མིའི་མཚན་ཉིད་བརྟག་པ་རྒྱ་མཚོ་ཞེས་བྱ་བ།
མི་སྦྱིན།
རྒྱ་གར་སྐད་དུ། ས་མུ་དྲི་ཀམ་པ་རཱི་ཀྵ་ཏེ་ན་ར་ལཀྵ་ཎེ་ནཱ་མ། བོད་སྐད་དུ། མིའི་མཚན་ཉིད་བརྟག་པ་རྒྱ་མཚོ་ཞེས་བྱ་བ། །ཐམས་ཅད་མཁྱེན་པ་ལ་ཕྱག་འཚལ་ལོ། །ཐམས་ཅད་མཁྱེན་པས་ཐམས་ཅད་གཟིགས། །དང་པོའི་ལྷ་ལ་ཕྱག་འཚལ་ནས། །སྐལ་བཟང་སྐྱེས་པ་བུད་མེད་ཀྱི། །རྒྱ་མཚོ་རབ་ཏུ་བཤད་པར་བྱ། །སྔོན་དུ་ཚེ་ནི་ཡོངས་སུ་བརྟག །ཕྱི་ནས་མཚན་ཉིད་ལ་སོགས་རྣམས། །ཚེ་ཐུང་པ་ཡི་མི་རྣམས་ལ། །མཚན་ཉིད་ཀྱིས་ནི་ཅི་ཞིག་བྱ། །བུད་མེད་རྣམས་ཀྱི་གཡོན་གྱི་ཆ། །སྐྱེས་པ་དེ་ནི་གཡས་སུ་དེ། །རྒྱ་མཚོ་ཡི་ནི་ཚིག་བཞིན་དུ། །དེ་རྣམས་མཚན་ཉིད་ངེས་པར་བརྟག །གནས་ལྔ་རིང་ཞིང་བཞི་ནི་ཐུང༌། །ལྔ་ནི་འཕྲ་ཞིང་དྲུག་ནི་མཐོ། །བདུན་ནི་དམར་ཞིང་གསུམ་
ནི་ཟབ། །གསུམ་ནི་རབ་ཏུ་ཡངས་པར་བསྔགས། །ལག་པ་མིག་དང་བྲང་དང་ནི། །དེ་ནི་པུས་མོ་སྣ་དེ་ནི། །ཡན་ལག་འདི་རྣམས་རིང་བ་ནི། །ལྔ་པོ་རིང་བར་བསྔགས་པ་སྟེ། །མགྲིན་པ་རྐང་པ་རྒྱབ་དང་ནི། །རྗེ་ངར་རྣམས་ནི་ཐུང་བར་བསྔགས། །གང་གི་བཞི་ངོ་ཐུང་བ་རྣམས། །རྟག་ཏུ་མཆོད་པ་ཐོབ་པར་འགྱུར། །སོར་མོ་ཕྲ་ཞིང་ཚིགས་པ་རྣམས། །སོ་དང་སྐྲ་དང་སེན་མོ་པགས། །གང་གི་ལྔ་པོ་ཕྲ་བ་ཉིད། །དེ་ནི་མཚན་ཉིད་མཆོག་ཡིན་ནོ། །མཆན་འོག་རྩིབ་འོག་བྲང་དང་ནི། །སྣ་དང་དཔུང་བ་དཔྲལ་བ་རྣམས། །རྒྱ་མཚོ་ཆེན་པོའི་བདག་ཉིད་ཀྱིས། །དྲུག་པོ་མཐོ་ན་དགེ་བར་བཤད། །ལག་པ་རྐང་པའི་མཐིལ་དམར་ཞིང༌། །མིག་གི་མཐའ་དང་སེན་མོ་དང༌། །རྐན་དང་ལྕེ་དང་མཆུ་རྣམས་ནི། །བདུན་པོ་རྣམས་ནི་དམར་བར་བསྔགས། །དབྱངས་དང་སེམས་དང་ལྟེ་བ་སྟེ། །གསུམ་པོ་རྣམས་ནི་ཟབ་ན་བསྔགས། །བྲང་དང་མགོ་བོ་དཔྲལ་བ་སྟེ། །གསུམ་པོ་རྣམས་ནི་ཡངས་པ་བསྔགས། །ལུས་ཀྱི་ནང་ནས་བཞིའམ་ནི། །ཡང་ན་ཐམས་ཅད་དུ་ཡང་བརྗོད། །དེ་ལ་མཆོག་ཏུ་རྣ་དང་ནི། །དེ་བཞིན་མཆོག་ཏུ་སོ་རྣམས་དང༌། །ཁ་དོག་རྣམས་ནི་མཆོག་ཏུ་སྣུམ། །དབྱངས་ནི་མཆོག་ཏུ་སྙན་པ་དང༌། །དབྱངས་ལས་མཆོག་ཏུ་བདེན་པ་དང༌། །ཀུན་ནས་བདེན་པས་རབ་ཏུ་གནས། །མིག་དམར་བུད་མེད་སྤོང་མི་བྱེད། །གསེར་མདོག་དམར་སྐྱ་ནོར་མེད་མིན། །ལག་རིང་རྣམས་ནི་དབང་ཕྱུག་སྟེ། །ཡན་ལག་མཛེས་བསྔགས་བདེན་པར་བྱེད། །དབང་པོ་ཆུང་ན་ནོར་ལྡན་ཞིང༌། །བུ་བྲལ་ཆེ་བས་ནོར་རྣམས་དམན། །སྒྲོ་བའི་གཡོན་དམའ་བུ་ནོར་ཉམས། །གཞན་རྣམས་མོན་པོ་བུ་ལྡན་དབུལ། །མགོ་བོ་ཆེ་ཞིང་རྩ་ཕྲ་དང༌། །རྩུབ་དང་རྩ་ནི་མཐོ་བ་དང༌། །སྤྲོ་མ་དང་མདུད་པ་གང་འགྱུར་དབུལ། །མཉེན་པས་རྟག་ཏུ་བདེ་བ་དང༌། །རྟགས་ནི་གྱོང་པོ་ཡུལ་གཞན་འཁྱམ། །ཆུང་ངུ་རྣམས་ནི་སྐལ་བ་བཟང༌། །ཆེན་པོ་ཡིས་ནི་དབུལ་པོ་དང༌། །དམའ་མོས་བུད་མེད་ངེས་པར་རྒྱལ། །སྒྲོ་བ་མཉམ་ཞིང་མཛེས་པར་མཐོང༌། །ཕན་པ་དང་ནི་ཆོ་དང་ལྡན། །བྲང་ཡངས་འབྲུ་དང་ནོར་རྣམས་སྤྱོད། །བུ་ཡངས་མི་
བདག་མཆོད་དང་ལྡན། །རྐེད་ཡངས་བུ་ནི་མང་དུ་སྤྱོད། །རྐང་པ་ཡངས་པ་ནོར་དང་ལྡན། །མིག་སྣུམ་པ་ནི་སྐལ་བ་བཟང༌། །སོ་སྣུམ་པ་ནི་ཟས་དང་ལྡན། །པགས་པ་སྣུམ་པ་བདེ་བར་འགྱུར། །རྐང་བ་སྣུམ་པ་བཞོན་པར་ལྡན། །ལས་མེད་ལག་པ་དག་ནི་སྲ། །རྐང་པ་དག་ནི་ལམ་ལ་མཉེན། །གང་གི་ལག་པ་རྐང་པར་ལྡན། །དེ་ནི་རྒྱལ་པོར་ངེས་པར་ལྡན། །གང་ལ་ཉ་ཡི་དབྱིབས་ཡོད་ན། །བརྒྱ་ཡི་བདག་པོར་ཤེས་པར་བྱ། །ཕན་ཚུན་གྱིས་ནི་སྟོང་དུ་ཤེས། །དུང་གིས་བྱེ་བར་ཤེས་པར་བྱ། །པདྨ་ཡིས་ནི་བྱེ་བ་སྟོང༌། །མཐེའུ་ཆུང་གི་ཕྱོགས་རྣམས་ནས། །མིང་མེད་ལ་ནི་རི་མོ་འགྲོ། །རྟགས་ནི་དེ་ཡི་སུམ་ཅུའི་ལོར། །འཚོ་བ་ཉིད་དུ་ཤེས་པར་བྱ། །མཐེའུ་ཆུང་གི་ཕྱོགས་རྣམས་ནས། །གུང་མོ་ལ་ནི་རི་མོ་འགྲོ། །འདི་ཡི་རྟགས་ཀྱིས་དྲུག་ཅུའི་ལོར། །འཚོ་བ་ཉིད་དུ་ཤེས་པར་བྱ། །མཉམ་པའི་ཕྱིར་ན་བརྒྱད་ཅུར་འཚོ། །མ་མཉམ་དེ་བཞིན་བདུན་ཅུར་འཚོ། །ཚིགས་པས་དམན་པའི་སྐྱེས་བུ་རྣམས། །ལོ་ནི་དྲུག་ཅུར་འཚོ་བར་འགྱུར། །མ་ཐོ་བ་ཆེན་གྱི་ནི་ཚིགས་ཀྱི་དབུས། །གང་ལ་ནས་ཡོད་རྣམ་པར་དགེ། །རྙེད་དང་ཟས་སུ་ལོངས་སྤྱོད་ཅིང༌། །མི་དེ་བདེ་བའི་ལོངས་སྤྱོད་ལྡན། །རི་མོ་མང་པོ་ཉོན་མོངས་ཤིང༌། །ཉུང་བ་ཡིས་ནི་ནོར་དམན་ནོ། །དམར་པོ་ཡིས་ནི་བདེ་བ་ཐོབ། །ནག་པོ་ཡིས་ནི་ཁོལ་པོར་བྱེད། །སློ་མའི་དབྱིབས་དང་རྣམ་པར་རྩུབ། །སེན་མོ་ཡོན་པོ་སྐྱ་བོ་དང༌། །རྩེ་མོ་ལ་ནི་རི་མོ་དང༌། །ཤིན་ཏུ་དཀར་བར་གྱུར་བ་དང༌། །རྐང་པའི་སོར་མོ་སྤྲད་པ་ནི། །དབུལ་བའི་སྡུག་བསྔལ་རབ་ཏུ་སྟེར། །གང་གི་རྐང་པ་ཚ་བ་དང༌། །ངུར་སྨྲིག་འདྲ་བར་གྱུར་བ་ནི། །རིགས་ནི་རྣམ་པར་ཆད་པ་སྟེ། །ཚངས་འཇོམས་གཞན་གྱི་ལས་བྱེད་པ། །ས་སྟེངས་དབང་མེད་མནར་བར་བྱེད། །རྡུལ་མི་འབྱུང་ཞིང་མཐིལ་ནི་མཉེན། །པདྨའི་ལྟེ་བ་ལྟ་བུས་ཏེ། །སོར་མོ་འབྱར་ཞིང་མཛེས་པ་དང༌། །སེན་མོ་ཟངས་མདོག་རྟིང་པ་ལེགས། །བྲོ་ཞིང་རྩ་ནི་མི་མངོན་དང༌། །ལོང་བུ་དག་ནི་མི་མངོན་ཞིང༌། །རྐང་པ་རུས་སྦལ་ལྟར་མཐོ་ན། །མི་རྣམས་ཀྱི་ནི་དབང་ཕྱུག་གོ །ཤིན་ཏུ་བློ་ལྡན་གྲགས་པ་ལྡན། །དེ་བཞིན་དུ་ནི་རྣམ་
པར་གནོན། །བདེ་དང་ཤིན་ཏུ་སྣུམ་པའི་མིག །དེ་རྣམས་ཚེ་ནི་ཐུང་བར་བཤད། །གོས་ངན་སོ་ཡི་དྲི་མ་སེལ། །མང་དུ་ཟ་ཞིང་ཚིག་རྩུབ་སྨྲ། །ཉི་མ་ནུབ་ཤར་ཉལ་བ་རྣམས། །གལ་ཏེ་འཁོར་ལོ་ལག་ལྡན་ཡང༌། །དཔལ་ནི་རྣམ་པར་སྤོང་བར་འགྱུར། །མགོ་བོ་ལ་ནི་མེ་ཏོག་བཅས། །རྐང་པ་ལ་ནི་ལེགས་པར་མཆོད། །ཡན་ལག་མཆོག་ལྡན་བསྟེན་པ་དང༌། །ཁ་ཟས་ཉུང་དུ་སྤྱོད་པ་དང༌། །གོས་མེད་ཉལ་བར་མི་བྱེད་ཅིང༌། །དུས་ཚིགས་འཁྲིག་པ་མི་བསྟེན་ན། །དཔལ་ནི་རབ་ཏུ་ཉམས་གྱུར་ཀྱང༌། །སླར་ཡང་རབ་ཏུ་ཐོབ་པར་འགྱུར། །མི་སྦྱིན་གྱིས་གསུངས་པའི་རྒྱ་མཚོ་ལས་སྐྱེས་པའི་མཚན་ཉིད་བརྟག་པའི་ལེའུ་སྟེ་དང་པོའོ།། །།མི་སྦྱིན་གྱི་ནི་གསུང་ཇི་བཞིན། །བུད་མེད་མཚན་ཉིད་བཤད་པར་བྱ། །ཉི་མ་འཆར་ཁའི་འོད་མཚུངས་པའི། །བུ་མོ་ཟླ་བ་གནག་བའི་གདོང༌། །མིག་ཡངས་མཆུ་ནི་དམར་བ་ཡི། །བུ་མོ་དེ་ནི་རྙེད་ན་བདེ། །ཨུཏྤལ་སྔོན་པོའི་མདོག་ལྟར་སྔོ། །རི་དགས་མིག་ཅན་གླང་ལྟར་དཀར། །ནོར་བུ་རིན་ཆེན་མཐའ་དག་དང༌། །གསེར་གྱི་རྒྱན་གྱིས་བརྒྱན་གྱུར་མ། །དེ་ནི་གང་ཞིག་མིག་ནག་པའི། །བུ་མོ་དཀར་མོ་ཤིན་ཏུ་མཛེས། །མིག་ཡངས་མཆུ་ནི་དམར་བ་ཡི། །བུ་མོ་དེ་ནི་རྙེད་ན་བདེ། །གང་ཞིག་འགྲོ་བ་ཙམ་གྱིས་ནི། །ས་གཞི་གཡོ་བ་ལྟར་བྱེད་འགྲོ། །ཇི་ལྟར་མི་སྦྱིན་གསུངས་པ་ནི། །དེ་ཡི་ཞེ་འགྲས་བྱེད་པར་གསུངས། །གང་གི་སོར་མོ་མི་སྡུག་ཅིང༌། །རྐང་པའི་མཐིལ་ནི་ཉག་པོར་གྱུར། །དེ་ཡང་ཞེ་འགྲས་བྱེད་པ་ནི། །ཇི་ལྟར་མི་སྦྱིན་གྱིས་ནི་གསུངས། །གང་ཞིག་རྐང་པའི་མཐེ་ཆུང་དག །ས་གཞི་ལ་ནི་མི་རེག་ན། །བདག་པོ་བརྒྱ་ཡང་མྱུར་འཇོམས་ཤིང༌། །དེ་སྲིད་དེ་ནི་འཚོ་བར་འགྱུར། །གང་གི་སྐྲ་ཡི་ཚོགས་པ་རྣམས། །རྟག་ཏུ་ལངས་བར་གྱུར་པ་ནི། །རྒྱལ་རིགས་ཉིད་དུ་སྐྱེས་གྱུར་ཀྱང། །དེ་ནི་བྲན་མོ་ཉིད་དུ་འགྱུར། །རྨ་བྱ་འཁོར་ལོ་པདྨ་དང༌། །བུམ་པ་གང་དང་རྟ་བབས་ལྡན། །དེ་ནི་བྲན་མོའི་རིགས་སྐྱེས་ཀྱང༌། །རྒྱལ་པོ་ཡི་ནི་བཙུན་མོར་འགྱུར། །གང་གི་ལག་མཐིལ་རི་མོ་ལ། །སོ་དང་རྟ་བབས་རབ་ཏུ་གནས། །བྲན་མོའི་རིགས་སུ་སྐྱེས་གྱུར་ཀྱང༌། །
དེ་ནི་རྒྱལ་པོའི་བཙུན་མོར་འགྱུར། །རྣམ་པར་བརྩོན་པའི་ངང་ཚུལ་ཅན། །བློ་ནི་རྐུབ་ལ་དགའ་ཞིང༌། །གཞན་གྱི་རིགས་དང་ལྡན་གྱིར་པ། །སྡིག་པ་མང་བྱེད་ལས་མེད་ཅིང༌། །གཞན་གྱི་ཁྱིམ་ལ་ཉེར་བརྟེན་ནས། །གལ་ཏེ་བུ་དང་བཅས་གྱུར་ཀྱང༌། །མི་ཡིས་དེ་འདྲའི་ཆུང་མ་སྤང། །མིག་སྐྱ་ཁྲོན་པའི་འགྲམ་པ་དང༌། །ཕ་རོལ་སྐྱེས་བུ་རྣམས་ལ་དགའ། །བྱིན་པ་སྦོམ་ཞིང་སྐྲ་ནི་འཕྱར། །མཆུ་འཕྱར་རྩིབས་ནི་རིང་བ་དང༌། །སོ་ནི་སྤྲད་པོ་ཁ་དོག་སྔོ། །རྐན་དང་མཆུ་དང་རྐེད་ལྕེ་དང༌། །ཡན་ལག་སྐམས་ཤིང་ཁ་སྐམས་དང༌། །ནུ་མ་ཟུང་དག་མི་མཉམ་དང། །སྣ་དང་པུས་མོ་རིང་བ་རྣམས། །བུ་བྲལ་ཚུལ་ཉམས་བུད་མེད་དེ། །བུ་མོ་དེ་ནི་ནོར་རྣམས་སྤོང༌། །རྡུལ་མི་འབྱུང་ཞིང་མཐིལ་ནི་མཉེན། །པདྨའི་ལྟེ་བ་ལྟ་བུ་སྟེ། །སོར་མོ་འབྱར་ཞིང་མཛེས་པ་དང༌། །སེན་མོ་ཟངས་མདོག་རྟིང་བ་ལེགས། །དྲོ་ཞིང་རྩ་ནི་མི་མངོན་པ། །ལོང་བུ་དག་ནི་མི་མངོན་ཞིང༌། །རྐང་པ་རུས་སྦལ་ལྟར་མཐོ་དང༌། །བརླ་རྒྱས་འགྲམ་པ་རྒྱས་པ་དང༌། །སོ་ནི་དཀར་ཞིང་མཉམ་པ་དང༌། །པདྨའི་འདབ་འདྲ་སྤྱན་ཡངས་མ། །བིམ་པའི་མཆུ་དང་སྣ་མཐོ་དང༌། །གོམ་པ་གླང་པོ་ལྟར་འགྲོ་དང༌། །གཡས་སུ་བསྐོར་ཞིང་ལོག་པ་དང༌། །ལུས་ནི་སྣུམ་ཞིང་ཁ་དོག་མཛེས། །གསང་གནས་མཉེན་ཞིང་མཐུག་པ་དང༌། །དབྱངས་སྙན་སྐྲ་ནི་མཛེས་པ་རྣམས། །དེ་ནི་བདག་མོའི་ཞིང་དུ་འགྱུར། །སྐལ་བཟང་བུ་བཅས་བུད་མེད་དེ། །རྡུལ་ཆུ་སྤུ་ནི་ཉུང་བ་དང༌། །གཉིད་དང་ཟས་ནི་ཆུང་བ་དང༌། །མིག་དང་ལུས་ལ་སྤུ་མེད་ན། །བུད་མེད་རྣམས་ཀྱི་མཚན་ཉིད་མཆོག །གཉིས་པོའི་མཚན་ཉིད་ཡང་དག་ལ། །གཞོན་ནུ་མ་དང་སྐྱེས་བུ་ཡང༌། །དགེ་བ་དང་ནི་མི་དགེའི་ལས། །དེ་བཞིན་དུ་ནི་བྱེད་པར་འགྱུར། །ཞེས་པ་ནི་བུད་མེད་ཀྱི་མཚན་ཉིད་མི་སྦྱིན་གྱི་གསུང་ལས། མིའི་མཚན་ཉིད་བརྟག་པ་རྒྱ་མཚོ་ཞེས་བྱ་བ་རྫོགས་སོ།། །།སྡེ་སྣོད་འཛིན་པ་ཆེན་པོ་བྷོ་ཊ་པཎྜི་ཏའི་གསུང་གིས་བསྐུལ་ནས་པཎྜི་ཏ་དྷརྨ་དྷ་རིའི་ཞལ་སྔ་ནས། ཡར་ལུངས་པ་གྲགས་པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་ཆེན་པོར་བསྒྱུར་བའོ། །