རྟའི་ཚེའི་རིག་བྱེད་ཤ་ལི་ཧོ་ཏྲས་བསྡུས་པ་ཞེས་བྱ་བ།
རྒྱ་གར་སྐད་དུ། ཤ་ལི་ཧོ་ཏྲ་ཡ་ཡཱཾ་ཨ་ཤྭ་ཨཱ་ཡུར་བཻ་དྱ་སཾ་ཧི་ཏ་ནཱ་མ། བོད་སྐད་དུ། རྟའི་ཚེའི་རིག་བྱེད་ཤ་ལི་ཧོ་ཏྲས་བསྡུས་པ་ཞེས་བྱ་བ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུཪྻ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཁྱབ་འཇུག་གི་ནི་བཙུན་མོའི་མཆོག །ལྷ་མོ་དཔལ་མོ་རྟ་ཡི་མངལ། །ཕྱག་འཚལ་ནས་ནི་རྟ་རྣམས་ཀྱི། །ཚེ་ཡི་རིག་བྱེད་རྟོགས་བཤད་བྱ། །གང་ལས་གང་ཕྱིར་གང་དོན་ཡིན། །དེ་དག་ཀུན་ཀྱང་བརྗོད་པར་བྱ། །ཁ་བ་ཅན་གྱི་བྱང་ཕྱོགས་ན། །ལྷ་ཡི་དབང་པོའི་གནས་འདྲ་བར། །ཤ་ལི་ཧོ་ཏྲ་དྲང་སྲོང་ཆེ། །སྦྱིན་སྲེག་བྱས་ནས་འདུག་པའི་ཚེ། །ལེགས་ཐོས་ཐོས་པ་ཕུན་ཚོགས་ལྡན། །བུ་ཡིས་ཕ་ལ་དྲིས་གྱུར་པ། །ལེགས་ལྡན་ཆོས་རྣམས་ཐམས་ཅད་མཁྱེན། །རྟ་ཚེའི་རིག་བྱེད་མཁས་ལགས་ན། །རྟ་རྣམས་ཀྱི་ནི་གསོ་བ་འདི། །ཇི་ལྟར་བྱུང་བར་གྱུར་པ་ལགས། །དྲང་སྲོང་གཟི་བརྗིད་ཆེན་པོ་ཡིས། །དེ་ལ་མཉན་པར་གྱིས་ཞེས་སྨྲས། །སྔོན་ཚེ་རྟ་རྣམས་རང་དགར་ནི། །མཁའ་ལ་རྒྱུ་ཞིང་གནས་བྱེད་ཅིང༌། །ཟས་དང་སྤྱོད་པ་ཅི་དགའ་བར། །དེ་རྣམས་རང་དགར་སྤྱོད་པ་ཡིན། །ཐམས་ཅད་ལ་ཡང་ལུས་ཀྱི་ནི། །གོམས་པས་ནད་ནི་བྱུང་མ་གྱུར། །གང་ནས་བརྩམས་ཏེ་ང་ཡི་བུ། །བཞོན་པ་ཉིད་དུ་བྱས་གྱུར་པ། །དེ་ནས་བརྩམས་ཏེ་གནོད་བྱེད་པའི། །ནད་ཀུན་གྱིས་ནིག་ཟིར་བ་ཡིན། །དེ་ནས་དེ་ལ་སེམས་གདུང་སྐྱེས། །ང་ཡིས་དཀའ་ཐུབ་ཆེན་པོ་བྱས། །ཚངས་པ་ལྷ་ནི་མཉེས་བྱས་ནས། །དེ་ཡི་གསོ་བ་རྙེད་པ་ཡིན། །ཟུག་རྔུ་ལུས་ཀྱི་གསོ་བ་དང༌། །དེ་བཞིན་ཆ་སྤྱད་ཉིད་དང་ནི། །རྟེའུ་ཡི་ནི་གསོ་བ་དང༌། །དུག་གི་རང་བཞིན་སྨན་དང་ནི། །བཅུད་ལེན་གདོན་ནད་གསོ་བ་དང༌། །རོ་ཙ་བྱེད་པ་བརྒྱད་པ་ཡིན། །དེ་ལྟར་རྟ་ཡི་ཚེའི་རིག་བྱེད། །འདི་ནི་ཡན་ལག་བརྒྱད་དུ་བཤད། །ཡན་ལག་བརྒྱད་པོ་འདི་ཡི་གནས། །རྒྱས་པར་བུ་ཡིས་མཉན་པར་གྱིས། །མདོ་ཡི་གནས་ནི་དང་པོ་སྟེ། །དེ་ཡི་ཕྱི་མ་གཉིས་པ་ཡིན། །གསུམ་པ་འདིར་ནི་ལུས་ཡིན་ལ། །བཞི་པ་ཉིད་ནི་གསོ་
པ་ཡིན། །ལྔ་པ་རྟེའུ་སྨན་ཡིན་ཏེ། །དྲུག་པ་ཕྱི་མའི་ཕྱི་མ་ཡིན། །བྱ་བ་དེ་དང་དེ་བསྟན་པ། །གྲུབ་པའི་གནས་ནི་བདུན་པ་ཡིན། །གསང་བ་གནས་ནི་བརྒྱད་པ་སྟེ། །ཚེ་ཡི་རིག་བྱེད་བསྡུས་པ་ཡིན། །ལེའུའི་རིམ་པ་ངེས་པ་ནི། །གནས་གནས་སུ་ནི་ངས་བཤད་བྱ། །ཚེ་ཡི་རིག་བྱེད་བྱུང་བ་དང༌། །དེ་བཞིན་སློབ་མ་སྦྱང་བུ་དང༌། །ངེས་པའི་ཚིག་དང་བྱུང་ཚུལ་དང༌། །དེ་ནས་མངལ་དུ་ཆགས་གྱུར་དང༌། །རང་བཞིན་དང་ནི་སྐྱེ་གནས་དང༌། །དེ་བཞིན་རིགས་ནི་བཞི་དག་དང༌། །ཡན་ལག་ཐམས་ཅད་བརྟག་པ་དང༌། །བཤད་པ་དང་ནི་ཚད་གཞལ་དང༌། །ཡན་ལག་བཅུ་ཡི་ཆ་དབྱེ་དང༌། །སྡུག་དང་མི་སྡུག་ཤེས་བྱ་དང༌། །ཚད་ཤེས་བྱ་དང་ཟས་སྦྱོར་བ། །མཛེས་དང་མཚན་གྱི་ལེའུ་དང༌། །དེ་བཞིན་ཁ་དོག་ཤེས་བྱ་དང༌། །ཞུར་མདངས་དང་ནི་ཐིག་ལེ་བརྟག །ཤ་རའི་མདོག་ནི་བཟང་ངན་དང༌། །འདྲེན་མ་རྒྱལ་པོའི་བཞོན་པ་དང༌། །མིག་བརྟག་པ་དང་སོ་བརྟག་པ། །གཙུག་དང་ན་ཚོད་ཤེས་བྱ་དང༌། །ཚེ་ཤེས་པ་དང་བཅས་པ་དང༌། །དྲི་དང་སྐད་གསང་བརྟག་པ་དང༌། །འགྲོས་དང་ལུས་འཕེལ་ཆོ་ག་དང༌། །རྒྱུག་པ་བརྟག་དང་གྲ་མ་ཅན། །ཉེས་པ་ཆེ་དང་སྙིང་སྟོབས་བརྟག །གཟི་མདངས་བརྟག་དང་རིགས་བརྟག་དང༌། །སྟོན་ཀ་པ་དང་ཉོ་འཚོང་བཅས། །དེ་ལྟར་གནས་ནི་དང་པོ་ཡི། །ལེའུའི་རིམ་པ་གནས་པ་ཡིན།། །།དྲི་བ་ཆེན་པོ་ཉིད་དང་ནི། །དེ་བཞིན་སྒོ་ང་ལས་བྱུང་དང༌། །རྨེན་བུའི་ལེའུ་གསུམ་པ་སྟེ། །ནད་ཤེས་བྱ་བ་རྣམ་གསུམ་དང། །ཡིད་བདེ་ཡིད་མི་བདེ་ཤེས་དང༌། །རླུང་འཁྱིལ་འཁྲུལ་བ་ཤེས་བྱ་དང༌། །རླུང་འཁྱིལ་གཏུགས་པ་ཤེས་བྱ་དང༌། །དེ་བཞིན་ལྟོ་བ་རྒྱས་པ་དང༌། །རྩུབ་པར་འཁྱིལ་བའི་ལེའུ་དང༌། །དེ་བཞིན་གཅིན་འགགས་གསོ་བ་དང༌། །རི་དགས་ལྟར་འཁྱིལ་མ་འདྲེས་འཁྱིལ། །རླུང་གི་རྨུ་རྫིང་གསོ་བ་དང༌། །དེ་བཞིན་ཁྲག་གི་གཅིན་ནད་དང༌། །ཀོ་ར་དུ་ཤས་གནོད་གྱུར་དང༌། །སྣུམ་འཁྱིལ་བ་དང་རྣམ་འཁྱིལ་བ། །ཁྲག་འཁྲུགས་ནད་ནི་གསོ་བ་དང༌། །ཁྲག་འཁྲུགས་ནད་གཞི་བཞི་ལས་གྱུར། །ཁྲག་འཁྲུགས་རྗེས་ལ་གསོ་བ་དང༌། །འཐེང་དང་རྐང་ནད་གསོ་བ་དང༌། །
སྐྱེ་འབྲུ་དབུགས་མི་བདེ་གསོ་དང༌། །དབུགས་མི་བདེ་བ་ལུད་པ་ཅན། །སྣ་རྣག་དང་ནི་མངོན་པར་ཚ། །རླུང་དང་མཁྲིས་པ་བད་ཀན་རིམས། །འདུས་པ་ལས་གྱུར་རིམས་གསོ་དང༌། །དུས་ནི་གོ་བཟློག་ལས་བྱུང་དང༌། །སྣད་པ་ལས་གྱུར་རིམས་དང་ནི། །ཡིད་ཀྱི་རིམས་ནི་གསོ་བ་དང༌། །དེ་བཞིན་འཁྲུ་བ་མང་པོ་དང༌། །སྨན་ཁུའི་གོང་བུའི་སྦྱོར་བ་དང༌། །སྦེག་པ་བརྟག་པའི་ལེའུ་དང༌། །དེ་བཞིན་རྔ་མའི་ནད་གསོ་དང༌། །གཞང་བྱུང་བ་ཡི་གསོ་བ་དང༌། །ཁྲག་དང་མཁྲིས་པ་གསོ་བ་དང༌། །སོ་ལྷག་བྱུང་བ་གསོ་བ་དང༌། །འུག་པའི་རྐང་འདྲའི་ལེའུ་དང༌། །གདུག་པས་ཟིན་པའི་མཚན་ཉིད་གསོ། །སྨད་པའི་མཚན་ཉིད་ཅན་ལེའུ། །དུག་གི་ཤུགས་ནི་ཤེས་བྱ་དང༌། །དེ་བཞིན་དུག་གིས་ཟིན་གསོ་བ། །དུག་མདས་ཕོག་པ་ཞེས་བྱ་བ། །གཉིས་པའི་གནས་སུ་བསྡུས་པ་ཡིན། །མངལ་ཆགས་ཞེས་པའི་ལེའུ་དང༌། །དེ་བཞིན་ལུས་ཀྱི་རྣམ་དབྱེ་དང། །ལུས་བསྐྱེད་པ་དང་རྩ་ཡི་ཚོགས། །ཡུལ་དང་ཚ་སོགས་བསྟན་པ་དང༌། །འཕེལ་དང་འབྲི་བ་ཤེས་བྱ་དང༌། །རོ་དྲུག་གི་ནི་བདག་ཉིད་དང༌། །ནང་གི་བདག་ཉིད་ཅན་བྱུང་དང༌། །བྱ་དང་བྱ་མིན་བརྟག་པ་དང༌། །འདིར་ནི་ཟས་སྐོམ་ཆོ་ག་དང༌། །དེ་བཞིན་ལྗང་པའི་རོ་ཡི་ཚོགས། །གསོ་བའི་ཡན་ལག་དབང་བྱས་དང༌། །ལོང་དང་ལྐུགས་སོགས་བསྟན་པ་དང༌། །དེ་བཞིན་སྐྲངས་པ་གསོ་བ་དང༌། །གཞན་ཡང་རྨ་གཉིས་ལེའུ་དང༌། །ཟུག་རྔུ་ཁོང་བརླག་གདོན་པ་དང༌། །ཟུག་རྔུ་དབྱུང་བའི་ལེའུ་དང༌། །སྦུབས་ཀྱི་རྨ་ནི་གསོ་བ་དང༌། །དེ་བཞིན་ཆག་གྲུགས་གསོ་བ་དང༌། །ཆུ་བུར་གསོ་བ་ཉིད་དང་ནི། །རྒོད་མའི་མཚན་ཉིད་བརྟག་པ་དང༌། །རླུང་ཉེན་མངལ་གྱི་ཉེས་པ་དང༌། །མངལ་དུ་ཤི་བའི་ནད་གསོ་དང༌། །བ་ལའི་ཏིལ་མར་དང་བཅས་པ། །ལེའུའི་རིམ་པ་འཆད་རྣམས་ཀྱིས། །གནས་ནི་གསུམ་པ་ཡིན་པར་བཤད། །གསོ་བའི་གནས་ཀྱི་ལེའུ་ནི། །སེམས་ཁོང་ཆུད་པར་བྱེད་པ་དང༌། །ནི་ར་ཀ་ཡི་ནད་གསོ་དང༌། །རྒན་ནད་བྱེ་བ་མེད་པ་ཉིད། །ཨ་བ་ཏང་ཀའི་གསོ་བ་དང༌། །ལྕེ་རིངས་སྣ་ནད་འཛག་བྱེད་དང༌། །སྣ་ནད་གལ་ལ་ཀ་གསོ་དང༌། །མགོ་ནད་རླུང་ལས་གྱུར་པ་དང༌། །
དེ་བཞིན་མཁྲིས་པ་ལས་གྱུར་དང༌། །བད་ཀན་ལས་གྱུར་ཁྲག་ལས་གྱུར། །འདུས་པ་ལས་གྱུར་མགོ་ནད་དང༌། །གློ་བུར་སྲིན་བུ་ལས་གྱུར་པ། །དེ་བཞིན་རྣ་བའི་ནད་གསོ་དང༌། །མཆི་མ་འཛག་པ་གསོ་བ་དང༌། །རླུང་ནད་པ་ལ་ཤ་ཉིད་དང༌། །དེ་བཞིན་ཀོལ་ཉེས་ནད་ཉིད་དང༌། །གཞན་ཡང་བྲང་ཆ་བ་ཡི་ནད། །ཚེའུ་ཚེའི་ནད་ནི་གསོ་བ་དང༌། །གཟུགས་འཁུམས་གཟུགས་གྱོང་ནད་གསོ་དང༌། །རྨིག་པ་རྡུལ་ཅན་ནད་གསོ་དང༌། །སྦལ་བ་ཚ་བར་བཤད་པ་དང༌། །མཚན་ནི་འཕྱང་བར་གྱུར་གསོ་དང༌། །རླིག་པ་སྐྲངས་པ་གསོ་བ་དང༌། །དེ་བཞིན་རླིག་འབྲས་གཡོས་པ་དང༌། །ཁྲག་ལས་གྱུར་པའི་རླིག་ནད་དང༌། །དེ་བཞིན་མཁྲིས་པ་ལས་གྱུར་དང༌། །བད་ཀན་ལས་གྱུར་རྔ་མའི་ནད། །སྣ་རེངས་དེ་བཞིན་རྒྱབ་རེངས་དང༌། །ལྟོ་བ་གཞོང་འདྲའི་ནད་གསོ་དང༌། །མཆུ་སྐྲངས་ནད་ནི་གསོ་བ་དང༌། །རླུང་ནད་ཐི་བ་ལྟ་བུ་དང༌། །མཁྲིས་ནད་སྦྲང་བུ་ལྟ་བུ་དང༌། །རི་དགས་ཅན་དང་རི་དགས་གླལ། །ཆུ་འཛིན་ཞེས་བྱའི་ནད་དང་ནི། །དེ་བཞིན་སྙིང་ནད་རླུང་གྱུར་དང༌། །མཁྲིས་པ་ལས་གྱུར་སྙིང་ནད་དང༌། །གཞན་ཡང་བད་ཀན་ཅན་སྙིང་ནད། །སྲིན་བུ་ལས་གྱུར་སྙིང་ནད་དང༌། །རླུང་གི་གཟེར་དང་ལྐོག་མའི་ནད། །སྣུམ་ཆོས་ཉེས་པའི་ནད་དང་ནི། །ལན་ཚྭའི་སྦྱོར་ཉེས་ཆང་བླུད་ཉེས། །དེ་བཞིན་འབྲུ་ཟོས་ཉེས་པ་དང༌། །འོ་མ་འཐུང་ཉིས་ཆུ་འཐུང་ཉེས། །སྦུ་བས་ལས་བླུད་ནི་ཉེས་པ་དང༌། །བརྡུང་ཉེས་བཞོན་པ་པོས་སྣད་དང༌། །ལུད་པ་གསོ་དང་མཛེ་ནད་གསོ། །གྱེན་འབྱུང་གློ་ནད་གསོ་བ་དང༌། །དྲེགས་དང་ཉེས་པ་གསོ་བ་དང༌། །སྨྱོ་ནད་གསོ་དང་མཚན་མོ་བཅོམ། །གཞང་འབྲུམ་གསོ་དང་རྔོ་གསོ་དང༌། །དེ་བཞིན་གཡན་པ་གསོ་བ་དང༌། །སྐྲངས་ནད་གསོ་བ་ཉིད་དང་ནི། །གཞན་ཡང་རི་བོ་ཅན་ནད་གསོ། །ཡན་ལག་ཕྱོགས་གཅིག་ནད་ཅོང་ཅན། །མགོ་འཁོར་ཆུ་ཡི་རྨུ་རྫིང་དང༌། །ཆུ་ལྷའི་གདོན་ནི་གསོ་བ་དང༌། །མིག་ཅན་འགེབས་པ་ཁན་གསོ་དང༌། །མིག་ནད་མིག་ནད་སྒོ་ང་ཅན། །ཆུ་བུར་ཅན་དང་སྔོ་མཚན་ཉིད། །ལིང་ཏོག་ཅན་དང་མཆི་མ་འཛག །ལིང་ནད་མ་འདྲེས་མཐོང་བ་ཉིད། །མིག་དམར་དང་ནི་མུན་ཛ་ཅན། །མུན་ཛའི་དྲ་བ་ཅན་
གསོ་དང༌། །ཐལ་མོ་བྱེད་པ་ཅན་གྱི་ནད། །ཁྲག་འཁྲུགས་པ་ཡི་ནད་གསོ་དང༌། །ཚིགས་སུ་རྨ་བྱུང་ཐོག་འབབ་དང༌། །གཉེའུ་རེངས་དང་སྦོས་ནད་གསོ། །འཁྲུ་བ་གསོ་བ་ཞེས་བྱ་བ། །གནས་ཆེན་བཞི་པ་གསོ་བ་ཡིན། །རྟེའུའི་གདོན་ནི་བསྟན་དང་བཤད། །འཁྲུ་དང་དེ་བཞིན་རིམས་དང་ནི། །གཡན་པ་ལྐོག་ནང་ཤ་ལུ་ཀ །ཁོང་བའི་སྲིན་ནད་གཅིན་སྲིར་བཅས། །བོང་བུ་ཅན་དང་རླིག་རླུགས་དང༌། །གཅིན་ནད་གཟེའུ་ཞེས་བྱ་བ། །སྦོ་དང་བྲང་ནད་ཅེས་བྱ་བ། །བཀྲེས་པས་ཉེན་དང་ལུད་པ་གསོ། །ཟད་བྱེད་དང་ནི་རོ་ཧི་ནི། །རི་མོ་ཅན་དང་སྦལ་བ་འདྲ། །མེས་ཚིག་ཚིགས་ནད་གཅིན་དམར་གསོ། །ཡིད་མི་བདེ་དང་རྣ་བའི་ནད། །སོ་ནད་དང་ནི་མཇིང་བའི་ནད། །འགྲམ་ནད་ལྕེ་ཡི་ནད་བཅས་དང༌། །མིག་ནད་སྣ་ནད་བཅས་པ་དང༌། །རྨིག་པའི་ནད་དང་དབྱིག་པའི་ནད། །སེམས་འཁྲུལ་པ་དང་རྡུལ་ནད་བཅས། །སྦྲུལ་གྱིས་ཟིན་དང་མེས་ཚིག་གསོ། །དེ་བཞིན་ཆག་གྲུགས་གསོ་བ་ནི། །ལྔ་བའི་གནས་སུ་ངས་བཤད་ཅིང༌། །རྟེའུའི་ནད་རྣམས་གསོ་བ་ཡིན།། །།རྟ་ཁང་པ་ནི་བརྟག་པ་དང༌། །ཁང་པའི་ལྷ་རྣམས་མཆོད་པ་དང༌། །དེ་གཞིན་གདོན་ནི་བསལ་བ་དང༌། །དཔལ་འཕེལ་བ་ཞེས་བྱ་བ་དང༌། །རྟ་རྣམས་རྗེས་སུ་བསྲུང་བ་དང༌། །རྣམ་རྒྱལ་རྟ་ནི་དབང་བསྐུར་དང༌། །མཆེ་བ་ཆག་པའི་ལྟས་བསྟན་དང༌། །ལྟས་ཀྱི་མཚན་ཉིད་གཞན་བསྟན་དང༌། །ཞི་བ་བསྐྱེད་པར་བྱ་བ་རྣམས། །དྲུག་པའི་གནས་སུ་བསྡུས་པ་ཡིན། །དང་པོར་རྗེས་བཏུང་ཆོ་ག་སྟེ། །དེ་ལོག་ལན་ཚྭའི་ཆོ་ག་ཡིན། །སྣུམ་དང་ལན་ཚྭ་ཆང་དང་འབྲུ། །འོ་མ་ཆུ་དང་སྦུབས་ལས་བྱུང༌། །གནོད་པའི་ནད་ནི་བདུན་པོ་ཡི། །ནད་གཞི་གསོ་བར་བཅས་བསྟན་དང༌། །མར་བླུད་དུགས་ཀྱི་ཆོ་ག་དང༌། །དུར་བྱིད་ཀྱི་ནི་ཏིལ་མར་དང༌། །དོན་གྲུབ་ཅེས་བྱའི་ཏིལ་མར་དང༌། །མེ་བཙའི་ལས་ཀྱི་ཆོ་ག་དང༌། །མས་གཏོང་ཆོ་ག་བསྟན་པ་དང༌། །གཙགས་བུ་ལས་གྱུར་ནད་བསྟན་དང༌། །དེ་བཞིན་ལྟ་བའི་ལས་བསྟན་དང༌། །སྣུམ་བླུད་པ་ཡི་ཡོན་ཏན་དང༌། །རོ་ཙར་བྱེད་པ་བསྟན་པ་དང༌། །སྣུམ་ལས་གྱུར་བའི་ནད་གསོ་བའི། །བྱ་བ་བསྟན་པའི་གནས་འདི་ནི། །བདུན་པ་གྲུབ་པའི་མཚན་ཉིད་ཡིན། །དང་པོ་རི་མོ་ལས་ཆེ་བརྟག །
དེ་རྗེས་ནད་ཀྱིས་འཆི་ལྟས་བསྟན། །ནད་མེད་འཆི་ལྟས་བསྟན་པ་དང༌། །ཕོ་ཉ་ལ་སོགས་ལྟས་བསྟན་དང༌། །ཕྱེ་མ་རྣམས་ཀྱི་ལེའུ་དང༌། །སྨན་མར་དང་ནི་ཏིལ་མར་དང༌། །དེ་བཞིན་སྨན་ཁུའི་ལེའུ་དང༌། །མ་ཞུ་སྦྱང་བའི་སྦྱོར་བ་དང༌། །སོ་སོར་བཏུང་དང་རྫས་སུ་བཏུང༌། །མས་གཏོང་ལས་ཀྱི་ཆོ་ག་དང༌། །སྣ་སྨན་རྣམས་ནི་བསྟན་པ་དང༌། །འཇམ་རྩི་སྣ་ཚོགས་བསྟན་པ་དང༌། །དེ་བཞིན་ཕྱི་ཡི་ལྡེ་གུ་དང༌། །ཐལ་སྨན་ལ་ན་ཚྭའི་ཆོ་ག་དང༌། །འབྲས་བུ་གསུམ་དང་ཨ་རུ་ར། །གུ་གུལ་སྒོག་སྐྱའི་ཆོ་ག་དང༌། །མི་ལ་བརྟག་པ་དང་བཅས་པའི། །ཁུར་བསྟན་པ་ཡི་ལེའུ་དང༌། །དེ་བཞིན་སྐྱེས་བུ་དང་བཅས་པའི། །ཤིང་རྟ་དང་སྦྱར་ཆོ་ག་དང༌། །སྔགས་དང་བྱ་བའི་སྦྱོར་བ་དང༌། མཆོག་ཏུ་གསང་བ་ཉིད་ཡིན་ནོ། །དེ་ལྟར་གསང་བ་མཆོག་གྱུར་པའི། །གནས་ཀྱི་ལེའུ་ཡིན་ཤེས་བྱ། །གནས་བརྒྱད་ཡན་ལག་བརྒྱད་དང་བཅས། །རྟ་ཡི་ཚེ་ཡི་རིག་བྱེད་མཆོག །མ་ལུས་འདི་ནི་ཚངས་པ་ཆེ། །ཞལ་བཟང་བཞི་དང་ལྡན་པས་བྱིན། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གནས་དང་པོ་ལས་ཚེའི་རིག་བྱེད་བྱུང་བའི་ཚུལ་བསྟན་པ་ཞེས་བྱ་བའི་ལེའུ་སྟེ་དང་པོའོ།། །།དེ་ནས་ཤ་ལི་ཧོ་ཏྲ་ཡིས། །ལེགས་ཐོས་ལ་ནི་ཡང་སྨྲས་པ། །སློབ་མ་སྦྱང་བ་ཞེས་བྱ་བ། །ལེགས་ཐོས་དེ་བཞིན་ང་ལས་ཉོན། །སློབ་མ་རིགས་བཟང་ཡན་ལག་ཚང༌། །མཚན་ལྡན་དད་པར་བཅས་པ་བྱ། །བྲམ་ཟེ་སོགས་གསུམ་གང་ཡང་རུང༌། །གཙང་མ་བླ་མས་སློབ་ཏུ་གཞུག །རྟ་ལ་ཤིན་ཏུ་བརྩེ་བས་ན། །བྲམ་ཟེ་ལས་ནི་སློབ་མ་གཟུང༌། །སྐྱེ་དགུ་སྐྱོང་ལ་བརྩོན་པ་ཡི། །རྒྱལ་རིགས་སློབ་མར་གཟུང་བར་བྱ། །དམངས་རིགས་རྣམས་ནི་གསོ་བ་ཡིས། །འཚོ་བ་ཚོལ་བས་དེ་ཡང་གཟུང༌། །ཉི་མ་བྱང་འགྲོ་བསོད་ནམས་དུས། །གཟའ་ལ་མིག་དམར་ཉི་མ་དང༌། །ཚེས་དྲུག་བརྒྱད་དང་ལྔ་དང་བཅུ། །ཚེས་བཞི་ཚེས་ནི་བཅུ་བཞི་དང༌། །ཚེས་གཅིག་དང་ནི་ཚེས་དགུ་ནི། །རིག་པ་རྩོམ་ལ་སྤང་བར་བྱ། །ཚེས་གྲངས་ལྷག་མ་ཤིས་པ་ཡིན། །གཞན་ཡང་སྐར་མ་པ་ལས་ཉོན། །གང་ཞིག་འཇམ་དང་མྱུར་བ་དང༌། །གཡོ་དང་
གདུག་དང་སྨིན་དྲུག་དང༌། །ཐ་སྐར་མ་གཏོགས་མི་རྣམས་ཀྱིས། །རིག་སློབ་རྩོམ་ལ་རྟག་ཏུ་ཤིས། །སྐར་མ་ཡང་ནི་འདི་རྣམས་དང༌། །ཐང་ཅིག་ཀྱང་ནི་ཤིས་བ་དང༌། །གཟའ་ནི་མ་སྨད་པ་རྣམས་དང༌། །ཆུ་ཚོད་བཟང་ལ་བརྩམ་པར་བྱ། །དེ་ལྟའི་དུས་ནི་ཤིས་པ་ལ། །སློབ་མ་གོས་གཙང་བགོས་པ་དང༌། །བྲམ་ཟེ་མཆོད་ཕྱིར་ཐོགས་དཀར་བཏགས། །དྲི་ནི་དཀར་པོས་བྱུགས་པ་དང༌། །ཕྲེང་བ་དཀར་བཏགས་མཁས་པ་དང༌། །གོས་དཀར་བགོས་པ་འདོན་དུ་གཞུག །དེ་བཞིན་རྒྱལ་རིགས་རྣམས་ཀྱང་ནི། །ཆ་ལུགས་ཐམས་ཅད་དམར་བ་དང༌། །དེ་བཞིན་དམངས་རིགས་ཐམས་ཅད་སེར། །ལྷ་རྣམས་ཐམས་ཅད་བྱེད་དུ་གཞུག །བྲམ་ཟེ་ཡིས་ནི་ཚངས་པ་མཆོད། །རྒྱལ་རིགས་ཀྱིས་ནི་བརྒྱ་བྱིན་ཏེ། །དམངས་རིགས་ཀྱིས་ནི་རླུང་ལྷ་མཆོད། །བྱེ་བྲག་མེད་པར་ཀུན་གྱིས་ནི། །དབྱངས་ཅན་དེ་བཞིན་དཔལ་མོ་དང༌། །ཤ་ལི་ཧོ་ཏྲ་མཆོད་པར་བྱ། །དེ་རྣམས་ལ་ནི་མེ་ཏོག་སྤོས། །ཁ་ཟས་ཕུན་ཚོགས་ཀྱིས་མཆོད་ནས། །དེ་ཡི་འོག་ཏུ་ས་བི་ཏྲ། །མེ་ལ་མར་གྱིས་ཚིམ་པར་བྱས། །བྲམ་ཟེ་རྣམས་ལ་ཁ་ཟས་སྦྱིན། །དེ་ནས་བུ་གཅིག་ཡོན་བྱས་པས། །སློབ་དཔོན་ལ་ནི་ཡོན་བྱིན་ཏེ། །ས་ཕྱོགས་དག་ཅིང་བརྒྱན་པ་རུ། །སློབ་མ་ནུབ་ཏུ་བལྟས་ནས་ནི། །སློབ་དཔོན་ཤར་དུ་བལྟས་ཏེ་བརྗོད། །རྟག་ཏུ་ལས་ལ་བརྩོན་པ་ཡི། །བུ་ཁྱོད་ཀྱིས་ནི་བསླབ་པར་བྱ། །སྲོག་གིས་ཀྱང་ནི་བླ་མ་དང༌། མཉེས་པར་བྱ་ན་ནོར་ཅི་སྨོས། །བླ་མ་བྲམ་ཟེ་ས་བདག་ལ། །བུ་ཡིས་འཁུ་བར་མི་བྱ་སྟེ། །ཁྱོད་ཀྱིས་རྟ་རྣམས་ལ་ཡང་ནི། །འཁུ་བར་ནམ་ཡང་མི་བྱའོ། །ང་ཡི་ཁ་ལས་གང་ཐོས་པ། །དེ་ནི་བུ་ཡིས་འབད་དེ་སློབས། །དེ་བཞིན་ཕོངས་པར་གྱུར་ཀྱང་ནི། །གླེགས་བམ་ལས་ནི་སློབ་མི་བྱ། །གླེགས་བམ་ལས་ནི་གང་བསླབས་དེ། །འཇིག་རྟེན་གཉིས་ཀ་དག་དང་འགལ། །དང་པོ་འདི་དག་ཐམས་ཅད་ནི། །གསོ་བ་བུ་ཡིས་བསླབ་པར་བྱ། །མ་བསླབས་པ་ནི་སྤངས་ནས་ཀྱང༌། །གང་སྨྲས་འདི་ནི་མཉན་པར་གྱིས། །བཅོ་ལྔ་གཉིས་དང་བཅུ་བཞི་གཉིས། །ཚེས་བརྒྱད་དང་བཅས་ས་འགུལ་དང༌། །བུ་བཙས་ཤིང་དྲུང་ཉིད་དང་ནི། །མི་གཙང་བས་ནི་ཁྱབ་གནས་དང༌། །བདག་
ཉིད་མི་གཙང་བ་ཉིད་དང༌། །ནད་ཀྱིས་སེམས་ནི་རྨོངས་པ་དང༌། །རླུང་ནི་ཆེན་པོ་རྒྱུ་བ་དང༌། །དེ་བཞིན་འབྲུག་སྒྲ་སྒྲོགས་པའི་ཚེ། །འདི་བསླབ་པ་ནི་སྤང་བྱས་ལ། །བུ་ཡིས་བསྟན་བཅོས་གཟུང་བར་བྱ། །བསྟན་བཅོས་གཟུང་བ་བྱས་ནས་ནི། །བསྟན་བཅོས་དོན་ནི་གཟུང་བར་གྱིས། །བསྟན་བཅོས་དོན་ནི་གཟུང་བྱས་ནས། །དེ་འོག་ལས་ལ་གོམས་པར་གྱིས། །བསྟན་བཅོས་ཤེས་པ་འབའ་ཞིག་ལ། །ལས་ཀྱི་བྱ་བ་ཙམ་མཐོང་བ། །གསོ་བའི་ལས་ལ་འཇུག་པར་ནི། །དེ་དག་གཉི་ག་དོན་མེད་འགྱུར། །གསོ་བའི་ལས་ལ་འཇུག་པ་ན། །ཁྱོད་ཀྱིས་རྟ་ནི་རྟག་ཏུ་སྐྱོངས། །མི་བཟད་ནད་ཀྱིས་ཉེན་ན་ཡང༌། །ཁྱོད་ཀྱིས་སྤང་བར་མི་བྱའོ། །རྟ་གང་གསོར་ནི་མི་རུང་བ། །དེ་ཡང་རིགས་པས་གསོ་བར་བྱ། །མ་གསོས་ན་ནི་ངེས་པར་འཆི། །གསོས་ཀྱང་ངེས་པ་མེད་གྱུར་པའི། །ནད་ཀྱིས་གདུངས་པར་གྱུར་པ་གང༌། །ནད་ནི་གཞན་ལ་འགོ་བར་འགྱུར། །བསྟན་བཅོས་ལས་དེ་སྤང་བར་བཤད། །སྤང་ཚུལ་དེ་ཡང་ང་ལས་ཉོན། །དེ་ནི་རྟ་བྲེས་ལས་རིང་བར། །སྲུང་མ་དང་བཅས་གཞག་པར་བྱ། །ན་བའི་རྟ་ནི་གང་ཡང་རུང༌། །གཏན་སྤང་བ་ནི་རིགས་མ་ཡིན། །ནད་དང་སྦེགས་དང་རྒས་པའི་རྟ། །གཏན་སྤང་བྲམ་ཟེ་གསོ་དང་མཚུངས། །རྟ་ནི་མཚན་ཉིད་ངན་གྱུར་པ། །ཉོ་བའི་དུས་སུ་བླང་མི་བྱ། །གང་ཞིག་རང་གི་ཁྱིམ་དུ་སྐྱེས། །བྲམ་ཟེ་གཞན་ཡུལ་པ་ལ་སྦྱིན། །ལྟས་ངན་བྱུང་བར་གྱུར་ན་ནི། །འདི་ཉིད་སྦྱིན་པ་གཏང་བར་བྱ། །མི་འཚེ་བ་ནི་ཚེ་སྐྱི་མཆོག །སེམས་ཅན་ལ་བརྟག་བརྩེ་བྱ་ཞིང༌། །དེ་བས་ཅི་ཙམ་གསོ་ནུས་པ། །དེ་ཙམ་ཞིག་ནི་གཞག་པར་བྱ། །བདེ་བར་འཇོག་པར་ནུས་གྱུར་ལས། །ལྷག་པར་འཇོག་པ་འབད་མི་བྱ། །རྟ་ནི་སྡུག་བསྔལ་བར་བཞག་ན། །ཆོས་དོན་འདོད་པ་འཇོམས་པར་འགྱུར། །གཞན་ཡང་རྒྱལ་པོའི་ས་སྐྱོང་བའི། །བྱ་བ་རྟ་ལ་རག་ལས་པས། །དེ་ལ་ཁྱེད་ཀྱིས་གུས་བྱ་ཞིང༌། །དེ་བཞིན་སློབ་དཔོན་བླ་མ་དང༌། །བྲམ་ཟེ་ལ་ཡང་གུས་པར་བྱ། །དེས་ནི་ཁྱེད་ཀྱིས་དཔལ་ཐོབ་འགྱུར། །དེ་ལས་གཞན་དུ་བྱེད་ན་ནི། །ལྟུང་ལས་ཉེ་བར་ལྟུང་བར་འགྱུར། །དམྱལ་བར་རང་ནི་ལྟུང་བ་དང༌། །ངེས་པར་ལྡན་པ་ཉིད་དུ་
འགྱུར། །དམ་པའི་ལམ་ལ་གནས་ན་ནི། །གྲགས་དང་བསོད་ནམས་ཚེ་རིང་དང༌། །ཆོས་དོན་འདོད་པ་མ་ལུས་པའི། །དཔལ་མཆོག་འབད་པ་མེད་པར་འཐོབ། །དེ་སྐད་བརྗོད་ནས་སློབ་པ་མ་ཡིས། །ཁས་བླང་དེ་རྗེས་སློབ་དཔོན་གྱིས། །དུས་ཤིས་པ་ལ་མ་ཡེངས་པར། །སློབ་མ་དེ་ནི་སློབ་ཏུ་གཞུག །དེ་ཡི་འོག་ཏུ་རྒྱུན་དུ་ནི། །མཁས་པ་རྟག་ཏུ་བརྩོན་པ་ཡིན། །བྱ་བ་ཅི་བཞིན་རྫོགས་པར་དུ། །སློབ་མ་དེ་ནི་སློབ་ཏུ་གཞུག །དེ་ལྟར་རིག་པ་བྱིན་པ་ཡིས། །བླ་མས་སློབ་མར་བསླབ་པ་ཡིན། །སློབ་དཔོན་དང་ནི་སློབ་མ་དག །འདོད་འཇོ་བ་ལྟར་ཟད་མེད་འགྱུར། །ཤ་ལི་ཧོ་ཏྲའི་མདོའི་གནས་ལས་སློབ་མ་སྦྱང་བའི་ལེའུ་སྟེ་གཉིས་པའོ།། །།དེ་ནས་ཤ་ལི་ཧོ་ཏྲས་བུ། །ལེགས་ཐོས་ལ་ནི་ཡང་སྨྲས་པ། །གང་ཕྱིར་འདི་ནི་དཔལ་མོའི་བུ། །དེ་ཕྱིར་མཆོག་ཏུ་བཀྲ་ཤིས་ཡིན། །གཞན་ཡང་རྟ་ཡི་མཆོད་སྦྱིན་ལ། །རྟ་ནི་དགོས་པ་ཉིད་ཡིན་པས། །དེ་བས་ཤིན་ཏུ་དག་བྱེད་དེའང༌། །འདི་ནི་བཀྲ་ཤིས་དམ་པ་ཡིན། །རི་དགས་དང་ནི་ཐག་རིང་འགྲོ། །དེ་བཞིན་གཡུལ་གྱི་ལས་རྣམས་ལའང༌། །རྒྱལ་པོ་རྒྱལ་བྱེད་པ་ཡི་རྒྱུ། །རྟ་ལས་མཆོག་གྱུར་ཡོད་མ་ཡིན། །རྟ་ཡི་མཆོད་སྦྱིན་དག་ལ་ནི། །སྐྱེ་དགུའི་བདག་གིས་ལོངས་སྤྱོད་ཅིག །དེ་བས་མཆོད་སྦྱིན་ཐམས་ཅད་ལ། །དེ་ནི་སྤྱད་བྱ་ཉིད་ཡིན་ནོ། །དེ་ཕྱིར་ཤིན་ཏུ་གཙང་བས་ན། །ཀུན་ལ་རྗེས་སུ་གནང་བ་ཡིན། །དེ་ཕྱིར་ཚངས་པ་མ་གཏོགས་པ། །ཐམས་ཅད་ཀྱི་ནི་ཟས་མ་ཡིན། །རྟ་ཡི་མཆོད་སྦྱིན་ལས་ལྷག་པའི། །དག་བྱེད་མི་ལ་ཡོད་མིན་པས། །རྟ་མ་གཏོགས་པར་ས་གསུམ་ན། །བཀྲ་ཤིས་མཆོག་གཞན་ཡོད་མ་ཡིན། །རྣག་ཅན་མྱུར་འགྲོ་ལམ་ལས་རྒྱལ། །འགྲོས་ལེགས་འཕྲོག་བྱེད་ལས་རྫོགས་དང༌། །མགྱོགས་དང་མགྱོགས་འགྲོ་མྱུར་འགྲོས་ཅན། །དཔལ་མོའི་བུར་ཡང་བཤད་པ་ཡིན། །འཇིག་རྟེན་ན་ནི་སྣ་ཆེ་བས། །དེ་ནི་སྣ་ཅན་ཞེས་བྱར་བཤད། །རྟག་ཏུ་འགྲོ་བས་མགྱོགས་འགྲོ་ཡིན། །ལམ་དུ་རྒྱལ་བས་ལམ་ལས་རྒྱལ། །འགྲོས་ལེགས་ལྡན་པས་འགྲོས་ཅན་ཡིན། །དབང་མེད་ཁྱེར་བས་འཕྲོག་བྱེད་དེ། །ལས་
རྣམས་རྫོགས་པར་བྱེད་ནུས་པས། །ལས་རྫོགས་ཞེས་ནི་ཚངས་པས་བཤད། །མགྱོགས་པ་དང་ནི་མགྱོགས་འགྲོ་དང༌། །དེ་བཞིན་མྱུར་འགྲོ་ཅན་ཞེས་པ། །དེ་ནི་མགྱོགས་པ་ཁོ་ནར་བཤད། །འདི་དག་དེས་ཚིག་ཚུལ་ཡིན་ནོ། །རྟ་ནི་དཔལ་མོའི་བུ་ཡིན་པས། །དཔལ་མོའི་བུ་ཞེས་བཤད་པ་ཡིན། །མཚན་དང་རིགས་ནི་བཟང་བ་དང༌། །དཔའ་བོས་བཞོན་ཞིང་བྱང་བ་ཡི། །རྟ་ནི་སྟོང་གིས་ས་བཞི་དག །མ་ལུས་པ་ལས་རྒྱལ་བར་ནུས། །མཚོན་ཐོགས་པ་ཡིས་མི་ཐུབ་པའི། །གནས་དེར་སྟོབས་ཆེ་བ་ཡི་རྟས། །འཕྲལ་དུ་རྒྱལ་བར་ནུས་པ་ཡིན། །དེ་ཕྱིར་ཁྱེད་ཀྱིས་དེ་ལ་ནི། །ཤིན་ཏུ་གུས་ཤིང་བརྩེ་བར་བྱ། །རྒྱལ་པོ་སྨན་པའི་ཆོས་དོན་དང༌། །ཕུན་ཚོགས་པ་ཡང་གཞན་ལས་མིན། །ཤ་ལི་ཧོ་ཏྲའི་མདོའི་གནས་ལས་ངས་པའི་ཚིག་གི་ལེའུ་སྟེ་གསུམ་པའོ།། །།ཤ་ལི་ཧོ་ཏྲ་བློ་གྲོས་ཆེ། །རྟ་ཡི་གནས་ན་འདུག་པ་ལ། །ལེགས་ཐོས་ཐོས་པ་ཕུན་ཚོགས་པས། །སླར་ཡང་པ་ལ་དྲིས་གྱུར་པ། །རྟ་ནི་ཅི་ལྟར་བྱུང་བར་གྱུར། །མཆོད་སྦྱིན་འཚམ་པ་ཅི་ལྟར་འགྱུར། །དེ་ནི་དང་པོར་རྒྱལ་པོ་དག །གང་གི་བཞོན་པ་ཉིད་དུ་འགྱུར། །དེ་ཡི་རིགས་བཞི་ཅི་ལྟ་བུ། །དེ་ལྟ་བུར་ནི་ཅི་ལྟར་འགྱུར། །ཅི་ཡི་ཕྱིར་ནི་དེ་འདྲར་འགྱུར། །དེ་དག་ཤེས་པར་འཚལ་ལགས་སོ། །དེ་ཡི་ཚིག་ནི་ཐོས་པ་དང༌། །ཤ་ལི་ཧོ་ཏྲས་སྨྲས་གྱུར་པ། །འདི་ན་རྒྱལ་པོའི་ཆོས་ཀྱི་མཆོག །ས་རྣམས་ཡོངས་སུ་སྐྱོང་བ་ཡིན། །དེ་ཡང་དཔུང་གིས་བྱེད་པར་ནུས། །དཔུང་གི་མཆོག་ནི་རྟ་རྣམས་ཡིན། །དེ་ཕྱིར་རང་དོན་ལ་མཁས་པའི། །རྒྱལ་པོའི་ཆོས་དོན་འདོད་དོན་དུ། །ཡང་ཡེ་རྣམ་པ་ཐམས་ཅད་དུ། །འབད་དེ་རྟ་རྣམས་བསྲུང་བར་བྱ། །ཆོས་དང་གྲགས་འདོད་སྨན་པ་ནི། །བསྟན་བཅོས་མཁས་གྱུར་པས་ཀྱང་བསྟེན། །དེ་བས་དེ་རྣམས་ལྷ་དང་ནི། །མི་ནི་ཇི་ལྟར་བྱུང་བ་བཤད། །རིགས་དང་ཉེ་བའི་རིགས་དང་ཚེ། །ན་ཚོད་ཤིས་དང་མི་ཤིས་དང༌། །གཙུག་དང་གདོང་དང་ཐིག་ལེ་དང༌། །འཚེར་དང་འགྲོས་ཀྱི་རིམ་པ་དང༌། །མཚན་ངན་གཉེན་པོ་མཆན་ཁུང་དང༌། །འབྱུང་དང་བཞོན་
བའི་བྱ་བ་དང༌། །ནད་མེད་ནད་ནི་རྒྱས་པ་དང༌། །རྣ་བ་རྣམས་ཀྱི་སྨན་དང་ནི། །དེ་བཞིན་སྨན་ནི་བྱུང་བ་ཡིན། །གོ་རིམས་ཅི་བཞིན་ཉིད་དང་ནི། །སྤུ་མདོག་མདོག་འདྲེས་ཁྱད་པར་དང༌། །སྤུ་མདོག་དག་དང་མིག་དག་དང༌། །རང་བཞིན་སྙིང་སྟོབས་དག་དང་ནི། །སྟོན་ཀ་སྐྱེས་པའི་མཚན་ཉིད་དེ། །འདི་དག་ཐམས་ཅད་མདོར་བསྡུས་ནས། །ཁྱེད་ལ་ལེགས་པར་བཤད་པར་བྱ། །ལྷ་རྣམས་ཀྱིས་ནི་མངལ་སྐྱེས་དང༌། །མངལ་མེད་བྱུང་བ་གཉིས་སུ་བཤད། །སྔོན་ཚེ་འཇིག་རྟེན་ཞིག་གྱུར་ཅིང༌། །འཇིག་རྟེན་འདི་ནི་མེད་པའི་ཚེ། །འབྱིན་བྱེད་མེ་ལ་སྦྱིན་སྲེག་ནི། །བྱས་པས་དང་པོར་ཚངས་པ་དང༌། །རྟ་ཕོ་དེ་རྗེས་རྒོད་མ་མཆོག །རང་གི་སྐྱེ་གནས་དག་ཏུ་བསྐྱེད། །གཞན་ཡང་སྐྱེ་དགུའི་བདག་མོ་ཡི། །མཆོད་སྦྱིན་ལ་ནི་ཚངས་པ་ཡི། །མཆི་མ་བྱུང་བ་དཔལ་མོ་ནི། །དགའ་བས་སྙིམ་པ་སྦྱར་བས་བླངས། །དེ་ཡི་ཡན་ལག་ལས་བྱུང་སྟེ། །རྟ་རྣམས་བྲམ་ཟེའི་རིགས་སོགས་གྱུར། །ཁ་དང་དཔུང་པ་བརླ་གཉིས་དང༌། །རྐང་པ་གཉིས་ལས་གོ་རིམས་བཞིན། །གཡས་གཡོན་ལས་ནི་ཕོ་མོ་སྟེ། །ཆངས་པ་ལས་རྟ་དེ་ལྟར་སྐྱེས། །འོ་མའི་རྒྱ་མཚོ་བསྲུབས་པའི་ཚེ། །རྟ་དང་བདུད་རྩི་ལྷན་ཅིག་བྱུང༌། །དེ་མིང་ཨུ་ཙ་སྲ་བ་སྟེ། །སྒྲ་ནི་སྤྲིན་ཆེན་ལྟ་བུ་ཡིན། །རྒྱ་མཚོ་དེ་ལས་ནམ་མཁའ་ལ། །ཤུགས་ཀྱིས་རྣམ་པར་འགྲོ་བ་ན། །ལྷ་མིན་སྟོབས་དང་ལྷ་འཁྲུག་པས། །ཕྱི་རྐང་གཉིས་ནི་བཟུང་བར་གྱུར། །སྟོབས་ཆེན་སྟོབས་ལྡན་གྱིས་དྲངས་པས། །དཔྱི་ནི་ཅུང་ཟད་ཉམས་པར་གྱུར། །དེ་བས་རྟ་རྣམས་ད་རུང་མི། །དབྱི་ནི་མྱུར་བར་མི་འདེབས་ཤིང༌། །ངལ་སོ་བ་ན་རྐང་པ་ནི། །ཕྱི་མ་རེས་ཀྱིས་དལ་བར་འདེགས། །ཚངས་པའི་བུར་གྱུར་གཏུམ་པོ་ནི། །དམོད་པ་ཡིས་ནི་འུག་པར་གྱུར། །ཡིད་འོང་ཡིད་ཀྱི་མཆོད་སྦྱིན་ནི། །རི་དགས་མོར་གྱུར་དེ་གཉིས་འདུས། །དེ་ལ་སྒོ་ང་སྣ་ཚོགས་པ། །དུ་མ་བྱུང་བར་གྱུར་བ་ཡིན། །ལྟེ་བ་མན་ཆད་མེས་གདུངས་པའི། །རྡུལ་ནི་ཐལ་བར་འཛག་གྱུར་པ། །དེ་ལས་ཀྱང་ནི་ཁ་དོག་རྣམས། །ཐ་དད་བོང་ཕོ་བོང་མོར་གྱུར། །སྒྲ་སྐད་རྩུབ་ཅིང་རྣོ་བ་དང༌། །རང་བཞིན་རྩུབ་ཅིང་རྐང་པ་རྩུབ། །དེ་ཡང་
རྟ་དང་ལྷན་ཅིག་བྱུང༌། །སྐྱེ་དགུའི་བདག་གི་གནས་ན་འདུག །དེ་ནས་དེ་དག་རྨོངས་པ་ཡིས། །དེ་ཡི་སྦྱིན་སྲེག་ཁང་པ་བརླག །དེས་ནི་དེ་ལ་བསད་དང་བཅིངས། །སྒྲོ་བཅད་རྩྭ་ནི་ཟ་བ་དང༌། །ལྷ་དང་མི་ཡི་བཞིན་པ་ནི། །ཉིད་གྱུར་ཅིག་ཅེས་དམོད་པ་བཏབ། །རྟ་དེ་ཡིད་ནི་ཁུམས་གྱུར་ནས། །སྐྱེ་དགུའི་བདག་ལ་གསོལ་བ་བཏབ། །དེ་ནས་དེ་ལ་མགུ་གྱུར་ནས། །མཆོག་འདི་ཐོབ་པར་གྱུར་པ་ཡིན། །རྟ་ཡི་མཆོད་སྦྱིན་ལ་བསད་དང༌། །གཡུལ་དུ་གཡོ་བར་གྱུར་པ་དང༌། །ལེགས་པར་སྦྱིན་པ་བཏང་བ་ན། །བསོད་ནམས་ཁྱེད་ཀྱིས་ཐོབ་གྱུར་ཅིག །དེ་བཞིན་དུ་ནི་ཡོན་གནས་ཀྱི། །མཆོག་ཉིད་དུ་ནི་རྟ་གྱུར་ཅིག །དད་པས་དགེ་སྦྱོང་བྲམ་ཟེ་ལ། །རྟ་རྣམས་བྱིན་པར་གྱུར་ན་ནི། །རྟ་ཡི་བ་སྤུ་ཇི་སྙེད་པར། །ལྷ་ཡུལ་དུ་ནི་སྐྱེ་བར་འགྱུར། །སྦྱིན་བ་བཏང་བའི་རྟ་ཡང་ནི། །འགྲོ་བའི་མཆོག་ཏུ་འགྱུར་བ་ཡིན། །དེ་ནས་སྐྱེ་དགུའི་བདག་པོ་ཡིས། །ཚིག་གིས་འདུས་ནས་ཁ་བ་ཅན། །ཤ་ལི་ཧོ་ཏྲ་ལ་འཁུར་ཞིང༌། །དྲང་སྲོང་རྣམས་དང་ལྷན་ཅིག་རྩེ། །སྟོབས་ལྡན་ཨུ་ཙ་སྲ་བ་ནི། །ཞོན་ནས་ལྷ་རྣམས་གཟིར་བར་བྱེད། །ལྷ་ཀུན་མངོན་མཐོ་འདོད་པ་ཡིས། །ཤ་ལི་ཧོ་ཏྲ་ལ་གསོལ་བཏབ། །དེ་ནས་ལྷ་ལ་བཞོན་པའི་ཕྱིར། །ཇི་ལྟར་འདོད་པ་བཞིན་དུ་བྱིན། །ཟླ་བ་ལ་དཀར་ལྷ་ཆེན་ལ། །ལྗང་གུ་ཁྱབ་འཇུག་ལ་རྟ་སེར། །མརྐཏ་མདོག་འདྲ་ཉི་མ་ལ། །མེ་ལྷ་ལ་དམར་གཤིན་རྗེ་ནག །པདྨ་དཀར་འདྲ་ཆུ་ལྷ་ལ། །སྔོ་དང་ཁྲ་བོ་ཐ་སྐར་གྱི། །བུ་གཉིས་དམར་པོ་རླུང་ལྷ་ལ། །ལྷ་རྣམས་གཞན་ལ་སྣ་ཚོགས་པ། །རང་རང་ཇི་ལྟར་དགའ་བར་ནི། །འདི་འདྲ་ཡིད་འཕྲོག་བྱེད་པ་བྱིན། །ལྷག་མའི་རྟ་ནི་སྐྱེ་དགུའི་བདག །ཡིད་ཆེས་བྱས་པས་བླངས་ནས་ནི། །དེ་ཡིས་མི་ཡི་རྒྱལ་པོ་ལ། །ཅི་རིགས་པར་ནི་བགོས་ཏེ་བྱིན། །གཤོག་པ་བཅད་པས་དེ་རྣམས་ནི། །ན་གྱུར་སླར་ཡང་མེ་ཡིས་བསྲེགས། །ནད་གདུངས་ཤ་ལི་ཧོ་ཏྲ་ལ། །འཁུས་པར་གྱུར་ཏེ་ཁྲོ་བ་ཡི། །མཆེ་བ་བཅད་ནས་སྟོབས་ཀྱིས་ནི། །དེ་གཉིད་ལོག་པ་བཟའ་སྣམ་ན། །དེ་ཚེ་དྲང་སྲོང་མི་སྣང་གྱུར། །དེ་ནས་རྟ་རྣམས་ཟོས་སྙམ་ནས། །དགའ་བར་རྟ་སྤངས་འབྱིན་ཅིང་སྣོམ། །
དེ་ཕྱིར་རྟ་རྣམས་ད་རུང་ཡང༌། །རྟ་སྤངས་བཏང་ནས་སྣོམ་པར་བྱེད། །སྐྱེ་དགུའི་བདག་གི་ཁྱིམ་བདག་ཚེ། །ཧ་ཧ་ཟེར་བས་ཧ་ཡར་བཤད། །བྱ་ལྟར་གཤོག་པ་མགྱོགས་འགྲོ་བས། །མགྱོགས་འགྲོ་ཞེས་ནི་བཤད་པ་ཡིན། །ལམ་རྫོགས་མགྱོགས་པས་བྱེད་པ་ནི། །འཕྲོག་པ་འཚེར་བ་ཉིད་ལའང་བྱ། །ལྷ་རྣམས་ཀྱིས་ནི་རྟ་བྱུང་བ། །རྣམ་པ་བཞི་སྟེ་དུ་མའང་ཡིན། །བོང་བུ་རྒོད་མ་ལ་དྲེའུ། །བོང་བུ་བས་ནི་བཟང་བར་འདོད། །དྲེའུ་ལས་སྐྱེས་ཀི་ན་ཡིན། །དེ་ལས་སྐྱེས་བ་ཀི་ས་ཏ་ཏ། །ཀི་ས་ཏ་ཏའི་བུ་ཆུ་བུར་ཅན། །ཆུ་བུར་ཅན་བུ་བོང་བུར་གྱུར། །རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །བོང་བུ་དང་ནི་རྟ་སོགས་ལ། །ལུགས་སུ་འབྱུང་དང་ལུགས་ལས་བཟློག །དེ་ལྟར་རིགས་ཀྱི་དབྱེ་བ་འདི། །གོ་རིམས་བཞིན་དུ་བརྗོད་པ་ཡིན། །རྟ་རྣམས་ཀྱི་ནི་འབྱུང་བ་དག །སླར་ཡང་འོད་ཆེན་བཀའ་སྩོལ་ཅིག །འོ་མའི་རྒྱ་མཚོ་ལས་བྱུང་ཉིད། །ཐམས་ཅད་ཤེས་པར་འཚལ་ལགས་སོ། །བུ་ཡིས་དེ་ལྟར་དྲིས་པ་དང༌། །ཤ་ལི་ཧོ་ཏྲས་སྨྲས་པ་ནི། །སྐྱེ་དགུ་དང་པོ་བྱུང་བའི་ཚེ། །འཚོ་བའི་འཇིག་རྟེན་བདེ་གནས་གྱུར། །དེ་རྗེས་ལྷ་དང་ལྷ་མིན་གྱི། །འཇིག་རྟེན་ཀུན་ལ་ཚངས་པ་ཡིས། །འཇིག་རྟེན་ཐམས་ཅད་ཁྱབ་བྱེད་པའི། །སྐོམ་གྱིས་གདུངས་པ་ཉིད་དུ་བྱས། །འཇིག་རྟེན་པ་ཡི་སྲོག་ཆགས་རྣམས། །སླར་ཡང་རྒྱུག་ཅིང་འགྲོ་བར་བྱེད། །ལྷ་དང་ལྷ་མིན་ཤ་ཟ་དང༌། ལྟོ་འཕྱེ་སྲིན་པོ་དེ་རྣམས་ཀྱང༌། །སྟོབས་དང་ལྡན་པའི་སྐོམ་གྱིས་ནི། །གདུངས་པས་ཉེ་བར་ཟིན་པར་གྱུར། །ལྷ་དང་ལྷ་མིན་ཁ་ཟས་དང༌། །མལ་སྟན་ལ་ནི་དགའ་མེད་གྱུར། །དེ་རྣམས་དེ་ལྟར་སེམས་པ་ན། །དེ་ཡི་ཚེ་ན་བློ་སྐྱེས་པ། །གང་འདི་ཆུ་ཡི་སྙིང་པོར་ནི། །གནས་དེར་བདག་ཅག་སྐོམ་སེལ་གྱུར། །དེ་ནས་རི་བོ་མནྡཱ་ར། །གྲགས་ལྡན་སྲུབ་ཞིང་ཉིད་དུ་བྱས། །ཀླུ་ཡི་རྒྱལ་ཆེན་མཐའ་ཡས་ནི། །སྲུབ་ཐག་ཏུ་ནི་ཡང་དག་སྦྱར། །དེར་ནི་ཕྱོགས་གཅིག་ལྷ་རྣམས་ཏེ། །ཕྱོགས་གཅིག་ཏུ་ནི་ལྷ་མིན་གནས། །སྲུབ་ཐག་འདྲེན་ཞིང་མཚོ་ཆེན་ནི། །འཇིགས་པའི་སྒྲ་རྣམས་བསྲུབས་པ་ན། །མཚོ་ཆེན་དེར་ནི་ལྷ་དང་མིའི། །སྨན་ནི་རྩ་བ་ལོ་མ་དང༌། །འོ་མར་བཅས་པ་བསྡུས་ནས་ནི། །
ཐམས་ཅད་བཅུག་པ་ཉིད་དུ་འགྱུར། །གཟི་བརྗིད་ཆེ་ཞིང་གཟི་བརྗིད་ཅན། །རོ་ལ་སོགས་པ་འབྱུང་ཞིང་དགེ །མེ་ཏོག་སེར་དང་གོ་སྲིང་གི །དེ་བཞིན་སོར་མོ་ལ་སྤྱོད་དང༌། །མདངས་ལྡན་ཛཱ་ཏི་ས་ར་དང༌། །འཚོ་བྱེད་འཆི་བ་གསོ་བྱེད་དང༌། །དེ་བཞིན་རྨ་འཚོ་བྱེད་ལ་སོགས། །གཞན་ཡང་ཚངས་པས་གང་སྤྲུལ་བའི། །བཅུད་དང་མཐུ་སྟོབས་བསམ་མི་ཁྱབ། །སྨན་རྣམས་མཚོ་ཆེན་དེར་བཅུག་སྟ། །རྒྱ་མཚོ་བསྲུབས་པར་གྱུར་པ་ན། །དེ་ཚེ་དང་པོ་ཁོ་ནར་ནི། །དཔལ་མོ་ལ་སོགས་བྱུང་བར་འགྱུར། །གང་གིས་ནང་བར་བརྗོད་ན་ནི། །རྨི་ངན་ལ་སོགས་འཇིག་བྱེད་པའི། །དགེ་བ་ཞེས་བྱའི་རིན་པོ་ཆེ། །བརྒྱད་ནི་ཆུ་ལས་བྱུང་བར་གྱུར། །ཉི་མ་བཞོན་པའི་ཤིང་རྟ་ནི། །འདྲེན་པའི་རྟ་དང་ལྷ་ཡི་ཆང༌། །དེ་བཞིན་ནོར་བཟང་ཀོ་ཐུ་བ། །ནོར་བུའི་རྣ་ཆ་བཟང་པོ་དང༌། །བདུད་རྩི་ཞེས་བྱའི་སྨན་དང་ནི། །བདུད་རྩི་ཉིད་ཀྱང་བྱུང་བར་འགྱུར། །བསྟན་བཅོས་ཐམས་ཅད་འཛིན་པའི་མཆོག །སྨན་པ་ཐང་ལ་འབར་དང་ནི། །སྒྲ་མཐོ་ཞེས་ནི་བྱ་བའི་རྟ། །སྙིང་སྟོབས་ཆེ་ཞིང་སྟོབས་ཆེ་ལ། །འབྲུག་དང་རྔ་ཡི་སྒྲ་དང་ནི། །དུང་དང་རྔ་ཆེན་སྒྲ་འདྲ་བ། །གང་ཞིག་སྐད་གསང་མཐོན་པོ་ཡིས། །སྒྲ་དེས་མིང་དུ་བཏགས་པ་ནི། །དེ་ཚེ་ལྷ་དང་ལྷ་མིན་གྱིས། །སྒྲ་མཐོ་ཞེས་ནི་བྱ་བར་བཏགས། །སྤྲིན་དཀར་གྱི་ནི་མདོག་འདྲ་ཞིང༌། །མགྱོགས་ཤིང་བདུད་རྩི་ལས་བྱུང་བ། །མདངས་ལྡན་རྒྱ་མཚོ་ཆེན་པོ་ལས། །བྱུང་སྟེ་མཁའ་ལ་འགྲོ་བར་བྱེད། །སྟོབས་ལྡན་ཞེས་བྱའི་སྣང་བྱེད་བུས། །དེ་ཡི་རྐང་པ་གཉིས་ལས་བཟུང༌། །དེ་ཚེ་ལྷ་མིན་ཐམས་ཅད་ཀྱིས། །མནྡཱ་ར་དང་དེ་བཞིན་དུ། །ཀླུ་ཡི་རྒྱལ་པོ་བོར་ནས་ནི། །རྟ་ཡི་རིན་ཆེན་ལ་འཇུས་ཏེ། །འོ་མའི་རྒྱ་མཚོ་སྤངས་ནས་ནི། །ས་གཞི་འདིར་ནི་ཕྱིན་པར་གྱུར། །ལྷ་མིན་བུམ་པ་མཉམ་པ་དང༌། །དེ་བཞིན་སེམས་རབ་འཕགས་པ་དང༌། །མེ་འདྲ་བ་དང་འདོད་ལྷ་དང༌། །གནོད་སྐྱོབས་གསེར་མདོག་ཅེས་བྱ་བ། །ཆུ་བུར་ཟླུམ་ངོ་ཞེས་བྱ་བས། །སྟོབས་ལྡན་ལ་ནི་ཚིག་འདི་སྨྲས། །གང་གིས་དཔལ་ཐོབ་འགྱུར་བ་ཡིན། །དོན་གཉེར་རིན་ཆེ་ཐོབ་པས་ན། །བདག་ཅག་ལྷ་དང་མི་རྣམས་ལ། །འཇིགས་པ་འབྱུང་བར་མི་འགྱུར་རོ། །
རྟག་པར་རབ་ཏུ་དགའ་བྱེད་ཅིང༌། །ཐམས་ཅད་སྟོབས་ཀྱིས་དྲེགས་པ་དང༌། །ལྷ་མིན་སྐྱེས་བུ་ཐམས་ཅད་ནི། །དགའ་ཞིང་མགུ་བ་ཉིད་དུ་བྱ། །དེ་ནས་སྟོབས་ལྡན་ཡིད་དགའ་བས། །དེས་ནི་ལྷ་རྣམས་ལ་སྨྲས་པ། །རྒྱ་མཚོ་ཆེན་པོ་བསྲུབས་པ་ལས། །རིན་ཆེན་གང་ཞིག་ཐོབ་གྱུར་པ། །དེ་ནི་ང་ལ་བྱིན་པས་ན། །གཞན་གྱིས་དེ་རྙེད་འོར་མ་ཡིན། །ལྷ་རྣམས་ཀྱིས་ཀྱང་ཚིག་སྨྲས་པ། །བདག་ཅག་གི་ཡང་རྩལ་ཡིན་པས། །རིན་ཆེན་ཁྱོད་ནི་གཅིག་པུའི་མིན། །ཁྱེད་དང་བདག་ཅག་ཐུན་མོང་ཡིན། །དེ་ནས་ལོ་ནི་ཁྲི་ཡི་བར། །སྐར་མའི་ཚུད་ཀྱིས་གཡུལ་འགྱེད་དེ། །ལྷ་དང་ལྷ་མིན་གཡུལ་ངོར་ནི། །དཔུང་ཚོགས་ལྡང་ཞིང་ལྡང་ཞིང་འཐབ། །དེ་ཚེ་སྟོབས་ལྡན་སྒྲ་མཐོ་བའི། །སྟོབས་མགྱོགས་ལྡན་པའི་རྟ་ཞོན་ནས། །ལྷ་རྣམས་ཀྱི་ནི་དཔུང་གི་ཚོགས། །ཆེན་པོ་དག་ཀྱང་བརླག་པར་གྱུར། །གང་ཡང་དེར་ནི་ལྷ་རྣམས་ཀྱིས། །གཡུལ་དུ་བསད་པའི་ལྷ་མིན་རྣམས། །རྟ་དབང་དེ་ཡིས་བསྣམས་པ་དང༌། །ཡང་དང་ཡང་དུ་སླར་འཚོ་གྱུར། །དེ་ནས་ལྷ་མིན་ཆེན་པོ་ཡིས། །བསད་པར་གྱུར་པས་རྨོངས་ནས་ནི། །སྐྱབས་འདོད་པ་ཡིས་ཚངས་པ་ལ། །སྐྱབས་སུ་ཉེ་བར་སོང་བར་གྱུར། །ལེགས་ལྡན་སྟོབས་ཆེན་ལྡན་པ་ཡི། །ལྷ་མིན་གཡུལ་གྱིས་ཕམ་པར་བགྱིས། །ལེགས་ལྡན་གྱིས་ནི་བདག་ཅག་ལ། །བཞོན་པ་བཟང་པོ་སྩལ་བའི་རིགས། །བདག་ཅག་གིས་ཀྱང་ལྷ་མིན་གྱི། །གཡུལ་བོའི་གནས་ལས་རྒྱལ་བར་བགྱི། །དེ་ནས་ཚངས་པ་སྐྱེ་དགུ་ཡི། །བདག་པོས་དེ་ལ་སྨྲས་པ་ནི། །ཕྱིས་འབྱུང་བ་ནི་གང་ཡང་རུང༌། །ང་ཉིད་ཀྱིས་ནི་སྔར་ཤེས་ཏེ། །གང་ཚེ་གནག་གིས་ཅི་ཙམ་འགྱུར། །འདི་ནི་ཁོ་བོས་སྔར་ཤེས་པས། །ང་ཡིས་སྔོན་ཚེ་རྟ་སྤྲུལ་བས། །དེ་བཞིན་ས་སྟེང་འགྲོ་བ་དང༌། །བར་སྣང་དང་ནི་ས་འོག་གི །རྒྱུ་དང་མི་རྒྱུ་གང་ཡིན་དང༌། །སྲོག་ཆགས་རྣམས་ནི་གང་ཅིའང་རུང༌། །དེ་དག་ཐམས་ཅད་མངོན་སྤྲུལ་ཏོ། །མཆོད་སྦྱིན་བཞོན་པའི་དོན་དུ་ནི། །རྟ་ཡང་ང་ཡིས་སྔོན་ཕྱུང་སྟེ། །སྦྱིན་སྲེག་བྱེད་ཚེ་ང་ཡི་ནི། །མཆི་མ་འཛག་པར་གྱུར་པ་དེ། །དཔལ་མོ་ཡིད་ནི་དགའ་བ་ཡིས། །ལག་པ་གཉིས་ཀྱིས་བླངས་པར་གྱུར། །དེ་ལས་དེར་ནི་རྟ་བྱུང་བས། །དེ་ཕྱིར་དཔལ་མོའི་བུ་ཞེས་བྱ། །དེར་ནི་ལག་པ་
གཡས་པ་ཡི། །མཆི་མ་ལས་ནི་རྟ་ཕོར་གྱུར། །གཡོན་པའི་མཆི་མ་ལས་རྒོད་མ། །སྙིང་སྟོབས་ལྡན་དང་མགྱོགས་མདངས་ལྡན། །དཔལ་མོའི་ལག་པའི་ངའི་མཆི་མ། །དེར་ནི་རྟ་དེ་བྲམ་ཟེའི་རིགས། །ང་ཡི་མཆི་མ་དཔལ་མོ་ཡི། །ལག་པ་གཉིས་ལས་འཛག་གྱུར་པ། །བྲང་ན་གནས་པ་རྒྱལ་རིགས་ཏེ། །གཡུལ་ངོར་སྲ་བར་ཤེས་པར་བྱ། །ལྟེ་བ་བརླ་ཡི་རྗེའུ་རིགས་ཏེ། །རྐང་པ་འཛག་པ་དམངས་རིགས་ཡིན། །དེར་ནི་གཡོན་ངོས་རྒོད་མ་སྟེ། །གཡས་ངོས་ཀྱིས་ནི་རྟ་ཕོར་བཤད། །འདི་རྣམས་ཕན་ཚུན་འདུས་པ་ནི། །རིགས་བཞི་དག་ཏུ་བཤད་པ་ཡིན། །དེ་ལྟར་རྟ་རྣམས་ཡང་དག་བྱུང༌། །ཡིད་ལྟར་མགྱོགས་ཞིང་དོག་ལྡན་ཏེ། །མདོག་གཅིག་མདོག་ནི་འདྲེས་པ་དང༌། །སྣ་ཚོགས་མདངས་ཀྱིས་ཕྱེ་བ་དང༌། །ཐོག་ལེ་ཅན་དང་ཁ་དོག་མདའ། །མཚན་མ་ཅན་དང་ཞུར་བ་དང༌། །རྐང་དཀར་རྔོག་མ་མུན་ཛ་འདྲ། །རྒྱལ་མཚན་དཀྱིལ་འཁོར་འདྲ་བ་དང༌། །རྔ་རྔོག་མདོག་ནི་མང་བ་དང༌། །ཁྲ་བོ་ཐིག་ལེ་ཕྲ་བ་དང༌། །འདམས་མདོག་སེ་བ་ཉིད་དང་ནི། །དཀར་ལ་རྔོག་མ་གནག་པ་སྟེ། །ཕལ་ཆེར་ཁ་དོག་སྣ་ཚོགས་ཤིང༌། །བ་སྤུ་སྣུམ་ཞིང་བཟང་བ་དང༌། །ཚད་དང་ལྡན་ཞིང་མིག་བཟང་ལ། །རོ་སྟོད་མཐོ་བར་གྱུར་པ་དང༌། །དབུས་ཕྲ་གསུས་ཁྱིམ་ཆུང་བ་དང༌། །མཆུ་ལེགས་བྲང་ཞེད་ཡངས་པ་དང༌། །རྔོག་མ་རྐེད་པ་རྨིག་པ་བཟང༌། །པགས་སྲབ་སྤུ་མཚམས་ཕྲ་བ་དང༌། །ཡིད་དུ་འོང་ཞིང་ཕུམ་ཕུམ་བཟང༌། །སྙིང་སྟོབས་ལྡན་ཞིང་རྐང་མདོག་མཐུན། །ལུས་ལས་སྐྱེས་པའི་གཤོག་པ་བཞི། །ནམ་མཁའ་འགེབས་པ་ལྟ་བུ་དང༌། །ཡན་ལག་དང་ནི་ཉིད་ལག་རྣམས། །ལྷ་ཡི་ཆར་ལྡན་གཟི་བརྗིད་ཆེ། །དཔལ་ལྡན་གྱུར་པ་དཔལ་མོའི་བུ། །ཚངས་པའི་མཆི་མ་ལས་བྱུང་མགྱོགས། །མེ་ཡིས་གདུངས་པ་ལས་གྱུར་བའི། །ལྟེ་བ་ལས་ནི་བྱུང་བའི་རྡུལ། །ཐལ་བར་འཛག་གྱུར་དེ་ལས། ནི། །བོང་བུ་དང་ནི་བོང་མོར་གྱུར། །རྣ་བ་རིང་ཞིང་མཇུག་མར་ལྡན། །གཞུང་ཐིག་ཕྲ་ཞིང་རྨིག་པ་སྲ། །སྐད་གདངས་རྩུབ་ཅིང་ཁུར་སྲན་ཆེ། །གང་ཞིག་རྩུབ་བ་བོང་བུ་ཡིན། །ཐལ་བ་ལས་ནི་སྐྱེས་པའི་ཕྱིར། །དེ་བས་བོང་བུ་ཐལ་མདོག་ལྡན། །དེ་དག་དེ་ལྟར་གྱུར་ནས་ནི། །སྐྱེ་
དགུའི་བདག་མོའི་གནས་ན་འདུག །དེ་ནས་དྲེགས་པས་རྩེ་བ་དང༌། །སྲེག་རྫས་དགང་གཟར་བླུགས་གཟར་དང༌། །གཞོང་པ་སྣོད་དང་བུམ་པ་བསྣམས། །རྨོངས་པའི་རྟ་ཡིས་རབ་ཏུ་བརླག །འཇག་མག་ཐལ་བས་ཁྱབ་པ་ཡི། །མི་གང་དེ་ནི་མཐོང་བ་དང༌། །དང་ཁྲ་ཁྲོས་པར་གྱུར་ནས་ན། །རྟ་རྣམས་དམོད་པ་བཏབ་པར་གྱུར། །གཤོག་བཅད་མཚན་ནི་ནུབ་པ་དང༌། །ས་ལ་རྒྱུ་ཞིང་ཚིག་མི་འདོན། །ལྷ་རྣམས་དང་ནི་མི་རྣམས་ཀྱི། །བཞོན་པ་ཉིད་དུ་སོང་གྱུར་ཅིག །དེ་ཐོས་སྡུག་བསྔལ་གྱིས་གདུངས་ཏེ། །དེ་ཚེ་རྟ་རྣམས་དང་ཁྲ་ནི། །དེ་ཉིད་ལ་ནི་སྐྱབས་སོང་ནས། །སླར་ཡང་རྗེས་སུ་ཕན་བཏགས་བྱས། །རྟ་ཡི་མཆོད་སྦྱིན་འབྲས་བུ་ནི། །བསོད་ནམས་དོན་དུ་འགྲོ་གྱུར་ཅིང༌། །མཆོད་པ་བཟང་པོ་ཐོབ་གྱུར་ཅིང༌། །བསོད་ནམས་འཇིག་རྟེན་གྱིས་ཐོབ་ཤོག །ཕན་བཏགས་ཐོབ་པས་དེ་དགའ་སྟེ། །དང་ཁྲ་ལ་ནི་བསྐོར་བར་བྱས། །མགོ་བོས་ཕྱག་བྱས་བདག་ཅག་གིས། །ཅི་ཞིག་བགྱིས་ཞེས་ཚིག་ཏུ་སྨྲས། །དང་ཁྲས་དེར་ནི་ལུང་བསྒོ་བ། །ཁ་བ་ཅན་དུ་ཁྱེད་སོང་ལ། །རོ་འདབ་ཡིད་དུ་འོང་བ་དང༌། །ཆུ་དང་ལྡན་པར་གནས་པར་གྱིས། །དེ་སྐད་སྨྲས་ནས་རྟ་རྣམས་ནི། །དགའ་བ་རི་རྒྱལ་དག་ཏུ་སོང༌། །སྦྱིན་སྲེག་བཤིགས་པས་ཁྲོས་པ་ན། །དང་ཁྲས་ཧ་ཧ་ཞེས་བཟློག་པས། །དེ་ཕྱིར་འདི་ལ་ཧ་ཡི་སྒྲ། །རྟ་རྣམས་ལ་ནི་བཏགས་པ་ཡིན། །རི་བོ་དམ་པ་དེ་རུ་ནི། །རྟ་རྣམས་གནས་པར་གྱུར་པས་ནི། །གང་ཞིག་འདོད་པ་སྤྱོད་གྱུར་པ། །རིགས་ནི་འདྲེས་པར་གྱུར་བའི་རྒྱུས། །རྟ་དང་བོང་བུ་དེ་དག་གི །སྐྱེ་གནས་འདྲེ་བར་བཤད་པར་བྱ། །བོང་བུ་རྟ་ལ་འཇུག་གྱུར་པ། །གང་ཡིན་དེ་ལས་རེའུ་འབྱུང༌། །དྲེའུ་དང་རྒོད་མ་དག་ལས་ནི། །གོ་རི་ཞེས་ནི་བྱ་བ་སྐྱེ། །གོ་རི་རྒོད་མར་འཇིག་པ་ལས། །ཀི་ནི་ཞེས་ནི་བྱ་བ་སྐྱེ། །ཀི་ནི་རྒོད་མ་ལས་སྐྱེས་པ། །ཀི་ས་ཏ་ཏ་ཞེས་བྱ་བ་ཡིན། །ཀི་ས་ཏ་ཏ་དང་རྒོད་མ་ལས། །ཆུ་བུར་ཅན་ཞེས་བྱ་བ་ཡིན། །ཆུ་བུར་ཅན་དང་རྒོད་མ་ལས། །སླར་ཡང་བོང་བུ་ཞེས་བྱར་བཤད། །བོང་བུ་འོང་བར་མཐོང་ན་ནི། །རྟ་ནི་ཐམས་ཅད་རྨོངས་པར་འགྱུར། །བྱ་བ་མང་ཞིང་བསླབ་བར་དཀའ། །དེ་ཕྱིར་བོང་བུ་བཞོན་
དགྲ་ཡིན། །དེ་ལྟར་འདི་ནི་དྲེའུ་སྟེ། །མ་འདྲེས་འཇུག་ལས་རྟ་ཉིད་ཡིན། །རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །རྟ་རྣམས་གཞན་གྱི་མངལ་དུ་ནི། །འཁྲིག་པ་སྤྱོད་པར་མི་བྱེད་ལ། །གལ་ཏེ་བྱེད་པར་གྱུར་ན་ནི། །ཡུལ་དེ་འཇིག་པར་ཤེས་པར་བྱ། །དེ་ལྟར་ང་ནི་རྟ་འབྱིན་ལ། །མཆོད་སྦྱིན་དོན་ནི་ཕྱུགས་ཀྱི་མཆོག །དགྲ་འཇོམས་རྒྱས་བྱེད་ལ་སོགས་པ། །རྒྱལ་པོ་རྣམས་ཀྱི་དཔུང་གི་མཆོག །དེ་ནས་ཁ་དོན་ལ་དགའ་ཞིང༌། །སྦྱིན་སྲེག་བྱེད་ལ་རབ་གཞོལ་བ། །གཞོན་ནུ་ཚངས་པར་སྤྱོད་ལ་གནས། །ཤ་ལི་ཧོ་ཏྲ་དཀའ་ཐུབ་ཆེ། །ཁ་བ་ཅན་གྱི་ངོས་ཀྱི་ནགས། །ལྷ་ཡི་ཚལ་འདྲར་འོངས་པར་གྱུར། །དེ་ནི་དེ་རུ་གནས་བཅས་ནས། །རི་ཡི་ཚོགས་ནི་ཉམས་དགའ་ཞིང༌། །རི་དགས་ཚོགས་ནི་དུ་མས་ཁྱབ། །མི་འམ་ཅི་ནི་སྣ་ཚོགས་གནས། །བྱ་ཚོགས་དུ་མ་སྒྲ་སྒྲོགས་ཤིང༌། །དྲི་ཟའི་བུ་མོ་རྣམས་ཀྱིས་བསྐོར། །གྲུབ་དང་དྲང་སྲོང་རོལ་པ་ཡི། །ཚོགས་དང་ལྷ་རྣམས་དག་གིས་མཛེས། །མེ་ཏོག་འབྲས་བུ་མང་པོ་ཡིས། །ཉམས་དགའ་ནེའུ་གསེང་བཟང་པོས་ཁྱབ། །ཤིན་ཏུ་ཡིད་དུ་འོང་བའི་གནས། །ཉམས་དགའ་དེར་ནི་གནས་པར་གྱུར། །དེར་ནི་ཕྱེ་ལེབ་ཡན་ཆད་ཀྱི། །རི་དགས་ལ་སོགས་ན་ཚོགས་གནས། །རྟ་དང་དྲི་ཟ་མི་འམ་ཅི། །ནེའུ་ལེ་སྦྲུལ་དང་བྱ་རྣམས་ནི། །སེང་གེ་སྟག་དང་ཕག་དང་ནི། །གླང་པོའི་དབང་པོ་སྤྲེའུ་དང་དོམ། །དེ་ལ་སོགས་པ་མང་པོ་ནི། །ཤ་ལི་ཧོ་ཏྲ་དྲང་སྲོང་ཆེ། །བདག་ཉིད་ཐུལ་ཅིང་གཙང་བ་ཡིས། །གནས་དང་ཉེ་བར་འཁོད་པ་ན། །ཤ་ལི་ཧོ་ཏྲས་རྟ་དེ་རྣམས། །བུ་དང་འདྲ་བར་ཡོངས་སུ་བསྐྱད། །ཁ་བ་ཅན་གྱི་ངོས་ན་རྩེ། །ཤ་ལི་ཧོ་ཏྲའི་དབང་དུ་གྱུར། །དེ་བས་ལྷ་རྣམས་མྱུར་དུ་ནི། །ཤ་ལི་ཧོ་ཏའི་གནས་སུ་སོང༌། །དེར་ནི་ཁྱེད་ལ་བཞིན་པ་མགྱོགས། །ཤ་ལི་ཧོ་ཏྲ་སྟེར་བར་འགྱུར། །ལྷ་མཆོག་ཚངས་པས་དེ་སྐད་དུ། །ལྷ་རྣམས་ལ་ནི་སྨྲས་པ་དང༌། །དགའ་བས་དེ་ལྟར་བགྱི་ཞེས་ཏེ། །དེ་རྣམས་རི་མཆོག་དེ་རུ་ཆས། །དེ་ནས་སྐད་ཅིག་ཙམ་གྱིས་ནི། །བརྒྱ་བྱིན་གཤིན་རྗེ་ཆུ་ལྷ་དང༌། །དཔལ་ལྡན་ནོར་གྱི་བདག་པོ་དང༌། །བཅས་པ་དྲང་སྲོང་གནས་སུ་སོང༌། །ཕྱིན་ནས་
བསྟི་གནས་གནས་དེ་ལ། །སྙན་པའི་ཚིག་ནི་འདི་སྐད་སྨྲས། །དྲང་སྲོང་ཁྱེད་ནི་གང་གི་ཕྱིར། །དཀའ་ཐུབ་གནས་བཅས་དཀའ་ཐུབ་གྲུབ། །ཚུར་སྤྱོན་གྲུབ་དང་དྲང་སྲོང་ཚོགས། །མི་བཟང་པ་ཡི་གནས་སུ་དེངས། །དེ་ནས་ངས་ནི་དགྲ་འཇོམས་པའི། །བརྒྱ་བྱིན་ལ་ནི་དེར་སྨྲས་པ། །ང་ལ་དཀའ་ཐུབ་ཡང་སྤྱད་པ། །མི་དགོས་དེ་ལྟར་བྱ་ཞེས་སྨྲས། །དེ་ནས་ང་ལ་གཤིན་རྗེ་ཡིས། །སྙན་པའི་ཚིག་ནི་འདི་སྐད་སྨྲས། །རྒ་མེད་འཆི་མེད་ཟད་མེད་པ། །ལྷ་ཡི་དབང་པོའི་གནས་འདྲ་བ། །འཇིག་རྟེན་ཀུན་ན་གནག་བཟང་བའི། །གནས་དེ་ང་ཡིས་སྤྱིན་པར་བྱ། །ཟས་དང་སྟན་དང་མལ་ཁྲི་དང༌། །སྤྱོད་ལམ་ཅི་བདེ་གནས་མེད་པའི། །ནགས་ཚལ་འདིར་ནི་དཀའ་ཐུབ་ཅན། །ཁྱེད་ནི་ཇི་ལྟར་དཀའ་བར་གྱུར། །བརྒྱ་བྱིན་བཅས་པའི་ལྷ་མཆོག་ནི། །ཀུན་ལ་ང་ཡིས་ལྷར་སྨྲས་པ། །རྩ་བ་འབྲས་བུ་ང་ཡི་ཟ། །གོས་ནི་ཤིང་ཤིན་རི་དགས་པགས། །འདོན་དང་སྤྱིན་སྲེག་བྱེད་པའི་ན། །མཐར་ཐུག་མེད་པར་ངའི་བློ་འཇུག །རི་དགས་ཚེགས་ཀྱང་རྟག་ཏུ་ནི། །ཁོ་བོའི་བསྟི་གནས་དག་ཏུ་འོངས། །གློ་བུར་ལྷགས་པ་གཞན་དག་དང༌། །གཤོག་ཐོགས་དག་ནི་བལྟ་བྱ་ཡིན། །དེ་དང་ལྷན་ཅིག་གནས་བྱ་ཡིན། །ལྷ་ཡུལ་འདོད་པ་ང་ལ་མེད། །དེ་ནས་དགྲ་ཐུབ་གཤིན་རྗེ་ཡིས། །ང་ལ་ཡང་ནི་སླར་སྨྲས་པ། །གང་དང་འགྲོགས་ན་ཁྱེད་དགའ་བའི། །གཟུགས་སྡུག་རི་དགས་བྱ་ཚོགས་དང༌། །གཤོག་པ་ཡོད་པའི་རྐང་བཞི་པ། །ཐམས་ཅད་བདག་ཅག་ལ་བསྟན་གསོལ། །ང་ཡིས་དེ་ལྟར་ཁས་བླངས་ཏེ། །རི་དགས་བྱ་ཚོགས་དེ་དག་ཀུན། །ཇི་སྲིད་མཐོང་བར་གྱུར་གྱི་བར། །ལྷ་རྣམས་ཡུད་ཙམ་འདུག་པར་གྱིས། །དེ་ནས་ལྷ་རྣམས་མཁའ་ལས་ནི། །ཕྱོགས་རྣམས་ཀུན་ནས་འོངས་གྱུར་ཅིང༌། །རི་རྩེ་ཆུ་བོ་རྣམས་ལས་ཀྱང༌། །བྲང་གི་ཕྱོགས་ནི་སྟོན་ཅིང་འོངས། །དེ་ཚེ་རྟ་ཕྲན་པར་སྣང་ལ། །ཡིད་དུ་འོང་བའི་སྐད་དུ་འཚེར། །རྣར་སྙན་པ་ཡི་སྒྲ་དང་ནི། །གཤོག་པའི་རླུང་ནི་ཡིད་འོང་བའི། །སྒྲ་དེས་མདངས་དང་ལྡན་པ་ཡི། །སྒྲ་དེས་ངོ་མཚར་སྐྱེས་པར་གྱུར། །ལྷ་རྣམས་དགའ་བས་ང་ལ་ནི། །སྣུམ་ཞིང་ཡིད་འོད་ཟབ་པ་དང༌། རྗེས་མཐུན་སྒྲ་ལྡན་པ་སྙམ་དགའ། །ཨེ་མའི་མཐོ་རིས་མཚུངས་ཞེས་སྨྲས། །ཀྱེ་མའོ་ཁྱེད་ནི་
ཉམས་དགའ་བར། །གནས་པར་གྱུར་པ་ལེགས་སོ་ལེགས། །ཀྱེ་མའོ་རི་དགས་གཟུགས་བཟང་ཞིང༌། །ཉམས་སྟོབས་སྙིང་པོར་མགྱོགས་པར་ལྡན། །ལྷ་དང་མི་ནི་སུ་ལ་ཡང༌། །འདི་འདྲའི་བཞོན་པ་ཡོད་མ་ཡིན། །བདག་ཅག་འདི་ལ་ཞོན་ནས་ནི། །འགྲོ་ན་ངེས་པར་རྒྱལ་པར་འགྱུར། །ཁྱོད་ཀྱིས་བདག་ཅག་ལ་གསོལ་ཅིག །ཅི་ལྟར་བཞོན་པར་གྱུར་པ་ཡི། །ཐབས་དེ་དྲང་སྲོང་མཆོག་གིས་ནི། །ཡིད་ལ་བདག་ཅག་བསམ་པར་འདོད། །དེ་ནས་དེ་སྐད་སྨྲས་པ་ཡི། །ལྷ་མཆོག་རྣམས་ལ་ངས་ལན་སྨྲས། །ལྷ་མིན་བརླག་པའི་དོན་དང་ནི། །དེ་ཕྱིར་ཁྱེད་རྣམས་རྒྱལ་ཕྱིར་དང༌། །བྲམ་ཟེ་རྣམས་ཀྱི་མཆོད་སྦྱིན་ཕྱིར། །ཚངས་པས་རྟ་ནི་སྤྲུལ་པ་ཡིན། །དེ་བས་ཚངས་པས་ང་བསྒོ་བས། །ཁྱེད་རྣམས་ཤས་ཆེར་དགའ་འགྱུར་པའི། །བཞོན་པ་རྣམས་ཀྱི་དམ་པ་ནི། །མ་ལུས་པར་ནི་སྦྱིན་པར་བྱ། །ལྷ་ཡི་དམ་པ་ཁྱེད་རྣམས་ནི། །བྲམ་ཟེའི་ཡུལ་དུ་འགྲོ་བར་གྱིས། །དེར་ནི་འདུལ་ཐབས་བྱ་བ་དག །འོངས་ནས་བྱ་ཡི་གཞན་དུ་མིན། །དེར་སོང་དེ་རྗེས་ང་ཡིས་ནི། །རྟ་ནི་ཇི་སྙེད་བོད་པར་བྱ། །དེ་ནས་ང་ཡིས་རྟ་རྣམས་ཀུན། །བསྡུས་ནས་ཚིག་ནི་འདི་སྐད་སྨྲས། །བླ་མ་མཁན་པོ་མཛའ་བ་དང༌། །གཉེན་དང་རང་མི་རྣམས་ཀྱང་ནི། །རིང་བར་བལྟ་བར་ང་འདོད་ལ། །ཁྱེད་རྣམས་ལ་ཡང་མགྲོན་དུ་འབོད། །དེར་ནི་འབྲས་བུ་མུངྒ་དང༌། །མ་ཤ་ནས་དང་ཏིལ་དག་དང༌། །སཱ་ལུ་དྲུག་ཅུ་པ་དང་འབྲུ། །རྩྭ་ནི་མཐོ་ཞིང་འཇམ་པ་དང༌། །ཆུ་བོ་ནེའུ་གསིང་རྣམས་ཀྱང་ཡོད། །དེའི་ནགས་གཟར་པོ་མ་ཡིན་ན། །ང་དང་ལྷན་ཅིག་འགྲོ་བྱའམ། །ཡང་ན་འདི་རུ་གནས་པར་གྱིས། །དེ་ནས་ང་ལ་རྟ་ཀུན་གྱིས། །སྙན་པའི་ཚིག་ཏུ་འདི་སྐད་སྨྲ། །ནགས་ཚལ་སྟོང་པ་འདི་མཐོང་ན། །བདག་ཅག་ཤས་ཆེར་ཡིད་སྐྱོ་བས། །ཁྱེད་ནི་གང་དུ་འགྲོ་འགྱུར་བ། །བདག་ཅག་དེར་འབྲེང་གཞན་དུ་མིན། །ཁྱེད་ཀྱི་རྗེས་སུ་འབྲངས་ཏེ་ནི། །འགྲོ་བ་བདག་ཅག་རབ་ཏུ་བསྔགས། །དེ་ནས་ང་ནི་རྟས་བསྐོར་ཞིང༌། །བདེ་གནས་དགྲ་དང་ལྷན་ཅིག་ཏུ། །གང་དུ་ལྷ་དང་དུས་བཏབ་པའི། །བྲམ་ཟེའི་ཡུལ་དུ་ཕྱིན་པར་གྱུར། །དེས་ནི་ཨ་ཤྭདྠ་ཡི་རྩྭར། །གཙུབ་ཤིང་
ལས་ནི་མེ་ཕྱུང་སྟེ། །སྦྱིན་སྲེག་ང་ཡིས་བྱས་ནས་ནི། །ལྷ་དང་སྲིན་པོ་ཚིམ་པར་བྱས། །དེ་ནས་ཡུལ་དེའི་ས་མཚམས་ཀྱི། །ཉེ་འཁོར་ཀུན་དུ་ཁྱབ་ནས་ནི། །རྟ་དེ་དག་གིས་འབྲུ་དག་ནི། །ཐམས་ཅད་ཟ་བ་ཉིད་དུ་འགྱུར། །དེ་ནས་འབྲུ་དེ་བརླག་གྱུར་པ། །བྲམ་ཟེས་མཐོང་ནས་ཁྲོས་པ་ཡི། །ཡིད་ཀྱིས་མིག་ནི་དམར་པོ་དང༌། །དེ་ལ་ཚིག་རྩུབ་འདི་སྐད་སྨྲ། །སྔོན་ནི་དཀའ་ཐུབ་ལ་གནས་པའི། །བྲམ་ཟེ་གཞན་དག་འདིར་འོངས་ཚེ། །དཀའ་ཐུབ་ཚངས་པར་སྤྱོད་པ་དང༌། །འདོན་དང་སྦྱིན་སྲེག་བྱེད་པ་ཡིས། །ལོ་གྲངས་མང་པོར་འདིར་གནས་ཤིང༌། །དེ་བཞིན་ཡམས་ཀྱང་ཞི་བྱེད་ན། །ཁྱེད་ནི་རི་དགས་འདི་འདྲ་བ། །ཁྱེར་ཏེ་ཡུལ་དུ་ཇི་ལྟར་འོང༌། །ལམ་གང་ནས་ནི་ཁྱེད་འོངས་པ། །དེ་ལས་སླར་ནི་འགྲོ་བར་གྱིས། །ཁྱེད་ཀྱི་ཡམས་འདི་བདག་ཅག་གིས། །བཟློག་པར་ནུས་པ་མ་ཡིན་ནོ། །བྲམ་ཟེ་ཁྲོས་བ་དེ་ལ་ངས། །བཟོད་གསོལ་སྔོན་འགྲོའི་ཚིག་འདི་སྨྲས། །རྟ་རྣམས་འབྲུ་ནི་ཟ་བ་དང༌། །ཁྱེད་ལ་འཚེ་བར་ང་མི་དགའ། །སྦྱིན་སྲེག་བྱེད་པས་ང་བྲེལ་བས། །ཁྱེད་ལ་གནོད་པ་ངས་མ་བཀག །དེ་ནས་ང་ཡིས་རྟ་རྣམས་ནི། །ཐམས་ཅད་བསྡུས་ནས་འདི་སྐད་སྨྲས། །ང་ལ་ཡུལ་གྱི་མི་རྣམས་ནི། །ཅི་སྐད་སྨྲས་གྱུར་པ་ལ་ལྟོས། །འདི་དག་མགུ་བར་བྱ་བའི་ཕྱིར། །རེ་ཞིག་ཁྱེད་ནི་ལེགས་པར་བཅིང༌། །དེ་ནས་མཚན་མོར་གྱུར་པ་དང༌། །སླར་ཡང་ཅི་དགར་སྤྱད་པར་གྱིས། །དེ་ནས་བཅིངས་པའི་ཚོར་བ་ནི། །མ་མྱོང་བས་ན་བཅིང་བར་ལྷགས། །ལྷ་རྣམས་ལྟད་མོ་སྐྱེས་པ་ཡི། །ཡིད་ཀྱིས་ང་ལ་ཡིད་ཆེས་འགྱུར། །དེ་ནས་ཆུ་ལྷ་རང་ཉིད་ནི། །བོས་ནས་ཞགས་པས་རྟ་རྣམས་ནི། །ཡན་ལག་ལྔར་བཅས་ཤིང་ལ་ནི། །གོ་རིམས་བཞིན་དུ་བཅིངས་པར་གྱུར། །བཅིངས་པའི་རྗེས་ལ་སྟོབས་ཡོད་ཀྱང༌། །འགུལ་བར་གྱུར་བ་མ་གྱུར་ཏོ། །ཉེ་བར་བཅིང་བ་བྱས་ནས་ནི། །མཚོན་ནི་རྣོན་པོ་ཐོགས་ནས་སུ། །ལྷ་ཡིས་མདུན་དང་རྒྱབ་ཀྱི་ནི། །རྟ་རྣམས་ཀྱི་ནི་གཤོག་པ་བྲེགས། །དེ་ནས་གཤོག་པ་བཅད་ཀྱང་ནི། །ཕྱི་ཕྱིར་ཞིང་ནི་སྐྱེ་བར་གྱུར། །དེ་རྗེས་མེ་ཡིས་བསྲེགས་པས་ན། །ཚིག་པས་མེ་ལྕེ་བྱུང་བར་གྱུར། །བཅིངས་ཤིང་གཤོག་པ་མེད་བྱས་ནས། །གང་ཚེ་
རྟ་རྣམས་ཉམ་ཐག་པ། །དེ་ཚེ་ལྷ་རྣམས་ཡིད་ལ་ནི། །ཇི་ལྟར་འདོད་པ་བཞིན་དུ་ཁྱེར། །ཟླ་བས་རི་བོང་དཀར་འདྲ་བ། །ཉི་མ་ནེ་ཚོའི་མདོག་འདྲ་བ། །བརྒྱ་བྱིན་གྱིས་ནི་སྔོ་བསངས་ཏེ། །གཤིན་རྗེ་ཡིས་ནི་ནག་པོ་ཡིན། །མེ་ལྷས་རྒྱ་སྐྱེགས་མདོག་འདྲ་བ། །རླུང་ལྷས་དམར་སེར་མདོག་འདྲ་བ། །ཆུ་ལྷས་སྔོན་པོ་ཁྱེར་བར་གྱུར། །ཉི་མ་གཞན་གྱིས་ཁ་དོག་སྐྱ། །ལྷ་ཆེན་གྱིས་ནི་སེར་པོ་སྟེ། །སྣ་ཚོགས་ལས་ཀྱིས་རྒྱང་མདོག་ཅན། །ཉི་མ་སུ་ཤས་སྣ་གནག་པ། །ཏྲཥྚས་མཚན་དང་ལྡན་པ་སྟེ། །ལྷ་གཞན་གྱིས་ནི་རང་རང་གི །ཡིད་ལ་འདོད་པ་བཞིན་དུ་ཁྱེར། །དེ་ལྟར་རྟ་རྣམས་བགོས་ནས་ནི། །ལྷག་མ་ང་ཡི་གནས་བཞག་སྟེ། །གཡུལ་དུ་དགོས་པའི་ལས་རྣམས་དང༌། །མཚན་ཉིད་མཚན་མ་རྣམས་དང་ནི། །གསོ་དང་སླར་འབྲོས་ལས་རྣམས་ལ། །བུ་དང་ལྷན་ཅིག་ཉེ་བར་བསྐྱང༌། །ངའི་བུ་མཛའ་བོ་ལས་རྒྱལ་དང༌། །འཁྲུལ་མེད་ཐ་ཆུངས་བྱེད་པ་ཞེས། །ཡོན་ཏན་ངེས་ལས་མིང་བཏགས་པ། །བུ་གསུམ་མཁས་པར་གྱུར་པ་ཡིན། །ཞི་ཞིང་མཛའ་བོ་རྣམས་ལས་རྒྱལ། །དེས་དེ་མཛའ་ལས་རྒྱལ་ཞེས་བྱ། །རིགས་བྱེད་བསྟན་བཅོས་མ་འཁྲུལ་བས། །དེ་ཕྱིར་འཁྲུལ་མེད་ཅེས་འདི་བཤད། །ང་ཡི་ཚིག་ལ་མངོན་དགའ་བས། །རྟག་ཏུ་འདི་ལྟར་བྱེད་པས་ན། །དེའི་ཕྱིར་དེ་ལ་བྱེད་པ་ཞེས། །ཐ་ཆུངས་ལ་ནི་བཏགས་པ་ཡིན། །དེ་ནས་རྟ་གཞན་བདག་ཉིད་ཆེ། །མ་ན་ཞེས་བྱ་ཚངས་སྲས་བྱིན། །དེ་ལས་གཞན་པ་རྟ་བྲེས་སུ། །ལས་རྣམས་ལ་ནི་བྱང་བར་བྱས། །བཞོན་པ་ལ་ནི་གདུལ་པ་དང༌། །བྱ་བའི་ལས་རྣམས་ལ་ཡང་གཞག །ང་ནི་རྒས་ཕྱིར་གྲོལ་བ་ཚོལ། །རྟ་རྣམས་ཀྱི་ནི་ནང་དུ་ཉལ། །དེ་ནས་རྟ་ཁྲོས་པ་ཡིས་ང༌། །གཉིད་ལོག་སྙམ་སྟེ་བསད་པར་བརྩམས། །དེ་དག་འདུས་ནས་འཁོན་གྱིས་ནི། །སྐྱོ་བའི་ཡིད་དང་ཕན་ཚུན་སྨྲ། །བདག་ཅག་བཅིང་དང་གསོད་འདི་ནི། །གང་ལས་སྡུག་བསྔལ་སྐྱེ་འགྱུར་བ། །འདི་དག་ཀུན་གྱི་རྩ་བ་ནི། །དྲང་སྲོང་གཉིད་ལོག་འདི་ཡིན་གྱི། །དེ་བས་གནོད་བྱས་ལན་བྱ་ཞིང༌། །ཟོས་པར་གྱུར་ན་ལེགས་པ་ཡིན། །དེ་ནས་བཅིངས་པ་བཅད་ནས་ནི། །ང་གསོད་ཕྱིར་ནི་ལྷགས་
པར་གྱུར། །ང་ནི་དེ་ལ་ཐབས་གང་གིས། །བདེ་བར་འགྱུར་ཞེས་སེམས་ཤིང་ཉལ། །དེ་ནས་ལྷ་ཡིས་སད་བྱས་པ། །ང་ཡིས་རྟ་ལ་དམོད་པ་བཏབ། །དེང་ནས་བརྩམས་ཏེ་ང་ཡི་ནི། །དམོད་པས་བཞོན་ཁྱེད་དོང་ལ་ནི། །འཇུག་ཅིང་རླིག་པ་འཕྱང་བ་དང༌། །བརྗེད་ངས་པ་ནི་ཉིད་གྱུར་ཅིག། དེ་ནས་དེ་ནི་འཆིག་པ་དག །སྐྱེས་ཤིང་དམོད་པས་བརྗེད་ངས་གྱུར། །དེ་སྐད་དེ་ལ་ངས་སྨྲས་ནས། །གནས་དེ་ནས་ནི་མི་སྣང་བྱས། །རྟ་ཡི་སྒྲ་དེ་ཐོས་པ་དང༌། །དེ་ནས་རྟ་ཡིས་འཚོ་བ་དང༌། །རྟ་ལ་ཞོན་དང་འཆིང་བྱེད་དང༌། །རྟ་བྲེས་སུ་ནི་འོངས་པར་གྱུར། །རྟ་རྣམས་གྲོལ་ནས་གནས་གནས་སུ། །ཕན་ཚུན་རྒྱུ་བར་བྱེད་པ་དང༌། །མལ་ཁྲི་རྒྱ་ཆེན་དག་དང་ནི། །མལ་སྟན་དག་ཀྱང་སྟོང་པ་མཐོང༌། །དེ་ཡིས་ང་ནི་མ་མཐོང་བས། །རྟ་རྣམས་ཀྱིས་ནི་ཟོས་སྙམ་ན། །དེ་ཡི་མལ་ཁྲི་ལས་མཚོན་པས། །བྲམ་ཟེ་མི་སྣང་ཉིད་གྱུར་སྙམ། །འདི་ལྟར་རྟ་ནི་དེ་དག་རྣམས། །བྲམ་ཟེ་ཟོས་པར་བྱས་སྙམ་སེམས། །དེ་ཡི་ཕྱིར་ན་རྟ་རྣམས་ནི། །རྟ་སྤངས་བཏང་ནས་མང་དུ་སྣོམ། །ཤ་ལི་ཧོ་ཏྲ་ཅི་ནས་ཀྱང༌། །ཕྱིས་མི་འབྱུང་བར་གྱུར་ཏོ་སྙམ། །རྟ་ཡི་སྐྱེ་བ་བྱུང་བ་འདི། །གང་ཞིག་རྟག་ཏུ་ཉན་བྱེད་པའམ། །ཡང་ན་ལ་ལ་འཛིན་བྱེད་དམ། །གཏམ་ལ་དད་པར་གྱུར་ན་ནི། །ལྷ་རྣམས་ཀྱིས་ནི་བཀུར་བ་དང༌། །བུ་དང་ཚ་བོ་འཕེལ་བར་འགྱུར། །ཚེ་རིང་བ་ནི་ཐོབ་འགྱུར་ཞིང༌། །གྲགས་པ་ཆེ་བ་ཉིད་དུ་འགྱུར། །འདི་ལྟར་ལྷ་ཡི་མཐུ་ལྡན་ཞིང༌། །འདས་དང་མ་འོངས་དོན་ཤེས་པའི། །དྲང་སྲོང་ཤ་ལི་ཧོ་ཏྲ་ཡིས། །བུ་ཡིས་དྲིས་ཏེ་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་རྟ་རྣམས་བྱུང་བའི་ཚུལ་ཞེས་བྱ་བའི་ལེའུ་སྟེ་བཞི་པའོ།། །།ཐ་སྐར་ཚ་བོ་དྲང་སྲོང་ཆེ། །རྟ་སྐད་ལས་ནི་ལུས་སྐྱེས་པ། །ལྷ་ཡི་མཐུ་ལྡན་དཀའ་ཐུབ་ཅན། །ཚངས་པ་ཉི་མ་མེའི་གཟི་མདངས། །ཤ་ལི་ཧོ་ཏྲ་དྲང་སྲོང་མཆོག །དེ་ལ་ལེགས་ཐོས་ཀྱིས་དྲིས་པ། །འདི་ལྟར་མངལ་དུ་ཆགས་པར་འགྱུར། །སྲོག་ནི་ཇི་ལྟར་འཛིན་པ་ལགས། །ལུས་གཟུངས་རྨིག་པ་སྤུ་དག་དང༌། །ནད་གཞི་ལྟོ་བ་འབྱུང་བ་དང༌། །ཡན་ལག་ལུས་ཀྱི་ཤ་རྣམས་དང༌། །རྩ་དང་རུས་པ་དེ་བཞིན་ཚིགས། །ཟླ་བ་གང་ལ་འབྱུང་བར་
འགྱུར། །མངལ་དུ་ཇི་ལྟར་འཚོ་བ་ལགས། །རྟེའུ་ཕོ་མོ་ཇི་ལྟར་འགྱུར། །མཚན་མི་ལྡན་དང་མ་ནིང་དང༌། །རྟེའུ་ཕོ་གཉིས་སམ་རྟེའུ་མོ་གཉིས། །སྐྱེ་བའམ་གཡང་གཤམ་ཉིད་འགྱུར་བའམ། །རྟེའུ་ཕོ་མོ་སྐྱེ་བའམ། །ཕྲ་དང་རགས་པ་ཇི་ལྟར་འགྱུར། །འདུག་པ་དང་ནི་ཉལ་བ་དང༌། །མངལ་དུ་ཞུ་དང་སྐམས་པ་དང༌། །ཤིན་ཏུ་དགྱེ་དང་མཐུག་པ་དང༌། །བསླབ་སྦྱང་སོ་སོར་ཤེས་པ་དང༌། །དེ་བཞིན་ཟས་དང་རྣོ་དང་བུལ། །ལྷོ་དང་ཞི་བ་ཇི་ལྟར་འགྱུར། །དཔལ་དང་མི་འཇིགས་བློ་ལྡན་དང༌། སྟོབས་ཆེ་མགྱོགས་བདུན་ཚོགས་དང༌། །བུལ་དང་བློ་ནི་ཞེན་པ་དང༌། །སྦེགས་དང་ཉམས་དང་ལྡན་པ་དང༌། །ངང་ཚུལ་མདངས་ལྡན་ནད་མེད་དང༌། །ཕོར་སྐྱེས་དོན་མེད་ཅི་ལྟ་བུ། །ཚེ་རིང་བ་དང་ཚེ་ཐུང་ཉིད། །བཀྲ་ཤིས་བཀྲ་མི་ཤིས་གཟུགས་བཟང༌། །མདོག་མ་འདྲེས་དང་མདོག་འདྲེས་དང༌། །སྣ་ཚོགས་དབྱེ་བ་ཇི་ལྟར་འགྱུར། །མཚན་དང་རླིག་པ་ལྕེ་དང་ནི། །སྤུ་དང་རྔོག་མ་དག་དང་རྐན། །སོ་དང་རྨིག་པ་མིག་མི་སྡུག །ཁ་དོག་མི་སྡུག་ཇི་ལྟར་འགྱུར། །སྒུར་དང་མ་ནིང་ཡན་ལག་ཉམས། །གཟུགས་དང་མཇུག་མ་ཡོ་བ་དང༌། །བེམས་པོ་འདྲ་དང་ལྐུགས་དང་འོན། །རྣ་ཡོན་ཁ་ནི་ཆེ་བ་དང། །མི་སྡུག་པ་ཡི་ནད་བུ་ཅན། །གཞན་གྱི་དབྱིབས་འདྲ་འཁུ་བ་མེད། །སི་སི་ཅན་ནམ་ཁྱི་རྔོ་ཅན། །མངལ་དུ་གནས་ཚེ་ཇི་ལྟར་འགྱུར། །དེ་ལྟར་བློ་ལྡན་གྱིས་དྲིས་ཚེ། །ཤ་ལི་ཧོ་ཏྲས་སྨྲས་གྱུར་པ། །ཇི་ལྟར་ལས་དང་ཉོན་མོངས་ལས། །སེམས་ཅན་རྣམས་ནི་འབྱུང་འགྱུར་བ། །ཡིད་བློ་དབང་པོ་ཞེས་བྱ་བ། །རྣམ་ཤེས་དང་ནི་འདུས་གྱུར་ནས། །མངལ་དུ་ཆགས་པར་གྱུར་པ་ན། །ལས་ཀྱི་ཚུལ་ལ་གནས་པ་ཡིན། །སེམས་ཅན་འབྱུང་བར་གྱུར་པའི་ཚེ། །ཁོང་ཁྲག་རླུང་ལ་བརྟེན་པ་ཡིན། །གང་ཚེ་རྟ་ཕོ་རྒོད་མ་ནི། །ཟླ་མཚན་ལྡན་ལ་འཇུག་གྱུར་བ། །དེ་ཚེ་འབར་བར་གྱུར་པ་ཡིས། །རྣམ་ཤེས་མངལ་དུ་གནས་པ་ཡིན། །དེས་ནི་ཁུ་བ་ཁྲག་བླངས་ནས། །མངལ་གྱི་གནས་སུ་འདྲེན་པར་འགྱུར། །ཇི་ལྟར་པདྨའི་སྡོང་བུའི་རྩར། །སྐྱེས་བུས་ཆུ་ནི་བླུགས་པ་ལྟར། །དེ་བཞིན་མངལ་གྱི་གནས་སུ་ནི། །ཁུ་བ་རླུང་
གིས་འདྲེན་པར་བྱེད། །དེ་ནི་རྩོལ་བ་ཐམས་ཅད་ཀྱིས། །ཁྲག་གིས་ལུས་ནི་འཕེལ་བར་བྱེད། །ཇི་ལྟར་མེ་གྲོགས་དུ་བ་ནི། །ཤིང་ལས་བྱུང་བས་གྱེན་དུ་འདྲེན། །དེ་ནི་བར་སྣང་ལ་གནས་ནས། །གཟུགས་ཅན་དུ་ནི་གནས་པར་བྱེད། །དེ་བཞིན་མངལ་ན་གནས་པའི་རླུང༌། །ཁུ་བ་ཁྲག་ཏུ་བྱུང་བ་རྣམས། །དེ་ནི་མངལ་ཆགས་གྱུར་པ་ན། །རྣམ་ཤེས་དང་ནི་བཅས་པ་ལས། །སེམས་མེད་གྱུར་བའི་དངོས་པོ་ཡང༌། །སེམས་དང་ལྡན་པ་ཉིད་དུ་འགྱུར། །དེ་ནས་ལུས་སུ་ཚོར་འགྱུར་ཞིང༌། །རང་གི་གནས་སུ་འབྱུང་ལས་སྐྱེ། །མངལ་གྱི་ཁུ་བ་ཁྲག་དང་རླུང༌། །འདུས་པ་ལས་ནི་མངལ་ཆགས་འགྱུར། །རྣམ་ཤེས་དང་ནི་འདྲེས་གྱུར་ལ། །ཁྲག་གིས་གསོས་པར་གྱུར་པ་ལས། །སྙིང་སྟོབས་དང་ནི་འདྲེས་འགྱུར་པ། །དེ་ནི་མངལ་ཆགས་ཤེས་པར་བྱ། །ལེགས་ཐོས་ཀྱིས་ནི་སླར་སྨྲས་པ། །བདག་ལ་ཐེ་ཚོམ་འདི་སྐྱེས་ཏེ། །ཁུ་བ་ཟླ་བའི་བདག་ཉིད་ཅན། །ཁྲག་ནི་མེ་ཡི་རང་བཞིན་ཡིན། །དེ་གཉིས་འདུས་པར་གྱུར་པ་ན། །ཇི་ལྟར་མངལ་ནས་ཟགས་མ་གྱུར། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སྨྲས་གྱུར་པ། །དེ་ནི་རྣམ་ཤེས་ཀྱིས་ཟིན་པས། །དྲོད་ཀྱིས་ཁུ་བར་འགྱུར་མ་ཡིན། །མ་ཡི་ཉིས་པའི་དབང་དང་ནི། །ཚེ་ཡང་ཡོངས་སུ་ཟད་ན་འཇིག །ས་སོགས་འབྱུང་བ་ཆེན་པོ་དང༌། །ཁུ་ཁྲག་སྐྱོན་མེད་གྱུར་པ་ལས། །དེ་ཚེ་ཡོན་ཏན་དང་ལྡན་པར། །མངལ་ནི་འཛིན་པར་འགྱུར་པ་ཡིན་།དེ་ནི་ང་ཡིས་བཤད་བྱ་ཡི། །རིམ་གྱིས་ཁྱོད་ཀྱིས་ཤེས་པར་གྱིས། །ནམ་མཁའ་རླུང་དང་མེ་དང་ནི། །ཆུ་དང་དེ་བཞིན་ས་རྣམས་ཏེ། །འབྱུང་བ་ཆེན་པོ་དེ་དག་ལས། །མངལ་ནི་སྐྱོན་མེད་འབྱུང་བར་འགྱུར། །ལུས་ཅན་དག་ནི་ཐམས་ཅད་ཀྱི། །སྐྱེ་བ་དེ་ལྟར་འབྱུང་བ་ཡིན། །གཞན་བཤད་གཞུང་ཡང་མང་མོད་ཀྱི། །ཁོ་བོ་དེ་ལྟར་མི་འདོད་དོ། །ཕ་དང་མ་ལས་བྱུང་བ་དང༌། །ལས་དང་དེ་བཞིན་སྙིང་སྟོབས་སྐྱེས། །དེ་ལྟར་སེམས་ཅན་ཐམས་ཅད་ནི། །མངལ་དུ་ཆགས་པར་ཤེས་པར་བྱ། །ཇི་ལྟར་འབྱུང་བ་བཤད་བྱ་སྟེ། །ལ་ལ་མགོ་བོ་སྔར་སྐྱེ་ཟེར། །ཁ་ཅིག་གིས་ནི་དང་པོར་སྙིང༌། །
གཞན་དག་རྒྱུ་མ་སྐྱེ་ཞེས་ཟེར། །དེ་ལྟ་མོད་ཀྱི་མངལ་དུ་ནི། །མིང་ཅན་ཅིག་ཅར་སྐྱེ་བར་འདོད། །ཁུ་བ་ཁྲག་དང་རྣམ་ཤེས་དག །འདྲེས་ཀྱང་བརྒྱལ་བར་གྱུར་པ་ལས། །ཞག་བདུན་ནས་ནི་རླུང་དག་གིས། །བསྐམས་ལས་ནུར་ནུར་པོར་འགྱུར་རོ། །ཞག་བཅུ་ན་ནི་མེར་མེར་པོ། །ཟླ་བ་གཅིག་ན་གོར་གོར་པོ། །རྫ་བུམ་གསེར་ལས་ཆུ་བླུགས་པ། །ཀུན་དུ་གཤེར་བར་བྱེད་པ་ལྟར། །མ་ཡི་ཁ་ཟས་ཡོན་ཏན་གྱིས། །མངལ་དུ་ཆགས་པ་གསོ་བར་བྱེད། །ནུར་ནུར་པོ་ལ་སོགས་པའི་ཚེ། །ཡན་ལག་མི་གསལ་ཉིད་དུ་བཤད། །ཟླ་བ་གཉིས་ན་རྐང་ལག་ནི། །སོ་སོའི་ཆར་ནི་འགྲོ་བར་འགྱུར། །དུས་ནི་དུས་ཀྱི་ཁྱད་པར་གྱིས། །ཡན་ལག་གསལ་ཞེས་བཤད་པ་ཡིན། །སྔར་ནི་མི་གསལ་དེ་རྗེས་ལ། །གསལ་བ་ཉིད་དུ་སྣང་བ་ཡིན། །ཇི་ལྟར་སྨན་གྱི་ས་བོན་ལ། །ཐམས་ཅད་མི་གསལ་ཉིད་དུ་འདོད། །དེར་ནི་བྱེད་པ་པོ་མི་སྣང༌། །ས་བོན་ལ་རྟ་དེ་བཞིན་ནོ། །དཔེར་ན་འོ་མ་མར་ཡོད་པ། །དེ་ལ་སྣང་བར་འགྱུར་མ་ཡིན། །དེ་ནི་བསྲུབས་པར་གྱུར་པ་ན། །ཐམས་ཅད་གསལ་བར་འགྱུར་བ་ཡིན། །དེ་བཞིན་མ་ཆགས་རང་བཞིན་ནི། །ཕྲ་བས་མངོན་པར་མི་འགྱུར་ལ། །དེ་ཉིད་འཕེལ་བར་གྱུར་བ་ཡི། །དུས་གཞན་དུ་ནི་གསལ་བར་འགྱུར། །ཇི་ལྟར་ཨ་མྲའི་ས་བོན་ལ། །ཤུན་པ་ལ་སོགས་མི་སྣང་གི །དུས་གཞན་ཞིག་ན་གསལ་བར་སྣང༌། །མངལ་དུ་ཆགས་པ་དེ་དང་འདྲ། །གང་ཚེ་གསལ་བར་གྱུར་ནས་ནི། །མངལ་དུ་སླར་ཡང་འཕེལ་འགྱུར་ཏེ། །ཡན་ལག་ཉིད་ལག་ཆགས་གྱུར་པ། །ཟླ་བ་གསུམ་ལོན་ལ་སོགས་ཉོན། །ལུས་དང་རྒྱབ་དང་བྲང་དུ་སྤུ། །པགས་པ་བུ་ག་རྐེད་པ་ལྟོ། །མིད་པ་དཔུང་པ་རྨིག་པ་དང༌། །རྐན་མཆུ་ནུ་མ་ཁ་འགྲམ་སོགས། །ནམ་ཚོང་བྲང་དང་རྩིབ་མ་རྣམས། །ཟླ་བ་གསུམ་ན་སྐྱེ་པར་འགྱུར། །ཟླ་བ་བཞི་པར་ཕོ་མཚན་ནི། །རྩ་རྒྱུས་བཅས་པ་སྐྱེ་བར་འགྱུར། །དེ་བཞིན་པགས་སྲ་ཤ་འཕེལ་དང༌། །མཇུག་མ་རྔོག་མ་རུས་པ་སྐྱེ། །ཟླ་བ་ལྔ་པར་རྐུབ་དང་ནི། །ལོང་ཀ་དག་ཀྱང་སྐྱེ་འགྱུར་ཞིང༌། །སྙིང་དང་གློ་བ་མཚེར་པ་དང༌། །མཆིན་པ་མཁལ་མ་གཞང་
དང་ནི། །རྒྱུ་མ་གཉེ་མ་སོགས་པ་འབྱུང༌། །ཟླ་བ་དྲུག་པར་ཡན་ལག་ཀུན། །རྒྱས་ཤིང་རྩ་ཕྲན་རྩ་ཆེན་དང༌། །རུས་པ་ཀུན་དང་ཚིགས་རྣམས་འབྱུང༌། །ཟླ་བ་བདུན་པའི་ཚེ་ན་ནི། །མ་ཡི་ནུ་མ་གཡོས་འགྱུར་ཞིང༌། །དབང་པོ་དྲུག་ནི་ཚང་བ་དང༌། །དབུགས་ནི་དམན་པ་ཉིད་ཀྱིས་རྟ། །དབང་པོའི་དོན་དང་བྱ་བ་ལ། །ནུས་པ་ཆུང་བ་ཉིད་དུ་འགྱུར། །དེ་ཕྱིར་ཟླ་བ་བདུན་པ་ན། །རྒོད་མ་དབུགས་རྔུབ་བདེར་མི་ནུས། །དེ་ཚེ་ཡན་ལག་རྒྱས་ཤིང་བརྟན། །རྩ་སོགས་བདུན་བརྒྱ་གསལ་བར་འགྱུར། །དེ་བཞིན་ཟླ་བ་བརྒྱད་པ་ལ། །མངལ་དུ་ལུས་དེ་ཆེར་འཕེལ་ཞིང༌། །ལུས་རྒྱས་རོ་དྲུག་ཚོར་བ་དང༌། །སྟོབས་དང་ལྡན་ཞིང་དབང་པོ་གསལ། །དབང་པོས་དོན་ནི་གསལ་བྱེད་ཅིང༌། །མ་ཡང་བདེ་བར་དབུགས་མི་རྔུབ། །ཚགས་ཚིགས་མཉེན་ཞིང་བརྟན་འགྱུར་ཞིང༌། །རྒོད་མའི་ལྟོ་བ་ཅི་ཞིག་ན། །ཟླ་བ་དགུ་པར་རྒོད་མ་ནི། །མཚན་དང་དེ་བཞིན་ནུ་མ་སྐྲངས། །འབྱུང་བ་གསལ་བ་ཉིད་འགྱུར་ཞིང༌། །ཡན་ལག་ཉིད་ལག་རྫོགས་པར་འགྱུར། །ཟླ་བ་དགུའམ་ནི་བཅུ་པའམ། །ཟླ་བ་བཅུ་གཅིག་པ་དག་ལ། །ཉེ་བར་བཙས་པ་ཉིད་དུ་འགྱུར། །རྒོད་མ་ནད་དང་བཅས་པར་ནི། །བུ་བཙས་པ་ནི་འགྱུར་བ་ཡིན། །བུ་ཡི་ལྟེ་བ་དང་འབྲེལ་བའི། །མངལ་ན་རྩ་སྦུབས་ཡོད་པས་ན། །དེ་ལས་དངས་མ་རྒྱུ་མ་ཡི། །མངལ་ནི་འཕེལ་བར་གྱུར་པ་ཡིན། །མངལ་ན་གནས་པ་རྟག་པར་ནི། །མགོ་བོ་གྱེན་དུ་བལྟས་ནས་གནས། །མངལ་ན་གནས་པའི་གཅིན་རྟུག་ནི། །སྐྱེ་བའི་དུས་ན་འབྱུང་འགྱུར་ལ། །ཟླ་བ་བཅུ་བར་དེ་འཕེལ་ཏེ། །དེ་ནི་ཤ་མ་ལ་གནོད་བྱེད། །དེ་ནི་གཅིན་རྟུག་ལ་གནས་པས། །ཡིད་མི་བདེ་ཕྱིར་སྒྱུར་བར་བྱེད། །མགོ་ནི་ཐུར་དུ་སྒྱུར་བྱེད་ཅིང༌། །གོ་བཟློག་པར་ནི་གནས་པས་ན། །རྒྱུ་མ་དཀྲུགས་པར་གྱུར་བའི་ཕྱིར། །མ་ཡི་ནད་ནི་མི་བཟད་སྐྱེད། །དེ་ལྟར་ཐུར་དུ་བསྒྱུར་བས་ན། །དེ་བས་རྒོད་མའི་ཁ་ཟས་ནི། །རྗེས་སུ་མཐུན་པ་ཉིད་དུ་བྱ། །རྒྱུ་དེས་ཟླ་བ་བཅུ་ན་ནི། །ལེགས་པར་བཙས་པ་ཉིད་དུ་འགྱུར། །དེ་ནི་འབྱུང་བར་བྱེད་པས་ན། །དང་པོ་མགོ་བོ་འབྱུང་འགྱུར་ཏེ། །དེ་ནས་ལུས་ནི་རིམ་གྱིས་འབྱུང༌།།
དེ་ལྟར་ན་ནི་བཙས་པར་བཤད། །དེ་ཡི་རྗེས་ལ་ཤ་མ་ནི། །མངལ་ནས་འབྱུང་བར་འགྱུར་བ་ཡིན། །ཕོ་ལ་སོགས་པ་མངལ་དུ་ནི། །ཆགས་པར་བྱེད་པའི་རྒྱུ་ཉོན་ཅིག །ཁུ་བ་མང་ཞིང་ཁྲག་ཉུང་བ། །རླུང་གིས་འདྲེས་པར་བྱས་ནས་ནི། །དེར་ནི་རྣམ་ཤེས་ཞུགས་གྱུར་ན། །རྟེའུ་ཕོ་རུ་སྐྱེ་བར་འགྱུར། །དེ་ལྟ་བུ་ཡི་ཚུལ་གྱིས་ནི། །ཁུ་བ་ཉུང་ཞིང་ཁྲག་མང་ན། །དེ་ལས་རྟེའུ་མོར་སྐྱེ་བར་འགྱུར། །གང་གིས་མ་ནིང་སྐྱེ་འགྱུར་ཉོན། །རྩ་དང་ཆུ་ནི་ཟད་འགྱུར་ཞིང༌། །ཁ་རླུང་གིས་ཉེན་གྱུར་པ་ཡི། །ཕྱིན་ཅི་ལོག་གི་དུས་སུ་ནི། །ཕ་མ་དག་ཀྱང་ཉམ་ཆུང་ཞིང༌། །དབང་པོའི་སྟོབས་ཀྱང་ཟད་གྱུར་པ། །དེ་གཉིས་ཕྲད་པར་གྱུར་བ་ནི། །ཁུ་བ་ཁྲག་ཀྱང་ཆ་མཉམ་ན། །མ་ནིང་དུ་ནི་སྐྱེ་བར་འགྱུར། །ཉེས་པ་དེ་དག་གཉིས་དང་ནི། །ཕ་མ་ནད་གཞིར་བཅས་གྱུར་ན། །ཟླ་མཚན་ཉེས་པ་ཆེར་ལྡན་ལས། །རྟ་ནི་གཡང་གཤམ་དག་ཏུ་འགྱུར། །སྔར་བཤད་པ་ཡི་རྒྱུ་ཡོད་ཅིང༌། །མངལ་དུ་ཆགས་པར་གྱུར་པ་ན། །མངལ་གྱི་གནས་ནི་ནད་གཞིར་བཅས། །རླུང་ནི་ཤས་ཆེར་གྱུར་པ་ན། །དེ་ལ་རྟེའུ་ཕོ་མོ་འབྱུང༌། །ཁུ་བ་ཉེས་པར་ལྡན་འགྱུར་ན། །གསེབ་ཀྱིས་བུ་ནི་སྐྱེད་མི་བྱེད། །ཁུ་བ་སྟོང་པར་གྱུར་པ་ན། །རླུང་གིས་གཉིས་སུ་ཕྱེ་བ་ལས། །ཁྲག་དང་འདྲེས་པར་གྱུར་པ་རུ། །རྣམ་ཤེས་གཉིས་ནི་ཞུགས་པ་ན། །རྟེའུ་མཚེ་མར་སྐྱེ་འགྱུར་ལ། །ཁུ་བ་མང་ན་ཕོ་གཉིས་ཏེ། །ཁྲག་ནི་མང་བར་གྱུར་པ་ལས། །རྟེའུ་མོའི་མཚེ་མར་སྐྱེ་བར་འགྱུར། །དེ་ལས་གཞན་ཡང་མངལ་གྱི་ནི། །ཉེས་པ་བཞི་པོ་མཉན་པར་གྱིས། །རླུང་ནད་གནོད་ཀྱི་ཉེས་པ་ཡིས། །མངལ་དུ་ཞུ་བར་གྱུར་པ་ཡིན། །དེ་ལ་བད་ཀ་ན་ལྷགས་གྱུར་ན། །མངལ་ན་ཉལ་བ་ཞེས་བྱར་འགྱུར། །རླུང་དང་བད་ཀན་གྱིས་ཉེན་པས། །མངལ་དུ་ལུགས་པ་ཞེས་བྱར་འགྱུར། །རྒོད་མ་རྩེག་ཅིང་མེ་དྲོད་ཉམས། །མངལ་སྐམ་པ་ཞེས་བྱ་བར་འགྱུར། །མངལ་དུ་རླུང་གིས་གཟིར་གྱུར་ཅིང༌། །འཇུག་ཚེ་ཤིན་ཏུ་གནོད་བྱས་ལ། །བད་ཀན་ཁྲག་དང་འདྲེས་པ་ལས། །དེ་ཚེ་མཚན་མི་ལྡང་བར་འགྱུར། །སྦྲུམ་
མ་ཡི་ནི་ཉེས་པ་དང༌། །ཁ་ཟས་རྩུབ་པས་རླུང་བསྐྱེད་ཅིང༌། །གྲང་བས་བཀག་ཅིང་གནོད་གྱུར་པས། །དེ་ནི་མངལ་དུ་གཟུགས་ཐུང་འགྱུར། །གང་ཚེ་དུས་ཚིགས་ཉེས་པ་ལ། །རྒོད་མའི་ནད་གཞི་དང་ཕྲད་པར། །མངལ་དུ་ཆགས་པར་གྱུར་བ་ན། །དེ་ཚེ་དབུ་ཅན་དུ་འགྱུར། །རོ་ནི་མི་མཉམ་ཉེས་པ་དང༌། །དེ་བཞིན་དུས་ནི་གོ་ལོག་པས། །མངལ་གྱི་རླུང་མཁྲིས་བད་ཀན་གྱི། །ཉེས་པ་ཉེ་བར་འཁྲུག་པར་འགྱུར། །རླུང་གིས་ལྕེ་ཡི་རྩ་དག་ཏུ། །རྗེས་སུ་རྒྱུ་བར་བྱེད་པ་ན། །ནད་གཞི་དེ་ནི་འཁྲུགས་གྱུར་ན། །དེ་ལས་རྟ་ནི་ལྐུགས་པར་འགྱུར། །རྣ་བའི་བུ་ག་འགགས་པ་ལས། །འོན་པ་ཉིད་དུ་སྐྱེ་བར་འགྱུར། །མིད་པའི་རྩ་ནི་འགགས་པ་ལས། །བེམས་པོ་འདྲ་བར་སྐྱེ་བར་འགྱུར། །མངལ་དུ་མིག་གི་རྩ་དག་ལ། །གནོད་གྱུར་བ་ཡིས་ཁེབས་པ་ལས། །རྟེའུ་དམུས་ལོང་དག་ཏུ་ནི། །རྒོད་མ་ལས་ནི་སྐྱེ་བར་འགྱུར། །སྣ་ཡོན་རྔོག་མ་གཡོ་བ་དང༌། །གཞོགས་ཉམས་གཞོགས་ཕྱེད་ཆེ་བ་དང༌། །ལུས་དང་མཇུག་རྔོག་མི་སྡུག་དང༌། །རྒྱབ་སྒུར་རླིག་པ་ཆེ་བ་དང༌། རླིག་པར་བ་ཆུང་ལྷག་པ་དང༌། མཚན་ནི་རིང་དང་ཐུང་དེང་གུག །ཡན་ལག་རེངས་དང་ཡོ་བ་དང༌། མ་ནིང་ཡན་ལག་མཚང་དང༌། གཟུགས་མི་སྡུག་དང་ཡན་ལག་ཉམས། །ཡན་ལག་ཕྲ་དང་ལྷག་མ་རྣམས། །དེ་ནི་རླུང་གི་གནོད་ལས་གྱུར། །དེ་ལྟར་ཇི་སྐད་བཤད་པ་དང༌། །དེ་ལས་ལྷག་པའི་སྨད་བྱ་བ། །སྣང་ན་རྟ་དེ་རླུང་གི་ནི། །ནད་ཀྱིས་ཉེན་པར་ཤེས་པར་བྱ། །རྟ་ནི་གསེབ་དང་ཕྲད་གྱུར་ཚེ། །ཡིད་ལ་གང་ཞིག་འདོད་གྱུར་པ། །དེ་ཡི་བུ་ནི་དེ་འདྲ་བར། །སྐྱེ་བར་འགྱུར་བ་ཁོ་ན་ཡིན། །དེ་བཞིན་སྤྱོད་ལམ་དག་དང་ཚང༌། །མདོག་དང་གཟི་མདངས་འགྲོས་དང་ནི། །ཕ་དང་མ་ནི་ཅི་འདྲ་བ། །དེ་འདྲ་ཕལ་ཆེར་འགྱུར་བ་ཡིན། །ཁ་ཟས་ངན་དུ་འཁྲུ་བ་དང༌། །སྣད་དང་འཇིགས་དང་ངལ་བ་ལས། །སྦྲུམ་མའི་ནད་ནི་འཁྲུགས་གྱུར་པས། །མངལ་འཇིགས་པར་ནི་འགྱུར་བ་ཡིན། །གང་ཚེ་རླུང་ནི་མངལ་གནས་པའི། །རྔོག་མའི་གནས་སུ་ཕྱིན་གྱུར་ན། །རྔོག་མ་རྩུབ་དང་མི་སྙོམས་
པའམ། །རྔོག་མ་སྲབ་པར་འགྱུར་པ་ཡིན། །པགས་པ་སྤུ་དང་རྔ་མ་ཡི། །སྐྱོན་གང་ཡོད་དེ་རླུང་ལས་གྱུར། །བད་ཀན་མཁྲིས་པ་ལས་གནས་པའི། །སོ་ཡི་རྩ་བར་གནས་གྱུར་ལ། །བད་ཀན་མཁྲིས་པ་ཤ་ས་ཆེ་ལས། །སོ་མི་སྡུག་པར་འགྱུར་བ་ཡིན། །འཁྲིག་ཚེ་ཁུ་བ་སྐྱོན་མེད་ཅིང༌། །ཟླ་མཚན་ཡོན་ཏན་ལྡན་པ་དང༌། །གོམས་ཤིང་འདོད་པ་དང་ཕྲད་ཅིང༌། །ཡིད་ལ་འདོད་པ་མ་བཀག་དང༌། །བཀྲ་ཤིས་ཤིས་པ་བརྗོད་བྱས་དང༌། །དགེ་སྦྱོང་བྲམ་ཟེ་མཆོད་པ་ལས། །ཚེ་རིང་བར་ནི་འགྱུར་བ་ཡིན། །གཞན་དུ་དེ་ནི་ཚེ་ཐུང་འགྱུར། །གསེབ་སྦྱར་ཚེ་ན་སྐར་མ་ཚེས། །བྱེད་པ་ལ་སོགས་བཟང་པོ་དང༌། །ཡིད་འོང་གཞན་ཡང་མང་པོ་ཡིས། །བཀྲ་ཤིས་དང་ནི་མཆོད་བྱས་ཏེ། །རྟ་ནི་མཚན་ལྡན་རྒོད་མ་ནི། །ཤིས་པ་དང་ནི་སྦྱར་བར་བྱ། །ལྷ་དང་བྲམ་ཟེ་མཆོད་བྱས་ལ། །རོལ་མོ་སེམས་ཅན་གཞན་གྱིས་བསྐོར། །རོ་ཙ་གཙང་བའི་ཁ་ཟས་དང༌། །ཁུ་བཅུད་བཟང་པོ་དག་ཀྱང་སྦྱིན། །དེ་ལྟར་བྱས་ན་བཟང་འགྱུར་ཏེ། །གཞན་དུ་བྱས་ན་བཟང་མི་འགྱུར། །གཟི་མདངས་ཉམས་དང་སྙིང་སྟོབས་རྩལ། །གཟུགས་དང་ནད་མེད་དཔའ་བ་དང༌། །འཇིགས་མེད་པ་དང་བློ་ལྡན་པ། །འོག་ནས་རྒྱ་ཆེར་བཤད་པར་བྱ། །རྫས་བཅུད་ནུས་པ་སྨིན་པ་ལས། །རྟ་རྣམས་མངལ་དུ་ཆགས་པའི་ཚེ། །བད་ཀན་པགས་པར་ཁྱབ་གྱུར་ན། །རྟེའུ་དཀར་པོར་སྐྱེ་བར་འགྱུར། །རླུང་གི་ཁ་དོག་སྔོ་བ་སངས་འགྱུར། །མཁྲིས་པ་ཡིས་ནི་ནག་པོར་སྐྱེ། །བད་ཀན་མཁྲིས་པ་འདྲེས་པ་ལས། །རྟ་མདོག་སེར་སྐྱར་སྐྱེ་བ་ཡིན། །གལ་ཏེ་ཁྲག་མཁྲིས་ཉུང་གྱུར་ལ། །བད་ཀན་ཡང་ནི་ཤས་ཆུང་བས། །རྟེའུའི་པགས་པར་ཕྱིན་གྱུར་ན། །མདོག་རྗེས་སེ་བོ་དག་ཏུ་འགྱུར། །ཁྲག་ནི་གལ་ཏེ་མང་གྱུར་ཅིང༌། །བད་ཀན་མཁྲིས་པ་ཤས་ཆུང་བ། །རྟ་ཡི་པགས་པར་ཕྱིན་ན་ནི། །རྟ་ནི་དམར་གྲོ་དག་ཏུ་འགྱུར། །གང་ཚེ་མཁྲིས་པ་མང་གྱུར་ཅིང༌། །ཁྲག་དང་བད་ཀན་ཉུང་གྱུར་པ། །རྟེའུའི་པགས་པར་ཕྱིན་གྱུར་ན། །རྟ་ནི་གྲོ་ནག་དག་ཏུ་འགྱུར། །བརྟག་པའི་ཚུལ་ནི་འདི་ཉིད་ཀྱིས། །བད་ཀན་དང་ནི་ཁྲག་འདྲེས་དང༌། །ཁྲག་མཁྲིས་
འདྲེས་པར་གྱུར་པ་ལས། །རྟ་ནི་སེར་སྐྱ་དག་ཏུ་འགྱུར། །རླུང་དང་མཁྲིས་པ་བད་ཀན་དང༌། །ཁྲག་རྣམས་འདྲེས་པར་གྱུར་པ་ལས། །རྟ་རྣམས་ཀྱི་ནི་ཁ་དོག་དག །རྣམ་པ་དུ་མར་འགྱུར་བ་ཡིན། །ནད་གཞི་རླུང་གིས་བཅད་གྱུར་པ། །པགས་པར་ཕན་ཚུན་གཏོར་བ་ལས། །ཁྲ་བོ་དང་ནི་ཐིག་ལེ་ཅན། །ཁ་དོག་དབྱེ་བ་དག་ཏུ་འགྱུར། །མདངས་ཀྱིས་གཟི་མདངས་འཕེལ་འགྱུར་ལ། །དེ་བཞིན་སྙིང་སྟོབས་དག་ཏུ་འགྱུར། །མདངས་དང་རླུང་ནི་ཤས་ཆེ་ཞིང༌། །མ་འདྲེས་ཟས་ནི་ཟ་བ་ལས། །ནད་མེད་པར་ནི་འགྱུར་བ་ཡིན། །མེ་རླུང་སྙིང་སྟོབས་དག་ལས་དཔལ། །འབྱུང་བ་ཆེན་པོ་ཆ་མཉམ་ཞིང༌། །སྙིང་སྟོབས་ཆེ་ལས་འཇིགས་མེད་འགྱུར། །སྙིང་སྟོབས་རླུང་དང་སྟོབས་ཆེ་ལས། །མགྱོགས་པ་ཕུན་སུམ་ཚོགས་པར་འགྱུར། །སེམས་དང་བློ་དང་སྙིང་སྟོབས་ཡིད། །དེ་བཞིན་བད་ཀན་རང་བཞིན་ཅན། །འདི་དག་ལྷགས་པར་གྱུར་པ་ལས། །ཡན་ལག་བཅུ་ཆང་བློ་ལྡན་འགྱུར། །དགེ་ཞིང་བྱད་ལ་རབ་དགའ་དང༌། །དེ་བཞིན་དབང་པོ་དགའ་བྱེད་པ། །རིགས་དང་དུས་ཚིགས་ཕུན་ཚོགས་ལྡན། །ཡིད་དང་བློ་ནི་མ་ཡེངས་པ། །མངལ་དུ་རྟ་ནི་གང་སྐྱེས་པ། །དེ་ནི་ཡོན་ཏན་ཀུན་ལྡན་འགྱུར། །དེ་ལས་བཟློག་པར་གང་སྐྱེས་པ། །དེ་ནི་ཡོན་ཏན་ཅན་མི་འགྱུར། །བཟང་དང་རྣོ་དང་ཞན་པ་སྟེ། །རང་བཞིན་རྣམ་གསུམ་ཅི་བཞིན་དང༌། །སྐྱེ་བའི་ཆ་ཡང་དེ་བཞིན་ཏེ། །རང་བཞིན་གསུམ་དུ་ཤེས་པར་བྱ། །མངལ་དུ་གནས་ནས་ཟླ་གཉིས་ན། །ནགས་སུ་ཉེ་བར་བསྐྱད་བྱ་ཞིང༌། །ཁ་ཟས་སྣ་ཚོགས་པ་དག་དང༌། །ཐུག་པ་དང་ནི་བལྡག་པ་སྦྱིན། །དེར་ནི་རྟག་ཏུ་གང་བརྟེན་པ། །ཁ་ཟས་གང་ཞིག་འདོད་གྱུར་པ། །དེ་ནི་ཡིད་ལ་རེ་བར་བཤད། །འདི་ནི་དེ་ལ་སྦྱིན་པར་བྱ། །གལ་ཏེ་འདོད་པ་མ་བྱིན་ན། །གཟུགས་མི་སྡུག་ཅིང་མི་སྲུན་དང༌། །ཡན་ལག་མི་ཚང་བློ་ཆུང་དང༌། །འཇིགས་སྐྱེན་སྟོབས་ཆུང་སེམས་ཉམས་ཤིང༌། །འདུས་དང་ལས་ཀྱི་དབང་དང་ནི། །ནད་གཞི་རྣམས་ཀྱི་རང་བཞིན་ལས། །མངལ་དུ་སྐྱེ་བར་འགྱུར་བ་ནི། །ཅི་ལྟ་བར་ནི་ཡོངས་སུ་བཤད། །ལེགས་
ཐོས་ཐོས་དང་ལྡན་པ་ཡིས། །ཚུལ་བཞིན་ཡོངས་སུ་དྲིས་པ་ན། །ཤ་ལི་ཧོ་ཏྲ་དཀའ་ཐུབ་ཆེས། །དྲིས་ལན་དེ་ལྟར་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་མངལ་དུ་ཆགས་པ་ཞེས་བྱ་བ་སྟེ་ལེའུ་ལྔ་པའོ།། །།རྟ་སྐད་ལས་སྐྱེས་དྲང་སྲོང་ནི། །རྟ་ཡི་རང་བཞིན་ཤེས་གྱུར་པ། །ཤ་ལི་ཧོ་ཏྲ་ཉིད་ལས་ནི། །ལེགས་ཐོས་ཀྱིས་ནི་ཡོངས་སུ་དྲིས། །བུ་ཡིས་དྲིས་ནས་དྲང་སྲོང་དེ། །དགའ་བའི་ཚིག་ཏུ་སྨྲས་པ་ནི། །རླུང་དང་མཁྲིས་པའི་བདག་ཉིད་ཅན། །རང་བཞིན་གསུམ་དུ་ཤེས་པར་བྱ། །རྩུབ་ཅིང་མི་བརྟན་རྔ་རྔོག་སྲབ། །འཇིགས་སྐྱེན་སྒྱིད་ཞན་ཁུར་སྟོབས་ཆུང༌། །ལམ་གྱིས་དུབ་ཅིང་སྣ་ནང་མང༌། །གཉིད་མེད་ཤིན་ཏུ་གཟུགས་མི་སྡུག །འཁྲིག་པ་ལ་འདུ་འདུལ་བར་དཀའ། །འདོད་པའི་ནུས་པ་ཆུང་བ་དང༌། །རླུང་གིས་གང་ཚེ་འཁུམས་པ་དང༌། །སླར་ཡང་རྗེས་སུ་རྒྱུག་པ་དང༌། །རྟག་ཏུ་རྟ་རྫི་རྣམས་དང་ནི། །རྟ་ལ་སོགས་ནི་འདེབས་པ་དང༌། །མི་དང་རྟ་ཡི་ཕྱི་ནས་ནི། །རྡུན་ནས་མདུན་དུ་བ་རྒྱུག་པ་དང༌། །འདྲེ་བར་བྱེད་ཚེ་ལུས་ཀུན་ནི། །བཟློག་ཅིང་འདྲེ་བར་མ་ནུས་ཀྱི། །གཞོགས་གཅིག་པ་ནི་ཡང་དང་ཡང༌། །འགྲེ་བར་བྱེད་པ་འང་ཉིད་དང་ནི། །དེ་བཞིན་ལམ་གྱི་གཞི་མཉམ་པར། །ཁལ་མེད་པར་ཡང་བུབ་པ་དང༌། །བརྡེག་ཀྱང་རང་གི་སྤྱོད་པ་ནི། །ཡུན་རིང་ཞིག་ནས་འདོར་བ་དང༌། །བསླབས་པ་རྣམས་ནི་བརྗེད་གྱུར་པའི། །རྟ་ནི་རླུང་གི་རང་བཞིན་ཅན། །རྡུལ་ཅན་ཁྲོ་བ་ཡུན་རིང་དང༌། །གཉིད་མེད་འཐབ་ལ་དགའ་བ་དང༌། །སོ་དང་དེ་བཞིན་ལག་གཉིས་ཀྱིས། །རྟ་ལ་རྟག་ཏུ་འཚེ་བ་དང༌། །རྟ་རྗིའི་ལས་ནི་བྱེད་པ་ལ། །རང་བཞིན་ཞི་བ་སྟོན་པ་ནི། །རྟག་ཏུ་འཇིགས་ཤིང་ནུས་པ་ཆུང༌། །ལམ་དང་ལས་ལ་སྲན་ཆུང་དང། །གཞོགས་གཅིག་གིས་ནི་ཅུང་ཟད་ཙམ། །ཐོག་མར་འདྲེ་བར་བྱེད་གྱུར་ཅིང༌། །དེ་རྗེས་ལུས་ནི་ཐམས་ཅད་ཀྱིས། །ཟློག་ཅིང་འདྲེ་བར་བྱེད་པ་དང༌། །དེ་བཞིན་ཉམ་ངའི་ལམ་དུ་ནི། །ཁལ་གྱིས་དུ་བ་ན་བུབ་པ་དང༌། །འདུལ་སྦྱོང་བ་ཡི་ཚིག་སྙན་ཅིང༌། །བསླབ་པ་
འདོར་ཞིང་འབྲོས་བྱེད་དང༌། །གྲང་བ་ལ་ནི་དགའ་གྱུར་པའི། །རྟ་ནི་མཁྲིས་པའི་རང་བཞིན་ཅན། །སྤུ་མདོག་སྣུམ་ཞིང་སྟོབས་ཆེ་ལ། །སྒྲ་སྙན་དལ་གྱིས་འཚེར་བ་དང༌། །རྟ་དང་དེ་བཞིན་མི་རྣམས་ལ། །རང་བཞིན་ཞི་བ་སྟོན་པ་དང༌། །འདུལ་སྤྱོད་སླ་ཞིང་བསླབས་ལ་བརྟན། །གཉིད་ཆེ་རྟག་ཏུ་བརྟག་པ་དང༌། །ཁལ་དང་ལམ་དུ་གཡུལ་ངོ་རུ། །རྟག་ཏུ་སྡུག་བསྔལ་ཆེར་བཟོད་དང༌། །ཆུ་ལ་བརྟན་ཞིང་ཤུགས་ཆེ་ལ། །གང་དུའང་བུབ་པར་འགྱུར་མ་ཡིན། །འགྲོ་ཚེ་གཞོགས་ནི་གཉིས་ཀ་ཡིས། །ཡང་དང་ཡང་དུ་ཟློག་པ་དང༌། །འོབས་ལ་གོམ་པ་མི་འདོར་གྱི། །ཤུགས་ཀྱིས་མཆོད་བར་འདོད་པ་དང༌། །བདག་པོ་ལ་ནི་དགའ་བ་ཡི། །རྟ་ནི་བད་ཀན་རང་བཞིན་ཅན། །མཚན་ཉིད་གཉིས་ཀ་དང་ལྡན་པ། །རང་བཞིན་གཉིས་པ་ཞེས་བྱར་བཤད། །རླུང་དང་མཁྲིས་པའི་རང་བཞིན་ཅན། །ཐ་མ་ཡིན་པར་ཡོངས་སུ་བཤད། །རླུང་དང་བད་ཀན་རང་བཞིན་ཅན། །བར་མ་དག་ནི་ཡིན་པར་བཤད། །མཁྲིས་པ་བད་ཀན་རང་བཞིན་ཅན། །རྟ་ནི་རབ་མཆོག་ཡིན་པར་བཤད། །ནད་མེད་ལུས་ཟུངས་མཉམ་གྱུར་ཅིང༌། །བད་ཀན་ཅན་གྱི་རྟ་བསྔགས་སོ། །ཤ་ལི་ཧོ་ཏྲའི་མདོའི་གནས་ལས་རྟའི་རང་བཞིན་གྱི་ལེའུ་སྟེ་དྲུག་པའོ།། །།ལེགས་ཐོས་ཐོས་པ་འཛིན་པ་ཡི། །བུ་ལ་ཤ་ལི་ཧོ་ཏྲས་སྨྲས། །བཟང་པོ་སྨན་དང་རི་དགས་དང༌། །འདྲེས་པའི་མཚན་ཉིད་མཉན་པར་གྱིས། །སྟོབས་ཆེན་མདོག་ནི་སྣུམ་པ་དང༌། །དུལ་བའི་གཟུགས་ཅན་གཙང་སྦྲར་ལྡན། །ཚངས་སྤྱོད་མཚན་མོ་གཉིད་ལོག་ཅིང༌། །ལེ་ལོ་མེད་ཅིང་ཕྲག་དོག་མེད། །ལངས་ནས་གཉིད་ནི་ལོག་པ་དང༌། །རྟག་ཏུ་ལངས་ནས་འདུག་པ་དང༌། །བདག་པོ་ལ་དགའ་ལྡབ་སྐྱེན་དང༌། །བསླབས་པ་ནམ་ཡང་མི་འདོར་དང༌། །ཐམས་ཅད་དུ་ནི་དཔའ་བ་དང། །གཡུལ་དང་ལམ་དང་མེ་ལ་ནི། །སྡུག་བསྔལ་གྱིས་ཞུམ་མེད་པ་དང༌། །ནད་ཀྱིས་གདུངས་པར་གྱུར་ན་ཡང༌། །ཤིན་ཏུ་ཉོན་མོངས་མེད་པ་དང༌། །ཅི་ཡང་རུང་བ་ཟོས་ནས་ནི། །མྱུར་དུ་ལུས་ནི་རྒྱས་འགྱུར་དང༌། །ཐམས་ཅད་དུ་ནི་བརྟན་པ་ཡི། །རྟ་ནི་བཟང་པོའི་སྐྱེ་
གནས་ཡིན། །བཀྲ་ཤིས་མཚན་ཉིད་ལྡན་མོད་ཀྱི། །ཅུང་ཟད་སྨད་པ་ཡོད་པ་དང༌། །བསླབ་པ་མྱུར་དུ་ལོབས་ན་ཡང༌། །མྱུར་དུ་བརྗེད་པར་གྱུར་ན་ཡང༌། །མཚན་མོའི་དུས་སུ་ལུས་ཕབ་སྟེ། །གཉིད་ནི་ལོག་པར་བྱེད་པ་དང༌། །རྟ་ལ་ཞེ་སྡང་ཆེ་བ་དང༌། །འཁྲིག་པ་ལ་འདུ་ཕྲག་དོག་ཅན། །དང་པོ་དཔའ་ཞིང་དེ་རྗེས་ལ། །འཇིགས་པ་དག་ཏུ་འགྱུར་པ་དང༌། །ལྕག་གིས་ཅུང་ཟད་གཞུས་པ་ནའང༌། །རིང་དུ་འགྲོ་བར་བྱེད་པ་སྟེ། །དེ་ལྟ་བུ་ཡི་རིགས་ལྡན་པའི། །རྟ་ནི་དམན་པ་ཉིད་ཡིན་ནོ། །རྩུབ་ཅིང་རྟ་ལ་འཇིགས་སྐྱེན་དང༌། །གཉིད་ཆེ་རྒྱུན་ཅན་ལེ་ལོ་ཅན། །ལྟོ་ཆེ་སྦེགས་ཅིང་འཁྱམ་ལ་དགའ། །དེ་བཞིན་ཀུན་དུ་དོག་པ་ཅན། །ཉིན་མོ་དང་ནི་མཚན་མོ་འང་རུང༌། །ཡན་ལག་མ་ལུས་བརྐྱང་ནས་ནི། །རྟག་ཏུ་གཉིད་ནི་ལོག་པ་དང༌། །རྟ་ལ་འཚོ་བར་བྱེད་ལ་དགའ། །ལྕག་གིས་གཞུས་ལ་མི་ཚོར་ཞིང༌། །མྱུར་དུ་ན་བར་བྱེད་པ་དང༌། །ལུས་རྒྱས་པར་ནི་དགའ་བ་ཡི། །རྟ་ནི་རི་དགས་སྐྱེ་གནས་ཡིན། །ཡོན་ཏན་འདྲེས་ལས་འདྲེས་གྱུར་ཏེ། །དེ་བཞིན་དབྱེ་བ་མང་པོའང་ཡོད། །བཟང་པོ་མཆོག་ཏུ་ཤེས་པར་བྱ། །དམན་པ་བར་མ་ཞེས་བཤད་ལ། །རི་དགས་ཐ་མ་ཡིན་ཞེས་བྱ། །རྟ་ཡི་སྐྱེ་གནས་འདི་ཉིད་ཡིན། །མདོར་ན་སྐྱོན་དང་ཡོན་ཏན་དག །འདྲེས་དང་ལྷག་པ་ཡིན་ཞེས་བྱ། །ཤ་ལི་ཧོ་ཏྲའི་མདོའི་གནས་ལས་རྟའི་སྐྱེ་གནས་ཀྱི་ལེའུ་སྟེ་བདུན་པའོ།། །།རྟ་ཡི་རང་བཞིན་དེ་ཉིད་ཤེས། །དུལ་ལ་བརྩོན་ཞིང་དབང་པོ་ཐུལ། །ཤ་ལི་ཧོ་ཏྲ་བློ་ཆེན་ལ། །མཛའ་བོ་ལས་རྒྱལ་གྱིས་དྲིས་པ། །གཟི་བརྗིད་ཆེན་པོ་རྟ་རྣམས་ཀྱི། །རིགས་བཞི་ཇི་ལྟར་ཤེས་པར་བགྱི། །མཚན་ཉིད་སྤྱོད་ལམ་གང་དག་གིས། །དེ་ལས་བཟློག་པར་ཤེས་པར་བགྱིས། །དེ་སྐད་དྲིས་ཏེ་དྲང་སྲོང་ཆེ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་རིགས་བཞི་ཤེས་དགའ་བས། །དེ་ནི་ང་ཡིས་གོ་བར་བྱ། །རིགས་བཞི་རྣམ་པར་དབྱེ་བ་ནི། །སྐྱེ་གནས་དང་ནི་གཟུགས་བྱད་དང༌། །ཚུལ་སྤྱོད་དང་ནི་དུལ་བ་དང༌། །སྐད་གདངས་དབྱིབས་དང་ཁ་དོག་དང༌། །དྲི་ཉིད་ལས་ནི་ཉེར་ཤེས་བྱ། །གང་ཞིག་དེ་ལས་གོ་བཟློག་སྟེ། །
དེ་ཡི་ཁྱད་པར་སྨྲ་བ་ནི། །ཉོན་ལ་རྣམ་པར་དཔྱད་པར་གྱིས། །གཟུགས་བཟང་དཔལ་དང་ལྡན་པ་དང༌། །སྤྱོད་པ་དུལ་ཞིང་བསྔགས་པར་འོས། །བློ་ལྡན་ངང་ཚུལ་བཟང་བ་དང༌། །འདུལ་སྦྱོང་མཁན་གྱིས་བྱས་པ་ཉན། །རྗེས་སུ་མཐུན་ཞིང་ནུས་པ་ལྡན། །གཙང་ཞིང་གཙང་སྦྲ་དག་ལ་བརྟེན། །བཀྲེས་དང་སྐོམ་ལ་སྲན་ཆེ་ཞིང༌། །ཁྲོ་བ་ཆུང་ཞིང་བླན་པར་སླ། །གཟི་བརྗིད་དང་ལྡན་གྲགས་དང་ལྡན། །ལས་རྣམས་ཀུན་གྱི་རྗེས་སུ་འཇུག །བཏུང་དང་ཁ་ཟས་བཟའ་བྱ་ཡི། །ལྷག་མ་དང་ནི་མི་གཙང་དང༌། །རྟ་སྤངས་དང་ནི་དེ་བཞིན་གཅིན། །འདི་ནི་རིང་དུ་སྤོང་བྱེད་ཅིང༌། །གཙང་ཞིང་གཙང་མར་སྤྱོད་པ་དང༌། །ཉལ་ཡང་གཉིད་ནི་མེད་པ་དང༌། །སྦྲང་རྩི་འབྲས་ཡོས་ཁུར་བ་མར། །འོ་ཐུག་སྲེག་རྫས་ལ་དགའ་ཞིང༌། །དྲི་དང་སྣ་མའི་ཕྲེང་བ་དང༌། །ཁྲུས་དང་བཀྲ་ཤིས་ལ་དགའ་ཞིང༌། །འཚེར་ཞིང་དེ་དག་སྣོམ་པ་དང༌། །མི་དག་ལྟ་ན་སྡུག་པ་དང༌། །འཇིགས་མེད་མཁས་ལ་སྲན་ཆེ་དང༌། །སྙན་པར་འཚེར་ཞིང་སྒྲ་སྐད་ཆེ། །སེར་དང་དཀར་དང་དམར་བ་དང༌། །ཕལ་ཆེར་སྦྲང་རྩི་ལྟར་སེར་དང༌། །འགྲོས་ཆེ་སྲན་ནི་ཆེ་བ་དང༌། །བརྟན་ཞིང་སྙན་པ་རྗེས་སུ་འཚེར། །མདོག་སྣུམ་པགས་པ་སྲབ་པ་དང༌། །བྲམ་ཟེ་ཀུན་ལ་དགའ་བ་དང༌། །གཉིད་ལོག་ཚེ་ནི་འབྲས་ཡོས་དང༌། །མར་དང་ཨུ་ཤིར་དྲི་འབྱུང་ལ། །ལྷ་དང་དྲི་ཟའི་སྙིང་སྟོབས་ཅན། །དགེ་ཞིང་རྟག་ཏུ་དེས་པ་སྟེ། །དེ་ལྟའི་ཚུལ་སྤྱོད་ལྡན་པའི་རྟ། །བྲམ་ཟེའི་རིགས་སུ་ཤེས་པར་བྱ། །རྒྱལ་རིགས་ཁྲོ་བའི་ཚུལ་ཅན་ཏེ། །ཚངས་པའི་མདོག་ལྡན་ཤེས་པར་བྱ། །རང་བཞིན་རྣོ་ཞིང་དཔའ་བ་དང༌། །སྒྲ་སྐད་བཏང་ནས་འཚེར་བ་དང༌། །དཔུང་པ་གློ་ཞིང་སྙིང་སྟོབས་ཆེ། །རང་བཞིན་གཙང་ཞིང་སྤྱོད་པ་ཡང༌། །གཅེས་པར་བསྡུས་དང་ལྡན་པ་དང༌། །ཡན་ལག་འབྱེས་ཤིང་པགས་པ་སྲབ། །སྤྱོད་པ་གཙང་ཞིང་དུལ་བ་དང༌། །འཇིགས་པ་རྣམས་ལ་མི་སྐྲག་པ། །ཆུ་དང་མེ་དང་འབྲུག་སྒྲ་དང༌། །སྒྲ་ཆེར་གྲགས་དང་ལྷུང་དང་ཁུར། །ཚ་དང་རྩུབ་པའི་རེག་པ་དང༌། །ས་རྩུབ་ཤིང་གི་ཚང་ཚིང་དང༌། །རིང་དུ་འགྲོ་དང་ལམ་དོག་པར། །གང་
ཞིག་འཇིགས་པ་མེད་པ་དང༌། །གླང་པོའི་ཚོགས་ནི་ཆེན་པོ་དང༌། །དྲིལ་བུ་རོལ་མོའི་སྒྲ་རྣམས་དང༌། །ཅ་ཅོ་འདོན་པའི་སྒྲ་རྣམས་དང༌། །རྟ་གཞན་འཚོར་བར་གྱུར་པ་དང༌། །དུང་དང་རྔ་ཆེན་སྒྲ་དང་ནི། །རོལ་མོའི་སྒྲ་དང་རྫ་རྔའི་སྒྲ། །གདུགས་དང་རྒྱལ་མཚན་བ་དན་གྱིས། །སྐྲག་པར་མི་འགྱུར་རྟ་མཆོག་ཡིན། །རྔ་རྔོག་ལེགས་པར་བརྐྱང་ནས་ནི། །དགའ་བའི་ཡིད་ཀྱིས་འཚེར་བ་དང༌། །རྐང་གཉིས་ལེགས་པར་འཇུག་བཞིན་དུ། །ས་སྟེང་ན་ནི་འཚེར་བ་དང༌། །རྡུལ་དང་གཅིན་དང་རྟ་སྦངས་ནི། །ཡན་ལག་བརྐྱང་སྟེ་འདོར་བ་དང༌། །མཐར་ནི་ཤུགས་ཀྱིས་འདོར་བ་དང༌། །རྟ་གཞན་ལ་ནི་བསྡིགས་པ་དང༌། །གཡུལ་ངོར་རྟ་དང་གླང་པོ་དང༌། །ཤིང་རྟ་དཔུང་བུ་ཆུང་འཇོམས་དང༌། །རྗེས་སུ་སྐད་འདོན་སྒྲ་འཇམ་པས། །ཕྱོགས་ཀུན་ཁྱབ་པར་འཚེར་བ་དང༌། །རྟ་གཞན་དག་ནི་ཕྱིན་ནས་ནི། །དེ་ནི་འགྲོ་བར་བཟོད་མི་བྱེད། །མཚོན་གྱིས་བསྣུན་ཀྱང་ནད་ཆུང་ཞིང༌། །མཚོན་ཆ་མཐོང་ན་འཇིགས་མི་འགྱུར། །སྤྱོད་པ་མྱུར་ཞིང་དཔའ་བ་དང༌། །འཐབ་ཚེ་མྱུར་དུ་ཕ་རོལ་གནོན། །ནོར་བུ་ལྟ་བུར་མིག་སེར་ཞིང༌། །མདོག་བཟང་ཁ་དོག་ངན་པ་མེད། །བློ་ལྡན་དེ་བཞིན་མགྱོགས་བ་དང༌། །སྒྲིན་ཞིང་མ་ཞུམ་སྟོབས་ཆེ་ལ། །རྟག་ཏུ་ལས་ཀུན་ནུས་པ་དང༌། །བག་ཡོད་རྟག་ཏུ་ཉོན་མོངས་མེད། །བསོད་ནམས་བྱེད་པའི་མེ་ཏོག་མར། །འབྲས་བུ་ལྡན་པའི་དྲི་ཡོད་ལ། །ལྷ་དང་དྲི་ཟའི་སྙིང་སྟོབས་ཅན། །དེ་མཚུངས་སྤྱོད་ཡུལ་སྤྱོད་པར་ལྡན། །དགེ་ཞིང་སྤྱོད་པ་ངེས་པའི་རྟ། །རྒྱལ་རིགས་སུ་ནི་ཤེས་པར་བྱ། །རྗེའུ་རིགས་བཏུང་བ་ལ་དགའ་བརྟན། །ཞི་ཞིང་བློ་ཆེ་ལེ་ལོ་ཅན། །མི་འཁྲུགས་དགའ་བར་འགྱུར་བ་མེད། །དུལ་བའི་སྤྱོད་པ་ཡང་དག་ལྡན། །ཁྲོ་བ་མེད་ཅིང་ང་རྒྱལ་མེད། །དུལ་ཞིང་དང་ཚུལ་སྙོམས་པ་དང༌། །ནད་དང་ཚ་དང་བཀྲེས་པ་བཟོད། །ཁལ་བཀལ་ལམ་དུ་འགྲོ་ཚེ་བརྟན། །དེ་ནི་མགྱོགས་བུལ་རན་མ་ཡིན། །ཉམས་དང་ལུས་སྟོབས་བར་མ་སྟེ། །མིག་ནི་དེ་བཞིན་སྔོ་དང་སེར། །གནག་དང་དཱུར་བའི་མདོག་འདྲ་དང༌། །སྔོ་བསངས་སྤུ་མདོག་
དཀར་བ་དང༌། །སྨྱིག་མ་ཏ་ལའི་མདོག་འདྲ་དང༌། །ཕལ་ཆེར་དད་པའི་མདོག་འདྲ་ཞིང༌། །སྟེང་འོག་ཐད་དཀར་ཆེ་མིན་གྱི། །རོ་སྟོད་ཆེ་བ་ཉིད་ཡིན་ནོ། །ཧ་རེ་ནུ་ཀ་དེ་བཞིན་དུ། །རྔ་མོའི་འོ་མའི་དྲི་དང་ལྡན། །བག་ཆུང་གཉིད་ནི་ཆེ་བ་དང༌། །མི་ཡི་སྙིང་སྟོབས་ལ་བརྟེན་པ། །བཟོད་ལྡན་དེ་ལྟའི་སྤྱོད་པ་ཅན། །རྟ་ནི་རྗེ་རིགས་ཡིན་ཞེས་བྱ། །དམངས་རིགས་ངང་ཚུལ་ངན་པ་དང༌། །སྤྱོད་ལམ་སྤྱོད་ཡུལ་མི་གཙང་ཞིང༌། །གཞན་གྱིས་ཡོངས་སུ་ལོངས་སྤྱོད་པའི། །ལྷག་མའི་ཟས་སྐོམ་དག་ལ་དགའ། །སྐམ་དང་སྨད་དང་ངན་པ་དང༌། །བཤད་གཅི་དག་ནི་བརྟེན་པར་དགའ། །མིག་རྐོང་མིག་ནི་ཟླུམ་པ་དང༌། །རྐང་པས་ས་ནི་བརྐོ་བ་དང༌། །བཤང་གཅི་སྣོམ་པར་བྱེད་པ་དང༌། །ཟ་ཞིང་ཉུང་དུ་སྤྱོད་པ་དང༌། །མི་གཙང་སར་ནི་འགྲོ་བ་དང༌། །རྟ་རྫི་ལ་ནི་འཕྲ་བ་དང༌། །རང་དང་རྩིག་པ་ཤིང་ལ་སོགས། །སོ་ཡིས་འདྲད་པར་བྱེད་པ་དང༌། །འབྲེད་བ་དབྱིག་པ་ལྕུག་མ་ཡི། །ལྕག་མི་ཚོར་ཞིང་མི་འཁྲུགས་ལ། །ལུད་པ་ལུ་ཚེ་གསུམ་པ་ཆེ། །འཇིགས་པ་ཀུན་ལས་སྔར་བ་དང༌། །མི་གཙང་བ་ལ་མི་སྨོད་ཅིང༌། །གཙང་སྦྲའི་སྤྱོད་པ་དེ་ལ་མེད། །དུ་བ་རྔུལ་འདྲའི་མདོག་ལྡན་ཞིང༌། །སེར་སྐྱ་མོ་གྲོ་དམར་སྐྱའི་མདོག །བསྲུང་བར་རབ་ཏུ་དགའ་བ་དང༌། །སྤྱོད་པ་ངན་ཞིང་ཞི་ཚུལ་ཆུང༌། །མ་ཁྲོས་ལས་སྦྱར་མི་ནུས་ཀྱི། །ཁྲོས་ན་ལས་ནི་ནུས་པ་དང༌། །བྱ་རོག་ཚང་གི་དྲི་བྲོ་ཞིང༌། །ཁྲ་དང་མི་རོའི་དྲི་དང་ནི། །ཀུན་ཁྱབ་གཉིད་ཆེ་བག་ཆུང་ལ། །སྲིན་པོ་ཤ་ཟའི་སྙིང་སྟོབས་ཅན། །དེ་འདྲའི་སྤྱོད་པ་མདོག་ལྡན་པའི། །རྟ་ནི་དམངས་རིགས་ཡིན་ཤེས་བྱ། །དེ་དག་འདྲེས་པར་འགྱུར་བ་ཡི། །སྐྱེ་བ་དག་ཀྱང་བསྟན་པར་བྱ། །རྒྱལ་རིགས་བྲམ་ཟེའི་རིགས་མོ་ལ། །ཞུགས་པའི་བུ་ནི་དངུལ་ཆུར་བཤད། །དངུལ་ཆུ་དེ་ནི་སྤྱོད་པ་གཙང༌། །དེས་ཤིང་ལྷག་མ་ཟ་མི་བྱེད། །མདོག་ནི་བ་སོ་ལྟར་དཀར་སེར། །ནག་པོའི་མདོག་ཏུ་འང་འགྱུར་བ་ཡིན། །ཕལ་ཆེར་མིག་ནི་དང་བ་དང༌། །སྒྲ་སྙན་རྗེས་སུ་སྒྲོགས་པར་བྱེད། །ཆང་དང་ཕྲེང་བའི་དྲི་ལྡན་གྱི། །དྲི་མི་ཞིམ་པའང་ཡོད་མ་ཡིན། །
གཉིད་ལོག་ན་ནི་བག་མེད་པའི། །རྟ་ནི་རིགས་འཛིན་རྒྱུད་ཡིན་ནོ། །བྲམ་ཟེའི་རིགས་མོར་རྗེའུ་རིགས་ཞུགས། །དེ་ནི་མ་ག་ད་ཞེས་བྱ། །སྙིང་སྟོབས་ཞན་ཞིང་ཁུར་སྟོབས་ཆེ། །ལམ་དུ་ཆས་ཚེ་འཚེར་ཞིང་འགྲོ། །རྔོག་མ་འཚོལ་བར་སྐྱེ་བ་དང༌། །གར་ལའང་སྨོད་པར་མི་བྱེད་དོ། །བུང་མེད་མིག་ནི་ན་བ་དང༌། །འགྲོས་ཆེ་ཡིད་ཕེབས་མེད་པ་དང༌། །ཁ་དོག་མི་སྡུག་པ་ཉིད་དེ། །ཤ་ཟའི་སྙིང་སྟོབས་དག་ལ་གནས། །སྡིག་ལ་དགའ་ཞིང་བ་སྟར་བ་དང༌། །གདུལ་དཀའ་དྲི་ནི་མི་ཞིམ་པ། །སྤྱོད་པ་ངན་པ་སྤྱོད་པ་དང༌། །དམན་པར་ལྟ་བ་མ་གད། །བྲམ་ཟེའི་རིགས་མོར་རྗེའུ་རིགས་དག །ཞུགས་པ་ལས་ནི་སྐྱེས་པའི་རྟ། །དེ་ནི་གདོལ་བ་ཞེས་བཤད་དེ། །སྡིག་པ་སྐྱེད་པའི་སྤྱོད་ཡུལ་ཅན། །ལས་རྣམས་ལ་ནི་མི་འཇུག་ཅིང༌། །གཏུམ་ཕ་བོང་བུའི་སྒྲ་ཅན་ཡིན། །སྒྲ་འཆག་རྩུབ་ཅིང་གདུག་པ་དང། །ཡན་ལག་མི་སྙོམས་པག་མེད་ལྡན། །མི་ཤིས་པ་ཡི་མཚན་ཉིད་དང༌། །མཚན་མ་སྤྱོད་པས་ཉེ་བར་བསྒོས། །ཐིག་ལེ་ཞུ་བ་མི་སྡུག་པ། །སྨད་པ་ཡིས་ནི་ཡོངས་སུ་ཁྱབ། །བདག་ལ་གསོད་པར་བྱེད་པ་དང༌། །བག་མེད་གནས་སུ་ཁྱེར་བར་བྱེད། །རྟ་སྤངས་ལྕི་བ་གཏོང་བ་ན། །ཟ་ཞིང་སྨོད་པར་མི་བྱེད་ལ། །མཐར་ནི་གནོད་པ་ཉིད་བྱེད་ཅིང༌། །ཁང་སྟོང་དག་ཏུ་དགའ་བར་བྱེད། །ཅེ་སྤྱང་དག་གམ་སྤྱང་ཀིའམ། །དུ་བའི་མདོག་གམ་མདོག་ངན་ལྡན། །སྒྲ་རྩུབ་ཡི་དྭགས་དྲི་ཅན་ཏེ། །ཆད་ལ་དགའ་ཞིང་ཤ་ལ་དགའ། །ཤ་ཟ་སྲིན་པོའི་སྤྱོད་པ་ཅན། །སྤྱོད་པ་ངན་པ་གདོལ་བའི་རྟ། །རྟགས་དང་མཚན་མ་འདི་དག་གིས། །རིགས་བཞིར་རྣམ་པར་དབྱེ་བར་བྱ། །གང་ཞིག་ཕ་དང་རྟག་སྤྱོད་འདྲ། །སྐྱེས་པའི་བུ་ནི་གང་ཡིན་པ། །རིགས་བཞི་རུ་ནི་རྣམ་ཕྱེ་ལ། །རྟ་ནི་རང་གི་རིགས་སུ་གཞག །རིགས་ཀྱི་དབྱེ་བ་ཅི་བཞིན་ཤེས། །སྡིག་པས་གོས་བར་མི་འགྱུར་རོ། །སྙིང་སྟོབས་སྤྱོད་པ་ལྷག་མ་ནི། །གང་གང་ཡིན་པ་མཉམ་པར་གྱིས། །དྲི་ཟ་བྲམ་ཟེ་དང་མཉམ་ལ། །གནོད་སྦྱིན་རྒྱལ་རིགས་ཉིད་དང་འདྲ། །སྲིན་པོ་རྗེའུ་རིགས་དང་མཚུངས་ཏེ། །དམང་རིགས་ཤ་ཟ་ཉིད་དང་འདྲ། །
དེ་ལྟར་སྐྱེ་གནས་འདྲ་བ་ཡི། །རང་རང་ཅི་བཞིན་རྣམ་པར་དབྱེ། །དེ་བཞིན་སྤྱོད་ཚུལ་མི་མཐུན་པ། །ཕྱ་ན་སྡིག་པས་གོས་པར་འགྱུར། །དེ་ལྟར་ལེགས་ལྡན་རྗེས་སྟོན་པ། །ཤ་ལི་ཧོ་ཏྲས་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་རྟའི་རིགས་བཞིའི་ལེའུ་སྟེ་བརྒྱད་པའོ།། །།དེ་ལ་རྟ་ཡི་མཚན་ཉིད་ནི། །ཡན་ལག་མ་གཏོགས་ཐག་དད་དེ། །གདོང་ནི་སྲབ་ལ་རྒྱ་ཆེ་ཞིང༌། །ཟུར་བཞི་པ་ལ་གཡུལ་སྙོམས་པ། །དྲང་ཞིང་འཁྱོག་པ་མ་ཡིན་ལ། །ཡོངས་སུ་ཚད་བ་བསྔགས་པ་ཡིན། །ཁ་ནི་བཙུམས་དང་རྒྱ་ཆེ་ལ། །དྲི་ཟད་ཁ་ཆུ་ཉུང་བ་དང༌། །ཁ་ཆུ་མི་འཇིག་སྐམ་པོ་མིན། །རྟ་ལ་རབ་ཏུ་བསྔགས་པ་ཡིན། །སོ་ནི་ཁ་དོག་ཡིད་འོང་བཟང༌། །སྲོག་ཤིང་སྲ་ལ་བརྟན་པ་དང༌། །མ་གྱེས་དྲང་པོར་སྐྱེ་བ་དང༌། །སྣུམ་ཞིང་ནང་མ་མཐོ་བ་དང༌། །མཐོ་ཞིང་རྩ་བ་བརྟན་པ་དང། །མཚན་མ་གསལ་ཞིང་སྲ་བ་དང༌། །སྦྲང་རྩི་འདྲ་བའམ་མ་རབ་ཏུ་དཀར། །རྟ་ལ་བསྔགས་པར་གྱུར་པ་ཡིན། །འགྲམ་སོ་མཉམ་ཞིང་ཟླུམ་པ་དང༌། །སྲ་ཞིང་སྙོམས་པར་གྱུར་པ་བཟང༌། །མཆེ་བ་མདུན་སོའི་མདོག་འདྲ་ཞིང༌། །རྩེ་མོ་རྣོ་བར་གྱུར་པ་དང༌། །ཟླུམ་ཞིང་རྩ་བ་བརྟན་པ་དང༌། །སྣུམ་ཞིང་འཇམ་ལ་སྐྱེ་བ་བསྔགས། །ལྕེ་ནི་སྲབ་ཅིང་རྗེས་འབྲེལ་དང༌། །འཇམ་ཞིང་རིང་ལ་སྙོམས་པ་དང༌། །མཉམ་ཞིང་འཇམ་ལ་དམར་བ་དང༌། །ཁྱི་ཡི་ལྕེ་དང་འདྲ་ན་བཟང༌། །ལྕེ་རྩ་ཅུང་ཟད་མཐུག་པ་དང༌། །འཇམ་ཞིང་མཉེན་ལ་སྙོམས་ལ་སྲབ། །བརྟན་ཞིང་ལྗང་ལྗིན་མེད་པ་དང༌། །རིང་ཞིང་དམར་ན་རབ་ཏུ་བཟང༌། །ལྕེའུ་ཆུད་གཏིང་རིང་རྩེ་མོ་དམར། །སྲབ་ལ་རི་མོས་རྣམ་པར་ཁྱབ། །འཇམ་ཞིང་གོས་པ་མེད་པ་དག །རྟ་ལ་རབ་ཏུ་བསྔགས་པ་ཡིན། །མཆུ་ནི་འཇམ་ཞིང་མཉེན་པ་དང༌། །དབྱེ་སླ་ཤ་རྒྱས་དབྱིབས་ལེགས་དང༌། །ཤིན་ཏུ་གཡོ་དང་འཕྱང་བའང་མིན། །སོ་ནི་ཁེབས་པར་གྱུར་པ་དང༌། །མཉམ་ཞིང་སྙོམས་ལ་ཟླུམ་པ་དང༌། །ཚད་ལྡན་དྲང་ན་བསྔགས་པ་ཡིན། །སྣ་གུང་མཉམ་པར་དབུགས་རྒྱུ་ཞིང༌། །ཟླུམ་ལ་ནང་ན་ཡངས་པར་
སྣང། །མཉེན་ཞིང་འཇམ་ལ་གནོད་པ་མེད། །རྟ་ལ་བསྔགས་པར་གྱུར་པ་ཡིན། །མཚུལ་པ་དྲང་ཞིང་དབྱིབས་མཛེས་ལ། །སྐྱོན་མེད་པར་ཡང་གང་གནས་དང༌། །དྲང་ཞིང་ཟླུམ་ལ་འཇམ་ཞིང་མཉེན། །ཡོན་ཏན་དག་གིས་བརྒྱན་ན་བཟང༌། །རྟ་ཡི་འཛུམ་ནི་དབུས་སྲབ་ཅིང༌། །འགྲམ་གཉིས་མཐོ་བར་གྱུར་ན་བཟང༌། །ཁ་འགྲམ་མཉེན་ཞིང་སྲབ་ལ་སྙོམས། །བུ་ག་ཁེབས་ཤིང་ཟླུམ་ལ་འབྱར། །ཁ་འགྲམ་ཡངས་པར་སྣང་གྱུར་པའི། །རྟ་ནི་ཡིད་དུ་འོང་བ་ཡིན། །མཁུར་ཚོས་བྱི་དོར་བྱས་འདྲ་ཞིང༌། །དབུས་སྡུག་སྲབ་ལ་ལྟ་ན་སྡུག །རིམ་གྱིས་མཁུར་བའི་ཞེང་ཆེ་ཞིང༌། །ཤ་ཡིས་རྒྱས་པར་གྱུར་པ་བསྔགས། །སྣ་འགྲམ་པགས་སྲབ་ན་ཆུང་བ། །རིམ་གྱིས་ཞིང་ཆེ་སྲ་བ་དང༌། །མཁུར་པ་ལེགས་པའི་འཕྲལ་དང་ནི། །རྣ་བར་ལེགས་པར་གནས་ན་བཟང༌། །མཆི་མ་འཛག་གནས་རྒྱུས་པ་སྲ། །མི་མངོན་ཤ་ནི་སྲབ་ན་བཟང༌། །མིག་ནི་དཀྱུས་རིང་མིག་འབྲས་དག །ཤིན་ཏུ་དང་བར་སྣང་བ་དག །ནོར་བུའི་འོད་ཀྱི་མདངས་འདྲ་ཞིང༌། །སྣུམ་པའི་སྦྲང་རྩི་ལྟར་སེར་སྐྱ། །སྣ་མ་འདྲ་འམ་རྨ་བྱ་འདྲ། །རྔ་མོ་ཀ་ལ་པིངྐ་ཡི། །ངུར་པའམ་གང་མ་སྲེག་ནག་པོ། །གླང་ཆེན་གྱི་ནི་མིག་འདྲ་འམ། །སེང་གེ་རི་དགས་མིག་འདྲ་འམ། །དེ་བཞིན་མཆིལ་པའི་མིག་འདྲ་ཞིང༌། །རྫི་མ་མཐུག་ཅིང་རིང་བ་ཡི། །མིག་ནི་རྟ་ལ་བསྔགས་པ་ཡིན། །མིག་སྦུབས་སྦོམ་པོ་མ་ཡིན་ཞིང༌། །གཙང་དང་མི་མཉམ་མེད་པ་དང༌། །དྲང་ཞིང་རིམ་གྱིས་སྲབ་པ་དང༌། །བལྟ་བའི་ཚེ་ན་ལྷོད་པ་དང༌། །སྨིན་མའང་སྙོམས་ཞིང་རིམ་གྱིས་སྲབ། །ཤ་ནི་སྲ་ཞིང་ཟླུམ་པ་དང༌། །ཤ་དང་པགས་པ་ལེགས་པར་འབྲེལ། །རྩ་རྒྱུས་མི་མངོན་མཉམ་ན་བཟང༌། །འཕྲལ་བ་ཡངས་པར་སྣང་བ་དག །ཤ་སྲབ་མཉམ་ཞིང་དབྱེས་ཆེ་དང༌། །རིམ་གྱིས་ཡངས་པར་གྱུར་པ་དང༌། །གཉེར་མ་མེད་ན་བསྔགས་པ་ཡིན། །འགྲམ་གླིང་རིམ་གྱིས་ཡངས་པ་དང༌། །བརྟན་ཞིང་སྲ་བར་གྱུར་པ་བཟང༌། །རྣ་བ་སྤུ་དང་གཉེར་མ་མེད། །རྩེ་མོ་ཕྲ་བ་བསྔགས་པ་ཡིན། །རྟ་ཡི་མགོ་པོ་
སྙོམས་པ་དང༌། །རིང་ཞིང་རྒྱ་ཆེ་ནད་མེད་དང༌། །གཙུག་དང་ཕུམ་ཕུམ་ལེགས་པ་དང༌། །དབྱིབས་ལེགས་པ་ནི་བསྔགས་པ་ཡིན། །རྔོག་མ་ཤིན་ཏུ་མང་ཉུང་མིན། །འཇམ་ཞིང་དེ་བཞིན་ནག་ནོག་མེད། །སྣུམ་ཞིང་རིང་ལ་ཅུང་ཟད་འཁྱིལ། །དེ་བཞིན་རིམ་པར་ལེགས་གནས་ཤིང༌། །ཤིན་ཏུ་མི་རིང་རབ་ཐུང་མིན། །རྟ་ལ་བསྔགས་པར་འགྱུར་བ་ཡིན། །རྟ་ཡི་སྦུ་ནི་མཐུག་མཉེན་འཇམ། །རྩ་བ་བརྟན་ཞིང་ཤ་ལ་འཛུགས། །ཤིན་ཏུ་སྣུམ་ཞིང་ལེགས་པར་སྐྱེ། །ཉག་རེ་ལས་ནི་སྐྱེ་བ་བསྔགས། །ལྐོག་མ་མགོ་དང་མགྲིན་པར་འབྲེལ། །རང་བཞིན་ཟླུམ་ལ་སྙོམས་པ་དང༌། །ལྗན་ལྗིན་གྱིས་ནི་གོས་པ་མེད། །དྲི་མ་མེད་ན་བསྔགས་པ་ཡིན། །སྲོལ་མདུད་ཟླུམ་ཞིང་མཉམ་ལ་འབྲེལ། །དབྱིབས་ནི་དྲང་པོར་འདུག་པ་བསྔགས། །སྐེ་མགྲིན་རིམ་གྱིས་ཟླུམ་པ་དང༌། །རིང་ཞིང་དབྱིབས་ནི་ལེགས་པ་དང༌། །མིད་པ་རྩེའུ་ཆུང་དང་འབྲེལ་ཞིང༌། །དེ་བཞིན་མགོ་བོ་དང་འབྲེལ་བ། །ལྐོག་མའི་ཕྱོགས་ནི་ཤ་སྲབ་ཅིང༌། །ལྷོད་མིན་ཅུང་ཟད་གུག་པ་དང༌། །ཤ་རྒྱས་ལེགས་པར་འབྲེལ་པ་ནི། །རྟ་ལ་རབ་ཏུ་བསྔགས་པ་ཡིན། །སྐ་རྩ་ལེགས་པར་རྒྱས་པ་དང༌། །ཤ་ཆེ་སུམ་མདོ་ཡངས་པ་དང༌། །ཤ་མཁྲིགས་ཡན་ལག་ལེགས་འབྲེལ་ཞིང༌། །ཤ་མོ་ལྷོད་ན་བསྔགས་པ་ཡིན། །ཟེའུ་ནི་ལེགས་འབྲེལ་ཆེར་མི་མཐོང༌། །ཟེའུ་ལྟག་དང་ནི་རྗེས་སུ་འབྲེལ། །ཕྲག་གང་ཟེ་འདབ་འབྲེལ་ཞིང་ཡངས། །ཤེ་རྒྱས་ཚིགས་འབྲེལ་མཉམ་ཞིང་སྲ། །སོག་པ་ཤ་རྒྱས་རབ་ཏུ་འབྲེལ། །རྟ་ལ་བསྔགས་པར་འགྱུར་བ་ཡིན། །བ་ཧ་ཟླུམ་ཞིང་ཤ་རྒྱས་ལ། །གཙུག་མེད་ཤིན་ཏུ་བརྟན་པ་དང༌། །ཡངས་ཤིང་དབུགས་ནི་རྒྱུ་བ་དང༌། །མཐོང་བར་གྱུར་ན་བསྔགས་པ་ཡིན། །དཔུང་རྒྱབ་ཟླུམ་ཞིང་རྒྱུས་པ་རྩ། །མི་མངོན་ཚིགས་དང་ཤ་སྙོམས་ལ། །ཤ་ནི་ཅུང་ཟད་མཐོ་བར་སྣང༌། །དེ་ནི་ཤིན་ཏུ་བསྔགས་པ་ཡིན། །དཔུང་པ་ཤ་རྒྱས་རིང་བ་དང༌། །སྲ་ཞིང་ཟླུམ་ལ་དྲང་ཞིང་མཉམ། །རིམ་གྱིས་ཕྲ་བར་གར་པ་དང༌། །ཚིགས་ནི་ལེགས་པར་འབྲེལ་བ་བཟང༌། །བུས་མོ་དག་ནི་རབ་མཉམ་
ཟླུམ། །ཚིགས་སམ་ཚིགས་ནི་མི་མངོན་དང༌། །མཛེས་ཤིང་རྩ་མི་མངོན་པ་དང༌། །འགྲོ་ཚེ་གུག་པར་བདེ་ན་བཟང༌། །ཆེ་དྲང་རིང་ཞིང་ཤིན་ཏུ་ཟླུམ། །ཤིན་ཏུ་ཤ་སྲབ་མ་ཡིན་མཁྲེགས། །རྩ་རྒྱུས་དག་ནི་མི་མངོན་ལ། །ནད་མེད་པ་ནི་རྟ་ལ་བསྔགས། །ཚེའུ་རྩུབ་ཅིང་འགྲེང་བ་དང༌། །ཟླུམ་ཞིང་ལེགས་སྐྱེས་ཐུང་བ་དང༌། །ཚིགས་མི་མངོན་ཞིང་ལོང་མོ་དང༌། །སྒྲོག་མཁར་རིང་པོར་སྣང་དང་བཅས། །རྐང་པ་དང་འབྲེལ་མཉམ་ཞིང་རིང༌། །རྟ་ལ་བསྔགས་པར་གྱུར་པ་ཡིན། །ཚེའུ་ཆེ་ཤིན་ཏུ་མཉམ་ཞིང་ཟླུམ། །རིང་ཞིང་ཟླུམ་ལ་མཛེས་པ་དང༌། །དབུས་ནི་ཅུང་ཟད་རྐྱོང་བ་དང༌། །ཚེའུ་སྤུས་གཡོགས་བསྔགས་པ་ཡིན། །རྨིག་པ་མཐོ་ཞིང་ཟླུམ་པ་དང༌། །ཤིན་ཏུ་སྲ་ཞིང་མཐུག་པ་དང༌། །ཟ་མ་ཏོག་ལྟར་ཟླུམ་ཞིང་མཛེས། །བོད་རྨིག་འདྲ་ནའང་བསྔགས་པ་ཡིན། །དེ་བཞིན་སྒྲོས་ནི་མ་གས་ཤིང༌། །རྣོ་ཞིང་མི་གུག་ཟེགས་པ་མེད། །ཁ་དོག་དུ་མའམ་ཁ་དོག་གཅིག །ཁྲ་བོར་གྱུར་པ་མེད་ན་བཟང༌། །དབུས་ནི་ཤིན་ཏུ་ཟབ་པ་དང༌། །རྨིག་མཐིལ་རྡོ་ལེབ་ལྟར་སྲ་ཞིང༌། །སྦལ་མཚམས་ལེགས་པར་སྐྱེས་པ་ནི། །མཛེས་པ་དག་དང་ལྡན་པ་དང༌། །སྦལ་པ་བུབ་ཅིང་གསལ་བར་མངོན། །མཚམས་ནི་ལེགས་པར་དོད་པ་དང༌། །ཉེ་འཁོར་མཉམ་ཞིང་འཇམ་པ་དང༌། །རྐང་པའི་ནད་དང་བྲལ་བ་དང༌། །བརྟན་ཞིང་ལྗན་ལྗིན་མེད་པ་དང༌། །ཁ་དོག་སྣུམ་པ་བསྔགས་པ་ཡིན། །ཟེའུའི་ཤ་ནི་རྒྱས་པ་དང༌། །གཙུག་མེད་པ་ནི་བསྔགས་པ་ཡིན། །སྒ་འོག་མཉམ་ཞིང་ཡངས་པ་དང༌། །རྒྱབ་ནི་མཐེབ་སོར་ཙམ་གྱིས་དམའ། །སྒལ་ཚིགས་ཅུང་ཟད་མཐོ་བ་དང༌། །ཤ་ཡིས་རྒྱས་ན་བསྔགས་པ་དང༌། །རྩིབ་མ་གུག་ཅིང་ལྕང་ལྕོང་མེད། །མི་མངོན་རབ་ཏུ་མཉམ་ཞིང་སྲ། །ཕྲག་གོང་རྒྱས་པར་ཁྱབ་གྱུར་ཅིང༌། །མཉམ་ཞིང་འཇམ་ན་བསྔགས་པ་ཡིན། །གསུས་ཁྱིམ་ཟླུམ་ཞིང་ཡངས་པ་དང༌། །རི་དགས་ཀྱི་ནི་དབྱིབས་འདྲ་ཞིང༌། །བུ་ག་མེད་ལ་ཐུང་ཟླུམ་ཆུ། །དགུ་སྙོམས་པ་ནི་བསྔགས་པ་
ཡིན། །ཨོང་དོ་མཉམ་ཞིང་ཟླུམ་པ་དང༌། །དབྱིབས་ནི་ལེགས་པར་གྱུར་པ་དང༌། །མཇུག་དོ་ཤིན་ཏུ་རྒྱས་མིན་ཞིང༌། །ཧ་ཅང་ཞུམ་པ་ཡང་མ་ཡིན། །རྒྱབ་གཞུང་བས་ནི་མཐོ་ན་བཟང༌། །སྲ་ཞིང་ཟླུམ་ལ་རྒྱུས་མི་མངོན། །གསལ་ཞིང་རིམ་གྱིས་མཛེས་པར་གནས། །ཤིན་ཏུ་ཐུང་དང་རིང་བ་མིན། །གདོང་གི་ཚད་དང་མཉམ་པ་དང༌། །མཇུག་མ་དང་ལེགས་འབྲེལ་བ་བཟང༌། །རྟ་ཡི་རྔ་མ་སྤུ་རིང་ཞིང༌། །མ་ཉམས་ཁ་དོག་གཅིག་པ་དང༌། །མཉེན་ཞིང་སྣུམ་པར་གྱུར་པ་ནི། །རྟ་ལ་ཤིས་པར་བཤད་པ་ཡིན། །མཇུག་ཙོས་ཤིན་ཏུ་མཐོ་མ་ཡིན། །ཤིན་ཏུ་གྱེས་དང་འདུས་པའང་མིན། །ལུས་དང་རྗེས་མཐུན་ཚད་དང་ལྡན། །དེ་ལྟ་བུ་དག་བསྔགས་པ་ཡིན། །རྐུབ་ནི་ཟབ་ཅིང་ཟླུམ་པ་དང༌། །དབྱིབས་ལེགས་ཕྱི་རོལ་གཉེར་མ་མེད། །གང་གིས་རྟ་སྤངས་ལེགས་གཏོད་བ། །དེ་ནི་རབ་ཏུ་བསྔགས་པ་ཡིན། །བརླ་ནང་ཤིན་ཏུ་ཡངས་མིན་ཞིང༌། །དོག་པར་གྱུར་པ་མིན་ན་བསྔགས། །རླིག་པ་ངོ་མཉམ་ལེགས་འབྲེལ་སྐྱེས། །སྤུ་ནི་མེད་པར་གྱུར་པ་དང༌། དབུས་ནི་བིལ་བ་ཙམ་ཞིག་ནི། །ཤིན་ཏུ་མི་འཕྱང་གྱུར་བ་བསྔགས། །མཚན་ནི་རྩ་སྦོམ་རིམ་གྱིས་ཕྲ། །འཇམ་ཞིང་མྱུར་དུ་ལྡང་བ་དང༌། །སྦུབས་ཡངས་པ་ས་ནི་གཡོགས་པ་དང༌། །ཁ་ཞིང་ཤིན་ཏུ་ཕྱེ་ཞིང་ཟླུམ། །གཏིང་རིང་ཁ་དོག་གཅིག་ལྡན་པའི། །རྟ་ནི་བསྔགས་པར་འགྱུར་བ་ཡིན། །དཔྱི་མགུལ་མཉམ་ཞིང་དབྱིབས་ལེགས་ལ། །བགས་སྲབ་སྤུ་ནི་ལེགས་པ་བཟང༌། །རྐུབ་ཚོས་སྲ་ཞིང་ལེགས་པར་འབྲེལ། །རྩ་རྒྱུས་དག་ནི་མི་མངོན་བཟང༌། །དབྱི་ནི་ལེགས་པར་འབྱོར་བ་དང༌། །ལེགས་པར་རྫོགས་པར་གྱུར་པ་དང༌། །ཡངས་ཤིང་དཀྱུས་ནི་རིང་བ་དང༌། །པགས་པ་སྲབ་ལ་ཤ་རྒྱས་བཟང། །རྗེ་ངར་སྙོམས་ཤིང་དབྱིབས་ལེགས་དང༌། །རིམ་གྱིས་ཕྲ་བར་གྱུར་པ་དང༌། །ཤིན་ཏུ་ཕྲ་བའི་རུས་པས་ཁྱབ། །རྟ་ནི་བསྔགས་པར་འགྱུར་བ་ཡིན། །ཆེ་དྲང་ལ་སོགས་ལུས་སྟོད་ནི། །ཅི་འདྲར་རོ་སྨད་དེ་བཞིན་དུ། །མཚན་ཉིད་ཐམས་ཅད་བཤད་
པར་བྱ། །དེ་ཡི་འོག་ཏུ་རྒོད་མ་ཡི། །ལུས་ཀྱི་ཕྱོགས་ཀྱི་མཚན་ཉིད་དག །གང་དག་ཡིན་པ་བཤད་པར་བྱ། །དེ་ཡི་མཚན་ནི་མཉམ་ཆེ་གསལ། །ལེགས་པར་བལྟམས་ཤིང་ལེགས་པར་འཛག །བུག་ཆེ་ཞིང་གྲྭ་མཚམས་ཆེ། །རིང་ཞིང་མཚན་ནི་རྒྱ་ཕྱེད་ལ། །མངལ་གྱི་ཉེས་པ་དང་བྲལ་བ། །དེ་ཡི་མོ་མཚན་དེ་འདྲ་བསྔགས། །ནུ་མ་ཟླུམ་ཞིང་རྒྱས་པ་དང༌། །ཤིན་ཏུ་འཕྱང་བ་མ་ཡིན་དང༌། །འོ་མ་སྐྱོན་མེད་ལེགས་པར་རྒྱས། །རྒོད་མ་རབ་ཏུ་བསྔགས་པ་ཡིན། །ནུ་སོར་མཉམ་ཞིང་ཟླུམ་པ་དང༌། །བུ་ག་ལེགས་ཤིང་འོ་མ་རྒྱས། །ཤིན་ཏུ་འདུས་མིན་གྱེས་པའང་མིན། །མཐུག་ཅིང་བརྟན་ལ་ལེགས་པར་སྐྱེས། །ཤིན་ཏུ་འབྱར་མིན་རབ་འཕྱར་མིན། །རྟེ་འུས་འོ་མ་བཏུང་བདེ་བསྔགས། །ལྷག་མ་རྒོད་མའི་ཡན་ལག་ཀུན། །རྟ་ཕོ་དང་ནི་འདྲ་བར་བསྔགས། །དེ་ལྟ་མོད་ཀྱི་གཟུགས་མཛེས་པས། །རྒོད་མའི་གཟུགས་ནི་བཟང་བར་བཤད། །ལུས་ནི་སྦོམ་པོར་གྱུར་པ་ཡང༌། །ཕྲ་བ་ལྟ་བུར་མངོན་པ་ཡིན། །ལུས་སྲབ་པར་ནི་གྱུར་ན་ཡང༌། །རྒོད་མ་སྤུ་མདངས་ཡོད་པ་མངོན། །དེ་འདྲའི་ཚུལ་གྱིས་ལུས་ཀྱི་ནི། །དབྱིབས་ཀྱི་བྱེ་བྲག་ཤེས་པར་བྱ། །རྒོད་མ་རྟ་ཕོ་འདྲ་བ་དང༌། །རྟ་ཕོ་རྒོད་མ་འདྲ་བར་རུ། །གལ་ཏེ་ཕྱིན་ཅི་ལོག་ཅི་སྣང༌། །དགོས་པའི་འབྲས་བུ་འབྱིན་མི་འགྱུར། །ལུས་ཆེ་མདངས་ནི་བཟང་བ་དང༌། །ལེགས་པར་སྐྱེས་ཞིང་ཚད་དང་ལྡན། །གཟི་བརྗིད་ཡན་ལག་དབྱེས་པ་དང༌། །ཡན་ལག་ཆ་ནི་སྙོམས་པ་དང༌། །གཙུག་འཁྱིལ་དགེ་ཞིང་གཟི་མདངས་དགེ །དྲི་བཟང་ཡན་ལག་མི་སྡུག་མེད། །ལུས་རྒྱས་འགྲོས་ནི་བཟང་བ་དང༌། །འཇིགས་མེད་གནས་གསུམ་ཡངས་པ་དང༌། །ཚད་མཉམ་དབྱི་བས་ནི་ལེགས་པ་སྟེ། །གང་ཞིག་དེ་འདྲའི་ལུས་ལྡན་པ། །བདག་པོའི་གྲགས་དང་རིགས་དང་ནོར། །རྣམ་པར་འཕེལ་བར་འགྱུར་བ་ཡིན། །ཡོན་ཏན་ཕྱིན་ཅི་ལོག་ལྡན་པ། །བདག་པོའི་དོན་རྣམས་ཉམས་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་ཡན་ལག་ཐམས་ཅད་ཀྱི་མཚན་ཉིད་ཀྱི་ལེའུ་སྟེ་དགུ་པའོ།། །།
དཀའ་ཐུབ་བསམ་གཏན་ཆེན་པོ་ཡིས། །གཟི་བྱིན་གསལ་གྱུར་དྲང་སྲོང་ལ། །བློ་དང་ལྡན་པ་ལེགས་ཐོས་ཀྱིས། །སྔར་བཤད་པ་ནི་དྲིས་གྱུར་པ། །ཁྱོད་ཀྱིས་ཕྱོགས་བསྟན་གསུངས་མོད་ཀྱི། །བཤད་པ་དག་ནི་མ་གསུངས་པས། །བསྟན་པ་རྣམས་ཀྱི་བཤད་པ་ནི། །ལེགས་ལྡན་གསུང་བར་མཛད་པའི་རིགས། །བསྟན་པ་བཤད་པ་དང་བཅས་པ། །བུ་ཡིས་བསྐུལ་བས་སྨྲས་པ་ནི། །མིད་པ་སྲོལ་གོང་དང་འབྲེལ་བས། །རོ་འཛིན་ལྕེར་ནི་ཤེས་པར་བྱ། །དེ་ཡི་སྟེང་ནི་རྐན་ཡིན་ཏེ། །མ་རྐན་ལྕེ་འོག་ཡིན་པར་བཤད། །འགྲམ་སོ་འགྲམ་པ་ལས་སྐྱེས་པ། །ལྡང་པའི་སོ་ནི་ཡིན་པར་བཤད། །དེ་ལས་གཞན་པ་མདུན་གྱི་སོ། །བཅུ་གཉིས་མཚན་མར་ལྡན་པ་ཡིན། །དེ་རྣམས་ཀྱི་ནི་དབུས་གནས་པ། །སྟེང་འོག་བཞི་ནི་མཆེ་བ་ཡིན། །སྟེང་འོག་གི་ནི་སོ་འགེབས་པ། །གཉིས་པོ་མཆུ་ནི་ཡིན་པར་བཤད། །མཆུ་མཐའ་ཡི་ནི་ངོས་གཉིས་ན། །འགྲམ་པའི་དབུས་ཆུད་ཁ་འགྲམ་ཡིན། །ཡ་མཆུའི་སྟང་ན་སྒྲོས་ཡོད་དེ། །དེ་ཡི་སྟེང་གི་མཆུ་ལྷག་ཡིན། །མ་མཆུའི་འོག་མ་ཀོ་སྐོ་སྟེ། །དེ་ལྟག་འགྲམ་པ་ཡིན་པར་བཤད། །སྣ་གོང་མིག་གཉིས་པར་མཚམས་གདོང། །གདོང་གི་ཡན་ལག་སྣ་ཁུང་གཉིས། །གདོང་གི་ངོས་གཉིས་མཁུར་ཚོས་ཡིན། །དེ་བར་དམའ་བ་མཆི་མའི་སྟན། །དེ་དག་རྣམས་ཀྱི་གོང་ན་མིག །མིག་འབྲས་འགེགས་པ་མིག་མཆུ་ཡིན། །མིག་མཐའི་དཀར་པོ་མིག་སྤྲིན་ཡིན། །དེ་དབུས་ཟླུམ་ནག་མཐོང་མིག་ཡིན། །མཐོང་མིག་ནག་པོ་ཟླུམ་པོའི་དབུས། །ཕྲ་ཞིང་དད་བ་མིག་རྒྱལ་བོང༌། །མིག་ལྟག་གཉིས་ནི་མིག་གི་སྐྱུ། །དེ་སྟེང་སྨིན་མ་གཉིས་ཡིན་ནོ། །མིག་གི་རྒྱ་བ་ནི་མིག་ཟུར་ཏེ། །ནང་གི་མཚམས་ནི་མིག་ཕུགས་ཡིན། །སྨིན་མ་གཉིས་རེ་དཔྲལ་བ་སྟེ། །དཔྲལ་བའི་སྟེང་གི་དཔྲལ་མཚམས་ཡིན། །དེ་སྟེང་སྤྱི་བོ་ཡིན་པར་བཤད། །རྣ་བ་འང་གཉིས་པར་གླད་པ་སྟེ། །མིག་ཟུར་མིག་འགྲམ་བར་མུར་གོང༌། །མུར་གོང་རྣ་བའི་བར་མུར་འགྲམ། །མཁུར་ཚོས་གཉིས་ཀྱི་རྒྱབ་ཟ་ཡུང༌། །དེ་གཉིས་ཕྱི་རོལ་
འགྲམ་གླད་ཡིན། །འགྲམ་པ་སྲོལ་གོང་གཉིས་ཀྱི་བར། །ལྐོག་མ་ཞེས་ནི་བྱ་བར་བཤད། །རྣ་བ་གཉིས་ཀྱི་སྟེང་དང་རྒྱབ། །རྣ་ལྟག་དང་ནི་རྣ་མཆན་ཡིན། །མགོ་དང་ཕྲག་སོའི་བར་སྐེ་མགྲིན། །སྐེ་མགྲིན་ཕྲག་པོའི་ལྟག་སྐེ་རྩ། །དེ་སྟེང་རྔོག་གཡབ་ཡིན་པར་བཤད། །རྔོག་མཐའ་རྣ་བའི་བར་ཕུམ་ཕུམ། །རྔོག་གཡབ་མཐའ་ནི་ཟེའུ་ལྟག་སྟེ། །དེ་ཡི་རྒྱབ་ནི་དང་རུ་ཡིན། །དང་རུའི་འོག་ནི་ནམ་ཙོང་ཞེས། །རྟ་རྣམས་ལ་ནི་བཤད་པ་ཡིན། །ཟེའུ་ལྟག་ནི་འོག་མ་ཉིད། །ཟེའུ་ཡིན་པར་ཤེས་པར་བྱ། །ཟེའུའི་རྗེས་ཐོགས་ཁོ་ན་ལ། །སྒ་འོག་ཡིན་པར་ཤེས་པར་བྱ། །དེ་ཕན་ཅད་ནི་སྒ་ལ་ཚིགས་དང༌། །རྒྱབ་ཉིད་ཡིན་པར་ཤེས་པར་བྱ། །ཟེའུའི་སོ་གཉིས་ཕྲག་སོ་སྟེ། །ཕྲག་སོའི་རྩ་བ་དཔུང་མགོ་ཡིན། །ལྐོག་མ་དང་ནི་སྲོལ་གོང་བར། །མིད་པའོ་དེ་འོག་སྲོལ་མདུད་ཡིན། །མིད་འོག་ལག་པར་བྲང་ཡིན་ཏེ། །དེ་རྗེས་ལག་འོག་བར་སྙིང་ག །དེ་འོག་དཔུང་སྣ་དཔུང་པ་ཡིན། །དཔུང་པའི་ནང་ནི་མཆན་ཁུང་ཕན། །རྒྱབ་ཀྱི་ཆ་ནི་དཔུང་རྒྱབ་ཡིན། །དེ་འོག་བུས་མོ་གཉིས་ཀྱི་ལྟག །བུས་གོང་དང་ནི་ལག་ངར་གཉིས། །པུས་མོའི་འོག་ཏུ་ཆིག་གྲང་སྟེ། །དེ་འོག་ཆིག་གྲང་ཕྲ་མོ་ཡིན། །ཆིག་གྲང་སྦོམ་ཕྲའི་བར་ན་ནི། །ཆིག་གྲང་ནང་སྟེ་དེ་འོག་གི །མདུན་གྱི་ཆ་ནི་ཚེའུ་གདོང་ཡིན། །རྒྱབ་ནི་ཚེའུ་སྤུར་ཤེས་པར་བྱ། །དེའི་ལྟག་དེ་ནི་སྒྲོག་མཁར་ཡིན། །དེའི་ཡང་འོག་ན་ཡོད་པ་ཡི། །ཚེའུ་ཆེ་ཞེས་ནི་བྱ་བར་བཤད། །དེའི་འོག་རྨིག་པའི་མཚམས་ཡིན་ལ། །དེ་ཡི་འོག་ཏུ་རྨིག་པ་ཡིན། །རྨིག་པའི་མཐའ་མ་རྨིག་སྒྲོས་ཡིན། །རྨིག་པའི་འོག་ནི་རྨིག་མཐིལ་ཏེ། །རྨིག་མཐིལ་ནང་མཐའ་སྦལ་བའི་མཚམས། །རྨིག་མཐིལ་དབུས་ནི་སྦལ་བ་ཡིན། །དཔུང་མཐའི་མགོན་སྙིང་ཡོད་དེ། །དེ་ཡི་ངོས་ནི་རྩིབ་ལོགས་ཡིན། །རྩི་བ་ལོགས་འོག་ཏུ་དཀུ་ཡིན་ལ། །དེ་ཡི་སྟེང་ནི་སྒ་འདབ་ཡིན། །སྒལ་ཚིགས་ཀྱི་ནི་ཆ་དག་གི །མཚམས་ནི་རོ་སྨད་ཡིན་པར་བཤད། །རུས་པ་གསུམ་ནི་འདུས་པ་ཡི། །སུམ་མདོ་མཇུག་དོ་ཡིན་པར་བཤད། །མཇུག་དོའི་འོག་ཏུ་ཨོང་
དོ་སྟ། །དེ་རྗེས་རྔ་རྩ་ཡིན་པར་བཤད། །དེ་ཡི་ངོས་གཉིས་དཔྱི་སྟེང་ཡིན། །དཔྱི་སྟེང་འོག་ནི་རོ་ཧི་ནི། །བར་ན་རྔ་མ་རྔ་སྙིང་བཅས། །དེ་གཉིས་འོག་ནི་བརླ་དཔྱིའི་མཚམས། །རྔ་རྩའི་འོག་ནི་རྐུབ་ཡིན་ལ། །དེ་ཡི་ངོས་གཉིས་རྐུབ་ཚོས་ཡིན། །དེ་ཡི་འོག་ནི་འབྲེག་ཡིན་ལ། །དེ་དག་བར་ནི་མཇུག་སྲུབ་ཡིན། །བརླ་ཡི་ཡང་ན་རླིག་པ་སྟེ། །རླིག་པ་དང་འབྲེལ་མཚན་ཡིན་ནོ། །དེ་གཉིས་མདུན་ན་རྨོང་ཁ་སྟེ། །རྨོང་ཁ་སྙིང་དེའི་དབུས་ལྟེ་བ། །དཀུ་ཡང་བར་ན་གནས་པ་ཡིན། །དཀུ་ན་ལྟེ་བའི་བར་ན་རྒྱུ། །རྒྱབ་དང་དཀུ་ཡི་བར་རན་འདྲ། །རན་འདྲའི་འོག་ནི་སྡུ་གུ་མིག །དེ་ཡི་ཕ་རོལ་དཔྱི་ཡིན་ཏེ། །དེ་ཡི་འོག་མ་བརླ་ཡིན་ནོ། །དེ་ཡི་ཡང་འོག་བརླ་ཕྲ་མོ། །དེ་ཡི་འོག་ནི་རྗེ་ངར་ཡིན། །དེ་འོག་སྲེ་ལོང་ཆིག་གྲང་ཡིན། །ལྷག་མ་རོ་སྟོད་རྗེས་འབྲངས་ཏེ། །ཐམས་ཅད་ཉེ་བར་དབྱེ་བར་བྱ། །ཤ་ལི་ཧོ་ཏྲའི་མདོའི་གནས་ལས་བསྟན་པ་རྣམས་བཤད་པ་སྟེ་ལེའུ་བཅུ་པའོ།། །།རྟ་ཡི་ཚེ་ཡི་རིག་བྱེད་མཁན། །དྲང་སྲོང་མགྱོགས་འགྲོའི་གཉེན་གྱུར་པ། །ཤ་ལི་ཧོ་ཏྲ་དབང་ཐུལ་ལ། །མཛའ་ལས་རྒྱལ་གྱིས་ཡོངས་དྲིས་པ། །རྟ་ཡི་ཚུལ་གྱི་དེ་ཉིད་མཁྱེན། །ཚད་ནི་རྣམ་པ་དུ་རུ་བཤད། །མི་སྡུག་གཞལ་མིན་གང་ཞིག་ལགས། །སྡུག་ཅིང་གཞལ་བཟོད་གང་ཞིག་ལགས། །ཡན་ལག་ཉིད་ལག་ཤེས་པ་དང༌། །གྲངས་ཉིད་ཀྱི་ནི་བྱེ་བྲག་རྣམས། །བདག་ཅག་བློ་གྲོས་ཞན་པས་ན། །ལེགས་ལྡན་ཁྱོད་ལས་མཉན་པར་འཚལ། །དེ་སྐད་སྨྲས་ཚེ་སློབ་དཔོན་གྱུར། །དྲང་སྲོང་དམ་པས་སླར་སྨྲས་པ། །ཇི་སྐད་བསྟན་པ་འདི་མཉན་ནས། །མཛའ་ལས་རྒྱལ་གྱིས་བཟུང་བར་གྱིས། །སྒུར་ཞིང་གདོང་དང་སྐེ་བ་ཞུམ། །འཁུམས་དང་ཤིན་ཏུ་རྒྱས་དྲགས་དང༌། །འདུག་དང་དབང་པོ་ཡུལ་གྱི་གནས། །དེ་བཞིན་བྲང་ནི་འཕྱུགས་པ་དང༌། །རྐེད་པ་སྐྲོངས་པར་གྱུར་པ་དང༌། །ཤིན་ཏུ་དམའ་དང་ཤིན་ཏུ་མཐོ། །གང་ཞིག་ལུས་སྟོད་ཤིན་ཏུ་ཆེ། །དེ་བཞིན་རྒྱ་བ་ནི་ལྷག་པར་དམའ། །ལུས་ནི་ཤིན་ཏུ་མི་སྙུག་དང༌། །དེ་བཞིན་རྐེད་པ་ཞུམ་པ་སྟེ། །མི་སྡུག་
རྟ་ནི་བཅུ་པོ་འདི། །གཞལ་མིན་ཡིན་པར་ཤེས་པར་བྱ། །སྟོབས་མ་ཉམས་ཤིང་མཛེས་པ་ཡི། །ལུས་ལྡན་རྟ་ནི་བཅོ་ལྔ་པ། །ལུས་ཀྱི་ཆུ་ཞིང་ལེགས་གནས་ཤིང༌། །གནས་ཀྱི་ཆ་ནི་མ་འཕྱུགས་པ། །ཚོད་ཤེས་པ་ཡི་གཞལ་བྱ་ཡིན། །གཟུགས་ངན་ནམ་ཡང་མི་གཞལ་ལོ། །སྐེ་མགྲིན་ལུས་ནི་ཆ་མཉམ་ཞིང༌། །རྔ་སྙིང་མགོ་དང་མཉམ་པ་དང༌། །ཨོང་དོ་དང་ནི་བྲང་ཞེང་མཉམ། །པུས་མོའི་ཚེའུ་མཉམ་པ་དང༌། །དཔངས་དང་ཞིང་གི་ཚད་དང་ནི། །ལེགས་པ་སྙོམས་པར་གྱུར་པའི་རྟ། །དེ་འདྲའི་ཚད་དང་ལྡན་པ་དག །ཆ་མཉམ་ཡིན་པར་ཤེས་པར་བྱ། །རྟ་ནི་ལུས་ཀྱི་ཆ་མཉམ་པའི། །ཚད་ནི་རྣམ་གསུམ་མཉན་པར་གྱིས། །རྟ་མཆོག་གི་ནི་དཔྲལ་བ་ལ། །སོར་ནི་བཅུ་གཉིས་ཡོད་པར་བཤད། །རྣ་བ་སོར་དྲུག་ཡིན་ཞེས་བྱ། །སོ་དག་སོར་ནི་ཕྱེད་དང་གཉིས། །མིག་ནི་སོར་གསུམ་ཤེས་པར་བྱ། །མཆེ་བའི་དཔངས་ནི་སོར་གཉིས་ཡིན། །མགོ་བོ་སོར་ནི་ཉི་ཤུ་བརྒྱད། །ཕུམ་ཕུམ་གནས་ནི་དཔངས་སོར་གསུམ། །རྟ་མཆོག་གི་ནི་ཆུ་རུ་ནི། །སོར་བརྒྱ་རྩ་བཞི་ཉིད་ཡིན་ནོ། །སྐེ་མགྲིན་སོར་ནི་སུམ་ཅུ་སྟེ། །ཟེའུ་ལྟག་སོར་ནི་དྲུག་ཡིན་ལ། །རྒྱབ་ནི་སུམ་ཅུར་ཤེས་པར་བྱ། །ཨོང་དོ་གདོང་པ་དག་དང་མཉམ། །འབྲེག་ནི་སོར་ནི་བཅུ་ཡིན་ཏེ། །འདི་ནི་ཆུ་ཡི་ཚད་དུ་བཤད། །རླིག་པ་བིལ་བ་བཟང་པོ་ཡི། །ཚད་ཙམ་ཡོད་པར་ཤེས་པར་བྱ། །རྟ་མཆོག་གི་ནི་མཚན་དག་ལ། །སོར་ནི་བཅུ་དྲུག་ཡིན་ཞེས་བྱ། །ཕྲག་སོ་སོར་ནི་ཉི་ཤུ་དྲུག །དཔུང་མགོ་ཉིད་ནི་སོར་བཅུ་ཡིན། །དཔུང་པ་ཉི་ཤུ་རྩ་བཞི་སྟེ། །པུས་མོའི་ཚིགས་ནི་སོར་དྲུག་པ། །ཚེའུ་སྤུ་སོར་དྲུག་ཡིན་ཞེས་བྱ། །ཆིག་གྲང་དཀྱུས་སུ་སོར་བཅུ་དྲུག །ཚེའུ་ཚེ་སོར་ནི་དྲུག་པ་ཡིན། །རྨིག་པའང་དེ་དང་མཉམ་པ་ཡིན། །རྐེད་པའི་དབུས་ཀྱི་ཞེང་གང་ཡིན། །དཔངས་ནི་དེ་དང་མཉམ་པ་ཡིན། །ཚད་ནི་རྟ་མཆོག་དག་གི་ཡིན། །དེ་ནས་བར་མའི་བཤད་བྱ་སྟེ། །དཔྲལ་བའི་ཚད་ནི་སོར་བཅུ་ཡི། །གདོང་བ་སོར་ནི་ཉི་ཤུ་དྲུག །མིག་ལ་སོར་ནི་ཕྱེད་དང་གསུམ། །ཕུམ་ཕུམ་གནས་ཀྱང་དེ་དང་
འདྲ། །སོ་ལ་སོར་གཅིག་བཞི་ཆ་གཅིག །མཆེ་བ་སོར་གཅིག་བཞི་ཆ་གསུམ། །རྣ་བའི་དཔངས་སུ་སོར་ལྔ་རུ། །རྟ་ནི་བར་མའི་ཡིན་པར་བཤད། །སྐེ་མགྲིན་ཉི་ཤུ་རྩ་བདུན་དུ། །བསྟན་བཅོས་རྟོགས་པས་ཤེས་པར་བྱ། །རྔོག་མཐའ་སོར་ནི་ལྔ་རུ་བཤད། །རྒྱབ་ནི་སྐེ་མགྲིན་དག་དང་མཉམ། །འབྲེག་ལ་སོར་ནི་བདུན་ཡིན་ཏེ། །ཨོང་དོ་ཉི་ཤུ་རྩ་དྲུག་ཡིན། །བར་མ་འདི་ཡི་ཆུ་རུ་ནི། །སོར་ནི་དགུ་བཅུ་རྩ་གཉིས་ཡིན། །མགོ་བོ་སོར་ནི་ཉི་ཤུ་དྲུག །འདི་ཡི་རྔ་སྙིང་དེ་དང་མཉམ། །བར་མ་རླིག་པའི་ཚད་དག་ནི། །བིལ་བ་འབྲིང་པོ་ཙམ་ཡིན་ནོ། །བར་གྱི་མཚན་གྱི་ཚད་དག་ནི། །སོར་ནི་བཅུ་བཞི་ཡིན་པར་བཤད། །དཔངས་སུ་སོར་ནི་བཅུ་དགུ་དག །འདི་ལ་བསྔགས་པར་གྱུར་པ་ཡིན། །ཕྲག་སོར་སོར་ནི་ཉི་ཤུ་ལྔ། །དཔུང་མགོ་སོར་ནི་བརྒྱད་ཡིན་ནོ། །དཔུང་བ་སོར་ནི་ཉི་ཤུ་གསུམ། །པུས་མོ་ཚེའུ་དང་མཉམ་པ་ཡིན། །ཆིག་གྲང་སོར་ནི་བཅུ་བཞི་སྟེ། །ཚེའུ་སྤུ་སོར་ནི་ལྔ་པ་ཡིན། །ཚེའུ་ཚེའང་སོར་ནི་ལྔ་པ་སྟེ། །རྨིག་པའང་དེ་དང་འདྲ་པར་བཤད། །རྟ་ཡི་ཐ་མ་དག་གི་ཚད། །དཔྲལ་བ་སོར་ནི་བརྒྱད་ཡིན་ཏེ། །མགོ་བོ་སོར་ནི་ཉི་ཤུ་བཞི། །མིག་ནི་སོར་གཉིས་ཡིན་ཤེས་བྱ། །ཕུམ་ཕུམ་གནས་ཀྱང་དེ་དང་འདྲ། །མཆེ་བ་སོར་ནི་ཕྱེད་དང་གཉིས། །སོ་ཡི་དཔངས་སུ་སོར་གཅིག་ཡིན། །རྣ་བའི་དཔངས་ནི་སོར་བཞི་སྟེ། །སྐྲ་འགྲམ་ཉི་ཤུ་རྩ་བཞི་སྟེ། །རྔོག་མཐའ་སོར་ནི་བཞི་ཡིན་ནོ། །རྒྱང་ནི་སྐེ་བ་ཉིད་དང་མཉམ། །འབྲེག་གི་ཆད་ནི་སོར་བཞི་སྟེ། །ཨོང་དོ་སོར་ནི་ཉི་ཤུ་བཞི། །ཆུ་རུ་སོར་ནི་བརྒྱད་ཅུ་ཡིན། །མགོ་པོ་ཉི་ཤུ་རྩ་བཞི་སྟེ། །རྔ་སྙིང་དག་ཀྱང་དེ་དང་མཉམ། །རླིག་བ་བིལ་བ་ཆུང་དུ་ཙམ། །ཕོ་མཚན་སོར་ནི་བཅུ་གཉིས་ཡིན། །རྟ་ནི་ཐ་མའི་དཔངས་སུ་ནི། །སོར་ནི་བརྒྱད་དུ་ཡིན་པར་བཤད། །ཕྲག་སོ་སོར་ནི་ཉི་ཤུ་བཞི། །དཔུང་མགོ་འདི་ཡི་སོར་དྲུག་ཡིན། །དཔུང་པ་སོར་ནི་ཉི་ཤུ་གཉིས། །པུས་མོ་སོར་ནི་བཞི་ཡིན་ལ། །རྟ་ནི་ཐ་མའི་ཆིག་གྲང་གི །དཔངས་ནི་སོར་བཅུ་གཉིས་ཡིན་ནོ། །ཚེའུ་སྤུའི་གནས་ནི་སོར་བཞི་སྟེ། །ཚེའུ་ཚེའི་རྨིག་པ་དེ་དང་འདྲ། །དེ་ལྟར་
ཆུ་ཡི་ཚད་བཤད་པ། །ཆ་ནི་ཅི་བཞིན་གཞག་པ་ཡིན། །རོ་སྟོད་ཀྱི་ནི་དཔངས་གང་ཡིན། །འོག་ནས་རྔོག་མཐའི་བར་དུ་གཞལ། །རོ་སྨད་འཇུག་དོའི་མཚམས་ནས་ནི། །འོག་ནས་སྟེང་དུ་དེ་བཞིན་གཞལ། །དེ་ལྟར་དཔངས་སུ་གཞལ་ནས་ནི། །བསྟན་བཅོས་མཁས་པས་བྱ་བ་ཡིན། །རྔ་སྙིང་རྩ་ནས་མིག་ཟུར་གྱི། །བར་དུ་ཆུར་ནི་གཞལ་བར་བྱ། །དཔྱི་སྟེང་མཇུག་ཏོ་དཔྱི་མགུལ་དང༌། །བརླ་དཔྱིའི་མཚམས་ནི་གང་ཡིན་པ། །མཆོག་དང་བར་མ་ཐ་མ་ལའང༌། །ཕྲག་སོ་དང་ནི་མཉམ་པ་ཡིན། །རྗེ་ངར་དཔྱི་ཡི་བ་ཧ་ལས། །སོར་གཅིག་གིས་ནི་ཆུང་བར་བཤད། །སྤུ་ར་པུས་མོའི་ཚད་ལས་ནི། །སོར་གཅིག་ལྷག་པར་ཤེས་པར་བྱ། །ཆིག་གྲང་ལ་སོགས་སྔར་བཤད་པ། །ཕྱི་རྐང་གི་ཡང་དེ་འདྲར་ལྡན། །ནས་རྒྱས་ཀྱི་ནི་ལྟོ་གཤིབས་པའི། །ཞེང་ནི་སོར་དུ་ཤེས་པར་བྱ། །ལ་ལ་མཐེ་བོའི་ཚིགས་ཀྱི་ཞེང༌། །སོར་ཡིན་པར་ནི་འཆད་པར་བྱེད། །གཞན་དག་སྐྱེས་བུ་རན་པ་ཡི། །ལག་སོར་གྱི་ནི་གུང་མོ་ཡི། །ཚིགས་ནི་དབུས་མའི་ནང་དག་ལ། །སོར་མིན་པར་ནི་འདོད་པ་ཡིན། །རྟ་གཞན་གང་དག་ཡོད་པ་དག །ཚད་འདི་ཡིས་སྣ་གཞལ་བར་བྱ། །དེ་ལྟར་མཆོག་དང་བར་མ་དང༌། །ཐ་མར་གྱུར་པའི་རྟ་གསུམ་ལ། །ཚད་ནི་རྣམ་པ་གསུམ་དག་གིས། །གཞལ་བར་འདི་ནི་བཤད་པ་ཡིན། །དེ་ལྟར་ཆུ་ཞེང་ཚད་ལྡན་པའི། །ལུས་དང་ལྡན་པ་གང་ཞིག་ཡིན། །ལུས་དང་འཚམ་པར་ཤ་རྒྱས་ཤིང༌། །རྐང་པ་སྲ་ལ་མཚན་དང་ལྡན། །ཡན་ལག་གསལ་ཞིང་མཉན་པ་དང༌། །ལུས་སྙོམས་ཤ་ནི་མཁྲེགས་པ་དག །བཀྲ་ཤིས་དཔལ་སྐྱེད་དགེ་བ་དང༌། །འདོད་པ་ཐམས་ཅད་སྦྱིན་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་ཚད་གཞལ་བའི་ལེའུ་སྟེ་བཅུ་གཅིག་པའོ།། །།དེ་ནས་གཞན་ཡང་ཡན་ལག་བཅུའི། །ཆ་ཡི་ལེའུ་བཤད་པར་བྱ། །དང་པོའི་གནས་ནི་དཔྲལ་བ་ཡིན། །མཐར་ཐུག་ཚད་དུ་བཤད་པ་ཡིན། །གཉིས་པ་དཔྲལ་བའི་སྟེང་གི་ནི། །གླད་པ་ལ་ནི་བརྟེན་པ་ཡིན། །གསུམ་པ་སྐེ་མགྲིན་ཕྲག་སོ་ཡི། །ལུས་ཀྱི་ཕྱོགས་ནི་ཡིན་
པར་བཤད། །ནམ་ཚོང་ཟེའུའི་ལྟག་ཟེའུ། །དཔུང་མགོ་དེ་བཞིན་ཕྲག་སོ་དང༌། །སོག་པའི་གནས་ནི་གང་ཡིན་པ། །བཞི་པ་དག་ནི་ཡིན་པར་འདོད། །ལུས་ཀྱི་རོ་སྟོད་ཆ་མཉམ་དང༌། །དཔུང་སྣ་ལ་སོགས་ལྔ་པོ་ཡིན། །སྙིང་ག་ལག་འོག་རྩི་བ་ལོགས་དང༌། །སྒ་འོག་དང་ནི་རྒྱབ་ཉིད་ནི། །རྟ་ཡི་གནས་ནི་དྲུག་པ་ཡིན། །སྒལ་ཚིགས་དང་ནི་ལྟོ་བ་དང༌། །མཚན་གྱི་ཉེ་འཁོར་གང་ཡིན་དང༌། །རྒྱུ་དང་མི་རྒྱུ་གང་ཡིན་རྣམས། །གནས་ནི་བདུན་པ་དག་ཏུ་བཤད། །ཨོད་དོའི་ཕྱོགས་ན་གང་ཡོད་དང༌། །བརླ་གཉིས་དང་ནི་བཅས་པ་དག །དེ་དག་གནས་ནི་བརྒྱད་པ་ཡིན། །དཔུང་པ་དཔུང་རྒྱབ་པུས་མོ་དང༌། །རྐུབ་ཚོས་དཔྱི་མགུལ་དཔྱི་མཚམས་དང༌། །རྗེ་ངར་དང་ནི་བཅས་པ་དང༌། །གནས་ནི་དགུ་པ་ཡིན་པར་འདོད། །པུས་མོ་རྗེ་ངར་མན་ཆད་ནི། །གནས་ནི་བཅུ་པ་ཞེས་བྱའོ། །དགེ་བའམ་ཡང་ན་མི་དགེ་བ། །ཐམས་ཅད་ཀྱང་ནི་མཚོན་པར་བྱ། །གནས་སྐབས་ཆ་ཡི་འབྲས་བུ་དག །དེ་ཡི་རྟག་ཏུ་བརྗོད་བྱ་མིན། །དེ་བཞིན་གནས་ཀྱི་དབྱེ་བ་ཡི། །རྟ་ཡི་ཚད་ལ་སོགས་པའང་བཤད། །གནས་ཤེས་པ་ཡི་གནས་རྣམས་ནི། །རྟོགས་པར་བྱས་ལའང་འབྲས་བུ་བརྗོད། །ཚེ་དང་ན་ཚོད་ཆ་རྣམས་ནི། །གནས་ལས་ཤེས་པར་བྱས་ཏེ་བསྟན། །མཚན་ཉིད་ལྡན་ན་འབྲས་བུར་བཅས། །གོ་བཟློག་པ་ནི་འབྲས་བུ་མེད། །མཚན་ཉིད་གནས་ནི་འཁྲུག་པ་ལས། །འབྲས་བུ་ཁྱད་པར་འཕགས་པར་འགྱུར། །མདོག་དང་གཟི་མདངས་སྙིང་སྟོབས་དྲི། །ཅི་བཞིན་དུས་སུ་འབྲས་བུ་སྟེར། །ལུས་ཀྱི་འགྲོས་དང་སྐད་དང་ནི། །རྟག་ཏུ་འབྲས་བུ་འབྱིན་པ་ཡིན། །ཐིག་ལེ་དང་ནི་གཙུག་གི་ནི། །གནས་སྐབས་ཆ་ནི་འདི་ལས་བྱུང༌། །ཤ་ལི་ཧོ་ཏྲའི་མདོའི་གནས་ལས་ཡན་ལག་བཅུའི་ཆ་དབྱེ་བའི་ལེའུ་སྟེ་བཅུ་གཉིས་པའོ།། །།ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །མི་སྡུག་ཅི་ལྟར་ཤེས་པར་གྱིས། །ཇི་བཞིན་སྡུག་པ་ཇི་ལྟ་བུ། །དམན་དང་དེ་བཞིན་མི་དམན་དང༌། །ཡན་ལག་ཚང་དང་མི་ཚང་དང༌། །གཞལ་བྱ་ཉིད་དང་གཞལ་མིན་དང༌། །གསོ་སླ་གསོ་དཀའ་ཇི་ལྟ་བུ།།
དེ་ལྟར་བུ་ཡིས་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །སོ་སོའི་མཚན་ཉིད་ཅི་འདྲ་བ། །དེ་དག་ཁྱེད་ལ་བཤད་པར་བྱ། །གང་ཡང་ལུས་ཀྱི་དབྱིབས་ལེགས་ཤིང༌། །རྩ་རྒྱུས་སྣང་བར་མི་འགྱུར་དང༌། །ཆུ་ཞེང་ཚད་དང་ལྡན་པ་དང༌། །ཤ་ནི་གནས་དང་འཚམ་པར་སྐྱེས། །ལུས་སྙོམས་གསུས་པ་ཆུང་བ་དང༌། །ཡིད་དང་མིག་ནི་དགའ་བྱེད་པ། །རོ་སྨད་མཉམ་ཞིང་ཟླུམ་པ་དང༌། མཛེས་ཤིང་དབྱིབས་ནི་ལེགས་གནས་དང༌། །ཡན་ལག་ཉིད་ལག་རྫོགས་པ་དང༌། །ཡན་ལག་ཀུན་གྱི་དབྱིབས་ལེགས་དང༌། །ཉིང་ལག་རྣམས་ནི་མི་སྡུག་དང༌། །མགྱོགས་ཤིང་མཉམ་དང་ལྡན་པ་དང༌། །དེས་ཤིང་སྟོབས་དང་ལྡན་པ་དང༌། །ན་ཚོད་གཞོན་ཞིང་འགྲོས་ཆེ་དང༌། །སྐེ་མགྲིན་ཕྲག་སོ་བྲང་གི་ཕྱོགས། །ཤ་རྒྱས་ཚད་དང་ལྡན་ལ་སོགས། །འདི་དག་གཞལ་བྱ་ཆ་མཉམ་དང༌། །གསོ་སླ་མི་སྡུག་མེད་པ་ཡིན། །དེ་ལས་བཟློག་པར་གྱུར་བའི་རྟ། །གཞལ་བྱའི་ལས་དག་མ་ཡིན་ནོ། །དེ་ལྟའི་མི་སྡུག་ལ་སོགས་དང༌། །ལྡན་པའི་རྟ་ནི་གང་ཡིན་པ། །ཤིང་རྟ་ལམ་དང་ཁལ་དང་ནི། །རྩེད་མོའི་གནས་དང་གཡུལ་དག་ཏུ། །ལས་དང་འཚམ་པ་མ་ཡིན་པས། །དེ་ཕྱིར་དེ་ནི་སྤང་བར་བྱ། །དེ་ཕྱིར་བཟང་པོ་ཤེས་བྱས་ལ། །དེ་ལྟའི་རྟ་ནི་བླང་བར་བྱ། །དེ་ལྟར་བླང་འོས་བླངས་ནས་ནི། །ལྷག་མ་སྤང་བྱ་རྣམ་པར་སྤང༌། །ཚོང་པ་རྣམས་ལ་རྟ་དག་ནི། །བཟང་པོ་བླང་བར་གྱུར་པ་དང༌། །སྤྲིས་མ་བཤུགས་པའི་ཞོ་ལྟ་བུར། །ལྷག་མ་སྙིང་པོ་མེད་པ་ཡིན། །དེ་ལྟ་མོད་ཀྱི་བརྩེ་བ་ཡིས། །སྤང་བྱ་དེ་ཡང་ཚོང་བ་དང༌། །རྟ་ལ་བརྩེ་བར་བྱ་བའི་ཕྱིར། །བླངས་ཏེ་སྦྱིན་པ་གཏང་བར་བྱ། །མཚན་ནི་ངན་པར་གྱུར་ན་ཡང༌། །མགྱོགས་ཤིང་རིགས་དང་ན་ཚོད་ལྡན། །རྒྱལ་པོས་ལྷག་གང་རྣམས་དང་ནི། །བྲམ་ཟེ་ལ་ནི་སྦྱིན་པར་བྱ། །མ་ནིང་རྒན་དང་ནད་ཀྱིས་ཉེན། །ཉེ་འཁོར་གནས་པའི་མི་ལ་སྦྱིན། །རླིག་པ་མེད་དང་རླིག་གཅིག་པ། །རླིག་སེར་དང་ནི་ལུས་སྐེམས་དང༌། །ཡན་ལག་མ་ཚང་གྱུར་པ་དག །ཉུང་རུམ་ལ་སོགས་རྣམས་ལ་
སྦྱིན། །གཡུལ་དུ་འཇུག་པར་མི་ནུས་པ། །གར་མཁན་དང་ནི་གླུ་མཁན་དང༌། །འཁྲུས་མཁན་དང་ནི་འདྲེག་མཁན་དང༌། །དེ་འདྲའི་ཚུལ་ལྡན་དག་ལ་སྦྱིན། །དེ་ལ་ཤིན་ཏུ་མི་སྡུག་པ། །ཤིན་ཏུ་བཟང་བ་མི་སྦྱིན་ནོ། །ཤུ་ལ་ཀ་དང་གཟུགས་མི་སྡུག །སོ་མི་སྡུག་དང་མི་སྲུན་པ། །ཉེ་འཁོར་གྱི་ནི་ཕོ་ཉ་སོགས། །དྲག་ཤུལ་བྱེད་པ་རྣམས་ལ་སྦྱིན། །འགྲོ་ས་ཆུང་བ་དང་སྦེགས་པ་དང༌། །རྐང་ངན་གླས་ཀྱི་ནང་མིར་སྦྱིན། །རྟ་ལ་གདུག་པར་གྱུར་པ་ནི། །མཚམས་སྲུང་མཐའ་འཁོབ་པ་དག་དང༌། །ཉེས་པ་ཆེར་བསྟེན་དག་ལ་སྦྱིན། །རང་གི་ཡུལ་དུ་དེ་མི་གཞག །དེ་རྣམས་རྟོག་ལ་མཁས་པ་ནི། །རྒྱལ་པོའི་དྲུང་དུ་རྟག་པར་གཞག །དེ་ལྟར་རྟ་ནི་རྣམ་ཕྱེ་ན། །རྒྱལ་པོའི་འབྱོར་བ་འཕེལ་འགྱུར་ཞིང༌། །ཡིད་ནི་དགའ་ཞིང་མགུ་བ་དང༌། །གཡུལ་དང་དགྲ་ལས་རྒྱལ་བར་འགྱུར། །ཤ་ལི་ཧོ་ཏྲའི་མདོའི་གནས་ལས་སྡུག་པ་དང་མི་སྡུག་པ་རྣམ་པར་ཕྱེ་བའི་ལེའུ་སྟེ་བཅུ་གསུམ་པའོ། །ཉི་མ་འཆར་ཀ་འདྲ་བ་ཡི། །དྲང་སྲོང་ཕ་ལ་ཕྱག་བྱས་ཏེ། །ལེགས་ཐོས་ཀྱིས་ནི་ཟས་ཀྱི་ཚད། །རྣམ་པར་བརྟག་པ་དྲིས་གྱུར་པ། །ལེགས་ལྡན་མི་ལ་ཟས་ཀྱི་ཚད། །བཤད་ཀྱིས་རྟ་ལ་ཅི་ཞིག་འཚལ། །ཕྱུགས་རྣམས་དང་ནི་ཁྱད་པར་དུ། །རྟ་ལ་དེ་གསོ་མ་མཆིས་ཏེ། །དེ་རྣམས་དབུགས་འབྱིན་ཙམ་གྱིས་ནི། །ཟོས་ཤིང་བཅས་པ་འཇུ་གྱུར་ལ། །ཕྱུགས་ནི་ལྟོ་བར་གྲགས་པས་ན། །དེ་ལ་ཚད་ནི་ཅི་ཞིག་བགྱི། །དེ་སྐད་ལེགས་ཐོས་ཀྱིས་སྨྲས་ཚེ། །ཤ་ལི་ཧོ་ཏྲས་སླར་སྨྲས་པ། །བློ་གྲོས་བཟང་པོ་ནན་ཏན་དུ། །ཤིན་ཏུ་འདྲངས་ཀྱང་ཚད་ཙམ་དུ། །བྱིན་ན་དགའ་བ་སྐྱེད་བྱེད་ཅིང༌། །ཚོད་ཟིན་དུག་ཀྱང་བདུད་རྩིར་འགྱུར། །ཚོད་མ་ཟིན་ན་བདུད་རྩིས་ཀྱང༌། །གསོད་པར་འགྱུར་བ་ཉིད་ཡིན་ནོ། །བདེ་ཞིང་གསོ་ལ་འཚོ་བྱེད་པས། །ཚོད་ཟིན་འཇིག་རྟེན་མ་དང་འདྲ། །དེ་མེད་སྲོག་མཐའི་འཇིགས་བསྐྱེད་ལ། །དེ་དང་ལྡན་ན་གནས་མཆོག་འགྱུར། །རྟ་ནི་མང་དུ་ཟ་བས་ན། །ཚད་ཀྱི་དགོས་པ་བདེན་མོད་ཀྱི། །སྨན་དང་ཟས་སྐོམ་ཆོ་ག་ནི། །འགྲོ་ངན་བོང་བུ་ལ་ཡང་དགོས། །ཚོད་མ་ཟིན་ན་སྨན་གྱིས་ཀྱང༌། །ནད་གཞན་སྐྱེད་བར་འགྱུར་
ཡིན་ལ། །ཚོད་དང་ལྡན་པ་བྱས་པ་ཡིས། །དུག་གིས་ཀྱང་ནི་ནད་འཇོམས་སོ། །རྫས་དང་འཇུ་སྟོབས་རྫས་ཅི་ཡང༌། །ཚད་ནི་རྣམ་པ་གསུམ་ལ་འཇུག །སྙིང་དགའ་ཤུགས་ནི་མ་བཀག་དང༌། །ལྟོ་ལ་ཤིན་ཏུ་མི་གནོད་དང༌། །རྩིབ་ལོགས་རྣམས་ནི་བདེ་བ་དང༌། །གསུས་པ་ཚིམ་བར་མ་གྱུར་ལ། །བཀྲེས་དང་སྐོམ་ནི་ཞི་བ་དང༌། །དབང་པོ་རྣམས་ནི་ཚིམ་པ་དང༌། །དབུགས་རྔུབ་དབུགས་དབྱུང་བདེ་བ་དང༌། །གཉིད་ནི་བདེ་བར་ལོག་བྱེད་དང༌། །སྟོབས་དང་ཁ་དོག་འཕེལ་བྱེད་དང༌། །བདེ་བར་འཇུ་བར་འགྱུར་བ་དང༌། །ལུས་གཟུངས་འཁྲུག་པར་མི་བྱེད་པ། །ཚོད་ཟིན་ཟོས་པ་ཡིན་པར་བཤད། །ཁ་ཟས་ལྕི་བས་ལྟོ་བ་ཡི། །ཕྱེད་དམ་སུམ་ཆ་བཀང་བ་བསྔགས། །ཁ་ཟས་ཤིན་ཏུ་ཡང་བ་ཡང༌། །ཤིན་ཏུ་འདྲངས་པར་མི་སྦྱིན་ནོ། །དེ་ལྟར་ཚད་ལས་ཚད་མིན་པར། །ལྷག་པའམ་ཆུང་པར་གྱུར་པ་ནི། །སྟོབས་དང་སྙིང་སྟོབས་བློ་དང་ནི། །མདོག་དང་དབང་པོ་ལ་གནོད་བྱེད། །རླུང་ནི་འགགས་པའམ་སྦྱོར་བར་བྱེད། །ནད་སྐྱེད་བྱེད་པའི་མཆོག་ཡིན་ལ། །རོ་མི་ཙ་ཞིང་ཚེ་ཐུང་དང༌། །མདངས་མེད་བཀྲ་མི་ཤིས་པར་འགྱུར། །དེ་བས་རྟ་རྣམས་ལོག་པ་ཡི། །ཟས་ལ་སྤྱོད་ལམ་བཟློག་པར་བྱ། །འདྲངས་དྲགས་པར་ནི་གྱུར་པ་ལས། །ནད་གཞི་ཐམས་ཅད་འཁྲུག་བྱེད་ཅིང༌། །གསུད་དང་ཕོ་བའི་ནད་སྐྱེས་པས། །རྟ་ནི་དེ་ལས་བཟློག་པར་བྱ། །ཇི་ཙམ་གྱིས་ནི་ལྟོ་བའི་མེ། །འབར་གྱུར་དེ་ཙམ་སྦྱིན་པར་བྱ། །ཚད་མི་ལྡན་པར་བྱིན་པ་ཡིས། །ཡང་ན་དྲགས་པའམ་ཆུང་བར་འགྱུར། །རྫས་ནི་ཆུ་སྐྱེས་རླན་ཅན་དང༌། །སྐམ་པར་སྐྱེ་སྟེ་གསུམ་དུ་འདོད། །དེ་དག་ཚད་མི་ལྡན་པར་ནི། །བཟའ་བའི་བྱ་བའང་ཐ་དད་དོ། །མར་དང་སྦྲང་རྩི་མཉམ་ཟས་སོགས། །ཚད་མི་ལྡན་དང་འདྲ་བ་ཡི། །ཟས་ཀྱི་སྨོས་ཀྱི་སྐོམ་མམ་ནི། །སྣུམ་མམ་རྩྭ་ཡི་ཚོད་དང་ནི། །གྲང་ལྷགས་འདྲེན་པ་དྲགས་པས་ཀྱང༌། །ཚད་མི་ལྡན་པར་གནོད་པ་སྐྱེད། །དེ་བས་སྤྱི་དང་ཁྱད་པར་གྱི། །ཚད་ནི་ང་ཡིས་བཤད་པར་བྱ། །འོ་ལམ་སེ་བཞི་མ་ཤ་བཞི། །དེ་བཞི་ལ་ནི་ཤ་ན་སྟེ། །དེ་
བཞི་ལ་ནི་སུ་བ་སྣ། །དེ་ཉིད་ཞོ་གཉིས་ཞེས་བྱའོ། །དེ་བཞི་ལ་ནི་སྲང་གཅིག་སྟེ། །དེ་བཞི་ལ་ནི་ཕུལ་དུ་བཤད། །ཕུལ་བཞི་ལ་ནི་བྲེ་གང་ཡིན། །དེ་བཞི་ལ་ནི་བྲེ་བཞི་སྟེ། །དེ་བཞི་ལ་ནི་དྲེ་ན་ཡིན། །འདི་ནི་སྤྱི་ཡི་ཚད་ཡིན་ལ། །གཤེར་རྫས་ལ་ནི་ཉིས་འགྱུར་བྱ། །སྣུམ་ནི་ཚད་ཀྱི་ཕྱེད་དུ་བྱ། །ཨཀྵ་ལག་པའི་མཐིལ་ལ་སོགས། །ཞོ་གཉིས་ཀྱི་ནི་མིང་ཡིན་ནོ། །སྲང་ཕྱེད་མིང་ནི་ཨ་སྨུར་བཅས། །སྲང་གཅིག་ཨུ་དུམྺཱ་ར་བ་ཤད། །སྲང་གཉིས་ཁྱོར་གང་ཞེས་བྱར་བཤད། །དེ་གཉིས་པ་ནི་གཉིས་པར་བཤད། །དེ་ལ་རྩྭ་སྐམ་དག་ལས་སྲང༌། །བརྒྱད་བརྒྱ་ཏ་ལ་རན་པ་ཡིན། །རློན་པ་དེའི་འདབ་སྙེ་མར་བཅས། །བཞི་བརྒྱ་ཉིན་མཚན་གཅིག་ལ་རན། །ཐུག་སོགས་ལ་ནི་བྲེ་བཞི་ཙམ། །བཟའ་སྐམ་བྲེ་ནི་ཕྱེ་དང་གཉིས། །སྣུམ་ལས་ཕུལ་གང་བཏུང་བ་ནི། །བྲེ་གང་སྦྱིན་པར་ཤེས་པར་བྱ། །སྦྲང་རྩི་ལས་ནི་ཕུལ་གང་སྦྱིན། །བུ་རམ་ལས་ནི་སྲང་བརྒྱད་སྦྱིན། །ཧྭགས་དང་ཁ་ར་གང་ཡིན་པ། །སྲང་ནི་བཅུ་ཡི་ཚད་དུ་སྦྱིན། །སྣ་སྨན་ཁུ་བ་ཕུལ་གང་སྟེ། །སྣུམ་གྱི་སྣ་སྨན་དེ་ཡི་ཕྱེད། །དུ་བས་བདུག་ལ་ཞོ་དྲུག་སྟེ། །དུ་བ་དྲག་པོ་ཞོ་གཉིས་ཚད། །སྨན་ཁའི་གོང་བུ་སྲང་བཞི་དག །བད་ཀན་ནད་ལ་སྦྱིན་པར་བྱ། །རྟ་ལ་དགོངས་ཀ་བཏུང་བར་ནི། །ཆང་ནི་བྲེ་གང་བླུད་པར་བྱ། །རྟ་རྣམས་ལ་ནི་ཕྱེ་མའི་སྨན། །བཏགས་པ་སྲང་གཉིས་སྦྱིན་པར་བྱ། །ཟས་དང་སྣུམ་ནི་མཉམ་བྱིན་ཚེ། །སྐོམ་དུ་ཆང་ནི་བླུད་པར་བྱ། །རྟ་ལ་ལན་ཚྭ་སྲང་ལྔ་ཡི། །ཚད་དུ་རབ་ཏུ་སྦྱིན་པར་བྱ། །ལུས་ཀུན་བསྐུ་བྱུག་བྱ་བ་ཡང༌། །སྣུམ་ནི་བྲེ་དང་སྦྱར་བར་བྱ། །རྣ་བ་ཀང་ལ་ཡང་སྣུམ་དག་ནི། །སྲང་གཉིས་ཉེ་བར་གཞུག་པར་བྱ། །བསྐུ་བའི་སྣུམ་ལ་སྨན་ལས་ནི། །སྲང་བརྒྱ་ཕྱེ་མར་བཏགས་པ་གཞུག །ཕྱེ་ལས་བྲེ་ནི་དོ་དག་དང༌། །དེ་རུ་བུ་རམ་སྲང་བརྒྱད་གཞུག །མར་ལས་ཕུལ་དོ་བསྲེས་པ་ཡི། །སྐྱོ་མ་དག་ནི་སྦྱིན་པར་བྱ། །ཆུ་སྐྱེས་ཤ་ནི་སྲང་ལྔ་བཅུ། །རླན་ཅན་ཤ་ནི་སྲང་བདུན་ཅུ། །སྐམ་པའི་ཤ་ནི་སྲང་དགུ་བཅུ། །ཤ་ཡི་ཁ་ཟས་ཚད་ཡིན་ནོ། །ཁྲག་བྲེ་དོ་ལ་རྒྱམ་
ཚ་ནི། །སྲང་གཉིས་ཉེ་བར་གཞུག་བྱ་ཞིང༌། །སྣུམ་ཡང་སྲང་གཉིས་བཅུག་པ་ནི། །ཁྲག་ཟད་པ་ལ་སྦྱིན་པར་བྱ། །མས་གཏོང་བ་ལ་བྲེ་གང་ཙམ། །དུམ་བུ་གསུམ་དུ་བྱས་ཏེ་གཏོང༌། །བཏགས་པ་ལས་ནི་སྲང་གསུམ་ཙམ། །སྲང་རེ་རུ་ནི་བཅད་དེ་གཏོང༌། །འཇམ་རྩི་ཕུལ་བཞི་གཏང་བར་བྱ། །འཇམ་རྩིའི་གོང་མ་ཕུལ་གང་གཏོང༌། །མར་ལ་འཇམ་རྩི་གཏོང་བ་ནི། །ཕུལ་དོ་དག་ནི་བྱ་བར་བཤད། །སྨན་ནི་སྲང་བཞིའི་ཚད་དག་ནི། །ཆུ་སྲང་སུམ་ཅུ་རྩ་གཉིས་བསྐོལ། །བཞི་ཆ་ལུས་པར་བྱས་པ་དག །འདི་ཡི་སྨན་ཁུ་ཡིན་པར་བཤད། །ཆུ་སྨན་བཅུ་དྲུག་འགྱུར་ནང་དུ། །བསྐོལ་བའི་སྨན་ནི་སྲང་བརྒྱ་གཞུག །སྣུམ་ཡང་སྲང་བརྒྱ་བཅུག་ནས་ནི། །བཞི་ཆ་ཆ་གསུམ་བསྲུབ་པར་བྱ། །དེར་ནི་སྣུམ་གྱི་བཞི་ཆ་ཡི། །སྨན་ཕྱེ་བཅུག་ལ་ལྡེ་གུར་བྱ། །དེ་ལ་ཤ་ཁུ་འོ་མ་ནི། །ཆུ་ཡི་བཞི་ཆ་གཞུག་པར་བྱ། །བསྐོལ་ཆུ་སྨན་དང་སྤྱར་བ་ཡང༌། །ཞག་ལོན་པ་ནི་སྤང་བར་བྱ། །བུ་རམ་བསིལ་དུ་འདོད་པ་དང༌། །བསྲེགས་ན་སྒྲ་མི་འབྱུང་བ་ཡི། །མཚན་མ་དེ་དང་དང་བར་ནི། །སྣང་ན་ཐོབ་ལ་དཔོག་པར་བྱ། །དེ་ནི་ཚོས་པ་ཡིན་པའི་ཕྱིར། །སྣུམ་དེ་སླར་ནི་དབབ་པར་བྱ། །དེ་ནི་བཙགས་པར་གྱུར་ན་ནི། །ཡོན་ཏན་ལྷག་པར་འགྱུར་བ་ཡིན། །སྣུམ་ཞིང་དང་བར་འགྱུར་བ་དང༌། །གསལ་བར་གྱུར་ན་མཁས་པ་ཡིས། །སྣུམ་དེ་མདོག་ནི་ཕྱིན་པའི་ཕྱིར། །ཚོས་པ་ཡིན་པར་ཤེས་པར་བྱ། །དེ་འདྲ་ནད་ཀུན་འཇོམས་བྱེད་ཡིན། །མ་ཚོས་ཆུ་དང་འདྲེས་པ་དང༌། །ཚོས་དྲགས་ནག་པོར་གྱུར་པ་ནི། །ནད་ཀུན་འཁྲུགས་པར་བྱེད་པ་ཡིན། །རྨ་དང་སྣ་སྨན་འཇམ་རྩི་ལ། །འཇམ་པར་ཚོས་པ་གཏང་བར་བྱ། །བསྐུ་ལ་ཚོས་དྲགས་བཏུང་བ་ལ། །བར་མ་ཙམ་ནི་བསྔགས་པ་ཡིན། །མ་ཚོས་སྣུམ་ནི་ནད་སྐྱེད་ལ། །ཚོས་དྲགས་ཕན་པ་མེད་པ་ཡིན། །ལེགས་པར་ཚོས་པའི་སྣུམ་དག་ནི། །རྟ་ཡི་ནད་ནི་འཇིག་བྱེད་ཡིན། །རླུང་མཁྲིས་བད་ཀན་སེལ་བའི་སྣུམ། །བཏུང་དང་བསྐུ་དང་སྣ་སྨན་དང༌། །རྨ་དང་འཇམ་རྩི་
ལས་རྣམས་ཏེ། །རྣམ་པ་ལྔ་ལ་གཏང་བར་བྱ། །ཚད་འདི་དག་ནི་རྟ་རྣམས་ལས། །མཆོག་གི་ཡིན་པར་ཤེས་པར་བྱ། །བར་མ་ལ་ནི་བཞི་ཆ་དབྲི། །ཐ་མ་ལ་ནི་ཕྱེད་དབྲིའོ། །སོ་སོའི་ཟས་སྐོམ་ཆོ་ག་དང༌། །སུམ་གྱི་ཆོ་ག་ཐ་དད་པས། །ནད་རྣམས་ཞི་བ་ཉིད་འགྱུར་གྱི། །ཀུན་ལ་གཅིག་ནི་བསྔགས་མ་ཡིན། །ཨུཏྤ་ལ་ནི་ཁ་འབྱེད་པ། །ཟླ་བའི་འོད་ཟེར་ཉིད་ཡིན་ལ། །ཉི་མའི་ཟེར་གྱིས་པདྨ་ནི། །ཁ་འབྱེད་པར་ནི་སྣང་བ་ཡིན། །ཚད་ནི་མེ་སྟོབས་ལས་ཤེས་བྱ། །ཇི་དགའ་སྦྱིན་པར་མི་བྱའོ། །མེ་དྲོད་དེ་ཡང་རྣམ་བཞི་སྟེ། །རྣོ་རྟུལ་མཉམ་དང་མི་མཉམ་པའོ། །རྣོ་བས་ཤིན་ཏུ་མྱུར་དུ་འཇུ། །རྟུལ་བས་དཀའ་བས་འཇུ་བ་ཡིན། །མ་སྙོམས་པས་ནི་འཇུ་མི་སྙོམས། །སྙོམས་པས་འཇུ་བ་སྙོམས་པ་ཡིན། །མེ་དྲོད་རྟུལ་བས་གཟི་མདངས་མདོག །དང་པོ་དང་ནི་འགྲོས་ཞན་འགྱུར། །མེ་དྲོད་རྣོ་བས་དེ་རྣམས་དང༌། །ལྡན་ཞིང་ནད་ནི་ཉུང་བར་འགྱུར། །མེ་དྲོད་སྙོམས་པས་སྙིང་སྟོབས་མདོག །ནད་མེད་འགྲོས་དང་སྐད་དང་ནི། །དབང་པོ་བདེ་ལྡན་ནད་མེད་འགྱུར། །མེ་དྲོད་མི་སྙོམས་སྐད་དང་མདོག །སྟོབས་ཆུང་ནད་ནི་མང་བ་དང༌། །བདེ་བ་མེད་པར་འགྱུར་རོ་ཞེས། །ཤ་ལི་ཧོ་ཏྲས་རྗེས་སུ་བསྟན། །ཤ་ལི་ཧོ་ཏྲའི་མདོའི་གནས་ལས་ཚད་ཀྱི་ལེའུ་སྟེ་བཅུ་བཞི་པའོ།། །།རྟ་བྲེས་ལ་ནི་ལེགས་གནས་པའི། །དྲང་སྲོང་ཆེན་པོ་དབང་པོ་ཐུལ། །མེ་ལ་སྦྱིན་སྲེག་བྱེད་བརྩོན་ལ། །ལེགས་ཐོས་ལ་སོགས་ཀྱིས་དྲིས་པ། །ཚོད་ཤིས་གང་གི་དོན་འགྱུར་ཞིང༌། །གང་གི་ཡོན་ཏན་སྐྱོན་བཤད་པ། །དེ་ཡི་ཟས་ཀྱི་བྱ་བ་ནི། །ལུས་དང་དེས་འབྲེལ་བཀའ་སྩོལ་ཅིག །དེ་སྐད་ཤ་ལི་ཧོ་ཏྲ་ལ། །དྲང་སྲོང་དམ་པ་བུས་དྲིས་ཚེ། །ཟས་ཀྱི་སྦྱོར་བ་དྲང་སྲོང་ཆེ། །མདངས་དང་ལྡན་པས་སླར་སྨྲས་པ། །ཟས་ཀྱི་སྦྱོར་བས་ཁ་དོག་མདངས། །མགྱོགས་མཛེས་སྙིང་སྟོབས་དྲན་པ་དང༌། །འདྲངས་དང་སེམས་ནི་དགའ་བ་དང༌། །ན་ཚོད་ལ་ནི་འཇོག་པ་ཡིན། །ལ་ལ་འཚམ་དང་མི་
འཚམ་དང༌། །ཟས་ཀྱི་སྦྱོར་བས་བདེ་འགྱུར་བའི། །སྦྱོར་བའི་ཆོ་ག་བཤད་པར་བྱ། །བཤད་པ་དེ་ནི་མཉན་པར་གྱིས། །མེ་དྲོད་ཆུང་དང་ཡིད་མི་བདེ། །ལྟོ་བ་ན་དང་དབུགས་མི་བདེ། །དུབ་ཅིང་ཁལ་གྱིས་ཉེན་པ་དང༌། །དུག་འཐུངས་པ་དང་སྐམས་པ་དང། །ལམ་འགྲོ་མཚན་ནི་མི་ལྡང་དང༌། །དུབ་ལའང་ཁ་ཟས་མི་སྦྱིན་ནོ། །སྟོབས་ལྡན་ལྕི་བའི་ཁ་ཟས་ནི། །དེ་ལ་སྦྱིན་པར་མི་བྱའོ། །ལམ་གྱིས་ཉམ་ཆུང་གྱུར་སྟོབས་བྲི། །རྒན་དང་རབ་གཞོན་དབང་ཉམ་ཆུང༌། །རྩ་དང་འབྲས་དང་གློ་གཅོང་ཅན། །ཟས་སྦྱོར་རྟག་ཏུ་བྱ་བར་རིགས། །གང་ཚེ་ཕྱི་དྲོའི་དུས་སུ་ནི། །སྐྱེས་བུ་གསུམ་པོའི་གྲིབ་མ་ལྷགས། །ཅུང་ཟད་ལྷག་པའམ་མ་ཚད་པའམ། །ཟས་སྦྱོར་བྱ་བའི་དུས་ཡིན་ནོ། །འབྲས་བྲེ་གང་ནི་ལེགས་བཙོས་ལ། །དེ་རྗེས་ཚ་དང་བསྲེ་བར་དང༌། །སྣུམ་དང་ལྡན་པར་བྱས་པ་ནི། །བྱིན་ན་ལེགས་པར་འཇུ་བར་འགྱུར། །དང་པོར་སྣུམ་དང་ལྡན་པ་ཡི། །རྗེས་ལ་ལན་ཚྭར་ལྡན་པ་དང༌། །ཟས་སྦྱོར་འདི་ནི་སྐོམ་དང་དག །མི་སྐྱེད་ལེགས་པར་འཇུ་པར་འགྱུར། །ཞོ་དང་ཀུ་ལངྠའི་ཁུ་བ། །ཆང་དང་སྦྲང་རྩི་ཀཉྫི་དང༌། །ཏིལ་མར་བསྲེག་པས་མཉེན་བྱ་མིན། །ཁུ་བ་གཞན་དང་བསྲེ་མི་བྱ། །ཀཉྫི་དང་ནི་ཤ་ཁུའམ། །འོ་མའམ་ཡང་ན་ཧྭགས་དང་ནི། །འདི་དག་མཉེ་བ་སྦྱིན་བྱ་ཞིང༌། །ཡང་ན་ཏིལ་མར་སྦྱར་བའང་རུང༌། །ཞག་དང་ཏིལ་མར་མར་སྦྱར་བ། །གསུམ་པོ་སྦྱར་བ་ཞེས་བྱ་བའང་བསྐུ། །དེ་ལ་ཤ་ཁུ་མཆོག་ཡིན་ཏེ། །དེ་དང་ཉེ་བར་བྱ་བ་ཡི། །ནས་དང་མ་ཤ་གྲོ་དང་ནི། །དྲུག་ཅུ་བ་ཡི་སྦྱོར་བ་གང༌། །དེ་ནི་འོ་མའམ་སྦྲང་རྩིའམ། །མར་དང་སྦྱར་བས་མཉེ་བར་བྱ། །འདི་དག་དང་ནི་མཉེ་བའི་ཚེ། །དེ་རུ་ལན་ཚྭ་གཞུག་མི་བྱ། །རླུང་དང་བད་ཀན་གྱིས་ཉེན་དང༌། །རྟ་ཡི་སྣུམ་མང་འཐུངས་པ་དང༌། །མེ་དྲོད་ཆུང་དང་མི་སྙམས་དང༌། །སྦེགས་ལ་ལན་ཚྭར་བཅས་པ་གཏང༌། །མཉེ་བའི་སྦྱོར་བ་བྱ་བ་དང༌། །ཆང་དང་ཆང་སྙིང་ཞོ་ག་ཆུས། །ལྟོ་བའི་མ་ཞུ་རྣམ་སྦྱང་ཞིང༌། །ཁ་ཆའི་རྒྱུན་ནི་འཛག་པར་བྱ། །ཁོད་བའི་སྲིན་བུ་ཡོད་པ་ལ། །བག་ཅིན་དང་སྦྱར་སྦྱིན་པར་བྱ། །གང་
ཞིག་རྒན་དང་ལུད་པ་ཅན། །དེ་ལ་ཁ་ཟས་སྐམ་མི་སྦྱིན། །དེ་ལྟ་བུ་ལ་སྣུམ་དང་ནི། །བཅས་པའི་ཟས་ཀྱི་སྦྱོར་བ་བྱ། །རྟ་ལ་ཟས་ནི་སྦྱིན་པ་ནི། །མགོ་བོ་གྱེན་དུ་ལེགས་བསྟན་ནས། །ཟས་ནི་ཁམ་རེ་བཅད་ནས་ནི། །མྱུར་མིན་འགོར་མ་མེད་པར་སྦྱིན། །ནས་ཐུག་མར་དང་ལྡན་པའམ། །ཡང་ན་ཆག་ཚེ་མར་གྱིས་སྤངས། །རྟ་རྣམས་རྟས་བྱེད་དམ་པ་ཡིན། །མཁྲིས་པ་ཅན་ལ་མཆོག་ཏུ་ཕན། །ཆག་ཚེ་ནས་ཐུག་སྣུམ་མེད་པ། །ལན་ཚྭ་དང་ནི་ལྡན་པ་རུ། །བཅའ་ལྒ་བཏབ་པར་གྱུར་པ་ནི། །བད་ཀན་ཅན་ལ་སྦྱིན་པར་བྱ། །རྒྱམ་ཚ་དང་ནི་བཅས་པ་དང༌། །མ་ཤ་རི་ལ་མར་བཅུག་པ། །རླུང་ནད་ཅན་ལ་ཕན་མོད་ཀྱི། །དེ་ལས་མཁྲིས་པ་སྐྱེ་བ་བསྲུང༌། །ཤ་རྣམས་སྣ་ཚོགས་དག་དང་ནི། །བད་ཀན་ཅན་ལ་ཆང་བླུད་ཅིང༌། །མཁྲིས་པ་ཅན་ལ་འོ་མ་བླུད། །རླུང་ནད་ཅན་ལ་ཤ་ཁུ་སྦྱིན། །མཁྲིས་པ་ཅན་ལ་རབ་བསིལ་བ། །རླུང་ནད་ཅན་ལ་དྲོ་འཇམ་ཙམ། །ཅུང་ཟད་དྲོ་འཇམ་བད་ཀན་ཅན། །ཟས་དང་སྐོམ་ནི་སྦྱིན་པར་བྱ། །རྒུད་ཅིང་སྣུམ་ནི་མེད་པ་དང༌། །ཡང་ཤིང་ཚད་ལས་ཆུང་བ་ནི། །བད་ཀན་ཅན་ལ་སྦྱིན་བྱ་ཡི། །ཁ་ཟས་སྣུམ་པའང་མི་སྦྱིན་ནོ། །ཆུ་དྲོན་གྱིས་ནི་ཁ་བཀྲུས་ལ། །ཁ་འགྲམ་ལེགས་པར་བལྟས་ནས་ནི། །མཉེས་ལ་སྣ་སྨན་བཏང་ནས་ནི། །དེ་ཡི་འོག་ཏུ་འདྲེ་རུ་གཞུག །དེ་ཡི་མོད་ལ་རྩྭ་མི་སྦྱིན། །ཁྱད་པར་དུ་ནི་སྔོ་མི་སྦྱིན། །དེ་ཚེ་ལམ་འགྲོ་དུབ་པའམ། །ཆུ་རྒལ་བ་ནི་བསྔགས་མ་ཡིན། །ཟས་སྦྱིན་འོག་ཏུ་བཏུང་བ་ནི། །ཆུ་བྲེ་ཕྱེད་ནི་བླུད་པར་བྱ། །དེས་ནི་དྲོད་སྐེད་ནད་གཞི་སེལ། །ལེགས་པར་འཇུ་བར་བྱེད་པ་ཡིན། །མགྱོགས་ཤིང་སྟོབས་དང་ལྡན་པ་དང༌། །ཤ་མཁྲེགས་དབང་པོ་བརྟན་པ་དང༌། །ཁལ་དང་ཁུར་ལ་སྲན་ཆེ་བར། །ཟས་དེ་ཡིས་ནི་འགྱུར་བ་ཡིན། །རྙིང་དང་འབུ་ཡིས་ཟོས་པ་དང༌། །ཚིག་དང་དུ་བས་ཁྱེར་བ་དང༌། གཡུལ་སར་ཆར་གྱིས་ཉེན་པ་ཡིན། །རྩྭ་ནི་རྟ་ལ་མི་བསྔགས་སོ། །སྐྱོན་མེད་པ་ནི་ནས་བས་ཀྱང༌། །ཡི་གར་འོང་ཞིང་ཟོས་པས་སྲེད། །དེ་ནས་རྟ་ཡི་འཚོ་བ་ནི། །རྩྭ་ཡིས་ངེས་པར་
བསྡུས་པ་ཡིན། །ལྗང་པ་དགའ་ཞིང་ཡི་གར་འོང༌། །མེ་དྲོད་གཟི་མདངས་སྲེད་འཕེལ་བྱེད། །དེ་ཕྱིར་རྟ་ཡི་ལྗང་པ་ཡིན། །ཟོས་ན་དེ་འདྲར་འགྱུར་བ་ཡིན། །ལྗང་པ་ཚད་ལྡན་བྱིན་ན་ནི། །ནད་རྣམས་སྐྱེ་བར་མི་འགྱུར་ཞིང༌། །རིགས་པར་ལྗང་པ་བྱིན་པ་ཡིས། །སྐྱེས་ཟིན་ནད་ཀྱང་འཇུ་བར་འགྱུར། །བོང་ང་སྤུ་ཤེལ་ཚ་བ་གསུམ། །བྱི་དང་ག་དང་དུག་མོ་ཉུང༌། །འབྲས་བཏགས་ཆང་དང་སྦྱར་བ་ནི། །མདོག་དང་ཚེ་ནི་འཕེལ་བྱེད་མཆོག །འོ་མ་མར་དང་མ་ཤར་བཅས། །ཏིལ་བཏགས་སྦྱར་བ་ཞོ་ཅན་ཡིན། །མ་ཤའི་ཕྱེ་ལ་ལན་ཚྭར་བཅས། །སྟོབས་སྐྱེད་བྱེད་པ་གཞན་དག་གམ། །སཱ་ལུའི་ཕྱེ་མའང་སྦྲང་རྩིར་བཅས། །བི་ད་རི་དང་ལྡན་པ་ནི། །འོ་མར་སྦྱར་བ་ཞག་གསུམ་བྱིན། །སྟོབས་དང་ཁ་དོག་འཕེལ་བྱེད་ཡིན། །ཞོ་དང་སྐྱུར་རྫས་ལན་ཚྭ་དང༌། །མར་དང་བཅས་པར་དཀྲུགས་པ་ནི། །ནས་དང་སྦྱར་བྱིན་ལུས་ཟུངས་བཟང༌། །སྟོབས་དང་ཁ་དོག་སྐྱེད་བྱེད་ཡིན། །སྐམས་དང་ཆུ་ལ་རྐྱལ་བ་དང༌། །རྩྭ་ནི་སྔོན་པོ་དག་དང་ནི། །གང་ཞིག་ཁ་ཟས་མངར་བ་དང༌། །མར་ལ་སོགས་དང་སྦྱར་བ་དང༌། །ཤ་ལ་སོགས་བཅས་བསིལ་བ་སྟེ། །དྲུག་པོ་འཕྲལ་དུ་སྲོག་སྟེར་ཡིན། །འབྲོག་ཏུ་རྩྭ་ནི་སྣ་ཚོགས་ལས། །རྩྭ་གཅིག་ལ་ནི་སྲེད་པ་གང༌། །གོམས་པས་བསྟེན་པ་ཡིན་ཞེས་བྱ། །རོ་ཡི་གོམས་བ་ཟས་སྦྱོར་ལས། །དེ་ཡི་རོ་ལས་ཤེས་པར་བྱ། །བྱ་བའི་སྦྱོར་བས་ལུས་འཕེལ་འགྱུར། །གཞན་གྱིས་ཟོས་དེ་གང་བོར་དང༌། །གང་ཞིག་རྩ་ནས་བྱུང་བ་དང༌། །ནང་དུ་རུལ་བར་གྱུར་པ་ཡི། །རྩྭ་ནི་ཤིན་ཏུ་སྟོབས་འཕྲོག་བྱེད། །ཤ་ལི་ཧོ་ཏྲའི་མདོའི་གནས་ལས་ཟས་ཀྱི་སྦྱོར་བའི་ལེའུ་སྟེ་བཅོ་ལྔ་པའོ།། །།གང་ཞིག་ཟས་སྦྱོར་སྣ་ཚོགས་ཀྱིས། །འབད་པ་མང་པོས་བསྒྲུབས་བྱས་པ། །མཛེས་པ་ཞེས་འདི་གྲགས་པ་འདི། །ཅི་འདྲ་རྣམ་པ་དུ་ཞིག་མཆིས། །ལེགས་ལྡན་དེ་ནི་གསུངས་ཤིག་ཅེས། །དེ་ལྟར་ལེགས་ཐོས་ཀྱིས་བསྐུལ་ཏོ། །ཤ་ལི་ཧོ་ཏྲ་དྲང་སྲོང་ཆེས། །གོ་
རིམས་དེ་ནི་སླར་སྨྲས་པ། །ལྗང་པ་ཟས་དང་སྐོམ་རྣམས་དང༌། །དེ་བཞིན་མར་དང་སྣུམ་ཚོགས་ཀྱིས། །སོས་པར་གྱུར་ཚེ་མཛེས་གྱུར་ཏེ། །དེ་ནི་རྣམ་པ་ལྔར་བཤད་དོ། །བྲག་བཅས་ཞེས་བྱ་དང་པོ་སྟེ། །གཉིས་བ་རྩི་བ་ལོགས་འགེངས་བྱེད་ཡིན། །གསུམ་པ་སྟོབས་ནི་སྐྱེད་པ་སྟེ། །བཞི་པ་ཤ་ནི་རྒྱས་པ་ཡིན། །ལྔ་པ་ལུད་པ་ཅན་ཞེས་བྱ། །དེ་ལྟར་རྣམ་པ་ལྔར་བཤད་དོ། །འདི་དག་རྣམས་ཀྱི་མཚན་ཉིད་ནི། །སོ་སོར་བཤད་ཀྱི་ཉན་པར་གྱིས། །མཚན་དང་རླིག་པ་རྨོང་ཀ་དང༌། རྐུབ་དང་བྲང་དང་རྩ་སྦུབས་རྣམས། །ཁྲག་དང་ཤ་ནི་སྲབ་པ་ཡིས། །མཉེན་ཞིང་ཁྲག་གིས་རྒྱས་འདྲ་བ། །དེ་ནི་ཁྲག་བཅས་མཛེས་ལ་གནས། །རྟ་ནི་གདུལ་སྦྱོར་དག་ལ་སྦྱར། །ཡན་ལག་ཤ་ནི་འཇམ་པོ་ཡིས། །ཅུང་ཟད་གཡོགས་པར་གྱུར་པ་དང༌། །ཕྲག་སོ་བྲང་སོགས་ཤ་སྐྱེས་པ། །སྟོབས་ལྡན་རྩིབ་ལོགས་འགེངས་བྱེད་ཡིན། །རྐེད་པ་བརླ་ནི་ཤ་རྒྱས་ཤིང༌། །རྩིབ་མ་ཤས་ནི་ལེགས་པར་ཁབས། །སྟོབས་ཆེན་ཅུང་ཟད་མ་རྫོགས་པ། །མཛེས་པ་དང་ནི་སྟོབས་སྐྱེས་ཡིན། །འདིར་ནི་ཇི་ལྟར་དགའ་བ་རུང༌། །བཞོན་པའི་དོན་དུ་བཤད་པར་བྱ། །ཅི་ནུས་པར་ནི་བཀོལ་བ་ཡང༌། །དེ་ནི་ཉམ་ཆུང་གིས་འགྱུར་རོ། །ཤ་ནི་རྒྱས་པར་གྱུར་བའི་རྟ། །བྱ་བ་ཀུན་ལ་ནུས་པར་ལྡན། །དྲེགས་པར་བཅས་ཤིང་མཛེས་དང་བཅས། །དཔའ་ཞིང་སྟོབས་ལྡན་དཔའ་བ་དང༌། །ཚིགས་རུས་རྩི་བ་ལོགས་རྐེད་པ་དང༌། །མཇུག་དོ་དང་ནི་ཤར་ནུས་ཟླུམ། །ཟེའུ་ནས་རྔ་སྙིང་བར་དུ་ནི། །དམའ་ཞིང་གང་གི་རི་མོ་ཆགས། །ཤ་ནི་ཤིན་ཏུ་རྒྱས་གྱུར་པ། །དེ་ནི་ལུད་པ་ཅན་ཞེས་བྱ། །མཛེས་པ་འདི་དང་ལྡན་པའི་རྟ། །བྱ་བ་ཐམས་ཅད་བདེ་བླག་ནུས། །ཤ་རྣམས་འཕྱང་ཞིང་དབུགས་མི་བདེ། །རྡུལ་དང་དུབ་པའི་ཤས་ཆེ་བ། །ཁྲུ་སྨན་ལེགས་པར་བཏང་བ་ཡིས། །འདི་ནི་ཉམ་སྨད་ཉིད་དུ་བྱ། །དེ་ཡན་ཆད་ནི་ཤ་རྒྱས་པར། །རྟ་ནི་ནམ་ཡང་མི་བྱའོ། །ཚིལ་ནི་ཤིན་ཏུ་ཆེས་གྱུར་པ། །དེ་ཡིས་ལས་སྦྱོར་མི་ནུས་འགྱུར། །གསོ་དཀའ་བ་ཡི་ནད་ལྡན་ན། །རིགས་
པས་ལེགས་པར་གསོ་བར་བྱ། །ཟས་ཀྱི་སྦྱོར་སོགས་སྤང་བ་དང༌། །རིམ་གྱིས་དབྲི་ཞིང་སྦྱང་བར་བྱ། །ཉམས་སྨད་དྲགས་པའམ་མྱུར་དུ་ནི། །བྱས་ན་མ་གོམས་དབང་གིས་འཆི། །མེ་དྲོད་ཁོང་ནས་འབར་གྱུར་ལ། །རྒྱུ་བའི་ལམ་ནི་ཆིལ་གྱིས་བཀག །སྣུམ་རྣམས་བྱིན་པར་གྱུར་པ་ནི། །དེ་ནི་ཉེ་བར་རྒྱས་པར་འགྱུར། །དེ་བས་བདེ་བ་དྲགས་པ་དང༌། །ཉམས་སྨད་དྲགས་པར་མི་བྱའོ། །དེ་དག་གཉི་ག་དྲགས་པ་ཡིས། །གསོར་མི་རུང་བ་ཉིད་དུ་འགྱུར། །གྲིབ་མ་འདོད་དང་སྐོམ་དད་ཆེ། །ལུད་པ་དབུགས་མི་བདེ་བས་ཉེན། །ཁུ་བཞིའི་ནད་ནི་མང་བ་དང༌། །གཅིན་མང་བདེ་བ་མེད་པ་དང༌། །གང་ཞིག་བདག་ཉིད་སྡུག་བསྔལ་ཞིང༌། །ཉམ་ཐག་པར་ནི་འགྲོ་གྱུར་ལ། །ལམ་འཇུག་པར་ནི་མི་ནུས་པ། །བཞོན་པ་པོ་ཡིས་ཅི་བྱར་ཡོད། །དེ་ནི་གྲང་དྲགས་ཚ་དྲགས་པའི། །བཀྲེས་དང་སྐོམ་པ་མི་བཟོད་པས། །མཛེས་འདོད་རྟ་ནི་སྐྱིད་ཆོས་དག །ཤིན་ཏུ་དྲགས་པར་མི་བྱའོ། །བཀོལ་དུ་མེད་ཅིང་ལུས་ཉམ་ཆུང༌། །གཟི་མདངས་ཆུང་ཞིང་སྟོབས་མེད་ལ། །ལས་ལ་སྦྱོར་བར་མི་ནུས་པ། །དེ་ནི་མཛེས་པར་མི་འདོད་དོ། །ཤ་ལི་ཧོ་ཏྲའི་མདོའི་གནས་ལས་མཛེས་པའི་ལེའུ་སྟེ་བཅུ་དྲུག་པའོ།། །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །གཟུགས་ནི་གང་དག་ཉིད་ཀྱིས་ན། །རྟ་ནི་གཟུགས་སྡུག་འགྱུར་བ་ལགས། །སྤྱོད་པ་དང་ནི་མཚན་དག་སྟེ། །དེ་ནི་བདག་ལ་ལུང་བསྟན་སྩོལ། །དེ་ནས་རྟ་ཡི་མཚན་མཁས་པ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་ཡན་ལག་ཉིད་ལག་གི །སྐྱོན་མེད་མཚན་ཉིད་མཉན་པར་གྱིས། །མཚན་ཉིད་སུམ་ཅུ་དྲུག་ལྡན་པ། །གང་གིས་དེ་ནི་བསྔགས་པ་ཡིན། །རིགས་དང་མཚན་ཉིད་ནད་མེད་དང༌། །ལུས་ཀྱང་སྨད་པ་མེད་གྱུར་པ། །གང་ལ་འདི་བཞི་ཡོད་པ་ཡི། །རྟ་དེ་བསྔགས་པར་འོས་པ་ཡིན། །གང་ཞིག་དབུགས་ནི་ཆེར་འབྱིན་ཅིང༌། །མིད་པ་སྲབ་པར་མངོན་པ་དང༌། །སྣ་ཡི་སྦུབས་ནི་མི་མཐུག་པ། །རྟ་ནི་རབ་ཏུ་བསྔགས་པ་ཡིན། །མཆུ་ལྟག་མཉམ་ཞིང་ཟླུམ་པ་དང༌། །ཆེ་བར་གྱུར་ན་བཟང་
བ་ཡིན། །མ་མཆུ་སྲབ་ཅིང་མཉེན་པ་དང༌། །མི་འཕྱང་ན་ནི་བསྔགས་པ་ཡིན། །སོ་ནི་ཐམས་ཅད་སྙོམས་པ་དང༌། །ཐགས་བཟང་དཀར་ཞིང་ནག་མཐོ་ལ། །སྣུམ་ཞིང་སྲབ་པར་གྱུར་པ་དང༌། །མཚན་ཉིད་ལེགས་པར་ལྡན་ན་བསྔགས། །རྐན་ནི་སྲབ་ཅིང་གཉེར་མ་ཆགས། །ཟབ་ཅིང་དམར་བ་བསྔགས་པ་ཡིན། །ལྕེ་ནི་སྲབ་ཅིང་མཉེན་པ་དང༌། །རྩ་མཐུག་རྒྱ་སྐྱེགས་འདྲ་བ་ལ། །ཁྱི་ཡི་ལྕེ་དང་དབྱིབས་འདྲ་བའི། །རྟ་ནི་བསྔགས་པར་གྱུར་པ་ཡིན། །མགོ་བོ་ཕྲ་མིན་སྦོམ་པ་མིན། །ལུས་དང་འཚམ་པར་གྱུར་པ་དང༌། །འགྲམ་གླང་ཆེ་བར་གྱུར་པ་ནི། །བསྔགས་པར་གྱུར་པ་ཉིད་ཡིན་ནོ། །དཔྲལ་བ་མཉམ་ཞིང་ཡངས་ལ་ཆེ། །པགས་པ་སྲབ་ཅིང་མི་གྱོང་ལ། །དབུས་ན་གཙུག་འཁྱིལ་གནས་པ་དག །གང་ཡིན་དེ་ནི་བསྔགས་པ་ཡིན། །རྟ་ཡི་མིག་ནི་མིག་མཆུ་དག །སྲབ་ཅིང་ལེགས་གནས་རྫི་མ་སྲབ། །མིག་འབྲས་ཀྱི་ནི་མཐའ་མ་དག །ལེགས་པར་དཀར་ཞིང་དབུས་ནག་ལ། །གང་ཞིག་གཟུགས་ཀྱི་མདོག་སྡུག་ཅིང༌། །ཕྲ་ཞིང་ཐག་རིང་མཐོ་བ་དང༌། །གླང་པོའི་མིག་འདྲ་མེ་ཏོག་ནི། །མ་ལི་ཀ་ཡི་སྙིང་པོ་འདྲ། །ཤེལ་ལྟར་ཡོངས་སུ་དང་བ་དང༌། །མཐོང་བ་བརྟན་པ་བསྔགས་པ་ཡིན། །རྣ་བ་སྲབ་ཅིང་མཉེན་པ་དང༌། །སྤུ་སྲབ་ཐུང་བར་གྱུར་པ་དང༌། །གང་གི་སྐྲ་གྲགས་ཕྲ་བ་དང༌། །ཐག་རིང་བ་ཡང་ཐོས་པ་བཟང༌། །གདོང་པ་གསལ་ཞིང་རྩ་མི་མངོན། །ཤ་སྲབ་ཤ་མཐུག་མ་ཡིན་ཞིང༌། །དཔྲལ་མཚམས་ཆུང་ཞིང་རྔོག་རིང་བསྔགས། །སྐེ་མགྲིན་ཤ་རྒྱས་རིང་བ་དང༌། །རྣ་ལྟག་རྣ་མཆན་ལེགས་པར་གནས། །པགས་སྲབ་རིམ་གྱིས་སྦོམ་པར་ནི། །གྱུར་པ་དེ་ནི་དགེ་བ་ཡིན། །ཕྲག་སོ་ལེགས་འབྲེལ་ནམ་ཚོང་ནུབ། །རྔོག་མཐའ་ལེགས་པར་འདུས་པ་དང༌། །རིང་ཞིང་ཁ་ཞེང་ཆེ་ན་བཟང༌། །བྲང་ནི་མཐུག་ཅིང་ཡངས་ལ་མཁྲེགས། །སྲ་ཞིང་གཉེར་མ་མེད་པ་དང༌། །བར་ཡངས་དཔུང་སྣ་ཆེ་བ་དང༌། །འདི་འདྲ་བ་དག་བསྔགས་པ་ཡིན། །དཔུང་པ་མཁྲེགས་ཤིང་ཡངས་པ་དང༌། །ཟླུམ་ཞིང་སྦོམ་ལ་རྩ་མི་མངོན། །རིམ་གྱིས་ཕྲ་བར་
གྱུར་པ་ནི། །རྟ་ལ་བསྔགས་པར་གྱུར་པ་ཡིན། །ལག་ངར་ཕྲ་མོ་རིམ་གྱིས་ཕྲ། །པུས་མོ་ཟླུམ་པར་གྱུར་པ་དང༌། །མཉེན་ཞིང་བསྐྱང་བར་བདེ་བ་དང༌། །རྟ་ལ་བསྔགས་པར་གྱུར་པ་ཡིན། །ཕྱི་གྲང་རིང་ཞིང་དབྱིབས་ལེགས་པ། །ཤ་སྲབ་རྩ་རྒྱུས་མི་མངོན་སྲབ། །པགས་སྲབ་ཤིན་ཏུ་ཟླུམ་པ་ཡི། །རྟ་ནི་བསྔགས་པར་གྱུར་པ་ཡིན། །ཚེ་འུ་ཚེ་ལེགས་སྐྱེས་མཉམ་ཞིང་ཟླུམ། །དོད་ཅིང་སྙོམས་པར་གྱུར་པ་དང༌། །སྤུ་ཕྲ་པགས་པ་སྲབ་པ་ཡི། །རྟ་ནི་བཟང་པོར་བཤད་པ་ཡིན། །རྨིག་པ་སྲ་ཞིང་དཀྱིལ་ལེགས་ལ། །བོང་བུའི་རྨིག་པ་འདྲ་བ་དང༌། །སྦལ་པ་ནུབ་ཅིང་ལེགས་པར་འབྱར། །ཆ་མཉམ་པར་ནི་འགྲོ་བ་དང༌། །རྒྱ་ནི་ཟབ་མོ་དང་འདྲ་ཞིང༌། །རྨིག་སྒྲོས་སྙོམས་ཤིང་སྲ་བ་དང༌། །མཁྲེགས་ཤིང་གཉེར་མ་མེད་པ་ཡི། །རྟ་ནི་རབ་ཏུ་བསྔགས་པ་ཡིན། །རྒྱབ་སོ་ཐུང་དང་རབ་ཏུ་བསྔགས། །རྩིབ་མ་ལེགས་པར་སྒུ་བ་དང༌། །ངོས་གཉིས་ལེགས་པར་སྐྱེ་བ་བསྔགས། །སྒ་འོག་གནས་ནི་ཁང་པ་བཟང༌། །ལྟོ་བ་ཟླུམ་ཞིང་རྩིབ་མའི་ནང༌། །འདུས་པ་ལྟར་འདུག་བསྔགས་པ་ཡིན། །ཨོང་དོ་ཡངས་ཤིང་ཆེ་ལ་འཇམ། །སྤུ་ཡི་ཚོགས་ཀྱིས་ཁེབས་པ་བཟང༌། །མཇུག་མ་རྔ་མ་ཕྲ་ཞིང་འཇམ། །མཇུག་རྩ་ཨོང་དོ་ལེགས་པར་འབྲེལ། །མཇུག་མའི་ཕྱོགས་སུ་དྲང་པོར་སྐྱེས། །རྟ་ནི་བསྔགས་པར་གྱུར་པ་ཡིན། །རྐུབ་ནི་ཟླུམ་ཞིང་ལེགས་པར་འཛུམས། །ཐུང་ཞིང་གཉེར་མ་ལེགས་པར་གནས། །གང་གིས་རྟ་སྤངས་ལེགས་པར་འབྱིན། །དེ་ནི་བསྔགས་པར་གྱུར་པ་ཡིན། །རླིག་པ་མཉམ་ཞིང་ལེགས་པར་སྐྱེས། །སྤུ་མེད་པར་ནི་གྱུར་པ་དང༌། །བིལ་བ་ཆུང་ངུའི་ཚོད་ཙམ་ཞིང༌། །མ་འཕྱངས་གྱུར་པ་བསྔགས་པ་ཡིན། །རྟ་ཡི་ཕོ་མཚན་རིམ་གྱིས་ཕྲ། །ཐུང་ཞིང་དྲང་ལ་མྱུར་དུ་འབྱིན། །གཏིང་རིང་ཁ་དོག་གཅིག་པར་ནི། །རྟ་ལ་བསྔགས་པར་གྱུར་པ་ཡིན། །རྗེ་ངར་རྒྱབ་མཐོང་ཡ་ཡོ་མེད། །ཤ་སྲབ་གུག་པ་མ་ཡིན་ཞིང༌། །མཉམ་ཞིང་མ་འཁུམས་དབྱིབས་ལེགས་པའི། །རྟ་ནི་བསྔགས་པར་གྱུར་པ་ཡིན། །རྟ་སྤུ་སྲབ་ཅིང་དྲང་
བ་དང༌། །མདངས་ལྡན་ཁ་དོག་མ་འདྲེས་བཟང༌། །རྟ་ནི་འདྲེ་བར་བྱེད་པའི་ཚེ། །གང་གིས་ལེགས་པར་སྤྲུགས་པ་དང༌། །སྟོབས་དང་ལྡན་པའི་གཟུགས་ཡོད་པ། །མཚན་ཉིད་མཆོག་ཏུ་བཤད་པ་ཡིན། །ཆུ་ལ་རྒལ་བའི་གནས་དང་ནི། །ཁལ་བཀལ་ལམ་དུ་འགྲོ་བ་དང༌། །བསྣུན་དང་ཉམ་ངའི་གནས་དག་ཏུ། །རྩལ་འབྱིན་གཟི་ཅན་མཚན་ཉིད་ཅན། །དེ་ལྟར་བསྔགས་པའི་མགྱོགས་འགྲོ་ནི། །རྒྱལ་པོའི་བཞོན་པར་རབ་ཏུ་བརྗོད། །ཤ་ལི་ཧོ་ཏྲའི་མདོའི་གནས་ལས་མཚན་གྱི་ལེའུ་སྟེ་བཅུ་བདུན་པའོ།། །།ལེགས་ལྡན་རྟ་ཡི་ཁ་དོག་དང༌། །དེ་བཞིན་མདོག་གི་དབྱེ་བ་དང༌། །དེ་ཡི་མིང་གི་ཉེས་པ་དག །བདག་ཅག་མཉེན་པར་འཚལ་ལགས་སོ། །བུ་ཡིས་དེ་སྐད་སྨྲས་པ་དང༌། །སྙན་པའི་ཚིག་གིས་སླར་སྨྲས་པ། །ང་ཡི་གཞུང་གི་མ་འདྲེས་མདོག །རྟ་ལ་རྣམས་བཞི་ཡོད་པར་འདོད། །དཀར་དང་དམར་དང་གནག་པ་དང༌། །བཞི་པ་སེར་པོ་ཞེས་བཤད་དོ། །འདི་རྣམས་ལུས་ཀྱི་ཕྱོགས་གནས་དང༌། །ཕན་ཚུན་འདྲེས་པར་གྱུར་པ་དང༌། །རྫས་དང་རྫས་མིན་འདྲེས་པ་ལས། །རྒྱས་པར་མདོག་ནི་དུ་མ་ཡིན། །དཀར་ལ་སོགས་པ་དེ་དག་རྣམས། །མ་ལུས་ཤེས་བྱ་མཉན་པར་གྱིས། །པགས་པ་དཀར་ཞིང་བ་སྤུ་དཀར། །དེ་བཞིན་རྔ་མ་རྔོག་མ་དཀར། །འདི་ནི་དཀར་པོ་ཞེས་བཤད་དོ། །རྟ་དེ་སྲིད་སྒྲུབ་ཡིན་པར་འདོད། །པགས་པ་དམར་ཞིང་བ་སྤུ་དམར། །རྔ་མ་རྔོག་མ་དག་ཀྱང་དམར། །ཁྲག་དང་ཉི་མ་འཆར་ཀ་འདྲ། །རྟ་ནི་དམར་པོ་ཞེས་བྱའོ། །པགས་པ་སྤུ་དང་རྔོག་མ་གནག །བུང་བ་འདྲ་བ་གང་ཡིན་པ། །སྟག་ཟིལ་ནག་པོའི་མདངས་འདྲའི་རྟ། །དེ་ཡི་ཐམས་ཅད་ནག་པོར་བཤད། །པགས་པ་རྔ་རྔོག་སྤུ་རྣམས་ནི། །གང་ཞིག་གསེར་གྱི་མདོག་འདྲ་ཞིང༌། །དར་ནི་སེར་པོའི་མདངས་ལྡན་པ། །རྟ་དེ་སེར་པོ་ཡིན་ཞེས་བྱ། །དེ་ལྟར་ཁ་དོག་རྣམ་པ་བཞི། །སོ་སོར་ཡང་དག་བཤད་པ་ཡིན། །དེ་རྣམས་མདོག་ནི་འདྲེས་གྱུར་པ། །བཤད་པ་ང་ལས་རྟོགས་པར་གྱིས། །པགས་པ་དམར་ཞིང་མིག་སྐྱོན་མེད། །ཁ་དང་རྐན་དང་ཕོ་མཚན་དམར། །མ་དུ་ཀ་ཡི་མེ་ཏོག་འདྲ། །
འདི་ནི་ལ་ལས་ཀར་ཀར་བཤད། །ཕོ་མཚན་རྨང་ཁ་རླིག་པ་དང༌། །རླིག་པ་དེ་བཞིན་རྐུབ་དང་ནི། །མཆུ་ལྟག་མཆུ་དང་ཁ་དང་ནི། །པགས་པ་པདྨའི་མདོག་འདྲ་གང༌། །མིག་དང་ཕུམ་ཕུམ་རྔོག་མའི་བར། །བ་སྤུ་དཀར་བར་གྱུར་པ་ནི། །རྟ་ནི་ཀར་ཀ་ཁ་ཅིག་འདོད། །བཀྲ་ཤིས་དགེ་བ་དམ་པ་ཡིན། །པགས་པ་དམར་ཞིང་བ་སྤུ་དམར། །རྔ་མ་རྔོག་མ་དམར་པ་ནི། །ཉི་མ་སྐྱོན་བྲལ་མདོག་འདྲ་བ། །དེ་ཡང་ཀར་ཀར་ཤེས་པར་བྱ། །བཙོ་མའི་གསེར་གྱི་མདོག་འདྲ་བའི། །སྤུ་ནི་གང་ལ་ཡོད་གྱུར་པ། །པགས་པ་པདྨའི་དབུས་འདྲ་ཞིང༌། །མིག་ནི་མེ་ཡི་རྩེ་མོ་འདྲ། །རྨིག་པ་ཁ་དོག་གཅིག་པ་ཡི། །རྟ་དེ་འཁོར་ལོས་སྒྱུར་བའི་ཡིན། །གང་ཞིག་ཀར་ཀ་དྲའི་གཞི་ལ། །ཡན་ལག་ལྟོ་དང་དཔྱི་དང་སྟོང༌། །ཐིག་ལེ་ནག་པོ་ཆགས་གྱུར་པ། །རྟ་ནི་ཁྱིམ་བྱ་ཅན་ཞེས་བྱ། །གང་ཞིག་ཀར་ཀ་ཅན་འདྲ་ལ། །དཔྱི་ལ་སོགས་པ་དམར་པོ་ཡི། །ཐིག་ལེ་ཆགས་པར་གྱུར་པ་ནི། །དེ་ཡང་ཁྱིམ་བྱ་ཅན་གཉིས་པ། །བ་སྤུ་རྔ་མ་རྔོག་མ་ནི། །དཀར་ལ་པགས་པ་ནག་པོ་ཅན། །མཚན་དང་རྨིག་པ་མིག་ཀྱང་ནག །དེ་ནི་དུར་བའི་གཤོག་པར་བཤད། །པགས་འཇམ་པགས་པ་མིག་དང་སྤུ། །རྔ་རྔོག་རྨིག་པ་དཀར་པ་དང༌། །སིན་དུ་བ་ར་དང་འདྲ་བས། །མདོག་དེ་སིན་དུ་བ་ར་ཅན། །པགས་དམར་སེང་གེའི་སྤུ་འདྲ་ཞིང༌། །རྔ་མ་དང་ནི་རྔོག་མ་དཀར། །རླིག་པ་དམར་ཞིང་འབྱར་གྱུར་ལ། །རྟ་དེ་སེང་གེའི་མདོག་ཅན་ཡིན། །གང་ཞིག་སྤུ་རྩེ་དུ་བ་འདྲ། །ཅུང་ཟད་དམར་ཞིང་སེར་སྐྱར་འདྲེས། །ཁ་དོག་དེ་ཡི་རྟ་དེ་ནི། །གོ་རིའི་སྤུ་ཞེས་བྱ་བར་བཤད། །དེ་བཞིན་དུ་བའི་མདོག་ལྡན་པ། །དུད་སེར་ཞེས་ནི་བྱ་བར་བཤད། །སེར་ཤས་ཆེ་བ་གང་ཡིན་པ། །མེ་ཏོག་ཀུ་རུཎྜཀ་དང་འདྲར་བཤད། །སེར་པོའི་ངེས་ཚིག་འདི་ཡི་ནི། །དཔེ་ཡང་ཁྱེད་ཀྱིས་མཉེན་པར་གྱིས། །སོག་མ་མདའ་སྨྱུག་དང་འདྲ་ཞིང༌། །སོ་དང་བད་ཀན་དང་འདྲ་ལ། །གང་ཞིག་སེར་པོ་ཟླུམ་པོ་ཡི། །དེ་ནི་ཁྱབ་འཇུག་བཞོན་པ་སྟེ། །རྒྱལ་དང་
རྣམ་རྒྱལ་དོན་གཉེར་ལ། །འདི་དག་ཐམས་ཅད་བསྔགས་པ་ཡིན། །དེ་བཞིན་ཁ་དོག་མང་བ་དང༌། །སེང་གེའི་མདོག་དང་འདྲ་བ་དང༌། །དུང་དང་ཀུནད་ཁ་ཤ་དང༌། །འོ་མ་དང་བ་ཉི་མའི་མདོག །ཀུ་མུ་ད་ཡི་མདོག་འདྲ་དང༌། །ཆུ་སྐྱར་བཟང་པོ་འདྲ་བ་དག །དཀར་དང་སེར་པོ་འདྲེས་པ་ནི། །ཐམས་ཅད་དང་པ་ཞེས་བྱར་བཤད། །གང་ཞིག་མེ་ཏོག་མཁའ་ལྡིང་འདྲ། །རྔ་མ་རྔོག་མ་ནག་པོ་ནི། །ཡོད་པའི་རྟ་དེ་སྟང་ཟིལ་གྱི། །སྤྱི་བོ་ཅན་ཞེས་བྱ་བ་ཡིན། །རྔོག་མ་འཇམ་ཞིང་དཀར་བ་ནི། །རྔོག་མ་མུ་ཉྫ་ཅན་ཞེས་བྱ། །ཤིན་ཏུ་དཀར་ལ་རྔོག་མ་གནག །རྔོག་མ་མིག་སྨན་མདོག་འདྲར་བཤད། །གང་ཞིག་རྔོག་མའི་མདོག་སྣ་ཚོགས། །འདྲེས་པའི་རྔོག་མ་ཞེས་བྱར་བཤད། །རྔ་མའི་ཁ་དོག་སྣ་ཚོགས་པ། །རྔ་མ་འདྲེས་པ་ཞེས་བྱར་བཤད། །དེ་དང་འདྲ་བ་གཞན་དག་ཀྱང༌། །དཀར་པོའི་མདོག་འདྲེས་པ་ཞེས་བྱ། །གསོ་མའི་མེ་ཏོག་མདོག་འདྲ་དང༌། །ལྷམ་བུ་ཆུ་གཤེར་འདྲ་བ་དང༌། །ཨ་མྲའི་ལོ་མའི་མདོག་འདྲ་དང༌། །རྟ་གང་ཀི་ཤུ་དང་འདྲ་དང༌། །ཆུ་ཤིང་མེ་ཏོག་འདྲ་བ་དང༌། །ཀར་ཀན་རུ་ཡི་མདོག་འདྲ་དང༌། །མེ་ཏོག་བནྡུ་ཛི་བའི་མདོག །ལྕང་མ་ཨ་ཤྭ་ཀའི་མདོག་དང༌། །གང་ཡང་བྱུ་རུའི་མདོག་འདྲ་དང༌། །མིག་དང་རྔ་རྔོག་ནག་པ་དང༌། །མཚན་དང་པགས་པ་དེ་བཞིན་གནག །དེ་ནི་སྤུ་གནག་ཞེས་བྱར་བཤད། །དེ་དག་དམར་པོ་དང་འདྲེས་མདོག །ནག་པོ་དང་འདྲེས་མདོག་ཉོན་ཅིག །ཁུ་བྱུག་དང་ནི་ཆར་སྤྲིན་འདྲ། །དཱུར་བའམ་མ་ཧེའི་མདོག་འདྲ་བ། །ཨ་མྲ་བ་ཡི་མདོག་འདྲ་བ། །གང་ཡང་ལུང་ཏད་རློན་འདྲ་དང༌། སཱ་ལ་ཏ་ལའི་མདོག་འདྲ་དང༌། ཨུཏྤལ་སྔོན་པོ་ལྟ་བུ་དང༌། །གང་གཞན་ཚུལ་ནི་འདི་འདྲ་བ། །རྟ་ནི་ནག་པོ་དང་འདྲེས་མདོག །གང་ཡང་སཱ་ལུའི་གྲ་མ་འདྲ། །ནེ་ཚོའི་སྒྲོ་གཤོག་འདྲ་བ་དང༌། །མར་གྱི་སྙིང་པོའི་མདོག་འདྲ་དང༌། །པདྨའི་ས་བོན་མདོག་འདྲ་དང༌། །པདྨའི་གེ་སར་ལྟ་བུ་དང༌། །དེ་བཞིན་མེ་ཡི་རྩེ་འདྲ་དང༌། །གང་ཞིག་གཞའ་དང་འདྲ་བ་དང༌། །གང་ཡང་བ་བླ་འདྲ་བ་དང༌། །སྤུ་ཏི་ཀ་ཡི་སེར་པོ་འདྲ། །ཤྲི་ཤའི་མེ་ཏོག་འདྲ་བ་དང༌། །
གང་ཡང་ཁྲེ་འབྲས་མདོག་འདྲ་དང༌། །གང་ཡང་སྤྱང་ཁུའི་མདོག་ཅན་དང༌། །ཁ་དོག་སེར་པོ་ཇི་སྙེད་དང༌། །གཞན་ཡང་སེར་པོ་དང་འདྲེས་དང༌། །དེ་འདྲ་དེ་ལས་གཞན་པ་དག །རྟ་ནི་སེར་པོ་དང་འདྲེས་མདོག །དེ་ལྟར་རྣམ་པ་བཞི་པོ་ནི། །མདོག་འདྲེས་པ་ཞེས་བྱ་བར་བཤད། །གཞན་ཡང་ཁ་དོག་དབྱེ་བ་དང༌། །ཁ་དོག་སྣ་ཚོགས་མཉན་པར་གྱིས། །ཕུག་རོན་གྱི་ནི་སྐེ་འདྲ་ཞིང༌། །པགས་པ་སྤུ་ཡི་མདོག་དམར་པ། །ཕུག་རོན་སྐེ་འདྲ་ཕུག་རོ་ན་སྐེ། །དམར་དང་ནག་པོ་ཅུང་ཟད་འདྲེས། །པགས་པ་རྔ་མ་རྔོག་མ་གནག །མིག་དང་གསང་བ་རྨིག་པའང་གནག །མཁལ་མའི་མདོག་འདྲ་ནག་འཚེར་བ། །འདི་ཉིད་གནག་པའི་ཤས་ཆེ་བ། །ནག་འཚོར་བ་ནི་ཡིན་ཞེས་བྱ། །གལ་ཏེ་མར་ནག་ཚམ་མཉམ་འདྲེས། །རྒུན་འབྲུ་ལྟར་འཚེར་ཡིན་པར་བཤད། །རྒུན་འབྲུ་ལྟར་འཚེར་དེ་ཉིད་ལ། །ཅུང་ཟད་སེར་སྐྱས་འདྲེས་པ་ནི། །ཁ་དོག་གཉིས་ནི་བསྡུས་པ་ལས། །གང་ཞིག་ཤས་ཆེ་ལེ་ལ་གདངས། །ནག་པོ་དཀར་པོ་དང་འདྲེས་ཤིང༌། །པགས་པ་ནག་པོར་འདུག་པ་ནི། །སྤུ་འདྲེས་རང་སྲོང་པ་ཞེས་བཤད། །གསལ་པ་རི་དགས་མདོག་ཅན་ཡིན། །དེ་ཉིད་དཀར་པོ་མ་གྱུར་ན། །དཀར་པོའི་དྲང་སྲོང་པ་ཞེས་བཤད། །དཀར་པོའི་གཞི་ལ་གནག་དང་འདྲེས། །ཁོར་ལིང་མང་དུ་སྣང་བ་དང༌། །ཡན་ལག་གནག་ཅིང་མུག་མ་དཀར། །དེ་ནི་སྐྱ་བའི་དྲང་སྲོང་པ། །དཀར་དང་དམར་དང་ནག་པོར་འདྲེས། །པགས་པ་ནག་པོ་ཡོད་གྱུར་ཅིག །མིག་དང་ཕོ་མཚན་རྨིག་པ་གནག །འདྲེན་མའི་དྲང་སྲོད་པ་ཞེས་བྱ། །དམར་དང་སེར་དང་ནག་པོ་ཡིས། །དཀར་ལ་འདྲེས་གྱུར་གསོ་དར་མདོག །དམར་སེར་སྐར་པོ་མདོག་འདྲེས་རྟ། །སེར་སྐྱའི་བ་འདྲ་སེར་སྐྱ་ཡིན། །ནག་པོ་དམར་པོས་ཁྱབ་གྱུར་ཅིང༌། །དམར་པོ་དང་ཡང་ཆེར་ལྡན་པ། །རྟ་དེ་རྟ་མཁན་དག་གིས་ནི། །དུད་ཀ་ཞེས་ནི་བྱ་བར་བཤད། །ཁྲག་དང་བཙག་གི་མདོག་འདྲ་ཞིང༌། །པགས་པ་འདྲེན་མར་སྣང་བ་དང༌། །རྔ་མ་རྔོག་མ་དམར་པ་ཡི། །སེར་དང་དམར་པོའི་འདྲེ་གྱུར་པ། །སྤུ་
རྩེའི་མདོག་ནི་གནག་པ་དང༌། །རྔ་རྔོག་གཉིས་ཀྱང་གནག་གྱུར་པ། །རྟ་དེ་མཚལ་བུ་ཞེས་བྱར་བཤད། །གང་ཞིག་སྤུ་རྩེ་གནག་གྱུར་ཅིང༌། །གཞན་དག་སེར་སྐྱར་གནས་གྱུར་པ། །གདོང་གི་མདོག་ནི་མ་འདྲེས་པའི། །རྟ་དེ་དུར་པ་ཞེས་བྱར་བཤད། །ཀུན་དུ་དཀར་དང་དམར་བ་ཡི། །སྤུ་ནི་འདྲེན་མར་གནས་གྱུར་ལ། །པགས་པ་ཕོ་མཚན་མཆུ་དམར་པའི། །རྟ་ནི་སེ་པོ་ཞེས་བྱར་བཤད། །དཀར་དང་སེར་བའི་མདོག་འདྲེས་ཤིང༌། །པགས་ནག་རྡ་མ་འདྲེན་མར་གནས། །སེར་ལ་དཀར་ཤས་ཆེ་བ་ནི། །ཁན་ཛ་ཏེ་ཞེས་བྱ་བ་ཡིན། །གོས་ནི་སྲབ་མོས་བཀབ་པ་ལྟར། །ཁ་དོག་གཅིག་ཏུ་མི་མངོན་ཞིང༌། །འཁོར་ལིང་མང་པོ་དང་ལྡན་པའི། །རྟ་དེ་འཁོར་ལོང་ཅན་ཞེས་བྱ་།ཁ་དོག་མང་པོ་དང་ལྡན་ཞིང༌། །མདོག་གཞན་འཁོར་ལིང་གནས་པ་ཡིས། །བརྒྱན་པ་ལྟ་བུར་སྣད་བ་ནི། །རྟ་དེ་ཁྲ་བོ་ཞེས་བཤད་དོ། །རྟ་ཡི་རྐང་པ་བཞི་དང་ནི། །མགོ་དང་རྔ་མ་རྔོག་མ་དང༌། །རྐེད་པ་དཀར་པོར་སྣང་བ་ནི། རྟ་དེ་བཀྲ་ཤིས་རྒྱས་པར་བཤད། །དམར་བའམ་དཀར་བའི་འཁོར་ལིང་ངམ། །ནག་པའམ་ཁ་དོག་གཞན་དག་ལས། །ཁ་དོག་དང་ནི་རྗེས་མཐུན་པར། །དེ་ལས་མིང་དུ་གདགས་པར་བྱ། །གང་གིས་ཁ་དོག་གང་དག་ལ། །མདོག་གིས་འདྲེས་པར་གྱུར་ན་ཡང༌། །མདོག་གི་ཤས་ནི་གང་ཆེ་བ། །དེ་ཡི་མདོག་ལས་གདགས་པར་བྱ། །གང་ཞིག་མདངས་སྣུམ་བརྟན་ཞིང་གསལ། །ཁ་དོག་དེ་ནི་ཐམས་ཅད་བསྔགས། །དེ་ནས་དཀར་བ་མཆོག་ཡིན་ལ། །དེ་དང་ལྡན་པ་གཞན་ཡང་བཟང༌། །རྟ་ཡི་ཁ་དོག་ཐམས་ཅད་ལས། །ཁ་དོག་དཀར་པོ་མི་འགྱུར་ཡིན། །བརྟན་ཞིང་མི་ཟད་ཉིད་ཀྱིས་ན། །དཀར་པོ་ཉིད་ནི་ཁྱད་པར་འཕགས། །དེ་ལྟར་རྟ་ཡི་ཁ་དོག་ནི། །མདོར་བསྡུས་ནས་ནི་བསྟན་པ་ཡིན། །ཁ་དོག་དབྱེ་བ་མ་ལུས་པར། །སྨྲ་བར་ནུས་པ་མ་ཡིན་ནོ། །ཤ་ལི་ཧོ་ཏྲའི་མདོའི་གནས་ལས་ཁ་དོག་ཤེས་པར་བྱ་བའི་ལེའུ་སྟེ་བཅོ་བརྒྱད་པའོ།། །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །ཞུར་དང་དེ་བཞིན་རྒྱལ་མཚན་
དག །ཇི་ལྟར་གནས་པ་བཀའ་སྩོལ་ཅིག །དེ་ལྟར་དྲིས་ཚེ་ལེགས་ཐོས་ལ། །ཤ་ལི་ཧོ་ཏྲས་སླར་སྨྲས་པ། །མཆུ་སྒྲོས་ལྟག་ནས་དཔྲལ་མཚམས་བར། །དཀར་བའམ་ཤིན་ཏུ་དཀར་གང་ཡིན། །དེར་ནི་ཞུ་བོར་ཤེས་བྱ་སྟེ། །འདི་ཡིས་འབྲས་བུ་རྣམ་པ་བཞི་ཡིན། །གནས་དང་དབྱིབས་དང་ཁ་དོག་དང༌། །རང་བཞིན་ལས་ཤིས་མི་ཤིས་འགྱུར། །ཁུར་བ་དེ་ཡི་འབྲས་བུ་ནི། །རིམ་པ་བཞིན་དུ་བཤད་པར་བྱ། །མཆུ་ལྟག་དཔྲལ་བ་སྣ་གདོང་དང༌། །གཞན་ཡང་མཆུ་ལྟག་གདོང་པ་དང༌། །མཆུ་ལྟག་ཕུམ་ཕུམ་མཐར་ཐུག་དེ། །རྟ་ཡི་གདོང་པ་ཀུན་དཀར་བ། །རིགས་ཀྱི་དབང་ཕྱུག་འཕེལ་བྱེད་ཡིན། །མགོ་བོ་རྣ་བར་བཅས་དཀར་བ། །བདག་པོ་བདེ་བ་ཀུན་སྐྱེད་དེ། །གནས་གཉིས་ན་ནི་གནས་པའི་འབྲས། །མེ་ལོང་ལྕགས་ཀྱུ་བུམ་པ་དང༌། །གདུགས་དང་རྔ་ཡབ་འདྲ་བ་དང༌། །དཔལ་ཤིང་རིམ་གྱིས་འཕེལ་འདྲ་དང༌། །བུམ་པ་གཡུང་དྲུང་དབྱིབས་འདྲ་བའི། །ཞུར་ནི་གང་གི་རྟ་ལ་ཡོད། །བུ་ཚ་བྲན་དང་མཛའ་བོ་འཕེལ། །རྒྱལ་པོས་ལེགས་པར་བཀུར་གྱུར་ལ། །རྟ་ཡང་བདེ་བར་འཚོ་བར་འགྱུར། །ཞུར་ནི་བྱང་ཆུབ་ཤིང་ལོ་འདྲ། །དེ་ཡིས་སྐལ་བ་བཟང་འགྱུར་ཞིང༌། །བུ་ནི་མང་པོ་ཡོད་པར་འགྱུར། །ཟུར་བཞི་ཡོད་ན་རྒྱལ་པོས་ནི། །ཡུལ་ཁམས་རྙེད་པར་སྟོན་པ་ཡིན། །རལ་གྲི་འཁོར་ལོ་རྡོ་རྗེ་གཞུ། །གཤོལ་དང་གཏུན་ཤིང་དབྱིག་པ་དང༌། །རྒྱལ་མཚན་བ་དན་གདུགས་འདྲ་བ། །ཞུར་ལ་དབྱིབས་ཡོད་རྒྱལ་པོ་ཡིས། །ཞོན་ན་གཡུལ་ལས་རྒྱལ་བྱེད་ཡིན། །རྟ་དེ་བཞོན་ནས་རྒྱལ་པོ་ཡིས། །དགྲ་རྣམས་ཐུལ་བར་འགྱུར་བ་ཡིན། །ཆུང་མ་བུ་དང་ཚ་བོ་དང༌། །ནོར་ཡང་ཤིན་ཏུ་མང་བར་འགྱུར། །དགང་གཟར་བླུགས་གཟར་མཆོད་སྡོང་མེ། །ཁ་ཁྱེར་གྱི་ནི་དབྱིབས་འདྲ་བའི། །ཞུར་ཡོད་བདག་པོས་འབྲས་ཆེན་ཐོབ། །མཆོད་སྦྱིན་མང་དུ་བྱེད་པ་དང༌། །སྦྱིན་པ་མང་དུ་འགྱེད་པར་འགྱུར། །གང་གི་ཞུར་ནི་བུམ་པ་འདྲ། །མེ་ཏོག་མགོ་ལྕོགས་དབྱིབས་འདྲ་བ། །རྟ་བདག་གཏེར་ནི་བརྒྱ་བྱིན་ཐོབ། །
མེ་ཏོག་པདྨའི་དབྱིབས་འདྲ་བའི། །མིག་མངས་རིས་ཀྱི་དབྱིབས་ཡོད་པ། །གང་གི་རྟ་ལ་ཡོད་གྱུར་པ། །བདག་པོ་བཀུར་སྟི་ནོར་མང་དགེ །ཤིང་རྟའི་དབྱིབས་འདྲའི་ཞུར་ཡོད་པའི། །རྟ་ནི་ནོར་རྣམས་འཕེལ་བྱེད་ཡིན། །སྟེང་ཆ་ཁ་ཞེང་ཆེ་བའི་ཞུར། །ནོར་དང་འབྲུ་དང་ཕྲད་བྱེད་དོ། །དེ་ཡི་བདག་པོས་དཔལ་ཐོབ་ཅིང༌། །བུ་དང་ཚ་བོ་རྣམ་པར་འཕེལ། །དེ་ཡི་ཁྱིམ་དུ་དཔལ་རྟག་གནས། །རྒྱལ་སྲིད་ཀྱང་ནི་ཐོབ་པར་འགྱུར། །རྟ་དེ་ཅི་འདོད་མ་སྨས་པར། །བདེ་བར་འཆི་བ་ཉིད་དུ་འགྱུར། །མི་ཤིས་པ་ཡི་མཚན་རྟགས་ནི། །རྟའི་ཞུར་ཁ་དོག་འདྲེས་པ་དང༌། །གཡོན་ངོགས་འགྲམ་གླང་བར་དུ་ཆགས། །གཡོན་པའི་མིག་དཀྱུས་དཔྲལ་བའི་ངོས་དང་བཅས། །ཁྱད་པར་སྐྱེས་པའི་རྟ་དེ་ནི། །དཔྲལ་ཆགས་ཞེས་ཏེ་དང་ཚུལ་ངན། །རྒྱུན་དུ་དང་ང་ཞིང་འཐབ་རྩོད་དགའ་བར་འགྱུར། །མུར་འགྲམ་དག་ཏུ་ཆགས་པའི་རྟ་ཡང་སྨད། །གདོང་བར་དབྱིག་འདྲའི་ཞུར་ཆགས་དང༌། །གཡོན་ངོས་ཆེ་ཞིང་ཅུང་ཟད་དང༌། །དབུས་ན་ལྕགས་སྒྲོག་འདྲ་ཡོད་པ། །རྟ་དེ་བདེ་བར་མི་འགྱུར་རོ། །དེ་ཡི་བདག་པོ་ཐག་པའམ། །ལྕགས་སྒྲོག་གིས་ནི་བཅིང་བར་འགྱུར། །མཚན་ཉིད་དེ་འདྲས་མི་འགོར་བར། །དེ་ནི་དགྲ་བོའི་དབང་དུ་འགྱུར། །འཕྲེད་དུ་ཞེང་དུ་ཆེ་བའི་ཞུར། །ནོར་བརླག་པར་ནི་སྟོན་པ་ཡིན། །ནག་ནོག་ཅན་གྱི་ཞུར་ཡོད་པ། །བདག་པོའི་ནོར་ཉི་ཉམས་པར་བྱེད། །ཞུར་བ་ཡོ་དང་སྤུབ་པ་དང༌། །ཆད་པའི་ཞུར་ཡང་སྡུག་བསྔལ་སྐྱེད། །སྤང་ལེབ་འདྲ་དང་འདྲེས་པ་ཡི། །ཞུར་ཡོད་རྟ་ཡང་དེ་དང་འདྲ། །ཁ་དོག་དཀར་ལ་མདོག་གཞན་གྱི། །ཞུར་ཡོད་པ་ནི་སྨད་པ་ཡིན། །ནག་པོས་བདག་པོ་མི་བཟད་དུག །རེག་པའང་བརླག་པར་བྱེད་པ་ཡིན། །གང་ཞིག་གློག་གི་དབྱིབས་འདྲ་དང༌། །མདུང་ཐུང་གི་ནི་དབྱིབས་འདྲ་བའོ། །དེ་བཞིན་མི་སྣང་གཞན་དག་དང༌། །སྲབ་ཅིང་གསལ་བར་མི་མངོན་པ། །དེས་ནི་ནོར་རྣམས་བརླག་པ་དང༌། །འཆི་བ་ཉིད་དུ་འགྱུར་བའོ། །མདོངས་ཀྱི་མཚན་ཉིད་གང་ཡིན་པ། །དེ་དག་བཤད་དོ་ཉན་པར་གྱིས། །ཟླ་བའམ་སྐར་མ་འདྲ་བ་ཡི། །
མདོངས་ཡོད་བདག་པོ་རྒྱལ་སྲིད་ཐོབ། །བུ་དང་ཚ་བོ་འཕེལ་བར་འགྱུར། །གང་གི་དགའ་བ་འཁྱིལ་འདྲ་བའི། །རུས་སྦལ་པདྨའི་དབྱིབས་འདྲ་ཡི། །མདོངས་ཡོད་བདག་པོ་ནོར་མང་རྙེད། །གང་ཞིག་རྒྱལ་མཚན་སོགས་དབྱིབས་འདྲ། །མདོངས་ཡོད་བདག་པོའི་ནོར་བརྒྱན་འཕེལ། །བུ་དང་ཚ་བོ་འཕེལ་བར་བྱེད། །ནས་འབྲས་འདྲ་ཡོད་ཐ་སྙད་མཁས། །གདུ་བུ་འདྲ་ཡོད་ཟས་རྙེད་འགྱུར། །བ་གླང་ར་དང་བྱ་དང་སྦྲུལ། །རྔ་མོ་ཡི་ནི་དབྱིབས་འདྲ་བ། །མདོངས་དེ་ཤིས་པ་སྐལ་བ་བཟང༌། །མི་ཤིས་པ་ཡང་བཤད་པར་བྱ། །དཔྲལ་བར་བྱ་རོག་རྗེས་འདྲ་དང༌། །བ་གླང་ལྕི་བའི་འབུ་འདྲ་དང༌། །གཡོན་འདུག་པའམ་འོག་ན་འདུག །གང་ཞིག་ཐུར་དུ་བལྟས་པ་ཡོད། །དེ་ཡི་བདག་པོ་སྡུག་བསྔལ་ཞིང༌། །རྟ་དང་ལྷན་ཅིག་ཉམ་ང་ཐོབ། །ཆད་དང་ཁ་དོག་མི་སྡུག་དང༌། །མི་གསལ་བ་དང་སྲབ་པ་དང༌། །འདྲེས་དང་པགས་པ་ལྟ་བུ་དང༌། །གང་ཞིག་དབྱིབས་ནི་མི་སྡུག་དང༌། །ཁ་དོག་གཞན་ལ་གཞན་པ་དང༌། །རྩུབ་དང་བཙོག་པ་ཅན་རྣམས་ཀྱི། །མདོངས་དེས་ནོར་རྣམས་ངེས་པར་འཇིག །རྒྱན་མཚན་ལ་སོགས་མཚན་མ་ཉོན། །མགོ་དང་རྣ་བ་མིག་རྔོག་མཐའ། །རྔ་མ་རྐང་པ་ལྟོ་དང་རྒྱབ། །ཁ་དོག་སྟེང་དུ་མདོག་གཞན་གྱི། །མཚན་མ་ཡོད་པར་གྱུར་བའི་རྟ། །ཞོན་ན་གཡུལ་ལས་ཕམ་པར་འགྱུར། །དེ་བཞིན་སྐྲ་མཚམས་གདོང་དང་ཙེག །ཟེའུ་དང་ཟེའུ་མཐའ་ཨན་ཏོང་དང༌། །སྨིན་མ་དང་ནི་སྣ་རྩེ་གཉིས། །མཆུ་ལྟག་ཕོ་མཚན་རྔ་མ་དང༌། །མདོག་སྟེང་ཁ་དོག་བྱུང་གྱུར་པ། །རྟ་དེ་རྒྱལ་མཚན་ཅན་ཞེས་བྱ། །རྒྱལ་མཚན་ཅན་དེ་ཞོན་ནས་ནི། །རྒྱལ་པོ་གཡུལ་འཇུག་དཔུང་ཉམས་འགྱུར། །ཤ་ལི་ཧོ་ཏྲའི་མདོའི་གནས་ལས་ཞུར་མདོངས་བརྟག་པའི་ལེའུ་སྟེ་བཅུ་དགུ་པའོ།། །།ཤ་ལི་ཧོ་ཏྲ་ཐུབ་ཆེན་ལ། །རྒྱལ་པོ་ནེ་ཤ་ཏྲས་དྲིས་པ། །རྟ་ལ་ཁ་དོག་དུ་མ་ཡི། །ཐིག་ལེ་རྣམས་ནི་མཐོང་ལགས་ན། །དགེ་དང་མི་དགེ་ཞུ་འཚལ་ལོ། །དྲང་སྲོང་གིས་ནི་སླར་སྨྲས་པ། །གང་ཞིག་ཐིག་ལེའི་མདོག་མི་གསལ། །
ལུས་ལ་སྐྱེས་པར་གྱུར་པ་ནི། །ཕྲ་ཞིང་མི་གསལ་བ་ཡི་གཟུགས། །དེ་ལ་ཐིག་ལེ་ཞེས་བྱའོ། །ཁ་དོག་འདྲ་བའི་ཐིག་ལེ་ནི། །འཇམ་པ་ཉིད་ཀྱི་མངོན་གྱུར་ཅིང༌། །སྦུབས་དང་རྩུབ་དང་གསལ་བ་དང༌། །སྤུ་འདུས་གྱུར་པ་ལས་ཀྱང་སྔོན། །ཇི་ལྟར་མིག་འབྲས་ནག་པོའི་དབུས། །མིག་གི་རྒྱལ་མོ་སྣང་བ་ལྟར། །ལོགས་ཤིག་གྱུར་པ་མེད་གྱུར་ཅིང༌། །མདོག་མཐུན་ན་ཡང་མངོན་པ་ཡིན། །མདོག་ནི་ཕན་ཚུན་འདྲེས་པ་ལས། །ཐིག་ལེ་གཞན་ཡང་འབྱུང་བར་འགྱུར། །ཇི་ལྟར་ཤིང་ལ་མེ་ཏོག་ལྟར། །དེ་ནི་གནས་དབྱིབས་ཁ་དོག་ལས། །ཤིས་པ་དང་ནི་མི་ཤིས་སྐྱེད། །མདུན་སོ་ཡ་མཆུ་མ་མཆུ་ལ། །སྣུམ་ཞིང་དཀར་བའི་ཁ་དོག་སྣང༌། །རྨིག་པ་རྣམས་ལའང་དེ་འདྲར་ཆགས། །མཁས་པས་དེས་ནི་ཞག་བདུན་ན། །ནོར་ཐོབ་ལྟས་སུ་ཤེས་པར་བྱ། །ཆེ་ཆུང་ལས་ཀྱི་ཟླ་ཕྱེད་ནི། །བདུན་ནམ་ཟླ་བ་བདུན་གྱིས་ཐོབ། །མཆུ་སྒྲོས་ལས་ནི་ཐིག་ལེ་ཆགས། །སས་དང་སྐོམ་ནི་རྙེད་པར་བཤད། །ཁ་འགྲམ་གོ་སྐོར་བྱུང་ན་ནི། །དེ་ཡིས་ཟས་དང་སྐོམ་རྙེད་ཅིང༌། །བདག་པོ་བདེ་དང་ལོངས་སྤྱོད་ཐོབ། །འདི་ཡིས་ཁྱིམ་ནི་འཕེལ་འགྱུར་ཞིང༌། །གཏེར་ཐོབ་པར་ཡང་སྣང་བ་ཡིན། །ཤིས་པ་བཤད་ཟིན་འདྲེས་མ་ཉོན། །སྣ་རུ་བྱུང་ན་མཚོན་གྱིས་འཆི། །མཁུར་བར་བྱུང་ན་བུ་ངེས་འཆི། །དཔྲལ་བར་བྱུང་ན་ནོར་ཐོབ་འགྱུར། །དཔྲལ་མཚམས་ཀྱིས་ནི་རྒྱལ་སྲིད་འགྱུར། །ལྐོག་མར་བྱུང་ན་ཟས་སྐོམ་རྙེད། །མུར་འགྲམ་དག་ཏུ་བྱུང་ན་ཕུང༌། །འཆིས་སྲན་བྱུང་ན་ཉེར་འཚེ་བྱེད། །མུར་འགྲམ་ཟ་ཡུར་བྱུང་དེ་འདྲ། །རྣ་བ་གཡོན་པའི་གཡས་ལས་འཕོ། །གཡས་སུ་བྱུང་ན་མཛའ་བོ་འཕེལ། །སྐེ་མཇིང་ལྟག་པ་ཟེ་མཆེན་དུ། །བྱུང་ན་མཚོན་གྱི་འཐབ་མོ་འོང༌། །ལྐོག་མར་བྱུང་ན་རྟ་བདག་གིས། །ཆུང་མ་དང་ནི་བུ་རྙེད་འགྱུར། །ཕྲག་སོར་བྱུང་ན་བུ་རྙེད་དོ། །རྩིབ་ལོགས་བྱུང་ན་རང་ཕྱོགས་འཕེལ། །པུས་མོར་བྱུང་ན་གནོད་པ་སྐྱེད། །དཔུང་པར་བྱུང་ན་མཛའ་དང་ཕྲད། །གཡོན་ལོགས་ཀྱིས་ནི་སྐྲོད་པར་བྱེད། །ལུས་ཀྱི་སྟོད་སྨད་དུ་བྱུང་
ན། །བདག་པོ་ཕྲོག་པར་སྟོན་པ་ཡིན། །མཆན་ཁུང་དཀུ་ཡི་གནས་སུ་བྱུང༌། །ལྟོགས་འགྱུར་མ་མཆུར་བྱུང་ན་འཆི། །ཡ་མཆུར་བྱུང་ན་མི་འཆི་ལ། །མིག་ཏུ་བྱུང་ན་གོས་ཟས་ཐོབ། །ཟེ་བ་ལྟག་དང་ཟེའུ་དང༌། །དཔྱི་མགུལ་བརླ་ནི་ཕྲ་མོ་དང༌། །རྗེ་ངར་དང་ནི་དེ་མཚམས་སུ། །བྱུང་ན་འདིར་ནི་སྨད་པར་བཤད། །སྐེ་རྩར་བྱུང་ན་ནོར་ཐོབ་ཅིང༌། །རྔོག་ལྟག་གིས་ནི་རྒྱལ་སྲིད་སྐྱེད། །རྒྱུ་མཚམས་ཐིག་ལེ་ནོར་རྙེད་ལ། །སྙིང་གར་བྱུང་ན་གཅོད་ཅན་འགྱུར། །རྩིབ་ལོགས་གཡས་བྱུང་བུད་མེད་རྙེད། །མཇུག་དོར་བྱུང་ན་ནོར་ཟད་འགྱུར། །རྒྱུར་བྱུང་ན་ནི་སྐལ་བ་བཟང༌། །རྒྱབ་ཏུ་བྱུང་ན་གནས་རྣམས་འཕེལ། །ལྟོར་བྱུང་རྟོགས་པའི་འཇིགས་པ་སྟེ། །རླིག་པར་བྱུང་ན་སྐལ་བཟང་རྙེད། །ལྟེ་བའི་རྩ་ལས་དམག་དཔོན་འགྱུར། །ཨོང་དོར་བྱུང་ན་ཆུང་མ་འཕྱོ། །རྐུབ་དང་རྔ་མའི་རྩ་བར་བྱུང༌། །ནོར་རྣམས་ཐམས་ཅད་བརླག་པར་འགྱུར། །པུས་མོར་བྱུང་ན་འཆི་བ་སྐྱེད། །ལྐོག་མ་ཚེའུ་པུས་ལམ་འགྲོ་སྟོན། །རྨང་ཁའི་ཐིག་ལེས་བུ་སྐྱེ་སྟོན། །སྤྱི་ལ་བུད་མེད་ཉེས་པ་སྐྱེད། །ཚེའུ་ཚེར་བྱུང་ན་གནོད་པ་སྐྱེད། །གང་ཞིག་བརྟན་པའི་གནས་སུ་བྱུང། །འདོད་པ་ཐམས་ཅད་སྐྱེད་བྱེད་དོ། །ཡན་ལག་ལ་བྱུང་དོན་ཀུན་འགྲུབ། །མཛའ་བོ་འཕེལ་ཞིང་དཔལ་སྐྱེད་ལ། །རིགས་དང་གྲགས་པ་འཕེལ་བར་བྱེད། །མདོག་དང་རྗེས་མཐུན་མདོག་བྱུང་ཤིས། །མདོག་གཞན་ཤིས་པ་མ་ཡིན་ནོ། །སེར་པོ་བྱུང་ན་གཡུལ་དུ་འཇུག །དཀར་པོ་ལ་ཡང་དེ་དང་འདྲ། །ནག་པོ་འཐབ་མོ་སྐྱེད་པར་བྱེད། །ནག་པོ་བྱུང་ན་གཡུལ་དུ་འཆི། །སྡུག་དང་མི་སྡུག་པ་དག་གིས། །བདག་པོ་ལ་ནི་འཇིགས་ཆེན་འབྱུང༌། །ཐིག་ལེའི་སྟེང་དུ་ཐིག་ལེ་བྱུང༌། །དེ་ཡང་རྗེས་མཐུན་མདོག་ཏུ་མིན། །དེས་ནི་རྒྱལ་པོ་བརླག་པ་དང༌། །ཡུལ་འཁོར་དག་ཀྱང་འཁྲུག་པར་སྟོན། །གང་ཚེ་རྟ་ནི་དཀར་པོ་ལ། །ཐིག་ལེ་དཀར་པོ་རྣམས་གྱུར་ན། །དེ་ཡི་བདག་པོ་རྟག་ཏུ་བདེ། །བུ་དང་ཚ་བོ་རྣམ་པར་འཕེལ། །གང་ཞིག་རྟ་ནི་དམར་པོ་ལ། །ཐིག་ལེ་དམར་པོ་སྣང་གྱུར་ན། །
བདག་པོས་མི་བཟད་དགྲ་འདུལ་ཞིང༌། །ལོངས་སྤྱོད་ཆེན་པོའང་ཡུན་རིང་འགྱུར། །ནད་ཀྱིས་ཐེབས་ཀྱང་མྱུར་དུ་འཚོ། །གང་ཚེ་རྟ་ནི་སེར་པོ་ལ། །ཐིག་ལེ་སེར་པོ་སྣང་གྱུར་ན། །བདག་པོ་རིགས་བཙུན་ནོར་མང་འཕེལ། །གང་ཚེ་རྟ་ནི་ནག་པོ་ལ། །ཐིག་ལེ་ནག་པོ་སྣང་གྱུར་ན། །དེ་ཡི་བདག་པོ་མི་བཟད་པའི། །ནད་ཀྱིས་བཏབ་ཅིང་མྱུར་དུ་འཆི། །གང་ཚེ་རྟ་ནི་དཀར་པོ་ལ། །ཐིག་ལེ་དམར་པོ་སྣང་གྱུར་ན། །བདག་པོ་མྱུར་དུ་དགྲ་ཡིས་གསོད། །ཐིག་ལེ་ནག་པོ་བྱུང་བ་ན། །བདག་པོ་མྱུར་དུ་འཆི་འམ་འཆི། །རྟ་དམར་པོ་ལ་ཐིག་ལེ་སེར། །མི་སྣང་དགྲ་བོ་བདག་པོ་གསོད། །རྟ་དམར་ཐིག་ལེ་ནག་པོ་སྣང༌། །དེ་ཡི་བདག་པོ་གྲགས་མིན་པའི། །ལས་ཀྱིས་གསོད་པར་འགྱུར་བ་ཡིན། །རྟ་ནག་ཐིག་ལེ་དཀར་པོ་སྣང༌། །བདག་པོ་གྲགས་ཐོབ་གཡུལ་ལས་རྒྱལ། །ནག་པོ་དམར་པོའི་ཐིག་ལེ་སྣང། །བདག་པོ་གཡུལ་དུ་སྙན་གྲགས་ཐོབ། །དཀར་ལ་ཤིན་ཏུ་དཀར་བ་དང༌། །སྣུམ་ཞིང་མཉམ་པའི་ཐིག་ལེ་སྣང༌། །དེ་ཡི་བདག་པོ་རྒྱལ་སྲིད་ཐོབ། །དེ་ནི་རྒྱལ་པོར་འགྱུར་བ་ཡིན། །བུ་དང་ཚ་བོ་རྣམ་པར་འཕེལ། །རྒྱལ་པོ་དང་ནི་ཡུལ་འཁོར་ཤིས། །དཔུང་དང་མཛོད་ཀྱང་འཕེལ་བར་འགྱུར། །ཐིག་ལེ་ཤེས་པའི་གཟུགས་ལྡན་ཞིང༌། །རྗེས་སུ་མཐུན་པའི་མདོག་ཅན་ལ། །སྣུམ་ཞིང་མདོག་ནི་སྡུག་པ་དང༌། །གནས་ལས་མདུན་དུ་བལྟ་བ་དང༌། །དེ་ནིར་རྣམས་རྙེད་པར་འགྱུར། །གོ་བཟློག་པ་ནི་སྨད་པ་ཡིན། །ཐིག་ལེ་ནས་འབྲས་འདྲ་བ་ནི། །བདག་པོ་བུད་དང་ཕྲད་པར་འགྱུར། །ཁ་དོག་སྣ་ཚོགས་མར་ཤས་ཆེ། །ནོར་རྙེད་པར་ནི་སྟོན་པ་ཡིན་།མདོག་མི་སྡུག་ཅིང་འཐོར་བ་དང༌། །རྩུབ་ཅིང་ཆ་ནི་མི་མཉམ་དང༌། །དབྱིབས་ངན་པ་དང་ཕྲ་བ་དང༌། །དེ་བཞིན་རྒྱབ་ཏུ་བལྟ་བ་དང༌། །མི་མཐུན་གནས་དང་མཚོན་ཆོགས་དང༌། །མདོག་ལས་མདོག་གཞན་གྱུར་པ་རྣམས། །དེས་ནི་ཡུལ་འཁོར་འཇོག་བྱེད་ཡིན། །རྒྱལ་སྲིད་ཉམས་པར་བྱེད་པ་ཡིན། །རྒྱལ་པོ་ཡི་ནི་དཔུང་རྣམས་དང༌། །མཛོད་དང་བུ་ནི་འཇོམས་པ་ཡིན། །ཐིག་ལེ་ཤིས་པའི་གནས་བྱུང་ཡང༌། །
གང་ཞིག་མཚམས་སུ་སྐྱེས་པ་དང༌། །སྣུམ་མདངས་ཆུད་བར་གྱུར་པ་རྣམས། །སྨད་པ་ཡིན་ཞེས་རྣམ་པར་བསྟན། །སྣུམ་ཞིང་མཛེས་པར་གྱུར་པ་ནི། །ཤིས་པ་ཐོབ་པ་ཁོ་ནར་བསྟན། །དེ་ལྟར་གནས་དང་གནས་མིན་པར། །སྐྱེས་པའི་མཚན་མ་ཀུན་བསྟན་ནས། །འདིར་ནི་ཁ་དོག་ཀུན་འབྲས་བུ། །འདི་ནི་རྩེ་གཅིག་ཡིད་ཀྱིས་ཟུང༌། །ཇི་ལྟར་གནས་ནི་རྣམ་པ་བཅུར། །མཚན་ཉིད་སོ་སོར་རྣམ་པར་དབྱེ། །དེ་བཞིན་ཐིག་ལེ་འབྲས་བུ་ཡང༌། །ལྟས་སུ་གྱུར་པར་ཤེས་པར་བྱ། །དེ་བས་གནས་དང་ལྟས་རྣམས་ནི། །མཚན་མ་དག་ཀྱང་གཟུང་བར་བྱ། །དེ་ལྟར་ཐིག་ལེ་མ་ལུས་པའི། །མཚན་ཉིད་ཇི་བཞིན་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་ཐིག་ལེ་བཟང་ངན་བརྟག་པའི་ལེའུ་སྟེ་ཉི་ཤུ་བའོ།། །།ཤ་ལི་ཧོ་ཏྲ་བདེར་གནས་ལ། །ལེགས་ཐོས་ཀྱིས་ནི་ཡང་དྲིས་པ། ཤ་ར་ཞེས་བྱའི་ཁྱད་པར་ཟློག །དཀའ་ཐུབ་ཆེན་པོས་དེ་གསུངས་ཤིག །དཀར་ལ་མདོག་གཞན་དང་འདྲེས་པ། །ཤ་ར་ཞེས་ནི་བྱ་བར་བཤད། །གང་ཞིག་ཁོ་ན་གཞན་གྱིས་ནི། །ཁ་དོག་དཀར་བ་ཟིལ་མནན་ན། །གནས་དང་གྲགས་པ་གཞན་དག་གིས། །དེ་ཡི་བདག་པོ་ཟིལ་མནན་འགྱུར། །འདི་ཡང་གནས་དང་དབྱིབས་དག་ནི། །གཞན་ལས་འབྲས་བུ་གཞན་དུ་འགྱུར། །ར་བ་མདའ་ཡབ་འདྲ་བ་དང༌། །ཁང་བའི་ཕྱི་སྒོ་ལྟ་བུ་ཡི། །རྟ་ལ་ཤ་ར་ཡོད་ན་ནི། །བདག་པོ་ས་ལ་དབང་བྱེད་འགྱུར། །གདེངས་ཀ་སྦྲུལ་འཁྱིལ་ཤིང་འདྲ་དང༌། །ཁྱུ་མཆོག་རུས་སྦལ་ཆུ་སྲིན་འདྲ། །ཤ་ར་རྟ་ལ་ཡོད་ན་ནི། །བདག་པོ་ཤིན་ཏུ་ཕྱུག་པར་འགྱུར། །ཁ་བཟང་རི་ཡི་རྩེ་མོ་འདྲ། །རི་མོ་གསལ་པོ་ཡོད་པའི་རྟ། །བདག་པོ་དབང་ཕྱུག་ལྡན་པ་དང༌། །རང་དང་གཞན་ཉིད་བཀུར་བར་འགྱུར། །ཆག་པའི་ཤིང་དང་སྐྲ་འདྲ་ཡོད། །བདག་པོ་ལ་ཕན་ཟད་པར་འགྱུར། །རྔ་རྩེ་དག་ཏུ་བྱུང་ན་ནི། །བདག་པོའི་འཆིང་བ་འཕེལ་བར་འགྱུར། །གང་ཞིག་ལྟེ་བ་ནས་བཟུང་ནས། །རོ་སྟོད་ཉི་མ་ཤར་ཁ་འདྲ། །དེ་བཞིན་རོ་སྨད་ཆ་དང་ནི། །ཟླ་བ་ཡི་ནི་མདོག་འདྲ་བ། །མདངས་དང་
མདོག་ནི་ཕུན་ཚོགས་པ། །ཉིན་མོ་གཡུལ་ལས་རྒྱལ་བྱེད་ཡིན། །དེ་ལས་གོ་བཟློག་གྱུར་པ་དང༌། །མཚན་མོ་གཡུལ་ལས་རྒྱལ་བྱེད་ཡིན། །གང་གི་ལྟེ་བ་ནས་བཟུང་ནས། །རོ་སྟོད་མདངས་སྣུམ་དཀར་བ་ལ། །རོ་སྟོད་མདངས་སྣུམ་ནག་པོ་ནི། །དེ་ཡང་ཉིན་མོ་རྒྱལ་བྱེད་ཡིན། །དེ་ལས་གོ་བཟློག་གྱུར་ཏེ་ཡང༌། །མཚན་མོ་རྒྱལ་བར་བྱེད་པ་ཡིན། །ཆ་ནི་འདི་དག་ཉིད་ཀྱིས་ནི། །གཡས་དང་གཡོན་དུ་འོད་གཞན་བྱུང༌། །ཉིན་མོ་འམ་ནི་མཚན་མོ་དག །འཐབ་པའི་ཚེ་ན་རྒྱལ་བྱེད་ཡིན། །གཡས་ཕྱོགས་ཀྱི་ནི་ཁ་དོག་དང༌། །རོ་སྟོད་ཀྱི་ནི་མདོག་འདྲ་ཞིང༌། །མདངས་སྣུམ་ཤིས་པའི་གཟུགས་ཅན་ནི། །རྟ་དེ་བསྔགས་པར་གྱུར་པ་ཡིན། །བྲམ་ཟེའམ་ནི་རྒྱལ་རིགས་ལས། །གཞན་གྱིས་དེ་ཐོབ་མི་རིགས་སོ། །དེས་ནི་དགྲ་ཀུན་ཟད་བྱེད་ཡིན། །ཆོས་དང་འདོད་པའང་སྟེར་བྱེད་ཡིན། །གང་གི་རོ་སྟོད་མདོག་ནག་ཅིང༌། །རོ་སྨད་མདངས་སྣུམ་དཀར་པ་ནི། །དགྲ་འཇོམས་མཛའ་བོ་འཕེལ་བྱེད་དེ། །དེ་ཡང་གཡུལ་ལས་རྒྱལ་བྱེད་ཡིན། །རོ་སྟོད་དུང་ལྟར་དཀར་བ་ལ། །རོ་སྨད་མདོག་ཞན་ལྡན་པ་ཡིན། །དེ་ལ་མཛའ་སྐྱེས་ཞེས་བྱ་སྟེ། །རིགས་འཕེལ་ཉིན་མོ་ཤིས་པ་ཡིན། །པར་ལ་ལྟར་མཆུ་དམར་ཞིང༌། །ཁ་དང་ལྕེའུ་ཆུང་དམར་གྱུར་པ། །ཁྱིམ་དུའང་ཤིས་པར་འགྱུར་བ་དང༌། །ལམ་དུའང་ཕན་པ་སྐྱེད་བྱེད་ཡིན། །གཞན་ཡང་དེ་དང་འདྲ་བའི་རྟ། །མདོག་ལ་སྤུ་ནི་སྲབ་བ་དང༌། །མདངས་སྣུམ་ཤིས་པའི་གཟུགས་ཅན་ནི། །རྟ་མཆོག་དེ་ནི་བསྔགས་པ་ཡིན། །གནག་དང་དམར་དང་སེར་པོ་ལ། །ཟླུམ་རིས་དཀར་པོས་བརྒྱན་པའམ། །དཀར་ལ་མདོག་གཞན་གྱིས་བརྒྱན་པའི། །རྟ་ནི་དཔལ་སྐྱེད་བྱེད་པ་ཡིན། །ཤ་ལི་ཧོ་ཏྲའི་མདོའི་གནས་ལས་ཤ་རའི་མདོག་གི་ཁྱད་པར་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ།། །།ལྷ་དང་དྲང་སྲོང་གྲུབ་པའི་ཕ། །གཙང་མའི་བདག་ཉིད་དབང་པོ་ཐུལ། །རྟ་ཡི་ཚེ་ཡི་རིག་བྱེད་མཁས། །རྟ་བྲེས་ནས་ནི་གནས་པ་ལ། །ཀ་ར་ཡ་ནས་རྐང་པ་ལ། །ལེགས་པར་བཟུང་ནས་ཚིག་འདྲི་དྲིས། །རྟ་ཡི་ཤིས་དང་མི་
ཤིས་པའི། །མཚན་ཉིད་ཐམས་ཅད་ཤེས་བྱ་བ། །སོ་སོར་རྒྱས་པ་དག་ཏུ་ནི། །ལེགས་ལྡན་གྱི་སྙི་སྔར་བཤད་ན། །འདི་དག་ཐམས་ཅད་མ་ལུས་པ། །བསྲེས་པ་དག་ཀྱང་རྟོགས་པར་འཚལ། །ཤ་ལི་ཧོ་ཏྲས་སླར་སྨྲས་པ། །མཚན་ཉིད་ཐམས་ཅད་ཕུན་སུམ་ཚོགས། །བསྲེས་པའི་མཚན་ཉིད་ཉན་པར་གྱིས། །ནག་པོ་སྣུམ་མདངས་ལྡན་པ་ལ། །ཁ་དང་རྐན་པ་རྔོག་མ་ལ། །དེ་བཞིན་མིག་དང་བྲང་རྣམས་ནི། །གང་ཞིག་དཀར་པོར་གྱུར་པ་དག །རྟ་དེ་ཞོ་ན་ན་རྒྱལ་པོ་ནི། །མ་ལུས་པ་ལས་རྒྱལ་བར་འགྱུར། །གང་ཞིག་རྨིག་པ་སྤུ་ཡིས་ནི། །ཀུན་ནས་ཁེབས་པར་སྣང་གྱུར་པ། །རྟ་དེ་གཡོགས་པ་ཞེས་བྱ་སྟེ། །བདག་པོ་ཕུན་ཚོགས་འཕེལ་བྱེད་ཡིན། །ཡལ་ལག་ཉིད་ལག་ལ་བསྟེན་ནས། །གང་གི་མདངས་ནི་ཤིས་པ་ཡོད། །མཐོང་ན་མིག་ནི་དགའ་བྱེད་ཅིང། །ཡིད་ཀྱང་མགུ་བར་བྱེད་པ་ཡིན། །རྟ་ནི་ཁ་དོག་གཅིག་གྱུར་བའི། །ལུས་དང་ལྡན་པ་དེ་ཡི་བདག །འཇིག་རྟེན་དུ་ནི་འགྲོ་ཀུན་ལ། །སྲོག་འདྲ་བར་ནི་སྡུག་པར་འགྱུར། །འཛམ་བུ་སྨིན་པ་ལྟ་བུར་སྣང༌། །གནག་པ་ལེགས་པར་བྲིས་པ་འདྲ། །རྟ་དེ་རྒྱལ་པོས་ཞོན་པ་ནི། །མི་དབང་བ་ཡང་དབང་དུ་འགྱུར། །ཤིན་ཏུ་དམར་ཞིང་རབ་སྣུམ་པའི། །རྟ་ནི་གང་ཞིག་འཆང་བྱེད་པ། །དེ་ནི་དོན་ཀུན་ཕུན་སུམ་ཚོགས། །གཡུལ་ངོ་དག་ཏུ་རྒྱལ་བར་འགྱུར། །ཀུན་ནག་བྱ་རོག་འདྲ་བ་འམ། །ཅེ་སྤྱང་སྤྱང་ཁུའི་མདོག་འདྲ་བའི། །གང་ཡང་གྲ་མའི་མདོག་འདྲ་བ། །དེ་ནི་གཡུལ་དུ་རྒྱལ་བྱེད་ཡིན། །རྒྱལ་གཞུང་བོང་བུ་འདྲ་བ་ཡི། །མདོག་གཞན་གྱི་ནི་རི་མོ་ཅན། །དེ་ནི་གཞུང་ཐིག་ཡིན་ཞེས་བྱ། །རྟ་དེ་ནོར་ནི་འཇིག་བྱེད་ཡིན། །གང་ཞིག་ལུས་མདོག་རི་དགས་འདྲ། །རྨིག་པ་སོར་མོ་འདྲ་བར་སྐྱེ། །བྱི་བའི་སྡེར་མོ་ཞེས་བཤད་དོ། །རྟ་དེ་མཛད་དང་འབྲལ་བྱེད་ཡིན། །གཞུང་ཐིག་ཅན་དང་མིག་མི་སྡུག །དེ་བཞིན་བྱི་བའི་སྡེར་མོ་ཅན། །མདོག་མི་སྡུག་པའི་རྟ་མཐོང་ན། །རིང་དུ་ཡོངས་སུ་སྤད་བར་བྱ། །རྫ་གྱོ་ཆག་པའི་མདོག་འདྲ་བའི། །ཐལ་བའི་
མདོག་དང་བྱི་ལའི་མདོག །བྱི་བའི་མདོག་དང་མདོག་མི་སྡུག །དེ་དག་གིས་ནི་བདག་པོ་གསོད། །དོན་གྲུབ་པ་ལ་སྨད་པ་ཡིན། །དུ་བ་དུ་བ་མིག་མདོག་འདྲེས། །མེ་ཏོག་ཁ་སེ་ཏཱ་ལའི་མདོག་འདྲ་བ། །རྔ་མ་རྔོག་མ་དམར་སེར་ཡོད། །རྟ་དེ་རིགས་ནི་རླག་བྱེད་ཡིན། །གང་གི་རླིག་པ་རྨིག་པ་དང༌། །རྔ་མ་མིག་དང་རྐན་ཡང་གནག །དེ་ནི་མཇུག་གནག་ཅེས་བྱ་སྟེ། །རིགས་དང་མཛོད་ནི་ཟད་བྱེད་ཡིན། །ཕྲག་སོ་རྒྱབ་དང་སྐེ་རྩ་དང༌། །ཨོང་དོ་དག་ཏུ་རི་དགས་ནི། །ཨེ་ན་ཡ་ཡི་མདོག་ལྟར་གནག །དེ་ནི་གཡང་གཞི་ཅན་ཞེས་བྱ། །ཕྲག་སོས་བུ་ནི་འཆི་བར་འགྱུར། །སྐེ་རྩས་ཁ་ལོ་བ་འཆི་འགྱུར། །རྒྱབ་ཀྱིས་བདག་པོ་འཆི་བར་འགྱུར། །ཨོང་དོས་ཆུང་མ་ངན་སྤྱོད་འགྱུར། །གང་ཞིག་སྟག་འདྲའི་རི་མོ་ཡོད། །རྟ་དེ་བླུན་པོ་ཞེས་བྱ་སྟེ། །གསེར་ཅན་ཞེས་ཀྱང་དེ་ལ་བྱ། །གཡུལ་དུ་བདག་པོ་གསོད་བྱེད་ཡིན། །རོ་སྟོད་དམ་ནི་གཞན་དག་ཏུ། །རི་དགས་པགས་འདྲའི་ནག་པོས་ཁྱབ། །བདག་པོ་གསོད་ཅིང་ཀུན་གསོད་སྐྱེས། །གང་ཞིག་མདངས་དང་བཅས་པ་ཡི། །རྐང་ལག་གཉི་གར་ཤིས་པ་ཡིན་།རྐང་ལག་གཉིས་ནི་དཀར་གྱུར་པ། །མདངས་དང་བཅས་ན་དེ་མི་སྨད། །ལག་པ་གཅིག་དཀར་མདངས་མེད་པ། །བདག་པོ་གསོད་བྱེད་གཡུལ་དུ་སྤང༌། །རྐང་ལག་གཉིས་ནི་དཀར་གྱུར་པ། །གཡུལ་དུ་ཤིས་ཤིང་དཔལ་སྐྱེད་མིན། །རྐང་ལག་དཀར་བའི་འབྲས་བུ་ནི། །རྒྱ་ཆེར་ང་ཡིས་བཤད་པར་བྱ། །རྟ་གང་གིས་ནི་མདུན་རྐང་གི །གཡས་པ་དཀར་པོར་གྱུར་པ་ནི། །གཡུལ་དུ་དོན་མི་འགྲུབ་པར་བྱེད། །སྔ་རྐང་གཡོན་པ་དཀར་གྱུར་པ། །དཔུང་པ་གནོད་པ་སྐྱེད་བྱེད་ཡིན། །ཕྱི་རྐང་གིས་ནི་གཡས་པ་དཀར། །བདག་པོ་གསོད་པར་བྱེད་པ་ཡིན། །གཡོན་པ་དཀར་བས་གཡུལ་དུ་ནི། །ཞོན་པ་པོ་དང་བཅས་བཙོན་འཁྱེར། །སྔ་རྐང་གཉིས་དང་དེ་བཞིན་དུ། །ཕྱི་རྐང་གི་ནི་གཡོན་པ་དཀར། །བདག་པོ་གཡུལ་དུ་མདའ་མདུང་གིས། །འཆི་བར་བྱེད་པ་ཉིད་ཡིན་ནོ། །སྔ་རྐང་གཉིས་དང་དེ་བཞིན་དུ། །ཕྱི་རྐང་གཡས་པ་དཀར་གྱུར་པ། །གཡུལ་དུ་བདག་པོ་འཆི་གྱུར་ནས། །དེ་ཡི་རྗེས་ལ་རང་ཉིད་འཆི། །
སྔ་རྐང་གཡོན་བ་དཀར་གྱུར་ཅིང༌། །ཕྱི་རྐང་གཉིས་ཀ་དཀར་གྱུར་པ། །རྟ་དེ་གཡུལ་དུ་འཇུག་གྱུར་ན། །གྲོགས་དང་བཅས་པ་འཆི་བར་འགྱུར། །སྔ་རྐང་གཡས་པ་དཀར་གྱུར་ཅིང༌། །ཕྱི་རྐང་གཉིས་ཀ་དཀར་ན་ནི། །རྟ་དེ་བདག་པོ་གསོད་བྱེད་ཡིན། །ལས་རྣམས་འགྲུབ་པར་མི་འགྱུར་རོ། །དེ་ལྟར་མི་ཤིས་བཤད་ནས་ནི། །ཤིས་པ་བཤད་ཀྱིས་ཉན་པར་གྱིས། །སྔ་རྐང་གཡས་པ་དཀར་གྱུར་ཅིང༌། །ཕྱི་རྐང་གཡོན་པ་དཀར་བ་ནི། །ཐད་ཀར་དཀར་པོ་ཞེས་བྱ་སྟེ། །མཛའ་བཤེས་ཉེ་དུ་འཕེལ་བྱེད་ཡིན། །དེ་བཞིན་ཅིག་ཤོས་གཉིས་དཀར་བ། །མཛའ་བོ་འཕེལ་བར་བྱེད་པ་ཡིན། །སྔ་རྐང་གཉིས་ནི་དཀར་གྱུར་ན། །ནོར་དང་བདེ་དང་དགའ་བ་སྐྱེད། །ཕྱི་རྐང་གཉིས་ནི་དཀར་གྱུར་པ། །གཡུལ་དུ་དགྲ་ལས་རྒྱལ་བར་འགྱུར། །ངོས་གཅིག་དཀར་བར་གྱུར་པ་ལས། །གཡས་པ་དཔུང་དང་མཛོད་འཕེལ་བྱེད། །གཡོན་པས་སྐལ་བ་བཟང་བ་དང༌། །ནོར་དང་མཛོད་ཀྱང་འཕེལ་བར་བྱེད། །རྐང་པ་བཞི་ཆར་དཀར་བའི་རྟ། །རིགས་དང་ཆོས་ནི་འཕེལ་བྱེད་ཡིན། །ཆིག་གྲང་མན་ཆད་རྐང་བཞི་དཀར། །འབྲས་བུ་ཆེན་པོ་སྐྱེད་ཅེས་བྱ། །བ་སྤུའི་མཐའ་མ་རྟིང་པའམ། །སྤྱི་བོར་གང་ཞིག་དཀར་གྱུར་རྟ། །དེ་ནི་སྔར་བཤད་ལས་ཁྱད་པར། །འབྲས་བུ་ཆུ་དུན་སྐྱེད་པར་བྱེད། །པུས་མོའི་བར་དུ་དཀར་བའི་རྟ། །འབྲས་བུ་གསལ་པོར་འབྱིན་པར་འགྱུར། །རྟ་ནི་ཁ་དོག་གཞན་ཡོད་པ། །རྐང་པ་ལུས་མདོག་མི་མཐུན་ན། །དེ་ཡི་འབྲས་བུ་སྔར་བཤད་པའི། །ཁྱད་པར་བཞིན་དུ་ཤེས་པར་བྱ། །གང་གི་ལག་པ་གཉིས་དཀར་ཞིང༌། །རྐང་པ་གཉིས་ནི་གནག་པའམ། །དམར་བའི་ཁ་དོག་གཞན་ཡོད་པ། །དེ་ནི་ཉིན་མོ་རྒྱལ་བྱེད་ཡིན། །དེ་ལས་བཟློག་པར་གྱུར་པ་ནི། །མཚན་མོ་རྒྱལ་བར་བྱེད་པ་ཡིན། །གང་ཞིག་ཁ་དོག་དམར་པོའི་རྟ། །རྐང་པ་སྔོ་སེར་དཀར་དང་གནག །ཡང་ན་རྨིག་པ་སྔོ་བའམ། །སེར་དང་དམར་དང་དཀར་དང་གནག །ཁ་དོག་གཉིས་སམ་གསུམ་མམ་བཞི། །མདོག་གང་མདོག་རྗེས་ཡོད་གྱུར་པ། །
ལྷ་ཡི་རྟ་ནི་དེ་འདྲ་འབྱུང༌། །དེ་ཡི་རྒྱལ་པོ་རྒྱལ་བྱེད་ཅིང༌། །དགྲ་རྣམས་ཐུལ་བར་བྱེད་པ་དང༌། །གཡུལ་དུ་རྟག་ཏུ་ཤིས་པ་དང༌། །ནོར་དང་བུ་དང་ཚ་བོར་ལྡན། །གང་ཞིག་སྐྱེས་པ་ཚུན་ཚང་ནི། །རྔ་རྔོག་སྐྱེ་བར་མི་འགྱུར་བ། །བདག་པོ་རིགས་ནི་བརླག་བྱས་ནས། །དེ་ཡི་རྗེས་ལ་ངར་ཉིད་ཉམས། །རྨོང་ཁ་ཡི་ནི་གཡས་གཡོན་ན། །བ་ཡི་ནུ་སོར་ལྟ་བུ་དག །ཡོད་པ་དེ་ཡིས་རྒྱལ་སྲིད་འཇིག །བ་གླང་རྭ་འདྲ་རུ་རུ་ཡི། །རྭ་ཡི་རྩེའམ་པ་ནུ་འདྲ། །ལྕི་བའི་རྩེ་མོ་ལྟ་བུའམ། །དེ་བཞིན་པགས་པའི་མཛེར་བའི་དབྱིབས། །ཡང་ན་བིལ་བ་ལྟ་བུའམ། །ལག་སོར་ལྟ་བུའི་རྭ་དག་ནི། །སྦོམ་པོའམ་ཡང་ན་ཕྲ་མོ་དག །རིང་དང་ཐུང་དང་རྩུབ་དང་ལྗང༌། །སྲ་དང་སྙི་བ་གང་ཡང་རུང༌། །རྣ་རྩའམ་སྐྲ་མཚམས་ཐ་མའམ། །དཔྲལ་བ་ཡང་ན་སྤྱི་བོའམ། །དེ་ལས་གཞན་པའི་གནས་དག་ཏུ། །དེ་ལས་གཞན་པའི་དབྱིབས་ཡོད་པ། །གང་བྱུང་དེ་ནི་རྭ་ཅན་དེ། །བདག་པོ་ཡུལ་འཁོར་འཇིག་བྱེད་ཡིན། །ཡུལ་ཕྱོགས་གང་ན་རྟ་དེ་ཡོད། །ཡུལ་དེ་རླག་པར་འགྱུར་པ་ཡིན། །དེས་ན་དེ་ནི་དགྲ་བོ་ཡི། །ཡུལ་དུ་བསྐྱལ་ལ་རྗེས་ཞི་བྱ། །རྟ་ནི་གང་གི་བ་ལ་ནི། །ཤ་ཁྲ་ཡིས་ནི་ཀུན་དུ་ཁྱབ། །དེ་བཞིན་རྐུབ་དང་རླིག་པ་དང༌། །རྣ་བ་ངག་དང་མིག་ཏུ་བྱུང༌། །རྟ་དེ་ཤ་ཁྲ་ཅན་ཞེས་བྱ། །མི་ཤིས་སྡིག་པའི་མཚན་ཉིད་ཅན། །རྟ་བྲེས་སུ་ནི་མི་གཞུག་ཅིང༌། །བཀྲ་ཤིས་འདོད་པས་རེག་མི་བྱ། །མིག་གི་ཉེས་པ་བཤད་བྱ་ཡི། །ཁྱི་མིག་དོམ་དང་བྱི་བའི་མིག །སྦལ་མིག་ནོར་བུའི་མིག་འདྲ་དང༌། །བྱི་བ་འུག་པ་ཉ་མིག་ཅན། །ཕག་དང་ཁྱུ་མཆོག་ལྟ་བུའི་མིག །བྱ་རོག་ལུག་དང་ཁྲ་མིག་ཅན། །ཁྲ་ཡི་མིག་ཅན་སྨད་པ་ཡིན། །མིག་ཡོ་མིག་ནི་གདུག་པ་དང༌། །མིག་སེར་བ་ཡང་སྤང་བར་བྱ། །དེས་ནི་བདག་པོ་མི་བདེ་ཞིང༌། །རིགས་ཟད་པ་ཡང་བྱེད་པ་ཡིན། །གཡུལ་དུ་བདག་པོ་ཕམ་དང་གསོད། །རྐན་གྱི་མདོག་ནི་སྣ་ཚོགས་དང༌། །དབྱིབས་ཀྱི་འབྲས་བུ་ང་ཡིས་བཤད། །གེ་སར་ནག་པོ་ལྟ་བུ་ཡི། །ཐིག་ལེ་གང་ལ་ཁྱབ་གྱུར་པ། །དེས་ནི་ལམ་དུ་ཉོན་མོངས་འགྱུར། །རྐན་གྱི་ཕྱེད་ནི་དཀར་བ་ཡིས། །ནོར་ཟད་གེ་སར་ལྟ་བུ་ཡིས། །འགགས་
ན་མི་ཤིས་གྱུར་པ་ཡིན། །རྐན་ནི་སྣུམ་ཞིང་ཟབ་པ་དང༌། །དམར་བར་གྱུར་ན་བསྔགས་པ་ཡིན། །ཤིན་ཏུ་དམར་ཞིང་ཆེར་ཁྱབ་ལ། །རྩུབ་མོ་མེད་ལའང་འབྲས་བུ་ཆེ། །སྣུམ་ཆུང་དམར་བའི་ཤ་ཆུང་བ། །འབྲས་བུ་ཆུང་བར་ཤེས་པར་བྱ། །རྐན་གྱི་ཁ་དོག་འབྲས་བུ་དང༌། །སོ་ཡི་འབྲས་བུ་ཉིད་དང་ནི། །མཚན་ཉིད་གནས་དང་བཞི་ལས་བརྟག །རླིག་འབྲས་གཅིག་པ་བདག་པོ་གསོད། །རླིག་འབྲས་གསུམ་པ་བུ་གསོད་བྱེད། །རླིག་འབྲས་མེད་པ་བཀྲ་མི་ཤིས། །རླིག་འབྲས་དམར་སེར་ནོར་ཉམས་བྱེད། །རླིག་འབྲས་ཤིན་ཏུ་འཕྱང་བ་དང༌། །གཡུལ་དུ་བདག་པོ་གསོད་པར་བྱེད། །རླིག་པ་སྤུ་ནི་ཆེ་བ་འམ། །ཡང་ན་སེར་སྐྱར་གྱུར་པའམ། །དེ་བཞིན་ཞུ་བར་གྱུར་པ་ཡང༌། །དེ་ཡིས་བདག་པོ་གསོད་བྱེད་ཡིན། །ཁ་དོག་གཞན་དང་ལྡན་པ་ལ། །པུས་མོ་གཉིས་ནི་ནག་གྱུར་ཅིང༌། །སྲེ་ལོང་ནག་པོར་གྱུར་པ་ནི། །བདག་པོ་གསོད་བྱེད་ཤེས་པར་བྱ། །ལུས་ཀྱི་ཁ་དོག་ཉིད་ལས་ནི། །རྔ་མའི་ཁ་དོག་གཞན་གྱུར་པ། །འབར་བའི་རྔ་མ་ཅན་ཞེས་བྱ། །རྟ་དེ་རྟག་ཏུ་སྤང་བར་བྱ། །རྔ་མའི་རྩེ་མོ་མདོག་གཞན་གྱུར། །ཡུལ་འཁོར་ཡང་ནི་རླག་པར་བྱེད། །རྟ་ནི་མདོག་དཀར་གྱུར་པ་ལ། །ནག་པོ་ཅུང་ཟད་ཡོད་མི་ཤིས། །རྣ་བ་དང་ནི་རྔོག་མ་ནག །རྔ་རྩེ་ནག་པོར་གྱུར་པ་ནི། །དེ་ནི་རྣ་ནག་ཡིན་ཞེས་བྱ། །ལས་རྣམས་ཀུན་ལ་ཤིས་པ་ཡིན། །གཡུལ་དང་ལམ་ཞུགས་ཁལ་བཀལ་བ། །རྒྱལ་པོའི་འདོད་པ་ཀུན་སྒྲུབ་ཡིན། །རྔ་མ་འབར་བ་ཞེས་བྱ་དང༌། །རྔ་རྩེ་ནག་པ་མ་གཏོགས་པ། །རྟ་ནི་ཁ་དོག་ནག་པ་ལ། །དཀར་པོ་ཅུང་ཟད་ཡོད་པ་ཤིས། །ལྷམ་བུ་ཆུ་ཤེལ་མདོག་འདྲ་ཞིང༌། །གང་གི་མགོ་ནི་དཀར་གྱུར་པ། །རྟ་དེ་དཔལ་ཡོན་ཅན་ཞེས་བྱ། །རྒྱལ་པོ་རྣམ་རྒྱལ་སྐྱེད་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་འདྲེས་པའི་ལེའུ་སྟེ་ཉི་ཤུ་རྩ་གཉིས་པའོ།། །།ཁ་བ་ཅན་གྱིས་རི་བོའི་མཆོག །འབྱུང་ཁུངས་སྣ་ཚོགས་ཀྱིས་བརྒྱན་པ། །ཤིན་ཏུ་མཐོ་ཞིང་རྩེ་མོ་ཆེ། །ཀུན་ནས་རླུང་ནི་མི་ལྡང་ཞིང༌། །རྩེ་མོ་ཁ་བས་རྣམ་པར་གཡོགས། །མི་འམ་ཅི་ཡི་གླུ་
སྒྲས་ཁྱབ། །བྱ་རྣམས་སྣ་ཚོགས་སྒྲ་འབྱིན་ཅིང༌། །རི་དགས་སྣ་ཚོགས་རྣམས་ཀྱིས་མཛེས། །སྣ་ཚོགས་ཤིང་གིས་ཀུན་དུ་ཁྱབ། །མཁའ་ལ་རྒྱུ་བ་རྟག་ཏུ་དགའ། །རིག་འཛིན་ཚོགས་ནི་ལེགས་གནས་ཤིང༌། །དྲི་ཟའི་ཆོགས་ཀྱིས་བསྟེན་པར་ནི། །ཤ་ལི་ཧོ་ཏྲ་ལེགས་གནས་ལ། །ལེགས་ཐོས་ཀྱིས་ནི་ཡང་དྲིས་པས། །རྒྱལ་པོའི་བཞོན་པར་འོས་པའི་རྟ། །དྲང་སྲོང་ཆེན་པོས་བདག་ལ་གསུངས། །རྒྱལ་པོའི་རྟ་ནི་ཅི་ལྟ་བུ། །དེ་ཡི་ངེས་པ་བདག་ལ་གསུངས། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །ཡོན་ཏན་སྐྱོན་དག་རྒྱལ་པོ་ལ། །འཇིག་རྟེན་འབྱུང་བ་ཅི་འདྲ་བར། །དེ་ལྟར་ཐ་མ་མི་རྣམས་ལ། །འབྱུང་མི་འབྱུང་བར་གཞུང་ལས་བཤད། །དེ་བས་རྒྱལ་པོའི་བཞོན་པ་ཡིན། །མཚན་ཉིད་འབད་པས་བརྟག་པར་བྱ། །ཅི་ནས་ཉེས་པ་མི་འབྱུང་བ། །རྣམ་པ་ཀུན་དུ་བྱ་བ་ཡིན། །ཚད་དང་སྟོབས་དང་སྙིང་སྟོབས་གཟི། །སྟོབས་དང་ལུས་ཀྱི་མེ་དྲོད་ལྡན། །གཙུག་འཁྱིལ་བཟང་ཞིང་མདངས་རབ་སྣང༌། །འགྲོས་ནི་ཕུན་སུམ་ཚོགས་པ་དང༌། །སྐད་བཟང་དྲི་ནི་ཞིམ་པ་དང༌། །དེ་བཞིན་སྐྱེ་གནས་བཟང་བ་དང༌། །རིག་ལྡན་ངང་ཚུལ་ཕུན་སུམ་ཚོགས། །དུལ་ཞིང་མཐོང་ན་དགའ་བ་དང༌། །བད་ཀན་རང་བཞིན་ཅན་མཆོག་དང༌། །དེ་བཞིན་བཟང་པོའི་སྐྱེ་གནས་དང༌། །སྨད་པའི་མཚན་ཉིད་མེད་གྱུར་ཅིང༌། །ཀུན་ནས་རྣམ་པ་ཐམས་ཅད་དུ། །མཚན་ཉིད་བཟང་པོ་ཕུན་ཚོགས་པ། །རབ་ཏུ་འབད་དེ་བརྟག་པར་བྱ། །རྒྱལ་པོའི་བཞོན་པར་འོས་པའི་རྟ། །རྒྱལ་པོའི་རྟ་ཞེས་བྱ་བར་བཤད། །གང་ཞིག་གཞན་ཀུན་མེད་པ་ཡི། །བརྟན་པའི་གཙུག་ནི་བཅུ་དང་ལྡན། །རྒྱལ་པོའི་བཞོན་པར་འོས་པའི་རྟ། །མ་ལི་ཀ་དང་འདྲ་བའི་མིག །མདོག་སྣུམ་རབ་ཏུ་དཀར་བའི་རྟ། །ཟླ་བའི་ལྷ་དང་ལྡན་པ་ཡིན། །རྒྱལ་པོ་དེ་ལ་ཞོན་ན་ནི། །ས་སྟེང་དབང་དུ་བྱད་པར་འགྱུར། །ནེ་ཚོ་མདོག་ཅན་ཉི་མའི་རྟ། །རྒྱལ་པོའི་གཡུལ་ངོར་ཞོན་ན་ནི། །དེ་ཡི་དོན་རྣམས་འགྲུབ་འགྱུར་ཞིང༌། །ས་ཡང་དབང་དུ་བྱེད་པར་འགྱུར། །དེ་བཞིན་རྒྱལ་པོའི་མདོག་དམར་རྟ། །རྣམ་ཐོས་སྲས་ཀྱི་ལྷ་ཅན་ཏེ། །དེ་ལ་བཞོན་ན་ས་རྣམས་ནི། །མ་
ལུས་དབང་བྱེད་ཐེ་ཚོམ་མེད། །སྔོ་བསངས་ལྷ་དབང་རྟ་ཡིན་ཏེ། །མདངས་སྣུམ་ལྡན་ལ་རྒྱལ་པོ་ནི། །ཞོན་ན་ས་ནི་མ་ལུས་ལས། །རྟག་ཏུ་རྒྱལ་བར་ངེས་པ་ཡིན། །གནག་ཅིང་འཚེར་བའི་མདངས་དང་ལྡན། །རྟ་མཆོག་དེ་ནི་ཆུ་ལྷའི་ཡིན། །དེ་ལ་ཞོན་ན་རྒྱལ་པོ་ནི། །མྱུར་དུ་ནོར་དང་འབྲུ་འཕེལ་འགྱུར། །མདོག་དཀར་རྣ་བ་སྔོ་བ་དང༌། །རྔོག་མ་དང་ནི་རྔ་མ་གནག །ཆུ་ལྷའི་རྟ་ནི་གཉིས་པ་སྟེ། །དེ་རྙེད་པ་ནི་མ་ལུས་འཐོབ། །ལྷམ་བུ་ཆུ་ཤེས་ལྟར་སྣང་བ། །རྟ་ནི་ནོར་ལྷའི་ཡིན་པར་བཤད། །རྒྱལ་པོ་དེ་ལ་ཞོན་ན་ནི། །མྱུར་དུ་ནོར་མང་བདག་པོར་འགྱུར། །བ་སོའི་མདོག་འདྲ་རྔ་མ་གནག །ཀུན་ནས་མདངས་ནི་སྣུམ་དང་ལྡན། །ཆོས་ཀྱི་ལྷ་དེས་དེ་ཞོན་ན། །རྒྱལ་པོ་མཆོད་སྦྱིན་བྱེད་པར་འགྱུར། །ལུང་ཏང་སྣུམ་པོ་དང་འདྲ་བ། །རྟ་མཆོག་དེ་ནི་གཤིན་རྗེའི་ཡིན། །རྒྱལ་པོ་དེ་ལ་ཞོན་གྱུར་ན། །མྱུར་དུ་དགྲ་ཀུན་ལས་རྒྱལ་འགྱུར། །རྨ་བྱའི་མདངས་དང་འདྲ་བ་ཡི། །རི་མོས་ཁྱབ་པར་གྱུར་བའི་རྟ། །སྣ་ཚོགས་ལྷའི་ཡིན་ཏེ་ཞོན་ན། །འདོད་པ་ཐམས་ཅད་ཐོབ་པར་འགྱུར། །དེ་བཞིན་མ་རྒད་བཅག་པ་ཡི། །མདོག་ལྟར་ཤིན་ཏུ་དམར་བའི་རྟ། །ཁྱབ་འཇུག་རྟ་སྟེ་དེ་ཞོན་ན། །མྱུར་དུ་ས་ནི་དབང་བྱེད་འགྱུར། །དེ་བཞིན་གསེར་དང་འདྲ་བ་ལ། །འཚེར་བས་རྣམ་པར་བརྒྱན་གྱུར་པ། །དབང་ཕྱུག་ཆེན་པོའི་རྟ་ཞོན་ན། །དགྲ་རྣམས་དབང་དུ་འགྱུར་བ་ཡིན། །དེ་བཞིན་ཤེལ་དང་འདྲ་བ་དུ། །དང་ཞིང་མདངས་བཅས་ལུས་ཡོད་པ། །རྙེད་ན་མཆོད་སྦྱིན་དམ་པ་ཡི། །སྐལ་བ་རྙེད་པར་འགྱུར་བ་ཡིན། །གང་ཞིག་ནག་ལ་མགོ་བོ་དང༌། །རྐང་པ་བཞི་ནི་དཀར་གྱུར་པ། །ཤེས་ལྡན་རྟ་དེ་རྙེད་ན་ནི། །ནད་ཀྱིས་ཟིལ་གནོན་མི་འགྱུར་རོ། །ལྷམ་བུ་ཆུ་ཤེལ་འདྲ་བ་ལ། །སྔར་ཞིང་ཡན་ལག་ལྔ་དཀར་བ། །རྒྱལ་པོ་དེ་ལ་ཞོན་ན་ནི། །ཕུན་སུམ་ཚོགས་པ་ཐམས་ཅད་ཐོབ། །ལུས་ཀྱི་མདོག་ནི་གཞན་དྲ་ཞིང༌། །མཚན་ཉིད་ཐམས་ཅད་ལྡན་པ་ཡི། །ཐ་སྐར་བུ་ཡི་རྟ་རྙེད་ན། །རྟ་ནི་མང་པོ་རྙེད་པར་འགྱུར། །དཀར་དང་གནག་པའི་ཚུལ་གྱིས་ཁྲ། །གཡས་ལོགས་དཀར་བའི་ཤས་ཆེ་ལ། །གཡོན་པ་ཁྲ་བོར་གྱུར་པ་ཡི། །རྟ་ནི་ཁྲ་བོར་རྙེད་
གྱུར་ན། །རྟ་དེའི་ལྷ་ནི་ངན་སྤོང་སྟེ། །འདོད་པ་ཐམས་ཅད་རབ་སྒྲུབ་ཡིན། །ལྷམ་བུ་ཆུ་ཤེལ་འདྲའི་མདོག་ལ། །ནེ་ཚོའི་མདོག་འདྲའི་འཁོར་ལིང་ཅན། །དྲག་པོའི་རྟ་དེ་རྙེད་ན་ནི། །འདོད་པ་ཐམས་ཅད་ཐོབ་པར་འགྱུར། །དེ་ལྟ་བུ་ཡི་རྒྱལ་བའི་རྟ། །རྒྱལ་པོ་ཡི་ནི་རྟག་ཏུ་བྱ། །དེ་ཡི་གནས་ནི་རྟ་གཞན་དག །གང་དང་ཡང་ནི་གཅིག་མི་བྱ། །ངོ་མཚར་མདོག་དང་ལྡན་པའི་རྟ། །དམོད་པས་ས་སྟེང་སྐྱེས་པ་ཡིན། །དྲི་ཟའི་བུར་ནི་ཤེས་ཀྱིས་ལ། །རབ་ཏུ་འབད་དེ་བསྙེན་བཀུར་བྱ། །ཤ་ལི་ཧོ་ཏྲའི་མདོའི་གནས་ལས་རྒྱལ་པོའི་བཞོན་པའི་རྟའི་མཚན་ཉིད་བརྟག་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་ཡང་བཤད་བྱ་བ། །རྟ་ཡི་མིག་གི་མཚན་ཉིད་དོ། །གང་ཞིག་བཻ་ཌཱུཪྻ་འདྲའི་མདོག །དེ་བཞིན་ཤེལ་གྱི་མདོག་འདྲ་དང༌། །ཕུག་རོན་གྱི་ནི་མིག་འདྲ་དང༌། །ཀ་ལ་པིངྐའི་མིག་འདྲ་དང༌། །གླང་ཆེན་མ་བྱ་རྔ་མོ་དང༌། །སྲེག་པའི་མིག་དང་འདྲ་བ་དང༌། །གསེར་གྱི་མདོག་དང་འདྲ་བ་ཉིད། །དེ་ཡི་མིག་ནི་ཤེས་པ་ཡིན། །སྐྱོན་མེད་པ་ཡི་མིག་ལ་ནི། །རྫི་མ་ཕྲ་མོས་ཁྱབ་པ་དང༌། །མིག་འདྲས་ལེགས་ཤིང་མ་སྣང་ལ། །ཐུར་དུ་བལྟས་པར་མ་གྱུར་པ། །མདོག་ནི་བཟང་པོ་དང་ལྡན་ཞིང༌། །མིག་གི་མདངས་དང་ལྡན་པའི་རྟ། །དེ་ནི་གཡུལ་ལས་རྒྱལ་བྱེད་པའི། །རྒྱལ་བ་ཡི་ནི་བཞོན་པར་འགྱུར། །ཡངས་ཤིང་སྣུམ་ལ་མཉམ་པ་དང༌། །མེ་ཏོག་མ་ལི་ཀ་འདྲ་དང༌། །ཐ་མ་རིང་མོ་ཡོད་གྱུར་ཅིང༌། །དབུས་ན་ཡོངས་སུ་མཛེས་པ་དག །རྟ་དེ་མ་ལི་ཀའི་མིག་ཅན། །མིག་ཟུར་ཅུང་ཟད་གནག་པ་ཡིན། །དེ་ཡིས་མཛའ་བོ་འཕེལ་འགྱུར་ཞིང༌། །རྟ་དང་མཛོད་ཀྱང་རྒྱས་པར་འགྱུར། །དཀར་བའམ་མདོག་རྗེས་དཀར་གྱུར་ལ། །མིག་ལ་སྐྱོན་མེད་མཐོང་མིག་ནག །རྫི་མ་མིག་དཀྱུས་ནག་གྱུར་པ། །གང་ལ་ཡོད་པ་དེར་ནོར་སྐྱེད། །མིག་ནི་ཤེལ་དུ་འདྲ་བ་ལ། །རྒྱལ་མོའི་རྩ་བ་གནག་གྱུར་ཅིང༌། །མིག་གི་རྒྱལ་མོ་རྡུལ་མེད་པས། །དེ་ནི་ཤེལ་མིག་ཅན་ཞེས་བྱ། །མིག་དང་ལུས་ཀྱི་མདོག་འདྲ་བ། །མིག་གི་མདོག་ཅན་ཞེས་བྱ་དགེ །ཁ་དོག་ལུས་དང་ཐ་དད་ཀྱང༌། །གང་གི་མིག་
ནི་བཟང་གྱུར་ཅིང༌། །མི་སྡུག་པ་དང་མ་ཚད་མེད། །དེ་ནི་མིག་བཟང་ནོར་འཕེལ་བྱེད། །ཁ་དོག་ལུས་དང་ཐ་དད་ཅིང༌། །སྨད་པར་བྱ་བའི་མིག་ཡོད་པ། །མིག་ངན་པ་ཡི་རྟ་གང་ཡིན། །ལས་རྣམས་ཀུན་ལ་སྨད་པ་ཡིན། །དེ་བས་དབྱིབས་དང་ཚད་ལྡན་ཞིང༌། །དཔེ་དང་ལེགས་པར་འདྲ་བ་དང༌། །རྫི་མའི་ཁ་དོག་སྣུམ་པ་ཡི། །མིག་གང་ཡིན་པ་དེ་བསྔགས་སོ། །ཤ་ལི་ཧོ་ཏྲའི་མདོའི་གནས་ལས་མིག་བརྟག་པའི་ལེའུ་སྟེ་ཉི་ཤུ་རྩ་བཞི་འོ།། །།བསྒྲུབ་དང་གྲུབ་པའི་རིག་འཛིན་གཙོ། །དྲང་སྲོང་གཟི་བརྗེད་ཆེན་པོ་ལ། །ཡོན་ཏན་དེས་ཀྱིས་ཡོངས་དྲིས་པ། །རྟ་སོའི་རིག་བྱེད་མཁྱེན་ལགས་སམ། །དེ་སྐད་དྲིས་ཚེ་དྲང་སྲོང་མཆོག །ཤ་ལི་ཧོ་ཏྲའི་སླར་སྨྲས་པ། །རྟ་སོའི་རིག་བྱེད་ཤེས་ལགས་སོ། །བུ་ཁྱོད་ཀྱིས་ནི་ཉན་པར་གྱིས། །མདུན་སོ་ཐམས་ཅད་ཐགས་བཟང་སྙོམས། །སྲ་ཞིང་མཚན་མ་རབ་ཏུ་གསལ། །སྣུམ་པའམ་སྤྲང་རྩིའི་མདོག་འདྲ་བའི། །རྟ་ཡི་སོ་ནི་བསྔགས་པ་ཡིན། །མཆེ་བ་སོ་དང་མདོག་འདྲ་དང༌། །འགྲམ་སོ་རྣམས་ཀྱང་དེ་དང་འདྲ། །སོ་རྣམས་གཏིང་རིང་སྲབ་པ་དང༌། །རི་མོ་ཕྲ་ཞིང་ཤིན་ཏུ་འཇམ། །གོས་བ་མེད་ཅིང་རྩ་བ་ཡི། །མདོག་དང་ཀུན་དུ་འདྲ་བ་ཤིས། །མཉམ་ཞིང་ཡན་ལག་རབ་ཏུ་འབྱོར། །ཆུ་ཞེང་ཚད་དང་ལྡན་པ་དང༌། །གཟུགས་ནི་ཤིན་ཏུ་ལེགས་གྱུར་བའི། །སོ་ནི་བདེ་བ་སྐྱེད་བྱེད་ཡིན། །སོ་ནི་ལྷག་པ་ཡོད་པའི་རྟ། །བདག་པོ་ཡུལ་མི་རྣམས་ལ་གནོད། །དེ་བཞིན་སོ་ནི་མ་ཚང་བ། །བདག་པོ་ཆུང་མར་བཅས་པ་རླག །སོ་ཡིས་ཁ་ནི་ཁེངས་གྱུར་པ། །རིགས་རླག་བྱེད་པས་སྤང་བར་བྱེད། །སོ་རྩ་སོ་དང་བཅས་པ་ནི། །མི་ཤིས་པ་ཡི་གཟུགས་ལྡན་ཞིང༌། །ལོག་ལས་བྱུང་བར་གྱུར་པ་དག །གཙིགས་པ་དེ་ནི་རིགས་རླག་བྱེད། །རྟ་ཡི་སོ་ནི་གནག་གྱུར་བ། །བདག་པོའི་ནོར་ནི་རླག་བྱེད་ཡིན། །མཐོ་དམན་ཁྱེར་དང་སྦོམ་ཕྲ་ཁྱེར། །དེ་བཞིན་ཕྲེད་ནི་རྣམ་པར་སྤངས། །མི་མཉམ་མེད་ཅེས་བྱ་སོ་དེ། །བདག་པོའི་བུ་ནི་གསོད་བྱེད་ཡིན། །རྩེ་མོ་ནང་དུ་གྲུབ་པ་ཡི། །སོ་ནི་ནོར་རྣམས་འཇིག་བྱེད་ཡིན།།
ཐམས་ཅད་བྱུང་བའི་ཆག་པའམ། །གང་ཞིག་སོ་ནི་སྔོན་དུ་འདུས། །དེ་ནི་ཤིན་ཏུ་ཉེས་ཆེན་སྐྱེད། །མདོག་དང་དབྱིབས་ནི་ཉ་ཕྱིས་འདྲ། །སོ་དེ་ཉ་ཕྱིས་ཅན་ཞེས་བྱ། །ཉ་ཕྱིས་སོ་ཅན་རྟ་ཡིས་ནི། །ཟས་དང་སྐོམ་ལ་གནོད་པ་སྐྱེད། །འོག་སོ་ཤིན་ཏུ་གྱེས་གྱུར་ན། །བདག་པོ་ལྟོགས་པའི་འཇིགས་པ་འབྱུང༌། །ཡ་སོ་ཤིན་ཏུ་གྱེས་གྱུར་ན། །བདག་པོ་དགྲ་ལས་ཕམ་པར་འགྱུར། །ཟུར་གསུམ་རྩེ་མོ་རྣོ་བའི་སོ། །སྒ་དང་ནོར་ནི་འཕྲོག་བྱེད་ཡིན། །ས་དང་བཅས་པར་སྐྱེས་གྱུར་ན། །དེ་ནི་ཐམས་ཅད་ཟད་བྱེད་ཡིན། །དེ་དག་ལས་ནི་གོ་བཟློག་པའི། །སོ་བཟང་འབྲས་བུ་ཤིས་པ་ཡིན། །མཆེ་བ་དང་ནི་འགྲམ་སོ་ཡི། །འབྲས་བུ་དེ་བཞིན་ཤེས་པར་གྱིས། །ཤ་ལི་ཧོ་ཏྲའི་མདོའི་གནས་ལས་སོ་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།མེ་དང་ཉི་མའི་མདོག་འདྲ་བ། །དཀའ་ཐུབ་ཅན་དེ་སྡིག་པ་མེད། །ཐུབ་མཆོག་ཤ་ལི་ཧོ་ཏྲ་ལ། །མཛའ་ལས་རྒྱལ་གྱིས་ཡང་དྲིས་པ། །བརྟན་པའི་གཙུག་ནི་དུར་ཤེས་བྱ། །གློ་བུར་བས་ནི་དུ་ཞིག་ཡིན། །ཤེས་དང་ཤེས་བྱའི་བདག་པོ་ཡིས། །གཙུག་རྣམས་ཀྱི་ནི་མཚན་ཉིད་ནི། །གང་དུ་ཇི་ལྟར་གནས་པ་ཡིན། །གཙུག་རྣམས་ཀྱི་ནི་དབྱིབས་གྱུར་པ། །རྣམ་པ་དུར་ནི་འགྱུར་པ་གསུངས། །གཙུག་གི་ཚད་ནི་ཇི་ཙམ་ཞིག །ཤེས་དང་སྨད་པའི་གྲངས་ནི་དུ། །ཐམས་ཅད་གནས་ལས་འཕྲོ་བ་དང༌། །གཡས་པ་དང་ནི་གཡོན་པ་དང༌། །སྟབས་བ་དང་ནི་སྨན་པ་ཡི། །འབྲས་བུ་འོད་ཟེར་ཅི་ལྟར་འགྱུར། །གཞན་ཡང་ལུས་ཀྱི་མཚན་ཉིད་ནི། །བརྟན་དང་མི་བརྟན་ཇི་ལྟ་བུ། །ལུས་ལས་སྐྱེས་པའི་གནས་རྣམས་ནི། །གནས་ཀྱི་གང་ཞིག་གནས་སྐབས་དང༌། །རྐན་གྱི་ཁ་དོག་བྱེ་བྲག་གི །གློ་བུར་བྱུང་བའི་འབྲས་བུ་དང༌། །སྲབ་དང་མཐུག་པའི་སྤུ་རྣམས་ནི། །གཙུག་པ་ཇི་ལྟར་འབྱུང་བ་ལགས། །དེ་སྐད་ཐུབ་མཆོག་ལ་དྲིས་ཚེ། །ཤ་ལི་ཧོ་ཏྲ་ས་བུ་ལ་སྨས། །འདི་ན་བརྟན་དང་མི་བརྟན་དང༌། །ཡན་ལག་རྣམ་པ་བརྒྱད་ཡིན་ལ། །འབྲས་བུ་འབྱུང་བའི་ཚུལ་གྱིས་ནི། །ཚན་ཉིད་རབ་ཏུ་ཤེས་པར་བྱ། །ཤིས་དང་རྨ་བྱའི་མཚན་
ཉིད་ནི། །ཐམས་ཅད་ལུས་ལ་བརྟེན་པ་ཡིན། །ལུས་ལས་འབྱུང་བར་གྱུར་པ་ནི། །ལུས་དང་ཡན་ལག་རྣམ་པ་གཉིས། །དགེ་བའི་གནས་སུ་ཤས་པའི་གཙུག །རྒྱ་ཆེ་བ་ཡི་འབྲས་བུ་སྟེར། །མི་ཤིས་གནས་ནི་ངན་པ་འབྱུང༌། །ཤིན་ཏུ་མི་ཤིས་སྐལ་ཆེན་འགྱུར། །ཚད་དང་ལྡན་ཞིང་གསལ་བར་བྱུང༌། །མཚན་ཉིད་ལྡན་པའི་འབྲས་བུ་ཆེ། །ཚད་མི་ལྡན་ཞིང་མི་གསལ་བ། །དེའི་འབྲས་བུ་ཆུང་བར་འདོད། །གནས་དང་དབྱིབས་ཀྱི་བྱེ་བྲག་ལས། །མཚན་ཉིད་འབྲས་བུ་ཆེན་པོར་འགྱུར། །སོར་གཉིས་ལས་ལྷག་ཉ་ཕྱིས་ཏེ། །སོར་གཉིས་པ་ནི་ལྷག་ཅེས་བྱ། །ཤིང་ལྷམ་འདྲ་དང་རྐང་བརྒྱ་བ། །སོར་ནི་ཕྱེད་དང་གཉིས་པ་ཡིན། །ཤིང་ལྷམ་ཕྱེད་ནི་ནས་དྲུག་ཞེང༌། །འདྲེས་པ་སོར་ནི་བརྒྱད་པ་ཡིན། །དེ་ཡི་ཆ་གསུམ་ཕྲི་བ་ནི། །འཁྱིལ་བ་ཞེས་ནི་བྱ་བར་བཤད། །བཞི་ཆ་ཕྲི་བར་གྱུར་པ་ནི། །ཁ་འབུས་པ་ཞེས་བྱ་བ་ཡིན། །དེ་ལས་ལྷག་པའམ་མ་ཚང་པའི། །གཙུག་ནི་འབྲས་བུ་མེད་པ་ཡིན། །པགས་སྲབ་སྤུ་ནི་ཕྲ་བ་དང༌། །ལུས་ཀྱི་གསང་བའི་གནས་སུ་བྱུང༌། །དེ་ནི་ངོ་བོ་ཉིད་ཀྱིས་ཕྲ། །ཚད་དང་ལྡན་རུང་མི་ལྡན་རུང༌། །འབྲས་བུ་བཅས་པར་ཤེས་པར་བྱ། །ཕྲ་བ་དེ་དག་གནོད་བྱེད་ཡིན། །ཡན་ལག་བརྒྱད་པའི་མཚན་ཉིད་ཀྱིས། །ཤིས་དང་མི་ཤིས་འོག་ནས་བཤད། །རྟ་ཡི་གནས་བཅུའི་སྤུ་ཚོགས་ལ། །བསྟན་པ་གང་ཡིན་དེར་ཤེས་བྱ། །མཆུ་སྒྲོས་རྔོག་མར་རེ་རེ་དང༌། །གཙུག་དང་བྲད་ལ་གཉིས་གཉིས་ཏེ། །རྒྱུ་ཞབས་རྐུབ་ལྷག་གཉིས་གཉིས་ཏེ། །བཅུ་པོ་དེ་དག་ལྡན་པར་བཤད། །ཀུན་ནས་རྫོགས་ཤིང་ཤིན་དུ་གསལ། །གཙུག་ནི་གཡས་སུ་འཁྱིལ་བ་དང༌། །ཆུང་བ་མ་ཡིན་ཆེ་བ་མིན། །གསེར་ལྟར་མདངས་སྣུམ་འོད་དང་བཅས། །དབྱིབས་ནི་ལེགས་པར་སྐྱེས་པ་དག །ལས་རྣམས་ཐམས་ཅད་སྒྲུབ་བྱེད་ཡིན། །ལེགས་ཐོས་ཐེ་ཚོམ་སྐྱེས་གྱུར་ནས། །དྲང་སྲོང་དེ་ལ་སླར་སྨྲས་པ། །ཇི་ལྟར་བཅུ་པོ་ཉིད་ལྡན་གྱི། །གཞན་དག་དེ་ལྟར་མ་ཡིན་བཤད། །རྟ་རྣམས་སྐྱེས་ཟིན་གྱུར་ནས་ནི། །གཙུག་དེ་ནམ་ཡང་མི་སྐྱེ་ལ། །སྐྱེས་པ་འཇིག་པར་མི་འགྱུར་ཞིང༌། །
གནས་ལས་འཕོ་བར་མི་འགྱུར་རོ། །སྐྱེས་ཚེ་ལྷན་ཅིག་སྐྱེ་བར་འགྱུར། །དེ་བས་ཐམས་ཅད་བསྟན་པ་ཡིན། །ལེགས་ཐོས་ཚིག་ནི་ཐོས་པ་དང༌། །དེ་རྗེས་དྲང་སྲོང་གིས་སྨྲས་པ། །ཇི་ལྟར་ཕྱོགས་དེར་སྐྱེས་གྱུར་པ། །དེ་ལྟར་གཞན་དུ་མ་ཡིན་པ། །ཕ་མར་ཡོད་དང་མེད་གྱུར་ཀྱང༌། །ཅིག་ཤོས་ལ་ནི་དབང་བ་ཡིན། །ཕལ་ཚེར་གནས་བཅུར་དབང་གྱུར་གྱི། །དེ་ལྟར་གཞན་དུ་མི་སྣང་ངོ༌། །དེ་བས་བཅུ་པོ་བསྟན་པར་བྱ། །ངེས་པ་ཉིད་དུ་ཟུང་བར་གྱིས། །འདི་དག་ལ་མེད་ངེས་འབྱུང་བ། །གཞན་དག་དེ་ལྟར་མིན་པར་བཤད། །བརྟན་དང་མི་བརྟན་གང་ཡིན་ཀྱང༌། །འབྲས་བུ་རྣམ་པ་གཉིས་སུ་བཤད། །གནས་ནི་དགུ་བཅུ་རྩ་དྲུག་ཡིན། །དབྱིབས་ནི་རྒྱལ་པོ་ཉིད་ཡིན་ནོ། །འདྲེས་དང་ཁ་འབུས་འཁྱིལ་བ་དང༌། རྐང་བ་བརྒྱ་དང་ལྷག་པ་དང༌། །ཤིང་ལྷམ་དང་འདྲ་ཤིན་ལྷམ་ཕྱེད་།ཉ་ཕྱིས་འདྲ་སྟེ་རྣམ་པར་བརྒྱད། །སྨད་པའམ་བསྔགས་པའི་གནས་དག་གམ། །གནས་སུ་བསྟན་དང་མ་བསྟན་གང༌། །གཙུག་འཁྱིལ་པ་ཡི་དབྱིབས་བྱུང་ན། །དེ་ནི་རྗེས་མཐུན་འབྲས་བུ་སྐྱེས། །འཁྱིལ་བ་ཆུ་སྐོར་ལྟ་བུ་ཡིན། །ཉ་ཕྱིས་ཉ་ཕྱིས་དབྱིབས་ལྟར་འོང༌། །དབྱིབས་གཅིག་གཉིས་སམ་མང་པོར་ནི། །དུ་མ་གང་ཚེ་འདུས་གྱུར་པའི། །གཙུག་འཁྱིལ་དེ་ནི་དྲེས་པ་འམ། །འདུས་པ་ཞེས་ནི་བྱ་བར་བཤད། །སྤུ་ནི་འགྲོ་ཚེ་མེ་ཏོག་དག །ཁ་འབུས་ལྟར་སང་ཁ་འབུས་ཡིན། །བཟློག་པ་ལྟར་སྣང་ལྷག་པ་ཡིན། །ཟླུམ་པོའམ་ཡང་ན་ཟུར་བཞི་ནི། །ཤིང་ལྷམ་དབྱིབས་འདྲ་ཤིང་ལྷམ་ཅན། །བྲང་བའམ་ཡང་ན་རྟིང་པའི་གནས། །བྱེད་འདྲ་ཤིང་ལྷམ་ཕྱེད་པ་ཡིན། །མེ་ཏོག་མགོ་ལྕོགས་དབྱིབས་འདྲ་བ། །དེ་ནི་རྐང་བརྒྱད་པར་ཤེས་བྱ། །དབྱིབས་ལས་མི་མཐུན་གྱུར་པ་ནི། །གཞན་དག་ཀྱང་ནི་སྣད་མོད་ཀྱི། །དེ་ནི་སྤུ་ཡི་འགྱུར་བ་ཡིན། །གནས་ལས་ཤིས་དང་མི་ཤིས་འགྱུར། །གཙུག་ཀྱང་གནས་དང་དབྱིབས་དང་ནི། །མི་ཤིས་མཚན་ཉིད་ཤེས་པར་བྱ། །ཆ་དང་འཕོས་དང་འཐོར་བ་དང༌། །གཙུག་ནི་འཕྲེད་དུ་འབྱུང་བ་དང༌། །ལྷག་པ་འམ་ཆད་པར་གྱུར་པའམ། །གང་ཡང་གནས་ལས་འཕོ་འགྱུར་པའམ། །དབྱིབས་ངན་མདོག་ནི་མི་སྡུག་པ་།བརྟན་པོ་རྣམས་ནི་མི་སྣང་
བའམ། །སྨད་པའི་གནས་སུ་གཡས་འཁྱིལ་དང༌། །བསྔགས་པའི་གནས་སུ་གཡོན་འཁྱིལ་བ། །མཚན་ཉིད་ངན་པ་ཡིན་ཞེས་བྱ། །དེས་ནི་ཚེ་ཐུང་སྐྱེད་པར་བྱེད། །གཙུག་གི་གནས་ནི་དགུ་བཅུ་དྲུག །ཡོད་པ་བཤད་པ་དེ་རྣམས་ནི། །ཤིས་དང་སྨད་པར་བྱ་བ་སྟེ། །རྣམ་པ་གཉིས་སུ་བསྡུ་བར་བྱ། །དེ་ལས་གཞན་ནི་ཉི་ཤུ་ཞིག །ཤིས་པ་ཡིན་པར་ཤེས་པར་བྱ། །བདུན་ཅུ་རྩ་དྲུག་སྨད་བྱ་སྟེ། །དེ་ལྟར་དགུ་བཅུ་རྩ་དྲུག་ཡིན། །ཁ་འགྲམ་ལ་གཉིས་དབྲལ་བར་བཞི། །དཔལ་མཚམས་ལ་གཅིག་ཁོ་ན་ཡིན། །རྣ་རྩར་གཉིས་ཏེ་ལྐོག་མར་གཅིག །མགོ་བོའི་མཐར་ནི་གཉིས་ཡིན་ལ། །བྲང་དུ་གསུམ་སྟེ་དཔུང་པར་གཉིས། །མིད་བ་གཅིག་སྟེ་དེ་བཞིན་དུ། །རྒྱུ་དང་ལོང་གུ་གཉིས་གཉིས་སུ། །གཙུག་ནི་འབྱུང་བར་ཤེས་པར་བྱ། །དེ་ལྟར་ཤིས་པར་གྱུར་པའི་གནས། །ཉི་ཤུ་ཡིན་པར་རྣམ་པར་བཤད། །གཙུག་ནི་འདི་རྣམས་གཉིས་ལ་ནི། །སུམ་ཅུ་རྩ་བདུན་གྲངས་སུ་འགྱུར། །མུར་འགྲམ་མུར་གོང་མཆི་སྟན་དང༌། །མཁུར་ཚོས་སྣ་ཕོར་སྨིན་མ་དང༌། །རྣ་རྩ་ལྕེའུ་ལྡང་རྩིའུ་ཆུང་དང༌། །མཆན་ཁུང་དགུ་དང་འགྲམ་སྲེ་ལོང༌། །སྣ་རྩེ་བུས་མོ་མིག་འབྲས་གཉིས། །རྩི་བ་ལོགས་རྐུབ་ཚོས་དག་ཏུ་ནི། །གནས་ནི་གཉིས་གཉིས་དག་ཏུ་གཙུག །གཉིས་གཉིས་འབྱུང་བ་སུམ་ཅུ་དྲུག །སྣ་གདོང་མཆུ་ལྟག་སྲོལ་མདུད་དང༌། །དཔུང་སྣ་སྙིང་ག་ཟེའུ་དྲུག་མདོ། །ལྟེ་བ་རྐུབ་དང་མཇུག་སྲུབ་དང༌། །ཡ་མཆུ་ཟེའུ་ལྟག་སྒ་འོག་སྟེ། །དེ་ལྟར་གནས་ནི་དེ་དག་ཏུ། །གཙུག་ནི་བཅུ་གསུམ་འབྱུང་བ་ཡིན། །ཚེའུ་སྤུ་དེ་བཞིན་ཚིགས་གྲངས་དང༌། །ཚེའུ་ཚེ་གཅིག་ཕྲ་མོ་ཡི། །གནས་ནི་བཅུ་དྲུག་འདི་དག་ཏུ། །གཙུག་ཀྱང་བཅུ་དྲུག་ཉིད་ཡིན་ནོ། །ཨན་དང་རུ་དང་སྐེ་བའི་རྩ། །རྨད་ཁ་རྡ་མར་གནས་གཉིས་གཉིས། །དེ་ལྟར་གནས་བརྒྱད་ལྡན་པ་རུ། །གཙུག་ནི་རྣམ་པའང་བརྒྱད་ཡིན་ནོ། །མཆུ་སྒྲོས་དེ་ཡི་སོ་གཉིས་ཏེ། །གནས་ཀྱི་གསུམ་པོ་འདི་དག་ཏུ། །གཙུག་ནི་གསུམ་པོ་འབྱུང་བ་ཡིན། །དེ་ཕྱིར་དགུ་བཅུ་དྲུག་གསལ་ནས། །དེ་ལྟར་བསྟན་ཞིང་དགེ་བ་དང༌། །སྨད་
པ་དག་ཀྱང་བཤད་པ་ཡིན། །གཙུག་རྣམས་ཀྱི་ནི་ཁྱད་པར་གྱིས། །འབྲས་བུ་འབྱུང་བ་མཉན་པར་བགྱི། །ཡ་མཆུར་གནས་པའི་གཙུག་གིས་ནི། །བདག་པོའི་བློན་པོ་གསོད་པར་བྱེད། །མཆུ་སྒྲོས་སྟེང་དང་གཡས་ཀྱིས་ནི། །བདག་པོའི་ཕ་ནི་འཆི་བར་འགྱུར། །དེ་ཡི་གཡོན་ན་ཡོད་པས་ནི། །ཞོན་པ་པོ་ཡི་མ་འཆི་བྱེད། །མཆུ་ལྟས་གོང་དུ་གཙུག་བྱུང་ན། །བདག་པོའི་རིགས་དང་བཅས་པ་སྲེག །སྣ་ཕོར་ལ་ནི་གཡས་པ་ཡིས། །འཚོ་བའི་སྒོ་ནི་འགག་པར་བྱེད། །གང་གི་མཁུར་ཚོས་གཉིས་ཀ་ལ། །གཙུག་འཁྱིལ་བ་ནི་སྣང་གྱུར་ན། །དེ་ཡི་བདག་པོའི་བུ་ཐུ་བོ། །རྟ་ཡིས་ཟ་བར་འགྱུར་བ་ཡིན། །རྟ་གདོང་འགྲམ་དང་སྣ་གདོང་ལ། །གང་གི་གཙུག་ནི་སྣང་གྱུར་བ། །རྟ་དེའི་བདག་པོ་གཡུལ་དུ་ནི། །དགྲ་བོས་གསོང་བར་འགྱུར་བ་ཡིན། །གང་གི་རྟ་ལ་མཆི་སྟན་དུ། །གཙུག་འཁྱིལ་ཁ་ནི་གནས་གྱུར་པ། །གང་ལ་འདི་འདྲའི་རྟ་ཡོད་པ། །དེའི་རིགས་རྟག་ཏུ་ངུ་བར་འགྱུར། །གང་གི་རྟ་ཡི་མུ་འགྲམ་གཉིས། །གཙུག་ནི་གསལ་པོར་སྣང་གྱུར་པ། །དེ་ལྟའི་གཙུག་ཅན་བཅང་གྱུར་ན། །དེས་ནི་རིགས་ནི་གཉིས་སུ་འགྱེས། །གང་གི་གཙུག་གི་སྨིན་མ་ཡི། །བར་དུ་གནས་པར་སྣང་གྱུར་པ། །རྟ་དེ་ཁྲོ་གཉེར་ཅན་ཞེས་བྱ། །ཉེ་དུ་མཛའ་བཤེས་རྣམས་ལ་གནོད། །གང་གི་མུར་གོང་གཉིས་སུ་ནི། །གཙུག་ནི་རེ་རེ་སྣང་གྱུར་པ། །དེ་ཡིས་རིགས་ཀུན་ཟད་བྱེད་ཅིང༌། །བདག་པོའི་ཕོངས་པ་སྐྱེད་བྱེད་ཡིན། །འགྲམ་གླང་ཙེའུ་ཆུང་དག་གམ་ནི། །ཚེའུ་སྦུའམ་སྐེ་རྩ་ཆིག་གྲང་ཕྲ། །མཆན་གཉིས་དག་ཏུ་གཙུག་འཁྱིལ་བ། །སྤུ་ནི་གཡོན་དུ་འཁྱིལ་གྱུར་ན། །དེ་ཡིས་རྟ་དང་བདག་པོ་ནི། །མདའ་ཆར་གྱིས་ནི་འཆི་བར་འགྱུར། །གང་གི་རྟ་ཡི་རྣ་བའི་རྩེ། །གཉི་གར་གཙུག་ནི་སྣང་གྱུར་ན། །གསང་འཕེལ་བ་ཡི་ཉེས་པ་ཡིས། །དེ་ཡི་བདག་པོ་འཆི་བར་འགྱུར། །གང་གི་རྟ་ལ་རྣ་རྩ་རུ། །གནས་པའི་གཙུག་ནི་སྣང་གྱུར་དང༌། །ཟེའུ་ལྷད་ལ་ཡོད་པའི་རྟ། །བདག་པོའི་དོན་སྒྲུབ་མ་ཡིན་ནོ། །གང་གི་རྟ་ཡི་སྲོང་གོང་དབུས། །གཙུག་འཁྱིལ་བ་ནི་སྣང་གྱུར་པ། །དེ་ཡི་བདག་པོ་བཟའ་བ་དང༌། །བཏུང་བ་རེ་བ་འགྲུབ་མི་འགྱུར། །ཨན་
དོང་རུ་ར་ནི་གཙུག་འཁྱིལ་བ། །རྟ་ནི་གང་ལ་སྣང་གྱུར་པ། །བདག་པོའམ་བུའམ་འདུལ་སྦྱོར་མཁན། །གང་ཡང་རུང་ལ་གནོད་ས་སྐྱེད། །གང་གི་ཟེའུར་གཙུག་བྱུང་བ། །རྟ་དེ་ཕོངས་པ་དང་བཅས་པར། །བདག་པོའི་རིགས་རྒྱུད་བཅས་བརླག་པའམ། །རིགས་ཀྱི་གཙོ་ལ་གནས་གྱུར་པ། །རྟ་དང་ནོར་ནི་དྲག་བྱེད་ཅིང༌། །རྒྱལ་པོའི་ཡུལ་འཁོར་བཅས་འཆི་དང༌། །དོན་ཀུན་འཇིག་ཅིང་འདུག་བར་ན། །སྐྱེས་པའི་ཚེ་ནི་ཉིད་ན་བསྐྲད། །ལག་གིས་རིག་དང་མིག་གིས་མཐོང༌། །ཐག་རིང་དུ་ནི་སྤ་དཔང་བྱ། །དེ་ནི་དགྲ་ལ་སྦྱིན་པ་འམ། །གཞན་གྱི་ཡུལ་འཁོར་དག་ཏུ་བསྒྱུར། །གང་གི་ཟེའུ་ལྟག་གཙུག་ཡོད་པ། །དེ་ཡི་བདག་པོ་པའམ་ནི། །སེམས་ཅན་མི་སྡུག་པས་ཟོས་ཤིང༌། །གཡུལ་དུ་དཔུང་དང་བཅས་པར་འཆི། །སྒ་འོག་གཙུག་གིས་བདག་པོ་འཆི། །གསལ་ཤིང་བསྐྱོན་ཏེ་འཆི་བར་འགྱུར། །ཉེན་པས་ཉེན་ཅིང་ནོར་བརླག་པར་མ། །ཡང་ན་མཚོན་གྱིས་འཆི་བར་བྱེད། །གང་གི་གཙུག་ནི་སྙིང་གའམ། དཔུང་སྣ་དག་ཏུ་ཡོད་གྱུར་པ། །རྟ་དེ་བདག་པོ་འཁོར་བཅས་པར། །གཡུལ་དུ་འཆི་བར་བྱེད་པ་ཡིན། །པུས་མོའི་གཙུག་གིས་གཡུལ་དུ་ནི། །འཁྲུལ་ཞིང་དཔུང་བཅས་དགྲ་པོས་གསོད། །རྒྱལ་པོ་རྐུན་མ་ཆད་པ་མེས། །བདག་པོའི་རིགས་ནི་རླག་པར་བྱེད། །གང་གིས་ཆིག་གྲང་གཉིས་ལ་ནི། །གཙུག་ནི་གནས་པར་སྣང་གྱུར་ན། །དེ་ཡི་བདག་གཉེན་བཅས་པ། །ལྕགས་སྒྲོག་གིས་ནི་བཅིང་བར་འགྱུས། །གང་གི་ཚེའུའི་ཚེ་རྣམས་སུ། །གཙུག་འཁྱིལ་བ་ནི་སྣ་འགྱུར་པ། །བཅིར་དང་གསོད་པའི་སྡུག་བསྔལ་གྱིས། །དེ་ཡི་བདག་པོ་རླག་པར་འགྱུར། །མཆན་ཁུང་གཙུག་ནི་ཡོད་པའི་རྟ། །གཡུལ་དུ་མྱུར་དུ་འཆི་འགྱུར་ཞིང༌། །དེ་ཡི་བདག་པོ་དག་ཀྱང་ནི། །བདེ་དང་ལྡན་པར་མི་གནས་སོ། །མཆན་ཁུང་གཅིག་གིས་ཉེས་པ་ཆུང༌། །གཉིས་ཀས་སྨད་པར་གྱུར་བ་ཡིན། །རྩི་བ་ལོགས་གཙུག་གིས་བདག་པོ་ནི། །ཕྱོགས་དང་བཅས་པར་ཟད་པར་འགྱུར། །ལྟེ་བར་གཙུག་ནི་འཁྱིལ་གྱུར་པ། །གང་ཞིག་གིས་ནི་རྟ་ལ་སྣང༌། །དེ་ཡི་བདག་པོ་རིགས་རྒྱུད་བཅས། །ནད་
ཀྱིས་ཡོངས་སུ་གདུངས་པར་འགྱུར། །རྨད་ཁར་གཙུག་ནི་ཡོད་གྱུར་པའི། །བདག་པོ་ཆུང་མ་མི་རིགས་སྤྱོད། །རླིག་པར་གང་གི་གཙུག་འཁྱིལ་བ། །རྟ་དེའི་བདག་པོར་གྱུར་བ་ནི། །བུ་མང་ཚེ་ནི་ཐུང་གྱུར་ཏེ། །རྟ་དེ་བལྟ་ན་མི་སྡུག་ཡིན། །རྟ་གང་གི་ནི་དྲུག་མདོ་ཡི། །དབུས་ན་གཙུག་ནི་སྣང་གྱུར་པ། །འདུལ་སྤྱོད་མཁན་གྱིས་དེ་ཞོན་ཏེ། །གལ་ཏེ་གཡུལ་དུ་འཇུག་གྱུར་ན། །རྟ་དེ་ཉིད་དང་ལྷན་ཅིག་ཏུ། །ཟུག་རྔུ་ཡིས་ནི་འཆི་བར་བྱེད། རྔ་རྩར་གང་གི་རྟ་ལ་ནི། །གཙུག་འཁྱིལ་བད་ཡོད་གྱུར་པ། །འདི་ནི་རྩག་ནས་འཇིག་བྱེད་ཡིན། །བདག་པོའི་སྒོ་བ་སྡུག་པར་བྱེད། །རྐུབ་ཀྱི་ཕྱོགས་དང་སྤུ་དག་དང༌། །འབྲེག་ལ་གནས་པར་གྱུར་པ་ནི། །བདག་པོའི་ལྟོ་བའི་ནད་སྐྱེད་ཅིང༌། །གར་ཡང་བདེ་བར་སི་འགྱུར་རོ། །རྐུབ་ཚོས་རྐུབ་ཀྱི་སྟེང་དག་ཏུ། །གང་གི་གཙུག་ནི་སྣང་གྱུར་པ། །དེ་ནི་རྟུག་འབྲུལ་ཞེས་བྱ་སྟེ། །བདག་པོའི་རིགས་ནི་རླག་བྱེད་ཡིན། །སྲེ་ལོང་བར་ནི་གཙུག་འཁྱིལ་བའི། །རྟ་ནི་རྟག་ཏུ་ལམ་འཇུག་འགྱུར། །བདག་པོ་གཡོག་དང་བཅས་པ་ནི། །མཚོན་གྱིས་འཆི་བ་ཉིད་དུ་འགྱུར། །ཆིག་གྲང་གཙུག་ལ་སོགས་པ་ཡི། །བཤད་འབྲས་ཕྱི་རྒང་ལ་ཡང་སྦྱར། །དེ་ལྟར་མི་ཤིས་བཤད་པ་ནི། །ཤིས་པ་དག་ཀྱང་བཤད་པར་བྱ། །གང་གི་ཁ་འགྲམ་དག་ཏུ་གཙུག །གསལ་བའམ་ཉ་ཕྱིས་དབྱིབས་འདྲ་གནས། །རྟ་མཆོག་དེ་ཡི་བདག་པོ་ནི། །ཟས་ཐོབ་དོན་རྣམས་འགྲུབ་པར་འགྱུར། །དཔྲལ་བར་གང་གི་གཙུག་འཁྱིལ་པ། །གཡས་སུ་འཁྱིལ་བ་གཉིས་ཡོད་པ། །དེ་ཡི་བདག་པོ་གཡུལ་དུ་ནི། །རྒྱལ་ཞིང་བུ་ཚ་རྣམ་པར་འཕེལ། །གང་གི་གཙུག་ནི་དཔྲལ་བ་ན། །མི་མཉམ་གསུམ་ནི་ཡོད་གྱུར་པ། །རྒྱལ་རིགས་ཀྱི་ནི་དེ་དང་རྙེད། །དགྲ་བོའི་ས་ལ་དབང་བྱེད་འགྱུར། །མཆོད་སྦྱིན་ལེགས་པར་བྱེད་པ་དང༌། །རྒྱལ་ཆེན་ཡོན་ཀུན་གཏོང་བར་འགྱུར། །གང་གི་དབྲལ་བར་གཙུག་འཁྱིལ་གསུམ། །གོང་ནས་གོང་དུ་བརྩེགས་པ་ནི། །གཡོན་དུ་མི་འཁྱིལ་མཉམ་ཟླུམ་ཡོད། །དེ་ནི་རྟ་ཡི་རིན་ཆེན་ཡིན། །དེས་ནི་རྒྱལ་པོས་སྟེང་དུ། །དགྲ་རྣམས་ལས་
ནི་ངེས་པར་འགྱུར། །གང་གི་དཔྲལ་བར་གཙུག་དག་ནི། །ཕྱོགས་བཞིར་བཞི་ནི་ཡོད་གྱུར་པ། །གང་ལ་དེ་འདྲའི་རྟ་ཡོད་པ། །དེ་ནི་མྱུར་དུས་བདག་འགྱུར། །གཡུལ་དུ་རྟག་ཏུ་རྒྱལ་བ་དང༌། །ནོར་ལྡན་བུ་དང་ཚ་བོ་འཕེལ། །རིན་ཆེན་ཚོགས་ཀྱང་རྣམ་པར་འཕེལ། །དགྲ་རྣམས་ཀྱི་ནི་སྤྱི་བོར་གནས། །གང་གི་དཔྲལ་འཚམས་གཙུག་གཡས་འཁྱིལ། །ཁ་འབུས་པའམ་འཁྱིལ་བ་ཡོད། །དེ་ནི་ལྷན་ཅིག་གཡུལ་ཞུགས་ན། །དགྲ་ལས་རྒྱལ་ཏེ་བཟློག་པར་འགྱུར། །རྣ་རྩེ་ཁོ་ནར་གཙུག་འཁྱིལ་བ། །རྟ་ནི་གང་ལ་ཡོད་གྱུར་པ། །དེ་ནི་གོས་པ་ཞེས་བྱ་སྟེ། །བདག་པོའི་མཆོད་སྦྱིན་འཕེལ་བྱེད་ཡིན། །ལྐོག་མ་རུ་ནི་གནས་པའི་གཙུག །གཡས་སུ་འཁྱིལ་ཞིང་རབ་གསལ་ཡོད། །ལྷ་ཡི་ནོར་བུ་ཞེས་དེ་བྱ། །འདོད་པའི་དོན་ཀུན་སྒྲུབ་བྱེད་ཡིན། །མགུལ་བ་སྐྱེ་བ་ཁ་རུ་ནི། །ཉ་ཕྱིས་འདྲ་བའི་གཙུག་ཡོད་པ། །ཡིད་དུ་འོང་བ་ཞེས་བྱ་སྟེ། །རྟ་དེ་དགྲ་བོ་འཇིག་བྱེད་ཡིན། །གང་གི་རྔོག་མཐར་ཉ་ཕྱིས་འདྲའི། །གཙུག་འཁྱིལ་གསལ་ཞིང་གཡས་སུ་འཁྱིལ། །རྒྱལ་རིགས་ཀྱི་ནི་དེ་འདྲ་བ། །རྙེད་ན་དགྲ་བོའི་སྤྱི་བོར་གནས། །གང་གི་བྲང་ལ་ལེགས་གནས་པའི། །གཙུག་ནི་གསུམ་པོ་གཡས་འཁྱིལ་ཞིང༌། །གསལ་ཞིང་ཉ་བྱིས་དབྱིབས་འདྲ་བ། །སྤུ་ནི་གྱེན་དུ་བལྟས་བ་སྣང༌། །དེས་ནི་གཡུལ་དུ་དགྲ་བསད་ནས། །བདེ་བར་ལྡོག་པར་འགྱུར་བ་ཡིན། །གང་ལ་བྲང་ལ་གཙུག་བཞི་ནི། །གཡས་སུ་འཁྱིལ་པ་ཡོད་པ་དང༌། །དེ་བཞིན་ཡིད་འོང་གཙུག་ཡོད་པ། །དེ་ནི་དབལ་གྱི་ཤིང་ཞེས་བྱ། །དཔལ་ཤིང་ཞེས་བྱ་འདི་ཉིད་ནི། །དོན་སྒྲུབ་བྱེད་པའི་རྟ་ཡིན་ཏེ། །དེ་ཡིས་གཡུལ་ལས་རྒྱལ་བ་དང༌། །བུ་དང་ཚ་བོ་འཕེལ་བར་འགྱུར། །དཔུང་བ་ལ་ནི་གཙུག་ཡོད་ཅིང༌། །དེ་ཡང་ཉ་ཕྱིས་དབྱིབས་འདྲ་བ། །དེ་ནི་དཔུང་རྒྱན་ཅན་ཞེས་བྱ། །བདག་པོའི་འདོད་པ་སྟེར་བྱེད་ཡིན། །རྒྱུ་ཡི་ལྟག་ན་གང་གི་གཙུག །གཡས་སུ་འཁྱིལ་པ་ཡོད་གྱུར་པ། །དེ་ནི་འོག་བག་ཅན་ཞེས་བྱ། །འབྲུ་དང་ནོར་རྣམས་འཕེལ་བྱེད་ཡིན། །ནོར་གྱིས་ཚིམས་པར་བྱས་ནས་ནི། །བུ་དང་ཚ་བོ་འཕེལ་བར་བྱེད། །དཔལ་ཤིང་པདྨ་གཡུང་
དྲུང་དང༌། །སཱ་ལུ་དབྱིག་པ་རྒྱལ་མཚན་དང༌། །དགའ་བ་འཁྱིལ་དང་འཁོར་ལོ་གཤོལ། །དུར་དང་རྡོ་རྗེ་རལ་གྲི་གཞུ། །ཉ་དང་ཟླ་བ་ཟླ་ཕྱེད་དམ། །དར་དང་དེ་བཞིན་གཏུན་ཤིང་འདྲ། །མཚན་མ་དེ་འདྲ་བ་གསལ་བའི། །གཙུག་འཁྱིལ་རྟ་ནི་གང་དག་གི །བྲང་ངམ་འཕྲལ་བར་ཡོད་གྱུར་པའི། །རྒྱལ་པོ་དེ་ནི་རྒྱལ་སྲིད་བརྟན། །དེ་ལྟར་སྨད་དང་ཤིས་པ་ཡི། །གཙུག་ནི་ཡང་དག་བཤད་པ་ཡིན། །གཙུག་ལས་ལྷག་པའི་སྤུ་ཡོད་པ། །བདག་པོའི་ནོར་དང་འབྲུ་སྐྱེད་བྱེད། །སྔར་བཤད་པ་ནི་སྣང་གྱུར་ན། །གནས་ལ་ས་འབྲས་བུ་འབྱིན་པ་ཡིན། །ལེགས་ཐོས་ཐེ་ཚོམ་གྱུར་པ་ཡིས། །སླར་ཡང་ཕ་ལ་སྨྲས་པ་ནི། །ཡན་ལག་བརྒྱད་པོ་འདི་དག་ལས། །འབྲས་བུ་སྣ་ཚོགས་འབྱུང་འགྱུར་པ། །རྒྱལ་པོའི་འབྲས་བུ་བྱེད་པ་ནི། །རྟ་ཡི་ལུས་ལ་བརྟེན་པ་མཐོང༌། །གལ་ཏེ་རྟ་ལས་དགེ་མི་དགེ །འབྲས་བུ་རྒྱལ་པོས་ཐོབ་གྱུར་ན། །རྒྱལ་པོ་དེ་ཡི་རང་ལུས་ལས། །བྱུང་བའི་མཚན་ཉིད་དོན་མ་མཆིས། །བུ་ཡིས་དེ་སྐད་སྨྲས་པ་དང༌། །ཤ་ལི་ཧོ་ཏྲས་སླར་སྨྲས་པ། །དཀའ་ཐུབ་ཅན་གྱི་དྲང་སྲོང་གིས། །རྒྱལ་པོའི་མཚན་མ་གང་མཐོ་བ། །དེ་ཡི་འབྲས་བུ་གསལ་བར་ནི། །རྟ་ཡི་མཚན་ཉིད་ཀྱིས་སྟོན་འགྱུར། །བདག་པོ་བསོད་ནམས་ཅན་ལ་ནི། །མཚན་ཉིད་བཟང་པོ་འབྱུང་བར་འགྱུར། །བདག་པོ་སྨད་པར་བྱ་བ་ལ། །རྟ་ཡང་སྨད་པར་སྐྱེ་བར་འགྱུར། །རྒྱལ་པོ་འདྲེན་མའི་ལ་ས་ཅན་ལ། །རྟ་ཡང་མཚན་ཉིད་འདྲེན་མར་འབྱུང༌། །ཚེ་ནི་གནས་དང་འབྲེལ་བ་ལས། །གནས་སྐབས་ཇི་བཞིན་འབྱུང་བར་འགྱུར། །རྐན་གྱི་མདོག་ནི་འདྲེན་མ་ཡིས། །ལེའུའི་ནང་དུ་སྔར་བཤད་ཟིན། །གློ་བུར་བ་ཡི་འབྲས་བུས་ནི། །ལྟས་ནི་ལེའུ་ནང་ནས་སྟོན། །དེ་ལྟར་གཙུག་ཀུན་ཤིས་མི་ཤིས། །བརྟན་དང་བརྟན་མིན་མཚན་ཉིད་ནི། །ཇི་ལྟར་དྲིས་པ་མ་ལུས་པར། །ད་ཡིས་ལེགས་པར་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་གཙུག་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།། །།ལེགས་ཐོས་ལ་སོགས་བུ་ཀུན་དང༌། །གཅེར་བུ་རྒྱལ་ཚོགས་སློབ་མ་རྣམས། །ན་ཚོད་ཤེས་ལ་མཚར་སྐྱེས་ནས། །ཕ་ལ་དེ་རྣམས་ཀྱིས་
དྲིས་པ། །རྟ་ཡི་ན་ཚོད་ཇི་ལྟར་ཤེས། །འདི་ཡི་ཚེ་ནི་ཇི་ལྟར་བཤད། །སོ་རྣམས་སུ་ནི་མཚན་མ་དང༌། །པགས་པ་སྤུ་ནི་ཇི་ལྟར་འགྱུར། །ན་ཚོད་གནས་སུ་ཕྱིན་མ་ཕྱིན། །ཅི་ལྟར་ཤེས་པར་གྱུར་པ་ལགས། །གང་གིས་ན་ཚོད་ཤེས་འགྱུར་བའི། །མཚན་མ་ཇི་ལྟར་ཤེས་པར་གྱིས། །དེ་སྐད་དྲིས་ཚེ་དྲང་སྲོང་མཆོག །དེ་ཉིད་ཤེས་པར་སླར་སྨྲས་པ། །རྟ་ཡིན་ཚོད་ཤེས་པ་ནི། །མཚན་མ་ལས་ཀྱིས་གཉེར་རྙེད་འགྱུར། །ལ་ལ་གཞོན་པའང་རྒས་འདྲ་དང༌། །རྒས་པ་འང་གཞོན་པའི་ཚུལ་དུ་སྣང༌། །དེ་བས་རྟ་ལས་ཁ་ཅིག་ནི། །ཤིན་ཏུ་རྨོངས་པར་བྱེད་པ་ཡིན། །དུས་ནི་བརྟག་ཅིང་བསམ་མི་ཁྱབ། །འཇིག་རྟེན་ཐམས་ཅད་མ་ལུས་ཁྱབ། །ཉིན་མཚན་དང་ནི་ཟླ་བ་དང༌། །ལོ་དང་དུས་དྲུག་བཅས་པར་ནི། །དུས་ཀྱི་མཚན་ཉིད་ལྡན་པ་རུང༌། །དུས་འདི་ཤེས་པར་བྱ་བ་ཡིན། །གང་གི་སོ་སོགས་ལ་རིམ་བཞིན། །དུས་ནི་དུས་ཀྱི་གྲངས་སུ་འགྲོ། །དུས་ལས་མཚན་མ་གསལ་གྱུར་ལ། །མཚན་མ་ལས་ཀྱང་དུས་ཤེས་བྱ། །རྟ་ནི་སྐྱེས་ནས་དུ་ལོན་པ། །མཚན་མ་ལས་ནི་ཤེས་པར་བྱ། །མཁས་པས་མཚན་མ་བསྟན་ནས་ནི། །ལེགས་པར་ཤེས་ནས་བསྟན་པར་བྱ། །ལེགས་པར་བརྟག་པར་གྱུར་པ་ཡིས། །གཟུང་བ་དེ་ནི་དེ་བཞིན་ཡིན། །མྱུར་བར་བལྟས་པས་མ་ཤེས་པ། །དེ་ནི་ལོག་པར་འཛིན་པར་འགྱུར། །ལེགས་བལྟས་མ་རྨོངས་པར་གྱུར་པ། །མཚན་མ་དུས་ནི་སྟོན་པ་ཡིན། །དེ་ལས་འབད་ཅིང་མཁས་པ་དང༌། །བསྟན་བཅོས་དོན་མཐོང་ཡང་དག་ཤེས། །མཚན་མ་ཤིན་ཏུ་ངེས་བརྟགས་ལ། །དོགས་པ་མེད་པར་བསྟན་པར་བྱ། །མདུན་སོ་སྟེང་དང་འོག་དག་ལ། །སྐྱེས་པ་དྲུག་དྲུག་ཡིན་ཞེས་བྱ། །དེ་ནས་རྟ་ཡི་མཆེ་བ་ནི། །སྟེང་འོག་གཉིས་ལ་བཞི་ཡོད་དེ། །འགྲམ་སོ་སྟེང་དང་འོག་གཉིས་ན། །ཉི་ཤུ་རྩ་བཞི་ཡོད་པ་ཡིན། །དེ་ལྟར་སོ་བསྡུས་ཀུན་གྱི་སྤྱི། །བཞི་བཅུ་ཡོད་པར་ཤེས་པར་བྱ། །མདུན་སོའི་འོག་མ་ཅི་ལྟ་བར། །སྟེང་སོ་དེ་ལྟར་མི་མངོན་ཏེ། །རྟ་ཡི་སོ་ལ་མཚན་མ་ནི། །མེ་ལོང་གཟུགས་བརྙེན་ལྟ་བུར་
མངོན། །ཟླ་བའི་རིམ་གྱིས་སྐྱེས་པ་ཡི། །མཚན་མ་ལོ་གཅིག་ཡིན་པར་འདོད། །ལོ་གཉིས་ནས་ནི་གོ་རིམས་བཞིན། །སོ་སོའི་ཁ་དོག་ལས་ཤེས་བྱ། །དེ་ནས་ལོ་གསུམ་ནས་བརྩམས་ཏེ། །སོ་འབྱུང་བར་ནི་འདོད་པ་ཡིན། །ལོ་ལྔའི་བར་དུ་སོ་དག་ནི། །འབྱུང་ཞིང་སྐྱེ་བར་ཤེས་པར་བྱ། །དེ་ཡི་རྗེས་ལ་སོ་རིས་ཀྱི། །ཆ་ནས་ན་ཚོད་ཤེས་པར་བྱ། །གནག་དང་སེར་དང་དཀར་བ་དང༌། །མཆིང་བུ་སྦྲང་བུའི་མདོག་འདྲ་དང༌། །དུང་དང་གཏུན་གྱི་དབྱི་བས་འདྲ་དང༌། །དེ་ནས་སོ་ནི་འགུལ་བ་དང༌། །དེ་རྗེས་དེ་ནི་འབྱུང་བ་སྟེ། །འདི་ནི་མཚན་མ་བསྡུས་པ་ཡིན། །མཚན་མ་རྣམས་ནི་གོ་རིམས་བཞིན། །རེ་རེ་ལས་ནི་རབ་བཤད་བྱ། །དེ་ལས་ཐོག་མར་ཟླ་རེ་ནི། །ལོན་པའི་མཚན་ཉིད་ཤེས་པར་བྱ། །རྔ་རྔོག་པགས་པ་ཤིན་ཏུ་ཕྲ། །ཡན་ལག་དང་ནི་རྨིག་པ་མཉེན། །དཔྲལ་བ་མཐོ་དམན་ཁྱེར་བ་དང༌། །ལུས་གུག་རྩོལ་བ་ཆུང་བ་དང༌། །མདུན་སོའི་དབུས་མ་གཉིས་ཟླུམ་པའི། །རྟེའུ་ཟླ་གཅིག་ལོན་ཞེས་བྱ། །ལུས་ཀྱི་ཚུལ་ནི་མཛེས་པ་དང༌། །མདུན་སོ་གཉིས་ནི་གསལ་བར་གནས། །དྲེགས་པས་འགྲོ་བའི་ཚུལ་ཅན་དག །དེ་ནི་ཟླ་བ་གཉིས་ལོན་ཡིན། །ཤ་ནི་རྒྱས་ཤིང་འབྱེས་པ་དང༌། །སྲ་ཞིང་བརྟན་པར་གནས་པ་དང༌། །མདུན་སོ་དག་ནི་རྣོ་བ་དང༌། །སྤུ་ནི་རྩུབ་པར་སྐྱེ་བ་དག །རྟ་ལ་མཁས་པས་རྟེའུ་ནི། །ཟླ་གསུམ་ལོན་བར་ཤེས་པར་བྱ། །སྐྱེས་པའི་སྤུ་ནི་བྱི་བ་དང༌། །མདུན་སོ་གཉིས་ནི་རྫོགས་པ་ཡི། །རྟེའུ་ཟླ་བ་བཞི་ལོན་པར། །མཁས་པ་རྣམས་ཀྱིས་ཤེས་པར་བྱ། །མདུན་སོ་གཉིས་ནི་རྫོགས་པ་དང༌། །བར་མ་དག་ཀྱང་སྐྱེ་བ་ཡི། །རྟེའུ་གང་ཡིན་དེ་ཉིད་ནི། །ཟླ་ལྔ་ལོན་པར་ཤེས་པར་བྱ། །གང་ཚེ་རི་མོ་དུང་མར་འདྲ། །ཤིན་ཏུ་ཕྲ་བར་སྣང་གྱུར་པ། །མདུན་སོ་ལ་ནི་ཡོད་གྱུར་ཅིང༌། །སོ་མཐའ་ལས་ནི་གྱེན་དུ་འགྲེང༌། །དེ་ཚེ་རྟེའུ་ཟླ་དྲུག་པར། །ཐེ་ཚོམ་མེད་པར་ཤེས་པར་བྱ། །སྤུ་ནི་མི་མཉམ་གྱུར་པ་དང༌། །མདུན་སོ་བར་མར་རི་མོ་སྣང༌། །ལུས་དང་རྨིག་པ་བརྟན་གྱུར་ཅིང༌།
ཀུན་ནས་འགྲིམ་པར་གྱུར་པ་དང༌། །མདུན་སོ་ཐ་མ་རྟོལ་གྱུར་པ། །དེ་ཚེ་ཟླ་བ་བདུན་པ་ཡིན། །མདུན་སོ་རྫོགས་པར་གྱུར་པ་དང༌། །འགྲམ་སོ་ཅུང་ཟད་སྐྱེ་བ་དང༌། །རྔ་མའི་ཚོགས་ཀྱང་ལེགས་སྐྱེས་པ། །ཟླ་བ་བརྒྱད་པར་ཤེས་པར་བྱ། །མདུན་སོ་བར་མ་ལེགས་རྫོགས་ཤིང༌། །དེར་ཡང་རི་མོ་སྣང་གྱུར་ལ། །རྔོག་མའམ་མི་མཉམ་པར་སྣང་ལ། །དེ་ཚེ་ཟླ་བ་དགུ་པ་ཡིན། །རྔོག་མའང་རྣམ་པར་གྱེས་པ་དང༌། །མདུན་སོ་བར་མའང་དཀར་བ་དག །གང་ཡིན་དེ་ནི་མཁས་པ་ཡིས། །སྐྱེས་ནས་ཟླ་བཅུ་ལོན་ཞེས་བྱ། །འགྲམ་སོ་རྫོགས་པར་གྱུར་པ་དང༌། །རླིག་པ་དག་ཀྱང་འཕྱང་བདག །དེ་ལྟ་བུ་ཡི་རྟེའུ་ཡིས། །ཟླ་བ་བཅུ་གཅིག་ལོན་ཞེས་བྱ། །གང་གི་སོ་ནི་ཐམས་ཅད་ཀྱང༌། །དཀར་བ་ཉིད་དུ་སྣང་བ་དང༌། །བ་སྤུ་འཇམ་ཞིང་རིང་བ་ཡིས། །ལུས་ལ་ཁྱབ་པར་གྱུར་པ་ཡི། །རྟེའུ་མཚན་མ་འདི་དག་གིས། །ལོ་གཅིག་ལེན་པར་ཤེས་པར་བྱ། །གང་ཚེ་སོ་ནི་མདོག་སེར་ཞིང༌། །དུད་མར་དག་ཏུ་འང་སྣང་གྱུར་པ། །རྔོག་མ་དང་ནི་རྔ་མ་རིང༌། །སྤུ་ཡང་འབྱི་བར་འགྱུར་བ་དང༌། །གཉིད་ཀྱང་ཆེ་བར་སྣང་བ་དང༌། །གྲགས་པ་གཟི་མདངས་འཕེལ་འགྱུར་བ། །མཚན་མ་འདི་དག་ལྡན་པ་ཡི། །རྟ་ནི་ལོ་གཉིས་ལོན་ཞེས་བྱ། །ལོ་གཉིས་གསུམ་མམ་དེ་བཞིན་དུ། །བཞི་འམ་ཡང་ན་ལྔ་ཡི་ཚེ། །མཆེ་བ་བཞི་ནི་སྐྱེ་འགྱུར་ཏེ། །འདི་ལ་ངེས་པ་མི་སྣང་ངོ༌། །རྟེའུ་ལོ་གཉིས་ལོན་པ་ལ། །རླིག་པའི་འབྲས་བུ་གཅིག་སྣང་སྟེ། །གཉིས་ནས་ལྡ་ན་མཉམ་གྱུར་ཏེ། །གཞན་དུ་མི་ཤེས་པ་ཉིད་ཡིན། །རླིག་པ་དག་ནི་གཉིས་ཀ་ཡང༌། །གང་ཞིག་མིར་སྐྱེས་དེ་གོ་བཟློག །རང་བཞིན་རྫོགས་པར་གྱུར་པ་ན། །རླིག་པ་རང་གི་གནས་སུ་ཕྱི་ན། །བུ་སྐྱེད་པར་ཡང་འགྱུར་བ་དང༌། །ལམ་དུ་འགྲོ་བའང་དེ་སྲན་ཐུབ། །དོན་ཀུན་ཡང་དག་སྒྲུབ་བྱེད་ཅིང༌། །ནོར་དང་དགའ་དང་བདེ་འཐོབ་བྱད། །མཆེ་བ་སྐྱེ་བའི་དུས་དག་གི །བྱ་བ་འདི་ནི་ཁྱེད་ལ་བཤད། །དེ་ཡན་ཆད་ནི་མཆེ་བ་དང༌། །རླིག་པ་རྟ་ལ་མི་སྐྱེའོ། །ལོ་གསུམ་པ་ལ་མདུན་སོ་གཉིས། །ལོ་བཞི་པ་ལ་བར་མ་སྟེ། །ལྔ་པ་ལ་
ནི་ཐ་མ་དག །འབྱུང་ཞིང་སྐྱེ་བར་འགྱུར་བ་ཡིན། །ཕྱེད་དང་གསུམ་ན་མདུན་སོ་ནི། །གཉིས་འབྱུང་བར་ནི་ངེས་པ་ཡིན། །དེ་སྐྱེས་ཡོངས་སུ་རྫོགས་པ་ནི། །ལོ་གསུམ་པར་ནི་ཤེས་པར་བྱ། །ཕྱེད་དང་བཞིན་དེ་ཡི་ནི། །བར་མ་འབྱུང་བར་ཤེས་པ་ཡིན། །དེ་ཉིད་སྐྱེས་པར་གྱུར་པ་ནི། །ལོ་བཞི་པར་ནི་ཤེས་པར་བྱ། །ཕྱེད་དང་ལྡན་མདུན་སོ་ཡི། །ཐ་མ་དག་ནི་འབྱུང་བར་འགྱུར། །དེ་ནས་ཐ་མ་སྐྱེས་གྱུར་པ། །ལོ་ལྔ་པར་ནི་དེ་ཤེས་བྱ། །སོ་འབྱུང་བ་དང་སྐྱེས་གྱུར་ཀུན། །རྫོགས་པའི་རྟ་ནི་ལོ་ལྔ་པ། །གཞོན་པ་ལས་ནི་དེ་འདས་ཤིང༌། །མཆོག་ཏུ་ལུས་ནི་རྒྱས་པ་དང༌། །པགས་པ་རྔ་རྔོག་སྡུག་པ་དང༌། །དབང་པོ་དང་ཞིང་དགའ་བ་དང༌། །ནུས་པ་ཐོབ་པར་འགྱུར་བ་དང༌། །དར་ལ་བབ་པ་གནས་གྱུར་ཅིང༌། །ཁུ་བ་འབྱུང་བར་འགྱུར་བ་དང༌། །སྐད་ཀྱང་ལོངས་སུ་བརྗེས་འགྱུར་ཏེ། །ཇི་ལྟར་སྐྱེས་པ་ལོ་བཅུ་དྲུག །ལོ་ལྔ་པ་ཡི་རྟ་དེ་འདྲ། །དེ་ཚེ་དར་ལ་བབ་ཅེས་བྱ། །ལས་རྣམས་ཀུན་ནི་ནུས་པར་འགྱུར། །དེ་རྗེས་དུ་ནི་ཐེ་ཚོམ་དག །སྐྱེས་པར་གྱུར་བས་དྲི་བ་དྲིས། །སོ་ནི་མི་འབྱུང་བར་ཤེས་ན། །ཇི་ལྟར་འབྱུང་ཞིང་སྐྱེ་བ་ལགས། །དེ་ནི་བདག་ལ་བཤད་པའི་རིགས། །དྲང་སྲོང་གིས་ཡང་སླར་སྨྲས་པ། །དཔེར་ན་འབྲས་བུ་སྐྱེ་བ་ན། །མེ་ཏོག་ལུང་ལས་ཆད་པར་འགྱུར། །དེ་བཞིན་སོ་ནི་སྐྱེ་གྱུར་པ། །གཡོ་ཞིང་འབྱུང་བར་འགྱུར་བ་ཡིན། །གང་ཞིག་གཞན་པར་གྱུར་པའི་མོ། །ལྟུང་བ་སྐྱེ་བ་ལྷན་ཅིག་པ། །དེ་ནི་གོ་རིམས་ཇི་བཞིན་དུ། །ཐམས་ཅད་ད་ཡིས་བསྟན་པར་བྱ། །འོ་མ་འབྱུང་བའི་སོ་སྲབ་ཅིང༌། །ཐུང་ཞིང་འཇམ་ལ་མི་མཉམ་ལྷོད། །རྩ་བ་ཕྲ་ཞིང་རྩེ་མོ་སྤོམ། །མ་སོ་རྩེ་མོ་ཟླུམ་པ་དང༌། །དེ་བཞིན་ཁ་དོག་ནག་ནོག་ཅན། །སོ་རྟེན་ཆུང་ཞིང་སྙི་བ་དང༌། །སོ་རྩེའི་མོ་ནག་པོ་དང༌། །ནག་ནོག་ཅན་གྱིས་མཚོན་པ་ཡིན། །འདི་ནི་དང་པོར་སྐྱེས་པ་ཡི། །སོ་ཡི་མཚན་ཉིད་གྱུར་པ་ཡིན། །རྩེ་མོ་རྣོ་ཞིང་རྩ་བ་སྤོ་མ། །ལེགས་གནས་སོ་དཀྱུས་མཉམ་པ་དང༌། །དཀར་ཞིང་སྣུམ་ལ་རིང་བ་དང༌། །སྲ་ཞིང་ཐགས་ནི་བཟང་བ་དང༌། །སྟེང་མི་རྐྱོང་ཞིང་དེ་བཞིན་དབུས། །གསལ་བར་
སྐྱེས་པ་དེ་འདྲའི་སོ། །རིམ་གྱིས་ཡོངས་སུ་རྫོགས་གྱུར་པ། །ནས་དང་འབྲུ་ནི་ཟ་བར་ནུས། །དེ་ལྟར་འབྱུང་དང་སྐྱེས་པའི་སོ། །རང་གི་མཚན་ཉིད་ཤེས་པར་བྱ། །ནག་པོ་མདུན་སོར་ཆགས་པོ་དྲུག །བདུན་པ་ལ་ནི་བར་མ་དང༌། །བརྒྱད་པ་ལ་ནི་ཐ་མ་རུ། །ཆགས་པ་ཡིན་པར་མངོན་པར་བསྟན། །སེར་པོ་དགུ་པར་མདུན་སོ་སྟེ། །བཅུ་པ་ལ་ནི་བར་མ་དེ། །ལོ་ནི་བཅུ་གཅིག་ལོན་པ་ལ། །ཐ་མར་དེ་ནི་ཆགས་པར་བསྟན། །དཀར་པོ་ལ་ནི་བཅུ་གཉིས་ན། །མདུན་སོ་བར་མར་བཅུ་གསུམ་ན། །ཐ་མར་ལོ་ནི་བཅུ་བཞི་ན། །གནས་པར་དེ་ནི་བསྟན་པ་ཡིན། །མཆིང་བུ་ལོ་ནི་བཅོ་ལྔ་ན། །མདུན་སོ་དག་ལ་གནས་པ་ཡིན། །བཅུ་དྲུག་པར་ནི་བར་མ་ལ། །བཅུ་བདུན་པར་ནི་ཐ་མར་འགྲོ། །སྦྲང་མ་དོག་ལོ་ནི་བཅོ་བརྒྱད་ན། །མདུན་སོ་བར་མ་བཅུ་དགུ་ན། །ཉི་ཤུ་ཚེ་ན་ཐ་མ་རུ། །དེ་ནི་གནས་པར་འགྱུར་བ་ཡིན། །དུང་འདྲ་ཉི་ཤུ་རྩ་གཅིག་ན། །མདུན་སོར་ཉི་ཤུ་གཉིས་ན་དབུས། །ཉི་ཤུ་གསུམ་ན་ཐ་མ་རུ། །དེ་ནི་གནས་པར་རབ་ཏུ་བཤད། །གཏུན་འདྲ་ཉི་ཤུ་རྩ་བཞི་ན། །མདུན་སོར་རྩ་ལྔའི་ཚེ་ན་དབུས། །ཐ་མ་དག་དང་ལྡན་པར་ནི། །ལོ་ནི་ཉི་ཤུ་དྲུག་ན་འབྱུང༌། །ཉི་ཤུ་རྩ་བདུན་ལ་མདུན་སོ། །རྩ་བརྒྱད་པ་ལ་བར་ན་སྟེ། །ཉི་ཤུ་དགུ་ལ་ཐ་མ་དག །ཡོངས་སུ་འགུལ་བར་འགྱུར་བ་ཡིན། །ལོ་སུམ་ཅུ་ན་མདུན་སོ་སྟེ། །སུམ་ཅུ་གཅིག་ན་བར་མ་ཡིན། །སུམ་ཅུ་གཉིས་ན་ཐ་མ་ནི། །འབྱུང་བ་འདི་ནི་ཐེ་ཚོམ་མེད། །དེ་ནས་གནས་ཀྱི་དབྱེ་བ་ཡིས། །མཚན་མ་རྣམས་ནི་ཤེས་པར་གྱིས། །སྙིང་པོ་ཆ་ཡི་ཕྱི་རོལ་གནས། །སོ་ཡི་རྩེ་མོར་མངོན་གནས་ཡིན། །གནག་དང་སེར་དང་དཀར་པོ་ལས། །དཀར་པོ་ཡིན་ན་མཐིལ་དབུས་སྐྱེ། །རྟ་ཡི་སོ་རྩར་ཆགས་པ་ནི། །ཉེ་བའི་ལུས་ཞེས་བྱ་བ་ཡིན། །མཆིང་བུ་སྤྲང་བུ་དུ་མདོག་འདྲ། །ཐེལ་གྱིས་དབུས་ལ་བརྟེན་པ་ཡི། །ནང་གི་སྙིང་པོའི་ཆ་ནས་ནི། །སོ་རྩེའི་བར་དུ་བརྟེན་པ་ཡིན། །གཏུན་འདྲ་སོ་རྟེན་དག་ལས་ནི། །བརྩམས་ཏེ་སྐྱེ་བ་ཡིན་པར་བཤད། །དེ་ནི་འཇོང་དང་ཟུར་བཞི་དང༌། །ཤིན་ཏུ་ཟླུམ་པའི་ཁྱད་པར་གྱི། །རྨ་འདྲ་དང་ནི་བཅས་
མཚན་མ། །དབྱིབས་ནི་རྣམ་པ་གསུམ་དུ་འགྱུར། །སྦྲང་བུའི་མདོག་ཅན་གྲུ་བཞིར་འགྱུར། །མཆིང་བུ་ཉིད་ནི་འཇོད་པར་གནས། །དུང་དང་གཏུན་འདྲ་ཉིད་དག་ནི། །ཤིན་ཏུ་ཟླུམ་པོར་གནས་པ་ཡིན། །རྟ་རྣམས་ཀྱི་ནི་སོ་ལ་མཚོན། །ངོ་བོ་ཉིད་ཀྱི་ཆགས་པ་ཡིན། །དཔེར་ན་ཤིང་ལས་སྐྱེས་ལོ་མ། །གཞོན་ཚེ་དམར་པོར་གནས་པ་ཡིན། །རྒྱས་པའི་ཚེ་ན་སྔོན་པོར་འགྱུར། །དེ་ཡི་རྗེས་ལ་སེར་པོ་སྟེ། །སྐམས་ཤིང་མི་སྡུག་གྱུར་པ་ན། །སྨིན་ཅིང་ལྷུང་བར་གྱུར་པ་ཡིན། །དེ་བཞིན་རྟ་ཡི་སོ་དག་གི །ཚོན་ནི་རིམ་གྱིས་ཡལ་བ་ཡིན། །དེ་ལས་གཞན་ཡང་མཚན་མ་ནི། །སོ་སོ་ཞིང་གི་རབ་སྦྱར་བྱ། །ལ་ལ་ལུང་ཏང་མདོག་ཅན་ལ། །གཞི་གཅིག་འཛམ་བུའི་འབྲས་བུ་མདོག །ཁ་ཅིག་ལྕགས་ནི་བཅག་པ་འདྲ། །ལ་ལ་དངུལ་རྡོ་འདྲ་བ་ནི། །ནག་པོ་དྲུག་ནས་དགུ་ཡི་བར། །རི་མོ་སོ་ལ་གནས་པ་ཡིན། །དེ་ཚེ་ཉམས་དགའ་སྟོབས་ལྡན་ཞིང༌། །ཤ་ནི་རྒྱས་པར་གྱུར་པ་དང༌། །རྔ་མ་དང་ནི་རྔོག་མ་སྣུམ། །སྤུ་མདོག་ཤིན་ཏུ་གསལ་བ་དང༌། །མ་ཞུམ་མཚེར་ཞིང་འགྲོས་བཟང་དང༌། །མཐོང་ན་དགའ་བ་ཉིད་དུ་ནི། །ཤུགས་དང་སྤྲོ་བར་ལྡན་པ་དང༌། །གྲིམ་ཞིང་ལང་ཚོ་དག་ལ་གནས། །པདྨའི་གེ་སར་འདྲ་བའམ། །གསེར་རམ་སྦྲང་རྩིའི་མདོག་འདྲ་ན། །བ་སེར་བ་ལང་སྤྲང་བུ་ཡི། །མདོག་འདྲ་དེ་ཡི་དབུས་ན་ནི། །གྲོག་མའི་དབྱིབས་འདྲ་ཆགས་པ་དང༌། །འདམ་བུའི་ཤུན་པའི་མདོག་འདྲ་བའམ། །ཅུང་ཟད་སྔོ་ཞིང་སེར་བ་ནི། །རིང་པོར་སོ་ཡི་ངོས་ལ་ཆགས། །སེར་པོ་མདུན་སོ་ལ་སོགས་པར། །དེ་ལྟར་དགུ་པ་ཡན་ཆད་ནས། །སེར་པོའི་མཚན་མ་ལྡན་པའི་རྟ། །ཤ་ཡིས་རྒྱས་ཤིང་སྟོབས་དང་ལྡན། །མདངས་ལྡན་དེ་བཞིན་ཁ་དོག་བཟང༌། །བརྟན་ཞིང་དགའ་བར་བྱེད་པ་ཡིན། །འབྲས་ནི་གྲུས་པ་ལྟ་བུ་དང༌། །དེ་བཞིན་མུ་ཏིག་མདོག་ཅན་ལ། །ཐིལ་དང་དབུས་ནི་མཉམ་ཞིང་ཟླུམ། །དེ་བཞིན་ཞོ་ཡི་མདོག་ཅན་དུ། །དཀར་པོ་རྣམ་པ་ཐ་དད་པར། །བཅུ་གཉིས་སོགས་པར་མདུན་སོར་གནས། །དཀར་པོའི་མཚན་མར་ལྡན་པ་ལ། །ཕྱི་རོལ་མཚན་མ་འདི་འབྱུང་སྟེ། །པས་པ་ཤ་ནི་
ལྷོད་པ་དང༌། །སྟོབས་ནི་ཡོངས་སུ་བྲི་བ་དང༌། །ཁ་དོག་དག་ཀྱར་ཉམས་པ་དང༌། །དཔྲལ་བ་སེར་བར་འགྱུར་བ་དང༌། །ལུས་ཀྱི་སྟོབས་དང་མགྱོགས་པ་དང༌། །སྤྲོ་བ་དག་ནི་འབྲི་བར་འགྱུར། །བྲང་གི་སྟོབས་ནི་ཟད་པའི་ཕྱིར། །ཕྲག་སོར་གཉེར་མ་འབྱུང་བར་འགྱུར། །ཁ་ཅིག་ཡུངས་ཀར་དཀར་འདྲ་དང༌། །ལ་ལ་སྦྲང་རྩི་འདྲ་བ་དང༌། །ཁ་ཅིག་མཆིང་བུ་ནག་པོ་འདྲ། །དམར་ཞིང་ཟླུམ་པའི་ཐིག་ལེ་ཆགས། །མཆིང་བུ་མདུན་སོ་ལ་སོགས་བར། །བཅོ་ལྔ་ཡན་ཆད་འབྱུང་བ་ཡིན། །མིག་དང་ཕྲག་སོ་འཕྲལ་བ་དང༌། །རྒྱུ་དང་མཆན་ཁུང་དག་དང་ནི། །རྔ་རྩའི་གནས་ནི་གང་ཡིན་པར། །སྤུ་དཀར་གཉེར་མ་འབྱུང་བར་འགྱུར། །རྟ་ཡི་སྤྱོད་པ་འཁྲིག་པ་དང༌། །འདྲེ་བདག་ཀྱང་སྤོང་བྱེད་ཅིང༌། །འགྲོས་དང་སྐད་ཀྱང་ཆུར་བ་དང༌། །ཉམ་ངའམ་ལམ་དུ་བུབ་པར་ནི། །ལོ་ནི་བཅུ་བདུན་པ་དག་ལ། །ཕྱི་རོལ་མཚན་མ་འདི་དག་འབྱུང༌། །སེར་དང་ནག་དང་དམར་བ་འམ། །སྦྲང་བུའི་དབྱིབས་འདྲར་སྦྲང་བུའི་མདོག །བཅོ་བརྒྱད་ནས་ནི་ཉི་ཤུའི་བར། །རྟ་ལ་འདི་འདྲ་འབྱུང་བར་འགྱུར། །དེ་ལ་གཉེར་མ་སྤུ་དཀར་ནི། །སླར་ཡང་འཕེལ་བར་འགྱུར་བ་དང༌། །རྟ་ཡི་སྤྱོད་པ་འཁྲིག་པ་དང༌། །འདྲ་བའང་རྣམ་པར་འདོར་བར་འགྱུར། །དུད་ནི་དུང་གི་མདོག་འདྲ་བར། །མཁས་པ་རྣམས་ཀྱིས་ཤེས་བྱ་སྟེ། །ཟླུམ་དང་ཟླ་བ་ཕྱེད་འདྲ་བར། །སོ་ཡོ་སོ་ལ་འཕྲེད་དུ་ཆགས། །རྟ་དེ་ཉི་ཤུ་རྩ་གཅིག་ནས། །རྩ་གསུམ་པ་ཡི་བར་ཡིན་ནོ། །དེ་ནི་ལྤགས་མཐུག་མདོག་འགྱུར་ཞིང༌། །མཉམ་པོ་ཉམ་ཆུང་རེག་ན་རྩུབ། །གཉེར་མ་དང་ནི་སྤུ་དཀར་སྐྱེ། །རྣ་བ་དང་ནི་མཇུག་མ་ལྷོང༌། །ཉི་ཤུ་རྩ་གསུམ་པ་ཡི་རྟ། །འདི་འདྲར་འགྱུར་བར་ཤེས་པར་གྱིས། །སོ་ཡི་དབུས་སུ་བུག་གང་འབྱུང༌། །དེ་ནི་གཏུན་འདྲར་ཤེས་པར་བྱ། །མདུན་སོ་ལ་སོགས་ཉི་ཤུ་ནི། །རྩ་བཞི་ཡན་ཆད་འབྱུང་ཤེས་བྱ། །འདི་ཡི་ཚིགས་རུས་གང་ཡིན་དང༌། །ཚེའུ་སྤུ་པུས་མོ་མི་སྡུག་ཅིང༌། །སྒྲོག་མཁར་གུག་པར་འགྱུར་བ་དང༌། །ཞུམ་ཞིང་ལེ་ལོས་འགྲོ་བར་འགྱུར། །གཉིད་ཆེ་བར་ནི་འགྱུར་བ་དང༌། །རྩ་ཡང་འདོར་བར་འགྱུར་བ་ཡིན། །རྟ་ནི་ཉི་ཤུ་དྲུག་ལོན་པ། །
འདི་འདྲ་བར་ནི་ཤེས་པར་བྱ། །སོ་མདོག་མི་སྡུག་གྱུར་ནས་ནི། །དེ་ཡི་རྗེས་ལ་འགུལ་བར་འགྱུར། །སྤུ་ནི་ཤོར་བར་འགྱུར་བ་དང༌། །འབྱི་ཞིང་འགྲོས་ནི་ཞེན་པ་དང༌། །མིག་གྱུར་མིག་ནི་འདྲེས་པ་དང༌། །མཆི་མར་བཅས་ཤིང་དམན་པར་ལྟ། །མཚན་མ་འདི་ཡིས་རྟ་དག་ནི། །ཉི་ཤུ་དགུ་པར་ཤེས་པར་བྱ། །ཤ་ཡི་གནས་ནས་རིམ་བཞིན་དུ། །སོ་རྣམས་འབྱུང་བར་འགྱུར་བ་དང༌། །འབྲེལ་པ་ཆད་ཅིང་གྱེས་པ་དང༌། །རྟ་རྒས་མིག་ནི་ཞུམ་པ་དང༌། །མདངས་བྲལ་སེམས་ཁོང་ཆུང་པ་དང༌། །ཉལ་བར་དགའ་ཞིང་སེམས་ཞུམ་དང༌། །ཁ་ཡི་དབུགས་ནི་དྲི་མི་ཞིམ། །རྟ་ཡི་ཁ་ནས་ཁ་ཆུ་འཛག །མིག་ལ་རྒྱུན་དུ་འཛག་པ་དང༌། །ཟོས་པ་དཀའ་བས་འཇུ་བར་འགྱུར། །གང་ཚེ་སུམ་ཅུ་གཉིས་ལོན་པའི། །རྟ་ནི་ལས་ལ་སྦྱོར་མི་ནུས། །ཇི་ལྟར་གླང་པོས་བརྒྱ་ཉི་ཤུ་ཐུབ། །རྔ་མོ་བོང་བུ་ཉི་ཤུ་ལྔ། །བ་ལང་འདི་དག་ཉི་ཤུ་ནི། །རྩ་བཞིས་ལྷག་པ་ཉིད་ཡིན་ལ། །ར་ལུག་ལོ་ནི་བཅུ་གཉིས་ཏེ། །དྲེའུ་ལོ་ནི་ཉི་ཤུ་ཡིན། །མི་དང་གླང་པོ་མཉམ་པ་ལྟར། །དེ་བཞིན་རྟའི་ལོ་སུམ་ཅུ་གཉིས། །ཚེ་ཡི་མཐར་ཐུག་གྱུར་པ་ཡི། །རྩྭ་ཡི་མེ་ལྟར་འཆི་བར་འགྱུར། །ན་ཚོད་ལོ་ཡི་དབྱེ་བ་ནི། །ཇི་བཞིན་རབ་ཏུ་བསྟན་པ་ཡིན། །ཤ་ལི་ཧོ་ཏྲའི་མདོའི་གནས་ལས་ན་ཚོད་བརྟག་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་ཤ་ལི་ཧོ་ཏྲའི་བུ། །མཛའ་ལས་རྒྱལ་གྱིས་ཡང་དྲིས་པ། །རྟ་ཡི་ཚེ་ནི་ཤེས་བྱ་སྟེ། །ལེགས་ལྡན་བདག་ལ་བཀའ་སྩོལ་ཅིག །ཤ་ལི་ཧོ་ཏྲ་གཟི་བརྗིད་ཆེ། །ཕ་ཡིས་བུ་ལ་སླར་སྨྲས་པ། །གང་གི་སོ་ནི་གྱེས་པ་དང༌། །སོ་རྩ་འབྱུང་བར་གྱུར་པ་དང༌། །མིག་ནི་གནས་བསྐྱོད་མཆི་མ་འཛག །ཞུམ་ཞིང་རྩ་བ་ལྷོད་པ་དང༌། །རྣ་རྩ་དང་ནི་ལུས་ཀུན་ཀྱང༌། །རབ་ཏུ་ལྷོད་པར་གྱུར་པ་དང༌། །གཟེ་མདངས་མེད་ཅིང་སེམས་ཁོང་ཆུད། །ཉལ་བར་དགའ་ཞེང་བློ་ཞུམ་དང༌། །ཁའི་དབུགས་དྲི་ནི་མི་ཞིམ་དང༌། །ཁ་ལས་ཁ་ཆུ་འཛག་པའི་རྟ། །དེ་ནི་དང་པོའི་གནས་སྐབས་ལས། །ལྷག་པར་འཚོ་བ་མ་ཡིན་ནོ། །གང་ཞིག་ཚིགས་ནི་མི་སྡུག་དང༌། །ཆིག་གྲང་ཚེའུ་གུག་པ་དང༌། །སྲེ་ལང་པ་ཡང་ཡོ་བ་དང༌། །འགྲོས་
ལྷོད་ལེ་ལོ་ཆེ་གྱུར་བ། །གཉིད་ནི་ཤིན་ཏུ་ཆེ་བ་དང༌། །སོ་ཡི་མདོག་ནི་མི་སྡུག་དང༌། །འདི་འདྲའི་མཚན་ཉིད་ལྡན་པའི་རྟ། །གནས་སྐབས་ཉིད་ལས་ལྷག་མི་འཚོ། །པགས་མཐུག་ཁ་དོག་མི་གསལ་དང༌། །དབང་པོའི་སྟོབས་ཞན་རེག་ན་རྩུབ། །རྣ་བ་རྔ་མ་ཞུམ་གྱུར་པ། །གསུམ་ལས་ལྷག་པར་མི་གནས་སོ། །མི་སྡུག་སྐད་ནི་དམན་པ་དང༌། །གང་ཞིག་སོ་ནི་སྤོམ་པ་དང༌། །དབུགས་འབྱིན་རྒྱུན་རིང་མི་བརྟན་པའི། །རྟ་དེ་བཞི་ལས་ལྷག་མི་འཚོ། །མིག་ནི་ཆུ་ཡིས་ཁེངས་པ་དང༌། །ཅུང་ཟད་ཞུམ་པར་གྱུར་པ་དང༌། །ལུས་ཀུན་བརྟན་པ་ཆུང་བའི་རྟ། །ལྔ་ལས་ལྷག་པར་མི་འཚོ་འོ། །གང་ཞིག་དར་ལ་བབ་པ་ཡི། །མཚན་ཉིད་གཞོན་པའི་ཚེ་ན་ཡོད། །དེ་ནི་གནས་སྐབས་དྲུག་འཐོབ་སྟེ། །རྟ་དང་འདྲ་བར་གྱུར་པ་ཡིན། །སྟོབས་དང་སྒྲོ་བའི་ཡོན་ཏན་ལྡན། །སྐད་གསང་དམན་པར་སྤྱོད་པ་ནི། །རྟ་དེ་གནས་སྐབས་བདུན་ཐོབ་ན། །སྲོག་དང་འབྲལ་བར་འགྱུར་བ་ཡིན། །སྟོབས་ལྡན་སྙིང་སྟོབས་ཕུན་སུམ་ཚོགས། །དྲི་མི་ཞིམ་པར་གྱུར་པའི་རྟ། །དེ་ནི་གནས་སྐབས་བརྒྱད་དུ་ནི། །ཕྱིན་ནས་སྲོག་དང་འབྲལ་བ་ཡིན། །ཚད་དང་སྟོབས་དང་སྙིང་སྟོབས་དང༌། །གཟི་མདངས་བརྟན་པ་རྒྱ་ཆེན་ལྡན། །རླིག་པ་འབྱར་བར་གྱུར་པ་གང༌། །གནས་སྐབས་དགུ་ནས་འཆི་བར་འགྱུར། །རྟ་གང་རྟག་ཏུ་དགའ་ཞིང་སྤྲོ། །ལྟ་སྟངས་སྡུག་ཅིང་བརྐམ་ཆགས་ཆུང༌། །སྟོབས་ལྡན་སྙིང་སྟོབས་ཕུན་སུམ་ཚོགས། །རླིག་འབྲས་ཟླུམ་ཞིང་མི་འཕྱང་རྟ། །དེ་ནི་གནས་སྐབས་བཅུ་པ་རུ། །ཕྱིན་ནས་སྲོག་འདོར་འགྱུར་པ་ཡིན། །སྙིང་སྟོབས་ཁ་དོག་མདངས་མཚན་ཉིད། །ལྡན་ཞིང་འགྲོས་བཟང་སྐད་གསང་སྙན། །ཕུན་ཚོགས་སྟོབས་ལྡན་དྲེགས་པར་ལྡན། །རུས་པ་ཆེ་ཞིང་ཚིགས་སྦོམ་ལ། །མདོག་བཟང་ཤ་མཚམས་ཀུན་ཚོགས་པ། །ཚེ་ཡི་མཐར་ཕྱིན་འགྱུར་བ་ཡིན། །ཤ་ལི་ཧོ་ཏྲའི་མདོའི་གནས་ལས་ཚེ་ཤེས་པར་བྱ་བའི་ལེའུ་སྟེ་ཉི་ཤུ་རྩ་བརྒྱད་པའོ།། །།ཤ་ལི་ཧོ་ཏྲ་དབང་པོ་ཐུལ། །མཆོག་དང་མཆོག་མིན་དེ་ཉིད་ཤེས། །བུ་ཡི་
ཐུ་པོ་མཛའ་ལས་རྒྱལ། །ཉེ་བར་སོང་སྟེ་ཡང་དྲིས་པ། །དྲི་ནི་ཡིད་འོང་དགེ་བ་དང༌། །དེ་བཞིན་དྲི་གང་མི་དགེ་བ། །དེ་རྣམས་ཀྱིས་ནི་འབྲས་བུ་དག །ཅིར་འགྱུར་བ་ནི་བཤད་དུ་གསོལ། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་རབ་བཤད་ཀྱིས། །ཐོས་ནས་ཟུང་ལ་བཅང་བར་གྱིས། །འོ་ཐུག་སྦྱིན་སྲེག་དུ་བ་དང༌། །དེ་བཞིན་ཨུཏྤལ་དམར་པོ་དང༌། །ཙནྡན་ཨ་ཀར་འདྲ་བ་དང༌། །བྱིའུ་རུག་པ་ཨ་རྫ་ཀ །སྦྲང་རྩི་ཆང་དང་འདྲ་བ་དང༌། །དེ་བཞིན་ཆང་གི་དྲི་འདྲ་དང༌། །ས་ལ་གསར་དུ་ཆར་བབ་དྲི། །དེ་བཞིན་སྣ་མ་སྤང་སྤོས་དང༌། །ཨུཏྤལ་པདྨའི་གེ་སར་དང༌། །ཧ་རི་བེ་ཏ་པདྨའི་རྩ། །ཨ་མྲ་བི་བ་ཀ་བི་ཏ་ཐ། །པ་ནས་འབྲས་སྨིན་འདྲ་དང༌། །ནིམ་པ་ཨརྫུ་ཀ་དམ་དང༌། །པ་ར་ལ་དང་ཨ་ཤོ་ཀ །དུག་མོ་ཉུངས་དང་པན་ད་ན། །སྤུ་ན་ག་ཡི་དྲི་འདྲ་དང༌། །ཙམ་པ་ཀ་དང་ར་མ་ལའི། །ལོ་མ་རྒྱ་སྦོས་དྲི་འདྲ་དང༌། །དཔྱིད་ཀའི་ནགས་ཀྱི་ཚོགས་འདྲ་དང༌། །གླང་པོའི་རྡུལ་གྱི་དྲི་འདྲ་དང༌། །གང་ཞིག་དྲི་ནི་ཞི་མ་གྱུར་བའི། །མེ་ཏོག་འབྲས་བུ་ལྡན་པ་དག །དེ་རྣམས་དྲི་ནི་མཚུངས་པ་ཡི། །རྟ་མཆོག་དེ་ནི་བཀྲ་ཤིས་སོ། །རྟག་ཏུ་རབ་ཏུ་དགའ་བ་དང༌། །ཀུན་གྱི་ཡིད་དུ་འོང་བ་དང༌། །དོན་ཀུན་ཡང་དག་སྒྲུབ་བྱེད་ཅིང༌། །སྐལ་ལྡན་རིགས་ནི་འཕེལ་བྱེད་ཡིན། །ཅི་ཙམ་ཡིད་འོང་དྲི་ཡོད་པ། །དེ་ཙམ་ཡིད་འོང་དོན་སྒྲུབ་བྱེད། །ཚེ་རིང་ནད་ནི་མེད་པ་དང༌། །ནོར་དང་དགའ་དང་བདེ་བ་སྐྱེད། །གཡུལ་ལས་རྟག་ཏུ་རྒྱལ་བྱེད་ཅིང༌། །གྲགས་དང་བུ་དང་ཚ་བོ་སྐྱེད། །དེ་ལྟར་དགེ་བའི་དྲི་དག་ནི། །བཤད་ནས་ཅིག་ཤོས་མཉན་པར་གྱིས། །རྟ་ནི་རྡུལ་བར་གྱུར་པ་དང༌། །མ་ད་ཀུ་ན་ཡི་དྲི་འདྲ་དང༌། །བཤང་དང་གཅི་བའི་དྲི་བཅས་དང༌། །དེ་བཞིན་སྒོག་པའི་དྲི་བཅས་དང༌། །བྱི་ལ་རྔ་མོ་ཕག་དང་ནི། །འུག་པའི་དྲི་དང་འདྲ་བ་དང༌། །གང་ཞིག་ཁྱི་རླིག་དྲི་འདྲ་བ། །དགེ་བའི་དྲི་ལ་བརྟེན་མ་ཡིན། །ཉེས་པ་འདི་དག་ལྡན་པ་ཡི། །རྟ་དེ་ཤིས་པ་མ་ཡིན་ནོ། །རྒྱལ་པོའི་དོན་མི་འགྲུབ་པ་དང༌། །དེ་བཞིན་བཀྲ་མི་ཤིས་པ་ཡིན། །རིང་དུ་འཚོ་བར་མི་འགྱུར་ཞིང༌། །ལས་རྣམས་ཀུན་ལ་སྨད་པ་ཡིན། །
དེ་ལྟར་ཤིས་དང་མི་ཤིས་པའི། །དྲི་རྣམས་རབ་ཏུ་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་དྲི་བརྟག་པའི་ལེའུ་སྟེ་ཉི་ཤུ་རྩ་དགུ་པའོ།། །།ཤ་ལི་ཧོ་ཏྲས་བུ་ལ་ནི། །རྟ་ཡི་སྐད་གསང་མཚན་ཉིད་བཤད། །སྲོག་ཅེས་བྱ་བའི་རླུང་ཤུགས་ཀྱིས། །ལྟེ་བའི་རྩ་ནས་བྱུང་གྱུར་ཏེ། །ལུས་ལ་གདོས་པར་གྱུར་ནས་ནི། །ཁར་ཕྱིན་འཚེར་བ་ཞེས་བཤད་དོ། །ཤིན་ཏུ་འཇམ་ཞིང་གཏིང་རིང་ལ། །ཀློད་ཆེ་འདྲིལ་ཞིང་རྒྱུན་མི་འཆད། །འཚེར་བར་བྱེད་པའི་རྒྱལ་བྱེད་རྟ། །རྒྱལ་པོས་ཡང་དག་རྒྱལ་བ་ཐོབ། །རྩུབ་ཅིང་ཉམ་ཆུང་ཀློད་ཆུང་ཆད། །ངར་ངར་པོ་དང་འཛེར་བར་ནི། །མགོ་བོར་ཕྱིན་ཏེ་འཚེར་བ་ཡི། །རྟ་ནི་བསྔགས་པ་མ་ཡིན་ནོ། །དུང་དང་རྔ་ཆེན་སེང་གེ་སྟག །ཤིང་རྟའི་གླིང་བུ་ཁྱུ་མཁྱོག་སྒྲ། །དར་དུར་གླང་པོ་ཀུ་ར་ར། །འབྲུག་དང་རྫ་རྣའི་སྒྲ་འདྲ་ཞིང༌། །ཆུ་བོ་འདྲ་བའི་སྒྲར་ལྡན་པའི། །དེ་ནི་རྟག་ཏུ་འཕེལ་བྱེད་སྟེར། །སྤྱད་ཁུ་བྱ་རྒོད་རྔ་མོ་དང༌། །བྱི་ལ་ཅེ་སྤྱང་སྣོད་ཆག་སྒྲ། །ཁྱི་དང་སྤྲེའུ་འུག་པ་དང༌། །ཤིང་དང་རྡོ་དང་འདྲེ་བ་དང༌། །སེར་བ་ཡི་ནི་སྒྲ་འདྲ་བ། །རྟ་ཡི་ཐ་མ་སྡིག་ལྡན་ཡིན། །སྐད་ཟད་པ་ཡི་རྟ་རྙེད་ན། །མྱུར་དུ་ཉམས་པ་ཐོབ་པར་འགྱུར། །ཐུར་དུ་ཁ་བལྟས་འཚེར་བའི་རྟ། །དེ་ནི་བདག་པོའི་ཕོངས་པ་སྐྱེད། །གཡོན་ལོགས་བལྟས་ཏེ་འཚེར་བ་དག །རིགས་རྒྱུད་ཉོན་མོངས་བྱེད་པ་ཡིན། །བཀྲ་མི་ཤིས་པའི་རྫས་དག་ནི། །མཐོང་ནས་མང་དུ་འཚེར་བྱེད་པ། །རྟ་དེ་མི་ཤིས་བསྐྱེད་པ་སྟེ། །བདག་པོའི་སྡུག་བསྔལ་བྱེད་པར་བཤད། །བོང་བུ་ཡི་ལྟར་གང་ཡིན་པ། །དེ་ནི་བཀྲ་མི་ཤིས་པར་བཤད། །བཀྲ་ཤིས་པ་ཡི་རྫས་མཐོང་ན། །གང་ཞིག་འཚེར་བར་བྱེད་པའི་རྟ། །བདག་པོ་རྣམ་པར་འཕེལ་བྱེད་ཅིང༌། །ནོར་དང་འབྲུ་ནི་རྒྱས་པར་བཤད། །གཡས་ལོགས་སུ་ནི་བལྟས་པའམ། །རེག་ཅིང་འཚེར་བྱེད་གང་ཡིན་པ། །རྟ་དེ་ཞོན་ན་རྒྱལ་པོ་ནི། །ས་རྣམས་ལས་ནི་རྒྱལ་བར་འགྱུར། །མང་པོ་འཚེར་བར་བྱེད་པ་ན། །དེ་ཡི་འཚེར་བ་གསལ་གྱུར་གང༌། །རྟ་དེ་རྗེས་སྒྲོགས་ཞེས་བྱ་སྟེ། །བདག་པོའི་དོན་ཀུན་སྒྲུབ་བྱེད་ཡིན། །གཅིག་པུ་
འཚེར་བར་བྱེད་པ་ཡང༌། །མང་པོ་ལྟ་བུར་མངོན་གྱུར་པ། །རྟ་དེ་གཏིང་རིང་འཚེར་ཞེས་བྱ། །བདག་པོའི་རྣམ་རྒྱལ་འཕེལ་བྱེད་ཡིན། །གང་ཞིག་འཚེར་བ་ཐོས་ནས་ནི། །རྟ་གཞན་འཚེར་བར་བྱེད་པ་དག །དེས་ནི་རྒྱལ་པོའི་རྟ་བརྒྱ་སྟོང༌། །འདོད་པར་བྱེད་པ་ཉིད་ཡིན་ནོ། །གཞན་ཡང་འཚེར་བ་ཐོས་ནས་ནི། །རྟ་གང་ཕྱིས་ནས་འཚེར་བྱེད་པ། །རྟ་དེ་ཞོན་པར་གྱུར་ནས་ནི། །མཛའ་བོ་འཕེལ་བར་བྱེད་པ་ཡིན། །རྒན་དང་བྱིས་པ་ནད་པ་དང༌། །གཅོང་ཅན་ངལ་དང་སྐོམ་པ་དང༌། །བཀྲེས་ཚེ་འཚེར་བར་གྱུར་པ་ཡི། །རྟ་སྐད་བརྟག་པར་མི་བྱའོ། །ཤ་ལི་ཧོ་ཏྲའི་མདོའི་གནས་ལས་སྐད་གསང་བརྟག་པའི་ལེའུ་སྟེ་སུམ་ཅུ་པའོ།། །།རྟ་ཡི་ཚེ་ཡི་དེ་ཉིད་ཤེས། །རིག་བྱེད་ཡན་ལག་མཐར་ཕྱིན་ལ། །འགྲོས་ཀྱི་བྱ་བ་ཤས་པ་ལ། །ཐེ་ཚོམ་སྐྱེས་པ་གར་དགར་སྲིད། །ལེགས་ལྡན་ས་ཡི་བདག་པོ་རྣམས། །གཡུལ་དུ་ཤུགས་མགྱོགས་རྟ་ལ་ནི། །དགའ་ཞིང་བརྟན་པས་རྩོམ་བྱེད་ལ། །རྟ་ལ་གཅེས་པར་འཛིན་པ་ཡི། །མཆོད་པ་དགའ་བ་སྐྱེ་འགྱུར་ལ། །མགྱོགས་པས་ཤིན་ཏུ་ཡིད་རྟོན་འགྱུར། །རྟ་ནི་འདི་ལྟར་མི་མཆོང་བ། །མགྱོགས་ཤུགས་མེད་ན་དགའ་མི་འགྱུར། །འགྲོས་འདེབས་མྱུར་བར་འགྲོ་བ་ལ། །ཞོན་ན་དགའ་བ་སྐྱེད་པར་བྱེད། །ས་ཐག་རིང་དུ་འགྲོ་བ་ན། །འགྲོས་བདེ་བ་ནི་བསྔགས་པ་ཡིན། །རྒྱལ་པོ་དང་ནི་རྒྱལ་བུ་དང༌། །བུད་མེད་སྐྱེད་དེ་བ་ཡིན་པས། །བཞོན་པས་བསྐྱོད་པའི་ནད་རྣམས་ནི། །དེ་འདྲས་འབྱུང་བར་མི་འགྱུར་རོ། །འགྲོས་ཀྱི་ཚུལ་ནི་སྣ་ཚོགས་ལས། །ཤིས་དང་མི་ཤིས་འབྲས་བུ་འབྱུང༌། །ལེགས་ལྡན་འགྲོས་ཀྱི་ཚུལ་དག་ནི། །རྟ་ལ་གང་ཡོད་བདག་ལ་གསུངས། །ག་རྒའི་ཚིག་དེའི་རྗེས་ལ་ནི། །ཤ་ལི་ཧོ་ཏྲས་སླར་སྨྲས་པ། །མདོར་ན་ནེའུ་ལེ་སྲེག་པ་དང༌། །རྨ་བྱ་དང་ནི་མཚུངས་པར་འགྲོ། །ཇི་ལྟར་ནེའུ་ལེའི་རྐང་པ་ནི། །མྱུར་དུ་འདོར་བར་བྱེད་པ་ནི། །བར་མཚམས་མེད་པ་ལྟ་བུར་མངོན། །རང་གི་སྤྱི་བོ་ཅུང་ཟད་འགུལ། །མགོ་མགྲིན་སེང་གེ་ལྟར་འདེགས་ཤིང༌། །རྒྱབ་དང་ལུས་ནི་བརྟན་པར་གནས། །མཇུག་ཚོས་རྒལ་ཚིགས་མི་འགུལ་ཞིང༌། རྔ་མའང་འགུལ་བར་མི་བྱེད་གང༌།།
དེ་ནི་ནེའུ་ལེའི་འགྲོས་ཅན་དུ། །བློ་དང་ལྡན་པས་ཤེས་པར་བྱ། །འཁྲུལ་པ་མེད་ཅིང་གཡོ་བ་མེད། །ལམ་དུ་མ་ཡེངས་བྱེད་པ་དང༌། །ཞོན་པའི་མི་ནི་བརྟན་བཟང་ངམ། །གྲུ་ལ་གནས་པ་སྙམ་སེམས་ཞིང༌། །གང་གི་ཤུགས་ནི་འདོར་བ་ན། །ཞོན་པ་སྤུ་རྩེ་ཙམ་མི་འགུལ། །ལམ་རིང་དུ་ནི་སོང་གྱུར་ཀྱང༌། །ཆད་པར་འགྱུར་པ་མེད་པ་དང༌། །ལམ་གྱིས་ངོམས་པ་མེད་ལྟར་འགྲོ། །དབྱིབས་ནི་ལེགས་པར་གྱུར་པའི་རྟ། །མེ་མདག་ལ་ནི་རེག་པ་ལྟར། །ལམ་དུ་མྱུར་དུ་འགྲོ་བ་དང༌། །སེང་གེ་ལྟ་བུར་ལུས་འདེགས་ཤིང༌། །མཆུ་ཡིས་ནམ་ཚོང་བརྐོ་པ་འདྲ། །ས་ལ་རྟོག་བྱེད་དེ་བཞིན་དུ། །ལུས་ནི་འདེགས་པ་ལྟར་བྱེད་དང༌། །ཞོན་པ་པོ་ནི་དགའ་སྐྱེད་པ། །གང་མ་སྲེག་གི་འགྲོས་བསྟེན་ཡིན། །གང་ཞིག་མགོ་དྲང་ལ་འཁུམས་དང༌། །མགོ་དང་སྐེ་མགྲིན་རབ་ཏུ་རྐྱོང༌། །བདག་པོའི་སེམས་དང་རྗེས་མཐུན་པར། །ལམ་དུ་མཉམ་པར་ལྟ་བ་དང༌། །རྟག་པར་ལམ་དུ་མི་བུབ་ཅིང༌། །ཆུ་ཡི་ནང་དུ་མི་ནུབ་ལ། །བརྟན་ཞིང་མ་འཆོལ་འགྲོ་བའི་རྟ། །རྨ་བྱའི་འགྲོས་ལ་བརྟེན་པ་ཡིན། །གསུམ་པོ་འདི་དག་འགྲོས་ཀྱི་ནི། །གཙོ་བོ་ཡིན་པས་ཤིས་པ་འཐོབ། །དེ་ལས་གཞན་པའི་འགྲོས་གང་ཡིན། །ཕལ་ཆེར་སྨད་པར་བྱ་བ་ཉིད། །འགྲོས་ཀྱི་མཚན་ཉིད་ཕུན་སུམ་ཚོགས། །རྟ་མཆོག་རྙེད་པར་གྱུར་ན་ནི། །རྒྱལ་པོ་དགྲ་ལས་རྒྱལ་འགྱུར་ཞིང༌། །ལམ་དུ་དུབ་པར་མི་འགྱུར་རོ། །འགྲོས་བཟང་རྟ་ལ་བདག་པོ་ཡིས། །ལྷག་པར་དགའ་བར་བྱ་བ་ཡིན། །དེ་བས་རྟ་ཡི་བསྟན་བཅོས་ནི། །ཤེས་པས་འགྲོས་ནི་བརྟག་པར་བྱ། །ཕག་དང་མ་ཧེ་རྔ་མོ་དང༌། །ཁྱི་སྤྲེའུ་རུས་སྦལ་གླང་སེང་འགྲོས། །གང་ཡང་བྱི་ལ་ལྟར་འགྲོ་བ། །རྟ་དེ་མི་ཤིས་ཡིན་ཞེས་བྱ། །ཚེའུ་ཚེ་ཚིག་གྲང་དཔུང་པ་བརླ། །འདེགས་པར་དཀའ་ཞིང་འགྲོས་ཞན་ལ། །འཁུམས་ཤིང་རྐང་འཆོལ་འགྲོ་བ་དང། །རྒྱབ་ངན་བཞོན་པར་མི་བདེ་དང༌། །གོམས་སྟེངས་འཇོག་ཉེས་བུལ་བས་འགྲོ། །དེ་ནི་ཡོངས་སུ་སྤང་པར་བྱ། །དབུགས་རྒོད་སླར་བསྡུ་དཀའ་བ་དང༌། །ལམ་ནི་ཐུང་དུས་རྟག་ཏུ་དུབ། །སྙིང་སྟོབས་ཆུང་སྟེ་རྟ་མཁན་གྱིས། །དགྲ་ཡི་བསམ་པ་འགྲུབ་དེ་སྤང༌། །རྟ་གང་མགོ་བོ་
འདེགས་པ་དང༌། །རྨིག་པ་མཐོ་བར་འདེབས་པ་དང༌། །བདག་པོ་དགའ་བར་འགྲོ་བྱེད་པ། །འགྲོས་དེ་མཆོག་ནི་ཡིན་པར་བཤད། །མགྱོགས་ཤུགས་མདའ་ལྟར་རྒྱུག་བྱེད་ཅིང༌། །ལུས་ཀུན་དུབ་པ་མེད་པ་དང༌། །སྡུད་ཅིང་རིང་དུ་སྙོད་བྱེད་པ། །འགྲོས་དེ་མཆོག་ནི་ཡིན་པར་བཤད། །རྐང་འཇོག་ལྷག་ཆད་མི་སྙོམས་ཤིང༌། །དེ་བཞིན་མྱུར་ཆེས་བུལ་ཆེས་པ། །ཤིན་ཏུ་འདུས་དང་ཤིན་ཏུ་སྐྱེ། །འགྲོས་ཀྱི་ཉེས་པ་འདི་དྲུག་ཡིན། །ཤ་ལི་ཧོ་ཏྲའི་མདོའི་གནས་ལས་འགྲོས་ཀྱི་བཟང་ངན་ཤེས་པར་བྱ་བ་སྟེ་ལེའུ་སུམ་ཅུ་སོ་གཅིག་པའོ།། །།ཤ་ལི་ཧོ་ཏྲ་ཡིད་གཞུངས་པས། །ཚངས་པ་མེ་ཡི་རྒལ་འདྲ་ལ། །ལུས་ཀྱི་འཕེལ་བའི་བྱ་བ་ནི། །མཛའ་ལས་རྒྱལ་གྱིས་ཡང་དྲིས་པ། །ཐོག་མ་ཐ་མ་བར་མར་ནི། །ལུས་འཕེལ་བར་ནི་ཇི་ལྟར་འགྱུར། །འགྲོས་དང་འགྲོས་གཞན་བཅས་བར་ནི། །འདི་དག་ཤེས་བར་འཚལ་ལགས་སོ། །རྟ་ནི་ཇི་ལྟར་རྒྱུ་བ་དན། །རྟེན་དུ་ཇི་ལྟར་གྱུར་པ་དག །འདི་དག་ཤེས་པར་འཚལ་ལགས་སོ། །བུ་ཡིས་དེ་སད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །འདི་ན་ནམ་མཁའ་ས་དང་རླུང་དང་མེ་དང་ཆུ་དང་ས་རྣམས་སྣང་གི །སེམས་ཞེས་བྱ་བ་དྲུག་པ་དང་འདྲེས་པ་རྒོད་མའི་མངལ་དུ་ཞུགས་ཤིང་གཅིག་ཏུ་འགྱུར་བ་ལས་ལུས་སུ་འབྲེལ་པ་ཡོངས་སུ་རྫོགས་པར་བྱེད་པར་འགྱུར་རོ། །དེ་ནས་དུས་ཡོངས་སུ་སྨིན་ཅིང་ཚོང་བ་ན། མངལ་གྱི་དྲི་མ་དང་བྲལ་བའི་ཚུལ་གྱིས་སྐྱེ་ཟིང་འབྱུང་བ་ན། །ཤ་མའི་དྲི་མས་ལུས་ལ་གོས་ཤིང༌། ལུས་དང་སེམས་ཉོན་མོངས་པ་ལས་ལུས་བདེ་བར་གནས་པ་ན་གྲང་བ་དང་ཚབ་དང་ཕྲད་པའི་ཚོར་བ་བདེ་སྡུག་བདག་ཉིད་ཀྱིས་མངོན་པར་ཤེས་པར་འགྱུར་རོ། །དེ་ལ་རྒྱུ་གང་གིས་འབྱུང་བ་ཆེན་པོ་ལྔ་དང་ནང་གི་བདག་ཉིད་དྲུག་པོ་ཕན་ཚུན་འདྲེས་པར་གྱུར་པ་སྟེ། ས་བོན་དང་འབྲས་བུའི་ཚུལ་དུ་ཉམས་པ་མེད་པར་གནས་པར་འགྱུར་རོ། །རྟ་དེ་དེ་ལྟར་བྱུང་བ་ན་ཤིང་ལྟར་རིམ་གྱིས་འཕེལ་བར་འགྱུར་ཞིང་ཡོན་ཏན་དུ་མ་དང་ལྡན་པར་འགྱུར་རོ། །དེ་བཞིན་དུ་སྲེད་པའི་དབང་གིས་དང་པོ་ཡུལ་ལ་འཇུག་པར་ཞུས་པ་དང༌། རླུང་འཐོར་བས་དབུས་ན་ཕན་ཚུན་དུ་ཁྱབ་པ་ན། ལུས་ཀྱི་འགྲོས་དང་གོམ་པའི་ཤུགས་རིམ་གྱིས་འབྱུང་བར་འགྱུར་ཏེ།
འགྲོས་གང་དང་གང་གིས་དང་པོར་མའི་རྗེས་སུ་འབྲང་ཞིང་ཟས་འདོད་པར་གྱུར་པ་དེ་ནི་ལུས་འཕེལ་བ་ཞེས་བྱའོ། །དེ་བཞིན་དུ་གཅིག་བུ་རྒྱུ་ཞིང་རྗེས་སུ་འབྲང་བའི་འགྲོས་ཀྱིས་འགྲོ་བར་བྱེད་པ་དང༌། རིམ་གྱིས་འཕེལ་བར་གྱུར་པ་ན་ཡང༌། ལུས་དང་རྗེས་སུ་མཐུན་པའི་སྟོབས་དང་འགྲོས་དང༌། རྒྱུག་པ་དང༌། རྩེ་བ་དང༌། མཆོང་བ་དང༌། དཀྱུ་བ་དང༌། འགྲོས་དམ་པའི་ཡོན་ཏན་དང་ལྡན་པ་དེ་ནི་དང་པོ་གཅིག་ཏུ་རྒྱུ་ཞིང་རྗེས་སུ་འཕྲེང་བ་ཞེས་བྱའོ། །དེ་ལ་རྐང་པ་འཇོག་པའི་འགྲོས་ནི་རྣམ་པ་བཞི་སྟེ། འདི་ལྟ་སྟེ་སྤོ་ཞིང་འགྲོ་བ་དང༌། བཞག་པ་མཉམ་པས་རྗེས་སུ་འགྲོ་བ་དང། གཞོགས་དུད་ཅིང་འགྲོ་བ་དང༌། སྤྱོད་པ་གཅིག་གིས་རྗེས་སུ་འགྲོ་བའོ། །དེ་དག་ནི་རང་བཞིན་གང་ཡིན་པ་དེ་ཉེ་བར་བཤད་པར་བྱའོ། །སྔ་མ་གཉིས་དང་ཕྱི་མ་གཉིས། །རྐང་པ་མཉམ་པར་འགྲོ་བྱེད་ཅིང༌། །རང་གི་ལུས་ནི་སྤོ་བ་དག །དེ་ནི་སྤོ་བའི་འགྲོས་ཡིན་ནོ། །རྩིབ་ལོགས་གཉིས་ནི་མཉམ་གནས་ཤིང༌། །རེས་ཀྱིས་ཉེ་བར་གནས་བྱེད་ལ། །རིམ་གྱིས་རྨིག་པ་ཉེ་བར་འདེགས། །དེ་ནི་གཞོགས་མཉམ་འགྲོ་བ་ཡིན། །མིག་སྦྲུག་འཁྲུལ་བ་མེད་པར་ནི། །ལུས་ནི་དད་ཅིང་རྒྱུ་བྱེད་ལ། །སྤྱོད་པ་གཅིག་གིས་མི་འགྲོ་བ། །གཞོགས་དུས་འགྲོས་ནི་དེ་ཡིན་ནོ། །གང་ཞིག་ཡན་ལག་རེས་མོས་ཀྱིས། །འཇོག་ཅིང་འདེགས་པར་བྱེད་པ་དང༌། །རྐང་པ་གསུམ་ནི་ཤས་ཆེར་འདེགས། །རྟ་ནི་སྤྱོད་པ་གཅིག་འགྲོས་ཡིན། །དེ་བཞིན་དུ་རི་དག་ས་དང༌། མ་ཧེ་དང༌། བྱི་ལ་དང༌། ཁྱི་དང༌། དོམ་དང༌། སྟག་དང༌། ནེའུ་ལེ་དང༌། གླང་པོ་ཆེ་དང༌། ཁྱུ་མཆོག་དང༌། རྔ་མོ་དང༌། དྲེའུ་དང༌། བོང་བུ་དང༌། ར་དང༌། ལུག་དང༌། ཨེ་ནེ་ཡ་དང༌། ས་ལ་དང༌། སྦྱང་ཀུ་དང༌། གཞན་ཡང་དེ་ལྟ་བུའི་རྣམ་པ་དག་ཀྱང་ལུས་མཆོག་དང༌། བར་མ་དང༌། ཐ་མའི་དབྱེ་བའི་ཚད་ཀྱིས་རྐང་བཞི་བ་རྣམས་ཀྱི་ལུས་འཕེལ་བའི་རྣམ་པར་དབྱེ་བ་བཤད་པ་ཡིན་ནོ། །ཤ་ལི་ཧོ་ཏྲའི་མདོའི་གནས་ལས་ལུས་འཕེལ་བ་ཞེས་བྱ་བའི་ལེའུ་སྟེ་སུམ་ཅུ་སོ་གཉིས་པའོ།། །།ཐུབ་མཆོག་ཤ་ལི་ཧོ་ཏྲ་ལས། །ལེགས་ཐོས་ཀྱིས་ནི་ཡང་དྲིས་པ། །ལེགས་ལྡན་རྒྱུག་པའི་མཚན་ཉིད་ནི། །མཉན་པ་རུ་ནི་འཚལ་ལགས་སོ། །འདིར་ནི་སྐྱོན་གང་ཡོན་ཏན་གང༌།།
འདི་རྣམས་རྣམ་པ་དུ་རུ་གྲགས། །མཚན་ཉིད་གང་དག་ཡིན་པ་དག །འདི་དག་ཐམས་ཅད་ཤེས་པར་འཚལ། །དེ་སྐད་སྨྲས་ཚེ་དྲང་སྲོང་མཆོག །ཤ་ལི་ཧོ་ཏྲས་སླར་སྨྲས་པ། །ཁྱེད་ཀྱི་ཡིད་ལ་གང་གནས་པ། །དེ་ནི་བཤད་ཀྱིས་མཉན་པར་གྱིས། །རྒྱུག་པ་མེད་པར་རྟ་རྣམས་ནི། །རྩིག་པ་ཤིང་འདྲ་བེམས་པོ་ཡིན། །རྒྱལ་པོའི་སྟེ་ཚོམས་གསུམ་པོ་ནི། །སྒྲུབ་ལ་དེ་ནི་གཙོ་བོ་ཡིན། །དེ་བས་རྒྱུག་པའི་མཚན་ཉིད་ནི། །བཞི་བཅུ་དག་ཏུ་ཤེས་པར་བྱ། །དང་པོར་གཏང་བའི་དོན་དུ་ནི། །ཉེས་པ་ཉི་ཤུ་ལྔ་ཤེས་བྱ། །ཡང་དག་གཞག་པར་བྱ་བ་ཡི། །ཡོན་ཏན་བཅོ་ལྔ་ཉིད་དུ་བཤད། །དེ་ལྟ་བུ་ཡི་རྒྱུག་པ་ནི། །ཟླུམ་པོ་དག་ཏུ་ཉེ་བར་སྦྱར། །རང་བཞིན་ལེགས་པར་ཤེས་བྱ་སྟེ། །གཞན་དུ་དེ་ནི་དོན་མེད་འགྱུར། །བརྡེག་ན་ལན་བྱེད་དང་པོ་སྟེ། །རྡེག་བྱེད་གཞན་ལ་དོགས་པ་དང༌། །སྐེ་བ་གཅུ་དང་རྔ་མ་བསྐྱོད། །མི་སྡུག་ལྟ་ཞེང་འབྲུ་ཚུགས་ལྟ། །མགོ་མདུད་རྣ་བ་མི་མཉམ་དང༌། །སྡིགས་དང་རྡེག་པར་གྱུར་ན་ཡང༌། །མགོ་ནི་མི་བརྟན་གྱུར་པ་དང༌། །འདུ་ཤེས་མི་གསལ་དེ་ལས་གཞན། །དབྱིག་པ་ལ་སྔངས་རྐོ་བྱེད་དང༌། །སོ་ནི་སྒྲ་དང་བཅས་པར་འཆའ། །གོམ་པ་དུད་དང་འཁྱོར་བ་དང༌། །བཅིང་དང་ཁྲོ་བ་དེ་ལས་གཞན། །གཞན་ཡང་བཅིངས་པས་རྨོངས་པ་དང༌། །སྐེ་སྐྱོད་བརྟན་པར་མི་གནས་དང༌། །དོགས་བཅས་ཡན་ལག་འཁྱོར་བ་དང༌། །ཡན་ལག་རེངས་དང་ཡན་ལག་ཆུད། །ལུས་ནི་བརྟན་པར་མི་གནས་དང༌། །དེ་བཞིན་གོམ་པ་མི་བརྟན་དང༌། །དབྱིབས་མི་མཉམ་དང་དབྱིབས་མི་སྡུག །འདི་དག་རྟ་ནི་ངན་པར་བཤད། །འདི་དག་རྣམས་ཀྱི་མཚན་ཉིད་ནི། །བཤད་པ་ང་ལས་བཟུང་བར་གྱིས། །གང་ཞིག་རྡེག་ན་སླར་རྡེག་པ། །རྡེག་ན་ལན་བྱེད་ཡིན་ཤེས་བྱ། །གང་ཞིག་རྡེག་པར་བྱེད་པ་ལ། །དོགས་འདོད་འདོག་པ་ཅན་ཞེས་བྱ། །སྐེ་བ་རང་དགར་འཇོག་པ་ནི། །སྐེ་གཅུ་རྟ་ཡི་ཐ་མ་ཡིན། །རྔ་མ་བརྐྱང་དང་སྤྲུག་བྱེད་ཅིང༌། །ཡང་ཡང་བསྐྱོད་པ་རྔ་སྤྲུགས་ཡིན། །རྟག་ཏུ་རྡེག་པར་འདོད་པ་ནི། །མི་སྡུག་རྟ་ཞེས་དེ་བཤད་དོ། །གང་ཞིག་བསླབས་ཀྱང་ཅུང་ཟད་ཙམ། །མི་སྟོང་སེམས་ཀྱིས་སྟོང་པར་འདུག །དེ་ནི་བལྟ་བར་སྡུག་པ་སྟེ། །དེས་ན་འབྲུ་ཚུགས་ལྟ་ཞེས་བཤད། །
གང་ཞིག་རྟག་ཏུ་སལ་བལྟ། །མགོ་དུད་པ་ནི་ཡིན་ཞེས་བྱ། །བརྡེགས་སམ་གཞུས་པ་ན། །ཁྲོས་པས་རྣ་བ་འཆོལ་བར་འཇོག །དེ་ནི་རྣ་བ་མི་མཉམ་ཡིན། །རང་བཞིན་གྱིས་ཡོད་མ་གཏོགས་སོ། །གང་ཞིག་སྤྱི་བོ་རྟག་ཏུ་བསྐྱོད། །དེ་ན་མགོ་མི་བརྟན་ཞེས་བྱ། །གང་ཞིག་རྟ་ནི་མི་དྲན་པ། །དེ་ནི་འདུ་ཤེས་མི་གསལ་ཡི་ན། །ལྕག་ལ་སོགས་པ་གཅིག་གིས་ཀྱང༌། །གནོད་མེད་དབྱིག་པ་ལའང་སྔངས་ཡིན། །ལག་པ་གཉིས་ཀྱིས་ས་རྐོ་བ། །དེ་ནི་རྐོ་བྱེད་ཞེས་བཤད་དོ། །ཁྲོ་བས་སོ་ནི་འཆའ་བྱེད་པ། །སོ་སྒྲ་འཆའ་ཞེས་བྱ་བར་བཤད། །རྟ་གང་འདུལ་བར་བྱེད་པ་ཡི། །རྗེས་སུ་ཅུང་ཟད་མི་འཇུག་ཅིང༌། །གོམ་པ་ལ་ལར་སྡུད་པ་དང༌། །ལ་ལར་ཡང་ནི་འཁྱོར་བྱེད་པ། །མི་མཉམ་པ་ཡི་འགྲོས་ཅན་ཏེ། །གོམ་པ་སྡུད་ཅིང་འཁྱོར་བ་ཡིན། །རོ་སྟོད་རོ་སྨད་གདོང་བའམ། །ཡིད་ན་ལུས་ཀྱི་བར་དག་ཏུ། །གང་ཞིག་བཅིངས་ན་མྱུར་དུ་འཁྲུག །བཅིངས་ན་ཁྲོ་བའི་རྟ་རུ་འདོད། །གང་ཞིག་ཐག་པས་བཅིངས་ན་ནི། །བཅིངས་པས་བློ་གྲོས་རྨོངས་གྱུར་ཡིན། །རོ་སྨད་ཀྱི་ནི་ལུས་བྱེད་འགུལ། །བསྐྱོད་པས་རྐེད་པ་སྐྱོད་བྱེད་ཡིན། །འདིས་ནི་བདག་ལ་རྡེག་སྙོམ་སྟེ། །འདུལ་སྦྱོང་མཁན་ལ་སྔར་རྡེག་བྱེད། །དེ་ནི་དོགས་པ་ཅན་ཞེས་བྱ། །ར་རོ་བ་ལྟར་ཡན་ལག་ཀུན། །ཕན་ཚུན་འཆོལ་བར་འགྲོ་བྱེད་པའམ། །གཟེར་བཅས་ལྟ་བུར་བྱེད་པའི་རྟ། །དེ་ནི་ཡན་ལག་འཁྱོར་ཞེས་བྱ། །ཡན་ལག་ཀྱང་ནི་འཁྱོར་བྱེད་ཅིང༌། །ཡང་དང་ཡང་དུ་རེངས་པ་དག །དེ་ནི་ཡན་ལག་རེངས་ཡིན་པའམ། །ཡང་ན་རྟག་ཏུ་ལུས་མི་འགྱུར། །གང་གི་ཡན་ལག་རབ་སྲ་ཞིང༌། །བརྡེག་ཀྱང་ཚོར་བ་མེད་པ་དང༌། །དགའ་བས་བྱ་བ་ལ་འཇུག་པ། །ཡན་ལག་རྩུབ་པར་དེ་བཤད་དོ། །གང་གི་ལུས་ཀྱི་དབྱིབས་དག་ནི། །ཚུལ་གཅིག་དུ་ནི་མི་མངོན་ཞིང༌། །ལུས་ཀྱང་སྦྲུགས་པར་བྱེད་གྱུར་པ། །དེ་ནི་བརྟན་མི་གནས་ཞེས་བྱ། །རྟ་གང་དང་པོར་གཞན་དུ་འགྲོ། །དེ་ཡི་རྗེས་ལའང་གཞན་འགྲོ་བ། །འགྲོས་ནི་གཏན་ནས་མེད་པའི་ཕྱིར། །དེ་ནི་གོམ་མི་བརྟན་ཞེས་བྱ། །གང་ཞིག་ལུས་ནི་འཛུམ་པའམ། །གང་ཞིག་ལུས་ནི་མི་མཉམ་པ། །དེ་ནི་དབྱིབས་མི་མཉམ་ཞེས་བྱ། །ལམ་དུ་འཇུག་
བྱེད་འོས་མ་ཡིན། །རྒྱབ་ནི་ཤིན་ཏུ་རིང་གྱུར་ཅིང༌། །ལུས་ནི་རྔ་མོ་དང་འདྲ་བ། །དབྱིབས་མི་སྡུག་པར་ཤེས་བྱ་སྟེ། །བསླབ་དང་མཛེས་པ་མེད་པ་ཡིན། །འདི་དག་སྐྱོན་ཅན་ཡིན་པས་ན། །མཁས་པས་སྐྱོན་ནི་ཤེས་པར་བྱ། །ད་ནི་ཡོན་ཏན་བསྟན་པ་ཡི། །མཚན་ཉིད་དག་ནི་བཤད་བྱ་སྟེ། །རྣ་བ་མཇུག་མ་རྒལ་ཚིགས་རྣམས། །ཡོན་ཏན་ཆེ་ཞིང་ཡིད་གཞུངས་ལས། །ཡིད་གཞུངས་སེམས་ནི་དེ་ཉིད་ལ། །ངེས་པར་སྦྱོར་བ་ཉིད་ཡིན་ནོ། །ལུས་ལ་ཡེངས་པ་མེད་ཉིད་དང༌། །ཡོན་ཏན་ཀུན་དང་ལྡན་པ་དག །ཡེངས་མ་དག་དང་བྲལ་བ་ཉིད། །མ་ཡེངས་ཞེས་བྱ་གཉིས་པ་ཡིན། །རོ་སྟོད་མཆོག་ཏུ་ཐེལ་ཀ་ཆེ། །ཤུགས་ཀྱིས་ཡོངས་སུ་རྒྱུག་བྱེད་ཅིང༌། །ལྟེ་བར་ལྟ་བར་བྱེད་པ་འདི། །ཡོན་ཏན་གསུམ་པར་ཤེས་པར་བྱ། །མཁའ་ལ་འགྲོ་བ་ལྟར་བྱེད་ཅིང༌། །རྒྱུག་པ་ལ་ནི་མངོན་དགའ་ལ། །བར་འཚམས་མེད་པ་ལྟར་རྒྱུག་པ། །ཡོན་ཏན་ཆེན་པོ་བཞི་པ་ཡིན། །དང་པོ་དབུས་དང་ཐ་མ་དུ། །ཆ་མཉམ་པར་ནི་མངོན་རྒྱུག་ཅིང༌། །དམན་དང་བར་མའང་མ་ཡིན་པར། །རྟ་ཡི་ཡོན་ཏན་ལྔ་པ་ཡིན། །རབ་ཏུ་ཐུང་མིན་རིང་མ་ཡིན། །ཡེངས་པ་དག་ཞི་མེད་པར་ནི། །རྟ་ནི་གང་ཞིག་རྒྱུག་བྱེད་ཅིང༌། །རྟག་ཏུ་ལེགས་གནས་དྲུག་པ་ཡིན། །གང་ཞིག་དང་པོར་ཞོན་པ་ན། །དྲང་པོར་གཞུ་འདོམ་བརྒྱར་འགྲོ་ཞིང༌། །ཤུགས་ཀྱིས་མྱུར་དུ་རྒྱུག་བྱེད་པ། །ཡོན་ཏན་དེ་ནི་བདུན་པར་བཤད། །རྐང་པ་འདོར་བ་མཁའ་ལ་ནི། །འགྲོ་བར་མང་དུ་སྣང་བྱེད་ཅིང༌། །ས་ཡི་ཆ་ནི་ཅུང་ཟད་སྣང༌། །ཡོན་ཏན་དེ་ནི་བརྒྱད་པར་འདོད། །རྟ་ནི་གང་ཞིག་ཡན་ལག་ལ། །རེག་པ་ཙམ་གྱིས་རྒྱུག་བྱེད་ཅིང༌། །བསྐུལ་བ་ཙམ་གྱིས་སེམས་ཤེས་པ། །ཡོན་ཏན་དམ་པ་དགུ་པ་ཡིན། །གང་གི་དང་ནི་ཚད་ལྡན་པར། །མཛེས་པར་བྱུགས་ནའང་སྣང་གྱུར་འདྲ། །སྲབ་ནི་ལེགས་པར་འཚོ་གྱུར་བ། །དེ་ནི་བཞིན་བཟངས་ཡིན་ཞེས་བྱ། །མ་འཆོལ་བར་ནི་འགྲོ་བྱེད་ཅིང༌། །མཁའ་ལ་འགྲོ་བ་ལྟར་སྣང་བ། །མཚན་ཉིད་གང་ཡིན་མ་ཞེན་པ། །དེ་ནི་ཡོན་ཏན་བཅུ་གཅིག་པ། །བྱ་བ་ལ་བསྐུལ་ཚེ་ན་ནི། །མྱུར་དུ་ལྡང་ཞིང་འཇུག་བྱེད་ལ། །ཚིག་གི་འགྱུར་དུ་གོ་བྱེད་པ། །ཡོན་ཏན་མཆོག་སྟེ་བཅུ་
གཉིས་པ། །ང་རྒྱལ་མེད་པར་ལྡང་བྱེད་ཅིང༌། །འབད་པ་མེད་པར་ལྡོག་པ་དང༌། །ཡོན་ཏན་གང་གི་ཡོན་ཏན་དང༌། །ལྡན་ཞེས་བཅུ་གསུམ་པ་ཡིན་ནོ། །འཕང་མཁན་བྱ་བ་དག་གིས་ནི། །མདའ་ཡིས་བསྣུན་པར་གྱུར་ན་ཡང༌། །ཞུམ་པ་མེད་པར་འགྲོ་བྱེད་པ། །ཡོན་ཏན་བཅུ་བཞི་པ་ཡིན་ནོ། །ཡོན་ཏན་གང་གི་ཤུགས་ཀྱིས་ནི། །བྱ་དང་འདྲ་བར་འགྲོ་བྱེད་ཅིང༌། །ཤུགས་ཀྱི་རྒྱུན་གྱིས་རྒྱུག་བྱེད་པ། །ཡོན་ཏན་འདི་ནི་བཅོ་ལྔ་བའོ། །དེ་ལྟར་ཡོན་ཏན་ཡང་དག་བཤད། །མཚན་ཉིད་ཅུང་ཟད་ལྡན་པའང་རུང༌། །ཡོན་ཏན་འདི་དག་ཡང་དག་ལྡན། །རྟ་མཆོག་གང་ཞིག་ཐོག་མཐར་ནི། །ཡོན་ཏན་རྟག་ཏུ་མི་འགྱུར་ཞིང༌། །ལེགས་པར་རྒྱུག་པ་བྱེད་པ་ཡིན། །རྟ་དེ་རབ་ཏུ་བསྔགས་པ་ཡིན། །ཁྱེད་ལ་རྒྱུག་པ་དེ་ལྟར་བཤད། །གཞན་དག་དྲིས་པ་ཅི་ཞིག་བྱ། །ཤ་ལི་ཧོ་ཏྲའི་མདོའི་གནས་ལས་རྒྱུག་པ་བརྟག་པའི་ལེའུ་སྟེ་སུམ་ཅུ་སོ་གསུམ་པའོ།། །།ལེགས་ལྡན་གྲ་མ་ཅན་ཞེས་པ། །འདི་ནི་གང་ཞིག་རྒྱུ་གང་ལགས། །མཚན་ཉིད་གང་གིས་དེ་ཤེས་བྱ། །དེ་ཡི་གསོ་བ་ཇི་ལྟ་བུ། །དེ་ལྟར་བུ་ཡིས་དྲིས་པ་ན། །ཤ་ལི་ཧོ་ཏྲ་དྲང་སྲོང་ཆེས། །དོན་གྱི་རྗེས་སུ་འགྲོ་བའི་ཚིག །གྲ་མ་ཅན་མཚན་ཉིད་འདི་སྨྲས། །གྲ་མ་རྩེར་བྱར་འོས་པ་སྟེ། །དེ་ན་ངོ་ཚ་འཇིག་སོགས་ཡིན། །དེ་རྣམས་གང་ཞིག་བྱེད་པ་ནི། །གྲ་མ་ཅན་ཞེས་དེ་བཤད་དོ། །དེ་བས་འཇིགས་མེད་ཚུལ་ངན་དང༌། །བརྩེ་མེད་རྩུབ་ཅིང་མི་སྲུན་པ། །འབྲས་བུའི་གྲ་མ་དང་འདྲ་བའི། །ཉེས་པ་འཛིན་པས་དེ་སྐད་བཤད། །དེ་བས་ཉེས་པ་འདི་ལྡན་པའི། །རྟ་ཡང་གྲ་མ་ཅན་ཞེས་བྱ། །རྟ་གང་གཏུམ་ཞིང་མི་སྲུན་པ། །ཁྲོ་བར་གྱུར་པ་གང་ཞིག་ཡིན། །དེ་ཀུན་གྲ་མ་ཅན་ཡིན་ཏེ། །དེ་ནི་རང་དབང་འགྱུར་མ་ཡིན། །ཆས་ན་འཁྲུག་ཅིང་རྫས་མཐོང་སྐྲག །འགྱུར་ཞིང་མི་སྲུན་བྱེད་པ་དང༌། །ཞོན་དུ་མི་བཏུབ་པ་དང་ནི། །ཞོན་ནས་འཕག་པར་བྱེད་པ་དང༌། །འཁྲུག་ཅིང་རིང་ནས་སོས་འདེབས་ལ། །ཟ་ཞིང་ལྟུང་བར་བྱེད་པ་དང༌། །ལྕག་གིས་གཞུས་ཀྱང་འདུག་བྱེད་ཅིང༌། །འཕྲ་བ་ཡང་དང་ཡང་དུ་བརྡེག །འདུལ་སྦྱོང་མཁན་ཡང་སྐྱུར་བྱེད་ཡིན། །འགྲེ་བ་ལྟ་བུར་བྱེད་པ་དང༌། །
ཁལ་ནི་ལེགས་པར་བཀལ་གྱུར་ཀྱང༌། །ས་གཞིར་སྐྱུར་བར་བྱེད་པ་དང༌། །འདུལ་སྦྱོང་མཁན་ལ་གནོད་བྱའི་ཕྱིར། །མགལ་མེ་བསྐོར་བ་ལྟ་བུར་འཁོར། །རྒྱབ་ནི་གླང་པོ་ལྟར་བསྒྱུར་ཞིང༌། །ཡང་དང་ཡང་དུ་སྦྲུགས་པ་དང༌། །སོ་དང་ལག་ཡབ་དག་གིས་འདེབས། །ཤིང་ཡང་ལྟུང་བར་བྱེད་པ་དང༌། །གཡང་དུ་ཡང་ཡང་སྐྱུར་བྱེད་དེ། །བགྲོད་བྱ་ལས་ནི་གཞན་དུ་རྒྱུག །དོགས་པ་མེད་པར་ལྡོག་པ་དང༌། །ལན་འགས་གཞན་དུའང་འགྲོ་བར་བྱེད། །ར་དང་རི་དགས་ལྟར་མཆོད་ཞིང༌། །བར་བར་དུ་ནི་འདུལ་བྱེད་སྒྱུར། །ཆུ་དོགས་ཤིང་དང་ཁྲོན་པ་དང༌། །གྲོགས་སྲོལ་དུ་ཡང་རྒྱུག་ཅིང་འབྱེར། །རྟ་ཁྱུའི་ནང་ན་མི་འདུག་ཅིང༌། །དཔུང་གཞན་གྱི་ནི་ནང་དུའང་འགྲོ། །རབ་ཏུ་འབད་པས་ཁ་བསྒྱུར་ཡང༌། །ཟློག་པར་ནུས་པ་མ་ཡིན་ལ། །རྟ་བྲེས་ལས་ནི་མི་འབྱུང་ཞིང༌། །བྱུང་དང་འཇུག་ཏུ་ནི་འདོད་ལ། །སྲོག་འཕྲོག་ལས་ནི་གང་དང་གང། །ཡིད་དུ་མི་འོང་ལས་གང་ཡིན། །དེ་དག་ལྷག་པར་བྱེད་འགྱུར་ཞིང༌། །བརྡུངས་ཀྱང་ཕན་པ་མེད་པ་ནི། །དེ་ནི་གྲ་མ་ཅན་ཞེས་བྱ། །དེ་ཡི་མཚན་ཉིད་འདི་ཉོན་ཅིག །ཁུར་ཚད་ཁུར་ནི་ཡོ་བ་དང༌། །ཁ་དང་ཕོ་མཚན་ཡོ་བ་དང༌། །རྟ་གང་འཕྲལ་བ་མགོས་འདྲ་དང༌། །རླིག་པ་ཤིན་ཏུ་འཕྱང་བ་དང༌། །རི་མོ་ཆེན་པོ་ཡོད་པ་དང༌། །ཡ་མཆུ་ནག་ཅིང་རྐན་ཡང་ནག །གང་ཞིག་མཆུ་ལྟག་ཞོམ་པ་དང༌། །སེར་སྐྱ་དམར་སེར་མདོག་ཅན་དང༌། །གང་གི་མཆེ་བ་མི་མཉམ་ཞིང༌། །གདོང་ལ་གཉེར་མ་ཡོད་པ་དང༌། །མི་གནག་སེར་བ་ཉིད་དང་ནི། །མིག་སྦོམ་ཁྲ་ཡི་མིག་འདྲ་དང༌། །བྱ་རྒོད་མིག་འདྲ་མཁུར་ཚོས་ཆུང༌། །གང་གི་ཡ་མཆུ་ཐུང་བ་དང༌། །མགོ་བོ་རྣ་བ་རབ་ཏུ་ཆེ། །འགྲམ་པ་ཡང་ནི་ཞུམ་པ་དང༌། །སྦལ་པ་བྱི་ལའི་མིག་འདྲ་ཞིང༌། །རི་བོང་མདོག་འདྲ་མད་ངས་རྩུབ་དང༌། །རླིག་པ་གཅིག་ནི་དཀར་བའམ། །ཡང་ན་རླིག་པ་གསུམ་དཀར་ལ། །བཤད་པའི་མདོག་འདྲ་དུ་བའི་མདོག །ཕྲག་སོ་ལ་ནི་གཉེར་མ་ཆགས། །འདི་དག་དང་ནི་གཞན་མང་ངོ༌། །མཚན་ལྡན་གྲ་མ་ཅན་དུ་འདོད། །དེ་བས་འདི་དང་རིགས་ཅན་རྟ། །གནས་དང་སློབ་སྦྱོང་བྱ་བ་དང༌། །དེ་བཞིན་རྒྱུག་པའི་བྱ་བ་རྣམས། །རྟེའུ་
ནས་བརྩམ་པ་སོ་སོར་བྱ། །བྱ་བའི་ཁྱད་པར་གཞན་ཡང་ནི། །རིམ་པ་བཞིན་དུ་བཤད་པར་བྱ། །རླུང་མེད་གནས་ན་རབ་དཔོན་པ། །སྤྱོད་ཡུལ་བདེ་བར་གཞག་པར་བྱ། །དེ་རྗེས་རེག་ན་བཟོད་གྱུར་ལ། །དེ་ནས་བྱ་བ་གཞན་དག་བྱ། །བདག་པོ་ཟས་དང་སྐོམ་བཅས་དང། །སྨན་རྣམས་ཆོ་ག་ཅི་བཞིན་བྱ། །གནྡྷ་བྷ་དྲ་བུ་ཤེལ་ཙེ། །ཀ་ར་པཱི་རའི་མེ་ཏོག་ནི། །འོ་མར་བཅས་དང་ཀ་ལང་ཐ། །བསྐོལ་བ་དེར་ནི་ཏིལ་ཐལ་བ། །ཀོ་ཀེ་ལཀྵ་སྭ་རྫི་ཀའི། །ཐལ་བ་དང་ནི་བཅས་པར་གཞུག །བསྐོལ་བ་དར་བ་དང་བཅས་པར། །ཉི་མ་བདུན་གྱི་བར་དུ་གཞག །འདི་ནི་འདི་ལ་ཞག་བདུན་པར། །ཆོ་ག་བཞིན་དུ་བཏུང་བ་སྦྱིན། །དེ་ལྟར་བཏུང་བས་དབང་གྱུར་ན། །རྟ་ནི་རེག་པ་ལ་སོགས་བཟོད། །བདག་གཅིན་དང་ནི་རྒོད་མའི་གཅིན། །ཡོངས་ཀར་དེ་བཞིན་རྣ་སྤབས་དང༌། །པི་པི་ལིང་རྩ་ནག་ཚུར་བཅས། །ཧ་རེ་ནུ་ཀ་ཚ་བ་གསུམ། །ཙནྡན་དང་ནི་ལྡན་པ་རུ། །བཏགས་ཏེ་དབེན་པར་སྦང་བར་བྱ། །འདི་ཡིས་ཟླ་ཚིགས་དག་ཏུ་ནི། །རྟ་ལ་མིག་སྨན་བསྐུ་བར་བྱ། །དེ་ནི་རང་བཞིན་གྱིས་གསོ་དཀའ། །གྲམ་ཅན་ནི་ཞི་བར་བྱ། །དོམ་དང་གཟིག་སྡེར་ཁྱིའི་རུས་པ། །བ་ལང་འགྲམ་པ་ཡུངས་ཀར་དང༌། །རྨ་བྱའི་མཁྲིས་པ་ལྡན་པར་ནི། །གདུག་པ་གྲ་མ་ཅན་སེལ་ཡིན། །རྟ་བྲེས་སུ་ནི་རྟག་པ་རུ། །གདུག་པ་འདི་ནི་གདུལ་བར་བྱ། །ཚེས་བརྒྱད་དང་ནི་བཅུ་བཞི་ལ། །ཁྱད་པར་དུ་ནི་བདུག་པས་བདུག །དེས་ན་རེག་དང་སྒྲ་དང་ནི། །གཟུགས་ནི་བདེ་བར་བརྟེན་བཟོད་འགྱུར། །གང་དང་གང་ནི་བྱེད་དུ་བཅུག །དེ་དེ་རྗེས་སུ་མཐུན་པར་བྱེད། །རྐན་དང་ཁ་འགྲམ་དཔྲལ་བ་དང༌། །མ་རྐན་སྨིན་མའི་འོག་དང་ནི། །རྟ་ཡི་མིག་ལའང་པི་པི་ལིང༌། །རྩ་བ་ཚ་བ་གསུམ་གྱིས་བསྐུ། །འདི་ཡི་ལུས་ནི་ཐམས་ཅད་ཀྱང༌། །བ་ཡི་ལྕི་བས་ཡང་ཡང་བསྐུ། །འདི་ཡི་ཡན་ལག་ནང་གྲོལ་ནི། །སྦྲང་རྩི་དང་ནི་ཁ་རས་བསྐུ། །ཨེ་ལ་ཨུ་ཤྲིར་པྲ་རྩི་པོག །རུ་རྟ་ཙནྡན་ཨ་ཀ་རུ། །ནཱ་ག་གེ་སར་ཏིལ་མར་བཅས། །བདུག་པས་རྟ་ལ་རབ་ཏུ་བདུག །རྟ་ནི་ཉག་པར་གྱུར་པ་ན། །བདུག་པས་ཡང་ཡང་བདུག་ན་ནི། །སྒྲ་དང་རེག་དང་གཟུགས་དག་ནི། །ངེས་པར་བཟོད་པར་
འགྱུར་བ་ཡིན། །ཇི་སྲིད་ངེས་པར་ཞི་གྱུར་པར། །ཆོ་ག་འདི་ནི་སྦྱར་བར་བྱ། །དེ་ཚེ་འཁྲུགས་པར་མི་བྱེད་ཅིང༌། །རྟ་རྫི་ལ་ནི་གནོད་མི་བྱེད། །གང་ན་གནས་ལ་མི་སྡང་ཞིང༌། །ཁྲོ་བ་མེད་པར་རྩྭ་རྣམས་ཟ། །རྣ་བ་འཇུམས་པར་མི་བྱེད་ཅིང༌། །འདུལ་སྦྱོང་མཁན་ལ་མངོན་པར་དགའ། །ལམ་དུ་ཞུགས་པར་ཆས་པ་ན། །འདོར་ཞིང་འཇིགས་པར་མི་འགྱུར་ལ། །ཁྲིད་ན་སེམས་ནི་དུལ་འགྱུར་ཞིང༌། །ཚིག་གིས་བསྡིགས་ནའང་འཇིགས་པར་འགྱུར། །ཅི་དགའ་བར་ནི་ཁྱེར་ན་ཡང༌། །ལོག་པར་བྱེད་པར་མི་འགྱུར་རོ། །དངོས་པོ་གཞན་ལ་བརྡེགས་ན་ཡང༌། །དེ་ནི་འཇིགས་པ་སྐྱེ་མི་འགྱུར། །དེ་ལྟར་གྲ་མ་མེད་པའི་རྟ། །བཟོད་པ་ཅན་དུ་བཤད་པ་ཡིན། །དམོད་པ་གདོན་གྱི་ཉེས་པ་དང༌། །རྟ་ཡི་རླུང་ནད་ཉེས་པ་དང༌། །ཡུལ་གྱི་ཉེས་པ་བཏང་སྙོམས་གཞག །མི་སྲུན་འགྲོགས་པ་དག་ལས་ཀྱང༌། །རྟ་ནི་སེམས་ཤེས་མི་འགྱུར་ལས། །གྲ་མ་ཅན་དུ་འགྱུར་པ་ཡིན། །དེ་བས་ཉེས་པ་འདི་རྣམས་ལ། །ཞི་བའི་ཐབས་འདི་ཡིན་པར་འདོད། །གང་ལ་ཆོ་ག་འདི་དག་ནི། །བྱས་ཀྱང་གྲམ་མ་ཞི་ན། །དེ་ཚེ་འབྲོག་སྟོང་དག་ཏུ་ཡང༌། །དེ་ལ་ལྟོས་པར་མི་བྱའོ། །གང་ཚེ་མིའམ་རྟ་གཞན་གྱི། །ཕྱི་ནས་སྙེག་པར་བྱེད་པར་འགྱུར། །དེའི་ཚེ་རླིག་པ་ཆུང་བ་ཡིས། །འདི་ཡི་སེམས་འཁྲུགས་ཞི་བར་བྱེད། །གྲ་མ་ཅན་ནི་ལེགས་དུལ་ཡང༌། །གཡུལ་དུ་གཞུག་པར་མི་བྱ་སྟེ། །གལ་ཏེ་འདི་ཡིས་རང་བཞིན་ཉིད། །ལས་ཀྱི་དབང་གིས་གསལ་བྱེད་སྲིད། །གང་ཞིག་གྲ་མ་ཅན་ཞི་ནས། །ལ་ལར་མི་སྲུན་བྱེད་གྱུར་ན། །དང་པོ་དེ་ནི་བྱེད་ཚུལ་གྱིས། །ཉེ་བར་ལེགས་པར་སྤྱར་བར་བྱ། །ཤ་ལི་ཧོ་ཏྲའི་མདོའི་གནས་ལས་གྲ་མ་ཅན་བརྟག་པའི་ལེའུ་སྟེ་སུམ་ཅུ་རྩ་བཞི་པའོ།། །།བུ་སྔོན་ང་ནི་རྟ་བྲེས་སུ། །གཉིད་ལོག་པ་ན་རྟ་དེར་བཏབ། །ང་ནི་ཁྲོ་བ་ཆེས་ཁྱབ་པས། །དེ་ལ་དམོད་པ་བཏབ་པར་གྱུར། །བཀྲ་མི་ཤིས་དང་རྣམ་ཀུན་དུ། །སྤང་བར་བྱ་བ་ཉིད་དུ་གྱུར་ཅིང༌། །བདག་པོ་ཆུང་མར་བཅས་པའི་ཡང༌། །རིགས་ནི་རླག་པ་ཉིད་གྱུར་ཅིག །ང་ཡི་དམོད་པའི་དབང་གིས་ནི། །ཉེས་པ་ཆེ་དང་ལྡན་པར་ནི། །རྟ་རྣམས་འགྱུར་བ་ཉིད་ཡིན་ལ། །འདི་ཡི་མིང་ནི་ཤེས་པར་
གྱིས། །ཤིས་པ་གཞན་དང་ལྡན་གྱུར་ཀྱང༌། །རྟ་ཡི་ཐ་ཆད་དེ་སྤང་བྱ། །སོ་ཡིས་ཁ་ཁེངས་ཁ་དོག་ནག །དེ་བཞིན་སོ་ནི་མི་མཉམ་ལྷག །ཡོ་ཞིང་འགུལ་ལ་ཆག་པ་དང༌། །སོ་གྱེས་པ་དང་མི་ཚང་དང༌། །ཉ་ཕྱིས་འདྲ་དང་ཟུར་གསུམ་དང༌། །སྐྱེས་ཚེ་སོ་ཡོད་ཉིན་མོ་སྐྱེས། །ཟེའུ་ལྟ་པུས་མོ་ཟེའུ་དང༌། །སྙིང་གན་ནི་གཙུག་ཡོད་དང༌། །ཡན་ལག་མ་ཚང་རླིག་ཆེར་སྐྱེས། །མཚན་ཆེ་ཡན་ལག་ལྷག་པ་དང༌། །ཐིག་ལེ་ཆགས་ཤིང་གསུམ་པོ་འཕྱང༌། །མདོ་མས་ནི་སྤྲེའུའི་སྤུ་འདྲ་ལ། །མི་སྡུག་གཡོ་ཞིང་དོམ་འདྲ་ལ། །སྡིག་པ་འདྲ་བའམ་རླིག་པ་མེད། །ཁྲ་དང་ལུག་དང་ཀང་ཀ་དང༌། །ཉ་དང་སྤྲིའུ་བྱི་བ་འདྲ། །དམར་སེར་ཕག་དང་བྱི་ལ་དང༌། །བྱ་རྒོད་འུག་པའི་མིག་འདྲ་ཞིང༌། །དེ་བཞིན་མ་ཧེ་ཁྱིའི་མིག་འདྲ། །བྱ་རོག་མིག་འདྲ་མིག་གཅིག་སེར། །པགས་པ་བསྲེགས་པའི་དྲི་འདྲ་དང༌། །འབྲལ་བ་མི་སྡུག་དེ་བཞིན་བླུན། །ཡི་དྭགས་ཀྱིས་ཟིན་ཤ་བཀྲ་ཅན། །སྤུ་སྡོམ་དེ་བཞིན་རལ་པ་ཅན། །འཕྲལ་བ་བསྐུས་འདྲ་རྔོག་མ་གནག །རྐང་བཀྲ་མི་ལེགས་མ་ནིང་དང༌། །རྔ་མ་རྔོག་མ་མེད་པ་ནི། །བཀྲ་མི་ཤིས་པར་སྐྱེ་བ་དང༌། །རླིག་པའི་སྤུ་མདོག་ཞན་པ་དང༌། །དེ་བཞིན་མགོ་བོའི་མདོག་མི་མཐུན། །རྒྱབ་ཏུ་ཞོན་ལ་གནོད་བྱེད་དང༌། །དེ་བཞིན་རྟ་དྲེའུའི་སྤུ་འདྲ་དང༌། །རྔོག་མ་ཕུམ་ཕུམ་འདྲེས་པ་དང༌། །ཁ་འགྲམ་མཆེ་རླིག་ནག་པ་དང༌། །དེ་བཞིན་མགོ་དང་ལྕེ་ནག་དང༌། །རྐན་དང་ལྟག་པ་མཆུ་གནག་དང༌། །མངལ་ན་གཉིས་སྐྱེ་མང་པོ་སྐྱེ། །ཉེས་པ་ཆེན་པོར་རབ་ཏུ་བཤད། །རྭ་ཅན་རྣམ་གསུམ་རྨིག་པ་གཉིས། །རྐང་ལྔ་བུ་ཅན་གཡང་གཞིར་ལྡན། །དྲུག་པོ་འདི་དག་མཆོག་ཏུ་ནི། །མི་ཤིས་ཉེས་ཆེན་ལྡན་པར་བཤད། །རྟ་ཡི་སོ་ནི་མི་ཚང་བ། །བདག་པོའི་བུ་དང་བཅས་པ་དང༌། །ཆུང་མ་སྤུན་ཟླར་བཅས་པ་དང༌། །རྟ་ཡི་ཐ་མས་གསོད་པར་བྱེད། །སོ་ནི་ལྷག་པར་གྱུར་བའི་རྟ། །དེ་ཡི་བདག་པོ་མི་རིང་བར། །ཉོན་མོངས་ཆེ་དང་ཕྲད་བྱེད་ནས། །ཡིད་དུ་མི་འོང་ལས་ཀྱིས་གསོད། །འོག་སོ་ལྷག་ཅིང་སོ་གྱེས་
པར། །གང་ཞིག་སྐྱེས་པར་གྱུར་བ་ནི། །སོ་སྐྱེས་དེ་ཡི་རིགས་ཀྱི་མཆོག །རིང་པོར་མི་ཐོགས་རླག་པར་བྱེད། །སོ་དང་བཅས་པར་ཉིན་མོ་སྐྱེས། །ཐམས་ཅད་ཟད་པར་བྱེད་པ་ཡིན། །ཆུ་ཞིང་ཚད་ཀྱི་གྲངས་ལས་ནི། །ལྷག་པར་གང་ཞིག་གནས་གྱུར་བའི། །ཡན་ལག་ཡོད་པའི་རྟ་ཡིས་ནི། །ནོར་ནི་ལྷག་པར་ཉམས་བྱེད་ཡིན། །ལོ་ལྔའི་བར་དུ་རླིག་པ་མེད། །རྒོད་མ་ལ་ཡང་མི་འཇུག་པ། །དབང་འཕེལ་གང་ཡིན་རྟ་དེས་ནི། །རིགས་ནི་རླག་པར་བྱེད་པར་བཤད། །གང་གི་རླིག་པ་མདོག་མི་མཐུན། །ཐིག་ལེ་ཡིས་ནི་ཁྲ་བོར་གྱུར། །དེ་ནི་རླིག་པ་ཐིག་ལེ་ཅན། །བདག་པོའི་རིགས་ནི་རླག་བྱེད་ཡིན། །པགས་པ་བསྲེགས་པའི་དྲི་འདྲ་བ། །མེ་ཡིས་ཚིག་པར་བྱེད་པ་ཡིན། །རྟ་མི་གནག་ལ་རྐན་ནག་པ། །མྱུར་དུ་མཚོན་གྱིས་གསོད་པར་བྱེད། །གང་གི་རྐན་ལས་ཉེར་མ་ནི། །གསུམ་མམ་བཞི་དག་ཡོད་གྱུར་པ། །དེ་ནི་རྐན་ནག་ཉེས་པ་ཡིས། །དགོས་པ་མེད་པའི་རྟར་འགྱུར་རོ། །མདོག་ནག་དུད་པའི་མདོག་ཅན་དང༌། །དངུལ་རྡོ་བཅག་པའི་མདོག་ལྟར་འཚེར། །རྟ་དེའི་རྐན་ཀུན་ནག་ན་ཡང༌། །མདོག་དང་མཐུན་པས་ཉེས་པ་མེད། །ཁ་དོག་བརྒྱད་པོ་རྣམས་ཀྱི་ནི། །ཅུང་ཟད་དམར་ཞིང་གཉེར་མ་གསལ། །དཀར་དང་དར་མདོག་སྐྱ་བ་དང༌། །སེང་གེ་དུར་པའི་མདོག་རྗེས་འདྲ། །དམར་དང་སེར་དང་སྔོ་བསངས་ཀྱི། །རྐན་གནག་པ་ནི་བསྔགས་མ་ཡིན། །རི་མོ་ཤིན་ཏུ་དམའ་བ་ཡིས། །རྨིག་པ་གཉིས་སུ་སྣང་གྱུར་ཏེ། །བ་ལང་རྨིག་པ་འདྲ་བ་ནི། །གང་གི་རྨིག་པ་སྣང་གྱུར་བ། །བདག་པོའི་ལུས་དང་ཡིད་ཀྱི་ནི། །མི་བཟད་སྡུག་བསྔལ་གཉིས་བསྐྱེད་ནས། །རིང་པོར་མི་ཐོགས་དུས་ཀྱིས་ནི། །དེ་དང་ལྷན་ཅིག་འཆི་བར་འགྱུར། །རྔོག་མའི་མཐར་ནི་རྟེན་པའི་རྭ། །མཐེ་བོའི་ཚིགས་དང་འདྲ་བའམ། །རྒྱ་ཤུགས་སྐྱུ་རུ་ར་འདྲ་བའམ། །ཨ་མྲའི་རུས་པ་འདྲ་བ་ནི། །གང་གི་རྟ་ལ་སྣང་གྱུར་རམ། །རྭ་ཡི་རྩེན་རྭ་འདྲ་གནས། །ཤ་འཚེར་གཞང་འབྲུམ་འདྲ་བ་སྟེ། །རྟ་ནི་རྣམ་པ་དེ་བདུན་ཡིན། །རྭ་ཅན་དེ་ནི་སྐྱེས་གྱུར་པའི། །གྲོང་དེར་རིང་པོར་མི་ཐོགས་བརླག །རྣ་བ་གསུམ་པའི་རྟ་གང་ཡིན། །དེ་ཡང་རྭ་ཅན་དག་དང་མཚུངས། །
རྟ་ཡི་ཐ་མ་འདི་གཉིས་ཀ །ཡུལ་མཐའ་གཞན་དུ་སྤང་བར་བྱ། །པུས་མོའི་ཚེའུ་སྤུ་དང་ཉེ་བར། །རྐང་པ་འདྲ་སྟེ་རྐང་ལྔ་པ། །རྭ་ཅན་ལྟ་བུ་དེའི་མོད་ལ། །སྤངས་པ་ཁོ་ནར་བསྔགས་པ་ཡིན། །ཟེའུའམ་རྒྱབ་ཏུ་གཙུག་ཡོད་པ། །རིགས་ནི་གཙོ་བོ་གསོད་བྱེད་ཡིན། །མི་ཤེས་བཞོན་བྱ་མ་ཡིན་ཏེ། །དེ་བས་དེ་དག་ཐམས་ཅད་རྟ། །མདོག་ནི་གང་ཡང་རུང་བ་ལ། །ལྕེ་ནག་པར་ནི་གྱུར་པའི་རྟ། །ཁྱིམ་དེ་མི་ཤིས་བྱ་བ་སྟེ། །རྟ་དེ་ཐམས་ཅད་ཟད་བྱེད་ཡིན། །གང་གི་ཁ་འགྲམ་ནག་པ་ཡི། །རྟ་ནི་བདག་པོ་གསོད་བྱེད་ཡིན། །རྟ་ཡི་ཐ་ཆད་ཤ་བཀྲ་ཅན། །བདག་པོ་ནོར་དང་འབྲལ་བྱེད་ཡིན། །སྟག་འདྲ་ཁ་དོག་གཞན་པ་ཡི། །མདོག་ནི་སྣ་ཚོགས་གྱུར་པ་དག །དེ་ནི་མི་ཤིས་སྡུག་བསྔལ་ནི། །ཐམས་ཅད་སྐྱེ་བས་སྤང་བར་བྱ། །སྟག་དང་འདྲ་ཞིང་རྗེས་མཐུན་ལ། །སྤྲེའུའི་མིག་དང་འདྲ་བ་ཡི། །དེ་འདྲ་བ་ཡི་བདག་པོ་ནི། །སེམས་ནི་སྨྱོ་བར་བྱེད་པ་དང༌། །ཁྱིམ་ནས་བྱུང་པའམ་སྤྱུག་པའམ། །ལོག་པའི་ཆད་པ་ཐོབ་པར་འགྱུར། །གང་ཞིག་མདོག་ཀུན་དཀར་བ་ལ། །རྔོག་མ་ནག་པོ་ཡོད་པ་ནི། །རྟ་དེ་རྔོག་ནག་ཅེས་བྱ་སྟེ། །གཡུལ་དུ་བདག་པོ་གསོད་བྱེད་ཡིན། །བོང་བུ་ལྟར་ནི་ཁྲ་བོའི་རྟ། །འཁོར་ལིང་དམའ་བར་གྱུར་པ་དང༌། །ཤིས་མིན་ཚེ་འཕེལ་བྱེད་མིན་ལ། །ལས་རྣམས་ཀུན་ལ་སྨད་པ་ཡིན། །མཆུ་ནག་པ་ཡི་བུ་དང་ནི། །རྟ་རྣམས་དུག་གིས་གསོད་པར་བྱེད། །རླིག་ནག་གསོད་དང་འཆི་བྱེད་ལ། །ཕོ་མཚན་ནག་པར་གྱུར་པ་ཡིས། །ཆུང་མ་མནའ་མ་སྒྱུག་མོ་དང། །དེ་བཞིན་དུ་ནི་བྲན་མོ་རྣམས། །འདི་དག་ཐམས་ཅད་རླག་པར་ནི། །རྟ་དེ་ལ་ནི་ཞོན་པས་འགྱུར། །རྟ་གང་རྨིག་པར་བཅས་པར་སྐྱེ། །མཚེ་མར་བྱུང་བར་གྱུར་པ་དག །གང་དག་ཏུ་ནི་བྱུང་གྱུར་པ། །རིགས་དེ་ཡོངས་སུ་བརྡུག་པ་ཡིན། །སེམས་མེད་བཅིང་དང་གསོད་པ་དང༌། །བླུན་པས་ངར་སེམས་མེད་པར་འགྱུར། །འཇིགས་པ་ཆེན་པོ་ཉེ་བར་ནི། །བྱེད་པས་རིང་དུ་སྤང་བར་བྱ། །གང་ཞིག་གཤིན་པོ་ལ་བསྔོས་དང༌། །རྟ་གང་གཤིན་པོས་ཁྱེར་བ་ཡི། །རྟ་དེ་ཡི་དྭགས་ཀྱིས་ཁྱེར་ཡིན། །རྟག་ཏུ་ཉེས་པ་ཐམས་ཅད་སྐྱེ། །དབང་པོ་
འཕེལ་བ་དང་འདྲ་ཞིང༌། །ཟ་མའི་གཟུགས་ཅན་མ་ནིང་ཡིན། །རྒྱབ་ཏུ་ཞོན་པ་གནོད་བྱེད་པ། །ཡི་དྭགས་ཀྱིས་ཁྱེར་བཞིན་དུ་ཡང༌། །གཉིས་སམ་མང་པོ་མཚེ་མར་སྐྱེས། །བུ་དང་བཅས་པ་ཡོངས་སུ་སྤང༌། །སོ་ཡི་ལེའུར་སོའི་ཉེས་པ། །མིག་ལེའུར་མིག་གི་ཉེས་པ་དང༌། །གཙུག་གི་འབྲས་བུ་དག་ལས་ནི། །གཙུག་ངན་འབྲས་བུ་བཅས་ཞེས་བྱ། །དཔྲལ་བར་ཆགས་པ་ཞུར་དང་འདྲ། །འདྲེས་པའི་ལེའུ་གང་བཤད་པ། །ནུ་མ་ཅན་དང་རླིག་པ་ནག །མགོ་ནག་ལ་སོགས་པར་བཤད་པ། །འདི་ཡི་འབྲས་བུའི་མཚན་ཉིད་ནི། །འདི་རུ་རྒྱས་པས་མ་བཤད་དོ། །དེར་ནི་སྤང་བྱ་གང་ཡིན་པ། །འདིར་ཡང་འབྲས་བུ་དེ་དང་འང༌། །དེ་ཉིད་ཚེ་ཡི་གནས་སྐབས་ལ། །བབ་ལ་ཉེས་པའི་འབྲས་བྱིན་བཤད། །ཉེས་ཆེན་ཤིན་ཏུ་ཉེས་ཆེ་བ། །རྟག་ཏུ་འབྲས་བུ་འབྱིན་བྱེད་ཡིན། །ཤིན་ཏུ་བཟང་བའི་མཚན་ཉིད་ཀུན། །ལྡན་ན་ཉེས་པ་ཆེན་པོའང་བཅང༌། །ཤིན་ཏུ་ཉེས་ཆེན་ལྡན་པ་ནི། །ནམ་ཡང་བཅང་བར་མི་བྱའོ། །གལ་ཏེ་ཡོན་ཏན་གཞན་ལྡན་ཡང༌། །ཤིན་ཏུ་ཉེས་ཆེར་ལྡན་པའི་རྟ། །ཁྱིམ་དུ་སྐད་ཅིག་ཙམ་གྱིས་ནི། །མཁས་པས་གཞག་པར་མི་བྱའོ། །རེག་པ་ཡིས་ཀྱང་རྟ་དེ་ནི། །ཕུང་ཁྲོལ་དང་ནི་ཕྲད་པར་འགྱུར། །ཤ་ལི་ཧོ་ཏྲའི་མདོའི་གནས་ལས་ཉེས་པ་ཆེན་པོ་བརྟག་པའི་ལེའུ་སྟེ་སུམ་ཅུ་རྩ་ལྔ་པའོ།། །།ཤ་ལི་ཧོ་ཏྲ་བདག་ཉིད་ཆེ། །ལེགས་ཐོས་ཀྱིས་ནི་རྟ་རྣམས་ཀྱི། །སྙིང་སྟོབས་ཤེས་པར་བྱ་བ་དྲིས། །དྲང་སྲོང་གིས་དེ་དེ་ལ་སྨྲས། །དཔའ་ཞིང་གཙང་སྤྲ་ཆེ་བ་དང༌། །བདག་པོ་ལ་གུས་བཞིན་དགེ་ལ། །སྟོབས་དང་སྙིང་སྟོབས་མགྱོགས་དང་ལྡན། །དེ་མཆོད་གཏོར་མ་ལ་དགའ་ཞིང༌། །རང་གི་སྤྱོད་པའི་མཚན་ཉིད་ལྡན། །དེ་བཞིན་ཞི་བའི་རང་བཞིན་ཅན། །འདུལ་བྱེད་དབང་བསྒྱུར་ལྡོ་བསྐྱེན་པའི། །རྟ་ནི་ལྷ་ཡི་སྙིང་སྟོབས་ཅན། །གཙང་སྦྲ་ལ་དགའ་དུལ་བ་དང༌། །སྐད་སྙན་ལམ་ནི་རྣལ་མར་འགྲོ། །རིག་བྱེད་སྒྲ་ལ་རབ་ཏུ་དགའ། །རྒོད་མ་ལ་ནི་རྒྱབ་ཀྱིས་ཕྱོགས། །ཁྲུས་ལ་དགའ་ཞིང་དེ་བཞིན་ནི། །དྲང་སྲོང་སྙིང་སྟོབས་ཅན་དུ་བཤད། །དཔའ་ཞིང་སྟོབས་ཆེ་ཚམ་ཚོམ་
མེད། །དེ་བཞིན་འཐབ་མོ་ལ་དགའ་ཞིང༌། །ཤ་དང་ཆང་ལ་དགའ་བ་ནི། །ལྷ་མིན་སྙིང་སྟོབས་ཅན་དེ་ཡིན། །དྲི་དང་ཕྲེང་བ་ལ་དགའ་ཞིང༌། །གླུ་རྣམས་ལ་ནི་ཤིན་ཏུ་མོས། །གཡུལ་འགྱེད་ལ་སྤྲོ་དེ་བཞིན་ཞི། །དྲི་ཟའི་སྙིང་སྟོབས་ལ་བརྟེན་ཡིན། །གཉིད་ལ་དགའ་ཞིང་ཁྲོ་ལ་བརྟག །རྟག་ཏུ་གཅིག་པུར་གནས་པ་དགའ། །སྟོབས་ཆེ་སྤྲོ་བ་ཆེ་བ་ཡི། །རྟ་ནི་རླུང་གི་སྙིང་སྟོབས་ཅན། །ཆུ་ཡི་གནས་ལ་དགའ་བ་དང༌། །རྟག་ཏུ་ཆུ་དང་ཕྲད་པར་འདོད། །ཕལ་ཆེར་ཏིལ་ལ་དགའ་གྱུར་བ། །ཡི་དྭགས་མཚུན་ལྷའི་སྙིང་སྟོབས་ཅན། །རི་ལ་འཛེག་ན་མི་སྐྱོ་ཞིང༌། །སྟོབས་ལྡན་འཚོར་ཞིང་འགྲོ་བ་དང༌། །ཏིལ་ལམ་ཁ་ཟས་མངར་ལ་དགའ། །གནོད་སྦྱིན་སྙིང་སྟོབས་ཅན་དུ་བཤད། །མི་བརྟན་ཁྲོ་ཞིང་གདུག་པ་དང༌། །ཆང་དང་སྦྱར་ཆང་ཤ་ལ་དགའ། །གདོང་ནི་མི་སྡུག་པར་སྣང་བ། །སྲིན་པོའི་སྙིང་སྟོབས་ལ་བརྟེན་ཡིན། །མི་བརྟན་རྩུབ་ཅིང་དྲི་མ་ཅན། །རྟག་ཏུ་མི་གཙང་ལ་སྤྱོད་ཅིང༌། །ཞུམ་ཞིང་ཁང་སྟོང་དག་ལ་དགའ། །ཤ་ཟའི་སྙིང་སྟོབས་ལ་བརྟེན་ཡིན། །བླུན་ཞིང་ལམ་ལོག་འགྲོ་ལ་དགའ། །རྒོད་མ་ཡི་ནི་ཕྱི་བཞིན་རྒྱུག །རྟག་ཏུ་རྩྭ་ཟ་ལ་དགའ་བ། །དུད་འགྲོའི་སྙིང་སྟོབས་ངག་དང་མཚུངས། །རླུང་དང་གྲང་ལྷགས་ཚད་པ་བཟོད། །བདག་པོ་ལ་དགའ་སྐད་སྙན་ཅིང༌། །སེམས་ཁོང་ཆུད་ཅིང་ལེ་ལོ་ཅན། །མི་རྒྱུའི་སྙིང་སྟོབས་ལ་བརྟེན་ཡིན། །རྐེ་མགྲིན་བཏུང་ཅིང་འཇིགས་པ་ཅན། །རྟག་ཏུ་གནས་འདི་སྟོང་པར་དགའ། །མི་གཙང་ལ་དགའི་ངང་ཚུལ་ཅན། །སྲིན་བུའི་སྙིང་སྟོབས་ལ་བརྟེན་ཡིན། །ཤུགས་ཆེན་རྒྱུན་དུ་ལྟོས་པ་དང༌། །ཡོངས་སུ་འཁོར་བའི་ངང་ཚུལ་ཅན། །རྒོད་མ་ལ་ནི་རབ་དགའ་བའི། །རྟ་ནི་འདབ་ཆགས་སྙིང་སྟོབས་ཅན། །དཔའ་ཞིང་འཇིགས་པ་ཉིད་དུ་ནི། །དུས་དང་དུས་སུ་གནས་འགྱུར་ཞིང༌། །རྒོད་མ་ལ་ནི་རབ་དགའ་བ། །འཆི་བ་ཡིས་ནི་ཤིན་ཏུ་འཇིགས། །བརྡེགས་པ་ན་ནི་རབ་ཏུ་འཁྲུག །རྩེ་དང་ཁྱིམ་དུ་གནས་ལ་དགའ། །བྱས་པ་ཚོར་ནི་སྟོབས་དང་ལྡན། །མི་ཡི་སྙིང་སྟོབས་ཅན་དེ་ཡིན། །ལྷ་དང་དྲང་
སྲོང་གནོད་སྦྱིན་ཀླུ། །དྲི་ཟ་དང་ནི་སྙིང་སྟོབས་དག །མཉམ་པར་གྱུར་པའི་རྟ་གང་ཡིན། །ལས་རྣམས་ཀུན་ལ་རབ་ཏུ་བསྔགས། །མི་དང་ཡི་དྭགས་ལྷ་མ་ཡིན། །བྱ་དང་མཚུངས་བ་བར་མ་ཡིན། །དེ་ལས་གཞན་པའི་སྙིང་སྟོབས་ཅན། །རྟ་ནི་ཐ་མ་ཡིན་པར་བཤད། །ཀུན་དུ་སྙིང་སྟོབས་གཙོ་བོ་སྟེ། །སྙིང་སྟོབས་ལ་ནི་ཐམས་ཅད་གནས། །ཤ་ལི་ཧོ་ཏྲའི་མདོའི་གནས་ལས་སྙིང་སྟོབས་བརྟག་པའི་ལེའུ་སྟེ་སུམ་ཅུ་རྩ་དྲུག་པའོ།། །།བུ་དག་གཟི་མདངས་རྣམ་པ་ལྔར། །རྟ་ལ་དུས་སུ་འབྱུང་བར་འགྱུར། །གང་ཕྱིར་འདི་དག་འབྱུང་བ་ཡི། །བདག་ཉིད་ཡིན་པས་རྣམ་ལྔར་འདོད། །མདོག་དང་སྦུ་ཁ་རྫས་དང་ནི། །དེ་བཞིན་དུ་ནི་དབྱིབས་དག་ལས། །མིག་གིས་གཟུང་བྱ་གཞན་གང་ཡིན། །གཟི་མདངས་ཀྱི་ནི་སྒྲར་བཤད་དོ། །རེ་ཞིག་རྫས་ནི་ཡོན་ཏན་བཞི། །ཁ་དོག་གཟུགས་ནི་དཀར་ལ་སོགས། །རྟ་ནི་ཁ་དོག་ཐ་དད་ཀྱང༌། །སྤུ་ཁ་རིང་པོ་ལས་ཀྱང་སྣང༌། །གཟི་མདངས་ཕྲ་ཞིང་དང་བས་ན། །ཉེ་བ་ཉིད་ན་མངོན་པ་ཡིན། །མདངས་ནི་མེད་པ་ཙམ་དེ་ལའང༌། །མེད་པར་ཡང་ནི་དམིགས་མ་ཡིན། །རླུང་དང་དེ་བཞིན་ནམ་མཁའ་དང༌། །མེ་དང་དེ་བཞིན་ས་དང་ནི། །ཆུ་ཉིད་ཀྱི་ནི་མཚན་ཉིད་དག །གང་ཡིན་དེ་ནི་མཉན་པར་གྱིས། །རླུང་གི་གཟི་མདངས་སྣད་པ་ཡིན། །ནམ་མཁའ་ཡི་ནི་འབྲིང་དུ་བཤད། །མེ་དང་ས་དང་ཆུ་ཡི་ནི། །མཚན་ཉིད་གསུམ་པོ་རྟག་ཏུ་ཤིས། །མི་བརྟན་རྩུབ་ཅིང་མདོག་ལ་གནོད། །དེ་བཞིན་ཅུང་ཟད་དཀར་བ་སྣང༌། །རྟ་ཡི་སྤུ་ཁ་ལ་གནོད་པ། །རླུང་གི་གཟི་མདངས་དེ་སྨད་བྱ། །ཤིན་ཏུ་དང་བ་ནམ་མཁའ་ནི། །སྤྲིན་དང་བྲལ་བ་དང་འདྲ་བ། །མདངས་ཅན་ཞི་བར་གྱུར་པ་དག །དེ་ནི་ནམ་མཁའ་ཅན་ཞེས་བཤད། །རྟ་རྣམས་ཕལ་ཆེར་རྟག་ཏུ་ནི། །ནམ་མཁའི་གཟི་མདངས་ཅན་དུ་སྣང༌། །དེ་ནི་མི་སྨད་བསྟོད་བྱ་དག །མིན་པར་གྱུར་པ་ཉིད་ཡིན་ནོ། །གཟི་མདངས་ལྡན་ཞིང་འོད་ཅན་འདྲ། །དེ་བཞིན་མེ་ནི་འབར་བ་འདྲ། །མེ་ཡི་གཟི་མདངས་བསྔགས་པ་སྟེ། །བསོད་ནམས་ཀྱིས་ནི་རྟ་ལ་འབྱུང༌། །སྣུམ་ཞིང་ཆུ་ཡི་མདོག་ལྡན་པ། །དགེ་སྐྱེད་དེ་ནི་ཆུ་ཡི་ཡིན། །གཟི་བརྗིད་ལྡན་ཞིང་ཤིན་ཏུ་
བརྟན། །ས་ཡི་གཟི་མདངས་གཉིས་ཡིན་ལ། །རྟ་ལ་རྟག་ཏུ་ས་ཡི་ནི། །གཟི་མདངས་བསྔགས་པར་གྱུར་པ་ཡིན། །སྨད་པའམ་བསྔགས་པར་བྱ་བ་ཡི། །གཟི་མདངས་ཡུན་རིང་གནས་གྱུར་པ། །བདག་པོས་བདེ་དང་སྡུག་བསྔལ་གྱི། །འབྲས་བུ་ཡུན་རིང་མྱོང་བར་འགྱུར། །གཙུག་དང་ཁ་དོག་འབྲས་བུ་ནི། །ཤིས་པ་དང་ནི་མི་ཤིས་གང༌། །ཞར་ལ་བྱུང་བར་གྱུར་པ་གང༌། །གཟི་མདངས་སུ་ནི་རྗེས་སུ་འགྱུར། །དཔེར་ན་ཉི་མའི་འོད་ཟེར་ནི། །སྤྲིན་གྱིས་ཁེབས་པར་བྱེད་པ་ཡིན། །དེ་བཞིན་རྟ་ལ་གཟི་མདངས་ཀྱི། །མཚན་ཉིད་ཀྱིས་ནི་ཁེབས་པར་འགྱུར། །གཉིད་ལོག་ལས་ལངས་ཁྲུས་བྱས་དང༌། །རྣམ་ཀུན་སྐོམ་འཐུངས་ཟས་ཟོས་པའི། །རྟ་ལ་རྟ་མཁན་དག་གིས་ནི། །གཟི་མདངས་ཉེ་བར་བརྟག་པར་བྱ། །ཤ་ལི་ཧོ་ཏྲའི་མདོའི་གནས་ལས་གཟི་མདངས་བརྟག་པའི་ལེའུ་སྟེ་སུམ་ཅུ་རྩ་བདུན་པའོ།། །།ཤ་ལི་ཧོ་ཏྲ་དྲང་སྲོང་ཆེ། །རིག་བྱེད་ཡན་ལག་མཐར་ཕྱིན་པ། །རྟ་བྲེས་གནས་ན་འདུག་པ་ན། །མཛའ་ལས་རྒྱལ་སོགས་བུ་རྣམས་དང༌། །བླ་མ་ལ་གུས་སློབ་མ་རྣམས། །རྟ་སྤྱོད་ཤེས་ལ་ཡང་དྲིས་པ། །ལེགས་ལྡན་རྒྱ་མཚོའི་མཐར་ཐུག་པའི། །ས་གཞི་དྲི་ཡི་ཕྲེང་བས་བསྐོར། །གྲོང་རྡལ་འབྱུང་གནས་ཡུལ་དག་དང༌། །ནགས་ཚལ་རྣམས་ཀྱིས་ཉེར་མཛེས་པར། །རང་དགར་རྒྱུ་བའི་རྟ་རྣམས་ནི། །ཁྱེད་ཀྱིས་བགོ་བཤའ་མཛད་ལགས་ན། །དེ་རྣམས་ཀྱི་ནི་འབྱུང་ལུགས་དང༌། །རིགས་དང་ཉེ་བའི་རིགས་རྣམས་དང༌། །ཡུལ་གྱི་རྟགས་ནི་འབྱུང་བ་དང༌། །ཁ་དོག་སྤྱོད་པ་གཟི་མདངས་ཤུགས། །སོ་སོའི་རིགས་ཤེས་རྣམ་བརྟག་པ། །བདག་ཅག་ལ་ནི་བཤད་དུ་གསོ། །དོག་པའི་གནས་ཀྱི་ཤེས་བྱ་དང༌། །རྟ་རྣམས་སྐྱེ་བ་ཉིད་དང་ནི། །ཡུལ་མཐར་ཡོན་ཏན་ཆེར་ལྡན་དང༌། །ཡུལ་དབུས་ཡོན་ཏན་ཆུང་བར་ནི། །འགྱུར་བས་དེ་ཕྱིར་དེ་ཐམས་ཅད། །ལེགས་ལྡན་གྱིས་ནི་བཤད་པར་རིགས། །དེ་ནས་ལེགས་ལྡན་དྲང་སྲོང་མཆོག །བུ་རྣམས་ལ་ནི་སླར་སྨྲས་པ། །གཟུགས་དང་སྐྱེ་གནས་ཁ་དོག་དང༌། །སྙིང་སྟོབས་སྤྱོད་པ་མདངས་དང་མ། །གཟི་
མདངས་དབྱིབས་དང་དྲི་དང་ནི། །བདེ་དང་མི་བདེ་སྐད་རྣམས་དང༌། །རིགས་ལས་བྱུང་བ་འདི་དག་ཀུན། །ཇི་ལྟ་བར་ནི་སྨྲས་པ་ཡིན། །ཐོག་མ་ཁོ་ནར་སྤྲུལ་པ་ན། །ལྷ་ཡུལ་དུ་ནི་རྒོད་མ་བྱུང༌། །མདོག་འདྲེས་གནག་དང་དམར་བ་དང༌། །དུད་ཀ་སྔོ་བསངས་སྐྱ་བོ་དང༌། །ཁྲ་དང་ལྗང་བ་རྣམས་ཡིན་ཏེ། །དེ་དག་ཡུལ་ཡུལ་དག་ཏུ་བགོས། །རྟ་མཆོག་དེ་དག་རྣམས་ཀྱིས་ནི། །བདག་པོ་ཡང་ནི་དེ་སྙེད་དེ། །བརྒྱ་བྱིན་ཟླ་བ་ཉི་མ་དང༌། །རླུང་ལྷ་དང་ནི་ཆུ་ལྷ་དང༌། །མེ་ལྷ་དང་ནི་ནོར་བདག་རྣམས། །རྟ་རྣམས་ཀྱི་ནི་བདག་པོར་གྱུར། །ལྷ་ཡི་རྟ་ཡི་འབྱུང་གནས་ཏེ། །ས་སྟེང་ཕྱོགས་ཕྱོགས་དག་ཏུ་བགོས། །ལྷ་ཡི་མཆོག་གི་རྒོད་མ་ནི། །དེ་ལྟར་རྗེས་སུ་སྤྲུལ་པ་ཡིན། །དབང་པོ་ཆེ་ལ་མདོག་འདྲེས་པ། །གཞན་དག་གོ་རིམས་ཇི་བཞིན་ནོ། །དེ་ཡི་བུ་དང་ཚ་བོ་ཡིས། །ས་གཞི་ཐམས་ཅད་ཁྱབ་པ་ཡིན། །ལ་ལ་རྒྱ་མཚོ་ལ་གནས་ཏེ། །དེ་བཞིན་གཞན་དག་སིན་དུར་བརྟེན། །ནས་གླིང་ཐོ་གར་ལ་གནས་ཤིང༌། །གཞན་དག་ནོར་ཅན་དག་ཏུའོ། །ཤ་ཁ་བྲུ་ཞ་གན་དུ་ར། །དྲང་སྲོང་ཅན་དང་ཉམས་དགའ་དང༌། །མཉའ་དགའ་གུར་ཤཱི་ཀ་ལི་ཀ །ཉ་དང་མེ་ཆ་ཏིག་ཏིག་གི །ཆུ་བོ་བརྒྱ་པ་ཝིང་ས་ཤ །ཟླ་བའི་ཆ་ཞེས་བྱ་བ་དང༌། །ཀོ་ཤི་ཀ་དང་སྦྱངས་ཅན་དང༌། །གང་གཱ་དེ་བཞིན་ས་སྲུང་དང༌། །ཆུ་བོ་ཆེར་ལྡན་དེ་དག་དང༌། །རུས་སྦལ་ཅན་དང་ཁ་བ་ཅན། །བ་ལང་ཤིང་རྟ་མ་ལ་ཡ། །སྤོས་དང་ལྡང་དང་དུ་ནི་རོ། །ཅ་ཅོ་ཅན་ནའང་གནས་པ་ཡིན། །གྲོང་ཁྱེར་བཟང་དང་དཔའ་བོའི་སྟེ། །ཁ་ཆེའི་འབྲོག་གི་ཆ་དང་ནི། །ལྔ་ལེན་སྒྲ་ངན་ཨཾ་པཤྩ། །རི་ཁྲོད་མཐའ་འཁོབ་ནས་ཀྱི་ཡུལ། །ཡུལ་དབུས་རྒྱ་མཚོ་བཅུ་པ་དང༌། །དངུལ་རྡོའི་རི་དང་ནི་ཤ་དང༌། །ཤར་གྱི་མཐའ་དང་བུ་ལིང་དང༌། །བི་དར་པ་དང་ཀེ་ཤི་ཀ །ཕྱོགས་དང་མི་ཡི་ཡུལ་ཀུན་ན། །ས་ལ་བརྡ་ནི་བརྟེན་པ་ཡིན། །ཡུལ་དེ་རྣམས་ཀྱི་ཁྱད་པར་གྱིས། །དབྱེ་བ་གསུམ་དུ་འགྱུར་བ་ཉོན། །དབྱངས་ཅན་གྱི་ནི་བྱང་ཕྱོགས་སུ། །དེར་ནི་གང་ཞིག་སྐྱེས་གྱུར་པ། །སྣ་ཚོགས་འབྱུང་གནས་ལས་
བྱུང་བ། །སྤྱོད་པ་མཆོག་དང་ལྡན་ཞེས་བྱ། །ཡང་ན་ལྷོ་ཕྱོགས་ཆ་རུ་ནི། །ཤར་དུ་འབབ་པའི་ཆུ་ངོགས་གནས། །དེ་ནི་སྟོབས་དང་གཟི་མདངས་སོགས། །ཚང་ཀྱང་བར་མ་ཡིན་ཞེས་བྱ། །ས་རྡུལ་ཅན་དང་རི་རོང་དོག །སོ་ར་སྲ་ལ་སོགས་པའི་རྟ། །གཟི་མདངས་སྟོབས་དང་ལུས་ཀྱི་ཚད། །སྙིང་སྟོབས་དམན་པ་ཡིན་ཞེས་བྱ། །རྟ་ཡི་རིགས་དང་དབྱེ་བ་ནི། །ཡུལ་ནི་སོ་སོ་ལས་བྱུང་བ། །རིགས་དང་སྐྱེ་བའི་ཚུལ་དག་ནི། །ཡུལ་ལས་ལྔ་བཅུ་རྩ་བཞིར་འགྱུར། །དེ་ལས་གཞན་ཡང་དོག་པ་ཡི། །ཡུལ་ས་སྐྱེ་བ་རབ་བཤད་བྱ། །མ་དང་ཆ་ཡིས་བསྟེན་པ་ཡི། །ཉེས་པ་ཡོན་ཏན་མེད་འགྱུར་ཞིང༌། །རིགས་བཟང་ཡིན་ཡང་ཕལ་ཆེར་ཡིན། །ལུས་ནི་མི་སྡུག་པ་དག་སྣང༌། །དཔེར་ན་ལ་ལར་མི་དག་ནི། །སྒུར་བོ་དང་ནི་མིའུ་ཐུང་ཡོད། །དེ་བཞིན་རྟ་ཡང་ལུས་བྱད་ནི། །མི་སྡུག་པར་ནི་ཤེས་པར་བྱ། །ལུས་དང་མགྱོགས་ཚུལ་སྟོབས་རྣམས་ནི། །དམན་པས་རྟ་གཞན་དག་ཏུ་གྱུར། །ཡུལ་ནི་བཟང་པོར་སྐྱེས་ན་ཡང༌། །ཡོན་ཏན་མེད་པ་དག་ཀྱང་ཡོད། །ཕ་དང་མ་ཡི་སྐྱོན་དང་ནི། །སྟོན་ཀ་སྐྱེས་པར་གྱུར་པ་དང༌། །དེ་འདྲ་གཞན་ལས་བྱུང་བ་ཡི། །དེ་དག་དང་ནི་འདྲ་བར་བཤད། །དེ་བཞིན་ཕ་དང་མ་དག་ནི། །ལུས་ཀྱི་ཡོན་ཏན་ལྡན་གྱུར་ཀྱང༌། །ལེགས་པར་སྐྱེས་པར་མ་གྱུར་པ། །མཚན་ཉིད་དེ་དང་ལྡན་པ་མིན། །རིགས་ལས་བྱུང་བའི་མང་པོ་དང༌། །འདུས་པ་དག་ཏུ་བསྟན་པའང་མིན། །མཛའ་ལས་རྒྱལ་ལ་སོགས་པ་ཡི། །བུ་ཡིས་ཕ་ལ་ཡང་དྲིས་པ། །རྒྱུ་ནི་མཚུངས་པ་དང་ལྡན་ཞིང༌། །མངལ་ལས་དུས་གཅིག་སྐྱེས་གྱུར་པ། །དབྱིབས་དང་ཡོན་ཏན་མཚུངས་གྱུར་ཅིང༌། །རླུང་གི་ཤུགས་འདྲར་མཉམ་པར་ནི། །སྔོན་ཚེ་ཚངས་པ་ཉིད་ཀྱིས་ནི། །རྟ་རྣམས་སྤྲུལ་པར་བྱས་པ་ཡིས། །དེ་ལྟར་ཡོན་ཏན་མཉམ་པ་ལས། །ཅི་ཕྱིར་དེ་དག་ཐ་དད་གྱུར། །འདི་ཡི་རྒྱུ་ནི་གང་ཡིན་པ། །ཁྱེད་ཀྱིས་བདག་ཅག་ལ་བཤད་རིགས། །དེ་ལྟར་བུ་ཡིས་བསྐུལ་བ་དང༌། །ཤ་ལི་ཧོ་ཏྲས་སླར་སྨྲས་པ། །དཔར་ན་ཆུ་ནི་རོ་གཅིག་པར། །མཁའ་ལས་
བབ་ཀྱང་ས་རྣམས་ཀྱི། །ཁྱད་པར་དག་གིས་བཟང་ངན་གྱི། །རོ་ནི་སྣ་ཚོགས་མང་པོར་འགྱུར། །དེ་བཞིན་ཚངས་པས་ཚུལ་གཅིག་པར། །རྟ་རྣམས་སྤྲུལ་པར་བྱས་མོད་ཀྱི། །ལྷ་རྣམས་ལ་ནི་བགོས་པ་ལས། །ལྷག་པ་གང་ཡིན་ས་གཞི་འདིར། །རྒྱལ་པོ་རྣམས་ལ་བྱིན་གྱུར་པ། །རྟ་དེ་ས་ཡི་ཁྱད་པར་གྱིས། །རིགས་དང་སྐྱེ་གནས་མིང་དག་ནི། །ཁྱད་པར་མང་པོར་གྱུར་པ་ཡིན། །ཤ་ལི་ཧོ་ཏྲའི་མདོའི་གནས་ལས་རིགས་བརྟག་པའི་ལེའུ་སྟེ་སུམ་ཅུ་རྩ་བརྒྱད་པའོ།། །།ཤ་ལི་ཧོ་ཏྲ་རྟ་བྲེས་ན། །འདུག་ཚེ་དྲི་ཟའི་རྒྱལ་པོ་དང། །མཛའ་ལས་རྒྱལ་བ་གཉིས་ཀ་ནི། །དུལ་དང་ལྡན་པས་དྲིས་གྱུར་པ། །ལེགས་ལྡན་རྟ་ནི་བཟང་པོ་ཡང༌། །སྤྱོད་པ་ངན་པ་སྣང་བ་དང༌། །མཚན་ཉིད་མི་ཤེས་ལྡན་གྱུར་ཀྱང༌། །ཁ་ཅིག་རང་བཞིན་བཟང་པོ་མཆིས། །དེར་ནི་རྒྱུ་དག་གང་ལགས་པ། །ཡང་དག་པར་ནི་གསུངས་ཞེས་དྲིས། །སྟོན་ཀ་བཙས་པའི་མཚན་ཉིད་ནི། །ཡང་དག་པར་ནི་བཀའ་སྩོལ་ཅིག །དེ་གཉིས་ཀྱིས་དེ་དྲིས་པ་ན། །ཤ་ལི་ཧོ་ཏྲས་སླར་སྨྲས་པ། །ལུང་ལ་གོམས་བྱས་ཤེས་རབ་ནི། །ནམ་ཡང་སླུ་བར་བྱེད་པ་མིན། །ལུས་དང་མདོག་དང་སྟོབས་ལྡན་པ། །ཚུལ་ངན་རིང་དུ་གྱུར་པ་ཡིན། །ལ་ལ་ལུས་ནི་གཙང་གྱུར་ཀྱང༌། །སྙིང་སྟོབས་མི་ཉམས་གྱུར་པ་ཡིས། །ཕྱིན་ཅི་ལོག་གི་སྙིང་སྟོབས་ཅན། །ལུས་ནི་གཏུགས་པར་སྟོན་པར་བཤད། །དེ་ནི་ཤེས་རབ་དམན་པ་ཡི། །སྐྱེ་བོ་ཕལ་ཆེར་རྨོངས་པར་འགྱུར། །སྐྱེ་བ་ཉིད་དང་གཅེས་པ་དང༌། །ཤིས་དང་མི་ཤིས་མི་རྟོགས་འགྱུར། །དེ་བས་དབྱིབས་ལེགས་སྙིང་སྟོབས་ལྡན། །ངང་ཚུལ་བཟང་བའི་དམ་པ་ནི། །སྙིང་སྟོབས་ངང་ཚུལ་ལུས་བྱད་ནི། །སུན་འབྱིན་བྱེད་དེ་སྤང་བར་བྱ། །དེ་ནི་ང་ཡིས་བཤད་བྱ་ཡིས། །ཁྱད་པར་མཉན་པ་ཉིད་དུ་གྱིས། །དབྱིབས་ལེགས་པ་དང་དཔའ་བ་དང༌། །གཟི་མདངས་སྟོབས་དང་མ་ཡེངས་དང༌། །འཕེལ་ཀ་ཆེ་ཞིང་སེམས་བཟང་ལ། །དར་ལ་བབ་ཅིང་མདངས་བཟང་ལ། །དབང་པོ་བརྟན་ཞིང་དགའ་བ་དང༌། །སྙིང་སྟོབས་མགྱོགས་བྱད་ལྡན་པ་ཡི། །དེ་འདྲ་
བ་ཡི་རྟ་དག་ནི། །ཡུལ་དང་དུས་ལས་དགའ་གྱུར་པར། །རྩྭ་དང་ཆུ་མང་དུས་སུ་ནི། །ཕ་དང་མ་ནི་འདུས་གྱུར་པའང༌། །དེ་ཚེ་སྐྱེས་གྱུར་རྟེའུ་ནི། །ཡོན་ཏན་ཀུན་དང་ལྡན་པ་ཡི། །རྟ་ནི་དེ་དག་ཉིད་ཀྱིས་ན། །ཡོན་ཏན་དེ་ཉིད་སྐྱེ་བར་འགྱུར། །འདོད་བཅས་པ་དང་འདོད་བྲལ་བའམ། །དོན་དུ་གཉེར་དང་དོན་མི་གཉེར། །གཞོན་དང་ཤིན་ཏུ་རྒན་པ་དང༌། །རྟེའུ་དང་རྟ་རྒན་ཉིད་ཀྱིས་ནི། །ལུས་དང་སྙིང་སྟོབས་ངང་ཚུལ་རྣམས། །བཟང་ངན་འདྲེས་པ་ཉིད་དུ་འགྱུར། །ཁྲོ་དང་འཁྲུག་པར་གྱུར་པ་དང༌། །འཇིགས་དང་སྐྲག་པར་བྱེད་པ་དང༌། །གཅོང་ཅན་དང་ནི་ཉམ་ཆུང་དང༌། །ངལ་དང་སེམས་ནི་དུབ་པ་དང༌། །སྐྱེ་བར་བྱེད་པའི་རྟ་གང་ཡིན། །ལས་ལ་མཁོ་བར་མི་འགྱུར་རོ། །དེ་ནི་མདངས་སྟོབས་དམན་འགྱུར་ཞིང༌། །ལས་རྣམས་ཀུན་ལ་ནུས་པ་ཆུང༌། །རྟག་ཏུ་ན་ཞིང་རྒྱུན་དུ་སྦེག །གང་ཞིག་རྙོག་ཅན་འགྱུར་བའི་རྟ། །ཕ་དང་མ་ཡི་རྒུད་པ་ཡིས། །སྟོབས་ཆུང་གཟི་མདངས་ཞན་པར་འགྱུར། །དེ་ལྟར་སྐྱེ་བར་གྱུར་བའི་རྟ། །ལས་རྣམས་འགྲུབ་པར་མི་བྱེད་དོ། །དགུན་མཐའ་ཚད་པའི་ཐོག་མ་རུ། །དཔྱིད་དུས་སྲོག་ཆགས་རྣམས་ལ་ཕན། །ཐུན་མོང་དུས་སུ་གྱུར་བའི་ཚེ། །ལུས་གཟུངས་སྙོམས་པར་གྱུར་པའི་རྟ། །རྒོད་མ་ལོ་བཞི་ལོན་པ་དང༌། །རྟ་ཕོ་ལོ་བརྒྱད་ལོན་པ་དང༌། །འདུས་གྱུར་པ་ལས་གྱུར་བའི་རྟ། །རྟག་ཏུ་ལས་རྣམས་ཀུན་ལ་བསྔགས། །དེ་ནི་ཡོན་ཏན་ཀུན་ལྡན་ཞིང༌། །ཉེས་པ་ཀུན་དང་བྲལ་བ་ཡིན། །ལུས་ཀྱི་ཕྱི་ནང་དག་གི་ནི། །ཡོན་ཏན་ལྡན་ཞིང་ཀུན་སྦྱོར་ནུས། །མཛའ་ལས་རྒྱལ་གྱིས་ཡང་སྨྲས་པ། །ཐ་མལ་པ་དང་ནད་བཅས་གནས། །སྟོན་ཀ་པ་ནི་གང་དག་ལགས། །གསོར་རུང་གསོར་མི་རུང་བ་དག །གང་ལགས་ཐེ་ཚོམ་སྐྱེས་ལགས་ཀྱི། །དྲང་སྲོང་ཆེན་པོ་དེ་གསུངས་ཤིག །མཛའ་ལས་རྒྱལ་གྱིས་དེ་སྐད་དྲིས། །ལེགས་ལྡན་གྱིས་ནི་སླར་སྨྲས་པ། །འབྲས་བུ་བཟང་དང་ངན་པ་ཡི། །ཕུན་ཚོགས་སྟོན་ཀའི་ཚེ་ན་གནས། །འབྲུ་ཡི་ཕུན་ཚོགས་མཐུན་པས་
ན། །རྟ་ལའང་སྟོན་ཀ་པ་ཞེས་བཤད། །རང་བཞིན་དེ་འདྲར་གྱུར་པ་ཡི། །སྟོན་ཀ་རྣམ་པ་བཞི་རུ་མཐོང༌། །རང་བཞིན་ལ་གནས་དེ་བཞིན་སྦོམ། །ཕྲ་དང་དམར་པའི་སྟོན་ཀ་པའོ། །རང་བཞིན་ལ་གནས་མཆོག་ཡིན་ཏེ། །ཕྲ་དང་སྦོམ་དང་གཞན་པ་ཡིན། །རྟེའུ་སྟོན་ཀ་དམར་པོ་ནི། །སྤང་བར་བྱ་བར་གྱུར་པ་ཡིན། །ཕྲ་དང་སྦོམ་པ་ཕྲད་པ་ལས། །སྦོམ་པའམ་ཡང་ན་ཕྲ་བར་འགྱུར། །ཕལ་ཆེར་གང་གི་མཚན་ཉིད་དང༌། །དེ་ལས་ལྷག་པར་མི་འགྱུར་རོ། །སྐྱེ་གནས་སྙིང་སྟོབ་མ་ལུས་ཀྱི་ནི། །མཚན་ཉིད་དང་ནི་རྟགས་དག་ལས། །འདི་རྣམས་ཀྱི་ནི་ལས་དག་ཀྱང༌། །ཐམས་ཅད་རིམ་བཞིན་བཤད་པར་བྱ། །རྒོད་མའི་སེམས་སྟོབས་ཉེ་བ་དང༌། །ལམ་དུ་ཞུགས་པར་གྱུར་པ་ཡིས། །ཁུར་དང་གོམ་པ་དག་གིས་ནི། །དེ་ནི་ཚ་བས་གདུངས་གྱུར་ཅིང༌། །བཀྲེས་དང་སྐོམ་པས་ཉེན་པས་ན། །མངལ་ནས་ཁྲག་ནི་འཛག་པར་འགྱུར། །ཟླ་བ་དྲུག་ནི་འདས་པ་ན། །ཤ་ནི་ཁྲག་ཏུ་འགྱུར་བ་ཡིན། །མངལ་དེའི་ཚིལ་ནི་གང་ཡིན་པའང༌། །ཕྲ་མོ་ཙམ་ཞིག་ཡོད་མི་འགྱུར། །རུས་ཕྲ་ཤ་ནི་སྲབ་པ་རུ། །སྐྱེ་བ་སྟོན་ཀ་དམར་པོ་ཡིན། །འདི་ནི་ལོངས་སྤྱོད་མི་རུང་ཞིང༌། །ལས་རྣམས་ནུས་པའམ་ཡིན་ནོ། །མངལ་ནི་ཆགས་པར་གྱུར་བའི་རྟ། །ཟས་ཀྱི་བྱ་བས་འཕེལ་མི་འགྱུར། །རྩུབ་ཅིང་རྣོ་བ་ཟ་བ་དང༌། །དེ་བཞིན་ལམ་དུ་ཞུགས་པ་དང༌། །ཁུར་གྱིས་དུབ་པར་བྱས་པ་དང༌། །བཅིངས་དང་རྟ་ལོ་དང་སྦྱར་དང༌། །དེར་ནི་མངལ་ཆགས་གྱུར་པ་ཡིས། །ཁྲག་ཟད་ལོག་པར་འགྱུར་བ་ཡིན། །ཇི་ལྟར་ཆར་མེད་སྨན་རྣམས་ནི། །སྐྱེ་བར་འགྱུར་བ་མ་ཡིན་ལ། །འབད་མེད་མེ་ཏོག་འབྲས་བུ་སོགས། །འཕེལ་བར་འགྱུར་བའང་མ་ཡིན་ནོ། །དེ་བཞིན་ལོག་པར་གསོས་པ་ཡིས། །རྟ་ཡི་མངལ་ནི་སྐམས་པར་འགྱུར། །དེ་ནི་སྦེག་ཅིང་ཉམ་ཆུང་བའི། །རྟེའུ་དུས་ནི་འདའ་བར་བྱེད། །དུས་མ་འདས་པའང་ཉམ་ཆུང་ཞུམ། །ཡན་ལག་མ་ཚང་སྐྱེ་བར་འགྱུར། །རྟེའུ་དེ་ནི་སྟོབས་ཞན་ཞིང༌། །དབང་པོ་ཞན་པར་སྐྱེ་བར་འགྱུར། །ཁྲག་ཆུང་སྙིང་སྟོབས་དམན་པ་རུ། །དུས་སུ་དེ་ནི་ལས་ཀྱིས་སྐྱེ། །དེ་ནི་རུས་
པའི་སྟོན་ཀ་བར། །ཤེས་བྱ་དེ་ཡི་ལས་ཉོན་ཅིག །རྟེའུ་དེ་ནི་མར་རམ་ནི་མ། །ཡང་ན་འོ་མས་གསོ་བྱ་ཞིང༌། །སྟོབས་སྐྱེད་པ་ནི་གཞན་དག་ནི། །ཕྲ་བའི་སྟོན་ཀ་གསོ་བར་བྱ། །མ་ནི་འབྲས་ཆ་ན་ཡུ་ཤ་དང༌། །དེ་བཞིན་ཁུ་བ་སྣ་ཚོགས་དང༌། །དེ་བཞིན་བཏུང་བ་སྣ་ཚོགས་དང༌། །བསྐུ་དང་འཇམ་རྩིས་བརྡ་བར་བྱ། །ཡང་ན་རྟེའུ་ཟླ་དྲུག་པ། །བསྐུ་དང་འཇམ་རྩི་འབྲས་ཆན་ཞུ། །ཚད་དང་ལྡན་པས་གོ་རིམས་བཞིན། །དེ་བཞིན་ལྷག་བར་བྱ་བ་དང༌། །མེ་སྟོབས་སྐྱེད་པ་སྦྱིན་པར་བྱ། །ཁ་ར་འོ་མར་སྦྱར་བ་ལ། །མར་ནི་ཚད་ཙམ་བཅུག་པ་སྦྱིན། །རྟེའུ་ལོ་གཉིས་ལོན་པ་ལ། །ཁ་ཟས་སྦྱིན་པར་བྱ་བ་ཡིན། །ལུག་གི་ཤ་དང་རྨ་བྱའི་ཤ །ཁྱིམ་བྱ་བྱ་ཡི་ཤ་རྣམས་དང༌། །ཉ་དང་རུས་སྤ་ལང་ཤ་རྣམས་ལས། །ཤ་ཁུ་དང་ནི་ཁ་ཟས་བྱ། །སྣ་སྨན་དགོངས་ཀ་བཏུང་བ་དང༌། །བསྐུ་དང་འཇམ་རྩི་རྩྭ་ཡིས་ཀྱང༌། །ལུས་ཀྱི་ལུས་གཟུངས་བརྟས་བྱ་བ། །ཟླ་དྲུག་པར་དུ་བྱ་བར་བཤད། །དེ་ནས་ས་འདིར་བསྐྱང་བྱ་ཞིང༌། །ལུས་དང་སྲོག་ཀྱང་བསྲུང་བར་བྱ། །སོར་ནི་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་སྟེ། །གཞུ་འདོམ་བརྒྱད་སྟོང་དག་ལ་ནི། །ལས་ལ་སྦྱོར་བའི་དཔག་ཚད་ཡིན། །དེར་ནི་དང་པོར་རྟེའུ་དག །རིམ་པ་འདི་དང་ལྡན་པས་ཀྱང༌། །འདོམ་ནི་སུམ་བརྒྱ་ནས་བརྩམས་ཏེ། །དཔག་ཚད་པར་དུ་རིམ་གྱིས་བཀྲི། །དགུན་ཟླ་འབྲིང་དང་ཐ་ཆུངས་ཚེ། །དེ་ལས་ཉིས་འདབ་བྱ་བ་ཡིན། །དཔྱིད་ཟླ་རབ་གསུམ་འགྱུར་ཏེ། །དཔྱིད་ཟླ་འབྲིང་བོ་དཔག་ཚད་མེད། །དེ་ཡི་རྗེས་ལ་དཔག་ཚད་ནི། །གཅིག་ཙམ་ཟླུམ་པོས་བསྐོར་བར་བྱ། །བྱ་བའི་སྦྱོར་བ་འདི་ཉིད་ནི། །ཉམ་ཆུང་བ་ལ་བྱ་བ་ཡིན། །ནས་དང་མ་ཤ་མར་འོ་མས། །བསྐུ་དང་འཇམ་རྩི་རྩྭ་རྣམས་དང༌། །ཤིན་ཏུ་སྣུམ་པའི་བཏུང་བ་ཡིན། །གང་ཚེ་གཉི་ག་བརྟས་བྱས་ལ། །དེ་བཞིན་རྒོད་མ་སྦོ་མ་གྱུར་ཀྱང༌། །སྤོམ་པོ་བསྐྱེད་པ་ཉིད་ཡིན་ཏེ། །སྦོམ་ཞིང་མང་ལ་དུ་ལྕི་བའི་ཕྱིར། །དེ་ནི་དུས་སུ་སོ་མི་འགྱུར། །དེ་ཡི་ཡང་ཡང་མ་ཞུ་ལྟར། །དུས་མིན་པར་ནི་སྐྱེད་བར་འགྱུར། །རྟེའུའི་ཚིལ་ནི་ཆེར་འགྱུར་ཞིང༌། །ཤ་ཡི་ཚོགས་
ལྟར་གནས་པ་ཡིན། །དེ་ནི་ལྡང་དང་བརྩེ་མི་ནུས། །ལྕི་ཞིང་ཁུར་གྱིས་ནོན་ལྟར་འགྲོ། །སྦལ་བ་ལྟར་འགྲོ་སྦོམ་པ་དང༌། །ལུས་ནི་སྙོམས་པར་སྐྱེ་བར་འགྱུར། །སྦལ་པ་སྐྲངས་པར་གྱུར་པ་ལྟར། །བརྟན་པར་འགྲོ་བར་འགྱུར་མ་ཡིན། །ཚིལ་གྱིས་སྙིང་ནི་ཁྱབ་གྱུར་ཅིང༌། །མི་རྩུབ་རྩ་བ་རྟེན་པ་ཡིན། །ཚིལ་ནི་ལྷག་པར་གྱུར་པ་ནི། །ལུས་ཀྱི་རྩེ་དང་འདེགས་པར་དཀའ། །འདི་ནི་ཚིལ་ཆེས་ཡིན་ཞེས་བྱ། །དེ་ལ་ལས་ནི་འདི་ཕན་ནོ། །པི་པི་ལིང་དང་བཅའ་ལྒ་དང༌། །ཧཾ་སྟི་པི་པི་ལིང་ཙི་ཏྲ། །འདི་དག་བསྐོལ་བའི་མར་དག་ནི། །ནང་པར་ཟས་ཀྱི་སྔོན་དུ་སྦྱིན། །ཚད་ཙམ་རྟེའུ་དེ་ལ་ནི། །སྦྱང་བའི་ཕྱིར་ནི་སྦྱིན་པར་བྱ། །དེ་ལ་མ་ཡི་འོ་མ་ནི། །མི་བླུད་ར་ཡི་འོ་མ་སྦྱིན། །ཚོན་མོའི་འོ་མ་ལྕི་བས་ན། །དེ་ཕྱིར་ར་ཡི་འོ་མ་བླུད། །འོ་མ་སྦྱོང་བར་བྱེད་པ་ཡི། །བཏུང་བ་རྒོད་མ་ལ་སྦྱིན་བྱ། །ཁ་བ་དང་ནི་བསྐ་བ་དང༌། །ཚ་བ་སྦྱིན་པས་དེ་སྦྱང་བྱ། །དེ་ལ་ཏི་ལ་མར་འཇམ་རྩི་དང༌། །དེ་ནས་སླར་ཡང་གནས་པར་བྱ། །ཟླ་བ་དྲུག་གི་བར་དུ་ནི། །རྟེའུ་དེ་ལས་ཡང་དག་སྤྱད། །གཞུ་འདོམ་སྟོང་ནི་སོང་ནས་ཀྱང༌། །དེ་ཉིད་ཙམ་དུ་བཟློག་པར་བྱ། །དེ་ཡི་རྗེས་ལ་འདོམ་བཞི་སྟོང༌། །དེ་ཉིད་འགྲོ་ཞིང་བཟློག་པར་བྱ། །ཟས་དང་བསྐྱང་བ་ཉིད་ཀྱིས་ནི། །ལུས་ནི་ལེགས་པར་མཁྲང་བར་འགྱུར། །ལུས་དང་ཡན་ལག་རྐང་པ་བརྟན། །ལག་གནས་དབང་པོ་དགའ་བ་དང༌། །གང་ཚེ་ནད་མེད་ཡིད་བདེ་བ། །དེ་ཚེ་ལས་ལ་སྦྱར་བར་བྱ། །དེ་ལྟར་སྦོམ་ཕྲ་ཤེས་བྱས་ལ། །དེ་ནས་ལས་རྣམས་སྦྱར་བར་བྱ། །འདི་ནི་དམར་པོར་གྱུར་པ་དང༌། །སྦོམ་ཕྲ་དག་ཀྱང་བཤད་པ་ཡིན། །རྟ་མཆོག་གི་ནི་སྟོན་ཀ་དག །རང་བཞིན་ལ་གནས་བཤད་པར་བྱ། །སྔར་ནི་ང་ཡི་རྟ་རྣམས་ཀྱི། །ཡོན་ཏན་ཀུན་ལྡན་གསེབ་དང་ནི། །རྒོད་མ་ཡོན་ཏན་དེ་ལྡན་ཞིང༌། །ན་ཚོད་སྟོབས་ནི་ཕུན་ཚོགས་པ། །སྲོག་ཆགས་ཐམས་ཅད་བདེ་བའི་དུས། །དཔྱིད་དོ་མེ་ཏོག་དྲི་ཅན་ལ། །ཕན་ཚུན་འདོད་པ་བསྐྱེད་པའི་ཚེ། །རྒོད་མ་འཁྲིག་པའི་དོན་དུ་འགྲོ། །དེར་ནི་མངལ་དུ་ཆགས་གྱུར་པ། །རྟ་ཡི་ཉམས་མཉམ་བཟང་པོ་ཡིན། །མངལ་དུ་ཆགས་
བ་བསྲུང་བའི་ཕྱིར། །ནས་དང་མ་ཤ་མར་གྱིས་གསོ། །དམན་པ་བསྟེན་དུ་མི་གཞུག་ཅིང༌། །སྐར་ཁུང་དྲ་བ་ཅན་དུ་གཞག །གོམ་པ་དལ་གྱིས་འགྲོ་བྱ་ཞིང༌། །དབེན་པའི་ཕྱོགས་སུ་བསྐྱང་བར་བྱ། །ཁང་པ་སྐར་ཁུང་ཅན་དེར་ནི། །བཞི་མཉམ་སྟན་དང་བཅས་པར་བྱ། །རྟེའུ་ལ་ནི་ཕན་པའི་ཕྱིར། །འདི་དག་ཐམས་ཅད་ཡང་དག་སྤྱད། །ཡུངས་ཀར་དང་ནི་ཆུ་དག་དང༌། །བུ་ཤེལ་ཙེ་དང་ཤུག་པ་དང༌། །བསེ་ཤིང་འབྲས་བུ་ཞིབ་བཏགས་པའི། །ཕྱེ་མ་ཡི་ནི་བདུག་བས་བདུག །དེ་ལྟར་ལེགས་པར་བསྲུངས་གྱུར་ན། །རྟེའུ་དུས་ཀྱི་བཟང་པོར་སྐྱེ། །ལུས་ཀྱི་སྟོབས་ནི་ཕུན་ཚོགས་ཤིང༌། །ཤིན་ཏུ་འབྱེས་པ་ལེགས་པར་འདུས། །ལུས་གཟུངས་ཐམས་ཅད་རྒྱས་པ་དང༌། །ཡན་ལག་མཛེས་ཤིང་ལྟ་ན་སྡུག །མགྱོགས་ཤིང་གཙུག་ནི་དག་པ་དང༌། །མཁྲེགས་ཤིང་གྲ་མ་ཅན་མིན་དང༌། །པགས་སྲབ་བ་སྤུ་སྣུམ་པ་དང༌། །འགྲོ་ལེགས་གཟུང་བར་སླ་བ་དང༌། །ལུས་ཀྱི་ཡོན་ཏན་ཀུན་ལྡན་ཞིང༌། །མཚན་ཉིད་ཐམས་ཅད་བསྔགས་པ་དང༌། །འཛིན་དང་འཇོག་པར་བྱེད་པ་ལ། །རྟག་ཏུ་མཉམ་པ་མེད་པར་དཔའ། །སྟོན་ཀ་དག་དང་ཞེས་འདི་བཤད། །རྟ་ནི་བཟང་པོ་ཡིན་པར་བསྟན། །རྐང་པ་བརྟན་ཞིང་འགྲོས་ཆེ་ལ། །ལུས་ཀྱི་འཕེལ་ཀ་ཆེ་ཞིང་ལེགས། །རྟག་ཏུ་ཁལ་གྱི་སྦྱོར་བ་དང༌། །ལས་རྣམས་ལ་ནི་ངེས་སྦྱོར་ནུས། །དེ་ནི་སློབ་དཔོན་དམ་པ་ཡིས། །རག་པའི་རང་བཞིན་སྟོན་ཀར་བཤད། །དེ་ནི་བཀྲ་ཤིས་རྟ་ཡིན་ཏེ། །རྒྱལ་པོའི་བཞོན་པར་དེ་ཉིད་བཤད། །དེ་ནི་གཡུལ་ངོར་རབ་ཏུ་བསྔགས། །རྟག་ཏུ་རྒོད་མའི་གསེབ་ཏུ་བཟང༌། །དེ་ནི་བྱང་ཞིང་དཔའ་བ་དང༌། །མཆོད་སྦྱིན་ལ་ཡང་རྟ་དེ་བཟང༌། །རྟག་ཏུ་ཚངས་པ་སྨྲ་བ་ཡི། །རྟ་མཆོག་ཅེས་ནི་དེ་བཤད་དོ། །དེ་ནི་རྟག་ཏུ་བཞོན་པར་བཟང༌། །སྐྱེ་དགུ་སྐྱེད་པ་ཡིན་པར་བཤད། །འདི་ཡི་ལས་རྣམས་བཤད་པ་སྟེ། །གཞན་ཡང་མངལ་ཅན་ཞེས་བྱའོ། །རྟ་ཡི་མཆོག་ཏུ་གྱུར་པ་འདི། །ལས་ལ་སྒྱིད་ལུག་འགྱུར་མ་ཡིན། །སྟོན་ཀ་བ་ནི་བཞི་བོ་འདི། །མཚན་ཉིད་གྲངས་ནི་དུས་མ་ཡིན། །སྦོམ་དང་
རང་བཞིན་ལ་གནས་དང༌། །དམར་དང་དེ་བཞིན་ཕྲ་བ་སྟེ། །རྣམ་པ་བཞི་པོ་གསོ་བ་དང༌། །བཅས་པར་དེ་བཞིན་བཤད་པ་ཡིན། །གཞན་ཡང་པགས་པ་ལ་སོགས་པའི། །རང་བཞིན་གང་ཡིན་བཤད་པར་བྱ། །པགས་སྲབ་མདངས་སྣུམ་ཕུན་སུམ་ཚོགས། །བ་སྤུ་སྣུམ་ཞིང་གཉེར་མ་སྙོམས། །གསང་བའི་ཕྱོགས་ནི་མཛེས་པ་དང༌། །གཙུག་ནི་བཟང་པོར་གང་གྱུར་དང༌། །བློ་ལྡང་བྱང་ཞིང་མགྱོགས་པ་དང༌། །རྨང་ཁ་མཉན་ཞིང་ཚོར་བ་ཅན། །ཤིན་ཏུ་འབྱར་བར་གང་གྱུར་པ། །པགས་བ་བཟང་པོར་དེ་བཤད་དོ། །ཡན་ལག་ཚད་དང་ལྡན་པ་དང༌། །ལུས་ཀུན་ལག་པར་སྙོམས་པ་དང༌། །དམར་ཞིང་དམར་བའི་མདོག་རྫས་ཅན། །མིག་དམར་ལྟ་ན་སྡུག་པ་དང༌། །མདངས་ལྡན་ཡིད་ནི་གཞུངས་པ་དང༌། །བློ་དང་དྲན་པའི་ཡོན་ཏན་ལྡན། །ཁྲག་གི་མཚན་ཉིད་བཟང་ལྡན་རྟ། །མཚན་དང་ཁ་དང་རྐན་དམར་བའོ། །སོ་སྣུམ་མིག་ནི་ལེགས་པ་དང༌། །པ་སྤུ་རྔ་མའི་མདངས་སྣུམ་ཞིང༌། །དེ་བཞིན་ཕུམ་ཕུམ་འཇམ་ལ་སྣུམ། །རྔོག་མ་རང་ཞིང་བཟང་བ་དང༌། །ལྕེ་ནི་འཇམ་ཞིང་ཡངས་པ་དང༌། །པདྨ་འདྲ་ཞིང་ལུས་ཚུགས་ནས། །ཤིན་ཏུ་མཛེས་ཤིང་ཤ་ཡིས་རྒྱས། །རྐན་དང་མ་རྐན་མིག་དམར་ཞིང༌། །སྟོབས་ཆེན་གཟུགས་ནི་བཟང་བ་དང༌། །ཤ་མཁྲེགས་པ་ཞེས་བྱ་བར་བཤད། །གསེང་ཁྲོམ་མེ་ཏོག་མདོག་འདྲ་ཞིང༌། །ཟླུམ་ལ་ཚིལ་གྱིས་རྒྱས་ཤིང་བཟང༌། །ཤ་ཆེ་ཚིལ་ནི་ཆེ་གྱུར་པ། །ཆེ་མཁྲེགས་པ་ཡི་རྟ་ཞེས་བྱ། །ཁ་དོག་དཀར་བའམ་སྦྲང་རྩི་འདྲ། །མདངས་གསལ་སྙོམས་ཤིང་མཁྲེགས་པ་ཡི། །སོའམ་མཆེ་བ་ཡོད་གྱུར་ལ། །མཚན་ནི་ཤིན་ཏུ་ལེགས་གྱུར་ཅིང༌། །གང་གི་རུས་པ་ལས་སྐྱེས་ཤིང༌། །འབྱེས་ལས་བརྟན་པར་གྱུར་པ་དག །ཁུར་གྱིས་ཞུམ་པ་མེད་གྱུར་པ། །དེ་ནི་རུས་མཁྲེགས་རྟ་ཡིན་ནོ། །རྐང་ནི་མར་གྱི་སྙིང་པོ་འདྲ། །སྲ་ཞིང་ལྕི་ལ་མཁྲེགས་པར་སྣང༌། །ཤ་ཡི་ཕྱི་དང་ནང་དག་ནི། །ཤིན་ཏུ་སྣུམ་པར་སྣང་བ་དང༌། །མིག་གི་མདངས་བཟང་ནག་པ་དང༌། །གང་གི་བ་སྤུ་སྣུམ་གྱུར་ཅིང༌། །སྟོབས་དང་མདངས་ཀྱི་ཡོན་ཏན་ལྡན། །
དེ་ནི་རྐང་མཁྲེགས་པ་ཞེས་བྱ། །སྣུམ་ཞིང་བསྐ་ལ་དྲིང་མེད། །མང་ཞིང་བ་རའི་འོ་མ་འདྲ། །གང་ལ་དེ་འདྲའི་ཁུ་བ་ཡོད། །དེ་ནི་ང་ཡིས་བཤད་ཀྱིས་ཉེན། །སྲ་ཞིང་སྟོབས་ལྡན་དྲེགས་པ་བདོ། །རྒྱ་ཆེར་དགའ་ཞིང་མགྱོགས་དང་ལྡན། །རྒོད་མ་ཤིན་ཏུ་ཚམ་བྱེད་ཅིང༌། །མ་དངས་སྣུམ་འགྲོས་ནི་མྱུར་བ་དང༌། །དཀར་བའམ་ཡང་ན་མདོག་རྗེས་དཀར། །ཤ་དང་གནད་དང་ཚིལ་དང་ནི། །རྐང་དང་རུས་པ་པགས་པ་དང༌། །ལུས་གང་གཞན་ལ་ཡོད་པ་རྣམས། །ཐམས་ཅད་རྒྱུས་པས་སྦྲེལ་བ་ཡིན། །འདི་ནི་མཁྲེགས་པར་གྱུར་པ་ཡི། །སྟོབས་དང་གཟི་མདངས་མགྱོགས་པར་ལྡན། །ལུས་ཀྱི་ཡན་ལག་ཀུན་ལེགས་འབྲེལ། །ཚིགས་ལེགས་ལས་རྣམས་ཐམས་ཅད་བྱེད། །འདི་ནི་རྩ་རུས་སྲ་བ་ཡིན། །སྙིང་སྟོབས་བརྟན་ལ་ད་ཉོན་ཅིག །དཔའ་ཞིང་གཡུལ་དུ་དཔའ་བའི་མགོ །བློ་དང་དྲན་པའི་ཡོན་ཏན་ལྡན། །མདོག་སྣུམ་དེ་བཞིན་མདངས་དང་ལྡན། །ཕོ་མཚན་ལྡན་ཞིང་ཚོར་བ་ཆེ། །ཆུ་ཞེང་གབ་པར་གྱུར་པ་ཡི། །ཡོན་ཏན་ཐམས་ཅད་ལྡན་པ་དག །སྙིང་སྟོབས་བརྟན་པའི་རྟ་ཡིན་ཏེ། །རྡོ་རྗེ་མཁྲེགས་པ་འདྲ་ཞིང་གྲིམས། །ས་ཀུན་ལ་ནི་ཐོར་མེད་ཅིང༌། །ལས་རྣམས་ཀུན་ལ་བསྔགས་པ་ཡིན། །འཁྲུགས་ཤིང་ཚིམ་པར་བྱས་ན་ཡང༌། །ཁོང་འཁྲུགས་དགའ་བར་འགྱུར་བ་མེད། །འདི་དག་སྲ་བར་ཡང་དག་བཤད། །དེ་རྣམས་ཀྱི་ནི་ཡོན་ཏན་ཉོན། །པགས་མཁྲེགས་སྲབ་ཅིང་མཚན་ལེགས་སྐྱེ། །མགྱོགས་དལ་དག་དང་ལྡན་པ་ཡི། །ཁྲག་བཟང་མདངས་དང་ལྡན་པ་དང༌། །ཡིད་གཞུངས་པར་ནི་འགྱུར་བ་ཡིན། །ཤ་མཁྲེགས་སྟོབས་དང་ལྡན་པ་དང༌། །རྟ་ནི་གཟུགས་བཟང་འགྱུར་བ་ཡིན། །ཚིལ་མཁྲེགས་པར་ནི་གྱུར་པའི་རྟ། །ལམ་གྱི་ཕ་རོལ་ཕྱིན་པར་འགྱུར། །རུས་མཁྲེགས་སྟོབས་དང་ལྡན་པ་དང༌། །དཔངས་མཐོ་དེ་བཞིན་ཀུན་བྱེད་ནུས། །རྐང་མཁྲེགས་པར་ནི་གྱུར་བའི་རྟ། །སྟོབས་དང་གཟི་མདངས་ཕུན་ཚོགས་འགྱུར། །ཁུ་བ་མང་བར་གྱུར་པའི་རྟ། །བུ་མང་སྟོབས་ཆེ་འདོད་མོས་མེད། །རྩ་རྒྱུས་མཁྲེགས་པར་གྱུར་བའི་རྟ། །གཉིད་སྲབ་ངལ་བ་མེད་པར་འགྱུར། །སྙིང་སྟོབས་ཆེ་བ་བདག་
ཉིད་བརྟན། །བདག་ཉིད་ཐུལ་ཞིང་ཐམས་ཅད་བྱེད། །དེ་ལྟར་སྟོན་ཀ་ཞེས་བྱ་དང༌། །མཁྲེགས་པར་གྱུར་པའང་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་སྟོན་ཀ་པ་ཞེས་བྱ་བའི་ལེའུ་སྟེ་སུམ་ཅུ་རྩ་དགུ་པའོ།། །།དཀའ་ཐུབ་བརྟུལ་ཞུགས་ཡང་དག་གྲུབ། །ཚངས་པའི་གཟི་ལྡན་ཐུལ་བར་དཀའ། །ཤེས་དང་རྣལ་འབྱོར་བསམ་གཏན་དང༌། །སྒོམ་པ་ལ་གོམས་སྡིག་བྲལ་ལ། །ཤ་ལི་ཧོ་ཏྲའི་བུ་ལེགས་ཐོས། །ཐོས་པ་ཕུན་ཚོགས་དུལ་བར་ལྡན། །དྲི་བའི་ཚིག་འདི་དོན་མཆོག་ལྡན། །ཤ་ལི་ཧོ་ཏྲ་ལ་དྲིས་པ། །ལེགས་ལྡན་སྔར་ནི་རྒྱལ་པོ་ལ། །རྟ་ལས་མཆོག་གྱུར་དཔུང་གཞན་མེད། །རྟ་ཡིས་ཐོབ་པར་མི་ནུས་པའི། །གནས་ཀྱང་རྒྱལ་པོས་ཐོབ་ཅེས་གསུངས། །དེ་ལ་རྟག་པར་རྟ་ཡོད་ཀྱང༌། །གལ་ཏེ་རྒྱལ་པོ་གཞན་ལས་ནི། །ཡུལ་གཞན་ལས་ནི་བྱུང་བ་ཡི། །རྟ་དག་ཉོ་བར་འདོད་གྱུར་ལ། །གང་ལ་རིན་ནི་ཅི་ལྟ་བུ། །ཡིན་པ་དེ་ལ་རྟོགས་པར་འདོད། །དེ་དོན་མ་ལུས་ཤེས་འགྱུར་བ། །ཁྱེད་ཀྱི་དོན་ནི་ཤེས་པར་འཚལ། །བདག་ཉིད་ཆེན་པོ་ལེགས་ཐོས་ཀྱིས། །དེ་ལ་བསྙེན་བཀུར་བྱེད་པ་ན། །དྲང་སྲོང་ཆེན་པོས་ཉོ་ཚོང་གི །བརྟག་པ་འདི་ནི་སྨྲས་པ་ཡིན། །གལ་ཏེ་རྟ་ནི་ཡོད་གྱུར་ཀྱང༌། །རྟ་གཞན་ཉོ་བར་འདོད་གྱུར་ན། །རྟ་ཉུང་བའམ་འོན་ཏེ་ནི། །བཞོན་པ་ཟད་ཚེ་སྨོས་ཅི་དགོས། །རྒན་ཡང་འཁོར་ལོས་སྒྱུར་བ་ཡི། །རྒྱལ་པོ་ལ་འོས་མཚན་ཉིད་རྫོགས། །མཚན་ཉིད་དོན་གྱིས་འབྲས་འདོད་པས། །རབ་ཏུ་འབད་དེ་ཉོ་བར་བྱ། །རྟ་གང་གཡུལ་དུ་མི་ཤིས་ཡོད། །ཡོན་ཏན་གཞན་དག་ལྡན་གྱུར་ན། །རྒྱུ་བའི་ཡོན་ཏན་ལྡན་པའི་ཕྱིར། །དེ་ཡང་འབད་པས་ཉོ་བར་བྱ། །མཚན་ཉིད་ངན་པའི་གནས་སྐབས་ལྡན། །རྟ་ཡང་ཉོ་བ་ཉིད་དུ་བྱ། །དཔེར་ན་མི་ཤིས་ཉེས་བྲལ་བའི། །ཉིན་ཞག་འདས་ན་ལན་དང་མཚུངས། །ལྷ་ཡི་སྙིང་སྟོབས་གཟི་མདངས་ལྡན། །མགྱོགས་ཤིང་རིགས་སྟོབས་ལ་གནས་ན། །མཚན་ཉིད་ཅུང་ཟད་ལྡན་ན་ཡང༌། །རྟ་ནི་བླང་བར་བྱ་བར་འོས། །དང་པོ་ལུས་ཀྱི་མཚན་ཉིད་དག །བཟང་ངན་གང་ཡིན་ཡང་ལག་ནི། །རེ་རེ་ནས་སྒོས་བརྟག་
པར་བྱ། །དེ་ཡི་རྗེས་ལ་ན་ཚོད་བརྟག །ལུས་བརྟགས་ནས་ནི་ཚེ་ཚད་དེ། །ཅི་སྲིད་ནས་ནི་འཆི་བ་བརྟག །དེ་རྗེས་རིན་ཐང་གདབ་བྱ་སྟེ། །གཞན་དུ་བཟང་པོ་ངན་པར་འགྱུར། །དེ་བཞིན་རིགས་དང་ཤེས་པ་དང༌། །མཚན་ཉིད་བཟང་དང་ངན་པ་དང༌། །མདོག་དང་གཙུག་དང་འགྲོས་ཀུན་དང༌། །དེ་ལས་གཞན་ཅིའང་རུང་བ་དང༌། །ཆུ་ཞེང་གི་ནི་ཚད་དག་དང༌། །དེ་བཞིན་རྒྱུ་བའི་འགྲོས་དང་ནི། །བརྒྱུག་ཚེ་ལུས་ཀྱི་མཐོ་དམན་དང༌། །དེ་བཞིན་སྡུག་དང་མི་སྡུག་དང༌། །ཞོན་ཚེ་སྙིང་ཉེ་སྙིང་རིང་དང༌། །སྐྱེ་གནས་བཅས་པར་ཤེས་པར་བྱ། །ལྷན་ཅིག་སྐྱེས་པའི་བ་དང་ནི། །སྲ་སྙི་དག་གི་རང་བཞིན་དང༌། །རྟ་ཡི་ནང་ན་རྒྱུ་བ་ན། །སྙིང་སྟོབས་དང་ཚུལ་གཟི་མདངས་དང༌། །ནད་མེད་ནད་དང་བཅས་རྣམས་དང༌། །རྟ་འདོད་པ་ཡིས་རྟག་ཏུ་བརྟག །རིན་ཐང་དག་ནི་ཅི་ཙམ་གྱིས། །ས་ནི་ཅི་ཙམ་ཆོད་གྱུར་པ། །དེ་ནི་རབ་ཏུ་བཤད་བྱ་ཡིས། །ངས་སྨྲས་པ་ལ་མཉན་པར་གྱིས། །རྟ་མཁན་དང་ནི་རྟ་རྫི་དང༌། །རྟ་ལ་གོམ་དང་འགྲོས་མཐུན་དང༌། །རིགས་མཐོ་བརྐམ་ཆགས་མེད་ཅིང་དུལ། །བློ་ཟབ་བསྟན་བཅོས་ཤེས་པ་དང༌། །གསོ་བ་ལེགས་པར་ཤེས་པ་དང། །ནད་གསོ་པ་ལ་མཁས་པ་དང༌། །ལན་འདེབས་པ་ལ་མཁས་པ་དང༌། །ལོང་ཡོད་པར་ནི་བརྟག་པར་བྱ། །སྐར་མ་ཉིན་ཞག་ཤིས་པ་དང༌། །གཟའ་ནི་བཟང་པོ་ལ་བབ་ཚེ། །རྒྱལ་པོ་བློན་པོའི་རྒྱལ་པོ་ཉིད། །གྲོང་ཁྱེར་གྱི་ནི་ཕྱི་རོལ་གྱི། །ཤར་དང་བྱང་གི་ཕྱོགས་སུ་ནི། །ས་ཕྱོགས་མཉམ་ཞིང་གཙང་བ་དག །ཐག་ཐོགས་མེད་ཅིང་བགྲོད་བདེ་བར། །ཀུན་དུ་མཉམ་པར་གྱུར་པ་ཡིས། །ཆུ་ཞེང་མཉམ་ཞིང་ཤར་དུ་ཡངས། །རིན་ཐང་སྤྱོད་པ་གཙང་མར་གནས། །ཆུར་ནི་གཞུ་འདོམ་ཉིས་བརྒྱ་པ། །ཞེང་དུ་དེ་ཡི་བརྒྱད་ཆ་རུ། །སྐེ་ནས་འཛིན་པར་བྱེད་པ་ཡི། །མི་རྣམས་ཀྱང་ནི་གཞག་པར་བྱ། །མང་པོ་ལས་ནི་མཆོག་དང་འབྲིང༌། །ཐ་མ་སྡེ་ཚོམས་གསུམ་དུ་བྱ། །དེ་རྣམས་མཚན་ཉིད་ངན་པ་ཡི། །ཉེས་དང་རིང་ལས་རིན་ཐང་གདབ། །ཉོ་བྱ་ཉུང་ཞིང་མཉམ་གྱུར་ན། །ཆ་
མཉམ་པ་ཡི་རིན་ཐང་གདབ། །སོ་སོར་ཡོངས་སུ་བརྟགས་ནས་ནི། །རིན་ཐང་སོ་སོར་གདབ་པར་བྱ། །དེ་བཞིན་བསླབ་པར་བྱ་བ་དང༌། །མ་བྱང་བ་ཡི་མཚན་ཉིད་ནི། །ཞོ་ན་ཏེ་འབད་པས་བརྟགས་ནས་ནི། །རིན་ཐང་གདབ་པ་ཉིད་དུ་བྱ། །སྒྲ་ཆེན་སྐྱེ་བོ་མང་པོ་ཡི། །ཐལ་མོ་ཅ་ཅོ་བསྡིགས་བྱས་པས། །སེམས་ཀྱི་རང་བཞིན་བརྟག་བྱ་ཞིང༌། །འཇམ་པ་ཡིས་ཀྱང་རེག་པ་བརྟག །གློ་བུར་གླང་ཆེན་འབྲུག་སྒྲ་དག །གྲག་ལས་སྙིང་སྟོབས་བརྟག་པར་བྱ། །གཟི་མདངས་དང་ནི་མི་མཐུན་ཕྱོགས། །ངང་ཚུལ་དང་ནི་དུལ་བ་དག །རེ་རེ་ནས་ནི་ཤར་ཕྱོགས་སམ། །བྱང་དུ་ཁ་ནི་བསྟན་བྱས་ལ། །གདོང་ནི་མཐར་ཐུག་ཡོངས་སུ་ནི། །བསྐོར་ཞིང་བརྟག་པ་ཉིད་དུ་བྱ། །ཅི་ནས་འཚོང་དང་ཉོ་བ་དང༌། །མཆོག་དང་དགའ་བ་གྱུར་བ་ནི། །རྟ་འདུལ་མཁན་དང་ཚོང་ཁ་བས། །དེ་ལྟར་རང་བཞིན་ངེས་པར་བཅད། །ཉོ་བ་དང་ནི་ཚོང་པ་དག །ལག་བརྔས་དང་པོར་གོ་བྱས་ལ། །དེ་ཡི་འོག་ཏུ་ཐམས་ཅད་ཀྱི། །མདུན་དུ་གནས་དེ་གསལ་བར་བྱ། །རྟ་ལ་བརྫུན་གྱིས་སླུ་བྱེད་ན། །རིགས་བརྒྱ་ངེས་བར་རླག་འགྱུར་བས། །འཚོང་བའམ་ཉོ་བར་བྱེད་པ་ལ། །སླུ་བ་དག་ཏུ་མི་བྱའོ། །གལ་ཏེ་རིན་ཐང་གསལ་བྱས་ནས། །རྟ་མི་གཏོང་ངམ་མི་ལེན་ནམ། །གང་ཞིག་འགལ་བར་གྱུར་པ་ན། །དེ་ལ་ཆད་པ་ཅི་རིགས་བཅད། །ཤ་ལི་ཧོ་ཏྲའི་མདོའི་གནས་ལས་ཉོ་ཚོང་བརྟག་པའི་ལེའུ་སྟེ་བཞི་བཅུ་པའོ། །གནས་དང་པོ་རྫོགས་སོ།། །།ཤ་ལི་ཧོ་ཏྲ་བདེར་གནས་ལ། །ལེགས་ཐོས་ཀྱིས་ནི་ཡང་དྲིས་པ། །རྗེས་སུ་བཏུང་བའི་ཆང་དག་ནི། །ཅི་འདྲ་བར་ནི་བླུད་པར་བྱ། །ནད་ཀྱི་རང་བཞིན་ཅི་འདྲ་བར། །སྨན་ནི་ཅི་འདྲ་དང་སྦྱར་སྦྱིན། །རོ་ནི་གཞན་དུ་གྱུར་པ་ན། །ཆང་གིས་ནད་ནི་གང་ཞིག་སྐྱེད། །འདིར་ནི་ཆུ་སྦུ་བས་ཚད་ཅི་ཙམ། །དེ་བཞིན་ཆང་ནི་ཅི་འདྲ་བླུད། །རྗེས་སུ་བཏུང་བའི་ཆོ་ག་འདི། །སྨྲ་མཆོག་ཁྱེད་ཀྱིས་བསྟན་དུ་གསོལ། །བུ་ཡིས་དེ་སྐད་དྲིས་པ་ན། །ཤ་ལི་ཧོ་ཏྲས་སླར་སྨྲས་པ། །འོད་མ་ཚིགས་ནི་གཉིས་པ་ལས། །སྨན་པ་ཡི་ནི་སོར་ཚད་ཀྱིས། །ཆུར་ནི་སོར་ཡང་བ་ཅུ་དྲུག་ལ། །ཞེང་དུ་
སོར་གཉིས་ཆུ་སྦུབས་བྱ། །ཟླུམ་ཞིར་རྩེ་མོ་རྟ་རྣ་འདྲ། །འཇམ་ཞིང་ཤིན་ཏུ་སྲ་བ་ལ། །བུ་ག་མཐེ་བོང་ཤོར་ཙམ་ནི། །རྩེ་མོའི་ཕྱོགས་སུ་བྱ་བ་ཡིན། །ཡ་སོའི་གསེབ་ཏུ་བཏང་ནས་ནི། །གཡོན་ཕྱོགས་སུ་ནི་གཞག་བར་བྱ། །བདེ་ཞིང་དྲང་པོར་བཞག་ནས་ནི། །མགོ་བོར་སླར་ཡང་བརྡེག་བྱས་ལ། །ཆུ་སྦུབས་མཚན་ཉིད་དེ་འདྲ་བ། །སུམ་ཆ་ཉེ་བར་བཟུང་ནས་ནི། །སོར་བཞིར་ཁ་ཡི་ནང་བསྲིངས་ལ། །གནོད་པ་མེད་པར་བླུད་པར་བྱ། །རིང་པར་སྦྱིན་པར་མི་བྱ་ཞིང༌། །ཉུང་ཉུང་ཡང་དང་ཡང་མི་སྦྱིན། །དེ་འདྲའི་ཚུལ་གྱི་ཆུ་སྦུབས་དང༌། །རྟ་ལ་བཏུང་བ་བླུད་པར་བྱ། །འོ་མ་ཆང་ལས་གྱུར་པའི་ནད། །ནམ་ཡང་ཆུ་སྦུབས་ཀྱིས་ནི་སེ་ལ། །དེ་བས་ཆུ་དང་འོ་མ་ནི། །ཆུ་སྦུབས་དང་ནི་བླུད་མི་བྱ། །ཆང་ནི་འབུ་ཞུགས་རུལ་པ་དང༌། །སྐྱུར་ཞིང་མདོག་ཉམས་སྤྱི་བག་ཅན། །གསར་དང་ཚིག་དང་ཤུན་པ་ཆགས། །སྙིགས་མར་གྱུར་པ་སྨད་པ་ཡིན། །གང་ཚེ་རྟ་ནི་སྐྱུར་བའམ། །སྤྱི་བག་ཅན་གྱི་ཆང་བླུད་ན། །དེ་ཚེ་ཁྲག་དང་མཁྲིས་པ་ནི། །ཐ་མལ་པ་གནས་འཁྲུག་པར་འགྱུར། །ཚིག་ཅིང་ཉམས་པས་བད་མཁྲིས་དང༌། །རླུང་ཡང་སྐྱེད་པར་བྱེད་པ་ཡིན། །དྲི་མི་ཞིམ་ཞིང་རུལ་པ་ཡིས། །རླུང་དང་བད་ཀན་མཁྲིས་པ་དག །གནས་ནས་སྐྱོད་པར་བྱེད་པ་དང༌། །བརྒྱལ་དང་རྨོངས་བག་སྐྱེད་པར་འགྱུར། །རྙིངས་དང་ཆང་གི་སྙིགས་མ་དང༌། །འབུ་དང་བཅས་པར་སྦྱིན་ན་ནི། །རྟ་ཡི་ནད་གཞི་རྣམས་དང་ནི། །ལུས་གཟུངས་དག་ཀྱང་འཁྲུགས་པར་འགྱུར། །རོ་དང་མཐུ་མེད་ཆང་གཞོན་དང༌། །བླུད་ན་རླུང་ནི་འཁྲུགས་པར་བྱེད། །དེ་བས་ཤས་ཆེར་མངར་གྱུར་པ། །ཁ་དང་ཆ་བའི་རོ་ལྡན་པ། །སྐྱུར་དང་ལན་ཚྭ་ཆེར་མི་བྲོ། །བསྐ་བ་བསྔགས་པར་གྱུར་པ་ཡིན། །ཆང་ནི་རོ་དྲུག་རྗེས་འཇུག་པས། །ཡོན་ཏན་དྲུག་དང་ལྡན་པ་ཡིན། །མདོག་བཟང་དྲི་ནི་བཟང་བ་དང༌། །གསལ་བ་རྣམས་ནི་བསྔགས་པ་ཡིན། །རོ་ཙ་རླུང་ནི་ཤད་སེལ་ཞིང༌། །དྲི་མེད་སྟོབས་ཀྱང་འཕེལ་བྱེད་ཡིན། །ངལ་བ་སེལ་ཞིང་ཡི་གར་འགྲོ། །ཕྱི་ལོ་བསིལ་བྱེད་ཡོན་ཏན་ལྡན། །ལུས་ཀྱི་ནང་ནི་ཚ་བྱེད་
ཅིང༌། །ཞུ་རྗེས་ཀྱང་ནི་ཚ་བ་ཡིན། །བན་ཀན་སྨུག་དང་སྐེམས་པ་སེལ། །ཁྲག་ཀྱང་དང་བར་བྱེད་པ་ཡིན། །གཅིན་སྲི་བ་དང་ཚད་འཁྲུ་བ། །ཕན་ཞིང་རླུང་ནི་བདེ་རྒྱུ་བྱེད། །རྟས་བྱེད་འཇུག་བྱེད་མཆོག་ཡིན་ཞིང༌། །མདོག་ཀྱང་གསལ་བར་བྱེད་པ་ཡིན། །མེ་དྲོད་ཉམས་པས་ཟོས་རྗེས་ལ། །ཆང་འཐུང་མེ་དྲོད་སྐྱེད་པར་བྱེད། །རྟ་ཡི་ནད་ནི་ཐམས་ཅད་ལ། །ཕལ་ཆེར་ཆང་ནི་ཕན་པ་ཡིན། །ཆང་ནི་ཁར་སྦྲང་རྩི་དང༌། །སྦྱར་བ་བཏུང་བར་བླུད་གྱུར་ན། །ཁོང་བའི་མེ་དྲོད་སྐྱེད་བྱེད་ཅིང༌། །ཁ་ཡི་ལྗན་ལྗིན་སྦྱོང་བར་བྱེད། །བུ་རམ་ཡང་ནི་ཁྱད་པར་དུ། །རོ་ཙ་བྱེད་ཅིང་རླུང་མཁྲིས་སྐྱེད། །ཁ་ཞིང་བསྐ་བའི་རོ་ལྡན་པ། །ཞུ་རྗེས་ཚ་བར་གྱུར་པ་ཡིན། །ཞུ་རྗེས་ཚ་ཞིང་རྩུབ་པས་ན། །བད་ཀན་སྦྱོང་བར་བྱེད་པ་ཡིན། །དེ་བཞིན་ཚ་ཞིང་རྩུབ་པ་ན། །མཁྲིས་པ་རླུང་ནི་འཁྲུགས་པར་བྱེད། །ཁར་བསིལ་ཞིང་རྩུབ་པས་ན། །དྲོད་པོ་མིན་པས་རླུང་སྐྱེད་བྱེད། །ནིམ་པ་སེང་ཕྲོམ་པྲི་ཡང་ཀུ། །གླ་སྒང་པི་པི་ལིང་བཏབ་དང༌། །སྦྲང་རྩི་དང་ནི་སྦྱར་བ་ཡི། །བཏུང་བ་དཔྱིད་ཀྱི་དུས་སུ་བསྔགས། །ཤིང་མངར་སེང་ཕྲོམ་པི་པི་ལིང༌། །པྲི་ཡང་ཀུ་དང་བཅའ་ལྒ་བཏབ། །བུ་རམ་དང་སྦྱར་བཏུང་བླུད། །སོས་ཀའི་ཚེ་ན་བསྔགས་པ་ཡིན། །ཐང་ཤིང་དང་ནི་བཅའ་ལྒ་དང༌། །ལན་ཚྭ་དང་ནི་ཏིལ་མ་དང༌། །པི་པི་ལིང་ཕྱེ་བཏབ་པ་ཡི། །རྗེས་སུ་བཏུང་བ་དང་དབྱར་ཚེ་བསྔགས། །ཤུ་ཏི་བཅའ་ལྒ་པི་པི་ལིང༌། །ཙི་ཏྲ་དར་ན་ལེ་ཤམ། །ཁང་རྒུན་འབྲུ་དང་སྦྱར་བའི། །རྗེས་སུ་བཏུང་བ་སྟོན་ཚེ་བསྔགས། །འཚོ་བྱེད་སྡེ་ཚན་པི་པི་ལིང༌། །ཤིང་མངར་དང་ནི་མ་ནུ་དང༌། །སེང་ཕྲོམ་རྒྱམ་ཚ་དང་སྦྱར་བའི། །བཏུང་བ་དགུན་གྱི་དུས་སུ་བསྔགས། །ཟེར་དང་ནི་བྱི་དང་ག །ཚ་བ་གསུམ་དང་ཙི་ཏྲ་ཀ །ལྕེ་མྱང་ཚ་དང་སྦྲང་རྩི་བཏབ། །བཏུང་བ་དགུན་གྱི་དུས་སུ་བསྔགས། །རླུང་དང་མཁྲིས་པ་བད་ཀན་རྣམས། །རྣམ་པ་དུ་མར་འཁྲུགས་ཀྱང་གྱུར་པའི། །གསོ་བ་ཉེ་བར་བསྟན་པ་ལ། །རྗེས་སུ་བཏུང་བ་བླུད་པར་བྱ། །ཉི་མ་ཤར་མ་ཐག་ཏུ་ནི། །དང་པོ་གདོང་ནི་བཀྲུས་ནས་ཀྱང༌། །ཁོང་པ་དག་གྱུར་རྟ་རྣམས་
ལ། །རྗེས་སུ་བཏུང་བ་བླུད་པར་བྱ། །ཆུ་ནི་གྲང་མོ་དག་གིས་ཀྱང༌། །གདོང་དུ་ཉེ་བར་བླུགས་བྱས་ལ། །རྩྭ་ནི་ཡིད་ཙམ་བྱིན་ནས་ཀྱང༌། །ཁྲུས་བྱས་རྗེས་ལ་ཁ་ཟས་སྦྱིན། །སོ་སོའི་མེ་སྟོབས་སོ་སོའི་ནད། །སོ་སོའི་རང་བཞིན་ལས་དཔག་སྟེ། །དུས་ནི་སོ་སོར་བླུད་བྱ་བས། །དེ་ཕྱིར་སོ་སོར་བཏུང་བར་བཤད། །ཟོས་པའི་རྗེས་ལ་བླུད་བྱ་བས། །རྗེས་སུ་བཏུང་བ་ཞེས་ཀྱང་བཤད། །ཟོས་པའི་རྗེས་ལ་བཏུང་བ་ནི། །འབྲས་ཆང་དངས་མ་འབའ་ཞིག་བསྔགས། །སྐོམ་དུ་ཆང་ནི་བླུད་གྱུར་པ། །ཟས་ནི་ཡི་ག་འབྱེད་བྱེད་ཅིང༌། །སྟོབས་ནི་འཕེལ་བར་བྱེད་པ་དང༌། །ནད་རྣམས་སེལ་བར་བྱེད་པ་ཡིན། །ལྟོགས་དང་ཤིན་ཏུ་དུབ་པ་དང༌། །ལུས་ཀྱི་ཁོང་ཚ་དྲན་པ་ཉམས། །གདོན་ནད་ཅན་དང་དུག་གིས་ཕོག །རྟ་ལ་ཆང་ནི་བླུད་མི་བྱ། །ཆང་བླུད་པ་ཡི་རྟ་ལ་ནི། །ནམ་ཡང་མཉེ་བར་མི་བྱའོ། །དེ་ལྟར་མེ་དྲོད་ཚུལ་ལས་ནི། །རྫས་སུ་བཏུང་བ་བླུད་པར་བྱ། །རྗེས་སུ་བཏུང་བ་ལན་ཚྭ་ལྟར། །བུ་རམ་ཡང་ནི་སྦྱིན་པར་བྱ། །པི་པི་ལིང་དང་བཅའ་ལྒ་ནི། །དེར་ནི་སྲང་བཞི་གཞུག་པར་བྱ། །ཏིལ་མར་ཕུལ་གང་ཉིད་དང་བསྲེ། །བཏུང་བ་སྔ་དྲོ་བླུད་པར་བྱ། །ཆང་གི་ཉེས་པ་ལས་གྱུར་པའི། །ནད་ནི་སྣང་གྱུར་གང་ཡིན་ལ། །གསོ་བ་རུ་ནི་བཤད་པ་ཡིན། །སྨན་གྱིས་སླར་ནི་བཅོས་པར་བྱ། །རྗེས་སུ་བཏུང་བའི་དོན་དུ་ནི། །ལེགས་ཐོས་ཀྱིས་ནི་ཡང་སྨྲས་པ། །གང་གི་དུས་སུ་གང་སྦྱིན་ཞིང༌། །ཚད་དང་སྨན་ནི་གང་དང་བཅས། །བཏུང་བ་སྨན་ནི་གང་དུ་སྦྱིན། །ཆང་དངས་ཆང་རྙིང་སྦྱར་བའི་ཆང༌། །དེ་བཞིན་རྒུན་ཆང་ལ་སོགས་པ། །གང་ཚེ་སྦྱིན་པ་བདག་ལ་གསུངས། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །དགུན་ཚེ་ནས་ཆང་སྦྱིན་བྱ་ཞིང༌། །དགུན་སྨད་དུས་སུ་ནས་ཆང་བླུད། །དཔྱིད་ནི་སྦྲང་ཆང་སྦྱིན་བྱ་ཞིང༌། །སོས་ཀ་ཆང་དངས་སྦྱིན་པར་བྱ། །དབྱར་གྱི་དུས་སུ་ཆང་རྙིང་སྦྱིན། །སྟོན་ནི་རྒུན་ཆང་སྦྱིན་པར་བྱ། །ཟླ་ཕྱེད་དུས་དང་སྨན་སྦྱར་བ། །གང་ཞིག་བླུད་བྱ་དེ་བཤད་བྱ། །སྔ་དྲོ་ཁོང་པ་སྦྱངས་པ་ལ། །ཆང་གི་དངས་མ་ཕུལ་གང་དང༌། །དེ་བཞིན་ཏིལ་མར་
ཕུལ་ཕྱེད་དང༌། །ཁ་ར་དཀར་པོ་སྲང་བཅུ་དང༌། །ཚ་བ་གསུམ་ནི་སྲང་གཅིག་དང༌། །ལན་ཚྭ་ཡང་ནི་སྲང་གཅིག་དག །རྟ་ནི་ཆེན་པོ་ལ་སྦྱིན་བྱ། །དེ་ཡིས་དེ་ལ་ཐོབ་པར་འགྱུར། །བར་མ་ལ་ནི་བརྒྱད་ཆ་དག །དེ་ལ་རྣམ་པར་དབྱེ་བར་བྱ། །པི་པི་ལིང་དང་ན་ལེ་ཤམ། །པར་ཆུ་དག་པུ་ཙེ་ཤེལ། །བཅའ་ལྒ་དང་ནི་ཤིང་ཀུན་དག །སྲང་གཅིག་དག་ནི་ཡིན་པར་བཤད། །སྔར་བཤད་པ་ཡི་ཚད་ལས་ནི། །ཕུལ་གང་ཉིད་ནི་འདི་ལ་སྦྱིན། །ལན་ཚྭ་ཁ་ར་ཏིལ་མར་ནི། །སྔར་བཤད་པ་ཡི་ཕྱེད་དུ་འདོད། །ཆང་བླུད་རྗེས་ལ་འོ་མ་ནི། །འབད་དེ་ཡོངས་སུ་སྤང་བར་བྱ། །དེ་བཞིན་འོ་མ་བླུད་རྗེས་ལ། །ཆང་སྦྱིན་པར་ཡང་མི་བྱའོ། །ཆང་འཐུངས་རྗེས་ལ་སྐོམ་བླུད་པའམ། །ཟས་ཀྱི་རྗེས་ལ་བླུད་པའང་རུང༌། །ཟས་ནི་དུས་རྣམས་ཀུན་དུ་སྦྱིན། །སྐོམ་ནི་ཕྱི་དྲོ་བླུད་པར་བྱ། །སྐོམ་བླུད་རྗེས་ལ་རྩོལ་དྲག་པ། །རྣམ་པ་ཀུན་དུ་སྤང་བར་བྱ། །ཟླ་ཕྱེད་དུས་སུ་གང་སྦྱིན་པ། །དེ་ནི་ཅི་བཞིན་སྔར་བཤད་ཡིན། །ཤ་ལི་ཧོ་ཏྲའི་གནས་བདུན་པ་ལས་རྗེས་སུ་བཏུང་བ་བསྟན་པའི་ལེའུ་འོ།། །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །སྨན་པ་མཆོག་གིས་རྟ་རྣམས་ལ། །རོ་དྲུག་པོ་ནི་དགོས་པར་གསུངས། །རོ་དྲུག་པོ་ནི་དགོས་པ་ལ། །འདི་ལ་ཤས་ཆེར་ལན་ཚྭ་ནི། །སྦྱོར་བ་ཀུན་ལ་རབ་ཤེས་ཏེ། །ལུས་ནི་རྟས་པར་བྱེད་པ་དང༌། །ཁ་ཟས་ལེན་པར་ནུས་པ་དང༌། །ལྟོ་བར་ཕྱིན་པར་གྱུར་པ་ནི། །ལེགས་ཉེས་ཅི་འགྱུར་རྒྱུ་དེ་གསུངས། །དེ་སྐད་དྲིས་ཚེ་ལེགས་ལྡན་ནི། །ཤ་ལི་ཧོ་ཏྲས་སླར་སྨྲས་པ། །རྟ་ནི་རླུང་གི་ཤུགས་ལྡན་ཞིང༌། །རླུང་ཤས་ལྷག་པར་ཆེ་བ་ཡིན། །རླུང་འཇོམས་པས་ནི་རོ་དྲུག་ལས། །ལན་ཚྭ་རྟ་ལ་མཆོག་ཏུ་བསྔགས། །མདངས་ནི་རྣམ་པར་འཕེལ་བྱེད་ཅིང༌། །སྦྱོར་བ་ཀུན་དང་རྗེས་མཐུན་ལ། །ལྗང་པ་ཤས་ཆེར་མངར་བས་ན། །འཇུ་དཀའ་བར་ནི་བཤད་པ་ཡིན། །དེ་བས་ལན་ཚྭ་ཕན་གྱུར་ཅིང༌། །རྟ་རྣམས་རྟས་པར་བྱེད་པ་ཡིན། །གཞན་ཡང་ལན་ཚྭའི་ཡོན་ཏན་རྣམས། །ང་ཡིས་བཤད་ཀྱིས་དེ་ཉན་གྱིས། །འདྲུལ་ཞིང་དྲོད་ནི་སྐྱེད་བྱེད་ལ། །ཟས་འཇུ་ལུས་རྒྱས་
བྱེད་པའི་མཆོག །དྲགས་ན་བད་ཀན་སྐྱེད་བྱེད་ཅིང༌། །ལུས་ཀྱང་ལྷོད་པར་འགྱུར་བ་བཤད། །རན་པས་ཁ་ནི་སྦྱོང་བྱེད་ཅིང༌། །སྟོབས་སྐྱེད་མདོག་ནི་དག་བྱེད་ཡིན། །གང་ཞིག་རླུང་ནད་ཀྱིས་ཉེན་དང༌། །གང་ཞིག་རྩྭ་དང་འགྲས་པ་དང༌། །གང་ཡང་ཡིད་མི་བདེར་གྱུར་དང༌། །གཉིད་ནི་མེད་པར་གྱུར་བ་དང༌། །གང་ཞིག་མེ་དྲོད་ཉམས་པའམ། །གང་ཞིག་མེ་དྲོད་མ་སྙོམས་དང༌། །ལུས་གཟུངས་རྣམས་ལ་གནོད་བྱ་ལས། །བརྟས་ཀྱང་ཚོན་པོར་མ་གྱུར་དང༌། །དེ་ལ་ཚད་ལྡན་ལན་ཚྭ་ནི། །བྱིན་ན་ནད་རྣམས་སེལ་བྱེད་ཡིན། །ལན་ཚྭ་འབའ་ཞིག་བྱིན་པའམ། །ཆང་དང་སྦྱར་ཏེ་སྦྱིན་པར་བྱ། །ལན་ཚྭ་ཕོ་བའི་མེ་དྲོད་ནི། །སྐྱེད་ཅིང་མདོག་སྟོབས་འཕེལ་བྱེད་ཡིན། །ལུས་ནི་རྣམ་པར་རྒྱས་བྱེད་ཡིན། །ཟས་ཀྱང་མང་དུ་ཟ་བར་ནུས། །དེ་ལྟར་ལན་ཚྭའི་ཡོན་ཏན་ནི། །བཤད་ནས་སོ་སོའི་དབྱེ་བ་བསྟན། །རྒྱམ་ཚ་དང་ནི་ཁ་རུ་ཚ། །རྒྱ་མཚོའི་ཚ་དང་མཚོ་ཚ་དང༌། །ཡ་བཀྵ་ར་སྲོ་ཧྣི་ཀ །རྩལ་རུ་ཚ་ནི་བདུན་པ་ཡིན། །བུལ་ཏོག་བརྒྱད་པ་ཉིད་ཡིན་ནོ། །འདི་ནི་ལན་ཚྭའི་ཚོགས་སུ་འདོད། །ཀུན་ལ་རྒྱ་ཚ་མཆོག་ཡིན་ཏེ། །དེ་ནས་རིམ་གྱིས་ཡོན་ཏན་ཆུང༌། །འདི་རྣམས་སྦྱོར་བའི་ཚད་དང་ནི། །དུས་ཀྱང་ང་ལས་ཉན་པར་གྱིས། །ཟས་དང་རྗེས་སུ་བཏུང་བ་ལ། །དེ་ཡི་ཁུ་བ་དང་སྦྱར་བྱ། །སྔ་དྲོའམ་ཡང་ན་ཕྱི་དྲོའམ། །ཡང་ན་ཁྲུས་བྱས་དུས་སུ་ནི། །རྟག་ཏུ་ལན་ཚྭ་བྱིན་གྱུར་ན། །མེ་དྲོད་རྣམ་པར་འཕེལ་བྱེད་ཡིན། །སྦེགས་དང་རྒན་དང་ཤིན་ཏུ་གཞོན། །དེ་བཞིན་སྐོམ་གྱིས་གདུངས་པ་དང༌། །མཁྲིས་པ་ཁྲག་གི་ནད་བཅས་དང༌། །གང་ཡང་བད་ཀན་གྱིས་ཉེན་དང༌། །གཅིན་ནི་ཁྲག་འདྲ་འབྱུང་བ་ཡི། །ནད་ནི་གང་ཚེ་སོགས་གྱུར་པ། །དེ་ཚེ་བཏང་ན་ཐམས་ཅད་ལ། །ཁོང་པར་གནོད་པ་སྐྱེད་པར་བྱེད། །ལན་ཚྭའི་སྦྱོར་ཉེས་ཁོང་པར་ནི། །ཁྲག་གི་ནད་ནི་སོག་པར་བྱེད། །མཁྲིས་པ་ཡང་ནི་སྐྱེད་བྱེད་ཡིན། །བད་ཀན་ཡང་ནི་སྡུད་བར་འགྱུར། །ཁྲག་དང་མཁྲིས་པ་ལས་བྱུང་བའི། །ཚ་བ་སྙིང་གར་སྐྱེད་པར་བྱེད། །དེ་ནི་རྨིང་བག་སྐྱེ་འགྱུར་ཏེ།།
རྟགས་འདིས་སྦྱོར་ཉེས་ཡིན་ཤེས་བྱ། །སྙིང་ག་ཚ་ཞིང་ཁ་ནས་ནི། །ཁ་ཆུ་ལྦུ་བ་དང་བཅས་འབྱུང༌། །ཆུ་ལ་མངོན་པར་དགའ་བ་དང༌། །རྟག་ཏུ་འཐུང་བར་འདོད་པར་འགྱུར། །ཉམ་ཆུང་བཤད་བ་སྲི་བ་དང༌། །ལྕེ་ཡང་འབྱིན་པར་བྱེད་པར་འགྱུར། །རྩྭ་བ་སྲེད་པ་ཆུང་བ་དང༌། །ས་ལ་ལྕེ་ཡིས་འདེགས་པར་བྱེད། །ཀུན་དུ་དབུགས་རྒོད་ལུས་རུལ་ཞིང༌། །མཁྲིས་པའི་ཚ་བས་གདུངས་པ་དང༌། །སྙིང་ག་སྲེག་པ་སྙམས་སེམས་ཤིང༌། །དེ་ཡི་ཁ་ཡང་སྐམས་པར་འགྱུར། །མགོ་བོ་འགུགས་ཤིང་སྐེ་བར་འཇོག །མདོག་ཉམས་ལུས་ནི་བཅག་པར་འགྱུར། །ལན་ཚྭ་ལས་འགྱུར་ནད་དེ་འདྲར། །ཤེས་པར་བྱས་ནས་གསོ་བ་བརྩམ། །ཆུ་ལ་སྦང་དང་བླུགས་པ་དང༌། །འདམ་གྱིས་ཡོངས་སུ་བསྐུ་བར་བྱ། །ཆུ་བསིལ་ཁ་ར་དང་སྦྱར་བའི། །བཏུང་བ་དེ་ལ་བླུད་པར་བྱ། །ཆུ་གྲང་ལ་ནི་སྤང་བར་བྱ། །འཐུང་དུ་གཞུག་པར་མི་བྱའོ། །འབྲས་ཆང་གྲང་མོའོ་མ་དང༌། །མར་དང་སྦྲང་རྩི་དང་སྦྱར་བྱིན། །ཕ་རུ་ཤ་ཀ་རྒུན་འབྲུ་དང༌། །ཙི་ལུའི་འབྲས་བུ་ཁ་ར་དཀར། །སྦྲང་རྩི་དང་ནི་བསྲེས་པ་ཡིས་།སྨན་གྱི་ཆང་བུ་དེ་ལ་བྱིན། །སྔར་བཤད་པ་ནི་གང་ཡིན་པ། །ཁ་སྦྱོང་ཆོ་ག་དེ་ཡང་བྱ། །ནས་དང་འབྲས་ནི་དྲུག་ཅུ་པ། །བ་གཅིན་དང་ནི་སྤྲུས་པ་བྱིན། །ཡང་ན་འབྲས་ཆན་བ་ལ་དང༌། །སྐྱུར་རྩབས་དང་ནི་སྦྱར་བ་བྱིན། །ཕལ་ཆེར་མངར་ཞིང་རླུང་འཇོམས་པའི། །སྨན་གྱིས་བདའ་བའི་ཆོ་ག་བྱ། །ཁྲག་དང་མཁྲིས་པ་སེལ་བ་ཡི། །མངར་བའི་སྨན་གྱི་འཇམ་རྩི་གཏང༌། །གལ་ཏེ་ཁྲག་ནི་ཤས་ཆེ་བས། །ལུས་ནི་ཤིན་ཏུ་ལྕི་གྱུར་ན། །རྟ་ལ་གཏང་ག་བྱས་གྱུར་ན། །བདེ་བ་ངེས་པར་འཐོབ་པར་འགྱུར། །ངང་པ་དུར་པ་ཁྲུང་ཁྲུང་དང༌། །ཆུ་བྱ་གཞན་དང་འོལ་བྱ་དང༌། །རྨ་བྱ་ཁྱིམ་བྱ་སྲེག་པ་ཡི། །ཤ་ལས་ཤ་ཁུ་བྱས་ཏེ་སྦྱིན། །གནས་ནི་བདེ་ཞིང་སེར་བུ་རྒྱུ། །བསིལ་ཞིང་ཆག་ཆག་བཏབ་པར་གཞག །ཨུཏྤལ་བརྒྱད་པ་དཱུར་བ་དང༌། །རྟ་མ་བྲིཏྟ་ཨ་རྫུན། །རྩྭ་ཡི་ཕྱེད་དུ་སྦྱིན་བྱས་ན། །དེས་ནི་བདེ་བ་འཐོབ་པར་འགྱུར། །ཤ་ལི་ཧོ་ཏྲའི་གནས་བདུན་པ་
ལས་ལན་ཚྭའི་སྐྱོན་དང་ཡོན་ཏན་བསྟན་པའི་ལེའུའོ།། །།ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །ཁྱེད་ནི་རྟ་ཡི་ཚེ་རིག་བྱེད། །ཡན་ལག་བརྒྱད་ཀྱི་དེ་ཉིད་མཁྱེན། །རྒྱུ་དང་མི་རྒྱུའི་འདྲི་བ་ནི། །ཆུ་ལ་རག་ནི་ལས་པ་ལགས། །འགྲོ་བ་འབྱུང་དང་འབྱུང་འགྱུར་དང༌། །དེ་ལྟར་གང་ཞིག་གནས་པ་ཡི། །སེམས་ཅན་རོ་ལ་རྣམ་པར་བརྟེན། །རོ་ཡང་ཆུ་ལས་འབྱུང་བར་བཤད། །མཆོག་ཏུ་རྟ་ནི་རོ་ཀུན་གྱི། །བདག་ཅག་ཆ་ནི་སྐོག་ཏུ་བཤད། །འདི་ནི་རྟ་ཡི་ཁང་པ་ན། །གནས་ཚེ་ནད་ནི་ཅི་ལྟར་བསྐྱེད། །ཟས་ཀྱི་ནང་དུ་རོ་གང་ཞིག །ཆུ་ཡིས་རྣམ་པར་རྒྱས་པར་བྱེད། །སྨན་པ་མཆོག་ལས་འདི་དག་གི །ངེས་པ་བདག་ནི་མཉན་པར་འཚལ། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །ལེགས་ཐོས་འདི་དག་ཐམས་ཅད་ནི། །ཡང་དག་ཉིད་དུ་མཉན་པར་གྱིས། །ཆུ་དང་ཤིང་ནི་མང་བ་དང༌། །རླུང་མང་ཐན་པ་མེད་གྱུར་པ། །དེ་ནི་རླན་ཅན་ཡིན་ཞེས་བྱ། །རྟ་ལ་མཆོག་ནི་ཡིན་པར་འདོད། །གང་ན་ཤིང་དང་ཆུ་ཉུང་ཞིང༌། །རླུང་མེད་ཐན་པ་ཆེ་གྱུར་པ། །ཡུལ་དེ་སྐམས་པ་ཅན་ཞེས་བྱ། །རྟ་ལ་རྟག་ཏུ་བཟང་མ་ཡིན། །རླན་ཅན་སྐམས་པ་འདྲེན་མ་ནི། །དེ་ནི་ཐུན་མོང་ཡིན་པར་བཤད། །དེ་ལྟར་རྣམ་པ་གསུམ་པོ་ཡི། །ཡུལ་ལས་གོམས་པར་འབྱུང་བ་ཡིན། །ཡུལ་ནི་ཡོན་ཏན་མང་པ་ལས། །བུ་ཡི་ཡོན་ཏན་ཆེན་པོར་འགྱུར། །ཆུ་ཡི་ཡོན་ཏན་ཆུ་ལས་ནི། །སྨན་རྣམས་ཀྱི་ནི་ཡོན་ཏན་འབྱུང༌། །སྨན་གྱི་ཡོན་ཏན་རྫོགས་གྱུར་ན། །ལུས་ཀྱི་ཡོན་ཏན་ཆེན་པོ་སྐྱེད། །དེ་ཕྱིར་རྟ་ཡི་ལུས་འཛིན་པ། །གཙོ་བོ་ཡུལ་ནི་ཡིན་པར་བཤད། །བསིལ་ཞིང་འཚོ་བྱེད་རླན་པར་བྱེད། །ཤིན་ཏུ་ཕྲ་ཞིང་བརྟགས་པ་དང༌། །ཁྱབ་ཅིང་རི་ཡི་གནས་གྱུར་ལ། །ཡང་ཞིང་སྣུམ་པ་བཅུད་ལེན་འགྱུར། །ཆུ་ནི་སེམས་ཅན་ཐམས་ཅད་ཀྱི། །དགོས་པའི་གཙོ་ཡིན་རིགས་དྲུག་ལྡན། །དེ་ལས་ཆར་ཆུ་མཆོག་ཡིན་ཏེ། །དེ་ནི་རླུང་དང་འདྲེ་བར་འགྱུར། །ལྡུད་ཅིང་ཕྱོགས་ཀྱི་གཙོར་གྱུར་ལ། །རང་བཞིན་གྱིས་ནི་མཁའ་ལ་གནས། །ཆུ་ལ་རོ་གང་མི་སྣང་བ། །དེ་ནི་ལུས་ལས་བརྟག་པར་བྱ། །
རོ་ནི་གང་ཡང་མི་བྲོ་ཞིང༌། །གཙང་ཞིང་དངས་ལ་དྲི་མེད་པ། །མ་འདྲེས་སླ་ལ་བསིལ་ཞིང་ཡང༌། །ཆུ་དེ་ནང་གཞི་གསུམ་སེལ་ཡིན། །སྐོམ་པ་འཇོམས་ཤིང་གཙང་བྱེད་ཅིང༌། །གཞན་ཡང་འདི་དང་འདྲ་མཆོག་ཡིན། །དེ་ལས་བཟློག་པ་བར་གནས་པ། །སྨད་དེ་ཁྲག་དང་ཉེས་གསུམ་བསྐྱེད། །རྫིང་བུའི་ཆུ་ནི་རླུང་སྐྱེད་དེ། །ཁྲོན་པའི་ཆུ་ཡིས་མཁྲིས་པ་སྐྱེད། །ཆུ་བལ་ཅན་ནི་བད་ཀན་སྐྱེད། །རྒྱ་མཚོའི་ཆུ་ཡིས་ཉེས་ཀུན་སྐྱེད། །འབུ་ཅན་ལྕི་ཞིང་འཇུ་དཀའ་ལ། །ཉི་མའི་ཟེར་དང་མ་ཕྲད་དང༌། །ཡུལ་ཕྱོགས་ཉེས་པའི་ཁྱད་པར་གྱིས། །གནོད་བཅས་དེ་ནི་སྨད་པ་ཡིན། །ཆུ་བོ་རྫིང་དང་བང་སོ་ཡི། །ཆུ་ནི་རྒྱུན་གྱི་དུས་སུ་བསྔགས། །གཡའ་ཆུ་བསིལ་མོ་གང་ཡིན་པ། །དེ་ནི་སོས་ཀའི་དུས་སུ་བསྔགས། །ཁྲོན་པའི་ཆུ་ནི་དབྱར་ཚེ་བསྔགས། །སྟོན་གྱི་ཆུ་ནི་ཐམས་ཅད་བཟང༌། །ཁ་ར་འོ་མ་དང་བསྲེས་པ། །དགུན་གྱི་དུས་སུ་བསྔགས་པ་ཡིན། །ས་ཕྱོགས་དཀར་ལས་བསྐ་དང་སེར་ལས་ཚ། །དམར་བས་ཁ་བསྐྱ་ལས་ལན་ཚྭ་ཅན། །གྲོ་བོ་ལས་གྱུར་གནག་ལས་མངར་བག་ཅན། །འབྱུང་བར་འགྱུར་ཞེས་བསྟན་བཅོས་མཁན་རྣམས་འཆད། །འདི་ནི་ལོག་པར་བླུད་པ་ལས། །ཆུ་ཡིས་ཁོང་བར་ནད་སྐྱེད་དེ། །ཐན་པར་རིང་དུ་ལམ་ཞུགས་དང༌། །ཁུར་ལྕི་བ་ཡིས་ཉེན་པ་དང༌། །ཤིན་ཏུ་དུབ་པར་གྱུར་པ་ཡིས། །རྡུལ་ཞིང་སྐོམ་གྱིས་ཉེན་པ་དང༌། །ལྟོ་སྟོང་གནས་དང་ངལ་མ་བསོས། །ཉེས་ཤིང་སྨན་གྱི་སྦྱོར་མ་རྫོགས། །ཆུ་ལ་སྤངས་པའི་མོད་ལ་ནི། །གང་ཚེ་བླུན་པོས་ཆུ་བླུད་ན། །དེ་ཚེ་གནོད་པས་བསྐྱོད་པ་ཡིས། །ཆུ་ནི་མང་དུ་འཐུང་གྱུར་ཞིང༌། །དབུགས་མ་བཏོན་པར་འཐུངས་པ་ལས། །སྣོད་ལས་ལྷག་པར་གྱུར་པ་སྟེ། །དབུགས་ཆུང་བར་ནི་གྱུར་པ་ན། །རླུང་གིས་ཀུན་དུ་སྐྱོད་པར་བྱེད། །དེ་ཚེ་རྩེ་གང་ལྟེ་བ་དང༌། །འབྲེལ་དང་སྙིང་ག་ལ་བརྟེན་དང༌། །ལྟོ་བར་ཆུ་ནི་རྒྱུ་བའི་ཚེ། །གང་ཚེ་འཕྲལ་དུ་ཆུས་རྒྱས་འགྱུར། །རླུང་གིས་ཀུན་དུ་བསྐྱོད་གྱུར་ཅིང༌། །དེ་ཡི་ལྟོ་ལ་རྒྱས་བྱས་ལས། །མཚན་མ་མཁལ་མའི་ནད་སྐྱེད་ཅིང༌། །ལྟོ་སྦོས་ཀྱང་ནི་འབྱུང་འགྱུར་བའམ། །ལོག་པར་
བླུད་པ་ལས་བྱུང་བའི། །འཆི་བ་ཉིད་ནི་འབྱུང་བར་འགྱུར། །དེ་ཡི་ལྟོ་བ་སྐྲངས་གྱུར་བའམ། །ཆུ་ཡིས་དམུ་རྫིང་འབྱུང་བར་འགྱུར། །དེ་ཡི་ལུས་ལ་སྐྲངས་འགྱུར་ཞིང༌། །ཁོང་པར་ཆུ་ཡང་འཕེལ་བར་འགྱུར། །དེ་ཡི་སྐོམ་དད་མི་ཞི་ཞིང༌། །སྤུ་ཡང་འབྱི་བར་འགྱུར་བ་ཡིན། །གོམ་པ་ལྕི་ཞིང་སྟོབས་ཆུང་ལ། །ལྡང་བར་དཀའ་ཞིང་སྦེགས་པར་འགྱུར། །གཅིན་རྟུག་སྲི་བར་འགྱུར་བ་དང༌། །རྟག་ཏུ་འདུག་པ་ལ་དགར་འགྱུར། །མིག་ནི་དམར་ཞིང་ཞུམ་པ་དང༌། །ལྟེ་བར་སྒྲ་ཡང་འཁྲོག་པར་འགྱུར། །ཤིན་ཏུ་སྐྲག་པར་འགྱུར་བ་དང༌། །མདོག་དང་དབང་པོ་ཞན་པར་འགྱུར། །དེ་ལྟར་ནད་གཞི་ཤེས་བྱས་ལ། །གསོ་བའི་ལས་ནི་བརྩམ་པར་བྱ། །ལྟོ་བ་ཏིལ་མར་གྱིས་བྱུགས་ལ། །གསོ་མའི་ལོ་མའི་དུགས་ཀྱང་བྱ། །ཤི་ཏ་བ་ལི་ནིམ་པ་དང༌། །ཨ་རུ་རའི་ཤ་པ་ཏ་ལ། །སྣམ་ཀ་ར་བཱི་རའི་རྩི། །བཏགས་པ་དར་བ་དང་སྦྱར་བ། །ལན་ཚྭ་ལྔ་པོ་བཏབ་པ་ནི། །སྔ་དྲོ་རྟ་ལ་བླུད་པར་བྱ། །དེས་ནི་ཀྱུ་རུ་ཆུ་འབྲས་དང༌། །རུས་སྐྲངས་ཆུ་ཡི་དམུ་རྫིང་ལ། །སྟོབས་དང་ཁ་དོག་གཟི་མདངས་དག །རྣམ་པར་འཕེལ་བར་འགྱུར་བ་ཡིན། །ཧ་རེ་ཎུ་ཀ་བྲི་ཡང་ཀུ། །རྒུན་འབྲུ་ཤུ་དག་སྤང་སྤོས་དང༌། །ཛ་ཏི་ཀ་ར་བཱི་རའི་རྩི། །ཆུ་ཡི་ནང་དུ་བསྐོལ་བར་བྱ། །ཁུ་བ་དེ་ནི་ལན་ཚྭར་བཅས། །སྔ་དྲོའི་ཚེ་ན་བླུད་པར་བྱ། །ཡང་དང་ཡང་དུ་ངལ་སོས་ལ། །ཞག་གསུམ་གྱིས་ཆོད་མང་དུ་སྦྱིན། །གལ་ཏེ་དེས་བདེར་མ་གྱུར་ན། །དེ་ལས་ཆུ་ནི་གནོད་བྱས་ལ། །ཆུ་ཡི་དམུ་རྫིང་གསོ་བ་ལས། །བཤད་པའི་ཆོ་ག་འདི་ལ་གཏང༌། །ཕག་དང་བྱ་རོག་པྲི་ཤ་ཏ། །ནེའུ་ལེ་ཁྱིམ་བྱ་འུག་པའི་ཤ །ཁུ་བར་བཅས་པ་བྱིན་གྱུར་ན། །དེས་དེ་འཚེ་བ་མེད་པར་འགྱུར། །ཤ་ཁུ་ཤིན་ཏུ་མི་སྐྱུར་ཞིང༌། །སྣུམ་ཞོ་པི་པི་ལིང་བཏབ་པ། །ཟི་ར་དང་ནི་བཅའ་ལྒ་དང༌། །ཚ་ཡང་རན་པ་དང་སྦྱར་བྱ། །དེ་དང་སྦྱར་བའི་འབྲས་ཆན་ནི། །དྲུག་ཅུ་པ་རྙིང་ལས་བྱས་སྦྱིན། །ཟས་འདི་དང་ནི་འཇམ་རྩི་དག །ཞག་རེ་ཡིས་ནི་ཅི་མང་གཏང༌། །ཞག་རེ་ཞིང་ནི་ལུས་ཀུན་ལ། །སྣུམ་གྱིས་ལེགས་པར་བསྐུ་བར་བྱ། །ནས་ཟན་འོ་
མའམ་ཤ་ཁུའམ། །བཅས་པའི་ཟས་ཀྱང་སྦྱིན་པར་བྱ། །དེ་ནི་གཙང་ཞིང་རླུང་མེད་པའི། །གནས་ནི་བདེ་བར་གཞག་པར་བྱ། །བི་བན་ཛི་ཀ་ཀུ་ལ་དང༌། །ཤ་ཤ་པེན་བུ་མོན་སྲན་དེའུ། །རྩྭ་ཡི་དོན་དུ་སྦྱིན་བྱ་ཞིང༌། །དུར་བྱིད་ཀྱང་ནི་བླུད་པར་བྱ། །དེ་འདྲ་བས་ནི་ཆུ་ཡི་ནད། །སེལ་ཞིང་བདེ་བར་འགྱུར་བ་ཡིན། །ཤ་ལི་ཧོ་ཏྲའི་གནས་བདུན་པ་ལས་ཆུ་ཤོར་བའི་ནད་གསོ་བའི་ལེའུའོ།། །།ལེགས་ཐོས་ཐོས་པ་ཕུན་སུམ་ཚོགས། །རྟ་ཡི་ཁོང་བར་ཕྱིན་ནས་ནི། །ཕ་ཡི་རྐང་པ་ལ་བཏུད་དེ། །འདྲི་བའི་ཚིག་ནི་འདི་སྐད་སྨྲས། །བླ་མའི་རྫས་ཀྱི་ནང་ན་ནི། །འོ་མ་མཆོག་ནི་ཡིན་པར་བཤད། །རྒྱུ་བའི་འགྲོ་བ་མར་དང་ནི། །འོ་མའི་བདག་ཉིད་ལ་བརྟེན་ལགས། །དེ་ཕྱིར་ཡོན་ཏན་ཀུན་འོ་མ། །རོ་དེས་ཕན་ཚུན་ཉིད་ཁྱབ་ན། །རྟ་ཡི་ཁོང་བར་བྱིན་པ་ན། །ནད་དུ་ཅི་ཕྱིར་གྱུར་པ་ལགས། །དེ་སྐད་སྨྲས་ཚེ་ལེགས་ལྡན་གྱིས། །དྲིས་པ་ཀུན་གྱི་ལན་སྨྲས་པ། །འོ་མ་ཡོན་ཏན་གྲངས་མེད་ཅིང༌། །རྫས་རྣམས་ཀུན་གྱི་དམ་པ་ཡིན། །ལུས་ཅན་དང་ནི་ལྷན་ཅིག་ཏུ། །བྱུང་བས་སྐྱེས་ནས་བརྩམས་ཏེ་གོམས། །རོ་རྣམས་ཀྱི་ནི་མཆོག་ཡིན་ཞིང༌། །ཚེ་འཕེལ་བྱེད་པ་ཉིད་ཀྱང་ཡིན། །དེ་ཕྱིར་འོ་མ་མཆོག་ཡིན་ནོ། །གཞན་ཡང་འདི་ཡི་ཡོན་ཏན་ཡང༌། །བ་དང་ར་དང་བུད་མེད་དང༌། །དེ་བཞིན་མ་ཧེ་ཉིད་དང་ནི། །བ་གླང་རྔ་མོ་རྟའི་འོ་མ། །དེ་བཞིན་ལུག་གི་བརྒྱད་པ་ཡིན། །འདི་དག་ཐམས་ཅད་མངར་བ་དང༌། །སྣུམ་ཞིང་བསིལ་བ་ཡིན་པར་བཤད། །རྟས་བྱེད་ཁོང་སྣུམ་ཕན་རོ་ཙ། །བློ་བསྐྱེད་བཅུད་ཀྱིས་ལེན་འགྱུར་ཡིན། །འཚོ་བྱེད་ཡིན་ཞིང་ངལ་བ་དང༌། །དབུགས་མི་བདེ་དང་ཉོན་མོངས་སེལ། །ཁྲག་མཁྲིས་ནད་ནི་ཞི་བྱེད་ཡིན། །ཚིགས་རྣམས་བདེ་བར་བྱེད་པ་ཡིན། །འདི་ནི་ལྷག་པར་རྟ་རྣམས་ལ། །བླུད་ན་སྲོག་ན་འཕེལ་བྱེད་འགྱུར། །སྐོམ་དད་འཕེལ་ཞིང་མེ་དྲོད་སྐྱེད། །སྦེག་ཅིང་ཉམ་ཆུང་ལ་མཆོག་ཡིན། །རླུང་འཁྱིལ་ལྟོ་བའི་ནད་རྣམས་དང༌། །དབུགས་མི་བདེ་ལ་མཆོག་ཏུ་ཕན། །ཚད་པར་འཁྲུ་དང་རིམས་པ་དང༌། །སྐངས་པ་དང་ནི་སྦྲུམ་མ་དང༌། །མངལ་གྱི་ནད་དང་
གཅིན་སྲི་བའི། །ནད་ལའང་ཤིན་ཏུ་བསྔགས་པ་ཡིན། །བཤད་པ་སྲི་བར་བྱེད་པ་དང༌། །དེ་བཞིན་རླུང་གི་ནང་ཀྱང་སེལ། །སྣ་སྨན་ལྡེ་གུ་ལུས་སྨན་དང༌། །རྟ་ཡི་ཆོ་ག་རྣམས་ལ་བསྔགས། །ཟུགས་དང་དེ་བཞིན་དུག་ལ་ཡང༌། །ཐམས་ཅད་དུ་ནི་འོ་མ་བཟང༌། །ན་ཚོད་ལ་འཇུག་ཚེ་ལ་ཕན། །སྟོབས་བསྐྱེད་པ་ཡང་བསྟེན་ན་གྲུབ། །གསོ་བའི་སྦྱོར་བ་དུས་དང་ནི། །གོམས་དང་ནད་ཚུལ་ལེགས་བརྟགས་ནས། །ལེགས་པར་བཏང་ན་རྟ་ནི་ནད། །ཐམས་ཅད་འོ་མས་སེལ་བར་འགྱུར། །བ་ཡི་འོ་མའི་བསིལ་བཅུད་ལེན། །ཞུ་རྗེས་མངར་ཞིང་ཕན་པ་ཆེ། །རླུང་མཁྲིས་སེལ་ཞིང་ཁོང་སྣུམ་བྱེད། །འཚོ་བྱེད་རྟས་བྱེད་མཆོག་ཡིན་ནོ། །ར་ཡི་འོ་མའང་དེ་འདྲ་ལས། །སྐྲ་དང་ཚད་འཁྲུ་དག་ལ་ཕན། །མ་ཧའི་འོ་མ་ཤིན་ཏུ་ལྕི། །བ་ཡི་བས་ཀྱང་དེ་བསིལ་ཞིང༌། །སྣུམ་ཆེ་གཉིད་མེད་ལ་ཕན་གྱི། །མེ་དྲོད་ཉམས་པར་བྱེད་པ་ཡིན། །རྔ་མོའི་ཚ་ཞིང་ལན་ཚྭ་བྲོ། །གཞང་འབྲུམ་སྐྲངས་དང་ལྟོ་ནད་སེལ། །ལུག་གི་ལྕི་ཞིང་བད་ཀན་སྐྱེད། །མངར་ཞིང་སྣུམ་ཤས་ཆེ་བ་ཡིན། །རྟ་ཡི་འོ་མ་ཞུ་རྗེས་ཚ། །ཡང་ཞིང་ཕན་པར་བྱེད་པ་ཡིན། །བ་གླང་འོ་མ་ཚ་ཞིང་ཞིམ། །ཡང་ཞིང་ལུད་པ་ཐམས་ཅད་སེལ། །བུད་མེད་འོ་མ་མངར་བཅས་སྣུམ། །མིག་ནད་རྣམས་ལ་ཕན་པ་ཡིན། །སྐྱེ་གནས་གོམས་པས་ལུས་རྟས་བྱེད། །མངར་བས་བད་ཀན་འཕེལ་བྱེད་ཡིན། །བསིལ་བས་སྣུམ་པ་སྐྱེད་བྱེད་ཡིན། །གྲང་བས་ཁུ་བ་འཕེལ་བར་བྱེད། །འདི་དག་ལྕི་དང་ཡང་བ་དང༌། །འདྲེས་ན་ནུས་པ་འདྲེན་པར་བྱེད། །ཡང་ན་སྣུམ་དང་ལྡན་པར་ནི། །བྱ་བ་དེ་དག་རྣམས་ལ་སྦྱིན། །སོས་ཀའི་ཚེ་ན་མ་ཧེའི་མཆོག །དགུན་ནི་ལུག་གི་འང་བསྔགས་པ་ཡིན། །བ་ཡི་འོ་མ་དབྱར་གྱི་ཚེ། །རྟ་ལ་བྱིན་ན་བསྔགས་པ་ཡིན། །ར་དང་མ་ཧེ་དཔྱིད་ཚེ་བཟང༌། །མར་ཡང་འོ་མ་དང་འདྲར་བཤད། །ཨ་གསར་རོ་ཙ་འཁྲུ་གཅོད་ཅིང༌། །བསྐལ་བད་ཀན་སེལ་བྱེད་ཡིན། །ཞོ་ནི་སྣུམ་སྐྱུར་དྲོ་བ་བསྲེ། །འཁྲུ་གཅོད་ལུས་ནི་རྟས་བྱེད་ཡིན། །དཀྱུགས་པ་སྐྱུར་བ་
ཉེས་ཆུང་ཞིང༌། །མེ་དྲོད་སྐྱེད་ཅིང་བད་ཀན་སེལ། །དར་བ་བད་རླུང་སེལ་བྱེད་ཡིན། །སྐྲ་དང་གཞང་འབྲུམ་དག་ལ་ཕན། །འདི་ནི་བླུད་ཉེས་ཉེས་པ་ཡིས། །འོ་མས་ཁོང་བའི་ནད་སྐྱེད་ཡིན། །ཚད་ཁས་ཆེས་ས་མ་དུས་མིན་པར། །འོ་མ་འཐུངས་ན་གནོད་པ་སྐྱེད། །ཆང་འཐུངས་འོ་མ་འཐུངས་པའམ། །འོ་མའི་རྗེས་ལ་ཆང་འཐུངས་པའམ། །རྟ་ནི་རྩོལ་དྲགས་བྱས་གྱུར་ནས། །གལ་ཏེ་འོ་མ་བླུད་པ་ལས། །དེ་རྗེས་རྗེ་ན་བ་ཟོས་གྱུར་ན། །འོ་མམ་ཞུར་གྱུར་བ་དེས། །བད་ཀན་གནས་ལས་བསྐྱོད་གྱུར་ནས། །དེ་རྗེས་སྙིང་ལ་གནོད་པར་བྱེད། །བད་ཀན་གཡོས་པར་གྱུར་པ་ན། །མེ་དྲོད་ཉམས་པར་བྱེད་པའི་རྟ། །ལྟོ་བ་སྦོ་བར་གྱུར་པ་དང༌། །དེ་བཞིན་འཁྲུ་བར་འགྱུར་བ་ཡིན། །རྒྱབ་རེངས་རྒྱུ་ལོང་རྒྱས་པ་དང༌། །ནད་དང་བཅས་པར་འགུལ་པ་ཡིན། །སྙིང་ག་ཚ་ཞིང་རྔུལ་བ་དང༌། །ཁ་ནས་ཁ་ཆུ་འབྱུང་བར་འགྱུར། །ནད་ཀྱིས་གདུངས་ཤིང་ཉམ་ཆུང་བ། །ཤིན་ཏུ་ཤས་ཆེར་འཁྲུ་བར་འགྱུར། །ཡན་ལག་ཀུན་དུ་འཁུམས་པ་དང༌། །མདོག་མི་སྡུག་ཅིང་ཡིད་མི་བདེ། །མགོ་ཡི་གཡུར་ནི་ལྕི་བ་དང༌། །སེམས་ཁོང་ཆུད་པ་ཉིད་ཀྱིས་འདུག །འོ་མ་ལས་གྱུར་ནད་འདི་ནི། །ཤེས་པར་བྱས་ལ་གསོ་བ་བརྩམ། །དེ་ཡང་གསོ་དཔྱད་ལས་བཤད་པའི། །སྨན་དང་ཁ་ཟས་སྦྱིན་པས་བཅོས། །ལེགས་ལྡན་རྟ་ལ་ཁྱད་པར་སྔགས། །ཤ་ལི་ཧོ་ཏྲའི་གནས་བདུན་པ་ལས་འོ་མའི་ཡོན་ཏན་བསྟན་པའི་ལེའུའོ།། །།མང་ཐོག་ཤ་ལི་ཧོ་ཏྲ་ལ། །ལེགས་ཐོས་ཀྱིས་ནི་ཡང་དྲིས་པ། །ལེགས་ལྡན་རྟ་ལ་ཁྱད་པར་དུ། །མར་བླུད་པ་དང་དུས་གང་ཚེ། །བྱིན་ན་ཕན་གྱུར་ཅོ་ག་དེ། །ཡང་དག་བདག་ནི་ཉན་པར་འཚལ། །རྟ་ཡི་ལས་ནི་བྱས་གྱུར་པ། །སྦྱར་བཞིན་པའམ་སྦྱོར་གྱུར་ཏེ། །རྒན་དང་ཁལ་གྱིས་དུབ་བ་དང༌། །ལམ་རིང་དུ་ནི་ཞུགས་པ་དང༌། །རླུང་དང་དེ་བཞིན་མཁྲིས་པ་དང༌། །བད་ཀན་གྱི་ནི་ནད་རྣམས་ལ། །མར་ནི་ཇི་ལྟར་སྩལ་བགྱི་བ། །འདི་ནི་བདག་ལ་བཀའ་སྩོལ་ཅིག །བུ་ཡིས་དེ་སྐད་རིས་པ་དང༌། །ཤ་ལི་ཧོ་ཏྲས་སླར་སྨྲས་པ། །མཁས་རྣམས་འཚོ་བའི་འཇིག་རྟེན་གྱི། །བདུད་རྩི་མར་ནི་ཡིན་ཞེས་འཆད། །
དེ་ཡི་དུས་སུ་བཏང་གྱུར་ཅིང༌། །ཚད་ལྡན་བྱིན་པ་ཤིན་ཏུ་བསྔགས། །མར་ནི་ཅི་སྲིད་ལས་འཁྲུས་པ། །དེ་སྲིད་པར་དུ་རྟ་ལ་སྦྱིན། །དེ་ནི་དུས་ཚིགས་རྣམས་ལ་ནི། །དྲི་མ་སྦྱང་བའི་དོན་དུ་བླུད། །བསྲུང་དང་ནད་གཞན་སྦྱང་ཕྱིར་ཡང༌། །རྟ་ལ་མར་ནི་སྦྱིན་པར་བྱ། །མཛེ་དང་དམར་རིགས་བཤད་འགགས་དང༌། །འབུ་ནད་ངེས་པར་སེལ་བ་ཡིན། །ནད་གཞན་ལ་ཡང་ཕན་བྱེད་ཅིང༌། །འདི་ཡིས་ཁྲག་ནི་སྐྱེད་མི་བྱེད། །གང་ཚེ་སྡོང་བུ་ཚེར་མར་གྱུར། །རྩྭ་ནི་སྣ་ཚོགས་ཟ་གྱུར་པ། །དེ་ཚེ་མར་ནི་བླུད་བྱ་ཞིང༌། །ལན་ཚྭ་ཡི་ནི་ཆང་བུ་སྦྱིན། །སྨན་པ་མཆོག་གིས་དེ་བཞིན་དུ། །སྟོན་གྱི་ཟླ་བ་གཉིས་པ་ལ། །རྟ་རྣམས་ནད་ནི་མེད་བྱའི་ཕྱིར། །སླར་ཡང་མར་ནི་བླུད་པར་བྱ། །རྟ་ལ་མར་ནི་བླུད་གྱུར་ན། །ཁོང་བའི་འབུ་ནི་རིང་པོ་དང༌། །རྡོ་དང་གཡན་པ་ལ་སོགས་པའི། །ནད་ནི་ནམ་ཡང་འབྱུང་མི་འགྱུར། །དཔྱིད་ཀྱི་དུས་ལ་བབ་པ་ན། །ཚ་དང་ཁ་བ་བྱིན་པར་བྱ། །དེས་ནི་ནད་མེད་གཡེན་པ་སེལ། །ཚེ་འཕེལ་མདོག་བཟང་སྟོབས་འཕེལ་འགྱུར། །མར་བླུད་པས་ནི་བཀྲ་ཤིས་ཤིང༌། །དེ་བཞིན་ལུས་ནི་བདེ་བར་བྱེད། །འདིས་ནི་བློ་གྲོས་གསལ་བྱེད་ཅིང༌། །བཅུད་ལེན་དུ་ཡང་འགྱུར་པ་ཡིན། །བཙས་པ་རྣམས་དང་དེ་བཞིན་དུ། །སྲོག་ཆགས་རྒན་པོ་རྣམས་ལའང་ཕན། །གཅོང་ཅན་ལ་ཡང་འདི་ཕན་ཞིང༌། །གཞན་ཡང་རླུང་མཁྲིས་ལས་གྱུར་དང༌། །ཁྲག་ལས་གྱུར་བའི་ནད་རྣམས་དང༌། །རྟ་གང་ལུས་ཟུངས་ཟད་པ་དང༌། །གཞོན་དང་དེ་བཞིན་རྒས་པ་དང༌། །གང་ཡང་ལུད་པ་དབུགས་མི་བདེ། །དུག་འཐུངས་དུག་མདངས་ཕོག་པ་དང༌། །དེ་བཞིན་རེག་པའི་དུག་རྣམས་ལ། །མར་ནི་གསར་བའམ་རྙིང་པའང་རུང༌། །འདི་ལ་ཕན་པར་ཐེ་ཚོམ་མེད། །གསེབ་ལ་ཁུ་བ་འཕེལ་བྱའི་ཕྱིར། །མར་ནི་ལེགས་པར་བླུད་པར་བྱ། །དེ་ལས་སྐྱེས་པའི་རྟེའུ་ནི། །སྙིང་སྟོབས་ཆེ་ཞིང་ལུས་མཁྲང་འགྱུར། །དབྱར་གྱི་ཟླ་བ་དང་པོ་ལ། །རྩྭ་ཡིས་རྟ་ནི་ཤིན་ཏུ་འཁྲུ། །དེ་ཚེ་རྟ་སྦངས་སླས་གྱུར་པ། །བཏུང་བར་མར་ནི་བླུད་པར་བྱ། །སྔ་དྲོ་ཟས་ནི་ཞུ་བ་ན། །བྱིན་པ་དེ་ནི་མཆོག་ཏུ་བསྔགས། །སྨན་པ་མཁས་པས་མེ་དྲོད་
དང། །གོམས་པ་ལ་སོགས་ལེགས་བརྟགས་ལ། །ཅི་རིགས་པ་ཡི་སྦྱོར་བ་ཡིས། །མར་གྱི་ཚད་ནི་བསྐྱེད་པར་བྱ། །ཡུང་བའི་ཕྱེ་དང་སྦྱར་བ་ཡང༌། །དེ་བཞིན་ས་རྫི་ཀ་སྦྱར་བའི། །མར་ནི་རྟ་ལ་བླུད་པའི་ཚེ། །བཅའ་བ་དང་ནི་བཟང་བ་དང༌། །ལན་ཚྭ་སྦྱིན་པར་མི་བྱ་ཡི། །རྩྭ་ནི་འབའ་ཞིག་སྦྱིན་པར་བྱ། །ཆུ་ཡང་ཚ་ཞིང་དྲོ་བ་དག །དེ་ལ་བླུད་དང་བསྲུང་བ་དང༌། །མར་ནི་འཐུངས་པར་གྱུར་པ་ལ། །ཉེར་སྤྱོད་ཐམས་ཅད་དྲོན་པོ་བྱ། །ཞག་གསུམ་མམ་ནི་ཞག་ལྔའམ། །ཡང་ན་ཞག་ནི་བདུན་ཉིད་དམ། །ཞག་དགུ་ཡི་ནི་བར་དག་ཏུ། །ཇི་སྲིད་འཁྲུས་ཀྱི་བར་དུ་སྦྱིན། །ཚད་ཆུང་བར་ནི་བྱིན་གྱུར་བའི། །མར་གྱིས་འཁྲུ་བར་བྱེད་མི་ནུས། །དེ་བས་ཅི་སྲིད་ལེགས་པར་ནི། །འཁྲུས་ཀྱི་བར་དུ་སྦྱིན་པར་བྱ། །ཆོ་ག་འདི་འདྲས་བརྟེན་གྱུར་ཀྱང༌། །འོན་ཀྱང་འཁྲུས་པར་མ་གྱུར་ན། །འདི་ནི་ལེགས་པར་འཁྲུས་གྱུར་པ། །དེ་ཡི་བར་དུ་སྦྱིན་པར་བྱ། །རྟ་ནི་མཆོག་ཏུ་གྱུར་པ་ལ། །མར་སྲང་སུམ་ཅུ་རྩ་གཉིས་སྦྱིན། །ཟས་ཀྱི་ནང་དུ་དེ་ཡི་ཕྱེད། །སྣ་སྨན་ལ་ནི་སྲང་བཞི་བཏང༌། །འདི་ལས་བཞི་ཆ་ཕྲི་བ་ནི། །བར་མའི་ཚད་དུ་ཤེས་པར་བྱ། །སྔ་མ་དེ་ཡི་ཕྱེད་གང་ཡིན། །ཆུང་བ་ལ་ནི་སྦྱིན་པར་བྱ། །གལ་ཏེ་དེས་ཀྱང་མི་འཁྲུ་ན། །ས་རྫི་ཀར་དང་སྦྱར་སྦྱིན། །གལ་ཏེ་རྟ་སྦངས་སྣུམ་གྱུར་ཞིང༌། །སྟོབས་དང་བཟའ་སྟོབས་ཆུང་གྱུར་པ། །དེ་ཚེ་མར་ནད་མ་ཆུང་བར། །དེ་ནི་ལེགས་པར་གསོ་བར་བྱ། །ནས་ཐུག་ཆང་དང་ལན་ཚྭ་བཅས། །ཞག་གསུམ་བར་དུ་བླུད་པར་བྱ། །དེ་ནས་རིམ་གྱིས་མེ་དྲོད་ཀྱི། །སྟོབས་ནི་ལེགས་པར་བསྐྱེད་པར་བྱ། །བཏུང་བ་དེ་ནི་ཅི་རིགས་པར། །སྦྱིན་ཞིང་ཆུ་ནི་ཉུང་དུ་བླུད། །དེ་ནས་འདི་ལ་འཇམ་རྩི་ནི། །བཏང་བའི་ཚུལ་གྱིས་ལུས་བརྟས་བྱ། །དེ་ལ་མངར་བའི་ཁ་ཟས་ནི། །དགོངས་ཀའི་དུས་སུ་སྦྱིན་པར་བྱ། །ཁྱིམ་བྱའམ་ནི་རྨ་བྱའམ། །ཕག་གམ་རའམ་མ་ཧེའམ། །སྲེག་པ་འོལ་བྱ་བར་ཏ་ཀ །ཀ་པིན་ཙ་ལ་དང་བཅས་པ། །ཤིན་ཏུ་ཚོ་མིན་སྦེགས་པ་མིན། །རྒས་པ་མེད་པའི་ཤ་སྦྱིན་བྱ། །དེ་ཡི་ཁུ་བས་ལུས་རྒྱས་ཤིང༌། །སྟོབས་
དང་སྤྲོ་བ་རྩོལ་བ་ཆེ། །དགའ་ཞིང་སྲན་མི་ཆེ་བ་ཡི། །ལས་རྣམས་ཐམས་ཅད་ནུས་པར་འགྱུར། །ཆོ་ག་འདི་ཡིས་རྟ་ལ་ནི། །མར་ནི་མང་པོ་བླུད་གྱུར་ན། །མདོག་མདངས་སྟོབས་དང་ལྡན་གྱུར་ཅིང༌། །ནད་མེད་པར་ནི་འཚོ་བར་འགྱུར། །ཏིལ་མར་ལེགས་པར་བྱིན་གྱུར་པ། །ཡོན་ཏན་འདི་དང་འདྲ་བ་ཡིན། །རྟ་ཡིས་ཏིལ་མར་འཐུང་འགྱུར་ན། །ནད་མེད་སྟོབས་དང་ལྡན་པར་འགྱུར། །དབྱར་ནི་ལན་ཚྭ་དང་སྦྱར་སྦྱིན། །དབྱར་མཐའ་འོ་མ་དང་ལྷན་ཅིག །དགུན་ཆེ་སྐྱུར་བ་དང་སྦྱར་བ། །དགུན་སྨད་འབྲས་བུ་གསུམ་དང་བཅས། །དཔྱིད་ནི་ཆང་དང་ལྡན་བྱ་ཞིང༌། །སོས་ཀ་ཆུ་དང་ལྡན་པ་སྦྱིན། །ཏིལ་མར་བླུད་པར་གྱུར་བའི་རྟ། །ཆུ་གྲང་ནང་དུ་སྤེན་པར་བྱ། །ཆོ་ག་འདི་ཡིས་སྣུམ་དག་ནི། །ལེགས་པར་བླུད་པར་གྱུར་བའི་རྟ། །ལས་ལ་བཀོལ་ཡང་མི་གནོད་ཅིང༌། །ནད་མེད་པར་ཡང་འགྱུར་པ་ཡིན། །ཏིལ་མར་ཞུ་བར་གྱུར་རྗེས་ལ། །ཆུ་གྲང་བླུད་ན་བསྔགས་པ་ཡིན། །ཤ་ལི་ཧོ་ཏྲ་གྲུབ་པའི་གནས་བདུན་པ་ལས་མར་བླུད་པའི་ཆོ་གའི་ལེའུའོ།། །།རྟ་ཡི་བསྟན་བཅོས་ལ་མཁས་པ། །གཟི་བརྗིད་རྣམ་པར་འབར་གྱུར་པས། །ཉེ་བར་འདུག་པར་གྱུར་པ་ལ། །ལེགས་ཐོས་ཀྱིས་ནི་ཡང་དྲིས་པ། །རྒྱུ་དང་མི་རྒྱུའི་འགྲོ་བ་རྣམས། །དྲོ་དང་བསིལ་བའི་རང་བཞིན་ཅན། །གསོ་བའང་དེ་ཡི་བདག་ཅན་དུ། །ལེགས་ལྡན་ཁྱེད་ཀྱིས་ཐམས་ཅད་གསུངས། །ཁྲག་དང་མཁྲིས་པས་ཉེན་རྣམས་ཀྱི། །ནད་ཀྱི་གསོ་བ་ལན་མང་བཤད། །དེ་ལ་བསིལ་བའི་གསོ་བ་ཡི། །རྣམ་པ་དུ་མའང་ཁྱེད་ཀྱིས་གསུངས། །རླུང་དང་བད་ཀན་དག་གི་ནད། །ལྕི་ཞིང་གནོད་པ་མ་གྱུར་ལ། །གསོ་དཀའ་བར་ནི་སྣང་གྱུར་ན། །དེ་ཡི་གསོ་བ་ཅི་འདྲ་ལགས། །དུས་ཀྱི་རྣམ་བ་དུ་ཞིག་མཆིས། །དྲོས་པའི་མཚན་ཉིད་ཅི་ལྟ་བུ། །ཚད་ནི་ཆེ་དང་ཆུང་གྱུར་དུགས། །མཚན་ཉིད་ཁྱེད་ནི་ཅི་ལྟར་བཞེད། །དུགས་མི་བྱ་བའི་ནད་གང་ལགས། །དུགས་ཀྱི་ཡོན་ཏན་གང་ཞིག་ལགས། །ཚ་ཞིང་རྡུལ་གྱུར་གསོ་བ་དག །ཡང་དག་གཙོ་བོས་བདག་ལ་གསུངས། །དེ་ནས་ལེགས་ལྡན་དེ་ཡིས་ནི། །ཅི་སྐད་སྨྲས་པ་དྲིས་གྱུར་པ། །དུགས་ཀྱི་ཆོ་ག་རྣམ་པ་བརྒྱད། །
རིམ་བཞིན་ཁྱེད་ཀྱིས་མཉན་པར་གྱིས། །སྣུམ་གྱི་དུགས་དང་ལ་གསོ་མ། །བྱེ་མ་དང་ནི་འདྲེན་མ་དང༌། །རྟུག་པ་གསུམ་དང་གོ་བྲ་དང༌། །ལྕགས་ལེབ་དང་ནི་རྫ་མའི་དུགས། །གཅི་བའི་དུགས་ཀྱིས་བཙོས་པའི་སྣུམ། །འོ་མ་དེ་བཞིན་ཤ་ཁུ་ནི། །ཤ་ཟ་བ་དང་རླན་ཅན་ཤ ། སྨན་སྤོད་ལེགས་པར་བཏབ་གྱུར་པ། །ཁྲོན་པའི་རྫིང་བུ་གཞོང་བ་ན། །ལེགས་པར་བསྲོས་བ་བླུགས་པར་བྱ། །སྣུམ་གྱི་དུགས་སུ་བྱ་བ་ནི། །སྣ་ཚོགས་སྨན་དང་སྦྱར་བྱ་སྟེ། །ཤི་ཀྲུ་དང་ནི་ཏད་ཀ་རི། །བ་སྲ་ར་ཧི་ཨེ་རན་དང༌། །བ་སྤྲུ་ཉེའུ་ཤིང་ས་རྫ་ཀ །ཀུ་པེ་རཀྵི་དུར་བྱིད་དང༌། །གཞན་ཡང་ཚུལ་འདི་དེ་འདྲ་བ། །དེ་རྣམས་ལ་ལ་སོ་སོར་ནི། །ཆུ་ནི་མང་པོ་དང་བསྐོལ་ལ། །བྲི་བ་རན་པ་བླུགས་པར་བྱ། །འདི་ནི་གསོ་མའི་དུགས་ཡིན་ཞིང༌། །ཤི་ཀུ་ཀ་ཡི་མེ་ཏོག་དང༌། །གླང་པོ་རྟ་དང་རྔ་མོ་ཡི། །རྟུག་པ་དང་ནི་འོ་མ་ཞོ། །གསོ་མའི་ལོ་མ་གཅིག་ཏུ་བསྡུས། །འདྲེན་མའི་དུགས་ཞེས་བྱ་བ་ཡིན། །གསོ་དང་སྐྱུར་རྩབ་ནང་དུ་སྤངས། །ཀུན་ནས་ལེགས་པར་བཙིར་ནས་ཀྱང༌། །དེ་ལ་ཨར་ཀའི་ལོ་མའམ། །ཨེ་རཎྜ་ཡི་ལོ་མ་ལྡིང༌། །སླ་དའམ་ས་སློང་ལ་བརྡོས་པའི། །བྱེ་མཚན་དེ་དེར་བསྲེ་བྱ། །དེ་ནས་དེ་ཡི་ཐོན་པོར་བྱ། །ལག་པ་གཉིས་ནི་མཉེས་ནས་ཀྱང༌། །ཡང་དང་ཡང་དུ་དུགས་བྱ་བ། །ཐུམ་པོའི་དུགས་སུ་དེ་བཤད་དེ། །བ་གླང་བོང་བུ་རའི་རྟུག་པ། །འོ་མ་དང་ནི་བསྲེས་པ་བསྐོལ། །གོས་ཀྱི་ནང་བཅུག་རབ་ཚ་མིན། །རྟུག་པ་གསུམ་གྱི་དུགས་ཞེས་བྱ། །ལ་ཕུག་ཆོམ་ཆོམ་བརྫུངས་ནས་ནི། །འོ་མའི་ནང་དུ་བཅུག་ནས་བསྐོལ། །འོ་མ་དག་ཀྱང་དེར་བཅུག་སྟེ། །དེ་བཏགས་ནས་ནི་གོང་བུར་བྱ། །གྱོ་མོ་མེ་མདག་འདྲ་དེར་གཞག །གྱོ་མོའི་དུགས་དེ་ཅི་རིགས་པ། །ཁྲེ་དང་འབྲས་དང་གྲོ་རྣམས་ནི། །ཕྱེ་མར་བཏགས་ལ་འོ་མར་སྦྱར། །ལ་ཕུག་ཨེ་རཎྜའི་འབྲས་བུ། །ག་གོན་གསོ་མའི་ས་བོན་དང༌། །ཕབས་དང་མ་ཤ་ཏིལ་རྣམས་དང༌། །ཡུངས་ཀར་རྣམས་ནི་ཕྱེར་བཏགས་ལ། །ཕྱེ་མ་དེ་ནི་འོ་མ་དང༌། །ཆང་བསྲེས་ལན་ཚྭ་བྲོ་བྱས་ལ། །དེ་ཡིས་མང་དུ་བསྒོས་པ་ཡི། །རས་མ་ཡིས་ཀྱང་རབ་དཀྲིས་པ། །དེ་ནི་ལྕགས་ལེབ་རབ་ཚ་བ། །ཀུན་དུ་
ཉེ་བར་སྦྱར་བར་བྱ། །འདི་ནི་ལྕགས་ལེབ་དུགས་ཡིན་ཏེ། །རླུང་གི་ནད་ནི་འཇོམས་བྱེད་ཡིན། །ལྕགས་ལེབ་ལ་ནི་ཇི་ལྟར་བྱས། །བུམ་པ་ཡིས་ཀྱང་དེ་བཞིན་བྱ། །བུམ་པའི་དུགས་སུ་བྱ་བ་འདི། །བརྒྱད་པ་བུམ་པའི་དུགས་སུ་བཤད། །འདི་ནི་སོ་སོའི་བྱ་བ་དག །ང་ཡིས་ཁྱེད་ལ་བསྟན་པ་ཡིན། །རྫ་བུམ་ཆེན་པོར་གསོ་མ་བཙོས། །སྦུབས་ཀྱི་དུགས་ཀྱང་བྱེད་དུ་གཞུག །འདི་ནི་རླངས་པའི་དུགས་ཡིན་ཏེ། །རེག་ན་བདེ་བར་བྱེད་པ་ཡིན། །བུམ་པའམ་རྫ་མ་དག་ཏུ་ནི། །གསོ་མ་དང་ནི་འབྲས་བུའི་རིགས། །སྣ་ཚོགས་པ་ནི་བཙོས་པ་ཡིས། །རླངས་པའི་དུགས་ནི་སོ་སོར་བྱ། །དཀྲི་བའི་དུགས་ཞེས་བྱ་བ་ནི། །གོང་བུའི་དུགས་ཀྱང་ཡིན་པར་བཤད། །ཏིལ་དང་མ་ཤ་ཟར་མ་ཕབས། །ནས་དང་གྲོ་དང་ཀུ་ལཏྠ། །ལ་ཕུག་ཨེ་རཎྜའི་ས་བོན། །དེ་བཞིན་ག་གོན་གསོ་མ་ཡི། །ས་བོན་ཡུངས་ཀར་ཐང་ཤིང་དང༌། །ས་ལ་ར་དང་རུ་རྟ་དང༌། །ཤུ་ཏི་དང་ནི་པོ་སོན་ཆ། །ར་སྣ་རྒྱ་སྤོས་ཆུ་སྲིན་སན། །དེ་བཞིན་རླུང་འཇོམས་པ་ཡི་སྨན། །ཕྱེ་མར་ཞིབ་ཏུ་བཏགས་པར་བྱ། །སྣུམ་ནི་བཞི་པོ་གཞུག་བྱ་ཞིང༌། །སྦྲང་རྩི་ཞོ་དང་འོ་མ་གཞུག །དེ་ལྟར་སྣུམ་རབ་ལྡན་སྦྱར་ལ། །ལན་ཚྭ་བཏབ་ལ་བཙོ་བར་བྱ། །ཚོས་ནས་གོང་བུར་གྱུར་པ་ནི། །གོང་བུའི་དུགས་ཞེས་བྱ་བར་བཤད། །རླུང་དང་བད་ཀན་ལས་གྱུར་ན། །ཚིལ་དང་སྨིན་བུར་བཅས་གང་ཡིན། །དེ་ལ་གོང་བུའི་དུགས་བྱ་ཡིན། །འདི་ནི་ཤིན་ཏུ་བསྔགས་པ་ཡིན། །སྨན་ནི་ཕན་ཚུན་སྦྱར་བའམ། །དེ་བཞིན་ཉི་མ་མེ་དྲོད་ཀྱིས། །གང་ཕྱིར་རྡུལ་ནི་འབྱིན་བྱེད་པས། །དེ་ཕྱིར་དུགས་ཞེས་བྱ་བར་བཤད། །འདི་ཡིས་ལུས་ནི་མཉེན་བྱེད་ཅིང༌། །འགགས་པ་འབྱིན་པར་བྱེད་པ་ཡིན། །ཞུ་བའི་ཕྱིར་ནི་འབྱིན་བྱེད་ཅིང༌། །འཐས་པ་ཞུ་བར་བྱེད་པ་ཡིན། །སྐྲངས་པ་ཞི་བར་བྱེད་པ་དང༌། །རླུང་ནི་བདེ་བར་རྒྱུ་བར་བྱེད། །ནད་ནི་ཚར་གཅོད་པར་བྱེད་ཅིང༌། །དེ་བཞིན་གསོ་མའི་གྲོགས་ཀྱང་བྱེད། །སྨིན་པར་བྱ་བའི་ནང་ན་ནི། །ནང་འཇིག་བྱེད་པའི་མཆོག་ཡིན་ནོ། །དཔེར་ན་ཤིང་ལ་སྣུམ་བསྐུས་ཤིང༌། །དཀྲི་ཞིང་བལྟོས་ན་དབུག་
པ་སླ། །དེ་བཞིན་དུས་ཚོགས་ཐམས་ཅད་དུ། །ལེགས་པར་སྦྱར་ན་ལུས་པ་དེ་བྱེད། །འཇམ་དང་དྲག་པོའི་སྦྱོར་བ་ནི། །ནད་ཀྱི་ཚོད་ལས་དཔག་སྟེ་བྱ། །ལེགས་པར་བསྐུས་ལ་དུགས་བྱ་ཡི། །རྩུབ་པོར་ནམ་ཡང་དུགས་མི་བྱ། །དཔེར་ན་ཤིང་ནི་རླན་མེད་པར། །བསྲོས་ན་འཇིག་པར་འགྱུར་བ་ཡིན། །དེ་བཞིན་ལུས་ནི་སྣུམ་མེད་པར། །དུགས་བྱས་ན་ནི་འཇིག་པར་འགྱུར། །ནད་གང་སྣུམ་དང་དུགས་རྣམས་ཀྱིས། །ལུས་ལ་ཟགས་པར་བྱས་གྱུར་པ། །དེ་ནི་སྦྱངས་པས་བསལ་བར་བྱ། །རྣ་བ་རྒྱུ་མ་དཀུ་དང་ནི། །རླིག་པ་མཚན་གྱི་བར་དག་ཀུན། །གང་ཚེ་རྡུལ་བར་གྱུར་པ་དང༌། །ཁ་ནི་ཡོངས་སུ་བསྐམ་གྱུར་པ། །ལུས་ལྷོད་ཉམས་ནི་མི་བསོད་པ། །དེའི་ཚེ་དུགས་གྱུར་ཡིན་ཞེས་བྱ། །མཉེན་ཞིང་ཡང་བ་ཉིད་དང་ནི། །དེ་བཞིན་ཟུག་གཟེར་ཞིབ་དང༌། །ནད་ནི་རྣམ་པར་བསལ་གྱུར་པ། །རྟའི་དུགས་ལེགས་པའི་མཚན་ཉིད་ཡིན། །གང་གི་སྤུ་ནི་འབྱི་འགྱུར་ཞིང༌། །ཁྲག་དང་འདྲ་བའི་གཅིན་འབྱུང་ངན། །སྐོམ་དད་དང་ནི་རྨོངས་བག་སྐྱེད། །ཉལ་བ་ལ་ནི་མངོན་པར་དགའ། །འདར་བས་ཉན་པར་གྱུར་པ་ནི། །དུགས་དྲགས་པ་ནི་ཡིན་པར་བཤད། །དུགས་ནི་ཆུང་བར་གྱུར་པ་ཡིས། །ནད་ནི་ཞི་བར་བྱེད་གྱུར་ཏེ། །ནད་ནི་སྐྱེད་པར་གྱུར་ན་ཡང༌། །གནས་དེ་ལས་ནི་ཕྱིན་མ་བྱས། །དེ་བས་འདི་ལ་ནད་ཤུགས་ནི། །ཤིན་ཏུ་དྲག་པོ་སྐྱེད་པར་བྱེད། །འདི་ལས་མཉེན་པ་མི་འབྱུང་གི །སླར་ཞིང་རེངས་པ་སྐྱེད་པར་བྱེད། །དུགས་དྲགས་པ་ལ་ལན་བརྒྱར་ནི། །གཅིན་པའམ་མར་གྱིས་བསྐུ་བར་བྱ། །འོ་མ་ཅན་ཤིང་ཁུ་བ་དང༌། །འོ་མ་ཞོ་དང་ཞོ་ག་ཆུ། །ཏིལ་དང་དེ་བཞིན་གཞན་གྱི་ཆུས། །ལེགས་པར་བསྐུས་ལ་བླུགས་པར་བྱ། །དུགས་ཆུང་བ་ལ་སླར་ཡང་ནི། །ཆོ་ག་བཞོན་དུ་དུགས་བྱའོ། །དུགས་དྲགས་ཆུང་བར་གྱུར་པའམ། །ཚད་ལས་ལྷག་པར་སྦྱར་གྱུར་ན། །ནད་གཞན་དག་ཀྱང་སྐྱེད་བྱེད་ཅིང༌། །འདི་ཡིས་ལུས་ལ་གནོད་པར་བྱེད། །ཁོང་ཚ་སྐྲངས་པར་གྱུར་པ་དང༌། །ལུས་ཀྱང་ཚིག་པར་འགྱུར་པ་ཡིན། །ཤིན་ཏུ་ཚིག་པའམ་ཆོས་མིན་པས། །ལས་ནི་ནམ་ཡང་འགྲུབ་མི་འགྱུར། །ཚད་པར་འཁྲུ་དང་
རིམས་ཀྱིས་ཐེབས། །པགས་ནད་ཅན་དང་ལུས་ཟུངས་ཟད། །དམུ་རྫིང་དབུགས་བདོ་གཅིན་ནད་དང༌། །ཁྲག་དང་མཁྲིས་པའི་ནད་ཡོད་དང༌། །གསེབ་ནི་མང་པོས་དུབ་པ་དང༌། །སྦྲུམ་མ་དང་ནི་བཙས་མ་ཐག །ཟླ་དྲུག་ལོན་པར་མ་གྱུར་དང༌། །གནོད་པ་ཅན་དང་སྣད་པ་དང༌། །དེ་བཞིན་གློ་བུར་པ་ཡི་ནད། །གང་ཡང་སྦྲུལ་གྱིས་ཟིན་པ་དང༌། །དུག་མདངས་ཕོག་པར་གྱུར་པ་དང༌། །གྱེན་དུ་རླུགས་བཟློག་སྐྱུགས་པ་དང༌། །ལུད་པ་ཅན་དང་ཁོང་པ་ན། །འབུ་ཡོད་པ་ལ་དུགས་མི་བྱ། །འདི་དག་ལ་ནི་དུགས་བྱས་ན། །འཆི་བའམ་རིམས་ཀྱིས་འདེབས་པར་འགྱུར། །ཤིན་ཏུ་གྲང་མིན་དྲོད་མིན་པའི། །དུས་སུ་རྟ་ལ་དུགས་བྱ་བསྔགས། །གནས་སྐབས་གཞན་དུ་གྱུར་པ་དང༌། །སོས་ཀ་སྟོན་ཚེ་བྱ་དགོས་ན། །ཚད་དང་དུས་ནི་ལེགས་བརྟགས་ལ། །ཅི་ནས་གནོད་པར་མི་འགྱུར་བྱ། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་དུགས་ཀྱི་ཆོ་གའི་ལེའུའོ།། །།དུར་བྱིད་གནད་བི་ར་དི། །པི་ལུ་བརྞ་བ་ལ་གཉིས། །གན་ད་ར་བའི་རྩ་བ་དང༌། །ས་ཧ་ཙ་རའི་རྩ་བ་དང༌། །ཨགྣི་མ་ན་བིལ་བ་དང༌། །གཟི་མདངས་དང་ནི་ཏིནྡུ་ཀ །དེ་འདྲའི་སྨན་གྱི་རྩ་བ་རྣམས། །བསྡུས་ཏེ་ཆུ་བྲེ་བཞི་ནང་བསྐོལ། །ལེགས་པར་ཚོས་པར་གྱུར་པ་ན། །སྨན་པས་སླར་ནི་དབོག་པར་བྱ། །དེ་བཙགས་སྨན་ཁུ་དང་མཉམ་པའི། །ཏིལ་མར་འོ་མ་གཉིས་འགྱུར་གཞུག །དེ་ནི་ཐང་ཤིང་ཏ་རུ་པ། །སྤང་སྤོས་ཆུ་དག་རྡོ་དྲེག་དང༌། །ཙནྡན་སྤང་སྤོས་རུ་རྟ་དང༌། །ཨད་ཤུ་མ་ཏི་ཨ་ཀ་རུ། །བ་ལ་ར་སྣ་ཤིང་མངར་དང༌། །པི་པི་ལིང་དང་རྒྱམ་ཚ་ནི། །སྨན་ནི་རེ་རེ་སྲང་ཕྱེད་ཀྱི། །ཚད་དུ་མཁས་པས་གཞུག་པར་བྱ། །དེར་ནི་སླར་བསྐོལ་སྦྱར་བ་ཡི། །ཏིལ་མར་འདི་ཡི་ནུས་པ་ཉོན། །རྟ་ནི་རླུང་གིས་ཉེན་པའམ། །གླང་པོ་ཤིན་ཏུ་སྦེགས་པའམ། །འདི་ཡིས་དབང་པོ་བརྟས་པར་འགྱུར། །བུད་མེད་མོ་གཤམ་གྱུར་པ་དག །འདི་ལའང་དེ་ནི་བླུད་པར་བྱ། །འདི་ཡིས་དྲེ་མོའང་བུ་ཆགས་ན། །མི་ཡི་བུད་མེད་སྨོས་ཅི་དགོས། །འདི་དག་ཚོགས་པར་གྱུར་བླུད་ལ། །དེ་རྗེས་ཆང་ནི་བླུད་གྱུར་ན། །རླུང་གི་གཟེར་གྱིས་ཉེན་པ་དང༌། །མི་བཟད་རྣ་བའི་
གཟེར་དང་ནི། །སྙིང་ནད་དང་ནི་སྙིང་གཉེར་དང༌། །མངལ་འཇིག་ཉམ་ཆུང་རྣམས་སེལ་ཡིན། །དེ་བཞིན་སྣ་ནད་ཁ་ནད་དང༌། །གཞོགས་ཕྱེད་ཀྱི་ནི་ནད་ལའང་ཕན། །དོན་གྲུབ་ཅེས་བྱའི་ཏིལ་མར་ནི། །ཁྱབ་འཇུག་གིས་ནི་བསྟན་པ་ཡིན། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་དོན་གྲུབ་ཅེས་བྱ་བ་ཏིལ་མར་གྱི་ལེའུའོ།། །།རྟ་ཡི་དེ་ཉིད་ལ་མཁས་པས། །བུ་དང་སློབ་མ་ལ་སྨྲས་པ། །ནད་གང་ལ་ནི་མེ་བཅའ་དག །གོ་རིམས་ཇི་བཞིན་བྱའོ་ཞེས། །གསོ་བའི་གནས་སུ་བསྟན་པ་སྟེ། །མེ་བཙའ་བཏབ་པའི་ཐབས་བཤད་ན། །དེ་ལ་རེ་ཞིག་ལེ་བཙའ་ལ། །དགོས་པའི་ཆ་བྱད་བརྗོད་བྱ་སྟེ། །ལྕགས་ལེབ་དན་དའི་འབྲས་བུའི་དབྱིབས། །ཆུར་ཆག་ཕྱེད་དང་གཉིས་ཀྱི་ཚད། །འདབ་མའི་ཆུར་ནི་སོར་བརྒྱད་ལ། །ཞེང་དུ་སོར་ནི་བཞི་བར་བྱ། །ཡུ་བའི་སྤོམ་ནི་མཐེབ་སོར་ཚད། །ཤིན་ཏུ་ཟླུམ་ཞིང་སྲ་པར་བརྡུང༌། །སྲེག་པར་བྱེད་པའི་ཆ་བྱད་ཀྱང༌། །ལྕགས་ལེབ་དང་ནི་འདྲ་བར་བརྡུང༌། །དེ་ཡི་རྩེ་མོ་ཞེང་སོར་གཉིས། །བྱང་ཆུབ་ཤིང་ལོ་འདྲ་བར་བྱ། །ཤེ་བ་ལི་འབྲས་ལྟར་གུག་པའི། །སོར་ནི་བཅོ་བརྒྱད་ཚད་དུ་བྱ། །ལྕགས་ནག་ལས་ནི་རབ་ཟླུམ་པའི། །རྩེ་མོ་དགུག་པའི་བཞར་སྤྱད་བྱ། །འཛམ་བུའི་ཚི་གུ་ཡུ་བ་འཇམ། །སོར་ནི་བཅོ་བརྒྱད་ཚད་དུ་བྱ། །འཇལ་ད་ཚེག་གུ་འདྲ་བ་ལ། །ཟླུམ་ཞིང་ལེགས་པ་ཉིད་དུ་བྱ། །ཐུར་མ་སོར་ནི་བཅུ་དྲུག་པའོ། །མར་མེའི་རྩེ་ལྟར་ཟླུམ་པ་ནི། །སྤུ་བསྲེག་པ་ཡི་ཆ་སྤྱད་འདི། །ལྕགས་ལས་ལེགས་པར་བརྡུང་བར་བྱ། །ལྕགས་དེ་མེ་ཡི་མདོག་འདྲ་བར། །བསྲེགས་པའི་གནས་ཆ་ཤེས་བྱས་ལ། །འཛམ་བུའི་ཚི་གུ་འདྲ་བ་ཡི། །དབྱིབས་ནི་དུ་མར་བསྲེག་པར་བྱ། །ཚིགས་ཀྱི་ཆ་ཡི་ཕྱོགས་སུ་ནི། །དབྱིབས་གང་བྱ་བ་ནི་ཉོན་ཅིག །ཆ་བཟུང་བར་ནི་གནས་པ་ལས། །དང་པོར་བྲི་བ་ཉིད་དུ་འདོད། །བིར་རམ་ཡང་ན་བཙག་གམ་ནི། །ས་དཀར་གྱིས་ནི་བྲི་བར་བྱ། །དེ་ནས་ཐུར་མ་བསྲེགས་པ་ཡིས། །གནས་དར་སྤུ་ནི་བསྲེག་པར་བྱ། །སྐྲེག་པར་བྱེད་ཚེ་ཚིགས་ལས་ནི། །གཞན་དུ་དབྱིབས་འདི་འགྱུར་སྲིད་ལ། །དེ་བས་མེ་བཙའི་ལས་
ལ་ནི། །དང་པོར་མཚན་མ་བྲི་བར་བྱ། །ཤིན་ཏུ་དྲང་དང་ཚ་བ་ཡི། །དུས་སུ་མེ་ཡི་ལས་ནི་བྱ། །གྲང་བའི་ཚེ་ན་རྩ་རྒྱུས་ནི། །རེངས་ཤི་འཐས་པར་འགྱུར་བ་ཡིན་།ནད་འདི་འཐས་པར་གྱུར་པ་དག །མེ་ཡི་ལས་ཀྱིས་སེལ་མི་ནུས། །དེ་ནས་གྲང་བས་ཉེན་གྱུར་རྟའི། །ནད་མི་སེལ་བས་དེ་མི་བྱ། །ཤིན་ཏུ་ཚ་ཚེ་ཁོང་ཚ་དང༌། །རྨོངས་བག་མགོ་འཁོར་དབུགས་རྒོད་བསྐྱེད། །སོས་ཀ་དབར་གྱི་ཚེ་ན་ནི། །སྲོག་ནི་ངེས་པར་ཟད་པར་བྱེད། །དེ་བས་སྔ་དྲོའི་ཚེ་ན་ནི། །ཤིན་ཏུ་གྲང་མིན་ཚ་མིན་པའི། །མེ་ལས་ཚད་ཙམ་བྱས་གྱུར་པ། །རྟ་ཡི་བདེ་བ་སྐྱེད་པ་ཡིན། །འདུག་པ་ངལ་ནི་ལེགས་བཅིངས་ལ། །ཕྱོགས་གཅིག་ཏུ་ནི་སྐྱེལ་བར་བྱ། །ཐག་པ་སྲ་ཞིང་སྦོམ་པ་ཡིས། །ལག་པ་གཉིས་ནི་བསྡམ་པར་བྱ། །ཕྱི་རྐང་གཉིས་ཀྱང་བཅིངས་ནས་ནི། །མ་སྣད་འགྱུར་བ་མེད་པར་བྱ། །ཞགས་པས་ནང་ནས་བསྡམས་ཏེ་བརྡུང༌། །འདིས་ནི་གཡོ་བ་མེད་པར་འགྱུར། །ཨ་བཅུ་དག་ཀྱང་བཅིང་བྱ་ཞིང༌། །རྣ་བ་གཉིས་ཀྱང་ལེགས་པར་བསྡམ། །བསྡམས་ཏེ་ལེགས་པར་བཞག་ནས་ནི། །དེ་རྗེས་ལས་ནི་བརྩམ་པར་བྱ། །གནས་ནི་མཉམ་ཞིང་རྩ་དགྲམ་པར། །པགས་པ་འཇམ་པོ་བཏིང་བར་ནི། །ཐག་པ་འཇམ་ཞིང་སྲ་བ་ལ། །སྦོམས་སུ་མཐེབ་སོར་དག་གི་ཚད། །དཀྱུས་སུ་འདོམ་དྲུག་ཡོད་པ་དག །བཅིངས་པའི་དོན་དུ་བྱ་བ་ཡིན། །ཕྲག་སོ་ནས་ནི་བཏབ་མ་ཡིན། །རོ་སྟོད་ལེགས་པར་བསྡམས་ནས་ནི། །ནང་ནས་བཅུག་སྟེ་ཚེའུ་ཚེ་ནས། །རོ་སྨད་དུ་ནི་བསྡམ་པར་བྱ། །བཟློག་ནས་བྱིན་པ་ནས་བཀྲི་བྱ། །དེ་ལྟར་ལེགས་པར་བསྡམས་ནས་ནི། །སྟོབས་དང་ལྡན་པས་ལེགས་པར་མནན། །རྩིབ་མ་ཕབ་སྟེ་ལེགས་བཞག་ལ། །དེ་ཡི་རྔ་མ་ནས་གཟུང་བྱ། །དེ་ནས་ལགས་པར་དགབ་པ་ཡིས། །མིག་གིས་མཐོང་མ་བེ་དཔར་གཞག །ལུས་ནི་ཤས་ཆེར་མི་བཙིར་ཞིང། །ཆུ་སོ་དང་ནི་མཆན་ཁུང་དང༌། །དཀུ་ཡི་བར་ནི་ལེགས་བསྲུངས་ལ། །དེ་ནས་གྲུབ་པའི་ལས་ཀྱང་བྱ། །སྙིང་ག་ཁ་དང་རྨང་ཀ་རུ། །ཆུ་ནི་ཡོངས་སུ་བླུགས་པར་བྱ། །དབུགས་ཕྱུང་སྙན་པའི་ཚིག་སྨྲས་པ། །དེ་རྗེས་སྲེག་པའི་ལས་རྣམས་བྱ། །དེ་ནས་གཞན་ཡང་
བསྲེག་བྱ་ཡི། །གནས་དང་དབྱིབས་ནི་བཤད་པར་བྱ། །མཆུ་ལྟག་གོང་དུ་འཕྲེད་དུ་ནི། །རི་མོ་གསུམ་ནི་བྱ་བ་ཡིན། །སྣ་གདོང་དང་ནི་འཁུར་ཚོས་སུ་འང༌། །མཉམ་པར་བྱེད་དུ་བྱ་བ་ཡིན། །མཆུ་གྲོས་དང་ནི་མཆུ་དག་ཏུ། །རི་མོ་ཟླུམ་པོ་དག་ཀྱང་བྱ། །འགྲམ་གླང་རྟག་ཏུ་ཐིག་ལེ་ཡི། །རི་མོ་ཅུང་ཞིག་བྱ་བ་ཡིན། །འཛམ་བུའི་ཚི་གུས་འབྲལ་བར་ནི། །བྱ་རོག་རྗེས་ནི་མཉམ་པོ་བྱ། །རྣ་བ་མིག་གི་ཕ་རོལ་དུ། །ཟླུམ་པོ་དག་ཀྱང་བྱ་བ་ཡིན། །མུར་གོང་དང་ནི་ཨུཏྤལ་འདབ། །དེ་བཞིན་བྱ་རོག་རྗེས་གཉིས་བྱ། །སྣ་རྩ་རུ་ནི་སྣུམ་གྱིས་ནི། །ས་ཐ་ལི་ཡིས་ཐིག་ལེ་བྱ། །རྩེའུ་ཆུང་གཉིས་སུ་ཟླུམ་པོའི་ནང༌། །རི་མོ་གསུམ་དག་བྱ་བ་ཡིན། །ཕྲག་སོ་གཉིས་སུ་སིན་ཛི་ཡི། །འདབ་མ་ལྟ་བུར་བྲི་བར་བྱ། །དཔུང་མགོར་དགའ་བ་འཁྱིལ་པ་དང༌། །ཤིང་རིས་ལྟ་བུ་བྱ་བ་ཡིན། །ནམ་ཚོད་དུ་ནི་ཐིག་ལེ་རིས། །ཡང་ན་ཟླུམ་པོ་བྱ་བ་ཡིན། །སྙིང་ག་ཡི་ནི་ཕྱོགས་དག་ཏུ། །ནམ་ཡང་བསྲེག་པར་མི་བྱའོ། །པུས་གོང་དང་ནི་དཔུང་པ་རུ། །ཆུ་སྲིན་སོ་འདྲ་བྱ་བ་ཡིན། །ཡང་ན་ཆུ་སྲིན་སོའི་འོག་ཏུ། །རི་མོ་རེང་བུར་བྱ་བ་ཡིན། །དཔུང་པ་གཉིས་ཀི་བར་དུ་ནི། །ཐིག་ལེ་ལྟ་བུའི་རི་མོ་བྱ། །ལག་ངར་ཆིག་རང་ཕྲ་མོ་རུ། །ཐིག་ལེའམ་ཡང་ན་འཁོར་ལོ་བྱ། །བྱིན་པ་ཚེའུ་ཚེ་དག་ལ་ནི། །ཐིག་ལེ་ཐོར་བུར་བྱ་བ་ཡིན། །དཀུ་གཉིས་སུ་ནི་བྱ་རོ་རྗེས། །ཡང་ན་ཨུཏྤལ་ཐིག་ལེ་བྱ། །སྒལ་ཚིགས་དོར་བའི་རྒྱབ་ཏུ་ནི། མཉམ་ཞིང་ཆུར་ནི་འགྲོ་བ་ཡིན། །རི་མོ་གསུམ་དག་བྱ་བ་སྟེ། །དྲུག་མདོག་ཡང་ནི་གསུམ་པོ་བྱ། །ཡང་དུག་མདོའི་གནས་སུ་ནི། །བྱ་རོག་རྗེས་ནི་བྱ་བ་ཡིན། །ཡང་ན་ལག་པ་དྲང་བའམ། །མར་མེ་ཡི་ནི་རྩེ་འདྲ་བྱ། །ལོང་བུ་བྱ་རོག་རྗེས་འདྲ་བའམ། །ཨུཏྤ་ལ་ཡི་ཐིག་ལེ་བྱ། །ལྟོ་བར་རི་མོ་བརྒྱད་པའམ། །པདྨ་ཡི་ནི་དབྱིབས་འདྲ་བྱ། །སྙིང་ག་དང་ནི་སྤུ་རིས་དང༌། །ལྟེ་བར་ཡོངས་སུ་སྤང་བར་བྱ། །དཔྱི་སྟེང་དུ་ནི་གཡུང་དྲུང་རུང༌། །དགའ་བ་འཁྱིལ་པའམ་པདྨ་བྱ། །ཡང་ན་རི་མོ་མཛེས་པའམ། །ཟླུམ་པོ་ཉིད་དུ་བྱ་བ་ཡིན། །རྔ་རྩ་དོར་ལ་མཇུག་ཚོས་སུ། །བྱ་རོག་རྗེས་སམ་
ཨུཏྤལ་བྱ། །ཚིགས་ཀྱི་མཚམས་སུ་ལེགས་བརྟགས་ལ། །དགའ་བ་འཁྱིལ་པའམ་ཟླུམ་པོའམ། །ལོ་མ་བདུན་པ་ལྟ་བུ་ནི། །ཀུན་དུ་གནོད་པ་མེད་པར་བསྲེག །དབྱི་ཡི་འོག་གི་ཆ་རུ་ནི། །ཆུར་ནི་རེངས་པའི་རི་མོ་བྱ། །ཡང་ན་ཟླ་བ་ལྟ་བུའམ། །ཆུ་སྲིན་གྱི་ནི་སོ་འདྲ་བྱ། །བརླ་ཡི་ཕྱི་དང་ནང་དུ་ནི། །རི་མོ་འཕྲེད་དུ་བྱ་བ་ཡིན། །སྲེ་ལོང་ཚིགས་སུ་མཁས་པ་ཡིས། །ནྱ་གྲོ་དྷ་ཡི་འདབ་འདྲ་བྱ། །རོ་སྟོད་ཀྱི་ནི་ཆ་བཞིན་དུ། །རོ་སྨད་དུ་ཡང་བྱ་བ་ཡིན། །དེ་བཞིན་མཁས་པས་སྐྲངས་པ་དང༌། །རྨར་གྱུར་པ་ཡི་ནད་ལ་ཡང༌། །དགའ་བ་འཁྱིལ་དང་ཆུ་སྲིན་གྱི། །སོ་འདྲ་བ་ནི་བྱ་བ་ཡིན། །ནད་ཀྱིས་ཉེན་པར་གྱུར་པ་ལ། །དབྱིབས་ནི་དེ་འདྲར་བསྲེག་པར་བྱ། །ཆ་རུ་དབྱིབས་འདི་གསལ་མངོན་ཞིང༌། །ལེགས་བར་གནས་པ་དྲོས་ནས་ནི། །རི་མོ་སྙོམས་པར་གནས་པ་ལ། །མཁས་པས་ལེགས་པར་བསྲེག་པར་བྱ། །ཏ་ལའི་སྙིང་པོ་དང་འདྲ་བའམ། །བིལ་བའི་སྙིང་པོ་འདྲར་གྱུར་པའམ། །ལེགས་པར་བསྲེག་པར་གྱུར་པ་སྟེ། །མདོག་གཞན་སྨད་པར་གྱུར་པ་ཡིན། །བསྲེགས་དྲགས་ན་ནི་ཤ་འདྲུལ་ཞིང༌། །ཤིན་ཏུ་གཏིང་རིང་རྨ་འཚོ་དཀའ། །སྡུག་བསྔལ་དག་ཀྱང་སྐྱེ་འགྱུར་ཞིང༌། །ཡན་ལག་སྡུད་མི་ཤེས་པར་འགྱུར། །བསྲེགས་ཆུང་བས་ནི་འདི་ཡི་ནད། །ལེགས་པར་བསལ་བར་མི་ནུས་ཤིང༌། །རྨ་ཡང་མྱུར་དུ་མི་འཚོ་ལ། །ལས་སུ་མི་རུང་ཉིད་དུ་འགྱུར། །རྟ་ནི་ལེགས་པར་བསྲེགས་པའི་རྨ། །ཤ་ནི་ཆུ་བུར་འདྲས་ཁྱབ་ཅིང༌། །ཅུང་ཟད་འཛག་པ་འདྲ་བ་དང༌། །ནད་ཀྱང་རབ་ཏུ་ཞི་བར་བྱེད། །སྐྲངས་པ་རྣམས་ནི་ཞི་འགྱུར་ཞིང༌། །སྐམ་པོ་སླར་ནི་སྐྱེད་པར་བྱེད། །རྨ་ནི་སྦྱོང་བར་བྱེད་པ་དང༌། །འཚོ་བ་ཅིང་རྣག་ནི་ཟད་པར་བྱེད། །གཟེར་ནི་སེལ་བར་འགྱུར་བ་དང༌། །རླུང་ནི་བདེ་བར་རྒྱུ་བར་བྱེད། །རྨེན་བུ་སྐྱེ་བར་མི་བྱེད་ཅིང༌། །རྨ་ཡང་མཆེད་པར་མི་འགྱུར་རོ། །གྱོང་པོ་རྣམས་ནི་མཉེན་འགྱུར་ཞིང༌། །ལྷོད་པ་རྣམས་ནི་སྲ་བར་བྱེད། །ཁྲག་ནི་རྨིག་ཏུ་འབྱུང་འགྱུར་བ། །མེ་བཙའ་ཉིད་ཀྱིས་ཞི་བར་
བྱེད། །རྨིག་མཐིལ་ཚད་དང་དུགས་ལ་ནི། །མེ་ཉིད་ཁོ་ན་བདེ་སྐྱེད་ཡིན། །དེ་ལ་སོགས་དང་གཞན་པ་ཡི། །ཡོན་ཏན་མེས་བསྲེགས་ལེག་ལས་བྱུང༌། །ཁ་ཟས་དང་ནི་བཏུང་བ་དང༌། །སྣ་སྨན་དང་ནི་འཇམ་རྩི་དང༌། །སྨན་ཆུ་བླུགས་དང་བསྐུ་བ་དང༌། །དུགས་ཡང་ཡོངས་སུ་མཉེ་བ་དང༌། །དཀྲི་བའི་ཚུལ་ནི་སྣ་ཚོགས་སམ། །ཡང་དག་གཏར་གིའི་ལས་རྣམས་ཀྱིས། །ནད་གཅོད་བདེ་བར་མི་སྣང་ཞིང༌། །ནད་ནི་ཤིན་ཏུ་འཕེལ་གྱུར་ན། །བདག་པོ་ལ་ནི་དྲིས་ནས་ཀྱང༌། །མེ་ཡི་ལས་ནི་བརྩམ་པར་བྱ། །མེ་ཡི་ལས་བྱས་འོག་ཏུ་ནི། །གང་དག་བྱ་བ་དེ་བཤད་བྱ། །ཚིག་དྲགས་གྱུར་ལ་ཡང་དང་ཡང༌། །མར་གྱིས་ལེགས་པར་བསྐུ་བར་བྱ། །ཏིལ་དང་འོ་མའི་ལྡེ་གུ་འམ། །མར་གསར་གྱིས་ཀྱང་བསྐུ་བར་བྱ། །གཞན་ཡང་གང་དག་བསིལ་གྱུར་པ། །འདབ་མ་ཉེས་པར་སྦྱར་བར་བྱ། །མ་ཚིག་རྨ་ནི་རེད་འགྱུར་ལ། །སྣུམ་ནི་དྲོན་པོ་གཏང་བར་བྱ། །དེ་བཞིན་སྨན་ཆུ་དྲོ་བ་དང༌། །བསྐུ་བ་དག་ཀྱང་དྲོན་པོ་བྱ། །དུས་ཀྱིས་ལས་དང་དེ་བཞིན་དུ། །དྲིལ་ཕྱིས་དག་ཀྱང་བྱ་བ་ཡིན། །དེ་ཡིས་ནད་ཞིར་མ་གྱུར་ན། །སླར་ཡང་དེ་ལ་བསྲེག་པར་བྱ། །བསྲེགས་ནས་ཡང་དང་ཡང་དུ་ནི། །དེ་ལ་མར་ནི་བླུགས་པར་བྱ། །དེ་ནས་ཉིན་ཞག་གསུམ་ན་ནི། །བརྟགས་ལ་འདྲུལ་བར་གྱུར་ན་ནི། །ཆུ་ནི་དྲོ་འཇམ་དག་གིས་ནི། །བླུགས་ཤིང་ལེགས་པར་བཀྲུ་བར་བྱ། །མར་དང་སྦྱར་བའི་ཏིལ་གྱི་ནི། །ལྡེ་གུ་ཡིས་ཀྱང་བསྐུ་བར་བྱ། །མེ་ཡིས་གདུངས་པར་གྱུར་པ་ལ། །རྒྱམ་ཚ་དང་སྦྱར་ལྡེ་གུ་བསྐུ། །དེ་ཡི་འོག་ཏུ་མར་དང་ནི། །སྤག་རྣམས་སྦྱར་བ་བསྐུ་བར་བྱ། །དེ་ལྟར་བསིལ་བཅོས་ཀྱིས་བཅོས་ན། །མེ་ཡིས་ནད་ནི་སེལ་བར་འགྱུར། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་མེ་བཙའི་ལས་ཀྱི་ཆོ་གའི་ལེའུའོ།། །།ག་ག་ནེ་ཤ་དའི་རྒྱལ་པོ། །མཛའ་བོ་བཟང་དང་ཀ་རི་ཏས། །མས་གཏོང་སྤུ་གུའི་ཆོ་ག་རྣམས། །ཤ་ལི་ཧོ་ཏྲ་ལ་དྲིས་པ། །མས་གཏོང་སྦུ་གུ་སྨན་དང་ནི། །བདའ་བ་ཡི་ནི་ཚོད་དག་དང༌། །སྨད་དུ་ཞུགས་པའི་ནད་རྣམས་ནི། །གསོ་
བ་དང་བཅས་རྒྱས་པ་དག །རྟ་ལ་ཅི་ལྟར་བགྱི་བ་ནི། །ལེགས་ལྡན་ཁྱེད་ལས་ཤེས་པར་འཚལ། །དེ་རྣམས་དེ་སྐད་སྨྲས་པ་དང༌། །ཤ་ལི་ཧོ་ཏྲས་སླར་སྨྲས་པ། །རྟ་ནི་སྣུམ་ཞིང་སྒོ་ལྔ་ནས། །ཡོངས་སུ་རྟས་པར་བྱེད་པ་ཡིན། །མར་དང་ཏིལ་མར་ཞག་དང་རྐང། །ཁ་དང་སྣ་དང་མཚན་མཇུག་མ། །པགས་པ་ལས་ནི་ཞུགས་པ་ཡིས། །ཐབས་ནི་བདེ་བས་དེ་རྟས་བྱེད། །སྟོབས་བསྐྱེད་རོ་ཙ་འཚོ་བྱེད་རྣམས། །སྦྱར་བའམ་ཡང་ན་མ་སྦྱར་བའམ། །སྦྱོར་བ་ལེགས་པར་གཏང་བའི་སྣུམ། །རྟ་ནི་འཚོ་བར་བྱེད་པ་ཡིན། །བཟའ་དང་རྗེས་སུ་བཏུང་བ་དང༌། །ཁ་བཀང་ཁ་ཡི་སྣུམ་ཡིན་ནོ། །དེ་བས་འཇམ་རྩིར་བཏང་གྱུར་པའི། །སྣུམ་གྱིས་ཁོང་སྣུམ་སྟོབས་སྐྱེད་ཅིང༌། །རྟས་བྱེད་མགྱོགས་དང་རོ་ཙ་དང༌། །དེ་བཞིན་མདོག་ནི་བཟང་བར་བྱེད། །འཇམ་རྩི་རྟ་ཡི་གསོ་བྱེད་ཀྱི། །མཆོག་ཡིན་པར་ཡང་བཤད་པ་ཡིན། །འཇམ་རྩི་སྤུ་གུའི་ཚད་དང་རྫས། །ངས་བཤད་པ་ལས་མཉན་པར་གྱིས། །ལྕགས་དང་ཤིང་དང་རི་དགས་དང༌། །བྱ་རྣམས་ཀྱི་ནི་ཆུ་སྦུབས་དང༌། །ཤ་མི་སེང་ལྡེང་ཤྲི་མི་ཤ །ཤིང་ཤ་པ་དང་ཏིན་ཏུ་ཀི། །ད་བ་འོ་མ་ཅན་ཙནྡན། །ཤིང་ནི་འདི་བརྒྱད་བསྔགས་པ་ཡིན། །ངང་པ་བྱ་རྒོད་ཀུ་དྲ་བ། །རྨ་བྱ་ས་རི་བླ་བ་དང༌། །དུད་པ་བ་ལ་མདའ་གུ་སྟེ། །བྱ་ཡི་མཆོག་ནི་དེ་བརྒྱད་ཡིན། །བོང་བུ་མ་ཧེ་རྔ་མོ་དང༌། །དེ་བཞིན་གླང་དང་བ་མེད་དང༌། །གཡག་དང་རུ་རུ་གླང་པོ་ཆེ། །ལྒང་པ་མཆོག་ཏུ་འདོད་པ་ཡིན། །གསེར་དང་དེ་བཞིན་དངུལ་དང་ནི། །ཁར་བར་གན་ཞ་ཉེ་དང༌། །རོ་ཉེ་ཟངས་དང་ལྕགས་རྣམས་ནི། །ལྕགས་ཀྱི་རིགས་ནི་བརྒྱད་དུ་བཤད། །བ་དང་ར་ལུག་མ་ཧེ་ཡི། །ལྒང་པ་སྤུ་གུ་དང་ཉེར་བཤད། །ཤིང་རྣམས་ལས་ནི་ཙནྡན་མཆོག །ཕྱུགས་ཀྱི་ནང་ན་གླང་པོ་མཆོག །པ་རི་བླ་བ་བྱ་ཡི་མཆོག །ལྕགས་རྣམས་མཆོག་ནི་གསེར་ཡིན་ནོ། །ཚན་ལྡན་གྲང་ལྡན་ཚེ་ལ་ཕན། །བཀྲ་ཤིས་བསིལ་སྨན་རྣམས་ཀྱི་མཆོག །པ་རི་བླ་བའི་མཛེར་པ་དང༌། །བསིལ་བ་མཆོག་ཏུ་བཤད་པ་ཡིན། །གསོ་བ་ལ་བཅས་སྤུ་གུ་ནི། །ལྕི་ཞིང་འཇམ་ལ་སྲ་བ་ཡིན། །དེ་ནི་རྟ་ཡི་
ནད་སེལ་ཡིན། །ཕན་པ་དམ་པ་ཡིན་པར་བཤད། །གསེར་ལས་བྱས་པའི་སྦུ་གུ་ནི། །འཇམ་ཞིང་མྱུར་དུ་ཆུད་པ་དང༌། །མྱུར་དུ་འབྱིན་པར་བྱེད་པ་དང༌། །ལྕི་བས་རྟ་ལ་ཕན་ཞིང་བཟང༌། །དེ་ནི་གས་མེད་འགྱུར་བ་མེད། །ཟླུམ་ཞིང་ཤིན་ཏུ་བདེ་བར་བྱ། །དེ་དག་རྙེད་པར་མ་གྱུར་ན། །འོད་མ་ལྕང་མ་དག་ལས་བྱ། །འཇམ་ཞིང་འབུ་ཡིས་མ་ཟོས་ལ། །གཞུག་པ་ལ་གནོད་མི་སྐྱེད་བྱ། །འོད་མའི་ནང་ནས་ནག་པོ་ནི། །སྦུ་གུའི་རྒྱུ་ནི་བཟང་བར་བཤད། །ཤ་མི་ཤིན་ཏུ་གཞོན་མིན་པ། །བདེ་བར་འགྲོ་བར་བྱེད་པ་ཡིན། །ས་རང་ག་ཡི་ལྒང་པ་ནི། །ལྒང་པ་རྣམས་ཀྱི་དམ་པ་ཡིན། །སྦུ་གུ་སོར་ནི་བཅུ་གཉིས་པ། །འཇམ་ཞིང་གག་པ་དང་བཅས་པ། །ཞེང་དུ་སོར་དྲུག་གིས་འཁྱུད་པ། །རྩེ་མོ་རིམ་གྱིས་ཕྲ་བ་བྱ། །རྩེ་མོ་སྣ་མའི་མེ་ཏོག་ནི། །ཁ་འབུས་འདྲ་ཞིང་བུ་ག་ཆུང༌། །མཐེའུ་ཆུང་གི་རྩེ་མོའི་ཚད། །འདི་ཡི་ཚད་ནི་ཡིན་པར་བཤད། །སྨན་པ་ལས་རྣམས་གྲུབ་འདོད་པས། །དེ་ལྟ་བུ་ཡི་སྦུ་གུ་ཡིས། །ཆོ་ག་བཞིན་དུ་ཟོས་འཐུངས་ལ། །འཇམ་རྩིའི་ལས་ནི་སྦྱར་བར་བྱ། །ལག་པ་གཡོན་པའི་མཛུབ་མོ་ཡིས། །བཀག་པ་ཡིས་ནི་བཅུག་ནས་ཀྱང༌། །ཆུད་ནས་རྩེ་མོ་བཀག་པ་ཡིས། །རྩེ་མོ་ཡོངས་སུ་གཏང་བར་བྱ། །དེ་ནས་ལག་པ་གཡས་པས་ནི། །ལྒང་པ་བརྩེར་བས་སྣུམ་པར་བྱ། །ཁ་ནས་སྣུམ་དང་ཚད་གང་ཡིན། །མས་གཏོང་བ་ལ་གཉིས་འགྱུར་བྱ། །སྲང་ནི་དྲུག་ཅུ་རྩ་བཞིའམ། །བཅུ་བཞི་བརྒྱད་དང་སུམ་ཅུ་གཉིས། །བཅུ་དྲུག་དང་ནི་དེ་ཡི་ཕྱེད། །དེ་ལྟར་རིམ་པར་གཞག་པ་ནི། །མཆོག་དང་བར་མ་ཐ་མ་ལ། །མས་གཏོང་བར་ནི་ཡིན་པར་བཤད། །འཇམ་རྩི་སྤུ་གུར་སྤུད་པ་ནི། །ཚད་དེ་རྣམ་པ་བཞི་ཡིན་ཏེ། །སོར་བཞི་སོར་གསུམ་སོར་གཉིས་དང༌། །སོར་གཅིག་པ་ནི་ཡིན་ཤེས་བྱ། །ཟླ་དྲུག་ལོན་པའི་རྟེའུ་ལ། །སོར་གཅིག་ནང་དུ་གཏང་བར་བྱ། །སྣུམ་ནི་སྲང་བཞི་ཡིན་པར་བཤད། །སྣུམ་ཚད་དེ་ནི་གོ་ལོག་བྱ། །ལོ་གཅིག་ལོན་ལ་སོར་གཉིས་ཏེ། །འཇམ་རྩིར་སྣུམ་ནི་སྲང་བརྒྱད་གཏང༌། །
ལོ་གཉིས་ལོན་ལ་སྦུ་གུའི་རྩེར། །སོར་གསུམ་ནང་དུ་གཏོང་བར་བྱ། །དེ་ཡི་འཇམ་རྩིར་གཏོང་བའི་སྣུམ། །སྲང་ནི་བཅུ་དྲུག་གཏང་བར་བྱ། །ལོ་ལྔ་ཡན་ཆད་སྣུམ་ཚོད་ནི། །གོང་དུ་ཅི་སྐད་བསྟན་པ་བྱ། །སྦུ་གུ་ནང་དུ་གཞུག་པའི་ཚེ། །ཐམས་ཅད་ལ་ཡང་སོར་བཞི་ཡིན། །རྩ་བ་ལྔ་ལ་ཉི་རྒྱ་ཚ། །ཡུངས་ཀར་བཅས་པ་བསྐོལ་བའམ། །མེ་དང་ལན་ཚྭ་དང་བཅས་པ། །དབྱར་གྱི་ཚེ་ན་མས་གཏོང་བྱ། །པི་པི་ལིང་དང་བཅའ་ལྒ་དང༌། །འབྲུ་སྐྱུར་དང་ནི་ཡུངས་ཀར་དག །ལན་ཚྭ་བྲོ་ཞིང་སྣུམ་དང་བཅོས། །དགུན་གྱི་དུས་ཀྱི་མས་གཏོང་ཡིན། །ཏིལ་ནག་དང་ནི་ཤིང་ནག་དང༌། །ཐང་ཤིང་དང་ནི་ས་ར་ལ། །ཀ་ར་བཱི་ར་ཨུཏྤ་ལ། །ཤུག་པ་ཙནྡན་པུ་ཤེལ་ཙེ། །ཤ་ར་བ་ཡི་ལྡེ་གུར་བཅས། །འོ་མ་དང་སྦྱར་སོ་གར་བསྔགས། །ནད་དང་བཅས་པའི་རྟ་རྣམས་ནི། །ཅི་སྐད་བཤད་པའི་བརྡ་ལ་བྱ། །མགོ་ནི་ཐུར་དུ་གཡངས་གྱུར་ན། །ལྒང་པ་མེད་པ་བཙིར་དྲགས་ན། །ཞུ་བའི་གནས་ལ་འདས་པ་ནི། །སྣུམ་ནི་གྱེན་དུ་འགྲོ་བར་འགྱུར། །དེ་ལས་འདི་ནི་རྨིག་བག་དང༌། །སེམས་མྱོས་ཁོང་ཚ་སྐྱེ་བར་འགྱུར། །སྣུམ་ནི་ཟློག་པར་མི་བྱེད་པའམ། །ཡང་ན་དུས་རིང་ཞིག་ན་འབྱུང༌། །དེས་ན་མགོ་བོ་རྒྱབ་ནས་ནི། །ལག་པས་ཅུང་ཟད་བརྡེག་པར་བྱ། །བསྐུ་ཞིང་མཉེ་བར་བྱས་ནས་ནི། །འཇམ་པོར་གྱུར་ནས་གཏོང་བར་བྱ། །དུབ་པར་གྱུར་པའམ་སྐོམ་གྱིས་གདུངས། །ལྟོགས་དང་ཤིན་ཏུ་ཉམ་ཆུང་བའི། །མས་གཏོད་བྱར་མི་རུང་བ་ཡིན། །གལ་ཏེ་རྨོངས་པས་བཏང་གྱུར་ན། །དེ་ཡི་བདེ་བ་སྒྲུབ་འདོད་ཀྱང༌། །སྡུག་བསྔལ་ཉིད་ནི་སྐྱེད་པར་བྱེད། །འཇམ་རྩི་དབྱར་ནི་མི་གཏོང་ལ། །གལ་ཏེ་བློ་ཆུང་བས་གཏོང་ན། །སྣུམ་ནི་མྱུར་དུ་ལྡོག་འགྱུར་ཞིང༌། །དེ་ཡིས་ཕན་པ་བྱེད་མི་འགྱུར། །དེ་ལྟར་ཉེས་པར་གྱུར་པ་ལ། །གཅིན་རྟུག་བསིལ་བའི་སྦྱོར་བ་བྱ། །དེ་རྗེས་འཇམ་རྩི་ལེགས་བཏང་ལ། །དེ་ཡི་དོན་ནི་སྒྲུབ་པར་བྱེད། །དུབ་ལ་སོགས་པར་མས་གཏོང་བྱས། །སྨར་ནི་བྱུང་རུང་མ་བྱུང་རུང༌། །དེ་ཡིས་ཕན་པ་མི་བྱེད་དེ། །ནད་ནི་སྐྱེད་པར་བྱེད་
པ་ཡིན། །སྨྱོ་དང་ལུད་པ་དབུགས་མི་བདེ། །ལྐོག་ནད་དང་ནི་གཉའ་རེངས་དང༌། །འཁྲུ་བ་དང་ནི་རླུང་འཁྱིལ་དང༌། །དེ་བཞིན་སྙིང་ནད་བཞི་པོ་དང༌། །མཇུག་དོ་རྒྱབ་རེངས་ལྟོ་སྦོས་པའི། །ནད་རྣམས་དེ་ལས་འབྱུང་བར་འགྱུར། །མས་གཏོང་ལས་གྱུར་ནད་འདི་རྣམས། །སོ་སོར་འབྱུང་བར་གྱུར་པ་ལ། །གསོ་བ་ལ་ནི་ཇི་སྐད་བསྟན། །ཆོ་ག་བྱས་པས་བསལ་བར་བྱ། །ལེགས་པར་འདུག་པར་འགྱུར་བ་ལ། །རྔ་མ་གཡས་སུ་གཟུང་བྱ་ལ། །ལག་པ་གཡོན་པས་བཅུག་ནས་ནི། །གཡས་པ་ཡིས་ནི་འཚིར་བར་བྱ། །རེངས་ན་ཤིན་ཏུ་དལ་མིན་པར། །རྒྱུན་གྱིས་རྗེས་སུ་འབབ་པར་གཏང༌། །ལན་ཅིག་གཏང་བར་བྱ་བའམ། །ཡང་ན་དུས་ནི་གཉིས་སུ་གཏང༌། །དུས་གསུམ་དུ་ནི་མི་གཏོང་ཞིང༌། །བག་མེད་པར་ནི་མི་བཙིར་རོ། །རྒྱབ་ནི་བསྐུ་སྟེ་བཏང་གྱུར་ན། །དེ་ལས་སྣུམ་ནི་སྙོམས་པར་འགྲོ། །བདེ་བས་ནད་རྣམས་གསོས་ནས་ནི། །སླར་ཡང་བཟློག་པར་འགྱུར་བ་ཡིན། །རླུང་ནི་མང་དུ་འབྱིན་བྱེད་ཅིང༌། །ནད་ནི་སླར་ཡང་འཇུག་པར་བྱེད། །འཇམ་རྩི་བཏང་བར་གྱུར་པ་ལ། །རྒྱབ་མཉེ་སེན་མོས་འཕྲུག་པར་བྱ། །ཏིལ་མར་འཇམ་རྩི་བཏང་གྱུར་ན། །ས་ཞག་གིས་ནི་བསྐུ་བར་འདོད། །ཏིལ་མར་དྲོ་ཞིང་ཚ་བས་ན། །རྟ་ཡི་མཁྲིས་པ་སྐྱེད་པར་བྱེད། །དེ་བས་རྐེད་པའི་ལོགས་གཉིས་སུ། །ས་ཞག་གིས་ནི་བསྐུ་བ་བསྔགས། །འཇམ་རྩི་གཏོང་བར་བྱེད་པ་ན། །གལ་ཏེ་རླུང་ནི་ཞུགས་གྱུར་ན། །འཇམ་རྩི་དང་ནི་འདྲེས་པ་ཡི། །ནད་ནི་དེ་རུ་གནས་པར་འགྱུར། །དེ་བས་ཤིན་ཏུ་མི་ལྷོད་ཅིང༌། །དྲག་ཏུ་བཙིར་བར་མི་བྱའོ། །འཇམ་རྩི་ཕྱེད་ཙམ་བཏང་བ་ན། །གལ་ཏེ་རྟ་ནི་དབུགས་སྟོང་ན། །སྦུ་གུ་མྱུར་དུ་དབྱུང་བྱ་ཞིང༌། །རླུང་དགག་པར་ནི་མི་བྱའོ། །རླུང་དེ་བཏང་བར་གྱུར་པ་ན། །རྟ་ནི་མཉམ་དུ་ལེགས་གཞག་ལ། །དེ་ནས་སྣུམ་གྱི་ལྷག་མ་ཡིས། །འཇམ་རྩི་གཉིས་པ་གཏང་བར་བྱ། །གང་ཕྱིར་རྗེས་མཐུན་བཏང་པས་ནི། །དེ་ཕྱིར་འཇམ་རྩི་ཡིན་པར་བཤད། །འཇམ་རྩི་ཟུང་དུ་མ་གྱུར་པས། །བཏང་ན་ཚེ་དང་སྟོབས་འཕེལ་བྱེད། །མཁྲིས་པ་ཅན་ལ་ལན་གསུམ་གཏང༌། །བད་ཀན་ཅན་ལ་
ལྔའམ་བདུན། །དེ་བཞིན་རླུང་ནད་ཅན་ལ་ནི། །དགུའམ་ཡང་ན་བཅུ་གཅིག་གཏང༌། །ནད་བུ་ཅན་ལ་ཅི་སྲིད་དུ། །ནད་ནི་ཞི་གྱུར་པར་དུ་གཏང༌། །ནད་ནི་མ་གཡོས་སྐྱེད་བྱེད་ཅིང༌། །བསྐྱོད་པ་རྣམས་ནི་འབྱིན་པར་བྱེད། །ནད་མེད་གྱུར་པ་རྣམས་ལ་ཡང༌། །ཟླ་བ་ཕྱེད་ཅིང་རྟག་ཏུ་གཏང༌། །ནད་མེད་པ་ལ་བཏང་གྱུར་ན། །སྟོབས་དང་མདོག་ནི་མཆོག་ཏུ་སྐྱེད། །ཟླ་ཕྱེད་ཚིགས་སུ་ལྷག་པར་ཡང༌། །འཇམ་རྩི་བཏང་བར་གྱུར་ན་ནི། །དེ་ཡི་ཡིད་ནི་བདེ་འགྱུར་ཞིང༌། །སྟོབས་སོགས་ཡོན་ཏན་འཕེལ་བར་འགྱུར། །དེ་ནི་ལེགས་པར་འཇུག་བྱའི་ཕྱིར། །རྗེས་སུ་བཏང་བ་བླུད་པར་བྱ། །དེ་ཡིས་ཕོ་བའི་དྲོད་སྐྱེད་ཅིང༌། །རླུང་ནི་བདེ་བར་རྒྱུ་བར་བྱེད། །འཇམ་རྩི་བཏང་བར་གྱུར་པ་ན། །སྨན་ཆུ་བླུད་པ་མཆོག་ཏུ་བསྔགས། །དེ་ནས་འཇམ་རྩི་གོང་མ་ཡི། །ཆོ་ག་ཡང་དག་བཤད་པར་བྱ། །སྔར་བཤད་པ་ཡི་རྫས་ལས་ནི། །སྦུ་གུ་འཇམ་ཞིང་ཕྲ་བ་བྱ། །བདག་མིད་མེད་ཅིང་ཁ་སྒོ་ཕྲ། །དཔངས་སུ་སོར་ནི་བཅུ་དྲུག་པ། །རྩ་བ་འཁོར་ལོ་གཉིས་དང་བཅས། །འཇམ་ཞིང་བཅིངས་པར་བདེ་བར་བྱ། །འདི་ནི་ཚད་ཆེན་སྲང་བརྒྱད་དེ། །གཞན་དག་ལ་ནི་དེ་ཡི་ཕྱེད། །མཚན་ནི་སྦུབས་ནས་ཕྱུང་ནས་ཀྱང༌། །བུ་གུ་དེ་རུ་གཞག་པར་བྱ། །དེ་ནས་རྟ་ནི་ལེགས་གཞག་ལ། །དེ་ནས་སྔར་བཤད་ཚུལ་དུ་ནི། །ལྒང་པ་ལེགས་པར་བཙིར་བར་བྱ། །དེ་འདྲའི་མས་གཏོང་གོང་མ་ནི། །གཅིན་ནད་ཅན་ལ་གཏང་བར་བྱ། །ཆོ་ག་འདི་འདྲས་རྟ་ལ་ནི། །གཅིན་ནད་སླར་ཡང་འབྱུང་མི་འགྱུར། །ལྷག་མ་ལུས་སམ་ཕྱིའི་འོག་འགྱུར། །མས་གཏོང་བས་ནི་གནོད་སྐྱེད་དེ། །དེ་བས་རྟ་ནི་ལེགས་གཞག་ལ། །དང་པོར་ལེགས་པར་གཟེགས་པར་བྱ། །སྨན་པ་བློ་དང་ལྡན་པ་ཡིས། །ན་ཚོད་སྟོབས་དང་དུས་ཚིགས་དང༌། །རང་བཞིན་གོམས་པ་ཀུན་བརྟགས་ལ། །སྣུམ་བཏང་ཅི་རིགས་དུགས་བྱའོ། །བ་ཡི་མར་རམ་ཡང་ན་ནི། །ཏིལ་མར་ཤིན་ཏུ་དང་བ་བསྐོལ། །རྟ་ཡི་གསོ་བ་ཐམས་ཅད་ལ། །བ་ཡི་མར་ནི་མཆོག་ཡིན་ནོ། །སྟོན་སྐྱེས་ཏིལ་ནི་ནག་པོ་ལ། །ལག་པས་བཅིར་བའི་ཏིལ་མར་ཡང༌།།
འཇམ་རྩི་དང་ནི་བསྐུ་བ་ལ། །རྟ་ལ་ཕན་པར་འགྱུར་བ་བསྔགས། །འཇམ་རྩི་གཏོང་བའི་དུས་སུ་ནི། །ཁ་ནས་གཏང་བར་མི་བྱའོ། །རྟ་ནི་སྐྱོན་མེད་ཤེས་བྱས་ལ། །ལྟོ་བ་རན་འགྲངས་ལེགས་གནས་ལ། །ཚད་ནི་ལེགས་པར་བརྟགས་ནས་ནི། །མར་གྱི་འཇམ་རྩི་གཏང་བར་བྱ། །ཕྱི་དེ་ཉིན་ནི་ལྟོ་སྟོར་ལ། །རྟ་ཡི་ཟས་ནི་ངན་པར་སྦྱིན། །འགྲངས་ཟིན་པ་ལ་བརྟག་མི་བྱ། །ལྟོགས་ལ་འཇམ་རྩི་མི་གཏོང་ངོ༌། །གལ་ཏེ་རྨོངས་པས་བཏང་གྱུར་ན། །མས་གཏོང་དེ་ལས་གནོད་འབྱུང་སྟེ། །དེ་ནི་རྣོ་བས་མ་ཕྱིན་པར། །ཟས་ནི་འབྱིན་པར་བྱེད་པ་ཡིན། །འཁྲུ་བ་སྐྱེད་པར་འགྱུར་བ་དང༌། །དེ་བཞིན་མི་བཟད་སྦོ་བར་འགྱུར། །གང་ཚེ་ལྟོ་སྟོང་གྱུར་པས་ལ། །འཇམ་རྩི་བཏང་བར་གྱུར་ན་ནི། །དེ་ཡི་ཁོང་པ་སྟོང་བས་ན། །རྟ་སྤངས་དང་ནི་མ་འདྲེས་པར། །སླར་ཡང་དོན་མེད་འབྱུང་འགྱུར་ཞིང༌། །ནད་ཀྱང་སྐྱེད་པར་བྱེད་པ་ཡིན། །དེ་བས་རྟ་སྤངས་བཏང་གྱུར་ཅིང༌། །ལྟོ་ནི་ཟས་དང་བཅས་པ་ལ། །ཚ་དང་ཁ་དང་དྲོ་བ་ཡིས། །འཇམ་རྩི་ཚད་ཙམ་གཏང་བར་བྱ། །འཇམ་རྩི་རྐུབ་ལས་བཏང་གྱུར་ཀྱང༌། །ཆོ་ག་ལེགས་ན་རིམ་གྱིས་ནི། །ལུས་ཀྱི་སྟེང་འོག་ཐད་ཀ་རུ། །རྣམ་པར་ཁྱབ་པར་བྱེད་པ་ཡིན། །མདོག་དང་ཁ་དོག་སྐྱེད་བྱེད་ཅིང༌། །ནད་ཀྱང་སེལ་བར་བྱེད་པ་ཡིན། །དབང་པོ་གསལ་ཞིང་དགའ་བ་དང༌། །ལུས་ཟུངས་རྣམས་ཀྱང་འཕེལ་བྱེད་ཡིན། །མེ་དྲོད་སྐྱེ་ཞིང་བརྟན་པ་དང༌། །གཅིན་རྟུག་བདེ་བར་འབྱུང་བ་ཡིན། །མངལ་ནི་ལེགས་པར་བྱེད་པ་དང༌། །ལུས་ཀྱང་བརྟན་པར་བྱེད་པ་ཡིན། །འདི་ནི་འཇམ་རྩི་བཏང་གྱུར་པ། །ལེགས་པར་གྱུར་པའི་མཚན་ཉིད་ཡིན། །འཇམ་རྩི་བཏང་དྲགས་མ་ལེགས་པས། །འཕྱིན་དང་རྟུག་པ་འགགས་འགྱུར་ཞིང༌། །དེ་བཞིན་གཅིན་ནད་འབྱུང་བ་དང༌། །རླུང་འཁྱིལ་ལྟོ་ནི་སྦོ་བ་དང༌། །ཚོན་གྱི་ནད་རྣམས་འབྱུང་འགྱུར་ལ། །སྣུམ་རགས་གྱུར་པའི་རྒྱུ་ལས་ནི། །དེ་བཞིན་མེ་དྲོད་མི་མཉམ་དང༌། །ངལ་སྐྱེན་རྨོངས་བག་རྣམས་ཀྱང་འབྱུང༌། །དེ་བས་འཇམ་རྩིའི་ལས་རྣམས་ནི། །ཤིན་ཏུ་ལེགས་པར་བྱ་བ་ཡིན། །དེ་བས་དྲགས་པར་མ་གྱུར་པའི། །སྣུམ་གྱི་འཇམ་རྩི་
གཏང་བར་བྱ། །འཇམ་རྩི་བཏང་བར་གྱུར་པའི་རྟ། །བཀོལ་བ་ལ་སོགས་སྤང་བར་བྱ། །འཇམ་རྩི་གཏོང་བའི་དུས་སུ་ནི། །སྨན་པས་མ་གཡེངས་ཉིད་དུ་བརྟག །འཇམ་རྩི་བཏང་བའི་རྗེས་ལ་ནི། །ཕོ་བའི་མེ་དྲོད་སྐྱེད་པའི་ཕྱིར། །ལན་ཚྭ་བཅའ་སྒ་ཤིང་ཀུན་དང༌། །ན་ལེ་ཤམ་སྦྱར་ཆང་བླུད་བྱ། །རྗེས་སུ་བཏུང་བ་འདི་ཉིད་ནི། །ནང་པར་ཟ་མ་ཟོས་ཚེ་བྱིན། །དུས་ནི་ཅི་སྲིད་བྱིན་གྱུར་པ། །དེ་སྲིད་པར་དུ་ཁོང་རྩུབ་བྱ། །ཁོང་རྩུབ་གྱུར་པར་ཤེས་ནས་ནི། །དེ་ལ་བཅོས་པའི་ཐབས་ཀྱང་བྱ། །དེ་ཡི་ཉིན་ཞག་གཉིས་པ་ལ། །སྔ་དྲོ་ཁ་ཟས་བྱིན་པ་ཕན། །ཕྱི་དྲོ་ཁྲུས་བྱས་རྗེས་ལ་ནི། །ཤ་ཁུ་དང་སྦྱར་ཁ་ཟས་ནི། །སྣུམ་དང་ལན་ཚྭ་བྲོ་བ་སྦྱིན། །དེ་སྟོབས་ཚེ་ནི་འཕེལ་བར་འགྱུར། །དེ་ནས་ཟས་སྐོམ་འོ་མར་བཅས། །སྦྱིན་ཞིང་ཆང་བླུད་པས་བརྡ་བྱ། །རྟ་ནི་པགས་པར་བརྟས་གྱུར་ནས། །ལས་རྣམས་ཀུན་ལ་ལེགས་པར་སྦྱར། །ཚེར་མ་ཆེན་པོ་ལས་སྐྱེས་དང༌། །ལྕུག་མ་ལས་སྐྱེས་རྩ་བ་སྐྱེས། །ལྔ་པ་རྩ་ལས་བྱུང་བ་སྟེ། །རྩ་བ་ལྔ་པ་རྣམ་ལྔ་ཡིན། །ལྔ་པའི་འོག་མ་དྲུག་པ་དང༌། །དེ་བཞིན་བདུན་པ་འཁྲུ་སྤྱོད་བྱེད། །བིལ་བ་ཨགྣི་མན་ཐ་དང༌། །སོ་ན་ཀ་དང་ཀ་མ་རི། །ས་ཧ་མ་སྟེ་འདི་དག་ནི། །རྩ་བ་ལྔ་པ་ཆེན་པོར་བཤད། །བྲྀ་ཧ་ཏི་གཉིས་ཨ་རན་དང༌། །ཨདྴུ་མ་ཏི་བ་སུ་ག །རྩ་བ་ལྔ་པ་ཆུང་དུ་རུ། །གཉིས་པ་འདི་ནི་ཤེས་པར་བྱ། །བྲྀཀྵ་དང་ནི་སྲེ་ཏྲེས་དང༌། །མི་ད་རི་དང་ཤ་རི་བ། །ཨ་ཛ་ཤྲྀདྒ་ལྕུག་མ་ལས། །སྐྱེས་པ་ལྕུག་མ་ཡིན་ཞེས་བྱ། །བྱ་བྲ་ན་ག་ཤྲེ་ཡ་དང༌། །ཀ་ར་མ་ཏི་ཏྲི་ཀ་ན་ར། །འདི་ནི་རྩ་བ་ལས་བྱུང་བའི། །རྩ་བ་ལྔ་བར་བཞི་པར་བཤད། །ཀུ་ཤ་འཇག་མ་འདམ་བུ་དང༌། །ཀུན་ཛ་མཱུ་ལ་དང་བ་ནི། །འདི་ནི་རྩ་ལས་བྱུང་བ་ཡི། །རྩ་བ་ལྔ་པ་ལྔ་པ་ཡིན། །ཀོ་ཤ་ཕ་ལ་བ་རུ་ན། །ཤི་ཀྲུ་བི་ར་རྟ་རུ་དང༌། །རྟ་རུ་ཞེས་བྱ་ལྔ་པ་ནི། །ལྔ་པའི་ཕྱི་མ་དྲུག་པ་ཡིན། །སྲི་བརྟག་པར་ནི་བ་ལ་གཉིས། །དེ་བཞིན་པུ་ན་རྣ་བ་གཉིས། །འདི་ནི་གཅོད་བྱེད་ལྔ་པ་སྟེ། །བདུན་པ་ཡིན་པར་རབ་ཏུ་བཤད། །དུར་བྱིད་ཙནྡན་ཅི་ཏྲ་ཀ །ས་ར་དེ་བཞིན་ཤིང་མངར་དང༌། །ཀུ་ཤ་ན་ས་ཤ་མ་དང༌། །བེ་ཛ་
ཡན་ཏི་ཏྲ་བན་ཏི། །དོང་ཀ་ནིམ་པོའུ་ཏི་ཀ །དེ་བཞིན་ག་པུར་སླེ་ཏྲེས་དང༌། །དེ་བཞིན་སཔྟ་པརྞི་དང༌། །མ་ཧཱ་ནིམ་པའི་འབྲས་བུ་དང༌། །ནས་དང་རྒྱ་ཤུག་ཀུ་ལང་དང༌། །འདི་ནི་འཇམ་རྩིའི་སྨན་སྡེ་ཚེན། །འདི་དག་ཐམས་ཅད་བསྡུས་ནས་ནི། །ཆུ་བྲེ་བཞི་ནང་མེ་ཆུང་ལ། །ལེགས་པར་བཙོས་པའི་སྲང་བརྒྱ་ནི། །རྟ་ནི་མཆོག་གྱུར་པ་ལ་གཏང༌། །བར་མ་རྣམས་དང་ཆུང་དུ་ལ། །བཞི་བཅས་ཕྲི་བ་གཏང་བར་བྱ། །སྨན་ཁུ་དེ་ནི་བླངས་ནས་ཀྱང༌། །བཞི་ཆ་ལུས་ཀྱི་བར་དུ་བསྐོ་ལ། །ཡུངས་ཀར་ཤར་པུཥྤ་དང༌། །པི་པི་ལིང་དང་བཅའ་ལྒ་དང། །ན་ལེ་ཤ་མ་དང་བྱི་དང་ག །ས་ར་ལ་དང་ཐང་ཤིང་དང༌། །སུ་ག་སྨེ་ལ་རུ་རྟ་ཧ་རེ་ཎུ། །བྱ་བྲ་ན་ཁ་ཤ་མ་དང༌། །ཧ་ཏི་པི་པི་ལིང་རྩ་བ། །དེ་བཞིན་ཡུངས་ཀར་སེར་པོ་དང༌། །པུ་ཙེ་ཤེལ་དང་པོ་ངང་དང༌། །དེ་བཞིན་དུ་ནི་ག་རུ་རྣམས། །ཆང་དང་ཏིལ་མར་གཅིན་དང་ནི། །དེ་བཞིན་ལན་ཚྭ་རྣམས་དང་ནི། །པོ་སོན་ཆ་དང་གཞན་ཡང་ནི། །འབྲས་བུ་གསུམ་ཡང་གཞུག་པར་བྱ། །དེ་ནི་གཅིག་ཏུ་བསགས་ནས་ཀྱང༌། །མཁས་པ་ཡིས་ནི་གནས་སྐབས་སུ། །རྟ་ནི་ལྟོགས་པར་གྱུར་པ་ལ། །ནི་རུ་ཧ་ནི་གཏང་བར་བྱ། །ལྒང་པ་ཚ་དང་ཁ་ར་པའི། །ཁུ་བ་ལ་ནི་སྤངས་ཏེ་གཏང༌། །རྟ་ཡི་ནད་དང་ཚེ་དང་ནི། །གོམས་དང་སྟོབས་དང་དུས་ཚོད་རྣམས། །ལེགས་པར་བརྟགས་ལ་བཞག་ནས་ཀྱང༌། །སྨན་གྱི་སྦྱོར་བ་ལེགས་པར་གཏང༌། །ལོ་གསུམ་ལོན་པ་ནི་རུ་ཧ། །སྲང་ལྔ་ཡོངས་སུ་གཏང་བར་བྱ། །རྟེའུ་དང་རྒན་དང་གཞོན་ནུ་ལ། །བཞི་ཆར་དབྱེ་བས་སྦྱང་བར་བྱ། །མཆོག་ལ་སྨན་ཁུ་བྲེ་དོ་སྟེ། །བར་མ་ལ་དེ་བཞི་ཆ་བྲི། །ཆུང་དུ་ལ་ནི་དེ་ཡི་ཕྱེད། །འདི་ནི་ཚད་ཀྱི་ངེས་པ་ཡིན། །དང་པོར་རེག་ན་བདེ་བ་དང༌། །དེ་བཞིན་རྣོ་བྲོ་ཚ་བྲོ་གཏང༌། །ནད་ཀྱི་ཚུལ་ནི་བརྟགས་ནས་ཀྱང༌། །གོང་ནས་གོང་དུ་བསྐྱེད་པར་བྱ། །དེ་ནས་ནད་ནི་མ་གདུངས་དང༌། །གནས་གསུམ་དག་ཀྱང་རྗེས་བརྟགས་ལ། །ནད་ཀྱི་ཚུལ་ལས་ཅི་རིགས་པར། །སྨན་གྱི་སྦྱོར་བ་བྱ་བ་ཡིན། །ནི་རུ་ཧ་ཡི་རྗེས་ཐོགས་ལ། །འོ་མའི་འཇམ་རྩི་བདེ་སྐྱིད་ཡིན། །ཁ་ར་སྦྲང་རྩི་མར་
དང་ནི། །ཤིང་མངར་དང་ནི་མ་དུ་ཀ །ཤུག་པ་བཙོད་དང་པུ་ཤེལ་ཙི། །ཙནྡན་པདྨ་གེ་སར་དང༌། །གཏང་བལ་དང་ནི་རྒུན་འབྲུ་དང༌། །ཤ་འགག་པ་དང་རིལ་རྣམས་དང༌། །འོ་མ་དྲང་དང་སྦྱར་བ་ཡི། །འོ་མའི་འཇམ་རྩི་བསིལ་མོ་གཏང༌། །འདི་ཡིས་ཁོང་པར་བདེ་འགྱུར་ཞིང༌། །ལུས་ཡང་ཡི་ག་འབྱེད་པ་དང༌། །གཅིན་རྟུག་འཕྱེན་ནི་འགགས་འགྱུར་བ། །ལེགས་པར་སེལ་བར་བྱེད་པ་ཡིན། །སེམས་གསལ་བ་དང་འགྲེས་གྱུར་པ། །ནི་རུ་ཧ་ལེགས་མཚན་ཉིད་ཡིན། །སེམས་བདེ་སྙིང་སྟོབས་ཆེ་བ་དང༌། །རྟ་ཡི་གཟི་མདངས་འཕེལ་བར་འགྱུར། །ལུས་ལ་གནས་པའི་རླུང་ལྔ་ཡང༌། །རྗེས་སུ་མཐུན་པར་རྒྱུ་བར་བྱེད། །རླུང་གི་ནད་ནི་འཁྱིལ་བ་དང༌། །དེ་བཞིན་རྟུག་སྐམ་ནད་རྣམས་དང༌། །གཞན་ཡང་དེ་འདྲ་བ་ཡི་ནད། །མས་གཏོང་དྲག་པོས་སེལ་བར་བྱེད། །པགས་ནད་སེལ་ཅིང་དབང་པོ་གསལ། །དེ་བཞིན་རིམ་གྱིས་སེལ་བྱེད་དེ། །ནམ་མཁའ་དངས་པའི་ཟླ་བ་ལྟར། །རྟ་དེ་སྐྱོན་མེད་པར་སྣང་ཡིན། །ནི་རུ་ཧ་ཉེས་མཚན་ཉིད་ནི། །ནད་ནི་བརྟན་པས་གནས་པ་དང༌། །ལུས་ལྕི་ཞུམ་པར་གྱུར་པ་དང༌། །འཕྱེན་དང་རྟ་སྤངས་འགགས་པ་དང། །ཚབས་ཆེ་རློན་པར་འགྱུར་པ་དང༌། །གཅིན་འགགས་སྦོས་པར་འགྱུར་བ་ཡིན། །ནི་རུ་ཧ་ནི་དྲགས་གྱུར་ན། །རྟ་ཡི་རྟུག་པ་ཟད་འགྱུར་ཞིང༌། །ཁོང་པ་གཟེར་གྱིས་ཁྱབ་པ་དང༌། །ལུས་ཀུན་ན་བར་བྱེད་པ་ཡིན། །དྲི་མ་ཤིན་ཏུ་བསལ་དྲགས་པས། །རླུང་ནི་རབ་ཏུ་འཁྲུགས་པར་བྱེད། །དེ་ལས་སྦེག་དང་མདོག་ངན་དང༌། །དབང་པོ་ཤིན་ཏུ་ཞུམ་འགྱུར་བའི། །རྨོངས་ཞིང་འཁྲུལ་པ་ཉིད་དང་ནི། །ལུས་རེངས་པར་ཡང་འགྱུར་པ་ཡིན། །དཀར་བའི་མཆུ་ནི་འབའ་ཞིག་པའི། །བདག་ནི་འཁྲུ་བར་འགྱུར་པ་ཡིན། །འདི་ཡི་ནད་བཞིར་འགྱུར་བ་ཡང། །ཡིད་བདེ་བར་ནི་མི་འགྱུར་རོ། །ཆུ་འཐུངས་པའམ་ཁྲུས་བྱས་པའི། །དེ་བཞིན་འགྲངས་པར་གྱུར་པ་དང༌། །རླུང་ནི་གྱེན་དུ་ཟློག་པ་དང༌། །ཤིན་ཏུ་འཁྲུ་བར་བྱེད་པ་དང༌། །རྟ་གང་འཇིགས་པས་ཉེན་པ་དང༌། །གཅོང་ཆེན་ནད་ཀྱིས་བཏབ་པ་དང༌། །ཁུར་གྱིས་ཤིན་
ཏུ་དུབ་པ་དང༌། །རྟེའུ་དང་དེ་བཞིན་གསེབ་དང་ནི། །ཁྱད་པར་དུ་ནི་སྦྲུམ་མ་དང༌། །དུགས་གིས་ཉེན་དང་ཆང་འཐུངས་དང༌། །དུབ་ཅིང་འཁྲུལ་བར་འགྱུར་པ་དང༌། །ལུད་པ་དབུགས་མི་བདེས་ཉེན་དང༌། །ཁྲག་དང་མཁྲིས་པས་ཉེན་པ་དང༌། །སྟོན་དང་སོས་ཀའི་ཚེ་ན་ནི། །མས་གཏོང་བས་ནི་གཏང་མི་བྱ། །འདི་ཡིས་ཕན་པ་མི་སྐྱེད་ཀྱི། །གནོད་པ་མི་བཟད་སྐྱེད་པར་བྱེད། །དེ་ནས་མས་གཏོང་བྱས་པ་ཡི། །རྟ་ནི་རླུང་མེད་གནས་སུ་གཞག །སྐེ་རེངས་ཀྱིས་ནི་བཏབ་གྱུར་ན། །རྗེས་སུ་གསོ་བ་འདི་བྱ་སྟེ། །ས་མང་གར་ཤུ་ཏི་དང༌། །རུས་རུ་རྒྱམ་ཚ་སྦྱར་བ་ཡིས། །བསྐུས་ནས་དེ་ཡི་རྗེས་ལ་ནི། །རྡོ་དང་གསེག་མས་དུགས་བྱའོ། །སྣ་སྨན་གྱི་ནི་ལས་རྣམས་དང༌། །མེ་བཙའ་ཡི་ནི་ལས་ཀྱང་བྱ། །འོ་མ་དང་ནི་ཤ་ཁུ་དང༌། །སྦྱར་བའི་ཟས་ནི་སྦྱིན་པར་བྱ། །གཞང་ཁ་ན་པར་གྱུར་བ་དག །དེ་ཡི་གསོ་བ་བཤད་པར་བྱ། །བསིལ་སྨན་གྱི་ནི་ལྡེ་གུ་དང༌། །འདམ་ལ་སོགས་པ་བསྐུ་བ་བྱ། །མཇུག་མ་མཚན་དང་མགོ་བོ་དང༌། །རྣ་བ་མཇུག་མ་ཚིགས་ཀུན་བསྐུ། །ཁ་ཟས་བུ་རམ་མར་དག་དང༌། །སྦྱར་བ་གྲང་མོ་བྱིན་ན་ཕན། །མར་དང་སྦྲང་རྩི་རྒུན་འབྲུ་དང༌། །ཁར་དང་སྦྱར་སྦྱིན་བྱ་ཞིང༌། །གནས་ནི་བསིལ་བར་གཞག་པར་བྱ། །དེས་ནི་བདེ་བ་འཐོབ་བར་འགྱུར། །གཅིན་ནི་གལ་ཏེ་འགགས་གྱུར་ན། །དེ་ལ་གསོ་བ་འདི་བྱ་སྟེ། །མངར་བའི་སྨན་དང་སྦྱར་བ་ཡི། །འོ་མའི་འཇམ་རྩི་དེ་ཉིད་གཏང༌། །སྨན་པས་རྟ་ནི་སྣུམ་ཆོས་དང༌། །དུགས་བྱས་ནས་ནི་རུ་ཧ་གཏང༌། །མངར་བའི་སྨན་དང་སྦྱར་བ་ཡི། །འཇམ་རྩི་ཉེ་བར་གཏང་བར་བྱ། །ཚ་བ་གསུམ་དང་སྦྱར་བ་ཡི། །རེང་བུ་རྣོ་ཞིང་ཚ་བ་དང༌། །ལན་ཚྭར་བཅས་པ་མཚན་ནས་གཏང༌། །དེ་ནི་གཅིན་འགགས་སེལ་བར་བྱེད། །ཁ་ཟས་མར་དང་འོ་མ་དང༌། །སྦྲང་རྩི་པི་པི་ལིང་བཅས་བྱིན། །ཡང་ན་ཕྱེད་དང་གསུམ་རི་དང༌། །པི་པི་ལིང་སྦྱར་སྦྱིན་པར་བྱ། །སྨན་དེ་དག་དང་ཆང་དང་སྦྱར། །རྗེས་སུ་བཏུང་བ་སྦྱིན་པར་བྱ། །འབྲས་ཆན་སཱ་ལུ་འོ་མ་དང༌། །ཞོ་སྦྱར་ཁ་ཟས་སྦྱིན་པ་བསྔགས། །ཅི་ནས་འདིར་ནི་བདེར་འགྱུར་བའི། །མེ་བཙའ་ཡི་ནི་ལས་ཀྱང་བྱ། །གལ་ཏེ་
ལུས་ནི་རེངས་གྱུར་ན། །དེ་ལ་གསོ་བ་འདི་བྱ་སྟེ། །ཟས་དང་བསྐུ་དང་བཏུང་བ་དང༌། །སྣ་སྨན་དང་ནི་འཇམ་རྩི་གཏང༌། །རྟུག་པ་གསུམ་གྱི་དུགས་དག་ཀྱང༌། །འདི་ལ་ལེགས་པར་སྦྱར་བར་བྱ། །གཏར་ག་ཡི་ནི་ལས་བྱ་ཞིང༌། །རླུང་མེད་པ་ཡི་གནས་སུ་གཞག །སྨྱོ་ན་འབྱུང་པོའི་གཏོར་མ་དང༌། །བདུག་པ་དང་ནི་མིག་སྨན་དང༌། །སྦྱིན་སྲེག་གི་ནི་ལས་བྱ་ཞིང༌། །བྲམ་ཟེ་དགེ་སྦྱོང་ཚིམ་པར་བྱ། །གཞན་ཡང་སྨྱོ་བ་གསོ་བ་ལས། །བཤད་པའི་ཆོ་ག་རྣམས་ཀྱང་བྱ། །དེ་བཞིན་ནད་ཀྱི་ཁྱད་པར་གཞན། །བྱུང་ནའང་ཅི་རིགས་གསོ་བར་བྱ། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་མས་གཏོང་བའི་ཆོ་ག་བསྟན་པའི་ལེའུའོ།། །།ཐུབ་མཆོག་ཤ་ལི་ཧོ་ཏྲ་ལ། །ལེགས་ཐོས་དུལ་བ་དང་ལྡན་པས། །རྐང་པ་ལ་ནི་མགོ་གཏུགས་ཏེ། །དྲི་ཞིང་སྐུལ་བའི་ཚིག་གིས་སྨྲས། །ཁྱེད་ཀྱིས་བརྩེ་བའི་ཕྱོགས་དང་ནི། །གནོད་པར་གྱུར་པ་རྣམས་ཀྱང་གསུངས། །གཙག་དཔྱད་ཀྱི་ནི་དབྱེ་བ་ཡང༌། །རྣམ་པ་དྲུག་ཏུ་ཡོངས་སུ་གསུངས། །རྩ་ཕུག་དྲགས་དང་རྒྱུས་པ་དང༌། །ཚིགས་ལ་གནོད་གྱུར་ལས་ནད་གྱུར། །འདི་དག་གི་ནི་མཚན་མ་དང༌། །གསོ་བ་བདག་ལ་བཀའ་སྩོལ་ཅིག །དེ་ནས་བུ་ཡིས་དྲིས་གྱུར་བའི། །ལེགས་ལྡན་གྱིས་ནི་སླར་སྨྲས་པ། །ནང་དང་རུས་པ་རྒྱུས་པ་ལ། །གནོད་འགྱུར་གསུམ་པོ་གསོར་མི་རུང༌། །ཚིགས་པ་གཉའ་བར་རྩ་བོ་ཆེར། །གནོད་པར་གྱུར་པ་གསོར་རུང་ཡིན། །བསྟན་བཅོས་ལས་རྣམས་ལེགས་མཐོང་ཞིང༌། །རང་བཞིན་བརྟན་ལ་ལ་ས་ལ་བྱ། །ལག་པ་ཤིན་ཏུ་གོམས་གྱུར་པ། །དེ་ཡིས་ནམ་ཡང་གནོད་མི་སྐྱེད། །རྟ་རྫི་ལས་བྱུང་ཉེས་པ་ཡང༌། །ནད་པ་སྤྱོད་ལམ་འཆོལ་བ་ལས། །ནད་ཀྱི་ཚུལ་ནི་བྱུང་གྱུར་པ། །དེ་ནི་གསོ་བར་སླ་བ་ཡིན། །གཙག་བུས་བཅད་དམ་ཕུག་པ་ན། །སྨན་པའི་ཉེས་པ་ལས་ནད་གྱུར། །དེ་ཡི་དབང་པོ་མ་ཚང་བ། །འཆི་བ་ཉིད་དུ་འགྱུར་པ་ཡིན། །སྨན་པར་རོ་ནད་བུ་ཅན། །དེ་བཞིན་དུ་བ་དང་ཚ་བས་ཉེན། །སྨྱོས་སམ་ཤིན་ཏུ་འཁྲུག་གྱུར་པའམ། །རྨོངས་བས་འཁྲུལ་པར་གྱུར་
པའམ། །ངོ་ཚས་འཁུམས་སམ་འདར་གྱུར་ཏམ། །ལས་ལ་ཐེ་ཚོམ་བཅས་པ་དང༌། །རྒན་པོའམ་ཡང་ན་བྱིས་པའམ། །ཡིད་མི་བདེ་བའམ་འཇིགས་གྱུར་པ། །དམ་པ་ལ་ནི་མི་བརྟེན་པའམ། །གང་ཞིག་རྨོངས་པར་གྱུར་པ་ཡི། །ཐོས་པ་ཉུང་ཞིང་ང་རྒྱལ་ཆེ། །བདག་ཉིད་མི་སྤྱོད་ནོར་ལ་སྡང༌། །གླེན་ཞིང་དོན་ཚོམ་ཡིན་ལ་མཁས། །སྨན་པ་གཞན་མི་བཟོད་ཅིང་སྨོད། །ཡུལ་ལ་བརྐམ་ཞིང་ཁྲོ་ལ་གདུག །རྟག་ཏུ་རང་གི་དོན་ལ་བརྩོན། །བདག་པོའམ་ནི་བླ་མ་དང༌། །དེ་བཞིན་ལེགས་པར་སྤྱོད་པ་ན། །འཛེམ་པ་མེད་ཅིང་དོར་མི་ལྟ། །ངོ་ཚ་དང་ནི་འཇིགས་པ་སྤངས། །རྒྱལ་པོའི་བཀའ་དྲིན་གྱིས་གསོ་ཡང༌། །རྒྱལ་པོའི་མཛོད་ནི་སྟོང་པར་བྱེད། །དེ་འདྲའི་སྨན་པ་ནམ་ཡང་ནི། །རྟ་ཡི་གནས་སུ་གཉེན་མི་བྱ། །དེ་འདྲའི་སྨན་པ་དྲག་ལྡན་པས། །རྟ་ལ་མཚོན་གྱིས་གནོད་པ་སྐྱེད། །ཚད་ལས་རྒྱལ་བའམ་གནས་ནོར་པའམ། །སྟེང་དང་འོག་ཏུ་གནོད་པའམ། །ཕུག་དྲགས་པའམ་མ་ཕུགས་པ། །རྩ་ནི་བློ་ངན་དེས་མི་ཤེས། །དེ་བས་ཕུག་ནི་དྲགས་པ་ཡི། །གནོད་པ་བཤད་ཀྱིས་མཉན་པར་གྱིས། །ཁྲག་ནི་ཕུག་དྲགས་མ་བྱུང་ན། །དབུགས་མི་བདེ་དང་ལུད་པ་སྐྱེད། །འདུག་པ་ན་ནི་ན་འགྱུར་ཞིང༌། །ཡན་ལག་ཉམས་དང་བརྩོན་ཆེན་སྐྱེད། །ཤ་སྙིང་རྨ་ནི་འདྲུལ་བ་དང༌། །ཁོང་ཚ་སྐྲངས་པ་མི་བཟོད་སྐྱེད། །སྤུ་ཡང་གཤོར་བར་འགྱུར་བ་དང༌། །རྩ་རྒྱུས་ཀྱི་ནི་ནད་སྐྱེད་བྱེད། །ནད་འདིས་སྲོག་ནི་འཕྲོག་བྱེད་དེ། །འཕྲལ་དུ་འཆི་བར་འགྱུར་པ་ཡིན། །མཚོན་གྱིས་གནད་དུ་ཕོག་གྱུར་བ། །དཔེར་ན་མེ་དང་གནམ་ལྕགས་སམ། །དུག་འཐུངས་ལས་ནི་གསོད་པ་ལྟར། །རྟ་ཡི་སྲོག་ནི་ཟད་བྱེད་ཡིན། །དེ་བས་ཡུས་དང་ནད་ཚུལ་དང༌། །ཡུལ་དང་གོམས་པ་ན་ཚོད་སྟོབས། །དུས་ཚིགས་ལུས་རྣམས་ལེགས་བརྟགས་ལ། །སྨན་པས་ཁྲག་ནི་དབྱུང་བར་བྱ། །རྩ་ནི་ཕུག་དྲགས་མ་ཕུགས་པ། །གཉིས་ཀ་ལས་ནི་ཉེས་པ་འབྱུང༌། །ལེགས་པར་ཕུག་ན་ནད་འབྱིན་ཅིང༌། །སྡུག་བསྔལ་དེ་ལས་ཐར་བར་བྱེད། །གལ་ཏེ་རྩ་ནི་རང་གནས་སུ། །མ་རྒྱས་གསལ་བར་མི་སྣང་
བའམ། །གནས་མིན་པར་ནི་ཕུག་གྱུར་པ། །དེ་ལས་གནོད་པ་སྐྱེད་པར་འགྱུར། །རུས་པ་རྒྱུས་པ་གནད་རྣམས་དང༌། །མིད་པ་དང་ནི་ཙེའི་ལྷད་དང༌། །དེ་ནི་ཚིགས་ཀྱི་སྦྲེལ་མཚམས་སུ། །གཙག་བུའི་ལས་ནི་སྤང་བར་བྱ། །ཙེའུ་ལྷད་གནས་སུ་རྩ་བཅད་ན། །དེ་ཡི་ལུས་ནི་སྐམས་འགྱུར་ཞིང༌། །རྩ་བ་ནས་བཅད་ཤིང་ལྟ་བུར། །དེ་ནི་འཆི་བར་འགྱུར་བ་ཡིན། །ཚིགས་ཀྱི་མཚམས་ལས་རྟ་ལ་ནི། །གཏར་ག་བྱས་པས་རྩ་བཅད་ནས། །དེ་ཡི་ཚིགས་ནི་སྲང་འགྱུར་ཞིང༌། །རྟག་ཏུ་འཐེང་བ་ཉིད་དུ་འགྱུར། །མཚོན་གྱིས་གང་གི་གནད་དུ་ནི། །རྩ་བཅད་དེ་ནི་འཚོ་མི་འགྱུར། །གང་གིས་གཙག་བུའི་རྩེ་ཡིས་ནི། །རྒྱུས་པ་ལ་ནི་གནོད་གྱུར་པ། །དེ་ཡིས་འཐེང་པོར་འགྱུར་བའམ། །འཕྲལ་དུ་དབང་པོ་ཉམས་པར་འགྱུར། །རུས་པ་ཕུག་ན་ཆུ་སེར་ནི། །སེར་པོ་སླ་བ་འཛག་པར་འགྱུར། །གླང་པོའི་སྣ་དང་འདྲ་བར་ནི། །ཡན་ལག་དེ་ནི་འཁུམས་པར་འགྱུར། །མིད་པ་བརྟན་ལ་ཕུག་གྱུར་ན། །དེ་ལས་གནོད་པ་མང་འགྱུར་ཏེ། །རླུང་གིས་རྒྱས་པར་འགྱུར་བ་དང༌། །ཡང་ན་འཆི་བར་འགྱུར་བ་ཡིན། །དེ་བས་ནད་དང་རུས་ཚིགས་སུ། །བྱུང་བ་གསུམ་པོ་གསོར་མི་རུང། །གསོར་རུང་བ་ནི་བཤད་པ་གསུམ། །དེ་ཡི་གསོ་བ་བཤད་པར་བྱ། །དེ་ལ་ཕུག་དྲགས་གྱུར་པ་ན། །སྣུམ་དང་དུགས་ཀྱི་ཆོ་ག་བྱ། །སྣུམ་ནི་བཞི་པོས་བསྐུས་ནས་ནི། །ཁྲག་ནི་སླར་ཡང་བསྐྱེད་པར་བྱ། །ཁྲག་འཕེལ་གྱུར་པས་ན་བ་དང༌། །ཚ་བས་གདུངས་པར་གྱུར་ན་ཡང༌། །འོ་མ་བསིལ་སྨན་ཁུ་བ་ཡིས། །བསྐུ་ཞིང་ཡོངས་སུ་བླུགས་པར་བྱ། །གནས་དང་ཁ་ཟས་བཟང་པོ་དང༌། །མངར་བག་དག་གིས་དེ་བསལ་བྱ། །སྨན་ཁུ་བསིལ་བའི་འཇམ་རྩི་ཡང༌། །སྨན་པས་བསྒྲིམས་ཏེ་བྱ་བ་ཡིན། །བཙགས་པ་དང་ནི་སྨན་ཁུ་བླུགས། །དུས་གཉིས་སུ་ནི་བྱ་བ་ཡིན། །ཇི་ལྟར་འཇུ་བར་གྱུར་བའི་ཚོད། །ཤེས་ནས་འོ་མའི་བཏུང་བ་སྐྱེད། །ཆུ་ལ་ཏིལ་མར་བླུད་པ་དང༌། །དེ་བཞིན་ལྗང་པ་སྦྱིན་པར་བྱ། །དེ་ཡི་འོག་ཏུ་འདི་ལ་ནི། །སྣ་སྨན་གྱི་ནི་ལས་ཀྱང་བྱ། །ཤིན་ཏུ་ཁྲག་མང་བྱུང་གྱུར་ན། །
གདོན་བསྲུང་པ་ཡི་ཆོ་གའང་བྱ། །འོ་མའི་འཇམ་རྩི་གཏང་བྱ་ཞིང༌། །དེ་བཞིན་ནས་ཆག་ཁ་ཟས་སྦྱིན། །སྨན་པས་འདི་ལ་ནས་ཐུག་དང༌། །ཉ་ཤ་ཡི་ནི་ཤ་ཁུ་སྦྱིན། །གཙག་བུ་ལས་བྱུང་ནད་རྣམས་ཀུན། །སྔར་ནི་རྣམ་པར་བཤད་པ་ཡིན། །དེ་ལས་བཤད་པའི་གསོ་པ་ནི། །བྱས་ནའང་བདེ་བ་ཐོབ་པར་འགྱུར། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་གཙག་བུ་ལས་གྱུར་བའི་ནད་བསྟན་པའི་ལེའུའོ།། །།ཤ་ལི་ཧོ་ཏྲ་བདེ་གནས་ལ། །ལེགས་ཐོས་ཀྱིས་ནི་ཡང་དྲིས་པ། །བརྟ་བྱའི་ཆོ་ག་མ་ལུས་པ། །དོན་གྱིས་ཡང་དག་ཤེས་པར་འཚལ། །འོ་མའི་འཇམ་རྩིའི་ཡོན་ཏན་དང༌། །འཇམ་རྩི་གཞན་ཡང་བསྟན་དུ་གསོལ། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་མ་ལུས་པར། །ངས་བཤད་པ་ལས་ཤེས་པར་གྱིས། །ཐོག་མ་ཐ་མར་བཅས་པ་ཡི། །རྩ་བ་ལྔ་པ་ཉིད་པོ་དང༌། །ནད་དང་རྒྱ་ཤུག་ཀུ་ལངྠ། །ཏ་པལ་ཡང་ནི་བསྐོལ་བར་བྱ། །ཡང་ན་པི་ད་རི་ལ་སོགས། །སྨན་གྱི་སྡེ་ཚན་བསྡུས་ནས་ནི། །ཆུར་བསྐོལ་བ་ཡི་ཁུ་བ་དག །ཚད་བཞིན་དུ་ནི་གཏང་བར་བྱ། །སྨན་ཁུ་དེར་ནི་ཐལ་སྨན་དང༌། །གཅིན་དང་དེ་བཞིན་གཞང་ཁ་ཆུང༌། །བུ་རམ་ཤིང་ཁུ་འོ་མ་དང༌། །ཆང་དང་སྦྱར་བའི་ཆང་རྣམས་ནི། །སྲོག་ཆགས་ཀུན་གྱི་ཤ་ཁུ་ནི། །སྨན་པ་མཆོག་གིས་གཅིག་ཏུ་བསྡུ། །དེ་ལས་རྟ་ཡི་རླུང་ནད་ནི། །གསོ་བའི་སྨན་གྱིས་སྦྱང་བར་བྱ། །གཅིན་རྣམས་ཀྱིས་ནི་བད་ཀན་སེལ། །ཐལ་སྨན་དེ་ལས་ལྷག་པ་ཡིན། །བུ་རམ་ཤིང་གི་ཁུ་བ་དང༌། །དེ་བཞིན་འོ་མ་སྣ་ཚོགས་ནི། །ཁྲག་དང་མཁྲིས་པ་སེལ་བྱེད་ཅིང༌། །རླུང་ནི་བདེ་བར་བྱེད་པ་ཡིན། །ནད་ཀྱི་ཚིགས་ནི་གསུམ་སེལ་བའི། །ལྡེ་གུ་ང་ལས་ཉན་པར་གྱིས། །ཤིང་མངར་དང་ནི་ཐང་ཤིང་དང༌། །ས་ར་ལ་དང་ཉུངས་ཀར་དང༌། །རུ་རྟ་སུག་སྨེལ་ཧ་ཏེ་བུ། །རྒྱ་སྤོས་དང་ནི་བཅའ་ལྒ་དང༌། །རསྣ་བྱཱ་གྷྲ་ན་ཁ་དང༌། །པི་པི་ལིང་དང་ཤུ་དག་དང༌། །དེ་བཞིན་ལན་ཚྭ་ལྔ་པོ་དང༌། །པོ་སོན་ཆ་ཡི་འབྲས་བུ་དང༌། །ཏིལ་མར་དང་ནི་སྦྱར་བ་དང༌། །འཁྲུ་བའི་དོན་དུའང་སྦྱིན་པར་
བྱ། །ཅི་སྐད་བཤད་པའི་རིམ་པ་ཡིས། །བཏབ་པའི་ཆོ་ག་ཉིད་བྱ་སྟེ། །དུས་སུ་རྟོགས་པར་གྱུར་པ་ལ། །སྨན་པས་ནི་རུ་ཧ་གཏང་བྱ། །དེ་ནི་ལན་ཚྭ་དང་བཅས་པ། །རྣམ་པ་གསུམ་ནི་གཏང་བྱ་སྟེ། །དང་པོ་འཇམ་པོ་ཉིད་དུ་བྱ། །དེ་ནས་ཕྱིར་ཞིང་རྣོན་པོ་བྱ། །ཚད་ལས་བཞི་ཆས་ཆུང་བ་དང༌། །དྲོ་ཞིང་ལན་ཚྭ་ཆུང་འཇམ་པ། །ནད་ནི་གདུལ་བར་དང་པོར་ནི། །མས་གཏོང་པ་ནི་འདི་བྱའོ། །ཚད་ལས་བཞི་ཆས་ལྷག་གྱུར་ཅིང༌། །ཚ་དྲོ་ལན་ཚྭ་དང་ལྡན་པ། །བཏུལ་ཟིན་པ་ཡི་ནད་ལ་ནི། །བཏང་ན་ནད་ནི་འབྱིན་པར་བྱེད། །སྨན་ནི་མངར་པོ་དང་ལྡན་ཞིང༌། །འོ་མ་མར་དང་སྦྱར་བ་དང༌། །སྦྲང་རྩི་ལེགས་པར་བཏགས་པ་དག །ནད་བསལ་ཟིན་ནས་སྦྱིན་པར་བྱ། །སྦྱང་བྱས་རྟ་ལ་བྱས་པ་ཡིན། །དངས་མ་རླུང་ནི་སྐྱོན་མེད་བྱེད། །ཞུ་བའི་གནས་ཀྱི་མཁྲིས་བད་ཀན། །ལེགས་པར་སེལ་པར་འགྱུར་བ་ཡིན། །ལུས་ཀྱི་རླུང་ནི་ལྔ་པོ་ཡང༌། །བདེ་བར་རྒྱུ་བར་བྱེད་པ་ཡིན། །ཅི་སྟེ་ཐལ་སྨན་བསྲེ་ན་ནི། །དྲི་མ་འབྱིན་པར་བྱེད་པ་ལྡན། །དེ་བཞིན་སྦྱངས་པས་ནད་ཀྱི་ཚོགས། །གཏོང་ནས་སེལ་བར་བྱེད་པ་ཡིན། །སྦྱངས་པས་ནད་ནི་བསལ་གྱུར་ཅིང༌། །ཁོང་པ་དག་པར་གྱུར་པ་ལ། །འཇམ་རྩི་ལེགས་པར་བཏང་ན་ནི། །ཟླ་རྒྱས་ལྟ་བུར་ལུས་འཕེལ་འགྱུར། །དུག་དང་རྒན་པོ་གཞོན་ནུ་དང༌། །ཆང་འཐུངས་པ་དང་ལྟོགས་པ་དང༌། །ཆུ་འཐུངས་པ་དང་ཁྲུས་བྱས་པ། །དེ་བཞིན་རྩུབ་བག་ཟོས་པ་དང། །གཅོང་ཅན་དག་དང་རླུང་ཡར་འཁྱིལ། །དེ་བཞིན་སྐྲངས་པ་རེད་པ་དང༌། །ལུད་པ་དབུགས་མི་བདེ་དམུ་རྫིང༌། །ཡིན་ལ་མས་གཏོང་ལས་མི་བྱེད། །གང་ལ་ནི་རུ་ཧ་གཏོང་བའི། །རྟ་དེ་ལ་ནི་ནང་པར་དག །ལྟོ་སྟོང་ཉིད་དུ་བཞག་ནས་ནི། །དེ་ནས་ལེགས་བཏང་ནད་བསལ་བྱ། །འཇམ་རྩི་ཆོ་གའི་ཚུལ་ལས་ནི། །སྔར་བཤད་ལྟ་བུར་གཏང་བར་བྱ། །ནད་དང་བཅས་པར་གྱུར་པ་ལ། །བདའ་བ་དག་ཀྱང་བྱ་བ་ཡིན། །ཚད་བཞིན་འཇམ་རྩི་བཏང་བ་དང༌། །འོ་མའི་འཇམ་རྩིའང་གཏང་བར་བྱ། །སྣུམ་འཐུངས་པ་ལས་གང་བཤད་པའི། །ཆོ་ག་དང་ནི་
བཏུང་པ་བླུད། །སྣུམ་གྱི་ཆོ་གས་རོ་སྟོད་ཀྱི། །ནད་ནི་སེལ་བར་བྱེད་པ་ཡིན། །དེ་བཞིན་ལུས་ཀྱི་རོ་སྨད་ཀྱི། །ནད་ནི་འཇམ་རྩིས་སེལ་བར་བྱེད། །སྦེག་དང་གཞོན་ནུ་རྒན་པོའི་དང༌། །རྟ་གང་སྟོབས་ནི་ཟད་པ་དང༌། །ལས་ཆེན་དག་ལ་སྦྱར་བ་དང༌། །དེ་བཞིན་ལུས་ཟུངས་ཟད་པ་དང༌། །རོ་སྨད་ཀྱི་ནི་ནད་རྣམས་དང༌། །ནད་ནི་ཚིགས་སུ་ཞུགས་པ་དེ། །འདི་དག་གིས་ནི་ཉིན་གྱུར་པ། །འཇམ་རྩི་བཏང་ན་བདེ་འཐོབ་འགྱུར། །ཁྱད་པར་དུ་ནི་སོས་ཀ་སྦྱར། །འཇམ་རྩི་ཚད་ཙམ་བཏང་བྱས་ཏེ། །འདི་ནི་སྦྱོར་བ་རྗེས་མཐུན་པའི། །འཇམ་རྩི་སྟོབས་ནི་སྐྱེད་བྱེད་ཡིན། །རྟ་ཡི་བཅུད་ཀྱིས་ལེན་དང་ནི། །རོ་ཙ་རྟས་བྱེད་ཉིད་དུ་འགྱུར། །སྔ་དྲོ་ཁྲུས་བྱས་སྐོམ་བླུད་ལ། །བཟའ་དང་བཅའ་བ་བྱིན་གྱུར་ནས། །སྔར་བཤད་པ་ཡི་ཆོ་ག་ཡིས། །ལེགས་པར་བཏང་ན་བདེ་འཐོབ་བྱེད། །རྩ་བ་ལྔ་པ་གཉིས་ཁུ་བ། །དེ་ལ་རྗེས་སུ་བཏུང་ཕྱིར་བླུད། །ར་མཉེ་ཀ་རྟི་ཀ་ཀོ་ལ། །བི་ཛ་ཀ་དང་རི་ཤ་བ། །མ་ཤ་མུངྒ་པ་རྞི་གཉིས། །མེ་དང་དེ་བཞིན་སླེ་ཏྲེས་དང༌། །སྟག་པ་ཚེར་དང་མ་དུ་ཀཾ། །ནཱ་ག་གེ་སར་བ་ཏ་ཀ །པྲི་ཡང་ཀུ་དང་ག་དུར་དང༌། །འོ་མ་ཅན་ཤིང་ཤུན་སྤང་སྤོས། །པདྨའི་རྩ་བ་སྡོང་བུར་བཅས། །ཀ་ཤེ་རུ་ཀ་ཤྲི་ག་ཏ། །ཀ་ར་བཱི་ར་ཨུཏྤ་ལ། །པུ་ཤེལ་ཙེ་དང་གསེང་ཕྲམ་དང༌། །ཙནྡན་དང་ནི་པ་ཡས་སྱ། །ཤ་རི་བ་དང་པྲ་ཏི་དང༌། །ཏིལ་ནག་དང་ནི་བཙོད་དང་ནི། །ཤུག་པ་སྲིང་སྣ་ཤ་ར་བ། །འདི་རྣམས་ལྡེ་གུར་བསྐོལ་བའི་ཆུ། །འོ་མ་དང་ནི་ལེགས་སྦྱར་བ། །ཚགས་ཀྱིས་ལེགས་པར་བཙགས་པ་ལ། །ཁ་ར་དང་ནི་སྦྲང་རྩི་བཏབ། །བསིལ་ཞིང་སྙིགས་མ་མེད་གྱུར་པ། །མར་དང་ལྷན་ཅིག་བསྲེས་ནས་ནི། །བཤང་གཅི་རྣམ་པར་བསལ་གྱུར་པ། །ཤར་དུ་བསྟན་དེ་མགོ་ལྡོག་ནས། །དྲང་བར་གཞག་པར་གྱུར་བ་ལ། །རྔ་མ་གཡས་ནས་བཟུང་ནས་ནི། །བློ་དང་ལྡན་པས་མ་བལྟབས་པར། །ལན་གསུམ་མམ་ནི་ལན་ལྔ་གཏང༌། །འོ་མའི་འཇམ་རྩིས་བསལ་བའི་ནད། །སོས་ཀ་སྦྱར་ཚེ་བསལ་བ་མཆོག །མཁྲིས་པ་ལས་བྱུང་ནད་རྣམས་དང༌། །དེ་བཞིན་རྟ་ཡི་ཁྲག་ནད་དང༌། །རིང་ནས་འོངས་དང་ལས་ཀྱིས་དུབ། །དབུགས་རྒོད་མགོ་
འཁོར་གྱུར་པ་དང༌། །ལུས་ཀྱི་ཕྱི་ནང་ཚ་བ་དང༌། །རིམས་ཀྱི་བཏབ་དང་སྣུམ་ཡལ་ལ། །འོ་མའི་འཇམ་རྩི་བཏང་གྱུར་བ། །ལུས་ཀྱི་མེ་དྲོད་སྐྱེད་བྱེད་ཡིན། །རྟ་གང་མཁྲིས་པ་ཅན་དང་ནི། །མཁྲིས་པ་རྗེས་འདྲེས་ནད་རྣམས་སེལ། །དེ་བས་ཚ་བ་སེལ་བ་འདི། །དུས་རྣམས་ཀུན་ཏུ་བསྔགས་པ་ཡིན། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་བདའ་བ་དང་འོ་མའི་འཇམ་རྩིའི་ལེའུའོ།། །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །རྟ་རྣམས་ལ་ནི་སྣ་ཚོགས་སྣུམ། །ཟས་དང་སྐོམ་དང་བཏུང་བ་དང༌། །དེ་བཞིན་རྗེས་སུ་བཏུང་བ་ལ། །མང་དུ་ཅི་ཕྱིར་སྦྱིན་པར་བགྱི། །འཇམ་རྩི་ཡི་ནི་ལས་རྣམས་ལའང༌། །ཅི་ཕྱིར་མར་དང་ཏིལ་མར་དང༌། །སྣ་སྨན་གྱི་ནི་ལས་རྣམས་ལ། །ཅི་ཕྱིར་སྣུམ་ནི་བསྔགས་པ་ལགས། །སྣུམ་འཐུང་སྦྱོར་བ་ཉེས་པ་ཡིས། །ནད་དུ་ཅི་ཕྱིར་གྱུར་པ་ལགས། །ཁྱད་པར་མཁྱེན་པ་ཁྱེད་ཀྱིས་ནི། །འདི་དག་སོ་སོར་བསྟན་དུ་གསོལ། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་མ་ལུས་པར། །ངས་བཤད་པ་ལས་ཤེས་པར་གྱིས། །རྟ་ནི་མེ་དང་རླུང་བདག་ཅན། །ལས་རྣམས་ཀུན་ལས་མྱུར་དུ་འགྲོ། །བསྐུལ་བར་ཆུང་དུ་བྱས་གྱུར་ཀྱང༌། །རྩོལ་བ་ཆེན་པོ་བྱས་པར་འགྱུར། །མ་གོམས་པ་ཡི་ཡུལ་དུ་ནི། །རྟག་ཏུ་རྒོད་པར་འགྱུར་བ་ཡིན། །རླུང་དང་མཁྲིས་པ་དང་ལྡན་པས། །དེ་ཕྱིར་རྟག་ཏུ་སྣུམ་ཆོས་འཕྲོད། །ཆོག་བཞིན་དུ་སྣུམ་བྱིན་ན། །སྟོབས་དང་མེ་དྲོད་འཕེལ་བར་འགྱུར། །དེ་ནི་རླུང་དང་གཅིན་རྟུག་རྣམས། །བདེ་བར་རྒྱུ་བར་བྱེད་པ་ཡིན། །དེའི་དོན་ཕྱིར་ན་གསོ་བ་ལ། །སྣུམ་ནི་རབ་ཏུ་བསྔགས་པ་ཡིན། །ལམ་ནི་རིང་པོར་ཞུགས་པ་དང༌། །ཡུལ་ཁམས་དུ་མར་ཕྱིན་པ་ཡིས། །ལུས་ནི་ཉམ་དར་གནས་གྱུར་ཅིང༌། །ཤིང་དང་འདྲ་བར་གྱུར་བའི་རྟ། །དེ་ལ་མར་དང་ཏིལ་མར་དང༌། །གང་ཞིག་ཀུན་དུ་བསྐུས་ན་ནི། །ལུས་ནི་མཉེན་པར་གྱུར་པ་དང༌། །ལས་རྣམས་ཀུན་ལ་སྟོབས་ལྡན་འགྱུར། །གང་ཞིག་རྟག་ཏུ་སྣུམ་བསྐུས་པ། །གནས་ངན་ཉལ་བ་ངན་པ་དང༌། །བཅིང་པ་དང་ནི་བརྡེག་པ་ཡིས། །སྡུག་བསྔལ་ཐམས་
ཅད་གནག་བུས་འགྱུར། །དཔེར་ན་ཤིང་ནི་ཆུས་བརླན་ན། །མྱུར་དུ་ཀུན་དུ་རྒྱས་པར་འགྱུར། །རྩ་བ་ཉིད་ནས་ཟུག་ནས་ནི། །རྒྱས་ཤིང་མེ་ཏོག་འབྲས་ལྡན་འགྱུར། །དེ་བཞིན་རྟ་ལ་སྣུམ་བསྐུས་དང༌། །བླུགས་པ་བདེ་བ་སྐྱེད་བྱེད་དེ། །བ་སྤུའི་བུ་ག་ལས་ཞུགས་ནས། །ཤ་དང་ཚིལ་ནི་རྒྱས་པར་འགྱུར། །རྩོལ་བ་དྲགས་གྱུར་ནད་ལ་ནི། །ཞུན་མར་ཁོ་ན་བདེ་སྐྱེད་ཡིན། །སྣུམ་འཐུངས་གྱུར་བའི་ལུས་ལ་ནི། །རླུང་ནི་ནམ་ཡང་འཁྲུགས་མི་འགྱུར། །དེ་བས་རླུང་གི་ནད་ལ་ནི། །སྣུམ་བསྐུས་པས་ནི་བསྔགས་པ་ཡིན། །རྟ་ལ་མར་ནི་བླུད་གྱུར་ན། །སྟོབས་དང་ལུས་ཟུངས་འཕེལ་བར་འགྱུར། །ཕོ་བའི་མེ་དྲོད་སྐྱེད་བྱེད་ཡིན། །སྟོབས་སྐྱེད་རོ་ཙ་ཚེ་འཕེལ་འགྱུར། །དབང་པོ་གཟི་མདངས་ཁ་དོག་ལ། །དུག་དང་རྨོངས་པག་སེལ་མཆོག་ཡིན། །དེ་ཡི་ཕྱིར་ན་རྟ་ལ་ནི། །མར་བླུད་པར་ནི་མཆོག་ཏུ་བསྔགས། །ཟས་ཀྱི་གང་དུ་སྣུམ་བྱིན་ཞིང༌། །རྗེས་སུ་བཏུང་བའང་སྣུམ་དག་ནི། །ཚད་དང་ལྡན་པ་ཉིད་དུ་ནི། །ཕྱི་དྲོའི་ཚེ་ཡང་སྦྱིན་པར་བྱ། །མཛེ་དང་གཡན་པའང་སེལ་བྱེད་ཡིན། །མཆོག་ཏུ་རླུང་ཡང་ཞི་བྱེད་ལ། །བད་ཀན་ལས་གྱུར་ནད་ཀྱང་ནི། །འདི་ཡིས་སེལ་བར་བྱེད་པ་ཡིན། །བཀྲེས་པ་དང་ནི་སྐོམ་པ་དང༌། །སྡུག་བསྔལ་ཀུན་ལ་འང་སྲན་ཆེར་འགྱུར། །དེ་བས་རྟག་ཏུ་ཟས་རྗེས་ལ། །སྣུམ་ནི་ཉེ་བར་བླུད་པར་བྱ། །སོས་ཀའི་ཚེ་ནི་ཏིལ་མར་ནི། །ཆ་གཉིས་དང་སྦྱར་ཆུ་སྦྱིན་བྱ། །དེས་ནི་དུབ་པ་མི་འབྱུང་ཞིང༌། །ལུད་པ་དབུགས་མི་བདེ་མི་འབྱུང༌། །ལུས་ལ་ནད་ཀྱིས་མི་ཚུགས་ཤིང༌། །ལས་རྣམས་ཀྱིས་ནི་ཞུམ་མི་འགྱུར། །དེ་བས་ཆུ་དང་སྦྱར་བ་ཡི། །ཏིལ་མར་སྦྱིན་པ་བསྔགས་པ་ཡིན། །སྣུམ་གྱི་སྦྱོར་བ་ཐམས་ཅད་ལས། །འཇམ་རྩི་མཆོག་ནི་ཡིན་པར་བཤད། །རྟ་ནི་རླུང་གི་བདག་ཉིད་ཅན། །འདི་ནི་རླུང་སེལ་བྱེད་མཆོག་ཡིན། །འཇུ་ཚེ་རྩ་ཡི་སྒོ་ནས་ནི། །ལུས་ཀུན་ལ་ནི་ཁྱབ་པར་བྱེད། །དེས་ནི་ཚིགས་རྣམས་ཐམས་ཅད་དང༌། །རྒྱུས་པ་བཀུར་ནི་ཁྱབ་པར་བྱེད། །དེ་དག་དང་ནི་འབྲེལ་བའི་ནད། །ཐམས་ཅད་ཉེ་བར་སེལ་བར་ནུས། །རོ་སྨད་འདྲ་བར་འགྱུར་བ་དང༌། །མཇུག་དོ་ཡངས་
པར་བྱེད་པ་ཡིན། །གཅིན་རྟུག་འགགས་པའང་སེལ་བྱེད་ཅིང༌། །ལུས་ཀུན་བདེ་བར་བྱེད་པ་ཡིན། །སྟོབས་དང་གཟི་བརྗིད་འཕེལ་བར་བྱེད། །དེ་བས་འཇམ་རྩི་ཁྱད་པར་འཕགས། །གཅིན་ནད་རྣམས་ནི་སེལ་བྱེད་ཅིང༌། །རོ་ཙ་ལྒང་པའི་སྒོ་སྦྱོང་བྱེད། །མངལ་གྱི་ནད་ནི་སྦྱོང་བྱེད་ཅིང༌། །གསེབ་ཀྱི་ཁུ་བ་འཕེལ་བར་བྱེད། །ཁུ་བ་ཟླ་མཚན་སྐྱོན་སེལ་བས། །མངལ་འཛིན་པར་ཡང་བྱེད་པ་ཡིན། །མཚན་མ་བཏང་བའི་སྣུམ་གོང་མ། །གསེབ་ཀྱི་གཅིན་ནད་རྣམས་ལ་བསྔགས། །རྟ་ཡི་སྣ་ནས་སྣུམ་བཏང་བ། །མིག་གི་མཐོང་སྟོབས་འཕེལ་བར་བྱེད། །རྣ་བ་མིག་དང་སྣ་ནད་དང༌། །དེ་བཞིན་དུ་ནི་མགོ་ནད་རྣམས། །རྟ་ལ་སྣ་སྨན་བཏང་ན་ནི། །ནམ་ཡང་འབྱུང་བར་མི་འགྱུར་རོ། །ནམ་འཚང་ཡན་ཆད་ནད་རྣམས་དང༌། །ལྐོག་མ་སྐེ་དང་མགོར་གཏོགས་པ། །སེལ་ཅིང་ཡིད་ནི་བདེ་བ་དང༌། །ཟས་འཇུ་བདེ་བར་གནས་པར་འགྱུར། །རོ་སྟོད་སྟོབས་ནི་ཆེ་བ་དང༌། །རྣམ་པར་འཕེལ་བར་འགྱུར་བ་ཡིན། །དེ་ཡི་ཕྱིར་ན་རྟ་ལ་ནི། །རྟ་སྨན་མཆོག་ཏུ་བསྔགས་པ་ཡིན། །ཏིལ་མར་གྱིས་ནི་རྟ་ཡི་ནི། །རླུང་སེལ་སྟོབས་ནི་སྐྱེད་པར་བྱེད། །ཤིན་ཏུ་ཚ་མིན་དྲོ་བ་མིན། །དེ་ནི་རླུང་འཇོམས་མཆོག་ཡིན་ནོ། །འདིས་ནི་ཡི་ག་འབྱེད་པ་དང༌། །གཟི་འཕེལ་དེ་ཡི་སྟོབས་སྐྱེད་བྱེད། །རྟ་ཡི་མདོག་ནི་བཟང་བྱེད་ཅིང༌། །ལུས་ཀྱང་མཉེན་པར་བྱེད་པ་ཡིན། །མྱུར་དུ་འཇུ་བར་ཤེས་བྱ་སྟེ། །ཏིལ་མར་ཡོན་ཏན་དེ་དག་ལྡན། །མར་གྱི་ཚེ་ནི་འཕེལ་བར་བྱེད། །ནད་ཀུན་འཇིག་པར་བྱེད་པ་ཡིན། །བཅུད་ཀྱིས་ལེན་དང་རོ་ཙར་བྱེད། །སྣུམ་རྣམས་ཀྱི་ཡང་མཆོག་ཡིན་ནོ། །བསིལ་ཞིང་མངར་བ་སྣུམ་པ་དང༌། །གདོན་འཇོམས་དུག་ནི་སེལ་བ་དང༌། །གོམས་ན་སྲོག་ནི་འཛིན་བྱེད་ཡིན། །རྟ་ཡི་རང་བཞིན་དག་དང་མཐུན། །དེ་བས་སྣུམ་ནི་ཐམས་ཅད་ལས། །མར་ནི་མཆོག་ཏུ་གྱུར་པ་ཡིན། །ཕག་དང་རླན་ཅན་ཆུ་ན་རྒྱུ། །ཤ་ཟ་བ་ཡི་ཞག་དང་རྐང༌། །སྣུམ་མཆོག་ཡིན་ཞིང་སྟོབས་སྐྱེད་པས། །གསོ་བའི་ལས་ནི་ཀུན་ལ་བཏང༌། །ཞག་ནི་ཀུན་གྱི་ནང་ནས་ཀྱང༌། །ཕག་གི་ཞག་ནི་མཆོག་ཡིན་ནོ། །རླུང་དང་
མཁྲིས་པ་སེལ་བྱེད་ཅིང༌། །རྟས་པར་བྱེད་པའི་དམ་པ་ཡིན། །ཆུ་དང་རླན་ཅན་ལས་བྱུང་པ། །གང་དེ་དབུགས་མི་བདེ་བ་སེལ། །འབྲས་བུ་ཟ་བའི་མཁྲིས་པ་སེལ། །ལོ་མ་ཟ་བའི་བད་ཀན་འཇོམས། །བ་ལང་མ་ཧེ་ར་དང་ནི། །དེ་བཞིན་རྟ་ཞག་རྐང་ཉིད་དེ། །ཞག་རྐང་བཞི་པོ་འདི་དག་གིས། །མཁྲིས་པ་དང་ནི་བད་ཀན་སེལ། །ཤིན་ཏུ་སྟོབས་ཆེའི་རྐང་དང་ཞག །ཐམས་ཅད་རླུང་ནད་ཅན་ལ་ཕན། །དེ་ལྟར་སྨན་པས་རླུང་གི་མཆོག །བཞི་པོ་ལེགས་པར་གཏང་བར་བྱ། །སྣ་སྨན་གྱི་ནི་སྦྱོར་བ་དང༌། །ཉེས་པ་རབ་ཏུ་བཤད་བྱ་སྟེ། །ཆུ་སྦུབས་སྲིད་དུ་སོར་བཅུ་པ། །ཞིང་དུ་སོར་ནི་ཕྱེད་དང་གཉིས། །ཁོང་སྟོང་ཚིགས་ནི་གཅིག་པ་ཡིན། །མོད་ལ་ལས་ནི་བྱ་བ་ཡིན། །རྩེ་མོ་རྟ་ཡི་སྣ་འདྲ་བ། །འཇམ་པོར་བྱས་ལ་སྣ་སྨན་གཏང༌། །ཡང་ན་བལ་གཙང་སྦངས་པ་ཡིས། །ཏིལ་མར་བཙིར་ཏེ་གཏང་བར་བྱ། །ཅི་སྐད་བཤད་པའི་ནད་རྣམས་སམ། །ནད་མེད་གྱུར་པའི་རྟ་ལ་ཡང༌། །ཚད་ཤེས་པ་ཡི་སྦྱོར་བ་ཡིས། །ཅི་སྐད་བཤད་པ་བཞིན་དུ་གཏང༌། །སྔ་དྲོ་ལྟོ་ནི་བཀྲེས་གྱུར་ཚེ། །མཁའ་ལ་སྤྲིན་ནི་མེད་པ་ན། །སྣ་ནི་དྲང་པོར་གཞག་བྱས་ལ། །ཁར་བའི་སྦུབས་ལས་སྣ་རུ་བླུགས། །དབུགས་ཕྱུང་བས་ནི་མ་གནོད་པར། །རྒྱུ་ནི་ཕྲ་མོར་གཏང་བར་བྱ། །མོད་ལ་སྣུམ་ནི་བླུགས་གྱུར་ན། །ལུད་པ་དབུགས་མི་བདེ་བ་སྐྱེད། །སྲིལ་རྐང་ཞུགས་པས་མཛེར་བྱེད་ཅིང༌། །མིག་དང་སྣ་ནས་ཆུ་འཛག་འགྱུར། །མགོ་ནི་ཡོན་པོར་གཞག་གཏད་ན། །རོ་སྟོད་ཀྱི་ནི་ཚིགས་རྣམས་དང༌། །བུ་ག་རྒྱུས་པ་རྩ་རྣམས་སུ། །གོ་རིམས་ཇི་བཞིན་འགྲོ་མི་ནུས། །གྱེན་རྒྱུ་སྣུམ་གྱིས་བཀག་པས་ན། །རྟ་ཡི་བུ་ག་ཐམས་ཅད་ནས། །རྒྱུན་ལམ་འགག་པར་འགྱུར་བ་ཡིས། །རོ་སྟོད་ཀྱི་ནི་ནད་རྣམས་སྐྱེད། །སྣབས་འཛག་མགོ་བོའི་ནད་དང་ནི། །གཉེའུ་རེངས་ལྐོག་མའི་ནད་རྣམས་དང། །ལུད་པ་དབུགས་མི་བདེ་གཅོད་ཅན། །ནད་རྣམས་འདི་ཡིས་སྐྱེད་པར་བྱེད། །ཚ་དང་རླུང་བཅས་ཁ་ཆར་འབབ། །ཁྲུས་བྱས་ཟས་སྐོམ་ཟོས་དང་འཐུངས། །སྐོམ་གྱིས་ཉེན་པར་གྱུར་པ་ན། །སྣ་སྨན་བཏང་བས་ནད་སྐྱེད་འགྱུར། །ཆོ་གཉེས་པ་འདི་དག་ལས། །སྣ་སྨན་ཉེ་
བར་བསྲུང་བར་བྱ། །སྣ་སྨན་བཏང་ཞིང་ལུས་བསྐུ་དང༌། །རྟ་ལ་སྣུམ་ནི་བླུད་པ་དང༌། །འཇམ་རྩི་བཏང་བར་བྱུར་པ་ལ། །ཆུ་ཡིས་གང་བའི་སྣོད་ལྟར་བསྲུང༌། །མཆོད་དང་རྒྱུག་པ་ཉིད་དང་ནི། །རྩོལ་དང་མི་འཕྲོད་ཟ་བ་དང༌། །ཁྲུས་དང་ཆར་དང་རླུང་ལས་ནི། །བསྲུང་ཞིང་ཀུན་ཏུ་བསྡམ་པར་བྱ། །སྣུམ་ནི་དྲི་མ་སེལ་བྱེད་ཅིང༌། །ནད་ནི་འགོག་པར་བྱེད་པ་ཡིན། །བརྟན་པར་གནས་པ་སྐྱོན་བྱེད་ཅིང༌། །གཡོས་པ་རྣམས་ནི་འབྱིན་པར་བྱེད། །དེ་ཡི་ནད་ནི་བསལ་གྱུར་པས། །མེ་སྟོབས་བྲི་བར་གྱུར་པ་ན། །ཉམ་ཆུང་དེ་ཡིས་ཁ་ཟས་ནི། །ལྕི་བ་མྱུར་དུ་འཇུ་མི་ནུས། །དེ་བས་ལས་ཀྱི་རྩོལ་བ་དང༌། །ཁ་ཟས་ལྕི་བ་བྱིན་པ་དག །དང་པོར་སྣུམ་ནི་འཐུངས་པ་ལ། །རྟག་ཏུ་སྤང་པར་བྱ་བ་ཡིན། །རྩོལ་བ་བྱས་ལས་རླུང་གི་ནད། །རྣམ་པ་དུ་མར་འབྱུང་འགྱུར་ཞིང༌། །བྲང་དུ་དྲུག་མདོ་རྒལ་ཚིགས་རེངས། །སྣ་ཚོགས་མགོ་བོའི་ནད་རྣམས་དང༌། །ལུད་པ་དབུགས་མི་བདེ་གཅོང་ཅན། །ལུས་ནི་སྐེམ་པར་འགྱུར་བའམ། །མཆི་མ་རུ་ནི་འགྱུར་བ་དག །སྣུམ་འཐུངས་རྩོལ་བ་སྦྱར་ལས་འབྱུང༌། །འཁྲུ་ཞིང་རླུང་ནི་འཁྱིལ་བ་དང༌། །དེ་བཞིན་སྙིང་ནད་རྣམ་བཞི་དང༌། །གཞན་ཡང་པགས་པའི་ནད་རྣམས་དང༌། །ལུས་ཟུངས་ཟད་པར་འགྱུར་བའམ། །ཁྲག་དང་མཁྲིས་པའི་ནད་རྣམས་དང༌། །བད་ཀན་གྱི་ནི་ནད་རྣམས་འབྱུང༌། །དེ་བས་སྣུམ་འཐུངས་གྱུར་པའི་རྟ། །ལེགས་པ་ཁོ་ནར་བསྲུང་པར་བྱ། །སྣུམ་ནི་ལེགས་པར་བཏང་གྱུར་ཅིང༌། །སྤྱོད་ལམ་ལེགས་པར་བསྲུངས་གྱུར་ན། །ནད་རྣམས་ཀུན་དང་བྲལ་བ་དང༌། །ཡོན་ཏན་ཐམས་ཅད་རྒྱས་པར་འགྱུར། །གནོད་པའི་དབང་དུ་མི་འགྱུར་ཞིང༌། །ལས་རྣམས་ལ་ནི་ཞུམ་པ་མེད། །སྣུམ་གྱི་བཏུང་བ་ལེགས་གྱུར་པར། །སྲོག་ནི་གནད་ལ་གནས་པར་འགྱུར། །ལུས་ཀྱི་མེ་སྟོབས་འབར་བ་ཡིས། །ཁ་ཟས་སྙོམས་པར་འཇུ་བར་འགྱུར། །འདི་ཡིས་ལུས་ཟུངས་རྣམས་དང་ནི། །སྟོབས་དང་ལུས་ཀྱི་ཡོན་ཏན་འཕེལ། །ལུས་ཀྱང་འགྱུར་བ་མེད་པ་དང༌། །མདོག་ཀྱང་གསལ་བ་ཉིད་དུ་འགྱུར། །གཅིན་དང་རྟུག་པ་འཕྱེན་རྣམས་ཀྱང༌། །བདེ་བ་ཁོ་ནར་འབྱིན་པར་
འགྱུར། །སྣུམ་ནི་ལེགས་པར་བཏང་གྱུར་པ། །མཚན་མ་འདི་ལས་ཤེས་པར་བྱ། །སྣུམ་ཆུང་བས་ནི་དྲི་མ་དག །འབྱིན་པར་དཀའ་ཞིང་ནད་དང་བཅས། །ཡན་ལག་སྐྲངས་ཤིང་རྒྱུ་བ་བུལ། །ལུས་ལྕི་གཅིན་ནི་དམར་བ་དང༌། །ཁ་ཆུ་འཛག་ཅིང་བཞིན་རས་ངན། །མེ་དྲོད་ཆུང་ཞིང་ཉམ་ཆུང་འགྱུར། །སྣུམ་སྦྱོར་ཉེས་པར་གྱུར་པ་ཡི། །རྟ་ཡི་ཚུལ་ནི་འདི་ཡིན་ཏེ། །རྟ་སྦངས་འགྲིལ་བར་བྱེད་པའམ། །ཡང་ན་སླ་ཞིང་མང་དུ་འཛག །འགྲོ་ཞིང་འཛག་པར་བྱེད་པའམ། །ཤིན་ཏུ་འཚེར་བར་བྱེད་པ་ཡིན། །སྤུ་ནི་ཤིན་ཏུ་གཤོར་བ་དང༌། །པགས་པའི་མདོག་ནི་མི་སྡུག་འགྱུར། །དེ་ནི་ཁོང་རྩུབ་ཤེས་བྱས་ལ། །སྣུམ་ནི་སླར་ཡང་སྦྱིན་པར་བྱ། །ཁ་ཟས་རྩུབ་བག་ཟོས་པའམ། །ཤུགས་ནི་བཀག་པར་འགྱུར་བ་ཡི། །རླུང་གི་གནས་ལས་བསྐྱོད་གྱུར་ནས། །ལུས་ཀུན་དུ་ནི་ཁྱབ་པར་བྱེད། །ཚིགས་དང་རྒྱུས་པ་རྩ་དང་ནི། །བུ་ག་རྣམས་ལ་འང་གནོད་པར་བྱེད། །དེ་ནི་རྟག་ཏུ་སྣུམ་བྱེད་ཡང༌། །ནད་ནི་བསལ་པར་ནུས་མ་ཡིན། །ནད་ནི་རབ་ཏུ་བསལ་བ་ལ། །ལུས་ཀྱི་མེ་དྲོད་སྐྱེད་པར་བྱེད། །མེ་དྲོད་འབར་ཞིང་ཁོང་སྣུམ་ན། །རྟག་ཏུ་ནད་མེད་ཉིད་དུ་འགྱུར། །དེ་བས་ཇི་སྐད་བཤད་པ་ཡི། །ཆོ་གས་རྟ་ལ་སྣུམ་བྱིན་བྱ། །སྣུམ་ནི་ལེགས་པར་བཏང་གྱུར་ན། །ཡོན་ཏན་ཀུན་དང་ལྡན་པར་བཤད། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་སྣུམ་ལེགས་པར་བཏང་བའི་ཡོན་ཏན་བསྟན་པའི་ལེའུའོ།། །།རྟ་ཡི་ཚུལ་གྱི་དེ་ཉིད་ཤེས། །རྟ་ཡི་བསྟན་བཅོས་ལ་མཁས་ཤིང༌། །རྟ་ཡི་ཚེ་ཡི་རིག་བྱེད་བྱ། །རྟ་ལ་ཕན་པར་རྟག་དགའ་བ། །ཤ་ལི་ཧོ་ཏྲ་བདག་ཉིད་ཐུལ། །ཚངས་པ་ཉི་མ་མེའི་གཟི་ཅན། །དཀའ་ཐུབ་ཀྱིས་ནི་གཙོར་བྱས་ལ། །ལེགས་ཐོས་ཐེ་ཚོམ་སྐྱེས་གྱུར་ནས། །དེ་ཡི་རྐང་གཉིས་ལ་བཏུད་དེ། །འདྲི་བའི་ཚུལ་ནི་འདི་དག་སྨྲས། །ཁྱེད་ཀྱིས་རྟ་ཡི་བསྟན་བཅོས་སུ། །ཟུག་རྔུ་ལུས་ཀྱི་གསོ་བ་དང༌། །དེ་བཞིན་རྟེའུའི་གསོ་བ་དང༌། །མཚོན་དང་བསྲུང་བའི་ཆོ་ག་དང༌། །དུག་གི་གསོ་བ་ཉིད་དག་ནི། །ཡན་ལག་དྲུག་ནི་ལེགས་གསུངས་ན། །ཁྱེད་ཀྱིས་བཅུད་ཀྱིས་ལེན་དང་ནི། །རོ་ཙར་བྱ་བ་བཀའ་
མ་སྩལ། །རྟ་ནི་ཁུ་བ་མང་གྱུར་ན། །འགྲོས་ཡང་རྩོལ་བ་ཆེ་བར་འགྱུར། །རང་བཞིན་དེ་དག་ཉིད་ཀྱིས་ནི། །རྒོད་མ་རྣམས་ལ་ངོམས་པ་མེད། །རྒྱུ་དེ་ཉིད་ཀྱིས་བློ་ལྡན་པ། །གཞན་གྱིས་རྟ་ལྟར་བྱེད་ཅེས་བཤད། །དེ་བས་ལ་ལར་མི་ལ་ཡང༌། །རྟ་ལྟར་བྱེད་པ་ཉིད་ཅེས་ཟེར། །རྟ་ཡི་དེ་ཉིད་མཁྱེན་གྱུར་པ། །རོ་ཙ་བར་ནི་ཅི་ལྟར་འགྱུར། །བཅུད་ཀྱིས་ལེན་གྱི་སྦྱོར་བ་དང༌། །དེ་དག་གི་ནི་རྒྱུ་ཉིད་ཀྱང༌། །ལེགས་ལྡན་བློ་གྲོས་མཆོག་གྱུར་པ། །ཁྱེད་ལས་ཡོངས་སུ་ཤེས་པར་འཚལ། །དེ་ལྟར་ཡོངས་སུ་དྲིས་པ་ན། །ལེགས་ལྡན་དྲང་སྲོང་གིས་སྨྲས་པ། །ལེགས་ཐོས་འདི་ཡི་རྒྱུ་ཡི་ཚུལ། །རྣམ་པ་སྣ་ཚོགས་ཡོད་པ་ཡི། །རེ་ཞིག་རྟ་ཡི་བཅུད་ཀྱིས་ལེན། །ཐོག་མ་ཁོ་ནར་བཤད་པར་བྱ། །དེ་ནི་ཚེ་འཕེལ་བློ་སྐྱེད་ཅིང༌། །སྐྲ་དཀར་གཉེར་མ་འཇིག་བྱེད་ལ། །དཔལ་ལྡན་མདོག་དང་ཁ་དོག་སྐྱེད། །ན་ཚོད་འཇོག་པའི་དམ་པ་ཡིན། །དབང་པོ་གསལ་ཞིང་མདངས་སྐྱེད་བྱེད། །དགེ་ཞིང་ཚིམ་ལ་མགྱོགས་པར་བྱེད། །དེ་ཡི་རྒྱུད་དང་བྱ་བ་ཡི། །ཐབས་ནི་ང་ལས་ཤེས་པར་གྱིས། །བཅུད་ཀྱི་སྦྱོར་བ་ཁྱད་འཕགས་པས། །བཅུད་ཀྱིས་ལེན་ཞེས་བྱ་བར་བཤད། །ལུས་ཟུངས་རྒྱས་པར་བྱེད་པ་དང། །ནད་རྣམས་འཇོམས་པར་བྱེད་པ་ཡིན། །དུས་དང་དུས་ཚིགས་གོམས་པ་དང༌། །ཡུལ་དང་སྟོབས་ནི་ཅི་བཞིན་དང༌། །རྟ་ཡི་ཁོང་པ་དག་གྱུར་ལ། །སྔ་དྲོའི་ཚེ་ན་བླུད་པར་བྱ། །བསེ་ཤིང་འབྲས་བུའི་ཁུ་བ་དང༌། །འབྲས་བུ་གསུམ་གྱི་ཁུ་བར་བསྲེ། །ལྕགས་ཕྱེད་དང་ནི་སྦྱར་བ་དག །ཕོ་བའི་མེ་དྲོད་ལེགས་དྲགས་ལ། །ཤིན་ཏུ་བསིལ་བ་ཞག་བཅུའི་བར། །མ་ཡེངས་པར་ནི་འདི་ལ་བླུད། །ཉེར་སྤྱོད་དང་ནི་ཁ་ཟས་དག །ཀུན་ཀྱང་བསིལ་ཆོས་ཉིད་དུ་བྱ། །འབྲས་ཆན་འོ་མ་དང་བཅས་ཤིང༌། །སྦྲང་རྩི་མར་ནི་བཏབ་པ་བྱིན། །དེ་ནས་བསེ་ཤིང་འབྲས་བུའི་ཁུ། །ཆ་ནི་རིམ་གྱིས་བསྐྱེད་ནས་ཀྱང༌། །སྔར་བཤད་པ་ཡི་ཆོ་ག་ཡིས། །ཞག་བཅུའི་བར་དུ་བླུད་པར་བྱ། །དེ་ལྟར་བླུད་པར་གྱུར་པ་ན། །རྟ་ནི་སྙོམས་བག་སྐྱེ་བར་འགྱུར། །ཞུ་བར་གྱུར་ནས་འོ་མ་ནི། །སྦྲང་རྩི་དང་སྦྱར་བཏུང་བ་བླུད། །དེ་ཡི་
རྗེས་ལ་བྲག་ཞུན་གྱི། །ཁུ་བ་སྦྲང་རྩི་དང་སྦྱར་བླུད། །མི་སྟོབས་ལ་སོགས་བརྟགས་ནས་ནི། །དེ་ནི་ཟླ་ཕྱེད་བར་དུ་སྦྱིན། །འོལ་བྱ་གོང་མ་སྲེག་ཤ་ཁུ། །དྲུག་ཅུ་པ་ཡི་འབྲས་ཆན་བྱིན། །ཁྱི་ར་བུལ་ཀ་སླེ་ཏྲེས་དང༌། །བ་ལ་བི་དར་འབྲས་བུ་གསུམ། །བསྐོལ་བའི་ཁུ་བའི་གྲང་མོ་ནི། །ཞག་བཅུའི་བར་དུ་བླུད་པར་བྱ། །སྦྲང་རྩི་ཁ་ར་དང་བཅས་པའི། །འབྲས་བུ་གསུམ་གྱི་ལྡེ་གུ་བྱིན། །ཉེ་བར་སྤྱོད་པ་འདི་ཡིས་ནི། །སྟོབས་དང་སྟོབས་མིན་ཤེས་པར་བྱ། །སྦྱོར་བ་འདི་དག་རྟ་རྣམས་ཀྱི། །བཅུད་ལེན་ཆོ་གར་ཡོངས་སུ་བཤད། །ཉེ་བར་སྤྱོད་པ་བསིལ་བ་དང༌། །རྩ་ཡང་མངར་པོ་བསྔགས་པ་ཡིན། །ཆོ་གར་ལྡན་པའི་མར་བྱིན་གྱི། །ཏིལ་མར་ལན་ཚྭ་སྦྱིན་མི་བྱ། །གནས་ནི་བསིལ་ཞིང་བདེ་བ་དང༌། །འཇམ་ཞིང་དབེན་པ་བྱེད་དུ་གཞུག །སྨན་གྱི་དུས་ཀྱི་ཉིས་འགྱུར་རམ། །ཡང་ན་དེ་ཡི་སུམ་འགྱུར་དུ། །འཇམ་རྩི་བཏང་བའི་སྦྱོར་བ་ལྟར། །རྟ་ནི་འབད་དེ་བསྲུང་བར་བྱ། །དེ་ལྟར་ལེགས་པར་སྤྱོད་པ་ཡིས། །རྟ་ལ་བཅུད་ལེན་བྱིན་གྱུར་ན། །སྔར་བཤད་པ་ཡི་ཡོན་ཏན་དང༌། །དེ་ལྟར་གཞན་ཡང་ཐོབ་པར་འགྱུར། །རྟ་རྣམས་ཀྱི་ནི་རོ་ཙ་བའི། །ཆོ་ག་ཡང་དག་མཉན་པར་གྱིས། །རོ་ཙ་བ་ཡི་ཆོ་ག་ཡི། །དྲི་བ་ཁྱེད་ཀྱིས་ལེགས་པར་སྨྲས། །རོ་ཙ་བར་ནི་བྱེད་པ་ཡི། །རྒྱུ་ནི་འདི་ཙམ་ཉིད་ཡིན་ནོ། །རྟ་ནི་སུ་ཡང་རུང་བ་ལ། །རོ་ཙ་འདི་ནི་བྱ་བ་མིན། །སྦེག་དང་རྒན་དང་ཉམ་ཆུང་དང༌། །སྟོབས་ཆུང་ཁུ་བ་ཟད་པ་དང༌། །རྒོད་མ་དང་ནི་སྦྱོར་འདོད་ལ། །རོ་ཙ་བ་ཡི་ཆོ་ག་བྱ། །དེ་རྣམས་ཡོན་ཏན་བཅས་འགྱུར་གྱི། །ལྷག་མ་རྣམས་ལ་དེ་ལྟར་མིན། །ཁྱོད་ལ་ཡང་དག་བག་ད་པ་ཡི། །ཡོན་ཏན་འདི་ནི་རིམ་གྱིས་ཉོན། །ཡིད་བདེ་ཤུགས་ནི་ཆེ་བ་དང༌། །སྤྲོ་བ་ཆེ་ཞིང་ཁུ་བ་མང༌། །འཇུག་དགའ་བུ་སྐྱེས་པ་ལ་བཟང༌། །བུ་ནི་མང་པོ་ཉིད་སྐྱེད་བྱེད། །ལུས་དྲང་མཛེས་ཤིང་མ་དངས་ལྡན་པ། །རོ་ཙ་ལས་བྱུང་ཡོན་ཏན་ཡིན། །དེ་བས་རྟའམ་གཞན་དག་ལ། །རོ་ཙ་བྱ་བ་དེ་ཉིད་ཉོན། །ལེགས་པར་སྣུམ་བཏང་སྦྱངས་བྱས་པའི། །ཁོང་པ་དག་འགྱུར་རྟ་ཡི་ནི། །ཁུ་བ་ལེགས་པར་འཕེལ་བྱེད་
པའི། །བཏུང་བ་འདི་ནི་བླུད་པར་བྱ། །འོ་མ་དང་ནི་བི་ར་ཏི། །ཛི་ད་ཀ་ད་རི་ཤ་བ། །མ་ཤ་པརྞི་རམ་ཉེ་བ། །ཨདྨ་གུཔྟ་ཉེའུ་ཤིང༌། །མུངྒ་པྲི་ཏགས་པརྞི་དང༌། །ས་མད་ག་དང་མ་དུ་ཀ །མེ་དང་ཤུ་ག་ན་པ་ཉིད། །ཙོ་ར་ཀ་དང་བཅས་པ་དག །བསྐོལ་བའི་ཁུ་བ་གྲང་མོ་ནི། །ཁ་ར་དང་ནི་སྦྲང་རྩིར་བཅས། །ལྡེ་གུ་དང་སྦྱར་བཏུང་བ་ནི། །སྔ་དྲོའི་ཚེ་ན་བླུད་པར་བྱ། །བཏུང་བ་འདི་ནི་ཞུ་བ་དང༌། །འོ་མ་སླར་ཡང་སྦྱིན་པར་བྱ། །བདེ་བར་གནས་ཚེ་ལྗང་པ་ནི། །སྔར་བཞིན་དུས་སུ་བྱུང་བ་སྦྱིན། །དེ་ཡིས་རྟ་ནི་ཉམས་བརྟས་ཤིང༌། །རྒོད་མ་ལ་ཡང་གདའ་བར་འགྱུར། །པདྨ་དང་ནི་ཀུ་མུད་དང༌། །དྲི་ཞིམ་པ་ཡི་སྡོང་བུ་དང༌། །པུཎྜ་རཱི་ཀ་བ་ད་རི། །ཨུཏྤ་ལ་དང་པ་སྤང་བྱ། །ཏ་པ་རི་ནི་དམར་པོ་དང༌། །ཤ་ལུ་ཀ་ཡི་སྡོང་བུ་དང༌། །ཀ་ཤེ་རུ་དང་པདྨའི་རྩ། །འབྲ་གོ་དང་ནི་མ་ག་ཏ། །སྲིང་ཀ་ཏ་ཀ་དང་བཅས་པ། །ཆ་མཉམ་བྱས་ཏེ་སྨན་ཁུ་བསྐོལ། །དེ་ཡི་ཁུ་བ་གྲང་མོ་ནི། །ཁ་ར་དང་ནི་སྦྲང་རྩིར་བཅས། །ཨདྨ་གུཔྟའི་མེ་ཏོག་དང༌། །འབྲས་བུ་དང་བཅས་སྔ་དྲོ་བླུད། །དེ་ཞུ་རྗེས་ལ་སྐོམ་བླུད་ཅིང༌། །སྐོམ་གྱི་རྗེས་ལ་ཁ་ཟས་བྱིན། །མ་ཤ་སྣུན་བསམ་ལེགས་པར་ཚོས། །ཕྱི་དྲོ་ལེགས་པར་སྦྱིན་པར་བྱ། །སཱ་ལུའི་འབྲས་ཆན་རི་དགས་དང༌། །བྱ་ཡི་ཤ་ཁུར་བཅས་པ་སྦྱིན། །རྩྭ་ཡང་མངར་པོ་སྦྱིན་ན་ཕན། །གནས་ནི་མཉམ་ཞིང་བདེ་བར་གཞག །འདི་ཡི་ཤིན་ཏུ་དྲེགས་བདོ་ཞིང༌། །རྟ་ཡི་རིགས་ནི་འཕེལ་བར་བྱེད། །ཡང་ན་སྦྱོར་བ་འདི་ཉིད་དང༌། །བ་བཞོན་བེའུ་རྒན་པོ་ཡི། །བ་ཡར་གྱི་ནི་འོ་མར་སྦྱང༌། །རྟ་དེ་ལ་ནི་བླུད་པར་བྱ། །འདི་ཡིས་རྟ་ནི་དྲེགས་བདོ་ཞིང༌། །ལན་མང་འཇུག་པར་ནུས་པར་འགྱུར། །སྨན་འདི་རྣམས་ཀྱི་ཁུ་བ་དང༌། །འོལ་བའི་ཤ་ཁུ་དང་བཅས་པ། །རྟ་ལ་བླུད་པར་གྱུར་པ་ནི། །དེས་ཀྱང་རོ་ཙ་ཉིད་དུ་བྱེད། །གསེབ་ནི་ཤིན་ཏུ་ཆགས་འདོད་ཅིང༌། །རྒོད་མ་ལ་ཡང་མངོན་དགར་འགྱུར། །ཨདྨ་གུཔྟ་པདྨའི་རྩ། །བཏགས་པའི་ལྡེ་གུ་བསིལ་པོ་ནི། །འོ་མ་དང་སྦྱར་བླུད་ན་ཡང༌། །ཤིན་ཏུ་རོ་ཙ་འགྱུར་བ་ཡིན། །ཀརྐ་ཏ་ཀ་རྒྱ་མཚོའི་ལྦུ། །
དེ་ནི་གཏུན་ནང་བརྡུངས་ནས་ནི། །ཤིན་ཏུ་ཞིབ་པར་གྱུར་པ་དང༌། །ཏིལ་མར་དང་ནི་གཅིག་ཏུ་བསྲེ། །ཨདྨ་གུཔྟའི་འབྲས་བུར་བཅས། །ཟས་ཀྱི་རྗེས་ལ་སྦྱིན་པར་བྱ། །བི་ད་ར་ཡི་སྡོང་བུ་ནི། །ཏིལ་མར་དང་བསྐོལ་བྱིན་པ་བསྔགས། །ཨུ་ད་ཙ་ཏ་ཡི་ཕྱེ་མ་བཏགས། །སྦྲང་རྩི་ཁ་ར་དང་སྦྱར་བ། །སྣ་ནས་བཏང་དང་བཏུང་བ་དང༌། །འཇམ་རྩིར་བཏང་བ་བསྔགས་པ་ཡིན། །བསྐོལ་ནས་ཞག་བདུན་བཞག་པ་ཡི། །ཏིལ་མར་གྱིས་ཀྱང་བསྐུ་བར་བྱ། །སྐམ་པའི་སྲོག་ཆགས་ལྡ་དང་ནི། །རྩ་བ་སྡོང་བུ་འབྲས་བུ་དག །བསིལ་ཞིང་ཡོན་ཏན་དང་ལྡན་པ། །ཚུལ་འདི་འདྲ་བ་གཞན་གང་ཡིན། །དེ་དག་ཐམས་ཅད་གཞན་གང་ནི། །རོ་ཙ་སྐྱེད་པའི་མཆོག་ཡིན་ནོ། །ར་ཡི་འོ་མ་ཉ་དང་མར། །དེ་བཞིན་མར་ཡང་ཤ་ཁུ་ནི། །ཡོངས་སུ་ལེགས་པར་བྱས་པ་དག །ཁ་ཟས་མཆོག་ནི་སྦྱིན་པར་བྱ། །རྒྱས་དང་བསྡུས་པའི་ཚུལ་གྱིས་ནི། །སྦྱོར་བ་སྔར་ནི་བསྟན་པ་ལས། །རོ་དང་ཞུ་རྗེས་དུས་ཀྱི་ཆ། །མཁས་པས་ལེགས་པར་བརྟག་པར་བྱ། །བྲས་སུ་ལྗང་པ་བྱིན་པ་དང༌། །ཆང་བླུད་པ་དང་བསྐུ་བ་དང༌། །ཨུད་ཙ་ར་དང་བི་ད་ར། །ཨཱདྨ་གུཔྟའི་འབྲས་བུ་ནི། །རྟག་ཏུ་འདི་ལ་སྦྱིན་བྱ་ཡི། །ཞག་གཅིག་ཤིན་ཏུ་དྲགས་མི་བྱ། །མེ་སྟོབས་གནས་ནི་ཅི་འདྲ་དང༌། །ནད་གཞི་དུས་ཚིགས་ཇི་བཞིན་དུ། །ལུས་ཀྱི་ཉམས་ནི་ཅི་ཡོད་པ། །ལེགས་པར་བརྟགས་ཏེ་བྱ་བ་ཡིན། །སྔར་ནི་ཅི་སྐད་བསྟན་པ་ཡི། །བདའ་བའི་ཆོ་ག་རྣམས་ཀྱང་བྱ། །རྒོད་མ་ལ་ནི་གསོ་བ་དང༌། །མངལ་སྐྱོན་སྦྱང་བའི་ལས་རྣམས་བྱ། །འདི་ནི་བཅུད་ལེན་དམ་པ་དང༌། །རྩར་བྱེད་པ་ནི་ཉིད་ཡིན་ནོ། །རྟ་ལ་གང་དག་དགོས་པ་ཡི། །དྲིས་པ་མ་ལུས་བསྟན་པ་ཡིན། །ལེགས་ཐོས་ཀྱིས་ནི་ཡང་སྨྲས་པ། །བདག་ལ་ཐེ་ཚོམ་གཞན་མཆིས་ཏེ། །རྟ་ལ་དངས་མ་སྐྱོན་མེད་པ། །རིམ་གྱིས་ལུས་ཟུངས་ལ་འཇུག་ན། །རོ་ཙ་བ་ཡི་ཡོན་ཏན་ནི། །ཞག་གཅིག་ནས་འབྱུང་ཁྱོད་ཀྱིས་བཤད། །ལུས་ཟུངས་རྣམས་ཀྱི་མཆོག་གྱུར་པ། །ཁུ་བ་རྒྱུ་ནི་གང་ཞིག་གིས། །འཕྲལ་དུ་འཕེལ་བར་འགྱུར་བ་བཤད། །ཤ་ལི་ཧོ་ཏྲས་སླར་སྨྲས་པ། །ཅི་ལྟར་ཤིང་ལ་ཆུ་
བླུད་ན། །དེ་ནི་མེ་ཏོག་འབྲས་བུ་ལ། །ཉིན་ཞག་དེ་ཉིད་ཁོ་ན་ལ། །ཁྱད་པར་གྱུར་པར་སྣང་བ་ཡིན། །དེ་བཞིན་སྨན་གྱི་བཅུད་རྣམས་ནི། །འཕྲལ་དུ་ནུས་པ་སྐྱེད་པ་ཡིན། །བུ་རམ་ཤིང་གི་རྩ་བ་དང༌། །བར་དང་རྩེ་མོ་བྱེ་བྲག་ཡོད། །དེ་བཞིན་མེ་ཏོག་འབྲས་བུ་སོགས། །ཞུ་རྗེས་སོ་སོར་སྣང་བ་ཡིན། །ཡོན་ཏན་ནུས་པ་ཐ་དད་པས། །རྫས་ཀྱི་རང་བཞིན་སྣ་ཚོགས་ཡིན། །སྦྱོར་བའི་ཡོན་ཏན་དབང་གིས་ནི། །འཕྲལ་དུ་དུས་གཞན་ནུས་པ་འབྱིན། །འདི་ནི་མངོན་སུམ་ཡིན་ཤེས་བྱ། །རྒྱུ་དྲིས་པ་ཡང་མཉན་པར་གྱིས། །དུར་བྱིད་དང་ནི་དེ་འདྲ་གཞན། །མོད་ལ་འཁྲུ་བར་བྱེད་པ་ཡིན། །འོ་མ་འཐས་པར་འགྱུར་བ་དང༌། །པོ་སོན་ཆ་ཡི་འབྲས་བུ་དག །འཕྲལ་དུ་འཁྲུ་བར་བྱེད་པ་དང༌། །ཐལ་སྨན་གྱིས་ཀྱང་འཕྲལ་སྲེག་བྱེད། །ཏིལ་མར་མར་གྱིས་འཕྲལ་སྣུམ་ཕྱེད། །མ་ཤ་འཕྲལ་དུ་འདུལ་བར་བྱེད། །ཆང་གིས་འཕྲལ་དུ་དྲེགས་པ་སྐྱེད། །འོ་མས་འཕྲལ་དུ་སྲོག་སྐྱེད་བྱེད། །བསེ་ཤིང་གི་ནི་འབྲས་བུ་ཡིས། །ལ་ལ་རྨ་ནི་འཕྲལ་དུ་སྐྱེད། །དེ་དང་འདྲ་བ་གཞན་དག་ཀྱང༌། །ནུས་པ་མོད་ལ་འབྱིན་པ་ཡོད། །རོ་ཡི་རྫས་ནི་ཁྱད་པར་ཅན། །མངོན་སུམ་གཏན་ཚིགས་འདི་དག་གིས། །རྫས་ཀྱི་ཞུ་རྗེས་ནུས་པ་ནི། །འཕྲལ་དུ་སྐྱེད་པར་མངོན་པ་ཡིན། །རོ་ཙ་བྱེད་པའང་དེ་བཞིན་དུ། །འཕྲལ་དུ་ཁུ་བའང་འཕེལ་བར་བྱེད། །སྔར་བཤད་པ་ཡི་སྨན་རྣམས་ཀྱང༌། །སྦྱོར་ལེགས་འབྲས་བུ་འཕྲལ་དུ་སྐྱེད། །འདི་ནི་སློབ་མ་མིན་པ་དང༌། །ལོག་འཇུག་བུ་ལའང་སྦྱིན་མི་བྱ། །སྨོད་པར་བྱེད་པ་རྣམས་དང་ནི། །སྡིག་ཅན་ལ་ནི་མི་སྦྱིན་ནོ། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་རོ་ཙ་བར་བྱེད་པ་བསྟན་པའི་ལེའུའོ།། །།རྟ་ཡི་ཆུ་སྦུབས་གྱུར་ནད་དང༌། །བླུད་བྱ་བླུད་མི་བྱ་ཉིད་དང༌། །གསོ་བའི་ནད་ནི་ཡང་དག་ཉིད། །ལེགས་ལྡན་གྱིས་ནི་བསྟན་དུ་གསོལ། །བུ་ཡིས་དེ་སྐད་སྨྲས་པ་ན། །ཤ་ལི་ཧོ་ཏྲས་སླར་སྨྲས་པ། །གང་ཚེ་རྟ་ལ་འོ་མ་ཆུ། །ཆུ་སྦུབས་བྱིན་གྱུར་དེ་ཡི་ཚེ། །ཉེས་སྐྱེད་འོ་མ་དང་བཅས་པ། །ཚ་སྐྱེད་མགོ་བོར་
ཞུགས་པ་ན། །སྤོས་བདུག་མགོ་ཡི་སྦྱངས་པ་ཡིས། །དེ་ནི་བསལ་བར་ནུས་མ་ཡིན། །སྐམ་པར་གྱུར་ཚེ་ཆུ་ཡི་ཚད། །ལེགས་པར་བསལ་བར་ནུས་མ་ཡིན། །དེ་བས་ཆུ་དང་འོ་མ་ནི། །ཆུ་སྦུབས་ལས་ནི་སྦྱིན་མི་བྱ། །ཆུ་དང་འོ་མ་དེ་དག་ཀྱང༌། །སྨན་དང་བཅས་པར་བསྐོལ་བ་ནི། །ཆུ་སྤུབས་ལས་ནི་སྦྱིན་མོད་ཀྱི། །ཅི་ནས་གནོད་མི་འགྱུར་བར་བྱ། །གང་ཚེ་ཆང་དང་འོ་མ་ཆུ། །སྤུབས་ལས་བླུད་པའི་ཤུགས་དྲགས་ན། །སྦྱོར་བ་ཉེས་པར་འགྱུར་བའི་རྒྱུས། །མོད་ལ་མང་དུ་ཞུགས་གྱུར་པ། །དེ་ཚེ་ལྕེ་དང་ལྐོག་མའི་སྦུབས། །ཤིན་ཏུ་བཀང་ན་དྲགས་པར་འགྱུར། །དེ་བཞིན་ཤིན་ཏུ་འཐོར་བ་ཡིས། །སྲོལ་གོང་དུ་ཡང་འཇུག་པར་འགྱུར། །དེ་ཡི་གྱེན་རྒྱུའི་རླུང་ལས་ནི། །བྱུང་བའི་ནད་ཀྱིས་ལུས་སྣོད་བྱེད། །དེ་ལས་ལུད་པ་འབྱུང་བ་ན། །ལྐོག་མར་གནས་པས་གནོད་སྐྱེད་བྱེད། །གྱེན་བྱུང་ཤུགས་ཀྱིས་བསྐྱོད་པ་ན། །མགོ་བོར་ཡང་ནི་ཕྱིན་པར་བྱེད། །དེ་ཡིས་མཆི་མ་འཛག་འགྱུར་ཞིང༌། །མགོ་འདེགས་པ་ཡང་དཀའ་བ་ཡིན། །ལྕེ་ནི་ནག་པོར་འགྱུར་བ་དང༌། །ལུད་པ་ལུ་ཞིང་སྐམ་པར་འགྱུར། །མིག་གཉིས་རྣམ་པར་འགྱུར་བ་དང༌། །ས་ལ་འགྲེ་ཞིང་འདར་བར་འགྱུར། །པ་ལ་ཤ་ཡི་མདོག་འདྲ་བའི། །སྣབས་ནི་སྣ་ནས་འཛག་པར་བྱེད། །རྣ་བ་ཆག་ཅིང་ཡིད་མི་བདེ། །ལུས་ནི་རྡུལ་ཞིང་ཞུམ་པར་འགྱུར། །ཆུ་སྦུབས་ལས་ནི་གྱུར་པའི་ནད། །གསོ་བར་ཤིན་ཏུ་དཀའ་བ་ཡིན། །འཆི་བར་འདྲ་བ་ཡིན་ན་ཡང༌། །དེ་ལ་ཕན་འགྱུར་གསོ་དཔྱད་བྱ། །དང་པོར་མར་གྱིས་བསྐུས་ནས་ནི། །ཤིན་ཏུ་བསིལ་བའི་སྨན་ཆུ་བླུགས། །ཏ་ལའི་འདབ་མའི་རླུང་གཡབ་བམ། །གོས་ནི་གཤེར་བས་གཡབ་པར་བྱ། །མར་བསྐུས་ནས་ནི་སྨན་བསིལ་བའི། །ལྡེ་གུའམ་འདམ་གྱིས་བསྐུ་བར་བྱ། །དེ་འཕྲལ་ཚ་དང་དབུགས་མི་བདེ། །རྡུལ་དང་དུ་བ་པ་དང་བྲལ་འགྱུར། །དེ་ནས་དུད་པས་བདུགས་པ་ཡིས། །བཅུད་བདེར་གནས་པར་གྱུར་བྱ་ལ། །ཐང་ཤིང་དང་ནི་སར་ལ། །ཤིང་མངར་དང་ནིག་བུར་དང༌། །བྲི་ཡང་ཀུ་དང་ཙནྡན་དང༌། །དེ་བཞིན་རྟ་ལ་པརྞི་དང༌། །ནཱ་ག་པུཥྤ་སྦོ་ན་ཡང༌། །
དུག་མོ་ཉུང་དང་བྱ་མ་ཀ །ཤྲེ་བེ་ར་དང་སྤང་སྤོས་དང༌། །རྡོ་དྲེག་གླ་སྒང་མ་དུ་ལི། །ཤིང་ཚ་དང་ནི་སྨྱིག་རྐང་དང༌། །ཨིང་གུ་དེའི་ཤུན་གུ་གུལ་དང༌། །ར་སྣ་ག་བྲ་ལྡོང་རོས་དང༌། །པུ་ཤེལ་ཙེ་དང་བ་ལ་ཀ །སྨན་ནི་འདི་རྣམས་ཆ་མཉམ་དུ། །ལེགས་པར་སྦྱར་བར་བྱ་བ་ཡིན། །གཞན་ཡང་དེ་འདྲ་འདུག་པ་ལ། །བསྔགས་པར་གྱུར་པ་རྣམས་ཀྱང་བཏུལ། །རླུང་ལས་གྱུར་བའི་ནད་ལ་ནི། །སྣུམ་དང་སྦྱར་ཏེ་བཏུལ་བར་བྱ། །བད་ཀན་གྱི་ནི་ནད་ཀུན་ལ། །བར་ཏ་ཀི་ཡི་ཁུ་བ་སྦྱར། །ཀ་ར་མར་དང་སྦྱར་བ་ཡིས། །ལྐོག་མ་བདེ་བའི་སྨན་ཡང་སྦྱིན། །སྦུ་གུ་མོད་ལ་ཁོང་སྟོང་ལས། །ཆ་གཉིས་པ་ནི་ཆེ་ཚད་ཡིན། །བཞི་ཆས་ཕྲི་བ་བར་མ་སྟེ། །ཕྱེད་ཕྲི་བ་ནི་ཐ་མ་ཡིན། །དེ་ནས་རྫ་བུམ་བླངས་ནས་ནི། །དེར་ནི་མེ་མདག་གཞུག་པར་བྱ། །ཁ་བཀག་པ་ཡི་དབུས་སུ་ནི། །སོར་གཅིག་པ་ཡི་བུ་ག་གདོད། །སྦུ་གུའི་བུ་ག་མཉམ་བྱས་ལ། །སྦུ་གུ་བུམ་པའི་བུ་གར་སྦྱར། །ངོས་ལ་བུ་ག་ཕྲ་གཏད་དེ། །དེ་ལས་དེ་ནི་བུད་པར་བྱ། །འདབ་མ་དེར་ནི་བདུག་པ་དེ། །བཅུག་ལ་དུད་པ་བདུག་ཏུ་གཞུག །སྨན་པ་མཆོག་གིས་དུ་བ་ནི། །ལེགས་པར་དེ་ལ་བདུག་པར་བྱ། །དུད་པ་བདུག་པའི་ཆེ་ཚད་ཡིན། །གྲངས་བརྒྱའི་བར་དུ་གཏུལ་བ་ཡིན། །བར་མ་བཞི་པས་ཕྲི་བ་སྟེ། །ཕྱེད་ཕྲི་བ་ནི་ཆུང་ཚད་ཡིན། །རྨ་ལམ་དུད་པས་བདུགས་གྱུར་ན། །ནད་སེལ་བར་ནི་འགྱུར་བ་ཡིན། །གང་ཚེ་སྣ་ནས་ལྗན་ལྗིན་ནི། །སྦྱིན་བག་མང་པོ་འཛག་འགྱུར་ཞིང༌། སྒྲ་ནི་འབྱིན་པར་ནུས་འགྱུར་བ། །སྦྱང་པ་ལེགས་པར་ཤེས་པར་བྱ། །དུ་བས་མགོར་སོང་ནད་དང་ནི། །རྐན་དང་ལྐོག་མར་གནས་པ་ཡང༌། །སེལ་ཅིང་བུ་ག་བད་ཀན་གྱིས། །ཁེངས་པའང་སྦྱོང་བར་བྱེད་པ་ཡིན། །རླུང་ནི་བདེ་བར་རྒྱུ་བྱེད་ཅིང༌། །སོ་ཡི་སྟོབས་ཀྱང་འཕེལ་བར་བྱེད། །དབང་པོ་རྣམས་དང་ལུས་ཟུངས་དག །དངས་ཤིང་སྐྱོན་མེད་བྱེད་པ་ཡིན། །རླུང་གིས་ཚིལ་ནི་སེལ་བྱེད་ཅིང༌། །སེམས་གསལ་ཡི་ག་འབྱེད་པར་བྱེད། །ལྷོད་པ་རྣམས་ནི་དམ་བྱེད་ཅིང༌། །གྱོང་བ་མཉེན་པར་བྱེད་པའང་ཡིན། །གསེབ་དང་ལམ་རིངས་ནས་འོངས་
དང། །ཤིན་ཏུ་རྒན་དང་སྐོམ་གྱིས་ཉེན། །ཟས་རྩུབ་ཟོས་དང་ཡོངས་སུ་དུ་བ། །ཁྲག་དང་མཁྲིས་པ་ན་པ་དང༌། །ཆུ་ཡིད་ཆུ་རྫིང་ཅན་དང་བརྟགས། །སྣུམ་བཏང་བ་དང་དུག་ཟོས་དང༌། །སྦེགས་དང་འཇིགས་པས་ཉེན་པ་དང༌། །ཆང་འཐུངས་བ་དང་ཉམ་ཆུང་དང༌། །འོ་མ་འཐུངས་པར་གྱུར་པ་ཡི། །རྟ་ལ་ནམ་ཡང་དུད་མི་བདུག །ལྐོག་ནད་ནམ་འཚང་ཡན་ཆད་ནད། །ལུད་པ་རྣམས་ཀྱི་ནད་རྣམས་དང༌། །སྐྱི་གས་བུ་མགོ་བོའི་ནད་རྣམས་དང༌། །ཆུ་སྦུབས་ལས་གྱུར་ནད་རྣམས་དང༌། །བད་ཀན་ལས་གྱུར་ནད་དང་ནི། །དེ་བཞིན་རླུང་གི་ནད་རྣམས་དང༌། །པུས་ཚིགས་ན་བ་རྣམས་ལ་ཡང༌། །དུད་པས་བདུགས་པ་བསྔགས་པ་ཡིན། །རྟ་ཡིས་ཁ་ཟས་ཟོས་གྱུར་ཅིང༌། །བསིལ་བར་གནས་ལ་དུད་པ་བཏང༌། །དུད་པས་ནད་ནི་བསལ་བ་དང༌། །སྨན་པས་རླུང་འཇོམས་ཁ་ཟས་སྦྱིན། །འབྲས་ཆན་སྦྲང་རྩི་དང་སྦྱར་ཅིང༌། །འོ་མ་བཅའ་སྒ་བཏབ་པ་སྦྱིན། །པི་ཙུ་མར་དའི་ཁུ་བ་དང༌། །བསྐོལ་བའི་མུངྒ་ཉིད་སྦྱིན་ཅིང༌། །དེ་ལ་རྩ་ཡི་དོན་དུ་ནི། །དཱུར་བ་ཉེ་བར་སྦྱིན་པར་བྱ། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་ཅེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གྲུབ་པའི་གནས་ཏེ་བདུན་པ་ལས་སྦུབས་ལས་གྱུར་པའི་ནད་གསོ་བའི་ལེའུའོ། །གྲུབ་པའི་གནས་ཞེས་བྱ་བ་གནས་བདུན་པ་རྫོགས་སོ།། །།རིག་བྱེད་རིག་བྱེད་ཡན་ལག་མཁས། །སྙིང་སྟོབས་ལྡན་ཞིང་དབང་པོ་ཐུལ། །གསོ་དང་རིག་པའི་ལས་ལ་མཁས། །རྟ་ཡི་བསྟན་བཅོས་ཕ་མཐར་ཕྱིན། །ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡོངས་དྲིས་པ། །རྟ་ནི་འཆི་བར་འདོད་གྱུར་པ། །ནང་དང་བཅས་པར་གནས་གྱུར་ཅིང༌། །སུམ་ཅུ་རྩ་གཉིས་པར་དག་གི །མཚན་ཉིད་ལེགས་ལྡན་ལས་རྟོགས་འཚལ། །འདི་ནི་ན་ཚོད་གང་གི་ཚེ། །ནད་ནི་གང་དང་གང་དག་གིས། །རྟ་ནི་འཆི་བ་ཉིད་འགྱུར་པའི། །མཚན་ཉིད་དེ་ནི་བདག་ལ་གསུངས། །དེ་ནས་ཤ་ལི་ཧོ་ཏྲ་ཡིས། །ལེགས་ཐོས་དྲིས་དོན་སླར་སྨྲས་པ། །རྟ་ཡི་ངེས་པ་འཆི་འགྱུར་རྟགས། །ཤ་ཡི་མིག་ཅན་གྱིས་ཤེས་དཀའ། །
རིམ་གྱིས་བརྒྱུད་དེ་ཤེས་གྱུར་པ། །བཤད་ཀྱིས་མཉན་ཏེ་བཟུང་བར་གྱིས། །མཆུ་ལྟག་སོར་ནི་བཞི་པ་ལ། །དེ་ནི་རི་མོ་བརྟག་བྱས་ཏེ། །ཁྱད་པར་རྣམ་པ་སྣ་ཚོགས་པ། །དེ་ལ་འཆི་བར་ཤེས་པར་བྱ། །མི་ཡི་ལག་པ་དང་འདྲ་བར། །རྟ་རྣམས་ཀྱི་ནི་མཆུ་ལྟག་བརྟག །གང་ལ་ཚེ་ནི་ཡོད་གྱུར་པ། །དེ་ཉིད་བཤད་ཀྱིས་མཉན་པར་གྱིས། །མཆུ་ལྟག་དབུས་མར་རི་མོ་ནི། །གྱེན་དུ་སོར་གཅིག་གང་ལ་ཡོད། །དེ་ནི་ལོ་གཅིག་ཉིད་ལ་ནི། །ཁ་ནད་ཀྱིས་ནི་འཆི་བར་འགྱུར། །དེ་འདྲ་བ་ཡི་རི་མོ་གཉིས། སོར་གཉིས་པར་ནི་སྣང་གྱུར་ན། །རྟ་དེ་ཉིད་ནི་ལོ་གཉིས་ན། །ལྕེ་རེངས་ཀྱིས་ནི་འཆི་བར་འགྱུར། །འདི་འདྲ་བ་ཡི་རི་མོ་གཉིས། །མཆུ་ལྟག་ཏུ་ནི་འཕྲེད་དུ་སྣང༌། །ལོ་གསུམ་ནས་ནི་འགྲམ་ནད་ཀྱིས། །དེ་ནི་འཆི་བར་འགྱུར་བ་ཡིན། །འདི་འདྲའི་རི་མོ་དབུས་ན་དམའ། །རྟ་གང་ལ་ནི་ཡོད་གྱུར་པ། །རྟ་དེ་ལོ་བཞི་ལོན་པ་ན། །འགྲམ་ལྐོག་ནད་ཀྱིས་འཆི་བར་འགྱུར། །གང་གི་གཡོན་ན་རི་མོ་ནི། །རྩེ་མོ་ཡོན་པོ་སོར་གཉིས་ཡོད། །རྟ་དེ་ཉིད་ནི་ལོ་ལྔ་ནས། །རི་དགས་གླལ་གྱི་ནད་ཀྱིས་འཆི། །མཆུ་ལྟག་དབུས་ན་རི་མོ་ནི། །སོར་གཉིས་ཚད་ནི་ཡོན་པོ་ཡོད། །གང་ཡིན་དེ་ནི་ལོ་དྲུག་ནས། །ཨ་བ་ར་གའི་ནད་ཀྱིས་འཆི། །གང་གིས་རི་མོ་འདི་འདྲ་བ། །སོར་ཕྱེད་ཁར་ནི་ཆུད་གྱུར་པ། །རྟ་དེ་ལོ་ནི་བདུན་ཉིད་ན། །གྲི་ཤིའི་ནད་ཀྱིས་གདུངས་ནས་འཆི། །རི་མོ་དེ་འདྲ་སོར་གསུམ་པ། །རྟ་ནི་གང་ལ་སྣང་གྱུར་པ། །རྟ་དེ་ལོ་བརྒྱད་ལོན་ནས་ནི། །རིམ་གྱིས་ཉེ་བར་འཆི་བར་འགྱུར། །གང་གི་རི་མོ་འདི་འདྲ་ལས། །དབུས་ན་ནས་འདྲ་སྦོམ་པོ་ཡོད། །རྟ་དེ་ཉིད་ནི་ལོ་དགུ་ན། །རླུང་གི་གཟེར་གྱིས་སྲོག་ཟད་འགྱུར། །རི་མོ་མཆུ་ལྟག་དང་མཉམ་པ། །གྱེན་དུ་བྱུང་བ་དབུས་ན་གནས། །རྟ་དེ་ལོ་ནི་བཅུ་པ་ན། །སྐེ་རེངས་ཀྱིས་ནི་བརླག་པར་འགྱུར། །གང་ལ་རི་མོ་འདི་འདྲ་གཉིས། །མཆུ་ལྟག་དབུས་ན་གནས་གྱུར་པ། །ལོ་ནི་བཅུ་གཅིག་ལོན་པ་ན། །རླུང་འཁྱིལ་ནད་ཀྱིས་སྲོག་ཟད་འགྱུར། །གང་ལ་དེ་ནི་སོར་གཉིས་ལས། །བཅུད་
ཆེ་བ་ཡི་རི་མོ་ཡོད། །རྟ་དེ་ལོ་ནི་བཅུ་གཉིས་ན། །གྱེན་དུ་ལོག་པའི་རླུང་གིས་གསོད། །རི་མོ་ཆུར་ནི་སོར་ཕྱེད་པ། །སྦོམ་པོ་ནས་དང་འདྲ་བ་ཡོད། །རྟ་དེ་ལོ་ནི་བཅུ་གསུམ་ན། །དབུགས་མི་བདེ་བའི་ནད་ཀྱིས་འཆི། །སྟེང་དང་ཐད་ཀར་རི་མོ་ནི། །མཆུ་ལྟག་དབུས་ན་གཉིས་གཉིས་ཡོད། །ཡང་ན་བྱ་རོག་རྗེས་འདྲ་བ། །གཉིས་ནི་རྟ་གང་ལ་ཡོད་པ། །རྟ་ནི་ལོ་ནི་བཅུ་བཞིན། །འབྱུང་བའི་ནད་ཀྱིས་དུས་བྱེད་འགྱུར། །དེ་ཡི་བདག་པོའི་ནོར་དང་འབྲུ། །ཉམས་པར་བྱེད་པ་ཉིད་དུ་འགྱུར། །གང་གི་རི་མོ་རིམ་ཙམ་ནི། །གྱེན་དུ་འགྲེང་ཞིང་དབྱིབས་ལེགས་ལ། །དྲང་ཞིང་གསལ་བར་གྱུར་པ་དང༌། །བལྟ་ན་སྡུག་ཅིང་ཡིད་འོང་པ། །གང་གི་མཆུ་ལྟག་དབུས་ན་ཡོད། །དེ་ནི་གང་གི་ཁྱིམ་ན་འདུག །མྱུར་དུ་རྒྱལ་པོ་ཉིད་འགྱུར་ཞིང༌། །དྲིན་སྐྱབས་ནོར་དང་འབྲུ་འཕེལ་འགྱུར། །རྟ་དེ་གང་ན་གནས་གྱུར་དེ། །གྲོང་ཁྱེར་རྒྱལ་སྲིད་འཕེལ་བར་འགྱུར། །དེ་འདྲའི་རྟ་ནི་རྙེད་གྱུར་ན། །མཆོད་ཅིང་ཡོངས་སུ་བསྐྱང་བར་བྱ། །དེ་ནི་དེ་འདྲས་ལོ་བཅོ་ལྔ། །བདེ་བ་ཁོ་ནར་སོན་ནས་ནི། །རྟ་རྫི་ཡིས་ནི་སྣང་བྱས་པ། །དེ་རྗེས་སྲོག་ནི་འདོར་བར་འགྱུར། །གང་ལ་མཆུ་ལྟག་རི་མོ་ནི། །འདི་འདྲ་དཀར་པོར་སྣང་གྱུར་པ། །དེ་ཡང་ལོ་ནི་བཅོ་ལྔ་ན། །བ་ལ་ཤ་ཡི་ནད་ཀྱིས་འཆི། །གང་གི་མཆུ་ལྟག་དབུས་ན་ནི། །རི་མོ་སོར་ནི་གསུམ་པ་ཡོད། །དེ་ནི་ལོ་ནི་བཅུ་དྲུག་ན། །ལོ་ལོགས་ནས་ནི་འཆི་བར་འགྱུར། །དེ་ལྟ་བུ་ཡི་རྟ་དེ་ནི། །བདག་པོ་མཛའ་བོའི་ནོར་འཕེལ་འགྱུར། །གང་ལ་དེ་འདྲའི་རི་མོ་ནི། །མཉམ་པོ་གསུམ་ནི་མཆུ་ལྟག་ནས། །དེ་ཡང་ལོ་ནི་བཅུ་དྲུག་ན། །རླིག་སྐྲངས་ཀྱིས་ནི་དུས་བྱེད་འགྱུར། །དེ་ལྟ་བུ་ཡི་རྟ་དེ་ནི། །རྟག་ཏུ་བདག་པོའི་དོན་སྒྲུབ་འགྱུར། །བུ་མང་བར་ནི་འགྱུར་བ་དང༌། །རྟ་ནི་ཕོ་མོ་འཕེལ་བར་འགྱུར། །སྟེང་གི་ཆར་གཉིས་འོག་ཁར་གཉིས། །རི་མོ་རྟ་ནི་གང་ལ་སྣང༌། །དེ་ནི་ལོ་ནི་བཅུ་བདུན་ན། །མཚོན་གྱིས་འཆི་བ་ཐོབ་པར་འགྱུར། །དེ་ལྟ་བུ་ཡི་རི་མོ་ནི། །གྱེན་དུ་ལྟ་བ་གང་ལ་ཡོད། །རྟ་དེ་ལོ་ནི་བཅོ་བརྒྱད་ན། །ཁྲག་ནད་ཀྱིས་ནི་སྲོག་ཟད་འགྱུར། །
རི་མོ་གྱེན་དུ་ལྟ་ཞིང་མཉམ། །སྣུམ་པ་བཞི་ནི་གང་ལ་ཡོད། །རྟ་དེ་ལོ་ནི་བཅུ་དགུ་ན། །གཅིན་འགག་པ་ཡིས་དུས་བྱེད་འགྱུར། །རི་མོ་ཉམས་ཤིང་རིང་བ་ལྔ། །གང་གི་མཆུ་ལྟག་མཉམ་ཡོད་པ། །དེ་ཡང་ལོ་ནི་ཉི་ཤུ་ན། །མགོ་ནད་ཀྱིས་ནི་འཆི་བར་འགྱུར། །གང་ལ་རྟ་ཕྱིས་འོན་ཏེ་ནད། །འདྲ་ཡོད་དེ་ནི་གསེབ་ཀྱི་མཆོག །ལོ་ནི་ཉི་ཤུ་རྩ་གཅིག་ན། །ཁ་ནད་ཀྱིས་ནི་འཆི་བར་འགྱུར། །གང་གི་མཆུ་ལྟག་རི་མོ་ནི། །བཅུད་གུག་པ་ནི་ཡོད་གྱུར་པ། །དེ་ནི་ཉི་ཤུ་རྩ་གཉིས་ན། །སྨད་ནད་ཀྱིས་ནི་འཆི་བར་འགྱུར། །མཆུ་ལྟག་ལྕགས་ཀྱུ་འདྲས་བརྒྱན་པ། །རྒྱལ་པོ་ལ་གཅེས་དཔལ་ཡོན་ཅན། །ལོ་ནི་ཉི་ཤུ་རྩ་གསུམ་ན། །བྲང་ཚ་བ་ཡིས་འཆི་བར་འགྱུར། །རུས་སྦལ་ཆུ་སྲིན་འདྲ་གང་ཡོད། །དེ་ཡང་རྒྱལ་པོའི་རྗེས་མཐུན་ཡིན། །ལོ་ནི་ཉི་ཤུ་རྩ་བཞི་ན། །རྣ་བའི་ནད་ཀྱིས་འཆི་བར་འགྱུར། །རྟ་ནི་གང་གི་མཆུ་ལྟག་ན། །པདྨའམ་ཨུཏྤལ་འདྲ་ཡོད་པ། །བདག་པོའི་ནོར་ནི་རྟག་ཏུ་བསྐྱེད། །ལོ་ལེགས་པར་ཡང་བྱེད་པ་ཡིན། །ལོ་ནི་ཉི་ཤུ་རྩ་ལྔ་ན། །གཞོང་འདྲའི་ནད་ཀྱིས་དུས་བྱེད་འགྱུར། །དེ་ནི་ཐ་སྐར་བཅས་ཡོད་པ། །བདག་པོའི་ནོར་དང་བུད་མེད་བསྐྱེད། །ལོ་ནི་ཉི་ཤུ་རྩ་དྲུག་ན། །སྣུམ་ནད་ཀྱིས་ནི་འཆི་བར་འགྱུར། །བ་དན་བཅས་པ་གང་ལ་ཡོད། །བདག་པོ་བསྟེན་ན་ནོར་སྟེར་འགྱུར། །ལོ་ནི་ཉི་ཤུ་རྩ་བདུན་ལ། །སྦྲུལ་གྱིས་བཟུང་སྟེ་འཆི་བར་འགྱུར། །གང་ལ་མཆོད་སྡོང་འདྲ་རིས་ཡོད། །བདག་པོ་མཆོད་སྦྱིན་གྱིས་འབྱོར་འགྱུར། །ལོ་ནི་ཉི་ཤུ་རྩ་བརྒྱད་ན། །གཟེར་ནད་ཀྱིས་ནི་འཆི་བར་འགྱུར། །གང་ལ་རི་མོ་བླུགས་གཟར་འདྲ། །མཆུ་ལྟག་དབུས་ན་ཉེ་བར་སྐྱེས། །དེ་ཡི་བདག་པོ་མཆོད་སྦྱིན་བྱེད། །སྦྱིན་གཏོང་རྟག་ཏུ་འགྱེད་པར་འགྱུར། །ལོ་ནི་ཉི་ཤུ་རྩ་དགུ་ན། །མགོ་ནད་ཀྱིས་ནི་དུས་བྱེད་འགྱུར། །གཡུང་དྲུང་རིས་དང་རིན་ཆེན་འདྲ། །དཔལ་གྱི་ཤིང་ངམ་ལྷ་ཡི་ཤིང༌། །དགའ་བ་འཁྱིལ་པའམ་ཕྲེང་བ་འདྲ། །གང་གི་མཆུ་ལྟག་ཉིད་ན་སྣང༌། །རྟ་མཆོག་དེ་ནི་བདག་པོ་ཡི། །དཔལ་ནི་མཆོག་ཏུ་འཕེལ་བར་བྱེད། །བུ་དང་ཚ་བོ་
འཕེལ་བར་བྱེད། །བདེ་བར་རྣམ་པར་རྒྱལ་བར་བྱེད། །གང་ལ་འདི་འདྲའི་རྟ་ཡོད་པ། །རྒྱལ་པོ་དེ་ནི་རྣམ་རྒྱལ་འགྱུར། །བདག་པོ་ཚིམ་ཞིང་བདེ་བ་དང༌། །ནོར་རྙེད་པ་ནི་ཚིམ་བྱས་ནས། །དེ་ནི་ལོ་ནི་སུམ་ཅུ་ན། །ཁོང་བའི་སྲིན་བུའི་ནད་ཀྱིས་འཆི། །འཁོར་ལོའམ་རྡོ་རྗེ་ལྟ་བུའི་དབྱིབས། །རྟ་གང་གི་ནི་མཆུ་ལྟག་གནས། །རྟ་དེ་རྒྱལ་པོའི་བཞོན་པར་འགྱུར། །བདག་པོ་རྟག་ཏུ་བདེ་སྐྱིད་བྱེད། །རྒྱལ་པོས་དེ་ནི་བཞོན་གྱུར་ན། །དགྲ་ཡི་ཚོགས་ནི་ཀུན་ལས་རྒྱལ། །རྟ་དེ་སུམ་ཅུ་རྩ་གཅིག་ན། །ནད་མེད་པར་ནི་འཆི་བར་འགྱུར། །གང་ལ་མཆུ་ལྟག་དབུས་ན་ནི། །ཟླ་བ་ཁམ་པའི་ཉི་འདྲ་ཡོད། །རྒྱལ་པོ་གང་ལའང་འདི་འདྲ་ཡི། །རྟ་ཡོད་དེ་ནི་འབྱོར་ཆེན་ཡིན། །ལོ་ནི་སུམ་ཅུ་རྩ་གཉིས་ན། །བདེ་བར་འདུག་བཞིན་དུས་བྱེད་འགྱུར། །གལ་ཏེ་རི་མོ་རྩུབ་བམ་ཆད། །དུམ་བུའམ་ཡོན་པོ་ཡོད་གྱུར་ན། །དེ་ནི་བསྔགས་པ་མ་ཡིན་གྱི། །དྲང་ཞིང་མདངས་སྣུམ་བསྔགས་པ་ཡིན། །དེ་ལྟར་ཚེ་ནི་ཤེས་བྱ་བ། །ང་ཡིས་ཁྱོད་ལ་བཤད་པ་ཡིན། །དེ་དག་ཤེས་ཀྱང་བརྗོད་མི་བྱ། །བརྗོད་ན་ཉེས་པར་འགྱུར་བ་མི་ཡིན། །ཉོ་བ་དང་ནི་འཚོང་བ་དང༌། །གསོ་དཔྱད་ཚེ་ཡང་བརྗོད་མི་བྱ། །ཤ་ལི་ཧོ་ཏྲའི་མདོའི་གསང་བའི་གནས་བརྒྱད་པ་ལས། །རི་མོ་ལས་ན་ཚོད་དང་ཚེ་བརྟག་པའི་ལེའུའོ།། །།ནད་ནི་ཤིན་ཏུ་མི་བཟད་པས། །རྟ་རྣམས་ཟད་པར་གྱུར་པ་ན། །གཞི་ནས་བརླག་པར་འགྱུར་བ་ཡིས། །བཞོན་པའི་བདེ་ལས་ཉམས་པར་འགྱུར། །དེ་ཚེ་རྒྱལ་པོ་སྐམ་པོ་རྩྭ། །གན་ད་ར་དང་མ་ཏྲ་ཀ །སིན་དུ་སོ་བིར་དང་ནི། །ལྷོ་ཕྱོགས་པ་ཡི་གཙོ་བོ་སོགས། །རྒྱལ་པོ་དང་ནི་གླིང་བར་པའི། །མི་རྣམས་གང་དག་ཡིན་པ་དང༌། །ཡུལ་གྱི་སྐྱེ་བོ་ཐམས་ཅད་ཀྱང༌། །རྟ་ཡི་འཆི་བའི་འཇིགས་པས་ཉེན། །ཤ་ལི་ཧོ་ཏྲ་དྲང་སྲོང་ཆེ། །དེ་ཡི་གནས་སུ་ཉེ་བར་ལྷགས། །ཉི་མ་ལྟ་བུའི་གཟི་བརྗིད་ཅན། །དེ་ལ་དུལ་བས་ཕྱག་བྱས་ནས། །རྟ་ཡི་ཚུལ་ལ་བརྟེན་ནས་ནི། །ཐམས་ཅད་ཀྱིས་ནི་དྲིས་པ་ལ།།
སྣ་ཚོགས་ནད་ཀྱིས་ཉེན་གྱུར་པ། །རྟ་རྣམས་ཤིན་ཏུ་མ་རུང་འགྱུར། །སྲོག་དང་བྲལ་གྱུར་ཉེ་བ་ན། །དེ་རྣམས་ཀྱི་ནི་སྐྱབས་ཁྱེད་ལགས། །ཁྱེད་ནི་རྟ་ཡི་དེ་ཉིད་མཁྱེན། །ཅི་ནས་དེ་དག་འཚོ་གྱུར་པ། །དེ་དག་ཁྱེད་ཀྱིས་བསྟན་པར་མཛོད། །དེ་ནས་ཤ་ལི་ཧོ་ཏྲ་ཡིས། །མི་དབང་འཁོར་བཅས་ལ་སྨྲས་པ། །སེམས་ནི་སྡུག་བསྔལ་གྱིས་གདུངས་ཤིང༌། །འཇིག་རྟེན་འདི་ནས་ལོ་གནས་ནི། །འཇིག་རྟེན་གཞན་དུ་འགྲོ་གྱུར་པ། །སྲོག་སྦྱིན་པ་ཡི་ཐབས་མེད་དོ། །དེ་ཡི་སྲོག་ནི་ཤེས་བྱ་དང༌། །འཆི་འདོད་པ་ནི་ཤེས་བྱ་དག །ཤེས་ལ་གོམས་པའི་མིག་ལྡན་ལས། །སྨན་པ་ཡིས་ནི་ཤེས་པར་བྱ། །བློ་མེད་བསྟན་བཅོས་མི་ཤེས་པས། །གསོ་བར་ནུས་པ་མ་ཡིན་ནོ། །གང་ཞིག་དུས་ལ་བབ་གྱུར་པ། །དེ་ལ་སྨན་པར་བྱར་མེད་དེ། །སེམས་ཅན་ཀུན་ལ་འཆི་བ་ནི། །བཅོས་སུ་མེད་པ་མདུན་ན་བསྟོད། །སེམས་ཅན་ཀུན་གྱི་དུས་མིན་འཆི། །ནད་ལས་བྱུང་བར་གྱུར་པ་ནི། །སྨན་དང་སྦྱོར་བ་རྣམས་དང་ནི། །སྔགས་རྣམས་ཀྱིས་ཀྱང་བཟློག་པར་བྱ། །གང་ཞིག་སྔོན་གྱི་ལས་ཀྱིས་ནི། །ཚེ་ནི་ངེས་པར་ཟད་གྱུར་པ། །དེ་ལ་ལྷ་སོགས་བཅས་པས་ཀྱང༌། །བཟློག་པར་ནུས་པ་མ་ཡིན་ནོ། །སྡུག་བསྔལ་ཚོར་བ་བཟློག་པ་དང༌། །ནད་རྣམས་བསལ་བར་བྱ་བ་ལ། །ཚེ་ཡི་རིག་བྱེད་ཡན་ལག་བརྒྱད། །རྟག་ཏུ་ནུས་དང་ལྡན་པར་བཤད། །ནད་རྣམས་ཞི་བར་བྱེད་པ་དང༌། །དེ་བཞིན་ཚོར་བ་གསལ་གྱུར་པ། །འདི་དག་སྨན་པའི་ལས་ཡིན་གྱི། །ཚེ་ཡི་བདག་པོ་སྨན་པ་ཡིན། །འཆི་ལྟས་ཀྱིས་ནི་ཟིལ་གནོན་པ། །འཆི་བར་འགྱུར་གྱིས་སྲོག་ཡོད་མིན། །འཆི་ལྟས་མེད་པར་གྱུར་ན་ནི། །དེ་ལ་འཆི་བ་ཡོད་མ་ཡིན། །གང་ཚེ་དུས་ལ་བབ་པ་ན། །དེ་ཚེ་འཆི་ལྟས་མང་དུ་འབྱུང༌། །དུས་ནི་གོ་བཟློག་གྱུར་པ་དང༌། །རྒྱལ་པོའི་སྐྱེས་སྐར་མི་འཕྲོད་དང༌། །སྔོན་གྱི་ལས་ཀྱི་ཉེས་པའམ། །དེ་བཞིན་རྒྱལ་པོའི་སྡིག་སྤྱོད་ལས། །ལོག་པར་སྤྱོད་པར་གྱུར་པ་ལས། །ལྟོས་ནས་མང་དུ་འབྱུང་བར་འགྱུར། །འཆི་ལྟས་ཀྱི་ནི་མཚན་ཉིད་དང༌།
ནད་ནི་སྣ་ཚོགས་དེ་ལས་འབྱུང༌། །མི་བཟད་ཚུལ་ཅན་དུ་མ་ནི། །སྲོག་ནི་འཇིག་པར་བྱེད་པ་འབྱུང༌། །དེ་ཚེ་གསོ་བ་སྔགས་བཅས་པས། །དོན་ནི་ཅི་བཞིན་བྱེད་མི་ནུས། །སྨན་རྣམས་ཀྱིས་ཀྱང་ནད་ཀྱི་ཚོགས། །ལེགས་པར་སེལ་བར་བྱེད་མི་ནུས། །དེ་ཚེ་ལྷ་ཚོགས་མཆོད་པ་དང༌། །སྡོམ་པ་གནས་དང་ཞི་བའི་ལས། །སྔགས་དང་སྦྱིན་སྲེག་ག་ཏོར་མ་ཡིས། །ནད་ཀྱི་ཚོགས་རྣམས་ཞི་བར་བྱ། །ཡམས་ཀྱི་ནད་ནི་ཞི་བྱའི་ཕྱིར། །སྔར་བཤད་པ་ཡི་ཞི་བའི་ལས། །བྱས་པས་སྲུང་ཞིང་འཚོ་བ་བསལ། །དེས་ནི་སྣ་ཚོགས་ནད་གཞི་འགྱུར། །སྨན་པས་གང་ཞིག་མཐོང་གྱུར་ན། །རྟ་ནི་ངེས་པར་བརླུག་འགྱུར་པའི། །ཚེ་ཟད་པ་ཡི་རྟགས་དང་ནི། །མཚན་མ་ཡང་དག་བཤད་པར་བྱ། །ནད་ནི་མི་བཟད་ཀྱིས་ཉེན་ཅིང༌། །སྲོག་དང་འབྲལ་བར་འགྱུར་བ་ན། །མཚན་མ་གང་ཞིག་སྣང་གྱུར་པ། །དེ་འདི་ང་ལས་ཤེས་པར་གྱིས། །གང་ཞིག་སྐེ་བསྡམས་ལུད་པ་ལུ། །ཁ་ཆུ་དང་ནི་མཆི་མ་འཛག །དཀུ་ནི་སྟོང་བར་སྣང་གྱུར་བ། །ནད་དེའི་མཚན་མ་ངན་པ་ཡིན། །གང་གི་ལུས་ཀུན་སྐྲངས་པ་དང༌། །རྨེན་བུ་མང་པོ་འབྱུང་བ་དང༌། །གས་ཤིང་འཛག་པར་བྱེད་པ་དང༌། །དེ་ལ་དྲི་བ་འབྱུང་འགྱུར་ཏེ། །བྱ་རྒོད་ཚང་གི་རིང་འབྱུང་བ། །དེ་ནི་ཅི་ནས་འཚོ་མི་འགྱུར། །རྔ་མ་གཡབ་བར་མི་བྱེད་ཅིང༌། །སོ་ཡང་ཀྲིག་ཀྲིག་འཆའ་བར་བྱེད། །སེམས་རྨུགས་ཤིན་ཏུ་ཡིད་མི་བདེ། །མགོ་ཡང་ཕྲུག་པར་བྱེད་མི་ནུས། །མཚན་དང་ལྟོ་བ་སྐྲངས་གྱུར་བ། །རྟ་དེ་འཚོ་བར་མི་འགྱུར་རོ། །རྣ་བ་ཆག་ཅིང་ཟས་མི་ཟ། །བཞིན་རས་ངན་ཅིང་རྔ་མ་འབྱི། །འདར་དང་མགོ་འཁོར་གྱིས་ཉེན་པ། །སྐད་མི་འབྱིན་ཅིང་འདུག་མི་ཚུགས། །སེམས་ཁོང་ཆུད་ཅིང་མཆི་མས་དཀྲུགས། །ཚེ་ཟད་པར་ནི་ཤེས་པར་བྱ། །ཁ་ནས་ཆུ་སྔོན་འདྲ་བ་ཡི། །ཁ་ཆུ་རྒྱུན་དུ་འཛག་པ་དང༌། །རྟ་སྤངས་རྒྱུན་མི་འཆད་པར་འཁྲུ། །གཅིན་ནི་ཁྲག་དང་འདྲ་བར་འཛག །སྨན་པ་མཁས་པར་གྱུར་པ་ཡིས། །དེ་ནི་འཆི་དང་འདྲར་ཤེས་བྱ། །རྟ་གང་སྒྲ་ནི་མི་ཐོས་དང༌། །གང་ཞིག་མི་འཕྲོད་
ལ་བརྟེན་ལ། །ཁ་ཟས་དང་ནི་བྲལ་གྱུར་པ། །དེ་ཡང་འཆི་བ་འདྲར་ཤེས་བྱ། །ཤིན་ཏུ་འཁྲུ་ཞིང་མི་ཟད་བྱེད། །བརྒྱལ་རེངས་ཡིད་མི་བདེ་དང་ལྡན། །གང་ཞིག་དཀུར་ནི་ལྟ་བྱེད་པ། །དེ་ཡང་སྲོག་ཟད་གྱུར་པ་ཡིན། །གང་ཞིག་རྩ་ནི་མི་ཟ་བར། །རྒྱུན་དུ་སོ་ནི་འཆའ་བྱེད་ལ། །རྐང་པས་ས་ནི་རྐོ་བྱེད་པ། །དེ་ཡང་འཆི་བར་འགྱུར་ཤེས་བྱ། །གང་གི་ཁ་དང་སྣ་ནས་ནི། །ཁྲག་ནི་རབ་ཏུ་འབྱུང་འགྱུར་ཞིང༌། །རྫི་མ་དམར་པོར་སྣང་གྱུར་ལ། །ཉེ་བར་གྱུར་ཀྱང་མཐོང་མི་ནུས། །མིག་ནི་དམར་ཞིང་འཚུབས་པར་བྱེད། །གཅིན་ནི་ཁྲག་འདྲ་འབྱུང་འགྱུར་ལ། །སེམས་ཁོང་ཆུད་པར་གྱུར་པ་དག །དེ་འདྲ་འཚོ་བར་འགྱུར་མ་ཡིན། །གང་གི་མིག་ནི་སེར་གྱུར་ཅིང༌། །འཁྲུལ་པའི་མིག་གིས་ལྟ་བའམ། །རྐང་པ་ལ་ནི་རྟོག་བྱེད་པ། །རྟ་དེ་འང་འཆི་བར་འགྱུར་བ་ཡིན། །གང་གི་མིག་ནི་དམར་གྱུར་ཅིང༌། །དཀར་པོའི་ཆ་ནི་མི་མངོན་ལ། །རབ་ཏུ་གཡོགས་པར་གྱུར་པ་གང༌། །དེ་ཡང་མྱུར་དུ་མ་རུང་འགྱུར། །འགྲོ་བའི་ཚེ་ན་རྣམ་པར་འཁྱོར། །རྐང་པ་འཛུགས་པར་མི་ནུས་ཤིང༌། །འཚེའུ་ཚེ་འཁུམས་པར་བྱེད་པ་དང༌། །གཉེའུ་རེངས་གྱུར་པ་དེ་མི་འཚོ། །རྩིབ་ལོགས་དག་ནི་རེ་རེ་ཡིས། །ཡང་དང་ཡང་དུ་འགྲོ་བྱེད་ཅིང༌། །གསུམ་ཆེ་མཆུ་འཕྱང་ལྕེ་ནག་པ། །འགྲོ་བར་བྱེད་པས་དེ་མི་འཚོ། །འགྲོ་བཞིན་དུ་ནི་ལྕི་བ་དང༌། །དཀུ་ལ་ཡང་དང་ཡང་དུ་ལྟ། །ཁ་ནས་བཏུང་བར་གྱུར་པ་རྣམས། །སྣ་ནས་འབྱུང་བར་བྱེད་པ་དང༌། །མིག་གིས་མཐོང་བར་མི་ནུས་ཤིང༌། །རྣ་བ་དག་ཀྱང་རེངས་གྱུར་པ། །དེ་ནི་འཆི་བ་དང་འདྲ་བས། །སྨན་གྱི་སྦྱོར་བ་མི་བྱའོ། །གང་ཞིག་རླུང་འཁྱིལ་དྲག་ཏུ་སྤོ། །ཡང་དང་ཡང་དུ་དྲག་ཏུ་འཁྲུ། །འཁྲུ་བ་རིང་དུ་འབྱིན་བྱེད་ཅིང༌། །འཁྲུས་ནས་སླར་ཡང་སྤོ་བ་དང༌། །གཅིན་དང་རྟུག་པ་ཟད་གྱུར་ཀྱང༌། །རྩ་ནི་ཟ་བར་མི་བྱེད་པ། །དེ་ཡང་འཆི་བ་དང་འདྲ་བས། །སྨན་གྱི་སྦྱོར་བ་མི་བྱའོ། །གང་གི་རྔོག་མ་མཐོར་གྱུར་ཅིང༌། །དཀུར་ནི་ལྟ་བར་བྱེད་པ་དང༌། །ལྕེ་རྐན་ཁ་དང་མཆུ་གནག་ཅིང༌། །འགྲམ་པ་འཐས་པར་གྱུར་པ་དང༌། །པགས་པ་སྤུ་དང་
ལུས་དྲི་ང༌། །འཇིག་རྟེན་ཕ་རོལ་འགྲོར་ཤེས་བྱ། །ཁའི་ཚོང་འདྲ་མ་ཤ་རུལ་ཕའམ། །མདའ་སྒྲོ་བ་སྲེགས་པ་ལྟ་བུ་ཡི། །རྟ་ནི་གང་ལ་ཡོད་གྱུར་པ། །དེ་ཡང་འཆི་བར་ཤེས་པར་བྱ། །གང་ལ་རྡོ་དང་གཡན་ལ་སོགས། །པགས་ནད་འབྱུང་བར་གྱུར་པ་ན། །པགས་པ་ནག་པོ་ཉིད་འགྱུར་ཞིང༌། །སྤུ་ཡི་ཚོགས་ཀྱང་བྱི་ནས་ནི། །ཆུ་སེར་ཤས་ནི་ཆེ་པ་ཡི། །ཁྲག་ནི་འཛག་པར་བྱེད་གྱུར་པ། །དེ་མཐོང་ནས་ནི་ཟླ་གསུམ་བ་ཅས། །ལྷག་མའི་འཚོ་བར་ཤེས་པར་བྱ། །ལུས་ནི་རྟག་ཏུ་རེངས་བ་དང༌། །ཁ་ནས་ཁ་ཆུའི་རྒྱུན་འཛག་ཅིང། །ཡང་དང་ཡང་དུ་སྒྲ་འབྱིན་པའི། །འཇིག་རྟེན་ཕ་རོལ་པར་ཤེས་བྱ། །རྟ་གང་ཁ་སྐམ་ལྕེ་དང་ནི། །རྐན་དང་མཆུ་ནི་ནག་པོར་འགྱུར། །མི་རོ་ལྟ་བུའི་དྲི་འབྱུང་པ། །དེ་ཡང་རོ་དང་འདྲ་ཤེས་བྱ། །གང་གི་འབྲས་བུ་ལྐོག་མ་ནི། །རབ་སྐྲངས་མགོ་པོའི་ནད་ཀྱིས་བཏབ། །ཁ་ཆུ་མདོག་ནི་དུ་མ་འཛག །དེ་ཡང་འཆི་བ་དང་འདྲར་བཤད། །གང་ཞིག་ལུང་པ་མི་བཟད་ལུ། གང་དུ་གནས་པར་རྣམ་པར་འགྲོ། །དབུགས་མི་བདེ་ཞིང་རྐང་འཛག་པ། །དེ་འདྲ་བ་ཡང་འཚོ་མི་འགྱུར། །ཟད་བྱེད་ནད་ཀྱིས་བཏབ་གྱུར་ཀྱང། །ཡིད་བདེ་ལྟ་བུར་བྱེད་གྱུར་པ། །གང་ལ་མཚན་ཉིད་འདི་ཡོད་པ། །དེ་ཡང་འཆི་བར་ཤེས་པར་བྱ། །མདོག་དང་སྟོབས་དང་སྐད་གསང་ཉམས། །མིག་དང་སྣ་དང་ལུས་སྐྲངས་ཤིང༌། །རྣ་བ་མཇུག་མ་བསྐྱོད་མི་ཤེས། །དེ་ཡང་འཆི་བར་ཤེས་པར་བྱ། །གང་ཞིག་མགོ་དང་དེ་བཞིན་དུ། །རོ་སྟོད་བསྐྱོད་པར་གྱུར་པ་དང༌། །ལུད་པ་ལུ་ཚེ་ཁ་ནས་ནི། །ཁྲག་ནི་འབྱུང་བར་བྱེད་པ་དང༌། །ལུས་སྐྲངས་གཅིན་ནི་དམར་པོ་འབྱུང༌། །དེ་ཡང་རོ་དང་འདྲ་བ་ཡིན། །རྟ་གད་གཅིན་མང་སྣ་ཚོགས་པའི། །མདོག་ཅན་མད་དུ་འབྱུང་འགྱུར་ལ། །རྩྭ་ནི་ཅི་ཡང་མི་ཟ་བ། །དེ་ཡང་རོ་དང་འདྲ་བ་ཡིན། །སྙིང་ག་སྐྲངས་པ་དང་བཅས་པས། །ཤིན་ཏུ་མི་བཟད་ལུད་པ་ལུ། །སྨན་པ་མཁས་པས་མཐོང་གྱུར་ན། །འདི་ནི་མི་འཚོ་ཞེས་བསྟན་བྱ། །རྟ་གང་སྒེ་ནི་ཡང་ཡང་
རྐྱོང། །འདར་ཞིང་མིག་ནི་དམར་བ་དང༌། །ལུས་ལྕི་ཡན་ལག་རེངས་གྱུར་པ། །དེ་ཡང་འཆི་བར་འགྱུར་ཞེས་བྱ། །གང་གི་བུ་གའི་སྒོ་སྐྱ་ཞིང༌། །མཆུ་ལྟག་སྐྲངས་པར་གྱུར་པ་དང༌། །མིག་ནི་ཐུར་དུ་འགེབས་ཤིང་འགྲོ། །སྤུ་ནི་ཤིན་ཏུ་གཤོར་གྱུར་པ། །ཡིད་མི་བདེ་བས་རིང་དུ་འདུག །ཕྲག་སོའི་སྟེང་ནི་སྐམ་པོར་སྣང༌། །གཉེའུ་རེངས་ཀྱིས་ཀྱང་བཏབ་གྱུར་པ། །རྟ་དེའང་འཚོ་བར་འགྱུར་མ་ཡིན། །རྩོལ་བ་ཆུང་ཞིང་ཆུ་ཉུང་འཐུང༌། །ཟས་ཀྱང་ཟ་བར་མི་བྱེད་ཀྱང༌། །རྟ་སྤངས་གཅིན་ནི་མང་གྱུར་པ། །དེ་ཡང་རོ་དང་འདྲ་ཤེས་བྱ། །གང་ཞིག་ཚུལ་ནི་འདི་འདྲ་བའི། །འཆི་ལྟས་སྣང་བར་གྱུར་པ་ན། །དེ་ཡང་ལེགས་པར་སྣང་གྱུར་ན། །གཞན་དུ་འགྱུར་བ་དེ་མ་ཡིན། །ནད་པ་གང་དག་ལུས་འཇམ་ཞིང༌། །མདོག་དང་སྤྱོད་པ་མང་གྱུར་ལ། །མིག་དང་སྤྱོད་པ་སྐྱོན་མེད་སྣང༌། །ཐམས་ཅད་དུ་ཡང་སྤྱོད་པ་ཡང༌། །དྲོ་གྲང་དུས་ནི་ཅི་བཞིན་ཤེས། །གཅིན་རྟུག་གནོད་པ་མེད་པར་འབྱུང༌། །ས་ལ་འགྲེ་བར་གྱུར་ནས་ནི། །སླར་ཡང་ཆུར་འཇུག་པར་མི་བྱེད། །སྨན་གྱི་སྦྱོར་བ་བྱས་པ་ན། །ཕན་དང་གནོད་པའི་ཁྱད་པར་སྣང༌། །དེ་ནི་གསོ་བའི་ལས་རྣམས་ལ། །གྲུབ་པའི་འབྲས་བུ་ཡོད་པ་ཡིན། །དེ་ལྟར་གསོར་རུང་གསོར་མི་རུང༌། །ཤེས་ནས་གསོ་བའི་ལས་རྣམས་བརྩམ། །དེ་ལྟར་ཤེས་ནས་གང་སྤྱོད་པ། །སྨན་པ་དེས་ནི་ལས་གྲུབ་འགྱུར། །གསོ་བའི་བྱ་བ་བྱས་ཀྱང་ནི། །འཆོས་པར་མི་འགྱུར་འཆི་འདོད་པ། །དེ་ལ་སྨན་གྱི་སྦྱོར་བ་ནི། །ཡོན་ཏན་སྐྱེད་པར་འགྱུར་བ་ཡིན། །འཆི་ལྟས་ཀྱི་ནི་མཚན་ཉིད་འདི། །ཡོན་ཏན་མེད་ལ་སྦྱིན་མི་བྱ། །བུ་དང་སློབ་མ་ཡོན་ཏན་གྱི། །སྣོད་ལྡན་རྣམས་ལ་སྦྱིན་པར་བྱ། །འཆི་ལྟས་བྱུང་བ་གསང་བ་ནི། །ནམ་ཡང་སུ་ལའང་བརྗོད་མི་བྱ། །ཤ་ལི་ཧོ་ཏྲའི་གནས་ཏེ་བརྒྱད་པ་ལས་ནད་ཀྱིས་འཆི་ལྟས་བསྟན་པའི་ལེའུའོ།། །།ཤ་ལི་ཧོ་ཏྲ་དྲང་སྲོང་ཆེ། །རྟ་ཡི་ཁང་པ་ལ་དགའ་བ། །ཐོས་ལྡན་བུ་ནི་ལེགས་ཐོས་ཀྱིས། །
ཚིག་ནི་འདི་སྐད་སྨྲས་པར་གྱུར། །ནད་དང་ལྡན་པའི་འཆི་ལྟས་རྣམས། །འདི་དག་ལེགས་པར་ཐོས་ལགས་ན། །ནད་མེད་རྣམས་ཀྱི་འཆི་ལྟས་ཀྱང༌། །གོ་རིམས་བཞིན་དུ་བརྟག་པར་མཛོད། །དེ་སྐད་དྲིས་ཚེ་ལེགས་ལྡན་ནི། །ཤ་ལི་ཧོ་ཏྲས་སླར་སྨྲས་པ། །ནད་མེད་རྣམས་ཀྱི་འཆི་ལྟས་ཀྱང༌། །ལེགས་ཐོས་ཉེ་བར་མཉན་པར་གྱིས། །རྟ་གང་ནད་ནི་མེད་བཞིན་དུ། །ལུས་ཀྱི་ཉམས་ནི་འགྲིབ་པ་དང༌། །ཡིད་མི་བདེ་ཞིང་སེམས་ཁོང་ཆུད། །ཕྱིན་ཅི་ལོག་ཏུ་སྣང་གྱུར་ན། །འཚེར་ཡང་ལོག་པར་འཚེར་བྱེད་ཅིང༌། །ལོག་པ་ཁོ་ནར་མཐོང་བར་བྱེད། །དབུགས་ཀྱང་དེ་འདྲར་སྣང་གྱུར་ཅིང༌། །ལུས་ནི་དེ་ལྟར་མི་སྡུག་འགྱུར། །དེ་མཐོང་ན་ནི་སྨན་པ་ཡི། །འཆི་བར་ངེས་པར་ཤེས་པར་བྱ། །མང་དུ་ཟ་ཡང་ཉོན་མོངས་བྱེད། །ཁ་ཆུ་མང་དུ་འཛག་བྱེད་ལ། །གཅིན་དང་རྟུག་པ་ཉུང་གྱུར་བ། །དེ་ཡང་མྱུར་དུ་བརླག་པར་འགྱུར། །ཉི་མའམ་ཡང་ན་མར་མེའམ། །ཟླ་བའམ་ནི་ཆུ་ནང་དུ། །གང་གི་གྲིབ་མ་མི་མངོན་པ། །ཡང་ན་མུན་པའི་ནང་དུ་ནི། །ཤིན་ཏུ་རིང་ངམ་ཐུང་བར་སྣང༌། །དེ་ཡང་མྱུར་དུ་འཇིག་པར་འགྱུར། །གང་ཞིག་འགྲོ་བར་བྱེད་པ་ན། །གྲིབ་མ་རྒྱབ་ཏུ་ཕྱོགས་གྱུར་པའམ། །ཡང་ན་ཉིས་འགྱུར་སྣང་གྱུར་པ། །རྟ་དེའང་འཆི་བར་འགྱུར་བ་ཡིན། །ཕག་གམ་དེ་བཞིན་རྔ་མོའམ། །ཁྱི་དང་འདྲ་བ་སྣང་གྱུར་ཞིང༌། །མི་སྡུག་རྟ་དང་མི་འདྲ་བའི། །གྲིབ་མ་གང་ལ་སྣང་གྱུར་པ། །དེ་ཡང་ཡུན་རིང་ནད་ཀྱིས་ནི། །འཆི་བར་འགྱུར་བ་ཁོ་ན་ཡིན། །ཤིན་ཏུ་དངས་པའི་ཆུ་ལ་ཡང༌། །གཟུགས་བརྙན་སྣང་བར་མི་འགྱུར་བའི། །སྐྱོན་དང་བཅས་པར་སྣང་གྱུར་པ། །དེ་ཡང་མྱུར་དུ་འཆི་བར་འགྱུར། །གང་གི་མགོ་ནི་སྟོད་སྨད་དག །མི་འདྲ་བར་ནི་སྣང་གྱུར་ལ། །རྩྭ་ཉུང་ཟ་ཞིང་ཆུ་ལ་དགའ། །དེ་ཡང་མྱུར་དུ་སྲོག་འཇིག་འགྱུར། །གང་གི་མིག་ནི་མཆི་མས་ཁེངས། །དེ་བཞིན་དབང་པོ་ལོག་པར་འགྱུར། །གང་གི་ལུས་ནི་ཤིན་ཏུ་ཞུམ། །སྐོམ་གྱིས་གདུངས་པ་ལྟ་བུར་སྣང༌། །སྦྲང་བུ་རྣམས་ནི་འདུས་ནས་ཀྱང༌། །རྒྱུན་དུ་ཚོར་བ་མི་བཟད་སྐྱེད། །
དེ་ལྟ་བུ་ཡི་རྟ་དེ་ནི། །སྲོག་ཟད་པར་ནི་ཤེས་པར་བྱ། །གང་ཞིག་རྣ་བས་མི་ཐོས་ཤིང༌། །དབང་པོ་ཉམས་པར་སྣང་གྱུར་ལ། །རྩྭ་ཡང་ཉུང་དུ་ཟ་བྱེད་པ། །དེ་ཡང་མྱུར་དུ་འཆི་བར་འགྱུར། །གང་གི་རྣ་བ་རེངས་ནས་ནི། །ཤིན་ཏུ་འགྲེང་བར་སྣང་བ་དང༌། །ཡང་དང་ཡང་དུ་འདུག་བྱེད་ཅིང༌། །དྲན་པའང་ཡང་དང་ཡང་དུ་སྟོར། །མིག་ཀྱང་ལིང་ཐོག་དག་གིས་ནི། །ཁེབས་པ་ལྟ་བུར་སྣང་གྱུར་པ། །ཤིན་ཏུ་ལྷོད་པར་སྣང་བ་དང༌། །རྣམ་པར་བསྐྱོད་པར་མི་ཤེས་ལ། །རྙོག་ཅན་ཚད་ནི་ཆེན་པོར་སྣང༌། །དེ་ཡང་མྱུར་དུ་མ་རུངས་འགྱུར། །གང་ཞིག་ཤིན་ཏུ་སྐྲག་པ་ལྟ། །རྒྱས་བསྡུས་འགུགས་པར་སྣང་བ་དང༌། །ལྕེ་ཡང་སྐྲང་ཞིང་རེངས་གྱུར་པ། །དེ་ཡང་མྱུར་དུ་འཆི་བར་འགྱུར། །སྐྲངས་པར་གྱུར་པ་མ་ཡིན་ཡང༌། །ཤིན་ཏུ་སྐྲངས་པར་ལྟར་སྣང་ལ། །རྟ་ནི་གང་ལ་སྣང་བར་གྱུར། །དེ་ནི་ཡུན་རིང་འཚོ་མི་འགྱུར། །གང་ཞིག་པདྨ་དཀར་འདྲ་བས། །མིག་ནི་རྣམ་པར་ཁྱབ་ལྟར་སྣང༌། །རབ་རིབ་ཡོད་ཀྱང་མཐོང་གྱུར་པ། །དེ་ཡང་མྱུར་དུ་འཆི་བར་འགྱུར། །མོད་ལ་སྟོབས་དང་ལྡན་གྱུར་ཞིང༌། །སྤྱོད་པ་ལ་ཡང་ཐག་ཐོགས་མེད། །དེ་ནས་མྱུར་དུ་ལུས་ཞུམ་པ། །དེ་ཡང་མྱུར་དུ་འཆི་བར་འགྱུར། །གང་ཞིག་ཁྲུས་ནི་བྱས་མོད་ལ། །དང་པོ་སྙིང་ག་སྐམས་འགྱུར་ཞིང༌། །ལུས་ཀུན་རློན་པར་གནས་གྱུར་པ། །དེ་ནི་ཟླ་ཕྱེད་ལས་མི་འཚོ། །གསོས་ཀྱང་རྟས་པར་མི་བྱེད་ཀྱི། །འགྲིབ་པ་ཚབ་ཆེར་སྣང་གྱུར་ལ། །སྟོབས་དང་མདོག་ནི་མེད་གྱུར་པ། །དེ་ཡང་ཡུན་རིང་འཚོ་མ་ཡིན། །བྱ་ནི་འཕུར་བར་གྱུར་པ་ན། །ཡུན་རིང་བལྟ་ཞིང་འགྲེང་འདོད་ལ། །དྲན་པ་ཉམས་ཀྱང་དགའ་དགའ་ལྟར། །ཡང་དང་ཡང་དུ་འཚེར་བར་བྱེད། །རྟ་དེ་ཚེ་ནི་ཐུག་ཟོས་པས། །རིང་པོར་ཐུབ་པར་འགྱུར་མ་ཡིན། །བུ་གའི་ཚོགས་རྣམས་སྐམ་གྱུར་ཞིང༌། །བློ་ཡང་ཤིན་ཏུ་འགྲིབ་པར་འགྱུར། །ལུས་ཀྱི་ཁྲག་ཀྱང་འགྲིབ་འགྱུར་ཅིང༌། །སྤྱི་བག་སྤྱོད་ཀྱང་འབྱར་མི་བཏུབ། །ལུས་ལས་དྲི་མི་མི་ཞིམ་འབྱུང༌། །སྐད་གསང་མདོག་ཀྱང་ཉམས་གྱུར་པ། །ལུས་ཀྱིས་ཀྱང་ནི་ཚ་གྲང་དང༌། །འཇམ་
རྩུབ་ཚོར་བར་མ་གྱུར་པའམ། །ཕྱིན་ཅི་ལོག་ཏུ་བྱེད་གྱུར་པ། །རྟ་དེའང་འཆི་བར་འགྱུར་བ་ཡིན། །ཟས་དང་སྤྱོད་ཚུལ་ཐམས་ཅད་ལ། །ཐམས་ཅད་དུ་ནི་འགྱུར་པ་སྟོན། །བློ་དང་ལྡན་པས་དེ་ལྟ་བུ། །སེམས་ཉམས་པར་ནི་ཤེས་པར་བྱ། །མཚན་མར་སྣང་བ་འདི་དག་གིས། །ཉམས་པར་འགྱུར་བར་ཤེས་པར་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནད་མེད་པའི་འཆི་ལྟས་བསྟན་པའི་ལེའུའོ།། །།ཤ་ལི་ཧོ་ཏྲ་དྲང་སྲོང་མཆོག །བསྟན་བཅོས་ཀུན་ལ་འཇིགས་མེད་པ། །ཐོས་ལྡན་བུ་ནི་ལེགས་ཐོས་ཀྱིས། །དུལ་དང་ལྡན་པས་དྲིས་གྱུར་པ། །ཕོ་ཉ་འོངས་དང་ལམ་དང་ནི། །ཁྱིམ་དུ་འཇུག་ཚེ་ཤེས་བྱ་དང༌། །ནད་ལ་མཐོང་བར་གྱུར་པ་དང༌། །ལས་ནི་རྩོམ་པར་གྱུར་པ་ན། །ཤིས་དང་མི་ཤིས་མཚན་ཉིད་དག །འདི་ནི་ལེགས་ལྡན་བསྟན་པའི་རིགས། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །འདི་ནི་རྟ་ཡི་ཕོ་ཉ་ཡི། །མཚན་ཉིད་ང་ཡིས་བཤད་པར་བྱ། །ནད་པའམ་ཞུམ་པའམ་རྟགས་ཅན་ནམ། །ཡང་ན་གོས་ནི་དྲི་མ་ཅན། །སྡང་དང་གདུག་པའི་ལས་ཅན་དག །ཕོ་ཉར་འོངས་པ་མཐོང་གྱུར་ན། །སྨན་པ་མཆོག་གིས་ན་བ་ཡི། །རྟ་དེ་འཆི་བར་ཤེས་པར་བྱ། །ནད་པའི་དོན་དུ་ཕོ་ཉ་ནི། །རྟ་དང་རྔ་མོ་མི་ལ་ནི། །ཞོན་ཏེ་འོངས་པར་མཐོང་གྱུར་ན། །རྟ་དེ་འཆི་བར་ཤེས་པར་བྱ། །ཕོ་ཉར་བུད་མེད་འོངས་པའམ། །མགོ་རེག་སྐྲ་བཅིངས་རལ་བ་ཅན། །གོས་ནི་རྡུལ་ཅན་གྱོན་པའམ། །ཡང་ན་ནག་གམ་རྙོག་ཅན་གྱོན། །མཐོང་ན་སྨན་པས་རྟ་གསོའི་ཕྱིར། །དེར་ནི་འགྲོ་བར་མི་བྱའོ། །གང་ཞིག་གོས་དམར་རློག་པ་ཡིས། །ལུས་ནི་ཀུན་ནས་དཀྲིས་གྱུར་ཅིང༌། །སྨན་པས་དྲིས་པར་གྱུར་བ་ན། །མེད་ཅེས་བྱ་བའི་ཚིག་སྨྲ་དང༌། །སོ་འདར་བ་དང་དེ་བཞིན་དུ། །སེན་མོ་ཕན་ཚུན་འདར་བྱེད་ལ། །སྐྲ་དང་ཁ་སྤུ་རྒྱུ་མེད་པར། །ཤིན་ཏུ་སྤྲུག་ཅིང་ཉེད་བྱེད་པའི། །ཕོ་ཉ་འོངས་པར་མཐོང་གྱུར་ན། །སྨན་པ་དེར་ནི་འགྲོ་མི་བྱ། །རྩྭ་དང་ཤིང་དང་རྡོ་བ་དག །གཅོད་དམ་གཅོད་པར་བྱེད་པའམ། །ཡང་ན་བཅོག་ཅིང་ཉེད་པའམ། །སྐྲ་དང་ཐལ་བ་
འཐོར་བྱེད་པ། །དེ་ལྟ་བུ་ཡི་ཚུལ་སྟོན་པ། །ཡོངས་སུ་སྤང་བར་བྱ་བ་ཡིན། །ཐལ་བ་ཕྱག་དར་སོལ་ཕུབ་དང༌། །གྱོ་མོ་བདར་བར་བྱེད་བཞིན་དུ། །ཕོ་ཉ་འོངས་པར་གྱུར་ན་ནི། །དེས་ནི་དོན་ནི་འགྲུབ་མི་འགྱུར། །སྐྱེས་བུ་ལག་ན་འཁར་ཐོགས་པ། །ཁྲོས་པའམ་ཤིན་ཏུ་ཞུམ་པ་ཡི། །ཡང་ན་མིག་ནི་མཆིམས་ཁེངས། །གོས་དང་ཕྲེང་བ་དམར་པོ་ཐོགས། །གང་གི་ཕོ་ཉ་འདི་འདྲ་བ། །རྟ་ནི་དེ་རུ་འཚོ་མི་འགྱུར། །རྣ་བཅད་ཡན་ལག་ཉམས་པ་དང༌། །ཡང་ན་ཅུང་ཟད་ཚིག་གྱུར་པ། །ཁ་ནས་མི་ཤིས་ཚིག་སྨྲ་བའམ། །ཡང་ན་ཡིད་ལ་མི་དགེ་སེམས། །སྨན་པ་ཉམས་ཚེ་འོངས་གྱུར་ན། །དེ་ཡང་ངེས་པར་བརླག་པར་འགྱུར། །ཤིའོ་ཚིག་གོ་ཉམས་སོ་ཞེས། །གཏམ་ནི་སྒྲོགས་པར་བྱེད་པའམ། །མི་ཤིས་པ་ནི་གཞན་སྨྲ་བ། །ཕོ་ཉ་དེས་ཀྱང་འཆི་འདོད་སྟོན། །ཕོ་ཉ་གང་གི་མདུན་ན་ནི། །མཚུན་གཏོར་བྱེད་པའི་རྫས་ཐོགས་པའམ། །ཤིང་རྟ་ཆག་གྱུར་མཐོང་ན་ནི། །དེ་ཡང་སྤང་བར་བྱ་བ་ཡིན། །གང་གི་མདུན་ན་ཆུ་ཡི་ནི། །བུམ་པ་ཆག་པ་མཐོང་གྱུར་པ། །ནད་པ་དེ་ནི་འཆི་འདོད་ཅིང༌། །འཇིག་རྟེན་གཞན་དུ་འགྲོ་ཤེས་བྱ། །སོག་མ་ཕུབ་མ་ཉའི་རུས་པ། །སྐྲ་དང་ཤ་དང་སེན་མོ་སོ། །ཞིབ་མ་གཏུན་དང་མཆིལ་ལྷ་མ་དང༌། །ཐལ་བ་དང་ནི་ཕྱག་དར་དང༌། །རྩྭ་དང་ཤིང་དང་སོལ་བ་དང༌། །བོད་པ་ལ་ཡང་རེག་བྱེད་དང༌། །ཤིང་དང་སྔོན་པོའི་གོས་གྱོན་པའམ། །མི་རོའི་རྒྱན་གྱིས་བརྒྱན་པའམ། །བཅོམ་དང་ཉམས་དང་རླག་པ་དང༌། །ཚིག་དང་ཆག་དང་དེ་བཞིན་ཤིང༌། །དེ་ལ་སོགས་པ་གཞན་དག་ཀྱང༌། །མཐོང་ངམ་ཐོས་སམ་རེག་གྱུར་པ། །ཕོ་ཉ་འོངས་པའི་ཐོག་མར་ནི། །སྣང་བར་གྱུར་ན་དེ་མི་འཚོ། །ཕོ་ཉ་འོངས་པར་གྱུར་པ་ན། །རྟ་ཡི་ཚུལ་ནི་དྲིས་པའི་ཚེ། །ནན་གྱིས་མི་ཤེས་སྨྲར་བཅུག་པ། །དེ་འདིར་བརྟག་པར་བྱ་མ་ཡིན། །ཕོ་ཉ་འོངས་པར་གྱུར་བའི་ཚེ། །རོ་ནི་ཡིད་དུ་མི་འོང་པའམ། །ཡང་ན་བཤང་བམ་གཅི་བ་ཡི། །དྲི་མ་གློ་བུར་བྱུང་གྱུར་བའམ། །འདྲི་བའི་ཚེ་ན་བྱུང་གྱུར་ན། །སྨན་པས་དེ་ནི་སྤང་བར་བྱ། །གསོ་བའི་
གནས་སུ་སོང་བ་དང༌། །ནད་པ་མཐོང་བར་གྱུར་པ་དང༌། །ལས་ནི་རྩོམ་པར་བྱེད་པ་དང༌། །མཚན་མ་མཐོང་བ་བཤད་པར་བྱ། །དམོད་མོ་འདེབས་པའམ་བརྡེག་པའམ། །བཟློག་པའམ་ནི་སྨོད་པའམ། །གོས་དང་གཙུག་ཏོར་སྟོད་གཡོགས་དང༌། །ཕྱུགས་དང་བྱ་ཡི་ཚོགས་རྣམས་དང༌། །ཤིང་རྟ་དང་ནི་གླང་པོ་ཆེ། །དེ་འདྲ་འཇིག་པར་འགྱུར་བ་དང༌། །གདུགས་དང་རྒྱལ་མཚན་བ་དན་དག །བསྒྲེང་བ་འགྱེལ་བར་མཐོང་བ་དང༌། །སྣོད་ནི་གང་བར་གྱུར་བ་དག །མངོན་སུམ་དུ་ནི་ཆག་གྱུར་བ། །བཅོམ་དང་ཡིད་དུ་མི་འོང་དང། །མཆིལ་མ་ཐལ་བ་འཐོར་བ་དང༌། །ལམ་ནི་འགེགས་པར་མཐོང་གྱུར་ན། །ནད་པ་ཡི་ནི་སྲོག་ཟད་འགྱུར། །འཇུག་ཚེ་བུམ་པ་གང་དང་མེ། །རྒུན་འབྲུའི་འབྲས་བུ་མར་དང་ནི། །ཁྱུ་མཆོག་བྲམ་ཟེ་རིན་པོ་ཆེ། །ལྷ་ནི་ཕྱིར་འབྱུང་མཐོང་གྱུར་ན། །སྨན་པས་དེར་ནི་ན་བ་ཡི། །རྟ་དེ་འཚོར་མི་འགྱུར་ཤེས་བྱ། །ཐལ་བས་གང་བའི་སྣོད་དང་ནི། །ཀུན་ནས་ཆག་པར་གྱུར་པ་དང༌། །ཉམ་ཆུང་བའམ་ཆག་གྱུར་པ། །ཐལ་བ་ཕུབ་མ་སོལ་བ་དག །ཁྱིམ་གང་དུ་ནི་འཇུག་མཐོང་ན། །དེར་ནི་རྟ་དེ་འཚོ་མི་འགྱུར། །ཟས་དང་སྐོམ་དང་སྨན་རྣམས་ནི། །དེ་བཞིན་ལོངས་སྤྱོད་གཞན་དག་ནི། །རོ་ལ་བྱེད་པ་ལྟར་བྱེད་ན། །རྟ་དེ་འཚོ་བར་འགྱུར་མ་ཡིན། །ནད་པའི་གན་ན་གནས་པ་དག །ཕན་ཚུན་སྤྱོད་པ་བྱེད་པ་ན། །ཤིན་ཏུ་རྨོངས་པ་ལྟར་འཇུག་ན། །དེ་ཡི་སྲོག་ཀྱང་རྙེད་པར་དཀའ། །དུད་པ་སོལ་བ་འཐོར་བྱེད་དང༌། །དེ་བཞིན་ཁྲི་ནི་གཅོག་པ་དང༌། །སྦེད་པའམ་ཡང་ན་མི་སྙན་སྨྲ། །ཡང་ན་སྣོད་ནི་གཅོག་པའམ། །གསོ་བ་ལས་ནི་ཟློག་བྱེད་པ། །གལ་ཏེ་སྨན་པས་མཐོང་གྱུར་ན། །དེར་ཡང་ནད་པ་དེ་ཡི་ནི། །སྲོག་ཟད་གྱུར་པར་ཤེས་པར་བྱ། །ཐལ་བས་བསྐུས་པའམ་ཚིག་པའམ། །འདམ་གྱིས་བསྐུས་པར་གྱུར་པའམ། །སྨྱོན་པའམ་རྫ་མཁན་མཐོང་གྱུར་ན། །དེ་ནི་འཆི་བར་སྟོན་པ་ཡིན། །སྐྱེས་བུ་གདོལ་བ་མཐོང་བ་དང༌། །ཡང་ན་ཏིལ་མར་གྱིས་བསྐུས་མཐོང༌། །ཤིན་ཏུ་ཉམས་པར་མཐོང་གྱུར་ན། །དེ་ཡང་མ་རུང་འགྱུར་ཤེས་བྱ། །གློ་བུར་ནས་ནི་དྲི་ང་བ། །བྱུང་
ན་དེ་ནི་འཆི་བར་འགྱུར། །སྨན་པ་ཡིས་ནི་མངོན་སུམ་དུ། །བྲམ་ཟེའི་ཁྱིམ་ནས་ཆུའམ་ནི། །མར་སྣོད་ཐོགས་ཏེ་སོང་གྱུར་ན། །དེ་ཡང་འཚོ་བར་འགྱུར་མ་ཡིན། །གང་ཞིག་ཨག་ཚོམ་དེ་བཞིན་དུ། །མཇུག་མ་ཉེད་ཅིང་ཕྱི་བྱེད་ན། །དེ་འདྲའི་མཚན་མ་མཐོང་ན་ཡང༌། །སྲོག་ཟད་པར་ནི་ཤེས་པར་བྱ། །སྨན་གྱིས་རྣམ་པ་ཐམས་ཅད་དུ། །ནད་ནི་བསལ་བར་མ་ནུས་པ། །གང་ཡིན་དེ་ནི་མྱུར་བ་རུ། །འཆི་བར་འགྱུར་བར་ཤེས་པར་བྱ། །དེ་ལྟར་མི་ཤིས་གྱུར་པ་ཡི། །མཚན་ཉིད་རྒྱས་པར་བསྟན་པ་ཡིན། །དེ་ནས་གཞན་ཡང་ཤིས་པ་དག །བཤད་ཀྱིས་ང་ལས་མཉན་པར་གྱིས། །གཙང་ཞིང་ཀུན་སྤྱོད་བཟང་དང་ལྡན། །ས་ཕྱོགས་ཡིད་འོང་ཉམས་དགའ་བར། །ཕོ་ཉ་འོངས་གྱུར་མཐོང་ན་ནི། །ལས་གྲུབ་པར་ནི་ཤེས་པར་བྱ། །བཅུ་བཞི་ཚེ་དབུ་མ་ཡིན་དང༌། །དེ་བཞིན་བཅུ་བཞི་མ་ཡིན་ཞིང༌། །མཚན་ཕྱེད་དང་ནི་ཉི་མ་གུང༌། །དུས་སུ་མ་ཡིན་ན་བ་མིན། །ཤིས་ཤིང་གནོད་པ་མེད་པ་ཡི། །ཡུལ་དང་དུས་སུ་ཅི་བཞིན་འོངས། །སྨན་པས་དེར་ནི་འོངས་པ་ལས། །ལས་གྲུབ་པར་ནི་ཤེས་པར་བྱ། །ལམ་དུ་འགྲོ་བར་གྱུར་བ་ན། །ཤིས་པའི་མཚན་མ་བཤད་པར་བྱ། །ཞོ་དང་འབྲས་བུ་མ་གནང་དང༌། །སྐྱེས་བུ་དྲེགས་དང་ལྡན་པ་དང༌། །ཁྱུ་མཆོག་དང་ནི་བུམ་པ་གང༌། །མཐོང་ན་འགྲུབ་པར་སྟོན་པ་ཡིན། །རྒྱལ་པོ་དང་ནི་དེད་དཔོན་དང༌། །དེ་བཞིན་གདུགས་དཀར་མཐོང་བ་དང༌། །བྲམ་ཟེ་ལག་པ་ཁེངས་དག་ནི། །མཐོང་ན་ལས་རྣམས་འགྲུབ་པར་འགྱུར། །ན་ཆུང་དགའ་སྟོན་བྱེད་པ་དང༌། །དེ་བཞིན་རིན་ཆེན་མཐོང་བ་དང༌། །ཕྱུགས་གཅིག་བཏགས་པར་གྱུར་པ་དང༌། །དེ་བཞིན་མེ་ནི་འབར་བ་དང༌། །དྲི་དང་ཕྲེང་བ་ཤིས་པ་དང༌། །བུད་མེད་བཟང་དང་རྒོད་མ་དང༌། །ས་ནི་འདེགས་པར་བྱེད་པ་དག །མཐོང་ན་ལས་ནི་འགྲུབ་པར་འགྱུར། །བུད་མེད་རིན་ཆེན་རྣམས་ཀྱི་ནི། །རྒྱན་གྱིས་བརྒྱན་ཅིང་བཀྲ་ཤིས་སྨྲ། །འབྲས་བུས་གང་བའི་སྣོད་དང་ནི། །ཆང་དང་སྦྲང་རྩིས་གང་བ་དང༌། །དྲི་དང་སྒྲ་ནི་ཡིད་འོང་དང༌། །གོས་དཀར་རོ་ནི་མངར་བ་ཡང༌། །
མཐོང་ངམ་ཐོས་ན་བློ་ལྡན་པས། །དོན་གྲུབ་པར་ནི་ཤེས་པར་བྱ། །ཕྲེང་བ་སར་པ་ཡིད་འོང་བ། །དེ་བཞིན་ཟས་སྐོམ་བཟང་པོ་དང༌། །ཤིང་རྟ་མི་དང་བཅས་པ་དག །མཐོང་ན་དགེ་བར་བཤད་པ་ཡིན། །རྒྱལ་མཚན་སྒྲེང་བར་གྱུར་པ་དང༌། །བ་དན་གྱིས་བརྒྱན་མཐོང་བོའམ། །གླང་པོ་ར་རོ་མཐོང་གྱུར་ན། །བློ་ལྡན་གྲུབ་པར་ཤེས་པར་བྱ། །ལྷ་དང་དེ་བཞིན་བྲམ་ཟེ་དང༌། །སྐྱེས་པ་བུད་མེད་ཆས་དང་ལྡན། །པདྨ་འདབ་བརྒྱད་དང་པ་དང༌། །ས་ར་ལ་དང་རྨ་བྱ་དང༌། །ཡུངས་ཀར་དང་ནི་སཱ་ལའི་ཤིང༌། །དེ་བཞིན་གི་ཝཾ་ཉིད་དག་ནི། །ལམ་དུ་མཐོང་ན་སྨན་པ་ཡིས། །དོན་གྲུབ་པར་ནི་ཤེས་པར་བྱ། །གང་ན་ཁྱུ་མཆོག་བཟང་པོ་ནི། །ལམ་ཀན་ནི་སྣང་གྱུར་ན། །དེ་ནི་རྙེད་པ་དང་བཅས་པར། །བྱ་བ་ཐམས་ཅད་འགྲུབ་པར་འགྱུར། །ཤིང་རྟ་ས་ཡིས་གང་བ་ནི། །བ་བཞི་ཡིས་ནི་དྲངས་གྱུར་པའམ། །ཡང་ན་འབྲུ་ཡིས་གང་གྱུར་པ། །མཐོང་ན་དོན་ནི་འགྲུབ་པར་འགྱུར། །ཤིན་ཏུ་བདེ་ལེགས་སྒྲ་དང་ནི། །མི་ནི་ལག་ན་པདྨ་ཐོགས། །གང་ཞིག་བྲམ་ཟེ་དགེ་སྦྱོང་མཆོད། །བརྒྱན་ཅིང་ཡིད་ལ་རེ་བ་རྫོགས། །དེ་ལས་གང་ཡང་རུང་བ་ནི། །མཐོང་ན་དོན་ནི་འགྲུབ་པར་འགྱུར། །ཁྱིམ་དུ་འཇུག་ཚེ་བུམ་པ་གང༌། །མཚན་མ་སྣ་ཚོགས་ཀྱིས་བརྒྱན་དང༌། །དེ་བཞིན་བུད་མེད་རྒྱན་ཅན་དག །མཐོང་ན་ལས་ནི་འགྲུབ་པར་འགྱུར། །དྲི་ཞིམ་མདོག་ནི་བཟང་པོ་དང༌། །དེ་བཞིན་རོ་ནི་མངར་ཞིང་གཙང༌། །བྱ་དང་རི་དགས་མི་རྣམས་ཀྱི། །སྒྲ་སྐད་སྙན་པ་ཐོས་ན་དགེ །གདུགས་དང་རྒྱལ་མཚན་བསྒྲེང་བ་དག །འཇུག་པའི་ཚེ་ན་མཐོང་གྱུར་ན། །བློ་ལྡན་དོན་གྲུབ་ཤེས་པར་བྱ། །དུང་དང་རྫ་རྔ་རྔ་བོ་ཆེ། །སྒྲ་ནི་སྙན་ཅིང་སྒྲ་ཆེ་དང༌། །གླུ་གར་རོལ་མོའི་སྒྲ་དག་དང༌། །སྙན་པའི་སྒྲ་ནི་སྐོར་ཕྱོགས་འགྲོ། །གནས་སུ་འཇུག་ཚེ་ཐོས་གྱུར་ན། །བློ་ལྡན་དོན་གྲུབ་ཤེས་པར་བྱ། །མཛའ་བོ་ཆུ་ལྷ་སྐེམ་བྱེད་དང༌། །ཉི་མ་ཟླ་བ་རྒྱ་མཚོ་ཆེ། །དགའ་བྱེད་དང་ནི་ཁྱབ་འཇུག་དང༌། །ཚངས་པ་ལྷ་ཆེན་མི་ཐུབ་དང༌། །བརྒྱ་བྱིན་དང་ནི་རྣམ་ཐོས་སྲས། །ཐ་སྐར་གཉིས་དང་ཚོགས་དང་རླུང༌། །
མིང་ནི་སྒྲོགས་པར་བྱེད་པ་དག །དོན་གྲུབ་པར་ནི་སྟོན་པ་ཡིན། །དད་པར་བྱེད་དང་རྗེས་མཐུན་དང༌། །ནོར་ནི་མང་པོ་བསགས་པ་དང༌། །ལས་ཀྱི་མཐའ་ནི་གྲུབ་པ་དང༌། །དེ་བཞིན་དགེ་བར་སྨྲ་བ་དང༌། །དབུགས་འབྱིན་བྱེད་ཅིང་ཉུག་པ་དང༌། །དེ་བཞིན་སྨན་ནི་འཐུང་བ་དང༌། །གྲུབ་པའི་ཕྱིར་ནི་བྱེད་པ་དང༌། །དེ་ནི་ནད་མེད་འགྱུར་རྟགས་ཡིན། །སྨན་རྣམས་རྙེད་པར་འགྱུར་བ་དང༌། །དེ་བཞིན་དགའ་བ་ཐོབ་པ་དང༌། །སྨན་ནི་སྣ་ཚོགས་སྦྱོར་བ་དག །བྱེད་པར་མཐོང་ན་འགྲུབ་པར་འགྱུར། །མཚན་ཉིད་ཐམས་ཅད་ཕུན་སུམ་ཚོགས། །དགེ་བ་ཐམས་ཅད་འདོད་གྱུར་པ། །ལྟས་འདི་ལས་ནི་ནད་མེད་པའི། །དོན་གྲུབ་པར་ནི་འགྱུར་བ་ཡིན། །དེ་ལྟར་ཕོ་ཉའི་གནས་སྐབས་སུ། །རྟགས་ནི་འདི་དག་བསྟན་པ་དག །ནད་ཀྱིས་བཏབ་པར་གྱུར་པ་ཡི། །གསོར་རུང་མི་རུང་སྟོན་པ་ཡིན། །ལམ་དང་ཁྱིམ་དུ་འཇུག་པ་ན། །ནད་པ་མཐོང་བར་གྱུར་པ་དང༌། །ལས་ནི་རྩོམ་པར་གྱུར་པའི་ཚེ། །འདིས་ནི་འགྲུབ་དང་མི་འགྲུབ་སྟོན། །འཆི་ལྟས་གསང་བ་འདི་དག་ནི། །ཡང་དག་ཉིད་དུ་ཤེས་པར་བྱ། །འདི་དག་ཐམས་ཅད་གང་གིས་ནི། །ཡང་དག་ཤེས་ཏེ་སྨན་པའི་མཆོག །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གནས་བརྒྱད་པ་ལས་གསང་བའི་གནས་ཏེ་ཕོ་ཉའི་ལས་བསྟན་པའི་ལེའུའོ། །རྟའི་ཚེའི་རིག་བྱེད་རྫོགས་སོ།། །།ཤ་ལི་ཧོ་ཏྲ་ཐུབ་ཆེན་ལ། །ལེགས་ཐོས་ཀྱིས་ནི་ཡང་དྲིས་པ། །ལེགས་ལྡན་ཆོས་རྣམས་ཐམས་ཅད་མཁྱེན། །བསྟན་བཅོས་ཀུན་གྱི་ཕ་མཐར་བྱོན། །གསང་བ་དང་ནི་བཅས་པའི་གནས། །ལེགས་ལྡན་གྱིས་ནི་སྔར་གསུངས་གང༌། །ཁྱེད་ཀྱི་དྲིན་གྱིས་ལེགས་པར་ནི། །དེ་ཉིད་མཉན་པར་འཚལ་ལགས་སོ། །བློ་ལྡན་དེ་སྐད་འདྲི་བ་དང༌། །ཤ་ལི་ཧོ་ཏྲས་སླར་སྨྲས་པ། །གསང་བ་ལེགས་རབ་རྙེད་དཀའ་དང༌། །ཕྱེ་མ་ཏིལ་མར་སྨན་མར་དང༌། །བཅུད་ཀྱིས་ལེན་ནི་བཟང་པོ་དང༌། །རོ་ཙ་བ་ཡི་མཆོག་གྱུར་པ། །འདོད་ནས་གནས་ཤིང་བསླབ་བྱ་བ། །བཤད་ཀྱི་བུ་ཡིས་མཉན་པར་གྱིས། །པི་པི་ལིང་དང་བཅའ་ལྒ་དང༌། །
བྱི་དང་ག་དང་ལན་ཚྭ་རྣམས། །པི་ཙུ་མར་ད་པ་ཏོ་ལ། །ཨ་རུ་ར་དང་ན་ལེ་ཤམ། །བ་རུ་ར་དང་སྐྱུ་རུ་ར། །ཡུངས་ཀར་ཤིང་ཀུན་ཙི་ཏྲ་ཀ །ཐང་ཤིང་དང་ནི་པ་ལ་ཤ །དུག་མོ་ཉུང་ཤུན་ཙུ་ཀ་དང༌། །ཨར་ཀའི་རྩ་བ་བོང་བ་དང༌། །སཔྟ་པརྞ་ཤིང་ཚ་དང༌། །ཏེ་ཛོ་བ་ཏི་ཛི་བ་ཏི། །ཀཎྜ་ཀ་རི་བྲྀ་ཧ་ཏི། །ཨ་མྲའི་ཚི་གུ་སྲུ་སྲུའི་རྩ། །དེ་བཞིན་སྤང་སྤོས་ཀད་ཕ་ལ། །སེའུ་འབྲུ་དང་ནི་ཏི་ཀ །ཤུ་དག་རུ་རྟ་སྟར་བུ་དང༌། །བྱི་ཚེར་བ་དང་སེར་པོ་གཉིས། །དུར་བྱིད་ཏིག་ཏ་རོ་ཧི་ནི། །ནས་ཚིག་འཁུས་ཐ་ལས་རྫི་ཀ །ཧ་རེ་ཎུ་ཀ་ཀྱི་ལྕེ་བ། །ཤ་ཏི་དང་ནི་མ་ནུ་དང༌། །སླེ་ཏྲེས་དང་ནི་བི་ཤ་ལ། །པི་པི་ལིང་རྩ་དབྱི་མོང་དང༌། །དེ་བཞིན་ཧ་རི་པི་པི་ལིང༌། །རྒྱ་ཤུག་དང་ནི་དྲ་བན་ཏི། །ཨ་ཤྭ་གནྡྷ་དན་བྱ་དང༌། །ཨ་ཛ་མོ་དང་ཟི་ར་ལྔ། །སོ་མ་ཀུ་རྩི་ལ་ལ་ཐུད། །ཉེའུ་ཤིང་དང་དུག་མོ་ཉུང༌། །དེ་བཞིན་ཀར་ཀ་ཏ་ཤྲི་ཀ །ཏ་མ་ལ་ག་ག་བྲའི་རྩ། །ཀེ་ར་ཏ་དང་བུ་ནིམ་པ། །བར་བ་ཏ་དང་གླ་སྒང་དང༌། །བྲི་ཡང་ཀུ་དང་བ་ལུ་ཀ །པྲྀ་ཤྩི་ཀ་ལི་སོ་ན་ཀ །གཟེ་མ་དང་ནི་གཡེར་མ་རྣམས། །དེ་དག་ཆ་ནི་མཉམ་བྱས་པ། །ཕྱེ་མ་ཞིབ་མོར་བཏགས་པར་བྱ། །ཕྱེ་མ་དག་ནི་སྲང་གཅིག་དང༌། །ཆང་སྦྱར་བ་ནི་བླུད་པར་བྱ། །ཡང་ན་ཉ་ཁུ་ཆུའམ་ནི། །ཆུ་ཚན་དང་ནི་སྦྱར་བ་བླུད། །དེ་ཡིས་རྟ་ནི་གང་ཞིག་གི །མེ་དྲོད་ཉམས་དང་མ་སྙོམས་དང༌། །ཁོང་བའི་སྲིན་བུ་རྣམས་དང་ནི། །ཟད་བྱེད་ཚངས་པར་འཁྲུ་བ་སེལ། །བ་གཅིན་དང་ནི་སྦྱར་ནས་ཀྱང༌། །དེ་ལ་བླུད་པར་གྱུར་ན་ནི། །འདི་ལ་རྟ་ཡི་སྒོམ་དང་དག །མཆོག་ཏུ་སེལ་བར་བྱེད་པ་ཡིན། །ཤ་ལི་ཧོ་ཏྲའི་གཞུང་བསྒྲུབ་པ། །རྟ་ཡི་སྟོབས་སྐྱེད་བྱེད་པ་ཡིན། །གསང་བའི་གནས་ཏེ་བརྒྱད་པ་ལས་ཕྱེ་མ་བདུན་ཅུ་རྩ་ལྔ་བའོ།། །།ཚ་བ་གསུམ་དང་འབྲས་བུ་གསུམ། །ཤིང་ཀུན་པི་པི་ལིང་རྩ་བ། །ཏིན་ཏི་ལི་ཀ་སེའུ་འབྲུ་དང༌། །སྟར་བུ་རྒྱམ་ཚ་ཀྲུ་ཏྲུག་ཏྲེས། །ཕ་ཐ་གླ་སྒང་གཡེར་མ་དང༌། །ཤིང་ཚ་སུག་སྨེལ་གཡེར་མ་དང༌། །ཀ་ར་ཀ་ཏ་སྲིང་ཧ་པུ་ཤ །བྱི་དང་ག་དང་ཁ་རུ་ཚ། །ཤུ་དག་ཐང་ཤིང་དུར་བྱིད་དང༌། །དུག་མོ་ཉུང་དང་བོང་ང་དང༌། །པ་ཐ་མ་ནུ་ག་བྲའི་རྩ། །ཡབ་ཀྵ་
ར་པུ་ཙེ་ཤེལ། །འདི་དག་ཆ་ནི་མཉམ་བྱས་ནས། །ཕྱེ་མ་ཞིབ་མོ་ཉིད་དུ་བཏགས། །ཕྱེ་མ་ཁྱོར་གང་ཆང་དང་ནི། །སྦྱར་བ་རྟ་ལ་བླུད་གྱུར་ན། །རླུང་དང་བད་ཀན་ནད་རྣམས་དང༌། །དེ་བཞིན་མེ་དྲོད་ཉམས་པ་དང༌། །ནད་ཀུན་སེལ་ཅིང་སྟོབས་སྐྱེད་ལ། །སྲིན་བུའི་ནད་ནི་སྦྱོང་བར་བྱེད། །ཏིལ་མར་ཡང་ན་མར་སྦྱར་བའི། །ཕྱེ་མ་སྣུམ་ཅན་མེ་དྲོད་སྐྱེད། །མཁྲིས་དང་བད་ཀན་ལས་གྱུར་བ། །ཝ་ར་སྦྲང་རྩི་དང་སྦྱར་སྦྱིན། །རླུང་ལས་གྱུར་པའི་ནད་རྣམས་དང༌། གཉེའུ་རེངས་དང་ལྐོག་ནད་དང༌། །ཁ་ཡི་ནད་ནི་ཐམས་ཅད་ལ། །སྦྲང་ཆང་དང་སྦྱར་སྦྱིན་ན་ཕན། །སྦེག་དང་ཟད་བྱེད་ཅན་ལ་ནི། །ཤ་ཁུ་དང་ནི་སྦྱར་ཏེ་སྦྱིན། །གལ་ཏེ་འདི་དག་མ་རྙེད་ན། །དར་བའམ་ཆུ་ཚན་དང་སྦྱར་སྦྱིན། །སྨན་པ་ཡི་ནི་རྟའི་གནས་དང༌། །ཉེ་བར་རྟག་ཏུ་འདི་གཞག་བྱ། །ཚ་བ་གསུམ་ལ་སོགས་པའི་ཕྱེ། །ཤ་ལི་ཧོ་ཏྲས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཚ་བ་གསུམ་ལ་སོགས་པའི་ཕྱེ་མ་བསྟན་པའོ།། །།ཚ་གསུམ་པི་པི་ལིང་མཱུ་ལ། །ཤུ་དག་ཅི་ཏྲ་འབྲས་བུ་གསུམ། །ཐལ་སྨན་གཉིས་དང་ལན་ཚྭ་ལྔ། །དེ་བཞིན་ཟི་ར་ལྔ་དང༌། བཅས། །ཀྱི་ལྕེ་བ་དང་སེར་པོ་གཉིས། །ཀྱི་ལྕེ་བ་དང་གླ་སྒང་དང༌། །དབྱི་མོ་ཧ་ཏི་པི་པི་ལིང༌། །ལ་ལ་ཕུད་དང་བོང་ང་དཀར། །མུར་བ་དང་ནི་དུག་མོ་ཉུང༌། །དེ་བཞིན་དུག་མོ་ཉུང་ཤུན་བ། །ཐང་ཤིང་དང་ནི་ས་ཁྲིས་དང༌། །ནི་མ་པ་དང་ནི་རོ་ཙ་ཀ །སོ་མ་ར་ཙ་སོ་བ་ན་ཛི། །རུ་རྟ་དང་ནི་པར་པ་ཏ། །གཡེར་མ་ཤིང་ཀུན་སྒོག་སྐྱ་དང༌། །དེ་བཞིན་རྟ་སྒ་ཉིད་དང་ནི། །ཟུར་པ་ཀན་ཏ་ཀ་རི་དང༌། །དེ་བཞིན་བྱི་ཛ་སུ་རའི་ཁུ། །འདི་དག་ཆ་མཉམ་བསྡུས་ནས་ནི། །ཕྱེ་མ་ཞིབ་མོ་ཉིད་དུ་བཏགས། །སྦྲང་རྩི་དང་སྦྱར་གོམ་བུའམ། །ཆང་དང་སྦྱར་ཏེ་བླུད་པར་བྱ། །ཡང་ན་མར་རམ་ཏིལ་མར་རམ། །བ་གཅིན་ཀཱཉྫི་དད་སྦྱར་བླུད། །བད་ཀན་གྱི་ནི་ནད་ཀུན་ལ། །སྦྲང་རྩི་དང་སྦྱར་སྦྱིན་ན་ཕན། །མཁྲིས་པའི་ནད་ནི་ཐམས་ཅད་ལ། །མར་རམ་ཁ་ར་དང་སྦྱར་སྦྱིན། །རླུང་གི་ནད་ནི་ཐམས་ཅད་ལ། །མར་རམ་ཏིལ་
མར་དང་སྦྱར་སྦྱིན། །གཅིན་སྲི་བ་དང་ཟ་གུ་ལ། །བ་གཅིན་ཀཱཉྫི་དང་སྦྱར་བླུད། །ཆག་གྲུགས་དང་ནི་ལུས་ཞུམ་དང༌། །ཁྱད་པར་དུ་ནི་སྦེག་ནད་དང༌། །ཟད་བྱེད་ཀྱིས་ནི་བཏབ་པ་ཡི། །རྟ་ལ་སྨན་གྱི་མཆོག་ཡིན་ནོ། །ནད་རྣམས་ཀུན་ལས་རྣམ་གྲོལ་ཞིང༌། །སྐྱོན་ཀུན་དང་ནི་བྲལ་བར་འགྱུར། །ཤུགས་ནི་རླུང་དང་མཉམ་པ་དང༌། །སྟོབས་ནི་གླང་པོ་དང་འདྲར་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཚ་བ་གསུམ་ལ་སོགས་པའི་ཕྱེ་མ་གཉིས་པའོ།། །།ཧ་པུ་ཤ་དང་ལྕེ་མྱང་ཚ། །རུ་རྟ་ཤིང་ཀུན་ཟི་ར་དང༌། །ཤུ་དག་ཨེ་རཎྜའི་ས་བོན། །ར་སྣ་བཅའ་སྒ་ཡུངས་ཀར་དང༌། །ཐང་ཤིང་ཨ་ཛ་མོ་ད་དང༌། །ནས་ཚིག་འཁུས་ཐལ་ལན་ཚྭ་རྣམས། །ཕྱེ་མར་བྱས་པ་མར་དང་ནི། །ཏིལ་མར་དང་བསྐོལ་དམ་པ་འདི། །རྟ་ནི་རླུང་གིས་ཉེན་པ་ལ། །འཇམ་རྩི་བཏང་ན་སྟོབས་སྐྱེད་ཡིན། །ཕྱེ་མ་འདི་དང་སྦྱར་བ་ཡི། །སྣུམ་གྱི་འཇམ་རྩི་གཞན་ཡང་བསྔགས། །ནད་མེད་རྟས་བྱེད་རོ་ཙ་བྱེད། །ནད་ཀྱིས་གདུངས་ལ་ངལ་བ་སེལ། །སྨན་པ་མཁས་པས་འཇམ་རྩི་ཡི། །ལས་རྣམས་ཀུན་ལ་འདི་སྦྱར་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་བ་ལས་ཧ་པུ་ཤ་ལ་སོགས་པའི་ཕྱེ་མའོ།། །།བྱི་དང་ག་དང་སེར་མོ་གཉིས། །ལྕེ་མྱང་ཚ་དང་ཙལ་རུ་ཚ། །པ་ཐ་པ་ཏོ་ལའི་ལོ་མ། །ནིམ་པའི་ལོ་མ་ཙི་ཏྲ་ཀ །པི་པི་ལིང་དང་བཅའ་ལྒ་རྣམས། །ཕྱེ་མར་བཏགས་པ་འདི་སྦྱིན་ན། །སྙིང་ནད་ཁོང་པའི་སྲིན་བུ་སེལ། །མེ་དྲོད་སྐྱེད་ཅིང་སྨིན་བྱེད་ཡིན། །ནད་ཀུན་རྣམ་པར་ཞི་བྱེད་ཅིང༌། །བད་ཀན་དང་ནི་མཛེ་ནད་སེལ། །རྟ་ནི་མེ་དྲོད་ཉམས་པ་ལ། །ལུས་ཀྱི་མེ་དྲོད་སྟོབས་འཕེལ་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་བྱི་དང་ག་ལ་སོགས་པའི་ཕྱེ་མའོ།། །།འབྲས་བུ་གསུམ་དང་སེར་པོ་གཉིས། །དེ་བཞིན་ཚ་བ་གསུམ་པོ་དང༌། །གླ་སྒང་ཏེ་ཛོ་བ་ཏི་དང༌། །མུར་པ་ཧ་རི་པི་པི་ལིང༌། །ཡུངས་ཀར་པི་པི་ལིང་རྩ་བ། །བ་ལ་ཀ་དང་པུ་ཙེ་ཤེ་ལ། །བྱི་ཚེར་སྲོ་ལོ་ཀྲུ་ཏྲུག་ཏྲེས། །དུག་མོ་ཉུང་གི་ས་བོན་དང༌། །པི་ཙུ་མར་ད་པ་ཏོལ། །དྲ་བན་ཏི་དང་དུར་བྱིད་དང༌། །བྲྀཤྩི་ཀ་ལི་ཟིར་
དང། །ག་བྲའི་རྩ་བ་ཐང་ཤིང་དང༌། །གཡེར་མ་དང་ནི་བྱི་དང་ག །ཤིང་ཀུན་རུ་རྟ་ཤི་ཀྲུ་དང༌། །ཨ་པ་མ་རྒ་བི་ཤ་ལ། །ཤུ་དག་དང་བཅས་ཕྱེ་མ་སྦྱར། །སྨན་གྱི་སྦྱོར་བ་འདི་ཉིད་ནི། །རྟ་ལ་བདུད་རྩི་དང་འདྲ་ཡིན། །རླུང་དང་བད་ཀན་ནད་རྣམས་དང༌། །དེ་བཞིན་རླུང་ཁྲག་འདྲེས་པ་དང༌། །དེ་བཞིན་ནད་ཁྲག་ཅན་དང་ནི། །གཡན་པ་བཀྲ་བ་སེལ་བ་ཡིན། །ཁྱད་པར་དུ་ཡང་སྙིང་ནད་དང༌། །ལུད་པ་མེ་དྲོད་ཉམས་ལ་བསྔགས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་འབྲས་བུ་གསུམ་ལ་སོགས་པའི་ཕྱེ་མའོ།། །།གཡེར་མ་ཤིང་ཀུན་ཨ་རུ་ར། །མ་ནུ་དང་ནི་ལན་ཚྭ་བརྒྱད། །ནས་བསྐོལ་ཁུ་བ་དང་སྦྱར་སྦྱིན། །ནད་གཞི་གསུམ་སྐྱེས་གཟེར་རྣམས་འཇོམས། །གནས་བརྒྱད་པ་ལས་གཟེར་འཇོམས་པ་ཞེས་བྱ་བའི་ཕྱེ་མའོ།། །།པི་ཙུ་མར་ད་པ་ཏོ་ལ། །ཀཎྜ་ཀ་རི་བྲྀ་ཧ་ཏི། །སླེ་ཏྲེས་དང་ནི་འབྲས་བུ་གསུམ། །གཡེར་མ་ཆུ་དང་ལྷན་ཅིག་བསྐོལ། །དེ་བཅགས་པ་ཡི་ཁུ་བར་ནི། །མུད་ག་ལེགས་པར་བཙོ་བར་བྱ། །དེ་ནི་ལེགས་པར་ཚོས་པ་དང༌། །ཐབ་ནས་སླར་ཡང་ཕོག་ནས་ནི། །དེར་ནི་ཚ་བ་གསུམ་པོ་དང༌། །ལན་ཚྭ་དག་ཀྱང་ཚད་ཙམ་གཞུག །མར་དང་ཏིལ་མར་ཞག་སྦྲང་རྩི། །དེ་དག་ཐམས་ཅད་གཅིག་ཏུ་བསྲེ། །ཚ་ཡི་ཕྱེ་མ་དག་དང་ནི། །མུད་གའི་ཁུ་བ་སྦྱར་བར་བྱ། །དེ་ནས་ཚ་བའི་ཁ་ཟས་ཏེ། །ཉ་ལ་ཆོ་ག་བཞིན་དུ་སྦྱིན། །དེས་ནི་བད་རླུང་སེལ་བྱེད་ཅིང༌། །ལུད་པ་དབུགས་མི་བདེ་བ་འཇོམས། །སྙིང་ནད་ཞི་བར་བྱེད་པ་དང༌། །སྐྲངས་པ་དག་ཀྱང་སེལ་བར་བྱེད། །འགོ་བའི་ནད་དང་རྣ་ནད་རྣམས། །ངེས་པར་སེལ་བར་བྱེད་པ་ཡིན། །ལྐོག་ནད་རྣམ་པར་སྦྱོང་བྱེད་ཅིང༌། །མཆོག་ཏུ་མེ་དྲོད་ཉམས་ལ་ཕན། །གནས་བརྒྱད་པ་ལས་ཚ་བའི་ཕྱེ་མ་དང་བསྲེས་བ་ཞེས་བྱ་བ་སྟེ་ཕྱེ་མའི་ལེའུའོ།། །།ཏིལ་མར་དེ་བཞིན་མར་ཆ་མཉམ། །ཞག་དང་རྐང་ནི་ཅི་རྙེད་དང༌། །དེ་བཞིན་སྐྱུར་ཡང་ཅི་རྙེད་དང༌། །འདིར་ནི་ཞོ་ནི་བཞི་འགྱུར་གཞུག །དེར་ནི་སྨན་ནི་འདི་དག་རྣམས། །ལྡེ་གུ་བཏགས་པ་གཞུག་པར་བྱ། །ཤུ་དགར་སྣ་ཤིང་མངར་དང༌། །འཚོ་བྱེད་དང་ནི་ཛི་བན་
ཏི། །ཨ་ཤུ་མ་ཏི་འདི་དག་ནི། །བ་ལ་བ་སྒི་བ་སྦྲུ་བ། །འདི་དག་དང་བསྐོལ་སྣུམ་ཆེན་པོ། །སྟོབས་དང་ནད་མེད་སྐྱེད་པར་བྱེད། །རླུང་ལས་སྐྱེས་པའི་ནད་བརྒྱད་ཅུ། །འདི་ཡིས་སེལ་བར་ཐེ་ཚོམ་མེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་སྣུམ་ཆེན་པོའོ།། །།ཀཎྜ་ཀ་རི་རྩའི་རྩ་དང༌། །འབྲས་བུ་བསྲིས་པ་སྲང་བརྒྱ་ནི། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་པར་གྱུར་པ་དང༌། །དེ་ལས་བྲེ་གང་ལུས་པ་རུ། །མར་ནི་བྲེ་གང་དང་བསྲེས་བསྐོལ། །གོ་རིམས་བཞིན་དུ་བཤད་པ་ཡི། །སྨན་གྱི་ལྡེ་སུ་འདི་ཡང་གཞུག །པི་པི་ལིང་རྩ་བྱི་དང་ག །ཧ་ཏི་པི་ལིང་ཅི་ཏྲ་ཀ །ནས་ཚིག་འཁུས་ཐལ་ཁ་རུ་ཚ། །ར་སྣ་ཤུ་དག་ཚ་བ་གསུམ། །འདི་བཅུ་མར་གྱི་དུད་པ་ལྔ། །སེལ་ཞིང་ལེགས་པར་གསོ་བར་བྱ། །ནད་ཀུན་སེལ་བར་བྱེད་པ་ཡིན། །སྣུམ་དེ་བདེ་བ་སྐྱེད་བྱེད་ཡིན། །གསང་བའི་གནས་ཏེ་བརྒྱད་པ་ལས་ཀཎྜ་ཀ་རིའི་སྨན་མར་རོ།། །།ཡུང་དང་སྐྱེར་པ་ཤུ་དག་བཅས། །ནིམ་པ་བྱི་ཚེར་བར་པ་ཏ། །སླེ་ཏྲེས་དང་ནི་ཀྱི་ལྕེ་བ། །པུ་ཙེ་ཤེལ་ནི་ཆ་མཉམ་བྱས། །དེ་ལ་འབྲས་བུ་གསུམ་དང་ནི། །ཏིག་ཏ་ཙནྡན་པི་པི་ལིང༌། །དུག་མོ་ཉུང་དང་ག་དུར་དང༌། །རི་ཤོ་བ་གཉིས་ཛི་བ་ཀ །ལྡེ་གུར་བཏགས་པ་དང་བསྲེས་པའི། །མར་བསྐོལ་གྱུར་པ་དེ་ཡིས་ནི། །རྟ་ཡི་མཁྲིས་པ་སེལ་བྱེད་ཅིང༌། །གཞང་འབྲུམ་ཁོང་ཚ་ཞི་བར་བྱེད། །རྡོ་དང་གཡན་པ་རྣམས་དང་ནི། །མེ་དཔལ་དང་ནི་རིམས་ལ་ཡང༌། །འདི་ནི་རྟག་ཏུ་བསྔགས་པ་ཡིན། །དབྱར་ཚེ་རྟ་ལ་རྟག་ཏུ་ཕན། །ཤ་ལི་ཧོ་ཏྲའི་གསང་བའི་གནས་དེ་བརྒྱད་པ་ལས་ཚ་བའི་སྨན་མར་རོ།། །།ཨ་ཤྭ་གནྡྷའི་རྩ་བ་དང༌། །འབྲས་བུ་ཡལ་ག་སྲང་བརྒྱ་ནི། །ཆུ་བྲེ་བཞི་ཡི་ནང་དུ་བསྐོལ། །དེ་ནས་སྨན་ཁུ་དེ་དང་ནི། །མར་ནི་བྲེ་གང་བསྐོལ་བར་བྱ། །ཏིལ་མར་མར་དང་ཅ་ཉམ་པ་དང༌། །འོ་མ་བཞི་འགྱུར་དེ་དུ་གཞུག །ཙནྡན་དང་ནི་བཅའ་ལྒ་དང༌། །ཨ་ག་རུ་དང་ཤུག་པ་དང༌། །རྒུན་འབྲུ་པད་རྩ་འབྲས་བུ་གསུམ། །སྣ་མའི་ལོ་མ་ཤ་རི་བ། །ཀཎྜ་ཀ་རི་བྲྀ་ཧ་ཏི། །ནཱ་ག་པུཥབ་བ་སྤྲུ་བ། །ས་ལ་ཀྲྀཥྞ་པ་རྞི་གཉིས། །ཤིང་ཚ་གནྡྷ་བྷ་དྲ་དང༌། །པདྨ་གེ་སར་ལྡེ་གུ་ནི། །བཏགས་པ་དེར་ནི་གཞུག་པར་བྱ། །འདི་
ཡིས་རྟ་ནི་སྦེག་པ་དང༌། །རླུང་གིས་ཉམ་ཐག་གྱུར་པ་དང༌། །ཟད་བྱེད་ཀྱིས་ནི་བཏབ་པ་དག །ཤ་སྐྱེད་བྱེད་པའི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་ཤྭ་གནྡྷའི་སྨན་མར་རོ།། །།བོང་ང་མུར་བ་པུ་ཙེ་ཤེལ། །གླ་སྒང་ཤིང་ཚ་བ་ཏོ་དང༌། །སཔྟ་པ་རྞི་པ་ཏོ་ལ། །པི་ཙུ་མར་ད་བྱི་ཚེར་མ། །བར་བ་ཏ་དང་འབྲས་བུ་གསུམ། །སེར་པོ་གཉིས་དང་དྲ་བན་ཏི། །ཙནྡན་དམར་པོ་མ་དུ་ཀ །རྩ་མཁྲིས་དང་ནི་པི་པི་ལིང༌། །ཉེའུ་ཤིང་ཤུག་པ་པུ་ཤེལ་ཙེ། །དོང་ག་དང་ནི་སླེ་ཏྲེས་རྣམས། །དུག་མོ་ཉུང་གི་ས་བོན་བཅས། །སྲང་རེ་ཆ་མཉམ་སྦྱར་ལྡེ་གུ། །ནི་མ་པ་པ་ཏོ་ལ་དང་བཅས། །ཀཎྜ་ཀ་རི་བ་ཤ་ཀ །སྲང་ནི་ལྔ་ཡི་ཚད་དུ་བྱས། །སྐྱུ་རུ་ར་ནི་བྲེ་གང་བཅས། །ཆོ་ག་བཞིན་དུ་བསྐོལ་ནས་ནི། །སྨན་ཁུ་མར་ཁུ་དང་བསྲེས་ལ། །མེ་ནི་ཆུང་དུས་བཙོ་བར་བྱ། །ཏིག་ཏ་ཆེན་པོ་ཞེས་བྱ་སྟེ། །འདི་ནི་གུ་གུལ་དང་བཅས་པའམ། །ཡང་ན་འབའ་ཞིག་སྦྱིན་བྱས་ན། །ཡོན་ཏན་བདུད་རྩི་དག་དང་མཚུངས། །ལུས་ཀྱི་མེ་དྲོད་སྐྱེད་པར་བྱེད། །གཟི་མདངས་སྟོབས་ནི་འཕེལ་བྱེད་ཡིན། །མཛེས་དང་ཁྲག་མཁྲིས་ནད་རྣམས་སེལ། །ལུས་རྒྱས་པར་ཡང་བྱེད་པ་ཡིན། །ཤ་སྐྱེད་མདོག་ནི་བཟད་བྱེད་ཅིང༌། །ནད་ཀུན་སེལ་བའི་དམ་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཏིག་ཏ་ཆེན་པོའི་སྨན་མར་རོ།། །།རྩ་བ་ལྔ་པ་གཉིས་ནིམ་བ། །སླེ་ཏྲེས་ཨ་ཏ་རུ་ཤ་ཀ །དོང་ག་དང་ནི་པ་ཏོ་ལ། །འབྲས་བུ་གསུམ་ནི་ཆ་མཉམ་བྱ། །ཆམ་ཆོམ་བརྡུངས་ལ་ཆུ་ནད་བསྐོལ། །སྨན་ཁུ་བཞི་ཆ་ལུས་པ་རུ། །དེ་དང་མཉམ་པའི་ཞུན་མར་དང༌། །སྨན་ནི་འདི་རྣམས་དང་བཅས་བསྐོལ། །ཀྱི་ལྕེ་བ་དང་བར་པ་ཏ། །ཤ་རི་བ་གཉིས་ཙནྡན་དང༌། །ཏིག་ཏ་དང་ནི་པུ་ཙེ་ཤེལ། །པ་ཐ་དད་ནི་བཅས་པ་དང༌། །བལ་བུ་དང་ནི་པུ་ཤེལ་ཙེ། །ཨུཏྤལ་སྔོན་པོ་ཤུག་པ་དང༌། །པི་པི་ལིང་རྩ་བྱི་དང་ག །ཏེ་ཛོ་བ་ཏི་ཙི་ཏྲ་ཀ །བོང་ད་ཧ་ཏི་པི་པི་ལིང༌། །དུག་མོ་ཉུང་ཤུ་ན་ས་བོན་དང༌། །སེར་པོ་གཉིས་དང་པི་པི་ལིང༌། །ན་ལེ་ཤམ་དང་
བཅའ་ལྒ་དང༌། །ཐང་ཤིང་ཞེས་བྱ་ཐམས་ཅད་ནི། །ཆ་མཉམ་དེར་ནི་གཞུག་པར་བྱ། །མེ་ཆུང་གིས་བསྐོལ་ཚོས་པ་དང༌། །ཤིན་ཏུ་སྦྱངས་པའི་སྣོད་དུ་གཞུག །ཏིག་ཏ་ཆེན་པོའི་སྨན་མར་འདི། །ཏ་ཡི་སྨན་གྱི་མཆོག་ཏུ་བཤད། །ལུད་པ་དབུགས་མི་བདེ་དང་མཛེ། །ལ་བ་འབྲས་ཀྱི་ཕྲེང་བ་དང༌། །བད་ཀན་གྱི་ནི་ནད་རྣམས་དང༌། །དེ་བཞིན་རྣ་རྣག་གྱུར་པ་དང༌། །བད་ཀན་ནད་ནི་གཞན་དག་ལའང༌། །འདི་ནི་ཤིན་ཏུ་བསྔགས་པ་ཡིན། །འདི་ནི་ནད་ཀུན་སེལ་བྱེད་ཅིང༌། །གཟི་མདངས་སྟོབས་ནི་སྐྱེད་པ་དང༌། །བརྟན་ཞིང་ལུས་ནི་སྲ་བར་བྱེད། །དབང་པོ་གསལ་བར་བྱེད་པ་དང༌། །ཡིད་ཀྱང་དགའ་བར་བྱེད་པ་ཡིན། །ཁྲག་དང་མཁྲིས་པ་སེལ་བྱེད་ཅིང༌། །གཅོང་ཆེན་རིགས་དང་ལུད་པ་འཇོམས། །པགས་པ་ལ་སྣད་ནད་རྣམས་དང༌། །གང་ཡང་ཁྲག་ལ་གནས་པ་དང༌། །རུས་པ་རྐང་ལ་ཞེན་པ་རྣམས། །མར་འདི་ཡིས་ནི་སེལ་བར་བྱེད། །ནད་ཀྱི་རྒྱ་མཚོ་རྒལ་འདོད་ལ། །གཟིངས་དང་འདྲ་བ་མར་འདི་ཡིན། །ཏིག་ཏ་ཆེན་པོའི་སྨན་མར་གཉིས་པའོ།། །།ཤི་ཤ་དང་ནི་ཡན་ལག་ལྔ། །ཆ་མཉམ་སྲང་ནི་བརྒྱ་རུ་བྱ། །ཆུ་བྲེ་བཅུ་དྲུག་ནད་དུ་བསྐོལ། །བཞི་ཆ་ལུས་པར་གྱུར་པ་དང༌། །དེ་རྣམས་སྨན་ཁུ་དེ་དང་ནི། །མར་ནི་བྲེ་དོ་བསྐོལ་བར་བྱ། །སྨན་ནི་འདི་དག་ཉིད་ཀྱི་ནི། །ལྡེ་གུ་དེར་ནི་གཞུག་པར་བྱ། །པི་པི་ལིང་རྩ་ཚ་བ་གསུམ། །བྲྀ་ཤྩི་ཀ་ལི་འབྲས་བུ་གསུམ། །ཤུ་ཏི་དང་ནི་ཐང་ཤིང་དང༌། །སྤང་སྤོས་དང་ནི་བ་ལུ་དང༌། །བྱ་ཀྲ་ན་ཀ་ཤྲི་ཀ་ཏ། །ཙི་ཏྲ་ཀ་དང་ན་ཀུ་ལི། །བཙོད་དང་ཛི་བ་ནི་ཡ་དང༌། །ཧ་ཏི་པི་པི་ལིང་ཙནྡན། །གནྡྷ་བྷ་དྲ་རུ་རྟ་རྣམས། །ལྡེ་གུར་བྱས་བཅུག་མེ་ཆུང་བསྐོལ། །རྟ་གང་རླུང་ནད་ཅན་དང་ནི། །དེ་བཞིན་མཁྲིས་པའི་ནད་ཡོད་དང༌། །བད་ཀན་སྙིང་གར་འཁྱིལ་གྱུར་པ། །དེ་རྣམས་ཀྱི་ནི་སྨན་མཆོག་ཡིན། །ཤྲི་ཤ་ལ་སོགས་སྨན་མར་འདི། །ནད་ཀུན་སེལ་བའི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤྲི་ཤ་ལ་སོགས་པའི་སྨན་མར་རོ།། །།ཤྲི་ཤ་ཡི་ནི་ལོ་མ་ནི། །ཆུ་བསྐོལ་དེ་ཡི་ཁུ་བ་དང༌། །མར་ནི་ཚད་བཞིན་བསྐོལ་བ་རུ། །ཚ་བ་གསུམ་དང་འབྲས་བུ་གསུམ། །དེ་བཞིན་ཧ་ཏི་པི་པི་ལིང༌། །
ལྡེ་གུར་སྦྱར་བ་དང་བསྲེས་བསྐོལ། །མཛེ་ཡི་ནད་ནི་ཐམས་ཅད་དང༌། །དུག་སེལ་མེ་དྲོད་སྐྱེད་མཆོག་ཡིན། །རླུང་དང་མཁྲིས་པ་ལས་གྱུར་དང༌། །ཁོང་ཚ་ཁྲག་གི་ནད་རྣམས་སེལ། །དབྱར་གྱི་ཚེ་ན་ཕྱིན་གྱུར་ན། །འདི་ནི་བདུད་རྩི་དང་འདྲ་ཡིན། །ཤྲི་ཤ་ལ་སོགས་པའི་སྨན་མར་གཉིས་པའོ།། །།མུར་བ་དང་ནི་འབྲས་བུ་གསུམ། །ཙི་ཏྲ་ཀ་དང་ཤུ་དག་དང༌། །བཅའ་ལྒ་དང་ནི་སེར་པོ་གཉིས། །པ་ཐ་ཤིང་ཚ་པར་པ་ཏ། །ན་ལེ་ཤམ་དང་གླ་སྒང་དང༌། །དེ་བཞིན་ནཱ་ག་གེ་སར་དང༌། །ཙནྡན་དང་ནི་ཤ་རི་བ། །རྒྱ་སྤོས་དང་ནི་མ་ལུ་ཀ་བོང་ང་ཧ་ཏི་པི་པི་ལིང༌། །དན་ད་དང་ནི་དྲ་བན་ཏི། །རོ་ཧི་ནི་དང་ཙི་ཏྲ་ཀ །དབྱི་མོ་དཱུར་བ་ཀྱི་ལྕེ་བ། །ཆ་མཉམ་སྦྱར་ཏེ་ཆུ་དང་ནི། །མར་དང་མེ་ནི་ཆུང་ངུས་བཙོ། །ཚོས་ཏེ་མར་ནི་ལུས་པ་དང༌། །དེ་ནི་དེ་ལས་དབབ་པར་བྱ། །འདི་བླུད་རྟ་ནི་མགྱོགས་པ་དང༌། །ལུས་སྟོབས་རྒྱ་ཆེར་འཕེལ་བར་འགྱུར། །པགས་པར་གཏོགས་པའི་ནད་ཀྱི་ཚོགས། །རྡོ་ལ་སོགས་དང་བྲལ་བར་འགྱུར། །རླུང་དང་མཛེ་ཡི་ནད་རྣམས་དང༌། །མཁྲིས་པའི་ནད་དང་ལུས་རེངས་དང༌། །དེ་བཞིན་དབུགས་མི་བདེ་ཀུན་དང༌། །ནད་ནི་སྣ་ཚོགས་གཞན་ཡང་སེལ། །འདི་ནི་ནད་འཇོམས་མཆོག་ཡིན་ཞིང༌། །བཀྲ་ཤིས་པར་ཡང་བྱེད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་མུར་བ་ལ་སོགས་པའི་སྨན་མར་རོ།། །།ནིམ་པ་པ་ཏོ་ལ་འབྲས་གསུམ། །སེར་པོ་གཉིས་དང་པུ་ཙེ་ཤེལ། །བྱི་ཚེར་བ་དང་པར་བ་ཏ། །དྲ་བན་ཏི་དང་སླེ་ཏྲེས་རྣམས། །འདི་དག་ཆ་ནི་མཉམ་བྱས་ལ། །བརྡུངས་པ་ཆུ་ནང་བསྐོལ་བར་བྱ། །བཞི་ཆ་ལུས་པར་གྱུར་པ་རུ། །སྨན་འདི་དག་གི་ལྡེ་གུ་གཞུག །ཙནྡན་པི་པི་ལིང་གླ་སྒང༌། །རི་ཤོ་བ་གཉིས་ཛི་བ་ཀ །ཀན་ད་ཀ་རི་ཏི་ག་ཏ་དང༌། །དུག་མོ་ཉུང་གི་ས་བོན་རྣམས། །ཆ་ནི་མཉམ་པར་སྦྱར་བྱས་ནས། །དེ་བཞིན་དུ་ནི་མར་ཁུ་དང༌། །འོ་མ་སྣུམ་དང་མཉམ་བཅུག་ལ། །མེ་ནི་ཆུང་ངུས་བཙོ་བར་བྱ། །འདི་ནི་ཏིག་ཏ་ཆེན་ཞེས་བྱ། །མཛེ་དང་རིམས་དང་མེ་དཔལ་དང༌། །འབྲུམ་བུ་དང་ནི་འབྲས་ནད་དང༌། །དེ་བཞིན་པགས་ནད་གཞན་དག་ཀྱང༌། །ཁྲག་མཁྲིས་ནད་རྣམས་སེལ་བར་བྱེད། །སྨན་
པ་མཁས་པས་འདི་ཉིད་ནི། །རྟ་ལ་ཉེ་བར་བླུད་པར་བྱ། །དཔྱིད་དང་དགུན་གྱི་ཚེ་ན་ནི། །སྣ་སྨན་འཇམ་རྩིར་བཏང་ན་ཕན། །དབྱར་གྱི་ཚེ་ན་ཁྱད་བར་དུ། །སྨན་འདི་རབ་ཏུ་བསྔགས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཏིག་ཏ་ཅན་གྱི་སྨན་མར་རོ།། །།དུར་བྱིད་ཆེན་པོ་བརྡུངས་ནས་ནི། །ཆུ་པྲེ་བཞི་ཡི་ནང་དུ་བསྐོལ། །བཞི་ཆ་ལུས་པར་གྱུར་པ་དང༌། །དེ་རུ་མར་ཁུ་བྲེ་གང་བླུགས། །ར་མཉེ་ཀྵི་ར་ཀ་ཀོ་ལ། །རི་ཤོ་བ་གཉིས་ཛི་བ་ཀ །བ་ལ་ཨ་ཏི་བ་ལ་དང༌། །དེ་བཞིན་ཀྵི་ར་བ་དང་ནི། །མེ་ད་མ་ཧཱ་མེད་དང༌། །ཤིང་མངར་དང་ནི་ཤ་རི་བ། །ཆ་ནི་མཉམ་པོར་བྱས་ནས་ཀྱང༌། །དེ་ནི་ལྡེ་གུར་བཏགས་པར་བྱ། །མར་དེར་བཅུག་ནས་དཀྲུགས་ནས་ནི། །མེ་ནི་ཆུང་ངུས་དལ་གྱིས་བཙོ། །དེ་ནི་ཚོས་པར་ཤེས་པ་ན། །དེ་ལས་ཕོག་སྟེ་བཙགས་པར་བྱ། །སྣུམ་འདི་རྟག་ཏུ་བཏུང་བ་དང༌། །འཇམ་རྩི་ཡི་ནི་ལས་ལ་སྦྱར། །རྒྱུན་དུ་བྱིན་ན་མོ་གཤམ་ཡང༌། །བུ་སྐྱེད་པར་ནི་ནུས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤ་མ་དུར་བྱིད་ཀྱི་སྨན་མར་རོ།། །།ནིམ་པ་དང་ནི་པ་ཏོ་ལ། །སྐྱེར་བ་ཙནྡན་པུ་ཙེ་ཤེལ། །ཀྱི་ལྕེ་བ་དང་ལ་ལ་ཕུད། །པར་པ་ཏ་ནི་སྲང་རེ་དང༌། །སྐྱུ་རུ་ར་ནི་བྲེ་གང་བཅས། །ཆུ་བལ་ཅན་གྱི་ཆུ་ལས་ནི། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་དང་མར་བྲེ་གང༌། །གླ་སྒང་རྩ་མཁྲིས་ཤིང་མདར་དང༌། །བཙན་དུག་དུག་མོ་ཉུང་ལ་ཕུད། །པི་པི་ལིང་དང་བཅས་བསྐོལ་བའི། །མར་གྱིས་སྣ་མིག་རྣ་ནད་འཇོམས། །རྒྱུ་རླུགས་རིམས་དང་ནད་དང་ནི། །མེ་དབལ་ལ་སོགས་སེལ་བར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནིམ་པ་ལ་སོགས་པའི་སྨན་མར་རོ།། །།ནིམ་པ་བ་ཏོ་པའི་ལོ་མ་དང༌། །སླེ་ཏྲེས་དང་ནི་ཀཎྜ་ཀ་རི་ཉིད། །ཆ་མཉམ་སྲང་བཞི་ཉི་ཤུར་བྱས་པ་དག །ཆུ་ནི་སྨན་གྱི་བཅུ་དྲུག་ནང་དུ་བསྐོལ། །སྨན་གྱི་ཁུ་བ་བཞི་ཆ་ལུས་པ་དང༌། །སྨན་ཁུ་དེ་དང་མཉམ་པའི་མར་དང་བསྐོལ། །དེར་ནི་ཚ་བ་གསུམ་ནི་སྲང་གསུམ་དག །ཞིབ་ཏུ་བཏགས་པའི་ཕྱེ་མ་གཞུག་པར་བྱ། །དེ་ནི་ལེགས་པར་
ཚོས་པར་ཤེས་པ་དང༌། །གུ་གུལ་དང་སྦྱར་རྟ་ལ་བླུད་པར་བྱ། །མང་ན་དེ་དང་མར་བསྲེས་འགའ་ཞིག་སྦྱིན། །དེས་ནི་འཛེ་ཡི་ནད་ཀུན་སེལ་བར་འགྱུར། །ཁྲག་མཁྲིས་རྔོ་དང་དེ་བཞིན་གཡན་པ་དང༌། །འབྲུམ་བུ་འབྲུམ་ཕྲན་དེ་བཞིན་ཤུ་བ་ནི། །སེལ་ཞིང་རྟ་ཡི་མདོག་དང་སྟོབས་ནི་སྐྱེད། །ནད་ཀྱི་ཚོགས་འཇོམས་བདུད་རྩི་དང་འདྲ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་བདུད་རྩི་ལྟ་བུའི་སྨན་མར་རོ།། །།ཀ་རན་ཛ་དང་བ་ཤ་ཀ །སྤོ་ར་ཁྱིམ་གྱི་དུད་པ་དང༌། །ཀ་པིང་ཐ་དད་དོང་ག་དང༌། །ཡུག་སྣམ་དང་ནི་པདྨ་དང༌། །ཀ་ར་བཱི་ར་བོང་ང་དང༌། །རོ་ཧི་ཏ་དང་སླེ་ཏྲེས་དང༌། །པྲྀ་ཧ་ཏི་ཡི་འབྲས་བུ་ནི། །ར་ཐུག་གི་ནི་གཅིན་དང་བཏགས། །འདི་དག་སྲང་གཉིས་སྦྱར་བ་ལ། །མར་སྲང་སུམ་ཅུ་རྩ་གཉིས་བསྐོལ། །མར་དང་མཉམ་པའི་འོ་མ་གཞུག །བསྐོལ་བའི་སྨན་མར་སྟོབས་ཆེན་ཡིན། །མཛེ་ཡི་ནད་ནི་ཐམས་ཅད་ལ། །རྟག་ཏུ་བསྐུས་དང་བླུད་ན་ཕན། །ཤ་ཚིལ་རུས་པ་སྐྱེད་བྱེད་ཅིང༌། །པགས་པར་ཞུགས་པའི་ཁྲག་སྦྱོང་བྱེད། །མཛེ་ནད་འཛག་པར་བྱེད་པ་ཡང༌། །ཐམས་ཅད་ཞི་བར་བྱེད་པ་ཡིན། །ལེགས་ལྡན་ཤ་ལི་ཧོ་ཏར་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཀ་རན་ཛ་ལ་སོགས་པའི་སྨན་མར་རོ། །སྨན་མར་གྱི་ལེའུའོ།། །།དེ་ནས་གཞན་ཡང་ཏིལ་མར་གྱི། །ལེའུ་ངེས་པར་བཤད་བྱ་སྟེ། །པྲ་ས་ར་ནི་སྲང་བརྒྱ་ནི། །ཆུ་བྲེ་བཅུ་དྲུག་ནང་དུ་བསྐོལ་བཞི་ཆ་ལུས་པར་གྱུར་པ་ན། །ཁུ་བ་དེ་ནི་ཐབ་ལས་དཔོག །སྨན་ཁུ་དེ་དང་མཉམ་པ་ཡིན། །ཏིལ་མར་ཉེ་བར་གཞུག་པར་བྱ། །ཀཉྫི་རང་སྐྱུར་ཉིས་འགྱུར་གཞུག །དེ་ལ་སྨན་ནི་འདི་དག་གི །ལྡེ་གུ་ཉེ་བར་གཞུག་པར་བྱ། །ར་སྣ་བ་ལ་གཟེ་མ་དང༌། །ལྕེ་མྱང་ཚ་དང་ཤི་ཀྲུ་དང། །པྲ་ས་ར་ནའི་རྩ་བ་དང༌། །པི་པི་ལིང་གི་རྩ་བར་བཅས། །ཙི་ཏྲ་ཀ་དང་བཅའ་ལྒ་དང༌། །ཤུ་ཏི་དང་ནི་ཐང་ཤིང་དང༌། །བསེ་ཤིང་འབྲས་བུ་བོང་ང་དང༌། །པི་པི་ལིང་ཡང་སྲང་རེ་ནི། །ཆ་ནི་མཉམ་པོར་སྦྱར་ནས་ཀྱང༌། །ཕྱེ་མ་ཞི་བ་མོ་འཐག་ཏུ་གཞུག །མེ་ནི་ཆུང་ངུ་
དང་བཙོས་ཏེ། །སྣུམ་དེ་སྣོད་ནི་བཟང་པོར་གཞུག །འདི་ནི་སྣ་སྨན་བསྐུ་བ་དང༌། །འཇམ་རྩི་བཏུང་བ་དག་ལ་བསྔགས། །རྟ་ནི་རླུང་ནད་ཀྱིས་བཅོམ་དང༌། །མིའམ་ཡང་ན་གླང་པོ་རུང༌། །ལུས་འཐེང་ཡུན་རིང་ནད་ཀྱིས་བཏབ། །ངེས་པར་བདེ་བ་འཐོབ་པར་འགྱུར། །རྟ་གང་བུ་ནི་མི་ཆགས་པ། །འདི་ཡིས་ངེས་པར་མངལ་སྐྱེད་འགྱུར། །ཕོ་མིན་སྐྱེས་པ་ཉིད་འགྱུར་ཞིང༌། །མོ་གཤམ་ཡང་ནི་བུ་སྐྱེད་བྱེད། །འདི་ཡིས་ལོང་བ་ཁྱབ་འཇུག་རིགས། །རབས་ཆད་བུ་ནི་ཡིད་འོང་སྐྱེས། །བྲ་ས་ར་ཡི་ཏིལ་མར་འདི། །ནད་ཀུན་འཇིག་པར་བྱེད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་པྲ་ས་རའི་ཏིལ་མར་རོ།། །།པྲ་སར་ཡི་རྩ་བ་དང༌། །ཡལ་ག་ལོ་མ་བཅས་སྲང་བརྒྱ། །རྩ་བ་བཅུ་ནི་དེ་ཡི་ཕྱེད། །ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པར་གྱུར་པ་དང༌། །ཐ་བ་ལས་སླར་ནི་དབོག་པར་བྱ། །སྨན་ཁུ་དེ་ཡི་ཉིས་འགྱུར་གྱི། །ཀཉྫི་རང་སྐྱུར་གཞུག་པར་བྱ། །ཞོ་ཡང་སྨན་ཁུའི་ཉིས་འགྱུར་ནི། །དེ་ལ་ཉེ་བར་གཞུག་པར་བྱ། །སྨན་ནི་འདི་རྣམས་སྲང་རེ་ལ། །ལྡེ་གུར་བྱས་ལ་དེ་རུ་གཞུག །བསེ་ཤིང་འབྲས་བུ་བཅའ་ལྒ་དང༌། །ཙི་ཏྲ་ག་དང་ལྕེ་མྱང་ཚ། །བྲ་ས་ར་ཡི་རྩ་བ། །དང། །དེ་བཞིན་པི་པི་ལིང་རྩ་བ། །ཐང་ཤིང་དང་ནི་ཤུ་ཏི་དང༌། །མེ་ད་ཙཀྲ་ཧྭ་གན་དང༌། །ཨེ་རཎྜའི་རྩ་ཛི་བན་ཏི། །རུ་རྟ་ཤུ་དག་ས་ཧ་ཙར། །བོ་སོན་ཆ་ནི་བཟང་པོ་དང༌། །དེ་བཞིན་མང་དུ་སྲ་བ་དང༌། །ས་བོན་ཛ་ན་སེར་པོ་གཉིས། །ཨ་ཤྭ་གནྡྷ་ཧ་པུ་ཤ །བ་མ་སེང་ཕྲོམ་མི་རྐང་དང༌། །ཤྲེ་ཡ་སེ་ནི་ཆ་མཉམ་གཞུག །འདི་ནི་བསྐུ་དང་སྣ་སྨན་དང༌། །བཏུང་དང་འཇམ་རྩི་དག་ལ་གཏང༌། །རླུང་གི་ནད་ནི་ཐམས་ཅད་དང༌། །དེ་བཞིན་གཞན་ཀུན་སེལ་བར་བྱེད། །སྨྱོ་དང་འབྱུང་བོ་བརྗེད་བྱེད་དང༌། །དེ་བཞིན་གདོན་ནད་སྣ་ཚོགས་དང༌། །ཞ་བོ་མེ་དཔལ་གྱིས་ཐབས་ལ། །ཏིལ་མར་བསྟེན་ན་བདེ་ཐོབ་འགྱུར། །སྐམ་དང་རུས་པའི་ནད་རྣམས་ལ། །ཏིལ་མར་འདི་ནི་གཏང་བར་བྱ། །རྒོད་མ་བུ་ནི་མི་ཆགས་པ། །འདི་བླུད་ན་ནི་བུ་ཆགས་འགྱུར། །རྒོད་མ་དང་ནི་རྟ་ཕོ་ཡི། །རླུང་ནད་བརྒྱད་ཅུ་སེལ་བར་བྱེད། །
གཉེར་མ་འདུས་ཤིང་ན་ཚོད་རྒས། །སླར་ཡང་ལང་ཚོ་ཐོབ་པར་འགྱུར། །པྲ་ས་ར་ཡི་ཏིལ་མར་འདི། །རྟ་ལ་ཕན་བྱེད་མཆོག་ཏུ་བཤད། །ཚེ་དང་སྟོབས་ནི་སྐྱེད་བྱེད་ཅིང༌། །དྲན་པ་སེམས་གསལ་དཔལ་སྐྱེད་བྱེད། །རྒྱུས་པ་ཆད་དང་རྩ་ཆད་ལ། །ཏིལ་མར་འདི་ཡིས་སྣ་སྨན་གཏང༌། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་པྲས་རའི་ཏིལ་མར་གཉིས་པའོ།། །།སླེ་ཏྲེས་ཆུ་ཡི་ནང་བསྐོལ་ལ། །ཁུ་བ་བཞི་ཆའི་ཏིལ་མར་གཞུག །འོ་མ་དེ་དང་མཉམ་བཅུག་ལ། །སྨན་འདི་དག་གི་ལྡེ་གུ་གཞུག །པི་པི་ལིང་རྩ་ཚ་བ་གསུམ། །ཙི་ཏྲ་ཧ་ཏི་པི་པི་ལིང༌། །ཤུ་དག་རུ་རྟ་བྱི་དང་ག །སྐྱེར་པ་དང་ནི་ལྕེ་མྱང་ཚ། །པྲ་ས་ར་ནི་བ་ལ་དང༌། །ར་སྣ་གཟེ་མ་ཧ་པུས་པ། །བཅུག་ལ་མེ་ནི་ཆུང་ངུས་བཙོ། །དེ་བཞིན་བཅའ་ལྒ་གཞུག་པར་བྱ། །འདི་ཡིས་སྣ་རེངས་རླིག་སྦོས་དང༌། །ལུས་རེངས་རྐེད་བ་ན་བ་དང༌། །དེ་བཞིན་རྒྱབ་ནི་རེངས་པ་དང༌། །རླུང་ནད་པ་ལ་ཤ་དང་ནི། །རླུང་ལས་གྱུར་པའི་མིག་ནད་ལ། །ཁྱད་པར་དུ་ནི་རྟག་ཏུ་བཏང༌། །སླེ་ཏྲེས་ལ་སོགས་ཏིལ་མར་ནི། །ཚངས་པས་སྔོན་ཚེ་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་སླེ་ཏྲེས་ལ་སོགས་པའི་ཏིལ་མར་རོ།། །།ཤུ་ཏི་ར་སྣ་དོང་གྲ་དང༌། །བཙོད་དང་རུ་རྟ་ལྕེ་མྱད་ཚ། །ཐང་ཤིང་དང་ནི་བ་ལ་གཉིས། །སེར་པོ་གཉིས་དང་ཙནྡན་དམར། །སླེ་ཏྲེས་ཀྱི་ནི་ཁུ་བ་དང༌། །ཏི་ལ་མར་འོ་མ་བཅས་བསྐོལ་བ། །འཐེང་བའི་ནད་ནི་ཐམས་ཅད་ལ། །བསྐུ་དང་སྣ་སྨན་འཇམ་རྩི་གཏང༌། །གསང་བའི་གནས་ཏེ་བརྒྱད་པ་ལས་ཤུ་ཏིའི་ཏིལ་མར་རོ།། །།པི་པི་ལིང་དང་པོ་སོན་ཆ། །བིལ་བ་ཤིང་མངར་ཤུ་ཏི་དང༌། །རུ་རྟ་དེ་བཞིན་མ་ནུ་དང༌། །ཙི་ཏྲ་ཀ་དང་ཐང་ཤིང་ནི། །བཏགས་ཏེ་ཏིལ་མར་འོ་མ་ནི། །ཉིས་འགྱུར་བཅུག་སྟེ་བསྐོལ་བར་བྱ། །གཞང་འབྲུམ་རླུང་ནི་འཁྱིལ་བ་ལ། །འཇམ་རྩིར་གཏང་པའི་མཆོག་ཡིན་ནོ། །གཞང་འབྲུམ་པ་དང་གཟེར་ནད་དང༌། །གཅིན་སྲི་བ་དང་ཟ་གུ་དང༌། །རྐེད་པ་བརླ་ཡི་ནད་རྣམས་དང༌། །སྦེག་པ་དང་ནི་སྦོས་ནད་དང༌། །ཁྲག་འཛག་པ་དང་གཞང་ཁ་སྐྲངས། །རླུང་འཁྱིལ་བ་ནི་སེལ་བར་
བྱེད། །དེ་ལ་སོགས་པའི་ནད་རྣམས་ནི། །འཇམ་རྩི་བཏང་ན་སེལ་འགྱུར་རོ། །གསང་བའི་གནས་ཏེ་བརྒྱད་པ་ལས་པི་པི་ལིང་ལ་སོགས་པའི་ཏིལ་མར་རོ།། །།འཚོ་བྱེད་ཤིང་མངར་མ་དང༌། །པི་པི་ལིང་དང་པོ་སོན་ཆ། །ཤུ་དགར་སྣ་བ་ལ་དང༌། །བིལ་པ་ཉེའུ་ཤིང་ཤུ་ཏི་ནི། །བཏགས་པའི་ལྡེ་གུ་ཏིལ་མར་དང༌། །འོ་མ་ཉིས་འགྱུར་བཅུག་སྟེ་བསྐོལ། །ཏིལ་མར་འདི་ནི་འཇམ་རྩི་རུ། །བཏང་ན་རླུང་ནད་སེལ་བར་བྱེད། །གསང་བའི་གནས་ལས་འཚོ་བྱེད་ལ་སོགས་པའི་ཏིལ་མར་རོ།། །།མ་ཤའི་རྩ་བ་སྲང་བརྒྱ་ནི། །དུས་སུ་སྐྱེས་པ་བཏུ་བར་བྱ། །ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པར་གྱུར་པ་དང༌། །སྨན་གྱི་ཁུ་བ་དེ་དང་ནི། །ཏིལ་མར་བྲེ་བཞི་བསྲེས་པ་རུང༌། །སྨན་འདི་དག་ནི་སྲང་གཉིས་པ། །མཉམ་བྱས་ལྡེ་གུ་བཅུག་སྟེ་བསྐོལ། །བཙོད་དང་ཨ་ཤྭགནྡྷ་དང༌། །རྒྱམ་ཚ་དང་ནི་ཤིང་མངར་དང༌། །ནིམ་བའི་རྩ་བ་ཤུ་ཏི་དང༌། །ར་སྣ་ཡང་ནི་བཅུག་སྟེ་བསྐོལ། །མེ་ཆུང་ལ་བསྐོལ་ཏིལ་མར་འདིས། །རླུང་གི་ནད་ཀུན་སེལ་བྱེད་ཅིང༌། །ལུས་རེངས་པ་ཡི་ནད་རྣམས་ནི། །རབ་ཏུ་འཇོམས་པར་བྱེད་པ་ཡིན། །རླུང་ལས་གྱུར་པའི་ནད་བརྒྱད་ཅུ། །ཐམས་ཅད་འདི་ཡིས་སེལ་བར་བྱེད། །གསང་བའི་གནས་ཏེ་བརྒྱད་པ་ལས་མ་ཤའི་ཏིལ་མར་རོ།། །།ར་སྣ་ལ་སོགས་བཤད་བྱ་ཡིས། །ལེགས་ཐོས་མ་ཡེངས་མཉན་པར་གྱིས། །ར་སྣའི་རྩ་བ་ལོ་མ་དང༌། །འབྲས་བུ་ཡལ་ག་སྲང་བརྒྱ་ནི། །བརྡུངས་ཏེ་ཆུ་བྲེ་བཅུ་དྲུག་དང༌། །བསྐོལ་ལ་བཞི་ཆ་ལུས་པ་ན། །དེ་ཡི་ཁུ་བ་བྲེ་བཞིར་ནི། །ཏིལ་མར་བྲེ་དོ་གཞུག་པར་བྱ། །ར་སྣ་དེ་ཉིད་ལྡེ་གུ་བྱས། །སྲང་བཅུ་དེར་ནི་བཅུག་པར་བྱ། །དེར་ནི་འོ་མ་བཞི་འགྱུར་དང༌། །བློ་ལྡན་སྨན་པས་སྦྱར་བར་བྱ། །ཁ་ར་སྲང་ནི་བཅོ་ལྔ་དག །སྲང་བཅུ་ཉེ་བར་གཞུག་པར་བྱ། །ཁ་ར་རྙེད་པར་མ་གྱུར་ན། །བུ་རམ་ཉིས་འགྱུར་གཞུག་པར་བྱ། །མེ་ནི་ཆུང་ངུས་བསྐོལ་ནས་ནི། །ཨུ་དུམྺཱ་རའི་སྣོད་ནང་གཞག །ཏིལ་མར་འདིས་ནི་རླུང་གྱུར་ཏེ། །བརྒྱད་ཅུ་སེལ་བར་བྱེད་པ་ཡིན། །ར་སྣའི་སྦྱོར་བ་ཅི་བཞིན་དུ། །ཧ་ས་ཙ་རའང་དེ་དང་འདྲ། །སྣ་སྨན་བསྐུ་བ་བཏུང་བ་དང༌། །
འཇམ་རྩིའི་ལས་ལའང་བསྔགས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ར་སྣ་ལ་སོགས་པའི་ཏིལ་མར་རོ།། །།འབྲས་བུ་གསུམ་དང་ན་ལེ་ཤམ། །བཅའ་ལྒ་ལྡོང་རོས་བ་བླ་དང༌། །ནག་ཚུར་དུར་བྱིད་གླ་སྒང་དང༌། །དེ་བཞིན་ཨར་ཀའི་ལོ་མ་དང༌། །ཐང་ཤིང་དང་ནི་སེར་པོ་གཉིས། །སྤང་སྤོས་དང་ནི་ཙནྡན་དམར། །འདི་དག་སྲང་རེའི་ཚད་བྱས་པ། །བ་གཅིན་དང་ནི་ལྷན་ཅིག་བསྐོལ། །ཡུངས་མར་སྲང་ནི་སུམ་ཅུ་དང༌། །དུག་ནི་སྲང་གཅིག་གཞུག་པར་བྱ། །ལྕགས་ཀྱི་སྣོད་དུ་མེ་ཆུང་གིས། །རིམ་གྱིས་དེ་ནི་བསྐོལ་བར་བྱ། །ཏིལ་མར་འདི་ཡིས་རྟ་ཡི་ནི། །ལུས་ཀྱི་ནད་རྣམས་སེལ་བར་བྱེད། །གཡན་པ་དང་ནི་རྐང་ཤུ་དང༌། །དེ་བཞིན་འབྲུམ་བུ་སྣ་ཚོགས་ནི། །བསྐུས་པ་ཡིས་ནི་སེལ་བྱེད་ཅིང༌། །མཉན་པར་ཡང་ནི་འགྱུར་བ་ཡིན། །གང་ཞིག་རྨ་རེད་གྱུར་པ་དག། དེ་ལའང་སྨན་ནི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་དུག་གི་སྙིང་པོ་ཅན་གྱི་ཏིལ་མར་རོ།། །།རུ་རྟ་རྒྱམ་ཚ་སེར་པོ་གཉིས། །ཀ་ར་བཱི་ར་ན་ལེ་ཤམ། །ན་ཏ་མན་ཏ་བི་ཤ་ལ། །ཀམ་པི་ལེ་དང་སྲ་རྩི་པོག །ཡུངས་ཀར་གླ་སྒང་པ་ཏོ་ལ། །ནི་བཾ་སྦད་མ་སྐྱེར་ཁཎ་དང༌། །བྱི་ད་ངག་ནི་ཆ་མཉམ་བྱ། །འདི་དང་ཏིལ་མར་བ་གཅིན་ནི། །ཉིས་འགྱུར་བཅུག་ལ་བསྐོལ་བར་བྱ། །ཏིལ་མར་བསྐ་བར་གྱུར་བའི་ཚེ། །རྙིགས་མར་བཅས་པས་བསྐུས་ན་ནི། །རྡོ་དང་གཡན་པའི་ནད་རྣམས་དང༌། །མཛེ་ནད་ལོ་མང་ལོན་པ་འཇོམས། །རྐང་ཤུ་དང་ནི་ཤ་བཀྲ་ཡང༌། །ལན་ཅིག་བསྐུས་པས་སེལ་བར་བྱེད། །མཛེ་ཡི་ནད་ནི་བཅོ་བརྒྱད་དག །དབང་པོའི་ཐོག་བབ་ལྟ་བུར་འཇོམས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་རུ་རྟ་ལ་སོགས་པའི་ཏིལ་མར་རོ། །ཏིལ་མར་གྱི་ལེའུ་རྫོགས་སོ། །ར་སྣ་བ་ལ་སླེ་ཏྲེས་དང༌། །བ་སྤྲུ་བ་དང་ཨེ་རཎ་དང༌། །ཤི་ཀྲུ་བཅའ་ལྒ་ཐང་ཤིང་དང༌། །ཨ་ཤྭ་གནྡྷ་ཉེའུ་ཤིང་དང༌། །རྩ་བ་ལྔ་བ་ཨ་རུ་ར། །ས་ཧ་ཙ་ར་སྲུ་སྲུའི་རྩ། །ཆུ་དང་བསྐོལ་བའི་སྨན་ཁུ་འདི། །གུ་གུལ་བཅས་པའམ་དེ་
གཅིག་པུ། །སྦྲང་རྩི་དང་ནི་སྦྱར་བྱས་པས། །སྐེ་རེངས་རྒྱབ་རེངས་མཇུག་དོའི་ནད། །གཞང་འབྲུམ་རོ་སྟོད་ནད་རྣམས་དང༌། །སྣ་རྣག་འབྱུང་བ་སེལ་བར་ངེས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ར་སྣ་ལ་སོགས་པའི་སྨན་གྱི་ཁུ་བའོ།། །།གླ་སྒང་པོ་དང་པ་ཐ་དང༌། །ཤུ་དག་དང་ནི་ཨ་རུ་ར། །པུ་ཙེ་ཤེལ་དང་ཀྱི་ལྕེ་བ། །ཐང་ཤིང་དང་ནི་པར་པ་ཏ། །པི་པི་ལིང་རྩ་བྱི་ཚེར་བ། །སླེ་ཏྲེས་དང་ནི་བཅའ་ལྒ་དང༌། །པ་ཏོ་ལ་ཡི་ལོ་མར་བཅས། །སྨན་ཁུ་བཟང་པོ་བསྐོལ་བར་བྱ། །མེ་དྲོད་བྲི་དང་རིམས་བཅས་དང༌། །སེམས་ཁོང་ཆུད་དང་ལྐོག་ནད་དང༌། །གཞོང་འདྲ་སྐྲངས་ནད་ལུད་པ་དང༌། །མ་ཞུ་རླུང་དང་སྟོབས་ཟད་པའི། །རྟ་ཡི་ནད་ལ་བཏང་གྱུར་ན། །ནད་ཀུན་སེལ་བའི་མཆོག་ཡིན་ནོ། །གསང་བའི་གནས་ཏེ་བརྒྱད་པ་ལས་གླ་སྒང་ལ་སོགས་པའི་སྨན་ཁུའོ།། །།ཤྲིང་ག་ཏ་ཀ་ཤྲི་ཤ་ཡི། །ཤུན་པ་ལ་ཀའི་རྩ་བ་དང༌། །ཨ་ཤྭ་གནྡྷ་ར་སྣ་དང༌། །སྲ་པ་ར་ཡི་རྩ་བ་ནི། །ཆ་ནི་མཉམ་པོར་སྦྱར་བྱས་ལ། །གཏུན་གྱི་ནང་དུ་བརྡུངས་ཏེ་བསྐོལ། །བཞི་ཆ་ལུས་པར་གྱུར་པ་དང༌། །དྲོ་འཇམ་རྟ་ལ་བླུད་པར་བྱ། །བྲང་གི་ནད་ནི་ཐམས་ཅད་ལ། །སྨན་པུ་འདི་ནི་མཆོག་ཏུ་བསྔགས། །གསང་བའི་གནས་ཏེ་བརྒྱད་པ་ལས་ཤྲིང་ག་ཏ་ཀ་ལ་སོགས་པའི་སྨན་ཁུའི་ལེའུའོ། །སྨན་ཁུའི་ལེའུ་རྫོགས་སོ།། །།རྟ་ནི་མ་ཞུར་གྱུར་པ་དག །རྩྭ་ཉུང་ཟ་ཞིང་ཡིད་མི་བདེ། །བྱིན་པ་གཉིས་ནི་འཐེང་གྱུར་ཞིང༌། །ཉམ་ཐག་པ་ཡིས་གཅིན་རྟུག་གཏོང༌། །ཡང་ན་བྱིན་པ་སྐྲངས་པའམ། །རྨ་ཡི་ནད་ནི་འབྱུང་བར་འགྱུར། །སྲོད་དང་ང་རྒྱལ་མེད་འགྱུར་ཞིང༌། །རྨོངས་བག་མ་ཞུ་ལས་བྱུང་སྐྱེ། །དེ་ལ་ཅི་སྲིད་ནད་མེད་ནི། །ཉམ་ཆུང་གྱུར་པར་སྨྱུང་བར་གཞག །ཤིན་ཏུ་ན་ན་ནད་གཞི་གསུམ། །སེལ་བའི་སྨན་ཁུ་དྲོ་འཇམ་བླུད། །རྟ་ལ་སྨྱུང་བ་བྱས་རྗེས་ལ། །དུས་མཐུན་ཟས་དང་སྐོམ་བྱིན་ཏེ། །ཞག་ལྔའམ་ཞག་བཞིའི་བར་དུ་ནི། །རྗེས་སུ་བཏུང་བ་བླུད་པར་བྱ། །དེ་ཡིས་ནང་བྱང་མ་གྱུར་ན། །ནད་སྟོབས་སྐྱེས་ལ་སྨན་པ་ཡིས། །ཞག་བདུན་གྱི་ནི་རྗེས་ལ་ནི། །གཏར་ག་ཉེ་བར་གདབ་པར་བྱ། །རྣ་བ་མུར་འགྲམ་རྩེའུ་ཆུང་
དང། །བྲང་གི་རྩ་ལ་གཏར་ག་གདབ། །བྱིན་པ་རྐང་པ་ཚེའུ་ཚེ་ཡི། །རྩ་ལས་འཐེང་གྱུར་གཏར་ག་གདབ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་མ་ཞུ་པ་སྦྱང་པའོ།། །།དེ་ནས་རྟ་ཡི་སོ་སོར་བཏུང༌། །ཁྱེད་ལ་ཡང་དག་བཤད་པར་བྱ། །ཨ་རྫ་མོ་དང་ལ་ལ་ཕུད། །པི་པི་ལིང་དང་ཙི་ཏྲ་ཀ །པི་པི་ལིང་གི་རྩ་བ་དང༌། །བཅའ་ལྒ་ཡང་ནི་ཆ་མཉམ་སྦྱར། །འདི་དག་གི་ནི་ཕྱི་མ་དག །ཆུ་ཚན་དང་སྦྱར་བླུད་པར་བྱ། །བཙོད་དང་སྦྲང་རྩི་ད་ཏ་ཀི། །སེར་པོ་གཉིས་དང་ལོ་མ་བདུན། །པྲི་ཡང་ཀུ་དང་ཁ་ར་དང༌། །ཡུངས་ཀར་དམར་དང་པི་པི་ལིང༌། །འདི་དག་ཆ་ནི་མཉམ་བྱས་ལ། །བུ་རམ་ཆང་དང་སྦྱར་བ་བླུད། །འདིས་ནི་རྟ་ཡི་ལྟོ་བ་ན། །གནས་པའི་ནད་རྣམས་སེལ་པར་བྱེད། །གསང་བའི་གནས་ཏེ་བརྒྱད་པ་ལས་སོ་སོར་བཏུང་བའོ།། །།པི་པི་ལིང་དང་ན་ལེ་ཤམ། །བཅའ་ལྒ་ཤུ་དག་བྱི་དང་ག །ཤིང་ཀུན་གཡེར་མ་ཙི་ཏྲ་ཀ །དན་ད་དང་ནི་བུ་ཙེ་ཤེལ། །ཆང་དངས་དང་ནི་སྦྱར་བ་ནི། །སོ་སོར་བ་ཏུང་བ་བླུད་པར་བྱ། །གསང་བའི་གནས་ཏེ་བརྒྱད་པ་ལས་སོ་སོར་བཏུང་བ་གཉིས་པའོ།། །།པི་པི་ལིང་དང་ལན་ཚྭ་དང༌། །ཤུ་དག་དང་ནི་ཤིང་ཚར་བཅས། །ཨརྫ་མོ་ད་གོ་སྙོད་དང༌། །ཙི་ཏྲ་ཀ་དང་ན་ལེ་ཤམ། །ཆང་དངས་དང་ནི་སྦྱར་བ་ཡི། །རྗེས་སུ་བཏུང་བ་བླུད་པར་བྱ། །འདི་ཡིས་རླུང་དང་བད་ཀན་གྱི། །ནད་རྣམས་སེལ་བར་བྱེད་པ་ཡིན། །གསང་བའི་གནས་ཏེ་བརྒྱད་པ་ལས་རྗེས་སུ་བཏུང་བའོ།། །།ལུས་ཀྱི་རྩ་བ་མཇུག་ཁུང་ཡིན། །སྨན་ལུགས་དེ་ནི་རབ་ཏུ་གནས། །འདི་ཡིས་རྐང་མཐིལ་སྤྱི་བོའི་བར། །ལུས་ཀུན་རྟས་པར་བྱེད་པ་ཡིན། །ཁུར་ཆེན་དང་ནི་བཀྲེས་དང་སྐོམ། །ཆར་དང་དེ་བཞིན་རླུང་རྣམས་ནི། །རྟ་ཡིས་རབ་ཏུ་བརྣགས་ནུས་ཤིང༌། །རྩ་མེད་ན་ཡང་སེམས་མི་ཞུམ། །རྟ་ནི་ཤ་ཚིལ་རུས་པ་བརྟན། །གོམ་པ་ཤིན་ཏུ་ཡངས་པ་དང༌། །ལུས་ནི་མཛེས་པར་སྣང་བ་དང༌། །རྒྱབ་དང་རྐང་པ་སྲ་བར་འགྱུར། །ཇི་ལྟར་ཤིང་ནི་རྩ་བ་ནས། །ཆུ་ཡིས་བརླན་པར་གྱུར་པ་ན། །ལོ་འདབ་ལ་སོགས་རྒྱས་པར་འགྱུར། །རྟ་ཡི་འཇམ་རྩིའང་དེ་དང་འདྲ། །ལུས་ལ་གནས་པའི་
རླུང་ལྔ་པོ། །སྲོག་དང་གྱེན་རྒྱུ་ཐུར་སེལ་དང༌། །མེ་དང་མཉམ་གནས་ཁྱབ་བྱེད་རྣམས། །རྗེས་སུ་མཐུན་པར་རྒྱུ་བར་འགྱུར། །དེ་ཚེ་ཐུར་སེར་རླུང་གིས་ནི། །མེ་དང་མཉམ་གནས་སྐྱེད་པར་བྱེད། །མཉམ་གནས་ཀྱིས་ཀྱང་ཁྱབ་བྱེད་བརྟན། །དེས་ཀྱང་གཞན་དག་བརྟན་པར་བྱེད། །དེ་ལྟར་གོང་ནས་གོང་དུ་ནི། །འདི་དག་རིམ་གྱིས་རྗེས་མཐུན་གནས། །དཔེར་ན་སོས་ཀའི་ཉི་མ་ཡིས། །ས་ལ་གནས་པའི་ཆུ་ཚོགས་ཀྱི། །གཟི་མདངས་བླངས་པར་གྱུར་ནས་ནི། །ནམ་མཁའི་ངོས་ལ་གནས་པ་ཡིན། །རྟ་ལ་འཇམ་རྩི་ལེགས་བཏང་པ། །དེ་དང་འདྲ་བར་ཤེས་པར་བྱ། །ཇི་ལྟར་ལེབ་རྒན་རྩིས་བསྒྱུར་བའི། །མཚོན་པའི་འདག་ཆལ་གྱིས་སེལ་ལྟར། །དེ་བཞིན་མས་གཏོང་ནི་རུ་ཧ། །ཕྲ་བའི་ལམ་ནས་ཞུགས་གྱུར་བས། །མགོ་ནས་རྐང་པའི་བར་གྱི་ནི། །ནད་རྣམས་སེལ་བར་བྱེད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་མས་གཏོང་བའི་ལས་ཀྱི་ཡོན་ཏན་བསྟན་པའོ།། །།སྣ་སྨན་གཏོང་བའི་སྦུ་གུ་ནི། །སོར་བཅུ་རུ་ནི་བྱ་བར་བཤད། །ཡང་ན་སྟེང་ནས་བླུགས་བྱ་སྟེ། །དེ་ཡང་རས་བལ་ཉིད་ལག་ཟབ། །སྔ་དྲོ་ལྟོ་སྟོང་གྱུར་པ་ཡི། །རྟ་ཡི་ལུས་ནི་དྲང་པོར་གཞག །འཕྲལ་དུ་བླུགས་ཀྱིས་རྒྱུན་དུ་མིན། །དབུགས་དབྱུང་ཚེ་ན་སྤྱད་པར་བྱ། །སྣ་སྨན་གཏོང་བ་རྩོལ་བ་དང༌། །ཆུ་འཐུངས་པ་ལས་བསྲུང་བར་བྱ། །གསང་བའི་གནས་ལས་སྣ་སྨན་བཏང་བའི་ཆོ་གའོ།། །།རུ་རྟ་ཡུང་བ་པི་པི་ལིང༌། །བཅའ་ལྒ་ཤིང་ཀུན་སྐྱེར་ཁ་ཎ་དང༌། །པྲི་ཡང་ཀུ་དང་ར་སྣ་ནི། །ལྷན་ཅིག་སྦྱར་ཏེ་བཏགས་པར་བྱ། །སྨན་ཁུ་དེ་ལ་ར་སྣ་ནི། །བཞི་ཆ་སླར་ཡང་གཞག་པར་བྱ། །སྣ་སྨན་འདི་ནི་གཉེའུ་རེངས་དང༌། །རྣ་རྩེའི་ནད་ལ་གཏང་བར་བྱ། །དེ་ནི་འཐེང་དང་བྲང་ཁ་ན། །འགྲམ་པ་དང་ནི་བརླ་རེངས་དང༌། །རླུང་དང་བད་ཀན་ལས་གྱུར་པའི། །ནད་ཀུན་སེལ་བར་བྱེད་པ་ཡིན། །གསང་བའི་གནས་ལས་རུ་རྟ་ལ་སོགས་པའི་སྣ་སྨན་ནོ།། །།བུ་རམ་བཅའ་ལྒའི་ར་བའམ། །པི་པི་ལིང་དང་རྒྱམ་ཚར་སྦྱར། །སྣ་སྨན་བཏང་ན་འགྲམ་པ་སྣད། །དཔུང་པ་མགོ་པོའི་ནད་རྣམས་དང༌།
ལྐོག་ནད་དང་ནི་རྣ་བའི་ནད། །རྒྱབ་རེངས་སེལ་བར་བྱེད་པ་ཡིན། །གསང་བའི་གནས་ལས་བཅའ་ལྒ་ལ་སོགས་པའི་སྣ་སྨན་ནོ།། །།པི་པི་ལིང་དང་བཅའ་ལྒ་དང༌། །རྒྱམ་ཚ་བྲྀ་ཧ་ཏིའི་འབྲས་བུ། །བག་ཅིན་དང་ནི་སྦྱར་བ་དག །སྣ་སྨན་དུ་ནི་གཏང་བར་བྱ། །སྣ་སྨན་འདི་ཡིས་རེངས་པའི་ནད། །ཅུང་ཟད་རྙིང་པར་འགྱུར་བ་ཡིན། །གསང་བའི་གནས་ལས་པི་པི་ལིང་ལ་སོགས་པའི་སྣ་སྨན་ནོ།། །།བྲྀ་ཧ་ཏི་ཡི་འབྲས་བུ་ནི། །ཆུ་དང་བཅས་པ་ཞིབ་ཏུ་བཏགས། །སྣ་སྨན་སྦྱར་བར་བཏང་གྱུར་ན། །ནི་ར་ན་ཀའི་ནད་སེལ་འགྱུར། །གསང་བའི་གནས་ལས་བྲྀ་ཧ་ཏིའི་འབྲས་བུ་ལ་སོགས་པའི་སྣ་སྨན་ནོ།། །།ཤྲི་ཤ་ནི་དང་ཛི་བན་ཏི། །ཤུད་ག་ར་སྣ་ཐང་ཤིང་དང༌། །ཨ་ར་ཤ་དང་བཅས་པ་ནི། །བ་གཅིན་གྱི་ནི་ནང་དུ་བསྐོལ། །རླུང་ལས་གྱུར་པའི་ནད་བརྒྱད་ཅུ། །སེལ་བར་བྱེད་པར་ཐེ་ཚོམ་མེད། །གསང་བའི་གནས་ལས་ཤྲི་ཤ་ལ་སོགས་པའི་སྣ་སྨན་གྱི་ལེའུའོ།། །།ཨ་ཤྭ་གནྡྷ་ཤུ་དག་དང༌། །ཉེའུ་ཤིང་རུ་རྟ་ཐང་ཤིང་དང༌། །ཨ་བ་དང་ནི་ཨ་པུ་ཤ །སེན་དུ་བར་སེར་པོ་གཉིས། །ཆུ་ཡི་ནང་དུ་བསྐོལ་ནས་ནི། །བཞི་ཆ་ལུས་པར་གྱུར་པ་ནི། །རླུང་ནད་ཅན་གྱི་རྟ་རྣམས་ལ། །མས་གཏོང་བ་ཡི་སྦྱོར་བ་བྱ། །རླུང་ནད་རྐེད་པའི་ཚིགས་གནས་དང༌། །དེ་བཞིན་བརླ་ལ་བརྟེན་པ་ལ། །རུས་པ་ལ་གནས་དེ་ཐམས་ཅད། །མྱུར་དུ་སེལ་བར་བྱེད་པ་ཡིན། །མདོག་དང་སྟོབས་ནི་སྐྱེད་བྱེད་དེ། །རྟ་ཡི་འཇམ་རྩི་མཆོག་གྱུར་ཡིན། །སྦྱོར་བ་འདི་ཡིས་ལམ་རིང་དུ། །བཀོལ་ཡང་གནོད་པ་མེད་པར་འགྱུར། །འདི་བྱས་གྱུར་ན་རྟ་དེ་ནི། །རང་གི་ལུས་སྟོབས་བྲི་མི་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་ཤྭ་གནྡྷ་ལ་སོགས་པའི་འཇམ་རྩིའོ།། །།ཨ་པུ་ཤ་དང་ལྕེ་མྱང་ཚ། །ཙི་ཏྲ་ཀ་དང་དབྱི་མོང་དང༌། །ཤུ་ཏི་རུ་རྟ་ཤུ་དག་དང༌། །ཐང་ཤིད་དང་ནི་ཡུངས་ཀར་རྣམས། །སྨན་གྱི་ཕྱེ་མར་བྱས་པ་ཡིས། །འཇམ་རྩིའི་སྦྱོར་བ་བྱས་གྱུར་ན། །རླུང་གི་ནད་ནི་བརྒྱད་ཅུ་དང༌། །མཁྲིས་པའི་ནད་ནི་བཞི་བཅུ་དང༌། །བད་ཀན་ནད་ནི་ཉི་ཤུ་དག །འཇམ་རྩི་འདི་ཡིས་སེལ་བར་འགྱུར། །ཤ་ལི་ཧོ་ཏྲའི་གསང་བའི་
གནས་ལས་ཨ་པུ་ཤ་ལ་སོགས་པའི་འཇམ་རྩིའོ།། །།རྟ་ལ་ཕན་པར་འདོད་པ་ཡིས། །རུ་རྟ་བརྒྱད་པ་བཤད་པར་བྱ། །རུ་རྟ་ཤུ་ཏི་ཤིང་མངར་དང༌། །ཨེ་རཎྜ་དང་ཐང་ཤིང་དང༌། །སྐྱེར་པ་དང་ནི་ཧ་པུ་ཤ །པོ་སོན་ཆ་ཡི་འབྲས་བུ་ནི། །ཆ་མཉམ་ཉིད་དུ་བསྡུས་ནས་ཀྱང༌། །ཕྱེ་མ་ཞིབ་མོར་བཏགས་ནས་ནི། །ཕྱེ་མ་དེ་ལས་སྲང་གཅིག་ཅིག །མར་རམ་ཏིལ་མར་དང་སྦྱར་ལ། །འཇམ་རྩི་རྟར་ནི་བཏང་གྱུར་ན། །རླུང་འཁྱིལ་བ་ཡི་ནད་རྣམས་སེལ། །ཁུ་བ་ཟད་དང་གཅོང་ཆེན་དང༌། །རླུང་ནད་སྨད་དུ་ཞུགས་པ་དང༌། །རླིག་སྐྲངས་གཅིན་ནི་སྲི་བ་དང༌། །རླུང་ནད་ཀྱིས་ནི་སེམས་བཅོམ་ལ། །དུས་དང་མཐུན་པའི་སྣུམ་དང་ནི། །བྱིན་ན་ཕན་པར་འགྱུར་བ་ཡིན། །ཤ་ལི་ཧོ་ཏྲའི་གསང་བའི་གནས་ལས་རུ་རྟ་བརྒྱད་པ་ཞེས་བྱ་བའི་འཇམ་རྩིའོ།། །།པི་པི་ལིང་དང་བཅའ་ལྒ་དང༌། །ན་ལེ་ཤམ་དང་དུར་བྱིད་དང༌། །བྲྀ་ཧ་ཏི་ཡི་འབྲས་བུ་དང༌། །གུར་གུམ་དེ་བཞིན་ག་བུར་དང༌། །གླ་རྩི་དང་ནི་རྒྱ་སྤོས་དང༌། །དེ་བཞིན་སྨིག་རྐང་ཉིད་དང་ནི། །སྐྱེར་པ་རྣམས་ནི་ཆ་མཉམ་བྱས། །ཕྱེ་མར་ཞིབ་ཏུ་བཏགས་པར་བྱ། །དེ་ལས་འཇམ་རྩིའི་སྦྱོར་བ་ནི། །བྱས་ཏེ་རྟ་ལ་བཏང་གྱུར་ན། །རླུང་དང་མཁྲིས་པའི་ནང་རྣམས་ནི། །འཇམ་རྩི་འདི་ཡིས་སེལ་བར་བྱེད། །གསང་བའི་གནས་ལས་པི་པི་ལིང་ལ་སོགས་པའི་འཇམ་རྩིའོ།། །།ཤ་ཁ་ར་ནི་སྲང་གཅིག་དང༌། །མད་དུ་ཀ་ནི་སྲང་གཉིས་དང༌། །དེ་བཞིན་མར་ནི་སྲང་ལྔ་དང༌། །འོ་མ་ལས་ཀྱང་སྲང་བཅུ་དྲུག །འོ་མའི་འཇམ་རྩི་འདི་བཏང་ན། །མཁྲིས་པའི་ནད་རྣམས་སེལ་བར་འགྱུར། །ཁྲག་དང་མཁྲིས་པ་ཞི་བྱེད་ལ། །སྟོན་དང་སོས་ཀའི་ཚེ་ན་བསྔགས། །གསང་བའི་གནས་ལས་འོ་མའི་འཇམ་རྩིའོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་འཇམ་རྩིའི་ལེའུའོ།། །།ཕྱེ་མ་མར་ནི་ཁ་ར་འམ། །བུ་རམ་དག་དང་སྦྱར་བྱས་ལ། །ཆུ་གྲང་དག་དང་སྐྱོས་པ་ནི། །ནང་པར་རྟ་ལ་བྱིན་གྱུར་ན། །ངལ་དང་ལྟོགས་དང་དབུགས་མི་བདེ། །གཅིན་འགགས་པ་ཡི་ནད་རྣམས་ནི། །འདི་ཡིས་འཕྲལ་དུ་ཞི་བྱེད་
ཅིང། །སྟོབས་ཀྱང་སྐྱེད་བྱེད་བྱེད་པ་ཡིན། །སྦེག་དང་གཅོད་ཆེན་གྱིས་ཉེན་དང༌། །ཉམ་ཆུང་ལམ་གྱིས་དུབ་པ་ལ། །འོ་མ་མར་དང་ཕྱིར་བྱས་པའི། །ལྡེ་གུ་དེ་ལ་སྦྱིན་པར་བྱ། །ཡང་ན་ཕྱེ་མར་པི་པི་ལིང༌། །ཁ་ར་དང་སྦྱར་སྦྱིན་གྱུར་ན། །སེམས་ནི་གསལ་བར་འགྱུར་བ་ཡིན། །མཁྲིས་ནད་ངལ་བ་སེལ་བར་འགྱུར། །ལུས་ཀྱང་སྦོམ་པ་ཉིད་འགྱུར་བས། །རྟག་ཏུ་རྟ་ལ་འདི་སྦྱིན་བྱ། །སྔ་དྲོ་ཁྲུས་བྱས་ཆུ་འཐུངས་ནས། །ཕྱེ་མ་ལྡེ་གུ་སྦྱིན་པར་བྱ། །གང་གི་ཁོང་པར་རླུང་ཞུགས་དང༌། །ལུས་ལ་མཁྲིས་པས་ཉེན་གྱུར་པ། །དེ་ལ་བཏུང་བ་དང་སྦྱར་སྦྱིན། །རླུང་མཁྲིས་ནད་རྣམས་སེལ་བར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཕྱེ་མའི་ལྡེ་གུའོ།། །།ཡ་བཀྵ་ར་ཚ་བ་གསུམ། །སེར་པོ་གཉིས་དང་ཙི་ཏྲ་ཀ །ཀ་ར་བཱི་ར་དཀར་ཙ་བ། །ལྕེ་མྱང་ཚ་དང་བཅས་པ་དང། །ཨརྐའི་རྩ་བ་བི་ཤ་ལ། །ཁང་པའི་དུད་པ་ཡུངས་ཀར་བཅས། །དེ་བཞིན་ས་རྫི་ཀ་ཀྵ་ར། །དུག་ནི་ཆ་ཕྱེད་དང་བསྲེས་པ། །རང་སྐྱུར་དང་ནི་བཏགས་ནས་ཀྱང༌། །གྲིབ་མ་ལ་ནི་བསྐམ་པར་བྱ། །བ་གཅིན་དང་ནི་སྦྱར་ནས་ཀྱང༌། །སྔ་དྲོ་མཛེ་ཅན་རྟ་ལ་སྦྱིན། །ལྗན་ལྗིན་རྣམ་པར་བསལ་ནས་ཀྱང༌། །ཐལ་སྨན་གྱིས་ཀྱང་དྲིལ་ཕྱིས་བྱ། །ཕྱི་བ་དང་ནི་བསྐུ་བ་དང༌། །ཞག་བདུན་གྱི་ནི་བར་དུ་བྱ། །འདི་ཡིས་འབུས་ཟོས་སྦྲུལ་གྱིས་ཟིན། །གཡན་པ་རྡོ་དང་འབྲུམ་ཕྲན་དང༌། །དེ་བཞིན་པགས་པའི་ནད་གཞན་དང༌། །སྡིག་པ་དང་ནི་དེ་བཞིན་དུ། །སྲོག་ཆགས་གདུག་པས་ཟིན་པ་དང༌། །རྐང་ནད་གསོར་ནི་མི་རུང་རྣམས། །ངེས་པར་སེལ་བར་བྱེད་པ་ཡིན། །ཐལ་སྨན་གྱི་ནི་སྦྱོར་བ་འདི། །དྲང་སྲོང་རྣམས་ཀྱིས་སྔོན་ཚེ་བཤད། །འདི་ཡིས་རྨ་རེང་རྟག་ཏུ་ནི། །སྦྱོང་བར་བྱེད་པར་ཐེ་ཚོམ་མེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨརྐའི་ཐལ་སྨན་ནོ།། །།ནས་ཚིག་འཁུས་ཐལ་ཆོ་ག་བཞིན། །བྱིན་པ་དེ་ཡི་ཡོན་ཏན་གང༌། །དེ་ནི་ང་ཡིས་བཤད་པར་བྱ། །ངས་བཤད་པ་ལས་མཉན་པར་གྱིས། །ཆེན་པོ་ལ་ནི་སྲང་གཅིག་བྱིན། །ཆ་གཅིག་ཕྲི་བ་བར་
མ་ལ། །ཐ་མ་ལ་ནི་སྲང་ཕྱེད་བྱིན། །ཡང་ཐ་ལ་ནི་ཞོ་གཉིས་སོ། །དབྱར་ཚེ་ཏིལ་མར་དང་སྦྱར་བ། །རྟག་ཏུ་སྦྱིན་པར་བྱ་བ་ཡིན། །དུས་ཀུན་དུ་ནི་མར་བཅས་པར། །བྱིན་པར་གྱུར་བ་རབ་ཏུ་བསྔགས། །འདི་ཡིས་སྐྲངས་པ་དུག་དང་ནི། །མཛེ་ནད་ཁོང་བའི་སྲིན་བུ་དང༌། །རླུང་འཁྱིལ་བ་ཡང་སྦོས་ནད་དང༌། །གཟེར་གྱི་ནད་དང་གཞང་འབྲུམ་དང༌། །ཕོ་བ་ཡི་ནི་ནད་རྣམས་དང༌། །ཁ་ཡི་ནང་རྣམས་མ་ལུས་དང༌། །ཤུ་བའི་ནད་རྣམས་སེར་བ་ཡིན། །དེ་ནི་ཚད་ཙམ་བྱིན་གྱུར་ན། །སྟོབས་སྐྱེད་མདོག་ནི་གསལ་བར་བྱེད། །རྟ་ལ་ནས་ཚིག་འཁུས་ཐལ་པ། །བཅུད་ལེན་མཆོག་ནི་ཡིན་པར་བཤད། །རྟ་གང་རྟག་ཏུ་མི་འཐུངས་པ། །དེ་ནི་རྟག་ཏུ་ནད་མེད་འགྱུར། །དེ་ནི་རླུང་གི་ནད་རྣམས་དང༌། །མཁྲིས་པ་དང་ནི་བང་ཀན་དང༌། །ལྡན་པ་དང་ནི་འདུས་པ་དང༌། །དེ་བཞིན་གློ་བུར་བ་ཡི་ནད། །ཁྲག་ལས་བྱུང་བའི་ནད་རྣམས་སེལ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནས་ཚིག་འཁུས་པའི་ཐལ་བའི་ཆོ་གའོ།། །།དེ་ནས་གཞན་ཡང་ལན་ཚྭ་ཡི། །ཆོ་ག་དམ་པ་བཤད་པར་བྱ། །ལན་ཚྭ་ཡི་ནི་ཡོན་ཏན་རྣམས། །བཤད་ཀྱིས་དེ་ནི་མཉན་པར་གྱིས། །རྒྱམ་ཚ་རྟ་ལ་ཕན་པའི་མཆོག །རླུང་དང་བད་ཀན་སེལ་བར་བྱེད། །དེ་ཡིས་སྙིང་ནད་མ་ཞུ་བའི། །ནད་རྣམས་སེལ་བར་བྱེད་པ་ཡིན། །རྟ་རྣམས་ནད་མེད་པར་འགྱུར་ཞིང༌། །རྔ་རྔོག་ཀྱང་ནི་ལེགས་པར་སྐྱེ། །མེ་དྲོད་བྲི་བར་མི་འགྱུར་ཞིང༌། །ཕོ་བའི་ནད་རྣམས་འབྱུང་མི་འགྱུར། །ཟོས་པ་མྱུར་དུ་འཇུ་འགྱུར་ཞིང༌། །བདེ་བ་ཁོ་ནར་སྨིན་པར་བྱེད། །ལན་ཚྭས་རྟ་ཡི་གཅིན་རྟུག་དག །བདེ་བ་ཁོ་ནར་འབྱུང་བར་འགྱུར། །ལན་ཚྭ་རྟ་ཡི་ཚེ་ཡིན་པས། །དུས་ནི་རྟག་ཏུ་བསྔགས་པ་ཡིན། །སྨན་པས་དགུན་སྟོད་དགུན་སྨད་ཚེ། །ལན་ཚྭ་སྔ་དྲོ་སྦྱིན་པར་བྱ། །དཔྱིད་དང་སོས་ཀ་དབྱར་དང་སྟོན། །ཕྱི་དྲོའི་དུས་སུ་སྦྱིན་པར་བྱ། །རྟ་ནི་མཆོག་ཏུ་གྱུར་པ་ལ། །ལན་ཚྭ་སྲང་དྲུག་སྦྱིན་པར་བྱ། །བར་མ་ལ་ནི་སྲང་བཞི་སྦྱིན། །ཆུང་བ་ལ་ནི་སྲང་གསུམ་སྦྱིན། །དབྱར་གྱི་
ཚེ་ན་ལན་ཚྭ་ནི། །ནིམ་པའི་ལོ་མ་དང་སྦྱར་སྦྱིན། །དགུན་གྱི་ཚེ་ནི་དགུ་ཐི་ཡི། །ལོ་མ་དང་བཅས་སྦྱིན་པར་བྱ། །པ་ཏོ་ལ་ཡི་ལོ་མར་བཅས། །དགུན་སྨད་དང་ནི་དཔྱིད་དུས་སྦྱིན། །སོས་ཀ་དང་ནི་སྟོན་གྱི་ཚེ། །མར་དང་སྦྱར་བ་སྦྱིན་པར་བྱ། །ལན་ཚྭ་ཡི་ནི་སྦྱོར་བ་འདི། །བུ་ལ་ང་ཡིས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ལན་ཚྭའི་ཆོ་གའོ།། །།ཚངས་པ་དྲག་པོ་ཁྱབ་འཇུག་ནི། །བད་ཀན་མཁྲིས་པ་རླུང་དག་ཅན། །ཕན་ཚུན་བསྟེན་པར་བྱེད་པ་དང། །གཅིག་ལ་གཅིག་ནི་མ་འདྲེས་གནས། །དེ་ལ་ཚངས་པ་བད་ཀན་ཏེ། །དྲག་པོ་མཁྲིས་པ་ཡིན་པར་བཤད། །ཁྱབ་འཇུག་རླུང་གི་བདག་ཉིད་ཅན། །དེ་ལྟར་ཚུལ་ནི་རྣམ་གསུམ་ཡིན། །ས་ལ་བཅོས་མས་གནས་པ་ཡིན། །ཚངས་པ་ལ་སོགས་ལྷ་གསུམ་པའོ། །ལུས་ཅན་རྣམས་ཀྱི་བརྟེན་པའི་རྒྱུ། །ཨ་རུ་ར་དང་སྐྱུ་རུ་ར། །བ་རུ་ར་སྟེ་འབྲས་བུ་གསུམ། །འདི་ཡི་ཡོན་ཏན་རྣམས་དང་ནི། །སྦྱོར་བའི་ཁྱད་པར་བཤད་པར་བྱ། །རྐེད་པ་བརླ་ཡི་ནད་སེལ་ཅིང༌། །ལུས་ཟུངས་ཐམས་ཅད་དང་བར་བྱེད། །མདོག་དང་སྟོབས་ནི་སྐྱེད་པའི་མཆོག །དེ་བཞིན་གནས་གསུམ་སྦྱོར་བར་བྱེད། །འདིས་ནི་མེ་དྲོད་སྐྱེད་བྱེད་ཅིང༌། །སྨིན་དང་ཉམས་བྱེད་མཆོག་ཡིན་ནོ། །དེ་བས་རླུང་དང་མཁྲིས་པ་དང༌། །བད་ཀན་འཁྲུགས་པར་གྱུར་བ་ན། །འབྲས་བུ་གསུམ་བསྐོལ་སྦྱོར་བ་ཡིས། །ནད་ནི་སྦྱོང་བར་བྱེད་པ་ཡིན། །ཨ་རུ་ར་ནི་ཆ་གཅིག་སྟེ། །བ་རུ་ར་ནི་དེའི་ཉིས་འགྱུར། །སྐྱུ་རུ་ར་ནི་བ་རུ་རའི། །ཉིས་འགྱུར་ཁོ་ནར་གཞུག་པར་བྱ། །སྨན་ནི་བྲེ་གང་དག་དང་ནི། །ཆུ་ནི་བྲེ་བཞི་བསྐོལ་བར་བྱ། །བཞི་ཆ་ལུས་པར་གྱུར་བ་དང༌། །སྨན་ཁུ་དེ་ནི་ཐབ་ལས་དབོག །ཚགས་ཀྱིས་ལེགས་པར་བཙགས་ནས་ནི། །དུས་ཀྱི་ཆོ་ག་ཤེས་པ་ཡིས། །མེ་སྟོབས་ཆེ་ཆུང་བརྟགས་བྱས་ལ། །རྟ་ལ་ཉེ་བར་བླུད་པར་བྱ། །རླུང་ནད་ཅན་ལ་ཏིལ་མར་སྦྱིན། །མཁྲིས་པ་ཅན་ལ་མར་སྦྱར་བླུད། །བད་ཀན་ཅན་ལ་
སྲེ་ཏྲེས་དང༌། །པི་པི་ལིང་དང་སྦྱར་བ་བླུད། །མིག་གི་ནད་དང་རླིག་སྦངས་དང༌། །རྨ་དང་རྒྱུས་ནད་འཁུམས་པ་དང༌། །རྡོ་དང་གཡན་པ་འབྲུམ་ཕྲན་དང༌། །འབྲུམ་བུ་ལྟོ་ཡི་ནད་རྣམས་དང༌། །དེ་བཞིན་ལྟོ་ནད་གཞོང་འདྲ་དང༌། །ལྐོག་ནད་འབྲས་ཀྱི་ཕྲེང་བ་ལ། །ཞག་ནི་ཉི་ཤུ་རྩ་གཅིག་པར། །བླུད་ན་བདེ་བ་ཐོབ་པར་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་འབྲས་བུ་གསུམ་གྱི་སྦྱོར་བའོ།། །།ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །ཨ་རུ་ར་ནི་གང་ན་སྐྱེ། །རིགས་ནི་དུ་ཞིག་རོ་དུ་མཆིས། །སྐྱེ་གནས་རྣམ་པ་དུ་ཞེས་བགྱི། །མིད་དང་ཁ་དོག་མཚན་ཉིད་དང༌། །རྟ་ཡི་ཉེས་པ་གང་དང་གང༌། །སེལ་འགྱུར་ཐུབ་མཆོག་ཁྱེད་ཀྱིས་གསུངས། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །བརྒྱ་བྱིན་བདུད་རྩི་འཐུངས་པ་ན། །ཐིགས་པ་ས་ལ་ལྷུང་བར་གྱུར། །དེ་ལས་རིགས་དང་ཡོན་ཏན་ནི། །ཐམས་ཅད་དང་ལྡན་སྨན་སྐྱེས་འགྱུར། །བསིལ་དང་བདུད་རྩིའི་ཐིགས་ལས་འབྱུང༌། །ཡོན་ཏན་གསུམ་ལྡན་ཨ་རུ་ར། །ལན་ཚྭ་ཉིད་ནི་མ་གཏོགས་པ། །རོ་ལྔ་དང་ནི་ལྡན་བཤད་དེ། །བསྐ་དང་མངར་དང་ཆ་བ་དང༌། །ཁ་དང་སྐྱུར་བར་གྲགས་དང་ལྡན། །དེ་ལྟར་རོ་ལྔ་བཤད་ནས་ནི། །དེ་ཡི་མིང་ནི་བཤད་པར་བྱ། །རྣམ་རྒྱལ་འཕེལ་བ་ཞེས་བྱ་དང༌། །སྐེམ་བྱེད་དེ་བཞིན་བདུད་རྩི་དང༌། །ནག་པོ་དང་ནི་འཇིགས་མེད་དང༌། །འཚོ་བྱེད་ཅེས་ནི་མིང་དུ་གྲགས། །རྣམ་རྒྱལ་ཀུ་བ་ལྟ་བུར་ཟླུམ། །འཕེལ་བྱེད་ཤིན་ཏུ་ཟླུམ་པ་ཡིན། །སྐེམ་བྱེད་རུས་པ་ཆ་ཞིང་དཀར། །བདུད་རྩི་རྩེ་མོ་སྦོམ་པ་ཡིན། །འཚོ་བྱེད་གསེར་གྱི་མདོག་ཅན་དེ། །འཇིག་མེད་ཟུར་ནི་ལྔ་བ་ཡིན། །ནག་པོ་ཟུར་གསུམ་པ་ཉིད་དེ། །རིགས་ནི་བདུན་དུ་ཤེས་པར་བྱ། །འཇིག་མེད་རྟ་ཡི་རྐང་པ་ཡི། །ནད་ལ་རྟག་ཏུ་གཏང་བར་བྱ། །འཕེལ་བྱེད་དང་ནི་བདུད་རྩི་དག །རྟག་ཏུ་རྟ་ཡི་ལུས་ལ་གཏང༌། །ནག་པོ་སྦྱོང་བར་བྱེད་པར་བཤད། །འཚོ་བྱེད་སྟོབས་ནི་འཕེལ་བར་བྱེད། །སྐེམ་བྱེད་མིག་གི་ནད་ལ་གཏང༌། །
རྣམ་པར་རྒྱལ་བས་འཁྲུ་བར་བྱེད། །དེ་ལྟར་རིགས་དང་མིང་དག་གིས། །རྣམ་པ་བདུན་དུ་བཤད་པ་ཡིན། །རླུང་དང་མཁྲིས་པ་ལས་གྱུར་དང༌། །ཁྱད་པར་དུ་ནི་བད་ཀན་ནད། །མངོན་དུ་འཕྲོག་བྱེད་ཨ་རུ་ར། །སྐྱུར་བས་རླུང་ནི་སེལ་བར་བྱེད། །མངར་དང་ཁ་བས་མཁྲིས་པ་སེལ། །ཚྭ་དང་བསྐ་བས་བད་ཀན་སེལ། །དེ་བས་ཉེས་གསུམ་འཇོམས་ཞེས་བཤད། །རྟ་ལ་ཅི་ལྟར་སྦྱིན་བྱ་བ། །དེ་ཡི་ཉེས་པ་ཉན་པར་གྱིས། །བ་གཅིན་ནང་དུ་ཟླ་བ་གཅིག །ཨ་རུ་ར་ནི་གཞག་པར་བྱ། །དང་པོའི་ཞག་ནི་རྔོག་མ་ལྔ། །གཉིས་པ་ལ་ནི་བཅུ་སྦྱིན་བྱ། །ཞག་ནི་ཉི་ཤུ་རྩ་གཅིག་པར། །ལྔ་ལྔ་ཡིས་ནི་བསྐྱེད་པར་བྱ། །ནིམ་པ་ཡི་ནི་ཁུ་བ་དང༌། །སེང་ལྡེང་ཁུ་བ་དང་བཏགས་ལ། །ལྕགས་ཀྱི་སྣོད་ནང་དུ་བཅུག་སྟེ། །མཚན་མོ་བཀབ་སྟེ་དབེན་པར་གཞག །ལྡེ་གུ་བཏགས་པའི་ཚད་གང་ཡིན། །སྣུམ་གྱི་ཚད་ཀྱང་དེ་ཙམ་དུ། །སྨན་པ་མཆོག་གིས་སྦྱིན་བྱ་ཡི། །སྣུམ་མང་སྐྱོན་ནི་ཡོད་ཤེས་བྱ། །ཤུ་བ་གཡན་པ་འབྲུམ་བུ་དང༌། །མཛེ་དང་རྐང་ཤུ་འབྲས་དང་ནི། །ནད་ནི་རྐང་ལ་ཞུགས་པ་དང༌། །གཞང་འབྲུམ་དང་ནི་ཤ་བཀྲ་དང༌། །དེ་བཞིན་རྟ་ཡི་རྐང་བའི་ནད། །ཨ་རུ་ར་ཡིས་སེལ་བར་བྱེད། །དབྱར་ཚེ་རྒྱམ་ཚ་དང་བཅས་སྦྱིན། །སྟོན་ནི་ཁ་ར་ཨ་རུ་ར། །དགུན་ནི་བཅའ་ལྒ་དང་བཅས་པ། །དགུན་སྨད་ཁ་རུ་ཚ་དང་བཅས། །སྦྲང་རྩི་དང་སྦྱར་དཔྱིད་ཚེ་སྦྱིན། །སོས་ཀ་བུ་རམ་སྦྱར་བ་སྦྱིན། །དེ་འདྲས་མེ་ཡིས་ཤིང་བསྲེགས་ལྟར། །ནད་ཀྱི་ཚོགས་རྣམས་ཟད་པར་བྱེད། །གནད་དང་རུས་པ་ཚིགས་རྣམས་དང༌། །དྲུག་མདོ་དང་ནི་གནས་པའི་ནད། །རླུང་མཁྲིས་ལས་ནི་གྱུར་པ་དང༌། །དེ་བཞིན་བད་ཀན་ལས་གྱུར་དང༌། །ཁྲག་དང་གྱུར་ལས་ཡན་ལག་གི །ནད་ནི་སྣ་ཚོགས་གནས་པ་སེལ། །བློ་དང་སྟོབས་དང་དབང་པོ་ཡི། །ཚོགས་ཀྱི་ཁ་ནི་འབྱེད་པ་ཡིན། །རླུང་དང་མཁྲིས་པ་བད་ཀན་གྱི། །ནད་རྣམས་ཁ་ནི་འཛུམས་པར་བྱེད། །གཅིན་དང་དེ་བཞིན་རྟུག་པ་དང༌། །དྲི་མ་རྣམས་ནི་སྦྱོང་བྱེད་པ། །ཨ་རུ་རས་ནི་རྟ་ཡི་ནི། །ནད་
ནི་མ་ལུས་འཇོམས་པར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་རུ་རའི་ཆོ་གའོ།། །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །གུ་གུལ་ཇི་ལྟར་བྱུང་གྱུར་ཅིང༌། །རང་བཞིན་མཚན་ཉིད་ཅི་འདྲ་ལགས། །ཚད་དང་ཚུལ་ནི་ཇི་ཙམ་ཞིག །ནད་ནི་གང་ལ་གཏང་བར་བགྱི། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །བདུད་རྩི་བསྲུབས་པར་གྱུར་པའི་ཚེ། །ཐིགས་པ་ཕྲ་མོར་འཐོར་གྱུར་པ། །འཛམ་བུ་ཆུ་བོའི་གྲུབ་པ་དང༌། །དྲི་ཟས་བརྟེན་པའི་གནས་སུ་བཅས། །དེ་ལས་རྩ་བ་རྒྱས་པ་ཡི། །ཤིང་ནི་ཆེན་པོར་སྐྱེས་པར་གྱུར། །དེ་ཡི་ཁུ་བཅུད་འཛགས་གྱུར་པ། །གུ་གུལ་ཞེས་ནི་བྱ་བར་གྲགས། །བསྐ་ཞིང་ཚ་ལ་བསྐ་བ་སྟེ། །ཞུ་རྗེས་མངར་པོ་ཡིན་པར་བཤད། །སྨིན་པ་འཛམ་བུའི་གསེར་འདྲ་ཞིང༌། །སྨིན་པའི་གི་ཝང་ལྟ་བུ་ཡིན། །དེ་འདྲའི་གསེར་མདོག་བསྟེན་འོས་ཡིན། །དེ་ལས་བཟློག་པ་སྨད་པར་འོས། །ཞག་བདུན་པ་གཅིན་དང་སྦྱར་བ། །ཞག་བདུན་འབྲས་བུ་གསུམ་དང་སྦྱར། །ཞག་བདུན་མར་དང་སྦྱར་བསྟེན་པ། །རྗེས་སུ་མཐུན་པ་གཏང་བར་བྱ། །རླུང་གི་ནད་ལ་མར་དང་སྦྱར། །བད་ཀན་ནད་ལ་བ་གཅིན་སྦྱར། །མཁྲིས་པ་འབྲས་བུ་གསུམ་སྦྱར་གཏང༌། །འདི་དག་ཚུལ་ནི་རྣམ་གསུམ་ཡིན། །སོས་ཀ་དང་ནི་དབྱར་གྱི་ཚེ། །མར་དང་སྦྱར་ཏེ་སྦྱིན་པར་བྱ། །སྟོན་གྱི་ཚེ་དང་དགུན་སྟོད་ནི། །འབྲས་བུ་གསུམ་ཁུ་དང་སྦྱར་གཏང༌། །དགུན་སྨད་དང་ནི་དཔྱིད་ཀྱི་ཚེ། །བ་གཅིན་དང་སྦྱར་སྦྱིན་པར་བྱ། །དང་པོ་སྲང་ནི་ཕྱེད་སྦྱིན་ཞིང༌། །སྲང་ཕྱད་ཀྱིས་ནི་རིམ་བཞིན་བསྐྱེད། །སྲང་ལྔ་དག་གི་ཚད་བྱས་པ། །ཆེ་ཚད་ཁོ་ན་ཡིན་པར་བཤད། །རྟ་ལ་སྔ་དྲོ་བླུད་ནས་ནི། །ཕྱི་དྲོ་ཁ་ཟས་སྦྱིན་བྱ་སྟེ། །ཤིན་ཏུ་སྣུམ་ཞིང་གཡོས་སུ་བྱ། །ཤ་ནི་དེ་ལ་སྦྱིན་པར་བྱ། །ཆུ་ནི་ཉེ་བར་བསྐོལ་བ་དང༌། །ལྗང་པ་སྐམ་པོ་སྦྱིན་པ་བསྔགས། །རྟ་ནི་ཆེན་པོ་ཉིད་ལ་ནི། །མཐར་གྱིས་དྲུག་ཅུ་རྩ་བཞི་སྦྱིན། །བར་མ་ལ་ནི་བཞི་བཅུ་བརྒྱད། །ཉེ་བར་སྦྱིན་པ་ཉིད་དུ་བྱ། །ཆུང་ངུ་ལ་ནི་སྲང་སུམ་ཅུ། །རྩ་གཉིས་
ཀྱི་ནི་ཚད་དུ་སྦྱིན། །འདི་ནི་རྟ་ཡི་ནད་གཞི་གསུམ། །འཁྲུགས་པར་གྱུར་ལ་བསྔགས་པ་ཡིན། །ཚིགས་སྐྲངས་པ་དང་སྐྲན་དང་ནི། །དེ་བཞིན་རྨ་ཡི་ནད་རྣམས་དང༌། །ལུས་རེངས་ཡན་ལག་སྐྲངས་པ་དང༌། །སྐྲངས་དང་གཞང་ཁའི་ནད་རྣམས་དང༌། །ལྟོ་བ་ཡི་ནི་ནད་རྣམས་དང༌། །དེ་བཞིན་བད་ཀན་ནད་རྣམས་དང༌། །འཐེང་བའི་ནད་ནི་ཐམས་ཅད་དང༌། །མཛེ་ནད་བད་ཀན་ལས་གྱུར་དང༌། །རྟ་གང་མེ་དྲོད་ཉམས་པ་དང༌། །དེ་བཞིན་འབྱུང་བ་མི་སྙོམས་དང༌། །མཚན་དང་རླིག་པ་སྐྲངས་པ་དང༌། །ནད་རྣམས་སྦྱོང་བར་བྱེད་པ་ཡིན། །རྒོད་མ་རྟེའུ་ཤོར་མངལ་མི་ཆགས། །གང་ཞིག་རྟག་ཏུ་བུ་འཆི་དང༌། །གང་ཞིག་རྟག་ཏུ་རླུང་གིས་གནོད། །རྒོད་མ་དེ་ལའང་སྨན་པས་སྦྱིན། །ལུས་ཀྱི་སྟོབས་དང་གོམས་པ་དང༌། །མེ་དྲོད་ཆེ་ཆུང་ཤེས་བྱས་ལ། །ཉམས་སྟོབས་ལྡན་ཞིང་གཟུགས་དྲེགས་བདོ། །ཁུར་དང་སྡུག་བསྔལ་བསྟེན་ནུས་ལ། །བྱིན་ན་བདེ་བ་ཉིད་འགྱུར་གྱི། །གཞན་ལ་བཅུད་ཀྱིས་ལེན་མི་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་གུ་གུལ་གྱི་ཆོ་གའོ།། །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །སྒོག་སྐྱ་ཇི་ལྟར་བྱུང་བར་གྱུར། །འདི་ཡི་རོ་ནི་དུ་རུ་བཤད། །རོ་མ་ཚང་ཞེས་ཇི་ལྟར་གདགས། །བཅུད་ཀྱིས་ལེན་དུ་ཇི་ལྟར་འགྱུར། །གང་ཞིག་དང་ནི་སྦྱར་གྱུར་ན། །སྨན་གྱི་བྱ་བ་བྱེད་པ་ལགས། །ནད་ནི་གང་ལ་སྦྱིན་པར་བགྱི། །ཅི་ལྟར་ན་ནི་ལུས་རྒྱས་བགྱིད། །བུ་ཡིས་དེ་སྐད་དྲིས་པ་དང༌། །ཤ་ལི་ཧོ་ཏྲས་སླར་སྨྲས་པ། །ལྟ་དང་ལྷ་མིན་དག་གི་ནི། །གནས་སུ་བདུད་རྩི་བྱུང་བར་གྱུར། །དེ་བྱུང་བ་དང་ལྷ་རྣམས་ནི། །ཐམས་ཅད་འབད་དེ་སྲུང་བར་བྱེད། །དེ་ཚེ་མ་ལ་ཕན་འདོད་པས། །མཁའ་ལྡིང་གིས་ནི་ཕྲོགས་པར་གྱུར། །དེ་ནི་ཤུགས་ཀྱིས་སོང་བ་ན། །བདུད་རྩི་ཐིགས་པ་ས་ལ་ལྟུང༌། །མི་གཙང་བ་ཡིས་སྨེས་པ་ཡི། །ལོགས་སུ་ལྷུང་བས་དྲི་ངར་གྱུར། །བདུད་རྩི་ལས་ནི་བྱུང་བས་ན། །དེ་བས་བཅུད་ཀྱིས་ལེན་ཉིད་ཡིན། །
སྣུམ་ཞིང་བརྟན་ལ་རོ་ལྔར་ལྡན། །ཚ་ཞིང་སྟོབས་ནི་སྐྱེད་པར་བྱེད། །ལྕི་ཞིང་རོ་ཚ་བྱེད་པ་སྟེ། །སྐྱུར་བའི་རོ་དང་བྲལ་བ་ཡིན། །དེ་བས་རོ་མ་ཚང་བ་ཞེས། །དྲང་སྲོང་རྣམས་ཀྱིས་བཤད་པ་ཡིན། །གང་ཞིག་རླུང་གི་ཤུགས་ཀྱིས་ནི། །ཡན་ལག་འབྱུང་ངམ་འཁུམས་གྱུར་ཏམ། །གང་ཡང་ཤིན་ཏུ་འཐེང་བ་དང༌། །གང་གི་ལམ་དུ་བ་འཐེང་གྱུར་དང༌། །གང་ཡང་འཁྱོར་ཞིང་འགྲོ་བ་དང༌། །བྱིན་པ་རྒྱབ་དང་དྲུག་མདོ་དང༌། །དཔུང་པ་པུས་མོ་རྣམས་སུ་ནི། །ནད་ནི་ཞུགས་པར་གྱུར་བ་དང༌། །རྩ་རྒྱུས་ཤ་དང་རུས་པ་དང༌། །རྩ་ལ་ནད་ཀྱིས་ཁྱབ་གྱུར་པ། །དེ་ལ་སྒོག་སྐྱ་ལས་ལྷག་པའི། །སྟོབས་ལྡན་སྨན་གཞན་ཡོད་མ་ཡིན། །རྟ་ནི་ལྟོ་བའི་ནད་ཀྱིས་ཉན། །སྒོག་སྐྱ་ཆང་དང་སྦྱར་བ་ནི། །ཆོ་ག་བཞིན་དུ་བྱིན་གྱུར་ན། །མྱུར་དུ་དེ་ལས་ཐར་བར་འགྱུར། །རླུང་འཁྱིལ་བ་ལ་སོགས་པའི་ནད། །ཁོང་པ་ལ་བརྟེན་མི་བཟད་དང༌། །སྐྲན་དང་མཆིན་པ་མཁལ་མའི་ནད། །ཤིན་ཏུ་གསོ་དཀའ་ཐམས་ཅད་ཀྱང༌། །འདི་ཡིས་ཉེ་བར་སེལ་བར་བྱེད། །མངར་དང་ཚ་དང་ཁ་བ་དང༌། །བསྐ་དང་དེ་བཞིན་ལན་ཚྭ་སྟེ། །དེ་ལྟར་རོ་ལྔ་དང་ལྡན་ཞིང༌། །རོ་སྐྱུར་གཅིག་པོ་མེད་པ་ཡིན། །འདི་ལ་ས་བོན་མངར་བ་ཡི། །མཚན་ཉིད་ཡོད་པར་བཤད་པ་ཡིན། །རྩ་བ་ཚ་བ་ཉིད་ཡིན་ལ། །ལོ་མ་ཁ་བ་ཡིན་པར་བཤད། །སྡོང་བུའི་རོ་ནི་བསྐ་བ་ཡིན། །སྡོང་བུའི་རྩེ་མོ་ལན་ཚྭ་ཅན། །སྦྱོར་བ་ཇི་བཞིན་བྱས་པ་ཡིས། །འདི་ཡི་ཡོན་ཏན་བཤད་པར་བྱ། །རླུང་གི་ནད་ལ་མར་དང་ནི། །ཤ་ཁུ་དང་སྦྱར་གཏང་བར་བྱ། །མཁྲིས་པ་ཅན་ལ་འོ་མ་དང༌། །ལེགས་པར་བསྐོལ་ཏེ་སྦྱིན་པར་བྱ། །རང་སྐྱུར་ཀཉྫི་དང་སྦྱར་བས། །སྤོ་དང་བཤང་བ་འགགས་པ་སེལ། །ཁོང་བའི་སྲིན་བུ་རྣམས་ལ་ནི། །བ་གཅིན་དང་ནི་སྦྱར་བ་བླུད། །བད་ཀན་ལ་ནི་འབྲས་བུ་གསུམ། །ཁུ་བ་དང་སྦྱར་བླུད་པར་བྱ། །འདི་ནི་སྦེག་པའི་རྟ་རྣམས་དང༌། །རླུང་ནད་ཅན་དང་སེམས་ཉམས་པ་དང༌། །རྟ་གང་ཁྲག་དང་ཉམས་སྟོབས་ཟད། །དེ་རྣམས་བརྟ་བའི་མཆོག་ཡིན་ནོ། །ལུད་པ་དབུགས་མི་བདེ་
སེལ་ཞིང༌། །ནད་ཀུན་འཇོམས་པར་བྱེད་པ་ཡིན། །ཏིལ་མར་དང་སྦྱར་བང་རླུང་འཇོམས། །མར་དང་སྦྱར་བས་རླུང་མཁྲིས་སེལ། །འོ་མ་བུ་རམ་ཤིང་ཁུར་སྦྱར། །ཁྲག་དང་མཁྲིས་པ་སེལ་བྱེད་ཡིན། །མེ་དྲོད་ཉམས་པ་རྒྱམ་ཚ་དང༌། །ཆང་དང་སྦྱར་ཏེ་སྦྱིན་པར་བྱ། །འོ་བྱེད་སོས་ཀ་སྟོན་གྱི་ཚེ། །སྒོག་སྐྱ་སྦྱིན་པར་མི་བྱའོ། །གལ་ཏེ་རྨོངས་པས་སྟེར་གྱུར་ན། །རྟ་ནི་ཉེ་བར་གསོད་པ་ཡིན། །ཞུ་རྗེས་ཁ་དང་མངར་བས་ན། །བད་ཀན་དང་ནི་མཁྲིས་པ་སེལ། །རྒོད་མ་མངལ་ནི་ཆགས་བྱེད་ཅིང༌། །གསེབ་ཀྱི་ཁུ་བ་འཕེལ་བར་བྱེད། །རླུང་ནད་ཀྱིས་ནི་ཉེན་པ་དང༌། །ཚིགས་སུ་བྱུང་བའི་སྨན་མཆོག་ཡིན། །སྒོག་པ་ལས་ནི་སྣུམ་ཉིས་འགྱུར། །བྱ་བ་སྦྱོར་བ་ལ་རབ་བསྔགས། །སྣོད་ནི་བཟང་པོའི་ནང་བཅུག་སྟེ། །ཤིན་ཏུ་དབེན་པའི་གནས་སུ་སྤ། །ལོ་གཅིག་ལོན་པར་གྱུར་བའི་ཚེ། །དྲི་ནི་གང་ཚེ་བྱུང་གྱུར་པ། །དེ་ཚེ་དུས་ཚིགས་ཁྱད་པར་དང༌། །རྟ་ནི་སྟོབས་དང་མེ་དྲོད་དང༌། །རང་བཞིན་དང་ནི་གོམས་པ་དག །ཤེས་པར་བྱས་ལ་ལེགས་པར་གཏང༌། །ཉིན་ཞག་བཟང་ལ་ལུས་སྦྱང་བྱ། །གཏར་ག་སྦྱོང་སོགས་ཀྱིས་བྱས་ལ། །བཅུད་ཀྱིས་ལེན་གྱི་སྦྱར་བ་འདི། །རྟ་རྣམས་ལ་ནི་བྱ་བར་བཤད། །རྟ་ཡི་མཆོག་ནི་རྟག་ཏུ་ནི། །དེ་ལ་སྲང་ནི་ཉི་ཤུ་སྦྱིན། །བར་མ་ལ་ནི་བཅོ་ལྔ་སྟེ། །ཐ་མ་ལ་ནི་བཅུ་ཉིད་སྦྱིན། །ཕག་དང་དེ་བཞིན་མ་ཧེ་དང༌། །ཡང་ཉ་བྱིའུ་གོང་མ་སྲེག །རྨ་བྱ་དང་ནི་རི་དགས་ཤ །མར་བཏབ་གཡོས་ནི་ལེགས་པར་བྱས། །ཁ་ཟས་བཟང་པོ་དང་སྦྱར་བ། །བྱིན་པས་ལུས་ནི་བརྟ་བར་བྱ། །བཅུད་ཀྱིས་ལེན་གྱི་དམ་པ་འདི། །རྟ་ནི་གང་གིས་བསྟེན་བྱས་པ། །ཤིན་ཏུ་ཉམ་ང་ལ་སྦྱར་ཡང༌། །ལུས་ནི་འབྲི་བར་འགྱུར་མ་ཡིན། །སྒོག་པ་དག་ནི་ཚེ་ལ་ཕན། །སྟོབས་སྐྱེད་ཁ་དོག་བཟང་བྱེད་ཅིང༌། །ལུས་འདི་རྒྱས་བར་བྱེད་པས་ན། །རོ་རྣམས་ཀྱི་ནི་མཆོག་ཡིན་ནོ། །འདི་ནི་ལེགས་པར་བརྟན་གྱུར་ན། །ན་ཚོད་རྒས་པར་གྱུར་པ་ཡང༌། །ཤིན་ཏུ་གཞོན་པ་ཉིད་འགྱུར་ཞིང༌། །ནུས་པ་ཀུན་དང་ལྡན་པར་འགྱུར། །ལེགས་ལྡན་ཤ་ལི་ཧོ་ཏྲ་ཡིས། །རྗེས་བསྟན་དེ་སྐད་སྨྲས་པ་ཡིན། །ཤ་ལི་ཧོ་
ཏྲའི་གསང་བའི་གནས་ཏེ་བརྒྱད་པ་ལས་སྒོག་སྐྱའི་ཆོ་ག་རྫོགས་སོ།། །།ཤ་ལི་ཧོ་ཏྲ་དྲང་སྲོང་མཆོག །ཉི་མ་དང་ནི་གཟི་མཉམ་པ། །རྟ་ཁང་ན་ནི་འདུག་པ་ན། །ལེགས་ཐོས་ཀྱིས་ནི་ཡང་དྲིས་པ། །རྟ་ལ་གོ་ཆ་བསྐོན་པ་ནི། །ཅི་འདྲ་བ་ཞིག་བགྱི་པ་གསུངས། །དེ་བཞིན་ཡན་ལག་གཅིག་པར་ནི། །ཤིང་རྟ་ལ་སྦྱར་བདག་ལ་གསུངས། །གཡུལ་དུ་དགྲ་དང་ལྷན་ཅིག་ནི། །འཐབ་པ་ན་ནི་གནོད་མེད་པ། །རྟ་ཡི་ལས་ཀྱི་ཆོ་ག་མཁྱེན། །འདི་ནི་ཁྱེད་ཀྱིས་བཤད་དུ་གསོལ། །ལེགས་ཐོས་ཀྱི་ནི་ཚིག་ཐོས་ནས། །ཤ་ལི་ཧོ་ཏྲས་སླར་སྨྲས་པ། །ན་ཚོད་ཀྱིས་ནི་ཆེ་བ་ཡི། །སྐྱེས་བུ་སྔར་ནི་སྨྲས་པ་ཡིན། །སུམ་ཅུ་མ་ལོན་པར་མ་ཡིན། །ལྔ་བོ་འབྲི་བ་ཆུང་ངུ་ཡིན། །གྲགས་ལྡན་རྣམས་ཀྱི་མི་ཡི་ཚད། །དེ་ལྟར་སྔར་ནི་བཤད་པ་ཡིན། །ཤིང་རྟ་བ་ལང་རྟ་ཡི་ནི། །བསྟན་བཅོས་ཤེས་ཤིང་ལེགས་པར་བྱས། །མདའ་གཞུ་རལ་གྲི་ལ་སོགས་པའི། །མཚོན་ཆ་ཡི་ནི་ཐབས་ལ་མཁས། །ལེགས་པར་གོ་བགོས་ཡན་ལག་བདེ། །དེ་ལྟ་བུ་ངག་རྟ་ལ་བསྐྱོན། །རྟ་ནི་རིགས་བཟང་ལེགས་བརྟགས་ལ། །འཐབ་པ་རྩེད་མོའི་ཚུལ་དུ་སྦྱར། །འདི་ཡི་དང་པོའི་ཁུར་པོ་ཡི། །མདོར་བསྡུས་ནས་ནི་བཤད་པར་བྱ། །དང་པོ་གོ་ཆ་སྲང་ཚད་ནི། །བརྒྱད་ཅུ་རྩ་བཞི་ཡིན་པར་བཤད། །ལས་གཅིག་ལ་ནི་རྗེས་བསྔགས་པ། །དེ་ཡི་སྲང་ཚད་སུམ་ཅུར་བཤད། །མགོ་བོ་འགེབས་པ་ལེགས་བརྡུངས་པ། །སྲང་ཚད་སུམ་ཅུ་རྩ་ལྔར་བཤད། །བརླ་འགེབས་པ་ནི་སྲང་བརྒྱད་དང༌། །དེ་བཞིན་བཅུ་ནི་ཡིན་པར་བཤད། །ལྐོག་མ་དང་ནི་རྨིག་པ་སོགས། །བསྲུང་བཞིན་བརྒྱན་པར་བྱེད་པ་ནི། །ཐམས་ཅད་སྲང་ནི་ལྔ་བཅུ་སྟེ། །རྟ་མཆོག་ལ་ནི་དེ་ལྟར་བྱ། །བར་མ་ལ་ནི་བརྒྱ་ཡིས་འབྲི། །ཆུང་ངུ་ལ་ནི་བརྒྱ་ལྔ་བཅུ། །ཅི་ནས་གཡུལ་དུ་ཤུགས་དྲགས་པས། །འགྲོ་བར་མི་འགྱུར་དེ་ལྟར་བྱ། །རལ་གྲི་སྲང་ཚད་ཉི་ཤུ་ལྔ། །གཡོན་ལོགས་སུ་ནི་གདགས་པར་བྱ། །གཞུ་ཉིད་སྲང་ནི་ཉི་ཤུ་ལྔ། །དེ་ཉིད་དུ་ནི་གདགས་པར་བྱ། །གཡས་ངོས་སུ་ནི་མདའ་ཡི་ཚོགས། །བརྒྱ་པོ་སྲང་ནི་ཉི་ཤུག་སུམ། །ཚད་དུ་ཕྱིན་པ་གདགས་པར་བྱ། །ཕུག་དང་
དེ་བཞིན་ཐག་པ་ཡི། །ཚད་ནི་འདིར་ནི་དེས་མ་བྱས། །མདུང་ལའང་ཚད་གཅིག་ཡོད་གྱུར་པས། །འདི་འདྲ་གང་གས་ཞེས་དེ་ལ་སྨྲས། །རྟ་ཡི་རྒྱབ་ཏུ་དགབ་བྱ་བ། །རི་དགས་རིའུ་བལ་ཤ་རང་ག །སྤུ་གཞན་འཇམ་པ་ལས་བྱས་པ། །སྲ་ཞིང་ཤིན་ཏུ་འཇམ་པ་བྱ། །ཤིན་ཏུ་ལེགས་པར་བཏགས་པ་ལས། །སྣ་ཚོགས་མདོག་གིས་བརྒྱན་པར་བྱ། །དེ་ཡི་འབྲེལ་ཐག་དང་བཅས་པ། །སྲང་ནི་སུམ་ཅུའི་ཚད་དུ་བྱ། །གདོང་རྒྱན་སྲང་ནི་ཉི་ཤུ་ལྔ། །ལེགས་པར་ལྷས་པ་གདགས་པར་བྱ། །གློ་ནི་སྡོམ་པར་བྱེད་པས་ན། །རྒྱབ་ཏུ་གནོད་སྐྱེད་མི་འགྱུར་པར། །ལུག་བལ་ཤིན་ཏུ་འཇམ་པ་ཡིས། །སྲད་བུ་ལས་ནི་ལེགས་བར་བྱ། །ཡང་ན་པགས་པ་ལེགས་ཉེད་པའམ། །རས་བལ་དཀར་པོ་ལས་བྱས་པའམ། །དར་རམ་གསོ་མདར་ལ་བྱས། །གཞན་ཡང་མཛེས་ཤིང་སྲ་ལ་འཇམ། །སྟན་དང་ཆ་བྱད་ལེགས་པ་ཡི། །རྫས་ཀྱི་བཟོ་ནི་དུ་མ་བྱ། །དེ་བཞིན་གདོང་གཟན་སང་ཚད་ནི། །བཅུ་དག་རྣ་བའི་གྲ་ནས་གདགས། །གདོང་ནི་ལེགས་པར་སྲུང་བྱེད་པ། །ཤིན་ཏུ་ལེགས་པ་ཉིད་དུ་བྱ། །གཡེར་ཁ་ཤིན་ཏུ་སྙན་པ་ནི། །སྲང་རེ་ཡི་ནི་ཚད་བྱས་པས། །སྲ་ཞིང་ལུས་ནི་བརྟན་པ་དག །རྣ་བའི་ངོས་ན་གདགས་པར་བྱ། །དེ་ལྟར་ཐམས་ཅད་བཏགས་ནས་ནི། །དེ་རྗེས་རྟ་ལ་ཞོན་པར་བྱ། །གཡུལ་དུ་རྟ་ཡིས་བསྐྱུར་བྱ་བའི། །ཁུར་དག་བདག་གིས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་གོ་ཆ་ལ་སོགས་པའི་ཁུར་བསྟན་པའོ།། །།དེ་ནས་ཤིང་རྟ་དང་སྦྱར་བའི། །ངེས་པར་ཡིས་བཤད་པར་བྱ། །རྟ་ནི་གང་གི་མཆུ་ལྟག་ན། །ཤིན་ཏུ་ཤིས་པའི་མཚན་མ་ཡོད། །བ་དན་བཟང་པོ་འམ་ཟླ་བརྒྱས། །ཉ་དང་རྒྱལ་མཚན་ཡོད་གྱུར་པ། །རྟ་དེ་རྟག་ཏུ་བསྔགས་པ་ཡིན། །དེ་འདྲའི་མཚན་ཉིད་དང་ལྡན་པའི། །རྟ་ནི་ས་རྟེང་ཤིས་པར་བཤད། །ངང་ཚུལ་བཟང་ཞིང་བུ་བཟང་ལ། །སྐད་ནི་དུང་དང་འདྲ་གྱུར་པ། །རྟ་དེ་རྒྱལ་པོ་ལ་ཤིས་པས། །རིགས་མཐུན་ཤིང་རྟ་ལ་སྦྱར་བྱ། །མདོག་དང་ཚད་ནི་མཚུངས་གྱུར་ཅིང༌། །སྟོབས་ལྡན་ཉོན་མོངས་བཟོད་པ་ཤིས། །འཐབ་པའི་
ཚེ་ན་མི་སྐྲག་ཅིང༌། །འདྲེས་པ་ན་ཡང་མི་འཐེན་ལ། །མདའ་དང་དབྱིག་པ་མདུང་སོགས་ཀྱིས། །བརྒྱབ་པ་ན་ནི་སྲན་ཆེ་བ། །དེ་འདྲ་བ་ཡི་རྟ་དག་ནི། །གཡུལ་གྱི་དུས་སུ་བསྔགས་པ་ཡིན། །རྣ་བར་བཟླས་པའི་ཚེ་ན་ནི། །མིག་ལས་མཆི་མ་འབྱིན་བྱེད་ཅིང༌། །སྣ་སྦུབས་ཤིན་ཏུ་རྒྱས་བྱས་ནས། །ཉི་མ་ལ་ཡང་བལྟ་བར་བྱེད། །རྐང་པ་གཡས་པ་ས་ལ་ནི། །ཡང་དང་ཡང་དུ་རྡེབས་པར་བྱེད། །འདི་ན་སྐྱེ་བ་དྲན་པ་ཡི། །མཚན་ཉིད་དང་ལྡན་མཆོག་ཏུ་བཤད། །དེ་ལས་གཞན་པའི་རྟ་ངན་དག །ཤིང་རྟ་ལ་ཡང་སྦྱར་མི་བྱ། །ལེགས་ཐོས་རྣམ་པ་ཐམས་ཅད་དུ། །རྣ་བར་བཟླས་ལ་བརྟག་པར་བྱ། །སྔོན་ཚེ་ང་ཡིས་ཇི་ལྟར་ཐོས། །རྣ་བར་བཟླས་པ་གང་གི་ནི། །རྟ་ནི་ཤིན་ཏུ་རིགས་ལྡན་འབྱུང༌། །དོན་མེད་མི་འགྱུར་དེ་མཉན་གྱིས། །ཤིང་རྟ་ཡན་ལག་ཀུན་ལྡན་ཞིང༌། །འཁོར་ལོ་ལེགས་པར་བཏགས་པ་དང༌། །གདུགས་དང་རྒྱལ་མཚན་ལེགས་པར་བསྒྲེང༌། །ཤིན་ཏུ་རྫོགས་པ་ཉིད་དུ་སྦྱར། །ལེགས་པར་སྦྲེལ་ཞིང་ཤིན་ཏུ་ཕྱིར། །ཉི་མ་ལྟ་བུར་གཟི་མདངས་ལྡན། །རིགས་དང་མཚན་ཉིད་བཟང་བ་ཡིན། །རྟ་བཞི་དང་ནི་ཡང་དག་ལྡན། །ཁོ་ལོ་བསྒྱུར་བ་བཟང་པོར་བཅས། །འབྲུག་སྒྲ་ལྟ་བུའི་སྒྲ་སྒྲོགས་པ། །ཤིང་རྟ་དེ་ནི་ལེགས་གནས་པས། །ཤར་ཕྱོགས་སུ་ནི་ཁ་བསྟན་གཞག །གཡས་སུ་བསྐོར་ཞིང་བཀྲ་ཤིས་དང༌། །ཤིས་པར་བརྗོད་པ་ལེགས་པར་བྱ། །དེ་ཡི་རྣ་བ་གཡས་པར་ནི། །སྔགས་ཀྱི་ཚིག་འདི་བརྗོད་པར་བྱ། །ཁྱོད་ནི་དྲི་ཟའི་རིགས་སུ་སྐྱེས། །རིགས་སུན་པར་ནི་མ་བྱེད་ཅིང༌། །ཁྱོད་ནི་དངུལ་ལས་བྱུང་གྱུར་ཅིང༌། །དཔལ་མོའི་ལག་ཏུ་གནས་ན་འཕེལ། །མེ་ཡི་བུ་ཉིད་ཁྱོད་དྲན་བྱོས། །ཀོ་ཏུ་བ་ཡི་ནོར་བུའང་དྲན། །འོ་མའི་མཚེ་ལས་བདུད་རྩིའི་ཕྱིར། །ལྷ་དང་ལྷ་མིན་གྱིས་བསྲུབས་ཚེ། །དང་པོ་ཨུ་ཙ་སྲ་བ་བྱུང༌། །དེ་ལས་ཁྱོད་སྐྱེས་དྲན་པར་གྱིས། །ཤུགས་མཆོག་སྟོན་དེ་ང་ཡིས་ནི། །དགྲ་དཔུང་མ་ལུས་ལས་རྒྱལ་གྱིས། །ཚངས་པ་དང་ནི་ཟླ་བ་དང༌། །ཆུ་ལྷ་ཡི་ནི་བདེན་ཚིག་དང༌། །ཉི་མ་ཡི་ནི་གཟི་བརྗིད་དང༌། །དེ་བཞིན་དྲང་སྲོང་དཀའ་ཐུབ་དང༌། །སྟོབས་བཟང་གི་ནི་ཚངས་སྤྱོད་དང༌། །དེ་བཞིན་རླུང་གི་ཤུགས་ཉིད་དང༌། །མེ་ཉིད་ཀྱི་ནི་ནུས་མཐུ་ཡིས། །རྟ་ཁྱོད་རྒྱལ་བ་སྐྱེད་གྱུར་ཅིང༌། །འཐབ་པའི་ཚེ་ན་རྟ་ཁྱོད་ཀྱིས། །
གལ་ཏེ་ལོག་པར་འགྲོ་འགྱུར་ན། །བྲམ་ཟེ་ཕ་མ་གསོད་འདྲ་ཡི། །ཉེས་དེ་ཁྱོད་ཀྱིས་འཐོབ་པར་འགྱུར། །གལ་ཏེ་གཡུལ་ལས་རྒྱལ་གྱུར་ན། །བདག་པོ་བདེ་བ་ཉིད་སྐྱེད་བྱེད། །ཨོཾ་ན་མ། །ཨཱ་དིད་ཏཡ་ཡ་ཨུ་པ་ཡག་ག་ག་སྭཱ་ཧཱ། རྟ་ཡི་རྣ་བ་གཡས་པར་ནི། །འཐབ་པའི་ཚེ་ན་བརྗོད་གྱུར་ན། །སྐྱེ་བ་དྲན་པ་ཙམ་གྱིས་ནི། །དོན་མེད་ཉིད་དུ་འགྱུར་མ་ཡིན། །དེ་འདྲའི་སྟོབས་དང་སྙིང་སྟོབས་ལྡན། །རྟ་དང་སྦྱར་བའི་ཤིང་རྟར་ཞུགས། །གོ་བགོས་མཚོན་ཆར་ལྡན་བརྩོན་པ། །ཡུལ་འཁོར་འཇིགས་པ་ལས་བསྐྱབ་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤིང་རྟ་དང་སྦྱར་བའི་ཆོ་གའོ།། །།དེ་ནས་རྣ་བར་བཟླ་བྱ་བ། །གང་ཞིག་ཤེས་པ་ཙམ་གྱིས་ནི། །སྔོན་གྱི་སྐྱེ་བ་དྲན་བྱེད་པ། །ཤིན་ཏུ་ངེས་པར་བཤད་པར་བྱ། །བུ་ཡིས་མཚན་ཉིད་འདི་དག་ནི། །དང་པོར་ང་ལས་མཉན་པར་གྱིས། །སྦྲང་མ་ན་སབ་སྱ་བཱ་དེ་ནས། །སོ་མ་ས་བཏུ་ན་ས་ཙཿཨོ་ཛྭ་སྭ་ཙཻ་བ་སུ་ཏྱ་སྱ། མཱ་ནི་ན་མ་ཏ་པ་སཏྟ། བྷ་དྲ་སཾ་བྷྲ་མ་ཙ་ཪྻེ་ན། པ་བྷ་ན་ས་བ་ལེན་ཙ་སྲ་བྷ་བཱནྟུ་ཏ། ཤྭཱ་སཱ་བརྡྷ་ས་ཏཱཾ་ཏུ་རཾ་ག་མཿཨོཾ་ཡ་ཡ་ཡ་ཡ། ག་ག་ག་ག་སྭཱ་ཧཱ། འདི་ནི་བདག་ཉིད་ཆེན་པོ་ནི། །རྟ་ཡི་སྙིང་པོར་གྱུར་པ་ཡིན། །གཡུལ་གྱི་དུས་སུ་དྲན་བྱ་ཡི། །གཞན་དུ་ནམ་ཡང་མ་ཡིན་ནོ། །ལེགས་པར་བཏགས་ཤིང་གོ་བགོས་ལ། །འདྲ་བ་ལ་རྟག་ཞོན་ནས་ནི། །འགའ་ཞིག་རང་གི་དོན་གྱི་ཕྱིར། །རྨོངས་པས་བདག་ཉིད་སྐྱོབ་བྱེད་ཀྱི། །ལེགས་ཐོས་རྟ་ཡི་ལུས་ཡན་ལག །ལེགས་པར་སྲུང་བ་མི་བྱེད་ན། །དེ་ཚེ་སྡིག་ཅན་དམྱལ་བར་ནི། །ཡུན་རིང་དུ་ནི་འཚེད་པར་འགྱུར། །རྟ་ཡི་སྤུ་ནི་ཅི་སྙེད་པའི། །དམྱལ་བར་དེ་ཚེ་གནས་པར་བྱེད། །རྟ་ལ་གོ་ཞིག་མ་བསྐོན་ཡང༌། །བདག་ཉིད་གོ་གྱོན་ཞོན་གྱུར་པ། །མང་དུ་བཤད་པས་ཅི་ཞིག་བྱ། །དེ་འདྲའི་སྡིག་པ་ཡོང་མ་ཡིན། །དེ་བས་འབད་པ་ཐམས་ཅད་ཀྱིས། །རྟ་ནི་ལེགས་པར་བསྲུང་བར་བྱ། །དཀའ་ཐུབ་ཡོན་ཏན་ཀུན་གྱི་གཏེར། །རྟ་ཚེའི་རིག་བྱེད་ལ་མཁས་པ། །ལེགས་ལྡན་ཤ་ལི་ཧོ་ཏྲ་ཡིས། །འདི་སྐད་ཅེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་རྣ་བར་བཟླས་པ་བསྟན་པའོ། །དྲང་སྲོང་ཆེན་པོ་ཤ་ལི་ཧོ་ཏྲས་ཡང་དག་པར་བསྡུས་པའི་
རྟའི་ཚེའི་རིག་བྱང་མཐའ་དག་རྗེས་སུ་བསྟན་པ་ཞེས་བྱ་བ་རྒྱས་པ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱ་ཪྻ་དྷ་རྨ་ཤྲཱི་བྷ་དྲ་དང༌། །བུདྡྷ་ཤྲཱི་ཤཱནྟི་དང༌། ཞུ་ཆེན་གྱི་ལོ་ཙཱ་བ་ཆེན་པོ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།དཔལ་ལྡན་རྒྱལ་པོའི་རྒྱལ་པོ་ཆེ། །མི་དབང་མངའ་བདག་ཅེས་གྲགས་པ། །རྩོད་པའི་དུས་སུ་འཁྲུངས་གྱུར་ཀྱང༌། །དམ་པའི་སྤྱོད་པ་ཀུན་དང་ལྡན། །ཁྱེད་ནི་ཐམས་ཅད་མཁྱེན་དང་ཅིང༌། །ཁྱེད་ལ་བཟོད་དང་བདེན་སོགས་མངའ། །ཁྱེད་ལ་ཡོན་ཏན་ཀུན་གནས་པས། །ཁྱོད་ཉིད་བསྟོད་པར་འོས་པ་དང༌། ཁྱེད་ལ་མཁས་དང་རྒྱལ་ཕྲན་གཞན། །བྲམ་ཟེ་སློང་མོ་བ་རྣམས་ཀྱིས། །རང་རེ་གསེར་གྱི་དབང་ཕྱུག་ཏུ། །རྒྱལ་ཆེན་ཁྱེད་ནི་གཅིག་ཏུ་བསྒྲགས། །མི་དབང་རྒྱལ་པོ་དགྱེས་པ་དང༌། །གསང་དཔྱད་ཀྱིས་གཞན་ཕན་གདགས་ཕྱིར། །བཀའ་ཡིས་བསྐུལ་བས་གཞུང་རྒྱས་འདི། །བོད་ཀྱི་རང་སྐད་སྤྱོད་ཡུལ་བྱས། །ཆོས་ལྡན་གཞུང་ལུགས་ལ་མཁས་པས། །ས་རྣམས་ལེགས་པར་སྐྱོང་མཛད་ཅིང༌། །ཡོན་ཏན་ཕུན་ཚོགས་ཀུན་ལྡན་པས། །སྐྱེ་དགུ་ཡུན་རིང་རྒྱས་པར་མཛོད། །དྲང་སྲོང་ཤེས་པ་རྒྱ་མཚོ་ཕ་མཐར་ཕྱིན། །མངོན་ཤེས་ལྔ་ལྡན་ཡོན་ཏན་ཕུན་ཚོགས་པའི། །ཤ་ལི་ཧོ་ཏྲས་ཚངས་པ་ལས་ཐོས་ནས། །རྟ་ཡི་ཚེ་ཡི་རིག་བྱེད་གང་གཏམས་ཏེ། །ཡུལ་མཐོས་གཙང་འཛམ་གླིང་དཀྱིལ་སྒང་ན། །མི་རྗེ་ལྷས་མཛད་སྤུ་རྒྱལ་བཙན་པོའི་གདུང༌། །བྱང་ཆུབ་སེམས་དཔའི་སྦྲུལ་པའི་རྒྱུད་དུ་འཁྲུངས། །མཐའ་བཞིའི་རྒྱལ་པོ་གཞན་ལས་ཁྱད་པར་འཕགས། །འཁོར་དང་སྟོང་སྡེ་གསེར་དབྱེར་ཀུན་ལ་མཁས། །ས་ཡི་བདག་པོ་སེང་གེའི་གཟི་བྱིན་གྱིས། །རྒྱལ་ཕྲན་གླང་ཆེན་མྱོས་པའི་དྲེགས་འཕྲོག་པ། །མི་དབང་བཀྲ་ཤིས་ལྷ་ལྡེ་བཙན་གྱི་བཀས། །གསང་སྔགས་ཕ་རོལ་ཕྱིན་དང་བདེན་པ་ཡི། །ལུང་དང་རིགས་པའི་བསྟན་བཅོས་ཀུན་ལ་མཁས། །སྐྱེ་འགྲོ་དམ་པ་མི་དང་མགྱོགས་འགྲོ་ཡི། །ཚེ་ཡི་རིག་བྱེད་ཀུན་ཀྱང་ཞུགས་སླད་དུ། །དམན་ལ་སྙིང་བརྩེ་བག་ཡོད་ཁྲེལ་ལ་སོགས། །གཏོང་ལ་སོགས་པའི་ཡོན་ཏན་རྣམས་དང་ལྡན། །མི་ཤེས་
བརྡ་སྤྲོད་སྒྲ་བསྒྱུར་ལོ་ཙཱ་བས། །ལྷ་མི་སྐལ་བ་ཅན་གྱི་མཆོད་པའི་གནས། །རིན་ཆེན་ཀུན་ལ་ཡོད་ཀྱང་བཟང་པོ་མེད། །རིན་ཆེན་སྔོན་འགྲོ་བཟང་པོས་མཐའ་བརྒྱན་པ། །གུས་པ་སྔོན་འགྲོའི་བཀའ་ཡིས་རབ་བསྐུལ་བས། །སྒྲ་དང་ཚད་མའི་བསྟན་བཅོས་ལ་མཁས་པ། །རྒྱ་གར་མཁན་པོ་སངས་རྒྱས་ཞི་དཔལ་དང༌། །རྟ་དཔྱད་ཤ་ལི་ཧོ་ཏྲས་བསྡུས་པ་བསྒྱུར། །འདི་ནི་དབང་པོའི་རྡོ་རྗེ་བསྡེབས་ཚུལ་དུ། །ཚིགས་བཅད་ཕྱེད་དང་བདུན་དུ་བྱས་པའོ།། །།ཨོཾ་སྭ་སྟི་སིདྡྷིཾ་གྲགས་པའི་འོད་ཟེར་བྱེ་བ་རབ་སྤྲོ་ཞིང༌། །རྒྱལ་མཚན་ཐུབ་བསྟན་ཤར་རིའི་རྩེར་སོན་ནས། །ཚོགས་གཉིས་རྟ་ལྗང་ཤུགས་ཀྱིས་གླིང་བཞི་ཡི། །མུན་སེལ་ནམ་མཁའི་ནོར་བུ་དེ་ལ་འདུད། །ཁྱེད་ཀྱིས་བསྐལ་བ་བྱེ་བ་དཔག་ཡས་སུ། །རང་གཞན་དོན་དུ་ཚོགས་གཉིས་རབ་རྫོགས་བྱས། །ཕུལ་ཆེན་ཤུགས་ཀྱིས་སྟོབས་ཀྱི་འཁོར་ལོས་སྒྱུར། །འཛིན་མའི་ཁྱོན་ཉུལ་ཁམས་གསུམ་བདེ་མཛད་བསྟོད། །བསོད་ནམས་ཕུལ་ཕྱིན་སྟོབས་ཀྱིས་རབ་བསྐྱོད་པས། །སྲིད་ཞིའི་དཔལ་འབྱོར་ལོངས་སྤྱོད་གང་མཆོག་དང༌། །གསང་སྔགས་ལུང་རིགས་མན་ངག་བསྟན་བཅོས་སོགས། །མ་ལུས་ཉིད་ཀྱི་དྲུང་དུ་འདུ་བའི་ཕྱིར། །མངའ་བདག་བཙན་པོ་སྡེ་ཡིས་རབ་བསྒྲུབས་པའི། །མགྱོགས་འགྲོ་དཔལ་མོའི་བུ་ཡི་བླད་དོར་གྱི། །གཏན་ཚིགས་ཆེན་པོ་བསྟན་བཅོས་རབ་གསལ་བ། །ཤིན་ཏུ་གསང་ཞེས་ཡང་ཡང་གདམས་པ་འདི། །གསང་སྔགས་ཟབ་མོར་སྤྱད་ན་དངོས་གྲུབ་ཐོབ། །འཆོལ་བར་སྤྱོད་པ་མཁས་པའི་ཚུལ་མིན་པས། །ཙནྡན་ཚུལ་དབང་ཀླུ་དབང་ནོར་བུ་ལྟར། །ཉམས་སུ་དོན་བཞེས་དཀོར་མཛོད་དུ་གཞག་གསོལ། །ཅེས་པ་དང་བཅས་པ་འདི་དག་ཕག་ལོ་ཟླ་བ་དང་པོའི་ཚེས་གཅིག་གི་ཉིན། །ཐོས་པ་ཅུང་ཟད་འཛིན་པ་མ་ཏི་བྷ་དྲས་གསོལ་པ་ཕྱོགས་ཀུན་དུ་བདེ་ལེགས་ཀྱིས་གང་བར་གྱུར་ཅིག། །