རིགས་ཀྱི་སྨོན་ལམ་ཞེས་བྱ་བ།
མར་མེ་མཛད་ཡེ་ཤེས།
རྒྱ་གར་སྐད་དུ། ཀུ་ལ་པྲ་ཎི་དྷཱ་ན་ནཱ་མ། བོད་སྐད་དུ། རིགས་ཀྱི་སྨོན་ལམ་ཞེས་བྱ་བ། འཕགས་མ་སྒྲོལ་མ་ལ་ཕྱག་འཚལ་ལོ། །བདག་ནི་འཆི་བའི་དུས་ཀྱི་ཚེ། །དབང་པོ་གསལ་བར་འཆི་བ་དང༌། །གནད་གཅོད་སྡུག་བསྔལ་མེད་པ་དང༌། །སྲིད་པ་བར་མ་དོ་རུ་ཡང༌། །རང་བྱུང་ཡེ་ཤེས་རྟོགས་པར་ཤོག །རང་བྱུང་ཡེ་ཤེས་རྟོགས་ནས་ཀྱང༌། །གར་སྐྱེ་རང་དབང་ཡོད་པར་ཤོག །གང་དེར་སྐྱེས་པའི་ས་དེར་ཡང༌། །ཉོན་མོངས་མཐའ་དག་ཆུང་བ་ཡི། །ཆོས་ལྡན་རིགས་སུ་སྐྱེ་བར་ཤོག །ཆོས་ལྡན་རིགས་སུ་སྐྱེས་གནས་ཀྱང༌། །ཆོས་ལྡན་གྲོགས་དང་ཕྲད་པར་ཤོག །ཆོས་ལྡན་གྲོགས་དང་ཕྲད་ནས་ཀྱང༌། །གཙོ་བོ་དཀོན་མཆོག་མཆོད་པ་དང༌། །སྡོམ་པ་གསུམ་ལ་གནས་པར་ཤོག །སྡོམ་པ་གསུམ་ལ་གནས་ནས་ཀྱང༌། །སྟོང་ཉིད་དམ་པ་བསྒོམ་པ་དང༌། །ཐོས་པའི་ཆོས་རྣམས་དྲན་པར་ཤོག །ཐོས་པའི་ཆོས་རྣམས་དྲན་ནས་ཀྱང༌། །རང་དོན་གཙོ་བོར་མི་བྱེད་ཅིང༌། །འཁོར་བའི་སེམས་ཅན་ཐམས་ཅད་ཀྱི། །སྡུག་བསྔལ་བདག་ལ་སྨིན་པར་ཤོག །སྡུག་
བསྔལ་བདག་ལ་སྨིན་ནས་ཀྱང༌། །ལུས་ངག་སེམས་ལ་མི་གནོད་ཅིང༌། །མཚན་མའི་སྤྱོད་པས་མི་གཡེལ་བའི། །གཞན་དོན་དམིགས་པའི་སེམས་ཀྱིས་སུ། །གཞན་དོན་ཐམས་ཅད་བྱེད་པར་ཤོག །གཞན་དོན་ཐམས་ཅད་མཐར་ཕྱིན་ནས། །ཡེ་ཤེས་ལྔ་དང་ལྡན་པ་ཡི། །སྐུ་གསུམ་ལྷུན་གྱིས་གྲུབ་པར་ཤོག །རིགས་ཀྱི་སྨོན་ལམ་ཞེས་བྱ་བ། སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།།