འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས།
པདྨ་དགེ་བསྙེན།
༄༅།སློབ་དཔོན་པདྨ་དགེ་བསྙེན་གྱིས་
འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས་བཞུགས། །ན་མོ་ལོ་ཀིར་ཤྭ་རཱ་ཡ། སྔོན་རྒྱ་གར་ལྷོ་ཕྱོགས་ན་བསྟན་པ་དར་བའི་ཚེ་གཙུག་ལག་ཁང་ཆེན་པོ་གཅག་ན་པཎྜི་ཏ་ཏིང་ངེ་འཛིན་ལ་བརྟན་པ་ཐོབ་པ་ཅིག་སྔ་དྲོ་རང་གི་བྲང་ཁང་སྒོ་བསྡམས་ཏེ་ཏིང་ངེ་འཛིན་ལ་བཞུགས་ནས། པོ་ཊ་ལ་ཀེའི་རི་ལ་ཐུགས་རྗེ་ཆེན་པོ་ལ་ཉི་མ་རེ་རེ་ཞིང་ཆོས་གསན་དུ་གཤེགས་སྐད། དེ་ལ་གཡོག་དགེ་བསྙེན་གཅིག་ཡོད་པ་ན་རེ། སློབ་དཔོན་ཉིན་རེ་ཞིང་སྒོ་བསྡམས་ནས་ཐུགས་དམ་མཛད་པ་དེ་ཅི་ལགས་ཞེས་ཞུས་པས། དེ་ཁྱོད་ལ་དོན་ཅི་ཡོད་ཅེས་གསུང་ངོ༌། །དེས་བདག་ལ་ཡང་ཆོས་དེ་ཞུས་ནས་སློབ་དཔོན་བཞིན་དགེ་སྦྱོར་བགྱིད་ཅེས་བྱས་པས། པཎྜི་ཏའི་ཞལ་ན་རེ་ཁྱོད་ཀྱིས་མི་འོང་སྟེ། །དགེ་སྦྱོར་གཞན་མི་བྱེད་དཔའ་པོ་ཊ་ལར་ཐུགས་རྗེ་ཆེན་པོ་ལས་ཆོས་ཉན་དུ་འགྲོ་བ་ཡིན་གསུང་ངོ༌། །དགེ་བསྙེན་གྱི་བདག་ཀྱང་དེ་བཞིན་དུ་ཞུ་ཞེས་བྱས་པས། ཇོ་བོ་ལ་ཞུ་དགོས་གསུངས་ཏེ། ནང་པར་ཆོས་ཐོན་རྗེས་ལ་བཅོམ་ལྡན་འདས་ལ་ཕྱག་དང་བསྐོར་བ་བྱས་ནས་ཞུས་པས། བཅོམ་ལྡན་འདས་ཀྱི་ཞལ་ནས། ལས་ངན་ཚན་པོ་ཆེ་བྱས་པས་དམྱལ་བར་མྱུར་དུ་སྐྱེ་བ་དེ་དང་མཇལ་བའི་སྐལ་པ་མེད་པས་དེ་སྐད་མ་ཟེར་ཅིག་ཅེས་གསུང་ངོ༌། །དེའི་ཚུལ་ཞུས་པས་ཁྱེད་རང་གི་གཙུག་ལག་ཁང་དེ་ན་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་བརྒྱད་སྟོང་པ་དངུལ་གྱི་གླེགས་བམ་ལ་གསེར་གྱིས་བྲིས་པའི་ཤོག་བུ་གཉིས་བརྐུས་ཏེ་གཟུགས་འཚོང་ལ་བྱིན་གསུང་ངོ༌། །དེ་པཎྜི་ཏ་དེ་ལྟ་བུར་རང་གི་ལས་ངན་ཡང་མི་ཤེས་པའི་སེམས་ཅན་གྱིས་བཅོམ་ལྡན་འདས་ལ་གསོལ་བ་འདེབས་སུ་འཛུད་པ་སྙམ་དུ་སྡུག་བསྔལ་ནས་དེར་ལོག་སྟེ་སྒོ་ཕྱིར་བྱོན་པ་དང༌། །དགེ་བསྙེན་གྱིས་སློབ་དཔོན་ལ་ཕྱག་ཕུལ་ནས་ཞུས་པས། །ཁྱོད་དམྱལ་བར་སྐྱེ་བར་དེ་ལྟ་བུའི་ལས་བྱས་པས་མི་ཤེས་པར་ཞུར་བཅུག་ངན་པ་ཡིན་ཞེས་གསུང་ངོ༌། །བདག་གིས་ཅི་བགྱིས་ཞེས་སྨྲས་པ་སྔར་གྱི་གཏམ་བསྙེན་པ་དང༌། །དེ་ངོ་ཚ་བ་དང་རྣམ་སྨིན་དམྱལ་བར་སྐྱེ་བས་སྐྲག་ནས་མང་པོ་དུས་སོ། །དེ་ནས་ཡང་སློབ་དཔོན་ལ་ཕྱག་ཕུལ་ཏེ་བདག་ལས་ངན་པ་འདི་ལས་ཐར་པའི་ཐབས་ཀྱིས་རྗེས་སུ་གཟུང་དུ་གསོལ་ཞེས་ཞུས་པས། དེ་ཁྱོད་ཀྱིས་ནུས་ན་ནི་ངས་
མི་ཤེས་པས་བཅོམ་ལྡན་འདས་ལ་ཞུ་དགོས་ཞེས་གསུངས་ཏེ། ནང་པར་ཆོས་པའི་རྗེས་ལ་ཕྱག་དང་བསྐོར་བ་བྱས་ནས་བདག་གིས་སྡིག་དེ་ལས་ཐར་བའི་ཐབས་བདོག་ན་ཕུགས་རྗེས་གཟུང་བར་ཞུ་ཞེས་གསོལ་བས། ཐབས་གཞན་མེད་མ་ཤི་བ་ལ་ངའི་ཡི་གེ་དྲུག་པ་འདི་སྒོམ་བཟླས་རྒྱུན་མི་ཆད་པར་བྱས་ན་ཐབས་ཀྱི་མཆོག་གོ་ཞེས་གསུང་ངོ༌། །པཎྜི་ཏས་ཏིང་ངེ་འཛིན་དེ་ལས་བཞེངས་ཏེ་ཕྱིར་བྱོན་ནས་ཁྱོད་བྱ་བ་གཞན་ཐམས་ཅད་བཏང་སྟེ། བཅོམ་ལྡན་འདས་ཡི་གེ་དྲུག་པའི་སྒོམ་བཟླས་ཀྱིས་དུས་འདའ་བར་བྱས་ན་ཕན་ཡོན་ཆེན་པོ་འབྱུང་ཞེས་འཕགས་པ་གསུང་ངོ་ཞེས་སྨྲས་པས། དེར་དགེ་བསྙེན་གྱིས་སློབ་དཔོན་ལ་གདམས་ངག་རྫོགས་པར་ཞུས་ཏེ། དེ་སྡིག་པའི་འབྲས་བུ་ལ་ཤིན་ཏུ་འཇིགས་སྐྲག་པས་ལྷོ་ཕྱོགས་དཔལ་གྱི་རིའི་ནགས་གསེབ་ཤིན་ཏུ་དབེན་པར་ཕྱིན་ཏེ། ཤིང་མ་ལའི་སྡོང་པོའི་ལོགས་ལ་བུག་པ་ཁོང་སྟོང་ཡོད་པའི་ནང་དུ་བསྡད་དེ་ཤིང་དེའི་པགས་པ་ཟ་ཞིང་ལོ་བཅུ་གཉིས་གཞན་ཅི་ཡང་ཡིད་ལ་མི་བྱེད་པས་དེར་སྒྲུབ་པར་བྱས་སོ། །ནམ་ཞིག་ཕྱིར་སྒོམ་བཟླས་བྱེད་པའི་ཚེ་བྱ་རོ་གཅིག་གིས་ཡུལ་གཞན་ནས་འབྲས་ཟན་དུམ་བུ་ཁྱེར་ཏེ་སྡོང་པོ་དེའི་ཡལ་གའི་སྟེང་དུ་བཟའ་བར་བརྩམས་པ་དང་ཁ་ནས་ཤོར་ཏེ་ལྷུང་བ་དེ་དང་པོའི་ཟས་སུ་དྲན་ཏེ་ཟོས་པས་དེ་ལ་སྲེད་པ་ཆེན་པོ་སྐྱེས་ཏེ་གྱོ་མོའི་དུམ་བུ་ཁྱེར་ནས། མཐར་གྱིས་འགྲོ་བའི་ཁྱིམ་ཀུན་གྱི་སྒོར་ཕྱིན་ནས་བླངས་པས་འབྲས་ཟན་ལ་སོགས་པ་ཁྱེར་ནས་ཕྱིན་ཀྱང་ཅི་ཡང་མ་མཐོང་སྟེ། ཐམས་ཅད་ཀྱང་དེ་བཞིན་ནང་དུ་ལོག་པས། དེའི་བསམ་པ་ལ་འདི་ནི་ངེས་པར་ང་རང་གི་ལས་ངན་ལེན་ཏེ། དེ་དང་ལས་ངན་མ་ཟད་སྙམ་པའི་ཁྲོ་བ་དང་བཅས་པས་གྱོ་མོ་ས་ལ་བརྡབས་ནས་ཡང་སྡོང་པོའི་སར་ལོག་གོ །དེའི་ཚེ་གྱོ་མོ་ཆག་པའི་དུམ་བུ་ཅིག་སའི་གཏིང་དུ་སོང་དེ་ཀླུ་ནོར་རྒྱས་ཀྱི་མདུན་དུ་བྱུང་བ་དང་ས་གཡོ་བ་ལ་སོགས་པའི་ལྟས་བྱུང་བ་དང༌། ཀླུའི་རྒྱལ་པོས་འདི་གཉིས་ཀྱི་རྒྱུ་ཅི་ཡིན་སྙམ་དུ་མངོན་ཤེས་ཀྱིས་བལྟས་པས་དེ་ལས་བྱུང་བར་ཤེས་ཏེ། དེས་བཟའ་བཏུང་ཕུན་སུམ་ཚོགས་པ་ཁྱེར་ནས་དེའི་དྲུང་དུ་ཕྱིན་ཏེ་དྲངས་པས། འདི་མི་འདོད་དེ་ང་ལས་ངན་པ་བསགས་པའི་གང་ཟག་ཡིན། དེ་རིང་འདི་ཟ་ན་ནང་བར་ཅི་བཞེས་གསུངས་ནས་མ་བཞེད། ཀླུ་རྒྱལ་གྱིས་ནང་པར་ནས་ཀྱང་བདག་
གིས་ཉི་མ་རེ་རེ་ཞིང་འདྲེན་པས་ཅིས་ཀྱང་གསོལ་བར་ཞུ་ཞུས་པས། དེར་ཟོས་ཏེ་ཀླུའི་རྒྱལ་པོ་ཡང་དགའ་བཞིན་དུ་ལོག་སྟེ། ནང་པར་ནས་ཉི་མ་རེ་རེ་ཞིང་བཟའ་བཏུང་མང་པོ་བུ་མོ་ལ་བསྐུར་ཏེ་གཉིས་ཀ་ཡང་སློབ་དཔོན་གྱི་དྲུང་དུ་འོང་ངོ༌། །དེ་ནས་ཀླུའི་བུ་མོ་དེ་སློབ་དཔོན་ལ་ཆགས་ཏེ་ཕ་ལ་སྨྲས་པ། ཡབ་གཅིག་བདག་སློབ་དཔོན་གྱི་ཇོ་མོ་བྱེད་པས་ཕུལ་ཅིག་ཅེས་སྨྲས་ཏེ་ཀླུའི་རྒྱལ་པོས་སློབ་དཔོན་ལ་འབུལ་ལགས་ཀྱིས་ཞེས་གསོལ་བ་བཏབ་པས་མ་གནང་ངོ༌། །དེའི་ཚེ་ཀླུའི་རྒྱལ་པོས་གསོལ་བ་ཆེར་བཏང་བ་དང༌། དེ་སློབ་དཔོན་གྱིས་འདི་མི་འགྲུབ་སྙམ་སྟེ་འོ་ན་ངའི་ཕ་ཐུགས་རྗེ་ཆེན་པོ་དང༌། མ་རྗེ་བཙུན་སྒྲོལ་མ་ཡིན་ཏེ། བུ་མོ་འདི་ལ་ཕས་ཁྲུས་དང༌། མས་བཀྲ་ཤིས་གསོལ་ན་བྱ། དེ་མ་གྲུབ་ན་ང་དེ་ལྟ་བུའི་བྱ་བ་མི་བྱེད་དོ་གསུངས་པས་ཀླུའི་རྒྱལ་པོས་ཕོ་ཊ་ལར་ཕྱིན་ནས་གཉིས་པོ་ལ་ཕྱག་བྱས་ཏེ། དེ་ལྟ་བུ་ཁྱེད་ཀྱི་སྲས་བོ་ལ་རུང་ན་བདག་གི་བུ་མོ་ལ་ཐུགས་རྗེས་གཟིགས་པར་ཞུས་པས། རུང་ཞེས་གསུངས་ནས་མྱུར་བར་གསུམ་ཀས་བྱོན་ཏེ། འཕགས་པས་སྐུ་ཁྲུས་དང༌། འཕགས་མས་ཨཥྚ་མངྒལ་ཞེས་བྱ་བའི་བཀྲ་ཤིས་གསོལ་ནས་བཙུན་མོར་བཞེས་སོ། །དེ་འཇིག་རྟེན་དུ་ཀ་མ་ལ་གོ་མི་ཞེས་པའི་གྲུབ་ཐོབ་ཆེན་པོར་གྲགས་སོ། །དེས་ན་དམ་པ་རྣམས་ཀྱིས་ལོ་རྒྱུས་འདི་ཡིད་ཆེས་པར་བྱས་ནས། ཡི་གེ་དྲུག་པའི་སྒོམ་བཟླས་ལ་བརྩོན་པར་བྱས་ན་ངེས་པར་འགྲུབ་གསུང་ངོ༌། །སློབ་དཔོན་པདྨ་དགེ་བསྙེན་གྱིས་འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས་སོ། །པཎྜི་ཏ་བི་མ་ལ་ཤྲཱི་མི་ཏྲ་དང༌། ལོ་ཙཱ་བ་ལྡན་མ་ཚུལ་ཁྲིམས་སེང་གེས་བསྒྱུར་བའོ། །