ཚེ་རྩིས་ཀྱི་འབྲས་བུ་གསལ་བར་བྱེད་པ་ཞེས་བྱ་བ།
རྒྱ་གར་སྐད་དུ། ཨཱ་ཡུ་ག་ཎི་ཏ་ཕ་ལ་བྲ་ཀ་ཤ་ནཱ་མ། བོད་སྐད་དུ། ཚེ་རྩིས་ཀྱི་འབྲས་བུ་གསལ་བར་བྱེད་བ་ཞེས་བྱ་བ། འཇམ་པའི་དབྱངས་ལ་ཕྱག་འཚལ་ལོ། །གནས་སྐབས་བཞིན་ཤེས་སྐྱེས་བུ་ཡིས། །དང་པོའི་གནས་སྐབས་གསལ་འདོད་ན། །མཁའ་
ཉི་དྲུག་སོགས་ལོ་ཡིས་བསྒྱུར། །དེ་ལ་མཁའ་ཉིས་བགོས་ཐོབ་ལོ། །དག་ན་ཀུན་བསྡོམས་མཁའ་ཉིད་གྲུབ། །སོ་སོའི་མེ་རྣམས་མཁའ་དུས་མེས། །བསྒྱུར་ཏེ་མཁའ་ཉིས་རྙེད་བརྟན་པའོ། །རང་རང་བརྟན་པ་དྲུག་སོགས་བསྒྱུར། །མཁའ་དུས་མེ་ཡིས་ཐོབ་པ་ལོ། །ལྷག་མ་མཁའ་མེས་ཐོབ་ཟླ་བ། །དེ་ཡི་ལྷག་མ་ཞག་ཏུ་འགྱུར། །དག་ན་རང་ལོའི་འགྲོ་ལྡོག་ངེས། །དང་པོའི་ཆ་ཤས་ངེས་རྒྱས་ཤེས། །བརྒྱ་སོགས་གསུམ་ལའང་དྲུག་ལ་སོགས། །གཟའ་དགུ་སོ་སོའི་ལོ་ཡིས་བསྒྲེ། །མཁའ་དང་ཉི་མས་ཐོབ་པ་ལོ། །ལྷག་ལ་ནམ་མཁའ་མེ་ཡིས། བསྒྲེ། །ཐོབ་པ་ཟླ་བ་ལྷག་མ་ཞག །དེ་ནས་སོ་སོའི་ལོ་རྣམས་ཀུན། །མཁའ་དུས་མེ་ཡིས་བསྒྱུར་བར་བྱ། །ཟླ་བ་མཁའ་མེས་བསྒྲེས་པ་སྦྱིན། །མཁའ་རོས་རྙེད་པ་བརྟན་པ་ཞག །ལྷག་མ་དྲུག་ཅུས་ཐོབ་ཆུ་ཆོད། །དེ་ནས་རང་རང་བརྟན་པ་རྣམས། །དྲུག་ལ་སོགས་པའི་རང་ལོས་བསྒྲེ། །མཁའ་དུས་མེས་བ་གོས་ཐོབ་པ་ལོ། །གལ་ཏེ་རྙེད་པར་མ་གྱུར་ན། །མཁའ་མེས་བགོས་ལ་ཟླ་བ་བྱ། །དེ་ཡི་ལྷག་མ་ཞག་ཏུ་འགྱུར། །དག་ན་ལྔ་སོགས་རང་གི་ལོ། །དགུ་ཚན་རེ་ལ་འགྲོ་ལྡོག་ངེས། །ཆ་ཤས་ཕྱི་མ་རྒྱས་པའོ། །ཆ་ཤས་རེ་རེ་དྲུག་ཆ་རེ། །ཕྲི་བས་བརྟན་པའང་དྲུག་ཆ་འབྲི། །དེ་ནི་རྩིས་ཀྱི་གཞི་མ་ཡིན། །བསྒྱུར་དང་འགོད་བྱེད་མཚུངས་པར་ལྡན། །དེ་ལྟར་ཟླ་ཀླུ་རྣམས་གཞི་ཤེས། །གཞན་ཡང་ཚེ་ཡི་སྣོད་འབྲིད་དང༌། །བསླུ་ཞིང་བསྲིང་བའི་ཆོག་རྣམས། །ཁོང་དུ་ཆུད་ནས་སྟོན་པར་གྱིས། །རྡོ་རྗེའི་ཚིག་འབྱེད་ལྡེ་མིག་འདི། །ཇི་སྙེད་མཁྱེན་པས་བསྒྱུར་བའོ། །ཚེ་འབྲས་ཀྱི་རྩིས་གསལ་བར་བྱེད་པ་མ་ན་པུ་རུ་ཥས་མཛད་པ། ཨིཐི་ན་ཀ་ར་ཀ་ཊའི་བྲམ་ཟེ་ལག་མ་ཏི་དང༌། མཁའ་འགྲོ་རྡོ་རྗེས་བསྒྱུར། །