་འདི་ཡང་ཡོད་པ་ཡིན་ནོ། །གཞན་དུ་ཕྱིན་ཅི་ལོག་ཏུ་བརྗོད་ན་གོ་བར་བྱེད་པའི་ཆོས་རང་བཞིན་ངེས་པའི་ཡུལ་གང་ཡིན་པ་དེ་མ་བསྟན་པར་འགྱུར་བའི་ཕྱིར། མ་
བཤད་པར་འགྱུར་བའི་ཕྱིར་རོ། །ཅི་ལྟར་གོ་བར་བྱེད་པར་ཤེས་པ་དེ་ལྟར་བསྟན་པར་བྱ་སྟེ། གཞན་དུ་བསྟན་ན་ནི་གཞན་ཉིད་དུ་བསྟན་པར་འགྱུར་རོ། །གལ་ཏེ་གོ་བར་བྱེད་པའི་མཚན་ཉིད་བརྗོད་པ་གཞན་ལ་བསྒྲུབ་པར་བྱ་བ་མ་ཡིན་ནམ། འདི་ནི་འདི་ལྟར་བརྗོད་པར་བྱའོ་ཞེས་རྗོད་པར་བྱེད་པའི་རིམ་པ་མི་ཤེས་ན་ཅི་ལྟར་བསྒྲུབ་པར་བྱ་ཞེ་ན། འདི་ནི་གང་གི་ཕྱིར་གྱི་དོན་ཏེ། ཚིག་ཤེས་པ་སྒྲའི་དོན་རིག་པ་ནི་དོན་ཉིད་ཉེ་བར་བསྟན་པ་ལ་ལྟོས་པ་ཡིན་གྱི། ཅི་ལྟར་རྣམ་པ་གནག་གིས་ཤེས་པ་དེ་ཉིད་ནི་ཡང་རྟོགས་པར་བྱ་བའི་ཕྱིར་ཉེ་བར་བསྟན་པ་གཞན་ཏེ་རང་གི་ངོ་བོའི་ཡུལ་ཅན་གྱི་ཉེ་བར་བསྟན་པ་ལས། གཞན་ཕ་རོལ་པོ་དག་གིས་ཉེ་བར་བསྟན་པ་ལ་ལྟོས་པ་མ་ཡིན་ནོ། །དེའི་ཕྱིར་ཚིག་ཤེས་པ་དོན་གྱི་རང་བཞིན་ཡོངས་སུ་ཤེས་པ་ཉེ་བར་བསྟན་པ་གཞན་ལ་ལྟོས་པར་འགྱུར་གྱི། དེའི་རྗོད་པར་བྱེད་པ་ཡོངས་སུ་ཤེས་པ་ནི་མ་ཡིན་ནོ། །དོན་ནི་རང་གི་དོན་གྱི་རྗེས་སུ་དཔག་པའི་དུས་སུ་ཡོངས་སུ་བཅད་པ་ཡིན་ལ། གཞན་གྱི་དོན་གྱི་རྗེས་སུ་དཔག་པ་དེ་ནི་རྗོད་པར་བྱེད་པ་ཙམ་ཡིན་པའི་ཕྱིར་ལོགས་ཤིག་ཏུ་བརྗོད་པར་བྱ་བ་མ་ཡིན་ནོ་ཞེ་ན། སློབ་དཔོན་གྱིས་རྗེས་སུ་བརྗོད་པ་གསུངས་པ། ཉེ་བར་བསྟན་པ་ལ་ལྟོས་པ་མ་ཡིན་པ་དང༌། ཚིག་ཤེས་པ་ལ་མཚན་ཉིད་བརྗོད་པར་བྱ་བ་མ་ཡིན་པ་དེ་ལྟར་བདེན་མོད་ཀྱི་འོན་ཀྱང་ཅི་ལྟར་ཡང་དག་པའི་ཤེས་པ་ཡང་མཁས་པ་ལ་བསྟན་པའི་དོན་དུ་བརྩམས་པ་མ་ཡིན་གྱི། འོན་ཀྱང་རང་ཉིད་རྟོགས་པར་མི་ནུས་པ་དེ་དག་ལ་ཡིན་པ་དེ་བཞིན་དུ་ཚིག་ཀྱང་རང་ཉིད་བརྗོད་པར་མི་ནུས་པ་ལ་སྟོན་པ་ཡིན་ནོ། །འདི་ཉིད་རྗོད་པར་བྱེད་པ་ནི་བརྩམས་པ་གང་ཡིན་པ་ནི་བྱིས་པས་རྟོགས་པའི་རྒྱུར་ཡིན་ནོ། །ཡང་དག་པའི་ཤེས་པ་ནི་རྟོགས་པར་མི་ནུས་པ་མ་ཡིན་ནམ། སྒྲ་དོན་གྱི་འབྲེལ་པ་ཤེས་པ་དོན་ཤེས་ཀྱང་དེ་རྟོགས་པར་བྱེད་པའི་སྒྲའི་སྦྱོར་བ་མི་ཤེས་པ་ནི་ཡོད་པ་མ་ཡིན་ནོ་ཞེས་དོགས་པ་བཟློག་པའི་ཕྱིར་སློབ་དཔོན་གྱིས་མི་ཤེས་པ་སྟོན་པར་མཛད་དེ། དངོས་པོ་ཇི་ལྟ་བ་བཞིན་དུ་རྟགས་ལས་མ་འདས་པར་རྟགས་ཅན་གྱི་དོན་རྟོགས་པ་སྟེ། ཚུལ་གསུམ་པའི་རྟགས་དུ་བ་ལས་བསྒྲུབ་བྱ་རྟོགས་པ་ཡིན་ནོ། །དེ་ལྟར་རྟོགས་ཀྱང་རྟགས་དེ་བཞིན་དུ་སྨྲ་བ་བརྗོད་པ་མཐོང་ངོ༌། །གཞན་ཉིད་སྟོན་པར་བྱེད་པ་ནི་རྟགས་དེའི་ཆོས་ཏེ་ངོ་བོ་ཉིད་གང་ཡིན་པ་དེ་མ་ཁྱབ་པར་ཟིན་པ་དང༌། ལྡོག་པ་ལྷག་པ་དེ་དག་གིས་ཞེས་བྱ་བ་དེ་
ལྟ་བུར་གྱུར་པའི་མཚན་ཉིད་གསུམ་པ་ཡིན་ནོ། །གནས་པ་སྤོང་བ་དང་ལྷག་པ་སྟོན་པའི་ཕྱིར་ཏེ། རིགས་པ་ཅན་ལ་སོགས་པ་དག་རྟགས་དེའི་ཆོས་ཡོད་པ་བཏང་ནས་ལྷག་པ་དང་ལྡན་པར་སྨྲ་བ་ཡིན་ནོ། །མ་ཁྱབ་པར་སྟོན་པར་བྱེད་པ་ནི་མེད་ན་མི་འབྱུང་བ་དེའི་བདག་ཉིད་དང་དེ་ལས་བྱུང་བའི་མཚན་ཉིད་ཀྱི་འབྲེལ་པ་མི་བརྗོད་པའི་ཕྱིར་མ་ཁྱབ་པ་བརྗོད་པ་ཡིན་ཏེ། རྟགས་ནི་མེད་ན་མི་འབྱུང་བས་གོ་བར་བྱེད་པ་ཡིན་ནོ། །ལྷག་པ་སྟོན་པར་བྱེད་དེ། ཉེ་བར་སྡུད་པ་ནི་ཉེ་བར་གཏོད་པའོ། །དཔེ་ལ་ནུས་པ་མཐོང་བའི་རྟགས་ཡང་བསྒྲུབ་བྱའི་ཆོས་ཅན་ལ་སྡུད་པ་དེ་ནི་ཉེ་བར་སྡུད་པ་ཡིན་ནོ། །དེ་ཡང་མཐུན་པའི་དཔེ་ལ་ལྟོས་ནས་དེ་བཞིན་དུ་སྒྲ་ཡང་བྱས་པ་ཡིན་ནོ་ཞེས་དེ་ལྟར་བྱ་བ་ཡིན་ཏེ། དེས་ན་ཉེ་བར་གཏོད་པ་ཞེས་བརྗོད་དོ། །ཉེ་བར་སྡོམ་པ་ནི་ཉེ་བར་གཏོད་པ་ཡིན་ནོ། །བསྒྲུབ་པར་བྱ་བའི་དོན་བཅའ་བའི་དོན་ཏོ། །དེ་ཟློས་པ་ནི་མཇུག་བསྡུ་བའོ། །དེ་ཡང་ནུས་པ་མཐོང་བའི་གཏན་ཚིགས་ཆོས་ཅན་ལ་ཉེ་བར་བསྡུས་པའི་བྱ་བ་ལོག་པར་རྟོགས་པ་བཟློག་པའི་དོན་དུ་དེའི་ཕྱིར་སྒྲ་མི་རྟག་གོ་ཞེས་མཇུག་སྡུད་པའི་རང་བཞིན་ཡིན་པར་བལྟའོ། །འདི་དག་གི་བརྗོད་པ་ཡང་དེ་དག་གི་སྦྱོར་བས་ཐ་དད་པར་བརྗོད་པ་ཡིན་ནོ། །དཔེ་ལ་བརྟེན་ནས་མེད་ན་མི་བྱུང་བར་ཤེས་པའི་གཏན་ཚིགས་ཆོས་ཅན་ལ་སྔར་བསྟན་པ་ཉིད་ན་ཆོས་ཅན་དང་འབྲེལ་པ་ངེས་པ་ཡིན་ཏེ། དེ་ལ་ཉེ་བར་གཏད་པ་ཅི་ཞིག་བྱ། མེད་ན་མི་འབྱུང་བར་རབ་ཏུ་གྲུབ་པའི་གཏན་ཚིགས་ནི་རང་ཉིད་ཀྱི་བསྒྲུབ་པར་བྱ་བའི་ཡང་འགའ་ཞིག་ཡོད་པར་སྟོན་པར་བྱེད་དེ། མེད་ན་མི་འབྱུང་བའི་ཕྱིར་རོ། །དེ་ལ་གཏན་ཚིགས་ཀྱི་ཡུལ་ལ་འཁྲུལ་པ་མེད་པའི་ཕྱིར། དེ་བཟློག་པའི་དོན་དུ་མཇུག་བསྡུ་བས་ཀྱང་ཅུང་ཟད་ཀྱང་བྱན་མེད་དོ། །དེས་ན་བྱིས་པ་རྟོགས་པར་བྱ་བའི་དོན་དང༌། ལོག་པར་རྟོགས་པ་ཡང་མཐོང་བའི་ཕྱིར་བརྗོད་པར་བྱ་བའི་མཚན་ཐ་དད་པ་མེད་ཀྱང་སྒྲུབ་པར་བྱེད་པའི་རིམ་པ་བསྟན་པའི་ཕྱིར་གཞན་གྱི་དོན་གྱི་རྗེས་སུ་དཔག་པ་བརྗོད་པར་བྱ་བ་ཉིད་ཡིན་ནོ། །དེ་ལྟར་རྣམ་པར་དབྱེ་བ་བསྟན་ནས་མཚན་ཉིད་བསྟན་པར་བྱ་བའི་ཕྱིར་བཤད་པ། དེ་ལས་རང་གི་དོན་དང་གཞན་གྱི་དོན་གྱི་རྗེས་སུ་དཔག་པ་དག་གི་ནང་ནས། རང་གི་དོན་གྱི་རྗེས་སུ་དཔག་པ་ནི། ཚུལ་གསུམ་གང་ཡོད་པ་ནི་ཚུལ་གསུམ་རྟགས་ཏེ། དེ་ལས་ལྐོག་ཏུ་གྱུར་པའི་དོན་མཐོང་བ་ནི་ཤེས་པ་སྟེ། ངེས་པ་ཡིན་ནོ། །གལ་ཏེ་ཚུལ་གསུམ་པའི་རྟགས་ལས་རང་
བདག་ཉིད་ལ་ཡང་ཤེས་པ་སྐྱེ་པ་མ་ཡིན་ནམ། མོད་ལས་ལྐོག་ཏུ་གྱུར་པའི་དོན་ནི་སྨོས་པ་མ་བྱས་ཏེ། དེས་ན་ཚུལ་གསུམ་པའི་རྟགས་སྨོས་པ་ཉིད་ཀྱིས་དེ་མཐོང་བ་རྗེས་སུ་དཔག་པར་ཐལ་བར་ཅིའི་ཕྱིར་མི་འགྱུར་ཞེ་ན་སྨྲས་པ། རྟགས་ནི་གོ་བར་བྱེད་པ་ཡིན་པ། གོ་བར་བྱེད་བའི་ཡང་བསྒྲུབ་པར་བྱ་བ་དང་འབྲེལ་པ་ཤེས་ཤིང་དྲན་པ་ཡིན་ནོ། །དེ་ཉིད་ཀྱི་ཕྱིར་དྲན་པས་བར་དུ་ཆོད་པའི་རྟགས་གོ་བར་བྱེད་པ་འདོད་པ་ཡིན་ཏེ། བསྒྲུབ་བྱ་མེད་ན་མ་འབྱུང་བ་འདྲེན་པས་བར་དུ་ཆོད་པའི་ཕྱིར་རོ། །དེའི་རང་གི་ཡུལ་ཅན་གྱི་མཐོང་བ་སྐྱེས་པའི་དུས་ན་ནི་རྟགས་ཉིད་དངོས་པོ་ཉིད་ཡིན་ཏེ། ད་རུང་དུ་ཡང་རྟགས་སུ་གྲུབ་པ་ནི་མ་ཡིན་ནོ། །འབྲེལ་པ་མཐོང་བ་ཞིང་དྲན་པས་སྐྱེས་པའི་ཤེས་པ་གང་ཡིན་པ་དེ་ནི་ཤུགས་ཀྱིས་རྟགས་ཀྱིས་ཤེས་པ་ལས་གཞན་ཉིད་དུ་གྱུར་བའི་ལྐོག་ཏུ་གྱུར་པའི་ཡུལ་ཅན་དུ་གནས་སོ། །ཤུགས་ཀྱིས་ཐོབ་པ་དེ་ཉིད་སྟོན་པ་ནི་རྗེས་སུ་དཔག་པར་བྱ་བ་རྟོགས་པ་དེ་ནི་རང་གི་དོན་གྱི་རྗེས་སུ་དཔག་པ་ཡིན་ནོ་ཞེས་བྱ་བ་ཡིན་ནོ། །དེ་ལྟར་མཚན་ཉིད་བསྟན་ནས་འབྲས་བུ་ལ་ལོག་པར་རྟོགས་པ་སེལ་པར་བྱེད་དོ། །རྗེས་སུ་དཔག་པའི་འབྲས་བུའི་རྣམ་པར་རྟོགས་པ་ནི། འབྲས་བུའི་ཁྱད་པའི་ནི་མངོན་སུམ་བཞིན་དུ་ཤེས་པར་བྱ་སྟེ། དོན་དང་འདྲ་བའི་ནི་ཚད་མ་ཡིན་ལ། དོན་རྟོགས་པའི་རང་བཞིན་ནི་འབྲས་བུ་ཡིན་ནོ། །ཡུལ་ལ་ལོག་པར་རྟོགས་པ་ནི་མངོན་སུམ་གྱི་ཡུལ་གཏན་ལ་དབབ་པའི་སྐབས་སུ། དེའི་ཕྱིར་རྣམ་པར་རྟོག་པའི་ཡུལ་ནི་དོན་མེད་པ་ཡིན་ནོ་ཞེས་བརྗོད་པས་གསལ་བ་ཡིན་ནོ། །འོན་ཀྱང་འདི་ལ་རྩོད་པ་འདི་ཡོད་དེ། གལ་ཏེ་རྗེས་སུ་དཔག་པའི་རྣམ་པར་རྟག་པའི་གཟུང་བའི་གཟུང་བའི་རྟགས་པའི་དོན་ཡིན་ནའོ་ན་ཅི་ལྟར་ཚད་མ་ཡིན་ཏེ། ཚད་མ་ནི་ཞེ་ན་པར་བྱས་པའི་ཡུལ་ཐོབ་པར་བྱེད་པ་ལས་ཡིན་ན། གཟུང་བའི་དོན་ནི་དོན་མེད་པ་ཞེན་པར་བྱས་པ་ཡིན་ཏེ། དེ་ནི་ཐོབ་པར་ནུས་པ་མ་ཡིན་ནོ། །ཅི་སྟེ་ཞེན་པའི་རང་གི་མཚན་ཉིད་རྗེས་སུ་དཔག་པས་ཐོབ་པར་བྱ་བ་དེས་ན་ཚད་མ་ཡིན་ལ། འོན་ཏེ་ཅི་ལྟར་འཁྲུལ་པ་དོན་མེད་པའི་ཡུལ་ཅན་ཡིན་འཁྲུལ་པ་དང་ཚད་མ་ཡིན་ནོ་ཞེས་གཉི་ག་ལྟར་ཡང་དམ་བཅས་པ་ནི་ཡིན་ནོ་ཞེས་རྩོད་པའི་ཡུལ་ལ་ལོག་པར་རྟོགས་པའི་ལྷག་མ་བསལ་བའི་དོན་དུ་འཁྲུལ་པ་དང་ཚད་མ་ཡང་བསྟན་པའི་ཕྱིར་བཤད་པ། རྗེས་སུ་དཔག་པའི་ཤེས་པ་དེ་ནི་འཁྲུལ་ཀྱང་ཚད་མ་ཉིད་ཅེས་འབྲེལ་ཏོ། །ཅི་སྟེ་འཁྲུལ་ཞེ་ན།
དེ་མ་ཡིན་ལ་དེའི་རང་བཞིན་མ་ཡིན་པ་ལ་ཡོད་པ་མ་ཡིན་པའི་རང་བཞིན་དེར་འཛིན་པའི་ཕྱིར་ཏེ། སྒྲོ་འདོགས་པའི་ཕྱིར་རྗེས་སུ་དཔག་པ་ནི་འཁྲུལ་པ་ཡིན་ནོ། །གལ་ཏེ་འཁྲུལ་ན་འོན་ཅི་ལྟར་ཚད་མ་ཡིན་ཞེན་ན། བཤད་པ། འབྲེལ་པའི་ཕྱིར་ཏེ་འབྲེལ་པ་ལས་ཚད་མ་ཡིན་ནོ། །འཁྲུལ་པ་ཉིད་བཤད་པའི་ཕྱིར་གསུངས་པ་ནི་རང་གི་སྣང་བ་ནི་བདག་ཉིད་ཀྱི་རྣམ་པ་སྟེ། ཕྱིར་རོལ་གྱི་མེའི་རང་བཞིན་གྱི་དོན་མེད་པ་དོན་དུ་ཞེན་ནས་འཇུག་པའི་ཕྱིར་ཏེ་འཛིན་པའི་ཕྱིར་རོ། །བདག་ཉིད་ཀྱི་རང་གི་ངོ་བོ་ཕྱི་རོལ་མ་ཡིན་པ་ལ་ཕྱི་རོལ་དུ་འཛིན་པ་ཡིན་གྱི། དེ་ལ་ཕྱི་རོལ་གྱི་རང་བཞིན་ཡོད་པ་ཉིད་ནི་མ་ཡིན་ཏེ། དེའི་ཕྱིར་དོན་མེད་པ་འཛིན་པའི་ཕྱིར་ནི་འཁྲུལ་པ་ཡིན་ཡང༌། དོན་ཕྱི་རོལ་གྱི་མེ་དང་འབྲེལ་པ་དེས་ན་དོན་དེ་ལ་མི་འཁྲུལ་པ་ཡིན་ལ། མི་འཁྲུལ་པ་དེའི་ཕྱིར་ཚད་མ་ཡིན་ནོ། །འདི་ལྟར་བཤད་པ་ཡིན་ཏེ། གཟུང་བ་ལ་འཁྲུལ་པ་ཡིན་ཡང་ངེས་པར་བྱས་པ་འཇུག་པའི་ཡུལ་དང་འབྲེལ་པ་དེས་ན་ཚད་མ་ཡིན་ནོ། །རྗེས་སུ་དཔག་པ་ཕྱི་རོལ་གྱི་དོན་དང་འབྲེལ་པ་དེ་ཉིད་ལྡོག་པའི་སྒོ་ནས་བསྟན་པའི་ཕྱིར། འདི་ལྟར་ཞེས་བྱ་བ་ལ་སོགས་པ་གསུངས་སོ། །ཐ་མི་དད་པའི་ཕྱིར་ཏེ་ངོ་བོ་དང་རང་བཞིན་དག་ཐ་མི་དད་པའི་ཕྱིར་དེ་མེད་ན་རང་བཞིན་སྲིད་པ་མ་ཡིན་ནོ། །འབྲས་བུའི་བདག་ཉིད་སྒྲུབ་པར་བྱེད་པ་ནི་རྒྱུ་ཡིན་པའི་ཕྱིར་དེ་མེད་ན་མེད་པ་ཡིན་ནོ། །ཅི་ལྟར་རྒྱུ་མེད་ན་འབྲས་བུ་མི་འབྱུང་བ་དེ་བཞིན་དུ་འབྲས་བུ་དང་རང་བཞིན་དེ་དག་མེད་ན་དེ་ལས་སྐྱེས་པ་འབྲས་བུ་དང་རང་བཞིན་ལས་སྐྱེས་པའི་ཤེས་པ་མེད་པ་ཡིན་ནོ་ཞེས་འབྲེལ་ཏོ། །དེ་ལས་སྐྱེས་པའི་ཤེས་པ་ཡང་རང་གི་བསྒྲུབ་པར་བྱ་བ་ལ་མི་འཁྲུལ་པ་ཉིད་ཀྱི་ཡུལ་ཅན་ཡིན་གྱི། རྟགས་ཀྱི་རང་གི་མཚན་ཉིད་འཛིན་པ་ནི་མ་ཡིན་ནོ། །དུ་བའམ་བྱས་པ་རང་གི་ངོ་བོས་གཟུང་བ་ནི་རྟགས་མ་ཡིན་གྱི། འོན་ཀྱང་བསྒྲུབ་བྱ་མེད་ན་མི་འབྱུང་བར་གཟུང་བ་ཡིན་ནོ། །དེའི་ཕྱིར་རྟགས་བསྒྲུབ་བྱ་དང་འབྲེལ་པར་འཛིན་པ་ནི་རྟགས་ཤེས་པ་ཡིན་ནོ། །དེ་ཡང་ཇི་ལྟར་རྟགས་ལས་སྐྱེ་བ་དེ་བཞིན་དུ་རྟགས་ཅན་ལས་ཀྱང་སྐྱེ་བ་ཡིན་ཏེ། དེའི་ཕྱིར་འབྲས་བུ་རང་བཞིན་དག་གི་མེད་ན་མི་འབྱུང་བ་ཤེས་པ་ནི་བསྒྲུབ་བྱའི་རྒྱུ་ཅན་དུ་ཁྱད་པར་མེད་པ་ཡིན་ནོ། །དེ་ལས་རྗེས་སུ་དཔག་པའི་ཤེས་པ་སྐྱེ་བ་མ་ཡིན་གྱི། འོན་ཀྱང་བསྒྲུབ་པར་བྱ་བ་ལ་མི་འཁྲུལ་པ་ཉིད་དྲན་པ་ཉིད་ལས་ཡིན་ཏེ། དེའི་དྲན་པ་ཉིད་ནི་རྟགས་ཡིན་ནོ་ཞེས་བྱ་བ་ནི་རྣམ་པར་འབྲེལ་པ་འདིས་དྲན་པས་བར་དུ་ཆོད་པའི་རྟགས་རྗེས་སུ་དཔག་པ་སྐྱེད་པ་ལ་ཉེ་བར་སྦྱོར་བ་
ཡིན་ནོ་ཞེས་བརྗོད་པ་ཡིན་ནོ། །དེ་ལས་སྐྱེས་པ་དེ་ཉིད་བསྟན་པའི་ཕྱིར་བཤད་པ། དེ་ལས་བྱུང་བའི་ངོ་བོ་དང་རྒྱུ་རྟོགས་པ་གང་ཡིན་པ་དེ་མི་འབྱུང་ངོ༌། །དེ་བཞིན་དུ་མི་དམིགས་པའི་ཡང་རང་བཞིན་འབྲེལ་པ་བསྟན་པའི་ཕྱིར་བཤད་པ། དེ་བཞིན་དུ་སྣང་བ་ལྟར་རུང་བའི་དངོས་པོ་ཡོད་ན། དེ་ལས་གཞན་གྱི་རྒྱུ་མ་ཚང་བ་མེད་པ་ཅན་གྱི་མཐོང་བ་གང་ཡིན་པ་དེ་ལྡོག་པ་ཡང་རིགས་པ་མ་ཡིན་ཏེ། དངོས་པོ་ཡོད་པ་ལ་ཞེས་བྱ་བར་སྦྱར་རོ། །དེའི་ཕྱིར་དངོས་པོ་མེད་པ་དང་འབྲེལ་པ་དང་འབྲེལ་པ་སྣང་བ་མི་དམིགས་པའི་རང་བཞིན་གྱི་མཐོང་བ་ལྡོག་པ་ཡང༌། དངོས་པོ་མེད་པའམ་མེད་པའི་ཐ་སྙད་ཀྱི་ཚད་མ་ཡིན་ནོ། །གལ་ཏེ་རྗེས་སུ་དཔག་པ་དངོས་པོ་ཐོབ་པར་བྱེད་པར་འདོད་ན། འོ་ན་ནི་གང་གིས་འཁྲུལ་པ་མེད་པར་འགྱུར་པའི་དངོས་པོ་སྣང་བ་རྗེས་སུ་དཔག་པ་ཉིད་དུ་ཅི་སྟེ་མི་བརྗོད་ཅེ་ན་བཤད་པ་རྗེས་སུ་དཔག་པ་ལ་སྣང་བ་དེ་ཉིད་ནི་དོན་བྱེད་ནུས་པའི་དོན་དང་ལྡན་པ་མ་ཡིན་ཏེ། དོན་བྱེད་པར་ནུས་པ་དེ་ནི་མངོན་སུམ་གྱི་གཞན་དུ་དེ་ལྟར་མ་ཡིན་པར་གསལ་བའི་སྣང་བ་མཐོང་བའི་ཕྱིར་ཏེ་གཟུང་བའི་ཕྱིར་རོ། །འདི་སྐད་བརྗོད་པ་ཡིན་ཏེ། དངོས་པོ་གཅིག་ལ་ཕན་ཚུན་འགལ་བའི་རྣམ་པ་གཉིས་ཡོད་པ་ནི་མ་ཡིན་ནོ། །རྣམ་པ་གང་ཡང་རུང་བ་གཅིག་འཛིན་ན་ནི་རྗེས་སུ་དཔག་པའི་རྣམ་པ་དངོས་པོར་མི་འགྱུར་ཏེ། དེ་ལས་དོན་བྱ་བ་མི་འགྲུབ་བའི་ཕྱིར་རོ། །དངོས་པོའི་རྣམ་པ་ནི་འགའ་ཞིག་མངོན་སུམ་གྱིས་ཡོངས་སུ་བཅད་པ་དེ་ཉིད་ཡིན་ཏེ། དེ་ལས་དོན་བྱ་བ་གྲུབ་པས་ན་བདེན་པའི་ཕྱིར་རོ། །ཚད་མར་བསྟན་པའི་ཕྱིར་དངོས་པོ་གང་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་བརྗོད་དོ། །དངོས་པོ་གང་ཅི་ལྟ་ཞེས་བྱ་བ་ནི་མེ་ལ་སོགས་པའི་རྣམ་པར་འཛིན་པ་ལས་རྟོགས་པར་བྱ་བ་དང༌། རྟག་པའི་དངོས་པོ་ལས་བཟློག་པས་རྣམ་པར་གནས་པའི་མི་རྟག་པ་ཉིད་དོ། །དེ་ནི་ཁྱད་པར་ཅན་གྱི་ཞེན་པས་རྟོགས་པར་བྱ་བ་དེ་འདྲ་བའི་རྟགས་གང་ཡིན་པ་དེའི་སེམས་ཀྱི་སྟེ། བསྒྲུབ་པར་བྱ་བ་ལ་མི་འཁྲུལ་པར་འཛིན་པ་དེའི་རྒྱུ་ཡིན་ནོ། །དེ་ལས་ཁྱད་པར་ཅན་གྱི་ཞེན་པའི་ཡུལ་གྱི་རྒྱུ་དང་རང་བཞིན་དེ་ལྟ་བུ་ལ་རྟགས་ཅན་བློ་རྗེས་སུ་དཔག་པའི་ཤེས་པ་རྟགས་ཀྱི་སེམས་ལས་སྐྱེ་བ་ཡིན་ནོ། །འདི་ལྟར་གྱི་སྒྲ་ནི་གང་གི་ཕྱིར་དོན་ཡིན་ལ། དེའི་ཕྱིར་ཞེས་ཀྱང་སྨོས་པ་དེས་ན་འདི་ལྟར་འབྲེལ་པ་ཡིན་ཏེ། གང་གི་ཕྱིར་རིམ་པ་འདིས་རྟགས་དང་རྟགས་ཅན་གྱི་བློ་སྐྱེ་བ་དེའི་ཕྱིར་དེ་
ལྟར་བརྒྱུད་པ་ཡིན་ནོ། །བརྒྱུད་པ་དེས་ན་གཉི་ག་ཡང་བསྒྲུབ་པར་བྱ་བའི་དོན་དང་འབྲེལ་པ་ཡིན་ནོ། །གང་གི་ཕྱིར་དེས་ན་སྐྱེ་བའི་རིམ་པ་འདི་ཡིན་པ་དེའི་ཕྱིར་གཉི་ག་ཡང་བརྒྱུད་ནས་བསྒྲུབ་བྱ་དང་འབྲེལ་པ་ཡིན་ནོ་ཞེས་བྱ་བའི་དོན་ཏོ། །རྟགས་དང་རྟགས་ཅན་གྱི་བློའི་ཡུལ་གྱི་དངོས་པོ་དང་འབྲེལ་པའི་རྒྱུའི་ཕྱིར་རོ། །དངོས་པོ་དེར་སྣང་བ་གང་ཡིན་པ་དེས་སྟོན་པ་ཡང་སླུ་བ་ཉིད་མ་ཡིན་གྱི། གང་གི་ཕྱིར་འདི་དག་དེ་ལྟར་སྐྱེ་པ་ཡིན་པ་དེའི་ཕྱིར་བརྒྱུད་ནས་དངོས་པོ་དང་འབྲེལ་པ་ཡིན་ལ། འབྲེལ་པ་དེས་ན་དངོས་པོ་སྣང་བས་སྟོང་པ་ཡིན་ཡང་མི་སླུ་བ་ཡིན་ཏེ། དེས་ན་ཚད་མ་ཡིན་ནོ། །གལ་ཏེ་ཇི་ལྟར་ཞེན་པའི་དངོས་པོ་ཐོབ་པར་བྱེད་པ་མི་བསླུ་བ་མ་ཡིན་ནམ་རྟགས་ཀྱི་ཤེས་པས་ངེས་པ་ནི་རྟགས་ཡིན་ན། དེ་ཅི་ལྟར་རྟགས་ཀྱི་བློ་བསྒྲུབ་བྱའི་དོན་ལ་མི་སླུ་བ་ཡིན། གཞན་ཡང་དེ་ལྟར་རྟགས་ཅན་གྱི་བློའི་ཡུལ་ལ་མི་སླུ་བར་བརྗོད་པའི་སྐབས་ཡིན་ཏེ། དེའི་ཕྱིར་རྟགས་ཀྱི་བློ་མི་སླུ་བར་བརྗོད་པས་ཅི་ཞིག་བྱ་ཞེ་ན། དེ་ལྟར་ནི་མི་རིགས་ཏེ། གང་གི་ཕྱིར་བསྒྲུབ་པར་བྱ་བ་ལ་མི་འཁྲུལ་པར་འཛིན་པ་ནི་རྟགས་ཤེས་པར་གཟུང་བར་བྱ་བ་ཡིན་ལ། དེ་ཡང་ཅི་ལྟར་རྟགས་ཀྱི་ཡུལ་ཅན་ཡིན་པ་དེ་བཞིན་དུ་རྟགས་སྲིད་པའི་རྒྱུ་མཚན་བསྒྲུབ་པར་བྱ་བའི་དངོས་པོའི་རྒྱུ་མཚན་ཅན་ཡང་ཡིན་ནོ། །དེའི་ཕྱིར་རྟགས་ཀྱི་ཤེས་པ་ནི་མི་འཁྲུལ་པའི་ཡུལ་བསྒྲུབ་པར་བྱ་བ་ངེས་པ་ཁོ་ན་སྟེ། རྟགས་མི་འཁྲུལ་པར་རྟོགས་པ་ནི་དེ་ངེས་པ་མེད་ན་མེད་པ་ཡིན་པའི་ཕྱིར་རོ། །མི་འཁྲུལ་པའི་ཤེས་པ་མི་སླུ་བའི་ཕྱིར་ན་དེ་སྔོན་དུ་འགྲོ་བ་ཅན་གྱི་ཤེས་པ་ཡང་མི་བསླུ་བ་ཡིན་ཏེ། འདི་ལྟར་མེད་ན་མི་འབྱུང་བར་འཛིན་པ་ལ་འཁྲུལ་པར་གྱུར་ན་ནི། དེ་སྔོན་དུ་འགྲོ་བ་ཅན་གྱི་རྗེས་སུ་དཔག་པར་བྱ་བའི་ཤེས་པ་མི་འཁྲུལ་པར་འཐད་པ་ཡིན་ནོ། །དེའི་ཕྱིར་འདི་འདྲ་བའི་རྟགས་ཉིད་ནི་རྒྱུ་མཚན་ཡིན་ལ། དེ་མེ་འཁྲུལ་པས་ནི་རྗེས་སུ་དཔག་པ་འཁྲུལ་པ་མེད་པ་ཡིན་ནོ་ཞེས་བསྟན་པའི་དོན་དུ་རྟགས་ཀྱི་ཤེས་པ་ཡང་དངོས་པོ་ལ་མི་སླུ་བ་ཉིད་དུ་བརྗོད་པ་ཡིན་ན། །གང་གིས་ན་རྟགས་ཉིད་དངོས་པོར་བརྗོད་པར་འགྱུར་བརྟགས་ཀྱི་དངོས་པོ་ཉིད་ལས་ནི་ཤེས་པ་བརྒྱུད་ནས་སྐྱེས་པ་མ་ཡིན་ཏེ། དེས་ན་མི་འཁྲུལ་བ་འཛིན་པ་རྟགས་ཀྱིས་ཤེས་པར་འདོད་པ་ཡིན་ནོ། །དངོས་པོ་ཉམས་སུ་མྱོང་བའི་བག་ཆགས་ཀྱིས་བསྐྱེད་པའི་གཟུང་བའི་རྣམ་པ་ཅན་ཉིད་ཀྱིས་རྣམ་པར་
རྟོག་པ་ཐམས་ཅད་དངོས་པོ་དང་འབྲེལ་པ་ཡིན་ཡང༌། དངོས་པོ་དང་འབྲེལ་པའི་རྟགས་མཐོང་བ་མེད་ན་མི་འབྱུང་བ་ཉིད་ཐུན་མོང་མ་ཡིན་པའི་དངོས་པ་དང་འབྲེལ་པ་འདི་ནི་རྗེས་སུ་དཔག་པའི་ཚད་མའི་རྒྱུ་མཚན་དུ་བཤད་པ་ཡིན་ནོ། །འོན་གལ་ཏེ་མི་སླུ་བ་ཡིན་ན་འཁྲུལ་པ་ཉིད་དུ་ཇི་ལྟར་རྣམ་པར་གཞག་ཆེན། དེའི་ཕྱིར་བཤད་པ། དེ་དངོས་སླུ་བྱེད་ཉིད་མིན་ཡང༌། །མི་སླུ་བ་ཉིད་ཡིན་ན་ཡང་རྟགས་ཀྱི་བློ་དེ་འཁྲུལ་པར་རྣམ་པར་གཞག་པ་བྱས་པ་ཡིན། ཅི་ལྟར་འཁྲུལ་པ་ཡིན་ཞེ་ན། དེའི་ངོ་བོས་སྟོང་བའི་ཕྱིར་རོ། །གལ་ཏེ་ཡང་སྔོན་པོའི་ཤེས་པ་སེར་བོས་སྟོང་བ་དེ་ལྟ་ན་ཡང་ལ་འཁྲུལ་བ་ནི་མ་ཡིན་ཏེ། སེར་པོར་མ་ཞེན་པའི་ཕྱིར་རོ། །རྟགས་རྣམས་ཀྱི་ཤེས་པའི་འདི་ནི་མེའི་རང་བཞིན་གྱིས་སྟོང་བ་ལ། དེའི་ངོ་བོར་ཞེན་པ་ཡིན་ཏེ། གཏན་ཚིགས་དེའི་ཕྱིར་འཁྲུལ་པ་ཉིད་དུ་རྣམ་པར་གཞག་པ་ཡིན་ནོ། །གལ་ཏེ་གང་ཞིག་མེད་པའི་ངོ་བོ་ཉིད་འཛིན་པར་ནི་མི་སླུ་བ་མ་ཡིན་ཏེ། དཔེར་ན་འདྲ་བ་ལ་སོགས་པའི་ཤེས་པ་བཞིན་ནོ། །རྗེས་སུ་དཔག་པའི་ཤེས་པ་ཡང་འཁྲུལ་པ་ཡིན་ཏེ། དེས་ན་མི་སླུ་བ་མ་ཡིན་ནོ། །གཞན་ཡང་གང་ཞིག་མ་བཟུང་བ་དེ་ཞེན་པར་བྱས་པ་མ་ཡིན་པ་དེས་ན་དེ་ཐོབ་པར་བྱ་བ་མ་ཡིན་ཏེ། དཔེར་ན་བ་ལང་གི་ཤེས་པས་རྟ་བཞིན་ནོ། །དེ་བཞིན་དུ་རང་གི་མཚན་ཉིད་ཀྱང་གཟུང་བ་མ་ཡིན་ནོ། །དེས་ན་ཐོབ་པར་བྱ་བ་མ་ཡིན་ནོ། །ཐོབ་པར་བྱེད་པ་ཡིན་པའི་ཕྱིར་ནི་དེ་འཛིན་པར་བྱེད་པ་ཡིན་ལ། འཛིན་པར་བྱེད་པ་ཡིན་པའི་ཕྱིར་ནི་མ་འཁྲུལ་པ་ཉིད་ཡིན་ནོ་ཞེས་དེ་ལྟར་དོགས་པ་ལ་ལེན་གདབ་པའི་ཕྱིར། ནོར་བུ་སྒྲོན་མའི་འོད་དག་ལ་ཞེས་བྱ་བ་ལ་སོགས་པ་དཔེ་འཆད་དོ། །ནོར་བུ་དང་སྒྲོན་མའི་འོད་ཀྱི་ཡུལ་དག་ལ། ནོར་བུའི་བློ་བྱེད་པར་གྱུར་པས་མངོན་དུ་རྒྱུག་པའི་སྐྱེས་བུ་དག །ལོག་པའི་ཤེས་པ་སྟེ་སླུ་བར་ཁྱད་པར་མེད་ཀྱང་ངོ༌། །ནོར་བུའི་འོད་དང་མར་མེའི་འོད་ལ་ནོར་བུར་ཤེས་པ་གང་ཡིན་པ་དེ་དག་ལོག་པའི་ཤེས་པ་སླུ་བ་ཉིད་དུ་ནི་ཁྱད་ཡོད་པ་མ་ཡིན་ཏེ། གཉི་གས་ཀྱང་ཞེན་པར་བྱས་པའི་ཡུལ་མི་ཐོབ་པའི་ཕྱིར་རོ། །འདི་ལྟར་སྒྲོན་མའི་འོད་ལ་ནོར་བུར་ཤེས་པ་དོན་བྱེད་ནུས་པ་ཐོབ་པའི་རྒྱུ་མཚན་ཉིད་གཏན་མ་ཡིན་པ་དེ་བཞིན་དུ། ནོར་བུའི་འོད་ལ་ནོར་བུར་འཛིན་པ་ནི་མ་ཡིན་ཏེ། འོན་ཀྱང་འདིར་རང་གི་ཡུལ་ཐོབ་པར་བྱེད་པ་མ་ཡིན་ཡང་བརྒྱུད་པས་ནོར་བུ་དང་འབྲེལ་པའི་ཕྱིར་ཐོབ་པར་བྱེད་པའི་ཤེས་པ་
གཞན་གྱི་རྒྱུ་ཡིན་པ་ན་ནོར་བུ་ཐོབ་པའི་རྒྱུར་འགྱུར་པ་ཡིན་ནོ། །དེས་ན་དོན་བྱེད་པ་ལ་ཁྱད་པར་ཡོད་པ་ཡིན་ནོ། །ཅི་ལྟར་འདི་དག་རང་གི་ཡུལ་ལ་སླུ་བ་ཁྱད་པར་མེད་ཀྱང་དོན་བྱེད་པར་ནུས་པ་ཐོབ་པའི་རྒྱུ་མཚོན་གྱི་ཤེས་པའི་རྒྱུ་མཚན་ཡིན་པ་དང་མ་ཡིན་པས་ན་ཁྱད་པར་ཡོད་པ་ཡིན་ཏེ། གཅིག་རྒྱུད་ནས་ནོར་དུ་དང་འབྲེལ་པའི་ཕྱིར་རོ། །དེ་བཞིན་དུ་རྗེས་སུ་དཔག་པ་དང་དེར་སྣང་བ་དག་ཇི་བཞིན་དོན་ཅན་མ་ཡིན་ཡང༌། དོན་མེད་པ་ཅན་གཟུང་བའི་རྣམ་པ་ལ་འཁྲུལ་པ་ཡིན་ཡང༌། རྗེས་སུ་དཔག་པ་ནི་དོན་བྱེད་པ་དང་རྗེས་སུ་འབྲེལ་པས་ན་ཚད་མ་ཉིད་དོ། །དེ་ལ་ནི་ཅི་འདྲ་བ་སྒྲོ་བཏགས་པ་བྱས་པ་དེ་འདྲ་བ་ཐོབ་པར་བྱེད་པ་ཡིན་ཏེ། རྟགས་ཀྱིས་བར་དུ་ཆོད་པས་དངོས་པོ་དེ་དང་འབྲེལ་པའི་ཕྱིར་རོ། །ཅིག་ཤོས་ནི་ཐོབ་པར་བྱེད་པ་མ་ཡིན་ཏེ། དེ་ནི་སྒྲོ་བཏགས་པ་དང་འདྲ་བའི་ཕྱི་རོལ་དང་འབྲེལ་པ་མེད་པའི་ཕྱིར་རོ། །དེས་ན་དོན་འདི་ཡིན་ཏེ། ཇི་སྙེད་དོན་མེད་པ་འཛིན་པར་མཚུངས་པའི་ཤེས་པ་དེ་ཐམས་ཅད་ངེས་པའི་དོན་ཐོབ་པར་བྱེད་པ་ལ་ཡང་མཚུངས་པར་མི་རིགས་ཏེ། ཅི་ལྟར་ནོར་བུ་དང་སྒྲོན་མའི་འོད་ཀྱི་ཡུལ་དག་ལ་སླུ་བ་ཁྱད་མེད་ཀྱང་རྒྱུད་ནས་འབྲེལ་པ་དང་མ་འབྲེལ་པ་དག་གི་ཐོབ་པའི་རྒྱུ་མཚན་ཡིན་པ་དང་མ་ཡིན་པ་དེ་བཞིན་དུ་གཟུང་བའི་དོན་འཁྲུལ་པར་ཁྱད་པར་མེད་ཀྱང་འབྲེལ་པ་དག་མ་འབྲེལ་པ་དག་གིས་ནི་རྗེས་སུ་དཔག་པ་གཅིག་པུ་ཉིད་སྒྲོ་བཏགས་དེ་འདྲ་བ་དངོས་སུ་ཐོབ་པར་བྱེད་པ་ནི་ཚད་མ་ཡིན་ལ། ཅིག་ཤོས་ནི་མ་ཡིན་ནོ། །དེའི་ཕྱིར་གང་གཞིག་མེད་པ་འཛིན་པ་དེ་ནི་མེད་པ་འཛིན་པ་གཞན་དག་ལས་ཁྱད་པར་མེད་པ་ཡིན་ཏེ་ཞེས་གང་བརྗོད་པ་དེ་འདིས་མ་ངེས་པ་ཡིན་ནོ། །མ་བཟུང་བ་གང་ཡིན་པ་དེ་ཉིད་ངེས་པ་མ་ཡིན་ནོ་ཞེས་བརྗོད་པ་དེ་ཡང་འདི་ཉིད་ཀྱིས་འཁྲུལ་པ་དང་བཅས་པ་ཡིན་ཏེ། འདི་ལྟར་ནོར་བུར་རྟོགས་པ་ཡིན་གྱི་གཟུང་བ་ནི་མ་ཡིན་པ་དེ་བཞིན་དུ་རྣམ་པར་རྟོག་པས་ཀྱང་མ་བཟུང་བའི་རང་གི་མཚན་ཉིད་ངེས་པ་ཡིན་ནོ། །གལ་ཏེ་དོན་བྱེད་པ་མི་འཛིན་ན་ཇི་ལྟར་རང་གི་མཚན་ཉིད་ངེས་པ་ཡིན་ཞེས་བྱ་བ་འདི་བརྗོད་དགོས་སོ་ཞེ་ན། བརྗོད་པ། ཤེས་པ་དེ་ནི་བདག་ཉིད་ཀྱི་རྣམ་པ་ལ་མེ་མ་ཡིན་པ་ལས་ལྡོག་པ་དང༌། ཡུལ་གཞན་དང་འབྲེལ་པ་ལས་ལྡོག་པ་མངོན་པར་འདོད་པའི་ཡུལ་གྱི་མེའི་རང་བཞིན་དུ་སྒྲོ་འདོགས་པ་ཡིན་ནོ། །དེས་ན་ཅི་འདྲ་བ་སྒྲོ་བཏགས་པ་རང་གི་མཚན་ཉིད་ཀྱང་དེ་འདྲ་བ་ཉིད་ཡིན་ཏེ། དེའི་ཕྱིར་སྒྲོ་
བཏགས་པའི་དོན་ཉིད་ངེས་པ་ན་རང་གི་མཚན་ཉིད་ངེས་པ་ཡིན་གྱི། རང་གི་མཚན་ཉིད་ངེས་པ་ཞེས་བྱ་བ་སྒྲོ་འདོགས་པ་ལས་བྱ་བ་གཞན་དུ་གྱུར་བ་མ་ཡིན་ནོ། །རང་གི་མཚན་ཉིད་དེ་ཡང་གང་ལ་ཇི་ལྟར་ངེས་པ་ཡོད་པ་དེ་ལ་འཇུག་པས་དེ་ཐོབ་པར་བྱེད་པ་ཡིན་པའི་ཕྱིར་ཚད་མ་ཡིན་ཏེ། དཔེར་ན་རྟགས་མཐོང་བ་ལས་སྐྱེས་པའི་ཤེས་པ་བཞིན་ནོ། །ཤེས་པ་གཞན་ནི་ཚད་མ་མ་ཡིན་གྱི་དེ་ཉིད་ཚད་མ་ཡིན་ནོ། །དེའི་ཕྱིར་དེ་ལྟར་ནོར་བུའི་ཤེས་པ་སླུ་བ་ཡིན་ཡང་དངོས་པོ་དང་འབྲེལ་པའི་ཕྱིར་བརྒྱུད་པས་བྱས་པའི་ཐོབ་པའི་རྒྱའི་དངོས་པོས་སླུ་བར་བྱེད་པ་གཞན་དག་ལས་ཁྱད་པར་ཡོད་པ་ཅི་ལྟ་བ་དེ་དེ་ལྟར་ལོག་བར་འཛིན་པ་ཉིད་དུ་ཁྱད་པར་མེད་ཀྱང་རྗེས་སུ་དཔག་པ་ནི་དངོས་པོ་དང་འབྲེལ་པའི་ཕྱིར་མི་སླུ་བ་ཉིད་ཀྱིས་རྗེས་སུ་དཔག་པ་ལྟར་སྣང་བ་ལས་ཁྱད་པར་དུ་གྱུར་བ་ཡིན་ནོ་ཞེས་བྱ་བའི་དོན་འདི་འདིར་འདོད་པ་ཡིན་ནོ། །གཞན་དག་ནོར་བུའི་འོད་ལ་ནོར་བུར་ཤེས་པ་ནི་རྗེས་སུ་དཔག་པར་དགོངས་ནས་སློབ་དཔོན་གྱིས་ཉེ་བར་བཀོད་པ་ཡིན་ནོ་ཞེས་ཟེར་བ་དེ་ནི་མི་རིགས་ཏེ། གང་གི་ཕྱིར་གཟུང་བའི་རྣམ་པ་ལ་ཕྱིན་ཅི་ལོག་པ་དེ་ནི་སླུ་བ་ཉིད་ཡིན་ཏེ། དཔེར་ན་རྗེས་སུ་དཔག་པ་ལྟར་སྣང་བ་བཞིན་ནོ་ཞེས་དེ་ལྟར་རྗེས་སུ་དཔག་པ་མ་ལུས་པ་ལ་བསྙོན་པ་ལ་རྗེས་སུ་དཔག་པ་ཅུང་ཞིག་ནི་གྲུབ་ལ་གཞན་དག་མ་གྲུབ་པར་ཅི་ལྟར་འགྱུར་། འདི་དོན་མེད་པ་འཛིན་པ་དང་མི་སླུ་བ་ཉིད་དུ་ནི་གཞན་ལས་ཁྱད་པར་ཡོད་པ་མ་ཡིན་ནོ། །ཅི་ལྟར་ནོར་བུར་ཤེས་པ་ལས་ནོར་བུ་ཐོབ་པ་དེ་བཞིན་དུ་བ་ལས་སྐྱེས་པ་མེ་ཤེས་པ་ལས། མེ་ཐོབ་པ་འཇིག་རྟེན་ན་གྲགས་པ་ཡིན་ཏེ། དེའི་ཕྱིར་གང་གིས་འདི་གཞན་གྱི་དཔེར་འགྱུར་བ་འདི་རྗེས་སུ་དཔག་པ་གཞན་དག་ལས་གྲགས་པས་བྱས་པའི་ཁྱད་པར་ཡང་ཡོད་པ་མ་ཡིན་ནོ། །འདི་ནི་སློབ་དཔོན་རྗེས་སུ་དཔག་པར་བཞེད་པ་མ་ཡིན་ནོ། །གཞན་ཡང་འདི་ལྟར་རྗེས་སུ་དཔག་པ་ནི་མེད་ན་མི་འབྱུང་བར་ངེས་པ་སྔོན་དུ་འགྲོ་བ་ཅན་ཡིན་ན། འདི་ནི་ནོར་བུའི་འོད་ལ་ནི་ནོར་བུའི་འོད་ཉིད་དུ་ངེས་པ་མེད་དེ། དེས་ན་འདི་ཅི་ལྟར་རྗེས་སུ་དཔག་པ་ཡིན། འདི་ལྟར་མིག་ནི་རང་བཞིན་གྱིས་མ་མཐོང་བར་དོན་གསལ་བར་བྱེད་པ་ཡིན་ལ། སྒྲོན་མ་ནི་རང་བཞིན་གྱིས་མཐོང་བ་ན་དོན་གསལ་བར་བྱེད་པ་ཡིན་གྱི། འབྲས་བུ་ནི་ངོ་བོ་ཉིད་ཁོ་ནས་མཐོང་ངམ་མ་མཐོང་ཡང་རུང་སྟེ། ལྐོག་ཏུ་གྱུར་པའི་དོན་རྟོགས་པའི་རྒྱུ་མ་ཡིན་ནོ། །དེས་ན་ལྐོག་ཏུ་གྱུར་པ་
རྟོགས་པར་བྱེད་པ་ནི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ལ་ལྟོས་པ་ཡིན་ཏེ། དེའི་ཕྱིར་རྟགས་ཀྱི་ལྐོག་ཏུ་གྱུར་བ་རྟོགས་པའི་རྒྱུ་མཚན་ནི་འདི་ཁོ་ན་ཡིན་ཏེ། དེ་མེད་ན་མི་འབྱུང་བ་ཉིད་ངེས་པ་གང་ཡིན་པའོ། །དེ་ཉིད་ཀྱི་ཕྱིར་ཤེས་པར་བྱེད་པའི་བྱེད་པ་ལ་ཐ་དད་པ་ཡིན་ནོ། །འདི་ལྟར་མེད་ན་མེད་པ་རྣམ་པ་ཐམས་ཅད་དུ་མ་ངེས་པར་ནི་དུ་བ་མེ་རྟོགས་པར་བྱེད་པ་མ་ཡིན་གྱི། ཕྱོགས་འགའ་ཞིག་ཏུ་དུ་བ་མེའི་འབྲས་བུ་ཉིད་དུ་གཟུང་བ་འདི་ཉིད་མེ་རྟོགས་པར་བྱེད་པ་ཡིན་ནོ། །དེས་ན་གཏན་ཚིགས་བསྒྲུབ་པར་བྱ་བ་དང་འབྲེལ་པའི་རང་བཞིན་དུ་དེས་ན་བསྒྲུབ་པར་བྱ་བའི་དོན་རྟོགས་པར་འགྱུར་བ་ཡིན་གྱི། གོ་བར་བྱེད་པའི་དངོས་པོ་གཞན་ཡོད་པ་ནི་མ་ཡིན་ནོ། །ཤུགས་ཀྱིས་འདི་ནི་མེ་ཡོད་དོ་ཞེས་བྱ་བར་འགྱུར་རོ་ཞེས་བྱ་བ་དང༌། སྒྲུབ་བྱེད་ཡན་ལག་མ་གྲུབ་པ་ལ་ཞེས་བྱ་བ་དང༌། རྟགས་ནི་རྗེས་སུ་འགྲོ་བ་དང་ལྡོག་པ་ལ་ལྟོས་པ་ཡིན་ནོ་ཞེས་གང་འཆད་པར་འགྱུར་རོ། །རྟགས་མི་འཁྲུལ་པར་འཛིན་པ་ནི་རྣམ་པ་གཉིས་ཏེ། གཅིག་ནི་ཆོས་ཅན་ལ་མི་ལྟོས་པར་ཁྱབ་པ་སྤྱིར་འཛིན་པ་ཡིན་ལ། གཞན་ནི་ཕྱོགས་ཀྱི་ཆོས་བཟུང་བ་ན་བཟུང་ཟིན་པ་ཉིད་ཀྱི་མི་འཁྲུལ་པ་གང་ཡིན་པ་དྲན་པ་སྟེ། བཟུང་ཟིན་པའི་མ་འཁྲུལ་པ་མ་དྲན་ན་ནི་བསྒྲུབ་བྱ་རྟོགས་པ་མེད་པ་ཕྱིར་རོ། །འདི་ལྟར་དུ་བ་མཐོང་ནས་འདི་ནི་ཐམས་ཅད་དུ་མེ་ལས་སྐྱེས་པའི་ཕྱིར་འདིར་ཡང་མེ་ལས་སྐྱེ་བ་ཡིན་ནོ་ཞེས་རྟོགས་པར་བྱེད་དོ། །ཐམས་ཅད་དུ་མེ་ལས་སྐྱེ་བ་དྲན་པ་གང་ཡིན་པ་འདི་ནི་རྟགས་ཤེས་པ་ཡིན་ལ། འདིར་ཡང་མེས་བསྐྱེད་པ་ཡིན་ནོ་ཞེས་བསྒྲུབ་བྱའི་ཆས་ཅན་ལ་མི་འཁྲུལ་བ་ཉིད་དྲན་པ་གང་ཡིན་པ་འདི་ཉིད་ནི་ལྐོག་ཏུ་གྱུར་བའི་དོན་རྟོགས་པ་ཡིན་ནོ། །དེ་ཡང་སྤྱིར་ཁྱབ་པ་འཛིན་པ་སྔོན་དུ་འགྲོ་བ་ཅན་ཡིན་ནོ། །དེས་ན་འདི་སྐད་དུ་རྟགས་ཤེས་པ་ནི་རྟགས་ཅན་ཤེས་པའི་རྒྱུ་ཡིན་ནོ་ཞེས་བརྗོད་པ་ཡིན་ཏེ། སྤྱིར་མི་འཁྲུལ་པར་འཛིན་པ་ནི་ཆོས་ཅན་ལ་མི་འཁྲུལ་པ་དྲན་པའི་ཡན་ལག་ཡིན་ནོ་ཞེས་བྱ་བའི་དོན་ཏོ། །འོ་ན་འདི་སྙམ་དུ་འདི་ནི་གདོན་མི་ཟ་བར་ནོར་བུའམ་ནོར་བུའི་འོད་ཡིན་པ་དེའི་ཕྱིར་གོ་སྐབས་འདི་ན་ནོར་བུ་ཡོད་པ་ཡིན་ནོ་ཉམ་པའི་ཤེས་པ་སྐྱེ་བ་དེ་ཇི་ལྟར་ཞེ་ན། དེ་ཡང་རྗེས་སུ་དཔག་པ་མ་ཡིན་ཏེ། འདི་ལྟར་འདི་ནི་གདོན་མི་ཟ་བར་ལྷ་སྦྱིན་ནམ་མཆོད་སྦྱིན་ཡིན་ནོ་ཞེས་ཤེས་པ་ན། ལྷ་སྦྱིན་ཡང་ཡོད་པ་དང་མེད་པར་ཐེ་ཚོམ་ཟ་བར་རིགས་པ་ཡིན་ལ་མཆོད་སྦྱིན་
ཡང་ཡིན་ནོ། །གང་གི་ཚེ་ལྷ་སྦྱིན་ཡིན་པ་དེའི་ཚེ་ནི་མཆོད་སྦྱིན་མེད་པ་ཡིན་ལ། གང་གི་ཚེ་མཆོད་སྦྱིན་ཡིན་པ་དེའི་ཚེ་ལྷ་སྦྱིན་མེད་པ་ཡིན་ནོ། །དེ་བཞིན་དུ་འདིར་ཡང་ནོར་བུ་དང་ནོར་བུའི་འོད་ཡོད་པ་དང་མེད་པར་བརྟགས་པ་ཡིན་ཏེ། དེས་ན་སྣང་བའི་དོན་ལ་ནོར་བུ་ཐེ་ཚོམ་ཟ་ལ། ནོར་བུའི་འོད་དུ་ཡང་ཚོམ་ཟ་བ་ཡིན་ནོ། །དེའི་ཕྱིར་ཐེ་ཚོམ་ཟ་བའི་མ་གྲུབ་པའི་གཏན་ཚིགས་ལྟར་སྣང་བ་ཡིན་ལ། གཏན་ཚིགས་ལྟར་སྣང་བ་ལས་ནི་དོན་གྲུབ་པ་མ་ཡིན་ནོ། །དེ་བཞིན་དུ་འདི་ན་ནོར་བུ་ཡོད་དོ་སྙམ་བའི་ཤེས་པ་གང་ཡིན་པ་དེ་ཡང་སྣང་བའི་ནོར་བུའི་འོད་ལ་ནོར་བུར་ཞེན་པ་ན། ཟུར་གཅིག་ལ་ཕྱོགས་གཞན་ན་ཡོད་པའི་ནོར་བུ་ངེས་པའི་པའི་ཕྱིར་འདི་ནོར་བུ་ཡིན་ནམ་འོན་ཏེ་ཡུལ་གཞན་ན་ཡོད་ཅེས་ཆ་གཉིས་ཀ་འཛིན་པའི་ཐེ་ཚོམ་ཉིད་དོ། །འདིའི་ཡུལ་ནི་དངོས་པོ་དང་དངོས་པོ་མེད་པར་བརྟགས་པ་ཡིན་ལ། དེ་འདྲ་བ་ནི་འགའ་ཡང་ཡོད་པ་མ་ཡིན་ན། གང་ཞིག་ཐོབ་པར་བྱེད་པས་ཤེས་པའི་འདི་ཚད་མར་འགྱུར། དངོས་པོ་ནི་གཅིག་ཉིད་དུ་ཡོད་པ་འམ་མེད་པར་འགྱུར་གྱི། རྒྱུ་གཉི་གའི་བདག་ཉིད་ནི་མ་ཡིན་ནོ། །གང་གི་ཕྱིར་ཐོབ་པའི་ནོར་བུ་ནི་ཡོད་པ་ཉིད་དུ་ངེས་པ་ཡིན་ལ། ཤེས་པ་འདིས་ནི་ཡོད་པར་མ་ངེས་པར་གཟུང་བ་ཡིན་པ་དེའི་ཕྱིར་གང་ཞིག་དེས་ངེས་པ་དེ་ནི་ཐོབ་པ་མ་ཡིན་ནོ། །མ་ངེས་པའི་དོན་ལ་ལྟོས་ནས་ཀྱང་ཚད་མར་འགྱུར་བ་ནི་མ་ཡིན་ཏེ། ངེས་པར་བྱས་ནས་འདུག་པ་ན་ཞེས་བཤད་པ་དང༌། རྣམ་འགྲེལ་ལས་ཀྱང་བསམ་པ་ལ་སླུ་བ་མེད་པའི་ཕྱིར་ཚད་མ་ཡིན་ནོ་ཞེས་བཤད་པ་ཡིན་ནོ། །ཐེ་ཚོམ་ནི་རྗེས་སུ་དཔག་པ་མ་ཡིན་ནོ། །འདི་ནི་ཚད་མ་གཞན་ཡང་མ་ཡིན་ཏེ། འདི་ལྟར་ཉེ་བར་བསྟན་པའི་འཇུག་པའི་ཡུལ་ཐོབ་པར་བྱེད་པ་ཤེས་པ་ནི་ཚད་མ་ཡིན་ན། འདིས་བསྟན་པའི་འཇུག་པའི་ཡུལ་ནི་ཐོབ་པར་བྱ་བ་མ་ཡིན་ནོ། །འདི་ལྟར་འདིས་ཡུལ་གང་གིས་ནོར་བུ་བསྟན་པ་དེ་ནི་མི་ཐོབ་ལ། ཡུལ་གང་ཐོབ་པ་ནི་འདིས་མ་བསྟན་པ་ཡིན་ནོ། །ཡུལ་དང་དུས་དང་རྣམ་པ་ཐ་དད་པ་ནི་འགལ་བའི་ཆོས་དང་འབྲེལ་པའི་ཡིན་ནོ་ཞེས་ནུས་པ་དང་སྣང་བ་ལ་སོགས་པ་ཐ་དད་པའི་ཕྱིར་རོ་ཞེས་བྱ་བ་དེའི་སྐབས་སུ་བཤད་ཟིན་ཏོ། །འགལ་བའི་ཆོས་དང་ལྡན་པའི་རྒྱུ་མཚན་གྱི་ཀྱང་ཐ་དད་པ་ཡིན་ཏེ། དེའི་ཕྱིར་ནོར་བུ་ཉིད་དུ་ཁྱད་པར་མེད་ཀྱང་ཡུལ་ཐ་དད་པའི་ཕྱིར་ན་ངེས་པ་གཞན་ཡིན་ཞིང་ཐོབ་པར་ཡང་གཞན་ཡིན་ནོ། །གལ་ཏེ་ཆ་གཞན་ལ་བསླུར་ཟིན་ཀྱང་ནོར་བུ་ཉིད་ལ་ནི་སླུ་བ་མ་ཡིན་
ནོ་ཞེས་དེ་སྐད་དུ་བརྗོད་པར་མི་ནུས་ཏེ། གང་གི་ཕྱིར་ནོར་བུ་ཉིད་ཁོ་ན་ཡུལ་གྱི་ཁྱད་པར་ཅན་དུ་ངེས་པ་ཡིན་པའི་ཕྱིར་རོ། །ཚད་མའི་འཇུག་པའི་ཡུལ་ཡང་ཤེས་པའི་བྱ་བ་ལ་ལྟོས་པ་ཡིན་གྱི་འདོད་པས་བྱས་པ་ནི་མ་ཡིན་ནོ། །དེས་ན་ཇི་ལྟར་སྨིག་རྒྱུ་ལ་ཆུར་ཤེས་པ་དངོས་པོ་ཉིད་དུ་མདོས་པར་ཞེན་པ་ཡིན་ཡང༌། དེ་ལ་ཚད་མ་ནི་མ་ཡིན་ཏེ་ཆུར་གཏོགས་པའི་དངོས་པོ་ཉིད་ནི་མ་ཐོབ་པའི་ཕྱིར་དང༌། གཞན་ཡང་མང་ཟུང་བའི་ཕྱིར་རོ། །དེ་བཞིན་དུ་ཡང་ཕྱོགས་ཀྱང་ཁྱད་པར་ཅན་གྱི་ནོར་བུ་ཤེས་པ་ནི་ཚད་མ་མ་ཡིན་ཏེ། ནོར་རྐྱང་བ་མ་བཟུང་བའི་ཕྱིར་དང༌། ཕྱོགས་ཀྱི་ཁྱད་པར་ཅན་དུ་གཟུང་བ་ཡང་མི་འཐོབ་པའི་ཕྱིར་རོ། །འོན་ནི་མངོན་སུམ་གྱིས་ཀྱང་སྐད་ཅིག་མ་མ་ཡིན་པ་གཅིག་ནེས་ལ། ཐོབ་པར་བྱ་བ་སྔོན་པོའི་དོན་ནི་སྐད་ཅིག་མ་དུ་མ་ཡིན་ནོ། །རྗེས་སུ་དཔག་པས་ཀྱང་ཅི་ལྟར་མཐོང་བ་ལྟར་སྐད་ཅིག་མ་མ་ཡིན་པ་གཅིག་ཉིད་ངེས་པ་ཡིན་ལ། ཐོབ་པར་བྱ་བ་ནི་གཞན་ཡིན་ནོ་ཞེ་ན། དེ་ལྟར་མི་རིགས་ཏེ། ཐམས་ཅད་ཀྱི་ཡོད་པ་ཉིད་ནི་དོན་བྱེད་པའི་རྒྱུ་མཚན་ཅན་ཡིན་ནོ། །དོན་བྱེད་པར་ནུས་པ་ཡང་དམིགས་པའི་སྔོན་པོ་ནི་ཡིན་ཏེ། དེས་ན་ཡོད་བ་ནི་མཐོང་བ་དེ་ཉིད་ཡིན་ལ། སྐད་ཅིག་ཉིད་དམ་རྟུལ་ཕྲ་རབ་ཉིད་ལ་སོག་པ་གཞན་ཡང་རུང་སྟེ། ཡོད་པ་ནི་དེ་ལས་ཐ་དད་པ་ཁས་བླང་བར་བྱ་བ་ཡིན་ནོ། །དེས་ན་སྐད་ཅིག་མ་ཉིད་ནི་མཐོང་བའི་སྔོ་པོ་ཉིད་ཡིན་མོད་ཀྱི། འོན་ཀྱང་དེ་ལ་སྐད་ཅིག་མ་མ་ཡིན་པ་ཉིད་དུ་ངེས་པ་འབའ་ཞིག་ཏུ་ཟད་དོ། །དེས་ན་མངོན་སུམ་གྱིས་གཞན་ཐོ་བ་ནི་མ་ཡིན་གྱི། འོན་ཀྱང་མཐོང་བའི་སྔོན་པོ་ཉིད་སྐད་ཅིག་མའི་རང་བཞིན་ཡིན་ནོ། །དེ་བཞིན་དུ་རྗེས་སུ་དཔག་པས་ཀྱང་འཆད་པར་ནུས་པའི་དངོས་པོ་ཞེ་ན་པར་བྱས་ལ། སྐད་ཅིག་མ་ཡང་དེ་ཉིད་ཡིན་ཏེ། དེ་ཡང་ཐོབ་པར་ནུས་སོ། །སྐད་ཅིག་མ་ཉིད་དུ་ངེས་པ་ནི་ཚད་མ་གཞན་གྱིས་ཡིན་གྱི། དེའི་རང་བཞིན་ནི་སྔོན་པོ་ལ་སོགས་པ་དེ་ཉིད་ཡིན་ནོ། །དེ་བཞིན་དུ་ཡུལ་གཞན་ན་གནས་པའི་ནོར་བུ་ནི་ཡུལ་གཞན་ན་གནས་པའི་རང་བཞིན་དུ་རྣམ་པར་གནས་པར་བསྒྲུབ་པར་ནུས་པ་མ་ཡིན་ནོ། །དེའི་ཕྱིར་རང་བཞིན་གཞན་གཟུང་བ་ན་དེའི་ཁོངས་སུ་མ་གཏོགས་པའི་རང་བཞིན་གཟུང་བ་མ་ཡིན་པའི་ཕྱིར་ཡུལ་གཞན་ན་གནས་པའི་ནོར་བུ་འཛིན་པ་ནི་ཡུལ་གཞན་གནས་པའི་ནོར་བུ་ཡོངས་སུ་གཅོད་པར་བྱེད་པ་མ་ཡིན་པས་དེ་ལ་ཚད་མ་མ་ཡིན་ནོ། །དེའི་ཕྱིར་དམ་པའི་དོན་ནི་འདི་ཡིན་ཏེ། གལ་ཏེ་ངེས་པས་ཡུལ་དུ་
བྱས་བའི་དངོས་པོའི་ཆ་ཐམས་ཅད་མ་ཐོབ་པ་དེ་ལྟར་ན་ཡང་མཐོང་བ་ལས་གཞན་ཐོབ་པ་ནི་མ་ཡིན་ནོ། །འདི་ལྟར་འགལ་བས་ངེས་པའི་ཆ་ལས་ཕྱི་རོལ་དུ་གྱུར་བའི་རང་བཞིན་གང་ཡིན་པ་དེའི་ཤེས་པ་དེའི་ཡོངས་སུ་གཅོད་པར་བྱེད་པ་མ་ཡིན་ཏེ། དཔེར་ན་སྔོན་པོར་འཛིན་པའི་སེར་པོ་ཡོངས་སུ་གཅོད་པར་བྱེད་པ་མ་ཡིན་པ་བཞིན་ནོ། །དེ་བཞིན་དུ་ཡུལ་གཞན་ན་གནས་པའི་ནོར་བུའི་རང་བཞིན་ཡང་མཐོང་བའི་རང་བཞིན་དང་འགལ་བ་ཡིན་ནོ། །ངེས་པར་མ་བྱས་པ་ཉིད་ཀྱང་ཚད་མའི་ཡུལ་མ་ཡིན་ནོ། །གལ་ཏེ་སྐད་ཅིག་པ་ཉིད་ཀྱང་སྔོན་པོའི་ཤེས་པས་མ་ངེས་པ་མ་ཡིན་ནམ། དེའི་ཕྱིར་དེ་ཇི་ལྟར་ཡུལ་ཡིན་ཞེ་ན། སྐད་ཅིག་མ་ཉིད་མི་ངེས་ཀྱང་སྔོན་པོའི་ཡུལ་ཡིན་པར་ནི་མི་སྨྲའི། འདི་ཙམ་ཞིག་ནི་སྨྲ་སྟེ། སྐད་ཅིག་མ་ཉིད་ནི་མཐོང་བའི་སྔོན་པོ་ལས་གཞན་མ་ཡིན་ནོ། །དེས་ན་གཞན་ཐོབ་པ་ནི་མ་ཡིན་གྱི། འོན་ཀྱང་མཐོང་བའི་སྔོན་པོ་ཁོ་ན་ཐོབ་སྟེ། དེ་ལ་ངེས་པར་བྱས་པ་སྐད་ཅིག་མ་མ་ཡིན་པའི་ཆ་གཞན་ནི་ཐོབ་པར་བྱ་བ་མ་ཡིན་ནོ། །འདིར་ནི་མཐོང་བའི་ཆ་ཉིད་ཐོབ་པ་མ་ཡིན་ཏེ། ཡུལ་གཞན་གནས་པ་ཉིད་མཐོང་ན་ཡུལ་གཞན་ན་གནས་པ་འགལ་བས་མེད་པའི་ཕྱིར་རོ། །གལ་ཏེ་དེ་ལྟ་ན་མངོན་སུམ་གྱིས་མཐོང་བའི་སྔོན་པོ་ནི་རགས་པ་ཡིན་ལ། ཐོབ་པ་ནི་ཕྲ་མོ་ཡིན་ནོ། །རགས་པ་དང་ཕྲ་བ་དག་ཀྱང་འགལ་ལོ་ཞེ་ན། དེ་ཡང་མི་རིགས་ཏེ། དངོས་པོ་གཅིག་ཉིད་ནི་ཕྲ་བ་དང་ཕྲ་བ་མ་ཡིན་པ་འགལ་བ་ཡིན་ཏེ། འགལ་བ་ནི་གཞི་གཅིག་ལ་ཡིན་པའི་ཕྱིར་རོ། །གང་གི་ཚེ་གཅིག་གི་རང་བཞིན་ནི་ཕྲ་མོ་ཡིན་ལ། དུ་མ་ནི་རགས་པ་ཡིན་པ་དེའི་ཚེ་འགལ་བ་འགའ་ཡང་མེད་དོ། །འདི་ལྟར་སྐད་ཅིག་མ་ཉིད་ནི་སྔ་ཕྱི་དང་བྲལ་བ་ཡིན་ལ། མང་པོའི་སྔ་ཕྱི་ཅན་དུ་སྣང་བ་དེ་བཞིན་དུ། རྡུལ་ཕྲ་རབ་གཅིག་ནི་ཕྲ་མོ་ཡིན་ལ་མང་པོ་ནི་རགས་པ་ཡིན་ནོ། །གལ་ཏེ་གཅིག་ཏུ་སྔོན་པོ་ཡིན་ན་མང་པོ་ཡང་སྔོན་པོ་ཉིད་ཡིན་པ་དེ་བཞིན་དུ་རྟུལ་ཕྲ་རབ་གཅིག་ཕྲ་མོ་ཡིན་ན་མང་པོ་ཡང་ཕྲ་མོར་འགྱུར་རོ་ཞེ་ན། བདེན་ཏེ། རང་རང་གི་ངོ་བོས་ཕྲ་བ་མང་པོ་རྣམས་ཀྱི་མང་པོའི་རང་བཞིན་མཐོང་བ་ན་རགས་པར་སྣང་བ་ཡིན་ནོ། །འགའ་ཞིག་ནི་དངོས་པོའི་ཆོས་ཡིན་ཏེ། སྔོན་པོ་ཉིད་ཅེས་བྱ་བར་མང་པོ་ལས་ཡང་ཁྱད་པར་མེད་པ་ཡིན་ནོ། །འགའ་ཞིག་ནི་འཛིན་པའི་ཆོས་ཡིན་ཏེ། གཟུང་བར་བྱ་བ་མང་པོ་ཉིད་ལ་སྣང་བ་གང་ཡིན་པའོ། །སྐད་ཅིག་གཅིག་གཟུང་བ་ལ་ནི་སྔ་ཕྱིར་ཡོངས་སུ་མ་བཅད་ན། མང་པོ་
གཟུང་བ་ལ་སྔ་ཕྱིར་ཡོངས་སུ་བཅད་པ་ཡིན་ནོ། །ཆོས་དེ་ནི་མང་པོ་དག་ཤེས་པ་གཅིག་གིས་གཟུང་བ་ན་སྣང་བའི་ཕྱིར་འཛིན་པའི་ཆོས་སུ་བརྗོད་ཀྱི་གཟུང་བའི་ཆོས་ནི་མ་ཡིན་ནོ། །དེ་བཞིན་དུ་རྡུལ་ཕྲ་རབ་གཅིག་གཟུང་བ་ལ་ནི་རགས་པར་མི་སྣང་ལ། མང་པོ་ཡུལ་ཐ་དད་པ་ཅན་ཤེས་པ་གཅིག་གིས་གཟུང་ན་དུ་མའི་རང་བཞིན་འཛིན་པའི་མཐར་ཐུག་པ་རགས་པར་སྣང་བར་གྱུར་ཏེ། མང་པོ་རྣམས་ཤེས་པ་གཅིག་ལ་སྣང་བ་འབྲེལ་པ་ཉིད་རགས་པ་ཡིན་ནོ། །དེ་ཉིད་ཀྱི་ཕྱིར་དེ་ནི་སོ་སོ་ལ་ཡོད་པ་མ་ཡིན་ནོ། །འདི་ནི་བརྟགས་པ་ཡང་མ་ཡིན་གྱི། འོན་ཀྱང་དབང་པོའི་ཤེས་པ་ལ་བརྟེན་པ་དང་བརྟགས་པར་ཡོད་པ་ཡིན་ཏེ། མང་པོ་རྣམས་གཅིག་གིས་གཟུང་བ་ན་སྣང་བའི་ཕྱིར་དང༌། སོ་སོ་བ་ལ་མེད་པའི་ཕྱིར་རོ། །དེའི་ཕྱིར་འདི་ནི་ཕྲ་མོ་མང་པོ་ཤེས་པ་གཅིག་གི་ཡུལ་དུ་གྱུར་པའི་རང་བཞིན་ཡིན་ནོ། །དེ་ལ་ཡང་རྡུལ་ཕྲ་རབ་ཀྱི་རང་བཞིན་འགལ་བ་མེད་པའི་ཕྱིར་འདི་ཚད་མར་རིགས་པ་ཡིན་ནོ། །མཐོང་བའི་སྔོན་པོ་ནི་རྡུལ་ཕྲ་རབ་དུ་མའི་རང་བཞིན་གྱི་རགས་པ་ཉིད་ཡིན་ནོ། །དེའི་ཕྱིར་ཇི་ལྟར་ཆུ་མཐོང་བ་སྨིག་རྒྱུ་རང་གི་མཚན་ཉིད་མཐོང་བ་ན། རྣམ་པར་འབྱེད་པར་བྱེད་མི་ནུས་པ་ལ་ཆོས་མཐུན་པའི་རྒྱུ་མཚན་ཅན་གྱི་ཆུར་འཁྲུལ་བ་སྐྱེ་བ་དེ་བཞིན་དུ་ནོར་བུ་མཐོང་བས་བུ་ག་ན་གནས་པའི་འོང་ཟླུམ་པོ་གཟུང་བ་ན། ཆོས་མཐུན་པའི་རྒྱུ་མཚན་ཅན་གཉི་གའི་རང་གི་མཚན་ཉིད་འཛིན་པ་ལ་རག་ལས་པ་ཅན་ཡིད་ཀྱིས་འཁྲུལ་པ་འདིར་འགྱུར་བ་ཡིན་ནོ། །འོན་ཀྱང་འདིར་ཡུལ་གང་ལ་སྐྱེས་པ་དེ་ནོར་བུ་དང་འབྲེལ་པའི་ཕྱིར། དངོས་པོ་དང་འབྲེལ་པས་ནོར་བུ་ཐོབ་པའི་རྒྱུ་མཚན་གྱི་ཤེས་བ་གཞན་གྱི་རྒྱུར་འགྱུར་བ་ན་བརྒྱུད་པས་བྱས་པའི་རྒྱུ་ཉིད་ཀྱིས་ན། ཅིག་ཤོས་སྒྲོན་མའི་འོད་ལ་ནོར་བུ་འཛིན་པ་ལས་ཁྱད་པར་ཡོད་པ་འབའ་ཞིག་ཏུ་ཟད་ཀྱི། རང་གི་ཡུལ་ལ་ལྟོས་ན་ནི་གཞན་ལས་ཁྱད་པར་ཡོད་པ་མ་ཡིན་པའི་ཕྱིར་བཤད་པ་སྔ་མ་ཉིད་སྐྱོན་མེད་པ་ཡིན་ནོ། །གལ་ཏེ་རྗེས་སུ་དཔག་པར་རང་གི་མཚན་ཉིད་སྣང་བ་མ་ཡིན་ན། འོ་ན་འདི་དེ་ལ་ཚད་མར་ཅི་ལྟར་འགྱུར། །འདིས་གཟུང་བ་སྒྲོ་བཏགས་པའམ་ཡོད་པའི་སྤྱི་འཛིན་པའི་བྱ་བའི་ཡུལ་དུ་གྱུར་པ་གང་ཡིན་པ་དེ་ཉིད་ལ་འདི་མངོན་སུམ་བཞིན་དུ་ཚད་མ་ཡིན་པར་རིགས་སོ་ཞེ་ན། དེ་ཉིད་ཀྱི་ཕྱིར་ཞེས་སྨོས་ཏེ། གང་གི་ཕྱིར་ཞེ་ན། དོན་བྱེད་པ་དང་རྗེས་སུ་འབྲེལ་བའི་ཕྱིར་རོ། །དངོས་པོ་ནི་
དོན་བྱེད་ནུས་པ་ཡིན་ནོ། །དོན་བྱེད་པ་དང་རྗེས་སུ་འབྲེལ་པའི་ཕྱིར་ཚད་མ་འདིའི་ཡུལ་ནི་དངོས་པོ་ཡིན་གྱ། གཟུང་བ་ཙམ་ནི་མ་ཡིན་ནོ། །ཡང་ཅིའི་ཕྱིར་གཟུང་བ་ལ་ལྟོས་ནས་ནི་ཚད་མ་མ་ཡིན་གྱི། འོན་ཀྱང་དོན་བྱེད་པར་ནུས་པའི་ཡུལ་ཅན་ཡིན་ཞེ་ན་བཤད་པ། ཚད་མ་ལ་སོགས་པ་དཔྱོད་པ་གང་ཡིན་པ་དེ་ནི་དོན་དེ་དོན་དུ་གཉེར་བར་བྱ་བ་སྲེག་པ་ལ་སོགས་པ་བྱེད་པ་བསྒྲུབ་པ་དེར་རུང་བའི་ཡུལ་ཅན་ཏེ། ཡུལ་གང་ལ་ཡོད་པའོ། །འདི་ལ་དོན་བྱེད་པ་དོན་དུ་གཉེར་བས་མེ་ལ་སོགས་པ་དོན་དུ་གཉེར་བ་ཙམ་གྱིས་བསྒྲུབ་བྱ་ཡིན་པར་ནི་མ་མཐོང་སྟེ། དེ་བསྒྲུབ་པར་ནུས་པ་དོན་དུ་གཉེར་བ་ན་ཚད་མའམ། གཞན་དཔྱོད་པ་ཡིན་ནོ། །དེའི་ཕྱིར་ཤེས་པའི་རང་བཞིན་གང་ཞིག་སྐྱེས་བུའི་དོན་སྒྲུབ་པར་བྱེད་པ་རྣམ་པར་དཔྱོད་པའི་ཡན་ལག་ཏུ་གྱུར་པ་དེ་ནི་ཚད་མར་བརྗོད་པ་ཡིན་ནོ། །གང་གིས་བཟུང་བ་ཙམ་གྱིས་ཡུལ་ཅན་ཚད་མར་འགྱུར་བ་བཟུང་བ་ཙམ་སྟོན་པ་ནི་སྐྱེ་བུའི་དོན་སྒྲུབ་པར་བྱེད་པ་མ་ཡིན་གྱི། འོན་ཀྱང་འཇུག་པའི་ཡུལ་རང་གི་མཚན་ཉིད་སྟོན་པར་བྱེད་པའི་མི་སླུ་བ་ཡིན་ནོ། །དེས་ན་དངོས་པོའི་ཡུལ་ཅན་དེ་ཉིད་ཚད་མ་ཡིན་ནོ། །གལ་ཏེ་དཔྱོད་པ་དོན་བྱེད་པར་རུང་བའི་ཡུལ་ཅན་ཡིན་ན། འོ་ན་ནི་རྟོག་པ་དང་ལྡན་པས་ཤེས་པས་དཔྱད་པར་མི་བྱ་སྟེ། དེ་ནི་ཕྱི་རོལ་གྱི་དོན་བསྒྲུབ་པར་བྱ་བའི་དོན་བྱེད་པ་སྒྲུབ་པར་བྱེད་པ་མ་ཡིན་པའི་ཕྱིར་རོ་ཞེས་དོགས་པ་ལ། ཇི་ལྟར་དོན་བྱེད་པ་དོན་དུ་གཉེར་བས་དེ་དཔྱད་པར་བྱ་བ་དང༌། ཇི་ལྟར་དོན་བྱེད་པའི་ཡན་ལག་ཏུ་འགྱུར་བ་དེ་གཉི་ག་འཇུག་པ་གཅིག་གིས་བསྟན་པའི་ཕྱིར། རྟོག་པ་སྔོན་དུ་གཏོང་བ་ཞེས་སྨོས་སོ། །བདེ་བ་དང་སྡུག་བསྔལ་སྨོས་པས་ནི་འདོད་པ་དང་མི་འདོད་པའི་མཚོན་བ་སྟེ། འབྲས་བུའི་མཚན་ཉིད་ནི་འདོད་པ་ཡིན་པའི་ཕྱིར་རོ། །འདོད་པ་དང་མི་འདོད་པའི་བསྒྲུབ་པའི་བྱེད་པ་གང་ཡིན་པ་དེ་བསྒྲུབ་པར་ཏེ། ནན་ཏན་དུ་བྱ་བར་འདོད་པས་སོ། །ཅི་ལྟར་བསྒྲུབ་པར་འདོད་ཅེ་ན། ཅི་ལྟར་འོས་པར་རོ། །བསྒྲུབ་པ་ནི་རྣམ་པ་གཉིས་ཏེ། སྤོང་བའི་བདག་ཉིད་དང་ལེན་པའི་རང་བཞིན་ནོ། །དེ་ལ་དངོས་པོ་ནི་སྡུག་བསྔལ་གྱི་སྒྲུབ་པར་བྱེད་པ་ཡིན་ལ། གཞན་ནི་བདེ་བ་བསྒྲུབ་པ་ཡིན་ནོ། །འདི་ལྟར་དངོས་པོ་ཡོད་པ་ཙམ་གྱིས་ནི་རང་གིས་བསྒྲུབ་པར་བྱ་བའི་དོན་བྱ་བ་མི་བྱེད་ཀྱི་འོན་ཀྱང་ཐོབ་པས་ཡིན་ནོ། །དེའི་ཕྱིར་དོན་དུ་གཉེར་བས་འདོད་པ་བསྒྲུབ་པ་ཐོབ་པར་བྱ་བ་དང༌། ཅིག་ཤོས་སྤང་བར་བྱ་བ་ཡིན་ནོ།།
འཇུག་པ་ལས་ཇི་ལྟར་འོས་པར་བསྒྲུབ་པར་ནུས་པ་ཡང་ཤེས་པས་བསྟན་པ་ཡིན་ནོ། །དེ་སྨྲས་པ་ནི་ཤེས་ནས་ཞེས་བྱ་བ་ཡིན་ནོ། །དེའི་ཕྱིར་ཇི་ལྟར་དོན་དུ་གཉེར་བ་དོན་བྱེད་པ་བསྒྲུབ་པས་དོན་དུ་གཉེར་བར་བྱེད་པ་དེ་བཞིན་དུ་དེ་སྟོན་པར་བྱེད་པའི་ཤེས་པས་ཀྱང་ཡིན་ནོ། །ལོག་པའི་ཤེས་པས་ཞུགས་པ་ལས་ནི་མངོན་པར་འདོད་པ་ཅུང་ཟད་འགྲུབ་པ་ནི་མེད་དོ། །དེས་ན་ཇི་ལྟར་མེད་པ་བསྒྲུབ་པ་ལེན་ཅིང་གཞན་སྤོང་བ་དེ་བཞིན་དུ་དེ་དག་རབ་ཏུ་སྟོན་པའི་མི་སླུ་བ་ནི་བླང་བར་བྱ་བ་ཡིན་ལ་གཞན་ནི་སྤང་བར་བྱ་བ་ཡིན་ནོ། །དེས་ན་དོན་བྱེད་པའི་དོན་དུ་གཉེར་བ་འཇུག་པའི་ཡུལ་གྱི་དངོས་པོ་སྟོན་པ་མི་སླུ་བ་བླང་བར་བྱ་བ་དང༌། གཞན་སྤངས་པའི་དོན་དུ་རྟོག་པ་ཡིན་ནོ། །བདེ་བ་དང་སྡུག་བསྔལ་གྱི་སྒྲུབ་པར་བྱད་པ་སྔར་ཤེས་པ་དང་རྗེས་སུ་མཐུན་པར་བསྒྲུབ་པར་འདོད་པ་ཡིན་གྱི། ཞེན་པས་ནི་མ་ཡིན་ནོ། །ཞེན་པ་ནི་དོན་མེད་པ་ལ་ཆགས་པ་ཡིན་ལ་རྟོག་པ་དང་ལྡན་པའི་འཇུག་པ་ནི་དགོས་པ་དང་ལྡན་པས་ཡིན་གྱི་ཆགས་པས་ནི་མ་ཡིན་ནོ། །དེའི་ཕྱིར་ནུས་པ་མེད་པ་གཟུང་བར་བྱ་བ་ཙམ་རབ་ཏུ་སྟོན་པ་བརྒྱུད་པས་ཀྱང་དོན་བྱེད་པའི་ཡན་ལག་མ་ཡིན་པ་དོན་དུ་གཉེར་བ་བརྟགས་པར་ནི་ལྟར་འགྱུར། འཇུག་པའི་ཡུལ་ནི་མི་སླུ་བའི་རབ་ཏུ་སྟོན་པར་བྱེད་པ་ནི་བརྒྱུད་ནས་དོན་བྱེད་པའི་ཡན་ལག་ཏུ་འགྱུར་བ་ཡིན་ནོ། །འདི་ལྟར་ཤེས་པ་ལས་ནི་འཇུག་པ་ཡིན་ལ་དེ་ལས་ནི་དོན་སྒྲུབ་པར་བྱེད་པ་བསྒྲུབ་པ་ཉམས་སུ་ལེན་པ་དང་མཐུན་པར་འགྱུར་ཞིང་དེ་ལས་དོན་གྲུབ་པ་ཡིན་ཏེ། དེའི་ཕྱིར་དོན་སྒྲུབ་པར་བྱེད་པ་རབ་ཏུ་སྟོན་པའི་ཤེས་པའི་ངོ་བོ་དོན་བྱེད་པའི་ཡན་ལག་ཡིན་ནོ། །གང་ཅུང་ཞིག་དོན་དུ་གཉེར་བས་རྣམ་པར་དཔྱད་པར་བྱ་བ་དེ་ཐམས་ཅད་ནི་དངོས་སུ་དོན་བྱེད་པའི་ཡན་ལག་མ་ཡིན་ཏེ། དངོས་སུ་དོན་བྱེད་པ་ནི་སྐད་ཅིག་མ་ཉིད་ཀྱིས་དཔྱོད་པ་འཇུག་པའི་སྔར་དོན་བྱས་པའི་ཕྱིར་རོ། དེའི་ཕྱིར་བརྒྱུད་པས་ཀྱང་དོན་བྱེད་པའི་ཡན་ལག་ཏུ་གྱུར་པ་བཤད་པར་བྱ་བའི་ཤེས་པའི་རང་བཞིན་དོན་བྱེད་ནུས་པ་རབ་ཏུ་སྟོན་པ་དེ་ཉིད་བསྟན་བཅོས་སུ་དཔྱད་པ་ཡིན་ནོ། །གལ་ཏེ་དངོས་པོ་ཉིད་དུ་ངེས་པའི་ཕྱིར་རྗེས་སུ་དཔག་པས་གཟུང་བར་བྱ་བ་དེ་ཉིད་དངོས་པོ་མ་ཡིན་ནམ་ཞེ་ན། རྗེས་སུ་དཔག་པའི་སྣང་བ་ཞེས་གསུངས་སོ། །གང་ཞིག་དོན་ཉིད་དུ་ངེས་པ་ཇི་ལྟར་དོན་མ་ཡིན་ཞེ་ན། དོན་སྒྲུབ་པར་བྱེད་པ་ཞེས་སྨོས་སོ། །དོན་ཉིད་དུ་ངེས་པའི་སྣང་བ་དེ་དོན་ལས་སྐྱེས་བའི་ཕྱིར་དོན་དུ་འགྱུར་ཏེ། དཔེར་ན་མངོན་སུམ་གྱིས་
སྣང་བ་ལྟ་བུ་འམ། དེ་ཉིད་དོན་བྱ་བ་བྱེད་པས་དོན་དུ་འགྱུར་གྲང་ན་རེ་ཞིག་དོན་ལས་སྐྱེས་པའི་ཕྱིར་ནི་དོན་མ་ཡིན་ཏེ། དེའི་འབྲས་བུ་ཉིད་མེད་པའི་ཕྱིར་རོ། །དེ་བཤད་པ་ནི། དོན་བྱེད་ནུས་པའི་དངོས་པོ་འགགས་ཀྱང་རྗེས་སུ་དཔག་པའི་སྣང་བ་མི་འགག་པའི་ཕྱིར། རང་ཉིད་དོན་བྱེད་པ་ཡང་མ་ཡིན་ནོ་ཞེས་འཆད་པ་ནི་དེ་ལས་སྲེག་པ་ལ་སོགས་པའི་དོན་ཅུང་ཟད་འགྲུབ་པ་མེད་པའི་ཕྱིར་རོ། །གལ་ཏེ་ཤེས་པའི་རང་བཞིན་ཉིད་ཀྱིས་སྣང་བའི་དོན་ཉིད་ཡིན་ཡང༌། ཇི་ལྟར་མེའི་བཞིན་དུ་ངེས་པ་དེ་ལྟར་དོན་བྱ་བ་ཅུང་ཟད་ཀྱང་སྒྲུབ་པར་བྱེད་པ་མ་ཡིན་ནོ། །བཞེད་མ་ཐག་པའི་གཏན་ཚིགས་གཉིས་པོ་དེ་ཉིད་ཀྱི་ཕྱིར་ཡོད་ཀྱང་ཡོད་པའི་སྤྱིའི་དོན་མ་ཡིན་ནོ་ཞེས་འབྲེལ་ཏེ། དོན་མ་ཡིན་ཏེ་མེ་མ་ཡིན་ནོ་ཞེས་བྱ་བའི་དོན་ཏོ། །བརྗོད་པར་བྱ་བ་མ་ཡིན་པའི་ཕྱིར་ཞེས་འཆད་པར་འགྱུར་བས་རེ་ཞིག་སྤྱི་ཡོད་པ་ནི་མ་ཡིན་མོད་ཀྱི། འོན་ཀྱང་དེ་ནི་ཡོད་དུ་ཆུག་ཀྱང་དེ་ནི་མ་ཡིན་ནོ་ཞེས་བྱ་བ་ནི་ཀྱང་གི་སྒྲའི་དོན་ཡིན་ནོ། །དེ་ནི་དངོས་པོ་ལོག་ཀྱང་གནས་པ་དང་སྲེག་པ་ལ་སོགས་པའི་མཚན་ཉིད་ཀྱི་དོན་ཅུང་ཟད་ཀྱང་དེ་ལས་འགྲུབ་པ་མེད་པ་ཡིན་ནོ། །ཅིའི་ཕྱིར་ཡོད་པ་ཉིད་ཡིན་ཞེ་ན། རང་གི་ཤེས་པ་སྐྱེད་པའི་ཕྱིར་རོ། །མེའི་བསྒྲུབ་པར་བྱ་བ་བྱེད་པ་ནི་མ་ཡིན་ཏེ། དེས་ན་མེ་རྗེས་སུ་དཔག་པ་ནི་སྤྱི་ཡོད་པའི་ཡུལ་ཅན་དུ་ཡང་མི་རིགས་སོ་ཞེས་བརྗོད་པར་འགྱུར་རོ། །དེས་ན་ཞེས་བྱ་བ་ནི་གང་གི་ཕྱིར་རྗེས་སུ་དཔག་པའི་སྣང་བ་ནི་དོན་མ་ཡིན་ལ། རྟོག་པ་དང་ལྡན་པའི་དཔྱོད་པ་ནི་དངོས་པོའི་ཡུལ་ཅན་ཡིན་པ་དེའི་ཕྱིར་དོན་བྱེད་ནུས་པའི་དངོས་པོའི་རང་བཞིན་ལ་མི་སླུ་བ་ཇི་ལྟར་བསྟན་པ་བཞིན་དུ་ཐོབ་པར་བྱེད་པ་གང་ཡིན་པ་དེ་ཉིད་ནི་རྗེས་སུ་དཔག་པ་འདིའི་ཡང་ཚད་མ་ཡིན་གྱི་མངོན་སུམ་འབའ་ཞིག་གི་ཡིན་པར་ནི་མ་ཟད་དོ་ཞེས་བྱ་བ་ནི་ཡང་གི་སྒྲ་ཡིན་ནོ། །འདི་ནི་ཚད་མ་གཉི་ག་དངོས་པོའི་ཡུལ་ཅན་ཞེས་བྱ་བ་དེ་བཀྲལ་བ་ཡིན་ནོ། །དཔྱོད་པ་ནི་དོན་བྱེད་པར་རུང་བའི་ཡུལ་ཅན་ཡིན་པའི་ཕྱིར་ཞེས་བྱ་བའི་གཏན་ཚིགས་འདི་ནི་མངོན་སུམ་དང་རྗེས་སུ་དཔག་པའི་ཚད་མ་དངོས་པོའི་ཡུལ་ཅན་དུ་སྒྲུབ་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་འདི་དག་ནི་ཚད་མ་དངོས་པོའི་ཡུལ་ཅན་གྱི་རྒྱུ་མཚན་ཅན་དུ་མཚུངས་པར་བསྟན་པའི་ཕྱིར་གཉི་ག་ཞེས་གསུངས་སོ། །དེ་ལྟ་མ་ཡིན་ན་རྗེས་སུ་དཔག་པའི་ཡུལ་དཔྱོད་པ་ན་མངོན་སུམ་ཉེ་བར་བཀོད་པ་མི་རིགས་པར་འགྱུར་རོ། །ད་ནི་རྗེས་སུ་དཔག་
པའི་ངེས་པའི་གཏན་ཚིགས་འཆད་དེ་དངོས་པོ་དེ་དང་འབྲེལ་བའི་དངོས་པོ་འབྲེལ་པ་ངེས་པ་གང་ཡིན་པ་དེ་ཉིད་རྟགས་ཡིན་ནོ། །གཞན་ནི་གོ་བར་བྱེད་པ་མ་ཡིན་པ་དེའི་ཕྱིར་རྟགས་སྨོས་སོ། །རྟགས་དེ་ལ་ལྟོས་པའི་ཕྱིར་ན་རྗེས་སུ་དཔག་པའི་ཚད་མ་ནི་དངོས་པོའི་ཡུལ་ཅན་ཡིན་ནོ། །འབྲེལ་པ་གཏན་ལ་ཕེབས་པའི་རང་གི་མཚན་ཉིད་མེད་ན་མི་འབྱུང་བ་ངེས་པར་རྟོགས་པ་མེད་ན་མི་འབྱུང་བ་གཉིས་པ་རྟོགས་པ་ནི་རྗེས་སུ་དཔག་པ་ཡིན་ཏེ། དེས་ན་དེའི་བདག་ཉིད་དང་དེ་ལས་བྱུང་བ་དག་གིས་རྟགས་གང་དུ་འབྲེལ་པ་སྲིད་པ་དེ་ཉིད་རྗེས་སུ་དཔག་པར་ངེས་པར་བྱས་པ་ནི་རྗེས་སུ་དཔག་པའི་ཤེས་པའི་ཡུལ་ཡིན་ནོ། །དོན་གང་རྟོགས་པ་དེ་ཉིད་རྟོགས་པའི་ཡུལ་ཡིན་ནོ། །རྣམ་འགྲེལ་ལས། ངེས་པ་རྣམས་ཀྱི་མ་ངེས་གང༌། །དེ་ནི་ཇི་ལྟར་དེ་དག་ཡུལ། །ཞེས་གང་བཤད་པ་ཡིན་ནོ། །རྟོགས་པའི་དོན་ཡང་མཐོང་བའི་རྟགས་དང་འབྲེལ་བ་ཅན་ཡིན་ཏེ། དེའི་ཕྱིར་དེ་ཉིད་ཡུལ་ཡིན་ནོ། །གང་གིས་མ་རྟོགས་པ་ཡང་ཚད་མའི་ཡུལ་དུ་འགྱུར་བ་རྟོགས་པའི་སྒོ་ནས་འཇུག་པའི་སྟོན་པ་ལས་ཚད་མའི་བྱ་བ་གཞན་ནི་ཡོད་པ་མ་ཡིན་ནོ། །དོན་འདི་ནི་འདི་དག་གིས་དོན་ཡོངས་སུ་བཅད་ནས་ཞེས་བྱ་བ་དེ་ཉིད་དུ་གཏན་ལ་ཕབ་ཟིན་ཏོ། །མཐོང་བའི་དངོས་པོ་དང་འབྲེལ་པ་ཅན་རྟོགས་པའི་དོན་དེ་ཡང་རང་གི་མཚན་ཉིད་དེ་ཁོ་ན་ཡིན་ཏེ། ཀུན་བརྟགས་པའི་ངོ་བོ་ནི་རང་གི་མཚན་ཉིད་གཞན་དག་གིས་རང་བཞིན་ནམ་རྒྱུར་འགྱུར་བས་མ་ཡིན་ནོ། །དེ་ཉིད་ཀྱི་ཕྱིར་གལ་ཏེ་ཡང་དེ་དང་འབྲེལ་བའི་དངོས་པོའི་རང་གི་ངོ་བོ་ཉིད་རྟགས་ཡིན་མོད་ཀྱི། འོན་ཀྱང་དེ་དང་འབྲེལ་བའི་དངོས་པོའི་རང་བཞིན་སྨོས་པས་ཁྱད་པར་དུ་བྱས་པ་ནི་རང་གི་རོ་བོས་སམ་སྒྲོ་བཏགས་པས་ཀྱང་རུང་སྟེ། ཤེས་པའི་སྣང་བ་ནི་འདི་འདྲ་བའི་དངོས་པོའི་རྟགས་ཀྱི་འབྲེལ་པ་ཅན་དུ་རྣམ་པ་ཇི་ལྟར་ཡང་མི་འཐད་པ་དེའི་ཕྱིར་འདི་ཚད་མའི་ཡུལ་ནི་རྟོགས་པར་གྱུར་པ་རང་དང་འབྲེལ་བ་ཅན་གྱི་དངོས་པོ་གང་ཡིན་པ་དེ་ཡིན་ནོ་ཞེས་ཅི་ནས་ཀྱང་ཤེས་པར་བྱ་བའི་ཆེད་དུ་ཡིན་ནོ། །དེས་ན་སྣང་བའི་རང་གི་མཚན་ཉིད་ལ་ལྟོས་ནས། མེད་ན་མེད་པ་རྟོགས་པའི་ཕྱིར་རྗེས་སུ་དཔག་པའི་ཚད་མའི་ཡུལ་ནི་རྟོགས་པའི་རང་གི་མཚན་ཉིད་ཡིན་ནོ་ཞེས་བཤད་པ་ཡིན་ནོ། །གལ་ཏེ་མངོན་སུམ་དང་རྗེས་སུ་དཔག་པ་དག་གི་ཡུལ་རང་གི་མཚན་ཉིད་གཅིག་ཉིད་ཡིན་ན། འོ་ན་སློབ་དཔོན་གྱིས་ཇི་ལྟར་མངོན་སུམ་དང་རྗེས་སུ་དཔག་པ་དག་ཡུལ་ཐ་དད་པར་གསུངས་ཤེ་ན། བཤད་པ། སྣང་བ་རྣམ་པ་ཐ་དད་པས་
ན་གཟུང་བའི་དངོས་པོ་གཅིག་ལ་དོན་བྱེད་པར་ནུས་པ་ལ་འཁྲུལ་པ་དང་མི་འཁྲུལ་པ་ཅན་གསལ་བར་སྣང་བ་དང་མི་གསལ་བར་སྣང་བ་རྣམ་པ་འགལ་བ་གཉིས་པོ་དེ་མི་འཐད་པའི་ཕྱིར་ན་མེད་པའི་ཕྱིར་ནའོ། །གསལ་བ་དང་མི་གསལ་བ་དག་གིས་ཐ་དད་པའི་སྣང་བ་ནི་དངོས་པོ་གཅིག་ལ་མི་ལྡན་པ་མ་ཡིན་ཏེ། ཐག་ཉེ་རིང་གི་བྱེ་བྲག་གིས་དངོས་པོ་གཅིག་ལ་ཡང་རྣམ་པ་ཐ་དད་པར་མཐོང་བའི་ཕྱིར་རོ། །འོན་ཀྱང་དོན་བྱེད་བར་ནུས་པ་ལ་མི་འཁྲུལ་པའི་རྣམ་པ་གསལ་བ་དང་ནུས་པ་ལ་འཁྲུལ་པའི་མི་གསལ་བའི་རྣམ་པ་གང་ཡིན་པ་དེ་དག་ནི་ཐ་དད་པར་བྱེད་པ་ཉིད་དེ། དེས་ན་ལྟ་བུར་གྱུར་པ་དག་གཅིག་ལ་མི་འཐད་པ་ཡིན་ནོ། །དེ་ཉིད་རྣམ་པར་འགྲེལ་པར་བཤད་པ་ནི། ཕན་ཚུན་རྣམ་པ་མི་མཐུན་པ་དེ་དག་ནི་གཅིག་པར་འཐད་པ་མ་ཡིན་ནོ་ཞེས་བྱ་བ་ཡིན་ནོ། །དེའི་ཕྱིར་དམིགས་པ་ཉིད་ནི་ཡུལ་ཏེ། དེ་ཐ་དད་པས་ན་སློབ་དཔོན་ཕྱོགས་ཀྱི་གླང་པོས་ཚད་མའི་ཡུལ་ཐ་དད་དུ་བཤད་ཀྱི་ཚད་མའི་བྱ་བ་འཇུག་པའི་ཡུལ་རབ་ཏུ་སྟོན་པ་ཞེས་བྱ་བ་གང་ཡིན་པའི་བྱ་བ་དེའི་ཡུལ་ཐ་དད་པ་ལས་ནི་མ་ཡིན་ནོ། །ཤེས་པ་རྣམས་ཀྱི་ཡུལ་ནི་རྣམ་པ་གཉིས་ཏེ། གཟུང་བ་དང་ཞེན་པའོ། །རྣམ་པར་རྟོག་པས་ནི་སྒྲོ་བཏགས་པའི་རང་བཞིན་འཛིན་ཅིང་དེ་དང་འདྲ་བའི་རང་གི་མཚན་ཉིད་ནི་ངེས་པར་བྱེད་པ་ཡིན་ནོ། །དབང་པོའི་ཤེས་པས་སྐད་ཅིག་མ་འཛིན་ཅིང་དེའི་སྟོབས་ཀྱིས་སྐྱེས་པའི་ངེས་པ་ནི་སྐད་ཅིག་མ་དེའི་ཆ་ཤས་རྒྱུན་མཐོང་ངོ་སྙམ་དུ་ངེས་པ་ཡིན་ནོ། །དེ་ལ་གཟུང་བ་ཡུལ་ཐ་དད་ཀྱི་འཇུག་པའི་ཡུལ་ནི་མ་ཡིན་ཏེ། གཉི་གས་ཀྱང་དེར་ཞེན་པས་རང་གི་མཚན་ཉིད་ཁོ་ན་ལ་འཇུག་པའི་ཕྱིར་རོ། །དེ་ཉིད་ཀྱི་ཕྱིར་མངོན་སུམ་གྱི་གཟུང་བའི་ཡུལ་གང་ཡིན་པ་དེ་ནི་ཐོབ་པར་བྱ་བ་མ་ཡིན་ཏེ། སྐད་ཅིག་མ་དེ་ནི་ཐོབ་པར་མི་ནུས་པའི་ཕྱིར་རོ། །འོན་ཀྱང་མངོན་སུམ་གྱི་སྟོབས་ལས་སྐྱེས་བའི་ཡུལ་ངེས་པའི་གཟུང་བའི་སྐད་ཅིག་མ་གང་ཡིན་བ་དེའི་རྒྱུན་ཡུལ་དུ་བྱེད་ལ། དེ་ཡང་ངེས་པར་བྱས་པའི་དོན་ཡིན་པ་དེས་ན་མངོན་སུམ་དང་རྗེས་སུ་དཔག་པ་དག་གིས་ཞེན་པར་བྱ་བའི་འཇུག་པའི་ཡུལ་ཁྱད་བར་མེད་པ་ཡིན་ནོ། །དེས་མངོན་སུམ་བཞིན་དུ་རྗེས་སུ་དཔག་པ་ཡང་གཟུང་བའི་ཡུལ་ཅན་དུ་རིགས་སོ་ཞེས་གང་སྨྲས་པ་དེ་ལ་གསལ་བ་ཡིན་ནོ། །གང་གི་ཕྱིར་མངོན་སུམ་གྱི་ཚད་མའི་ཡུལ་ཡང་གཟུང་བའི་སྐད་ཅིག་ཉིད་ནི་མ་ཡིན་གྱི། འོན་ཀྱང་ཞེན་པ་ཡིན་ནོ། །གལ་ཏེ་ཐ་དད་པ་ནི་དངོས་པོའི་ཡུལ་ཅན་མ་ཡིན་ནམ། རྗེས་
སུ་དཔག་པའི་གཟུང་བའི་དོན་ནི་སྒྲོ་བཏགས་པ་ཡིན་པས་དེ་ལ་ཐ་དད་བ་ག་ལ་ཡོད་ཅེ་ན། ཐ་དད་ཅེས་བྱ་བ་ཡང་ཞེས་སྨྲས་སོ། །ཐ་དད་པའི་སྒྲས་ནི་གཉི་གའི་གཟུང་བའི་དོན་གཅིག་ཡིན་པར་མི་འཐད་དོ་ཞེས་རྗེས་སུ་དཔག་པའི་ཡུལ་འདི་ཐ་མི་དད་པ་ཡིན་པ་བཀག་པའི་ཉིད་བྱེད་པ་ཡིན་གྱི། དོན་དམ་པའི་ཡུལ་ཐ་དད་པ་ཡིན་པར་ནི་བརྗོད་པ་མ་ཡིན་ནོ། །དེས་ན་ཐ་དད་པའི་ཚིག་ནི་འདིར་ཐ་མི་དད་པ་འགོག་པ་ལྷུར་བྱེད་པ་ཡིན་གྱི་དུ་མ་ཉིད་ནི་ལས་བསྒྲུབས་པ་ནི་མ་ཡིན་ནོ། །ཡང་ཅིའི་ཕྱིར་ཡུལ་དུ་མ་ཉིད་དུ་མི་བརྗོད་ཅེ་ན། སྨྲས་པ། རྗེས་སུ་དཔག་པ་ཉིད་རྣམ་པར་རྟོག་པ་སྟེ། དེ་ནི་ཡུལ་མེད་པ་ཅན་ཉིད་ཡིན་པའི་ཕྱིར་རོ། །གལ་ཏེ་ཡུལ་ཞིག་ཡོད་ན་ནི་ཐ་དད་པ་འམ་ཐ་མི་དད་པར་འགྱུར་བ་ཞིག་ན་དེ་ནི་ཡོད་པ་མ་ཡིན་ཏེ། རྣམ་པར་རྟོག་པ་རྣམས་ནི་ནི་ཡུལ་མེད་པ་ཅན་ཉིད་ཡིན་པའི་ཕྱིར་རོ། །ཅི་ལྟར་ཡུལ་མེད་པ་ཅན་ཉིད་ཡིན་ཞེ་ན། བཤད་པ་། རྣམ་པར་རྟོགས་པ་དེའི་སྣང་བ་གང་ཡིན་པ་དེ་ནི་གང་ཞིག་རང་གི་ཡུལ་དུ་འདོད་པ་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པའི་རྒྱུའི་ཕྱིར་རོ། །བདག་ཉིད་དུ་གྱུར་བ་མ་ཡིན་པ་མེ་ལ་སོགས་པ་རྗེས་སུ་དཔག་པ་པས་ངེས་པ་གང་ཡིན་པ་དེ་དེའི་ཡུལ་དུ་འགྱུར་བ་ཡིན་ཞིང་དེ་ཡང་ཕྱིར་རོལ་དུ་འདོད་པ་ཡིན་ནོ། །རྗེས་སུ་དཔག་པའི་སྣང་བ་ནི་ཕྱི་རོལ་ཡོད་པ་དང་མེད་པའི་རྗེས་སུ་བྱེད་པ་མ་ཡིན་ཏེ། དེའི་ཕྱིར་དངོས་པོ་ངེས་པ་མ་ཡིན་པས་དངོས་པོ་མེད་པའི་ཡུལ་ཅན་ཡིན་པའི་ཕྱིར་རྣམ་པར་རྟོགས་པའི་ཤེས་པ་ནི་ཡུལ་མེད་པ་ཅན་ཡིན་ནོ། །གང་ཞིག་གཟུང་བའི་ཡུལ་དངོས་པོ་ཡོད་པ་ཡིན་པ་དེའི་སྣང་བ་ནི་མངོན་པར་འདོད་པའི་ཡུལ་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་འགྱུར་བ་ཡིན་ཏེ། དཔེར་ན་མངོན་སུམ་བཞིན་ནོ། །འདི་ནི་དེ་ལྟ་མ་ཡིན་པ་དེས་ན་ཡུལ་མེད་པ་ཅན་ཉིད་དོ། །འདི་སྙམ་དུ་རྣམ་པར་རྟོག་པའི་སྣང་བ་གསལ་བའི་རྗེས་སུ་འགྲོ་བ་དང་ལྡོག་པའི་རྗེས་སུ་མི་བྱེད་པ་ཡིན་གྱི། རྟག་པ་ཡིན་པའི་ཕྱིར་གསལ་བ་ལ་བརྟེན་པའི་སྤྱི་ལ་ནི་འཁྲུལ་པ་ཡོད་པ་མ་ཡིན་ནོ། །དེ་ཡང་གསལ་བ་དང་འདྲ་བ་ཡིན་པའི་ཕྱིར་གསལ་བའི་རང་བཞིན་ལྟ་བུར་ངེས་པར་གཟུང་བར་འགྱུར་བ་ཡིན་པ་དེས་ན་དེ་ཡུལ་དུ་འགྱུར་རོ་ཞེན་བཤད་པ་སྤྱི་ཡང་དངོས་པོ་ལས་གཞན་དུ་ཐ་དད་པར་བརྗོད་པར་མི་ནུས་པའི་ཕྱིར་ཡུལ་མེད་པ་ཅན་ཉིད་དོ། །གལ་ཏེ་སྤྱི་གསལ་བ་ལས་ཐ་དད་པ་བསྒྲུབ་པར་ནུས་ན་ནི་གསལ་བ་ཡུལ་མ་ཡིན་ན་སྤྱི་ཡུལ་དུ་འགྱུར་བ་
ཞིག་ཡིན་ན་མི་ནུས་པ་དེའི་ཕྱིར་སྤྱིའི་ཡུལ་ཅན་ནི་ཡུལ་མེད་པ་ཅན་དུ་གྲུབ་པ་ཡིན་ནོ། །གང་ཡང་རྗེས་སུ་དཔག་པའི་སྣང་བའི་སྤྱི་ནི་ཡོད་ཀྱང་དོན་མ་ཡིན་ཏེ། མེ་མ་ཡིན་ནོ་ཞེས་བཤད་པ་དེ་ཙམ་གྱིས་ནི་རྗེས་སུ་དཔག་པའི་ཡུལ་མེད་པར་བརྗོད་པ་མ་ཡིན་ཏེ། སྣང་བའི་ཕྱི་ནི་ཡོད་ཀྱང་མེའི་རང་བཞིན་གྱི་དོན་མ་ཡིན་ནོ། །རང་གི་ངོ་བོས་ནི་དོན་ཡིན་ལ་གཟུང་བར་བྱ་བ་ཡང་དེ་ཉིད་ཡིན་གྱི་གཞན་ནི་མ་ཡིན་པ་དེས་ན་རྗེས་སུ་དཔག་པའི་ཡུལ་ཡོད་པར་འགྱུར་རོ། །དེའི་ཕྱིར་འདི་བརྗོད་པ་ཡིན་ཏེ་རང་གི་སྣང་བ་ནི་དོན་མ་ཡིན་ཏེ། ཕྱི་རོལ་དོན་རྟོགས་པ་དོན་ཡིན་པའི་ཕྱིར་རོ། །ཕྱི་རོལ་ཡང་མ་ཡིན་ཏེ། དེའི་རྗེས་སུ་འགྲོ་ལྡོག་གི་རྗེས་སུ་མི་བྱེད་པའི་ཕྱིར་རོ། །སྤྱི་ནི་མ་ཡིན་ཏེ། དེ་མེད་པའི་ཕྱིར་རོ། །དེས་ན་རྗེས་སུ་དཔག་པ་ནི་ཡུལ་མེད་པ་ཅན་ཉིད་དོ། །གཉི་གའི་ཞེས་བྱ་བ་ནི་མངོན་སུམ་དང་རྗེས་སུ་དཔག་པ་དག་གི་ཚད་མ་གང་ཡིན་པ་དེའི་ཡུལ་དངོས་པོའི་རང་གི་མཚན་ཉིད་ཡིན་པ་དེའི་རྗེས་སུ་དཔག་པའི་བདག་ཉིད་ཀྱི་རྟགས་ལས་ནི་སྤྱི་རྟོགས་ལ། གཞན་མངོན་སུམ་ལས་ནི་རང་གི་མཚན་ཉིད་ཡིན་ཞེས་ཅི་སྟེ་བརྗོད་འདི་ལྟར་གཉི་གས་ཀྱང་ཞེན་པར་བྱ་བ་དང་ཐོབ་པར་བྱ་བ་ནི་རང་གི་མཚན་ཉིད་ཁོ་ན་ཡིན་ལ། འདི་དག་གི་ཚད་མ་ཡང་ཞེན་པར་བྱས་པ་ཐོབ་པར་བྱ་བ་ལ་ལྟོས་པ་ཡིན་ནོ་ཞེ་ན། འདིར་ཅི་ལྟར་རང་གི་མཚན་ཉིད་ཁོ་ན་ཕྱིར་བརྗོད་པ་དེ་ལྟར་བསྟན་པའི་དོན་དུ་བཤད་པ། མངོན་པར་འདོད་པའི་དགོས་པ་བསྒྲུབ་པའི་རང་བཞིན་དེ་གང་ལ་མེད་པ་དེ་ནི་དེ་མིན་རང་བཞིན་ནོ། །དེ་ལས་ལྡོག་པ་ནི་ཐ་དད་པའོ། །དེ་ཉིད་ནི་དངོས་པོ་ཙམ་མོ། །དེ་རབ་ཏུ་གྲུབ་པ་ནི་ཉེ་བར་འཇོག་པ་སྟེ། རྒྱུ་དེའི་ཕྱིར་རྟགས་གང་ལ་སྤྱིའི་ཡུལ་ཡོད་པ་དེ་ནི་དེ་སྐད་དུ་བཤད་དོ། །གལ་ཏེ་རྟགས་ཀྱིས་དེ་མ་ཡིན་པའི་རང་བཞིན་ལས་ལོག་པའི་དངོས་པོ་ཉེ་བར་འཇོག་པར་བྱེད་པ་དེ་ལྟ་ན་ཡང༌། དེ་མ་ཡིན་པའི་རང་བཞིན་ལས་ལོག་པ་དེ་ཉིད་དངོས་པོའི་རང་གི་མཚན་ཉིད་ཉེ་བར་འཇོག་པར་ཁྱད་པར་ཉིད་ཡིན་པ་དེའི་ཕྱིར་ཅི་ལྟར་སྤྱིའི་ཡུལ་ཅན་དུ་བརྗོད་ཅེ་ན། བཤད་པ། ཁྱད་པར་ཐ་དད་པ་གནས་པ་མེད་པའི་ཕྱིར་རོ། །དེ་སོ་སོར་ངེས་པར་མི་གནས་པའི་ཕྱིར་རོ། །འདི་སྐད་བརྗོད་པ་ཡིན་ཏེ་འདིར་རང་གི་མཚན་ཉིད་ཉེ་བར་འཇོག་པར་མི་བྱེད་པ་ནི་མ་ཡིན་ཏེ། འོན་ཀྱང་གང་ཞིག་དེའི་སོ་སོར་ངེས་པའི་རང་གི་མཚན་ཉིད་ཀྱི་རང་བཞིན་གཅིག་བུ་དེ་ངེས་པ་ཁོང་དུ་ཆུད་པར་མི་ནུས་པ་ཡིན་ཏེ། འདིའི་དོན་བྱེད་པར་
འགྱུར་བ་འདི་ཁོ་ན་དེའི་རང་བཞིན་ཡིན་གྱི། གཞན་ནི་མ་ཡིན་ནོ་ཞེས་རང་བཞིན་གཞན་ཡོངས་སུ་སྤངས་ནས་སོ་སོར་ངེས་པའི་རང་བཞིན་མ་ངེས་པའི་ཕྱིར་ཁྱད་པར་གནས་པ་མེད་པ་ཡིན་ནོ། །གང་ཡང་དེའི་དོན་བྱེད་པར་རུང་བའི་དོན་གྱི་རང་བཞིན་དེ་ནི་ཁྱད་པར་ཐམས་ཅད་ལ་ཁྱད་པར་ཡོད་པ་མ་ཡིན་ཏེ། དེས་ན་རུང་བའི་རང་བཞིན་འཛིན་པའི་ཕྱིར་རྗེས་སུ་དཔག་པའི་ཡུལ་རང་གི་མཚན་ཉིད་ཡིན་ནོ། །གང་ཡང་དེ་ནི་འདི་འདྲ་བ་ཁོ་ན་ཡིན་གྱི་གཞན་དུ་ནི་མ་ཡིན་ནོ་ཞེས་གཅིག་གི་རུང་བའི་རང་བཞིན་དེ་ངེས་པར་ནུས་པ་མ་ཡིན་ནོ། །ཁྱད་པར་མ་ངེས་པའི་རུང་བ་འཛིན་པ་དེའི་རང་གི་མཚན་ཉིད་ག་ཡིན་པ་དེ་སྤྱི་ལྟ་བུ་དང་ཐུན་མོང་པ་ལྟ་བུ་རྗེས་སུ་དཔག་པས་རྣམ་པར་འཇོག་པར་བྱེད་པའི་ཕྱིར་རྗེས་སུ་དཔག་པ་སྤྱིའི་ཡུལ་ཅན་ཡིན་གྱི་ཐུན་མོང་བའི་རང་བཞིན་གཅིག་རྟོགས་པའི་ཕྱིར་ནི་མ་ཡིན་ནོ། །དེ་ཉིད་ཀྱི་ཕྱིར་དང་བོ་ཁོ་ནར་དེ་མ་ཡིན་པའི་རང་བཞིན་ལས་ལྡོག་པའི་དངོས་པོ་ཙམ་རྟོགས་པོ་ཙམ་རྟོགས་པ་ཡིན་ནོ་ཞེས་བཤད་པ་ཡིན་ནོ། །འདི་ལྟར་འདིའི་རང་བཞིན་ཞེས་བསྒྲུབ་པའི་ཚུལ་དུ་བསྟན་ན་ནི་ཁྱད་པར་ཅན་གྱི་རང་བཞིན་ཡང་ཉེ་བར་འཇོག་པར་བྱེད་པ་ཡིན་ནོ་ཞེས་བྱ་བར་འགྱུར་རོ། །དེའི་རང་བཞིན་མ་ཡིན་པ་ལས་ལྡོག་པའི་ངོ་བོ་ནི་ཐམས་ཅད་ལ་ཁྱད་པར་མེད་པ་ཡིན་པའི་ཕྱིར་དེའི་སྒོ་ནས་སྤྱིའི་ཡུལ་ཅན་དུ་བཤད་དོ། །དེ་ཉིད་རྣམ་པར་འགྲེལ་པར་བཤད་པ་ནི། གང་གི་ཕྱིར་བཙོ་བ་དང་བསྲེག་པ་ལ་སོགས་པའི་དགོས་པ་གང་དང་ལྡན་པའི་དོན་དེ་དག་ཤེས་པར་འདོད་པའི་དོན་བྱེད་པ་དོན་དུ་གཉེར་བ་ལ་དེ་ལས་བཟློག་པ་ཕྱིར་ཅི་ལོག་ཏུ་གྱུར་བའི་དོན་དེ་ལས་ཐ་དད་པ་དང་ལྡན་པའི་དོན་ཙམ་ཞིག་རྟགས་ཀྱི་ཉེ་བར་འཇོག་པར་བྱེད་དེ། སྟོན་པར་བྱེད་པའི་ཕྱིར་རོ། །དེའི་ཕྱིར་འདིའི་ཡུལ་ནི་སྤྱི་ཡིན་ནོ། །འདི་སྐད་བཤད་པ་ཡིན་ཏེ། མང་པོ་རྣམས་ཀྱི་རང་བཞིན་ཐུན་མོང་བ་གང་ཡིན་པ་དེ་དེས་ཉེ་པར་འཇོག་པ་ནི་མ་ཡིན་གྱི། འོན་ཀྱང་རྟགས་ཀྱི་ཐུན་མོང་མ་ཡིན་པའི་རང་བཞིན་གཅིག་ཉིད་ངེས་པར་འཇོག་མི་ནུས་པ་དེས་ན་སྤྱིའི་ཡུལ་ཡིན་ནོ། །སྤྱིའི་དོན་ནི་ཁྱད་པར་མེད་བའི་དོན་ཡིན་གྱི། ཐུན་མོང་གི་ནི་དོན་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ཉིད་སྟོན་པར་བྱེད་པ་ནི་དོན་རྟོགས་པ་དེ་ལས་ཐ་དད་པ་ཁྱད་པར་གནས་པ་མེད་པའི་ཕྱིར་ཏེ། མི་རྟོགས་པའི་ཕྱིར་རོ། །དངོས་པོ་རང་གི་མཚན་ཉིད་ཡོད་པ་ནི་རང་གི་ངོ་བོས་ཏེ། དེ་བསྐལ་པ་ནི་ཉེ་བར་མི་འཇོག་བའོ། །འདི་སྐད་དུ།
དངོས་པོ་ཡོད་པ་སྟོན་པ་ཡིན་ཡང་མ་ངེས་པར་སྟོན་པའི་ཕྱིར་ན་རྗེས་སུ་དཔག་པ་སྤྱིའི་ཡུལ་ཅན་ཡིན་ནོ་ཞེས་བརྗོད་པ་ཡིན་ནོ། །ཡང་ཅིའི་ཕྱིར་རྟགས་ལས་ཁྱད་པར་ངེས་པར་གནས་པ་མེད་ཅེ་ན། བཤད་པ། འབྲས་བུ་ལ་སོགས་པའི་རང་བཞིན་གྱི་རྟགས་རྟོགས་པ་ངེས་པ་ཡང་དེ་ལྟ་བུའི་རང་བཞིན་ཡིན་པའི་ཕྱིར་ཏེ། སྤྱིའི་རང་བཞིན་ཡིན་པའི་ཕྱིར་རོ། །བསམ་པ་ནི་འདི་ཡིན་ཏེ། གང་གི་ཚེ་བསྒྲུབ་བྱ་དང་འབྲེལ་བར་ངེས་པ་དེའི་ཚེ་རྟགས་ཀྱང་སྤྱིའི་རང་བཞིན་དང་སྤྱིའི་ཡུལ་ཅན་དུ་ངེས་པ་ཡིན་ནོ། །འདི་ལྟར་མེའི་ཡུལ་ཅན་རྣམ་པ་ཅན་གྱི་ཤེས་པའི་རྒྱུ་ཉིད་ཀྱིས་མེ་དུ་བའི་རྒྱུ་ཉིད་ངེས་པ་ཡིན་ལ་དེའི་ཤེས་པའི་ཡུལ་ཉིད་དུ་ནི་མེ་ཐམས་ཅད་ཁྱད་པར་མེད་པའི་ཕྱིར་དུ་བའི་རྒྱུ་སྤྱིར་ངེས་པ་ཡིན་ནོ། །དུ་བ་ཡང་མགྲིན་པ་དང་མིག་རྣམ་པར་འགྱུར་བའི་རྒྱུ་ཉིད་ཀྱིས་རྣམ་པ་གཅིག་ཏུ་འཛིན་པའི་རྒྱུར་གྱུར་བ་ཉིད་དེའི་འབྲས་བུར་ངེས་པ་ཡིན་ནོ། །དེའི་ཕྱིར་གང་གིས་ན་རྗེས་སུ་དཔག་པར་འགྱུར་བ་ཚང་བང་དུ་མཐོང་བ་ལས་ཕྱོགས་གཞན་ན་ཡོད་པའི་དུ་བ་མེའི་འབྲས་བུར་ངེས་པར་འགྱུར་བ་ཡིན་ནོ། །དེ་བཞིན་དུ་རྟག་པའི་དངོས་པོ་ལས་བཟློག་པས་རྣམ་པར་གནས་པའི་མི་རྟག་པ་ཉིད་གང་ཡིན་པ་དེ་དང་བྱས་པ་ཉིད་འབྲེལ་པར་ངེས་ཤིང༌། བྱས་པ་ཉིད་ཀྱང་མ་བྱས་པ་ལས་བཟློག་པས་རྣམ་པར་གནས་པ་མཐའ་དག་ལ་སྤྱིའི་རང་བཞིན་དུ་ངེས་པ་ཡིན་ཏེ། དེའི་བདག་ཉིད་ནི་གནོད་པའི་ཚད་མས་ངེས་པ་ཡིན་ལ། དེ་ཡང་ཕྱོགས་གཅིག་ལ་འཇུག་པ་ནི་མ་ཡིན་གྱི། འོན་ཀྱང་དོན་ཐམས་ཅད་བསྡུས་པའི་ཡུལ་ཅན་ཡིན་ཏེ། མཉན་པར་བྱ་བ་ཉིད་ཐུན་མོང་མ་ཡིན་པར་བསྒྲུབ་པ་ན་འཆད་པར་འགྱུར་རོ། །རྟགས་དེ་ཡང་སྤྱིའི་རང་བཞིན་དང་ཐུན་མོང་གི་རྣམ་པའི་རྟགས་ཅན་དང་འབྲེལ་པ་ངེས་པ་ཡིན་པའི་ཕྱིར་རྟགས་དེ་ལས་རྟོགས་པ་ཡང་དེ་ལྟ་བུ་ཉིད་དུ་རིགས་སོ། །རྗེས་སུ་འགྲོ་བ་ལ་ལྟོས་པའི་ཕྱིར་རོ། །ཉེ་བའི་རང་གི་མཚན་ཉིད་ལ་ཡང་འབྲེལ་པ་ཐུན་མོང་བའི་ཡུལ་ཅན་ཡིན་པ་འབའ་ཞིག་ཏུ་མ་ཟད་ཀྱི་བསྒྲུབ་བྱ་རྟོགས་པའི་དུས་སུ་ཡང་ཡིན་ནོ། །རྟགས་དེ་ནི་རྗེས་སུ་འགྲོ་བའི་བསྒྲུབ་པར་བྱ་བ་གང་ཡིན་པ་དེ་ཉིད་ཀྱི་སྒྲུབ་པར་བྱེད་པ་ཡིན་ནོ། །སོ་སོར་ངེས་པའི་ཁྱད་པར་ནི་དཔེ་དང་བསྒྲུབ་པར་བྱ་བའི་ཆོས་ཅན་ཁྱད་པར་བྱེད་པ་མ་ཡིན་གྱི། འོན་ཀྱང་འབྲས་བུ་དེ་བྱེད་པ་ལ་ནུས་པ་ཐུན་མོང་བ་ཉིད་ཡིན་ནོ། །གང་ཞིག་དཔེའི་ཆོས་ཅན་ལ་ཡང་མཐོང་བ་དེ་རྗེས་སུ་འགྲོ་བའི་བསྒྲུབ་པར་བྱ་བའི་ཆོས་ཅན་ཉིད་ལ་གནས་པ་སོ་སོར་ངེས་པའི་
རང་བཞིན་གང་ཡིན་པ་དེས་ནི་རྗེས་སུ་འགྲོ་བ་མ་ཡིན་ནོ། །དཔེའི་ཆོས་ཅན་ལ་མཐོང་བའི་རྗེས་སུ་འགྲོ་བ་ལ་ལྟོས་པའི་ཕྱིར་ན་རྟགས་ནི་སྤྱིའི་ཡུལ་ཅན་ཡིན་ནོ། །དེའི་བསྡུས་པའི་དོན་ནི་འདི་ཡིན་ཏེ། རྟགས་ཀྱང་སྤྱིའི་རང་བཞིན་ནི་སྤྱི་དང་འབྲེལ་པར་ངེས་པ་ཡིན་ལ། རྗེས་སུ་དཔག་པར་བྱ་བ་རྟོགས་པའི་ཡུལ་ན་ཡང་དཔེའི་ཆོས་ཅན་ལ་མཐོང་བའི་རང་བཞིན་རྗེས་སུ་འགྲོ་བ་ཐུན་མོང་བ་དང་ལྡན་པའི་རྟགས་ལ་བརྟེན་ནས་བསྒྲུབ་པར་བྱ་བ་རྟོགས་པར་འགྱུར་བ་ཡིན་ནོ། །དེ་ཉིད་ཀྱི་ཕྱིར་རྣམ་འགྲེལ་ལས། འབྲེལ་པ་དྲན་པས་བར་དུ་ཆོད་པའི་རྟགས་ལས་ལྐོག་ཏུ་གྱུར་པའི་དོན་རྟོགས་པར་བཤད་པ་ཡིན་ནོ། །དེས་ན་བསྒྲུབ་པར་བྱ་བ་རྟོགས་པའི་དུས་སུ་རྟགས་གང་གིས་ཁྱབ་པར་རྗེས་སུ་འགྲོ་བ་རྟོགས་པ་དེའི་སྒྲུབ་པར་བྱེད་པ་ཡིན་ལ། འབྲེལ་པ་འཛིན་པའི་དུས་སུ་ཡང་ཐུན་མོང་གི་རང་བཞིན་གྱི་རྟགས་རྣམ་པ་ཅི་ལྟ་བུའི་བསྒྲུབ་བྱའི་ཆོས་དང་འབྲེལ་པ་མཐོང་བ་དེ་ཉིད་ཀྱི་སྒྲུབ་པར་བྱེད་པ་ཡིན་པར་རིག་པ་ཡིན་ནོ། །དེ་ཡང་ཁྱད་པར་མེད་པ་ཡིན་པའི་ཕྱིར་གཏན་ཚིགས་གཉི་གས་རྟགས་སྤྱིའི་ཡུལ་ཅན་དུ་བརྗོད་པ་ཡིན་ནོ། །ད་ནི་རྗེས་སུ་དཔག་པ་སྤྱིའི་ཡུལ་ཅན་ཉིད་གསལ་བར་བྱ་བའི་ཕྱིར་མངོན་སུམ་རང་གི་མཚན་ཉིད་ཀྱི་ཡུལ་ཅན་དུ་སྟོན་པར་བྱེད་དོ། །ཅིག་ཤོས་མངོན་སུམ་ནི་མཐོང་བའི་ཁྱད་པར་དེ་ལས་གཞན་དུ་གྱུར་བའི་ཁྱད་པར་ནི་ཁྱད་པར་གཞན་ཏེ། རྒྱུན་གཞན་ནོ། །དེ་འཛིན་པ་ནི་རྟོགས་པའོ། །དེ་དབེན་པ་ནི་བྲལ་བ་སྟེ། དེ་དང་བྲལ་བའི་རྒྱུས་ན་སོ་སོར་གནས་པ་སོ་སོར་ངེས་པ་གང་ཡིན་པ་དེའི་རང་བཞིན་གྱིས་རྣམ་པ་དང་ལྡན་པར་བྱེད་པ་རང་བཞིན་དང་ལྡན་པར་བྱེད་པས་ན་རྣམ་པ་ཅན་ཡིན་ནོ། །འདི་ལྟར་རྩྭ་ལས་བྱུང་བ་དང་སེང་ལྡེང་ལས་བྱུང་བ་ལ་སོགས་པ་མདུན་ན་གནས་པའི་དོན་ཁྱད་པར་གྱི་ཁོངས་སུ་གཏོགས་པའི་དོན་དོན་གཞན་དུ་རྟོགས་པ་དང་འབྲེལ་པ་རྟོགས་པ་ཡིན་ནོ། །དེས་ན་རང་གི་མཚན་ཉིད་དེ་མངོན་སུམ་གང་ལ་རང་གི་ངོ་བོའི་ཡུལ་ཡོད་པ་དེ་ལ་དེ་སྐད་ཅེས་བརྗོད་དོ། །འདིར་སྐད་ཅིག་གི་ཁྱད་བར་གྱིས་ཐ་དད་པར་ནི་མི་རྟག་སྟེ། གང་གི་ཕྱིར་ཁྱད་པར་གང་ལ་མངོན་སུམ་གྱིས་སྟོབས་ཀྱིས་ངེས་པའི་ཤེས་པ་སྐྱེས་པའི་ཁྱད་པར་དེ་ཉིད་ཀྱིས་མངོན་སུམ་དོན་དང་ལྡན་པར་བརྗོད་པ་ཡིན་ན། སྐད་ཅིག་མ་ཉིད་ལ་ནི་ཞེན་པའི་ཤེས་པ་ཡོད་པ་མ་ཡིན་ཏེ། དེའི་དེས་ནི་མངོན་སུམ་དོན་དང་ལྡན་པ་མ་ཡིན་ནོ། །སྐད་ཅིག་གི་དངོས་པོ་ནི་མངོན་སུམ་གྱིས་ཐོབ་པར་ཡང་མི་ནུས་ཏེ། དེས་ན་མངོན་སུམ་
གྱི་ཚད་མ་ནི་དེའི་ཡུལ་ཅན་མ་ཡིན་གྱི། འོན་ཀྱང་དེའི་རྒྱུན་གྱི་ཁོངས་སུ་གཏོགས་པའི་སྐད་ཅིག་གཞན་ཡུལ་ཡིན་ནོ། །དེ་ཉིད་ཀྱི་ཕྱིར་ཚད་མ་རྣམས་ཀྱི་འཇུག་པའི་ཡུལ་ནི་ངེས་པའི་དོན་ཡིན་ནོ། །དེའི་ཕྱིར་མངོན་སུམ་གྱིས་སོ་སོར་ངེས་པའི་རྒྱུན་རྒྱུན་གཞན་གྱིས་དབེན་པའི་རང་བཞིན་དུ་གཟུང་བས་མངོན་སུམ་རང་གི་མཚན་ཉིད་ཀྱི་ཡུལ་ཅན་ནོ། །རང་ལས་དེ་བདག་ཉིད་ལས་དོན་རྟོགས་པ་ཡིན་པའི་རྒྱུའི་ཕྱིར་རོ། །གང་གི་ཕྱིར་རང་ཉིད་ལས་དོན་དེ་རྟོགས་པ་ཡིན་གྱི། གཞན་རྟགས་ལས་ནི་མ་ཡིན་པ་དེའི་ཕྱིར་ཁྱད་པར་ངེས་པ་རྟོགས་པ་ཡིན་ནོ་ཞེས་བྱ་བའི་ཐ་ཚིག་གོ །རྟོགས་པ་གང་ལ་རྒྱུའི་ཡན་ལག་གཞན་ཡོད་པ་གཞན་དང་འབྲེལ་པ་ལས་རྟོགས་པ་དེ་ནི་ཁྱད་པར་ངེས་པའི་ཡུལ་ཅན་མ་ཡིན་ཏེ། སྒྲུབ་པར་བྱེད་པ་གཞན་དེ་ཉིད་ལ་ནུས་པ་མེད་པའི་ཕྱིར་རོ། །ཇི་ལྟར་ནུས་པ་མེད་ཅེ་ན། གང་གི་ཕྱིར་ཐུན་མོང་གི་རང་བཞིན་གྱིས་རྟགས་ཐུན་མོང་གི་རང་བཞིན་དང་འབྲེལ་པ་ཤེས་ཤིང་དཔེའི་ཆོས་ཅན་དང་ཐུན་མོང་པའི་རང་བཞིན་དུ་ཁྱབ་པ་ཡང་ཤེས་ནས་བསྒྲུབ་པར་བྱ་བ་རྟོགས་པར་བྱ་བ་ཡིན་ནོ། བསྒྲུབ་པར་བྱ་བའི་ཆོས་ཅན་ལ་རྟགས་བསྒྲུབ་བྱ་མེད་ན་མི་འབྱུང་བ་ཉིད་དུ་རྟོགས་པ་གང་ཡིན་པ་དེ་ཉིད་ནི་བསྒྲུབ་བྱ་རྟོགས་པ་ཡིན་ནོ། །རྟགས་ནི་སྒྲོན་མ་བཞིན་དུ་ལྐོག་ཏུ་གྱུར་བའི་དོན་གསལ་བར་བྱེད་པ་ནི་མ་ཡིན་ནོ། །དེའི་ཕྱིར་རྟགས་གཞན་དེ་ཉིད་ནི་ཁྱད་པར་ཉེ་བར་འཇོག་པར་ནུས་པ་མ་ཡིན་ནོ། །འོ་ན་དེ་ཅི་ལྟར་རང་གི་མཚན་ཉིད་ཀྱི་ཡུལ་ཅན་ཡིན་ཞེ་ན། བཤད་པ། རང་གི་མཚན་ཉིད་ཀྱི་དོན་ལ་མི་སླུ་བ་ནི་ངེས་པ་སྔོན་དུ་འགྲོ་བ་ཅན་གྱི་ཐོབ་པར་བྱེད་པ་སྟེ། མི་སླུ་བ་ནི་མངོན་སུམ་དང་རྗེས་སུ་དཔག་པ་གཉི་ག་ཡང་མཚུངས་པའི་ཕྱིར་གཉི་གའི་ཚད་མ་ནི་དངོས་པོའི་ཡུལ་ཅན་ཉིད་དོ། །དེའི་ཕྱིར་དེ་ལྟར་མངོན་སུམ་གྱི་གཟུང་བ་ནི་རང་གི་མཚན་ཉིད་ཡིན་ལ་རྗེས་སུ་དཔག་པའི་ནི་སྤྱི་ཡིན་ནོ། །ཇི་ལྟར་གཟུང་བ་དང་དངོས་པོ་མ་ཡིན་པའི་ཕྱིར་དེ་ལ་ལྟོས་ནས་ཚད་མ་མ་ཡིན་པ་དེ་བཞིན་དུ། མངོན་སུམ་ཡང་གཟུང་བའི་ཡུལ་སྐད་ཅིག་མ་ཅིག་ལ་ཚད་མ་མ་ཡིན་ཏེ། དེ་ཐོབ་པར་མི་ནུས་པའི་ཕྱིར་རོ། །དེའི་ཕྱིར་ཚད་མ་གཉི་ག་ཡང་ངེས་པར་བྱས་པའི་རྒྱུན་ལ་ལྟོས་ན་རང་གི་མཚན་ཉིད་ཀྱིས་ཡུལ་ཅན་དུ་མཚུངས་སོ། །འོན་ཀྱང་སོ་སོར་ངེས་པའི་རྒྱུད་བདག་ཉིད་ཀྱི་རང་བཞིན་གྱིས་དོན་བྱེད་པ་རྒྱུད་གཞན་གྱིས་དབེན་པར་ཉེ་བར་འཇོག་པར་བྱེད་པའི་ཕྱིར་མངོན་སུམ་
རང་གི་མཚན་ཉིད་ཀྱི་ཡུལ་ཅན་ཡིན་ལ། རྗེས་སུ་དཔག་པས་ནི་རྒྱུན་གཞན་ལས་རྣམ་པར་བཅད་པའི་སོ་སོར་ངེས་པའི་ཁྱད་པར་གཅིག་ཉིད་འཇོག་པར་མི་ནུས་པའི་ཕྱིར་སྤྱིའི་ཡུལ་ཅན་ཡིན་ནོ། །ཡུལ་ལ་ལོག་པར་རྟོགས་པའི་ལྷག་མ་བསལ་ནས། ཚུལ་གསུམ་རྟགས་ལས་ཞེས་གང་བཤད་པའི་ཚུལ་གསུམ་པ་དེ་ཉིད་བསྟན་པའི་ཕྱིར་བཤད་པ། འཆད་པར་འགྱུར་བའི་རྗེས་སུ་དཔག་པར་བྱ་བའི་རང་བཞིན་ལ་ཡོད་པ་དང༌། དེ་དང་མཚུངས་པ་མཐུན་པའི་ཕྱོགས་ལ་ཡོད་པར་ངེས་པ་དང༌། མེད་པ་མི་མཐུན་པའི་ཕྱོགས་ལ་མེད་པར་ངེས་པའོ། །རྗེས་སུ་དཔག་པར་བྱ་བ་ཡང་གང་ཞེ་ན། བཤད་པ། ཤེས་པར་འདོད་པ་སྟེ། ཤེས་པར་བྱ་བའི་དོན་དུ་འདོད་པའི་བྱེ་བྲག་གང་ལ་ཡོད་པ། དེ་ལ་དེ་སྐད་ཅེས་བྱ་སྟེ། རྗེས་སུ་དཔག་པར་བྱ་བ་ནི་ཆོས་ཅན་ཡིན་ནོ། །རྗེས་སུ་དཔག་པར་བྱ་བའི་ཐ་སྙད་ནི་རྣམ་པ་གསུམ་ལ་ཡིན་ཏེ། སྒྲུབ་པར་བྱེད་པ་ལས་རྟོགས་པ་ཆོས་དང་ཆོས་ཅན་གྱི་སྤྱི་གང་ཡིན་པ་དེ་ནི་དངོས་སུ་རྗེས་སུ་དཔག་པར་བྱ་བ་ཡིན་ཞིང༌། ཁྱབ་པའི་ཡུལ་བསྒྲུབ་པར་བྱ་བའི་ཆོས་དང་གཏན་ཚིགས་ཀྱི་མཚན་ཉིད་ཀྱི་ཡུལ་ཆོས་ཅན་ནི་བཏགས་ནས་རྗེས་སུ་དཔག་པ་ཡིན་ནོ། །འདིའི་ཡུལ་ལ་སྤྱིའི་ནི་རྗེས་སུ་དཔག་པར་བྱ་བ་མ་ཡིན་ཏེ། དེ་ལྟ་བུའི་སྤྱི་ལ་རྟགས་མ་གྲུབ་པའི་ཕྱིར་རོ། །དེ་ལ་གྲུབ་ན་ཡང་རྟགས་ཉིད་མ་ཡིན་ཏེ། བསྒྲུབ་པར་བྱ་བ་མེད་པའི་ཕྱིར་རོ། །ཆོས་ཙམ་ཡང་འདིར་རྗེས་སུ་དཔག་པར་བྱ་བ་མ་ཡིན་ཏེ། རྗེས་སུ་འགྲོ་བ་དང་ལྡོག་པའི་སྒོ་ནས་དེ་ལྟ་བུའི་ཆོས་ཙམ་ལ་ཡོད་པར་འཆད་པར་འགྱུར་བའི་ཕྱིར་རོ། །དེའི་ཕྱིར་ཆོས་ཅན་ཉིད་རྗེས་སུ་དཔག་པར་བྱ་ཞེས་ཁྱད་པར་དུ་བྱས་པ་ཡིན་ནོ། །འདིར་ཞེས་བྱ་བ་ནི་གཏན་ཚིགས་ཀྱི་མཚན་ཉིད་ཀྱི་སྐབས་འདིར་རོ། །རྗེས་སུ་དཔག་པར་བྱ་བ་དེ་ལ་མཐོང་བ་ནི་ངེས་པ་སྟེ། ས་ཕྱོགས་སུ་དུ་བ་ནི་མངོན་སུམ་གྱིས་ཡིན་ལ། སྒྲ་ལ་བྱས་པ་ཉིད་ནི་རྗེས་སུ་དཔག་པས་ཡིན་ནོ། །དེ་ལ་ཡོད་པ་ཚད་མ་ལས་ཡིན་པ་འབའ་ཞིག་ཏུ་མ་ཟད་ཀྱི། དེ་བཞིན་དུ་དེ་དང་མཚུངས་པ་ཉིད་དེ་མཐུན་པའི་ཕྱོགས་ལ་ཡང་ངོ༌། །ཉིད་ཀྱི་སྒྲས་ནི་མི་མཐུན་པའི་ཕྱོགས་ལས་ལྡོག་པ་སྟོན་པ་ཡིན་ལ། ཡང་གི་སྒྲ་ནི་སྡུད་པའོ། །རྗེས་སུ་དཔག་པར་བྱ་བའི་ཆོས་ཅན་གྱི་ཁྱད་པར་དུ་བྱས་པ་ནི་རྣམ་པར་བཅད་པར་གཞན་དཔེའི་ཆོས་ཅན་ལ་ཡོད་པ་སྲིད་པ་ནི་འགལ་ལོ། །དེ་སྟེ་ཡང་ཆོས་ཅན་གྱིས་ཁྱད་པར་དུ་མི་བྱེད་ན་ནི་དེའི་ཚེ་རྗེས་
སུ་དཔག་པར་བྱ་བའི་ཆོས་གཏན་ཚིགས་ཡིན་ནོ་ཞེས་གཏན་ཚིགས་རྗེས་སུ་དཔག་པར་བྱ་བའི་ཆོས་མ་ཡིན་པར་འགྱུར་ན་འདོད་པ་ནི་ཡིན་ནོ། །དོན་ནི་འདི་ཡིན་ཏེ། དཔེར་ན་རྒྱལ་པོའི་སྐྱེས་བུ་གཞན་ལས་རྣམ་པར་གཅད་པ་དེ་བཞིན་དུ་རྗེས་སུ་དཔག་པར་བྱ་བས་ཀྱང་ཆོས་ཆོས་ཅན་གཞན་ལ་རྣམ་པར་གཅོད་པ་ཡིན་ནོ་ཞེས་གཞན་དོགས་པ་ལ་མ་ཡིན་ཏེ་ཞེས་སྨོས་ཏེ། གཞན་ལ་ཡོད་པ་འགལ་བ་མ་ཡིན་ནོ། །དེ་ཅིའི་ཕྱིར་ཞེ་ན། མི་ལྡན་པ་མ་འབྲེལ་པ་རྣམ་པར་གཅོད་པ་བཟློག་པའི་རྒྱུས་ནི་ཆོས་ཁྱད་པར་བྱས་པའི་ཕྱིར་རོ། །འདི་སྐད་བཤད་པ་ཡིན་ཏེ། མི་ལྡན་པ་རྣམ་པར་གཅད་པ་ཉིད་བྱས་ནས་ཆོས་ཅན་གྱི་ཆོས་རྣམ་པར་གཅད་ཀྱི། གཞན་དང་ལྡན་པ་རྣམ་པར་གཅོད་པ་ནི་མ་ཡིན་ནོ། །ཅི་གང་གིས་མ་འབྲེལ་པ་རྣམ་པར་གཅོད་པ་ཞེས་ཁྱད་པར་དུ་བརྗོད་པ་རྣམ་པར་གཅོད་པ་རྣམ་པ་དུ་མ་ཡོད་དམ་ཞེ་ན། ཡོད་དོ་ཞེས་བརྗོད་དོ། །ཆོས་ཅན་གྱི་གཞན་གྱི་དབང་བརྟེན་པ་ཆོས་ཀྱི་ཚིག་ཕྲད་ཉིད་ཅེས་བྱ་པའི་སྒྲ་ཐ་དད་པར་བྱེད་པ་ཡིན་པས་མི་ལྡན་པ་མ་འབྲེལ་པ་དང༌། གཞན་དང་ལྡན་པ་གཞན་དང་འབྲེལ་པ་དང༌། གཏན་མི་ལྡན་པ་ཤིན་ཏུ་མི་སྲིད་པ་རྣམ་པར་གཅོད་བྱེད་ཟློག་པར་བྱེད་དོ། །ཉིད་ཀྱི་སྒྲ་ནི་རྣམ་པར་གཅོད་པ་ནི་འདི་ཙམ་མོ་ཞེས་རྣམ་པར་གཅོད་པ་ངེས་པར་སྟོན་ཏོ། །དང་གི་སྒྲས་ནི་ཡོད་པའི་དངོས་པོ་སྡུད་པའོ། །ཡང་ཇི་ལྟར་ན་ཚིག་ཕྲད་གཅིག་གིས་བརྗོད་པར་བྱ་བའི་དོན་ཕན་ཚུན་འགལ་བ་གསུམ་འཇོག་པར་ནུས་ཤེ་ན། རྒྱུ་མཚན་བསྟན་པའི་ཕྱིར་སྨྲས་པ་ནི་ཁྱད་པར་དང་ཁྱད་པར་ཅན་ཏེ། དེ་དག་གི་རྗོད་པར་བྱེད་པ་དག་དང་ལྷན་ཅིག་བརྗོད་པ་དང༌། བྱ་བ་ཞེས་བྱ་བའི་ཚིག་དང་ལྷན་ཅིག་བརྗོད་པའོ། །འདི་ལ་བསམ་པ་ནི་འདི་ཡིན་ཏེ། ཚིག་ཕྲད་ནི་གསལ་བར་བྱེད་པ་ཡིན་ལ། གསལ་བར་བྱེད་པ་ལས་ནི་ཚིག་གཞན་གྱིས་བརྗོད་པར་བྱ་བའི་དོན་ཕྱིས་འབྱུང་བའི་ཁྱད་པར་གང་ཡིན་པ་དེ་གསལ་བར་བྱེད་པ་ཡིན་གྱི། རང་དབང་དུ་ནི་བརྗོད་པར་བྱ་བའི་དོན་དང་ལྡན་པ་མ་ཡིན་ནོ། །དེས་ན་གསལ་བར་བྱེད་པའི་ཚིག་གང་དང་འབྲེལ་བར་བརྗོད་པ་དེས་ནི་ཚིགས་དེར་གཏོགས་པའི་ཁྱད་པར་གསལ་བར་བྱ་བ་མ་ཡིན་གྱི། གཞན་ནི་འགའ་ཡང་མ་ཡིན་ནོ། །དེའི་ཕྱིར་འདིའི་དོན་ནི་ཚིག་གཞན་དང་འབྲེལ་བས་རྣམ་པར་འཇོག་པར་བྱེད་དོ། །ཁྱད་པར་ནི་འདིར་བརྟེན་པ་སྟེ་ཆོས་ལ་བྱའོ། །ཁྱད་པར་ཅན་ནི་ཆོས་ཅན་ལ་བརྗོད་དོ། །དེས་ན་རྗེས་སུ་དཔག་
པར་བྱ་བ་ལ་ཞེས་བདུན་པའི་མཐའ་ཅན་ཡིན་ཡང་ཁྱད་པར་ཅན་ཉིད་དོ། །རྟེན་ཡིན་པའི་ཕྱིར་རོ། །ཆོས་ནི་དང་པོའི་མཐའ་ཅན་ཡིན་ཡང་ཁྱད་པར་ཉིད་དེ་བརྟེན་པའི་ཕྱིར་རོ། །འོ་ན་ནི་གང་གི་ཚེ་ཚིག་ཕྲད་མ་སྦྱར་བ་དེའི་ཚེ་ཇི་ལྟར་རྣམ་པར་བཅད་པ་རྟོགས་པར་བྱ་ཞེ་ན། སྨྲས་པ། དེ་སྦྱར་མེད་ཀྱང་བརྗོད་འདོད་དེ་བརྗོད་པར་འདོད་པ་ལས་ཚིག་ཕྲད་དེའི་དོན་གང་ཡིན་པ་རྟོགས་པར་འགྱུར་ཏེ། གང་གིས་གང་སྦྱར་བ་དེ་ལས་དོན་དེ་རྟོགས་པར་འགྱུར་རོ། །གང་གི་ཕྱིར་གལ་ཏེ་དོན་དེ་སྟོན་པར་མི་འདོད་ན་ནི་ངག་སྦྱར་བ་དོན་མེད་པར་འགྱུར་རོ། །ཅི་ལྟར་དོན་མེད་ཅེ་ན། བཤད་པ། གང་ཕྱིར་ཏེ་གང་གི་ཕྱིར་དག་གང་ལ་འབྲས་བུ་རྣམ་པར་གཅོད་པ་ཡོད་པ་སྟེ་དེའི་ཕྱིར་རོ། །དཔེར་ན་ཆུ་འོན་ཅིག་ཅེས་སྨྲས་པ་ན། གལ་ཏེ་ཆུའམ་གཞན་ཡང་རུང་བ་ཞིག་ཁྱེར་ཏེ་འོང་བར་འདོད་ན་ནི་ཆུ་སྨོས་པ་དོན་མེད་པར་འགྱུར་རོ། །ཅི་སྟེ་ཡང་ཁྱེར་ཏེ་འོང་བར་མི་འདོད་ན་ནི། འོན་ཅིག་ཅེས་སྨོས་པ་དོན་མེད་པར་འགྱུར་རོ། །དེ་བཞིན་དུ་ཚིག་གི་དོན་དུ་མ་བསྡུས་པའི་བདག་ཉིད་ངག་གི་དོན་ཀྱང་སྐབས་ཀྱི་དབང་གིས་རྣམ་པ་ཅི་ཞིག་ལྟར་རྣམ་པར་གཅད་པ་སྨྲ་བ་པོ་དག་གི་འབྲས་བུར་འདོད་པ་ཡིན་ནོ། །འདི་ལྟར་གལ་ཏེ་ནག་པ་འཕོང་མི་སྐྱེན་ན། འཕོང་སྐྱེན་ཞེས་མི་བརྗོད་ཅིང༌། དེ་བཞིན་དུ་འཕོང་སྐྱེན་པ་ཕུལ་དུ་བྱུང་བ་གཞན་ཡང་ཡོད་ན་སྲིད་སྒྲུབ་འཕོང་སྐྱེན་པར་བརྗོད་པར་མི་བྱ་སྟེ། དེ་འཕོང་སྐྱེན་པ་ནི་གྲུབ་པའི་ཕྱིར་རོ། །གལ་ཏེ་སྔོན་པོ་པདྨ་མི་སྲིད་ན་ནི་སྔོན་པོ་ཞེས་བརྗོད་པར་མི་བྱའོ། །དེས་ན་གང་གི་དོན་བསྟན་པར་འདོད་པའི་བརྗོད་པར་འདོད་པ་གང་ཡིན་པ་དེ་ལས་ངེས་པར་གཟུང་བའི་དོན་རྟོགས་པ་ཉིད་དོ། །རྣམ་པར་གཅོད་པ་རྣམ་པ་གསུམ་ཀ་ལ་ཡང་དཔེ་སྟོན་པ་ནི་དཔེར་ན་ནག་པ་འཕོང་སྐྱེན་པའམ་ཞེས་བྱ་བ་ལ་སོགས་པའོ། །འདི་ལ་གཞན་རྟོགས་པའི་དོན་དུ་ངག་སྦྱོར་བ་ན་ཕ་རོལ་པོས་རྨོངས་པ་གང་དོགས་པར་བྱས་པ་དེ་ཉིད་རྣམ་པར་གཅད་པར་བྱ་བ་ཡིན་ནོ། །ནག་པ་ནི་འཕོང་སྐྱེན་པར་འཇིག་རྟེན་ན་གྲགས་པ་མེད་དོ། །དེས་ན་ནག་པ་འཕོང་མི་སྐྱེན་པར་དོགས་པ་རྣམ་པར་གཅད་པར་བྱ་བའི་དོན་དུ་འཕོང་སྐྱེན་པ་བསྒྲུབ་པའི་ཕྱིར་ངག་སྦྱོར་བ་ཡིན་ནོ། །དེས་ན་ངག་གི་རྣམ་པར་གཅད་པའི་འབྲས་བུ་འདི་འདྲ་བ་ཡིན་ནོ། །སྲིད་སྒྲུབ་ནི་འཕོང་སྐྱེན་པར་གྲགས་པའི་ཕྱིར་འགལ་བ་ཡང་དོགས་པ་མེད་དོ། །དེའི་ཕྱིར་འཕོང་སྐྱེན་པ་ཉིད་ཕུལ་དུ་བྱུང་བ་གང་ཡིན་པ་དེ་སྐྱེས་བུ་གཞན་དང་ཐུན་མོང་དུ་རྟོགས་པའི་ཕྱིར་དེ་རྣམ་པར་གཅད་པའི་
དོན་དུ་སྲིད་སྒྲུབ་ཉིད་འཕོང་སྐྱེན་ནོ་ཞེས་རྣམ་པར་གཅོད་པ་དག་གི་འབྲས་བུ་ཡིན་ནོ། །སྔོན་པོའི་ཁ་དོག་གི་དབྱིན་པའི་པདྨ་ནི་རབ་ཏུ་གྲུབ་ལ། ཅི་འདིའི་རང་བཞིན་ཅན་ལ་སྔོན་པོ་ཉིད་སྲིད་དམ་མི་སྲིད་ཅེས་དོགས་པ་དེའི་ཚེ། དེ་རྣམ་པར་གཅད་པའི་དོན་དུ་སྔོན་པོ་མཚོ་སྐྱེས་སྲིད་པ་ཉིད་དོ་ཞེས་བྱ་བའི་ངག་ཡིན་ནོ། །གལ་ཏེ་ནག་པའི་དོན་འཕོང་སྐྱེན་པ་ཉིད་དོ་ཞེས་བྱ་བ་ལ་སོགས་པའི་ངག་ལ་འཕང་སྐྱེན་པ་ལ་སོགས་པའི་སྒྲའི་བརྗོད་པར་བྱ་བར་མ་གྱུར་བ་དེ་དག་ཀྱང་འཕོང་སྐྱེན་པ་ཉིད་ལ་སོགས་པར་སྒྲའི་བརྗོད་པར་བྱ་བ་དག་ལས་གཞན་ཡིན་པས་ཐ་དད་པར་བྱེད་པའི་ཚིག་གི་ཕྲད་ལས་ལྡོག་པར་རྟོགས་ན། འོ་ན་ནི་གཞན་ཡོད་པར་ཁྱད་པར་མེད་པའི་ཕྱིར་གཏོང་ཕོད་ལ་སོགས་པའི་ཆོས་གཞན་དག་ཀྱང་ལྡོག་པར་རྟོགས་པར་འགྱུར་རོ་ཞེས་དོགས་པ་ལ། བཤད་པ། རྣམ་པར་གཅོད་པར་བྱེད་པ་གསུམ་པོ་དེར་ཡང་ཟླ་བོ་འགལ་ཟླ་རྣམ་པར་གཅོད་པ་ལྡོག་པ་དོན་དེ་དག་གི་དོན་རྣམས་ལ་ནི་རྟོགས་པར་འགྱུར་ཏེ། ཆོས་འགའ་ཞིག་ངེས་པ་གང་ཡིན་པ་དེ་ལས་བཟློག་པ་ཉིད་རྟོགས་པར་འགྱུར་རོ་ཞེས་བྱ་བའི་དོན་ཏོ། །འཕོང་སྐྱེན་པ་བསྒྲུབས་ན་འགལ་ཟླ་འཕོང་མི་སྐྱེན་པ་རྣམ་པར་གཅོད་ཀྱི། གཞན་ཙམ་ནི་མ་ཡིན་ལ། སྲིད་སྒྲུབ་ཀྱི་ཐུན་མོང་མ་ཡིན་པའི་འཕོང་སྐྱེན་པ་བསྒྲུབས་པས་ན་འགལ་ཟླ་འགྲོ་བ་ཐམས་ཅད་དང་ཐུན་མོང་དུ་གྱུར་པའི་འཕོང་སྐྱེན་པ་རྣམ་པར་གཅོད་ཀྱི་གཏོང་ཕོད་ལ་སོགས་པ་ནི་མ་ཡིན་ནོ། །དེ་བཞིན་དུ་སྔོན་པོ་ཉིད་སྲིད་པར་བསྒྲུབས་ན་མི་སྲིད་པར་རྣམ་པར་གཅོད་ཀྱི་གཞན་ནི་མ་ཡིན་ནོ། །ཕྱོགས་འདིས་ངག་ཐམས་ཅད་ལ་འབྲས་བུ་རྣམ་པར་གཅོད་པ་གསུམ་བལྟ་བར་བྱ་སྟེ། སྲོག་ནར་འགྲོ་བའི་ལམ་ནི་འདིའོ་ཞེས་སྨྲས་པ་ནི། རྨོངས་པའི་དོགས་པའི་ཁྱད་པར་གྱི་རྣམ་པར་གཅོད་པ་རྣམ་པ་གསུམ་ཀ་ཡང་སྲིད་པ་ཡིན་ནོ། །ལམ་གཉིས་ལས་འདི་ཉིད་ཡིན་གྱི་ཅིག་ཤོས་ནི་མ་ཡིན་ནོ་ཞེས་བྱ་བ་གཞན་དང་ལྡན་པ་རྣམ་པར་གཅོད་པའོ། །ཅི་འདི་སྲོག་ནར་འགྲོ་བ་ཡིན་ནམ་འོན་ཏེ་གྲོང་གཞན་དུ་འགྲོ་བ་ཡིན་ཞེས་ཐེ་ཚོམ་ཟ་ན་སྲོག་ནར་འགྲོ་བ་ཉིད་དོ་ཞེས་མ་འབྲེལ་པ་རྣམ་པར་གཅོད་པ་ཡིན་ནོ། །ཅི་འགྲོ་འམ་འོན་ཏེ་མི་འགྲོ་ཞེས་ཐེ་ཚོམ་ཟ་ལ་འགྲོ་བ་ཉིད་དོ་ཞེས་གཏན་མི་ལྡན་པ་རྣམ་པར་གཅོད་པ་ཡིན་ནོ། །དེ་བཞིན་དུ་གཞན་དུ་ཡང་སྦྱར་རོ། །ཡང་ཅིའི་ཕྱིར་འགལ་ཟླ་ཉིད་བཟློག་པའི་གཞན་ཙམ་མ་ཡིན་ཞེ་ན། དེ་ལྟར་གྲགས་དང་ཞས་སྨོས་ཏེ། འཇིག་
རྟེན་ཐ་དད་པར་བྱེད་པའི་ཚིག་ཕྲད་ཀྱི་འགལ་བ་ཉིད་ཟློག་གི་གཞན་ཙམ་ནི་མ་ཡིན་ནོ་ཞེས་གྲགས་པ་ཡིན་ཏེ། དེས་ན་དེ་ལྟར་གྲགས་ཕྱིར་ཏེ། དེ་ཉིད་ཟློག་པ་ཡིན་ནོ་ཞེས་རྟོགས་པར་འགྱུར་རོ། །དཔེར་ན་སྒྲའི་དོན་རྟོགས་པ་འཇིག་རྟེན་གྱི་གྲགས་པའི་རྗེས་སུ་འབྲང་བ་ལས་རྒྱུ་མཚན་གཞན་མེད་པ་དེ་བཞིན་དུ། སྒྲའི་དོན་ལས་གཞན་བཟློག་པ་ཡང་གྲགས་པ་ལས་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་སྒྲའི་བརྗོད་བྱ་མ་ཡིན་པར་ཁྱད་པར་མེད་པ་ལས་ཅིའི་ཕྱིར་འགའ་ཞིག་ཉིད་བཟློག་པར་གྲགས་ཀྱི་ཐམས་ཅད་ནི་མ་ཡིན་ནོ་ཞེས་བྱ་བ་འདི་ཉིད་ཁྱོད་ལ་དྲིས་པ་མ་ཡིན་ནམ་ཞེ་ན། ནུས་པ་དང་ཞེས་སྨོས་ཏེ། སྒྲའི་དོན་མ་ཡིན་པ་ཡང༌། བཟློག་པར་གྲགས་བ་རྒྱུ་མཚན་མེད་པ་མ་ཡིན་གྱི། འོན་ཀྱང་སྒྲའི་ནུས་པ་ལས་སོ། །གལ་ཏེ་འཕོང་མི་སྐྱེན་པ་ཉིད་རྣམ་པར་མི་གཅོད་ན་ནི་འཕོང་སྐྱེན་པའི་ཚིག་དོན་མེད་པར་འགྱུར་བའི་ཕྱིར་རོ། །ཤུགས་ཀྱིས་འཕོང་སྐྱེན་པ་ཉིད་ཀྱིས་འཕོང་སྐྱེན་པ་རྣམ་པར་གཅོད་པ་ཡིན་གྱི། དེ་ལྟར་གཏོང་ཕོད་པ་ཉིད་རྣམ་པར་མི་གཅོད་ན་འཕོང་སྐྱེན་པའི་ཚིག་དོན་མེད་པར་འགྱུར་བ་ནི་མ་ཡིན་ནོ། །དེས་ན་གཞན་ཙམ་རྣམ་པར་གཅད་པ་ལ་ནི་སྒྲའི་ནུས་པ་ཡོད་པ་མ་ཡིན་པས་གཞན་ཙམ་རྣམ་པར་གཅོད་པར་མ་གྲགས་པ་ཡིན་ནོ། །སྒྲའི་ནུས་པའི་ཕྱིར་རོ་ཞེས་སྤྱིའི་ཕྱིར་བརྗོད་དེ། སྒྲ་སྦྱར་བ་ཅི་སྙེད་པ་ནི་རང་གི་དོན་རྟོགས་པར་བྱ་བའི་ཕྱིར་ཡིན་ན་འདིར་ཟླ་བོའི་ཆོས་ནི་བརྗོད་བྱ་བ་མ་ཡིན་ནོ་ཞེ་ན། སྒྲ་ནི་བརྗོད་འདོད་རྗེས་འབྲང་ཞིང༌། །ཞེས་སྨོས་ཏེ། སྒྲ་ནི་ངག་གི་དོན་བསྟན་པར་འདོད་པའི་བསམ་པ་བརྗོད་པར་འདོད་པ་དེའི་རྗེས་སུ་འབྲང་བའི་ཕྱིར་རོ། །དེ་སྐད་བརྗོད་པ་ཡིན་ཏེ། བརྗོད་པར་འདོད་པ་ལ་སྣང་བ་ཉིད་སྒྲས་བརྗོད་ཀྱི་མི་སྣང་བ་ནི་མ་ཡིན་ལ། བརྗོད་པར་འདོད་པ་ལ་ཡང་ཟླ་བོ་རྣམ་པར་བཅད་པ་ལ་འཇུག་པ་ཡིན་ནོ། །འདི་ལྟར་བློ་གྲོས་རྨོངས་པའི་དོགས་པའི་གནས་གཅོད་པར་བྱེད་པས། དོན་འགའ་ཞིག་བརྗོད་པར་འདོད་པ་ཡིན་ཏེ། དེས་ན་སྨྲ་བ་པོའི་བརྗོད་པར་འདོད་པ་ལ་སྣང་བའི་དོན་བརྗོད་པའི་སྒྲ་བརྗོད་པར་འདོད་པའི་བརྗོད་བྱ་དོན་འགའ་ཞིག་བཟློག་པར་འདོད་པ་ཡིན་ལ། དེ་ཡང་འགལ་ཟླ་ཡིན་ནོ། །འདི་ལྟར་འགལ་ཟླ་ཅིག་ཤོས་མི་ཟློགས་ན་ནི་བརྗོད་བྱ་བརྗོད་པར་འདོད་པའི་དོན་མེད་པར་འགྱུར་གྱི། གཞན་ཙམ་མི་ཟློགས་པས་ནི་མ་ཡིན་ནོ། །དེའི་ཕྱིར་སྒྲ་རྣམས་ཀྱི་དོན་ནི་བརྗོད་པར་འདོད་པའི་རྗེས་སུ་འབྲང་བ་
ཡིན་ལ། བརྗོད་པར་འདོད་པ་ཡང་འགལ་ཟླ་ཟློག་པར་བྱེད་པར་མི་འཐད་པས་སྒྲ་རྣམས་ནི་རྗོད་པར་བྱེད་པ་ཡིན་པའི་ཤུགས་ཀྱིས་བརྗོད་བྱ་མ་ཡིན་ཡང་འགལ་ཟླའི་ཆོས་ཉིད་ཐ་དད་པར་བྱེད་པའི་ཚིག་ཕྲད་ཀྱིས་བཟློག་པར་བྱ་བ་ཡིན་པར་གྲགས་ཀྱི་གཞན་ཙམ་ནི་མ་ཡིན་ནོ། །གལ་ཏེ་རྣམ་འགྲེལ་ལས་དེ་ལྟར་གྲགས་པའི་ཕྱིར་དང༌། ནུས་པའི་ཕྱིར་དང༌། སྒྲ་ནི་བརྗོད་པར་འདོད་པའི་རྗེས་སུ་འབྲང་བ་ཡིན་པའི་ཕྱིར་རོ་ཞེས་གཏན་ཚིགས་གསུམ་ལ་བསྡུ་བ་བྱས་པ་མ་ཡིན་ནམ་ཞེ་ན། བདེན་ཏེ། བསྡུ་བ་ནི་ཡི་གེ་དུ་མ་ཆུད་པ་དང༌། མི་འཚམ་པ་ཡིན་ནོ། །དེས་ན་སློབ་དཔོན་གྱིས་བཞེད་པ་ནི་མ་ཡིན་ནོ། །དཔེར་ན། འཚེ་བ་མེད་དང་ཡང་དག་དོན། །ངོ་བོ་ཉིད་ལ་ཞེས་བྱ་བ་ལ། བདག་མེད་པ་ལ་མཐོང་བ་ནི་འཚེ་བ་མེད་པ་དང༌། ཡང་དག་པའི་དོན་ཤེས་པའི་ངོ་བོ་ཉིད་ཡིན་ནོ་ཞེས་བྱ་བ་སློབ་དཔོན་གྱི་བཤད་པ་བོར་ནས་འགྲེལ་པ་བྱེད་པས་འཚེ་བ་མེད་པའི་ངོ་བོ་ཉིད་དང༌། ཡང་དག་པའི་དོན་གྱི་ངོ་བོ་ཉིད་ཅེས་བཤད་པ་དེ་བཞིན་དུ་གཞན་དུ་ཡང་འདོད་པ་མ་ཡིན་པ་སྲིད་དོ་ཞེས་རྟོགས་སོ། །གང་གི་ཕྱིར་གཞན་ལས་རྣམ་པར་གཅོད་པར་འགྱུར་བ་ཇི་ལྟར་སྲིད་སྒྲུབ་འཕོང་སྐྱེན་པ་གྲགས་པ་གཞན་ལས་རྣམ་པར་གཅད་པར་བྱ་བ་དེ་ལྟར་ནི་གཏན་ཚིགས་རྗེས་སུ་དཔག་པར་བྱ་བའི་ཆོས་སུ་མ་གྲགས་ཏེ། བསྟན་བཅོས་ཀྱི་མཚན་ཉིད་ཀྱི་ཚིག་གཞན་མེད་པའི་ཕྱིར་རོ། །དེས་ན་རྗེས་སུ་དཔག་པར་བྱ་བའི་ཆོས་སུ་སྒྲུབ་པ་ཡིན་པའི་ཕྱིར་འདིར་མི་ལྡན་པ་ཉིད་རྣམ་པར་གཅོད་པ་ཡིན་ནོ་ཞེས་འཆད་པ་ནི། དེས་ན་མི་ལྡན་པ་རྣམས་གཅོད་པའི་རྒྱུ་དེས་ན་ཆོས་ཅན་ཆོས་ཀྱི་ཁྱད་པར་ཡིན་ཏེ། རྣམ་པར་གཅོད་པར་བྱེད་པ་བལྟ་བར་བྱའོ། །དེས་ན་ཆོས་ཅན་གྱི་ཁྱད་པར་ཅན་གྱི་ཆོས་དཔེ་ལ་རྗེས་སུ་འགྲོ་བ་མེད་པའི་སྐྱོན་བརྟེན་པ་མ་ཡིན་ནོ། །གཞན་དང་ལྡན་པ་རྣམ་པར་གཅད་པས་ཁྱད་པར་ཡིན་པར་ཁས་ལེན་ན་སྐྱོན་བསྟན་པའི་ཕྱིར་བཤད་པ། སྒྲ་ལ་སོགས་པ་དང་འབྲེལ་པའི་བྱ་བ་གཅིག་གཏན་ཚིགས་ཉིད་དེར་འགྱུར་ན་ཆོས་ཅན་གཞན་དང་འབྲེལ་པའི་བྱས་བ་གཞན་དེ་ཉིད་མ་ཡིན་པ་ཞེས་བྱ་བ་གཏན་ཚིགས་ཉིད་མ་ཡིན་པར་འགྱུར་རོ། །འདི་ལྟར་རྗེས་སུ་དཔག་པར་བྱ་བ་ཉིད་ཀྱི་ཆོས་གཏན་ཚིགས་ཡིན་གྱི་གཞན་གྱི་ནི་མ་ཡིན་ནོ་ཞེས་བྱ་བའི་ངག་འདིར་འགྱུར་ན། དེ་ལྟར་ན་མི་འཐད་དེ་རང་བཞིན་མཚུངས་པ་དག་ལས་གཅིག་གཏན་ཚིགས་ཉིད་ཡིན་ན།
གཞན་གཏན་ཚིགས་མ་ཡིན་པར་ཇི་ལྟར་འགྱུར། སྒྲ་གཅིག་བྱས་པ་ཉིད་ཡིན་ན་གཞན་བུམ་པ་མ་བྱས་པ་ཉིད་དུ་ཐལ་ལོ་ཞེས་བྱ་བའི་དོན་འདི་ནི་མ་ཡིན་ཏེ། འདི་ལྟར་གང་ཞིག་རྗེས་སུ་དཔག་པར་བྱ་བ་ཉིད་དུ་ཡོད་པ་དེ་ནི་གཏན་ཚིགས་ཡིན་ནོ་ཞེས་བྱ་བ་འདི་དག་གི་དོན་ཡིན་གྱི། གང་གིས་གཞན་མ་བྱས་པ་ཉིད་དུ་འགྱུར་བ་གང་རྗེས་སུ་དཔག་པར་བྱ་བ་ཉིད་ལ་ཡོད་པ་དེ་ནི་བྱས་པ་ཡིན་ནོ་ཞེས་བྱ་བའི་དོན་འདི་ནི་མ་ཡིན་ནོ། །གཏན་ཚིགས་མ་ཡིན་པ་ཉིད་དུ་ནི་ཐལ་བར་འགྱུར་ཏེ། འདི་ལྟར་གང་གི་ཚེ་རྟག་པའི་དངོས་པོ་ལས་ལྡོག་པས་མི་རྟག་པ་ཉིད་དུ་གཟུང་བ་དེའི་ཚེ་སྤྱིར་གཅིག་ཏུ་འགྱུར་བ་ཡིན་ལ། གང་གི་ཚེ་ལྡོག་པ་གཞན་གྱི་ཁྱད་པར་དུ་བྱས་པ་དེའི་ཚེ་ནི་གཞི་སོ་སོ་ལ་ཐ་དད་པས་དུ་མར་འགྱུར་བ་ཡིན་ནོ། །དེ་བཞིན་དུ་བྱས་པ་ཉིད་ཀྱང་དུ་མ་ཡིན་ནོ། །དེས་ན་གཅིག་གཏན་ཚིགས་ཉིད་ལ་གཞན་ནི་གཏན་ཚིགས་མ་ཡིན་པར་འགྱུར་རོ། །སྐྱོན་འདིར་མ་ཟད་དེ། འོན་ཀྱང་ཁྱད་པར་དང་ཁྱད་པར་ཅན་དང་འབྲེལ་པའི་ཚིག་ཕྲད་ཀྱང་སྟེ། དེ་དག་གི་ཚིག་ཕྲད་ཁྱད་པར་མེད་པར་འགྱུར་རོ་ཞེས་བྱ་བའི་དོན་ཏོ། །མ་འབྲེལ་པར་རྣམ་པར་བཅད་པའི་སྒོ་ནས་གཏན་ཚིགས་ཀྱི་ཆོས་ཅན་གྱིས་ཁྱད་པར་དུ་བྱས་པར་བཤད་པ་འདིས་ནི་བསྒྲུབ་པར་བྱ་བའི་ཆོས་ལ་ཡང་མ་འབྲེལ་པ་རྣམ་པར་གཅོད་པའི་རྒྱུ་མཚན་གྱིས་ཁྱད་པར་དང་ཁྱད་པར་ཅན་གྱི་དངོས་པོར་ངེས་པར་བྱའོ། །དེས་ན་དེ་ལ་ཡང་རྗེས་སུ་འགྲོ་བ་མེད་པའི་སྐྱོན་སྤང་བར་འགྱུར་རོ། །འདི་ཉིད་སྟོན་པ་ནི་དེས་ན་རྗེས་སུ་འགྲོ་བ་མེད་པ་མ་ཡིན་ནོ་ཞེས་བྱ་བ་ཡིན་ནོ། །འདི་ནི་བཅའ་བ་སྦྱོར་བ་ཡིན་ན་བརྗོད་པར་བྱ་བ་མ་ཡིན་གྱི། དམ་བཅའ་བ་སྦྱོར་བ་མེད་ན་རྗེས་སུ་འགྲོ་བའི་དུས་སུ་ཆོས་ཅན་ཉིད་མེད་པའི་ཕྱིར་རྗེས་སུ་འགྲོ་བ་མེད་པའི་སྐྱོན་གྱི་རྟོགས་པ་ཡོད་པ་མ་ཡིན་ནོ། །མ་འབྲེལ་པར་རྣམ་པར་གཅོད་པ་ལ་ཡོན་ཏན་གཞན་ཡང་སྟོན་པ་ནི་དེ་བཞིན་དུ་ཞེས་བྱ་བ་ལ་སོགས་པའོ། །མི་རྟག་པ་ཉིད་ཀྱི་རང་བཞིན་ནམ། མེའི་རང་བཞིན་གྱི་སྤྱི་བསྒྲུབ་པར་བྱ་བ་ཡིན་ཡང་འདི་སྐད་ཅེས་མེ་ཙམ་དང་མི་རྟག་པ་ཙམ་བསྒྲུབ་པ་ན་གྲུབ་པ་ལ་སྒྲུབ་པ་ཉིད་ཀྱི་སྐྱོན་དུ་འགྱུར་རོ་ཞེས་ནི་བརྗོད་པར་ནུས་པ་མ་ཡིན་ན། གང་གི་ཕྱིར་སྤྱིའི་རང་བཞིན་མེ་ཙམ་དང་མི་རྟག་པ་ཙམ་རབ་ཏུ་གྲུབ་ན། མ་འབྲེལ་པ་རྣམ་པར་གཅོད་པའི་མཚན་ཉིད་ཁྱད་པར་ཅན་གྱི་ཕྱོགས་སམ། སྒྲ་དང་འབྲེལ་པར་འགྲུབ་པར་འགྱུར། མ་འབྲེལ་པ་རྣམ་པར་གཅོད་པ་དེ་ནི་མ་གྲུབ་པ་སྒྲུབ་པར་
འགྱུར་བ་ཡིན་ནོ། །དེའི་ཕྱིར་ཁྱབ་པའི་ཚུལ་སྤྱིས་ཡིན་ཡང་མེད་ན་མི་འབྱུང་བའི་ཁྱད་པར་རྟོག་པར་འགྱུར་བ་ཡིན་པའི་ཕྱིར་གྲུབ་པ་ལ་སྒྲུབ་པ་མ་ཡིན་ནོ། །དེ་ཉིད་སྟོན་པར་བྱེད་པ་ནི། སྒྲ་དེ་དང་མ་འབྲེལ་པ་རྣམ་པར་བཅད་པ་མ་གྲུབ་པའི་ཕྱིར་རོ། །མི་ལྡན་པ་རྣམ་པར་བཅད་པ་ནི་ལྡན་པ་སྟེ། འབྲེལ་པ་ལ་བྱའོ། །འབྲེལ་པ་ཡང་འབྲེལ་བ་ཅན་ལས་ཐ་དད་པ་མེད་དེ། དེས་ན་མ་འབྲེལ་པ་རྣམ་པར་བཅད་པ་ནི་ཆོས་དང་ཆོས་ཅན་བསྡུས་པ་ཉིད་ཡིན་ནོ། །དེའི་ཕྱིར་ཇི་ལྟར་ཆོས་ཅན་ཆོས་ཀྱི་སྤྱིའི་ཕྱོགས་གཅིག་ཆོས་ལ་ཁྱབ་པའི་དུས་ན་ཉེ་བར་བརྟགས་ནས་བསྒྲུབ་བྱར་བརྗོད་པ་དེ་བཞིན་དུ། མ་འབྲེལ་པར་རྣམ་པར་བཅད་པའི་ཆོས་བསྒྲུབ་པར་བྱ་བ་ཡིན་ནོ། །དེ་ལྟར་ཡིན་དང་ཅིའི་ཕྱོགས་གཅིག་ཆོས་ཙམ་ཁྱད་པར་མེད་པ་ལ། བསྒྲུབ་བྱར་བརྗོད་པ་ཡིན་ནོ་ཞེས་གང་སྨྲས་པ་དེ་བསལ་བ་ཡིན་ཏེ། ཆོས་དང་ཆོས་ཅན་བསྡུས་པ་ལས་མི་ལྡན་པ་རྣམ་པར་གཅོད་པ་གཞན་མེད་པའི་ཕྱིར་རོ། །སྤྱིའི་ཕྱོགས་གཅིག་ནི་མི་ལྡན་པ་རྣམ་པར་བཅད་པའི་ཁྱད་པར་ཅན་ཉིད་མ་ཡིན་གྱི། འོན་ཀྱང་ཁྱད་པར་དང་འབྲེལ་པ་ཉིད་དུ་གྱུར་པ་ཡིན་པའི་དུས་སུ་བསྒྲུབ་བྱར་ཉེ་བར་བརྟགས་ནས་བརྗོད་པ་ཡིན་ལ། སྤྱི་ཡང་དེ་ཉིད་ཡིན་ནོ། །མཐུན་པའི་ཕྱོགས་ཉིད་ལ་ཡོད་པ་ཞེས་ངེས་པར་གཟུང་བ་དེའི་ཕྱིར་བསྒྲུབ་བྱའི་ཆོས་ཅན་ལ་མེད་པར་ཏེ་མི་ལྡོག་པར་འགྱུར་རོ། །འདི་ལྟར་ངེས་པར་གཟུང་བས་ནི་གཏན་ཚིགས་གཞན་ལས་ལྡོག་པར་བརྗོད་པ་ཡིན་ལ་མི་མཐུན་པའི་ཕྱོགས་དང་རྗེས་སུ་དཔག་པ་དག་ཀྱང་མཐུན་པའི་ཕྱོགས་ལས་གཞན་པར་ཁྱད་པར་མེད་དོ། །དེས་ན་གཉིས་ལས་ཀྱང་ལྡོག་པར་བརྗོད་པ་ཡིན་ནོ་ཞེས་ཕ་རོལ་དག་དོགས་པ་ལ་བཤད་པ་དེ་ལྟར་ནི་མ་ཡིན་ཏེ། ཆོས་ཅན་ལ་མེད་པར་ཐལ་བ་མ་ཡིན་ནོ། །གཞན་དགག་པའི་ཁྱད་པར་དོན་གྱི་ཕྱིར་རོ་ཞེས་བྱ་བ་ནི་གཞན་མི་མཐུན་པའི་ཕྱོགས་ལ་དགག་པའི་དོན་དགོས་པ་ངེས་པར་གཟུང་བ་གང་ལ་ཡོད་པ་སྟེ། མི་མཐུན་པའི་ཕྱོགས་ལས་བཟློག་པའི་དོན་དུ་ངེས་པར་བྱས་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་འདི་སྙམ་དུ་དོན་འདི་འདོད་པ་དེ་ལྟ་ན་ཡང་ངེས་པ་ཁྱད་པར་མེད་པ་ཡིན་པའི་ཕྱིར་རྣམ་པར་དབྱེ་བ་འདི་ག་ལས་ཡིན་ཞེ་ན། བཤད་པ། བསྒྲུབ་པར་བྱ་བའི་ཆོས་ཅན་དེ་ལ་སྔར་ཡོད་པར་གྲུབ་པའི་ངེས་པར་གཟུང་བ་ངེས་པར་བརྗོད་པའི་སྒྲས་ནི་འཇུག་པའི་ཡུལ་གཞན་དེ་མ་ཡིན་པ་རྣམ་པར་གཅོད་པ་ཡིན་ནོ།།
འདི་སྙམ་དུ་ཡོད་པར་གྲུབ་ན་ཡང་ཕྱིས་ངེས་པར་བྱས་པས་སྔར་གྱི་ཡོད་པ་དང་གཞན་ཁྱད་པར་མེད་པར་བཟློག་པར་འགྱུར་རོ་སྙམ་ན་སྡུད་པའི་ཞེས་སྨོས་སོ། །བསམ་པ་ནི་འདི་ཡིན་ཏེ། འདིར་གཞན་བསྒྲུབ་བྱའི་ཆོས་ཅན་ལ་ཡོད་བ་ཉིད་དུ་སྡུད་པའི་མཐུན་པའི་ཕྱོགས་ལ་ཡོད་པར་ངེས་པ་ཡིན་ནོ། །གལ་ཏེ་ངེས་པའི་བསྒྲུབ་བྱའི་ཆོས་ཅན་ལ་ཡོད་པ་ཉིད་བཟློག་ན་ནི་དེའི་ཚེ་བསྡུ་བ་ཉམས་པར་འགྱུར་རོ། །སྒྲའི་དོན་གང་གི་ཁྱད་པར་གསལ་བར་བྱེད་པའི་སྒྲ་སྨོས་པ་དེ་ཉིད་ཀྱིས་གསལ་བར་བྱ་བའི་ཁྱད་པར་གྱི་དོན་གྱི་རང་བཞིན་བཟློག་པ་ནི་མ་ཡིན་ཏེ། དེ་ལྟ་མ་ཡིན་ན་གསལ་བར་བྱེད་པ་ཉིད་དུ་མི་འགྱུར་རོ། །དེའི་ཕྱིར་དོན་གྱི་ཁྱད་པར་ཅི་འདྲ་བ་ཞིག་གི་གསལ་བྱེད་དུ་ཉེ་བར་བླང་པའི་ཚིག་ཕྲད་དེ་ནི་དེའི་རང་བཞིན་ལ་མི་གནོད་པར་ཁྱད་པར་གསལ་བར་བྱེད་པ་ཡིན་ནོ། །ཁྱད་པར་གསལ་བར་བྱེད་པ་སྨོས་པ་འདི་ནི་སྡུད་པ་ཡིན་ཏེ། དེས་ན་བསྡུ་བ་ཉིད་རྗེས་སུ་བརྗོད་ནས་ཁྱད་པར་གསལ་བར་བྱེད་པར་འོས་པ་ཡིན་ཞིང༌། དེ་ལས་ཀྱང་བསྒྲུབ་པར་བྱ་བའི་ཆོས་ཅན་ལ་ཡོད་པ་ཉིད་མ་བཀག་པར་ངེས་པ་ཡིན་ཏེ། སྡུད་པའི་རང་བཞིན་རྗེས་སུ་བརྗོད་པའི་ཕྱིར་རོ། །དེའི་ཕྱིར་སྡུད་པའི་ངེས་པར་གཟུང་བ་ཞེས་བརྗོད་པ་ཡིན་ནོ། །སྒྲའི་དོན་ནི་འཇིག་རྟེན་པར་རྟོགས་པར་བྱ་བ་ཡིན་ནོ་ཞེས་དེ་ལྟ་བུའི་རང་བཞིན་ཅན་འཇིག་རྟེན་པ་ཉིད་ཀྱི་དཔེ་བསྟན་པ་ནི། དཔེར་ན་ཞེས་བྱ་བ་ལ་སོགས་པའོ། །འདིར་དོན་ཡིན་ཏེ། ན་ར་དང་ལྷན་ཅིག་ཏུ་བསྡུས་པའི་སྲེད་མེད་ཀྱི་བུའི་ངེས་པར་གཟུང་བ་གང་ཡིན་པ་དེས་ནི་བུ་གཞན་ཉིད་རྣམ་པར་གཅོད་ཀྱི་ན་ར་ཉིད་ནི་རྣམ་པར་གཅོད་པ་མ་ཡིན་ཏེ། དེ་དང་ལྷན་ཅིག་ཏུ་བསྡུས་པའི་ངོ་བོ་བཀག་པར་ཐལ་བའི་ཕྱིར་རོ། །ཚིགས་སུ་བཅད་པ་འདི་འབའ་ཞིག་གི་དོན་འདི་ལྟར་ཡིན་པར་ནི་མ་ཟད་དེ། འདི་འདྲ་བའི་རིགས་ཅན་འཇིག་རྟེན་པའི་ངག་ཀྱང་ཡོད་པ་ཡིན་ནོ། །དཔེར་ན་ལྷ་སྦྱིན་དང་མཆོད་སྦྱིན་ཁོ་ན་ལ་ཟན་བྱིན་ཅིག་ཅེས་བྱ་བ་ལྟ་བུའོ། །ཟན་སྦྱིན་པར་བྱ་བ་ཉིད་བསྡུས་པའི་མཆོད་སྦྱིན་གྱི་ངེས་པར་གཟུང་བ་གང་ཡིན་པ་དེས་ནི་ཟན་སྦྱིན་པར་བྱ་བ་གཞན་རྣམ་པར་གཅོད་ཀྱི། གང་ལ་ལྟོས་ནས་དེའི་བསྡུ་བར་འགྱུར་བ་དེ་ཉིད་ནི་མ་ཡིན་ནོ། །དེས་ན་ཚིགས་སུ་བཅད་པ་འདིས་ནི་གང་དུ་ཡང་བརྗོད་པར་མེད་དོ་ཞེས་གང་སྨྲས་པ་དེ་སྤངས་པ་ཡིན་ནོ། །བསྒྲུབ་པར་བྱ་བ་དང་དེ་དང་རིགས་མཐུན་པ་ལ་ཡོད་པ་ཚུལ་གཉིས་དང་ལྡན་པའི་གཏན་ཚིགས་གང་ཡིན་པ་དེའི་མེད་པ་མཐུན་པའི་ཕྱོགས་དངོས་པོ་མེད་པ་ལ་མེད་པ་ཉིད་ཀྱི་ངོ་བོ་ནི་
ཚུལ་གསུམ་པ་སྟེ། དེ་ཡང་ཚང་མས་ངེས་པར་གཟུང་བར་བྱ་བ་ཡིན་ནོ་ཞེས་དེ་ལྟར་བསྟན་པའི་དོན་དུ་ངེས་པ་སྨོས་སོ། །ཐ་མར་ཏེ་ཚུལ་གསུམ་པར་སྨོས་པའི་ངེས་པ་ངེས་པའི་མཚན་ཉིད་ཀྱི་ཆོས་བརྗོད་པ་གང་ཡིན་པ་དེ་ནི་གསུམ་ཀ་དང་སྦྲེལ་བར་བྱའོ། །འདི་ལྟར་ཚུལ་ཐ་མ་ལ་སྒྲུབ་པར་བྱེད་པའི་ཡན་ལག་ཏུ་ངེས་པ་ཉིད་འདོད་པ་དེ་ནི་ཚུལ་སྔ་མ་གཉིས་ལ་ཡང་སྒྲུབ་པར་བྱེད་པའི་ཡན་ལག་ཏུ་ཁྱད་པར་ཡོད་པ་མ་ཡིན་ནོ། །ཡང་ཅི་ལྟར་མེད་པ་ལ་མེད་པ་ཉིད་ངེས་པར་ནུས་ཤེ་ན། བཤད་པ། བསྒྲུབ་པར་བྱ་བ་ལས་དོན་གཞན་དང་རང་བཞིན་དག་གོ །དེའི་རབ་ཏུ་སྐྱེ་བ་ནི་འབྲས་བུ་གྲུབ་པ་དང༌། དེ་ཞེས་བྱ་བ་བསྒྲུབ་པར་བྱ་བ་ཙམ་རྗེས་སུ་འབྲེལ་པ་སྟེ། བསྒྲུབ་པར་བྱ་བས་བྱས་པ་དང་རང་བཞིན་དུ་མངོན་སུམ་དང༌། མི་དམིགས་པ་དག་གམ། གནོད་པར་བྱེད་པའི་ཚད་མ་འཇུག་པས་གྲུབ་ན་སྟེ། དེས་ན་བསྒྲུབ་པར་བྱ་བ་རྒྱུ་དང་ཁྱབ་བར་བྱེད་པ་ཤིང་ཉིད་ལ་སོགས་པའི་དངོས་པོ་མི་དམིགས་པས་མེད་པ་ཉིད་འགྲུབ་པར་འགྱུར་བར་བལྟའོ། །འདི་སྙམ་དུ་ཇི་ལྟར་འབྲས་བུ་དང༌། རང་བཞིན་དག་མི་དམིགས་པ་ཙམ་ཚད་མ་མ་ཡིན་པ་དེ་བཞིན་དུ་རྒྱུ་དང་ཁྱབ་པར་བྱེད་པ་དག་ཀྱང་ངོ་ཞེ་ན། བཤད་པ། བལྟར་རུང་བའི་ཡུལ་ཅན་ཏེ་མི་དམིགས་པ་གང་ལ་ཡུལ་ལྟར་རུང་བ་ཡོད་པའོ། །འདི་སྐད་བཤད་པ་ཡིན་ཏེ། སྣང་བའི་རྒྱུ་འམ་ཁྱད་པར་བྱེད་པ་དག་མ་དམིགས་ན་ཡོད་པ་ཉིད་མེད་པར་ངེས་པ་ཡིན་ཞིང༌། དེ་ངེས་ན་ནི་འབྲས་བུ་དང་རང་བཞིན་དག་ཀྱང་མེད་པར་ངེས་པར་འགྱུར་གྱི། མི་སྣང་བར་གྱུར་པའི་མི་དམིགས་པ་གཞན་གྱིས་ནི་མ་ཡིན་ནོ། །འོ་ན་མི་དམིགས་པ་ལ་ཅི་ལྟར་ལྡོག་པ་ངེས་པར་བྱེད་ཅེ་ན། བཤད་པ། བཟློག་པ་དངོས་པོ་ཡོད་པ་ལ་མངོན་སུམ་འཇུག་པ་ལྡོག་པ་ངེས་པའི་རྒྱུ་ཡིན་པའི་ཕྱིར། ཐ་དད་པ་མེད་པར་ལྡོག་པར་ངེས་པ་ཡིན་ནོ་ཞེས་བཤད་དོ། །འདི་ལྟར་དམིགས་པའི་རྒྱུ་གཞན་ཡོད་ཅིང་སྣང་བའི་དངོས་པོ་ཡང་ཉེ་བ་ལ། གལ་ཏེ་མངོན་སུམ་མི་འཇུག་ན་ནི་འགར་ཡང་འཇུག་པར་མི་འགྱུར་ཏེ། དེ་ནི་དེ་ཙམ་གྱི་རྒྱུ་མཚན་ཅན་ཉིད་ཡིན་པའི་ཕྱིར་རོ། །དེའི་ཕྱིར་ལ་ལར་རྒྱུ་མཚན་དེ་ཙམ་གྱིས་མངོན་སུམ་འཇུག་ན་ནི། འདིར་ཡང་དངོས་པོ་དེ་ཡོད་ན་འཇུག་པར་འགྱུར་རོ་ཞེས་ལྡོག་པར་ངེས་སོ། །དེས་ན་རྒྱུ་གཞན་ཡོད་ཅིང་སྣང་བའི་དངོས་པོ་ཡོད་ན་ངེས་པར་དམིགས་པའི་ཕྱིར། དམིགས་པ་མེད་པ་ལས་མེད་པ་ཉིད་དུ་གདོན་མི་
ཟ་བར་ངེས་པ་ཡིན་ནོ། །དེ་དང་མཐུན་པ་ཉིད་ལ་ཡོད་པ་ཞེས་བྱ་བ་དེ་ཙམ་གྱིས་མི་མཐུན་པའི་ཕྱོགས་ལས་ལྡོག་པ་གང་ཡིན་པ་དེ་གཏན་ཚིགས་ཡིན་ནོ་ཞེས་ངེས་པ་ན་མེད་པ་ལ་མེད་པ་ཉིད་བརྗོད་པ་དོན་མེད་པ་ལས་དེ་བྱས་པ་ནི་ངེས་པར་བྱ་བའི་ཕྱིར་ཡིན་ནོ། །གྲུབ་ཟིན་པ་ལ་རྩོམ་པ་ནི་ངེས་པར་བྱ་བའི་ཕྱིར་རོ་ཞེས་བྱ་བས་འདི་ནི་རིགས་པ་ཡིན་ནོ། །ངེས་པ་ཅི་འདྲ་བ་ཞིག་ཡིན་པ་སྟོན་པ་ནི་མེད་པ་ཁོ་ན་ལས་མེད་པ་ཉིད་ནི་ཚུལ་གསུམ་པ་ཡིན་གྱི་གཞན་པ་ལ་ཡང་མ་ཡིན་པ་འགལ་བ་ལ་ཡང་མ་ཡིན་ནོ་ཞེས་བྱ་བ་འདི་ནི་ངེས་པའི་འབྲས་བུ་ཡིན་ནོ་ཞེས་ཁ་ཅིག་གིས་རྟོགས་སོ། །འདི་ལྟར་ལུས་ཅན་ཉིད་ལ་སོགས་པ་ནི་མི་རྟག་པ་ཉིད་ལས་ཆོས་གཞན་ཡིན་ཞིང༌། གཞན་ཡང་མི་མཐུན་པའི་ཕྱོགས་ཉིད་ཡིན་པས་གཏན་ཚིགས་འགའ་ཡང་མེད་པར་འགྱུར་རོ། །གང་ཞིག་མི་རྟག་པ་ཉིད་ལ་སོགས་པ་གཅིག་ཁོ་ན་ལ་ཡོད་ཀྱི་གཞན་ལ་མེད་པའི་ཆོས་འགའ་ཡང་མེད་དེ། དེས་ན་འགའ་ཞིག་ཀྱང་གཏན་ཚིགས་སུ་མི་འགྱུར་རོ། །འགལ་བ་ཙམ་མི་མཐུན་པའི་ཕྱོགས་ཡིན་ན་ཡང་དེ་ཉིད་ལས་རྣམ་པར་བཅད་པའི་ཕྱིར་མེས་དྲོ་བ་རྟོགས་པར་མི་འགྱུར་ཏེ། གྲང་བ་ཡང་མ་ཡིན། དྲོ་བ་ཡང་མ་ཡིན་པ་མ་བཟློག་བའི་ཕྱིར་རོ། །ཇི་སྐད་དུ་འགལ་བ་ལས་རྣམ་པར་བཅད་པར་ཐལ་བའི་ཕྱིར་དང༌། གཏན་ཚིགས་མེད་པར་འགྱུར་བའི་ཕྱིར་རོ་ཞེས་བརྗོད་པ་ཡིན་ནོ། །དེ་ལ་དེ་དང་མཐུན་པ་ཉིད་ལ་ཡོད་པ་ཞེས་བརྗོད་པ་ན་གཞན་པ་དང་འགལ་བ་མེད་པ་དེ་དང་མཐུན་པ་མ་ཡིན་པ་ཐམས་ཅད་ལ་མེད་པ་ཉིད་མཚན་ཉིད་གཞན་དུ་ཐལ་བས་ན། མེད་པ་ཉིད་ལ་མེད་པ་ཚུལ་གསུམ་པ་ཡིན་གྱི། གཞན་པ་འམ་འགལ་བ་ནི་མ་ཡིན་ནོ་ཞེས་བསྟན་པའི་ཕྱིར་ངེས་པར་བྱ་བའི་དོན་དུ་མེད་པ་ཉིད་ལ་ཞེས་བཤད་དོ་ཞེས་སོ། །སློབ་དཔོན་གྱིས་འདི་དགག་པའི་ཕྱིར་བཤད་པ། འདི་མེད་པ་ལ་མེད་པར་བརྗོད་པའི་དོན་དེ་ལྟར་རྟོགས་པ་དེ་ལའོ། །འདི་སྐད་དུ་བརྗོད་པ་ཡིན་ཏེ། ཆོས་གཞན་ལ་ཡོད་པ་སྲིད་པ་དེ་འགོག་པ་དེ་ལྟར་དོགས་པ་ནི་མེད་དོ། །ཅིའི་ཕྱིར་ཞེ་ན། མི་སྲིད་པ་ཉིད་ཀྱི་ཕྱིར་རོ། །འདི་སྐད་བརྗོད་པར་འགྱུར་ཏེ། མི་རྟག་པ་ཉིད་ལས་ཐ་དད་པའི་ཆོས་ལས་ཡོད་པ་འགག་པ་ནི་དོགས་པ་མ་ཡིན་ཏེ། ཆོས་གཅིག་ཁོ་ན་ལ་ཡོད་པ་ནི་མི་སྲིད་པའི་ཕྱིར་རོ། །གལ་ཏེ་དེ་ལྟར་གྱུར་པ་སྲིད་ན་ནི་དེའི་ཚེ་དངོས་པོ་མེད་པ་མ་བརྗོད་ན་དེ་རྟོགས་པའི་དོན་དུ་ཆོས་གཞན་ལ་འཇུག་པ་དགག་པར་དོགས་
པར་འགྱུར་བ་ཞིག་ན་རྣམ་པ་དེ་ལྟ་བུ་ནི་མི་སྲིད་དོ། །དེ་ཉིད་ཀྱི་ཕྱིར་རྣམ་པ་གཞན་འགོག་པར་རྟོགས་པར་འགྱུར་ཏེ། དེ་ཉིད་སྲིད་པའི་ཕྱིར་རོ། །དེས་ན་མཐུན་པ་ཉིད་ལ་ཡོད་པ་ཞེས་བརྗོད་ན་འགའ་ཡང་ཆོས་གཞན་ལས་བཟློག་པར་དོགས་པ་མེད་དོ། །དེས་ན་བཟློག་པའི་ཕྱིར་མེད་པ་ལ་མེད་པ་ཉིད་སྨོས་པ་དོན་མེད་དོ། །འགལ་བ་རྣམ་པར་གཅོད་པར་ཐལ་ལོ་ཞེས་གང་བརྗོད་པ་དེ་མི་རིགས་ཏེ། འདི་ལྟར་འགལ་བ་ལ་གཏན་ཚིགས་འགོག་པར་རྟོགས་པ་དེ་ཡང་གལ་ཏེ་དེ་ཁོ་ན་ལ་བྱེ་བྲག་ཏུ་ངེས་པར་འགོག་པར་རྟོགས་པར་བྱ་བ་ཡིན་ན་ནི་དེའི་ཚེ་སྐྱོན་དུ་འགྱུར་རོ། གང་གི་ཕྱིར་དེ་ཁོ་ན་ལས་བཟློག་པ་ནི་མ་ཡིན་ཏེ། འོན་ཀྱང་གྲང་བ་ཡང་མ་ཡིན་དྲོ་བ་ཡང་མ་ཡིན་གཞན་ལས་ཀྱང་ཡིན་ནོ། །འདི་སྙམ་དུ་འགལ་བ་ཁོ་ན་མི་མཐུན་པའི་ཕྱོགས་ཡིན་པ་དེས་ན་དེ་ཁོ་ན་ལ་ལྡོག་པར་འགྱུར་གྱི། དེ་གྲང་བ་ཡང་མ་ཡིན་དྲོ་བ་ཡང་མ་ཡིན་པ་ལས་ཀྱང་ལྡོག་པ་ག་ལས་ཤེ་ན། དེ་དང་མཐུན་པ་ཁོ་ན་ལ་ཞེས་སྨོས་སོ། །དེ་དང་མཐུན་པའི་ཕྱོགས་ཁོ་ན་ལ་གཏན་ཚིགས་ཡོད་པ་ཞེས་བྱ་བའི་ཚིག་འདི་ཙམ་གྱིས་ནི་འགལ་བ་ཁོ་ན་དེ་དང་མཐུན་པ་མ་ཡིན་ནོ་ཞེས་པ་དེ་ལྟར་རྟོགས་པར་མི་འགྱུར་རོ། །འདི་ལྟར་དེ་དང་མཐུན་པ་ཉིད་ལ་ཞེས་བརྗོད་པས་ནི་དེ་དང་མཐུན་པ་ལ་ཡོད་པར་ངེས་པར་འགྱུར་གྱི། དེ་དང་མཐུན་པ་མ་ཡིན་པ་ནི་འགའ་ཡང་ངེས་པར་མི་འགྱུར་ན། གང་གི་ཡིན་ཁྱད་པར་མེད་པ་ཉིད་དུ་མི་འགྱུར་བར་འགལ་བ་ཁོ་ན་མི་མཐུན་པར་འགྱུར། གལ་ཏེ་འགལ་བ་ཁོ་ན་མི་མཐུན་པའི་ཕྱོགས་ཡིན་ན་སྐྱོན་ཅིར་འགྱུར་ཞེ་ན། བཤད་པ། འགལ་བ་ཁོ་ན་མི་མཐུན་པའི་ཕྱོགས་ཡིན་པ་གང་གིས་མི་མཐུན་པའི་ཕྱོགས་ཁོ་ན་ལས་ལྡོག་པའི་ཕྱིར། གཏན་ཚིགས་མེད་པ་ཉིད་ཀྱི་མཚན་ཉིད་ཀྱིས་བསྒྲུབ་བྱ་དྲོ་བ་རྟོགས་པར་མི་འགྱུར་བའོ། །འདི་སྐད་བརྗོད་པ་ཡིན་ཏེ། མི་མཐུན་པའི་ཕྱོགས་ལས་ལྡོག་པའི་གཏན་ཚིགས་ནི་ད་ཉིད་ལྡོག་པ་སྟོན་པར་བྱེད་པ་ན་ལྡོག་པའི་སྒོ་ནས་བསྒྲུབ་བྱ་སྒྲུབ་པར་བྱེད་པ་ཡིན་ནོ། །མི་མཐུན་པའི་ཕྱོགས་ཀྱང་གལ་ཏེ་འགལ་བ་ཉིད་ཡིན་ན་ནི་འགལ་བ་དེ་ཉིད་ལས་ལྡོག་པའི་གཏན་ཚིགས་ཀྱིས་དེ་ཉིད་ཟློག་པར་བྱེད་བར་འགྱུར་ཏེ། །འགལ་བ་ནི་བཟློག་པར་བྱས་ཀྱང་དྲོ་བ་རྟོགས་པར་མི་འགྱུར་ཏེ། མི་མཐུན་པའི་ཕྱོགས་མ་ཡིན་པ་གྲང་དྲོ་གཉི་ག་མ་ཡིན་པ་མ་བཟློག་པའི་ཕྱིར་རོ། །དེའི་ཕྱིར་འགལ་བ་འབའ་ཞིག་མི་
མཐུན་པའི་ཕྱོགས་ཡིན་ན་ནི་སྐྱོན་འདིར་འགྱུར་བ་ཞིག་ན་དེ་དང་མཐུན་པ་ཉིད་ལ་ཞེས་བརྗོད་པ་ནི་འགལ་བ་ཉིད་གཅིག་ཏུ་ངེས་པར་མི་མཐུན་པའི་ཕྱོགས་སུ་ཁོང་དུ་ཆུད་པ་མ་ཡིན་ཏེ། འོན་ཀྱང་དེ་དང་མཐུན་པ་ལས་ལྡོག་པ་དངོས་པོ་མེད་པ་ཡང་ཡིན་ཏེ། ཡང་གི་སྒྲས་ནི་ད་དང་མཐུན་པ་ལས་གཞན་བ་ཡང་མི་མཐུན་པའི་ཕྱོགས་ཡིན་ནོ། །འདི་ལྟར་དེ་དང་མཐུན་པ་ལས་ལྡོག་པ་དེ་ལས་གཞན་པ་དང་དེ་དང་འགལ་བ་ཡང་ཐམས་ཅད་དེ་དང་མཐུན་པ་མ་ཡིན་ལ། དེ་དང་མཐུན་པ་མ་ཡིན་པ་གང་ཡིན་པ་དེ་ཐམས་ཅད་དེ་དང་མི་མཐུན་པའི་ཕྱོགས་ཡིན་ནོ། །དེས་ན་དེ་ལ་འགལ་བ་ཉིད་ལས་རྣམ་པར་གཅོད་པར་ཐལ་བའི་ཕྱིར་རོ་ཞེས་ཁྱེད་ཀྱིས་གང་བརྗོད་པའི་སྐྱོན་མེད་པ་དེའི་ཕྱིར་ཁྱེད་ཀྱིས་བསྟན་པའི་སྐྱོན་སྤང་བའི་ཕྱིར་ཚུལ་གསུམ་པ་ནི་མ་བརྗོད་པ་ཉིད་དུ་འགྱུར་རོ། །སློབ་དཔོན་གྱི་དགོངས་པ་ནི་འདི་ཡིན་ཏེ། མེད་པ་ལ་མེད་པ་ཉིད་རྗོད་པའི་དོན་ནི་གང་ཞིག་མེད་པ་ཙམ་ལ་མེད་པ་དེ་ནི་གཏན་ཚིགས་ཡིན་ནོ་ཞེས་བྱ་བ་འདི་ཡིན་ནོ། །འགལ་བ་གཞན་ལ་ལྡོག་པ་དག་ཀྱང་མེད་པ་ཙམ་དུ་ནི་ཁྱད་པར་མེད་དོ། །དེའི་ཕྱིར་ན་གཏན་ཚིགས་ཀྱི་བསྒྲུབ་བྱའི་ཆོས་མེད་པ་ཙམ་ལ་མེད་པ་ནི་ཚུལ་གསུམ་པར་བཤད་པ་ཡིན་ནོ། །གཞན་པ་ཙམ་དང་འགལ་བ་ཙམ་ལ་མེད་པ་ཉིད་ནི་མ་ཡིན་ཏེ། འགལ་བ་འབའ་ཞིག་མི་མཐུན་པའི་ཕྱོགས་ཡིན་ན་དེ་ཉིད་ལས་རྣམ་པར་གཅོད་པར་ཐལ་ལོ། །གཞན་པ་ཙམ་ཡང་མི་མཐུན་པའི་ཕྱོགས་མ་ཡིན་ཏེ། བསྒྲུབ་བྱ་མི་རྟག་པ་ཉིད་ལ་བྱས་པ་ཞེས་བྱ་བ་གཏན་ཚིགས་ཉིད་མ་ཡིན་པར་ཐལ་བའི་ཕྱིར་ཏེ། ལྡོག་པའི་ཡུལ་མི་རྟག་པ་ལས་གཞན་དུ་གྱུར་པ་མེད་པའི་ཕྱིར་རོ། །ཆོས་གཞན་ནི་བསྒྲུབ་པར་བྱ་བའི་ཆོས་ལ་གཞན་ཡིན་ནོ་ཞེས་ཁྱེད་ཀྱིས་གཞན་ཉིད་དུ་བརྟགས་པ་གང་ཡིན་པ་དེ་ནི་མ་འབྲེལ་པ་ཉིད་དེ། འདི་ལྟར་ལྡོག་པ་ལ་ལྟོས་ནས་བརྟགས་པའི་ཆོས་གཞན་ལ་ནི་བྱས་པ་ཉིད་མ་ཡིན་གྱི་འོན་ཀྱང་ཆོས་ཅན་དངོས་པོར་གྱུར་པ་ཉིད་ལ་ཡིན་ནོ། །འདི་སྙམ་དུ་དེ་ཡང་ཆོས་དེ་ལས་གཞན་མ་ཡིན་ནོ་སྙམ་ན། བདེན་ཏེ། འོན་ཀྱང་ཆོས་དེ་དང་ལྡན་པས་དེ་ཉིད་གཞན་ཡིན་ནོ་ཞེས་ནི་བསྙད་པར་མི་ནུས་ཏེ། འདི་ལྟར་མི་རྟག་པ་དང་ལྡན་པའི་ཕྱིར་ནི་དེ་རེ་ཞིག་མཐུན་པའི་ཕྱོགས་ཡིན་ལ། ཆོས་གཞན་དང་ལྡན་པས་ནི་མི་མཐུན་པའི་ཕྱོགས་ཡིན་ནོ་ཞེས་བསྟན་པར་མི་ནུས་པ་མ་ཡིན་ནོ། །བྲམ་ཟེ་དང་ལྡན་པས་བྲམ་ཟེ་ཡིན་པ་ཉིད་ཆོས་གཞན་དང་ལྡན་པས་བྲམ་ཟེ་མ་ཡིན་པ་ནི་
མ་ཡིན་གྱི། འོན་ཀྱང་སྐབས་སུ་བབ་བའི་ཆོས་ཀྱི་རྟེན་མ་ཡིན་པའི་ཕྱིར་རོ། །དེས་ན་མི་རྟག་པ་ཉིད་ཀྱི་རྟེན་མ་ཡིན་པ་ཁོ་ན་གཞན་ཡིན་གྱི། མི་རྟག་པ་དང་ལྡན་པ་ཉིད་ནི་མ་ཡིན་ནོ། །དེའི་ཕྱིར་གཞུང་འདི་ལ་སློབ་དཔོན་གྱི་དགོངས་པ་ནི་གཞན་དུ་ཡིན་ནོ། །འོ་ན་ཇི་ལྟར་མེད་པ་ལ་མེད་པ་ཉིད་བརྗོད་ཅེ་ན། སྨྲས་པ། རྗེས་སུ་འགྲོ་བ་དང༌། ལྡོག་པ་དག་གི་སྦྱོར་བ་བསྟན་པའི་དོན་ཏེ། དགོས་པ་གང་ལ་ཡོད་པ་སྟེ། མི་མཐུན་པའི་ཕྱོགས་ལ་མེད་པར་བརྗོད་པ་ནི་སྦྱོར་བ་བསྟན་པའི་ཕྱིར་ཡིན་ནོ། །ཡང་སྦྱོར་བ་བསྟན་པ་ཅི་ལྟ་བུ་ཞིག་ཅེ་ན། བཤད་པ། རྗེས་སུ་འགྲོ་བ་དང་ལྡོག་པ་དག་གི་ནང་ནས་ཐམས་ཅད་ཉེ་བར་བསྡུས་པའི་ཁྱབ་པ་ངེས་པ་དང་ལྡན་པའི་ཚུལ་གང་ཡིན་པ་དེ་གཅིག་སྦྱར་བའི་ཤུགས་ཀྱིས་སོ། །ཤུགས་ལས་རྟོགས་པ་ནི་དོན་གྱིས་གོ་བ་སྟེ། དེ་གཉིས་པ་རྟོགས་པར་བྱེད་དེ་གོ་བར་བྱེད་པ་ཡིན་ནོ། །དེའི་ཕྱིར་ཞེས་བྱ་བ་ནི་གང་གི་ཕྱིར་ཁྱབ་པ་དང་ལྡན་པ་གཅིག་བརྗོད་པས་གཉིས་ལ་འཕེན་པ་དེའི་ཕྱིར་གཅིག་ཉིད་སྦྱོར་གྱི་གཉི་ག་ནི་མ་ཡིན་ནོ། །ཁྱབ་པ་ཡང་ངེས་པར་གཟུང་བས་གོ་བར་བྱ་བ་ཡིན་ཏེ། དེས་ན་ངེས་པར་གཟུང་བ་དང་ལྡན་པའི་ངག་གིས་ངེས་པ་ཅི་འདྲ་བ་དང་ལྡན་པར་བརྗོད་པ་དེ་འདྲ་བ་ཉིད་སྦྱར་བར་བྱའོ་ཞེས་བསླབ་པའི་ཕྱིར། དག་གཉི་ག་ལ་ངེས་པར་གཟུང་བ་དང་བཅས་པར་བསྟན་ཏོ། །ཅི་སྟེ་གཉི་ག་དུས་གཅིག་ཏུ་སྦྱར་བར་མི་བྱའོ་ཞེས་གཅིག་ངེས་པ་དང་ལྡན་པའི་ངག་སྦྱར་བར་བྱ་བར་བསྟན་ཏམ་ཞེ་ན། མ་ཡིན་ནོ་ཞེས་སྨྲའོ། །འོ་ན་ཅི་ལྟར་ཞེ་ན། འབྲས་བུ་གཞན་གྱི་ཕྱིར་ངེས་པ་དང་ལྡན་པར་སྦྱར་བར་བྱ་བ་ཉིད་ཡིན་ལ། དེ་སྦྱར་བ་ན་ཡང་གཉིས་པ་ནི་བརྗོད་པ་ཉིད་ནི་ཞར་ལ་འོངས་པ་ཡིན་ནོ། །འདི་ལྟར་ཡོད་པ་དང་མེད་པ་ཙམ་རྗེས་སུ་འགྲོ་བ་དང་ལྡོག་པ་ཡིན་པར་བརྗོད་ན་ནི་སྦྱོར་བ་གཉི་ག་ཡང་གོ་བར་བྱེད་པ་མ་ཡིན་པར་འགྱུར་རོ། །འདི་ལྟར་ངེས་པ་མེད་ན་ནི་སྦྱོར་བའི་དོན་འདི་འདྲ་བར་འགྱུར་ཏེ། གང་ཞིག་མཐུན་པའི་ཕྱོགས་ལ་ཡོད་པ་དང་མི་མཐུན་པའི་ཕྱོགས་ལ་མེད་པ་དེ་གཏན་ཚིགས་ཡིན་ནོ་ཞེས་བྱ་བར་རོ། །ཤིང་ཕུང་གཅིག་ལས་སྐྱེས་པ་ལ་ཡང་མཐུན་པའི་ཕྱོགས་ལ་ཡོད་པ་ཙམ་དང༌། མི་མཐུན་པའི་ཕྱོགས་ལ་མེད་པ་ཙམ་ཡོད་པ་ཉིད་དོ། དེས་ན་དེ་བཟློག་པའི་ཕྱིར་ཡོད་པ་དང་མེད་པ་ངེས་པ་ཉིད་དུ་བརྗོད་པར་བྱ་བ་ཡིན་ལ། ངེས་པ་གཅིག་ཉིད་དུ་ཡོད་པ་འམ་མེད་
པར་བརྫད་པ་ན་ཡང་གཉིས་པ་འཕེན་པ་ཡིན་ནོ། །དེ་ལ་དོན་དམ་པ་ནི་འདི་ཡིན་ཏེ། ངེས་པ་ཉིད་དུ་བརྗོད་པས་ན་གཏན་ཚིགས་གོ་བར་བྱེད་པ་ཡིན་པ་དེའི་ཕྱིར་ངེས་པ་ནི་གདོན་མི་ཟ་བར་བྱ་བ་ཡིན་ལ། ངེས་པ་ཡང་གཅིག་བརྗོད་ན་གཉིས་པ་འཕེན་པ་ཡིན་པའི་ཕྱིར་གཉིས་པ་སྦྱར་བར་མི་བྱའོ། །གཏན་ཚིགས་མཐུན་པའི་ཕྱོགས་ཉིད་ལ་ངེས་པ་ནི་འབྲེལ་པ་ལས་ཡིན་ཞིང༌། དེ་ཉིད་ལས་མི་མཐུན་པའི་ཕྱོགས་ལས་ལྡོག་པ་ཡིན་ནོ། །མི་མཐུན་པའི་ཕྱོགས་ལས་ངེས་པ་དང་ལྡན་པར་ལྡོག་པ་ཡང་འབྲེལ་པ་ཉིད་ལས་མཐུན་པའི་ཕྱོགས་ལས་ངེས་པ་དེ་ཉིད་ལས་ཡིན་ལ། འབྲེལ་པ་དེ་ཡང་རྗེས་སུ་འགྲོ་བའི་མཚན་ཉིད་ཡིན་པའི་ཕྱིར་ལྡོག་པ་སྦྱར་བ་ན་ཡང་རྗེས་སུ་འགྲོ་བ་རྟོགས་པ་ཡིན་ནོ། །དེ་ནི་གཅིག་རྟོགས་པ་ན་ཡང་གཉིས་པ་རྟོགས་པར་ངེས་པ་འཁྲུལ་པར་བསྒྲུབ་པའི་ཕྱིར། གལ་ཏེ་ཞེས་བྱ་བ་ལ་སོགས་པ་སྨོས་སོ། །མཉན་པར་བྱ་བ་ཉིད་ལྡོག་པ་ཡིན་ཡང་གོ་བར་བྱེད་པ་ཉིད་མ་ཡིན་པ་དེའི་ཕྱིར་ལྡོག་པ་རྟོགས་པས་རྗེས་སུ་འགྲོ་བ་ངེས་པ་ལྡན་པར་རྟོགས་སོ་ཞེས་ཇི་ལྟར་བརྗོད། གཏན་ཚིགས་ནི་རབ་ཏུ་གྲུབ་པའི་རྗེས་སུ་འགྲོ་བ་དང་ལྡོག་པ་དག་གིས་གོ་བར་བྱེད་པ་ཡིན་ཏེ། དེས་ན་ལྡོག་པ་རྟོགས་ཀྱང་རྗེས་སུ་འགྲོ་བ་མི་རྟོགས་པ་དེའི་ཕྱིར་མཉན་པར་བྱ་བ་ཉིད་གོ་བར་བྱེད་པ་མ་ཡིན་ནོ་ཞེ་ན། དེ་བཟློག་པའི་ཕྱིར་མ་ཡིན་ཏེ་ཞེས་སྨོས་སོ། །མཉན་པར་བྱ་བ་ཉིད་ལ་ནི་ལྡོག་པ་ཡོད་པ་མ་ཡིན་ནོ། །གལ་ཏེ་ལྡོག་པ་ཡོད་ན་ནི་ངེས་པར་རྗེས་སུ་འགྲོ་བ་ཡང་ཡོད་པར་འགྱུར་ཏེ། མེད་ན་མི་འབྱུང་བ་ཡིན་པའི་ཕྱིར་རོ། །འགའ་ལས་ཀྱང་ཞེས་བྱ་བ་ནི་རྟག་པ་ཉིད་དམ་མི་རྟག་པ་ཉིད་ལའོ། །གལ་ཏེ་འགའ་ལས་ལྡོག་པར་ངེས་ན་ནི་གང་ལས་ལྡོག་པ་དེ་ལ་ཐེ་ཚོམ་སྐྱེ་བར་མི་འགྱུར་གྱི། འོན་ཀྱང་རང་ཉིད་ཡོད་པས་དེ་མེད་པར་གོ་བར་བྱེད་པ་ཉིད་དུ་འགྱུར་ལ། འགལ་ཟླ་མེད་པར་གོ་ན་ཡང་ཅིག་ཤོས་ངེས་པར་ཡོད་པར་འགྱུར་བའི་ཕྱིར་མཉན་པར་བྱ་བ་ཉིད་ཐེ་ཚོམ་སྒྲུབ་པར་བྱེད་པར་མི་འགྱུར་བ་ཞིག་ན། ཐེ་ཚོམ་སྒྲུབ་པར་བྱེད་པའི་རྒྱུའི་ཕྱིར་འགའ་ལས་ཀྱང་ལོག་པར་ངེས་པར་མེད་པ་ཡིན་ནོ། །འདི་ཉིད་གསལ་བར་བྱ་བའི་ཕྱིར་ལྡོག་པའི་གཏན་ཚིགས་ངེས་པའི་རྒྱུ་ཉིད་དུ་བསྟན་པའི་ཕྱིར་ལྡོག་པ་དང་ལྡན་པ་ལ་ནི་ཞེས་སྨོས་སོ། །ལྡོག་པ་དང་ལྡན་པ་ལ་ནི་ཐེ་ཚོམ་ཡོད་པ་མ་ཡིན་ཏེ། དཔེར་ན་བྱས་པ་ཉིད་ལས་མི་རྟག་པ་ཉིད་བཞིན་ནོ། །བྱས་པ་ཉིད་དེ་ནི་རྟག་པ་ལས་ལྡོག་པ་ན་
འགའ་ཞིག་ཏུ་རང་ཡོད་པ་ན་ཟློག་པར་བྱེད་པ་ཉིད་དོ། །བྱས་པ་ཉིད་ངེས་པར་རྟག་པ་ལས་ལྡོག་པ་ནི་ཡིན་ལ་བྱས་པ་ཉིད་ཀྱི་ཡུལ་རྟག་པར་ཐེ་ཚོམ་ཡང་ཟའོ་ཞེས་ནི་བརྗོད་པར་མི་ནུས་སོ། །རྟག་པ་ཉིད་ཀྱི་ཡུལ་ལ་ཐེ་ཚོམ་མེད་ན་ནི་དེ་ཡོངས་སུ་སྤངས་པས་གནས་པའི་མཚན་ཉིད་མི་རྟག་པ་ཉིད་ལ་ཡང་ཐེ་ཚོམ་མེད་པ་ཡིན་ཏེ། དེའི་ཕྱིར་གང་ལ་ལྡོག་པ་ཡོད་པ་དེ་ནི་ཐེ་ཚོམ་གྱི་རྒྱུ་མ་ཡིན་ལ། གང་ཞིག་ཐེ་ཚོམ་གྱི་རྒྱུ་ཡིན་བ་དེ་ནི་ཐམས་ཅད་ལས་ལྡོག་པར་ཐེ་ཚོམ་དུ་གྱུར་བ་ཡིན་ནོ། །འདི་སྙམ་དུ་མཉན་པར་བྱ་བ་ཉིད་འགའ་ཞིག་ལས་ལྡོག་བར་དེ་ལྟ་ན་ཡང་ལྡོག་པའི་ཡུལ་ཉིད་ལྡོག་པར་ནུས་པ་ཡིན་གྱི། ཅིག་ཤོས་ཀྱི་ངོ་བོ་སྒྲུབ་པ་ལ་ནི་ཐེ་ཚོམ་སྐྱེད་པ་ཡིན་ནོ་སྙམ་ན། དངོས་པོའི་ཆོས་ཞེས་སྨོས་ཏེ། མཉན་པར་བྱ་བ་ཉིད་ནི་དངོས་པོའི་ཆོས་ཡིན་ལ། དངོས་པོའི་ཆོས་གང་ཡིན་པ་དེ་ཡང་དངོས་པོ་ཐམས་ཅད་ལ་ངེས་པར་ལྡོག་པ་དེ་ལྟ་ན་ཡང་ལྡོག་པའི་ཡུལ་ཉིད་མ་ཡིན་ཏེ། དངོས་པོའི་ཆོས་ཉིད་ནི་དེའི་ཆོས་མ་ཡིན་པར་འགལ་བའི་ཕྱིར་རོ། །རྟག་པ་དང་མི་རྟག་པ་དག་གིས་དངོས་པོ་ཐམས་ཅད་ཀྱང་ཕུང་པོ་གཉིས་ཡིན་ཏེ། དེའི་ཕྱིར་གཅིག་ལས་ལྡོག་ན་གཉིས་པ་ལ་ངེས་པར་འཇུག་ལ། ཞུགས་ན་ཡང་རང་གི་ཡུལ་ཉེ་བར་འཇོག་པར་བྱེད་པ་ཡིན་ནོ། །དེའི་ཕྱིར་དངོས་པོའི་ཆོས་གཅིག་ལས་ལྡོག་ན་གཞན་ལ་ངེས་པར་ཡོད་པས་འགའ་ལ་ཡང་ཐེ་ཚོམ་མི་བྱེད་དོ། །གང་ཞིག་འགའ་ལས་ཀྱང་ལྡོག་པར་མ་ངེས་པ་དེ་ནི་གཉི་ག་ལ་འཇུག་པར་དོགས་པ་ཉིད་ཀྱིས་ཐེ་ཚོམ་གྱི་རྒྱུ་ཉིད་དོ། །འདི་ཉིད་སྟོན་པ་ནི་དེས་ན་དེ་ཡོད་པར་དོགས་པ་ཉིད་ཀྱིས་ཞེས་བྱ་བ་ཡིན་ནོ། །འོ་ན་ཅི་ལྟར་མཉན་པར་བྱ་བ་ཉིད་ལྡོག་པ་དང་ལྡན་པར་བཤད་ཅེ་ན། སྨྲས་པ། གང་གི་ཕྱིར་འདི་འགའ་ཞིག་ཏུ་ཡང་རྗེས་སུ་འགྲོ་བ་མ་མཐོང་བ་དེའི་ཕྱིར་འདི་ལ་ལྡོག་པ་ཡོད་པའི་ལྡོག་པ་དང་ལྡན་པར་བཤད་པ་ཡིན་ནོ། །འདི་སྐད་བརྗོད་པ་ཡིན་ཏེ། ལྡོག་པའི་སྒྲ་འདི་ནི་རྗེས་སུ་འགྲོ་བ་མཐོང་བ་འགོག་པ་ལྷུར་བྱེད་པ་ཡིན་གྱི། ལྡོག་པ་ངེས་པ་བརྗོད་པ་ནི་མ་ཡིན་ནོ། །རྗེས་སུ་འགྲོ་བ་མ་མཐོང་བའི་བདག་ཉིད་ཀྱི་ལྡོག་པ་ནི་གོ་བར་བྱེད་པ་མ་ཡིན་ནོ། །འོ་ན་གོ་བར་བྱེད་པ་ཅི་འདྲ་བ་ཞིག་ཡིན་ཞེ་ན། བཤད་པ། རྒྱུ་མི་དམིགས་པ་དང་ཁྱབ་པར་བྱེད་པ་མི་དམིགས་པས་ངེས་པར་བྱ་བའི་གོ་བར་བྱེད་པ་གང་ཡིན་པ་དེ་ནི་བརྗོད་ཟིན་ཏོ། །འདི་སྙམ་དུ་དེ་ཡང་རྗེས་སུ་འགྲོ་བ་མེད་པར་འགྱུར་བ་དེས་ན་
འཕེན་པ་མ་ཡིན་ན་སྙམ་ན། སྨྲས་པ་དེ་ཡང་རྗེས་སུ་འགྲོ་བ་མེད་པར་ལྡོག་པ་ངེས་པར་བསྟན་པར་མི་ནུས་སོ། །འབྲེལ་པ་ཡོད་ན་ནི་བསྒྲུབ་པར་བྱ་བ་ལོག་ན་གཏན་ཚིགས་ལྡོག་ལ། འབྲེལ་པ་ཡང་དེའི་བདག་ཉིད་དང་དེ་ལས་བྱུང་བའི་རྒྱུ་མཚན་ཅན་ཡིན་ཏེ། དེའི་ངོ་བོ་ཉིད་ནི་དེའི་བདག་ཉིད་དང་རྒྱུའི་དངོས་པོ་མཐོན་བ་ཡོད་པའི་ཡུལ་ཅན་གྱི་ཚད་མ་སྒྲུབ་པར་བྱེད་པ་ཤེས་པར་བྱེད་པ་ཡིན་ནོ། །འདི་སྐད་དུ་བརྗོད་པ་ཡིན་ཏེ། འགའ་ཞིག་ཏུ་རང་བཞིན་ན་མ་འབྲས་བུར་མཐོང་ན། འགའ་ཞིག་གིས་ཁྱབ་པ་དང༌། འགའ་ཞིག་གིས་འབྲས་བུར་རྟོགས་པར་འགྱུར་རོ། །དེའི་བདག་ཉིད་དུ་ངེས་པར་བྱེད་པའི་ཚད་མའི་ཡུལ་དང༌། དེ་ལས་བྱུང་བའི་ཚད་མའི་ཡུལ་གང་ཡིན་པ་དེ་ཉིད་རྗེས་སུ་འགྲོ་བའི་ཡུལ་ཡིན་ཏེ། དེའི་ཕྱིར་བདག་ཉིད་དང་དེ་ལས་བྱུང་བའི་ངེས་པ་ཉིད་ཀྱིས་ལྡོག་པར་ངེས་པའི་ཕྱིར་རྗེས་སུ་འགྲོ་བ་མེད་པའི་ལྡོག་པ་ངེས་པ་འགའ་ཡང་ཡོད་པ་མ་ཡིན་ནོ། །དེས་ན་ཕན་ཚུན་ལྟོས་པར་གྲུབ་པོ། །གལ་ཏེ་མཉན་བྱ་ཉིད་ནི་ཉན་པའི་རྣམ་པར་ཤེས་པའི་གཟུང་བ་ཡིན་ལ། དེ་ཡང་རང་གི་རྣམ་པ་ཅན་གྱི་རྒྱུ་མ་ཡིན་ནམ། སྐད་ཅིག་མ་མ་ཡིན་པ་ནི་དོན་བྱེད་པ་མེད་དེ། དེས་ན་མི་རྟག་པ་ཉིད་བསྒྲུབ་པ་ལ་མཉན་པར་བྱ་བ་ཉིད་མི་མཐུན་པའི་ཕྱོགས་ལས་ལྡོག་པ་ཡིན་ནོ། །བསྒྲུབ་པར་བྱ་བའི་ཆོས་ཅན་ལས་གཞན་ལ་མེད་པ་ཙམ་གྱིས་ནི་དེ་རྗེས་སུ་འགྲོ་བ་མེད་པ་མ་ཡིན་ནོ། །དེས་ན་ལྡོག་པ་མེད་པའི་ཕྱིར་མཉན་བྱ་ཉིད་ནི་གོ་བར་བྱེད་པ་མ་ཡིན་ནོ་ཞེས་ཅི་སྟེ་བརྗོད་ཅེ་ན། གལ་ཏེ་ཉན་པའི་ཤེས་པའི་རྒྱུ་ཉིད་མཉན་བྱ་ཡིན་ན། འོ་ན་ནི་དེ་སྒྲ་ཙམ་ལ་ཡོད་བས། གནོད་པར་བྱེད་པའི་ཚད་མ་གང་གིས་སྐད་ཅིག་མ་ཉིད་ཀྱི་ཁྱབ་པ་སྒྲུབ་པ་དེ་ཉིད་ཀྱི་སྒྲ་ཡང་སྐད་ཅིག་མར་གྲུབ་པའི་ཕྱིར། མཉན་བར་པར་བྱ་བ་ཉིད་ཀྱིས་གཞན་ཅི་ཞིག་བསྒྲུབ་པར་བྱ། གང་ཞིག་རྟགས་ཀྱི་ཚུལ་གྲུབ་པའི་དུས་སུ་མ་གྲུབ་པ་དེ་ནི་རྟགས་ལས་སྒྲུབ་པ་ཡིན་ན། སྒྲའི་སྐད་ཅིག་མ་ཉིད་ནི་མཉན་བྱའི་རྗེས་སུ་འགྲོ་བ་གྲུབ་པའི་དུས་ཉིད་དུ་གྲུབ་པ་ཡིན་ཏེ། དེས་ན་མཉན་བྱ་ལ་མི་ལྟོས་སོ། །དེ་ལྟར་ཡོད་པའི་ཁྱབ་པ་གྲུབ་པའི་དུས་ཉིད་ན་སྒྲ་སྐད་ཅིག་མ་གྲུབ་པ་ནི་མ་ཡིན་ནོ། །འདི་ལྟར་ཡོད་པའི་དངོས་པོ་ནི་ཚད་མེད་པ་ཡིན་ཏེ། དེའི་ཕྱིར་ཐུན་མོང་གི་ཡུལ་ལ་ཁྱབ་པར་འགྲུབ་པོ། །ཇི་ལྟར་དངོས་པོ་གཅིག་གི་མུར་ཐུག་པ་ནི་རིམ་དང་ཅིག་ཅར་དག་གིས་དོན་བྱེད་པ་མེད་པར་བསྟན་པར་མི་ནུས་པ་དེ་ལྟར་ནི་སྐད་ཅིག་མ་འཇིག་པའི་སྐབས་སུ་འཆད་པར་འགྱུར་
རོ། ཐུན་མོང་གི་ཡུལ་ཅན་གྱི་ཁྱབ་པ་སྒྲུབ་ཀྱང་སྒྲ་ཡོད་པར་ཐེ་ཚོམ་ཟ་བ་ན། སྐད་ཅིག་མར་མ་གྲུབ་པ་ཡིན་ལ་ཡོད་པར་ངེས་པ་ལ་ནི་གྲུབ་པ་ཡིན་ནོ། །མཉན་བྱ་ཉིད་ནི་སྒྲ་ཙམ་ལ་ཡོད་པས་དེ་ཉིད་དུ་ཁྱབ་པ་བསྒྲུབ་པར་བྱ་བ་ཡིན་ནོ། །དེའི་ཕྱིར་མཉན་བྱ་འམ་གཞན་ཡང་རུང་སྟེ་གང་ཞིག་ཐུན་མོང་མ་ཡིན་པ་དེ་ནི་གོ་བར་བྱེད་པ་མ་ཡིན་ཏེ། གནོད་པར་བྱེད་པའི་ཚད་མ་ཉིད་ཀྱིས་ཤེས་པར་འདོད་པའི་བྱེ་བྲག་རྗེས་སུ་དཔག་པར་བྱ་བ་གྲུབ་པའི་ཕྱིར་ན། དེའི་བྱ་བ་མེད་པའི་ཕྱིར་རོ། །དངོས་པོ་གཅིག་ལ་བརྟེན་པ་ནི་རིམ་དང་ཅིག་ཅར་དག་གིས་དོན་བྱེད་པ་མེད་པར་བསྒྲུབ་པ་ཡང་མི་ནུས་ཏེ། དེའི་ཕྱིར་ཁྱབ་པ་འགྲུབ་པར་ག་ལ་འགྱུར། གལ་ཏེ་ངེས་པ་ཉིད་རྗེས་སུ་འགྲོ་བ་འམ་ལྡོག་པ་ཡིན་ན། འོ་ན་ནི་རྟགས་ཚུལ་གཉིས་པར་ཐལ་བར་འགྱུར་ཏེ། ཕྱོགས་ཀྱི་ཆོས་རྗེས་སུ་འགྲོ་ལྡོག་དག་ལས་གང་ཡང་རུང་བའོ་ཞེ་ན། དགག་པའི་ཕྱིར་མ་ཡིན་ཏེ་ཞེས་སྨོས་ཏེ། རྗེས་སུ་འགྲོ་བ་དང་ལྡོག་པ་དག་ཚུལ་ཐ་དད་པ་ཉིད་དོ། །འདི་ལྟར་མཐུན་པའི་ཕྱོགས་ལ་ཡོད་པ་ཚད་མས་ངེས་ཀྱང་གཞལ་བྱ་ཉིད་བཞིན་དུ་མི་མཐུན་པའི་ཕྱོགས་ལ་མེད་པར་ངེས་པ་མ་ཡིན་ནོ། །གང་ཞིག་ངེས་ཀྱང་མ་ངེས་པ་གང་ཡིན་པ་དེ་ལས་ཁྱད་པར་གཞན་ཉིད་ཡིན་ལ། ཁྱད་པར་གཞན་ཉིད་ཀྱང་ཚུལ་གཞན་ཡིན་པར་བསྟན་པའི་ཕྱིར་ན་ཚུལ་གཅིག་ཉིད་མ་ཡིན་ནོ། །འོ་ན་ཀྱང་སྔར་བཤད་པའི་ཚུལ་གྱིས་དེ་དག་ནི་ངེས་པའི་སྒྲས་བརྗོད་པར་བྱ་བ་ཡིན་ལ། ངེས་པ་དེ་དག་ནི་གཅིག་གིས་ཀྱང་གྱི་ག་བསྟན་པར་ནུས་པའི་ཕྱིར་སྒྲའི་སྦྱོར་བ་དེ་བསྡུས་ཏེ་བརྗོད་ཀྱི་ཚུལ་གཅིག་ཏུ་བྱས་པའི་ཕྱིར་ནི་མ་ཡིན་ནོ། །དེ་སྐད་དུ་ཡང་སློབ་དཔོན་ཕྱོགས་ཀྱི་གླང་པོས་ཡང་ན་དོན་གྱིས་གོ་བ་སྟེ། ཤུགས་ཀྱིས་རྟོགས་པ་གང་ཡང་རུང་བ་གཅིག་རབ་ཏུ་སྦྱར་བས་ཀྱང་གཉི་ག་རབ་ཏུ་བསྟན་པའི་ཕྱིར་རོ་ཞེས་བཤད་དོ། །ཡང་ནའི་སྒྲ་ནི་ཚད་མ་ཀུན་ལས་བཏུས་པའི་སྐབས་ཀི་གཞུང་ལ་ལྟོས་པའོ། །དེའི་ཕྱིར་སྦྱོར་བ་བསྡུས་པ་ཡིན་ཏེ། སྦྱོར་བ་གཅིག་གིས་བརྗོད་པའི་ཚུལ་ནི་ཐ་དད་པ་ཁོ་ནའོ། །གཞན་དག་ནི་མེད་པ་ཡོད་པ་མ་ཡིན་པ་ལ་ནི་མེད་པ་ཉིད་འཇུག་པ་འགོག་པར་བྱེད་དེ། །མེད་པ་ཡོད་པ་མ་ཡིན་པ་ནི་གཞི་ཞེས་བྱ་བ་གནས་གཞིའི་ནུས་པ་དང༌། སོགས་པའི་སྒྲས་བྱེད་པ་ལ་སོགས་པའི་ནུས་པ་དེར་མི་འཐད་པའི་ཕྱིར་ཏེ། མི་སྲིད་པའི་ཕྱིར་ཏེ། མི་སྲིད་པའི་ཕྱིར་རོ། །མེད་པ་ནི་ནུས་པ་
ཐམས་ཅད་དང་བྲལ་བའི་ཕྱིར་རོ། །འདི་དགག་པའི་ཕྱིར་ཕ་རོལ་ལ་བཞད་གད་དུ་སྨྲས་པ་ནི་རེ་ཞིག་ཕྱུགས་དག་ཀྱང་ཟེས་བྱ་བ་ཡིན་ནོ། །གང་གི་ཚེ་གང་མི་རིགས་པར་མཐོང་བ་དེ་ཉིད་ཀི་ཚེ་སྔ་མ་དང་ཕྱི་མ་དྲན་པའི་ནུས་པ་མེད་ཀྱང་དེ་ལ་མི་གནས་སོ། །རྒོལ་ལ་འདི་ནི་གང་ཁོ་ནའི་ཚེ་གཞན་འགོག་པ་དེ་ཉིད་ཀྱི་ཚེ་རང་ཉིད་སྤྱོད་པར་བྱེད་དོ། །དེས་ན་ཕྱུགས་ལས་ཀྱང་ཕྱུགས་ཡིན་ཏེ། ཕྱུགས་ཀྱི་དྲུང་ན་ཡང་ཕྱུགས་ཡིན་ནོ། །སློབ་དཔོན་ཕྱོགས་ཀྱི་གླང་པོ་ལ་སོགས་པ་ཆེན་པོའི་ཡང་ཆེན་པོ་བླ་མ་དག་ལ་སྨེད་པའི་ཕྱིར་འདི་ལས་བདག་ཉིད་མི་ཤེས་པ་གཞན་ཅི་ཞིག་ཡོད་དེ། བདག་ཉིད་མི་ཤེས་པའི་བྱ་བ་ནི་འདི་ཙམ་དུ་ཟད་པའི་ཕྱིར་རོ། །གཞན་འགོག་པའི་དུས་སུ་བདག་ཉིད་མི་རིགས་པ་བྱེད་པ་ཉིད་བསྟན་པའི་དོན་དུ་བཤད་པ་ནི། ཕ་རོལ་པོ་འདི་ལྡོག་པའི་དོན་སྟོན་པ་རྗོད་པར་བྱེད་པའི་ཚིག་དེ་ཉིད་ཀྱིས་ཏེ། མེད་པ་ལ་མེད་པ་ཉིད་མི་འཐད་དོ་ཞེས་བྱ་བ་དེ་ལྟ་བུ་ལ་སོགས་པ་དག་གིས་མེད་པ་དངོས་པོ་མ་ཡིན་པ་ལ་ཐ་སྙད་མི་འཐད་པར་སྟོན་ཅིང་སྒྲུབ་ཅིང་གཟན་དག་འགོག་པར་བྱེད་པ་ནི་གསལ་བར་རྒྱལ་པོའི་ཆོས་ལུགས་ཡིན་ནོ། །ཁྱེད་ཀྱི་རིགས་པ་དང་མི་རིགས་པ་བརྟགས་པ་དང་མི་ལྡན་པའི་ཚིག་འདི་ནི་རྒྱལ་པོའི་ཆོས་ལུགས་དང་འདྲ་བ་ཡིན་ནོ། །འདི་སྙམ་དུ་མེད་པ་བརྗོད་པའི་ཚིག་གིས་འདི་ཐ་སྙད་དུ་མི་བྱེད་དོ་སྙམ་ན། སྨྲས་པ། བདག་ཉིད་མི་སྨྲ་ན་ནི་གཞན་རྟོགས་པར་མི་ནུས་ཏེ། མི་དབང་ལ་སྨྲ་ན་ཡང་མེད་པ་ལ་སྒྲ་འཇུག་པའི་སྐྱོན་འདི་སྤང་བར་མི་ནུས་སོ། །དེ་བཞིན་དུ་འདི་ནི་སྐྱོན་གཞན་ཏེ། མེད་པ་ལ་གཏན་ཚིགས་མི་འགོག་ན་སྒྲུབ་པ་ཐོབ་པར་འགྱུར་རོ། །ཅིའི་ཕྱིར་ཞེ་ན། བཤད་པ། མེད་པ་ལས་ལྡོག་པ་ཐ་དད་པའི་མཚན་ཉིད་ག་ལ་ཡོད་པའོ། །འདི་སྐད་བརྗོད་པ་ཡིན་ཏེ། དངོས་པོ་མེད་པ་བཀག་པ་ཉིད་དངོས་པོ་འགའ་ཞིག་ཏུ་བརྗོད་པ་ཡིན་ཏེ། དེས་ན་གཉི་ག་ལ་དགག་པར་མི་ནུས་སོ། །དངོས་པོ་མེད་པ་བཀག་པའི་ཕྱིར་ན་དངོས་པོ་ཁས་བླངས་པར་འགྱུར་ན་དེ་ཡང་རིགས་པ་མ་ཡིན་ནོ། །གཞན་ཡང་མེད་པ་ལས་ལྡོག་པའི་ལྡོག་པ་དེ་ཉིད་ཁྱོད་ཅི་ལྟར་འདོད། ཚིག་གི་སྦྱོར་བ་གང་གིས་འདོད་ཅེ་ན། བཤད་པ། མེད་པ་ལས་ལྡོག་པ་མེད་དོ་ཞེས་བ་བ་འདིས་སོ། །འདི་སྐད་བརྗོད་པ་ཡིན་ཏེ། མེད་པ་ལས་ལྡོག་པ་གྲུབ་པ་མ་ཡིན་ཞེས་སྨྲས་པ་ན། ལྡོག་པའི་ལྡོག་པ་ལ་མེད་པ་འབྱུང་ཁུང་དུ་བསྟན་པ་ཡིན་ནོ། །ཇི་ལྟར་ལྡོག་པ་ལ་ལྟོས་ནས་ནུས་པ་མེད་པའི་
ཕྱིར་འབྱུང་ཁུང་ཉིད་མ་ཡིན་པ་དེ་བཞིན་དུ་ལྡོག་པའི་ལྡོག་པ་ལ་ཡང་ཡིན་ནོ། །ལྡོག་པ་ལ་ནི་འབྱུང་ཁུང་ཉིད་བཀག་ལ། ལྡོག་པའི་ལྡོག་པ་ལ་ནི་འབྱུང་ཁུང་ཉིད་དུ་བརྗོད་དེ། དེ་ཡང་རིགས་པ་མ་ཡིན་པ་བྱས་པ་ཡིན་ནོ། །དོན་འདི་ཉིད་ལྷག་དང་བཅས་ཏེ་ཚིགས་སུ་བཅད་པ་དག་གིས་བསྟན་པའི་ཕྱིར་སྨྲས་པ། ལྡོག་པ་མེད་པའི་མེད་པ་གང་ཡིན་པ་དེ་ཉིད་ནི་བསྒྲུབ་པ་ཡིན་ནོ། །དེ་ཡང་དངོས་པོ་དེ་ཡོད་པར་བསྟན་པ་ཡིན་ཞིང༌། མེད་པ་ལ་ཡང་དེ་ནི་ཡོད་པར་འདོད་པ་ཡིན་ལ། དངོས་པོ་མེད་པ་ནི་མེད་པ་དང་འབྲེལ་པ་ཡོད་པ་མ་ཡིན་ནོ་ཞེས་སྟོན་པ་འདི་ནི་བླུན་པོ་སྟེ། གླེན་པའི་ཀུན་དུ་སྤྱོད་པ་ཡིན་ནོ། གལ་ཏེ་དེ་ལས་ལྡོག་པ་མེད་ན་དངོས་པོ་མེད་པ་དེ་ལ་གཏན་ཚིགས་འཇུག་པར་བྱ་སྟེ། ཡོད་པར་འདོད་དམ་ཅི་ཞེས་རྣམ་པར་དབྱེ་བ་སྒྱུར་ལ་སྦྱར་ཏེ། ལྡོག་པའི་སྒྲ་ནི་བྲལ་པའི་དོན་བརྗོད་པ་ཡིན་པའི་ཕྱིར་རོ། །གལ་ཏེ། ཡང་ལྡོག་པའི་སྒྲ་དངོས་པོ་མེད་པ་བརྗོད་ན་ནི། དེས་ན་དེ་ལ་ལྡོག་པ་མེད་ན་ཞེས་གནས་གཞི་རིགས་པར་འགྱུར་རོ། །འདི་སྙམ་དུ་དངོས་པོ་མེད་པ་དེ་ལ་གཏན་ཚིགས་འཇུག་པ་དེ་ཡང་མ་ཡིན་ནོ་ཞེ་ན། སློབ་དཔོན་གྱིས་སྨྲས་པ། འོ་ན་ནི་འདི་ཉིད་ནི་དགག་པ་ཡིན་ཏེ། འདི་ལྟ་སྟེ་དངོས་པོ་བཀག་པ་ཞེས་བྱའོ། །དེས་ན་འདོད་པ་མེད་དོ་ཞེས་ཅི་སྟེ་འགོག །དེ་ལྟར་གལ་ཏེ་སྒྲུབ་པ་དེ་ཉིད་འགོག་ན་དགག་པ་ཐོབ་པ་ཡིན་ལ། དགག་པ་འགོག་པ་ཡང་སྒྲུབ་པ་ཡིན་པས་མེད་པ་ལ་གཉི་ག་དགག་པར་བྱ་བ་ནི་མི་ནུས་སོ་ཞེས་བསྟན་པ་ཡིན་ནོ། །ད་ནི་སྐྱོན་གཞན་བསགས་པའི་ཕྱིར། །སྒྲུབ་དང་དགག་པ་མ་རྟོགས་པ། །ཞེས་བྱ་བ་ལ་སོགས་པ་སྨོས་སོ། །འདི་སྐད་བརྗོད་པ་ཡིན་ཏེ། དག་གི་དོན་གྱི་མཚན་ཉིད་སྒྲ་ལས་བྱུང་བའི་ཐ་སྙད་ནི་མེད་པ་ལ་འཇུག་པར་མི་ནུས་ཏེ། གང་གི་ཕྱིར་གཞན་མེད་པ་ནི་དེ་ལ་ཡོད་པ་དང་མེད་པ་ཐ་སྙད་བྱ་བ་མ་ཡིན་ལ། དངོས་པོ་མེད་པ་དེ་ཉིད་ཀྱང་རང་ཉིད་ཡོད་པ་དང་མེད་པར་ཐ་སྙད་དུ་མི་ནུས་སོ། །གང་གི་ཕྱིར་རྣམ་པར་དབྱེ་བའི་མཐའ་ཅན་གྱི་ཚིག་གིས་བརྗོད་པར་བྱ་བ་དངོས་པོ་མེད་པ་བརྟག་པ་འམ་བརྗོད་པར་འགྱུར་པ་རྣམ་པར་དབྱེ་བ་ཐམས་ཅད་ནི་བྱེད་པ་པོ་བརྗོད་པར་འདོད་པའི་རྒྱུ་མཚན་ཅན་ཉིད་དོ། །རྣམ་པར་དབྱེ་བ་དང་པོ་ཡང་བྱེད་པ་པོའི་ནུས་པ་ཁོངས་སུ་འདུས་པ་ཅན་ཉིད་ཡིན་ལ། དྲུག་པའི་ཡུལ་ཡང་ལྷག་མ་བྱ་བ་དང་བྱེད་པ་སྔོན་དུ་འགྲོ་བ་ཅན་ཉིད་དོ། །དེས་
ན་ནུས་པ་དང་བྲལ་པའི་ཕྱིར་གནས་གཞི་ལ་སོགས་པའི་ནུས་པ་དང་འབྲེལ་པ་མེད་པས། དངོས་པོ་མེད་པ་འདི་ལ་སྒྲུབ་པ་དང་དགག་པའི་ཐ་སྙད་བྱ་བར་མི་ནུས་པའི་ཕྱིར་མི་སྨྲ་བ་ཉིད་ཐོབ་པར་འགྱུར་རོ། །དངོས་པོ་མེད་པ་ལ་མི་སྨྲ་བ་ཐོབ་པ་འབའ་ཞིག་ཏུ་མ་ཟད་ཀྱི། དགག་པའི་ཐ་སྙད་ཐམས་ཅད་ཀྱང་ཆད་པར་འགྱུར་རོ་ཞེས་བསྟན་པའི་དོན་དུ་བཤད་པ། འགལ་བའི་ཕྱིར་ན་རེ་ཞིག་ཡོད་པའི་དོན་རྣམས་ལ་ནི་དགག་པ་མེད་དོ། །གནས་གཞི་ལ་སོགས་པ་མི་འཐད་པས་དགག་པ་དེ་ནི་མེད་པ་འཇུག་པར་མི་འགྱུར་རོ། །དེས་ན་རྣམ་པ་གཞན་གསུམ་པ་མེད་པའི་ཚུལ་འདིས་དགག་པའི་དོན་མེད་པར་ཏེ་ནུས་པར་འགྱུར་རོ། །འདི་སྙམ་དུ་ཡོད་པ་ཉིད་ཡུལ་དང་དུས་ལ་ལྟོས་ནས་འགོག་པ་ཡིན་ཏེ། དཔེར་ན་བུམ་པ་ཡོད་པ་ཉིད་ཡུལ་ལམ་དུས་དེ་ན་མེད་དོ་ཞེས་དགག་པ་བཞིན་ནོ་ཞེས་ཕ་རོལ་དོགས་ནས་གལ་ཏེ་ཡུལ་དུས་ཞེས་བྱ་བ་ལ་སོགས་པར་སྨོས་སོ། །ཅི་ལྟར་དེ་ཡོད་པ་སྟེ་དངོས་པོ་དེ་རྣམ་པ་གང་གིས་ཡོད་པའི་རྣམ་པ་དེས་ནི་དགག་པར་མི་ནུས་ལ། རྣམ་པ་གང་གིས་དེ་མེད་པའི་རྣམ་པ་དེས་ཀྱང་དགག་པར་མི་ནུས་པ་ཉིད་དེ། མེད་པ་ནི་གནས་གཞི་ལ་སོགས་པར་མི་འཐད་པའི་ཕྱིར་རོ། །དེའི་ཕྱིར་ཞེས་བྱ་བ་ནི་གང་གི་ཕྱིར་ཕྱི་རོལ་གྱི་དངོས་པོ་འམ་དངོས་པོ་མེད་པ་དགག་པ་དང་འབྲེལ་པར་མི་ནུས་ལ། དགག་པ་བྱེད་པ་ཡང་ཡིན་པ་དེའི་སྒྲའི་དོན་ལ་བརྟེན་ནས་འགྲོ་བ་འདིར་དགག་པ་དང་སྒྲུབ་པ་ཐམས་ཅད་འདོད་པ་ཡིན་ནོ། །སྒྲའི་དོན་ཅི་འདྲ་བ་ཞིག་ཅེ་ན། དངོས་དངོས་མེད་པ་བརྟེན་པ་སྟེ། །དངོས་པོ་དང་དངོས་པོ་མེད་པའི་རྟེན་གང་ལ་ཡོད་པའོ། །སྒྲ་དོན་ཆོས་ནི་རྣམ་པ་གསུམ། །ཞེས་གང་འཆད་པ་ཡིན་པ། །དེ་ཕྱིར་དངོས་དངོས་མེད་རྟེན་ཅན། །ཞེས་བཤད་པ་ཡིན་ནོ། །གལ་ཏེ་ཕྱི་རོལ་གྱི་རང་བཞིན་དུ་ལྷག་པར་ངེས་པའི་ཕྱིར་སྒྲའི་དོན་ཀྱང་ཕྱི་རོལ་ཉིད་མ་ཡིན་ནམ་ཞེ་ན་ཕྱི་རོལ་གྱི་རང་བཞིན་དུ་ངེས་པ་སྒྲའི་དོན་ཡིན་པར་སུ་སྨྲ། འདི་ལྟར་གང་ལ་ཕྱི་རོལ་གྱི་རྟེན་ཡོད་པ་མ་ཡིན་པའོ། །རྟེན་ནི་ངེས་པའོ། །ཕྱི་རོལ་ཏེ་ཕྱིའི་ཡུལ་དུ་ངེས་པ་ནི་སྒྲའི་དོན་མ་ཡིན་ཏེ། ཕྱི་རོལ་གྱི་རང་བཞིན་དུ་ནི་ངེས་པ་མ་ཡིན་ནོ་ཞེས་བྱ་བའི་དོན་ཏོ། །དགག་པ་དང་སྒྲུབ་པ་དག་དང་འབྲེལ་བ་ཉིད་ཤིང་གི་ཚིག་གི་དོན་ཡིན་ཏེ། ཐ་སྙད་ཀྱི་ཡུལ་གྱི་དོན་གཞན་མེད་པའི་ཕྱིར་རོ། །བློའི་ཡུལ་ཉིད་སྒྲའི་དོན་ཡིན་ཏེ། དགག་པ་དང་སྒྲུབ་པ་དག་འབྲེལ་པར་རུང་བ་ཉིད་ཤིང་ལ་སོགས་པའི་ཚིག་གི་དོན་ཡིན་
གྱི་གཞན་ནི་མ་ཡིན་ནོ། །ཕྱི་རོལ་ཤིང་ལ་སོགས་པ་ཉིད་ངེས་པ་ནི་ཚིག་གི་དོན་དུ་མི་འཐད་དོ། །ཕྱི་རོལ་གྱི་ཤིང་ནི་གང་ན་ཡོད་པ་དེར་བདག་ཉིད་ཐམས་ཅད་ཀྱིས་ཡོད་པ་གང་ལ་མེད་པ་དེ་ན་ཡང་དག་ཉིད་ཐམས་ཅད་ཀྱིས་མེད་པའི་ཕྱིར་རོ། །གལ་ཏེ་དེ་འདྲ་བར་ཡོད་པ་ངེས་པར་བྱས་པའི་ཚིག་གི་དོན་ཡིན་ན། འོ་ན་ནི་དེ་ལ་སྒྲུབ་པ་འམ་དགག་པ་གཞན་འབྲེལ་པར་མི་འཐད་དོ། །ཡོད་པའི་དོན་གྱི་ཁྱད་པར་ཅན་གྱི་ཤིང་མྱོང་བར་འགྱུར་བ་ནི་དོན་དག་གམ། དེ་བཀག་པ་དང་འབྲེལ་པར་ནུས་པ་ནི་མེད་དོ། །ཅི་སྟེ་ཡང་ཡོད་པ་མ་ཡིན་པར་ཤེས་པའི་ཤིང་སྒྲའི་དོན་ཡིན་ན། དེ་ཡང་སྒྲུབ་པ་འམ་དགག་པ་གཞན་དང་འབྲེལ་པར་རུང་བ་མ་ཡིན་ནོ། །གང་ཞིག་ངེས་པས་སྒྲུབ་པ་དང་དགག་པ་འབྲེལ་པར་རུང་བ་ཡོད་པ་དང་མེད་པ་དག་ལས་ཕྱི་རོལ་རྣམ་པ་གཞན་ནི་ཡོད་པ་མ་ཡིན་ནོ། །དེའི་ཕྱིར་ཤིང་ཡོད་དོ་ཤིང་མེད་དོ་ཞེས་བྱ་བའི་ངག་ལ་ཕྱི་རོལ་གྱི་རང་བཞིན་ངེས་པ་ནི་ཤིང་གི་སྒྲའི་དོན་མ་ཡིན་ཏེ། དེ་ཡོང་བ་འམ་མེད་པར་ངེས་པར་བྱས་པ་ནི་སྒྲུབ་པ་ནི་སྒྲུབ་པའམ་དགག་པ་དང་འབྲེལ་བར་མི་རུང་བའི་ཕྱིར་རོ། །སྒྲའི་དོན་ནི་ཕྱིར་རོལ་ལ་བརྟེན་པ་མ་ཡིན་ཏེ། ཕྱི་རོལ་བདག་ཉིད་ཐམས་ཅད་ཀྱིས་ལོག་གམ་གནས་ཀྱང་སྒྲའི་དོན་རྟོགས་པའི་ཕྱིར་རོ། །གང་ཞིག་དགག་པ་དང་སྒྲུབ་པ་ནི་ཕྱི་རོལ་ལ་བརྟེན་པ་མ་ཡིན་ནོ་ཞེས་ཟེར་བ་དེ་ལ་འདི་སྐད་འདྲི་བར་བྱ་སྟེ། སྒྲའི་དོན་ལ་བརྟེན་ནས་སྒྲུབ་པ་དང་དགག་པ་དང་དགག་པ་ཐམས་ཅད་འདོད་པ་ཡིན་ནོ་ཞེས་བྱ་བ་འདི་ཙམ་གྱིས་ཅི་དགག་པ་དང་སྒྲུབ་པ་ཕྱི་རོལ་ལ་མི་བརྟེན་པར་མ་བརྗོད་དམ། བརྗོད་ན་ཡང་འདིས་ཅི་བྱ། འོ་ན་དགག་པ་དང་སྒྲུབ་པའི་ཕྱི་རོལ་ལ་བརྟེན་པར་ཅི་ལྟར་རྟོགས་པར་འགྱུར་ཏེ། གང་གི་ཕྱིར་ཕྱི་རོལ་དེ་འདྲ་བ་ནི་མེད་དོ་ཞེ་ན། བདེན་ཏེ་ཕྱི་རོལ་གྱི་དངོས་པོ་དེ་འདྲ་བ་ནི་མེད་དོ། །འོན་ཀྱང་ཕྱི་རོལ་གྱི་རྟེན་ཆོས་ཅན་དེ་ཉིད་ཕྱི་རོལ་གྱི་ཡུལ་དགག་པ་དང་སྒྲུབ་པ་དེ་དག་དང་འབྲེལ་བར་སྣང་ཏེ་མངོན་ནོ། །གལ་ཏེ་ཕྱི་རོལ་གྱི་རང་བཞིན་དུ་ངེས་པ་མ་ཡིན་པ་ཆོས་ཅན་ཡིན་ན་ཕྱི་རོལ་ལ་བརྟེན་པའི་སྒྲུབ་པ་དང་དགག་པ་དང་འབྲེལ་པར་སྣང་བར་ཇི་ལྟར་འགྱུར། གང་ཞིག་གང་གི་རང་བཞིན་དུ་ངེས་པ་མ་ཡིན་པ་དེ་ནི་དེ་ལ་བརྟེན་པའི་སྒྲུབ་པ་འམ་དགག་པ་དང་འབྲེལ་པ་མ་ཡིན་ནོ་ཞེ་ན། འདིར་སྨྲས་པ། ཤིང་གི་སྒྲའི་དོན་ནི་ཕྱི་རོལ་དུ་ངེས་པ་མ་ཡིན་པ་ཉིད་དོ། །འདིས་ཅི་འདྲ་བ་ཞིག་ངེས་པ་དེ་འདྲ་བ་ནི་ཕྱི་རོལ་
ན་མེད་དོ། །འདི་ལྟར་ཤིང་མ་ཡིན་པ་གཅིག་པུ་ལས་ལོགས་པའི་དངོས་པོ་ནི་ཕྱི་རོལ་ན་འགའ་ཡང་མེད་དོ། །རྣམ་པར་རྟོག་པ་ནི་རང་གི་བག་ཆགས་ཡོངས་སུ་སྨིན་པའི་དབང་གིས་ལྡོག་པ་གཅིག་ལ་ལྟོས་ཏེ། ཕྱི་རོལ་གྱི་ཤིང་གི་བརྗོད་པར་བྱ་བ་ལྡོག་པ་གཞན་དང་འབྲེལ་པའི་རང་བཞིན་དུ་རྟོགས་པར་བྱེད་དོ། །དེ་འདྲ་བའི་རང་བཞིན་དངོས་པོ་དང་དངོས་པོ་མེད་པ་ཐུན་མོང་བ་ངེས་པ་མེད་པའི་ཕྱི་རོལ་གྱི་དངོས་པོ་ནི་ཡོད་པ་མ་ཡིན་ནོ། །དེ་ནི་གཅིག་ཏུ་ཡོད་པ་འམ་མེད་པར་འགྱུར་གྱི། ཡོད་མེད་ཐུན་མོང་བ་ནི་མ་ཡིན་ནོ། །དེས་ན་ཕྱི་རོལ་གྱི་རང་བཞིན་ཐུན་མོང་བ་རྣམ་པར་རྟོག་པ་སྦྲུལ་པ་ནི་གང་ལ་བརྟེན་པའི་སྒྲུབ་པ་དང༌། དགག་པ་དག་ཕྱི་རོལ་དང་འབྲེལ་པ་ངེས་པར་འགྱུར་བ་སྒྲའི་དོན་ཡིན་ནོ། །ཕྱི་རོལ་ལ་གཏན་མེད་པ་ཡིན་ཡང་འདི་ནི་ཕྱིར་རོལ་གྱི་ཤིང་གི་རང་བཞིན་དུ་རྣམ་པར་རྟོག་པས་བཀོད་པ་ཡིན་ཏེ། དེས་ན་འདི་ཕྱི་རོལ་དུ་ལྷག་པར་ཞེན་པར་བྱས་པ་ཡིན་ཏེ། ཕྱི་རོལ་དེ་འདྲ་བ་ཉིད་ནི་མ་ཡིན་པས་ན་ཕྱི་རོལ་གྱི་ངོ་བོ་ངེས་པ་མ་ཡིན་པར་བརྗོད་དོ། །ཆོས་ཅན་སྒྲའི་དོན་འདི་ལྟ་བུ་ནི་སྒྲ་འཇུག་པ་ཉིད་ཀྱི་ཕྱིར་ཡོད་དོ་ཞེས་འདོད་པ་ཡིན་གྱི། འདི་ལ་ཚད་མ་གཞན་བརྗོད་པར་བྱ་བ་ནི་མ་ཡིན་ནོ། །ཤིང་གི་སྒྲས་བརྗོད་པར་བྱ་བ་ལྡོག་པ་གཅིག་དང་འབྲེལ་པ་ཆོས་ཅན་འདི་འདྲ་བ་མེད་ན་ནི་དོན་གཞན་དགག་པ་དང་སྒྲུབ་པ་དང༌། འབྲེལ་པ་ནི་མི་རིགས་པའི་ཕྱིར་རོ། །གལ་ཏེ་ཡོད་ན་འོན་ན་དེ་ཉིད་དོན་དམ་པའི་དངོས་པོ་ཡིན་ནོ་ཞེ་ན། སྨྲས་པ། ཐ་སྙད་ལ་བརྟེན་ནས་ཡོད་དོ་ཞེས་འདོད་ཀྱི་དོན་དམ་པར་ནི་མ་ཡིན་ནོ། །འདི་ལྟར་ངེས་པའི་ཆོས་ཅན་འདི་བློའི་རང་བཞིན་ནམ། བློའི་རྣམ་པའི་རང་བཞིན་ནི་མ་ཡིན་ཏེ། དེ་དག་ནི་ཤིང་མ་ཡིན་པ་ལས་ལྡོག་པའི་རང་བཞིན་དུ་མི་གནས་པའི་ཕྱིར་རོ། །ཕྱི་རོལ་ཡང་མ་ཡིན་ཏེ། ལྡོག་པ་གཅིག་དང་འབྲེལ་པའི་ཕྱི་རོལ་གྱི་དོན་མེད་པའི་ཕྱིར་རོ། །དེའི་ཕྱིར་ཐ་སྙད་བརྟེན་པ་སྟེ། ཐ་སྙད་ཀྱི་ཡུལ་དུ་སྒྲོ་བཏགས་པའི་རང་བཞིན་ཡིན་ནོ་ཞེས་བྱ་བའི་དོན་ཏོ། །རྣམ་པར་རྟོག་པ་ནི་རང་གི་སྣང་བ་དོན་མེད་པ་ཡང་དོན་དུ་སྟོན་པར་བྱེད་པ་ཡིན་ནོ། །དེས་ན་སྒྲོ་བཏགས་པའི་ཚུལ་གྱིས་ཤིང་གི་སྒྲའི་དོན་ཡོད་པ་ཉིད་དུ་ངེས་པ་ཡིན་ཏེ། དེའི་ཕྱིར་དེའི་རང་བཞིན་ལ་ནི་སྒྲུབ་པ་འམ་དགག་པ་གཞན་འབྲེལ་པ་མ་ཡིན་ནོ། །གལ་ཏེ་ཕྱི་རོལ་མི་སྣང་བ་ལ་སྒྲོ་བཏགས་པ་ཡང་དགག་པར་བྱ་བ་མ་ཡིན་ན། འོ་ན་སྒྲུབ་པ་དང་དགག་པ་ཇི་ལྟར་ངེས་ཤེ་ན།
བཤད་པ། སྒྲོ་བཏགས་པའི་རང་བཞིན་དེ་གང་གི་རང་བཞིན་ཡིན་པར་ངེས་པ་དེ་དགག་པར་ངེས་པ་ཡིན་ནོ། །ཕྱི་རོལ་གྱི་ཤིང་གི་རང་བཞིན་དུ་ཡང་ངེས་པ་ཡིན་ཏེ། དེས་ན་སྒྲུབ་པ་དང་དགག་པར་ངེས་པ་ཡིན་ནོ། །དེའི་ཕྱིར་བློ་མ་ཡིན། བློའི་སྣང་བ་ཡང་མ་ཡིན། སྒྲོ་བཏགས་པའི་རང་བཞིན་གང་ཡིན་པ་དེ་ཡང་མ་ཡིན་ཞིང་ཕྱི་རོལ་ཡང་སྒྲུབ་པ་དང་དགག་པ་དང་འབྲེལ་པ་མ་ཡིན་གྱི། འོན་ཀྱང་སྒྲོ་བཏགས་པ་དེ་ལྡོག་པ་གཅིག་ལ་བརྟེན་ནས་ཕྱི་རོལ་གྱི་རང་བཞིན་དུ་ངེས་པ་ཡིན་ལ། ཕྱི་རོལ་དེ་ལ་སྒྲུབ་པ་དང་དགག་པ་འབྲེལ་པ་ཡིན་ནོ། །ཐག་པའི་རྫས་སྦྲུལ་དུ་མོས་པ་ལ་སྒྲུབ་པ་དང་དགག་པའི་འཇུག་པ་ནི་བློ་མ་ཡིན་དེའི་སྣང་བ་མ་ཡིན་ཞིང༌། སྒྲོ་བཏགས་པའི་སྤྲུལ་ལ་ཡང་རིག་པ་མ་ཡིན་གྱི། འོན་ཀྱང་སྒྲོ་བཏགས་པའི་རང་བཞིན་ཕྱི་རོལ་དུ་ངེས་པ་མ་ཡིན་ནོ། །དེས་ན་ཕྱི་རོལ་ཏུ་དེའི་རང་བཞིན་དུ་གྱུར་པ་ཡིན་ནོ། །དེས་ན་ཤིང་མེད་དོ་ཞེས་བྱ་བའི་ངག་བརྗོད་པ་ན་ཕྱི་རོལ་གྱི་ཤིང་ནི་བཟློག་པར་བྱ་བ་ཡིན་ཏེ། དེས་ན་དགག་པའི་བྱ་བ་མེད་པའི་ཕྱིར་རོ། །བློ་ཡང་མ་ཡིན་ཏེ། སྒྲའི་དོན་མ་ཡིན་པའི་ཕྱིར་དང༌། མྱོང་བ་ཡིན་པའི་ཕྱིར་རོ། །བློའི་སྣང་བ་ཡང་མ་ཡིན་ཏེ། དེ་ཡང་མྱོང་བ་ཡིན་པའི་ཕྱིར་རོ། །དེའི་ཕྱིར་ཚིག་གི་དོན་སྒྲོལ་པ་སྔོན་དུ་འགྲོ་བ་ཅན་གྱི་ངག་གི་དོན་མེད་པར་འགྱུར་རོ་ཞེས་གང་སྨྲས་པ་དེ་བསལ་བ་ཡིན་ནོ། །རྣམ་པར་རྟོག་པ་ནི་དངོས་པོ་དང་དངོས་པོ་མེད་པ་ཐུན་མོང་བ་ཤིང་མ་ཡིན་པ་རྗོད་པ་ལྡོག་པ་དང་འབྲེལ་པ་ཕྱི་རོལ་གཏན་མེད་པ་ཡོད་པ་དང་མེད་པ་དང་ལྡན་པ་དོན་བཏགས་ནས། ཀུན་དུ་བརྟགས་པའི་དོན་དེ་ཕྱི་རོལ་གྱི་ཡུལ་སྒྲུབ་པ་དང་དགག་པར་རློམ་པ་ཡིན་ནོ། །བློ་མ་ཡིན་སྣང་བ་མ་ཡིན་ཕྱི་རོལ་མ་ཡིན། སྒྲོ་བཏགས་པ་ཡང་མ་ཡིན་མོད་ཀྱི། འོན་ཀྱང་སྒྲོ་བཏགས་པར་གྱུར་པའི་ཕྱི་རོལ་ཡིན་ནོ། །ལྡོག་པ་གཅིག་གི་མཐར་ཐུག་པའི་ཤིང་གི་རྣམ་པར་རྟོག་པ་འཇུག་པ་ཡིན་ནོ་ཞེས་བྱ་བ་འདི་ཅི་ལྟར་རྟོགས་པར་བྱ་སྟེ། ཤིང་མ་ཡིན་ལས་ལྡོག་པར་རྟོགས་སོ་ཞེས་ཉམས་སུ་མྱོང་བ་ནི་མེད་དོ་ཞེ་ན། དེ་ནི་བདེན་མོད་ཀྱི། འོན་ཀྱང་གང་ངེས་པ་དེ་རྣམ་པར་རྟོག་པའི་ཡུལ་ཡིན་ནོ། །གཟུང་བ་དང་འཛིན་པའི་རྣམ་པ་དག་ནི་ངེས་པ་མ་ཡིན་ཏེ། དེ་དག་ངེས་པ་མྱོང་བ་མེད་པའི་ཕྱིར་རོ། །དེས་ན་དེ་དག་ནི་རྣམ་པར་རྟོག་པའི་ཡུལ་མ་ཡིན་གྱི། འོན་ཀྱང་དེ་དག་ནི་རང་རིག་པའི་མངོན་སུམ་ཉིད་དོ། །རང་གི་མཚན་ཉིད་ཀྱང་ཡུལ་མ་ཡིན་ཏེ། གང་གི་ཕྱིར་རྣམ་པར་
རྟོག་པའི་དོན་ནི་སྒྲ་དང་འདྲེས་པ་ཡིན་ནོ། །སྒྲ་དང་འདྲེས་པ་ཡང་སྒྲའི་བྱ་བ་ལས་སྐྱེས་པའི་བློ་ལ་སྣང་བ་གང་ཡིན་པ་ཡིན་ན། རང་གི་མཚན་ཉིད་ནི་སྒྲའི་བྱ་བའི་དུས་སུ་སྣང་བ་མ་ཡིན་ནོ། །རྣམ་པར་རྟོག་པ་རང་གི་མཚན་ཉིད་ངེས་པའི་བདག་ཉིད་དུ་ཡང་ཉམས་སུ་མྱོང་བས་གྲུབ་པ་ཡིན་ཏེ། དེའི་ཕྱིར་རྣམ་པར་རྟོག་པ་ནི་མེད་པའི་རང་གི་མཚན་ཉིད་སྟོན་པར་བྱེད་དེ། རྣམ་འགྲེལ་ལས། སྒྲ་དོན་འདི་དག་གཞི་མཐུན་ཉིད། །ཡོད་པ་མིན་ཡང་ཞེས་བཤད་པ་ཡིན་ནོ། །སྒྲོ་བཏགས་པའི་རང་བཞིན་དེ་ནི་དངོས་པོ་དང་མེད་པ་ཐུན་མོང་དུ་ངེས་པ་ཡིན་ན། ཕྱི་རོལ་མཐོང་བའི་རང་བཞིན་ནི་གཉི་གའི་ཐུན་མོང་བ་ཉིད་མ་ཡིན་ནོ། །དེའི་ཕྱིར་ཤིང་མ་ཡིན་པ་གཅིག་པུ་ལས་ལྡོག་པ་དང་ཡོད་པ་དང་མེད་པ་ལས་མི་ལྡོག་པ་ཉིད་དུ་རྟོགས་པ་ན། དངོས་པོ་དང་དངོས་པོ་མེད་པ་ཐུན་མོང་དུ་རྟོགས་པར་འགྱུར་བ་ཡིན་ནོ། །གང་ཡང་སྒྲོ་བཏགས་པའི་རང་བཞིན་དེ་གཉི་གའི་ཐུན་མོང་བ་དང༌། མི་གསལ་བ་ཉིད་ཀྱི་ཕྱི་རོལ་དང་མི་འདྲ་བ་ཡིན་ཡང་ཕྱི་རོལ་དུ་ངེས་པ་ཡིན་ནོ། །སྣང་བ་དང་སྒྲོ་བཏགས་པ་དག་རྣམ་པ་གཞན་གྱིས་འདྲ་བར་ནི་མི་འཐད་དོ། ཕྱི་རོལ་དེའི་རང་བཞིན་མ་ཡིན་པས་སྟོང་པའི་རྟོགས་པ་ན་ཡང་དེའི་རང་བཞིན་མ་ཡིན་པས་སྟོང་པར་སྒྲོ་བཏགས་པ་ཡིན་ཏེ། དེས་ན་ཕྱི་རོལ་དང་སྒྲོ་བཏགས་པ་དག་དེའི་རང་བཞིན་མ་ཡིན་པས་སྟོང་བར་འདྲ་བའི་ཕྱིར། སྒྲོ་བཏགས་པར་བྱ་བའི་ཕྱི་རོལ་ངེས་པར་འགྱུར་བ་ཡིན་ནོ། །དེའི་ཕྱིར་ཡང་ཤིང་མ་ཡིན་པ་ལས་ལྡོག་པ་ངེས་སོ་ཞེས་ཁོང་དུ་ཆུད་པ་ཡིན་ནོ། །གཞན་ཡང་གལ་ཏེ་གཞན་ལས་ལྡོག་པའི་དོན་སྒྲོ་མི་འདོགས་ན་གཞན་མེད་པ་གང་གིས་རྟོགས། མེའི་ངོ་བོ་ཉིད་ངེས་པ་རྟོགས་པ་ན་དེ་ལས་གཞན་མེད་པ་རྟོགས་པ་ཡིན་ནོ་ཞེ་ན། གཞན་ལ་ས་ལྡོག་པ་རྟོགས་པ་མེད་ན། གཅིག་ཏུ་ངེས་པར་བརྟག་པར་མི་ནུས་པ་མ་ཡིན་ནམ། དེའི་ཕྱིར་ངེས་པའི་རང་བཞིན་སྒྲོ་འདོགས་པ་ཉིད་ནི་གཞན་ལྡོག་པ་རྟོགས་པ་ནང་དུ་འདུས་པ་ཡིན་ནོ། །དེས་ན་བདག་གིས་ལྡོག་པ་རྟོགས་སོ་སྙམ་དུ་ཉམས་སུ་མྱོང་བའི་ཕྱིར་ནི་གཞན་ལྡོག་པ་སྒྲོ་འདོགས་པར་མི་བརྗོད་ཀྱི། འོན་ཀྱང་དངོས་པོ་དང་དངོས་པོ་མེད་པ་ཐུན་མོང་བ་དང༌། ཕྱི་རོལ་ཉིད་དང༌། ངེས་པའི་རང་བཞིན་ངེས་པའི་ཤུགས་ཀྱིས་ཡིན་ནོ། །དཔེར་ན་བདག་གིས་སྤྱི་མཐོང་ངོ་སྙམ་དུ་མྱོང་
བ་མེད་མོད་ཀྱི། དེ་ལྟ་ན་ཡང་སྤྱིའི་རྣམ་པ་ཅན་གྱི་ཤེས་པ་ཉམས་སུ་མྱོང་པའི་ཤུགས་ཀྱིས་སྤྱི་མཐོང་བ་ཡིན་ནོ་ཞེས་གཞན་གྱིས་བརྟས་པ་བཞིན་ནོ། །དེ་ཉིད་ཀྱི་ཕྱིར་རྣམ་པར་རྟོག་པའི་དོན་སྒྲོ་བཏགས་པ་ཡང་སྒྲུབ་པའི་རང་བཞིན་ནི་མ་ཡིན་གྱི། འོན་ཀྱང་ལྡོག་པའི་རང་བཞི་ཡིན་ནོ། །གཞན་ལྡོག་པའི་རང་བཞིན་གྱི་མཐར་ཐུག་པ་མ་བཟུང་ན་ནི་སྔར་བཤད་པའི་རྣམ་པ་གསུམ་གྱི་ངེས་པ་མི་འཐད་པའི་ཕྱིར་རོ། །གཞན་ཡང་ལྡོག་པ་གཙོར་གྱུར་པ་སྒྲོ་བཏགས་པའི་དོན་དེ་ཡང་གཞན་སེལ་པར་བརྗོད་པ་ཡིན་ལ། གང་གི་ཕྱིར་སྒྲོ་བཏགས་པའི་རང་བཞིན་གྱི་གཞན་ལྡོག་པ་དེ་ངེས་པ་ན་ཡང༌། གཞན་ལས་ལྡོག་པའི་ཕྱི་རོལ་གྱི་དོན་རྟོགས་པར་འགྱུར་བ་དེའི་ཕྱིར། རྣམ་པར་རྟོག་པ་སྒྲོ་བཏགས་ཀྱི་གཞན་ལྡོག་པས་འཇུག་པ་ཡིན་ནོ། །ཕྱི་རོལ་དག་ལ་ནི་གཞན་ལྡོག་པ་ཅམ་ཞིག་རྟོགས་པར་འགྱུར་གྱི། རང་གི་མཚན་ཉིད་ནི་མ་ཡིན་ནོ། །དེས་ན་སྒྲོ་བཏགས་ཀྱི་གཞན་ལྡོག་པ་ནི་དངོས་སུ་ཡིན་ལ། ཕྱི་རོལ་གྱི་གཞན་ལྡོག་པ་ནི་ཤུགས་ཀྱིས་འཛིན་པ་ཡིན་ནོ། །མེད་པར་དགག་པའི་གཞན་སེལ་བ་དོན་གྱི་ཤུགས་ཀྱིས་རྣམ་པར་རྟོག་པའི་ཡུལ་དུ་འགྱུར་བ་དེ་ཉེ་བར་བཟུང་ནས་ནི། ལྡོག་པའི་ངོ་བོ་ཉིད་མེད་ཕྱིར། །གནས་དང་མི་གནས་རྟོགས་པ་མེད། །ཅེས་བཤད་ལ། སྒྲོ་བཏགས་པའི་གཞན་སེལ་བ་དངོས་སུ་རྣམ་པར་རྟོག་པའི་དོན་ཉེ་བར་བཟུང་ནས་ནི། །སྤྱི་ཡི་བློ་ཡང་བསླད་པ་ཡིན། །དེས་ན་སུན་དབྱུང་བ་ཡང་མེད། །ཅེས་གསུངས་སོ། །དེས་ན་རྣམ་པར་རྟོག་པ་ནི་གཞན་སེལ་པའི་ཡུལ་ཅན་ཡིན་ནོ། །སྒྲ་སེལ་པར་སྦྱོར་པའི་དུས་ན་ནི་ངེས་པའི་རྣམ་པར་རྟོག་པའི་དོན་བརྗོད་པར་བྱ་བ་ཉིད་དུ་སྦྱར་བར་བྱ་སྟེ། གཞན་དུ་ན་ངེས་པའི་དོན་བརྗོད་པ་ཉིད་དུ་མི་འགྱུར་རོ། །དེས་ན་རྣམ་པར་རྟོག་པའི་ཡུལ་གྱི་དོན་བརྗོད་པར་བྱ་བ་ཉིད་བྱེད་ན། ངེས་པའི་རང་བཞིན་ཡིན་པའི་ཕྱིར་གཞན་སེལ་བ་སྒྲ་རྣམས་ཀྱི་བརྗོད་པར་བྱ་བ་ཡིན་པས། གཞན་སེལ་བ་གཞན་དང་བྲལ་བ་ལ་སྒྲ་འཇུག་པ་ཡིན་ནོ་ཞེས་གནས་སོ། །གདོན་མི་ཟ་བར་སྒྲོ་བརྟགས་པ་ལྡོག་པ་གཅིག་དང་འབྲེལ་པ་ཆོས་ཅན་དུ་གཟུང་བར་བྱའོ། །དེ་ལྟ་ཡིན་ན་ཞེས་བྱ་བ་ནི་གལ་ཏེ་ཕྱིའི་དོན་རྣམ་པ་གནས་པ་དེ་འདྲ་བའི་སྒྲའི་དོན་གྱི་མཚན་ཉིད་ཆོས་ཅན་དུ་བཟུང་ན་ནི། དེའི་ཚེ་ཆོས་གཅིག་སྒྲུབ་ན་ཆོས་ཐམས་ཅད་སྒྲུབ་པར་ཐལ་ལ། འགོག་པ་ན་
འང་རང་བཞིན་ཐམས་ཅད་འགོག་པར་ཐལ་ལོ། །དོན་ནི་འདི་ཡིན་ཏེ། ཕྱི་རོལ་གྱི་དངོས་པོ་ཁྱད་པར་ཇི་སྙེད་དང་ལྡན་པའི་ཁྱད་པར་དེ་ཐམས་ཅད་ནི་གཅིག་མེད་ན་ཡང་ཐམས་ཅད་ལྡོག་པར་འགྱུར་གྱི། ཆོས་འགའ་ཞིག་ནི་རྣམ་པར་གནས་ལ་ཆོས་འགའ་ཞིག་ལྡོག་པར་ནི་ཕྱི་རོལ་གྱི་ཡུལ་རྟོགས་པ་མ་ཡིན་ནོ། །གལ་ཏེ་ཡང་ཇི་ལྟར་ཕྱི་རོལ་རྟོགས་པ་དེ་ལྟར་བློས་སྒྲའི་ཡུལ་ཆོས་ཅན་དུ་བཟུང་བ་ནི། དེའི་ཚེ་བུམ་པའི་རང་བཞིན་དང་ཆུ་འཛིན་པར་ནུས་པ་དང༌། རྟག་པ་དང་མ་བྱས་པ་མ་ཡིན་ནོ་ཞེས་བྱ་བའི་གཞི་མཐུན་པའི་ཆོས་བཞི་པོ་རྣམས་ཀྱི་སྒྲུབ་པ་དང་དགག་པ་དང་གྲུབ་པ་དང་བདེ་བ་གཅིག་པར་ཐལ་པར་འགྱུར་རོ། །ཕྱི་རོལ་ནི་ཇི་སྙེད་ཅིག་བདེ་ཐམས་ཅད་ལྡོག་པ་འམ། ཡོད་པར་ཁྱད་པར་མེད་པ་ཡིན་ནོ། །འགའ་ཞིག་ནི་སྒྲུབ་ལ་གཞན་དག་ནི་འགོག་པས་ཐ་དད་པར་ནི་རྟོགས་པ་ཡིན་ཏེ། དེའི་ཕྱིར་ཕྱི་རོལ་དང་མི་མཐུན་པའི་སྒྲའི་ཡུལ་ཆོས་ཅན་ཡིན་ནོ། །འདི་སྙམ་དུ་ཆོས་དེ་དག་གཅིག་ཏུ་རྟོགས་པ་མ་ཡིན་ཏེ། དེས་ན་འགའ་ཞིག་ནི་སྒྲུབ་ལ་གཞན་དག་ནི་འགོག་པ་ལ་འགལ་བ་མེད་དོ། །དཔེར་ན་ལྷ་སྦྱིན་སྒྲུབ་ལ་མཆོད་སྦྱིན་འགོག་པ་བཞིན་ནོ་ཞེ་ན། གལ་ཏེ་དེ་ལྟར་ཐ་དད་པར་ཁས་ལེན་ན། གཞན་དང་གཞན་དུ་གྱུར་པ་དག་གི་བཀག་པ་དང་ནི་སྒྲུབ་པ་བཞིན་དུ། ཆོས་ཀྱི་ཡུལ་སྒྲུབ་པ་དང་ནི་དགག་པ་དག །ཆོས་ཅན་གཅིག་ལ་འདུ་པར་མི་འགྱུར་རོ། །སྒྲུབ་པ་དང་དགག་པ་དག་གཅིག་ལ་འདུ་པར་ནི་རྟོགས་པ་ཡིན་ཏེ། བུམ་པ་ནི་སའི་རང་བཞིན་ཡིན་གྱི། གསེར་གྱི་རང་བཞིན་ནི་མ་ཡིན་ནོ་ཞེས་བུམ་པར་གྱུར་པ་ཉིད་ཀྱི་གསེར་གྱི་རང་བཞིན་འགོག་པ་ཡིན་ནོ། །དེའི་ཕྱིར་ཕྱི་རོལ་གྱི་དོན་ཅི་འདྲ་བ་དེ་འདྲ་བའི་སྒྲའི་དོན་གྱི་ཡུལ་ནི་ཆོས་ཅན་དུ་མི་བཟུང་སེ། སྔར་བཤད་པའི་སྐྱོན་དུ་ཐལ་བའི་ཕྱིར་རོ། །འོ་ན་ཁྱོད་ཀྱི་སྒྲོ་བཏགས་པའི་རང་བཞིན་ལ་ཆོས་དང་ཆོས་ཅན་གྱི་ཐ་སྙད་ཅི་ལྟར་འགྱུར་ཞིང༌། སྒྲོ་བཏགས་པའི་དོན་ཡང་དག་པའི་རྟོགས་པས་རེས་འགའ་མི་གནོད་པ་ཡང་ཅི་ལྟར་འགྱུར་ཞེ་ན། རང་གི་འདོད་པས་གཉི་ག་ཡང་བསྟན་པའི་ཕྱིར་སྨྲས་པ། བུམ་པ་མ་ཡིན་པ་ལས་ལྡོག་པ་འབའ་ཞིག་གིས་ཕྱི་རོལ་དུ་བཏགས་པའི་ཆོས་ཅན་གཅིག་གི་དབང་དུ་བྱེད་ཏེ། ཐ་སྙད་ཅི་ལྟར་བློས་བསྟན་པ་ཞེས་འབྲེལ་ཏོ། །
ལྡོག་པ་གཅིག་གི་མཐར་ཐུག་པའི་ཆོས་ཅན་དེ་ལྟ་བུའི་ཕྱི་རོལ་ནི་འགའ་ཡང་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་ཆོས་གཅིག་སྒྲུབ་པ་ན། དེ་སྟེན་ཏེ་དེ་དང་འབྲེལ་པ་ལྟ་བུའི་ཆོས་ཅན་དེའི་དབང་དུ་བྱས་ཏེ་ཞེས་བྱ་བ་དེ་ཉིད་དང་སྦྱར་རོ། །ལྟ་བུའི་སྒྲ་སྨོས་པ་ནི་དོན་དམ་བར་ཐ་དད་པ་སྔོན་དུ་སོང་བ་ཅན་གྱི་ལྡན་པ་མེད་པའི་ཕྱིར་རོ། །གཅིག་ལས་ལོག་པ་འབའ་ཞིག་ཏུ་བཏགས་པ་གང་ཡིན་པ་དེ་ཉིད་ནི་མང་པོ་ལས་ལྡོག་པར་བརྟགས་པ་ཡིན་ཏེ། དེས་ན་དེ་ནི་ཆོས་ཅན་དུ་རྣམ་པར་གནས་པ་ཡིན་ནོ། །དེ་ཉིད་ན་སྣ་ཚོགས་ཆོས་ཀྱི་གཞིར་གྱུར་པ་ཞེས་སྨོས་སོ། །ཆོས་གཞན་རྣམས་ནི་བཏང་སྙོམས་ཏེ་ཡོངས་སུ་མ་བཟུང་བའོ། །སྒྲ་མི་རྟག་གོ་ཞེས་བརྗོད་པ་ན་ཆོས་གཞན་འབྲེལ་པར་རུང་བ་དག་ལས་ཡང་བཏང་སྙོམས་སུ་འགྱུར་བ་ཡིན་ཏེ། འདི་གཞན་དུ་གྱུར་ཏམ་མ་གྱུར་ཀྱང་རུང་སྟེ། མི་རྟག་པ་ཉིད་དུ་རེ་ཞིག་གྱུར་པ་ཡིན་ནོ་ཞེས་བྱ་བ་ནི་བཏང་སྙོམས་སོ། །མ་བྱས་པ་མ་ཡིན་ནོ་ཞེས་ཆོས་འགའ་ཞིག་འགོག་ན་དེའི་དབེན་པ་སྟེ། དེས་སྟོང་པར་གྱུར་པའི་ཆོས་ཅན་ཞེས་འབྲེལ་ཏོ། །འདིར་ཡང་ལྟ་བུའི་སྒྲ་ལྟ་བར་བྱའོ། །གང་གི་ཕྱིར་སྒྲ་དང་གཞི་གཅིག་པའི་མ་བྱས་པ་ཉིད་རྗེས་སུ་བརྗོད་ནས་འགོག་པ་ཡིན་པ་དེའི་ཕྱིར། སྔར་རང་བཞིན་དེ་དང་ལྡན་པ་ཕྱིས་འགག་པ་དང་འབྲེལ་པ་དབེན་པ་ལྟ་བུར་སྣང་བར་ནི་ཆོས་ཅན་ཡིན་ནོ། །དེ་ལས་གཞན་པའི་ཆོས་དག་ལ་ནི་ལྟོས་པར་བྱ་སྟེ། མ་བྱས་པ་ཉིད་འགོག་པ་ན་བྱས་པ་ཉིད་ལ་ལྟོས་པ་ཡིན་ནོ། །སྒྲུབ་པའི་དུས་སུ་ནི་གཅིག་བསྒྲུབ་ན་ཆོས་གཞན་ལ་གདོན་མི་ཟ་བར་ལྟོས་པར་བྱ་བ་མ་ཡིན་གྱི། འགོག་པ་ལ་ནི་དགག་པར་བྱ་བ་དང་འགལ་བའི་ཆོས་གཞན་ལས་ལྟོས་པར་བྱ་བ་ཁོ་ནའོ། །གང་ན་བཏང་སྙོམས་ཞེས་འདོན་པ་དེར་ནི་དགག་པར་བྱ་བ་གཞན་བཏང་སྙོམས་སུ་གྱུར་པ་ཞེས་བྱ་བའི་དོན་དུ་སྦྱར་རོ། །རེ་ཞིག་ཆོས་གཅིག་ནི་དགག་པར་བྱ་བ་ཡིན་ལ། གཞན་དག་ནི་བཏང་སྙོམས་སུ་བྱ་བ་འམ། སྒྲུབ་པ་ལ་ལྟོས་པར་བྱ་བ་ཉིད་དོ། །ཁོ་བོ་ཅག་གི་ཆོས་དང་ཆོས་ཅན་གྱི་ཐ་སྙད་དེ་ལྟ་བུར་གྱུར་པ་ཡིན་ནོ་ཞེས་དོན་གཅིག་བཤད་པ་ཡིན་ནོ། །ད་ནི་ཆོས་དང་ཆོས་ཅན་གྱི་ཐ་སྙད་སྒྲོ་བཏགས་པ་ལ་བདེན་པའི་ཤེས་པས་གནོད་པ་མེད་དོ་ཞེས་བསྟན་པའི་དོན་དུ་སྨྲས་པ། ཅི་ལྟར་ཆོས་ཅན་གཅིག་ལ་བརྟེན་ནས་དོན་རྣམས་ཀྱི་ཐ་སྙད་རྟོགས་པར་བྱ་བ་དེ་བཞིན་དུ། ཐ་སྙད་བྱེད་པ་པོས་ཀྱང་ཐ་
སྙད་དེ་མ་བརྟགས་པར་ཏེ། རྣམ་པར་མ་ཕྱེད་པར་ཁས་ལེན་པ་སྟེ་རྟོགས་བས་སོ། །འདི་སྐད་བརྗོད་པ་ཡིན་ཏེ། རྣམ་པར་རྟོག་པ་ཉིད་རྣམ་པར་འབྱེད་པར་བྱེད་པ་ཡིན་ལ། དེ་ཡང་རྣམ་པར་བསླད་པར་གྱུར་པའི་ཕྱིར་གང་གིས་ཡུལ་རྣམ་པར་དབྱེ་བར་བྱ། འདི་སྙམ་དུ་ཅི་ལྟར་སྨིག་རྒྱུ་ལ་ཆུར་ཞེན་པ་ནི། རང་ཉིད་སྐྱེས་པའི་བདེན་པའི་ཤེས་པས་བཟློག་པ་དེ་བཞིན་དུ། ཆོས་དང་ཆོས་ཅན་དུ་སྒྲོ་བཏགས་པ་འདི་ཡང་ཡིན་ནོ་ཞེས་དགོས་པ་ལ། ཐ་དད་དོན་རྟེན་ཞེས་སྨོས་སོ། །ཐ་སྙད་གང་ལ་ཐ་དད་པའི་དོན་ཕན་ཚུན་ལྡོག་པའི་རྟེན་ཡོད་པའོ། །སྨིག་རྒྱུ་ལ་ཆུར་ཤེས་པ་ནི་ཆུ་མ་ཡིན་པ་ལས་ལྡོག་པའི་རྒྱུ་མཚན་ཅན་མ་ཡིན་ཏེ། དེས་ན་གནོད་པ་ཡིན་ནོ། །ཆོས་དང་ཆོས་ཅན་གྱི་ཐ་སྙད་ནི་ཕན་ཚུན་ལྡོག་པའི་རྒྱུ་མཚན་ཅན་ཡིན་པའི་ཕྱིར་གནོད་པ་མ་ཡིན་ནོ། །གལ་ཏེ་སྒྲོ་འདོགས་པ་འདི་རེས་འགའ་བ་ཡིན་ན་ནི་གནོད་པར་འགྱུར་བ་ཞིག་ན། རེས་འགའ་བ་ནི་མ་ཡིན་ནོ་ཞེས་རྣམ་པ་གཞན་གྱིས་ཀྱང་བསྟན་པའི་ཕྱིར་བཤད་པ། འདི་ནི་ཐོག་མ་མེད་པ་ཡང་ཡིན་ལ་བག་ཆགས་ཀྱང་ཡིན་ཏེ། རྣམ་པར་རྟོག་པ་བསྐྱེད་པའི་ནུས་པའོ། །དེ་ལས་བྱུང་བའི་ཆོས་དང་ཆོས་ཅན་གྱི་དོན་གང་ཡིན་པའོ། །འཇིག་རྟེན་དོན་ཏེ་འཇིག་རྟེན་བའི་རབ་ཏུ་གྲགས་པའི་དོན་དེ་ལ་ཐ་སྙད་དུ་བྱེད་པ་པོས་གནོད་པ་མིན་ཏེ། གནོད་པར་བྱེད་པའི་ཤེས་པ་བདེན་པ་དང་ལྡན་བ་མ་ཡིན་ནོ་ཞེས་བྱ་བའི་དོན་ཏོ། །དེས་ན་རེས་འགའ་བ་ཉིད་མ་ཡིན་པའི་ཕྱིར་མི་གནོད་དོ། །ད་ནི་ཅི་ལྟར་ཐ་དད་པ་ལ་བརྟེན་པ་དང༌། བསླད་པ་ཅི་ལྟར་མི་ལྡོག་པར་དེ་ལྟར་བསྟན་པའི་ཕྱིར་བཤད་པ། ཆུ་འཛིན་པ་ལ་སོགས་པ་དེའི་འབྲས་བུ་གང་ལ་ཡོད་པ་དང༌། བགོ་བ་ལ་སོགས་པ་སྣམ་བུའི་བསྒྲུབ་པར་བྱ་བའི་འབྲས་བུ་གང་ལ་མེད་པའི་དོན་དེ་ནི་གཅིག་པ་ཡིན་ནོ། །དེ་ལས་ཞེས་བྱ་བ་ནི་ཆུ་འཛིན་པ་ལ་སོགས་པའི་རྒྱུ་ཉིད་ཀྱིས་དེ་རྒྱུ་མ་ཡིན་པ་དག་དང༌། དེ་བཞིན་དུ་བགོ་བ་ལ་སོགས་པ་བྱེད་པའི་ནུས་པ་མེད་པས་དེ་མ་ཡིན་པ་དག་ལས་ཐ་དད་པ་ལྡོག་པའོ། །དོན་གཅིག་ཅེས་བྱ་བ་འདིས་ནི་དོན་དམ་པར་ལྡོག་པ་དང་ལྡན་པའི་དོན་གཅིག་ཉིད་ཡིན་ནོ་ཞེས་བསྟན་པར་འགྱུར་རོ། །དེའི་ཕྱིར་ཐ་དད་པའི་རྟེན་ཅན་གྱི་བསླད་པ་གང་དག་ཡིན་པ་ཐ་དད་རྟེན་ཅན་ཏེ། དོན་དམ་པ་ལྡོག་པའི་རྒྱུ་མཚན་ཅན་གྱི་བསླད་པ་གང་དག་ཡིན་པའི་བསླད་པ་དེ་དག་གིས་དོན་དེ་མཐོང་བ་ཉིད་ལ་སྦྱོར་རོ་
ཞེས་འབྲེལ་ཏོ། །དེ་དང་ངག་གིས་ཞེས་ཟློས་པས་ནི་ལྡོག་པ་མང་བའི་ཕྱིར་བསླད་པ་མང་བ་ཉིད་དུ་སྟོན་པ་ཡིན་ནོ། །བསླད་པ་གང་དག་གིས་དོན་གང་ཞིག་འཕེལ་བ་དང་འགྲིབ་པ་ལྟ་བུར་བྱེད་པ་དེ་ལ་དེ་སྐད་ཅེས་བརྗོད་དོ། །འདི་སྐད་བརྗོད་པ་ཡིན་ཏེ། ཆུ་འཛིན་པའི་རང་བཞིན་ཞེས་དེ་ལྟར་དེའི་རྒྱུ་ཉིད་ཀྱིས་དེ་ལས་གཞན་དག་ལས་ལྡོག་པའི་བུམ་པ་སྒྲུབ་པའི་རྟོག་པས་ཡུལ་དུ་བྱས་པ་ནི་འཕེལ་བ་དང་ལྡན་པ་ཡིན་ལ། སྣམ་བུ་མ་ཡིན་ནོ་ཞེས་དེ་ལྟར་དེའི་དོན་གྱི་རྒྱུ་མ་ཡིན་པ་ཉིད་ཀྱིས་འགྲིབ་པ་དང་ལྡན་པ་ཡིན་ནོ། །དེ་ལྡན་ཉིད་མིན་ཡང་ཞེས་བྱ་བ་ནི་དོན་དམ་པ་ནི་མ་ཡིན་ཏེ། གང་གི་དེ་ལས་འཕེལ་བའམ་འགྲིབ་པ་བྱེད་པར་འགྱུར་བ་དོན་དེ་ནི་ལྡན་པའི་ཆོས་འགའ་ཞིག་དང་བྲལ་བ་མེད་ལ། བྲལ་བ་དང་ཡང་ལྡན་པ་མེད་དེ། དེ་ལྟ་མོད་ཀྱི་དེ་དང་ལྡན་པ་མ་ཡིན་ཡང་དོན་དེ་མཐོང་བ་ངེས་པ་ཉིད་ལ་སྦྱར་རོ། །འབྲེལ་པ་འགའ་ལས་ཞེས་བྱ་བ་ནི་ཆོས་གཞན་འགའ་ཞིག་ལྡོག་པ་དོགས་པ་ན་ནི་སྒྲུབ་པ་ལྟ་བུར་བྱེད་ལ། སྒྲུབ་པའི་ཆོས་དེས་ཀྱང་བུམ་པ་འཕེལ་བ་ལྟ་བུར་མངོན་པ་འབའ་ཞིག་ཏུ་ཟད་དོ། །གང་ཞིག་ཆོས་གཞན་མེད་པ་ཡོད་པར་དོགས་པ་དེ་བཟློག་པའི་དོན་དུ་བུམ་པ་ལ་ནི་འགེབས་པར་བྱེད་པ་ནུས་པ་མེད་དོ་ཞེས་བློ་གྲོས་རྨོངས་པའི་དོགས་པ་ལ་ལྟོས་ནས་འགེབས་པར་ནུས་པ་ཡོད་པ་བཞིན་དུ་བརྟགས་ནས་གཞི་གཅིག་པ་ཉིད་དུ་བསྟན་པ་སེལ་བར་བྱེད་དོ། །དེས་ན་སྔར་ལྡན་ཞིང་ཕྱིས་བྲལ་བའི་ཆོས་དེས་འགྲིབ་པ་དང་ལྡན་པ་ལྟ་བུར་ངེས་པའི་ཐ་སྙད་ལ་སྦྱོར་བ་ཡིན་ནོ། །ཉེ་བར་བསླད་པ་དེ་ཡང་དེས་ན་བསླད་པར་ཞེས་པ་མ་ཡིན་ཏེ། བསླད་པ་ཉིད་དུ་མི་རིགས་སོ། །འདི་སྐད་བཤད་པ་ཡིན་ཏེ། བསླད་པ་གང་ཡིན་པ་དེ་དག་ནི་དོན་རྣམས་ཀྱི་དོན་དམ་པ་ཐ་དད་པ་ལ་བརྟེན་ནས་འཇུག་པ་ཡིན་ཏེ། དེས་ན་དེ་དག་གི་བསླད་པ་ཉིད་ནི་ཤེས་པར་མི་ནུས་ཏེ། མི་སླུ་བ་ཡོད་པའི་ཕྱིར་རོ། །སྨིག་རྒྱུ་ལ་ཆུར་བསླད་པ་ལ་ནི་ལྡོག་པའི་ཁྱད་པར་མེད་པའི་ཕྱིར། སླུ་བ་སྲིད་པས་གནོད་པར་འགྱུར་བ་ཉིད་དོ། །དེས་ན་ཉེ་བར་བསླད་པ་ཡིན་ཡང་བསླད་པར་ངོ་མ་ཤེས་པའི་རང་བཞིན་ནི་ལྡོག་པ་མ་ཡིན་ནོ། །སྒྲ་ཡང་དེའི་རྒྱུ་མཚན་ཅན་ཡིན་ནོ། །དེས་ན་སྒྲ་ལ་བསླད་པར་བསྟན་པ་ལ་ནི་དགོས་པ་ཅུང་ཟད་ཀྱང་མཐོང་ངོ༌། །བསླད་པའི་དོན་ཉིད་ནི་སྒྲའི་དོན་ཡིན་པས་གང་གི་ཚེ་དེ་དག་གི་དོན་ལ་མི་གནོད་པ་དེའི་ཚེ་སྒྲ་ལ་ཡང་མི་
གནོད་པས་སྒྲོ་བཏགས་པ་ཅི་དགོས། །དེའི་ཕྱིར་དེ་ལྟར་སྒྲོ་བཏགས་པའི་སྒྲུབ་པ་དང་དགག་བ་ཁོ་ན་སྒྲའི་དོན་ཡིན་པས་མེད་པ་ལ་ཉིད་འཐད་པ་ཡིན་ནོ། །དེའི་ཕྱིར་ན་གང་ཞིག་མཚན་ཉིད་དེ་དང་ལྡན་པའི་གཏན་ཚིགས་ནི་མི་དམིགས་པ་དང་བདག་དང་འབྲས་བུ་ཞེས་བྱ་བར་བརྗོད་པ་གང་ཡིན་པ་གསུམ་པོ་དེ་ཁོ་ནའོ། །འདི་ཉིད་བཤད་པ་ནི་མི་དམིགས་པ་དང་རང་བཞིན་དང་འབྲས་བུའོ་ཞེས་བྱ་བ་ཡིན་ནོ། །རང་གི་སྒྲས་ནི་གསུམ་པོ་དེ་སྟོབས་མཚུངས་པར་སྟོན་ལ། འོའི་སྒྲས་ཀྱང་དེ་ཙམ་ཉིད་དུའོ། །དེ་ཉིད་དཔེར་བརྗོད་པ་སྟོན་པ་ནི། དཔེར་ན་ཕྱོགས་ཀྱི་ཁྱད་པར་དམིགས་ཀྱིས་གཟུང་བ་ལ་ལར་རོ། །འགའ་ཞིག་ཏུ་ཞེས་བྱ་བ་ནི་རྒོལ་བ་དང་ཕྱིར་རྒོལ་བའི་མངོན་སུམ་ནའོ། །བུམ་པ་མེད་དེ་ཞེས་བྱ་བ་ནི་བུམ་པ་མེད་པའི་ཐ་སྙད་བསྒྲུབ་པར་བྱའོ། །དམིགས་པའི་མཚན་ཉིད་ཅེས་བྱ་བ་ལ་སོགས་པས་ནི་གཏན་ཚིགས་སྟོན་ཏོ། །དམིགས་པའི་མཚན་ཉིད་ནི་རྒྱུའོ། །དེར་གྱུར་པ་ནི་ཚོགས་པའི་ནང་དུ་འདུས་པའི་དོན་བརྗོད་པའོ། །ཡུལ་ནི་ཡུལ་ཉིད་ཀྱི་ནང་དུ་འདུས་པ་ཡིན་ཏེ། ཚོགས་པ་གཞན་དག་ནི་དམིགས་པ་མ་ཡིན་པའི་ཕྱིར་རོ། །དེ་ལྟ་བུར་གྱུར་པ་ནི་མེད་པའི་ཐ་སྙད་དུ་གྲུབ་པ་ཡིན་ནོ། །ཡང་ཅི་ལྟར་ན་གང་ཞིག་མེད་པ་དེ་དམིགས་པའི་མཚན་ཉིད་ཀྱི་གྱུར་པ་ཤེས་པའི་ཡུལ་དུ་འགྱུར། ཤེས་པའི་ཡུལ་ཉིད་ཡིན་ན་ཡང་ཇི་ལྟར་མེད་པར་བརྗོད་ཅེ་ན། དེའི་རང་བཞིན་དུ་བཏགས་ནས་འགོག་པ་ཡིན་ཏེ། དགག་པ་ཐམས་ཅད་ནི་སྒྲོ་བཏགས་པའི་ཡུལ་ཅན་ཡིན་ནོ། །དཔེར་ན་སྐྱེས་བུ་དཀར་ཤམ་འདི་ན་མེད་པོ་ཞེས་བྱ་བ་འདི་ལ། འདི་སྐད་ཅེས་དཀར་ཤམ་ཡིན་ན་ནི་དགག་ཏུ་མེད་ལ། འགོག་པ་ཡིན་ན་ཡང་དཀར་ཤམ་མ་ཡིན་ནོ་ཞེས་ནི་བརྗོད་པར་མི་ནུས་པ་དེ་བཞིན་དུ་འདི་ཡང་ཡིན་ནོ། །གལ་ཏེ་དེ་ལྟར་ན་མི་སྣང་བ་ཡང་ཤ་ཟ་ལ་སོགས་པ་སྣང་བ་ཉིད་དུ་སྒྲོ་བཏགས་ནས་དགག་པར་འགྱུར་རོ་ཞེ་ན། གང་ལ་སྒྲོ་གདགས་པར་རུང་བ་དེ་ཉིད་ལ་སྒྲོ་འདོགས་པ་ཡིན་ནོ། །སྒྲོ་གདགས་པར་རུང་བ་ཡང་དོན་གང་ཞིག་ཡོད་ན་གདོན་མི་ཟ་བར་དམིགས་པ་ཉིད་ཡིན་ན། ཤ་ཟ་ལ་སོགས་པ་ནི་དེ་ལྟར་ཡང་མ་ཡིན་ནོ། །དེ་ལྟ་ན་ཡང་ཕྱོགས་འདི་ན་བུམ་པ་ཡོད་ན་གདོན་མི་ཟ་བར་དམིགས་པ་ཁོ་ནར་འགྱུར་གྱི། བུམ་པ་ཡོད་ཀྱང་རྒྱུ་འགའ་ཞིག་མ་ཚང་བས་མི་དམིགས་པ་ཡིན་ནོ་ཞེས་དོགས་པར་མི་འགྱུར་བ་དེ་ཉིད་ལ་སྒྲོ་འདོགས་པ་ཡིན་ནོ། །སྒྲོ་
གདགས་པ་ག་ལས་དེས་ཤེ་ན། དེ་ལྟ་ན་ནི་འོ་ན་རྒྱུ་མ་ཚང་བ་མེད་པར་འགྱུར་བ་ན་བུམ་པ་ཡོད་ན་དམིགས་པར་རུང་བར་རྟོགས་ཀྱི། ཤ་ཟ་ལ་སོགས་པ་ནི་མ་ཡིན་ནོ། །འོ་ན་རྒྱུ་མ་ཚང་བ་མེད་པ་ཉིད་ག་ལས་ཤེས་ཤེ་ན། དོན་འགའ་ཞིག་མཐོང་བ་ན་གང་ཞིག་དོན་དེ་དང་ཤེས་པ་གཅིག་ལ་གདོན་མི་ཟ་བར་འདྲེ་བའི་དོན་དེ་གཉིས་ནི་དམིགས་པའི་རྒྱུ་ཁྱད་པར་མེད་པ་ཡིན་ནོ། །དེས་ན་ཤེས་པ་གཅིག་ལ་འདྲེ་བའི་ས་ཕྱོགས་ལ་སོགས་པ་དམིགས་པ་ན། གདོན་མི་ཟ་བར་དམིགས་པའི་བུམ་པ་གང་ཡིན་པ་དེ་ཉིད་ནི་དམིགས་པའི་ཚོགས་པ་ཅན་སྒྲོ་གདགས་བར་རུང་བ་ཡིན་ནོ། །གང་ཞིག་ཡུལ་དེ་ཉིད་ལ་བརྟེན་པར་བརྟགས་པའི་བུམ་པ་གང་ཡིན་པ་དེ་ཉིད་ཡུལ་དེ་དང་ཤེས་པ་གཅིག་ལ་འདུ་བ་ཡིན་གྱི། ཡུལ་གཞན་ན་གནས་པ་ནི་མ་ཡིན་ཏེ། དེས་ན་དེ་ཉིད་སྒྲོ་གདགས་པར་རུང་བ་ཡིན་ནོ། །དེས་ན་ཤེས་པ་གཅིག་ལ་ཚོགས་པའི་དངོས་པོ་གཞན་དམིགས་པ་ཉིད། རུང་བ་ཉིད་དུ་སྲིད་པའི་བུམ་པ་མི་དམིགས་པ་ཡིན་ཏེ། དེའི་ཕྱིར་རུང་བ་ཉིད་དུ་སྲིད་པ་དམིགས་པའི་མཚན་ཉིད་དུ་གྱུར་པའི་མི་དམིགས་པ་ལས་ངེས་པར་འགྱུར་བ་ཡིན་གྱི། གཞན་ལས་ནི་མ་ཡིན་ནོ། །དེའི་ཕྱིར་ཤེས་པ་གཅིག་ལ་འདུ་བའི་དོན་གཞན་དམིགས་པ་ཉིད་དམིགས་པའི་མཚན་ཉིད་དུ་གྱུར་པ་མི་དམིགས་པར་རིགས་པས་ཐོབ་པ་ཡིན་གྱི་ཚིག་ཙམ་གྱིས་བརྟགས་པ་ནི་མ་ཡིན་ནོ། །དེ་ཉིད་ཀྱི་ཕྱིར་འདིའི་མཚན་ཉིད་མ་བརྗོད་དེ། དཔེར་བརྗོད་པ་ཉིད་ཀྱི་མཚན་ཉིད་གྲུབ་པའི་ཕྱིར་རོ། །དོན་དེའི་རྗེས་སུ་འབྲངས་ན་ནི་གཞུང་མངས་པ་འབའ་ཞིག་ཏུ་ཟད་དོ། །ཤེས་པ་གཅིག་ལ་འདྲེར་རུང་བ་ཉིད་ཀྱིས་སྣང་བ་ཉིད་ཡིན་པ་དེ་ཉིད་བསྟན་པའི་ཕྱིར་བཤད་པ། བུམ་པ་ལ་སོགས་པ་གལ་ཏེ་ཡོད་ན་དམིགས་པ་སྣང་བའི་ཡོད་པ་དེ་ནི་དེ་ལྟ་བུར་འགྱུར་བ་ཉིད་དུ་འགྱུར་གྱི། གཞན་དུ་ནི་མ་ཡིན་ཏེ། བུམ་པ་ནི་དེའི་རང་བཞིན་ཉིད་དུ་གྲུབ་པའི་ཕྱིར་རོ། །རང་བཞིན་གྱི་གཏན་ཚིགས་ཀྱི་དཔེར་བརྗོད་པ་ཡང༌། འདི་ནི་ཞེས་བྱ་བ་ནི་ཆོས་ཅན་སྟོན་པའོ། །ཤིང་སྟེ་ཤིང་གི་ཐ་སྙད་དུ་རུང་བ་ནི་བསྒྲུབ་པར་བྱ་བའོ། །ཤིང་ཤ་བ་ཡིན་པའི་ཕྱིར་ཞེས་བྱ་བ་ནི་སྒྲུབ་པར་བྱེད་པའོ། །ཤིང་ཤ་པ་མང་པོ་མོད་པའི་ཡུལ་དུ་ཤིང་ཤ་པའི་ཐ་སྙད་ཤེས་པའི་བླུན་པོ་ལོ་མ་ལ་སོགས་པ་དང་ལྡན་པ་ལ་ཤིང་གི་ཐ་སྙད་བྱེད་པ་ཤེས་ཀྱང་ལོ་མ་ལ་སོགས་པ་དང་ལྡན་པ་ཙམ་རྒྱུ་མཚན་
ཡིན་པར་མ་རྟོགས་པར་མཐོང་བའི་ཁྱད་པར་གཞན་ཐ་སྙད་ཀྱི་རྒྱུར་སྒྲོ་བཏགས་ནས། སྒྲོ་བཏགས་པ་དེ་མ་མཐོང་བའི་ཤིང་ཤ་བ་ལ་ཤིང་གི་ཐ་སྙད་མི་འཇུག་པ་དེ་ལ། ཁྱོད་ཀྱིས་སྔར་ལོ་མ་ལ་སོགས་པ་དང་ལྡན་པ་ཙམ་གྱི་རྒྱུ་མཚན་གྱིས་ཤིང་གི་ཐ་སྙད་བྱས་པ་དེ་ཅི་ལྟར་བརྗོད་པར་གྱུར་ཅེས་སྔར་ཞུགས་པའི་བརྡ་དྲན་པར་བྱེད་པ་ཡིན་ནོ། །འབྲས་བུའི་གཏན་ཚིགས་ཀྱིས་དཔེར་བརྗོད་པ་ནི་འདི་ན་ཞེས་བྱ་བ་ནི་ཆོས་ཅན་བསྟན་པའོ། །མེ་ཡོད་དོ་ཞེས་བྱ་བ་ནི་བསྒྲུབ་པར་བྱ་བའོ། །དུ་བ་ལ་ནི་ཞེས་བྱ་བ་ནི་གཏན་ཚིགས་སོ། །ཅིའི་ཕྱིར་ཚུལ་གསུམ་པ། ཁྱད་པར་མེད་པ་ལས་གསུམ་ཉིད་ཡིན་ཞེ་ན། བཤད་བ། གཏན་ཚིགས་གསུམ་པ་དེ་ལ་གཉིས་ནི་དངོས་པོ་སྟེ་བསྒྲུབ་པ་སྒྲུབ་པ་སྟེ་གོ་བར་བྱེད་པ་ཡིན་ལ། མི་དམིགས་པ་ཞེས་བྱ་བ་གཅིག་ནི་དགག་པ་སྟེ། དགག་པའི་ཐ་སྙད་གོ་བར་བྱེད་པ་ཡིན་ནོ། །འདི་སྐད་བརྗོད་པ་ཡིན་ཏེ། བསྒྲུབ་པར་བྱ་བ་ལ་ལྟོས་ནས་གཏན་ཚིགས་རྣམ་པར་འཇོག་པ་ན། དེ་ཐ་དད་པས་ཐ་དད་པ་ཡིན་ནོ། །ཡུལ་ཡང་སྒྲུབ་པ་དང་དགག་པ་ཕན་ཚུན་འགལ་བས་དེ་དག་ཐ་དད་པའི་ཕྱིར་གཏན་ཚིགས་གཉིས་ཡིན་ལ། སྒྲུབ་པའི་དོན་ཡང་གཏན་ཚིགས་ལས་ཐ་དད་པ་དང༌། ཐ་མི་དད་པ་ཡིན་པས་དེ་དག་འགལ་བ་ཡིན་ལ། དེ་ལས་ཀྱང་དེ་ཐ་དད་པས་གཏན་ཚིགས་གཉིས་སོ། །དེའི་ཕྱིར་དེ་ལྟར་ཡུལ་ཐ་དད་པའི་ཕྱིར་གཏན་ཚིགས་གསུམ་དུ་འགྱུར་བ་ཡིན་ནོ། །ཅི་སྟེ་ཡུལ་འགལ་བའི་ཕྱིར་གཏན་ཚིགས་གསུམ་པ་ཡིན་ཡང༌། གང་ཡོད་པས་རང་བཞིན་ལ་སོགས་པ་གོ་བར་བྱེད་པ་ཡིན་ལ། མེད་པའི་ཕྱིར་ནི་གཞན་དག་གོ་བར་བྱེད་པ་མ་ཡིན་པའི་རང་བཞིན་འབྲེལ་པ་དེར་བསྟན་པའི་ཕྱིར་བཤད་པ། རང་བཞིན་འབྲེལ་པ་ནི་རང་བཞིན་གྱིས་འབྲེལ་པ་སྟེ། འབྲེལ་པའི་རང་བཞིན་ཞེས་བྱ་བའི་དོན་ཏོ། །དེ་ཡོད་ན་དོན་གྱིས་དོན་གཞན་བསྒྲུབ་པར་བྱ་བ་ལ་འཁྲུལ་པ་མེད་ལ། མི་འཁྲུལ་བ་ལས་ཀྱང་གོ་བར་བྱ་བ་དང་གོ་བར་བྱེད་པའི་དངོས་པོ་ཡིན་ནོ། །ན་ཞེས་བྱ་བ་ནི་གང་གི་ཕྱིར་འཁྲུལ་པ་མེད་པ་ནི་རང་བཞིན་འབྲེལ་པ་སྔོན་དུ་འགྲོ་བ་ཅན་ཡིན་པ་དེའི་ཕྱིར། འབྲེལ་པ་དང་ལྡན་པ་འདི་དག་ཁོ་ན་གོ་བར་བྱེད་པ་ཡིན་གྱི་གཞན་ནི་མ་ཡིན་ནོ། །གང་གིས་རང་བཞིན་འབྲེལ་ཅེ་ན་སྨྲས་པ། དེའི་བདག་ཉིད་ཡིན་པའི་ཕྱིར་རོ། །གང་གི་ཕྱིར་སྒྲུབ་པར་བྱེད་པ་དེ་བསྒྲུབ་པར་བྱ་བའི་རང་བཞིན་ཉིད་ཡིན་པ་དེས་ན་དེ་བསྒྲུབ་པར་བྱ་བ་ལ་རང་བཞིན་འབྲེལ་པ་ཡིན་ནོ། །སྒྲུབ་པར་བྱེད་པ་
བསྒྲུབ་པར་བྱ་བ་དེའི་བདག་ཉིད་ཡིན་ན། བསྒྲུབ་པར་བྱ་བ་དང་སྒྲུབ་པར་བྱེད་པ་ཁྱད་པར་མེད་པར་འགྱུར་ལ། དེས་ན་དམ་བཅའ་བའི་དོན་གྱི་ཕྱོགས་གཅིག་གཏན་ཚིགས་སུ་འགྱུར་རོ་ཞེས་གཞན་དག་དོགས་ན། མ་ཡིན་ཏེ་ཞེས་སྨོས་སོ། །རྣམ་པར་རྟོག་པའི་ཤེས་པའི་ཡུལ་གྱི་རང་བཞིན་ལྡོག་པའི་རྒྱུ་མཚན་ཅན་ནི་ཆོས་སོ། །དེའི་བྱེ་བྲག་ཀུན་བརྟགས་པའི་ཕྱིར་ཏེ། སྒྲོ་བཏགས་པའི་ཕྱིར་རོ། །འདི་སྐད་དུ་ཆོས་ཀྱི་བྱེ་བྲག་སྒྲོ་བཏགས་པས་དེས་ན་བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་ཡིན་ནོ་ཞེས་བཤད་པ་ཡིན་ནོ། །གོ་བར་བྱ་བ་དང་གོ་བར་བྱེད་པ་ནི་ངེས་པའི་ཡུལ་ཉིད་ཡིན་གྱི། དངོས་པོའི་རང་བཞིན་ནི་མ་ཡིན་ནོ། །འདི་ལྟར་གོ་བར་བྱ་བ་ནི་ངེས་པར་བྱ་བ་ཉིད་ཡིན་ལ། གོ་བར་བྱེད་པ་ཡང་ངེས་པར་འགྱུར་བ་ངེས་པར་བྱེད་པ་ཡིན་ནོ། །ངེས་བ་ཡང་སྒྲོ་བཏགས་པ་ཡིན་ཏེ། དེས་ན་ངེས་པའི་ཡུལ་གྱི་ཐ་དད་པ་ཡང་སྒྲོ་བཏགས་པ་ཡིན་ནོ། །དོན་འདི་ལ་སློབ་དཔོན་ཕྱོགས་ཀྱི་གླང་པོའི་ཚིག་ཚད་མ་ཉིད་དུ་སྟོན་པ་ནི། འདི་རྗེས་སུ་དཔོག་པས་ན་རྗེས་སུ་དཔག་པ་སྟེ་རྟགས་སོ། །རྗེས་སུ་དཔག་པར་བྱ་བ་ནི་གཏན་ཚིགས་ཀྱི་མཚན་ཉིད་ཀྱི་ཡུལ་དུ་ཆོས་ཅན་ལ། ཁྱབ་པའི་ཡུལ་དུ་ནི་རྗེས་སུ་དཔག་པར་བྱ་བ་བསྒྲུབ་པར་བྱ་བའི་ཆོས་སོ། །རྟགས་དང་བསྒྲུབ་བྱའི་ཆོས་ཅན་དེ་དག་གི་ཐ་སྙད་ཐ་དད་པ་ལྡོག་པའི་རང་བཞིན་དེ་ཐམས་ཅད་ནི་བློ་ལ་ཡོད་པའི་ཆོས་དང་ཆོས་ཅན་གྱི་བྱེ་བྲག་ཐ་དད་པའི་རང་བཞིན་གྱི་རྗེས་སུ་འགྲོ་བ་ཁོ་ན་སྟེ། བློ་ལ་བརྟེན་པའི་རང་བཞིན་དེས་ཐ་དད་པའི་ཐ་སྙད་དུ་འགྱུར་བ་ཡིན་ནོ། །གལ་ཏེ་ཆོས་དང་ཆོས་ཅན་གྱི་ཐ་སྙད་བློས་བརྟགས་པ་ཡིན་ནོ། དེ་ལྟ་ན་ནི་འོ་ན་བརྟགས་པའི་གཏན་ཚིགས་ཀྱིས་བསྒྲུབ་བྱ་བསྒྲུབ་པར་ཐལ་ལོ་ཞེ་ན། བཤད་པ། འདི་ནི་ཆོས་སོ་འདི་ནི་ཆོས་ཅན་ནོ་ཞེས་བྱ་བའི་ཆོས་ཅན་ཉིད་གང་ཡིན་པ་དེ་ཁོ་ན་བློས་ཀུན་བཏགས་པ་ཡིན་གྱི་ལྡོག་པའི་རང་བཞིན་གྱི་དོན་ཀྱང་ནི་མ་ཡིན་ཏེ། བློའི་བྱེ་བྲག་རང་དགའ་བ་དོན་ལ་མི་ལྟོས་པ་རྣམས་ནི་དོན་གྱི་རྟེན་མ་ཡིན་པ་སྟེ། དོན་གྱི་གཞི་མ་ཡིན་པའི་ཕྱིར་རོ། །དེ་དག་གིས་བརྟགས་པའི་ཡུལ་གང་ཡིན་པ་དེ་ལས་དོན་གོ་བར་ཁས་ལེན་ན་ནི་དོན་ཏེ། དངོས་པོ་མི་འཐོབ་པ་ཁོ་ནར་འགྱུར་རོ། །དེའི་ཕྱིར་འདི་ནི་རྟེན་ཆོས་ཅན་ཡིན་ལ། འདི་ནི་རྟེན་པ་ཆོས་ཡིན་ནོ་ཞེས་བྱ་བ་དང༌། བསྒྲུབ་པར་བྱ་བ་དང་སྒྲུབ་པར་བྱེད་པ་ཡིན་ནོ་ཞེས་བྱ་བ་དུ་མ་ཙམ་ཞིག་
བློས་བརྟགས་བ་ཡིན་གྱི། ཕྱི་རོལ་ཏུ་ངེས་པའི་དོན་གྱི་བདག་ཉིད་དེ་དང་དེ་ལས་ལྡོག་པ་ཡང་བརྟགས་པ་ཉིད་ནི་མ་ཡིན་ནོ། །ཡང་ཅི་ལྟར་གཅིག་ལ་ཐ་དད་པར་བརྟགས་པར་ནུས་ཤེ་ན། ཐ་དད་པར་རྟོག་པའི་རྒྱུ་མཚན་བསྟན་པའི་ཕྱིར་བཤད་པ། གང་གི་ཕྱིར་དངོས་ཀུན་ཏེ་འགའ་ཞིག་ནི་མ་ཡིན་ནོ། །མཐུན་དངོས་ནི་རིགས་མཐུན་བའོ། །གཞན་གྱི་དངོས་ནི་རིགས་མི་མཐུན་པ་སྟེ། དེ་དག་ལས་རང་བཞིན་གྱིས་ཏེ་བརྟགས་པ་མ་ཡིན་པའི་རང་གི་མཚན་ཉིད་ཀྱིས་ལྡོག་པ་ལ་ནི་རྟེན་པ་ཅན་ཞེས་འབྲེལ་ཏོ། །ཅིའི་ཕྱིར་རང་བཞིན་གྱིས་ལྡོག་ཅེ་ན། རང་རང་ལ་ངོ་བོ་ལ་གནས་པའི་རྒྱུའི་ཕྱིར་རོ། །འདི་སྐད་བརྗོད་པ་ཡིན་ཏེ། གང་གི་ཕྱིར་དངོས་པོ་ཐམས་ཅད་རང་གི་ངོ་བོ་ཉིད་ལ་གནས་པ་ཡིན་གྱི། ཕན་ཚུན་འདྲེ་བ་མ་ཡིན་པ་དེའི་ཕྱིར་ན། ངོ་བོ་ཉིད་ཀྱིས་མ་འབྲེལ་པས་རིགས་མཐུན་པ་དང་མི་མཐུན་པ་ལས་ལྡོག་པ་ཡིན་ནོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ལྡོག་མཚམས་ཀྱི་དོན་གང་དང་གང་ལས་དེ་ལྡོག་པ་དོན་གཞན་གྱི་ལྡོག་པ་དེའི་རྒྱུ་ཅན་ལྡོག་མཚམས་ཁྱད་པར་ཅན་གྱི་ཡུལ་གྱི་ལྡོག་པའི་རྒྱུ་ཅན་རིགས་ཀྱི་དབྱེ་བ་རིགས་ཀྱི་ཁྱད་པར་སྒྲའི་བརྗོད་པར་བྱ་བ་རབ་ཏུ་འབྱེད་ཅིང་རབ་ཏུ་འཇོག་གོ །འདི་ལྟར་དཔེར་ན་བུམ་པ་གཅིག་བུམ་པ་མ་ཡིན་པ་ལས་ལྡོག་པ་དེ་བཞིན་དུ་བུམ་པ་གཞན་རྣམས་ཀྱང་ཡིན་ལ། ཐུན་མོང་བའི་ལྡོག་པ་དེ་ཡང་སྒྲའི་བརྗོད་བར་བྱ་བའི་རིགས་སུ་བརྗོད་པ་ཡིན་ནོ། །རང་གི་མཚན་ཉིད་དེའི་ཁྱད་པར་གང་ཡིན་པ་དེ་རྟོགས་འགྱུར་ཞེས་བྱ་བ་ནི་སྒྲོ་བཏགས་པའི་རིགས་རྟོགས་ན་རང་གི་མཚན་ཉིད་ཁྱད་པར་ངེས་པར་འགྱུར་བའི་ཕྱིར་དེ་རྟོགས་པ་ཡིན་ནོ། །དེས་ན་ལྡོག་མཚམས་གཞན་དང་གཞན་ལ་ལྟོས་ནས་ཀུན་བརྟགས་པའི་ལྡོག་པའི་བྱེ་བྲག་རྣམ་པར་རྟོག་པས་ཡུལ་དུ་བྱེད་པ་ཡིན་ནོ། །དེའི་ཕྱིར་མངོན་སུམ་བཞིན་དུ་དུ་མ་ལས་ལྡོག་པ་ཅན་གྱི་དངོས་པོའི་རང་བཞིན་གཅིག་ནི་རྣམ་པར་རྟོག་པས་ཡུལ་དུ་བྱ་བར་ནུས་པ་མ་ཡིན་ནོ་ཞེས་བསྟན་པའི་ཕྱིར་བཤད་པ། གང་གི་ཕྱིར་དེ་ལྟར་ཡིན་པ་དེས་ན་ལྡོག་མཚམས་གཞན་གྱི་རྒྱུ་མཚན་ཅན་རང་གི་མཚན་ཉིད་ཀྱི་ཁྱད་པར་གང་ཞིག་སྒྲའི་ཆོས་གང་གིས་གོ་བར་འགྱུར་བ་དེའི་སྒྲ་ཡང་བརྗོད་པར་བྱ་བ་ལ་བརྟེན་པའི་ཕྱིར་ཆོས་དང་འདྲ་བས་ཆོས་ཞེས་བརྗོད་དོ། །ལྡོག་པ་གཞན་གྱི་ཡུལ་ཅན་གྱི་སྒྲ་དེ་ལས་གཞན་གྱིས་ནི་གོ་བར་ནུས་པ་མ་ཡིན་ནོ། །རྒྱུ་དེས་ན་རྣམ་པར་རྟོག་པ་དང་སྒྲ་དག་རྣམ་གྲངས་པ་ཉིད་ནི་མ་ཡིན་གྱི། འོན་ཀྱང་ཡུལ་
ཐ་དད་པ་ཡིན་ནོ་ཞེས་སྨྲས་པ་ནི་ཐ་དད་རྣམ་པར་གནས་ཞེས་བྱ་བ་ཡིན་ནོ། །གལ་ཏེ་ངེས་པའི་ཡུལ་སྒྲོ་བཏགས་པའི་རང་བཞིན་དག་ཉིད་ཐ་དད་པ་དང་གོ་བྱ་གོ་བྱེད་ཡིན་ན། དེ་དག་ལ་ནི་དེའི་བདག་ཉིད་ཀྱི་མཚན་ཉིད་ཅན་གྱི་འབྲེལ་པ་མེད་དོ། །གང་ལ་འབྲེལ་པ་ཡོད་པ་དེ་དག་ནི་གོ་བྱ་གོ་བྱེད་ཀྱི་དངོས་པོ་མ་ཡིན་ཏེ། རང་གི་མཚན་ཉིད་ལ་གོ་བྱ་གོ་བྱེད་མི་འཐད་པའི་ཕྱིར་རོ། །དེས་ན་བསྒྲུབ་བྱ་སྒྲུབ་བྱེད་དག་དེའི་བདག་ཉིད་ཅི་ལྟར་འགྱུར་ཞེ་ན། བདེན་ཏེ་འོན་ཀྱང་ངེས་པ་ལ་གནས་པ་སྒྲོ་བཏགས་ཀྱི་རང་བཞིན་དུ་ངེས་པ་ནི་གོ་བར་བྱེད་པ་མ་ཡིན་ཏེ། དེ་ལྟ་བུར་གྱུར་པ་ནི་སུ་ཡང་དོན་དུ་གཉེར་བ་མེད་པའི་ཕྱིར་རོ། །གོ་བར་བྱ་བ་དང་གོ་བར་བྱེད་པ་ནི་རང་གི་མཚན་ཉིད་དུ་ལྷག་པར་བརློམས་པ་ཉིད་ཡིན་ཏེ། རང་གི་མཚན་ཉིད་ལ་དོན་དུ་གཉེར་བ་ཡོངས་སུ་རྫོགས་པའི་ཕྱིར་རོ། །དེས་ན་གོ་བར་བྱ་བ་དང་གོ་བར་བྱེད་པ་ནི་རང་གི་མཚན་ཉིད་ཁོ་ན་ཉིད་ཡིན་ལ། དེ་ལ་ནི་དེའི་བདག་ཉིད་ཡོད་པ་ཉིད་དོ། །འོན་ཀྱང་མངོན་སུམ་གྱིས་ནི་རང་གི་མཚན་ཉིད་དེ་ཐ་མི་དད་པར་འཛིན་ལ། རྣམ་པར་རྟོག་པས་ནི་སྒྲོ་བཏགས་ཀྱི་རང་བཞིན་གྱིས་ཉེ་བར་ཟིན་པ་ཐ་དད་པ་ལྟ་བུར་སྟོན་པ་ཡིན་ནོ། །ལྡོག་མཚམས་གཅིག་གི་རྒྱུ་མཚན་ཅན་ལྷག་པར་སྒྲོ་བཏགས་པའི་རང་བཞིན་གྱིས་བར་དུ་གཅོད་པ་རང་གི་མཚན་ཉིད་དེ་རྟོགས་པ་ན། ལྡོག་མཚམས་གཞན་ལས་ལྡོག་པ་ནི་ངེས་པར་མི་འགྱུར་རོ། །གང་ཞིག་ངེས་པས་མ་ངེས་པ་དེ་ནི་ངེས་པའི་ཡུལ་མ་ཡིན་ནོ། །དེས་ན་མངོན་སུམ་ནི་དེའི་རྣམ་པ་ཅན་ཡིན་པས་རང་བཞིན་ཐམས་ཅད་འཛིན་ལ། རྣམ་པར་རྟོག་པ་ནི་སྒྲོ་བཏགས་ཀྱི་རྗེས་སུ་འབྲང་ནས་རང་གི་མཚན་ཉིད་ངེས་པ་ཡིན་ཡང་ལྡོག་པ་གཅིག་གི་རང་བཞིན་དུ་ཞེན་པ་ཡིན་ནོ། །དེས་ན་གོ་བར་བྱ་བ་དང་གོ་བར་བྱེད་པའི་དངོས་པོ་གང་ཡིན་པ་དེ་དག་ཉིད་དེའི་བདག་ཉིད་དུ་གྱུར་པ་ཉིད་ཡིན་ཏེ། སྒྲོ་བཏགས་པའི་རང་བཞིན་གྱིས་ཉེ་བར་ཟིན་པ་དག་ངེས་པ་ཡིན་པའི་ཕྱིར་རོ། །སྒྲོ་བཏགས་པ་དང་འབྲེལ་པའི་ཐ་དད་པ་ངེས་པས་རང་གི་མཚན་ཉིད་ཀྱིས་ཡུལ་གསལ་བར་བྱེད་པ་ན། བསྒྲུབ་པར་བྱ་བ་དང་སྒྲུབ་པར་བྱེད་པ་རང་གི་མཚན་ཉིད་དུ་གྱུར་པ་དག་ཀྱང་ཐ་དད་པར་སྟོན་པར་བྱེད་དོ། །དེའི་དོན་ནི་འདི་ཡིན་ཏེ། སྒྲོ་གདགས་པར་བྱ་བའི་རང་བཞིན་ཐ་དད་པར་སྒྲོ་བཏགས་པ་ཡིན་ལ། རང་གི་མཚན་ཉིད་ཀྱང་སྒྲོ་བཏགས་པ་དང་འདྲ་བ་ཡིན་ཏེ། དེས་ན་
སྒྲོ་བཏགས་ཀྱི་རང་བཞིན་གྱིས་རྗེས་སུ་རྟོགས་པ་ན་ཐ་དད་པར་ཞེན་པ་ཡིན་ནོ། །གོ་བར་བྱ་བ་དང་གོ་བར་བྱེད་པའི་དངོས་པོ་ཡང་ཞེན་པར་བྱས་པའི་ཐ་དད་པའི་རྒྱུ་མཚན་གྱིས་ཡིན་ཏེ། དེས་ན་རང་གིས་དེའི་བདག་ཉིད་ཡིན་ནོ། །དེའི་བདག་ཉིད་ཀྱིས་འབྲེལ་པའི་རང་བཞིན་འདི་ཡང་རང་བཞིན་གྱི་གཏན་ཚིགས་སུ་བརྗོད་པ་ཡིན་ནོ། །གང་གིས་འབྲས་བུ་ཡང་རང་བཞིན་འབྲེལ་པར་འགྱུར་བ་དེ་སྟོན་པར་བྱེད་པ་ནི་འབྲས་བུ་ཡང་དེ་ལས་བྱུང་བའི་རྒྱུའི་ཕྱིར་རོ། །གང་གི་ཕྱིར་དེ་ལས་བྱུང་བ་ཡིན་པའི་ཕྱིར་འབྲས་བུ་ཡང་དེ་རང་བཞིན་འབྲེལ་པ་ཡིན་ནོ། །དེའི་ཕྱིར་གང་ཞིག་རང་བཞིན་འབྲེལ་པ་འབྲས་བུ་དང་རང་བཞིན་ལས་སྐྱེས་པའི་རྗེས་སུ་དཔག་པར་བྱ་བ་ཤེས་པ་འདི་གཉིས་ནི་ཚད་མ་ཡིན་ཏེ། དེར་འཁྲུལ་པ་མེད་པ་དག་ཡིན་པ་དེས་ན་སྟེ། རྗེས་སུ་དཔག་པར་བྱ་བའི་དོན་ལ་འཁྲུལ་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །དཔེར་ན་མངོན་སུམ་སྣང་ཡང་འཁྲུལ་པ་མེད་པས་ཚད་མ་ཡིན་པ་དེ་བཞིན་ནོ། །ཅིའི་ཕྱིར་དེ་ལ་འཁྲུལ་པ་མེད་ཅེ་ན། བཤད་པ། རྗེས་སུ་དཔག་པར་བྱ་བའི་དོན་དེ་ལས་སྐྱེས་པའི་ཕྱིར་རོ། །དེ་ལས་སྐྱེས་པ་ཉིད་ནི། དངོས་གང་ཡང་དག་ཇི་བཞིན་པ། །ཞེས་བྱ་བ་དེར་གཏན་ལ་ཕབ་ཟིན་ཏོ། །འོ་ན་འདི་མངོན་སུམ་ལས་ཁྱད་ཅི་ཡོད་ཅེ་ན། སྨྲས་པ་དེ་སྣང་བ་ཉིད་མ་ཡིན་པའི་ཕྱིར་ནི་མངོན་སུམ་མ་ཡིན་ནོ། །འདི་སྐད་བརྗོད་པ་ཡིན་ཏེ། དོན་རྣམ་པ་མེད་པས་མངོན་སུམ་མ་ཡིན་ལ། མངོན་སུམ་མ་ཡིན་ན་ཡང་འཁྲུལ་པ་མེད་པའི་ཕྱིར་ཚད་མ་ནི་ཡིན། ཡང་ཅི་ལྟར་དེ་སྣང་བ་ཉིད་མ་ཡིན་ཞེ་ན། བཤད་པ། དངོས་ལས་མ་སྐྱེས་པའི་ཕྱིར་རོ། །གང་གི་ཕྱིར་དོན་ལས་དངོས་སུ་སྐྱེས་པའི་ཤེས་པ་ནི་དེའི་རྣམ་པའི་རྗེས་སུ་བྱེད་པ་ཡིན་ནོ། །གཟུང་བར་བྱ་བའི་དོན་གྱི་རང་བཞིན་ཡང་འཁྲུལ་པའི་རྒྱུ་མེད་ན་ངེས་པར་རྣམ་པར་འཇོག་པར་བྱེད་པས་ཤེས་པའི་རྒྱུར་འགྱུར་བ་ཡིན་ཏེ། དེ་ལྟ་མ་ཡིན་ན་མིག་བཞིན་དུ་གཟུང་བར་བྱ་བ་ཉིད་དུ་མི་འགྱུར་རོ། །རྗེས་སུ་དཔག་པ་ནི་རྗེས་སུ་དཔག་པར་བྱ་བ་ལས་དངོས་སུ་མ་སྐྱེས་པའི་ཕྱིར་དེའི་རྣམ་པ་ཡོད་པ་མ་ཡིན་ནོ། །ད་ནི་དོན་གང་ལ་མི་དམིགས་པ་ཚད་མ་ཡིན་པ་དེ་བསྟན་པའི་ཕྱིར་བཤད་པ། མེད་པར་ངེས་པ་ནི་མེད་པའི་ཐ་སྙད་དེ་འབྲས་བུ་དེ་ཉིད་མི་དམིགས་པ་གང་ལ་ཡོད་པའོ། །མི་དམིགས་པ་དེ་ནི་དེ་ལ་མི་འཁྲུལ་པ་ཡིན་ཏེ། མེད་པའི་ཐ་སྙད་
ལ་མི་འཁྲུལ་བ་ཡིན་ནོ། །གལ་ཏེ་ཐ་སྙད་ནི་འབྲས་བུ་ཡིན་ལ། མི་དམིགས་པ་ནི་རྒྱུ་མ་ཡིན་ནམ། རྒྱུ་ནི་འབྲས་བུ་ལ་མི་འཁྲུལ་པར་བརྗོད་མི་ནུས་སོ་ཞེ་ན། བཤད་པ། སྔོན་ཞུགས་པའི་ཐ་སྙད་གྲུབ་པ་ལ་ཡུལ་ཡོད་པ་བདོག་པ་ལ་འཁྲུལ་པ་མེད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གང་དུ་བསྐྱེད་བྱ་སྐྱེད་བྱེད་ཀྱི་དངོས་པོས་རྒྱུ་མཚན་དང་རྒྱུ་མཚན་གྱི་དངོས་པོ་ཉིད་ཡིན་པ་དེར་རྒྱུ་འབྲས་བུ་ལ་འཁྲུལ་པ་ཡིན་ཡང༌། འདིར་ནི་ངེས་པར་སྦྱར་བའི་རྒྱུ་མཚན་དང་རྒྱུ་མཚན་ཅན་གྱི་དངོས་པོ་ཡིན་ནོ། །འདི་ལྟར་ཤེས་པ་དང་ཤེས་བྱའི་བདག་ཉིད་སྣང་བ་མི་དམིགས་པའི་ཡུལ་ལ་ཡུལ་ཅན་མེད་པའི་ཐ་སྙད་རང་འདོད་ཀྱིས་བཅུག་པ་ཡིན་ཞིང༌། ལན་ཅིག་ཞུགས་པ་ཉིད་ལས་ཀྱང་འབྲེལ་པ་ཤེས་པས་ཡུལ་དེ་ལ་རང་གི་འདོད་པ་ཐ་སྙད་འཇུག་པར་བྱ་བ་ཡིན་ནོ། །དེ་ལ་གལ་ཏེ་ཡུལ་གཞན་ལ་དེའི་རྒྱུ་མཚན་ཅན་གྱི་ཐ་སྙད་ཞུགས་པར་མ་གྱུར་ན་ནི་དེ་འདོད་བ་དང་འབྲེལ་པ་ཡིན་ཡང་འདིར་མི་འཇུག་པར་ནུས་པ་ཞིག་ན། གང་གི་ཕྱིར་གཞན་དག་ཏུ་དེ་ཙམ་གྱི་རྒྱུ་མཚན་གྱིས་རབ་ཏུ་ཞུགས་པ་དེའི་ཕྱིར་འདིར་ཡང་དེ་ཙམ་ལ་ལྟོས་ནས་འཇུག་པར་བྱ་བ་ཉིད་དོ། །འདོད་པས་སྤྱོད་པ་ལས་མ་གཏོགས་པར་ནི་གཞན་དག་ཏུ་དེ་ཙམ་ལ་ལྟོས་ནས་འཇུག་པ་ཡིན་ལ། འདིར་ནི་མི་འཇུག་གོ་ཞེས་བྱ་བའི་རྒྱུ་མཚན་ནི་ཅུང་ཟད་ཀྱང་ཡོད་པ་མ་ཡིན་ནོ། །དེས་ན་ཡུལ་ཡོད་པ་ལ་དེ་ཙམ་གྱི་རྒྱུ་མཚན་གྱིས་ཐ་སྙད་ཞུགས་པར་སྔར་གཏན་ལ་ཕེབས་པ་ཉིད་དོ། །དེས་ན་རྒྱུ་འབྲས་བུ་ལ་མི་འཁྲུལ་པ་ཡིན་ནོ། །འདིར་ནི་ཐ་སྙད་ཅེས་བྱ་བའི་འབྲས་བུ་ཉིད་ནི་སྒྲུབ་པ་མ་ཡིན་ཏེ། དེ་ནི་འདོད་པ་ལ་རག་ལས་པའི་ཕྱིར་རོ། །བསྒྲུབ་པར་བྱ་བ་ནི་རུང་བ་ཙམ་ཡིན་ནོ། །ཡང་ཅིའི་ཕྱིར་མི་དམིགས་པས་དངོས་པོ་མེད་པ་ཉིད་མི་བསྒྲུབ་ཅེ་ན། བཤད་པ། མི་དམིགས་པ་ཉིད་ནི་རྟགས་ཏེ། དེས་མེད་པ་བསྒྲུབ་པར་བྱ་བ་ཡིན་ན། ཅི་ལྟར་དོན་མེད་པ་ཤེས་པ་མེད་པས་བསྒྲུབ་པ་དེ་བཞིན་དུ་ཤེས་པ་མེད་པ་ཡང་ཤེས་པ་གཞན་མེད་པས་བསྒྲུབ་པར་བྱ་དགོས་སོ། །དེས་ན་དེའི་དམིགས་པ་མེད་པ་ཡང་དམིགས་པ་གཞན་མེད་པའི་མི་དམིགས་པ་གཞན་གྱིས་ཡིན་པས་ཐུག་པ་མེད་པར་འགྱུར་ཏེ། མི་དམིགས་པ་རྣམས་ཀྱི་རང་བཞིན་རྟོགས་པ་མཐར་ཐུག་པ་མེད་པར་འགྱུར་བའི་ཕྱིར་རོ་ཞེས་བྱ་བའི་དོན་ཏོ། །ཐུག་པ་
མེད་པ་དེའི་ཕྱིར་ནི་གཞི་བའི་དོན་གྱི་དངོས་པོ་མི་རྟོག་པ་ཉིད་དུ་འགྱུར་རོ། །ཅི་སྟེ་ཕ་རོལ་གྱི་བསམ་པ་ཇི་ལྟར་དོན་ནི་གཞན་ལ་རག་ལས་ནས་བསལ་བ་ཡིན་ལ། ཤེས་པ་ནི་རང་ཉིད་གསལ་བ་ཡིན་པ་དེ་བཞིན་དུ། དོན་མེད་པ་ཡང་གཞན་གྱིས་གསལ་ལ། ཤེས་པ་མེད་པ་ནི་རང་ཉིད་གསལ་ལ་ཞེས་བྱ་བ་ཡིན་ནོ་ཞེས་སྨྲས་པ་ནི་ཇི་སྟེ་དམིགས་པ་མེད་པ་ཞེས་བྱ་བ་ལ་སོགས་པའོ། །དམིགས་པའི་རང་བཞིན་གྱི་ཤེས་པ་ནི་དོན་ལས་ཐ་དད་པའི་ཕྱིར་རང་ཉིད་གསལ་བར་འཐད་པ་ཡིན་ན། མེད་པ་དག་ནི་ཕན་ཚུན་ཁྱད་པར་མེད་པའི་ཕྱིར་གཅིག་རང་ཉིད་གསལ་ན་གཉིས་པ་ལ་ཡང་དེའི་རང་བཞིན་བ་ཟློག་ཏུ་མེད་དོ་ཞེས་བྱ་བའི་བསམ་པ་འདི་སྨྲས་པ་ནི། དེ་བཞིན་དུ་ཡོད་པ་མེད་པ་ཡང་འགྱུར་བས་མི་དམིགས་པ་དངོས་པོ་མེད་པའི་སྒྲུབ་བྱེད་དུ་ཉེ་བར་གཞག་པ་དོན་མེད་དོ། །ཅི་སྟེ་ཡང་དེ་དག་གཞན་དམིགས་པས་ཡུལ་མི་དམིགས་པ་འགྲུབ་པའི་ཕྱིར་རོ། །འདི་སྐད་བརྗོད་པ་ཡིན་ཏེ། དོན་གཞན་གྱི་ཡུལ་ཅན་གྱི་ཤེས་པ་གང་ཡིན་པ་དེ་ངེས་པའི་རང་བཞིན་ཉིད་དུ་གྲུབ་ན་ནི་དོན་གཞན་དམིགས་པ་མེད་པ་ཡང་འགྲུབ་པར་འགྱུར་རོ། །དེའི་ཕྱིར་མི་དམིགས་པ་ནི་མངོན་སུམ་གྱིས་གྲུབ་པ་ཡིན་གྱི། མི་དམིགས་པ་ལ་ལྟོས་པ་ནི་མ་ཡིན་ནོ། །དེའི་ཡུལ་ནི་དེས་གྲུབ་པ་ཡིན་ནོ་ཞེ་ན། གལ་ཏེ་དེ་ལྟར་ན་དོན་གཞན་ཡོད་པར་གྲུབ་པས་བུམ་པ་ལ་སོགས་པ་གཞན་མེད་པ་ཅི་སྟེ་མི་འགྲུབ། ཅི་ལྟར་ཤེས་པ་གཞན་གྲུབ་པས་དེ་མ་ཡིན་པའི་ཤེས་པ་མེད་པར་གྲུབ་པ་དེ་བཞིན་དུ། དེ་ལས་གཞན་ཡོད་པས་མེད་པ་གྲུབ་པའི་ཕྱིར་མི་དམིགས་པ་ཉེ་བར་བླངས་པས་ཅི་ཞིག་བྱ། མེད་པ་ནི་མི་དམིགས་པས་གྲུབ་པ་ཡང་མ་ཡིན་ནོ། །གལ་ཏེ་མེད་པ་བསྒྲུབ་པར་བྱ་བ་མ་ཡིན་ནོ། །འོ་ན་ནི་དེ་མ་གྲུབ་ན་མེད་པའི་ཐ་སྙད་ཀྱང་མི་འགྲུབ་པོ། །ཡུལ་བསྒྲུབ་པར་མི་ནུས་པ་དེ་བཞིན་དུ། མེད་པའི་ཐ་སྙད་ཀྱང་མི་དམིགས་པས་རྟོགས་པར་མི་ནུས་སོ་ཞེ་ན། གང་གི་ཚེ་ཞེས་སྨོས་སོ། །གལ་ཏེ་མི་དམིགས་པ་ལས་མེད་པ་གཞན་ཡིན་ན་ནི། དེའི་ཚེ་དེ་མ་གྲུབ་ན་མི་དམིགས་པས་ཐ་སྙད་རྟོགས་པར་མི་འགྱུར་བ་ཞིག་ན། གང་གི་ཚེ་མེད་པ་མི་དམིགས་པ་ལས་ཐ་དད་པ་ཉིད་ནི་ཡོད་པ་མ་ཡིན་གྱི། འོན་ཀྱང་རྣམ་པ་འདི་ལྟ་བུ་ཞེས་བྱ་བ་དམིགས་པའི་མཚན་ཉིད་ཀྱིར་གྱུར་པའི་མི་དམིགས་པ་ཉིད་དོན་མེད་པ་རྣམས་ཀྱི་མེད་པ་ཡིན་གྱི་གཞན་ནི་མ་ཡིན་པ་དེའི་ཚེ་མེད་པའི་མཚན་ཉིད་ཀྱི་ཡུལ་
གྲུབ་པས་ཡུལ་ཅན་མེད་དོ་སྙམ་པའི་རྣམ་པ་ཅན་གྱི་ཤེས་པ་དང༌། མེད་དོ་ཞེས་བྱ་བ་དེ་ལྟ་བུའི་སྒྲ་དང༌། དོགས་པ་མེད་པར་འགྲོ་བ་དང་འོང་བའི་མཚན་ཉིད་ཀྱི་འཇུག་པའི་ཐ་སྙད་དེ་དག་རང་ཉིད་རྟོགས་པ་འམ། གཞན་གྱིས་སྒྲུབ་པར་བྱེད་པ་ཡིན་ནོ། །གང་གི་ཕྱིར་འདི་ཐ་སྙད་ཉིད་ལ་མ་ཞུགས་ན་གཞན་གྱིས་ཇི་ལྟར་སྒྲུབ་པར་བྱེད་ཅེ་ན། བཤད་པ། ཡུལ་ཏེ་མེད་པའི་ཐ་སྙད་དང་འབྲེལ་པ་བུམ་པས་དབེན་པར་དམིགས་པའི་ཕྱོགས་རབ་ཏུ་བསྟན་པས་སོ། །བུམ་པས་དབེན་པའི་ས་ཕྱོགས་དེ་ཉིད་ནི་མེད་པའི་ཐ་སྙད་ཀྱི་ཡུལ་ཡིན་ལ། དེའི་ཡུལ་ཅན་གྱི་ཤེས་པ་མི་དམིགས་པ་ནི་རྒྱུ་ཡིན་ནོ། །སློབ་དཔོན་ནི་ལ་ལར་གྱུར་ཐ་སྙད་བྱེད་དེ། རྒྱུ་མཚན་གྱིས་རྒྱུ་མཚན་ཅན་རབ་ཏུ་བསྒྲུབ་པའི་ཕྱིར་རོ་ཞེས་སོ། །ལ་ལར་ནི་ཡུལ་དུ་སྟེ་དཔེར་ན་ཡུལ་བསྟན་པས་ཡུལ་ཅན་དྲན་པའི་ཕྱིར་རོ་ཞེས་བསྟན་པ་ལྟ་བུའོ། །བརྡ་ནི་ངེས་པ་སྟེ། དངོས་པོ་མེད་པའི་བརྡ་ལ་འཇུག་པའི་ཕྱིར་རོ། །སུ་ཞེ་ན། རྨོངས་པའོ། །ཅི་ཐ་སྙད་རབ་ཏུ་ཞུགས་པའི་ཡུལ་རྟོགས་ཀྱང་གང་ཞིག་ཡུལ་ཅན་ཐ་སྙད་མ་རྟོགས་བ་འགའ་ཞིག་ཡོད་དམ་ཞེ་ན་ཡོད་དོ་ཞེས་བཤད་པ་ནི་དཔེར་ན་འདི་ནི་བ་ལང་ཡིན་ཏེ། འདུས་པ་འདི་ནི་བ་ལང་གི་ཐ་སྙད་དུ་རུང་བ་ཡིན་ནོ། །ལྐོག་ཤལ་ལ་སོགས་པ་འདུས་པའི་བདག་ཉིད་ཡིན་པའི་ཕྱིར་ཏེ། བ་ལང་གི་ཐ་སྙད་ཀྱི་རྒྱུ་མཚན་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །གང་གི་ཚེ་བློ་གྲོས་བླུན་པོ་བ་ལང་ཆུང་དུ་ལ་བ་ལང་གི་ཐ་སྙད་ཞུགས་ཀྱང་མི་འདྲ་བར་མཐོང་ནས་བ་ལང་ཆེན་པོ་ལ་ཐ་སྙད་འཇུག་པར་མི་བྱེད་པ་དེ་ལ་རྒྱུ་མཚན་རབ་ཏུ་བསྟན་པས་བ་ལང་གི་ཐ་སྙད་ལ་འཇུག་པར་བྱེད་དེ། བ་ལང་གི་ཐ་སྙད་ནི་ལྐོག་ཤལ་ལ་སོགས་པ་འདུས་པའི་རྒྱུ་མཚན་ཅན་ཡིན་གྱི་ཆུང་དུའི་རྒྱུ་མཚན་ཅན་ནི་མ་ཡིན་ནོ། །དེས་ན་འདི་ལ་ཡང་རྒྱུ་མཚན་ཡོད་པའི་ཕྱིར་ཅི་ལྟར་ན་འཇུག་པར་མི་བྱེད། དེ་བཞིན་དུ་མི་དམིགས་པ་ལ་ཡང་རྒྱུ་མཚན་ཉིད་རབ་ཏུ་བསྟན་པས་བརྡ་ལ་འཇུག་པ་ཡིན་ཏེ། འདིའི་རྒྱུ་མཚན་ཅན་གྱིས་ཐ་སྙད་འདི་ལ་ཁྱོད་ཀྱིས་སྔར་ཞུགས་པ་ཡིན་ཞིང༌། འདི་ལ་ཡང་རྒྱུ་མཚན་ཡོད་པས་འཇུག་བར་བྱའོ་ཞེས་བྱ་བ་ཡིན་ནོ། །དེས་ན་དཔེ་མ་གྲུབ་པར་རྒོལ་བ་ཁྱབ་པར་བྱེད་པའི་དངོས་པོ་འགར་ཡང་རབ་ཏུ་གྲུབ་པ་མེད་དེ། དེའི་སྒྲུབ་པར་བྱེད་པ་ནི་མི་དམིགས་པ་ཁོ་ནར་ཟད་པའི་ཕྱིར་རོ་ཞེས་གང་སྨྲས་པ་དེ་ཡང་
བསལ་བ་ཡིན་ཏེ། སྤངས་པ་ཡིན་པར་བལྟ་སྟེ། རབ་ཏུ་ཞུགས་པའི་ཐ་སྙད་ཡིན་ཡང་བརྡ་ལ་འཇུག་པར་བྱེད་པའི་ཕྱིར་རོ། །དེ་བཞིན་དུ་ཤིང་གི་ཁྱད་པར་ཤིང་ཤ་པ་ཆེན་པོ་འགའ་ཞིག་ལ་ཤིང་གི་ཐ་སྙད་རབ་ཏུ་ཞུགས་པར་གྱུར་ཀྱང༌། བློ་གྲོས་བླུན་པོ་ཤིང་ཤ་པ་ཆུང་དུ་ལ་རྒྱུ་མཚན་མེད་པས་ཐ་སྙད་མི་རྟོགས་པ་ལ། འདི་ནི་ཤིང་ཡིན་ཏེ་ཤ་པ་ཡིན་པའི་ཕྱིར་རོ་ཞེས་འཇུག་པར་བྱེད་དོ། །འདི་ལྟ་བུ་ལ་སོགས་པ་མངོན་སུམ་སྔོན་དུ་འགྲོ་བའི་ཐ་སྙད་ནི་ཐམས་ཅད་དུ་རྗེས་སུ་དཔག་པ་ཁོ་ན་རྟོགས་པར་བྱེད་པ་མ་ཡིན་གྱི། འོན་ཀྱང་གང་གི་ཚེ་རྒྱུ་མཚན་ལ་རྨོངས་བ་དེའི་ཚེ་རྗེས་སུ་དཔག་པས་རྟོགས་པར་བྱེད་དོ། །རྒྱུ་མཚན་ལ་རྨོངས་ན་ནི་མངོན་སུམ་ཉིད་ལས་དོན་རྟོགས་པར་འགྱུར་རོ། །མེད་པའི་ཐ་སྙད་ནི་ནམ་ཡང་མངོན་སུམ་ལས་རྟོགས་པ་མེད་དེ་དངོས་པོ་མེད་པའི་ཡུལ་ལ་མངོན་སུམ་མེད་པའི་ཕྱིར་རོ། །མེད་པའི་ཐ་སྙད་ནི་ཐམས་ཅད་ཀྱི་ཚེ་རྟོགས་པ་པོས་ཤེས་མོད་ཀྱི་འོན་ཀྱང་མེད་བའི་ཐ་སྙད་ཀྱི་ཡུལ་རིགས་སྣ་ཚོགས་ཀྱི་ཕྱིར། གང་གི་ཚེ་རྒྱུ་མཚན་ལ་རྨོངས་པ་དེའི་ཚེ་རང་བཞིན་གྱི་གཏན་ཚིགས་ཀྱི་སྒོ་ནས་རང་ཉིད་རྟོགས་པ་འམ། གཞན་གྱིས་རྟོགས་པར་བྱེད་པ་ཡིན་ནོ། །མ་རྨོངས་པ་ནི་ཐམས་ཅད་དུ་ཁྱབ་བྱེད་མི་དམིགས་པ་ཁོ་ནས་རྟོགས་པ་ཡིན་ལ། ཁྱབ་པར་བྱ་བ་དང་ཁྱབ་བར་བྱེད་པའི་དངོས་པོ་ལ་རྨོངས་པ་ནི་རང་བཞིན་གྱི་གཏན་ཚིགས་ལས་ཡིན་ནོ། །འདི་ནི་ཤིན་ཏུ་རྒྱས་པ་སྐྱེད་པར་བྱེད་པར་བརྗོད་པ་ལ་ཕ་ཉིད་བཞིན་ཞེས་བྱ་བ་དེར་བསྟན་ཟིན་ཏོ། །དེས་ན་འདིར་རྒྱ་མི་སྐྱེད་དོ། །གང་གིས་ན་དཔེ་མ་གྲུབ་པར་རྒོལ་བ་བསལ་ཞེ་ན། བཤད་པ་མེད་པའི་ཐ་སྙད་འབྲེལ་པར་འགྱུར་བའི་ཡུལ་རྟོགས་ཀྱང་གང་དག་གིས་ཡུལ་ཅན་མ་རྟོགས་པའི་ཐ་སྙད་བྱེད་པ་པོ་དེ་དག་སྣང་བའི་ཕྱིར་རོ། །ཇི་ལྟར་རྟོགས་པར་བྱེད་པས་ཡུལ་འགའ་ལ་བ་ལང་གི་ཐ་སྙད་ཞུགས་སུ་ཟིན་ཀྱང༌། ཐ་སྙད་ཀྱི་ཡུལ་རྟོགས་པ་ལ་ཡང་ཐ་སྙད་འཇུག་པར་མི་ནུས་ཏེ། འདི་ལྟར་དེས་བ་ལང་ཆེན་པོ་ལ་བ་ལང་གི་ཐ་སྙད་ཞུགས་པར་བྱས་ལ། རང་བཞིན་མི་འདྲ་བའི་ཆུང་དུ་ལ་ནི་ཐ་སྙད་ཀྱི་རྒྱུ་མཚན་མེད་པར་རྟོགས་པས་མི་འཇུག་པ་དེ་རྒྱུ་མཚན་བསྟན་པས་འཇུག་པ་དེས་ན་དཔེ་ཡོད་པ་དེ་བཞིན་དུ་མེད་པའི་ཐ་སྙད་ལ་ཞུགས་པ་ཡིན་ཡང་རྒྱུ་མཚན་གཏན་ལ་ཕེབས་པ་མེད་པའི་ཕྱིར་འཇུག་པར་མི་བྱེད་པ་ལ་མི་དམིགས་པ་རྒྱུ་མཚན་དུ་ཉེ་བར་བསྟན་པས་འཇུག་པར་བྱེད་དེ། དེས་
ན་དཔེ་ཡོད་པ་ཡིན་ནོ། །དངོས་པོ་ལྡོག་པ་བཀག་པ་ནི་དངོས་པོ་མེད་པ་ཡིན་ལ། མི་དམིགས་པ་དམིགས་པ་ལ་སོགས་པ་ཡིན་ན་ཞེས་བྱ་བ་ལ་ནི་གང་ཕྱིར་གྱི་དོན་ཏེ། དེ་ནི་འདི་སྐད་བརྗོད་པ་ཡིན་ཏེ། གང་གི་ཕྱིར་དངོས་པོ་མེད་པ་ནི་དངོས་མེད་ཡིན་ལ། ཤེས་པ་མེད་པ་ནི་མི་དམིགས་པ་ཡིན་པ་དེའི་ཕྱིར་མི་དམིགས་པ་དེ་ཉིད་ཇི་ལྟར་ན་བུམ་པ་ལ་སོགས་པའི་དངོས་པོ་མེད་པ་ཡིན། འདི་གཉིས་སྤྱི་དང་ཁྱད་པར་གྱི་དངོས་པོ་ཡིན་པའི་ཕྱིར་དམིགས་པ་ལོག་པས་དོན་དངོས་པོ་མེད་པར་ཡང་ཅི་ལྟར་འགྱུར། ཡང་སྨོས་པ་ནི་གཉིས་པ་གཞན་སྡུད་པའོ། །དོན་ལས་གཞན་དུ་གྱུར་བའི་ཤེས་པ་ནི་དེའི་འབྲས་བུ་ཡིན་ལ། འབྲས་བུ་ལྡོག་པས་ནི་རྒྱུ་གདོན་མི་ཟ་བར་ལྡོག་པ་ཡང་མ་ཡིན་ནོ་ཞེས་གང་སྨྲས་པ་ནི་འབྲས་བུ་ལོག་ཀྱང་ཞེས་བྱ་བ་ལ་སོགས་པ་ཡིན་ནོ། །ཡུལ་དེ་ལ་ཐ་མའི་གནས་སྐབས་སུ་གྱུར་པའི་འབྲས་བུ་མེད་པ་རྒྱུ་མེད་པ་ཡང་མ་ཡིན་ཏེ། གནས་སྐབས་ཐ་མ་མ་ཐོབ་པའི་ཤེས་པར་ངེས་པ་མེད་པའི་ཕྱིར་རོ། །རེ་ཞིག་མི་དམིགས་པ་ཡང་དོན་མེད་པ་ཉིད་དུ་ཇི་ལྟར་བརྗོད་པར་བྱ་བ་ཡིན་པ་དེ་ལྟར་བསྟན་པའི་ཕྱིར་བཤད་པ། ཡོད་པར་གཞག་པ་གང་ལ་རྒྱུ་མཚན་དམིགས་པ་ཡོད་པའོ། །དེ་འདྲ་བའི་ཞེས་བྱ་བ་ནི་སྣང་དུ་རུང་བའིའོ། །གང་གི་ཕྱིར་སྣང་བ་ཡོད་པར་རྣམ་པར་གཞག་པའི་རྒྱུ་མཚན་ནི་མཐོང་བ་ཡིན་ཏེ། རྣམ་པ་དེ་ལྟ་བུའི་དངོས་པོ་ནི་མཐོང་བ་མེད་ན་ཡོད་པར་རྣམ་པར་གཞག་མི་ནུས་པ་དེའི་ཕྱིར་དམིགས་པའི་ཤེས་པ་ལ་དོན་གྱི་ཡོད་པར་སྟོན་པ་ཡིན་ནོ། །འདི་སྐད་ཅེས་སྣང་དུ་རུང་བ་ཡོད་པར་རྣམ་པར་འཇོག་པའི་རྒྱུ་མཚན་མཐོང་བ་ཡིན་པའི་ཕྱིར་དེ་ཉིད་ཉེ་བར་བཏགས་ནས་ཡོད་པར་ཐ་སྙད་བྱེད་པ་ཡིན་ནོ་ཞེས་བརྗོད་པར་འགྱུར་རོ། །ཉེ་བར་འདོགས་པའི་རྒྱུ་གཉིས་པ་བསྟན་པའི་ཕྱིར་བཤད་པ། རྒྱུ་གཞན་ཚང་ན་སྟེ། དམིགས་པའི་རྐྱེན་གཞན་ཚད་ན་སྣང་བ་གང་ལ་དམིགས་པར་རུང་བའི་རང་བཞིན་དེ་ཡོད་པ་དེ་ནི་ཤེས་པ་དེ་ལ་མི་འཁྲུལ་བའི་ཕྱིར་རོ། །འདི་སྐད་བརྗོད་པ་ཡིན་ཏེ། མཐོང་བའི་རྒྱུ་གཞན་ཚང་ན་སྣང་བའི་དངོས་པོ་ཡོད་པ་ཙམ་རྒྱུ་མཚན་ཡིན་ཏེ། གལ་ཏེ་དེ་ཡོད་ཀྱང་མི་སྐྱེ་ན་ནི་ནམ་ཡང་སྐྱེ་བར་མི་འགྱུར་རོ། །གཏན་ཚིགས་དེས་ན་དོན་གྱི་ཡོད་པ་གང་ཡིན་པ་དེ་ཉིད་ལ་དམིགས་པར་བརྗོད་པ་ཡིན་ནོ། །དེའི་ཕྱིར་དེ་ལྟར་ཉེ་བར་བཏགས་ནས་ཤེས་པ་ཉིད་ལ་སྣང་བའི་དོན་ཡོད་པར་བརྗོད་པ་འམ། ཉེ་བར་
བཏགས་པ་ཁོ་ནས་དོན་ཡོད་པ་ལ་ཡང་ཤེས་པར་བརྗོད་པ་ཡིན་ནོ། །ཡོད་པ་ལ་དམིགས་པ་ཡིན་པར་བརྗོད་པ་འམ་དམིགས་པ་ཡང་ཡོད་པར་བརྗོད་པ་འདིས་ནི་འབྲས་བུ་ཉིད་ཡིན་ཡང་དམིགས་པ་དེ་ལྟ་བུ་ནི་དོན་གྱི་ཁྱབ་བྱེད་དུ་བསྟན་པ་ཡིན་ཏེ། ནུས་པ་ཐོགས་པ་མེད་པ་ཅན་གྱི་འབྲས་བུ་ནི་རང་བཞིན་ཉིད་དོ་ཞེས་འཆད་པར་འགྱུར་བ་བཞིན་ནོ། །དོན་གྱི་རང་བཞིན་སྣང་དུ་རུང་བ་ཡང་དོན་ཡོད་པའི་ཁྱབ་པར་བྱེད་པ་ཡིན་ཏེ། དེས་ན་དེ་ལྟ་བུར་གྱུར་པའི་དོན་གྱི་ཡོད་པ་ཉིད་ནི་དམིགས་པའི་ཡུལ་གྱི་རང་བཞིན་སྣང་དུ་རུང་བ་ཉིད་ཀྱིས་ཁྱབ་པ་ཡིན་ནོ། །རྒྱུ་ཐམས་ཅད་ཡོད་པ་ན་དངོས་པོ་ཡོད་པ་ཡིན་ཡང་ཚོགས་པ་ཡོངས་སུ་འགྱུར་བ་ལ་ལྟོས་པའི་ཕྱིར་ཤེས་པ་མི་སྐྱེ་སྟེ། དཔེར་ན་ས་བོན་ལ་སོགས་པའི་ཚོགས་པ་ཡོད་ཀྱང་ཡོངས་སུ་གྱུར་བ་ལ་ལྟོས་པའི་ཕྱིར་མྱུ་གུ་མི་སྐྱེ་བས་ན་འཁྲུལ་པ་སྲིད་པ་བཞིན་ཏེ། དེས་ན་དེ་ལྟ་བུར་གྱུར་པའི་དངོས་པོ་ནི་མ་མཐོང་བས་མེད་པའི་ཐ་སྙད་དུ་བྱ་བ་མ་ཡིན་ནོ་ཞེ་ན། མ་ཡིན་ཏེ་ཞེས་སྨོས་ཏེ། སྣང་བའི་དོན་དེའི་འབྲས་བུའི་དུས་ཤེས་པ་སྐྱེད་པའི་དུས་ན་མེད་པར་རྟོགས་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གང་གིས་འཁྲུལ་པར་དོགས་པ་ཡོངས་སུ་འགྱུར་བ་ལ་ལྟོས་པའི་དུས་སུ་ནི་དངོས་པོ་མེད་པར་རྟོགས་པ་མ་ཡིན་ཏེ། འོན་ཀྱང་འབྲས་བུའི་དུས་སུ་ཡིན་ནོ། །འབྲས་བུའི་སྐྱེ་བའི་དུས་དེའི་ཚེ་ནི་འཁྲུལ་པར་དོགས་པ་ཡོད་པ་མ་ཡིན་ནོ། །དེས་ན་གང་གི་དངོས་པོ་མེད་པ་མི་དམིགས་པར་བརྗོད་པ་དངོས་པོ་ཅི་འདྲ་བ་ཞིག་འབྲས་བུ་དུས་སུ་ཉེ་བར་གནས་པའི་ཡོད་པ་དམིགས་པར་བརྗོད་པ་དེ་ནི་ཤེས་པ་ལ་འཁྲུལ་པ་མེད་པ་ཉིད་དོ། །ཅི་ལྟར་དེའི་འབྲས་བུའི་དུས་ཡིན་པར་དེས་པར་ནུས་ཤེ་ན། གཞན་དམིགས་པ་ན་ཞེས་སྨོས་ཏེ། ཤེས་པ་གཅིག་ལ་འདུ་བ་གཞན་དམིགས་པའི་དུས་ན་དེ་མི་དམིགས་པར་འགྲུབ་པའི་ཕྱིར་རོ། །འདི་སྐད་བརྗོད་པ་ཡིན་ཏེ། ཤེས་པ་གཅིག་ལ་འདུ་བ་དམིགས་པར་གྱུར་པ་ན་ཅིག་ཤོས་ཀྱི་ཡུལ་ཅན་གྱི་ཤེས་པ་བསྐྱེད་པར་ནུས་པའི་ཚོགས་པ་ཡོད་པར་རྟོགས་པ་དེས་ན་དེའི་འབྲས་བུའི་དུས་ཡིན་པར་ངེས་པ་ཡིན་ནོ། །གལ་ཏེ་མཐུ་དང་ལྡན་པའི་རྣལ་འབྱོར་པས་སམ། ཤ་ཟ་ལ་སོགས་པས་བྱིན་གྱིས་བརླབས་ཏེ། ལྷག་པར་མོས་པའི་ཕྱིར་ཤེས་པ་གཅིག་ལ་འདྲེ་བ་ས་ཕྱོགས་ལ་སོགས་པ་དམིགས་པའི་འབྲས་བུའི་དུས་སུ་ཡང་བུམ་པ་ཡོད་པར་མི་དམིགས་པར་འགྱུར་རོ་ཞེ་ན། མ་ཡིན་ཏེ་ཞེས་སྨོས་སོ། །
ཡུལ་དང་དབང་པོ་དག་ལས་གང་ཡང་རུང་བ་ཞིག་གཞན་དུ་གྱུར་བ་ཉིད་མེད་པར་ཏེ་འདུས་བྱས་པ་མ་བསྒྲུབས་པར་ནི་བྱིན་གྱིས་བརླབས་པ་ཉིད་ལྷག་པར་བསྒྲུབ་པ་ཉིད་མི་འཐད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། དབང་པོ་འམ་ཡུལ་བྱིན་གྱིས་བརླབས་བས་ནི་ཡུལ་ཉིད་བྱིན་གྱིས་བརླབས་པ་ཡིན་ཏེ། དབང་པོ་ཡུལ་ཅན་མ་ཡིན་པར་བྱས་པས་ཀྱང་ཡུལ་བྱིན་གྱིས་བརླབས་པར་འགྱུར་བ་ཡིན་ནོ། །དེས་ན་བཤད་པ། དབང་པོ་དང་ཡུལ་དེ་དག་གཅིག་གམ་གཉིས་འདུས་བྱས་ན་ནི་མི་དམིགས་པར་འགྱུར་རོ། །འདི་ཉིད་འཁྲུལ་པའི་ཡུལ་ཡིན་ནོ་སྙམ་ན་བཤད་པ། དེའི་ཚེ་ཡང་འཁྲུལ་པ་མེད་དོ་ཞེས་བྱ་བ་ལ་ལྟོས་པར་བྱའོ། །གང་གི་ཕྱིར་རྣམ་པ་དེ་ལྟ་བུའི་དབང་པོས་གཟུང་བར་བྱ་བའི་བུམ་པ་གང་ཡིན་པའི་མེད་བ་ནི་དོན་ཡོད་པ་ཉིད་དོ། །དེ་ལྟར་ན་ཡང་གཏན་ཚིགས་ཀྱི་དོན་ནི་ས་ཕྱོགས་འདི་དང་ཤེས་པ་གཅིག་ལ་འདུ་བའི་བུམ་པ་ནི་འདི་ན་མེད་ལ། མཐུས་གཞན་དུ་བསྒྱུར་བ་དེ་ནི་མི་དགག་གོ ། གང་གི་ཚེ་དབང་པོ་དེ་ལྟ་བུར་གྱུར་པའི་དོན་འཛིན་པར་མི་ནུས་པར་བྱས་པ་དེའི་ཚེ་ཡང་མཐོང་བའི་ས་ཕྱོགས་དང་ཤེས་པ་གཅིག་ལ་འདུ་བ་མེད་པ་ནི་ཡོད་པ་ཉིད་དོ། །དེས་ན་འཁྲུལ་པ་མེད་པའི་ཕྱིར་ཤེས་པ་ཉིད་ལ་དོན་ཡོད་པ་ཡིན་པར་བཏགས་པ་དེའི་ཕྱིར་ཤེས་པ་དེར་རུང་བ་ཉིད་ཀྱི་དོན་གང་ཡིན་པ་དེ་ནི་དངོས་སུ་ཡོད་པ་ཡིན་ལ། ཉེ་བར་བཏགས་ནས་ནི་ཤེས་པ་ལ་ཡང་དེར་བརྗོད་པ་ཡིན་ནོ། །དེའི་ཕྱིར་ཡོད་པའི་བདག་ཉིད་ཀྱི་ཤེས་པ་ལྡོག་པ་དང༌། ཤེས་པའི་བདག་ཉིད་ཀྱི་ཤེས་བྱ་མེད་པ་མི་དམིགས་པ་དང་དོན་གྱི་མེད་པར་ཡང་བརྗོད་པ་ཡིན་ནོ། །འདི་ནི་མ་ཡིན་པར་དགག་པ་འཇུག་པས་ཤེས་པ་གཅིག་ལ་འདུ་བའི་དོན་སྣང་བ་འམ། དེའི་ཤེས་པ་ལ་མི་དམིགས་པ་དང་མེད་པར་བརྗོད་པ་ཡིན་ནོ། །ལྡོག་པ་ཙམ་ནི་མ་ཡིན་ནོ། །ཤེས་པ་གཅིག་ལ་འདུ་བའི་དོན་ནམ་དེའི་ཤེས་པ་ལས་སྣང་བའི་རང་བཞིན་དང༌། ཤེས་པ་མེད་པར་ངེས་པ་ཡིན་གྱི་ལྡོག་པ་ཙམ་ལས་ནི་མ་ཡིན་ནོ་ཞེས་མང་དུ་བཤད་ཟིན་ཏོ། །དེས་ཀྱང་དེ་ལྟ་བུར་གྱུར་པ་མེད་པའི་ཡུལ་ཅན་གྱི་མེད་པའི་ཐ་སྙད་སྒྲུབ་པར་བྱེད་དོ། །ཤེས་བྱ་ཡོད་པ་ཤེས་པ་ལ་མི་འཁྲུལ་པར་བསྟན་པ་འདི་ནི་རྒྱུ་འབྲས་བུ་ལ་འཁྲུལ་པ་དེས་ན་འབྲས་བུ་མེད་པས་རྒྱུ་མེད་པ་མ་ཡིན་ནོ་ཞེས་གང་བརྗོད་པ་དེ་ཡང་གསལ་བ་ཡིན་ནོ། །གང་གིས་གདོན་མི་ཟ་བར་བྱ་བའི་འབྲས་བུ་དེ་ལ་
ནི་འཁྲུལ་པ་མེད་དོ། །དེ་ལྟར་གྱུར་པའི་དོན་གྱིས་ནི་ཤེས་པ་གདོན་མི་ཟ་བར་བྱ་བ་ཡིན་ནོ། །དེ་ཉིད་ཀྱི་ཕྱིར་དེ་ལ་སྣང་བ་ཉིད་ནི་ཡོད་པའི་ཁྱད་པར་བྱེད་པ་ཡིན་ཏེ། དེས་ན་འདི་ལ་འབྲས་བུ་མེད་པས་རྒྱུ་མེད་པར་ངེས་པ་ཡིན་ནོ། །དེ་ལ་ཡང་ཞེས་བྱ་བ་ནི་རྒྱུ་མེད་པ་ལ་མི་འཁྲུལ་པའི་འབྲས་བུ་མེད་པ་ལ་ཡང་འབྲས་བུ་མེད་པས་རྒྱུ་མེད་པ་ཉིད་ནི་བསྒྲུབ་པར་བྱ་བ་མ་ཡིན་ཏེ། དེ་ནི་མངོན་སུམ་གྱི་སྟོབས་ཀྱིས་ངེས་པའི་ཕྱིར་རོ། །འོན་ཀྱང་ཐ་སྙད་བསྒྲུབ་པར་བྱ་བ་ཡིན་ལ། དེ་ལ་ཡང་མི་དམིགས་པའི་རྒྱུ་མཚན་ཅན་ཡིན་པར་གྲུབ་པ་ཉིད་དོ། །མེད་པའི་ཐ་སྙད་མི་བྱེད་པའི་ཐ་སྙད་དུ་བྱེད་བ་པོ་གང་ཡིན་པ་དེ་ནི་འཇིག་རྟེན་འགའ་ཡང་མེད་ལ། མེད་པའི་ཐ་སྙད་དེ་ཡང་ཐམས་ཅད་དུ་མི་དམིགས་པའི་རྒྱུ་མཚན་ཅན་ཁོ་ན་ཡིན་ནོ། །འོན་ཀྱང་མེད་པའི་ཐ་སྙད་ཀྱི་ཡུལ་མི་འདྲ་བས་གང་གི་ཚེ་རྒྱུ་མཚན་ལ་ཞེས་རྨོངས་པ་དེའི་ཚེ། སྔར་མེད་པའི་ཐ་སྙད་དུ་ཞུགས་པའི་ཡུལ་དང་ཆོས་མཐུན་པའི་སྒོ་ནས་མི་དམིགས་པ་རྒྱུ་མཚན་དུ་བྱས་ཏེ། རང་ཉིད་རྟོགས་པར་འགྱུར་བ་འམ་གཞན་གྱིས་རྟོགས་པར་བྱེད་པ་ཡིན་ནོ། །དེ་ཉིད་ཀྱི་ཕྱིར་མི་དམིགས་པས་བསྒྲུབ་བར་བྱ་བ་གང་ཡིན་པ་དེ་ནི་རྒྱུ་ཡོད་པའི་སྒོ་ནས་རབ་ཏུ་གྲུབ་པའི་ཐ་སྙད་ཉིད་བསྒྲུབ་པར་བྱ་བ་ཡིན་ཏེ། རྒྱུ་མཚན་ཅན་གཞན་བཞིན་ནོ། །དཔེར་ན་བ་ལང་ཆེན་པོ་དང་ཆུང་དུ་དག་གམ་རིང་པོ་དང་ཐུང་ངུའི་ཤིང་དག་གི་ཁྱད་པར་མཐོང་ནས་བརྡའི་དུས་སུ་མཐོང་བ་བ་ལང་དང་ཤིང་ཉིད་ཀྱི་སྙད་ཀྱི་རྒྱུ་མཚན་ངེས་པ་ལ་རྨོངས་པ་རང་ཉིད་མཐོང་བ་དང་ཆོས་མཐུན་པའི་སྒོ་ནས་རྟོགས་པར་འགྱུར་བའམ་གཞན་གྱིས་རྟོགས་པར་བྱེད་པ་དེ་བཞིན་དུ་འདི་ལ་ཡང་ཡིན་ནོ། །གལ་ཏེ་མི་དམིགས་པ་ཉིད་མ་གྲུབ་པར་ནི་མེད་པའི་ཐ་སྙད་སྒྲུབ་པར་བྱེད་པ་མ་ཡིན་པ་དེས་ན་རེ་ཞིག་དེ་སྒྲུབ་པར་བྱེད་པའི་ཚད་མ་བརྗོད་དགོས་སོ་ཞེ་ན། བཤད་པ། འདི་ནི་འོག་ཏུ་དེའི་ཕྱིར་མི་དམིགས་པ་འདི་ནི་མངོན་སུམ་ཉིད་ཀྱིས་གྲུབ་པ་ཡིན་ཞེས་འཆད་པར་འགྱུར་རོ། །བཤད་མ་ཐག་པའི་མཚན་ཉིད་ཀྱི་མི་དམིགས་པ་དེ་ལ་ཡང་ངོ༌། །འཇུག་པ་ནི་སྒྲའི་བྱེད་པ་སྟེ། དེའི་བྱེ་རབ་གིས་རྣམ་པ་བཞི་གང་ལ་ཡོད་པའོ། །སྦྱོར་བའི་བྱེ་བྲག་གིས་ཞེས་གང་འཆད་པར་འགྱུར་རོ། །ཡང་ན་འཇུག་པ་ནི་མི་དམིགས་པ་ཉིད་བྱེད་པ་ཡིན་པས་དེའི་བྱེ་བྲག་ཡིན་ཏེ། སྦྱོར་བའི་བྱེ་བྲག་ཀྱང་དེ་ཉིད་ལ་བརྗོད་པ་ཡིན་ནོ། །མི་དམིགས་བ་དེ་ཡང་
ལ་ལར་ནི་དོན་གཞན་སྒྲུབ་པའི་སྒོ་ནས་དངོས་པོ་མེད་པ་བསྒྲུབ་པར་སྦྱོར་བ་ཡིན། ལ་ལར་ནི་གཞན་འགོག་པའི་སྒོ་ནས་ཡིན། སྦྱར་བར་བྱ་ཞིང་རབ་ཏུ་འཇུག་པར་བྱ་བ་དེའི་བྱེད་པ་ཐ་དད་པ་ནི་འཇུག་པའི་བྱེ་བྲག་གོ །གང་དུ་འགལ་བ་སྒྲུབ་པས་གཞན་འགོག་པ་དེར་འགལ་བའི་དོན་སྒྲུབས་པ་ཉིད་ཟློག་པར་བྱེད་པ་ཡིན་གྱི། མི་དམིགས་པ་ནི་མ་ཡིན་ན་དེ་ཅི་ལྟར་སྦྱོར་བའི་བྱེ་བྲག་གིས་མི་དམིགས་པ་རྣམ་པ་བཞིར་བརྗོད་ཅེ་ན། དགག་པ་གང་ཇི་སྙེད་པ་ཞེས་སྨོས་སོ། །འདི་ནི་ཁྱབ་པ་བརྗོད་པ་ཡིན་ཏེ། དེས་ན་མི་དམིགས་པ་མེད་པར་བྱ་བར་ནུས་པ་མེད་པའི་ཐ་སྙད་དེ་ནི་འགའ་ཡང་མེད་དོ། །དགག་པ་གང་ཇི་སྙེད་པ་དེ་ཐམས་ཅད་མི་དམིགས་པ་ལས་ཇི་ལྟར་ཡིན་པ་དེ་ལྟར་ནི་ལེའུ་དང་བོར་བཤད་ཟིན་ཏོ། །ཁྱད་པ་དེ་ཉིད་སྟོན་པ་ནི་འདི་ལྟར་ཞེས་བྱ་བ་ཡིན་ནོ། །དགག་པ་དེ་ནི་རྣམ་པ་གཉིས་ཀྱིས་བྱེད་ཅིང་ཐ་སྙད་འདོགས་ཏེ། དོན་གཞན་སྒྲུབ་པ་དང་དགག་པས་སོ། །དེ་ལ་གང་གི་ཚེ་འགའ་ཞིག་བསྒྲུབ་པས་དགག་པ་བྱེད་པའི་དོན་གཞན་བསྒྲུབས་པ་དེ་མི་འགའ་བ་ཡིན་ན་ནི། དེའི་ཚེ་ཡུལ་གཅིག་ན་གནས་པ་ལ་འགལ་བ་མེད་པའི་ཕྱིར་ཏེ། གང་ཞིག་བརྗོད་པའི་དོན་དེ་ཡང་ཡོད་ལ་དགག་པར་བྱ་དེ་ཡང་ཡོད་པས་འགའ་བ་མེད་པའི་ཕྱིར་དགག་པར་བྱ་བ་འགའ་ཡང་མེད་པར་ངེས་པ་མ་ཡིན་ཏེ། གལ་ཏེ་རྒྱུ་མ་ཟད་པར་ནི་འབྲས་པར་འགྱུར་བ་ཡིན་ནོ། །དེ་བཞིན་དུ་གཞན་དུ་ཡང་རྒྱུ་མེད་པ་ཞན་འགོག་པར་འགྱུར་ན། དེ་ལྟ་མོད་ཀྱི་འགལ་བ་དེ་ཡང་མི་དམིགས་པ་མེད་པའི་ཕྱིར་འགལ་བར་མི་ངེས་ཀྱི། འོན་ཀྱང་མི་དམིགས་པ་སྔོན་དུ་འགྲོ་བ་ཅན་ཉིད་དོ། །དེ་བསྟན་པའི་ཕྱིར་འདི་ལྟར་ཞེས་སྨོས་སོ། །གང་ལ་རྒྱུ་མ་གཏུགས་ཤིང་མ་ཟད་པ་ཡོད་བའོ། །འདིས་ནི་འདི་སྐད་སྟོན་པ་ཡིན་ཏེ། གལ་ཏེ་རྒྱུ་མ་ཟད་པར་ནི་འབྲས་བུ་མི་ལྡོག་ལ། རྒྱུ་ཟད་ན་ཡང་དེ་ཉིད་ཀྱིས་འབྲས་བུ་ལྡོག་པའི་ཕྱིར་གང་ཞིག་གཞན་དང་ལྷན་ཅིག་འགལ་བར་ངེས་པར་འགྱུར་བ་ཟློག་པར་བྱེད་པ་ཞེས་བྱ་བ་འགའ་ཡང་ཡོད་པ་མ་ཡིན་མོད་ཀྱི། འོན་ཀྱང་གང་གི་ཚེ་རྒྱུ་གེགས་མེད་པ་ཅན་ཉེ་བར་གྱུར་ལ། དེ་དག་གི་གེགས་གཞན་ཡང་མ་མཐོང་བ་དེར་དངོས་པོ་གང་ཞིག་ཉེ་བར་གྱུར་ན་གང་གི་རྒྱུ་མཐར་ཐུག་པར་འགྱུར་བའི་དངོས་པོ་གཞན་དེ་ནི་རྒྱུ་ཟད་པར་བྱེད་པའི་སྒོ་ནས་དངོས་པོ་དེའི་ཟློག་པར་བྱེད་པ་ཡིན་གྱི། རྒྱུ་བཟློག་པ་མེད་པར་ནི་འགའ་ཞིག་ཀྱང་འགའི་ཡང་ཟློག་པར་བྱེད་པ་ཞེས་བྱ་བར་མི་འགྱུར་རོ། །དེས་ན་གང་ཞིག་གང་གིས་ཟློག་པར་བྱེད་པ་ཡིན་པ་དེ་ནི་དེ་ལྟར་མྱུར་ན་སྐད་ཅིག་མ་གསུམ་པ་ལ་དེ་ཟློག་པར་བྱེད་
དོ། །སྐད་ཅིག་དང་པོ་ལ་ནི་རེ་ཞིག་རྒྱུ་ཚོགས་པ་མ་ཚང་བ་མེད་པ་ཡིན་ནོ། །སྐད་ཅིག་གཉིས་པ་ལ་ནི་སྔར་གྱི་ཚོགས་པ་དང་ལྷན་ཅིག་བྱེད་པ་སྣང་བ་དེ་ལ་མུན་པ་གཞན་སྐྱེད་པར་ནུས་པ་དང་བྲལ་བའི་ཚོགས་བསྐྱེད་པར་བྱེད་དེ། དེས་ན་སྐད་ཅིག་མ་གསུམ་པ་ལ་མུན་བ་ལ་ལྡོག་པ་ཡིན་ནོ། །སྣང་བ་དང་མུན་པའི་སྐད་ཅིག་མ་གཉིས་ལྷན་ཅིག་གནས་པར་ཐལ་ལོ་ཞེ་ན། རྡུལ་ཕྲ་རབ་ཐམས་ཅད་རང་གི་ཡུལ་དུ་གཞན་སྐྱེ་བའི་གགས་བྱེད་པའི་ཕྱིར་ལྷན་ཅིག་གནས་པ་མ་ཡིན་ནོ། །འོན་ཏེ་ཉེ་བ་ན་གནས་པར་འདོད་ན་དེ་ནི་ཁོ་བོ་ཅག་ཀྱང་འདོད་པ་ཉིད་དོ། །འདི་ལྟར་མུན་ཁང་གི་ཕྱོགས་སུ་ཞུགས་བ་སྒོ་ན་གནས་བའི་མར་མེའི་འོད་ནི་ཕྱོགས་གཅིག་ན་གནས་པའི་མུན་པ་དང་ཤིན་ཏུ་ཉེ་བར་གནས་པའི་ཕྱིར་འདོད་པ་ཉིད་དོ། །གལ་ཏེ་སྣང་བ་དང་མུན་པའི་རྡུལ་ཕྲ་རབ་དག་འདྲེན་མར་སྐད་ཅིག་གཉིས་གནས་པར་ཐལ་ལོ་ཞེ་ན། མ་ཡིན་ཏེ། རིམ་པ་དང་ལྡན་པའི་སྒྲོན་མའི་འོད་ཀྱིས་རིམ་གྱིས་མུན་པ་བཟློག་པའི་ཕྱིར་རོ། །རྡུལ་ཕྲ་རབ་འཕོ་བའི་དུས་ནི་སྐད་ཅིག་གི་ཚད་དུ་བརྗོད་དེ། དེས་ན་རིམ་གྱིས་ཉེ་བར་འགྲོ་བའི་སྒྲོན་མའི་འོད་ནི་ཅིག་ཅར་མུན་ཁང་ཁྱབ་པ་མ་ཡིན་ནོ། །དེའི་ཕྱིར་སྣང་བའི་ཆ་གང་གིས་མུན་པའི་ཆ་ཤས་བཟློག་པའི་སྣང་བའི་ཆ་དེ་ནི་ཉེ་བར་འགྲོ་བ་ཉིད་ཀྱིས་མུན་པ་སྐྱེད་པའི་ཚོགས་པའི་གེགས་ཡིན་ནོ། །དེས་ན་མི་འཇུག་བའི་མུན་པའི་ཡུལ་དུ་ནི་དེས་ཚོགས་པ་ནུས་པ་མེད་པར་མི་བསྐྱེད་དོ། །དེ་ཅིའི་ཕྱིར་སྐད་ཅིག་གསུམ་པ་ལ་མུན་པ་མ་སྐྱེས་པ་དང་ཡུལ་དེར་སྣང་བ་སྐྱེས་པ་ཡིན་ནོ། །དེ་ལྟར་རིམ་གྱིས་སྣང་བའི་ཆ་ཐག་རིང་པོར་གནས་པ་དག་གིས་ཚོགས་པ་དེ་ལ་གནོད་པར་བྱས་པས་སྐད་ཅིག་གསུམ་པ་ལ་མུན་པ་ལོག་པ་ལ་ཡུལ་དེར་གནོད་པར་འགྱུར་བ་ཡིན་ནོ། །དེ་བཞིན་དུ་གཞན་དུ་ཡང་རྒྱུ་མེད་པར་བྱེད་པའི་རྒྱུ་མཚན་ཉིད་འགལ་བ་ཡིན་པར་བལྟ་བར་བྱའོ། །དེ་ཉིད་ཀྱིས་ན་འགལ་བ་སྐད་ཅིག་མའི་ཡུལ་ཅན་ནི་མ་ཡིན་གྱི། འོན་ཀྱང་རྒྱུན་གྱི་ཡུལ་ཅན་ཡིན་ཏེ། རྒྱུ་དང་འབྲས་བུ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །དེ་ཉིད་བསྟན་པའི་ཕྱིར་འབྱུང་ལ་ཞེས་སྨོས་ཏེ། རྒྱུན་གྱིས་འཇུག་པ་འགལ་བར་རྟོགས་པ་ཡིན་ནོ། །རྒྱུན་ཡང་རྒྱུན་ཅན་དག་ལས་ཐ་དད་པ་གཅིག་པ་ཉིད་ནི་དགག་པ་ཡིན་གྱི། སྐད་ཅིག་དུ་མའི་བདག་ཉིད་དུ་འགྱུར་བའི་རྒྱུན་ནི་དགག་པར་ནུས་པ་མ་ཡིན་ནོ། །དུ་མ་གང་ཇི་སྙེད་པ་
མཐའ་དག་མེད་པ་ནི་མ་ཡིན་ཏེ། དེས་ན་རྒྱུན་གྱི་ཡུལ་ཅན་གྱི་འགལ་བ་གང་ཡིན་པ་དེ་ནི་ཡུལ་ཅན་གྱི་དོན་གྱི་ཡུལ་ཅན་ཡིན་གྱི། དངོས་པོ་མེད་པའི་ཡུལ་ཅན་ནི་མ་ཡིན་ཏེ། རྒྱུ་ཅན་རྣམས་དངོས་པོ་ཡིན་པའི་ཕྱིར་རོ། །སྔ་མ་དང་ཕྱི་མའི་སྐད་ཅིག་མ་རྒྱུ་དང་འབྲས་བུའི་དངོས་པོར་གྱུར་པ་གང་ཡིན་པ་དེ་དག་ཉིད་ནི་འགལ་བ་མ་ཡིན་གྱི། འོན་ཀྱང་རྒྱུ་དང་འབྲས་བུ་སྔོན་དུ་འགྲོ་བ་ཅན་སྐད་ཅིག་ཕྱི་མའི་སྐད་ཅིག་གཞན་དང་མཚམས་སྦྱོར་མི་ནུས་པ་ཞེས་བྱ་བ་སྣང་བས་བྱས་པ་གང་ཡིན་པ་དེ་ཉིད་འགལ་བ་ཡིན་ཏེ། དེ་ཉིད་ཀྱིས་མུན་པ་དེ་རྒྱུན་ཆད་པ་ཡིན་ནོ། །དེས་ན་འགལ་བ་ནི་དངོས་པོའི་ཡུལ་ཅན་ཁོ་ནའོ། །རྒྱུ་དང་འབྲས་བུ་ཡང་སྐད་ཅིག་གཅིག་ལ་ནི་ངེས་པར་ནུས་པ་མ་ཡིན་ཏེ་འོན་ཀྱང་རྒྱུ་ཉིད་ལ་ཡིན་ན། ཅི་དེ་ཙམ་གྱིས་དེ་ཡང་དངོས་པོ་མེད་པའི་ཡུལ་ཅན་ཉིད་ཡིན་ནམ། དེ་བཞིན་དུ་སྐད་ཅིག་ཕྱི་མ་ལ་ནུས་པ་མེད་པ་ཞེས་བྱ་བ་སྣང་བས་བྱས་པ་གང་ཡིན་པ་དེ་ཉིད་འགལ་བ་ཡིན་ལ། དེ་ཡང་རྒྱུན་ལ་ཤེས་ཀྱི་སྐད་ཅིག་གཅིག་ལ་མ་ཡིན་པ་དེ་ཙམ་གྱིས་ཅི་དངོས་པོ་མེད་པའི་ཡུལ་ཅན་དུ་འགྱུར་རམ། དེས་ན་དེ་ལྟར་རྒྱུའི་གགས་བྱེད་པའི་སྒོ་ནས་འགལ་བར་ངེས་པ། དེ་ཡང་དངོས་པོ་མེད་པའི་ཡུལ་ཅན་ནི་མ་ཡིན་ནོ། །འགལ་བའི་རྒྱུ་མཚན་དོན་གཞན་མེད་པ་དེ་ཡང་མི་དམིགས་པ་ལས་ཡིན་ཏེ། མི་དམིགས་པ་ཐ་སྙད་དུ་བྱེད་དོ། །འགལ་བ་གཉིས་པ་ཡང་ཕན་ཚུན་སྤངས་པ་ནི་ལྡོག་པའོ། །ལྡོག་པ་དེས་གནས་པའི་མཚན་ཉིད་དེ་ངོ་བོ་ཉིད་གང་ཡིན་པ་དེ་དག་ནི་ཕན་ཚུན་སྤངས་ཏེ་གནས་པའི་མཚན་ཉིད་ཁོ་ན་ལས་འགལ་བ་ཡིན་ནོ། །འདི་ནི་མཚན་ཉིད་པའི་འགལ་བའི་མཚན་ཉིད་ཀྱི་རང་བཞིན་ལ་རྣམ་པར་གནས་པ་ཡིན་ནོ། །གང་གི་ཕྱིར་བདག་ཉིད་གཅིག་པར་འགལ་བ་དེའི་ཕྱིར་དེའི་རང་བཞིན་གྱི་ཡུལ་ཅན་ཡིན་ཏེ། རྟག་པ་དང་མི་རྟག་པ་བཞིན་ནོ། །དེ་ལ་མི་རྟག་པ་ཉིད་ནི་རྟག་པ་ཡོངས་སུ་སྤངས་པས་གནས་པའི་ངོ་བོ་ཡིན་ལ། །རྟག་པ་ཡང་མི་རྟག་པ་ཉིད་ཡོངས་སུ་སྤངས་པ་ཡིན་ནོ། །འདིར་ཡང་དེ་ཡང་མི་དམིགས་པ་ལས་ཡིན་ནོ་ཞེས་བྱ་བ་ལ་ལྟོས་པར་བྱས་ཏེ། འགལ་བའི་རྒྱུ་ཕན་ཚུན་སྤངས་པ་དེ་ཡང་མི་དམིགས་པ་ཉིད་ལས་ངེས་པར་བྱ་བ་ཡིན་ནོ། །ཅི་ལྟར་ན་ཕན་ཚུན་སྤངས་པ་འགལ་བའི་རྒྱུ་ཡིན་ཞིང༌། མི་དམིགས་པ་ལས་ངེས་པར་བྱ་བ་ཡང་ཇི་ལྟར་ཡིན་ཞེ་ན་སྨྲས་པ། འདི་ལ་གང་ཡོངས་
སུ་གཅོད་པ་ན་གང་ཞིག་རྣམ་པར་བཅད་པར་འགྱུར་བའི་ཡོངས་སུ་བཅད་པའི་དེའི་རང་བཞིན་ནི་རྣམ་པར་བཅད་པ་ཡོངས་སུ་སྤངས་བས་གནས་པ་ཡིན་ནོ། །རང་བཞིན་འགའ་ཞིག་ཡོངས་སུ་གཅོད་པ་ན་ཡང་དེའི་རང་བཞིན་ཉམས་པ་རྣམ་པར་གཅོད་པ་ཡིན་ཏེ། དེས་ན་དེའི་རང་བཞིན་ནི་དེའི་རང་བཞིན་ཉམས་པ་ཡོངས་སུ་སྤངས་པས་གནས་པ་ཡིན་ནོ། །ཇི་ལྟར་དེའི་ངོ་བོ་ཉམས་པ་ཡོངས་སུ་སྤངས་པས་གནས་པ་བཞིན་དུ། དེའི་ངོ་བོ་ཉམས་པ་དང་ལྡན་པའི་དངོས་པོ་ཡང་ཡོངས་སུ་སྤངས་པས་གནས་པ་ཡིན་ནོ། །དེས་ན་དངོས་པོ་དང་དངོས་པོ་མེད་པ་དག་ནི་གཅིག་ལ་འགལ་ལ། དངོས་པོ་ནི་གང་དག་གཅིག་ལ་གཅིག་མེད་པར་མི་འཁྲུལ་པ་དེ་དག་གཅིག་ལ་གཅིག་མེད་པ་མི་འཁྲུལ་བའི་རྒྱུ་མཚན་གྱིས་འགལ་བ་ཡིན་གྱི་དངོས་སུ་ནི་མ་ཡིན་ནོ། །དེ་ལྟར་འགལ་བའི་རྒྱུ་ནི་ཐམས་ཅད་དུ་ཕན་ཚུན་སྤངས་པ་ཉིད་ཡིན་ནོ། །དེ་ཡང་མི་དམིགས་པ་ཉིད་ལས་ངེས་པར་བྱ་བ་ཡིན་ཏེ། གང་ཞིག་གང་དུ་མི་དམིགས་པ་དེ་ནི་དེ་ན་མེད་པར་ངེས་ནུས་ཀྱི། གཞན་དུ་ནི་མ་ཡིན་ནོ། །མི་དམིགས་པས་ངེས་པ་ཉིད་ཀྱང་དངོས་པོ་གང་ཞིག་རྣམ་པར་ངེས་པ་དེ་ཡིན་ཏེ། དཔེར་ན་སེར་པོ་ལ་རྣམ་པར་ངེས་པར་གྱུར་པའི་སྔོན་པོ་བཞིན་ནོ། །གང་ཞིག་མ་ངེས་པའི་ངོ་བོ་དེ་ནི་ཐམས་ཅད་ལ་ཡོད་པར་ཐེ་ཚོམ་ཟ་སྟེ། དཔེར་ན་སྐད་ཅིག་མ་ཡིན་ནོ། །དེ་ནི་སྔོན་པོ་ལ་སོགས་པ་དག་ལས་རྣམ་པ་ཐ་དད་པར་མི་འདོད་དོ། །དེས་ན་དེ་ནི་ཐམས་ཅད་ལ་དམིགས་པར་ཐེ་ཚོམ་ཟ་སྟེ་ཇི་སྲིད་རྗེས་སུ་དཔག་པ་མེད་པ་དེ་ཉིད་དུ་མི་དམིགས་པར་ངེས་པ་ནི་མ་ཡིན་ནོ། །དེ་ཉིད་ཀྱི་ཕྱིར་འགའ་ཡང་སྐད་ཅིག་མ་ཉིད་ཡོངས་སུ་སྤངས་ནས་གནས་པར་རྟོགས་པ་ནི་མེད་དེ། དེས་ན་རྣམ་པར་ངེས་པར་ཤེས་པའི་རང་བཞིན་གཞན་དུ་མི་དམིགས་པ་ལས་མེད་པའི་ཐ་སྙད་དུ་འགྱུར་རོ། །གལ་ཏེ་སྣང་དུ་རུང་བའི་རྣམ་པ་ངེས་པ་ཉིད་མི་དམིགས་པ་ལས་མེད་པའི་ཐ་སྙད་དུ་འགྱུར་བ་མ་ཡིན་ནམ། དེས་ན་བུམ་པ་ལ་ཤ་ཟ་ལ་སོགས་པའམ། མི་རྟག་པ་ལ་རྟག་པ་སྣང་སྡུ་མི་རུང་བ་མི་སྣང་བ་མི་དམིགས་པ་ལས་ཅི་ལྟར་འགོག །འདི་ལྟར་སྣང་དུ་རུང་བར་འགྱུར་བ་རྟག་པ་ཉིད་ནི་འགའ་ཡང་མེད་དེ། དེ་ཉིད་ཀྱི་ཕྱིར་མ་ངེས་པའི་རྣམ་པ་གཞན་གང་ལ་འགོག་ཅེ་ན། སྨྲས་པ། ཐམས་ཅད་དུ་མི་དམིགས་པ་ཁོ་ན་ལས་ཡིན་ནོ། །ཅི་ལྟར་ཞེ་ན། འདི་ལ་གང་གི་ཕྱིར་མི་སྣང་བ་མི་དམིགས་
པར་འགྱུར་བ་བུམ་པ་ལ་ཐ་དད་པའི་ཤ་ཟ་མེད་པར་བསྒྲུབ་པ་ནི་མ་ཡིན་གྱི། འོན་ཀྱང་ཐ་མི་དད་པ་སྟེ། སྣང་བའི་བུམ་པ་འདི་ནི་ཤ་ཟའི་རང་བཞིན་མ་ཡིན་ནོ་ཞེས་དེ་ལྟར་སྣང་བ་ཉིད་དུ་ལས་བླངས་ནས་ཤ་ཟ་དགག་པར་བྱེད་པའི་ཕྱིར་སྣང་བ་མི་དམིགས་པ་ཉིད་ཡིན་ཏེ། དཔེར་ན་གལ་ཏེ་འདི་ནི་བུམ་པ་ཡོད་ན་ནི་སྣང་བ་ཁོ་ནར་འགྱུར་རོ་ཞེས་བུམ་པ་སྣང་བ་ཉིད་ཁས་བླངས་ནས་ཡིན་པ་དེ་བཞིན་དུ། གལ་ཏེ་འདི་ཤ་ཟ་ཡིན་ན་ནི་སྣང་བ་ཉིད་དུ་འགྱུར་རོ། །དེ་བཞིན་དུ་སྣང་བའི་རང་བཞིན་ཉིད་དུ་ཁས་བླངས་ནས་རྟག་པ་ཉིད་འགོག་པའི་ཕྱིར་སྣང་བ་མི་དམིགས་པ་ཉིད་ལས་ཡིན་ནོ། །རྟག་པ་ཉིད་ནི་རྣམ་པར་ཤེས་པར་གྱུར་པ་མ་ཡིན་ནོ་ཞེས་གང་བརྗོད་པ་ཤ་ཟ་ཡང་རྣམ་པར་ཤེས་པར་གྱུར་པ་ནི་མ་ཡིན་གྱི། འོན་ཀྱང་ཅི་སྲིད་དུ་སྣང་བའི་རང་བཞིན་གྱིས་བུམ་པ་ལས་ཤ་ཟ་རྣམ་པ་གཞན་ཉིད་དུ་བརྟགས་པ་དེ་ནི་རྟོགས་པས་བྱས་པའི་གཞན་ཉིད་ཡིན་ནོ། །དེ་བཞིན་དུ་རྟག་པ་ཉིད་ཀྱང་མི་རྟག་པ་ཉམས་པའི་ངོ་བོ་ཡིན་ཏེ། དེས་ན་རྣམ་པ་གཞན་དུ་བརྟགས་པ་ཡིན་ནོ། །དེ་བཞིན་དུ་དངོས་པོ་མེད་པ་ལས་ཡང་དངོས་པོ་བཀག་པའི་རང་བཞིན་བཟློག་པའི་རྣམ་པ་བརྟགས་པའི་ཕྱིར་རྣམ་པ་ཐ་དད་པར་སྣང་བའི་དངོས་པོ་འམ་ཐ་དད་པར་བརྟགས་པའི་དངོས་པོ་མེད་པ་ཡིན་ཡང་རུང་སྟེ། སྣང་དུ་རུང་བ་ཉིད་ཁས་བླངས་ནས་དགག་པར་བྱེད་པ་ན། སྣང་བ་མི་དམིགས་པ་ཁོ་ནས་བྱས་པར་འགྱུར་བ་ཡིན་ནོ། །དེ་ཉིད་ཀྱི་ཕྱིར་གཏན་ཚིགས་ཐིགས་པར་ཁྱད་པར་མ་བརྗོད་དོ། །ཐ་དད་པ་འགོག་པ་ལ་ནི་འཁྲུལ་པའི་ཕྱིར་སྣང་བ་ཉིད་དུ་རུང་བ་ཞེས་ཁྱད་པར་དུ་བྱ་དགོས་ཀྱི། །ཐ་མི་དད་པ་ཉིད་དུ་ཁས་བླངས་པ་འགོག་པ་ལ་ནི་འཁྲུལ་པ་མེད་པའི་ཕྱིར་ཁྱད་པར་དོན་མེད་པ་ཉིད་དོ། །དེ་ལྟར་ན་བདག་ཉིད་གཅིག་པ་འགོག་པ་ལ་སྣང་བ་མི་དམིགས་པ་ཁོ་ནས་བྱས་པར་འགྱུར་བ་ཡིན་ནོ། །དེ་ལྟ་ཡིན་དང་ངེས་པར་འགྱུར་བ་མེད་དེ་ཞེས་བྱ་བའི་སྦྱོར་བ་སྣང་བ་མི་དམིགས་པ་ཁོ་ནའི་ནང་དུ་འདུས་པར་འགྱུར་བ་ཡིན་ནོ། །གལ་ཏེ་དེ་ཡོངས་སུ་གཅོད་པ་དང་དེ་ལས་གཞན་རྣམ་པར་གཅོད་པ་དང་ཕུང་པོ་གསུམ་པ་ཡང་མེད་པར་སྟོན་པ་ཞེས་བྱ་བ་དང༌། དེ་བཞིན་དུ་བསྒྲུབ་པ་དང་དགག་པའི་རྣམ་པར་རྟོག་པའི་རྒྱུ་ཉིད་ཀྱིས་འབྲས་བུ་དང་བཅས་པའི་ཕྱིར་རོ་ཞེས་བཤད་པའི་ཕྱིར། དངོས་པོ་མེད་པ་མངོན་སུམ་ཉིད་ཀྱིས་གྲུབ་པར་བཤད་པ་མ་ཡིན་ཞེ་ན། བདེན་
ཏེ། དངོས་པོ་མེད་པ་ནི་མངོན་སུམ་གྱིས་གྲུབ་མོད་ཀྱི། འོན་ཀྱང་དེ་ཐ་སྙད་ནི་སྣང་བ་མི་དམིགས་པ་ལས་ཡིན་ནོ། །གལ་ཏེ་སྣང་བ་མི་དམིགས་པ་ཉིད་ལས་མེད་པའི་ཐ་སྙད་དུ་འགྱུར་ན། འདི་ནི་ཡོད་དོ། །འདི་ནི་མེད་དོ་ཞེས་བྱ་བའི་སྒྲུབ་པ་དང་དགག་པའི་རྣམ་པར་རྟོག་པའི་རྒྱུ་ཡིན་པ་ཉིད་ཀྱིས་འབྲས་བུ་དང་བཅས་པའི་ཕྱིར་རོ་ཞེས་འཆད་པར་འགྱུར་བ་ཅི་ལྟར་ཞེ་ན། དམིགས་པ་འདི་ནི་ཡོད་དོ། །མ་དམིགས་པ་འདི་ནི་མེད་དོ་ཞེས་དམིགས་པ་བསྒྲུབ་པ་དང༌། དགག་པའི་རྣམ་པར་རྟོག་པ་ཁོ་ནས་འབྲས་བུ་དང་བཅས་པར་དགོངས་ནས་དེ་སྐད་དུ་བཤད་དོ། །དེ་ཉིད་ཀྱིས་ན་འདི་ནི་དམིགས་སོ་ཞེས་རྣམ་པར་རྟོག་པ་ཅན་གྱི་བློ་སྐྱེ་བར་འགྱུར་རོ་ཞེས་འཆད་པར་འགྱུར་རོ། །གལ་ཏེ་དམིགས་པ་གཞན་མེད་པའི་ཐ་སྙད་ཀྱང་སྣང་བ་མི་དམིགས་པ་ཁོ་ན་ལས་འགྱུར་པ་མ་ཡིན་ནམ། དེའི་ཕྱིར་དམིགས་པ་མེད་པའི་ཐ་སྙད་ཀྱང་མངོན་སུམ་གྱིས་ཇི་ལྟར་འགྲུབ་ཅེ་ན། དེ་ནི་མི་རིགས་ཏེ། གང་གི་ཕྱིར་གང་ལ་དམིགས་པ་ལས་ཐ་དད་པའི་རང་བཞིན་ཡོད་པ་དེ་ནི་མ་དམིགས་པར་ངེས་ཀྱང་ཡོད་པར་ཐེ་ཚོམ་ཟ་བའི་ཕྱིར། རྨོངས་པ་ལ་མི་དམིགས་པ་ལས་མེད་པའི་ཐ་སྙད་བསྒྲུབ་པར་བྱ་བ་ཡིན་གྱི། གང་ལ་དམིགས་པ་ལས་ཐ་དད་པའི་རང་བཞིན་མེད་པ་དེ་ལ་ནི་དམིགས་པ་མེད་པར་ངེས་པ་ཉིད་མེད་པའི་ཐ་སྙད་ཡིན་པའི་ཕྱིར་བསྒྲུབ་པར་བྱ་བ་གཞན་ཅི་ཞིག་ཡོད་དེ། དེ་ཉིད་ཅིའི་ཕྱིར་ཞེ་ན། རྣམ་པ་གཅིག་ཏུ་ངེས་པར་དམིགས་པའི་ཕྱིར་རོ། །རྣམ་པ་གཅིག་ཏུ་ངེས་པ་ཉིད་དམིགས་པ་ངེས་པ་ན་ཅིག་ཤོས་དམིགས་པ་མེད་པར་ངེས་པར་འགྱུར་རོ། །ཇི་སྲིད་དུ་ཤེས་པ་གཞན་མེད་པར་མ་ངེས་པ་དེ་སྲིད་དུ་ནི་ངེས་པའི་ངོ་བོའི་ཤེས་པ་ངེས་པར་མི་འགྱུར་བ་ཡིན་ཏེ། ཤེས་པ་ནི་བདག་ཉིད་ཤེས་པ་གཞན་ལས་རྣམ་པར་གཅོད་དོ་ཞེས་གང་འཆད་པར་འགྱུར་བ་ཡིན་ནོ། །དེ་ཉིད་ཀྱི་ཕྱིར་ཤེས་པ་གཞན་མེད་པའི་ཐ་སྙད་ཀྱི་རྒྱུ་ཡིན་པའི་ཕྱིར་མངོན་སུམ་ཉིད་མ་ཡིན་པར་དགག་པ་འཇུག་པའི་སྒོ་ནས་མི་དམིགས་པར་བཤད་པ་ཡིན་ནོ། །སློབ་དཔོན་གྱིས་ཀྱང་དགག་པ་གང་ཇི་སྙེད་པ་དེ་ཐམས་ཅད་ནི་མི་དམིགས་པ་ལས་ཡིན་ནོ་ཞེས་བཤད་པ་ན། དམིགས་པ་ལས་གཞན་གྱི་མེད་པའི་ཐ་སྙད་མི་དམིགས་པའི་རྒྱུ་མཚན་ཅན་དུ་བཤད་པ་ཡིན་གྱི། དམིགས་པ་ཉིད་ནི་མ་ཡིན་ནོ། །དམིགས་པ་མེད་པའི་ཐ་སྙད་ཀྱི་རྒྱུ་ཡིན་པ་ཉིད་ཀྱིས་
ན། མངོན་སུམ་གྱིས་སྣང་བའི་དངོས་པོ་མེད་པར་དོན་གྱིས་ངེས་པར་བརྗོད་དོ། །འདི་ལྟར་མངོན་སུམ་བདག་ཉིད་ཀྱི་རང་བཞིན་ངེས་པ་ངེས་པར་བྱེད་པ་ནི་ཤེས་པ་གཞན་མེད་པར་ངེས་པར་བྱེད་པ་གང་ཡིན་པ་ཉིད་ཡིན་ལ། སྣང་བའི་དངོས་པོ་ཡོད་ན་ནི་མངོན་སུམ་གྱིས་བྱས་པའི་ཤེས་པ་གཞན་མེད་པར་ངེས་པ་མི་འཐད་དོ། །དེའི་ཕྱིར་དོན་གྱིས་ཤེས་པ་གཞན་མེད་པར་ངེས་པར་བྱེད་པའི་མངོན་སུམ་ཉིད་ནི་དངོས་པོ་མེད་པར་ངེས་པར་བྱེད་པ་ཉིད་ཡིན་ནོ། །དོན་གྱིས་དངོས་པོ་མེད་པར་ངེས་པར་བྱེད་པ་དེ་ཉིད་ཀྱི་ཕྱིར་ཤེས་པ་དེ་ཉིད་ཉེ་བར་བཏགས་ནས་དོན་གྱིས་མེད་པར་བརྗོད་པ་ཡིན་ནོ། །དམིགས་པ་མེད་པར་ངེས་ཀྱང་ཡོད་པ་མཐོང་བའི་ཕྱིར་སྣང་བ་མི་དམིགས་པ་ཐ་སྙད་དུ་བྱ་བ་ཡིན་ནོ། །དེའི་ཕྱིར་ཤེས་པ་མེད་པའི་ཐ་སྙད་ནི་མངོན་སུམ་གྱིས་བྱས་པ་ཉིད་དོ། །དེས་ན་ཡིན་གྱི། ངེས་པ་ནི་མངོན་སུམ་ཉིད་ཀྱིས་ཡིན་ནོ། །དེའི་ཕྱིར་དག་གིས་འབྲས་བུ་དང་བཅས་པ་ཡིན་ནོ། །ཡང་ན་དངོས་པོ་མེད་པ་སྣང་བ་མི་དམིགས་པས་ཐ་སྙད་དུ་བྱ་བ་ཡིན་གྱི། ངེས་པ་ནི་མངོན་སུམ་ཉིད་ཀྱིས་ཡིན་ནོ། །དེའི་ཕྱིར་དངོས་པོ་མེད་པའི་རྣམ་རྟོག་པས་ཀྱང་འབྲས་བུ་དང་བཅས་པར་བརྗོད་པ་དེ་ལྟར་ན་ཡང་འགལ་བ་མེད་དོ། །དམིགས་པ་མེད་པར་ངེས་པའི་བྱེད་པ་ཉིད་ཀྱིས་ན། དེ་ཡོངས་སུ་གཅོད་པ་དང་ཞེས་བྱ་བ་ལ་སོགས་པ་ཚད་མའི་བྱ་བ་རྣམ་པ་གསུམ་ཡང་རྗེས་སུ་རྟོགས་པར་བྱའོ། །དེ་ལྟར་འགལ་བ་རྣམ་པ་གཉི་ག་ལ་ཡང་འགལ་བ་རྣམ་པར་འཇོག་པའི་རྒྱུ་དངོས་པོ་མེད་པ་ནི་མི་དམིགས་པ་ཉིད་ལས་ཐ་དད་དུ་བྱའོ། །རྣམ་པ་གཉི་ག་ལ་ཡང་ཞེས་ཅིའི་ཕྱིར་བརྗོད། འདི་ལྟར་ལྷན་ཅིག་མི་གནས་པར་འགལ་བ་ལ་ནི་མི་དམིགས་པ་ལས་མེད་པའི་ཐ་སྙད་དུ་འགྱུར་ཏེ། སྣང་བའི་དོན་ལ་དོན་གཞན་འགོག་པའི་ཕྱིར་རོ། །ཕན་ཚུན་སྤངས་ཏེ་གནས་པའི་འགལ་བ་ལ་ནི་ངེས་པའི་ངོ་བོ་གཅིག་དམིགས་པ་ཉིད་ཀྱིས་གཞན་མེད་པའི་ཐ་སྙད་དུ་འགྱུར་རོ། །དེར་ནི་བདག་ཉིད་གཅིག་པར་དགག་པར་བྱ་བ་ཡིན་ལ། དེ་ཡང་གཅིག་གི་ངོ་བོར་དམིགས་པ་ཉིད་ཀྱིས་ནུས་སོ་ཞེ་ན་མི་ནུས་ཏེ། གང་གི་ཕྱིར་ཕན་ཚུན་སྤངས་ཏེ། གནས་པའི་འགལ་བ་དེ་ལ་ཡང་ཅིག་ཤོས་མེད་པའི་ཐ་སྙད་ཀྱི་རྒྱུ་གཅིག་གི་ངོ་བོ་ངེས་པ་དམིགས་པ་ཁྱོད་ཀྱིས་བཤད་པ་གང་ཡིན་པ་གཅིག་དམིགས་པ་དེས་ན་ངོ་བོ་
གཞན་མི་དམིགས་པར་བརྗོད་པ་ཡིན་ཏེ། རང་བཞིན་ངེས་པ་གཅིག་དམིགས་པའི་ཕྱིར་ཡིན་གྱི། དེ་ཡང་སྤངས་པ་ནི་མ་ཡིན་ནོ་ཞེས་བྱ་བའི་དོན་ཏོ། །གདོན་མི་ཟ་བར་འདི་ལྟར་ཤེས་པར་བྱ་དོགས་ཏེ། དེ་ལྟར་མ་ཡིན་ན་ནི་གལ་ཏེ་གཅིག་དམིགས་པས་གཞན་མི་དམིགས་པར་མི་བརྗོད་དོ། །ཅིག་ཤོས་ཀྱི་ངོ་བོ་དམིགས་པ་མི་འགོག་ན་ནི་དེའི་ཚེ། དམིགས་པ་མ་བཀག་པ་ཅན་གང་ཡིན་པ་དེ་མེད་པ་མི་འགྲུབ་པར་འགྱུར་རོ། །དམིགས་པར་དོགས་པ་ན་མེད་དོ་ཞེས་ངེས་པར་ནུས་པ་ནི་མ་ཡིན་ནོ། །དེས་ན་དམིགས་པ་ལ་མ་བཀག་པ་ཅན་མེད་པ་མི་འགྲུབ་པའི་རྒྱུའི་ཕྱིར་གཅིག་དམིགས་པས་གཞན་མི་དམིགས་པར་བརྗོད་པ་ཉིད་དོ། །ཅིག་ཤོས་མེད་པར་ཐེ་ཚོམ་ཟ་བ་ཡིན་ན་ནི་གཅིག་གི་རང་བཞིན་ངེས་པ་དམིགས་པར་ངེས་པ་ནི་མ་ཡིན་ནོ། །དེའི་ཕྱིར་གཅིག་གི་རང་བཞིན་དམིགས་པས་ཅིག་ཤོས་མེད་པར་ངེས་པར་འཕངས་པ་ཡིན་ན་ཅིག་ཤོས་མ་དམིགས་པ་འཕེན་པར་འགྱུར་ཏེ། དམིགས་པ་མ་བཀག་ན་དངོས་པོ་དགག་པར་མི་ནུས་པའི་ཕྱིར་རོ། །གལ་ཏེ་དམིགས་པ་མ་བཀག་པ་ཅན་མེད་པར་མི་འགྲུབ་ན། འོ་ན་དེ་མ་ཐག་པ་ཁོ་ནར་རྣམ་པ་གཅིག་མྱོང་བ་ལས་གཞན་དམིགས་པ་མེད་པའི་ཐ་སྙད་དུ་འགྱུར་རོ་ཞེས་གང་བཤད་པ་དེ་ཅི་ལྟར་ཡིན་ཏེ། དམིགས་པ་མ་བཀག་པ་ཅན་གྱི་དམིགས་པ་ཡང་མེད་པར་མི་འགྲུབ་པའི་ཕྱིར་རྣམ་པ་གཅིག་ཉམས་སུ་མྱོང་བར་མ་གྲུབ་པར་ཐལ་བའི་ཕྱིར་རོ། །དམིགས་པ་བཀག་ན་ཡང་དེ་ཉིད་ལས་མེད་པའི་ཐ་སྙད་ཡིན་གྱི་རྣམ་པ་གཅིག་ཉམས་སུ་མྱོང་བ་ལ་ལས་ནི་མ་ཡིན་ནོ་ཞེ་ན། བདེན་ཏེ། དམིགས་པ་མ་བཀག་པར་ནི་ཤེས་པ་ཡང་དགག་པར་མི་ནུས་སོ། །ཁྱད་པར་ནི་འདི་ཡོད་དོ། །ཤེས་པ་ནི་དམིགས་པ་ལས་རང་བཞིན་གཞན་མ་ཡིན་ཏེ། དེས་ན་མི་དམིགས་པར་ངེས་པ་ཉིད་མེད་པའི་ཐ་སྙད་ཡིན་གྱི། མི་དམིགས་པའི་རྟགས་ལས་འགྱུར་བ་ནི་མ་ཡིན་ནོ། །མི་དམིགས་པར་ངེས་པ་ཡང་མངོན་སུམ་ཉིད་ལས་ཡིན་ནོ། །དེར་ཡང་གང་གིས་སྔ་མ་དང་ཕྱི་མར་སྐྱེ་བར་བསམ་པར་བྱ་བ་རྣམ་པ་གཅིག་དང་གཞན་མེད་པའི་ཐ་སྙད་དག་ཐ་དད་པ་ནི་མ་ཡིན་གྱི། འོན་ཀྱང་རྣམ་པ་གཅིག་ངེས་པ་ཉིད་ཤེས་པ་གཞན་དམིགས་པ་མེད་པར་ངེས་པ་ཡིན་ནོ། །རྣམ་པ་གཅིག་ངེས་པ་དེ་ཡང་མངོན་སུམ་ལས་ཡིན་ཏེ། དེས་ན་ཤེས་པ་གཞན་མེད་པའི་ཐ་སྙད་ནི་མངོན་སུམ་ཉིད་ལས་ཡིན་གྱི། མི་དམིགས་པ་ལས་ནི་མ་ཡིན་ཏེ། རྣམ་པ་གཅིག་
ཏུ་ངེས་པ་ལས་མ་གཏོགས་པའི་ཤེས་པ་དམིགས་པ་མེད་པའི་ཐ་སྙད་མེད་པའི་ཕྱིར་དང༌། དམིགས་པ་དམིགས་པ་མེད་པའི་ཐ་སྙད་ལས་ཀྱང་དམིགས་པ་མེད་པའི་ཐ་སྙད་གཞན་མེད་པའི་ཕྱིར་རོ། །དེས་ན་ཤེས་པ་འགོག་པ་ལ་ཡང་དམིགས་པ་དགག་པར་བྱ་བ་ཡིན་ནོ། །དེ་ལ་མི་དམིགས་པས་ནི་མེད་པའི་ཐ་སྙད་བྱེད་པ་མ་ཡིན་གྱི། འོན་ཀྱང་མངོན་སུམ་ཉིད་ལས་ཡིན་པའི་ཕྱིར་ཉེས་པའི་གོ་སྐབས་མེད་དོ། །དེ་ལྟར་དོན་གཞན་སྒྲུབ་པ་ལ་ཡང་དགག་པའི་གོ་བར་བྱེད་པ་མི་དམིགས་པ་ཡིན་པར་བསྒྲུབས་ནས། དོན་གཞན་དགག་པ་ལ་ཡང་བསྒྲུབ་པའི་ཕྱིར་གཅིག་བཀག་པས་ཞེས་སྨོས་སོ། །གང་དུ་གཅིག་བཀག་པས་གཞན་མེད་པ་སྒྲུབ་པ་དེ་ལ་ནི། མི་དམིགས་པའི་གཏན་ཚིགས་ཀྱིས་རང་བཞིན་དུ་རབ་ཏུ་གྲུབ་པ་ཉིད་དེ། དགག་པ་ནི་མི་དམིགས་པའི་ངོ་བོ་ཉིད་ཡིན་པའི་ཕྱིར་རོ། །དགག་པ་ནི་སྣང་བ་མི་དམིགས་པའི་ངོ་བོ་ཉིད་ཡིན་ལ། དེ་ཡང་གཏན་ཚིགས་སུ་བཀོད་པ་ཡིན་ཏེ། དེས་ན་མི་དམིགས་པ་གོ་བར་བྱེད་པ་ཡིན་པར་གྲུབ་པོ། །དོན་གཞན་བཀག་པས་དོན་གཞན་འགོག་པ་ལ་ཧ་ཅང་ཐལ་བར་ཡང་མི་འགྱུར་ཏེ། གང་གི་ཕྱིར་དོན་གཞན་འགོག་པའི་གཏན་ཚིགས་དེ་ལ་ཡང་གང་ཞིག་བཀག་པ་གཏན་ཚིགས་སུ་འགྱུར་བ་དེ་དགག་པར་བྱ་བའི་རྒྱུ་དང་འབྲས་བུ་དག་གམ་གཉི་ག་མ་ཡིན་པར་འགྱུར་གྲང་ན། གསུམ་པོ་དེ་ལ་རེ་ཞིག་གཉི་ག་མ་ཡིན་པ་མེད་པས་ནི་གཞན་མེད་པར་མི་རིགས་ཏེ། དེ་ནི་མ་འབྲེལ་པའི་ཕྱིར་རོ། །གཉིས་པོ་ཕན་ཚུན་འབྲེལ་ན་ནི་འགོག་པར་བྱེད་པ་ལོག་ན་ཅིག་ཤོས་ལྡོག་པར་འགྱུར་གྱི། གཞན་དུ་ནི་མ་ཡིན་ནོ། །འབྲས་བུ་མ་དམིགས་ཀྱང་རྒྱུ་དེ་མེད་པར་ག་ལ་འགྱུར་ཏེ་མི་འགྱུར་བ་ཉིད་དོ། །གང་གི་ཕྱིར་རྒྱུ་ནི་ངེས་པ་ཁོ་ནར་འབྲས་བུ་དང་འབྲེལ་པར་མ་ཡིན་པའི་ཕྱིར་ཏེ། མེ་ཡོད་ཀྱང་རྒྱུ་གཞན་མེད་པས་དུ་བ་མི་སྐྱེད་པའི་ཕྱིར་རོ། །འདི་བཟློག་པའི་ཕྱིར་བཤད་པ། ནུས་པ་མཐུ་དང་ལྡན་པ་རྒྱུ་ཡིན་གྱི་མི་ནུས་པ་ནི་མ་ཡིན་ཏེ། དེས་ན་གནས་སྐབས་གང་ན་མི་ནུས་པ་མེད་པ་དེའི་ཚེ་ནི་རྒྱུ་མ་ཡིན་ལ། གང་གི་ཚེ་ནུས་པ་དེའི་ཚེ་ནི་སྐྱེད་པར་བྱེད་པ་ཁོ་ན་ཡིན་ནོ། །དེས་ན་གདོན་མི་ཟ་བར་དེ་དང་ལྡན་པ་མ་ཡིན་ནོ་ཞེས་ཅི་སྟེ་བརྗོད། འདི་སྙམ་དུ་ནུས་པ་ཡང་འགའ་ཞིག་གིས་ནུས་པ་འཇོམས་པ་དེའི་ཕྱིར་འབྲས་བུ་མེད་པར་འགྱུར་རོ་ཞེ་ན། ནུས་པ་ལ་ནི་ཞེས་སྨོས་སོ། །གལ་ཏེ་ནུས་པ་ཉེ་བ་ཅན་གྱིས་བོན་ལ་སོགས་པ་ཡང་གང་གི་ཚེ་
བྱ་རོག་ལ་སོགས་པས་ས་བོན་ལ་སོགས་པ་ཟོས་པ་ན་རེས་འགའ་དགག་བྱར་ཡོད་པ་ཡིན་ནོ་ཞེ་ན། ཐ་མི་གནས་སྐབས་ན་ཡོངས་སུ་འགྱུར་བ་མེད་པའི་ཕྱིར་རོ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། ས་བོན་ལ་སོགས་པ་ནི་ཐ་མའི་གནས་སྐབས་ཉིད་ན་ནུས་པ་ཡོད་པ་ཡིན་ལ། དེ་ལ་ནི་ཡོངས་སུ་འགྱུར་བའི་ལྷན་ཅིག་བྱེད་པའི་རྐྱེན་དང་འབྲེལ་པ་ངོ་བོ་ཉིད་གཞན་དུ་གྱུར་པའི་སྐྱེད་པར་བྱེད་པ་མེད་པའི་ཕྱིར་ཏེ། སྐྱེས་མ་ཐག་ཁོ་ནར་འབྲས་བུ་སྐྱེད་པར་བྱེད་པས་གེགས་མེད་པ་ཡིན་ནོ། །གནས་སྐབས་སྔ་མ་རྣམས་སུ་ཡོངས་སུ་འགྱུར་བ་ལ་ལྟོས་པའི་ཕྱིར་ནུས་པ་མེད་པར་འགྱུར་རོ། །འདི་སྙམ་དུ་ཐ་མའི་སྐད་ཅིག་ཉིད་ལ་གེགས་བྱེད་དོ་སྙམ་ན། བཤད་པ་སྐད་ཅིག་གཅིག་ལ་ཆ་ཤས་མེད་པའི་ཕྱིར་ཏེ། གང་གིས་སྔར་ནུས་པ་མེད་པའི་རྒྱུ་འབྲས་བུ་སྐྱེད་པ་ལ་སྡོད་པ་ན་འགའ་ཞིག་གིས་བསྒྲགས་པར་འགྱུར་བ་སྔ་ཕྱི་ནི་ཡོད་པ་མ་ཡིན་ནོ། །དེ་སྐྱེས་པ་ན་བར་མཆོད་པ་ཁོ་ནར་ཅི་ཙམ་དུ་གེགས་བྱེད་པ་ཉེ་བར་གནས་པ་དེ་ཙམ་ཉིད་ན་འབྲས་བུ་སྐྱེས་ཟིན་པའི་ཕྱིར་གང་གིས་གང་ལ་གེགས་བྱ། འདི་སྙམ་དུ་གལ་ཏེ་མཚན་ཉིད་གཅིག་ལ་དབྱེ་བ་མེད་པ་དེ་ལྟ་ན་ཡང་རང་བཞིན་གྱི་ཁྱབ་པ་ཁོ་ནས་གཞན་གེགས་བྱེད་པ་ཉིད་ཡིན་ནོ་སྙམ་ན། བཤད་པ། འབྲས་བུས་སྐྱེད་པ་ལ་མི་མཐུན་པ་བསྐྱེད་པ་སྒྲུབ་པ་ནི་གེགས་གང་ཡིན་པའི་མཚན་ཉིད་ཡིན་ནོ། །གེགས་བྱེད་པ་ནི་ཅུང་ཞིག་བྱེད་པ་ཡིན་ལ། དེ་ཡང་རང་བཞིན་ཁྱད་པར་བྱེད་པ་ཡིན་ནོ། །དེ་ནི་བདག་ཉིད་ཐམས་ཅད་གྲུབ་པ་གཅིག་ལ་མི་འཐད་དེ། དངོས་པོ་ཐ་དད་པ་ནི་རང་བཞིན་ཐ་དད་པའི་མཚན་ཉིད་ཡིན་པའི་ཕྱིར་རོ། །རང་བཞིན་གཞན་བྱེད་པ་ཡིན་ན་ཡང་སྔ་མ་སྐྱེད་པ་མ་ཡིན་པ་ཉིད་དུ་འགྱུར་རོ། །དེ་ལྟ་མ་ཡིན་ཏེ། གལ་ཏེ་དེ་ལྟར་རང་བཞིན་གྱི་ཁྱད་པར་གེགས་སུ་ཁས་མི་ལེན་གྱི། འོན་ཀྱང་ཐ་དད་པའམ་དངོས་པོ་མེད་པ་ཡིན་པ་དེའི་ཚེ་གེགས་བྱེད་པ་ཞེས་བྱ་བ་ཅུང་ཟད་མི་བྱེད་པར་འགྱུར་ལ། ཅུང་ཟད་མི་བྱེད་པ་དེ་ནི་གེགས་ཡིན་པར་མི་འཐད་དེ། ཐུག་པ་མེད་པར་ཐལ་བའི་ཕྱིར་རོ། །དེས་ན་ཅུང་ཟད་མི་བྱེད་པ་ནི་གེགས་མ་ཡིན་པའི་ཕྱིར་རང་བཞིན་གྱི་ཁྱད་པར་ཉིད་གགས་ཡིན་པས། དེ་ཅིའི་ཕྱིར་འབྲས་བུ་མེད་པས་རྒྱུ་མེད་པ་མ་ཡིན་ནོ་ཞེས་བརྗོད་ཅེས་བྱ་བའི་ཕ་རོལ་གྱི་ཚིག་གི་དོགས་པ་འདི་བསུ་ནས་ཁས་བླངས་པའི་ཕྱིར་བཤད་པ། དེ་འདྲ་བའི་རྒྱུ་ནི་མེད་པར་རྟོགས་པར་འགྱུར་བ་ཉིད་དེ་ཞེས་འབྲེལ་ཏོ། །དེ་འདྲ་བའི་ཞེས་བྱ་བ་ནི་སྐད་ཅིག་མ་ཐ་མར་གྱུར་པ་ནུས་པ་ཡོད་
པའོ། །འབྲས་བུ་མེད་པ་ལས་ཏེ་ལྡོག་པ་ལས་སོ། །དཔེར་ན་ཞེས་བྱ་བ་ནི་དཔེ་ཉེ་བར་བསྟན་པའི་དོན་དུའོ། །འདི་ན་ཞེས་བྱ་བའི་ཆོས་ཅན་ནོ། །ཁྱིམ་གྱི་དགར་འདི་ན་དུ་བའི་རྒྱུ་ནུས་པ་ཐོགས་པ་མེད་པ་གང་ཡིན་པ་དེ་མེད་དོ་ཞེས་བྱ་བ་ནི་བསྒྲུབ་པར་བྱའོ། །དུ་བ་མེད་པའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །དངོས་པོ་མེད་པ་སྒྲུབ་པའི་སྦྱོར་བ་འདི་ཡང༌། གང་གི་ཚེ་རྒྱུ་དམིགས་པའི་མཚན་ཉིད་དུ་གྱུར་པ་མ་ཡིན་པ་དེའི་ཚེ་སྦྱར་བར་བྱའོ། །འདི་ལྟར་བླག་བ་མེད་པ་ན་འདུག་པས་དུ་བའི་རྒྱུ་ཁྱིམ་གྱི་དགར་ན་ཡོད་ཀྱང་བལྟ་བར་མི་ནུས་ལ། དེས་བསྐྱེད་པའི་དུ་བ་ཡང་བླག་བ་མེད་པའི་ཡུལ་དེ་ན་འཐུལ་བ་ཡིན་པ་ན་ཁྱིམ་གྱི་དགར་དེ་ཉིད་ཀྱི་དབང་དུ་བྱས་པ་བླག་པ་མེད་པ་ན་འདུག་པས་མཐོང་བའི་སྟེང་གི་ཆ་དང་ལྡན་པ་ཆོས་། །རང་བཞིན་མི་དམིགས་པ་སྒྲུབ་བྱེད་དུ་ཉེ་བར་བླངས་ཏེ། སྣང་བའི་ནམ་མཁའི་ཡུལ་ན་གནས་པའི་དུ་བསྐྱེད་པར་བྱེད་པའི་རྒྱུ་ཁྱིམ་གྱི་དགར་ན་མེད་པར་རྟོགས་པར་བྱེད་དོ། །དེ་ལྟ་བུར་གྱུར་པའི་འབྲས་བུ་དེ་ནི་རྒྱུ་ཁྱབ་པར་བྱེད་པའི་ཁྱབ་པ་དང་ལྡོག་པ་མེད་པ་ལྷག་པ་མེད་པ་ཡིན་པ་དེའི་ཕྱིར་རོ། །ཇི་ལྟར་རྒྱུའི་རང་གི་རང་བཞིན་ནི་ཁྱབ་པར་བྱེད་པ་ཡང་ཡིན་ཏེ། རང་བཞིན་མེད་པར་རྒྱུ་མེད་པའི་ཕྱིར་རོ། །ལྡོག་པ་མེད་ཅིང་ལྷག་པ་མེད་པ་ཡང་ཡིན་པ་དེ་བཞིན་དུ་འབྲས་བུ་ཡང་རྒྱུ་ཁྱབ་པར་བྱེད་པ་དང༌། རྒྱུ་མེད་པར་མི་འཇུག་པས་རྒྱུ་ལས་ལྡོག་པ་མེད་པ་ཡིན་པ་དེའི་ཕྱིར་རང་གི་ལྷག་པ་མེད་པ་ཡིན་པ་དེའི་ཕྱིར་རོ། །ཇི་ལྟར་རྒྱུའི་རང་གི་ཐ་སྙད་བྱེད་དོ། །དེ་ལྟ་བུར་གྱུར་པ་དེ་མི་དམིགས་པ་ནི་རང་བཞིན་མི་དམིགས་པ་ཉིད་དུ་བཤད་དོ། །འབྲས་བུ་མི་དམིགས་པ་ཇི་ལྟ་བ་དེ་བཞིན་དུ་འབྲས་བུ་དེ་དང་འགལ་བ་གང་ཡིན་པ་དེ་དམིགས་པ་ནི་རང་བཞིན་མི་དམིགས་པ་ཉིད་དུ་བཤད་དོ་ཞེས་འབྲེལ་ཏོ། །དེ་ཉིད་ཀྱི་དཔེར་བརྗོད་པའི་ཕྱིར་དཔེར་ན་ཞེས་བྱ་བ་ལ་སོགས་པ་སྨོས་སོ། །དེ་ལ་ཆོས་ཅན་ཁྱད་པར་ཅན་གང་ལ་གྲང་བའི་རྒྱུ་ནི་ཡོད་ཀྱང་རྟོགས་པ་པོའི་མངོན་སུམ་མ་ཡིན་ལ། གྲང་བའི་རེག་པ་ཡང་མི་དམིགས་ཀྱི་རྒྱང་རིང་པོ་ནས་མེ་ནི་སྣང་བའི་ཡུལ་དེ་ལ་འདི་སྦྱོར་བ་ཡིན་ནོ། །དེ་ལ་མེ་མཐོང་བ་ལས་གྲང་བའི་རེག་པ་ལྡོག་ཅིང་དེ་ལས་ཀྱང་དེའི་རྒྱུ་ལྡོག་པའི་ཕྱིར་རོ། །འོ་ན་འབྲས་བུ་ལྡོག་པ་རྒྱུ་མེད་པར་གོ་བར་བྱེད་པ་མ་ཡིན་ནོ་ཞེས་ཅི་སྟེ་བརྗོད་ཅེ་ན། བཤད་པ་རྒྱུའི་རྫས་ཀྱི་སྤྱི་གང་ཞིག་འཇིག་རྟེན་གྱི་ཐ་སྙད་དུ་གྲགས་པ་རྣམ་པ་གཅིག་
ཏུ་འཛིན་པའི་རྒྱུན་གྱི་མཚན་ཉིད་ཀྱི་དབང་དུ་བྱས་ནས་འབྲས་བུ་མི་དམིགས་པ་གོ་བར་བྱེད་པ་མ་ཡིན་པར་བརྗོད་དེ། དཔེར་ན་ཞེས་བྱ་བ་ལ་སོགས་པ་ནི་དེ་དཔེར་བརྗོད་པའོ། །རྒྱུ་མི་དམིགས་པ་ཡང་ཕྱོགས་ཀྱི་བྱེ་བྲག་ལ་ལར་དངོས་པོ་མེད་པ་གོ་བར་བྱེད་པ་ཡིན་ནོ། །དཔེར་ན་མཚོ་ཆེན་པོའི་སྟེང་ན་ཡོད་པའི་རླངས་པ་ལ་ཐག་རིང་པོ་ནས་དུ་བ་ལ་སོགས་པའི་དངོས་པོར་ཐེ་ཚོམ་ཟ་བ་ན་ངེས་པར་བྱ་བའི་ཕྱིར་མེ་མེད་པ་གཏན་ཚིགས་སུ་བྱེད་པ་བཞིན་ཏེ། མཚོ་ཆེན་པོ་མི་གཡོ་བ་དེ་ན་ནི་མེའི་འཛེལ་མ་ཙམ་ཡང་སྣང་བར་གྱུར་བ་མ་ཡིན་ནོ། །དེས་ན་མེ་མེད་པ་ལས་འབྲས་བུ་མེད་པ་སྒྲུབ་པ་ཡིན་ནོ། །རང་བཞིན་མི་དམིགས་པ་ནི་སྔར་བཤད་པའི་ཚུལ་གྱིས་རང་མེད་པ་ཁོ་ན་ཡིན་ཏེ། དེས་དེ་ལ་ནི་དངོས་པོ་མེད་པ་གྲུབ་པ་ནི་མ་ཡིན་ཏེ། འོན་ཀྱང་ཡུལ་ཅན་མེད་པའི་ཐ་སྙད་སྒྲུབ་པར་བཟད་དོ། །རང་བཞིན་མི་དམིགས་པ་འདིའི་ནང་དུ་འབྲས་བུ་མི་དམིགས་པ་དང་འབྲས་བུ་འགལ་བ་མི་དམིགས་པ་དག་རང་ཉིད་སྡུད་པར་འགྱུར་བ་དེས་ན་དེ་དག་ལ་ལ་ཡང་ལྟོས་ནས་མེད་པ་ཡང་ཡིན་ནོ་ཞེས་བཤད་དོ། །དེ་དག་ནི་འབྲས་བུ་མི་དམིགས་པས་མཚོན་པའི་ཕྱིར་དཔེར་བརྗོད་པ་ནི་དེའི་ངོ་བོ་རྒྱུའི་རང་གི་ངོ་བོ་ཁྱབ་པར་བྱེད་པའི་འབྲས་བུ་གང་ཡིན་པའི་འབྲས་བུ་དེ་མེད་པས་ནི་དངོས་པོ་མེད་པ་བསྒྲུབ་པར་བྱ་བ་ཡིན་ནོ། །འདིས་ནི་འབྲས་བུ་འགལ་བ་དམིགས་པ་ཡང་བཤད་དོ། །དེ་བཞིན་དུ་ཁྱབ་པར་བྱེད་པ་མི་དམིགས་པ་ཡང་རང་བཞིན་མི་དམིགས་པའི་ནང་དུ་འདུས་པས་དེ་ཡང་དཔེར་བརྗོད་པའི་དོན་དུ་བཤད་པ། སྨྲ་བ་པོ་གང་གི་ཚེ་ཁྱབ་པར་བྱེད་པའི་ཆོས་ཤིང་ཉིད་མི་དམིགས་པས་ཁྱབ་པར་བྱ་བ་ཤིང་ཤ་པ་མེད་པར་སྨྲ་བ་དེའི་ཚེ་ཡང་དངོས་པོ་མེད་པར་བསྒྲུབ་པར་བྱ་བ་ཡིན་པ་ཉིད་དོ། །གང་གི་ཕྱིར་དེ་ལྟ་ཡིན་པ་དེས་ན་དེ་ལྟར་ཞེས་བཤད་མ་ཐག་པའི་ཚུལ་གྱིས་འགའ་ཞིག་བསྒྲུབ་པ་དང་དགག་པའི་སྒོ་ནས་གཞན་འགའ་ཞིག་འགོག་པ་དང༌། འགོག་པའི་ཐ་སྙད་བསྒྲུབ་པར་བྱ་བ་ལ། ཇི་སྙེད་གོ་བར་བྱེད་པར་བླངས་པ་དེ་ཐམས་ཅད་ནི་མི་དམིགས་པ་ཁོ་ནའི་རང་བཞིན་ཡིན་ནོ། །གང་དུ་འགའ་ཞིག་འགོག་པ་དེ་ཐམས་ཅད་དུ་དགག་པའི་ཐ་སྙད་བསྒྲུབ་པའི་གཏན་ཚིགས་གོ་བར་བྱེད་པ་གཞན་ནི་མེད་དོ། །བསྟན་མ་ཐག་པ་དགག་པ་མེད་པའི་ཐ་སྙད་ཀྱི་ཡུལ་གང་ལ་ཡོད་པའི་མི་དམིགས་པ་དེ་ཡིན་གྱི། ཡོད་པའི་ཐ་སྙད་ཟློག་པའི་འབྲས་བུ་ཅན་གྱི་མི་དམིགས་པ་ནི་འདི་ལྟ་བུ་མ་ཡིན་ནོ་ཞེས་ཁྱད་པར་དུ་སྟོན་པ་ཡིན་ནོ། །སྦྱོར་བ་ནི་སྒྲའི་བྱེད་པའམ་གཏན་ཚིགས་ཀྱི་
བྱེད་པ་ཉིད་དོ། །སྒྲའི་བྱེད་པ་དེའི་བྱེ་བྲག་གིས་སམ། ཡང་ན་སྦྱར་བར་བྱ་བའི་མི་དམིགས་པ་དེའི་བྱེད་པའི་བྱེ་བྲག་གིས་རྣམ་པ་བཞིར་འགྱུར་ཏེ། འདི་ལྟར་དེ་ནི་རེས་འགའ་དོན་གཞན་སྒྲུབ་པའི་སྒོ་ནས་འཇུག་ལ། དོན་གཞན་དགག་པའི་སྒོ་ནས་ཀྱང་འཇུག་པའི་ཕྱིར་རྣམ་པ་བཞིའོ། །དེ་ཉིད་ཀྱི་དཔེར་བརྗོད་པ་ནི་འགལ་བ་སྒྲུབ་པའོ། །ཅི་ལྟ་བུ་ཞེ་ན། དཔེར་ན་འདི་ན་གྲང་བའི་རེག་པ་མེད་དེ། མེ་ཡོད་པའི་ཕྱིར་རོ་ཞེས་སྨོས་སོ། །དངོས་པོ་མེད་པའི་སྦྱོར་བ་འདི་ཡང་ཡུལ་གང་ལ་སྦྱར་བར་བྱ་བ་དེ་ནི་བསྟན་ཟིན་ཏོ། །འདིས་ནི་ཞེས་བྱ་བས་ནི་ཁྱབ་པར་བྱེད་པ་འགལ་བ་ཡང་འགལ་བ་གྲུབ་བའི་ནང་དུ་འདུས་པར་སྟོན་ཏེ་དཔེར་བརྗོད་པ་ཡང་བ་མོའི་རིག་པ་མེད་དོ་ཞེས་བྱ་བ་ནི་བསྒྲུབ་པར་བྱའོ། །མེ་ཡོད་པའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །བ་མོའི་རིག་པ་མངོན་སུམ་ཡིན་པ་དང་གྲང་བའི་རིག་པའི་རང་གི་ངོ་བོ་ཡང་མི་དམིགས་ཀྱི་མེ་ནི་མངོན་སུམ་ཉིད་ཡིན་ཏེ། དེས་ནི་གྲང་བའི་རེག་པ་ལྡོག་ལ་དེ་ལ་ལོག་ན་བ་མོའི་རིག་པ་ཡང་ལྡོག་པའི་ཕྱིར་རོ། །འདི་ནི་འགལ་བ་གྲུབ་པ་ཉིད་ཀྱི་ནང་དུ་འདུས་པ་ཡིན་ནོ། །འགལ་བའི་འབྲས་བུ་དེ་གྲུབ་པ་ནི་རྣམ་པ་གཉིས་པའོ། །གང་དུ་གྲང་བའི་རེག་པ་དང་མེ་ལྐོག་ཏུ་གྱུར་པ་དེར་དུ་བ་ཡོད་པའི་ཕྱིར་རོ་ཞེས་འདི་གཏན་ཚིགས་སུ་ལེན་པ་ཡིན་ཏེ། ཡུལ་དེ་ལ་དངོས་པོ་མེད་པའི་སྒྲུབ་པ་འདི་སྦྱོར་རོ། །འདི་གཉིས་ནི་སྒྲུབ་པའི་རྣམ་པ་ཡིན་ནོ། །གསུམ་པ་དགག་པའི་རྣམ་པ་བསྟན་པའི་ཕྱིར། བཤད་པ་རྒྱུ་མ་གྲུབ་པའི་དཔེར་བརྗོད་པ་སྟོན་པར་བྱེད་པ་ནི་དཔེར་ན་ཞེས་བྱ་བ་ལ་སོགས་པ་ཡིན་ནོ། །ཡུལ་གང་ལ་འདི་ལ་སྦྱར་བར་བྱ་བ་དེ་ནི་བསྟན་ཟིན་ཏོ། །མི་དམིགས་པ་བཞི་བའི་རྣམ་པ་སྟོན་པ་ནི་རང་བཞིན་མ་གྲུབ་པ་ནི་དཔེར་ན་ཞེས་དཔེར་བརྗོད་དོ། །འདི་ན་ཞེས་བྱ་བ་ནི་ཆོས་ཅན་ནོ་ཞེས་བྱ་བ་ལ་སོགས་པ་སྦྱར་བར་བྱའོ། །ད་ནི་སྦྱོར་བ་གཞན་རང་བཞིན་མི་དམིགས་པ་འདི་ཉིད་ཀྱི་ནང་དུ་འདུས་པ་སྟོན་པ་ནི་འདིས་ནི་ཞེས་བྱ་བ་ལ་སོགས་པ་ཡིན་ནོ། །ཤིང་ཤ་པའི་ཁྱབ་པར་བྱེད་པའི་ཆོས་ཀྱི་རང་བཞིན་ཤིང་ཉིད་དེ། དེ་མ་གྲུབ་པ་ཡང་འདི་ཉིད་ཀྱིས་བཤད་པར་བལྟའོ། །དཔེར་ན་ཞེས་བྱ་བ་ནི་དཔེར་བརྗོད་བའོ། །དངོས་པོ་མེད་པ་སྒྲུབ་པའི་སྦྱོར་བ་འདི་ཡང་གང་གི་ཚེ་རི་མཐོན་པོ་གཉིས་ལ་གཅིག་ལ་ནི་ཤིང་གི་ཚོགས་མཐོང་ལ་དེའི་ཤིང་གི་ཁྱད་པར་མི་རྟོགས་པ་ན་རི་གཉིས་པ་དེ་ལ་ཤིང་ཤ་པ་མེད་པར་ངེས་པར་མི་ནུས་ཏེ།
ཤིང་ཤ་པ་ནི་སྣང་དུ་མི་རུང་བའི་ཕྱིར་རོ། །ཤིང་ནི་དམིགས་པའི་མཚན་ཉིད་དུ་གྱུར་བ་ཡིན་པའི་ཕྱིར་དེ་མེད་པར་ངེས་ནུས་པ་དེའི་ཚེ་བལྟ་བར་བྱ་སྟེ། དེས་ན་ཁྱབ་པར་བྱེད་པ་མེད་པས་ཁྱབ་པར་བྱ་བ་ལ་ལྡོག་པ་ཡིན་ནོ། །དངོས་པོ་མེད་པ་སྒྲུབ་པའི་སྦྱོར་བ་འདི་ཐམས་ཅད་ནི་སྣང་བ་མི་དམིགས་པའི་ཡུལ་ལས་གཞན་དུ་རིག་པར་བྱ་སྟེ། སྣང་བ་མི་དམིགས་པའི་ཡུལ་ལ་ནི་དངོས་པོ་མེད་པ་གྲུབ་ཟིན་པའི་ཕྱིར་རོ། །ཡུལ་ཡང་དཔེ་བརྗོད་པ་དག་ཏུ་ཅི་ལྟ་ཅི་ལྟར་བསྟན་ཟིན་པ་བཞིན་ནོ། །ཐ་སྙད་སྒྲུབ་བ་ལ་ནི་ཁྱད་པར་མེད་པ་ཞེས་བྱ་བར་རིགས་སོ། །གལ་ཏེ་རང་བཞིན་མི་དམིགས་པ་ཁོ་ན་ལ་སྣང་དུ་རུང་བ་དགག་པར་བྱ་བ་ཡིན་གྱི། མི་དམིག་པའི་སྦྱོར་བ་གསུམ་པོ་དག་ལ་དགག་བྱ་སྣང་དུ་མི་རུང་བ་མ་ཡིན་ནམ། འགལ་བའམ། དེའི་འབྲས་བུ་ལ་ནི་འགལ་བའི་དོན་སྣང་དུ་མི་རུང་བ་ཡིན་ལ། རྒྱུ་མེད་པ་ལ་ཡང་འབྲས་བུ་སྣང་དུ་མི་རུང་བ་དགག་པར་བྱ་བ་ཡིན་ཏེ་སྣང་དུ་རུང་བ་ཉིད་ཡིན་ན་ནི་རང་བཞིན་མི་དམིགས་པ་ཉིད་རབ་ཏུ་སྦྱོར་བའི་ཕྱིར་རོ། །སྣང་དུ་མི་རུང་བ་འགོག་པ་ཡང་སྣང་བ་མི་དམིགས་པ་མ་ཡིན་ན། དེ་ཅི་ལྟར་སྦྱོར་བ་བཞི་ཀ་ལ་སྣང་བ་མི་དམིགས་པ་ཉིད་གོ་བར་བྱེད་པ་ཡིན་ཞེ་ན། གལ་ཏེ་འགའ་ཞིག་ཏུ་དགག་བྱ་སྣང་དུ་མི་རུང་བ་ཉིད་ཡིན་ན་ནི། ཐམས་ཅད་དུ་སྣང་བ་མི་དམིགས་པ་ཉིད་གོ་བར་བྱེད་པ་ཡིན་པར་མི་འགྱུར་ན། མེད་པ་དང་ཐ་སྙད་སྒྲུབ་པའི་མི་དམིགས་པ་འདི་ཐམས་ཅད་ལ་ཡང་གང་ཞིག་འགོག་པ་དེ་དང་ནི་མི་དམིགས་པར་རིག་པར་བྱའོ། །རང་བཞིན་ཅི་ལྟ་བུ་ཞིག་ཅེ་ན། སྣང་བའི་དོན་ལས་གཞན་དུ་གྱུར་པའི་དམིགས་པའི་རྒྱུ་རྣམས། གང་ཞིག་མི་དམིགས་པ་ན་ཡོད་པ་སྟེ་དེ་འདྲ་བའོ། །དམིགས་པའི་མཚན་ཉིད་ཀྱིར་གྱུར་པའི་མི་དམིགས་པར་རིག་པར་བྱའོ་ཞེས་བྱ་བའི་དོན་ཏོ། །འདིར་འབའ་ཞིག་ཏུ་ནི་མ་ཟད་ཀྱི་འོན་ཀྱང་དམིགས་པར་ཡང་རིག་པར་བྱའོ། །གང་དག་ཅེ་ན། དེ་དག་དང་དེ་དང་འགལ་བ་དག་གོ །གསུམ་པ་རྒྱུ་མི་དམིགས་པའི་དཔེར་བརྗོད་པ་ལ་ནི་དགག་པར་བྱ་བ་འབྲས་བུའི་ཁྱད་པར་རྣམས་དེ་དག་ཅེས་བྱ་བས་སྟོན་པར་བྱེད་པ་ཡིན་ལ། འགལ་བའི་དཔེར་བརྗོད་པ་གཉིས་པོ་དག་ལ་ནི་དགག་པར་བྱ་བ་འགལ་ཟླ་དག་དེ་དག་ལས་འགལ་བ་ཞེས་བྱ་བས་བརྗོད་པར་བྱ་བ་ཡིན་ནོ། །དེ་དག་ཅེས་བྱ་བ་སྦྱར་བ་ནི་འགལ་བ་དང་དེའི་འབྲས་བུ་དག་བརྗོད་པ་ཡིན་ནོ། །གལ་ཏེ་འགལ་བའི་འབྲས་བུ་དམིགས་པའི་སྦྱོར་བ་ལ། དགག་བྱ་རྒྱུ་དང་
འགལ་བ་ཡིན་གྱི་འབྲས་བུ་དང་ནི་མ་ཡིན་ན། དེ་ཇི་ལྟར་ན་དེ་དག་དང་འགལ་བའི་སྒྲ་དགག་བྱ་ལ་བརྗོད་ཅེ་ན། བརྒྱུད་པ་སྟེ་དེའི་རྒྱུ་དང་འགལ་བའི་ཕྱིར་དེ་ཡང་འགལ་བར་བརྗོད་པས་ཉེས་བ་མེད་དོ། །དམིགས་པ་དང་སྣང་བ་མི་དམིགས་པ་དག་ནི་སྣང་དུ་མི་རུང་བ་ལ་ནི་མེད་དོ། །དེས་བལྟར་རུང་བའི་ཞེས་སྨོས་སོ། །དེ་དག་དང་འགལ་བ་བལྟར་རུང་བ་དག་ཁོ་ན་དེ་ལྟར་གྱུར་བར་རིག་པར་བྱའོ། །གཞན་དག་ནི་མ་ཡིན་ནོ་ཞེས་བྱ་བའི་དོན་ཏོ། །དེའི་དོན་ནི་འདི་ཡིན་ཏེ་བལྟར་རུང་བ་ཁོ་ནའི་འབྲས་བུ་དང་རང་བཞིན་དང་འགལ་བ་དང་རྒྱུ་དང་འགལ་བ་དག་ཁོ་ན་དགག་པ་ཡིན་གྱི། བལྟར་མི་རུང་བ་ནི་དགག་བྱ་མ་ཡིན་ཏེ། གང་གི་ཕྱིར་སྣང་དུ་རུང་བ་དག་ཁོ་ན་དམིགས་པ་དང་སྣང་བ་མི་དམིགས་པར་སྲིད་པ་དེས་ན་སྣང་དུ་མི་རུང་བ་ནི་དགག་བྱ་མ་ཡིན་ནོ་ཞེས་བྱ་བ་ཡིན་ནོ། །གང་དག་བལྟར་རུང་བའི་དེ་དག་མ་གྲུབ་པ་དང༌། བལྟར་རུང་བའི་དེ་དག་དང་འགལ་བ་དག་གྲུབ་པ་ཞེས་ཅི་རིགས་པར་འབྲེལ་པར་བྱེད་པ་དེ་དག་གི་ལྟར་ན་ཁྱད་པར་དོན་མེད་དེ་གཞན་ནི་དམིགས་པར་མི་འཐད་པས་སྣང་དུ་རུང་བ་ཁོ་ན་དམིགས་པ་ཡིན་པའི་ཕྱིར་རོ། །གང་ལས་སྣང་དུ་རུང་བ་དག་ཁོ་ན་དགག་པར་བྱ་བར་རྟོགས་པར་འགྱུར་བ་མེད་པ་སྒྲུབ་པའི་མི་དམིགས་པ་ཐམས་ཅད་ལ་དགག་པར་བྱ་བ་མི་དམིགས་པ་དང་སྣང་བ་མི་དམིགས་པ་དང་ལྡན་པ་ཁོ་ནར་རིགས་པར་བྱ་བའི་ངེས་པ་འདི་ཉིད་ག་ལས་ཤེ་ན། དོན་གྱི་ཤུགས་ཀྱིས་སོ། །དེ་ཡང་གང་ཞེ་ན། གཞན་དག་ལ་ནི་ཞེས་བྱ་བ་སྨོས་སོ། །དམིགས་པ་དང་བལྟར་རུང་བ་མི་དམིགས་པ་དང་བྲལ་བ་དག་ལ་ནི་རྒྱུ་དང་འབྲས་བུ་ཡོད་པ་དང་མེད་པ་དང་འགལ་བ་དེ་དག་མི་འགྲུབ་པའི་ཕྱིར་རོ། །གང་དག་དམིགས་པ་དང་བལྟར་རུང་བ་མི་དམིགས་པ་དང་ལྡན་པ་མ་ཡིན་པ་དེ་དག་ལ་ནི་འདི་གསུམ་ཀ་ཡང་མི་འགྲུབ་བོ། །འདི་ལྟར་ཡོད་པ་དག་གཞན་ཡོད་ན་མེད་པའི་ཕྱིར་ནི་འགལ་བར་རྟོགས་ལ། ཡོང་པ་དག་ཉིད་གཞན་མེད་ན་མེད་པ་ལས་ནི་རྒྱུ་དང་འབྲས་བུའི་དངོས་པོར་རྟོགས་སོ། །འགལ་བ་དང་རྒྱུ་དང་འབྲས་དུ་རྣམ་པར་འཇོག་པའི་རྒྱུ་ཡོད་པ་དང་མེད་པར་ངེས་པ་ཡང་མཐོང་བ་དང་བལྟར་རུང་བ་མི་དམིགས་བའི་རྒྱུ་མཚན་ཅན་ཡིན་ཏེ། དེའི་ཕྱིར་མཐོང་བ་དང་བལྟར་རུང་བ་མི་དམིགས་པ་དང་ལྡན་པ་ཡོད་པ་དང་མེད་པ་ངེས་པ་དག་ཁ་ན་འགལ་བ་དང་རྒྱུ་དང་འབྲས་བུར་གྲུབ་པ་ཡིན་ལ། དེ་འདྲ་བ་དག་ཀྱང་བལྟར་རུང་བའི་བདག་ཉིད་ཡིན་ནོ། །དེ་བཞིན་དུ་དངོས་པོ་
མེད་པ་ཡང་གཉི་ག་ལས་གྲུབ་པ་ཡིན་ལ། གཉི་ག་ཡང་བལྟར་རུང་བ་ཁོ་ན་ཡིན་ནོ། །དེའི་ཕྱིར་འདིས་ནི་ཁྱབ་བར་བྱེད་པ་མི་དམིགས་པ་ལ་ཁྱབ་བྱ་བལྟར་རུང་བ་ཁོ་ན་མེད་པ་ཡིན་ནོ་ཞེས་བྱ་བའི་དོན་འདི་བཤད་པར་རིག་པར་བྱའོ། །འདི་ལྟར་རིམ་དང་རིམ་མ་ཡིན་པ་མི་དམིགས་ན་ཡང་ཡོད་པ་ཉིད་དང༌། ཤིང་མེད་ན་ཤིང་ཤ་པ་མེད་པར་གྲུབ་པས་ཆོས་གཉིས་ཁྱབ་བྱ་ཁྱབ་བྱེད་དུ་གྲུབ་ལ། དེ་མེད་པར་གྲུབ་པ་ཡང་སྣང་བ་དང་སྣང་བ་མི་དམིགས་པ་དང་ལྡན་པ་ཡིན་ཏེ། དེས་ན་ཁྱབ་བྱ་བལྟར་རུང་བ་ཉིད་དུ་རྟོགས་སོ། །འདི་སྐད་བརྗོད་པ་ཡིན་ཏེ། གལ་ཏེ་སྦྱོར་བའི་དུས་ན་དགག་བྱ་བལྟར་མི་རུང་བ་དེ་ལྟ་ན་ཡང༌། འགལ་བ་དང་རྒྱུ་དང་འབྲས་བུའི་དངོས་པོ་དང་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་འཛིན་པའི་དུས་ན་ཡོད་པའི་སྣང་བ་མི་དམིགས་པ་འབྲས་བུ་དང་ཁྱབ་བྱ་མེད་པའི་ཡུལ་ཅན་གང་ཡིན་པ་དེ་ཉིད་ལས་དངོས་པོ་མེད་པར་ངེས་པ་ཡིན་ཏེ། དེ་སྦྱོར་བའི་དུས་སུ་མ་དྲན་ན་ནི་འགལ་བ་དང་རྒྱུ་དང་འབྲས་བུ་དང་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་རྟོགས་པ་ཉིད་དུ་མི་འགྱུར་ན་འགལ་བ་མཐོང་བ་དང་རྒྱུ་མེད་པ་དང་ཁྱབ་པར་བྱེད་པ་མེད་པ་ལས་ཅིག་ཤོས་མེད་པར་རྟོགས་པར་ལྟ་ག་ལ་འགྱུར། འགལ་བ་དང་ཁྱབ་པར་བྱ་བ་དང་ཁྱབ་པར་བྱེད་པ་དང་རྒྱུ་དང་འབྲས་བུར་རྟོགས་པའི་དོན་ལ་མི་དམིགས་པའི་རྗེས་སུ་འབྲངས་པ་ན་ནི། དེ་ཉིད་ཀྱིས་ཅིག་ཤོས་མེད་པ་རྟོགས་པར་འགྱུར་གྱི། འགལ་བཙམ་རྒྱུ་དང་ཁྱབ་པར་བྱེད་པ་མེད་པ་ཙམ་གྱིས་ནི་མ་ཡིན་ནོ། །དེས་ན་དེ་ལྟར་མེད་པའི་ཐ་སྙད་བསྒྲུབ་པའི་མི་དམིགས་པ་འདི་ཐམས་ཅད་ལ་ཡང་ཞེས་བྱ་བ་ལ་སོགས་པས་སྦྱོར་བ་ཐམས་ཅད་སྣང་བ་མི་དམིགས་པའི་ནང་དུ་འདུས་པར་བཤད་པ་ཡིན་ནོ། །ཇི་སྐད་དུ། རྣམ་འགྲེལ་ལས། གཞན་དུ་ཆོས་གཅིག་ཡོད་བརྗོད་པས། །གཞན་མེད་དེ་ཉིད་གང་གིས་རྟོགས། །གལ་ཏེ་འགལ་ལས་ཡིན་དེ་ཡང༌། །ཅིས་གྲུབ། ལྷན་ཅིག་མི་གནས་བའི་ཕྱིར་ཞེ་ན། དེ་གང་ལས་འདོད། སྣང་བ་མཐོང་མེད་ཕྱིར་ཞེ་ན། དེ་ནི་མཚན་ཉིད་མ་ཡིན་ཞེས་བཤད་ནས། ཐ་མར། ཐམས་ཅད་དུ་ནི་སྦྱོར་བ་ཉིད། །ཐ་དད་དོན་ལ་ཐ་དད་མེད། །ཅེས་བཤད་པ་ཡིན་ནོ། དགག་པ་གང་ཇི་སྙེད་པ་ནི་མི་དམིགས་པ་ལས་ཡིན་ནོ་ཞེས་བྱ་བ་ནས་བརྩམས་ནས། གོ་བར་བྱེད་པ་ཐམས་ཅད་ནི་མི་དམིགས་པའི་རང་བཞིན་ཡིན་ནོ་ཞེས་བྱ་བ་འདིའི་མཐར་ཐུག་པའི་གཞུང་གིས་དགག་པ་ཐམས་ཅད་ནི་
མི་དམིགས་པ་སྔོན་དུ་འགྲོ་བ་ཅན་ཡིན་ནོ་ཞེས་བྱ་བའི་དོན་འདི་བརྗོད་པ་ཡིན་ནོ། །རྣམ་འགྲེལ་ལས། ཚད་མས་གྲུབ་པར་སྨྲ་རྣམས་ཀྱི། །དོན་གྱིས་ཟློག་པ་ཉིད་ལས་ཡིན། །ཞེས་བཤད་དོ། །བཤད་ཟིན་པ་དེ་ཉིད་དོན་བསྡུས་པའི་ཕྱིར་བཤད་པ། སྣང་བ་མཐོང་བ་མེད་པ་དང༌། །དངོས་པོ་མི་དམིགས་པ་ལ་ནི། །རྒྱུ་མི་སྲིད་པར་གྱུར་པ་ན། །དངོས་པོ་མེད་པ་དགག་པ་རྟོགས་པར་འགྱུར་རོ། །དེ་ལ་རང་བཞིན་མི་དམིགས་པ་དང་ཕན་ཚུན་སྤངས་ཏེ་གནས་པའི་མཚན་ཉིད་ཀྱི་འགལ་བའི་སྦྱོར་བ་ལ་ནི་སྣང་བ་མཐོང་བ་མེད་པ་ཡིན་ནོ། །འདི་ལྟར་དེ་ལ་དངོས་པོ་གཅིག་སྣང་བ་ན་རང་བཞིན་གཞན་སྣང་བ་ཉིད་དུ་ཁས་བླངས་བའི་མཐོང་བ་མེད་པ་ཡིན་ཏེ། སྔར་ཇི་སྐད་བསྟན་པ་བཞིན་ནོ། །རྒྱུ་མི་དམིགས་པ་དང་ལྷན་ཅིག་མི་གནས་པའི་འགལ་བ་ལ་ནི་རྒྱུ་མི་སྲིད་པ་ཡིན་ཏེ། འདི་ལྟར་འགལ་བའི་མེས་ཀྱང་རྒྱུ་བཟློག་པའི་སྒོ་ནས་གྲང་བའི་རེག་པ་བཟློག་པ་ཡིན་ནོ་ཞེས་སྔར་བསྟན་ཟིན་ཏོ། །དེའི་ཕྱིར་དེ་ལྟར་ཚིགས་སུ་བཅད་པ་འདི་ནི་སྔར་བཤད་པའི་དོན་མཐའ་དག་སྡུད་པའི་ཚིགས་སུ་བཅད་པ་ཡིན་ནོ། །གལ་ཏེ་འགལ་བའི་འབྲས་བུ་དེ་དམིགས་པས་ཀྱང་འགལ་བ་ཅིག་ཤོས་མེད་པར་ངེས་ན། འགལ་བ་དེའི་རྒྱུ་དམིགས་པས་ཀྱང་མེད་པར་ཅི་སྟེ་མ་ངེས། རྒྱུས་ཀྱང་འབྲས་བུ་གདོན་མི་ཟ་བར་ཉེ་བར་འཇོག་གོ་སྙམ་དུ་བསམས་པའོ། །དེ་ལྟར་ནི་མ་ཡིན་ཏེ། རྒྱུ་དེ་ནི་འཁྲུལ་པའི་ཕྱིར་རོ། །རྒྱུ་ནི་འབྲས་བུ་ལ་འཁྲུལ་པ་ཡིན་ནོ་ཞེས་དཔེར་བརྗོད་པ་ནི་དཔེར་ན་འདི་ན་གྲང་བའི་རེག་པ་མེད་དེ། ཤིང་ཡོད་པའི་ཕྱིར་ཏེ། ཤིང་མཐོང་བའི་ཕྱིར་རོ་ཞེས་བྱ་བ་དེ་ལྟ་བུའི་རྒྱུ་དེ་དམིགས་པ་ནི་འབྲས་བུའི་གོ་བར་བྱེད་པ་མ་ཡིན་ཏེ། རྩོམ་པར་མ་ངེས་པས་སོ། །དེས་ན་གང་དུ་གྲང་བ་བཟློག་པར་བྱ་བ་གྲང་བ་ཟློག་པའི་མེ་གདོན་མི་ཟ་བར་འགྱུར་བ་ནི་མ་ཡིན་ནོ། །ཐ་མའི་གནས་སྐབས་ཀྱི་ཁྱད་པར་གྱི་སྐད་ཅིག་མ་ལ་ནི་འཁྲུལ་པ་མེད་དོ། དེས་ན་དེ་ལས་འབྲས་བུ་རྗེས་སུ་དཔག་གོ་ཞེས་དོགས་ན་མ་ཡིན་ཏེ་ཞེས་འགོག་པར་བྱེད་དོ། །སྐད་ཅིག་མ་ཐ་མར་གྱུར་པའི་རྒྱུས་ནི་འབྲས་བུ་རྗེས་སུ་དཔག་པ་མ་ཡིན་ནོ། །ཅིའི་ཕྱིར་ཞེ་ན། བཤད་པ། མཐའི་སྐད་ཅིག་དེ་ལས་འབྲས་བུ་སྐྱེ་བ་གང་ཡིན་པ་དེ་ནི་སྡོད་པ་དུས་འགོར་བ་སྟེ། དེ་མེད་པའི་ཕྱིར་རོ། །མདོར་བསྟན་པའི་ཚིག་དེ་ཉིད་རྒྱས་པར་རྣམ་པར་དགྲོལ་བའི་ཕྱིར་མཐའི་སྐད་ཅིག་གི་བར་དུ་ནི་ཞེས་སྨོས་སོ། །འདི་ལ་རྒྱུའི་རྒྱུན་གྱི་མཐའི་སྐད་ཅིག་ལས་སྔོན་རོལ་གྱི་སྐད་ཅིག་གང་ཡིན་པ་དེ་དག་ལ་ནི་འབྲས་
བུ་སྐྱེད་པ་ལ་གེགས་བྱེད་པ་སྲིད་དེ། དེས་ན་དེ་དག་ལས་འབྲས་བུ་རྗེས་སུ་མི་དཔོག་གོ །མཐའི་སྐད་ཅིག་ལ་ནི་རྣམ་པར་དབྱེར་མེད་པའི་ཕྱིར་གེགས་མེད་དེ། དེས་ན་དེ་ཁོ་ན་ལས་འབྲས་བུ་རྗེས་སུ་དཔོག་གོ །དེས་ན་མཐའི་སྐད་ཅིག་དེ་ཉིད་ནི་རྟགས་ཡིན་ལ། དེའི་མཐོང་བ་དེ་ལས་རྗེས་སུ་དཔག་པར་བྱ་བ་རྟོགས་པ་སྐྱེའོ། །ཁྱད་པར་ཅི་ལྟ་བུ་ཅན་ཞིག་ལས་ཤེ་ན། འབྲེལ་པ་དྲན་པ་ནི་རྗེས་སུ་དྲན་པ་སྟེ། དེ་ལ་ལྟོས་པའི་མཐོང་བ་གང་ཡིན་པ་ལས་སོ། །འདི་སྐད་བཤད་པ་ཡིན་ཏེ། སྐད་ཅིག་ཐ་མའི་རྒྱུ་ཡོད་ན་མཐོང་བ་སྐྱེ་ལ། མཐོང་བའི་འོག་ཏུ་ནི་རྟགས་དང་རྟགས་ཅན་གྱི་འབྲེལ་པ་དྲན་ནོ། །དྲན་པས་པར་དུ་ཆོད་པའི་རྟགས་མཐོང་བ་ལས་ནི་རྗེས་སུ་དཔག་བར་བྱ་བ་རྟོགས་ཏེ། དེས་ན་དང་པོར་རྒྱུ་སྐད་ཅིག་གཉིས་པ་ལ་མཐོང་བ། མཐོང་བའི་དུས་དེ་ཉིད་དུ་སྐྱེས་པའི་འབྲས་བུ་མངོན་སུམ་ཡིན་པའི་ཕྱིར་འབྲེལ་བ་དྲན་པ་བས་ཀྱང་སྔ་བར་འགྱུར་རོ། །འདི་ཉིད་སྟོན་པ་ནི་མཐའི་སྐད་ཅིག་དང་ཞེས་བྱ་བ་ལ་སོགས་པ་ཡིན་ནོ། །རྟགས་མཐོང་ཞིང་འབྲེལ་པ་ཡང་དྲན་པ་ན་རྗེས་སུ་དཔག་པ་འཇུག་པ་གང་ཡིན་པ་འདི་ནི་ངེས་པ་ཡིན་ཏེ། འབྲེལ་པ་དྲན་པ་ལ་མི་ལྟོས་པར་རྟགས་འབའ་ཞིག་གམ་མཐོང་བ་ལས་ཀྱང་ནི་མ་ཡིན་ནོ་ཞེས་བཤད་པར་འགྱུར་རོ། །འདི་སྙམ་དུ་དཔེར་ན་མེ་མངོན་སུམ་པ་ལ་རྗེས་སུ་དཔོག་པ་མ་ཡིན་པ་དེ་བཞིན་དུ། འབྲས་བུ་མངོན་སུམ་པ་ལ་ནི་རྗེས་སུ་མི་དཔོག་གི །ལྐོག་ཏུ་གྱུར་པ་ལ་ནི་རྗེས་སུ་དཔོག་པར་འགྱུར་རོ་སྙམ་ན། གང་གི་ཞེས་བྱ་བ་ལ་སོགས་པ་སྨོས་ཏེ། འབྲས་བུ་མངོན་སུམ་མ་ཡིན་པ་གང་ཡིན་པ་དེ་ལ་ནི་མངོན་སུམ་དང་མི་དམིགས་པས་བསྒྲུབ་པར་བྱ་བའི་རྒྱུ་དང་འབྲས་བུའི་དངོས་པོ་ངེས་པར་མི་འགྱུར་རོ། །གལ་ཏེ་ཡང་མེ་དང་དུ་བ་དག་རྒྱུ་དང་འབྲས་བུའི་དངོས་པོར་མཐོང་བ་ཡིན་པ་དེ་ལྟ་ན་ཡང༌། ཇི་སྲིད་འབྲས་བུ་མ་མཐོང་བ་དེ་སྲིད་དུ་ནི་མཐའ་ཉིད་དུ་ཡང་ངེས་པ་མི་ནུས་ན་རྒྱུ་ལྟ་ཅི་སྨོས། འདི་ལྟར་སྐད་ཅིག་ནི་རེ་ཞིག་ཚུ་རོལ་མཐོང་བས་རྣམ་པར་དབྱེ་བར་ནུས་བ་ཡིན་པ་ཉིད་ཡིན། དེའི་ནུས་པ་རྣམ་པར་དབྱེ་བ་ལྟ་སྨོས་ཀྱང་ཅི་དགོས། འབྲས་བུ་སྣང་བ་ཡིན་ན་ནི་གང་གི་ཕྱིར་འབྲས་བུ་སྐྱེས་པའི་ཕྱིར་འདི་ནི་འདིའི་གནས་སྐབས་ཐ་མ་ཡིན་ནོ་ཞེས་ངེས་པར་ནུས་ཀྱི། འབྲས་བུ་མེད་བར་ན་ངེས་པ་མེད་དོ་ཞེས་འཆད་པ་ནི་འབྲས་བུ་མངོན་སུམ་མ་ཡིན་པ་ལ་ནི་རྒྱུའི་དངོས་བོར་རྟོགས་པ་མེད་
དོ་ཞེས་བྱ་བའོ། །དེའི་ཕྱིར་སྐད་ཅིག་མའི་རྒྱུ་ལས་འབྲས་བུ་མི་འགྲུབ་པོ། །གལ་ཏེ་དངོས་པོ་མཐོང་བ་རང་གི་འབྲས་བུ་དང་འགལ་བ་ཟློག་པར་བྱེད་པ་མ་ཡིན་ན། འོན་ནི་མེ་ཡང་རང་གི་འབྲས་བུ་ལུས་ཡོངས་སུ་གདུང་བའི་འགལ་ཟླ་གྲང་བའི་རེག་པས་བྱས་པའི་ཡུལ་ལ་ཞེས་བྱེད་པ་ལ་སོགས་པ་ལྡོག་པའི་གོ་བར་བྱེད་པར་མི་འགྱུར་ན། འདོད་པ་ཡང་ཡིན་ནོ། །དེས་ན་ཇི་ལྟར་ཡིན་ཞེ་ན། རྒྱུ་མཚན་དག་འགལ་བ་ནི་ཞེས་བྱ་བ་ལ་སོགས་པ་སྨོས་སོ། །འདིས་ནི་འདི་སྐད་བརྗོད་པ་ཡིན་ཏེ། རྒྱུ་ནི་གཞན་དང་འགལ་བའི་འབྲས་བུ་ཉེ་བར་འཇོག་པས་འགལ་ཟླ་ཅིག་ཤོས་ཟློག་པ་ནི་མ་ཡིན་གྱི། འོན་ཀྱང་འགལ་ཟླའི་རྒྱུ་གང་ཡིན་པ་དེ་ཟློག་པར་བྱེད་པ་ཉིད་ཀྱིས་ཟློག་པར་བྱེད་པ་ཡིན་ནོ། །འདི་དཔེར་བརྗོད་པས་སྟོན་པར་བྱེད་པ་ནི་འདི་ལ་ཞེས་བྱ་བ་ནི་ཆོས་ཅན་བསྟན་པའོ། །སྦུ་ལངས་ཞེས་བྱ་བ་ནི་གྱེན་དུ་ལངས་བའོ། །སོགས་པ་སྨོས་པས་ནི་སོ་ཏག་ཏག་བྱེད་པ་ལ་སོགས་པ་གཟུང་ངོ༌། །དེ་དག་ཉིད་དགའ་བ་དང་དད་པ་ལ་སོགས་པས་བྱས་པ་དག་ལས་ཁྱད་པར་དུ་འགྱུར་བས་བྱེ་བྲག་གོ །མེད་དོ་ཞེས་བྱ་བ་ནི་བསྒྲུབ་བྱ་བསྟན་པའོ། །སྐྱེས་བུ་གང་ལ་གདུང་བར་བྱེད་པའི་བྱ་བྲག་ཉེ་བར་ཏེ། གཏན་ཚིགས་དེའི་ཕྱིར་རོ། །གདུང་བར་བྱེད་པའི་བྱ་བྲག་མངོན་སུམ་དུ་གྱུར་པ་ལས་གྲང་བའི་རེག་པ་ལྡོག་པར་དཔོག་ལ། དེས་ན་དེའི་འབྲས་བུ་ཡང་ལྡོག་པ་ཡིན་ནོ། །དངོས་པོ་མེད་པ་སྒྲུབ་པའི་སྦྱོར་བ་འདི་ཡང་གྲང་བའི་རེག་པ་དང་དེའི་འབྲས་བུ་མི་དམིགས་པ་ལ་བྱ་བ་ཡིན་ནོ། །གལ་ཏེ་མེ་མཐོང་བ་ལས་ཡོངས་སུ་གདུང་བ་དཔག་པས་ན། ཡོངས་སུ་གདུང་བ་དང་འགལ་བ་སྤུ་ལངས་པ་ལ་སོགས་པ་ལྡོག་པ་མ་ཡིན་ནམ། འགལ་བ་དག་གི་རྒྱུ་གང་ཡིན་པ་དེ་དག་འགལ་ན་ཞེས་ཅིའི་ཕྱིར་བརྗོད་ཅེ་ན། བཤད་པ། སྤུ་ལངས་ཞེས་བྱེད་པ་ལ་སོགས་པའི་བྱེ་བྲག་དང་འགལ་བ་ཡོངས་སུ་གདུང་བ་ལུས་དྲོས་པའི་གནས་སྐབས་ཏེ། དྲོས་པའི་གནས་སྐབས་དེས་ནི་སྤུ་ལངས་ཞེས་བྱེད་པ་ལ་སོགས་པའི་བྱེ་བྲག་ཟློག་པ་ཡིན་ནོ། །ཡོངས་སུ་གདུང་བ་དེའི་རྒྱུ་མེ་ཡིན་ལ། ངེས་ནི་སྤུ་ལངས་ཞེས་བྱེད་པ་ལ་སོགས་པའི་བྱེ་བྲག་གྲང་བའི་རེག་པ་དང་འགལ་བའི་རྒྱུའི་ཕྱིར་རོ། །འདི་སྐད་བརྗོད་པ་ཡིན་ཏེ། སྤུ་ལངས་ཞེས་བྱེད་པ་ལ་སོགས་པའི་བྱེ་བྲག་དང་ཡོངས་སུ་གདུང་བའི་གནས་སྐབས་དག་ནི་ཕན་ཚུན་འགལ་བ་ཡིན་ནོ། །མེ་མཐོང་བ་ལས་ཀྱང་ཡོངས་སུ་གདུང་བའི་གནས་སྐབས་རྗེས་སུ་
དཔག་པ་ན་སྤུ་ལངས་ཞེས་བྱེད་པ་ལ་སོགས་པ་ལྡོག་པ་ནི་མ་ཡིན་གྱི། འོན་ཀྱང་མེ་མཐོང་བ་ལས་སྤུ་ལངས་ཞེས་བྱེད་པ་ལ་སོགས་པའི་རྒྱུ་གྲང་བའི་རེག་པའི་མཚན་ཉིད་ལྡོག་པ་ཡིན་ནོ། །དེ་སྨྲས་པ་ནི་གྲང་བ་རྒྱུན་ཆད་པ་དངོས་པོ་མེད་པར་རྟོགས་ན་དེའི་འབྲས་བུ་ཡང་མེད་པར་ངེས་པ་ཡིན་ནོ། །སྦྱོར་བ་གཞན་དག་ཀྱང་བསྟན་པའི་ཕྱིར་འདིས་ནི་ཞེས་སྨོས་སོ། །འགལ་བ་དེས་འབྲས་བུ་ལས་ཀྱང་སྟེ། གྲང་བའི་རེག་པ་དང་འགལ་བ་མེད་པའི་འབྲས་བུ་དུ་བས་མེད་དང་འགལ་བ་གྲང་བའི་རེག་པའི་འབྲས་བུ་སྤུ་ལངས་ཞེས་བྱེད་པ་ལ་སོགས་པ་གང་ཡིན་པ་དེ་མེད་པར་ངེས་པར་བཤད་པ་ཡིན་ནོ། །འདི་སྐད་བཤད་པ་ཡིན་ཏེ། དུ་བ་ལས་མེ་ངེས་པར་བྱས་པ་ན་ཡོངས་སུ་གདུང་བའི་མཚན་ཉིད་ཀྱི་འབྲས་བུ་རྗེས་སུ་དཔག་པའི་སྒོ་ནས། སྤུ་ལངས་ཞེས་བྱེད་པ་ལ་སོགས་པ་ལྡོག་པ་ནི་མ་ཡིན་གྱི། འོན་ཀྱང་མེ་ངེས་པ་ལས་གྲང་བའི་རེག་པ་ལྡོག་ཅིང་དེ་ལས་ནི་དེའི་འབྲས་བུ་ལྡོག་པ་ཡིན་ནོ། །དེའི་དཔེར་བརྗོད་པ་ནི་དཔེར་ན་ཞེས་བྱ་བའོ། །ཕྱོགས་ཀྱི་བྱེ་བྲག་འདི་ནི་སྤུ་ལངས་ཞེས་བྱེད་པ་ལ་སོགས་པའི་བྱེ་བྲག་སྔར་བསྟན་པ་དང་བཅས་པ་དེ་ངང་འབྲེལ་པའི་མེ་དང་ལྡན་པ་མ་ཡིན་ཏེ་ཞེས་བྱ་བ་ནི་བསྒྲུབ་བྱ་བསྟན་པའོ། །དུ་བ་ཡོད་པའི་ཕྱིར་ཏེ། མེ་དང་འབྲེལ་པའི་དུ་བ་ཁྱད་པར་ཅན་མཐོང་བའི་ཕྱིར་རོ། །དངོས་པོ་མེད་པ་བསྒྲུབ་པའི་སྦྱོར་བ་འདི་ཡང་གང་དུ་མེ་གྲང་བའི་རེག་པ་དང་སྤུ་ལངས་ཞེས་བྱེད་པ་ལ་སོགས་པའི་ཁྱད་པར་མི་སྣང་བ་དེར་སྦྱར་བར་བྱའོ། །གལ་ཏེ་སྐབས་སུ་བབ་པའི་མི་དམིགས་པའི་སྦྱོར་བ་རྣམ་པ་བཞི་ལས་འདི་དག་ཐ་དད་པ་མ་ཡིན་ནམ་ཞེས་དོགས་ན། དེ་དང་འགལ་བ་གྲུབ་པ་འདི་ཡང་སྔར་བསྟན་པའི་རྒྱུ་མ་གྲུབ་པ་མ་དམིགས་པ་ཉིད་ཡིན་ནོ་ཞེས་སྨྲས་སོ། །གང་གི་ཕྱིར་སྦྱོར་བ་འདི་དག་ཀྱང་རྒྱུ་མི་དམིགས་པ་ཉིད་ལས་འབྲས་བུ་མེད་པར་རྟོགས་པར་བྱེད་པ་ཡིན་པ་དེའི་ཕྱིར་འདི་ནི་རྒྱུ་མི་དམིགས་པ་ཉིད་དུ་བཤད་དོ། །དེའི་ཕྱིར་སྣང་བ་མི་དམིགས་པ་འདི་ནི་སྦྱོར་བ་རྗོད་པར་བྱེད་པ་ཞེས་བྱ་བ་སྒྲའི་བྱེད་པ་དོན་གཞན་སྒྲུབ་པ་དང་དགག་པ་དག་གི་སྒོ་ནས་ཐ་དད་པའི་བྱེ་བྲག་གིས་སམ། དེ་ཉིད་ཀྱི་དོན་མི་དམིགས་པའི་བྱ་བ་དོན་གཞན་སྒྲུབ་པ་དང། དགག་བའི་སྒོ་ནས་ཉེས་པར་བླངས་པའི་སྦྱོར་བ་ཞེས་བྱ་བའི་བྱེ་བྲག་གིས་མི་དམིགས་པ་རྣམ་པ་བཅུ་ཡིན་ཏེ། སྐབས་སུ་བབ་པའི་དཔེར་བརྗོད་ཀྱིས་རྗེས་སུ་འབྲང་སྟེ་ཡོངས་སུ་བགྲང་བར་བྱའོ། །གལ་ཏེ་འགལ་བའི་འབྲས་བུ་དམིགས་པ་ལས་འཁྲུལ་པ་རྟོགས་པ་མ་ཡིན་ནམ། འདི་ལྟར་
ཡུལ་གང་དུ་དུ་བ་མཐོང་བ་དེ་ཉིད་དུ་རེ་ཞིག་གྲང་བའི་རེག་པ་བགག་པ་མེད་ན་གཞན་དུ་འགོག་པར་འགྱུར་བ་ལྟ་ཅི་སྨོས་སོ། །དེའི་ཕྱིར་སྦྱོར་བ་འདི་ལྡོག་པར་བྱེད་པ་ཅི་ལྟར་འགྱུར་ཞེ་ན། བཤད་པ། འགལ་འབྲས་ལ་ཡང་ཡུལ་དང་ནི། །དུས་དང༌། སོགས་པ་སྨོས་པས་དུ་བའི་རང་བཞིན་གྱི་ཁྱད་པར་གཞན་ཡང་རུང་སྟེ། གང་ཅུང་ཟད་མེ་ལ་མི་འཁྲུལ་བའི་ཆོས་དེ་གཟུང་ངོ༌། །དེ་དག་ལ་ལྟོས་པར་འདོད་དེ། ཡུལ་གང་དུ་གནས་པའི་མེ་ལས་གང་གི་ཚེ་དུ་བ་སྐྱེས་པ་དེར་དེའི་ཚེ་གང་བའི་རེག་པ་མེད་པར་འགྱུར་བ་ཡིན་ནོ། །དུ་བའི་ཁྱད་པར་ལ་ཡང་ལྟོས་པར་བྱ་བ་ཡིན་ཏེ། གཙུབ་ཤིང་གཙུབས་པ་ལས་བྱུང་བའི་དུ་བ་ནི་གྲང་བའི་རེག་པ་མེད་པར་ངེས་པ་མ་ཡིན་པའི་ཕྱིར་ཏེ། གྲང་བའི་རིག་པ་ཟློག་པར་རུང་བའི་མེ་མེད་པའི་ཕྱིར་རོ། །གཞན་དུ་ན་གལ་ཏེ་དེ་ལྟ་བུའི་ཁྱད་པར་མི་ལྟོས་པ་དེའི་ཚེ་ནི་རྟགས་འཁྲུལ་པར་འགྱུར་ཏེ། དཔེར་ན་མི་གྲང་ལ་གྲང་བའི་རེག་པ་མེད་པ་སྒྲུབ་པ་ལ་ཐལ་བ་བཞིན་ནོ། །ཅི་ལྟར་གྲང་བ་ལྡོག་པ་སྒྲུབ་པ་ལ་ཐལ་བ་ཉེ་བར་བླངས་པ་གོ་བར་བྱེད་པ་མ་ཡིན་པ་བཞིན་ནོ། །འདིར་ཡང་ཡུལ་དང་དུས་ལ་ལྟོས་ན་གོ་བར་བྱེད་པ་ཁོ་ནའོ། །དེ་ལྟར་ན་སྣང་དུ་རུང་བའི་ཡུལ་མི་དམིགས་པ་ནི་གོ་བར་བྱེད་པའི་ཚད་མ་ཡིན་ལ། སྣང་དུ་མི་རུང་བའི་ཡུལ་ཅན་གྱི་མི་དམིགས་པ་ནི་དངོས་པོ་མེད་པར་ངེས་པའི་འབྲས་བུ་ཅན་མ་ཡིན་ཏེ། དེས་ན་ཚད་མ་མ་ཡིན་ནོ། །ཇི་ལྟར་ཚད་མ་མ་ཡིན། བཤད་པ། གང་གི་ཕྱིར་བསྐལ་པ་རྣམས་ལ་ནི། མེད་པར་ངེས་པ་ཡོད་མ་ཡིན། །བསྐལ་པ་དང་ལྡན་པ་རྣམས་ལའོ། །དེའི་ཕྱིར་ན་དེའི་ཡུལ་ཅན་གྱི་མི་དམིགས་པ་ནི་ངེས་པའི་འབྲས་བུ་ཅན་མ་ཡིན་པས་ཚད་མ་མ་ཡིན་ནོ། །བསྐལ་པ་དེ་དག་ཀྱང་གང་ཡིན་ཞེ་ན། རྣམ་པ་གསུམ་ཞེས་སྨོས་ཏེ། འདི་དག་ལ་བསྐལ་པ་ཡོད་པ་ཡིན་ནོ། །ཡུལ་དང་དུས་དང་རང་བཞིན་གྱིས་བསྐལ་པ་གང་དག་ལ་ཡོད་པ་དེ་དག་དང་ལྡན་པ་ཡིན་ནོ། །དེ་དག་བསྐལ་པ་ཞེས་ཅིའི་ཕྱིར་བརྗོད་དེ། གང་གི་ཕྱིར་ཡོང་པ་གང་ཡིན་པ་དེ་ནི་གདོན་མི་ཟ་བར་ཡུལ་དེན་གནས་པ་འགའ་ཞིག་གི་དམིགས་པ་ཡིན་ནོ། །རང་བཞིན་གྱིས་བསྐལ་བའི་ཤ་ཟ་ཡང་རིགས་མཐུན་པ་དག་གིས་དམིགས་པ་ཡིན་ནོ། །དུས་ཀྱིས་བསྐལ་པ་གང་ཡིན་པ་དེ་ཡང་འདས་པ་ནི་འགའ་ཞིག་གིས་དམིགས་པ་ཡིན་ལ། མ་འོངས་པ་ནི་དམིགས་པར་འགྱུར་བ་ཡིན་ནོ། །འདི་ཉིད་སྟོན་པར་བྱེད་པ་ནི་འདས་པ་དང་མ་འོངས་པ་ན་
དམིགས་པ་གང་ལ་ཡོད་པའོ། །དེ་ཅི་ལྟར་གང་མི་དམིགས་པ་དེ་མེད་པ་མ་ཡིན་ཞེས་ངེས་པར་མི་རུང༌། འདི་ལྟར་དམིགས་པ་ཐམས་ཅད་ལྡོག་པ་དེ་ནི་དངོས་པོ་མེད་པ་ཡིན་ནོ་ཞེ་ན། འདི་བཟློག་པའི་ཕྱིར་མ་ཡིན་ཏེ་ཞེས་སྨོས་ཏེ། ཐམས་ཅད་ཀྱི་དམིགས་པ་ལོག་པ་དེ་ནི་དངོས་པོ་མེད་པར་ངེས་པར་བྱ་བ་འདིར་རྟགས་ཉིད་མ་ཡིན་ཏེ། གཏན་ཚིགས་དེའི་ཕྱིར་ན་ཐམས་ཅད་ཀྱི་དམིགས་པ་ལོག་པ་ལས་འགའ་ཞིག་ཀྱང་དངོས་པོ་མེད་པར་མི་འགྲུབ་པོ། །དངོས་པོ་མེད་པ་ནི་རྟོགས་པ་པོས་རང་ཉིད་ཀྱིས་རྟོགས་པར་བྱ་ཞིང་གཞན་ལ་ཡང་བསྟན་པར་བྱ་བ་ཡིན་ན། ཐམས་ཅད་ཀྱི་དམིགས་པ་ལོག་པ་ནི་དེ་རང་ཉིད་ལ་གྲུབ་པ་མ་ཡིན་ཞིང༌། གཞན་ལ་ཡང་མ་ཡིན་ནོ། །དེ་བཤད་པ་ནི་བདག་དང་གཞན་དག་ལ་གྲུབ་པ་མེད་པའི་ཕྱིར་རོ་ཞེས་བྱ་བ་ཡིན་ནོ། །གང་གི་ཕྱིར་མི་དམིགས་པ་ཐམས་ཅད་མ་གྲུབ་པ་དེའི་ཕྱིར་ཕ་རོལ་པོ་འདི་བདག་ཉིད་ཀྱི་དམིགས་པ་ལོག་པ་ཉིད་ཚད་མ་གཏན་ཚིགས་སུ་བྱེད་པ་ན་དོན་སྤོང་པ་ཡིན་ནོ། །ཇི་ལྟར་བལྟར་རུང་བའི་དོན་ལ་དེའི་དམིགས་པ་མེད་པ་དེ་བཞིན་དུ་བལྟར་མི་རུང་བ་དག་ལ་ཡང་ཡོད་ན། དེ་དག་མི་དམིགས་པའི་ཕྱིར་ན་མེད་པ་ཉིད་དུ་ནི་བརྗོད་པར་ནུས་པ་མ་ཡིན་ནོ། །བསྐལ་པ་དེར་ཡང་ཡོད་ན་ནི་མངོན་སུམ་དང་རྗེས་སུ་དཔག་པ་དང་ལུང་ཡང་རུང་སྟེ་འཇུག་པ་ཉིད་དོ། །དེའི་ཕྱིར་བདག་ཉིད་དང་འབྲེལ་པའི་མངོན་སུམ་དང་རྗེས་སུ་དཔག་པ་དང་ལུང་ལོག་པའི་མཚན་ཉིད་ཀྱི་མི་དམིགས་བ་ནི་ཚད་མ་ཡིན་གྱི། གང་དུ་གཅིག་ལོག་པ་ནི་མ་ཡིན་ནོ། །དེས་ན་དེའི་རྣམ་པ་དེ་ལྟ་བུའི་བདག་ཉིད་ཀྱི་དམིགས་པ་ལོག་པས་དངོས་པོ་མེད་པར་རྟོགས་པ་ཡིན་ནོ་ཞེས་གཞན་དག་དོགས་བ་བསལ་བའི་ཕྱིར་བཤད་པ། དེ་ནི་དེ་ལྟ་མ་ཡིན་ཏེ་ཡུལ་ཁྱད་པར་ཅན་འབའ་ཞིག་ལ་བསྟན་བཅོས་ཀྱི་དབང་དུ་བྱས་པ་མེད་པའི་ཕྱིར་ཏེ། བྱེད་པ་མེད་པའི་ཕྱིར་རོ། །གང་འདི་ཉིད་རྣམ་པར་དགྲོལ་བའི་ཕྱིར་བསྟན་བཅོས་འཇུག་པ་ནི་ཞེས་སྨོས་སོ། །འདི་ལྟར་སྐྱེས་བུའི་དོན་ཉེ་བར་སྟོན་པ་ལྷུར་བྱེད་པ་ནི་བསྟན་བཅོས་སུ་བརྗོད་ལ། སྐྱེས་བུའི་དོན་ཡང་ཐབས་ཉེ་བར་བསྟན་པའི་སྒོ་ནས་བསྟན་པར་བྱ་བ་ཡིན་ནོ། །དེས་ན་སྐྱེས་བུའི་དོན་སྒྲུབ་པར་བྱེད་པའི་ཐབས་འགའ་ཞིག་ལ་བརྟེན་ནས་ཏེ་བརྗོད་བྱར་བྱས་ནས་འཇུག་པ་ཡིན་ནོ། །སྐྱེས་བུའི་དོན་ཉེ་བར་སྟོན་པ་ལ་མི་ལྟོས་ན་ནི་བསྟན་བཅོས་ཉིད་སྨ་ཡིན་ནོ་ཞེས་བསྟན་པའི་ཕྱིར་རོ། །དེ་ལྟར་མ་ཡིན་
ན་ཞེས་སྨོས་ཏེ། སྐྱེས་བུའི་དོན་ཉེ་བར་མི་སྟོན་ནའོ། །འབྲེལ་པ་མེད་པ་ཞེས་བྱ་བ་ནི་ཉེ་བར་མི་མཁོ་བའི་དོན་ཏོ། །བརྗོད་བ་ཞེས་བྱ་བ་ནི་ཕན་ཚུན་མ་འབྲེལ་པའི་དོན་སྨྲ་བ་སྟེ། དེ་ལྟ་བུ་ནི་ཚད་མར་མི་འགྱུར་བའི་ཕྱིར་རོ། །འདི་སྙམ་དུ་གང་གི་ཕྱིར་བསྟན་བཅོས་སུ་སྐྱེས་བུའི་དོན་ཉེ་བར་སྟོན་པ་དེ་ཁོ་ནའི་ཕྱིར་ན་དངོས་པོ་ཐམས་ཅད་བསྟན་བཅོས་སུ་བསྟན་པར་བྱ་བ་ཡིན་ནོ་སྙམ་ན། བཤད་པ། སྐྱེས་བུའི་དོན་ཉེ་བར་སྟོན་པའི་སྐབས་དེར་ཡང་དོན་མང་པོ་གདོན་མི་ཟ་བར་ཁོ་ནར་བསྟན་པར་བྱ་བ་ནི་མ་ཡིན་ཏེ་འགའ་ཞིག་ནི་བསྟན་པར་མི་ནུས་པ་དང༌། འགའ་ཞིག་ནི་བསྟན་པར་མི་འོས་པ་དག་ཡིན་ནོ། །རེ་ཞིག་བསྟན་པར་མི་ནུས་པ་བསྟན་པའི་ཕྱིར། བཤད་པ། དཔེར་ན་བདག་ཉིད་སོ་སོ་ལ་ངེས་པ་བདག་ཉིད་དང༌། བདག་ཉིད་ལ་ངེས་པའི་སྐྱེས་བུ་རྣམས་ཀྱི་སེམས་ཀྱི་འཇུག་པ་རབ་ཏུ་རྒྱུ་བའོ། །འདི་སྐད་བརྗོད་པ་ཡིན་ཏེ། སེམས་ཀྱི་འཇུག་པ་ནི་ཐུན་མོང་མ་ཡིན་པའི་ཕྱིར་གཞན་ལ་མེད་པ་ཉེ་བར་བསྟན་པར་མི་ནུས་ལ། ཉེ་བར་བསྟན་པ་ལ་དགོས་པ་ཡང་ཅི་ལང་མེད་དོ། །འདི་སྙམ་དུ་རྒྱུ་མཚན་གྱི་ཁྱད་པར་གྱིས་དེ་དག་བསྟན་པར་ནུས་པ་ཁོ་ནའོ་སྙམ་ན་ཁ་ཤད་པ། རྒྱུ་མཚན་ངེས་པ་ལ་བྱུང་པ་མ་ཡིན་པའི་ཚུལ་འདི་ལ་ཡོད་པའོ། །འདི་སྐད་བརྗོད་པ་ཡིན་ཏེ། རང་གི་ངོ་བོས་བསྟན་པར་ནུས་པ་མ་ཡིན་ལ་རྒྱུ་མཚན་གྱི་སྒོ་ནས་ཀྱང་མ་ཡིན་ཏེ། རྒྱུ་མཚན་ངེས་པ་མེད་པའི་ཕྱིར་རོ། །ཉེ་པར་བསྟན་པ་ལ་དོགས་པ་མེད་པ་བསྟན་པའི་ཕྱིར་བཤད་པ། ཡུལ་དང་དུས་དེ་དག་གིས་ཆོད་པའི་དངོས་པོ་གང་ཡིན་པ་སྟེ། དེ་ཉིད་ཀྱི་ཕྱིར་སྐབས་སུ་ཞེས་བྱ་བ་སྐྱེས་བུའི་དོན་ཉེ་བར་སྟོན་བའི་སྐབས་སུ་མི་དོགས་པས་ན་ཉེ་བར་མཁོ་བ་མེད་བ་ཡིན་ནོ། །འདི་སྐད་བརྗོད་པ་ཡིན་ཏེ། །དུས་ཀྱིས་ཆོད་པ་འདས་པ་དང་མ་འོངས་པའི་དངོས་པོ་ཡོད་པ་མ་ཡིན་པའི་རང་བཞིན་ཅན་དག་ནི་སྐྱེས་བུའི་དོན་ཉེ་བར་སྟོན་པའི་སྐབས་འགར་ཡང་དགོས་པ་མེད་ལ། ད་ལྟར་བ་ལ་ཡང་ཡུལ་གྱིས་ཆོད་པ་ཐག་རིང་བ་ན་འདུག་པ་ནི་ཉེ་བར་མཁོ་བ་མེད་ཅིང༌། ཉེ་བ་ན་འདུག་པ་ཁ་ཅིག་ཀྱང་ཉེ་བར་མི་མཁོ་བ་ཡིན་ཏེ། དེས་ན་ཉེ་བར་མཁོ་བ་མེད་བ་དེ་དག་ནི་བསྟན་བཅོས་ཀྱི་བརྗོད་བྱར་བྱེད་པ་མ་ཡིན། འདི་སྙམ་དུ་གལ་ཏེ་ལུང་གིས་དེ་དག་བསྡུས་པ་མ་ཡིན་ཡང་མངོན་སུམ་གྱིས་གཟུང་བར་བྱ་བ་ཡིན་ནོ་སྙམ་ན། དེ་ལྟར་བསྐལ་པ་དག་ལ་ནི། །ཞེས་བྱ་བ་ནི་ཡུལ་དང་དུས་དང་རང་བཞིན་གྱིས་བསྐལ་པའོ། །རང་གི་བདག་
ཉིད་ཀྱི་མཐུ་དེས་ཉེ་བར་གནས་པ་ཉེ་བར་གཞག་པ་གང་ལ་ཡོད་བ་དེ་ནི་དེ་སྐད་བརྗོད་དོ། །དེ་གང་ཡིན་ཞེ་ན། སྨྲས་བ། ཤེས་པ་སྐྱེད་པ་ལ་ནུས་པ་གང་ཡིན་པའོ། །འདི་སྐད་བརྗོད་པ་ཡིན་ཏེ། ཁ་ཅིག་ནི་བརྒྱུད་ནས་ཤེས་པ་སྐྱེད་པར་ནུས་པ་ཡིན་ལ། ཁ་ཅིག་ནི་དངོས་སུའོ། །དེ་ལ་བརྒྱུད་པའི་ནུས་པ་གང་ཡིན་པ་དེ་ནི་དོན་གཞན་ཉིད་ལ་རྣམ་པར་གནས་པ་ཡིན་ཏེ། གཞན་ལ་ནི་མེད་ན་མི་འབྱུང་བ་ཉིད་ཀྱིས་ཉེ་བར་བརྟགས་ནས་ནུས་པ་ཐ་སྙད་དུ་བྱེད་པ་ཡིན་ནོ། །དེས་ན་གཞན་གྱི་མཐུས་ཉེ་བར་གནས་པ་དེ་ནི་དེས་ཉེ་བར་གཞག་པའི་ནུས་པ་ཡིན་གྱི། བདག་ཉིད་ཀྱི་མཐུས་ཉེ་བར་གནས་པ་ནི་མ་ཡིན་ནོ། །གང་ལ་དངོས་སུ་རྣམ་པར་ཤེས་པ་སྐྱེ་བ་དེའི་རྣམ་པར་ཤེས་པ་སྐྱེད་པའི་ནུས་པ་ནི་བདག་ཉིད་ཁོ་ན་ལས་རྣམ་པར་གནས་པ་ཡིན་པས་རང་གི་མཐུས་ཉེ་བར་གནས་པར་ཐ་སྙད་དུ་བྱ་བ་ཡིན་ནོ། །དེས་ན་རྣམ་པར་གཅོད་པར་བྱ་བ་ཡོད་པས་ན། རང་གི་མཐུས་ཉེ་བར་གནས་པའི་ནུས་པ་ཞེས་བསྟན་ཏེ། དེ་ལྟ་མ་ཡིན་ན་མཐུ་དང་ནུས་པ་དག་རྣམ་གྲངས་ཡིན་པའི་ཕྱིར་ན་གཅིག་ལ་སྦྱོར་བར་མི་འགྱུར་རོ། །གཟུང་བའི་རང་བཞིན་གྱི་དོན་གང་ཡི་པ་དེ་ནི་དབང་པོ་ཉམས་པ་མེད་པའི་རྣམ་པར་ཤེས་པ་དངོས་སུ་སྐྱེད་པར་བྱེད་པའི་ཕྱིར་གཟུང་བ་ཡིན་གྱི། གཞན་ནི་མ་ཡིན་ནོ། །གཟུང་བར་བྱ་བ་མ་ཡིན་པའི་ངོ་བོ་གང་ཡིན་པ་དེ་ནི་དངོས་སུ་སྐྱེད་པར་བྱེད་པ་ཡིན་ཡང་གཟུང་བ་ནི་མ་ཡིན་ཏེ་དབང་པོ་བཞིན་ནོ། །རབ་རིབ་ལ་སོགས་པས་དབང་པོ་ཉམས་བ་ལས་སྐྱེས་པ་ལ་ནི་ཕྱིན་ཅི་ལོག་གི་རྣམ་པ་གཞག་པའི་ཕྱིར་སྐྱེད་བར་བྱེད་པ་ཡིན་ཡང་གཟུང་བ་མ་ཡིན་ཏེ། ཟླ་བ་གཉིས་ཀྱི་ཤེས་པ་ལ་ཟླ་བ་གཅིག་གི་རང་གི་རྣམ་པ་མ་བཞག་པའི་ཕྱིར་རོ། །ཤེས་པ་གཞན་གྱིས་གཟུང་བར་ཇི་ལྟར་འགྱུར་ཞེ་ན། རྣམ་པར་འཇོག་པ་ལ་གགས་བྱེད་པའི་རྒྱུ་མེད་པའི་ཕྱིར་རོ། །དོན་གཅིག་ཉིད་རྣམ་པར་ཤེས་པ་འཇོག་པར་ནུས་པ་དང་མི་ནུས་པ་འགལ་ལོ་ཞེ་ན། འོ་ན་ནི་སྣང་བ་ཡང་འུག་པ་དང་མིག་ལ་སོགས་པའི་མིག་གི་རྣམ་པར་ཤེས་པ་སྐྱེད་པའི་ནུས་པ་བསྒྲུབ་པ་དང་གེགས་བྱེད་པ་འགལ་བར་འགྱུར་རོ། །སྣང་བ་ནི་ལྷན་ཅིག་བྱེད་པ་ཡིན་པའི་ཕྱིར་འགལ་བ་མེད་དོ་ཞེ་ན། ཡུལ་ཡང་རྣམ་བ་དང་ལྡན་བའི་རྣམ་པར་ཤེས་པའི་ལྷན་ཅིག་བྱེད་པ་ཡིན་གྱི། ཉེ་བར་ལེན་པ་ནི་མ་ཡིན་པའི་ཕྱིར་འགའ་ཞིག་ལ་རྣམ་པ་གཏོད་ཀྱི་ཐམས་ཅད་ལ་མ་ཡིན་པས་སྐྱོན་མེད་དོ། །ཆོད་པ་དག་ལ་ནི་ནུས་པ་དེ་འདྲ་བ་མེད་དེ། དེས་ན་མངོན་སུམ་མ་ཡིན་
ནོ། །འདི་སྙམ་དུ་དེ་དག་ནི་རྗེས་སུ་དཔག་པར་རྟོགས་སོ་སྙམ་ན་གང་གིས་ཞེས་སྨོས་སོ། །དེ་དག་གི་འབྲས་བུ་གདོན་མི་ཟ་བར་དམིགས་པ་ཡང་མ་ཡིན་ནོ། །འདི་སྐད་བརྗོད་པ་ཡིན་ཏེ། རང་གི་རྒྱུན་ལས་ཐ་དད་པའི་འབྲས་བུའི་རྒྱུ་ནི་གོར་མ་ཆག་པར་བསྐྱེད་པར་བྱ་བ་མ་ཡིན་ཏེ། དཔེར་ན་མེས་དུ་བའི་རྒྱུན་བཞིན་ནོ། །བརྩམས་པའི་འབྲས་བུ་གདོན་མི་ཟ་བར་དམིགས་པ་ཡང་མ་ཡིན་ལ། དམིགས་ཀྱང་དེའི་འབྲས་བུ་ཉིད་དུ་གདོན་མི་ཟ་བར་ངོ་ཤེས་པ་ཡང་མ་ཡིན་ཏེ། རྒྱུ་དང་འབྲས་བུའི་དངོས་པོ་ནི་མངོན་སུམ་དང༌། མི་དམིགས་པར་བསྒྲུབ་པར་བྱ་བ་ཡིན་ན། དེ་ནི་བསྐལ་བ་དག་ལ་མི་སྲིད་དོ། །ལྐོག་ཏུ་གྱུར་པའི་དངོས་པོ་ལ་ཡང་སྣང་བའི་དོན་གྱིས་དངོས་པོ་གཞན་དུ་མི་འཐད་པས་ཡོད་པར་རྗེས་སུ་དཔོག་པ་ཡིན་ཏེ། དཔེར་ན་མིག་བཞིན་ནོ། །དེའི་དོན་དུ་གདོན་མི་ཟ་བར་ཞེས་སྨོས་ཏེ། དེ་ལྟ་མ་ཡིན་ན་འབྲས་བུ་མི་དམིགས་པ་ཁོ་ནའོ་ཞེས་བརྗོད་པར་འགྱུར་རོ། །དེས་ན་རྗེས་སུ་དཔག་པར་མི་ནུས་སོ། །དེ་དག་ནི་མངོན་སུམ་དང་རྗེས་སུ་དཔག་པ་དང་ལུང་ལོག་ཏུ་ཟིན་ཀྱང་མེད་དོ་ཞེས་ངེས་པར་ནུས་པ་མ་ཡིན་ནོ། །གང་ཡང་ཤེས་བར་བྱེད་པ་གོ་བར་བྱེད་པ་མེད་པའི་ཕྱིར་དབང་པོ་ལས་འདས་བ་དབང་པོའི་སྤྱོད་ཡུལ་མ་ཡིན་བའི་དོན་ནམ། སྣང་བའི་དོན་གྱི་རང་བཞིན་གྱི་ཁྱད་པར་སྤོང་བར་བྱེད་པ་སྟོན་པར་བྱེད་པ་དེ་ཕྱིན་ཅི་ལོག་པ་ཡིན་ནོ་ཞེས་བྱ་བའི་དེའི་སྒྲ་འདི་དང་འབྲེལ་ཏེ། གང་ཡང་ཞེས་པ་གང་གི་སྒྲ་ཡོད་པའི་ཕྱིར་རོ། །དབང་པོ་ལས་འདས་པ་གང་ཡིན་ཞིང༌། རང་བཞིན་གྱི་ཁྱད་པར་ཡང་གང་ཞིག་ཡིན་ཞེ་ན། དཔེར་ན་ཞེས་བྱ་བ་ལ་སོགས་པ་སྨོས་སོ། །སེམས་འདོད་ཆགས་དང་བྲལ་བ་དང་ལྷའི་ཁྱད་པར་ནི་དབང་པོ་ལས་འདས་པར་འགྱུར་བ་ཡིན་ལ། རྫས་གཏོང་བའི་སྦྱིན་པ་དང་འཚེ་བ་ལ་སོགས་པ་སྤོང་བ་དེ་དག་དོན་དུ་གཉེར་བའི་སེམས་པ་དེ་དག་ནི་མངོན་པར་མཐོ་བའི་རྒྱུ་མ་ཡིན་ནོ་ཞེས་བྱ་བ་ལ། འདི་ལ་སྦྱིན་པ་ལ་སོགས་པའི་སེམས་པ་མངོན་སུམ་པ་དག་ལ་ཡང་མཐོ་རིས་ལ་སོགས་པའི་མཚན་ཉིད་ཀྱི་མངོན་པར་མཐོ་བའི་རྒྱུ་ཉིད་ཀྱི་རང་བཞིན་དེ་སྤོང་བ་ནི་རང་བཞིན་གྱི་ཁྱད་པར་སྤོང་བ་ཡིན་གྱི། སྦྱིན་པའི་སེམས་པའི་མཚན་ཉིད་ཀྱི་དོན་ཐམས་ཅད་དུ་སྤོང་བ་ནི་མ་ཡིན་ནོ། །རྒྱུ་མ་ཡིན་ནོ་ཞེས་བྱ་བ་ལྟ་བུའོ་ཞེས་བྱ་བ་ལ་ཞེས་བྱ་བ་ནི་འདིས་འདི་ལྟར་གྱི་དོན་ཏེ། གང་ཡང་འདི་ལྟར་དབང་པོ་ལས་འདས་པའི་དོན་ནམ་རང་བཞིན་གྱི་ཁྱད་པར་སྤོང་བ་དེ་
ནི་ཕྱིན་ཅི་ལོག་ཡིན་ཏེ། སྤོང་བའི་དོན་དེ་ལས་སྤོང་བ་དེ་ཕྱིན་ཅི་ལོག་ཡིན་ནོ། །དེ་ལ་ཤེས་པར་བྱེད་པ་མེད་པ་ཁྱད་པར་མེད་པར་ཕྱིན་ཅི་ལོག་གི་རྒྱུ་བརྗོད་ནས། རང་བཞིན་གྱི་ཁྱད་པར་ལ་ཕྱིན་ཅི་ལོག་གི་རྒྱུ་བྱེད་བྲག་ཏུ་མངོན་སུམ་གྱིས་ཞེས་བྱ་བ་ལ་སོགས་པ་འཆད་དོ། །འབྲས་བུ་དེ་ཞེས་བྱ་བ་ནི་མངོན་པར་མཐོ་བའོ། །འབྲས་བུ་དེ་དང་ལྡན་པ་མ་ཡིན་པ་ནི་དེ་མེད་པ་སྟེ། འབྲས་བུ་གཞན་དང་ལྡན་པ་གང་ཡིན་པའོ། །འབྲས་བུ་དང་ལྡན་པ་མ་ཡིན་པ་དེ་དང་ཆོས་མཚུངས་པས་ན་སྟེ་འདྲ་བ་ནའོ། །ཇི་ལྟར་མྱུ་གུ་ལ་སོགས་པའི་འབྲས་བུ་ས་བོན་ལ་སོགས་པ་འབྲས་བུ་དེ་མ་ཐག་པ་ཅན་ཡིན་པ་དེ་བཞིན་དུ་སྦྱིན་བ་ལ་སོགས་པའི་སེམས་པ་མངོན་པར་མཐོ་བའི་འབྲས་བུ་ཅན་ཡིན་ན་ནི། འབྲས་བུ་དེ་མ་ཐག་ཏུ་འགྱུར་དགོས་ཞེས་འདྲ་བར་སྒྲོ་འདོགས་པས་འདྲ་བ་དེས་ན་ཕྱིན་ཅི་ལོག་པ་ཡིན་ནོ། །མངོན་པར་མཐོ་བ་འདི་ནི་སྦྱིན་པ་ལ་སོགས་པའི་སེམས་པའི་འབྲས་བུ་ཅན་མ་ཡིན་ཏེ། གལ་ཏེ་ཡིན་ན་ནི་གཞན་དང་འདྲ་བར་འགྱུར་ན། འདྲ་བ་ཡང་མ་ཡིན་ཏེ། འབྲས་བུ་དེ་མ་ཐག་པ་བར་མ་ཆོད་པ་དེ་མེད་པའི་ཕྱིར་རོ། །ཇི་ལྟར་ས་བོན་ལ་སོགས་པའི་འབྲས་བུ་དེ་མ་ཐག་པ་ཡིན་པ་ལྟར་འདིའི་འབྲས་བུ་ནི་དེ་ལྟར་དེ་མ་ཐག་པར་འགྱུར་རོ། །གལ་ཏེ་འབྲས་བུ་དེ་མ་ཐག་ཏུ་སྐྱེས་ཀྱང་མི་མཐོང་བ་མ་ཡིན་ནམ། དེ་ཅི་ལྟར་དེ་མ་ཐག་ཏུ་མེད་པ་ཡིན་ཞེ་ན། སྨྲས་པ། འབྲས་བུར་གྱུར་པ་མངོན་སུམ་གྱི་དོན་ལ་ཡང་ངོ༌། །འདི་སྐད་བརྗོད་པ་ཡིན་ཏེ། གལ་ཏེ་མངོན་པར་མཐོ་བའི་མཚན་ཉིད་ཀྱི་འབྲས་བུ་ལྐོག་ཏུ་གྱུར་པ་ཡིན་ན་ནི། ཐེ་ཚོམ་ཟ་བ་ཉིད་ཡིན་ན་ལྐོག་ཏུ་གྱུར་བ་ནི་མ་ཡིན་ཏེ། འདི་ལྟར་ཡུལ་ངེས་པའི་རྒྱུ་མཚན་གྱི་བདེ་བ་རང་གི་རྒྱུད་ལ་ཡོད་པ་དང༌། ཡུལ་ཡང་བདག་ཉིད་དང་འབྲེལ་པར་རིག་པ་ནི་མངོན་པར་མཐོ་བ་ཡིན་ལ། དེ་ནི་འདིའི་ལྐོག་ཏུ་གྱུར་པ་མ་ཡིན་ཏེ། དེས་ན་དེ་མ་ཐག་པ་མེད་པར་ངེས་པས་འདྲ་བ་མེད་པར་ངེས་པ་ཡིན་ནོ། །འབྲས་བུ་དེ་དང་ལྡན་པ་མ་ཡིན་པ་དང་འདྲ་བར་ཡང་གདོན་མི་ཟ་བར་འགྱུར་བར་བརྟགས་པ་ཡིན་ཏེ། དེ་མེད་པས་དེའི་འབྲས་བུ་མེད་པའི་ཕྱིན་ཅི་ལོག་པ་ཡིན་ནོ། །འདི་ཕྱིན་ཅི་ལོག་པ་ཡིན་གྱི་བདེན་པའི་དོན་མ་ཡིན་ནོ་ཞེས་བྱ་བའི་ཉིད་ག་ལས་ཤེ་ན། རྒྱུ་ལས་ཞེས་བྱ་བ་ལ་སོགས་པ་སྨོས་སོ། །བྱི་བ་དང་ཁྱི་སྨྱོན་པ་ཞེས་བྱ་བ་ཁྱི་སྨྱོན་གྱི་དུག་གིས་འགྱུར་བ་བཞིན་ནོ། །འདི་ལྟར་དེ་ནི་དུག་ཞུགས་མ་ཐག་ཉིད་དུ་ནི་མི་འགྱུར་གྱི། འོན་ཀྱང་ལྷན་ཅིག་བྱེད་པར་འདོད་པའི་
དུས་ཀྱི་ཁྱད་པར་ཉེ་བར་གྱུར་བ་ན་འབྱུང་བ་ཡིན་ཏེ། རྒྱུ་གཞན་ཉིད་ནི་ཡོད་པ་མ་ཡིན་ནོ། །དེ་བཞིན་དུ་གཞན་དག་ཀྱང་འགྱུར་རོ། །མཐོང་བ་དང་མ་མཐོང་བ་འབའ་ཞིག་ནི་མ་ཡིན་ཏེ། འོན་ཀྱང་དངོས་པོ་དེའི་འབྲས་བུ་ཆོད་པ་སྐྱེད་པའི་ནུས་པ་ཡོད་པ་དང༌། དབང་པོ་ལས་འདས་པའི་དོན་ཡོད་པ་ལ་ཡང་འགལ་བ་མེད་པའི་ཕྱིར་མངོན་པར་མཐོ་བའི་རྒྱུ་འམ་དབང་པོ་ལས་འདས་པའི་དངོས་པོ་འདི་ལ་བལྟར་རུང་བའི་ཁྱད་པར་དང་བྲལ་བའི་མི་དམིགས་པ་ཙམ་ནི་ཚད་མ་མ་ཡིན་ནོ། །མངོན་པར་མཐོ་བ་ལ་སོགས་པའི་རྒྱུ་དགག་པར་མི་ནུས་པ་འབའ་ཞིག་ཏུ་མ་ཟད་ཀྱི། །བསྒྲུབ་པར་ཡང་མི་ནུས་པ་ཡིན་ནོ་ཞེས་བརྗོད་པ་ནི་དེ་འབྱུང་བ་ལ་ཚད་མ་ཅི་ཡོད་ཅེ་ན་ཞེས་བྱ་བ་ཡིན་ནོ། །གཞན་དག་དེ་ལྟར་དོགས་པར་བྱས་ནས་སྤོང་བ་དེ་བཟློག་པའི་ཕྱིར་དེ་ཉིད་ཀྱི་ཕྱིར་ཞེས་སྨོས་སོ། །ཤིན་ཏུ་དབང་པོ་ལས་འདས་པའི་དོན་བསྒྲུབ་པ་དང་གནོད་པར་བྱེད་པ་མེད་པ་ལ་ནི་རྟོག་པ་དང་ལྡན་པ་ཐེ་ཚོམ་བྱ་བར་རིགས་སོ། །ཡང་ན་གལ་ཏེ་དངོས་པོ་གང་ཞིག་བཟློག་པར་ཡང་མི་ནུས་པ་སྒྲུབ་པར་བྱེད་པའི་ཚད་མ་ཡང་མེད་པ་དེ་ལ་དེ་ལྟར་བརྟག་པར་ནི་མི་རིགས་ཏེ། འདི་ལ་རེས་འགའ་སྒྲུབ་པར་བྱེད་པའི་ཚད་མ་སྲིད་པ་ཡིན་ནོ། །བདག་ཉིད་ཀྱིས་སྔར་རེ་ཞིག་མ་ཤེས་པ་འགའ་ཞིག་ཕྱིས་ཤེས་པ་དེ་བཞིན་དུ་མ་ངེས་པའི་ཚད་མ་ཡང་གོམས་པའི་དབང་གིས་དུ་གཞན་དུ་ཤེས་པར་འགྱུར་བའམ། ཡང་ན་ཤེས་པའི་སྐྱེས་བུ་གཞན་གྱིས་ཉེ་བར་སྟོན་པའི་ཕྱིར་རོ། །དེ་ལྟར་ན་གཞུང་གི་དོན་ནི་སྒྲུབ་པར་བྱེད་པའི་ཚད་མའི་ཡུལ་ཉིད་ལ་རྟོག་པ་དང་ལྡན་པ་ཐེ་ཚོམ་ཟ་བར་རིགས་ཀྱི་ཡུལ་མེད་པར་ངེས་པ་ནི་ཡིན་ནོ་ཞེས་བྱ་བ་འདི་ཡིན་གྱི། སློབ་དཔོན་བདག་ཉིད་ལ་ཚད་མ་ཡོད་པ་ནི་མ་ཡིན་ཏེ། སློབ་དཔོན་གྱིས་ནི་ཕྱོགས་གཞན་འགའ་ཞིག་ཏུ་ཡང་མངོན་པར་མཐོ་བའི་རྒྱུ་འདི་སྒྲུབ་པར་བྱེད་པའི་ཚད་མ་ཉེ་བར་བཀོད་པ་མེད་པའི་ཕྱིར་རོ། །དེས་ན་དོན་ནམ་ཚད་མ་ལ་ཐེ་ཚོམ་ཟ་བའི་ཕྱིར་སྤང་བར་བྱ་བ་ཉིད་མ་ཡིན་ནོ་ཞེས་བྱ་བའི་དོན་འདི་ཡིན་ནོ། །གང་གི་ཕྱིར་འབྲས་བུ་ཆོད་པ་ཡང་སྐྱེད་པ་དེའི་ཕྱིར་དབང་པོ་ལས་འདས་པའི་དོན་འདི་ལ་མངོན་པར་མཐོ་བའི་རྒྱུ་ལ་སོགས་པ་རང་བཞིན་ནམ་འདོད་ཆགས་དང་བྲལ་བ་ལ་སོགས་པའི་དོན་འགའ་ཞིག་གི་ཡོད་པའི་ཤེས་པར་བྱེད་པ་གོ་བར་བྱེད་པ་མ་གྲུབ་པ་ཡིན་ཏེ། མཐོང་བ་གསལ་བ་མེད་པའི་ཕྱིར་རོ། །འདི་སྐད་དུ་དོན་འགའ་ཞིག་གིས་ཤེས་པར་བྱེད་པ་ནི་མཐོང་བ་ཉིད་ཡིན་ན་དེ་ཡང་མི་གསལ་བ་དེས་ན་རྣམ་པ་ཐམས་ཅད་ལ་ངེས་པར་བྱེད་པ་མ་ཡིན་
ནོ་ཞེས་བརྗོད་པ་ཡིན་ནོ། །རྒྱུ་རྣམས་ནི་འབྲས་བུ་བསྐྱེད་པའི་ཕྱིར་ཡང་ངོ༌། །དེས་ན་འབྲས་བུ་དེ་མ་ཐག་པ་མཐོང་བ་མེད་བའི་ཕྱིར་དེའི་འབྲས་བུའི་སྒོ་ནས་ཀྱང་མངོན་པར་མཐོ་བའི་རྒྱུ་ཉིད་ཁས་བླངས་པར་མི་ནུས་ཏེ། དཔེར་ན་དུ་བ་མཐོང་བས་མེ་སྐྱེད་པའི་ནུས་པ་བཞིན་ནོ། །དེ་བཞིན་དུ་དབང་པོ་ལས་འདས་པའི་དོན་རྣམས་ཀྱི་མཐོང་བ་ཡིད་ཀྱི་རྣམ་པར་ཤེས་པའི་མཚན་ཉིད་གསལ་བ་མེད་པའི་ཕྱིར་མངོན་སུམ་གྱིས་གཟུང་བ་མ་ཡིན་ལ། མཐོང་བ་གསལ་བ་མེད་པ་ཉིད་ཀྱིས་ན་བསྒྲུབ་པར་བྱ་བའི་རང་བཞིན་ནམ་འབྲས་བུ་མཐོང་ངམ་དེ་ལྟར་ངེས་པར་མི་རྟོགས་པ་ཡིན་ནོ། །འདི་ནི་དངོས་པོ་ཡོད་པ་དག་ལ་ཡང་ལྟ་བ་པོའི་སྐྱོན་ཡིན་ནོ། །རྒྱུ་དང་འབྲས་བུར་ཡོང་པ་དེ་དག་གི་སྐྱོན་དེ་ཡང་རྒྱུ་རྣམས་ནི་ཞེས་བྱ་བ་ལ་སོགས་པས་འཆད་དོ། །དེ་དག་རང་གི་རྒྱུན་ལ་ནུས་པ་ཡོད་པ་ཡིན་ཡང་རྒྱུ་ཐ་དད་པའི་མཚན་ཉིད་ཀྱི་འབྲས་བུ་སྐྱེད་པར་ངེས་པ་མེད་པའི་ཕྱིར་རོ། །རང་གི་རྒྱུད་ཀྱི་མཚན་ཉིད་ཀྱིས་འབྲས་བུ་མི་སྐྱེད་ན་ནི་དངོས་པོ་ཉིད་མ་ཡིན་པར་ཐལ་བར་འགྱུར་རོ། །རང་གི་རྒྱུད་ཀྱི་འབྲས་བུ་མཐོང་བས་ནི་དངོས་པོ་དེ་རྗེས་སུ་དཔག་པར་འགྱུར་བ་མ་ཡིན་གྱི། འོན་ཀྱང་མཐོང་བ་ཉིད་ཡིན་ནོ། །དེའི་ཕྱིར་འདིར་གཞན་གྱི་རྒྱུད་ཀྱི་མཚན་ཉིད་ཀྱིས་འབྲས་བུ་ཉིད་བཟུང་བ་ཡིན་ནོ། །དེ་ནི་བྱེད་པར་མ་ངེས་པའམ་བྱས་ཀྱང་མཐོང་བར་མ་ངེས་པའམ་མཐོང་ཡང་དེའི་འབྲས་བུ་ཉིད་དུ་རྟོགས་པར་མི་འགྱུར་ཏེ། དེ་ལ་མི་དམིགས་པ་དང་མངོན་སུམ་དག་མེད་པའི་ཕྱིར་རོ། །མིག་བཞིན་དུ་མཐོང་བ་གཞན་དུ་མི་འཐད་པའི་སྒོ་ནས་ནི་ཐམས་ཅད་འགྲུབ་པ་མ་ཡིན་ནོ། །དེས་ན་མངོན་སུམ་དང་རྗེས་སུ་དཔག་པ་ཡང་ཤེས་པར་བྱེད་པ་མ་ཡིན་མོད་ཀྱི། དེ་ཙམ་གྱིས་ནི་དབང་པོ་ལས་འདས་པའི་དོན་སྤོང་བ་མ་ཡིན་ནོ། །གང་གི་ཕྱིར་འདི་དག་གིས་མ་དམིགས་ཀྱང་ཡང་རིམ་གྱིས་མཐར་གྱིས་རྩིག་ཕུག་ན་གནས་པ་ལ་སོགས་པའི་དོན་འབའ་ཞིག་མངོན་སུམ་མམ་རྗེས་སུ་དཔག་པས་མངོན་པར་གསལ་བར་འགྱུར་བའི་ཕྱིར་ཏེ། སྣང་བར་འགྱུར་བའི་ཕྱིར་རོ། །གང་ཡང་ལུང་ལོག་ན་དོན་ལྡོག་གོ་ཞེས་སྨྲས་པ་དེ་ནི་མི་རིགས་ཏེ། འདི་ལྟར་གལ་ཏེ་ལུང་འཇུག་པ་དོན་ལ་ལྟོས་ན་ནི་ལྡོག་པར་འགྱུར་བ་ཡིན་ན། གང་གི་ཕྱིར་ལུང་ནི་སྒྲའི་བདག་ཉིད་ཡིན་ལ། སྒྲ་རྣམས་ནི་དངོས་པོ་ཇི་ལྟ་བ་བཞིན་དངོས་པོ་ལས་མ་འདས་པར་འཇུག་པ་ཡང་མ་ཡིན་ནོ། །དངོས་པོ་ཇི་ལྟ་བ་བཞིན་འཇུག་པའི་རྒྱུ་གང་གི་ཕྱིར་སྒྲ་དེ་དག་ལས་དོན་གྱི་རང་བཞིན་ངོ་བོ་ཉིད་ངེས་པར་འགྱུར་བའོ། །གལ་ཏེ་དངོས་པོ་
ཇི་ལྟ་བ་བཞིན་དུ་འཇུག་པ་ཡིན་ན་ནི་དེ་ལས་དངོས་པོ་མེད་པར་ངེས་པར་འགྱུར་ན་དེ་ལྟ་ནི་མ་ཡིན་ནོ། །འོ་ན་དེ་དག་ཇི་ལྟར་འཇུག་པ་ཡིན་ཞེ་ན། དེ་དག་ནི་ཞེས་སྨོས་སོ། །བརྗོད་པར་འདོད་པ་ནི་ཁྱད་པར་ཅན་གྱི་དོན་བསྟན་པར་འདོད་པའོ། །སྒྲ་གང་ཡིན་པ་ནི་དེས་འཇུག་པ་ཡིན་ཏེ་དེའི་ཕྱིར་དེ་ལ་འཁྲུལ་པ་མེད་པ་སྟེ། རྗོད་པར་འདོད་པ་དང་འབྲེལ་པས་ན་འདི་ནི་རྗོད་པར་འདོད་པ་དེ་ཉིད་ཀྱི་གོ་བར་བྱེད་པ་ཡིན་ནོ་ཞེས་བྱ་བར་སྲིད་པར་འགྱུར་གྱི། དངོས་པོའི་ནི་མ་ཡིན་ནོ། །ཇི་ལྟར་བརྗོད་པར་འདོད་པ་གོ་བ་དེ་ལྟར་ནི་སྨྲ་བ་པོའི་འདོད་པའི་དོན་གོ་ཕྱིར་ཏེ་ཞེས་བྱ་བ་དེ་ལྟར་བསྟན་ཟིན་ཏོ། །འདི་སྙམ་དུ་འོ་ན་ནི་སྐྱེས་པའི་དོན་ལ་འཁྲུལ་པ་མེད་པ་ཡིན་ནོ་སྙམ་ན་སྐྱེས་བུའི་འདོད་པ་ཞེས་བྱ་བ་ལ་སོགས་པ་སྨོས་སོ། །འདོད་པ་འགའ་ཞིག་ནི་དོན་ཇི་ལྟ་བ་དང་འབྲེལ་པར་ཡང་འགྱུར་བ་ཡིན་ཏེ། དེས་ན་ཐམས་ཅད་ཅེས་ཁྱད་པར་དུ་བྱེད་པ་ཡིན་ནོ། །དོན་ཇི་ལྟར་བ་སྟེ་དོན་ལས་མ་འདས་པར་འགྱུར་བའི་དང་ཚུལ་འདི་ལ་ཡོད་པ་མ་ཡིན་ནོ། །འདི་སྙམ་དུ་སྒྲ་རྣམས་ནི་མེ་དང་དུ་བ་བཞིན་དུ་དོན་དང་འབྲེལ་པའི་ཕྱིར་ནི་དེའི་གོ་བར་བྱེད་པ་མ་ཡིན་གྱི། འོན་ཀྱང་བརྗོད་བྱ་རྗོད་བྱེད་ཀྱི་འབྲེལ་པ་ལས་ཡིན་ནོ་སྙམ་ན། དེ་ནི་མི་རིགས་ཏེ། འདི་ལྟར་གང་ཞིག་གང་དང་མ་འབྲེལ་པའི་རང་བཞིན་གྱི་དངོས་པོ་དེས་ནི་འབྲེལ་པའི་ཡུལ་མ་ཡིན་པའི་དངོས་པོ་གཞན་གོ་བར་བྱེད་པ་མ་ཡིན་ནོ། །བསམ་པ་ནི་འདི་ཡིན་ཏེ། བརྗོད་བྱ་རྗོད་བྱེད་ཀྱི་འབྲེལ་པ་ནི་དངོས་པོ་མ་ཡིན་གྱི་འོན་ཀྱང་བརྟགས་པ་ཡིན་ནོ། །བརྟགས་པའི་འབྲེལ་པ་ལས་ཀྱང་དོན་འགྲུབ་པ་ནི་མེད་ལ། དངོས་པོའི་འབྲེལ་པ་ནི་ཡོད་པ་མ་ཡིན་ནོ། །འདི་སྙམ་དུ་སྒྲ་ཐམས་ཅད་ནི་ཁོ་བོ་ཅག་གི་ལུང་མ་ཡིན་གྱི། འོན་ཀྱང་ཡིད་ཆོས་པས་བསྟན་པ་ཡིན་ནོ། །ཡིད་ཆེས་པས་བསྟན་པའི་ཕྱིར་སྨྲས་པ། དོན་ཇི་ལྟར་གནས་པ་བཞིན་དུ་མཐོང་བ་གང་ཡིན་པ་དེ་ནི་དོན་ཇི་ལྟ་བ་བཞིན་དུ་མཐོང་བ་སྟེ། འདི་ནི་ཕྱིན་ཅི་མ་ལོག་པར་ཡོངས་སུ་ཤེས་པ་ཞེས་བྱ་བའི་ཡོན་ཏན་གཅིག་ཡིན་ནོ། །བདེན་པའི་དོན་སྟོན་པའི་རྒྱུ་ཁྲོ་བ་མེད་པ་ལ་སོགས་པའི་ཡོན་ཏན་གཞན་ནི་སོགས་པ་སྨོས་པས་གཟུང་བ་ཡིན་ནོ། །དེ་དག་དང་ལྡན་པའི་སྐྱེས་བུ་ནི་ཡིད་ཆེས་པ་ཡིན་ནོ། །ཡིད་ཆེས་པ་ནི་སྐྱོན་ཟད་པ་ཡིན་ལ། སྐྱོན་ཡང་ལོག་པའི་ཤེས་པ་ལ་སོགས་པ་ཡིན་ཞིང༌། དེ་དག་ཀྱང་ཇི་ལྟ་བ་བཞིན་མཐོང་བ་ལ་སོགས་པས་སྤངས་པར་བརྗོད་པ་ཡིན་ནོ། །ཇི་ལྟ་བ་བཞིན་མཐོང་བ་དེས་བསྟན་པའི་ལུང་གང་
ཡིན་པ་ནི་བསྟན་པར་བྱ་བའི་དོན་ལ་མི་སླུ་བ་ཡིན་ཏེ། ཁོ་བོ་ཅག་གི་ལུང་དེ་ལྟ་བུ་ནི་ཚད་མ་ཡིན་ནོ་ཞེས་ཕ་རོལ་པ་དོགས་བ་བཟློག་པའི་ཕྱིར་བཤད་པ། དེ་ལྟ་བུའི་སྐྱེས་བུ་ནི་བདེན་པའི་དོན་ཉིད་བརྗོད་པ་ཡིན་ནོ་ཞེས་བྱ་བའི་དོན་འདི་འདོད་པ་ཉིད་དེ། འོན་ཀྱང་སྐྱེས་བུ་དེ་ལྟ་བུས་བསྟན་པའི་ཚིག་ཁོ་བོ་ཅག་གི་འཇུག་པའི་ཡན་ལག་ནི་མ་ཡིན་ཏེ། འདི་ལྟར་ངེས་པས་ཡུལ་དུ་བྱས་པས་འཇུག་པའི་ཡན་ལག་དེ་ལྟ་བུའི་སྐྱེས་བུ་ཁྱད་པར་ཅན་ནི་ཤེས་པར་ནུས་པ་མ་ཡིན་ནོ། །དེའི་ཕྱིར་བཤད་པ། གལ་ཏེ་ཁྱད་པར་ཅན་དེ་ཉིད། །ཤེས་པར་ནུས་ན་དེ་ཡི་ཕྱིར། །དོན་འདི་འདོད་པ་ཉིད་ཡིན་ནོ། །གལ་ཏེ་ཁྱད་པར་དུ་འཕགས་པ་ངེས་པར་མི་ནུས་ཀྱང་ཚིག་འཇུག་པའི་ཡན་ལག་མ་ཡིན་པར་ཅི་ལྟར་འགྱུར་ཞེ་ན། བཤད་པ། རྟོག་པ་སྔོན་དུ་གཏོང་བའི་ངང་ཚུལ་གང་ལ་ཡོད་པ་ནི་རྟོག་པ་སྔོན་དུ་གཏོང་བ་ཅན་ཏེ། ངེས་པར་རྟོགས་པར་བྱེད་པ་ཞེས་བྱ་བའི་ཐ་ཚིག་གོ །ལུང་ངམ་ལུང་མ་ཡིན་པ་ཚོལ་བ་དེ་ཐམས་ཅད་ནི་ཞེས་བྱ་བ་ལ། འདི་ནི་འཇིག་རྟེན་པའི་ཚིག་གི་ཚུལ་ཡིན་ཏེ། འཇིག་རྟེན་ན་ཐམས་ཅད་དུ་མངོན་པར་འདོད་པའི་མི་མཐུན་པའི་ཕྱོགས་དོགས་པར་བྱས་ཏེ། དགེ་མི་དགེ་རྙེད་མ་རྙེད་ཅེས་མི་མཐུན་པའི་ཕྱོགས་དང་བཅས་པ་བརྗོད་དོ། །དེ་བཞིན་དུ་འདིར་ཡང་ལུང་ཚོལ་བ་ཡིན་མོད་ཀྱི། མངོན་པར་འདོད་པའི་མི་མཐུན་པའི་ཕྱོགས་དང་ལྡན་པའི་ཕྱིར་ལུང་མ་ཡིན་པ་ཞེས་སྨོས་སོ། །ཡང་ན་ལུང་མ་ཡིན་པ་ཡང་ཚོལ་བ་ཉིད་དེ། དེ་ལྟ་ན་ནི་སྤང་བར་བྱ་བའི་ཡུལ་ལེགས་པར་ཤེས་པར་འགྱུར་བ་ཡིན་ནོ། །རྟོག་པ་དང་ལྡན་པ་ནི་དོན་དུ་གཉེར་བར་བྱ་བ་ཉིད་མེད་པར་འཇུག་པར་མི་རིགས་སོ། །རྟོག་པ་དང་ལྡན་པ་ལུང་ངམ་ལུང་མ་ཡིན་པ་ཡོངས་སུ་རྟོག་པ་ཡང་དགོས་པ་དང་ལྡན་པ་ཉིད་ཡིན་ལ། ལུང་ཡོངས་སུ་རྟོག་པ་ལ་ནི་འཇུག་པ་ལས་མ་གཏོགས་པའི་དགོས་པ་གཞན་ཡང་ཡོད་པ་མ་ཡིན་ཏེ། དེའི་ཕྱིར་འདིར་འཇུག་པར་འདོད་པས་ཡིན་ཏེ། ལུང་གི་རྒྱུ་མཚན་གྱིས་འཇུག་པར་འདོད་པ་དེ་ཡོངས་སུ་རྟོག་པ་ཡིན་ནོ། །གལ་ཏེ་དེའི་རྒྱུ་མཚན་གྱིས་འཇུག་པ་དོན་དུ་གཉེར་བ་མེད་པར་དེ་ཡོངས་སུ་རྟོག་ན་ནི་དགོས་པ་མེད་པའི་ཕྱིར་ན། ཞེན་པས་ཡོངས་སུ་རྟོག་པར་འགྱུར་ན། རྟོག་པ་དང་ལྡན་པ་ནི་ཞེན་པས་མ་ཡིན་ནོ། །རྟོག་པ་དང་མི་ལྡན་པ་འཇུག་པའི་ཡན་ལག་ཀྱང་དཔྱད་པར་བྱ་བ་མ་ཡིན་ནོ། །ཡོན་ཏན་ངེས་པ་ཉིད་ལས་འཇུག་པར་རིགས་ཏེ། ཡོན་ཏན་མ་ངེས་
པ་ལས་འཇུག་ན་ནི་ལམ་པོ་ཆེའི་སྐྱེས་བུའི་ངག་ལས་ཀྱང་འཇུག་པར་འགྱུར་རོ། །དེའི་ཕྱིར་སྐྱེས་བུ་འཇུག་པའི་ཡན་ལག་སེམས་པ་ནི་ཅི་ནས་ཀྱང་ཡོན་ཏན་དང་ལྡན་པའི་ལུང་གཟུང་བར་བྱའི། གཞན་ནི་མ་ཡིན་པ་དང༌། དེ་བཞིན་དུ་ཡོན་ཏན་ངེས་པ་གཟུང་བར་བྱའི་གཞན་དག་ནི་མ་ཡིན་ནོ། །དེའི་ཡོན་ཏན་ངེས་པ་ཡང་སྐྱེས་བུའི་ཡོན་ཏན་ངེས་པ་ལས་འགྱུར་བ་ཡིན་ཏེ། དེས་ན་དང་པོར་སྐྱེས་བུ་བརྟག་པར་བྱའོ། །དེ་སྐྱེས་བུ་བརྟགས་ལ་རྒྱུར་གྱུར་པ་ལས་འཇུག་པར་ཁས་ལེན་ན་ནི་འཇུག་པར་མི་འགྱུར་བ་ཉིད་དོ། །གཏན་ཚིགས་སྨྲས་པ། སྐྱེས་བུའི་ཁྱད་པར་དེ་ལྟ་བུ་ནི་ཤེས་པར་མི་ནུས་པའི་ཕྱིར་རོ། །གལ་ཏེ་དབང་པོ་ལ་བརྟེན་པའི་ཤེས་པ་ཡོན་ཏན་ཡོངས་སུ་མ་བརྟགས་པ་ཡང་འཇུག་པའི་ཡན་ལག་ཏུ་མཐོང་བ་མ་ཡིན་ནམ་ཞེ་ན། བདེན་ཏེ། དབང་པོའི་ཤེས་པའམ་རྣམ་པར་རྟོག་པ་གཞན་ཡང་རུང་སྟེ། ཡོན་ཏན་ཡོངས་སུ་མ་བརྟགས་བ་ནི་སྐྱེས་བུའི་འཇུག་པའི་ཡན་ལག་ཡིན་ཏེ། དེ་མེད་པར་ནི་ཐ་སྙད་ཉིད་མི་འཐད་པའི་ཕྱིར་རོ། །གང་གིས་ཡོན་ཏན་ངེས་པ་མ་ཤེས་ཀྱང་དབང་པོ་ལས་འདས་པའི་དོན་བརྗོད་པ་འཇུག་པའི་ཡན་ལག་ཏུ་བྱེད་པ་དབང་པོ་ལས་འདས་པའི་དོན་བརྗོད་པའི་སྒྲ་མེད་པར་སྐྱེས་བུའི་ཐ་སྙད་མི་འཐད་པ་ནི་མ་ཡིན་ནོ། །དེས་ན་ཡོན་ཏན་མེད་པའི་ཚིག་ལས་འཇུག་ན་ནི་ལམ་པོ་ཆེའི་མིའི་ཚིག་ལས་ཀྱང་འཇུག་པར་འགྱུར་ལ། ཡོན་ཏན་བརྟགས་ནས་འཇུག་ན་ནི་འཇུག་པར་མི་འགྱུར་བ་ཡིན་ནོ་ཞེས་བྱ་བར་གོར་མ་ཆག་གོ །མི་འདོད་པའི་ཕྱིར་ནི་མ་ཡིན་ཏེ། ཇི་ལྟ་བ་བཞིན་དུ་མཐོང་བ་ལ་སོགས་པའི་ཡོན་ཏན་དང་ལྡན་པ་དེ་འདྲ་བ་ནི་ཕྱིན་ཅི་མ་ལོག་པའི་དོན་ཉིད་བརྗོད་པའི་ཕྱིར་རོ། །འདི་ལྟར་མི་ཤེས་པའམ་ཁྲོ་བ་ལ་སོགས་པ་ནི་ཕྱིན་ཅི་ལོག་ཏུ་བརྗོད་པའི་རྒྱུ་ཡིན་ལ་གང་ལ་དེ་མེད་པ་དེ་ཕྱིན་ཅི་ལོག་ཏུ་སྨྲ་བ་ཇི་ལྟར་འགྱུར། རྣམ་པ་དེ་ལྟ་བུའི་སྐྱེས་བུ་ཁྱད་པར་དུ་འཕགས་པ་ཅི་ལྟར་ཤེས་པ་མི་ནུས་ཤེ་ན། འདི་ལྟར་ཞེས་སྨོས་ཏེ། གང་གི་ཕྱིར་གཞན་གྱི་སྐྱོན་ཁྲོ་བ་ལ་སོགས་པ་དང་ཡོན་ཏན་དོན་ཇི་ལྟ་བ་བཞིན་དུ་མཐོང་བ་ལ་སོགས་པ་དེ་དག་ངེས་པ་ལ། ངེས་པའི་རྒྱུ་རྟགས་ནི་མེད་དོ། །འདི་སྙམ་དུ་རྟགས་མེད་དུ་ཆུག་ཀྱང་དེ་དག་ནི་མངོན་སུམ་ཉིད་ཀྱིས་རིག་པར་འགྱུར་རོ་སྙམ་ན་དེ་དག་ནི་ཞེས་བྱ་བ་ལ་སོགས་པ་སྨོས་སོ། །གང་གི་ཕྱིར་དེ་དག་ནི་སེམས་ཀྱི་ཆོས་ཏེ་ངོ་བོ་ཉིད་ཡིན་པས་དབང་པོ་ལས་འདས་པ་དེའི་ཕྱིར་རྗེས་
སུ་དཔོག་པ་ཡིན་ནོ། །རང་ལས་སྐྱེས་པའི་ལུས་དང་ངག་གང་ཡིན་པ་དེ་དག་གིས་བྱས་པའི་ཐ་སྙད་ཕན་ཚུན་རྟོགས་པར་བྱེད་པའི་མཚན་ཉིད་དེ་ལས་རྗེས་སུ་དཔག་པར་འགྱུར་རོ། །འདི་སྙམ་དུ་དེ་ལྟ་ན་ནི་འོ་ན་དེ་ལས་སྐྱེས་པའི་ལུས་དང་དག་གི་ཐ་སྙད་དེ་རྟགས་སུ་འགྱུར་རོ་སྙམ་ན། ཐ་སྙད་ཀྱང་ཞེས་བྱ་བ་ལ་སོགས་པ་སྨོས་སོ། །ཕལ་ཆེར་ཞེས་བྱ་བ་ནི་མང་དུའོ། །འདི་ལྟར་མི་ཚངས་པར་སྤྱོད་པ་ལ་སོགས་པའི་མཚན་ཉིད་ཀྱིས་ལུས་ཀྱི་ཐ་སྙད་འགའ་ཞིག་ནི་རྗེས་སུ་དཔག་པའི་རྒྱུར་འགྱུར་བ་ཁོ་ནའོ། །དེས་ན་ཕལ་ཆེར་ཞེས་སྨོས་སོ། །དེས་ན་ལུས་དང་འབྲེལ་པ་ཀུན་དུ་སྤྱོད་པའི་ཁྱད་པར་ཐ་སྙད་ནི་རྟགས་སུ་གཟུང་བ་ཡིན་ན། དེ་ནི་དངོས་པོ་གཞན་དག་ཏུ་གནས་པ་ལ་ལག་བརྡ་ལ་སོགས་པའི་མཚན་ཉིད་ཀྱི་ཐ་སྙད་ཕྱིན་ཅི་ལོག་གི་དོན་གསལ་བར་བྱེད་པ་བྱ་བར་ནུས་སོ། །བློ་སྔོན་དུ་བཏང་ནས་ཞེས་བྱ་བ་ནི་བྱེད་པའི་ཁྱད་པར་རོ། །བློ་རྒྱུར་གྱུར་པས་གཞན་དུ་ཡང་བྱ་བར་ནུས་སོ་ཞེས་བྱ་བའི་དོན་ཏོ། །གལ་ཏེ་དངོས་པོ་གཞན་དུ་གནས་པ་ལ་བློས་ཅི་ལྟར་གཞན་དུ་བྱེད་ཅེ་ན། བཤད་པ། སྐྱེས་བུའི་འདོད་པ་དེས་འཇུག་པ་གང་ཡིན་པ་དག་གོ །འདི་སྙམ་དུ་སྐྱེས་བུའི་འདོད་པ་ནི་དངོས་པོ་ཇི་ལྟ་བ་བཞིན་འཇུག་གོ་སྙམ་ན། དེ་དག་ཀྱང་ཞེས་བྱ་བ་ལ་སོགས་པ་སྨོས་ཏེ། བསམ་པ་སེམས་ཀྱི་རྒྱུ་བ་སྣ་ཚོགས་པ་གང་དག་ལ་ཡོད་པའོ། །འདི་སྐད་བརྗོད་པ་ཡིན་ཏེ། དེ་དག་གི་བསམ་པ་ནི་དོན་ཅི་ལྟ་བ་བཞིན་མ་ཡིན་ནོ། །དགོས་པའི་དབང་གིས་དངོས་པོ་གཞན་དུ་གསན་ཀྱང་གཞན་དུ་སྟོན་པར་བྱེད་དོ། །དེ་ལྟ་ཡིན་པ་དེའི་ཕྱིར་ལུས་དང་ངག་གི་ཐ་སྙད་ནི་རྟགས་སུ་འཐད་ལ། རྟགས་གཞན་ཡང་མེད་དོ། །དེས་ན་རྟགས་འཆོས་བའི་ཕྱིར་འདི་ཇི་ལྟར་གཞན་གྱི་སྐྱོན་དང་ཡོན་ཏན་ངེས་པ་མེད་པ་རྟོགས་པར་བྱེད། འཇུག་པའི་རྒྱུ་མཚན་མེད་པའི་ཕྱིར་རྟོགས་པའི་འཇུག་པ་ཇི་ལྟར་བྱེད། དེ་ལྟར་ཡིད་ཆེས་པས་བྱས་པའི་ལུང་ནི་རྟོག་པ་དང་ལྡན་པ་རྣམས་ཀྱི་ཚད་མ་མ་ཡིན་ནོ་ཞས་རྗེས་སུ་བརྗོད་ནས། དཔྱོད་པ་རང་གི་གཞུང་བསྟན་པའི་ཕྱིར་གལ་ཏེ་བྱེད་པ་པོ་ཞེས་བྱ་བ་ལ་སོགས་པ་སྨོས་ཏེ། སྐྱེས་བུ་ལ་བརྟེན་པའི་ཚིག་གང་ཡིན་པ་སྟེ། ཚིག་གང་ཞིག་སྐྱེས་བུའི་བྱེད་པས་བསྐྱེད་པ་འམ། གང་གི་རང་བཞིན་དུ་བཀོད་པ་དེ་ནི་སྐྱེས་བུ་ལ་བརྟེན་པ་ཡིན་ཏེ། དེ་ནི་ལུང་མ་ཡིན་ཏེ། བྱེད་པ་པོ་ཤེས་པར་དཀའ་བའི་ཕྱིར་རོ། །སྐྱེས་བུས་མ་བྱས་པ་སྐྱེས་བུས་མ་བསྒྲུབས་པ་ནི་ཕྱིན་ཅི་མ་ལོག་པ་བདེན་པའི་དོན་ཅན་ཡིན་ནོ། །འདི་ལྟར་སྐྱེས་བུ་ནི་
མ་རིག་པ་དང་འདོད་ཆགས་ལ་སོགས་པ་དང་ལྡན་པ་ཡིན་ལ། མི་ཤེས་པ་དང་ཆགས་པ་ལ་སོགས་པ་ལས་ཀྱང་ཕྱིན་ཅི་ལོག་ཏུ་ཡང་སྨྲ་བར་འགྱུར་གྱི། ཚིག་གང་ཞིག་སྐྱེས་བུས་མ་བཀོད་པ་དེ་ནི་ཕྱིན་ཅི་ལོག་གི་རྒྱུ་དང་མི་ལྡན་པའི་ཕྱིར་ཕྱིན་ཅི་མ་ལོག་པར་འགྱུར་རོ་ཞེས་བྱ་བ་འདི་དོགས་པར་བྱས་ནས། མ་ཡིན་ཏེ་ཞེས་སྨོས་སོ། །སྐྱེས་བུས་མ་བྱས་པའི་ཚིག་དེ་ནི་མི་འཐད་པའི་ཕྱིར་རོ། །སྐྱེས་བུས་མ་བྱས་པ་ནི་རྣམ་པ་གསུམ་སྟེ། རང་བཞིན་རྟག་པའི་ཕྱིར་རམ། ཚིག་བཀོད་པའི་བདག་ཉིད་ཀྱི་དག་སྐྱེས་བུས་མ་བྱས་པའི་ཕྱིར་རམ། དོན་ལས་སྐྱེས་བུ་འཇུག་པར་མ་བྱས་པའི་ཕྱིར་ཡིན་གྲང་ན། སྐྱེས་བུས་མ་བྱས་པ་ཉིད་འདི་གསུམ་ཀ་ཡང་མི་སྲིད་དོ། །འདི་ལྟར་ཚིག་འདི་རྟག་པར་མི་འཐད་ལ། སྐྱེས་བུས་ངག་ཏུ་བསྡེབས་པ་མ་ཡིན་པ་ཞེས་བྱ་བར་ཡང་མི་སྲིད་དོ། །འོན་ཏེ་ཡང་དེ་དག་གི་དོན་དང་འབྲེལ་པ་སྐྱེས་བུས་མ་བྱས་པ་ཡིན་ནོ་ཞེས་དོན་གྱི་སྒོ་ནས་སྐྱེས་བུས་མ་བྱས་པ་ཉིད་བཟློག་པའི་ཕྱིར་བཤད་པ། སྒྲའི་དོན་བརྗོད་པ་སྟོན་པ་ནི་སྐྱེས་བུའི་ཉེ་བར་སྟོན་པ་དེ་ལ་ལྟོས་པ་ཡིན་ཏེ་དེའི་ཕྱིར་རོ། །འདི་སྐད་དུ་སྒྲ་རྣམས་ཀྱི་དོན་དང་འབྲེལ་པ་ཡང་སྐྱེས་བུས་མ་བྱས་པ་ཡིན་པར་མི་འཐད་ལ། རང་གི་ངོ་བོ་ཡང་མ་ཡིན་ནོ་ཞེས་བརྗོད་པ་ཡིན་ནོ། །རང་གི་ངོ་བོ་སྐྱེས་བུས་མ་བྱས་པ་ཉིད་བསལ་བའི་ཕྱིར་བཤད་པ། དམིགས་པར་རུང་བ་དང་མི་རུང་བ་དེ་དག་གི་བདག་ཉིད་དེ་ཐོབ་པ་དང་གཏོང་བ་དེ་དག་ནི་རང་བཞིན་གཞན་སྐྱེ་བ་དང་ཉམས་པ་ཞེས་བྱ་བ་ལྡོག་པ་དེ་དག་མེད་ན་མེད་པ་སྟེ་འཁྲུལ་པ་མེད་པ་ཡིན་ཏེ། གང་གི་ཕྱིར་མི་འཁྲུལ་པ་ཡིན་པ་དེའི་ཕྱིར་རོ། །འདི་སྐད་བརྗོད་པ་ཡིན་ཏེ། གང་གི་ཚེ་སྒྲས་དམིགས་པར་རུང་བའི་ངོ་བོ་ཉིད་ཐོབ་པ་དེའི་ཚེ་རང་བཞིན་གཞན་ཐོབ་པ་ཡིན་ལ། མི་རུང་བའི་ངོ་བོ་བཏང་བ་ན་ཡང་ངོ་བོ་གཞན་བཏང་བ་ཡིན་ནོ། །རུང་བ་དང་མི་རུང་བའི་རང་བཞིན་ཐོབ་པ་དང་གཏོང་བ་ཉིད་ཇི་ལྟར་ཞེ་ན། རྟག་ཏུ་དེའི་བདག་ཉིད་ཅེས་སྨོས་ཏེ། རྟག་ཏུ་དམིགས་པར་རུང་བའི་བདག་ཉིད་ཡིན་ན་ནི་རེས་འགའ་དམིགས་པ་མེད་པར་འགྱུར་ལ། མི་རུང་བ་ཉིད་རྟག་པ་ཡིན་ན་ནི་རེས་འགའ་མི་དམིགས་པ་མེད་པར་ཐལ་ཏེ། གཏན་ཚིགས་དེའི་ཕྱིར་ངོ་བོ་ཉིད་གཞན་སྐྱེ་བ་དང་ཉམས་པའི་རང་བཞིན་རུང་བ་དང་མི་རུང་བ་དག་ཐོབ་པ་དང་གཏོང་བ་ཡོད་པ་ཡིན་ནོ་ཞེས་མཇུག་སྡུད་པའོ། །འདི་སྙམ་དུ་དམིགས་སུ་རུང་བའི་བདག་ཉིད་ཡིན་
ཡང། ལྷན་ཅིག་བྱེད་པའི་རྐྱེན་ལ་ལྟོས་ནས། རེས་འགའ་དམིགས་པ་མེད་པར་བྱེད་པ་ཡིན་ནོ་སྙམ་ན་བཤད་པ། སྒྲ་རྟག་པ་ནི་ལྷན་ཅིག་བྱེད་པ་གཞན་ལ་ལྟོས་པ་ཡང་མ་ཡིན་ཏེ། རྟག་པའི་ཕྱིར་ལྷན་ཅིག་བྱེད་པ་དེས་སྒྲའི་བདག་ཉིད་དེ་ལ་ཅུང་ཟད་ཀྱང་མ་བྱས་པའི་ཕྱིར་རོ། །འདི་སྙམ་དུ་འདིའི་ཅུང་ཟད་བྱེད་པ་ཉིད་ལྟོས་པའི་དངོས་པོ་ཡིན་མོད་ཀྱི། འོན་ཀྱང་སྒྲ་དེ་ལས་ཕན་པ་གཞན་དུ་གྱུར་པ་བྱེད་པ་ཡིན་ཏེ། ཐ་དད་པ་མ་ཡིན་པ་བྱེད་ན་ནི་དེ་ཉིད་སྒྲས་བྱས་པར་ཐལ་བའི་ཕྱིར་ལ། དེ་ཡང་རྟག་པ་ཉིད་ཀྱིས་བྱ་བར་མི་ནུས་པའི་ཕྱིར་རོ་ཞེ་ན། གཞན་བྱེད་ན་ནི་དེ་གཞན་གྱི་བྱེད་པ་པོར་འགྱུར་གྱི། སྒྲ་དེའི་ཞེས་ཅི་ལྟར་བརྗོད་པར་འགྱུར་ཏེ། འབྲེལ་པ་མི་འཐད་པའི་ཕྱིར་ཏེ་མེད་པའི་ཕྱིར་རོ། །འདི་སྙམ་དུ་ལྟོས་པར་བྱ་བ་དེས་ཕན་པ་ཐ་དད་པར་བྱས་པ་གང་ཡིན་པ་དེ་སྒྲ་དང་འབྲེལ་པ་ཡིན་ཏེ། དེས་ན་དེ་དང་འབྲེལ་པའི་ཕན་པར་བྱེད་པའི་ཕྱིར་དེའི་ཞེས་བརྗོད་པ་ཡིན་ནོ་སྙམ་ན། ཕན་པ་དེ་དང་འབྲེལ་པ་ཡིན་ན་ཡང་ཞེས་སྨོས་ཏེ། སྒྲ་དང་འབྲེལ་པ་ཡིན་ན་ཡང་ཕན་གདགས་བྱ་འདོགས་བྱེད་མ་ཡིན་པ་དག་ཅི་ཞིག་འབྲེལ་ཏེ། སྒྲ་དང་ཕན་པ་དག་ཅུང་ཟད་ཀྱང་འབྲེལ་པ་མེད་དོ། །འདི་སྐད་བརྗོད་པ་ཡིན་ཏེ། ཕན་པ་དེས་སྒྲ་ལ་ཕན་འདོགས་པར་མི་བྱེད་ཅིང་སྒྲས་ཀྱང་ཕན་པ་ལ་མ་ཡིན་ནོ། །འདི་སྙམ་དུ་འཁར་གཞོང་དང་རྒྱ་ཤུག་དག་ཕན་གདགས་བྱ་འདོགས་བྱེད་མ་ཡིན་ཡང་རྟེན་དང་བརྟེན་པའི་དངོས་པོ་ཡིན་པ་དེ་བཞིན་དུ་འདི་ལ་ཡང་འགྱུར་རོ་སྙམ་ནས་རྟེན་དང་བརྟེན་པའི་དངོས་པོ་ཡིན་ནོ་ཞེས་སྨོས་ཏེ། སྒྲའམ་ཕན་པ་དེའི་བདག་ཉིད་ཀྱི་ཕན་པ་མེད་ན་རྟེན་དང་བརྟེན་པའི་དངོས་པོ་དེ་ཡང་མི་འགྲུབ་པོ། །ལྟུང་བའི་ཆོས་ཅན་གྱི་རྒྱ་ཤུག་ནི། འཁར་གཞོང་གིས་རང་གི་ཉེ་བར་ལེན་པའི་མཚན་ཉིད་ཀྱི་ཕན་འདོགས་པར་བྱེད་པ་ཉིད་དོ། །དེ་ལྟ་མ་ཡིན་ན་དེ་དག་ཀྱང་འབྲེལ་པར་མི་འགྱུར་བ་ཉིད་དོ། །དེ་བཞིན་དུ་སྒྲས་ཀྱང་ཕན་པ་ལ་ཕན་འདོགས་དགོས་པར་འགྱུར་རོ། །དེ་ཡང་གཞན་ཁོ་ན་ལས་སྐྱེས་པའི་ཕྱིར་སྒྲས་ཕན་འདོགས་པ་མེད་ལ། དེས་ཀྱང་སྒྲ་ལ་ཕན་བཏགས་པ་མེད་དོ། །འདི་སྙམ་དུ་དེས་སྒྲ་ལ་ཕན་འདོགས་པར་བྱེད་པའམ། སྒྲས་དེ་ལ་ཕན་འདོགས་པར་བྱེད་པ་ཉིད་དེ་སྙམ་ན། བཤད་པ། ཕན་པ་བདག་ཉིད་གཞན་ཡིན་ན་ནི་ཞེས་བྱ་བ་སྒྲ་ལའམ་སྒྲས་ཕན་པ་ཐ་དད་པ་བྱེད་ན་བརྒལ་ཞིང་བརྟགས་པ་མཚུངས་པ་ཡིན་ཏེ། ཇི་ལྟར་ཕན་པ་དང་པོ་ལ་སྒྲ་དང་ལྷན་ཅིག་འབྲེལ་
པ་བརྒལ་ཞིང་བརྟགས་པ་དེ་བཞིན་དུ་ཕན་པ་དེ་དང་སྒྲ་ལ་ཡང་འབྲེལ་པ་ཅི་ཞིག་ཅེས་དེ་ལྟ་བུར་གྱུར་པས་སོ། །ཅི་སྟེ་དེ་ལ་ཡང་ཕན་པ་གཞན་རྟོག་ན་དེའི་ཚེ་ཐུག་པ་མེད་པར་ཡང་འགྱུར་རོ་ཡང་ཞེས་བྱ་བ་ནི་སྐྱོན་གཞན་སྟོན་པའོ། །འདི་སྙམ་དུ་ཕན་པས་སྒྲ་ལ་ཕན་པར་བྱེད་པ་ནི་མ་ཡིན་ཏེ། དེ་ཐ་དད་པར་ཁས་བླངས་ན་ནི་ཐུག་པ་མེད་པར་ཐལ་བའི་ཕྱིར་དང༌། ཐ་དད་པ་མེད་ན་ཡང་སྒྲ་འབྲས་བུ་ཉིད་དུ་ཐལ་བའི་ཕྱིར་རོ། །འོན་ཀྱང་སྒྲས་རྐྱེན་གཞན་དང་ལྷན་ཅིག་ཏུ་ཕན་པ་དེ་སྐྱེས་པ་ཡིན་ནོ་ཞེས་དོགས་པ་ལ་བཤད་བ། བསྐྱེད་བྱ་སྐྱེད་བྱེད་ཀྱི་དངོས་པོར་ཁས་ལེན་ན་ནི་རྐྱེན་གཞན་ལ་ལྟོས་པ་མེད་པའི་ཕྱིར་སྒྲ་དང་ཕན་པ་དག་གི་བསྐྱེད་བྱེད་ཀྱི་དངོས་པོ་དེ་རྟག་ཏུ་འགྱུར་རོ། །གལ་ཏེ་སྒྲ་ནི་ཕན་པ་དེ་བྱེད་པ་ལ་སོགས་པར་རུང་བ་ཡིན་ནོ་ཞེན། རྟག་པ་ནི་གཞན་གྱིས་བོགས་དབྱུང་དུ་མེད་པས་ཐམས་ཅད་ཀྱི་ཚེ་ཕན་པ་བྱེད་པར་འགྱུར་རོ། །དེས་ན་རང་གིས་བྱས་པའི་ཕན་བ་དང་ལྡན་པ་དེ་ཉིད་ཀྱིས་ཤེས་པ་སྐྱེད་པའི་ཕྱིར་སྔ་མ་བཞིན་དུ་ཐལ་བར་འགྱུར་རོ། །ཅི་སྟེ་ཡང་སྒྲ་ཕན་པ་དེ་སྐྱེད་པ་ལ་གཞན་ལ་ལྟོས་ན་ནི་དེའི་ཚེ་གཞན་ལ་ལྟོས་པ་ན་ཐུག་པ་མེད་པར་ཐལ་བར་འགྱུར་རོ། །འདི་ལྟར་སྒྲ་རྟག་པ་ཤེས་པ་བསྐྱེད་པར་བྱ་བ་ལ་ལྷན་ཅིག་བྱེད་པ་ལ་ལྟོས་ན་ཧ་ཅང་ཐལ་བ་དེ་བཞིན་དུ། ཕན་པ་ལ་ཡང་ལྷན་ཅིག་བྱེད་པ་ལ་ལྟོས་ན་ཐལ་བ་མཚུངས་པར་འགྱུར་རོ། །དེ་ལྟར་མངོན་པར་འདོད་པའི་དོན་བསྒྲུབས་ནས་མཇུག་བསྡུ་བའི་ཕྱིར་བཤད་པ། དེའི་ཕྱིར་དམིགས་སུ་རུང་བའི་བདག་ཉིད་རེས་འགའ་བ་ཡིན་ནོ། །གང་གི་ཕྱིར་དེས་ན་མི་རྟག་པ་ཡིན་ལ། མི་རྟག་པ་ཡང་ཅི་ལྟར་ས་བོན་གྱི་རྗེས་སུ་འགྲོ་ལྡོག་གི་རྗེས་སུ་བྱེད་པའི་མྱུ་གུ་ས་བོན་གྱི་འབྲས་བུ་ཡིན་པ་དེ་བཞིན་དུ། དམིགས་སུ་རུང་བའི་བདག་འདི་ཡང་སྐྱེས་བུའི་བྱེད་པ་གནས་དང་བྱེད་པ་ཕྲད་པ་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཅན་ཡིན་ཏེ། དེས་ན་སྐྱེས་བུའི་བྱེད་པས་བསྐྱེད་པ་སྐྱེས་བུས་བྱས་པ་སྐྱེས་བུ་ལས་བྱུང་བ་ཡིན་ནོ། །དེའི་ཕྱིར་སྒྲ་འདི་ནི་རེས་འགའ་བ་དང་སྐྱེས་བུའི་བྱེད་པ་རྗེས་སུ་བྱེད་པ་ཡིན་པས་ན་མི་རྟག་པ་དང་སྐྱེས་བུས་བྱས་པ་ཡིན་ནོ། །གལ་ཏེ་རྟག་པར་གྱུར་ན་ནི་དོན་རྗོད་པར་བྱེད་པ་ཉིད་དུ་མི་འགྱུར་རོ་ཞེས་འཆད་པ་ནི་དེ་ལྟ་མ་ཡིན་ན་ཞེས་བྱ་བ་ཡིན་ནོ། །རྟག་པ་ཉིད་ཡིན་ན་ནི་མེད་ན་མི་འབྱུང་བར་འབྲེལ་བ་མེད་པའི་ཕྱིར་སྒྲ་དག་ལས་དོན་རྟོགས་པར་མི་འགྱུར་རོ། །ཡང་ཞེས་བྱ་བ་ནི་སྡུད་
པར་བྱེད་པའོ། །རྟག་པ་ནི་འབྲས་བུ་མ་ཡིན་ནོ། །སྒྲའི་བདག་ཉིད་ནི་དོན་ལས་གཞན་པ་ཡང་ཡིན་ཏེ། དེས་ན་དེའི་བདག་ཉིད་ཀྱིས་འབྲེལ་པ་ཡང་མེད་དོ། །དེས་ན་འབྲེལ་པ་གཉིས་ཀ་མེད་པ་ན་དོན་གཞན་གྱིས་དོན་གཞན་རྟོགས་པར་མི་འགྱུར་རོ། །འདི་སྙམ་དུ་སྒྲ་ནི་ངོ་བོ་ཉིད་དུ་འགྱུར་བའི་བདག་ཉིད་འབྲེལ་པ་ལས་དོན་གོ་བར་བྱེད་པ་ཡིན་ལ། དེའི་ངོ་བོ་ཉིད་ཀྱང་ཡོད་པ་ཉིད་དོ་སྙམ་ན། སྒྲའི་ཡོད་པ་ཉིད་ནི་ཞེས་སྨོས་ཏེ། དོན་གྱི་ཁྱད་པར་ཁྱད་པར་ཅན་གྱི་དོན་དེ་ལ་ཡོད་པ་ངོ་བོ་ཉིད་ཀྱིས་འབྲེལ་པ་མ་ཡིན་ནོ། །གཏན་ཚིགས་བཤད་པ། ཡོད་པ་དེ་ནི་དོན་ཐམས་ཅད་ལ་ཁྱད་པར་མེད་པའི་ཕྱིར་རོ། །དོན་ནི་འདི་ཡིན་ཏེ། སྒྲའི་ངོ་བོ་གྲུབ་ཟིན་པ་ནི་དོན་ལ་ལྟོས་པའི་རང་བཞིན་ཅུང་ཟད་ཀྱང་མེད་དོ། །དེས་ན་སྒྲ་ཡོད་པ་ཞེས་བྱ་བ་དེ་ཙམ་གྱིས་དོན་རྟོགས་པ་ན་ཡོད་པ་ལ་ཁྱད་པར་མེད་པའི་ཕྱིར་དོན་ཐམས་ཅད་རྟོགས་པར་འགྱུར་ན། ཁྱད་པར་ཅན་གྱི་དོན་རྟོགས་པར་ཡང་མཐོང་བ་ཡིན་ནོ། །དེའི་ཕྱིར་དོན་གྱི་ཁྱད་པར་དང་འབྲེལ་པ་ཡོད་པ་ཡིན་ལ། དེ་ཡང་ཐ་དད་པའི་དོན་གྱི་དེ་ལས་སྐྱེས་པའི་རྒྱུ་མཚན་ཅན་ཉིད་དེ་རྣམ་པ་གཞན་མེད་པའི་ཕྱིར་རོ། །འདི་སྙམ་དུ་ཇི་ལྟར་ཡུལ་ལས་སྐྱེས་པ་མ་ཡིན་པའི་དབང་པོས་ཁྱད་པར་ཅན་གྱི་དོན་རྟོགས་པར་བྱེད་པ་ཡིན་ཏེ། དབང་པོ་ནི་ཁྱད་པར་ཅན་གྱི་དོན་ལ་ཤེས་པ་སྐྱེད་པར་རུང་བའི་ཕྱིར་དང༌། དོན་ཀྱང་ཁྱད་པར་ཅན་གྱི་དབང་པོས་གཟུང་བར་རུང་བ་ཡིན་པའི་ཕྱིར་རོ། །དབང་པོ་དང་ཡུལ་གཞན་དུ་སྒྲ་དང་དོན་དག་ཀྱང་ཕན་ཚུན་རུང་བ་ཉིད་ངེས་པར་བྱེད་པ་ཡིན་ནོ། །དོན་ནི་ཡུལ་ཉིད་ཀྱིས་ཁྱད་པར་ཅན་གྱི་སྒྲས་རྟོགས་པར་རུང་བ་ཡིན་ལ། སྒྲ་ཡང་ཡུལ་ཅན་ཉིད་ཀྱིས་ཁྱད་པར་ཅན་གྱི་དོན་རྟོགས་པར་རུང་བ་ཡིན་ནོ། །དེ་དག་གི་རུང་བ་ཉིད་ནི་ཡུལ་ཅན་ཉིད་དུ་ངེས་པར་བྱེད་པ་ཡིན་ནོ་ཞེ་ན་ཞེས་བྱ་བའི་དོགས་པ་བསུ་ནས། མ་ཡིན་ཏེ་ཞེས་སྨོས་སོ། །ཡུལ་དང་དབང་པོ་དེ་ལས་ཡང་དབང་པོའི་ཡུལ་གཅིག་ལ་སོ་སོར་ངེས་པ་གང་ཡིན་པའི་ངེས་པ་དེ་ནི་དོན་དེ་ལས་སྐྱེས་པའི་མཚན་ཉིད་ཀྱི་རྒྱུ་མཚན་ཅན་ཡིན་ཏེ། དབང་པོའི་དོན་དེ་ལ་ངེས་པ་ནི་དེས་བསྐྱེད་པའི་རྒྱུ་མཚན་ཅན་ཡིན་ནོ་ཞེས་བྱ་བའི་དོན་ཏོ། །འདི་ཉིད་སྟོན་པ་ནི་ཡུལ་དེས་ཕན་བཏགས་པའི་ཞེས་བྱ་བ་ལ་སོགས་པའོ། །གདོན་མི་ཟ་བར་འདི་དེ་ལྟར་ཁས་བླང་དགོས་སྟེ། དེ་མ་ཡིན་ན་ཡུལ་ཕན་འདོགས་པ་མ་ཡིན་པར་འགྱུར་ལ། ཕན་མི་འདོགས་པ་དེ་ནི་དབང་པོས་ལྟོས་པར་བྱ་བར་མི་འགྱུར་ཏེ།
ཡུལ་གཞན་བཞིན་ནོ། །དཔེར་ན་སྒྲས་མ་བྱས་པའི་མིག་སྒྲ་ལ་མི་ལྟོས་པ་བཞིན་ནོ། །དེ་བཞིན་དུ་གཟུགས་ལ་ཡང་མི་ལྟོས་པར་འགྱུར་རོ། །སྐྱེས་བུ་ཉི་མ་ནས་གྲིབ་མར་ཞུགས་པའི་མིག་གི་དབང་པོ་ནི་གཟུགས་ལ་ལྟོས་པ་ཡང་ཡིན་ཏེ། དེ་ལ་གསལ་བའི་རྫས་ཀྱིས་ཉམས་པའི་དབང་པོ་གཟུགས་དང་སྣང་བ་དང་ཡིད་ལ་བྱེད་པ་དག་གིས་འདུ་བྱ་བ་ཡིན་པའི་ཕྱིར་རོ། །དེས་ན་དེས་ལེགས་པར་བྱས་པ་དེ་ལ་ཤེས་པ་སྐྱེད་པ་ཡིན་ནོ། །གལ་ཏེ་ཕན་ཚུན་འདོགས་པ་དང་བྲལ་བའི་མིག་ལ་སོགས་པ་ཕན་ཚུན་ཉེ་བར་འདུ་བའི་རྒྱུ་ལས་སྐྱེས་པ་དག་ལས་མིག་གི་རྣམ་པར་ཤེས་པ་སྐྱེ་བ་ན། དེ་ལ་དབང་པོའི་ཡུལ་གྱིས་ཕན་བཏགས་པ་ཞེས་བྱ་བ་གང་ཡིན། འོན་ཀྱང་ཐག་རིང་པོ་ན་གནས་པའི་གཟུགས་ཀྱིས་དབང་པོ་ལ་ཕན་འདོགས་པ་དེས་ན་རྟག་ཏུ་དབང་པོ་ལ་ཕན་འདོགས་པར་བྱེད་པ་ཡིན་ནོ་སྙམ་ན། དེ་ནི་མི་རིགས་ཏེ། ཐག་རིང་བོ་ན་གནས་པའི་གཟུགས་ཀྱང་གཟུང་བར་ཐལ་བའི་ཕྱིར་རོ། །འོན་ཏེ་གཟུགས་ཀྱི་སྐད་ཅིག་གང་གི་རུང་བའི་ཡུལ་ན་གནས་པའི་གཟུགས་སྐྱེད་པ་དེ་ཉིད་ཀྱིས་དབང་པོ་ལ་ཕན་པར་བྱེད་པ་ཡིན་ནོ་སྙམ་ན། དེ་ལྟ་ན་ནི་འོ་ན་གཏན་ཚིགས་ཐིགས་པར་ཕན་ཚུན་ལྟོས་པ་མེད་པ་དག་ཀྱང་ཤེས་པ་བསྐྱེད་པར་ནུས་པར་བཤད་པ་དེ་འདིར་འགལ་བར་འགྱུར་རོ། །ཕྱོགས་འདི་ནི་རིགས་པ་ཡང་མ་ཡིན་ཏེ། འདི་ལྟར་ས་ལ་སོགས་པ་དང་ལྷན་ཅིག་པའི་ས་བོན་གྱིས་མྱུ་གུ་སྐྱེ་བ་དང་མཐུན་པའི་ཁྱད་པར་དང་པོ་སྐྱེད་པར་བྱེད་དེ། དེ་ལ་ས་བོན་ནི་ཁྱད་པར་དང་པོ་སྐྱེད་པ་སལ་སོགས་པའི་ལྷན་ཅིག་བྱེད་པའི་རྐྱེན་ལ་ལྟོས་པ་ཉིད་ཡིན་མོད་ཀྱི་དེ་དག་གིས་ཕན་འདོགས་པར་བྱེད་པ་ནི་མེད་དོ། །དེ་བཞིན་དུ་མིག་གི་དབང་པོ་ཡང་ཡུལ་གྱིས་ཕན་མ་བཏགས་པར་ཡང་རྣམ་པར་ཤེས་བསྐྱེད་པར་བྱེད་པ་ཡིན་ནོ། །ཕན་འདོགས་པ་མེད་པ་དག་ལ་ཅི་ལྟར་ལྟོས་ཤེ་ན། ལྟོས་པ་ནི་ཅུང་ཟད་ཀྱང་མེད་དོ། །འོན་ཀྱང་ཉེ་བར་འདུ་བའི་རྒྱུ་ཁོ་ན་ལས་ས་བོན་གྱི་མྱུ་གུ་སྐྱེ་བ་དང་རྗེས་སུ་མཐུན་པའི་ངོ་བོ་ཉིད་ཀྱིས་ཁྱད་པར་དང་པོ་སྐྱེད་པ་ཡིན་ལ། གཞན་གྱི་ཚེ་ནི་རྒྱུ་མེད་པས་དེའི་རང་བཞིན་མེད་པ་འབའ་ཞིག་ཏུ་ཟད་དོ། །དེ་བཞིན་དུ་འདིར་ཡང་ཉེ་བར་ཚོགས་པའི་རྒྱུ་ཁོ་ན་ལས་རང་བཞིན་གྱི་ཁྱད་པར་ཡིན་ཏེ། དེས་ན་འདི་ནི་ལུང་དང་འགལ་བ་དང་རིགས་པ་དང་འགལ་བ་ཡིན་ནོ་ཞེ་ན། བཤད་པ། འདིས་ནི་འདི་སྐད་སྟོན་པ་ཡིན་ཏེ། འབྲས་བུས་འགའ་ཞིག་སྐྱེད་པ་
ན་གང་གིས་གང་ལ་རེས་འགའ་ཡང་རང་གི་ངོ་བོའི་ཕན་གདགས་དགོས་པ་དེ་ནི་རེས་འགའ་དེ་ཉིད་ཀྱིས་ཕན་བཏགས་ནས་འབྲས་བུ་དེ་བྱེད་པ་ཡིན་པའམ། ཕན་མ་བཏགས་ན་ནི་ཉེ་བར་ཚོགས་པའི་རྒྱུ་དག་ལས་ཁྱད་པར་དུ་འགྲུབ་པ་དེ་ཉིད་ཀྱིས་བྱེད་པ་ཡིན་ཏེ། དཔེར་ན་སྐད་ཅིག་གཉིས་པ་ལ་སོགས་པ་ལ་ནི་ཞིང་ལ་སོགས་པས་ཕན་བཏགས་པའི་ས་བོན་མྱུ་གུ་སྐྱེ་བ་དང་རྗེས་སུ་མཐུན་པའི་ཁྱད་པར་སྐྱེད་པར་བྱེད་པ་ཡིན་ལ། སྐད་ཅིག་མ་དང་པོ་ལ་ནི་ཉེ་བར་ཚོགས་པར་བྱེད་པའི་རྒྱུ་དག་ཁོ་ན་ལས་ཁྱད་པར་ཅན་དུ་གྲུབ་པས་དེ་དག་དང་ལྷན་ཅིག་ཏུ་ཁྱད་པར་དང་པོ་སྐྱེད་པར་བྱེད་པ་བཞིན་ནོ། །གདོན་མི་ཟ་བར་ས་བོན་གྱིས་ལ་སོགས་པས་ཕན་གདགས་པར་བྱ་བའི་རང་གི་ངོ་བོའི་ཁྱད་པར་ནི་རང་གི་རྒྱུ་བརྒྱུད་པ་ལས་འོངས་པར་ཁས་བླང་དགོས་པ་དེ་བཞིན་དུ། དབང་པོའི་ཡུལ་གྱི་ཁྱད་པར་གྱིས་ཕན་གདགས་པར་བྱ་བའི་རང་གི་ངོ་བོའི་ཁྱད་པར་ཡང་རང་གི་རྒྱུ་བརྒྱུད་པ་ལས་འོངས་པར་ཁས་བླང་པར་བྱའོ། །དེ་ཡང་རེས་འགའ་ནི་ཡུལ་གྱིས་སད་པར་བྱེད་ལ། རེས་འགའ་ནི་ཉེ་བར་ཚོགས་པར་བྱེད་པའི་རྒྱུས་ཡིན་གྱི། རྟག་པའི་དངོས་པོ་ལ་ནི་ངེས་པ་འགའ་ཡང་ཡོད་པ་མ་ཡིན་ནོ། །གདོན་མི་ཟ་བར་དེ་ཁས་བླང་དགོས་ཏེ། དེ་ལྟ་མ་ཡིན་ན་ཕྱོགས་དང་ཕྱོགས་སུ་ཕན་མི་འདོགས་པ་ལ་ལྟོས་པ་མེད་དོ་ཞེས་བརྗོད་པ་དེ་མི་འཐད་པར་འགྱུར་རོ། །ས་བོན་གྱི་ཁྱད་པར་དང་པོ་སྐྱེད་པ་ལ་ནི་ས་ལ་སོགས་པ་ལ་ལྟོས་པ་ཡིན་གྱི། དེ་དག་གིས་ཕན་གདགས་པ་ནི་འགའ་ཡང་མེད་དོ། །དེའི་ཕྱིར་བསམ་པ་ནི་འདི་ཉིད་ཡིན་ཏེ། རྟག་པའི་དངོས་པོ་ནི་ལྟོས་པར་མི་འཐད་ཀྱི། རྟག་པ་ནི་ཕན་ཚུན་འདུ་བའི་རྒྱུ་ལ་ལྟོས་པས་དེ་ལ་ལྟོས་པའམ། དེ་ལས་རང་གི་ངོ་བོའི་ཁྱད་པར་སྐྱེས་པ་དེའི་ཕྱིར་དེ་ལ་ལྟོས་པ་ཡིན་ནོ་ཞེས་བྱ་བའི་དོན་འདི་ཡིན་ནོ། །གལ་ཏེ་དེས་ཕན་གདགས་པར་བྱ་བའི་ངོ་བོ་ཉིད་ཀྱིས་དབང་པོ་དེ་ལ་ཕན་པ་ཡིན་ནོ། ཅིའི་ཕྱིར་ཡུལ་གཅིག་བུ་དེ་ཁོ་ནས་ཕན་འདོགས་པར་བྱེད་ཅེ་ན། དེ་ལས་དེ་བརྒལ་ཞིང་བརྟག་པ་དེ་ལ་དངོས་པོའི་རང་བཞིན་ཉིད་ལན་འདེབས་པར་བྱེད་པ་ཡིན་ནོ། །འདི་སྐད་བརྗོད་པ་ཡིན་ཏེ། གལ་ཏེ་རྒྱུ་རྣམ་པ་སྣ་ཚོགས་པ་ཅན་གྱི་རང་བཞིན་སྣ་ཚོགས་པ་དག་ཁོ་བོ་ཅག་གིས་རྣམ་པར་གཞག་པར་མི་ནུས་ན་ནི། གཞན་གྱིས་བརྒལ་ཞིང་བརྟག་པར་བྱ་བ་ཉིད་ཡིན་གྱི། ཅིའི་ཕྱིར་དངོས་པོ་འདི་རྒྱུ་འདི་ལས་སྐྱེས་པ་ཡིན་ཞེས་དེ་ལྟར་ནི་ཁོ་བོ་ཅག་ལ་དྲི་བར་མི་བྱ་
སྟེ། གང་ཞིག་རང་གི་རྒྱུ་དག་ལས་དེ་ལྟ་བུར་གྱུར་པའི་ས་ལ་སོགས་པས་ས་བོན་ལ་སོགས་པ་ལ་ཅིའི་ཕྱིར་ཕན་འདོགས་ཤེས་པ་ལ་སོགས་པ་ཉིད་ལ་འདྲི་བར་བྱ་བ་ཡིན་ནོ། །དེ་ཉིད་སྟོན་པ་ནི་འདི་ལྟར་ཞེས་བྱ་བ་ཡིན་ནོ། །དེ་ཐམས་ཅད་ཀྱིས་ནི་དོན་འདི་ལྟར་བསྟན་པ་ཡིན་ཏེ། དེ་ཁོ་ན་སེམས་པར་བྱེད་པས་ནི་དངོས་པོ་རྣམས་རྒྱུ་དང་བཅས་པ་དང་རྒྱུ་ཐ་དད་པ་དང་ལྡན་པར་རྣམ་པར་གཞག་པར་བྱ་བ་ཡིན་གྱི། རྒྱུ་མཚན་འདིས་ན་འདི་ལས་ནི་མི་སྐྱེའི། གཞན་ལས་སྐྱེ་བ་ཡིན་ནོ་ཞེས་བྱ་བའི་དོན་འདི་ནི་སྐྱེས་བུས་བསམ་པར་བྱ་བ་མ་ཡིན་ཏེ། ཅི་ལྟར་རྟེན་ཅིང་འབྲེལ་པར་འབྱུང་བ་ནི་བསམ་གྱིས་མི་ཁྱབ་པོ་ཞེས་བྱ་བ་བཞིན་ནི། །དེའི་ཕྱིར་གང་ཞིག་གང་དང་ལྷན་ཅིག་བྱེད་པར་སོ་སོར་ངེས་པ་དེ་ནི་རེས་འགའ་དེས་ཕན་གདགས་པར་བྱ་བ་ཡིན་ལ། རེས་འགའ་ནི་ཉེ་བར་ཚོགས་པར་བྱེད་པའི་རྒྱུས་ཡིན་ནོ་ཞེས་བྱ་བ་ནི་དེ་ཁོ་ནའི་དོན་ཡིན་ནོ། །དེ་བཞིན་དུ་གལ་ཏེ་སྒྲ་རྣམས་ཀྱང་རེས་འགའ་དོན་ལས་སྐྱེ་བ་ཡིན་ན་ནི་དབང་པོ་བཞིན་དུ་དེ་ལ་རུང་བ་ཉིད་སོ་སོ་བར་འགྱུར་བ་ཡིན་ནོ། །དེ་ལས་སྐྱེ་བ་ཉིད་མེད་ན་ནི་དོན་གྱི་ཁྱད་པར་དང་འབྲེལ་པར་མི་འགྱུར་ལ། དེ་ལས་ཀྱང་ཁྱད་པར་རྟོགས་པར་བྱེད་པ་ཉིད་མ་ཡིན་པར་འགྱུར་རོ། །དེ་མེད་ན་སྟེ་དེ་ལས་སྐྱེ་བ་མེད་ན་ནི་འདི་ནི་འདིའོ་ཞེས་བྱ་བའི་སྒྲ་འདི་བརྗོད་པར་བྱ་བའི་འབྲེལ་པའི་ཡུལ་ཅན་གྱི་ཤེས་པ་མེད་པར་འགྱུར་ལ། ཡུལ་ཅན་མེད་ན་དེའི་ཡུལ་འབྲེལ་པའི་དངོས་པོ་ལ་ཡང་མེད་པར་འགྱུར་རོ་ཞེས་བརྗོད་པ་ཡིན་ནོ། །དོན་ལས་མ་སྐྱེས་ན་ནི་འདི་ནི་འདིའོ་ཞེས་བྱ་བའི་འབྲེལ་པ་མི་འཐད་པ་འབའ་ཞིག་ཏུ་མ་ཟད་ཀྱི། སྒྲ་རྣམས་དོན་དང་ལྡན་པར་ཡང་མི་འགྱུར་རོ། །དོན་མེད་པར་འགྱུར་བ་དེ་ཉིད་སྟོན་པ་ནི། དོན་ལས་ནི་ཞེས་བྱ་བ་ལ་སོགས་པ་ཡིན་ནོ། །རེ་ཞིག་དོན་ལས་ནི་མཐོང་བ་སྐྱེ་བ་ཡིན་ནོ། །མཐོང་བ་ལས་དེ་སྟོན་པར་འདོད་པ་ཡིན་ནོ། །འདོད་པ་དེས་ནི་དོན་ཤེས་པའི་ཕྱིར་ཡུལ་དེ་ལ་རབ་ཏུ་སྦྱོར་བ་ཡིན་ཏེ། བརྡ་ཉིད་དུ་རབ་ཏུ་སྦྱོར་རོ། །དོན་དེ་དང་དེ་དག་ལ་བརྡར་བྱས་པའི་སྒྲ་ནི་དོན་དེས་དེ་དང་ལྡན་པར་འགྱུར་བ་ཡིན་ཏེ། དཔེར་ན་དོན་མཐོང་ནས་དོན་བསྟན་པར་འདོད་པ་ན་མིག་འཇུམས་པ་ལ་སོགས་པ་ལུས་ཀྱི་བྱ་བ་བརྡར་བྱ་བར་ནུས་པ་དེས་ན་དེ་དོན་དང་ལྡན་པར་འགྱུར་བ་བཞིན་ནོ། །དེ་ལྟར་དངོས་པོ་རྟག་པ་ནི་འདོད་པས་བརྡར་བྱ་བ་ནུས་པ་མ་ཡིན་ནོ། །དངོས་པོ་གང་ཞིག་འདོད་པས་རང་བཞིན་
ནམ། གནས་སྐབས་གཞན་དུ་བསྒྲུབ་པར་ནུས་པ་དེ་ནི་བརྡར་བྱ་ནུས་པ་ཡིན་ནོ། །བརྡ་ཞེས་བྱ་བ་ནི་རང་གི་བསམ་བ་སྟོན་པའི་མཚན་མ་ངེས་པར་སྦྱོར་བ་ཡིན་ཏེ། །དེས་ན་སྣང་བའི་དངོས་པོ་གང་ཞིག་སྐྱེས་བུའི་འདོད་པའི་རྗེས་སུ་བྱེད་པའི་རང་བཞིན་དེ་ནི་རང་གི་བསམ་པའི་དུས་སུ་དེའི་དབང་གིས་བསྐྱེད་པའམ་བཀོད་པའི་ཕྱིར་དེ་མཚོན་པར་བྱེད་པར་འགྱུར་ཏེ། རྩའི་ཐོ་ལ་སོགས་པ་བཞིན་ནོ། །རྟག་པ་འམ་མི་རྟག་པ་ཡིན་ཡང་རུང་སྟེ། དངོས་པོ་གང་ཞིག་སྐྱེས་བུའི་བསམ་པའི་དབང་གིས་འཇུག་པ་འམ་ལྡོག་པ་མ་ཡིན་པ་དེ་ནི་གང་ལས་དེ་མངོན་པར་འདོད་པའི་དོན་གྱིས་དོན་དང་ལྡན་བར་འགྱུར་བ། བརྡའི་དུས་དང་ཐ་སྙད་ཀྱི་དུས་དང་བར་བར་གྱི་གནས་སྐབས་སུ་དུས་རྟག་ཏུ་རང་བཞིན་གཅིག་ཉིད་ཀྱིས་གནས་པའི་ཕྱིར་རྣམ་པ་གང་གིས་བསམ་པ་གོ་བར་བྱེད་པར་འགྱུར། དེས་ན་རྟག་གམ་མི་རྟག་ཀྱང་བླ་སྟེ། དངོས་པོ་གང་ཞིག་བསམ་པའི་རྗེས་སུ་མི་བྱེད་པ་དེ་ནི་བརྡར་བྱ་བར་མི་ནུས་སོ། །འབྲེལ་པ་དངོས་པོ་ལ་ཡོད་ཀྱང་བརྡ་ནི་འབྲེལ་པ་གསལ་བར་བྱེད་པར་འདོད་པར་ཡིན་ནོ། །དེས་ན་འདི་ནི་དོན་འདི་བསྟན་པ་ཡིན་ཏེ། རྟག་པ་ནི་དངོས་པོའི་འབྲེལ་པ་གསལ་བར་བྱེད་པའི་བརྡ་མ་ཡིན་ཞིང༌། བརྡ་ཙམ་དུ་བྱས་པ་ཡང་ཡིན་ཏེ། དེ་ནི་བརྡར་བྱ་བར་མི་ནུས་པའི་ཕྱིར་རོ། །དེའི་ཕྱིར་བཤད་པ། དོན་དེ་ལས་བྱུང་བ་སྐྱེ་བ་ཡོད་པ་མ་ཡིན་པ་གང་དག་ཡིན་པ་དེ་དག་གིས་ནི་དོན་དེ་རྟོགས་པར་བྱེད་པ་མ་ཡིན་ནོ། །གང་ཞིག་དོན་གང་ལས་མ་བྱུང་བ་དེ་བརྡ་ལ་ལྟོས་ནས་དེ་རྟོགས་པར་བྱེད་པའི་རྒྱུ་མ་ཡིན་ཏེ། དཔེར་ན་བུམ་པ་ལ་སོགས་པ་དེ་དག་ལས་བྱུང་བ་མ་ཡིན་པའི་ནམ་མཁའ་དེ་རྟོགས་པ་མ་ཡིན་པ་བཞིན་ནོ། །དེས་ན་དེ་དག་ལས་བྱུང་བ་མ་ཡིན་པའི་སྒྲ་རྣམས་ནི་དོན་གྱི་ཁྱད་པར་དེས་དོན་དང་ལྡན་པར་མི་འགྱུར་རོ། །འདི་སྙམ་དུ་ངེས་པ་གང་གི་ཕྱིར་སྒྲའི་ངེས་པར་བྱེད་པ་དེ་ལས་སྐྱེ་བར་འགྱུར་བའི་སྒྲའི་རང་བཞིན་ནི་དོན་ལ་ངེས་པ་མ་ཡིན་ནོ། །རང་གི་ངོ་བོ་ངེས་པ་ཉིད་ཡིན་ན་ནི་སྐྱེ་བ་ལས་གཞན་ངེས་པར་བྱེད་པ་མེད་པ་ཡིན་ནོ། །གལ་ཏེ་གང་ལ་ངེས་པར་རྟོགས་པར་འགྱུར་བ་རང་གི་ངོ་བོ་ངེས་པ་མ་ཡིན་ན། འོ་ན་སྒྲའི་ངེས་པ་ཅི་ཡིན་ཞེ་ན། སྨྲས་པ། ཤེས་པར་བྱེད་པའི་ནུས་པ་ངེས་པ་ཡིན་ནོ། །སྒྲའི་རང་གི་ངོ་བོ་ངེས་པ་མ་ཡིན་ཡང་བྱེད་པའི་མཚན་ཉིད་དོན་ཤེས་པར་བྱེད་པའི་ནུས་
པ་ངེས་པ་ཡིན་ནོ། །འདི་སྐད་དུ་རང་གི་ངོ་བོ་དོན་ཐམས་ཅད་ལ་ཁྱད་པར་མེད་པ་ཡིན་ཡང་སྒྲ་རྣམས་ཀྱི་ངེས་པ་ནི་རྟོགས་པར་རུང་བ་ཡིན་ལ། དེ་ཡང་འབྲས་བུ་རྗེས་སུ་དཔག་པར་བྱ་བ་ཡིན་ནོ་ཞེས་བརྗོད་པ་ཡིན་ནོ། །ཤེས་པ་སྐྱེད་པར་བྱེད་པའི་ནུས་པ་དེ་ཉིད་སྨྲས་པ་ནི་འདི་ནི་འདི་ཁོ་ནའི་རྟོགས་པར་བྱེད་པ་ཡིན་གྱི་གཞན་གྱི་ནི་མ་ཡིན་ནོ་ཞེས་བྱ་བའོ། །གཞན་དག་དེ་ལྟར་དོགས་པ་བསལ་བའི་ཕྱིར་བཤད་པ། ཡོད་པ་དང་མེད་པ་དག་གིས་ཏེ། དངོས་པོ་ཡོད་ན་དེའི་ནུས་པ་ཡོད་པ་དང༌། མེད་ན་མེད་པ་འདིས་དངོས་པོ་དེར་འབྲེལ་པ་དེ་ཡང་ངོ༌། །གལ་ཏེ་སྒྲ་རྟག་པ་ཉིད་ཡིན་ན་དེའི་རྟོགས་པར་བྱེད་པའི་ནུས་པ་ཡང་རྟག་པ་མ་ཡིན་ནམ། དེ་ལྟར་ཡོད་པ་དང་མེད་པའི་རྗེས་སུ་བྱེད་ཅེ་ན། བདེན་མོད་ཀྱི་འོན་ཀྱང་ནུས་པ་དེ་དོན་ཤེས་པར་བྱེད་པ་ན། གལ་ཏེ་དོན་དེས་ཕན་གདགས་པར་བྱ་བ་མ་ཡིན་ན། དེས་དོན་ཤེས་པ་ངེས་པ་ཉིད་དུ་བྱེད་པར་མི་འགྱུར་རོ། །དེས་ན་དོན་དེ་ལ་ལྟོས་པས་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ནུས་པ་ནི་དེའི་འབྲས་བུ་ཡིན་ནོ། །དངོས་པོ་གཞན་དག་ལ་ཡང་འབྲས་བུ་གང་ཡིན་པ་དེའི་མཚན་ཉིད་ནི་ཡོད་པ་དང་མེད་པའི་རྗེས་སུ་བྱེད་པ་དེ་ཙམ་དུ་ཟད་པའི་ཕྱིར་རོ། །གཞན་དུ་ཡང་ཡོད་པ་དང་མེད་པའི་རྗེས་སུ་བྱེད་པ་ཙམ་འབྲས་བུ་ཡིན་ལ། དེ་ནི་འདིར་ཡང་མ་ཚང་བ་མེད་པ་ཡིན་ཏེ། དེས་ནི་འབྲས་བུ་ཉིད་ལས་མ་འདས་སོ། །གལ་ཏེ་ཡོད་པ་དང་མེད་པའི་རྗེས་སུ་བྱེད་པའི་མཚན་ཉིད་ཀྱི་འབྲས་བུ་དེ་ལས་འདས་ན་ནི་ངེས་པ་ཉིད་མེད་པར་འགྱུར་རོ། །གཞན་ཡང་གལ་ཏེ་ནུས་པ་ངེས་ན་རང་གི་ངོ་བོ་ཉིད་ངེས་པ་ཡིན་ཏེ། ནུས་པ་ནི་རང་བཞིན་ལས་དོན་གཞན་མ་ཡིན་པའི་ཕྱིར་རོ། །དོན་གཞན་ཉིད་ཡིན་པར་ཁས་ལེན་ན་ནི་ནུས་པ་དེ་ཉིད་ལས་དོན་རྣམས་ལ་ཤེས་པ་སྐྱེ་བའི་ཕྱིར་ནུས་པ་དེ་ཉིད་རྗོད་བྱེད་ཡིན་པར་འགྱུར་གྱི་སྒམ་ཡིན་ནོ། །འདི་སྙམ་དུ་སྒྲ་དང་འབྲེལ་པའི་ནུས་པ་བརྗོད་པར་བྱེད་པ་ཡིན་པའི་ཕྱིར་སྒྲ་རྗོད་པར་བྱེད་པར་འགྱུར་རོ་སྙམ་ན། དེའི་ཞེས་བྱ་བ་ལ་སོགས་པ་སྨོས་སོ། །ཐ་དད་པའི་ཕྱོགས་ལ་ནུས་པ་འདི་ནི་སྒྲ་དེའི་ཡིན་ནོ་ཞེས་བྱ་བའི་འབྲེལ་པ་མི་འགྲུབ་སྟེ། སྒྲ་རྟག་བ་ཉིད་ཀྱིས་ནུས་པའི་རྒྱུ་ཉིད་དུ་མི་འཐད་པའི་ཕྱིར་དང༌། ནུས་པས་ཀྱང་ཕན་གདགས་པར་བྱ་བ་མ་ཡིན་པའི་ཕྱིར་རོ། །གང་གི་ཕྱིར་ནུས་པ་རང་གི་ངོ་བོ་ལས་གཞན་མ་ཡིན་པ་དེའི་ཕྱིར་བརྗོད་པར་བྱ་བའམ་གསལ་བར་བྱ་བ་འམ་གཟུང་བར་
བྱ་བའི་ཡུལ་འགའ་ཞིག་ཏུ་ངེས་པའི་རང་བཞིན་བདག་ཉིད་གང་ཡིན་པ་དེ་ཐམས་ཅད་ནི་རང་གི་རྒྱུ་ངོ་བོ་ཉིད་རང་བཞིན་ལས་བྱུང་བ་ཡིན་པས་སོ། །ངེས་པར་བྱེད་པ་ཞེས་བྱ་བ་ནི་ངེས་པའི་ཡུལ་ཏེ། གང་ཞིག་ཡུལ་གང་ལ་ངེས་པར་འདོད་པའི་ཡུལ་དེས་ངེས་པའི་དོན་དེ་ལ་ཕན་གདགས་པར་བྱ་བ་ཉིད་དེ། དེ་ལྟ་མ་ཡིན་ན་ཅི་ལྟར་དེ་ལ་ངེས་པར་འགྱུར་གྱི་གཞན་ལ་ནི་མ་ཡིན། གལ་ཏེ་མེའི་བུད་ཤིང་སྲེག་པའི་ནུས་པ་དང་སྒྲོན་མེ་གསལ་བར་བྱེད་པའི་ནུས་པ་ཡུལ་ངེས་པ་ཡིན་ཡང་གསལ་བར་བྱ་བའི་དོན་ནམ། བསྲེག་པར་བྱ་བས་སྒྲོན་མ་དང་མེ་བསྐྱེད་པ་མ་ཡིན་པ་དེ་བཞིན་དུ་རང་གི་ཚོགས་པ་ལས་དོན་འགའ་ཞིག་འགའ་ཞིག་ལ་ངེས་པར་སྐྱེ་བ་ཡིན་ནོ་ཞེ་ན། དེ་ནི་མི་རིགས་ཏེ། འདི་ལྟར་དོན་འགའ་ཞིག་རང་གི་རྒྱུ་དེ་ལས་འབྲས་བུ་འགའ་ཞིག་བྱེད་ནུས་པར་སྐྱེས་པ་ཡིན་གྱི་འབྲས་བུ་དེས་བསྐྱེད་པར་བྱ་བ་ནི་མ་ཡིན་ཏེ། རྒྱུ་རྣམས་ཁྱད་པར་ཅན་གྱི་འབྲས་བུ་བྱེད་པའི་དངོས་པོ་སྐྱེད་པ་ལ་འགལ་བ་མེད་པ་ཡིན་ནོ། །དེས་ན་རྒྱུའི་འབྲས་བུ་བྱེད་པའི་ནུས་པ་ནི་ངེས་པའི་ཡུལ་ཅན་ཡིན་ལ། ཡུལ་གྱིས་བསྐྱེད་པ་ནི་མ་ཡིན་ནོ། །སྒྲོན་མས་ནི་ནུས་པ་ལ་སོགས་པ་རང་གི་ཤེས་པ་སྐྱེད་པར་རུང་བར་བྱས་ལ། མེད་ཀྱང་སོ་སོར་ངེས་པའི་ཤིང་སོལ་པར་བྱེད་པ་ཡིན་གྱི། དབང་པོ་དང་སྒྲ་དང་ཤེས་པ་ནི་རང་གི་ཡུལ་བསྐྱེད་པ་མ་ཡིན་ནོ། །དབང་པོ་ནི་དེ་གང་ལ་ཤེས་པ་བསྐྱེད་པར་ངེས་པའི་རང་བཞིན་དུ་འདོད་ཅིང༌། སྒྲ་རྣམས་ནི་ཤེས་པ་བསྐྱེད་པ་ལ་ཤེས་པ་ནི་འཛིན་པ་ལ་སོ་སོར་ངེས་པའི་རང་བཞིན་ཡིན་ཏེ། དེས་ན་དབང་པོ་ལ་སོགས་པ་ལ་ནི་དེས་ཕན་པ་བྱ་དགོས་པ་ཁོ་ནའོ། །གལ་ཏེ་འབྲས་བུ་ཞེས་བྱ་བའི་ཡུལ་རྒྱུ་ངེས་པའི་སྐྱེད་བྱེད་མ་ཡིན་ཏེ། དེ་ནི་རྒྱུ་འདེ་ཉིད་ཀྱི་ནུས་པ་ངེས་པ་ལས་སྐྱེས་པ་འདི་བཞིན་དུ། དབང་པོ་གསལ་བར་བྱ་བ་ཡུལ་དང་ཤེས་པའི་གཟུང་བ་ཡང་དབང་བོ་དང་ཤེས་པ་སྐྱེད་པར་བྱེད་པ་མ་ཡིན་ཏེ། རང་གི་རྒྱུའི་ནུས་པ་ངེས་པ་ཁོ་ན་ལས་སྐྱེས་པའི་ཕྱིར་རོ་ཞེ་ན། འདི་ལ་ཉི་མ་ནས་གྲིབ་ཁང་དུ་ཞུགས་པའི་དབང་པོ་ནི་རང་གི་རྒྱུ་ཉིད་ལས་དེ་ལྟར་སྐྱེས་པ་ཡིན་གྱི་དེ་ལ་མི་ལྟོས་པར་ནི་རིགས་སོ་ཞེས་བཤད་ཟིན་ཏོ། །དེའི་ཕྱིར་རེས་འགའ་དེ་ལས་སམ་དེ་ཉེ་བར་ཚོགས་པར་བྱེད་པའི་རྒྱུ་ལས་ཀྱང་རུ་སྟེ། དབང་པོ་ཁྱད་པར་པར་ན་དུ་གྱུར་པ་ན་དེ་ངེས་པར་འགྱུར་བ་ཡིན་ནོ། །དབང་པོ་བཞིན་དུ་དོན་གྱི་རྗེས་སུ་འགྲོ་ལྡོག་གི་རྗེས་སུ་བྱེད་པའི་ཤེས་པ་ལ་གལ་ཏེ་དོན་ཕན་འདོགས་པར་བྱེད་པ་མ་ཡིན་ན་ནི་གཞན་དག་
ཀྱང་མི་འགྱུར་ཏེ། ཁྱད་པར་མེད་པའི་ཕྱིར་རོ། །དེའི་ཕྱིར་འབྲས་བུ་ལས་གཞན་ལྟོས་པར་བྱ་བའི་ངེས་པའི་རྒྱུ་མཚན་ནི་སྐྱེད་པར་བྱེད་པ་ཉིད་ཡིན་ནོ་ཞེས་བརྗོད་པ་ཡིན་ནོ། །དེའི་ཕྱིར་གསལ་བར་བྱེད་པ་ཉིད་དམ། འཛིན་པར་བྱེད་པ་ཉིད་དམ། རྣམ་པ་ཐམས་ཅད་དུ་སྒྲ་འམ་ཤེས་པར་གྱུར་པའི་ངེས་པ་ཉིད་ཐམས་ཅད་ནི་ངེས་པའི་ཡུལ་སྐྱེད་པར་བྱེད་པ་ཉིད་དུ་རྣམ་པར་འཇོག་པར་བྱེད་པ་ཡིན་པའི་ཕྱིར་ནུས་པ་ངེས་པ་ཞེས་བྱ་བ་ནི་ངོ་བོ་ཉིད་ངེས་པ་ལས་གཞན་མ་ཡིན་ལ། རྒྱུས་མ་བྱས་པ་ཡང་མ་ཡིན་ནོ། །གལ་ཏེ་སྒྲའི་དོན་རྟོགས་པ་འབྲེལ་པ་ངེས་པ་སྔོན་དུ་འགྲོ་བ་ཅན་ཡིན་ན་ནི་དེའི་ཚེ་དོན་དང་འབྲེལ་པ་མེད་པའི་ཕྱིར་དང༌། བརྡ་མེད་པའི་ཕྱིར་མ་བྱས་པའི་སྒྲ་རྗོད་པར་བྱེད་པ་མ་ཡིན་པར་འགྱུར་བ་ཡིན་ན། དེ་ལྟར་ན་ནི་མ་ཡིན་ནོ་ཞེས་སྨྲས་པ་ནི། གལ་ཏེ་མེད་ན་མི་འབྱུང་བ་ཉིད་ཀྱིས་སྒྲ་ལས་དོན་རྟོགས་པ་ནི་མ་ཡིན་གྱི། འོན་ཀྱང་སྒྲོན་མས་གཟུགས་བཞིན་དུ་རུང་བ་ཉིད་ཀྱིས་སྒྲ་ལས་དོན་རྟོགས་པ་ཡིན་ནོ། །དེས་ན་འབྲེལ་པ་མེད་པའི་ཕྱིར་མ་བྱས་པའི་སྒྲ་ནི་དོན་གོ་བར་བྱེད་པ་མ་ཡིན་ནོ་ཞེས་བྱ་བའི་སྐྱོན་འདི་མེད་དོ་ཞེ་ན། མ་ཡིན་ཏེ་ཞེས་སྨོས་ཏེ། གཟུགས་ལ་སྒྲོན་མ་བཞིན་དུ་རང་གི་ངོ་བོས་དོན་རྟོགས་པར་བྱེད་པ་མ་ཡིན་པའི་ཕྱིར་རོ། །གང་ཞིག་རུང་བ་ཉིད་ཀྱིས་དོན་རྟོགས་པར་རུང་བ་དེ་ནི་ཉེ་བར་བསྟན་པ་མེད་པར་དོན་གོ་བར་བྱེད་པ་མ་ཡིན་ཏེ། དཔེར་ན་སྒྲོན་མ་བཞིན་ནོ། །སྒྲ་ནི་དེ་ལྟར་ཉེ་བར་བསྟན་པ་མེད་པར་དོན་གོ་བར་བྱེད་པ་མ་ཡིན་ཏེ། དེའི་ཕྱིར་སྒྲ་དང་རྟགས་དག་ནི་རྟོགས་པར་བྱ་བའི་དོན་དེ་ཡོད་པ་དང་མེད་པ་ལ་གོ་རིམས་བཞིན་དུ་མཐོང་བ་དང་མ་མཐོང་བ་དེ་དག་དྲན་པ་ལ་ལྟོས་པ་ཡིན་ནོ། །འདིས་ནི་རྟགས་དཔེར་བརྗོད་པ་ཡིན་ཏེ་དཔེར་ན་རྟགས་མཐུན་པའི་ཕྱོགས་དང་མི་མཐུན་པའི་ཕྱོགས་དག་ལ། མཐོང་བ་དང་མི་མཐོང་བ་དེ་དག་ལ་ལྟོས་ནས་དོན་གྱིས་གོ་བར་བྱེད་པ་ཡིན་པ་དེ་བཞིན་དུ། སྒྲ་ཡང་བརྗོད་པར་བྱ་བ་དང་བརྗོད་པར་བྱ་བ་མ་ཡིན་པ་དག་ལ་མཐོང་བ་དང་མ་མཐོང་བ་དེ་དྲན་པ་ལ་ལྟོས་ནས་རྗོད་པར་བྱེད་པ་ཡིན་ནོ། །མཐོང་བ་ལ་ལྟོས་པའི་གཏན་ཚིགས་སུ་མ་མཐོང་བ་དང་ཞེས་སྨོས་ཏེ། གང་ཞིག་བརྗོད་པར་བྱ་བའི་དོན་ལ་མ་མཐོང་བའི་སྒྲ་དེ་ལས་ནི་དོན་མི་རྟོགས་པའི་ཕྱིར་ན་སྒྲ་ནི་མཐོང་བ་ལ་ལྟོས་པ་ཡིན་ནོ། །ཡང་མཐོང་བ་བརྗོད་པ་དྲན་པ་མེད་པ་དེ་ལ་ཡང་སྒྲས་རྟོགས་པ་བྱེད་པ་མ་ཡིན་ཏེ། གཏན་ཚིགས་དེའི་ཕྱིར་ན་མཐོང་བ་དྲན་པ་ལ་
ལྟོས་པ་ཡིན་ནོ། །མ་མཐོང་བ་དྲན་པ་ལ་ལྟོས་པའི་གཏན་ཚིགས་སྨྲས་པ། མ་མཐོང་བ་ཐེ་ཚོམ་ཟ་བར་གྱུར་ན་ཐེ་ཚོམ་དུ་འགྱུར་བའི་གཏན་ཚིགས་ཀྱི་ཕྱིར་མཐོང་བ་མེད་པ་དྲན་པ་ལ་ལྟོས་པ་ཡིན་ནོ། །བརྗོད་པར་བྱ་བ་ལས་གཞན་པ་གང་ལ་མཐོང་བར་ཐེ་ཚོམ་ཟ་བ་དེ་ལ་ནི་ཅི་སྒྲ་འདིས་བརྗོད་པར་བྱ་བ་མ་ཡིན་པར་ཡང་ཐེ་ཚོམ་ཟ་བར་འགྱུར་བའི་ཕྱིར་ན་མ་མཐོང་བ་ལ་ཡང་ལྟོས་པ་ཡིན་ནོ། །གང་གི་ཕྱིར་མ་མཐོང་བ་ལ་ཐེ་ཚོམ་ཟ་ན་ཐེ་ཚོམ་ཟ་བར་འགྱུར་བ་འབའ་ཞིག་ཏུ་མ་ཟད་ཀྱི་མ་མཐོང་བ་ཉིད་མེད་ན་ཡང་ཐེ་ཚོམ་དུ་འགྱུར་རོ་ཞེས་བསྟན་པའི་ཕྱིར། མང་པོ་མཐོང་བ་ལ་ནི་ཐེ་ཚོམ་དུ་འགྱུར་བའི་ཕྱིར་རོ་ཞེས་སྨོས་ཏེ། གང་གི་ཚེ་དོན་མང་པོ་དག་ལ་སྒྲ་གཅིག་མཐོང་བ་དེའི་ཚེ། སྨྲ་བ་པོའི་མངོན་པར་འདོད་པའི་བརྗོད་བྱ་གཅིག་ལས་གཞན་པའི་དངོས་པོ་ལ་མཐོང་བས་མཐོང་བ་མེད་པ་གང་ཡིན་པ་དེ་བཟློག་པ་ཡིན་ལ། དེ་མེད་པའི་ཕྱིར་ན་ཡང་རྟོགས་པ་པོ་ཐེ་ཚོམ་དུ་འགྱུར་བ་ཡིན་ནོ། །འདི་སྙམ་དུ་རྣམ་པ་དེ་ལྟ་བུ་དངོས་པོ་དུམ་ལས་མཐོང་བ་དང་ལྷན་ཅིག་པའི་སྒྲ་ཉིད་ཐེ་ཚོམ་གྱི་རྒྱུ་ཡིན་ནོ་སྙམ་ན། གཅིག་ལ་ཞེས་སྨོས་ཏེ། དངོས་པོ་གཅིག་ལ་མཐོང་བའི་ལྟ་བ་པོ་ལ་ཐེ་ཚོམ་མེད་པའི་ཕྱིར་རོ། །དོན་འདི་ཡིན་ཏེ་སྒྲ་གཅིག་བརྗོད་པ་ལས་གང་གིས་དེ་དོན་དུ་མ་ལ་མཐོང་བ་དེ་ནི་ཐེ་ཚོམ་དུ་འགྱུར་ལ། གང་གིས་སྒྲ་དེ་དོན་གཅིག་ལ་མཐོང་བ་དེ་ནི་ཐེ་ཚོམ་དུ་མི་འགྱུར་བ་ཡིན་ཏེ་དེས་ན་དོན་མང་པོ་དག་ལ་མཐོང་བ་དང་ལྷན་ཅིག་པའི་སྒྲ་ནི་ཐེ་ཚོམ་གྱི་རྒྱུ་མ་ཡིན་ནོ། །འདི་སྙམ་དུ་ཐེ་ཚོམ་དུ་གྱུར་པ་གང་ཡིན་པ་དེ་ནི་རྟོགས་པ་པོའི་ཉེས་པ་ཡིན་ནོ་སྙམ་དུ་དོགས་ན། ཡང་མཐོང་ན་རྟོགས་པར་བྱེད་པ་གཅིག་ཉིད་ཐེ་ཚོམ་དུ་འགྱུར་བའི་ཕྱིར་རོ། །འདི་སྐད་བརྗོད་པ་ཡིན་ཏེ། རྟོགས་པར་བྱེད་པ་གང་གིས་དོན་དུ་མ་ལ་མ་མཐོང་བའི་ཕྱིར་སྒྲ་དེས་དོན་ངེས་པའི་རྟོགས་པ་པོ་དེ་ཉིད་ཕྱི་ནས་དངོས་པོ་དུ་མ་ལ་མཐོང་བའི་ཕྱིར་སྒྲ་དེ་ཉིད་ལས་ཐེ་ཚོམ་དུ་འགྱུར་བ་ཡིན་ཏེ། དེའི་ཕྱིར་རྟོགས་པར་བྱེད་པའི་ཉེས་པ་མ་ཡིན་ལ། སྒྲའི་རང་བཞིན་ཡང་མ་ཡིན་གྱི་འོན་ཀྱང་མཐོང་བ་མེད་པ་འམ་ཐེ་ཚོམ་ཟ་བ་ལས་ཡིན་ནོ། །ད་ནི་བསྒྲུབ་པའི་སྒོ་ནས་མཐོང་བའི་བྱ་བ་བསྟན་པའི་ཕྱིར་བཤད་པ། མཐོང་བ་ཇི་ལྟ་བ་བཞིན་མཐོང་བ་ལས་མ་འདས་པར་རྟོགས་པའི་ཕྱིར་རོ། །འདི་ག་ལས་ཤེ་ན། བཤད་པ་རྗོད་པར་བྱེད་པའི་སྒྲ་དེ་གང་ཞིག་སྨྲ་བ་པོས་བརྗོད་པར་འདོད་པའི་ཁྱད་པར་དེ་ལས་ཁྱད་པར་གཞན་ལ་མཐོང་ཞིང་རྟོགས་པར་གྱུར་ན་རྣམ་པ་གཞན་
དུ་བྱེད་པར་གཞན་ལ་སྒྲ་སྦྱར་བ་ཡང་ལོག་པར་དོན་གཞན་རྟོགས་པར་འགྱུར་བར་མཐོང་བའི་ཕྱིར་རོ། །འདི་སྐད་བརྗོད་པ་ཡིན་ཏེ། རྟོགས་པ་པོས་ཁྱད་པར་གང་ལ་མཐོང་བའི་ཁྱད་པར་དེ་ཉིད་སྒྲ་དེ་ལས་རྟོགས་པ་ཡིན་གྱི། སྨྲ་བ་པོ་མངོན་པར་འདོད་བའི་ཁྱད་པར་ནི་མ་ཡིན་ཏེ། གཏན་ཚིགས་དེའི་ཕྱིར་ན་མཐོང་བ་ཇི་ལྟ་བ་བཞིན་རྟོགས་པ་ཡིན་ནོ། །མཐོང་བ་གཞན་དུ་གྱུར་ན་དེ་བརྡ་གཞན་དུ་གྱུར་ན་དོན་གཞན་ཡོངས་སུ་འཛིན་པ་ཡིན་ཏེ། དེའི་ཕྱིར་ན་མཐོང་བ་ཇི་ལྟ་བ་བཞིན་རྟོགས་པ་ཡིན་ལ། དེ་ལས་ཀྱང་སྒྲ་མཐོང་བ་ལ་ལྟོས་པ་དང་བཅས་པ་ཡིན་ནོ། །མཐོང་བ་ཇི་ལྟ་བ་བཞིན་རྟོགས་པའི་གཏན་ཚིགས་མཐོང་བའི་དབང་གིས་དོན་གཞན་འཛིན་པ་དང༌། ཁྱད་པར་གཞན་རྟོགས་པར་འགྱུར་བ་གང་ཡིན་པ་དེ་དག་གི་དཔེ་བསྟན་པའི་ཕྱིར་ཀ་ལི་ཞེས་སྨོས་ཏེ། དབུས་པས་དུས་ཀྱི་ཁྱད་པར་རྗོད་པར་བྱེད་པར་སྦྱར་བའི་ཀ་ལིའི་སྒྲ་ལས་འགྲོ་ལྡིང་ཐས་སྨྱོ་བར་རྟོགས་ལ། དབུས་བས་དང་འགྲོ་ལྡིང་བ་དག་ཡུལ་གཞན་དུ་ཕྱིན་ན། འགྲོ་ལྡིང་བས་ཀྱང་མཐོང་བ་ཇི་ལྟ་བ་བཞིན་དུ་དུས་ཀྱི་ཁྱད་པར་རྟོགས་ཤིང༌། དབུས་པས་ཀྱང་མཐོང་བ་ཇི་ལྟ་བ་བཞིན་དུ་སྨྱོ་བ་རྟོགས་པར་འགྱུར་རོ། །དེ་བཞིན་དུ་གསོད་པར་བརྗོད་པར་སྦྱོར་བའི་སྒྲ་ལས་ཀྱང་འགྲོ་ལྡིང་བས་ཆར་འབབ་པ་རྟོགས་ལ། བརྡ་གཞན་དུ་བྱས་ན་ནི་འགྲོ་ལྡིང་བས་ཀྱང་གསོད་པར་རྟོགས་ཤིང་འཕགས་པས་ཀྱང་ཆར་འབབ་པ་རྟོགས་སོ། །དེས་ན་འགྲོ་ལྡིང་བ་དང་ཡུལ་དབུས་པ་དག་གིས་ཞེས་སྨོས་སོ། །དེ་ལྟར་ན་གང་གི་ཕྱིར་རུང་བ་ཉིད་ཀྱིས་རྟོགས་པ་མ་ཡིན་པ་དེའི་ཕྱིར་འདི་དག་མཐོང་བ་དང་མ་མཐོང་བ་ལ་ལྟོས་པ་ཡིན་པ་ན། མཐོང་བ་དང་མ་མཐོང་བ་འདིའི་སྒྲུབ་པར་བྱེད་པ་གོ་བར་བྱེད་པ་མི་འཁྲུལ་པ་གང་ལ་ཡོད་པའི་མི་འཁྲུལ་པ་དེ་རྟོགས་པ་ལ་བརྟེན་པ་ཡིན་ཏེ། རྟགས་བཞིན་ནོ། །མི་འཁྲུལ་པ་ངེས་པ་དེ་ལས་ཀྱང་སྒྲ་རྗོད་པར་བྱེད་པར་འགྱུར་བ་ཡིན་གྱི། རུང་བ་ཉིད་ཀྱིས་ནི་མ་ཡིན་ནོ། །འབྲེལ་པ་ཡང་དེ་ལས་བྱུང་བའི་རྒྱུ་མཚན་ཅན་བརྡས་གསལ་བར་བྱ་བའི་དངོས་པོ་འམ་བརྡ་ལས་བྱུང་བ་ཡིན་ལ། སྐྱེས་པ་དང་བརྡ་ལས་བྱུང་བ་ཡང་མ་བྱས་པར་མི་འཐད་དོ་ཞེས་བརྗོད་པ་ཡིན་ནོ། །དེའི་ཕྱིར་དེ་ལྟར་རེས་འགའ་བའི་དམིགས་པར་རུང་བ་དང་དོན་ངེས་པར་རྟོགས་པའི་ནུས་པ་དང༌། འབྲེལ་པ་ལ་ལྟོས་པའི་ཕྱིར་ན། སྒྲ་མི་རྟག་པར་བསྒྲུབ་པ་ན། གཞན་དག་སྒྲ་བྱས་པར་གྱུར་དུ་ཆུག་ཀྱང༌། དོན་
དང་འབྲེལ་བ་ནི། སྐྱེས་བུས་མ་བྱས་པ་ཡིན་ནོ་ཞེས་བྱ་བའི་དོགས་པ་འདི་བཟློག་བའི་ཕྱིར་ཉེ་བར་བསྟན་པ་མེད་ན་མི་རྟོགས་པའི་ཕྱིར་རོ་ཞེས་སྨོས་སོ། །འདི་སྐད་བརྗོད་པ་ཡིན་ཏེ། དངོས་པོའི་འབྲེལ་པས་ནི་སྒྲ་འགལ་ཡང་དོན་རྟོགས་པར་བྱེད་པ་མ་ཡིན་ཏེ། སྒྲ་གང་ལ་ཡང་ཉེ་བར་བསྟན་པ་མེད་པ་ནི་དེ་ལས་དོན་རྟོགས་པ་མེད་པའི་ཕྱིར་རོ། །འདི་སྙམ་དུ་ཉེ་པར་བསྟན་པས་དངོས་པོའི་འབྲེལ་པ་གསལ་བར་བྱེད་པ་ཡིན་ནོ་སྙམ་ན། ཉེ་བར་བསྟན་ན་ནི་ཞེས་སྨོས་སོ། །བཀག་པ་མེད་པའི་ཕྱིར་ཏེ། གེགས་མེད་པའི་ཕྱིར་རོ། །གལ་ཏེ་ཉེ་བར་བསྟན་པ་ཡོད་ཀྱང་དོན་རྟོགས་པ་ལ་གེགས་ཡོད་ན་ནི་དེའི་ཚེ་གང་ལ་ཉེ་བར་བསྟན་པ་ཡོད་ཀྱང་དོན་རྟོགས་པ་མ་ཡིན་ན་དེ་ཉིད་ལ་དངོས་པོའི་འབྲེལ་པ་མེད་པ་ཡིན་ལ། གཞན་ལ་ཡོད་པ་ཡིན་ནོ་ཞེས་འབྲེལ་པ་དངོས་པོར་གྱུར་པ་གོ་བར་གྱུར་ན། གང་གི་ཕྱིར་ཉེ་བར་བསྟན་པ་ཁོ་ན་ལས་དོན་རྟོགས་པ་གེགས་མེད་པ་དེའི་ཕྱིར་སྐྱེས་བུའི་འདོད་པ་ཡུལ་མ་ངེས་པ་ཅན་གྱི་རང་དབང་ཉིད་ཡིན་པས་རྣམ་པར་གནས་བ་ངེས་པ་སེལ་བ་ཡིན་ནོ། འདི་སྐད་དུ་དངོས་པོའི་འབྲེལ་པ་ནི་འགའ་ཡང་ཡོད་པ་མ་ཡིན་གྱི། འོན་ཀྱང་འདོད་པས་དོན་རྗོད་པར་བྱེད་པའི་ཕྱིར་ན་བརྡ་ལས་བྱུང་བ་ཡིན་ནོ་ཞེས་བརྗོད་པ་ཡིན་ནོ། །དངོས་པོ་འབྲེལ་པ་ཉིད་ཀྱི་རྩོད་པ་འདི་ཚད་མ་རྣམ་འགྲེལ་དུ་བཀག་པའི་ཕྱིར་མི་སྤྲོའོ། །རིག་བྱེད་སྐྱེས་བུས་མ་བྱས་པ་འདི་ལ་ཡི་གེ་འམ་ཚིག་རྟག་པ་ཉིད་ནི་ཉེ་བར་མཁོ་བ་མ་ཡིན་ཏེ། དེ་དག་ནི་རིག་བྱེད་དང་འཇིག་རྟེན་པ་ལ་ཁྱད་མེད་པས་ལམ་པོ་ཆེའི་མི་ཚིག་ཀྱང་ཚད་མར་ཐལ་བའི་ཕྱིར་རོ། །འོན་ཀྱང་དག་དང་ངག་གི་དོན་ཉིད་སྐྱེས་བུས་མ་བྱས་པར་བསྒྲུབ་པར་བྱ་བ་ཡིན་ནོ། །སློབ་དཔོན་གྱིས་ཚིག་གི་རང་བཞིན་སྐྱེས་བུས་བྱས་པར་བསྒྲུབ་པ་བསམ་པ་ནི་འདི་ཡིན་ཏེ། ངག་ནི་ཚིག་ལས་ཐ་དད་པ་མ་ཡིན་པས་དེ་སྐྱེས་བུས་བྱས་པ་ཡིན་ན་ངག་ཀྱང་སྐྱེས་བུས་བྱས་པར་འགྱུར་ལ། དག་གི་ངོ་བོ་སྐྱེས་བུས་བྱས་ནས་དོན་ཀྱང་སྐྱེས་བུས་བྱས་པར་འགྲུབ་པ་ཡིན་ཏེ། དེས་ན་རིག་བྱེད་སྐྱེས་བུས་བྱས་པར་འགྲུབ་པ་ཡིན་ནོ། །ཅི་སྟེ་སྐྱེས་བུས་བྱས་པའི་ཚིག་རྣམས་འདུས་པའི་བདག་ཉིད་ཀྱི་ངག་སྐྱེས་བུས་མ་བྱས་པ་ཡིན་ནམ། ཡང་ན་ཚིག་ཉིད་རྟག་པ་ཡིན་ན་དེ་ལྟ་ན་ཡང་དོན་སྐྱེས་བུས་མ་བྱས་ན་རིག་བྱེད་ཚད་མར་འགྱུར་གྱི། རང་གི་ངོ་བོ་ནི་མ་ཡིན་ནོ། །ཚིག་རྣམས་རྟག་པ་དང་དེ་བཀོད་པའི་བདག་ཉིད་ཀྱི་དག་
སྐྱེས་བུས་མ་བྱས་པ་ནི་རྣམ་འགྲེལ་དུ་བཀག་པ་ཡིན་ཡང་ཁས་བླངས་ནས། རྣམ་འགྲེལ་གྱི་ཚིག་ལེ་འུར་བྱས་པ་དག་གིས་དངོས་པོའི་དོན་དང་འབྲེལ་པ་འགོག་པར་སྟོན་པར་བྱེད་དོ། །རིག་བྱེད་ཀྱི་སྒྲ་ངག་གམ་ཚིག་ཏུ་གྱུར་པ་དག་གི་དོན་ནི་སྐྱེས་བུའི་ཉེ་བར་བསྟན་པ་མེད་པར་གང་གིས་ཀྱང་ངེས་པར་ནུས་པ་མ་ཡིན་ནོ་ཞེས་བསྟན་པའི་ཕྱིར་བཤད་པ། རེ་ཞིག་སྐྱེས་བུ་བདག་ཉིད་ནི་རིག་བྱེད་ཀྱི་དོན་རིག་པ་མ་ཡིན་ཏེ། འདོད་ཆགས་ལ་སོགས་པ་དང་ལྡན་པའི་ཕྱིར་རོ། །གཞན་ལས་ཀྱང་མ་ཡིན་ཏེ། འདོད་ཆགས་ལ་སོགས་པ་དང་ལྡན་པ་ཁྱད་པར་མེད་པའི་ཕྱིར་རོ། །རིག་བྱེད་ཀྱང་ཉེ་བར་བསྟན་པ་མེད་པར་ཐོས་པ་ན་བདག་ཉིད་ཀྱི་དོན་སྟོན་པར་བྱེད་པ་མ་ཡིན་ཏེ། དེས་ན་རིག་བྱེད་ཀྱི་དོན་ནི་ཇི་ལྟར་ཡང་རྟོགས་པ་མ་ཡིན་ནོ། །དེས་ན་ཚིག་གི་དོན་དང་ངག་གི་དོན་ངེས་པ་མེད་པའི་ཕྱིར་མེ་ལ་སྦྱིན་སྲེག་སྦྱིན་པར་བྱའོ་ཞེས་བྱ་བའི་ངག་འདི་ལ་ཇི་ལྟར་རིག་བྱེད་ཚད་མར་བྱེད་པ་དག་གིས་བརྟགས་པ་དེ་ཁོ་ན་ལྟར་ཡིན་གྱི་ཁྱི་ཤ་ཟོ་ཤིག་ཅེས་བྱ་བ་འདི་ནི་དོན་མ་ཡིན་ནོ་ཞེས་བྱ་བ་འདིར་ཚད་མ་ཅི་ཞིག་ཡོད། འདི་སྙམ་དུ་འདི་ནི་འདི་འཇིག་རྟེན་གྱི་ཚིག་སྒྲ་ལས་བྱུང་བའི་ཐ་སྙད་དུ་གྲགས་པ་ཡིན་པས་དེ་ཉིད་རིག་བྱེད་ཀྱི་དོན་ངེས་པའི་རྒྱུ་ཡིན་ནོ། །མེ་ལ་སྦྱིན་སྲེག་བྱ་བའི་སྒྲས་ཁྱི་ཤ་བརྗོད་པ་འམ། སྦྱིན་པར་བྱའོ་ཞེས་བྱ་བ་འདིའི་དོན་བཟའ་བར་ནི་གྲགས་པ་མེད་ན། དེ་ཇི་ལྟར་དོན་འདི་ལྟར་རྟོག་ཅེས་དོགས་པ་ལ། བཤད་པ་འཇིག་རྟེན་འདིར་དབང་པོ་ལས་འདས་པའི་དོན་མཐོང་བ་གང་ཞིག་ཡོད་ན་གང་གིས་རིག་བྱེད་ལ་དོན་འདི་རྣམ་པར་ཕྱེ་བ་ཡིན། གང་གི་ཕྱིར་སྐྱེས་བུས་མ་བྱས་པའི་དོན་འདི་དབང་པོ་ལས་འདས་པ་ཡིན་པས་གཟུགས་ལ་སོགས་པ་དེ་བཞིན་དུ་དབང་པོས་རྟོགས་པར་བྱ་བ་མ་ཡིན་ལ། དབང་པོ་ལས་འདས་པའི་དོན་མཐོང་བ་ཡང་འགའ་ཡང་ཡོད་པ་མ་ཡིན་པ་དེའི་ཕྱིར་སྐྱེས་བུས་མ་བྱས་པའི་དོན་ངེས་པར་ནི་སུས་ཀྱང་བསྟན་པར་མི་ནུས་སོ། །འཇིག་རྟེན་པའི་དོན་ནུས་པ་ཡང་ཉེ་བར་བསྟན་པ་ལ་ལྟོས་པ་དེའི་ཕྱིར་བརྡར་བྱས་པ་ཡིན་གྱི། སྐྱེས་བུས་མ་བྱས་པ་ནི་མ་ཡིན་ནོ། །དེས་ན་བརྡ་ལས་བྱུང་བས་ཅི་ལྟར་སྐྱེས་བུས་མ་བྱས་པའི་དོན་ངེས་པར་འགྱུར། སྐྱེས་བུས་མ་བྱས་པའི་བཤད་པ་ལས་རིག་བྱེད་ཀྱི་དོན་ངེས་པ་ཡིན་ནོ་ཞེས་གང་བཤད་པ་དེ་ཡང་འདི་ཉིད་ཀྱིས་བསལ་བ་ཡིན་ཏེ། བཤད་པ་ཡང་དོན་
ངེས་པ་མེད་པ་ཅན་ཡིན་པའི་ཕྱིར་རོ། །འོན་ཏེ་ཡང་འཇིག་རྟེན་པའི་སྒྲ་དོན་གྱི་འབྲེལ་པ་བརྡ་ལས་བྱུང་བ་མ་ཡིན་པ་དེ་ལྟ་ན་ཡང༌། འཇིག་རྟེན་པའི་སྒྲ་དོན་གྱི་འབྲེལ་པ་སྣ་ཚོགས་པ་ཅན་ཡིན་པས་ན། དེ་ལས་དོན་ངེས་པ་མ་ཡིན་ནོ། །གལ་ཏེ་འཇིག་རྟེན་པའི་སྒྲའི་དོན་གཅིག་ཡིན་ན་ནི་དེ་ལ་རིག་བྱེད་ཀྱི་དོན་གཅིག་ཏུ་ངེས་པར་འགྱུར་བ་ཡིན་ན། འཇིག་རྟེན་པའི་སྒྲ་ནི་དོན་སྣ་ཚོགས་པ་ཅན་ཡིན་ཏེ། འདི་ལྟར་གོའི་སྒྲ་ལས་དོན་དགུ་རྟོགས་པ་ཡིན་ནོ། །དེ་བཞིན་དུ་བརྡ་ལ་ལྟོས་ནས་སྒྲ་ཐམས་ཅད་ལ་དོན་ཐམས་ཅད་མཐོང་བ་ཡིན་ནོ། །གྲགས་པས་བྱས་པའི་དོན་རྟོགས་པ་ལས་བརྡས་བྱས་པའི་དོན་རྟོགས་པ་ནི་ཁྱད་པར་ཡོད་པ་མ་ཡིན་ཏེ། དེས་ན་འཇིག་རྟེན་པའི་སྒྲ་ཐམས་ཅད་ལ་དོན་ཐམས་ཅད་ཡོད་པ་ཡིན་ཏེ། གྲགས་པའི་ཕྱིར་དང་བརྡ་བྱས་པའི་ཕྱིར་རོ། །དེས་ན་དེ་དག་ལས་དོན་ངེས་པ་གཏན་ལ་ཕེབས་པར་གལ་འགྱུར། ཡང་ན། མཐོ་རིས་ལྷ་མོ་ལ་སོགས་སྒྲ། །གྲགས་པ་མ་ཡིན་བརྗོད་མཐོང་སྟེ། །དཔྱོད་པ་པ་དེ་ཉིད་ཀྱིས་མཐོ་རིས་ནི་བདེ་བ་ཁྱད་པར་ཅན་ཡིན་ལ། ལྷ་མོ་ནི་གཙུབ་ཤིང་ཡིན་པར་བརྗོད་པ་ཡིན་ནོ། །འདི་གཅིག་ལ་ཚད་མ་མ་ཡིན་པའི་གྲགས་པ་དེ་ཉིད་ཇི་ལྟར་གཞན་ལ་ཚད་མར་བྱེད། འདི་སྙམ་དུ་མེ་ལ་སྦྱིན་སྲེག་ཅེས་བྱ་བའི་སྒྲ་ཁྱི་ཤ་ལ་ཐལ་བར་འགྱུར་རོ་ཞེས་བྱ་བ་ནི་རེ་ཞིག་རིགས་པ་མ་ཡིན་ཏེ། གང་གི་ཕྱིར་དེའི་དོན་ནི་གཞན་དག་ཏུ་རིག་བྱེད་ཉིད་ཀྱིས་རྣམ་པ་གཞན་དུ་བཤད་པ་ཡིན་ནོ་སྙམ་ན། བཤད་པ་དེ་འདྲའི་རིག་བྱེད་ཀྱི་སྒྲ་གཞན་དག་ལ་ནི་མ་གྲགས་པའི་དོན་རྗོད་པར་རྟོག་པ་དེ་འདྲའི་རྣམ་རྟོག་ཉིད་དུ་འགྱུར། མེ་ལ་སྦྱིན་སྲེག་གི་ངག་ལ་ཅི་འདྲ་བདེ་འདྲ་བར་མེ་ལ་སྦྱིན་སྲེག་ལ་སོགས་པའི་ངག་ངེས་པར་བྱེད་པའི་རྒྱུ་རིག་བྱེད་ཀྱི་ཕྱོགས་དེར་ཡང་འགྱུར་བ་ཡིན་ནོ། །དེའི་དོན་ནི་འཇིག་རྟེན་པ་ཉིད་ལས་བརྟག་པར་བྱ་བ་ཡིན་ན། འཇིག་རྟེན་ཡང་ཚད་མ་མ་ཡིན་ཏེ། དེས་ན་རྒྱལ་དཔོག་པ་བཞིན་དུ་ཁོ་བོ་ཡང་དེར་ཁྱི་ཤ་ཟ་བ་དང་མཐུན་པར་རྟོགས་པར་བྱེད་དོ། །གང་གི་ཕྱིར་མེ་ལ་སྦྱིན་སྲེག་ལ་སོགས་པའི་སྒྲ་གང་ཞིག་ངེས་པའི་དོན་དང་ལྡན་པར་མ་གྲུབ་པ་དེ་ལ་ངེས་པའི་དོན་རབ་ཏུ་སྒྲུབ་པར་བྱེད་པ་བསྟན་པར་བྱ་བ་ལ། སྐྱེས་བུའི་ཉེ་བར་བསྟན་པ་མེད་ན་རང་ཞེས་བྱ་བ་མེ་ལ་སྦྱིན་སྲེག་ལ་སོགས་པའི་ངག་གི་དོན་སྟོན་པའི་རང་བཞིན་རིག་བྱེད་ཀྱི་ཕྱོགས་གཅིག་པོ་དོན་མ་གྲུབ་པས་ནུས་པ་ཡོད་པ་མ་ཡིན་ཏེ། གང་གི་ཕྱིར་དེ་ལ་ཡང་
བརྒལ་ཞིང་བརྟག་པ་མཚུངས་པའི་ཕྱིར་ཏེ། ཅི་ལྟར་དེ་ལ་ངེས་པར་གཏན་ལ་ཕེབས་ཞེས་བྱ་བ་ལ་སོགས་པ་དེ་ལྟ་བུའི་ཚུལ་དུའོ། །གཞན་ཡང་འཇིག་རྟེན་གྱི་གྲགས་པས་རིག་བྱེད་ཀྱི་སྒྲའི་དོན་ཡོངས་སུ་འཛིན་པ་ནི་རིགས་པ་མ་ཡིན་ནོ་ཞེས་བྱ་བའི་གྲགས་བ་ཞེས་བྱ་བས་འཆད་དོ། །མི་རྣམས་ཀྱི་བརྗོད་པ་ནི་ཚད་མར་མི་འདོད་པ་དང༌། དེ་ལས་རིག་བྱེད་ཀྱི་སྒྲའི་དོན་ཡང་རྟོགས་པར་བྱེད་པའི་སྡང་བ་དད་འདོད་བ་འདི་ཅི་ལྟ་བུ་ཞིག་ཡིན། གང་ཁོ་ནའི་ཚེ་འཇིག་རྟེན་པའི་དག་གང་ལ་སྡང་བར་གྱུར་ཏེ། རིག་བྱེད་ཀྱི་ཚིག་ཚད་མར་འཛིན་པ་དེ་ཉིད་ཀྱི་ཚེ་དེ་ལ་འདོད་པ་ཡིན་ཏེ། དེའི་དབང་གིས་རིག་བྱེད་ཀྱི་དོན་ཡོངས་སུ་འཛིན་པའི་ཕྱིར་རོ། །ཅི་སྟེ་གྲགས་པ་ལས་རྒལ་བ་སྟེ། ཡོངས་སུ་སྤངས་ནས་མ་གྲགས་པའི་དོན་ཁྱི་ཤ་ཟ་བ་རྟོགས་པ་ལ་རྒྱུ་ཅི་ཞིག་ཁྱེད་ལ་ཡོད་ཅེ་ན། །སློབ་དཔོན་གྱིས་རབ་གྲགས་ཞེས་བྱ་བ་ལ་སོགས་པ་སྨོས་སོ། །གྲགས་པ་ནི་ཚད་མ་མ་ཡིན་ན་ཚད་མ་མ་ཡིན་པ་དེ་ཉིད་ལས་རིག་བྱེད་ཀྱི་དོན་རྣམ་པར་འཇོག་པར་ཇི་ལྟར་འགྱུར། དེ་རྣམ་པར་འཇོག་ན་ཡང་ཇི་ལྟར་ཚད་མ་དང་མི་ལྡན་པའི་དོན་ཁྱེད་ཀྱིས་བརྟགས་པ་དེ་ལྟར་ཁོ་བོ་ཡང་ཁྱི་ཤ་ཟོ་ཤིག་ཅེས་བྱ་བར་རྟོགས་པའི་ཕྱིར་འོ་སྐོལ་གཉིས་མཚུངས་པར་འགྱུར་རོ་ཞེས་བསྟན་པ་ཡིན་ནོ། །གཞན་ཡང་འཇིག་རྟེན་གྱི་གྲགས་པ་གང་གིས་ཁོ་བོ་ཅག་རིག་བྱེད་ཀྱི་སྒྲའི་དོན་ལ་ཐེ་ཚོམ་ཟ་བ་དེ་ཁོ་ནས་ཁྱོད་དོན་རྣམ་པར་གནས་པར་བྱེད་པར་ཅི་འདོད་འདི་ལྟར་གྲགས་པ་ཉིད་ཀྱིས་སྒྲའི་དོན་གཅིག་ཏུ་ངེས་པར་བྱ་བའི་སྐབས་སུ་འདིར་དོན་ཅི་ཞིག་ཡིན་ཞེས་བྱ་བ་དེ་འདྲ་བའི་དོགས་པ་ཐེ་ཚོམ་སྐྱེད་པར་བྱེད་དེ། གང་ཞིག་གང་ལ་ཐེ་ཚོམ་ཟ་བའི་རྒྱུ་དེ་ཉིད་དེ་ལ་ངེས་པའི་རྒྱུར་ནི་མི་རིགས་སོ། །ཅི་ལྟར་གྲགས་པ་ཐེ་ཚོམ་གྱི་རྒྱུ་ཡིན་ཞེ་ན། གང་གི་ཕྱིར་འཇིག་རྟེན་གྱི་ཐ་སྙད་གྲགས་པ་དེ་ལ་སྣ་ཚོགས་ཀྱི་དོན་དག་ལ། སྒྲ་འཇུག་པར་མཐོང་བའི་ཕྱིར་རོ། །དོན་སྣ་ཚོགས་པ་ཅན་རྣམ་པ་གཉིས་གྲགས་པ་ལས་གྱུར་པ་དང་བརྡ་ལས་གྱུར་བ་ནི་སྔར་གཏན་ལ་ཕབ་ཟིན་ཏོ། །གལ་ཏེ་ཡང་འཇིག་རྟེན་གྱི་སྒྲ་ནི་དོན་སྣ་ཚོགས་པ་ཅན་ཡིན་ཞིང། འཇིག་རྟེན་པའི་སྒྲའི་དོན་ཉིད་གཟུང་བར་མ་བྱས་པ་ཡིན་པ་དེ་ལྟར་ཡང་འཇིག་རྟེན་པ་གང་ལ་བརྗོད་བྱ་རིགས་པ་ཚད་མས་གནོད་པ་མེད་པ་དེ་གཟུང་བར་བྱ་བ་ཡིན་ལ། གང་ཞིག་ཚད་མས་གནོད་པ་དེ་ནི་སྤངས་པ་ཡིན་ནོ། །མེའི་སྦྱིན་སྲེག་ལ་སོགས་པའི་ངག་གི་བརྗོད་བྱ་མར་ལ་སོགས་པའི་བསྲེག་རྫས་མེར་
འཇུག་པ་ལ་ནི་ཚད་མས་གནོད་པ་མེད་པ་དེ་ཕྱིར་དེ་ཉིད་གཟུང་བར་བྱ་བ་ཡིན་གྱི། ཁྱི་ཤ་བ་ཟ་བ་ལ་སོགས་པ་ནི་མ་ཡིན་ནོ་ཞེ་ན། གལ་ཏེ་ཚད་མས་མི་གནོད་པའི་འཇིག་རྟེན་པའི་བརྗོད་བྱ་གཟུང་བ་ཡིན་ན། ད་ནི་སྐྱེས་བུས་མ་བྱས་པ་རླུང་གི་བུའི་ཚིག་ལས་ཁྱད་པར་ཅི་ཞིག་ཡོད་དེ། སྐྱེས་བུས་མ་བྱས་པ་ཡང་རིགས་པ་དང་ལྡན་པ་ཡིན་པ་དེས་ན་གཟུང་བར་བྱ་བའི་དོན་ཡིན་པས་རླུང་གི་བུ་གཤོ་བ་ཅན་གྱི་ཚིག་གང་ཡིན་པ་དེ་གལ་ཏེ་རིགས་པས་གནོད་པ་མ་ཡིན་ན་ནི་ཅིའི་ཕྱིར་མི་གཟུང༌། སྐྱེས་བུས་མ་བྱས་པ་ཡོངས་སུ་འཛིན་པ་ལ་མངོན་པར་ཞེན་པ་སུ་ཞིག་ཡོད། རིགས་པའི་སྟོབས་ཀྱིས་འཇུག་པ་ན་རླུང་གི་བུའི་ཚིག་གཟུང་བ་ཉིད་གླའི་རིག་བྱེད་ནི་མ་ཡིན་ཏེ། རླུང་གི་བུ་ལ་ནི་རིགས་པ་ཡོད་ཀྱི་འདི་ལ་རིགས་པ་མི་སྲིད་པ་ཡིན་ནོ། །གང་གིས་གནོད་པ་ཁྱི་ཤ་ཟོས་པ་ནི་མཐོ་རིས་ཐོབ་ལ། མར་ལ་སོགས་པའི་བསྲེག་རྫས་བཅུག་པས་མ་ཡིན་པ་འདི་ལ་རིགས་པ་ཅི་ཡོད། འདི་ལྟར་དབང་པོ་ལས་འདས་པའི་མཐོ་རིས་ཐོབ་པའི་རྒྱུ་ཁྱི་ཤ་ཟ་བ་འམ་གཞན་རྟག་པ་ནི་དབང་པོ་ལས་འདས་པ་ཉིད་དོ། །དབང་པོ་ལས་འདས་པའི་དོན་ལ་གནོད་པར་བྱེད་པ་འམ་སྒྲུབ་པར་བྱེད་པའི་རིགས་པ་ནི་དངོས་པོའི་སྟོབས་ཀྱིས་ཞུགས་པའི་ཚུལ་གསུམ་པ་ལ་བརྟེན་པ་ནི་མ་ཡིན་གྱི། འོན་ཀྱང་ལུང་གི་དོན་གྱི་རྒྱུ་མཚན་ཉིད་དོ་ཞེས་གང་བཤད་པ་ནི། །དབང་པོ་ལས་འདས་པ་ཞེས་བྱ་བ་ཡིན་ནོ། །དབང་པོ་ལས་འདས་པའི་དོན་ལ་འཇུག་པའི་རིགས་པ་གང་ཡིན་པ་དེ་ནི་ལུང་གི་དོན་ཉིད་ལ་བརྟེན་པ་ཚུལ་གསུམ་པ་རྣམ་པར་འཇོག་པའི་རྒྱུ་མཚན་ཅན་ཡིན་གྱི་གཞན་དངོས་པོའི་སྟོབས་ཀྱིས་ཞུགས་པའི་ཚུལ་གསུམ་ནི་ཡོད་པ་མ་ཡིན་ནོ། །འོ་ན་ནི་ལུང་ལ་བརྟེན་པའི་རིགས་པ་ཉིད་ཀྱིས་ཁྱི་ཤ་ཟོས་པས་མཐོ་རིས་ཐོབ་པ་ལ་གནོད་པར་བྱེད་དོ་ཞེན་བཤད་པ་དེའི་དོན་ཏེ། ལུང་གི་དོན་ཡང་གནས་མེད་ཕྱིར། །རྣམ་པར་གནས་པ་མེད་པའི་ཕྱིར་རིགས་པ་མ་ཡིན་ནོ། །བསྟན་བཅོས་ཐམས་ཅད་ཀྱི་དོན་ནི་རིགས་པས་རྣམ་པར་གཞག་པར་བྱ་བ་ཡིན་ལ། བསྟན་བཅོས་ཀྱི་དོན་རྣམ་པར་གནས་པ་ཡང༌། ཕྱོགས་གཞན་དུ་གྲུབ་པའི་དོན་ལ་ལྟོས་ནས་ལུང་གི་དོན་ལ་བརྟེན་པའི་རྗེས་སུ་དཔག་པ་འཇུག་པ་ཡིན་ན། རིགས་པ་མེད་པས་ཕྱོགས་གཞན་གྱི་དོན་རྣམ་པར་གནས་པ་ཡང་མེད་དེ། དེས་ན་བསྟན་བཅོས་འདིས་ཅི་ཞིག་བསྒྲུབ་པ་འམ། ཅི་ཞིག་བཀག་པ་ཡིན་ཞེས་རིགས་
པས་ལུང་གི་དོན་འགར་ཡང་དུང་མ་གྲུབ་པས་རིགས་པ་མི་སྲིད་པ་ཡིན་ནོ། །གལ་ཏེ་རིགས་པ་མེད་མོད་གྲགས་པའི་སྟོབས་ཉིད་ཀྱིས་ཁ་ཅིག་ཏུ་དོན་དུ་མ་ལ་འཇུག་ལ། ཁ་ཅིག་ཏུ་ངེས་པ་ཉིད་ལ་འཇུག་པ་ཡིན་ཏེ། དེས་ན་གྲགས་བ་ཉིད་ཀྱིས་སྒྲ་དོན་ནི་ཞེས་བྱ་བ་ལ་སོགས་པ་ཅིའི་ཕྱིར་བརྗོད་ཅེ་ན། རྣམ་གཞན་ཞེས་སྨོས་ཏེ། རྣམ་པ་གཞན་དོན་དུ་མ་ལ་འཇུག་པ་མི་སྲིད་པ་གང་ཡིན་པ་དེ་མེད་པའི་གཏན་ཚིགས་དེ་ཕྱིར་རོ། །སྒྲ་རྣམས་ནི་དོན་གཅིག་པ་ཡང་ཉེ་བར་བསྟན་པའི་དབང་གིས་ཞུགས་པ་ཡིན་ལ། དེ་ལ་དེ་ནི་བརྡ་གཞན་དུ་སྦྱར་ན་ཡང་འཇུག་པ་ཉིད་དོ། །དེས་ན་ཐེ་ཚོམ་དུ་འགྱུར་རོ། །ཅི་སྒྲ་འདི་ངོ་བོ་ཉིད་ཀྱི་དོན་ཐམས་ཅད་རྟོགས་བར་རུང་བ་ཡིན་ནམ། འོན་ཏེ་ཉེ་བར་བསྟན་པའི་དབང་གིས་ཡིན། ཐམས་ཅད་དུ་ཡང་རུང་བ་ཉིད་ནི་དོན་ཐམས་ཅད་ལ་འཇུག་པ་མ་བཀག་པ་ཡིན་ནོ། །སྒྲ་གང་ལ་ནུས་པ་སྣ་ཚོགས་ཡོད་པ་དེ་ལ་དེ་སྐད་ཅེས་བརྗོད་དོ། །རང་ཉིད་ཅེས་བྱ་བ་ནི་བརྡའི་སྟོབས་འབའ་ཞིག་གི་དོན་སྣ་ཚོགས་ལ་འཇུག་པ་ནི་མ་ཡིན་གྱི། འོན་ཀྱང་རང་ཉིད་གྲགས་པ་ལས་ཀྱང་རྣམ་པར་གནས་པ་ཡིན་ནོ། །དེའི་དོན་འདི་ཡིན་ཏེ། བརྡའི་དབང་དང་གྲགས་པ་ལས་སྒྲ་རྣམས་ནི་དོན་སྣ་ཚོགས་ལ་འཇུག་པར་གནས་ཏེ། དེས་ན་རིག་བྱེད་ཀྱི་སྒྲ་མེ་ལ་སྦྱིན་སྲེག་སྦྱིན་ནོ་ཞེས་བྱ་བ་ལ་སོགས་པ་དག་ལ་ངེས་པར་བྱེད་པའི་རྒྱུ་མཐོང་བ་མེད་པའི་མཁས་པ་རྣམས་ཀྱི་བརྡའི་དབང་གིས་མི་འདོད་པའི་དོན་ཡིན་ནམ། འོན་ཏེ་གོའི་སྒྲ་བཞིན་དུ་རྒྱལ་དཔོག་པས་མི་འདོད་པ་དོན་གཞན་ཉིད་དུ་གསལ་བར་བྱེད་པ་ཡིན་ཞེས་གདོན་མི་ཟ་བར་ཐེ་ཚོམ་དུ་འགྱུར་རོ། །དེའི་ཕྱིར་དང་འདི་ལ་གྲགས་པའི་དབང་ཉིད་ཀྱིས་ཐེ་ཚོམ་དུ་འགྱུར་བ་ཡིན་ནོ་ཞེས་བྱ་བ་འདི་ན་རིགས་པར་བརྗོད་པ་ཡིན་ནོ། །འདི་སྙམ་དུ་རིག་བྱེད་ཉིད་རང་གི་དོན་ངེས་པར་སྟོན་པ་ཡིན་ཏེ། འདི་ལྟར་རིག་བྱེད་ཀྱིས་ནི་རྒྱལ་དཔོག་པ་ལ་རང་གི་དོན་བསྟན་ལ། དེས་ན་དེ་ལ་རིག་བྱེད་ཀྱི་དོན་བསྟན་པ་ཡིན་ནོ་ཞེ་ན། དེ་བཟློག་པའི་ཕྱིར་བཤད་པ། འགའ་ཞིག་སྡོང་དུ་མ་འདི་ན་རེ་ལམ་འདི་ཡིན་ནོ་ཞེས་སྨྲའོ་ཞེས་ཟེར་བ་དང༌། གཞན་དག་བདག་ཉིད་ལམ་འདི་ཡིན་པར་སྨྲའོ་ཞེས་ཟེར་བ་དེ་ལྟར་རོ། །འདིས་ནི་དོན་གཞན་ཉེ་བར་བཀོད་པའི་སྒོ་ནས་དོན་འདི་བསྟན་པ་ཡིན་ནོ། །གལ་ཏེ་རིག་བྱེད་ལ་རང་གི་དོན་སྟོན་པའི་ནུས་པ་ཡོད་ན་ནི། བདག་ཅག་ལ་ང་རང་གི་དོན་སྟོན་པར་འགྱུར་བ་ཉིད་ཡིན་
ནོ། །དེས་ན་རྒྱལ་དཔོག་པ་ལ་ཡང་དེས་རང་གི་དོན་བསྟན་པ་ནི་མེད་དོ། །དེ་ནི་དོན་འདིར་རིག་བྱེད་ཀྱིས་བསྟན་པ་ཡིན་ནོ་ཞེས་སྨྲ་བ་ན་རིག་བྱེད་ལ་སྙད་བཏགས་ནས་བདག་ཉིད་སྟོན་པ་ཡིན་ལ། ཁོ་བོ་ནི་ཁྱི་ཤ་ཟ་བར་བྱའོ་ཞེས་བྱ་བ་ལ་སོགས་པ་དོན་འདི་བདག་ཉིད་ཀྱིས་བརྟགས་པར་སྟོན་པ་ཡིན་ནོ། །དེ་ལ་དེའི་དང་པོ་ཁོ་བོ་ལ་ཁྱད་པར་ནི་ཅུང་ཟད་ཀྱང་མེད་དོ། །དོན་དེ་བཤད་པ་ནི་དེ་གཉིས་བྱེ་བྲག་བརྟག་པར་གྱིས་ཞེས་བྱ་བ་ཡིན་ནོ། །ཚིགས་སུ་བཅད་པ་འདིས་ནི་གཏམ་སྟེར་བ་ལས་ཀྱང་རིག་བྱེད་ཀྱི་དོན་ངེས་པ་གཏན་ལ་ཕབ་པ་མ་ཡིན་ནོ་ཞེས་བརྗོད་པ་ཡིན་ནོ། །དེའི་ཕྱིར་རིག་བྱེད་ཀྱི་དོན་ངེས་པ་ནི་གྲགས་པས་གཏན་ལ་མི་ཕེབས་ཤིང་རིགས་པས་མ་ཡིན། གཏམ་སྟེར་བས་ཀྱང་མ་ཡིན་ནོ། །གཞན་ཡང་གལ་ཏེ་དོན་ངེས་པ་ཞིག་ཡོད་ན་ནི་དེ་རྒྱལ་དཔོག་པས་ཤེས་ནས་ཉེ་བར་སྟོན་པ་ཡིན་ནོ། །དོན་གཅིག་ཉིད་གསལ་བར་བྱེད་པའི་ངེས་པ་དེ་ཉིད་གང་ལས་ཡིན་ཏེ། མ་ཡིན་པ་ཉིད་དོ། །བརྗོད་པར་བྱ་བའི་ཡུལ་ཐམས་ཅད་ལ་རུང་བའི་སྒྲས་ནི་དོན་ཐམས་ཅད་བརྗོད་པར་ནུས་པ་དང༌། སྒྲ་ནི་བརྡའི་དབང་གིས་འཇུག་པར་མཐོང་བ་ཡིན་ན་དེ་ཇི་ལྟར་དོན་གཅིག་ལ་ངེས་པར་འགྱུར། རིག་བྱེད་ལ་དོན་ངེས་པ་ཡོད་ཀྱང་དེ་ཤེས་པར་ཅི་ལྟར་འགྱུར་ཏེ། གང་ལས་མཐོང་བ་ཉིད་ཀྱིས་དོན་ངེས་པར་འགྱུར་བ་རིག་བྱེད་ཀྱི་སྒྲ་ལ་རང་བཞིན་གྱི་ཁྱད་པར་ནི་ཅུང་ཟད་ཀྱང་ཡོད་པ་མ་ཡིན་ལ། ཡོད་ཀྱང་མངོན་སུམ་ནི་མ་ཡིན་ཏེ། ཉེ་བར་བསྟན་པ་མེད་ཀྱང་རྟོགས་པར་ཐལ་བའི་ཕྱིར་རོ། །དབང་པོ་ལས་འདས་པ་ནི་སུས་ཀྱང་ཤེས་པར་ནུས་པ་མ་ཡིན་ན། གང་གིས་དབང་པོ་ལས་འདས་པ་དེ་ཡང་ཤེས། འོ་ན་ནི་འཇིག་རྟེན་པའི་དག་ལ་དོན་ངེས་པ་མེད་པར་འགྱུར་ཞིང་ཡོད་ཀྱང་ཤེས་པར་ནུས་པ་མ་ཡིན་ནོ་ཞེ་ན་བཤད་པ། བརྗོད་འདོད་དེ་བརྗོད་པར་འདོད་པ་ལ་གནས་པའི་དོན་རྗོད་བྱེད་མ་གཏོགས་པར་ནི་ངེས་པར་བྱེད་པ་མེད་ལ། ཤེས་པར་ཡང་མི་ནུས་སོ། །བརྗོད་པར་འདོད་པ་ལ་སྣང་བའི་དོན་བརྗོད་ན་ནི་བརྗོད་པར་འདོད་པ་དོན་ངེས་པའི་རྒྱུ་ཡིན་ཏེ། གང་ཞིག་བརྗོད་པར་འདོད་པའི་དོན་དེ་ཉིད་བརྗོད་བར་བྱ་བ་ཡིན་པའི་ཕྱིར་དོན་ངེས་པ་ཡིན་ལ། དོན་ངེས་པ་དེའི་གསལ་བར་བྱེད་པ་ནི་བརྡ་ཡིན་ནོ། །བྱས་པའི་ལུང་དང་འཇིག་རྟེན་པའི་ཐ་སྙད་ལ་ནི་སྨྲ་བོ་གང་ཞིག་བརྗོད་པར་འདོད་པའི་བརྗོད་པར་བྱ་བ་དེ་ལ་བརྡར་བྱེད་ལ། དེའི་ཚེ་སྨྲ་བ་པོའི་ཐ་སྙད་ནས་རྟོགས་པ་པོ་ཡང་རང་གི་སློབ་མ་ལ། དེ་དག་ཀྱང་རང་གི་སློབ་མ་ལ་
རྟོགས་པར་བྱེད་པའི་ཕྱིར་མན་ངག་རྒྱུན་མ་ཆད་པས་ངེས་པའི་དོན་ཡོད་པར་ཤེས་པར་འགྱུར་བ་ཡིན་ནོ། །དོན་ངེས་པར་བརྗོད་པར་འདོད་པ་དེ་ནི་སྐྱེས་བུས་བྱས་པ་མ་ཡིན་པའི་ཡུལ་ལ་མེད་ཅིང༌། དེ་གསལ་བར་བྱེད་པའི་བརྡའི་ཡང་མེད་དེ། དེས་ན་སྐྱེས་བུས་མ་བྱས་པ་དེ་ལ་དོན་གཅིག་པོ་དེ་ཉིད་གང་ལས་ཡིན་ཏེ། གང་ལས་ཀྱང་མ་ཡིན་ལ་ཤེས་པར་ཡང་མི་འགྱུར་རོ། །སྒྲའི་དོན་ནི་འཇིག་རྟེན་གྱི་གྲགས་པས་གཟུང་བ་ཡིན་ནོ། །འཇིག་རྟེན་པའི་དོན་ནི་ངོ་བོ་ཉིད་ངེས་པས་ངེས་པ་ནི་འགའ་ཡང་མ་ཡིན་གྱི་འོན་ཀྱང་བརྡའི་དབང་གིས་ཡིན་ནོ། །རིག་བྱེད་ཀྱི་ཡང་དེ་ཉིད་ཡིན་ཏེ། དེས་ན་ཅི་ལྟར་དོན་སྐྱེས་བུས་མ་བྱས་པ་ཡིན། འོན་ཏེ་ངོ་བོ་ཉིད་ཀྱིས་ངེས་པར་ཁས་ལེན་ན། དེ་ནི་མི་རིགས་ཏེ་འདི་ལྟར་སྒྲ་རྣམས་ངོ་བོ་ཉིད་ཀྱིས་ངེས་པར་ཁས་ལེན་ན། བརྗོད་པར་འདོད་པས་དེས་གཞན་དུ་སྦྱོར་བ་བརྡར་བྱེད་པ་མེད་པར་འགྱུར་རོ། །གཞན་ཡང་དོན་ལ་སྒྲ་རྣམས་ངོ་བོ་ཉིད་ཀྱིས་ཡིན་ན་བརྡ་ཡང་དོན་མེད་པར་འགྱུར་རོ། །གང་ཞིག་དོན་གང་ངོ་བོ་ཉིད་ཀྱིས་རྟོགས་པར་ནུས་པ་དེ་ནི། དེ་ལ་བརྡར་བྱེད་པ་ལ་ལྟོས་པ་མ་ཡིན་ཏེ། དཔེར་ན་སྒྲོན་མ་བཞིན་ནོ། །སྒྲ་རྣམས་ཀྱང་ངོ་བོ་ཉིད་ཀྱི་ནུས་པ་ཡིན་ཏེ་དེས་ན་བརྡ་དོན་མེད་པ་ཡིན་ནོ། །ཅི་སྟེ་རུང་བ་ཉིད་བརྡ་གསལ་བར་བྱ་བ་ཡིན་ནོ་ཞེ་ན། དེ་ནི་མི་རིགས་ཏེ། གང་གི་ཕྱིར་གསལ་བར་ཁས་ལེན་ན་ཡང་ངེས་པ་གང་ལས་ཡིན་ཏེ། མི་འགྱུར་བ་ཉིད་དོ། །འདི་ལྟར་གང་གང་ལ་རྟོགས་པའི་ནུས་པ་ཡོད་པར་འདོད་པ་དེ་ཉིད་བརྡས་གསལ་བར་བྱེད་པའི་ཕྱིར་ངེས་པ་མེད་པར་འགྱུར་རོ། །འདི་ཉིད་སྟོན་པར་བྱེད་པ་ནི། གང་ལ་འདོད་པས་རང་རྒྱུད་པ་ཞེས་བྱ་བ་ལ་སོགས་པ་ཡིན་ནོ། །འདོད་པས་རུང་བ་གསལ་བར་བྱེད་ཅིང་བརྡར་བྱེད་པ་ན་འདོད་པའི་རུང་བ་ཉིད་གསལ་བར་མི་འགྱུར་གྱི། འོན་ཀྱང་མི་འདོད་པའི་རུང་བ་ཉིད་ཀྱང་བརྡས་གསལ་བར་བྱེད་པར་འགྱུར་རོ། །ཐམས་ཅད་ལ་རུང་དོན་གཅིག་གི །ཞེས་བྱ་བ་ལ་སོགས་པས་ནི་རིག་བྱེད་ལ་དོན་ངེས་པ་མེད་པ་དང༌། ཡོངས་སུ་མི་ཤེས་པ་ཉིད་དུ་སྒྲུབ་པ་ཡིན་ནོ། །དེའི་ཕྱིར་དེ་ལྟར་ངོ་བོ་ཉིད་དམ་དོན་སྐྱེས་བུས་མ་བྱས་པ་ཉིད་མེད་པའི་ཕྱིར་སྐྱེས་བུས་མ་བྱས་པ་ནི་ལུང་གི་མཚན་ཉིད་མ་ཡིན་ནོ། །ལུང་གི་མཚན་ཉིད་གཞན་སྤང་བའི་ཕྱིར་བཤད་པ། ཕྱོགས་གཅིག་ལ་མི་སླུ་བ་ནི་ལུང་གི་མཚན་ཉིད་ཡིན་ནོ། །ལུས་གང་ཞིག་མངོན་སུམ་དང་རྗེས་སུ་དཔག་པར་བྱ་བའི་
ཡུལ་ལ་མི་སླུ་བ་དང་བཅས་པ་དེ་ནི་དབང་པོ་ལས་འདས་པའི་ཡུལ་ལ་ཐེ་ཚོམ་ཟ་ན། ཕྱོགས་གཅིག་ལ་མི་སླུ་བ་ཉིད་ཡིན་ནོ། །སྦྱོར་བའི་དོན་ནི་འདི་ཡིན་ཏེ། གང་ཞིག་ལུང་འདིའི་ཕྱོགས་གཅིག་ཡིན་པ་དེ་ནི་མི་སླུ་བ་ཅན་ཡིན་ཏེ། དཔེར་ན་མེ་ཁ་བའི་གཉེན་པོ་ཡིན་ནོ་ཞེས་བྱ་བའི་ངག་བཞིན་ནོ། །རྩོད་པའི་གཞིར་གྱུར་བ་མེ་ལ་སྦྱིན་སྲེག་སྦྱིན་ནོ་ཞེས་བྱ་བའི་ངག་དང༌། སྲོག་གཅོད་པ་སྤོང་བ་ལ་སོགས་པའི་ངག་ཀྱང་ལུང་འདིའི་ཕྱོགས་གཅིག་ཡིན་ནོ། །དེ་ལུང་འདིའི་ཕྱོགས་གཅིག་ཡིན་པར་ནི་གྲུབ་པ་ཉིད་དེ། འདི་ལྟར་སྨྲ་བ་པོ་དེའི་ཚིག་གང་ཡིན་པ་དེའི་དོན་དེ་དང་རྗེས་སུ་འབྲེལ་པའི་དོན་དང་ལྡན་པའི་གཞན་གང་ཡིན་པ་ནི་དེ་དང་འབྲེལ་པའི་དོན་རྗོད་བར་བྱེད་པ་ཡིན་པས་དོན་གྱི་སྒོ་ནས་དེའི་ཕྱོགས་གཅིག་ཏུ་འགྱུར་བ་ཡིན་ལ། སྐྱེས་བུས་མ་བྱས་པའི་ཡུལ་ལ་ཡང་ཕྱོགས་གཞན་གྱི་རྗེས་སུ་ཞུགས་པའི་རྗེས་སུ་བྱེད་པའི་ངག་གང་ཡིན་པ་དེ་ནི་དེའི་ཕྱོགས་གཅིག་ཏུ་གྱུར་པ་ཡིན་བར་བལྟའོ་ཞེ་ན། འདི་ཡང་རྟོགས་པ་མེད་པ་ཉིད་དོ། །འདི་ལྟར་གལ་ཏེ་ལུང་འདིའི་ངག་འགའ་ཞིག་མི་སླུ་བར་མཐོང་བ་དེ་ཙམ་གྱིས་ཅི་ཐམས་ཅད་སླུ་བ་མ་ཡིན་པ་དང༌། མི་སླུ་བ་ཡང་ཡིན་པར་འགྱུར་རམ། འདི་སྟོན་པ་ནི་མ་མཐོང་བ་ཙམ་གྱི་གཏན་ཚིགས་ཀྱིས་མི་འཁྲུལ་པ་མི་འགྲུབ་པའི་ཕྱིར་ལུང་དེའི་མཚན་ཉིད་ཀྱི་དོན་ནི་མ་ངེས་པ་ཉིད་དོ། །ད་ནི་གལ་ཏེ་ཞེས་བྱ་བ་ལ་སོགས་པས་ལུང་གི་དག་རྣམས་རང་གི་དོན་ལ་འཁྲུལ་པ་མེད་པར་བསྒྲུབས་པས་ལུང་ཐམས་ཅད་མི་སླུ་བ་ཉིད་དུ་སྟོན་ཏོ། །སྒྲར་གཏོགས་པའི་སྦྱོར་བའི་ཤུགས་ཉིད་ཀྱིས་སྒྲ་རྣམས་དོན་དང་འབྲེལ་པ་མི་འཁྲུལ་པ་འགྲུབ་པ་ཡིན་ཏེ། སྣང་བ་ལ་སྣང་བའི་ངག་གི་དོན་མེད་ན་ངག་མི་སྦྱོར་ལ། སྒྲའི་དོན་ཡང་དེ་ཉིད་ཡིན་པས་དེ་ལ་མི་འཁྲུལ་པ་ཡིན་ན་སྒྲ་ཇི་ལྟར་ཚད་མ་མ་ཡིན། གལ་ཏེ་འདི་སྙམ་དུ་དོན་དེ་ནི་ཚད་མ་གཞན་གྱིས་གནོད་པ་ཡིན་ཏེ། དེས་ན་ཚད་མ་མ་ཡིན་ནོ་སྙམ་ན། དེ་ནི་མི་འཐད་དེ། གང་གི་ཕྱིར་སྒྲའི་དོན་ལ་ནི། ཚད་མ་གཞན་འཇུག་པ་མ་ཡིན་ཏེ། བྱ་བ་དང་བྱེད་པའི་འབྲེལ་པ་ནི་མངོན་སུམ་གྱིས་རྟོགས་པ་མ་ཡིན་ནོ། །མངོན་སུམ་གྱིས་ནི་དངོས་པོ་ཙམ་འཛིན་པ་ཡིན་ནོ། །དངོས་པོ་རྣམས་ནི་ལྕགས་ཀྱི་ཐུར་མ་ལྟར་འབྲེལ་པ་མེད་པ་ཡིན་ནོ། །རྗེས་སུ་དཔག་པ་ཡང་མངོན་སུམ་སྔོན་དུ་འགྲོ་བ་ཅན་ཡིན་ནོ། །དེས་ན་དངོས་སུ་མ་འབྲེལ་པའི་ངག་གི་དོན་ལ་ནི་མངོན་
སུམ་དང་རྗེས་སུ་དཔག་བ་འཇུག་པ་མ་ཡིན་ནོ། །དེས་ན་ཆུ་རླུང་གི་དོགས་ན་བུ་རམ་གྱི་ཕུང་པོ་སྦུངས་པ་ཡོད་དོ་ཞེས་བྱ་བ་དང༌། སོར་མོའི་རྩེ་མོ་ལ་གླང་པོ་ཆེ་བརྒྱ་ཡོད་དོ་ཞེས་བྱ་བ་དེ་ལྟ་བུ་དག་ལ་ཡང་དག་གི་དོན་ནི་འགའ་ཞིག་གིས་ཀྱང་ཡུལ་དུ་བྱེད་པ་འམ། གནོད་པ་མ་ཡིན་ནོ། །དེར་མངོན་སུམ་གྱི་ཡུལ་ལ་ནི་གནོད་པ་ཡིན་ན། དེའི་སྒྲའི་དོན་མ་ཡིན་ནོ། །དེའི་ཕྱིར་དེ་ལྟར་ངག་རྣམས་དབང་པོ་ལས་འདས་པའི་རང་གི་དོན་ལ་མ་འཁྲུལ་པ་དང་མངོན་སུམ་ལ་སོགས་པ་ཡང་མི་འཇུག་པ་ན་ཇི་ལྟར་ཚད་མ་མ་ཡིན་པ་ཡིན་ཞེ་ན། དེ་ལྟར་ནི་རིགས་མོད་ཀྱི་ཞེས་སྨོས་ཏེ་སྣང་བ་ལ་གནས་པ་བརྗོད་པ་དང༌། མངོན་སུམ་གྱིས་གཟུང་བ་རང་གི་མཚན་ཉིད་ཡུལ་མ་ཡིན་པར་གང་བརྗོད་པ་དེ་ནི་རིགས་མོད་ཀྱི་འོན་ཀྱང་མི་རིགས་སོ་ཞེས་སྨོས་པ་ནི་འོན་ཀྱང་ཞེས་བྱ་བ་ཡིན་ནོ། །ཇི་ལྟར་རྣམ་པ་གང་གིས་དོན་ཡོད་པར་བསྟན་པར་བྱ་བ་དེ་ལྟ་བུ་ཉིད་རབ་ཏུ་གྲུབ་ཀྱང༌། ཐོབ་པ་ཡིན་ཡང་སྒྲ་སྦྱོར་བ་ནི་འདོད་པ་ཙམ་དང་འབྲེལ་པ་ཡིན་བའི་ཕྱིར་དོན་ལ་འཇུག་པ་ཡང་འདོད་པས་བཟློག་པ་མེད་པས་གཞན་དུ་དོན་ཇི་ལྟ་བ་ཉིད་མ་ཡིན་པར་ཡང་ཐ་སྙད་བྱེད་པའི་སྒྲ་མཐོང་བའི་ཕྱིར་ཏེ། དེས་ན་ཚད་མས་གནོད་པ་མེད་ཀྱང་དོན་ཇི་ལྟ་བ་བཞིན་མ་ཡིན་པར་ཐེ་ཚོམ་ཟ་བ་ཉིད་ནི་མི་ལྡོག་གོ །སྣང་བ་ལ་གནས་པའི་དོན་ཚད་མའི་ཡུལ་ཡིན་ནོ་ཞེས་གང་བརྗོད་པ་དེ་ཡང་རིགས་པ་མ་ཡིན་ཏེ། ཚད་མ་ནི་འཇུག་པར་བྱེད་པ་ཡིན་ན། བློ་ལ་གནས་པའི་དོན་ལ་ནི་སུ་ཡང་མི་འཇུག་སྟེ། དེ་དང་སྣང་བ་གཅིག་ཏུ་བྱས་ནས་མངོན་གསུམ་གྱིས་རྟོགས་པར་བྱ་བའི་དོན་བྱ་བ་བྱེད་བའི་ཕྱི་རོལ་ཉིད་ལ་དོན་བྱེད་པ་དོན་དུ་གཉེར་བའི་སྐྱེས་བུ་འཇུག་པ་ཡིན་ནོ། །དེས་ན་སྒྲ་རྣམས་ནི་ཞེས་པའི་དབང་གིས་དོན་བྱེད་པའི་དངོས་པོའི་ཡུལ་ཅན་དང་ཚད་མ་ཉིད་ཡིན་ནོ། །མཐོང་བ་བཞིན་དུ་མ་མཐོང་བའི་དོན་ལ་ཡང་སྒྲ་ནི་འཁྲུལ་པར་དོགས་པ་ཉིད་དོ། །ཚུལ་འདིས་སྒྲའི་དོན་མངོན་སུམ་ལ་སོགས་པས་གནོད་པ་ཡོད་པ་ཉིད་དོ། །དེའི་ཕྱིར་སྒྲ་རྣམས་གང་ལ་ཚད་མ་ཡིན་པ་དེ་ལ་ནི་སླུ་བར་དོགས་པ་ཡིན་ལ། གང་ལ་འཁྲུལ་པ་མེད་པའི་བློའི་དོན་དེ་ལ་ནི་ཚད་མ་མ་ཡིན་ནོ། །གང་གི་ཕྱིར་སྐྱེས་བུས་མ་བྱས་པའི་ལུང་ནི་འགའ་ཡང་མེད་པ་དང༌། དོན་དང་དངོས་པོའི་འབྲེལ་པ་ཡང་མེད་པ་དེའི་ཕྱིར་ལུང་ལོག་ཀྱང་དོན་མེད་ལ་རྟོགས་པ་མ་ཡིན་ནོ། །ཀྱང་གི་སྒྲས་ནི་བསྐལ་པའི་ཡུལ་གྱི་མངོན་སུམ་དང་
རྗེས་སུ་དཔག་པ་ཡང་ངོ༌། །མངོན་སུམ་ལོག་པ་ཉིད་ཀྱིས་མི་དམིགས་པ་ཉིད་ནི་དངོས་པོ་མེད་པའི་ཐ་སྙད་སྒྲུབ་པར་བྱེད་པ་ཡིན་ནོ། །གལ་ཏེ་མངོན་སུམ་ཡང་དོན་གྱི་འབྲས་བུ་ཡིན་པའི་ཕྱིར་ལྡོག་པ་དོན་མི་ལྡོག་གོ་ཞེ་ན། མངོན་སུམ་ཙམ་ལྡོག་པས་ནི་དོན་ལྡོག་པར་མི་སྨྲའི། འོན་ཀྱང་རྒྱུ་མ་ཚང་བ་མེད་པ་ཞེས་བྱ་བ་མངོན་སུམ་གང་ལ་རྒྱུ་མ་ཚང་བ་མེད་པ་ཡོད་པ་ནི་དོན་མེད་ན་དེ་ཉེ་བར་གནས་ན་མེད་པ་མི་འཐད་པའི་ཕྱིར་རོ། །གང་གི་ཚེ་ཤེས་པ་གཅིག་ལ་འདུ་བའི་དོན་གཞན་དམིགས་པ་དེ་ཉིད་ཀྱི་རྒྱུ་མ་ཚང་བ་མེད་པར་འགྱུར་བ་ཡིན་ནོ། །དེ་ཉིད་ཀྱི་ཕྱིར་དོན་གཞན་དམིགས་པ་དེ་དང་དེའི་རང་གི་ངོ་བོ་མ་དམིགས་པར་བརྗོད་པ་ཡིན་ནོ། །དོན་དེ་ལྟར་གནས་པ་དེ་ལ་ཚུ་རོལ་མཐོང་བས་ནི་དངོས་པོ་མེད་པ་བསྒྲུབ་པ་ལ་བདག་ཉིད་ཀྱི་མངོན་སུམ་ལོག་པ་ཚད་མར་བྱ་བ་ཡིན་ལ། དེ་དེ་ལྟར་ཚད་མར་བྱེད་པས་ནི་བདག་གི་མངོན་སུམ་ལྡོག་པ་དེས་གང་གཟུང་བ་དེར་འོངས་པའི་དངོས་པོ་གང་ཡིན་པ་དེ་དགག་པར་རིགས་སོ། །ཐམས་ཅད་མཁྱེན་པ་ལ་ནི་ཐམས་ཅད་མངོན་སུམ་གྱིས་གཟུང་བར་འོས་པ་ཡིན་པ་དང༌། གཞན་ཐམས་ཅད་ཀྱི་མངོན་སུམ་ལོག་པ་མ་གྲུབ་པ་ཡིན་པའི་ཕྱིར་ཚུ་རོལ་མཐོང་བ་སྨོས་སོ། །ཐམས་ཅད་ནི་དེ་ལྟ་མ་ཡིན་པའི་ཕྱིར་ཏེ། ཚུ་རོལ་མཐོང་བས་ནི་ཐམས་ཅད་མངོན་སུམ་གྱིས་གཟུང་བར་རུང་བ་མ་ཡིན་ཏེ། དེའི་ཕྱིར་དངོས་པོ་ཐམས་ཅད་དགག་པ་ནི་མ་ཡིན་ནོ། །དེའི་ཕྱིར་དེ་ལྟར་མེད་པར་ངེས་པའི་འབྲས་བུ་ཅན་མི་དམིགས་པར་བཤད་པ་ན། གཞན་གང་མངོན་སུམ་དང་རྗེས་སུ་དཔག་པ་ལོག་པའི་མཚན་ཉིད་དེ་ཅི་ཚད་མ་མ་ཡིན་ནམ་སྙམ་པའམ། བཤད་པ། བཤད་ཟིན་པའི་མི་དམིགས་པ་ལས་གཞན་པའི་དམིགས་པ་གང་ཡིན་པ་དེ་ནི་མི་འཇུག་པ་ཡོད་པའི་ཐ་སྙད་མེད་པའི་འབྲས་བུ་གང་ལ་ཡོད་པའོ། །འཇུག་པའི་བློ་སྔོན་ཅན་ཉིད་ཕྱིར་རོ། །དམིགས་པ་ཉིད་ཡོད་པ་རྣམས་ཀྱི་ཡོད་པ་ཡིན་ཏེ། དེ་ནི་ཡོད་པའི་ཐ་སྙད་ཀྱི་རྒྱུ་མཚན་ཡིན་པའི་ཕྱིར་རོ། །གང་དུ་ཡོད་པའི་ཐ་སྙད་ཀྱི་རྒྱུར་གྱུར་པ་དེ་མེད་པ་དེར་ནི་ཡོད་པའི་ཐ་སྙད་ཀྱང་ལྡོག་པ་ཡིན་ཏེ། རྒྱུ་མཚན་མེད་པའི་ཕྱིར་རོ། །དེ་ཉིད་རྣམ་པར་དགྲོལ་བའི་ཕྱིར་བསྐལ་བའི་ཡུལ་ལ་ཞེས་སྨོས་ཏེ། དམིགས་པར་མི་རུང་བའི་ཡུལ་ཅན་གྱི་མི་དམིགས་པ་གང་ཡིན་པའོ། །མངོན་སུམ་དང་རྗེས་སུ་དཔག་པ་མེད་པ་ཞེས་བྱ་བ་ནི་རང་གི་ངོ་བོ་སྟོན་པའོ། །མི་འཇུག་འབྲས་ཅན་ཞེས་བྱ་བ་དེ་རྣམ་པར་དགྲོལ་བའི་ཕྱིར་ཡོད་
པའི་ཤེས་པ་དང་ཞེས་བྱ་བ་ལ་སོགས་པ་སྨོས་སོ། །ཡོད་པའི་ཤེས་པ་དང་ཡོད་དོ་ཞེས་བྱ་བའི་སྒྲ་དང༌། ཡོད་བའི་ཡུལ་ལེན་པ་ལ་སོགས་པའི་ཐ་སྙད་དོ། །དེ་དག་འགོག་པ་མེད་པར་ངེས་པའི་འབྲས་བུ་གང་ལ་ཡོད་པའོ། །ཅི་ལྟར་ཞེ་ན། བཤད་པ། དམིགས་པ་སྔོན་དུ་འགྲོ་བ་སྟེ་རྒྱུ་ཅན་གང་ཡིན་པ་དག་གོ །དམིགས་པ་ཉིད་ཡོད་པ་རྣམས་ཀྱི་ཡོད་པ་ཡིན་ཏེ། དེས་ན་དེ་ཉིད་ཡོད་པའི་ཤེས་པ་དང༌། སྒྲ་དང་ཐ་སྙད་རྣམས་ཀྱི་རྒྱུ་ཡིན་པས་དེ་མེད་པ་ལས་དེ་དག་མེད་དོ་ཞེས་ངེས་པ་ཡིན་ནོ། །འདི་ལས་གཞན་པའི་མི་དམིགས་པ་ནི་མེད་པའི་ཐ་སྙད་འཇུག་པའི་འབྲས་བུ་གང་ལ་ཡོད་པའོ། །འཇུག་པར་བྱ་བ་མེད་པའི་ཐ་སྙད་དེའི་རྒྱུ་མཚན་མཐོང་བའི་ཕྱིར་རོ། །སྔ་མ་སྔར་བཤད་པ་ནི་མེད་པའི་ཤེས་པ་དང༌། མེད་དོ་ཞེས་བྱ་བ་དེ་ལྟ་བུའི་རྣམ་པའི་སྒྲ་དང༌། བུམ་པ་མེད་པར་ངེས་པ་སྔོན་དུ་འགྲོ་བ་ཅན་གྱི་དོགས་པ་མེད་པར་འོངས་པ་དང་འགྲོ་བའི་མཚན་ཉིད་འཇུག་པའི་ཐ་སྙད་དེ་དག་འཇུག་པའི་འབྲས་བུ་དེ་ཉིད་གང་ལ་ཡོད་པ་དང༌། ཡང་གི་སྒྲས་ནི་ཡོད་པའི་ཐ་སྙད་འགོག་པའི་འབྲས་ཅན་ཡང་ཡིན་ནོ། །དེའི་རྒྱུ་མཚན་ཞེས་བྱ་བ་དེ་དགྲོལ་བའི་ཕྱིར་བཤད་པ། ཡུལ་བུམ་པ་ལ་སོགས་པས་སྟོང་པའི་ས་ཕྱོགས་རབ་ཏུ་བསྟན་པས་རབ་ཏུ་གྲུབ་པའི་ཡུལ་ཅན་ཐ་སྙད་སྒྲུབ་པའི་ཕྱིར་རོ།། ཚིག་ལེ་འུར་བྱ་བར་ནི་རྒྱུ་མཚན་སྨོས་པ་བྱ་བ་ལ། འགྲེལ་པར་ནི་ཡུལ་དུ་སྨོས་ཏེ། དེས་ན་འདིས་ནི་གཉི་གར་ཡང་གཉི་གའི་ཐ་སྙད་བྱ་བར་བསྟན་པ་ཡིན་ནོ། །རྒྱུ་མཚན་ནི་མི་དམིགས་པའི་མཚན་ཉིད་དུ་གྱུར་པ་མི་དམིགས་པ་ཡིན་ལ། ཡུལ་ནི་བུམ་པས་དབེན་པའི་ས་བཞི་ཡིན་ནོ། །གང་དུ་མེད་བའི་ཐ་སྙད་དུ་བྱེད་པ་དེར་ནི་ཡུལ་སྨོས་པས། གཉི་ག་གཟུང་བར་བལྟ་སྟེ། །ཡུལ་ཉིད་དུ་ཁྱད་པར་མེད་པའི་ཕྱིར་རོ། །རྒྱུ་མཚན་སྨོས་པས་ཀྱང་གཉི་ག་ཡིན་ཏེ། རྒྱུ་མཚན་ཉིད་དུ་ཁྱད་པར་མེད་པའི་ཕྱིར་རོ། །ཡང་གི་སྒྲའི་དོན་སྟོན་པ་ནི་གཉི་ག་ཡོད་པའི་ཐ་སྙད་འགོག་པའི་འབྲས་བུ་ཅན་ཉིད་དུ་ནི་འདྲ་བར་བཤད་དོ། །རང་ཞེས་བྱ་བ་ནི་ཡོད་པའི་ཐ་སྙད་ཀྱི་རང་བཞིན་གྱི་བདག་ཉིད་གཟུང་ངོ༌། །བཟློག་པ་ནི་འགལ་བ་སྟེ། མེད་པའི་ཐ་སྙད་དོ། །དེ་དག་གི་རྒྱུ་དམིགས་པ་དང་སྣང་བ་མི་དམིགས་པ་དེ་གཉིས་གོ་རིམས་བཞིན་དུ་མེད་པ་དང་ཡོད་པའི་རྒྱུ་དེས་ན་འདྲ་བ་ཡིན་ནོ། །དེའི་དོན་ནི་འདི་ཡིན་ཏེ། ཐ་སྙད་ཀྱི་རྒྱ་
མཚན་དམིགས་པ་ཉིད་ནི་ཡོད་པ་རྣམས་ཀྱི་ཡོད་པ་ཡིན་ནོ། །མངོན་སུམ་དང་རྗེས་སུ་དཔག་པ་ལོག་པ་ལ་ནི་མེད་དོ། །དེས་ན་རྒྱུ་མེད་པའི་ཕྱིར་དེའི་ཡོད་པའི་ཐ་སྙད་ལྡོག་པ་ཡིན་ནོ། །ཅིག་ཤོས་ལ་ནི་ཡོད་པའི་ཐ་སྙད་དང་འགལ་བ་མེད་པའི་ཐ་སྙད་ཀྱི་རྒྱུ་ཡོད་པའི་ཕྱིར་འགལ་བ་ཞུགས་པ་ནི་ཅིག་ཤོས་ལྡོག་པ་ཡིན་ནོ། །གལ་ཏེ་དེ་ལས་བློ་ལྡོག་པ་ཡིན་ཡང་ཅི་དེ་ཙམ་གྱིས་དོན་ཡང་ལྡོག་གམ། ལྡོག་ན་ནི་དམིགས་པ་ཙམ་གོ་བར་བྱེད་པ་ཡིན་པར་འགྱུར་རོ། །ཅི་སྟེ་དོན་མི་ལྡོག་ན་ནི་དེའི་ཐ་སྙད་ཀྱི་ཅི་ལྟར་ལྡོག་ཅེ་ན། བཤད་པ། ལྡོག་པ་ཅམ་གྱིས་མི་དམིགས་པ་གཅིག་ལ་ནི་ཡོད་པར་ཐེ་ཚོམ་ཟ་བའི་ཕྱིར་རོ། །དེས་ན་ངེས་པ་སྔོན་དུ་འགྲོ་བའི་ཐ་སྙད་ལྡོག་པ་ཉིད་དོ། །ཐེ་ཚོམ་ཟ་བའི་ཡོད་པའི་ཐ་སྙད་ནི་མི་ལྡོག་གོ །གཞན་སྣང་བ་མི་དམིགས་པ་ལ་ནི་བཟློག་པའི་ཕྱིར་རོ། །ཐེ་ཚོམ་ལས་བཟློག་པ་ནི་ངེས་པ་ཡིན་ཏེ། དེའི་ཕྱིར་ཐེ་ཚོམ་དང་ངེས་པའི་ཡོད་པའི་ཐ་སྙད་ལྡོག་པ་ཡིན་ནོ། །དེའི་ཕྱིར་དེ་ལྟར་གཏན་ཚིགས་སྔ་མ་དག་གིས་ནི་ཡོད་པའི་ཐ་སྙད་གཉི་ག་ཡང་དགག་པའི་འབྲས་བུ་ཅན་ཡིན་ལ། གཏན་ཚིགས་ཕྱི་མ་དག་གིས་ནི་ཡོད་པའི་ཐ་སྙད་གཉིས་ཀྱི་ཁྱད་པར་འགོག་པར་བཤད་པ་ཡིན་ནོ། །གཅིག་ལ་ནི་ཐེ་ཚོམ་ཟ་བའི་ཕྱིར་ངེས་པ་ཉིད་ཀྱི་ཡོད་པའི་ཐ་སྙད་འགོག་པ་ཡིན་ལ། གཞན་ལས་ནི་ཡོད་པའི་ཐ་སྙད་མཐའ་དག་འགོག་པ་ཡིན་ཏེ། མེད་པ་ཉིད་དུ་ངེས་པའི་ཕྱིར་རོ། །བཤད་མ་ཐག་པའི་མི་དམིགས་པ་གཉིས་པ་དེ་ལ་གཉིས་པ་ལྡོག་པའི་མཚན་ཉིད་ཙམ་གྱི་དམིགས་པ་ཙམ་གྱི་ཡོད་པའི་ཐ་སྙད་འགོག་པ་ལ་ཉེ་བར་མཁོ་བའི་ཕྱིར་ཚད་མར་བཤད་དོ། །འོ་ན་དེ་གང་ལ་ཚད་མ་མ་ཡིན་ཞེ་ན། ལྡོག་པ་མེད་པ་མཐོང་བ་ངེས་པའོ། །དེ་ལས་སོགས་པ་དེའི་རྒྱུ་མཚན་ཅན་སྒྲ་དང་ཐ་སྙད་གང་ཡིན་པ་དེ་ལ་ཉེ་བར་སྦྱོར་བ་ནི་མ་ཡིན་ཏེ། ཐེ་ཚོམ་ཟ་བའི་ཕྱིར་ཏེ། གང་གི་ཕྱིར་དངོས་པོ་མེད་པར་ངེས་པ་མི་སྐྱེད་པ་དེས་ན་ཚད་མ་མ་ཡིན་ནོ། །ཉེ་བར་མི་སྦྱོར་བ་ཉིད་སྒྲུབ་པའི་ཕྱིར་བཤད་པ་ཤེས་པར་བྱེད་པའི་ཡན་ལག་མ་ངེས་པའི་མི་དམིགས་བ་གང་ཡིན་པའོ། །མི་འཁྲུལ་པ་ནི་རྟགས་ཐམས་ཅད་ཀྱི་ཡན་ལག་ཡིན་ན། མི་དམིགས་པ་འདི་ལ་ནི་མི་འཁྲུལ་པ་མེད་དེ། དེས་ན་དེ་ལས་རྟོགས་པ་མ་ཡིན་ནོ། །དང་པོ་སྣང་བ་མི་དམིགས་པ་ནི་ཚད་མ་ཡིན་ཏེ། ངེས་པའི་
འབྲས་བུ་གང་ལ་ཡོད་པའོ། །འདི་སྐད་བརྗོད་པ་ཡིན་ཏེ། མི་དམིགས་པ་དང་པོ་ནི་དངོས་པོ་མེད་པ་ངེས་པར་བྱེད་པས་ཚད་མ་ཡིན་ནོ། །ཚད་མ་ནི་འཇུག་པར་བྱེད་པ་ཉིད་ལ་བརྗོད་ལ། འཇུག་པར་བྱེད་པ་ཡང་ངེས་པའི་རྒྱུ་ཅན་ཡིན་ནོ། །སྣང་བ་མི་དམིགས་པ་ནི་བུམ་པས་དབེན་པའི་ས་ཕྱོགས་དང་བུམ་པ་མེད་པར་ངེས་པར་བྱེད་པ་ཡིན་པས་བུམ་པ་དོན་དུ་གཉེར་བ་ལྡོག་པར་བྱེད་པ་དང༌། བུམ་པ་མེད་པ་དོན་དུ་གཉེར་བའི་སྐྱེས་བུ་འཇུག་པར་བྱེད་པ་ཡིན་པའི་ཕྱིར་ཚད་མ་ཡིན་ནོ། །མི་སྣང་བ་མི་དམིགས་པ་ནི་ངེས་པར་བྱེད་པ་མ་ཡིན་པས་ན་དོན་གང་ལ་ཡང་སྐྱེས་བུ་འཇུག་པར་བྱེད་པ་མ་ཡིན་ནོ། །ངེས་པ་སྔོན་དུ་འགྲོ་བའི་ཡོད་པའི་ཐ་སྙད་ནི་འགོག་པར་བྱེད་ཀྱི། ཐེ་ཚོམ་སྔོན་དུ་འགྲོ་བའི་ཐ་སྙད་ནི་འགོག་པ་མ་ཡིན་ནོ། །དེས་ན་ཐེ་ཚོམ་ལས་ཀྱང་འཇུག་པ་ནི་ཡོད་པ་ཉིད་དོ། །དེའི་ཚད་མ་ཉིད་ནི་ངེས་པ་སྔོན་དུ་འགྲོ་བ་ཅན་གྱི་ཡོད་པའི་ཐ་སྙད་འགོག་པར་ངེས་པའི་རྒྱུ་ཡིན་པའི་ཕྱིར་རོ། །མི་དམིགས་པ་བཤད་ནས་རང་བཞིན་བཤད་པའི་ཕྱིར་སྨྲས་པ། བདག་ཉིད་ངོ་བོ་ཉིད་ཀྱི་གཏན་ཚིགས་གང་ཡིན་པ་དེ་ནི་རང་བཞིན་ཡིན་ནོ། །ཁྱད་པར་ཅི་ལྟ་བུ་དང་ལྡན་པའི་ངོ་བོ་ཡིན་ཞེ་ན། བཤད་པ་སྒྲུབ་པར་བྱེད་པའི་ཆོས་དེ་ཡོད་པ་དེའི་དངོས་པོ་ཉིད་དེ་ཁོ་ན་ཙམ་གྱི། དེ་ཡོད་ཙམ་དང་རྗེས་འབྲེལ་ཅན། །མི་གཉིས་པར་རྗེས་སུ་འགྲོ་བའི་ངོ་བོ་ཉིད་གང་ལ་ཡོད་པའི་ངོ་བོ་ཉིད་དེའི་ཡིན་ནོ། །ཅིའི་ཕྱིར། དེ་ཡོད་ཙམ་དང་རྗེས་འབྲེལ་ཅན། །ཞེས་བརྗོད་ཀྱི། དེའི་བདག་ཉིད་ཀྱི་གཏན་ཚིགས་གང་ཡིན་པ་དེ་ནི་རང་བཞིན་ཡིན་ནོ་ཞེས་དེ་ཙམ་ཞིག་མི་བརྗོད་ཅེ་ན། དོན་གྱི་དེའི་བདག་ཉིད་ཅེས་སྨོས་སོ། །བསྒྲུབ་པར་བྱ་བའི་ཆོས་དེའི་བདག་ཉིད་གང་ཡིན་པའི་སྒྲུབ་པར་བྱེད་པའི་ཆོས་དེའིའོ། །དེའི་བདག་ཉིད་ནི་བསྒྲུབ་པར་བྱ་བའི་ཆོས་དེ་ཙམ་དང་རྗེས་སུ་འབྲེལ་པ་ཅན་ཉིད་དུ་གྱུར་པ་ལ་འཐད་པ་ཡིན་གྱི། དོན་གཞན་དང་འབྲེལ་པ་ལ་ནི་མ་ཡིན་ནོ། །འདི་ལྟར་ཞེས་པ་ནི་གང་གི་ཕྱིར་ཏེ། དེའི་ཕྱིར་ཁྱད་པར་ཉེ་བར་བཀོད་པ་ཡིན་ནོ། །དེ་གང་ལས་ཤེ་ན། སྒྲུབ་པར་བྱེད་པའི་ཆོས་དེ་ཡོད་ན་ཡང་ཡོད་པར་མ་གྱུར་པ་གྲུབ་པར་མ་གྱུར་པ་ཕྱིས་འབྱུང་བ་ལ་ནི་སྒྲུབ་པར་བྱེད་པའི་ཆོས་ཀྱི་དེའི་བདག་ཉིད་རང་བཞིན་ཉིད་གང་ཡིན་པ་དེ་འགལ་བའི་ཕྱིར་རོ། །ཕྱིས་གྲུབ་པ་ཞེས་བྱ་བ་གང་ཡིན་པ་དེ་ཅི་ལྟར་སྔར་གྲུབ་པའི་རང་བཞིན་
ཡིན་པར་འགྱུར། དེ་ལྟར་རྟོག་ན་ནི་སྔར་གྲུབ་པ་བདག་ཉིད་མེད་པ་ཅན་དུ་འགྱུར་ཏེ། དེས་ན་གྲུབ་པ་ཉིད་མི་འཐད་དོ། །གཞན་ཡང་ཐ་དད་པ་ནི་འགལ་བའི་ཆོས་དང་འབྲེལ་པ་ཡིན་ནོ། །གྲུབ་པ་དང་མ་གྲུབ་པ་ཡང་དངོས་པོ་དང་དངོས་པོ་མེད་པའི་མཚན་ཉིད་ཀྱི་འགལ་བ་ཡིན་པས་གཅིག་པར་མི་འཐད་དོ། །གཞན་ཡང་དངོས་པོ་རྣམས་ཀྱི་ཐ་དད་པ་ནི་རྒྱུ་ཐ་དད་པ་སྔོན་དུ་འགྲོ་བ་ཅན་ཡིན་ནོ། །གང་ཞིག་སྔར་སྐྱེས་པ་དང༌། ཕྱིས་རྒྱུ་གཞན་གྱིས་སྐྱེད་པར་འགྱུར་བ་གང་ཡིན་པ་དེ་དག་གལ་ཏེ་ཐ་མི་དད་པ་ཡིན་ན་འོ་ན་གང་ལས་ཐ་དད་པར་འགྱུར་བ་ཡིན། དེ་ན་འགལ་བའི་ཆོས་དང་ལྡན་པ་དང༌། རྒྱུ་ཐ་དད་པའི་ཕྱིར་སྔ་མ་དང་ཕྱི་མའི་དུས་སུ་འབྱུང་བ་དག་ཐ་དད་པ་ཡིན་པས་དེའི་བདག་ཉིད་མ་ཡིན་ནོ། །གལ་ཏེ་དེའི་བདག་ཉིད་མ་ཡིན་མོད། གོ་བར་བྱ་བ་དང་གོ་བར་བྱེད་པའི་དངོས་པོར་ནི་འགྱུར་རོ་ཞེ་ན། རྒྱུ་རྣམས་ཀྱང་ཞེས་སྨོས་ཏེ། སྒྲུབ་པར་བྱེད་པའི་ཆོས་གྲུབ་པ་ན་ཕྱིས་རྒྱུ་གཞན་ལས་འགྲུབ་པའི་བསྒྲུབ་བྱའི་ཆོས་ནི་འབྲས་བུར་འགྱུར་གྲང་ན། རྒྱུ་རྣམས་ཀྱང་གདོན་མི་ཟ་བར་འབྲས་བུ་དང་ལྡན་པ་མ་ཡིན་ནོ། །དེས་ན་འབྲས་བུ་ལ་འཁྲུལ་པའི་ཕྱིར་གོ་བར་བྱ་བ་དང༌། གོ་བར་བྱེད་པའི་དངོས་པོ་ཡང་ཡོད་པ་མ་ཡིན་ནོ། །གང་གི་ཕྱིར་ཕྱིས་རྒྱུ་གཞན་ལས་འགྲུབ་པ་དེའི་བདག་ཉིད་མ་ཡིན་ཞིང༌། དེའི་གོ་བར་བྱ་བ་ཡང་མ་ཡིན་པ་དེའི་ཕྱིར་བསྒྲུབ་པར་བྱ་བ་དེ་ཡང་ཡོད་པ་ཙམ་དང་རྗེས་སུ་འབྲེལ་པ་ཉིད་ཀྱི་གཏན་ཚིགས་ནི་རང་བཞིན་དང་གོ་བར་བྱེད་པ་ཡང་ཡིན་ཏེ། དེས་ན་དེ་ཡོད་ཙམ་དང་རྗེས་འབྲེལ་ཅན། །ཞེས་ཁྱད་པར་དུ་བྱས་སོ། །རང་བཞིན་དེ་ཡང་རང་གི་བདག་ཉིད་གཏན་ཚིགས་ཉིད་དུ་སྒྲས་ཉེ་བར་འགོད་པ་ན་ཁྱད་པར་ནི་བྱེ་བྲག་སྟེ། དེ་ལ་ལྟོས་བ་ཉེ་བར་འགོད་པའམ། ཡང་ན་དག་པ་སྟེ། དཔེར་ན་འཇིག་པ་མི་རྟག་པ་བསྒྲུབ་པར་བྱ་བ་ལ་འབྲས་བུ་བྱས་པ་ཉིད་ཁྱད་པར་ལ་ལྟོས་པ་དང་ཅས་པ་དང༌། ཡོད་པ་ཉིད་དེ་དོན་བྱེད་པར་ནུས་པ་ཉིད་ཙམ་དུ་བརྗོད་པའི་དག་པ་ཉིད་བརྗོད་པ་བཞིན་ནོ། །གལ་ཏེ་བྱས་པའི་སྒྲ་ལ་ཁྱད་པར་བརྗོད་པའི་སྒྲ་སྦྱར་བ་ནི་མེད་ཀྱི། བྱས་པའི་དངོས་པོ་ཙམ་ཉིད་བྱས་པའི་སྒྲར་བརྗོད་པ་མ་ཡིན་ནམ། ཅི་ལྟར་བྱས་པའི་སྒྲས་ཁྱད་པར་ལ་ལྟོས་པའི་རང་བཞིན་བརྗོད་པ་ཡིན་ཞེ་ན། རང་གི་ངོ་བོར་གྲུབ་པར་བྱ་བའི་ཕྱིར་ཞེས་སྨོས་ཏེ། གྲུབ་པར་བྱ་བའི་དོན་དུ་རྒྱུ་དང་རྐྱེན་གཞན་དག་གི་བྱེད་པ་ལ་ལྟོས་པའོ། །དོན་ནི་འདི་ཡིན་ཏེ། གང་གི་
ཕྱིར་བྱེད་པ་ལ་ལྟོས་པ་བྱས་པར་བརྗོད་པ་ཡིན་བ་དེའི་ཕྱིར་བྱས་པའི་སྒྲས་ནི་ཁྱད་པར་ལ་ལྟོས་པའི་རང་བཞིན་བརྗོད་པ་ཡིན་ཏེ། རྣམ་པ་ཐམས་ཅད་དུ་སྒྲ་གཞན་སྦྱར་བ་ཉིད་ཀྱིས་དོན་གཞན་རྟོགས་པ་ནི་མ་ཡིན་ནོ། །ཁ་ཅིག་ཏུ་ཁྱད་པར་རྟོགས་པར་འགྱུར་བ་ཉིད་དེ། དེས་ན་སྒྲ་སྦྱོར་རོ། །དཔེར་ན་བུམ་པ་བྱས་སོ་ཞེས་བརྗོད་པ་ན་རྫ་མཁན་གྱིས་སོ་ཞེས་ཁྱད་པར་རྟོགས་པར་འགྱུར་བ་ནི་སྨྲ་བ་པོའི་བསམ་པའི་དབང་གིས་ཁྱད་པར་སྦྱར་བར་བྱ་བ་འམ་མ་བྱས་ཀྱང་སླའོ། །གང་དུ་ཁྱད་པར་ནང་དུ་འདུ་བ་དེར་ནི་དེའི་སྦྱར་བ་མ་ཡིན་ཏེ། དཔེར་ན་འཚོའོ་ཞེས་བྱ་བ་འདིར་གནས་སོ་ཞེས་བྱ་བར་རྟོགས་པ་ཡིན་པས། དེར་སྲོག་གི་སྒྲ་སྦྱར་བར་བྱ་བ་མ་ཡིན་པ་བཞིན་ནོ། །དེ་བཞིན་དུ་བྱས་པའི་སྒྲས་རྒྱུ་ལ་ལྟོས་པ་ནང་དུ་འདུས་པ་ཡིན་ནོ། །དེས་ན་འདིར་བྱས་སོ་ཞེས་བྱ་བའི་སྒྲས་ནི་ཁྱད་པར་རྟོགས་པ་ཡིན་ལ། བྱས་པའི་སྒྲས་ནི་ཁྱད་པར་ནང་དུ་འདུས་པ་ཡིན་ནོ། །དེ་ཉིད་ཀྱི་ཕྱིར་རྒྱུ་དག་གིས་བྱས་པ་ཞེས་སྦྱོར་བ་མ་ཡིན་ནོ། །རྐྱེན་གྱི་བྱེ་བྲག་གིས་ཐ་དད་པ་ཉིད་ཅན་ལ་སོགས་པ་ལ་ནི་ཁྱད་པར་སྦྱར་བ་ཡིན་ཏེ། དེས་ན་ཁྱད་པར་ལ་ལྟོས་པའི་སྒྲས་རང་བཞིན་ཉེ་བར་འགོད་པ་ན་ཁྱད་པར་བརྗོད་པར་སྦྱར་བའི་སྒྲ་དང་མ་སྦྱར་བའི་སྒྲ་ཡོད་པ་ཡིན་ནོ། །ཁྱད་པར་གྱི་སྒྲ་མ་སྦྱར་བ་ནི་ཁྱད་པར་བརྗོད་པ་ལ་རྩོད་པ་དང་བཅས་པ་ཡིན་ཏེ། དེས་ན་ཚིག་ལེ་འུར་བྱས་པར་ཁྱད་པར་རྟོགས་པའི་འབྲས་བུའི་སྒྲ་དཔེར་བརྗོད་ན། འགྲེལ་པར་ནི་ཁྱད་པར་ནང་དུ་འདུས་པར་བྱས་པའི་སྒྲ་དཔེར་བརྗོད་པ་ཡིན་ནོ། །རྣམ་པ་དེ་ལྟ་བུ་ནི་རང་བཞིན་དག་པ་རྗོད་བར་བྱེད་པ་མ་ཡིན་ནོ་ཞེས་བསྟན་པའི་ཕྱིར། དེའི་ཁྱད་པར་གཞན་དེ་འདྲ་བའི་རང་བཞིན་དེ་དག་འཕེན་པ་ཡིན་ནོ། །རང་བཞིན་གྱི་གཏན་ཚིགས་གཞན་དག་ཀྱང་བསྟན་པའི་ཕྱིར་འདིར་ནི་ཞེས་སྨོས་སོ། །རྐྱེན་གྱི་བྱེ་བྲག་གི་ཐ་དད་པ་ཉིད་ཅན་གྱི་མཚན་ཉིད་ཀྱི་རང་བཞིན་འདི་ལ་ནི་ཁྱད་པར་རྗོད་པར་བྱེད་པ་རྐྱེན་གྱི་སྒྲ་སྦྱར་བ་ཉིད་དོ། །དེ་ལྟར་རང་བཞིན་གྱི་གཏན་ཚིགས་ཁྱད་པར་དང་བཅས་པ་ཡིན་ནོ། །ཁྱད་པར་མེད་པ་ཡང་དཔེར་ན་མི་རྟག་པ་ཉིད་ལ་ཡོད་པ་ཉིད་བཞིན་ནོ། །ཡོད་པའི་སྒྲས་ནི་དོན་བྱེད་པ་ཉིད་བརྗོད་ཀྱི་གཞན་ནི་མ་ཡིན་ནོ། །ཁྱད་པར་དང་བཅས་པའི་རང་བཞིན་ཡང་རྣམ་པ་གཉིས་ཏེ། བདག་ཉིད་དུ་གྱུར་པའི་ཆོས་ཀྱི་བྱེ་བྲག་ལ་ལྟོས་
པ་དང༌། འབྲེལ་པ་གཞན་ལ་ལྟོས་པའོ། །འདི་ལྟར་འགའ་ཞིག་ལས་ལྡོག་པ་ལ་ལྟོས་ནས་དངོས་པོའི་སྐྱེ་བ་ཐ་དད་པ་ལྟ་བུར་བརྟགས་པ་ཡིན་ལ། སྐྱེ་བ་དེ་དང་འབྲེལ་པའི་དངོས་པོ་ནི་གཏན་ཚིགས་སུ་བཀོད་པ་ཡིན་ནོ། །འབྲེལ་པ་དེ་ཡང་དངོས་པོའི་རང་བཞིན་ཉིད་ཡིན་ནོ། །དེ་ཉིད་སྟོན་པ་ནི་རང་བཞིན་དུ་གྱུར་པའི་ཆོས་གང་ཡིན་པ་དེ་ཡོངས་སུ་བཟུང་ནས་རང་བཞིན་གྱི་གཏན་ཚིགས་ཡིན་ཞེས་འབྲེལ་ཏོ། །དཔེར་བརྗོད་པ་ནི་དཔེར་ན་དེ་ཉིད་ལས་སྐྱེ་བ་བཞིན་ནོ། །སྐྱེ་བའི་སྒྲས་ནི་སྐྱེ་བ་དང་ལྡན་པའི་དངོས་པོ་ཉིད་བརྗོད་པ་ཡིན་ནོ། །རྟེན་མེད་པའི་སྐྱེ་བ་ཉིད་འགའ་ཡང་གཏན་ཚིགས་མ་ཡིན་ནོ། །དེས་ན་སྐྱེ་བའི་ཁྱད་པར་ཅན་གྱི་རང་བཞིན་གྱི་གཏན་ཚིགས་ཡིན་ནོ། །དེའི་ཕྱིར་ཇི་སྙེད་སྐྱེ་བ་དང་ལྡན་པར་བརྗོད་པ་ཡིན་པ་དེ་ཐམས་ཅད་ནི་སྐྱེ་བ་ཡིན་ནོ། །ཕྱོགས་འདིས་ཞེས་བྱ་བ་ནི་དག་པ་དང༌། ཁྱད་པར་གཞན་ལ་ལྟོས་པ་དང༌། རང་བཞིན་དུ་གྱུར་བའི་ཆོས་ཀྱི་བྱེ་བྲག་ལ་ལྟོས་པའི་རང་བཞིན་གྱི་རབ་ཏུ་དབྱེ་བ་བཤད་པ་གང་ཡིན་པའི་ཕྱོགས་འདི་ཉིད་ཀྱིས་གཞན་དུ་ཡང་རང་བཞིན་གྱི་གཏན་ཚིགས་ཀྱི་དབྱེ་བ་བལྟ་བར་བྱའོ། །འདི་ཐམས་ཅད་ཀྱིས་ནི་དོན་འདི་བརྗོད་པ་ཡིན་ཏེ། གང་དུ་རང་བཞིན་གྱི་སྒྲ་འམ། ཡོད་པའི་སྒྲས་རང་གི་ངོ་བོ་ཉེ་བར་བཀོད་པ་དེ་ཉིད་ཀྱི་རང་བཞིན་གྱི་གཏན་ཚིགས་སུ་འགྱུར་བ་ནི་མ་ཡིན་གྱི། འོན་ཀྱང་ཁྱད་པར་དང་འབྲེལ་པའི་དོན་བརྗོད་པའི་སྒྲས་བསྒྲུབ་པར་བྱ་བ་ལ་ཐ་དད་པ་མེད་པའི་སྒྲུབ་པར་བྱེད་པའི་ཆོས་གང་གི་བཀོད་པ་དེ་ཐམས་ཅད་ཀྱང་རང་བཞིན་ཉིད་དོ། །ཁྱད་པར་ཉེ་བར་བཀོད་པས་ནི་རྨོངས་པར་བྱ་བ་མ་ཡིན་ནོ་ཞེས་བྱ་བ་ཡིན་ནོ། །ཡང་ཇི་ལྟར་ན་རང་བཞིན་འདི་གོ་བར་བྱེད་པ་ཡིན་ཞེ་ན། རང་བཞིན་དེ་ཡང་ཞེས་སྨོས་ཏེ། བྱས་པ་དེ་ཡང་གལ་ཏེ་རྟག་པས་ཁྱབ་པ་རྗེས་སུ་འགྲོ་བ་ཚད་མས་ངེས་པ་ཡིན་པ་དེ་ལྟ་ན་ནི་གོ་བར་བྱེད་པ་ཡིན་ནོ། །ཁྱབ་པ་ངེས་པ་མེད་པའམ། ཆོས་ཅན་ལ་བརྟེན་པའི་ཕྱོགས་ཀྱི་ཆོས་ཉིད་མ་ངེས་ན་ནི་རྗེས་འགྲོ་ལྡོག་དང་ཕྱོགས་ཀྱི་ཆོས་དེའི་རང་བཞིན་གྱིས་གང་ཞིག་གོ་བར་བྱེད་པ་ཡིན་པའི་གོ་བར་བྱེད་པ་དེ་ནི་གོ་བར་བྱེད་པ་ཉིད་མ་ཡིན་པར་འགྱུར་བའི་ཕྱིར་རོ། །འདི་སྐད་བརྗོད་པ་ཡིན་ཏེ། དོན་གང་ཞིག་རང་གི་རང་བཞིན་རྟོགས་པ་ལ་ལྟོས་ནས། འགའ་ཞིག་གི་གོ་བར་བྱེད་པ་ཡིན་པ་དེ་ནི་རང་གི་ངོ་བོའི་ཡུལ་ཅན་གྱི་ཤེས་པ་མེད་པ་རང་གི་གོ་བར་བྱ་བ་གོ་བར་བྱེད་པ་
མ་ཡིན་ནོ། །དཔེར་ན་གསལ་བའི་རང་བཞིན་དུ་ཤེས་པར་བྱ་བའི་གསལ་བ་ཉིད་ཀྱིས་བུམ་པ་ལ་སོགས་པ་གསལ་བར་བྱེད་པའི་སྒྲོན་མ་ནི་གསལ་བ་དེའི་རང་བཞིན་མ་རྟོགས་ན་རང་གི་དོན་བྱ་བ་གསལ་བར་བྱེད་པའི་མཚན་ཉིད་མི་བྱེད་པ་བཞིན་དང༌། ཡང་དཔེར་ན་ཡི་གེའི་གོ་རིམས་ཀྱི་ཁྱད་པར་གྱི་རྗེས་སོན་པའི་སྒྲ་དོན་གྱིས་གོ་བར་བྱེད་པ་མཐོང་བ་ནི་བཀོད་པ་དེ་མ་རྟོགས་ན་རྟོགས་པར་བྱེད་པ་ཉིད་མ་ཡིན་པ་དེ་བཞིན་དུ་རང་གི་ཤེས་པ་ལ་ལྟོས་ན་རྗེས་སུ་འགྲོ་ལྡོག་དང་ཕྱོགས་ཀྱི་ཆོས་དང་ལྡན་པ་ཉིད་ཀྱིས་གོ་བར་བྱེད་པ་ཉིད་དུ་གྱུར་བའི་གཏན་ཚིགས་ཀྱང་དེའི་རང་བཞིན་མ་རྟོགས་པར་ནི་གོ་བར་བྱེད་པ་མ་ཡིན་ཏེ་སྒྲ་བཞིན་དང་གསལ་བ་བཞིན་ནོ། །དེའི་ཕྱིར་ཁྱབ་པར་བྱ་བ་ཉིད་དུ་ངེས་པ་ཉིད་ཀྱི་ཁྱབ་པར་བྱ་བ་ནི་གོ་བར་བྱེད་པ་ཡིན་ལ། ཁྱབ་པར་བྱེད་པ་ཉིད་དུ་ངེས་པའི་ཁྱབ་པར་བྱེད་པ་ནི་གོ་བར་བྱ་བ་ཡིན་ནོ། །དེའི་ཕྱིར་དེ་ལྟར་ངེས་པ་ཉིད་ཀྱིས་ཁྱབ་པར་བྱ་བ་དང་ཁྱབ་པར་བྱེད་པ་དག་ནི་རྗེས་སུ་བྱེད་པ་པོ་དང་རྗེས་སུ་བྱེད་པ་ཡིན་ནོ། །ངེས་པ་དེ་དག་ཉིད་ནི་ལྡོག་པར་བྱེད་པ་དང་ལྡོག་པར་བྱ་བ་ཡང་ཡིན་ནོ་ཞེས་སྟོན་པ་ནི་ཁྱབ་པར་བྱེད་པའི་ཆོས་ཅེ་ནི་ཡུལ་འགའ་ཞིག་ལས་རང་ལྡོག་པ་ན་ཁྱབ་པར་བྱ་བསྒྲུབ་པར་བྱེད་པ་དེ་ལྡོག་པར་བྱེད་པ་ཡིན་ནོ། །འདི་ཉིད་བསྒྲུབ་པའི་ཕྱིར་བཤད་པ། གང་གི་ཕྱིར་གལ་ཏེ་ཁྱབ་པར་བྱེད་པ་འདི་མེད་ན་ཁྱབ་པར་བྱ་བའི་ཆོས་དེ་མེད་པ་ཡིན་ན། དེ་ལྟར་ན་ནི་ཞེས་བྱ་བ་བཤད་མ་ཐག་པའི་རྣམ་པ་དེ་ལྟ་བུ་ཡིན་ན་ནི་བསྒྲུབ་པར་བྱ་བའི་ཆོས་དེའི་ཁྱབ་པར་བྱེད་པ་འགྲུབ་པ་ཡིན་ནོ། །བསྒྲུབ་པར་བྱ་བ་མེད་ཀྱང་ཡོད་པའི་སྒྲུབ་པར་བྱེད་པའི་ཆོས་ཀྱི་ཁྱད་པར་བྱེད་པ་ནི་བསྒྲུབ་པར་བྱ་བའི་ཆོས་མ་ཡིན་ནོ། །དེའི་ཕྱིར་དེ་ལྟར་ཚད་མས་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་དེས་ན་གོ་བར་བྱ་བ་དང་གོ་བར་བྱེད་པའི་དངོས་པོ་གྲུབ་པར་འགྱུར་བ་ཡིན་ལ། ཁྱབ་པར་བྱ་བ་དང་ཁྱབ་པར་བྱེད་པ་དག་ཀྱང་ལྡོག་པར་བྱེད་པ་དང་ལྡོག་པར་བྱ་བ་ཡིན་ཏེ། དེ་ལྟ་མ་ཡིན་ན་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ཉིད་དུ་མི་འགྱུར་རོ་ཞེས་བྱ་བ་འདི་བསྟན་པ་ཡིན་ནོ། །དེ་ལྟར་བསྟན་པ་འདིས་ནི་ཆོས་མཐུན་པ་དང་མི་མཐུན་པ་ཅན་དག་གིས་གཏན་ཚིགས་རྣམ་པ་གཉིས་ཀྱི་གོ་བར་བྱ་བ་དང་གོ་བར་བྱེད་པའི་གོ་བར་བྱ་བ་དང་གོ་བར་བྱེད་པ་ཉིད་གང་ཡིན་པ་དེའི་མཆན་ཉིད་ཀྱང་ངོ༌། །གོ་བར་བྱ་བ་དང་གོ་བར་བྱད་པ་ཉིད་
ཀྱི་རྒྱུ་ནི་ཐམས་ཅད་ཀྱང་ཁྱབ་པ་ངེས་པ་ཡིན་པས་ན། དེའི་མཚན་ཉིད་ནི་རྒྱུ་མཚན་ཏེ། ཁྱབ་པ་ངེས་པ་ཡིན་ནོ། །གལ་ཏེ་ཚུལ་གསུམ་པའི་རྗེས་སུ་ཞུགས་པ་དེའི་བདག་ཉིད་ཀྱི་འབྲེལ་པ་དང་ལྡན་པའི་གཏན་ཚིགས་གཅིག་ཉིད་མ་ཡིན་ནམ། གང་ལས་རྣམ་པ་གཉིས་སུ་འགྱུར་ཞེ་ན། བཤད་པ། སྦྱོར་བའི་དབང་གིས་སོ། །སྦྱོར་བ་ནི་སྒྲ་བརྗོད་པའི་བྱེད་པ་སྟེ་དངོས་སུ་བརྗོད་པའི་ནུས་པས་སོ། །དེ་ལས་གཏན་ཚིགས་རྣམ་པ་གཉིས་ཡིན་ནོ། །དག་ཁ་ཅིག་ལ་ནི་སྒྲུབ་པ་དངོས་ཀྱི་བརྗོད་བྱ་ཁ་ཅིག་ལ་ནི་དགག་པ་ཡིན་ནོ། །དེ་ལ་རྣམ་པ་གཉིས་ནི་བརྗོད་བྱ་ཐ་དད་པ་ལས་ཡིན་ནོ། །རྣམ་པ་གཉིས་ཀྱི་རྒྱུ་དེ་ཉིད་སྟོན་པར་བྱེད་དེ། དཔེའི་ཆོས་ཅན་དང་བསྒྲུབ་བྱའི་ཆོས་མི་མཐུན་པ་ཉིད་འདི་ལ་ཡོད་པའོ། །ཆོས་མི་མཐུན་པ་ཡང་སྒྲུབ་པར་བྱེད་པའི་ཆོས་ཀྱིས་བྱས་པའོ། །གང་བྱས་པ་དེ་ནི་མི་རྟག་པ་ཡིན་ལ་སྒྲ་ཡང་བྱས་བ་ཡིན་ནོ་ཞེས་བྱས་བ་ཉིད་ཀྱིས་བྱས་བས་ཆོས་ཅན་གཉིས་ཆོས་མཐུན་པ་ཅན་ཡིན་ལ། གང་རྟག་པ་དེ་ནི་མ་བྱས་པ་ཡིན་ལ། སྒྲ་ནི་བྱས་པ་ཡིན་ནོ་ཞེས་འདི་དག་གི་ཆོས་མི་མཐུན་པ་ཡང་བྱས་པ་ཡིན་ནོ། །གང་ལ་བརྗོད་པར་བྱ་བ་ཆོས་མཐུན་པ་ཡོད་པ། དེ་ནི་ཆོས་མཐུན་པ་ཅན་ཡིན་ལ། གཞན་ནི་ཆོས་མི་མཐུན་པ་ཅན་ནོ། །གལ་ཏེ་གང་དུ་ཆོས་མཐུན་པ་ཅན་ཡིན་པ་དེར་ནི་རྗེས་སུ་འགྲོ་བར་བརྗོད་བྱ་ཡིན་ལ། གང་དུ་ཆོས་མི་མཐུན་པ་དེར་ནི་ལྡོག་པ་མ་ཡིན་ནམ། འགའ་ཞིག་གི་ཚུལ་འགའ་ཞིག་ཁོ་ན་བརྗོད་པའི་ཕྱིར་གཉི་གས་ཚུལ་གསུམ་མ་བརྗོད་པར་འགྱུར་རོ། །དེས་ན་སྦྱོར་བའི་བྱེ་བྲག་འབའ་ཞིག་ཏུ་མ་ཟད་ཀྱི། དོན་གྱི་བྱེ་བྲག་ཀྱང་ཡོད་པ་ཡིན་ནོ་ཞེ་ན། འདི་གཉིས་དོན་དུ་ནི་བྱེ་བྲག་ཅི་ཡང་མེད་དོ་ཞེས་སྨོས་སོ། །དོན་གང་གི་དབང་དུ་བྱས་ནས་དག་གཉིས་རབ་ཏུ་སྦྱར་བའི་དགོས་པར་འགྱུར་བ་དེ་ནི་འདིར་དོན་དུ་བརྗོད་པ་ཡིན་གྱི། བརྗོད་པར་བྱ་བ་ནི་མ་ཡིན་ནོ། །དེའི་ཕྱིར་ངག་འདི་གཉིས་ཀྱི་དོན་ལ་ན་བྱེ་བྲག་ཅི་ཡང་མེད་དེ། གཉི་ག་ཡང་ཚུལ་གསུམ་པའི་རྟགས་ཀྱི་དབང་དུ་བྱས་ནས་འཇུག་པའི་ཕྱིར་རོ། །གལ་ཏེ་འོ་ན་ནི་འདི་གཉིས་ཀྱི་རྟོགས་པར་བྱ་བའི་དོན་ལ་ཁྱད་པར་ཅུང་ཟད་ཀྱང་མེད་ན། རྗོད་པར་བྱེད་པའི་བྱ་བ་ལ་ཁྱད་པར་ཡོད་པར་མི་འགྱུར་ཏེ། དེ་ནི་དེའི་ཡུལ་ཅན་ཡིན་པའི་ཕྱིར་རོ་ཞེས་དོགས་པ་ལ། སྦྱོར་བའི་བྱེ་བྲག་མ་རྟོགས་པར་ཞེས་སྨོས་སོ། །འདི་སྐད་བརྗོད་པ་ཡིན་ཏེ། རྗོད་པར་བྱེད་པའི་བྱེད་པ་ལས་ནི་ཁྱད་པར་ཡོད་པ་ཉིད་དོ། །གོ་བར་བྱ་
བའི་དོན་ལས་ཁྱད་པར་ཅུང་ཟད་ཀྱང་མེད་དོ། །གང་ཞིག་དངོས་སུ་བརྗོད་པར་བྱ་བ་དེ་ཉིད་རྟོགས་པར་བྱ་བར་འགྱུར་བ་ནི་མ་ཡིན་ན། གང་གིས་རྗོད་པར་བྱེད་པའི་བྱེད་པ་ཐ་དད་པས་དངོས་པོ་ཐ་དད་པར་འགྱུར། འོན་ཀྱང་དངོས་སུ་བརྗོད་པར་བྱ་བ་ནི་གཞན་ཡིན་ལ། རྟོགས་པར་བྱ་བ་ཡང་གཞན་ཡིན་ཏེ། དཔེར་ན་ལྷ་སྦྱིན་ཚོན་པོ་ཉིན་པར་ཟན་མི་ཟའོ་ཞེས་ཟོས་པའི་འབྲས་བུ་ཚོན་པོ་ཉིད་ངག་གིས་དངོས་སུ་བརྗོད་ཅིང་ཁྱད་པར་ཅན་གྱི་དུས་ཀྱང་བཀག་པ་ན། དོན་གྱིས་མཚན་མོ་ཟ་བར་ངེས་པ་བཞིན་ནོ། །དེས་ན་འདིར་བརྗོད་པར་བྱ་བ་གཞན་ཡིན་ལ། རྟོགས་པར་བྱ་བ་ཡང་གཞན་ཡིན་ནོ། །རྟོགས་པར་བྱེད་པ་དེ་ཡང་མཚན་མོ་བླའོ་ཞེས་བྱ་བའི་སྒྲ་འདིས་ཀྱང་རྟོགས་པར་ནུས་པ་ཡིན་ནོ། །དེ་བཞིན་དུ་འདིར་ཡང་དག་གཉིས་ཀྱི་བརྗོད་པར་བྱ་བ་ནི་གཞན་ཡིན་ལ། རྟོགས་པར་བྱ་བ་ཡང་གཞན་ཡིན་ནོ། །དེས་ན་གཉི་གས་ཀྱང་དོན་གཅིག་ཁོ་ན་རྟོགས་པར་བྱ་བ་ཉིད་དོ། །གལ་ཏེ་འདི་སྙམ་དུ་སྒྲའི་བྱེད་པ་ལ་བརྟེན་པའི་ཁྱད་པར་ནི་གཞན་གྱི་དོན་གྱི་རྗེས་སུ་དཔག་པར་བརྗོད་པར་བྱ་བ་མ་ཡིན་ན། ཅི་ལྟར་འདིར་བརྗོད་ཅེ་ན། བཤད་པ། སྦྱོར་བ་དེ་མཐོང་བ་གོམས་པ་ལས་རང་ཉིད་རྟོགས་པ་ན་ཡང་སྟེ། གཞན་ལས་རྟོགས་པ་འབའ་ཞིག་ཏུ་མ་ཟད་ཀྱི་རང་རྟོགས་པ་ན་ཡང་དེ་ལྟར་འགྱུར་བའི་ཕྱིར་ཏེ། བསྒྲུབ་པའི་སྒོ་ནས་སམ་དགག་པའི་སྒོ་ནས་རྟོགས་པར་འགྱུར་བའི་ཕྱིར་རང་གི་དོན་གྱི་རྗེས་སུ་དཔག་པ་ལ་ཡང་གཏན་ཚིགས་ཀྱི་དབྱེ་བ་བསྟན་ཏོ། །འདི་སྐད་བརྗོད་པ་ཡིན་ཏེ། ཇི་ལྟར་གཞན་རྟོགས་པ་ལ་དབྱེ་བ་ཉེ་བར་མཁོ་བ་དེ་བཞིན་དུ་བདག་ཉིད་རྟོགས་པ་ལ་ཡང་ཡིན་ཏེ། དེས་ན་རང་གི་དོན་དུ་ཡང་སྲིད་པའི་ཕྱིར་འདི་ཉིད་དུ་དབྱེ་བར་བྱས་པ་ཡིན་ནོ། །གལ་ཏེ་གང་གི་རྟགས་ཀྱི་ཚུལ་གསུམ་བརྗོད་པར་འགྱུར་བ་རྗེས་སུ་འགྲོ་བ་བརྗོད་པ་ན་ལྡོག་པ་རྟོགས་པར་ཅི་ལྟར་འགྱུར་ཞེས་དོགས་པ་དང༌། བཤད་པ། གང་གི་ཕྱིར་བརྗོད་པར་བྱ་བ་ཆོས་མཐུན་པ་ཉིད་དང་ལྡན་པའི་སྦྱོར་བ་ལ་ཡང་དོན་གྱིས་ཏེ། ཤུགས་ཀྱིས་ཆོས་མི་མཐུན་པ་ཉིད་རྟོགས་པ་ཡོད་པ་ཡིན་ནོ། །ཤུགས་དེ་ཉིད་སྟོན་པར་བྱེད་པ་ནི་ལྡོག་པ་རྟོགས་པའི་བློ་དེ་མེད་ན་བསྒྲུབ་པར་བྱ་བས་གཏན་ཚིགས་ཀྱི་རྗེས་སུ་འགྲོ་བ་མེད་པའི་ཕྱིར་རོ། །ལྡོག་པའི་བློ་མེད་ན་ཡང་སྒྲ་ལས་རྗེས་སུ་འགྲོ་བ་ཡང་ངེས་པར་མི་འགྱུར་རོ་ཞེས་བྱ་བའི་དོན་ཏོ། །འདི་ལྟར་
བསྒྲུབ་པར་བྱ་བའི་ཆོས་གང་འགའ་ཞིག་ཉིད་ལས་ལྡོག་པ་ན། སྒྲུབ་པར་བྱེད་པའི་ཆོས་མི་ལྡོག་པར་དོགས་པ་དེ་ཉིད་སྒྲུབ་པར་བྱེད་པའི་ཆོས་བསྒྲུབ་པར་བྱ་བའི་ཆོས་དེ་དང་བྲལ་བར་དོགས་པར་འགྱུར་རོ། །དེས་ན་རྗེས་སུ་འགྲོ་བའི་ངག་གིས་རྗེས་སུ་འགྲོ་བ་རྟོགས་ན་ལྡོག་པ་ཡང་རྟོགས་པར་འགྱུར་བ་ཉིད་དེ། དེ་ལྟར་མ་ཡིན་ན་རྗེས་སུ་འགྲོ་བ་ཉིད་ནི་མི་རྟོགས་པར་འགྱུར་བའི་ཕྱིར་རོ། །དེ་བཞིན་དུ་དོན་གྱིས་ཆོས་མི་མཐུན་པའི་སྦྱོར་བ་ལ་ཡང་རྗེས་སུ་འགྲོ་བ་ངེས་པར་འགྱུར་ཏེ། དེ་མེད་ན་ཞེས་བྱ་བ་རྗེས་སུ་འགྲོ་བ་རྟོགས་པ་མེད་ན་བསྒྲུབ་པར་བྱ་བ་མེད་པ་ལ་སྟེ། ལོག་པ་ལ་གཏན་ཚིགས་མེད་པར་ཐེ་ཚོམ་ཟ་བའི་ཕྱིར་རོ། །ཡུལ་གང་ན་གཏན་ཚིགས་ཡོད་པ་ན་བསྒྲུབ་བྱ་ཡོད་པར་ཐེ་ཚོམ་ཟ་བ་དེ་ཉིད་ལས་བསྒྲུབ་བྱ་ལོག་པ་ན་སྒྲུབ་པར་བྱེད་པ་ལོག་པར་ཐེ་ཚོམ་ཟ་བར་འགྱུར་རོ། །དེའི་ཕྱིར་ལོག་པའི་ཚིག་གིས་ལྡོག་པར་རྟོགས་པ་ན་རྗེས་སུ་འགྲོ་བ་ཡང་རྟོགས་པ་ཉིད་དེ། དེ་ལྟ་མ་ཡིན་ན་ལྡོག་པ་དེ་ཉིད་ལ་ཐེ་ཚོམ་ཟ་བར་འགྱུར་བའི་ཕྱིར་རོ། །གལ་ཏེ་ནམ་མཁའ་ལ་མཉན་པར་བྱ་བ་ཉིད་དང་མི་རྟགས་པ་ཉིད་ལྡོག་ཅིང་མིག་གིས་གཟུང་བར་བྱ་བ་ཉིད་ཀྱང་དེ་ལས་ལྡོག་པ་ཡིན་ན། མཉན་པར་བྱ་བ་ཉིད་ནི་ཡོད་དུ་ཟིན་ཀྱང་མི་རྟག་པ་ཉིད་དང་མིག་གིས་གཟུང་བར་བྱ་བ་ཉིད་ཡོད་པ་མ་ཡིན་ཏེ། དེས་ན་རྗེས་སུ་འགྲོ་བ་མེད་པར་ལྡོག་པ་ཡོད་པ་མ་ཡིན་ནམ་ཞེ་ན། འདི་ནི་ཕྱིས་འཆད་པར་འགྱུར་ཏེ་དོན་འདི་འཆད་པར་འགྱུར་རོ། །མ་མཐོང་བ་ཙམ་གྱིས་ཆོས་གཅིག་ལྡོག་པ་ན་ཆོས་གཞན་ལྡོག་པར་བྱེད་པ་ནི་མ་ཡིན་ཏེ། འོན་ཀྱང་དེ་དག་འབྲེལ་པ་ཡོད་ན་ཡིན་ནོ། །དེས་ན་གཅིག་ལོག་པས་གཞན་ལྡོག་པར་རྟོགས་པར་བྱེད་པ་ནི་དེ་དག་གིས་འབྲེལ་བ་ཚད་མས་རྟོགས་པར་བྱ་བ་ཡིན་ནོ། །འབྲེལ་བ་ངེས་པ་ཉིད་ཀྱི་རྗེས་སུ་འགྲོ་བ་ངེས་པ་ཡིན་ཏེ། དེའི་ཕྱིར་རྗེས་སུ་འགྲོ་བ་མེད་པའི་ལྡོག་པ་ནི་འགའ་ཡང་ཡོད་པ་མ་ཡིན་པས། འདི་དག་ལ་ནི་རྗེས་སུ་འགྲོ་བ་མེད་ཅིང་ལྡོག་པ་ཡང་མེད་པ་ཡིན་ནོ། །གང་ལ་ཆོས་འདི་དག་བསམ་པར་བྱ་བའི་གཏན་ཚིགས་དེ་གཉིས་ཀྱང་གང་ཡིན་ཞེ་ན། བཤད་པ། རབ་ཏུ་སྦྱར་བར་བྱ་བའི་གཏན་ཚིགས་དེ་དག་ཀྱང་ཅུང་ཟད་བྱས་པ་ཞེས་བྱ་བ་ནི་མཚོན་བྱེད་ཀྱི་ཚུལ་གྱི་གཏན་ཚིགས་བསྟན་པའོ། །དེ་ཐམས་ཅད་མི་རྟག་པ་སྟེ་ཞེས་བྱ་བ་མཚོན་བྱའི་ཚུལ་གྱིས་བསྒྲུབ་བྱ་བསྟན་པའོ། །ཐམས་ཅད་སྨོས་པ་ནི་ངེས་པར་བྱ་བའི་ཕྱིར་ཏེ། དེ་ཐམས་ཅད་ནི་མི་རྟག་པ་སྟེ་དེ་ནི་མི་རྟག་
པ་ཁོ་ནའོ་ཞེས་གང་ལ་ཁོ་ནའི་སྒྲས་བྱས་པ་དེ་ལས་གཞན་ངེས་པར་འཛིན་པའི་ཕྱིར་བྱས་པ་ཉིད་དང་བཙལ་མ་ཐག་ཏུ་བྱུང་བ་ཉིད་ནི་མི་རྟག་པ་ཉིད་ལ་ངེས་པ་ཡིན་ནོ། །དཔེར་ན་བུམ་པ་ལ་སོགས་པ་བཞིན་ནོ་ཞེས་བྱ་བ་འདི་ནི་ཁྱབ་བར་བྱ་བ་དང་ཁྱབ་པར་བྱེད་པའི་དངོས་པོ་རབ་ཏུ་བསྒྲུབ་པའི་ཚད་མའི་ཡུལ་རབ་ཏུ་སྟོན་པའོ། །སྒྲ་ཡང་བྱས་པ་ཡིན་ནོ་ཞེས་བྱ་བ་ནི་ཕྱོགས་ཀྱི་ཆོས་ཉེ་བར་སྟོན་པ་སྟེ། འདི་ནི་རྗེས་སུ་འགྲོ་བ་དང་ལྡན་པའི་སྦྱོར་བའོ། །བྱས་པ་ཉིད་ནི་མི་རྟག་པ་ཉིད་ལ་ངེས་པར་བསྟན་པ་ཡིན་ལ། མི་རྟག་པ་དང་ལྡན་པའི་བྱས་པ་དེ་ཡང་སྒྲ་ལ་ཡོད་པའི་ཕྱིར་ཤུགས་ཀྱིས་སྒྲ་མི་རྟག་པ་དང་ལྡན་པར་འགྱུར་བ་ཡིན་ནོ། །དེའི་ཕྱིར་འདིར་ནི་ཕྱོགས་ནི་གདོན་མི་ཟ་བར་བསྟན་པར་མི་བྱ་བ་ཡིན་ནོ། །ལྡོག་པ་དང་ལྡན་པའི་སྦྱོར་བ་ལ་ཡང་བསྒྲུབ་པར་བྱ་བ་མི་རྟག་པ་ཉིད་མེད་ན་བྱས་པ་ཉིད་དུ་འགྱུར་བ་མ་ཡིན་ན་ཞེས་བྱ་བ་འདིས་ནི་ངེས་པར་བསྟན་པ་ཡིན་ཏེ། བསྒྲུབ་པར་བྱ་བ་ལྡོག་པ་གཏན་ཚིགས་ལྡོག་པ་ལ་ངེས་བ་ཉིད་ཡིན་གྱི་དེ་དང་བྲལ་བ་ནི་མ་ཡིན་ནོ། །སྒྲ་ནི་བྱས་པ་ཡིན་ནོ་ཞེས་བྱ་བ་ནི་སྒྲུབ་པར་བྱེད་པ་ལྡོག་པ་མེད་པ་སྒྲུབ་པར་བྱེད་པ་ཡོད་པར་བསྟན་པ་ཡིན་ཏེ། དེས་ན་འདི་ལ་བསྒྲུབ་པར་བྱ་བ་ལ་སོགས་པ་ཡང་མེད་པའི་ཕྱིར་ཤུགས་ཀྱིས་བསྒྲུབ་པར་བྱ་བ་ཡོད་པ་ཡིན་ཏེ། དེས་ན་ཕྱོགས་ནི་སྦྱར་བར་བྱ་བ་མ་ཡིན་ནོ། །དེ་ཉིད་གསལ་བར་བྱ་བའི་ཕྱིར་དེའི་ངོ་བོར་ཞེས་སྨོས་སོ། །མི་རྟག་པ་དེ་ཉིད་ཀྱི་ངོ་བོ་ནི་དེའི་ངོ་བོའོ། །གང་ཞིག་དེར་གྲུབ་པ་དེའི་དངོས་པོ་དེར་རྒྱུར་གྱུར་བས་ན་དེའི་བདག་ཉིད་ཀྱིས་མི་རྟག་པ་ཉིད་ལོག་ན་བྱས་པ་ཉིད་ལྡོག་པ་ཡིན་ནོ། །བྱས་བ་དེ་མེད་ན་མེད་པ་ཉིད་ལྡོག་པ་དང༌། གང་གི་ཚེ་སྒྲ་ལ་ཡང་ཡོད་པར་བདོག་པར་བསྟན་པ་སྟེ་འདིས་ནི་ཕྱོགས་ཀྱི་ཆོས་ཉིད་བསྟན་ཏོ། །དེ་ལྟར་བསྟན་པ་ན་དངོས་པོ་མི་རྟག་པ་དེའི་བདག་ཉིད་དུ་ཡོད་པ་ཡིན་ནོ་ཞེས་གོ་བར་འགྱུར་གྱི། འབའ་ཞིག་ཙམ་ནི་མ་ཡིན་ནོ། །འདི་ལྟར་མི་རྟག་པའི་ངོ་བོ་ཉིད་དུ་ངེས་ཤིང་དེའི་ངོ་བོ་ཉིད་དེ་ཡང་འདི་ལ་ཡོད་པའི་ཕྱིར་ཤུགས་ཀྱིས་སྒྲ་མི་རྟག་པས་རྗེས་སུ་དཔག་པར་བྱ་བ་མི་བརྗོད་དོ། །རྗེས་སུ་འགྲོ་བ་ཡང་དོན་གྱིས་གོ་བ་སྟེ། དོན་གྱི་ཤུགས་ཀྱིས་འགྲུབ་སྟེ། གང་གི་ཚེ་གང་ཞིག་གང་གི་བདག་ཉིད་དུ་ངེས་པ་མེད་པ་དེའི་བདག་ཉིད་དུ་མ་ངེས་པ་དེ་ནི་ལྡོག་པ་སྟེ་ངེས་པའི་ཡུལ་མ་ཡིན་པ་ལྡོག་པས་ལྡོག་པར་མི་འགྱུར་ཏེ། དཔེར་ན་བཙལ་མ་ཐག་ཏུ་བྱུང་བ་ཉིད་ལྡོག་པས་མི་རྟག་པ་ཉིད་
མི་ལྡོག་པ་བཞིན་ཏེ། འདི་ལྟར་དེ་ནི་བརྩལ་མ་ཐག་ཏུ་བྱུང་བ་མ་ཡིན་པའི་བདག་ཉིད་ཀྱང་ཡོད་པ་ཡིན་ནོ། །གང་གི་ཕྱིར་ངེས་པའི་ཡུལ་མ་ཡིན་པ་ལོག་ཀྱང་ཆོས་གཞན་ལྡོག་པ་མ་ཡིན་པ་དེས་ན་དེའི་བདག་ཉིད་ཀྱི་རྒྱུ་མཚན་ཅན་གྱི་ངེས་པ་ཚད་མས་རབ་ཏུ་བསྒྲུབས་ནས་དེ་ལས་གཞན་ལོག་པས་ཆོས་ལྡོག་པར་བརྗོད་པར་བྱའི་གཞན་དུ་ནི་མ་ཡིན་ནོ། །དེས་ན་འདིས་དོན་འདི་བརྗོད་པ་ཡིན་ཏེ། ཚད་མས་སྔོན་དུ་འགྲོ་བའི་རྗེས་སུ་འགྲོ་བ་ངེས་པས་ལྡོག་པར་བྱེད་པ་དང་ལྡོག་པར་བྱ་བའི་དངོས་པོ་ངེས་པ་འམ་ངེས་པར་བྱེད་ནུས་པ་ཡིན་ལ། སྒྲུབ་བར་བྱེད་བ་བསྒྲུབ་པར་བྱ་བའི་བདག་ཉིད་དུ་རྟོགས་པས་རྗེས་སུ་འགྲོ་བ་ངེས་པར་བྱས་པ་ན་ཡང་བསྒྲུབ་བྱ་རྟོགས་པར་འགྱུར་བའི་ཕྱིར་ཕྱོགས་དེ་ནི་སྦྱར་བར་བྱ་བ་མ་ཡིན་ནོ། །སྔར་ནི་དག་གི་བྱ་བ་སྟོན་པ་ན་དེ་མེད་ན་བསྒྲུབ་བྱ་མེད་པ་ལ་གཏན་ཚིགས་མེད་པར་ཐེ་ཚོམ་ཟ་བའི་ཕྱིར་རོ་ཞེས་བཤད་པ་ཡིན་ཏེ། རྗེས་སུ་འགྲོ་བའི་བློ་རྟོགས་པར་བྱེད་པ་མ་ཡིན་པའི་ངག་ནི་ལྡོག་པར་རྟོགས་པར་བྱེད་པ་མ་ཡིན་ནོ། །དེའི་ཕྱིར་ངག་གཅིག་ཀྱང་གཉི་ག་གོ་བར་བྱེད་པ་ཡིན་ནོ། །ཁྱབ་པར་བྱས་པ་དང་ཁྱབ་པར་བྱེད་པའི་དངོས་པོར་ངེས་པར་གོ་བར་བྱེད་པའི་གཏན་ཚིགས་སུ་ཁས་ལེན་ན། དེ་ནི་ཤེས་པ་གང་གིས་ཁྱོད་བྱས་པའི་སྒྲ་ནི་མི་རྟག་པ་ཡིན་ཏེ་། གང་བྱས་པ་དེ་ནི་མི་རྟག་པའོ་ཞེས་དེ་སྐད་དུ་བརྗོད་པར་འགྱུར་བ་བྱས་པ་གདོན་མི་ཟ་བར་མི་རྟག་པའོ་ཞེས་ཇི་ལྟར་ཏེ་ཚད་མ་གང་གིས་ཤེས་པ་འདིར་འགྱུར་ཞེས་འདྲི་བ་ལ། ཁྱབ་པའི་ཡུལ་ཅན་གནོད་པར་བྱེད་པའི་ཚད་མ་བསྟན་པའི་ཕྱིར། འདི་ལྟར་ཞེས་སྨོས་སོ། །གང་གི་ཕྱིར་ལྡོག་པའི་ཆོས་ཀྱི་ངོ་བོ་འཇིག་པ་ནི་རང་གི་ངོ་བོ་སྟེ། རང་བཞིན་ཙམ་ཉིད་ལས་སམ། ཡང་ན་འདི་ལས་བྱུང་བས་ན་ངོ་བོའོ། །རང་གི་ངོ་བོ་ནི་རང་གི་དངོས་པོ་སྟེ་རང་རྒྱུའོ། །དེས་རྗེས་སུ་འབྲེལ་པ་ཉིད་ནི་དངོས་པོར་ཡོད་པ་སྟེ། དེའི་ཕྱིར་ན་བྱས་པ་མི་རྟག་པ་ཉིད་དོ། །དེ་ག་ལས་ཤེ་ན། རྒྱུ་མེད་ཕྱིར་ཏེ་གང་གི་ཕྱིར་སྐྱེད་པར་བྱེད་པའི་རྒྱུ་ལས་འཇིག་པའི་རྒྱུ་གཞན་མེད་པ་དེའི་ཕྱིར་རང་གི་ངོ་བོས་རྗེས་སུ་འབྲེལ་པ་ཡིན་ནོ། །གལ་ཏེ་རིམ་དང་ཅིག་ཅར་མེད་པའི་ཕྱིར་ན་རྟག་པ་ལས་ཡོད་པ་འམ་བྱས་པ་ལྡོག་པ་མ་ཡིན་ནམ། འཇིག་པ་ངོ་བོ་ཉིད་ཀྱིས་རྗེས་སུ་འབྲེལ་པ་ནི་གྲུབ་ཀྱང་སྐྱེ་བ་ལ་བར་དུ་གཅོད་པ་མེད་པར་འབྱུང་བའི་འཇིག་པ་འཇིག་པའི་ངང་ཅན་དུ་གྲུབ་པར་འགྱུར་གྱི་དོན་ཐམས་ཅད་འཇིག་པའི་ངང་ཅན་དུ་
འགྲུབ་པར་ནི་མི་འགྱུར་རོ། །དེས་ན་རིམ་དང་ཅིག་ཅར་མེད་པ་ཉིད་བརྗོད་པར་བྱ་བ་ཡིན་གྱི་འདིས་ཅི་བྱ་ཞེ་ན། བདེན་མོད་ཀྱི་འོན་ཀྱང་གཞན་གྱིས་སྐད་ཅིག་མ་མ་ཡིན་པ་ལྷན་ཅིག་བྱེད་པའི་རྐྱེན་ལ་ལྟོས་པ་དང་བཅས་པ་དོན་བྱེད་ནུས་པར་ཁས་བླངས་ནས། འཇིག་པའི་རྒྱུ་ནི་དཔེ་ཉིད་དུ་ཉེ་བར་བཀོད་དེ། དཔེར་ན་འཇིག་པའི་རྒྱུ་ཅུང་ཟད་མི་བྱེད་ཀྱང་དངོས་པོ་ལྡོག་པར་བྱེད་པ་ཡིན་པ་དེ་བཞིན་དུ་ལྷན་ཅིག་བྱེད་པའི་རྐྱེན་ཡང་ཅུང་ཟད་མི་བྱེད་ཀྱང་དོན་བྱེད་པ་ལ་འཇུག་པར་བྱེད་དོ། །དཔེར་ན་རྒྱུ་དང་འབྲས་བུའི་དངོས་པོ་རྗེས་སུ་འགྲོ་བ་དང་ལྡོག་པས་རྟོགས་པར་བྱ་བ་ཡིན་ཡང༌། དེར་རྒྱུ་དང་འབྲས་བུ་མངོན་པར་འདུས་བྱས་ཏེ་སྐྱེད་པ་ནི་མ་ཡིན་གྱི། འོན་ཀྱང་དེ་ཉེ་ན་ཅིག་ཤོས་འབྱུང་བ་ཙམ་འབའ་ཞིག་ཏུ་ཟད་པ་དེ་བཞིན་དུ། ལྡོག་པར་བྱ་བ་དང་ལྡོག་པར་བྱེད་པའི་དངོས་པོ་ནི་མངོན་སུམ་དང་མི་དམིགས་པས་རྟོགས་པར་བྱ་བ་ཡིན་ཡང༌། འཇིག་པའི་རྒྱུས་དངོས་པོ་མངོན་པར་འདུ་བྱས་ནས་ལྡོག་པར་བྱེད་པ་ནི་མ་ཡིན་གྱི། འོན་ཀྱང་དེ་དག་ཉེ་ན་དངོས་པོ་ལྡོག་པ་ཡིན་ནོ། །དཔེ་ཅུང་ཟད་ཀྱི་མི་བྱེད་པའི་འཇིག་པའི་རྒྱུ་མངོན་སུམ་དང་མི་དམིགས་པས་རྒྱུའི་ངོ་བོར་ཁོང་དུ་ཆུད་པ་ལ་ལྟོས་ནས་དངོས་པོ་ལྡོག་པ་དེ་བཞིན་དུ། སྐད་ཅིག་མ་མ་ཡིན་པའི་དངོས་པོ་ཡང་འབྲས་བུ་བྱེད་པར་ནུས་ཀྱང་ལྷན་ཅིག་བྱེད་པའི་རྐྱེན་ལ་ལྟོས་ནས་དོན་བྱ་བ་ལ་འཇུག་པ་ཡིན་ཏེ། དེས་ན་སྐད་ཅིག་མ་མ་ཡིན་པ་ནི་རིམ་པ་དང་ལྡན་པར་དོན་བྱེད་པར་མི་འཐད་ཅེས་ཇི་ལྟར་སྨྲ་ཞེས་དེ་ལྟར་སྐད་ཅིག་མ་མ་ཡིན་པར་སྨྲ་བའི་ལྡོག་པ་བྱེད་པ་ལ་ཅུང་ཟད་མི་བྱེད་པ་ལྷན་ཅིག་པར་ཉེ་བར་བཀོད་པའི་ཕྱིར་འཇིག་པའི་རྒྱུ་དཔེ་ཉིད་དུ་ཉེ་བར་བཀོད་པ་སྤོང་བ་བཤད་པ་ནི་རྒྱུ་མེད་ཕྱིར་ན་ཞེས་བྱ་བ་ཡིན་ནོ། །འདིའི་བསམ་པ་ནི་འདི་ཡིན་ཏེ། འདི་ལ་ལྡོག་པར་བྱ་བ་དང་ལྡོག་པར་བྱེད་པའི་དངོས་པོ་ནི་མངོན་སུམ་དང་མི་དམིགས་པས་གྲུབ་པ་ཡིན་ནོ་ཞེས་སྨྲས་པ་ན་མངོན་སུམ་དང་མི་དམིགས་པ་ད་ལས་གྱོ་མོའི་གནས་སྐབས་སུ་སྐྱེ་པའམ་དངོས་པོ་ལྡོག་པ་ཙམ་མ་མ་། དངོས་པོ་འཇིག་པའི་ངང་ཅན་དུ་བྱས་པ་ཉིད་ཐོབ་པ་ལ་སོགས་པའི་བྱེད་པར་གྲུབ་པར་བརྗོད་གྲང་ན། དེ་ལ་གྱོ་མོའི་གནས་སྐབས་སུ་སྐྱེད་པར་བྱེད་པ་ཡིན་ན་ནི་མངོན་སུམ་དང་མི་དམིགས་པས་གྲུབ་པར་འདོད་པ་ཉིད་དོ། །ལྡོག་པ་ཙམ་ནི་དངོས་པོ་མ་ཡིན་པའི་ཕྱིར་ན་བྱ་བ་མ་ཡིན་ནོ་ཞེས་འཆད་པར་འགྱུར་རོ། །གལ་ཏེ་
འཇིག་པའི་ངང་ཅན་འཇིག་པ་ཡིན་པར་འདོད་པ་ཡིན་ན་ཡང༌། དེ་ནི་ཐ་དད་པ་མ་ཡིན་ཞིང་ཐ་མི་དད་པ་ཡང་བྱ་བར་མི་ནུས་སོ། །གང་ཡང་ཇི་ལྟར་སྐྱེད་པར་བྱེད་པ་ཡོད་ན་མངོན་པར་འདུས་བྱས་པ་མེད་ཀྱང༌། དངོས་པོ་སྐྱེ་བ་འབའ་ཞིག་ཏུ་ཟད་པ་དེ་བཞིན་དུ། འཇིག་པའི་རྒྱུ་ཉེ་ན་དངོས་པོ་ལྡོག་པ་འབའ་ཞིག་ཏུ་ཟད་དོ་ཞེས་སྨྲས་པ་དེ་ནི་རྣམ་པར་དཔྱད་དགོས་སོ། །སྐྱེད་པར་བྱེད་པའི་རྒྱུ་རྣམས་ནི་དངོས་པོ་མེད་པའི་ཉེ་བར་འཇོག་པ་པོའི་རང་བཞིན་ཡིན་ལ། དངོས་པོ་མེད་པ་ལ་ནི་མངོན་པར་འདུ་བྱེད་པ་ཅུང་ཟད་མེད་དོ། །འཇིག་པའི་རྒྱུ་རྣམས་ནི་ཡོད་པར་རྣམ་པར་གནས་པའི་ཟློག་པར་བྱེད་པ་ཡིན་པས་དེ་ལ་ནི་གདོན་མི་ཟ་བར་དཔྱད་པར་བྱ་བ་ཡིན་ཏེ། ཅི་དངོས་པོ་ཡོད་པ་དེ་རང་གི་རྒྱུ་དག་ལས་ལྡོག་པའི་ཆོས་ཀྱི་ངོ་བོར་སྐྱེས་སམ། འོན་ཏེ་མི་ལྡོག་པའི་ཆོས་སུ་ཡིན་གལ་ཏེ་ཕྱོགས་དང་པོ་ལྟར་ན་ནི། ལྡོག་པའི་ཆོས་ཉིད་ཀྱི་རང་ཉིད་ལྡོག་པར་འགྱུར་གྱི་འཇིག་པའི་རྒྱུ་ལ་ལྡོག་པ་དང་བཅས་པའི་ལྡོག་པ་ཉིད་ནི། དངོས་པོའི་རྒྱུ་དག་གིས་བསྐྱེད་པར་མི་རིགས་སོ་ཞེས་བརྗོད་པར་རིགས་པ་ཡིན་ནོ། །འདི་ལྟར་ཅི་སྲིད་འཇིག་པའི་རྒྱུ་ཉེ་བ་དེ་སྲིད་དུ་ནི་གནས་པའི་ཆོས་ཡིན་ཏེ་མི་གནས་པའི་ཆོས་ཉིད་ཡིན་ན་ནི་སྔ་མ་ཉིད་དུ་ལྡོག་པར་ཐལ་བའི་ཕྱིར་རོ། །འཇིག་པའི་རྒྱུ་ཉེ་བའི་དུས་སུ་ཡང་དུས་ཅུང་ཟད་གནས་པའི་རང་བཞིན་གང་ཡིན་པ་སྐད་ཅིག་མ་ངང་པོར་གནས་པ་དེ་ཉིད་ཡིན་ཏེ། དེས་ན་ལྡོག་པ་ཟློག་པ་མ་ཡིན་ཏེ། དེ་ནི་དུས་ཅུང་ཟད་ཅིག་གནས་པའི་ཕྱིར་རོ། །དེའི་ཕྱིར་འཇིག་པའི་རྒྱུ་ལ་ལྟོས་ནས་ལོག་པ་ནི་འགའ་ཡང་དངོས་པོའི་རྒྱུས་བསྐྱེད་པ་མ་ཡིན་ནོ། །ཅི་སྟེ་དེའི་ངོ་བོ་མི་ལྡོག་པའི་ཆོས་ཉིད་ཡིན་ན་ནི་འཇིག་པའི་རྒྱུས་ཀྱང་བཟློག་པར་མི་ནུས་སོ། །དེ་ལྟར་དངོས་པོ་སྐྱེ་བ་ལ་ནི་སྐྱེད་པར་བྱེད་པ་ལ་ལྟོས་པའི་རྣམ་པར་རྟོག་པ་འགའ་ཡང་ཡོད་པ་མ་ཡིན་ཏེ། སྐྱེ་བ་ནི་མེད་པ་མ་ཡིན་པའི་ཕྱིར་རོ། །དེའི་ཕྱིར་འཇིག་པའི་རྒྱུ་ཅུང་ཟད་ཀྱང་མི་བྱེད་པ་ནི་ལྡོག་པར་བྱེད་པ་མ་ཡིན་ནོ་ཞེས་བསྒྲུབས་པས། ལྷན་ཅིག་བྱེད་པའི་རྐྱེན་དག་ཀྱང་དངོས་པོ་ལ་ཅུང་ཟད་མི་བྱེད་པ་བཀག་ན་གནོད་པར་བྱེད་པའི་ཚད་མ་སྟོན་པའི་ཕྱིར་གནོད་པར་བྱེད་པའི་ཚད་མའི་ཡན་ལག་ཡོངས་སུ་སྦྱང་བའི་དོན་དུ་འདི་བརྗོད་པ་ཡིན་ནོ། །གཞན་ཡང་འཇིག་པ་རྒྱུ་དང་ལྡན་པར་གྲུབ་པ་ཡིན་ལ། རིམ་དན་ཅིག་ཅར་གྱིས་དོན་མི་བྱེད་པ་མི་འཐད་པ་ཉིད་ཀྱིས་
བསྒྲུབ་པར་མི་ནུས་པར་འགྱུར་ཏེ། འདི་ལྟར་འཇིག་པ་རྒྱུ་དང་ལྡན་པ་ནི་ལ་ལར་རེས་འགའ་འབྱུང་བའི་ཕྱིར་རིམ་དང་རིམ་མ་ཡིན་པའི་སྟོབས་ཀྱིས་སྐད་ཅིག་ཉིད་དུ་མི་འགྱུར་ཏེ། དེའི་ཕྱིར་ཡང་འདི་ནི་གནོད་པར་བྱེད་པ་ཡོངས་སུ་སྦྱོང་བ་ཡིན་ནོ། །ཡང་གང་གི་རྒྱུ་མེད་པ་ཉིད་འཇིག་པའི་རྒྱུ་མ་ངེས་པ་ཉིད་ལ་བརྗོད་པ་དེའི་ཚེ་ནི་འདི་ཉིད་གནོད་པར་བྱེད་པའི་ཚད་མར་འགོད་པར་བལྟ་བར་བྱས་ཏེ། འདི་ལྟར་གང་གི་ཚེ་འཇིག་པའི་ངང་ཅན་གྱི་ངོ་བོ་ཉིད་ནི་རྒྱུ་འགའ་ལ་ཡང་ངེས་པ་མ་ཡིན་པ་དེའི་ཚེ། གང་སྐྱེ་བ་དེ་ཐམས་ཅད་འཇིག་པའི་ངང་ཅན་ཉིད་དུ་འགྱུར་ཏེ། དངོས་པོ་འཇིག་པ་ལས་ཡང་རྒྱུ་གཞན་ལ་མི་ལྟོས་པ་ནི་སྐད་ཅིག་མར་གྲུབ་པ་ཡིན་ནོ། །དེའི་ཕྱིར་དེ་ལྟར་གནོད་པར་བྱེད་པའི་ཚད་མའི་ཡན་ལག་གམ། གནོད་པར་བྱེད་པའི་ཚད་མར་ཉེ་བར་བཀོད་པ་ཉིད་ཡིན་ནོ། །དེ་ལ་རེ་ཞིག་གནོད་པར་བྱེད་པའི་ཚད་མའི་ཡན་ལག་ཉིད་སྒྲུབ་པར་བྱེད་པའི་གཏན་ཚིགས་འཆད་པ་ནི་དངོས་པོའི་འཇིག་པ་ནི་ཞེས་བྱ་བ་ཡིན་ནོ། །དེའི་ངོ་བོ་ཏེ་འཇིག་པའི་ངང་ཅན་གྱི་རང་གི་ངོ་བོར་ནི་རང་གི་ངོ་བོ་སྐྱེད་པར་བྱེད་པ་ལས་གཞན་པའི་རྒྱུ་ལ་ལྟོས་པ་མ་ཡིན་ནོ། །དེ་ཅིའི་ཕྱིར་ཞེ་ན། རང་གི་རྒྱུ་ཁོ་ན་ལས་འཇིག་པའི་ངང་ཅན་ལྡོག་པའི་ཆོས་ཉིད་དུ་འབྱུང་བའི་ཕྱིར་རོ། །གང་གི་ཕྱིར་དངོས་པོ་རྣམས་ཀྱི་འཇིག་པའི་ངང་ཚུལ་གྱི་རང་བཞིན་ཉིད་ནི་ལྟོས་པ་མེད་པ་ཡིན་པ་དེ་བས་ན། གང་ཅུང་ཟད་བྱས་པ་དེ་ནི་རང་གི་ངོ་བོ་ཉིད་ཀྱིས་འཇིག་པའི་ངང་ཅན་ཡིན་ནོ། །འཇིག་པའི་ངང་ཅན་དུ་མཐོང་བ་ཉིད་ནི་ཡང་གཞན་གྱིས་དེ་ལྟར་བྱེད་པ་མ་ཡིན་ན། །འཇིག་པའི་རྒྱུ་མེད་པ་འདི་ཉིད་ཀྱི་ཕྱིར་སྟོན་པར་འགྱུར་རོ། །དེ་ནི་གང་དག་གིས་འཇིག་པའི་རང་གི་ངོ་བོ་ངེས་པར་ཁས་ལེན་པ་དེ་དག་གིས་རྒྱུ་མེད་པར་ཁས་བླངས་དགོས་སོ་ཞེས་ལྟོས་པ་དང་བཅས་པའི་ཆོས་རྣམས་ནི་ཞེས་བྱ་བར་སྟོན་པར་བྱེད་དོ། །ནི་ཞེས་བྱ་བ་ནི་གང་གི་ཕྱིར་ལྟོས་པ་དང་བཅས་པའི་ཆོས་རྣམས་ངེས་པར་འགྱུར་བ་མེད་པར་མཐོང་བ་དེའི་ཕྱིར་ན་དངོས་པོ་འཇིག་པའི་ངང་ཅན་ནི་ལྟོས་པ་མེད་པ་ཡིན་ཏེ། རྒྱུ་ལ་ལྟོས་པ་དང་བཅས་པ་ཉིད་ཡིན་ན་ནི་བུམ་པ་ལ་སོགས་པའི་ནང་ནས་འགའ་ཞིག་རྟག་པ་ཉིད་དུ་ཡང་འགྱུར་ཏེ། རྒྱུ་རྣམས་ནི་འབྲས་བུ་རྩོམ་པར་མ་ངེས་པའི་ཕྱིར་རོ། །གལ་ཏེ་འཇིག་པའི་རྒྱུ་གཅིག་ཏུ་ཟད་ན་ནི་ཉེ་བ་ལ་འཁྲུལ་པར་དོགས་པར་འགྱུར་ན། གང་གི་ཕྱིར་ཐོབ་ལ་
སོགས་པའི་འཇིག་པའི་རྒྱུ་རྣམ་པ་མང་པོ་ཡོད་པས་ན། གདོན་མི་ཟ་བར་དེ་དག་འགའ་ཞིག་འཇིག་པ་ཉེ་བར་འགྱུར་བ་ཡིན་ནོ་སྙམ་ན། གལ་ཏེ་ཞེས་སྨོས་སོ། །འཇིག་པའི་རྒྱུ་མང་བ་དེ་ལྟར་ནི་བདེན་ཏེ། གལ་ཏེ་འཇིག་པའི་རྒྱུ་མང་པོ་ཡོད་ཀྱང་དེ་དག་ཀྱང་སོ་སོར་རང་གི་རྐྱེན་དང་འབྲེལ་པས་ཉེ་བ་ཡིན་ལ། དེ་དག་ཉེ་བར་ཡང་རེས་འགའ་བ་ཡིན་པའི་ཕྱིར་དེའི་འབྲས་བུ་འཇིག་པའི་རྒྱུ་དག་ཀྱང་གདོན་མི་ཟ་བར་ཉེ་བ་མ་ཡིན་བས་འགའ་ཞིག་མི་འཇིག་བར་འགྱུར་རོ། །འདི་ཉིད་འཆད་པ་ནི་རྒྱུ་རྣམས་ནི་གདོན་མི་ཟ་བར་ཞེས་བྱ་བ་ཡིན་ནོ། །མ་ཚང་བ་དང་གེགས་བྱེད་པ་དེ་དག་སྲིད་པའི་ཕྱིར་རོ། །འབྲས་བུ་གང་ཞིག་ཚོགས་པ་ཙམ་དང་འབྲེལ་པ་དེ་ནི་རྒྱུ་མ་ཚང་བས་མི་སྐྱེད་པ་ཡིན་ཏེ། དཔེར་ན་ས་བོན་གྱི་མྱུ་གུ་སྐྱེ་བ་དང་མཐུན་པའི་ཁྱད་པར་དང་པོ་བཞིན་ནོ། །འབྲས་བུ་གང་ཞིག་ཚོགས་པ་ཡོངས་སུ་འགྱུར་བ་ལ་ལྟོས་པ་དེ་ནི་ཚོགས་པ་ཡོད་ཀྱང་གེགས་བྱེད་པ་སྲིད་པ་ལས་མི་སྐྱེ་བ་ཡིན་ཏེ། དཔེར་ན་ས་བོན་ལ་སོགས་པ་ཡོངས་སུ་འགྱུར་བ་ལ་ལྟོས་པའི་མྱུ་གུ་ས་བོན་ལ་སོགས་པ་ཡོད་ན་ཡང་འགའ་ཞིག་གིས་འགའ་ཞིག་ཏུ་སྐྱེས་བར་མི་འགྱུར་བ་བཞིན་ནོ། །རྒྱུ་རྣམས་འབྲས་བུ་ལ་འཁྲུལ་བར་བསྟན་པ་དེས་ནི། འཇིག་པའི་རྒྱུ་མང་པོ་ཐམས་ཅད་ཀྱང་འཁྲུལ་པ་ཉིད་དུ་བཤད་པ་ཡིན་ནོ། །ཅིའི་ཕྱིར་འཁྲུལ་པ་ཉིད་ཡིན་ཞེ་ན། འབྲས་གནས་མེད་པའི་ཕྱིར་ཏེ་མ་ངེས་པའི་ཕྱིར་འཁྲུལ་པ་ཉིད་དོ། །འཁྲུལ་པའི་ཉེ་བ་གང་དག་ལ་བརྗོད་ཅེ་ན། གང་དག་འཇིག་བརྒྱུ་དང་བཅས་པར་སྨྲ་བའི་རྒོལ་བ་དེ་དག་ལ་འཁྲུལ་པ་ཉིད་ཀྱི་སྐྱོན་དུ་འགྱུར་བ་ཡིན་ནོ། །གནག་གི་ཕྱིར་འཇིག་པ་རྒྱུ་མེད་པ་ཡིན་པ་དེའི་ཕྱིར་འཇིག་པའི་ངང་ཅན་ལྡོག་པའི་ཆོས་དེའི་ངོ་བོར་འགྱུར་བ་ལ་ལྡོག་པ་མེད་པར་འགྱུར་བ་ནི་དེའི་ངོ་བོར་ལྡོག་པའི་ཆོས་སུ་ངེས་པ་ཡིན་ནོ། །ཚད་མའི་དོན་ནི་འདི་ཡིན་ཏེ། གང་ཞིག་གང་གི་ངོ་བོར་འགྱུར་བ་ལ་ལྟོས་པ་མེད་པ་དེ་ནི་དེའི་ངོ་བོར་ངེས་པ་ཡིན་ན། གལ་ཏེ་ལྟོས་པ་མེད་ཀྱང་དུས་དང་ཡུལ་དང་གནས་སྐབས་གཞན་ལ་ལྟོས་ནས་འཇིག་པ་ཡིན་ན། དེ་ཡུལ་དང་དུས་དང་གནས་སྐབས་གཞན་ལ་ལྟོས་པའི་ཕྱིར་ལྟོས་པ་མེད་པ་ཉིད་ཉམས་པར་འགྱུར་རོ། །དེས་ན་གལ་ཏེ་སྐད་ཅིག་གནས་ཀྱང་དུས་གཞན་ལ་ལྟོས་པས་ན་ལྟོས་པ་མེད་པ་ཉིད་གསལ་བར་འགྱུར་རོ། །དེས་ན་སྐད་ཅིག་ཙམ་གནས་ན་ཡང་ལྟོས་པ་དང་བཅས་པ་ཉིད་དུ་འགྱུར་བའི་ཕྱིར་ལྟོས་པ་མེད་པ་ཉིད་དང་འགལ་བ་ཉེ་བར་དམིགས་
པས་མི་མཐུན་པའི་ཕྱོགས་ལྡོག་པ་ཡིན་ནོ། །སྐད་ཅིག་ཙམ་གནས་ནས་ལྟོས་པ་མེད་པ་ཉིད་དུ་མི་འགྱུར་བ་འབའ་ཞིག་ཏུ་མ་ཟད་ཀྱི། འོན་ཀྱང་དངོས་པོ་ལ་ལྡོག་པའི་ཆོས་ཉིད་སྲིད་པར་ཡང་མི་འགྱུར་རོ། །འདི་ལྟར་སྐད་ཅིག་ཙམ་དུ་གནས་པའི་རང་བཞིན་ནི། སྐད་ཅིག་གི་མཐར་ཐུག་པ་ན་ཡང་མི་ལྡོག་པས་ཡང་སྐད་ཅིག་གནས་པར་འགྱུར་རོ། །དེས་ན་སྐད་ཅིག་ཙམ་དུ་གནས་པའི་རང་བཞིན་ནི་ནམ་ཡང་མི་ལྡོག་པའི་ཕྱིར་རྟག་ཏུ་གནས་པར་ཐལ་ལོ། །དེའི་ཕྱིར་དངོས་པོ་ལྡོག་པའི་ཆོས་ཡིན་ན་ནི། སྐད་ཅིག་ཙམ་དུ་གནས་པར་ཡང་མི་འགྱུར་རོ། །གལ་ཏེ་སྐད་ཅིག་ཙམ་ཡང་མི་གནས་ན་ཇི་ལྟར་དངོས་པོ་དེ་ཉིད་སྐད་ཅིག་ཙམ་ཡང་མི་གནས་པའི་ཆོས་སུ་སྐྱེས་པ་ཡིན་ནོ་ཞེས་འཆད་ཅེ་ན། སྔ་ཕྱི་དང་བྲལ་བའི་དུས་ནི་སྐད་ཅིག་ཡིན་པར་བརྗོད་དེ། དེས་ན་ཡོད་པའི་དུས་གང་ཡིན་པ་དེ་ཉིད་སྐད་ཅིག་གཅིག་ཡིན་ཏེ། དེའི་དབང་དུ་བྱས་ནས་སྐད་ཅིག་ཙམ་དུ་གནས་པར་བཤད་ཀྱི། སྐྱེས་ནས་སྐད་ཅིག་གནས་པའི་དངོས་པོ་ནི་སྐད་ཅིག་དུ་གནས་པར་མི་འཐད་དོ། །དེས་ན་དངོས་པོ་ནི་འཇིག་པ་ལ་ལྟོས་པ་མེད་པ་ཡིན་ན། །གནས་པ་ལོག་ནས་ནི་འཇིག་པར་ངེས་པ་ཡིན་ནོ། །རྒྱུ་ཚོགས་པ་རང་གི་འབྲས་བུ་སྐྱེད་པ་ལ་ཞེས་བྱ་བ་ནི་དཔེ་སྟོན་པའོ། །གང་ལ་གེགས་བྱེད་པ་མི་སྲིད་པ་དེ་ནི་རྒྱུ་ཚོགས་པ་ཐ་མ་སྐད་ཅིག་ཙམ་དུ་གནས་པ་ཡིན་པར་བལྟ་སྟེ། གང་གི་ཕྱིར་གེགས་བྱེད་པ་མི་སྲིད་པ་ནི་དེ་ཉིད་ཡིན་ནོ། །དཔེར་ན་ཚོགས་པ་འབྲས་བུ་སྐྱེད་པའི་ནུས་པ་ལ་ལྟོས་པ་མེད་པར་གྱུར་ན་གང་གི་ཚེ་སྐྱེས་པ་དེ་ཉིད་ཀྱི་ཚེ་སྐྱེད་པར་བྱེད་པ་ཡིན་པ་དེ་བཞིན་དུ། དངོས་པོ་ཡང་འཇིག་པའི་དང་ཅན་གྱི་རང་བཞིན་ཉིད་དུ་འགྱུར་བ་ལ་ལྟོས་པ་མེད་པ་ནི་དེར་དེས་པ་ཡིན་ཏེ། དེས་ན་སྐྱེས་པ་ཉིད་ན་འཇིག་པ་ཡིན་ནོ། །དེ་ནི་ལྟོས་པ་མེད་པའི་གཏན་ཚིགས་འཁྲུལ་པར་བསྟན་པའི་ཕྱིར་གལ་ཏེ་འགའ་ཞིག་ཅེས་བྱ་བ་ལ་སོགས་པ་སྨོས་སོ། །ཁྱོད་ཀྱིས་ནི་ལྟོས་པ་མེད་པ་ཉིད་ཡིན་ན་དེ་ངེས་པར་བརྗོད་ན། ས་བོན་ལ་སོགས་པ་ནི་མྱུ་གུ་ལས་སོགས་པ་སྐྱེད་པ་ལ་རྒྱུད་གཞན་ལ་ལྟོས་པ་མེད་ཀྱང་ངེས་པ་མེད་པར་མཐོང་ངོ༌། །ས་དང་ས་བོན་དང་ཆུ་སྟེ་འདི་དག་གི་ཚོགས་པ་འདུས་པ་དེ་དག་ནི་ཡོད་ཀྱི་རེས་འགའ་ཞེས་བྱ་བ་དུས་དེ་སྲིད་དུ་བསྡད་ནས་རྒྱུན་ཡོངས་སུ་གྱུར་
ན་མྱུ་གུ་སྐྱེད་པའི་ཕྱིར་དང༌། གེགས་ཡོད་ན་ཡང་གཏན་མི་བྱེད་པའི་ཕྱིར་རོ། །འདི་ལྟོས་པ་མེད་པ་ཉིད་ཡིན་པ་དགག་པའི་ཕྱིར་མ་ཡིན་ཏེ་ཞེས་སྨོས་སོ། །དེར་ཡང་སྟེ་ས་བོན་དང་ཆུ་ལ་སོགས་པ་ཡོད་པ་དེར་ཡང་རྒྱུན་ཡོངས་སུ་འགྱུར་བ་ཞེས་བྱ་བ་རང་བཞིན་གཞན་སྐྱེ་བའི་མཚན་ཉིད་དེ་ལ་ལྟོས་པའི་ཕྱིར་རོ། །འདི་སྐད་བརྗོད་པ་ཡིན་ཏེ། དེ་དག་ལྟོས་པ་མེད་པར་ཅི་ལྟར་བརྗོད་དེ། འདི་ལྟར་དེ་དག་ནི་འབྲས་བུ་སྐྱེད་པའི་ནུས་པའི་ངོ་བོ་ཉིད་དེ་ལྟ་བུ་ལ་ལྟོས་པ་ཡིན་ནོ། །གལ་ཏེ་འདི་སྙམ་དུ་ཅི་ལྟར་ལྷན་ཅིག་བྱེད་པའི་རྐྱེན་གྱིས་བྱས་པའི་རང་བཞིན་གཞན་ལ་ལྟོས་པ་དེ་བཞིན་དུ། དངོས་པོ་ཡང་འཇིག་པའི་རང་བཞིན་ལ་ལྟོས་པ་ཡིན་ནོ་ཞེ་ན་དེ་ལྟར་དངོས་པོ་ནི་ཞེས་སྨོས་སོ། །ཡང་ཇི་ལྟར་དངོས་པོ་འཇིག་པའི་ངང་ཅན་གྱི་རང་བཞིན་དུ་འགྱུར་བ་ལ་ལྟོས་པ་མེད་པ་དེ་བཞིན་དུ། ས་བོན་དང་ཆུ་ལ་སོགས་པ་དེ་ལ་ཡང་རྒྱུ་ཚོགས་པ་ཐ་མ་ལ་ལྟོས་པ་མེད་པ་ཉིད་ཡོད་པ་ཡིན་ལ། དེ་ཡང་འབྲས་བུ་སྐྱེད་པར་བྱེད་པ་ཉིད་དུ་ངེས་པ་ཡིན་ནོ། །ཐ་མ་དེ་ཡང་གང་ཡིན་ཞེ་ན། བཤད་པ། འབྲས་བུ་སྐྱེད་པ་ལ་སྐད་ཅིག་ཙམ་གྱི་དུས་ཀྱིས་ཀྱང་བར་དུ་ཆོད་པ་མེད་པའོ། །གང་ལ་ལྟོས་ནས་ཚོགས་པ་བར་དུ་ཆོད་པ་མེད་པ་ཡིན་པ་དེ་དང་འབྲེལ་པ་ཉིད་ཀྱིས་འབྲས་བུ་སྐྱེད་པ་ལ། བར་དུ་ཆོད་པ་མེད་པ་ཞེས་དེ་ཐ་སྙད་དུ་བྱེད་པ་ཡིན་ནོ། །དེ་ནི་འབྲས་བུ་དང་ལྡན་པ་ཉིད་དོ་ཞེས་བྱ་བ་ནི་འབྲས་བུ་གདོན་མི་ཟ་བར་སྐྱེད་པ་ཞེས་བྱ་བའི་དོན་ཏོ། །གལ་ཏེ་རེ་ཞིག་སྐྱེད་པར་བྱེད་པ་ཡང་ངེས་པ་མེད་པར་ཁོ་བོ་ཅག་གིས་བསྟན་པ་ཡིན་ནོ་ཞེ་ན། དེ་ལ་མྱུ་གུའི་རྒྱུ་ནི་དེ་ཉིད་ཡིན་ལ་ཞེས་སྨོས་ཏེ་གཞན་ནི་འགའ་ཡང་མ་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་རྒྱུ་ཚོགས་པ་སྔ་མ་དེ་མྱུ་གུའི་རྒྱུ་མ་ཡིན་ན། འོ་ན་ཅི་ལྟར་དེ་དོན་དུ་གཉེར་བ་དག་གིས་ལེན་ཅིང་དེ་ལྟར་ཐ་སྙད་དུ་བྱེད་ཅེ་ན། བཤད་པ། ཡོངས་སུ་འགྱུར་བ་སྔ་མ་ཞེས་བྱ་བ་གནས་སྐབས་སྔ་མའི་ཁྱད་པར་དག་ནི་དེའི་དོན་དུ་ཞེས་བྱ་བ་མྱུ་གུ་སྐྱེད་པར་ནུས་པའི་མཐའི་སྐད་ཅིག་དེའི་དོན་དུ་ཡིན་ནོ། །དེས་ན་དོན་དུ་གཉེར་བ་དག་ལེན་པ་དང༌། བླངས་ནས་ཀྱང་ཐ་སྙད་དུ་བྱེད་པ་ཡིན་ནོ། །འདི་སྙམ་དུ་དེ་ལ་ཡང་གེགས་སྲིད་པ་ཡིན་ཏེ། དེས་ན་འབྲས་བུ་སྐྱེད་པར་ངེས་པ་མ་ཡིན་ནོ་ཞེ་ན། བཤད་པ། ཚོགས་པ་ཐ་མ་དེར་ནི། གེགས་བྱེད་པར་ནུས་པ་འགའ་ཡང་ཡོད་པ་མ་ཡིན་ནོ་ཞེས་མི་དམིགས་པའི་
སྐབས་སུ་རྒྱུ་ཐ་མ་ལས་འབྲས་བུ་རྗེས་སུ་དཔག་པས་མ་ཡིན་ནོ་ཞེས་བྱ་བ་དེའི་ནང་དུ་མང་དུ་བཤད་ཟིན་ཏོ། །གལ་ཏེ་ནས་ཕྱིར་ས་བོན་ལ་སོགས་པ་ཡང་ཞེས་བྱ་བ་ནི་སླར་ཡང་འཁྲུལ་པར་བརྗོད་པའོ། །གཏན་ཚིགས་སྨྲས་པ། སཱ་ཕུའི་མྱུ་གུ་དེ་སྐྱེད་པའི་རྐྱེན་རྒྱུ་གང་ཡིན་པ་དེ་དག་ནི་ནས་ཀྱི་ས་བོན་གྱི་ཡུལ་དེར་ཡང་ཉེ་བའི་ཕྱིར་ཏེ། དེ་ཡོད་པའི་ཕྱིར་རོ། །གང་གི་ཚེ་སཱ་ལུའི་མྱུ་གུ་སྐྱེད་པར་ནུས་པའི་ས་བོན་ལ་ཉེ་བར་གྱུར་ཅིང་ནས་ཀྱིས་ས་བོན་ཡང་དེ་ཉིད་དུ་ཉེ་བར་གནས་པ་དེའི་ཚེ། ནས་ཀྱི་ས་བོན་དེ་རྒྱུན་ཡོངས་སུ་འགྱུར་བ་ལ་ལྟོས་པ་མ་ཡིན་ཞིང༌། སཱ་ལུའི་མྱུ་གུ་ནུས་པའི་རྒྱུ་གཞན་ལ་ལྟོས་པར་ཡང་མ་ཡིན་ཏེ། ཐམས་ཅད་ཉེ་བར་གནས་པའི་ཕྱིར་རོ། །དེ་ནི་སཱ་ལུའི་མྱུ་གུ་སྐྱེད་པ་ཡང་མ་ཡིན་ཏེ། དེས་ན་ལྟོས་པ་མེད་པ་ཉིད་ཡིན་པ་ལ་ཡང་འཁྲུལ་པ་མཐོང་བའི་ཕྱིར་ངེས་པ་མ་ཡིན་ནོ་ཞེ་ན། ངེས་པ་མེད་པ་བཟློག་པའི་ཕྱིར་ཅི་ལྟར་ལྟོས་པ་མེད་པ་ཡིན་ཏེ་ཞེས་སྨོས་སོ། །སཱ་ལུའི་མྱུ་གུ་སྐྱེད་པར་བྱེད་པ་སྟེ། སྐྱེད་པ་པོ་ལྷན་ཅིག་བྱེད་པ་དག་གིས་བོགས་དབྱུང་ནས། སཱ་ལུའི་མྱུ་གུ་སྐྱེད་པར་བྱེད་པའི་རང་གི་ངོ་བོ་གང་ཡིན་པ་དེ་ཉིད་མེད་པ་ཡིན་ཏེ། དེའི་ཕྱིར་དེའི་རང་གི་ངོ་བོ་ལ་ལྟོས་པ་ཡིན་པས་ཅི་ལྟར་ལྟོས་པ་མེད་པ་ཉིད་དུ་འགྱུར། འདི་ལྟར་རྒྱུད་གཞན་ལ་ལྟོས་པ་བས་ནི་རང་གི་ངོ་བོ་ལ་ལྟོས་པ་ཆེན་སྟེ། དོན་གཞན་ཉེ་བས་ཀྱང་རང་གི་ངོ་བོ་ཉིད་ཁྱད་པར་དུ་བྱ་བ་ཡིན་ནོ། །གལ་ཏེ་དེ་ལྟར་ན་ནི་གཞན་དུ་ཡང་མཚུངས་པར་ཐལ་ལོ་ཞེས་སྨྲས་པ་ནི། དེ་ལྟ་ན་ནི་འོ་ན་ཞེས་བྱ་བ་ཡིན་ནོ། །བྱས་པ་འམ་ཡོད་པ་ཞེས་བྱ་བ་ནི་བྱས་པ་དང་ཡོད་པ་སྐད་ཅིག་མའི་འཇིག་པའི་སྒྲུབ་བྱེད་དུ་ཉེ་བར་གཟུང་བས་གཉི་ག་རྣམ་པར་རྟོག་པའོ་ཞེས་བྱ་བ་འཇིག་པའི་རང་གི་ངོ་བོ་ལ་ལྟོས་པའི་ཕྱིར་ནི། འཇིག་པ་མ་ཡིན་ཏེ་འཇིག་པར་མི་འགྱུར་རོ་ཞེ་ན། འདི་འགོག་པར་རྩོམ་པ་ནི་སཱ་ལུའི་ས་བོན་ལ་སོགས་པ་ཞེས་བྱའོ། །སཱ་ལུའི་ས་བོན་ལ་པ་སོགས་པ་དེ་དག་གིས་སཱ་ལུའི་མྱུ་སྐྱེད་པར་ནུས་པའི་རང་གི་ངོ་བོ་དེ་ཡང་རང་གི་རྒྱུ་ལས་སྐྱེས་པ་ཡིན་པའི་ཕྱིར་རོ། །གང་ལ་དེ་འདྲ་བའི་རྒྱུ་མེད་པའི་ནས་ཀྱིས་ས་བོན་དེ་ནི་དེའི་རང་བཞིན་དུ་མི་འགྱུར་རོ། །དེས་ན་རྒྱུའི་དབྱེ་བ་ཉིད་ལས་དབྱེ་བ་འདིར་འགྱུར་བ་ཡིན་ནོ། །གལ་ཏེ་རྒྱུའི་ནུས་པ་སོ་སོར་ངེས་པ་ཉིད་ཤེས་པར་དཀའ་བ་མ་ཡིན་ནམ། དེས་ན་ཅིའི་ཕྱིར་གང་ལ་དེ་འདྲ་བའི་རྒྱུ་མེད་པ་དེ་ནི་རང་
བཞིན་དེར་འགྱུར་བ་མ་ཡིན་ནོ་ཞེས་བརྗོད་ཅེ་ན། རྒྱུའི་ནུས་པ་ངེས་པ་དེ་ལ་ཡང་ཞེས་སྨོས་ཏེ། རྒྱུའི་ནུས་པ་དེས་པ་དེ་ནི་རང་གི་ངོ་བོས་རྟོགས་པ་ཡིན་ནོ། །གལ་ཏེ་ནུས་པའི་དངོས་པོ་ནི་འབྲས་བུ་ལས་ཤེས་པར་ནུས་པ་མ་ཡིན་ནམ། རང་གི་ངོ་བོས་ནི་མ་ཡིན་ནོ་ཞེ་ན། བསམ་པ་ནི་འདི་ཡིན་ཏེ། ལྷན་ཅིག་བྱེད་པ་ལ་ལྟོས་པ་ག་ལས་སཱ་ལུར་མྱུ་གུ་སྐྱེ་བ་མཐོང་བ་དེའི་དེ་བསྐྱེད་པའི་ནུས་པའི་རང་གི་ངོ་བོ་ནི་མངོན་སུམ་དང་མི་དམིགས་པ་དག་ལས་ཤེས་པ་ཡིན་ལ། གང་ལ་མི་སྐྱེ་བ་དེ་ནི་དེ་སྐྱེད་པར་མི་ནུས་པ་ཡིན་ནོ། །ནུས་པ་དང་མི་ནུས་པ་དེ་དག་ཀྱང་རྒྱུ་ནུས་པ་དང༌། མི་ནུས་པ་ཤེས་པ་ལ་ཡིན་ཏེ། དེས་ན་འབྲས་བུ་ཕན་ཚུན་གྱི་རང་བཞིན་གྱིས་རྒྱུ་ནུས་པ་ངེས་པར་བརྗོད་པ་ཡིན་གྱི། འབྲས་བུ་མ་མཐོང་བར་ནི་མ་ཡིན་ནོ། །གལ་ཏེ་འདི་སྙམ་དུ་རང་བཞིན་གྱི་དབྱེ་བ་རྒྱུས་བྱས་པ་ནི་མ་ཡིན་གྱི། འོན་ཀྱང་ལྟོས་པ་ཉིད་ཀྱི་དངོས་པོ་རྣམས་འགའ་ཞིག་ནི་རང་བཞིན་ནི་དེ་འདྲ་བར་འགྱུར་ལ། གཞན་ནི་གཞན་དུ་སྣང་བ་ཡིན་ནོ་ཞེ་ན། དོན་རྣམས་ཀྱི་ཞེས་སྨོས་སོ། །གློ་བུར་ཞེས་བྱ་བ་ནི་ཡུལ་ལ་ལར་དང༌། རྒྱུ་ལ་ལྟོས་པ་མེད་པ་ནི་ཡུལ་ལ་ལར་དང༌། དུས་འགའ་ཞིག་ཏུ་དང༌། སཱ་ལུའི་ས་བོན་ལ་སོགས་པའི་རྫས་འགའ་ཞིག་ལ་སཱ་ལུའི་མྱུ་གུ་སྐྱེད་པའི་རང་བཞིན་ངེས་པར་མི་འགྱུར་གྱི། འོན་ཀྱང་དེ་ལྟ་མོད་ཀྱི་སྲིད་ཕྱིར་ཐམས་ཅད་ཐམས་ཅད་ཀྱི་ཆེ་ཐམས་ཅད་དུ་འགྱུར་རོ། །དེ་བཞིན་དུ་འཇིག་པ་དང༌། མི་འཇིག་པའི་རང་བཞིན་གྱི་རྣམ་པར་དབྱེ་བ་འདི་ལ་ཡང་རྒྱུ་གང་གིས་འདི་དགའ་ཞིག་འཇིག་པའི་རང་བཞིན་དུ་སྐྱེ་བར་འགྱུར་བར་རང་བཞིན་ངེས་པའི་རྒྱུ་འགའ་ཞིག་བརྗོད་དགོས་སོ། །འདི་སྙམ་དུ་ཁོ་བོ་ཅག་གིས་ངེས་པའི་རྒྱུ་མཛུབ་ཚུགས་སུ་བསྟན་པར་མི་ནུས་ཀྱང་དེ་ལྟ་མོད་ཀྱི་སྲིད་པའི་ཕྱིར་རོ། །ཁྱབ་པ་མི་འགྲུབ་པོ་སྙམ་ན། བཤད་པ། འཇིག་རྟེན་འདིར་འཇིག་པའི་ངོ་བོ་ངེས་པར་བྱེད་པའི་རང་བཞིན་འགའ་ཡང་ཡོད་པ་མ་ཡིན་ཏེ། མི་སྲིད་དོ་ཞེས་བྱ་བའི་དོན་ཏོ། །སྐྱེ་བ་ཅན་སྐྱེ་བ་དང་ལྡན་པ་ཐམས་ཅད་ནི་སྟེ། རྣམ་པ་ཐམས་ཅད་ནི་འཇིག་པ་དང་ལྡན་པ་འགྲུབ་པའི་ཕྱིར་ཏེ། མཐོང་བའི་ཕྱིར་འཇིག་པ་ནི་རྒྱུ་ངེས་པ་ཅན་མ་ཡིན་ནོ་ཞེས་བྱ་བའི་དོན་ཏོ། །འདི་སྙམ་དུ་འཇིག་པའི་རང་བཞིན་རྒྱུ་ངེས་པ་ཅན་མ་ཡིན་དུ་ཆུག་མོད། རྒྱུ་མེད་པ་ནི་མ་ཡིན་ནོ། །དེས་ན་གང་སྐྱེ་བ་དེ་དག་ནི་འཇིག་པའི་རང་བཞིན་དུ་
འགྱུར་གྱི། གཟུགས་ལ་སོགས་པ་གང་དག་མི་སྐྱེ་བ་ད་དག་ནི་འཇིག་པའི་རང་བཞིན་དུ་འགྱུར་བ་མ་ཡིན་ནོ། །དེའི་ཕྱིར་སྐྱེ་བ་ཅན་གྱི་རང་བཞིན་ཉིད་འཇིག་པ་དང་ལྡན་གྱི་གཞན་ནི་མ་ཡིན་ནོ་ཞེས་ཕ་རོལ་པོ་དོགས་པ་ལ། དེའི་སྐྱེ་བ་ནི་ཞེས་སྨོས་ཏེ། གང་གི་ཕྱིར་སྐྱེ་བའི་དབང་གིས་དངོས་པོའི་རང་བཞིན་དུ་འབྱུང་བ་མ་ཡིན་པ་དེའི་ཕྱིར་སྐྱེ་བ་ནི་འཇིག་པའི་རྒྱུ་མ་ཡིན་ནོ། །རྒྱུ་མེད་ཀྱང་རང་བཞིན་ངེས་པ་ཉིད་ཡིན་ནོ་ཞེ་ན་རྒྱུ་མེད་པ་ལ་ཡང་ཞེས་སྨོས་སོ། །དེ་ལ་བསམ་པ་ནི་འདི་ཡིན་ཏེ། རྒྱུ་དང་བྲལ་བ་མ་སྐྱེས་པ་རྣམས་ནི་ཡུལ་དང་དུས་དང་རང་བཞིན་ངེས་པར་མི་རུང་བའི་ཕྱིར་ངེས་པའི་རང་བཞིན་འགའ་ཡང་ཡོད་པ་མ་ཡིན་ནོ། །དེའི་ཕྱིར་ན་གཟུགས་ལ་སོགས་པ་མཐོང་བའི་རང་གི་ངོ་བོ་ཅི་འདྲ་བ་ནི་རྒྱུ་མེད་པར་མི་འཐད་ལ། རྒྱུ་དང་ལྡན་པར་མཐོང་བ་གང་ཡིན་པ་དེ་ཐམས་ཅད་ཀྱང་འཇིག་པ་ཉིད་ཡིན་པའི་ཕྱིར་མཐོང་བ་གཟུགས་ལ་སོགས་པའི་དངོས་པོ་རྣམས་ཀྱི་འཇིག་པ་ནི་རྒྱུ་ལ་ངེས་པ་མ་ཡིན་ལ། རྒྱུ་ངེས་པ་མེད་པ་ཅན་གྱི་འཇིག་པ་ཡང་རྒྱུ་མེད་པར་བརྗོད་པ་ཡིན་ཏེ། དེས་ན་གང་ཅུང་ཟད་སྐྱེད་པར་བྱེད་པ་དེ་ཐམས་ཅད་ནི་འཇིག་པ་སྐྱེད་པ་ཡིན་ནོ། །དེའི་ཕྱིར་འཇིག་པའི་དངོས་པོ་འདི་ལ་རྒྱུའི་ཞེས་བྱ་བ་སྐྱེད་པར་བྱེད་པའི་འཇིག་པ་དང་འཇིག་པ་མ་ཡིན་པ་སྐྱེད་པའི་སྐྱེད་པའི་སྒོ་ནས་རང་བཞིན་གྱི་རྣམ་པར་དབྱེ་བ་འགའ་ཡང་མེད་ལ། རྒྱུའི་རང་བཞིན་གྱི་རྣམ་པར་དབྱེ་བ་དེ་མེད་པའི་ཕྱིར་འབྲས་བུ་ཡང་འཇིག་པ་དང་མི་འཇིག་པའི་རྣམ་པར་དབྱེ་བ་མེད་པར་འགྱུར་ཏེ། དེས་ན་མི་མཚུངས་སོ། །ཇི་ལྟར་སཱ་ལུའི་ས་བོན་དང་ནས་ཀྱི་ས་བོན་དག་ཕན་ཚུན་གྱི་མྱུ་གུ་བསྐྱེད་པའི་ནུས་པ་མེད་པར་རང་གི་རྒྱུས་བྱས་པར་མཐོང་བའི་རྒྱུའི་ནུས་པ་ཐ་དད་པར་སྟོན་པ་དེ་བཞིན་དུ་གང་ཞིག་རྒྱུ་ཐ་དད་པར་རྗེས་སུ་དཔག་པར་འགྱུར་བ་གཟུགས་ལ་སོགས་པ་རྣམས་ནི་འཇིག་པ་དང་མི་འཇིག་པའི་རང་བཞིན་དུ་མཐོང་བ་མ་ཡིན་ནོ། །དེའི་ཕྱིར་ཐམས་ཅད་དུ་མཐོང་བའི་འཇིག་པ་ཉིད་ནི་རྒྱུ་ཐ་དད་པར་རྗེས་སུ་དཔོག་པར་བྱེད་པ་མ་ཡིན་པ་དེས་ན་སཱ་ལུའི་ས་བོན་ལ་སོགས་པ་དང་མི་མཚུངས་སོ། །གལ་ཏེ་དེ་ལྟ་ན་ཡང་མཐོང་བའི་གཟུགས་ལ་སོགས་པ་དག་ལས་ཐ་དད་པའི་དངོས་པོ་གཟུགས་ལ་སོགས་པ་ཤིན་ཏུ་རིགས་མི་མཐུན་པའི་རྒྱུ་དང་བཅས་པ་འགའ་ཞིག་ནི་མི་འཇིག་པར་འགྱུར་རོ། །ཇི་ལྟ་བུ་ཞེ་ན། ཁོ་བོ་ཅག་གིས་དེ་མཐོང་བ་ནི་མ་ཡིན་གྱི། སྲིད་པར་དོགས་པས་ན་ཁྱབ་པ་ནི་
ཉམས་པར་འགྱུར་རོ་ཞེས་སྨྲས་པ་གལ་ཏེ་ཞེས་བྱ་བ་ཡིན་ཏེ། ཚོགས་པ་ལས་སྐྱེ་བ་གང་ཡིན་པ་ཐམས་ཅད་ནི་ངེས་པ་མེད་པ་སྟེ་ངེས་པར་མི་ནུས་པ་ཡིན་ནོ། །མཐོང་བའི་ཚོགས་པ་ཅན་ནི་འཇིག་པ་ཡིན་གྱི། ཚོགས་པ་མཐོང་བ་མེད་པ་གཞན་ནི་མ་ཡིན་ནོ་ཞེས་སྨྲས་པ་ནི། ཚོགས་པ་དེ་དག་མཐོང་བ་གང་ལས་མ་ལུས་པར་གྱུར་པའི་མཐོང་བ་དེ་མེད་པའི་ཕྱིར་རོ། །འབྲས་བུ་ཐམས་ཅད་མཐོང་བ་མེད་པའི་ཕྱིར་ན་མཐོང་བ་མེད་པའི་རྣམ་པར་སྐྱེད་པར་བྱེད་པའི་ཚོགས་པ་མི་འཇིག་པ་སྐྱེད་པ་ནི་མི་མཐོང་བ་ཉིད་དུ་འགྱུར་རོ། །འདི་སྙམ་དུ་གལ་ཏེ་ཚོགས་པ་འགའ་ཞིག་མི་འཇིག་པ་སྐྱེད་པར་འགྱུར་ན་ནི་མཐོང་བའི་ཚོགས་པ་རྣམས་ལས་ཀྱང་འགའ་ཞིག་མི་འཇིག་པ་སྐྱེད་པར་འགྱུར་ན། དེ་ལྟ་ཡང་མ་ཡིན་ཏེ། དེའི་ཕྱིར་མ་མཐོང་བ་ཡང་མི་འཇིག་པ་ནི་འགའ་ཡང་མི་སྐྱེད་དོ་ཞེ་ན། སྨྲས་པ་ཚོགས་པ་གང་ཡིན་པ་དེ་དག་ནི་ནུས་པ་སྣ་ཚོགས་པར་མཐོང་ངོ༌། །དེ་ལས་ཅིར་འགྱུར་ཞེ་ན། དེའི་ཕྱིར་ཚོགས་པ་ནུས་པ་སྣ་ཚོགས་པ་དེ་ལ་ཇི་ལྟར་གཟུགས་སྐྱེད་པའི་ཚོགས་པ་ཐོགས་པ་དང་བཅས་པ་སྐྱེད་པར་བྱེད་པར་ནུས་པ་ཡིན་ཡང་འགའ་ཞིག་ཐོགས་པ་མེད་པའི་དངོས་པོ་སྐྱེད་པའི་ནུས་པ་ཡང་ཡོད་པ་དེ་བཞིན་དུ་ཕལ་ཆེར་འཇིག་པ་སྐྱེད་པར་ནུས་པ་ཡིན་ཡང༌། འགའ་ཞིག་ནི་མི་འཇིག་པ་སྐྱེད་པར་འགྱུར་རོ། །རྣམ་པ་ཐམས་ཅད་དུ་ཚོགས་པ་དང་གཞན་འགོག་པར་བྱེད་པའི་གཏན་ཚིགས་མེད་པའི་ཕྱིར་ན་ཁྱབ་པ་མ་གྲུབ་པོ་ཞེ་ན། རེ་ཞིག་རྒྱུ་ངེས་པ་མེད་པ་ཅན་གྱི་འཇིག་པ་དེ་ཉིད་ནི་ཡུལ་ཐམས་ཅད་ལ་སྒྲུབ་པར་ནུས་པར་མཁྱེན་ནས། གནོད་པར་བྱེད་པ་རིམ་པ་དང་ཅིག་ཅར་འགལ་བ་ཉིད་བསྟན་པའི་ཕྱིར་མ་ཡིན་ཏེ་ཞེས་སྨོས་ཏེ། འཇིག་པ་རྒྱུ་མེད་པ་ཉིད་ནི་ཚད་མ་འདི་ཉིད་ཡོངས་སུ་སྦྱང་བའི་དོན་དུ་གཉེར་བ་བཀོད་པར་རང་སྔར་བཤད་ཟིན་ཏེ། རྒྱུ་ཙམ་དང་འབྲེལ་པའི་འཇིག་པའི་རང་བཞིན་ལ་ནི་སྒྲུབ་པར་མི་ནུས་པའི་ཕྱིར་རོ། །དོན་ནི་དགོས་པའོ། །དེ་བྱེད་པ་ནི་སྒྲུབ་པའོ། །དེར་ནུས་པ་མཐུ་སྟེ། དངོས་པོ་གང་ལ་མཚན་ཉིད་དེ་རང་བཞིན་དེ་ཡོད་པའོ། །ཡང་ཅིའི་ཕྱིར་ནུས་པ་ཉིད་དངོས་པོ་ཡིན་ཞེ་ན། བཤད་པ། གང་གི་ཕྱིར་ཐམས་ཅད་ནུས་པ་དེར་བརྗོད་པ་ནི་བསྙད་པ་སྟེ། དེ་དང་བྲལ་བ་མི་ལྡན་པའི་མཚན་ཉིད་གང་ལ་ཡོད་པ་དེ། འབྲས་བུ་བྱ་བའི་རྒྱུ་མཚན་དུ་
བསྙད་བ་དང་བྲལ་བ་ནི་ཉེ་བར་བརྗོད་པ་མེད་པ་སྟེ་དངོས་པོ་མེད་པ་ཡིན་ནོ། །དེའི་ཕྱིར་གང་ཞིག་བྱ་བ་བྱེད་པ་དེ་ནི་དངོས་པོ་ཡིན་ན། གལ་ཏེ་དེ་ལྟར་མཐའ་ཞེས་བྱ་བ་དགྲ་བཅོམ་པ་ཡོངས་སུ་མྱ་ངན་ལས་འདས་པའི་དུས་ཀྱི་སེམས་ཀྱི་སྐད་ཅིག་ཐ་མར་གྱུར་པ་གང་ཡིན་པ་དེ་ནི་མཐའ་ཞེས་བརྗོད་པ་ཡིན་ཏེ། སྐད་ཅིག་དེ་ཉེ་བར་བརྗོད་པ་མེད་པ་ཞེས་བྱ་བ་དངོས་པོ་མེད་པར་ཐལ་ལོ་ཞེ་ན། མ་ཡིན་ཏེ་ཞེས་སྨོས་ཏེ། སེམས་ཅན་ཞེས་བྱ་བར་བགྲངས་པ་སྟེ། གྲངས་སུ་བགྲང་ཞིང་རྣམ་པར་གཞག་པའི་སེམས་ཀྱི་ངོ་བོ་ཉིད་ཀྱི་སྐད་ཅིག་གཞན་གང་ཡིན་པ་དེ་ནི་སེམས་ཅན་དུ་བགྲངས་པ་ཡིན་ལ། དེའི་ཉེ་བར་ལེན་པ་ནི་མཐའ་གང་ཡིན་པའི་མཚན་ཉིད་ཡིན་ཏེ། དེའི་ཕྱིར་ལྷན་ཅིག་བྱེད་པའི་རྒྱུ་ཡིན་པའི་ཕྱིར་དངོས་པོ་ཉིད་ཡིན་ལ། ཉེ་བར་ལེན་པ་ལས་བྱུང་བ་མེད་པའི་ཕྱིར་མཐའ་ཉིད་ཡིན་ནོ་ཞེས་བྱ་བའི་དོན་ཏོ། །ད་ནི་མཐའ་སྐད་ཅིག་ཁམས་གསུམ་དུ་འབྲས་བུ་གང་ལ་ལྷན་ཅིག་བྱེད་པའི་རྒྱུ་ཡིན་པ་དེ་སྟོན་པར་བྱེད་པ་ནི་དེ་ཡང་ཞེས་བྱ་བ་ཡིན་ནོ། །ཐ་ནི་ཞེས་བྱ་བ་ནི་ཆུང་བའི་དོན་ཏེ་ནུས་པའི་ཡུལ་འདི་ནི་ཆུང་སྟེ་འདི་ལྟ་སྟེ་དེ་བཞིན་གཤེགས་པའི་ཡེ་ཤེས་ཙམ་མོ། །ཤེས་བྱ་ཁྱབ་པར་བྱེད་པས་ན་ཁྱབ་པ་སྟེ་ཤེས་བྱ་ཁྱབ་པ་དེ་བཞིན་གཤེགས་པའི་ཡེ་ཤེས་དེ་ལའོ། །གཟུགས་དང་བྲལ་བའི་གཟུགས་མེད་པའི་ཁམས་སུ་ཡང་དེ་བཞིན་གཤེགས་པའི་མཁྱེན་པ་བསྐྱེད་པ་ལ་ནི་མཐའི་སྐད་ཅིག་ནུས་པ་ཉིད་ཡིན་ནོ། །ཁམས་འདོད་པའི་ཁམས་དང་གཟུགས་ཀྱི་ཁམས་སུ་ནི་དུ་མ་ལ་ཕན་འདོགས་པར་འགྱུར་ཏེ། རང་གི་རྒྱུད་ལ་ཡོད་པའི་ལུས་ཀྱི་བྱ་བ་དང༌། གཞན་གྱི་རྒྱུད་ལ་ཡོད་པའི་གཞན་གྱི་སེམས་ཤེས་པ་ལ་རྒྱུའི་དངོས་པོ་ཉིད་ཀྱིས་ཕན་འདོགས་པ་ཡིན་ནོ། །གལ་ཏེ་འདི་སྙམ་དུ་གཟུགས་མེད་པའི་ཁམས་སུ་བཅོམ་ལྡན་འདས་སྒྲིམ་པ་མེད་པ་ན་སྟེ་གདུལ་བྱའི་རྒྱུད་ལ་གཟིགས་པར་བཞེད་པ་མི་མངའ་བ་ནི་སེམས་ཀྱི་རྒྱུད་སྐད་ཅིག་ཐ་མ་ནུས་པར་མི་འགྱུར་རོ་ཞེ་ན། མ་ཡིན་ཏེ་ཞེས་སྨོས་སོ། །གཏན་ཚིགས་བཤད་པ། བསྒྲིམ་པ་མེད་པ་མི་སྲིད་པའི་ཕྱིར་རོ། །ཇི་ལྟར་མི་སྲིད་ཅེ་ན། གཞན་གྱི་དོན་ལ་འཇུག་ཅིང་སྤྱོད་པ་དེ་ལ་སྒྲུབ་པར་བྱེད་པ་མ་ཚང་བ་མེད་པ་ནི་མི་འཐད་པའི་ཕྱིར་རོ། །སྒྲུབ་པར་བྱེད་པ་སྟེ་ཡོངས་སུ་གྲུབ་པར་བྱེད་པ་མ་ཚང་བ་མེད་པ་མ་ཉམས་པ་དེ་མི་འཐད་པའི་
ཕྱིར་རོ། །ཅིའི་ཕྱིར་མི་འཐད་ཅེ་ན། སྒྲུབ་པར་བྱེད་པ་མ་ཚང་བ་མེད་པ་དེའི་ཡན་ལག་མ་ཚང་བས་སོ། །བསྒྲིམ་པ་མེད་ན་ནི་བསྒྲུབ་པའི་ཡན་ལག་མ་ཚང་བར་འགྱུར་རོ། །ཅིའི་ཕྱིར་མ་ཚང་བར་འགྱུར་ཞེ་ན། སེམས་ཅན་རྣམས་ཀྱི་བྱ་བ་དང་བྱ་བ་མ་ཡིན་པ་སྤང་བྱ་དང་བླང་བྱ་དག་གི་རྟོགས་པར་འགྱུར་བའི་ཕྱིར་རོ། །བསྒྲིམ་པ་མེད་ན་སྤང་བྱ་དང་བླང་བྱ་དག་མི་རྟོགས་ལ། རྟོགས་པ་ནི་སྒྲུབ་པར་བྱེད་པ་མ་ཚང་བ་མེད་པ་ཡིན་ནོ། །ཇི་ལྟར་ན་མི་རྟོགས་ཤེ་ན། ཆོས་གཅིག་ཡོངས་སུ་མ་ཤེས་ན་ཡང་ངོ༌། །བསྒྲིམ་པ་མེད་ན་ནི་མང་པོ་ཤེས་པར་མི་འགྱུར་ལ། གཅིག་ཡོངས་སུམ་ཤེས་ན་ཡང་བྱ་བ་དང་བྱ་བ་མ་ཡིན་པ་མི་རྟོགས་པར་འགྱུར་རོ། །ཇི་ལྟར་གཅིག་ཡོངས་སུ་མ་ཤེས་ན་མི་རྟོགས་པར་འགྱུར་རོ་ཞེ་ན། ཐམས་ཅད་དུ་བླང་བྱ་དང་སྤང་བྱར་ཐེ་ཚོམ་སྐྱེ་བའི་ཕྱིར་རོ། །ཇི་ལྟར་གཅིག་མ་ཤེས་པ་ཐམས་ཅད་ལ་ཐེ་ཚོམ་སྐྱེ་ཞེ་ན། བྱ་བ་འམ་བྱ་བ་མ་ཡིན་པ་ཐམས་ཅད་ལ་ཅི་ཞིག་ལྟར་ཞེས་བྱ་བ་དངོས་སུ་འམ་བརྒྱུད་པས་ཐམས་ཅད་ཉེ་བར་མཁོ་བའི་ཕྱིར་རོ། །མ་ཤེས་པའི་དངོས་པོ་གཅིག་པོ་དེ་ནི་དངོས་སུ་འམ་བརྒྱུད་པས་གདོན་མི་ཟ་བར་སེམས་ཅན་ནམ། སེམས་ཅན་གྱི་དོན་འགའ་ཞིག་གི་གནོད་པར་བྱེད་པ་ཡིན་པ་དེས་ན་སྤང་བར་བྱ་བ་མ་ཡིན་པ་འམ། སེམས་ཅན་གྱི་དོན་གཞན་འགའ་ཞིག་ལ་ནི་ཕན་འདོགས་པར་བྱེད་པ་ཡིན་པ་དེས་ན་བླང་བར་བྱ་བ་ཡིན་ནོ། །དེའི་ཕྱིར་དེ་ཡོངས་སུ་མ་ཤེས་ན་ནི་ཐམས་ཅད་མཁྱེན་པ་སྒྲུབ་པར་བྱེད་པ་མ་ཚང་བ་མེད་པའི་ཡན་ལག་མ་ཚང་བ་ཡིན་པ་དེས་ན་ཐམས་ཅད་ཤེས་པ་ནི་བསྒྲིམ་པ་དང་བཅས་པ་ཉིད་དོ། །དེས་ན་ཐམས་ཅད་མཁྱེན་པའི་ཡེ་ཤེས་ནི་ཐམས་ཅད་ཀྱི་ཚེ་གཟུགས་མེད་པའི་ཁམས་ལ་དམིགས་པ་ཉིད་དོ། །རྟག་ཏུ་བསྒྲིམ་པ་མེད་དུ་ཟིན་ཀྱང་ཐ་མ་དངོས་པོ་མེད་པ་ཉིད་དུ་ནི་ཐལ་བ་མེད་དོ་ཞེས་བཤད་པ་ནི། ཐ་མ་ནུས་པ་མེད་པ་ཉིད་ཀྱང་མ་ཡིན་ཏེ་ཞེས་བྱ་བ་ཡིན་ནོ། །ནུས་པ་མེད་པ་ཉིད་ཅེས་བྱ་བར་ངེས་པ་ནི་མ་ཡིན་ཏེ། བསྒྲིམ་པའི་དུས་སུ་འབྱུང་བའི་ཐ་མ་འགའ་ཞིག་ནི་འབྲས་བུ་བྱེད་པའི་ཕྱིར་རོ། །མི་བྱེད་ཀྱང་ཞེས་བྱ་བ་ནི་འབྲས་བུ་ནི་འབྲས་བུ་མི་བྱེད་ན་ཡང་ལྷན་ཅིག་བྱེད་པའི་རྐྱེན་དང་བྲལ་བས་མི་ནུས་པ་ཡིན་ནོ། །གཅིག་པུས་སྐྱེད་པ་ནི་འགའ་ཡང་ཁས་མི་ལེན་ཏེ། དེས་ན་རྐྱེན་དང་བྲལ་བས་མི་བྱེད་པ་ཡིན་གྱི། རྐྱེན་དང་མ་བྲལ་ན་ནི་ནུས་པའི་ཕྱིར་བྱེད་པ་ཉིད་དོ། །གལ་
དེ་སྐད་ཅིག་མ་མ་ཡིན་པ་ཡང་ཐ་མ་བཞིན་དུ་ལྷན་ཅིག་བྱེད་པ་ལ་ལྟོས་ནས་འབྲས་བུ་བྱེད་དོ་ཞེ་ན། དེ་ནི་མ་ཡིན་ཏེ། གང་གི་ཕྱིར་ཇི་ལྟར་འདིར་ཐ་མའི་སེམས་ཀྱི་སྐད་ཅིག་ལྷན་ཅིག་བྱེད་པའི་རྐྱེན་དང་མ་བྲལ་ན་ལྷན་ཅིག་ཏུ་བྱ་བ་བྱེད་ནུས་པ་དེ་བཞིན་དུ་སྐད་ཅིག་མ་མ་ཡིན་པ་ལྷན་ཅིག་བྱེད་པ་ལ་ལྟོས་པ་དང་བཅས་པ་ན་བྱེད་པ་མ་ཡིན་ཏེ། རྣམ་པ་ཐམས་ཅད་དུ་ཞེས་བྱ་བ་ལྷན་ཅིག་བྱེད་པ་ལ་ལྟོས་པ་དང་འགའ་ཞིག་པས་ཀྱང་རུང་བ་ཐམས་ཅད་དུ་བྱེད་པ་སྲིད་པའི་ཕྱིར་རོ། །མདོར་བསྟན་པའི་དག་འདི་ཉིད་གསལ་བར་བསྟན་པའི་ཕྱིར་སྐད་ཅིག་མ་ཡིན་པ་ཞེས་སྨོས་སོ། །སྐད་ཅིག་མ་ཡིན་པའི་དོན་ལ་ནི་རིམ་དང་ཅིག་ཅར་དེ་དག་འགལ་བའི་ཕྱིར་རོ། །རིམ་གྱིས་ནི་མ་ཡིན་ཏེ་ཞེས་བྱ་བ་ནི་རེ་ཞིག་སྐད་ཅིག་མ་མ་ཡིན་པ་ལ་རིམ་ནི་ཡོད་པ་མ་ཡིན་ནོ། །ཅིའི་ཕྱིར་ཞེ་ན་བཤད་པ། གང་ཞིག་ལྷན་ཅིག་བྱེད་པ་དག་ལ་ལྟོས་པ་མེད་པ་གང་ཡིན་པ་དེ་ནི་སྡོད་པ་སྟེ། དུས་འགྲོ་བའི་བྱེད་པ་དེ་མི་རིགས་སོ། །ཇི་ལྟ་བུར་གྱུར་པ་ཞེ་ན། རང་ཡོད་པ་ཙམ་གྱིས་བྱེད་པ་པོར་གྱུར་པའོ། །གཞན་གྱི་ངོ་བོས་བྱེད་པ་པོར་གྱུར་པའི་དངོས་པོ་ནི་འགའ་ཡང་མེད་དེ། གཞན་གྱིས་འབྲས་བུ་བྱས་ན་གཞན་བྱེད་པ་པོ་ཉིད་དུ་ནི་མི་འཐད་པའི་ཕྱིར་རོ། །དེས་ན་རང་ཡོད་པས་རང་གི་ངོ་བོས་དངོས་པོ་བྱེད་པ་པོར་འགྱུར་བ་ཡིན་ནོ། །དེའི་ཉི་མ་གསུམ་པ་འམ་སྐད་ཅིག་གསུམ་པ་ལ་འབྲས་བུ་བྱེད་ནུས་པའི་རང་བཞིན་གང་ཡིན་པ་དེ་ནི་དང་པོ་ཉིད་ཀྱི་ཉི་མ་འམ་སྐད་ཅིག་ལ་ཡོད་པའི་ཕྱིར། དེ་དང་འབྲེལ་པའི་འབྲས་བུ་བྱེད་པར་འགྱུར་རོ། །འདི་སྙམ་དུ་སྐད་ཅིག་དང་པོ་ལ་ནི་དེ་ལ་བྱེད་པ་པོའི་རང་བཞིན་མེད་པ་ཡིན་ནོ་སྙམ་ན། བཤད་པ། སྔར་བྱེད་པ་པོ་མ་ཡིན་པ་ནི་ཕྱིས་ཀྱང་མི་འགྱུར་ཏེ། རང་གི་ངོ་བོར་འགྱུར་བ་མེད་པའི་ཕྱིར་ཏེ། རྣམ་པ་གཞན་དུ་མི་འགྱུར་བའི་ཕྱིར་རོ། །དེས་ན་ཕྱིས་བྱེད་པ་པོ་ཡིན་ན་ནི་དེ་སྐད་ཅིག་དང་པོར་ཡང་བྱེད་པ་ཉིད་དོ། །འདི་སྙམ་དུ་བྱེད་པ་པོ་ཉིད་ཡིན་ཡང་ལྷན་ཅིག་པ་ལ་ལྟོས་ནས་རིམ་གྱིས་འབྲས་བུ་བྱེད་པ་ཡིན་ནོ་སྙམ་ན། བཤད་པ། ལྟོས་པ་ཡིན་ན་ནི་ཡང་རིག་བྱེད་སུན་འབྱིན་པའི་སྐབས་སུ་ཇི་ལྟར་སྐད་ཅིག་མ་ཡིན་པ་ལྟོས་པར་མི་རིགས་པ་དེ་ལྟར་བཤད་ཟིན་ཏོ། །འདི་སྙམ་དུ་འབྲས་བུ་བྱེད་པ་ཉིད་ཀྱིས་ཅིག་ཅར་བྱེད་པ་ཡིན་ནོ་སྙམ་ན། བཤད་པ། ཅིག་ཅར་བྱེད་པ་ཡང་མ་ཡིན་ཏེ། དེའི་ཞེས་
བྱ་བ་ནུས་པའི་རང་གི་ངོ་བོ་ནི་ཕྱིས་ཀྱང་ཞེས་བྱ་བ་སྐད་ཅིག་དང་པོའི་འོག་རོལ་དུ་ཡང་མི་བྱེད་པ་མི་འཐད་པའི་ཕྱིར་རོ། །དངོས་པོ་དེའི་རང་བཞིན་གང་གིས་སྐད་ཅིག་དང་པོར་འབྲས་བུ་བྱེད་པའི་རང་བཞིན་དེ་ནི་སྐད་ཅིག་གཉིས་པ་ན་ཡང་ཡོད་པའི་ཕྱིར་སྐད་ཅིག་དང་པོ་བཞིན་དུ་མ་ཚང་བ་མེད་པར་ཐམས་ཅད་བྱེད་པར་འགྱུར་རོ། །སྐད་ཅིག་གཉིས་པར་གང་བྱས་པ་དེ་བྱེད་པའི་ནུས་པའི་རང་བཞིན་ནི་སྐད་ཅིག་དང་པོར་ཡོད་པའི་ཕྱིར་སྐད་ཅིག་དང་པོར་འབྲས་བུ་དེ་བྱེད་པར་འགྱུར་ལ། སྐད་ཅིག་དང་པོར་བྱས་པ་གང་ཇི་སྙེད་པ་དེ་ཐམས་ཅད་ནི་སྐད་ཅིག་མ་གཉིས་པ་ལ་ཡང་བྱེད་པར་འགྱུར་ཏེ། དེའི་རང་བཞིན་ཡོད་པའི་ཕྱིར་རོ། །དེའི་ཕྱིར་དེ་ལྟར་དངོས་པོ་སྐད་ཅིག་གཉིས་གནས་པ་ཡང༌། རིམ་དང་ཅིག་ཅར་དོན་བྱེད་པར་མི་འཐད་པའི་ཕྱིར་རོ། །སྐད་ཅིག་མ་ཡིན་པ་ལ་ནི་དོན་བྱེད་ནུས་པ་མེད་དོ། །དེས་ན་གང་གི་ཕྱིར་ཐམས་ཅད་ལས་ནུས་པ་ལྡོག་པ་དེའི་ཕྱིར་འདིའི་སྐད་ཅིག་མ་ཡིན་པའི་དོན་དེ་ནི་ཡོད་པའི་རང་བཞིན་ལས་འདས་པ་ཡིན་ཏེ། མཚན་ཉིད་ཡོད་པ་མ་ཡིན་ནོ་ཞེས་མཇུག་སྡུད་པ་སྟེ་དེས་ན་མེད་པ་ཡིན་ནོ། །དེ་ཉིད་བསྡུ་པའི་ཕྱིར་བཤད་པ། དོན་བྱེད་པར་ནུས་པ་གང་ཡིན་པ་དེ་ནི་དངོས་པོ་དེ་ཁོ་ན་རྣམ་པར་དཔྱོད་པ་འམ། འགྲོ་བ་འདིར་དོན་དམ་པ་མ་བཅོས་པའི་རང་བཞིན་དུ་ཡོད་པ་ཡིན་ནོ། །ཤིན་ཏུ་སྐུར་པ་ལྷུར་ལེན་པས་ཀྱང་དོན་དམ་པར་དོན་བྱེད་པར་ནུས་པ་ལ་བསྙོན་པ་དང༌། ཀུན་རྫོབ་ཏུ་ཡང་རྣམ་པར་བཞག་ནས་དངོས་པོ་ཡོད་པར་བརྗོད་པར་བྱའི། དོན་དམ་པར་དོན་བྱེད་ནུས་པ་ཉིད་ནི་མ་ཡིན་ནོ། །གང་གི་ཕྱིར་དོན་བྱེད་པར་ནུས་པ་ཡོད་པ་ཡིན་པ་དེས་ན་སྐད་ཅིག་མ་མ་ཡིན་པ་ནི་མེད་པ་ཡིན་ཏེ། རིམ་དང་ཅིག་ཅར་དོན་བྱེད་པ་འགལ་བའི་ཕྱིར་རོ། །དེའི་ཕྱིར་དེ་ལྟར་རིམ་དང་ཅིག་ཅར་མེད་པ་ཉིད་གནོད་པར་བྱེད་པའི་ཚད་མར་ཉེ་བར་བསྟན་པ་ཡིན་ནོ། །འཇིག་པ་རྒྱུ་མེད་པ་ཉིད་ནི་གཞི་འདིང་བར་བྱེད་པ་ཡིན་ནོ། །ཡང་ན་ཕུང་པོ་དང་ཁམས་དང་སྐྱེ་མཆེད་ཀྱི་རང་བཞིན་གང་ཡིན་པ་དེའི་བྱས་པ་མི་རྟག་པར་གྲུབ་པ་ཡིན་ཏེ། དེས་ན་འདི་ཡང་ངེས་པ་མེད་པ་ཡིན་ཏེ་ཞེས་གང་བརྗོད་པའི་སྐྱོན་དེ་མེད་དོ། །འདི་སྐད་བརྗོད་པ་ཡིན་ཏེ། གཟུགས་ལ་སོགས་པ་མཐོང་བ་ལས་ཐ་དད་པའི་དངོས་པོ་སྲིད་པ་གང་ཡིན་པའི་ཡུལ་དེ་ལ་ནི་ཁོ་བོ་ཅག་གིས་ཁྱབ་པ་བསྟན་པ་མ་ཡིན་ནོ། །གང་དག་ལ་ཁྱབ་པ་
བསྟན་པར་བྱ་བ་དེ་དག་ནི་འཇིག་པའི་རང་བཞིན་ཡིན་པའི་ཕྱིར་རྣམ་པ་དེ་ལྟ་བུའི་རྒྱུ་དག་ལ་ངེས་པ་མེད་པ་དེ་ཙམ་དང་རྗེས་སུ་འབྲེལ་པར་མཐོང་བ་ཡིན་ནོ། །དེས་ན་རྣམ་པ་འདིས་ནི་འཇིག་པའི་རྒྱུ་མེད་པ་ཉིད་ནི་རྒྱུ་ངེས་པ་མེད་པའི་མཚན་ཉིད་དུ་བསྟན་པ་ཡིན་ལ། དེ་ལྟར་བསྟན་པས་ཀྱང་རྒྱུ་དང་ལྡན་པ་ཐམས་ཅད་འཇིག་པར་གྲུབ་པར་འགྱུར་གྱི། རིམ་དང་ཅིག་ཅར་འགལ་བའི་སྟོབས་ཀྱིས་ནི་མ་ཡིན་ནོ། །ཡང་ཇི་ལྟར་ཕུང་པོ་དང་ཁམས་དང་སྐྱེ་མཆེད་ཀྱི་མཚན་ཉིད་མི་རྟག་པར་སྒྲུབ་ཅེ་ན། བཤད་པ། དེའི་རང་བཞིན་མ་ཡིན་པ་ཕུང་པོ་དང་ཁམས་དང་སྐྱེ་མཆེད་ཀྱི་ངོ་བོ་མ་ཡིན་པ་ལ་ནི་ཚད་མ་མེད་པས་མ་གྲུབ་པའི་ཕྱིར་ཏེ་མ་ངེས་པའི་ཕྱིར་རྗེས་སུ་འགྲོ་བ་སྒྲུབ་པ་རྗེས་སུ་འགྲོ་བ་སྟོན་པ་གང་ཡིན་པ་དེ་མི་འཐད་པའི་ཕྱིར་རོ། །ཚད་མ་ངེས་པའི་དངོས་པོ་ལ་བྱས་པའམ་ཡོད་པ་བསྒྲུབ་པར་བྱ་བ་མི་རྟག་པས་རྗེས་སུ་འགྲོ་བ་བསྟན་པར་ནུས་པ་ཡིན་ཏེ། དེའི་ཕྱིར་ཚད་མས་མཐོང་བའི་ཕྱུང་པོ་ལྔ་པོ་ཉིད་ལ་གཏན་ཚིགས་བསྒྲུབ་བྱས་རྗེས་སུ་འགྲོ་བར་བསྟན་པར་བྱ་བ་ཡིན་ནོ། །མ་མཐོང་བའི་རྣམ་པ་འགའ་ཞིག་བརྟགས་པ་གང་ཡིན་པ་དེ་ནི་རྣམ་པ་དེ་ལྟ་བུ་མ་ཡིན་པའི་ཕྱིར་དེ་ལ་ཁྱབ་པ་བསྟན་པར་བྱ་བ་ནི་མ་ཡིན་ནོ། །འདི་སྙམ་དུ་གལ་ཏེ་བྱས་པ་འམ་ཡོད་པ་དེ་ཙམ་འགའ་ཞིག་གཟུང་ན་ནི་དེའི་ཚེ་གྲུབ་པའི་མཐའ་དང་འགལ་ལོ་སྙམ་ན། བཤད་པ། ཁོ་བོ་ཅག་གིས་བྱས་པ་ནི་དེ་ཉིད་ཡིན་ཏེ། ཕུང་པོ་ལྔའི་བདག་ཉིད་གང་ཡིན་པའོ། །དེ་ཉིད་ཀྱི་ཕྱིར་བཤད་པ། ཇི་སྐད་དུ་ཆོས་མངོན་པ་ལས་འདུས་བྱས་ཏེ། བྱས་པའི་ཆོས་གང་ཡིན་ཞེ་ན་ཞེས་དྲི་བ་བྱས་ནས་ཕུང་པོ་ལྔའོ་ཞེས་གསུངས་པས་དེ་ཉིད་དུ་ལན་བཏབ་པ་ཡིན་ནོ། །ཕུང་པོ་ལྔ་པོ་དེ་ལ་དབང་པོ་ལྔ་ནིའོ། །འཕོ་བའི་རང་བཞིན་དེ་གང་དག་ལ་ཡོད་པའོ། །ཡང་ཇི་ལྟར་ན་ལྐོག་ཏུ་གྱུར་པའི་དབང་པོ་རྣམས་ཀྱི་རང་བཞིན་འཕོ་བ་ཅན་ཡིན་ཞེ་ན། བཤད་པ། དེའི་འབྲས་བུ་རྣམ་པར་ཤེས་པ་གང་ཡིན་པ་དེ་རྣམ་པར་འཆད་པ་དང་རྣམ་པར་འགྱུར་བའོ། །འབྲས་བུ་རྣམ་པར་ཤེས་པ་ལྡོག་པ་ལས་དབང་པོ་དེ་དག་ཡོད་པ་ཡིན་པ་དེ་བཞིན་དུ་དེའི་འབྲས་བུ་རྣམ་པར་ཆད་པ་མཐོང་བའི་ཕྱིར་རྒྱུ་ཡང་རྣམ་པར་ཆད་པར་རྗེས་སུ་དཔོག་ལ། གསལ་བ་དང་མི་གསལ་བ་རྣམ་པར་འགྱུར་
བ་མཐོང་བའི་ཕྱིར་ནི་དེ་དག་ཀྱང་རྣམ་པ་གཞན་དུ་འགྱུར་བ་ཉིད་དུ་རྗེས་སུ་དཔོག་གོ །འདི་ལྟར་རྒྱུ་ལྡོག་པ་འམ་རྣམ་པ་གཞན་དུ་འགྱུར་བ་མེད་པར་ནི་འབྲས་བུ་དེ་དག་ཏུ་འགྱུར་བ་མ་ཡིན་ནོ་ཞེས་གང་བཤད་པ་ནི་རང་བཞིན་དེ་ཉིད་ཡིན་ན་ནི་ཞེས་བྱ་བ་ཡིན་ནོ། །དེ་དག་གི་སྔར་གྱི་གནས་སྐབས་རྣམ་པར་འགྱུར་བ་མེད་པ་རྣམ་པར་ཆད་པ་མེད་པ་གང་ཡིན་པའི་རང་བཞིན་དེ་ཉིད་དེ། དེ་ཡིན་ན་ནི་རྣམ་པར་ཆད་པ་དང་རྣམ་པར་འགྱུར་བ་དེ་མི་འཐད་པའི་ཕྱིར་རོ། །སྐད་ཅིག་མ་མ་ཡིན་པའི་དོན་ནི་ལྷན་ཅིག་བྱེད་པ་ལ་ལྟོས་ནས་འབྲས་བུ་བྱེད་པ་ཡང་མ་ཡིན་ནོ། །བཤད་པ་ནི་ལྟོས་པར་འགལ་བའི་ཕྱིར་རོ་ཞེས་བྱ་བ་ཡིན་ནོ། །འབྲས་བུ་རྣམ་པར་ཤེས་པ་རེས་འགའ་བ་ཉིད་ཀྱིས་ནི་ཡུལ་རྣམས་ཀྱང་མི་རྟག་པ་ཉིད་དུ་བརྟག་པར་ནུས་མོད་ཀྱི། འོན་ཀྱང་མངོན་སུམ་ཉིད་ཀྱིས་ཤེས་པར་ནུས་སོ་ཞེས་བཤད་པ་ནི་དེ་བཞིན་དུ་ཡུལ་སྐྱེ་བ་དང་འགག་པ་སོ་སོར་རིག་པ་ཉིད་དོ། །རེ་ཞིག་སྐྱེ་བ་ནི་དམིགས་པའི་མཚན་ཉིད་དུ་གྱུར་པ་རྣམས་ཀྱི་སོ་སོར་རིག་པ་ཉིད་དོ། །དེ་བཞིན་དུ་བ་ལྟར་རུང་བ་རྣམས་ཀྱི་འགག་པ་ཡང་དེས་དབེན་པའི་ས་ཕྱོགས་ལ་སོགས་པ་དམིགས་པ་ལས་སོ་སོར་རིག་པ་ཉིད་དོ། །གཟུགས་ཀྱི་ཕུང་པོ་བཤད་ཟིན་ཏོ། །དེ་བཞིན་དུ་བདེ་བ་དང་སྡུག་བསྔལ་དག་ནི་རང་རིག་པའི་མངོན་སུམ་གྱིས་སོ་སོར་རིག་པ་ཡིན་ནོ། །དེ་ཉིད་ཀྱི་ཕྱིར་སྐྱེ་བ་དང་འགག་པ་ཡང་སོ་སོར་རིག་པ་ཉིད་ཡིན་ནོ། །འདིས་ནི་ཚོར་བའི་ཕུང་པོ་བཤད་དོ། །མཚན་མ་སྟེ་དོན་རྣམས་ཀྱི་ཕན་ཚུན་དབེན་པ་ཉེ་བར་རྟོགས་པ་སྟེ། རྟོགས་པའི་རང་བཞིན་གང་ཡིན་པ་དེ་ཡང་སོ་སོར་རིག་པ་ཡིན་ནོ། །འདིས་ནི་འདུ་ཤེས་ཀྱི་ཕུང་པོ་བཤད་དོ། །གང་གི་ཕྱིར་འདུ་ཤེས་ནི་དོན་རྣམས་ཀྱི་རིགས་གཅིག་པ་དང་རིགས་ཐ་དད་པ་ཉིད་དུ་རྣམ་པར་གཞག་པའི་མཚན་མ་རྒྱུ་མཚན་དུ་གྱུར་པ་ཐུན་མོང་གི་རང་བཞིན་རྣམ་པར་འབྱེད་པ་ཡིན་ནོ། །དེ་ལྟར་གྱུར་པ་རྟོགས་པའི་རང་བཞིན་དེ་ཡང་མངོན་སུམ་གྱིས་གྲུབ་པས་དེའི་སྐྱེ་བ་དང་འཇིག་པ་ཡང་གྲུབ་པ་ཡིན་ནོ། །འདུ་བྱེད་ཀྱི་ཕུང་པོ་བསྟན་པའི་ཕྱིར་འདོད་ཆགས་ལ་སོགས་པ་ཞེས་སྨོས་སོ། །ཀུན་ནས་ཉོན་མོངས་པའི་དངོས་པོ་ལ་ཞེན་པའི་ནི་འདོད་ཆགས་ཡིན་ནོ། །དེ་ཡང་སྐྱེ་བ་དང་འགག་བ་སོ་སོར་རིག་པ་ཡིན་ནོ། །སོགས་པ་སྨོས་པ་ནི་ཞེ་སྡང་ལ་སོགས་པའོ། །ཡུལ་ཉེ་བར་དམིགས་པ་ནི་འཛིན་བསྟེན་པར་ཤེས་བའོ། །དེ་ཡང་སྐྱེ་བ་དང་འགག་པ་སོ་སོར་
རིག་པ་ཡིན་ནོ། །འདིར་ཡང་ཡུལ་ཙམ་འཛིན་པ་ནི་རྣམ་པར་ཤེས་པ་ཡིན་ལ། རིགས་གཅིག་པ་དང་རིགས་ཐ་དད་པ་ཉིད་དུ་རྣམ་པར་གཞག་པའི་མཚན་མའི་རང་བཞིན་རྣམ་པར་དབྱེ་བར་ནུས་པ་རྟོགས་པའི་ངོ་བོ་ནི་འདུ་ཤེས་ཡིན་ཞིང༌། རྟོགས་པའི་རང་བཞིན་མངོན་པར་ཞེན་པ་ནི་འདོད་ཆགས་ཡིན་ཏེ། ཕུང་པོ་གསུམ་པོ་དེ་དག་གི་རྣམ་པའི་རབ་ཏུ་དབྱེ་བ་ནི་འདི་ཉིད་ཡིན་ནོ། །སྐྱེ་བ་ཞེས་བྱ་བ་ནི་འབྱུང་བའོ། །འགག་པ་ཞེས་བྱ་བ་ནི་འཇིག་པའོ། །དེའི་ཕྱིར་མི་རྟག་པ་ཡིན་ནོ། །དེ་ལྟ་བུའི་རང་བཞིན་ཅན་འཇིག་པའི་ངོ་བོ་ཉིད་ཀྱི་ཕུང་པོ་ལྔ་པོ་དེ་དག་ནི་རང་གི་རྒྱུའི་རང་བཞིན་དེ་ལྟ་བུའི་ངོ་བོར་འཇིག་པ་སྐྱེད་པར་ནུས་པ་ཉིད་དུ་སྒྲུབ་པར་བྱེད་པ་སྟེ། རྟོགས་པར་བྱེད་པ་ཡིན་ནོ། །འདི་ནི་གཏན་ཚིགས་བརྗོད་པའོ། །གང་གི་ཕྱིར་རང་གི་རྒྱུའི་རང་གི་ངོ་བོ་དེ་ལྟ་བུའི་རང་བཞིན་དུ་རྟོགས་པར་བྱེད་པ་དེའི་ཕྱིར་རྣམ་པ་དེ་ལྟ་བུའི་ངག་སྐྱེས་པ་གང་ཡིན་པ་དེ་དག་ཀྱང་བདག་ཉིད་དང་འདྲ་བར་འཇིག་པའི་རང་གི་ངོ་བོར་རྟོགས་པར་བྱེད་པ་ཡིན་ནོ། །དེ་བཤད་པ་ནི་རང་གི་ངོན་དེ་ལ་སྦྱོར་བར་བྱེད་པ་ཡིན་ཏེ་འབྲེལ་པར་བྱེད་པ་ཡིན་ནོ། །འདི་སྐད་བཤད་པ་ཡིན་ཏེ། གཟུགས་ལ་སོགས་པ་ཐམས་ཅད་འཇིག་པའི་ངོ་བོར་མཐོང་བས་གཟུགས་ལ་སོགས་པ་སྐྱེད་པར་ནུས་པའི་རང་བཞིན་ཐམས་ཅད་འཇིག་པའི་རང་བཞིན་སྐྱེད་པར་ནུས་པར་རྗེས་སུ་དཔོག་པ་ཡིན་ཏེ། དེས་ན་གཟུགས་ལ་སོགས་པ་རྣམས་ཀྱི་འཇིག་པའི་རང་བཞིན་ནི་གཟུགས་ལ་སོགས་པའི་རྒྱུ་ལ་ངེས་པ་མེད་པར་ཐམས་ཅད་ལས་སྐྱེ་བ་ཡིན་ནོ། །དེའི་ཕྱིར་གཟུགས་ལ་སོགས་པ་བྱས་པ་ཐམས་ཅད་མི་རྟག་པའི་ངོ་བོར་འགྲུབ་པར་འགྱུར་བའི་ཕྱིར་ཁྱབ་པ་གྲུབ་པོ། །དེའི་ཕྱིར་དེ་ལྟར་དོན་གྱི་རྣམ་པ་སྐྱེད་པར་ནུས་པའི་རྒྱུ་ཐམས་ཅད་ལ་ངེས་པ་མེད་པའི་འཇིག་པའི་རང་བཞིན་རྒྱུ་མེད་པ་ཉིད་ནི་ཁྱབ་པ་སྒྲུབ་པར་བྱེད་པ་གནོད་པའི་ཚད་མར་འགྱུར་བ་ཡིན་ནོ། །ཕུང་པོ་རྣམས་མི་རྟག་པ་ཉིད་དུ་བསྒྲུབས་པ་འདིས་ནི་ཁམས་དང་སྐྱེད་མཆེད་དག་ནི་ཁམས་དང་སྐྱེ་མཆེད་དེ་དག་ཀྱང་བཤད་པ་ཡིན་ནོ། །འདི་ལྟར་མིག་ལ་སོགས་པའི་དབང་པོ་ལྔ་ནི་སྐྱེ་མཆེད་དང་ཁམས་ལྔ་ཡིན་ནོ། །དེ་བཞིན་དུ་ཡུལ་ཡང་སྐྱེ་མཆེད་ལྔ་དང་ཁམས་ལྔ་ཡིན་ནོ། །ཡུལ་ཉེ་བར་དམིགས་པ་ནི་ཡིད་ཀྱི་
སྐྱེ་མཆེད་ཡིན་ལ། ཕུང་པོ་གསུམ་པོ་ནི་ཆོས་ཀྱི་ཁམས་དང་སྐྱེ་མཆེད་ཡིན་ནོ། །ཡིད་ཀྱི་སྐྱེ་མཆེད་ཉིད་ཀྱང་སེམས་ཀྱི་ཁམས་བདུན་ཡིན་ཏེ། མིག་གི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་དང༌། རྟེན་ཐ་དད་པས་ཐ་དད་པའི་སེམས་ཀྱི་ཁམས་དྲུག་པོ་དེ་དག་ཉིད་གང་དང་གང་འདས་མ་ཐག་པ་ཕྱི་མ་སྐྱེད་པར་བྱེད་པ་དེ་ཉིད་ནི་ཡིད་ཅེས་བརྗོད་པའོ། །དེའི་ཕྱིར་ཕུང་པོ་ལྔ་དང་སྐྱེ་མ་ཆེད་བཅུ་གཉིས་དང་ཁམས་བཅོ་བརྒྱད་ཀྱི་བྱས་པ་འམ་ཡོད་པ་ནི་མི་རྟག་པར་བསྟན་པ་ཡིན་ནོ། །གལ་ཏེ་ཆོས་ཀྱི་མིང་ཅན་གྱི་ཁམས་དང་སྐྱེ་མཆེད་ནམ་མཁའ་དང་སོ་སོར་བརྟགས་པ་དང༌། སོ་སོར་བརྟགས་པ་མ་ཡིན་པའི་འགོག་པ་དག་ནི་རྟག་ཏུ་ཡོད་པ་དང་མ་བྱས་པ་མ་ཡིན་ནམ། དེས་ན་སྐྱེ་མཆེད་དང་ཁམས་ཀྱང་མི་རྟག་པར་གྲུབ་པོ་ཞེས་ཇི་ལྟར་བརྗོད་ཅེ་ན། ཆོས་ཀྱི་ཞེས་སྨོས་ཏེ། ཆོས་ཀྱི་སྐྱེ་མཆེད་དང་ཁམས་དེ་དག་ཀྱང་ཚོར་བ་དང་འདུ་ཤེས་དང་འདུ་བྱེད་དེ་ཕུང་པོ་གསུམ་པོ་དེ་ཉིད་ཀྱི་རང་བཞིན་གང་ཡིན་པའོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་ཁམས་དང་སྐྱེ་མཆེད་དག་ཀྱང་མི་རྟག་པར་འགལ་བ་མེད་དོ། །འདི་ལྟར་ཕུང་པོ་གསུམ་པོ་དེ་དག་ནི་མི་རྟག་པ་སྒྲུབ་པ་ཡིན་ལ། དེ་ལས་ཐ་དད་པ་ནམ་མཁའ་ལ་སོགས་པ་ནི་མདོ་སྡེ་པས་བཀག་པ་དང་ཁས་མ་བླངས་པ་ཡིན་ནོ། །ཕུང་པོ་དང་ཁམས་དང་སྐྱེ་མཆེད་རྣམས་ཀྱི་བྱས་པ་མི་རྟག་པས་ཁྱབ་པ་བསྒྲུབས་པ་འདིས་ནི་ཡོད་པ་འང་མེ་རྟག་པ་ཉིད་ཀྱིས་ཁྱབ་པ་བསྒྲུབས་པ་ཡིན་ནོ། །འདི་ལྟར་ཕུང་པོ་དང༌། ཁམས་དང་སྐྱེ་མཆེད་ཉིད་རྒྱུས་ཡོད་པ་བྱས་པ་ཡིན་ལ། དེ་ཡང་རྒྱུ་དང་བཅས་པ་ཡིན་ནོ། །རྒྱུ་རྣམས་ལ་ཡང་འཇིག་པ་ངེས་པ་མེད་པར་བསྒྲུབ་པའི་ཕྱིར་འཇིག་པ་ཉིད་ཀྱིས་ཁྱབ་པོ། །གལ་ཏེ་དབང་པོ་རྣམས་རྗེས་སུ་དཔག་པ་གཞན་གྱིས་ཡིན་ཞིང༌། དེ་ལས་གཞན་རྣམས་ནི་མངོན་སུམ་གྱིས་གྲུབ་པས་ཕུང་པོ་དང་ཁམས་དང་སྐྱེ་མཆེད་རྣམས་མི་རྟག་པ་ཉིད་དུ་གྲུབ་པ་ཡིན་ན། འོ་ན་དངོས་པོ་འཇིག་པ་ལྟོས་པ་མེད་པ་ལ་ནུས་པ་ཅུང་ཟད་ཀྱང་མེད་དོ། །གལ་ཏེ་དངོས་པོ་རྣམས་འཇིག་པ་ལ་ལྟོས་པ་མེད་པ་ལས་འཇིག་པ་ཉིད་དུ་གྲུབ་པ་དེ་ལྟ་ན་ནི་ལྟོས་བ་མེད་བ་ནུས་པར་འགྱུར་ན། དེ་ལྟ་ནི་དེ་ལྟ་མ་ཡིན་ནོ། །དེའི་ཉིད་སྟོན་པར་བྱེད་པ་ནི་ཕུང་པོ་ལ་སོགས་པ་དག་ནི་ཞེས་བྱ་བ་ཡིན་ནོ། །སོགས་པས་
ནི་ཁམས་དང་སྐྱེ་མཆེད་གཟུང་ངོ༌། །གཏན་ཚིགས་གཞན་ཁོ་ནས་ཞེས་བྱ་བ་ནི་དབང་པོ་རྣམས་ནི་འབྲས་བུ་རྣམ་པར་འཆད་པ་དང་འགྱུར་བ་མཐོང་བ་ལས་མི་རྟག་པ་ཡིན་ཞིང༌། གཞན་རྣམས་ནི་ཉམས་སུ་མྱོང་བ་ཉིད་ཀྱིས་སོ། །འདི་བཟློག་པའི་ཕྱིར་བཤད་པ། ཉམས་སུ་མྱོང་བ་དང་འབྲས་བུ་མཐོང་བ་ལས་ནི་འགའ་ཞིག་མི་རྟག་པར་གྲུབ་ཀྱང་རྣམ་པ་དེ་ལྟ་བུ་ཞེས་བྱ་བ་དེ་དང་འདྲ་བ་གཟུགས་ལ་སོགས་པ་མ་མཐོང་བའི་བྱས་པའམ་ཡོད་པ་དག་མི་རྟག་པ་ཉིད་དེས་ཁྱབ་པ་ནི་ལྟོས་པ་མེད་པ་ལས་ཡིན་ནོ། །གལ་ཏེ་རྒྱུ་དང་ལྡན་པ་ཉིད་དུ་གྱུར་ན་ཅིའི་ཕྱིར་ཁྱབ་པ་མེད་པར་འགྱུར་ཞེ་ན། འཇིག་པ་ལ་རྒྱུ་ཡོད་པ་ཉིད་ཡིན་ན་ཞེས་སྨོས་སོ། །གལ་ཏེ་གཟུགས་ལ་སོགས་པ་མཐོང་བ་དག་གི་འཇིག་པ་རྒྱུ་དང་བཅས་པར་གྱུར་ན་ནི་དེའི་ཚེ་འཇིག་པའི་རང་བཞིན་གཟུགས་ལ་སོགས་པ་སྐྱེད་པའི་རྒྱུ་ལ་རག་ལས་པ་མ་ཡིན་པར་འགྱུར་བ་དེས་ན། གཟུགས་ལ་སོགས་པ་གང་དག་ལ་འཇིག་པའི་རྒྱུ་ཉེ་བ་དེ་དག་ཉིད་འཇིག་པར་འགྱུར་གྱི་གཞན་དག་ལ་འཇིག་པའི་རྒྱུའི་གགས་ཡོད་པ་དང་མ་ཚང་བ་སྲིད་པའི་ཕྱིར་ཉེ་བ་མེད་པ་ན་མི་འཇིག་པར་ཡང་འགྱུར་བའི་ཕྱིར་མ་ཁྱབ་པར་ཡང་འགྱུར་རོ། །དེས་ན་གང་གི་ཕྱིར་དེ་ལྟར་དངོས་པོ་འཇིག་པ་སྐྱེད་པར་བྱེད་པ་ལས་གཞན་པའི་རྒྱུ་ལ་མི་ལྟོས་པ་དེའི་ཕྱིར། སྐྱེད་པར་བྱེད་པ་ཙམ་ལ་རག་ལས་པ་ནི་འདིའི་ལྟོས་པ་མེད་པ་ཉིད་དོ། །རྒྱུ་མེད་པ་ཉིད་འདིས་ནི་འཇིག་པ་ཞེས་བྱ་བ་འཇིག་པའི་རང་བཞིན་རྫས་འགའ་ཞིག་ལ་འགའ་ཞིག་གི་ཚེ་ཞེས་བྱ་བ་དུས་འགའ་ཞིག་ཏུ་འགྱུར་བ་གང་ཡིན་པ་དེ་དང་འགལ་བ་ན་རྫས་དང་དུས་ཀྱི་ཁྱད་པར་ཅན་གྱི་དངོས་པོ་དེ་མེད་པའི་རང་གི་ངོ་བོ་ཉིད་དུ་སྒྲུབ་པར་བྱེད་དོ། །ཅིའི་ཕྱིར་འགལ་ཞེ་ན་ལྟོས་པའི་རང་བཞིན་གང་ཡིན་པ་དེ་ནི་ཞེས་སྨོས་ཏེ། ནི་ཞེས་བྱ་བ་ནི་གང་གི་ཕྱིར་རོ། །གང་གི་ཕྱིར་རེས་འགའ་འགྱུར་བའི་འཇིག་པ་ནི་དུས་དེ་ལ་ལྟོས་པ་དང་འགའ་ཞིག་ལ་འགྱུར་བ་ནི་ཐོགས་པ་དང་བཅས་པ་བཞིན་དུ་རྫས་དེའི་རྒྱུ་ལ་སོ་སོར་ངེས་པ་དེ་ལ་ལྟོས་པར་འགྱུར་བ་དེའི་ཕྱིར་རེས་འགའ་འམ་འགའ་ཞིག་ལ་འགྱུར་ན་ནི་ལྟོས་པ་དང་བཅས་པས་ཁྱབ་པ་ཡིན་ལ། ལྟོས་པ་མེད་པ་ཉིད་ནི་དེ་དང་འགལ་བ་ཡིན་པ་དེའི་ཕྱིར་ཁྱབ་པར་བྱ་བ་དང་ཡང་འགལ་བ་ཡིན་ནོ། །འགའ་ཞིག་ལ་འགྱུར་བ་འགལ་བས་ནི་ཐམས་ཅད་འཇིག་པ་ཡིན་ལ།
རེས་འགའ་འགྱུར་བ་འགལ་བས་ནི་སྐྱེས་པ་ཉིད་ན་འཇིག་པ་སྐད་ཅིག་མ་ཡིན་ནོ་ཞེས་བཤད་པར་འགྱུར་རོ། །འོ་ན་ནི་ཞེས་བྱ་བ་ལ་འཇིག་པ་ཉིད་རང་གི་ངོ་བོ་སྟེ་འཇིག་པ་དེ་ནི་དེ་དང་དེར་བཤད་ཟིན་ལ། དེ་ཡང་ལྟོས་པ་མེད་པའི་ཕྱིར་རྒྱུ་མེད་པ་ཅན་དུ་འགྱུར་རོ་ཞེ་ན། འདི་བཟློག་པའི་ཕྱིར་མི་འགྱུར་ཏེ་ཞེས་སྨོས་སོ། །དངོས་པོ་ཡོད་པའི་རྒྱུའི་དངོས་པོ་གང་ཡིན་པ་དེ་ཉིད་ལས་དེ་ལྟར་འཇིག་པའི་རང་གི་ངོ་བོ་ཉིད་དུ་སྐྱེའོ། །གལ་ཏེ་གང་ལས་ཡོད་པར་སྐྱེ་བ་དེ་ལས་འཇིག་པ་ཇི་ལྟར་སྐྱེ་འདི་ལྟར་འབྲས་བུའི་ཁྱད་པར་ནི་ལྷན་ཅིག་བྱེད་པའི་ཁྱད་པར་ཉིད་ལས་ཡིན་ཏེ། དཔེར་ན་བུམ་པའི་དབྱིབས་ཀྱི་ཁྱད་པར་ནི་རྫ་མཁན་ལས་ཡིན་ལ། འཇི་བ་ལས་ནི་དེའི་ངོ་བོ་ཡིན་པ་བཞིན་དུ་འདིར་ཡང་འཇིག་པ་ཉིད་རྒྱུ་གཞན་ལས་བརྟག་པར་བྱ་བ་ཡིན་ནོ་ཞེ་ན། ཡོད་པ་འབྱུང་བ་ནི་ཞེས་སྨོས་ཏེ། ཡོད་པ་ཉིད་དུ་གྲུབ་པ་ནི་དེ་འདྲ་བ་འཇིག་པ་ཉིད་དུ་འགྱུར་བའི་ཕྱིར་རོ། །གང་ཞིག་ཕན་ཚུན་འཁྲུལ་པ་དེ་ལ་ནི་རྒྱུ་ཐ་དད་པར་རྟོགས་པ་ཡིན་ཏེ། དཔེར་ན་དབྱིབས་དང་སའི་རང་བཞིན་དག་བཞིན་ནོ། །འདིར་ཕན་ཚུན་འཁྲུལ་པ་ཡོད་པ་མ་ཡིན་ཏེ། གང་གི་ཕྱིར་གང་ཅུང་ཟད་ཡོད་པ་དེ་དག་ཐམས་ཅད་ནི་འཇིག་པ་ཁོ་ན་སྟེ། དེས་ན་འདིར་ཡོད་པའི་རྒྱུ་གང་ཡིན་པ་དེ་ཉིད་འཇུག་པའི་རྒྱུ་ཡིན་ནོ། །འབྲས་བུའི་ཁྱད་པར་ལས་འགའ་ཞིག་ཏུ་རྒྱུའི་ཁྱད་པར་རྟོགས་པ་ཡིན་ན། འབྲས་བུ་ཐམས་ཅད་དུ་ཁྱད་པར་མེད་ན་ནི་རྒྱུ་ཡང་ཁྱད་པར་ཡོད་པར་མི་འགྱུར་རོ་ཞེས་བྱ་བའི་ཐ་ཚིག་གོ །གལ་ཏེ་ཡོད་པའི་རྒྱུ་ཉིད་ལས་འཇིག་པ་སྐྱེ་ན། འོ་ན་ནི་རྒྱུ་མེད་པ་ཅན་གྱི་ཡོད་པ་གང་ཡིན་པ་དེ་མི་འཇིག་པར་འགྱུར་ཏེ། འདི་ལྟར་ཡོད་པའི་དོན་ནི་གདོན་མི་ཟ་བར་འགའ་ཞིག་ལས་འབྱུང་བ་མ་ཡིན་ཏེ། མ་སྐྱེས་པ་ཡང་ཡོད་པའི་ཕྱིར་རོ་ཞེ་ན། བཤད་པ། གློ་བུར་བ་ནི་རྒྱུ་མེད་པ་སྟེ་དེའི་ཕྱིར་ཡོད་པ་འདི་རྫས་འགའ་ཞིག་ལ་ལྡོག་པར་མི་འགྱུར་རོ། །གལ་ཏེ་བུམ་པ་ལ་སོགས་པའི་རྫས་གཞན་ནི་རྒྱུ་དང་ལྡན་པ་ཡིན་ལ། རྒྱུ་མེད་པ་ནི་གཞན་དེ་དག་དང་རིགས་མི་མཐུན་པ་མ་ཡིན་ནམ། དེའི་ཡོད་པ་ནི་ཇི་ལྟ་བ་གཞན་གྱི་གྱུར་ཞེ་ན། བདེན་ཏེ་འོན་ཀྱང་འགའ་ཞིག་ལ་ལྡོག་པར་མི་འགྱུར་རོ་ཞེས་བྱ་བའི་དོན་ཅི་ཡིན་ཞེ་ན། རང་བཞིན་འདིར་མ་གྱུར་པའི་དོན་གང་ཡིན་པ་དེ་ནི་འགའ་ཡང་མེད་དེ། ཐམས་ཅད་ཀྱི་བདག་ཉིད་ཅན་
དུ་ཐལ་བར་འགྱུར་རོ་ཞེས་བྱ་བའི་དོན་ཏོ། །གལ་ཏེ་དེ་རང་བཞིན་ཐ་དད་པར་དམ་བཅས་པ་མ་ཡིན་ནམ། དེས་ན་ཐམས་ཅད་ཀྱི་བདག་ཉིད་ཅན་དུ་ཇི་ལྟར་ཐལ་ཞེ་ན། བུམ་པ་ལ་སོགས་པའི་རྣམ་པ་དང་མ་དོག་གང་ཡིན་པར་ཐལ་ལོ་ཞེས་ནི་མི་བརྗོད་ཀྱི། འོན་ཀྱང་ཁྱད་པར་ཅན་གྱི་འབྲས་བུ་བྱེད་ནུས་པ་སྟེ། དཔེར་ན་མེ་དྲོ་བ་བྱེད་ནུས་པ་དེ་བཞིན་དུ་བདག་ཉིད་གཞན་དུ་གནས་པ་འདི་ཡང་འགྱུར་རོ། །དེ་བཞིན་དུ་ཇི་ལྟར་གཟུགས་ལ་སོགས་པ་མིག་ལ་སོགས་པའི་རྣམ་པར་ཤེས་པས་ཡོངས་སུ་གཅད་པར་བྱ་བ་དེ་བཞིན་དུ་དེ་ཡང་འགྱུར་རོ། །གང་ལ་རྒྱུའི་ཁྱད་པར་ཡོད་པ་དེ་ནི་ནུས་པ་ངེས་པར་འགྱུར་བ་ཡིན་ན། རྒྱུ་མེད་པ་ལ་ནི་ངེས་པར་བྱེད་པ་མེད་པས་མི་ལྡོག་པར་འགྱུར་རོ། །རང་བཞིན་འགལ་བ་ཅན་གྱི་ནུས་པ་ཐམས་ཅད་དུ་ཐལ་བར་འགྱུར་ཏེ། ནུས་པ་ཐམས་ཅད་དང་ལྡན་པའི་ཕྱིར་རོ། །ཤེས་པ་ཐམས་ཅད་ཀྱིས་བཅད་པར་ཐལ་བ་ནི་ཐམས་ཅད་ཀྱིས་ཐམས་ཅད་ཀྱི་ཚེ། ཐམས་ཅད་དུ་མཐོང་བར་འགྱུར་ལ། འབྲས་བུ་རྣམས་ལ་ཡང་སྦྱོར་བར་འགྱུར་རོ། །དོན་འདི་ནི། དེ་དང་དེ་མིན་རང་བཞིན་ཅན། །ཞེས་བྱ་བ་དེར་ངེས་པར་བརྟགས་ཟིན་ཏོ། །ཡུལ་འགའ་ཞིག་གི་ཚེ་ཞེས་བྱ་བ་དུས་ལ་ལར་རོ། །འདི་ཉིད་སྨྲས་པ་ནི་དངོས་པོ་གང་འགའ་ཞིག་ལ་ཞེས་བྱ་བ་ནི་ལས་ཀྱི་ཚིག་སྟེ། ཡུལ་དང་དུས་དང་རང་བཞིན་འགའ་ཞིག་ལ་ཉེ་བར་བརྟེན་པ་སྟེ། གནས་པ་འམ་མ་ཡིན་པ་ཡོངས་སུ་འདོར་བར་བྱེད་པ་དེའི་འགའ་ཞིག་པོ་དེ་འདོར་བ་འམ་བརྟེན་པའི་དངོས་པོ་དེ་ཉིད་ནི་གང་ལ་ཞེས་བྱ་བ་ཡུལ་དང་དུས་དང་རང་བཞིན་ལ་ཅུང་ཟད་འབྲེལ་པའི་རྒྱུ་ཡོད་པ་ཡིན་ཏེ། རྒྱུ་དང་ལྡན་པའི་ཡུལ་དང་དུས་དང་དེ་དང་ལྡན་པའི་རང་བཞིན་ལ་ནི་རྟེན་ལ། དེ་ལས་བཟློག་པ་ནི་དངོས་པོས་སྤོང་བ་ཡིན་ནོ། །ཡང་ན་རྒྱུར་གྱུར་པའི་ཡུལ་དང་དུས་ལ་ནི་རང་བཞིན་འབྲེལ་པར་སྦྱར་ལ། རང་བཞིན་ལ་སྐྱེད་པར་བྱེད་པའི་རྒྱུ་སྦྱར་བར་བྱའོ། །གལ་ཏེ་འདི་འདྲ་བའི་ཡོད་པ་འདི་ཡུལ་དང་དུས་དང་རང་བཞིན་དང་འབྲེལ་པ་དང་བྲལ་པ་ཡིན་ན་ནི། རང་བཞིན་ལ་སོགས་པ་ངེས་པ་དང་ལྡན་པར་མི་འགྱུར་རོ། །གང་ཞིག་ཐམས་ཅད་དུ་ཐམས་ཅད་ཀྱིས་རྟོགས་པར་མི་འགྱུར་བའི་ངེས་པ་ཡང་ཁས་བླང་བར་བྱ་བ་ཡིན་ནོ། །དེའི་ཕྱིར་གློ་བུར་བ་ནི་མེད་དོ། །གལ་ཏེ་ཡོད་པ་གློ་བུར་བ་མེད་ན་
འཇིག་པ་ཞེས་བྱ་བའི་དངོས་པོ་རྒྱུ་མེད་པར་ཇི་ལྟར་བཤད་ཅེ་ན། སྐྱེས་པ་གྲུབ་པ་འཇིག་པ་དེའི་ངོ་བོར་གྱུར་པ་སྐྱེད་པར་བྱེད་པའི་རྒྱུ་ལས་གཞན་ལ་མེ་ལྟོས་པའི་ཕྱིར་རོ། །དོན་འདི་མིན་ཏེ། གང་གི་ཕྱིར་སྐྱེད་པར་བྱེད་པ་ལས་གཞན་ལ་མི་ལྟོས་པ་དང༌། གཟུགས་ལ་སོགས་པ་ལ་ངེས་པ་ཡང་མ་ཡིན་པ་དེའི་ཕྱིར། འཇིག་པའི་རང་བཞིན་ལྟོས་པ་མེད་པ་ཡིན་གྱི། རྒྱུ་མེད་པ་ཉིད་ཀྱི་ཕྱིར་ནི་མ་ཡིན་ནོ། །གལ་ཏེ་འཇིག་པ་ལས་འཇིག་པ་དང་ལྡན་པའི་དངོས་པོ་གཞན་མ་ཡིན་ནམ། དེས་ན་ཡོད་པའི་རྒྱུ་ཉིད་ལས་འཇིག་པ་སྐྱེས་པར་ཇི་ལྟར་འགྱུར་ཞེ་ན། གཞན་ཡང་ཞེས་སྨོས་སོ། །འཇིག་བ་ནི་ཡོད་པའི་རྒྱུ་ལས་སྐྱེས་པ་ཡིན་ཏེ་དངོས་པོ་ལས་གཞན་འགའ་ཞིག་ནི་མ་ཡིན་ནོ། །གལ་ཏེ་གཞན་ཡིན་ན་ནི་ཡོད་པའི་རྒྱུ་ལས་སྐྱེ་བར་མི་འགྱུར་རོ། །འཇིག་པའི་སྒྲས་ནི་ལྡོག་པའི་ཆོས་ཀྱི་དངོས་པོ་ཉིད་བརྗོད་པ་ཡིན་ནོ་ཞེས་བཤད་པ་ནི། དེ་ཉིད་སྐད་ཅིག་མར་གནས་པར་སྐྱེས་པའི་ཕྱིར་རོ་ཞེས་བྱ་བ་ཡིན་ནོ། །སྐད་ཅིག་མར་གནས་པའི་ངང་ཚུལ་འདི་ལ་ཡོད་པའོ། །དངོས་པོ་ཡོད་པའི་དུས་གང་ཡིན་པ་འདི་ཉིད་སྐད་ཅིག་མ་གཅིག་ཡིན་པའི་ཕྱིར་སྐད་ཅིག་མར་གནས་པ་ཞེས་བརྗོད་ཀྱི། སྐྱེས་ནས་ནི་སྐད་ཅིག་ཀྱང་མི་གནས་ཏེ་གནས་ན་ནི་ནམ་ཡང་ལྡོག་པར་མི་འགྱུར་རོ་ཞེས་མང་དུ་བཤད་ཟིན་ཏོ། །གལ་ཏེ་དོན་གྱི་བདག་ཉིད་ནི་འཇིག་པར་འཇིག་རྟེན་ན་མི་བརྗོད་ཀྱི། འོན་ཀྱང་དངོས་པོ་མེད་པ་ཉིད་ཡིན་ཞེ་ན། གཞན་པ་རྣམས་ཀྱིས་འདིའི་རང་བཞིན་དེ་ཞེས་སྨོས་ཏེ། འཁོར་བ་ཇི་སྲིད་པར་མ་རིག་པ་དང་རྗེས་སུ་འབྲེལ་པ་ཞན་པ་ནི་སྣང་བཞིན་བ་དེའི་ཆོས་ཐམས་ཅད་ཁོང་དུ་ཆུད་པར་མི་ནུས་སོ། །དེ་ལ་མི་གནས་པ་ཞེས་བྱ་བའི་ཆོས་ནི་ཡོད་པའི་དུས་ལས་ཕྱིས་ངེས་པར་འགྱུར་གྱི། ཡོད་པའི་དུས་ཉིད་དུ་མཐོང་བ་ཡིན་ཡང་སྔར་ནི་མ་ཡིན་ཏེ། དེ་ལྟར་གྱུར་བའི་རང་བཞིན་ནི་མཐོང་བ་ཡིན་ཡང༌། མཐོང་བའི་དུས་སུ་རྣམ་པར་འཇོག་པ་ནི་མ་ཡིན་ཏེ། མ་རིག་པ་དང་ལྡན་པའི་ཞན་པ་རྣམས་ལ་མཐོང་བ་གསལ་བ་མེད་པའི་ཕྱིར་རོ། །གང་གི་ཕྱིར་དེའི་རང་བཞིན་ནི་ལྡོག་པའི་དུས་སུ་ངེས་པ་དེས་ན་ཕྱིས་ཞེས་བྱ་བ་དུས་གང་དང་དེའི་རང་བཞིན་ངེས་པའི་དུས་སུ་དེའི་ཁྱད་པར་ཅན་ཉིད་དུ་དེའི་དབང་གིས་ཏེ། ངེས་པ་དེའི་དབང་གིས་དངོས་པོ་དེ་མི་གནས་པའི་ངང་ཅན་འཇིག་པར་རྣམ་པར་འཇོག་གི །
འཇིག་པ་ལྡོག་པའི་གནས་སྐབས་ཉིད་ཡིན་པར་ནི་འཇིག་རྟེན་པས་ཀྱང་རྟོགས་པ་མ་ཡིན་ཏེ། དེ་ལྟ་མ་ཡིན་ན་ནི་བུམ་པ་ཞིག་གོ །བུམ་པའི་འཇིག་པ་ཞེས་བྱ་བའི་འབྲེལ་པར་མི་འགྱུར་བ་ཉིད་དོ། །དངོས་པོ་དང་དངོས་པོ་མེད་པ་ཕན་ཚུན་སྤངས་ཏེ་གནས་པ་དག་ནི་འབྲེལ་པ་འགའ་ཡང་མེད་ལ། འབྲེལ་པའི་ཐ་སྙད་ཀྱང་ཡོད་པ་ཡིན་ནོ། །དེའི་ཕྱིར་དངོས་པོའི་རང་བཞིན་ལྡོག་པའི་ཆོས་དེ་ཉིད་ལྡོག་པར་ངེས་པའི་དུས་ཀྱི་ཁྱད་པར་ཅན་གྱི་འཇིག་པར་ཐ་སྙད་བྱེད་པ་པོས་རྟོགས་མོད་ཀྱི། འོན་ཀྱང་ཡོད་པ་དང་མེད་པ་འགའ་བའི་ཕྱིར་རོ། །ཡོད་པའི་གནས་སྐབས་དང་འགལ་བ་མེད་པའི་གནས་སྐབས་ནི་ཁོ་བོས་འཇིག་པར་རྟོགས་སོ་ཞེས་རློམ་པ་འབའ་། །ནུ་པ་མེད་པ་བསྟན་པའི་དོན་དུ་བཤད་པ། དངོས་པོ་གྲུབ་ན་ནི་ཞེ་ཅན་བཞིན་དུ་མ་ངེས་པ་ཕྱིས་ངེས་པར་འགྱུར་བ་འགའ་ཞིག་ཡོད་དམ་ཞེ་ན། ཡོད་དོ་ཞེས་བཤད་པ་ནི་མི་ཤེས་པ་རྣམ་པར་འགྱུར་བ་མཐོང་ནས་ཞེས་བྱ་བ་ཡིན་ནོ། །ཇི་ལྟར་དུག་མི་ཤེས་པ་མཐོན་ཡང་འཆི་བའི་ནུས་པ་དང་ལྡན་པ་ཉིད་ནི་འདི་ཚེ་ངེས་པ་མི་ནུས་ཏེ་རྣམ་པར་འགྱུར་བའི་གནས་སྐབས་སུ་ངེ་པར་བྱེད་དོ། །དེ་མཐོང་བའི་དུས་སུ་མི་ངེས་པའི་ཆོས་ནི་སྲིད་དོ་ཞེས་བྱ་བའི་ཆ་དེ་ཙམ་གྱིས་དཔེ་ཡིན་གྱི། དུག་གིས་འཆི་བའི་ནུ་པ་དུས་ཕྱིས་འབྱུང་བར་འགྱུར་བ་ཉིད་དུ་རྣམ་པར་གཞག་པར་བྱ་བ་ནི་མ་ཡིན་ནོ། །འདི་ལྟར་འཆི་བའི་ནུས་པ་ནི་འབྲས་བུ་བྱེད་པའི་ནུས་པ་ཉིད་ཡིན་ལ། ནུས་པ་ཡང་རྗེས་སུ་འགྲོ་བ་དང་ལྡོག་པས་ཁོང་དུ་ཆུད་པར་བྱ་བ་ཡིན་ནོ། །དངོས་པོ་རྣམས་ཀྱི་རྗེས་སུ་འགྲོ་བ་དང་ལྡོག་པ་ཁོང་དུ་ཆུད་པ་ཡང་རང་བཞིན་གྱི་ཡུལ་ཅན་ཡིན་ནོ། །དེའི་ཕྱིར་ནུས་པ་ནི་རང་བཞིན་ཡིན་མོད་ཀྱི། འོན་ཀྱང་འགའ་ཞིག་ལ་ལྟོས་ནས་ནུས་པ་ཐ་དད་པར་ཐ་སྙད་དུ་བྱེད་པ་འབའ་ཞིག་ཏུ་ཟད་དོ། །ནུས་པ་དང་ནུས་པ་དང་ལྡན་པ་དག་ནི་འགལ་བ་ཅུང་ཟད་ཀྱང་མེད་དེ། དེས་ན་ཕྱི་མ་གནས་སྐབས་ཀྱི་ཁྱད་པར་ཅན་ནི་དངོས་པོའི་ནུས་པ་རྣམ་པར་གཞག་པ་མ་ཡིན་ནོ། །དངོས་པོ་དང་དངོས་པོ་མེད་པ་དག་ནི་འགལ་བའི་ཕྱིར་བུམ་པའི་འཇིག་པ་བུམ་པའི་ཞིག་པ་ཞེས་དངོས་པོ་ལ་ལྡོག་པའི་ཆོས་ཅན་གྱི་རང་བཞིན་དུ་ཐ་སྙད་དུ་བྱེད་ཀྱང་དེའི་རང་བཞིན་ཕྱིས་ངེས་པའི་ཕྱིར་དང༌། མེད་པའི་གནས་སྐབས་དང་ཡོད་པའི་གནས་སྐབས་ཀྱང་འགལ་བའི་ཕྱིར་ན་དུས་ཕྱིས་
འབྱུང་བ་ལྟ་བུར་ཐ་སྙད་དུ་བྱེད་དོ། །འཇིག་པ་ནི་རང་གི་ངོ་བོར་བརྗོད་པ་དེ་ཉིད་ཡིན་ཏེ། དེ་ལྟ་མ་ཡིན་ན་འབྲེལ་པ་མི་འཐད་པའི་ཕྱིར་རོ། །དངོས་པོ་དང་དངོས་པོ་མེད་པ་ནི་འཇིག་རྟེན་པའི་ཐ་སྙད་དུ་གྲུབ་པ་ཡིན་ནོ། །དེ་བས་ན་ཞེས་བྱ་བ་ནི་གང་གི་ཕྱིར་འཇིག་པ་འདི་ནི་སྐྱེད་པར་བྱེད་པ་ཙམ་ལ་རག་ལས་པའི་རང་བཞིན་ཡིན་པ་དེའི་ཕྱིར། ཡོད་པ་མ་གཏོགས་པ་ཡོད་པའི་རྒྱུའི་ཁྱད་པར་རམ། འཇིག་པར་བྱེད་པའི་རྒྱུ་འགའ་ཞིག་ལ་ལྟོས་པ་མེད་པ་ཡོད་པ་དེ་ལ་ཁྱབ་པར་བྱེད་པ་ཡིན་ནོ། །གང་ལ་གང་གི་ཚེ་འཇིག་པ་ཙམ་ཡོད་པ་དེ་ལ་དེའི་ཚེ་འཇིག་པ་ཉིད་ཡོད་པས་མཐའ་དག་སྐད་ཅིག་ཙམ་གནས་པ་ཡིན་ནོ། །གང་གིས་སྐྱེད་པར་བྱེད་པ་ཙམ་རག་ལས་པར་རྟོགས་པར་འགྱུར་བ་ཡོད་པའི་རྒྱུ་ལས་གཞན་ལ་རག་ལས་པ་མ་ཡིན་ནོ་ཞེས་བྱ་བ་འདི་ཉིད་ག་ལས་ཤེས་ཤེ་ན། བཤད་པ། འཇིག་པ་དེའི་རྒྱུ་དེའི་རྒྱུ་དེ་ལ་ནུས་པ་མེད་ཕྱིར་ཡང༌། ཡང་གི་སྒྲས་ནི་རྒྱུ་མ་ཡིན་པ་ཉིད་ཀྱང་ངོ༌། །འདི་ཉིད་རྣམ་པར་འགྲེལ་པ་བཤད་པ་ནི། ཡང་གི་སྒྲས་ནི་དངོས་པོ་མེད་པ་དོན་མེད་པ་བྱེད་པའི་ངང་ཚུལ་འདི་ལ་ཡོད་པས་ན་དངོས་པོ་མེད་པ་བྱེད་པ་སྟེ། དེར་མངོན་པར་འདོད་པ་དེའི་བྱ་བ་བཀག་པའི་ཡང་ཕྱིར་རོ། །གང་ཞིག་དངོས་པོ་མེད་པར་བྱེད་པར་འདོད་པ་དེ་ནི་བྱེད་པ་མ་ཡིན་པ་ཉིད་དོ། །ནུས་པ་མེད་པ་བསྟན་པའི་དོན་ཏུ་བཤད་པ། དངོས་པོ་གྲུབ་ན་ནི་ཞེས་བྱ་བ་སྐྱེས་ན་ནི་རྒྱུའི་དངོས་པོས་དེ་བྱེད་པ་མ་ཡིན་ནོ། །རེ་ཞིག་ཐོ་བ་ལ་སོགས་པ་རྣམས་ཀྱིས་གཡོ་མོའི་གནས་སྐབས་སྐྱེད་པ་ནི་མི་འགོག་ལ། ལྡོག་པ་ཙམ་བྱེད་པ་ཡང་ད་ལྟ་ཉིད་འགོག་པར་འདོད་པ་ཡིན་ནོ། །ལྷག་པར་གྱུར་པས་བྱེད་པའི་རྒྱུས་འཇིག་པའི་རང་བཞིན་བྱེད་པར་འགྱུར་ན་བྱ་བའི་རང་བཞིན་དེ་ཡང་གལ་ཏེ་དངོས་པོ་ལས་ཐ་དད་པར་མེད་པ་ཡིན་ན་ནི། དངོས་པོའི་རང་གི་རྒྱུ་ཉིད་ལས་གྲུབ་ཟིན་པ་ཡང་དེས་བྱ་བས་མ་ཡིན་ནོ། །གཞན་བྱེད་ན་ཡང་དེ་ལ་འཇིག་པ་འམ་གཞན་ཡང་རུང་སྟེ་ཅུང་ཅད་བྱས་པ་མེད་དོ། །འཇིག་པ་བྱས་པའི་སྔོན་རོལ་དུ་དེའི་གནས་སྐབས་གང་ཡིན་པའི་སྔར་གྱི་གནས་སྐབས་དེ་ཉིད་ཡིན་ཏེ། དེའི་ཕྱིར་གནས་སྐབས་དེ་ལ་ཅུང་ཟད་ཀྱང་བྱས་པ་མེད་དོ། །གཏན་ཚིགས་དེས་ན་དངོས་པོ་དེ་ལ་འཇིག་པར་བྱེད་པས་གཞན་བྱེད་པ་ནི་མ་ཡིན་ནོ། །དེས་ན་འདི་དོན་དེའི་རང་བཞིན་གང་ཡིན་པ་དང་གཞན་དེ་དག་མི་
བྱེད་པས་ན་ཅུང་ཟད་ཀྱང་མི་བྱེད་པ་ཉིད་ནི་ལྟོས་པར་བྱ་བ་མ་ཡིན་ནོ། །ཅུང་ཟད་མི་བྱེད་པ་ཡང་ལྟོས་པར་བྱ་བ་ཡིན་ན་ནི། ཐུག་པ་མེད་པར་ཐལ་བར་འགྱུར་བའི་ཕྱིར་རོ། །དེ་ལྟར་ན་ནུས་པ་མེད་པ་ཡིན་ནོ། །ཇི་ལྟར་བྱ་བ་འགོག་ཅེ་ན། བཤད་པ། འདི་ལྟར་འཇིག་པ་ཞེས་བྱ་བ་ནི་དངོས་པོ་མེད་པར་འགྱུར་བ་ཡིན་པར་གཞན་དག་སེམས་ལ། ཁོ་བོ་ཅག་གིས་ནི་འཇིག་པ་དངོས་པོའི་རང་བཞིན་ཉིད་ཡིན་པར་བརྗོད་དོ། །དེས་ན་འཇིག་པའི་རྒྱུས་འཇིག་པར་བྱེད་དོ་ཞེས་བྱ་བ་ནི་དངོས་པོ་མེད་པ་བྱེད་དོ་ཞེས་བྱ་བ་ཐལ་ལོ། །དེ་ལ་ཞེས་བྱ་བ་ཐལ་བ་དེར་གྱུར་པ་ན་གལ་ཏེ་མེད་པ་ཞེས་བྱ་བའི་ངོ་བོ་འགའ་ཞིག་བྱ་བ་ཡིན་པར་གྱུར་ན་ནི་དེ་ཉིད་དངོས་པོ་ཡིན་པས་སོ། །འདི་ལྟར་གང་ཞིག་དངོས་པོ་དང་དངོས་པོ་མེད་པའི་རྗེས་སུ་བྱེད་པ་ཅན་དེ་ནི་བྱ་བར་བརྗོད་ལ། དངོས་པོ་དང་དངོས་པོ་མེད་པ་དང་ལྡན་པ་ཡང་གཞན་ལས་ལྡོག་པའི་རང་བཞིན་ཉིད་ཡིན་ཏེ། གཞན་གྱི་རང་བཞིན་མ་རང་བཞིན་མེད་པ་ཉིད་ལ་ཡོད་པ་དང་མེད་པའི་རྗེས་སུ་མི་རིགས་པའི་ཕྱིར་རོ། །ཐ་དད་པའི་རང་བཞིན་གྱི་དོན་ཀྱང་དངོས་པོ་ཡིན་ཏེ། དེ་འདྲ་བ་ཉིད་ནི་དོན་བྱེད་པ་ཡིན་པའི་ཕྱིར་རོ། །དེ་ཡང་དངོས་པོ་ཡོད་པ་ཡིན་པ་དེས་ན་དངོས་པོ་མེད་པ་ཉིད་མ་ཡིན་ནོ། །དངོས་པོའི་ཕྱོགས་ཀྱི་རྣམ་པར་རྟོག་པ་ལ་ཡང་སྔར་བཤད་ཟིན་ཏོ། །དེ་བས་ན་དངོས་པོ་མེད་པར་བྱེད་དོ་ཞེས་བྱ་བ་ནི་ལྡོག་པ་ཙམ་ཡོད་པ་མ་ཡིན་པ་ནི་དངོས་པོ་མེད་པ་ཡིན་ལ་དེ་ཡང་བྱ་བ་མ་ཡིན་པའི་ཕྱིར་བྱེད་དོ་ཞེས་བྱ་བའི་བསྡུ་བའི་དོན་དང་ལྷན་ཅིག་འབྲེལ་པ་མ་ཡིན་པས་དགག་པ་དང་ལྷན་ཅིག་འབྲེལ་པར་འགྱུར་རོ། །དེས་ན་དག་གི་དོན་ནི་དངོས་པོ་མི་བྱེད་དོ་ཞེས་པར་ཐལ་བ་དེས་ན་བྱ་བ་སྟེ་བྱེད་པ་དགག་པར་བྱས་པར་འགྱུར་རོ། །དེ་ལྟ་ན་ཡང་ཅུང་ཟད་མི་བྱེད་པས་འདི་ལྟོས་པར་བྱ་བ་མ་ཡིན་པར་འགྱུར་རོ། །ལྟོས་པ་མེད་པ་དའི་ཕྱིར་འཇིག་པ་དེའི་རང་བཞིན་ནི་ངོ་བོ་ཉིད་ཀྱིས་ཏེ་དངོས་པོ་ཡོད་པ་ཉིད་ཀྱིས་འགྱུར་བ་ཡིན་ཏེ། ལྷག་པའི་རྒྱུའམ་སྐྱེད་པར་བྱེད་པ་ངེས་པ་ལ་ལྟོས་པ་ནི་མ་ཡིན་ནོ།། དེས་ན་དངོས་པོའི་རང་བཞིན་ལས་འགྱུར་བ་ཡིན་ཏེ། དངོས་པོའི་རང་བཞིན་ཡོད་ན་ཡོད་དོ་ཞེས་བྱ་བའི་དོན་ཏོ། །གང་གི་ཚེ་འདི་ལས་འགྱུར་བ་ན་རང་གི་ངོ་བོ་སྟེ་རྒྱུ་ལ་བརྗོད་པ་དེའི་ཚེ་ནི་དངོས་པོའི་སྐྱེད་པར་བྱེད་པ་ཉིད་ལས་འགྱུར་བ་ཡིན་ལ། གཞན་ལས་མ་ཡིན་ཞིང་ཐོགས་པ་དང་བཅས་པ་བཞིན་དུ་ཁྱད་པར་གྱི་
སྐྱེད་པར་བྱེད་པ་ལས་ཀྱང་མ་ཡིན་ནོ་ཞེས་བྱ་བའི་ཐ་ཚིག་གོ །གང་གི་ཕྱིར་འདི་གང་ལ་འགྱུར་བར་གྲུབ་པ་ཞེས་བྱ་བ་གང་འགའ་ཞིག་ལ་རང་གི་ངོ་བོས་འགྱུར་བ་ཡིན་ཏེ། རྒྱུ་དེ་ལས་རང་གི་ངོ་བོས་ཡོད་པ་ཡིན་པས་ན་གཞན་ལའང་རང་གི་ངོ་བོའི་རང་བཞིན་ཙམ་དུ་ཡོད་པ་ཙམ་མམ། སྐྱེད་པར་བྱེད་པ་ཙམ་ལས་འགྱུར་རོ་ཞེས་ཤེས་སོ། །དེས་ན་དོན་ནི་འདི་ཡིན་ཏེ། དངོས་པོའི་རང་བཞིན་ལ་ལྟོས་པར་བྱ་བ་གཞན་མེད་པའི་ཕྱིར་འཇིག་པའི་རང་བཞིན་འདི་ཐམས་ཅད་ལ་ཡོད་པ་ཡིན་པ་དེ་ཉིད་ཀྱི་ཕྱིར་འདི་ནི་དང་པོ་ཉིད་ནས་ཡོད་པ་ཡིན་ཏེ། གང་གིས་སྐྱེས་པ་ཉིད་ན་འཇིག་པའི་ཕྱིར་མཐའ་དག་སྐད་ཅིག་མ་ཡིན་ནོ། །འདི་ཉིད་རྣམ་པར་དགྲོལ་བའི་ཕྱིར་འགའ་ཞིག་ལ་འགྱུར་བར་མཐོང་བ་འདི་ནི་ཞེས་བྱ་བ་ལ་སོགས་པ་སྨོས་སོ། །གཟུགས་ལ་སོགས་པ་འགའ་ཞིག་ལ་འགྱུར་ཞིང་ཡོད་པར་མཐོང་བ་ནི་ངོ་བོ་ཉིད་ཀྱིས་ཏེ་རང་བཞིན་ཙམ་གྱིས་སོ། །སྐྱེད་པར་བྱེད་པ་ཙམ་ལས་འགྱུར་བ་ཡིན་ཏེ། སྐྱེད་པར་བྱེད་པ་ལས་གཞན་ནམ། སྐྱེད་པར་བྱེད་པའི་ཁྱད་པར་ལ་ལྟོས་པ་མེད་པའི་ཕྱིར་རོ། །ཇི་ལྟར་གཅིག་ལ་སྐྱེད་པར་བྱེད་པ་ཙམ་ཉིད་ལས་འགྱུར་བ་དེ་བཞིན་དུ་གཞན་ལ་ཡང་ཡིན་ཏེ། སྐྱེད་པར་བྱེད་པའི་ཁྱད་པར་དང་རྒྱུ་ཐ་དད་པ་ལ་ལྟོས་པའི་མཚན་ཉིད་ཀྱི་ཁྱད་པར་མེད་པའི་ཕྱིར་རང་གི་ངོ་བོ་ཙམ་དང་རྗེས་སུ་འབྲེལ་པར་གྲུབ་བོ། །དེས་ན་འདིར་མཐོང་བའི་གཟུགས་ལ་སོགས་པའི་རྣམ་པ་དག་ལས་རིགས་ཐ་དད་པ་སྲིད་པ་ལས་བྱས་པ་དང་ཡོད་པ་ཉིད་ཀྱིས་ཁྱབ་པར་བྱེད་པར་རབ་ཏུ་གྲུབ་པའི་རིམ་དང་ཅིག་ཅར་བ་མི་མཐུན་པའི་ཕྱོགས་སྐད་ཅིག་མ་མ་ཡིན་པ་ལས་རང་གི་ཁྱབ་པར་བྱ་བ་དང་བཅས་ཏེ་ལྡོག་པ་ན་ཁྱབ་པར་བྱ་བ་ཉིད་དང་ལྷན་ཅིག་སྐད་ཅིག་མ་ཉིད་དུ་གནས་པར་འགྱུར་རོ།། དེས་ན་སྐད་ཅིག་མ་ཉིད་ཀྱིས་ཁྱབ་པ་གྲུབ་པོ། །གང་གི་ཚེ་ཚད་མས་གྲུབ་པའི་ཕུང་པོ་ལྔ་ཉིད་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོའི་ཡུལ་ཡིན་པ་དེའི་ཚེ་ནི་དངོས་པོ་འཇིག་པའི་རྒྱུ་མེད་པར་བསྒྲུབས་པ་ན། ཡོད་པ་དང་བྱས་པ་ཡང་འཇིག་པའི་རང་བཞིན་དུ་འགྱུར་བ་ལ་ལྟོས་པ་མེད་པས་ཁྱབ་པ་ཡིན་ནོ། །འགའ་ཞིག་འཇིག་པ་ཡིན་ན་ནི་ཐོགས་པ་དང་བཅས་པ་བཞིན་དུ་སྐྱེད་པར་བྱེད་པའི་ཁྱད་པར་ལ་ལྟོས་པས་འཇིག་པའི་རང་བཞིན་དུ་སྐྱེ་བ་མཐོང་བ་འགའ་ཞིག་པོ་གང་ཡིན་པ་དེའི་སྐྱེད་པར་བྱེད་པ་དེ་ཉིད་མེད་པས་དེ་ལ་ལྟོས་པའི་ཕྱིར་བྱས་པ་ལྟོས་པ་མེད་པ་ཉིད་དུ་མི་འགྱུར་རོ། །སྐྱེས་པ་ཕྱིས་འཇིག་པ་ཡིན་ན་ཡང་དེ་འཇིག་པར་བྱེད་
པའི་དུས་གང་ཡིན་པ་དེ་ཉིད་འདི་ལ་ཉེ་བ་མ་ཡིན་པ་ཡིན་ལ། དེ་ཡང་རྒྱུ་གཞན་མ་ཚང་བ་ཡིན་པ་དེས་ན་དེ་ལ་ལྟོས་པའི་ཕྱིར་ལྟོས་པ་མེད་པ་མ་ཡིན་ནོ། །དེས་ན་འགའ་ཞིག་གམ་རེས་འགའ་འཇིག་ན་ནི་ཁྱབ་པར་བྱེད་པ་ལ་ལྟོས་པ་མེད་པ་ཉིད་ལྡོག་པས་ན། ཁྱབ་པར་བྱ་བ་མི་དམིགས་པས་སྐད་ཅིག་མ་ཉིད་ཀྱིས་ཁྱབ་པ་གྲུབ་པོ། །ཇི་ལྟར་ཡོད་པ་དང་བྱས་པ་དག་གི་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་བསྒྲུབས་པ་དེ་བཞིན་དུ་རང་བཞིན་གྱི་གཏན་ཚིགས་གཞན་དག་ལ་ཡང་འབྲེལ་པ་བསྒྲུབ་པར་བྱའོ་ཞེས་བསྟན་པའི་ཕྱིར་དེ་བཞིན་དུ་ཞེས་སྨོས་སོ། །རང་བཞིན་གྱི་གཏན་ཚིགས་མཐའ་མེད་པས་གནོད་པར་བྱེད་པའི་ཚད་མ་ཡང་མཐའ་ཡས་པའི་ཕྱིར། བདག་ཉིད་ཇི་ལྟ་བའི་ཚད་མ་དག་གིས་ཤེས་པ་མང་པོའི་ཚིག་གོ །དེ་ཙམ་དང་རྗེས་སུ་འབྲེལ་པ་རྗེས་སུ་འགྲོ་བ་གྲུབ་པའི་བསྒྲུབ་བྱ་གང་ཡིན་པ་དེ་ཉིད་ཀྱི་གོ་བར་བྱེད་པ་ཡོད་པ་ཡིན་ནོ། །ཅིའི་ཕྱིར་དེ་ལྟར་ཡིན་ཞེ་ན། དངོས་པོ་དེ་ཙམ་དང་རྗེས་སུ་འབྲེལ་པའི་རང་བཞིན་གང་ཡིན་པ་ནི་ཞེས་སྨོས་ཏེ་གང་གི་ཕྱིར་སྒྲུབ་པར་བྱེད་པ་གང་ཡིན་པ་དེ་ནི་དངོས་པོ་ཙམ་དང་རྗེས་སུ་འབྲེལ་པའི་རང་བཞིན་ཡིན་པས་ན་དེ་ཉིད་ལས་ཏེ། ཡུལ་དེ་ཁོ་ན་ལ་མེད་ན་མི་འབྱུང་བ་ངེས་པ་ཡིན་ནོ། །རྒྱུ་གཞན་དང་འབྲེལ་པ་དེ་ཙམ་གྱི་རྗེས་སུ་འགྲོ་བ་ཅན་མ་ཡིན་པའི་རང་བཞིན་གང་ཡིན་པ་ནི་མ་ཚང་བ་དང་གེགས་བྱེད་པ་སྲིད་པས་རྒྱུ་ཉེ་བར་རེས་འགའ་བ་ཉེ་བར་གནས་པའི་ངེས་པ་མེད་པ་ལ་འཁྲུལ་པར་ཡང་འགྱུར་རོ། །དེའི་ཕྱིར་དེ་ལྟ་བུར་གྱུར་པའི་བསྒྲུབ་པར་བྱ་བ་ལ་ནི་གཏན་ཚིགས་ཐམས་ཅད་འཁྲུལ་པ་ཡིན་ནོ། །འོ་ན་ཇི་ལྟར་ངོ་བོ་ཉིད་གཞན་སྒྲུབ་པར་བྱེད་པ་ཙམ་གྱི་རྗེས་སུ་འཇུག་པ་ཡིན་ནོ་ཞེ་ན། བཤད་པ། དངོས་པོ་ཙམ་དང་རྗེས་སུ་འབྲེལ་པའི་རང་བཞིན་ཞེས་བྱ་བ་དེ་ལྟ་བུས་ནི་གང་གི་ཕྱིར་གཞན་ནི་འགའ་ཡང་མི་བརྗོད་ཀྱི། འོན་ཀྱང་སྒྲུབ་པར་བྱེད་པར་འགྱུར་བའི་དངོས་པོ་དེ་ཉིད་དོ། །བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་མེད་པར་ཐལ་བ་ཡང་མ་ཡིན་ཏེ། གང་གི་ཕྱིར་དེ་དག་ཐ་མི་དད་པ་ནི་དངོས་སུ་ཡོད་པ་ཡིན་གྱི། བློས་བརྟགས་ནས་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་དག་ཐ་དད་པར་ཤེས་སོ། །དེ་ལས་ཅིར་འགྱུར་ཞེ་ན། དེའི་ཕྱིར་བསྒྲུབ་པར་བྱ་བའི་རང་བཞིན་གྱི་བདག་ཉིད་ངོ་བོར་ནས་ཡོད་པ་མ་ཡིན་ལ། ཡོད་ན་ཡང་བདག་མེད་པ་འམ་གཞན་གྱི་བདག་ཉིད་དུ་ཐལ་བར་འགྱུར་ཏེ། ཐ་དད་པའི་
བདག་ཉིད་ནི་འགལ་བའི་ཆོས་དང་ལྡན་པ་ཡིན་པའི་ཕྱིར་དང༌། གྲུབ་པ་དང་མ་གྲུབ་པ་དག་ཀྱང་འདིར་འགལ་བ་ཡིན་པའི་ཕྱིར་རོ། །གལ་ཏེ་དངོས་པོ་གང་ཞིག་བྱས་པ་འམ་ཡོད་པར་མཐོང་བ་དེ་ནི་ཚད་མ་གང་གིས་ཡོད་པ་དང་ལྡན་པར་མཐོང་བའི་ཚད་མ་དེ་ཉིད་ཀྱིས་བརྟག་པར་ངེས་པ་མ་ཡིན་ནམ། དེས་ན་ཚད་མས་ཡུལ་དུ་བྱས་པའི་ཡོད་པ་གང་ཡིན་པ་དེ་ནི་རྟག་པའི་ཁྱད་པར་ཅན་ཉིད་དུ་ངེས་སོ། །དེས་ན་གལ་ཏེ་ཡོད་པ་ཉིད་རྟགས་སུ་ཉེ་བར་ལེན་ན་ནི་དེ་མི་རྟག་པ་ཉིད་དང་འགལ་བའི་རང་བཞིན་དུ་ངེས་པ་ཡིན་ལ་འགལ་བའི་རང་བཞིན་དུ་ངེས་པར་བྱ་བའི་ཡོད་པ་ཡང་འགལ་བའི་རང་བཞིན་གཞན་ཉེ་བར་སྡུད་ནུས་པ་མ་ཡིན་ནོ། །ཅི་སྟེ་ཡང་རྟག་པ་དང་བྲལ་བའི་ཡོད་པ་ཉིད་འབའ་ཞིག་རྟགས་སུ་འགོད་པར་འདོད་པ་ཡིན་ན། དེ་ཡང་མི་རིགས་ཏེ། གང་གི་ཕྱིར་འགའ་ཞིག་ཚད་མས་གྲུབ་པ་དེ་ཉིད་རྟགས་ཉིད་ཉེ་བར་དགོད་པར་རིགས་ཏེ། མ་གྲུབ་པ་ནི་རྟགས་སུ་མི་འཐད་པའི་ཕྱིར་རོ། །དེ་ལྟ་བུར་གྱུར་པའི་འབའ་ཞིག་པ་ནི་གྲུབ་པ་ཡང་མ་ཡིན་ནོ་ཞེ་ན། འདི་ནི་ཚད་མའི་བྱ་བ་མི་ཤེས་པའི་འགྱུར་བ་ཡིན་ནོ། །འདི་ལྟར་མ་ངེས་པའི་དོན་འཇུག་པའི་ཡུལ་དུ་བྱ་བར་ནུས་པ་མ་ཡིན་ལ་འཇུག་པར་བྱེད་པ་མ་ཡིན་པ་ཡང་ཚད་མ་མ་ཡིན་ནོ། །དེའི་ཕྱིར་ངེས་པའི་ཡུལ་ལ་འཇུག་པར་བྱེད་པ་ཚད་མ་ཡིན་པ་ན་ངེས་པ་སྐྱེད་པར་ནུས་པ་ལ་ལྟོས་པ་ཉིད་དུ་འགྱུར་རོ། །ངེས་པ་ཡང་རང་གི་མཚན་ཉིད་ཕན་ཚུན་ལྡོག་པའི་ཁྱད་པར་ལྟོས་ནས་བརྟག་པའི་ཆོས་ཀྱི་ཡུལ་ཅན་ཡིན་ལ། བརྟགས་པའི་ཆོས་ཀྱང་ལྡོག་མཚམས་ཀྱི་ཁྱད་པར་ལ་ལྟོས་ནས་ཕན་ཚུན་ཐ་དད་པར་འགྱུར་རོ། །ངེས་པའི་ཆ་གང་ལ་མི་སླུ་བར་རྗེས་སུ་རྫོགས་པ་དེ་ཉིད་ལ་ནི་ཚད་མ་ཡིན་ལ། གང་སླུ་བ་དེ་ལ་ནི་ཚད་མ་མ་ཡིན་ཏེ། དཔེར་ན་སྐྲ་ཤད་ཀྱི་ཚོགས་སུ་འཛིན་པའི་རབ་རིབ་ཅན་གྱི་ཤེས་པ་སྐྲ་ཤད་ཀྱི་ཆ་ལ་ནི་ཚད་མ་མ་ཡིན་ལ། རང་གི་ངོ་བོའི་ཆ་ལ་ནི་ཚད་མ་མ་ཡིན་པ་བཞིན་ནོ། །དེའི་ཕྱིར་ངེས་པ་ལ་མི་སླུ་བ་ལ་ལྟོས་ནས་ཚད་མ་ཡིན་པ་དང༌། ངེས་པའི་ཡུལ་གྱི་ཆོས་རྣམས་ཀྱང་ལྡོག་མཚམས་ལ་ལྟོས་ནས་ཐ་དད་པ་ཡིན་པ་ལ། ཚད་མའི་བྱ་བ་ནི་ཆོས་སོ་སོ་ཐ་དད་བ་ལ་ཡིན་ནོ། །དེས་ན་མེད་པ་ལས་ལྡོག་པས་བརྟགས་པའི་ཡོད་པ་ཉིད་གང་ཡིན་པ་དེ་ནི་རྟག་པ་ཉིད་དང་ལྷན་ཅིག་ཚད་མའི་ཡུལ་མ་ཡིན་ཏེ། ཡོད་པ་ཉིད་དེ་ནི་རྟག་པ་ལས་ཐ་དད་པར་མངོན་སུམ་གྱི་ཚད་མས་གྲུབ་པ་
ཡིན་ལ། རྟག་པ་ཉིད་ཀྱང་ཡོད་པ་ལས་ཐ་དད་པར་བྱ་བ་གཞན་གྱི་ཡུལ་ཡིན་ནོ། །དེས་ན་མི་སླུ་བ་དང་ལྡན་པའི་ཡོད་པ་ཙམ་ཉིད་ལ་བརྟེན་ནས་མངོན་སུམ་གྱིས་ངེས་པའི་རྟག་པ་གང་ཡིན་པ་དེ་ལ་མི་སླུ་བར་ཐེ་ཚོམ་ཟ་བ་ན་རྣམ་པར་དཔྱད་པ་ཡིན་པའི་ཕྱིར་མ་གྲུབ་པའམ། འགལ་བ་ཉིད་ཀྱི་སྐྱོན་མེད་དོ། །ཇི་སྟེ་གང་དུ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་གྲུབ་པར་འགྱུར་བ་ནི་རྟག་པ་ཉིད་སྒྲུབ་པ་ལ་དཔེ་ཅི་ཡོད་གཞུང་ལ་བརྟེན་ནས་ནི་གཏན་ཚིགས་དགོད་པར་བྱ་བ་མ་ཡིན་ནོ་ཞེས་འཆད་པར་འགྱུར་རོ། །གཞན་གཞུང་ལུགས་ལ་མི་བརྟེན་པ་དག་གང་གི་ཚེ་སྐད་ཅིག་མ་ཉིད་ལ་ཕྱིར་ཟློག་པར་བྱེད་པ་དེའི་ཚེ་འདིས་སུན་འབྱིན་པས་ཀྱང་དོན་འགའ་ཞིག་སྐད་ཅིག་མ་ཉིད་དུ་ཁས་ལེན་དུ་གཞུག་དགོས་ཏེ། དེ་ལྟ་མ་ཡིན་ན་དཔེ་མེད་པས་གཏན་ཚིགས་མ་ཡིན་པར་འགྱུར་རོ། །དེའི་ཕྱིར་བསྒྲུབ་པར་བྱ་བའི་ཆོས་མ་གྲུབ་པ་ལ་ནི་དཔེ་འགའ་ཡང་མེད་དོ། །དེ་དང་དེར་དཔེ་གཟུང་བར་བཤད་པ་གང་ཡིན་པ་དེར་ནི་དགོངས་པ་འདི་ཡིན་ཏེ། བསྒྲུབ་པར་བྱ་བའི་ཆོས་ཅན་ལས་གཞན་པའི་དངོས་པོ་ལ་གཏན་ཚིགས་ཡོད་པ་ལ་བརྟེན་ནས་གནོད་པར་བྱེད་པའི་ཚད་མ་འཇུག་པ་ནུས་པ་ཡིན་གྱི། གཞན་དུ་ནི་མ་ཡིན་ནོ། །དེས་ན་གཏན་ཚིགས་ཡོད་པའི་ཡུལ་གནོད་པར་བྱེད་པའི་ཚད་མ་རབ་ཏུ་སྟོན་པའི་སྤྱོད་ཡུལ་གྱི་དོན་ནི་དཔེ་ཡིན་གྱི། ཕྱིར་རྒོལ་བ་ལ་བསྒྲུབ་བྱའི་ཆོས་དང་ལྡན་པར་གྲུབ་པ་ནི་མ་ཡིན་ནོ། །གལ་ཏེ་གནོད་པར་བྱེད་པའི་ཚད་མ་བསྒྲུབ་བྱའི་ཆོས་གྲུབ་པ་ལ་ལྟོས་པ་མ་ཡིན་ནོ། །དེ་ལྟ་ན་ནི་འོ་ན་གནོད་པར་བྱེད་པའི་ཚད་མ་གང་གིས་དཔེའི་ཆོས་ཅན་ལ་བྱས་པ་མི་རྟག་པས་ཁྱབ་པ་སྟོན་པའི་ཚད་མ་དེ་ཉིད་ཀྱིས་བསྒྲུབ་བྱའི་ཆོས་ཅན་ལ་ཡང་མི་རྟག་པ་ཉིད་གྲུབ་པས་ཐམས་ཅད་དུ་གནོད་པར་བྱེད་པའི་ཚད་མ་ཉིད་བསྒྲུབ་བྱ་སྒྲུབ་པར་ནུས་པ་ཡིན་ཏེ། དེའི་ཕྱིར་རང་བཞིན་གྱི་གཏན་ཚིགས་ཉིད་མ་ཡིན་པར་ཐལ་ལོ། །ཇི་སྟེ་ཡང་ཡོད་པ་འམ་བྱས་པ་ལ་མ་བརྟེན་པར་གནོད་པར་བྱེད་པ་ཉིད་མི་འཇུག་པས་ཡོད་པ་ལ་བརྟེན་པར་བྱ་བ་ཡིན་ན། དེ་ལྟ་ན་ཡང་གནོད་པར་བྱེད་པའི་ཚད་མ་དང་ལྷན་ཅིག་པའི་ཕྱོགས་ཀྱི་ཆོས་ཉིད་ལས་བསྒྲུབ་བྱ་གྲུབ་པའི་ཕྱིར་ཚུལ་གསུམ་མེད་པར་ཐལ་ལོ་ཞེ་ན། སྨྲས་པ། བསྒྲུབ་པར་བྱའི་ཆོས་ཅན་ཉིད་ལ་ཁྱབ་པ་གྲུབ་པ་དེས་ན་ཆོས་ཅན་གཞན་ཡོངས་སུ་གཟུང་པས་
ཅི་བྱ་ཞེས་གང་སྨྲས་པ་དེ་ནི་མི་རིགས་ཏེ། འདི་ལྟར་བསྒྲུབ་པར་བྱ་བའི་ཆོས་ཅན་ལས་མ་གཏོགས་པའི་མཐོང་བའི་དངོས་པོ་ཡོངས་སུ་སྤངས་ཏེ། ཆོས་ཅན་གཅིག་ཉིད་ལ་ནི་གནོད་པར་བྱེད་པའི་ཚད་མ་བསྟན་པར་མི་ནུས་སོ། །གལ་ཏེ་སྒྲ་སྐད་ཅིག་མ་མ་ཡིན་ན་ཡོད་པ་ཉིད་དུ་མི་འགྱུར་རོ་ཞེས་དེ་ལྟར་གནོད་པ་བྱེད་པའི་ཚད་མ་བསྟན་པར་བྱ་བ་ཡིན་ན་གལ་ཏེ་གཞན་དག་ཇི་ལྟར་བུམ་པ་ལ་སོགས་པ་མཐོང་བའི་དངོས་པོ་སྐད་ཅིག་ཉིད་མ་ཡིན་ཡང་དོན་བྱེད་པ་ཡིན་པ་དེ་བཞིན་དུ་སྒྲ་འདི་ཡང་ཡིན་ནོ་ཞེས་དེ་སྐད་སྨྲ་བ་ན། མཐོང་བའི་བུམ་པ་ལ་སོགས་པ་དེ་དག་ཀྱང་གནོད་པར་བྱེད་པའི་ཚད་མས་ཡུལ་དུ་བྱ་དགོས་ཤིང༌། དེ་དག་ཡུལ་དུ་བྱས་པ་ན་ཡང་དངོས་པོ་མི་སྣང་བ་འགའ་ཞིག་དོན་བྱེད་ཀྱང༌། སྐད་ཅིག་མ་མ་ཡིན་པར་འགྱུར་བ་དེ་བཞིན་དུ་མཐོང་བ་འདི་དག་ཀྱང་ཡིན་ནོ་ཞེས་ཀྱང་སྨྲ་བ་ན། གཞན་གྱི་དཔེར་བྱས་པ་མི་སྣང་བའི་དངོས་པོ་ཡང་གནོད་པར་བྱེད་པའི་ཚད་མས་ཡུལ་དུ་བྱ་དགོས་པའི་ཕྱིར། ཇི་ལྟར་བསྒྲུབ་པར་བྱ་བའི་ཆོས་ཅན་གཅིག་ཉིད་ལ་གནོད་པར་བྱེད་པའི་ཚད་མ་རབ་ཏུ་བསྟན་པར་བྱ་བ་ཡིན། དེ་ཉིད་ཀྱི་ཕྱིར་སློབ་དཔོན་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་སྒྲུབ་པར་བྱེད་པ་ནི་དོན་ཐམས་ཅད་ཉེ་བར་བསྡུས་པའི་ཡུལ་ཅན་དུ་བཞེད་པ་ཡིན་ཏེ། གང་ཅུང་ཟད་བྱས་པ་དེ་ཐམས་ཅད་ནི་མི་རྟག་པའོ་ཞེས་གང་བཤད་པ་ཡིན་ནོ། །ཕྱོགས་ལ་སོགས་པའི་རྣམ་པ་རང་བྱེ་བ་ལ་ལྟོས་པ་ནི་ཁྱབ་པར་མི་འདོད་དེ། དེའི་ཕྱིར་དོན་ཐམས་ཅད་ཀྱི་ཡུལ་ཅན་གྱི་རྟགས་ཉིད་གནོད་པར་བྱེད་པའི་ཚད་མས་རང་གི་བསྒྲུབ་པར་བྱ་བས་ཁྱབ་པར་བྱ་བས་ཁྱབ་པ་གྲུབ་པ་ངེས་པར་བྱའོ། །གལ་ཏེ་དོན་ཐམས་ཅད་ཉེ་བར་བསྡུས་པ་དང་ལྡན་པའི་ཁྱབ་པར་ཉེ་བར་སྟོན་པ་ན་ཐམས་ཅད་ཀྱི་ནང་དུ་འདུས་པས་སྒྲ་ཡང་སྐད་ཅིག་མར་གྲུབ་པའི་ཕྱིར་ཕྱོགས་ཀྱི་ཆོས་ཉེ་བར་བསྡུ་བ་དོན་མེད་དོ་ཞེ་ན། དེ་ཅི་ད་ནི་སྐྱེས་བུས་གང་ཡོད་པ་དེ་ཐམས་ཅད་མི་རྟག་གོ་ཞེས་ངེས་པས་རི་བོང་གི་རྭ་ཡང་ཡོད་དོ་ཞེས་ཤེས་སམ། གལ་ཏེ་རི་བོང་གི་རྭ་ནི་མེད་པའི་ཕྱིར་མི་ཤེས་ཀྱི་སྒྲ་ནི་ཡོད་པ་ཉིད་དོ་ཞེ་ན། འོ་ན་ནི་དེ་ཚད་མ་གཞན་གྱིས་ཤེས་པར་བྱ་བ་ཡིན་ཏེ། གང་ཞིག་ཤེས་ན་རི་བོང་གི་རྭ་ལྟར་སྒྲ་ནི་མ་ཡིན་ནོ་ཞེས་རྟོགས་པར་འགྱུར་བ་ཡིན་ནོ། །དེའི་ཕྱིར་ཁྱབ་པའི་དུས་སུ་སྤྱིས་སྒྲ་ནང་དུ་འདུས་ཀྱང་སྐད་ཅིག་མ་
ཉིད་དུ་ངེས་པར་བྱ་བའི་ཕྱིར་ཡོད་པ་ཉིད་ཁྱད་པར་དུ་ཚད་མ་གཞན་གྱིས་ཤེས་པར་བྱ་བ་ཡིན་ནོ། །གང་ཞིག་སྒྲུབ་པར་བྱེད་པའི་ཚིག་གི་སྔོན་རོལ་དུ་ཡོད་པ་ཉིད་ཤེས་པ་དེ་ལ་ནི་དེ་ཉིད་ཕྱོགས་ཀྱི་ཆོས་ཡོངས་སུ་ཤེས་པ་ཡིན་ཏེ། དེ་ཉིད་ཀྱི་ཕྱིར་འབྲེལ་པ་དང་ཕྱོགས་ཀྱི་ཆོས་དག་ལ་གོ་རིམས་ངེས་པ་འགའ་ཡང་མེད་དོ་ཞེས་བཤད་དོ། །འབྲས་བུའི་གཏན་ཚིགས་བསྟན་པའི་ཕྱིར་དོན་གཞན་རྟོགས་པར་བྱ་བ་ལ་ནི་ཞེས་སྨོས་སོ། །རྟགས་ནི་སྒྲོན་མ་ལ་སོགས་པ་བཞིན་དུ་རུང་བ་ཙམ་གྱིས་དོན་གོ་བར་བྱེད་པ་ནི་མ་ཡིན་གྱི། འོན་ཀྱང་མི་འཁྲུལ་པ་ཉིད་དུ་ཤེས་པ་ཡིན་ནོ། །འཁྲུལ་པ་མེད་པ་ཡང་འབྲས་བུ་ཉིད་ཡིན་ཏེ། དེས་ན་འཁྲུལ་པ་མེད་པའི་ཕྱིར་གོ་བར་བྱེད་པ་ཡིན་ནོ། །གལ་ཏེ་ལྡན་པ་ཅན་དང་འདུ་བ་ཅན་ལ་སོགས་པ་ཡང་འཁྲུལ་པ་མེད་པ་མ་ཡིན་ནམ་ཞེ་ན། བཤད་པ། འདི་ལྟར་བསྒྲུབ་པར་བྱ་བ་དེ་དེ་ལས་སྐྱེས་པ་མ་ཡིན་པ་གང་ཡིན་པ་དེ་ནི་མི་འཁྲུལ་པ་མ་ཡིན་ལ། ལྡན་པ་ཅན་ལ་སོགས་པ་ཡང་དེ་ལས་སྐྱེས་ན་ནི་དེ་ཉིད་ཀྱིས་དེ་ལས་མི་འཁྲུལ་པ་ཡིན་ནོ། །མ་སྐྱེས་ན་ནི་མི་འཁྲུལ་པ་ཉིད་མ་ཡིན་ནོ་ཞེས་འཆད་པ་ནི་རག་མ་ལས་པ་མ་འབྲེལ་པའི་ངོ་བོ་གང་ཡིན་པ་རྣམས་ཏེ་དེའི་བདག་ཉིད་དང་དེ་ལས་བྱུང་བ་མེད་པ་ལ་ནི་འབྲེལ་པ་འགའ་ཡང་མེད་པས་ན་རག་མ་ལས་པ་ཉིད་ནི་ལྷན་ཅིག་འབྱུང་བར་ངེས་པ་མེད་དོ། །གང་ཞིག་གང་ལ་རག་མི་ལས་པ་དེ་ནི་འབྲེལ་པའི་ཡུལ་མ་ཡིན་པ་དེ་དང་ལྷན་ཅིག་ངེས་པར་ཡོད་པ་མ་ཡིན་ཏེ། དཔེར་ན་བ་ལ་སོགས་པ་དང་རྟ་བཞིན་ནོ། །དེ་དེའི་ཆོས་སུ་ཇི་ལྟར་འགྱུར་ཞེས་བྱ་བ་ནི་འདི་ལྟར་གཏན་ཚིགས་ནི་བསྒྲུབ་པར་བྱ་བའི་ཆོས་དང་ཆོས་ཅན་ལས་ཐ་དད་པ་ཡིན་ན་དེ་དག་གི་འབྲས་བུ་ཡིན་ལ། དུས་མཚུངས་པ་ཉིད་ཀྱི་རྒྱུ་ཅན་གྱི་ཆོས་དང་ཆོས་ཅན་གྱི་དངོས་པོ་ནི་རྒྱུ་དང་འབྲས་བུ་མི་འཐད་དོ་ཞེས་བྱ་བ་ནི་བསམ་པ་ཡིན་ནོ། །ཅིག་ཤོས་ནི་དུས་མཉམ་པ་ཉིད་ནི་ཅིར་ཡང་མི་དགོས་ཀྱི། ཆོས་དང་ཆོས་ཅན་གྱི་དངོས་པོ་ནི་རྟེན་དང་བརྟེན་པ་ལས་ཡིན་ནོ་སྙམ་ནས་སྨྲས་པ། དེ་ལ་བརྟེན་པའི་ཕྱིར་རོ། །ཅིག་ཤོས་ཀྱིས་ནི་ཆོས་དང་ཆོས་ཅན་གྱི་རྒྱུ་མཚན་དེའི་རྟེན་ཉིད་དུས་གཅིག་པར་བསམས་ནས་སྨྲས་པ། ཇི་ལྟར་རྒྱུ་དང་འབྲས་བུའི་དངོས་པོ་ཡིན་ཏེ། དེ་དག་ནི་དུས་ཐ་དད་པར་གྲུབ་པའི་ཕྱིར་རོ་ཞེ་ན། སློབ་དཔོན་ནི་འཁར་གཞོང་དང་རྒྱ་ཤུག་བཞིན་དུ་ཐ་དད་པའི་རྟེན་གྱི་རྒྱུ་
མཚན་ནི་རྒྱུ་དང་འབྲས་བུའི་དངོས་པོ་ཉིད་ཡིན་པར་དགོངས་ནས་བཤད་པ། དེ་ཉིད་ཀྱི་ཕྱིར་ཏེ། རྟེན་ཉིད་ཀྱི་ཕྱིར་རོ། །གང་གི་ཕྱིར་རྟེན་ཡིན་པ་དེ་ཉིད་ཀྱིས་ན། རྒྱུ་དང་འབྲས་བུའི་དངོས་པོ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་མ་ཡིན་ཏེ་རྒྱུ་དང་འབྲས་བུའི་དངོས་པོ་མ་ཡིན་ན་ནི་རྟེན་ཉིད་མི་འགྲུབ་པའི་ཕྱིར་ཏེ། ཐམས་ཅད་ལ་ཧ་ཅང་ཐལ་བར་འགྱུར་རོ། །ཅིག་ཤོས་ནི་ཡུལ་ཐ་དད་པས་ན་རྒྱུ་དང་འབྲས་བུའི་དངོས་པོ་དང༌། རྟེན་དང་བརྟེན་པའི་དངོས་པོ་ཐ་དད་པར་བསྟན་པའི་ཕྱིར་གལ་ཏེ་དུ་བའི་རྟེན་ནི་ཞེས་བྱ་བ་ལ་སོགས་པ་སྨོས་སོ། །དེས་ན་རྒྱུ་དང་འབྲས་བུའི་རྒྱུ་མཚན་ཅན་ཉིད་རྟེན་ཡིན་པར་ཇི་ལྟར་འགྱུར་ཞེ་ན། དེ་ཡང་ཞེས་སྨོས་ཏེ། གང་ཡང་རྟེན་དུ་མངོན་པར་འདོད་པའི་ས་ཕྱོགས་ཀྱང་དུ་བའི་གཞི་ཡིན་པའི་གནས་ཡིན་པའི་ཕྱིར་རྒྱུ་ཉིད་དོ། །འདི་ལྟར་དུ་བ་ཡང་ཡུལ་གཞན་སྤངས་ནས་མེ་དང་ཉེ་བར་གནས་པ་ཞེས་བྱ་བ་ནི་སྣང་བའི་མིང་ཅན་གྱི་ཡུལ་ལ་བརྟེན་ནས་འཇུག་པ་ན། སྣང་བའི་མིང་ཅན་གྱི་ཡུལ་གྱི་འབྲས་བུ་ཡིན་ནོ། །གང་གི་ཚེ་བུད་ཤིང་གི་རྟེན་གྱི་ཡུལ་གཟུང་བ་དེའི་ཚེ་ནི་གཞིར་གྱུར་པའི་ཡུལ་དེ་བུད་ཤིང་ལ་སོགས་པའི་རྒྱུ་ཡིན་པའི་ཕྱིར་བརྒྱུད་ནས་དུ་བའི་རྒྱུ་ཡིན་ཏེ། རྣམ་པ་ཐམས་ཅད་དུ་རྒྱུ་མ་ཡིན་པ་ནི་རྟེན་མ་ཡིན་ནོ། །གལ་ཏེ་རྒྱུ་དང་འབྲས་བུའི་དངོས་པོ་ཐམས་ཅད་ལ་ཡོད་པ་དེ་ལྟ་ན་ཡང་རྟེན་དང་བརྟེན་པའི་དངོས་པོ་ནི་རྒྱུ་དང་འབྲས་བུའི་ཁྱད་པར་ཉིད་ཡིན་ཏེ། དེས་ན་ཐམས་ཅད་ལ་ཐལ་ཆེས་པ་ནི་མེད་དེ་དཔེར་ན་རྒྱུ་ཉིད་ལས་འགའ་ཞིག་གསལ་བར་བྱེད་པ་ཡིན་པ་བཞིན་ནོ། །དེ་ལས་བྱུང་བ་ནི་དེ་ལས་སྐྱེ་བ་སེ། གལ་ཏེ་གཏན་ཚིགས་དེའི་ཕྱིར་འབྲས་བུ་གོ་བར་བྱེད་པ་ཡིན་ན། དེའི་ཚེ་སྐྱེད་པར་བྱེད་པ་ཡིན་པའི་ཕྱིར་མེ་ནི་གོ་བར་བྱ་བ་ཡིན་ལ། བསྐྱེད་པར་བྱ་བ་ཡིན་པའི་ཕྱིར་དུ་བ་ནི་གོ་བར་བྱེད་པ་ཡིན་ནོ། །བསྐྱེད་པར་བྱ་བ་ཡང་དེ་དང་དེ་ལས་ལྡོག་པར་བྱེད་པ་ཡིན་པ་ཞིང༌། སྐྱེད་པར་བྱེད་བ་ཡང་མེ་ཆ་ཤས་མེད་པ་ཡིན་ཏེ། དེས་ན་ཇི་ལྟར་ལྡོག་པ་ཐམས་ཅད་ཀྱི་མེ་སྐྱེད་པར་བྱེད་པ་ཡིན་པ་དང༌། དུ་བ་བསྐྱེད་པར་བྱ་བ་ཡིན་པ་དེ་བཞིན་དུ་ལྡོག་པ་ཐམས་ཅད་ཀྱིས་གོ་བར་བྱ་བ་དང་གོ་བར་བྱེད་པའི་དངོས་པོར་འགྱུར་ཏེ། དེ་ནི་བསྐྱེད་བྱ་སྐྱེད་བྱེད་ཀྱི་དངོས་པོའི་རྒྱུ་མཚན་ཅན་ཡིན་པའི་ཕྱིར་རོ་ཞེས་དོགས་པ་བསལ་བའི་ཕྱིར་མ་ཡིན་ཏེ་ཞེས་སྨོས་སོ། །གང་ཞིག་གང་མེད་པར་ཡང་འབྱུང་བའི་དངོས་པོ་དེ་ནི་དེ་
མེད་པར་འབྱུང་བ་སྟེ། དེས་ན་དངོས་པོ་དེ་ལས་སྐྱེ་བར་ངེས་པ་གང་ཡིན་པ་མེད་པའི་ཕྱིར་རོ། །འདི་སྐད་བརྗོད་པ་ཡིན་ཏེ་སྐྱེ་བར་ངེས་པ་མེད་པའི་ཕྱིར་ན་གང་ལས་རྒྱུ་དང་འབྲས་བུ་ཉིད་མེད་པ་དེར། ཇི་ལྟར་གོ་བར་བྱ་བ་དང་གོ་བར་བྱེད་པའི་དངོས་པོར་འགྱུར། དེར་ནི་ལྡོག་པའི་རྒྱུ་མཚན་ཅན་གྱི་ཆོས་འགའ་ཞིག་ཁོ་ན་རྒྱུ་དང་འབྲས་བུ་དང་འབྲེལ་པ་བསྐྱེད་པར་བྱ་བ་དང༌། སྐྱེད་པར་བྱེད་པའི་དངོས་པོའི་ཡུལ་དུ་གྱུར་པ་ཡིན་ཏེ། དེས་ན་ཆོས་འགའ་ཞིག་ཁོ་ན་བསྐྱེད་པར་བྱ་བ་དང་སྐྱེད་པའི་དངོས་པོ་ཡིན་གྱི་ཐམས་ཅད་ནི་མ་ཡིན་ནོ། །དེ་ཉིད་བསྟན་པའི་ཕྱིར་བཤད་པ། གང་གི་ཕྱིར་འགའ་ཞིག་ཁོ་ན་ལ་རྒྱུ་དང་འབྲས་བུ་དངོས་པོ་ཡོད་པ་དེའི་ཕྱིར། ཕན་ཚུན་ལྡོག་པ་ལ་ལྟོས་ནས་རྣམ་པར་གཞག་པ་རྒྱུ་ལ་རྣམ་པར་གནས་པའི་རང་བཞིན། ཇི་སྙེད་ཅིག །མེད་ན་མི་འབྱུང་བ་འབྲེལ་པའི་འབྲས་བུ་ནི་རྒྱུ་ལ་གནས་པ་དེ་དག་ཉིད་ཀྱི་གོ་བར་བྱེད་པ་ཡིན་གྱི། ཙན་དན་གྱི་མེ་ལ་སོགས་པའི་རང་བཞིན་གང་དག་དང་མེད་ན་མི་འབྱུང་བའི་ངེས་པ་མེད་པ་དེ་དག་གི་གོ་བར་བྱེད་པ་ནི་མ་ཡིན་ནོ། །ཡང་ཇི་ལྟར་ན་ལ་དེ་ན་མི་འབྱུང་བའི་ཡུལ་གྱི་ཆོས་རྣམས་ཁོ་ནའི་གོ་བར་བྱེད་པ་ཡིན་ཞེ་ན། བཤད་པ། དེ་ནི་དེ་དག་གི་འབྲས་བུ་ཉིད་དུ་ངེས་པ་ཡིན་ཏེ། དེས་ན་དེ་ནི་ཆོས་དེ་དག་ཁོ་ནའི་འབྲས། ངེས་ཀྱི་གཞན་དག་གི་ནི་མ་ཡིན་ནོ། །དེའི་ཕྱིར་དེ་དག་ཁོ་ནའི་གོ་བར་བྱེད་པ་ཡིན་ནོ། །ད་ནི་འབྲས་བུ་རྟགས་པའི་ཆོས་རྣམས་ལས་ཀྱང་གང་དག་གོ་བར་བྱེད་པ་ཡིན་པའི་ཆོས་དེ་དག་བསྟན་པའི་ཕྱིར། གང་དག་དེ་དག་དེ་མེད་ན་མི་འབྱུང་བ་དེ་དག་ཁོ་ནས་ཡིན་ནོ་ཞེས་སྨོས་སོ། །འབྲས་བུ་ལ་ཡོད་པའི་ཁྱད་པར་གྱི་ཆོས་གང་དག་རྒྱུ་ལ་ཡོད་པའི་སྤྱིའི་ཡོད་པའི་སྤྱིའི་ཆོས་དེ་དག་མེད་ན་མི་འབྱུང་བ་དེ་ཁོ་ན་གོ་བར་བྱེད་པ་ཡིན་གྱི། སྤྱིའི་ཆོས་དངོས་པོ་དང་ལུས་ཅན་ཉིད་ལ་སོགས་པ་ནི་མ་ཡིན་ཏེ། དེ་དག་ནི་མེ་མེད་ཀྱང་འབྱུང་བའི་ཕྱིར་རོ། །སྔར་གྱི་དེ་དག་གི་འབྲས་བུ་ཉིད་དུ་ངེས་པའི་ཕྱིར་རོ་ཞེས་བྱ་བ་ཡང་འདིར་གཏན་ཚིགས་སུ་བལྟའོ། །གལ་ཏེ་ཆོས་འགའ་ཞིག་ཁོ་ན་དང་མེད་ན་མི་འབྱུང་བ་ངེས་པ་ཡིན་ན་ནི་དེའི་ཚེ་ཆོས་དེ་དག་ཁོ་ན་དང་བསྐྱེད་པར་བྱ་བ་དང་སྐྱེད་པར་བྱ་བའི་དངོས་པོར་འགྱུར་རོ་ཞེས་དོགས་པ་ལ་མ་ཡིན་ཏེ་ཞེས་སྨོས་སོ། །དེས་བསྐྱེད་པར་བྱ་བའི་ཁྱད་པར་དེ་གཟུང་
ན་ནི་སྐྱེད་པར་བྱེད་པ་དང་འབྲེལ་པའི་ཆོས་གོ་བར་བྱ་བ་ཉིད་ཡིན་པར་འདོད་པའི་ཕྱིར་རོ། །གང་གི་ཚེ་འབྲས་བུར་གཏོགས་པའི་དེས་བསྐྱེད་པར་བྱ་བའི་ཁྱད་པར་ངེས་པ་དེའི་ཚེ་ནི་རྒྱུ་ལ་ཡོད་པའི་ཁྱད་པར་གྱི་ཆོས་གོ་བར་བྱ་བར་འགྱུར་བ་ཉིད་དོ། །དེས་ན་གང་གིས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡང་ངེས་པའི་ཡུལ་ཅན་དུ་འགྱུར་བ། གོ་བར་བྱ་བ་དང་གོ་བར་བྱེད་པའི་དངོས་པོ་ནི་ངེས་པའི་ཡུལ་ཅན་ཉིད་མ་ཡིན་ནོ། །དེས་ན་འདི་ལ་དོན་ནི་འདི་ཡིན་ཏེ། དངོས་པོ་ལ་བསྐྱེད་བྱ་སྐྱེད་བྱེད་ཀྱི་དངོས་པོ་ཡོད་དོ་ཞེས་དེ་ཙམ་གྱིས་ནི་གོ་བྱ་གོ་བྱེད་ཀྱི་དངོས་པོ་མ་ཡིན་ནོ། འོ་ན་ཅི་ཞེ་ན། བསྐྱེད་བྱ་སྐྱེད་བྱེད་ཀྱི་དངོས་པོ་ངེས་པ་ནི་གོ་བྱ་གོ་བྱེད་ཀྱི་རྒྱུ་མཚན་ཡིན་ནོ། །ལྡོག་པ་འགའ་ཞིག་ཏུ་ངེས་ན་ནི་དངོས་པོ་དེ་ལ་འཁྲུལ་པར་ཤེས་པ་ཡིན་ཏེ། དཔེར་ན་ཙན་དན་གྱི་མེར་ངེས་པ་ནི་དུ་བ་ཙམ་གྱི་སྐྱེད་བྱེད་དུ་ངེས་པ་མ་ཡིན་ཏེ། དེ་མེད་ཀྱང་དུ་བ་ཙམ་མཐོང་བའི་ཕྱིར་རོ། །དུ་བ་ཡང་དངོས་པོ་ཉིད་ལ་སོགས་པ་དང་ལྡན་པར་ངེས་ན་མེའི་འབྲས་བུ་ཉིད་དུ་ངེས་པར་འགྱུར་བ་མ་ཡིན་ཏེ། མེ་མེད་ཀྱང་དངོས་པོ་ཙམ་ཡོད་པའི་ཕྱིར་རོ། །དེས་ན་དངོས་པོ་ལ་བདག་ཉིད་ཐམས་ཅད་ཀྱིས་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོ་ཡིན་ཡང༌། གོ་བྱ་གོ་བྱེད་ཀྱི་ངོ་བོ་ནི་ཆ་ཐམས་ཅད་ལ་བསྐྱེད་བྱ་སྐྱེད་བྱེད་དུ་ངེས་པར་འགྱུར་བ་ཡིན་ནོ། །དེ་མེད་པ་ནི་མ་ངེས་པ་ཡིན་གྱི་གཞན་དུ་ནི་མ་ཡིན་ལ། ངེས་པ་ལ་ལྟོས་པས་ནི་བསྐྱེད་བྱ་སྐྱེད་བྱེད་དག་ཆ་ཤས་ཅན་དུ་ཐལ་བ་ཡང་མ་ཡིན་ནོ། །རྒྱུ་ལ་ཡོད་པའི་ཁྱད་པར་རྣམས་གོ་བར་བྱ་བ་ཉིད་དུ་བསྒྲུབས་ནས། འབྲས་བུ་ལ་ཡོད་པའི་སྤྱི་ཡང་གོ་བར་བྱེད་པ་ཉིད་དུ་བསྟན་པའི་ཕྱིར་བཤད་པ། རྟགས་ཉིད་བྱེ་བྲག་སྟེ་ཁྱད་པར་དེ་དག་ལ་ཡོད་པའི་སྤྱི་གང་ཡིན་པ་རྣམས་ནི་གོ་བར་བྱེད་པ་ཉིད་ཡིན་པར་འདོད་པའི་ཕྱིར་རོ། །འདི་སྐད་བརྗོད་པ་ཡིན་ཏེ། དངོས་པོ་ཉིད་འབའ་ཞིག་ངེས་པ་ན་འཁྲུལ་པ་ནི་དུ་བ་ལ་བརྟེན་པ་མ་ཡིན་ནོ། །གལ་ཏེ་ཁྱད་པར་ཉེ་བར་བཀོད་ན་གོ་བྱ་རྟོགས་པའི་ཕྱིར་ཉེ་བར་བཀོད་པ་དོན་མེད་དོ་ཞེ་ན། བདེན་ཏེ། འདིར་འཁྲུལ་པ་སྤང་བའི་ཕྱིར་ནི་སྤྱི་ཉེ་བར་བཀོད་པ་མ་ཡིན་ནོ། །འོ་ན་ཅི་ཞེ་ན། གོམས་པའི་ཕྱིར་ན་རྟོགས་པ་པོ་འགའ་ཞིག་མཐོང་བའི་དངོས་པོ་ལ་ཡང་དངོས་པོ་འདི་ནི་ལུས་ཅན་ནོ་ཞེས་ཀྱང་ངེས་པ་སྐྱེ་བ་འམ། ཡང་ན་
རྟོགས་པ་པོ་ཐམས་ཅད་ཀྱང་མཐོང་བའི་དངོས་པོ་ལ་སྤྱིའི་རྣམ་པར་རྟོགས་པར་འགྱུར་ལ། ཁྱད་པར་ངེས་པ་ནི་ཕྱིས་འགྱུར་རོ། །དེ་ལ་ཉེ་བར་གཟུང་བའི་སྤྱི་གང་ཡིན་པ་དེ་ནི་མ་སྤངས་པ་ཉིད་དོ། །དེའི་ཕྱིར་རྟོགས་པ་པོའི་ཞེན་པའི་དོར་ཁྱད་པར་གྱིས་ཟིན་པའི་སྤྱི་གོ་བར་བྱེད་པ་ཡིན་གྱི། ཁྱད་པར་འཁྲུལ་པའི་ཕྱིར་ནི་མ་ཡིན་ཏེ། དཔེར་ན་འདི་ནི་གཡོར་མོ་ཡིན་ཏེ། རྩེ་མོར་བྱ་ཚང་བཅས་པའི་ཕྱིར་རོ་ཞེས་བྱ་བ་ལྟ་བུ་སྟེ། རྩེ་མོ་ཉིད་དང་བྱ་ཚང་བཅས་པ་དག་ཉེ་བར་བཀོད་པ་ནི་སོ་སོར་འཁྲུལ་པའི་ཕྱིར་རོ། །གང་གི་ཚེ་ཁྱད་པར་རྟོགས་པར་བྱ་བ་ལ་སྤྱི་ཁྱད་པར་དུ་མ་བྱས་པ་སེམས་པ་ལ་གནས་པར་གྱུར་ན་ནི། སྤྱི་དེའི་རང་བཞིན་དེས་དངོས་པོ་ལ་འཁྲུལ་པར་འགྱུར་བའི་ཕྱིར་སྤྱི་དེ་གོ་བར་བྱེད་པ་ཉིད་དུ་མི་འདོད་དོ། །མི་འཁྲུལ་བའི་ཕྱིར་འབྲས་བུ་གོ་བར་བྱེད་པར་འགྱུར་ན། གལ་ཏེ་ཡང་དུ་བ་མེ་ལས་སྐྱེས་པ་དེ་ལྟ་ན་ཡང་དེ་ལས་སྐྱེས་པ་དེ་ལྟ་ན་ཡང་འཁྲུལ་པ་མེད་དོ་ཞེས་ག་ལ་ཡིན་ཞེ་ན། མི་འཁྲུལ་པའི་རྒྱུ་བཤད་པ། རྒྱུ་མེད་དེ་ལ་འཁྲུལ་ན་ནི་འབྲས་བུ་འདི་རྒྱུ་ལྡན་པ་ལས་འདས་པར་གྱུར་ཏེ། མེ་ལ་འཁྲུལ་ན་ནི་དུ་བ་རྒྱུ་དང་ལྡན་པ་ལས་འདས་པར་འགྱུར་རོ། །གང་དག་དམིགས་ན་ཞེས་བྱ་བ་འདིས་ནི་རྒྱུའི་ཡུལ་ཅན་གྱི་དམིགས་པ་སྟོན་ཏེ། ཤ་ཟ་ལ་སོགས་པ་མི་དམིགས་པ་ནི་རྒྱུའི་དངོས་པོ་མ་ཡིན་ནོ། །མི་དམིགས་པ་གང་དག་དམིགས་ན་དམིགས་པའི་དངོས་པོ་དེ་ནི་འབྲས་བུ་ཡིན་ནོ། །དེའི་མཚན་ཉིད་དུ་གྱུར་པ་ཞེས་བྱ་བ་ནི། གལ་ཏེ་མ་དམིགས་པ་དེ་མ་དམིགས་པའི་དུས་སུ་དེ་དམིགས་པའི་མཚན་ཉིད་ཀྱི་ཡུལ་ཡིན་ནོ། །འདི་སྐད་བརྗོད་པ་ཡིན་ཏེ། གང་ཞིག་མ་དམིགས་པས་དམིགས་པའི་དངོས་པོ་དེ་མ་དམིགས་པའི་དུས་སུ་ཡང་གལ་ཏེ་ཡོད་ན་སྣང་བ་ཉིད་དུ་གྱུར་ན་ནི་སྣང་བར་ངེས་པར་ནུས་པས་དེ་ལྟར་ན་འབྲས་བུར་ངེས་པ་ཡིན་ནོ། །མ་དམིགས་པ་ལས་དམིགས་པ་ན་སྣང་བར་ངེས་པར་ནུས་པ་དེ་ཡང་གང་ཡིན་ཞེ་ན། མ་དམིགས་པའི་གནས་སྐབས་སུ་ཡང་སྣང་བའི་ས་ཕྱོགས་དེ་དང་ཤེས་པ་གཅིག་ལ་འདུ་བ་ངེས་པར་ནུས་པ་གང་ཡིན་པའོ། །དེ་ལྟར་ངེས་པར་ནུས་པ་དེ་ཡང་གང་ཡིན་ཞེ་ན། ཡུལ་དེ་ཉིད་དུ་རྒྱུན་སྐྱེ་བཞིན་པར་ངེས་པ་གང་ཡིན་པའོ། །གལ་ཏེ་འདི་ནི་འདིར་སྐྱེས་པ་ཡིན་
ལ། འདི་ནི་ཡུལ་གཞན་ནས་འོངས་པ་ཡིན་ནོ་ཞེས་བྱ་བ་འདི་ཉིད་ངེས་པ་མེད་པ་མ་ཡིན་ནམ་ཞེ་ན། ངེས་པ་མེད་པ་མ་ཡིན་ཏེ། རྒྱུ་དང་འབྲས་བུའི་དངོས་པོ་ངེས་པ་ནི། གང་ལ་དོན་འདི་ནི་སྐྱེ་བའི་རང་བཞིན་ཡིན་ལ། འདི་ནི་སྐྱེས་ཟིན་པ་ཡིན་ནོ་ཞེས་རྣམ་པར་བྱེད་པའི་ནུས་པ་ཡོད་པ་དེའི་དབང་དུ་བྱས་པའི་ཕྱིར་རོ། །གང་ཞིག་མཐོང་བའི་རང་བཞིན་སྐྱེ་བཞིན་པ་དང༌། སྐྱེས་ཟིན་པའི་རང་བཞིན་དུ་རྣམ་པར་འབྱེད་མི་ནུས་པ་དེ་ནི་བསྐྱེད་བྱ་ཉིད་དུ་མི་ཤེས་པས་ན། ཇི་ལྟར་བསྐྱེད་བྱ་སྐྱེད་བྱེད་ཀྱི་ངོ་བོ་ངེས་པར་བྱེད། བསྐྱེད་པར་བྱ་བ་ཉིད་ངེས་པར་ཤེས་ན་ནི་བསྐྱེད་བྱ་སྐྱེད་བྱེད་ཀྱི་ངོ་བོ་ངེས་པར་བྱེད་ཀྱི་གཞན་དུ་ནི་མ་ཡིན་ནོ། །དེས་ན་བོང་བུམ་རྟོགས་པས་གལ་ཏེ་མི་དམིགས་ནས་བོང་བུ་དམིགས་ལ། མེ་མ་དམིགས་ན་ཡང་སྐྱེ་བོས་བར་དུ་ཆོད་པས་མ་དམིགས་པ་དེ་ལྟ་ན་ཡང་སྐྱེས་བུ་དེས་བོང་བུ་དེ་ཉིད་དུ་སྐྱེ་བར་མཐོང་བ་ནི་མ་ཡིན་ཏེ། འོན་ཀྱང་སྐྱེས་ཟིན་པའི་རང་བཞིན་མིག་མངོན་དུ་གཏད་མ་ཐག་ཏུ་དམིགས་པ་ཡིན་ནོ། །དེས་ན་དམིགས་པའི་སྔོན་རོལ་དུ་ནི་དེས་དེ་སྣང་བའི་ས་ཕྱོགས་དང་ཤེས་པ་གཅིག་ལ་འདུ་བའི་བལྟར་རུང་བ་ཉིད་དུ་མ་ངེས་པ་ཉིད་དོ། །འདི་ལྟར་རྣམ་པ་དེ་ལྟ་བུ་སྐྱེས་ཟིན་པ་དག་ནི་ཡུལ་གཞན་ནས་འོངས་པ་དག་ཏུ་མེད་པ་ཉིད་དོ། །གང་ཞིག་དམིགས་པའི་སྔོན་རོལ་དུ་རྒྱུ་གཞན་དམིགས་པ་ན། མིག་མངོན་དུ་ཕྱོགས་པས་ཡུལ་གཞན་དུ་འོངས་པ་སྲིད་པ་བཀག་ཅིང༌། མཐོང་བའི་ས་ཕྱོགས་དེ་ཉིད་དུ་རྒྱུ་དང་ལྡན་པ་ཅིག་ཅར་རམ་རིམ་གྱིས་སྐྱེ་བཞིན་པའི་རང་བཞིན་དུ་མཐོང་བ་དེ་ཉིད་ནི་སྣང་བའི་ས་ཕྱོགས་དང་ལྷན་ཅིག་དམིགས་པའི་སྔོན་རོལ་དུ་ཤེས་པ་གཅིག་ལ་འདུ་བར་སྲིད་པ་ཡིན་པས་ན་དེའི་མཚན་ཉིད་དུ་གྱུར་པ་མི་དམིགས་པར་འགྱུར་བ་ཡིན་ནོ། །དེས་ན་རྣམ་པ་དེ་ལྟ་བུའི་ཡུལ་ལ་འབྲས་བུ་ཉིད་དུ་ཁོང་དུ་ཆུད་པའི་ཕྱིར་འཁྲུལ་པ་མེད་དོ། །གང་ཡང་མུན་ཁུང་དུ་སྒྲོན་མ་དམིགས་ན་སྔ་ན་མེད་པའི་བུམ་པ་དམིགས་ལ། དེ་ལ་དམིགས་ན་ནི་དེ་ཡང་མི་དམིགས་སོ་ཞེས་ཇི་སྐད་བརྗོད་པ་དེ་ཡང་བསལ་བ་ཡིན་ཏེ། འདི་ལྟར་དེར་ནི་དམིགས་པའི་བུམ་པ་དམིགས་པའི་སྔོན་རོལ་དུ་བལྟར་རུང་བའི་རང་བཞིན་དུ་ངེས་པ་མ་ཡིན་ཏེ། སྐྱེས་ཟིན་པའི་རང་བཞིན་དུ་མཐོང་བའི་ཕྱིར་དང༌། སྒྲོན་མ་ཉེ་བའི་སྔོན་རོལ་
དུ་ཤེས་པ་གཅིག་ལ་དུ་བའི་ས་ཕྱོགས་འགའ་ཡང་མ་མཐོང་བའི་ཕྱིར་རོ། །གང་གིས་དེ་འབྲས་བུ་ཉིད་དུ་ངེས་པར་འགྱུར་བ་སྒྲོན་མ་དམིགས་པ་ན་དམིགས་པའི་རྒྱུ་མཚན་ཉིད་ཀྱི་འགྱུར་པའི་བུམ་པ་མ་དམིགས་པ་ཡང་མ་ཡིན་ནོ། །རྒྱུ་དང་འབྲས་བུའི་དངོས་པོ་འདི་ལ་ནི་དམིགས་པའི་མཚན་ཉིད་དུ་གྱུར་པ་མ་དམིགས་པས་གང་གི་ཚེ་མེད་པར་ངེས་པ་དེའི་ཚེ་དེ་འབྲས་བུ་ཉིད་དུ་ངེས་པ་ཡིན་ནོ། །དེ་ཉིད་ཀྱི་ཕྱིར་དངོས་པོ་མེད་པར་ངེས་པ་དེ་ཡང་དམིགས་པའི་མཚན་ཉིད་ཀྱི་གྱུར་པ་མ་དམིགས་པ་སྔོན་དུ་འགྲོ་བ་ཅན་ཡིན་ལ། གང་གི་ཚེ་དམིགས་བའི་མཚན་ཉིད་ཀྱིར་གྱུར་པ་ཉིད་ཀྱི་འབྲས་བུ་དེ་མ་དམིགས་པ་དེའི་ཚེ་རྒྱུ་དང་འབྲས་བུའི་དངོས་པོར་ངེས་པ་ཡིན་ནོ་ཞེས་བརྗོད་དོ། །དེས་ན་འབྲས་བུ་དམིགས་པའི་སྔོན་རོལ་གྱི་དམིགས་པའི་མཚན་ཉིད་ཀྱིར་གྱུར་པ་མ་དམིགས་པ་གཅིག་དང༌། དམིགས་པ་ཡང་ཕྱིས་རྒྱུ་མི་དམིགས་པ་སྔོན་དུ་འགྲོ་བ་ཅན་གྱི་མི་དམིགས་པ་གཞན་ཏེ། དེ་ལྟར་མི་དམིགས་པ་གཉིས་དང་དམིགས་པ་གཅིག་ནི་འབྲས་བུའི་ཡུལ་ཅན་ཡིན་ལ། རྒྱུའི་ཡུལ་ཅན་ཡང་དམིགས་པ་དང་མི་དམིགས་པ་གཉིས་ཡིན་ནོ། །དེ་ལ་དམིགས་པ་དང་མི་དམིགས་པ་ལྔ་པོ་གང་དག་ཡིན་པ་དེ་དག་ཐམས་ཅད་མདོར་བསྡུས་ནས་རྒྱུད་པ་འབྲས་བུའི་དངོས་པོ་སྒྲུབ་པར་བྱེད་པའི་མངོན་སུམ་དང་མི་དམིགས་པར་བཤད་པ་ཡིན་ནོ། །དམིགས་པ་དང་མི་དམིགས་པའི་སྒྲུབ་པར་བྱེད་པ་ཅན་གྱི་འབྲས་བུ་ཞེས་བྱ་བ་དེ་ཡང་དུ་བ་ལ་ཡོད་དོ། །ལན་ཅིག་སྟེ་ཕྱོགས་གཅིག་དེ་ལྟར་ཞེས་བྱ་བ་བསྐྱེད་པར་བྱ་བ་ཉིད་དུ་མཐོང་བས་ཀྱང་དུ་བ་དེ་མེ་དེའི་འབྲས་བུར་ཞེས་བྱ་བ་བསྐྱེད་པར་བྱ་བར་འགྲུབ་སྟེ། མེ་རྒྱུ་མ་ཡིན་ལ་དུ་བ་ཡང་འབྲས་བུ་མ་ཡིན་ན་ནི་ཆུ་བཞིན་དུ་རྒྱུ་མ་ཡིན་པའི་མེ་ལས་ལན་ཅིག་ཀྱང་འབྱུང་བར་མི་འགྱུར་རོ། །ད་ནི་དུ་བ་མེ་མེད་པར་སྐྱེ་བ་མངོན་སུམ་དུ་གྲུབ་པར་བསྟན་པའི་ཕྱིར་གལ་ཏེ་གཙུབ་ཤིང་གཅུ་བས་བ་ལ་སོགས་པ་དག་ལས་ཞེས་བྱ་ལ་སོགས་པ་སྨོས་སོ། །སོགས་པའི་སྒྲས་ནི་མེ་ཤེས་ལ་སོགས་པ་གཟུང་ངོ༌། །མེ་མེད་ཀྱང་གཙུབ་ཤིང་གཙུབས་པ་དང་མེ་ཤེལ་དང་ཕྲད་པ་ཙམ་ལས་ཀྱང་དུ་བ་འབྱུང་བའི་ཕྱིར་རོ་ཞེ་ན། དེའི་འབྲས་བུ་མ་ཡིན་པ་ཉིད་དགག་པའི་ཕྱིར་མ་ཡིན་ཏེ་ཞེས་སྨོས་སོ། །བུད་ཤིང་གི་འགྱུར་བ་ནི་ཚིག་བ་ཉིད་
དེའི་རྒྱུའོ། །འདིས་ནི་འབྲས་བུའི་ཁྱད་པར་བསྟན་ཏོ། །དྲོ་བའི་རེག་པའི་ཁྱད་པར་ཞེས་བྱ་བ་ནི་རང་བཞིན་གྱི་ཁྱད་པར་སྟེ། འབྲས་བུ་དང་རང་བཞིན་གྱི་ཁྱད་པར་གྱིས་ཉེ་བར་མཚོན་པ་ནི་མེ་ཡིན་ནོ་ཞེས་བྱ་བའི་དོན་ཏོ། །གཙུབ་ཞིང་གཙུབས་པ་དང༌། མེ་ཤེལ་དང་ཕྲད་པ་དེར་ཡང་འབྲས་བུ་བུད་ཤིང་འགྱུར་བ་དང༌། རང་བཞིན་རེག་པའི་ཁྱད་པར་ཡང་ཡོད་པ་ཡིན་ན། དེས་ན་ཇི་ལྟར་མེ་མེད་པ་ཡིན། གཞན་ཡང་འབྲས་བུ་རྒྱུ་མེད་པར་འབྱུང་ན་ནི་རྒྱུ་མེད་པ་ཅན་ཉིད་དུ་འགྱུར་རོ། །མངོན་སུམ་གྱི་ཡུལ་ལ་འཁྲུལ་པ་མེད་པ་འབའ་ཞིག་ཏུ་མ་ཟད་ཀྱི། འཐད་པས་ཀྱང་འཁྲུལ་པར་མི་རིགས་སོ་ཞེས་བྱ་བའི་ཐ་ཚིག་གོ །འཐད་པ་སྟོན་པར་བྱེད་པ་ནི་གང་ཞིག་ཅེས་བྱ་བ་ཡིན་ནོ། །འབྲས་བུ་གང་ཞིག་སྐྱེད་པར་བྱེད་པའི་དངོས་པོ་གང་མེད་པར་འབྱུང་བའི་དངོས་པོ་དེ་ནི་དེའི་རྒྱུ་ཅན་མ་ཡིན་ནོ། །དེའི་རྒྱུ་ཅན་ཉིད་ནི་དེ་ལ་མི་འཁྲུལ་པས་ཁྱབ་པ་ཡིན་ཡང་དེ་དང་འགལ་བ་ནི་འཁྲུལ་པ་ཡིན་ཏེ། དེས་ན་ཁྱབ་པར་བྱེད་པ་འགལ་བ་དམིགས་པས་དེའི་རྒྱུ་ཅན་ཉིད་བཀག་པ་ཡིན་ནོ། །དུ་བ་ཡང་མེ་མེད་པར་འབྱུང་སྟེ་ཞེས་བྱ་བ་ནི་ཕྱོགས་ཀྱི་ཆོས་ཉེ་བར་བསྡུ་བའོ། །དེས་ན་དེའི་རྒྱུ་ཅན་དུ་མི་འགྱུར་རོ་ཞེས་བྱ་བ་ནི་སྒྲུབ་པར་བྱེད་པའི་འབྲས་བུའོ། །གལ་ཏེ་འདི་སྙམ་དུ་མེ་ཡོངས་སུ་སྤངས་ནས་གཞན་དུ་སྐྱེ་བ་དེ་ལྟ་ན་ཡང་གཞན་གྱི་རྒྱུ་ཅན་དུ་འགྱུར་གྱི། རྒྱུ་མེད་པ་ཅན་ནི་མ་ཡིན་ནོ་སྙམ་ན་མ་ཡིན་ཏེ་ཞེས་སྨོས་ཏེ། རྒྱུའི་ཚོགས་པ་གཞན་ཡིན་པ་དེ་ལ་ཡང་འབྲས་བུ་མ་ཡིན་པ་ཉིད་དུ་ཐལ་བ་མཚུངས་པའི་ཕྱིར་རོ། །འབྲས་བུ་མ་ཡིན་པ་ཉིད་སྟོན་པ་ནི་མངོན་པར་འདོད་པའི་རྒྱུའི་ཚོགས་དེ་མེད་ཀྱང་མེ་ཡོད་ན་འབྱུང་བའི་ཕྱིར་དེའི་འབྲས་བུ་ཉིད་མ་ཡིན་ནོ། །དེ་ལྟར་མི་དང་གཞན་ལས་ཀྱང་འབྱུང་བར་ཁས་བླངས་ཏེ་རྒྱུ་མེད་པ་ཉིད་དུ་བསྟན་ནས། ད་ནི་ཡང་ན་ཞེས་བྱ་བ་སོགས་པས་གཞན་ལས་འབྱུང་བ་ནི་མེ་ལས་སྐྱེ་བ་མ་ཡིན་ལ། མེ་ལས་འབྱུང་བ་ནི་གཞན་ལས་སྐྱེ་བ་མ་ཡིན་པར་བསྟན་པས་རྒྱུ་མེད་པ་ཉིད་དུ་བསྟན་ཏོ། །མེ་དེའམ་དངོས་པོ་གཞན་གང་ཡང་རུང་སྟེ། དེ་བསྐྱེད་པ་དེ་ལྟ་བུའི་རང་བཞིན་མ་ཡིན་པ་གང་ཡིན་པ་དེ་ལས་ཇི་ལྟར་འབྱུང་བར་འགྱུར་ཏེ། དུ་བ་མེ་ལས་སྐྱེ་བར་མཐོང་བ་ན་ནི་རྒྱུའི་ཚོགས་པ་གཞན་དེའི་སྐྱེད་པར་བྱེད་པ་མ་ཡིན་ཏེ། རྒྱུ་རྣམས་ཀྱི་ནུས་པ་སོ་སོར་
ངེས་པའི་ཕྱིར་རོ། །དེ་བཞིན་དུ་དུ་བ་གཞན་ལས་སྐྱེ་ན་ནི་མེ་དེ་སྐྱེ་བའི་རང་བཞིན་མ་ཡིན་པ་ཤེས་ཏེ། དེས་ན་དུ་བ་བསྐྱེད་པའི་རང་བཞིན་མ་ཡིན་པ་གཉི་ག་ལས་དུ་བ་སྐྱེ་བ་མ་ཡིན་པ་དང༌། འདི་སྐྱེ་བར་ཡང་སྣང་བ་དེའི་ཕྱིར་རྒྱུ་མེད་པ་ཅན་དུ་འགྱུར་རོ། །དེ་ཉིད་སྟོན་པ་ནི་རང་གིས་དེ་བདག་ཉིད་ཀྱིས་སྐྱེད་པར་བྱེད་པ་དེའི་རང་བཞིན་མ་ཡིན་པ་གང་ཡིན་པ་ནི་དེ་སྐྱེད་པར་བྱེད་པ་མ་ཡིན་པའི་ཕྱིར་ཏེ། རྒྱུ་མ་ཡིན་པའི་ཕྱིར་རོ། །གལ་ཏེ་རང་ཉིད་སྐྱེད་པར་བྱེད་པ་མ་ཡིན་ཡང་འབྲས་བུ་སྐྱེད་ན་ནི་ཐམས་ཅད་ཀྱིས་སྐྱེད་པའི་ཕྱིར་འགའ་ཡང་གང་ལས་ཀྱང་མི་སྐྱེ་བ་མེད་པར་འགྱུར་རོ། །དེས་ན་ཐམས་ཅད་ལ་ཐམས་ཅད་སྐྱེ་བར་ཐལ་བར་འགྱུར་བ་དེའི་ཕྱིར་རྒྱུ་མེད་པ་ཉིད་ལ་སྐྱོན་གང་འགྱུར་བ་དེ་འདི་ལ་འགྱུར་རོ། །ཅིག་ཤོས་ཀྱིས་སྐྱོན་སྤང་པའི་ཕྱིར་སྨྲ་པ། མེ་ལས་སྐྱེ་བར་མཐོང་བའི་དུ་བ་དེ་ཉིད་ལས་གཞན་ལས་སམ། གཞན་གྱི་རྒྱུ་ཅན་ཡང་མེ་ལས་འབྱུང་ངོ་ཞེས་སུ་ཟེར། འོ་ན་དེ་ཇི་ལྟར་ཡིན་ཞེ་ན། སྨྲས་པ། དངོས་པོ་གང་ཞིག་མེ་ལས་སྐྱེ་བ་དེ་དང་འདྲ་བ་གཞན་ལས་འབྱུང་བའི་ཕྱིར་རོ་ཞེ་ན། ཅིག་ཤོས་ཀྱིས་སྨྲས་པ། མེ་ལ་སོགས་པའི་ཚོགས་པ་དང་མི་མཐུན་པ་མི་འདྲ་བའི་རྒྱུ་ཚོགས་ལས་བྱུང་བའི་འབྲས་བུ་ཇི་ལྟར་དེ་དང་འདྲ་བ་ཡིན་ཏེ། འདྲ་བ་ཉིད་ནི་དོན་གཅིག་བྱེད་པར་ནུས་པ་ཅན་རྣམས་ཀྱི་ཁྱད་པར་ཅན་གྱི་དོན་བྱེད་པའི་རྒྱུ་མཚན་ཅན་དང༌། རྣམ་བ་གཅིག་ཏུ་འཛིན་པ་སྐྱེད་པར་ནུས་པས་བྱས་པ་ཡིན་ནོ། །རྒྱུའི་ཚོགས་ཐ་དད་པ་ལས་སྐྱེ་པ་ནི་རང་བཞིན་མི་འདྲ་བ་ཉིད་དུ་འགྱུར་བར་རིགས་པ་ཡིན་ཏེ། དཔེར་ན་སཱ་ལུའི་ས་བོན་དང་ནས་ཀྱི་ས་བོན་ལ་སོགས་པའི་ཚོགས་པ་ལས་མྱུ་གུ་མི་འདྲ་བ་ཉིད་ཡིན་པ་བཞིན་ནོ། །འདི་ཉིད་སྟོན་པ་ནི་དེ་དང་འདྲ་བ་ལས་བྱུང་བའི་ཕྱིར་དེ་དང་འདྲ་བའི་དངོས་པོར་འགྱུར་བ་ཡིན་ནོ། །གལ་ཏེ་མཐོང་བའི་རྣམ་པའི་རྒྱུའི་ཚོགས་དང་མི་འདྲ་བའི་རྒྱུའི་ཚོགས་པ་དག་ལས་དེ་དང་འདྲ་བ་འབྱུང་ན་ནི། རྒྱུ་དེ་དག་གི་ནུས་པ་ངེས་པ་དེ་མེད་པས་རྒྱུའི་ཐ་དད་པ་འབྲས་བུ་ཐ་དད་པར་བྱེད་པ་མ་ཡིན་ནོ། །འབྲས་བུ་དག་ནི་ཕན་ཚུན་རིགས་མི་མཐུན་པ་དང་འགའ་ཞིག་ནི་རིགས་མཐུན་པར་ཡང་མཐོང་བ་ཡིན་ནོ། །དེ་ལས་ཐ་དད་པར་འདྲ་བ་ལས་འགའ་ཞིག་དང་འདྲ་
བ་དང་འགའ་ཞིག་ནི་མི་འདྲ་བར་མཐོང་བ་ཡིན་ལ། གཅིག་ཅིག་འགའ་ཞིག་དང་འདྲ་བ་དང་འགའ་ཞིག་དང་མི་འདྲ་བ་གང་ཡིན་པ་དེ་ནི་རྒྱུ་མཚན་མེད་པ་ཅན་ཡང་མ་ཡིན་ནོ། །འདྲ་བ་དང་མི་འདྲ་བ་ལས་མ་གཏོགས་བའི་དངོས་པོའི་ངོ་བོ་འགའ་ཞིག་ཡོད་པ་ཡང་མ་ཡིན་ཏེ། དེས་ན་དངོས་པོའི་རང་བཞིན་གྱི་རྒྱུ་གང་ཡིན་པ་དེ་ཉིད་འདྲ་བ་དང་མི་འདྲ་བའི་རྒྱུ་ཡིན་ནོ། །དེ་ལྟ་ན་ཡང་རྒྱུ་ཐ་དད་པ་ཅན་གྱི་ནས་ཀྱི་མྱུ་གུ་དང༌། སཱ་ལུའི་མྱུ་གུ་དག་ནི་ནུས་པ་ཐ་དད་པ་དང༌། རྣམ་པ་ཐ་དད་པར་གཟུང་བར་བྱ་བ་རང་བཞིན་ཐ་དད་བ་ཡིན་ལ། རྒྱུ་མཚུངས་པ་ཅན་སཱ་ལུའི་མྱུ་གུ་དག་ནི་དོན་གཅིག་བྱེད་པར་ནུས་པ་དང༌། རྣམ་པ་གཅིག་ཏུ་གཟུང་བར་བྱ་བའི་རང་བཞིན་ཡིན་ནོ། །གང་གི་ཚེ་རྒྱུ་ཐ་དད་པ་དང་འབྲེལ་ཀྱང་ཅིག་ཤོས་དང་མཚུངས་ན་ནི་དེའི་ཚེ་ཅིག་ཤོས་དེའི་གཞན་ལས་ཐ་དད་པ་དེ་ནི་རྒྱུ་མེད་པ་ཅན་ཉིད་དོ། །རང་བཞིན་གཞན་ཡང་མེད་པའི་ཕྱིར་ཐམས་ཅད་དུ་རྒྱུ་མེད་པ་ཅན་དུ་འགྱུར་རོ། །དེ་ལ་ཡང་ཞེས་བྱ་བ་མཐའ་དག་གི་སྣ་ཚོགས་ཀྱི་རང་བཞིན་རྒྱུ་མེད་པ་ལ་ཡང་ཡུལ་དང་དུས་དང་རང་བཞིན་ངེས་པ་མི་རུང་བའི་ཕྱིར་རོ་ཞེས་ཉེས་པ་བཤད་ཟིན་ཏོ། །ཐམས་ཅད་ཐམས་ཅད་ལས་སྐྱེ་བར་ཡང་འགྱུར་རོ་ཞེས་བྱ་བ་འདི་ནི་སྐྱོན་གཞན་ཡིན་ཏེ་གང་གི་ཚེ་རྒྱུ་རྣམས་ཀྱི་ནུས་པ་མ་ངེས་པ་དེའི་ཚེ་བསྐྱེད་པར་བྱ་བ་ཡིན་པ་ཉིད་ཀྱིས་ཐམས་ཅད་སྐྱེད་པར་བྱེད་པ་ཡིན་པའི་ཕྱིར་ཐམས་ཅད་ལས་སྐྱེད་པར་བྱེད་པ་ཡིན་བའི་ཕྱིར་ཐམས་ཅད་ལས་སྐྱེ་བར་འགྱུར་རོ། །དེའི་ཕྱིར་ཇི་སྲིད་དུ་འགྲོ་བ་ན་དངོས་པོ་གཅིག་གནས་པ་དེ་སྲིད་དུ་དེའི་འབྲས་བུ་སྐྱེ་བ་ལྡོག་པ་མེད་པར་འགྱུར་རོ། །དེའི་ཕྱིར་འདི་གཉི་ག་ལས་སྐྱེན་གཅིག་ལ་འཁྲུལ་པའི་ཕྱིར། རྒྱུ་མེད་པ་ཉིད་དམ་ཐ་དད་པ་དང་ཐ་མི་དད་པ་དག་རྒྱུ་མེད་པའི་ཕྱིར་རྒྱུ་མེད་པ་ཉིད་དུ་འགྱུར་རོ། །ཐམས་ཅད་ཐམས་ཅད་ལས་སྐྱེ་བར་ཐལ་བ་ནི་རྒྱུ་མེད་པའི་སྐབས་ཉིད་ཡིན་ཏེ། རྒྱུ་མེད་ན་ནི་ཐམས་ཅད་ལ་ཐམས་ཅད་ཡོད་པར་ཐལ་ཞིང༌། ཐམས་ཅད་རྒྱུ་ཡིན་པ་ཉིད་ལ་ཡང་ཐལ་བའི་འདི་ཁྱད་པར་མེད་པས་རྒྱུ་མེད་པ་ཉིད་དོ། །གང་གི་ཕྱིར་དེ་ལྟར་ཐམས་ཅད་ལས་སྐྱེ་བར་ཐལ་བ་དེའི་ཕྱིར་རྒྱུ་ཐ་དད་པ་དང་ཐ་དད་པ་མ་ཡིན་པ་ལས། འབྲས་བུ་ཐ་དད་པ་དང་ཐ་དད་པ་མ་ཡིན་པར་འགྱུར་བ་ཡིན་ནོ། །དེའི་ཕྱིར་དུ་བ་ནི་མཐོང་བའི་རྣམ་པ་དང་རིགས་མི་མཐུན་པའི་དོན་ལས་མི་འབྱུང་གི །གང་
ལས་སྐྱེ་བར་མཐོང་བ་དེ་ཁོ་ན་ལས་འབྱུང་བ་ཡིན་ཏེ། དེ་ལྟ་མ་ཡིན་ན་ནི་རྒྱུ་མེད་པར་ཐལ་བར་འགྱུར་རོ། །རྒྱུ་མེད་པ་ཉིད་ཡིན་ན་ཡང་དངོས་པོ་རྟག་ཏུ་ཡོད་པའམ་མེད་པར་འགྱུར་ཏེ། དངོས་པོ་རྒྱུ་མེད་པ་ནི་དོན་གཞན་ལ་མི་ལྟོས་པའི་ཕྱིར་རོ། །ཅིའི་ཕྱིར་ཞེ་ན། རེས་འགའ་འབྱུང་བ་ནི་འབྲས་བུའི་ཡུལ་ཉིད་དུ་ལྟོས་པ་ལས་ཡིན་པའི་ཕྱིར་རོ། །འདི་ཉིད་རྣམ་པར་དགྲོལ་བའི་ཕྱིར་དུ་བ་དེ་ཞེས་བྱ་བ་སྨོས་སོ། །དུ་བརྒྱ་མེད་པ་ལས་བྱུང་ན་ནི་གེས་འགའ་བར་མི་འགྱུར་ཏེ། དེ་འབྱུང་བ་ལ་མ་ཚང་བ་མེད་པའི་ཕྱིར་རོ། །འདོད་པ་ཞེས་བྱ་བ་ནི་ཡོད་པའི་དུས་སོ། །དེའི་ཚེ་ཡང་ཞེས་བྱ་བ་ནི་ཡོད་པའི་དུས་སུ་ཡང་ངོ༌། །དེ་ཡོད་པའི་དུས་ནི་དེ་བསྐྱེད་པར་བྱ་བ་ལ་མེད་པའི་དུས་དང་ཁྱད་པར་མེད་པའི་ཕྱིར་རོ། །འདི་སྙམ་དུ་གལ་ཏེ་དངོས་པོ་རྒྱུ་ལ་མི་ལྟོས་ཀྱང་རེས་འགའ་བར་འགྱུར་བ་ཅི་འགལ་ཞེ་ན། ལྟོས་པ་དང་བཅས་པ་རྣམས་ནི་ཞེས་སྨོས་སོ། །རེས་འགའི་དངོས་པོ་ནི་རེས་འགའ་བའོ། །བསམ་པ་ནི་འདི་ཡིན་ཏེ། ཡུལ་དེ་ལ་ལྟོས་པ་ལས་རྒྱུ་མཚན་གཞན་ནི་མེད་དོ། །འགའ་ཞིག་འགའ་ཞིག་གི་རྒྱུ་ཞེས་བྱ་བར་འདོད་པ་གང་ཡིན་པ་དེ་ཡང༌། གང་གི་ཕྱིར་དེ་ཡོད་ན་འབྲས་བུ་ཡོད་ལ། མེད་ན་མེད་པས་ན་དེ་ཡོད་པ་དང་མེད་པའི་རྗེས་སུ་བྱེད་པའི་མཚན་ཉིད་ཅན་གྱི་ལྟོས་པས་རྒྱུར་འགྱུར་བ་ཡིན་ལ་དེ་ནི་འབྲས་བུའི་དུས་ལ་ཡང་ཁྱད་པར་མེད་དེ། དེས་ན་དུས་ནི་རྒྱུ་ཡིན་ནོ་ཞེས་གང་བཤད་པ་ནི། ཡོད་པ་དང་མེད་པའི་དུས་ཏེ། དུས་དེ་དག་ཏུ་དོན་དེ་འབྱུང་བར་རུང་བ་དང་མི་རུང་བ་གང་ཡིན་པ་དེ་དང་ལྡན་པའི་ཕྱིར་རོ། །ཡོད་པའི་དུས་སུ་ནི་དེ་སྐྱེད་པར་རུང་བ་དང་ལྡན་པ་ཡིན་ལ། མེད་པའི་དུས་ན་ནི་དེ་སྐྱེད་པར་མི་རུང་བ་དང་ལྡན་པ་ཡིན་ཏེ། དེས་ན་རེས་འགའ་བ་ཡིན་ལ། རེས་འགའ་བ་ཡིན་ན་ཡང་ལྟོས་པ་དང་བཅས་པ་ཡིན་ནོ། །ཇི་ལྟར་ན་ཡོད་པ་དང་མེད་པའི་དུས་དེ་དག་རུང་བ་དང་མི་རུང་བ་ཡིན་ཞེ་ན། ཡུལ་དང་དུས་རུང་བ་དང་མི་རུང་བ་འདྲ་བ་ཅན་ཞེས་སྨོས་ཏེ། གལ་ཏེ་ཡོད་པ་དང་མེད་པའི་ཡུལ་དང་དུས་དག་འདྲ་བར་རུང་བ་དང་མི་རུང་བ་ཉིད་དུ་འདོད་ན། དེ་ལྟ་ན་ནི་དེའི་ཡུལ་དང་དུས་ཞིག་དེ་དང་ལྡན་པ་འབྲས་བུ་དང་ལྡན་པའམ། ཅིག་ཤོས་ཏེ་དེ་དང་མི་ལྡན་པ་དེ་དག་ཏུ་ངེས་པ་མི་འཐད་དོ། །རུང་བ་དང་མི་རུང་བར་ཁྱད་པར་མེད་ན་ནི་ཐམས་ཅད་དེ་དང་ལྡན་པའམ་དེ་དང་མི་ལྡན་པར་
འགྱུར་གྱི་ཡུལ་དང་དུས་འགའ་ཞིག་ནི་དེ་དང་ལྡན་པ་ཡིན་ལ། གཞན་ནི་མ་ཡིན་ནོ་ཞེས་བྱ་བ་གང་ཡིན་པའི་ངེས་པ་འདིར་ནི་མི་འགྱུར་རོ། །དེ་ལྟར་མི་འཐད་པ་ཡིན་ཏེ། མི་རུང་བ་དེའི་ཕྱིར་གང་ན་དངོས་པོ་འགྱུར་བའི་ཡུལ་དང་དུས་དེ་ནི་དངོས་པོའི་རྒྱུ་ཡིན་ལ། གང་དུ་མི་འགྱུར་བ་དེ་དག་ནི་མི་རུང་བ་ཉིད་ཀྱི་རྒྱུ་མ་ཡིན་ནོ། །རུང་བ་ཉིད་དེ་ཡང་རྒྱུའི་དངོས་པོ་ལས་གཞན་པའི་དོན་ནི་མ་ཡིན་གྱི། འོན་ཀྱང་རྒྱུའི་དངོས་པོ་ཉིད་དོ། །དུས་ནི་འདུ་བྱེད་དག་ལས་གཞན་མ་ཡིན་གྱི། འོན་ཀྱང་དོན་དེ་སྐྱེ་བའི་རྒྱུ་གྲང་བའི་རེག་པ་ལ་སོགས་པའི་རྡུལ་ཕྲ་རབ་ཐམས་ཅད་དུ་ཁྱབ་པ་ནི་དགུན་ལ་སོགས་པའི་ཐ་སྙད་བརྟེན་པ་ཡིན་ནོ། །དེའི་ཕྱིར་ལྟོས་པར་བྱ་བའི་ཡུལ་དང་དུས་ཀྱི་ཁྱད་པར་གང་ཡིན་པ་དེ་ཉིད་རྒྱུ་ཡིན་ནོ། །དེའི་ཕྱིར་ཡུལ་དང་དུས་འགའ་ཞིག་སྤངས་ནས་ཡུལ་དང་དུས་གཞན་དག་ན་ཡོད་པའི་དངོས་པོ་ཡུལ་དང་དུས་དེའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པས་དེའི་རྒྱུ་ཅན་ཡིན་ཏེ། དེ་ལྟ་ན་ལྟོས་པ་དང་བཅས་པ་ཡིན་ནོ། །གལ་ཏེ་ཡུལ་དང་དུས་ངེས་སུ་ཆུག་མོད། དེ་ལྟ་ན་ཡང་ལྟོས་པ་དང་བཅས་པ་ཇི་ལྟར་འགྱུར་ཞེ་ན། འདི་ལྟར་ཞེས་སྨོས་སོ་ཆུག་མོད། དེ་ལྟ་ན་ཡང་ལྟོས་པ་དང་བཅས་པར་ཇི་ལྟར་འགྱུར་རོ་ཞེ་ན། འདི་ལྟར་ཞེས་སྨོས་སོ། །གང་གི་ཕྱིར་ཡུལ་དང་དུས་འགའ་ཞིག་སྤངས་ནས། ཡུལ་དང་དུས་འགའ་ཞིག་ན་ཡོད་པ་ཉིད་ནི་ལྟོས་པར་བརྗོད་པ་ཡིན་ནོ། །གལ་ཏེ་ལྟོས་པ་ཕན་འདོགས་པ་མ་ཡིན་ནམ་ཞེ་ན། བདེན་ཏེ། འདི་ལ་ཡང་ཡུལ་དང་བཅས་པར་ཁོ་ན་སྟེ། ཡུལ་དང་དུས་དེ་དག་གིས་བྱས་པའི་ཕན་པ་ལ་མི་ལྟོས་པ་ནི་ཡུལ་དང་དུས་དེར་ཡོད་པར་ངེས་པ་མི་རུང་བའི་ཕྱིར་རོ། །འདི་ལྟར་དེ་ལས་རང་བཞིན་གྱི་ཁྱད་པར་མ་སྐྱེས་པ་ནི། རང་གི་ངོ་བོས་ཡུལ་ལམ་དུས་འགའ་ཞིག་ཏུ་ཡང་ཁྱད་པར་ཡོད་པ་མ་ཡིན་ནོ། །འབྱུང་བའི་ཆོས་ཅན་ཡིན་པའི་ཕྱིར་ན་ཐམས་ཅད་དུ་འབྱུང་བར་འགྱུར་རོ། །ལ་ལར་འགྱུར་བ་ནི་ཡུལ་དང་དུས་དེ་དག་གིས་རང་བཞིན་གྱི་ཁྱད་པར་སྐྱེད་པ་ཡིན་པས། སྐྱེད་པར་བྱེད་པ་ལ་རྒྱུའི་དངོས་པོར་ལྟོས་པ་ཡིན་ནོ། །ཁྱད་པར་ལྟོས་པ་གང་ཡིན་པ་དེ་ཉིད་ནི་རྒྱུ་ཡིན་ལ། རྒྱུ་དང་ལྡན་པའི་ཆོས་ཡུལ་དང་དུས་ངེས་པ་ཉིད་གང་ཡིན་པ་དེ་ནི་དུ་བ་ལ་ཡང་ཡོད་དེ། དེའི་ཕྱིར་དུ་བ་ནི་རྒྱུ་དང་ལྡན་པ་ཡིན་ནོ། །
རྒྱུ་དང་ལྡན་པར་ཤེས་པ་ན་ཡང་ཡུལ་དུས་དང་ལྡན་པའི་རྫས་ཡོད་པ་གང་དུ་དུ་བ་བསྐྱེད་པར་མཐོང་ལ། དེ་མེད་ན་མ་མཐོང་བ་ནི་མེ་དེ་སྐྱེད་པར་བྱེད་པ་ཉིད་དུ་ལྟོས་པའི་ཕྱིར་འདིའི་ངེས་པ་བསྐྱེད་པར་བྱ་བ་དེའི་རྒྱུ་ཅན་གྱི་རང་བཞིན་ཡིན་ཏེ། གཞན་དུ་ན་དེས་བསྐྱེད་པར་བྱ་བ་ཉིད་མ་ཡིན་ན་ནི་ལན་འགའ་སྟེ། ཕྱོགས་གཅིག་ཀྱང་སྐྱེད་པར་བྱེད་པ་མ་ཡིན་པའི་མེ་དེ་ལས་མེད་པའི་ཕྱིར་ཏེ། ཆུ་ལས་བཞིན་ནོ། །འབྱུང་བ་འང་ཡིན་ཏེ་དེའི་ཕྱི་མེ་དེར་ངེས་པ་ཡིན་ན། ཇི་ལྟར་གཞན་ལས་འབྱུང་བར་འགྱུར། འབྱུང་ན་ནི་དེ་དུ་བ་ལ་མ་ཡིན་ཏེ། འོན་ཀྱང་དངོས་པོ་གཞན་ཉིད་དུ་འགྱུར་རོ། །གང་གི་ཕྱིར་མེ་ངེ་བསྐྱེད་པའི་དོན་ནི་འཇིག་རྟེན་ན་དུ་བ་ཞེས་བརྗོད་པ་ཡིན་ནོ། །ཇི་ལྟར་མེས་བསྐྱེད་པའི་རང་བཞིན་དུ་བ་ཡིན་པ་དེ་བཞིན་དུ་རྒྱུ་ཡང་འབྲས་བུ་དེ་ལྟ་བུ་སྐྱེད་པའི་རང་བཞིན་གང་ཡིན་པའོ། །དེ་ལས་ཅིར་འགྱུར་ཞེ་ན། དེས་ན་འབྲས་བུ་བ་དེ་གཞན་ལས་ཞེས་བྱ་བ་མངོན་པར་འདོད་པའི་རྒྱུ་ཚོགས་པ་ལས་གཞན་མེ་མ་ཡིན་པ་ལ་སོགས་པ་དེ་ལས་ཀྱང་འབྱུང་ན་ནི་མངོན་པར་འདོད་པའི་རྒྱུ་ཚོགས་པ་དེ་དུ་བ་སྐྱེད་པ་དེའི་རང་བཞིན་མ་ཡིན་ནོ། །ཡོད་པ་དང་མེད་པའི་རྗེས་སུ་ངེས་པས་ལྟོས་པར་བྱ་བ་ནི་འབྲས་བུའི་སྐྱེད་པར་བྱེད་པར་བརྗོད་པ་ཡིན་ནོ། །རྒྱུའི་ཚོགས་པ་འདི་ནི་དུ་བས་ལྟོས་པར་བྱ་བ་མ་ཡིན་པས་སྐྱེད་པར་བྱེད་པ་མ་ཡིན་ནོ། །དེས་ན་ལན་འགའ་ཡང་སྐྱེད་པར་མི་འགྱུར་རོ། །ཡང་ན་མེ་ལས་གཞན་དེས་སྐྱེད་པ་དེ་དུ་བ་མ་ཡིན་ཏེ། དུ་བ་སྐྱེད་པའི་རང་བཞིན་མ་ཡིན་པ་གང་ཡིན་པ་དེ་ལས་བྱུང་བའི་ཕྱིར་རོ། །གལ་ཏེ་བསྐྱེད་པའི་རང་བཞིན་མ་ཡིན་པ་ནི་མ་ཡིན་ཏེ། དེ་ལས་ཀྱང་དུ་བ་སྐྱེ་བའི་ཕྱིར་རོ་ཞེ་ན། དེའི་ཞེས་བྱ་བ་ནི་དུ་བ་སྐྱེད་པའི་རང་བཞིན་ཉིད་དུ་ཁས་ལེན་ན་ནི་དེ་ཉིད་མེ་ཡིན་ནོ། །གལ་ཏེ་དུ་བའི་སྐྱེད་པར་བྱད་པ་ནི་གཉིས་ཏེ། མེ་ལ་སོགས་པའི་ཚོགས་དང་མངོན་པར་འདོད་པ་གཞན་ཡིན་ཏེ། དེས་ན་སྐྱེད་པར་བྱེད་པ་གང་ཡིན་པ་དེ་ནི་མ་ཡིན་ནོ་ཞེས་བྱ་བར་མི་འགྱུར་ཞིང་ཐམས་ཅད་ལས་སྐྱེ་བ་ཡང་མ་ཡིན་ཏེ། གཉིས་ཉིད་སྐྱེད་པར་བྱེད་པའི་རང་བཞིན་ཡིན་པའི་ཕྱིར་རོ་ཞེ་ན། འདི་ལ་བསམ་པ་འདི་ཡིན་ཏེ། དུ་བའི་གཞན་ལས་ཐ་དད་པ་ནི་རྒྱུ་མེད་པ་འམ། གཞན་གྱི་རྒྱུ་ཅན་ནི་མ་ཡིན་གྱི། འོན་ཀྱང་རྒྱུ་ཐ་དད་པ་སྔོན་དུ་འགྲོ་བ་ཅན་ཡིན་ནོ། །དེ་ལ་
མཐོང་བ་དང་རིགས་མི་མཐུན་པ་ལས་ཀྱང་རྐྱེན་ནི་རྒྱུ་ཐ་དད་པར་མི་འགྱུར་རོ། །དེ་ཉིད་ཀྱི་ཕྱིར་ཐ་མི་དད་པ་ལས་ཀྱང་ཐ་མི་དད་པ་མ་ཡིན་པའི་ཕྱིར་རྒྱུ་མེད་པ་ཉིད་དུ་འགྱུར་རོ། །དེས་ན་འབྲས་བུ་རྒྱུ་དང་ལྡན་པར་ཁས་ལེན་པས་རྒྱུ་ཐ་དད་པ་ལས་ཐ་དད་པར་ཁས་ལེན་བླང་བར་བྱའོ། །དེས་ན་མེ་ལས་སྐྱེ་བར་མཐོང་བའི་རང་བཞིན་གང་ཡིན་པ་དེ་འདྲ་བའི་སྐྱེད་པར་བྱེད་པ་ནི་མེ་ཁོ་ན་ཡིན་པས་དུ་བ་མེ་ལས་འཁྲུལ་པ་མེད་དོ། །གལ་ཏེ་མེས་བསྐྱེད་པར་བྱ་བ་ཉིད་དུ་བ་ཡིན་ནོ་ཞེས་བྱ་བའི་ངེས་པ་མེད་པ་མ་ཡིན་ནམ། སྒྲ་རང་འདོད་ཀྱིས་སྦྱོར་བ་ན་གཞན་ཡང་དུ་བར་འགྱུར་རོ་ཞེ་ན། གཞན་ལ་ཡང་དུ་བར་བརྗོད་ལ་ནི་རག་ན། དེ་དག་ལས་གང་ཞིག་མེས་བསྐྱེད་པའི་དུ་བ་དེ་ནི་གཞན་ལས་མ་ཡིན་པའི་ཕྱིར་ངེས་པ་ཉིད་དོ། །ད་ལྟ་ནི་འཇིག་རྟེན་ན་མགྲིན་པ་དགུ་བ་ལ་སོགས་པའི་དོན་གཅིག་བྱེད་པ་ཉིད་ཀྱི་རྣམ་པ་གཅིག་ཏུ་ཞེན་པར་རུང་བའི་དོན་ལ་ངུ་བའི་སྒྲ་འཇུག་ཅིང༌། དུ་བ་དེ་ཡང་ཁྱད་པར་ཅན་གྱི་དོན་བྱེད་པ་རྣམ་པ་གཅིག་ཏུ་ཤེས་པའི་ཡུལ་གྱི་དོན་ལ་ངེས་པའི་ཕྱིར་མེས་བ་སྐྱེད་བ་ཉིད་ཡིན་གྱི་དུ་བའི་སྒྲས་བརྗོད་པར་བྱ་བ་ཉིད་ནི་མ་ཡིན་ནོ། །དེ་བཞིན་དུ་བུད་ཤིང་འགྱུར་བའི་རྒྱུ་ཉིད་ཀྱིས་རྣམ་པ་གཅིག་ཏུ་འཛིན་པའི་གཟུང་བར་བྱ་བའི་མེ་ནི་དུ་བའི་སྐྱེད་བྱེད་དུ་མཐོང་བ་ཡིན་ཏེ། དེའི་ཕྱིར་སྲེག་པའི་རྣམ་པར་ཞེན་པར་རུང་བ་དང༌། འབྲེལ་པ་དུ་བའི་རྣམ་པར་འཛིན་པར་རུང་བའི་དོན་ཡིན་ནོ་ཞེས་བརྗོད་པ་ཡིན་ཏེ། འདི་སྐད་དུ་རྣམ་འགྲེལ་ལས་དེ་བཞིན་དུ་མེ་ཐ་དད་ཀྱང་མེ་ཤེས་པའི་རྟེན་ཡིན་ནོ་ཞེས་བྱ་བ་དང༌། དེ་བཞིན་དུ་གཞན་ལ་ལྟོས་པའི་མེར་རྟོགས་པའི་ཡན་ལག་ཉིད་ལས་བྱུང་བ་ན། དུ་བ་དེ་ལ་འཁྲུལ་པ་མེད་པའི་ཕྱིར། འབྲས་བུར་གྱུར་པ་དེ་བཞིན་དུ་གཞན་ཡང་མ་ཡིན་ནོ་ཞེ་ནའོ། །དོན་འདི་ཉིད་སྨོས་པ་ནི་གལ་ཏེ་བརྒྱ་བྱི་ན་སྤྱི་བོ་མེ་ཉིད་ཀྱི་རང་བཞིན་གང་ཡིན་པ་སྟེ། མེས་བསྐྱེད་པར་བྱ་བའི་དུ་བ་སྐྱེད་པ་ཡིན་ན་ནི་དེ་ཉིད་མེ་ཡིན་ཏེ། མེའི་བསྐྱེད་པར་བྱ་བ་སྐྱེད་པར་བྱེད་པའི་ཕྱིར་རོ། །འོན་ཏེ་མེའི་རང་བཞིན་གང་ཡིན་པ་དེ་མ་ཡིན་ན་ནི་ཇི་ལྟར་ནི་གཞི་དེ་ལས་དུ་བ་འབྱུང་བ་ཡིན། ཅིའི་ཕྱིར་མེའི་རང་བཞིན་མ་ཡིན་པ་ལས་དུ་བ་མི་འབྱུང་ཞེ་ན། བཤད་པ། དུ་བ་རྒྱའི་རང་བཞིན་གང་ཡིན་པ་སྟེ། དེ་ལས་སྐྱེ་བའི་ཕྱིར་དེའི་ནུས་པ་སྟེ། དུ་བསྐྱེད་པར་བྱེད་པའི་
ནུས་པ་ཉིད་ཀྱིས་དངོས་པོ་གཞན་དག་ལས་བྱེ་བྲག་ཏུ་ལྡན་པ་ཡིན་ཏེ། སྐྱེད་པར་བྱེད་པ་ཉིད་ཀྱིས་ལྟོས་པར་བྱ་བ་མ་ཡིན་པ་གཞན་དག་ལས་ཐ་དད་པ་ཡིན་ནོ་ཞེས་བྱ་བའི་དོན་ཏོ། །ད་ནི་དུ་བ་གཞན་ལས་འབྱུང་ན་ནི་དུ་བའི་རྒྱུ་མ་ཡིན་པ་ལས་སྐྱེས་པར་འགྱུར་ལ། དུ་བ་དུ་བའི་རྒྱུ་མ་ཡིན་པ་ལས་བྱུང་བར་རྟོགས་པ་ན་མཐའ་དག་གི་སྣ་ཚོགས་རྒྱུ་མེད་བ་ཅན་དུ་འགྱུར་བའི་ཕྱིར་དེ་ཡང་རྒྱུ་མེད་པ་ཅན་དུ་འགྱུར་རོ། །ད་ནི་ཞེས་བྱ་བ་ནི་རྒྱུ་ཐ་དད་བ་ལས་འབྲས་བུ་ཐ་དད་པར་ཁས་བླངས་པ་ནའོ། །ལྷན་ཅིག་བྱེད་པ་ཐ་དད་པ་ལས་ཞེས་བྱ་བ་ནི་རིགས་ཀྱིས་གཅིག་གི་ཚིག་ཡིན་ཏེ། ལྷན་ཅིག་བྱེད་པར་ཐ་དད་པ་རྣམས་ལས་ཞེས་བྱ་བའི་ཐ་ཚིག་གོ །དེ་ཉིད་སྟོན་པ་ནི་དཔེར་ན་མིག་དང་གཟུགས་ལ་སོགས་པ་དག་ལས་ཤེས་པར་བྱ་བ་ཡིན་ཏེ། སོགས་པ་སྨོས་པས་སྣང་བ་དང་ཡིད་ལ་བྱེད་པ་ལ་སོགས་པའོ། །འདི་བཟློག་པའི་ཕྱིར་བཤད་པ། དངོས་པོ་གཅིག་བུ་སྐྱེད་པར་བྱེད་པ་སྟེ། བྱེད་པ་པོའི་བྱ་བ་དང་ལྡན་པའམ། དེའི་རང་བཞིན་ཏེ་སྐྱེད་པར་བྱེད་པའི་རང་བཞིན་ཡིན་པ་ནི་འགའ་ཡང་མེད་དོ། །འོན་ཁྱེད་ཀྱི་སྐྱེད་པར་བྱེད་པར་འདོད་པ་གང་ཡིན་ཞེ་ན། བཤད་པ། ཚོགས་པ་སྐྱེད་པར་བྱེད་པ་ཡིན་ལ། སྐྱེད་པར་བྱེད་པའི་རང་བཞིན་ཡང་དེ་ཉིད་ཡིན་ནོ། །ཇི་ལྟར་ན་སྐྱེད་པར་བྱེད་པ་ཉིད་ལས། དེའི་རང་བཞིན་ལོགས་ཤིག་ཏུ་བརྗོད་དེ། གང་གི་ཕྱིར་གང་ཞིག་སྐྱེད་པར་བྱེད་པའི་དངོས་པོ་དེ་ཉིད་ནི་དེའི་རང་བཞིན་ཡིན་ཏེ། སྐྱེད་པར་བྱེད་པ་མ་ཡིན་པ་ཡང་དེའི་རང་བཞིན་ཉིད་ཡིན་ན་ནི་ཧ་ཅང་ཐལ་བའི་ཕྱིར་རོ་ཞེ་ན། བདེན་ཏེ། སྐད་ཅིག་མ་མ་ཡིན་པར་སྨྲ་བ་ནི་ལྷན་ཅིག་བྱེད་པ་སོ་སོ་བདག་སྐྱེད་པར་བྱེད་པའི་རང་བཞིན་ཡིན་ཡང༌། སྐྱེད་པར་བྱེད་པ་ནི་ཚོགས་པ་ཡིན་པར་འདོད་ལ། དེ་ཡང་ཁོ་བོ་ཅག་ནི་མི་འདོད་དེ། གང་གི་ཕྱིར་འགའ་ཞིག་སྐྱེད་པར་བྱེད་པ་མ་ཡིན་ན། སྐྱེད་པར་བྱེད་པའི་རང་བཞིན་ཡང་མ་ཡིན་ནོ། །དེ་ཉིད་ཀྱི་ཕྱིར་འབྲས་བུ་མཐོང་བ་ལས་དེ་འདྲ་བའི་ཚོགས་པ་རྗེས་སུ་དཔག་པར་བྱ་བ་ཡིན་ནོ། །དོན་དུ་གཉེར་བ་ཉིད་ཀྱིས་ནི་ཚོགས་པའི་ཁོངས་སུ་གཏོགས་པ་གཅིག་རྗེས་སུ་དཔག་པ་ཡིན་ནོ། །གལ་ཏེ་མིག་ལ་སོགས་པ་མང་པོ་རྣམས་གཅིག་གི་སྐྱེད་པར་བྱེད་པ་ཡིན་ན། ཇི་ལྟར་རྒྱུ་ཐ་དད་པ་ལས་འབྲས་བུ་ཐ་དད་པར་
འགྱུར་བ་འམ། དེ་དག་སོ་སོར་ནུས་པར་ཡང་ཇི་ལྟར་བརྗོད་དེ། སྐད་ཅིག་གི་འོག་རོལ་གྱི་བུམ་པ་ཚོགས་པ་བསྐྱེད་པར་ཡང་གང་གིས་འགྱུར་ཞེ་ན། ཚོགས་པ་དེ་ཉིད་ཅེས་སྨོས་ཏེ། དེ་དག་ལས་རྒྱུན་འཇུག་པའི་འབྲས་བུའི་ཁྱད་པར་སོ་སོར་འགྱུར་བ་ཡིན་ཏེ། དེས་ན་སོ་སོར་ནུས་པ་དང་ཐ་དད་པར་བྱད་པ་ཉིད་ཡིན་ཞིང༌། རྒྱུན་འཕེལ་བའི་ཕྱིར་སྐྱེད་པར་བྱེད་པ་ཡང་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །སྐྱེད་པར་བྱེད་པའི་ཚོགས་གང་ཡིན་པ་དེ་ཉིད་ནི། འབྲས་བུ་རང་གི་ངོ་བོ་དེའི་གནས་པ་དེའི་རྟེན་ཡིན་ནོ། །ལྷན་ཅིག་བྱེད་པའི་གང་དག་ལས་འབྲས་བུ་དེ་སྐྱེས་པ་དེ་དག་ལས་དེའི་ཁྱད་པར་སོ་སོར་འགྱུར་བ་ཡིན་ལ། དེ་དག་གིས་ནི་དེའི་རྒྱུ་ཅན་མ་ཡིན་པ་དག་ལས་འབྲས་བུ་དེ་ཐ་དད་པར་བྱེད་པ་ཡིན་ནོ། །དེས་ན་རྗེས་སུ་འགྲོ་བ་དང་ལྡོག་པ་དག་ལས་འབྲས་བུ་དེ་འབྲས་བུ་གཞན་དག་ལས་ཐ་དད་པའི་རང་བཞིན་དུ་རྣམ་པར་གནས་པའི་རྒྱུ་ནི་ལྷན་ཅིག་བྱེད་པ་དག་ཡིན་གྱི། གཅིག་ཉིད་ནི་རྒྱུ་མཚན་མ་ཡིན་ནོ། །དེའི་ཕྱིར་ཚོགས་པ་ནི་རང་གི་ངོ་བོ་གནས་པའི་རྟེན་དུ་བརྗོད་པ་ཡིན་ནོ། །འདི་ནི་འདི་སྐད་བརྗོད་པ་ཡིན་ཏེ། རྒྱུ་ཐ་དད་པ་ལས་འབྲས་བུ་ཐ་དད་པ་ཞེས་བྱ་བ་ནི་རྒྱུ་དུ་མ་ལས་འབྲས་བུ་མ་ཡིན་ནོ་ཞེས་བྱ་བའི་དོན་འདི་ནི་མ་ཡིན་གྱི། འོན་ཀྱང་རྒྱུ་རིགས་མི་འདྲ་བ་ལས་འབྲས་བུ་ཡང་འབྲས་བུ་གཞན་དང་རིགས་མི་འདྲ་བ་འབྱུང་བའི་ཕྱིར་ཐ་དད་པའི་དོན་རིགས་མི་འདྲ་བའི་དོན་ཡིན་གྱི། དུ་མའི་དོན་ནི་མ་ཡིན་ནོ། །དེ་ལྟ་མ་ཡིན་ན་མངོན་སུམ་དང་འགལ་བར་བརྗོད་པར་འགྱུར་ཏེ། ཚོགས་པ་ལས་འབྲས་བུ་སྐྱེ་བར་མཐོང་བའི་ཕྱིར་རོ། །ཇི་ལྟར་ན་རྫས་གཅིག་ལས་ཐ་མི་དད་པའི་ཁྱད་པར་རྒྱུ་ཐ་དད་པས་བྱས་པར་རྟོགས་ཤེ་ན། རྗེས་སུ་འགྲོ་བ་དང་ལྡོག་པ་དག་ལས་ཏེ། མ་རྟོགས་པ་ལས་བཟློག་པ་ནི་མཚུངས་པ་དེ་མ་ཐག་པའི་རྐྱེན་ཉིད་ལས་ཡིན་གྱི། ཡུལ་དང་དབང་པོ་དག་ལས་ནི་མ་ཡིན་ཏེ། དེ་དག་གི་བྱེད་པ་མེད་ཀྱང་རྣམ་པར་ཤེས་པ་གཞན་རྟོགས་པར་མཐོང་བའི་ཕྱིར་དང༌། བྱེད་པ་ཡོད་ཀྱང་དེ་དག་གིས་ཉེ་བར་ལེན་པ་དག་ལས་མིག་དང་ཡུལ་གྱི་སྐད་ཅིག་དག་རྟོགས་པ་མེད་པར་མཐོང་བའི་ཕྱིར་རོ། །ཡུལ་གྱི་རྣམ་པ་ནི་ཡུལ་ཉིད་ལས་ཡིན་ཏེ། མིག་དང་ཡིད་དག་གི་བྱེད་པ་
ཡོད་ཀྱང༌། ངེས་པའི་རྣམ་པ་མ་མཐོང་བའི་ཕྱིར་རོ། །དེ་བཞིན་དུ་རྗེས་སུ་འགྲོ་བ་དང་ལྡོག་པ་དག་ལས་བུམ་པ་ལ་རྫ་མཁན་ལ་སོགས་པ་རྣམས་བདག་ཉིད་ཀྱི་ཁྱད་པར་དག་ལ་བྱེད་པར་སྦྱར་རོ། །ཇི་ལྟར་ཡང་རྒྱུ་དང་འབྲས་བུའི་དངོས་པོ་ནི་སྐད་ཅིག་གཅིག་གི་ཡུལ་ཅན་མ་ཡིན་ཏེ། དེ་ནི་རྗེས་སུ་འགྲོ་བ་དང་ལྡོག་པ་དག་ལས་ངེས་པར་བྱ་བ་ཡིན་ནོ། །སྐད་ཅིག་གཅིག་ནི་རྒྱུར་མངོན་པར་འདོད་པའི་སྐད་ཅིག་འབའ་ཞིག་མེད་ན་མེད་པ་མ་ཡིན་ཏེ། ཁམས་གསུམ་ལ་མེད་ན་ཡང་མེད་པའི་ཕྱིར་ཐམས་ཅད་ཀྱིས་ཐམས་ཅད་ཀྱི་འབྲས་བུར་འགྱུར་རོ། །ཡོད་པ་དང་མེད་པའི་རྗེས་སུ་བྱེད་པ་དང༌། ཚུ་རོལ་མཐོང་བའི་ཡུལ་མ་ཡིན་པའི་ཕྱིར་སྐད་ཅིག་ནི་འབྲས་བུ་ཉིད་དུ་ངེས་པ་མ་ཡིན་ནོ། །མེའི་རྣམ་པར་འཛིན་པ་སྐྱེད་པར་རུང་བ་ཙམ་ཉིད་ཀྱི་དུ་བའི་རྣམ་པར་འཛིན་པ་ཙམ་དུ་རུང་བའི་སྐྱེད་པར་བྱེད་པ་ཉིད་དུ་ངེས་པར་ཡིན་ལ། དེ་ལྟ་བུར་གྱུར་བ་ཡང་གཅིག་མ་ཡིན་པའི་ཕྱིར་རྒྱུ་དང་འབྲས་བུའི་དངོས་པོར་ངེས་པ་ནི་ཚོགས་པའི་ཡུལ་ན་ཡིན་ནོ། །ཚོགས་པ་ཅན་དག་ལས་ཐ་དད་པའི་ཚོགས་པ་གཅིག་དངོས་པོར་མེད་ཀྱང༌། དུ་མ་ཡང་མེད་པ་ནི་མ་ཡིན་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །དེ་བཞིན་དུ་དངོས་པོ་དུ་མའི་ཡུལ་ཅན་ཉིད་ཀྱི་ཁྱད་པར་ནི་ལྷན་ཅིག་བྱེད་པ་ལ་ལྟོས་ཏེ། སོ་སོར་ཐ་དད་པ་ཡིན་གྱི་སྐད་ཅིག་གཅིག་གི་ཡུལ་ཅན་ནི་མ་ཡིན་ནོ། །དེས་ན་ཚོགས་པ་ནི་འབྲས་བུ་ཁྱད་པར་ཅན་གྱི་རང་གི་ངོ་བོ་གནས་པའི་རྟེན་ཡིན་ནོ། །འོ་ན་ཇི་ལྟར་ན་ཚོགས་པ་རྣམས་སོ་སོར་ནུས་པར་བརྗོད་ཅེ་ན། གང་གི་ཕྱིར་འདུས་པ་གཞན་མེད་པའི་ཕྱིར་འབྲས་བུ་མི་སྐྱེད་པར་ཐལ་བ་དེའི་ཕྱིར་ཚོགས་པ་རྣམས་སོ་སོར་ནུས་པ་ཡིན་ནོ། །གང་གི་ཕྱིར་དོན་གྱི་དངོས་པོ་སྐྱེད་པའི་ཚོགས་བ་རྣམ་པར་གནས་པའི་རྟེན་དུ་གྱུར་པ་ཡིན་པ་དེ་ཉིད་ཀྱི་ཕྱིར། ལྷན་ཅིག་བྱེད་པ་རྣམས་ཀྱང་རྣམ་གྲངས་མེད་པར་ཏེ། རིམ་པ་མ་ཡིན་པ་དང་སོ་སོར་མ་ཡིན་པར་སྐྱེད་པར་བྱེད་པ་ཡིན་ནོ། །གལ་ཏེ་ཐ་དད་པ་དག་ཀྱང་སྐྱེད་པར་བྱེད་པ་ཉིད་ཡིན་ན་ནི་དེའི་ཚེ་སོ་སོར་དུས་ཐ་དད་དུ་ནུས་པས། རིམ་གྱིས་འབྲས་བུ་སྐྱེད་པར་བྱེད་པར་འགྱུར་རོ། །གང་གི་ཚེ་ཚོགས་པས་འབྲས་བུ་ཁྱད་པར་ཅན་གཅིག་སྐྱེད་པར་ནུས་པ་དེའི་ཚེ་ནི་རྣམ་གྲངས་མེད་ཅིང་སོ་སོ་མ་ཡིན་པར་སྐྱེད་པ་ཡིན་ནོ། །འབྲས་བུ་གཅིག་
དུ་མ་ལས་རང་བཞིན་གྱི་ཁྱད་པར་འགྲུབ་པ་ནི་ལྷན་ཅིག་བྱེད་པ་ཡོད་པའི་ཕྱིར་སོ་སོ་ཐ་དད་པར་སྐྱེད་པར་བྱེད་པ་མ་ཡིན་ནོ། །རིགས་མི་མཐུན་པ་ལས་མི་སྐྱེའོ་ཞེས་ཇི་ལྟར་བརྗོད་དེ། གང་གི་ཕྱིར་གཅི་བ་ལ་སོགས་པ་རིགས་མི་མཐུན་པ་ལས་ཀྱང༌། ཨུཏྤལ་ལ་སོགས་པ་འབྱུང་བར་མཐོང་བ་ཡིན་ནོ། །རྗེས་སུ་འགྲོ་བ་དང་ལྡོག་པ་དག་ལས་གང་ཞིག་འབྲས་བུ་གང་གི་རྒྱུའི་དངོས་པོར་མཐོང་བ་དེ་ནི་རིགས་མཐུན་པའི་རྒྱུ་ཡིན་ལ། དེ་ལས་ཐ་དད་བ་ནི་རིགས་མི་མཐུན་པའི་རྒྱུ་ཡིན་ནོ། །དེ་བཞིན་དུ་ཨུཏྤལ་ལ་སོགས་པ་ཡང་མཐོང་བའི་རྒྱུ་ལས་གཞན་ལས་སྐྱེ་བ་དེ་དེས་ན་རིགས་མི་མཐུན་པ་ལས་སྐྱེ་བ་ཡིན་ནོ་ཞེ་ན། ལན་བཤད་པ། རིགས་མི་མཐུན་པ་ལས་སྐྱེ་བར་མཐོང་བ་དེ་ལ་ཡང༌། ཨུཏྤལ་ཞེས་དེ་སྐད་བརྗོད་ཀྱང་སྟེ། སྒྲ་མཚུངས་པས་བརྗོད་པར་བྱ་བ་ཡིན་པས་ཞེས་བྱ་བའི་ཐ་ཚིག་གོ །ཨུཏྤལ་གང་ལ་རང་གི་ས་བོན་ལས་རབ་ཏུ་སྐྱེ་བ་ཡོད་པ་དེ་ལས་ཨུཏྤལ་ཅིག་ཤོས་གཅི་བ་ལས་བྱུང་བ་ནི་རྣམ་པ་དང་དབྱིབས་དང་འབྲས་བུ་ལ་སོགས་པས་མཚོན་པའི་རང་གི་ངོ་བོ་ཐ་དད་པ་ཁོ་ནའོ། །ཐ་དད་པ་ཡང་གང་ཞེ་ན། རྒྱུའི་རང་གི་ངོ་བོ་ཐ་དད་པའི་ཕྱིར་རོ་ཞེས་སྨོས་སོ། །དཔེར་ན་ཞེས་བྱ་བ་ནི་དཔེའི་ཐབས་ཀྱིས་གཞན་གྱི་སྒོ་ནས་ཀྱང་དོགས་པ་བཟློག་པའི་ཕྱིར་རོ། །ས་བོན་དང་སྡོང་བུ་དག་ལས་སྐྱེ་བའི་ཆུ་ཤིང་གང་ཡིན་པ་ལྟ་བུའོ། །ས་བོན་ལས་སྐྱེ་བའི་ཆུ་ཤིང་ནི་འབྲས་བུ་མེད་པ་ཡིན་ལ། སྡོང་བུ་ལས་སྐྱེ་བའི་ནི་འབྲས་བུ་ཅན་ཡིན་ཏེ། དེས་ན་དེ་དག་ནི་འབྲས་བུ་དང་འབྲེལ་པ་དང་མ་འབྲེལ་པ་དག་གིས་ཐ་དད་པ་ཡིན་ནོ། །རྣམ་པ་ཐ་དད་པའི་སྒོ་ནས་ཀྱང་ཐ་དད་པར་བསྟན་པའི་ཕྱིར། དེ་ལྟ་བུ་ནི་འཇིག་རྟེན་ན་གསལ་བ་ཁོ་ནར་རྣམ་པར་འབྱེད་དོ་ཞེས་སྨོས་ཏེ། སྡོང་བུ་ལས་སྐྱེས་པའི་ཆུ་ཤིང་ནི་སྦོམ་པ་དང་སྔོ་བའི་རྣམ་པ་ཅན་ཡིན་ལ། ས་བོན་ལས་སྐྱེས་པའི་ཆུ་ཤིང་ནི་ཤུན་ལྤགས་སྐྱ་བ་དང་སྡོང་བུ་ཕྲ་བ་ཡིན་ནོ། །དེ་ལྟ་ན་ཡང་སྡོང་བུ་ལས་སྐྱེས་པ་ནི་རྣམ་པ་གཉིས་ཏེ། ས་བོན་ལས་བྱུང་བའི་སྡོང་བུ་ལས་སྐྱེས་པ་དང༌། སྡོང་བུ་ལས་བྱུང་བའི་སྡོང་བུ་ལས་སྐྱེས་པ་ཡིན་ལ། དེ་དག་ཀྱང་གཟུགས་ཁྱད་པར་མེད་པའི་ཕྱིར་དེ་དག་ལས་བར་དུ་ཆོད་པའི་ས་བོན་དཔོག་པ་ན་འཁྲུལ་པར་འགྱུར་བ་ཞེ་ན། འདི་ལ་ལན་གདབ་པའི་ཕྱིར་བཤད་
པ། བར་དུ་ཆོད་པའི་རྒྱུ་རྗེས་སུ་དཔག་པའི་ཕྱིར་ནི་འབྲས་བུ་འཇུག་པ་མ་ཡིན་ནོ། །འོ་ན་ཅི་ཞེ་ན། དེ་མ་ཐག་པའི་རྒྱུ་ཉིད་རྗེས་སུ་དཔག་པར་བྱ་བ་ཡིན་ནོ། །བར་དུ་མ་ཆོད་པའི་རྒྱུ་དེ་ནི་འབྲས་བུའི་རྫས་འདྲ་བ་རྣམས་ལ་འདྲ་བ་ཉིད་ཡིན་ནོ། །དེ་ལ་ནི་རྗེས་སུ་དཔོག་པ་འཁྲུལ་པ་མེད་ལ། བར་དུ་ཆོད་པའི་རྒྱུ་ནི་རྗེས་སུ་དཔོག་པར་མ་ཡིན་པས་འཁྲུལ་པ་མེད་དོ། །དཔེར་ན་རྗེས་སུ་འབྲེལ་པ་ཞེས་བྱ་བ་ནི་རྒྱུན་དུ་རྗེས་སུ་འཇུག་པའི་ཆུ་ཤིང་གཟུགས་ཁྱད་པར་མེད་པ་སྡོང་བུ་གཅིག་ལས་སྐྱེས་པ་དག་བཞིན་ནོ། །འབྲས་བུ་གང་ལ་དངོས་ཀྱི་སྐྱེད་པར་བྱེད་པའི་རྒྱུ་ཐ་དད་པ་དེ་ལ་ནི་འབྲས་བུའི་རང་བཞིན་ཐ་དད་པ་ཡང་ཡོད་པ་ཡིན་ཏེ། དཔེར་ན་གང་དག་ས་བོན་དང་སྡོང་བུ་ལས་སྐྱེ་བ་ཅན་གྱིས་ཆུ་ཤིང་དེ་དག་ཉིད་ཡིན་ནོ། །དེས་ན་རྒྱུ་གང་ལས་འབྲས་བུ་ཅི་འདྲ་བ་དངོས་སུ་སྐྱེ་བར་མཐོང་བའི་འབྲས་བུ་དེ་འདྲ་བ་དེ་ལས་ནི་དེ་མ་ཐག་པའི་རྒྱུ་དེ་འདྲ་བ་ཉིད་རྗེས་སུ་དཔོག་པ་ཡིན་ནོ། །བར་དུ་ཆོད་པ་བརྒྱུད་པ་དང་ལྡན་པ་དག་ཀྱང་རྗེས་སུ་དཔོག་པ་ནི་མ་ཡིན་པ་དེས་ན་འཁྲུལ་པ་མེད་དོ་ཞེས་བྱ་བ་ནི་མཇུག་བསྡུ་བའོ། །འདི་སྙམ་དུ་རྒྱུ་ཐ་དད་པའི་འབྲས་བུ་དག་ཀྱང་རེས་འགའ་རྣམ་པར་མཚུངས་པ་ཡིན་ཏེ། དཔེར་ན་ནགས་དང་ཅིག་ཤོས་ཀྱི་རྒྱལ་མོ་ག་གོན་ལ་སོགས་པ་ལྟ་བུའོ། །དེས་ན་དེ་མ་ཐག་པའི་རྒྱུ་རྗེས་སུ་དཔོག་པ་ལ་འཁྲུལ་པ་མེད་དོ་ཞེས་ཇི་ལྟར་བརྗོད་ཅེ་ན། བཤད་པ། རྣམ་པ་ཐ་དད་པ་འབའ་ཞིག་ནི་དངོས་པོ་དེའི་དེ་ཉིད་མ་ཡིན་པ་དང་ཐ་དད་པ་ཉིད་ཀྱི་རྒྱུ་མཚན་མ་ཡིན་ན། གང་གིས་རྣམ་པ་ཐ་དད་པ་མེད་པའི་ཕྱིར་ཐ་དད་པ་ཉིད་མ་ཡིན་པར་འགྱུར་རོ། །འོན་ཀྱང་རང་བཞིན་གཞན་ཡང་ཡིན་ཏེ། རྣམ་པ་ཐ་དད་པས་ཀྱང་ཐ་དད་པར་རྣམ་པར་འཇོག་ལ། རང་བཞིན་གཞན་གྱིས་ཀྱང་ཡིན་ནོ། །བཅོས་མ་དང་བཅོས་མ་མ་ཡིན་པའི་ནོར་བུ་ལ་སོགས་པ་ནི་རྣམ་པ་མཚུངས་པ་ཡིན་ཡང་ལྗིད་དང་མཐུའི་ཁྱད་པར་གྱིས་ཐ་དད་པར་རྣམ་པར་གཞག་ནུས་པ་ཡིན་ནོ། །རང་བཞིན་གཞན་དེ་ཉིད་རྣམ་པར་མཚུངས་ཀྱང་ཐ་དད་པའི་རྒྱུ་མཚན་དུ་རྣམ་པ་དུ་མའི་སྒོ་ནས་བསྟན་པའི་ཕྱིར། ཁ་ཅིག་ཏུ་ནི་མེ་ཏོག་ཐ་དད་པས་ཏེ་ཞེས་སྨོས་སོ། །མེ་ཏོག་གི་རྒྱུ་མཚན་གྱིས་ཐ་དད་པ་སྟེ། གལ་ཏེ་དེ་དག་རང་བཞིན་ཐ་དད་པ་མ་ཡིན་ན་མེ་ཏོག་ཀྱང་ཐ་དད་པར་མི་འགྱུར་རོ། །ཡང་ན་མེ་ཏོག་ཡོད་ན་
ཐ་དད་པར་མཚོན་པ་འམ། མེ་ཏོག་དེ་ལ་ཐ་དད་པར་རྟོགས་པ་ཡིན་ནོ། །དེ་བཞིན་དུ་གཞན་དག་ཡང་སྦྱོར་རོ། །མཐུ་ནི་འབྲས་བུ་སྐྱེད་པའི་ནུས་པའོ། །མེ་ཏོག་ལ་སོགས་པ་ནི་རྫས་ཀྱི་ནང་དུ་འདུས་པ་ཉིད་ཡིན་ལ། ནུས་པ་ཡང་ཐ་དད་པའི་ཡུལ་ཅན་ཡིན་ནོ། །དེའི་ཕྱིར་ཤིན་ཏུ་རྣམ་པར་བྱེ་བའི་འབྲས་བུ་ནི་ཞེས་བྱ་བ་ནི་འབྲས་བུ་ལ་སོགས་པ་དང་འབྲེལ་པས་ཤིན་ཏུ་རྣམ་པར་ཕྱེ་བའི་འབྲས་བུ་གང་ཡིན་པ་དེ་ཉིད་ཀྱིས་རྗེས་སུ་དཔག་པར་ནུས་པའི་ཕྱིར་རྒྱུ་ལ་འཁྲུལ་པ་མེད་དོ། །བཤད་ཟིན་པའི་དོན་ཉིད་བསྟན་པར་བྱ་བའི་ཕྱིར། བཤད་པ། རྒྱུ་ཁྱད་པར་ཡོད་ཀྱང་འབྲས་བུ་ཁྱད་པར་མེད་ན་སྐྱོན་དུ་འགྱུར་བའི་ཕྱིར་ཏེ། རྒྱུ་མེད་པ་ཉིད་དུ་ཐལ་བའི་ཕྱིར་རོ། །དོན་འདི་ཉིད་དུ་སྡུད་པ་ནི་གང་གི་ཕྱིར་རྗེས་སུ་འགྲོ་བ་དང་ལྡོག་པ་དེ་ལས་རང་བཞིན་གང་ཞིག་རྒྱུར་གྱུར་པའི་རང་བཞིན་དེའི་རྗེས་སུ་འགྲོ་བར་མཐོང་བའི་རྗེས་སུ་འགྲོ་བར་བྱེད་པ་དེའི་རང་བཞིན་གྱི་རྒྱུ་ནི་དེ་ཡིན་པས། དེ་རྒྱུ་ཅན་ཡིན་པ་དེའི་ཕྱིར་མི་མཐུན་པ་ལས་མི་འབྱུང་ངོ༌། །དེའི་ཕྱིར་དེ་ལྟར་འབྲས་བུ་དང་རང་བཞིན་གྱི་གཏན་ཚིགས་བཤད་ནས། འབྲེལ་པ་ངེས་པའི་ཕྱིར་དེ་དག་ཉིད་གོ་བར་བྱེད་པ་ཡིན་ནོ་ཞེས་གང་བཤད་པ་དེ་བཤད་པ་རྒྱུ་དང་འབྲས་བུའི་དངོས་པོ་ངེས་པར་བྱེད་པའམ། རང་བཞིན་ངེས་པར་བྱེད་པ་ལས་བསྒྲུབ་པར་བྱ་བར་གྱུར་པ་དང་རྒྱུ་དང་འབྲས་བུའི་དངོས་པོ་དང༌། དེའི་བདག་ཉིད་ཡིན་པ་ནི་བསྒྲུབ་པར་བྱ་བར་གྱུར་པ་བསྒྲུབ་པ་ལ་གཏན་ཚིགས་སུ་ངེས་པར་ཡིན་པའི་ཕྱིར། དེ་ལས་བསྒྲུབ་པར་བྱ་བ་མེད་ན་མི་འབྱུང་བ་ངེས་པར་བལྟའི། གཏན་ཚིགས་མི་མཐུན་པའི་ཕྱོགས་ལ་མ་མཐོང་བ་དང་མཐུན་པའི་ཕྱོགས་ལ་མཐོང་བ་ལས་ནི་མ་ཡིན་ནོ། །གཞན་དུ་རྒྱུ་དང་འབྲས་བུའི་དངོས་པོ་དང་དེའི་བདག་ཉིད་མེད་ན་གཞན་དག་དང་ལྷན་ཅིག་ངེས་པར་ཡོད་པའི་ངེས་པ་མེད་པར་འགྱུར་རོ། །གང་ཞིག་བྱས་པ་གྲུབ་ན་མ་གྲུབ་པའི་རང་བཞིན་དེ་དོན་གཞན་རྒྱུ་མཚན་ཅན་གྱི་ཆོས་ཡིན་པར་ཁས་ལེན་ན། ངེས་པར་ཡོད་པའི་ངེས་པ་ཞེས་བྱ་བ་གང་ཞིག་ཡིན་ཏེ། དཔེར་ན་གོས་ལ་ཚོན་ངེས་པར་ཡོད་པའི་ངེས་པ་བཞིན་ནོ། །གཞན་ཡང་ཞེས་བྱ་བ་ནི་ཆོས་དོན་གཞན་གྱི་རྒྱུ་མཚན་ཅན་ཡིན་ན། ངེས་པར་ཡོད་པའི་ངེས་པ་མེད་པར་འགྱུར་བ་འབའ་ཞིག་ཏུ་མ་ཟད་ཀྱི། དོན་གཞན་གྱི་རྒྱུ་མཚན་ཅན་
གྱི་རང་བཞིན་ནི་དོན་གཞན་ཡིན་པར་ཡང་འགྱུར་རོ་ཞེས་བཤད་པ་ནི་གང་གི་ཕྱིར་ཆོས་གང་ཞིག་དོན་གཞན་གྱི་རྒྱུ་མཚན་ཅན་ཡིན་པར་མཐོང་བ་དེ་ནི་དེ་ལས་གཞན་ཉིད་ཡིན་ནོ། །འདི་ནི་རང་བཞིན་གྱི་གཏན་ཚིགས་ཀྱི་གནས་སྐབས་སུ་འགྱུར་བ་སྐད་ཅིག་འཇིག་པའི་འཕྲོ་ཡིན་པས་དེ་ཉིད་དུ་བཤད་པར་བྱ་བ་མ་ཡིན་ན་མ་ཞེ་ན། བདེན་མོད་ཀྱི་འོན་ཀྱང་གང་ཞིག་དོན་གཞན་གྱི་རྒྱུ་མཚན་ཅན་ཉིད་ཀྱིས་དོན་གཞན་དུ་གྱུར་པ་དེ་ནི་དེའི་རྒྱུའི་ཐ་དད་པ་ཐ་དད་པར་བྱེད་པ་ཡིན་ནོ་ཞེས་བྱ་བའི་དོན་གྲུབ་པ་ན་གྲུབ་པ་ཡིན་ལ། རྒྱུའི་ཐ་དད་པ་ཐ་དད་པར་བྱེད་པ་ཞེས་བྱ་བའི་དོན་འདི་ཡང་འབྲས་བུའི་གཏན་ཚིགས་ཀྱི་སྐབས་སུ་བཤད་པར་བྱ་བ་ཡིན་ནོ། །དེས་ན་འབྲས་བུའི་གཏན་ཚིགས་བཤད་པ་ན་ལྷག་མ་འདི་བཤད་པ་ཡིན་ནོ། །རྣམ་པར་འབྲེལ་པ་བཤད་པ་ནི་དེ་གྲུབ་ན་ཞེས་བྱ་བ་ཡིན་ནོ། །གང་གྲུབ་པ་ན་གང་མ་གྲུབ་པ་དེ་ནི་གྲུབ་ན་མ་གྲུབ་པ་འམ་རྒྱུ་ཐ་དད་པ་ཡིན་ཏེ། དེ་ནི་སྔར་གྲུབ་ཟིན་པ་དེའི་རང་བཞིན་དུ་རིགས་པ་མ་ཡིན་ནོ། །ཅིའི་ཕྱིར་དེ་ལྟར་ཡིན་ཞེ་ན། དངོས་པོ་རྣམས་ཀྱི་ཞེས་སྨོས་ཏེ། ཆོས་འགལ་བ་གནས་པ་གང་ཡིན་པ་དེ་ཉིད་ནི་ཐ་དད་པ་ཡིན་ལ། ཐ་དད་པའི་ཐ་སྙད་ནི་དེའི་ཡུལ་ཅན་ཡིན་ནོ། །རྒྱུ་ཐ་དད་པ་ཡང་འདི་ཁོ་ན་ཡིན་ཏེ། སྐྱེད་པར་བྱེད་པ་ཐ་དད་པ་གང་ཡིན་པའོ། །གང་ཞིག་འཇིག་རྟེན་ན་ཐ་དད་པར་གྲགས་པ་དེ་ཉིད་ཐ་དད་པར་བརྗོད་པར་བྱ་བ་མ་ཡིན་ནམ། འགལ་བའི་ཆོས་གནས་པ་ནི་འཇིག་རྟེན་ན་གྲགས་པ་མ་ཡིན་ནོ་ཞེ་ན། དེ་ལྟ་ན་ནི་འོ་ན་འཇིག་རྟེན་ན་ཐ་དད་པར་གྲགས་པ་དེ་གང་ཡིན་གང་ལ་འཇིག་རྟེན་ན་ཐ་དད་པར་རྟོགས་པའོ་ཞེ་ན། འཇིག་རྟེན་ན་གྲགས་པའི་ཐ་དད་པ་འདྲི་བ་ན་འཇིག་རྟེན་པའི་རྟོགས་བའོ། །རྟོགས་པ་འདིའི་ཡུལ་གང་ཡིན་ཞེས་བྱ་བའི་དོན་འདི་ཁྱོད་ལ་དྲིས་པ་མ་ཡིན་ནམ། དེས་ན་གང་ལ་འཇིག་རྟེན་རྟོགས་པའོ་ཞེས་ཅིའི་ཕྱིར་བརྗོད། ཆོས་ཐ་དད་པ་ལས་གཞན་པའི་རྒྱུ་ནི་མེད་པས་འཇིག་རྟེན་པའི་ཐ་སྙད་ཀྱི་རྒྱུ་ནི་དེ་ཡིན་ནོ། །དེས་ཀྱང་ཞེས་བྱ་བ་ནི་འགལ་བའི་ཆོས་གནས་པས་སོ། །རྒྱུ་ཐ་དད་པ་ནི་སྔར་བསྒྲུབས་ཟིན་པའི་ཕྱིར་འདིར་མི་བསྒྲུབ་ཀྱི་འདི་ནི་འགལ་བའི་ཆོས་བསྒྲུབ་པར་བྱ་བའི་ཕྱིར་ཡིན་ནོ། །ཐ་དད་པའི་རྒྱུ་མཚན་གཞན་མེད་པའི་ཕྱིར། རིལ་གཅིག་ཏུ་འགྱུར་རོ། །གལ་ཏེ་རིལ་གཅིག་ཏུ་གྱུར་མོང་དེས་ཅི་
འགྱུར་ཞེ་ན། བཤད་པ། གཅིག་ཡིན་པ་དེས་ན་ལྷན་ཅིག་སྐྱེ་བ་དང་འཇིག་པ་དེར་འགྱུར་རོ། །རིམ་གྱིས་སྐྱེ་བ་དང་འཇིག་པ་ཡིན་ན་ནི་སྐྱེས་པ་དང་མ་སྐྱེས་པ་དང་ཞིག་པ་དང་མ་ཞིག་པ་གང་ཡིན་པ་དེ་དག་གཅིག་ཏུ་མི་འགྱུར་རོ། །དེས་ན་རིམ་པ་དང་མི་ལྡན་པའི་སྐྱེ་བ་དང་འཇིག་པ་དག་ཏུ་འགྱུར་རོ། །གང་ཞིག་འགལ་བའི་ཆོས་གནས་པ་ཐ་དད་པའི་རྒྱུ་མཚན་དུ་མི་འདོད་པ་དེ་ལ་རིམ་གྱིས་སྐྱེ་བ་དང་འཇིག་པས་ན་སྐྱེས་པ་དང་མ་སྐྱེས་པ་དང༌། ཞིག་པ་དང་མ་ཞིག་པ་དག་ཐ་དད་པར་ཐལ་བར་འགྱུར་བ་མི་རིགས་པ་མ་ཡིན་ནམ་གང་ཞིག་ཐ་དད་པ་འགལ་བའི་ཆོས་ཀྱི་རྒྱུ་མཚན་ཅན་དུ་ཁས་མི་ལེན་པ་དེ་གྲུབ་པ་དང་མ་གྲུབ་པའི་རྒྱུ་མཚན་དང་ཞིག་པ་དང་མ་ཞིག་པའི་རྒྱུ་མཚན་གྱིས་དུ་མ་ཉིད་དུ་ཁས་ལེན་པ་ཇི་ལྟར་འགྱུར་ཞེ་ན། བདེན་མོད་ཀྱི་གང་གིས་གང་ཞིག་ཡོད་པར་འདོད་པ་དེས་ནི་དེའི་རང་བཞིན་བཏང་བ་དང་བྲལ་བར་ཁས་བླང་བར་བྱ་བ་ཡིན་ཏེ། གང་གི་ཚེ་ཡོད་པ་དེ་ཉིད་ཀྱི་ཚེ་དེ་དེའི་རང་བཞིན་ལས་ཉམས་པ་ཡིན་ནོ་ཞེས་ནི་ཤེས་པར་ནུས་པ་མ་ཡིན་ནོ། །ཐམས་ཅད་དུ་དེའི་རང་བཞིན་ཉམས་པ་ཡོངས་སུ་སྤངས་ནས་གནས་པ་ཡིན་ནོ། །འོ་ན་དེ་དག་གི་ཐ་དད་པ་འགལ་བའི་ཆོས་དང་ལྡན་པའི་རྒྱུ་མཚན་ཅན་དུ་ཇི་ལྟར་ཁས་བླངས་པ་མ་ཡིན་ཞེ་ན། སྨྲས་པ། ཡོད་པ་ཐམས་ཅད་ནི་ཡོད་པ་དང་མེད་པ་ལས་གཞན་པའི་འགལ་བའི་ཆོས་དང་ལྡན་པའི་རྒྱུ་མཚན་གྱིས་ཐ་དད་པར་ཁས་བླངས་པ་མ་ཡིན་གྱི་ཡོད་པ་དང་མེད་པའི་རྒྱུ་མཚན་གྱིས་ཐ་དད་པར་ཁས་བླངས་པ་ཁོ་ནའོ། །དེ་ལ་དངོས་པོ་གང་ཞིག་སྐྱེས་པ་དང་མ་ཞིག་པ་གང་ཡིན་པ་དེ་ནི་ཉམས་པ་དང་བྲལ་བ་དེའི་རང་གི་ངོ་བོར་ཡོད་པ་ཡིན་ལ། གང་ཞིག་མ་སྐྱེས་པ་དང༌། ཞིག་པ་གང་ཡིན་པ་དེ་ནི་དེའི་རང་བཞིན་ཉམས་པ་དང་ལྡན་པས་དེ་ལས་ཐ་དད་པ་ཡིན་ནོ། །དེའི་ཕྱིར་ཐ་དད་པ་འགལ་བའི་ཆོས་དང་ལྡན་པའི་རྒྱུ་མཚན་ཅན་དུ་ཁས་བླངས་ཀྱང་ཡོད་པ་དང་མེད་པའི་རྒྱུ་མཚན་ཅན་དུ་ནི་ཐ་དད་པ་ཁས་བླང་བར་བྱ་བ་ཡིན་པ་ཁོ་ནའོ། །སྐྱེ་བ་དང་འཇིག་པ་རིམ་པ་དང་ལྡན་པ་ཡིན་ན་ཐ་དད་པ་ཉིད་དུ་ཐལ་བ་དེའི་ཕྱིར། གཅིག་པ་ཐམས་ཅད་ཅིག་ཅར་སྐྱེ་བ་དང་འཇིག་པ་དང་ལྡན་པར་འགྱུར་རོ། །ཐམས་ཅད་ཐམས་ཅད་ལ་ཞེས་བྱ་བ་འདིས་ནི་འདི་སྐད་བརྗོད་པ་ཡིན་ཏེ། དངོས་པོའི་ཡོད་པ་ཉིད་ནི་དོན་བྱ་བ་མེད་པའི་རྒྱུ་མཚན་ཅན་ཡིན་ནོ། །གལ་ཏེ་ཡོད་པ་ཐམས་ཅད་གཅིག་ཉིད་ཡིན་ན་ནི། དེའི་ཚེ་བུམ་པ་ལ་སོགས་པ་ལ་ཡང་སྣམ་བུའི་རང་བཞིན་ཡོད་པ་དེའི་
ཕྱིར་བུམ་པ་ལ་སོགས་པས་ཀྱང་སྣམ་བུས་བསྒྲུབ་པར་བྱ་བའི་དོན་བྱ་བ་བྱ་དགོས་ཏེ། གལ་ཏེ་ཐམས་ཅད་ལ་ཐམས་ཅད་ཡོད་ན་དེ་ལྟ་ན་གཅིག་ཉིད་དོ། །དོན་བྱ་བ་བྱེད་པ་དེ་ལས་ལྡོག་ན་ནི་དངོས་པོ་ཉིད་ཀྱང་ལྡོག་པར་བྱེད་དོ། །གང་ཞིག་གང་ལ་མེད་པ་དེ་ནི་དེའི་རང་བཞིན་ཉམས་པ་དང་ལྡན་པ་ཉིད་ཀྱིས་གཞན་ཉིད་ཡིན་པའི་ཕྱིར་རོ། །དེ་ལ་ཡང་ཡོད་པ་དང་མེད་པ་འགལ་བའི་རྒྱུ་མཚན་ཅན་ཐ་དད་པར་ཐལ་བ་ཁོ་ནའོ། །དེས་ན་རིལ་གཅིག་ཉིད་ཡིན་ན་ཅིག་ཅར་སྐྱེ་བ་དང་འཇིག་པ་དག་དང༌། ཐམས་ཅད་དོན་བྱ་བ་ཐམས་ཅད་ལ་ཉེ་བར་སྦྱོར་བར་ཐལ་བ་ཁོ་ནའོ། །དེ་ལྟ་མ་ཡིན་ཏེ་སྐྱེ་བ་དང་འཇིག་པ་རིམ་པ་དང་ལྡན་པ་དང༌། ཐམས་ཅད་ཐམས་ཅད་ལ་ཉེ་བར་མི་སྦྱོར་ན་དེའི་རང་བཞིན་ཡོད་པ་དང་མེད་པ་དག་གི་མཐའ་དག་ཐ་དད་པ་ཡིན་པའི་ཕྱིར་གཅིག་ཅེས་བྱ་བ་གཅིག་ཉིད་དང་ལྡན་པ་དངོས་པོའི་གནས་ལུགས་ཀྱིས་གཅིག་གི་རང་བཞིན་དུ་མི་འགྱུར་བའམ། ཡོད་པ་དང་མེད་པའི་རྒྱུ་མཚན་གྱིས་ཐ་དད་པར་ཁས་བླངས་པའི་ཕྱིར་གཅིག་ཅེས་མིང་ཐ་དད་པར་ཟད་དོ། །ཅིའི་ཕྱིར་ཞེ་ན། དུ་མ་ཉིད་ཀྱི་སྒྲས་བརྗོད་པར་བྱ་བའི་དོན་ཁས་བླངས་ནས་དེ་སྐད་དུ་ཞེས་བྱ་བ་གཅིག་གི་སྒྲས་བརྗོད་པའོ། །དེས་ན་གཅིག་ཡིན་ན་ཅིག་ཅར་ཡོད་པ་དང་མེད་པ་ལ་མི་འཁྲུལ་བའི་ཆོས་སུ་མི་འགྱུར་ཏེ། དེ་དག་གཅིག་ལ་ཅིག་ཅར་འགལ་བའི་ཕྱིར་རོ། །རིམ་གྱིས་སྐྱེ་བ་དང་འགག་པ་དག་ཡིན་ན་ནི་དངོས་པོ་དང་དངོས་པོ་མེད་པ་ལ་མི་འཁྲུལ་བ་ཡིན་ནོ། །དོན་བྱེད་པ་ལ་ཉེ་བར་སྦྱོར་བ་ཡང་ངེས་པའི་ཡུལ་ཅན་མ་ཡིན་ཏེ། དེས་ན་རིལ་རྫས་གཅིག་ཉིད་མ་ཡིན་ནོ། །གལ་ཏེ་འགལ་བའི་ཆོས་བརྟེན་པ་ལས་དུ་མ་ཉིད་ཡིན་ན། རྒྱུ་དོན་ཐ་དད་པ་འབའ་ཞིག་ཏུ་མ་ཟད་ཀྱི། རྒྱུ་དོན་ཐ་དད་པ་ཉིད་མེད་ཀྱང་སྟེ། དོན་གྱི་དངོས་པོ་ཡོད་པའི་དུས་ན་མི་རྟག་པ་ཉིད་མ་གྲུབ་པའི་ཕྱིར་རོ། །མི་རྟག་པ་ཉིད་ནི་ལྡོག་པའི་རང་བཞིན་དངོས་པོ་དང་འགལ་བ་ཡིན་ནོ། །གལ་ཏེ་སྐད་ཅིག་དོང་པོ་ལ་ཡོད་ན་ནི་དངོས་པོ་ཉིད་དུ་མི་འགྱུར་ཏེ། སྐད་ཅིག་གཉིས་བ་བཞིན་ནོ། །འདིས་ནི་དངོས་པོ་དང་མི་རྟག་པ་འགལ་བའི་ཆོས་བརྟེན་པར་བརྗོད་པ་ཡིན་ནོ། །མཚུངས་སོ་ཞེས་བྱ་བ་ནི་ཇི་ལྟར་དོན་གཞན་རྒྱུ་ཡིན་བ་ཉིད་ལ་གྲུབ་པ་དང་མ་གྲུབ་པ་དག་གིས་དུ་མ་ཡིན་བ་དེ་བཞིན་
དུ། རྒྱུ་དོན་གཞན་མེད་པ་ལ་ཡང་ཡིན་ནོ། །འདི་སྤང་བའི་ཕྱིར་གཞན་ནི་འགའ་ཡང་མེད་དོ་ཞེས་སྨོས་སོ། །སྔོན་མེད་པའི་རང་བཞིན་ཐོབ་པ་ནི་གྲུབ་པར་བརྗོད་དོ། །གལ་ཏེ་མི་རྟག་པ་དངོས་པོ་ཡིན་པར་གྱུར་ན་ནི་དེ་སྔར་མ་གྲུབ་པ་ཕྱིས་གྲུབ་པས་འགལ་བའི་ཆོས་བརྟེན་པར་འགྱུར་བ་ཡིན་ན་གང་གི་ཕྱིར་གང་ཞིག་ཕྱིས་འགྲུབ་པར་འགྱུར་བ་མི་རྟག་པ་ཉིད་ཀྱི་དངོས་པོ་ནི་འགའ་ཡང་ཡོད་པ་མ་ཡིན་ཏེ། དེའི་ཕྱིར་རྒྱུ་མཚན་གྲུབ་པ་ཉིད་མེད་པས་འགལ་བའི་ཆོས་བརྟེན་པ་ཡོད་པ་མ་ཡིན་ནོ། །གལ་ཏེ་མི་རྟག་པ་ཉིད་དངོས་པོ་མེད་ན་འོ་ན་གཏན་ཚིགས་དང་བསྒྲུབ་བྱ་དག་ཇི་ལྟར་དེའི་བདག་ཉིད་ཀྱི་མཚན་ཉིད་ཀྱིས་འབྲེལ་ཞེ་ན། དངོས་པོ་ཞེས་སྨོས་སོ། །སྐད་ཅིག་མར་གནས་པའི་ཆོས་ཅན་ཞེས་བྱ་ནི་ལྡོག་པའི་ཆོས་ཀྱི་རང་བཞིན་ཉིད་ནི་མི་རྟག་པར་བརྗོད་དོ། །དེ་ཉིད་བསྒྲུབ་པར་བྱ་བ་ཡིན་པ་དེས་ན་གཏན་ཚིགས་དང་བསྒྲུབ་བྱ་ཐ་མི་དད་པར་གྱུར་པ་ན་དེའི་བདག་ཉིད་ཀྱི་འགྲེལ་པ་ཡིན་ནོ་ཞེས་བཤད་པ་ཡིན་ནོ། །དེས་ན་དངོས་པོ་ལྡོག་པར་འགྱུར་རོ། །མི་རྟག་པར་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པའི་ངག་དག་གིས་དངོས་པོའི་རང་བཞིན་ནམ་འབྲས་བུ་གང་ཞིག་གྲུབ་པར་བརྗོད་པ་ནི་མ་ཡིན་གྱི། འོན་ཀྱང་མཐོང་བའི་རང་བཞིན་གྱི་དོན་གང་ཡིན་པ་དེ་མེད་དོ་ཞེས་བྱ་བའི་དོན་འདི་བརྗོད་པ་ཡིན་ནོ། །དངོས་པོ་གཞན་བརྗོད་པ་ཡིན་ན་དངོས་པོ་སྔ་མ་ལྡོག་པ་མ་བསྟན་པར་ཐལ་བའི་ཕྱིར་རོ། །དེ་ནི་མང་དུ་བཤད་ཟིན་ཏོ། །མང་དུ་ཆ་ལྷག་པ་གང་ཡིན་པའོ། །སྐད་ཅིག་ཏུ་གནས་པའི་ཆོས་ཅན་ཞེས་བྱ་བདེར་རོ། །འོ་ན་ཇི་ལྟར་བུམ་པ་མི་རྟག་པ་བུམ་པ་མི་རྟག་པ་ཞེས་རྗོད་པར་བྱེད་པ་ཐ་དད་ཅེ་ན། བཤད་པ། ཚིག་སྟེ་བརྗོད་པ་ཐ་དད་པ་ཞེས་བྱ་བ་དུ་མ་ཉིད་ལ་ཡང་སྟེ། འདིའི་ཐ་དད་པའི་ཐ་སྙད་ལ་ཡང་ངོ༌། །ཆོས་དང་ཆོས་ཅན་ཉིད་དུ་ཇི་ལྟར་འགྱུར་ཞེ་ན། ཐ་མི་དད་བར་བརྗོད་པ་ནི་ཆོས་ཅན་ཉིད་དུ་སྟེ། སྒྲ་མི་རྟག་ཅེས་བྱ་བའོ། །ཐ་དད་པར་བརྗོད་པ་ནི་ཆོས་ཉིད་དུ་སྟེ། སྒྲའི་མི་རྟག་པ་ཉིད་ཅེས་བྱ་བའོ། །ཆོས་དང་ཆོས་ཅན་གྱི་སྒྲ་གཉི་གས་རྟག་པ་ལས་ལྡོག་པ་གཅིག་ཉིད་བརྗོད་པ་ཡིན་ནོ། །ཚིག་ཐ་དད་པ་འདི་ལ་ནི་རྒྱུ་མཚན་ཁྱད་པར་གཞན་ཏེ། ལྡོག་པ་གཞན་མི་སྤོང་པ་སྟེ། དེ་དང་བརྗོད་པར་བྱ་བའི་ཆོས་བདག་ཉིད་གཅིག་ཏུ་
འབྲེལ་པར་རུང་བ་ཉིད་དོ། །གང་གི་ཆོས་གཞན་དག་དང་འབྲེལ་པར་རུང་བ་བརྗོད་པ་དེའི་ཚེ་ནི་ཆོས་གཞན་མི་སྤོང་བ་ཡིན་ཏེ། དཔེར་ན་སྒྲ་མི་རྟག་པ་ཞེས་བྱ་བ་བཞིན་ནོ། །འདིར་ནི་མི་རྟག་པ་ཞེས་བྱ་བའི་ཆོས་སྒྲ་ཉིད་ལ་སོགས་པ་སྒྲ་ལ་བརྟེན་པའི་ཆོས་དེ་དག་དང་བདག་ཉིད་གཅིག་ཏུ་འབྲེལ་པར་རུང་བར་བརྗོད་པ་ཡིན་ནོ། །གང་གི་ཚེ་ཆོས་དེ་ཉིད་སྒྲ་ཉིད་ལ་སོགས་པ་སྒྲ་ལ་བརྟེན་པའི་ཆོས་དག་དང་འབྲེལ་པར་མི་རུང་བ་དེའི་ཚེ་ཆོས་གཞན་སྤོང་བ་ཡིན་ཏེ། དཔེར་ན་སྒྲའི་མི་རྟག་པ་ཉིད་ཅེས་བྱ་བ་ལྟ་བུའོ། །འདིར་མི་རྟག་པ་ཉིད་ལ་སྒྲ་ལ་བརྟེན་པའི་ཆོས་དག་བདག་ཉིད་གཅིག་ཏུ་འབྲེལ་པར་མི་རུང་བར་བརྗོད་པ་ཡིན་གྱི། ཐམས་ཅད་དུ་འགྲོ་བ་ལ་སོགས་པ་བདག་ཉིད་ལ་བརྟེན་པའི་ཆོས་དག་དང་ནི་མི་རྟག་པ་ཉིད་འབྲེལ་པར་རུང་བ་ཁོ་ནའོ། །དེ་ཉིད་ཀྱི་ཕྱིར་ཆོས་གཞན་དང་འབྲེལ་པར་རུང་བའི་ཆོས་ཅན་གྱི་ཆོས་ལས་ཐ་དད་པར་སྟོན་པ་ལ་དྲུག་པ་ཡིན་ནོ། །གཞི་མཐུན་པ་ལ་ནི་སྤོང་བ་དང་མི་སྤོང་བ་དག་ཏུ་མི་འགྱུར་རོ། །དེ་ལྟ་བུ་ལ་སོགས་པ་བསྟན་པར་བྱ་བའི་གང་ནས་གང་དུ་འཕྲོས་པ་གང་ཡིན་པ་དེ་ནི་རྣམ་འགྲེལ་དུ་གཏན་ལ་ཕབ་ཟིན་པའི་ཕྱིར་འདིར་ནི་མི་སྤྲོའོ། །གལ་ཏེ་དངོས་པོའི་རང་བཞིན་ལྡོག་པའི་ཆོས་དེ་ཉིད་འཇིག་པ་ཡིན་ན། དེ་ལྟ་ན་ནི་འོ་ན་ཇི་ལྟར་ཐ་སྙད་བྱེད་པ་པོ་རྣམས་ལྡོག་པའི་བདག་ཉིད་ཀྱི་གནས་སྐབས་ཕྱིས་འབྱུང་བ་འཇིག་པར་འདོད་ཅེ་ན། འདིའི་རང་བཞིན་དེ་ནི་མཐོང་བ་བཞིན་དུ་ཡང་ཞེས་སྨོས་སོ། །གང་ལ་ཐོག་མ་མེད་པའི་འཁོར་བ་ནས་གོམས་པའི་མ་རིག་པའི་བག་ཆགས་ཀྱིས་བློ་ཞེ་ན་པ་ཡོད་པ་སྟེ། དེ་ལྟ་མ་ཡིན་ན་ཅིའི་ཕྱིར་མཐོང་བའི་དངོས་པོའི་བདག་ཉིད་ཐམས་ཅད་མི་རྟོགས། གལ་ཏེ་མ་རིག་པས་ལྡོག་པའི་ཆོས་ཅན་ཉིད་དུ་མི་རྟོགས་པ་ཡིན་ན། དེ་ལྟ་ན་ནི་ཞིག་པའི་དངོས་པོ་ལ་ཡང་མི་བརྟན་པར་རྟོགས་པར་མི་འགྱུར་རོ་ཞེས་དོགས་པ་ལ། མ་རིག་པའི་བག་ཆགས་ཡོད་པ་ལ་ཕྱི་རོལ་ཡང་འཁྲུལ་པའི་རྒྱུ་མཚན་དུ་བསྟན་པའི་ཕྱིར། བཤད་པ། ལྡོག་པ་དང་མི་ལྡན་པར་དངོས་པོ་དང་འབྲེལ་པའི་ཡོད་པ་འབའ་ཞིག་དམིགས་པ་སྟེ། མེད་པ་དང་བཅས་པའི་ཡོད་
པ་དམིགས་ན་ནི། ཡོད་པར་དོགས་པ་མ་ཡིན་པའི་ཕྱིར་བུམ་པ་འཇིག་པ་མཐོང་བ་བཞིན་ནོ། །རྟག་ཏུ་ཞེས་བྱ་བ་ནི་སྐད་ཅིག་གཉིས་པ་ལ་སོགས་པར་ཡང་ངོ༌། །དངོས་པོ་སྔར་མཐོང་བ་དེ་ལྟར་ཡོད་པ་དེའི་དོགས་པ་སྐྱེས་པ་དེས་བསླུས་ཤིང་བྲིད་པའོ། །མིག་གི་རྣམ་པར་ཤེས་པས་དངོས་པོ་ཡོད་པ་འབའ་ཞིག་དམིགས་ཀྱི། མེད་པ་ནི་མ་ཡིན་པ་དེས་ན་སླུ་བར་བྱེད་པའི་འཁྲུལ་པ་སྐྱེས་པ་ཡིན་ནོ། །ཡོད་པ་དམིགས་ཀྱང་བལྟར་རུང་བ་དང་བྲལ་བའི་ས་ཕྱོགས་ལ་སོགས་པ་དམིགས་པ་ལས་བུམ་པ་མེད་པར་ངེས་པ་མཐོང་བ་དེ་བཞིན་དུ། དངོས་པོ་གཞན་སྐད་ཅིག་གཉིས་པའི་དངོས་པོ་སྔར་མཐོང་བའི་རང་བཞིན་གྱིས་སྟོང་བར་དམིགས་ན་སྔ་མ་མེད་པར་ཐ་སྙད་དུ་བྱེད་པ་མ་ཡིན་ནམ་ཞེ་ན། འདྲ་བ་གཞན་འབྱུང་བ་དེས་བསླུས་པ་ཡིན་ནོ། །སྐད་ཅིག་གཉིས་པ་ལ་མཐོང་བའི་རང་བཞིན་གང་ཡིན་པ་དེ་ནི་སྔ་མའི་རང་བཞིན་དང་འདྲ་བ་ཡིན་པར་ཏེ། དེས་ན་ཐ་དད་པར་རྟོགས་པ་མེད་ལ། དེ་མེད་པས་ན་སྔ་མ་མེད་པར་ངེས་པ་མ་ཡིན་ནོ། །རྣམ་པར་དབྱེ་བ་མ་ངེས་ན་སྔར་ཡོད་པ་དེ་ཉིད་འདི་ཡིན་ནོ་ཞེས་རྟོགས་པ་ཡིན་ནོ་ཞེས་བྱ་བའི་དོན་ཏོ། །འདི་ལ་དེ་འདྲ་བ་གཞན་འབྱུང་བ་མཐོང་བ་དང༌། བར་ཆད་མེད་པ་ནི་སླུ་བའི་རྒྱུ་ཡིན་གྱི། མ་དམིགས་པ་དང་བར་དུ་ཆོད་པ་ནི་མ་ཡིན་ནོ། །གློག་གཉིས་འདྲ་བ་ཡིན་ཡང་བར་མཆོད་པ་མ་ཡིན་པའི་ཕྱིར་སྔ་མ་མེད་པར་ངེས་པར་དེས་ན་གཅིག་ཏུ་འཁྲུལ་པ་མ་ཡིན་པ་བཞིན་ནོ། །འདིར་ནི་གཉིས་པའི་ངོ་བོས་སྟོང་བའི་དུས་མེད་པའི་ཕྱིར་བར་ཆོད་མེད་པ་ཡིན་ཏེ། སྐྱེ་བ་དང་འཇིག་པ་མཉམ་པ་ཞེས་བྱ་བ་གང་བཤད་པ་ཡིན་ནོ། །དམིགས་པ་ཡང་འདྲ་བར་འཁྲུལ་པའི་རྒྱུ་ཡིན་ནོ། །འམ་ཞེས་སྨོས་པ་ནི་ཕྱོགས་སྔ་མ་གཉིས་ལ་ལན་ཐ་དད་པར་སྟོན་པའོ། །དོན་དམ་པར་ནི་ཕྱོགས་སྔ་མ་བསྡོམས་པའི་ལན་བསྡོམས་པ་ཉིད་ཡིན་ནོ། །དེས་ན་ཐ་དད་པ་ལ་ལྟོས་ནས་ནི་རྣམ་པར་བརྟགས་པ་ཡིན་ལ། བསྡོམས་པ་ལ་ལྟོས་ནས་ནི་སྡུད་པ་ཡིན་ཏེ། དཔེར་ན་གལ་ཏེ་ལྷ་སྦྱིན་འོང་ངམ། གལ་ཏེ་སྣ་ཚོགས་བཤེས་གཉེན་འོང་བ་དེ་ལྟ་ན་ཡང་དོ་ཟླའི་གྱ་ད་ནི་ངའོ་ཞེས་དེ་དང་དེ་ལ་དོ་ཟླའི་གྱ་ད་ནི་ངའོ་ཞེས་སྨྲ་བ་ན་
རེ་རེ་ལ་བསམས་ནས་ལམ་གྱི་སྒྲ་སྦྱར་བ་བཞིན་ནོ། །ཡང་ན་ད་ལྟར་ཡོད་པ་དམིགས་པས་གང་གི་ཚེ་དངོས་པོ་ཡོད་པ་མ་མཐོང་བ་དེའི་ཚེ་ཡང་ཡོད་པར་སེམས་པ་ཡིན་ཏེ། དཔེར་ན་དངོས་པོ་འདི་ལྟར་གནས་པ་དེ་བཞིན་དུ་ཕྱིས་ཀྱང་གནས་སོ་ཞེས་བྱ་བ་འམ། མཐོང་བའི་བུམ་པ་དུས་རེ་ཞིག་མ་མཐོང་བ་ལས་ཡང་མཐོང་བ་ན། དེའི་ཚེ་མཐོང་བའི་བུམ་པ་གང་ཡིན་པ་དེ་ཉིད་དུས་དེ་སྲིད་དུ་གནས་སོ་ཞེས་དོགས་པ་བཞིན་ནོ། །མ་མཐོང་བ་ལ་ཡང་གནས་པར་དོགས་པ་ནི་ཡོད་པ་དམིགས་པ་ལས་ཡིན་ལ། ད་ལྟར་ཡོད་པ་འབའ་ཞིག་ཏུ་དམིགས་པ་ནི་སྔར་བཤད་པའི་ཁྱད་པར་གྱི་འདྲ་བ་གཞན་འབྱུང་བ་ལས་ཡིན་ནོ། །དེས་ན་འདྲ་བ་གཞན་འབྱུང་བས་བསླུས་པ་ནི་ཡོད་པ་དམིགས་པའི་རྒྱུ་མཚན་དུ་བརྗོད་པ་ཡིན་ལ། ཡོད་པ་དམིགས་པས་ནི་ཐམས་ཅད་དུ་མ་མཐོང་བའི་དུས་སུ་ཡང་གནས་པར་འཁྲུལ་པ་ཡིན་ནོ། །དེའི་ཕྱིར་བཤད་མ་ཐག་པ་འདིས་ནི་ཕྱི་རོལ་གྱི་འཁྲུལ་པའི་རྒྱུ་བཤད་པ་ཡིན་ནོ། །དེས་ན་སྐད་ཅིག་མ་ཐ་མཐོང་བ་རྣམས་ལ་ལྡོག་པའི་ཆོས་ངེས་པའི་ཕྱིར་ཡོད་པ་དམིགས་པ་འཁྲུལ་པའི་རྒྱུ་མཚན་ཡིན་ལ། ཕྱི་རོལ་གྱི་རྒྱུ་མཚན་དེ་ཡོད་ཀྱང་ཐར་པ་རྣམས་ལ་འཁྲུལ་པ་མེད་པ་དེའི་ཕྱིར་སྔར་བློ་ཞེན་པ་ཞེས་བྱ་བས་མ་རིག་པའི་བསླད་པ་རྒྱུར་བཤད་པ་ཡིན་ཏེ། བློ་ཞེན་པ་ནི་མ་རིག་པའི་མཚན་ཉིད་དུ་བརྗོད་དོ། །སློབ་དཔོན་ཕྱོགས་ཀྱི་གླང་པོས་ཕྱི་རོལ་གྱི་རྒྱུ་མཚན་ཉིད་སྟོན་པར་མཛད་པ་ན། འདྲ་བ་ཡིས་ནི་སྒྲིབ་པའི་ཕྱིར། །དེ་བཟུང་པས་ན་དེ་མི་འཛིན། །ཞེས་བཤད་དོ། །གཞན་གང་དག་གཞུང་འདི་རྗོད་པར་བྱེད་པ་མ་ཡིན་པ་དང་མ་འབྲེལ་པར་འཆད་པ་ནི་བཤད་པ་འདིས་སྤང་བར་བྱའོ། །འོ་ན་ལྡོག་པའི་གནས་སྐབས་ཇི་ལྟར་མི་རྟག་པ་ཉིད་ཡིན་ཞེ་ན། བཤད་པ། ཡོད་པའི་དུས་ཀྱི་ཕྱིས་བུམ་པ་ལ་སོགས་པའི་དངོས་པོ་འདི་བུམ་པས་དབེན་པའི་ས་ཕྱོགས་ཤེས་པའི་བདག་ཉིད་མི་དམིགས་པ་རྒྱུར་གྱུར་པས་མི་གནས་པར་རྟོགས་པ་དེའི་ཕྱིར། འཇིག་པའི་རང་བཞིན་ངེས་པ་ནི་དུས་ཕྱིས་ཡིན་ནོ། །དེའི་ཕྱིར་གང་གི་ཚེ་ངེས་པ་དེའི་ཚེ་མི་རྟག་པ་ཉིད་དུ་རྣམ་པར་གཞག་གོ །
དངོས་པོ་ལྡོག་པ་ཉིད་ཀྱི་དུས་གང་ཡིན་པ་དེའི་ཁྱད་པར་ཅན་གྱི་ལྡོག་པའི་གནས་སྐབས་ཀྱི་བདག་ཉིད་ནི་མི་རྟག་པ་ཉིད་ཡིན་ནོ་ཞེས་བྱ་བ་འདི་ཡང་འགྱུར་བ་མཐོང་ནས་ཕྱིས་རྣམ་པར་འཇོག་པ་བཞིན་ནོ་ཞེས་བྱ་བ་དེར་བཤད་ཟིན་ཏོ། །དེས་ན་ལྡོག་པའི་གནས་སྐབས་ཀྱི་མཐར་ཐུག་པ་དེའི་རང་གི་ངོ་བོ་ཉིད་ལྡོག་པའི་ཆོས་མི་རྟག་པ་ཉིད་དུ་གནས་པ་ཡིན་གྱི། ལྡོག་པའི་གནས་སྐབས་འབའ་ཞིག་ནི་མ་ཡིན་ཏེ། དེ་ནི་དངོས་པོ་དང་ལྷན་ཅིག་འབྲེལ་པ་མེད་པའི་ཕྱིར་རོ། །དངོས་པོ་དང་དངོས་པོ་མེད་བ་དག་འགལ་བའི་ཕྱིར། ངེས་བའི་དུས་ཀྱི་ཁྱད་པར་ཅན་གྱི་ལྡོག་པ་ཉིད་ཁོ་བོས་མི་རྟག་པ་ཉིད་དུ་རྟོགས་སོ་ཞེས་སྨོས་པ་ཡིན་ནོ་ཞེས་བྱ་བ་ཡང་དེ་ཉིད་དུ་བཤད་ཟིན་ཏོ། །དེས་ན་ལྡོག་པའི་ཆོས་ཀྱི་དངོས་པོ་ཉིད་མི་རྟག་པ་ཡིན་པར་ནི་ཐ་སྙད་ལས་ཀྱང་ཡིན་ནོ། །དེ་ལྟ་མ་ཡིན་ཏེ་གལ་ཏེ་དངོས་པོ་ཉིད་མི་རྟག་པ་མ་ཡིན་གྱིས་འོན་ཀྱང་དུས་ཕྱིས་འབྱུང་བ་ཡིན་ན་དེའི་ཚེ་འགལ་བའི་ཆོས་དང་ལྡན་པའི་ཕྱིར་དོན་གཞན་ཁོ་ནར་འགྱུར་རོ། །གཞན་གྱི་རྒྱུ་མཚན་ཅན་ཞེས་བྱ་བ་རྒྱུ་མཆན་ཡོད་པ་ཡིན་ནམ་མེད་པ་ཡིན་ཡང་རུང་སྟེ། དུས་ཐ་དད་པས་གཞན་ཉིད་དོ། །དོན་གཞན་དུ་གྱུར་པ་དེ་ལྟ་ཡིན་ན་ནི་བུམ་པ་ལ་སོགས་པའི་དངོས་པོ་མི་རྟག་པ་ཉིད་དེ་དང་ལྡན་པར་མི་འགྱུར་ཏེ། མི་དགོས་པའི་ཕྱིར་རོ་ཞེས་བྱ་བ་ནི་དོན་གྱི་བདག་ཉིད་ལ་ཐ་དད་པ་དེའི་བྱེད་པ་མེད་པའི་ཕྱིར་རོ། །ཅི་སྟེ་དོན་གྱི་བདག་ཉིད་མི་རྟག་པར་བྱ་བའི་ཕྱིར་འབྲེལ་པ་ཅན་གྱི་འཇིག་པ་དེ་བྱེད་བ་ཉིད་ཡིན་པས་དེ་ལ་དགོས་ན་ནི་དེའི་བྱ་བ་གང་དང་འབྲེལ་པས་འཇིག་པའི་རང་གི་བདག་ཉིད་དུ་གྱུར་པའི་འཇིག་པ་སྐྱེད་པ་གང་ཡིན་པ་དེ་ཉིད་མི་རྟག་པ་ཡིན་པར་འགྱུར་གྱི། མི་རྟག་པ་གཞན་གྱིས་ཅི་ཞིག་བྱ་སྟེ་རང་གི་བདག་ཉིད་དུ་གྱུར་པའི་འཇིག་པ་མེད་པར་ནི་དེ་ཡོད་ཀྱང་དངོས་པོ་འཇིག་པ་མ་ཡིན་ནོ། །འདི་སྙམ་དུ་མི་རྟག་པ་ཉིད་དང་འབྲེལ་པས་དངོས་པོ་མི་རྟག་པ་ཡིན་གྱི། རང་གི་ངོ་བོས་ནི་མ་ཡིན་ནོ། །དེས་ན་མི་རྟག་པ་ཉིད་ཉེ་བར་སྦྱོར་བ་མ་ཡིན་ཡང་མི་རྟག་པ་ཉིད་དང་འབྲེལ་པས་མི་རྟག་པར་འགྱུར་བ་ཡིན་ནོ་སྙམ་ན། རང་བཞིན་གྱིས་མི་གཡོ་ན་ཞེས་སྨོས་སོ། །བརྟན་པ་རང་གི་ངོ་བོས་
གཡོ་བ་མེད་པ་ནི་དོན་གཞན་འགའ་ཞིག་དང་ལྡན་པ་ན་རང་གི་ངོ་བོ་ལས་འཕོ་བ་མ་ཡིན་ཏེ། དེས་ན་གཡོ་བ་དེའི་ངོ་བོར་མི་འཐད་དེ། གཏན་ཚིགས་དེའི་ཕྱིར་དངོས་པོ་དེ་དང་ལྡན་པར་མི་འགྱུར་རོ། །གཞན་ཡང་མི་རྟག་པ་ཉིད་དེ་དོན་གཞན་གྱི་རྒྱུ་མཚན་ཅན་དུ་ཁས་ལེན་ན། མི་རྟག་པ་ཉིད་ཅེས་བྱ་བ་འམ། ཆོས་གཞན་དེའི་དངོས་པོའི་རྒྱུ་གཞན་ལས་གྱུར་པའི་དོན་གཞན་ལས་འབྱུང་བ་ན་སྒྲུབ་པར་བྱེད་པ་མཚན་ཉིད་ཀྱིས་དངོས་པོ་དེའི་རང་གི་ངོ་བོར་མི་འགྱུར་རོ། །དེས་ན་རྒྱུའམ་འབྲས་བུ་ཞིག་ཡིན་པར་འགྱུར་ཏེ། གཞན་ནི་འབྲེལ་པ་མེད་པའི་ཕྱིར་སྒྲུབ་པར་བྱེད་པའི་མཚན་ཉིད་ཀྱི་དངོས་པོ་དེ་ལ་ཡོད་པ་འདོགས་པར་རྗེས་སུ་དཔག་པ་གང་ཡིན་པ་དེ་མི་སྲིད་པའི་ཕྱིར་རོ། །དེ་ལྟར་རྣམ་པར་རྟོག་པར་འགྱུར་བ་དེ་ལ་དོན་གཞན་དེ་རྒྱུ་ཉིད་ནི་མ་ཡིན་ཏེ། སྒྲུབ་པར་བྱེད་པར་གྱུར་པ་དེའི་ཚེ་ཕྱིས་འབྱུང་བའི་རྒྱུའི་ཕྱིར་ནའོ། །གང་ཞིག་གང་གི་ཕྱིས་འབྱུང་བ་དེ་ནི་དེའི་རྒྱུ་མ་ཡིན་ཏེ། །སྔར་གྱི་དེ་རྒྱུ་ཡིན་པའི་ཕྱིར་རོ། །འབྲས་བུ་ཡིན་ན་ཡང་དེ་ཡོད་པ་ན་གཅིག་ཏུ་ངེས་པ་མ་ཡིན་ཏེ། ངེས་པར་རྗེས་སུ་དཔག་པར་མི་འགྱུར་རོ། །དོན་གཞན་ལས་སྐྱེས་པ་དེ་ཇི་ལྟར་སྒྱུ་མ་ཡིན་ཞེ་ན། དེ་ཞེས་སྨོས་ཏེ། སྒྲུབ་པར་བྱེད་པ་ཞེས་བྱ་བའི་དངོས་པོ་སྒྲུབ་པར་བྱེད་པའི་རྒྱུ་དག་ལས་གྲུབ་ནས་སོ། །དོན་གཞན་ལས་འབྱུང་ན་ཞེས་བྱ་བ་ནི། སྐྱེ་བ་འགྲུབ་པའི་རྒྱུ་དངོས་པོ་གཞན་ཡིན་ནོ། །གང་ཞིག་གང་མེད་པར་གྲུབ་པའི་དངོས་པོ་དེ་ནི་ཡོད་པ་སྔོན་དུ་འགྲོ་བ་ཅན་མ་ཡིན་པའི་ཕྱིར་དེ་དེའི་རྒྱུ་མ་ཡིན་ནོ། །གཞན་གྱི་ཕན་པ་སྟེ་སྒྲུབ་པར་བྱེད་པའི་མཚན་ཉིད་ཀྱི་དངོས་པོ་ལས་གཞན་དུ་གྱུར་པའི་ཕན་པ་བོགས་དབྱུང་བ་ལ་ལྟོས་པའི་འབྲས་བུ་ཡང་རྒྱུ་གཅིག་ལ་གདོན་མི་ཟ་བར་ཡོད་པ་མ་ཡིན་ཏེ། འདི་ལྟར་འབྲས་བུ་དེས་ན་སྒྲུབ་པར་བྱེད་པའི་རྒྱུ་ལས་ཐ་དད་པའི་རྒྱུ་ལྟོས་པར་བྱ་བ་ཡིན་ན་གང་གི་ཕྱིར་དེ་ཡང་རང་གི་རྒྱུ་དང་འབྲེལ་པ་ལ་ལྟོས་ནས་ཉེ་བ་ཡིན་པ་དེའི་ཕྱིར། དོན་གཞན་ལས་སྐྱེས་པ་དེ་ཡོད་པ་སྟེ། བདོག་པའི་གོ་བར་བྱེད་པའི་གཏན་ཚིགས་མ་ངེས་པ་ཡིན་ནོ། །ཅི་སྟེ་དོན་གཞན་ལ་ལྟོས་པ་ནི་མ་ཡིན་ཏེ། འོན་ཀྱང་འཇིག་པ་ནི་སྒྲུབ་པར་བྱེད་པ་ཙམ་ལ་ལྟོས་པ་ཡིན་ནོ་ཞེ་ན། གལ་ཏེ་དེ་ལྟར་དངོས་པོ་ཙམ་ལས་འབྱུང་བ་ཡིན་ཏེ། འབྲས་བུར་གྱུར་པའི་དངོས་
པོ་དེ་རྒྱུ་གཞན་ལ་མི་ལྟོས་པ་ཉིད་ཡིན་ན། དངོས་པོ་གཞན་ལ་མི་ལྟོས་པའི་ཕྱིར་དེ་ཉིད་དེའི་རྒྱུ་མེད་པར་སྐྱེས་པ་ཡིན་ཏེ། དངོས་པོའི་རྒྱུ་ལས་གཞན་ལ་མི་ལྟོས་པས་འཇིག་པ་རྒྱུ་མེད་པར་བཤད་པ་ཡིན་ལ། འཇིག་པ་རྒྱུ་མེད་པ་དེ་ནི་ཁྱེད་ཀྱི་ཕྱོགས་དེར་ཡང་མཚུངས་སོ། །དེ་ཙམ་གྱིས་ཞེས་བྱ་བ་ནི་སྒྲུབ་པར་བྱེད་པ་ཙམ་གྱི་རྗེས་སུ་འབྲེལ་པ་རྗེས་སུ་འགྲོ་བའོ། །གལ་ཏེ་དེ་ཙམ་ལ་ལྟོས་པའི་ཕྱིར་གང་འགའ་ཞིག་ན་སྒྲུབ་པར་བྱེད་པ་ཡོད་པ་དེ་ལ་དེ་ཡང་ཡོད་པ་དང་གང་གི་ཚེ་དངོས་པོ་གྲུབ་པ་དེ་ཉིད་ཀྱི་ཚེ་གྲུབ་པ་ཡིན་ན་ནི་དེའི་ཕྱིར་ཡུ་བུ་གཉིས་ལ་ཁྱད་པར་ཅུང་ཟད་ཀྱང་མེད་དེ། འདི་ལྟར་ཁྱེད་ཀྱིས་ཀྱང་འཇིག་པ་རྒྱུ་མེད་པ་ཅན་དང༌། སྐད་ཅིག་ཙམ་གྱི་རྗེས་སུ་འགྲོ་བ་ཡིན་པའི་ཕྱིར་རོ། །གལ་ཏེ་དངོས་པོའི་རྒྱུ་ལས་གཞན་ལ་མི་ལྟོས་པས་རྒྱུ་མེད་པར་བརྗོད་པ་མ་ཡིན་ནམ། འདིར་ནི་རྒྱུ་ལས་དངོས་པོ་དང་དངོས་པོ་ལས་ནི་འཇིག་པ་ཡིན་པའི་ཕྱིར། རྒྱུ་གཞན་ཡིན་པས་རྒྱུ་མེད་པར་མི་འགྱུར་རོ། །དེ་ལྟ་ཡིན་དང་སྐད་ཅིག་དང་པོ་ལ་ནི་དངོས་པོ། སྐད་ཅིག་གཉིས་པ་ལ་འཇིག་པ། སྐད་ཅིག་གསུམ་པ་ལ་ལྡོག་པ་ཡིན་པའི་ཕྱིར་ཁྱད་པར་ཡོད་དོ་ཞེས་དོགས་པ་ལ། དངོས་པོ་དེ་ལས་འཇིག་པ་འགའ་ཞིག་འབྱུང་ཡང་སྟེ། སྐྱེས་ཀྱང་སྐྱེད་པར་བྱེད་པའི་དངོས་པོ་དེ་ལ་རང་བཞིན་གྱིས་ཁྱད་པར་བྱེད་པ་ལ་འཇིག་པ་དེ་མི་དགོས་པས་སོ། །འདི་སྐད་བརྗོད་པ་ཡིན་ཏེ། འཇིག་པ་སྐྱེད་པར་བྱེད་པའི་དངོས་པོ་བརྟན་པའི་རང་བཞིན་དེ་ནི་དེས་བསྐྱེད་པས་རང་བཞིན་གཞན་དུ་མི་འགྱུར་ཏེ་དེས་ན་དོན་དེ་ཉམས་པ་མེད་པ་ཉིད་དོ། །དེ་ལྟར་ན་ཡང་ཐལ་བ་སྔ་མ་ཞེས་བྱ་བ་དངོས་པོ་དེ་ལ་ལྡན་པར་མི་འགྱུར་རོ་ཞེས་བྱ་བ་ཉིད་ཡིན་ནོ། །གལ་ཏེ་དངོས་པོ་རང་གི་ངོ་བོ་ཟློག་པར་བྱེད་པའི་དོན་བྱེད་ན་ནི་རང་ཉིད་ལྡོག་པའི་ཆོས་སུ་འགྱུར་ཏེ། དེ་ཙམ་ལས་བྱུང་བའི་འཇིག་པ་ཞེས་བྱ་བའི་དངོས་པོས་དེ་འཇིག་པར་བྱེད་པའི་ནུས་པ་དེ་ཉིད་ལས་ཐོབ་པའི་ཕྱིར་རོ། །གལ་ཏེ་བདག་ཉིད་ལྡོག་པར་བྱེད་པའི་ནུས་པ་མེད་ན། ཅི་ལྟར་བདག་ཉིད་ལྡོག་པར་བྱེད་ནུས་པའི་དངོས་པོ་སྐྱེད་པར་བྱེད། དེ་ལ་རང་གི་ངོ་བོ་ལྡོག་པར་བྱེད་ནུས་ན་རང་ཉིད་ལྡོག་པའི་ཕྱིར་གཞན་གྱིས་བྱས་པ་ནི་ཅུང་ཟད་ཀྱང་མེད་དོ། །ལྡོག་པར་བྱེད་པའི་ནུས་པ་མེད་ན་དེས་བྱས་པ་གང་ཡིན་པ་དེ་ཡང་ཟློག་པར་རུང་བ་མ་
ཡིན་ཏེ། ནུས་པའི་རྒྱུ་མེད་པའི་ཕྱིར་རོ། །བྱི་བ་དང་ཁྱི་སྨྱོན་གྱི་དུག་ལ་སོགས་པ་དང་དངོས་སུ་མི་ནུས་པ་ཡང་བརྒྱད་པས་ནུས་པ་མཐོང་བ་མ་ཡིན་ནམ། དེ་བཞིན་དུ་དོན་དེ་བདག་ཉིད་ལྡོག་པར་བྱེད་མི་ནུས་ཀྱང་དེ་ལྡོག་པར་བྱེད་པ་ཡིན་ནོ་ཞེ་ན། འདི་ནི་སྙིང་པོ་མེད་པ་སྟེ། འདི་ལྟར་དངོས་པོ་གང་ཞིག་དངོས་སུ་འབྲས་བུ་གང་བྱེད་པའི་ནུས་པ་མེད་པ་དེ་ཉིད་རང་གི་ངོ་བོ་ཙམ་གྱིས་བྱས་པའི་ལྷན་ཅིག་བྱེད་པ་དང༌། ལྷན་ཅིག་དངོས་སུ་བྱེད་ནུས་པར་ཡང་འགྱུར་བ་ནི་མ་ཡིན་ནོ། །འདིར་ནི་དེ་ཙམ་གྱིས་བྱས་པ་འཇིག་པ་ཞེས་བྱ་བའི་དངོས་པོས་རང་ཉིད་ཀྱི་དངོས་པོ་དེ་ཉིད་གཞིག་དགོས་ཀྱི་གང་གིས་དུག་བརྒྱུད་པས་འཆི་བར་བྱེད་པ་ལྟར་བརྒྱུད་པར་འགྱུར་བ་གཞན་ནི་མ་ཡིན་ནོ། །འདིས་ནི་ཚོགས་པ་གང་ལས་དངོས་པོ་དེ་སྐྱེ་བ་དེ་ཉིད་ལས་དངོས་པོ་འཇིག་པར་བྱེད་པ་ཡིན་ཏེ། དེས་ན་སྐད་ཅིག་མ་ཉིད་ཡིན་ཡང་རེ་ཞིག་འཇིག་པ་ཐ་དད་པར་ནི་གྲུབ་པོ་ཞེས་གང་སྨྲས་པ་དེ་ཡང་གསལ་བ་ཡིན་ནོ། །ཚོགས་པ་དེ་ཉིད་ཀྱིས་དངོས་སུ་དངོས་པོ་དེ་ལྡོག་པའི་ཆོས་ཀྱི་རང་བཞིན་དུ་བྱ་དགོས་ལ། དེས་བྱས་པའི་འཇིག་པ་དེས་ཀྱང་དངོས་སུ་བསྐྱེད་པའི་དངོས་པོ་དེ་ཉིད་བཟློག་པར་བྱ་བ་ཡིན་ནོ། །དེའི་ཕྱིར་ཚོགས་པ་དེ་དངོས་སུ་བསྐྱེད་པར་བྱ་བའི་རང་བཞིན་ལྡོག་པར་བྱེད་པ་དང༌། ལྡོག་པར་བྱ་བར་བྱེད་ནུས་པ་ཡིན་ན། ལྡོག་པའི་བྱ་བའི་དངོས་པོ་དེ་ཉིད་ཇི་ལྟར་ལྡོག་པའི་ཆོས་སུ་མི་བྱེད་དེ། བརྒྱུད་པ་ལ་བརྟེན་པས་ཅི་ཞིག་བྱ། དེའི་རང་བཞིན་ལྡོག་པའི་ཆོས་མ་ཡིན་ན་ནི་གཞན་གྱིས་ཀྱང་ལྡོག་པར་བྱེད་མི་ནུས་སོ། །ཚོགས་པ་གཅིག་ནི་འབྲས་བུ་འགའ་བར་སྐྱེད་པར་བྱེད་པ་ཡང་མི་འཐད་པས་ཚོགས་པ་གཅིག་ལས་སྐྱེས་པའམ། དེ་ཙམ་ལས་བྱུང་བས་ནི་དངོས་པོ་འཇིག་པར་ནུས་པ་མ་ཡིན་ནོ། །དེས་ན་གལ་ཏེ་འཇིག་པ་མ་ཡིན་པའི་རང་བཞིན་གྱི་དངོས་པོ་ཡིན་ན། དེ་ལ་མི་རྟག་པ་ཉིད་རྗེས་སུ་དཔོག་པར་བྱེད་པ་ནི་མ་ཡིན་ནོ། །དེས་ན་འདིས་དོན་འདི་བརྗོད་པ་ཡིན་ཏེ། དངོས་པོ་ཙམ་གྱི་རྗེས་སུ་འགྲོ་བ་ཡིན་ན་ནི་འབྲས་བུར་གྱུར་པའི་འཇིག་པ་རྒྱུ་མེད་པ་ཉིད་དང༌། དེ་ཙམ་དང་རྗེས་སུ་འབྲེལ་པར་འགྲུབ་པ་ཡིན་ནོ། །དོན་གཞན་ཉིད་ཡིན་ན་ནི་དངོས་པོ་འཇིག་པར་མི་འགྱུར་རོ། །དེས་ན་རྒྱུ་གཞན་
ལ་མ་ལྟོས་པ་དང་དེ་ཙམ་གྱིས་རྗེས་སུ་འབྲེལ་པར་ཁས་ལེན་ན། དེའི་བདག་ཉིད་ཁོ་ནས་ཁས་བླང་དགོས་ཏེ། དེ་ལྟ་མ་ཡིན་ན་དངོས་པོ་འཇིག་པ་ཉིད་དུ་མི་འཐད་པའི་ཕྱིར་རོ། །གལ་ཏེ་དེའི་བདག་ཉིད་མེད་ཀྱང་རྗེས་སུ་འགྲོ་བ་དང་ལྡོག་པ་དག་ལས་སྐྱེ་བ་ཅན་འཇིག་པའི་གོ་བྱེད་དུ་འགྱུར་བ་མ་ཡིན་ནམ། དེ་ལ་སྐྱེ་བ་ཅན་འགའ་ཞིག་འཇིག་པར་མཐོང་བས་ནི་རྗེས་སུ་འགྲོ་བ་ཡིན་ལ། མི་རྟག་པ་མ་ཡིན་པའི་དངོས་པོ་སྐྱེ་བ་སྟེ། སྐྱེ་བ་དང་ལྡན་པར་མ་མཐོང་ན་ནི་ལྡོག་པ་ཡིན་ནོ། །མ་མཐོང་བ་ལས་ནི་བསྒྲུབ་པར་བྱ་བ་མེད་པ་མི་མཐུན་པའི་ཕྱོགས་ལས་གཏན་ཚིགས་ལྡོག་པ་ཡིན་ལ། རྗེས་སུ་འགྲོ་བ་དང་ལྡོག་པ་དེས་ན་གཏན་ཚིགས་འཁྲུལ་པ་མེད་པ་ཡིན་ནོ། །འཁྲུལ་པ་མེད་པ་ལས་ཀྱང་གོ་བར་བྱེད་པ་ཡིན་ཏེ། དེས་ན་འདི་ལ་དེའི་བདག་ཉིད་ཀྱིས་ཅི་བྱ་ཞེས་དོགས་པ་བཟློག་པའི་ཕྱིར་བཤད་པ། མི་མཐུན་པའི་ཕྱོགས་ལ་མ་མཐོང་བ་ཙམ་གྱིས་ནི་གཏན་ཚིགས་འཁྲུལ་པ་མེད་པར་རིགས་པ་མིན་ཏེ། གང་གི་ཕྱིར་མ་མཐོང་བ་ཡོད་ཀྱང་འདི་ལ་འཁྲུལ་པ་སྲིད་པ་ཅན་ཉིད་ཕྱིར། ཕྲུལ་བའི་འབྲས་ཚོས་པ་ལ་འཁྲུལ་པ་བཞིན་ནོ། །དེར་དེ་ཉིད་བསྒྲུབ་པའི་ཕྱིར་བཤད་པ། མང་པོ་ཞིག་ཚོས་པ་མཐོང་ཡང་ཕྲུ་བའི་ནང་དུ་ཆུད་པ་ཙམ་འབའ་ཞིག་གིས་ནི་ཚོས་བར་མི་འགྲུབ་པོ། །ཁྱད་པར་གཞན་གྲུབ་ན་ནི་ཆོས་པར་འགྲུབ་པ་ཡིན་པས་དེ་བཟློག་པའི་ཕྱིར་ཙམ་སྨོས་པ་ཡིན་ཏེ། འདི་ལྟར་འདི་ལྟ་བུའི་རང་བཞིན་ཡིན་ལ་ཞེས་གང་འཆད་པ་ཡིན་ནོ། །ཅིའི་ཕྱིར་མི་འགྲུབ་ཅེ་ན། འཁྲུལ་པ་མཐོང་བའི་ཕྱིར་རོ། །འདི་ལྟ་བུ་ཞེས་བྱ་བ་སཱ་ལུ་ལ་སོགས་པའི་རང་བཞིན་ཡིན་ལ། མེ་དང་ཆུ་དང་ཕྲུ་བ་ལ་སོགས་པ་དང་འབྲེལ་པས་འདི་དང་ཚོགས་པའི་རྒྱུ་འདྲ་བ་དག་ཚོགས་སོ་ཞེས་བྱ་བ་ནི་འཁྲུལ་པར་མི་འགྱུར་རོ། །དེ་ལྟ་མ་ཡིན་ཏེ་ཁྱད་པར་དེ་མེད་ན་འདེ་ལ་ལྷག་མ་ཡོད་པས་ལྷག་མ་དང་ལྡན་པ་སྟེ། ཡུལ་གཏན་ལ་མ་ཕེབས་པ་ཡོད་པ་ཞེས་བྱ་བའི་དོན་ཏོ། །དེ་ཡང་འཁྲུལ་པ་ཅན་ཡིན་ནོ། །ལྷག་མ་དང་ལྡན་པའི་རང་གི་ངོ་བོ་བསྟན་པའི་ཕྱིར་བཤད་པ། སྒྲུབ་པར་བྱེད་པ་གང་ཞིག་བསྒྲུབ་པར་བྱ་བ་མེད་པ་ལ་མ་མཐོང་བ་ཙམ་གྱིས་ལྡོག་པ་སྟོན་པར་བྱེད་པ་དེའི་ལྡོག་པ་ནི་མ་ངེས་པའི་ཕྱིར་མི་མཐུན་པའི་ཕྱོགས་ལ་ཡོད་པར་ཐེ་ཚོམ་ཟ་བར་འགྱུར་ལ། མི་མཐུན་པའི་ཕྱོགས་ལ་འཇུག་པའི་གཏན་ཚིགས་ཀྱང་གོ་
༄༅།།བར་བྱེད་པ་མ་ཡིན་པས་མ་མཐོང་བ་ནི་ཐེ་ཚོམ་རྒྱུ་ཡིན་ཕྱིར། ཐེ་ཚོམ་གྱི་རྒྱུའི་རྗེས་སུ་དཔག་པ་ལྷག་མ་དང་ལྡན་པར་བརྗོད་དོ། །མི་དམིགས་ཀྱང་ཇི་ལྟར་ཐེ་ཚོམ་ཟ་ཞེ་ན། མི་དམིགས་པ་ཐམས་ཅད་ནི་ཞེས་སྨོས་སོ། །སྣང་བ་དང་མི་སྣང་བའི་ཡུལ་ཅན་ཐམས་ཅད་ནི་མེད་པ་རྟོགས་པར་བྱེད་པ་མ་ཡིན་ནོ། །དེའི་ཕྱིར་ལྡོག་པར་བྱ་བ་དང་ལྡོག་པར་བྱེད་པ་འདོད་པ་ནི། ལྡོག་པར་བྱ་བ་དང་ལྡོག་པར་བྱེད་པ་དེ་གཉིས་རང་བཞིན་འབྲེལ་པ་ཉིད་འདོད་པར་བྱ་དགོས་ཏེ། འབྲེལ་པ་ནི་ལྡོག་པར་བྱ་བ་ཡིན་ལ། འབྲེལ་བའི་ཡུལ་ནི་ལྡོག་པར་བྱེད་པ་ཡིན་ནོ། །དེ་ལྟ་མ་ཡིན་ཏེ་ལྡོག་པ་དང་ལྡོག་པར་བྱེད་པ་དག་རང་བཞིན་འབྲེལ་པ་མེད་ན་ཐེ་ཚོམ་ཟ་བའི་ཕྱིར་གཏན་ཚིགས་བསྒྲུབ་བྱ་གོ་བར་བྱེད་པ་མ་ཡིན་པར་འགྱུར་རོ་ཞེས་བྱ་བ་ནི་ལྷག་མ་དང་ལྡན་པ་ཉིད་ཀྱི་མཇུག་བསྡུས་པའོ། །གང་གི་ཕྱིར་རང་བཞིན་འབྲེལ་པ་ཉིད་ཀྱིས་གཏན་ཚིགས་གོ་བར་བྱེད་པ་ཡིན་གྱིས་མ་མཐོང་བ་ཙམ་གྱིས་ནི་མ་ཡིན་པའི་རྒྱུ་དེས་ན་སློབ་དཔོན་ཕྱོགས་ཀྱི་གླང་པོས་མ་གྲུབ་པ་དང་བཟློག་པ་དོན་འགལ་བ་དང་འཁྲུལ་པ་ཅན་མ་ངེས་པ་དེ་དག་གི་གཉེན་པོ་སྟེ། དེས་ན་གང་གི་ཕྱིར་མ་གྲུབ་པ་དང་འགལ་བ་དང་མ་ངེས་པ་མི་མཐུན་པའི་ཕྱོགས་ཡིན་པ་དེའི་ཕྱིར་གཏན་ཚིགས་ཀྱི་ཚུལ་ཕྱོགས་ཀྱི་ཆོས་དང་རྗེས་སུ་འགྲོ་བ་དང་ལྡོག་པ་གསུམ་ལ་ངེས་པ་ཡོད་པར་བརྗོད་པར་མཛད་པ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་རང་བཞིན་འབྲེལ་པའི་འབྲེལ་པ་མེད་པ་ནི་སྔར་བཤད་པའི་ཚུལ་གྱིས་རྗེས་སུ་འགྲོ་བ་དང་ལྡོག་པ་ངེས་པ་ཉིད་མི་འགྲུབ་པ་དེས་ན། སློབ་དཔོན་རང་བཞིན་འབྲེལ་པ་ངེས་པ་དེ་ཉིད་སྟོན་པར་མཛད་པ་ན། རྗེས་སུ་འགྲོ་བ་དང་ལྡོག་པ་དག་ངེས་པ་ཡིན་པར་བཤད་པ་ཡིན་ནོ། །སློབ་དབོན་གྱི་ཚུལ་གསུམ་པའི་ཡུལ་ཅན་གྱི་ངེས་པ་བརྗོད་བའི་ཚིག་དེ་ཉིད་སྟོན་པར་བྱེད་དེ། རབ་ཏུ་གྲུབ་པ་ནི་ཞེས་བྱ་བ་ནི་ངེས་པའི་དོན་ནིའོ། །གང་ལ་ཞེ་ན། རྒོལ་བ་དང་ཕྱིར་རྒོལ་བ་གཉི་ག་ལ་ཡང་ངོ༌། །སྒྲུབ་པ་ཞེས་བྱ་བ་ནི་གོ་བར་བྱེད་པ་སྟེ་ཚིག་ནི་འདི་ཡིན་ནོ། །ཚུལ་གསུམ་པ་ངེས་པའི་ཚིག་དེ་ལ་རྗེས་སུ་འགྲོ་བ་ངེས་པས་ནི་འགལ་བ་བསལ་ལོ། །དེའི་ཕྱོགས་དང་མཐུན་པ་ནི་འགལ་བའི་ཕྱོགས་དང་མཐུན་པ་དག་སྟེ། རྗེས་སུ་
འགྲོ་བ་ངེས་པ་ཉིད་ཀྱིས་བསལ་བ་ཡིན་ནོ། །དེ་དག་ནི་དེའི་ཕྱོགས་སུ་གཏོགས་པ་ཡིན་ཏེ། འགལ་བ་དང་ལྷན་ཅིག་གྲུབ་པ་དང་བདེ་བ་གཅིག་པའི་ཕྱིར་རོ། །ལྡོག་པར་ངེས་པ་ནི་མི་མཐུན་པའི་ཕྱོགས་ལ་ལྡོག་པར་ཐེ་ཚོམ་ཟ་བ་དང་ཐུན་མོང་གི་མ་ངེས་བའོ། །གཉི་ག་ལ་ཞེས་བྱ་བ་ནི་གཅིག་ལ་གྲུབ་པ་འགོག་པ་སྟེ། གཞན་གྱིས་རང་ལ་གྲུབ་པའི་གཏན་ཚིགས་ལས་དོན་བསྟན་པར་བྱ་བ་ཡིན་ཏེ། དེས་ན་གཅིག་ལ་གྲུབ་པ་ནི་གོ་བར་བྱེད་པ་མ་ཡིན་ནོ། །རབ་ཏུ་གྲུབ་ཅེས་བྱ་བས་ནི་ཐེ་ཚོམ་ཟ་བ་ལྷག་མ་དང་ལྡན་པ་ཐུན་མོང་མ་ཡིན་པ་དག་གོ་ཞེས་བཤད་པར་བྱ་བ་ཡིན་ནོ། །ལྷག་མ་དང་ལྡན་པ་ནི་བཤད་མ་ཐག་པ་ཡིན་ལ། ཐུན་མོང་མ་ཡིན་པ་ནི་མཉན་བྱ་ཉིད་དོ། །གང་ལ་ཐེ་ཚོམ་ཟ་བ་དག་ཅེ་ན། མཐུན་པའི་ཕྱོགས་དང་མི་མཐུན་པའི་ཕྱོགས་ལའོ། །ལྷག་མ་དང་ལྡན་པ་ནི་མི་མཐུན་པའི་ཕྱོགས་ལ་ཐེ་ཚོམ་ཟ་ལ། ཐུན་མོང་མ་ཡིན་པ་ནི་གཉི་ག་ལ་ཡང་ཐེ་ཚོམ་ཟ་བ་ཡིན་ནོ། །དེ་ལྟར་རྗེས་སུ་འགྲོ་བ་དང་ལྡོག་པ་ངེས་པར་བརྗོད་པའི་ཕྱིར་སློབ་དཔོན་རང་བཞིན་འབྲེལ་པ་བཞེད་པ་ཡིན་ནོ་ཞེས་བསྒྲུབས་ནས་ཡང༌། ཚིག་གཞན་གྱིས་བསྒྲུབ་པའི་ཕྱིར། འབྲེལ་པ་མེད་པར་ཞེས་བྱ་བ་ལ་སོགས་པ་སྨོས་སོ། །མ་མཐོང་བ་ཚད་མ་མ་ཡིན་པ་ཙམ་གྱིས་སློབ་དཔོན་ལྡོག་པར་བཞེད་པ་ཡིན་ན་ནི་སློབ་དཔོན་གྱིས་བཤད་པ་གང་ཡིན་པ་སྟེ་ཅི་ཞིག་བཤད་ཅེ་ན། རེ་ཞིག་ཅེས་བྱ་བ་ནས་འདིས་བརྩམས་ཞེས་བཤད་པ་ཞེས་བྱ་བའི་མཐར་ཐུག་པའོ། །རིགས་པ་དེ་ཡང་གང་ཡིན་ཞེ་ན་བཤད་པ། གཉི་ག་བརྗོད་པར་བྱ་བ་གང་ཡིན་པ་འདིས་ནི་རིགས་སོ། །གཉི་ག་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པའོ། །འགལ་བ་དང་མ་ངེས་པ་དེས་པ་དེ་དག་གི་གཉེན་པོར་ཏེ་དེའི་ཕྱིར་རོ། །གང་གི་ཕྱིར་འགལ་བ་དང་མ་དེས་པ་འདི་དག་གི་མི་མཐུན་པའི་ཕྱོགས་ཡིན་པ་དེའི་ཕྱིར་དེ་དག་བཟློག་པའི་རྗེས་སུ་འགྲོ་བ་དང་ལྡོག་པ་བརྗོད་པར་བྱ་བ་ཡིན་ནོ།། རྗེས་སུ་འགྲོ་བ་མ་བརྗོད་ན་ནི་གཏན་ཚིགས་འགལ་བར་དོགས་པར་འགྱུར་ལ། ལྡོག་པ་མ་བརྗོད་ན་ནི་མ་ངེས་པར་རོ། །རེ་ཞིག་གི་སྒྲ་ནས་ཤེས་ཀྱི་སྒྲའི་མཐར་ཐུག་པའི་ཚིག་ནི་གང་གི་སྒྲས་གཟུང་བ་ཡིན་ལ་གང་དང་དེ་ཡང་རྟག་ཏུ་འབྲེལ་པ་ཡིན་ཏེ། དེས་ན་དེ་ལ་ཞེས་ཁོང་
ནས་ཕྱུང་སྟེ་ངག་ཏུ་བརྟག་པར་བྱའོ། །བཤད་པ། གང་ཡིན་པ་དེ་ལ་ཆོས་མི་མཐུན་པ་སྨོས་པ་ནི་མ་ངེས་པའི་གཉེན་པོར་རོ། །དེས་ན་ཆོས་མི་མཐུན་པ་སྨོས་པས་ཅི་བྱ། གལ་ཏེ་མ་མཐོང་བ་སྟོན་པར་བྱེད་དོ་ཞེ་ན། གལ་ཏེ་མ་མཐོང་བ་བ་སྟོན་པར་བྱེད་ན་ནི། མ་མཐོང་བ་དེ་ནི་མ་སྨོས་ཀྱང་རྟོགས་པར་འགྱུར་རོ། །གལ་ཏེ་འདི་སྙམ་དུ་སྨོས་པའི་སྔར་ཕ་རོལ་པོ་ལ་མཐོང་བར་འཁྲུལ་པ་ཡོད་པ་གང་ཡིན་པ་དེ་སྨོས་པས་ལྡོག་གོ་སྙམ་ན་དེ་ལ་སྔར་ཞེས་སྨོས་སོ། །ཚིག་གིས་མ་མཐོང་བ་ལ་ཞེས་བྱ་བ་ནི་མཐོང་བར་འཁྲུལ་པ་ནི་མེད་ཀྱི། འོན་ཀྱང་བརྗེད་པའི་ཕྱིར་ཚིག་གིས་དྲན་པར་བྱེད་པ་ཡིན་ཏེ། དཔེར་ན་མཐོང་བ་ཉིད་ཚིག་གིས་དྲན་པར་བྱེད་པ་བཞིན་ནོ་ཞེས་དོགས་ན་དཔེ་ཉིད་མི་མཐུན་པར་བསྟན་པའི་ཕྱིར་མཐོང་བ་མ་རྟོགས་པ་ནི་ཞེས་སྨོས་ཏེ། གང་གི་ཕྱིར་མ་དྲན་པ་ནི་ཡན་ལག་མ་ཡིན་པ་དེས་ན་མཐོང་བ་དེ་ལ་ནི་དྲན་པའི་རྒྱུ་བརྗོད་པར་རིགས་ན། མ་མཐོང་བའི་དོན་དུ་ནི་མི་རིགས་ཏེ། གང་གི་ཕྱིར་མ་མཐོང་བ་ནི་མཐོང་བ་ལོག་པ་ཡིན་ཏེ། དེ་ནི་མཐོང་བས་ལྡོག་པར་འགྱུར་རོ། །མཐོང་བ་དེ་མེད་ན་མཐོང་བ་མེད་པ་གྲུབ་པ་ཁོ་ན་ཡིན་ནོ། །བསམ་པ་ནི་འདི་ཡིན་ཏེ། མཐོང་བའི་དངོས་པོ་འཇུག་པ་ནི་རེས་འགའ་བརྗོད་པར་འགྱུར་བའི་ཕྱིར་དེའི་དོན་དུ་བརྗོད་པ་ཡིན་གྱི། མཐོང་བ་ལྡོག་པའི་རང་བཞིན་མཐོང་བ་མེད་པ་ནི་བརྗོད་པར་ནུས་པ་མ་ཡིན་ཏེ། དེ་བརྗེད་ན་ནི་མཐོང་བ་ཡོད་པར་དོགས་པར་འགྱུར་རོ། །མཐོང་བ་ཡང་ངོ་བོ་དང་ལྡན་པར་མྱོང་བ་ཡིན་ན་མྱོང་བ་ཡང་མེད་དེ། དེས་ན་མཐོང་བ་མྱོང་བ་མེད་པ་ཉིད་ཀྱིས་མཐོང་བ་མེད་པ་མ་བརྗེད་པར་གནས་པའི་ཕྱིར་ཅི་ཞིག་དྲན་པར་བྱར་ཡོད། འོན་ཏེ་ཡང་སྔར་མཐོང་བ་བྱུང་བར་དོགས་པ་གང་ཡིན་པ་དེའི་ཚེ་མ་མཐོང་བར་ཡང་དོགས་པར་འགྱུར་བས། དོགས་པ་དེ་བཟློག་པའི་དོན་དུ་མི་མཐུན་པའི་ཕྱོགས་དེ་ལ་གཏན་ཚིགས་མ་མཐོང་ངོ་ཞེས་བརྗོད་དོ་ཞེ་ན། དེ་ནི་མི་རིགས་ཏེ། གང་ཞིག་རང་ཉིད་འགའ་ཞིག་ལ་མཐོང་བར་ཐེ་ཚོམ་ཟ་བ་དེ་གཞན་གྱི་ཚིག་ཚད་མ་མ་ཡིན་པས་ཇི་ལྟར་མཐོང་བ་མེད་པར་ངེས་པར་འགྱུར། དུས་དེའི་ཚེ་ཡོད་པའི་མཐོང་བ་མེད་པ་ཡང་ངེས་པ་ཉིད་ཡིན་པའི་ཕྱིར་མ་མཐོང་བ་བསྟན་པ་ནི་དོན་མེད་དོ། །དེ་ཙམ་གྱིས་ཞེས་བྱ་བ་མི་དམིགས་པ་ཙམ་གྱིས་
མེད་དོ་ཞེས་མེད་པར་ངེས་པ་མ་ཡིན་པས་དེའི་དོན་དུ་མེད་པ་ཉིད་དུ་ངེས་པའི་དོན་དུ་མི་མཐུན་ཕྱོགས་ལ་མེད་པ་བརྗོད་དོ་ཞེ་ན། གལ་ཏེ་ཞེས་སྨོས་ཏེ། གལ་ཏེ་མ་མཐོང་བས་མི་རྟོགས་ན་བརྗོད་པས་ཀྱང་མི་འགྱུར་རོ། །ཅིའི་ཕྱིར་ཞེ་ན། དེ་ཡང་ཞེས་སྨོས་ཏེ། མི་དམིགས་པ་ཙམ་ཞིག་བརྗོད་པས་ཁྱད་པར་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །འདི་སྙམ་དུ་ཚིག་གིས་ནི་སྒྲུབ་པར་བྱེད་པ་མི་དམིགས་པ་ཙམ་སྟོན་པ་མ་ཡིན་གྱི། འོན་ཀྱང་བསྒྲུབ་པར་བྱ་བ་མི་དམིགས་པ་ཡང་ཡིན་ལ། དེ་ལས་གྲུབ་པར་བྱེད་པ་མེད་པར་རྟོགས་པ་ཡིན་ནོ་ཞེ་ན། བཤད་པ། བསྒྲུབ་བར་བྱ་བ་གཅིག་མི་དམིགས་པས་སོ། །གཞན་ཞེས་བྱ་བ་ནི་སྒྲུབ་པར་བྱེད་པའོ། །ཧ་ཅང་ཐལ་བར་འགྱུར་བའི་ཕྱིར་རོ་ཞེས་བྱ་བ་ལ། གང་ཡང་རུང་བ་ཞིག་མ་དམིགས་པས་ཐམས་ཅད་མེད་པར་སྒྲུབ་པར་འགྱུར་ཏེ་ཁྱད་པར་མེད་པའི་ཕྱིར་རོ་ཞེས་བྱ་བ་ནི་ཧ་ཅང་ཐལ་བའོ། །སྒྲུབ་པར་བྱེད་པ་མེད་པ་ནི་གཞན་མི་དམིགས་པ་དེས་བསྒྲུབ་པ་ནི་མ་ཡིན་ན་གང་གིས་ཧ་ཅང་ཐལ་བར་འགྱུར། འོན་ཀྱང་རང་ཉིད་དེ་བདག་ཉིད་ཀྱི་ཡུལ་ཅན་གྱི་མི་དམིགས་པས་གྲུབ་པོ། །རང་ཉིད་ཅེས་བྱ་བ་འདིས་ནི་བསྒྲུབ་པར་བྱ་བ་མ་དམིགས་པ་རྒྱུ་ཡིན་པ་བཀག་པ་ཡིན་ནོ། །དེ་ལྟ་ན་ཡང་སྣང་བ་མི་དམིགས་པར་རུང་བའི་དོན་མ་མཐོང་ན་མེད་པའི་ཐ་སྙད་དུ་རིགས་ཀྱི། སྣང་བ་མ་མཐོང་བ་དེ་མེད་ན་ནི་སྒྲུབ་པར་བྱེད་པ་མེད་པའི་ཐ་སྙད་དེ་མི་རིགས་སོ། །བསྒྲུབ་པར་བྱ་བ་མེད་པ་ཐམས་ཅད་ལ་ནི། སྒྲུབ་པར་བྱེད་པ་སྣང་བ་མི་དམིགས་པ་མེད་དོ། །འོ་ན་ནི་བསྒྲུབ་པར་བྱ་བ་མེད་པའི་ཕྱོགས་འགའ་ཞིག་ཏུ་སྒྲུབ་པར་བྱེད་པ་སྣང་བ་མཐོང་བ་མེད་པ་ཡོད་པ་དེ་ཉིད་ལས། བསྒྲུབ་པར་བྱ་བ་མེད་པ་ཐམས་ཅད་ལ་སྒྲུབ་པར་བྱེད་པ་མེད་པར་རྟོགས་པ་ཡིན་ནོ། །གལ་ཏེ་མ་མཐོང་བའི་སྒྲུབ་པར་བྱེད་པ་ཡོད་ན་ནི། དེའི་ཚེ་མཐོང་བ་ལ་ཡང་འགྱུར་ན་མཐོང་བ་ལ་ནི་མེད་དེ། བལྟར་རུང་བ་ལས་མ་དམིགས་པའི་ཕྱིར་རོ། །དེས་ན་མ་མཐོང་བ་ལ་ཡང་མི་འགྱུར་རོ་ཞེ་ན་བཤད་པ། ལ་ལར་ཏེ་མཐོང་བ་ལ་རྒྱུ་མཚན་མེད་པར་ཉེ་བར་གནས་པས་འདོད་རྒྱལ་དུའོ། །བཟློག་པར་བྱ་བ་དང་ཟློག་པར་བྱེད་པའི་རྒྱུ་མཚན་ནི་འབྲེལ་པ་ཡིན་ཏེ། དེ་མེད་པར་དེ་ལྟར་ཞེས་བྱ་བ་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་
ལོག་པར་གྱུར་ཀྱང་དེ་དག་འབྲེལ་པ་མེད་པས་ཁྱབ་པ་མི་འགྲུབ་པའི་ཕྱིར་རོ། །ཆོས་ཉིད་འབྲེལ་པ་ཡིན་ན་ནི་འབྲེལ་པའི་ཡུལ་ལོག་ན་འབྲེལ་པ་ཡང་གདོན་མི་ཟ་བར་ལྡོག་པར་རྟོགས་ཀྱི། ཕྱོགས་གཅིག་ལ་འཇུག་པའི་སྣང་བ་མི་དམིགས་པས་ནི་ཁྱབ་པ་མི་འགྲུབ་པོ། །དེའི་ཕྱིར་དེ་མི་རིགས་སོ། །དེས་ན་བསྒྲུབ་པར་བྱ་བ་མ་མཐོང་བ་ལས་ནི་སྒྲུབ་པར་བྱེད་པ་མེད་པར་རྟོགས་པ་མ་ཡིན་ཏེ་དེར་མ་འབྲེལ་པའི་ཕྱིར་རོ། །དེ་རང་གི་ངོ་བོ་མ་མཐོང་བས་ཀྱང་མ་ཡིན་ཏེ། བལྟར་མི་རུང་བའི་ཕྱིར་རོ། །མཐོང་བ་མེད་པ་ནི་རང་ཉིད་གྲུབ་པའི་ཕྱིར་ཚིག་གིས་ནི་ཅུང་ཟད་ཀྱང་བྱར་མེད་དོ། །འདི་ལྟར་དམིགས་པ་བཀག་པའི་མི་དམིགས་པ་ནི་ཚིག་གིས་ནུས་པར་བྱ་བ་མ་ཡིན་ཏེ་མེད་པ་ལ་ནུས་པ་མེད་པའི་ཕྱིར་རོ། །དེས་ན་ཚིག་ནི་དོན་སྟོན་པ་ཉིད་ཀྱིས་འབྲས་བུ་དང་བཅས་པ་ཡིན་ལ་དོན་ཡང་མཐོང་བ་མེད་པ་ཉིད་ཡིན་ན། དེ་ནི་གྲུབ་ཟིན་པའི་ཕྱིར་ཚིག་གིས་ཅི་བྱ། འདི་སྙམ་དུ་ཚིག་གང་ལས་སྒྲུབ་པར་བྱེད་པ་དེ་བཟློག་པ་ནི་ནུས་པ་དེ་འདྲ་བ་ཡིན་ནོ་སྙམ་ན། རྒོལ་བ་དེས་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་མེད་དོ་ཞེས་བརྗོད་པས་ཀྱང་དེ་ལྟར་འགྱུར་བ་མ་ཡིན་ཏེ་ཞེས་བྱ་བ་དེ་ལ་སྒྲུབ་པར་བྱེད་པ་མེད་པར་མི་འགྱུར་ཏེ་ཧ་ཅང་ཐལ་བར་འགྱུར་བའི་ཕྱིར་རོ། །ཡོད་དམ་མེད་ཀྱང་རུང་སྟེ་རྒོལ་བ་དང་འདོད་པ་གང་ཡིན་པ་དེ་ཉིད་དེའི་ཚིག་ལས་འགྲུབ་པར་འགྱུར་ན། དེ་ལྟ་ཡང་མ་ཡིན་ནོ། །དེ་བས་ན་གཅིག་ལོག་པས་གཞན་ལོག་པར་འདོད་པས་དེ་ལ་སྟེ་ཅིག་ཤོས་ལྡོག་པ་སྔོན་དུ་འགྲོ་བ་ཅན་གྱི་ལྡོག་པ་ལ་རིགས་པ་ནི་འཐད་པ་སྟེ། རིགས་པ་གང་གིས་རྟོགས་པ་པོ་འདི་བསྒྲུབ་བྱ་ལོག་ན་སྒྲུབ་བྱེད་ལྡོག་པ་ཞེས་ངེས་པར་འགྱུར་བའོ། །དོན་དེ་ཉིད་ཚིགས་སུ་བཅད་པས་བསྡུ་བའི་ཕྱིར། མེད་ཅེས་བྱ་བའི་ཚིག་གིས་ཀྱང་ཞེས་བྱ་བ་ལ་སོགས་པ་སྨོས་སོ། །མེད་དོ་ཞེས་བརྗོད་པས་ནི་དེ་མེད་པ་ཁོ་ནར་མི་འགྱུར་གྱི། གལ་ཏེ་ཇི་ལྟར་ཏེ་རིགས་པའི་རྣམ་པ་གང་གིས་དེ་མེད་པའི་རིགས་པ་དེ་བརྗོད་པ་དེའི་ཚེ་མེད་དོ་ཞེས་ངེས་པ་ཡིན་ནོ། །དེའི་ཕྱིར་རང་བཞིན་འབྲེལ་པ་ཉིད་བསྟན་པའི་དོན་དུ་འབྲེལ་པའི་ཡུལ་ལོག་པས་འབྲེལ་པའི་ཆོས་ལྡོག་པ་ནི་ལྡོག་པའི་ཚིག་གིས་བརྗོད་པར་བྱ་བ་ཡིན་ནོ་ཞེས་བྱ་
བ་ནི་སློབ་དཔོན་ཕྱོགས་ཀྱི་གླང་པོའི་དགོངས་པ་ཡིན་ནོ། །དེ་ཞེས་བྱ་བ་བསྒྲུབ་པར་བྱ་བ་མེད་པ་ལ་སྒྲུབ་པར་བྱེད་པ་མི་དམིགས་པས་བསྒྲུབ་པར་བྱ་བ་མེད་པ་ལས་ལྡོག་པ་གྲུབ་པའོ། །འདི་ལ་ལ་ལར་འདོད་རྒྱལ་དུ་ལོག་པ་ཡིན་ཡང་འབྲེལ་པ་མེད་པས་ཁྱབ་པ་མི་འགྲུབ་པོ་ཞེས་ཅུང་ཟད་བཤད་ཟིན་ཏོ། །གཞན་ཡང་གལ་ཏེ་མ་མཐོང་བ་མཐོང་བ་མེད་པ་ཙམ་གྱིས་མི་མཐུན་པའི་ཕྱོགས་ལས་ལྡོག་པར་འགྱུར་ན། སློབ་དཔོན་གྱིས་ཇི་ལྟར་ལྷག་མ་དང་ལྡན་པའི་རྗེས་སུ་དཔག་པ་འཁྲུལ་པ་ཅན་ཡིན་པར་གསུངས། དཔེར་ན་ཞེས་བྱ་བ་ནི་ལྷག་མ་དང་ལྡན་པའི་རྗེས་སུ་དཔག་པ་སློབ་དཔོན་གྱིས་གསུངས་པ་དེ་ཉིད་སྟོན་པ་ཡིན་ནོ། །འབྲས་བུ་རྣམ་པར་སྨིན་པ་དང་རོ་འདི་བྲོ་བ་ཞེས་བྱ་བ་ཟོས་པའི་འབྲས་བུ་དང་རོ་འདྲ་བ་ཉིད་ནི་བསྒྲུབ་པར་བྱ་བའོ། །ཁྱད་པར་ཅན་གྱི་གཟུགས་སྐྱ་བོ་ནི་གཏན་ཚིགས་ཡིན་ལ། ཤིང་ཕུང་ངམ་ཡལ་ག་གཅིག་ལས་སྐྱེས་པ་ཡང་གཏན་ཚིགས་ཡིན་ནོ། །ཟོས་པའི་འབྲས་བུ་ནི་དཔེ་ཡིན་ནོ། །སྦྱོར་བ་འདི་ལ་ཡང་མི་དམིགས་པ་ཡོད་པ་ཡིན་ཏེ། དཔེ་ཟོས་པའི་འབྲས་བུ་ལས་གཞན་པའི་འབྲས་བུ་ཕྱོགས་སུ་བྱས་ཏེ། བསྒྲུབ་པར་བྱ་བ་ཉིད་དུ་བརྟེན་ན་གཏན་ཚིགས་ཡལ་ག་གཅིག་ལས་སྐྱེས་པ་དང་གཟུགས་ཁྱད་པར་མེད་པ་དག་བསྒྲུབ་པར་བྱ་བ་མེད་པ་ལ་མི་དམིགས་པ་ཡོད་པ་ཡིན་ནོ། །འདི་ལྟར་ཟོས་པ་དང་ཕྱོགས་སུ་བྱས་པ་ལས་གཞན་ལ་གཏན་ཚིགས་འཇུག་པ་མེད་པས་བསྒྲུབ་བྱ་མེད་པ་ལ་མི་དམིགས་པ་ཡིན་ཏེ། དེའི་ཕྱིར་མ་མཐོང་བ་ཙམ་གྱིས་ལྡོག་པ་གྲུབ་པའི་གཏན་ཚིགས་བསྒྲུབ་པར་བྱ་བ་ལ་ཇི་ལྟར་འཁྲུལ་པ་ཡིན། དབང་ཕྱུག་སྡེ་ལ་སོགས་པ་ཁ་ཅིག་ན་རེ་མངོན་སུམ་གྱིས་བསྒྲུབ་པར་བྱ་བ་ལ་གནོད་པ་དེར་དོགས་པ་དེ་ཉིད་འཁྲུལ་པ་ཡིན་ཏེ། ཕྱོགས་སུ་བྱས་པའི་ཡུལ་ལ་མངོན་སུམ་གྱིས་གནོད་པར་དོགས་པས་གཏན་ཚིགས་འཁྲུལ་པ་ཡིན་ནོ་ཞེས་ཟེར་རོ། །དེའི་དོན་ནི་འདི་ཡིན་ཏེ། རྗེས་སུ་འགྲོ་བ་དང་ལྡོག་པ་འབའ་ཞིག་གིས་ནི་གཏན་ཚིགས་གོ་བར་བྱེད་པ་མ་ཡིན་ཏེ། འོན་ཀྱང་གནོད་པ་མེད་པའི་ཡུལ་ཅན་ཞེས་བྱ་བའི་མཚན་ཉིད་གཞན་ཡོད་པ་ཡིན་ནོ། །མངོན་སུམ་གྱིས་གནོད་པར་དོགས་པ་ལ་ནི་དེ་ངེས་པ་མེད་པའི་ཕྱིར་མཚན་ཉིད་གཞན་མ་ངེས་པའི་ཕྱིར་འཁྲུལ་པ་ཡིན་ནོ། །མ་ཡིན་ཏེ་
ཞེས་བྱ་བས་དེ་ཟློག་པར་བྱེད་དོ། །ཕྱོགས་སུ་བྱས་པའི་ཡུལ་དེ་ལ་མངོན་སུམ་གྱིས་གནོད་པ་མེད་པའི་ཕྱིར་རོ། །ཇི་སྟེ་ཕྱོགས་ལ་མངོན་སུམ་གྱིས་གནོད་པར་གལ་ཏེ་ན་འགྱུར་རོ་ཞེ་ན། ཇི་ལྟ་བུར་དོགས་ན་ཞེས་བྱ་བ་གནོད་པ་འཇུག་པར་དོགས་ནའོ། །མངོན་པར་འདོད་པའི་ཕྱོགས་གཞན་ལ་ཡང་གནོད་པ་མེད་པར་ངེས་པ་མེད་པའི་ཕྱིར་རོ། །གལ་ཏེ་གནོད་པར་དོགས་པ་ལ་ཡང་སྒྲུབ་པར་བྱེད་པ་འཇུག་པར་ཁས་བླངས་ན། འོ་ན་ནི་གནོད་པ་ཞུགས་པ་གནོད་པར་བྱས་པའི་ཡུལ་ལ་ཡང་འཇུག་སྟེ། དེས་ན་གང་ལ་མངོན་སུམ་གྱིས་གནོད་པ་ཡོད་པ་དེ་ལ་ཡང་རྗེས་སུ་དཔག་པ་འཇུག་པར་འགྱུར་རོ་ཞེ་ན། འདི་གསལ་བའི་ཕྱིར་བཤད་པ། ཚད་མ་ཞུགས་པ་གཏན་ཚིགས་ཟློག་པར་བྱེད་པ་ཡིན་གྱི། ཚད་མ་མ་ཞུགས་པར་གནོད་པར་བྱེད་པ་ཡིན་ན་ནི་གོ་བར་བྱེད་པ་མ་ཡིན་པའི་ཕྱིར་གཏན་ཚིགས་ཐམས་ཅད་ལ་ཡིད་བརྟན་དུ་མེད་དོ། །འདི་ལྟར་ཅི་སྲིད་གཏན་ཚིགས་མ་ཞུགས་པ་དེ་སྲིད་དུ་བསྒྲུབ་བྱ་མེད་པར་དོགས་པ་ཉིད་ཡིན་ལ། མེད་པར་དོགས་པ་ཉིད་ཀྱང་གནོད་པར་དོགས་པ་ཡིན་ནོ། །གནོད་པའི་ཡུལ་ཅན་གང་ཡིན་པ་དེ་ནི་གོ་བར་བྱེད་པ་མ་ཡིན་ཏེ། དེས་ན་འགའ་ཡང་གོ་བར་བྱེད་པར་མི་འགྱུར་རོ། །ཅི་སྟེ་སྔར་སྒྲུབ་པར་བྱེད་པ་ཞུགས་པ་ལས་ཡུལ་འགའ་ཞིག་ཏུ་བསྒྲུབ་བྱ་མེད་པར་དོགས་པ་མེད་དོ། །དངོས་པོ་གཏན་ལ་ཕེབས་པའི་ཕྱིར་རོ་ཞེ་ན། འོ་ན་ནི་གོང་ལས་གནོད་པ་མེད་པར་ངེས་པ་དེ་ཉིད་གོ་བར་བྱེད་པ་ཡིན་པས་གཏན་ཚིགས་གཞན་གྱིས་ཅི་བྱ། དེས་ན་གནོད་པར་དོགས་པར་འགྱུར་བ་ཉིད་ལ་གཏན་ཚིགས་སྦྱོར་བ་ཡིན་ནོ། །དེ་ལྟ་ཡིན་དང་གནོད་པར་དོགས་པ་གཏན་ཚིགས་འཇུག་པའི་ཡན་ལག་གང་ཡིན་པ་དེ་ཉིད་ཀྱིས་གཏན་ཚིགས་སྐྱོན་ཅན་དུ་འགྱུར་བ་ནི་མ་ཡིན་ནོ། །དེས་ན་ཡུལ་འགོག་པའི་ཕྱིར་ཞུགས་པའི་ཚད་མ་ཉིད་གནོད་པར་བྱེད་པ་ཡིན་གྱི་མ་ཞུགས་པ་ནི་མ་ཡིན་ཏེ། ཐེ་ཚོམ་ཟ་བ་ཉིད་གཏན་ཚིགས་ཀྱི་ཡུལ་ཡིན་པའི་ཕྱིར་རོ། །གལ་ཏེ་དེ་ལྟ་ན་ནི་ལྡོག་པ་ལ་ཡང་ཞུགས་པའི་ཚད་མ་གནོད་པར་བྱེད་པར་འགྱུར་གྱི་དོགས་པ་ནི་མ་ཡིན་ནོ། །མ་མཐོང་བ་ཙམ་ལ་ནི་གནོད་པར་བྱེད་པའི་ཚད་མ་ཞུགས་པ་མེད་དོ་ཞེས་དོགས་པ་ལ་བཤད་པ། ལྡོག་པ་ནི་གྲུབ་པ་ཁོ་
ན་ངེས་པ་ཁོ་ན་སྒྲུབ་པར་བྱེད་པ་གོ་བར་བྱེད་པ་ཡིན་ཏེ། དེའི་ཕྱིར་དེ་ལྟ་བུའི་ངོ་བོ་གྲུབ་པར་བྱེད་པའི་ངོ་བོའི་ལྡོག་པ་ནི་ངེས་པ་ལ་ལྟོས་སོ། །འདི་སྐད་བརྗོད་པ་ཡིན་ཏེ། གཏན་ཚིགས་ནི་སྒྲོན་མ་བཞིན་དུ་རུང་བའི་ཁྱད་པར་གྱི་དོན་གྱིས་གོ་བར་བྱེད་པ་ནི་མ་ཡིན་གྱི། འོན་ཀྱང་བསྒྲུབ་པར་བྱ་བ་མེད་ན་མི་འབྱུང་བ་ཉིད་དུ་ངེས་པ་ཡིན་ནོ། །དེའི་མེད་ན་མི་འབྱུང་བར་ངེས་པ་ཉིད་ལྐོག་ཏུ་གྱུར་བའི་དོན་སྒྲུབ་པར་བྱེད་པ་ཡིན་གྱི་གཞན་ནི་མ་ཡིན་ནོ། །མེད་ན་མི་འབྱུང་བ་དེས་ན་ཡང་ལྡོག་པ་མ་ངེས་པ་ཅི་ཡོད། ལྡོག་པ་ལ་ཐེ་ཚོམ་ཟ་ན་ནི་འབྲེལ་པ་ལ་ཐེ་ཚོམ་ཟ་བར་འགྱུར་བས། འབྲེལ་པ་ངེས་པའི་བདག་ཉིད་གོ་བར་བྱེད་པའི་དངོས་པོར་མི་འགྱུར་རོ། །དེས་ན་ལྡོག་པ་ནི་ངེས་པ་ལ་ལྟོས་པ་ཁོ་ན་གོ་བར་བྱེད་པ་ཡིན་ནོ། །གནོད་པར་བྱེད་པའི་ཚད་མ་ཡོད་པར་དོགས་ན་ནི་ལྡོག་པ་ངེས་པར་མི་འགྱུར་རོ། །བསྒྲུབ་པར་བྱ་བ་ནི་ཐེ་ཚོམ་ཟ་བ་ཉིད་གཏན་ཚིགས་ཀྱི་ཡུལ་ཡིན་ཏེ། ངེས་སམ་བཟློག་པ་ཡིན་ན་ནི་དེ་བསྒྲུབ་པར་བྱ་བ་མ་ཡིན་པའི་ཕྱིར་རོ། །དེས་ན་ཇི་ལྟར་བསྒྲུབ་པར་བྱ་བའི་ཡུལ་ལ་གནོད་པ་ཡོད་པར་དོགས་ན། གཏན་ཚིགས་གོ་བར་བྱེད་པ་ཡིན་པ་དེ་བཞིན་དུ་ལྡོག་པ་ལ་ནི་མ་ཡིན་ཏེ། ལྐོག་ཏུ་གྱུར་པ་སྒྲུབ་པ་ནི་འབྲེལ་པ་ངེས་པའི་རང་བཞིན་ཡིན་པའི་ཕྱིར་རོ། །འོ་ན་ཁྱོད་ཀྱི་ཕྱོགས་ལ་མི་མཐུན་པའི་ཕྱོགས་ལ་མ་མཐོང་བ་ཡོད་ཀྱང་ལྷག་མ་དང་ལྡན་པ་འཁྲུལ་པར་འགྱུར་བ་ཅི་ལྟར་ཞེ་ན་བཤད་པ། མི་དམིགས་པས་བལྟར་རུང་བའི་བསྒྲུབ་བྱ་མེད་པར་ངེས་ལ་འགའ་ཞིག་ལ་བལྟར་རུང་བའི་གཏན་ཚིགས་མེད་པར་གྲུབ་ཀྱང༌། བསྒྲུབ་པར་བྱ་བའི་དོན་དང་འབྲེལ་པ་མེད་པ་ནི་བསྒྲུབ་པར་བྱ་བ་དེ་མེད་པ་ཐམས་ཅད་ལ་ཞེས་བྱ་བ་ལྐོག་ཏུ་གྱུར་པའི་ཡུལ་ལ་ཡང་གཏན་ཚིགས་མེད་པར་མི་འགྲུབ་པའི་གཏན་ཚིགས་ཀྱིས་ལྡོག་པ་ལ་ཐེ་ཚོམ་ཟ་པ་དེའི་ཕྱིར། འདི་ལ་ལྡོག་པ་ངེས་པ་མེད་པ་ཡིན་ནོ། །བསྒྲུབ་པར་བྱ་བའི་དོན་དང་འབྲེལ་པ་མེད་པའི་ཕྱིར། མི་མཐུན་པའི་ཕྱོགས་ལས་ལྡོག་པ་ངེས་པ་མེད་པའི་གཏན་ཚིགས་ནི་ལྷག་མ་དང་ལྡན་པའི་འཁྲུལ་པ་འདི་ལ་ཡོད་པས་འཁྲུལ་པ་ཡིན་ནོ། །མ་མཐོང་བ་ཙམ་ལྡོག་པ་ངེས་པའི་རྒྱུ་ཡིན་ན་ནི་ལྡོག་པ་ཅན་ཡང་གཏན་ཚིགས་འགྱུར་ན། དེ་ནི་སློབ་དཔོན་གྱིས་གོ་བྱེད་དུ་བཞེད་པ་མ་ཡིན་ནོ། །ལྡོག་པ་ཅན་གྱི་གཏན་
ཚིགས་དེ་ཉིད་སྟོན་པ་ནི་གསོན་པོ་མ་ཤི་བའི་ལུས་འདི་ནི་ཞེས་བྱ་བ་ནི་ཆོས་ཅན་ནོ། །བདག་མེད་པ་མ་ཡིན་ཏེ་ཞེས་བྱ་བ་བདག་མེད་པ་བཀག་པ་ནི་བསྒྲུབ་བྱའོ། །སྲོག་ལ་སོགས་པ་དང་ལྡན་པ་མ་ཡིན་པར་སྲོག་ལ་སོགས་པ་ལྡོག་པ་དེ་ལྟར་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་གཏན་ཚིགས་སོ། །སྲོག་ལ་སོགས་པ་དང་ལྡན་པ་ཞེས་བྱ་བའི་གཏན་ཚིགས་འདི་ནི་བདག་དང་བཅས་པ་འགའ་ཞིག་ལ་མ་མཐོང་ལ། བདག་མེད་པ་དག་ལ་ནི་ལྡོག་པའི་ཕྱིར་བསྒྲུབ་བྱ་ལོག་པ་ན་ལོག་པའི་ཆོས་ལྡོག་པ་ཅན་དུ་བརྗོད་པ་ཡིན་ནོ། །འདི་ནི་གལ་ཏེ་བདག་མེད་པ་གསོན་པའི་ལུས་ལས་མ་ལོག་ན་སྲོག་ལ་སོགས་པ་མེད་པ་ཡང་ལྡོག་པར་མི་འགྱུར་རོ་ཞེས་ཐལ་བར་འགྱུར་བའི་སྒོ་ནས་བཀོད་པ་ཡིན་ནོ། །ད་ནི་བུམ་པ་ལ་སོགས་པ་བདག་མེད་པ་རྣམས་སྲོག་ལ་སོགས་པ་མེད་པས་ཁྱབ་པ་བསྟན་པའི་ཕྱིར་བདག་མེད་པ་བུམ་པ་ལ་སོགས་པ་ཞེས་སྨོས་སོ། །བདག་མེད་པ་གང་ཡིན་པ་དེ་ནི་སྲོག་ལ་སོགས་པ་དང་ལྡན་པ་མེད་པས་ཁྱབ་པ་དེའི་ཕྱིར་སྲོག་ལ་སོགས་པ་མེད་པ་དེ་ལོག་ན་ན་ཁྱབ་པར་བྱ་བ་བདག་མེད་པ་ཡང་ལྡོག་པའི་གཏན་ཚིགས་ཀྱིས་བདག་མེད་པ་སྤངས་ནས་བདག་ཡོད་པ་རྟོགས་པར་འགྱུར་རོ། །དེ་ལྟར་བསྟན་པའི་གཞན་གྱི་ཐལ་བར་འགྱུར་བ་སྤང་བའི་ཕྱིར་བཤད་པ། བལྟར་མི་རུང་བ་དེའི་མི་དམིགས་པ་དེས་མེད་པ་མ་གྲུབ་ན་བུམ་པ་ལ་སོགས་པ་དག་མེད་པར་མ་གྲུབ་པོ། །གང་གིས་བུམ་པ་ལ་སོགས་པ་ལ་དེ་མེད་པར་འགྱུར་བ་བདག་བལྟར་རུང་བ་ནི་མ་ཡིན་ནོ། །བདག་མེད་པ་དེ་ལ་མ་གྲུབ་པའི་ཕྱིར་ཏེ། གཏན་ཚིགས་ཀྱིས་སྲོག་ལ་སོགས་པ་བདག་མེད་པ་ལས་ལྡོག་པ་མེད་དོ། །སྲོག་ལ་སོགས་པ་ལྡོག་པས་བདག་མེད་པ་ཐེ་ཚོམ་ཟ་བ་དེ་ལ་ཁྱབ་པ་མ་གྲུབ་པོ་ཞེས་བྱ་བའི་དོན་ཏོ། །འདི་སྐད་བརྗོད་པ་ཡིན་ཏེ། བདག་མེད་པ་དང་སྲོག་ལ་སོགས་པ་ལྡོག་པ་བདག་ཁྱབ་པར་བྱ་བ་དང༌། ཁྱབ་པར་བྱེད་པའི་དངོས་པོ་གྲུབ་ན་ཐལ་བ་འདིར་འགྱུར་བ་ཡིན་ན། དེ་དག་ནི་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོར་མ་གྲུབ་སྟེ་བདག་མེད་པ་ཉིད་ནི་ཐེ་ཚོམ་ཟ་བའི་ཕྱིར་དང༌། ཐེ་ཚོམ་ཟ་བ་ཡང་བདག་བལྟར་རུང་བ་མ་ཡིན་པའི་ཕྱིར་རོ། །འདི་སྙམ་དུ་བུམ་པ་ལ་སོགས་པ་ནི་བདག་མེད་པར་ཁྱེད་ཀྱིས་ཁས་བླངས་
པ་ཡིན་པས་དེ་ཉིད་ཀྱིས་དེ་འགྲུབ་པོ་སྙམ་ན། ད་ནི་ཇི་ལྟར་ཞེས་སྨོས་སོ། །གལ་ཏེ་ངེད་ཀྱིས་ཁས་བླངས་པས་བདག་མེད་པར་འདོད་ན། དེ་ལྟ་ནི་འོ་ན་ངེད་ཅག་གིས་ཐམས་ཅད་བདག་མེད་པར་འདོད་པའི་ཕྱིར་ཇི་ལྟར་བདག་འགྲུབ་པར་འགྱུར། གལ་ཏེ་གསོན་པོའི་ལུས་འདི་ནི་གཞན་གྱིས་བདག་མེད་པར་ཁས་བླངས་པ་དེ་ལྟ་ན་ཡང་དེ་ཚད་མ་དང་ལྡན་པ་མ་ཡིན་པ་ཉིད་པས་དེའི་དོན་དུ་བདག་བསྒྲུབ་པ་ཡིན་ཞེ་ན། གསོན་པོའི་ལུས་ལས་གཞན་བུམ་པ་ལ་སོགས་པ་བདག་མེད་པར་ཕྱིར་རྒོལ་བ་ལ་གྲུབ་པ་ཡང་ཚད་མ་དང་ལྡན་པ་མ་ཡིན་ནོ། །འདི་ལྟར་བདག་མེད་པའི་ཕྱིར་རྒོལ་བའི་ཁས་བླངས་པས་འགྲུབ་པ་མི་རིགས་པས་གྲུབ་ཀྱང་བླ་སྟེ། རྣམ་པ་ཐམས་ཅད་དུ་ཕྱིར་རྒོལ་བ་ནི་བདག་མེད་པ་དང་དངོས་པོ་ཐམས་ཅད་ཀྱི་ཡུལ་ཅན་དུ་འདོད་པ་ཡིན་ནོ། །དེ་ལ་གསོན་པོའི་ལུས་ལ་བདག་མེད་པ་ཚད་མ་ཅན་མ་ཡིན་པར་སྨྲ་བ་ནི། དེའི་ཁས་བླངས་པ་དང་རིགས་པ་ཡང་ཚད་མ་མ་ཡིན་པར་བརྗོད་པ་ཡིན་ནོ། །དེ་ལྟར་ཁས་བླངས་པ་འམ་རིགས་པ་ཚད་མ་མ་ཡིན་པ་དེ་ཉིད་ལས་བུམ་པ་ལ་སོགས་པ་བདག་མེད་པར་ཅི་ལྟར་རྗོད་པར་བྱེད། དེའི་ཕྱིར་བདག་མེད་པར་ནི་སྲོག་ལ་སོགས་པ་མེད་པས་མ་ཁྱབ་པོ། གཞན་ཡང་ཁས་བླངས་པ་འབའ་ཞིག་གིས་བདག་དང་བཅས་པ་དང་བདག་མེད་པ་ངག་རྣམ་པར་ཕྱེ་ནས་བུམ་པ་ལ་སོགས་པ་གཞན་ནམ་བདག་གིས་བདག་མེད་པར་ཁས་བླངས་པ་དེས་ན་བདག་མེད་པ་ཡིན་ལ། གསོན་པོའི་ལུས་ལ་ཁོ་བོ་ཅག་གིས་བདག་མེད་པར་ཁས་བླངས་པ་སྟེ། དེའི་ཕྱིར་བདག་མེད་པ་མ་ཡིན་ནོ་ཞེས་དེ་ལྟར་རྣམ་པར་ཕྱེ་ནས་བདག་མེད་པ་དེ་ལ་སྲོག་ལ་སོགས་པ་མེད་པས་བདག་གི་རྟོགས་པར་བྱེད་པ་ཉིད་དུའོ། །སྲོག་ལ་སོགས་པ་བདག་མེད་པ་དག་ལས་ལོག་པས་བདག་དང་བཅས་པས་ཁྱད་པར་ཁས་ལེན་པར་བྱེད་པས་ནི་ཁྱབ་པ་ལུང་གིས་གྲུབ་པར་བརྗོད་པར་འགྱུར་རོ། །དེ་ལས་ཀྱང་བདག་གྲུབ་པའི་ཕྱིར་བདག་ཀྱང་ལུང་གིས་གྲུབ་པར་འགྱུར་རོ། །དེས་ན་ཁྱབ་པའི་ཡུལ་ཁས་བླངས་པས་གྲུབ་པའི་ཕྱིར་ཁྱབ་པ་མེད་དོ། །མ་མཐོང་བ་ཙམ་གྱིས་ལྡོག་པ་ཡིན་ན་ནི་སྲོག་ལ་སོགས་པ་བདག་མེད་པ་ལ་མ་མཐོང་བ་དེས་ན་ལྡོག་པར་འགྱུར་ཏེ། དེའི་ཕྱིར་འདི་གོ་བར་བྱེད་པ་ཡིན་
པར་འགྱུར་རོ། །འདི་ནི་གོ་བར་བྱེད་པར་འདོད་པ་ཡང་མ་ཡིན་ཏེ། དེའི་ཕྱིར་རང་བཞིན་འབྲེལ་པ་ཁོ་ནས་གོ་བར་བྱེད་པར་འདོད་དོ། །མ་མཐོང་བ་ཙམ་གྱིས་ལྡོག་ན་གང་ཡང་མ་གྲུབ་སྦྱར་བ་དེ་ཡང་ཞེས་བྱ་བར་སྦྱར་རོ། །དེ་བཞིན་དུ་ཞེས་བྱ་བ་ནས་བརྗོད་པར་བྱ་བའི་མཐར་ཐུག་པ་ནི་མ་གྲུབ་སྦྱོར་བའི་ངག་ཡིན་ནོ། །བསྒྲུབ་པར་བྱ་བའི་ཆོས་ལ་གཉི་ག་དང་གང་ཡང་རུང་བ་དང་ཐེ་ཚོམ་ཟ་བ་དང་ཞི་མ་གྲུབ་པ་བཞི་བསྟན་ནས་ཕྱོགས་ཀྱི་ཆོས་དགུ་ལ་བསྒྲེ་བའི་ཕྱིར་དེ་བཞིན་དུ་ཞེས་སྨོས་པ་ཡིན་ནོ། །ཇི་ལྟར་བསྒྲུབ་བྱའི་ཆོས་ཅན་ལ་མ་གྲུབ་པ་རྣམ་པ་བཞི་བཤད་པ། དེ་བཞིན་དུ་ཕྱོགས་ཀྱི་ཆོས་བཤད་པ། གང་ཞིག་མཐུན་པའི་ཕྱོགས་ལ་ཡོད་པ་དང་མེད་པ་ཞེས་བྱ་བ་དེ་ལྟ་བུ་ལ་སོགས་པ་གང་ཡིན་པ་དེ་ལ་ཡང་མཐུན་པ་དང་མི་མཐུན་པའི་ཕྱོགས་ལ་མ་གྲུབ་པ་རྣམ་པ་བཞིར་བརྗོད་པར་བྱ་སྟེ། མཐུན་པའི་ཕྱོགས་སམ་གཞན་གང་ལ་མ་གྲུབ་པ་གང་རིགས་པ་དེ་ནི་དེ་ལ་བརྗོད་པར་བྱའོ། །གལ་ཏེ་མ་མཐོང་བ་ཙམ་གྱི་རྒྱུ་མཚན་གྱིས་ལྡོག་པར་བཞེད་ན་ནི་བསྒྲུབ་བྱའི་ཆོས་ཅན་ལ་མ་གྲུབ་པ་རྣམ་པ་བཞིར་བཤད་ནས། མཐུན་པའི་ཕྱོགས་མི་མཐུན་པའི་ཕྱོགས་ཀྱི་ཡུལ་ཅན་ཕྱོགས་ཀྱི་ཆོས་རྣམ་པ་དགུ་ལ་བསྒྲེས་ཤིང་སྐྱེ་བའི་མ་གྲུབ་སྦྱར་བ་འདི་ནི་བརྗོད་བྱ་མིན་པར་འགྱུར་རོ། །ཅིའི་ཕྱིར་ཞེ་ན་བཤད་པ། མི་དམིགས་པ་ཁོ་ནར་ཟད་ན་ཐེ་ཚོམ་ཟ་བའི་ཕྱིར་རོ། །དེ་ག་ལས་ཤེ་ན་བཤད་པ། དམིགས་ན་ཐེ་ཚོམ་དེ་མེད་པའི་ཕྱིར་རོ། །འགའ་ཞིག་ཏུ་དམིགས་པ་དང་མི་དམིགས་པ་ལས་ཆོས་ཀྱི་རྣམ་པ་གཞན་ནི་མེད་དོ། །དེ་ལ་དམིགས་པ་ལ་ནི་ངེས་པ་ཉིད་ཡིན་གྱི་ཐེ་ཚོམ་ནི་མ་ཡིན་ནོ། །ལྷག་མར་གྱུར་པས་མི་དམིགས་པ་ཉིད་ལས་ཐེ་ཚོམ་ཡིན་ལ་ལྡོག་པ་ཡང་དེ་ཉིད་ལས་ཡིན་ནོ། །གལ་ཏེ་མ་དམིགས་པ་ཉིད་ལས་ལྡོག་པ་ལ་ཐེ་ཚོམ་ཟ་བ་ཡིན་མོད། དེ་ཅི་ལྟར་འགྱུར་ཞེ་ན། གཏན་ཚིགས་དེས་ན་ཐེ་ཚོམ་དུ་གྱུར་པ་མ་བཟློག་པར་འགྱུར་རོ། །མི་དམིགས་པས་ལྡོག་པ་གྲུབ་པའི་ཕྱིར་ལ། ལྡོག་པ་གྲུབ་པ་ཉིད་ནི་གོ་བར་བྱེད་པ་ཡིན་ཏེ། དེའི་ཕྱིར་གང་གིས་གོ་བར་བྱེད་པ་ལས་བཟློག་པར་བྱ་བ་ཡིན་ལ། ཐེ་ཚོམ་དུ་གྱུར་པ་ཡང་ཟློག་པར་འགྱུར་བ་མ་གྲུབ་པ་སྦྱར་བ་དེ་ཉིད་མི་བྱ་བར་འགྱུར་
རོ། །འདི་སྙམ་དུ་ཅི་རིགས་པར་ཞེས་བྱ་བའི་སྒྲ་འདི་ནི་སྨོས་པའི་ཕྱིར་ལྡོག་པ་ལ་ཐེ་ཚོམ་ཟ་བ་མ་བཟློག་པ་ཁོ་ན་སྟེ། མཐུན་པ་དང་མི་མཐུན་པའི་ཕྱོགས་དག་ལས་གང་ལ་མ་གྲུབ་པ་རྣམ་པ་བཞི་པོ་འགྲིགས་པ་དེ་ལ་སྦྱར་བར་བྱའོ་ཞེས་བྱ་བའི་དོན་ཏེ། དེས་ན་མི་མཐུན་པའི་ཕྱོགས་ལ་ཐེ་ཚོམ་ཟ་བའི་མ་གྲུབ་པ་ནི་གཏན་ཚིགས་ཀྱི་སྐྱོན་དུ་བརྗོད་བ་མ་ཡིན་ནོ་ཞེ་ན། འདི་དགག་པའི་ཕྱིར་མ་ཡིན་ཏེ་ཞེས་སྨོས་སོ། །ཅིའི་ཕྱིར་ཞེ་ན། གང་ཞིག་གཉི་ག་ལ་ཞེས་བྱ་བ་ལ་སོགས་པ་གསུངས་པའི་ཕྱིར་རོ། །གང་ཞིག་གཉི་ག་ལ་ངེས་པར་བརྗོད་པ་དེ་ཁོ་ན་བསྒྲུབ་པ་འམ་སུན་འབྱིན་པ་ཡིན་གྱི། གང་ཡང་རུང་བ་ལ་གྲུབ་བ་དང་ཐེ་ཚོམ་ཟ་བ་བརྗོད་པ་ནི་མ་ཡིན་ནོ་ཞེས་སློབ་དཔོན་གྱིས་གསུངས་ཏེ། རྒོལ་བ་དང་ཕྱིར་རྒོལ་བ་གཉི་ག་ལ་ངེས་པའི་དོན་བརྗོད་པའི་སྒྲ་གང་ཡིན་པ་དེ་ཉིད་གཞན་གྱི་དོན་གྱི་རྗེས་སུ་དཔག་པ་ལ་སྒྲུབ་པ་འམ་སུན་འབྱིན་པ་ཡིན་གྱི་གང་ཡང་རུང་བ་ལ་གྲུབ་པ་དང་ཐེ་ཚོམ་ཟ་བ་བརྗོད་པ་ནི་མ་ཡིན་ནོ། །འདིར་གཞུང་འདི་ནི་དཔེར་བརྗོད་པ་ཡིན་ཏེ། གང་ཞིག་རྒོལ་བ་དང་ཕྱིར་རྒོལ་བ་ལ་མ་གྲུབ་པའམ་ཐེ་ཚོམ་ཟ་བ་བརྗོད་པ་དེ་ནི་སྒྲུབ་པར་བྱེད་པ་འམ་སུན་འབྱིན་པ་མ་ཡིན་ནོ། །ལྡོག་པ་ལ་ཐེ་ཚོམ་ཟ་བའི་ཆོས་ཀྱང་གཉི་ག་མི་མཐུན་པའི་ཕྱོགས་ལ་ཐེ་ཚོམ་ཟ་སྟེ། དེའི་ཕྱིར་དེ་བརྗོད་པ་སྒྲུབ་བྱེད་མ་ཡིན་ལ། དེ་ཡང་གཏན་ཚིགས་མ་ཡིན་ནོ་ཞེས་བསྟན་པ་ཡིན་ནོ། གལ་ཏེ་ལྡོག་པ་ལ་ཐེ་ཚོམ་ཟ་ཡང་གཏན་ཚིགས་ཡིན་ན་འདིར་ཡང་དེ་གཏན་ཚིགས་སུ་བསྟན་པའི་ཕྱིར་ཅི་རིགས་ཞེའམ་གཞན་ཡང་རུང་སྟེ། དེའི་ཕྱིར་དམིགས་ཀྱིས་བསལ་བའི་ཕྱིར་སྒྲ་འགའ་ཞིག་སྦྱོར་བར་འགྱུར་ན་སྦྱར་བ་མེད་དོ། །དེས་ན་གང་ཞིག་གཞན་དུ་གཏན་ཚིགས་མ་ཡིན་པར་བཤད་པ་དེ་ཉིད་ཅི་འདིར་ཅི་རིགས་པར་སྨོས་པའི་སྒོ་ནས་གཏན་ཚིགས་སུ་བརྗོད་པ་ཅི་ལྟར་འགྱུར། འོ་ན་ཅི་རིགས་བར་ཞེས་ཅིའི་ཕྱིར་སྨོས་ཤེ་ན། བརྗོད་པ་ཇི་ལྟར་བསྒྲུབ་བྱའི་ཆོས་ཅན་ལ་ཕྱོགས་ཀྱི་ཆོས་ཀྱི་གཞི་མ་གྲུབ་བ་བཤད་པ་དེ་བཞིན་དུ་མི་མཐུན་པའི་ཕྱོགས་ལ་ཡང་ལྡོག་པའི་གཞི་མ་གྲུབ་པར་འགའ་ཞིག་རྟོགས་པས་དེ་བཟློག་པའི་ཕྱིར་རོ། །ངེས་པར་འདི་ལ་གཞི་མི་འདོད་ཅེས་གང་བཤད་པ་ཡིན་ཏེ། དངོས་པོ་ཡོད་ན་ནི་གཏན་ཚིགས་འཇུག་སྲིད་པས་ལྡོག་པ་ལ་ཐེ་ཚོམ་ཟ་བར་འགྱུར་གྱི། མེད་ན་ནི་དེ་
མེད་པས་དེ་ལ་མི་འཇུག་པའི་ཕྱིར་ལྡོག་པ་ངེས་པ་ཡིན་ནོ། །གང་གི་ཕྱིར་གཞན་དུ་གཏན་ཚིགས་མ་ཡིན་པར་བཤད་པ། དེའི་ཕྱིར་མི་དམིགས་ཀྱང་ཐེ་ཚོམ་ཟ་བས་མི་མཐུན་པའི་ཕྱོགས་ལས་གཏན་ཚིགས་ལྡོག་པ་མེད་པར་དགོངས་ཏེ། མ་གྲུབ་པ་སྦྱར་བས་ལྡོག་པ་ལ་ཐེ་ཚོམ་ཟ་བ་དེ་གཏན་ཚིགས་ཉིད་དགག་པ་བཤད་པ་ཡིན་ནོ། །མ་མཐོང་བ་ཙམ་གྱིས་ལྡོག་པ་མི་བཞེད་པ་གཞན་ཡང་བསྟན་པའི་ཕྱིར་མཉན་པར་བྱ་བ་ཉིད་ཀྱང་ཞེས་སྨོས་སོ། །མཉན་པར་བྱ་བ་ཉིད་ནི་སློབ་དཔོན་གྱིས་ཐུན་མོང་མ་ཡིན་པའི་མ་ངེས་པར་གསུངས་སོ། །གལ་ཏེ་མ་མཐོང་བས་ལྡོག་པར་འགྱུར་ན་མཉན་པར་བྱ་བ་ཉིད་ཀྱང་རྟག་པ་འམ་མི་རྟག་པ་ཉིད་མེད་པར་བསྒྲུབ་པ་ལ་མི་མཐུན་པའི་ཕྱོགས་ལ་མ་མཐོང་བ་ཡོད་པ་ཡིན་ཏེ། དེའི་ཕྱིར་ལྡོག་པ་གྲུབ་པས་གོ་བར་བྱེད་པར་འགྱུར་རོ། །གང་གི་ཕྱིར་རྟག་པ་དང་མི་རྟག་པ་ཉིད་ལ་མ་མཐོང་བའི་ཕྱིར་དེ་ལས་ལོག་པ་ཡིན་ཏེ། དེ་བས་ན་རྟག་པ་དང་མི་རྟག་པ་དེ་དག་རྣམ་པར་གཅོད་པ་འགོག་པ་གོ་བར་བྱེད་པའི་གཏན་ཚིགས་སུ་འགྱུར་རོ། །གལ་ཏེ་མ་མཐོང་བའི་ཕྱིར་མཉན་པར་བྱ་བ་ཉིད་དེ་དེ་ལས་ལྡོག་མོད། རྣམ་པར་གཅོད་པའི་གཏན་ཚིགས་སུ་གོ་ཇི་ལྟར་འགྱུར་ཞེ་ན། རྣམ་པར་གཅོད་པ་ནི་ཞེས་སྨོས་སོ། །འདི་ལྟར་གང་གང་ལས་ལོག་པ་དེའི་དེ་ལས་ལྡོག་པ་གང་ཡིན་པ་དེ་ལས་རྣམ་པར་གཅོད་པ་ཞེས་བྱ་བ་གཞན་ནི་མེད་དོ། །ལྡོག་པའི་ཡུལ་དེ་ལས་རྣམ་པར་གཅོད་པ་ནི་ལྡོག་པ་ཉིད་དོ། །དེས་ན་འགའ་ཞིག་འགའ་ཞིག་ལས་ལྡོག་པ་ངེས་པ་གང་ཡིན་པ་དེ་ཉིད་ལྡོག་པའི་མཚན་ཉིད་ཀྱི་དོན་ལྡོག་པའི་ཆོས་དང་ལྡན་པའི་དངོས་པོ་ལ་མེད་པར་ངེས་པ་ཡིན་ནོ། །དེས་ན་དེ་ལས་ལྡོག་པ་ཉིད་རྣམ་པར་གཅོད་པ་ཡིན་ནོ། །འོ་ན་ཁྱོད་ཀྱི་ཕྱོགས་ལ་རྟག་པ་དང་མི་རྟག་པ་དག་ལ་མ་མཐོང་བའི་མཉན་པར་བྱ་བ་ཉིད་དེ་དག་རྣམ་པར་གཅོད་པར་མི་བྱེད་པར་ཇི་ལྟར་ཞེ་ན། རྣམ་པར་གཅོད་པ་མ་ཡིན་པ་ནི་ཞེས་སྨོས་སོ། །རྟག་པའམ་མི་རྟག་པ་གང་ལས་ཀྱང་མཉན་བྱ་ཉིད་ལྡོག་པ་ཉིད་ཡིན་པར་མ་ངེས་པའི་ཕྱིར་རོ། །ལྡོག་པར་མ་ངེས་པ་ནི་གཅིག་དང་ཡང་འབྲེལ་པ་མ་ངེས་པའི་ཕྱིར་རོ། །དངོས་པོའི་ཆོས་ནི་འགའ་ཞིག་ལ་འཇུག་པར་ངེས་ན་གཞན་ལས་ལྡོག་པར་འགྱུར་གྱི། གཞན་དུ་ནི་མ་ཡིན་ནོ། །གལ་ཏེ་རྣམ་པར་གཅོད་པར་ངེས་པ་
ལྡོག་པའི་བདག་ཉིད་མ་ཡིན་ན་ནི་ལྡོག་པ་མ་ངེས་པས་རྣམ་པར་གཅོད་པར་མི་འགྱུར་པ་ཡིན་ན། དེ་ཉིད་ཇི་ལྟར་ཞེ་ན་བཤད་པ། གང་ཞིག་ཡུལ་གང་ལ་མེད་དོ་ཞེས་བྱ་བར་ངེས་པ་དེ་ནི་དེ་ལས་ལྡོག་པར་ངེས་པ་ཡིན་ཏེ། དེ་ལྟར་ངེས་པར་འགྱུར་བ་དེ་དངོས་པོ་འགའ་ལ་ཡོད་ན་སྟེ། བདོག་ན་ཅི་ལྟར་ག་ལ་མེད་པར་ངེས་པ་དེ་མེད་པ་གོ་བར་མི་བྱེད། ཇི་ལྟར་གང་ལ་མེད་དོ་ཞེས་རྟོགས་པ་མེད་པར་རྟོགས་པར་མི་བྱེད། གལ་ཏེ་གཞན་རྣམ་པར་གཅོད་པ་གོ་བར་མི་བྱེད་པ་དེ་ལྟ་ན་ནི་ལྡོག་པ་ངེས་པར་མི་འགྱུར་རོ། །དེ་ལྟར་ཡང་མ་ཡིན་ཏེ། དེས་ན་གཞན་རྣམ་པར་གཅོད་པ་ནི་ལྡོག་པ་ངེས་པ་ཉིད་ཡིན་ནོ། །མ་མཐོང་བ་ཡོད་ཀྱང་རྟག་པ་དང་མི་རྟག་པ་གཉི་ག་རྣམ་པར་གཅོད་པ་ནི་མ་ཡིན་ཏེ། ཚད་མ་གཞན་གྱིས་གནོད་པ་གང་ཡིན་པ་དེའི་ཕྱིར་རོ། །བསམ་བ་ནི་འདི་ཡིན་ཏེ། གང་དུ་ཚད་མའི་གནོད་པ་མེད་པ་དེར་མ་མཐོང་བའི་རྒྱུ་མཚན་གྱིས་ལྡོག་པ་ཡོད་པ་དེས་ན་རྣམ་པར་གཅད་པ་འགྲུབ་པ་ཡིན་གྱི། མ་མཐོང་བ་ཡིན་ཡང་གང་ལ་ལྡོག་པ་ལ་གནོད་པའི་ཚད་མ་ཡོད་པ་དེར་ནི་ལྡོག་པ་ངེས་པ་འམ། དེའི་བདག་ཉིད་ཀྱིས་གཞན་རྣམ་པར་བཅད་བ་ཡོད་པ་མ་ཡིན་ལ། འདིར་ཡང་གནོད་པ་ཡོད་པ་ཡིན་ནོ། །དེ་ཉིད་བསྟན་པའི་ཕྱིར་བཤད་པ། ཕན་ཚུན་རྣམ་པར་གཅོད་པའི་ངོ་བོ་ནི་ལྡོག་པའོ། །ངོ་བོ་ཉིད་གང་ལ་ཡོད་པ་དེ་རྣམས་ནི་རྟག་པ་འམ་མི་རྟག་པ་གཅིག་རྣམ་པར་བཅད་པས་འགལ་བའི་ཆོས་གཞན་གྲུབ་པའི་རྒྱུའི་ཕྱིར། བསྒྲུབས་པ་དེ་ཉིད་ཡང་བཀག་པ་མ་ཡིན་ནོ། །མི་རྟག་པ་ཉིད་རྣམ་པར་གཅོད་པར་བྱེད་པ་ན་རྟག་པ་བསྒྲུབས་པ་ཡིན་ལ། ཡང་གཏན་ཚིགས་དེ་ཉིད་རྟག་པ་ཟློག་པར་བྱེད་པས་རྟག་པ་རྣམ་པར་གཅོད་པའི་གཏན་ཚིགས་ཡིན་ན་ནི་གཅིག་ཉིད་གཅིག་ལ་གཅིག་གི་ཚེ་བསྒྲུབ་པ་དང་དགག་པ་འགལ་བའི་ཕྱིར་འགའ་ཡང་རྣམ་པར་བཅད་པ་མ་ཡིན་ནོ། །བསྒྲུབ་པ་ནི་རང་གི་ངོ་བོ་ཉམས་པ་ཡོངས་སུ་སྤངས་པ་ཡིན་ལ། རང་གི་ངོ་བོ་ཉམས་པ་ཡོངས་སུ་སྤངས་པ་ཡིན་ལ། རང་གི་ངོ་བོ་ཉམས་པ་ཉིད་ནི་དགག་པ་ཡིན་པས་འགལ་བ་དེ་གཉིས་གཅིག་ལ་ཅིག་ཅར་ཇི་ལྟར་འགྱུར། དེས་ན་མཉན་བྱ་ཉིད་ནི་འགའ་ཞིག་ལས་ཀྱང་ལྡོག་པར་ངེས་པ་འམ། དེའི་བདག་ཉིད་རྣམ་པར་བཅད་པ་ཡང་མ་ཡིན་པས་གོ་བར་བྱེད་པ་ཉིད་མ་ཡིན་ནོ། །གལ་ཏེ་མཉན་བྱ་ཉིད་ནི་ཉན་པའི་ཤེས་པ་སྐྱེད་པ་ཡིན་ལ།
དེ་ཡང་དོན་བྱེད་པར་ནུས་པ་ཉིད་ཡིན་པ་དེས་ན་མཉན་པར་བྱ་བ་ཉིད་རྟག་པ་དག་ལས་ལྡོག་པའི་ཕྱིར་མི་རྟག་པ་ཉིད་གོ་བར་བྱེད་པའི་རྟག་པ་ཉིད་མ་ཡིན་ནམ་ཞེ་ན། ཅི་སྟེ་མཉན་བྱ་ཉིད་ཅི་ཉན་པའི་ཤེས་པས་རྟོགས་པའི་དོན་བྱེད་པ་ཙམ་ཞིག་ཡིན་ནམ། གལ་ཏེ་དེ་ལྟ་ན་ནི་གོ་བར་བྱེད་པ་ཉིད་ཡིན་ནོ། །འོན་ཀྱང་དེ་ནི་ཐུན་མོང་བ་ཉིད་ཡིན་ཏེ། ཡོད་པ་ཙམ་ནི་ཐམས་ཅད་ལ་ཡོད་པའི་ཕྱིར་རོ། །ཅི་སྟེ་མཉན་པའི་ཤེས་པ་སྐྱེད་པ་ཉིད་མཉན་བྱ་ཡིན་ན། དེ་ནི་ཐུན་མོང་མ་ཡིན་པ་ཡིན་ན་གོ་བར་བྱེད་པར་ནི་མི་འགྱུར་རོ། །དེ་ནི་སྒྲ་ཉིད་ལ་བརྟེན་པས་གནོད་པར་བྱེད་པས་སྒྲ་ལ་ཁྱབ་པ་བསྒྲུབ་པར་བྱ་བ་ཡིན་ན། ཚད་མ་གང་གིས་སྒྲ་ལ་དེ་མི་རྟག་པས་ཁྱབ་པ་བསྒྲུབ་པ་དེ་ཉིད་ཀྱིས་སྒྲ་མི་རྟག་པར་གྲུབ་པའི་ཕྱིར་མཉན་བྱ་ཉིད་ཀྱིས་ཅི་བྱ། འདིས་ནི་ཐུན་མོང་མ་ཡིན་པ་ཐམས་ཅད་གོ་བར་བྱེད་པ་ཡིན་ནོ། །གཞན་ཡང་ཆོས་ཅན་གཅིག་ཉིད་ལ་ནི་ཡོད་པ་མི་རྟག་པས་ཁྱབ་པ་བསྟན་པར་མི་ནུས་སོ་ཞེས་སྔར་བཤད་ཟིན་ཏོ། །འོ་ན་ནི་ངེས་པའི་ཡུལ་ཅན་གྱི་ཡོད་པ་ཉིད་མི་རྟག་པ་ཉིད་ཀྱིས་ཁྱབ་པ་མི་འགྲུབ་པ་དེ་བཞིན་དུ་བརྩལ་མ་ཐག་ཏུ་འབྱུང་བ་ཉིད་ཀྱང་མ་ཁྱབ་པར་འགྱུར་ཏེ། ངེས་པའི་ཡུལ་ཅན་ཡིན་པའི་ཕྱིར་རོ་ཞེ་ན། བརྩལ་མ་ཐག་ཏུ་བྱུང་བ་ཉིད་ཡོད་པའི་རང་བཞིན་ཉེ་བར་བཟུང་ནས་མི་རྟག་པ་ཉིད་ཀྱིས་ཁྱབ་པ་བསྒྲུབ་པར་ནི་མི་བརྗོད་ཀྱི། འོན་ཀྱང་རྩོལ་བའི་འབྲས་བུ་ཉིད་དོ། །དེ་ཡང་རྩོལ་བའི་རྗེས་སུ་འགྲོ་ལྡོག་གི་རྗེས་སུ་བྱེད་པའི་ཕྱིར་དེ་དང་འབྲེལ་པ་ཞེས་བྱ་བ་མི་རྟག་པས་ཁྱབ་པ་ཡིན་གྱི་ཡོད་པ་ཙམ་ནི་མ་ཡིན་ནོ། །རྩོལ་བ་དང་འབྲེལ་པ་ཉིད་ནི་ཡོད་པ་ལས་ཐ་དད་པ་མ་ཡིན་ཏེ། དེས་ན་རང་བཞིན་ཡིན་པས་སྐྱོན་མེད་དོ། །མ་མཐོང་བས་ཀྱང་ལྡོག་པ་མ་ཡིན་ན། འོ་ན་ད་ནི་མི་དམིགས་པ་ཚད་མ་མ་ཡིན་ཏེ། ཚད་མས་གནོད་པར་སྲིད་པའི་ཕྱིར་རོ། །མ་མཐོང་བ་ལྡོག་པ་སྒྲུབ་པ་ནི་ཚད་མས་གནོད་པ་ཉིད་དོ། །འདི་ལྟར་གནོད་པ་མཐོང་བའི་མ་མཐོང་བ་ལས་གཞན་གནོད་པ་མཐོང་བ་ཆད་མ་ཉིད་དུ་འདོད་པའི་མ་མཐོང་བ་ལ་ཡང་ཚད་མ་གཞན་གྱིས་གནོད་པ་སྲིད་དེ། དེས་དེ་ལྟར་མ་མཐོང་བ་དེ་ལ་གནོད་པ་དེ་བཞིན་དུ་འདི་ལ་ཡང་འགྱུར་སྲིད་པ་ཡིན་ནོ། །ཇི་ལྟར་ན་གནོད་པར་བྱེད་པའི་ཚད་མ་མ་ཞུགས་ཀྱང་དོགས་པར་འགྱུར་ཞེ་ན། གོ་བར་བྱེད་
པའི་མཚན་ཉིད་དང་ལྡན་པ་ལ་གནོད་པ་སྲིད་ན། དེའི་ཞེས་བྱ་བ་གོ་བར་བྱེད་པའིའོ། །དེ་ཙམ་གྱིས་མཚན་ཉིད་ལ་གནོད་པར་བྱས་ན་མཚོན་བྱ་མཚོན་པར་མི་ནུས་ཏེ་དེས་ན་སུན་ཕྱུང་བར་བརྗོད་པ་ཡིན་ཏེ་མཚོན་པར་མི་བྱེད་པའི་ཕྱིར་རོ། །གང་གི་ཕྱིར་ཡུལ་གཅིག་ཉིད་ལ་མཚན་ཉིད་དེ་མཚོན་བྱེད་མ་ཡིན་པས་ན་དེའི་ཕྱིར་ལྡོག་པ་བསྒྲུབ་པའི་ཕྱིར་མི་དམིགས་པ་སྔ་མ་ལ་ཡང་ཡིད་བརྟན་དུ་མེད་དེ་ཡིད་མི་ཆེས་སོ། །གོ་བར་བྱེད་པ་མ་ཡིན་པར་ངེས་སོ་ཞེས་བྱ་བའི་དོན་ཏེ། །གལ་ཏེ་དེ་ལྟར་ན་རྗེས་སུ་དཔག་པའི་རྟོགས་པར་བྱ་བའི་ཡུལ་ལ་མངོན་སུམ་དང༌། རྗེས་སུ་དཔག་པ་དང་འགལ་བ་མཐོང་བས་ཡིད་བརྟན་དུ་མེད་པ་རྗེས་སུ་དཔག་པ་ལ་ཡང་མཚུངས་སོ། །འདི་ལྟར་སྨིན་པ་ཞེས་བྱ་བ་ལ། ཡལ་ག་གཅིག་ལས་སྐྱེས་པ་དང༌། །གཟུགས་ཁྱད་པར་མེད་པ་ཚུལ་གསུམ་དང་ལྡན་པ་ཡིན་ཡང་མངོན་སུམ་གྱིས་མ་སྨིན་པར་མྱོང་བ་དང་ཇི་ལྟར་སྔོ་བསངས་ཡིན་ཏེ། དེའི་བུ་ཡིན་པའི་ཕྱིར་ཞེས་བྱ་བ་ལ། དེའི་བུ་ཉིད་ཚུལ་གསུམ་པ་ཡིན་ཡང་སྔོ་བསངས་ཉིད་མངོན་སུམ་ཉིད་ཀྱིས་གནོད་པ་ལྟ་བུ་འམ། དཔེར་ན་མི་རྟག་པ་ཉིད་བསྒྲུབ་པ་ལ་ཚུལ་གསུམ་དང་ལྡན་པའི་བྱེད་པ་ཉིད་སྒྲ་རྟག་སྟེ། མཉན་བྱའི་ཕྱིར་རོ་ཞེས་བྱ་བའི་ཚུལ་གསུམ་དང་ལྡན་པའི་མཉན་བྱ་ཉིད་ཀྱིས་གནོད་པའི་ཕྱིར་རྗེས་སུ་དཔག་པ་གནོད་པ་ཡིན་ནོ་ཞེ་ན། འདི་དགག་པའི་ཕྱིར་བཤད་པ་དེ་ལྟར་ནི་མ་ཡིན་ཏེ། ཇི་སྐད་བཤད་པ་ལྟ་བུ་ཞེས་བྱ་བ་བཤད་ཟིན་པའི་མཚན་ཉིད་ཅན་གྱི་རྗེས་སུ་དཔག་པ་དེའི་བདག་ཉིད་དང་དེ་ལས་བྱུང་བའི་འབྲེལ་པ་དང་ལྡན་པ་ལ་མངོན་སུམ་དང་རྗེས་སུ་དཔག་པས་གནོད་པ་མི་སྲིད་དོ། །དེའི་བུ་ཉིད་དང་ཡལ་ག་གཅིག་ལས་སྐྱེས་པ་ནི་བསྒྲུབ་བྱ་དང་འབྲེལ་པ་འགའ་ཡང་མེད་དོ། །བྱས་པ་ནི་བསྒྲུབ་བྱ་དང་འབྲེལ་བའི་ཕྱིར་གནོད་བྱ་མ་ཡིན་ལ། མཉན་བྱ་ཉིད་ནི་མ་འབྲེལ་པའི་ཕྱིར་གནོད་བྱེད་མ་ཡིན་ནོ། །གལ་ཏེ་རྗེས་སུ་དཔག་པ་ལ་མངོན་སུམ་དང་རྗེས་སུ་དཔག་པས་གནོད་པ་མེད་ན། ཚུལ་གསུམ་པའི་རྟགས་ཚུལ་གསུམ་པར་མཚུངས་པ་ཉིད་ཀྱིས་གནོད་པ་སྟོན་པ་ན་འགལ་བ་འཁྲུལ་པ་མེད་པ་ཅན་བརྗོད་པ་དེ་མི་འཐད་པར་འགྱུར་རོ་ཞེ་ན་བཤད་པ། རྗེས་སུ་དཔག་པའི་ཡུལ་ལ་འགལ་བ་འཁྲུལ་པ་མེད་པ་ཅན་ཞེས་བྱ་བ་འགའ་ཡང་མེད་དོ་ཞེས་བྱ་བ་འདི་ནི་འདོད་པ་ཉིད་དོ། །ཁོ་བོ་
འབའ་ཞིག་འདོད་པར་མ་ཟད་ཀྱི་སློབ་དཔོན་ཡང་བཞེད་པ་ཡིན་ཏེ། རྗེས་སུ་དཔག་པའི་ཡུལ་ལ་དེ་མ་བརྗོད་པའི་ཕྱིར་རོ། །ཡུལ་གང་ལ་འགལ་བ་འཁྲུལ་པ་མེད་པ་ཅན། སློབ་དཔོན་གྱིས་གསུངས་པ་འདིའི་ཡུལ་དེ་ནི་ལེའུ་གསུམ་པར་བསྟན་པར་བྱའོ། །མ་མཐོང་བ་ཙམ་གྱིས་ནི་ལྡོག་པར་སློབ་དཔོན་བཞེད་པ་མ་ཡིན་ནོ་ཞེས་ཡང་བསྟན་པའི་ཕྱིར་བཤད་པ། སློབ་དཔོན་གྱིས་གང་ཡང་བཤད་པའོ། །གང་ཞེས་བྱ་བའི་སྒྲ་འདི་ནི་གཞུང་གི་ངོ་བོ་བསྟན་པ་གང་ཡིན་པའོ། །དེ་ཉིད་སྟོན་པ་ན་གལ་ཏེ་མ་མཐོང་བ་ཙམ་གྱིས་ཞེས་བྱ་བ་ཡིན་ནོ། །འདིར་བྱེ་བྲག་པས་རླུང་ཡོད་པར་བསྒྲུབ་པའི་ཕྱིར་ཤིང་དང་རྩྭ་མེད་པའི་མྱ་ངམ་གྱི་ཕྱོགས་སུ་གྲང་བ་མ་ཡིན། དྲོ་བ་ཡང་མ་ཡིན་པའི་རེག་པའི་ཁྱད་པར་དམིགས་པ་དེ་ནི་ཡོན་ཏན་ཡིན་ལས། དེའི་རྟེན་རྫས་ཡིན་དགོངས་ན་དེས་ལ་སོགས་པ་མཐོང་བ་རྣམས་ཀྱི་ཡོན་ཏན་ནི་མ་ཡིན་ནོ། །དེས་ན་ཡོན་ཏན་འདི་ནི་རླུང་གི་ཡིན་པར་འགྱུར་རོ་ཞེས་སྨྲས་པ་ལ། སློབ་དཔོན་གྱིས་ས་ལ་སོགས་པ་རྣམ་སྣང་ཟེར་བ་དག་ལ་མཐོང་བས་འདི་དེ་དག་གི་ཡོན་ཏན་མ་ཡིན་དུ་ཆུག་ཀྱང་མི་སྣང་བ་རྣམས་ཀྱི་གོ་ཇི་ལྟར་མ་ཡིན་གྱི། དེ་ལ་ཡང་མ་མཐོང་བའི་ཕྱིར་རོ་ཞེ་ན། གལ་ཏེ་མ་མཐོང་བ་ཙམ་གྱིས་མི་སྣང་བ་དག་ལས་རེག་པའི་ཁྱད་པར་འགོག་པར་བྱེད་ན་དེ་ཡང་རིགས་པ་མ་ཡིན་ནོ་ཞེས་གསུངས་ཏེ། ས་ལ་སོགས་པ་མི་དམིགས་པ་ལ་དམིགས་པ་མེད་པ་གང་ཡིན་པ་དེ་ནི་བལྟར་མི་རུང་བ་མི་སྣང་བ་ཡིན་ཏེ། གང་གི་ཕྱིར་དེ་ལྟ་མ་ཡིན་པ་དེའི་ཕྱིར་མི་དམིགས་པ་ཙམ་ཡིན་ནོ། །དེས་ན་དགག་པ་གང་ཡིན་དེ་མི་རིགས་སོ་ཞེས་དེ་ལྟར་སློབ་དཔོན་གྱིས་བརྒལ་ཞིང་བརྟགས་པ་མ་མཐོང་བ་ཙམ་གྱི་རྒྱུ་མཚན་ཅན་གྱི་དགག་པ་དེ་ཇི་ལྟར་རིགས་པ་མ་ཡིན། གང་གི་ཕྱིར་ཁྱེད་ལ་མི་དམིགས་པ་ཙམ་གྱིས་གཏན་ཚིགས་ཀྱི་ལྡོག་པ་གྲུབ་པ་ཡིན་ལ། གྲུབ་པའི་གཏན་ཚིགས་དེའི་ཕྱིར་རིགས་པ་ཁོ་ནར་འགྱུར་གྱི། མི་རིགས་པར་ནི་མི་འགྱུར་རོ། །དེས་ན་མ་མཐོང་བ་ཙམ་གྱི་རྒྱུ་མཚན་གྱིས་དགག་པར་རིགས་པ་མ་ཡིན་ནོ་ཞེས་བཤད་པས་ན། མ་མཐོང་བ་ཙམ་གྱི་རྒྱུ་མཚན་ལས་སློབ་དཔོན་ལྡོག་པར་བཞེད་པ་མ་ཡིན་ནོ། །དེ་ལྟར་སློབ་དཔོན་གྱི་དགོངས་པ་བསྒྲུབས་ནས་མ་མཐོང་བ་ཙམ་གྱི་ཞེས་བཤད་པ་གང་ཡིན་བ་དེ་བརྟག་པའི་ཕྱིར། རེག་པ་ཞེས་སྨོས་ཏེ།
དམིགས་པའི་མཚན་ཉིད་ནི་ཡུལ་ཏེ་དེར་གྱུར་པའི་རྒྱུ་དེའི་ཕྱིར་རེག་པ་དགག་པར་རིགས་པ་ཁོ་ན་མ་ཡིན་ནམ། རེག་པ་ཐ་མལ་པ་ནི་དམིགས་པ་ཡིན་ནོ་ཞེ་ན། ཅིག་ཤོས་ཀྱིས་དགག་པ་སྨྲས་པ་ནི། རིགས་པ་མ་ཡིན་ཏེ་ཞེས་བྱ་བ་ཡིན་ནོ། །དེའི་ཞེས་བྱ་བ་ནི་སྣང་བའོ། །དེའི་རང་བཞིན་གང་ལ་ཡོད་པ་དེ་ནི་དེའི་རང་བཞིན་ནོ། །དེའི་རང་བཞིན་གྱི་ཡུལ་དེ་གང་ལ་ཡོད་པ་ནི་དེའི་རང་བཞིན་གྱི་ཡུལ་ན་ཡོད་པ་སྟེ། སྣང་བའང་ཡིན་ལ་དེའི་རང་བཞིན་གྱི་ཡུལ་ན་ཡོད་པའང་ཡིན་པས་སོ། །དེ་ཉིད་ནི་དེ་ཙམ་སྟེ་དེ་ནི་འགོག་པ་མ་ཡིན་པའི་ཕྱིར་རོ། །མི་སྣང་བ་མི་དམིགས་པ་ནི་རྣམ་པ་གཉིས་ཏེ། ཤིན་ཏུ་བལྟར་མི་རུང་བ་གང་ཡིན་པ་དང༌། བལྟར་རུང་བ་མི་སྣང་བའི་ཡུལ་ཅན་གང་ཡིན་པ་སྟེ། དཔེར་ན་སྣང་བ་དང་མི་སྣང་བའི་ཡུལ་ལ་ཤ་ཟ་ལྟ་བུ་འམ། མི་སྣང་བའི་ཡུལ་དུ་བུམ་པ་བཞིན་ནོ། །དེའི་ཕྱིར་སྣང་བ་མི་དམིགས་པས་བལྟར་རུང་བ་འགོག་པར་བྱེད་པས་ནི་ས་ཕྱོགས་ལ་སོགས་པ་སྣང་བ་ལ་སྣང་བ་ལ་སྣང་བ་དགག་པར་བྱ་བ་ཡིན་ནོ། །བྱེ་བྲག་པ་དེས་ནི་ས་ལ་སོགས་པ་སྣང་བ་དང་མི་སྣང་བའི་སྤྱིར་བཟུང་ནས་དགག་པ་སྨྲས་སོ། །དེ་ལ་མི་སྣང་བའི་ཡུལ་དུ་ནི་མ་མཐོང་བ་ཙམ་གྱིས་དགག་པ་འདིར་རིགས་པ་མ་ཡིན་ནོ། །གལ་ཏེ་སྔོན་པོ་སེར་པོ་ལས་ལོག་པའི་རང་བཞིན་དང༌། ཤེས་པ་མ་རྟོགས་པ་ལས་བཟློག་པ་དང། མེ་མི་དྲོ་བ་ལས་བཟློག་པའི་རང་བཞིན་དུ་མཐོང་བ་དེ་ལྟར་མ་མཐོང་བ་ཡང་ཐ་སྙད་བྱེད་པ་མ་ཡིན་ནམ། སྔོན་པོ་ལ་སོགས་པ་མཐོང་བ་དག་ནི་སེར་པོ་ལ་སོགས་པའི་རང་བཞིན་ལས་ལོག་པ་ཡིན་གྱི་མ་མཐོང་བ་ནི་རྣམ་པ་གཞན་དུ་ཡང་སྲིད་དོ་ཞེས་ནི་དོགས་པ་མ་ཡིན་ནོ། །དེ་བཞིན་དུས་ལ་སོགས་པ་སྣང་བ་ལ་རིག་པའི་ཁྱད་པར་མ་མཐོང་བ་དེས་ན། ཅི་ལྟར་ས་ལ་སོགས་པ་སྣང་བ་དག་དེའི་རང་བཞིན་དང་བྲལ་པ་དེ་བཞིན་དུ་མ་མཐོང་བ་ཡང་ཡིན་ནོ། །ཅི་སྟེ་འདིར་མ་མཐོང་བ་དག་ལ་རྣམ་པ་གཞན་དུ་རྟོག་ན། འོ་ན་ནི་ཉེ་བར་བཀོད་པའི་རྣམ་པར་ཤེས་པ་ལ་སོགས་པ་ཡང་མ་མཐོང་བ་ལ་རྣམ་པ་གཞན་དུ་དོགས་པར་བྱ་དགོས་སོ་ཞེས་དོགས་པ་ལས། བཤད་པ་ས་ལ་སོགས་པའི་སྤྱི་དང་ལྡན་པ་དེ་ལ་ཡང་དགག་པར་བྱ་བ་གྲང་བ་ཡང་མ་ཡིན་དྲོ་བ་ཡང་མ་ཡིན་པའི་རེག་པ་ཡོད་པར་གདོན་མི་ཟ་བར་དོགས་པར་འགྱུར་གྱི་ངེས་པར་ནི་མི་འགྱུར་རོ། །ཅིའི་ཕྱིར་ཞེ་ན། སྣང་བའི་ཡུལ་འགའ་ཞིག་ལས་ཉིད་
ཡིན་ཡང་མཐོང་བ་ལས་གཞན་པའི་ཁྱད་པར་སྲིད་པའི་ཕྱིར་རོ་ཞེས་འཆད་པ་ནི། ཤིང་བལ་དང༌། རྡོ་བ་དང༌། ལོ་མ་དང༌། མེ་ཏོག་ལ་སོགས་པ་སྣང་བ་དག་ལས་ཉིད་དེ་ཡོད་ཀྱང༌། འཇམ་པ་དང་རྩུབ་པ་ལ་སོགས་པ་རེག་པ་ཐ་དད་པ་མཐོང་བའི་ཕྱིར་རོ། །དེ་བཞིན་དུ་རེག་པའི་ཁྱད་པར་གཞན་ཡང་ས་ཉིད་ལས་མ་འདས་པར་ལྐོག་ཏུ་གྱུར་པའི་ཡུལ་ལ་འཇུག་པར་འགྱུར་རོ། །དེའི་དོན་ནི་འདི་ཡིན་ཏེ། གལ་ཏེ་རེག་པའི་ཁྱད་པར་ཉིད་ས་ཡིན་ན་ནི་མི་སྣང་བ་ཡང་རེག་པ་གཞན་དང་མི་ལྡན་པར་འགྱུར་བ་ཡིན་ན། གང་གི་ཕྱིར་རེག་པའི་ཁྱད་པར་ལ་ལྟོས་པ་རེག་པ་ལ་སོགས་པ་འདུས་པའི་བདག་ཉིད་ཅན་འཛིན་པའི་བྱ་བ་བྱེད་པས་རབ་ཏུ་ཕྱེ་བ་རང་དང་མཐུན་པའི་རྟོག་པ་སྐྱེད་པར་རུང་བ་ཡིན་ཏེ། དེས་ན་ཇི་ལྟར་གང་ཞིག་སྲེག་པའི་རྣམ་པ་ཅན་གྱི་རྟོག་པའི་གཟུང་བ་མ་ཡིན་པ་དེ་བཞིན་དུ་གང་ཞིག་འཛིན་པའི་བྱ་བ་བྱེད་པ་དང་དེའི་རྣམ་པ་ཅན་གྱི་རྟོག་པའི་གཟུང་བ་མ་ཡིན་པའི་དོན་དེ་ནི་ས་མ་ཡིན་པར་འགྱུར་གྱི། རེག་པ་གཞན་དང་ལྡན་པས་ནི་མ་ཡིན་ནོ། །དེས་ན་དེ་ལྟར་ཡིན་ནོ། །གང་གི་ཕྱིར་མཐོང་བའི་ཤིང་བལ་ལ་སོགས་པའི་རེག་པ་གཞན་དང་འབྲེལ་པ་ནི། ས་ཉིད་ཟློག་པར་བྱེད་པ་མ་ཡིན་པའི་གཏན་ཚིགས་དེའི་ཕྱིར་ཐམས་ཅད་ལ་ཞེས་བྱ་བ་སྣང་བ་དང་མི་སྣང་བ་ལ་མ་མཐོང་བ་ཙམ་གྱིས་རེག་པ་དགག་པར་རིགས་པ་མ་ཡིན་ནོ། །རྣམ་པར་ཤེས་པ་ལ་སོགས་པ་ནི་མ་མཐོང་བ་རྣམས་ཀྱང་རྣམ་པ་གཞན་དུ་སྲིད་པ་དགག་པ་ཡིན་ཏེ། དོན་འཛིན་པར་བྱེད་པ་དང་འཛིན་པར་བྱེད་པའི་རྟོག་པ་སྐྱེད་པའི་དངོས་པོ་གང་ཡིན་པ་ནི་རྣམ་པར་ཤེས་པར་བརྗོད་པ་ཡིན་ནོ། །དེས་ན་རྣམ་པར་ཤེས་པ་ཉིད་ཀྱི་རྒྱུ་མཚན་ནི་མ་རྟོགས་པ་ལས་བཟློག་པ་ཉིད་ཡིན་པས་དེ་མེད་ན་ཤེས་པ་ཉིད་མ་ཡིན་པར་འགྱུར་རོ། །དེ་བཞིན་དུ་དྲོ་བའི་རེག་པའི་མེ་ཡང་རང་བཞིན་དུ་མི་འཐད་དོ། །དེ་བཞིན་དུ་ཁ་དོག་གཞན་ལས་ལྡོག་པའི་རང་བཞིན་གྱི་སྔོན་པོ་ཉིད་ནི་ཁ་དོག་གཞན་ཡིན་པར་ནི་འགྱུར་རོ། །མ་མཐོང་བ་ཙམ་གྱིས་ལྡོག་པར་སྨྲ་ན་མངོན་སུམ་གྱིས་གནོད་པར་བསྟན་པའི་ཕྱིར་གཞན་ཡང་ཞེས་སྨོས་སོ། །གལ་ཏེ་ཅི་ཞིག་ལྟར་ཞེས་བྱ་བ་ནི་ཡུལ་གཞན་ལ་སོགས་པ་མ་བརྟགས་པར་མི་མཐུན་པའི་ཕྱོགས་ལ་མ་མཐོང་བ་ཙམ་
གྱིས་ཏེ། མི་སྣང་བ་མི་དམིགས་པས་བསྒྲུབ་བྱ་དེ་ལ་འབྲེལ་པ་མེད་པ་ཡང་བསྒྲུབ་པར་བྱ་བ་དང་འཁྲུལ་པ་མེད་པར་ཁས་ལེན་ནོ་ཞེ་ན། དེའི་ཚེ་ཡུལ་འགའ་ཞིག་ན་སྐྱུ་རུ་ར་ལ་སོགས་པའི་རྫས་ཁ་ཅིག་ཅི་ཞིག་ལྟར་ཞེས་བྱ་བ་ཡིད་འབྱུང་བ་བསྐྱེད་པར་བསྐ་བ་ལ་སོགས་པའི་རོ་དང་ལྡན་པར་མཐོང་བ་ཡུལ་དང་དུས་དང་འདུ་བྱེད་པ་གཞན་ལ་གཞན་དུ་ཡང་སྣང་ངོ༌། །ཕྱོགས་དེར་གཞན་དུ་མཐོང་བ་ནི་གནོད་པར་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ །དཔེར་ན་སྨན་ཁ་ཅིག་དང་ལོ་ཏོག་ལ་སོགས་པ་ཞིང་ཁྱད་པར་ཅན་ལས་ནི་རོ་ལ་སོགས་པ་ཁྱད་པར་ཅན་ཡོད་པ་གང་ཡིན་པ་སྟེ། རོ་ནི་མངར་བ་ལ་སོགས་པའོ། །གང་གི་ཚེ་ཟོས་པ་ཞུ་བ་ན་གྲང་བ་དང་དྲོ་བ་ལ་སོགས་པ་བྱེད་པར་ནུས་པ་དེའི་ཚེ་ནུས་པ་ཞེས་བརྗོད་དོ། །ཟོས་ཏེ་ཞུ་བ་དང་མངར་བ་ལ་སོགས་པའི་རོར་གྱུར་པ་གང་ཡིན་པ་ནི་སྨིན་པར་བྱེད་པ་ཞེས་བརྗོད་དོ། །ཞིང་གཞན་ལས་ནི་དེ་ལྟ་བུར་འགྱུར་བ་མ་ཡིན་ནོ། །དཔེར་ན་ཡུལ་གྱི་ཁྱད་པར་གྱིས་རོ་དང་ནུས་པ་དང་སྨིན་པར་བྱེད་པའམ། ཁྲུན་དང་སྦོམས་ཐ་དད་པ་དེ་བཞིན་དུ་དུས་ཀྱི་ཁྱད་པར་ལས་ཀྱང་ཡིན་ཏེ། བདག་ཉིད་ཐམས་ཅད་ཀྱི་སཱ་ལུའི་མྱུ་གྱུ་དབྱར་གྱི་ཚེ་གཞན་དུ་འགྱུར་ལ། དབྱིད་ཀྱི་ཚེ་ཡང་གཞན་དུ་འགྱུར་བ་བཞིན་ནོ། །དེ་བཞིན་དུ་ལེགས་པར་བྱ་བའི་བྱེ་བྲག་ལས་ཀྱང་ཞིང་དེ་ལ་ཡོད་པའི་སྨན་ཡང་ཐ་དད་པར་འགྱུར་རོ། །ལུད་བཏབ་པ་ལ་སོགས་པ་ནི་ཞིང་ལེགས་པར་བྱེད་པ་ཡིན་ལ། འོ་མས་བཅུ་བ་ལ་སོགས་པ་ནི་སྐྱུ་རུ་ར་ལ་སོགས་པའི་རྫས་ལེགས་པར་བྱེད་པ་ཡིན་ནོ། །དེའི་ཕྱིར་སྨན་ལ་སོགས་པ་དག་དེ་ལྟར་ཡུལ་དང་དུས་དང་ལེགས་པར་བྱ་བའི་ཁྱད་པར་ལས་ཐ་དད་པར་མཐོང་བ་ཡིན་ནོ། །སྨན་ནི་མཚོན་པ་ཙམ་སྟེ་འབྲས་བུ་དང་ལྗོན་ཤིང་ཁྱད་པར་ཅན་དག་ལ་ཡང་དེ་བཞིན་དུ་བལྟའོ། །འདི་ལྟར་སའི་ཁྱད་པར་ལས་འབྲ་གོ་སྐྱེད་པ་དང༌། འོ་མས་བཅུས་པའི་ཁྱད་པར་ལས་སྐྱུ་རུ་རའི་འབྲས་བུ་མངར་པོར་འགྱུར་བ་བཞིན་ནོ། །འདུ་བྱེད་དང་ལྡན་པའམ་དེ་དང་བྲལ་བའི་ཡུལ་གཅིག་དུ་སྐྱེས་པའི་སྨན་དེ་ཡང་སྨན་དེ་ཉིད་ཀྱི་ཡུལ་ན་ཡོད་པའི་སྲོག་ཆགས་གང་ཡིན་པ་ཡུལ་དེ་བ་དེ་རྣམས་ཀྱིས་དེ་ལྟར་མཐོང་བ་གང་ཡིན་པ་དེའི་ཕྱིར་ཐམས་ཅད་དུ་སཱ་ལུ་དང་སྐྱུ་རུ་ར་དེ་ཉིད་ཀྱིས་དེ་ལྟ་བུ་ཞེས་བྱ་བ་ཡུལ་གཞན་དུ་མཐོང་བའི་རོ་ལ་སོགས་པ་དང་ལྡན་
པ་ཡིན་པར་ནི་མི་འགྱུར་རོ། །འདི་སྐད་དུ་སཱ་ལུ་ཉིད་དམ་སྐྱུ་རུ་ར་ཉིད་ཡིན་པས་ནི་ཐམས་ཅད་དུ་རོ་དང་ནུས་པ་དང་སྨིན་པར་བྱེད་པ་འདྲ་བར་རྗེས་སུ་དཔག་པར་མི་ནུས་སོ་ཞེས་བཤད་པ་ཡིན་ནོ། །གཏན་ཚིགས་བཤད་པ། རོ་ལ་སོགས་པ་དང་འབྲེལ་པའི་རྒྱུའི་ཁྱད་པར་གང་ལ་སྲིད་པ་དེ་དག་ལ་ནི། རོ་དང་ནུས་པ་དང་སྨིན་པར་བྱེད་པ་ལ་སོགས་པའི་མཚན་ཉིད་ཀྱི་ཡོན་ཏན་གཞན་དུ་སྲིད་པའི་ཕྱིར་རོ། །ཁྱད་པར་ཅན་གྱི་རྒྱུའི་དབང་གིས་ཡོན་ཏན་གཞན་སྲིད་པ་གང་ཇི་སྙེད་པ་དེ་ཐམས་ཅད་སཱ་ལུ་དང་སྐྱུ་རུ་ར་ཉིད་ལོག་པ་ཡིན་ནོ་ཞེས་བརྗོད་པར་མི་ནུས་ཏེ། གང་གི་ཕྱིར་དོན་གང་བྱེད་པར་མཐོང་བའི་དངོས་པོ་དང་དེ་དང་རྗེས་སུ་མཐུན་པའི་རྟོག་པ་ནི་སྐྱུ་རུ་ར་ཞེས་བརྗོད་དོ། །རོ་དང་ནུས་པ་དང་སྨིན་པར་བྱེད་པ་གཞན་དང་ལྡན་པ་ལ་ཡང་སྐྱུ་རུ་རའི་ཉེ་བར་སྦྱོར་བས་ལྡོག་པར་བྱ་བའི་ནད་ལ་ཕན་པའི་ཕྱིར་ཁྱད་པར་ཅན་གྱི་དོན་བྱེད་པ་དང༌། སྐྱུ་རུ་རའི་རྣམ་པ་ཅན་གྱི་རྟོག་པ་སྐྱེད་པར་བྱེད་པར་སྐྱུ་རུ་རའི་ཐ་སྙད་ཀྱི་ཡུལ་དེ་ནི་ཡོད་པ་ཉིད་དོ། །དཔེར་ན་ཁྱད་པར་གཞན་དག་ལ་རེག་པ་ཐ་དད་པ་དང་ལྡན་ན་ཡང་ས་ཉིད་དང་མིག་ལ་སོགས་པ་རྟེན་ཐ་དད་པས་བྱས་པ་ལས་ཤེས་པ་ཉིད་དང༌། བུད་ཤིང་གི་ཁྱད་པར་གྱིས་གནས་པ་ལ་མེ་ཉིད་དང༌། བཻ་དཱུ་ཪྻ་ལ་སོགས་པའི་དབྱེ་བས་བྱས་པ་ལ་སྔོན་པོ་ཉིད་མི་ལྡོག་པ་བཞིན་ནོ། །དེས་ན་ཁྱད་པར་ཅན་གྱི་རྟོག་པ་སྐྱེད་པ་ལ་སོགས་པར་ནུས་པའི་རང་བཞིན་གང་ཡིན་པ་ཐ་སྙད་ཀྱི་རྒྱུ་མཚན་མ་ལོག་པར་འཇུག་པའི་ཁྱད་པར་གང་ཡིན་པ་དེ་ནི་རྒྱུ་ཁྱད་པར་སྲིད་པ་ལ་ཡང་འཇུག་པས་ན་དགག་པ་མ་ཡིན་ནོ། །གང་ལ་རྒྱུ་ཁྱད་པར་མེད་པར་གྱུར་པ་དེའི་རང་བཞིན་རྗེས་སུ་དཔག་ཏུ་རུང་ངོ༌། །ཅི་ལྟ་བུ་ཞེ་ན། དཔེར་ན་ཞེས་བྱ་བས་སྟོན་ཏེ་ཚིག་གང་ལ་བྱེད་པ་པོ་མ་མཐོང་བ་ཡོད་པའོ། །སྐྱེས་བུའི་འདུ་བྱེད་པ་ནི་བསྐྱེད་པར་བྱ་བ་སྟེ། དེ་སྔོན་དུ་འགྲོ་བ་གང་ལ་ཡོད་པའོ། །སྐྱེས་བུས་བྱས་པ་ཞེས་བྱ་བའི་ཐ་ཚིག་གོ །གལ་ཏེ་བྱེད་པ་པོ་མཐོང་བ་མེད་ཀྱང་དེ་སྐྱེས་བུས་བྱས་པར་གྱུར་པ་ཅིའི་ཕྱིར་རོ་ཞེ་ན། བཤད་པ། སྐྱེས་བུས་བྱས་པ་དང་མ་བྱས་བར་འདོད་པ་མཐོང་བའི་ཚིག་ལ་ཁྱད་པར་མེད་པའི་ཕྱིར་ཏེ་མ་མཐོང་བའི་ཕྱིར་རོ། །གལ་ཏེ་སྒྲ་ལ་བརྟེན་པའི་ཁྱད་པར་སྨྲ་དཀའ་བཞེས་བྱ་བ་དང༌། འབྲས་བུ་གྲུབ་པའི་ཁྱད་པར་སྔགས་ཀྱི་བདག་ཉིད་
སྐྱེས་བུས་མ་བྱས་པ་ལ་མཐོང་བ་མ་ཡིན་ནམ། དེས་ན་ཁྱད་པར་མེད་པའི་ཕྱིར་ཞེས་ཇི་ལྟར་བརྗོད་ཅེ་ན། རང་བཞིན་ལ་བརྟེན་པ་དང་འབྲས་བུ་ལ་བརྟེན་པའི་ཁྱད་པར་གྱི་རྣམ་པ་ཐམས་ཅད་སྐྱེས་བུ་དག་གིས་བྱེད་པའི་ཕྱིར་རོ། །འདི་ལྟར་རིག་བྱེད་ཀྱི་བཞིན་དུ་འཇིག་རྟེན་པའི་ཡང་འབྲེལ་པར་དཀའ་བ་ཉིད་བརྗོད་དཀའ་བ་ཉིད་སྐྱེས་བུས་བྱེད་པར་ནུས་པ་ཡིན་ནོ། །སྔགས་ཀྱི་རྒྱུ་ལས་འབྱུང་བའི་གྲུབ་པ་ཡང་སྐྱེས་བུས་བྱས་པའི་སྔགས་ལས་ཀྱང་མཐོང་སྟེ། དེས་ན་རང་བཞིན་ལ་བརྟེན་པ་འམ་འབྲས་བུ་ལ་བརྟེན་པ་དེ་འདྲ་བ་ནི་ཁྱད་པར་མ་ཡིན་ནོ། །ཡི་གེའི་གོ་རིགས་དང་ཚིག་གི་གོ་རིམས་ཀྱང་སྐྱེས་བུས་བྱས་པ་ལས་ཁྱད་པར་ཡོད་པ་མ་ཡིན་ནོ། །དེའི་ཕྱིར་གང་ཞིག་མཐོང་བས་སྐྱེས་བུས་མ་བྱས་པར་རྟོགས་པར་འགྱུར་བ་རིག་བྱེད་ལ་སྐྱེས་བུས་བྱ་བར་མི་ནུས་པའི་ཁྱད་པར་ནི་འགའ་ཡང་མེད་དོ། །དེ་འདྲ་བ་ནི་སྐྱེས་བུས་བྱས་པ་ལ་མཐོང་བས་ཚིག་དེ་སྐྱེས་བུས་མ་བྱས་པར་ཇི་ལྟར་རྟོགས། གལ་ཏེ་དེའི་ཁྱད་པར་སྐྱེས་བུས་བྱེད་པར་མི་ནུས་པ་ཡིན་ན་ནི། སྐྱེས་བུས་རྩོལ་བས་མ་བསྐྱེད་པར་རྟོགས་པར་འགྱུར་རོ། །གང་ཞིག་རྒྱུ་གང་གིས་སྐྱེད་པར་ནི་ནུས་པ་དེ་ནི་རྒྱུ་མཐོང་བ་ཅན་ཡིན་ཡང་གཞན་གྱི་རྒྱུ་ཅན་དུ་ཤེས་པར་འགྱུར་བ་འམ། སྐྱེ་བ་མ་མཐོང་མ་རྒྱུ་མེད་པར་འགྱུར་བ་ཡིན་གྱི། གང་ཞིག་བདག་ཉིད་ཐམས་ཅད་དེས་བསྐྱེད་པ་དང་འདྲ་བ་དེའི་རྒྱུ་གཞན་ཉིད་ཡིན་ན་ནི་མཐོང་བ་དེའི་རྒྱུ་ཡང་དེ་ཡིན་པར་ཐལ་བར་འགྱུར་བ་འམ། དེ་རྒྱུ་མེད་པ་ཅན་ཡིན་ན་དེ་ཡང་རྒྱུ་མེད་པ་ཅན་དུ་འགྱུར་རོ། །རྒྱུ་མཚན་མེད་པར་འདྲ་བ་དག་ལས་གཅིག་ནི་གཞན་གྱི་རྒྱུ་ཅན་ཡིན་ལ། ཅིག་ཤོས་ནི་རྒྱུ་མེད་པ་ཅན་ནམ་ཐ་དད་པའི་རྒྱུ་ཅན་དུ་བརྟག་པར་མི་ནུས་ཏེ། ཐ་དད་པ་དང་ཐ་དད་པ་མེད་པའི་ཐ་སྙད་འཇིག་པར་འགྱུར་བའི་ཕྱིར་རོ། །གལ་ཏེ་སྐྱེས་བུས་མ་བྱས་པ་མཐོང་བ་རྣམས་ཁྱད་པར་མེད་ཀྱང༌། ཚད་མེད་པ་ཉིད་ཀྱི་ཕྱིར་མ་མཐོང་བ་རྣམས་ལ་འགྱུར་བ་མ་ཡིན་ནམ། དེས་ན་ཁྱད་པར་མེད་པའི་ཕྱིར་རོ་ཞེས་ཇི་ལྟར་བརྗོད་ཅེ་ན། བསམ་པ་འདི་ཡིན་ཏེ་གལ་ཏེ་སྐྱེས་བུས་མ་བྱས་པར་འདོད་པའི་ངག་ཐམས་ཅད་མ་མཐོང་བ་དེ་ལྟ་ན་སྐྱེས་བུས་མ་བྱས་པར་འདོད་པའི་ངག་མཐོང་བ་ཅི་སྙེད་པ་དེ་ཐམས་ཅད་སྐྱེས་བུས་བྱས་པ་ལས་ཁྱད་པར་མེད་པར་ཤེས་པ་ཡིན་ནོ། །དེའི་ཕྱིར་ངག་གཅིག་ལ་སྐྱེས་བུས་མ་བྱས་པ་ལས་
གྱུར་པའི་ཁྱད་པར་མ་མཐོང་བ་གང་ཡིན་པ་དེ་ནི་སྐྱེས་བུས་མ་བྱས་པ་ཐམས་ཅད་ལ་ཡོད་པ་མ་ཡིན་ཏེ། ཁྱད་པར་རྣམ་པར་འཇོག་པའི་རྒྱུ་མཚན་གྱི་རྒྱུ་ཐ་དད་པ་མེད་པའི་ཕྱིར་རོ། །རྒྱུ་ནི་སྐྱེས་བུས་མ་བྱས་པ་ཉིད་ཡིན་ན་དེ་ནི་གཞན་ལ་ཡང་ཁྱད་པར་མེད་དོ། །དེ་ནི་གཅིག་ལ་ཁྱད་པར་གྱི་རྒྱུ་མ་ཡིན་ན་ཡང་ཐམས་ཅད་དུ་ཁྱད་པར་གྱི་རྒྱུར་མི་འགྱུར་རོ། །དེས་ན་ཁྱད་པར་གྱི་རྒྱུ་མེད་པའི་ཕྱིར་མ་མཐོང་བ་ལ་ཡང་ཁྱད་པར་མེད་པ་རྗེས་སུ་དཔག་གོ །དེས་ན་ཁྱད་པར་མེད་པའི་ཕྱིར་དག་ཐམས་ཅད་སྐྱེས་བུས་བྱས་པར་རྗེས་སུ་དཔོག་པ་ཡིན་ནོ། །འགའ་ཞིག་སྐྱེས་བུས་མ་བྱས་ན་དེ་དང་ཁྱད་པར་མེད་པ་ཐམས་ཅད་སྐྱེས་བུས་མ་བྱས་པར་འགྱུར་བའི་ཕྱིར་རོ། །གཞུང་གི་ཚོགས་འདིས་ནི་དོན་འདི་བརྗོད་པ་ཡིན་ཏེ། རྣམ་པ་ཐམས་ཅད་མཐོང་བའི་རྫས་གང་ཡིན་པ་དེ་དག་ནི་མ་མཐོང་བའི་རྣམ་པ་ཡང་དེ་དང་འདྲ་བར་དཔག་པར་ནུས་པ་ཡིན་གྱི། རྣམ་པ་ཐམས་ཅད་མ་མཐོང་བ་སྐྱུ་རུ་ར་དང་ས་ལ་སོགས་པ་དེ་དག་ནི་མ་མཐོང་བའི་རང་བཞིན་མཐོང་བ་དང་འདྲ་བར་རྗེས་སུ་དཔག་པར་མི་ནུས་སོ། །ཚིག་རྣམས་ནི་སྐྱེས་བུས་བྱས་པ་དང་མ་བྱས་པ་ཉིད་ཀྱིས་རྣམ་པ་གཉིས་སུ་མཐོང་བའི་ཕྱིར་མ་མཐོང་བའི་ཁྱད་པར་གང་ཡིན་པ་དེ་བརྟག་པར་ནུས་པ་མ་ཡིན་ནོ། །གལ་ཏེ་དེ་ལྟ་ན་རང་གི་སེམས་ཀྱི་རྒྱུད་མཐོང་བ་ལས་སེམས་ཀྱི་རྣམ་པ་ཐམས་ཅད་ཤེས་པར་འགྱུར་ཏེ། དེས་ན་ཇི་ལྟར་ད་ལྟར་རྟོགས་པའི་རང་བཞིན་དང༌། དབང་པོ་ལ་བརྟེན་པ་དང༌། རྟོག་པ་དང་བཅས་པ་དེ་ཐམས་ཅད་ནི་འདོད་ཆགས་ལ་སོགས་པའི་སྐྱེད་པའི་ནུས་པ་དང་འབྲེལ་པ་ཡིན་པ་དེ་བཞིན་དུ་མ་འོངས་པའི་གནས་སྐབས་སུ་ཡང་ཡིན་ལ། བདག་ཇི་ལྟ་བ་དེ་བཞིན་དུ་སེམས་དང་ལྡན་པ་གཞན་ཡང་ཡིན་ནོ། །འདིར་སེམས་དང་འབྲེལ་པའི་ཁྱད་པར་མ་མཐོང་བ་གང་ཡིན་པ་དེ་ནི་གཞན་དུ་ཡང་མི་སྲིད་དོ། །དེས་ན་གང་ལས་འདོད་ཆགས་དང་བྲལ་བ་དང་ཐམས་ཅད་མཁྱེན་བ་ལྡོག་པར་འགྱུར་ལ། །སེམས་ཉིད་དང་དབང་པོ་ལ་སོགས་པ་ལ་བརྟེན་པ་ཉིད་དང༌། ཚིག་ལ་སོགས་པའི་རྒྱུ་ཡིན་པ་ཉིད་ཀྱིས་སེམས་ཅན་ཐམས་ཅད་ཀྱི་ཚེ་འདོད་ཆགས་ལ་སོགས་པ་དང་ལྡན་པ་དང༌། དེས་པའི་དངོས་པོ་འཛིན་པ་ཉིད་དུ་ཅིའི་ཕྱིར་རྟོགས་པར་མི་བྱེད་ཅེ་ན་བཤད་པ། སྐྱེས་བུས་མ་བྱས་པ་ལས་གྱུར་པའི་
ཁྱད་པར་སྒྲུབ་པར་བྱེད་པའི་ཡན་ལག་མེད་པར་བརྗོད་ཀྱི། འདི་ལ་ནི་སྒྲུབ་པའི་ཡན་ལག་ཡོད་པ་ཡིན་ཏེ། དེས་ན་ཇི་ལྟར་དག་ལ་ཁྱད་པར་སྒྲུབ་པར་བྱེད་པའི་ཡན་ལག་མེད་པར་དེ་ལྟར་སྐྱེས་བུ་དག་ནི་ཁྱད་པར་སྒྲུབ་པར་བྱེད་པའི་ཡན་ལག་མེད་པ་མ་ཡིན་ནོ། །གང་གི་ཕྱིར་དེ་དག་ལ་བློ་ལ་བརྟེན་པའི་ཁྱད་པར་གྱི་སྐྱེད་པར་བྱེད་པའི་རྒྱུ་མི་སྲིད་པ་མ་ཡིན་ནོ། །འདི་ལ་གང་ཞིག་བློའི་གནས་སྐབས་ཀྱིས་ཁྱད་པར་བསྐྱེད་པར་བྱ་བའི་རྒྱུ་དེ་ཉིད་འདོད་ཆགས་དང་བྲལ་བ་ཐམས་ཅད་མཁྱེན་པའི་མཚན་ཉིད་ཀྱིས་ཁྱད་པར་སྒྲུབ་པར་བྱེད་པའི་ཡན་ལག་ཡིན་ནོ། །དེའི་ཕྱིར་བློའི་གནས་སྐབས་འདིར་ཁྱད་པར་གྱི་རྒྱུ་མཐོང་བ་ལས་སེམས་འདོད་ཆགས་དང་བྲལ་བ་ལ་སོགས་པའི་ཁྱད་པར་རྟོགས་པ་ཡིན་ནོ། །རྒྱུའི་ཁྱད་པར་མེད་པ་དེ་ཡང་ཇི་ལྟ་བུ་ཞིག་ཅེ་ན། བཤད་པ། རྒྱུའི་ཁྱད་པར་མེད་པ་གང་གིས་ཚིག་ལ་སོགས་པ་སྟེ། སོགས་བ་སྨོས་པས་ནི་དབང་པོ་ལ་བརྟེན་པ་ཉིད་དང༌། སེམས་ཉིད་ལ་སོགས་པ་གཟུང་ངོ༌། །ཕྱོགས་གཅིག་ཅུང་ཟད་ཙམ་གྱིས་ཆོས་མཐུན་པ་དེའི་ཕྱིར་འདོད་ཆགས་ལ་སོགས་པ་དང་ལྡན་པ་ཉིད་དང༌། ངེས་པའི་ཡུལ་ཅན་ཉིད་དམ། གཞན་གྱིས་ཀྱང་རུང་སྟེ། སྐྱེས་བུ་རྣམས་རྣམ་པ་ཐམས་ཅད་མཐུན་པར་དཔག་བར་འགྱུར་བ་སྟེ། གལ་ཏེ་རྒྱུའི་ཁྱད་པར་མི་སྲིད་ན་ནི་དེ་ལྟར་རྗེས་སུ་དཔག་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །རྒྱུའི་ཁྱད་པར་དེ་ནི་མེད་པ་མ་ཡིན་ནོ། །ཅིའི་ཕྱིར་ཞེ་ན་བཤད་པ། སེམས་ཀྱི་ཡོན་ཏན་ཐམས་ཅད་ལ་ཁྱད་པར་མཐོང་བའི་ཕྱིར་ཏེ་དམིགས་པའི་ཕྱིར་རོ། །ཆགས་པ་དང་ཤེས་རབ་ལ་སོགས་པ་རང་གི་ཡུལ་འཛིན་པ་ལ་དམན་ཞིང་དམན་པར་འཇུག་པ་ཡང་ཡོངས་སུ་གྱུར་ནས་དུས་ཀྱིས་གསལ་བར་འགྱུར་བ་ཡིན་ལ། གཟུང་བའི་རྣམ་པ་མི་གསལ་བ་ཡང་ཡིད་བརྟན་པར་གོམས་པས་གསལ་བར་མཐོང་བ་ཡིན་ནོ། །གལ་ཏེ་དེ་ལྟ་ན་ཡང་ཁྱད་པར་དེ་གང་ལས་ཡིན་ཞེས་ཁྱད་པར་གྱི་རྒྱུ་མི་ཤེས་པས་སོ། དེས་ན་འདོད་ཆགས་ལ་སོགས་པ་ཉིད་རྒྱུ་དང་བཅས་པར་འགྱུར་གྱི། སེམས་གཞན་ནི་མ་ཡིན་ནོ་ཞེས་དོགས་པ་ལ། བཤད་པ། ལེགས་པར་བྱ་བ་ནི་གོམས་པ་སྟེ། དེའི་བྱེ་བྲག་ལས་ཁྱད་པར་རྟོགས་པ་མཐོང་བའི་ཕྱིར་རོ། །གང་གི་ཕྱིར་ཡིད་ཀྱི་ཡོན་ཏན་ཐམས་ཅད་ལ་ཐུན་
མོང་དུ་ཡིད་ཀྱི་ཡོན་ཏན་གྱི་རྒྱུ་གོམས་པའི་ཁྱད་པར་མཐོང་བ་ཡིན་པ་དེའི་ཕྱིར་བདག་མེད་པར་ཤེས་པའི་མཚན་ཉིད་དང༌། དོན་ཐམས་ཅད་འཛིན་པའི་ཕྱིར་ཤེས་པ་གཞན་ལ་ཡང་གོམས་པ་སྔོན་དུ་འགྲོ་བ་ཅན་གྱི་ཁྱད་པར་སྲིད་བའི་ཕྱིར་རོ། །ཡིད་ཀྱི་ཡོན་ཏན་ཐམས་ཅད་ཀྱི་བྱེ་བྲག་གིས་རྒྱུ་ཤེས་པ་ཡིན་ནོ། །གོམས་པའི་དབང་གིས་དེ་གསལ་བར་སྣང་བའི་བདག་མེད་པའི་རྣམ་པ་དང༌། དོན་ཐམས་ཅད་འཛིན་པར་བྱེད་པའི་ཕྱིར་རྣམ་པར་རྟོག་པ་དེ་ཉིད་འདོད་ཆགས་དང་བྲལ་བ་དང་ཐམས་ཅད་མཁྱེན་པའི་གཞི་ཡིན་ནོ། །དེའི་ཕྱིར་འདོད་ཆགས་དང་བྲལ་བ་དང་ཐམས་ཅད་མཁྱེན་པ་མི་སྲིད་པ་ཉིད་ནི་རྣམ་པ་གསུམ་གྱིས་འགྱུར་ཏེ། གལ་ཏེ་བདག་མེད་པའི་རྣམ་བ་ཅན་དང་དངོས་པོ་ཐམས་ཅད་ལ་རྣམ་པར་རྟོག་པ་མི་སྲིད་པ་འམ། སྲིད་པར་གྱུར་ཀྱང་ཡིད་ཀྱི་ཡོན་ཏན་རྣམས་གལ་ཏེ་ཁྱད་པར་དུ་མི་འགྱུར་རམ། ཁྱད་པར་ཡོད་ཀྱང་གལ་ཏེ་ཁྱད་པར་གྱི་རྒྱུ་མི་ཤེས་པར་འགྱུར་ནའོ། །འདི་ལྟར་སྔར་བཤད་པའི་ཚུལ་གྱིས་རྣམ་པར་རྟོག་པར་སྲིད་པ་དང༌། གོམས་པ་ཁྱད་པར་གྱི་རྒྱུ་ཡིན་པར་ཡང་ཤེས་པ་ཡིན་ཏེ། དེའི་ཕྱིར་ཇི་ལྟར་མ་ཚང་བ་དང་གགས་བྱེད་པ་མེད་ནས་ལ་སོགས་པའི་ཚོགས་པ་མྱུ་གུ་སྐྱེད་བར་ནུས་པ་ཡིན་ནོ་ཞེས་ནུས་པ་རྗེས་སུ་དཔོག་པ་དེ་བཞིན་དུ་གེགས་བྱེད་པ་དང་མ་ཚང་བ་མེད་ན་ཡུན་རིང་དུ་བར་ཆད་མེད་པར་གོམས་པའི་དབང་གིས་རྣམ་པར་རྟོག་པ་དེ་དང་བདག་མེད་པའི་རྣམ་པ་ཅན་གྱིས་ཤེས་པ་དེ་གསལ་བར་སྣང་བ་ཉིད་དོ། །དེ་སྲིད་པའི་ཕྱིར་འདོད་ཆགས་དང་བྲལ་བ་དང་ཐམས་ཅད་མཁྱེན་བ་དག་སྲིད་པ་རྗེས་སུ་དཔོག་གོ །དེའི་ཕྱིར་མཐོང་བའི་སེམས་ལ་ནི་འདོད་ཆགས་དང་བྲལ་བ་ལ་སོགས་པའི་མཚན་གྱི་ཁྱད་པར་ཤེས་པར་བྱེད་པ་ཡོད་པ་མ་ཡིན་ནོ་ཞེས་གང་བརྗོད་པ་དེ་རིགས་པ་མ་ཡིན་ཏེ། གོམས་པས་བསྒྲུབ་པའི་འདུ་བྱེད་མ་མཐོང་བ་ཉིད་ནི་འདོད་ཆགས་དང་བྲལ་བ་རྗེས་སུ་དཔག་པའི་གཏན་ཚིགས་དང་ལྡན་པར་མཐོང་བ་ཡིན་ནོ། །སྐྱེས་བུས་མ་བྱས་པའི་ཚིག་ནི་སྐྱེས་བུས་མ་བྱས་པ་ཉིད་དུ་དཔོག་པའི་གཏན་ཚིགས་དང་ལྡན་པར་མཐོང་བ་མ་ཡིན་ནོ། །འདི་ནི་རེ་ཞིག་ཁོ་བོ་ཅག་གིས་སྲིད་པར་རྗེས་སུ་དཔག་པ་ཡིན་ནོ། །མི་སྲིད་པར་རྗེས་སུ་དཔག་པར་བྱ་
བ་ལ་ནི་ཆོས་དེ་གནོད་པར་བྱེད་པའི་གཏན་ཚིགས་འགའ་ཡང་ཁྱེད་ལ་མེད་དེ། དེ་མེད་པའི་ཕྱིར་སྐྱེས་བུ་དག་ལ་རྒྱུའི་ཁྱད་པར་མེད་པ་མ་ཡིན་ནོ་ཞེས་འབྲེལ་ཏོ། །གནོད་པར་བྱེད་པའི་གཏན་ཚིགས་མེད་པ་ཡང་ཇི་ལྟར་ཞེ་ན་འདོད་ཆགས་དང་བྲལ་བ་མ་མཐོང་བའི་ཕྱིར་རོ། །འདི་ནི་མཚོན་པ་སྟེ་ཐམས་ཅད་མཁྱེན་པ་ཡང་མ་མཐོང་བའི་ཕྱིར་རོ། །གལ་ཏེ་འདོད་ཆགས་དང་བྲལ་བ་དང་ཐམས་ཅད་མཁྱེན་པ་མཐོང་མོད། དེ་ལྟ་ན་ཡང་དེའི་གནོད་པར་བྱེད་པའི་གཏན་ཚིགས་མེད་པར་ཇི་ལྟར་འགྱུར་ཞེ་ན་བཤད་པ། འདོད་ཆགས་དང་བྲལ་བ་དང་ཐམས་ཅད་མཁྱེན་པ་མ་མཐོང་བ་དང་ནི་འགའ་ཞིག་ལྷན་ཅིག་འགལ་བ་མི་འགྲུབ་ལ། འགལ་བ་མ་གྲུབ་ན་གནོད་པར་བྱ་བ་དང་གནོད་པར་བྱེད་པའི་དངོས་པོ་མི་འགྲུབ་པ་དེའི་ཕྱིར་གནོད་པར་བྱེད་པའི་གཏན་ཚིགས་མེད་དོ། །གལ་ཏེ་དངོས་པོ་ཉིད་དང་མི་རྟག་པ་ཉིད་དངོས་པོ་མེད་པ་ཉིད་དང་རྟག་པ་ཉིད་མ་མཐོང་བ་དང་ཕན་ཚུན་སྤངས་ཏེ་གནས་པའི་མཚན་ཉིད་ཀྱི་འགལ་བ་གྲུབ་པ་དེ་བཞིན་དུ། ཐམས་ཅད་མཁྱེན་པ་དང་ཐམས་ཅད་མཁྱེན་པ་མ་ཡིན་པའི་ཡང་མ་ཡིན་ནམ། དེ་སྟེ་འདོད་ཆགས་དང་བཅས་པ་ཉིད་དང༌། ཐམས་ཅད་མཁྱེན་པ་མ་ཡིན་པ་ཉིད་དུས་གཞན་གྱི་ཚེ་རང་གི་རྒྱུད་ལ་འགྱུར་བར་ཐེ་ཚོམ་ཟ་སྟེ། དེས་ན་ཐེ་ཚོམ་གྱི་ཚུལ་གྱིས་གནོད་པར་བྱེད་པ། གྲུབ་པ་དེས་ཀྱང་ཐམས་ཅད་མཁྱེན་པ་ཉིད་དང༌། འདོད་ཆགས་དང་བྲལ་བ་ཉིད་དགག་པར་མི་ནུས་པ་ཡིན་ན་ནི། གལ་ཏེ་དེ་ལྟ་ན་ནི་འོ་ན་མཐོང་བའི་ཕྱིར་ལ། མ་མཐོང་བ་ལ་ཡང་གནོད་པར་བྱ་བ་དང་གནོད་པར་བྱེད་པ་མི་འགྲུབ་པའི་ཕྱིར་རོ་ཞེས་སྨྲས་པ་དེ་མི་རིགས་སོ་ཞེ་ན། བསམ་པ་འདི་ཡིན་ཏེ་ཕན་ཚུན་སྤངས་ཏེ་གནས་པའི་མཚན་ཉིད་ཀྱིས་འགལ་བའི་ཕྱིར། དངོས་པོ་དང་དངོས་པོ་མེད་པ་བཞིན་དུ་ཆགས་པ་དང་ཆགས་པ་མེད་པའི་སེམས་དག་ནི་གཅིག་པ་མ་ཡིན་ལ། ལྷན་ཅིག་གནས་པ་ཡང་མ་ཡིན་ཏེ། མཚུངས་པ་དེ་མ་ཐག་པའི་རྐྱེན་གཅིག་ལས་ཅིག་ཅར་མི་སྐྱེ་བའི་ཕྱིར་རོ། །མི་སྐྱེ་བ་ཡང་འགལ་བ་དག་ཉེ་བར་ལེན་པ་གཅིག་པ་ཉིད་དུ་འགལ་བའི་ཕྱིར་རོ་ཞེས་བྱ་བ་འདི་ཁོ་བོ་ཅག་གི་འདོད་པ་ཁོ་ནའོ། །འདོད་ཆགས་དང་འདོད་ཆགས་དང་བྲལ་
པའི་སེམས་ཅིག་ཅར་ཡོད་པ་འམ་ཐ་མི་དད་པར་ནི་ཁོ་བོ་ཅག་ལས་མི་ལེན་ནོ། །དེའི་ཕྱིར་འདིར་འགལ་བ་ཙམ་དུ་ནི་སྐབས་ཀྱང་ཅི་ཡང་མི་ཕན་ནོ། །འདི་ལྟར་བསྒྲུབ་པར་བྱ་བ་ཡིན་ཏེ། གཞན་གྱི་རྒྱུད་གང་ལ་འདོད་ཆགས་དང་ཐམས་ཅད་མཁྱེན་པ་མ་ཡིན་པ་ཉིད་མཐོང་བ་རྒྱུ་དེ་ལ་འདོད་ཆགས་དང་བྲལ་བ་དང༌། ཐམས་ཅད་མཁྱེན་པ་ཉིད་འགྱུར་བ་མ་ཡིན་ནོ་ཞེས་སོ། །འདི་ཡང་ཇི་ལྟར་བསྟན་པར་ནུས་ཤེ་ན། ཇི་ལྟར་ཐམས་ཅད་མཁྱེན་པ་དང་ཐམས་ཅད་མཁྱེན་པ་མ་ཡིན་པ་དག་ཕན་ཚུན་སྤངས་ཏེ་གནས་པའི་མཚན་ཉིད་ཡིན་པ་དེ་བཞིན་དུ་གལ་ཏེ་དེའི་རྒྱུ་དང་རྒྱུ་དག་ཀྱང་ཕན་ཚུན་སྤངས་པ་ཉིད་དུ་མཐོང་ནའོ། །རྒྱུ་དང་འགལ་བར་མཐོང་བ་ཡང་མ་ཡིན་ཏེ། འདོད་ཆགས་དང་བྲལ་བ་ལ་སོགས་པ་མི་མཐོང་བའི་ཕྱིར་རོ། །ཡོད་པ་དང་མེད་པ་རྗེས་སུ་བྱེད་པའི་སྒོ་ནས་མཐོང་བའི་རྒྱུ་དེས་ན། དེ་ལས་གཞན་ཐམས་ཅད་ནི་རྒྱུ་མ་ཡིན་པར་ངེས་པར་འགྱུར་ལ། དེའི་རྒྱུ་ཡིན་པ་དང་མ་ཡིན་པ་ཡང་རྒྱུ་འགལ་བར་ངེས་པ་ཡིན་ནོ། །འདོད་ཆགས་དང་བྲལ་བ་ལ་སོགས་པ་མ་མཐོང་ན་ནི་དེའི་རྒྱུ་དང་རྒྱུ་མ་ཡིན་པ་མ་ངེས་པའི་ཕྱིར་རྒྱུ་དང་འགལ་བར་ངེས་པར་ནུས་པ་མ་ཡིན་ནོ། །དེའི་ཕྱིར་གང་གིས་རང་གི་ཤེས་པའི་རྒྱུད་ལ་ཐམས་ཅད་མཁྱེན་པ་ལ་སོགས་པ་ཐམས་ཅད་མཁྱེན་པ་མ་ཡིན་པ་ལ་སོགས་པས་གནོད་པར་འགྱུར་པ། འདོད་ཆགས་དང་བྲལ་བ་ལ་སོགས་པ་མི་སྣང་བ་དང༌། རྒྱུའི་སྒོ་ནས་ཐམས་ཅད་མཁྱེན་པ་མ་ཡིན་པ་ལ་སོགས་པ་འགའ་ཞིག་ཀྱང་གནོད་པར་བྱ་བ་དང་གནོད་པར་བྱེད་པ་གྲུབ་བ་མེད་དོ། །དེ་དང་འགལ་བ་སྐྱེད་པར་ནུས་པ་མཐོང་བའི་རྒྱུད་ལ་དེའི་རྒྱུ་མེད་པར་འགྱུར་ན། དེ་ནི་མ་གྲུབ་སྟེ། འདོད་ཆགས་དང་བྲལ་བ་མ་གྲུབ་པའི་ཕྱིར་རོ། །དེའི་ཕྱིར་ཐམས་ཅད་མཁྱེན་པ་མ་ཡིན་པ་དང་ལྡན་པའི་རྒྱུད་འདི་ཐམས་ཅད་མཁྱེན་པ་སྲིད་པ་མ་ཡིན་ནོ་ཞེས་གང་བརྗོད་པ་དེ་མི་རིགས་སོ། །གལ་ཏེ་ཕན་ཚུན་སྤངས་ཏེ་གནས་པ་གང་ཡིན་པ་དེ་དག་ཉེ་བར་ལེན་པ་གཅིག་ལས་སྐྱེས་པར་མི་རིགས་པ་ཡིན་ཏེ། སྔོན་པོ་དང་སྔོན་པོ་མ་ཡིན་པ་བཞིན་ནོ། །དེས་ན་རྣམ་པར་ཤེས་པའི་རྒྱུད་གཅིག་ལས་ཐམས་ཅད་མཁྱེན་པ་མ་ཡིན་པ་དག་ཇི་ལྟར་འབྱུང་བར་འདོད་ཅེ་ན་སྨྲས་པ། གལ་ཏེ་རྣམ་
པར་ཤེས་པའི་སྐད་ཅིག་གཅིག་ལས་ཐམས་ཅད་མཁྱེན་པ་དང༌། ཐམས་ཅད་མཁྱེན་པ་མ་ཡིན་པ་དག་སྐྱེ་བར་ཁོ་བོ་ཅག་ལ་རྒོལ་ཞིང་རྟོག་བར་བྱེད་ན་ནི་མ་ཡིན་ནོ་ཞེས་བརྗོད་དོ། །རིམ་གྱིས་དེ་དག་སྐྱེ་བ་ལ་ནི་རྒྱུད་ཐ་དད་བ་ཁོ་ནའོ། །གལ་ཏེ་གྲང་བ་སྐྱེད་པར་བྱེད་བའི་རྒྱུན་ལས་དྲོ་བའི་རེག་པ་མི་འབྱུང་བ་མ་ཡིན་ནམ་ཞེ་ན། གལ་ཏེ་ལ་ལར་མཐོང་དུ་ཟད་མོད། དེས་ཅིར་འགྱུར། རྣམ་པར་ཤེས་པ་ནི་དོན་དམ་པར་ན་དོན་འཛིན་པའི་རང་བཞིན་ནོ་ཞེས་རྣམ་འགྲེལ་དང༌། འདིར་ཡང་ལེའུ་དང་པོར་བསྒྲུབས་ཟིན་ཏོ། །རྒྱུ་དག་གཅིག་ལ་སྔར་མུ་སྟེགས་པའི་བདག་གི་རྣམ་པར་རྟོག་པ་དང༌། ཕྱིས་བདེ་བར་གཤེགས་པའི་ལུགས་ཀྱི་རྗེས་སུ་འབྲངས་པ་བདག་མེད་པའི་རྣམ་པར་རྟོག་པ་མཐོང་བ་ཡིན་ནོ། །རྣམ་པར་རྟོག་པ་ཁྱད་པར་དུ་འགྱུར་བའི་གནས་སྐབས་སྲིད་པ་ཡང་བཤད་མ་ཐག་པ་ཡིན་ནོ། །དེའི་ཕྱིར་རྒྱུ་དག་གཅིག་ལ་འགལ་བ་འབྱུང་བ་ནི་མི་འགལ་ལོ། །འདི་ལྟར་བདེ་བ་དང་སྡུག་བསྔལ་འགལ་བ་དག་རྒྱུ་དག་ཅིག་ཅར་མི་སྐྱེ་ཡང་རིགས་ཀྱིས་སྐྱེ་བ་མཐོང་བ་དང༌། དེ་བཞིན་དུ་ས་བོན་གྱི་རྒྱུད་གཅིག་ཉིད་ལས་ཕན་ཚུན་དབེན་པ་ཉིད་ཡིན་ཡང་མྱུ་གུའི་རང་བཞིན་དང་ས་བོན་གྱི་རང་བཞིན་སྐྱེ་བ་ཡིན་ནོ། །འདི་སྙམ་དུ་ས་བོན་གྱི་རྒྱུན་ལ་ནི་ལྷན་ཅིག་བྱེད་པ་ཐ་དད་པ་ལས། རང་བཞིན་གྱི་ཁྱད་པར་འབྱུང་བ་ཡིན་གྱི་རྒྱུད་ཙམ་ལས་ནི་མ་ཡིན་ནོ་སྙམ་ན་བདེན་ཏེ། འདི་ལ་ཡང་ལྷན་ཅིག་བྱེད་པ་ལུས་དང་ངག་གི་ལས་ཀྱིས་མཚན་ཉིད་ཅན། བསོད་ནམས་དང་གོམས་པ་ལས་འགལ་བའི་རང་བཞིན་འབྱུང་བར་འགྱུར་རོ། །དབང་པོ་ལས་བྱུང་བའི་བདེ་བ་དང་སྡུག་བསྔལ་ནི་བདེ་བ་ལ་སོགས་པའི་བག་ཆགས་སྨིན་པར་བྱེད་པའི་ཡུལ་ལས་སྐྱེ་ལ། ཡིད་ཀྱིས་ནི་འབད་རྩོལ་ལ་སོགས་པ་ལས་ཡིན་གྱི་རྒྱུན་ཙམ་ལས་ནི་མ་ཡིན་ནོ། །དེའི་ཕྱིར་སྐད་ཅིག་གཅིག་ལ་འགལ་གྱི་རིམ་གྱིས་ནི་ལྷན་ཅིག་བྱེད་པ་ལ་ལྟོས་པ་དེ་ཉིད་ལས་འགལ་བ་སྐྱེ་བའི་ཕྱིར་མི་འགལ་ལོ། །དེ་ལྟར་རྒྱུ་ལ་བརྟེན་པའི་འགལ་བ་མེད་པའི་ཕྱིར་རེ་ཞིག་རང་གི་རྒྱུད་ལ་འདོད་ཆགས་དང་བྲལ་བ་དང༌། ཐམས་ཅད་མཁྱེན་པ་མ་མཐོང་བས་དུས་གཞན་དུ་ཡང་མི་འགྱུར་རོ་ཞེས་བརྗོད་པར་ནི་མི་ནུས་སོ། །དེ་བཞིན་དུ་གཞན་གྱི་རྒྱུད་ལ་ཡང་ཐམས་ཅད་མཁྱེན་པ་དང་འདོད་ཆགས་དང་བྲལ་བ་དང་ད་ལྟར་ཉིད་ཀྱང་དགག་པར་
མི་ནུས་སོ་ཞེས་བཤད་པ་ནི། འདོད་ཆགས་ལ་སོགས་པ་རྣམས་ཀྱི་འབྲས་བུ་འཁྲུལ་པ་མེད་པ་ཅན་གང་ཡིན་པ་དེ་མ་མཐོང་བའི་ཕྱིར་རོ། །གལ་ཏེ་འདོད་ཆགས་ལ་སོགས་པ་འཁྲུལ་པ་མེད་པ་ཅན་གྱི་འབྲས་བུ་ཡོད་ན་ནི། དེ་མ་མཐོང་བ་ལས་གཞན་གྱི་རྒྱུད་ལ་འདོད་ཆགས་ལ་སོགས་པ་རྗེས་སུ་དཔག་པས་འདོད་ཆགས་དང་བྲལ་བ་ལ་གནོད་པ་ཡིན་ནོ། །འདོད་ཆགས་ལ་སོགས་པ་རྗེས་སུ་དཔག་པ་ལ་འབྲས་བུ་མེད་པའི་ཕྱིར་ཇི་ལྟར་འདོད་ཆགས་དང་བྲལ་བ་ལྡོག་པར་བྱེད། འདི་སྙམ་དུ་གལ་ཏེ་དེ་ལ་འདོད་ཆགས་དང་བྲལ་བའི་མཚན་ཉིད་ཀྱི་ཁྱད་པར་ཡོད་ན་ཁོ་བོ་ཅག་གིས་ཇི་ལྟར་མ་དམིགས་ཤེ་ན་བཤད་པ། རྒྱུད་གཞན་ལ་འདོད་ཆགས་དང་བྲལ་བ་ལ་སོགས་པའི་མཚན་ཉིད་ཀྱི་ཁྱད་པར་དེ་རྣམས་ནི་སྲིད་ཀྱང་བལྟར་མི་རུང་བའི་ཕྱིར་རོ། །དོན་ནི་འདི་ཡིན་ཏེ། འདོད་ཆགས་དང་བྲལ་བའི་མཚན་ཉིད་ཀྱིས་ཁྱད་པར་ནི་འགལ་བའི་འབྲས་བུ་མཐོང་བས་མི་སྲིད་པར་རྗེས་སུ་དཔག་པར་མི་ནུས་ལ། རང་གི་ངོ་བོ་མ་མཐོང་བས་མེད་པར་དཔག་པར་ཡང་མ་ཡིན་ནོ། །རྣམ་པ་དེ་ལྟ་བུའི་མི་དམིགས་པ་ནི་སྤང་བར་རིགས་པ་མ་ཡིན་ནོ་ཞེས་བཤད་པ་ནི། དེ་ལྟ་བུ་དག་ནི་སྤང་བར་འོས་པ་ཡང་མ་ཡིན་ནོ། །དེས་ན་གཞན་གྱི་རྒྱུད་ལས་ཡོད་པའི་ཁྱད་པར་དག་ནི་འགལ་བར་རྗེས་སུ་དཔག་པ་མེད་པའི་ཕྱིར་འགལ་བ་དམིགས་པས་ལྡོག་པ་མ་ཡིན་ལ། རང་གི་རང་བཞིན་མ་དམིགས་པས་ཀྱང་མ་ཡིན་ནོ། །རང་གི་རྒྱུད་ལ་ཡང་མ་འོངས་པའི་དུས་སུ་མི་སྲིད་པར་ཕ་རོལ་པོས་རྗེས་སུ་དཔག་པར་ནུས་པ་མ་ཡིན་ནོ། །སྲིད་པའི་དུས་སུ་དཔག་པ་ནི་སྔར་བཤད་ཟིན་ཏོ། །དས་ན་སྐྱེས་བུ་དག་ནི་རྒྱུའི་ཁྱད་པར་མེད་པ་ཅན་མ་ཡིན་ནོ། །གལ་ཏེ་འདི་སྙམ་དུ་སྐྱེས་བུའི་ཁྱད་པར་མཐོང་བ་ཉིད་ཡིན་ཡང་སྤང་བར་འོས་པ་མ་ཡིན་པ་དེ་བཞིན་དུ་ངག་ཀྱང་ཡིན་ནོ་སྙམ་ན་བཤད་པ། ཚིག་རྣམས་ནི་དེ་ལྟ་བུ་མ་ཡིན་ནོ། །གང་གི་ཕྱིར་སྐྱེས་བུ་རྣམས་ལ་ནི་ཁྱད་པར་ཡོད་ཀྱང་བལྟར་མི་རུང་བ་དེའི་ཕྱིར་སྤང་བར་མི་འོས་པ་ཡིན་ནོ། །གལ་ཏེ་དག་ཀྱང་ཁྱད་པར་བལྟར་མི་རུང་བ་ཡིན་ན་ནི་ཁྱད་པར་སྤང་བར་འོས་པ་མ་ཡིན་པར་འགྱུར་བ་ཞིག་ན། ཁྱད་པར་བལྟར་རུང་བའི་ཕྱིར་དག་རྣམས་ཀྱི་ཁྱད་པར་མ་མཐོང་བ་ནི་སྤང་བར་བྱ་བ་ཡིན་ནོ། །གལ་ཏེ་ཇི་ལྟར་ས་ལ་སོགས་པ་ཐམས་ཅད་མཐོང་བ་མ་ཡིན་པ་དེ་བཞིན་དུ་ཚིག་དག་ཀྱང་
ཐམས་ཅད་ནི་མཐོང་བ་མ་ཡིན་ནོ་ཞེ་ན། བལྟར་མི་རུང་བ་ཉིད་གཅིག་ཡིན་ན་ཡང་ཞེས་སྨོས་སོ། །གལ་ཏེ་ངག་འགའ་ཞིག་གི་མ་མཐོང་བ་དེ་ལྟར་ན་ཡང་ཁྱད་པར་མ་མཐོང་བ་ཅན་གང་ཡིན་པ་དེ་རྣམས་རིགས་མི་མཐུན་པ་ཉིད་ཁས་ལེན་པ་འགལ་བ་ཡིན་ནོ། །འདི་སྐད་བརྗོད་པ་ཡིན་ཏེ། གལ་ཏེ་ཚིག་ཐམས་ཅད་མཐོང་བ་མ་ཡིན་པ་དེ་ལྟ་ན་ཡང་སྐྱེས་བུས་མ་བྱས་པ་ཉུང་ཟད་ཅིག་ནི་མཐོང་བ་ཡིན་ནོ། །དེ་དག་ཀྱང་སྐྱེས་བུས་བྱས་པ་ལས་ཁྱད་པར་ནི་འགའ་ཡང་མ་མཐོང་སྟེ། དེས་ན་གང་གི་ཕྱིར་ངག་ཉུང་ཟད་མཐོང་བ་དག་ལ་སྐྱེས་བུས་མ་བྱས་པ་ཉིད་ཀྱང་རྣམ་པར་མ་མཐོང་བའི་ཕྱིར། སྐྱེས་བུས་མ་བྱས་པའི་རྒྱུ་མཚན་ཅན་གྱི་ཁྱད་པར་དེ་ནི་མ་མཐོང་བའི་ངག་རྣམས་ལ་ཡང་ཁས་བླང་བར་མི་ནུས་ཏེ། དེ་ཙམ་གྱི་རྒྱུ་མཚན་ཅན་ནི་གཅིག་ལ་མེད་ན་ཐམས་ཅད་དུ་ཡང་ཁྱད་པར་མེད་པའི་ཕྱིར་རོ། །དེས་ན་འགལ་བའི་ཕྱིར་སྐྱེས་བུས་བྱས་པ་དང་མ་བྱས་པ་མཐོང་བའི་ངག་ལ་བལྟར་རུང་བ་མ་མཐོང་པའི་ཁྱད་པར་གང་ཡིན་པ་དེ་ནི་ཐམས་ཅད་དུ་སྤང་བར་བྱ་བ་ཡིན་ནོ། །མཐོང་བ་ཉུང་ཟད་པོ་ལ་ཇི་ལྟར་ཁྱད་པར་མེད་ཅེ་ན་བཤད་པ། དེའི་ཁྱད་པར་རྣམས་ཏེ་བཟླ་དཀའ་བ་ལ་སོགས་པ་སྐྱེས་བུས་མ་བྱས་པའི་ཁྱད་པར་རྣམས་ནི་གཞན་སྐྱེས་བུས་བྱས་པའི་ངག་ལ་ཡང་བྱ་བར་ནུས་པའི་ཕྱིར་རོ། །གལ་ཏེ་དངོས་པོ་ཐ་དད་པར་མཐོང་ཡང་འཁྲུལ་བས་ཐ་མི་དད་པར་རྟོགས་པ་དེ་བཞིན་དུ་སྐྱེས་བུས་བྱས་པ་དང་མ་བྱས་པའི་ངག་དག་ལ་ཐ་མི་དད་པར་མོད་ཀྱང་འཁྲུལ་པས་རྟོགས་པ་ཡིན་ནོ་ཞེ་ན། འཁྲུལ་པ་མི་འགྲུབ་པའི་ཕྱིར་ཞེས་སྨོས་ཏེ། འཁྲུལ་པ་མ་འགྲུབ་པའི་ཕྱིར་ན་སྐྱེས་བུས་བྱས་པ་དང་མ་བྱས་པ་དག་ལ་ཁྱད་པར་སྲིད་པ་མེད་པ་མ་ཡིན་ནོ། །ཡང་ཇི་ལྟར་འདི་ལ་འཁྲུལ་པ་མ་གྲུབ་ཅེ་ན། གནོད་པར་བྱེད་པ་མེད་པས་ཞེས་སྨོས་སོ། །སྐྱེས་བུས་བྱས་པ་དང་སྐྱེས་བུས་མ་བྱས་པ་ཐ་དད་པ་མེད་པ་ནི་མངོན་སུམ་གྱིས་གྲུབ་པ་ཡིན་ན། གནོད་པར་བྱེད་པའི་ཚད་མ་མེད་པར་ཡང་གྲུབ་པ་དེ་སྤང་བར་ཇི་ལྟར་ནུས་ཉམས་སུ་མྱོང་བ་ཚད་མ་ཡིན་ནོ་ཞེ་ན། འོ་ན་ཚད་མ་གང་ཡིན་གཞན་དག་ཀྱང་བསྟན་པའི་དོན་ཐོབ་པར་བྱེད་པས་ཚད་མ་ཡིན་ལ། ཉམས་སུ་མྱོང་བ་ཡང་བསྟན་པའི་དོན་ཐོབ་པར་བྱེད་པ་ཡིན་ནོ། །གང་ལ་གནོད་པ་བྱེད་པ་མེད་པ་དེ་ཇི་ལྟར་ཚད་མ་ཡིན་ཏེ་གནོད་པ་ཡོད་ན་
ནི་མྱོང་བ་འཁྲུལ་པར་འགྱུར་བ་ཡིན་ནོ། །ཤེས་པའི་དོན་མེད་པ་ཉིད་ནི་རང་དགའ་མ་ཡིན་གྱི། འོན་ཀྱང་ཚད་མས་ཡིན་ནོ། །དེ་ཉིད་ཀྱི་ཕྱིར་རྣམ་འགྲེལ་ལས། གནོད་བྱེད་ཀྱི་རིགས་པ་དམ་པ་མེད་པར་ཉམས་སུ་མྱོང་བས་གྲུབ་པའི་བློ་ཅིག་ཅར་དུ་འབྱུང་བ་ཡང་སྤངས་པར་མི་ནུས་སོ་ཞེས་བཤད་དོ། །དེ་ལྟ་མ་ཡིན་ན་གང་མཐོང་བ་དེ་ཐམས་ཅད་སྤང་བར་བྱ་བར་འགྱུར་རོ། །དེའི་ཕྱིར་ཉམས་སུ་མྱོང་བས་གྲུབ་པའི་དོན་ནི་གནོད་པར་བྱེད་པའི་ཚད་མས་དགག་པར་བྱ་བ་ཡིན་ཏེ། དཔེར་ན་རབ་རིབ་ཅན་གྱིས་སྐྲ་ཤད་ཀྱི་ཚོགས་ཤེས་པ་གནོད་པར་བྱེད་པས་བཟློག་པ་དང༌། མངོན་སུམ་གྱིས་རྟོགས་པར་རློམས་པའི་སྐད་ཅིག་མ་མ་ཡིན་པ་ཉིད་ཀྱང་རབ་རིབ་ཅན་གྱིས་མཐོང་བའི་སྐྲ་ཤད་བཞིན་དུ་རིམ་དང་ཅིག་ཅར་མི་འཐད་པའི་མཚན་གྱི་གནོད་པར་བྱེད་པའི་ཚད་མས་ཟློག་པར་བྱེད་པ་ལྟ་བུའོ། །དེ་བཞིན་དུ་ལི་དོང་གྲ་དང་དུག་གཉིས་ཐ་དད་པ་མེད་པར་རྟོགས་པ་ཡང་གནོད་པར་བྱེད་པ་ཉིད་ཀྱིས་བཟློག་པར་བྱ་བ་ཡིན་ནོ། །དེ་ལྟ་ན་ནི་འོ་ན་བདག་ཉིད་བཞིན་དུ་གཞན་ཡང་འདོད་ཆགས་ལ་སོགས་པ་དང་ལྡན་པར་མཐོང་བ་ཉིད་ཀྱིས་ངེས་པ་དེས་ན་གནོད་པར་བྱེད་པ་མེད་པར་དེ་འཁྲུལ་པ་ཇི་ལྟར་པའི་ཕྱིར་རོ། །གཏན་ཚིགས་དེས་ན་འཁྲུ་རྒྱུ་མཚན་ཡོད་པའི་ཕྱིར་རོ། །དེ་ལ་ནི་རེ་ཞིག་མངོན་སུམ་དུ་གྱུར་པའི་ལུས་འདྲ་བས་མངོན་སུམ་མ་ཡིན་པའི་སེམས་ཀྱང་འདྲ་བར་རྟོགས་པར་བྱེད་པར་ཟད་དོ། །དེ་ལྟ་ན་འོ་ན་འདིར་ཡང་མངོན་སུམ་དུ་གྱུར་པ་འདྲ་བར་མཐོང་ནས། མངོན་སུམ་དུ་མ་གྱུར་པ་འདྲ་བར་རྟོགས་པར་བྱེད་པ་ཡིན་ནོ་ཞེ་ན། སྒྲ་མངོན་སུམ་པ་རྣམས་ལ་ཞེས་བྱ་བ་ལ་སོགས་པ་སྨོས་སོ། །འདི་སྐད་བཤད་པ་ཡིན་ཏེ། མངོན་སུམ་མ་ཡིན་པའི་ངོ་བོ་ནི་འཁྲུལ་པའི་རྒྱུ་མཚན་ཡིན་ན་དེ་དག་འདི་ལ་མེད་དོ། །དེ་མེད་པའི་ཕྱིར་འཁྲུལ་པའི་རྒྱུ་མཚན་མེད་པ་ཡིན་ཏེ། དེའི་ཕྱིར་ཡང་མངོན་སུམ་གྱིས་རང་བཞིན་ལ་གནོད་པར་བྱེད་པ་མེད་ན། ཇི་ལྟར་ཉམས་སུ་མྱོང་བ་བཞིན་དུ་ཐ་སྙད་འཇུག་པར་བྱ་བས་འདི་ལ་ཡང་དེའི་རང་བཞིན་ཅན་དུ་ཁས་བླང་བར་བྱ་བ་ཡིན་ཏེ། གནོད་པར་བྱེད་པ་མེད་པའི་ཕྱིར་རོ། །གལ་ཏེ་མངོན་སུམ་མ་ཡིན་པ་གཞན་གྱི་སེམས་ལ་འཁྲུལ་པ་ཡིན་གྱི། རང་གི་རྒྱུད་ལ་བརྟེན་པའི་ཤེས་པ་ནི་འདོད་ཆགས་ལ་སོགས་པ་དང་ལྡན་པར་མཐོང་ཞིང་ངེས་པ་ཡིན་
ནོ། །རང་གི་སེམས་ཀྱི་ཁྱད་པར་ལ་ནི་འཁྲུལ་པའི་རྒྱུ་མངོན་སུམ་མ་ཡིན་པའི་རང་བཞིན་ཡོད་པ་མ་ཡིན་ལ། གནོད་པར་བྱེད་པའི་ཤེས་པ་ཡང་མེད་པའི་ཕྱིར་འདོད་ཆགས་དང་བྲལ་བ་སྲིད་པར་ཅི་ལྟར་རྗེས་སུ་དཔག་ཅེ་ན་བཤད་པ། སྐྱེས་བུ་དག་ལ་ནི་ཤེས་རབ་ལ་སོགས་པ་གནས་པའི་ཁྱད་པར་ཕུལ་དུ་བྱུང་བ་གོམས་པ་སྔོན་དུ་འགྲོ་བ་ཅན་མཐོང་བ་དེ་ཉིད་གནོད་པར་བྱེད་པ་ཡིན་ནོ། །གལ་ཏེ་གོམས་པ་ལ་ལྟོས་ནས་ཁྱད་པར་དུ་མི་འགྱུར་ན་ནི་སྐྱེས་བུའི་སེམས་འདོད་ཆགས་དང་བྲལ་བ་མི་སྲིད་པར་འགྱུར་བ་ཞིག་ན་འགྱུར་བ་ཡང་ཡིན་ཏེ། དེས་ན་བདག་མེད་པ་ནི་རྣམ་པར་རྟོག་པ་དང༌། མཐའ་དག་ལ་དམིགས་པའི་རྣམ་པར་རྟོག་པ་དག་གོམས་པའི་དབང་གིས་གསལ་བར་སྣང་བ་དང༌། དེའི་ཕྱིར་རྟོག་པ་མེད་པ་ཉིད་ཀྱང་ཡིན་པ་ན། འདོད་ཆགས་དང་བྲལ་བ་དང་ཐམས་ཅད་མཁྱེན་པ་ཉིད་ནི་མངོན་སུམ་ཉིད་ཡིན་ནོ། །དེའི་ཕྱིར་རང་གི་རྒྱུད་ཀྱི་སེམས་ཀྱི་ཁྱད་པར་མངོན་སུམ་དུ་གྱུར་བ་ནི་ཚིག་གི་མངོན་སུམ་འཁྲུལ་པ་དང་མཚུངས་པ་མ་ཡིན་ནོ། །དེ་ལ་ནི་འཁྲུལ་པ་རྣམ་པར་འཇོག་པའི་རྒྱུ་མཚན་ཁྱད་པར་མཐོང་བར་གནོད་པར་བྱེད་པ་ཡོད་པ་ཡིན་ནོ། །འབྱུང་བར་འགྱུར་བའི་འདོད་ཆགས་དང་ཐམས་ཅད་མཁྱེན་པ་མ་ཡིན་པ་ནི་ད་ལྟར་ཡོད་པ་མ་ཡིན་ཏེ། དེས་ན་དེ་ནི་མངོན་སུམ་མ་ཡིན་ནོ། །དེའི་ཕྱིར་མེད་པར་ངེས་པ་ནི་འཁྲུལ་པ་ཡིན་ནོ། །སྐྱེས་བུས་བྱས་པ་དང་སྐྱེས་བུས་མ་བྱས་པ་མངོན་པར་འདོད་པ་དག་ལ་མངོན་སུམ་སྔོན་དུ་འགྲོ་བ་ཅན་གྱི་ཐ་དད་པ་མེད་པར་ངེས་པ་ལ་ནི་གནོད་པར་བྱེད་པ་ཡོད་པ་མ་ཡིན་ནོ། །འདི་སྙམ་དུ་འོ་ན་དག་ལ་ཡང་བལྟར་མི་རུང་བའི་ཁྱད་པར་ཐ་དད་པ་ཡོད་པ་ཡིན་ཏེ། དཔེར་ན་སྐྱེས་བུའི་ལུས་མཐོང་བའི་སེམས་ལ་འཁྲུལ་པའི་རྒྱུ་ཡིན་པ་བཞིན་ནོ་ཞེ་ན། ཚིག་གི་ཁྱད་པར་གཞན་གྱི་ངོ་བོར་ཞེས་སྨོས་སོ། །ཚིག་དེ་ལས་ཐ་དད་པའི་ཚིག་གི་ཁྱད་པར་གང་ཡིན་པ་དེ་ནི་སྐྱེས་བུས་མ་བྱས་པའི་ངག་རྟག་པ་དེ་དང་དེའི་བདག་ཉིད་ཀྱི་འབྲེལ་པ་མེད་ལ་དེ་ལས་བྱུང་བའི་ཡང་མེད་དེ། དེས་ན་དེའི་ཁྱད་པར་མ་ཡིན་ནོ། །འབྲེལ་པ་མེད་ན་དེའི་ཞེས་བྱ་བའི་ཐ་སྙད་མི་འཐད་པའི་ཕྱིར་རོ། །གཏན་ཚིགས་དེས་ན་འཁྲུལ་པའི་རྒྱུ་མེད་པ་ཡིན་ལ། གནོད་པ་མེད་པའི་ཕྱིར་ནི་མངོན་སུམ་ལ་སྣང་བའི་ཐ་དད་པ་མད་པ་གྲུབ་བ་ཡིན་ནོ། །དེས་ན་ཇི་ལྟར་སྐྱེས་བུས་མ་བྱས་བ་ཅུང་ཟད་ཅིག་སྐྱེས་བུས་
བྱས་པ་ལས་ཁྱད་མེད་པ་དེ་གཞན་དུ་ཐམས་ཅད་ཀྱང་ཁྱད་མེད་པ་ཡིན་ནོ། །དེའི་ཕྱིར་སྐྱེས་བུས་བྱས་པ་དང་ཁྱད་པར་མེད་པའི་རང་བཞིན་ཐམས་ཅད་སྐྱེས་བུས་བྱེད་པར་འགྱུར་བའམ། ཡང་ན་ནི་དེ་དག་སྐྱེས་བུས་མ་བྱས་ན་འགའ་ཡང་སྐྱེས་བུས་བྱས་པ་མ་ཡིན་ནོ་ཞེས་བྱ་བ་འདི་གྲུབ་པ་ཡིན་ནོ། །གང་ལ་ཁྱད་པར་གྱི་རྒྱུ་མེད་པ་དེར་ནི་ཐམས་ཅད་འདྲ་བར་དཔག་པར་ནུས་པ་ཡིན་ལ། གང་ལ་ཁྱད་པར་གྱི་རྒྱུ་སྲིད་པ་དེར་ནི་བདག་ཉིད་ཐམས་ཅད་འདྲ་བར་རྗེས་སུ་དཔག་པར་རིགས་པ་མ་ཡིན་ནོ། །དེ་ལས་དང་སྨན་དང་སྐྱུ་རུ་ར་ལ་སོགས་པ་དང༌། སྐྱེས་བུ་དག་ནི་ཁྱད་པར་སྤང་བར་མི་ནུས་པས་ཕྱོགས་གཅིག་ཏུ་བཞག་པ་ཡིན་ལ། ཁྱད་པར་དགག་པར་ནུས་པའི་ངག་རྣམས་ཀྱང་ཕྱོགས་གཅིག་ཏུ་གནས་པ་ཡིན་ནོ། །དེ་ལ་དོན་དམ་ནི་འདི་ཡིན་ཏེ། གང་ལ་རྣམ་པ་ཐམས་ཅད་བལྟར་རུང་བ་དེ་ལ་ནི་རྣམ་པ་གཞན་མི་སྲིད་པས་ན་འདྲ་བར་དཔག་པར་ནུས་པ་ཡིན་ལ། གང་ལ་རྣམ་པ་ཐམས་ཅད་བལྟར་རུང་བ་མ་ཡིན་པ་དེ་ལ་ནི་ཕྱོགས་གཅིག་གི་སྒོ་ནས་ཐམས་ཅད་འདྲ་བར་རྗེས་སུ་རྟོགས་པ་མ་ཡིན་ནོ། །དེས་ན་རྣམ་པ་འགའ་ཞིག་གིས་བསྒྲུབ་བྱ་ལོག་པ་ལ་གཏན་ཚིགས་ལྡོག་པ་དེ་ཙམ་གྱིས་ནི་དོན་ཐམས་ཅད་ལ་དོན་གཉིས་ཀ་ལྡོག་པ་དང་ལྡན་པ་ཡིན་ནོ་ཞེས་བྱ་བ་འདི་ངེས་པ་མེད་པ་ཁོ་ནའོ་ཞེས་བྱ་བར་གནས་སོ། །གང་གི་ཕྱིར་སློབ་དཔོན་མ་མཐོང་བ་ཙམ་གྱིས་ལྡོག་པར་མི་བཞེད་པ་དང་འཐད་པ་ཡང་མ་ཡིན་པ་དེའི་ཕྱིར་ལྡོག་པར་བྱ་བའི་དངོས་པོ་དེ་ཁོ་ན་ཙམ་དེ་དང་འབྲེལ་པའི་ངོ་བོ་མི་རྟག་པ་ལ་སོགས་པ་གང་ཡིན་པ་དེའི་ངོ་བོ་ཉིད་ཀྱིས་སྒྲ་རིམ་པ་གཞན་དུ་སྦྱོར་ཏེ། ངོ་བོ་ཉིད་ཁོ་ནས་རང་ཉིད་ལྡོག་པ་ན་སྒྲུབ་པར་བྱེད་ཅེས་བྱ་བའི་ངོ་བོ་ལྡོག་པར་བྱེད་པ་ཡིན་ནོ། །འམ་ཞེས་སྨོས་པ་ནི་འབྲས་བུའི་གཏན་ཚིགས་ལ་ལྟོས་པའོ། །རང་བཞིན་གཏན་ཚིགས་ཀྱི་དཔེར་བརྗོད་པ་ཉིད་སྟོན་པ་ནི། དཔེར་ན་ཤིང་ཞེས་བྱ་བ་ཤིང་ཉིད་ཀྱིས་ཤིང་ཤ་པ་ཞེས་བྱ་བ་ཤིང་ཤ་པ་ཉིད་ལྡོག་པར་བྱེད་པ་ལྟ་བུའོ། །གང་དུ་ཤིང་མེད་པར་ནི་ངེས་ལ་ཤིང་ཤ་པ་མེད་པར་མ་ངེས་པ་དེ་ལ་དཔེར་བརྗོད་པ་འདི་ཡིན་ཏེ། རྒྱང་རིང་པོ་ནས་ཤིང་ཉིད་ནི་རྣམ་པར་དབྱེ་བར་ནུས་ཀྱི་ཤིང་ཤ་པ་ནི་མ་ཡིན་ནོ། །ཤིང་དང་ཤིང་ཤ་པ་འདི་གཉིས་དེའི་བདག་ཉིད་དུ་བསྒྲུབ་པའི་ཕྱིར་བཤད་པ། ཡལ་ག་ལ་སོགས་
པ་དང་ལྡན་པའི་དོན་དེ་ལས་གཞན་པ་དག་ལས་ཁྱད་པར་དུ་གྱུར་པས་ན་ཁྱད་པར་ཏེ། དེ་ཉིད་འགའ་ཞིག་ལ་ཡིན་གྱི་ཐམས་ཅད་ལ་ནི་མ་ཡིན་ནོ། །དེ་སྐད་དུ་ཞེས་བྱ་བ་ཤིང་ཤ་པ་ཉིད་དུ་གྲགས་པའི་ཕྱིར་ལོ་མ་ལ་སོགས་པ་དང་ལྡན་པའི་དོན་དེ་ནི་ཤིང་ཤ་པ་ཉིད་ཀྱི་རང་བཞིན་ཡིན་ནོ། །གང་གི་ཕྱིར་གཞན་ནི་འགའ་ཡང་ཤིང་ཤ་པ་མ་ཡིན་གྱི། ལོ་མ་ལ་སོགས་པ་དང་ལྡན་པའོ། །དོན་ཤིང་གི་སྒྲ་བརྗོད་པར་བྱ་བ་ཉིད་ཤིང་ཤ་པ་ཡིན་པ་དེའི་ཕྱིར་དེ་ནི་དེའི་རང་གི་ངོ་བོ་ཡིན་ན། དེ་ཡང་བདག་ཉིད་པོར་ནས་ཇི་ལྟར་ཡོད་པར་འགྱུར། དེས་ན་ཤིང་ཤ་པ་ཉིད་ཀྱི་ངོ་བོ་ལྡོག་པར་བྱེད་པ་བསྒྲུབ་པར་བྱ་བའི་ངོ་བོ་ལ་འབྲེལ་པ་ཡིན་ལ། འབྲེལ་པའི་ཕྱིར་ན་འཁྲུལ་པ་མེད་དོ། །རྒྱུ་ཡིས་ཀྱང༌། ཀྱང་སྨོས་པ་ནི་རང་བཞིན་ཡང་ལྡོག་པར་བྱེད་པ་ཡིན་ལ། རྒྱུ་ཡང་ལྡོག་པར་བྱེད་པ་ཡིན་གྱི། གཞན་ནི་མ་ཡིན་ནོ་ཞེས་བྱ་བ་ཡིན་ནོ། །ཅི་ཞིག་ལྡོག་པར་བྱེད་ཅེ་ན། འབྲས་བུ་སྟེ་འཁྲུལ་པ་མེད་པའི་ཕྱིར་རོ། །རང་བཞིན་འབྲེལ་པའི་རྒྱུ་མཚན་ཅན་འཁྲུལ་པ་མེད་པ་ཡིན་པའི་ཕྱིར་ལྡོག་པར་བྱེད་པ་ཡིན་ནོ། །རྒྱུ་ལོག་པ་ན་ཡང་ཞེས་བྱ་བ་ལ་སོགས་པས་འདི་ཉིད་རྣམ་པར་འགྲེལ་པར་བྱེད་དོ། །གཞན་དུ་ན་གལ་ཏེ་དེ་ལོག་པ་ན་འབྲས་བུ་ལོག་པར་མི་བྱེད་ན། དེ་མེད་པར་འབྱུང་བའི་དངོས་པོ་ནི་དེ་ལ་འཁྲུལ་པའི་ཕྱིར་དེ་དེའི་འབྲས་བུ་ཉིད་དུ་མི་འགྱུར་རོ། །གང་གི་ཕྱིར་རྒྱུ་ལ་འཁྲུལ་པས་ན་དེའི་འབྲས་བུ་ཉིད་དུ་མི་འགྱུར་བ་དེས་ན་རྒྱུ་དང་འབྲས་བུ་དངོས་པོ་གང་ཡིན་པ་དེ་ཡང་འབྲས་བུའི་རང་བཞིན་དེ་རྒྱུ་ལ་ངེས་པར་བྱེད་པ་ཡིན་ནོ། །དེ་ཡོད་ན་ནི་ཡོད་ལ་མེད་ན་ནི་མེད་པ་ཞེས་བྱ་བའི་འབྲས་བུའི་ངེས་པ་ཡིན་ནོ། །དེའི་ཕྱིར་གཉི་གར་ཡང་དེའི་བདག་ཉིད་དམ་དེ་ལས་བྱུང་བས་རང་བཞིན་འབྲེལ་པ་གང་ཡིན་པ་དེ་ཁོ་ནས་ཡིན་ནོ། །དེ་ལྟར་གང་ལ་འབྲེལ་པ་ཡོད་པ་དེ་ལ་ལྡོག་པར་བྱ་བ་དང་ལྡོག་པར་བྱེད་པ་ཡོད་པ་ཡིན་ནོ་ཞེས་བསྒྲུབ་པའི་སྒོ་ནས་བཤད་ནས། ད་ནི་རང་བཞིན་འབྲེལ་པ་མེད་པ་ལ་ལྡོག་པར་བྱ་བ་དང་ལྡོག་པར་བྱེད་པ་མེད་དོ་ཞེས་ལྡོག་པའི་སྒོ་ནས་བསྟན་པའི་ཕྱིར་དེ་ལྟ་མིན་ན་ཞེས་སྨོས་སོ། །གང་ཡང་རུང་བ་གཅིག་ལོག་པས་ཇི་ལྟར་མ་འབྲེལ་པ་གཞན་ནི་ལྡོག་པར་འགྱུར་ན། འདི་ཉིད་དཔེའི་སྒོ་ནས་བསལ་བར་བྱ་བའི་ཕྱིར་མི་ལ་ཞེས་སྨོས་སོ། །རྟ་མེད་པའི་ཕྱིར་ན་རྟ་མེད་པའི་མི་དེ་ལ་ཕྱུགས་ཀྱང་མེད་པར་འགྱུར་རམ་ཅི། དེ་ལྟར་ནི་མི་སྲིད་
དེ་མངོན་སུམ་གྱིས་གནོད་པར་མཐོང་བའི་ཕྱིར་རོ། །དེ་བཞིན་ཞེས་བྱ་བ་ནི་ཇི་ལྟར་འབྲེལ་པ་མེད་ན་ལྡོག་པར་བྱ་བ་དང་ལྡོག་པར་བྱེད་པའི་ངོ་བོ་མི་འཐད་པ་དེ་བཞིན་དུ་བྱས་པ་ཉིད་ལ་སོགས་པ་གང་ཡང་རུང་བ་གཅིག་ཅིག་ཉེ་བའི་ཕྱིར། ཇི་ལྟར་མི་རྟག་པ་ཉིད་ལ་སོགས་པ་གཞན་ནི་ངེས་པར་ཉེ་བར་འགྱུར་ཏེ། འདི་ལྟར་མི་ལ་ཕྱུགས་ནི་བདོག་ཅེས་ཏེ། ཕྱུགས་ཡོད་པའི་ཕྱིར་དེ་བཞིན་དུ་རྟ་ཡང་བདོག་པར་འགྱུར་རམ་ཅི། དེའི་ཕྱིར་རང་བཞིན་འབྲེལ་པ་ཁོ་ནས་ཞེས་བྱ་བ་ནི་རང་བཞིན་གྱི་འབྲེལ་པ་ཡིན་པའི་ཕྱིར་གཏན་ཚིགས་བསྒྲུབ་པར་བྱ་བ་གོ་བར་བྱེད་པ་མ་ཡིན་ནོ། །རང་བཞིན་འབྲེལ་པ་དེ་ཡང་དེའི་ངོ་བོ་ནི་དེ་ཉིད་དེ། བསྒྲུབ་པར་བྱ་བའི་བདག་ཉིད་ཀྱི་མཚན་ཉིད་དོ། །རྒྱུ་མཚན་གང་ལ་ཡོད་པ་འམ། དེ་ལས་བྱུང་བའི་མཚན་ཉིད་ཡིན་ནོ། །གལ་ཏེ་རང་བཞིན་འབྲེལ་པ་ཁོ་ནས་གཏན་ཚིགས་གོ་བར་བྱེད་པ་ཡིན་ན། འོ་ན་ནི་དཔེ་དགོད་པར་མི་བྱ་སྟེ། དེས་ན་བསྒྲུབ་པར་བྱ་བའི་ཆོས་ཅན་དང་དཔེའི་ཆོས་ཅན་འདྲ་བའམ། མི་འདྲ་བ་ཙམ་སྟོན་པ་ཡིན་ཞེ་ན། དཔེ་དེས་ཆོས་ཅན་འདྲ་བ་འམ་ཅིག་ཤོས་སུ་སྟོན་ཏོ་ཞེས་བྱ། འོ་ན་ཅི་བྱེད་ཅེ་ན། དེའི་བདག་ཉིད་ཀྱི་རྒྱུ་མཚན་ཅན་ནམ། དེ་ལས་བྱུང་བའི་རྒྱུ་མཚན་ཅན་གྱི་མེད་ན་མི་འབྱུང་བ་དེ་ཉིད་སྟོན་ཏོ། དཔེ་དེ་དག་གིས་མེད་ན་མི་འབྱུང་བའི་ཡུལ་ཅན་གྱི་ཚད་མ་ཉེ་བར་སྟོན་པར་བྱེད་པ་ཡིན་ནོ་ཞེས་བྱ་བའི་ཐ་ཚིག་སྟེ། ཚད་མ་བསྟན་པས་མེད་ན་མི་འབྱུང་བ་བསྟན་པར་འགྱུར་བ་ཡིན་ནོ། །གང་གི་ཕྱིར་དཔེ་དག་གིས་འབྲེལ་པའི་ཚད་མ་ཙམ་རབ་ཏུ་སྟོན་པ་དེའི་ཕྱིར་ཆོས་མི་མཐུན་པའི་ཡུལ་གྱི་དཔེ་ལ་ངེས་པར་གདོན་མི་ཟ་བར་འདི་ལ་ཞེས་བྱ་བ་གཏན་ཚིགས་ལ་གཏན་ཚིགས་ཀྱི་ཚུལ་རབ་ཏུ་གྲུབ་པའི་དོན་དུ་གཞི་ཆོས་ཅན་དངོས་པོར་གྱུར་པ་མི་འདོད་དོ། །གལ་ཏེ་ཆོས་མི་མཐུན་པའི་དཔེའི་སྟོབས་ཀྱིས་བསྒྲུབ་པར་བྱ་བའི་ཆོས་ཅན་དངོས་པོ་གཞན་དང་ཆོས་མི་མཐུན་པར་བསྟན་པར་བྱ་བ་ཡིན་ན་ནི། ཆོས་མི་མཐུན་པའི་དཔེ་ཡང་དངོས་པོར་གྱུར་པ་ཞིག་ཏུ་ཁས་བླང་བར་བྱ་བ་ཞིག་ན། གང་གི་ཕྱིར་འབྲེལ་པའི་ཚད་མ་ཙམ་བསྟན་པར་བྱ་བ་ཡིན་པ་དེའི་ཕྱིར་འབྲེལ་པའི་ཆོས་གཉིས་གཅིག་ལས་ལྡོག་པ་ཙམ་དུ་བསྟན་པ་ནི་དངོས་པོ་མེད་པ་ལ་ཡང་བསྟན་པར་ནུས་པ་ཡིན་ནོ། །དངོས་པོ་ལ་ནི་སྒྲུབ་པར་བྱེད་པ་དང༌། བསྒྲུབ་པར་བྱ་བ་དངོས་པོའི་ཆོས་དག་འཇུག་པར་དོགས་
ཀྱང༌། དངོས་པོ་མེད་པ་ལ་ནི་གེགས་མེད་པར་ལྡོག་པ་ཉིད་དུ་རྟོགས་པ་ཡིན་ནོ། །གལ་ཏེ་ཡོད་པ་ལ་ཆོས་དག་འབྲེལ་པར་ཚད་མས་བསྟན་པར་ནུས་པ་མ་ཡིན་ནམ། ཆོས་མི་མཐུན་པའི་དཔེ་དངོས་པོ་མེད་ན་ཆོས་དེ་དག་མི་སྲིད་པས་སྒྲུབ་པའི་ཡུལ་ཅན་གྱི་ཚད་མ་ཡང་བསྟན་པར་མི་ནུས་སོ་ཞེ་ན། དཔེ་ལ་ནི་ཞེས་སྨོས་ཏེ། བསྒྲུབ་པར་བྱ་བའི་ཆོས་སྒྲུབ་པར་བྱེད་པ་ཉིད་དེའི་ངོ་བོར་བསྒྲུབ་པར་བྱ་བའི་ཆོས་ཉིད་ཡིན་གྱི་གཞན་ནི་མ་ཡིན་ནོ་ཞེས་སྟོན་ཏེ། སྒྲུབ་པར་བྱེད་པའི་ངོ་བོ་ཉིད་ཅེས་བྱ་བའི་དོན་ཏོ། །དེ་ཙམ་དང་འབྲེལ་པ་སྟེ་སྒྲུབ་པར་བྱེད་པ་ཙམ་དང་འབྲེལ་པའི་རྒྱུ་མཚན་གྱིས་སོ། །དེ་ལྟར་བསྟན་ན་དེའི་རང་བཞིན་དུ་བསྟན་པར་འགྱུར་གྱི་གཞན་དུ་ནི་མ་ཡིན་ནོ། །དེ་ཙམ་དང་རྗེས་སུ་འབྲེལ་པ་སྟོན་པ་ནི་འདི་ལྟར་བྱས་པའི་རང་གི་ངོ་བོ་ཉིད་ཅེས་བྱ་བ་ལ་སོགས་པ་ཡིན་ནོ། །ཞེས་ཀྱི་སྒྲ་ནི་ངག་གི་དོན་འཛིན་པར་རུང་བའི་བྱེད་པ་ཡིན་ཏེ་ཞེས་བྱ་བ་དེ་ལྟར་ངག་གི་དོན་དེ་ཙམ་དང་རྗེས་སུ་འབྲེལ་པ་རྟོགས་པར་བྱེད་པའི་ཚད་མ་ནི་དཔེ་སྟོན་ཏོ། །དཔེས་བསྟན་པའི་ཚད་མ་དེས་ཀྱང་ངག་གིས་བསྟན་པ་ཙམ་དུ་རྗེས་སུ་འབྲེལ་པའི་རྟོགས་པར་འགྱུར་གྱི་བརྗོད་པས་ནི་མ་ཡིན་ནོ། །ཡང་ན་རྒྱུའི་དངོས་པོར་བསྒྲུབ་པར་བྱ་བ་དོན་གཞན་དཔེ་ལ་རབ་ཏུ་གྲུབ་པའི་ཚད་མས་རྟོགས་པར་འགྱུར་ཏེ། དཔེ་ལ་རབ་ཏུ་གྲུབ་པའི་མངོན་སུམ་དང་མི་དམིགས་པ་དག་ལས་ཐམས་ཅད་དུ་རྒྱུ་ཉིད་དུ་རྟོགས་པའི་ཕྱིར་རོ། །དེ་ཡོད་པ་ཉིད་ན་ཞེས་བྱ་བ་ནི་གོང་དུ་མངོན་སུམ་དང་མི་དམིགས་པ་དང་ལན་ཅིག་ཞུགས་བའི་རྒྱུའི་དངོས་པོ་དེ་ཡོད་པ་ཁོ་ན་ན་ཅིག་ཤོས་ཡོད་པའི་ཕྱིར་རོ་ཞེས་ཀྱི་སྒྲ་ནི་ད་ལྟར་གྱི་དོན་ཏེ། དེ་ལྟར་དཔེ་ལ་རབ་ཏུ་གྲུབ་པའི་ཚད་མས་རྒྱུའི་དངོས་པོ་རྟོགས་པ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ཞེས་བྱ་བ་ནི་ཆོས་མཐུན་པའི་དཔེས་རབ་ཏུ་བསྟན་པའི་འབྲེལ་པའི་ཡུལ་ཅན་གྱི་ཚད་མས་དེའི་ངོ་བོ་སྒྲུབ་བར་བྱེད་པའི་རང་གི་ངོ་བོ་ཉིད་དང་རྒྱུའི་དངོས་པོར་རབ་ཏུ་གྲུབ་ན་མི་རྟག་པ་ཉིད་མེད་ན་ཞེས་བྱ་བ་ལ་སོགས་པའི་དོན་འདི་ཡང་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཞེས་སྨོས་སོ། །གང་གི་ཕྱིར་བསྒྲུབ་པར་བྱ་བའི་ཆོས་ནི་སྒྲུབ་པར་བྱེད་པ་དེའི་རང་གི་ངོ་བོ་དང་རྒྱུ་ཡིན་པར་དཔེ་ལ་རབ་ཏུ་གྲུབ་པའི་ཚད་མས་གྲུབ་པ་ཡིན་ནོ། །དེས་ན་སྒྲུབ་བར་བྱེད་པར་གྱུར་བའི་དངོས་པོ་བསྒྲུབ་པར་བྱ་བ་བདག་ཉིད་ཀྱི་རང་གི་ངོ་བོ་དང་རྒྱུ་མེད་
པར་ཡོད་པར་ཇི་ལྟར་འགྱུར། རྒྱུ་དེའི་ཕྱིར་ཆོས་མཐུན་པའི་དཔེས་རབ་ཏུ་བསྟན་པའི་ཚད་མས་གྲུབ་པའི་འབྲེལ་པའི་དབང་གིས་གཞི་ཆོས་ཅན་དངོས་བོར་གྱུར་པ་མེད་པར་ཡང་ཉེ་བར་བཀོད་པ་ཙམ་གྱི་ཆོས་མི་མཐུན་པའི་དཔེ་ལ་ལྡོག་པར་བྱེད་པ་དང་ལྡོག་པར་བྱ་བའི་མཚན་ཉིད་ཀྱང་ལྡོག་པ་རབ་ཏུ་འགྲུབ་པོ། །འདི་སྐད་བརྗོད་པ་ཡིན་ཏེ། གང་གིས་ཆོས་གཉིས་ཀྱི་རྟེན་དངོས་པོར་གྱུར་པ་ཚོལ་བར་འགྱུར་བ་ཆོས་མི་མཐུན་པའི་དཔེ་ལ་འབྲེལ་པའི་ཡུལ་ཅན་གྱི་ཚད་མ་བསྟན་པར་བྱ་བ་ནི་མ་ཡིན་ནོ། །འབྲེལ་པ་གྲུབ་ཟིན་པ་དག་གི་ལྡོག་པ་ཙམ་ནི་དངོས་པོར་མ་འགྱུར་བ་ལ་ཡང་བསྟན་པར་ནུས་པ་ཡིན་ནོ། །གང་གི་ཕྱིར་འབྲེལ་པ་ནི་འགའ་ཞིག་ལྡོག་པར་བྱེད་པ་ཡིན་པ་དེའི་ཕྱིར་རྒྱུ་དང་རང་བཞིན་དག་མེད་པ་ནི་འགའ་ཞིག་དགག་པ་གོ་བར་བྱ་བའི་ཡང་གཏན་ཚིགས་ཡིན་ཏེ། གོ་བར་བྱེད་པ་ཡིན་ནོ། །འདི་ཉིད་རྣམ་པར་འགྲེལ་པ་ནི་དེ་དག་ཁོ་ན་ཞེས་གསུངས་པ་ཡིན་ནོ། །གང་གི་ཕྱིར་རང་གི་བདག་ཉིད་དང་འབྲེལ་པའི་རྟགས་ལྡོག་པར་བྱེད་པ་ཡིན་པའི་རྒྱུ་དེའི་ཕྱིར་ཡོད་པའི་བསྒྲུབ་པར་འདོད་པས་འབྲེལ་པ་གཏན་ཚིགས་སུ་བརྗོད་པར་བྱ་བ་འབའ་ཞིག་ཏུ་མ་ཟད་ཀྱི། ཅི་སྲིད་དུ་དུ་བ་ལ་སོགས་པའི་དོན་འགའ་ཞིག་དགག་པ་བསྒྲུབ་པར་འདོད་པས་ཀྱང་གཏན་ཚིགས་ཉིད་དུ་བརྗོད་པར་བྱའོ། །དེ་ལྟ་མ་ཡིན་ཏེ་ལྡོག་པར་བྱ་བ་དང་ལྡོག་པར་བྱེད་པ་དག་འབྲེལ་པ་མེད་ན་ནི་འབྲེལ་པ་མེད་པ་ལོག་པས་གཞན་འབྲེལ་པ་མེད་པ་ལྡོག་པར་མི་འགྲུབ་པའི་ཕྱིར་རོ། །གལ་ཏེ་བརྩལ་མ་ཐག་ཏུ་བྱུང་བ་ལ་སོགས་པ་སྒྲུབ་པར་བྱེད་པའི་ཆོས་བསྒྲུབ་པར་བྱ་བ་མི་རྟག་པ་ལ་སོགས་པ་ལ་འབྲེལ་པ་མ་ཡིན་ནམ། བསྒྲུབ་པར་བྱ་བ་ནི་སྒྲུབ་པར་བྱེད་པ་དང་འབྲེལ་པ་མ་ཡིན་ཏེ། སྒྲུབ་པར་བྱེད་པ་མེད་ཀྱང་ཡོད་པའི་ཕྱིར་རོ། །དེ་འདི་ཉིད་ཀྱི་ཕྱིར་བསྒྲུབ་བའི་གཏན་ཚིགས་མ་ཡིན་ན། དེ་ཅིའི་ཕྱིར་འབྲེལ་པ་མེད་པ་ལྡོག་པས་གཞན་ལྡོག་པར་མི་འགྲུབ་པོ་ཞེས་བརྗོད་ཅེ་ན། འདི་སྙམ་དུ་བསམས་པ་ཡིན་ཏེ། འབྲེལ་པ་ནི་གཉི་ག་ལ་གནས་པ་ཡིན་ཏེ། དེའི་ཕྱིར་འབྲེལ་པའི་ཡུལ་དུ་གྱུར་པ་དེ་དག་ལྡན་པ་བསྒྲུབ་བྱའི་ཆོས་ལ་ཡང་འབྲེལ་པ་ཞེས་བརྗོད་པ་ཡིན་ཏེ། མི་དམིགས་པ་གསུམ་པ་ཡང་བསྟན་པའི་ཕྱིར་བཤད་པ། དམིགས་པར་རིགས་པ་གང་ལ་ཡོད་པ་སྟེ། རྒྱུ་གཞན་ཡོད་པ་དང་བ་ལྟར་རུང་
པའི་ངོ་བོ་གང་ཡིན་པ་དེ་ནི་དམིགས་པར་རིགས་པ་ཡིན་ནོ། །ཡང་གི་སྒྲས་ནི་དེ་དང་རྒྱུ་དང་ཁྱབ་པར་བྱེད་པ་མི་དམིགས་པ་དག་ཀྱང་ཡིན་ནོ། །གལ་ཏེ་རང་བཞིན་མི་དམིགས་པར་ནི་དགག་པ་གྲུབ་པ་ཡིན་པས་དེའི་ཐ་སྙད་བསྒྲུབ་པར་བྱ་བ་མ་ཡིན་ནམ། དགག་པའི་གཏན་ཚིགས་དེ་ཞེས་ཇི་ལྟར་བརྗོད་ཅེ་ན། བཤད་པ། དགག་པའི་ཡུལ་གང་ལ་ཡོད་པའི་ཐ་སྙད་དེའི་གོ་བར་བྱེད་པ་གང་ཡིན་པ་དེ་ལ་དེའི་གཏན་ཚིགས་ཞེས་བྱ་བ་དགག་པའི་གཏན་ཚིགས་ཞེས་ལེའུར་བྱ་བར་བཤད་དོ། །ཅི་སྟེ་དགག་པ་ཉིད་ཀྱི་གཏན་ཚིགས་སུ་ཅིའི་ཕྱིར་མ་བཤད་ཅེ་ན་བཤད་པ། དེ་ལྟ་བུ་སྟེ་བལྟར་རུང་བའི་དོན་གྱིས་མི་དམིགས་པ་གང་ཡིན་པ་དེའི་རང་ཉིད་དགག་པའི་རང་བཞིན་ཏེ། དངོས་པོ་མེད་པའི་རང་བཞིན་ཡིན་ནོ། །ཇི་ལྟར་བུམ་པས་དབེན་པའི་ས་ཕྱོགས་དང་དེ་ལ་དམིགས་པའི་ཤེས་པ་ཉིད་བུམ་པ་མེད་པ་ཡིན་པ་དེ་ལྟར་ནི་དེ་ཉིད་མེད་པ་རྣམས་ཀྱི་མེད་པ་ཡིན་ནོ་ཞེས་བྱ་བ་དེར་གཏན་ལ་ཕབ་ཟིན་ཏོ། །དེའི་ཕྱིར་དགག་པ་གྲུབ་ཟིན་པས་ཐ་སྙད་བསྒྲུབ་པར་བྱ་བ་ལ་གཏན་ཚིགས་སུ་བརྗོད་དོ། །གཉི་གའི་ཡང་ཞེས་བྱ་བ་ནི་དགག་པ་དང་ཐ་སྙད་ཀྱིའོ། །འབྲས་བུ་དང་ཁྱབ་བྱ་བལྟར་མི་རུང་བ་ལ་ནི་རྒྱུ་དང་ཁྱབ་པར་བྱེད་པ་མི་དམིགས་པས་དངོས་པོ་མེད་པ་དང་མེད་པའི་ཐ་སྙད་གཉི་ག་གོ་བར་བྱེད་ལ། འབྲས་བུ་དང་ཁྱབ་བྱ་བལྟར་རུང་བ་ལ་ནི་མེད་པའི་ཐ་སྙད་འབའ་ཞིག་ཏུ་ཟད་དོ། །མི་དམིགས་པ་རྣམ་པ་གསུམ་དུ་བསྟན་ནས་མཇུག་བསྡུ་བར་བྱ་བའི་ཕྱིར་དགག་པའི་གཏན་ཚིགས་འདི་ནི་རྣམ་པ་གསུམ་ཁོ་ན་སྟེ་ཞེས་སྨོས་སོ། །རྒྱུ་ལ་སོགས་པ་ཇི་འདྲ་བ་ཞིག་དང༌། གང་གི་ཚེ་མི་དམིགས་པས་གོ་བར་བྱེད་པ་དེ་གཉི་ག་ཡང་སྟོན་པར་བྱེད་དེ། དམིགས་སུ་ཡོད་པའི་རྒྱུ་གང་ཡིན་པ་དེ་གང་གི་ཚེ་དེ་ལྟར་ཏེ། རྒྱུ་ཉིད་དུ་ངེས་པར་འགྱུར་པ་དེའི་ཚེ་མི་དམིགས་པ་གོ་བར་བྱེད་པ་ཡིན་ནོ། །ཇི་ལྟར་སྒྲོན་མ་བཞིན་དུ་རུང་བ་ཉིད་ཀྱིས་ནི་གཏན་ཚིགས་གོ་བར་བྱེད་པ་མ་ཡིན་ནོ། །འོ་ན་ཅི་ཞེ་ན། མེད་ན་མི་འབྱུང་བ་ཉིད་དུ་ངེས་པ་ཉིད་ན་ཡིན་ནོ་ཞེས་བྱ་བ་དེ་ནི་བཤད་ཟིན་ཏེ། མེད་ན་མི་འབྱུང་བ་ཉིད་དུ་ངེས་པ་དང་ས་ཕྱོགས་ལ་སོགས་བ་ལ་བརྟེན་པའི་རྟགས་ཉིད་བསྒྲུབ་བྱ་ངེས་པར་བྱེད་པ་ཡིན་པར་མཐོང་བའི་ཕྱིར་རོ། །དེ་བཞིན་དུ་བསྒྲུབ་པར་བྱ་བ་གཞན་ལྡོག་པར་ངེས་པར་བྱེད་པ་ཡང་རང་བཞིན་འབྲེལ་པ་ངེས་པ་སྔོན་དུ་འགྲོ་བ་ཅན་
ཡིན་པས་ན་དེའི་རྒྱུ་ཉིད་དུ་ངེས་པ་ཞེས་བརྗོད་དོ། །དམིགས་སུ་ཡོད་པའི་ཁྱབ་པར་བྱེད་པ་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ཉིད་དུ་དེ་ལྟར་ངེས་པ་གོ་བར་བྱེད་པ་ཡིན་ཏེ་སྔ་མ་བཞིན་ནོ། །རང་གི་བདག་ཉིད་ཀྱང་ངོ༌། །ཁྱད་པར་ཇི་ལྟ་བུ་དང་ལྡན་པ་ཞིག་ཅེ་ན། དམིགས་པར་ཡོད་པ་དང་དེ་ལྟར་ངེས་པ་སྟེ་དམིགས་པར་ཡོད་པ་ཉིད་དུ་ངེས་པར་འགྱུར་བ་ཡིན་ཏེ། རྣམ་པ་གང་གིས་བུམ་པ་དམིགས་པར་བྱ་བ་ཉིད་དུ་ངེས་བའི་རྣམ་པ་དེས་མ་དམིགས་པའི་ཕྱིར་མེད་པའི་ཐ་སྙད་དུ་བྱེད་པ་ཡིན་ནོ། །དགག་པའི་གཏན་ཚིགས་རྣམ་པ་གསུམ་པོ་དེ་ནི་ཕྱོགས་གཞན་དག་ཏུ་རྣམ་པ་དུ་མར་ཏེ། དབྱེ་བ་མང་པོར་བཤད་དོ། །ཇི་ལྟར་ཞེ་ན་བཤད་པ། འགལ་བ་ལ་སོགས་པ་དེ་དང་དེ་དག་གིས་སོ། །འགལ་བ་ལ་སོགས་པ་གང་ཡིན་པ་སྟེ། སོགས་པ་སྨོས་པས་ནི་རང་གི་ངོ་བོ་ལ་སོགས་པ་གཟུང་ངོ༌། །རང་གི་ངོ་བོ་ལ་སོགས་པ་མ་རྟོགས་པ་མ་དམིགས་པ་དང་འགལ་བ་ལ་སོགས་པ་རྟོགས་པ་དམིགས་པའོ། །དེ་དག་གི་སྦྱོར་བ་ནི་དེ་དག་བརྗོད་པའི་སྒྲ་ཡིན་ལ། དེའི་དབྱེ་བ་དེ་དང་དེ་དག་ནི་འགལ་བ་ལ་སོགས་པ་མ་རྟོགས་པ་དང་རྟོགས་པའི་དབྱེ་བ་དེ་དང་དེས་སོ། །འདི་སྐད་བཤད་པ་ཡིན་ཏེ། རྒྱུ་ལ་སོགས་པ་མི་དམིགས་པའི་སྦྱོར་བ་ཐ་དད་དེ་རང་བཞིན་མི་དམིགས་པ་དང༌། རྒྱུ་མི་དམིགས་པ་དང༌། ཁྱབ་པར་བྱེད་པ་མི་དམིགས་པ་དང༌། འབྲས་བུ་མི་དམིགས་པས་སོ། །དེ་བཞིན་དུ་དེ་དང་འགལ་བ་དམིགས་པའི་སྦྱོར་བ་ཡང་ཐ་དད་དེ། རང་བཞིན་འགལ་བ་དམིགས་པ་དང༌། འགལ་བའི་འབྲས་བུ་དམིགས་པ་དང༌། ཁྱབ་པར་བྱེད་པ་འགལ་བ་དམིགས་པ་དང༌། འབྲས་བུ་འགལ་བ་དམིགས་པ་དང༌། རྒྱུ་འགལ་བ་དམིགས་པ་དང༌། རྒྱུ་འགལ་བའི་འབྲས་བུ་དམིགས་པ་སྟེ། དེ་ལྟར་སྦྱོར་བ་རྣམ་པ་བཅུའོ། །བཅུ་གཅིག་པ་འགལ་བས་ཁྱབ་པ་དམིགས་པ་ནི་ལེའུ་གསུམ་པར་འཆད་པར་འགྱུར་རོ། །སློབ་དཔོན་ཆོས་མཆོག་གིས་སྦྱར་བའི་ཚད་མ་རྣམ་པར་ངེས་པའི་འགྲེལ་བཤད་ལས་ལེའུ་གཉིས་པའོ།། །།འདི་ལ་བམ་པོ་བཅུ་གཉིས་དང་ཚིགས་བཅད་སུམ་ཅུ་རྩ་གཉིས་ཡོད་དོ།། །།