གཅེས་པ་བསྡུས་པའི་ཕྲིན་ཡིག་བོད་རྗེ་འབངས་ལ་བརྫངས་པ།
དཔལ་དབྱངས།
གཅེས་པ་བསྡུས་པའི་འཕྲིན་ཡིག་བོད་རྗེ་འབངས་ལ་བརྫངས་པ་བཞུགས། །གཅེས་པ་བསྡུས་པའི་འཕྲིན་ཡིག་བཙུན་པ་ཆེན་པོ་དཔལ་དབྱངས་ཀྱིས་བོད་རྗེ་འབངས་༌༌༌༌ལ་བརྫངས་པ། བདག་རྟོག་སྐྱོན་གྱི་ཕུང་པོ་བཤིག །ལེགས་པའི་ཡོན་ཏན་
མཐར་ཕྱིན་པ། །འགྲོ་བའི་གཉེན་གཅིག་དེད་དཔོན་གཙོ། །མ་ལུས་མཁྱེན་ལ་བདག་ཕྱག་འཚལ། །རྒྱལ་པོ་རྣམས་དང་དགེ་སློང་དང༌། །བློན་པོ་ལས་ཀྱི་སྣ་ལ་གཏོགས། །སོ་སོའི་དེད་དཔོན་དབང་བྱེད་དང༌། །ཞིང་པ་ཚོང་པ་ཞོ་ཤས་འཚོ། །མི་ཡི་སྐྱེ་བ་བླངས་པ་ཡི། །དལ་འབྱོར་རྙེད་དང་མ་རྙེད་དང། །བུད་མེད་རོལ་མོ་མཁན་རྣམས་དང༌། །དབུང་མཐའི་བོད་ནི་རྗེ་འབངས་ལ། །འདི་དང་ཕྱི་མར་ཕན་པའི་ཕྱིར། །དགེ་བ་བཅུ་དང་བཅུ་དྲུག་དང༌། །བསམ་བ་བཅུ་དང་ཆོས་སྤྱོད་བཅུ། །ཕ་རོལ་ཕྱིན་དྲུག་སྤྱད་པ་ཡིས། །ཚེ་རབས་མང་པོ་བགྲངས་པར་ཡང༌། །ལེགས་པའི་གཞུང་གཟུགས་བདེ་འགྲོ་དང༌། །མཐར་ནི་སངས་རྒྱས་སྒྲུབ་པའི་ཕྱིར། །ཞལ་ནས་གསུངས་པའི་མདོ་སྡེ་དང༌། །དགེ་བཤེས་པ་རྣམས་མཉེས་པར་མཛད། །ཀླུ་སྒྲུབ་སྙིང་པོ་བློ་གྲོས་དང༌། །མ་ལ་བྱམས་པས་མཛད་པ་ཡི། །བྱང་ཆུབ་སེམས་དཔའི་སྤྱོད་པ་དང༌། །བཤེས་ཤིང་མཛའ་བའི་འཕྲིན་ཡག་དང༌། །རིན་ཆེན་ཕྲེང་བ་ལ་སོགས་པའི། །ནང་ནས་ཕན་པའི་གདམས་ངག་དང༌། །མང་ཞིང་ཟབ་མོའི་དོན་རྣམས་ནི། །རྒྱས་པར་བཤད་ན་མི་རྟོགས་པས། །དེ་ལས་བསྒྲུབ་གླ་གཟུང་བདེ་རྣམས། །ཉུང་ཟད་ཙམ་ཞིག་བདག་གིས་བསྡེབས། །དུལ་བའི་དཔལ་ནི་བསྐྱེད་ནས་ཀྱང༌། །བདུད་རྩི་འཐུང་བ་བཞིན་དུ་ཉོན། །དགེ་བཅུ་རྨད་དུ་བྱ་བ་ཡི། །མདོ་སྡེ་ལས་ནི་འདི་སྐད་འབྱུང༌། །ལུས་ཀྱི་སྤྱོད་པ་རབ་བསྡམས་ནས། །སྲོག་གཅོད་རྐུ་དང་གཡེམ་མི་བྱ། །ཕྲ་མ་བརྫུན་དང་ཚིག་རྩུབ་དང༌། །ཀྱལ་པ་སྨྲ་བར་མི་བྱའོ། །འདོད་པ་རྣམས་ལ་མི་ཆགས་ཤིང༌། །ཞེ་སྡང་སེམས་ཀྱང་མེད་པར་བྱ། །ལོག་པར་ལྟ་བ་ཀུན་སྤངས་ན། །བྱང་ཆུབ་སེམས་དཔའི་སྤྱོད་པ་ཡིན། །ཞེས་འབྱུང༌། མི་དགེ་བ་བཅུ་སྤྱད་པའི་རྣམ་པར་སྨིན་བ་ཅིར་འགྱུར་ཞེ་ན། རིན་པོ་ཆེའི་ཕྲེང་བ་ལས། གསོད་པ་ཡིས་ནི་ཚེ་ཐུང་ཞིང༌། །དམྱལ་བའི་གནས་སུ་ཡུན་རིང་འགྱུར། །རྣམ་པར་འཚེ་བས་གནོད་པ་མང༌། །ཚེ་རབས་ཀུན་དུ་སྡུག་བསྔལ་འགྱུར། །རྐུ་བ་ཡིས་ནི་ལོངས་སྤྱོད་ཉམས། །ཚེ་རབས་ཀུན་དུ་ཡི་དྭགས་སྐྱེ། །བྱི་པོ་བྱེད་པས་དགྲ་དང་བཅས། །ཆུང་མ་སྙིང་ནི་རིང་བར་འགྱུར། །བརྫུན་དུ་སྨྲ་བས་སྐུར་པ་མང༌། །ཚིག་ནི་ནམ་དུའང་མི་བཙུན་འགྱུར། །ཕྲ་མ་ཡིས་ནི་བཤེས་དང་འབྲལ། །བདག་ལ་སླུ་
བ་བྱེད་པ་མང༌། །ཚིག་རྩུབ་ཀྱིས་ནི་མི་སྙན་ཐོས། །མང་པོའང་ངན་སྨྲ་བར་འགྱུར། །འཁྱལ་བ་ཡིས་ནི་དོན་མི་རྙེད། །བདག་ལའང་རྐྱལ་བ་བྱེད་པར་འགྱུར། །བརྣབ་སེམས་ཡིད་ཀྱི་རེ་བ་འཇོམས། །གནོད་སེམས་འཇིགས་པ་སྦྱིན་པར་བྱེད། །ལོག་པར་ལྟ་བས་ལྟ་ངན་ཉིད། །ཆང་གིས་འཇིག་རྟེན་མྱོས་འགྱུར་ཏེ། །ནོར་ཤོར་དོན་རྣམས་ལ་ལ་བ་དང༌། །བྱ་བ་མ་ཡིན་ཐམས་ཅད་བྱེད། །དེས་ན་ཆང་ནི་ཚོད་ཟིན་བྱ། །ཞེས་འབྱུང་ངོ༌། །མི་ཆོས་བཅུ་དྲུག་ནི། དཀོན་མཆོག་གསུམ་ལ་གཅིག་ཏུ་དད། །དགེ་སྦྱོང་འཛིན་ཅིང་བྲམ་ཟེར་འཛིན། །དྲང་ཞིང་དྲང་བའི་རང་བཞིན་ཅན། །བྱས་གཟོ་བྱས་ལ་ཕན་འདོགས་དང༌། །ཕ་དང་མར་ནི་འཛིན་པ་དང༌། །རིགས་ཀྱི་རྒན་རིམས་གུས་པར་བྱེད། །ཚེས་གྲངས་རྒྱུད་ལ་མཁས་པ་དང༌། །དུས་ཚིགས་གསོ་སྦྱོང་བྱེད་པ་དང༌། །བྲེ་སྲང་འཇལ་ལུགས་གཡོ་སྒྱུ་མེད། །ཕན་ཚུན་འགྲན་སེམས་གནོད་མི་བྱེད། །འདི་ཆེད་ཕྱི་མ་བསྙོམས་ནས་སྤྱོད། །དགེ་བཅུའི་སྟེང་དུ་འདི་བསྣན་ཏེ། །ཚུལ་བཞིན་བསྲུངས་ན་ལྷ་མི་ཡི། །ལུས་ཐོབ་དོན་ཡོད་ཆུད་མི་ཟ། །དེ་ཕྱིར་ཐུབ་པ་ཆེན་པོ་ཡིས། །འཇིག་རྟེན་པ་ཡི་ཡང་དག་ལྟ། །ཆེན་པོ་སུ་ལ་ཡོད་གྱུར་བ། །དེ་ནི་ཚེ་རབས་སྟོང་དག་ཏུ། །ངན་འགྲོར་ལྟུང་བར་མི་འགྱུར་རོ། །ཞེས་འབྱུང༌། རྟག་ཏུ་བསམ་བ་བཅུ་ནི། ངེས་པར་འཆི་བསམ་ལས་ཀྱི་བསགས་པ་བགྲང༌། །དཀོན་མཆོག་གསུམ་བསྟེན་ངོ་བོ་གཉིས་མེད་མོས། །བྱང་ཆུབ་སེམས་བརྟན་ཐེག་ཆེན་ཞུགས་ལ་བྱམས། །རྟགས་བསམ་དོན་ཆེན་དཔལ་གྱི་ཕྲེང་བས་བསྔགས། །ཞེས་མདོ་སྡེ་དཔལ་ཕྲེང་ལས་འབྱུང་སྟེ། རྟག་ཏུ་བསམ་པ་བཅུ་པོ་འདི་དག་དང་ལྡན་ན་ཡོན་ཏན་ཅི་འཐོབ་ཅེ་ན། ཡང་མདོ་དག་ལས། དུས་གསུམ་རྒྱལ་བ་རྣམས་ཀྱིས་འདི་དགོངས་པས། །དུག་གསུམ་སྐྱེ་བའི་ལྗོན་པ་རྩ་ནས་བཅད། །ཉོན་མོངས་བུད་ཤིང་སྐམ་པོ་ཚང་ཚིང་ལ། །ཡེ་ཤེས་མེ་སྟག་རང་རིག་གསལ་འབར་བ། །བློ་ལས་བྱུང་ནས་ཐལ་བ་བཞིན་དུ་བསྲེགས། །བདུད་བཞིའི་དམག་དཔུང་གཡུལ་བཟློག་བཀན་ཕུབ་ནས། །བདུད་ཀྱི་གནས་ཁང་ཀུན་གཞི་གཏན་ནས་བླངས། །དེ་དག་ཕྱིན་ཆད་ང་ནི་རྒྱལ་བ་མངོན་ཕྱུང་སྟེ། །ལྷ་མི་ཀུན་གྱི་བདེ་སྟོན་དཔལ་གྱི་སྡོང་པོ་དང༌། །རྟག་ཏུ་བསམ་པར་བྱ་བ་བསམས་པས་ན། །དེ་ཕྱིར་སངས་རྒྱས་
ཞེས་ནི་མཚན་གསོལ་ཏོ། །ཞེས་འབྱུང་ངོ༌། །ཆོས་སྤྱོད་རྣམ་པ་བཅུ་ནི། མགོན་པོ་བྱམས་པས་དབུས་མཐའ་ལས། །ཡི་གེ་འདྲི་མཆོད་སྦྱིན་པ་དང༌། །ཉན་དང་འཛིན་དང་ཀློག་པ་དང༌། །འཆད་དང་ཁ་དོན་བྱེད་པ་དང༌། །དེ་སེམས་པ་དང་སྒོམ་པའོ། །འདི་བཅུ་ཆོས་ཀྱི་སྒོ་མོ་སྟེ། །འདྲེན་པ་རྣམས་ཀྱི་གཤེགས་ཤུལ་ཡིན། །རིག་པའི་གནས་ལྔ་ཀུན་མཁྱེན་པས། །ཐམས་ཅད་མཁྱེན་པར་མཚན་གསོལ་ཏོ། །དེ་ཕྱིར་རིགས་ལྡན་སྐྱེས་བུས་ཀྱང༌། །གཉིད་དང་སྙོམ་ལས་ལེ་ལོ་དང༌། །འདུ་འཛི་ཆགས་ཕྱིར་ཁྱིམ་ལ་དགའ། །བྲེ་མོའི་གཏམ་དང་བསྲུང་ལྡེབས་དང༌། །རྒྱན་པོ་འགྱེད་དང་འདུས་ལ་ལྟ། །སྡིག་པའི་གྲོགས་དང་འགྲོགས་པ་དང༌། །ཆང་དང་མཚན་མོ་འགྲོ་བ་དང༌། །ལོང་ཡོད་སྙམ་པའི་ཤེས་སྤང༌། །དེང་བྱ་སང་བྱ་མ་སེམས་པར། །བང་བྱ་བརྟོད་དེ་མ་འབད་ན། །འཆི་བདག་བདུད་ནི་དྲུང་ན་བྱ་ར་བྱེད། །ཅེས་འབྱུང་ངོ༌། །ཕ་རོལ་ཏུ་ཕྱིན་པ་བཅུ་ནི། སྦྱིན་པ་དང་ནི་ཚུལ་ཁྲིམས་དང༌། །བཟོད་དང་བརྩོན་འགྲུས་བསམ་གཏན་དང༌། །ཤེས་རབ་ཐབས་ལ་སོགས་པ་རྣམས། །སྲིད་པའི་རྒྱ་མཚོ་སྒྲོལ་བའི་གྲུ། །ཞེས་འབྱུང༌། ཕ་རོལ་ཏུ་ཕྱིན་པ་དྲུག་པོ་འདི་དག་མ་སྤྱད་ན་སྒོ་གཞན་ནས་ཐབས་མེད་དམ་ཞེ་ན། མདོ་ལས། ཡུན་རིངས་འགྲོན་པོའི་རྒྱགས་སུ་སྦྱིན་པ་སྨེ། །ལུས་སེམས་རྒྱན་དང་ཆས་སུ་ཚུལ་ཁྲིམས་བརྗོད། །ཉོན་མོངས་དགྲ་ཚོགས་འཇོམས་པར་བཟོད་པ་དཔའ། །འཕགས་ལམ་བདེ་འགྲོད་བཞོན་པར་བརྩོན་འགྲུས་བཟང༌། །ཡང་དག་དོན་ཆེན་རྟོགས་པར་བསམ་གཏན་མྱུར། །མ་རིག་མུན་པ་བསལ་བར་ཤེས་རབ་གསལ། །ཞེས་པ་དང༌། རིན་པོ་ཆེའི་ཕྲེང་བ་ལས་ཀྱང༌། །སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་དགེ་བས་བརྗིད། །བསམ་གཏན་གྱིས་ནི་བློ་གྲོས་འཕེལ། །སྙིང་བརྩེ་བས་ནི་དོན་ཀུན་འགྲུབ། །བདུན་པོ་འདི་དག་མ་ལུས་པར། །ཅིག་ཅར་ཕ་རོལ་ཕྱིན་སྤྱད་པས། །ས་ཐོབ་མ་གྱུར་བར་དུ་ཡང༌། །འཁོར་བའི་བདེ་བ་ཕུན་སུམ་ཚོགས། །ངན་སོང་མིང་ཡང་མི་གྲག་ཅིང༌། །མི་ཁོམ་བརྒྱད་པོ་གཏན་དུ་སྤངས། །དེ་ནས་རིམ་པར་ས་ཐོབ་ནས། །འཇིག་རྟེན་མགོན་པོ་ཉིད་ཐོབ་འགྱུར། །ཞེས་འབྱུང་ངོ༌། །ད་ནི་དེ་ལྟར་དགེ་བ་བཅུ་དང་མི་ཆོས་བཅུ་དྲུག་དང༌། རྟག་ཏུ་བསམ་པ་བཅུ་དང༌།
ཆོས་སྤྱོད་རྣམ་པ་བཅུ་དང༌། ཕ་རོལ་ཏུ་ཕྱིན་པ་དྲུག་ལ་སོགས་པ་ཉམས་སུ་བླངས་ནས་སྤྱད་དགོས་པ་མདོ་ཙམ་བསྟན་ནས་ད་ནི་ཆོས་འདི་དག་ཚིག་ཙམ་དུ་བཟླས་པས་མི་ཕན་པར་བསྟན་ཏེ། དེ་ཡང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ནང་ནས། སྨན་པའི་ངག་མ་མཉན་ན་སྨན་དག་གིས། །བཅོས་དགོས་ནད་པ་སོས་པར་ག་ལ་འགྱུར། །སྨན་དཔྱད་བཀླགས་པ་ཙམ་གྱིས་ནི། །ནད་པ་ལ་ནི་དེ་ཕན་ནམ། །ཞེས་འབྱུང་སྟེ། རྒྱལ་པོ་ཆེན་པོ་ལ་གདམས་ངག་གསོལ་པ་ཡང་རྒྱལ་པོ་ཀ་ནི་ས་ཀ་ལ་གསོལ་བའི་འཕྲིན་ཡིག་ལས། གདམས་བགྱི་མང་པོར་མཆིས་མོད་ཀྱང༌། །ཐམས་ཅད་གདམས་པར་སུས་རྔོ་ཐོགས། །མདོ་ཙམ་དུ་ནི་གདམས་བགྱི་ན། །དེ་ལྟར་སྙན་གཏོད་ཉིད་ཀྱི་ཆེད། །བདག་གིས་གསོལ་བ་འདི་གསོན་ཏེ། །བསྒྲུབ་དང་གཏང་བའི་ཕྱོགས་གཉིས་ལས། །གང་རིགས་དེ་ནི་ཉམས་སུ་བཞེས། །གཏང་བར་བགྱི་བ་གཏན་མ་མཛད། །ས་བདག་ཚེར་མའི་ཤིང་ལས་སྦྲང་རྩི་ལྟར། །དགྲ་བོ་ལས་ཀྱང་ལེགས་པར་སྨྲས་པ་གཟུང༌། །གསེར་གྱི་རི་ལ་དུག་རྒྱུན་ཇི་བཞིན་དུ། །ཡིད་འོང་སྐྱེ་བོའི་ཚིག་ངན་སྤང་འཚལ་ཏེ། །མདོ་ཙམ་གསོལ་བ་འདི་དག་ཉམས་སུ་བཞེས། །རྒྱལ་སྲིད་འཇིག་རྟེན་ཕ་རོལ་ནས། །བསྣམས་ཏེ་མ་བྱོན་བསྣམས་མི་འགྱུར། །བསོད་ནམས་རྒྱུན་ལས་བསྒྲུབས་པ་སྟེ། །དེ་ཡང་ཡུད་ཙམ་ཅིག་ཏུ་བས། །གཡུང་དྲུང་བཙུགས་པར་མ་དགོངས་ཤིག །དགེ་བའི་བཤེས་གཉེན་བསྟེན་བགྱི་ཞིང༌། །གུས་དང་ཞེ་སར་བཅས་པ་ཡིས། །དམ་པའི་ཆོས་ནི་གསན་པར་མཛོད། །གསན་པོའི་ཆོས་རྣམས་རྣམ་དཔྱད་དེ། །དཔྱད་པ་ལ་ནི་མཁས་པར་མཛོད། །མྱ་ངན་གྱིས་ནི་མ་གདུངས་ཤིག །ན་གཞོན་ནད་མེད་ལོངས་པ་ཡི། །དངོས་པོ་ད་ལྟར་བྱུང་བ་ཡི། །བློ་གྲོས་ལ་ནི་མི་ནུས་མེད། །ལོངས་སྤྱོད་སྲིད་ལམ་ཡེངས་པར། །མཁས་པ་རྣམས་ལས་དུས་སུ་གསོན། །འོན་ཏང་རིམ་གྱིས་མཁྱེན་པར་འགྱུར། །ཉུང་དུའང་བསྩགས་ན་ངེས་པར་ནི། །རིང་པོར་མི་ཐོགས་མང་པོར་འགྱུར། །རྟག་ཏུ་ཆུ་ཐིགས་རེ་རེའི་རྒྱུན། །བར་ཆད་མེད་པར་བབ་པ་ཡིས། །གང་ཞིག་གང་བར་མི་འགྱུར་བའི། །སྣོད་དེ་ཇི་ལྟ་བུ་ཞིག་མཆིས། །ཇི་ལྟར་དཔེ་གསལ་དེ་ལྟ་བུ། །རྒྱལ་པོས་ཚད་མར་མཛད་ནས་ནི། །དམ་པའི་ཆོས་ནི་གསན་
པ་ལ། །རྟག་པར་དགྱེས་པ་ཉིད་དུ་མཛད། །ཞམ་རང་བློན་པོའི་པུ་ཚུགས་ནི། །ཡོན་ཏན་ནོར་གྱི་གཉེར་ལ་གཉེན། །མཁས་ཤིང་སྙིང་རྗེའི་བདག་ཉིད་ཅན། །བྱས་གཟོ་ཕོངས་ཆོས་མི་བགྱིད་པ། །བཟང་པོ་ཁྱོད་ཀྱི་སླད་དུ་ཞོག །མི་གང་དཀའ་བ་སྤྱོད་བྱེད་དང༌། །དོར་བར་བྱ་དཀའ་འདོར་བ་དང། །བཟོད་པར་དཀའ་བ་བཟོད་བྱེད་དང༌། །བཀུར་དཀའ་ཉམས་སུ་ལེན་པ་དང༌། །རིང་པོར་བལྟ་ཞིང་ངེས་པ་དང༌། །འཕྲལ་བློ་མྱུར་ཞིང་སྡུག་པ་དང༌། །ཁོང་སྲན་ཆེ་ཞིང་དཔའ་བ་དང༌། །བསླུ་བར་མི་ཚུགས་གསང་ཐུབ་དང༌། །ཆོས་ཀྱིས་རྒྱལ་སྲིད་སྐྱོང་དགའ་དང༌། །དམ་ཆོས་མཛད་ལ་མི་འཁོར་བ། །རིན་གྱིས་འཇལ་ཡང་མི་ཕམ་གྱིས། །ཐུགས་བརྟན་མཛོད་ལ་སྤྱན་སྔར་ཞོག །ཁྱོད་ཀྱིས་བླུན་དང་ཕོངས་ཆོས་ཅན། །གཞུང་ངན་གདོང་གང་བྱེད་པ་དང༌། །བརྐམ་ཞིང་བྱས་པ་མི་གཟོ་དང༌། །ཁ་གཅམ་གཏུམ་པོ་མི་བཟང་བ། །ཡུལ་ནའང་གནས་སུམ་སྩལ་ཅིག །གལ་ཏེ་གཞུང་ལུགས་བཟང་དགྱེས་ན། །གོང་ནས་གོད་དུ་འབར་བར་འགྱུར། །གལ་ཏེ་ངན་པ་སྤྱོད་མཛད་ན། །འོག་ནས་འོག་ཏུ་ལྟུང་བར་འགྱུར། །ཁྱུ་མཆོག་དང་ནི་ཁྱུས་འགྲོ་བཞིན། །ཁྱོད་ནི་གྱ་གྱུ་ལ་ཞུགས་ན། །གྱ་གྱུ་ཁོ་ནའི་རྗེས་འབྲངས་ཏེ། །སྐྱེ་དགུ་ཁྱོད་ཀྱི་རྗེས་འབྲངས་པས། །རྒྱལ་ཁམས་ངན་པར་འོང་འགྱུར་རོ། །ཟླ་བ་མར་གྱི་ངོ་བཞིན་དུ། །ཉེས་པའི་ཚོགས་རྣམས་འགྲིབ་པར་མཛོད། །ཟླ་བ་ཡར་གྱི་ངོ་བཞིན་དུ། །རྒྱལ་ཁམས་ལེགས་པར་རྒྱས་པར་མཛོད། །དམ་ཆོས་བསྐྱང་བའི་ཁྲིམས་རྣམས་མཛོད། །དམ་ཆོས་འཇིག་པའི་སྐྱེ་བོ་དང༌། །བཀའ་ཁྲིམས་འདྲལ་བའི་ངན་པ་རྣམས། །ལོ་ཐོག་རྩི་ཐོག་རྒྱས་པ་ལ། །ཐོག་དང་སེར་བ་བཞིན་དུ་ཕོབ། །འོན་དང་ངན་མིག་འགག་པར་འགྱུར། །ལེ་ལོ་ཉམ་བུ་ཤེད་མ་མཛད། །འཆི་བདག་སུ་དང་མི་བཤེས་པ། །གློ་བུར་དག་ཏུ་འབབ་འགྱུར་བས། །སང་དག་བྱ་ཞེས་མ་གཞེས་པར། །དམ་པའི་ཆོས་ལ་སྨྱུར་ཏེ་མཛོད། །འཆི་བདག་གིས་ནི་དྲངས་པ་ན། །དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལོག་ནས། །འགའ་ཡང་ཁྱོད་རྗེས་མི་འབྲང་བས། །མཁྱེན་པར་མཛོད་ལ་ལེགས་པར་སྤྱོད། །སློབ་དཔོན་ཆེན་པོ་ཀླུ་སྒྲུབ་ཀྱིས། །རྒྱལ་པོ་བདེ་སྤྱོད་བཟང་པོ་ལ། །བརྫངས་པའི་འཕྲིན་ཡིག་དག་ལས་ཀྱང༌། །
ལོངས་སྤྱོད་གཡོ་བ་སྙིང་པོ་མེད་མཁྱེན་ནས། །དགེ་སློང་བྲམ་ཟ་བཀྲེན་དང་བཤེས་རྣམས་ལ། །སྦྱིན་པ་ཚུལ་བཞིན་སྩལ་བགྱི་ཕ་རོལ་ཏུ། །སྦྱིན་ལས་གཞན་པའི་གཉེན་མཆོག་མ་མཆིས་སོ། །ཁྱོད་ཀྱིས་དགེ་སློང་བྲམ་ཟེ་ལ་དང་ནི། །མགྲོན་དང་ཡབ་ཡུམ་སྲས་དང་བཙུན་མོ་དང༌། །འཁོར་གྱི་སླད་དུ་སྡིག་པ་མི་བགྱི་སྟེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །སྡིག་པའི་ལས་རྣམས་སྤྱད་པ་འགའ་ཡང་ནི། །མཚོན་བཞིན་འཕྲལ་དུ་ལུས་ལ་མི་གཅོད་ཀྱང༌། །གང་དུ་ཕྱིན་པའི་ས་ཕྱོགས་དེ་ན་སྡོད། །ཐར་པ་དག་ལ་རག་ལུས་འདི་ལ་ནི། །གཞན་གྱིས་གྲོགས་བགྱིར་ཅིར་ཡང་མ་མཆིས་ཀྱིས། །དེ་ལྟར་ཉིད་ཀྱ་རྩལ་གྱིས་འབད་པར་མཛོད། །ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་སྟེ། །དབུགས་རྔུབ་དབུགས་ཕྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་དག་ངོ་མཚར་ཆ། །ལུས་མཐའ་ཐལ་བ་མཐར་སྐམ་མཐར་འདྲུལ་ཞིང༌། །ཐ་མར་མི་གཙང་སྙིང་པོ་མ་མཆིས་པ། །རྣམ་པར་འཇིག་དེངས་མྱགས་པར་འགྱུར་བ་དེ། །སོ་སོར་གྱེས་ཆོས་ཅན་དུ་རིག་པར་མཛོད། །རྒྱ་མཚོ་གཅིག་གནས་གཉའ་ཤིང་བུ་ག་དང༌། །རུས་སྦལ་ཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་འཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །གང་ཞིག་གསེར་སྣོད་རིན་ཆེན་སྤྲས་པ་ཡི། །སྣོད་དུ་ངན་སྐྱུགས་ཕྱག་དར་བགྱིད་པ་བས། །གང་ཞིག་མི་རུ་སྐྱེས་ནས་སྡིག་པ་དག །བགྱིད་པ་དེ་ནི་ཆེས་རབ་བླུན་པ་ལགས། །སྲས་དང་བཙུན་མོ་ཡབ་ཡུམ་འཁོར་རྣམས་ཀྱང༌། །ངེས་པ་མ་མཆིས་ལས་ཀྱི་རླུང་དམར་གྱིས། །བདས་པ་ཙམ་སྟེ་བདག་ཏུ་བཟུང་པ་བས། །ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་ཡང་བཤེས་ཉིད་དང༌། །བཟློག་པ་ཉིད་དུ་མཆིས་པས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཐུགས་བརྟན་མ་མཛད་འདི་ཀུན་བསླུ་བའི་བདུད། །བསྙེངས་དང་བྲལ་བ་མང་དུ་གསོལ་ཅི་འཚལ། །ཕན་པའི་གདམས་ངག་དམ་པ་འདི་ལགས་ཏེ། །ཁྱོད་ཀྱིས་ཐུགས་དུལ་མཛོད་ཅིག་བ་ཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །རིན་པོ་ཆེའི་ཕྲེད་བ་ལས་ཀྱང༌། དམ་པའི་ཆོས་དང་ཆོས་སྨྲ་ལ། །ཉིད་ཀྱིས་བཀུར་སི་མཆོག་དང་ནི། །གུས་
པར་མཛོད་དེ་གདན་ལས་བཞེངས། །མེ་ཏོག་གཏོར་ནས་ཆོས་མཉན་ཅིང༌། །ཆོས་ཀྱི་སྦྱིན་པ་དག་ཀྱང་མཛོད། །འཇིག་རྟེན་གཏམ་ལ་དགའ་མ་མཛད། །འཇིག་རྟེན་འདས་ལ་དགྱེས་བར་མཛོད། །འཁོར་རྣམས་ཟིལ་གྱིས་མནན་པའི་ཕྱིར། །ལྷུན་སྟུག་བརྟན་དང་ངེས་པར་མཛད། །བཀའ་ལུང་མི་འགྱུར་ངེས་པར་གསུངས། །སྙན་ཁུང་མི་ཡངས་སྟུག་པ་དང༌། །བུད་མེད་ཆགས་ཕྱིར་འཕྱར་གཡེང་དང༌། །སྲབ་ཆོས་བུས་པ་ལྟར་མ་མཛད། །ཅུང་ཟད་ཙམ་གྱིས་ཁྲོམ་མཛད། །ཇི་ལྟར་རྒྱལ་སྲིད་བསྐྱང་བ་དང༌། །འབངས་ཀུན་བདེ་ལ་འགོད་པ་དང༌། །བསྔོ་བའི་དགྲ་རྣམས་གདུལ་བ་དང༌། །རྒྱལ་ཁམས་ཆོས་ཀྱིས་བསྐྱང་བགྱི་བ། །ཞིབ་ཏུ་དགོངས་ནས་གྲུབ་པར་མཛོད། །འགྲུབ་བམ་མི་འགྲུབ་མ་ངེས་པར། །དགོངས་མ་ཐག་ཏུ་མ་གསུངས་ཤིག །ཡུན་ཇི་སྲིད་ཅིག་ཆོས་སྒྲུབ་ཅིང༌། །སེར་སྣ་འཇུར་འགེགས་མ་མཛད་པར། །བདོག་པ་ཐམས་ཅད་གཏུགས་ཏེ་མཛོད། །ཁྱོད་ནི་བདོག་པ་ཀུན་བོར་ནས། །གཅིག་བུ་གཤེད་གཤེགས་འཚལ་བ། །ཆོས་ཀྱི་སླད་དུ་སྤྱད་པ་ཀུན། །ཁྱོད་ཀྱི་མདུན་དུ་འོང་བ་ཉིད། །འབངས་ལ་རེ་བ་མ་འཇོག་པར། །ཞལ་བཞུགས་ཚེ་ན་མྱུར་བར་མཛོད། །གཙུག་ལག་ཁང་དག་བརྩིག་པ་དང༌། །མཆོད་རྟེན་བརྩིག་དང་ན་བཟའ་གསོལ། །ཞིག་རལ་བཅོས་དང་མཆོད་པ་གཟུགས། །ལྷ་ཁང་ལ་སོགས་གཞན་བགྱི་བ། །སྔ་ལུགས་བཞིན་དུ་རྒྱས་པར་མཛོད། །དམ་ཆོས་ཚུལ་བཞིན་སྤྱོད་པ་ཡི། །དགེ་སློང་དགེ་བསྙེན་ལ་སོགས་པ། །གཞན་གྱིས་གཙེ་བ་མེད་པ་ཡི། །དཔུང་གཉེན་སྐྱབས་དང་ཁ་འཛིན་མཛོད། །འདི་ཀུན་ཡུན་དུ་བདེ་བ་ཡི། །མྱ་ངན་འདའ་བའི་དགེ་ཚོགས་ལགས། །བགྲེས་ཁར་དགོན་པར་གཤེགས་ནས་ནི། །མི་རུ་འཁྲུངས་པའི་དོན་ཡོད་མཛོད། །བློན་པོ་རྣམས་དང་ལས་ཀྱི་སྣ། །མངའ་རིས་དབུས་མཐའི་འབངས་རྣམས་ནི། །དྲན་པ་ཅན་གྱིས་བསྒྲུབས་བྱས་པ། །རྣམ་པ་མང་པོ་ཡོད་ན་ཡང༌། །སྔོན་གྱི་དྲང་སྲོང་མཁས་རྣམས་ཀྱིས། །གདམས་ངག་མདོ་ཙམ་འདིར་བསྟན་གྱིས། །བདུང་རྩི་འཐུང་བ་བཞིན་དུ་སློབས། །གཏིང་ནས་ཁྲོས་ཤིང་འཁྲུགས་གྱུར་ཀྱང༌། །མདོག་མདངས་ལྡན་ཞིང་འཛུམ་པར་སྨྲ། །འཁོན་གཅུགས་ཆེ་ཞིང་ཤ་ཆགས་ཀྱང༌། །ཕྲན་ཚིགས་ཁྲོ་གཏུམ་གནོད་མི་བྱེད། །
དགྲ་བོ་འཐབ་ཟླར་གྱུར་ཀྱང་འཕྲལ་ཚུལ་ཅི་དགར་འདྲིད། །ཕ་རོལ་ཚིག་ངན་རྫོགས་ཀྱང་ངན་དུ་ལན་མི་སྨྲ། །བདག་གི་རྒྱབ་ཏུ་ལྟ་ཞིང་ལམ་སེལ་ཐུབ་ཐབས་སྲང་སྲུབ་ཚོལ། །གཉེན་སྦྱར་རན་པར་ཚོལ་ཞིང་སོ་ནམ་ཞིབ་མོར་སྒྲུབ། །ཕཊ་རལ་རྩིང་དང་གཏུམ་ཆོས་ང་རྒྱལ་ཆུང༌། །རྣམ་སྨིན་མེད་པའི་སོ་ནམ་ཡལ་བར་བོར་ནས་ནི། །གཞན་གྱི་ནོར་ལ་རྩིས་གདབ་ཆོམ་རྐུན་གཟན་བཙལ་ཡང༌། །ཕ་མའི་ནོར་དང་དྲིན་ཆེན་དགའ་མཛའི་ནོར། །དཀོན་མཆོག་དཀོར་དང་ལྷ་ཀླུས་དབང་བྱས་ནོར། །ནམ་དུའང་མི་སྤྱོད་ཕོངས་ཆོས་ཁྲེལ་དོར་སྤང༌། །བྱའོ་ཅོག་ལ་ཡིད་རིང་སྲན་དང་ལྡན། །རྣ་ཁུང་རན་པར་ཆེ་ཞིང་ཕྲ་མའི་ཁ་ན་ལྕི། །དྲིན་ཅན་ཕ་ཁུ་མ་དང་གཉེན་བཤེས་ལ། །གསོང་དེས་བཀུར་སྟི་རིམ་གྲོ་བྲན་ལྟར་བྱེད། །བྱེད་དགུ་རན་ལ་ཚོད་ཟིན་བརྟན་པར་གཞུང་ལ་མཁས། །དོགས་པའི་དོན་ལམ་ལུས་ལེ་ལོ་མེད། །གྱ་ཚོམ་མི་སྨྲ་ཤེས་ཀྱང་མ་བཅོལ་རང་ཞུགས་ཡོང་མི་བྱེད། །ཟིན་ཁར་མི་འདོར་འོག་ནས་སྔར་མི་སྨྲ། །ལྷག་པར་ཁེ་མཐོང་བཙལ་གླགས་ཡོད་ཀྱང་མི་རིགས་འདོད་ཆེན་ཡོང་མི་བྱེད། །དབང་དང་ཚན་གྱིས་ཐུབ་ཀྱང་འཕྱས་གནོན་གཟན་མི་ཚོལ། །ཉེ་ཞེས་ཉེ་མགོན་མི་བྱེད་རིང་ཞེས་སྙོམ་ལས་ཡོང་མི་སྦྱོང༌། །དབང་སར་ཕྱིན་ཅིང་ཀུན་གྱིས་བཀུར་ཡང་མཐའ་དག་སེམས་བསྲུང་བྱ། །ལེགས་ཉེས་བསམ་ཞིང་སྲོད་དང་ཐོ་རངས་དགེ་བ་སྤྱད། །ང་རྒྱལ་ཁེངས་སེམས་མུར་ཅོར་སྨྲ་དང་རྒྱགས་ཆོས་མེད། །ཚན་ཀར་མི་འདོར་གཞན་གྱིས་བརྩི་སར་ཡུན་རིངས་སྡོད། །ཕྱི་ཚུལ་མི་འཆོས་ནང་གི་གཡོ་སྒྱུ་མེད། །གསོང་དེས་མཉེན་དང་གསལ་སྟུག་འཇམ་ལ་རིང༌། །ངན་ལ་ཁྱད་དུ་མི་གསོད་ཞེ་ས་ཕངས་མེད་མཉམ། །ཕྲག་དོག་འགྲན་སེམས་ནོར་ངན་གཞན་ལ་འཕྱ་མི་བྱེད། །བདག་ལ་རང་བསྟོད་མི་བྱེད་གཞན་ལ་མཚང་མི་འབྲུ། །དབའ་ལ་སྲན་ཆེ་བྱེད་དགུ་མཛངས་ལས་སློབ། །ཆང་དང་བུད་མེད་དད་དང་ཁེ་བརྐམ་གཅམ་བུའི་ལས། །ནམ་དུའང་མི་བྱེད་ཆུང་མ་ངན་པའི་ཁར་མི་གཏང༌། །ཡོང་ནི་འཕྱ་ལ་མི་མཁས་ཤིང༌། །བྱེད་དུ་བཅུག་ན་ནོར་པར་རྩོམ། །ཞིབ་ཏུ་དཔྱད་དེ་ལས་རྣམས་བརྩམ། །མང་པོ་རྣམས་ནི་ཁ་བསྡུས་ལ། །ངན་པའང་ཁྱད་དུ་མི་གསོད་པར། །གྲོས་སུ་བྱས་དང་འགྱོད་པ་མེད། །མཛངས་བ་རྣམས་ནི་ལས་སུ་བརྐོ།
ཡུལ་དུ་གསར་ཁུང་བྱུང་བ་ཡིན། །དཔའ་བོ་རྣམས་ཀྱིས་འཐབ་སྣ་དྲང༌། །དྲང་རྒན་རྣམས་ཀྱིས་མདུན་ས་གཟུང༌། །དྲང་པོ་རྣམས་ཀྱིས་ཞལ་ལྕེ་གཅད། །གཡོག་རྣམས་འཁོར་གྱིས་མེལ་ཙེ་བསྒྲིམ། །ཉེས་ན་ཆད་པར་ན་པར་གཅད། །ཆེས་ན་བུས་ཀྱང་མི་བཟོད་འགྱུར། །ཐོག་ཏུ་བབ་པའི་ལས་རྣམས་བྱ། །འོན་ཏང་ཀུན་གྱིས་བསྔགས་པར་འགྱུར། །ལེགས་པའི་ངོ་འཕྲལ་སྦྱིན་པ་ཡང༌། །ཐོག་ཏུ་བབ་དང་ཕྲག་དོག་མེད། །ཉེས་པའི་སྐྱོན་ཡང་མི་འཕེལ་ལོ། །ཉེས་པ་མ་ལེགས་བྱུང་ན་ཡང༌། །མི་ནི་གཏིང་ནས་ཡི་མི་གཅད། །ཕྱ་ནས་ཆུ་གང་དྲན་པར་འགྱུར། །ཕྱུགས་ནི་དུས་གཅིག་སུ་ན་མི་དབྱུང༌། །འོན་དང་ལྕགས་སྐྱེད་ཆེ་བར་འགྱུར། །བྲན་ནི་འོས་ཤིང་རིགས་བཀོལ་དང༌། །ཡུན་དུ་སྙིང་ནི་ཉེ་བར་འགྱུར། །བུ་ཚ་མཁས་པར་བསླབ་པ་ནི། །གཏན་གྱི་སྲིད་དུ་ཕྱི་ཕྱིར་ཆེ། །སྐྱེས་བ་མཛད་ས་བར་གྱུར་པ་ནི། །ནོར་དུ་མཁས་དང་གཏམ་སྙན་སྒྲུབ། །བུད་མེད་མཛངས་པར་གྱུར་པ་ནི། །ཁྱོ་ལ་སྲི་ཞུ་རིམ་གྲོ་དང༌། །རིགས་ལས་བསྒྲུབས་པའི་བདོག་དོན་དང༌། །མི་སྨྲ་རྣ་ཁུང་ཆེ་བ་དང༌། །དགོས་པའི་མགྲོན་ལ་ཡངས་པ་དང༌། །སྐྱེས་བུ་གཞན་དུ་མི་ཚོལ་དང༌། །བྱ་བ་རྣམས་ལམ་རྨོངས་ན། །ལྐུགས་པ་བཞིན་དུ་འདུག་ཀྱང་བླ། །ཞེས་པ་ལ་སོགས་པ་སྔོན་གྱི་དྲང་སྲོང་གིས་གདམས་ངག་མདོ་ཙམ་བསྟན་པ་ཡང་ཚེ་འདིའི་ཆེད་དང༌། ཚེ་ཕྱི་མའི་ཆེད་ཀྱང་གོང་དུ་བསྟན་པ་བཞིན་བྱས་ལ་ངང་དྲང་ན་ཡུན་གྱི་སྲིད་ཆེན་པོ་ཡང་ཞར་ལ་ཡོད་དེ། རྒྱལ་པོས་དྲང་པོར་བྱས་དང་རྒྱལ་སྲིད་མི་ཉམས་ཆེ། །བློན་པོས་དྲང་པོར་བྱས་དད་ཆེ་བཙན་ཡུན་དུ་རྟག །དེ་ཡི་གཞི་ལས་ཐར་པ་ཐོབ་པར་འགྱུར། །ཞེས་འབྱུང༌། གཞན་དག་ལས་ཀྱང༌། རྩོད་པ་མེད་པར་ཆོས་སྨྲ་བ་ནི་མཁས་པའི་རབ། །ཇི་ལྟར་ངན་པར་གླེངས་པར་གྱུར་ཡང་མ་འཁྲུགས་པ་ནི་བདུད་ཀྱི་ཡུལ་ལས་འདས། །རྒྱལ་པོའི་ཕྲིན་ལས་བྱ་བ་ནི། །གཙོ་ཆེར་འབངས་ཀྱི་སྤུ་འདམ་མོ། །བློན་པོའི་ལས་སུ་བྱ་བ་ནི། །དྲང་སྙོམས་མི་ནི་ཐབས་ཀྱིས་བཅོས། །ཕྱུགས་ནི་མིག་གིས་བཙའ་བ་དང༌། །ནོར་ནི་དགོས་པའི་དོན་དང་སྦྱར། །མོ་ནི་སྨན་དང་ཡུལ་མི་འཆོར། །སྐྱིད་པའི་མཐའ་ནི་རིང་པོར་འགྱུར། །དལ་གྱིས་འབབ་པའི་ཆུ་བོ་ནི། །ཡུན་དུ་གཞུང་ནི་བཙན་པར་འགྱུར། །སྤྲིན་ནི་ཧལ་ཧོལ་ཅན་དག་གིས། །
ཞིང་པ་དགའ་བའི་ཆར་མི་ཕེབས། །མི་ནི་ཁྲ་ཁྲོ་ཅན་དག་གིས། །དགོས་པའི་དོན་ནི་ཤོར་བར་འགྱུར། །དལ་བུས་སོང་བས་གང་དུའང་ཕྱིན། །འཇམ་བར་སྨྲས་པས་སུ་ཡང་གོ །བསྲིངས་ནས་བསྒྲུབས་པ་ཅི་ཡང་འགྲུབ། །བློན་པོ་རྣམས་ཀྱིས་བྱ་བའི་མདོ། །ཁྲིམས་སུ་བཅས་པ་བརྟན་པོར་བཟུང༌། །བཀའ་ལུང་བཙན་ཞིང་སྙན་པར་བསྒྲུབ། །སྒོ་ཕྱེད་ཡལ་བར་བོར་ནས་ནི། །གཙོ་ཆེར་སྤྱི་ཆེད་སྲོག་དང་བསྔོ། །མནའ་ནི་གཟན་དུ་མི་བོར་ཞིང༌། །འཐམས་པ་ཐམས་ཅད་བཙན་པར་བྱ། །དམ་ཆོས་བསྲུང་ལ་བརྩོན་པ་དང༌། །གཙོ་ཆེར་ཡུན་གྱི་སྲིད་དུ་ནི། །དམ་ཆོས་སྤྱོད་པ་མཆོག་ཡིན་ནོ། །ཞེས་འབྱུང༌། བློན་པོ་གཅིག་པུར་མ་ཟད་ཀྱི། །མི་ཡི་རིས་སུ་སྐྱེས་པ་ཡི། །གླེན་ལྐུགས་འོན་པ་མ་གཏོགས་པར། །ཐམས་ཅད་ཀུན་གྱིས་དེ་བཞིན་སྤྱད། །འོན་ཏང་འདི་དང་ཕྱི་མར་ཡང༌། །བདེ་བ་ཕུན་སུམ་ཚོགས་བར་འགྱུར། །དེ་དག་གདམས་ངག་དམ་པ་ཡིན། །ད་ནི་རབ་ཏུ་བྱུང་བའི་དགེ་སློང་དང༌། དགེ་ཚུལ་དང༌། དགེ་སློང་མ་ལ་གདམས་ངག་བྱ་བ། དང་པོར་རབ་ཏུ་ཇི་ལྟར་བྱུང༌། །སེམས་ཐག་བཅད་ནས་སྐྲ་བྲེགས་ཤིང༌། །སྟོན་པའི་ན་བཟའ་དུར་སྨྲིག་བགོས། །ཕ་དང་མ་དང་གཉེན་བཤེས་ལའང༌། །ཆགས་པ་མེད་པའི་ཚུལ་བྱས་པས། །ཀུན་གྱི་མཆོད་གནས་ཡིན་པས་ན། །འཇིག་རྟེན་པ་ཡིས་མ་འཕྱས་པས། །བསླབ་པ་འདི་ལྟར་རིམ་བཞིན་བྱ། །སྟོན་པ་རྐང་གཉིས་གཙོ་བོ་དང༌། །འདོད་ཆགས་བྲལ་བ་ཆོས་ཀྱི་གཙོ། །འདུས་བའི་གཙོ་སྟེ་དགེ་འདུན་ལ། །གུས་པར་སྐྱབས་སུ་མཆི་བར་བགྱི། །སློབ་དཔོན་མཁན་པོ་ཁྲིམས་དབང་དང༌། །ཕྲིན་ལས་མཛད་པའི་དགེ་འདུན་ལ། །གུས་བར་ཞུས་ཏེ་དགེ་བསྙེན་དང༌། །དགེ་ཚུལ་དགེ་སློང་བར་སློབ་དང༌། །དགེ་སློང་མ་ཡི་སྡོམ་པ་དང༌། །བྱང་ཆུབ་སེམས་དཔའི་བསླབ་པ་རྣམས། །རིམ་པ་བཞིན་དུ་མནོས་ནས་ཀྱང༌། །ཉེས་བྱས་མེད་པར་བསྲུང་བར་བྱའོ། །མཎྜལ་ཆག་ཆག་ཕྱག་དར་དང༌། །ཞུ་གནས་བཅའ་དང་ལྷུང་བཟེད་བཀྲུ། །བླ་མ་དགེ་འདུན་བགྲེས་པ་ཡི། །དགོས་པའི་ཡན་ལག་ཐམས་ཅད་བྱ། །སྲོད་དང་ཐོ་རངས་ཐུན་གཉིས་ལ། །མི་ཉལ་ཁ་ཐོན་དགེ་བ་བྱ། །འདྲི་ཀློག་ཉན་འཛིན་བསམ་པ་དང༌། །སྒོམ་དང་བདེན་པ་བཞི་
ལ་བསམ། །དེ་ནས་རིམ་གྱིས་བརྩོན་ལྡན་པར། །བླ་མ་མགུ་བར་བྱས་ནས་ནི། །ཕུང་པོ་ཁམས་དང་སྐྱེ་མཆེད་དང༌། །རྟེན་ཅིང་འབྲེལ་བར་འབྱུང་བའི་ལུགས། །འདུལ་བ་མདོ་སྡེ་མངོན་པ་རྣམས། །ཐེག་པ་ཀུན་ལས་འཇམ་པར་བསླབ། །ཀུན་གྱི་ཕུལ་དུ་ཕྱིན་བྱའི་ཕྱིར། །རིག་པའི་གནས་ལྔ་དག་དང་ནི། །རིག་པའི་གནས་ནི་བཅོ་བརྒྱད་ལ། །ཐོགས་པ་མེད་པར་བསླབ་པར་བྱའོ། །བཀུར་སྟིའི་གནས་སུ་གྱུར་ནས་ཀྱང༌། །ང་རྒྱལ་ཁེངས་སེམས་ཕྲག་དོག་སྤང༌། །རང་མཐོང་སྒེར་བུའི་ལས་མི་བྱ། །ཁ་ནས་སྨྲ་བའི་ཚིག་རྣམས་དང༌། །དོན་དུ་མཐུན་པར་ཆོས་བཞིན་སྤྱོད། །མཁས་གཞན་ནི་མི་ཤེས་ཞེས། །ཀུན་ལ་འཕྱ་བའི་ལས་མི་བརྩམ། །སློབ་པར་འདོད་པའི་གང་ཟག་རྣམས། །ཅི་ལ་དགའ་བར་བཤད་པར་བྱའོ། །སྔོན་གྱི་སློབ་དཔོན་དྲིན་ཅན་ལ། །བཀུར་སྟི་རིམ་གྲོ་བྲན་བཞིན་བྱའོ། །གཙོར་ན་སྙིང་རྗེ་བརྩེར་ལྡན་ཞིང༌། །ཚད་མེད་བཞི་ཡི་གོ་ཆ་བགོས། །དུས་ངན་ཐ་མར་སྐྱེས་པ་ཡི། །ད་ལྟའི་དགེ་སློད་རང་མཐོང་ཅན། །ཅུང་ཟད་ཡོན་ཏན་རྙེད་པ་དང༌། །ཁེངས་ཤིང་རང་མཐོང་གྱོང་བུ་བྱེད། །མར་གྱིས་ཀོ་ཁེངས་བསྐུས་མཉེས་ན། །མི་དུལ་བ་ནི་གཅིག་ཀྱང་མེད། །དེ་བཞིན་ཆོས་ཀྱི་མར་གྱིས་ཀྱང༌། །མི་ཤེས་ཀོ་ཁེངས་འདྲ་བ་འདུལ། །གྲོད་སྐོགས་མར་དང་ལྷན་ཅིག་ཀྱང༌། །མཉེ་བཏུལ་མ་བྱས་གྱོང་བུར་འདུག །དེ་བཞིན་ཆོས་ཀྱི་མར་གྱིས་བསྐུས། །ཤེས་བཞིན་དྲན་པས་མ་མཉེས་ན། །ཆོས་མར་བསྐུས་ཀྱང་གོང་བུར་འདུག །མཉེས་པ་བཞིན་དུ་དུལ་བར་ཀྱིས། །བསླབ་པས་མི་ངོམས་མཉན་པར་བྱོས། །མཁས་པ་རྣམས་ལ་དྲི་བ་བྱོས་། །ཚ་འཆོས་ས་ནི་ཤོར་དོགས་པར། །ཐོས་པ་མང་པོ་མ་ཡིན་ཡང༌། །འགའ་ཙམ་གོམས་ལའང་མཉེན་པར་བྱོས། །གྲོགས་པོ་རྣམས་ལ་འགྲན་སེམས་པོར། །རྒན་པ་རྣམས་ནི་རིམ་པར་ཁུར། །གཞན་ལ་འཕྱ་བ་མི་དགོས་གྱིས། །རང་ཉིད་དེ་ལྟར་མ་བྱེད་ཅིག །ཆོས་ཀྱི་སྤུན་དང་བྲལ་ནས་ནི། །མི་ཆོས་གཉེན་ལ་མཉེས་མ་བྱེད། །སེམས་ཅན་ངན་མག་མ་སྐྱེད་ཅིག །ཁྱོད་ཀྱིས་བྱ་བའི་ལས་མིན་པ། །ཆུང་མ་བླང་དང་བུ་ཚང་ཀླག །འཁྲུག་པ་བྱ་དང་ཁེ་ཚོང་བྱ། །བྲེ་ཟོལ་བྱ་དང་སྲང་ཟོལ་བྱ། །སྒྱུ་ནི་རྣམ་པ་སྣ་ཚོགས་དང༌། །འཕྱར་དང་རྟ་གད་རྩབ་ཧྲལ་དང༌། །ཆོས་གོས་མེད་པར་
གྲོང་རྒྱུ་དང༌། །གཞན་གྱི་ཆུང་མ་བསྟེན་པ་དང༌། །སྲོག་ཆགས་གསད་དང་བརྫུན་སྨྲ་དང༌། །ཆོམ་རྐུན་བྱ་བའི་ཕོ་ཉ་དང༌། །ཕྲ་མ་མི་དབྱེས་ལ་སོགས་པ། །འཆི་བར་བསམས་ནས་མི་བྱའོ། །བཅོམ་ལྡན་ཤཱཀྱས་བཀའ་སྩལ་པ། །ང་ཡི་བསྟན་པའི་དམ་ཆོས་ནི། །མུ་སྟེགས་ཅན་གྱིས་མི་བཤེགས་ཏེ། །སེང་གེའི་ཁོག་པ་ཇི་བཞིན་དུ། །ང་ཡི་སྤོབ་མས་གཞིག་ཕར་འགྱུར། །ང་ཡི་བསྟན་པ་དམ་ཆོས་ནི། །ནན་ཏན་སྙིང་པོར་བྱེད་པ་ཡི། །གང་ཟག་དགེ་སློང་ལག་ན་གནས། །བཀའ་བཞིན་བྱེད་པའི་དགེ་སློང་ནི། །འཇིགས་པ་མེད་པར་ངས་བཤད་དེ། །དམ་པའི་ཆོས་འཇིག་ངན་སྣ་འདྲེན། །ངན་སོང་གསུམ་གྱི་འཇིགས་ཆེན་ལས། ནམས་ཀྱང་ཐར་པར་ངས་མ་གསུངས། །བདུད་ཀྱི་སླུ་བས་ཟིན་པ་ལ། །ཐར་པའི་གླགས་ནི་མེད་འགྱུར་གྱིས། །དང་པོའི་དམ་བཅས་ཇི་བཞིན་དུ། །ཆོས་ཀྱི་ཀླུང་དུ་འགྲོ་བར་བྱོས། །བུ་སྨད་འདོད་པའི་སྲེད་པ་དང༌། །ནམས་ཀྱང་གནས་པར་མ་བྱེད་ཅིག །གལ་ཏེ་བུ་སྨད་འདོད་ཅེས་ཏེ། །ཁྱིམ་པའི་དངོས་པོ་བྱེད་ཅེ་ན། །དང་པོ་ཁྱོད་ནི་སུ་ཡིས་བསླུས། །དཀོན་མཆོག་གསུམ་བསླུ་ཅི་ཡི་ཕྱིར། །སློབ་དཔོན་མཁན་པོ་ཅི་ལ་དགོས། །སྐྱེ་བོའི་མཆོད་གནས་ཅི་ཕྱིར་བྱ། །འདྲེག་པའི་བྱེ་བྲག་གསུམ་ཡོད་དེ། །སོག་པོ་རྣམས་ནི་བཅོས་ཀྱིས་འདྲེག །དུད་འགྲོ་ཕལ་ནི་ལས་ཀྱིས་འདྲེག །དགེ་འདུན་རྣམས་ནི་ཡོན་ཏན་གྱིས། །འདྲེག་པ་ཡིན་ན་གང་ཕྱིར་བྲེགས། །སྟོན་པའི་ན་བཟའ་ཆུད་རེ་ཟོས། །ན་བཟའ་ཆོས་གོས་འོ་རེ་བརྒྱལ། །དང་པོ་འདོད་ཆགས་བྲལ་ཞེ་ན། །ཅིའི་ཕྱིར་ད་ནི་བུ་སྨད་ལ། །མི་ཤེས་སྐྱེ་བོ་འཇུ་བ་བཞིན། །ཁོང་ནས་གདུང་སེམས་ཡོང་རེ་ཆེ། །འདོད་པ་རྣམས་ལ་དེ་བཞིན་འདུན། །དང་པོའི་དམ་བཅའ་གང་ཙུག་སོང༌། །དེ་ཡིས་མྱ་ངན་འདའ་འགྱུར་རམ། །སྡུག་བསྔལ་གྲོང་ཁྱེར་འཇིག་འགྱུར་རམ། །ཇི་ལྟར་བཤང་གཅི་གཤེར་བ་ལ། །ངན་སྐྱུགས་ཁྱི་ཕག་ཆགས་པ་ལྟར། །དེ་བཞིན་བཤང་གཅི་གཤེར་བ་ལ། །འདོད་ལྡན་བན་དེ་ཕག་ལྟར་ཆགས། །བདག་ལུས་བུད་མེད་མི་གཙང་པར། །ད་དུང་བར་དུ་མ་རྟོགས་པར། །མི་རྟག་སྒྱུ་མའི་བུ་སྨད་ལ། །ཡང་དང་ཡང་དུ་ཆགས་པ་ནི། །མི་གཙང་དོན་དུ་ཁྱི་རྣམས་བཞིན། །ཨེ་མའོ་གཟུ་ལུམ་ས་ཨེ་མའོ་བླུན། །ཨེ་མའོ་སྐྱེ་བོས་ཁྲེལ་དུ་རུང༌། །སློབ་དཔོན་མཁན་པོ་ཁྲིམས་དཔང་རྣམས། །ཁྱུད་སྐོར་ལོས་ཀྱང་མཐོང་མི་བྱེད། །ཆུར་མའི་གཉེན་ལ་དགེ་བཤེས་
བཞིན། །སྐྱོ་བ་ཙམ་དུ་འཁོར་བར་བྱེད། །དེས་ཅི་འཁོར་བའི་རྒྱ་མཚོ་ལས། །མྱུར་དུ་རྒལ་བར་འགྱུར་ཞེའམ། །ག་ཤ་ཁུ་ལྗོ་མ་བྱས་ཙམ། །གླེགས་བམ་ཐག་པས་ཁུ་ལྗོ་ཡི། །དཀྲི་བའི་ཐག་པ་མ་བྱས་ཙམ། །སྐུ་གཟུགས་དར་མ་ལྷ་ཆ་རྣམས། །བྱི་བྲུན་ཐིགས་པ་དུ་བས་ནོན། །གཡང་ས་གཙང་མར་བསྐྱལ་ན་རུང༌། །གལ་ཏེ་ལེགས་དོན་མ་ཡིན་ཡང༌། །འབུམ་ལ་ཁྱིམ་པར་གྱུར་ཡང་ནི། །བདེ་གཤེགས་བསླབ་པ་དྲན་བྱས་ནས། །གནས་ཁང་སོ་སོར་འདུག་བྱས་ལ། །ཉེས་པ་བཤགས་ཤིང་དགེ་བ་སྤྱད། །བསླབ་ལ་འགྲུས་པར་བརྩོན་པར་བསྐྱེད། །བཙུན་པ་རྣམས་ལ་བཀུར་སྟི་བྱ། །རང་སྐྱོན་སྦ་ཕྱིར་མཚང་མི་འབྲུ་།འོན་ཏང་སྡིག་ཞད་འབྲི་ལ་ཕན། །སེམས་ལ་ལྟ་ཞིང་དོན་ལ་སྒོམ། །ཚུལ་ཁྲིམས་རྣམ་པར་དག་པར་འགྱུར། །དགེ་སློང་མ་ཡང་ཅི་ཡི་ཕྱིར། །དང་པོ་ཁས་བླངས་དམ་བཅས་ནས། །སྔར་ཚུལ་བསྟན་པའི་དགེ་སློང་བཞིན། །ལེགས་པར་རབ་ཏུ་བྱུང་བྱས་ནས། །རང་བསླུས་སྡིག་པའི་ཁུར་བུ་དྲགས། །སྟོན་པའི་བཀའ་ནི་ཁྱད་དུ་གསད། །ཁྱིམ་པ་སྐྱེ་བོའི་འོག་ན་ཉལ། །དང་པོ་སྐྲ་ནི་འདྲག་པའི་ཚེ། །ཁྱིམ་བདག་སྙིང་དུ་མི་སྡུག་གམ། །ཕ་མ་སྡང་ངམ་མགོ་རྒྱན་མེད། །ཁྱིམ་ཐབ་མཆིས་སམ་ཉེས་སྐྱོན་བྱུང༌། །ཅི་ཡི་ཕྱིར་ན་ཚུལ་ཁྲིམས་དྲལ། །སྙིང་ནས་དམ་ཆོས་སྤྱོད་ཅེ་ན། །ལས་འཕྲོ་ངན་ཅིང་བློ་ཞན་པས། །མཁས་པའི་ཕུལ་དུ་མི་འགྲུབ་ཀྱིས། །སེམས་ཐག་ཆོད་ལ་བཙུན་པར་སྒྲུབས། །ཀློག་དང་དོན་ལ་བརྩོན་འགྲུས་བསྐྱེད། །སྐྱེས་པ་རྣམས་ལ་མི་ལྟ་ཞིང༌། །རང་གི་གནས་ཁང་དག་ཏུ་འདུག །ཐོས་པ་བསགས་ན་ནམ་ཞ་ཡི། །ཆོས་ཀྱི་གཏེར་ནི་གཟུང་བར་འགྱུར། །བྱ་བྱེད་དག་ལ་ཡོང་མ་འཇུག །དེ་དག་ཙམ་ནི་ཐེག་ཚང་ཡིན། །ད་འདི་མན་ཆད་ནི། སྤྱིར་དགེ་བ་སྤྱད་ཅང་སྡིག་པ་སྤང་བར་གདམས་ངག་བྱེད། དེ་ཡང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ནང་ནས་མདོ་ཙམ་བསྟན་པ། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུས་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །བདག་གི་འབྱོར་པ་དྲུག་གཞན་གྱི་འབྱོར་པ་བདུན་ཏེ་བཅུ་གསུམ་མོ། །དེ་ལ་བདག་གི་འབྱོར་པ་དྲུག་ལ། ཡུལ་གྱི་དབུས་སུ་སྐྱེས་པ་དང༌། དབང་པོ་ཚང་བ་དང༌། གནས་ལ་དད་པར་གྱུར་པ་དང༌། སྨོན་ལམ་དག་པས་སྡིག་པའི་གྲོགས་པོ་དང་མ་ཕྲད་པ་དང༌། ལས་ཀྱི་མཐའ་མ་ལོག་པ་དང༌། ལྟ་བ་ངན་པས་མི་འཕྲོགས་པའོ། །གཞན་
གྱི་འབྱོར་པ་ལ། སངས་རྒྱས་འཇིག་རྟེན་བྱུང་བ་དང༌། དམ་པའི་ཆོས་བསྟན་པ་དང༌། བསྟན་པ་གནས་པ་དང༌། ཆོས་ཀྱི་རྗེས་སུ་འཇུག་པའི་གྲོགས་པོ་ཟང་ཟིང་ལ་མི་ལྟ་བ་དང་ཕྲད་པ་དང༌། ཐེག་པ་ཆེན་པོའི་དགེ་བའི་བཤེས་གཉེན་གཞན་གྱི་དོན་དུ་སྙིད་རྗེ་ཆེན་པོ་དང་ཕྲད་པ་དང༌། ཆོས་བྱེད་པ་ལ་བྱམས་པའི་གྲོང་ཁྱེར་དུ་ཉེ་བར་སྐྱེས་པ་དང༌། རྒྱལ་པོ་ཆོས་བཞིན་བྱེད་པའི་ཡུལ་དུ་སྐྱེས་པའོ། །ཇི་ལྟར་མཚན་མོའི་མུན་ནག་སྤྲིན་རུམ་ནས། །གློག་འགྱུས་སྐད་ཅིག་བར་སྣང་སྟོན་པ་ལྟར། །དེ་བཞིན་སངས་རྒྱས་མཐུས་ཀྱང་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །དེ་ལྟར་དགེ་བ་ཉམ་ཆུང་ཉིད་ལ་རྟག །སྡིག་པ་སྟོབས་ཆེན་ཤིན་ཏུ་མི་བཟད་པ། །དེ་ནི་རྫོགས་པའི་བྱང་ཆུབ་སེམས་མིན་པ། །དགེ་གཞན་གང་གིས་ཟིལ་གྱིས་གནོན་པར་འགྱུར། །སྡུག་བསྔལ་འདོར་འདོད་སེམས་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཡིད་བརྟན་མི་རུང་འཆི་བདག་འདི། །བྱས་དང་མ་བྱས་མི་སྡོད་པས། །ན་དང་མིན་ཀུན་གྱིས་ཀྱང༌། །གློ་བུར་ཚེལ་ཡིད་མི་བརྟན། །ཐམས་ཅད་བོར་ཏེ་ཆས་དགོས་པར། །བདག་གིས་དེ་ལྟར་མ་ཤེས་ནས། །མཛའ་དང་མི་མཛའི་དོན་གྱི་ཕྱིར། །སྡིག་པ་རྣམ་པ་སྣ་ཚོགས་བྱས། །མི་མཛའ་རྣམས་ཀྱང་མེད་འགྱུར་ཞིང༌། །མཛའ་བ་རྣམས་ཀྱང་མེད་པར་འགྱུར། །བདག་ཀྱང་མེད་པར་འགྱུར་བ་ཉིད། །དེ་བཞིན་ཐམས་ཅད་མེད་པར་འགྱུར། །རྨི་ལམ་ཉམས་སུ་མྱོང་བ་བཞིན། །རེ་ཞིག་གསོན་ཚེ་འདི་ཉིད་ལ། །མཛའ་དང་མི་མཛའ་དུ་མ་འདས། །དེ་དག་དོན་དུ་བྱས་པའི་སྡིག །མི་བཟད་གང་ཡིན་མདུན་ན་གནས། །དེ་ལྟར་བདག་ནི་གློ་བུར་ཞེས། །བདག་གིས་རྟོགས་པར་མ་གྱུར་པས། །གཏི་མུག་ཆགས་དང་ཞེ་སྡང་གིས། །སྡིག་པ་རྣམ་པ་དུ་མ་བྱས། །ཉིན་མཚན་སྡོད་པ་ཡོང་མེད་པར། །ཚེ་འདི་རྟག་ཏུ་འགོད་འགྱུར་ཞིང༌། །སྣོན་པ་གུད་ནས་འོང་མེད་ན། །བདག་ལྟ་འཆི་བར་ཅིས་མི་འགྱུར། །བདག་ནི་མ་ལན་འདུག་བཞིན་དུ། །གཉེན་བཤེས་མང་པོས་མཐའ་བསྐོར་ཡང༌། །སྲོག་གཅོད་པ་ཡི་ཚོར་བདག །བདག་ཉིད་གཅིག་པུས་མྱོང་བར་འགྱུར། །གཤིན་རྗེའི་ཕོ་ཉས་ཟིན་པ་ལ། །གཉེན་པས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟེན་ཏོ། །འཇིགས་པ་འདི་འདྲ་
མ་འཚལ་ནས། །མི་རྟག་ཚེ་འདིའི་ཆེད་དག་ཏུ། །སྡིག་པ་མང་པོ་ཉེ་བར་བསྒྲུབས། །དེ་ལྟར་འཇིགས་ཆེན་ཡོད་པས་ན། །དགེ་བཤེས་བསྟན་ལ་བསོད་ནམས་བྱོས། །གཉེན་དང་བཤེས་རྣམས་རྣམ་སྤངས་ནས། །གཅིག་པུ་གཤེད་འགྲོ་དགོས་ན། །མཛའ་དང་མི་མཛའ་ཀུན་ཅིར་རུང༌། །མི་དགེ་བ་ལས་སྡུག་བསྔལ་འབྱུང༌། །དེ་ལས་ཇི་ལྟར་ངེས་ཐར་ཞེས། །ཉིན་མཚན་རྟག་ཏུ་བདག་གིས་ནི། །དེ་ཉིད་རྟག་ཏུ་བསམ་པར་རིགས། །ད་ནི་བདག་གིས་ཅི་ནས་ཀྱང༌། །མི་རུ་སྐྱེས་པའི་དོན་ཡོད་བྱ། །ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །དེ་བཞིན་ཇི་ཞིག་ལྟར་སྟེས་ནས། །བྱང་ཆུབ་སེམས་ནི་བདག་ལ་སྐྱེས། །བློ་འདིར་རབ་ཏུ་ཤུགས་དབྱུང་ངོ༌། །དིང་ནས་བརྩོན་པ་མ་བྱས་ན། །འོག་ནས་འོག་ཏུ་འགྲོ་བར་འགྱུར། །སེམས་ཅན་རྣམས་ལ་ཕན་མཛད་པའི། །སངས་རྒྱས་གྲངས་མེད་འདས་གྱུར་ཀྱང༌། །བདག་ནི་རང་གིས་ཉེས་པ་དེའི། །གསོ་བའི་སྤྱོད་ཡུལ་མ་གྱུར་ཏོ། །ད་དུང་དེ་བཞིན་བདག་བྱེད་ན། །ངན་འགྲོ་ངན་དང་འཆི་བ་དང༌། །སྡུག་བསྔལ་སྣ་ཚོགས་མྱོང་བར་འགྱུར། །དེ་བཞིན་གཤེགས་པ་བྱུང་བ་དང༌། །དད་དང་མི་ལུས་ཐོབ་པ་དང༌། །དགེ་གོམས་རུང་བ་དེ་ལྟ་བུར། །དཀོན་པ་ནམ་ཞིག་ཐོབ་པར་འགྱུར། །ནད་མེད་ཉི་མ་འདི་ལྟ་བུར། །ཟས་བཅས་འཚེ་བ་མེད་ཀྱང་ནི། །ཚེ་ནི་སྐད་ཅིག་སླུ་བ་སྟེ། །ལུས་ནི་ཐང་ཅིག་བརྙན་པོ་བཞིན། །བདག་གི་སྤྱོད་པ་འདི་འདྲས་ནི། །མི་ལུས་ཕྱིས་ནི་ཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང༌། །དགེ་བ་བདག་གིས་མ་བྱས་ན། །ངན་སོང་སྡུག་བསྔལ་ཀུན་རྨོངས་པ། །དེ་ཚེ་བདག་གིས་ཅི་བྱར་ཡོད། །དགེ་བ་དག་ཀྱང་མ་བྱས་ལ། །སྡིག་པ་དག་ནི་ཆེར་བསགས་ན། །བསྐལ་པ་བྱེ་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །དོན་མེད་དགྲ་ཡིས་རྨ་སྲོལ་བཏོད་པ་ཡང༌། །ལུས་ལ་རྒྱན་དང་འདྲ་བར་སྲེལ་བྱེད་ན། །དོན་ཆེན་སྒྲུབ་ཕྱིར་ཡང་དག་བརྩོན་གྱུར་ལ། །བདག་ལ་སྡུག་བསྔལ་ཅིའི་ཕྱིར་གནོད་བྱེད་ཡིན། །ཉ་པ་ཞིང་པ་གདོལ་བ་ལ་སོགས་པ། །རང་གི་འཚོ་བ་ཙམ་ཞིག་སེམས་པ་ཡང༌། །གྲང་དང་ཚ་ལ་སོགས་པ་གནོད་བཟོད་ན། །ཡུན་གྱི་བདེ་ཕྱིར་བདག་ལྟ་ཅི་ཞིག་སྨོས། །དེ་ཕྱིར་སྡིག་ནི་སེམས་ལས་བྱུང་བས་ན། །བསླབ་པ་བསྲུང་བར་འདོད་པ་ཡིས། །རབ་ཏུ་བསྒྲིམས་ཏེ་སེམས་གདུལ་ཏེ། །སེམས་འདི་གདུལ་བ་མ་བྱས་ན། །བསླབ་པ་བསྲུང་བར་ཡོང་མི་
ནུས། །སེམས་ཀྱི་གླང་པོ་ཡན་བཏང་བས། །མནར་མེད་གནོད་པ་བྱེད་པ་ལྟར། །གླང་ཆེན་མ་དུལ་མྱོས་པ་ཡིས། །འདི་ན་དེ་འདྲའི་གནོད་མི་བྱེད། །ཀུན་ནས་དྲན་པའི་ཐག་པ་ཡིས། །སེམས་ཀྱི་གླང་པོ་དམ་བཏགས་ན། །འཇིགས་པ་ཐམས་ཅད་མེད་པར་འགྱུར། །དགེ་བ་ཐམས་ཅད་ལག་ཏུའོང༌། །སེམས་འདི་ཁོ་ན་ཐུལ་བ་ཡིས། །གནོད་བྱེད་ཐམས་ཅད་འདུལ་བར་འགྱུར། །སེམས་ཅན་མི་སྲུན་ནམ་མཁའ་བཞིན། །དེ་དག་གཞོམ་གྱིས་ག་ལ་ལང༌། །ཁྲོ་བའི་སེམས་ན་གཅིག་བཅོམ་ན། །དགྲ་དེ་ཐམས་ཅད་ཆོམས་དང་འདྲ། །ས་སྟེངས་འདི་ཀུན་ཀོས་གཡོག་ཏུ། །དེ་སྙེད་ཀོ་བ་ག་ལ་ཡོད། །རྐང་མཐིལ་གང་གི་ཀོ་བས་ནི། །ས་སྟེངས་ཐམས་ཅད་གཡོགས་དང་འདྲ། །དེ་ཕྱིར་ཕྱི་རོལ་དངོས་པོ་ཡང༌། །བདག་གིས་ཕྱར་བཟློག་མི་ལང་གིས། །བདག་གི་སེམས་འདི་ཕྱིར་བཟློག་བྱའི། །གཞན་རྣམས་བཟློག་གོ་ཅི་ཞིག་དགོས། །གང་གིས་ཆོས་ཀྱི་དོན་པོ་མཆོག །སེམས་ཀྱི་གསང་འདི་མ་ཤེས་ན། །བདེ་འདོད་སྡུག་བསྔལ་གཞོམ་འདོད་ཀྱང༌། །དེ་དག་དོན་མེད་གྱི་ན་འཁྱམ། །དེ་ལྟར་བདག་གི་སེམས་འདི་ནི། །ལེགས་གཟུང་ལེགས་པར་རྟོགས་པར་བྱ། །སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །མ་གྲངས་གྲོལ་བའི་ཁྲོད་གནས་ན། །བསྒྲིམས་ཏེ་རྨ་ཡི་བག་བྱེད་བཞིན། །སྐྱེ་བོ་ངན་ཁྲོད་གནས་པས་ཀྱང༌། །སེམས་ཀྱི་རྨ་ནི་རྟག་ཏུ་བསྲུང༌། །སེམས་རྨ་རྟག་ཏུ་བསྲུང་བ་ཡང༌། །བླ་མ་དང་ནི་འགྲོགས་པ་ལས། །མཁས་པས་རྗེས་སུ་བསྟན་པ་དང༌། །འཇིགས་པས་སྐལ་ལྡན་གུས་བྱེད་ལ། །དྲན་པ་ཤིན་ཏུ་སྐྱེ་བར་འགྱུར། །དེ་ཕྱིར་དགེ་བཤེས་མཁས་པ་བསྟེན། །དོན་མེད་གཡེང་བར་ལྟ་བ་ནི། །བན་དེས་ནམ་ཡང་མི་བྱ་སྟེ། །སྐྱེ་བོ་མཛངས་པའང་ངེ་བཞིན་སྤྱོད། །གང་ཞིག་མིག་ལམ་འོངས་ན་ཡང༌། །བལྟས་ནས་ལེགས་པར་མགུ་བར་བྱ། །དགོས་ན་ཐག་རིང་དག་ཏུའང་ལྟ། །གང་ཞིག་བསམས་ནས་བྱར་བརྩམས་པ། །དེ་ལས་གཞན་དུ་མི་བསམ་སྟེ། །དེར་གཏད་པ་ཡི་བསམ་པ་ཡིས། །དེ་ཉིད་ཁོ་ན་བསྒྲུབ་པར་བྱ། །དེ་ལྟར་ན་ནི་ཀུན་འགྲུབ་འགྱུར། །གཞན་དུ་གཉིས་ཀར་མི་འགྲུབ་པོ། །ཁྱི་ནི་ཅུང་པེང་སྙེག་པ་དང༌། །ལྷ་ཁང་བར་གྱི་ཁྱི་བཞིན་དུ། །དྲན་དྲོད་ཐམས་ཅད་མི་བྱའོ། །རིང་ཞིག་ལོན་ནས་དལ་བའི་མཆོག །རྙེད་པ་ཡང་དང་ཡང་བསམས་ནས། །དགེ་སློང་ཡིན་ན་འཁོར་གཡོག་དང༌། །དྲུང་དུ་
འོངས་པའི་ལྷ་མི་རྣམས། །ཐམས་ཅད་དགེ་ལ་གཟུད་པར་བྱ། །ཁྱིམ་པ་ཡིན་ནའང་བུ་དག་དང༌། །ཆུང་མ་ཕ་མ་གཉེན་འདུན་རྣམས། །གྲོས་བཏབ་ཐམས་ཅད་དགེ་ལ་གཟུང༌། །འོན་ཏང་བྱང་ཆུབ་སྤྱོད་པ་རྫོགས། །བྲན་གཡོག་བཀོལ་དུ་མི་བཏུབ་པ། །ཟས་ལ་སོགས་པ་མི་སྦྱིན་ལྟར། །དགེ་བ་མི་བྱེད་ལུས་འདི་ལ། །བསྙོད་ཀྱང་དེའུ་རེ་གཞན་འགྲོ་ལ། །སྡིག་ལུས་བསྙོད་ཅིང་གོས་བསྐོན་ཡང༌། །ཕན་མེད་སྡིག་བྱེད་ཇི་སྟེ་གསོ། །ཁྱོད་མ་འགྲངས་པས་ཕུང་འོག་བཅུག །ཁྱོད་འགྲངས་པས་ན་ཕུང་མགོ་བཙུགས། །དཀོན་མཆོག་ཕ་མ་དགའ་མཛའ་དང༌། །དྲིན་ཡོད་དྲིན་མེད་རྣམས་ཀྱི་ནོར། །སྒྱུས་བརྐུས་མཐུས་ཕྲོགས་ཐབས་ཀྱིས་བསླུས། །མ་འགྲངས་མ་གཡོགས་སྡིག་ལུས་ཁྱད། །མཇུག་ཏུ་འབུ་སྤྲད་ཉོད་པར་སོང༌། །ཁྱོད་མ་སོས་པས་དམྱལ་བར་བཏང༌། །བསད་པའི་སྡིག་པ་ཁྱོད་ལས་བྱུང༌། །ཁྱོད་མ་མགུ་བས་འཕྲོག་རློམ་བྱས། །ཡི་དྭགས་གནས་སུ་ཁྱོད་ཀྱིས་བཏང༌། །ཁྱོད་མ་སོས་པས་ལོང་ཆུང་སྟེ། །དགེ་བཤེས་མ་བསྟེན་ཆོས་མ་ཉན། །དེས་ན་དུད་འགྲོ་བླུན་པོར་གྱུར། །གཏན་དུ་འཁྱམས་པ་ཁྱོད་ཀྱིས་ཉེས། །ཁྱོད་ནི་དགེ་བ་སྤྱོད་གྱུར་ན། །རིན་ཆེན་ཕུང་པོ་ཕངས་པའི་གཙོ། །ཁྱོད་ལ་བརྟེན་ནས་སངས་རྒྱས་ཆོས། །འབྲས་བུ་བླ་མེད་བྱང་ཆུབ་དང༌། །བར་དུའང་བདེ་འགྲོ་སྐྱིད་པ་ནི། །ལོང་བཏགས་དོན་ཡོད་བྱེད་པས་ན། །འགྲོ་དང་འོང་པའི་རྟེན་ཙམ་དུ། །ལུས་ལ་གྲུ་ཡི་བློ་ཞོག་སྟེ། །འདི་ལ་གླ་རྔན་བྱིན་ནས་ནི། །ད་ནི་རང་གི་དོན་བྱེད་ཆུག །རྨོངས་པའི་སེམས་ཁྱོད་ཅི་ཞིག་ཟེར། །གཟུགས་སུ་འཛིན་པ་ཁྱོད་རང་ཡིན། །ལུས་སུ་ལྟ་བ་ཁྱོད་རང་ཡིན། །དོན་མེད་ཤེས་པ་གཞན་ནས་འོངས། །འབྱུང་བས་བསྒྲུབས་པའི་ཁུ་ཁྲག་ལ། །ཁྱོད་ཀྱིས་ངར་འཛིན་བྱས་ནས་ནི། །བུ་དང་བུ་མོར་ཁྱོད་ཀྱིས་བཟུང༌། །གཞན་གྱིས་འབྱུང་བའི་ཁུ་ཁྲག་ལ། །གཞན་ཞེས་དགུ་རུ་ལྟ་བར་བྱེད། །སྡིག་པས་བསྒྲུབས་པའི་ཟང་ཟིང་ལ། །གཞན་གྱིས་ཁྱེར་སྙམ་ཕྲག་དོག་ལངས། །དོན་མེད་གྱིས་པའི་སྤྱོད་པ་འདྲ། །ཁྱེད་ཀྱིས་ཤེས་ན་དེ་མིན་པའི། །བཟང་པོའི་དཔལ་ཏ་རེ་ཡོད་ན། །དེ་ལས་མ་ཤེས་ཅི་བྱར་ཡོད། །ད་ཡི་ཉེས་པ་ཅི་ཡང་མེད། །ཉེས་པ་ཐམས་ཅད་ཁྱོད་ལས་བྱུང༌། །ཁྱོད་ཀྱིས་རྩ་ཡ་ཀུན་བཅོམ་ན། །གང་དུ་འགྲོ་བ་ཁོ་བོས་ལྟ། །ཁྱོད་ཀྱིས་ངར་འཛིན་མ་བྱས་ན། །ང་ནི་འབྱུང་བའི་བག་ལ་ཞ། །ང་མ་གསོ་བར་ཁྱེད་བདེར་སྒྲུབས། །སྐྱོན་ཅན་ཁྱོད་ཀྱི་ཉེས་པ་ཀུན། །དྲན་དྲོད་མ་སྨྲ་སོ་སོར་འདུག །ཁྱོད་ལ་
གསོལ་བག་ཅི་མ་ལུས། །གཞན་ཡང་ཚིགས་སུ་བཅད་པ་ལ། །དེང་བྱ་སང་བྱ་ལེ་ལོ་ཕྱི་ཤོལ་གྱིས། །སྔོན་འདས་དུ་ས་ནས་ད་སྲིད་འགྱངས་པས་ཆོག །འཆི་བདག་དགྲ་དང་བང་བྱ་བརྟོད་ནས་ནི། །བཀའ་བསྔོས་མྱུར་ཏེ་བྱ་བའི་མི་རིགས་སམ། །སྐྲ་དཀར་སྐྱེས་ཤིང་གཉེར་མའི་ཚོགས་བགྲངས་ཀྱང༌། །བྱིས་པ་ཤེང་མ་བྱེ་དང་འདྲ་བ་ནི། །དོན་ལ་མཁས་པས་བརྟགས་ན་སྙིང་རེ་རྗེ། །གཞན་ཡང༌། བསྐལ་པ་སྟོང་དུ་བསགས་པ་ཡི། །སྦྱིན་དད་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་ཐམས་ཅད་ཀྱང༌། །ཁོང་ཁྲོ་གཅིག་གིས་འཇོམས་པར་བྱེད། །ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་བཞིན་བསྒོམ་པར་བྱ། །ཞེ་སྡང་ཟུག་རྔུའི་སེམས་འཆང་ན། །ཡིད་ནི་བདེ་བའི་ཉམས་མི་མྱོང༌། །སྒྱུ་མར་བསམས་ནས་བཟོད་པ་བསྒོམས། །གལ་ཏེ་བཅོས་སུ་ཡོད་ན་ནི། །དེ་ལ་མི་དགའ་བྱར་ཡང་མེད། །འོན་ཏེ་བཅོས་སུ་མེད་ན་ཡང༌། །དེ་ལ་མི་དགའ་བྱས་ཅི་ཕན། །ལ་ལ་བདག་གི་ཁྲག་མཐོང་ན། །ཕྱིར་ཞིང་ཁོང་དགྲར་འགྱུར་བའང་ཡོད། །ལ་ལ་གཞན་གྱི་ཁྲག་མཐོང་ན། །འབོག་ཅིང་བརྒྱལ་བར་འགྱུར་བའང་ཡོད། །དེ་ནི་སེམས་ཀྱི་ངང་བརྟན་དང༌། །སྔར་མའི་ཚུལ་ལས་གྱུར་པ་ཡིན། །དེ་བཞིན་དགེ་བ་བསྒྲུབ་པ་ཡང༌། །སེམས་ཐག་གཅད་དམ་མི་གཅད་ཟན། །ཁྱིམ་དང་འབྲལ་བར་མི་ནུས་དང༌། །སོ་ནམ་ཡལ་བར་དོགས་པ་དང༌། །དམ་ཆོས་བསྒྲུབ་པར་བསམ་པ་དང༌། །ཡུན་གྱི་བདེ་བ་བསྒྲུབ་པ་ནི། །གཉིས་ཀ་ཡོང་ཡེ་འགྲུབ་མི་འགྱུར། །སྦྱིན་བ་གཏང་བར་བྱ་བ་དང༌། །ཟད་པར་དོགས་པ་གཉིས་མི་འཕྲུགས། །དཔའ་བོ་བྱ་བར་བསམ་པ་དང༌། །ཤི་བར་དོགས་པ་གཉིས་མི་འཕྲུགས། །མང་པོ་དགའ་བར་བྱ་བ་དང༌། །ཁྲོ་གཏུམ་བྱ་བ་གཉིས་མི་འཕྲུགས། །བསླབ་ལ་འགྲུས་པར་བྱ་བ་དང༌། །ཟང་ཟིང་བཙལ་བ་གཉིས་མི་འཕྲུགས། །བཙུན་པའི་ཕུལ་དུ་བྱུང་བ་དང༌། །ཡུལ་ལ་ཆགས་པ་གཉིས་མི་འཕྲུགས། །ཀུན་གྱིས་བཀུར་བར་འདོད་པ་དང༌། །སྤྱོད་ལམ་ངན་པ་གཉིས་མི་འཕྲུགས། །རྒྱལ་པོ་མཉེས་པར་བྱ་བ་དང༌། ཁྱིམ་ན་ཉལ་བ་གཉིས་མི་འཕྲུགས། །སངས་རྒྱས་བསྒྲུབ་པར་བྱ་བ་དང༌། །སྡིག་པ་སྤྱད་པ་གཉིས་མི་འཕྲུགས། །དེ་བཞིན་གང་ཞིག་སྒྲུབ་ན་ཡང༌། །སེམས་ཐག་གཅོད་པར་བྱེད་པར་བྱ། །འོན་ཏང་དགོས་པ་ཐམས་ཅད་འགྲུབ། །འཇིག་རྟེན་མགོན་པོས་དེ་སྐད་གསུངས། །མདོ་སྡེ་རྣམས་ལས་བསླབ་པ་སྣང༌། །རྟག་ཏུ་མདོ་སྡེ་
བལྟ་བར་བྱའོ། །དེ་དག་གང་ཞིག་སྒྲུབ་ན་བདེ། །རླུང་མེད་གཡོ་བའང་མེད་པ་བཞིན། །བསོད་ནམས་བརྩོན་འགྲུས་མེད་མི་འགྱུར། །སྒྱིད་ལུག་སྙོམ་པའི་སྟོབས་བཅོམ་སྟེ། །ཉིན་མཚན་ཕྱད་པར་བསྒྲུབ་པར་བྱའོ། །དེས་ན་འབྲས་བུ་མེད་མི་སྲིད། །སྲིད་པའི་རྒྱ་མཚོ་རྒལ་བ་དང༌། །འཇིག་རྟེན་འཇིག་རྟེན་འདས་པ་ཡི། །དགོས་པ་མ་ལུས་བོས་པ་བཞིན། །སེམས་ཅན་མོས་པ་སྣ་ཚོགས་པ། །རྒྱལ་བས་ཀྱང་ནི་མི་མགུ་ན། །བདག་འདྲ་ངན་པས་ཅི་ཞིག་སྨོས། །དེ་བས་འཇིག་རྟེན་བསམ་པ་བཏང༌། །སེམས་ཅན་རྙེད་པ་མེད་ལ་སྨོད། །རྙེད་པ་ཅན་ལ་མི་སྙན་བརྗོད། །རང་བཞིན་འགྲོགས་དཀའ་དེ་དག་གིས། །དགའ་བ་ཇི་ལྟར་སྐྱེ་བར་འགྱུར། །དེས་ན་དབེན་པར་གནས་པར་བྱའོ། །བདག་གིས་མཁས་པའི་རྗེས་བསྙགས་ལ། །བག་ཡོད་གདམས་ངག་དྲན་བྱས་ཏེ། །གཉིད་དང་རྨུགས་པ་བཟློག་པར་བྱ། །རྒྱལ་སྲས་ཐུགས་རྗེ་ཆེན་པོ་ལྟར། །རིགས་པའི་སྲན་དུ་གཟུགས་བྱ་སྟེ། །བྱིས་པའི་སྤྱོད་པ་བཏང་བྱས་ནས། །མདོར་ན་བདག་དང་གཞན་རྣམས་ལ། །ཕན་པ་འབའ་ཞིག་ལྷུར་བྱའོ། །དེ་ལྟར་གདམས་ངག་བྱས་ནས་ཀྱང༌། །བདག་གིས་སྤྱད་པར་མ་གྲུབ་ཅིང༌། །ཉམས་ཀྱིས་ལྟོགས་པར་མ་གྱུར་ན། །ཚེ་རབས་ཀུན་དུ་ཕན་པ་ཡང༌། །དེ་བཞིན་གཤེགས་པའི་ཞལ་ནས་གསུངས། །སྡིག་པ་ཐམས་ཅད་ཟང་བྱེད་ཅིང༌། །དགེ་བ་མ་ལུས་རྫོགས་བྱེད་པ། །འདི་དག་བརྗོད་པའི་བསོད་ནམས་གང༌། །གལ་ཏེ་དེ་ལ་གཟུགས་ཡོད་གྱུར། །གང་གཱའི་བྱེ་མ་སྙེད་ཀྱི་ནི། །འཇིག་རྟེན་ཁམས་སུ་ཤོང་མི་འགྱུར། །ཚིགས་སུ་བཅད་པ་ཉི་ཤུ་འདི། །གཙུག་ལག་ཁང་ངམ་མཆོད་ཁང་ངམ། །མཆོད་རྟེན་སྐུ་གཟུགས་སྤྱན་སྔ་འམ། །གཞན་དུའང་རུང་སྟེ་འདི་སྐད་བརྗོད། །ཉིན་མཚན་ལན་ནི་གསུམ་གསུམ་བརྗོད། །སངས་རྒྱས་ཆོས་དང་དགེ་འདུན་དང༌། །བྱང་ཆུབ་སེམས་དཔའ་རྣམས་ལ་ཡང༌། །སྒོ་གསུམ་བཏུད་དེ་སྐྱབས་སུ་མཆིའོ། །མཆོད་འོས་རྣམས་ལ་ཕྱག་འཚལ་ལོ། །སྡིག་པའི་ལས་ལས་བཟློག་བགྱིད་ཅིང༌། །བསོད་ནམས་ཐམས་ཅད་ཡོངས་སུ་གཟུང༌། །ལུས་ཅན་རྣམས་ཀྱི་བསོད་ནམས་དག །ཀུན་ལ་རྗེས་སུ་ཡི་རང་ངོ༌། །བདག་ནི་སྤྱིས་བཏུད་ཐལ་སྦྱར་ཏེ། །ཆོས་ཀྱི་འཁོར་ལོ་བསྐོར་སླད་དང༌། །འགྲོ་གནས་རབ་ཏུ་བཞུགས་སླད་དུ། །རྫོགས་པའི་སངས་རྒྱས་རྣམས་ལ་གསོལ། །དེ་ལྟར་བགྱིས་པའི་བསོད་ནམས་དང༌། །བདག་གིས་བགྱིས་དང་མ་བགྱིས་གང༌། །དེས་ནི་སེམས་ཅན་ཐམས་ཅད་ཀྱང༌། །བླ་མེད་བྱང་ཆུབ་སེམས་ལྡན་ཤོག །སེམས་ཅན་ཐམས་ཅད་དྲི་མེད་
དབང། །ཡོངས་རྫོགས་མི་ཁོམ་ཀུན་འདས་ཤིང༌། །སྤྱོད་པ་རང་དབང་ཡོད་པ་དང༌། །འཚོ་བ་བཟང་དང་ལྡན་པར་ཤོག །ལུས་ཅན་དག་ནི་ཐམས་ཅད་ཀྱང༌། །ལག་ན་རིན་ཆེན་ཉིད་ལྡན་ཞིང༌། །ཡོ་བྱད་ཐམས་ཅད་མཐའ་ཡས་པ། །འཁོར་བ་ཇི་སྲིད་མི་ཟད་ཤོག །བུད་མེད་ཐམས་ཅད་རྣམ་ཀུན་དུ། །ཕན་ཚུན་ཕྲག་དོག་འགྲན་སེམས་དང༌། །རང་བཞིན་བཟང་པོར་སྐྱེས་གྱུར་ནས། །སྐྱེས་མཆོག་ཉིད་དུ་འགྱུར་བར་ཤོག །ལུས་ཅན་ཐམས་ཅད་རིག་པ་དང༌། །རྐང་པར་ལྡན་པ་ཉིད་དུ་ཤོག །ལུས་ཅན་ཁ་དོག་ལྡན་པ་དང༌། །གཟུགས་བཟང་གཟི་བརྗིད་ཆེ་བ་དང༌། །བལྟ་ན་སྡུག་ཅིང་ནད་མེད་དང༌། །སྟོབས་ཅན་ཚེ་དང་ལྡན་པར་ཤོག །ཐམས་ཅད་ཐབས་ལ་མཁས་གྱུར་ཏེ། །སྡུག་བསྔལ་ཀུན་ལས་ཐར་བ་དང༌། །དཀོན་མཆོག་གསུམ་ལ་གཞོལ་བ་དང༌། །དམུ་རྒོད་མི་ནག་མེད་པར་ཤོག །གཙུག་ལག་ཁང་དང་དབེན་གནས་ཀྱི། །གནས་དང་ཉེ་བར་གནས་པར་ཤོག །སངས་རྒྱས་ཆོས་ནོར་ལྡན་པ་དང༌། །ཚད་མེད་བཞི་དང་ལྡན་པ་དང༌། །ཕ་རོལ་ཕྱིན་དྲུག་ལྡན་པར་ཤོག །ཚོགས་རྣམས་ཐམས་ཅད་ཡོངས་རྫོགས་ཏེ། །མཚན་དང་དཔེ་བྱད་གསལ་བ་དང༌། །བསམ་གྱིས་མི་ཁྱབ་ས་བཅུ་དག །རྒྱུན་མི་འཆད་པར་བགྲོད་པར་ཤོག །བདག་ཀྱང་ཡོན་ཏན་དེ་དག་དང༌། །གཞན་ཀུན་གྱིས་ཀྱང་རྒྱན་ལྡན་ཏེ། །ཉེས་པའི་སྐྱོན་ལས་གྲོལ་བ་དང༌། །སེམས་ཅན་ཀུན་མཆོག་བྱམས་པ་དང༌། །སེམས་ཅན་ཐམས་ཅད་ཡིད་རེ་བའི། །བདེ་བ་ཐམས་ཅད་རྫོགས་བྱེད་ཅིང༌། །རྟག་ཏུ་ལུས་ཅན་ཐམས་ཅད་ཀྱི། །སྡུག་བསྔལ་སེལ་བར་བྱེད་པར་ཤོག །འཇིག་རྟེན་ཀུན་ན་སྐྱེ་བོ་གང༌། །སུ་དག་འཇིགས་པས་ཉེན་པ་རྣམས། །བདག་གི་མིང་ཙམ་ཐོས་པས་ཀྱང༌། །ཤིན་ཏུ་འཇིགས་པ་མེད་པར་ཤོག །བདག་ནི་མཐོང་དང་དྲན་པ་དང༌། །མིང་ཙམ་ཐོས་པས་སྐྱེ་བོ་རྣམས། །རབ་ཏུ་འཁྲུག་མེད་རྣལ་མ་དང༌། །རྫོགས་པའི་བྱང་ཆུབ་མཁས་པ་རྣམས། །ཚེ་རབས་ཀུན་དུ་རྗེས་འབྲངས་པའི། །མངོན་ཤེས་ལྔ་པོ་ཐོབ་པར་ཤོག །སེམས་ཅན་ཀུན་ལ་རྣམ་ཀུན་དུ། །རྟག་ཏུ་ཕན་བདེ་བྱེད་པར་ཤོག །འཇིག་རྟེན་ཀུན་ན་སྐྱེ་བོ་གང། །སྡིག་པ་བྱེད་པར་འདོད་གྱུར་བ། །དེ་དག་ཐམས་ཅད་གནོད་མེད་པར། །རྟག་ཏུ་ཅིག་ཅར་ཟློག་གྱུར་ཅིག །ས་དང་ཆུ་དང་མེ་དང་རླུང༌། །སྨན་དད་དགོན་པའི་ཤིང་བཞིན་དུ། །རྟག་ཏུ་སེམས་ཅན་ཐམས་ཅད་ཀྱིས། །རང་དགར་དགག་མེད་སྤྱོད་པར་ཤོག །སེམས་ཅན་ལ་བདག་སྲོག་བཞིན་ཕངས། །དེ་དག་བདག་ལ་ཆེས་
ཕངས་ཤོག །བདག་ལ་དེ་དག་སྡིག་སྨིན་ཅིང༌། །བདག་དགེ་མ་ལུས་དེར་སྨིན་ཤོག །ཇི་སྲིད་སེམས་ཅན་འགའ་ཞིག་ཀྱང༌། །གང་ན་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །བདག་ནི་དགེ་སློང་དཔལ་དབྱངས་ཀྱིས། །གཅེས་པའི་ཕྲིང་བ་ལས་བསྡུས་པའི། །གདམས་དག་བརྩམ་པར་བྱས་པ་ཡིས། །གདམས་ངག་འདི་ནི་སུས་ཐོས་པ། །གདམས་པའི་རྗེས་སུ་སྤྱོད་གྱུར་ནས། །བྱང་ཆུབ་མྱུར་དུ་ཐོབ་པར་ཤོག །བོད་ལ་དགེ་སློང་མིང་ཡང་མེད་པ་ལས། རྗེ་བྱང་ཆུབ་སེམས་དཔའ་ཁྲི་སྲོང་ལྡེ་བཙན་གྱིས་དམ་པའི་ཆོས་བརྙེས་ནས་དཔལ་ལྷ་བཙན་པོ་དད་པ་བསྐྱེད་དེ། རབ་ཏུ་བྱུང་བའི་མིང་དཔལ་དབྱངས་ཞེས་བགྱི། བཙུན་པའི་ཕུལ་དུ་ཕྱིན། མཛངས་པའི་ཞི་རབ་ཏུ་ཕྱིན། །བོད་ཀྱི་མདུན་སར་བསྲེས་ན་དཔེ་ཟླ་མེད་པ་དེས་མཛད་དེ། །བཙན་པོ་ལ་བཀའ་གྲོས་དག་གསོལ་བ་ལས། ལ་ལ་ནི་གནང༌། ལ་ལ་ནི་མ་གནང་བས་འཁོན་ནས་གྱེད་དེ་ལྟོར་བཞུད། གདམས་ངག་འདི་སླར་རྗེ་བློན་དང༌། སེར་ཆགས་ཡོངས་དང༌། བོད་རྗེ་འབངས་ལ་བརྫངས་པ་ལགས་སོ། །མཇུག་འཁོན་བས་ལེགས་ཏེ། བཙུན་པས་ནི་བཟང་པོའི་སྤྱོད་པ་འགྲུབ། །བོད་རྗེ་འབངས་ནི་གྲོགས་ཀྱིས་དམའ་ཞེས་གདའོ། །གདམས་ངག་གཅེས་པ་བསྡུས་པའི་འཕྲིན་ཡིག་བཙུན་པ་དཔལ་དབྱངས་ཀྱི་ས་སྔོན་ནས་ལས་ཀྱིས་འབྲེལ་ཅིང་བཤེས་པར་གྱུར་པ་བོད་རྗེ་འབངས་ལ་བརྫངས་བ་རྫོགས་སོ།། །།