 མགོ་ལོག་སྤྲུལ་སྐུའམ་གར་དབང་འཇིགས་མེད་རྣམ་རྒྱལ་་གྱི་གསུང་འབུམ།གླེགས་བམ། ཨཱཿ༽གཡུ་ཁོག་མགོ་ལོག་སྤྲུལ་སྐུའམ་གར་དབང་འཇིགས་མེད་རྣམ་རྒྱལ་བཟང་པོ།སྔ་འགྱུར་མདོ་ཁམས་གཡུ་ཁོག་དཔེ་ཚོགས།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། རྡོ་རྗེ་གྲོ་ལོད་ཀྱི་ལས་བྱང་ཁྲིགས་བསྡེབས་གནམ་ལྕགས་ཐོག་གི་ཚྭ་ཚྭ།གུ་རུའི་ཐུགས་སྒྲུབ་པད་ཕྲེང་ལས༔ རྡོ་རྗེ་གྲོ་ལོད་ཀྱི་ལས་བྱང་ཁྲིགས་བསྡེབས་གནམ་ལྕགས་ཐོག་གི་ཚྭ་ཚྭ་ཞེས་བྱ་བ་བཞུགས༔ བདག་ཏུ་ལྟ་བའི་རུ་ཏྲ་ཀུན༔ བདག་མེད་སྟོང་པའི་ཀློང་དུ་བསྒྲལ༔ དཔའ་རྟགས་རྔམ་པའི་ང་རོ་ཅན༔ དཔལ་ཆེན་ཁྲོ་བོའི་རྒྱལ་ལ་འདུད༔ མ་ཧཱ་གུ་རུ་ཐོད་ཕྲེང་གི༔ མཚན་བརྒྱད་བསྒྲུབ་པའི་ཆ་ལག་ཏུ༔ རྡོ་རྗེ་ཁྲོ་བོའི་སྒྲུབ་པ་བརྩམ༔ མཚོ་རྒྱལ་དགོངས་པའི་གཏེར་དུ་སྦོས༔ ལས་ཅན་བུ་ལ་སྨོན་ལམ་ཐོབ༔ ལས་འཕྲོ་ཅན་གྱི་དཔལ་དུ་ཤོག༔ ས་མ་ཡཱ༔ འདི་ལ་སྦྱོར་དངོས་རྗེས་དང་གསུམ༔ དབེན་པར་འཁོར་བས་རབ་སུན་ནས༔ བདེ་བའི་སྟན་ལ་བག་ཕབ་སྟེ༔ དཀོན་མཆོག་ཀུན་འདུས་པད་འབྱུང་ལ༔ ཁྱེད་ཤེས་བློ་ཡིས་སྐྱབས་འགྲོ་ནི༔ ཧཱུྃ་ཧཱུྃ་ཧཱུྃ༔ དཀོན་མཆོག་རྩ་གསུམ་སྐུ་གསུམ་སོགས༔ ཀུན་འདུས་པདྨ་ཐོད་ཕྲེང་ལ༔ ཁྱེད་ཤེས་བློ་ཡིས་སྐྱབས་སུ་མཆི༔ འགྲོ་དོན་སངས་རྒྱས་འཐོབ་བྱའི་ཕྱིར༔ བསྟན་དང་འགྲོ་ལ་འཚེ་བ་ཡི༔ དམ་སྲི་སྒྲོལ་བར་སེམས་བསྐྱེད་དོ༔ ལྟ་བ་རང་ཞལ་མཇལ་བའི་ཕྱག༔ སྒོམ་པ་ཡེངས་མེད་མཆོད་སྤྲིན་འབུལ༔ དངོས་འཛིན་མཚན་མའི་སྒྲིབ་སོགས་བཤགས༔ མ་ཡེངས་དྲན་པའི་ཆོས་འཁོར་བསྐོར༔ དམིགས་མེད་ངང་དུ་རྗེས་ཡི་རང་༔ རྩོལ་མེད་འགྲོ་མགོན་བཞུགས་གསོལ་འདེབས༔ འཁོར་གསུམ་དམིགས་མེད་དགེ་ཚོགས་བསྔོ༔ དེ་ཡིས་སྔོན་འགྲོའི་ཆོས་གསུམ་རྫོགས༔ དེ་དང་འབྲེལ་བར་བགེགས་ཀྱི་གཏོར། རཾ་ཡཾ་ཁཾ་དང་ཨོཾ་ཨཱཿཧཱུྃ་གིས་བྱིན་གྱིས་བརླབས། ཨོཾ་སརྦ་བིགྷྣན་ཨེ་དམ་བྷ་ལིངྟ་ཁ་ཁ་ཁ་ཧཱི༔ ཞེས་ལན་གསུམ་གྱིས་ཚིམ་པར་བསྔོས་ལ། ཧཱུྃ་ཧཱུྃ་ཧཱུྃ༔ ང་ནི་ཡེ་ནས་གྲོ་བོ་ལོད། །སྒྲུབ་ལ་བར་གཅོད་དམ་སྲི་རྣམས། །བཀའ་ལས་མ་འདའ་གཏོར་མ་ལོངས། །འདས་ན་བརླག་པར་གདོན་མི་ཟ། །དྲག་སྔགས་བརྗོད་ཅིང་ཐུན་གྱིས་བྲབ། བསྲུང་འཁོར་ནི། ཧཱུྃ་ཧཱུྃ་ཧཱུྃ༔ སྣོད་བཅུད་ལྷ་དང་གཞལ་ཡས་ཁང་། །ཡེ་ཤེས་ཁྲོ་མཚོན་མེ་དཔུང་དང་། །རྡོ་རྗེའི་བསྲུང་གུར་ཡངས་པས་གཏམས། །འགྱུར་མེད་སྲ་མཁྲེགས་བརྟན་པར་གྱུར། བྱིན་འབེབས་ནི། ཧཱུྃ་ཧྲཱིཿ འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །གྲུབ་པའི་རྟགས་མཚན་མྱུར་དུ་སྟོན། །བདག་ཅག་ལས་འབྲས་མཆིས་པར་མཛོད། །ཨེ་ཨ་རལླི་ཕེཾ་ཕེཾ་ཧྲིཾ་ཧྲིཾ་ཛ་ཛ༔ ཛ༔ཧཱུྃ་བཾ་ཧོ༔ ཨ་བེ་ཤ་ཡ་ཨ་ཨཱ༔ མཆོད་རྫས་བྱིན་རླབས་ནི། ཨོཾ་ཨཱཿཧཱུྃ། བླ་མེད་གསང་བའི་དཀྱིལ་འཁོར་འདིར། །རྟོག་གཉིས་ཡུལ་སྣང་རྣམ་དག་པ། །སྣང་སྲིད་འདོད་ཡོན་མཆོད་པའི་སྤྲིན། །ཕྱི་ནང་གསང་བའི་དམ་ཚིག་རྫས༔ དཀྱིལ་འཁོར་ལྷ་ཚོགས་མཉེས་བྱེད་སྤྲིན༔ རབ་འབྱམས་ནམ་མཁའི་མཛོད་དུ་སྤེལ༔ ཨོཾ་བཛྲ་ཨརྒྷཾ༴སོགས་ནས་ ཤཔྟ་པཱུ་ཛ་ཨཱ༔ཧཱུྃ། ཨོཾ་མ་ཧཱ་པཉྩ་ཨ་མྲྀ་ཏ་ཨཱ༔ཧཱུྃ། ཨོཾ་མ་ཧཱ་རཀྟ་ཨཱ༔ཧཱུྃ། ཨོཾ་མ་ཧཱ་བ་ལིངྟ་ཨཱ༔ཧཱུྃ། ཨོཾ་མ་ཧཱ་ཏ་ན་ག་ཎ་གུ་ཧྱ་པཱུ་ཛ་ཨཱ༔ཧཱུྃ། དངོས་གཞི་སྒོ་གསུམ་ལྷ་སྔགས་དུ༔ རྒྱས་གདབ་བསྐྱེད་པའི་རིམ་པ་ནི༔ ཧཱུྃ་ཧཱུྃ་ཧཱུྃ༔ འཁོར་འདས་དམིགས་མེད་སྟོང་པའི་ངང་༔ མ་རྟོགས་འགྲོ་ལ་སྙིང་རྗེའི་གདངས༔ ཟུང་འཇུག་རང་རིག་ཡི་གེ་ཧཱུྃ༔ དེ་ལས་འོད་འཕྲོས་ཕྱི་སྣོད་ཞིང་༔ རྔ་ཡབ་ཟངས་མདོག་དཔལ་གྱི་རི༔ འཇིགས་རུང་སྲིན་པོའི་ཕོ་བྲང་དབུས༔ པད་ཉི་སྡེ་བརྒྱད་དམ་སྲིའི་སྟེང་༔ རྩལ་ལྡན་སྟག་མོ་རྔམ་ཞིང་བརྗིད༔ དེ་སྟེང་ཧཱུྃ་ཡིག་ཡོངས་གྱུར་ལས༔ རྩ་གསུམ་ཀུན་འདུས་པདྨ་འབྱུང་༔ ཁྲོ་བོ་ཆེ་བཙན་གྲོ་བོ་ལོད༔ སྨུག་ནག་རྔམ་བརྗིད་སྲིན་པོའི་གཟུགས༔ སྡང་མིག་གློག་འཁྱུགས་ཨམ་གཙིགས་བསྡམས༔ རལ་པ་དམར་སེར་ཐོད་སྐམ་སྤྲས༔ མགོ་རློན་དོ་ཤལ་སྦྲུལ་ཆུན་བརྒྱན༔ བེར་མཐིང་བླ་གོས་མཐིང་ཤམ་དམར༔ ཕྱག་གཡས་གསེར་རྡོར་རྩེ་ལྔ་ཕྱར༔ རྒྱལ་འགོང་བདུད་བཞིའི་ཀླད་པ་དཀྲུགས༔ གཡོན་པས་གནམ་ལྕགས་ཕུར་བུ་བསྒྲིལ༔ ལོག་འདྲེན་དམ་སྲིའི་སྙིང་ལ་བསྡིག༔ སྡིགས་མཛུབ་རྩེ་ལས་ལྕགས་སྡིག་འཕྲོ༔ བཟོད་དཀའ་བསྐལ་མེ་འབར་བའི་ཀློང་༔ ཡང་སྤྲུལ་ཁྲོ་ཚོགས་སྤྲིན་ལྟར་གཏིབས༔ ཕྱོགས་བཞིར་དཀར་སེར་དམར་ལྗང་གང་༔ ཐོད་དབྱུག་སྡིགས་མཛུབ་མེ་སྟག་འཕྲོ༔ སྣང་སྟོང་དབྱེར་མེད་ཆུ་ཟླའི་གར༔ གསལ་སྟོང་བདེ་བ་ཆེན་པོའི་ངང་༔ གནས་གསུམ་ཡི་གེའི་འོད་ཟེར་གྱིས༔ རྔ་ཡབ་གླིང་ནས་རང་འདྲ་བ༔ ཆར་ལྟར་བབས་ནས་ཐིམ་པར་བསམ༔ སྤྱན་འདྲེན་ནི། ཧཱུྃ་ཧཱུྃ་ཧཱུྃ༔ འཇིགས་རུང་དབང་དྲག་རོལ་པའི་ཞིང་༔ ལང་ག་མགྲིན་བཅུ་སྲིན་པོའི་ཡུལ༔ ཟངས་མདོག་དཔལ་རི་སྤྲུལ་པའི་གནས༔ པདྨ་འོད་ཀྱི་ཕོ་བྲང་ནས༔ ཁྲོ་བོ་ཡོངས་ཀྱི་ཆེ་བཙན་མཆོག༔ གུ་རུ་རྡོ་རྗེ་གྲོ་བོ་ལོད༔ ཁྲོ་ཚོགས་སྤྲུལ་པ་སྐར་ལྟར་འཁྲིགས༔ གིང་ཆེན་མཁའ་འགྲོ་རྡུལ་ལྟར་འཚུབས༔ སྔོན་ནས་ཁྱོད་དང་འབྲེལ་བའི་ཕྱིར༔ རྩེ་གཅིག་གདུང་བས་སྤྱན་འདྲེན་གཤེགས༔ བཛྲ་ས་མ་ཡཱ་ཛ༔ བཞུགས་གསོལ་ནི༔ གུ་རུ་གིང་དང་མཁའ་འགྲོའི་ཚོགས། དམ་ཚིག་དབང་གིས་འདིར་གཤེགས་ལ༔ སྒོ་གསུམ་རྟེན་དང་དབྱེར་མེད་བཞུགས༔ འདུ་འབྲལ་མེད་པར་ཏིཥྛ་ལྷན༔ ཕྱག་འཚལ་བ་ནི། སྒོ་གསུམ་སྐུ་གསུང་ཐུགས་ཀྱི་ངང་༔ ཐ་མི་དད་པས་བརྡ་ཕྱག་འཚལ༔ མཆོད་འབུལ་ནི། ཕྱི་ལྟར་ཞིང་བཅུ་འདུལ་བའི་ཆེད༔ དགྲ་བགེགས་དམ་སྲི་བསྒྲལ་བ་ཡི༔ ཁྲག་གི་མཆོད་ཡོན་ཆུ་རྒྱུན་སྦྲེང༔ དབང་པོའི་མེ་ཏོག་གསར་དུ་བཞད༔ ཚིལ་ཆེན་བསྲེགས་པའི་དུད་སྤྲིན་འཁྲིགས༔ ཞུན་ཆེན་མར་མེ་ཉི་ལྟར་འབར༔ ཁྲག་མཁྲིས་དྲི་ཆབ་སྦྱར་བའི་ཆབ༔ ཤ་ཁྲག་རུས་པའི་ཞལ་ཟས་དང་༔ ཐོད་རྔ་རྐང་གླིང་རོལ་མོའི་སྒྲ༔ ནང་ལྟར་རང་རྒྱུད་ཉོན་མོངས་ལྔ༔ གཏི་མུག་ཤ་དང་འདོད་ཆགས་ཁྲག༔ ཞེ་སྡང་རུས་པ་ང་རྒྱལ་ཚིལ༔ ཕྲག་དོག་མཁྲིས་ཆེན་ཉོན་མོངས་ལྔ༔ མ་སྤངས་མི་ཞེན་རང་བབས་གཤིས༔ རྣམ་དག་མཆོད་པ་ཆེན་པོ་བཞེས༔ གསང་བ་གང་སྣང་ཡུལ་དྲུག་ཀུན༔ བླང་དོར་གཉིས་མེད་མཉམ་པའི་ངང་༔ ཟག་མེད་བདུད་རྩི་ཨ་མྲྀ་ཏ༔ བདེ་གསལ་མི་རྟོག་ཞེན་བྲལ་ཁྲག༔ སྣང་སྲིད་སྣོད་བཅུད་བྷ་ལིང་ཏ༔ དབྱིངས་རིག་འབྲལ་མེད་དབྱིངས་སུ་སྦྱོར༔ ཞིང་བཅུ་ཚད་མེད་སྙིང་རྗེས་སྒྲོལ༔ འཁོར་གསུམ་དམིགས་མེད་མཆོད་པ་བཞེས༔ སྐུ་གསུམ་མངོན་གྱུར་དངོས་གྲུབ་སྩོལ༔ མ་ཧཱ་ཤ་མ་ཤ་ན་སརྦ་པཱུ་ཙ་ཨ་མྲྀ་ཏ་རཀྟ་བྷ་ལིང་ཏ་ཁཱ་ཧི༔ སརྦ་ཨརྠ་སིདྡྷི་ས་མ་ཡཱ་ཧཱུྃ༔ བསྟོད་པ་ནི། ཧཱུྃ་ཧཱུྃ་ཧཱུྃ༔ ཆེ་མཆོག་པདྨ་ཐོད་ཕྲེང་རྩལ༔ ཁྲོ་བོ་འཆོལ་བ་གྲོ་བོ་ལོད༔ སྐུ་ནི་སྨུག་ནག་གར་དགུའི་ཉམས༔ མི་ཟན་སྟག་མོ་དྲུས་མའི་སྟེང་༔ དཔའ་ཞིང་གཏུམ་པའི་བརྟུལ་ཤུགས་ཅན༔ ལོག་འདྲེན་གཤེད་དུ་རྔམ་ལ་བསྟོད༔ གསུང་ནི་དྲག་སྔགས་ཧཱུྃ་གི་སྒྲས༔ བསྟན་པའི་དམ་སྲིའི་ཀླད་པ་འགེམས༔ གྲགས་སྟོང་རྡོ་རྗེའི་སྒྲ་དབྱངས་སྒྲོག༔ རྡོ་རྗེའི་གད་མོ་བཞད་ལ་བསྟོད༔ གང་ཐུགས་སྤྲོས་བྲལ་ཆོས་སྐུའི་ཀློང༔ དམིགས་མེད་སྙིང་རྗེ་ཆེན་པོའི་རྩལ༔ ཞེ་སྡང་ཅན་ལ་ཁྲོ་ཚུལ་སྟོན༔ འཁྲུལ་མེད་དབྱིངས་སུ་སྦྱོར་ལ་བསྟོད༔ རབ་འབྱམས་རྒྱལ་བ་ཐམས་ཅད་དང་༔ དབྱེར་མེད་གཅིག་པའི་སྒྱུ་འཕྲུལ་གར༔ ཞི་དང་ཁྲོ་བོ་ཆགས་པའི་ཉམས༔ མ་འདྲེས་ཡོན་ཏན་རྫོགས་ལ་བསྟོད༔ ཁྱོད་མཚན་ཡིད་ལ་དྲན་པས་ཀྱང་༔ བདུད་དང་ལོག་འདྲེན་མ་ལུས་པ༔ སྤ་བཀོང་ཟིལ་གནོན་བྲན་དུ་འཁོལ༔ དྲག་པོའི་ཕྲིན་ལས་རྫོགས་ལ་བསྟོད༔ སྔགས་ཀྱི་བཟླས་པ་བྱ་བ་ནི༔ རང་གི་ཐུགས་ཀར་ཉི་མའི་སྟེང་༔ ཡེ་ཤེས་སེམས་དཔའ་ཧཱུྃ་སྨུག་ནག༔ མཐའ་བསྐོར་སྔགས་ཀྱི་ཕྲེང་བ་ནི༔ གཡས་སུ་འཁོར་ཞིང་རང་སྒྲ་སྒྲོག༔ མེ་སྟག་ལྕགས་སྡིག་ཚྭ་ཚྭ་འཕྲོས༔ རྒྱལ་བསེན་དམ་སྲི་འབྱུང་པོའི་ཚོགས༔ བསྐྲད་བཅོམ་རྨིང་མེད་བརླག་པར་བསམ༔ སྟོང་ཉིད་ལྟ་བའི་གདེང་ལྡན་པས༔ ཡེངས་མེད་ངང་ནས་སྔགས་འདི་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་གྲོ་བོ་ལོད་སརྦ་སིདྡྷི་ཕ་ལ་ཧཱུྃ༔ བསྙེན་ཚད་འབྲུ་འབུམ་དག་ཏུ་བཟླ༔ སྐབས་སུ་ལས་ལ་སྦྱོར་བའི་སྔགས༔ ཨོཾ་ཨཱཿཧཱུྃ་མ་ཧཱ་གུ་རུ་བཛྲ་ཀྲོ་ཏ་སརྦ་དུཥྚན་ཨ་ཡ་མ་དུ་རུ་ཙ་ཤ་ན་དམ་སྲི་འབྱུང་པོའི་སྙིང་ལ་མཱ་ར་ཡ་ཧཱུྃ་ཕཊ༔བྷྱོ་ཟློག༔ སླར་ཡང་སྔགས་ལས་འོད་ཟེར་འཕྲོས༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཐོ་བ་དགྲ་སྟྭ་རལ་གྲི་མེ༔ ཕྱག་མཚན་སྣ་ཚོགས་ཐོགས་པ་ཡི༔ སྟོབས་ལྡན་ཤུགས་དྲག་ལས་མཁན་ཚོགས༔ གློག་ལྟར་འཁྱུག་ཅིང་ཐོག་ལྟར་འབེབས༔ གང་དམིགས་དགྲ་འདྲེ་དམ་སྲིའི་ཚོགས༔ ལྕགས་ཀྱུས་སྙིང་བཟུང་ཞགས་པས་བསྡམས༔ ལྕགས་སྒྲོག་གིས་བཅིངས་དྲིལ་བུས་མྱོས༔ ཐོ་བས་བསྣུན་ཅིང་དགྲ་སྟྭས་གཤགས༔ རལ་གྲིས་གཏུབས་ནས་མེ་ལ་བསྲེགས༔ དམིགས་པ་བརྟན་པོས་བཟླ་བར་བྱ༔ གྲངས་ནི་ཁྲི་ཚོ་གསུམ་ཡིན་ནོ༔ གནོད་ཚབས་ཆེ་ཆུང་དག་དང་བསྟུན༔ མཐར་ནི་གནོད་བྱ་གནོད་ཡུལ་ཀུན༔ སྤྲོས་བྲལ་སྟོང་པའི་ངང་མདངས་བསྐྱངས༔ ཁྱད་པར་དྲག་སྔགས་སོ་ལྔ་པ༔ དྲག་པོ་སྤྱི་དྲིལ་སྔགས་ཡིན་པས༔ རྣོ་སོ་གདགས་ཕྱིར་བརྒྱ་སྟོང་གྲངས༔ ལོང་སྐབས་དག་དང་བསྟུན་ཏེ་བཟླ༔ གང་ཟག་དབང་པོའི་ཁྱད་པར་ལས༔ རབ་འབྲིང་ཐ་མའི་རྟགས་རྣམས་འབྱུང་༔ ཐེ་ཚོམ་མེད་པ་གནད་དུ་ཆེ༔ ལོག་ལྟ་ཅན་གྱི་སྤྱོད་ཡུལ་མིན༔ ས་མ་ཡཱ༔ ཐུན་མཐར་དབྱངས་གསལ་ཡིག་བརྒྱ་རྟེན་སྙིང་མཆོད་བསྟོད་བྱའོ། རྗེས་ལ་ཚོགས་ཀྱི་ལས་རིམ་ལས། ཐོག་མར་བྱིན་གྱིས་བརླབ་པ་ནི། རཾ་ཡཾ་ཁཾ། ཚོགས་ཀྱི་དངོས་འཛིན་བསྲེག་གཏོར་སྦྱངས། །ཡེ་ཤེས་བདུད་རྩིར་སྦྱངས་སྤེལ་བསྒྱུར། །ལྷ་ཚོགས་དགྱེས་སྐོང་ལོངས་སྤྱོད་གཏེར། །ཀུན་བཟང་མཆོད་སྤྲིན་ལྟ་བུར་གྱུར། །ཨོཾ་ཨཱ༔ཧཱུྃ། ལན་གསུམ། ཚོགས་ཞིང་སྤྱན་འདྲེན་པ་ནི། ཧཱུྃ་ཧཱུྃ་ཧཱུྃ། རྔ་ཡབ་པདྨ་འོད་གླིང་ནས། །རྡོ་རྗེ་གྲོ་ལོད་གཙོ་དང་འཁོར། །འདིར་བྱོན་ཚོགས་ལ་བྱིན་ཆེན་ཕོབ། །དབང་དྲག་ལས་ཀྱི་དངོས་གྲུབ་སྩོལ། །ཨོཾ་གུ་རུ་བཛྲ་གྲོ་བོ་ལོད་སརྦ་ཀིངྐ་ར་ཊཱཀྐི་ནི་ཕེཾ་ཛཿ ཛཿཧཱུྃ་བཾ་ཧོ། ཚོགས་ཕུད་འབུལ་བ་ནི། ཧཱུྃ། རྡོ་རྗེ་ཁྲོ་རྒྱལ་རྩ་གསུམ་ལྷར། །འདོད་སྲེད་ཞེན་པ་མ་མཆིས་ཀྱང་། །ཚོགས་ཆེན་རྣམ་གཉིས་མྱུར་རྫོགས་ཕྱིར། །བརྩེ་ཆེན་ཐུགས་རྗེས་བཞེས་སུ་གསོལ། །གྷ་ན་ཙཀྲ་པུ་ཙ་ཧོ། བར་བ་བཤགས་པ་ནི། ཧཱུྃ། བདག་གིས་བག་མེད་འཁྲུལ་སེམས་ཀྱིས། །སོ་བྱང་སྔགས་ཀྱི་བསྲུང་སྡོམ་ལ། །སྔོན་ནས་འགལ་འཁྲུལ་ཅི་བགྱིས་རྣམས། །ཚོགས་ཀྱི་མཆོད་པས་བསྐང་ཞིང་བཤགས། །ཡིག་བརྒྱ་བརྗོད། ཐ་མ་བསྒྲལ་བསྟབས་ནི། །ཧཱུྃ་ཞེས་བྱིན་བསྡུས། དགུག་གཞུག་བྱས་ལ། ཧཱུྃ་ཧཱུྃ་ཧཱུྃ། གཏུམ་དྲག་རྔམ་འབར་ཁྲོ་ཆེན་གྱིས། །དམ་སྲི་མ་རུང་གདུག་ཅན་རྣམས། །གཟུགས་ཕུང་ཚལ་བ་དུམ་བུར་ཐོངས། །རྣམ་ཤེས་ལྡོག་མེད་དབྱིངས་སུ་སྤོར། སརྦ་ནྲྀ་ཏྲི་མཱ་ར་ཡ་རྦད། ཞིང་གྱུར་གདུག་པ་བསྒྲལ་བ་ཡི། །ཤ་ཁྲག་བདུད་རྩིར་སྤེལ་བ་འདི། །ཁྲོ་ཆེན་འབར་བའི་རྔམ་ཞལ་དུ། །བཞེས་ལ་མངོན་སྤྱོད་ལས་འགྲུབ་མཛོད། །སརྦ་རུ་ཏྲ་ཏ་ན་མ་ཧཱ་པུ་ཙ་ཁ་ཧཱི། འདིར་དྲང་བ་ཞུ་ལན་བཅས་ཏེ་ཚོགས་ལ་རོལ། ལྷག་མ་ནི། ཨོཾ་ཨཱཿཧཱུྃ་ཧ་ཧོ་ཧྲཱིཿཕེཾ་ཕེཾ། ཞེས་བྱིན་གྱིས་བརླབས་ལ་ལྷག་མགྲོན་སྤྱན་དྲངས། ཧཱུྃ་བྷྱོཿ ཐབས་ཀྱི་སྒྱུ་འཕྲུལ་གང་འདུལ་བྲན། །འཇིགས་གཟུགས་ལྷག་སྡུད་དབང་ཕྱུག་མ། །གིང་ལིང་མ་སྲིང་འབར་མ་སོགས། །ལྷག་གཏོར་འདི་བཞེས་ཕྲིན་ལས་མཛོད། །ཨུཥྩི་ཊ་བྷ་ལིང་ཏ་ཁ་ཧཱི། ཞེས་ཕྱིར་དོར་རོ། །དེ་ནས་བསྐུལ་བ་ནི། ཧཱུྃ་ཧཱུྃ་ཧཱུྃ། ཁྲག་འཐུང་ཀུན་གྱི་ཆེ་བཙན་མཆོག །གཏུམ་ཆེན་རྡོ་རྗེ་གྲོ་བོ་ལོད། །གིང་བཞི་རྩ་གསུམ་སྲུང་མར་བཅས། །ཐུགས་དམ་བསྐུལ་ལོ་མ་གཡེལ་ཅིག །བོད་ཁམས་ཕུང་བྱེད་དམ་སྲི་བདུད། །མཐའ་དམག་རྒྱ་འདྲེའི་ཁ་དར་ནས། །བསྟན་བཤིག་འགྲོ་རྣམས་ཕོང་བགྱིད་ཚེ། །མྱུར་དུ་མངོན་སྤྱོད་ཕྲིན་ལས་མཛོད། །འགྲན་ཟླ་མེད་པའི་རྫུ་འཕྲུལ་དང་། །མཐུ་སྟོབས་ནུས་པའི་རྩལ་བསྐྱེད་ལ། །དམ་སྲི་རྒྱལ་འགོང་མཐའ་བཞིའི་དམག །དྲག་པོའི་ལས་ཀྱིས་མྱུར་དུ་སྒྲོལ། །ཐ་ཚིག་བསྒྲག་པ་ནི། ཧཱུྃ། སྔོན་ཚེ་འོད་སྣང་མཐའ་ཡས་ཀྱིས། །བླ་མེད་གསང་རྒྱུད་བསྟན་པའི་ཚེ། །རྡོ་རྗེ་ཐེག་པའི་བསྲུང་མ་རྣམས། །ཇི་ལྟར་ཐུགས་བསྐྱེད་རང་དམ་བཅས། །དེ་རྗེས་འཇིག་རྟེན་མགོན་པོ་ཡིས། །འཁོར་མཚོ་ལན་གསུམ་སྟོང་བྱས་ཚེ། །ཡེ་ཤེས་སྤྱན་ལྡན་སྲུང་མ་རྣམས། །ཐུགས་བསྐྱེད་དམ་བཅའ་ཇི་ལྟར་མཛད། །དེ་འོག་སློབ་དཔོན་ཆེན་པོ་ཡིས། །འཛམ་གླིང་དཀར་པོར་བསྒྱུར་བའི་ཚེ། །ལྷ་སྲིན་སྡེ་བརྒྱད་མ་ལུས་ཀུན། །ཇི་ལྟར་དམ་བཞག་སྲོག་སྙིང་ཕུལ། །དེ་བཞིན་ལུང་རིག་གླིང་པ་ཡིས། །གསང་མཛོད་ཐུགས་ཀྱི་གཏེར་བཏོན་ཅིང་། །དྷརྨའི་མིང་འཛིན་གྲོལ་ཞིག་པས། །ལུང་བཞིན་ཟབ་གཏེར་མཇུག་བསྐྱངས་ཚེ། །ཐུགས་དམ་མཛད་བཞིན་གཏེར་སྲུང་རྣམས། །མཆོད་གཏོར་འདི་བཞེས་ཕྲིན་ལས་མཛོད། །བསྟན་གཏོར་ནི། བྷྱོ། གཏུམ་ཆེན་རྡོ་རྗེ་གྲོ་ལོད་དང་། །དཔལ་གྱི་སེང་གེའི་བཀའ་དམ་བཞིན། །བོད་སྐྱོང་མ་སྲིང་བསྟན་མ་རྣམས། །བཤལ་ཆུའི་མཆོད་གཏོར་འདི་བཞེས་ལ། །དམ་སྲི་རྒྱལ་བསེན་ཀླ་ཀློ་དང་། །དུས་འཁྲུགས་མཐའ་དམག་རྡུལ་དུ་རློགས། །སྔ་འགྱུར་བསྟན་པ་མི་ཉམས་ཤིང་། །བོད་ཁམས་བདེ་ཞིང་སྐྱིད་པར་མཛོད། །མ་མ་ཧྲིང་ཧྲིང་བ་ལིང་ཏ་ཁ་ཧཱི། བྲོ་མནན་ནི། ཧཱུྃ་ཧཱུྃ་ཧཱུྃ། ཁྲོ་ཆེན་འཆོལ་བའི་ས་མ་དྷིས། །དམ་སྲི་རྒྱལ་བསེན་ཀླ་ཀློ་སོགས། །ལོག་འདྲེན་གདུལ་བར་དཀའ་བ་རྣམས། །མི་ཤིག་ལྡོག་མེད་ཨེ་ཀློང་དུ། །མནན་ནོ་སྟྭཾ་བྷ་ཡ་ལཾ་ནན། །བཛྲ་ས་མ་ཡཱ་ཐཾ་རྒྱ། །གཏང་རག་གི་མཆོད་བསྟོད་བྱས་ལ་དངོས་གྲུབ་ནི། ཧཱུྃ་ཧྲཱིཿ བྱིན་རླབས་ཀུན་གྱི་འབྱུང་གནས་མཆོག །སྐུ་གསུམ་ཡོངས་རྫོགས་གྲོ་བོ་ལོད། །རྩ་གསུམ་གིང་དང་མཁའ་འགྲོ་ཡིས། །དབང་དང་དངོས་གྲུབ་དེང་འདིར་སྩོལ། །སྔོན་ཚེ་ཁྱེད་ཀྱིས་འཕགས་བོད་དུ། །དམ་སྲི་རྒྱལ་གདོན་ཚར་བཅད་བཞིན། །གདུག་པ་ཅན་རྣམས་ཚར་གཅོད་པའི། །དབང་དྲག་དངོས་གྲུབ་མཆོག་འདིར་སྩོལ། །རྩ་སྔགས་བརྗོད། བཤགས་ཚིག་ནི། མ་རྙེད་ཡོངས་སུ༴སོགས། ཡིག་བརྒྱ་ལན་གསུམ་སོགས་བརྗོད། བརྟན་བཞུགས་བྱ་བའམ་གཤེགས་སུ་གསོལ་བ་སྐབས་དང་བསྟུན། རྟག་ཆད་བསལ་ཕྱིར་བསྡུ་ལྡང་ནི། ཨ་ཧོ། རྟག་པའི་མཐའ་གྲོལ་སྟོང་དབྱིངས་ཨཱཿ ཆད་མཐའ་ལས་གྲོལ་གསལ་སྣང་ཧཱུྃ། གནས་གསུམ་སྐུ་གསུམ་ས་བོན་ལས། །འོད་འཕྲོས་རང་ལུས་རཀྵ་བྷྲུཾ། །བསྔོ་སྨོན་ནི། ཨེ་མ་ཧོ༔ སྔོན་འདས་དུས་ནས་བྱང་ཆུབ་བར༔ སྒོ་གསུམ་ལས་ལ་བརྟེན་པ་ཡི༔ ཟག་བཅས་ཟག་མེད་དགེ་རྩ་ཀུན༔ གཞན་དོན་རྫོགས་བྱང་ཐོབ་ཕྱིར་བསྔོ༔ དེ་མཐུས་འདིར་ཞུགས་ཚེ་འདི་ལ། །རྡོ་རྗེ་གྲོ་ལོད་མངོན་གྱུར་ནས། །གཞི་ཐོག་ཉིད་དུ་ཡིད་ཅན་ཀུན། །ཚོམ་བུ་གཅིག་ཏུ་གྲོལ་བགྱིད་ཤོག མེ་ཏོག་འཐོར་ཞིང་ཤིས་བརྗོད་ནི༔ ཧཱུྃ་ཧཱུྃ་ཧཱུྃ༔ གཞི་དབྱིངས་རིག་སྟོང་ཁྲོ་བོའི་རྒྱལ༔ ལམ་སྣང་སྤྲུལ་པའི་འཁོར་ལོར་ཤར༔ འབྲས་བུ་གདོད་མའི་ཧེ་རུ་ཀས༔ ལོག་འདྲེན་ཚར་གཅོད་ཤིས་པ་སྩོལ༔ ངོ་བོ་ཆོས་སྐུ་སྣང་མཐའ་ཡས། །རང་བཞིན་ལོངས་སྐུ་སྤྱན་རས་གཟིགས། །ཐུགས་རྗེ་སྤྲུལ་སྐུ་གྲོ་བོ་ལོད། །དབྱེར་མེད་ལྷུན་གྲུབ་ཤིས་པ་སྩོལ། །ཞེས་སོགས་བརྗོད་དོ། ས་མ་ཡཱ༔ དེ་ལྟར་བདེ་གཤེགས་ཀུན་འདུས་པ༔ པདྨ་དྲག་པོའི་སྒྲུབ་པ་འདིས༔ བྱང་ཆུབ་སྒྲུབ་པའི་སྐལ་ལྡན་གྱི༔ བར་ཆད་སེལ་བར་ཐེ་ཚོམ་མེད༔ བཅོས་མའི་ཚིག་གིས་བསླད་མིན་པའི༔ འགྱུར་མེད་ཟབ་གསང་ཌཀྐཱིའི་བརྡའ༔ ལས་འཕྲོ་ལྡན་པའི་སྤྱོད་ཡུལ་ཡིན༔ གུ་ཧྱ༔ ཅེས་འགྲོ་མགོན་ལུང་རིག་གླིང་པའི་དགོངས་གཏེར་ཡང་དག་པ་ནས་བཏོན་པའི་གུ་རུའི་ཐུགས་སྒྲུབ་པད་དཀར་ཕྲེང་མཛེས་ཀྱི་ཆ་ལག རྡོ་རྗེ་གྲོ་ལོད་ཀྱི་རྣལ་འབྱོར་རྒྱུན་ཁྱེར་གནམ་ལྕགས་ཐོག་གི་ཚ་ཚྭ་ཞེས་བྱ་བ་འདི་མཐོང་བ་བརྒྱུད་པའི་ཕྱག་བཞེས་ལྟར་དག་སྣང་རྐང་བཞི་འགའ་རེས་ཁ་བསྐང་ནས་འཇུག་བདེར་བསྒྲིགས་པ་འདི་ཡང་། རང་སློབ་ཡོངས་འཛིན་འཇིགས་མེད་རང་གྲོལ་གྱི་བཞེད་ངོར། རྒྱལ་དབང་པདྨའི་གཏེར་ལུང་གིས་ལན་འགར་ཟིན་པའི་ཆོས་བདག་མགོ་སྤྲུལ་དྷརྨའི་མིང་ཅན་ནམ་གྲོལ་ཞིག་ལམ་སྟོན་གླིང་པར་ཡང་བཏགས་ཆོག་པར་རྒྱལ་རོང་གཏེར་ཆེན་གྱི་དངོས་སློབ་མཁའ་འགྲོ་གླིང་པ་ནས་ཡང་ཡང་གསུངས་པའི། མགོ་ལོག་གི་སྔགས་རྒན་སྤྲུལ་མིང་པ་དེས་བགྱིས་པ་དུས་ཀུན་དགེ་ལེགས་འཕེལ་ཞིང་བརྟན་པའི་རྒྱུར་གྱུར་ཅིག །སརྦ་མངྒ་ལཾ། རྡོ་རྗེ་གྲོ་ལོད་ཀྱི་བསྐང་བསྡུས་འདོད་འབྱུང་ནོར་བུ།༄༅། རྡོ་རྗེ་གྲོ་ལོད་ཀྱི་བསྐང་བསྡུས་འདོད་འབྱུང་ནོར་བུ་བཞུགས། གུ་རུ་བཛྲ་ཀྲོ་དྷ་ཡ་ན་མཿ རྡོ་རྗེ་གྲོ་ལོད་ཀྱི་བསྐང་བསྡུས་བྱེད་པར་འདོད་པས། བསྐང་རྫས་རྣམས་ནམ་མཁའ་མཛོད་ཀྱི་སྔགས་རྒྱས་ཀུན་ཏུ་བཟང་པོའི་མཆོད་སྤྲིན་ལྟ་བུར་སྤེལ་ལ། ཧཱུྃ་ཧཱུྃ་ཧཱུྃ། མ་སྐྱེས་ཆོས་དབྱིངས་སྟོང་པའི་ངང་ཉིད་ལས། །ཏིང་འཛིན་བདེན་མེད་སྒྱུ་མའི་ཆོ་འཕྲུལ་འགྱེད། །དངོས་བཤམས་ཡིད་སྤྲུལ་བསྐང་རྟེན་བསྒྲུབ་པའི་རྫས། །ཀུན་བཟང་མཆོད་པའི་སྤྲིན་དུ་བྱིན་རླབས་ནས། །སྐྱབས་གནས་སྐུ་གསུམ་མཆོག་གསུམ་རྩ་བ་གསུམ། །གུ་རུ་གྲོ་ལོད་བཀའ་ཉན་བསྲུང་མར་བཅས། །ཟག་མེད་སྒོ་གསུམ་དགྱེས་ཕྱིར་གུས་པས་འབུལ། །བརྩེ་ཆེན་ཐུགས་ཀྱིས་བཞེས་ཤིང་བྱིན་གྱིས་རློབས། ། ཧཱུྃ་ཧཱུྃ་ཧཱུྃ། ངོ་བོ་ཀ་དག་རང་བཞིན་ལྷུན་གྱིས་གྲུབ། །སྐུ་གསུམ་དོན་བརྒྱུད་རིག་འཛིན་ཐུགས་དམ་བསྐང་། །བྱིན་རླབས་རྩ་བ་མ་ནོར་ཐར་ལམ་སྟོན། །རྩ་བརྒྱུད་བླ་མ་རྣམས་ཀྱི་ཐུགས་དམ་བསྐང་། །དངོས་གྲུབ་རྩ་བ་གང་འདུལ་གཟུགས་སྐུར་སྟོན། །ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་། །ཕྲིན་ལས་རྩ་བ་སྒྲུབ་མཆོག་བུ་བཞིན་སྐྱོངས། །མ་མོ་མཁའ་འགྲོ་རྣམས་ཀྱི་ཐུགས་དམ་བསྐང་། །རྒྱལ་ཀུན་སྤྱི་གཟུགས་འགྲོ་བ་ཡོངས་ཀྱི་མགོན། །པདྨ་ཐོད་ཕྲེང་རྩལ་གྱི་ཐུགས་དམ་བསྐང་། །སྒྲུབ་སྡེ་བརྒྱད་དང་དབྱེར་མེད་ལྷག་པའི་ལྷ། །སྤྲུལ་པའི་གུ་རུ་མཚན་བརྒྱད་ཐུགས་དམ་བསྐང་། །སྐུ་གསུམ་བདེ་གཤེགས་ཡོངས་རྫོགས་ཆེ་བཙན་མཆོག །ཁྲོ་རྒྱལ་རྡོ་རྗེ་གྲོ་ལོད་ཐུགས་དམ་བསྐང་། །རྒྱལ་བསེན་དམ་སྲི་མུ་སྟེགས་གདུལ་དཀའི་གཤེད། །སྤྲུལ་པ་གིང་ཆེན་བཞི་ཡི་ཐུགས་དམ་བསྐང་། །ཕུང་བྱེད་ཀླ་ཀློ་མཐའ་བཞིའི་གདུག་པ་འདུལ། །ཡང་སྤྲུལ་མ་སྲིང་དམ་ཅན་ཐུགས་དམ་བསྐང་། །གསང་སྔགས་གྲུབ་བརྙེས་མཆོག་གི་སར་གཤེགས་པའི། །རིག་འཛིན་རྗེ་འབངས་ཉེར་ལྔའི་ཐུགས་དམ་བསྐང་། །སྨིན་གྲོལ་བསྐྱེད་རྫོགས་ལམ་ཀུན་མཐའ་རུ་ཕྱིན། །རྒྱ་བོད་མཁས་གྲུབ་ཡོངས་ཀྱི་ཐུགས་དམ་བསྐང་། །ཟབ་གཏེར་སྲུང་མ་བཙན་རྒོད་དྲག་པོ་རྩལ། །ཡུམ་སྲས་འཁོར་དང་བཅས་པའི་ཐུགས་དམ་བསྐང་། །བར་ཆད་ཀུན་སེལ་མཐུན་རྐྱེན་ཆར་འབེབས་པའི། །ལྷ་བཙན་གཞོན་ནུ་འབར་བའི་ཐུགས་དམ་བསྐང་། །ཚེ་དང་ནོར་དང་ལོངས་སྤྱོད་དངོས་གྲུབ་སྟེར། །དམ་ལྡན་ནོར་ལྷ་རྒྱ་མཚོའི་ཐུགས་དམ་བསྐང་། །ཆོས་མཐུན་ཡོངས་ལ་མི་འབྲལ་སྲུང་སྐྱོབས་མཛད། །བཀའ་གཏེར་དག་སྣང་སྲུང་མའི་ཐུགས་དམ་བསྐང་། །མི་རབས་ཆོས་རྒྱུད་ཚེ་རབས་སྲུང་མ་མཆོག །འགོ་ཞིང་སྐྱོབས་པའི་ལྷ་སྲུང་ཐུགས་དམ་བསྐང་། །ཧཱུྃ་ཧཱུྃ་ཧཱུྃ། ཐུགས་དམ་གཉན་པོ་བསྐང་བའི་དམ་རྫས་ནི། །རི་རབ་གླིང་བཞི་ཕྱི་སྣོད་འཇིག་རྟེན་དང་། །ནང་བཅུད་ལྷ་མིའི་འདོད་ཡོན་འབྱོར་བའི་ཚོགས། །གང་ཡང་མ་ཚང་མེད་པས་ཐུགས་དམ་བསྐང་། །ཕྱི་ནང་གསང་མཆོད་དེ་བཞིན་ཉིད་ཀྱི་དབྱིངས། །ལྟ་སྒོམ་སྤྱོད་འབྲས་བཞི་ཡིས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །རྒྱལ་ཁམས་བདེ་ཞིང་སངས་རྒྱས་བསྟན་པ་དར། །བདག་ཅག་འདིར་ཚོགས་མཆེད་ལྕམ་ཐམས་ཅད་ཀྱི། །སྔོན་ལས་བྱང་ཞིང་འཕྲལ་རྐྱེན་བར་ཆད་ཟློག །ཚེ་རིང་ནད་མེད་ཆོས་མཐུན་བསམ་པ་འགྲུབ། །ནད་མུག་མཚོན་འཁྲུགས་བསྐལ་ངན་དབྱིངས་སུ་ཞི། །ཉམས་ཆག་སྡིག་ལྟུང་ཆོས་ཉིད་དབྱིངས་སུ་དག །ཚངས་པ་མཆོག་གི་དངོས་གྲུབ་སྩལ་དུ་གསོལ། །ཡིག་བརྒྱ་བརྗོད་ཅིང་སྤྲོས་བྲལ་གྱི་ངང་ལ་བཞག་གོ །ཞེས་གུ་རུ་རྡོ་རྗེ་གྲོ་ལོད་ཀྱི་བསྐང་བསྡུས་འདོད་འབྱུང་ནོར་བུ་ཞེས་བྱ་བ་འདི་ཡང་། གཏེར་ཆེན་རིན་པོ་ཆེ་གང་གི་གསུང་གསང་ལས་མགོ་སྤྲུལ་རྒད་པོས་འཇུག་བདེར་བཏུས་ནས་སྤེལ་བ་དགེའོ། །དགེའོ། །དགེའོ། ། ཚོགས་ཞུ་ལན།༈ ཚོགས་ཞུ་ནི། ཧོ། ཕྱི་སྣོད་རབ་ཡངས་ཀཱ་པ་ལར། །ནང་བཅུད་འདོད་ཡོན་ལོངས་སྤྱོད་ཚོགས། །ཟག་མེད་ཡེ་ཤེས་བདུད་རྩི་འདི། །རྡོ་རྗེ་རྒྱལ་པོས་བཞེས་སུ་གསོལ། །ལན་ནི། ཧོ། བདེ་གཤེགས་ཆོས་ལ་རིན་ཐང་མེད། །སྲེད་ལེན་ཞེན་རྟོག་དྲི་མ་བྲལ། །གཟུང་དང་འཛིན་པ་ལས་འདས་པའི། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོ། །ཞེས་བརྗོད། དེ་ནས་ཐམས་ཅད་ཀྱིས་ཚོགས་ལ་རོལ། །མགོ་སྤྲུལ་པས་སོ༎ བསྙེན་གནས་ཐར་བའི་ཐེམ་སྐས་ཀྱི་ཁ་བསྐང་ཕྱག་འཚལ།༄༅། བསྙེན་གནས་ཐར་བའི་ཐེམ་སྐས་ཀྱི་ཁ་བསྐང་དུ་ཕྱག་འཚལ་བའི་རིམ་པ་ལ་རྒྱས་བསྡུས་གཉིས་ལས། སྤྲོས་པ་ལ་དགའ་བ་རྣམས་ཀྱིས་ཕྱག་འཚལ་རྒྱས་པའི་རིམ་པ་འདི་བཞིན་ནོ། ཨེ་མ་ཧོ། རབ་བདུན་བདེར་གཤེགས་མཆེད་བརྒྱད་ཕྱོགས་བཅུ་ཡི། །སངས་རྒྱས་རྣམས་དང་སྐལ་བཟང་སེམས་དཔའི་ཚོགས། །འདིར་གཤེགས་གདན་བཞུགས་ཀུན་བཟང་མཆོད་སྤྲིན་འབུལ། །བདག་གཞན་འགྲོ་རྣམས་གུས་པས་ཕྱག་འཚལ་ལོ། །སྔོན་ཚེ་བསྐལ་བ་བརྒྱད་ཁྲིའི་དུས་དག་ཏུ། །གྲོང་ཁྱེར་གཉེན་དྲུང་རྒྱལ་རིགས་ལ་འཁྲུངས་ནས། །པོ་ཏ་ལ་ཡི་ཤིང་དྲུང་སངས་རྒྱས་པའི། །བཅོམ་ལྡན་རྣམ་པར་གཟིགས་ལ་ཕྱག་འཚལ་ལོ། །ཚེ་ལོ་བདུན་ཁྲིར་ཀ་ནིའི་གྲོང་ཁྱེར་དུ། །རྒྱལ་རིགས་རྫུ་འཕྲུལ་ཅན་དུ་སྐུ་འཁྲུངས་ནས། །པུཎྚ་རི་ཀའི་ཤིང་དྲུང་སངས་རྒྱས་པའི། །བདེ་གཤེགས་གཙུག་ཏོར་ཅན་ལ་ཕྱག་འཚལ་ལོ། །ཚེ་ལོ་དྲུག་ཁྲིའི་དུས་ན་མཉན་ཡོད་དུ། །རྒྱལ་རིགས་བློ་གྲོས་ཅན་དུ་སྐུ་འཁྲུངས་ཏེ། །སཱ་ལའི་ཤིང་དྲུང་མངོན་པར་སངས་རྒྱས་པའི། །རྒྱལ་བ་ཐམས་ཅད་སྐྱོབས་ལ་ཕྱག་འཚལ་ལོ། །ཚེ་ལོ་བཞི་ཁྲིའི་དུས་ན་བདེ་ལྡན་དུ། །སྟོབས་ལྡན་བྲམ་ཟེའི་རིགས་སུ་སྐུ་འཁྲུངས་ཏེ། །ཤི་རི་ཤ་ཡི་ཚལ་དུ་སངས་རྒྱས་པའི། །ཐུབ་པ་འཁོར་བ་འཇིག་ལ་ཕྱག་འཚལ་ལོ། །ཚེ་ལོ་སུམ་ཁྲིར་གྲོང་ཁྱེར་མཛེས་ལྡན་དུ། །མཆོག་ལྡན་བྲམ་ཟེའི་རིགས་སུ་སྐུ་འཁྲུངས་ཏེ། །ཨུ་དུམ་ཝ་རའི་ཤིང་དྲུང་སངས་རྒྱས་པའི། །བཅོམ་ལྡན་གསེར་ཐུབ་ཞབས་ལ་ཕྱག་འཚལ་ལོ། །ཚེ་ལོ་ཉི་ཁྲིར་ཝ་ར་ཎ་སི་རུ། །བྲམ་ཟེ་ཡོན་ཏན་ཅན་དུ་སྐུ་འཁྲུངས་ནས། །ནྱ་གྲོ་ཏ་ཡི་ཤིང་དྲུང་སངས་རྒྱས་པའི། །བཅོམ་ལྡན་འོད་སྲུང་ཞབས་ལ་ཕྱག་འཚལ་ལོ། །ཚེ་ལོ་བརྒྱ་པའི་དུས་སུ་སེར་སྐྱ་རུ། །རྒྱལ་རིགས་བརྩོན་འགྲུས་ཅན་དུ་སྐུ་འཁྲུངས་ཏེ། །ཨ་ཤཏྠ་ཡི་ཤིང་དྲུང་སངས་རྒྱས་པའི། །བཅོམ་ལྡན་ཤཱཀྱ་ཐུབ་ལ་ཕྱག་འཚལ་ལོ།། ༧ གསེར་གྱི་མདོག་ཅན་སྐྱབས་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིད། །གཞན་གྱིས་མི་ཐུབ་ཞིང་གི་དཔལ་གྱུར་པའི། །མཚན་ལེགས་ཡོངས་བསྒྲགས་དཔལ་ལ་ཕྱག་འཚལ་ལོ། །སྐུ་མདོག་སེར་པོ་མཆོག་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་ལྡན་པའི་ཞིང་གི་དཔལ་གྱུར་པའི། །རིན་ཆེན་ཟླ་བའི་ཞབས་ལ་ཕྱག་འཚལ་ལོ། །འཛམ་བུའི་གསེར་འདྲ་ཆོས་སྟོན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །སྤོས་ཀྱིས་ཡོངས་གང་ཞིང་གི་དཔལ་གྱུར་པའི། །གསེར་བཟང་དྲི་མེད་སྣང་ལ་ཕྱག་འཚལ་ལོ། །སྐུ་མདོག་དམར་སྐྱ་མཉམ་བཞག་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །མྱ་ངན་མེད་པའི་ཞིང་གི་དཔལ་གྱུར་པའི། །མྱ་ངན་མེད་མཆོག་དཔལ་ལ་ཕྱག་འཚལ་ལོ། །སྐུ་མདོག་དཀར་དམར་ཆོས་སྟོན་ཕྱག་རྒྱ་ཅན། ། སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །ཆོས་ཀྱི་རྒྱལ་མཚན་ཞིང་གི་དཔལ་གྱུར་པའི། །ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །བྱུ་རུའི་མདོག་ཅན་མཆོག་སྦྱིན་ཕྱག་རྒྱ་ཅན། ། སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་རྒྱ་མཚོའི་ཞིང་གི་དཔལ་གྱུར་པའི། །མངོན་མཁྱེན་རྒྱལ་པོ་དེ་ལ་ཕྱག་འཚལ་ལོ། །སྐུ་མདོག་སྔོན་པོ་མཆོག་སྦྱིན་ཕྱག་རྒྱ་ཅན། །བཅུ་གཉིས་སྨོན་གྲུབ་ཚོགས་གཉིས་དཔལ་གྱིས་བརྗིད། །བཻ་ཌཱུརྱ་སྣང་ཞིང་གི་དཔལ་གྱུར་པའི། །སྨན་པའི་རྒྱལ་པོ་དེ་ལ་ཕྱག་འཚལ་ལོ། །གསེར་གྱི་མདོག་ཅན་ས་གནོན་ཕྱག་རྒྱ་ཅན། །རྨད་བྱུང་ཐུགས་རྗེ་བརྩོན་འགྲུས་ཆེན་པོའི་མཐུས། །མི་མཇེད་འཇིག་རྟེན་ཁམས་ཀྱི་དཔལ་གྱུར་པའི། །འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། ། ༧ སྐུ་མདོག་དཀར་པོ་ཤེལ་འོད་གསལ་བའི་མདངས། །ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད། །ཤར་ཕྱོགས་བྱང་ཆུབ་སེམས་དཔའི་འཁོར་གྱིས་བསྐོར། །བདེ་གཤེགས་དཀོན་མཆོག་འབྱུང་གནས་ལ་ཕྱག་འཚལ། །བཻཌཱུར་མདོག་འདྲ་གཟི་འོད་ཕྱོགས་བཅུར་འཕྲོ། །ཕྱག་གཡས་འཁོར་ལོ་གཡོན་པ་མཉམ་བཞག་མཛད། །ལྷོ་ཕྱོགས་སེམས་དཔའ་གྲངས་ལས་འདས་པས་བསྐོར། །མྱ་ངན་མེད་པའི་དཔལ་ལ་ཕྱག་འཚལ་ལོ། །དམར་གསལ་བྱེ་རུར་ཉི་འོད་འཁྱུད་འདྲའི་མདོག ། ཕྱག་གཡས་མཆེ་བ་གཡོན་པ་མཉམ་བཞག་མཛད། །ནུབ་ཕྱོགས་བྱང་སེམས་འཁོར་གྱི་དབུས་ན་བཞུགས། །བདེ་གཤེགས་རིན་ཆེན་འོད་འཕྲོ་ལ་ཕྱག་འཚལ། །མར་གད་ལྗང་གུའི་མདོག་ཅན་རབ་ཏུ་མཛེས། ། ཕྱག་གཡས་པད་དཀར་གཡོན་པ་མཉམ་བཞག་མཛད། །བྱང་ཕྱོགས་སེམས་དཔའ་མང་པོའི་འཁོར་གྱིས་བསྐོར། །བདེ་གཤེགས་རྒྱལ་བའི་དབང་པོར་ཕྱག་འཚལ་ལོ། །སྐུ་མདོག་དཀར་པོ་ཞལ་གཅིག་ཕྱག་གཉིས་པ། །ཕྱག་གཡས་པདྨ་གཡོན་པ་མཉམ་བཞག་མཛད། །ཤར་ལྷོའི་བྱང་ཆུབ་སེམས་དཔའ་རྣམས་ཀྱིས་བསྐོར། །བདེ་གཤེགས་པདྨའི་དཔལ་ལ་ཕྱག་འཚལ་ལོ། །སྐུ་མདོག་དམར་སྨུག་ཞལ་གཅིག་ཕྱག་གཉིས་པ། །ཕྱག་གཡས་ཉི་མ་གཡོན་པ་མཉམ་བཞག་མཛད། །ལྷོ་ནུབ་བྱང་ཆུབ་སེམས་དཔའ་རྣམས་ཀྱིས་བསྐོར། །ཉི་མ་སྣང་བའི་དཔལ་ལ་ཕྱག་འཚལ་ལོ། །སྐུ་མདོག་སྔོན་པོ་ཞལ་གཅིག་ཕྱག་གཉིས་པ། ། ཕྱག་གཡས་སྣ་ཚོགས་རྡོ་རྗེ་གཡོན་མཉམ་བཞག །ནུབ་བྱང་སེམས་དཔའ་རྣམས་ཀྱིས་བསྐོར་མཛད་པ། །གདུགས་ཆེན་དམ་པའི་དཔལ་ལ་ཕྱག་འཚལ་ལོ། །སྐུ་མདོག་སེར་པོ་ཞལ་གཅིག་ཕྱག་གཉིས་པ། །གཡས་པས་ཆོས་འཆད་གཡོན་པས་ཆོས་གོས་བསྣམས། །བྱང་ཤར་སེམས་དཔའི་ཚོགས་ཀྱིས་ཀུན་ནས་བསྐོར། །གླང་པོ་དམ་པའི་དཔལ་ལ་ཕྱག་འཚལ་ལོ། །སྐུ་མདོག་སྔོ་ནག་ཞལ་གཅིག་ཕྱག་གཉིས་པ། ། ཕྱག་གཡས་བུམ་པ་གཡོན་ཕྱག་དཀུ་ལ་བརྟེན། །སྟེང་ཕྱོགས་བྱང་ཆུབ་སེམས་དཔའ་རྣམས་ཀྱིས་བསྐོར། །བདེ་གཤེགས་དགའ་བའི་དཔལ་ལ་ཕྱག་འཚལ་ལོ། །སྐུ་མདོག་སེར་ནག་ཞལ་གཅིག་ཕྱག་གཉིས་པ། །ཕྱག་གཡས་པདྨ་གཡོན་པ་མཉམ་བཞག་མཛད། །འོག་ཕྱོགས་བྱང་ཆུབ་སེམས་དཔའ་རྣམས་ཀྱིས་བསྐོར། །སངས་རྒྱས་པདྨོའི་དཔལ་ལ་ཕྱག་འཚལ་ལོ། །༧ བྱམས་པ་དཀར་པོ་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །མཐོང་བ་དོན་ཡོད་དཀར་པོ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ངན་སོང་ཀུན་འདྲེན་དཀར་པོ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །མྱ་ངན་མུན་པ་འཇོམས་པའི་བློ་གྲོས་དཀར། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །སྤོས་ཀྱི་གླང་པོ་སེར་གསལ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །དཔའ་བར་འགྲོ་བ་སེར་པོ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ནམ་མཁའ་མཛོད་ནི་གསེར་མདོག་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཡེ་ཤེས་ཏོག་ཆེན་སེར་པོ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །འོད་དཔག་མེད་པ་དམར་གསལ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཟླ་འོད་དམར་པོ་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །བཟང་སྐྱོང་དམར་པོ་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །དྲྭ་བ་ཅན་གྱི་འོད་ཟེར་སྐུ་མདོག་དམར། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །རྡོ་རྗེའི་སྙིང་པོ་ལྗང་གསལ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །བློ་གྲོས་མི་ཟད་ལྗང་གུ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །སྤོབས་པ་བརྩེགས་པ་ལྗང་གུ་ཞལ་གཅིག་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཀུན་བཟང་ལྗང་གུ་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་གཡོན་པ་དྲིལ་བུ་འཛིན། །ཞབས་གཉིས་ཕྱེད་སྐྱིལ་སེམས་དཔའི་རྒྱན་ཆས་སྤྲས། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཞེས་སོགས་བརྗོད། འདི་ཡང་མགོ་སྤྲུལ་རྒན་པོས་ཁ་བསྐང་དུ་བྲིས་པའོ།། མཚམས་ལྷ་བསྐྱེད།༄༅། དེ་ནས་མཚམས་ལྷ་བསྐྱེད་པ་ནི། ངག་ཏུ་ ཧྲཱིཿཧྲཱིཿཧྲཱིཿ ཞེས་བརྗོད་པས། སྐད་ཅིག་གིས་སྐྱེ་མེད་ཆོས་སྐུའི་མཁའ་ལ། འགགས་མེད་གཟུགས་སྐུའི་རྣམ་པར་སྣང་བ་ནི། བསྲུང་འཁོར་དུར་ཁྲོད་གཞལ་ཡས་ཁང་དང་བཅས་པའི་དབུས་སུ། པདྨ་ཉི་ཟླ་དྲེགས་པ་ཕོ་མོའི་གདན་ལ། རང་བྱུང་རིག་པའི་ངོ་བོ་ཧྲཱིཿཡིག་དམར་པོ་གསལ་བ་འཕྲོ་འདུས་ཡོངས་སུ་གྱུར་པ་ལས། དབང་ཆེན་ཧེ་རུ་ཀཿསྐུ་མདོག་དམར་པོ་བསྐལ་པའི་མེ་ལྟར་འབར་བ། ཕྱག་གཡས་པདྨའི་གྲི་གུག་ནམ་མཁར་གདེངས་པ། གཡོན་པས་ཐོད་ཁྲག་ཐུགས་ཀར་འཛིན་པ། སྤྱན་གསུམ་མཆེ་གཙིགས་སྨ་ར་སྨིན་མ་དབུ་སྐྲ་དམར་སེར་གྱེན་དུ་བརྫེས་པ། དཔལ་དང་དུར་ཁྲོད་ཀྱི་ཆས་རྣམས་ཡོངས་སུ་རྫོགས་པ། ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན། ཞབས་གཉིས་འགྱིང་བའི་སྟབས་ཀྱིས་ཡེ་ཤེས་ཀྱི་མེ་དཔུང་འབར་བའི་ཀློང་ན་ཡེ་ནས་བཞུགས་པ་དེ་ཉིད་ཡོངས་སུ་གསལ་བར་གྱུར་བར་བསམ་ལ། ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ཅེས་བརྗོད། མགོ་སྤྲུལ་པས་སོ།། རྟ་མགྲིན་མདུན་བསྐྱེད།༄༅། མདུན་བསྐྱེད་ལ་དམིགས་ནས། སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་ཧཱུྃ་ཡོངས་སུ་གྱུར་པ་ལས་བསྲུང་བའི་འཁོར་ལོ་རྒྱ་ཁྱོན་ནམ་མཁའི་མཐའ་དང་མཉམ་པར་གྲུབ་པའི་དབུས་སུ་ཨེ་ལས་ནམ་མཁའ་མཐིང་གསལ་མཐའ་དབུས་བྲལ་བའི་ཀློང་དུ། ཡཾ་ལས་རླུང་གི་དཀྱིལ་འཁོར་ལྗང་ནག་གཞུའི་དབྱིབས་ཅན། རཾ་ལས་མེའི་དཀྱིལ་འཁོར་དམར་པོ་ཟུར་གསུམ་པ། བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། ལཾ་ལས་སའི་དཀྱིལ་འཁོར་སེར་པོ་གྲུ་བཞི་པ་རྣམས་མས་ནས་རིམ་པར་བརྩེགས་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པ། དེའི་སྟེང་དུ་རཾ་ལས་རཀྟའི་རྒྱ་མཚོ་རྦ་ཀློང་འཁྲིགས་པ། སུཾ་ལས་ཤ་ཆེན་གྱི་ཕུང་པོ་བརྡལ་བ། ཀེཾ་ལས་རུས་པའི་རི་རབ་དང་བཅས་པའི་སྟེང་དུ། བྷྲུཾ་ཡོངས་སུ་གྱུར་པ་ལས་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་ཆེན་པོ་ཕྱི་རིན་པོ་ཆེ་སྣ་ལྔའི་རྩིག་པ་ལ། ནང་ཐོད་པ་ཚར་གསུམ་གྱི་མཁར་དུ་ཡོད་པ། གྲུ་བཞི་སྒོ་བཞི་རྟ་བབས་བང་རིམ་བཞི་དང་ལྡན་པ། པདྨ་ཆོས་འཁོར་གདུགས་རི་དྭགས་ཞིང་གི་རྒྱལ་མཚན། ཙིཏྟའི་ཏོག་དང་བཅས་པ། ལྷ་བརྒྱད་ཀྱི་ཀ་བ། ཀླུ་བརྒྱད་ཀྱི་གདུང་མ། རྒྱུ་སྐར་གྱི་དྲལ་ཕྱམ། དུར་ཁྲོད་བརྒྱད་ཀྱི་ཁོར་ཡུག པདྨའི་ར་བ། རྡོ་རྗེ་དང་མེ་དཔུང་གི་གུར་ཁང་སོགས་འཇིགས་སུ་རུང་བའི་རྒྱན་དང་ཆས་ཐམས་ཅད་ཀྱིས་བརྒྱན་པ། དེའི་དབུས་སུ་ཆོས་འབྱུང་ཟླ་གམ་དམར་པོས་མཚན་པ་ལ་ལྷ་ཆེན་བརྒྱད་དང་ཀླུ་ཆེན་བརྒྱད་གཡས་དང་གཡོན་དུ་བསྣོལ་བའི་ཁར། སེང་གེ་གླང་ཆེན་ཆུ་སྲིན་མ་ཧེ་སྟག་གཟིག་དོམ་དང་སྦྲུལ་གདུག་རྣམས་ཀྱིས་བཏེགས་པའི་ཁྲིར་སྣ་ཚོགས་པདྨ་དང་ཉི་མའི་གདན་ལ། ལྷ་ཆེན་ཁ་བུབ་དང་། ཨུ་མ་གན་རྐྱལ་དུ་བསྒྱེལ་བའི་སྟེང་དུ་ཨཱོཾ་མ་ཧཱ་ཤྲཱི་ཧེ་རུ་ཀ་པདྨ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཡོངས་སུ་གྱུར་པ་ལས། དཔལ་ཆེན་པོ་ཆེ་མཆོག་པདྨ་དབང་ཆེན་ཧེ་རུ་ཀ་སྐུ་མདོག་དམར་པོ་བསྐལ་པའི་མེ་ལྟར་འབར་བ། ཞལ་དགུའི་རྩ་བའི་ཞལ་གསུམ་དམར་པོ་ཆགས་པའི་ཉམས་དང་ལྡན་པ། གཡས་ཀྱི་ཞལ་གསུམ་དཀར་པོ་འཛུམ་ཞིང་བཞད་པ། གཡོན་གྱི་ཞལ་གསུམ་ལྗང་གུ་ཆེས་ཆེར་ཁྲོས་པ། ཞལ་རེ་རེ་ལ་ཡང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། སྨ་ར་དང་སྨིན་མ་དང་དབུ་སྐྲ་དམར་སེར་གྱེན་དུ་བརྫེས་པ། ཕྱག་བཅོ་བརྒྱད་ཀྱི་རྩ་བའི་ཕྱག་གཉིས་ཀྱིས་པདྨ་དང་དུང་ཁྲག་འཛིན་པས་ཡུམ་ལ་འཁྱུད་པ། ལྷག་མ་གཡས་བརྒྱད་ཀྱིས་རྡོ་རྗེ། གྲི་གུག རལ་གྲི། མེ་དཔུང་། ཟླ་བ། ཐོད་དབྱུག ཁ་ཊཱཾ་ཀ ལྕགས་ཀྱུ་རྣམས་འཛིན་པ། གཡོན་བརྒྱད་ཀྱིས་དྲིལ་བུ། ཐོད་རྔ། ཨུཏྤ་ལའི་ཕྲེང་བ། ཉི་མ། བདུད་ཀྱི་ཙིཏྟ། ཞགས་པ། ལྕགས་སྒྲོག གནམ་ལྕགས་ཀྱི་སྡིག་པ་རྣམས་འཛིན་པ། སྤྱི་གཙུག་ཏུ་རྟ་དབུ་དཀར་སེར་དམར་ལྗང་གསུམ་རྟ་སྐད་དྲག་པོ་ལྷང་ལྷང་འཚེར་བ། ཞབས་བརྒྱད་ཀྱི་གཡས་བསྐུམ་ཞིང་གཡོན་བརྐྱངས་པས་དྲེགས་པ་མ་ལུས་བརྫིས་པ། ཐོད་སྐམ་གྱི་དབུ་རྒྱན། རློན་པའི་དོ་ཤལ། སྟག་ལྤགས་ཀྱི་ཤམ་ཐབས། མི་ལྤགས་ཀྱི་གཡང་གཞི། གླང་ཆེན་གྱི་གོ་རློན། ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་སྟེ་དུར་ཁྲོད་ཀྱི་ཆས་བརྒྱད་དང་། སྒེག་པ་ལ་སོགས་པའི་གར་དགུ་དང་། རྡོ་རྗེའི་གཤོག་པ་ལ་སོགས་པའི་དཔལ་གྱི་ཆས་བཅུས་བརྒྱན་པ། དེའི་པང་དུ་ཡུམ་རྡོ་རྗེ་རྣལ་འབྱོར་མ་པདྨ་གཟི་ལྡན་སྔོན་མོ་ཞལ་གཅིག་ཕྱག་གཉིས་སྤྱན་གསུམ་པ་དྲག་མོ་ཆེན་མོ། དབུ་སྐྲ་ཁམ་ནག་ཕྱལ་བ། ཕྱག་གཡས་ཐོད་ཁྲག་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་པས་ཙིཏྟ་ཡབ་ལ་སྟོབས་པ། ཞབས་གཉིས་གཡས་བརྐྱང་ཞིང་གཡོན་བསྐུམ་པས་ཡབ་དང་མཉམ་པར་སྦྱོར་བ། ཁྲོ་མོའི་རྒྱན་དང་ཆ་ལུགས་ཡོངས་སུ་རྫོགས་པ། ཡབ་ཡུམ་གཉིས་ཀའང་བསྐལ་པའི་མེ་དཔུང་འབར་བའི་དབུས་ན་བཞུགས་པ། ཁམས་གསུམ་སྲིད་པ་གསུམ་ལས་རྣམ་པར་རྒྱལ་བའི་བདག་ཉིད་འཇིག་རྟེན་གསུམ་པོས་བལྟ་བར་ཡང་མི་བཟོད་པའི་སྐུ་ཅན་དུ་གྱུར། དེའི་ཕྱི་རོལ་འཁོར་ལོ་རྩིབས་བཞིའི་མདུན་གྱི་རྩིབས་ལ། ཨོཾ་ཧྲཱིཿབཛྲ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊཿ ཡོངས་སུ་གྱུར་པ་ལས། པདྨ་ཉི་མ་དྲི་ཟ་ཕོ་མོ་བསྣོལ་བའི་གདན་ལ་རྡོ་རྗེ་དབང་ཆེན་དཀར་པོ། དཀར་དམར་ལྗང་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་གྲི་གུག་དང་ཐོད་རྔ་། གཡོན་གཉིས་དུང་ཁྲག་དང་པདྨའི་ཕྲེང་བ་འཛིན་པ། ཡུམ་བཛྲ་ཀྲོ་ཏི་སྔོ་སྐྱ་གཡས་པས་གྲི་གུག་ཡབ་ཀྱི་མགུལ་ནས་འཁྱུད་ཅིང་། གཡོན་པས་ཐོད་ཁྲག་སྟོབས་པ། ཡབ་ཀྱི་སྤྱི་གཙུག་ན་རྟ་མགོ་དཀར་པོ་འཚེར་སྐད་སྒྲོགས་པས་དགའ་བྲོད་ལྷའི་བུའི་བདུད་ཚོགས་འཇོམས་པར་མཛད་པའོ། ། གཡས་ཀྱི་རྩིབས་ལ། ཨོཾ་ཧྲཱིཿརཏྣ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊཿ ཡོངས་སུ་གྱུར་པ་ལས། པདྨ་ཉི་མ་གཤིན་རྗེ་ཕོ་མོ་བསྣོལ་བའི་གདན་ལ་རིན་ཆེན་དབང་ཆེན་སེར་པོ། སེར་དམར་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་གཏེར་བུམ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་གྲི་གུག་དང་རལ་གྲི། གཡོན་གཉིས་དུང་ཁྲག་དང་པདྨའི་ཕྲེང་བ་འཛིན་པ། ཡུམ་རཏྣ་ཀྲོ་ཏི་སྔོ་སྐྱ་གཡས་པས་གྲི་གུག་ཡབ་ཀྱི་མགུལ་ནས་འཁྱུད་ཅིང་། གཡོན་པས་ཐོད་ཁྲག་སྟོབས་པ། ཡབ་ཀྱི་སྤྱི་གཙུག་ན་རྟ་མགོ་སེར་པོ་འཚེར་སྐད་སྒྲོགས་པས་ཐོགས་བཅས་ཕུང་པོའི་བདུད་ཚོགས་འཇོམས་པར་མཛད་པའོ། །རྒྱབ་ཀྱི་རྩིབས་ལ། ཨོཾ་ཧྲཱིཿཔདྨ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊཿ ཡོངས་སུ་གྱུར་པ་ལས། པདྨ་ཉི་མ་ཀླུ་དབང་ཕོ་མོ་བསྣོལ་བའི་གདན་ལ་པདྨ་དབང་ཆེན་དམར་པོ། དམར་དཀར་སྔོ་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་པདྨའི་བེ་ཅོན་དང་དབང་གི་ཞགས་པ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་མེ་དཔུང་དང་རྩེ་གསུམ། གཡོན་གཉིས་དུང་ཁྲག་དང་པདྨའི་ཕྲེང་བ་འཛིན་པ། ཡུམ་པདྨ་ཀྲོ་ཏི་སྔོ་སྐྱ་གཡས་པས་གྲི་གུག་ཡབ་ཀྱི་མགུལ་ནས་འཁྱུད་ཅིང་། གཡོན་པས་ཐོད་ཁྲག་སྟོབས་པ། ཡབ་ཀྱི་སྤྱི་གཙུག་ན་རྟ་མགོ་དམར་པོ་འཚེར་སྐད་སྒྲོགས་པས་ཐོགས་མེད་ཉོན་མོངས་པའི་བདུད་ཚོགས་འཇོམས་པར་མཛད་པའོ། །གཡོན་གྱི་རྩིབས་ལ། ཨོཾ་ཧྲཱིཿཀརྨ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊཿ ཡོངས་སུ་གྱུར་པ་ལས། པདྨ་ཉི་མ་གནོད་སྦྱིན་ཕོ་མོ་བསྣོལ་བའི་གདན་ལ་ལས་ཀྱི་དབང་ཆེན་ལྗང་གུ། ལྗང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རལ་གྲི་དང་ཙིཏྟ་འཛིན་པས་ཡུམ་ལ་འཁྱུད་པ། ལྷག་མ་གཡས་གཉིས་རྒྱ་གྲམ་དང་ཕུར་བུ། གཡོན་གཉིས་ཞིང་དབྱུག་དང་པདྨའི་ཕྲེང་བ་འཛིན་པ། ཡུམ་ཀརྨ་ཀྲོ་ཏི་སྔོ་སྐྱ་གཡས་པས་གྲི་གུག་ཡབ་ཀྱི་མགུལ་ནས་འཁྱུད་ཅིང་། གཡོན་པས་ཐོད་ཁྲག་སྟོབས་པ། ཡབ་ཀྱི་སྤྱི་གཙུག་ན་རྟ་མགོ་ལྗང་གུ་འཚེར་སྐད་སྒྲོགས་པས་སྙེམས་བྱེད་འཆི་བདག་གི་བདུད་ཚོགས་འཇོམས་པར་མཛད་པའོ། །དེའི་ཕྱི་རོལ་འཁོར་ལོ་རྩིབས་བརྒྱད་ཀྱི། ཤར་གྱི་རྩིབས་སྟེང་དུ་ཨོཾ་བཛྲ་ཤྲཱི་ཧེ་རུ་ཀ་རུ་ཀ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿཡོངས་སུ་གྱུར་པ་ལས། པད་ཉི་རུ་ཏྲའི་གདན་ལ། ཡང་དག་དབང་ཆེན་མཐིང་ནག་ཞལ་གཅིག་ཕྱག་གཉིས་རྡོ་རྗེ་དང་དུང་ཁྲག་ཅན། ཡུམ་བཛྲ་ཀྲོ་ཏི་སྔོ་སྐྱ་དང་མཉམ་པར་རོལ་བ། རྡོ་རྗེའི་རིགས་ཀུན་འདུས་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། ལྷོ་ཡི་རྩིབས་ལ། ཨོཾ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་ཆུ་གླང་བསྣོལ་བའི་གདན་ལ། གཤིན་རྗེ་དབང་ཆེན་སེར་ནག་བེ་ཅོན་དང་འཁོར་ལོ་འཛིན་པ། ཡུམ་རོ་ལང་ནག་མོ་དང་མཉམ་པར་རོལ་བ། རིན་ཆེན་རིགས་ཀུན་འདུས་པའི་ངོ་བོ་རང་སྣང་གི་འཁོར་ཚོགས་དང་བཅས་པ། ནུབ་ཀྱི་རྩིབས་ལ། ཨོཾ་ཧྲཱིཿཔདྨན་ཏ་ཀྲིཏ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་ཀླུ་དབང་ཕོ་མོའི་གདན་ལ། རྟ་མགྲིན་དབང་ཆེན་དམར་པོ་པདྨ་དང་ཁ་ཊཱཾ་ཀ་བསྣམས་པ། ཡུམ་པདྨ་གཟི་ལྡན་དམར་སྐྱ་དང་མཉམ་པར་རོལ་བ། པདྨའི་རིགས་ཀུན་འདུས་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། བྱང་གི་རྩིབས་ལ། ཨོཾ་བཛྲ་ཀཱི་ལི་ཀི་ལ་ཡ་སརྦ་བིགྣཾ་བཾ་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་ལྷ་ཆེན་ཕོ་མོའི་གདན་ལ། ཕྲིན་ལས་དབང་ཆེན་རྡོ་རྗེ་གཞོན་ནུ་ལྗང་ནག་ཕུར་བུ་འདྲིལ་བ། ཡུམ་མཆོག་འཁོར་ལོ་རྒྱས་འདེབས་མ་དང་མཉམ་པར་རོལ་བ། ལས་ཀྱི་རིགས་ཀུན་འདུས་་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། ཤར་ལྷོའི་རྩིབས་ལ། ཨོཾ་གུ་ཧྱ་ཛྙཱ་ན་ཤྲི་ཧེ་རུ་ཀ་མ་མ་ཡོ་གི་ནི་རུ་ལུ་རུ་ལུ་བྷྱོ་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་མ་མོ་བསྣོལ་བའི་གདན་ལ། བླ་མེད་དབང་ཆེན་བྱ་ཁྱུང་དང་ཞིང་དབྱུག་བསྣམས་པ། ཡུམ་ཆེན་ཉིད་ཞི་མུ་ཁ་ལེ་སྔོ་སྐྱ་དང་མཉམ་པར་རོལ་བ། མ་མོ་རྦོད་གཏོང་གི་རིགས་ཀུན་འདུས་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། ལྷོ་ནུབ་ཀྱི་རྩིབས་ལ། ཨོཾ་བཛྲ་མ་ཧཱ་གུ་རུ་སརྦ་བིདྱ་དྷ་ར་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་དར་ཟབ་བརྩེགས་པའི་གདན་ལ། རིག་འཛིན་དབང་ཆེན་རྡོ་རྗེ་ཆོས་དཀར་དམར་རྡོར་དྲིལ་འཛིན་པ། ཡུམ་མནྡྷ་ར་བ་དཀར་མོ་དང་མཉམ་པར་རོལ་བ། རིག་འཛིན་རྒྱ་མཚོ་འདུས་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། ནུབ་བྱང་གི་རྩིབས་ལ། ཨོཾ་བཛྲ་ཙཎྜ་སརྦ་དུཥྚན་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་དྲེགས་པ་ཕོ་མོ་བསྣོལ་བའི་གདན་ལ། མཆོད་བསྟོད་དབང་ཆེན་དྲེགས་པ་ཀུན་འདུལ་སྨུག་ནག་ཕྱག་གཉིས་ལྷ་ཀླུའི་མགོ་ཕྲེང་བསྣམས་པ། ཡུམ་ཁམས་གསུམ་སྤྱི་འདུལ་དམར་སྐྱ་དང་མཉམ་པར་རོལ་བ། མཆོད་བསྟོད་ལྷ་ཚོགས་འདུས་པའི་ངོ་བོ་རང་འོད་ཀྱི་འཁོར་ཚོགས་དང་བཅས་པ། བྱང་ཤར་གྱི་རྩིབས་ལ། ཨོཾ་བཛྲ་མནྟྲ་ཀྲོ་དྷ་ཀ་སརྦ་དུཥྚན་ཧཱུྃ་ཕཊ༔ ཡོངས་སུ་གྱུར་པ་ལས། པད་ཉི་དགྲ་བགེགས་བསྣོལ་བའི་གདན་ལ། དྲག་སྔགས་དབང་ཆེན་སྟོབས་ལྡན་ནག་པོ་སྙིང་ཕྲེང་དང་ཐོད་ཁྲག་བསྣམས་པ། ཡུམ་འབྱུང་ལྔའི་བདག་མོ་སྔོན་མོ་དང་མཉམ་པར་རོལ་བ། དྲེགས་ཚོགས་ཡོངས་ཀྱི་གཙོ་བོ་རང་འོད་ཀྱི་འཁོར་ཚོགས་དང་བཅས་པ། རྡོ་རྗེ་དབང་ཆེན་ལ་སོགས་པའི་ཁྲོ་བོ་དེ་རྣམས་ཐམས་ཅད་ཀྱང་གར་དགུའི་ཉམས་དང་ལྡན་ཞིང་། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ་མེ་དཔུང་འབར་བའི་ཀློང་ན་གཡོན་བརྐྱང་གི་སྟབས་ཀྱིས་བཞུགས་པའོ། །ཡུམ་རྣམས་ཀྱང་པདྨའི་ཕྲེང་བ་དང་རུས་རྒྱན་གཟིག་ཤམ་ལ་སོགས་ཁྲོ་མོའི་ཆས་ཀྱིས་བརྒྱན་ཞིང་གཡོན་བསྐུམ་པས་ཐབས་ལ་འཁྲིལ་བ། ཡབ་ཡུམ་གཉིས་ཀའང་སྣང་སྟོང་གཉིས་སུ་མེད་པ་མཆོག་ཏུ་མི་འགྱུར་བའི་བདེ་བ་ཆེན་པོ་དང་སྟོང་ཆེན་རྣམ་པ་ཀུན་ལྡན་ཟུང་དུ་འཇུག་པའི་བདག་ཉིད་ཅན་ནོ། །དེའི་ཕྱི་རོལ་དུ་གནས་ཀྱི་མ་མོ་བརྒྱད་དང་། ཡུལ་གྱི་ཕྲ་མེན་བརྒྱད་དང་། ལས་བཞིའི་ཕྲིན་ལས་སྒྲུབ་པའི་སྒོ་མ་ཆེན་མོ་བཞི་ལ་སོགས་པ་དབང་ཆེན་བཀའ་བརྒྱད་ཀྱི་ལྷ་ཚོགས་བདུན་བརྒྱ་དང་ཉེར་ལྔ། གཞན་ཡང་རྩ་བ་གསུམ་གྱི་ལྷ་ཚོགས་དམ་ཅན་རྒྱ་མཚོ་སྤྲུལ་པ་དང་ཡང་སྤྲུལ་གྱི་ཚོགས་དང་བཅས་པ་ཏིལ་གྱི་གོང་བུ་ཁ་ཕྱེས་པ་ལྟར་བཞུགས་པའོ། །ལྷ་ཚོགས་དེ་དག་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱ༔དམར་པོ། ཐུགས་ཀར་ཧཱུྃ་སྔོན་པོ་དེ་ལས་འོད་ཟེར་འཕྲོས་པས་རབ་འབྱམས་ཕྱོགས་བཅུའི་ཞིང་ན་བཞུགས་པའི་བླ་མ་རྒྱལ་བ་སྲས་དང་བཅས་པ་ཐམས་ཅད་དཔལ་ཆེན་པོ་པདྨ་དབང་ཆེན་སྒྲུབ་སྡེ་དགུའི་ལྷ་ཚོགས་ཀྱི་རྣམ་པར་ཁ་བ་བུ་ཡུག་འཚུབ་པ་ལྟར་བྱོན་ནས་བདག་མདུན་གྱི་ལྷ་ཚོགས་རྣམས་ལ་གཉིས་མེད་དུ་ཐིམ་པར་གྱུར་བར་བསམ་ལ། སྤྱན་འདྲེན་ནས་བཟུང་ཛཔ་བསྙེན་བར་དཀྱུས་བཞིན་བྱ། བཟླས་པ་ལོང་སྐབས་དང་སྦྱར་བས་རྒྱས་བསྡུས་ཅི་རིགས་གཞུང་དང་མན་ངག་གིས་བརྒྱན་པའི་དམིགས་པའི་འཕྲོ་འདུ་བཅས་བྱ་ཞིང་། དེ་ནས་མདུན་བསྐྱེད་ཀྱི་བཟླས་དམིགས་ནི། རང་ཉིད་དཔལ་ཆེན་གསལ་བའི་ཐུགས་ཀ་ཡི། །ཧྲཱིཿལས་འོད་འཕྲོས་མདུན་བསྐྱེད་ལྷ་ཚོགས་ཀྱི། །ཐུགས་ཀར་ཕོག་ནས་རྒྱུད་བསྐུལ་འོད་འཕྲོས་པས། །ཕྱོགས་བཅུའི་རྒྱལ་བ་སྲས་བཅས་མཆོད་པས་མཉེས། །ཀུན་ཀྱང་དབང་ཆེན་ཁྲོ་བོའི་རྣམ་པར་བཞེངས། །འོད་ཟེར་མར་འཕྲོས་འགྲོ་དྲུག་ཀུན་ལ་ཕོག །ལས་ཉོན་སྡིག་ལྟུང་བག་ཆགས་ཀུན་བྱང་ནས། །རྟ་མཆོག་རོལ་བའི་གོ་འཕང་མཆོག་ལ་བཀོད། །ཁྱད་པར་འོད་ཟེར་མེ་མཚོན་འབར་བ་འཕྲོས། །གཟུགས་ཅན་དགྲ་དང་གཟུགས་མེད་གནོད་བྱེད་བགེགས། །བར་གཅོད་དམ་སྲི་བྱད་མ་རྦོད་གཏོང་སོགས། །སྦུར་མ་ཞུགས་དང་འཕྲད་བཞིན་བརླག་ནས་ཀྱང་། །རྣམ་ཤེས་གཟི་ལྡན་ཡུམ་གྱི་མཁའ་ལ་སྤར། །སྒྲིབ་ཚོགས་ཀུན་དག་རྒྱལ་བའི་སྲས་སུ་བསྐྱེད། །ལྷ་སྔགས་ཡེ་ཤེས་ཆེན་པོའི་རོལ་བར་གྱུར། །ཞེས་ཡང་ཡང་གསལ་བཏབ་ལ། ཨཱོཾ་མ་ཧཱ་ཤྲཱི་ཧེ་རུ་ཀ་པདྨ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ ཨོཾ་ཧྲཱིཿརཏྣ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ ཨོཾ་ཧྲཱིཿཔདྨ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ ཨོཾ་ཧྲཱིཿཀརྨ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ ཨོཾ་བཛྲ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿ ཨོཾ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔ ཨོཾ་ཧྲཱི༔པདྨན་ཏ་ཀྲིཏ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཨོཾ་བཛྲ་ཀཱི་ལི་ཀི་ལ་ཡ་སརྦ་བིགྣཾ་བཾ་ཧཱུྃ་ཕཊ༔ ཨོཾ་གུ་ཧྱ་ཛྙཱ་ན་ཤྲི་ཧེ་རུ་ཀ་མ་མ་ཡོ་གི་ནི་རུ་ལུ་རུ་ལུ་བྷྱོ་ཧཱུྃ་ཕཊ༔ ཨོཾ་བཛྲ་མ་ཧཱ་གུ་རུ་སརྦ་བིདྱ་དྷ་ར་ཧཱུྃ་ཕཊ༔ ཨོཾ་བཛྲ་ཙཎྜ་སརྦ་དུཥྚན་ཧཱུྃ་ཕཊ༔ ཨོཾ་བཛྲ་མནྟྲ་ཀྲོ་དྷ་ཀ་སརྦ་དུཥྚན་ཧཱུྃ་ཕཊ༔ ཨོཾ་བཛྲ་ཨཥྚ་ཊཱཀྐི་ནི་ཡེ་ཧཱུྃ་ཕཊ༔ ཨོྃ་བཛྲ་ཨཥྚ་མུ་ཁ་ཡེ་ཧཱུྃ་ཕཊ༔ ཨོཾ་བཛྲ་ཨང་ཀུ་ཤ་ཛ༔ ཨོཾ་བཛྲ་པ་ཤ་ཧཱུྃ༔ ཨོཾ་བཛྲ་སྥོ་ཊ་བཾ༔ ཨོཾ་བཛྲ་གྷནྚེ་ཧོ༔ ཨོཾ་དྷརྨ་པཱ་ལ་ཝ་དྷུ་ཏེ་སརྦ་ཧཱུྃ་ཕཊ༔ ཅེས་པ་རྣམས་ཅི་ནུས་སུ་བཟླའོ། །དེ་ནས་བཟློག་པའི་དམིགས་པ་ནི། རང་ཉིད་དབང་ཆེན་གསལ་བའི་ཐུགས་ཀ་ཡི། །ཧྲཱིཿལས་འོད་འཕྲོས་མདུན་བསྐྱེད་ལྷ་ཚོགས་ཀྱི། །ཐུགས་ཀར་ཕོག་ནས་རྒྱུད་བསྐུལ་བ་སྤུ་ཡི། །བུ་ག་ཀུན་ནས་ཁྲོ་ཆུང་ཉི་ཟེར་གྱི། །རྡུལ་ལྟར་འཕྲོས་པས་བདག་ཅག་འཁོར་བཅས་ལ། །གནོད་བྱེད་ཕ་རོལ་རྦོད་གཏོང་མཁན་པོ་དང་། །དུག་མཚོན་གཡུལ་སོགས་བསམ་སྦྱོར་ངན་བརྩོམ་པའི། །གཟུགས་ཅན་དགྲ་དང་རྦད་འདྲེ་ལྷ་མ་སྲིན། །སྡེ་བརྒྱད་འབྱུང་པོ་སྤྱི་དང་བྱེ་བྲག་སོགས། །ལུས་ལ་ན་ཚ་སེམས་ལ་སྡུག་བསྔལ་གཏོང་། །བསམ་པར་བར་གཅོད་ཆགས་ཆེ་ཉམ་ང་གཡོ། །མདོར་ན་འགལ་རྐྱེན་མི་མཐུན་ཕྱོགས་བརྩོམ་པའི། །གཟུགས་མེད་བགེགས་རྣམས་ཐལ་བའི་རྡུལ་བཞིན་རློགས། །རྣམ་ཤེས་བླ་ཚེ་སྲོག་དབུགས་བཅས་པ་རྣམས། །དམིགས་རྟེན་གཟུགས་ཀྱི་ཉ་བོ་འདི་ཉིད་ལ། །རང་དབང་མེད་པར་བཀུག་ནས་ཐིམ་པར་གྱུར། །ཨཱོཾ་མ་ཧཱ་ཤྲཱི་ཧེ་རུ་ཀ་པདྨ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ གནོད་བྱེད་བན་བོན་སྔགས་པས་བཏང་བའི་མཐུ་བྱད་རྦད་འདྲེ་དང་། སྡེ་བརྒྱད་འབྱུང་པོའི་གནོད་པ་ཐམས་ཅད་ཨ་པ་ན་ཡ་བཟློག་བྷྱོ༔ ཞེས་དམིགས་པ་དང་བཅས་ཅི་ནུས་སུ་བཟླས་མཐར་ཐུན་རྫས་ལ་ཕུས་བཏབ་སྟེ་བཟློག་གཏོར་ལ་བྲབ་ཅིང་བསྐུལ། ཞེས་བཟློག་གཏོར་གྱི་བཟླས་དམིགས་འདི་རྟ་མགྲིན་ཡང་གསང་དང་ཁམ་གསུམ་ཟིལ་གནོན་གྱི་སྨད་ལས་ནས་སོ། །སྤྲོ་ཞིང་ཡོད་ན་ཟོར་རྫས་རྣམས་ལ་དམིགས་ཏེ། རང་ཉིད་དབང་ཆེན་ཐུགས་ཀའི་ཧྲཱིཿཡིག་ལས། །འོད་འཕྲོས་ཟོར་རྫས་རྣམས་ལ་ཕོག་པ་ཡིས། །དབང་ཆེན་རོལ་པའི་ཁྲོ་བོ་སྐར་ལྟར་འཁྲིགས། །མཚོན་ཆ་སྣ་ཚོགས་བུ་ཡུག་ལྟ་བུ་རུ། །འཚུབ་ཅིང་འཕྲོས་པས་བདག་ཅག་འཁོར་བཅས་ལ། །གནོད་བྱེད་ཕ་རོལ་རྦོད་གཏོང་མཁན་པོ་དང་། །དུག་མཚོན་གཡུལ་སོགས་བསམ་སྦྱོར་ངན་བརྩོམ་པའི། །གཟུགས་ཅན་དགྲ་དང་རྦད་འདྲེ་ལྷ་མ་སྲིན། །སྡེ་བརྒྱད་འབྱུང་པོ་སྤྱི་དང་བྱེ་བྲག་སོགས། །ལུས་ལ་ན་ཚ་སེམས་ལ་སྡུག་བསྔལ་གཏོང་། །བསམ་པར་བར་གཅོད་ཆགས་ཆེ་ཉམ་ང་གཡོ། །མདོར་ན་འགལ་རྐྱེན་མི་མཐུན་ཕྱོགས་བརྩོམ་པའི། །ཕྱིན་ཆད་འཁོར་བར་སྐྱེ་བའི་ལམ་བཅད་དེ། །དགྲ་བགེགས་རྗེས་ཤུལ་མེད་པར་བརླག་པར་གྱུར། །ཞེས་དམིགས་པ་དང་བསྒྲགས་ཏེ་གཏོར་ཟོར་ལ་རྩ་སྔགས་དང་། སརྦ་པཱ་པཾ་སརྦ་དུ་ཏྲི་མཱ་ར་ཡ་བཟློག་བཟློག་བྷྱོ་བྷྱོ༔ ཞེས་དང་། ཁྲག་ཟོར་ལ་དམིགས་ཏེ་རྩ་སྔགས་དང་། མ་མ་ཏྲག་རཀྴ་མ་རུ་རུ་ཏྲ་སྙིང་ཁ་རག་ཐུན་བྷྱོ་བྷྱོ་བཟློག་བཟློག༔ ཅེས་དང་། ཡུངས་ཟོར་ལ་དམིགས་ཏེ། རྩ་སྔགས་དང་། ཤིག་ཤིག་དུམ་དུམ་ཉིལ་ཉིལ་རྒྱོབ། དུམ་བུ་རིལ་རྦད། དུམ་བུ་ཉིལ་རྦད། ཐུམ་རིལ་ཐུམ་རིལ་བྷྱོ་བྷྱོཿ ཐིབས་ཡ་ཐིབས་ཡ་བྷྱོ་བྷྱོཿ ཧུ་ཡ་ཧུ་ཡ་སྲོག་སྲོག་བྷྱོ་བྷྱོ༔ ཞེས་དང་། ཟོར་རྫས་ཀུན་ལ་དམིགས་ཏེ་རྩ་སྔགས་མཐར། ཧྲཱིཿཧྱ་གྷྲྀ་ཝ་རཀྴ་རྦད་ཐུན་སོད། པདྨནྟ་ཀྲྀཏ་དགྲ་བོའི་སྙིང་ལ་ཐུན་རྦད། མ་མ་ཏྲག་རཀྴ་དགྲ་བོའི་སྙིང་ལ་ཐུན་རྦད་མ་མ་རཀྴ་དགྲ་བོའི་སྙིང་ལ་ཐུན་རྦད། རག་མོ་ཚལ་དུན་སྙིང་ལ་ཁས་རྦད། ཀྲོ་ཏ་རཀྴ་དགྲ་བོའི་སྙིང་ལ་རྦད། ཐུམ་མ་ར་ཡ་རྦད། ཐུམ་རིལ་ཧ་ན་ཧ་ན་བྷྱོ་བྷྱོ༔ ཞེས་པ་རྣམས་མང་དུ་བཟླས་ལ་ཟོར་རྫས་རྣམས་ལ་ཐུན་བྲབ། དེ་ནས་ལས་སྦྱོར་དམིགས་པ་ནི། ཧྲཱིཿ བདག་མདུན་ཕོ་བྲང་ཕྱི་རོལ་དུར་ཁྲོད་བརྒྱད༔ དེ་ཕྱིར་རྡོར་ཕྲེང་མེ་རི་དམར་ནག་འཁྲུགས༔ སྟེང་འོག་ཟངས་ལྕགས་འཁོར་ལོ་རྩིབས་སྟོང་འབར༔ རྩེ་བསྣོལ་བར་དུ་དམ་སྲི་ཐལ་བར་བརླག༔ གཙོ་འཁོར་ཞལ་ནས་དྲག་སྔགས་འབྲུག་སྟོང་ལྡིར༔ དགྲ་གདོན་ཆོས་ཉིད་གདོད་མའི་དབྱིངས་སུ་བསྒྲལ༔ བློ་འདས་སྟོང་ཉིད་སྤྲོས་བྲལ་ངང་དུ་བཞག༔ དྲག་སྔགས་མེ་དཔུང་རྩུབ་དྲག་བཟླ༔ ཞེས་གཏེར་གཞུང་ནས་སོ།། དེ་ནས་བསྙེན་བསྟོད་ནས་བཟུང་ཚོགས་བར་བ་ཡན་ཆད་སྤྱི་ལྟར་བཏང་རྗེས། ཚོགས་ཐ་མ་བསྒྲལ་བསྟབས་རྒྱས་པ་ཉིད་ལ་འཐུས་པས། ༧ བསྒྲལ་ལས་དངོས་ལ་འཇུག་པ་ནི། ཐོག་མར་བསྐུལ་གཏོར་བཤམས་ཤིང་འགུགས་གཞུག་བྱས་ལ། དཔལ་པདྨ་དབང་ཆེན་རྟ་མཆོག་རོལ་བ་ཁྲག་འཐུང་ཚོམ་བུ་དགུའི་ལྷ་ཚོགས་བདུན་བརྒྱ་ཉེར་ལྔའི་ཐུགས་ཀ་ནས་སོ་སོའི་སྤྲུལ་པ་དང་ཡང་སྤྲུལ། ཞལ་ཕྱག་སྐུ་མདོག་ཆ་ལུགས་ཅིར་ཡང་བསྒྱུར་བ་བསམ་གྱིས་མི་ཁྱབ་པ་སྤྲོ་ཞིང་རྣམ་བཞིའི་ཕྲིན་ལས་སྤྱི་དང་། ཁྱད་པར་སྒྲོལ་བ་དྲག་པོའི་ལས་ལ་འུར་དིར་གྱིས་ཆས་པར་བསམ་ལ། ལྷ་ཚོགས་སྤྱིར་བསྐུལ་བ་ནི། ཧཱུྃ༔ མི་གནས་ཡེ་ཤེས་ཆོས་སྐུའི་ཕོ་བྲང་ནས། །ལོངས་སྤྱོད་རྫོགས་པ་ཞི་དང་ཁྲོ་བོའི་ལྷ། །ཁྱད་པར་དབང་ཆེན་རྟ་མགྲིན་གཙོ་འཁོར་རྣམས། །ཐུགས་དམ་བསྐུལ་ལོ་འགྲོ་བའི་དོན་ལ་དགོངས། །རིག་པའི་རང་བཞིན་བདེ་གཤེགས་སྙིང་པོ་ཡང་། །མ་རིག་འཛིན་པའི་ཀུན་གཞི་ལུང་མ་བསྟན། །སྒོ་ལྔའི་ཡུལ་དང་རྟེན་ཅིང་འབྲེལ་བ་ལས། །རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས། །ལས་དང་ཉོན་མོངས་མཐུ་ཡིས་གཟིར་བའི་མཐུ། །ཕྱི་རོལ་ཡུལ་ལ་སྨིན་པའི་སྡུག་བསྔལ་དང་། །ནད་མཚོན་མུ་གེ་དགྲ་བགེགས་འབྱུང་པོའི་གདོན། །འཇིགས་པ་ཆེན་པོ་བརྒྱད་དང་བཅུ་དྲུག་ཀུན། །མངོན་སྤྱོད་དྲག་པོའི་རོལ་པས་ཚར་བཅད་ནས། །ལོག་རྟོག་དངོས་པོར་ཞེན་པའི་སེམས་ཅན་རྣམས། །རྒྱུ་འབྲས་ཐེག་པ་གཞན་གྱིས་གདུལ་དཀའ་བས། །རང་བྱུང་ཡེ་ཤེས་རྟོགས་པའི་ཕྲིན་ལས་མཛོད། །ཅེས་ཡིག་རྙིང་ནས་སོ། །སླར་ཡང་སྒོས་སུ་བསྐུལ་བ་ནི། ཧྲཱིཿ རང་བཞིན་ཆོས་ཀྱི་སྐུ་ལས་རང་བྱུང་བ། །དམར་ནག་གྲུ་གསུམ་དབང་གི་དཀྱིལ་འཁོར་ནས། །པདྨ་འཁྱིལ་བ་དབང་ཆེན་ཁྲོ་བོའི་སྐུ། །ཐུགས་རྗེའི་ཐབས་ཀྱིས་སྤྲུལ་སྐུ་བཞེངས་སུ་གསོལ། །ལྷ་ཀླུ་གཙོ་བརྒྱད་ཁྲི་རྐང་པད་ཉིའི་སྟེང་། །བདུད་ཕོ་བདུད་མོ་སྤྱི་ཆིངས་བསྣོལ་བའི་ཁར། །དུས་གསུམ་དབང་བསྒྱུར་ཡེ་ཤེས་ལྷ་ཡི་ལྷ། །དབང་ཆེན་ཁྲག་འཐུང་ཧྱཱ་གྷྲྀ་ཝའི་སྐུ། །ཆེ་མཆོག་པདྨ་དབང་ཆེན་སྐུ་མདོག་དམར། །བསྐལ་པའི་མེ་ལྟར་བཟོད་དཀའི་ཉམས་ཀྱིས་སྒེག །དབུ་དགུ་གཡས་གསུམ་ཞི་ཞལ་དཀར་འཛུམ་བཞད། །གཡོན་གསུམ་ལྗང་གུ་སྒེག་ཅིང་གཏུམ་རྔམས་ཁྲོ། །རྩ་བའི་ཞལ་གསུམ་དམར་གསལ་རྗེས་ཆགས་ཉམས། །བཅོ་བརྒྱད་ཕྱག་ལྡན་རྩ་བའི་ཕྱག་གཉིས་ཀྱིས། །པདྨ་དུང་ཁྲག་ཤེས་རབ་ཡུམ་ལ་འཁྱུད། །དེ་འོག་གཡས་བརྒྱད་རྡོ་རྗེ་གྲི་གུག་གྲི། །མེ་དཔུང་ཟླ་བ་ཐོད་དབྱུག་ཁ་ཊཱཾ་ཀ །ལྕགས་ཀྱུ་གཡོན་བརྒྱད་དྲིལ་བུ་ཐོད་པའི་རྔ། །ཨུཏྤལ་ཕྲེང་མཛེས་ཉི་མ་བདུད་སྙིང་དམར། །ཞགས་པ་ལྕགས་སྒྲོག་གནམ་ལྕགས་སྡིག་པ་འཛིན། །ཞལ་གདངས་ལྗགས་འདྲིལ་མཆེ་བ་རབ་ཏུ་གཙིགས། །རལ་པ་དམར་སེར་གྱེན་བརྫེས་ཐོད་པ་འཛིན། །སྐུ་གསུམ་དོན་མཚོན་རྟ་དབུ་དཀར་དམར་ལྗང་། །རྟ་སྐད་ཐེག་གསུམ་ཆོས་སྒྲས་སྲིད་གསུམ་འདུལ། །དཔལ་གྱི་སྐུ་ལ་བགོ་བའི་གོས་གསུམ་དང་། །གདགས་པའི་རྒྱན་གཉིས་བྱུགས་པའི་རྫས་གསུམ་སོགས། །དུར་ཁྲོད་བརྒྱད་བསེ་ཁྲབ་དབང་གི་ཆས། །དཔལ་ཆས་ཡོངས་རྫོགས་མེ་དཔུང་ཀློང་ན་བཞུགས། །དབང་ཆེན་གདུག་པའི་སྤྱན་རྩ་ལྡོག་པ་ཡིས། །སྣང་སྲིད་དྲེགས་པ་ཐམས་ཅད་དབང་དུ་བསྡུས། །ཤངས་ནས་རླུང་ནག་འཚུབ་པའི་བསྐལ་པ་འབྱུང། །སྣང་སྲིད་ཀུན་འདར་མཐུ་ཆེན་དྲག་རྩལ་འདུལ། །སྙན་ནས་བསྐལ་པའི་འབྲུག་སྟོང་ལྡིར་བ་ཡིས། །སྲིད་པའི་ཆེ་བཙན་ཐམས་ཅད་ཟིལ་གྱིས་གནོན། །ཚེམས་ལ་དྲག་པོའི་ཐོག་ཆེན་ཕབ་པ་ཡིས། །སྡང་དགྲ་གདོན་བགེགས་ཐལ་བ་རྡུལ་དུ་རློགས། །ཞལ་ནས་རཀྟའི་རྒྱ་མཚོ་འཁྲུག་ཅིང་འཁྱིལ། །བསྟན་པ་བཤིག་པའི་དགྲ་ལ་སྐྱིན་ཐང་ཕོབ། །ཁྲོ་རྒྱལ་དབང་གི་རྟ་སྐད་འཚེར་རེ་རེ། །ཐུགས་རྗེ་དབང་ཆེན་ཆེ་བཙན་དབང་དུ་སྡུད། །པདྨ་དབང་ཆེན་ཁྲག་འཐུང་མི་བཟད་པ། །ཁྱོད་ཀྱི་དབང་དྲག་ཕྲིན་ལས་དུས་ལ་བབ། །སྡང་དགྲ་གནོད་བྱེད་ཐལ་བ་རྡུལ་དུ་རློག །ཧྲཱིཿ ཁྲོ་རྒྱལ་དབང་ཆེན་སྐུ་ཡི་གཡོན་ཕྱོགས་ནས། །གནམ་ཞལ་དབྱིངས་ཕྱུག་རྡོ་རྗེ་རྣལ་འབྱོར་མ། །རྒྱལ་ཀུན་བསྐྱེད་ཡུམ་པདྨ་གཟི་ལྡན་སྔོ། །སྤྱན་གསུམ་ཞལ་བགྲད་མཆེ་བ་རབ་ཏུ་གཙིགས། །གཡས་པས་ཐོད་ཁྲག་གཡོན་པས་ཙིཏྟ་སྟོབས། །ཞབས་གཉིས་བརྐྱང་བསྐུམ་བདེ་སྟོང་ཡབ་དང་སྦྱོར། །སྐུ་ལ་དུར་ཁྲོད་ཆས་བརྒྱད་ལེགས་པར་ལྡན། །ཁྲོ་མོ་ཀུན་གྱི་དབང་ཕྱུག་ཆེན་མོ་ཁྱོད། །རྔམས་པའི་ང་རོས་ཐམས་ཅད་ཟིལ་གྱིས་གནོན། །སྤྱན་ནས་ཁྲག་འཛག་ཞལ་ནས་མི་རོ་འབྲུལ། །སྙན་ནས་འབྲུག་སྒྲོག་ཤངས་ནས་རླུང་ནག་འཚུབ། །ཁྱོད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལས། །ཐུགས་ཀྱི་སྤྲུལ་པ་དབང་ཆེན་ཁྲོ་བོའི་སྐུ། །ཤར་ཕྱོགས་འཁོར་ལོ་འབར་བའི་རྩིབས་སྟེང་ནས། །དྲི་ཟ་ཕོ་མོ་བསྣོལ་བའི་གདན་སྟེང་ན། །རྡོ་རྗེ་དབང་ཆེན་རཀྴ་ཧེ་རུ་ཀཿ སྐུ་མདོག་དཀར་པོ་གཡས་དམར་གཡོན་ལྗང་འཛུམ། །གཡས་གསུམ་རྡོ་རྗེ་གྲི་གུག་ཐོད་པའི་རྔ་། །གཡོན་གསུམ་དྲིལ་བུ་དུང་ཁྲག་པདྨའི་ཕྲེང་། །བཛྲ་ཀྲོ་ཏི་སྔོ་སྐྱ་གྲི་ཐོད་འཁྱུད། །དུར་ཁྲོད་ཆས་རྫོགས་མེ་དཔུང་ཀློང་ནས་འགྱིང་། །རྔམ་པའི་ང་རོ་འབྲུག་སྟོང་ལྡི་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལས། །ཐུགས་ཀྱི་སྤྲུལ་པ་དབང་ཆེན་ཁྲོ་བོའི་སྐུ། །ལྷོ་ཕྱོགས་འཁོར་ལོ་འབར་བའི་རྩིབས་སྟེང་ནས། །གཤིན་རྗེ་ཕོ་མོ་བསྣོལ་བའི་གདན་སྟེང་ན། །རིན་ཆེན་དབང་ཆེན་ས་ནུ་ཧེ་རུ་ཀཿ སེར་ནག་གཡས་དམར་གཡོན་དཀར་སྒེགས་པའི་ཚུལ། །གཡས་གསུམ་རིན་ཆེན་གྲི་གུག་གནམ་ལྕགས་གྲི། །གཡོན་གསུམ་གཏེར་བུམ་དུང་དམར་པདྨའི་ཕྲེང་། །རིན་ཆེན་ཀྲོ་ཏི་སྔོ་སྐྱ་གྲི་ཐོད་འཁྱུད། །དུར་ཁྲོད་ཆས་རྫོགས་མེ་དཔུང་ཀློང་ནས་འགྱིང་། །རྔམས་པའི་ང་རོ་འབྲུག་སྟོང་ལྡི་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལས། །ཐུགས་ཀྱི་སྤྲུལ་པ་དབང་ཆེན་ཁྲོ་བོའི་སྐུ། །ནུབ་ཕྱོགས་འཁོར་ལོ་འབར་བའི་རྩིབས་སྟེང་ནས། །ཀླུ་དབང་ཕོ་མོ་བསྣོལ་བའི་གདན་སྟེང་ན། །པདྨ་དབང་ཆེན་གུ་ཧྱ་ཧེ་རུ་ཀཿ གཡས་དཀར་གཡོན་སྔོ་ཆགས་ཤིང་བརྩེ་བའི་ཉམས། །གཡས་གསུམ་པདྨའི་བེ་ཅོན་མེ་རྩེ་གསུམ། །གཡོན་གསུམ་ཞགས་པ་ཁྲག་མཚོ་པདྨའི་ཕྲེང་། །པདྨ་ཀྲོ་ཏི་སྔོ་སྐྱ་གྲི་ཐོད་འཁྱུད། །དུར་ཁྲོད་ཆས་རྫོགས་མེ་དཔུང་ཀློང་ནས་འགྱིང་། །རྔམ་པའི་ང་རོ་འབྲུག་སྟོང་ལྡི་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལས། །ཐུགས་ཀྱི་སྤྲུལ་པ་དབང་ཆེན་ཁྲོ་བོའི་སྐུ། །བྱང་ཕྱོགས་འཁོར་ལོ་འབར་བའི་རྩིབས་སྟེང་ནས། །གནོད་སྦྱིན་ཕོ་མོ་བསྣོལ་བའི་གདན་སྟེང་ན། །ཕྲིན་ལས་དབང་ཆེན་ཡཀྴ་ཧེ་རུ་ཀ །ལྗང་ནག་གཡས་དཀར་གཡོན་དམར་གཏུམ་ཞིང་ཁྲོ། །གཡས་གསུམ་རལ་གྲི་རྒྱ་གྲམ་ཕུར་བུ་འདྲིལ། །གཡོན་གསུམ་མི་སྙིང་ཞིང་དབྱུག་པདྨའི་ཕྲེང་། །ཀརྨ་ཀྲོ་ཏི་སྔོ་སྐྱ་གྲི་ཐོད་འཁྱུད། །དུར་ཁྲོད་ཆས་རྫོགས་མེ་དཔུང་ཀློང་ནས་འགྱིང་། །རྔམ་པའི་ང་རོ་འབྲུག་སྟོང་ལྡི་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཧྲཱིཿ དབང་ཆེན་སྤྲུལ་པ་ཡེ་ཤེས་བྱ་ཁྱུང་དམར། །གནམ་ལྕགས་རྭ་སྡེར་སྤུ་གྲི་གཤོག་པ་གདེངས། །ཀླུ་སྦྲུལ་ཞལ་གསོལ་གཏི་མུག་གདོན་ཚོགས་འཇོམས། །ནོར་བུ་རིན་ཆེན་འབར་བས་དབུ་ལ་བརྒྱན། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །དབང་ཆེན་ཆེ་མཆོག་ཐུགས་ཀྱི་སྤྲུལ་པ་ལས། །ཕྱོགས་སྐྱོང་འདུལ་བྱེད་ཁྲོ་བོ་ཆེན་པོ་བཅུ། །ཏ་ཀྲྀཏ་སྒོ་བཞི་ལྕེ་སྤྱང་མ་བརྒྱད་སོགས། །དཀྱིལ་འཁོར་དབུས་ཀྱི་ལྷ་ཚོགས་ཐུགས་དམ་ཅན། །ཁྱེད་ཀྱི་དབང་དྲག་ཕྲིན་ལས་དུས་ལ་བབས། །སྡང་དགྲ་གནོད་བྱེད་ཐལ་བའི་རྡུལ་དུ་རློགས། །ཡང་དག་གཤིན་རྗེ་དབང་ཆེན་ཕུར་པའི་ལྷ། །རྦོད་གཏོང་རིག་འཛིན་མཆོད་བསྟོད་དྲག་སྔགས་རྣམས། །སོ་སོ་བཀའ་སྡོད་དམ་ཅན་རྒྱ་མཚོའི་ཚོགས། །དབང་ཆེན་བཀའ་བརྒྱད་ལྷ་ཚོགས་མ་ལུས་རྣམས། །ཐུགས་དམ་བསྐུལ་ལོ་དབྱིངས་ནས་བཞེངས་མཛོད་ལ། །ཚར་གཅོད་དབྱིངས་སྒྲོལ་དབང་དྲག་ཕྲིན་ལས་ཀྱིས། །གཟུགས་ཅན་གཟུགས་མེད་དམ་སྲིའི་དཔུང་ཚོགས་རྣམས། །ལྷག་མེད་རྡུལ་དུ་བརླག་པའི་ཕྲིན་ལས་མཛོད། །ཧཱུྃ། དུས་གསུམ་བདེ་གཤེགས་རྒྱལ་བ་ཡོངས་རྫོགས་ཀྱི། །བསྟན་སྲུང་སྔགས་བདག་དྲེགས་པ་མཐུ་རྩལ་ཅན། །དུས་གསུམ་རྒྱལ་བ་ཡོངས་རྫོགས་བཀའ་བྱུང་གི། །དམར་ཆེན་གཏོར་མ་ལོངས་ལ་ཕྲིན་ལས་མཛོད། །དམ་ཚིག་དུས་ལ་བབ་པོ་ས་མ་ཡ། །གནོད་བྱེད་དགྲ་བགེགས་ཁུག་ལ་མྱུར་དུ་སྒྲོལ། །ཡེ་ཤུའི་བསྟན་ལོག་སྤེལ་དང་ཆབ་གཅིག་པར། །མཐའ་འཁོབ་ཀླ་ཀློའི་འཁྲུགས་རྩོད་དར་བའི་ཚེ། །མངོན་སྤྱོད་དྲག་པོའི་ལས་ཆེན་བཅུ་གཉིས་ཀྱིས། །མཐུ་ནུས་ཤིགས་ལ་རང་གཤེད་རང་ལ་ཕོབས། །སྙིང་ཁྲག་ཧུབ་འཐུང་སྲོག་རྩ་དམར་པོ་ཆོད། །ཐལ་བའི་རྡུལ་དུ་རློག་པའི་ཕྲིན་ལས་མཛོད། །མཐའ་དམག་དམ་སྲི་བསམ་སྦྱོར་གནག་པའི་ཚོགས། །ཞེ་སྡང་འབར་བའི་ཐུགས་ཀྱིས་ད་དགོངས་ལ། །འཇིགས་པའི་མུན་ནག་འབར་བས་མདུན་ནས་བསུས། །དྲག་པོའི་རླུང་ནག་འཚུབ་མས་རྒྱབ་ནས་ཕུལ། །གནམ་གྱི་འཇུ་ཐག་དཀར་པོ་ཆོད་ལ་ཤོག །ས་ཡི་རྟེན་ཕུར་ནག་པོ་ཆོད་ལ་ཤོག །ལུས་སྲོག་དོན་སྙིང་ཚལ་བར་གཏུབ་ལ་ཤོག །མགོ་དང་ཡན་ལག་བྲེག་ཏེ་ཁྱེར་ལ་ཤོག །ཀླད་པ་དཀར་པོ་ཞོ་ལྟར་དཀྲུགས་ལ་ཤོག །སྲོག་རྩ་དམར་པོ་མདའ་ལྟར་ཆོད་ལ་ཤོག །འབྱུང་བཞི་འདུས་པའི་ཕུང་པོ་གཞིག་ལ་ཤོག །རྣམ་ཤེས་གསལ་བའི་སྒྲོན་མེ་སོད་ལ་ཤོག །རྟགས་དང་མཚན་མ་མྱུར་དུ་ཁྱེར་ལ་ཤོག །རྫས་དང་ཀ་ཆ་མྱུར་དུ་ལོངས་ལ་ཤོག །བཅོལ་པའི་ཕྲིན་ལས་མྱུར་དུ་འགྲུབ་པར་མཛོད། །ཅེས་བསྐུལ། འདི་ནི་དབང་ཆེན་རྒྱུད་ཀྱི་ལེའུ་བཅུ་གཉིས་པ་ནས་བྱུང་བ་དང་། རང་ཤར་དང་། གཏེར་གཞུང་ནས་བྱུང་བའི་ཚིག་རྣམས་ལེགས་པར་བསྒྲིགས་ཤིང་འཐད་འོས་ཀྱི་ཚིག་ཁ་ཤས་བསྣན་ནས་མགོ་སྤྲུལ་བས་བཀོད་པ་ལགས་སོ།། རྟ་མགྲིན་གྱི་དབང་བཤད།༄༅། རྟ་མགྲིན་གྱི་དབང་བཤད་སྐལ་བཟང་ཐར་ལམ་འདྲེན་པའི་ཐེམ་སྐས་ཞེས་བྱ་བ་བཞུགས་སོ།། ༄༅། ཁྲུས་བྱས་བགེགས་བསྐྲད་སྲུང་འཁོར་བསྒོམ་པ་སྔོན་དུ་སོང་ནས། འོ་ད་ལམ་ཁྱེད་རྣམས་ཀྱིས་འགྲོ་བ་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པར་བྱ་བའི་ཆེད་དུ་སྨིན་བྱེད་དབང་གི་རིམ་པ་འདི་ཉིད་ཚུལ་བཞིན་དུ་ཞུས་ནས་སྒོམ་སྒྲུབ་མཐར་ཕྱིན་པར་བགྱིའོ་སྙམ་པའི་དམ་བཅའ་བརྟན་པོ་ཡིད་ལ་བཞག་ནས་གསན་འཚལ། དེ་ལ་གང་གསན་པར་བྱ་བ་ལ་བཅུད་བཟང་པོ་བདུད་རྩི་ལྟ་བུ་བླུག་སའི་སྣོད་དེ་ཉིད་སྔོན་དུ་བཀྲུ་བཤལ་བྱེད་དགོས་པ་བཞིན། སྣོད་ཀྱི་སྐྱོན་གསུམ། དྲི་མ་དྲུག་དང་བཅས་པ་སྤང་དགོས་པས། དང་པོ་ནི། རྣ་བ་མི་གཏོད་ཁ་སྦུབ་ལྟ་བུའི་སྐྱོན། །ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། །ཉོན་མོངས་དང་འདྲེས་དུག་ཅན་ལྟ་བུའི་སྐྱོན། །ཞེས་དང་། དྲི་མ་དྲུག་ནི། སློབ་དཔོན་དབྱིག་གཉེན་གྱིས་གསུངས་པའི་རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་དང་། གཞན་ཡང་ཉན་པ་པོ་རྣམས་ལ་ཆོས་མི་འཛིན་པའི་སྐྱོན་ལྔ་བྱ་བ་ཡོད་དེ། དེ་གང་ཡིན་ཞེ་ན། ཚིག་མི་འཛིན་པ་དང་། དོན་མི་འཛིན་པ་དང་། བརྡ་མ་འཕྲོད་པར་འཛིན་པ་དང་། ལོག་པར་འཛིན་པ་དང་། མ་ལུས་པར་མི་འཛིན་པའོ། །དང་པོ་ཚིག་མི་འཛིན་པ་སྟེ། ཚིག་འདྲ་བ་ཅི་ཞིག་བཏགས་ཀྱང་ཆོག་ཟེར་ནས་གསུང་སྒྲོས་ལ་ནན་ཏན་མི་བྱེད་པར་དོན་གཅིག་པུ་ལ་ནན་ཏན་བྱེད་དེ་ཚིག་ནོར་ན་དོན་ཡང་ནོར་ནས་འགྲོ་ལ། དང་པོ་ཚིག་མ་ནོར་བ་རེ་བཟུང་ནས་བསམ་ན་དོན་མ་ནོར་བ་ཞིག་སྐྱེ་བ་ཡིན། གཉིས་པ་དོན་མི་འཛིན་པ་ནི། ཚིག་གཅིག་པུ་ལ་ནན་ཏན་བྱེད་ལ། དོན་ལ་ནན་ཏན་མི་བྱེད་ཙ་ན། ཆོས་མང་པོ་བློ་ལ་ཟིན་ཀྱང་། ནེ་ཙོའི་ཁ་ཏོན་དུ་འགྲོ། གསུམ་པ་བརྡ་མ་འཕྲོད་པར་འཛིན་པ་ནི། ཆོས་དེའི་དགོས་དོན་དང་། བསྡུས་དོན་དང་། ཚིག་དོན་གང་ཡིན་ཆ་མེད་པར་འཛིན་པ་ལ་ཟེར་ཏེ། དེའི་ཆོས་ཀྱིས་རང་གཞན་ལ་ཕན་མི་ཐོགས། བཞི་པ་ལོག་པར་འཛིན་པ་ནི། བླ་མས་དྲང་པོར་བཤད་ཀྱང་། ཆོས་གཤའ་མ་དེ་སྐད་བྱ་བ་མེད་ཟེར་ནས་ལོག་པར་འཛིན་པའོ།། ལྔ་པ་མ་ལུས་པར་མི་འཛིན་པ་ནི། གལ་ཆེ་ཆེ་འཛིན། ཆུང་ཆུང་མི་འཛིན་པ་སྟེ། དེ་ལྟར་བྱས་ན་ཆོས་མགོ་མེད་གཞུག་མེད་དུ་སོང་ནས་ཕྱིས་གཞན་ལ་ཕན་མི་ཐོགས། དང་པོ་ཉན་པའི་དུས་ན་རང་གི་བློས་འཆུན་ཚད་ཀྱིས་མཐར་ཆགས་སུ་འཛིན་དགོས། དེ་ལྟར་ཆོས་ཉན་པའི་དྲི་མ་དེ་དག་སྤང་ལ། ཚུལ་ཇི་ལྟ་བུས་ཉན་སྙམ་ན། འདུ་ཤེས་དད་གུས་དང་ལྡན་པས་ཆོས་ཉན་པ་ནི་མཆོག་ཡིན་ཏེ། ཆོས་དང་གང་ཟག་དམ་པ་རྣམས་ཀྱི་སྤྱོད་ཡུལ་མཐོང་བས། དེ་ལ་དགའ་སྤྲོ་དྭངས་བ་ཁྱད་པར་ཅན་སྐྱེ་བ་ནི་དྭངས་བའི་དད་པ་དང་། འཁོར་བའི་སྡུག་བསྔལ་ལ་འཇིགས་ཤིང་སྐྲག་ནས་ཆོས་དང་བླ་མ་རྟག་ཏུ་ཡིད་ལ་མི་འབྲལ་བ་ནི་འདོད་པའི་དད་པ་དང་། བླ་མ་དང་མཇལ་ནས་ཆོས་ཐོས་པའི་ཚེ་ན་ཆོས་དང་བླ་མ་ལ་ཡིད་གཉིས་ཐེ་ཚོམ་མེད་པ་ཡིད་ཆེས་པའི་དད་པ་དང་། དམ་པའི་ཆོས་ཐོས་བསམ་སྒོམ་སྒྲུབ་གང་བྱེད་ཀྱང་། ན་ཚ་སྡུག་བསྔལ་དགྲ་བགེགས་སོགས་རྐྱེན་གང་གིས་ཀྱང་བར་དུ་མི་ཆོད་པ་ཕྱིར་མི་ལྡོག་པའི་དད་པ་སྟེ། འདི་བཞི་པོ་ནི་ཐེག་པ་རིམ་པ་དགུ་ཡི་ཆོས་སྒོ་གང་ལ་འཇུག་ཀྱང་མེད་ཐབས་མེད་པས་ལྡེའུ་མིག་ལྟ་བུ་ཡིན་པས་ལུས་ངག་ཡིད་གསུམ་ཞི་དུལ་དད་གུས་ཀྱི་སྤྱོད་ལམ་མདོ་རྒྱུད་རྣམས་ནས་ཇི་སྐད་གསུངས་པ་བཞིན། སྦྱོར་བ་སེམས་བསྐྱེད་དམ་པའི་ཐབས་ཀྱིས་ཟིན་པར་བྱས་ནས། དེ་ཡང་འདི་ལྟར་ལུས་རྟེན་རྙེད་པར་དཀའ་བའི་ཚུལ་ལ་བསམས་ནས་དལ་ཁོམ་རེས་འཇོག་མེད་པར་ཆོས་ལ་སྦྱང་བ། འཇིག་ངེས་པའི་རྒྱུ་མཚན་བསམས་ནས་རྟག་ཏུ་ངེས་འབྱུང་དང་སྐྱོ་ཤས་སྐྱེ་བ། འཆི་ངེས་པའི་དཔེ་ལ་བསམས་ནས་དགོས་དུས་སྟོང་པའི་ཟབ་དོན་བསྒོམ་པའོ། །དང་པོ་ནི། སྐྱེ་བར་དཀའ་བ་འཛམ་བུའི་གླིང་ཆོས་སྤྱོད་པའི་ཡུལ་དུ་སྐྱེས། རྙེད་པར་དཀའ་བ་དལ་འབྱོར་ཕུན་སུམ་ཚོགས་པ་རྙེད། འཕྲད་པར་དཀའ་བ་བླ་མ་དགེ་བའི་བཤེས་གཉེན་དང་འཕྲད། ཞུགས་པར་དཀའ་བ་རྒྱལ་བའི་བསྟན་པ་རིན་པོ་ཆེའི་སྒོར་ཞུགས། ཤེས་པར་དཀའ་བ་བླ་ན་མེད་པའི་མན་ངག་ཕྱིན་ཅི་མ་ལོག་པར་ཤེས། སྤང་བར་དཀའ་བ་འཁོར་བ་སྡུག་བསྔལ་གྱི་རྒྱ་མཚོ་སྤངས་ནས་ཐར་པ་བྱང་ཆུབ་ཀྱི་གླིང་དུ་འགྲོ་བའི་དུས་ད་རེས་བརྩོན་འགྲུས་དང་སྙིང་རུས་བསྐྱེད་ནས་མ་བསྒྲུབ་ན། ཕྱིས་ནས་འདི་ལྟ་བུའི་མཐུན་རྐྱེན་ཚང་བ་མི་སྲིད་པས་ཚེ་འདིའི་བྱ་བཞག་སྦྲུལ་གྱི་ཤུན་པ་བཞིན་དོར་ནས་ཟབ་མོའི་དོན་བསྒོམ་པར་རིགས་ཏེ། མན་ངག་རིན་པོ་ཆེའི་མཛོད་ལས། རྐྱེན་ངན་བསྟུད་ལས་མི་རྟག་རྒྱུད་ལ་སྐྱེས། །རྒྱུ་འབྲས་ཤེས་ནས་ལས་ངན་དུག་བཞིན་སྤོང་། །མོས་གུས་ཚུད་པས་བླ་མ་སངས་རྒྱས་མཐོང་། །ཆོས་ལ་ངེས་པས་དགེ་སྦྱོར་བྲོད་པ་སྐྱེས། །དགེ་འདུན་དད་པས་ཡར་འདྲེན་སྐྱེལ་མ་ཞུ། །སངས་རྒྱས་འདོད་པས་བརྩོན་པས་ཅི་ཐོབ་བྱེད། །སྐལ་བཟང་དམ་པ་རྣམས་ཀྱི་ལུགས་ཡིན་ནོ། །ཞེས་གསུངས་པ་ལྟར་ཡིད་ལ་འདྲོང་ངེས་པར་བྱས་ནས། གསན་བྱའི་ཆོས་ཀྱི་ངོ་བོ་ནི། འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་རྣམ་པ་ཐམས་ཅད་མཁྱེན་པ་གདུལ་བྱ་འདུལ་བའི་ཐབས་ལ་མཁས་པ། སེམས་ཅན་ཐམས་ཅད་ཀྱི་མགོན་དུ་གྱུར་པ་རྣམ་འདྲེན་ཟས་གཙང་གི་སྲས་པོ་དེ་ཉིད་ཀྱིས་འཁོར་དགེ་སློང་གི་དགེ་འདུན་རབ་ཏུ་བྱུང་བ་དག་ལ་སངས་རྒྱས་ཀྱི་བསྟན་པ་རྣལ་མ་ཡོངས་སུ་གྲགས་པ་རྩོད་པ་མེད་པའི་གཞུང་སྡེ་སྣོད་རིན་པོ་ཆེ་གསུམ་དང་། དབང་རྣོན་ཆོས་ཀྱི་རྗེས་སུ་འབྲང་བ་ཨོ་རྒྱན་གྱི་རྒྱལ་པོ་ཨིནྡྲ་བྷོ་དྷི་དང་། རིགས་ཅན་དྲ་མ་ལ་ལྔ། ཆོས་རྒྱལ་ཟླ་བ་བཟང་པོ་སོགས་ལ་སྟོན་པ་ཉིད་དཀྱིལ་འཁོར་གྱི་བདག་པོར་བཞེངས་པའམ། ཆགས་བྲལ་གྱི་རྣམ་པ་ཅི་རིགས་པས་གསང་སྔགས་རྡོ་རྗེ་ཐེག་པའི་རྒྱུད་སྡེ་རྣམས་བསྟན་ཏེ། དམ་པ་དང་པོའི་རྒྱུད་ལས། སྟོན་པས་བྱ་རྒོད་ཕུང་པོ་རུ། །ཤེས་རབ་ཕ་རོལ་ཕྱིན་ཚུལ་བཞིན། །ཆོས་བསྟན་དཔལ་ལྡན་འབྲས་སྤུང་དུ། །དེ་བཞིན་གསང་སྔགས་ཚུལ་རབ་གསུངས། །ཞེས་གསུངས་པ་ལྟར་སྤྱིར་ཆོས་ཀྱི་རྣམ་གྲངས་བརྗོད་དུ་མེད་པའི་མཐའ་དང་བྲལ་ཡང་བསྡུ་ན་རྒྱུ་ཕར་ཕྱིན་གྱི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སུ་འདུས་ཏེ། ད་ལམ་འདིར་ནི་ཐབས་ཁྱད་པར་ཅན་གྱི་སྒོ་ནས་སྤང་བྱ་ཉོན་མོངས་པ་དང་འདོད་པའི་ཡོན་ཏན་དེ་ཉིད་ལམ་དུ་བྱས་ཏེ་བསྒོམས་པས་དེ་དག་སླར་རྣལ་འབྱོར་པའི་གྲོགས་སུ་འཆར་ཞིང་། ལམ་མྱུར་དུ་རྫོགས་པར་བྱེད་པའི་མན་ངག་ཟབ་མོ་ཡིན་ཀྱང་། རྟེན་གྱི་གང་ཟག་གསང་སྔགས་རང་ཚོད་དང་ལྡན་མི་ལྡན་གལ་ཤིན་ཏུ་ཆེ་བས། སྔགས་ཀྱི་སྤྱད་བསྲུང་གི་དམ་ཚིག་ས་མ་ཡཱ་འབུམ་སྡེ་ཉམས་འོག་ཏུ་ཚུད་ངེས་བྱེད་དགོས་ཏེ། སྔགས་ཀྱི་རྡུལ་ཚོན་གྱི་དཀྱིལ་འཁོར་བྲི་བའི་དུས་ན་ཡང་། ཐིག་བག་ཙམ་ཞིག་འགྲིས་ཀྱང་། ཉན་ཐོས་ཀྱི་ཕས་ཕམ་གྱིས་དོ་མ་ཡིན་གསུངས་ན་དམ་ཚིག་གཞན་ལྟ་ཅི་སྨོས། གསང་སྔགས་ལམ་ཉེ་གསུངས་པ་ལ་ཐམས་ཅད་ཀྱིས་རྣ་བ་ཀྲོང་ངེ་ཉན་འདུག་ཀྱང་། བློ་གྲོས་དང་མི་ལྡན་ཞིང་སྙིང་སྟོབས་མེད་པས་སྔགས་ལ་འཇུས་ན་ཁེ་ཉེན་ཤིན་ཏུ་ཆེ་བས་གླང་པོ་ཆེ་ལ་མྱོས་རྫས་བླུད་ནས་སྣ་རྩེ་རུ་མཚོན་ཆའི་འཁོར་ལོ་བཏགས་ཏེ་དགྲ་ཡུལ་དུ་གཏོང་བ་ལེགས་ན་དགྲ་དཔུང་ཐམས་ཅད་དུས་གཅིག་ཏུ་བརླག་པར་བྱེད་ལ། གལ་ཏེ་རྟེན་འབྲེལ་མ་འགྲིག་ནས་ཚུར་འཁོར་ན་སྐད་ཅིག་གིས་རང་ལུས་དུམ་བུར་གཏུབ་པ་ལྟར་གསང་སྔགས་ཀྱི་ཐབས་དང་གཉེན་པོའི་རྟེན་འབྲེལ་འགྲིག་ན་ཚེ་གཅིག་གིས་སངས་རྒྱས་ཐོབ་ལ། ལྷ་དང་བླ་མ་མཆེད་གྲོགས་ཐ་ན་ཤོ་ལོ་ཀ་གཅིག་གི་བཀླག་ལུང་ཐོབ་པ་ཚུན་ཆད་ལ་རྩེད་མོའི་ཞོར་ཙམ་དུའང་ཅུང་ཟད་འགལ་ནས་སོར་མ་ཆུད་ན་རྡོ་རྗེ་དམྱལ་བར་འགྲོ་བར་གདོན་མི་ཟ་བས་དེས་ན་བློ་གྲོས་དང་སྙིང་སྟོབས་དང་། སྐྱེ་བ་སྔ་མ་ནས་སྦྱངས་སྟོབས་དང་ལྡན་པ་གལ་ཆེ། དེ་ལྟར་རྟོག་དཔྱོད་ཞིབ་པར་བཏང་ནས་སྨོན་འཇུག་གཉིས་ཀྱི་བློ་ཚོད་དང་ལྡན་པའི་བྱང་ཆུབ་སེམས་དཔའ་ཞིག་གསང་སྔགས་ཀྱི་སྒོར་འཇུག་པར་འདོད་པ་ལ། དང་པོ་བླ་མ་མཚན་ཉིད་དང་ལྡན་པ་ཞིག་གིས་སློབ་མ་མཚན་ཉིད་དང་ལྡན་པ་ཞིག་ལ་དབང་བཞི་རྫོགས་པར་བསྐུར་ནས། ལམ་བསྐྱེད་རྫོགས་ཀྱི་ཐབས་ཟབ་མོ་ཐུན་བཞི་ལ་སོགས་པས་ཉམས་སུ་བླངས་ནས་དམ་ཚིག་རང་གི་སྲོག་ལས་ཕང་བར་བསྲུང་ནས་ཐེ་ཚོམ་ཡིད་གཉིས་མེད་ན་བསྐལ་པ་གྲངས་མེད་གསུམ་ཚེ་གཅིག་གིས་བསྒྲོད་པ་ལ་ཚེགས་མེད་དེ། ཡེ་ཤེས་རོལ་པ་ལས། བསྐྱེད་དང་རྫོགས་པའི་རིམ་པ་ལས། །ཡེ་ཤེས་རླུང་གིས་ལས་བྱེད་ཅིང་། །ནམ་མཁའི་འཇོ་བ་རབ་རྫོགས་པའི། །ཚེ་གཅིག་གིས་ནི་རབ་གྲོལ་ལོ། །ཞེས་གསུངས་པས་དེ་ལྟ་བུའི་སྔགས་ལའང་། གསར་མ་དང་རྙིང་མ་གཉིས། རྙིང་མ་ལའང་རིང་བརྒྱུད་བཀའ་མ་དང་། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་བརྒྱུད་པའི་བཀའ་སྲོལ་རིམ་པ་གསུམ་དུ་ཡོད་པའི་ནང་ཚན་ད་ལམ་ཉེ་བརྒྱུད་བྱིན་རླབས་ཀྱི་དྲོད་མ་ཡལ་བ་ཟབ་མོ་གཏེར་གྱི་ཕྱོགས་སུ་གཏོགས་པ་ཡིན་ཏེ། དེ་ལའང་ངོ་བོ། ངེས་ཚིག དབྱེ་བ། མཚན་ཉིད། བསྡུས་དོན་དང་ལྔ་ལས། དང་པོ་ངོ་བོ་ནི། རང་བྱུང་རིག་པ་བྱང་ཆུབ་ཀྱི་སེམས་སོ། ངེས་ཚིག་ནི། གབ་པས་གཏེར། སྦས་པས་གཏེར། ཟད་མི་ཤེས་པས་གཏེར། དགོས་འདོད་ཀུན་འབྱུང་བས་གཏེར་དང་བཞིའོ། མཚན་ཉིད་ནི། ལས་དང་སྐལ་ལྡན་སྨོན་ལམ་གནས་དུས་འཛོམས་པ། ཚོགས་གཉིས་ཀྱི་འབྲས་བུ་རྒྱས་པ། སྣོད་དང་བཅུད་འཛོམས་པས་སྐལ་བཟང་ལས་འཕྲོ་ཅན་ཀྱི་སྤྱོད་ཡུལ། དད་མེད་ལོག་ལྟ་ཅན་ལ་གསང་བ། དབྱེ་བ་ནི་ཕྱི་འབྱུང་བཞི། ནང་སྐུ་གསུང་ཐུགས། གསང་བ་རང་བྱུང་རང་བབས་རང་གིས་རྟོགས་པའི་གཏེར། བྱེ་བྲག་སྨན་རྩིས་སྒྱུ་འཕྲུལ་བཟོ་ལ་སོགས་པ་རྣམས་སོ། བསྡུས་དོན་ནི། གང་འདོད་ཀྱི་གདུལ་བྱའི་རེ་བ་སྐོང་ནུས་པའོ། །དེ་ཡང་འདི་ལྟར་རྒྱུད་ཡེ་ཤེས་གསང་བ་ལས། སུ་ཞིག་ཐུགས་ཀྱི་དཀྱིལ་འཁོར་དུ། །གཏེར་དང་ལྡན་ནོ་ཁྱད་པར་ཆེ། །ཞེས་དང་། རིན་ཆེན་སྤུངས་པའི་རྒྱུད་ལས། རྒྱུད་དོན་གབ་པའི་གཏེར་སྒོ་ཕྱེ། །ནམ་མཁའ་མཛོད་གཏེར་ཉིད་ལོངས་སྤྱོད། །ཅེས་གསུངས་པ་དང་། མདོ་རྣམ་རོལ་ལས། བཅོམ་ལྡན་འདས་ཀྱིས་བཀའ་བསྩལ་པ། འཇམ་དཔལ། འབྱུང་བ་ཆེན་པོ་བཞི་ནི་ནམ་མཁའི་གཏེར་ལས་འབྱུང་། དེ་བཞིན་ཏུ་ཆོས་ཐམས་ཅད་རྒྱལ་བའི་ཐུགས་གཏེར་ལས་བྱུང་བས། དོན་གཏེར་ལ་ལོངས་སྤྱོད་པར་གྱིས་ཤིག །ཅེས་གསུངས་པ་ལྟར་དེ་ཡང་ཤེས་རབ་ཀྱི་མིག་རྟུལ་བ་ལོག་ལྟའི་དྲ་བར་ཚུད་པ་ཁ་ཅིག་གིས་གཏེར་ཟེར་བ་ཨོ་རྒྱན་པདྨ་དང་རྙིང་མ་བ་ཁོ་ན་ལ་ཆ་བཞག་སྟེ་བླ་བརྡོལ་དུ་སྨྲ་ཡང་མ་ཡིན་ཏེ། ཆོས་སྐུ་ཀུན་ཏུ་བཟང་པོས། རང་ཤར་དག་པའི་འཁོར་ལ། དབང་བསྒྱུར་ཐབས་ཀྱི་ཐེག་པ་གསུམ་པོ། སྟོན་འཁོར་དགོངས་པ་མཉམ་པའི་ཚུལ་དུ་བསྟན་པ་ཆོས་སྐུའི་གཏེར་དང་། སྟོན་པ་རྣམ་པར་སྣང་མཛད་ཀྱིས་ས་བཅུའི་བྱང་ཆུབ་སེམས་དཔའ་རྣམས་ལ། དཀའ་ཐུབ་རིག་བྱེད་ཀྱི་ཐེག་པ་གསུམ་བརྡའི་ཚུལ་དུ་བསྟན་པ་ལོངས་སྐུའི་གཏེར་དང་། མཉམ་མེད་བུ་རམ་ཤིང་པས་འཁོར་ལྔ་སྡེ་བཟང་པོ་སོགས་ལྷ་ཀླུ་མི་གསུམ་ལས་དང་སྐལ་ལྡན་མང་པོའི་བསོད་ནམས་ལ་བརྟེན་ནས་ཀུན་འབྱུང་འདྲེན་པའི་ཐེག་པ་གསུམ་པོ་ཚངས་པའི་དབྱངས་ཀྱིས་གསུངས་པ་སྤྲུལ་པའི་སྐུ་ཡི་གཏེར་ཕྱུང་བའོ། །དེ་ལྟར་ངེས་པའི་ལུང་ནི། སྒྱུ་འཕྲུལ་བརྒྱད་ཅུའི་ལེའུ་བཅུ་པ་ལས། ཆོས་སྐུ་དཔག་མེད་བརྗོད་དུ་མེད། །ལོངས་སྐུ་ཟད་མེད་རིན་ཆེན་གཏེར། །སྤྲུལ་སྐུ་སྐྱེ་བ་བསམ་མི་ཁྱབ། །དེ་ལ་སོགས་པ་བསམ་ཡས་མཆོག །ཟད་མི་ཤེས་པའི་གཏེར་དུ་འགྱུར། །ཞེས་གསུངས་སོ། །དེ་ལྟར་ན་ཐེག་པ་རིམ་པ་དགུ་པོ་སྐུ་གསུམ་སྟོན་པའི་ཐུགས་ལ་གབ་པའི་གཏེར་དེ་ཉིད། གདུལ་བྱ་དུས་བབས་ཀྱི་དབང་གིས་སོ་སོའི་སྣང་ངོར་འབྱུང་བ་དང་། རང་རང་གིས་ཞུ་དོན་གསོལ་བ་ནི། ཁ་བྱང་ཡང་བྱང་ལ་བརྟེན་ནས་གཏེར་འདོན་པའི་དུས་ཡིན་པས་བློ་དང་བསྟུན་ནས་བཀའ་བསྩལ་པ་ནི་ཐུགས་གཏེར་ཕྱུང་བ་དེ་དག་སླར་ཡང་གཏེར་དུ་སྦས་པ་ནི་སངས་རྒྱས་མྱ་ངན་ལས་འདས་པའི་རྗེས་སུ་དགྲ་བཅོམ་རྣམས་ཀྱིས་བཀའ་བསྡུ་ལན་གསུམ་མཛད་ནས་གཏེར་དུ་སྦས་པ་ནི། ཀུན་དགའ་བོས། གནས་ལ་མ་འཆམས་ལྷ་ཀླུས་ཐོབ་ཤ་བྱས༔ དེ་ལ་གཏེར་དུ་མ་སྦས་ཐབས་མ་མཆིས༔ མུ་སྟེགས་ངན་པས་མེར་བསྲེག་དཀྲུག་པ་བྱུང་༔ དེ་ལ་བརྟེན་ནས་གཏེར་དུ་སྦས་པའོ༔ ཞེས་གསུངས་པ་ལྟར་དམ་ཆོས་ཐམས་ཅད་གཏེར་དུ་སྦས་ནས་སླར་འདོན་པའི་དུས་ནི་སངས་རྒྱས་ཀྱི་ཞལ་ནས། ཐུབ་པ་མྱ་ངན་འདས་འོག་ཏུ། །ལོ་ནི་ཉི་ཤུ་རྩ་བརྒྱད་ནས། །རྒྱལ་པོ་ཛ་ཞེས་བྱ་བ་འབྱུང་། །དེ་བཞིན་གཤེགས་པ་ང་འདས་ནས། །ལོ་ནི་བརྒྱད་བཅུ་ལོན་པ་ན། །ནུབ་ཕྱོགས་ཨོ་རྒྱན་ཡུལ་ཞེས་པར། །དེ་བ་བཟང་སྐྱོང་བྱ་བ་འབྱུང་། །ཡོ་ག་རྣམ་གསུམ་སྟོན་པར་བྱེད། །ང་ནི་མི་གནས་འདས་འོག་ཏུ། །སྔོན་གྱི་ལས་ཀྱིས་རབ་བསྐུལ་ནས། །ཨོ་རྒྱན་ཡུལ་གྱི་ལྷོ་ནུབ་ཏུ། །མངལ་སྐྱེས་སྤང་བའི་རྫུས་སྐྱེས་ཉིད། །པདྨ་འབྱུང་གནས་རྫུ་འཕྲུལ་ཅན། །ང་ལས་ལྷག་པའི་སྐྱེས་བུ་འབྱུང་། ཞེས་དང་། རྟག་ལྟ་སུན་འབྱིན་ང་ནི་མྱ་ངན་འདའ། །ཆད་ལྟ་སུན་འབྱིན་ཀོ་ཤའི་མཚོ་ལས་འཁྲུངས། །ཞེས་གསུངས་པ་ལྟར་དུས་གསུམ་རྒྱལ་བ་ཐམས་ཅད་ཀྱི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་དེ་ཉིད་སྤྲེལ་ལོ་ཧོར་ཟླ་དྲུག་པའི་ཚེས་བཅུའི་ཉི་ཤར་ལ་དྷ་ན་ཀོ་ཤར་པདྨའི་སྦུབས་ལས་བརྫུས་སྐྱེས་ཀྱི་སྐུར་འཁྲུངས་ཏེ། རྒྱལ་པོ་ཨིནྡྲ་བྷོ་དྷིའི་སྲས་ཀྱི་སྐལ་བ་མཛད། རྒྱལ་སྲིད་ཐབས་ཀྱིས་སྤངས་ནས་དུར་ཁྲོད་བསིལ་བ་ཚལ་དུ་བརྟུལ་ཞུགས་ཀྱི་སྤྱོད་པ་མཛད་པས་མཁའ་འགྲོ་ཐམས་ཅད་དབང་དུ་བསྡུས། དེ་ནས་དགའ་བའི་ཚལ་དུ་ཡེ་ཤེས་ཀྱི་མཁའ་འགྲོ་མ་བདུད་འདུལ་མས་དབང་བསྐུར་ཞིང་བྱིན་གྱིས་བརླབས། སོ་ས་གླིང་དུ་ཞི་བ་འཚོས་དབང་བསྐུར། རྒྱ་མཚོའི་གླིང་དུ་མཁའ་འགྲོ་བཞི་དབང་དུ་བསྡུས། འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་ཐམས་ཅད་བསྒྲུབ་ཅིང་དབང་དུ་མཛད། མཆོག་གི་དངོས་གྲུབ་བརྙེས་པའི་སྤྲུལ་པའི་སྐུར་བཞུགས་ཀྱང་། འགྲོ་བའི་ཁམས་དང་མོས་པ་སྣ་ཚོགས་དེ་དག་སློབ་དཔོན་མེད་པ་ལ་མི་དད་པ་ལྡོག་པའི་ཕྱིར་སློབ་དཔོན་པྲ་བྷ་ཧསྟིའི་དྲུང་དུ་རབ་ཏུ་བྱུང་བས་ཤཱཀྱ་སེང་གེ་ཞེས་མཚན་གསོལ། རྡོ་རྗེ་དབྱིངས་ཀྱི་དཀྱིལ་འཁོར་ཞལ་གཟིགས་ནས་ཚེ་ཡི་རིག་འཛིན་ལ་མངའ་བརྙེས། རྒྱ་གར་ལྷོ་ཕྱོགས་སུ་ཀླུ་སྒྲུབ་སྙིང་པོ་ལ་སྒྲ་དང་ཚད་མ་སོགས་རྒྱུ་འབྲས་ཀྱི་ཐེག་པ་མ་ལུས་པར་གསན་ནས་ཕྱི་རོལ་མུ་སྟེགས་པའི་སྡེ་ཚོགས་སངས་རྒྱས་ཀྱི་བསྟན་པ་ལ་བཀོད། དགེ་སློང་ཀུན་དགའ་མོ་ལ་པདྨ་གསུང་གི་སྒྲུབ་སྡེ་གསན་ཅིང་གྲུབ་པ་བརྙེས། རིག་འཛིན་བརྒྱད་ཀྱི་དྲུང་དུ་སྒྲུབ་སྡེ་བརྒྱད་དང་གཞན་ཡང་རྒྱུད་སྡེ་མཐའ་དག་མ་ལུས་པ་གསན་པར་མཛད་ནས་དེ་དག་སོ་སོའི་ལྷ་ཡི་དཀྱིལ་འཁོར་དཔག་ཏུ་མེད་པས་ཞལ་གཟིགས། དེ་ནས་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་བུ་མོ་ལྷ་ལྕམ་མན་དྷ་ར་བ་དབང་དུ་མཛད་ནས་ཡུལ་ཁམས་དེ་ཉིད་ཆོས་ལ་བཙུད། སླར་ཨོ་རྒྱན་ཡུལ་དུ་བྱོན་ནས་རྒྱལ་པོ་ཨིནྡྲ་བྷོ་དྷི་འཁོར་ཚོམ་བུ་འབུམ་དང་བཅས་པ་གསང་སྔགས་ཀྱི་དཀྱིལ་འཁོར་དུ་བཅུག་ཅིང་དབང་བསྐུར་ནས་ཐམས་ཅད་གྲུབ་པ་ཐོབ་ནས་མཁའ་སྤྱོད་དུ་གཤེགས། དེ་ནས་རྡོ་རྗེ་ཕག་མོས་ལུང་བསྟན་ནས་རྩུབ་འགྱུར་ཚལ་གྱི་དུར་ཁྲོད་དུ་བྱོན་ནས་སློབ་དཔོན་ཆེན་པོ་ཤྲཱི་སིང་ཧ་ལ་མཐར་ཐུག་བླ་ན་མེད་པའི་ཉེ་ལམ་རྫོགས་པ་ཆེན་པོ་ཨ་ཏི་ཡོ་གའི་རྒྱུད་སྡེ་མ་ལུས་པ་གསན་ཅིང་བསྟན་པ་གཏད་པས་ཐུགས་ཉམས་སུ་བཞེས་ནས་སྐྱེ་ཤི་གཉིས་སྤངས་ཆུ་ཡི་ཟླ་བ་ལྟ་བུའི་སྐུར་གྲུབ་ནས་རྫུ་འཕྲུལ་གྱིས་གནས་རྣམ་པ་སྣ་ཚོགས་སུ་མི་དང་མི་མ་ཡིན་པའི་འགྲོ་བ་མང་པོ་ཐར་ལམ་ལ་བཀོད་ཅིང་མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ། །དེ་ཡི་ཚེ་བོད་གངས་ཅན་གྱི་ལྗོངས་འདིར་འཕགས་པ་འཇམ་དཔལ་གྱི་སྤྲུལ་པ་གནམ་ལྷ་བབས་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག འགྲེང་མགོ་ནག་ཡོངས་ཀྱི་རྒྱལ་པོ། མངའ་བདག་ཁྲི་སྲོང་ལྡེའུ་བཙན་གྱིས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་བཞེངས་པའི་དུས་སུ། སྤྲུལ་པའི་རྒྱལ་པོའི་ཐུགས་བསྐྱེད་སྐྱ་རེངས་དང་པོས་བསྟན་འགྲོའི་རྒུད་མུན་སེལ་བའི་ཉིན་བྱེད་ལྷ་གཅིག་པདྨ་འབྱུང་གནས་སྤྱན་དྲངས་ནས་བོད་ཁམས་མུན་པའི་གླིང་འདིར་རྒྱལ་བསྟན་བཤད་སྒྲུབ་ཀྱི་བསྟན་པ་འོད་སྟོང་མཁའ་ལ་ཤར་བ་ལྟར་མཛད་ནས་གཏེར་གྱི་རིགས་བསམ་གྱིས་མི་ཁྱབ་པ་བརྗོད་པའི་མཐའ་དང་བྲལ་བ་ས་འོག་ས་སྟེང་ས་བླ་ཐམས་ཅད་ཁྱབ་པར་སྦས་ཏེ། གཏེར་འདོན་པའི་གང་ཟག་ཀྱང་། གཏེར་སྟོན་བརྒྱ་རྩ། གཏེར་ཕྲན་སྟོང་དང་རྩ་གཉིས། ཡང་གཏེར་གྲངས་ལས་འདས་པ། དེ་དག་སོ་སོའི་ཆོས་བདག་སྐྱེས་བུ་དང་བཅས་པ་ལུང་བསྟན་པའི་ནང་ཚན། ད་ལམ་འདིར་ནི། ཟབ་ཆོས་པདྨ་དྲག་ཁྲོས་ཀྱི་ལུང་བསྟན་ལས། བྱ་འམ་ཁྱི་ཡི་ལོ་བ་གསང་སྨེ་ཅན༔ འདི་ནི་རྩ་བའི་ཆོས་བདག་སྐྱེས་བུ་ཡིན༔ རྡོ་རྗེ་མཁའ་འགྲོས་བྱིན་གྱིས་བརླབས་པའི་བུ༔ མཚོ་རྒྱལ་སྤྲུལ་པ་རྒྱལ་གྱི་མིང་ཅན་འབྱུང་༔ ཞེས་དང་། དམ་ཆོས་བདེ་ཆེན་ལམ་མཆོག་གི་སྐལ་ལྡན་ལུང་བསྟན་ལས། ང་ཡི་ཆོས་ལ་དབང་བ་ཡི༔ སྐལ་ལྡན་སྐྱེས་བུ་མཐའ་མིའི་རིགས༔ བརྒྱུད་འཛིན་དམ་པ་སྨད་ནས་འབྱུང་༔ སྙིང་ཐིག་སྲུང་མས་སྡོང་གྲོགས་བྱེད༔ ཅེས་གསུངས་པ་ལྟར། རིག་འཛིན་ཉི་མ་གྲགས་པ་དེ་ཉིད་སླར་ཡང་འགྲོ་སེམས་དད་པའི་ཆུ་མཚོར་རྒྱལ་བའི་ཐུགས་རྗེའི་ཟླ་གཟུགས་ཅིར་ཡང་འཆར་བ་སྤྲུལ་པའི་ཟློས་གར་རིག་པའི་གནས་ལྔ་ལ་ཐོགས་པ་མེད་པ། བླ་མ་བརྒྱུད་པའི་གདམས་ངག་ཐུན་མོང་མ་ཡིན་པ་མངའ་བ། བྱམས་པ་དང་སྙིང་རྗེ་བྱང་ཆུབ་ཀྱི་ཐུགས་ཀྱིས་གཞན་དོན་གཙོ་བོར་མཛད་པ། ངུར་སྨྲིག་གར་གྱི་རྣམ་རོལ་འཆང་བ་འགྲོ་འདུལ་ལུང་རིག་གླིང་པ་དེ་ཉིད་ལ་རྒྱ་བོད་ཀྱི་པཎ་གྲུབ་རྣམས་དང་། རབ་འབྱམས་ལྷག་པའི་ལྷ་ཐམས་ཅད་ཀྱིས་ཞལ་གཟིགས་ཤིང་། ལུང་བསྟན་དབུགས་དབྱུང་། གཟེངས་བསྟོད་ནས་དེ་དག་གི་སྒྲུབ་ཐབས་ལག་ལེན་དང་བཅས་པ་དགོངས་གཏེར་དུ་བབས་པ་གྲངས་ལས་འདས་ཀྱང་། ཆ་ཤས་འགྱུར་མེད་ཀྱི་གྲངས་སུ་ཐེབས་པའི་ནང་ཚན། ད་ལམ་སྒྲུབ་ཆེན་བཀའ་བརྒྱད་ཀྱི་སྙིང་པོ་རྒྱ་བོད་པཎ་གྲུབ་ཡོངས་ཀྱི་ཐུགས་ཀྱི་ཉིང་ཁུ། དཔལ་ཆེན་རྟ་མཆོག་རོལ་པའི་སྨིན་བྱེད་དབང་གི་རིམ་པ་བསམ་འཕེལ་ནོར་བུ་ཞེས་བྱ་བ་བྱིན་རླབས་ཀྱི་སྤྲིན་ཕུང་མ་ཡལ་བ། གདམས་ངག་གི་སྣ་ཁ་མ་ལོག་པ། སྟེང་ན་རིག་འཛིན་བརྒྱུད་པའི་གྲལ་མ་ཞིག་པ། བར་ན་དཀྱིལ་འཁོར་གྱི་བཀྲག་མདངས་མ་ཡལ་བ། འོག་ན་རྡོ་རྗེའི་ཟམ་མ་ཆད་པ། མཐའ་ན་ཆོས་སྐྱོང་གི་ཁ་རླངས་མ་ཡལ་བ། བྱིན་རླབས་ཀྱི་སོ་མ་ཉམས་ཤིང་། མ་དང་མཁའ་འགྲོའི་ཁ་རླངས་ཟིལ་བ་ཁྲོམ་མེ་ཡོད་པ། འདི་ལྟ་བུའི་ཡིད་ཆེས་ཤིང་ཁུངས་བཙུན་པའི་དབང་ཟབ་མོ་བསྐུར་བར་བྱེད་པ་ལ་སློབ་དཔོན་གྱི་བྱ་བར་འོས་པ་རྣམས་ལེགས་པར་གྲུབ་ཟིན་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ། དེ་ལྟར་དཔལ་ཆེན་རྟ་མཆོག་རོལ་པའི་དབང་གི་རྣམ་བཤད་སྐལ་བཟང་ཐར་ལམ་འདྲེན་པའི་ཐེམ་སྐས་ཞེས་བྱ་བ་འདི་ཉིད། སྐྱབས་རྗེ་རིན་པོ་ཆེ་ཉིད་ནས་བཀའ་ཕེབས་ལྟར་ཆོས་བདག་དྷརྨ་དྷརྟུའི་མིང་གིས་དབང་ཆེན་སེང་གེ་གནམ་རྫོང་ནས་བྲིས་པ་དགེའོ། །དགེའོ། །དགེའོ། །སརྦ་མངྒ་ལཾ།། གསང་བདག་གཏུམ་པོའི་ཐུགས་སྒྲུབ་སྙིང་པོའི་བསྐང་བ།༄༅། གསང་བདག་གཏུམ་པོའི་ཐུགས་སྒྲུབ་སྙིང་པོའི་བསྐང་བ་བཞུགས། བསྐང་རྫས་རྣམས་ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབས་ལ། །གདུང་དབྱངས་རོལ་མོ་བཅས་པས་འདི་བཞིན་བྱའོ། །ཧཱུྃ་ཧཱུྃ། ཆོས་དབྱིངས་སྐྱེ་མེད་སྤྲོས་བྲལ་ངང་ཉིད་ལས། །འགགས་མེད་སྒྱུ་འཕྲུལ་གར་གྱིས་རྣམ་རོལ་བའི། །བླ་མ་ཡི་དམ་མཁའ་འགྲོ་ཆོས་སྐྱོང་ཚོགས། །རང་བཞིན་དབྱིངས་ནས་བསྐང་བའི་གནས་འདིར་གཤེགས། །ཚོགས་ཁང་གཞལ་ཡས་འདི་ལ་བརྟན་པར་བཞུགས། །ཕྱི་ནང་གསང་གསུམ་བསྐང་རྟེན་རྫས་ཀྱིས་མཆོད། །ལུས་ངག་ཡིད་གསུམ་དད་གུས་ལྡན་པས་བསྟོད། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཧཱུྃ་ཧཱུྃ། སྐུ་གསུམ་ཞིང་ནས་འགྲོ་དོན་སྐུར་སྣང་བ། །ཀུན་བཟང་རིགས་ལྔ་གསང་བདག་པདྨ་འབྱུང་། །མཚོ་རྒྱལ་མངའ་བདག་རླངས་ཆེན་དཔལ་སེང་དང་། །དཔལ་གྱི་དབང་ཕྱུག་ཀླུ་དབང་ལུང་རིག་གླིང་། །རིག་འཛིན་བཟང་པོ་མ་ཏིའི་མཚན་ཅན་སོགས། །དྲིན་ཆེན་རྩ་རྒྱུད་བླ་མའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི་དམ་རྫས་ནི། །དངོས་འབྱོར་ཡིད་སྤྲུལ་ཕྱི་ནང་གསང་མཆོད་ཚོགས། །བསྐང་རྫས་སྒྲུབ་རྫས་རྟེན་རྫས་སྣ་ཚོགས་དང་། །བདུད་རྩི་སྨན་དང་རཀྟ་བྷ་ལིང་ཏ། །འདོད་ཡོན་ལོངས་སྤྱོད་བཟའ་བཏུང་ཚོགས་འཁོར་སོགས། །རབ་འབྱམས་ནམ་མཁའི་ཁྱོན་ཀུན་ཡོངས་བཀང་བའི། །རྨད་བྱུང་མཆོད་སྤྲིན་རྒྱ་མཚོས་ཐུགས་དམ་བསྐང་། །ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ། །ཧཱུྃ་ཧཱུྃ། གནས་མཆོག་ལྕང་ལོ་ཅན་གྱི་ཕོ་བྲང་ནས། །རྒྱལ་བ་ཀུན་གྱི་ཕྲིན་ལས་གཅིག་བསྡུས་པའི། །གསང་སྔགས་རིགས་སྔགས་ཀུན་གྱི་མངའ་བདག་རྗེ། །བདུད་སྡེ་དཔུང་འཇོམས་ལོག་འདྲེན་ཚར་གཅོད་པའི། །བཅོམ་ལྡན་དཔལ་ཆེན་ཁྲོ་བོ་ཡོངས་ཀྱི་རྒྱལ། །གསང་བདག་རྡོ་རྗེ་འཛིན་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཁྲོ་རྒྱལ་ཆེན་པོའི་སྐུ་ཡི་གནས་ལྔ་ནས། །སྐུ་གསུང་ཐུགས་ཡོན་ཕྲིན་ལས་སྤྲུལ་པའི་ཁྱུང་། །དཀར་སེར་དམར་ལྗང་མཐིང་མདོག་ཀླུ་རིགས་གསོལ། །ས་བདག་ཀླུ་གཉན་དྲེགས་པའི་སྲོག་སྙིང་འདྲེན། །དུག་ལྔའི་གདོན་ཚོགས་ཡེ་ཤེས་ལྔར་སྒྲོལ་བའི། །བྱ་ཁྱུང་རིགས་ལྔའི་ཚོགས་ཀྱི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཔལ་ཆེན་ཁྲོ་རྒྱལ་ཐུགས་ཀྱི་སྤྲུལ་པ་ལས། །ཕྱོགས་བཞིའི་འཁོར་ལོ་འབར་བའི་རྩིབས་སྟེང་དུ། །པད་ཉི་དྲེགས་པ་ཕོ་མོ་བསྣོལ་བའི་ཁར། །ཉོན་མོངས་བདུད་བཞི་འཇོམས་མཛད་ཡེ་ཤེས་སྐུ། །ཁྲོ་བོའི་ཆས་རྫོགས་རང་རྟགས་ཕྱག་རྒྱ་བསྣམས། །གསང་བདག་གཏུམ་པོ་རིགས་བཞིའི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཕྱོགས་བཅུའི་དྲེགས་པ་ཕོ་མོའི་གདན་སྟེང་ནས། །བདུད་དཔུང་འཇོམས་མཛད་ཡེ་ཤེས་ཁྲོ་བོའི་སྐུ། །ཧཱུྃ་དཀར་རྣམ་རྒྱལ་དབྱུག་སྔོན་གཤིན་རྗེ་གཤེད། །མི་གཡོ་རྟ་མགྲིན་འདོད་རྒྱལ་བདུད་རྩི་འཁྱིལ། །ཁམས་གསུམ་རྣམ་རྒྱལ་སྟོབས་ཆེན་ཁྲོ་བོ་བཅུ། །མ་ལུས་འཁོར་དང་བཅས་པའི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། གཞལ་ཡས་ཆེན་པོའི་ཕྱོགས་བཞིའི་སྒོ་བཞི་ནས། །བདུད་བཞི་འདུལ་མཛད་ཏ་ཀྲྀཏ་སྒོ་བ་བཞི༔ ཁྲོ་བོའི་ཆ་ལུགས་དཀར་སེར་དམར་ལྗང་མདོག །རིགས་རྒྱ་གཡས་དང་རང་རྟགས་གཡོན་ན་བསྣམས། །ཞི་རྒྱས་དབང་དྲག་ཕྲིན་ལས་སྒྲུབ་པའི་ལྷ། །རང་རང་སྤྲུལ་འཁོར་བཅས་པའི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཀྱིལ་འཁོར་ཕྱི་རིམ་ཁོར་ཡུག་ལ་གནས་པའི། །དབང་ཕྱུག་ཆེན་མོ་ཉི་ཤུ་རྩ་བརྒྱད་དང་། །ཚངས་པ་བརྒྱ་བྱིན་རྒྱལ་ཆེན་ཕྱོགས་སྐྱོང་བཅུ། །ལྷ་བརྒྱད་ཀླུ་བརྒྱད་གཟའ་བརྒྱད་ནོར་སྲུང་བརྒྱད། །རྒྱུ་སྐར་ཉི་ཤུ་རྩ་བརྒྱད་ལ་སོགས་པའི། །གཙང་རིས་དཔལ་མགོན་འཁོར་བཅས་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། རྒྱལ་བསྟན་དྲི་མེད་སྐྱོང་བར་ཞལ་བཞེས་པའི། །དཔལ་མགོན་ཕྱག་དྲུག་སྔགས་སྲུང་རལ་གཅིག་མ། །དུད་སོལ་ལྷ་མོ་གཟའ་བདུད་རཱ་ཧུ་ལ། །དམ་ཅན་རྡོར་ལེགས་བཙན་རྒོད་དྲག་པོ་རྩལ། །ཚེ་རིང་མཆེད་ལྔ་གནོད་སྦྱིན་མི་ཐུང་སོགས། །གཙོ་འཁོར་སྤྲུལ་པར་བཅས་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། བདེ་སྟོང་ཡེ་ཤེས་ཆེན་པོའི་རོལ་པ་ལས། །རང་བྱུང་རང་ཤར་མཆོད་པའི་སྤྲིན་ཆེན་པོ། །བླ་མེད་ལྷ་ཚོགས་དགྱེས་པ་སྐོང་བའི་རྫས། །ཕྱོགས་ཀྱི་འཁོར་ལོའི་ཁྱོན་ཀུན་འགེང་བ་འདིས། །རྩ་རྒྱུད་བླ་མ་རྣམས་ཀྱི་ཐུགས་དམ་བསྐང་། །ཡི་དམ་ཞི་ཁྲོ་རབ་འབྱམས་ཐུགས་དམ་བསྐང་། །མ་ཚོགས་མཁའ་འགྲོ་རྒྱ་མཚོའི་ཐུགས་དམ་བསྐང་། །དམ་ཅན་ཆོས་སྐྱོང་སྲུང་མའི་ཐུགས་དམ་བསྐང་། །བསྐང་དུ་མེད་དེ་སྐྱེ་མེད་དབྱིངས་སུ་བསྐང་། །སྦྱོར་དུ་མེད་དེ་ཟུང་འཇུག་ཆེན་པོར་སྦྱོར། །སྒྲོལ་དུ་མེད་དེ་མཉམ་ཉིད་ཀློང་དུ་སྒྲོལ། །ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །བདག་གི་ཉམས་ཆགས་སྡིག་སྒྲིབ་ཀུན་དག་ནས། །ནད་གདོན་བར་ཆད་རྐྱེན་རྣམས་ཞི་བ་དང་། །ཚེ་དབང་ལོངས་སྤྱོད་བསོད་ནམས་རྒྱས་པར་མཛོད། །ཁམས་གསུམ་སྲིད་གསུམ་མ་ལུས་དབང་དུ་སྡུས། །གནོད་བྱེད་དགྲ་བགེགས་འབྱུང་པོ་རྡུལ་དུ་རློགས། །མདོར་ན་ཡིད་ལ་གང་ལྟར་འདོད་པའི་དོན། །རྩོལ་བ་མེད་པར་ལྷུན་གྱིས་གྲུབ་པ་དང་། །རྡོ་རྗེ་འཛིན་གྱི་གོ་འཕང་མྱུར་ཐོབ་ནས། །མཁའ་མཉམ་འགྲོ་བའི་མགོན་དུ་འགྱུར་བར་ཤོག །ཞེས་བརྗོད་ཅིང་སྡོམ་གསུམ་ཉམས་ཆགས་བཤགས་པ་ཟག་མེད་བདུད་རྩིའི་ཁྲུས་བུམ་དང་ཡིག་བརྒྱ་བཟླའོ། །ཡིག་རྙིང་གཞིར་བཞག་ལ་མགོ་སྤྲུལ་པས་ཁ་བསྐང་བྱས་པ་དགེ་བར་གྱུར་ཅིག །སརྦ་མངྒ་ལཾ། གསང་བདག་རྡོ་རྗེ་གཏུམ་པོའི་སྒྲོལ་བ་དྲག་པོའི་ལས་རིམ།༄༅། གསང་བདག་རྡོ་རྗེ་གཏུམ་པོའི་སྒྲོལ་བ་དྲག་པོའི་ལས་རིམ་ཁྲིགས་སུ་བསྡེབས་པ་ཁྲོ་རྒྱལ་སྟོབས་འདུས་ཞེས་བྱ་བ་བཞུགས་སོ།། ༄༅། ཨོཾ་སྭ་སྟི། རབ་འབྱམས་རྒྱལ་བ་མ་ལུས་པའི། །མཐུ་སྟོབས་ནུས་བྱིན་འདུས་པའི་དཔལ། །གསང་བ་ཀུན་བདག་དཔའ་བོ་ཆེར། །མི་ལྡོག་དད་པས་ལེགས་བཏུད་ནས། །ལུང་རིག་གླིང་པའི་དགོངས་མཛོད་ལས། །ལེགས་འོང་གསང་འཛིན་སྒྲུབ་ཐབས་ཀྱི། །སྒྲོལ་བ་དྲག་པོའི་ལས་རིམ་རྣམས། །ལེགས་བཤད་རྣམས་ནས་བསྡུས་ཏེ་འབྲི། །དེ་ལ་འདིར་གཏུམ་པོའི་ཐུགས་སྒྲུབ་ལ་བརྟེན་ནས་དྲག་པོའི་ཕྲིན་ལས་ལ་འཇུག་པར་འདོད་པས། དབང་ཐོབ་བསྙེན་བསྒྲུབ་ཐེམས་ཤིང་དམ་ཚིག་དང་ལྡན་པས་ཚུལ་འདི་ལྟར་འཇུག་པར་བྱ་སྟེ། དེ་ཡང་ཡོ་བྱད་ཀྱི་བཤམས་ཚུལ་དང་། ཆོ་ག་དངོས་གཉིས་ལས། དང་པོ་ནི། དྲག་པོའི་ལས་དང་མཐུན་པའི་གནས་སུ། ལྕགས་སླང་སོགས་དྲག་པོར་འོས་པའི་སྣོད་གས་ཆག་མེད་པར་སྲིད་པའི་བྱེ་མའམ། ས་གཙང་མས་ལེགས་པར་བཀང་ཞིང་འདག་འཇལ་བྱས་པ་ལ་རོ་སོལ་གྱིས་བྱུགས་པའི་སྟེང་། མ་ཊཾ་རྒྱས་པའམ་ཆོས་འབྱུང་མཐིང་ནག་ནྲྀ་ཏྲིས་མཚན་པ་ཐོད་ར་དང་མེ་རི་བྲིས་པའི་སྟེང་དུ་འབྲུ་ནག་གི་བག་ཕྱེ་ཞིབ་པར་བཏག་པ་ལས། དབུས་སུ་དམར་གཏོར་གྲུ་གང་བ་ཞལ་དང་མེ་རིས་མཛེས་པ་བྱ། དེའི་མཐའ་སྐོར་དུ་དམར་གཏོར་ཆུང་ངུ་བཞི་དང་། དེ་མཐར་བཅུ་དང་། དེའི་ཕྱོགས་བཞིར་བཞི་སྟེ་ལྷ་གྲངས་ཀྱིས་བསྐོར། ཁྲག་ཕོར་སྐྱུ་གུ་མཚེ་ཡུངས་རྩང་སོགས་དང་། སྐུ་རྟེན་གྱི་ཙཀ་ལི། དར་རས་ནག་པོའི་ལྡིང་གུར་གྱིས་བརྒྱན་པ་བཤམས། དེ་མཐར་ཁྲག་གི་མཆོད་ཡོན་དང་ཞབས་བསིལ། དབང་པོ་ལྔའི་མེ་ཏོག ཚིལ་ཆེན་གྱི་བདུག་སྤོས། ཞུན་ཆེན་གྱི་མར་མེ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས། རྐང་གླིང་དང་ཐོད་པའི་རོལ་མོ་རྣམས་ཀྱིས་གཡོན་དུ་བསྐོར་ཞིང་། གཞན་ཡང་ཇི་ལྟར་བདེ་བའི་སྟེགས་ཀྱི་ཁར་རྩ་གསུམ་བསྲུང་མར་བཅས་པའི་གཏོར་ཚོགས་སྨན་རཀ་ཉེར་སྤྱོད་དང་བཅས་པ་རང་གཞུང་གི་བཅའ་ཤོམ་སྤྱི་དང་། བྲུབ་ཁུང་ལིང་ཀ་ཅན་དང་། ཕུར་བ་ཐུན་རྫས་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚོགས་པར་བྱའོ། །གཉིས་པ་ཆོ་ག་དངོས་ལ། སྦྱོར་བ་དངོས་གཞི། རྗེས་དང་གསུམ། དང་པོ་སྦྱོར་བའི་རིམ་པ་ནི། བླ་མ་བརྒྱུད་པའི་གསོལ་འདེབས་ནས་མཆོད་རྫས་བྱིན་གྱིས་བརླབས་པའི་བར་རོ། །གཉིས་པ་དངོས་གཞི་ལ་སྒྲུབ་པའི་ལས་རིམ་དང་། ལས་ལ་སྦྱོར་བ་གཉིས་ལས། དང་པོ་ལ་བདག་བསྐྱེད་ཏིང་འཛིན་རྣམ་གསུམ་ནས་སྤྱན་འདྲེན་ལ་ཐུག་གི་བར་དང་། མདུན་བསྐྱེད་ལ་དམིགས་ནས། ཨོཾ་སྭ་བྷ་ཝ་ཤུདྡྷ༴སོགས་ནས། ཤུདྡྷོ྅ཧཾ། ཆོས་ཐམས་ཅད་སྟོང་ཆེན་བློ་འདས་ཀ་དག་དོན་གྱི་དབྱིངས་སྤྲོས་པའི་མཐའ་བརྒྱད་དང་བྲལ་བར་གྱུར། །བཛྲ་མ་ཧཱ་ཀཱ་རུ་ཎི་ཀ་བོ་དྷི་ཙིཏྟ་ཛྙ་ན་ས་མ་ཏི་ཨཱ༔ ཞེས་བརྗོད་པས། ངོ་བོ་སྐྱེ་འགགས་མཐའ་དབུས་དང་བྲལ་བ་སྟོང་ཆེན་གཉུག་མའི་མཁའ་དབྱིངས་ལ། རང་བཞིན་དམིགས་པ་མེད་པའི་སྙིང་རྗེ་ཆེན་པོས་ཕྱོགས་དང་རིས་མེད་པར་སྙོམས་པར་བརྡལ་བར་གྱུར། མ་ཧཱ་ཙིཏྟ་བཛྲ་ཛྙཱ་ན་ཨེ་ཀ་ཏི་ལ་ས་མ་ཡཱ་ཧཱུྃ༔ རྣམ་པ་ཀུན་ལྡན་གྱི་སྟོང་པ་ཉིད་དང་མཆོག་ཏུ་མི་འགྱུར་བའི་བདེ་བ་ཆེན་པོ་ཟུང་དུ་འཇུག་པའི་རང་མདངས་ལས། རང་བྱུང་རིག་པའི་ངོ་བོ་ཧཱུྃ་ཡིག་སྔོན་པོ་ཡེ་ཤེས་ལྔའི་བདག་ཉིད་ཅན་གསལ་ལ་འཚེར་བ་ནམ་མཁའི་ཁམས་སུ་གནས་པར་གྱུར། དེ་ལས་ཨེཿཡཾཿརཾཿརཿསུཾཿཀེཾཿརྣམས་རིམ་པར་སྤྲོས་པ་སོ་སོར་ཡོངས་སུ་གྱུར་པ་ལས། ཨེཿལས་ནམ་མཁའི་དཀྱིལ་འཁོར་མཐིང་ནག་མཐའ་དབུས་མེད་པ། ཡཾཿལས་རླུང་གི་དཀྱིལ་འཁོར་ནག་པོ་སྲ་ཞིང་འཐས་པ། རཾ་ལས་མེའི་དཀྱིལ་འཁོར་དམར་པོ་ཚ་ཟེར་འབར་བ། རཿལས་རཀྟའི་རྒྱ་མཚོ་རྦ་ཀློང་འཁྱིལ་བ། སུཾ་ལས་བམ་ཆེན་གསར་རྙིང་གི་ས་གཞི་སྙོམ་པར་བརྡལ་བ་རྣམས་རིམ་པར་བརྩེགས་པ། དེའི་སྟེང་དུ་ཀེཾ་ལས་རུས་པའི་རི་རབ་གྲུ་བཞི་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་སྟེང་དུ། ཧཱུྃ་ལས་སླར་ཡང་པཾ་འཕྲོས་ལས་པདྨ་འདབ་མ་སྟོང་ལྡན་གྱི་དབུས་སུ་སྣ་ཚོགས་རྡོ་རྗེའི་ལྟེ་བར་བྷྲུཾཿའཕྲོས་པ་ལས་གནས་མཆོག་ལྗང་ལོ་ཅན་གྱི་ཕོ་བྲང་ཆེན་པོ་ཡངས་ཤིང་རྒྱ་ཆེ་ལ་དཔང་མཐོ་བ། ཕྱི་རིན་པོ་ཆེ་སྣ་ཚོགས་ཀྱི་གཞལ་ཡས་ཁང་གྲུ་བཞི་སྒོ་བཞི་པ། རྒྱན་རྟ་བབས་ཆོས་འཁོར་རི་དྭགས་གདུགས་དང་རྒྱལ་མཚན་ཉི་ཟླ་ནོར་བུའི་ཏོག་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ། ནང་དུར་ཁྲོད་འབར་བའི་གཞལ་ཡས་ཁང་ཆེན་པོ་ཐོད་པ་སྐམ་རློན་གྱི་རྩིགས་པ་ལ་གནམ་ལྕགས་ཀྱི་གཟེར་ཆེན་བཏབ་པ། རུས་སྦལ་གྱི་ཀ་གདན། ལྷ་བརྒྱད་ཀྱི་ཀ་བ། ཀླུ་བརྒྱད་ཀྱི་གདུང་མ། གཟའ་བརྒྱད་ཀྱི་ཀ་ཞུ། རྒྱུ་སྐར་ཉེར་བརྒྱད་ཀྱི་དྲལ་ཕྱམ། ཞིང་ཆེན་གྱི་ཐོག་ཕེབ། ཐོད་སྐམ་ཀྱི་ཁ་པད། མི་རོའི་རྒྱལ་མཚན། ཀེང་རུས་ཀྱི་འཕན་གདུགས། རྒྱུ་མའི་དྲྭ་བ་དང་དྲྭ་ཕྱེད། ཙིཏྟའི་ཕོ་ལུང་། རྡོ་རྗེའི་ཡ་ཐེམ་དང་མ་ཐེམ། གནམ་ལྕགས་འབར་བའི་སྒོ་ལེབ། ཉི་ཟླའི་ཡག་ཤིང་། རྡོ་རྗེ་སྔོན་པོའི་ཏོག་དང་བཅས་པའི་ནང་དབུས་སུ། གནམ་ལྕགས་ཀྱི་འཁོར་ལོ་རྩིབས་བཅུ་པའི་ལྟེ་བར་སླར་ཡང་རྡོ་རྗེའི་རང་བཞིན་འཁོར་ལོ་སྔོན་པོ་རྩིབས་བཞི་པ། དེའི་ལྟེ་བར་མཐིང་ནག་གྲུ་གསུམ་འབར་བའི་དབུས་སུ། པཾ་ལས་པདྨ་དང་། ཨ་ལས་ཟླ་བ། མ་ལས་ཉི་མའི་དཀྱིལ་འཁོར་རྣམས་རིམ་པར་བརྩེགས་པའི་གདན་ལ། དྲེགས་པ་ཕོ་མོ་བསྣོལ་བའི་སྟེང་དུ་ནམ་མཁར་གནས་པའི་ཧཱུྃ་ཡིག་དེ་ཉིད། ཨོཾ་བཛྲ་པཱ་ཎི་ཙཎྚ་མ་ཧཱ་རོ་ཥ་ཎ་ཧཱུྃ་ཧཱུྃ་ཕཊཿཅེས་སྔགས་ཀྱི་སྒྲ་གདངས་དང་བཅས་ཏེ་བབས་པ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་པར་གྱུར། དེ་ལས་འོད་ཟེར་དཔག་ཏུ་མེད་པ་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་མཆོད་ཅིང་ཐུགས་དམ་གྱི་རྒྱུད་བསྐུལ། མཐུ་སྟོབས་ནུས་བྱིན་མ་ལུས་པ་འོད་ཟེར་སྔོན་པོའི་རྣམ་པར་བསྡུས་ཏེ་ཧཱུྃ་ལ་ཐིམ། སླར་ཡང་འོད་ཟེར་དང་ཁྲོ་མཚོན་མེ་དཔུང་གི་ཚོགས་བསམ་གྱིས་མི་ཁྱབ་པ་འཕྲོས། དངོས་གྲུབ་ལ་བར་དུ་གཅོད་པའི་དགྲ་བགེགས་ཐམས་ཅད་ཚར་བཅད། སེམས་ཅན་མ་ལུས་པའི་སྡིག་སྒྲིབ་སྦྱངས། ཐམས་ཅད་གསང་བའི་བདག་པོའི་གོ་འཕང་ལ་བཀོད། འོད་ཟེར་ཚུར་འདུས་རྡོ་རྗེ་ཧཱུྃ་དང་བཅས་པ་ལ་ཐིམ། དེ་ཡོངས་སུ་གྱུར་པ་ལས། ཕྱོགས་བཅུ་དུས་གསུམ་གྱི་རྒྱལ་བ་སྲས་བཅས་མ་ལུས་པའི་མཐུ་སྟོབས་གཅིག་ཏུ་བསྡུས་པའི་བདག་ཉིད་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། སྨ་ར་དང་སྨིན་མ་དུས་མཐའི་མེ་ལྟར་འབར་ཞིང་། དབུ་སྐྲ་ཁམ་སེར་གྱེན་དུ་བརྫེས་ཤིང་སྦྲུལ་གྱིས་བཅིངས་པ། རིགས་བདག་མི་བསྐྱོད་པ་སྔོན་པོ་ལོངས་སྐུའི་ཆ་བྱད་ཅན་གྱིས་དབུ་ལ་བརྒྱན་པ། ཕྱག་གཡས་གནམ་ལྕགས་ཀྱི་རྡོ་རྗེ་རྩེ་དགུ་པ་ནམ་མཁའ་ལ་ཕྱར་ཞིང་། གཡོན་པས་སྡིག་མཛུབ་ཀྱིས་ལོག་འདྲེན་དུག་སྦྲུལ་གྱི་གཟུགས་བཟུང་ནས་ཞལ་དུ་གསོལ་བ། སྒེག་པ་ལ་སོགས་པ་འབར་བའི་གར་དགུ་དང་ལྡན་པ། ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ། གླང་ཆེན་གྱི་ཀོ་རློན། སྟག་ལྤགས་ཀྱི་ཤམས་ཐབས། ཞིང་ལྤགས་ཀྱི་སྐེད་དཀྲིས། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྦྲུལ་རིགས་ལྔའི་ཡན་ལག་གི་རྒྱན་སོགས་ཤིན་ཏུ་འཇིགས་པའི་ཆས་ཐམས་ཅད་ཀྱིས་བརྒྱན་ཅིང་། ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་ཞབས་གཉིས་གཡས་བསྐུམ་པའི་སྟབས་ཀྱིས་བཞུགས་པ། ཁམས་གསུམ་སྲིད་པ་གསུམ་ལས་རྣམ་པར་རྒྱལ་བ། འཇིག་རྟེན་གསུམ་པོས་བལྟ་བར་ཡང་མི་བཟོད་པའི་སྐུ་ཅན་དུ་གྱུར། དེའི་སྤྱི་བོར་ཟླ་བ་ལ་གནས་པའི་ཨོཾ་ཡིག་དཀར་པོ་ལས་དུས་གསུམ་གྱི་རྒྱལ་བ་མ་ལུས་པའི་སྐུའི་སྤྲུལ་པ་བུདྡྷ་རིགས་ཀྱི་བྱ་ཁྱུང་དཀར་པོ། མགྲིན་པར་པདྨ་དམར་པོ་ཨཱཿས་མཚན་པ་ལས་གསུང་གི་སྤྲུལ་པ་པདྨ་རིགས་ཀྱི་བྱ་ཁྱུང་དམར་པོ། ཐུགས་ཀར་རྡོ་རྗེ་སྔོན་པོ་ཧཱུྃ་གིས་མཚན་པ་ལས་ཐུགས་ཀྱི་སྤྲུལ་པ་རྡོ་རྗེ་རིགས་ཀྱི་བྱ་ཁྱུང་མཐིང་ནག ལྟེ་བར་རིན་པོ་ཆེ་སྭཱ་ཡིག་གིས་མཚན་པ་ལས་ཡོན་ཏན་གྱི་སྤྲུལ་པ་རིན་ཆེན་རིགས་ཀྱི་བྱ་ཁྱུང་སེར་པོ། གསང་བར་སྣ་ཚོགས་རྡོ་རྗེ་ཧས་མཚན་པ་ལས་ཕྲིན་ལས་ཀྱི་སྤྲུལ་པ་ལས་ཀྱི་རིགས་ཀྱི་བྱ་ཁྱུང་ལྗང་གུ། ཀུན་ཀྱང་གནམ་ལྕགས་རྡོ་རྗེའི་རྭ་དང་མཆུ་སྡེར་རྣོ་ཞིང་མེ་ཡི་ཚ་ཚྭ་འཕྲོ་བ། གཡས་རྣམས་འཁོར་ལོ། པདྨ། རྡོ་རྗེ། རིན་ཆེན། རལ་གྲི་རྣམས་བསྣམས་ཤིང་། གཡོན་རྣམས་ཀླུ་རིགས་ལྔའི་ངོ་བོ་སྦྲུལ་ཆེན་ལྔ་བཟུང་ནས་ཞལ་དུ་གསོལ་བ། སྐུ་ལས་རང་དང་འདྲ་བའི་བྱ་ཁྱུང་རིགས་ལྔ་གྲངས་མེད་འཕྲོ་ཞིང་དྲེགས་པ་མ་ལུས་འཇོམས་ཤིང་འཇིགས་པར་མཛད་པའོ། །དེའི་ཕྱི་རོལ་ཕྱོགས་བཞིར་འཁོར་ལོའི་རྩིབས་ལ་གཙོ་བོའི་ཐུགས་ཀ་ནས་ཧཱུྃ་ཡིག་དཀར་སེར་དམར་ལྗང་བཞི་འཕྲོས་པ་ཡོངས་སུ་གྱུར་པ་ལས། ཤར་དུ་རྡོ་རྗེ་གཏུམ་པོ། ལྷོར་རིན་ཆེན་གཏུམ་པོ། ནུབ་ཏུ་པདྨ་གཏུམ་པོ། བྱང་དུ་ཀརྨ་གཏུམ་པོ་རྣམས་ཕྱོགས་ཀྱི་མདོག་ཅན། ཞལ་གཅིག་ཕྱག་གཉིས་སྤྱན་གསུམ་པ། གཡས་རྣམས་རྡོ་རྗེ་རིན་ཆེན་པདྨ་རྒྱ་གྲམ། གཡོན་རྣམས་རང་རྟགས་ཀྱིས་ཡུ་བ་བྱས་པའི་དྲིལ་བུ་བསྣམས་པ། ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་ཤིང་། ཡེ་ཤེས་ཀྱི་མེ་དཔུང་འབར་བའི་དབུས་ན། པད་ཉི་དྲེགས་པའི་གདན་ལ་ཞབས་གཉིས་གཡོན་བརྐྱང་བའི་སྟབས་ཀྱིས་བཞུགས་པའོ། དེའི་ཕྱི་རོལ་འཁོར་ལོ་རྩིབས་བཅུར་པད་ཉི་ཕྱོགས་སྐྱོང་ཕོ་མོ་བསྣོལ་བའི་གདན་ལ། གཙོ་བོའི་ཐུགས་ཀ་ནས་ཧཱུྃ་མཐིང་ནག་བཅུ་འཕྲོས་པ་སོ་སོར་ཡོངས་སུ་གྱུར་པ་ལས། ཤར་སྟོད་དུ་ཁྲོ་བོ་ཆེན་པོ་ཧཱུྃ་ཀ་ར། ཤར་སྨད་དུ་རྣམ་པར་རྒྱལ་བ། ཤར་ལྷོར་དབྱུག་སྔོན་ཅན། ལྷོར་གཤིན་རྗེ་གཤེད་པོ། ལྷོ་ནུབ་ཏུ་མི་གཡོ་མགོན་པོ། ནུབ་སྟོད་དུ་རྟ་མགྲིན། ནུབ་སྨད་དུ་སྟོབས་པོ་ཆེ་། ནུབ་བྱང་དུ་གཞན་གྱིས་མི་ཐུབ་པ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། ཐམས་ཅད་ཀྱང་སྐུ་མདོག་མཐིང་ནག ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་རྡོ་རྗེ་དང་གཡོན་སྡིག་མཛུབ་མཛད་པ། སྟག་ཤམ་དང་སྦྲུལ་ཆུན་ལ་སོགས་ཁྲོ་བོའི་ཆས་ཐམས་ཅད་ཀྱིས་བརྒྱན་ཅིང་། ཞབས་གཉིས་འདོར་སྟབས་ཀྱིས་མེ་དཔུང་འབར་བའི་ཀློང་ན་བཞུགས་པའོ། །སླར་ཡང་གཙོ་བོའི་ཐུགས་ཀ་ནས་ཛཿཧཱུྃ་བཾ་ཧོཿབཞི་འཕྲོས་པ་ལས་གཞལ་ཡས་ཁང་གི་སྒོ་བཞིར་པད་ཉིའི་གདན་ལ། ཤར་སྒོར་རྣམ་པར་རྒྱལ་བ། ལྷོ་སྒོར་གཤིན་རྗེ་གཤེད། ནུབ་སྒོར་རྟ་མགྲིན། བྱང་སྒོར་བདུད་རྩི་འཁྱིལ་བ་རྣམས་ཕྱོགས་ཀྱི་མདོག་ཅན། གཡས་རྡོ་རྗེ་རིན་ཆེན་པདྨ་རྒྱ་གྲམ་རྣམས་ཀྱིས་མཚན་པའི་དབྱུག་པ་ཕྱར་ཞིང་། གཡོན་རྣམས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་རྣམས་འཛིན་པ། ཁྲོ་བོའི་རྒྱན་དང་ཆ་ལུགས་རྫོགས་པའོ། །གཞལ་ཡས་ཁང་གི་ཁྱམས་ལ་དབང་ཕྱུག་མ་ཉི་ཤུ་རྩ་བརྒྱད་དང་། དཔལ་མགོན་བདུན་ཅུ་རྩ་ལྔ་ལ་སོགས་པ་སྤྲུལ་པ་དང་ཡང་སྤྲུལ་གྱི་འཁོར་ཚོགས་བསམ་གྱིས་མི་ཁྱབ་པས་བསྐོར་བ། ཐམས་ཅད་ཀྱང་ཕྲིན་ལས་རྣམ་པ་བཞི་སྒྲུབ་པ་ལ་མངའ་བརྙེས་པའི་ཚུལ་ཅན་ནོ། །བདག་མདུན་གྱི་ལྷ་ཚོགས་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱ༔དམར་པོ། ཐུགས་ཀར་ཧཱུྃ་སྔོན་པོ། དེ་ལས་འོད་ཟེར་འཕྲོས་པས་བྱང་ཕྱོགས་ལྕང་ལོ་ཅན་གྱི་ཕོ་བྲང་ནས་དཔལ་གསང་བའི་བདག་པོའི་དཀྱིལ་འཁོར་གྱི་ལྷ་ཚོགས་རྣམས་དང་། གཞན་ཡང་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་གསང་བདག་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་སྤྱན་དྲངས་བར་བསམ་ལ། ཨོཾ་བཛྲ་པཱ་ཎི་ས་པཱ་རི་ཝ་ར་བཛྲ་ས་མཱ་ཡ་ཛ་ཛཿ ཞེས་བརྗོད། སྤོས་རོལ་དབྱངས་དང་བཅས་ཏེ་གཞུང་གི་སྤྱན་འདྲེན་ནས་བཟུང་སྟེ། བསྙེན་སྒྲུབ་ཀྱི་བཟླས་དམིགས་བར་བྱས་ལ། ལས་སྦྱོར་གྱི་སྐབས་སུ་རང་ཉིད་ཅེས་པར། བདག་མདུན་ལྷ་ཡི་སོགས་སྦྱོར་ལ། རྩ་སྔགས་སྤྱི་འདུལ་གྱི་ཤམ་བུ་ཅན་དང་། ཁྲོ་བཅུ། ཁྱུང་ལྔ། སྒོ་སྲུང་གི་སྔགས་རྣམས་རིམ་པར་བཟླ་བའམ། སྤྲོས་པ་ལ་དགའ་ན་བཟླས་དམིགས་བྱེ་བྲག་ཏུ་བྱ་བ་ནི། བདག་མདུན་གསང་བདག་རྡོ་རྗེ་འཆང་། །གཏུམ་པོ་རིགས་ལྔའི་ཐུགས་ཀ་རུ། །རྡོ་རྗེ་མཐིང་ནག་ཚོན་གང་བའི། །ལྟེ་བར་ཉི་མའི་དལ་གྱི་སྟེང་། །ཧཱུྃ་ཡིག་མཐིང་གའི་མཐའ་བསྐོར་དུ། །སྔགས་ཕྲེང་སྤུ་ཤད་ཙམ་གྱིས་བསྐོར། །བཟླས་པས་འོད་ཟེར་ཁྲོ་ཆུང་མཚོན། །ཡེ་ཤེས་མེ་ཡི་ཚ་ཚྭ་འཕྲོས། །གཟུགས་ཅན་དགྲ་དང་གཟུགས་མེད་བགེགས། །སྡེ་བརྒྱད་ལོག་འདྲེན་བྱད་ཕུར་དཔུང་། །བསྟན་དང་འགྲོ་ལ་གནོད་པའི་རིགས། །ལུས་གདོན་གློ་བུར་གདོན་དང་བཅས། །རྩྭ་སྦུར་མེ་ལ་བསྲེགས་པ་བཞིན། །མིང་མེད་རྡུལ་དུ་བརླག་ནས་ཀྱང་། །ཆོས་ཉིད་སྟོང་པའི་ངང་མདངས་སུ། །རང་བབས་ཆེན་པོའི་གནས་ལུགས་བསྐྱངས། །ཨཱོྃ་བཛྲ་ཙཎྚ་མ་ཧཱ་རོ་ཥ་ཎ་ཧཱུྃ་ཕཊ༔ ཨཱོྃ་བཛྲ་ཙཎྚ་སརྦ་དུཥྚཾ་ད་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཅེས་བརྒྱ་རྩ་བརྒྱད་བཟླའོ། །དེ་ནས། བདག་མདུན་གསང་བདག་ཐུགས་ཀ་ནས། །འོད་ཟེར་མཐིང་ནག་ཕྱོགས་བཅུར་འཕྲོས། །ཁྲོ་རྒྱལ་བཅུ་ཡི་ཐུགས་རྒྱུད་བསྐུལ། །སོ་སོའི་ཐུགས་ལས་འོད་འཕྲོས་པས། །བགེགས་ཀྱི་གཙོ་བོ་ཕྱོགས་སྐྱོང་བཅུ། །བཀུགས་ཤིང་ཞབས་ཀྱི་འོག་ཏུ་མནན། །ཕྱོགས་བཅུའི་དགྲ་བགེགས་དམ་སྲིའི་དཔུང་། །གནོད་ཅིང་གདུག་པའི་བསམ་སྦྱོར་ཅན། །མ་ལུས་ལྷག་མེད་མཐར་བྱས་ནས། །ཆོས་དབྱིངས་ཀློང་དུ་བསྒྲལ་བར་བསམ། ། ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཨོཾ་བཛྲ་ཀྲོ་ཏ་བཱི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཨོཾ་བཛྲ་ཀྲོ་ཏ་ནི་ལ་ཏནྟྲ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྚ་ལི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་མ་ཧཱ་བྷ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ ཞེས་པ་རྣམས་རེ་རེར་ལྔ་བཅུ་སོགས་བཟླས་ལ། དཔལ་ཆེན་ཡང་དག་ཧེ་རུ་ཀའི། །སྐུ་གསུང་ཐུགས་ཡོན་ཕྲིན་ལས་ལས། །གདུག་པ་འདུལ་ཕྱིར་སྤྲུལ་པའི་སྐུ། །ཡེ་ཤེས་ཁྱུང་ཆེན་རིགས་ལྔ་ཡི། །ཐུགས་ཀར་རང་སྲོག་ས་བོན་མཐར། །སོ་སོའི་སྔགས་ཀྱིས་བསྐོར་བ་ལས། །འོད་ཟེར་ཁྱུང་དང་མཚོན་ཆ་མེ། །དཔག་མེད་སྟོང་གསུམ་གང་བར་འཕྲོས། །གནོད་ཅིང་འཚེ་བའི་དགྲ་བགེགས་སྤྱི། །ཁྱད་པར་ཀླུ་གཉན་ས་བདག་ལས། །བྱུང་བའི་ནད་གདོན་བར་གཅོད་རྣམས། །ན་བུན་རླུང་གིས་གཏོར་བ་བཞིན། །སྟོང་ཆེན་ཡུམ་ལྔའི་ཀློང་དུ་བཅོམ། །ཞེས་བསམ་ལ། ཨཱོྃ་བུདྡྷ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊཿ ཅེས་དང་། དེ་བཞིན་དུ། བཛྲ། རཏྣ། པདྨ། ཀརྨ་སོགས་ནས་ཧཱུྃ་ཕཊ༔ ཅེས་སོ་སོར་ཅི་ནུས་བཟླས། སླར་ཡང་དཔལ་ཆེན་ཐུགས་ཀ་ནས། །འོད་ཟེར་དཀར་སེར་དམར་མཐིང་བཞི། །འཕྲོས་པས་སྒོ་སྐྱོང་ཐུགས་རྒྱུད་བསྐུལ། །སོ་སོའི་སྔོན་གྱི་དམ་བཅས་ལྟར། །ཞི་རྒྱས་དབང་དྲག་ཕྲིན་ལས་ཀྱིས། །བདག་ཅག་རྣལ་འབྱོར་སྒྲུབ་པ་པོའི། །ཇི་ལྟར་རེ་ཞིང་སྨོན་པའི་དོན། །གེགས་མེད་ཡིད་བཞིན་བསྒྲུབ་པར་དམིགས། །ཛཿཧཱུྃ་བཾ་ཧོ༔ །ཉེར་གཅིག་སོགས་བཟླའོ། །གཞན་ཡང་གཉན་སྔགས་སྲོག་གི་སྤུ་གྲི་དང་། ལས་སྔགས་མེ་དཔུང་མ་སོགས་ཀྱང་སྤྲོ་ན་འདིར་བྱ། བཟླས་པའི་མཇུག་ཏུ་ལས་བཞིའི་སྔགས་ཤམ་དང་། དབྱངས་གསལ། ཡིག་བརྒྱ། རྟེན་འབྲེལ་སྙིང་པོ་རྣམས་ལན་གསུམ་གསུམ་སོགས་བཟླས་མཐར། མཆོད་པ་ཉུང་བསྡུས་སུ་བྱ་བ་ནི། ཧཱུྃ་ཧཱུྃ༔ གསང་བདག་དཀྱིལ་འཁོར་ལྷ་ཚོགས་ལ། །འདོད་ཡོན་མ་སྤངས་ཕྱི་མཆོད་འབུལ། །ཉོན་མོངས་མ་སྤངས་ནང་མཆོད་འབུལ། །འདུ་འབྲལ་མེད་པའི་གསང་མཆོད་འབུལ། །དཀྱིལ་འཁོར་ལྷ་ཚོགས་མཉེས་གྱུར་ཅིག །ཨཱོྃ་བཛྲ་པཱ་ཎི་ས་པཱ་རི་ཝ་ར་ཨརྒྷཾ་སོགས་ནས་ཤཔྟ་མ་ཧཱ་པུཙྪ་ཧོ། བསྟོད་པ་ནི། ཧཱུྃ་ཧཱུྃ༔ ཆོས་སྐུ་སྤྲོས་མེད་མཁའ་དབྱིངས་ལས། །གཟུགས་སྐུ་རྡོ་རྗེ་གཏུམ་པོར་ཤར། །བདུད་བཞི་འདུལ་མཛད་ཁྲོ་བོའི་རྒྱལ། །གསང་བའི་བདག་པོར་ཕྱག་འཚལ་བསྟོད། །གཏུམ་པོ་རིགས་བཞི་ཁྱུང་ཆེན་ལྔ། །ཁྲོ་བཅུ་ཡབ་ཡུམ་སྒོ་སྐྱོང་བཞི། །དབང་ཕྱུག་དམ་ཅན་བསྲུང་མར་བཅས། །ཡོངས་རྫོགས་དཀྱིལ་འཁོར་ལྷ་ལ་བསྟོད། །ཅེས་སོགས་ཀྱིས་བསྟོད་ཅིང་དཀྱུས་བཞིན་དངོས་གྲུབ་བླངས། དེ་ནས་སྤྱི་དང་སྒོས་ཀྱི་བཀའ་གཏེར་སྲུང་མ་རྣམས་ཀྱི་གཏོར་ཆོག་ལག་ལེན་བཞིན་ཕུལ་ལ། ཚོགས་ཀྱི་ཡོ་བྱད་ཅི་འབྱོར་འདུ་བར་བྱས་ནས་གཞུང་བཞིན་བྱིན་རླབས་ནས་བཟུང་། ཚོགས་བར་བ་ཡན་གྲུབ་པར་བྱས་ལ། དེ་ནས་ལྷ་ཚོགས་རྣམས་ཀྱི་ཐུགས་དམ་སྐོང་བའི་ལས་རིམས་ལ་བརྩོན་པར་བྱ་སྟེ། དེ་ཡང་བསྐང་རྫས་རྣམས་ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབས་ལ། གདུངས་དབྱངས་རོལ་མོ་བཅས་པས་འདི་བཞིན་བྱའོ།། ཧཱུྃ་ཧཱུྃ། ཆོས་དབྱིངས་སྐྱེ་མེད་སྤྲོས་བྲལ་ངང་ཉིད་ལས། །འགགས་མེད་སྒྱུ་འཕྲུལ་གར་གྱིས་རྣམ་རོལ་བའི། །བླ་མ་ཡི་དམ་མཁའ་འགྲོ་ཆོས་སྐྱོང་ཚོགས། །རང་བཞིན་དབྱིངས་ནས་བསྐང་བའི་གནས་འདིར་གཤེགས། །ཚོགས་ཁང་གཞལ་ཡས་འདི་ལ་བརྟན་པར་བཞུགས། །ཕྱི་ནང་གསང་གསུམ་བསྐང་རྟེན་རྫས་ཀྱིས་མཆོད། །ལུས་ངག་ཡིད་གསུམ་དད་གུས་ལྡན་པས་བསྟོད། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཧཱུྃ་ཧཱུྃ། སྐུ་གསུམ་ཞིང་ནས་འགྲོ་དོན་སྐུར་སྣང་བ། །ཀུན་བཟང་རིགས་ལྔ་གསང་བདག་པདྨ་འབྱུང་། །མཚོ་རྒྱལ་མངའ་བདག་རླངས་ཆེན་དཔལ་སེང་དང་། །དཔལ་གྱི་དབང་ཕྱུག་ཀླུ་དབང་ལུང་རིག་གླིང་། །རིག་འཛིན་བཟང་པོ་མ་ཏིའི་མཚན་ཅན་སོགས། །དྲིན་ཆེན་རྩ་རྒྱུད་བླ་མའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི་དམ་རྫས་ནི། །དངོས་འབྱོར་ཡིད་སྤྲུལ་ཕྱི་ནང་གསང་མཆོད་ཚོགས། །བསྐང་རྫས་སྒྲུབ་རྫས་རྟེན་རྫས་སྣ་ཚོགས་དང་། །བདུད་རྩི་སྨན་དང་རཀྟ་བྷ་ལིང་ཏ། །འདོད་ཡོན་ལོངས་སྤྱོད་བཟའ་བཏུང་ཚོགས་འཁོར་སོགས། །རབ་འབྱམས་ནམ་མཁའི་ཁྱོན་ཀུན་ཡོངས་བཀང་བའི། །རྨད་བྱུང་མཆོད་སྤྲིན་རྒྱ་མཚོས་ཐུགས་དམ་བསྐང་། །ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ། །ཧཱུྃ་ཧཱུྃ། གནས་མཆོག་ལྕང་ལོ་ཅན་གྱི་ཕོ་བྲང་ནས། །རྒྱལ་བ་ཀུན་གྱི་ཕྲིན་ལས་གཅིག་བསྡུས་པའི། །གསང་སྔགས་རིགས་སྔགས་ཀུན་གྱི་མངའ་བདག་རྗེ། །བདུད་སྡེ་དཔུང་འཇོམས་ལོག་འདྲེན་ཚར་གཅོད་པའི། །བཅོམ་ལྡན་དཔལ་ཆེན་ཁྲོ་བོ་ཡོངས་ཀྱི་རྒྱལ། །གསང་བདག་རྡོ་རྗེ་འཛིན་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཁྲོ་རྒྱལ་ཆེན་པོའི་སྐུ་ཡི་གནས་ལྔ་ནས། །སྐུ་གསུང་ཐུགས་ཡོན་ཕྲིན་ལས་སྤྲུལ་པའི་ཁྱུང་། །དཀར་སེར་དམར་ལྗང་མཐིང་མདོག་ཀླུ་རིགས་གསོལ། །ས་བདག་ཀླུ་གཉན་དྲེགས་པའི་སྲོག་སྙིང་འདྲེན། །དུག་ལྔའི་གདོན་ཚོགས་ཡེ་ཤེས་ལྔར་སྒྲོལ་བའི། །བྱ་ཁྱུང་རིགས་ལྔའི་ཚོགས་ཀྱི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཔལ་ཆེན་ཁྲོ་རྒྱལ་ཐུགས་ཀྱི་སྤྲུལ་པ་ལས། །ཕྱོགས་བཞིའི་འཁོར་ལོ་འབར་བའི་རྩིབས་སྟེང་དུ། །པད་ཉི་དྲེགས་པ་ཕོ་མོ་བསྣོལ་བའི་ཁར། །ཉོན་མོངས་བདུད་བཞི་འཇོམས་མཛད་ཡེ་ཤེས་སྐུ། །ཁྲོ་བོ་ཆས་རྫོགས་རང་རྟགས་ཕྱག་རྒྱ་བསྣམས། །གསང་བདག་གཏུམ་པོ་རིགས་བཞིའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། ཕྱོགས་བཅུའི་དྲེགས་པ་ཕོ་མོའི་གདན་སྟེང་ནས། །བདུད་དཔུང་འཇོམས་མཛད་ཡེ་ཤེས་ཁྲོ་བོའི་སྐུ། །ཧཱུྃ་དཀར་རྣམ་རྒྱལ་དབྱུག་སྔོན་གཤིན་རྗེ་གཤེད། །མི་གཡོ་རྟ་མགྲིན་འདོད་རྒྱལ་བདུད་རྩི་འཁྱིལ། །ཁམས་གསུམ་རྣམ་རྒྱལ་སྟོབས་ཆེན་ཁྲོ་བོ་བཅུ། །མ་ལུས་འཁོར་དང་བཅས་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། གཞལ་ཡས་ཆེན་པོའི་ཕྱོགས་བཞིའི་སྒོ་བཞི་ནས། །བདུད་བཞི་འདུལ་མཛད་ཏ་ཀྲྀཏ་སྒོ་བ་བཞི། །ཁྲོ་བོའི་ཆ་ལུགས་དཀར་སེར་དམར་ལྗང་མདོག །རིགས་རྒྱ་གཡས་དང་རང་རྟགས་གཡོན་ན་བསྣམས། །ཞི་རྒྱས་དབང་དྲག་ཕྲིན་ལས་སྒྲུབ་པའི་ལྷ། །རང་རང་སྤྲུལ་འཁོར་བཅས་པའི་ཐུགས་དམ་བསྐང་། ། ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། དཀྱིལ་འཁོར་ཕྱི་རིམ་ཁོར་ཡུག་ལ་གནས་པའི། །དབང་ཕྱུག་ཆེན་མོ་ཉི་ཤུ་རྩ་བརྒྱད་དང་། །ཚངས་པ་བརྒྱ་བྱིན་རྒྱལ་ཆེན་ཕྱོགས་སྐྱོང་བཅུ། །ལྷ་བརྒྱད་ཀླུ་བརྒྱད་གཟའ་བརྒྱད་ནོར་སྲུང་བརྒྱད། །རྒྱུ་སྐར་ཉི་ཤུ་རྩ་བརྒྱད་ལ་སོགས་པའི། །གཙང་རིས་དཔལ་མགོན་འཁོར་བཅས་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། རྒྱལ་བསྟན་དྲི་མེད་སྐྱོང་བར་ཞལ་བཞེས་པའི། །དཔལ་མགོན་ཕྱག་དྲུག་སྔགས་སྲུང་རལ་གཅིག་མ། །དུད་སོལ་ལྷ་མོ་གཟའ་བདུད་རཱ་ཧུ་ལ། །དམ་ཅན་རྡོར་ལེགས་བཙན་རྒོད་དྲག་པོ་རྩལ། །ཚེ་རིང་མཆེད་ལྔ་གནོད་སྦྱིན་མི་ཐུང་སོགས། །གཙོ་འཁོར་སྤྲུལ་པར་བཅས་པའི་ཐུགས་དམ་བསྐང་། །ཁྱེད་རྣམས་ཐུགས་དམ་བསྐང་བའི༴སོགས་ནས། དངོས་གྲུབ་སྩོལ། །ཧཱུྃ་ཧཱུྃ། བདེ་སྟོང་ཡེ་ཤེས་ཆེན་པོའི་རོལ་པ་ལས། །རང་བྱུང་རང་ཤར་མཆོད་པའི་སྤྲིན་ཆེན་པོ། །བླ་མེད་ལྷ་ཚོགས་དགྱེས་པ་སྐོང་བའི་རྫས། །ཕྱོགས་ཀྱི་འཁོར་ལོའི་ཁྱོན་ཀུན་འགེང་བ་འདིས། །རྩ་རྒྱུད་བླ་མ་རྣམས་ཀྱི་ཐུགས་དམ་བསྐང་། །ཡི་དམ་ཞི་ཁྲོ་རབ་འབྱམས་ཐུགས་དམ་བསྐང་། །མ་ཚོགས་མཁའ་འགྲོ་རྒྱ་མཚོའི་ཐུགས་དམ་བསྐང་། །དམ་ཅན་ཆོས་སྐྱོང་སྲུང་མའི་ཐུགས་དམ་བསྐང་། །བསྐང་དུ་མེད་དེ་སྐྱེ་མེད་དབྱིངས་སུ་བསྐང་། །སྦྱོར་དུ་མེད་དེ་ཟུང་འཇུག་ཆེན་པོར་སྦྱོར། །སྒྲོལ་དུ་མེད་དེ་མཉམ་ཉིད་ཀློང་དུ་སྒྲོལ། །ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །བདག་གི་ཉམས་ཆགས་སྡིག་སྒྲིབ་ཀུན་དག་ནས། །ནད་གདོན་བར་ཆད་རྐྱེན་རྣམས་ཞི་བ་དང་། །ཚེ་དབང་ལོངས་སྤྱོད་བསོད་ནམས་རྒྱས་པར་མཛོད། །ཁམས་གསུམ་སྲིད་གསུམ་མ་ལུས་དབང་དུ་སྡུས། །གནོད་བྱེད་དགྲ་བགེགས་འབྱུང་པོ་རྡུལ་དུ་རློགས། །མདོར་ན་ཡིད་ལ་གང་ལྟར་འདོད་པའི་དོན། །རྩོལ་བ་མེད་པར་ལྷུན་གྱིས་གྲུབ་པ་དང་། །རྡོ་རྗེ་འཛིན་གྱི་གོ་འཕང་མྱུར་ཐོབ་ནས། །མཁའ་ཁྱབ་འགྲོ་བའི་མགོན་དུ་འགྱུར་བར་ཤོག །ཞེས་བརྗོད་ཅིང་སྡོམ་གསུམ་ཉམས་ཆགས་བཤགས་པ་ཟག་མེད་བདུད་རྩིའི་ཁྲུས་བུམ་དང་ཡིག་བརྒྱ་བཟླའོ། །དེ་ཡན་ཆད་ཀྱིས་སྒྲུབ་པའི་ལས་རིམ་རྣམས་རེ་ཞིག་གྲུབ་ནས། ༧ གཉིས་པ་ལས་སྦྱོར་དངོས་ལ་འཇུག་པ་ལ། བསྐུལ་བ། བསྒྲལ་ལས། བཟློག་པའི་ལས་རིམ་གསུམ་གྱི། དང་པོ་དཀྱིལ་འཁོར་གྱི་ལྷ་ཚོགས་རྣམས་མངོན་སྤྱོད་ཀྱི་ལས་ལ་དྲག་ཏུ་བསྐུལ་བ་ནི། དམར་གཏོར་བཤམས་ཤིང་དགུག་གཞུག་བྱས་ལ། སྤོས་བསྲེག །རྐང་གླིང་འབུད། དར་ནག་གཡབ་ཅིང་རྔ་རོལ་དབྱངས་དང་བཅས་ཏེ་འདི་སྐད་གྱེར་རོ། །ཧཱུྃ་ཧཱུྃ༔ ཆོས་སྐུ་ཞི་བའི་ངང་ལས་མ་གཡོས་ཀྱང་། །ཐུགས་རྗེ་ཆེན་པོས་གདུག་པའི་ཚོགས་འདུལ་ཕྱིར། །ཐབས་ཀྱི་གཟུགས་མཆོག་འཆོལ་བའི་ཁྲོ་རྒྱལ་སྐུར། །སྟོན་མཛད་དཔལ་ཆེན་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་སྒོ་མར་བཅས། །མངོན་སྤྱོད་རོལ་བ་དྲག་པོའི་ཕྲིན་ལས་ཀྱིས། །ཉོན་མོངས་དགྲ་བགེགས་དབྱིངས་སུ་གཞོམ་པའི་ཕྱིར། །དབྱིངས་ནས་སྤྱན་འདྲེན་འདིར་གཤེགས་བརྟན་པར་བཞུགས། །དབྱེར་མེད་ངང་ནས་ཕྱག་བགྱིད་མཆོད་པ་འབུལ། །གུས་པས་བསྟོད་དོ་དབང་དང་དངོས་གྲུབ་སྩོལ། །ཐུགས་རྗེས་ཁྲོས་པ་གཏུམ་ཆེན་ཧེ་རུ་ཀའི། །དམ་ཚིག་ཐུགས་དམ་ཆེན་པོ་བདག་བསྐུལ་ན། །ཁྱེད་ཀྱི་དབང་དྲག་ཐུགས་དམ་དུས་ལ་བབས། །དམ་རྫས་བརྒྱན་པའི་གཏོར་མ་འདི་བཞེས་ལ། །དྲག་ཤུལ་མཐུ་སྟོབས་ནུས་པའི་རྩལ་ཕྱུངས་ནས། །ཐུགས་དམ་ཐུགས་རྗེས་དགྲ་བགེགས་མྱུར་དུ་སྒྲོལ། །ཧཱུྃ་ཧཱུྃཿ དུས་གསུམ་ཕྱོགས་བཅུའི་རྒྱལ་བ་མ་ལུས་པའི། །མཐུ་སྟོབས་འདུས་པ་གསང་བདག་རྡོ་རྗེ་འཆང་། །བདུད་འདུལ་ཁྲོ་རྒྱལ་གཏུམ་པོ་ཁྲོས་པའི་སྐུ། །སྐུ་མདོག་མཐིང་ནག་ནམ་མཁའི་མདོག་ལྟར་གསལ། །ཞལ་གཅིག་ཕྱག་གཉིས་ཞབས་གཉིས་བསྐྱང་བསྐུམ་བཞུགས། །སྤྱན་གསུམ་སྡང་མིག་ཁྲོ་གཉེར་མཆེ་བ་གཙིགས། །རལ་བ་ཁམ་ནག་ཨག་ཚོམ་སྨིན་མ་སེར། །ཕྱག་གཡས་རྡོ་རྗེས་དྲེགས་པ་མ་ལུས་འཇོམས། །གཡོན་པས་སྡིགས་མཛུབ་སྦྲུལ་གྱིས་ཀླུ་གཉན་འདུལ། །གཏུམ་ཆེན་བསྐལ་པ་དུས་མཐའི་མེ་ལྟར་འབར། །དུར་ཁྲོད་ཆས་བརྒྱད་སྐུ་ཡི་རྒྱན་དུ་རྫོགས། །སྙན་ནས་འབྲུག་སྒྲས་དྲེགས་པ་ཐམས་ཅད་བརྒྱལ། །སྤྱན་ནས་མེ་འབར་ཁམས་གསུམ་བསྲེགས་པར་བྱེད། །ཤངས་ནས་རླུང་འབྱུང་སྣང་སྲིད་ཐལ་བར་གཏོར། །ཞལ་ནས་སྔགས་སྒྲས་ཉོན་མོངས་ཐམས་ཅད་སྒྲོལ། །བ་སྤུ་ཀུན་ལས་བྱ་ཁྱུང་སྤྲུལ་པ་འགྱེད། །བཀའ་ལས་འདའ་བྱེད་ཀླུ་གཉན་ཟས་སུ་ཟ། །སྐུ་ལས་ཁྲོ་ཆུང་མཚོན་ཐོགས་དཔག་མེད་འཕྲོས། །ལྷ་སྲིན་སྡེ་བརྒྱད་མ་ལུས་བྲན་དུ་བཀོལ། །རབ་འཇིགས་དཔའ་བོ་ཆེན་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །སྔོན་གྱི་ཐུགས་དམ་ཞལ་བཞེས་མ་གཡེལ་བར། །སྡང་བའི་དགྲ་དང་གནོད་བྱེད་བགེགས་རིགས་སོགས། །བདུད་དང་བར་དུ་གཅོད་པ་རྣམ་མང་པོ། །མ་ལུས་ན་བུན་རླུང་གིས་གཏོར་བ་བཞིན། །ལྷག་མེད་རྡུལ་དུ་རློག་པའི་ཕྲིན་ལས་མཛོད། །ཧཱུྃ་ཧཱུྃཿ བཅོམ་ལྡན་གསང་བདག་ཐུགས་ལས་སྤྲུལ་པའི་སྲས། །རྣམ་བཞིའི་ཕྲིན་ལས་སྒྲུབ་མཛད་ཡེ་ཤེས་ལྷ། །བདུད་བཞིའི་དཔུང་འཇོམས་ཁྲོ་རྒྱལ་གཏུམ་པོ་བཞི། །ཐུགས་དམ་རྒྱུད་བསྐུལ་བཅོལ་པའི་ལས་ལ་དགོངས། །ཤར་རྩིབས་པད་ཉི་ལྷ་བདུད་དྲེགས་པའི་སྟེང་། །ཞེ་སྡང་གནས་གྱུར་མེ་ལོང་ཡེ་ཤེས་སྐུ། །མཐིང་གསལ་རྡོ་རྗེ་དྲིལ་འཛིན་ཁྲོ་ཆས་རྫོགས། །ཞི་མཛད་རྡོ་རྗེ་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ནད་གདོན་སྡིག་སྒྲིབ་བར་ཆད་མི་མཐུན་ཕྱོགས། །མ་ལུས་ཆོས་ཀྱི་དབྱིངས་སུ་ཞི་བར་མཛོད། །ལྷོ་རྩིབས་པད་ཉི་ཕུང་བདུད་དྲེགས་པའི་སྟེང་། །ང་རྒྱལ་གནས་གྱུར་མཉམ་ཉིད་ཡེ་ཤེས་སྐུ། །སེར་གསལ་རིན་ཆེན་དྲིལ་འཛིན་ཁྲོ་ཆས་རྫོགས། །རྒྱས་མཛད་རིན་ཆེན་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཚེ་བསོད་དཔལ་འབྱོར་ཆོས་སྲིད་ཡོན་ཏན་ཀུན། །འབད་མེད་དབྱར་མཚོ་ལྟ་བུར་རྒྱས་པར་མཛོད། །ནུབ་རྩིབས་པད་ཉི་ཉོན་བདུད་དྲེགས་པའི་སྟེང་། །འདོད་ཆགས་གནས་གྱུར་སོར་རྟོག་ཡེ་ཤེས་སྐུ། །དམར་གསལ་པདྨ་དྲིལ་འཛིན་ཁྲོ་ཆས་རྫོགས། །དབང་མཛད་པདྨ་གཏུམ་པོ་ཁྱོད་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཁམས་གསུམ་སྲིད་གསུམ་མོས་པ་བཞི་ལ་སོགས། །རྩོལ་མེད་དབང་དུ་འདུ་བའི་ཕྲིན་ལས་མཛོད། །བྱང་རྩིབས་པད་ཉི་འཆི་བདག་དྲེགས་པའི་སྟེང་། །ཕྲག་དོག་གནས་གྱུར་བྱ་གྲུབ་ཡེ་ཤེས་སྐུ། །ལྗང་གསལ་རྒྱ་གྲམ་དྲིལ་འཛིན་ཁྲོ་ཆས་རྫོགས། །དྲག་པོའི་ལས་མཛད་ཀརྨ་གཏུམ་པོར་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །དགྲ་བགེགས་དམ་སྲི་བསམ་སྦྱོར་གནག་པའི་ཚོགས། །ལྷག་མེད་རྡུལ་དུ་བརླག་པའི་ཕྲིན་ལས་མཛོད། །ཧཱུྃ་ཧཱུྃཿ དཔལ་ཆེན་ཐུགས་སྤྲུལ་ཕྱོགས་བཅུའི་གདོན་འདུལ་བ། །གཏུམ་དྲག་རབ་འཇིགས་ཁྲོ་རྒྱལ་ཆེན་པོ་བཅུ། །ཐུགས་དམ་བསྐུལ་ལོ་དབྱིངས་ནས་སྐུར་བཞེངས་ལ། །གང་བཅོལ་ཕྲིན་ལས་མཛད་པའི་དུས་ལ་བབས། །ཕྱི་རིམ་འཁོར་ལོ་རྩིབས་བཅུར་པད་ཉི་དང་། །ཕྱོགས་སྐྱོང་གདན་ལ་རང་བྱུང་གྲུབ་པའི་ལྷ། །ཧཱུྃ་དཀར་རྣམ་རྒྱལ་དབྱུག་སྔོན་གཤིན་རྗེ་གཤེད། །མི་གཡོ་རྟ་མགྲིན་འདོད་རྒྱལ་བདུད་རྩི་འཁྱིལ། །གསུམ་རྒྱལ་སྟོབས་པོ་ཆེ་རྣམས་སྐུ་མདོག་མཐིང་། །གཡས་རྣམས་རྡོ་རྗེ་གཡོན་ཕྱག་སྡིག་མཛུབ་མཛད། །ཁྲོ་ཆས་ཡོངས་རྫོགས་ཐབས་ཤེས་གཉིས་མེད་རོལ། །མི་དགེ་གནས་གྱུར་ཁྲོ་རྒྱལ་བཅུ་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ཕྱོགས་བཅུའི་དགྲ་གདོན་བགེགས་རྣམས་མ་ལུས་ཀུན། །མིང་ལྷག་མེད་པར་ཐལ་བ་རྡུལ་དུ་རློགས། །ཧཱུྃ་ཧཱུྃཿ དཔལ་ཆེན་ཐུགས་སྤྲུལ་སྒོ་སྐྱོང་ཁྲོ་བོ་བཞི། །རྣམ་རྒྱལ་གཤིན་རྗེ་དབང་ཆེན་བདུད་རྩི་འཁྱིལ། །ཕྱོགས་མདོག་རིགས་དང་རྟགས་ཀྱི་ཕྱག་རྒྱ་ཅན། །ཁྲོ་ཆས་ཡོངས་རྫོགས་སྒོ་སྲུང་བཞི་ལ་བསྟོད། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །དངོས་གྲུབ་འཕྲོག་ཅིང་འཚེ་བའི་དགྲ་བགེགས་རྣམས། །རྣམ་བཞིའི་ལས་ཀྱིས་ཚར་ཆོད་དབྱིངས་སུ་སྒྲོལ། །གཞན་ཡང་ཁྱམས་ཀྱི་དབང་མོ་ཉེར་བརྒྱད་སོགས། །སྤྲུལ་པ་ཡང་སྤྲུལ་བསམ་མི་ཁྱབ་པའི་ཚོགས། །དུ་མ་རོ་གཅིག་ཆུ་ཟླ་ལྟ་བུའི་འཁོར། །མ་ལུས་བསྟོད་ཅིང་བསྐུལ་ལོ་ལས་ལ་དགོངས། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །གང་བཅོལ་ཡིད་བཞིན་འགྲུབ་པའི་ཕྲིན་ལས་ཀྱིས། །རྣལ་འབྱོར་བསྒྲུབ་པའི་འབྲས་བུ་མཆིས་པར་མཛོད། །ཧཱུྃ་ཧཱུྃཿ ཁྲོ་རྒྱལ་ཆེན་པོའི་སྐུ་ཡི་གནས་ལྔ་ནས། །རྒྱལ་ཀུན་ཡེ་ཤེས་ལྔ་ཡི་རང་མདངས་ལས། །རང་བྱུང་སྤྲུལ་པའི་ཁྱུང་ཆེན་རིགས་ལྔ་ཡང་། །ཐུགས་དམ་བསྐུལ་ལོ་ཕྲིན་ལས་དུས་ལ་བབས། །སྐུ་སྤྲུལ་བུདྡྷ་རིགས་ཀྱི་ཁྱུང་ཆེན་དཀར། །གཏི་མུག་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །རྒྱལ་རིགས་ས་བདག་ཀླུ་གཉན་རྡུལ་དུ་རློགས། །གསུང་སྤྲུལ་པདྨ་རིགས་ཀྱི་ཁྱུང་ཆེན་དམར། །འདོད་ཆགས་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །བྲམ་ཟེ་ས་བདག་ཀླུ་གཉན་རྡུལ་དུ་རློགས། །ཐུགས་སྤྲུལ་རྡོ་རྗེ་རིགས་ཀྱི་ཁྱུང་ཆེན་མཐིང་། །ཞེ་སྡང་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །དམངས་རིགས་ས་བདག་ཀླུ་གཉན་རྡུལ་དུ་རློགས། །ཡོན་ཏན་རིན་ཆེན་རིགས་ཀྱི་ཁྱུང་ཆེན་སེར། །ང་རྒྱལ་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །རྗེ་རིགས་ས་བདག་ཀླུ་གཉན་རྡུལ་དུ་རློགས། །ཕྲིན་ལས་སྤྲུལ་པ་ཀརྨ་ཁྱུང་ཆེན་ལྗང་། །ཕྲག་དོག་འཇོམས་པའི་ཁྲོ་རྒྱལ་བསྟོད་ཅིང་བསྐུལ། །མཆོད་གཏོར་འདི་བཞེས་བསམ་སྦྱོར་ངན་རྩོམ་པའི། །གདོལ་རིགས་ས་བདག་ཀླུ་གཉན་རྡུལ་དུ་རློགས། །གསང་བདག་སྤྲུལ་པ་ཡེ་ཤེས་ཁྱུང་ཆེན་ལྔ། །རང་རྟགས་གཡས་ལ་ཀླུ་སྦྲུལ་རིགས་ལྔ་གཡོན། །གནམ་ལྕགས་རྡོ་རྗེའི་རྭ་དང་མཆུ་སྡེར་ཅན། །ཉི་ཟླས་དབུ་བརྒྱན་གསེར་མིག་འཁྱིལ་ཞིང་གསལ། །སྤུ་གྲིའི་སྒྲོ་གཤོག་མེ་མཚོན་ཐོག་སེར་འབེབས། །ཡང་སྤྲུལ་ཁྱུང་ཆེན་རིགས་ལྔ་གྲངས་མེད་འགྱེད། །བཀའ་ལས་འདའ་བྱེད་ཀླུ་གཉན་ཟས་སུ་ཟ། །ཁྱེད་རྣམས་ཐུགས་དམ་བསྐུལ་ལོ་དབྱིངས་ནས་བཞེངས། །འོག་ཕྱོགས་ས་བདག་ཀླུ་གཉན་ལས་བྱུང་བའི། །ནད་གདོན་རྐྱེན་བགེགས་བར་ཆད་མི་མཐུན་ཕྱོགས། །མངོན་སྤྱོད་རོལ་བ་དྲག་པོའི་ཕྲིན་ལས་ཀྱིས། །ཚར་ཆོད་ཡེ་ཤེས་ལྔ་ཡི་དབྱིངས་སུ་སྒྲོལ། །ཧཱུྃ་ཧཱུྃཿ གསང་བདག་ཐུགས་རྗེའི་ཀློང་ནས་སྐུར་སྤྲུལ་པ། །མཚོ་རྒྱལ་དགོངས་མཛོད་སྐྱོངས་བའི་བསྲུང་མའི་ཚོགས། །ཕྱག་དྲུག་ཡེ་ཤེས་མགོན་པོ་བཀའ་ཉན་བཅས། །སྔགས་སྲུང་རལ་གཅིག་དཔལ་ལྡན་དུད་སོལ་མ། །དྲང་སྲོང་ཁྱབ་འཇུག་གནོད་སྦྱིན་ཙིའུ་དམར། །དམ་ཅན་སྐྱེས་བུ་བཙན་རྒོད་དྲག་པོ་རྩལ། །སྨན་བཙུན་མཆེད་ལྔ་མི་ཐུང་ནོར་བདག་སོགས། །ཕོ་རྒྱུད་མོ་རྒྱུད་བཀའ་གཏེར་བསྲུང་མ་རྣམས། །དམ་རྫས་ཤ་ཁྲག་གཏོར་མ་འདི་བཞེས་ལ། །དམ་ཚིག་ཐུགས་དམ་ཞལ་བཞེས་མ་གཡེལ་བར། །ངེས་པའི་དོན་ལ་སྨོད་པའི་སྡིག་ཅན་དང་། །བླ་མའི་ཐུགས་རྒྱུད་དཀྲུགས་པའི་དམ་ཉམས་མཁན། །གསང་སྔགས་རྡོ་རྗེའི་ཐེག་པ་འཕྱ་བྱེད་དང་། །ཉེས་མེད་མར་གྱུར་འགྲོ་ལ་འཚེ་བ་དང་། །བྱང་ཆུབ་སྒྲུབ་ལ་བར་དུ་གཅོད་པ་སོགས། །ཞིང་བཅུ་ཉམས་པ་བདུན་ལ་གཏོགས་པ་རྣམས། །སྔོན་ཚེ་རྡོ་རྗེ་འཆང་གི་བཀའ་བཞིན་དུ། །དམ་ཅན་དྲེགས་པའི་དམག་ཚོགས་ཁྱེད་རྣམས་ཀྱིས། །སྟག་སྤྱང་འཕར་བ་ཤ་ལ་རྔམ་པ་ལྟར། །ཞལ་གདངས་མཆེ་གཙིགས་ཁྲོས་པའི་རྔམ་སྟབས་ཀྱིས། །དོན་སྙིང་དམར་པོ་སྲུང་མའི་ཞལ་དུ་གསོལ། །ཁྲག་རྒྱུན་དྲོན་མོ་སྲུང་མའི་སྐོམ་དུ་བཞེས། །ཞིང་ཆེན་གཡང་གཞི་སྲུང་མའི་རྒྱན་དུ་ཀླུབས། །མིང་བརྡ་ཙམ་ཡང་མེད་པར་བརླག་པར་མཛོད། །བསྐུལ་ཡང་མི་དགོངས་བཅོལ་ཀྱང་མ་མཛད་ན། །དམ་ཚིག་གཉན་པོར་འགལ་བར་མི་འགྱུར་རམ། །ནུས་སྟོབས་ཅི་འདུག་བལྟའོ་བསྲུང་མའི་ཚོགས། །ཐུགས་དམ་དུས་ལ་བབ་པོ་དམ་ཅན་རྣམས། །རྣལ་འབྱོར་བདག་གིས་ཇི་ལྟར་བཅོལ་པའི་ལས། །ཐོགས་མེད་མྱུར་དུ་འགྲུབ་པའི་ཕྲིན་ལས་མཛོད། །ཅེས་བསྐུལ་བས་ལྷ་ཚོགས་རྣམས་དགྲ་བགེགས་སྒྲོལ་བའི་ལས་ལ་དགོངས་ཤིང་བཞུགས་པར་བསམ། གཉིས་པ་བསྒྲལ་བའི་ལས་རིམ་ལ། དང་པོ་གསེར་སྐྱེམས་བཤམས་ལ་བསང་ཆུས་འཐོར་ཏེ། རཾ་ཡཾ་ཁཾ། གསེར་སྐྱེམས་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱ༔ཧཱུྃ།ཞེས་བྱིན་གྱིས་བརླབས་ལ། བདུད་བཞིའི་དཔུང་འཇོམས་སྟོན་པ་རྫོགས་སངས་རྒྱས། །སྲིད་ཞིའི་སྡུག་བསྔལ་ལས་སྐྱོབས་དམ་པའི་ཆོས། །ཡང་དག་ཐར་བའི་ལམ་སྟོན་དགེ་འདུན་སྡེ། །གསེར་སྐྱེམས་འདི་བཞེས་བདེན་རྫུན་དཔང་པོ་མཛོད། །བྱིན་རླབས་རྩ་བ་བརྒྱུད་ལྡན་བླ་མ་དང་། །དངོས་གྲུབ་གཏེར་མཛོད་ཡི་དམ་ཞི་ཁྲོའི་ལྷ། །བར་ཆད་ཀུན་སེལ་གནས་གསུམ་མཁའ་འགྲོའི་ཚོགས། །གསེར་སྐྱེམས་འདི་བཞེས་རྣལ་འབྱོར་སྡོང་གྲོགས་མཛོད། །ཁྱད་པར་དཔལ་ཆེན་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་ཡུམ་དང་བཅས། །སྒོ་སྐྱོང་བཞི་དང་དབང་མོ་ཉེར་བརྒྱད་སོགས། །གསེར་སྐྱེམས་འདི་བཞེས་ཞིང་བཅུའི་དགྲ་བགེགས་སྒྲོལ། །སྔགས་བསྲུང་ཁྲོ་མོ་མ་མོ་རལ་གཅིག་མ། །བཀའ་བསྲུང་དུད་སོལ་ལྷ་མོ་གཟའ་བདུད་སོགས། །མཚོ་རྒྱལ་དགོངས་མཛོད་སྐྱོང་བའི་བསྲུང་མ་རྣམས། །གསེར་སྐྱེམས་འདི་བཞེས་དམ་ཉམས་དགྲ་བགེགས་སྒྲོལ། །ཞེས་ཕུད་ཕྱོགས་བཅུར་གཏོར་རོ། ། གཉིས་པ་གཟུ་དཔང་ནི། ཧཱུྃ་ཧཱུྃཿ ངོ་བོ་སྟོང་ཆེན་འགྱུར་མེད་ཆོས་ཀྱི་སྐུ། །རང་བཞིན་གསལ་དག་བདེ་ཆེན་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་རྨད་བྱུང་སྤྲུལ་པའི་སྐུ། །སྐུ་གསུམ་རྒྱལ་བ་མ་ལུས་གཟུ་དང་དཔང་། །དོན་གཉིས་མཐར་ཕྱིན་རྫོགས་སངས་རྒྱས་རྣམས་དང་། །བདེན་གཉིས་ཟུང་འཇུག་ལུང་དང་རྟོགས་པའི་ཆོས། །ཚོགས་གཉིས་ཉམས་ལེན་འཕགས་པའི་དགེ་འདུན་ཏེ། །བསླུ་མེད་དཀོན་མཆོག་རྣམ་གསུམ་གཟུ་དང་དཔང་། །བྱིན་རླབས་མཆོག་སྩོལ་རྩ་རྒྱུད་བླ་མ་དང་། །དངོས་གྲུབ་ཆར་འབེབས་ཡི་དམ་ཞི་ཁྲོའི་ལྷ། །དམ་ལྡན་བུ་བཞིན་སྐྱོང་བའི་མཁའ་འགྲོའི་ཚོགས། །རྩ་གསུམ་རྒྱ་མཚོས་གཟུ་དང་དཔང་མཛོད་ཅིག །ཁྱད་པར་དུས་གསུམ་རྒྱལ་བ་མ་ལུས་པའི། །མཐུ་སྟོབས་འདུས་པ་ཡང་དག་ཧེ་རུ་ཀཿ གཏུམ་པོ་རིགས་བཞི་ཁྲོ་བཅུ་སྒོ་བར་བཅས། །མངོན་སྤྱོད་དྲག་པོའི་ལས་ཀྱིས་གཟུ་དཔང་མཛོད། །གསང་སྔགས་ཕྱི་ནང་བཀའ་གཏེར་སྲུང་མའི་ཚོགས། །གཙང་རིགས་དཔལ་མགོན་ཡུལ་ལྷ་གཞི་བདག་སོགས། །དཀར་ཕྱོགས་སྐྱོང་བའི་མཐུ་ལྡན་ཐམས་ཅད་ཀྱིས། །དམ་ལྡན་བདག་གི་གཟུ་དང་དཔང་མཛོད་ཅིག །འགྲོ་ཀུན་བདེ་གཤེགས་སྙིང་པོའི་རང་བཞིན་ལ། །དགྲ་གཉེན་ཕྱོགས་ཆའི་སྡང་ཞེན་མ་དམིགས་ཀྱང་། །གཟུང་འཛིན་གདོན་གྱིས་བརླམས་པའི་ཉམས་པ་བདུན། །བྱང་ཆུབ་སེམས་གཉིས་བསྒོམ་པའི་དགྲ་རུ་ལངས། །དམ་ལས་ཉམས་པས་སློབ་དཔོན་མཆེད་ལ་བརྙས། །བཀའ་ལས་ཉམས་པས་ལས་འབྲས་ཁྱད་དུ་བསད། །དོན་ལས་ཉམས་པས་བདེན་གཉིས་ཆད་པར་བལྟ། །ལས་ཀྱིས་ཉམས་པས་ཉེས་མེད་རྣམས་ལ་འཇུག །མཚན་མས་ཉམས་པས་ཆོས་ལ་ཕྱོགས་རིས་བཟུང་། །འདོད་པས་ཉམས་པས་ཉེས་མེད་འཕྲོག་བཅོམ་བྱས། །ལོག་པས་ཉམས་པས་སེམས་ཅན་སྡུག་ལ་སྦྱོར། །དང་པོ་སངས་རྒྱས་བསྟན་པ་གཉན་པོ་བཤིགས། །བར་དུ་དཀོན་མཆོག་གསུམ་གྱི་དབུ་འཕང་སྨད། །ཐ་མ་གསང་སྔགས་དྲལ་ཞིང་ལོག་ལྟ་བྱས། །བླ་མའི་སྐུར་བསྡོས་གསུང་བཅག་ཐུགས་རྒྱུད་དཀྲུགས། །རྡོ་རྗེའི་མཆེད་དང་ལྕམ་དྲལ་བརྙས་ཤིང་སྨད། །ཉེས་མེད་སེམས་ཅན་ཡོངས་ལ་གནོད་ཅིང་འཚེ། །དགེ་བཅུ་ཁྱད་བསད་མི་དགེ་དང་དུ་བླངས། །བསྲུང་སྡོམ་བསླབ་བྱ་དམ་ཚིག་ཀུན་དང་འགལ། །མཚམས་མེད་ལྔ་ཡི་ལས་ཀྱང་འདི་ཡིས་བྱས། །དེ་འབྲས་ངན་སོང་སྡུག་བསྔལ་མྱོང་ངེས་པས། །འདི་ལ་མངོན་སྤྱོད་ཕྲིན་ལས་མི་མཛད་ན། །མཐར་གྱིས་འཆི་བ་སེམས་ཅན་ཀུན་ལ་ཡོད། །དུས་ལ་བབས་ན་དཔག་བསམ་ཤིང་ཡང་འགྱེལ། །བསམ་སྦྱོར་ངན་པའི་འབྲས་བུ་མཐར་ཕྱིན་ན། །ཚར་གཅོད་རྗེས་འཛིན་མཐུ་སྟོབས་རྫུན་དུ་ཟད། །ཆོས་ཉིད་བདེན་པ་བསླུ་བ་མེད་པ་དང་། །སྔགས་ཀྱིས་སྒྲོལ་བ་སངས་རྒྱས་རྣམས་ཀྱི་མཐུས། །ཨ་བྷི་ཙརྱའི་དུས་ལ་ད་བབ་ན། །བརྣག་པའི་ལས་ལ་བཏང་སྙོམ་མ་མཛད་ཅིག །དུས་གསུམ་སངས་རྒྱས་རྣམས་ཀྱང་དབྱིངས་ནས་གཟིགས། །བདེན་གཉིས་རྒྱུ་འབྲས་བསླུ་མེད་གཟུ་དང་དཔང་། །དཔལ་མགོན་ཆོས་སྐྱོང་རྣམས་ནི་མཐུ་རྩལ་བསྐྱེད། །ཉེས་ཅན་འདི་ལ་མངོན་སྤྱོད་ཕྲིན་ལས་མཛོད། །གསང་བདག་ཕྱག་རྡོར་ལྷ་ཚོགས་འཁོར་བཅས་རྣམས། །ཆོས་ཉིད་ཞི་བའི་ངང་ལས་མ་གཡོས་ཀྱང་། །ཐུགས་རྗེའི་ཐབས་ཀྱིས་དྲག་པོའི་སྐུར་བཞེངས་ལ། །དགྲ་བགེགས་མ་ལུས་སྒྲོལ་བའི་ཕྲིན་ལས་མཛོད། །ཅེས་བརྗོད་པས་འགྲོ་ཀུན་ཐུགས་རྗེས་མི་གཏོང་བའི་ཕྱིར་ཚར་གཅོད་དབྱིངས་སྒྲོལ་གྱི་ཕྲིན་ལས་ལ་ཆེས་ཆེར་དགོངས་པར་བསམ་མོ། །གསུམ་པ་དམིགས་བྱ་གསལ་བ་ནི། བདག་ཉིད་དཔལ་ཆེན་པོ་ཡང་དག་ཧེ་རུ་ཀར་གསལ་བའི་ཐུགས་ཀ་ནས་ཨེ་ནག་པོ་གཅིག་མདུན་དུ་འཕྲོས་པ་ལས། དམ་ཉམས་པའི་དགྲ་བགེགས་ཀྱི་ལས་ངན་པའི་རྣམ་སྨིན་ལས་གྲུབ་པའི་གནམ་ལྕགས་ཀྱི་ཁང་སྒྲོམ་ནག་པོ་ཟུར་གསུམ་པ། མཚན་ཉིད་དང་ལྡན་པར་གྱུར་པའི་ནང་དུ་ནྲྀ་ཏྲི་ལས། དམ་ཉམས་པའི་དགྲ་བགེགས་གང་ཡིན་པ་དེ་ཉིད་ཤིན་ཏུ་ཉམས་ཐག་པའི་གཟུགས་ཅན། མྱ་ངན་གྱི་ཕྱག་རྒྱ་བྱེད་ཅིང་འོ་དོད་ཀྱི་སྨྲེ་སྔགས་འདོན་པ། མགོན་སྐྱབས་ཀྱི་ལྷ་དང་བྲལ་ཞིང་འདར་ཡེད་ཡེད་གནས་པ་ཞིག་ཏུ་གྱུར་བར་བསམ་མོ། བཞི་པ་རྣམ་ཤེས་དགུག་གཞུག་བྱ་བ་ནི། བདག་མདུན་གྱི་ཐུགས་ཀ་ནས་སྤྲུལ་པའི་ཕོ་ཉ་འགུགས་པར་བྱེད་པའི་ལྕགས་ཀྱུ་ཅན་དང་། རིང་ནས་འཛིན་བྱེད་ཞགས་པ་ཅན་དང་། ཡན་ལག་སྡོམ་བྱེད་ལྕག་སྒྲོག་ཅན་དང་། མྱོས་ཤིང་བརྒྱལ་བྱེད་དྲིལ་བུ་མ་དང་། ལས་རླུང་བསྐུལ་ནས་སྐྱོད་བྱེད་མ་དང་། སྟོབས་ནུས་འཇོམས་པའི་ཐོ་བ་ཅན་དང་། འདེད་པར་བྱེད་པའི་དབྱུག་པ་ཅན་དང་། ལྷ་དང་འབྱེད་པའི་ཕྲ་མ་མཁན་དང་། ལྷ་སྲུང་སྐྲོད་པའི་རྫུ་འཕྲུལ་ཅན་ལ་སོགས་པ་གཟུགས་དང་ཁ་ཏོག་སྣ་ཚོགས་པ། རྣམ་པར་འགྱུར་བའི་སྤྲུལ་བསྒྱུར་ཅིར་ཡང་སྟོན་པ་གྲངས་མེད་འཕྲོས་པས་དགྲ་བགེགས་གང་ཡིན་པ་དེ་ཉིད་རང་དབང་མེད་པར་བཀུགས་ནས་ལིང་ཀ་ལ་ཐིམ་པར་གྱུར་བར་བསམ་ལ། ན་མོ་རིག་འཛིན་རྩ་རྒྱུད་ཀྱི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། གནས་གསུམ་གྱི་དཔའ་བོ་མཁའ་འགྲོ། དམ་ཅན་ཆོས་སྐྱོང་སྲུང་མ་དང་བཅས་པ་རྣམས་ཀྱི་བཀའ་བདེན་པ་དང་། བསླུ་བ་མེད་པ་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་། ཕྱོགས་བཅུ་དུས་གསུམ་གྱི་རྒྱལ་བ་མ་ལུས་པའི་མཐུ་སྟོབས་གཅིག་ཏུ་བསྡུས་པའི་བདག་ཉིད་དཔལ་གསང་བའི་བདག་པོ་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་ཆོས་ཉིད་དེ་བཞིན་ཉིད་རྒྱུ་འབྲས་བསླུ་བ་མེད་པ་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། བསྒྲལ་བའི་ཞིང་བཅུ་དང་། ཉམས་པ་བདུན་ལ་གཏོགས་པའི་དགྲ་བགེགས་སྤྱི་དང་། ཁྱད་པར་དུ་སངས་རྒྱས་ཀྱི་བསྟན་པ་བཤིགས་པ། བླ་མ་དམ་པའི་སྐུ་ལ་བསྡོ་བ། མཚམས་མེད་པ་ལྔ་བྱེད་པ་རྣམས་དང་། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་རྣམས་སྲིད་པ་གསུམ་གྱི་ཁོངས་གར་གནས་གང་དུ་བྲོས་ཀྱང་མགོན་སྐྱབས་ཀྱི་ལྷ་དང་། ཚེ་དང་དབང་ཐང་བསོད་ནམས་དང་དུས་ཀྱི་དབང་དུ་མི་བཏང་བར་དུས་ད་ལྟ་ཉིད་དུ་དམིགས་པའི་རྟེན་གཟུགས་ལིང་ག་འདི་ལ་ཁུག་ཅིག རྩ་སྔགས་ཀྱི་གཤམ་དུ། ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛཿ ཛཿཧཱུྃ་བཾ་ཧོ། ཨ་ཝེ་ཤ་ཡ་ཨ་ཨཿ ཞེས་རོལ་མོའི་སྒྲ་དྲག་པོ་དང་བཅས་འགུགས་གཞུག་ལན་མང་དུ་བྱའོ། །ལྔ་པ་བསྐུལ་ཞིང་ཕོ་ཉ་ལས་ལ་འགྱེད་པ་ནི། ཧཱུྃ་ཧཱུྃཿ རྒྱལ་ཀུན་མཐུ་སྟོབས་འདུས་པའི་སྐུ། །གསང་བདག་དཀྱིལ་འཁོར་ལྷ་ཚོགས་རྣམས། །བསྟན་པ་གཉན་ལ་དགྲ་དར་ན། །མི་མངོན་དབྱིངས་ནས་སྐུར་བཞེངས་ལ། །རྣལ་འབྱོར་བདག་གི་ར་མདའ་རློག །གནས་འདིར་དྲག་པོའི་ལས་ལ་ཡ། །ཡིད་ལ་བརྣག་པའི་དགྲ་བགེགས་རྣམས། །དྲག་པོའི་ལས་ཀྱིས་མྱུར་དུ་སྒྲོལ། །སླས་དང་བྱན་མོ་བྲན་གྱི་ཚོགས། །གནས་འདིར་དྲག་པོའི་ལས་ལ་དགོངས། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་བསྡུས་ནས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་ཁས་བླངས་དམ་བཅས་པ། །མ་ཐོགས་མྱུར་བར་མངོན་དུ་ཕྱུང་། །དམ་བཅའ་བཞིན་དུ་མ་བྱས་ན། །མགོ་ལུས་སྙིང་ཡང་ཚལ་བ་བདུན། །ཡཀྴ་ཁྲོ་བོས་གཏུབ་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་ཁས་བླངས་མནའ་བོར་བཞིན། །རུས་མྱགས་ཚིགས་ནས་དམྱལ་བར་འགྲོ། །དེ་བས་རང་གིས་མནའ་བོར་བའི། །སྡོམ་བྱས་དེ་ལས་མ་འདའ་བར། །རྣལ་འབྱོར་དམ་ལ་གནས་གྱུར་བའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོངས། །ཕྲ་མེན་མ་ཡང་དངོས་གྲུབ་ཐོབ། །བཅོལ་པའི་ལས་རྣམས་མངོན་དུ་བྱོས། །ཞིང་བཅུ་ཉམས་པ་བདུན་ཚངས་པའི། །གཟུགས་ཅན་དགྲ་དང་གཟུགས་མེད་བགེགས། །ཞི་བའི་ཐབས་ཀྱིས་གདུལ་དཀའ་བས། །དྲག་པོའི་ལས་ཀྱིས་མྱུར་དུ་སྒྲོལ། །གྲངས་མེད་སྤྲུལ་པ་ཡང་སྤྲུལ་ཚོགས། །ཁྱེད་རྣམས་དཔལ་གྱི་ཕོ་ཉ་སྟེ། །རྦད་ཅིང་བཏང་བ་ང་ཡིས་བྱེད། །འགུགས་ཤིང་སྒྲོལ་བ་ཁྱེད་ཀྱིས་གྱིས། །རྣལ་འབྱོར་མངོན་ཤེས་མི་ལྡན་པས། །སྒྲོལ་ཞིང་གང་ལགས་མ་རྟོགས་ཀྱང་། །ཁྱེད་རྣམས་ཐུགས་རྗེས་ཉེར་དགོངས་ལ། །གང་ལ་བྱ་བ་ཁྱོད་ཀྱིས་ཤེས། །བསྒྲལ་བར་འོས་པའི་དགྲ་བགེགས་རྣམས། །ལྕགས་ཀྱུ་ཅན་གྱིས་སྙིང་ནས་ཟུངས། །ཞགས་པ་ཅན་གྱིས་མགུལ་ནས་ཆིངས། །ལྕགས་སྒྲོག་ཅན་གྱིས་དབང་པོ་སྡོམ། །དྲིལ་བུ་ཅན་གྱིས་མྱོས་སུ་ཆུགས། །རང་དབང་མེད་པར་འདིར་ཁུག་ལ། །གཟུགས་བྱང་འདི་དང་གཉིས་མེད་མཛོད། །རྩ་སྔགས་ཀྱི་ཤམ་དུ། གནོད་བྱེད་དགྲ་བགེགས་ཐམས་ཅད་བཛྲ་ཨངྐུ་ཤ་ཡ་ཛ༔ རཏྣ་པཱ་ཤ་ཧཱུྃ༔ པདྨ་སྥོ་ཊ་བཾཿ ཀརྨ་གྷནྚེ་ཧོཿ ཞེས་བརྗོད་པས། སྤྲུལ་པའི་ཕོ་ཉ་རྣམས་ཀྱིས་དགྲ་བགེགས་འགུགས་འཆིང་སྡོམ་མྱོས་ཀྱི་ལས་མཛད་ཅིང་། ལས་རླུང་གིས་བཏེགས་ནས་རང་དབང་མེད་པར་བྱེ་ཚན་ལ་མར་ཐིམ་པ་བཞིན་ལིང་ག་ལ་ཐིམ་ནས་རེངས་ཤིང་འགུལ་མི་ནུས་པར་བསམ་མོ། །དྲུག་པ་ལྷ་དང་དབྱེ་བ་ནི། ལིང་གར་དབྱེ་རྫས་ཀྱིས་བདུག་ཅིང་། བྱ་འུག་གི་སྒྲོ་བཅས་དབྱེ་བའི་ཕྱག་རྒྱ་བྱས་ལ། ཧཱུྃ་ཧཱུྃཿ དཀྱིལ་འཁོར་ལྷ་དང་རྣལ་འབྱོར་བའི། །ཐུགས་ལ་བརྣག་པའི་དགྲ་བགེགས་རྣམས། །སྲུང་སྐྱོབས་བྱེད་པའི་ལྷ་ཁྱོད་ཉོན། །གདུག་པའི་སེམས་ལྡན་དགྲ་བགེགས་འདིས། །རྒྱལ་བསྟན་བསྣུབས་ཤིང་རྟེན་གསུམ་བཤིགས། །དཀོན་མཆོག་གསུམ་སྨོད་བླ་མར་བསྐུར། །གསང་སྔགས་བྲལ་ཞིང་མཆེད་ལྕམ་བརྙས། །རྣལ་འབྱོར་ལ་སྡང་སེམས་ཅན་འཚེ། །མཚམས་མེད་ལྔ་དང་མི་དགེ་བཅུ། །སྤྱད་ཅིང་རྒྱུ་འབྲས་ཁྱད་བསད་ནས། །དཔག་ཚད་སྟོང་དུ་ལྷུང་བ་ཡི། །དམྱལ་བའི་སྡུག་བསྔལ་མྱོང་འགྱུར་བས། །བདག་གིས་མྱུར་དུ་བསྒྲལ་ནས་ནི། །གཟུགས་ཀྱིས་ལྷ་རྣམས་མཆོད་པ་ཡིན། །ཁྱེད་ཀྱིས་སྲུང་བར་མ་བྱེད་པར། །སྡིག་ཅན་འདི་ནི་མྱུར་དུ་སྤོངས། །རྣམ་པར་མི་རྟོག་ཐུགས་ཀྱི་བདག །ལས་ངན་འདི་ལ་མ་ཞུགས་ཅིག །སྤྲོས་བྲལ་ཆོས་སྐུའི་མཁའ་དབྱིངས་སུ། །ཡེ་ཤེས་ལྷར་བཅས་གཤེགས་སུ་གསོལ། །ལས་ཀྱིས་བསྐྱེད་པའི་འཇིག་རྟེན་ལྷ། །དམ་ཚིག་ནུས་སྟོབས་ཉམས་སྲིད་པས། །འདི་ཡི་མགོན་སྐྱབས་མ་མཛད་པར། །རང་རང་གནས་སུ་མྱུར་དུ་དེངས། །རྩ་སྔགས་མཐར། ནྲྀ་ཏྲི་སརྦ་ཧ་ས་ན་ཡ་ཧ་ས་ན་ཡ་ཧཱུྃ་ཕཊ༔ དམ་ཉམས་པའི་དགྲ་བགེགས་འདི་རྣམས་ལ་སྲུང་སྐྱོབ་བྱེད་པའི་ལྷ་སྲུང་ཐམས་ཅད་ཨུ་ཙ་ཏ་ཡ་ཧཱུྃ་ཕཊཿ ཅེས་བརྗོད་པ་ཙམ་གྱིས་མགོན་སྐྱབས་བྱེད་པའི་ལྷ་དང་སྲུང་མ་ཐམས་ཅད་ཀྱིས་རིང་དུ་སྤངས་བར་བསམ་མོ། །བདུན་པ་གནད་ལ་དབབ་པ་ལ་བཞི་ལས། དང་པོ་བསད་པ་ནི། ཧཱུྃ་ཧཱུྃཿ དམ་ཚིག་ཆེན་པོའི་དུས་ལ་བབས། །སྤྲུལ་པ་ཆེན་པོའི་དུས་ལ་བབས། །བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབས། །བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱལ་བའི་གདུང་གསོབ་པའི། །རིག་འཛིན་བདག་ཅག་དཔོན་སློབ་ལ། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པའི་ཚོགས། །དངོས་གྲུབ་འཕྲོག་ཅིང་འཚེ་བ་རྣམས། །ལྷ་འམ་འོན་དེ་བདུད་ཀྱང་རུང་། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་ཁུག་ལ། །མཐུ་དང་རྫུ་འཕྲུལ་མེད་པར་གྱིས། །ཟུངས་ཤིག་རྒྱོབས་ཤིག་རྣམ་པར་ཆིངས་། །གཏོགས་ཤིག་གྲོགས་དང་བྲལ་བར་གྱིས། །སྨྱོ་ཞིང་འབོག་དང་བརྒྱལ་དུ་ཆུགས། །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་ལ་ཉན་པར་གྱིས། །སྔོན་ཆད་ཁས་བླངས་དམ་བཅས་ལྟར། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིགས་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཅེས་དང་། གང་ཞིག་དཀོན་མཆོག་གསུམ་སོགས་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་བརྩོན་མ་རུང་རྣམས། །མཁས་པས་བསྒྲིམས་ཏེ་གསད་པར་བྱ། །ཆོས་མིན་ལྡན་དང་སྡིག་སྤྱོད་དང་། །རྟག་ཏུ་སེམས་ཅན་གནོད་བརྩོན་དང་། །དམ་ཚིག་སྡང་རྣམས་སྙིང་བརྩེ་བས། །སྔགས་པས་སྔགས་ཀྱིས་གཞོམ་པར་བྱ། །རྩ་སྔགས་མཐར། ཨོཾ་མཱ་ར་ན་སོད་སོད། མཱ་ར་ན་བྱིང་བྱིང་། མཱ་ར་ན་རྨུགས་རྨུགས། མཱ་ར་ན་ཧལ་ཧལ། མཱ་ར་ན་དུན་དུན། མཱ་ར་ན་མྱོགས་མྱོགས། བྱིང་བྱིང་། ཐུཾ་རི་ལི་ལི་རྦད་ཛ་ཛ༔ ནྲྀ་ཏྲི་སརྦ་ཤ་ཏྲུཾ་ཨེ་ཧུར་ཐུམ་ཛ༔ མ་ར་ཡ་རྦད་རྦད། ཅེས་བཟླས་པས། ཁོའི་སྙིང་ནང་དུ་ངན་སེམས་གདུག་པའི་རྣམ་སྨིན་དེ་ཉིད་ལྕགས་བསྲེགས་ཀྱི་འཁོར་ལོ་རྩིབས་དྲུག་པ། དྲག་སྔགས་དང་བཅས་པའི་རྣམ་པས་གཡོན་དུ་འཁོར་བས་སྙིང་ཁྲག་དམར་ཐོ་རོ་རོ་གཏོར་ཞིང་སྲོག་རྩ་རྦད་རྦད་བཅད། རྣམ་ཤེས་མར་མེ་བསད་པ་ལྟར་ནག་སྐེམ་སྐེམ་སོང་བར་བསམ་ལ། བསད་སྔགས་མང་དུ་བཟླའོ། །གཉིས་པ་མནན་པ་ནི། ཧཱུྃ་ཧཱུྃ༔ གསང་བདག་དཀྱིལ་འཁོར་ལྷ་ཚོགས་རྣམས། །ཐུགས་རྗེའི་ཀློང་ནས་སྐུར་བཞེངས་ལ། །མ་རིག་གཉིས་འཛིན་རྟོག་ཚོགས་ཀྱིས། །བསྐྱེད་པའི་དགྲ་བགེགས་དམ་སྲིའི་དཔུང་། །ཚད་མེད་རྣམ་བཞིའི་ཕྱག་རྒྱ་ཡིས། །དགུག་གཞུག་བཅིངས་དང་མྱོས་བྱས་ནས། །སྐྱེ་མེད་ཆོས་སྐུའི་ཀློང་ཆེན་པོར། །ལྡོག་མེད་མནན་པའི་ལས་མཛོད་ཅིག །རྩ་སྔགས་མཐར། ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛ༔ མཱ་ར་ཡ་བྷྱོ་རྦད་ཐུམ་རིལ་ནན། ཨོཾ་སརྦ་ཛི་ན་ཧཱུྃ་ཛ༔ ཏྲི་ཛ་དྲིག་ནན། ནྲྀ་ཏྲི་མུ་ཏྲི་ལཾ་ནན། ཤན་ཏྲི་གན་ཏྲི་ནན། ཕུང་སྲི་གུཾ་གུཾ་སྟྭཾ་བྷ་ཡ་ནན། ནྲྀ་ཏྲི་སརྦ་ཤ་ཏྲུཾ་ཀཱ་ཡ་ཝཀྐ་ཙིཏྟ་སྟྭཾ་བྷ་ཡ་ནན། མ་ར་ཡ་ནན། ན་ཤ་ཡ་ནན། ཆིངས་ཤིག ཅེས་བརྗོད་པས། བདག་མདུན་གྱི་ལྷ་ཚོགས་རྣམས་དགྲ་བགེགས་མནན་པའི་ལས་ལ་དགོངས་པ་ཙམ་གྱིས་མདུན་གྱི་ལིང་ག་དགྲ་བགེགས་དངོས་སུ་གསལ་བའི་གནས་ལྔར་གནམ་ལྕགས་ཀྱི་འཁོར་ལོ་རྩིབས་བཞི་པ་ལྟེ་བར་སྣ་ཚོགས་རྡོ་རྗེའི་མཚན་པ་རེ་རེས་མནན་ཅིང་། ཡན་ལག་དང་ཚིགས་བཞི་ཐམས་ཅད་རྡོ་རྗེ་རྒྱ་གྲམ་རེ་རེས་གཟིར་བས་ཉམས་ཐག་ཅིང་གཡོ་འགུལ་མི་ཤེས་པར་གྱུར་བར་བསམ། མནན་སྔགས་མང་དུ་བཟླའོ། །གསུམ་པ་ཐུན་བརྡེག་པ་ནི། ཧཱུྃ་ཧཱུྃཿ ཁྲག་འཐུང་ཁྲོས་པ་དྲག་པོའི་མཚོན། །གཏུམ་དྲག་ཕོ་ཉ་འབར་བའི་ཐུན། །ལྕགས་ཕྱེ་རྡོ་ཕྱེ་དུག་སྣ་དང་། །ཡུངས་དཀར་ཡུངས་ནག་སྐེ་ཚེ་ཏིལ། གཟེ་མ་སྐྱེར་མ་སེ་བའི་ཚེར། །རྣོ་མྱུར་ཤུགས་དྲག་རྡོ་རྗེའི་མེ། །མི་བཟད་མཚོན་ཆའི་འཁྲུལ་འཁོར་ནི། །གནམ་ས་འཁྲུགས་པའི་ཐོག་སེར་བཞིན། །རྫས་སྔགས་ཏིང་འཛིན་ལྡན་པས་བྲབ། །དགྲ་བགེགས་གཟུགས་ཕུང་རྟེན་ལ་ཡ། །རྡུལ་ཕྲན་བཞིན་དུ་བརླག་པར་མཛོད། །རྣམ་ཤེས་ཆོས་དབྱིངས་ཀློང་དུ་སྒྲོལ། །རྩ་སྔགས་མཐར། །དགྲ་བགེགས་གནོད་བྱེད་སརྦ་ཤ་ཏྲུཾ་ཧུར་ཐུཾ་ཛཿ ནྲྀ་ཏྲི་མ་ར་ཡ་རྦད་རྦདཿ ཅེས་བརྗོད་པས། ཐུན་རྫས་དྲེགས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོས་དམིགས་བྱ་རྣམས་གཟིར་ཞིང་བརྡེག་པས་གཟུགས་ཕུང་ཕྱེ་མར་བརླག་ནས་རྣམ་པར་ཤེས་པའི་ངོ་བོ་ཏྲི་དམར་སེར་ནྲྀ་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམ་གྱིས་བསད་པར་བསམ་མོ། །བཞི་པ་དེ་ལྟར་གནད་ལ་དབབ་པའི་དོན་བསྟན་པ་ནི། ཧཱུྃ་ཧཱུྃཿ ཞེ་སྡང་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམས་ཀུན། །ཁྲོས་པས་སྐད་ཅིག་བརླག་མཛད་དེ། །བརླག་པར་མ་གྱུར་གང་ཡང་མེད། །སྙིང་རྗེའི་སེམས་ཀྱིས་རབ་བཅིངས་ནས། །དྲག་པོའི་ལས་ཀྱིས་བསྒྲལ་བ་རྣམས། །འཁོར་བ་ལས་ནི་ཕ་རོལ་བྱས། །སངས་རྒྱས་རྣམས་ཀྱི་ཞིང་དུ་འགྲོ། །ཀྱེ་མ་གསད་བྱ་ལེགས་པར་བྱས། །གསད་པར་བྱ་བ་མ་བསད་དོ། །ཇི་སྲིད་སྡིག་རྣམས་གྲོལ་བར་བྱས། །ཤི་བ་དེ་ཡང་མ་ཤི་སྟེ། །སྡིག་པ་སྟོང་ཕྲག་བྱས་པ་སྤངས། །མནར་མེད་ལ་སོགས་མི་སྐྱེའོ། །ཨེ་མ་བདག་ཉིད་ཆེན་པོ་སྟེ། །བསད་པས་སངས་རྒྱས་བྱང་ཆུབ་ཐོབ། །སླར་ཡང་བརྩེ་བས་སེམས་ཅན་རྣམས། །བསད་པར་བྱ་བས་གསད་པར་བྱ། །ཨེ་མ་སྙིང་རྗེའི་སྟོབས་ཀྱིས་ཏེ། །སྙིང་རྗེ་དམན་པས་འགྲུབ་མི་འགྱུར། །སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་བརྗོད། བརྒྱད་པ་ཕུར་བུ་གདབ་པ་ལ་གསུམ་ལས། དང་པོ་ཕུར་བུ་ལྷར་བསྐྱེད་ཅིང་བསྐུལ་བ་ནི། ཕུར་བུ་ཐལ་མོ་སྦྱར་བའི་བར་དུ་བཟུང་ལ། བདག་ཉིད་དཔལ་ཆེན་པོ་ཡང་དག་ཧེ་རུ་ཀར་གསལ་བའི་གཡས་ཀྱི་སོར་མོ་ལྔ་ལ་ཨོཾ་ཧཱུྃ་ཏྲཾ་ཧྲཱི་ཨཱ༔ལས་རིགས་ཀྱི་ཡབ་ལྔ་དང་། གཡོན་གྱི་སོར་མོ་ལྔ་མཱུཾ་ལཱཾ་མཱཾ་པཱཾ་ཏཱཾ་ལས་རིགས་ཀྱི་ཡུམ་ལྔ་སྟེ་རིགས་ལྔ་ཡབ་ཡུམ་བཅུར་གྱུར་པ་རྣམས་ཀྱིས་ས་མ་ཡཱ་སྟྭཾ། ཞེས་བརྗོད་ཅིང་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་མཁའ་ལ་སྲས་མཆོག་བཛྲ་ཀཱི་ལ་ཡ་སྐུ་སྟོད་ཁྲོ་བོ་མཐིང་ནག་ཕུར་བུ་འདྲིལ་བ། དུར་ཁྲོད་ཀྱི་ཆས་ཀྱིས་བརྒྱན་པ། སྐུ་སྨད་གནམ་ལྕགས་ཀྱི་ཕུར་བུ་ཟུར་གསུམ་པ་ཤིན་ཏུ་རྣོ་བའི་དབལ་དང་ལྡན་པ་ཆུ་སྲིན་གྱི་ཁ་ནས་སྦྲུལ་གྱི་ཆུན་པོ་སྐྱུགས་པ། ཕྱི་ཕུར་བུའི་རྣམ་པ་ཅན་ལ་ནང་དུ་གསང་བའི་བདག་པོའི་དཀྱིལ་འཁོར་ཡོངས་སུ་རྫོགས་པ། རྩེ་མོར་དྲེགས་པའི་དམག་ཚོགས་ལས་ལ་རྔམས་ཤིང་འོད་དང་མེ་ཡི་ཚ་ཚྭ་འཕྲོ་བ་ཞིག་ཏུ་གྱུར། ཨཱོྃ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཀྐ་ཙིཏྟ་ཨ་བྷི་ཥིཉྩ་མཾ། ཞེས་བརྗོད་པས། ཕུར་བུའི་གནས་གསུམ་དུ་ཨོཾ་ཨཱ༔ཧཱུྃ་གསུམ་གསལ་བ་ལས་འོད་ཟེར་འཕྲོས། ཕྱོགས་དུས་ཀྱི་རྒྱལ་བ་སྲས་བཅས་མ་ལུས་པ་མཆོད་ཅིང་བྱིན་རླབས་ནུས་མཐུ་ཐམས་ཅད་བསྡུས་ནས་ཕུར་པ་ལ་ཐིམ་པས་སྲིད་ཁམས་རྒྱ་མཚོ་དུས་གཅིག་ལ་སྒྲོལ་བར་ནུས་པའི་དབང་ཐོབ་པར་གྱུར་བར་བསམ་ལ། ཧཱུྃ་ཧཱུྃཿ ཁྲོ་རྒྱལ་ཁྲག་འཐུང་ཆེན་པོ་ཡི། །སྲས་མཆོག་བཛྲ་ཀཱི་ལ་ཡ། །བསྒྲིལ་བས་ལྷ་ཡང་སྐྲག་བྱེད་ཅིང་། །ཕྱར་བས་ཁམས་གསུམ་སྔངས་བྱེད་ན། །བཏབ་པས་དགྲ་བགེགས་སྨོས་ཅི་དགོས། །ཡེ་ནས་མ་བྱུང་མ་སྐྱེས་པའི། །ཆོས་ཉིད་དོན་གྱི་སྙིང་པོ་ནི། །གཟུང་འཛིན་མཐའ་བྲལ་དོན་རྟོགས་ཏེ། །ང་བདག་འཛིན་པའི་རྣམ་རྟོག་གིས། །དྲེགས་ཤིང་གཟིར་བའི་རུ་ཏྲ་དེ། །མ་བསྒྲལ་བ་ནི་ཉེས་པ་སྟེ། །ཐབས་དང་ཤེས་རབ་སྙིང་རྗེ་གསུམ། །མཐུན་ཞིང་མཚུངས་ལྡན་སྲས་ཀྱིས་བསྒྲལ། །དམ་པའི་དོན་དེ་མ་རྟོགས་པར། །དངོས་པོར་སྤྱད་པས་འཁོར་བར་ལྟུང་། །མཁས་རྟོགས་ལྡན་པས་སྤྱད་པ་ཡིས། །འཕགས་པ་མཉེས་ཤིང་སེམས་ཅན་སྒྲོལ། །ཚོགས་གཉིས་རྫོགས་ཏེ་སྐུ་གསུམ་ཐོབ། །དེ་ཕྱིར་སྙིང་རྗེའི་ཡུལ་གྱུར་པའི། །ཞིང་བཅུ་ཚངས་པའི་ལོག་འདྲེན་རྣམས། །གཟུང་འཛིན་བག་ཆགས་རྒྱུན་གཅོད་ཕྱིར། །ཐུགས་རྗེས་ཡེ་ཤེས་ཀློང་དུ་སྒྲོལ། །ཞེས་དང་། ཆོ་ག་ལྷག་ཆད་དུ་མི་འགྲོ་ཕྱིར་ཚོགས་ཐ་མ་བསྒྲལ་བསྟབས་ཀྱང་སྦྱོར་བ་ལེགས་པར་བཤད་པས་འདིར་ཡང་། ཧཱུྃ་ཧཱུྃཿ དུས་གསུམ་སངས་རྒྱས་སྟོང་རྩའི་སྐུ་བསྲུང་བ༔ བདག་ཉིད་གསང་བདག་གཏུམ་པོའི་ཁྲོས་པའི་རྩལ༔ སྤྲུལ་པའི་སྲས་མཆོག་བཛྲ་ཀཱི་ལ་ཡས༔ དགྲ་བགེགས་དུག་ལྔའི་ཕུང་པོ་རྡུལ་དུ་བརླགས༔ རྣམ་ཤེས་རིག་པ་ཆོས་ཀྱི་དབྱིངས་སུ་སྤར༔ ཨཱོྃ་བཛྲ་ཀཱི་ལི་ཀཱི་ལ་ཡ་བཛྲ་པཱ་ཎི་སརྦ་ཤ་ཏྲུཾ་དགྲ་བགེགས་འབྱུང་པོ་མ་ར་ཡ་ཧཱུྃ་ཕཊ༔ ཅེས་སོ། གཉིས་པ་རྫོང་འཕྲང་སྲོག་གསུམ་གྱི་གནད་དང་ལྡན་པས་བརྟེན་པ་དབྱིངས་སུ་བསྒྲལ་བ་ནི། གསལ་བ་གསུམ་གྱི་ང་རྒྱལ་བརྟན་པོའི་ངང་ནས་དྲག་སྔགས་སོ་ལྔ་པ་ཕུར་སྐོར་དང་སྦྱར་ཏེ། ཕུར་བུ་སྙིང་གར་གདབ་པས་སྲས་མཆོག་གི་འོད་ཟེར་གྱིས་ཁོ་ལ་ལྷན་སྐྱེས་སུ་གནས་པའི་བདུད་བཞི་རང་གཤེད་དུ་བབ་ནས་འཁོར་ལོ་བཞིའི་རྩ་རྣམས་བཅད། གཟུགས་ཕུང་གི་འབྱུང་ལྔའི་དངས་མ་རྣམས་རིམ་བཞིན་དུ་འདུས་ནས་ཡལ། ཁོའི་ཚེ་བསོད་བཀྲག་མདངས་ཐམས་ཅད་ཡི་གེ་ཨའི་རྣམ་པར་བསྡུས་ནས་རང་ལ་བསྟིམ་པས་གཉིས་མེད་བྱང་ཆུབ་ཀྱི་སེམས་སུ་གྱུར་པས་བདག་ཉིད་བཀྲག་མདངས་གཟི་བྱིན་དང་ལྡན་པར་གྱུར་བར་བསམ་པ་ནི་ཚེ་ལུང་དང་། ཀུན་གཞི་ནྲྀ་ཡི་རྣམ་པར་གནས་པ་དེ་ཉིད་ཕུར་རྩེའི་ཧཱུྃ་གིས་བླངས་ཏེ་ཕུར་པའི་ཁོང་སེང་ནས་བརྒྱུད་པས་ལས་ཉོན་དང་ཤེས་བྱའི་སྒྲིབ་པ་མ་ལུས་པ་ལྷག་མེད་དུ་སྦྱངས་ནས་རྣམ་ཤེས་དྭངས་མའི་ཐིག་ལེ་ཧཱུྃ་སྔོན་པོར་གྱུར་པ་རྒྱ་མདུད་ཀྱི་དབུས་ནས་ཐོན་ཏེ། འོག་མིན་དུ་རྡོ་རྗེ་སེམས་དཔའི་ཐུགས་ཀར་ཐིམ་པར་གྱུར་བར་བསམ་པ་ནི་ཁྲུས་ལུང་སྟེ། དམིགས་པ་དེ་དག་དང་ལྡན་པས་སླར་ཡང་། ཧཱུྃ་ཧཱུྃ༔ ཆོས་ཀུན་སྒྱུ་མ་ལྟ་བུ་ལ། །བསྒྲལ་བྱ་སྒྲོལ་བྱེད་བསྒྲལ་བའི་ལས། །ཡང་དག་ཉིད་དུ་མི་དམིགས་ཀྱང་། །ལས་ཉོན་བགས་ཆགས་གཞོམ་པའི་ཕྱིར། །ཀུན་ཁྱབ་ཐུགས་རྗེའི་རང་མདངས་ལས། །ལོག་རྟོག་འཁོར་བར་འཁྱམས་པའི་འགྲོ། །མ་ལུས་དབྱིངས་སུ་སྒྲོལ་བྱེད་པའི། །རང་བྱུང་ཡེ་ཤེས་ཕུར་པ་འདིས། །ཐོག་མར་རྟོག་གོམ་བདག་ཉིད་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །གསལ་བ་གསུམ་ལྡན་ཏིང་འཛིན་གྱིས། །ཐུགས་རྗེའི་ཀློང་ནས་སྤྲུལ་པའི་སྲས། །བསྒྲིལ་ཞིང་གདབ་པས་ཞིང་བཅུ་ཡི། །ཚེ་བསོད་བསྡུས་ཏེ་རང་ལ་བསྟིམ། །ལས་སྒྲིབ་བག་ཆགས་དྲུང་ཕྱུངས་ཤིང་། །འཁོར་བའི་ལམ་ལྔ་སྒོ་བཅད་ནས། །རྣམ་ཤེས་ཧཱུྃ་གིས་བསྡུས་གཏུབ་ཏེ། །བླ་མེད་འོག་མིན་གནས་མཆོག་ཏུ། །གཙོ་བོ་ལྔ་དང་གཙོ་མོ་ལྔ། །སེམས་དཔའ་དང་ནི་སེམས་མ་དང་། །ཁྲོ་བོ་དང་ནི་ཁྲོ་མོ་རྣམས། །སྦྱོར་བའི་ལྷུམས་སུ་ཕཊ་ཀྱིས་འཕང་། །ཞེས་པས་སྐྱེ་མེད་དབྱིངས་སུ་སྤར་ནས། དམིགས་མེད་ཀྱི་ངང་ལ་དར་ཅིག་མཉམ་པར་བཞག་གོ །གསུམ་པ་རྟེན་གཞི་སྙིགས་མའི་ལུས་དབྱིངས་སུ་བསྒྲལ་བ་ནི། གདབ་ཕུར་དམིགས་བྱའི་གནས་སོ་སོར་གདབ་ཅིང་། ཧཱུྃ་ཧཱུྃཿ ལྕགས་སམ་ནག་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་ཟུར་གསུམ། །ལོགས་ལ་དྲག་པོའི་ལྷ་བཀོད་དེ། །ཞེ་སྡང་རྡོ་རྗེར་གསལ་བར་གདབ། །ཞེ་སྡང་རྡོ་རྗེའི་ཏིང་འཛིན་གྱིས། །ཆོ་ག་སྔགས་དང་རྫས་ལྡན་པས། །ཆོས་སྐུ་རྡོ་རྗེའང་འཇིག་འགྱུར་ན། །གཞན་ལྟ་སྨོས་ཀྱང་ཅི་ཞིག་དགོས། །རྣོ་མྱུར་ཤུགས་དྲག་ཕུར་པ་འདིས། །ཞིང་བཅུའི་སྤྱི་བོ་མགྲིན་པ་དང་། །སྙིང་ག་ལྟེ་བ་གསང་གནས་ལྔར། །གཟིར་ཅིག་བཛྲ་ཀཱི་ལ་ཡ། །མིག་དང་རྣ་བ་སྣ་དང་ལྕེ། །དོན་ལྔ་སྣོད་དྲུག་ཡན་ལག་ལྔ། །ཤ་རུས་པགས་པ་རྩ་རྒྱུས་ལ། །གཟིར་ཅིག་བཛྲ་ཀཱི་ལ་ཡ། །གཞན་ཡང་མཛའ་བཤེས་གཉེན་འཁོར་དཔུང་། །ཡུལ་མཁར་དབང་ཐང་ལོངས་སྤྱོད་སོགས། །བརྣག་པའི་ཡུལ་དུ་གྱུར་རྣམས་ལ། །གཟིར་ཅིག་བཛྲ་ཀཱི་ལ་ཡ། །ཞེས་བརྗོད་ཅིང་གདབ་པས། ཕུར་བའི་དབལ་སོ་ནས་མེ་དང་མཚོན་ཆའི་ཆར་བབས་པས་ལས་ཉོན་འདུས་པའི་གཟུགས་ཕུང་དེ་ཉིད་དུམ་བུར་གཏུབ་པར་བསམ་མོ། །དགུ་པ་མཚོན་ཆས་བསྒྲལ་བ་ནི། །སྒྲོལ་གྲི་ཐོགས་ལ། ཧཱུྃ་ཧཱུྃཿ གནམ་ལྕགས་རལ་གྲི་གདུག་པའི་དབལ། །རེག་གཅོད་ཡེ་ཤེས་མཚོན་ཆེན་པོས། །ཞིང་བཅུ་ཚངས་བའི་དགྲ་བགེགས་ཀྱི། །ཕུང་ཁམས་སྐྱེ་མཆེད་ལས་ཉོན་སྒྲིབ། །ཐལ་བའི་རྡུལ་བཞིན་བརླག་ནས་ནི། །ལོག་རྟོག་འཁོར་བ་རྒྱུན་བཅད་དེ། །ཐར་མཆོག་གཉུག་མའི་གཏན་སྲིད་ལ། །མངའ་དབང་བསྒྱུར་བའི་མཐུ་ལྡན་ཤོག །རྩ་སྔགས་མཐར། དགྲ་བགེགས་གནོད་བྱེད་སརྦ་ཤ་ཏྲུཾ་ཧུར་ཐུམ་ཛཿ ནྲྀ་ཏྲི་མ་ར་ཡ་རྦད༔ ཅེས་བརྗོད་ཅིང་། རྣམ་ཤེས་སྤར་ཤུལ་གྱི་ལས་ཉོན་སྒྲིབ་ཚོགས་ཕུང་པོའི་རྣམ་པར་གནས་པ་དེ་ཉིད་ཕྱེ་མར་འཐག་པར་བསམ་ལ་སྒྲོལ་གྲིས་དུམ་བུར་གཏུབ་བོ། བཅུ་པ་གཏུན་དུ་བརྡུང་བ་ནི། ཧཱུྃ་ཧཱུྃཿ སྟོང་ཆེན་རྡོ་རྗེ་བཙུན་མོའི་མཁར། །ཐབས་མཆོག་བདེ་ཆེན་རྡོ་རྗེ་ཡིས། །ཞིང་བཅུ་བསྒྲལ་བའི་ཤ་ཁྲག་རུས། །བརྡུངས་ཤིག་ཆོམས་ཤིག་རྡུལ་དུ་རློགས། །ཁྲོ་མོ་འབར་བའི་ཧོམ་ཁུང་དུ། །རྡོ་རྗེ་ཐོ་བས་བརྡུང་བྱས་པས། །ལྷ་ཡང་རུང་སྟེ་བརླག་བྱེད་ན། །དགྲ་དང་བགེགས་ལ་སྨོས་ཅི་དགོས། །རྩ་སྔགས་དང་། ཨཱོྃ་བཛྲ་པདྨ་ཨ་ཀོ་ཊ་ཡ་ཁ་ཐཾ་ཁ་ཐཾ་ཧཱུྃ་ཕཊཿ ཅེས་བརྡུངས་པས་ངོ་བོ་ཞིང་བཅུའི་ལས་ཉོན་བག་ཆགས་ཀྱི་ཕུང་པོ་ལ་རྣམ་པ་ཤ་ཁྲག་རུས་གསུམ་གཅིག་ཏུ་འདྲེས་པའི་རྒྱ་མཚོ་ཆེན་པོ་ཟག་མེད་ཀྱི་བདུད་རྩི་དང་གཉིས་སུ་མེད་པ་རྒྱ་ཁྱོན་བསམ་གྱིས་མི་ཁྱབ་པ་ལྷ་ཚོགས་རྣམས་ཀྱི་དགྱེས་པ་སྐོང་བར་བྱེད་པའི་རང་བཞིན་ཅན་དུ་གྱུར་བར་བསམ་མོ། །བཅུ་གཅིག་པ་ཞལ་དུ་བསྟབས་པ་ནི། ཧཱུྃ་ཧཱུྃཿ ཕྱེས་ཤིག་ཕྱེས་ཤིག་ཞལ་ཕྱེས་ཤིག །གསང་བདག་དཀྱིལ་འཁོར་ལྷ་ཚོགས་རྣམས། །གནམ་ས་ཙམ་གྱི་ཞལ་གདངས་ཤིང་། །རི་རབ་ཙམ་གྱི་མཆེ་བ་གཙིགས། །བར་སྣང་ཙམ་གྱི་ལྗགས་རྐྱོངས་ལ། །སྟོང་གསུམ་ཙམ་གྱི་མྱིད་པ་རུ། །ཞིང་བཅུའི་དགྲ་བགེགས་མ་ལུས་པའི། །ཟག་བཅས་ཕུང་པོ་ཁམས་སྐྱེ་མཆེད། །སེམས་དང་སེམས་བྱུང་འཁྲུལ་རྟོག་ཚོགས། །ལས་ཉོན་རྒྱུ་དང་འབྲས་བུར་བཅས། །ཞལ་དུ་བསྟབ་པོ་ཁ་རཾ་ཁཱ་ཧི། །མགུལ་དུ་བསྒྲེང་ངོ་ཨ་ར་ལི། །དབྱིངས་སུ་བསྟིམ་མོ་ས་མ་ཡཱ། །བཞེས་ཤིག་ལྷག་མ་མེད་པར་མཛོད། །ཞེས་དང་ཆད་ལྷག་བསྐང་ཕྱིར་སླར་ཡང་། ཧཱུྃ་ཧཱུྃཿ དགྲ་བགེགས་བསྒྲལ་བའི་ཕུང་པོ་ཚོགས་ཀྱི་རྫས༔ དུག་གསུམ་ཤ་ཁྲག་རུས་པ་མ་ལུས་ཀུན༔ སྐུ་གསུམ་བདག་ཉིད་ལྷ་ཚོགས་ཞལ་དུ་བསྟབས༔ དུག་གསུམ་དབྱིངས་གྲོལ་བདེ་ཆེན་མཆོག་ཐོབ་ཤོག༔ རུ་ཏྲ་ཧ་ལ་པཉྩ་མ་ཧཱ་མཾ་ས་རཀྟ་ཀེཾ་ནི་རི་ཏི་ཁཱ་ཧི༔ ཞེས་བརྗོད་ཅིང་བསྟབས་པས། ལྷ་ཚོགས་རྣམས་ཀྱིས་རྐན་སྒྲ་དང་བཅས་ཏེ་གསོལ་བས་མཉེས་ཤིང་ཚིམས་ནས་ཅི་བཅོལ་བའི་ཕྲིན་ལས་མཛད་པར་བསམ་ལ་ལིང་རོ་སྒྲུབ་གཏོར་སོགས་ལ་བྲན་ནོ། །དེ་ནས་ཚོགས་ལ་རོལ་ཅིང་སྒོ་གསུམ་རྡོ་རྗེ་གསུམ་གྱི་རོལ་པར་ཤེས་བཞིན་པའི་ངང་ནས་སྤྱོད་ལམ་ལ་འཇུག་པའོ། ། ༧ གསུམ་པ་བཟློག་པའི་ལས་རིམ་ལ་ལྔ་ལས། ཐོག་མར་དཀྱིལ་འཁོར་གྱི་ལྷ་ཚོགས་རྣམས་ལ་བཟློག་པའི་ཕྲིན་ལས་བཅོལ་བ་ནི། གཏོར་ཆུང་ལྷ་གྲངས་སོགས་བཤམས་ཤིང་། འགུགས་གཞུག་དང་བྱིན་རླབས་སྤྱི་ལྟར་བྱས་ལ། རོལ་མོའི་སྒྲ་དང་བཅས་ཏེ་འདི་བཞིན་དུ་གྱེར་རོ། །ཧཱུྃ་ཧཱུྃཿ སྐུ་གསུམ་རྒྱལ་བ་མ་ལུས་པའི། །མཐུ་སྟོབས་ཡེ་ཤེས་འདུས་པའི་དཔལ། །གསང་བ་ཀུན་བདག་ཧེ་རུ་ཀཿ བཅོམ་ལྡན་ཕྱག་ན་རྡོ་རྗེ་ནི། །འཁོར་འདས་ཡོངས་ཀྱི་སྤྱི་དཔལ་ཏེ། །ཐུགས་རྗེ་ཕྲིན་ལས་དཔག་མེད་པས། །གཉིས་འཛིན་གློ་བུར་འཁྲུལ་སྣང་ཀུན། །སྐྱེ་འགགས་མེད་པའི་དབྱིངས་སུ་ཟློག །ཆོས་ཉིད་འགྱུར་བ་མེད་པའི་ཕྱིར། །སྐུ་མདོག་མཐིང་ནག་རབ་ཏུ་འབར། །ཀུན་རྫོབ་སྣང་ཆའི་ཉེས་ཚོགས་ཀུན། །འཕོ་འགྱུར་མེད་པའི་ངང་དུ་ཟློག །ཉག་གཅིག་ཆོས་གཅིག་མི་གཉིས་ཕྱིར། །ཞལ་གཅིག་ནམ་མཁའི་མདོག་ལྟར་གསལ། །གཉིས་སྣང་དངོས་པོར་ཞེན་པ་རྣམས། །གཉིས་མེད་ཆོས་སྐུའི་ཀློང་དུ་ཟློག །བདེ་སྟོང་ཟུང་དུ་འཇུག་པའི་ཕྱིར། །དཔའ་བོ་ཆེན་པོའི་ཕྱག་གཉིས་ཀྱིས། །ཟག་བཅས་འཕོ་བའི་འཛིན་ཞེན་ཀུན། །ལྷན་སྐྱེས་ཡེ་ཤེས་ཆེན་པོར་ཟློག །ལོག་རྟོག་དྲེགས་པ་འདུལ་བའི་ཕྱིར། །གནམ་ལྕགས་རྡོ་རྗེ་ཕྱར་བ་ཡིས། །གནོད་ཅིང་གདུག་པའི་བསམ་སྦྱོར་ཀུན། །དམིགས་མེད་ཐུགས་རྗེའི་ཀློང་དུ་ཟློག །ཉོན་མོངས་གདོན་ཚོགས་འཆིང་བའི་ཕྱིར། །སྦྲུལ་ཞགས་ཐོགས་པའི་སྡིགས་མཛུབ་ཀྱིས། །མ་རིག་ལས་བྱུང་དགྲ་གདོན་བགེགས། །རང་བྱུང་རིག་པའི་ངང་དུ་ཟློག །ཁམས་གསུམ་མ་ལུས་དབང་སྡུད་ཕྱིར། །གློག་ལྟར་གཡོ་བའི་སྤྱན་གསུམ་གྱིས། །ཁམས་གསུམ་ལ་གནས་རྒྱུ་འབྲས་ཀུན། །སྐུ་གསུམ་དགོངས་པའི་ཀློང་དུ་ཟློག །སྲིད་གསུམ་ཟིལ་གྱིས་གནོན་བྱེད་པའི། །སྨིན་མ་སྨ་ར་ཨག་ཚོམ་འབར། །དུག་གསུམ་ལས་ཉོན་རྣམ་སྨིན་བཅས། །གསང་བ་གསུམ་གྱི་ངང་དུ་ཟློག །བདུད་བཞིའི་གཡུལ་ལས་རྒྱལ་བའི་ཕྱིར། །རྣོ་དཀར་མཆེ་བ་བཞི་གཙིགས་པས། །བདུད་བཞིས་གནོད་ཅིང་འཚེ་བ་རྣམས། །ཚད་མེད་རྣམ་བཞིའི་ངང་དུ་ཟློག །རིགས་སྔགས་རྦོད་གཏོང་བཟློག་པའི་ཕྱིར། །གློག་ལྟར་མྱུར་བའི་ལྗགས་འདྲིལ་བས། །དམོད་སྔགས་མཐུ་གཏད་ཧོམ་སྦྱོར་སོགས། །བསམ་བརྗོད་བྲལ་བའི་དབྱིངས་སུ་ཟློག །དྲེགས་ཚོགས་བྲན་དུ་ཁོལ་བའི་ཕྱིར། །ཁམ་ནག་དབུ་སྐྲ་བརྫེས་པ་ཡིས། །དྲེགས་པ་ཡོངས་ཀྱི་གདུག་པའི་སེམས། །དམིགས་པ་མེད་པའི་དབྱིངས་སུ་ཟློག །རིགས་ལྔའི་སངས་རྒྱས་རྫོགས་པའི་ཕྱིར། །ཐོད་སྐམ་ལྔ་ཡིས་དབུ་བརྒྱན་པས། །ཉོན་མོངས་དུག་ལྔའི་རྟོག་སྒྲིབ་ཀུན། །ཡེ་ཤེས་ལྔ་ཡི་ངང་དུ་ཟློག །སེམས་བྱུང་ལྔ་བཅུ་གནས་དག་པའི། །ཐོད་རློན་ཕྲེང་བའི་དོ་ཤལ་གྱིས། །བརྒྱད་ཁྲི་བཞི་སྟོང་རྟོག་པའི་ཚོགས། །གསལ་སྟོང་འཛིན་མེད་ངང་དུ་ཟློག །ལོག་རྟོག་མ་སྤང་གནས་དག་ཕྱིར། །བཀོད་པ་ཐལ་ཆེན་ཚོམ་བུ་ཡིས། །ལོག་པར་ལྟ་བའི་དགྲ་གདོན་བགེགས། །རང་གྲོལ་ཡེ་ཤེས་ཆེན་པོར་ཟློག །ང་རྒྱལ་མ་སྤང་གནས་དག་ཕྱིར། །བྱུགས་པ་ཞག་གི་ཟོ་རིས་ཀྱིས། །ང་རྒྱལ་ལས་བྱུང་དགྲ་གདོན་བགེགས། །མཉམ་ཉིད་ཡེ་ཤེས་ཀློང་དུ་ཟློག །འདོད་ཆགས་མ་སྤང་གནས་དག་ཕྱིར། །བྲིས་པ་རཀྟའི་ཐིག་ལེ་ཡིས། །འདོད་ཆགས་ལས་བྱུང་དགྲ་གདོན་བགེགས། །སོར་རྟོག་ཡེ་ཤེས་ཀློང་དུ་ཟློག །གཏི་མུག་མ་སྤང་གནས་དག་པའི། །སྟོད་གཡོག་གླང་ཆེན་ཀོ་རློན་གྱིས། །གཏི་མུག་ལས་བྱུང་དགྲ་གདོན་བགེགས། །ཆོས་དབྱིངས་ཡེ་ཤེས་ཀློང་དུ་ཟློག །ཞེ་སྡང་མ་སྤང་གནས་དག་པའི། །སྨད་དཀྲིས་སྟག་གི་པགས་པ་ཡིས། །ཞེ་སྡང་ལས་བྱུང་དགྲ་གདོན་བགེགས། །མེ་ལོང་ཡེ་ཤེས་ཀློང་དུ་ཟློག །ཕྲག་ཏོག་མ་སྤང་གནས་དག་པའི། །སྐེད་དཀྲིས་ཞིང་ཆེན་གཡང་གཞི་ཡིས། །ཕྲག་ཏོག་ལས་བྱུང་དགྲ་གདོན་བགེགས། །ནན་ཏན་ཡེ་ཤེས་ཀློང་དུ་ཟློག །རྒྱལ་རིགས་ཀླུ་གཉན་འདུལ་བའི་ཕྱིར། །མགུལ་རྒྱན་དུང་སྦྲུལ་དཀར་པོ་ཡིས། །རྒྱལ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །བྲམ་ཟེ་ཀླུ་གཉན་འདུལ་བའི་ཕྱིར། །དབུ་རྒྱན་སྦྲུལ་ཆེན་དབང་མདོག་གིས། །བྲམ་ཟེའི་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །རྗེ་རིགས་ཀླུ་གཉན་འདུལ་བའི་ཕྱིར། །ཕྱག་གདུབ་གསེར་སྦྲུལ་སེར་པོ་ཡིས། །རྗེ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །དམངས་རིགས་ཀླུ་གཉན་འདུལ་བའི་ཕྱིར། །སྐ་རགས་གཡུ་སྦྲུལ་ལྗང་ཀུ་ཡིས། །དམངས་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །གདོལ་བའི་ཀླུ་གཉན་འདུལ་བའི་ཕྱིར། །དུག་སྦྲུལ་ནག་པོའི་ཞབས་གདུབ་ཀྱིས། །གདོལ་རིགས་ས་བདག་ཀླུ་གཉན་གྱི། །གནོད་པའི་བསམ་སྦྱོར་དབྱིངས་སུ་ཟློག །མ་ལུས་ཟིལ་གནོན་དབང་སྡུད་ཕྱིར། །ཞབས་གཉིས་བརྐྱང་བསྐུམ་བགྲད་པ་ཡིས། །དྲེགས་པ་ཕོ་མོ་མ་ལུས་པའི། །གནོད་པའི་བསམ་སྦྱོར་དབྱིངས་སུ་ཟློག །གཟའ་ཀླུའི་གདུག་པ་འདུལ་བའི་ཕྱིར། །གཟའ་བརྒྱད་ཀླུ་བརྒྱད་བཏིང་བ་ཡིས། །གཟའ་ཀླུའི་གདུག་པའི་བསམ་སྦྱོར་རྣམས། །དམིགས་མེད་སྟོང་པའི་དབྱིངས་སུ་ཟློག །སྲིད་ཞིའི་ཁམས་ལ་དབང་བསྒྱུར་རྟགས། །པད་ཉིའི་གདན་ལ་བཞུགས་པ་ཡིས། །འགལ་རྐྱེན་མི་མཐུན་ཕྱོགས་རྣམས་ཀུན། །མི་གནས་ཡེ་ཤེས་ཆེན་པོར་ཟློག །ལས་ཉོན་བག་ཆགས་སྲེག་པའི་ཕྱིར། །ཡེ་ཤེས་མེ་དཔུང་ཀློང་བཞུགས་པས། །སྔོན་ལས་འཕྲལ་རྐྱེན་ངན་པའི་ཚོགས། །རང་བཞིན་རྣམ་དག་དབྱིངས་སུ་ཟློག །རྒྱལ་ཀུན་གསང་བའི་མཛོད་འཛིན་རྟགས། །རིགས་བདག་མི་བསྐྱོད་རྒྱལ་པོ་ཡིས། །རྟེན་འབྱུང་སྒྱུ་མའི་འཁྲུལ་སྣང་ཀུན། །བདལ་ཁྱབ་ཀ་དག་ཀློང་དུ་ཟློག །ཆོས་ཉིད་ཞི་ལས་མ་གཡོས་ཀྱང་། །ཐུགས་རྗེས་ཁྲོ་བོའི་སྐུར་སྟོན་པ། །གདུལ་དཀའ་མ་ལུས་འདུལ་བ་པོ། །ཡང་དག་དཔལ་ཆེན་ཧེ་རུ་ཀས། །ལོག་རྟོག་རུ་ཏྲའི་དུག་གསུམ་གྱི། །ཤ་ཁྲག་གཏོར་མ་འདི་བཞེས་ལ། །བླ་མའི་ཐུགས་དང་འགལ་བ་སོགས། །བྱང་ཆུབ་སྒྲུབ་པའི་བར་ཆད་ཟློག །ཡེ་ཤེས་ལྷ་ཡི་བཀའ་ཆད་དང་། །མ་མོ་མཁའ་འགྲོའི་བསུན་མ་ཟློག ། ༧ གསོད་གཅོད་རྐུ་འཕྲོག་འཐབ་རྩོད་སོགས། །སྡང་བ་དགྲ་ཡི་གནོད་པ་ཟློག ཧོར་སོག་མཐའ་བཞིའི་དམག་དཔུང་དང་། །དུས་འཁྲུགས་མཚོན་ཁ་དར་བ་ཟློག །དལ་ཡམས་འགོ་བའི་ནད་རིམ་སོགས། །མི་ལ་ན་ཚ་བྱུང་བ་ཟློག །གློ་གོར་ཧོན་གསུམ་སྐེ་འགགས་སོགས། །ཕྱུག་ལ་གོད་ཁ་བྱུང་བ་ཟློག །བཙའ་སད་སེར་བ་འབུ་སྲིན་སོགས། །མི་འདོད་ལོ་ཉེས་སྣ་ཚོགས་ཟློག །ཐུན་ཟོར་གཏད་མནན་སྦྱིན་སྲེག་སོགས། །བན་བོན་བྱད་ཕུར་རྦོད་གཏོང་ཟློག །ལུང་བསྟན་རྩིས་དང་མོ་ལྟས་པྲ། །རྨི་ལམ་མཚན་མ་ངན་པ་ཟློག །ཉམ་ང་ཁུ་འཕྲིག་བག་གྲང་བའི། །རྟགས་དང་རྟེན་འབྲེལ་ངན་པ་ཟློག །མིག་འཕྲུལ་ཐོག་དང་གཅན་གཟན་སོགས། །སྡེ་བརྒྱད་འཁྲུགས་པའི་ཆོ་འཕྲུལ་ཟློག །ས་གཡོ་ཆུ་ལུད་རི་ཉིལ་སོགས། །འབྱུང་བཞིའི་གཡོ་འཁྲུགས་མ་ལུས་ཟློག །མེ་ཆུ་དུག་མཚོན་ཟ་བྱེད་སོགས། །འཇིགས་དང་དུས་མིན་འཆི་བ་ཟློག །གཞན་ཡང་ཡིད་ལ་མི་འདོད་པའི། །རྐྱེན་དང་བར་གཅོད་མ་ལུས་ཟློག །མདོར་ན་སྔོན་ལས་འཕྲལ་རྐྱེན་གྱིས། །བསྐྱེད་པའི་ནད་གདོན་བར་ཆད་སོགས། །མི་མཐུན་གནོད་པའི་ཕྱོགས་རྣམས་ཀུན། །སྤྲོས་བྲལ་བློ་འདས་དབྱིངས་སུ་ཟློག ཧཱུྃ་ཧཱུྃཿ ཁྲོ་རྒྱལ་གསང་བའི་བདག་པོ་ཡི། །སྐུ་གསུང་ཐུགས་ཡོན་ཕྲིན་ལས་ཀྱི། །སྤྲུལ་པ་བྱ་ཁྱུང་རིགས་ལྔ་པོ། །ཀུན་ཀྱང་ཁྲོ་ཆུ་ཞུན་མའི་ལུས། །ལྕགས་ཀྱི་རྭ་དང་མཆུ་སྡེར་ཅན། །མེ་གཤོག་རྡེབ་ཅིང་ཀླུ་རིགས་ཟ། །སྤྱི་གཙུག་རིགས་ལྔའི་ཕྱག་རྒྱས་བརྒྱན། །རལ་གྲིའི་མཇུག་སྒྲོར་མེ་མཚོན་འཕྲོ། །བ་སྤུའི་ཀློང་ནས་ཐོག་སེར་འཁྲིགས། །རང་འདྲའི་ཡང་སྤྲུལ་གྲངས་མེད་འགྱེད། །ཁྱེད་རྣམས་དཔལ་གྱི་བཀའ་ལུང་བཞིན། །བཟློག་ཅིང་བསྒྱུར་བའི་ཕྲིན་ལས་མཛོད། །སྐུ་སྤྲུལ་བུདྡྷ་ག་རུ་ཡིས། །རྒྱལ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །གསོད་གཅོད་རྐུ་འཕྲོག་ལོག་གཡེམ་སོགས། །ལུས་ཀྱི་ལས་ཉོན་རྒྱུ་འབྲས་ཀུན། །སྣང་སྟོང་སྐུ་ཡི་ངང་དུ་ཟློག །གསུང་སྤྲུལ་པདྨ་ག་རུ་ཊ། །བྲམ་ཟེ་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །རྫུན་དང་ཚིག་རྩུབ་ངག་འཁྱལ་དབྱེན། །ངག་གི་ལས་ཉོན་རྒྱུ་འབྲས་ཀུན། །གྲགས་སྟོང་གསུང་གི་དབྱིངས་སུ་ཟློག །ཐུགས་སྤྲུལ་བཛྲ་ག་རུ་ཊ། །དམངས་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །བརྣབ་སེམས་གནོད་སེམས་ལོག་ལྟ་སོགས། །ཡིད་ཀྱི་ལས་ཉོན་རྒྱུ་འབྲས་ཀུན། །གསལ་སྟོང་ཐུགས་ཀྱི་ངང་དུ་ཟློག །ཡོན་ཏན་རཏྣ་ག་རུ་ཊས། །རྗེ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །བག་མེད་རྣམ་གཡེང་ལེ་སོགས། །ཀུན་གཞིའི་ལས་ཉོན་རྒྱུ་འབྲས་རྣམས། །རིག་སྟོང་ཡོན་ཏན་ཀློང་དུ་ཟློག །ཕྲིན་ལས་ཀརྨ་ག་རུ་ཊས། །གདོལ་རིགས་ས་བདག་ཀླུ་གཉན་གྱི། །གནོད་ཅིང་གདུག་པའི་བསམ་སྦྱོར་དང་། །མཚམས་མེད་ལྔ་དང་དེར་ཉེ་སོགས། །སྒོ་ལྔའི་ལས་ཉོན་རྒྱུ་འབྲས་ཀུན། །བདེ་སྟོང་ཕྲིན་ལས་ཀློང་དུ་ཟློག །ཡེ་ཤེས་ཁྱུང་ཆེན་རིགས་ལྔའི་ཚོགས། །ཤ་ཁྲག་གཏོར་མ་འདི་བཞེས་ལ། །འོག་གདོན་ཀླུ་གཉན་ས་བདག་དང་། །ས་སྲིན་ས་འདྲེའི་གདུག་རྩུབ་ཟློག །འབྲས་འབྲུམ་མེ་དབལ་དྲེག་གྲུམ་དང་། །རྨ་སྐྲང་ཤུ་ཐོར་གཉན་གཟེར་ཟློག །གག་ལྷོག་གཟེར་གསུམ་ཚད་རིམ་དང་། །མཛེ་རིགས་བཅོ་བརྒྱད་ནད་རྣམས་ཟློག །གསོད་གཅོད་རྐུ་འཕྲོག༴སོགས་ཀུན་ལ་འགྲེས་སོ། །ཧཱུྃ་ཧཱུྃཿ གསང་བདག་ཐུགས་ལས་སྤྲུལ་པའི་སྲས། །དྲེགས་པ་ཀུན་འདུལ་གཏུམ་པོ་བཞི། །ཕྱོགས་མདོག་རང་རྟགས་ཕྱག་རྒྱ་བསྣམས། །ཁྲོ་བོའི་རྒྱན་དང་ཆ་ལུགས་རྫོགས། །སྐུ་ལས་ཁྲོ་མཚོན་མེ་ཁྱུང་འཕྲོ། །སྡེ་བརྒྱད་དྲེགས་ཚོགས་ལས་ལ་འགྱེད། །གཏུམ་དྲག་མཐུ་ལྡན་ཁྲོ་བོའི་རྒྱལ། །ཁྱེད་རྣམས་ཐུགས་དམ་དབྱིངས་ནས་བསྐུལ། །ཁྲོ་རྒྱལ་རྡོ་རྗེ་གཏུམ་པོ་ཡིས། །ལྷ་བདུད་ལས་བྱུང་དགྲ་གདོན་བགེགས། །ཞེ་སྡང་ལས་ཉོན་རྒྱུ་འབྲས་ཀུན། །མེ་ལོང་ལྟ་བུའི་དབྱིངས་སུ་ཟློག ། ཁྲོ་རྒྱལ་རཏྣ་གཏུམ་པོ་ཡིས། །ཕུང་བདུད་ལས་བྱུང་དགྲ་གདོན་བགེགས། །ང་རྒྱལ་ལས་ཉོན་རྒྱུ་འབྲས་ཀུན། །མཉམ་པ་ཉིད་ཀྱི་དབྱིངས་སུ་ཟློག ། ཁྲོ་རྒྱལ་པདྨ་གཏུམ་པོ་ཡིས། །ཉོན་བདུད་ལས་བྱུང་དགྲ་གདོན་བགེགས། །འདོད་ཆགས་ལས་ཉོན་རྒྱུ་འབྲས་ཀུན། །སོ་སོར་རྟོག་པའི་དབྱིངས་སུ་ཟློག ། ཁྲོ་རྒྱལ་ཀརྨ་གཏུམ་པོ་ཡིས། །འཆི་བདུད་ལས་བྱུང་དགྲ་གདོན་བགེགས། །ཕྲག་དོག་ལས་ཉོན་རྒྱུ་འབྲས་ཀུན། །བྱ་བ་གྲུབ་པའི་དབྱིངས་སུ་ཟློག །བདུད་ཚོགས་ཀུན་འདུལ་ཁྲོ་བོ་བཞིས། །ཤ་ཁྲག་གཏོར་མ་འདི་བཞེས་ལ། །ཕྱོགས་བཞིའི་དགྲ་བགེགས་དམ་སྲི་དང་། །བདུད་བཞིའི་གནོད་པའི་བསམ་སྦྱོར་ཟློག །གསོད་གཅོད་རྐུ་འཕྲོག༴སོགས་ཀུན་ལ་འགྲེས་སོ། །ཧཱུྃ་ཧཱུྃཿ དཔལ་ཆེན་ཕྲིན་ལས་སྤྲུལ་པ་ལས། །རང་བྱུང་ཁྲོ་རྒྱལ་ཆེན་པོ་བཅུ། །མཐིང་ནག་རྡོ་རྗེ་སྡིག་མཛུབ་ཀྱིས། །དགྲ་དཔུང་འཇོམས་ཤིང་བགེགས་ཚོགས་བསྲེགས། །ཡང་སྤྲུལ་ཁྲོ་བོས་སྟོང་ཁམས་འགེངས། །ཧཱུྃ་ཕཊ་རྔམ་པའི་སྒྲ་སྒྲོགས་པས། །སྣང་སྲིད་དབང་བསྡུད་ཟིལ་གྱིས་གནོན། །ཁྱེད་རྣམས་ཐུགས་དམ་གནད་ནས་བསྐུལ། །ཁྲོ་ཆེན་རྣམ་པར་རྒྱལ་བ་ཡིས། །ལྷ་དང་དྲི་ཟ་ལ་སོགས་པའི། །ཤར་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་གཤིན་རྗེ་གཤེད་པོ་ཡིས། །གྲུལ་བུམ་འཆི་བདག་གཤིན་རྗེ་སོགས། །ལྷོ་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་ཆེན་རྟ་མགྲིན་རྒྱལ་པོ་ཡིས། །གཉན་དང་ཆུ་བདག་ཀླུ་རིགས་སོགས། །ནུབ་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་བདུད་རྩི་འཁྱིལ་བ་ཡིས། །ཟ་བྱེད་ནོར་བདག་གནོད་སྦྱིན་སོགས། །བྱང་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་དབྱུག་པ་སྔོན་པོ་ཡིས། །རྒྱལ་བཙན་ཐེའུ་རིང་མེ་ལྷ་སོགས། །ཤར་ལྷོའི་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་མི་གཡོ་མགོན་པོ་ཡིས། །དྲང་སྲོང་གཟའ་དང་སྲིན་པོ་སོགས། །ལྷོ་ནུབ་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་གཞན་གྱིས་མི་ཐུབ་པས། །བདུད་དང་འབྱུང་པོ་རླུང་ལྷ་སོགས། །ནུབ་བྱང་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་ཁམས་གསུམ་རྣམ་རྒྱལ་གྱིས། །སྲོག་འཕྲོག་མ་མོ་དབང་བདག་སོགས། །བྱང་ཤར་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་རྒྱལ་ཧཱུྃ་ཆེན་ཀཱ་ར་ཡིས། །མཁའ་སྤྱོད་གཟའ་དང་སྒྱུ་སྐར་སོགས། །སྟེང་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་མཆོག་སྟོབས་ཆེན་རྒྱལ་པོ་ཡིས། །ས་བདག་ཀླུ་གཉན་གཏོད་ལ་སོགས། །འོག་ཕྱོགས་གདོན་དང་དགྲ་བགེགས་ཀྱི། །དྲག་ཤུལ་གདུག་པའི་བསམ་སྦྱོར་ཟློག །ཁྲོ་བཅུ་ཡབ་ཡུམ་སྤྲུལ་པར་བཅས། །ཤ་ཁྲག་གཏོར་མ་འདི་བཞེས་ལ། །ཕྱོགས་བཅུའི་དགྲ་བགེགས་དམ་སྲི་སོགས། །མི་མཐུན་གནོད་པའི་ཕྱོགས་རྣམས་ཟློག །གསོད་གཅོད་རྐུ་འཕྲོག༴སོགས་འགྲེས་སོ། ། ཧཱུྃ་ཧཱུྃཿ གསང་བདག་ཐུགས་རྗེའི་རང་རྩལ་ལས། །སྤྲུལ་པའི་སྒོ་སྐྱོང་ཁྲོ་བོ་བཞི། །ཕྱོགས་མདོག་རང་རྟགས་བེ་ཅོན་གཡས། །ལས་བཞི་སྒྲུབ་པའི་ཕྱག་རྒྱ་གཡོན། །རྔམ་བརྗིད་ཁྲོ་བོའི་ཆས་ཀྱིས་བརྒྱན། །འགུགས་འཆིང་སྡོམ་མྱོས་ལས་མཛད་པའི། །སྤྲུལ་པ་སྟོང་གསུམ་ཁྱབ་པར་འགྱེད། །ཁྱེད་རྣམས་ཐུགས་དམ་གནད་ནས་བསྐུལ། །ཁྲོ་ཆེན་ཤེས་རབ་མཐར་བྱེད་ཀྱིས། །ཤར་ཕྱོགས་དགྲ་བགེགས་གནོད་པའི་ཚོགས། །ནད་གདོན་འཇིགས་བརྒྱད་མི་མཐུན་ཕྱོགས། །ཞི་བའི་ཐབས་ཀྱིས་བཟློག་ཏུ་གསོལ། །ཁྲོ་རྒྱལ་གཤིན་རྗེ་མཐར་བྱེད་ཀྱིས། །ལྷོ་ཕྱོགས་དགྲ་དང་བགེགས་ཀྱི་ཚོགས། །ཆོས་སྲིད་འདོད་དོན་སྒྲུབ་པའི་གེགས། །རྒྱས་པའི་ལས་ཀྱིས་བཟློག་ཏུ་གསོལ། །ཁྲོ་རྒྱལ་པདྨ་མཐར་བྱེད་ཀྱིས། །ནུབ་ཕྱོགས་དགྲ་དང་བགེགས་ཀྱི་ཚོགས། །རྣམ་བཞི་དབང་དུ་འདུ་བའི་གེགས། །དབང་གི་ལས་ཀྱིས་བཟློག་ཏུ་གསོལ། །ཁྲོ་རྒྱལ་བགེགས་རྣམས་མཐར་བྱེད་ཀྱིས། །བྱང་ཕྱོགས་དགྲ་དང་བགེགས་ཀྱི་ཚོགས། །ཞིང་བཅུ་ཚང་བའི་ལོག་འདྲེན་རྣམས། །དྲག་པོའི་ལས་ཀྱིས་བཟློག་ཏུ་གསོལ། །བདུད་འདུལ་ཁྲག་འཐུང་སྒོ་བ་བཞིས། །ཤ་ཁྲག་གཏོར་མ་འདི་བཞེས་ལ། །ཐོགས་མེད་ལས་བཞིའི་ཕྲིན་ལས་ཀྱིས། །མི་མཐུན་གནོད་པའི་ཕྱོགས་རྣམས་ཟློག །གསོད་གཅོད་རྐུ་འཕྲོག༴སོགས་འགྲེས་སོ། །ཧཱུྃ་ཧཱུྃཿ གསང་བ་ཀུན་བདག་ཧེ་རུ་ཀའི། །དཀྱིལ་འཁོར་མུ་རན་སྐྱོང་མཛད་པའི། །མ་ཚོགས་དབང་ཕྱུག་ཉེར་བརྒྱད་དང་། །ཚངས་པ་བརྒྱ་བྱིན་རྒྱལ་ཆེན་བཞི། །ཕྱོགས་སྐྱོང་ལྷ་ཀླུ་གནོད་སྦྱིན་དང་། །འཇིགས་བྱེད་གཟའ་དང་སྒྱུ་སྐར་སོགས། །མགུར་ལྷ་དགེ་བསྙེན་བསྟན་མའི་ཚོགས། །སོ་སོའི་བྲན་གཡོག་དཔུང་དང་བཅས། །སྐུ་མདོག་ཕྱག་མཚན་ཅིར་ཡང་བསྒྱུར། །ཀུན་ཀྱང་དཀར་ཕྱོགས་སྐྱོང་ལ་དགྱེས། །སངས་རྒྱས་བསྟན་སྲུང་མཐུ་སྟོབས་ཅན། །ཁྱེད་རྣམས་ཐུགས་དམ་དབྱིངས་ནས་བསྐུལ། །ཤ་ཁྲག་གཏོར་མ་འདི་བཞེས་ལ། །མ་མོ་འཁྲུགས་པའི་ཆོ་འཕྲུལ་ཟློག །ཆོས་སྐྱོང་སྲུང་མའི་བཀའ་ཆད་དང་། །སྣང་སྲིད་ལྷ་འདྲེའི་གདུག་རྩུབ་ཟློག །གསོད་གཅོད་རྐུ་འཕྲོག༴སོགས་ནས་དབྱིངས་སུ་ཟློག །ཧཱུྃ་ཧཱུྃཿ གསང་བདག་བཀའ་ཡི་སྲུང་མ་ཆེ། །ཡེ་ཤེས་མགོན་པོ་བཀའ་ཉན་བཅས། །སྔགས་སྲུང་ཁྲོ་མོ་རལ་གཅིག་མ། །དུད་སོལ་ལྷ་མོ་སྤྲུལ་འཁོར་བཅས། །གཟའ་མཆོག་ཆེན་པོ་རཱ་ཧུ་ལ། །དམ་ཅན་སྐྱེས་བུ་ཐིག་ལེ་རྩལ། །རྒྱལ་ཆེན་སྐུ་ལྔ་ཡང་ལེ་བེར། །བཙན་རྒོད་རྡོ་རྗེ་དྲག་པོ་རྩལ། །ཁྱེད་རྣམས་སྤྲུལ་པ་ཡང་སྤྲུལ་བཅས། །ཤ་ཁྲག་མཆོད་པ་འདི་བཞེས་ལ། །སྔོན་ཚེ་ཁས་བླངས་དམ་བཅས་ལྟར། །བཟློག་བསྒྱུར་བཅོལ་པའི་ཕྲིན་ལས་མཛོད། །སྨན་བཙུན་ཚེ་རིང་མཆེད་ལྔ་དང་། །ཚེ་འཛིན་རིགས་བཞི་སྨན་གྱི་ལྷ། །འཛམ་གླིང་མི་ཐུང་ནོར་གྱི་བདག། །རྒྱལ་ཆེན་རྣམ་མང་ཐོས་སྲས་སོགས། །སོ་སོའི་གཡོག་འཁོར་སྤྲུལ་པར་བཅས། །དམ་རྫས་གཏོར་མ་འདི་བཞེས་ལ། །འགལ་རྐྱེན་མི་མཐུན་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །མཚོ་རྒྱལ་དགོངས་པའི་གསང་མཛོད་སོགས། །ཡང་ཟབ་དག་སྣང་སྐོར་གསུམ་གྱི། །བསྟན་བསྲུང་མ་ལུས་ཁྱེད་རྣམས་ལ། །བཟློག་པའི་ཕྲིན་ལས་བཅོལ་བ་ནི། །རྣལ་འབྱོར་དཔོན་སློབ་འཁོར་བཅས་ལ། །ལྷ་ཡིས་བཀའ་ཆད་འབེབས་པ་ཟློག །བདུད་ཀྱིས་ཞགས་པ་འདེབས་པ་ཟློག །རྒྱལ་པོས་སྨྱོ་འབོགས་གཏོང་བ་ཟློག །གཤིན་རྗེས་འཁོར་ལོ་བསྐོར་བ་ཟློག །འཆི་བདག་ཁྲམ་ལ་བཏབ་པ་ཟློག །བཙན་གྱིས་ཇག་པ་རྒྱུག་པ་ཟློག །གནོད་སྦྱིན་རྩིས་ལ་འདེབས་པ་ཟློག །མ་མོས་ཁྲག་ཟོར་འཕེན་པ་ཟློག །གཟའ་ཡིས་དུག་རླངས་གཏོང་བ་ཟློག །ཀླུ་ཡིས་བྱད་དུ་བཅུག་པ་ཟློག །ཐེའུ་རིང་སྲི་ལ་རྐུ་བ་ཟློག །མུ་སྟེགས་ངན་སྔགས་བྱེད་པ་ཟློག །བནྡྷེས་སྔགས་ཟོར་འཕེན་པ་ཟློག །བོན་པོས་སྟྭ་ཟོར་འཕེན་པ་ཟློག །ཞང་ཞུང་བཙོ་ཟོར་འཕེན་པ་ཟློག །སུམ་པའི་གླང་ཟོར་འཕེན་པ་ཟློག །རྒྱ་གར་ཆོས་ཀྱི་མཐུ་བྱེད་ཟློག །རྒྱ་ནག་གཙུག་ལག་ཙང་ཀུན་ཟློག །བོད་ཀྱི་རྦོད་གཏོང་དམོད་མོ་ཟློག །བྲམ་ཟེ་དྲང་སྲོང་དམོད་པ་ཟློག །ནད་རིགས་བཞི་བརྒྱ་རྩ་བཞི་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །དུས་མིན་འཆི་བ་རྣམ་བརྒྱད་ཟློག །ལྟས་ངན་བརྒྱད་ཅུ་རྩ་གཅིག་ཟློག །ཡེ་འདྲོག་སུམ་བརྒྱ་དྲུག་ཅུ་ཟློག །གློ་བུར་ཉི་ཁྲི་ཆིག་སྟོང་ཟློག །ཆགས་ཆེ་ཉམ་ང་ཐམས་ཅད་ཟློག །རྒན་སྲི་གཞོན་སྲི་ཆུང་སྲི་ཟློག །ལོ་ཀེགས་ཟླ་ཀེགས་ཞག་ཀེགས་ཟློག །མི་ནད་ཕྱུགས་ནད་ཐམས་ཅད་ཟློག །རིམས་ནད་ཡམས་ནད་ཐམས་ཅད་ཟློག །ཚེ་ལ་བར་ཆད་བྱེད་པ་ཟློག །སྲོག་ལ་ཧུར་ཐུམ་འབྱུང་བ་ཟློག །མདོར་ན་རྣལ་འབྱོར་འཁོར་བཅས་ཀྱི། །འབྱུང་བཞིའི་གཡོ་འཁྲུགས་ཕྱི་ཡི་དགྲ། །ན་ཚ་སྡུག་བསྔལ་ནང་གི་བགེགས། །བར་ཆད་འཁྲུལ་རྟོག་གསང་བའི་གདོན། །ཐམས་ཅད་ཆོས་ཀྱི་དབྱིངས་སུ་ཟློག །བཟློག་གོ་བྱད་ཕུར་རྦོད་གཏོང་བཟློག །བསྒྱུར་རོ་ལྟས་ངན་མཚེར་རྩུབ་སྒྱུར། །བཟློག་བསྒྱུར་ཕྲིན་ལས་དུས་ལ་བབས། །དུས་ལ་བབ་པོ་ས་མ་ཡཱཿ བཅོལ་པའི་ཕྲིན་ལས་འགྲུབ་པར་མཛོད། །རྩ་སྔགས་དང་། ས་མ་ཡཱཿ བྷྱོ་བྷྱོ་བྷྱོཿ བཟློག་བཟློག་བཟློགཿ ཞེས་བརྗོད་པས། རྩ་བ་གསུམ་གྱི་ལྷ་ཚོགས་བཀའ་སྲུང་དང་བཅས་པ་ཐམས་ཅད་རྔམ་ཤིང་ཁྲོས་པའི་ཚུལ་གྱིས་མི་མཐུན་པའི་ཕྱོགས་ཐམས་ཅད་དམིགས་མེད་ཆོས་ཀྱི་དབྱིངས་སུ་བཟློག་པར་བསམ་ལ། བྷྱོ་བཟློག་གི་དྲག་སྔགས་བརྗོད། དུལ་མོ་བརྡབ་ཅིང་། ཞིང་ལྤགས་དང་དར་ནག་གཡབ་པ་སོགས་བྱའོ། །གཉིས་པ་ཡེ་ཤེས་ཁྱུང་གི་བཟློག་པ་བྱ་བ་ནི། ཧཱུྃ་ཧཱུྃཿ ཁྲོ་རྒྱལ་གསང་བའི་བདག་པོ་ཡི། །སྐུ་གསུང་ཐུགས་ཡོན་ཕྲིན་ལས་ཀྱི། །སྤྲུལ་པ་ཡེ་ཤེས་ཁྱུང་ཆེན་ལྔ། །ཡང་སྤྲུལ་ཁྱུང་ཆེན་གྲངས་མེད་བཅས། །བཞེངས་ཤིག་སྐུ་ལྔའི་ཀློང་ནས་བཞེངས། །རོལ་ཅིག་ཤ་ཁྲག་མཆོད་གཏོར་བཞེས། །བསྐུལ་ལོ་ཐུགས་དམ་གནད་ནས་བསྐུལ། །མཛོད་ཅིག་བཟློག་བསྒྱུར་ཕྲིན་ལས་མཛོད། །ཕྱག་ན་རྡོ་རྗེའི་སྤྲུལ་པ་ནི། །ཡེ་ཤེས་ཁྱུང་ཆེན་རིགས་ལྔའི་ཚོགས། །བཞུགས་པ་འབྱུང་ལྔའི་དབྱིངས་ན་བཞུགས། །ཕྲིན་ལས་སྤྲུལ་པ་ཕྱོགས་བཅུར་འཕྲོས། །དབུ་ལ་རང་རྟགས་ཉི་ཟླས་བརྒྱན། །གཤོག་པས་ནམ་མཁའ་ཁྱབ་པར་མཛད། །རྡོ་རྗེ་རལ་གྲིའི་གཤོག་པ་ལས། །ཁྲོ་ཁྱུང་མེ་མཚོན་ཐོག་སེར་འབེབས། །མཆུ་ནི་གནམ་ལྕགས་རྡོ་རྗེའི་མཆུ། །ས་བདག་ཀླུ་གཉན་འདུལ་ཞིང་ཟ། །གནམ་ལྕགས་ངར་མའི་མཆེ་བ་ཡིས། །གནོད་བྱེད་མ་ལུས་ཚལ་བར་གཤག །ལྕགས་ཀྱི་སྡེར་མོ་བགྲད་པ་ཡིས། །ཀླུ་གཉན་གདུག་པའི་སྙིང་ཁྲག་འབྱིན། །རལ་བ་དྲག་ཏུ་བསིག་པ་ལས། །ཡུལ་གྱི་མ་མོ་བཅུ་གསུམ་འགྱེད། །གཡས་གཤོག་བརྡབ་ཅིང་སྤྲུག་པ་ལས། །ཁྲོ་བོ་ལྔ་བཅུ་རྩ་དྲུག་འཕྲོ། །གཡོན་གཤོག་བརྡབ་ཅིང་སྤྲུག་པ་ལས། །ལྔ་བཅུ་རྩ་དྲུག་མ་མོ་བྱུང་། །མཇུག་སྒྲོ་སྤྲུག་ཅིང་བརྡབ་པ་ལས། །རྒྱལ་མོ་བཞི་དང་གདོང་བཞི་འགྱེད། །ཁྱེད་རྣམས་སྤྲུལ་པ་ཡང་སྤྲུལ་བཅས། །ཤ་ཁྲག་གཏོར་མ་འདི་བཞེས་ལ། །སྡང་བའི་དགྲ་དང་གནོད་པའི་བགེགས། །འགལ་རྐྱེན་སྤྱི་དང་ཁྱད་པར་དུ། །ནམ་མཁའ་སྨུག་ནག་འཐིབ་པ་དང་། །དྲེད་མོ་རལ་འཛིང་བཟློག་ཏུ་གསོལ། །སེང་གེ་འབྲུག་སྔོན་འཐབ་པ་དང་། །གནམ་ལྕགས་འབར་བ་བཟློག་ཏུ་གསོལ། །གླང་ཆེན་རྦ་ལ་འཕྱོ་བ་དང་། །སྟག་སེང་འཛིང་བ་བཟློག་ཏུ་གསོལ། །གནམ་ས་སྤྲིན་དམར་མཆེད་པ་དང་། །བུད་མེད་རལ་འཛིང་བཟློག་ཏུ་གསོལ། །སྐར་མདའ་ས་ལ་ལྟུང་བ་དང་། །དབྱིག་གི་ནོར་བུ་བཟློག་ཏུ་གསོལ། །རི་རབ་མེ་ཆེན་མཆེད་པ་དང་། །ལྕི་བ་ཟས་སུ་སྤྱོད་པ་ཟློག །རྒྱ་མཚོར་དུག་སྦྲུལ་འཁྱིལ་བ་དང་། །མེ་ཏོག་བཅུད་ཉམས་བཟློག་ཏུ་གསོལ། །མཁའ་ལ་སྟག་མོ་འཕྱོ་བ་དང་། །རྫི་བས་སྤྱོད་པ་བཟློག་ཏུ་གསོལ། །ནམ་མཁར་བྱ་རྒོད་སྡེར་འཛིང་དང་། །གཏེར་གྱི་བཅུད་ཉམས་བཟློག་ཏུ་གསོལ། །གཡུ་ཤ་དཀར་མོ་འཛིང་བ་དང་། །སེང་གེ་ངུ་འབོད་བཟློག་ཏུ་གསོལ། །རྣོ་དབལ་ངར་གྱི་ལྟས་ངན་དང་། །རྨ་བྱ་གཡེང་བ་བཟློག་ཏུ་གསོལ། །གཡུ་སྒོང་སྔོན་པོ་ཡར་བ་དང་། །ལྕགས་ཀྱི་སེར་བ་འབེབས་པ་ཟློག །ཤེལ་སྒོང་སྣོད་དུ་དུག་གཡོས་དང་། །ཟངས་སྒོང་དམར་པོ་འདྲིལ་བ་ཟློག །མི་བཟད་འབར་བ་ཀླད་ལ་བསྐོར། །ཉི་མ་སྤྲིན་གྱིས་འཁྲིགས་པ་ཟློག །འཚུབ་མ་མང་པོའི་སྙིང་རྟགས་དང་། །སེང་གེ་གངས་ནས་ལྟུང་བ་ཟློག །ཤེལ་གྱི་སྒོ་ང་ཡར་བ་དང་། །སྤྲིན་ཆེན་རལ་བའི་རྟགས་བསྟན་ཟློག །བོང་བུའི་བཅུད་ཆེན་ཟག་པ་དང་། །འོད་ཀྱི་ཕྲེང་བ་ཤར་བ་ཟློག །གསེར་སྒོང་ཁྲ་བོ་ཟུར་བསྟན་ཏེ། །ལྕུགས་ཕྲན་ཟོར་བས་འདེབས་པ་ཟློག །ཟོར་བརྒྱད་རྩེ་ལ་སྦུད་པ་ཆགས། །གཟའ་སྐར་འཁྲིགས་པ་བཟློག་ཏུ་གསོལ། །མདོར་ན་མི་མཐུན་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །ཅེས་དང་། ཨཱོྃ་བཛྲ་པཱ་ཎི་ཀརྨ་མ་ཧཱ་པཉྩ་ག་རུ་ཊ་ཧཱུྃ་ཕཊ། སརྦ་དུཥྚན་ས་མ་ཡཱ་བྷྱོ་བྷྱོ་བཟློག་བཟློག །ཅེས་བརྗོད་དོ། །གསུམ་པ་དྲག་པོའི་རྩང་གི་བཟློག་པ་བྱ་བ་ནི། ཧཱུྃ་ཧཱུྃ༔ གསང་བ་ཀུན་བདག་ཧེ་རུ་ཀ །དྲག་པོའི་གཏོར་ཆེན་ལྕགས་རི་ལ། །དམར་ནག་རྩང་ཕུར་ཟུར་གསུམ་པ། །བསྣོལ་ཐབས་སྲིན་མོའི་འགྲོས་སུ་བཙུགས། །མི་མཐུན་བཟློག་པའི་བྱང་བུ་བཀོད། །རྩེ་ལ་ཤ་ཆེན་ལིང་གས་བརྒྱན། །ཁ་ཏོག་ལྔ་ལྡན་སྲད་བུས་དཀྲིས། །ལས་མཁན་ཕོ་ཉའི་སྐུར་བསྒོམ་ཏེ། །ཉོན་མོངས་དགྲ་བགེགས་འདུལ་བའི་ཕྱིར། །བསྐུལ་ཞིང་ལས་ལ་མངག་པའི་ཚེ། །ཡེ་ཤེས་རྩང་གི་ཕུར་བུ་རྣམས། །ཆོས་ཀྱི་དབྱིངས་ནས་ད་བཞེངས་ཤིག །ཐུགས་དམ་བསྐུལ་ལོ་ལས་ལ་བསྐྱོད། །བཟློག་བསྒྱུར་ཕྲིན་ལས་དུས་ལ་བབས། །དགྲ་བགེགས་ཤ་ཁྲག་ཚོགས་སུ་རོལ། །བར་ཆད་སོལ་ལ་རྐྱེན་རྣམས་ཟློག །དངུལ་ལམ་དཀར་པོའི་ཤིང་རྣམས་ལ། །ཞི་བའི་རྩང་ཕུར་ཟུར་གསུམ་པ། །སྐེད་པ་ཟླུམ་པོ་གཞལ་ཡས་ཁང་། །ཞི་མཛད་ཧེ་རུ་ཀར་བསྒོམ་ནས། །གཏོར་ཆེན་ཤར་ཕྱོགས་ལྕགས་རི་ལ། །བཙུགས་པས་ཐམས་ཅད་ཞི་བར་འགྱུར། །ཐུགས་རྗེ་ཞི་བའི་ཕྲིན་ལས་ཀྱིས། །ཞི་བར་མ་གྱུར་གང་ཡང་མེད། །གནོད་བྱེད་དགྲ་བགེགས་བྱད་མ་ཡི། །རིགས་སྔགས་རྦོད་གཏོང་ཞི་བར་མཛོད། །ནད་གདོན་རྐྱེན་དང་བར་ཆད་ཀུན། །བྱམས་པ་ཚད་མེད་དབྱིངས་སུ་ཟློག །གསེར་རམ་སེར་པོའི་ཤིང་རྣམས་ལ། །རྒྱས་པའི་རྩང་ཕུར་ཟུར་གསུམ་པ། །སྐེད་པ་རྒྱ་མདུད་གཞལ་ཡས་ཁང་། །རྒྱས་མཛད་ཧེ་རུ་ཀར་བསྒོམ་ནས། །གཏོར་ཆེན་ལྷོ་ཕྱོགས་ལྕགས་རི་ལ། །བཙུགས་པས་ཐམས་ཅད་རྒྱས་པར་འགྱུར། །ཐུགས་རྗེ་རྒྱས་པའི་ཕྲིན་ལས་ཀྱིས། །རྒྱས་པར་མ་གྱུར་གང་ཡང་མེད། །རྣལ་འབྱོར་དཔོན་སློབ་འཁོར་བཅས་ཀྱི། །ཚེ་དང་བསོད་ནམས་རྒྱས་པར་མཛོད། །མི་མཐུན་རྐྱེན་དང་བར་ཆད་ཀུན། །སྙིང་རྗེ་ཚད་མེད་ཀློང་དུ་ཟློག །ཟངས་སམ་དམར་པོའི་ཤིང་རྣམས་ལ། །དབང་གི་རྩང་ཕུར་ཟུར་གསུམ་པ། །སྐེད་པ་ཟླ་གམ་གཞལ་ཡས་ཁང་། །དབང་མཛད་ཧེ་རུ་ཀར་བསྒོམ་ནས། །གཏོར་ཆེན་ནུབ་ཕྱོགས་ལྕགས་རི་ལ། །བཙུགས་པས་ཐམས་ཅད་དབང་དུ་བསྡུད། །ཐུགས་རྗེ་དབང་གི་ཕྲིན་ལས་ཀྱིས། །དབང་དུ་མ་འདུས་གང་ཡང་མེད། །རྒྱལ་བློན་རྗེ་འབངས་འབྲུ་བཅུད་དང་། །དམིགས་བྱ་དབང་དུ་འདུ་བར་མཛོད། །མི་མཐུན་རྐྱེན་དང་བར་ཆད་ཀུན། །དགའ་བ་ཚད་མེད་དབྱིངས་སུ་ཟློག །ལྕགས་སམ་གདུག་པའི་ཤིང་རྣམས་ལ། །དྲག་པོའི་རྩང་ཕུར་ཟུར་གསུམ་པ། །སྐེད་པ་ཆོས་འབྱུང་གཞལ་ཡས་ཁང་། །མཐར་མཛད་ཧེ་རུ་ཀར་བསྒོམ་ནས། །གཏོར་ཆེན་བྱང་ཕྱོགས་ལྕགས་རི་ལ། །བཙུགས་པས་དགྲ་བགེགས་བརླག་པར་འགྱུར། །ཐུགས་རྗེ་དྲག་པོའི་ཕྲིན་ལས་ཀྱིས། །བརླག་པར་མ་གྱུར་གང་ཡང་མེད། །སྡིག་ཅན་དགྲ་བགེགས་བྱད་མ་རྣམས། །སྐད་ཅིག་ཉིད་ལ་བརླག་པར་མཛོད། །མི་མཐུན་རྐྱེན་དང་བར་ཆད་ཀུན། །བཏང་སྙོམས་ཚད་མེད་དབྱིངས་སུ་ཟློག །ཐུགས་རྗེའི་ཀློང་ནས་རང་བྱུང་བ། །འདུལ་བྱེད་དྲག་པོའི་རྩང་ཕུར་འདི། །ཡར་གྱི་རྩེ་མོ་ཟུར་གསུམ་ལྡན། །འོག་མིན་ཆོས་དབྱིངས་ཞིང་དུ་སླེབས། །མ་རིག་ལས་ཉོན་གྱིས་བསྐྱེད་པའི། །དགྲ་གདོན་བགེགས་ཚོགས་དབྱིངས་སུ་ཟློག །མར་གྱི་རྩེ་མོ་དབལ་དང་ལྡན། །ངན་སོང་གསུམ་གྱི་གནས་སུ་ཟུག །གཟུང་འཛིན་འཁྲུལ་བའི་དགྲ་གདོན་བགེགས། །རང་གྲོལ་ཡེ་ཤེས་དབྱིངས་སུ་ཟློག །སྐེད་པ་རྒྱ་མདུད་ཕོ་ཉའི་གྲོང་། །སྟོང་གསུམ་ཀུན་དང་གཉིས་སུ་མེད། །སྡུག་བསྔལ་གསུམ་དང་ཆུ་བོ་བཞི། །བདེ་སྟོང་གཉིས་མེད་ཀློང་དུ་ཟློག །ཟུར་གསུམ་སྐུ་གསུང་ཐུགས་སུ་གྲུབ། །ངོས་ལ་རྩ་གསུམ་ལྷ་ཚོགས་བཞུགས། །དུག་གསུམ་དགྲ་བགེགས་ལོག་འདྲེན་རྣམས། །སྐུ་གསུམ་དགོངས་པའི་ཀློང་དུ་ཟློག །རྩེ་ལ་འདབ་ཆགས་སྣ་ཚོགས་ལྡིང་། །མཁའ་ལྡིང་བྱ་ཡི་ལྟས་ངན་ཟློག །སྐེད་པར་སྟག་སེང་དོམ་དྲེད་ངར། །སྡེར་ཆགས་ཡོངས་ཀྱི་ལྟས་ངན་ཟློག །རྩ་བར་སྦལ་སྦྲུལ་སྡོམ་སྡིག་འཕྱོ། །ཀླུ་དང་དུད་འགྲོའི་ལྟས་ངན་ཟློག །རྩེ་ལ་ཡེ་ཤེས་མེ་དཔུང་འབར། །བསྲེག་པ་ཧོམ་གྱི་ལས་སྦྱོར་ཟློག །སྐེད་པར་རླུང་ནག་འཚུབ་ཤིང་འཁྱིལ། །འབོད་རྦད་གསོད་པའི་ངན་སྔགས་ཟློག །རྩ་བར་དུག་གི་རྒྱ་མཚོ་ཁོལ། །མནན་གཏད་བཅིང་བའི་མཐུ་ནུས་ཟློག །རྩེ་ལ་གློག་འཁྱུག་འབྲུག་སྟོང་ལྡིར། །དྲག་སྔགས་དམོད་པའི་རྦོད་གཏོང་ཟློག །རྐེད་པར་དུག་ཁྲག་སེར་ཆེན་འབེབ། །བྲབ་པ་ཐུན་གྱི་རྦོད་གཏོང་ཟློག །རྩ་བར་གནམ་ལྕགས་ཐོག་རྒོད་འདྲིལ། །འཕེན་པ་ཟོར་གྱི་རྦོད་གཏོང་ཟློག །རྩེ་ལ་ཤ་ཆེན་ལིང་གས་བརྒྱན། །སྡང་བྱེད་དགྲ་ཡི་གནོད་པ་ཟློག །སྐེད་པར་བཟློག་པའི་བྱང་བུས་བརྒྱན། །ལོག་འདྲེན་བགེགས་ཀྱི་གནོད་པ་ཟློག། །རྩ་བར་དུར་འཇིམ་ལྕགས་རིས་བསྐོར། །བར་གཅོད་དམ་སྲིའི་གནོད་པ་ཟློག །གདུག་རྩུབ་ལས་ཀྱི་རྩང་ཕུར་གྱིས། །ཆོ་འཕྲུལ་ཐན་ལྟས་མཁའ་ལ་སྒྱུར། །མི་མཐུན་ཕྱོགས་ཀུན་དབྱིངས་སུ་ཟློག །བཟློག་གོ་བསྒྱུར་རོ་མཱ་ར་ཡ། །དྲག་པོའི་རྩང་གི་དྲྭ་མིག་ནས། །ལས་བྱེད་ཕོ་ཉའི་ཚོགས་འཕྲོས་པས། །བཞི་བརྒྱ་རྩ་བཞིའི་ནད་རྣམས་ཟློག །སྟོང་ཕྲག་བརྒྱད་ཅུའི་བགེགས་རྣམས་ཟློག །བརྒྱད་ཁྲི་བཞི་སྟོང་གདོན་རྣམས་ཟློག །དུས་མིན་འཆི་བ་རྣམ་བརྒྱད་ཟློག །གསོན་གྱི་བདུད་དུ་གཡོས་པ་ཟློག །གཤིན་གྱི་དུར་སྲི་ལང་པ་ཟློག །གེགས་དང་ཡེ་འདྲོགས་ཐམས་ཅད་ཟློག །ཆགས་ཆེ་ཉམས་ང་ཐམས་ཅད་ཟློག །བྱད་ཕུར་རྦོད་གཏོང་ཐམས་ཅད་ཟློག །ཆོ་འཕྲུལ་ལྟས་ངན་ཐམས་ཅད་ཟློག །ནད་མཚོན་མུ་གེ་དུས་འཁྲུགས་ཟློག །མི་ཕྱུགས་ནོར་གྱི་གོད་ཁ་ཟློག །དགྲ་གདོན་བགེགས་ཀྱི་བསམ་སྦྱོར་ཟློག །ཧོར་སོགས་མཐའ་བཞིའི་དམག་དཔུང་ཟློག །འཇིགས་དང་སྡུག་བསྔལ་ཐམས་ཅད་ཟློག །རྐྱེན་དང་བར་ཆད་ཐམས་ཅད་ཟློག །མི་མཐུན་གནོད་པའི་ཕྱོགས་རྣམས་ཀུན། །བཟློག་ཅིང་བསྒྱུར་བའི་ཕྲིན་ལས་མཛོད། །ཅེས་སོ། །བཞི་པ་ལྟས་ངན་དམིགས་ཀྱིས་བཟློག་པ་བྱ་བ་ནི། །ཧཱུྃ་ཧཱུྃ༔ ཁྲོ་རྒྱལ་ཁམས་གསུམ་ཧཱུྃ་སྒྲ་ཅན། །སྐུ་ལ་ཟངས་ཁྲབ་འོད་ཀྱིས་མཛེས། །ཕྱག་ན་མདུང་དམར་ཆེམས་སེ་ཆེམས། །བ་དན་རྩེ་གསུམ་གཡབ་མོས་འདེབས། །གཡས་ནས་བསྐོར་བས་ལྷ་སྲིན་སྡུད། །གཡོན་ནས་བསྐོར་བས་ཀླུ་སྲིན་འཇོམས། །ཀླད་ལ་བསྐོར་བས་བདུད་དཔུང་འཇོམས། །སྲོག་ལ་དབང་བྱེད་དྲོད་ལ་ཁྱབ། །ཤ་ཁྲག་མཆོད་པ་འདི་བཞེས་ལ། །ལྟས་ངན་དམིགས་ཀྱིས་བཟློག་ཏུ་གསོལ། །ལྟས་ངན་ཀུན་གྱི་ཕ་སྨོས་པ། །གནམ་གྱི་བྱ་དཀར་མཆེ་བ་ཅན། །ལྟས་ངན་ཀུན་གྱི་མ་སྨོས་པ། །ས་ལ་བྱི་དཀར་གཤོག་པ་ཅན། །དེ་གཉིས་སྲིད་ཅིང་བསྡེབས་པ་ལས། །བྱུང་བའི་ལྟས་ངན་སྣ་ཚོགས་ཟློག །ཉི་ཟླ་ཤི་བ་མ་བདུད་ལྟས། །གནམ་ནས་ལྟས་ངན་བྱུང་བ་ཟློག །བྱ་དང་རྒོད་སོགས་སྲོག་བདག་ཐན། །བར་སྣང་ནས་བྱུང་ལྟས་ངན་ཟློག །དབྱིངས་དང་མཐའ་ཡས་ལྷ་བདུད་ལྟས། །གངས་ནས་བྱུང་བའི་ཐན་ལྟས་ཟློག །ཤ་ལྒོ་སྨན་དང་གཟའ་ཡི་ཐན། །སྤང་ནས་བྱུང་བའི་ཐན་ལྟས་ཟློག །གླ་འུག་བྲག་བཙན་གཉན་གྱི་ཐན། །བྲག་ནས་ཐན་ལྟས་བྱུང་བ་ཟློག། །དོམ་དྲེད་མ་བདུད་གཉན་གྱི་ཐན། །ནགས་ནས་ཐན་ལྟས་བྱུང་བ་ཟློག །འབྲོང་བུ་གཡག་སོགས་དམུ་བདུད་ཐན། །གཡའ་སྔོན་ནས་བྱུང་ཐན་ལྟས་ཟློག །རྒོད་པོ་སྡེར་འཛིང་ལྷ་གཉན་ལྟས། །མཁའ་དབྱིངས་ནས་བྱུང་ཐན་ལྟས་ཟློག །སྦལ་སྦྲུལ་ཉ་སོགས་ཀླུ་གཉན་ལྟས། །རྒྱ་མཚོ་ནས་བྱུང་ཐན་ལྟས་ཟློག །མཛེ་ཤུ་གཡན་པ་ས་བདག་ཐན། །ས་གཞི་ནས་བྱུང་ཐན་ལྟས་ཟློག །སྲིན་བྱ་ཁུས་འདེབས་འདྲེ་མོའི་ཐན། །དུར་དང་འཆད་པའི་ཐན་ལྟས་ཟློག །གོང་སྲེག་གླུ་ལེན་འདྲེ་སྲིན་ཐན། །བྲག་དང་ནགས་ཀྱི་ཐན་ལྟས་ཟློག །ཤ་ཕོ་རུ་འཛིང་གཉན་བདུད་ཐན། །ཕུ་ནས་ཐན་ལྟས་བྱུང་བ་ཟློག །ཉ་མོ་མངལ་འཛིང་ཀླུ་སྲིན་ཐན། །མདའ་ནས་ཐན་ལྟས་བྱུང་བ་ཟློག །ཝ་བརྒྱལ་ཝ་རོ་དུར་སྲིའི་ཐན། །དུར་ནས་བྱུང་བའི་ཐན་ལྟས་ཟློག །དྲུག་གྲུམ་གདོང་གས་གཟི་མིག་སོགས། །རྟ་ལ་བྱུང་བའི་ཐན་ལྟས་ཟློག །མིག་གསུམ་ཡན་ལག་མཚེ་མ་སོགས། །ཕྱུགས་ལ་བྱུང་བའི་ཐན་ལྟས་ཟློག །རོ་སྒལ་སྐེད་འཁོར་ནག་པོ་སོགས། །ལུག་ལ་བྱུང་བའི་ཐན་ལྟས་ཟློག །ཟངས་ལྡན་སྤུ་རྟགས་དམར་པོ་སོགས། །ར་ལ་བྱུང་བའི་ཐན་ལྟས་ཟློག །འཚེ་བ་བྱུང་དང་ཐོ་རེངས་ངུ། །ཁྱི་ལ་བྱུང་བའི་ཐན་ལྟས་ཟློག །སྲོད་ལ་བྱ་ཕོ་འཚེར་བ་སོགས། །རྒྱལ་འགོང་འདྲེ་ཡི་ཐན་ལྟས་ཟློག །བྱ་རོག་འུག་པ་སྡེར་འཛིང་བྱེད། །དམེ་འཁོན་བདུད་ཀྱི་ཐན་ལྟས་ཟློག །གཤིན་རྗེའི་སེང་གེ་ངུ་འབོད་དང་། །འཇའ་འཁྱིལ་ལྷ་ཡི་ཐན་ལྟས་ཟློག །གཅན་གཟན་འཐབ་དང་ནང་དམེ་བྱེད། །སྲིད་པ་མ་མོའི་ལྟས་ངན་ཟློག །ཤ་རྐྱང་བཙན་གྱི་ལྟས་ངན་དང་། །གླ་བ་སྨན་གྱི་ཐན་ལྟས་ཟློག །སྦྲུལ་ནག་འཁྱིལ་བ་ཀླུ་ཡི་ལྟས། །དོམ་ནག་བདུད་ཀྱི་ཐན་ལྟས་ཟློག །བྱ་རྒོད་རྒྱལ་པོའི་ལྟས་ངན་དང་། །ཁྲུང་ཁྲུང་འདྲེ་ཡི་ཐན་ལྟས་ཟློག །འཕར་སྤྱང་སྟག་གཟིག་མི་རྒོད་སོགས། །དགེ་བསྙེན་ཟོ་དོར་ཐན་ལྟས་ཟློག །བྱ་ནག་སྡེར་འཛིང་བྱེད་པ་སོགས། །བདུད་ཀྱི་ཐན་ལྟས་བྱུང་བ་ཟློག །ཁྲ་གསུམ་ཁ་ནས་སྦྲུལ་ཁྱེར་བ། །ཀླུ་དང་རྒྱལ་པོའི་ཆོ་འཕྲུལ་ཟློག །དུར་བྱའི་ཁ་ནས་ཉ་ཁྱེར་བ། །ཀླུ་དང་མ་མོའི་ཆོ་འཕྲུལ་ཟློག །བྱ་གསུམ་སྡེར་འཛིང་བྱེད་པ་སོགས། །ཕུང་སྲི་ལངས་པའི་ལྟས་ངན་ཟློག །རྒོད་བཞི་གཤོག་འཛིང་བྱེད་པ་སོགས། །གནམ་ལྷ་དཀར་པོའི་ལྟས་ངན་ཟློག །རྨ་བྱ་མི་རོ་ཟ་བ་སོགས། །སྲིད་པའི་རྒྱལ་མོའི་ཐན་ལྟས་ཟློག །བྱ་གསུམ་གནམ་ལ་ཤ་འབྲད་པ། །བདུད་ཀྱི་ཕྱག་བརྙན་ལྟས་ངན་ཟློག །འདབ་ཆགས་གཅིག་ལ་གཅིག་ཞོན་པ། །སྲི་ཁ་ལྡང་བའི་ཐན་ལྟས་ཟློག །དོམ་གསུམ་ཁ་ནས་མི་རོ་ཁྱེར། །དབྱིངས་ཀྱི་མ་མོའི་ལྟས་ངན་ཟློག །སྦྲུལ་ནག་ཐུར་དུ་རྒྱུག་པ་སོགས། །ཀླུ་དང་མ་མོའི་ལྟས་ངན་ཟློག །དུར་སར་ཝ་མོ་བརྒྱལ་བ་སོགས། །དུར་སྲི་ཕུང་སྲི་ལྡང་བ་ཟློག །སྲེ་མོང་བྱི་རོ་ཁྱེར་བ་སོགས། །མོ་རྒྱུད་ཆུང་སྲིའི་ཐན་ལྟས་ཟློག །སྤྱང་གསུམ་འོ་དོད་འབོད་པ་སོགས། །རྒྱལ་པོ་བཙན་གྱི་ཆོ་འཕྲུལ་ཟློག ། ཁྱི་སྤྱང་ཁ་ནས་སྙིང་ཁྱེར་བ། །ལྷ་བདུད་ཁྲོས་པའི་ཐན་ལྟས་ཟློག །ཐོ་རེངས་སྒོ་ཁྱི་ངུ་ཟུག་བྱེད། །ཡ་བདུད་ལངས་པའི་ཐན་ལྟས་ཟློག །བྱི་བས་སྐྲ་ལ་ཟ་བ་སོགས། །གནམ་ས་འཁྲུགས་པའི་ལྟས་ངན་ཟློག །ཅང་ཤེས་དྲུག་གྲུམ་ཤེལ་མིག་སོགས། །ཡ་བདུད་རྒྱལ་པོའི་ཐན་ལྟས་ཟློག །དྲེལ་ཕྲུག་བླང་དོར་བྱུང་བ་སོགས། །ཀླུ་བཙན་འཁྲུགས་པའི་ཐན་ལྟས་ཟློག །རྔ་མོང་མི་རོ་ཁུར་བ་སོགས། །ཕུང་གསུམ་ལངས་པའི་ཐན་ལྟས་ཟློག །རྨིག་ཟླུམ་ཕྲུ་གུར་མགོ་བརྙན་བྱུང་། །དགྲ་སྲི་ལངས་པའི་ཐན་ལྟས་ཟློག །དྲེའུའི་སྟེང་དུ་འདབ་ཆགས་ཞོན། །མ་མོ་དམ་སྲིའི་ལྟས་ངན་ཟློག །མི་སྲིད་པ་ཡི་བུ་བྱུང་བ། །གདག་སྲིབ་ལོགས་པའི་ལྟས་ངན་ཟློག །བོང་བུ་སྦྲུལ་གྱི་མཐུར་ཐག་ཅན། །མ་བདུད་ཁྲོས་པའི་ཐན་ལྟས་ཟློག །བོང་དོར་མགོ་གསུམ་བྱུང་བ་སོགས། །མ་ཡམས་བསྟན་མའི་ལྟས་ངན་ཟློག །སྤྲེལ་གསུམ་ལག་ན་ཁྲམ་བམ་ཁྱེར། །ཐེའུ་རིང་སྤུན་གསུམ་ཐན་ལྟས་ཟློག །སྤྲེལ་གསུམ་སྟག་ལ་ཞོན་པ་སོགས། །ཕུང་སྲི་ལངས་པའི་ཐན་ལྟས་ཟློག །འདབ་ཆགས་དྲེད་ལ་ཞོན་པ་སོགས། །རྒྱལ་བློན་བྲན་གསུམ་ལྟས་ངན་ཟློག །སྤྱང་གསུམ་མི་རོ་ཟ་བ་སོགས། །མ་ཡམས་བསྟན་མའི་ཐན་ལྟས་ཟློག །སྦལ་བའི་ལག་ན་སྦྲུལ་ཁྱེར་བ། །ཀླུ་དང་ས་བདག་ཐན་ལྟས་ཟློག །བུད་མེད་འཐབ་ཅིང་རལ་འཛིང་བྱེད། །མ་ཡམས་དམ་སྲིའི་ཐན་ལྟས་ཟློག །དྲེད་མོས་སྐྲ་འབལ་བྲང་བརྡུང་བ། །ལྷ་མོ་བདུད་མོའི་ཐན་ལྟས་ཟློག །ཕོ་མོས་ལྷ་སར་མནོལ་བྱེད་པ། །ལྷ་ཀླུ་འཕངས་པའི་ཐན་ལྟས་ཟློག །མཛོ་ལ་དུར་བྱ་ཞོན་པ་ནི། །བདེ་ཆེན་རྒྱལ་མོའི་ཐན་ལྟས་ཟློག །ནམ་གུང་རྟ་ཕོ་འཚེར་བ་དང་། །སྲོད་ལ་མཛོ་ཕོ་ངུར་བ་ཟློག །ཁང་ཁྱིམ་འུག་པ་རྒོད་པ་དང་། །སྲིན་བྱས་ཉིན་པར་ཀུས་འདེབས་ཟློག །དྲེལ་རྟའི་རྔ་རྔོག་ཆད་པ་དང་། །ཆོན་ཐག་རྟ་རྒྱུག་བྱེད་པ་ཟློག །ཁྱིམ་བྱས་རོ་བྱུང་ཟེར་བ་དང་། །མི་ནག་འོ་དོད་འབོད་པ་ཟློག །སྒོ་ཁྱི་ངུ་ཟུག་བྱེད་པ་དང་། །འོག་རྟ་སྲབ་འགྲོས་བྱེད་པ་ཟློག །མདོར་ན་སྣང་ཞིང་སྲིད་པ་ལ། །མི་རུང་མི་སྲིད་མི་འདོད་པའི། །ཆོ་འཕྲུལ་ཐན་ལྟས་མ་ལུས་ཀུན། །དམིགས་མེད་སྟོང་པའི་དབྱིངས་སུ་ཟློག །བཟློག་གོ་དགྲ་བགེགས་དབྱིངས་སུ་ཟློག །བསྒྱུར་རོ་ཐན་ལྟས་དབྱིངས་སུ་སྒྱུར། །བཟློག་བསྒྱུར་དྲག་པོའི་ཕྲིན་ལས་མཛོད། །དུས་ལ་བབ་པོ་ས་མ་ཡཱ༔ ཞེས་བརྗོད་དོ། ལྔ་པ་ཐུན་གཏོར་འབུལ་བ་ནི། དམར་གཏོར་རཀྟས་བྲན་ཏེ། དགུག་གཞུག་ལན་གསུམ་བྱ་ཞིང་། བདུད་རྩིས་བྲན་ལ། རཾ་ཡཾ་ཁཾ། སྟོང་པའི་ངང་ལས་བྷཉྫའི་སྣོད་དུ་དམར་གཏོར་དགྲ་བགེགས་བསྒྲལ་བའི་ཤ་ཁྲག་རུས་པ་ནང་ཁྲོལ་གྱི་རྣམ་པ་ལྷུན་པོར་སྤུངས་པ་ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱ༔ཧཱུྃ། ལན་གསུམ་གྱིས་བྱིན་གྱིས་བརླབས་ནས། རྩ་སྔགས་མཐར། ཨེ་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། བཛྲ་པུཥྤེ་དྷུཔྤེ༴སོགས་ནས། ཤཔྟ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སརྦ་པུ་ཙ་ས་མ་ཡཱ་ཁཱ་ཧི་ཁཱ་ཧི། ཞེས་པས་མཆོད་ཅིང་བསྟོད་པ་ནི། ཧཱུྃ་ཧཱུྃཿ རབ་འབྱམས་རྒྱལ་ཀུན་ཕྲིན་ལས་འདུས་པའི་དཔལ། །གསང་བ་ཀུན་བདག་ཁྲོ་རྒྱལ་རྡོ་རྗེ་འཆང་། །གཏུམ་པོ་རིགས་བཞི་ཁྲོ་བཅུ་སྒོ་བར་བཅས། །ཡོངས་རྫོགས་དཀྱིལ་འཁོར་ལྷ་ལ་ཕྱག་འཚལ་བསྟོད། །ཅེས་བསྟོད་ནས་ཕྲིན་ལས་བཅོལ་བ་ནི། ཧཱུྃ་ཧཱུྃ༔ གསང་བདག་ཕྱག་རྡོར་ལྷ་ཚོགས་འཁོར་བཅས་ལ། །དགྲ་བགེགས་ཤ་ཁྲག་རུས་པ་ནང་ཁྲོལ་ཚོགས། །ལྷུན་པོར་སྤུངས་པའི་འདོད་དགུའི་བྷ་ལིང་ཏ། །ཕྱི་ནང་ཉེར་སྤྱོད་སྨན་རཀ་བདུད་རྩིའི་ཚོགས། །འབུལ་ལོ་དགྱེས་པར་རོལ་ལ་བདག་ཅག་གི། །ནད་གདོན་ཀུན་གཞི་ཚེ་དཔལ་ལོངས་སྤྱོད་སྤེལ། །ཁམས་གསུམ་དབང་བསྡུས་དགྲ་བགེགས་བདུད་སྡེའི་དཔུང་། །ཐམས་ཅད་མིང་གི་ལྷག་མར་ཚར་ཆོད་ཅིག །ཕས་རྒོལ་བསམ་ངན་སྦྱོར་རྩུབ་བྱད་ལྟེམ་དཔུང་། །ཐམས་ཅད་རང་གཤེད་ཕོབ་ལ་མཐུ་ནུས་ཤིག །མནན་པའི་སྐབས་ཡིན་ན། ལུས་ངག་ཡིད་གསུམ་མཐུ་རྩལ་ནུས་པ་རྣམས། །ནམ་ཡང་ལྡང་མེད་མནན་པའི་ལས་མཛོད་ཅིག །ཅེས་དང་། གང་ལྟར་ཡང་། མདོར་ན་བདག་གི་རེ་འབྲས་གང་ཡིན་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །ཅེས་བཟློག་སྔགས་དང་། ཐུན་གཏོར་གཏོར་ཆེན་དུ་འབུལ་ལོ། །གསུམ་པ་རྗེས་ཀྱི་ལས་རིམ་ནི། ཉིན་སྔ་མ་རྣམས་ལ་ལྷག་གཏོར། ཆད་བརྟན། བྲོ་བརྡུང་། མཆོད་བསྟོད། བཟོད་གསོལ། བརྟན་བཞུགས། བསྡུ་ལྡང་། བསྔོ་སྨོན། ཤིས་བརྗོད་རྣམས་བྱའོ།། ཉིན་རྗེས་མར་ཐུན་གཏོར་ཡན་གྲུབ་ནས། ཟོར་གྱི་ལས་རིམ་ལའང་དྲུག་ལས། དང་པོ་ཕྱི་སྒོ་དབྱེ་བ་ནི། གསེར་སྐྱེམས་བསང་སྦྱངས་བྱིན་གྱིས་བརླབས་ལ། ཧཱུྃ་ཧཱུྃ༔ བདེ་གཤེགས་སྙིང་པོ་གདོད་མའི་དབྱིངས། །ཀུན་ཁྱབ་ལྷུན་གྲུབ་འདུས་མ་བྱས། །འཁོར་འདས་དག་མཉམ་ཆོས་སྐུའི་ཞིང་། །སྐྱེ་འགག་མེད་པའི་གཞལ་ཡས་ནས། །བླ་མ་ཡི་དམ་མཁའ་འགྲོའི་ཚོགས། །མཆོག་གསུམ་བཀའ་གཏེར་བསྲུང་མར་བཅས། །བདུད་རྩི་གསེར་སྐྱེམས་འདི་གསོལ་ལ། །དྲག་པོའི་ལས་ཀྱི་གཟུ་དཔང་མཛོད། །ཚངས་པ་ལ་སོགས་ལྷ་ཆེན་བརྒྱད། །དགའ་བོ་ལ་སོགས་ཀླུ་ཆེན་བརྒྱད། །ཉི་ཟླ་ལ་སོགས་གཟའ་ཆེན་བརྒྱད། །དབང་པོ་ལ་སོགས་ཕྱོགས་སྐྱོང་བཅུ། །རྒྱུ་སྐར་ཉེར་བརྒྱད་འཇིགས་བྱེད་དགུ། །རྒྱལ་ཆེན་བཞི་སོགས་དཔལ་མགོན་ཚོགས། །སྣང་སྲིད་ལྷ་སྲིན་སྡེ་བརྒྱད་དང་། །ལོ་ཟླ་ཞག་དུས་ཚེས་ཀྱི་ལྷ། །ས་བདག་གཞི་བདག་གནས་ཀྱི་བདག །དཀར་ཕྱོགས་སྐྱོང་རྣམས་མ་ལུས་ཀུན། །མཆོད་སྦྱིན་གསེར་སྐྱེམས་འདི་བཞེས་ལ། །ཀོ་ལོང་རུ་ང་མ་མཛད་པར། །ཟོར་གྱི་ལམ་ཕྱེས་དམག་དཔུང་བསྐྱེད། །དགྲ་གདོན་བགེགས་ཚོགས་རྡུལ་དུ་རློགས། །སྟེང་འོག་ཕྱོགས་བཅུར་གནས་པ་ཡི། །ལྷ་ཀླུ་གཞི་བདག་དྲེགས་ཚོགས་ཀུན། །དམ་རྫས་གསེར་སྐྱེམས་འདི་བཞེས་ལ། །མཐོ་བ་རྣམས་ཀྱིས་ཞབས་བསྐུམ་ལ། །དམའ་བ་ཐམས་ཅད་དབུ་ཁུག་ཅིག །ཐད་ན་འདུག་པ་སྐུ་ཟུར་ལ། །དྲག་པོ་ཟོར་གྱི་ལམ་ཕྱེས་ཤིག །གཏོར་ཟོར་གཉན་པོར་འོད་འཕྲོས་ནས། །ཁྱེད་རྣམས་སྐུ་ལ་ཕོག་པར་མཆིས། །དེ་བས་ཐམས་ཅད་སྐུ་བསྐྱོད་ལ། །དམག་དཔུང་བསྐྱེད་ལ་རུ་མཚོན་ཕྱོར། །རྣལ་འབྱོར་མགོན་དང་གྲོགས་མཛོད་ཅིག །ཞེས་བརྗོད་ཅིང་གསེར་སྐྱེམས་མཆོད། གཉིས་པ་ཟོར་སྒྲུབ་པ་ནི། གཏོར་མའི་ལྷ་ཚོགས་ལ་མཆོད་བསྟོད་བཟོད་གསོལ་བྱ། ཁྱུང་སྐུ་དང་ཙཀ་ལི་སོགས་ལས་དབང་བཞི་བླངས། ཨོཾ་བཛྲ་ཨུ་ཊིཥྛཿ ཞེས་པས། གཏོར་ཆེན་གྱི་ཡེ་ཤེས་པ་མདུན་གྱི་ནམ་མཁར་བཏེགས་པའམ། ཙཀ་ལི་སོགས་ལ་བསྟིམ། དམ་ཚིག་པ་རྣམས་འོད་དུ་ཞུ་ནས་རང་ལ་ཐིམ་པར་བསམ་ནས། སླར་ཡང་གཏོར་ཆེན་ཟོར་རྫས་དང་བཅས་པ་སྐད་ཅིག་གིས་གསང་བདག་ཕྱག་ན་རྡོ་རྗེའི་དཀྱིལ་འཁོར་གྱི་ལྷ་ཚོགས་བཀའ་བསྲུང་དྲེགས་པ་ལྷ་སྲིན་སྡེ་བརྒྱད་ཀྱི་དམག་དཔུང་བསམ་གྱིས་མི་ཁྱབ་པ་དང་བཅས་པ་ཐམས་ཅད་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ། ནད་མཚོན་དུག་གི་ཆར་བ་འབེབས་པ་དགྲ་བགེགས་སྒྲོལ་བའི་ལས་ལ་རྔམ་པའི་སྐུར་བཞེངས་པར་གྱུར་བར་བསམ་ཞིང་། ཧཱུྃ་ཧཱུྃཿ ཁྲོ་རྒྱལ་ཡོངས་ཀྱི་སྟོབས་འདུས་པ། །གསང་བདག་ལྷ་ཚོགས་མ་ལུས་དང་། །རྩ་རྒྱུད་བླ་མ་ཡི་དམ་ལྷ། །མཆོག་གསུམ་མཁའ་འགྲོ་ཆོས་སྐྱོང་དགོངས། །ད་དུས་བསྐལ་པའི་ཡང་མཐའ་འདིར། །སངས་རྒྱས་བསྟན་པ་ལྷག་ལ་ཉེ། །དགྲ་གདོན་བུ་ཡུག་རླུང་ལྟར་འཚུབ། །ནད་མཚོན་མུ་གེའི་བསྐལ་པ་དང་། །མཆོག་གསུམ་བསྟན་པའི་དབུ་འཕང་དམའ། །ཆོས་མཛད་རྣལ་འབྱོར་སྐྱབས་མགོན་བྲལ། །ཀྱེ་མ་བསྟན་པའི་གཞུག་གཉེར་འདི། །དབྱིངས་ན་བཞུགས་པའི་རྒྱལ་བ་རྣམས། །ཐུགས་རྗེ་མ་གཡེལ་ཐུགས་བསྐྱེད་དགོངས། །བརྟེན་ཅིང་བསྒྲུབ་པའི་རྩ་བ་གསུམ། །མོས་འདུན་གཏད་པ་སུན་མ་ཕྱུངས། །བསྙེན་སྒྲུབ་བརྩམ་པའི་ཡིད་མ་གཅོད། །མཆོད་གཏོར་ཕུལ་བའི་ཆོས་སྐྱོངས་རྣམས། །གསོལ་མཆོད་བྱས་པ་ཆུད་མ་གསོན། །སྣང་སྲིད་ལྷ་སྲིན་སྡེ་བརྒྱད་རྣམས། །རྒྱལ་བ་རྣམས་ཀྱིས་བཀའ་བསྒོས་ལྟར། །དམ་ཚིག་ལྡན་པའི་ཕྲིན་ལས་མཛོད། །མངོན་སྤྱོད་དྲག་པོའི་དུས་ལ་བབས། །ཉམས་པའི་བྱད་མ་དགྲ་བགེགས་འདིས། །བླ་མའི་སྐུ་དང་བསྟན་ལ་བསྡོས། །སྡིག་ལྟུང་མི་དགེ་མཚམས་མེད་སྤྱད། །ད་ལྟ་བདག་གི་དགྲ་རུ་ལངས། །རྣལ་འབྱོར་བདག་ལ་ལྷ་མེད་ཟེར། །རྩ་གསུམ་བསྲུང་མར་མཐུ་མེད་ཟེར། །དེ་ཕྱིར་བསྒྲལ་བའི་ཞིང་བཅུ་འདི། །མཐུ་སྟོབས་དྲག་པོས་མ་བསྒྲལ་ན། །རྗེས་འཇུག་རྣལ་འབྱོར་སུ་ལ་རེ། །སངས་རྒྱས་བསྟན་པ་མི་འཇིག་གམ། །དེ་ཕྱིར་ཐུགས་རྗེའི་ཤུགས་ཕྱུངས་ཤིག །དེ་ཕྱིར་ནུས་པའི་སྟོབས་བསྐྱེད་ཅིག །ཅེས་བརྗོད་ཅིང་བསད་ཟློག་གི་སྔགས་བཟླས་པས་ཟོར་ནུས་ལྡན་དུ་བསྒྲུབ། དམར་གཏོར་ཁྲག་སྐྱེམས་བཅས་བཤམས་ལ། གོང་བཞིན་འགུགས་གཞུག་དང་བྱིན་རླབས་བྱ་ཞིང་། དམག་ལྟོའི་ཚུལ་དུ་ཕུལ་ལ་ཕྲིན་བཅོལ་བྱ། གོང་དུ་ཚོགས་ལྷག་བཙོན་འཛིན་བྱས་ན་མཚམས་འདིར་གཏོང་། གསུམ་པ་ནང་སྒོ་དབྱེ་བ་ནི། གསེར་སྐྱེམས་འབྲུ་གསུམ་གྱིས་སྤེལ་ལ། ཧཱུྃ་ཧཱུྃཿ རང་བྱུང་སྤྲུལ་པའི་སྒོ་བཞི་ནས། །སྤྲུལ་པའི་ཁྲོ་རྒྱལ་སྒོ་བ་བཞི། །གསེར་སྐྱེམས་མཆོད་པ་འདི་བཞེས་ལ། །ཡེ་ཤེས་བཞི་ཡི་སྒོ་ཕྱེས་ཤིག ། རབ་འཇིགས་དྲག་པོའི་དུར་ཁྲོད་ནས། །ལས་བྱེད་ཕོ་ཉ་སྒོ་མའི་ཚོགས། །གསེར་སྐྱེམས་མཆོད་པ་འདི་བཞེས་ལ། །དྲག་པོ་དཔལ་གྱི་ཟོར་ལམ་ཕྱེས། །བཀའ་གཏེར་སྤྱི་དང་བྱེ་བྲག་གི། །བསྲུང་མ་དམ་ཅན་རྒྱ་མཚོའི་ཚོགས། །གསེར་སྐྱེམས་མཆོད་པ་འདི་བཞེས་ལ། །དྲག་པོའི་ཟོར་གྱི་དཔུང་ལ་གཤེགས། །སྡེ་བརྒྱད་ལྷ་ཀླུ་དྲེགས་པའི་ཚོགས། །ལས་དང་གྲོགས་ལ་མ་བྱོན་ན། །དྲག་པོའི་ཟོར་གྱི་འོད་འཕྲོས་པས། །ཕོག་ན་རྡུལ་དུ་བརླག་པར་འགྱུར། །དེ་བས་སྔོན་གྱི་དམ་དགོངས་ལ། །གསེར་སྐྱེམས་འདི་བཞེས་ཕྲིན་ལས་མཛོད། །དམག་དཔུང་བསྐྱེད་ལ་རུ་མཚོན་ཕྱོར། །ཟོར་སྣ་དྲོངས་ལ་དགྲ་བགེགས་སྒྲོལ། །ཡེ་ཤེས་ལས་དང་འཇིག་རྟེན་གྱི། །དམ་ཅན་ཆོས་སྐྱོང་སྲུང་མ་རྣམས། ། གསེར་སྐྱེམས་མཆོད་པ་འདི་བཞེས་ལ། །མངོན་སྤྱོད་ལས་ཆེན་བཅུ་གཉིས་ཀྱིས། །དགྲ་གདོན་བགེགས་ཚོགས་མ་ལུས་པའི། །དྲག་ཤུལ་གདུག་པའི་བསམ་སྦྱོར་རྣམས། །ཀུན་བཟང་དགོངས་པའི་ཀློང་ཆེན་པོར། །རྡུལ་དུ་རློག་ཅིང་གཞོམ་པར་མཛོད། །ཅེས་བརྗོད་ཅིང་སྒོ་བཞི་དབྱེའོ། །དེ་ནས་ཟོར་ལམ་འཐེན་ཞིང་། ཟོར་རྣམས་འགྲོ་ཕྱོགས་སུ་དཔག་ལ། སྨན་རཀ་བྲན་ཅིང་ཞུན་ཆེན་གྱི་མར་མེ་དང་། ཚིལ་ཆེན་གྱི་དཔལ་འབར་བཙུགས། བསྐུལ་བ་དང་ཆད་མདོ་བསྒྲགས་ཤིང་ཆད་གཏོར་གཏོར་ཆེན་དུ་འབུལ་ལོ། །བཞི་པ་སྲིན་མོ་ཟ་ལམ་ནི། གཟུགས་སམ་ཞལ་གཏོར་ཟོར་ཀོང་བཅས་བཤམས་ལ། རཀྟ་སྦྲེང་། རྐང་གླིང་འབུད། ཞིང་ལྤགས་བརྡབ་ཅིང་འདི་བཞིན་བྱའོ། །ཧཱུྃ་བྷྱོཿ སྲིན་མོ་ཟ་ལམ་གོམ་པ་བདུན་ཅུ་འདས་པའི་ཕ་རོལ་ན། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །ཡེ་ཤེས་གྲུབ་ཀྱང་ལས་ཀྱི་ཕོ་ཉར་སྟོན། །དྲེགས་པ་སྡེ་བརྒྱད་ཡོངས་ཀྱི་ལྕམ་སྲིང་ཚུལ། །ཕྱོགས་མཚམས་སྟེང་འོག་དྲེགས་པའི་བཀའ་བསྒྱུར་ནས། །བདག་དང་བསྲུང་བྱ་འཁོར་དང་བཅས་པ་ལ། །སྡེ་བརྒྱད་དྲེགས་པའི་བཀའ་ཆད་ཕོག་ཏ་རེ། །བཟློག་གོ་དམར་ཆེན་གཏོར་མ་འདི་ཡིས་ཟློག །བསྒྱུར་རོ་རྐྱེན་ངན་བར་ཆད་མ་ལུས་པ། །དམ་ཉམས་སྡང་དགྲ་གནོད་པའི་བགེགས་ལ་བསྒྱུར། །བཟློག་གོ་སྔོན་ལས་འཕྲལ་རྐྱེན་མི་མཐུན་ཕྱོགས། །བསྟན་འགྲོར་གནོད་པའི་ཞིང་བཅུའི་སྟེང་དུ་ཟློག །རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད། །ས་མ་ཡཱཿ བྷྱོ་བྷྱོ་བཟློག་བཟློགཿ ཞེས་སོ། ལྔ་པ་ཟོར་འཕེན་པ་ནི། ཟོར་རྣམས་རིམ་བཞིན་ཁྱེར་བའི་ཕྱི་ནས་སྒྲུབ་པ་པོ་རྣམས་ལྟ་སྒོམ་གྱི་གདེངས་དང་ལྡན་པས་རིག་པ་ཧུར་ཕྱུངས་ཏེ། རྩ་སྔགས་དང་། ཨོཾ་བཛྲ་ཙཎྚ་སརྦ་དུཥྚན་ཨེ་ཛ་བྷྱོ་ཧཱུྃ་ཕཊ། ཅེས་བཟླ་ཞིང་འཕེན་པའི་ས་དེར་སོང་ལ་ཟོར་རྣམས་སྟེགས་ལ་བཀོད། རྒྱས་པར་དཀར་གཏོར་དང་གསེར་སྐྱེམས་མཆོད་ཅིང་རྒྱབ་ཡིག་བསྒྲགས། བསྡུ་ན། ཧཱུྃ་ཧཱུྃཿ ཕྱོགས་མཚམས་སྟེང་འོག་ལ་གནས་པའི། །སྣང་སྲིད་ལྷ་འདྲེ་དྲེགས་པའི་ཚོགས། །གསེར་སྐྱེམས་མཆོད་པ་འདི་བཞེས་ལ། །རིག་འཛིན་བདག་གི་བཀའ་ལ་ཉོན། །དམར་ཆེན་དྲག་པོའི་གཏོར་ཟོར་འདི། །དགྲ་གདོན་བགེགས་ཀྱི་སྟེང་དུ་འཕེན། །ཕྱོགས་འདིར་གནས་པའི་གཞི་བདག་རྣམས། །འཁོར་བཅས་དྲག་པོའི་དམག་སྣ་དྲོངས། ། གསེར་སྐྱེམས་མཆོད་པ་འདི་བཞེས་ལ། །ཞིང་བཅུ་ཉམས་པ་བདུན་ལྡན་པའི། །དགྲ་གདོན་བགེགས་རྣམས་མ་ལུས་ཀུན། །ལྷག་མེད་རྡུལ་དུ་རློག་པར་མཛོད། །ཅེས་ཕུད་གཏོར་རོ། །འཕེན་པ་དངོས་ནི། །འགུགས་གཞུག་བྱ་ཞིང་དམིགས་བྱ་འབེན་དུ་བཙུགས་ནས། ཧཱུྃ་ཧཱུྃཿ ང་ནི་ཁྲོ་རྒྱལ་ཡོངས་ཀྱི་རྗེ། །ང་ནི་གསང་བ་ཀུན་གྱི་བདག །འཁོར་འདས་སྐྱེ་འགྲོ་ང་ཡི་དབང་། །དྲེགས་པ་མ་ལུས་ང་ཡི་བྲན། །སྤྲུལ་པ་ཡང་སྤྲུལ་ཕོ་ཉའི་ཚོགས། །གྲངས་མེད་ཞིང་གི་རྡུལ་སྙེད་འཕྲོས། །གདུག་ཅིང་སྡང་སེམས་ལྡན་པ་རྣམས། །ལྷ་ཡང་རུང་སྟེ་བརླག་པར་བྱེད། །འཇིག་རྟེན་འདས་དང་མ་འདས་པའི། །དྲེགས་པ་ཕོ་རྒྱུད་མོ་རྒྱུད་ཀུན། །རང་རང་ཕོ་ཉའི་དམག་བསྡུས་ལ། །དེ་རིང་དགྲ་བགེགས་སྟེང་དུ་དྲོངས། །རྦད་དོ་བསྐུལ་ལོ་དྲེགས་པའི་ཚོགས། །དྲག་རྩལ་མཐུ་དང་དཔུང་བསྐྱེད་ལ། །མེ་ཆུ་ས་རླུང་རྡོ་ཟོར་མཚོན། །ཁྲག་མདའ་མཚེ་ཡུངས་ནམ་མཁའི་ཟོར། །ཐོག་སེར་བུ་ཡུག་འཚུབ་ལྟ་བུས། །གནོད་ཅིང་འཚེ་བའི་སེམས་ལྡན་པའི། །ཞིང་གྱུར་དགྲ་བགེགས་མ་ལུས་པའི། །གཟུགས་ཕུང་ཐལ་བའི་རྡུལ་བཞིན་ཤིགས། །རྣམ་ཤེས་ཚངས་པའི་ལམ་ནས་དྲོངས། །རིག་པ་སྐྱེ་མེད་དབྱིངས་སུ་སྤོར། །ཚར་གཅོད་དབྱིངས་སྒྲོལ་མངོན་སྤྱོད་ཀྱི། །དུས་ལ་བབ་བོ་མཐུ་རྩལ་བསྐྱེད། །ཅེས་དང་། རྦད་ཐུམ་རི་ལི་ལི། །ཨཱོྃ་བཛྲ་པཱ་ཎི་ཙཎྚ་མ་ཧཱ་རོ་ཥ་ཎ་ཧཱུྃ་ཧཱུྃ་ཕཊཿ ཏྲིལ་ཤག་སྲོག་ཁྱེར་བྷྱོ་ཏྲིག་མྱག་ཀ་པ་ཡེ་དགྲ་བགེགས་ཐུན་བྷྱོ་བཟློག ཞེས་བཟླའོ། །དེ་ནས་རྡོ་རྗེ་སློབ་དཔོན་གྱིས་རྟིང་མནན་ཏེ་ཚུར་ལོག རྡོ་རྗེའི་གུར་ཁང་གི་ནང་དུ་བདག་གཞན་བསྲུང་བྱ་ཐམས་ཅད་ཚུད་པར་བསམ་ལ། བསྲུང་འཁོར་བསྒོམ། རྩ་སྔགས་མཐར་བཟློག་ཤམ་དང་། ཧཱུྃ་ཧཱུྃ་ཧཱུྃཿ བདུད་པྲ་མ་ར་ཡ་རྦད་ནན་ནན༔ སོགས་བདུན་ནམ་ཉེར་གཅིག་བཟླས། སྒོ་དྲུང་དུ་བསྟན་མའི་གཏོར་མ་སྐྱོང་། བྲོ་བརྡུང་བྱ་ཞིང་རྒྱལ་དབྱངས་གྱེར། ནང་དུ་འོང་ནས་ཚེ་འགུགས་བྱ་ཞིང་སྒྲུབ་གཏོར་ལྷར་གསལ་བ་ལ་དབང་བཞི་བླངས། གཏང་རག་མཆོད་བསྟོད་དང་བཟོད་གསོལ་བྱ། ནམ་མཁར་བཏེགས་པའི་ཡེ་ཤེས་པ་རྣམས་གཤེགས་གསོལ་བྱ་བའམ། བྲིས་སྐུ་སོགས་རྟེན་ལ་བརྟན་བཞུགས་བྱ། དམ་ཚིག་པ་རྣམས་རང་ལ་བསྡུ་ཞིང་རྒྱུན་སྤྱོད་བསྔོ་སྨོན་ཤིས་བརྗོད་རྣམས་རིམ་པར་དཀྱུས་བཞིན་བྱ་བ་ཁོ་ནའོ། །འདིར་སྨྲས་པ། གཞན་ཕན་བྱང་སེམས་རྩི་ཡིས་མ་ཐེབས་པའི། །རང་དོན་ལོག་པའི་དྲག་ལས་ངན་འགྲོའི་རྒྱུན། །མི་དགེ་ཕལ་དང་ཐུན་མོང་མིན་ཞེ་ན། །དྲག་པོའི་ཕྲིན་ལས་ཡིན་འདོད་གད་མོའི་གནས། །རང་འདོད་འཁྲི་བ་མེད་པའི་ལྷག་བསམ་གྱིས། །བསྒྲལ་བྱའི་ལས་ཉོན་རྒྱུ་འབྲས་གཞོམ་པའི་བློས། །དྲག་པོའི་ལས་ཀྱིས་འགྲོ་བ་ཀུན་བསྒྲལ་ནས། །ཚོགས་རྫོགས་རྒྱལ་བ་དགྱེས་པའི་ལམ་དུ་འགྱུར། །ཐུགས་རྗེ་ཕྱོགས་རིས་མེད་པའི་རྣལ་འབྱོར་བས། །ཐབས་ཀྱིས་གདུལ་དཀའི་འགྲོ་དོན་མཛད་པ་ལ། །ཚར་གཅོད་དབྱིངས་སྒྲོལ་མངོན་སྤྱོད་ཕྲིན་ལས་ཉིད། །འདྲེན་མཆོག་ལྗགས་ལས་བསྔགས་པ་དང་བཅས་བསྩལ། །རྣམ་དཔྱོད་ལྷ་བུ་གཞོན་ནུས་དོན་གཉེར་གྱིས། །བསྒྲལ་བའི་ལས་རིམ་རྡོ་རྗེའི་མཚོན་འཁོར་འདི། །བཀའ་གཏེར་འཆི་མེད་དབང་པོའི་འདུན་ཁང་ནས། །བླངས་ཏེ་ལེགས་བཤད་གཉིས་འཐུང་སྣ་རྩེར་བཀོད། །འདི་སྦྱར་དགེ་བས་བསྟན་འགྲོའི་ལེགས་ཚོགས་ལ། །བར་གཅོད་རྩོམ་པའི་ལོག་འདྲེན་ལྷ་མིན་དཔུང་། །ཆོས་དབྱིངས་ཀློང་དུ་སྨག་མེད་མཐར་བྱས་ནས། །བསྟན་འཛིན་ལྷ་དབང་སྡེར་བཅས་རྒྱལ་གྱུར་ཅིག ། ཅེས་སྤྲུལ་པའི་གཏེར་ཆེན་འགྲོ་འདུལ་ལུང་རིག་གླིང་པའི་ཟབ་གཏེར་མཚོ་རྒྱལ་དགོངས་པའི་གསང་མཛོད་ཀྱི་ཆོས་སྡེ་ལས་བྱུང་བ། གསང་བདག་གཏུམ་པོའི་ཐུགས་སྒྲུབ་ཀྱི་སྨད་ལས་སྒྲོལ་བ་དྲག་པོའི་ལས་རིམ་ཁྲོ་རྒྱལ་སྟོབས་འདུས་ཞེས་བྱ་བ་འདི་ཡང་། གཏེར་ཆེན་ཆོས་ཀྱི་རྒྱལ་པོ་གང་གི་རིགས་དབོན་བླ་མ་རིན་པོ་ཆེའི་བཀའ་ལུང་ལྷ་རེག་བཅས་བསྩལ་བ་སྤྱི་བོར་བླངས་ནས་ཟབ་ཆོས་འདི་ཉིད་ལ་དད་པ་ཅུང་ཟད་ཐོབ་པའི་སྤྲུལ་མིང་པ་མགོ་སྤྲུལ་ཆོས་དབྱིངས་ཀུན་གསལ་བློ་གྲོས་རྒྱ་མཚོས་བཀའ་གཏེར་དུ་མ་ནས་བསྡུས་ཏེ་ཁྲིགས་སུ་བསྡེབ་པ་ཡི་གེའི་རིས་སུ་འབེབས་པ་པོ་ནི་གོས་དཀར་འཆང་བ་རྡོ་རྗེ་དཔལ་འཛིན་སྟེ། ཉེས་འགལ་གང་མཆིས་རྩ་བ་གསུམ་ལ་བཤགས་ཤིང་དགེ་བས་བསྟན་འགྲོའི་རྒུད་པ་མཐའ་དག་ལྷག་མེད་དུ་བཅོམ་ནས་གསང་སྔགས་རྡོ་རྗེ་ཐེག་པའི་འོད་སྟོང་ཕྱོགས་ཀུན་ཏུ་རྒྱས་པར་གྱུར་ཅིག །དགེའོ། །དགེའོ། །དགེའོ། ། གསང་བདག་ལུས་དཀྱིལ་རྗེས་ཆོག༄༅། ལུས་དཀྱིལ་རྒྱུན་ཁྱེར་གྱི་རྗེས་ཆོག་ནི། ཨོཾ་ཤྲཱི་བཛྲ་ཀཱུ་མ་ར་ས་པ་རི་ཝ་ར་ཨརྒྷཾ་སོགས་ནས། ཤཔྟ་པྲ་ཏིཙྪ་པཱུ་ཛ་ཨཱ༔ཧཱུྃ། སརྦ་པཉྩ་ཨ་མྲྀ་ཏ་རཀྟ་བྷ་ལིང་ཏ་པུ་ཛ་ཨཱ༔ཧཱུྃ། བསྟོད་པ་ནི། ཧཱུྃ། དཔལ་ཆེན་རྡོ་རྗེ་གཞོན་ནུ་ཡབ་ཡུམ་དང་། །ཀཱི་ལ་རིགས་བཞི་བདུད་འདུལ་ཁྲོ་རྒྱལ་བཅུ། །སྒོ་བསྲུང་བཞི་དང་དབང་མོ་ཉི་ཤུ་བརྒྱད། །ཕུར་སྲུང་བཅུ་དྲུག་བཅས་ལ་ཕྱག་འཚལ་བསྟོད། །དངོས་གྲུབ་ལེན་པ་ནི། ཧཱུྃ། ཁྲོ་རྒྱལ་བསྒྲུབ་པའི་ཐུགས་དམ་དུས་ལ་བབས། །རྒྱལ་ཀུན་ཕྲིན་ལས་ལྷ་ཚོགས་འཁོར་བཅས་ཀྱི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །དངོས་གྲུབ་དམ་པ་དེང་འདིར་སྩལ་དུ་གསོལ། །རྩ་སྔགས་མཐར། ཀཱ་ཡ་ཝཀྐ་ཙིཏྟ་སརྦ་སིདྡྷ་ཧོ། །བཟོད་གསོལ་ནི། ཧཱུྃ། བདག་ཅག་མི་ཤེས་ལུས་ངག་ཡིད་གསུམ་གྱིས། །བསྐྱེད་རིམ་བཟླས་བརྗོད་ཏིང་འཛིན་ནོར་འཁྲུལ་དང་། །དམ་ཚིག་ཉམས་ཆག་འགལ་འཁྲུལ་ཅི་མཆིས་པ། །གནོང་ཞིང་འགྱོད་པའི་སེམས་ཀྱིས་བཟོད་པར་གསོལ། །ཡིག་བརྒྱ། བསྡུ་རིམ་ནི། ཧཱུྃ། རང་བྱུང་རང་ཤར་དཔལ་ཆེན་ལྷ་ཚོགས་རྣམས། །རང་བཞིན་ཆོས་ཀྱི་དབྱིངས་སུ་བཛྲ་མུཾ། །ཧཱུྃ་ཧཱུྃ་ཧཱུྃ། ལྷར་སྡང་ནི། སླར་ཡང་ཆུ་ལས་ཆུ་བུར་ཇི་བཞིན་དུ། །ཕྱག་རྒྱ་གཅིག་པ་མཁའ་ལ་འཇའ་བཞིན་གསལ། །ཕཊ་ཕཊ་ཕཊ། །བསྔོ་བ་ནི། བདག་གཞན་རྣམས་ཀྱིས་དུས་གསུམ་དགེ་བསགས་པ། །ནམ་མཁའི་མཐའ་ཁྱབ་མར་གྱུར་སེམས་ཅན་རྣམས། །དཔལ་ཆེན་ཁྲག་འཐུང་རྡོ་རྗེ་གཞོན་ནུ་དེའི། །གོ་འཕང་ཚེ་འདི་ཉིད་ལ་ཐོབ་ཕྱིར་བསྔོ། །བཀྲ་ཤིས་ནི། ཨོཾ་སྐྱེ་འཆི་འགྱུར་མེད་ཕྲིན་ལས་རྡོ་རྗེའི་སྐུ། །ཨཱ༔འགགས་མེད་གསལ་དག་ཆོས་དབྱིངས་ཡེ་ཤེས་གསུང་། །ཧཱུྃ་སྨྲ་བསམ་བརྗོད་མེད་ཡང་དག་དེ་བཞིན་ཉིད། །བླ་མེད་སྐུ་གསུང་ཐུགས་ཀྱི་བཀྲ་ཤིས་ཤོག །མགོ་སྤྲུལ་པས་བྲིས་པའོ།། ཕུར་པ་དམ་སྲི་ཚར་གཅོད་ཀྱི་ཟོར་ལས།༄༅།། རྡོ་རྗེ་ཕུར་པ་བདུད་དཔུང་ཟིལ་གནོན་དམ་སྲི་ཚར་གཅོད་ཀྱི་གཏེར་གཞུང་སྐབས་སུ་ཁ་སྐོང་ཟོར་གྱི་ལས་རིམ་ལ། ཐོག་མར་ཟློག་པའི་མཇུག་ཏུ་ཐུན་གཏོར་ནི། དམར་གཏོར་ལ་དགྲ་བགེགས་དགུག་གཞུག་བྱས་ཏེ་འབྲུ་གསུམ་གྱི་བྱིན་གྱིས་བརླབས་ལ། རྩ་སྔགས་དང་། ནྲྀ་ཏྲི་སརྦ་ཤ་ཏྲུཾ་མ་ར་ཡ་མ་ཧཱ་བ་ལིངྟ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་གྱིས་ཕུལ། བཛྲ་པུཥྤེ་སོགས་ནས་ཤཔྟ་ཨ་མྲྀ་ཏ་རཀྟ་བྷ་ལིང་ཏ་པཱུ་ཛ་ས་མ་ཡཱ་ཁཱ་ཧི་ཁཱ་ཧི། ཞེས་མཆོད་ཅིང་བསྟོད་པ་ནི། ཧཱུྃ། རྡོ་རྗེ་གཞོན་ནུ་སྟངས་དཔྱལ་སྲས། །ཁྲོ་བཅུ་ཡབ་ཡུམ་ཟ་གསོད་དང་། །སྒོ་སྐྱོང་དམ་ཅན་ཚོགས་བཅས་ཀྱི། །སྐུ་གསུང་ཐུགས་ཡོན་ཕྲིན་ལས་བསྟོད། ཕྲིན་ལས་བཅོལ་བ་ནི། ཧཱུྃ་ཧཱུྃ། བདུད་དཔུང་ཟིལ་གནོན་བཅོམ་ལྡན་འདས། །སྤྱི་དཔལ་རྡོ་རྗེ་གཞོན་ནུ་ཆེ། །དམ་ཚིག་སྲས་དང་སྤྲུལ་པའི་ཚོགས། །ཕྱག་བརྙན་ཕོ་ཉ་བྲན་དང་བཅས། །དྲག་པོའི་དམ་རྫས་འདི་རོལ་ལ། །རྣལ་འབྱོར་དཔོན་སློབ་འཁོར་བཅས་ཀྱི། །མི་མཐུན་ཞི་ཞིང་ལེགས་ཚོགས་རྒྱས། །མོས་བཞི་དབང་སྡུད་ཕྲིན་ལས་མཛོད། །དགྲ་གདོན་བར་གཅོད་ཕུང་སྲི་བདུད། །སྲོག་ལ་རྒོལ་བའི་གདུག་པ་ཅན། །མཐའ་དམག་སྣ་འདྲེན་སྡོང་ཟླར་བཅས། །གཏན་ནས་བརླག་པའི་ཕྲིན་ལས་མཛོད། །མེ་ཆུ་ས་གཡོ་རླུང་འཇིགས་དང་། །ནད་མཚོན་མུ་གེ་ལྟ་ལོག་སོགས། །སྣོད་བཅུད་སྙིགས་མའི་འཕོ་འགྱུར་རྣམས། །བཟློག་བསྒྱུར་དྲག་པོའི་ཕྲིན་ལས་མཛོད། །ཁྱད་པར་ལས་བཞི་གྲུབ་པ་བརྒྱད། །ཐུན་མཆོག་དངོས་གྲུབ་ཚེ་འདི་ལ། །རྣལ་འབྱོར་ལག་རྩེར་སྩོལ་བ་ཡི། །ཐུགས་དམ་མ་གཡེལ་ས་མ་ཡཱ། །ཞེས་འབུལ་ལོ། །དེ་ནས་ཕྱིའི་སྒོ་དབྱེ་ནི། གཏོར་སྐྱེམས་འབྲུ་གསུམ་གྱིས་སྤེལ་ལ། ཧཱུྃ་ཧཱུྃ། ང་ནི་དཔལ་ཆེན་ཁྲོ་བོའི་རྒྱལ། །བདུད་འདུལ་རྡོ་རྗེ་གཞོན་ནུ་ཆེ། །ང་ལས་ཆེ་བཙན་སུ་ཡང་མེད། །ཐམས་ཅད་ང་ཡི་བཀའ་ལ་ཉོན། །བསྟན་པ་གཉན་ལ་དགྲ་དར་ན། །དེ་རིང་དམར་ཆེན་དྲག་པོའི་ཟོར། །དམ་ཉམས་རུ་ཏྲའི་སྟེང་དུ་འཕེན། །ཀུན་ཀྱང་གྲོགས་མཛོད་ཟོར་ལམ་ཕྱེས། །ཁྲོ་བོ་རོལ་པའི་གཞལ་ཡས་ཀྱི། །ཕྱོགས་བཞིའི་ཕྱི་སྒོ་སྐྱོང་བའི་བདག །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །སོ་སོའི་བཙུན་མོ་སྲས་བློན་འཁོར། །དུང་གསེར་ཟངས་གཡུའི་བུ་མོ་བཞི། །དྲི་ཟ་གྲུལ་བུམ་ཆུ་བདག་དང་། །གནོད་སྦྱིན་བུད་མེད་འབུམ་འབུམ་བཅས། །དམ་རྫས་གཏོར་སྐྱེམས་འདི་གསོལ་ལ། །དམར་ཆེན་ཟོར་གྱི་ལམ་ཕྱེས་ཤིག །དཔལ་མགོན་བདུན་ཅུ་རྩ་ལྔ་དང་། །སྣང་སྲིད་སྡེ་བརྒྱད་དཀར་ཕྱོགས་སྐྱོང་། །འཁོར་བཅས་གཏོར་སྐྱེམས་འདི་གསོལ་ལ། །ཟོར་ལམ་ཕྱོགས་སུ་མ་འདུག་པར། །སྒོ་དབྱེ་འཕྲང་སོལ་དམག་ལ་ཆས། །དམ་ཅན་རྒྱ་མཚོའི་དམག་དཔུང་སྐྱེད། །སྣང་སྲིད་ལྷ་འདྲེས་དམག་སྣ་དྲོངས། །དེ་རིང་སྔགས་འཆང་སྡོང་གྲོགས་མཛོད། །ཅེས་གཏོར་མ་གསེར་སྐྱེམས་ཕུལ། ནང་གི་སྒོ་དབྱེ་ནི། ཧཱུྃ། ཕྲིན་ལས་ཀུན་རྫོགས་ཕོ་བྲང་གི། །ནང་སྒོ་སྲུང་མཛད་སྒོ་མ་བཞི། །རྣལ་འབྱོར་དབང་ཕྱུག་གདོང་མོ་བཞི། །ཐུགས་རྗེ་ཐུགས་དམ་ཉེར་དགོངས་ལ། །ཚད་མེད་རྣམ་བཞིའི་ཕྱག་རྒྱ་ཡིས། །ཡེ་ཤེས་བཞི་ཡི་སྒོ་ཕྱེས་ལ། །འཇིགས་དང་བར་ཆད་མི་མཐུན་ཕྱོགས། །མ་ལུས་ལྷག་མེད་ཞི་བ་དང་། །ཚེ་བསོད་ཡེ་ཤེས་ཡོན་ཏན་རྣམས། །འཕེལ་ཞིང་རྒྱས་པའི་དངོས་གྲུབ་སྩོལ། །ཁམས་གསུམ་མོས་བཞི་དབང་འདུས་ཤིང་། །སྲིད་གསུམ་ཆེ་དགུ་ཟིལ་གནོན་མཛོད། །དགྲ་བདུད་དམ་སྲི་གདུག་པ་ཅན། །ཚར་གཅོད་དབྱིངས་སྒྲོལ་དངོས་གྲུབ་སྩོལ། །བྷྲུཾ་སརྦ་ཤནྟིཾ་པུཥྚིཾ་ཝ་ཤཾ་མ་ར་ཡ་ཛཿཧཱུྃ་བཾ་ཧོ་ཕཊ༔ ཅེས་བསལ། མཆོད་བསྟོད་བསྡུས་ཙམ་དང་། བཟོད་གསོལ་ནི། མ་རྙེད་ཡོངས་སུ་མ་འཚལ་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་ནོངས་པ། །དེ་ཀུན་ཁྱེད་ཀྱིས་བཟོད་པར་གསོལ། །ཡིག་བརྒྱ་བརྗོད། ལྷ་བཏེགས་ནི། ཨོཾ་མ་ཧཱ་ཛྙཱ་ན་ཙཀྲ་ཧ་ཧེ་ཕཊ་བྷྱོ་རཾ། ཞེས་འདེགས་རྒྱ་བྱ་ཞིང་། ཡེ་ཤེས་པ་རྣམས་བདག་ལ་ཐིམ། དམ་ཚིག་པ་ཟོར་གྱི་རྣམ་པར་བཞེངས་ནས་ཁྲོ་འཁྲུག་རྔམས་པས་དགྲ་བགེགས་དམ་སྲི་ལོག་འདྲེན་ཐམས་ཅད་མངོན་སྤྱོད་དྲག་པོའི་ལས་ཆེན་བཅུ་གཉིས་ཀྱིས་རྡུལ་དུ་བརླག་པར་དགོངས་ཏེ་རིངས་པའི་ཚུལ་གྱིས་ཆས་པར་བསམ་ལ། ཟོར་སྒྲུབ་ནི། ཧཱུྃ་ཧཱུྃ། སྐུ་གསུམ་དག་པའི་ཞིང་ཁམས་ནས། །བདེ་གཤེགས་ཡོངས་རྫོགས་ཧེ་རུ་ཀ །རྡོ་རྗེ་གཞོན་ནུ་ཁྲོ་བོའི་རྒྱལ། །སྟངས་དཔྱལ་འཁོར་དང་བཀའ་ཉན་ཚོགས། །བརྒྱུད་གསུམ་རིག་འཛིན་བླ་མ་དང་། །སྒྲུབ་སྡེ་དགུ་རྫོགས་དཀྱིལ་འཁོར་ལྷ། །རྒྱུད་སྡེ་བཞི་དྲུག་ཐེག་རིམ་དགུ། །མ་སྲིང་དམ་ཅན་སྲུང་མར་བཅས། །ཁྱད་པར་མཆོད་བསྟོད་དྲེགས་པའི་སྡེ། །བཀའ་སྡོད་དཔལ་མགོན་དཀར་ཕྱོགས་སྐྱོང་། །ལོ་ཟླ་ཞག་དུས་དབང་བྱེད་ལྷ། །གནས་དང་རྒྱུ་བའི་ས་བདག་རྣམས། །ཟོར་མཆོག་འདི་ལ་བྱིན་གྱིས་རློབས། །ཟོར་ཆེན་རྫས་ཀྱི་མཐུ་ནུས་སྐྱེད། །ཟོར་བདག་དམོད་པ་ལས་ཀྱི་ལྷས། །མི་མཐུན་དཔུང་ཚོགས་གཞོམ་དུ་གསོལ། །རྩ་སྔགས་དང་དྲག་སྔགས་སོ་ལྔའི་མཐར། བསྟན་དང་འགྲོ་ལ་གནོད་ཅིང་འཚེ་བའི་དགྲ་གདོན་དམ་སྲི་གདུག་པ་ཅན་ཐམས་ཅད་མ་ར་ཡ་ཧཱུྃ་ཕཊ༔ ཅེས་མང་དུ་བཟླའོ། །བཞེངས་བསྐུལ་ནི། ཧཱུྃ། རབ་འཇིགས་དུར་ཁྲོད་འབར་བའི་དབུས། །མཐིང་ནག་གྲུ་གསུམ་དཀྱིལ་འཁོར་ནས། །སྐུ་གསུམ་ཕྲིན་ལས་ཀུན་རྫོགས་དཔལ། །རྡོ་རྗེ་གཞོན་ནུ་ཆེ་བའི་མཆོག །ཡབ་ཡུམ་གཙོ་འཁོར་སྤྲུལ་བར་བཅས། །དམ་ཚིག་གཏོར་མ་འདི་བཞེས་ལ། །ཞིང་བཅུ་ཉམས་པ་བདུན་ཚང་བའི། །དགྲ་གདོན་བགེགས་རིགས་ཐལ་བར་རློགས། །བསྐུལ་ལོ་ཐུགས་དམ་གནད་ནས་བསྐུལ། །བཞེངས་ཤིག་ཟོར་གྱི་ལས་ལ་བཞེངས། །ཆས་ཤིག་དམིགས་བྱའི་སྟེང་དུ་ཆས། །མཛོད་ཅིག་མངོན་སྤྱོད་ཕྲིན་ལས་མཛོད། །མ་གཡེལ་སྐུ་གསུམ་བདེ་གཤེགས་རྣམས། །མ་གཡེལ་རྡོ་རྗེ་ཕུར་པའི་ལྷ། །མ་གཡེལ་དཀོན་མཆོག་རྩ་བ་གསུམ། །མ་གཡེལ་དམ་ཅན་བཀའ་སྡོད་ཚོགས། །གཟུ་དང་དཔང་དུ་དཀོན་མཆོག་བཞུགས། །གིང་སྒྲོལ་ཁྲག་འཐུང་དཔལ་གྱིས་དགོངས། །ལེགས་ཉེས་སྲིད་པའི་ལྷ་འདྲེས་རྩིས། །དྲང་ཤན་དམ་ཅན་སྲུང་མས་མཛོད། །ཞི་བས་མི་ཐུལ་དགྲ་བགེགས་བདུད། །དྲག་པོས་ཚར་གཅོད་རྗེས་འཛིན་ཕྱིར། །ཁྲོ་གཏུམ་རྔམས་པའི་གར་བསྒྱུར་ལ། །དགྲ་བགེགས་སྟེང་དུ་དམག་ལ་ཆས། །དམག་དཔུང་བསྐྱོད་ལ་རུ་མཚོན་ཕྱོར། །བྱད་ཕུར་རྦོད་གཏོང་རང་གཤེད་ཕོབས། །གདུག་པའི་དམག་ཚོགས་ཕྱིར་ལ་ཟློག །བར་གཅོད་དམ་སྲི་དབྱིངས་སུ་སྒྲོལ། །བྷྱོ་བྷྱོ་སྡང་བའི་དགྲ་ལ་བྷྱོ། །ཟློག་ཟློག་གནོད་པའི་བགེགས་ལ་བཟློག །བསྒྱུར་རོ་རྐྱེན་ངན་དབྱིངས་སུ་བསྒྱུར། །བྷྱོ་ཟློག་བསྒྱུར་བའི་ཕྲིན་ལས་མཛོད། །ཅེས་བརྗོད་ཅིང་ཟོར་ལམ་དཀར་ཤར་གྱིས་འཐེན་ལ་གཏོར་གྲལ་བསྒྲིགས་ནས་བསྐུལ་བ་དང་ཆད་མདོ་བསྒྲགས། ཟ་ལམ་ནི། བྷྱོ་ཛ༔ ནམ་མཁའི་དབང་ཕྱུག་དཔལ་ཆེན་མོ༔ ཀུན་ཏུ་བཟང་མོ་སྤྲུལ་བསྒྱུར་མ༔ དབྱིངས་ཀྱི་རྒྱལ་མོ་ཨེ་ཀ་ཛ༔ མདོས་དང་ཟོར་ལ་སྤྱན་འདྲེན་ནོ༔ ཁྱོད་ནི་ཁམས་གསུམ་སྲོག་གི་བདག༔ མཁའ་འགྲོ་ཡོངས་ཀྱི་རྗེ་མོ་སྟེ༔ དྲེགས་པ་སྡེ་བརྒྱད་སྲིང་གཅིག་མ༔ སྲིན་མོ་ཟ་ལམ་དཔལ་ལྷ་མོ༔ དགྲ་བགེགས་བཟློག་ཕྱིར་གཤེགས་སུ་གསོལ༔ དེ་རིང་རྣལ་འབྱོར་བདག་ཅག་གིས༔ ཡི་དམ་རྩ་གསུམ་བསྙེན་བསྒྲུབས་ནས༔ དངོས་གྲུབ་རྟགས་མཚན་དེ་རིང་ཐོབ༔ དྲག་པོའི་དུས་ལ་ད་བབ་ཀྱི༔ འཕང་བ་ཟོར་གྱི་ལས་བྱེད་དོ༔ མ་སྲིང་གཙོ་མོ་ཟ་ལམ་ཁྱོད༔ རང་གཟུགས་གླུད་དང་དབྱེར་མེད་དུ༔ དམ་ཉམས་དགྲ་བོའི་ཡུལ་ཕྱོགས་སུ༔ དམར་ཆེན་གཏོར་མའི་ཟོར་སྣ་དྲོངས༔ དམིགས་པའི་ཡུལ་གྱུར་དགྲ་བགེགས་ལ༔ སྡེ་བརྒྱད་ཟ་ཁ་ཁྱོད་ཀྱིས་སྟོན༔ དྲེགས་པའི་དམག་སྣ་ད་དྲོངས་ཤིག༔ སྣང་སྲིད་ལྷ་འདྲེས་ཟ་ལམ་ཕྱེ༔ ཁྱོད་ཀྱི་འཁོར་དུ་གནས་པ་ཡི༔ ཡུམ་ཆེན་མཁའ་འགྲོ་སྡེ་ལྔ་ཡིས༔ མ་སྲིང་ཌཱཀྐི་དམག་བསྡུས་ལ༔ རིགས་ཀྱི་བསུན་མ་དགྲ་ལ་ཟློག༔ གཞན་ཡང་བདུད་བཙན་མ་མོ་དང་༔ གཟའ་ཀླུ་ཐེའུ་རང་རྒྱལ་པོ་སྟེ༔ སྣང་སྲིད་ལྷ་འདྲེ་སྡེ་བརྒྱད་རྣམས༔ གོ་གྱོན་མཚོན་ཐོགས་དམག་ལ་ཆས༔ དགྲ་བགེགས་སྟེང་དུ་ཟོར་སྣ་དྲོངས༔ དམིགས་པའི་ཕྱོགས་སུ་ལམ་ཕྱེས་ལ༔ ཀོ་ལོང་སྡོམ་པའི་འཕྲང་སོལ་ཅིག༔ ཕུང་སྲི་འགོང་པོའི་སྡེ་ཚོགས་བཅས༔ སྣང་སྲིད་ལྷ་འདྲེ་ཐམས་ཅད་ཀུན༔ དེ་རིང་ཟོར་གྱི་དམག་ལ་ཆས༔ ལམ་སྣ་དྲོངས་ལ་གཡུལ་ངོ་ཐོབ༔ དགྲ་བོའི་ནོར་རྫས་ལོངས་སྤྱོད་རྣམས༔ མ་ཟད་བར་དུ་ལོངས་སྤྱོད་གྱིས༔ སྲིད་གསུམ་བྱད་སྣ་ཁྱོན་བསྡོམས་ནས༔ དགྲ་དང་བགེགས་ཀྱི་སྟེང་དུ་བྷྱོ༔ སྲོག་གཅོད་སྲིན་མོ་ཟ་ལམ་ཁྱོད༔ གཤེགས་སོ་བཞུད་དོ་ཤ་ར་ར༔ ཟོར་ལམ་ཕྱེ་ལ་དགྲ་ཡུལ་སོང་༔ མ་མོའི་ནད་རྐྱལ་ཁ་ཕྱེས་ལ༔ དགྲ་བོའི་ཡུལ་ཁམས་སྟོངས་སུ་ཆུག༔ གཡས་ཀྱི་གཤིན་རྗེའི་ཁྲམ་ཤིང་ལ༔ དགྲ་བོའི་མི་ནོར་ཁྲམ་ལ་ཐོབ༔ གཡོན་པ་ཁྲག་གི་ ཀོང་ཟོར་གྱིས༔ དམར་ཡམས་ནད་ཀྱིས་མྱོས་པར་གྱིས༔ གཤེགས་ནས་ཚུར་ལ་མ་ལྡོག་པར༔ དགྲ་ཡུལ་མ་མོའི་ཕོ་བྲང་ཐོབ༔ དྲེགས་པ་སྡེ་བརྒྱད་བཙན་རྫོང་བརྩིགས༔ སྣང་སྲིད་ལྷ་འདྲེའི་འདུ་གནས་གྱིས༔ མིང་ཙམ་མེད་པར་རྡུལ་དུ་རློགས༔ བཅོལ་བའི་ཕྲིན་ལས་འགྲུབ་པར་མཛོད༔ སླར་ཡང་ཟོར་ལམ་བསལ་བ་ནི། གསེར་སྐྱེམས་འབྲུ་གསུམ་གྱིས་བརླབས་ལ། ཧཱུྃ༔ བདག་ཉིད་རྣལ་འབྱོར་དབང་ཕྱུག་གིས༔ ཁྲག་འཐུང་རྡོ་རྗེ་གཞོན་ནུ་ཡི༔ དམར་ཆེན་དྲག་པོའི་གཏོར་ཟོར་འདི༔ དགྲ་གདོན་བགེགས་ཀྱི་སྟེང་དུ་འཕེན༔ ཕྱོགས་བཞི་མཚམས་བརྒྱད་སྟེང་འོག་ན༔ བཞུགས་པའི་སྣང་སྲིད་ལྷ་འདྲེ་ཀུན༔ ཟོར་ལམ་ཕྱོགས་སུ་མ་འདུག་པར༔ དྲག་པོ་ཟོར་གྱི་ལམ་ཕྱེས་ཤིག༔ དཔལ་གྱི་ཟོར་ཆེན་གཉན་པོ་འདི༔ ལྷ་སྲིན་ཚོགས་ལ་འཕེན་སྙམ་སྟེ༔ སྟེང་གི་ལྷ་ལ་ཟོར་མི་འཕེན༔ འོག་གི་ཀླུ་ལ་ཟོར་མི་འཕེན༔ བར་གྱི་གཉན་ལ་ཟོར་མི་འཕེན༔ དཀར་ཕྱོགས་སྐྱོང་ལ་ཟོར་མི་འཕེན༔ འོན་ཀྱང་གདུག་པའི་དབལ་ཟོར་གྱིས༔ དབུ་ཞབས་ཀུན་ལ་ཕོག་སྲིད་པས༔ གསེར་སྐྱེམས་མཆོད་པ་འདི་བཞེས་ལ༔ སྟེང་འོག་གཡས་དང་གཡོན་དུ་བྱོལ༔ མཐོ་བ་རྣམས་ཀྱིས་ཞབས་བསྐུམས་ཤིག༔ དམའ་བ་རྣམས་ཀྱིས་དབུ་ཆུམ་ཞིག༔ བར་བ་རྣམས་ཀྱིས་སྐུ་བཟུར་ཅིག༔ སོ་སོའི་ཕོ་བྲང་སྒོ་སྡོམས་ཤིག༔ སྲིད་ཧུའི་རྒྱབ་ཡིག་བཀླག་ཅིང་། དམིགས་བྱ་འབེན་བཙུགས་པ་ཡོད་ན་འགུག་གཞུག་བྱ། དཔུང་བསྐྱེད་ཅིང་བསྐུལ་བ་ནི། ཧཱུྃ་ཧཱུྃ། རྣལ་འབྱོར་ཟོར་འཕེན་གང་དུ་འཕེན། །སྡང་བྱེད་དགྲ་བོའི་སྟེང་དུ་འཕེན། །གནོད་བྱེད་བགེགས་ཀྱི་སྟེང་དུ་འཕེན། །དམ་ཉམས་རཱུ་ཏྲའི་སྟེང་དུ་འཕེན། །དཔལ་ཆེན་ཁྲག་འཐུང་ལྷ་ཚོགས་རྣམས། །མངོན་སྤྱོད་ཟོར་གྱི་ལས་ལ་དགོངས། །དོ་ནུབ་དགྲ་ལ་དམག་འདྲེན་གྱིས། །དམག་དཔུང་བསྐྱོད་ལ་རུ་མཚོན་ཕྱོར། །དཔལ་ཆེན་སྲས་བཅས་མཐུ་རྩལ་ཕྱུང་། །ཁྲོ་ཚོགས་ཕྲ་ཐབས་ནུས་སྟོབས་སྐྱེད། །དབང་ཕྱུག་གིང་ཚོགས་དགྲ་ལ་བྷྱོ། །ཕུར་སྲུང་དམ་ཅན་ལས་ལ་ཆས། །ཕྱོགས་དེར་གནས་པའི་སྡེ་བརྒྱད་རྣམས། །འཁོར་བཅས་དྲག་པོའི་དམག་སྣ་དྲོངས། །ཐུགས་རྗེས་སྒྲོལ་འདྲེན་མངོན་སྤྱོད་ཀྱི། །ཐུགས་དམ་གཉན་པོ་དུས་ལ་བབས། །བསྡུ་ན་དེས་ཆོག སྤྲོ་ན། ཧཱུྃ། ང་ནི་རྡོ་རྗེ་གཞོན་ནུ་སྟེ། །ཁྲག་འཐུང་ཀུན་གྱི་རྒྱལ་པོ་ཡིན། །བཀའ་སྡོད་ལས་བྱེད་སྟོང་གསུམ་གང་། །ཐམས་ཅད་དྲག་པོའི་དམག་ལ་ཆས། །སྒྲོལ་བྱེད་དྲག་པོའི་ཟོར་གྱི་རྫས། །ཁྲོ་མཚོན་མེ་ཡི་ཚྭ་ཚྭ་འཕྲོ། །གཏོར་ཟོར་ཐོག་འབྲུག་འུ་རུ་རུ། །ཡུངས་ཟོར་མཚོན་ཆར་ཟི་ལི་ལི། །ཀོང་ཟོར་བུ་ཡུག་ཐིབས་སེ་ཐིབ། །ཐུན་ཟོར་མེ་རླུང་ཐོ་རོ་རོ། །ཁྲག་ཟོར་ནད་རླངས་བུ་ནུ་ནུ། །དུག་ཟོར་མུན་ནག་ཐིབས་སེ་ཐིབ། །མཚོན་ཟོར་མེ་ལྕེ་ལམས་སེ་ལམ། །རྡོ་ཟོར་རྦབ་རྒོད་ཉི་ལི་ལི། །ཕུར་ཟོར་རྣོ་དབལ་ཟེངས་སེ་ཟེང་། །མདའ་ཟོར་གློག་ཞགས་ཁྱུགས་སེ་ཁྱུག །སྡང་བ་དགྲ་ཡི་སྙིང་ལ་ཡ། །བདུན་རྒྱུད་ཆོད་ཅིག་མཱ་ར་ཡ། །གནོད་པ་བགེགས་ཀྱི་སྲོག་ལ་ཡ། །མེད་པར་ཆོམས་ཤིག་མཱ་ར་ཡ། །བདག་འཛིན་བདུད་ལ་ཟོར་འདི་ཡ། །གཉིས་མེད་སྒྲོལ་ཅིག་མཱ་ར་ཡ། །ཞིང་གྱུར་ཉམས་པའི་དགྲ་གདོན་བགེགས། །རྡུལ་དུ་རློགས་ཤིག་མཱ་ར་ཡ། །སརྦ་ནྲྀ་ཏྲི་ཤ་ཏྲུཾ་མཱ་ར་ཡ་རྦད།། སྤྲོ་ན་ཟོར་དམིགས་ཀྱིས་འཕེན་པ་ནི། ཧཱུྃ། དཔལ་ཆེན་བཛྲ་ཀཱུ་མ་ར། །བདུད་བགེགས་དམ་སྲི་ཚར་གཅོད་པའི། །ཕོ་ཉ་ལས་བྱེད་ཟོར་བདག་རྣམས། །དགྲ་གདོན་བགེགས་ལ་མཱ་ར་ཡ། །ཐོག་རྒོད་ལྕེ་འབེབས་དམར་གཏོར་ཟོར། །མཚོན་རྩེ་གཟེངས་པ་ཡུངས་དཀར་ཟོར། །འཚུབས་ནག་འཁྲུགས་པ་ཀོང་གི་ཟོར། །མེ་རླུང་འཁྱིལ་བ་ཐུན་གྱི་ཟོར། །རྦ་ཀློང་འཕྱུར་བ་ཁྲག་གི་ཟོར། །མུན་ནག་འཐིབས་པ་དུག་གི་ཟོར། །གདུག་རྩུབ་མེ་འབར་མཚོན་ཆའི་ཟོར། །རི་བོ་སྙིལ་བ་རྡོ་ཡི་ཟོར། །མེ་དབལ་འབར་བ་ཕུར་བུའི་ཟོར། །རྣོ་མྱུར་ཤུགས་དྲག་མདའ་ཡི་ཟོར། །གློག་ལྟར་འཁྱུག་ཅིང་ཐོག་བཞིན་འབེབས། །དགྲ་བགེགས་ལུས་སེམས་འབེན་ལ་ཟོར། །ཟོར་རོ་སྐྱོབ་པའི་ལྷ་ལ་ཟོར། །ཟོར་རོ་བསྲུང་བའི་གུར་ལ་ཟོར། །སྡང་བར་བྱེད་པའི་དགྲ་ལ་ཟོར། །གནོད་པར་བྱེད་པའི་བགེགས་ལ་ཟོར། །ཕུང་བར་བྱེད་པའི་སྲི་ལ་ཟོར། །བར་དུ་གཅོད་པའི་བདུད་ལ་ཟོར། །ཕྱི་སྣོད་འབྱུང་བའི་གཡོ་འཁྲུག་ཟློག །ནང་བཅུད་སྐྱེ་འགྲོའི་དུས་འཁྲུག་བཟློག །ཕུང་བྱེད་མཐའ་བཞིའི་ དམག་དཔུང་ཟློག །བྱང་ཆུབ་སྒྲུབ་པའི་བར་གཅོད་ཟློག །ས་མ་ཡཱ་བྷྱོ་བྷྱོ་ཟློག་ཟློག ། ཟོར་ཆེན་འཕང་བ་ནི། ཧཱུྃ་བྷྱོ་ཛ༔ དམར་ཆེན་ཟོར་མཆོག་གཉན་པོ་འདིར། །བསྒྲུབ་པའི་ཕྲིན་ལས་ཕུར་པའི་ལྷ། །སྡེ་བརྒྱད་དྲེགས་པའི་དཔུང་དང་བཅས། །བསྟན་འགྲོར་གནོད་ཅིང་འཚེ་བ་ཡི། །དགྲ་གདོན་བགེགས་རིགས་དམ་སྲི་སྤྱི། །ཁྱད་པར་ཡིད་ལ་བརྣག་པ་ཡི། །བསྒྲལ་བའི་ཞིང་བཅུར་གྱུར་པ་དང་།།ཉམས་པ་བདུན་ལྡན་སྟེང་དུ་རྦད། །ཐུགས་རྗེས་ཐུགས་དམ་མ་གཡེལ་བར། །སྲིད་པ་གཡོ་ཞིང་འཁྲུག་བྱེད་པའི། །དམག་དཔུང་དེར་བསྐྱོད་གཡུལ་ངོ་སྤྲོད། །དགྲ་དཔུང་ཆོམས་ལ་བགེགས་ཚོགས་ཐུལ། །བར་གཅོད་དམ་སྲི་རྨིང་མེད་ཐོངས། །བྱད་མ་ལྷ་སྲུང་རྡུལ་དུ་རློགས། །མངོན་སྤྱོད་ཕྲིན་ལས་དུས་ལ་བབས། །མ་ཧཱ་བཛྲ་ས་མ་ཡཱ། དམོད་བཅོལ་ཟློག་སྔགས་བཅས་བརྗོད་ཅིང་འཕང་ངོ་། །རྗེས་གཅོད་ནི། རྩ་སྔགས་དང་། ཧཱུྃ་ཧཱུྃ་ཧཱུྃ། བདུད་པྲ་མཱ་ར་ཡ་རྦད་ནན། རཱ་ཛ་དུན་ལིང་ཤག་རྦད་ནན། ཁ་ལ་ཛ་མ་ལིང་རྦད་ནན། ཤིག་ཤིག་དུམ་དུམ་རྦད་ནན། ཚལ་པ་ཚལ་པ་རྦད་ནན། ཁྲོཾ་ཁྲོཾ་བྷྱོ་རྦད་ནན། རྨུག་རྨུག་རྦད་ནན། ཏིར་ཏིར་རྦད་ནན། ཚལ་དུ་ཚལ་དུ་རྦད་ནན། ཞེས་བརྗོད། ཡེ་ཤེས་ཀྱི་བྱ་ཁྱུང་ནག་པོ་འཇིགས་སུ་རུང་བ་ཞིག་གིས་ཞལ་ཕྱིར་གཟིགས་ཏེ་མཚམས་བཅད་པར་བསམ་ལ། ཨོཾ་ཁྲོཾ་ཛྙཱ་ན་ག་རུ་ཊ་ཙ་ལེ་ཙ་ལེ་ཧཱུྃ་ཕཊ། སྲུང་འཁོར་ནི། ཧཱུྃ་ཧཱུྃ། རང་བྱུང་ཆོས་དབྱིངས་རིག་པའི་རང་རྩལ་ལས། །སྲ་བརྟན་རྡོ་རྗེ་རྒྱ་གྲམ་རླུང་མེ་དང་། །གནམ་ལྕགས་ཕུར་པ་རྣོ་དབལ་ཚྭ་ཚྭ་འཕྲོས། །མི་མིན་འཚེ་བའི་བགེགས་ཚོགས་སུ་ཡང་རུང་། །སྲུང་བའི་མཚམས་འདིར་འཇུག་པའི་གནས་མ་མཆིས། །རྒྱལ་ཀུན་མཐུ་བྱིན་འོད་ཟེར་ཕྱོགས་བཅུར་འཕྲོས། །སྲིད་པའི་ལས་རླུང་ཐར་བའི་གོ་སྐབས་མེད། །བཛྲ་རཀྵ་ཛྭ་ལ་བྷྲུཾ༔ ཞེས་བརྗོད་ལ་བསྟན་མ་སྐྱོང་བ་དང་། བྲོ་མནན་སོགས་དཀྱུས་བཞིན་བྱའོ། །ཞེས་པའང་ངེས་ལེགས་མཆོག་སྤྲུལ་རིན་པོ་ཆེས་བཀའ་ཕེབས་ངོར། རིག་འཛིན་གསང་སྔགས་གླིང་པའི་ཟ་ལམ་བསྣན་ནས་མགོ་སྤྲུལ་གྱིས་ཁ་བསྐང་བ་དུས་ཀུན་ཏུ་དགེ་ཞིང་བཀྲ་ཤིས་པའི་རྒྱུར་གྱུར་ཅིག །མངྒ་ལཾ། སྲི་མནན་བདེ་ཆེན་རྡོ་རྗེའི་རི་དབང་།༄༅། སྲི་ཅན་གདུག་པའི་ཚོགས་རྣམས་སྐྱེ་མེད་དབྱིངས་ཀྱི་བྲུབ་ཁུང་དུ་གནོན་པའི་ཐབས་ཟབ་མོ་བདེ་ཆེན་རྡོ་རྗེའི་རི་དབང་ཞེས་བྱ་བ་བཞུགས་སོ། ། ༄༅། ཨོཾ་སྭ་སྟི། མཆོག་གསུམ་ཀུན་དངོས་རྩ་གསུམ་འདུས་པའི་དཔལ། །རབ་འབྱམས་ཞི་ཁྲོའི་དཀྱིལ་འཁོར་རྒྱ་མཚོའི་མགོན། །གསང་ཆེན་སྙིང་པོའི་སྟོན་མཆོག་ཧེ་རུ་ཀར། །རང་རིག་ངོ་བོར་ཤེས་པས་ལེགས་བཏུད་ནས། །མངོན་སྤྱོད་རོལ་པའི་ཕྲིན་ལས་གང་ལ་ཡང་། །སྦྱར་དུ་རུང་བའི་སྲི་གནོན་ལྷན་ཐབས་ཤིག །གཞུང་དང་མན་ངག་ཁུངས་བཙུན་དུ་མ་ནས། །ཉུང་གསལ་འཇུག་བདེར་བསྡུས་ཏེ་སྤེལ་བར་བྱ། །དེ་ལ་འདིར་བསྟན་པ་དང་འགྲོ་བའི་དོན་ཕུན་སུམ་ཚོགས་པ་ལ་བར་གཅོད་རྩོམ་པའི་སྲི་ངན་གྱི་རིགས་ཞི་བས་མི་འདུལ་བ་རྣམས་དྲག་པོའི་ལས་ཀྱིས་ལྡོག་མེད་ཨེ་ཡི་དབྱིངས་ཆེན་པོར་གནོན་པའི་རིམ་པ་འདི་ལ་གསུམ་ལས། དང་པོ་སྦྱོར་བའི་ལས་རིམ་ལའང་ལྔ། དེའི་དང་པོ་ལིང་ག་བཅའ་བ་ནི། དུག་ཤོག་དྲི་མས་མ་སྦག་པ་ལ་སྲི་ལིང་རིད་ཅིང་ཉམས་ཐག་པ། དབུས་མི་མགོ། གཡས་རྟ་མགོ། གཡོན་སྤྲེལ་མགོ། སྟེང་བྱ་མགོ་ཅན་རྐང་ལག་ལྕགས་སྒྲོག་ཏུ་བཅུག་པ་བྱ། སྙིང་ཁར་ནྲྀ་དང་ཏྲི་ཡིག་གི་མཐར། ཛ་དང་ཁྲམ་རིས་ཀྱིས་བསྐོར། དེའི་ཕྱི་རོལ་དུ་ཡིག་མགོ་ནང་དུ་བསྟན་ལ་མཇུག་ཕྱིར་འོང་བར་བྱས་ནས། བྱུར་སྲི་དམ་སྲི་རྙབ་པ་ལག་རིང་ཐམས་ཅད་ཏྲི་ཛ་མ་ར་ཡ་རྦད་ནན་ནན༔ སོགས་ནས། གླག་འགོང་ཐམས་ཅད་ཏྲི་ཛ་མ་ར་ཡ་རྦད་ནན༔ བར་བྲི། སྲི་གཟུགས་ཀྱི་མགོ་ཐོག་ནས་སླར་ཡིག་མགོ་ཕྱིར་བསྟན་ནས་མཇུག་ནང་དུ་སོང་བར་བྱས་ལ། ཨོཾ་བཛྲ་སརྦ་དུཥྚན་སོགས་ནས། ཨོཾ་ལཾ་སུཾ་ལཾ་སྟྭཾ་བྷ་ཡ་ནན་ནན༔ བར་དང་། དེ་ནས། ཧཱུྃ་དམ་སྲི་བྱ་བའི་ལས་ངན་སྡིག་ཅན་ཁྱོད༔ ཞེས་པ་ནས། མནར་མེད་བཙོན་ཁང་ནག་པོའི་གནས་སུ་ཚུད༔ བར་བྲིས་ལ། སླར་ཡང་ཚིགས་བཞིར་ཛཿཧཱུྃ་བཾ་ཧོཿ དང་། དཔྲལ་བར་ནན་ནན། མིག་གཉིས་ལ་ལོང་ལོང་། རྣ་བར་འོན་འོན། སྣ་བུག་ལ་འཚུབ་འཚུབ། ཁ་ལ་ཆིངས་ཆིངས། ཡན་ལག་བཞི་ལ་ཆག་ཆག སྲིད་རྩ་ལ་ཆོད་ཆོད། རྐང་མཐིལ་གཉིས་ལ་ཡཾ་ཡཾ། ཞེས་པ་རྣམས་བྲིས་ལ། ཁྲམ་རིས་ཀྱིས་བསྐོར་ཞིང་ཁྲམ་འདེབས་བྱ། དེ་ལས་ཀྱང་ཤིན་ཏུ་རྒྱས་པ་དང་། ལྷག་པར་བསྡུས་པའི་བྲི་ཐབས་ནི་མན་ངག་གཞན་ནས་ཤེས་པར་བྱ་དགོས་སོ། །གཉིས་པ་མནན་ཐོད་བཅའ་བ་ནི། དམ་སྲི་གནོན་པ་ལ་ཕོང་གསུམ་གྱི་ཐོད་པ། གོད་སྲི་ལ་འཕར་སྤྱང་གི་ཐོད་པ། དུར་སྲི་ལ་ཝ་ཐོད། ཆུང་སྲི་ལ་ཆུང་གསུམ་གྱི་ཐོད་པ། སྲི་རིགས་སྤྱིར་གནོན་པ་ལ་ཁྱི་ཐོད་རྣམས་གང་ཡང་རུང་བ་ལ་དཔྲལ་བར་རྒན་པའི་རྒན་སྲི་ནན༔ གཞོན་པའི་གཞོན་སྲི་ནན༔ བྱིས་སྦའི་ཆུང་སྲི་ནན༔ ཞེས་དང་། འགྲམ་པ་གཡས་ལ། ཕོ་ཡི་ཕོ་སྲི་ནན༔ གཡོན་ལ། མོ་ཡི་མོ་སྲི་ནན༔ བྱ་བ་བྲིའོ། །གསུམ་པ་ལིང་གར་ཁྲུས་བྱ་བ་ནི། ཐོག་མར་རང་སྒྲིབ་སྦྱོང་ཕྱིར། རང་ཉིད་ཐ་མལ་སྤྱི་མགྲིན་སྙིང་ག་རུ། །རྡོ་རྗེ་སེམས་དཔའ་དཀར་དམར་མཐིང་གསུམ་གསལ། །དེ་རྣམས་སྐུ་ལས་བདུད་རྩིའི་རྒྱུན་བབས་པས། །སྒོ་གསུམ་སྡིག་སྒྲིབ་མ་ལུས་དག་པར་གྱུར། །ཞེས་བརྗོད་ཅིང་བསམ་ལ། ཡིག་བརྒྱ་བཟླས། གནས་གསུམ་རྡོར་སེམས་སྐུ་ལས་འོད་འཕྲོས་པས། །རབ་འབྱམས་ཞིང་གི་རྒྱལ་ཀུན་མཆོད་པས་མཉེས། །གསང་གསུམ་བྱིན་རླབས་བསྡུས་ཏེ་གནས་གསུམ་ལ། །ཐིམ་པས་ཉེས་ལྟུང་བག་ཆགས་དྲི་མ་སྦྱངས། །ཁྱད་པར་ཕ་རོལ་བྱད་མའི་སྦྱོར་ངན་གྱིས། །གནོད་བྱས་ཉེས་ཚོགས་མ་ལུས་ཀུན་དག་གྱུར། །ཡིག་བརྒྱའི་མཐར། ཨེ་ཧོ་ཤུདྡྷེ་ཤུདྡྷེ༔ བཾ་ཧོ་ཤུདྡྷེ་ཤུདྡྷེ༔ ལཾ་ཧོ་ཤུདྡྷེ་ཤུདྡྷེ༔ རཾ་ཧོ་ཤུདྡྷེ་ཤུདྡྷེ༔ ཡཾ་ཧོ་ཤུདྡྷེ་ཤུདྡྷེ༔ ཨ་ཧ་རཾ་ཨེ་ན་རཾ་བི་ན་རཾ་ཤུདྡྷེ་ཤུདྡྷེ་ཨ་ཨ་ཨ་སྭཱ་ཧཱ། ཞེས་བདུན་ནམ་ཉེར་གཅིག་བཟླ། སྨན་སྤོས་ཀྱི་ཆུར་བཏབ་ལ་བཏུང་ཞིང་ལུས་ལ་བྱུག་ལ་ཉེས་ཚོགས་ཐམས་ཅད་དག་པར་བསམ། དེ་ནས་ལིང་ཀའི་དྲི་མ་སྦྱོང་ཕྱིར། བྱེ་མ་གསེར་ལྡན་གྱིས་ཕྱི་ནང་ལེགས་པར་འཕུར་ཞིང་སྲིད་པའི་བྱེ་མ་འམ་གནས་རྟེན་གྱི་སས་ཞིང་ཁང་མལ་གསུམ་གྱི་ས་ཡིན། མཆན།བསྐོར་ཞིང་། ལཾ་ཧོ་ཤུདྡྷེ་ཤུདྡྷེ་ཡེ་སྭཱ་ཧཱ། ལན་གསུམ། ཆུ་མིག་ལྐུགས་པའམ་མིའི་རྒྱུ་འགྲུལ་མེད་པ། མཆན། ཕུག་རྡུགས་ཀྱི་ཆུ་མཇུག་མེད། མཆན།ཆུས་འཐོར་ཞིང་། བཾ་ཧོ་ཤུདྡྷེ་ཤུདྡྷེ་ཡེ་སྭཱ་ཧཱ། ལན་གསུམ། པྲ་རྐང་ངམ་ཤིང་ཚེ་ཟད་མེས་ཚིག་འཕྲོ་དབྱུག་པའམ་སྡོང་རུལ་མཆན། དམ་རྩྭ་ཚེ་ཟད་མཛོ་དྲེལ་སོགས་ཀྱི་ཟ་འཕྲོ་ཕྲོག་པ་མཆན།ཀྱི་མེས་བསྐོར་ཞིང་དུད་པས་བདུག་ལ། རཾ་ཧོ་ཤུདྡྷེ་ཤུདྡྷེ་ཡེ་སྭཱ་ཧཱ། ལན་གསུམ། བྱ་རོག་དང་འུག་པའི་སྒྲོས་གཡབ་ཅིང་། ཡཾ་ཧོ་ཤུདྡྷེ་ཤུདྡྷེ་ཡེ་སྭཱ་ཧཱ། ལན་གསུམ། ལིང་ཀ་བར་སྣང་ལ་གཡུག་ཅིང་། ཨེ་ཧོ་ཤུདྡྷེ་ཤུདྡྷེ་ཡེ་སྭཱ་ཧཱ། ལན་གསུམ་དང་། ཨཿརྐྱང་ཉེར་གཅིག་བརྗོད་མཐར། བདག་ཅག་འཁོར་དང་བཅས་པ་རྣམས་ཀྱི་ལུས་ངག་ཡིད་གསུམ་གྱི་དྲི་མས་གོས་པ་ཐམས་ཅད་བྱང་ཞིང་དག་པར་གྱུར་ཅིག ཅེས་བརྗོད་ལ་ཐམས་ཅད་སྟོང་པར་བལྟའོ། །བཞི་པ་ལིང་ག་ཆས་སུ་གཞུག་པ་ནི། ལིང་ཤོག་གི་ཟུར་བཞི་ཉམས་པར་བྱས་ལ་སྲི་ལིང་གི་ནང་དུ་གསེར་དངུལ་ཟངས་ལྕགས་མུ་ཏིག་སོགས་ཀྱི་ལིང་སྙིང་དང་བཅས་ཏེ། ལིང་ག་ཤི་ལྤགས་ལྟར་དྲིལ་ཞིང་ཚོན་སྐུད་སྣ་ལྔའམ་བྱད་ཐག་སྔོ་དམར་གྱིས་བཅིངས་ནས་རང་ལ་མི་ལྡོག་ཅིང་ཕར་ལ་ཐེབས་པའི་ཕྱིར་ལིང་ག་མགོ་མཇུག་ཟློག་ནས། རང་འཐག་གི་སོ་ཕྱིར་བསྟན་པའི་ལྟེ་མིག་ཏུ་ཕྱི་ལོགས་སུ་ལན་བདུན་དྲངས་ཤིང་ངག་ཏུ། དགྲ་བགེགས་ཆེ་གེ་མོ་རྦད་རྦུད་ནྲྀ་ཏྲི་རྦད་རྦུད་ཡ༔ ཞེས་ལན་བདུན་བརྗོད། དེ་ནས་ལས་དེ་ཉིད་མི་འགྱང་བའི་ཕྱིར་དུ་ཕྱི་སྒོའི་མ་ཐེམ་གྱི་འོག་ཏུ་ནང་ནས་ཕྱིར་འདྲེན་ཅིང་། དགྲ་བགེགས་ཆེ་གེ་མོའི་སྲོག་ལ་ནྲྀ་ཏྲི་ལཾ་ནན་མ་ར་ཡ་རྦད་ནན༔ ལན་བདུན་བཟླས། ཁོའི་ཁ་རྗེ་ལྡོག་པའི་གནད་དུ་ཁྱིའི་སྦོ་འོག་ཏུ་དྲངས་ཤིང་། དགྲ་བགེགས་ཆེ་གེ་མོ་རྦད་རྨུག་རྦད་ཡ། ལན་བདུན་བྱ། དགྲ་བགེགས་ཚེ་ཟད་བརྒྱག་ཟད་ཀྱི་གནད་དུ་ཡག་ཤིང་གི་བུག་པར་བསྐོར་ཞིང་། སརྦ་རྦད་ཁ་ཤི་རྦད་ཁ་ཤི༔ ཞེས་ལན་བདུན། རང་དང་བསྲུང་བྱ་འཁོར་བཅས་ལ་མི་ལྡོག་པའི་ཆེད་དུ་རང་གི་རྒྱིད་ཁུང་གཡོན་པར་ཕྱིར་དྲངས་ཤིང་། ཨོཾ་བཛྲ་སརྦ་དུཥྚན་མ་ར་ཡ་བྷྱོ༔ དགྲ་བགེགས་ཆེ་གེ་མོ་སརྦ་ཤ་ཏྲུཾ་རྦད་རྦུད་སོད་ནན༔ ཞེས་ལན་བདུན་བྱ། དེ་ནས་དུག་སྣ་དང་ཁྲག་སྣས་བྲན་ཞིང་རྫས་ངན་གྱི་དུད་པས་བདུག་ལ། མི་ཁའི་རྫས་དང་ལྷན་ཅིག་མནན་ཐོད་དུ་བཅུག་གོ། ། ༧ དམ་ཅན་བཀའ་སྡོད་དྲེགས་པའི་ཚོགས་ཀྱིས་དམ་ཉམས་པའི་དགྲ་བོ་མཐའ་བཞིའི་དམག་དཔུང་རྒྱབ་བརྟེན་དང་བཅས་པའི་སྲིད་པ་རྩད་ནས་ཆོད་ཅིག བྱུར་ཐན་ཡམས་ཀྱི་ཆར་ཕོབ་ཅིག རང་གཤེད་རང་ལ་ཕོབ་ཅིག རང་སྲོག་རང་གིས་ཆོད་ཅིག རང་ཤ་རང་གིས་ཟོ་ཞིག རང་ཁྲག་རང་གིས་འཐུང་ཤིག རང་ཕུང་རང་གིས་སྒྲུབ་ཤིག ཕུང་བརླག་ཐལ་བར་ཐོངས་ཤིག རྗེས་མེད་རླུང་ལ་སྐུར་ཅིག་ཡ། ཅེས་སོགས་དམོད་བྱང་གང་འདོད་བྲི་འདོན་བྱ། ལྔ་པ་འབེན་དུ་བཀོད་པ་ནི། རང་དང་དཀྱིལ་འཁོར་གྱི་མདུན་ངོས་ཀྱི་འདབས་སུ། དྲག་པོའི་ས་སྣ་དང་བྱེ་མ་ལས་བྱས་པའི་ས་ཁོད་གྲུ་བཞི་ངོས་སྙོམས་པ། རོ་སོལ་གྱིས་ནག་པོར་བྱས་པའི་སྟེང་དུ་ཕོང་གསུམ་གྱིས་ལས་བྱས་པའི་བྲུབ་ཁུང་ཁ་ཁྱེར་བང་རིམ་གསུམ་པ་ངོས་རེར་ཁྲུ་གང་རེ་བ་ཟུར་གཅིག་ལྷོ་ནུབ་ཏུ་བསྟན་པ། ཕྱི་རོ་སོལ་དང་ནང་དུག་ཁྲག་གིས་བྱུགས་ཤིང་མཐའ་རྩང་དམར་གྱིས་བསྐོར་བའི་ནང་དུ་ལྕགས་ཁང་ངམ་རོ་གཡམ་གྱི་གཞི་ལ་སྔར་གྱི་མནན་ཐོད་ལིང་ག་ལྡན་པ་དེ་ཉིད་མཚུལ་བ་འོག་དང་། ཀླད་ཁུང་སྟེང་དུ་ཕྱོགས་པས་བཀོད་ལ། ཟུར་རྣམས་སུ་བཙོད་མཚུར་རམ་རུག་སོགས་མི་ཁའི་རྫས་དང་། རེ་བ་ནག་པོ། ཁྱི་སྤུ་དང་ར་སྤུའི་སྐུད་པ་སོགས་ཀྱང་བཞག་ལ། ལས་སྦྱོར་དངོས་ཀྱི་སྐབས་མ་གཏོགས་པར་འོག་ཏུ་རྡོ་རྗེ་རྒྱ་གྲམ་དང་། སྟེང་དུ་རི་རབ་གླིང་བཞི་བྲིས་པའི་རྡོ་ལེབ་དང་། ལིང་ཁེབ་ནག་པོས་བྲུབ་ཁུང་གི་ཁ་བཀབ་ལ་བྲུབ་ཁུང་གི་ནང་དུ་ཉི་ཟེར་དང་མར་མེའི་མདངས་དང་། བདུད་རྩིའི་ཟེགས་མས་མི་ཕོག་པར་བྱ། ལྷ་དབྱེའི་སྒྲོ་གཉིས་བྲུབ་ཁུང་གི་གཡས་གཡོན་དུ་བཙུག་གོ། །དེའི་སྟེང་དུ་ཤིང་གི་ཨེ་ཁྲོམ་ལ་བརྟེན་ནས་གོང་གནོན་གྱི་གཏོར་མ་ཞལ་མེ་མཚེ་ཡུངས་རྩང་དམར་གཏོར་གདུགས་སོགས་ཀྱིས་བརྒྱན་པ་བཤམས་པའོ། ། ༧ གཉིས་པ་ལས་སྦྱོར་དངོས་ལ་འཇུག་པ་ལ། དྲག་པོའི་ཕྲིན་ལས་གང་རུང་བཟླས་པའི་མཐའི་བར་གྲུབ་པའི་རྗེས་སུ། ཐུན་རྫས་སྣ་ཚོགས་སྐེ་ཚེ་ཤིང་ཚེ་ཡུངས་དཀར་ལྕགས་ཕྱེ་ཟངས་ཕྱེ་རྡོ་ཕྱེ་ཕོང་ས་དགུ་སོགས་ས་སྣ། མཛེ་དམེ་གྲི་སོགས་ཁྲག་སྣ། བཙན་དུག་སོགས་དུག་སྣ། བྲ་བོ་སྦང་སྐམ་རམ་བུ་ཉུང་ནག ཚིག་ཕྱེ་ལ་ཕུག ཁོག་མའི་དྲེག་པ་སོགས། མཆན།དང་། རྦབ་རྡོ། མཁར་གོང་། འདྲེ་ཆེན་གནས་པའི་ལུང་གསུམ་འདུས་མདོའི་རྡོ་རྣམས་ཁྲག་སྣས་སྦྲུས་པ་ལ། དྲག་སྔགས་སོ་ལྔ་པ་དང་། ལོག་ཏྲིའི་སྔགས་ཀྱི་ངར་གདགས། དེ་ནས་ལས་གཞུང་གི་མཆོད་བསྟོད་སོགས་བྱ་ཞིང་། བསྙེན་བསྟོད་ཀྱི་རྗེས་སམ། སྒྲོལ་ལས་ཀྱི་བར་མཐའ་འམ། བསྟན་གཏོར་སྐྱོང་བའི་རྗེས་སོགས་སུ། རབ་དུས་དྲུག འབྲིང་དུས་བཞི། ཐ་མའང་དུས་གསུམ་དུ་སྲི་ཅན་གནོན་པའི་ལས་རིམ་འདིར་བརྩོན་པར་བྱ་དགོས་ཏེ། དེ་ལ་ཡང་གསེར་སྐྱེམས། གཟུ་དཔང་། དམིགས་བྱ་གསལ་བ། དགུག་གཞུག་བྱ་བ། ལྷ་དང་དབྱེ་བ། མཐུ་དང་རྫུ་འཕྲུལ་འཕྲོག་པ། སྲི་གནོན་དངོས་ལ་འཇུག་པ། ཐུན་གྱིས་བྲབ་པ། ལྡང་མེད་དུ་གནོན་པ། ཐུན་གཏོར་འབུལ་བ། ཐམས་ཅད་མཁྱེན་པའི་ལམ་དུ་བསྒྱུར་བ་སྟེ་བཅུ་གཅིག་གིས་བསྟན་པས། དང་པོ་གསེར་སྐྱེམས་ནི། ཕུད་སྐྱེམས་བཤམས་ལ། རཾ་ཡཾ་ཁཾ། གསེར་སྐྱེམས་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱ༔ཧཱུྃ། ཞེས་བྱིན་གྱིས་རླབས་ལ། ཧཱུྃ་ཧཱུྃ། སྐུ་གསུམ་ཀུན་དངོས་གུ་རུ་པདྨ་འབྱུང་། །བྱང་ཆུབ་རྡོ་རྗེ་འགྲོ་འདུལ་ལུང་རིག་གླིང་། །བཀའ་བབས་ཆོས་བདག་རྩ་རྒྱུད་བླ་མར་བཅས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །གུ་རུ་ཞི་དྲག་དགོངས་འདུས་གྲོ་བོ་ལོད། །ཆེ་མཆོག་ཡང་དག་གཤིན་རྗེ་པདྨ་དབང་། །རྡོ་རྗེ་གཞོན་ནུ་དྲེགས་འདུལ་སྟོབས་ལྡན་སོགས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །གསང་བ་ཡེ་ཤེས་རྡོ་རྗེ་རྣལ་འབྱོར་མ། །ཕག་མོ་ཁྲོས་ནག་བདུད་འདུལ་སེང་གེའི་གདོང་། །ཀུ་རུ་ཀུལླེ་འོད་ཟེར་ཅན་ལ་སོགས། ། གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །ཕྱག་དྲུག་མགོན་པོ་རལ་གཅིག་དུད་སོལ་མ། །ཕུར་སྲུང་བཅུ་དྲུག་གཟའ་བདུད་ནོར་ལྷ་སོགས། །དགོངས་མཛོད་རྣམ་གསུམ་སྐྱོང་བའི་བསྲུང་མ་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །སྔགས་འཆང་བདག་གི་རིགས་ཀྱི་བསྲུང་མ་དང་། །ས་ཕྱོགས་འདི་ཡི་ཡུལ་གཞི་གནས་ཀྱི་བདག །ལོ་ཟླ་ཞག་དུས་ཚེས་ལ་དབང་བའི་ལྷ། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །ཅེས་ཕུལ་ལོ། གཉིས་པ་གཟུ་དཔང་ནི། ཧཱུྃ་ཧཱུྃ། མི་མངོན་དབྱིངས་ནས་དཀོན་མཆོག་གཟུ་དང་དཔང་། །རྩ་གསུམ་མཁའ་འགྲོ་ཆོས་སྐྱོང་དགོངས་སུ་གསོལ། །བདག་ནི་ཡང་དག་ངེས་པའི་རྣལ་འབྱོར་དེ། །སྒོ་གསུམ་རྒྱལ་བའི་བཀའ་ལྟར་དང་བླངས་ཀྱང་། །ཉམས་པའི་དགྲ་བོ་ལས་ངན་སྡིག་ཅན་འདིས། །བྱང་ཆུབ་སྒྲུབ་པའི་ཆོས་ལ་བར་བཅད་ཅིང་། །དང་པོ་སངས་རྒྱས་བསྟན་པ་གཉན་པོ་བཤིགས། །བར་དུ་གསང་སྔགས་ཐེག་པའི་དམ་ཡང་བཀྲལ། །ད་ལྟ་བསྒྲུབ་པའི་རྣལ་འབྱོར་བདག་ལ་བསྡོས། །བསྒྲལ་བའི་ཞིང་བཅུ་ཚང་བ་འདི་ཡིན་པས། །རྩ་གསུམ་དཔའ་བོ་མཁའ་འགྲོ་ཆོས་སྐྱོང་རྣམས། །མ་གཡེལ་མ་གཡེལ་ཕྲིན་ལས་དུས་ལ་བབས། །ཞལ་ལྕེ་སྣང་སྲིད་ལྷ་འདྲེ་ཡོངས་ཀྱིས་ཆོད། །ཟ་གསོད་སྤྲུལ་པས་དམ་ཉམས་དགྲ་བགེགས་སྒྲོལ། །ཧཱུྃ་བདག་ནི་སངས་རྒྱས་བསྟན་པའི་སྒོར་ཞུགས་ཤིང་། །རྩ་གསུམ་ལྷ་ཚོགས་བརྟེན་ཅིང་མཆོད་དེ་བསྒྲུབས། །དེ་རིང་དམ་ཉམས་དགྲ་བོས་བར་དུ་བཅད། །རེ་ཞིང་ལྟོས་པའི་ལྷ་ཚོགས་ར་མདར་བསྐུལ། །དབང་མནོས་དམ་ཚིག་བསྲུང་བ་དོན་མ་ཆུང་། །བསྙེན་སྒྲུབ་ལྷ་ཚོགས་བརྟེན་པ་ཆུད་མ་གསོན། །ཆོས་སྐྱོང་བསྲུང་མ་རྣམས་ཀྱང་མཐུ་མ་ཆུང་། །བརྒྱུད་པའི་རིག་འཛིན་བསྲུང་མ་རྩལ་མ་ཞན། །ཡུལ་ལྷ་གཞི་བདག་རྣམས་ཀྱང་བང་མ་བུལ། །བདུད་དང་མུ་སྟེགས་ལོག་འདྲེན་མཐའ་བཞིའི་དམག །ཁྱད་པར་ཀླ་ཀློ་ལ་སོགས་བསྟན་པའི་སྲི། །དམེ་སྲི་གྲི་སྲི་ནད་མུག་མཚོན་གྱི་སྲི། །ཟ་འདྲེ་ཕུང་སྲི་ལ་སོགས་ཡུལ་གྱི་སྲི། །རྒན་སྲི་གཞོན་སྲི་ཆུང་སྲི་ཡོད་མེད་སྲི། །གོད་སྲི་ཕོ་མོའི་སྲི་སོགས་སྒོས་ཀྱི་སྲི། །བྱད་ཕུར་རྦོད་གཏོང་འཇིགས་དང་དུས་མིན་འཆི། །བར་གཅོད་དམ་སྲི་ལ་སོགས་རྣལ་འབྱོར་སྲི། །སྔོན་ལས་འཕྲལ་རྐྱེན་ལས་བྱུང་སྲི་རིགས་ཀུན། །མངོན་སྤྱོད་ལས་ཀྱིས་དབྱིངས་སུ་གནོན་པར་མཛོད། །ཅེས་བརྗོད། གསུམ་པ་དམིགས་བྱ་གསལ་བ་ནི། ཧཱུྃ་ཧཱུྃ། ཁྲག་འཐུང་དཀྱིལ་འཁོར་ཆེན་པོའི་མདུན་གྱི་གཞིར། །ཨེ་ལས་ལྕགས་ཁང་ནག་པོ་གྲུ་གསུམ་པ། །ཁ་ཏོག་མཐིལ་ཡངས་ཟིན་པས་ཐར་མེད་གནས། །ཕྱི་ནས་ཞེ་སྡང་ལས་གྲུབ་མེ་འབར་ཞིང་། །ནང་ནས་འདོད་ཆགས་རང་བཞིན་ཁྲག་ཟིལ་ཅན། །འཇིགས་ཤིང་སྐྱི་གཡའ་གཤིན་རྗེའི་བཙོན་ཁང་དབུས། །བྲུབ་དོང་མནན་ཐོད་གཏི་མུག་མུན་འཐིབ་ནང་། །སྡང་དགྲ་གདོན་བགེགས་ཟ་འདྲེ་ཕུང་བྱེད་སྲི། །ཐམས་ཅད་འདུས་པའི་དམིགས་ཡུལ་གདུག་པ་འདི། །ལུས་ཀྱི་སྟོབས་ཉམས་སེམས་མྱོས་ཉམས་ཐག་གཟུགས། །རྐང་ལག་ལྕགས་སྒྲོག་འབར་བས་དམ་དུ་བཅིངས། །རྣམ་སྨིན་ཉམས་སུ་མྱོང་བཞིན་འཁོད་པར་གྱུར། །བདག་ཉིད་ཡི་དམ་ལྷར་གསལ་ཐུགས་ཀ་ནས། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་སོགས། །མཚོན་ཆ་ཐོགས་པའི་ཕོ་ཉ་མང་སྤྲོས་ཏེ། །བསྟན་དང་འགྲོ་ལ་གནོད་པའི་ཕུང་སྲི་ཀུན། །རང་དབང་མེད་པར་སྐད་ཅིག་དེ་ཉིད་ལ། །བཀུག་ནས་མགོན་སྐྱབས་ལྷར་བྲལ་གཟུགས་ལ་བསྟིམ། ཞེས་བརྗོད་ཅིང་བསམ་མོ། །བཞི་པ་དགུག་གཞུག་བྱ་བ་ལ། བདེན་པའི་སྟོབས་ཀྱིས་དགུག་པ་དང་། འགུགས་སྔགས་བཟླ་བ་གཉིས་སུ་ཡོད་པ་ལས། ཐོག་མར་བདེན་སྟོབས་ཀྱིས་དགུག་པ་ནི། ལྕགས་ཀྱུའི་ཕྱག་རྒྱ་དང་བཅས་ལ། ན་མོ། རིག་འཛིན་རྩ་རྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། །སྐུ་གསུམ་རྩ་གསུམ་མཆོག་གསུམ་རྒྱ་མཚོའི་ཚོགས་མ་ལུས་པའི་བདེན་པ་དང་། གསང་སྔགས་དང་རིགས་སྔགས། གཟུངས་སྔགས་དང་སྙིང་པོ། ཕྱག་རྒྱ་དང་ཏིང་ངེ་འཛིན་རྣམས་ཀྱི་བཀའ་བདེན་པ་དང་། ཆོས་ཉིད་རྣམ་པར་དག་པ་དང་། ཆོས་ཉིད་རྒྱུ་འབྲས་བསླུ་བ་མེད་པའི་བཀའ་བདེན་པ་དང་། ཁྱད་པར་དུ་དཔལ་ཆེན་པོ་རྡོ་རྗེ་གཞོན་ནུའི་ཞེས་སམ། གསང་བའི་བདག་པོ་ཕྱག་ན་རྡོ་རྗེའི་ཞེས་སོགས་བསྒྱུར་ལ། ཆེ་གེ་མོའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བཀའ་བདེན་པ་དང་། དཔལ་ལྡན་ཡེ་ཤེས་ཀྱི་མགོན་པོ་ཕྱག་དྲུག་པ། དཔལ་མགོན་མ་ནིང་ནག་པོ། སྔགས་སྲུང་ཨེ་ཀ་ཙ་ཊི། དཔལ་ལྡན་དུད་སོལ་ལྷ་མོ་ལ་སོགས་པའི་བསྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། དམ་ལྡན་སྔགས་འཆང་རྣལ་འབྱོར་པ་བདག་གི་སྔགས་དང་ཏིང་ངེ་འཛིན་གྱི་བདེན་པ་དང། བདེན་པ་ཆེན་པོ་དེ་རྣམས་ཀྱི་མཐུ་དང་ནུས་པ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། དཔལ་ལྡན་བླ་མའི་སྐུ་དགྲ། རྣལ་འབྱོར་ཡོངས་ཀྱི་སྒོས་དགྲ། བསྟན་པ་བཤིག་པའི་དམ་ཉམས། བསྟན་ཞབས་སྡུད་པའི་ཀླ་ཀློ་ལ་སོགས་པ། བདུད་དང་ལོག་འདྲེན་བར་ཆད་དམ་སྲི་འབྱུང་པོ་བསྒྲལ་བའི་ཞིང་དུ་གྱུར་པ་དང་། ཉམས་པ་བདུན་ལ་གཏོགས་པ་ཐམས་ཅད་དང་། ཁྱད་པར་དུ་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་རྣམས་ལ་བསམ་པ་ངན་ཞིང་། སྦྱོར་བ་རྩུབ་པ། ནད་དང་གདོན་གྱི་སྣ་འདྲེན་པ་སོགས་གནོད་ཅིང་འཚེ་བར་བྱེད་པའི་ཕུང་བྱེད་འབྱུང་པོ་སྲི་རིགས་ལོག་པར་འདྲེན་པ་ཐམས་ཅད་སྐད་ཅིག་ཉིད་ལ་གཟུགས་བྱང་ལིང་ཀ་འདི་དང་གཉིས་སུ་མེད་པར་ཁུག་ཅིག རྩ་སྔགས་དང་། སརྦ་བིགྷྣན་ཤ་ཏྲུཾ་ནྲྀ་ཏྲི་བཛྲ་ཨང་ཀུ་ཤ་ཡ་ཛ་ཛཿ ཛཿཧཱུྃ་བཾ་ཧོ། ཞེས་ལན་གསུམ་བདུན་ཉེར་གཅིག་སོགས་སྐབས་དང་བསྟུན་ལ་བརྗོད། གཞན་ཡང་བྱང་བདག་བཀྲ་ཤིས་སྟོབས་རྒྱལ་གྱིས་མཛད་པའི་སྲི་འགུགས་ཚིགས་བཅད་མ་དེ་ཉིད་སོགས་གཞན་ནས་བྱུང་བའི་འགུགས་གཞུག་ཀྱང་སྤྲོ་ན་བྱ། དེ་ནས་སླར་ཡང་འགུགས་སྔགས་བཟླ་བ་ནི། དཀྱིལ་འཁོར་གསུམ་ལས་ཕོ་ཉ་སྤྲུལ་པ་ཡང་སྤྲུལ་གྱི་ཚོགས་དཔག་ཏུ་མེད་པ་སྤྲོས་པས་དམ་སྲི་ཕུང་སྲི་གོད་སྲི་སོགས་སྲི་རིགས་ཐམས་ཅད་གར་གནས་ཀྱང་སྐད་ཅིག་གིས་རང་དབང་མེད་པར་ལིང་ག་ལ་བསྟིམ་ནས་བསྡམ་བཅིངས་མྱོས་པར་བྱས་ཤིང་རྒྱབ་བརྟེན་དང་བྲལ་བར་གྱུར་བར་བསམ་ལ། རྩ་སྔགས་མཐར། གནོད་བྱེད་དམ་སྲི་ཕུང་སྲི་ན་སྲི་ཤི་སྲི་དུར་སྲི་དགྲ་སྲི་གོད་སྲི་སོགས་སྲི་རིགས་ཐམས་ཅད་ཛཿཧཱུྃ་བཾ་ཧོ༔ སྲི་ངན་གྱི་བླ་ཤ་རེ་མ་ཏི་འགྲིམ་འགྲིམ། ཤ་མ་རུ་ཏི་ཐུམ་ཐུམ། མྱོག་མྱོག་ཡེད་ཡེད་ཤ་མ་རུ་ཏི་ཁུག་ཁུག ལིང་མྱོག་ལིང་ཤ་ལིང་ཐུམ། ཙ་མུནྚི་ཛ༔ཧཱུྃ་བཾ་ཧོ༔ ཞེས་པ་ལྔ་བཅུའམ་བརྒྱ་རྩ་སོགས་ཁུག་རྟགས་མ་གསལ་བར་དུ་ནན་ཏན་གྱིས་ཡང་ཡང་བརྗོད་ཅིང་དམིགས་པ་གསལ་བར་བྱའོ། །ལྔ་པ་ལྷ་དང་དབྱེ་བ་ནི། བྱ་རོག་དང་འུག་པའི་སྒྲོས་བྱབ། ཡུངས་དཀར་ནག་གིས་བྲབ་ཅིང་། ཧཱུྃ་ཧཱུྃ་བྷྱོ༔ བཀའ་ཉན་ཆེན་པོ་ཕྲ་མ་མཁན། །གདུག་ཅིང་སྡང་སེམས་ལྡན་པ་དང་། །དངོས་གྲུབ་འཕྲོག་པའི་དགྲ་དང་བགེགས། །འགོ་བའི་ལྷ་དང་ཕྲལ་བར་གྱིས། །དམ་ཉམས་དགྲ་བགེགས་སྡིག་ཅན་འདིའི། །དགྲ་ལྷ་སྤྱི་བོའི་གཙུག་ནས་ཕྲོལ། །སྲོག་ལྷ་སྙིང་གི་དཀྱིལ་ནས་ཕྲོལ། །ཞང་ལྷ་ལྟེ་བའི་ཁུང་ནས་ཕྲོལ། །མ་ལྷ་གསང་བའི་གནས་ནས་ཕྲོལ། །ཕོ་ལྷ་ཕྲག་པ་གཡས་ནས་ཕྲོལ། །ཡུལ་ལྷ་ཕྲག་པ་གཡོན་ནས་ཕྲོལ། །རིག་འཛིན་སྲུང་མ་རྒྱབ་ནས་ཕྲོལ། །བན་བོན་ལ་སོགས་འགོ་བའི་ལྷ། །ལུས་ཀྱི་གནས་རྣམས་ཀུན་ནས་ཕྲོལ། །བྷྱོཿ ཁ་ཁ་མུ་ཁ་མཐུ་མོ་ཆེ། །མཐིང་ནག་ཆེན་མོ་བྱ་རོག་དབུ། །ཉིན་གྱི་ལས་མཛད་རྫུ་འཕྲུལ་ཅན། །ཁྱེད་ཀྱི་ཐུགས་དམ་དུས་ལ་བབ། །བྷྱོཿ ཧུ་ལུ་མུ་ཁ་མཐུ་མོ་ཆེ། །སེར་ནག་ཆེན་མོ་འུག་པའི་དབུ། །མཚན་གྱི་ལས་མཛད་དྲག་ཤུལ་ཅན། །ཁྱེད་ཀྱི་ཐུགས་དམ་དུས་ལ་བབ། །ཁྱེད་གཉིས་ཉིན་མཚན་མེད་པར་རྒྱུག །དགྲ་དང་དགྲ་ལྷ་ཕྲོལ་ལ་ཤོག །གཉེན་དང་ཉེ་དུ་ཕྲོལ་ལ་ཤོག །བུ་དང་བུ་མོ་ཕྲོལ་ལ་ཤོག །ཁྱོ་དང་ཆུང་མ་ཕྲོལ་ལ་ཤོག །མངོན་སྤྱོད་དྲག་པོས་རྡུལ་དུ་རློགས། །ཞེས་བརྗོད་པས། དཀྱིལ་འཁོར་གསུམ་གྱི་ལྷ་ཚོགས་རྣམས་ཀྱི་ཐུགས་ཀ་ནས་ཕོ་ཉ་ལྷ་དང་དབྱེ་བའི་ཕྲ་མ་མཁན་སྤྲུལ་པ་ཡང་སྤྲུལ་གྱི་ཚོགས་དཔག་ཏུ་མེད་པ་སྤྲོས་པས་ཡིད་ལ་བརྣག་པའི་དགྲ་བགེགས་རྣམས་བསྲུང་སྐྱོབས་བྱེད་པའི་ལྷ་བསྲུང་ཐམས་ཅད་ན་བུན་རླུང་གིས་གཏོར་བ་ལྟར་བསྐྲད་ནས་ཉམས་པ་དེ་ཉིད་སྐྱབས་དང་བྲལ་ཏེ། མགོན་མེད་ཉམ་ཐག་རེད་ཅིང་འདུག་པར་བསམ་ལ། གུ་གུལ་ནག་པོ། ཁྱི་ནག་གི་ལུད། ལྷྭམ་འབོལ། རྟ་བོན། གླང་ནག་གི་རྭ་རྣམས་ཀྱི་དུད་པས་བདག་དང་དཀྱིལ་འཁོར་ལ་ཧ་ཅང་མ་ཕོག་པར་བདུག་ཅིང་། རྩ་སྔགས་ཀྱི་མཐར། མ་མ་དྲག་རུ་ཏྲ་མ་ར་ཡ་ཕྱེས་ཕྱེས། ཨ་ནྲྀ་ཏྲག་རཀྴ་མ་ར་ཡ་ཕྱེས་ཕྱེས། ཞེས་མང་དུ་བརྗོད་པས་དབྱེའོ། །དྲུག་པ་མཐུ་དང་རྫུ་འཕྲུལ་དབྲོག་པ་ལ། དངོས་དང་རྗེས་འབྲེལ་གཉིས་ལས། ཐོག་མར་གོང་བཞིན་སྔར་གྱི་དབྱེ་རྫས་ཀྱིས་བདུག་ཅིང་། ཧཱུྃ་ཧཱུྃཿ གཉེན་པོ་ཀུན་བྲལ་བདུག་པའི་རྫས། །གུ་གུལ་ནག་པོའི་དུད་པ་འདི། །དམ་སྲི་འབྱུང་པོའི་སྣར་བདུག་པས། །མཐུ་དང་རྫུ་འཕྲུལ་ཉམས་པར་ཤོག །ཁྱི་བྲུན་ལྷྭམ་འབོལ་རྟ་བོན་དང་། །གླང་ནག་རྭ་ཡི་དུད་པ་ཡིས། །སྲི་ཅན་མཐུ་དང་རྫུ་འཕྲུལ་ཀུན། །འཕྲོགས་ཤིང་ལྷག་མེད་བརླག་གྱུར་ཅིག །ཅེས་དང་། རྩ་སྔགས་མཐར། བྷེ་ཤ་ཡ་བྷེ་ཤ་ཡ་དྲག་རཀྴ་དགྲ་བགེགས་དམ་སྲི་འབྱུང་པོའི་སྐྱོབས་བྱེད་ལྷ་སྲུང་མཐུ་དང་རྫུ་འཕྲུལ་ཐམས་ཅད་མ་ར་ཡ་ཕྱེས་ཕྱེས། ཞེས་བརྗོད། སླར་ཡང་དེ་དང་རྗེས་འབྲེལ་དུ་འགུགས་ཤིང་གཟིར་བའི་སྔགས་བཟླ་བ་འཐད་པར་སྣང་ཕྱིར་འདི་ལྟར་བྱ། ཧཱུྃ་ཧཱུྃཿཛ༔ ཕུང་སྲི་བྱ་བའི་ལས་ངན་སྡིག་ཅན་ཁྱོད། །ཚེ་རབས་སྔ་མའི་ལས་དང་བག་ཆགས་ཀྱིས། །བསྟན་དང་འགྲོ་ལ་གནོད་བསྒྲུབ་བར་ཆད་བརྩམས། །ཁྱད་པར་རྡོ་རྗེ་སློབ་དཔོན་འཁོར་བཅས་དང་། །བདག་གིས་བསྲུང་བྱར་གྱུར་པའི་སྦྱིན་བདག་འདིར། །སྡང་བའི་དགྲ་བྱས་གནོད་པའི་བགེགས་ཀྱང་བྱས། །ཟ་བའི་འདྲེ་བྱས་ཕུང་བའི་སྲི་ཡང་བྱས། །དེ་ཕྱིར་གདུག་ཅིང་སྡང་སེམས་ལྡན་པ་ཁྱོད། །ཞིང་བཅུ་ཀུན་ཚང་བསྒྲལ་བྱ་དངོས་ཡིན་པས། །གཞན་དང་ནོར་གྱིས་དོགས་ནས་མིང་རུས་བཀོད། །བརླག་གིས་དོགས་ནས་གཟུགས་བརྙན་ལིང་གར་བྲིས། །ཟག་གིས་དོགས་ནས་སྐྱེན་པོའི་ཐོད་པར་བཅུག །རྫུ་འཕྲུལ་བརླག་ཕྱིར་གཟིར་ཕྲོག་སྔགས་ཀྱིས་གཅུན། །རྒྱབ་བརྟེན་ཕྲལ་ཕྱིར་དམེ་རྫས་དུད་པས་བདུག །དབང་མེད་འགུགས་ཕྱིར་སྤྲུལ་པའི་ཁྲོ་ཚོགས་བཀྱེ། །དེ་ཕྱིར་ད་ལྟ་གནས་འདིར་མཆིས་པར་གྱུར། །ཞེས་བརྗོད་ལ། གོང་བཞིན་འགུགས་སྔགས་མང་དུ་བཟླ་ཞིང་། སླར་ཡང་རྩ་སྔགས་མཐར། ཨོཾ་སརྦ་ན་ཏྲི་ནི་ཧཱུྃ་ཛ༔ ནི་ཏྲི་ནི་ཧཱུྃ་ཛ༔ ཤནྟྲི་ནི་ཧཱུྃ་ཛ༔ ཀ་ཏྲི་ནི་ཧཱུྃ་ཛ༔ སུ་ཏྲི་ནི་ཧཱུྃ་ཛ༔ དནྟྲི་ནི་ཧཱུྃ་ཛ༔ གནོད་བྱེད་དམ་སྲི་དགྲ་སྲི་དུར་སྲི་གོད་སྲི་སོགས་ཕུང་བར་བྱེད་པའི་སྲི་རིགས་ཐམས་ཅད་ཀྱི་སྲོག་ལ་ཏྲི་མ་ར་ཡ་ཧཱུྃ་ནན༔ ཞེས་ཅི་ནུས་སུ་བཟླའོ། །བདུན་པ་སྲི་གནོན་དངོས་ལ་འཇུག་པ་ནི། བྱུར་སྲི་མནན་པའི་དམིགས་པ་མི་ཁུར་མ་ལྟར། བྲུབ་དོང་ནང་དུ་སྲི་ངན་ཕོ་མོའི་ཚོགས། །ཀུན་འདུས་ངོ་བོ་འདྲེ་གཟུགས་ལུས་རིད་པ། །དབུས་མི་གཡས་རྟ་གཡོན་སྤྲེལ་སྟེང་བྱའི་མགོ། །མགོན་མེད་སྐྱབས་བྲལ་ཉམས་ཐག་གྱུར་པའི་སྟེང་། །བདག་མདུན་ཐུགས་ལས་ཁྲོ་མཚོན་ཐུན་རྫས་ཆར། །གྲངས་མེད་འཕྲོས་པས་དགྲ་དང་བགེགས་རྣམས་ཀྱི། །བླ་སྲོག་བཀུག་བསྟིམ་དྲག་ཏུ་རབ་བརྡེགས་པ། །སྒོ་གསུམ་སྲོག་བཅས་གཞོབ་བསྲེག་དམྱལ་ཁམས་འབར། །གཟིར་ཞིང་རྡུལ་ཕྲན་སིལ་བུར་རབ་གཏོར་ནས། །བག་ཆགས་སྣང་གཟུགས་དབང་པོའི་སྒོ་རྣམས་ཀུན། །གནམ་ལྕགས་རི་རབ་དུག་མཚོན་དྲག་སྔགས་ཀྱི། །རང་བཞིན་བཞུ་བླུགས་འབར་བས་ཡོངས་སུ་མནན། །གནས་ལྔར་གནམ་ལྕགས་འཁོར་ལོ་རྩིབས་བརྒྱད་པ། །ལྟེ་བར་སྣ་ཚོགས་རྡོ་རྗེ་རྒྱ་གྲམ་གྱིས། །མཚན་པ་རེ་དང་ཚིགས་བཞིར་རྒྱ་གྲམ་རེ། །ལྕི་ཞིང་སྲ་འཐས་གྱུར་པ་རེ་རེ་ཡིས། །སྒོ་གསུམ་བསྒུལ་བསྐྱོད་སྨྲ་བསམ་མེད་པར་བསམ། །སྟེང་ནས་བདུད་འདུལ་ལྷ་ཚོགས་རྔམ་བྲོ་འཁྲབ། །ནམ་ཡང་ལྡང་མེད་ཆེན་པོ་ཉིད་དུ་གྱུར། །ཞེས་བསམ་ལ། རྩ་སྔགས་སམ་དྲག་སྔགས་སོ་ལྔ་པའི་མཐར། བྱུར་སྲི་དམ་སྲི་བརྙབ་པ་ལག་རིང་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ བྱུར་སྲི་དམ་སྲི་ཡམ་ཤུད་དམར་པོ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ བྱུར་སྲི་དམ་སྲི་ཐེའུ་རིང་སྟོང་འཁྲུགས་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ བྱུར་སྲི་དམ་སྲི་བསེན་མོ་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ རག་མོ་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ ཡག་མོ་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ ཤོ་ན་མ་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ གསོན་འདྲེ་མོ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ བསེ་རག་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ ཆུང་འདྲེ་ཆུང་སྲི་མོ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ ཕུང་འདྲེ་ཕུང་སྲི་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ འཁོན་འདྲེ་འཁོན་སྲི་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ དམ་སྲི་འགོང་པོ་སྤུན་དགུ་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ གནོད་བྱེད་དམ་སྲི་ཕུང་འདྲེ་ཕུང་སྲི་བྱུར་འདྲེ་བྱུར་སྲི་གྱོད་འདྲེ་གྱོད་སྲི་གོད་འདྲེ་གོད་སྲི་ནད་འདྲེ་གདོན་བགེགས་གླག་འགོང་ཐམས་ཅད་ཏྲི་ཛ་མཱ་ར་ཡ་རྦད་ནན་ནན༔ ༧ ཨོཾ་བཛྲ་སརྦ་དུཥྚཾ་ཏ་ཀ་ཧ་ན་དཱ་ཧ་པ་ཙ་ཧཱུྃ༔ གནོད་བྱེད་ཐམས་ཅད་མཱ་ར་ཡ་ཧཱུྃ་ཕཊ༔ ཨོཾ་བཛྲ་ལོག་ཏྲི་པ་ལ་ནན༔ ས་ག་པ་ཤ་ནན༔ ན་ག་དུ་དུ་ནན༔ མ་མཾ་མ་མཾ༔ ཙི་ཙ་ར་ཙི་ཙ་ར༔ བཾ་རུ་ལུ་བཾ་རུ་ལུ༔ རྦད་ཏྲ་ཀོ་ཤ་ཡ༔ རྦད་ཏྲ་ཀོ་ཤ་ཡ༔ ཧོ་ར་ཧོ་ར༔ གནོད་བྱེད་ཙི་ཏུ་སོད་ཙི་ཏུ་སོད༔ ལུས་ཤིག་ལྷུ་རུ་གཏུབ༔ ཧ་ལ་པ་ཏྲི་རྦད་ནན་འཁོར་བ་ཐུལ་ཀཱ་ཡ་ཝཱཀྐ་ཙིཏྟ་རླག་རླག༔ གནོད་བྱེད་འབྱུང་པོ་ཕོ་མོ་མཱ་ར་ཡ་རྦད་ནན་ནན༔ ལོང་ཀ་ལོང་ཀ་དུ་ར་དུ་ར་ཧབ་ཤ་ཧབ་ཤ༔ གནོད་བྱེད་བྱུར་སྲི་དམ་སྲི་ཆེ་སྲི་ཆུང་སྲི་གོད་སྲི་དར་སྲི་འབྱུང་པོ་ཕོ་མོ་སྐྱུག་ཅིག་སྐྱུག་ཅིག༔ ཁ་ཐཾ་ཁ་ཐཾ༔ མཆུ་ཆིངས་མཆུ་ཆིངས༔ གྲེ་བསྡོམ་གྲེ་བསྡོམ༔ དཱན་དྷ་དཱན་དྷ་མུ་དྷ་ཡེ་རྦད་ནན་ནན༔ ཧཾ་ཤཾ་ཏྲི་རུ་ཏྲི་བཱི་ཧེ་ཤ་རྦད་ནན་ནན༔ ཏྲིའུ་ཏྲིའུ་ཏྲི་ཁ་ཤ་ཏྲིའུ་ཛ་ར་ཏྲི་ཡེ་རྦད་ནན་ནན༔ དུ་ཏྲི་དུ་ཏྲི་རྦད་ནན་ནན༔ ཤི་ཏྲི་ནི་རྦད་ནན་ནན༔ ཀ་ཏྲི་ནི་རྦད་ནན་ནན༔ ཏྲི་དུ་ནི་ཆུང་སྲི་ནི་རྦད་ནན་ནན༔ དུ་ཏྲི་གོད་འདྲེ་ཕོ་མོ་རྦད་ནན་ནན༔ གྲུམ་གྲུམ་དམ་སྲི་བྱུར་སྲི་ཆེ་སྲི་ཆུང་སྲི་གོད་སྲི་དར་སྲི་འགག་འདྲེ་འགག་སྲི་ཉེས་བྱེད་ཕོ་མོ་ཐམས་ཅད་ཀྱི་སྲོག་ལ་ཏྲི་མཱ་ར་ཡ་རྦད་ནན་ནན༔ འབྱུང་པོ་དམ་སྲི་ཕོ་མོ་ཨ་མུ་ཀ་སྙིང་དུ་ནན་ནན༔ ཏྲི་དུ་ནན་ནན༔ ཛ་ཏྲི་ནན་ནན༔ སྙིང་གཟེར་བུ་ནན་ནན༔ གནོད་བྱེད་སརྦ་ཀཱ་ཡ་ཝཀྐ་ཙིཏྟ་ནན་ནན༔ གནོད་བྱེད་དམ་སྲི་ཕོ་མོའི་ལུས་ངག་ཡིད་གསུམ་སརྦ་ཧཱུྃ་ལཾ་སུཾ་ལཾ་སྟྭཾ་བྷ་ཡ་ནན་ནན༔ བྷི་ཏིང་སྟྭཾ་བྷ་ཡ་ནན་ནན༔ ཏྲི་ཛ་ཏྲི་ཧྲཱིཿ མ་དཱ་ཡ་སུ་ཏྲི་ཡ་དུ་ཏྲི་ཡ་མ་ཏྲི་ཡ༔ དཱ་ནི་ཛ་ཧེ་དཱ་ར་ནི་ཛ༔ དམ་སྲི་བྱུར་སྲི་ཆུང་སྲི་གོད་འདྲེ་འབྱུང་པོ་ཕོ་མོ་ཐམས་ཅད་ཁ་ཐཾ་ལུས་ཆིངས་ངག་ཆིངས་ཡིད་ཀྱི་དྲན་པ་རྨུག་པར་གྱིས་ཤིག༔ ཆིངས་ཆིངས་ནན་ནན༔ པཀྴ་པཀྴ་རཀྴ་རཀྴ་ཐུཾ་ཐུཾ་གནོད་བྱེད་ཕོ་མོ་རེངས་རེངས༔ གྷྲྀ་ཎ་གྷྲྀ་ཎ་ཧ་ན་ཧ་ན་དཱ་ཧ་དཱ་ཧ་པ་ཙ་པ་ཙ་གནོད་བྱེད་ཕོ་མོ་མཱ་ར་ཡ་རྦད་ནན་ནན༔ འཁུམས་ཤིག་འཁུམས་ཤིག༔ ཁྲག་ཏུ་སྐྱུག་ཅིག་ནན་ནན༔ ཚིནྡྷ་ཚིནྡྷ་ནན་ནན༔ བྷིནྡྷ་བྷིནྡྷ་ནན་ནན༔ གནོད་བྱེད་ཕོ་མོ་ནན་ནན༔ ཆིངས་ཆིངས་དམ་སྲི་ཕོ་མོ་ནན་ནན༔ ཆིངས་ཆིངས་བྱུར་སྲི་ཕོ་མོ་ནན་ནན༔ ཆིངས་ཆིངས་ཆེ་སྲི་ཕོ་མོ་ནན་ནན༔ ཆིངས་ཆིངས་ཆུང་སྲི་ཕོ་མོ་ནན་ནན༔ ཆིངས་ཆིངས་གོད་འདྲེ་གོད་སྲི་ཕོ་མོ་ནན་ནན༔ ཆིངས་ཆིངས་ཟ་འདྲེ་ཕུང་སྲི་ཐམས་ཅད་མཱ་ར་ཡ་རྦད་ནན་ནན༔ ཆིངས་ཆིངས་ཕུག་གི་སྲི་ལ་ཟ་བ་ཐམས་ཅད་མཱ་ར་ཡ་རྦད་ནན་ནན༔ མཆན་གྱི་བུ་ལ་ཟ་བ་ཐམས་ཅད་མཱ་ར་ཡ་རྦད་ནན་ནན༔ སྒོ་ཡི་ནོར་ལ་ཟ་བ་ཐམས་ཅད་མཱ་ར་ཡ་རྦད་ནན་ནན༔ ལེགས་སུ་མི་སྟེར་བ་ཐམས་ཅད་མཱ་ར་ཡ་རྦད་ནན་ནན༔ ཉེས་སུ་དགའ་བ་ཐམས་ཅད་མཱ་ར་ཡ་རྦད་ནན་ནན༔ ཀེག་ལྟ་ཞིང་གླག་འཚོལ་བ་ཐམས་ཅད་མཱ་ར་ཡ་རྦད་ནན་ནན༔ ཆགས་ཆེ་ཞིང་ཉམས་ང་བ་ཐམས་ཅད་མཱ་ར་ཡ་རྦད་ནན་ནན༔ མོ་ལྟས་པྲ་བརྟགས་ངན་པ་ཐམས་ཅད་མཱ་ར་ཡ་རྦད་ནན་ནན༔ རྨིས་ལྟས་མཚན་མ་ངན་པ་ཐམས་ཅད་མཱ་ར་ཡ་རྦད་ནན་ནན༔ གནོད་བྱེད་བྱུར་འདྲེ་བྱུར་སྲི་དམ་སྲི་ཆུང་འདྲེ་ཆུང་སྲི་གོད་འདྲེ་གོད་སྲི་ཕོ་མོ་ཐམས་ཅད་ཁ་ཐམ་མཆུ་ཆིངས་ཤིག༔ ཏྲི་དུ་ཏྲི་མཱ་ར་ཡ་རྦད་ནན་ནན༔ ཨོཾ་ལཾ་ཧཱུྃ་ལཾ་སུཾ་ལཾ་སྟྭཾ་བྷ་ཡ་ནན་ནན༔ ༧ ཨོཾ་བཛྲ་སརྦ་དུཥྚཾ་ཏ་ཀ་ཧ་ན་དཱ་ཧ་པ་ཙ་ཧཱུྃ་ཕཊ༔ ཨོཾ་ཡ་མནྟ་ཀ་ཡ་མཱ་ར་ཙ་གནོད་བྱེད་བྱུར་འདྲེ་མི་ལ་སྤུན་དགུ་དམ་སྲི་ཟ་འདྲེ་ཕོང་སྲི་ཆེ་འདྲེ་ཆུང་སྲི་གོད་འདྲེ་གོད་སྲི་སྒབ་འདྲེ་སྒབ་སྲི་ཕོ་མོ་སརྦ་ཛཿཧཱུྃ་བཾ་ཧོ༔ མ་ཧཱ་དྷེ་ཝ་ཏྲི་མཱ་ར་ཡ་རྦད་ནན་ནན༔ ཨ་ཡ་མ་དུ་རུ་ཙ་ཤ་ན་ས་མ་ཡཱ་ཨེ་ཛ༔ ཏྲི་ནྲྀ་ཛ༔ རྦད་ཛ༔ ཁུག་ཛ༔ ཨང་ཀུ་ཤ་ཛ་ཛ༔ ཨོཾ་མ་ཧཱ་དེ་ཝ་ཧཱུྃ༔ ཨུ་མ་དེ་ཝི་ཧྲཱིཾ༔ མི་ལ་ཀུ་རུ༔ བསེ་རག་ཤནྟྲི་གོད་འདྲེ་ཙིཏྟ་བསེན་མོ་རུ་ཏྲི༔ ཀཱ་ཡ་ཤནྟྲི་སརྦ་གནོད་བྱེད་ནན་ནན༔ གནོད་བྱེད་བརྙབ་པ་ལག་རིང་རུ་ཏྲི་ཛ༔ རུ་ཏྲི་ཧུར་ཐུཾ་ཛ༔ ཏྲི་མཱ་ར་ཡ་ཛ༔ སྟྭཾ་བྷ་ཡ་ནན་ནན༔ གནོད་བྱེད་བཙན་ཡམ་ཤུད་དམར་པོ་རུ་ཏྲི་ཛ༔ རུ་ཏྲི་ཧུར་ཐུཾ་ཛ༔ ཏྲི་མཱ་ར་ཡ་ཛ༔ སྟྭཾ་བྷ་ཡ་ནན་ནན༔ གནོད་བྱེད་ཐེའུ་རིང་སྟོང་འཁྲུགས་རུ་ཏྲི་ཛ༔ རུ་ཏྲི་ཧུར་ཐུཾ་ཛ༔ ཏྲི་མཱ་ར་ཡ་ཛ༔ སྟྭཾ་བྷ་ཡ་ནན་ནན༔ བདུད་བཙན་ཐེའུ་རིང་སྟོང་འཁྲུགས་སྟྭཾ་བྷ་ཡ་ནན་ནན༔ ཆིངས་ཤིག་ཆིངས་ཤིག་སྭཱཧཱ༔ བཛྲ་ར་ཏྲི་ཏྲི་མཱ་ར་ཡ་རྣྲྀ་ཏྲི་ཀྲོ་ཏ་མཱ་ར་ཡ་སོད༔ ཡཀྴ་མཱ་ར་ཡ་དུ་ཏྲི་ཛ༔ གཟའ་བདུད་ཆེན་པོའི་འཁོར་དུ་གཏོགས་པའི་གནོད་བྱེད་སྒབ་འདྲེ་ཕོ་མོ་རྣམས་ཁུག་ཅིག༔ སརྦ་གནོད་བྱེད་ཀཱ་ཡ་ཝཀྐ་ཙིཏྟ་ནན་ཆིངས་ཤིག་སརྦ་རཀྴ་སྟྭཾ་བྷ་ཡ་ནན༔ ཞེས་པའི་བར་ལན་གསུམ་ལྔ་བདུན་སོགས་སྐབས་དང་བསྟུན། མཇུག་ཏུ། ཧཱུྃ་བྷྱོ༔ དམ་སྲི་བྱ་བའི་ལས་ངན་སྡིག་ཅན་ཁྱོད༔ ཆུ་སྲིན་ནག་པོའི་ཁ་རུ་བཏབ༔ གྲི་ཐོག་སྟོང་གིས་བསྐོར་བ་ཡིས༔ ཐར་མེད་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ རི་རབ་ཆེན་པོའི་འོག་ཏུ་མནན༔ གསེར་རི་བདུན་གྱིས་བསྐོར་ནས་བཞག༔ ཁྱེད་རྣམས་རྣམ་སྨིན་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ རྒྱ་མཚོ་ཆེན་པོའི་གཏིང་དུ་བསྒྱུར༔ རོལ་མཚོ་བདུན་གྱིས་བསྐོར་ནས་བཞག༔ ཁྱེད་རྣམས་ཐར་མེད་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ གནམ་ལྕགས་འཁོར་ལོའི་རྩིབས་ལ་བསྐྱོན༔ མཚོན་ཆའི་ཚོགས་ཀྱིས་བསྐོར་ནས་བཞག༔ ཁྱེད་རྣམས་ཐར་མེད་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ ཁྲོ་རྒྱལ་ཁྲག་འཐུང་རྣམས་ཀྱི་ཞལ་དུ་བསྟབས༔ ནག་པོ་སྟོང་གིས་བསྐོར་བ་ཡིས༔ ཁྱེད་རྣམས་ཐར་མེད་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ བསྲེག་བྱེད་མེ་ཡི་དཀྱིལ་ནས་བསྲེགས༔ མེ་དཔུང་འབར་བས་བསྐོར་བ་ཡིས༔ ཁྱེད་རྣམས་ཐར་མེད་ལས་ཀྱི་བཙོན་རར་ཚུད༔ བསྐལ་པ་འཇིག་ཀྱང་ཐར་མི་འགྱུར༔ ཆུ་སྲིན་གདུག་པའི་ཧོམ་ཁུང་དུ༔ རིན་ཆེན་ནོར་བུ་ཚུད་པ་ལྟར༔ མཐའ་ཡི་རྒྱ་མཚོ་སྐེམ་ཀྱང་མི་གཏོང་ངོ༔ ཉི་ཟླ་ཐང་ལ་ལྷུང་ཡང་མི་བཏང་ངོ༔ བསྐལ་པ་འཇིག་ཀྱང་མི་བཏང་ངོ༔ རི་རབ་ཆེན་པོ་ཉིལ་ཡང་མི་བཏང་ངོ༔ རྣལ་འབྱོར་བསམ་དོན་མ་འགྲུབ་བར༔ ཁྱེད་རྣམས་ཐར་མེད་ལས་ཀྱི་བཙོན་རར་ཚུད༔ མནར་མེད་བཙོན་ཁང་ནག་པོའི་གནས་སུ་ཚུད༔ ཅེས་བརྗོད། བརྒྱད་པ་ཐུན་གྱིས་བྲབ་པ་ནི། ཧཱུྃ་ཧཱུྃ༔ དྲག་པོའི་སྔགས་ཀྱིས་ངར་བཏགས་པའི། །ཕུང་སྲི་ཀུན་འདུལ་འབར་བའི་མཚོན། །འབྲུ་གསུམ་ཕྱེ་གསུམ་སྣ་གསུམ་དང་། །ངན་གསུམ་ཡུངས་ནག་ཚིག་ཕྱེ་དང་། །ལ་དྲག་མཁར་གོང་རྦབ་རྡོ་སོགས། །དཔག་མེད་ཐོག་སེར་དྲག་པོ་ལྟར། །བབས་པས་ཕུང་སྲི་གདུག་བྱེད་ཀྱི། །ལས་ཉོན་ལྔ་ཕུང་རྡུལ་དུ་རློགས། །ཞེས་བརྗོད་པས། ཐུན་རྫས་དྲེགས་པའི་དམག་ཚོགས་ཀྱིས་ནད་མཚོན་དུག་གི་ཆར་ཕབ་པས་ཡིད་ལ་བརྣག་པའི་དགྲ་བགེགས་དམ་སྲི་འབྱུང་པོ་ཐམས་ཅད་ཀྱི་སྒོ་གསུམ་ལས་ཉོན་བག་ཆགས་མ་ལུས་པ་གཟུགས་ཕུང་གི་རྣམ་པར་གནས་པ་དེ་ཉིད་ཁང་རུལ་ལ་རྒྱོགས་ཕོག་པ་ལྟར་རྡུལ་དུ་བརླག་པར་བསམ་ལ། སླར་ཡང་དྲག་སྔགས་སོ་ལྔའི་མཐར། བྱུར་སྲི་དམ་སྲི་བརྙབ་པ་ལག་རིང་ཐམས་ཅད་ཏྲི་ཛ༴སོགས་ནས། ཨོཾ་ལཾ་སུཾ་ལཾ་སྟཾ་བྷ་ཡ་ནན༔ བར་ཚར་གཅིག་ཁོ་ན་བརྗོད་པའི་རིང་ལ་ཐུན་གྱིས་བྲབ་བོ། དགུ་པ་སླར་ཡང་ལྡང་མེད་དུ་གནོན་པ་ནི། ཧཱུྃ་ཧཱུྃ༔ བྲུབ་དོང་སྟོང་ཆེན་ཨེ་དབྱིངས་ཟབ་མོ་རུ། །སྒྲོལ་ཞིང་སྲི་ཅན་གདུག་པའི་སྒོ་གསུམ་པོ། །འཆོར་མེད་བྲུབ་ཅིང་ལྡང་མེད་མནན་བྱས་ནས། །འགྱུར་མེད་བདེ་ཆེན་ཝཾ་ཡིག་རྡོ་རྗེའི་རྒྱས། །བཏབ་པས་བསྐལ་ཆེན་གྲངས་མེད་བྱེ་བ་བརྒྱ། ཆགས་གནས་འཇིག་སྟོང་རིམ་པར་བྱུང་ན་ཡང་། །བདེ་སྟོང་ཟུང་འཇུག་ཆོས་སྐུའི་ཀློང་ཆེན་པོར། །གདོད་མའི་མགོན་པོའི་གོ་འཕང་མངོན་གྱུར་པ། །དེ་སྲིད་ཁམས་གསུམ་འཁོར་བའི་གྲོང་ཁྱེར་འདིར། །སྐད་ཅིག་ཙམ་ཡང་ལྡོག་པར་མ་གྱུར་ཅིག །རྩ་སྔགས་དང་། ཨེ་ཝཾ་པཱ་ར་མརྠ་དྷརྨ་དྷརྟུ་མ་ཧཱ་གརྦྷ་ས་མ་ཡཱ༔ ཨོཾ་ལཾ་ཨཱ༔ལཾ་ཧཱུྃ་ལཾ་སྟྭཾ་བྷ་ཡ་ནན་ནན༔ ཞེས་སོ། །བཅུ་པ་ཐུན་གཏོར་འབུལ་བ་ནི། དམར་གཏོར་ཤ་ཁྲག་གིས་བརྒྱན་པ་ལ། དགུག་གཞུག་བྱ་ཞིང་། རཾ་ཡཾ་ཁཾ། སྟོང་པའི་ངང་ལས་དགྲ་བགེགས་བསྒྲལ་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་ཆེན་པོ་བདུད་རྩིའི་རང་བཞིན་དུ་གྱུར། ཨོཾ་ཨཱ༔ཧཱུྃ། ཞེས་བྱིན་གྱིས་བརླབས་ལ། རྩ་སྔགས་མཐར། ས་པཱ་རི་ཝ་ར་ཨེ་དཾ་བྷ་ལིང་ཏ་ཁ་ཁ་ཁ་ཧཱི་ཁ་ཧཱི༔ ཞེས་པ་ལན་གསུམ་མམ་བདུན་གྱིས་འབུལ། མཐར་མཆོད་བསྟོད་བྱ་ཞིང་ཕྲིན་ལས་བཅོལ་བ་ནི། ཧཱུྃ་ཧཱུྃ༔ ཆེ་གེ་མོའི་ལྷ་ཚོགས་འཁོར་བཅས་ལ། །དགྲ་བགེགས་ཤ་ཁྲག་རུས་པ་ནང་ཁྲོལ་ཚོགས། །ལྷུན་པོར་སྤུང་པའི་འདོད་དགུའི་བྷ་ལིང་ཏ། །ཕྱི་ནང་ཉེར་སྤྱོད་སྨན་རཀ་བདུད་རྩིའི་ཚོགས། །འབུལ་ལོ་དགྱེས་པར་རོལ་ལ་བདག་ཅག་གི། །ནད་གདོན་ཀུན་ཞི་ཚེ་དཔལ་ལོངས་སྤྱོད་སྤེལ། །ཁམས་གསུམ་དབང་བསྡུས་དགྲ་བགེགས་བདུད་སྡེའི་དཔུང་། །ཐམས་ཅད་མིང་གི་ལྷག་མར་ཚར་ཆོད་ཅིག །ཕས་རྒོལ་བསམ་ངན་སྦྱོར་རྩུབ་བྱད་སྟེམ་དཔུང་། །ཐམས་ཅད་རང་གཤེད་ཕོབ་ལ་མཐུ་ནུས་ཤིག །ཞིང་གྱུར་བདུད་དང་ལོག་འདྲེན་ཕུང་སྲི་ཡི། །ལུས་ངག་ཡིད་གསུམ་མཐུ་རྩལ་ནུས་པ་རྣམས། །ཆོས་དབྱིངས་ཀུན་ཏུ་བཟང་མོའི་མཁའ་ཀློང་དུ། །ནམ་ཡང་ལྡང་མེད་མནན་པའི་ལས་མཛོད་ཅིག །མདོར་ན་བདག་གི་རེ་འབྲས་གང་ཡིན་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །ཅེས་སོ། །བཅུ་གཅིག་པ་ཐམས་ཅད་མཁྱེན་པའི་ལམ་དུ་བསྒྱུར་བ་ལ་གཉིས་ལས། ཐོག་མར་བསྔོ་བ་ནི། ཧཱུྃ་ཧཱུྃ༔ བླ་མེད་གསང་བའི་དཀྱིལ་འཁོར་ཆེན་པོ་རུ། །མོས་པས་ཞུགས་ཤིང་བསྙེན་སྒྲུབ་གྲངས་ཐེམ་ནས། །བྱམས་ཤིང་བརྩེ་བའི་མ་ཡིས་བུ་རྣམས་ལ། །ཕན་ཕྱིར་ཐབས་ཀྱིས་བསྣུན་ཞིང་བཀྱོན་པ་ལྟར། །བསམ་པ་བྱང་ཆུབ་སེམས་ཀྱིས་གཞི་བཟུང་ནས། །སྦྱོར་བ་མངོན་སྤྱོད་དྲག་པོའི་དྲག་པོའི་ཕྲིན་ལས་ཀྱིས། །ཞིང་གྱུར་ཉམས་པར་གཏོགས་པའི་དགྲ་གདོན་བགེགས། །ཞི་བའི་ཐབས་ཀྱིས་གདུལ་བར་དཀའ་བ་རྣམས། །ཚར་གཅོད་དབྱིངས་སྒྲོལ་ཐབས་ལམ་ཟབ་མོ་ལ། །ཚུལ་བཞིན་བརྩོན་པའི་རྣམ་དཀར་དགེ་འདིས་མཚོན། །དུས་གསུམ་བསགས་པའི་དགེ་ཚོགས་མཐའ་ཡས་ཀུན། །བསྡོམས་ཏེ་དམིགས་མེད་ངང་ནས་ཡོངས་ལ་བསྔོ། །ཞེས་དང་། དེ་དང་འབྲེལ་བར་སྨོན་ལམ་གདབ་པ་ནི། དེ་མཐུས་གནས་སྐབས་བདུད་དང་དམ་སྲིའི་དཔུང་། །མུ་སྟེགས་ཀླ་ཀློ་དུས་འཁྲུགས་མཐའ་བཞིའི་དམག །འབྱུང་བཞིའི་གཡོ་འཁྲུགས་ནད་གདོན་མུ་གེ་སོགས། །མི་མཐུན་རྒུད་པ་མ་ལུས་ཞི་གྱུར་ཅིག །ཡུལ་གྲུ་འདིས་མཚོན་རྒྱལ་ཁམས་ཐམས་ཅད་དུ། །སད་སེར་བཙའ་ཐན་མི་ཕྱུགས་གོད་ཡམས་ཞི། །ཚེ་བསོད་དཔལ་འབྱོར་ཆོས་སྲིད་གོང་དུ་འཕེལ། །དགེ་ལེགས་བསམ་པ་ཡིད་བཞིན་འགྲུབ་གྱུར་ཅིག །ཁྱད་པར་བསྲུང་བྱར་གྱུར་པ་འདི་རྣམས་ཀྱི། །མི་མཐུན་ཉེས་པའི་ཚ་གདུང་ཀུན་ཞི་ནས། །མཐུན་རྐྱེན་སྨོན་པ་འགྲུབ་པའི་ཟིལ་དངར་གྱིས། །བདེ་སྐྱིད་ཕུན་ཚོགས་དགའ་ཚལ་རྒྱས་གྱུར་ཅིག །མཐར་ཐུག་འཁྲུལ་འཛིན་སྒྱུ་མའི་འགྲོ་ཀུན་གྱི། །ལས་ཉོན་བག་ཆགས་ཕོངས་རྒུད་དབྱིངས་སུ་གྲོལ། །སྤངས་རྟོགས་མཐར་ཕྱིན་སྐུ་བཞིའི་ལེགས་ཚོགས་འབྱོར། །གཉིས་མེད་གདོད་མའི་རྒྱལ་སར་དབང་བསྒྱུར་ཤོག །ཞེས་བརྗོད་པར་བྱའོ། །དེ་ལྟར་དུས་གསུམ། དུས་བཞི། དུས་དྲུག་སོགས་གང་ལྟར་ཡང་འདི་ཡན་ཆད་གནད་ལྡན་དུ་བསྐྱར་ཞིང་། དེ་ལས་སྒྲོལ་ལས་ཀྱི་དཀྱུས་སུ་འཛུད་པའི་སྐབས་སུ། གོང་གི་ལྷ་དབྱེའམ་རྫུ་འཕྲུལ་དབྲོག་པའི་མཇུག་ཡན་ཆད་སྒྲོལ་བའི་ལས་རིམ་གྱིས་འཐུས་པས་བྱ་མི་དགོས་ལ། བསྒྲལ་ལས་ཀྱི་ལྷ་དབྱེའམ་མནན་སྔགས་ཡན་གྲུབ་པའིམཚམས་སུ། གོང་གི། ཧཱུྃ་ཧཱུྃ་ཛ༔ ཕུང་སྲི་བྱ་བའི་ལས་ངན་སྡིག་ཅན་ཁྱོད། ཅེས་པ་ནས། གནས་སུ་ཚུད། ཅེས་པའི་བར་བརྗོད། སླར་ཡང་སྒྲོལ་ལས་ཀྱི་ཕུར་བསྐྱེད་སོགས་བྱ་ཞིང་། ཐུན་བརྡེགས་ཀྱི་ཐོག་མཐའ་གང་འོས་སུ། གོང་གི། ཧཱུྃ་ཧཱུྃ༔ དྲག་པོའི་སྔགས་ཀྱིས་ངར་བཏགས་པའི། སོགས་ནས། ཨོཾ་ལཾ་སུཾ་ལཾ་སྟཾ་བྷ་ཡ་ནན་ནན༔ བར་གྱིས་ཐུན་བྲབ། དེ་ནས་སྔར་གྱི་སྒྲོལ་ལས་ཀྱི་ལྷག་མ་རྣམས་ཞལ་བསྟབས་ཀྱི་མཇུག་ཡན་རྫོགས་ནས། གོང་གི་འཕྲོར། ཧཱུྃ་ཧཱུྃ༔ བྲུབ་དོང་སྟོང་ཆེན་ཨེ་དབྱིངས་ཟབ་མོ་རུ། ཞེས་པ་ནས། ཐུན་གཏོར་བསྔོ་སྨོན་བཅས་རྫོགས་པར་བྱས་པས་གྲུབ་པའོ། །གསུམ་པ་རྗེས་ཀྱི་བྱ་བ་ལ། མནན་རྫས་ཚགས་སུ་འཛུད་པ། མནན་དོང་བྲུ་བ། མནན་པའི་ལས་རིམ་དང་གསུམ། དང་པོ་མནན་རྫས་ཚགས་སུ་འཛུད་པ་ནི། ཞག་གྲངས་རྫོགས་ནས་མནན་པའི་དུས་ལ་བབ་པ་ན། མནན་ཐོད་ཀྱི་ནང་ཁོངས་སུ་ཐུན་རྫས་ཀྱིས་སེང་མེད་པར་བཀང་ལ། གླད་ཁུང་དུ་མི་ཁའི་རྫས་སྣ་ཚོགས་བླུགས། ཁ་ཐལ་སྐྱོས་བཅད་ལ། རོ་རས་སམ་རེ་བ་ནག་པོས་དྲིལ། ཐོད་པའི་སྟེང་དུ་ཕོ་ཤིང་སྟག་པ་དང་། འོག་ཏུ་མོ་ཤིང་གླང་མའི་དུམ་བུ་བཞག་ལ། བྱད་ཐག་ཁྱི་སྤུ་ར་བལ་གྱི་སྐུད་པས་རྒྱ་གྲམ་དུ་བཅིངས་ཏེ་ཀླད་ཁུང་གི་ཐད་དུ་མདུད་པ་ཐོན་པར་བྱས་པའི་སྟེང་དུ་ཕུར་བའི་ཐེལ་ལམ་རྡོ་རྗེ་རྒྱ་གྲམ་གྱིས་ཐེལ་བརྒྱབ། རྩང་ཕུར་རྣམས་ཀྱིས་ཕྱོགས་ཀུན་ནས་རྒྱ་གྲམ་དུ་གཟེར། གང་དུ་མནན་པའི་ས་དེ་མ་གཏོགས་པར་ས་གཞན་དུ་མ་རེག་པར་སླ་ང་སོགས་སུ་བཞག་ལ། རང་ཉིད་ལྷག་པའི་ལྷ་ཆེ་མཆོག་ཧེ་རུ་ཀའི་ཏིང་འཛིན་བརྟན་པོའི་ངང་ནས། ཧཱུྃ་ཨེ་ཛ་བྷྲུཾ། ཐུགས་རྗེའི་རང་རྩལ་སྲིད་གསུམ་གང་བའི་ཚོགས། །གཅིག་ཏུ་དྲིལ་བའི་སྟོབས་ཤུགས་ནུས་པའི་དཔལ། །ཞིང་བཅུ་མཐར་བྱེད་གཤིན་ཡུལ་ཨེ་གསང་ཀློང་། །ཏིང་འཛིན་རྡོ་རྗེ་ཐོད་པའི་བརྡ་རུ་སྣང་། །དབྱིངས་རྩལ་འགོག་མེད་བདུད་འདུལ་ཁྲོ་བོའི་སྤྲིན། །དྲག་སྔགས་ལུ་གུ་རྒྱུད་ཀྱི་ཐིག་ལེ་ཡིས། །ནམ་ཡང་གཞོམ་མེད་རྡོ་རྗེའི་ངོ་བོ་རུ། །སྲིད་པ་སྤུ་གྲིའི་འཁོར་ལོས་རྒྱས་ཐོབ་ཅིག ཨོཾ་ལཾ་ཨཱ༔ལཾ་ཧཱུྃ་ལཾ་སྟྭཾ་བྷ་ཡ་ནན། ཞེས་བརྗོད་ལ། ཧཱ་སྭཱ་ཡེ་ཎ་མ་ཤྲ་ཧཱ་མ་དི་བཱ་ཝཾ་ཨེ་དྷ་རོ་ནི་ཡོ་ཙ་ཥན་ཏེ་དཏ་བཱ་ཧྱ་ཏོ་ག་ཐཱ་ཏ་ཥན་ཏེ་དུན་ཧེ་ཝ་བྷ་པྲ་ཏུ་ཧེ་མ་དྷར་ཡེ་ཨོཾ། ཞེས་ཉེར་གཅིག་གིས་རྟེན་འབྲེལ་ནག་པོའི་རབ་གནས་བྱའོ། ། དེ་ནས་སྒོ་དབྱེ་སོགས་ཟོར་ལས་རྣམས་རྫོགས་པར་བྱའོ། ། ༧ གཉིས་པ་མནན་དོང་བརྐོ་བ་ནི། གང་དུ་གནོན་པའི་སར་ཡུལ་ལྷ་གཞི་བདག་ལ་དཀར་གཏོར་དང་། གསེར་སྐྱེམས་འབུལ་ཞིང་ཕྲིན་ལས་བཅོལ་ལོ། །དྲང་སྲོང་འགྱུ་ཕྱོགས་སུ་ཁ་གཏད་དེ་ལྷའི་ང་རྒྱལ་དང་ལྡན་པས་ཤྭ་རུའམ་གཙོད་རུ་སོགས་ཀྱིས་ཟུར་སྣེ་དགྲ་ཕྱོགས་སུ་བསྟན་པའི་ས་གྲུ་གསུམ་དུ་དྲ་ཞིང་། འཇོར་གྱིས་བྲུ་བའི་དོང་ཚད་ནི། ཁྲུ་གང་ཡན་ཆད་ཕན་མེད་གནོད་མེད་ཀྱི་ས་རོ་ཡིན་ལ། དེ་ནས་སོར་དགུ་མ་མོའི་གནས་ཡིན་པས་འགོང་ཆོག་མནན་པ་ལ་བཟང་། དེ་ནས་སོར་བཅུ་པ་ལྷའི་གནས་ཡིན་པས་མནན་པ་ཐམས་ཅད་ལ་བཟང་། དེ་ནས་སོར་ཉི་ཤུ་རྩ་བཞི་ཀླུའི་གནས་ཡིན་པས་སྐམ་གཏད་བྱེད་པར་བཟང་ངོ། །དེ་བས་ཟབ་ན་རང་ལ་ལྡོག་ཅིང་། ཐུང་ན་ནུས་པ་ཆུང་བས་མི་ནོར་མི་ནོན་ཟེར་བ་འདུག རློན་གཏད་ལ་དོང་ཚད་མེད་དོ། ། ༧ གསུམ་པ་མནན་པའི་ལས་རིམ་ལ། གསེར་སྐྱེམས། གཟུ་དཔང་། ལས་གཤིན་གསལ་བ། བརྔན་གཏོར་འབུལ་བ། མནན་བྱ་གཏད་པ། ལས་གཤིན་སླར་གཏོང་གི་དམིགས་པ། དམིགས་བསལ་གྱི་དམོད་པ་འདོར་བ། མི་འགྱུར་མཁར་གྱི་དམིགས་པ། རིམ་དགུའི་རྒྱས་གདབ་པ་སྟེ་དགུ་ལས། དང་པོ་གསེར་སྐྱེམས་ནི། འཕེན་པ་ཟོར་གྱི་ལས་རིམ་རྫོགས་མཚམས་སུ། དམར་གཏོར་རྒྱན་ལྡན། མནན་ཐོད། མནན་རྫས་ཚྭ་སྒོག་རམ་རུག་སོགས་དང་བཅས་ཁྱེར་ཏེ་མནན་སར་སླེབས་པ་དང་། ཕུད་སྐྱེམས་བཤམས་ཤིང་། སྔར་བཞིན་བྱིན་རླབས་བྱས་ལ། ཧཱུྃ་ཧཱུྃ༔ སྐུ་གསུམ་ཀུན་དངོས༴སོགས་ནས། མཐུ་དཔུང་བསྐྱེད། ཅེས་ཕུལ་ལོ། །གཉིས་པ་གཟུ་དཔང་ཡང་གོང་ལྟར། ཧཱུྃ་ཧཱུྃ༔ མི་མངོན་དབྱིངས་ནས༴སོགས་ནས། གནོན་པར་མཛོད། ཅེས་སོ། །གསུམ་པ་ལས་ཀྱི་གཤིན་རྗེ་གསལ་བ་ནི། རང་ཉིད་ཡི་དམ་གང་རུང་གི་ང་རྒྱལ་གྱིས། ཕུར་བུའམ་རལ་གྲི་སོགས་ཕྱག་མཚན་གང་ཡིན་གྱིས་ས་གཞིར་བཏབ་པའི་ཚུལ་བྱ་ཞིང་། ཧཱུྃ་ཧཱུྃ༔ རང་ཉིད་དཔལ་ཆེན་སྐུ་རུ་གསལ་བ་ཡི། །ཕྱག་གཉིས་གནམ་ལྕགས་རལ་གྲི་ས་ལ་བཏབ། །ས་གཞི་གས་ཏེ་རྒྱ་མཚོ་སྔོ་མེར་གསལ། །དེ་དབུས་གནམ་ལྕགས་ཁང་པ་སྒོ་མེད་ནང་། །འཆི་བདག་གཤིན་རྗེ་ནག་པོ་འཇིགས་རུང་བ། །ལག་གཡས་དབྱུག་ཐོ་གཡོན་ན་ཞགས་པ་ཐོགས། །མི་སྡུག་དྲི་འཐུལ་མ་ཧེ་ནག་པོ་ཞོན། །གཤིན་རྗེའི་འཁོར་ཚོགས་རྔམ་པའི་ཚུལ་གྱིས་བསྐོར། །མངོན་སུམ་ལྟ་བུར་གསལ་བ་ཉིད་དུ་གྱུར། །ཞེས་གསལ་གདབ་ཅིང་། ས་མ་ཡཱ་ཛ༔ ས་མ་ཡཱ་ཧཱུྃ༔ ཞེས་དམ་བསྣན། བཞི་པ་བརྔན་གཏོར་འབུལ་བ་ནི། དམར་གཏོར་ཤ་ཁྲག་གིས་བརྒྱན་པ་བཤམས་ལ། དམིགས་བྱ་དགུག་གཞུག་དྲག་ཏུ་བྱས་མཐར། ཨོཾ་ཨཱ༔ཧཱུྃ་གིས་བྱིན་གྱིས་བརླབས་ནས། ཏྲིཥྞ་ཛ༔མ་ར་ཡ་རྦད་དགྲ་བགེགས་ཀྱི་མཾ་ས་ཙིཏྟ་རཀྟ་ཀོ་རོ་ཙ་ན་ཀེཾ་ནི་རི་ཏི་གྷྲྀ་ཧ་ཎ་ཁ་ཧཱི༔ ཞེས་ལན་བདུན་གྱིས་ཕུལ་ལ། ཧཱུྃ་ཧཱུྃ༔ འཆི་བདག་ནག་པོ་འཁོར་བཅས་ལ། །དགྲ་བགེགས་ཤ་ཁྲག་གཏོར་མ་འདི། །འབུལ་གྱིས་དགྱེས་པར་རོལ་ནས་ཀྱང་། །ཞིང་བཅུར་གྱུར་པའི་དགྲ་བགེགས་སྤྱི། །ཁྱད་པར་ཀླ་ཀློ་ཕུང་སྲི་སོགས། །བསྟན་འགྲོར་གནོད་འཚེའི་བསམ་སྤྱོད་ཅན། །དམ་ཉམས་དགྲ་བགེགས་འཁོར་བཅས་རྣམས། །སྡོམ་འཛིན་མནན་པའི་ཕྲིན་ལས་མཛོད། །ཅེས་བརྗོད། དམར་གཏོར་དོང་དུ་འབུལ་ལོ། །ལྔ་པ་མནན་བྱ་གཏད་པ་ནི། ༧ སྤྲོ་ན་སླར་ཡང་མནན་རྫས་རྣམས་མདུན་དུ་བཞག་ལ། དམིགས་བྱ་གསལ་ཞིང་འགུགས་གཞུག་བྱས་ནས་བཟུང་། སྲི་གནོན་ལ་མ་ཐུག་གི་བར་སྔར་བཞིན་བྱ་ཞིང་། མ་སྤྲོས་ཀྱང་རུང་། སྤྲོ་བསྡུ་གང་ལྟར་ཡང་། མནན་ཐོད་དེ་ཉིད་ལས་གཤིན་རང་གི་ཕྱིར་མི་འབྲང་བའི་ཆེད་དུ། རང་གི་སྐེད་པར་གཡོན་ཕྱོགས་ནས་ཕྱིན་ཀ་ལོག་ཏུ་ལན་གསུམ་བསྐོར་ཞིང་ངག་ཏུ། ཧཱུྃ་ཧཱུྃ༔ དགྲ་བགེགས་བྱ་བའི་ལས་ངན་འདིས། །རྡོ་རྗེ་སློབ་དཔོན་སྐུ་ལ་བསྡོས། །རྡོ་རྗེའི་མཆེད་ལ་བར་ཆད་བྱས། །རྣལ་འབྱོར་བདག་ལ་རྟག་ཏུ་འཚེ། །དམ་ཉམས་སྡིག་ཅན་ལས་ངན་འདིས། །དཀོན་མཆོག་གསུམ་གྱི་བསྟན་པ་བཤིག །རྒྱལ་ཁམས་ཡོངས་ལ་གནོད་པ་བྱས། །སྦྱོར་སྒྲོལ་མང་པོའི་སྒོ་ཡང་བཀག །སེམས་ཅན་མང་པོའི་བདེ་སྐྱིད་ཕྲོག །འགལ་རྐྱེན་ཉེས་ཚོགས་སྤྲིན་ལྟར་གཏིབ། །མཐུན་རྐྱེན་ལེགས་ཚོགས་རླུང་ལྟར་གཏོར། །དེ་ཕྱིར་སྐྱབས་འོས་ཉམས་ཆུང་མིན། །བཀའ་ལས་འདའ་བྱེད་སྡིག་ཅན་རྣམས། །བྱང་ཆུབ་སེམས་ནི་མ་སྐྱེས་བར། །ནམ་ཡང་བཏང་བར་མ་བྱེད་ཅིག །འཇིགས་རུང་གཤིན་རྗེའི་ཁ་ནང་ཆུགས། །མི་འགྱུར་ཡངས་པའི་མགྲིན་པར་དྲོངས། །ཐར་མེད་ལས་ཀྱི་ལྟོ་བར་ཆུག །གཏད་དོ་འཆི་བདག་ཁྱོད་ལ་གཏད། །འཆི་བདག་ནག་པོའི་དམ་ཚིག་གིས། །གལ་ཏེ་བྱང་ཆུབ་སེམས་ལྡན་ཞིང། །ལས་ཉོན་སྲིད་པའི་བཙོན་ཁང་ནས། །འགྲོ་མང་བདེ་ལ་འགོད་ནུས་བར། །དགྲ་བགེགས་གཏད་ཀྱི་སླར་མ་བཏང་། །ཟུངས་ཤིག་ཆིངས་ཤིག་ཤོར་ར་རེ། །མཐུ་སྟོབས་ནུས་པའི་རྩལ་བསྐྱེད་ལ། །བདུད་དང་མུ་སྟེགས་དམ་སྲི་ཀུན། །ཐར་མེད་མནན་པའི་ལས་མཛོད་ཅིག །ཅེས་བརྗོད་ལ། ཐོད་པའི་གདོང་དགྲ་གདོན་གནས་པའི་ཕྱོགས་དང་། གླད་ཁུང་གནམ་དུ་བསྟན་ལ་དོང་ནང་དུ་བསྒྱུར་ཞིང་མནན་རྫས་བླུགས། ཕྱོགས་ཀུན་ནས་སྔར་གྱི་ཕོང་ས་ལས་བྱས་པའི་བྲུབ་ཁུང་སོགས་ས་རྡོས་བརྫངས་ཤིང་བསྐྱོར། །བར་འདིར་སྤྲོ་ན་སྔར་ལྟར། བྲུབ་དོང་ནང་དུ་སྲི་ངན༴སོགས་ནས། ཉིད་དུ་གྱུར། ཞེས་དང་། འགུགས་གཞུག་བྱ། འགུགས་སྔགས་བརྗོད། རྩ་སྔགས་དང་མནན་སྔགས་བརྗོད་པ་ནས། ལྡང་མེད་དུ་གནོན་པའི་མཐའི། ཧཱུྃ་ལཾ་སྟྭཾ་བྷ་ཡ་ནན་ནན༔ བར་བརྗོད། དྲུག་པ་ལས་གཤིན་སླར་གཏོང་བའི་དམིགས་པ་ནི། དམིགས་བྱ་ཁོང་ཆུད་གཤིན་རྗེས་ཞལ་བསྡམས་ཏེ། །མནན་པའི་ལས་སྦྱོར་དམ་ཉམས་དགྲ་བགེགས་རྣམས། །ནམ་ཞིག་ལས་ཉོན་བག་ཆགས་མཐར་བྱས་པ། །དེ་སྲིད་བསྐལ་པ་སྟོང་ཀྱང་མི་ཐར་ན། །མུན་ནག་རུམ་གྱི་རང་གནས་རྒྱ་མཚོའི་གཏིང་། །རིམ་བདུན་ས་འོག་གཤིན་རྗེའི་གྲོང་ཁྱེར་སོང་། །ཞེས་སོ། །བདུན་པ་དམིགས་བསལ་གྱི་དམོད་པ་འདོར་བ་ནི། མནན་ཐོད་རི་རབ་དང་རྒྱ་གྲམ་བྲིས་པའི་དུར་རྡོས་བཀབ། དེའི་སྟེང་དུ་ས་རིམ་པ་བདུན་གྱིས་བཀབ་ཅིང་། མེ་ཆུ་གོ་ལྡོག་གི་རྒྱས་བཏབ་ཏེ། དེའི་རིང་ལ་ངག་ཏུ། སྤྲོ་ན་རྩ་སྔགས་དང་། ལོ་དང་ཟླ་བ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ ཞག་དང་ཟ་མ་ལ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ སྲོག་ལུས་དབང་ཐང་རླུང་རྟ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ དགྲ་མགོ་ཐོག་ཏུ་བབས་པ་ཐམས་ཅད་མཱ་ར་ཡ་རྦད་ནན༔ སྔ་དགྲ་ལག་ཏུ་བརྡར་བ་ཐམས་ཅད་མཱ་ར་ཡ་རྦད་ནན༔ ཕྱི་དགྲ་ཡིད་ལ་སེམས་པ་ཐམས་ཅད་མཱ་ར་ཡ་རྦད་ནན༔ ད་དགྲ་ཁྱི་ལྟར་ཟུག་པ་ཐམས་ཅད་མཱ་ར་ཡ་རྦད་ནན༔ མགོ་ལ་ཏིལ་བརྡུང་བྱེད་པ་ཐམས་ཅད་མཱ་ར་ཡ་རྦད་ནན༔ སེམས་ལ་སྡུག་བསྔལ་གཏོང་བ་ཐམས་ཅད་མཱ་ར་ཡ་རྦད་ནན༔ ལུས་ལ་ན་ཚ་གཏོང་བ་ཐམས་ཅད་མཱ་ར་ཡ་རྦད་ནན༔ སྲོག་ལ་བར་ཆད་གཏོང་བ་ཐམས་ཅད་མཱ་ར་ཡ་རྦད་ནན༔ ཟས་ནོར་ལ་གོད་ཁ་གཏོང་བ་ཐམས་ཅད་མཱ་ར་ཡ་རྦད་ནན༔ རྒྱབ་ནས་འདེད་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ མདུན་ནས་རྩང་བཞིན་འཛུག་པ་ཐམས་ཅད་མཱ་ར་ཡ་རྦད་ནན༔ ཟུར་ནས་གཅོད་དགོས་ཟེར་བ་ཐམས་ཅད་མཱ་ར་ཡ་རྦད་ནན༔ ཟ་ལམ་དུ་དུག་གཡོས་བྱེད་པ་ཐམས་ཅད་མཱ་ར་ཡ་རྦད་ནན༔ འགྲོ་ལམ་དུ་རྩང་འཛུག་པ་ཐམས་ཅད་མཱ་ར་ཡ་རྦད་ནན༔ བྱམས་པ་གཉེན་གྱིས་བརྗོད་དུ་མ་འཇུག་ཅིག་མཱ་ར་ཡ་རྦད་ནན༔ སྡང་བ་དགྲ་ཡིས་སྒྲོག་ཏུ་མ་འཇུག་ཅིག་མཱ་ར་ཡ་རྦད་ནན༔ མཉན་པའི་གྲུ་ཚུགས་སུ་གླེང་དུ་མ་འཇུག་ཅིག་མཱ་ར་ཡ་རྦད་ནན༔ མགར་གྱི་སོ་མལ་དུ་གླེང་དུ་མ་འཇུག་ཅིག་མཱ་ར་ཡ་རྦད་ནན༔ དགེ་འདུན་གྱི་འཚོགས་གྲལ་དུ་གླེང་དུ་མ་འཇུག་ཅིག་མཱ་ར་ཡ་རྦད་ནན༔ སྔགས་པའི་ཕུར་གྲལ་དུ་གླེང་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ བརྒྱ་ཁ་མང་གི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ སྟོང་མིག་མང་གི་བྲ་མཆུ་ངན་པ་ཐམས་ཅད་མཱ་ར་ཡ་རྦད་ནན༔ གཙོ་བོའི་མདུན་ཁང་དུ་གླེང་བ་ཐམས་ཅད་མཱ་ར་ཡ་རྦད་ནན༔ གསོད་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ རྐུ་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ འཕྲོག་བཅོམ་བྱེད་པ་ཐམས་ཅད་མཱ་ར་ཡ་རྦད་ནན༔ དམག་ཇག་གྲོས་ངན་ཤོམ་པ་ཐམས་ཅད་མཱ་ར་ཡ་རྦད་ནན༔ ལྐོག་ནས་འབུ་བཞིན་འབུག་པ་ཐམས་ཅད་མཱ་ར་ཡ་རྦད་ནན༔ ངོ་ལ་སྤྲེལ་ལྟར་འཛེགས་པ་ཐམས་ཅད་མཱ་ར་ཡ་རྦད་ནན༔ ཀེག་བདུད་གཤེད་གསུམ་ལ་བབས་པ་ཐམས་ཅད་མཱ་ར་ཡ་རྦད་ནན༔ བྱད་ཁ་ཕུར་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ རྦད་འདྲེ་རྦོད་གཏོང་གཏོང་བ་ཐམས་ཅད་མཱ་ར་ཡ་རྦད་ནན༔ མནན་སྲེག་འཕང་གསུམ་བྱེད་པ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་སྣ་རླུང་ལྟར་འཚུབ་པ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་སྣ་མེ་ལྟར་འབར་བ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་ལྟར་ཆུ་ལྟར་འཁྲིགས་པ་ཐམས་ཅད་མཱ་ར་ཡ་རྦད་ནན༔ ཡུལ་མི་ཁྱིམ་མཚེས་ཀྱི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ རྗེ་ཁོལ་སྐྱ་སེར་གྱི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ ཉི་མ་ཕྱོགས་བཞི་མཚམས་བརྒྱད་ཀྱི་དགྲ་འདྲེ་བྱུར་གསུམ་ཐམས་ཅད་མཱ་ར་ཡ་རྦད་ནན༔ རྨི་ལྟས་མཚན་ངན་ཐན་ལྟས་ངན་པ་ཐམས་ཅད་མཱ་ར་ཡ་རྦད་ནན༔ འགབ་འདྲེ་དམ་སྲི་ཟ་འདྲེ་ཤི་གཤེད་འགོང་པོ་སྲི་ངན་བསེ་རག་ངན་པ་ཐམས་ཅད་མཱ་ར་ཡ་རྦད་ནན༔ རྒྱལ་སྲི་བློན་སྲི་ཕོ་སྲི་མོ་སྲི་ཆེ་སྲི་ཆུང་སྲི་གཞོན་སྲི་དུར་སྲི་ངན་པ་ཐམས་ཅད་མཱ་ར་ཡ་རྦད་ནན༔ གོད་སྲི་ཕུང་སྲི་གྱོད་སྲི་བྱེས་སྲི་དགྲ་སྲི་ངན་པ་ཐམས་ཅད་མཱ་ར་ཡ་རྦད་ནན༔ དཀར་འདྲེ་དབུལ་འདྲེ་བང་འདྲེ་ཐབ་འདྲེ་བསེ་རག་འགོང་པོ་ཐེའུ་རིང་གོད་འདྲེ་ཕུང་སྲི་ངན་པ་ཐམས་ཅད་མཱ་ར་ཡ་རྦད་ནན༔ སད་སེར་བཙའ་ཐན་འབུ་སྲིན་བྲ་བྱི་ལ་སོགས་གཏོང་བའི་ཟ་འདྲེ་ཕུང་སྲི་ཐམས་ཅད་མཱ་ར་ཡ་རྦད་ནན༔ གནོད་བྱེད་རྒྱལ་བསེན་ཐེའུ་རིང་ཤི་འདྲེ་གསོན་འདྲེ་གཅན་གཟན་ཕོ་མོ་ཐམས་ཅད་མཱ་ར་ཡ་རྦད་ནན༔ ནད་མཚོན་མུ་གེ་གཏོང་བའི་འདྲེ་གདོན་རྒྱལ་བསེན་འབྱུང་པོ་ཐམས་ཅད་མཱ་ར་ཡ་རྦད་ནན༔ བདུད་དང་རྣམ་རྟོག་དམ་སྲི་བར་དུ་གཅོད་པ་ཐམས་ཅད་མཱ་ར་ཡ་རྦད་ནན༔ བསྟན་དགྲའི་ལུས་ངག་ཡིད་གསུམ་ཚེ་བླ་སྲོག་གསུམ་དབང་ཐང་རླུང་རྟ་བསོད་ནམས་སྟོབས་ནུས་ལྷ་སྲུང་རྒྱབ་བརྟེན་དང་བཅས་པ་ཐམས་ཅད་མཱ་ར་ཡ་རྦད་ནན༔ གཞན་ཡང་སྣང་སྲིད་ལྷ་སྲིན་སྡེ་བརྒྱད་ཀྱི་ཟ་ཁ་སྟོན་པ་ཐམས་ཅད་མཱ་ར་ཡ་རྦད་ནན༔ བསྐལ་པ་སྟོང་གི་བར་དུ་མ་ལྡང་ཅིག་མཱ་ར་ཡ་རྦད་ནན། ཨོཾ་ལཾ་ཧཱུྃ་ལཾ་སྟྭཾ་བྷ་ཡ་ནན། དགྲ་བགེགས་སརྦ་ཤ་ཏྲུཾ་མཱ་ར་ཡ་རྦད་ནན། ཞེས་བརྗོད་པའམ་བསྡུས་པ་ལ་དགའ་ན། རྩ་སྔགས་དང་། བདག་དང་བསྲུང་བྱའི་ཡིད་ལ་བརྣག་པའི་དགྲ་བགེགས་བྱད་མ་དམ་སྲི་ཐམས་ཅད་མཱ་ར་ཡ་རྦད་ནན། དགྲ་སྣ་གྱོད་སྣ་ཇག་སྣ་རྐུན་སྣ་ཟུག་པ་ཐམས་ཅད་མཱ་ར་ཡ་རྦད་ནན། ནད་སྣ་རིམ་སྣ་གདོན་སྣ་གོད་སྣ་ཟུག་པ་ཐམས་ཅད་མཱ་ར་ཡ་རྦད་ནན། གཅན་སྣ་ཐན་སྣ་དམོད་སྣ་བྱད་སྣ་ཟུག་པ་ཐམས་ཅད་མཱ་ར་ཡ་རྦད་ནན། ངན་སྨྲས་གླེང་བརྗོད་མི་ཁ་བྲ་མཆུ་ཟུག་པ་ཐམས་ཅད་མཱ་ར་ཡ་རྦད་ནན། གཏད་ཁྲམ་མནན་སྔགས་ཧོམ་ཟོར་བྱད་ཕུར་རྦོད་གཏོང་ཐམས་ཅད་མཱ་ར་ཡ་རྦད་ནན། མདའ་གྲི་མདུང་གྲི་ཆུ་གྲི་རྦབ་གྲི་ལ་སོགས་པ་སྲོག་འཕྲོག་གྲི་ཡི་རིགས་སུ་གྱུར་པ་ཐམས་ཅད་མཱ་ར་ཡ་རྦད་ནན། ཆེ་སྲི་ཆུང་སྲི་དགྲ་སྲི་དུར་སྲི་གོད་སྲི་དམ་སྲི་ལ་སོགས་པ་ཕུང་བྱེད་སྲི་ངན་གྱི་རིགས་སུ་གྱུར་པ་ཐམས་ཅད་མཱ་ར་ཡ་རྦད་ནན། ཤི་འདྲེ་གསོན་འདྲེ་ཡུལ་འདྲེ་དཀར་འདྲེ་དབུལ་འདྲེ་རྨང་འདྲེ་ལ་སོགས་པའི་ཟ་བྱེད་འདྲེ་ཡི་རིགས་སུ་གྱུར་པ་ཐམས་ཅད་མཱ་ར་ཡ་རྦད་ནན། ཕོ་གདོན་མོ་གདོན་ཀླུ་གདོན་གནས་གདོན་ལུས་གདོན་སེམས་གདོན་ལ་སོགས་པའི་འཚེ་བྱེད་གདོན་གྱི་རིགས་སུ་གྱུར་པ་ཐམས་ཅད་མཱ་ར་ཡ་རྦད་ནན། མེ་ཆུ་དུག་མཚོན་གནོད་སྦྱིན་སྲིན་པོ་ལ་སོགས་འཇིགས་པ་དང་དུས་མ་ཡིན་པར་འཆི་བ་ཐམས་ཅད་མཱ་ར་ཡ་རྦད་ནན། དམ་ཉམས་ཀླ་ཀློ་མཐའ་དམག་དུས་འཁྲུགས་མེ་ཆུ་ས་གཡོ་ལ་སོགས་བསྟན་དང་འགྲོ་ལ་གནོད་ཅིང་འཚེ་བའི་དགྲ་བགེགས་ཐམས་ཅད་མཱ་ར་ཡ་རྦད་ནན། མདོར་ན་ནད་དང་སྡུག་བསྔལ་རྐྱེན་དང་བར་ཆད་མི་མཐུན་པའི་ཕྱོགས་ངན་པ་ཐམས་ཅད་མཱ་ར་ཡ་རྦད་ནན། ཨོཾ་ལཾ་ཨཱ༔ལཾ་ཧཱུྃ་ལཾ་སུཾ་ལཾ་སྟྭཾ་བྷ་ཡ་ནན། ཞེས་བརྗོད། བརྒྱད་པ་མི་འགྱུར་བའི་མཁར་བརྩིགས་པའི་དམིགས་པ་ནི། ཧཱུྃ་ཧཱུྃ༔ ནམ་མཁའ་རླུང་མེ་ཆུ་ས་རི་རབ་འོག །མནན་པ་ཡིན་གྱི་ལྡང་བར་མ་བྱེད་ཅིག །སངས་རྒྱས་དོན་ཡོད་གྲུབ་པས་རྒྱས་བཏབ་པོ། །དམིགས་མེད་ཆོས་ཀྱི་དབྱིངས་སུ་ས་མ་ཏི། །ཨོཾ་སུམ་བྷ་ནི་སོགས་ནས། ཧཱུྃ་ཕཊ༔ དགྲ་བགེགས་ནྲྀ་ཏྲི་ཤ་ཏྲུཾ་སརྦ་སྟྭཾ་བྷ་ཡ་ལཾ་ནན། བསྐལ་པ་མ་སྟོང་གི་བར་དུ་མ་ལྡང་ཅིག ཅེས་སོ། །དགུ་པ་རིམ་དགུའི་རྒྱ་ཡིས་གདབ་པ་ནི། ཧཱུྃ་ཧཱུྃ༔ དང་པོ་རྩེ་གཅིག་ཏིང་འཛིན་རྒྱ། །གཉིས་པ་ཐབས་ཤེས་ཟུང་འཇུག་རྒྱ། །གསུམ་པ་རྣམ་ཐར་སྒོ་གསུམ་རྒྱ། །བཞི་པ་ཚད་མེད་རྣམ་བཞིའི་རྒྱ། །ལྔ་པ་ཡེ་ཤེས་ལྔ་ཡི་རྒྱ། །དྲུག་པ་ཕ་རོལ་ཕྱིན་དྲུག་རྒྱ། །བདུན་པ་ཡན་ལག་བདུན་གྱི་རྒྱ། །བརྒྱད་པ་རྣམ་ཐར་བརྒྱད་ཀྱི་རྒྱ། །དགུ་པ་ཐེག་པ་རིམ་དགུའི་རྒྱ། །དོན་དང་བརྡ་སྦྱར་རྟགས་ཀྱི་རྒྱ། །གཉིས་སུ་མེད་པར་ལེགས་བཏབ་པས། །ཡེ་ཤེས་ཀློང་དགུར་འདའ་བ་མེད། །རྩ་སྔགས་དང་། ཨོཾ་ལཾ་ཨཱ༔ལཾ་ཧཱུྃ་ལཾ་སྟྭཾ་བྷ་ཡ་ནན། དྷརྨ་དྷརྟུ་ཨ་ཨ་ཨཱ༔ ཞེས་མནན་ནོ། །དེ་ནས་བསྟན་མ་སྐྱོང་ཞིང་གཏོར་གཞོང་ཁ་སྦུབས་ཏེ་འགུག་གཞུག་བྱ་ཞིང་སྟེང་དུ་རྡོ་རྗེ་རྒྱ་གྲམ་གྱིས་གནོན་པའི་ཚུལ་བྱ་ཞིང་མཆེད་ལྕམ་རྣམས་མཐེའུ་ཆུང་ལུ་གུ་རྒྱུད་དུ་སྦྲེལ་ལ་བྲོ་བརྡུང་བྱ་ཞིང་མཐར་གཏོར་གཞོང་སྨན་འབྲུས་བཀང་། ནང་དུ་ལོག་ནས་རྗེས་ཆོག་རྣམས་རང་གཞུང་གང་ལགས་ལྟར་བྱ་ཞིང་ལས་ཀྱི་རྗེས་མི་མངོན་པར་བྱའོ། །ཞེས་མངོན་སྤྱོད་ཀྱི་ཕྲིན་ལས་གང་ལ་ཡང་སྦྱར་དུ་རུང་བའི་སྲི་གནོན་གྱི་ལྷན་ཐབས་ནག་འགྲོས་སུ་བཀོད་པ། སྲི་ཅན་གདུག་པའི་ཚོགས་རྣམས་སྐྱེ་མེད་དབྱིངས་ཀྱི་བྲུབ་ཁུང་དུ་གནོན་པའི་ཐབས་ཟབ་མོ་བདེ་ཆེན་རྡོ་རྗེའི་རི་དབང་ཞེས་བྱ་བ་འདི་ཡང་གསང་ཆེན་རྡོ་རྗེ་སྙིང་པོའི་རྣལ་འབྱོར་པ་ཆེན་པོ་གོས་དཀར་ལྕང་ལོའི་ཟུར་ཕུད་ཅན་རྡོ་རྗེ་དཔལ་འཛིན་ནས་ཚུལ་འདི་ལྟ་བུ་ཞིག་འབྲི་དགོས་ཞེས་བཀས་བསྐུལ་ངོར། སྔགས་བཙུན་འདུ་ཤེས་གསུམ་པ་མགོ་སྤྲུལ་རྒྱ་རས་སྔར་བཞུགས་ཀྱི་ལེགས་བཤད་དུ་མ་ཞིག་ནས་བསྡུས་ཏེ་བསྐོས་ལེགས་ཚོགས་གཉིས་གོང་འཕེལ་གླིང་ནས་ཁྲིགས་སུ་བསྡེབས་པ་སྟེ་ཉེས་ཚོགས་དབྱིངས་སུ་བཤགས་ཤིང་། དགེ་བས་བསྟན་འགྲོ་ཡོངས་ལ་གནོད་ཅིང་འཚེ་བའི་ཕུང་བྱེད་སྲི་ཡི་རིགས་མ་ལུས་པ་ཆོས་ཉིད་ཀྱི་དབྱིངས་སུ་ལྷག་མེད་དུ་ཞི་ནས་སྲིད་ཁམས་མ་ལུས་པ་གནས་སྐབས་དང་མཐར་ཐུག་ཀུན་ཏུ་བདེ་སྐྱིད་ཕུན་སུམ་ཚོགས་པའི་དཔལ་ལ་ལོངས་སྤྱོད་པར་གྱུར་ཅིག་གུ། ཤུ་བྷཾ། དབྱངས་ཅན་མའི་དབང་གི་མཚམ་སྦྱོར།༄༅། དབྱངས་ཅན་མའི་ལོ་རྒྱུས་ནི། དེ་ཡང་དོན་ལ་ལྷ་མོ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་མ་ཉིད་ཡིན་ཞིང་། སྤྱིར་རྒྱུད་སྡེ་ཀུན་དང་། ཁྱད་པར་དུ་མདོ་སྡེ་ཟ་མ་ཏོག་དང་། འཇམ་དཔལ་རྩ་བའི་རྒྱུད་དང་། གསེར་འོད་དམ་པ་སོགས་ནས་གསལ་བར་གསུངས་ལ། འཇིག་རྟེན་སྤྲུལ་རྒྱུད་ལྟར་ན། སྔོན་འཇིག་རྟེན་འདི་ཆགས་ནས་མི་རིང་བར་རྫོགས་ལྡན་གྱི་ཐོག་མའི་སྐབས་ཤིག་ཏུ་རི་རབ་ཀྱི་ལྷོ་ཕྱོགས་རྒྱ་མཚོ་ཆེན་པོ་བདུད་རྩིའི་རང་བཞིན་དུ་གནས་པ་ཞིག་ཡོད་པ་ཕྱོགས་ཀུན་ནས་རླུང་གིས་བསྐྱོད་པའི་རླབས་ལས། སྲིད་པ་གསུམ་གྱི་བརྟན་གཡོའི་སྒྲ་སྐད་སྙན་པ་དུ་མ་དཔག་ཚད་བྱེ་བ་ཁྱབ་པར་གནས་སོ། །དེའི་ཚེ་ཚངས་པ་ཆེན་པོ་འཆི་མེད་ཅེས་བྱ་བས་སྒྲ་དེ་ཚངས་པའི་གྲོང་ཁྱེར་དུ་ཐོས་ནས་ལོ་སྟོང་གི་བར་སྒྲ་དེའི་རོ་མྱང་ནས་བསྡད་པའི་ཚེ། སྒྲ་སྐད་དེ་རྣམས་འདུས་པ་ལས་ལྷ་མོ་འཚེར་སྒེག་དང་ལྡན་པ་ཞིག་འཁྲུངས་སོ། །དེ་ལྟར་རྒྱ་མཚོ་ཡུམ་གྱི་དོད་དང་། ཚངས་པའི་བསམ་པ་ནི་ཡབ་ཀྱི་དོད་ཡིན་པས་ཚངས་པའི་སྲས་མོ་དང་། མཚོ་ལས་བྱུང་བས་མཚོ་བྱུང་ལྷ་མོ་དང་། རྒྱ་མཚོའི་བུ་མོ། སྒྲ་ལས་བྱུང་བས་སྒྲ་དབྱངས་ལྷ་མོ་ཞེས་གྲགས་ལ། ལྷོ་ཕྱོགས་ཀྱི་རྒྱ་མཚོ་ནི་གཤིན་རྗེའི་གནས་ཡིན་པས་གཤིན་རྗེའི་སྲིང་མོ་ཞེས་ཀྱང་གྲགས་སོ། །གང་གི་ཚེ་ལྷ་མོ་དེ་ནམ་མཁའ་ལ་འདུག་ཏེ། གང་སྐྱེ་དགུ་རྣམས་བདེན་པ་དང་ཚུལ་ཁྲིམས་དང་མི་འཚེ་བ་ལ་གནས་པའི་ཚེ་ལྷ་མོ་དེ་དགའ་བས་གར་མཛད་པས་བརྟན་གཡོ་ཐམས་ཅད་ལས་ཡིད་དུ་འོང་བའི་སྒྲ་མཐའ་ཡས་པ་འབྱུང་ཞིང་། ཡིད་ཅན་རྣམས་བློ་གྲོས་རྒྱས་ཤིང་བརྗོད་པ་ལེགས་པ་ཡིན་ལ། སྐྱེ་རྒུ་རྣམས་དེ་ལྟ་བུའི་སྤྱོད་པ་ལས་ལྡོག་པའི་ཚེ་ལྷ་མོ་དེ་ཕྱིར་ཕྱོགས་དེ་འདུག་པས་སྒྲ་ཐམས་ཅད་ཉམས་ཏེ་ཡིད་ཅན་རྣམས་རྨོངས་ཤིང་བརྗོད་མི་མཁས་པར་འགྱུར་བ་ཡིན་ཞིང་དེ་ཚེ་དབྱངས་ཅན་མ་ཞེས་གྲགས་པར་བཤད། རང་ཅག་ནང་པའི་ཐེག་པ་ཐུན་མོང་པའི་ལུགས་ལྟར་ན། སྤྱན་རས་གཟིགས་ཀྱིས་འགྲོ་བ་མཐའ་དག་ཐུགས་རྗེ་ཆེན་པོས་སྐྱོབས་པར་དགོངས་ཤིང་སྤྱན་ཆབ་གཡས་གཡོན་ལས་སྒྲོལ་མ་དཀར་ལྗང་དང་། ཚེམས་ཀྱི་མཆེ་བ་ལས་དབྱངས་ཅན་ལྷ་མོ་སོགས་སྤྲུལ་པར་གྲགས་ཤིང་། རང་འདྲའི་སྒྲ་དབྱངས་ལྷ་མོ་མང་པོ་སྐུ་ལས་སྤྲུལ་ནས་སེམས་ཅན་གྱི་དོན་བྱེད་པར་བཞེད་དེ། ལྷ་མོ་བརྒྱད་ཁྲི་བཞི་སྟོང་སྐུ་ལས་སྤྲོས་པའི་མཚམས་སུ་བདུད་སྡིག་ཅན་གྱིས་རྒྱུན་བཅད་པས་འཇིག་རྟེན་ན་མཁས་པ་ཉུང་བ་ནི་རྒྱུ་དེས་ལན་ཞིང་། ལྷ་མོ་རབ་བཀྲམ་ཞིག་བྱུང་ན་སྐྱེ་འགྲོ་ཐམས་ཅད་མཁས་པ་འབའ་ཞིག་ཏུ་འགྲོ་རྒྱུ་ཡིན་པར་ཡང་བཞེད་པ་མང་ངོ་། །ཐུན་མོང་མ་ཡིན་པའི་ལུགས་ལྟར་ན་ཉག་གཅིག་ཆོས་ཀྱི་དབྱིངས་ནས་ཡེ་ཤེས་སྒྱུ་མའི་སྣང་བརྙན་ཆུ་ཟླའི་རོལ་གར་བཞིན་དུ་རྡུལ་གཅིག་གི་སྟེང་ན་རྡུལ་སྙེད་ཀྱི་ཞིང་རྣམས་སུ་ཡེ་ནས་རང་བྱུང་རང་ཤར་ཆེན་པོར་གནས་པར་འདོད་དོ། །དེ་ལྟ་བུའི་འཕགས་མ་དེ་ཉིད་ལའང་སྒྲུབ་ཐབས་ཀྱི་རྣམ་གྲངས་མང་དུ་ཡོད་པ་ལས། འདིར་སྤྲུལ་པའི་སྐུ་མཆོག་ལུང་རིག་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བའི་རྗེས་སུ་གནང་བ་ཟབ་མོ་བསྐུར་བའི་སྐབས་སུ་བབས་པ་ཡིན། ཞེས་སོགས་བརྗོད། མགོ་སྤྲུལ་བས་སོ། འོད་ཟེར་ཅན་མའི་ཚེ་སྒྲུབ།འོད་ཟེར་ཅན་མའི་ཐུགས་སྒྲུབ་ཀྱི༔ ཚེ་སྒྲུབ་བདུད་རྩིའི་ཡང་བཅུད་བཞུགས༔ སྐབས་གང་རུང་ལ། བདག་མདུན་ཐུགས་ཀའི་འོད་ཟེར་གྱིས༔ སྐུ་གསུམ་ཞིང་གི་རྒྱལ་བ་དང་༔ ཚེ་བདག་དཔའ་མོའི་དངོས་གྲུབ་བྱིན༔ འཁོར་འདས་ཀུན་གྱི་དྭངས་བཅུད་བསྡུས༔ བདག་དང་བསྲུང་བྱའི་བླ་ཚེ་གསོས༔ འཆི་མེད་རིག་འཛིན་འགྲུབ་པར་བསམ༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་མ་རི་ཙྱཻ་ཨ་ཡུརྡ་ཏེ་བྷྲུཾ་སྭཱ་ཧཱ༔ ཞེས་བཟླས་ལ་ཚེ་འགུགས་ནི༔ ཧཱུྃ་ཧྲཱིཿ རབ་འབྱམས་རྒྱལ་བ་ཀུན་གྱི་ཐུགས་རྗེའི་འཕྲུལ༔ རྒྱལ་ཡུམ་དཔའ་མོ་འཇིགས་པ་ཀུན་སྒྲོལ་མ༔ གསང་སྔགས་རྗེས་འཛིན་ལྷ་མོ་འོད་ཟེར་ཅན༔ འཆི་མེད་མཆོག་སྩོལ་གཙུག་ཏོར་རྣམ་རྒྱལ་མས༔ བདག་དང་བསྲུང་བྱའི་ལུས་ངག་ཡིད་གསུམ་ལ༔ བྱིན་རླབས་ཚེ་ཡི་དངོས་གྲུབ་སྩལ་དུ་གསོལ༔ མདའ་དར་ཐོགས་ལ། མཱུཾ་ཧྲཱིཿ ཚེ་བདག་དཔའ་མོའི་ཐུགས་རྗེའི་འོད་ཟེར་གྱིས༔ སྐུ་གསུམ་སྟོན་པ་ཡོངས་ཀྱི་བྱིན་རླབས་དང་༔ ཉན་རང་བྱང་སེམས་མཁྱེན་བརྩེའི་ཚེ་བཅུད་བསྡུས༔ བསྲུང་བྱའི་བླ་ཚེ་འཁྱམས་པ་སོར་ཆུད་ནས༔ གསལ་སྟོང་རིག་པ་ཆོས་སྐུའི་ཀློང་ཡངས་སུ༔ འཆི་མེད་ཚེ་ཡི་དྭངས་བཅུད་སྩལ་དུ་གསོལ༔ གོང་གི་སྔགས་བརྗོད། ཧྲཱིཿ ཤར་གྱི་ཕྱོགས་ནས་དྲི་ཟ་ཕོ་མོ་ཡིས༔ སྨྱོ་འབོག་བརྒྱལ་ནད་ཤུགས་ཀྱིས་ཚེ་བརྐུས་ཤིང༔ རྣམ་གཡེང་བྱིང་རྒོད་མཐུ་ཡིས་བླ་ཉམས་པ༔ རྡོ་རྗེ་མཁའ་འགྲོས་ས་ཡི་ཁམས་ནས་ཁུག༔ དྲི་ཟ་ཕོ་མོའི་ཚེ་ཡི་བཅུད་བསྡུས་ལ༔ འཆི་མེད་རིག་འཛིན་ཚེ་ཡི་གསོས་སུ་སྩོལ༔ ཧྲཱིཿ ལྷོ་ཡི་ཕྱོགས་ནས་གཤིན་རྗེ་ཕོ་མོ་ཡིས༔ དྲག་ཤུལ་རླུང་མཁྲིས་ཤུགས་ཀྱིས་ཚེ་བརྐུས་ཤིང༔ གསང་གསུམ་དམ་ལས་འགལ་བས་བླ་ཉམས་པ༔ རིན་ཆེན་མཁའ་འགྲོས་ཆུ་ཡི་ཁམས་ནས་ཁུག༔ གཤིན་རྗེ་ཕོ་མོའི་ཚེ་ཡི་བཅུད་བསྡུས་ལ༔ འཆི་མེད་རིག་འཛིན་ཚེ་ཡི་གསོས་སུ་སྩོལ༔ ཧྲཱིཿ ནུབ་ཀྱི་ཕྱོགས་ནས་ཀླུ་དབང་ཕོ་མོ་ཡིས༔ མཛེ་ཤུ་ཕོལ་མིག་ཤུགས་ཀྱིས་ཚེ་བརྐུས་ཤིང༔ ཆད་ལྟ་མཐར་འཛིན་སྟོབས་ཀྱིས་བླ་ཉམས་པ༔ པདྨ་མཁའ་འགྲོས་མེ་ཡི་ཁམས་ནས་ཁུག༔ ཀླུ་དབང་ཕོ་མོའི་ཚེ་ཡི་བཅུད་བསྡུས་ལ༔ འཆི་མེད་རིག་འཛིན་ཚེ་ཡི་གསོས་སུ་སྩོལ༔ ཧྲཱིཿ བྱང་གི་ཕྱོགས་ནས་གནོད་སྦྱིན་ཕོ་མོ་ཡིས༔ བྱིང་རྨུག་འཐིབ་གསུམ་ཤུགས་ཀྱིས་ཚེ་བརྐུས་ཤིང༔ གཏི་མུག་རྨོངས་པའི་སྟོབས་ཀྱིས་བླ་ཉམས་པ༔ ལས་ཀྱི་མཁའ་འགྲོས་རླུང་གི་ཁམས་ནས་ཁུག༔ གནོད་སྦྱིན་ཕོ་མོའི་ཚེ་ཡི་བཅུད་བསྡུས་ལ༔ འཆི་མེད་རིག་འཛིན་ཚེ་ཡི་གསོས་སུ་སྩོལ༔ སྔགས་བཟླ། ཧྲཱིཿ ཤར་ལྷོ་མེ་ལྷའི་ལག་ནས་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ ལྷོ་ནུབ་སྲིན་པོའི་ལག་ནས་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ ནུབ་བྱང་རླུང་ལྷའི་ལག་ནས་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ བྱང་ཤར་དབང་ལྡན་ལག་ནས་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ སྟེང་ནས་ཚངས་པ་ཉི་ཟླའི་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ འོག་ནས་མཐའ་ཡས་འཇོག་པོའི་ཚེ་ཁུག་ལ༔ དེང་འདིར་སྒྲུབ་མཆོག་ཚེ་ཡི་གསོས་སུ་སྩོལ༔ ཤ་ཡི་ཁམས་ནས་ཉམས་པའི་ཚེ་དང་སྲོག༔ སྲ་བརྟན་འབྱུང་བ་ས་ཡི་དབྱིངས་ནས་ཁུག༔ ཡུམ་མཆོག་བུདྡྷ་ལོ་ཙའི་བྱིན་རླབས་ཀྱིས༔ ཉམས་པ་སོར་ཆུད་སྲོག་གི་ཀ་བ་ཚུགས༔ ཁྲག་གི་ཁམས་ནས་ཉམས་པའི་ཚེ་དང་སྲོག༔ མཉེན་ལྕུགས་འབྱུང་བ་ཆུ་ཡི་དབྱིངས་ནས་ཁུག༔ ཡུམ་མཆོག་མ་མ་ཀི་ཡི་བྱིན་རླབས་ཀྱིས༔ ཉམས་པ་སོར་ཆུད་སྲོག་གི་ཀ་བ་ཚུགས༔ དྲོད་ཀྱི་ཁམས་ནས་ཉམས་པའི་ཚེ་དང་སྲོག༔ དྲོད་གསལ་འབྱུང་བ་མེ་ཡི་དབྱིངས་ནས་ཁུག༔ ཡུམ་མཆོག་གོས་དཀར་ལྷ་མོའི་བྱིན་རླབས་ཀྱིས༔ ཉམས་པ་སོར་ཆུད་སྲོག་གི་ཀ་བ་ཚུགས༔ དབུགས་ཀྱི་ཁམས་ནས་ཉམས་པའི་ཚེ་དང་སྲོག༔ ཡངས་བསྐྱོད་འབྱུང་བ་རླུང་གི་དབྱིངས་ནས་ཁུག༔ ཡུམ་མཆོག་དམ་ཚིག་སྒྲོལ་མའི་བྱིན་རླབས་ཀྱིས༔ ཉམས་པ་སོར་ཆུད་སྲོག་གི་ཀ་བ་ཚུགས༔ རྣམ་ཤེས་ཁམས་ནས་ཉམས་པའི་ཚེ་དང་སྲོག༔ སྟོང་གསལ་འབྱུང་བ་ནམ་མཁའི་དབྱིངས་ནས་ཁུག༔ ཡུམ་མཆོག་ཀུན་ཏུ་བཟང་མོའི་བྱིན་རླབས་ཀྱིས༔ ཉམས་པ་སོར་ཆུད་སྲོག་གི་ཀ་བ་ཚུགས༔ སྒོ་གསུམ་གཡེང་ཞིང་དམ་སྡོམ་ཉམས་པ་ཡིས༔ ཚེ་སྲོག་ཆད་ཉམས་འཐོར་དང་ཡར་བ་རྣམས༔ རྩ་གསུམ་ཚེ་ལྷའི་ནུས་མཐུའི་འོད་ཟེར་གྱིས༔ ཆད་པ་མཐུད་ལ་ཉམས་པ་འཕེལ་ཞིང་རྒྱས༔ འཐོར་བ་སྡུས་ལ་ཡར་བ་མྱུར་དུ་ཁུག༔ མི་ཤིག་མི་འགྱུར་ཚེ་ཡི་དངོས་གྲུབ་སྩོལ༔ གོང་གི་སྔགས་དང་ཚེ་གཟུངས་བཟླ་བཞིན་ཚེ་མདའ་སྤྱི་བོར་བཞག ཚེ་ཆང་ལ། མཱུཾ་ཧྲཱིཿ མངར་གསུམ་ཚེ་ཡི་བཅུད་བསྡུས་ཚེ་ཡི་ཆང་༔ རིགས་སྔགས་གྲུབ་པ་རྣམས་ཀྱི་ཚེ་ཡི་སྐྱེམས༔ བསྲུང་བྱའི་ངག་གི་འཁོར་ལོར་ལེགས་བྱིན་པས༔ དུས་མིན་ཚེ་ཡི་བར་ཆད་སྒྲོལ་བར་ཤོག༔ སྔགས་བཟླ་ཞིང་བླུད། ཚེ་རིལ་ལ། མཱུཾ་ཧྲཱིཿ དཀར་མངར་ཚེ་ཡི་བཅུད་དྲིལ་རིལ་བུ་འདི༔ སྔོན་གྱི་དྲང་སྲོང་གྲུབ་པའི་ཚེ་ཡི་ཟས༔ བསྲུང་བྱའི་མགྲིན་པ་ནས་ཞུགས་ལུས་ཀུན་གང༔ དུས་མིན་འཆི་བའི་ཚེ་གེགས་ལས་གྲོལ་ཤོག༔ སྔགས་བཟླ་ཞིང་བྱིན། དེ་ནས་དངོས་གྲུབ་ཀྱི་རྫས་བླངས་ལ། མཱུཾ་ཧྲཱིཿ དུས་གསུམ་རྒྱལ་བའི་ཡུམ་མཆོག༴སོགས་ནས། དཔལ་ཐོབ་ཤོག༔ སྔགས་བརྗོད་ལ། ཀ་ཡ༴སོགས། ཧཱུྃ་ཨཱ༔ ཅེས་བརྗོད་གནས་གསུམ་གཏུག༔ ཚེ་གཟུངས་བཟླ། རྒྱས་གདབ་ནི། ཨཱ༔ འབྱུང་ལྔའི་དབྱིངས་སུ་འཁྱམས་པའི་ཚེ་དང་སྲོག༔ བསྲུང་བྱའི་ཤ་ཁྲག་དྲོད་དབུགས་རྣམ་ཤེས་ལ༔ འགྱུར་མེད་ཡེ་ཤེས་ལྔ་རུ་རྒྱས་གདབ་པས༔ དངོས་དང་དངོས་མེད་བར་ཆད་མཚན་མ་ཡིས༔ ནམ་ཡང་གླགས་མི་རྙེད་པར་རཀྵ་བྷྲུཾ༔ སྔགས་མཐར། བཛྲ་རཀྵ་རཀྵ་བྷྲུཾ༔ སྤྱི་བོར་མདའ་དར་རྒྱ་གྲམ་དུ་བཞག་ལ་ཤིས་བརྗོད་བྱའོ། །ཞེས་པ་འདི་ཡང་སྐྱིད་པ་བླ་མ་མཁྱེན་རབ་རྒྱ་མཚོའི་དགོངས་བཞེད་བཞིན་དགོངས་གཏེར་ཐང་རྒྱལ་ཚེ་སྒྲུབ་ལས་མགོ་སྤྲུལ་གྱིས་བཀོལ་ནས་བྲིས་པའོ། །དགེའོ། །དགེའོ། །དགེའོ། ། འོད་ཟེར་ཅན་མའི་དགྲ་མནན་ལྕགས་ཀྱི་མཆོད་རྟེན་ནག་པོ།དཔའ་མོ་འོད་ཟེར་ཅན་མའི་དྲག་པོའི་ལས་མཐའ་དགྲ་མནན་ལྕགས་ཀྱི་མཆོད་རྟེན་ནག་པོ་ཞེས་བྱ་བ་བཞུགས་སོ།། འཆི་བདག་བདུད་དཔུང་འཇོམ་མཛད་ཧེ་རུ་ཀའི། །སྦྱོར་ཡུམ་མཁའ་འགྲོའི་གཙོ་མོ་མ་རི་ཙྱཻར། །གུས་པས་བཏུད་ནས་མངོན་སྤྱོད་དྲག་པོའི་ལས། །དགྲ་མནན་ལྕགས་ཀྱི་མཆོད་རྟེན་ནག་པོ་འབྲི། །དེ་ཡང་བསྙེན་སྒྲུབ་ཐེམ་པའི་རྣལ་འབྱོར་བས་ཤིན་ཏུ་མ་རུང་བའི་དགྲ་དང་ཇག་ཆོམ་རྐུན་པོ་གདུག་པ་ཅན་རྣམས་མནན་པའི་ལས་ཀྱི་སྦྱོར་བ་རྩོམ་པར་འདོད་པས། གང་དུ་བྱ་བའི་གནས་སུ། རང་གཞུང་ལས། མི་བསད་ས་ལ་དུག་ཁྲག་སྦྲུས༔ དབུས་སུ་བྲུབ་ཁུང་བང་རིམ་གསུམ༔ དེ་ནང་དགྲ་འདྲེའི་ལིང་ག་ནི༔ ཟག་རྫས་བྱུགས་ཤིང་ཚོན་སྐུད་དཀྲིས༔ རྩང་མཚེ་ཡུངས་དང་མཚོན་ཆས་བསྐོར༔ ཅེས་དང་། ཁྲིའུར་ལྕགས་སྣོད་དམར་གྱི་གཏོར༔ ལྷ་གྲངས་མཚེ་ཡུངས་རྩང་ཕུར་བསྐོར༔ ཞེས་སོགས་གསུངས་པ་རྣམས་དཀྱུས་ལྟར་དང་། གཞན་ཡང་ཐུན་རྫས། མནན་སྣོད། ཕུང་རེ། བྱད་ཐག རོ་གཡམ་སོགས་བསགས་པ་མཐོང་བརྒྱུད་བཞིན་བྱའོ། །དེ་ནས་བདག་གི་རྣལ་འབྱོར་སྒྲུབ་པའི་རིམ་པ་རྣམས་གྲུབ་ནས་སྐབས་སུ་བབ་པ་ན། དགྲ་མནན་ཁོ་ནའི་ཚེ་ཐོག་མར་བསྐུལ་བ་ནི། རྒྱས་པར་སྤྲོ་ན་དྲག་བསྐུལ་ཀླུ་བདུད་ཁྲོས་པའི་ང་རོ་ཚང་བར་གཏོང་བའམ། ཅུང་ཟད་བསྡུ་ན། ཧཱུྃ་བྷྱོ༔ དགོངས་སུ་གསོལ་ལོ་རྩ་གསུམ་དམ་ཅན་ཚོགས༔ གསན་དུ་གསོལ་ལོ་འཕགས་མ་འོད་ཟེར་ཅན༔ ཐུགས་དམ་བསྐུལ་ལོ་དམ་ཅན་དྲེགས་པའི་སྡེ༔ དབྱིངས་ནས་བཞེངས་ཤིག་དགྲ་འདྲེའི་གཤེད་དུ་ཆས༔ དམ་ཅན་ཕོ་རྒྱུད་ཚོགས་རྣམས་གཡས་ནས་ཆས༔ དགྲ་བོའི་ཕོ་རྒྱུད་མ་ལུས་གྲི་རུ་སོད༔ བསྲུང་མ་མོ་རྒྱུད་ཚོགས་རྣམས་གཡོན་ནས་ཆས༔ དགྲ་བོའི་མོ་རྒྱུད་མ་ལུས་མངལ་ནས་སྐོམས༔ ཡུལ་ལྷ་དྲག་རྩལ་ཅན་རྣམས་རྒྱབ་ནས་ཆས༔ དགྲ་བོའི་ལྷ་སྲུང་རང་གཤེད་རང་ལ་ཕོབས༔ བདག་གི་ཚེ་རབས་བསྲུང་མ་མདུན་ནས་ཆས༔ དགྲ་རྐུན་ཇག་ཆོམ་ལུས་སྲོག་སོ་སོར་ཕྲོལ༔ ཁྱད་པར་སྔ་དགྲ་བརྡར་བའི་དམ་ཉམས་ཀྱི། །མགོ་བོ་ཆོད་ལ་དོན་སྙིང་རྔམ་ཟས་གྱིས། །ཕྱི་དགྲ་ཡིད་ལ་བརྣག་པའི་ལོག་འདྲེན་གྱི། །བསམ་ངན་རླུང་ལ་སྐུར་ལ་དབང་པོ་སྣུབས། །ད་དགྲ་ལག་ཏུ་ལེན་པའི་དགྲ་རྐུན་གྱི། །མིག་དབང་སྐུད་པས་ཚེམས་ལ་ཚ་གྲང་གི། །ནད་ཡམས་ཆར་དུ་ཕོབས་ལ་མི་ནོར་རློགས། །མདོར་ན་ལོག་སྦྱོར་ཤོམ་པའི་དགྲ་འདྲེ་ལ། །མངོན་སྤྱོད་དྲག་པོའི་ཕྲིན་ལས་མི་ཟད་པས། །གནམ་ལྕགས་ཐོག་མདས་བྲག་རུལ་བཤིགས་པ་ལྟར། །ད་ལྟ་སྐད་ཅིག་བརླག་པའི་ཕྲིན་ལས་མཛོད། །ཅེས་བསྐུལ་ལོ། །གསེར་སྐྱེམས་ནི། རཾ་ཡཾ་ཁཾ། བརྗོད་པས། གསེར་སྐྱེམས་ཟག་མེད་བདུད་རྩིའི་རྒྱ་མཚོར་གྱུར་བར་བསམ་ལ། ཨོཾ་ཨཱ༔ཧཱུྃ་གིས་བྱིན་གྱིས་བརླབས་ལ། རྩ་རྒྱུད་བླ་མ་ཡི་དམ་ཞི་ཁྲོའི་ཚོགས། །ཁྱད་པར་རྒྱལ་ཡུམ་ཁྲོ་མོ་འོད་ཟེར་ཅན། །རིགས་བཞི་ཁྲོ་མོ་བརྒྱད་སོགས་སྤྲུལ་འཁོར་བཅས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །དཔལ་མགོན་ཕྱག་དྲུག་རལ་གཅིག་དུད་སོལ་མ། །དྲང་སྲོང་རྡོར་ལེགས་སྡེ་དཔོན་སྔགས་བདག་ཚོགས། །འཁོར་དང་ཡང་འཁོར་སྤྲུལ་པ་ཡང་སྤྲུལ་བཅས། ། གསེར་སྐྱེམས་འདི་བཞེས་དགྲ་ཇག་ཆོམ་རྐུན་སྒྲོལ། །སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་ཡི་ཡུལ་གཞི་གནས་གཏེར་བདག །ལོ་ཟླ་ཞག་དུས་ཚེས་ལ་དབང་བའི་ལྷས། །གསེར་སྐྱེམས་འདི་བཞེས་མངོན་སྤྱོད་ཕྲིན་ལས་མཛོད། །ཅེས་ཕུལ་ལོ། །གཟུ་དཔང་ནི། ཧཱུྃ་བྷྱོཿ དགོངས་ཤིག་རྩ་གསུམ་སྲུང་མ་རྣམས། །གསོན་ཅིག་ཁྲོ་མོ་འོད་ཟེར་ཅན། །གཟིགས་ཤིག་སྤྲུལ་པ་ཡང་སྤྲུལ་འཁོར། །གཟུ་དཔང་མཛོད་ཅིག་མཁྱེན་ལྡན་རྣམས། །ཐབས་ཀྱིས་གདུལ་དཀའ་འདུལ་བའི་ཕྱིར། །ཐུགས་རྗེས་ཡེ་ཤེས་སྐུར་བཞེངས་ལ། །དབྱིངས་ནས་དགོངས་ཤིང་གཟིགས་སུ་གསོལ། །རྣལ་འབྱོར་སྒྲུབ་པོའི་གཟུ་དཔང་མཛོད། །རིག་འཛིན་བདག་ལ་དགྲ་བྱུང་ན། །མ་ཉེས་མ་ཡོ་སྲུང་མས་མཁྱེན། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྣང་སྲིད་ལྷ་འདྲེས་ཆོད། །དམ་ཉམས་དགྲ་བོ་ལས་ངན་འདིས། །རྒྱལ་བསྟན་བཤིགས་ཤིང་མཆོག་གསུམ་སྨད། །བླ་མའི་ཐུགས་དཀྲུགས་འདུས་སྡེ་བརྙས། །རྟེན་གསུམ་བཤིག་ཅིང་མཚམས་མེད་སྤྱད། །ལུས་ཀྱིས་དཀོར་འཕྲོག་བརྡུང་བརྡེག་བྱས། །ངག་གིས་ངན་བརྗོད་ཡ་ག་བསྒྲགས། །ཡིད་ཀྱིས་བསམ་ངན་དུག་ལྟར་གཡོས། །ཚེ་དང་སྲོག་ལ་བར་ཆད་བྱས། །སྔ་དགྲ་ཇག་ཆོམ་རྐུ་འཕྲོག་བྱས། །ཕྱི་དགྲ་བསམ་ངན་དུག་ལྟར་གཡོས། །ད་དགྲ་ངན་སྦྱོར་སྣ་ཚོགས་བརྩམས། །མི་ཕྱུག་ནོར་ལ་བྱེ་བྲལ་གཏོང་། །ཉམས་པ་བདུན་ལྡན་ཞིང་བཅུ་ཚངས། །འབྲས་བུ་ཤིན་ཏུ་བརྣག་དཀའ་ལ། །ཐོགས་མེད་ཡེ་ཤེས་སྤྱན་ལྡན་རྣམས། །མྱུར་དུ་མངོན་སྤྱོད་ཕྲིན་ལས་མཛོད། །དམིགས་བྱ་བསྐྱེད་པ་ནི། ཨེ་སྥ་ར་ཎ་ཕཊ། མདུན་བསྐྱེད་རྒྱལ་ཡུམ་ཁྲོ་མོའི་དཀྱིལ་འཁོར་གྱི་འོག་ཕྱོགས་སུ་དགྲ་བོ་བྲུབ་པའི་བཙོན་དོང་ཨེ་ལས་གྲུ་གསུམ་གནམ་ལྕགས་ཀྱི་ཁང་སྒྲོམ་དམར་ནག་འབར་བ། ཁ་དོག་ཅིང་གཏིང་ཟབ་པའི་ནང་དུ་ནྲྀ་དང་ཏྲི་ལས་བསྒྲལ་བའི་ཞིང་བཅུ་དང་ཉམས་པ་བདུན་ལ་གཏོགས་པའི་དགྲ་བགེགས་གང་ལ་བྱ་བ་དེ་རྣམས་མྱ་ངན་གྱི་ཕྱག་རྒྱ་ཅན་ཉམས་ཐག་པའི་གཟུགས་སུ་གནས་པར་གྱུར་བར་བསམ་ལ། ཕོ་ཉ་སྤྲོ་བ་ནི། བདག་མདུན་ཐུགས་ལས་འོད་ཟེར་དམར་ནག་འཕྲོས༔ དེ་ལས་འགུགས་བྱེད་ཕོ་ཉ་རྡུལ་ལྟར་འཚུབསཿ བསྟན་འགྲོར་གནོད་བྱེད་སྤྱི་དགྲ་སྒོས་དགྲ་དང༔ ཁྱད་པར་བདག་ལ་དངོས་སུ་གཤེ་ཞིང་སྡང༔ ནོར་རྫས་ཕྲོགས་ཤིང་བརྡུང་བརྡེག་སྨྲ་ཕབ་བྱེད༔ ལྐོག་ནས་བསམ་ངན་རྐུ་ཤོམ་ཟས་དུག་སྦྱོར༔ མི་ཁ་སྒྲོ་སྐུར་གཏམ་ངན་ཕྱོགས་སུ་བཀྲམ༔ གསོད་ཤོམ་མཐུ་གཏད་ཁ་རྗེ་དབང་ཐང་ལ༔ གནོད་ཅིང་ལེགས་པའི་ལམ་ལ་བར་གཅོད་པའི༔ མུ་སྟེགས་ཀླ་ཀློ་མཐའ་དམག་བོད་ཆེན་དགྲ༔ ཡིད་ལ་དམིགས་པའི་ཇག་ཆོམ་རྐུན་པོ་དང༔ ཕུང་བྱེད་དམ་སྲི་འབྱུང་པོའི་བླ་ཚེ་སྲོག༔ ལྕགས་ཀྱུས་བཀུགས་ཤིང་ཞགས་པས་རབ་ཏུ་བཅིང་༔ ལྕགས་སྒྲོག་གིས་བསྡམས་དྲིལ་བུས་མྱོས་བྱས་ཏེ༔ རང་དབང་མེད་པར་ཉེས་ཅན་བཙོན་ཁྲིད་ལྟར༔ མདུན་དུ་གྲུ་གསུམ་དགྲ་གཟུགས་རྫས་ལ་བསྟིམས༔ འགུགས་པ་ནི། ན་མོ། རིག་འཛིན་རྩ་རྒྱུད་ཀྱི་བླ་མ། ཡི་དམ་རྒྱལ་བ་ཞི་ཁྲོ། གནས་གསུམ་གྱི་དཔའ་བོ་མཁའ་འགྲོ། བསྟན་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའ་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་རྣམས་ཀྱི་བཀའ་བདེན་པ་དང་། ཁྱད་པར་དུ་དྲག་མོ་འོད་ཟེར་ཅན་གྱི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པའི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་ཅིང་འགྱུར་བ་མེད་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པ་ཆེན་པོའི་མཐུས། མུ་སྟེགས་ཀླ་ཀློ་མཐའ་དམག་རྒྱ་འདྲེ་དགྲ་སྲི་གདུག་པ་ཅན་རྣམས་དང་། ཁྱད་པར་བདག་ཅག་དཔོན་སློབ་ཡོན་མཆོད་རྣམས་ལ་གནོད་ཅིང་འཚེ་བར་བྱེད་པའི་ཇག་ཆོམ་རྐུན་པོ་ཡིད་ལ་དམིགས་པ་རྣམས་ཀྱི་བླ་སྲོག་རྣམ་པར་ཤེས་པ་སྲིད་པ་གསུམ་གྱི་ཁོང་གང་ན་གནས་ཀྱང་སྐད་ཅིག་རང་དབང་མེད་པར་དགྲ་གཟུགས་ལིང་ཀ་མིང་རུས། བླ་རྟེན་རྫས་དང་བཅས་པ་འདི་རྣམས་དང་དབྱེར་མེད་དུ་ཁུག་ཅིག ཨོཾ་ཨཱརྱ་མ་རི་ཙྱཻ་མཱུཾ་སྭཱཧཱ༔ ནྲྀ་ཏྲི་སརྦ་ཤ་ཏྲུཾ་ཧུར་ཐུམ་ཛཿ ནྲྀ་ཤ་ཀུ་རུ་ནྲྀ་ཤ་ཀུ་རུ༔ ཁོ་སོ་པ་ཏི་ཡཾ་རི་ཏི༔ ཡཾ་སེན་ཡཾ་སེན་མེན་ཡཾ༔ སྙིང་ཚལ་པ་བཾ་རིལ་རྦད༔ གནོད་བྱེད་མཐའ་དམག་ཡུལ་འདྲེ་དགྲ་རྐུན་ཇག་པའི་བླ་རྟེན་ཚེ་རྟེན་སྲོག་རྟེན་ཐམས་ཅད་ཁུག་ཅིག་ཛ་ཛཿ ཛཿཧཱུྃ་བཾ་ཧོ༔ ལན་གསུམ་མམ་དགུ་སོགས་ཀྱིས་འགུགས་གཞུག་དྲག་པོ་རྟགས་ཐོན་དུ་བྱ། བསྒྲལ་མནན་ལྟོ་སྦྱར་ཏེ་གཏོང་སྐབས་བསྒྲལ་ལས་ཀྱི་གཞུང་གི་འགུགས་པའི་བར་བརྗོད་པས་འཐུས་ཕྱིར་འདི་ཡན་གཏོང་མི་དགོས། དེ་ནས་གང་ལྟར་ཡང་ཁྱད་པར་དུ་དགྲ་བོའི་བླ་འགུགས་པ་ནི། ཧཱུྃ་བྷྱོ༔ ད་ནི་དགྲ་བོ་བསྒྲལ་བའི་དུས་ལ་བབས། །ཇག་ཆོམ་རྐུན་པོ་འགུགས་པའི་དུས་ལ་བབས། །ད་ལྟ་ནམ་གྱི་སྲོད་ལ་བབས་དུས་འདིར། །དམ་ཉམས་ཆོམ་རྐུན་ལས་ལ་གཡེངས་བའི་དུས། །དགྲ་བོའི་བླ་ཚེ་རྣམ་ཤེས་བླ་ཚེ་གཡེངས་བའི་ཚེ། །བླ་འཁྱམས་ལས་ངན་མྱུར་དུ་ཁུག་ལ་ཤོག བྷྱོ༔ ད་ལྟ་ནམ་གྱི་གུང་ལ་བབས་པའི་དུས། །སེམས་མེད་འབྱུང་བ་ཆུ་ཡང་གཉིད་ལོག་གི། །དགྲ་བོ་ལས་ངན་སྡིག་ཅན་གཉིད་ལོག་ཚེ། །བླ་ཡིད་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ནམ་གྱི་ཐོ་རངས་ལ་བབས་ཚེ། །དམ་ཉམས་དགྲ་བོའི་བླ་ཚེ་ཤེས་པ་འཕྱོ། །དགྲ་བོའི་བླ་ཚེ་རྣམ་ཤེས་འཕྱོ་བའི་དུས། །བླ་ཚེ་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ནམ་ལང་ཉི་མ་ཤར་བའི་དུས། །མི་ཕྱུགས་ཐམས་ཅད་ལས་ལ་འགྲིམ་དུས་སུ། །དགྲ་བོའི་རྣམ་ཤེས་སྒོ་རུ་ཐོན་པའི་དུས། །བླ་ཡིད་འཁྱམས་པོ་མྱུར་དུ་ཁུག་ལ་ཤོག །བྷྱོ༔ ད་ལྟ་ཉི་མའི་གུང་ལ་བབས་པའི་དུས། །དགྲ་རྐུན་ཇག་པའི་རྣམ་ཤེས་བྱིང་ཞིང་མྱོས། །དགྲ་བོའི་བླ་ཚེ་འཐོམས་ཤིང་མྱོས་པའི་དུས། །བླ་ཡིད་སེམས་གསུམ་མྱུར་དུ་ཁུག་ལ་ཤོག །བྷྱོ༔ ད་ལྟ་ཉི་ནུབ་གྲིབ་སོ་ཕོག་པའི་དུས། །སྙིང་མི་དགའ་ཞིང་ཤེས་པ་འཐིབ་ཅིང་རྨུགས། །དགྲ་བོའི་བླ་ཚེ་རྣམ་ཤེས་རྨོངས་པའི་དུས། །ལས་ངན་བླ་འཁྱམས་མྱུར་དུ་ཁུག་ལ་ཤོག །བླ་འཁྱམས་ལས་ངན་འཕྱོ་བའི་དུས་དྲུག་ལ། །བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུགས། །མགོན་མེད་བྱིའུ་ཕྲུག་རྒྱ་ཁྲས་ཟིན་པ་ལྟར། །རང་དབང་མེད་པར་མྱུར་དུ་ཁུག་ལ་ཤོག །བྷྱོ༔ དགྲ་བོའི་བླ་འཁྱམས་མི་རུ་བརྫུ་བ་ན། །ཕོ་ཉ་གནོད་སྦྱིན་སྲིན་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་ཤ་བར་བརྫུ་བ་ན། །ཕོ་ཉ་གསེར་གྱི་སྟག་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་དགོ་བར་བརྫུ་བ་ན། །ཕོ་ཉ་ལྕགས་དོམ་ནག་པོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་ལུག་ཏུ་བརྫུ་བ་ན། །ཕོ་ཉ་ལྕགས་ཀྱི་སྤྱང་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་ར་རུ་བརྫུ་བ་ན། །ཕོ་ཉ་བྱི་རུའི་ཁྱི་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་བྱ་རུ་བརྫུ་བ་ན། །ཕོ་ཉ་བྱ་རྒྱལ་ཁྱུང་གི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམས་གླ་བར་བརྫུ་བ་ན། །ཕོ་ཉ་གསེར་གྱི་འཕར་བའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག ། དགྲ་བོའི་བླ་འཁྱམས་བོང་བུར་བརྫུ་བ་ན། །ཕོ་ཉ་ཟངས་ཀྱི་དྲེད་མོའི་སྐུར་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །བྷྱོ༔ དམ་ཉམས་དགྲ་བོའི་བླ་རྟགས་བརྒྱད་པོ་ལ། །ཕོ་ཉ་གཉེན་པོ་བརྒྱད་ཀྱི་སྐུར་སྤྲུལ་ནས། །བྲུབ་ཁུང་ཐར་མེད་བཙོན་དོང་འདིའི་ནང་དུ། །དགྲ་གཟུགས་རྟེན་ལ་དམ་ཉམས་བླ་སྲོག་ཁུག །བླ་ཚེ་སྲོག་ལ་དྲག་པོའི་ཕུར་བུ་ཐོབ། །ཕུར་མཚོན་ཐུན་གྱིས་ལུས་སེམས་ཕྱེ་མར་ཐོངས། །དགྲ་བོའི་བླ་སྲོག་སྟེང་དུ་མཱ་ར་ཡ། །སྲོག་རྩ་དམར་པོ་རྦད་ཀྱིས་ཆོད་ལ་ཤོག །ར་དང་ལུག་དང་བོང་བུ་རྣམ་པ་གསུམ། །བླ་རྟགས་ཡིན་པས་མྱུར་དུ་ཁུག་ལ་ཤོག །སོ་དང་སེན་མོ་པགས་པ་གསུམ་པོ་ནི། །ཕྱི་རྟགས་ཡིན་པས་ད་ལྟ་ཁྱེར་ལ་ཤོག །རྣ་བ་ལྕེ་དང་མིག་བུ་གསུམ་པོ་ནི། །དབང་རྟགས་ཡིན་པས་མྱུར་དུ་ཁྱེར་ལ་ཤོག །གློ་བ་སྙིང་དང་མཆིན་པ་གསུམ་པོ་ནི། །དོན་སྙིང་ཡིན་པས་མ་ཐོགས་ཁྱེར་ལ་ཤོག །གཉེ་མ་སྒྱུ་མ་མཁལ་མ་གསུམ་པོ་ནི། །ནང་ཁྲོལ་ཡིན་པས་མ་འགྱངས་ཁྱེར་ལ་ཤོག །ཤ་ཁྲག་བརྒྱན་པའི་གཏོར་མ་འདི་བཞེས་ལ། །བཅོལ་པའི་ཕྲིན་ལས་ད་ལྟ་མྱུར་འགྲུབ་མཛོད། །ཅེས་བསྐུལ་ཞིང་། རྩ་སྔགས་མཐར། གནོད་བྱེད་མཐའ་དམག་ཡུལ་འདྲེ་དགྲ་ཇག་ཆོམ་རྐུན་ཐམས་ཅད་ཀྱི་བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོགས་མྱོགས༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོགས༔ ལིང་ཤག༔ ལིང་ཐུཾ༔ ཙ་མུནྟྲི་བྷྱོ་ཛ༔ ཞེས་བླ་འགུགས་ལྡེ་མིག་གི་སྔགས་ཅི་ནུས་དང་། ཡང་རྩ་སྔགས་མཐར། ནྲྀ་ཛ་ཏིལ་བཾ་རིལ༔ ཨ་ཀརྴ་ཡ་ཛ་ཛཿ ནྲྀ་ཤ་ཀུ་རུ་ནྲྀ་ཤ་ཀུ་རུ༔ ཁོ་སོ་བ་ཏི༔ ཡཾ་རི་ཏི༔ ཡཾ་སེན་ཡཾ་སེན༔ སྙིང་ཚལ་པ་བཾ་རིལ་རྦད༔ གནོད་བྱེད་མཐའ་དམག་ཡུལ་འདྲེ་དགྲ་རྐུན་ཇག་པའི་བླ་རྟེན་ཚེ་རྟེན་སྲོག་རྟེན་ཐམས་ཅད་ཁུག་ཅིག་ཛ་ཛ༔ ཞེས་བཏགས་པའང་མང་དུ་བཟླས་ལ། བསྒྲལ་མནན་ལྟོ་སྦྱར་ཚེ་ཕྱག་རྒྱ་རྣམ་བཞིས་རྒྱས་བཏབ་པ་སོགས་ནས་ཚེ་ཁྲུས་ཀྱི་དགོངས་པའི་མཇུག་བར་བསྒྲལ་ལས་ཀྱི་དཀྱུས་ལྟར་བཏང་ནས་འོག་གི་བསད་དམིགས་ལ་འཇུག མནན་པ་ཁོ་ནའི་སྐབས་ཕྱག་རྒྱ་རྣམ་བཞིས་རྒྱས་གདབ་འདིར་ལེན་ཏེ། ཧཱུྃ་ཧཱུྃ༔ དཀོན་མཆོག་བདེན་མཐུས་བཀུགས་པའི་མཐའ་བཞིའི་དམག༔ དགྲ་ཇག་ཆོམ་རྐུན་ཡུལ་འདྲེ་ཕུང་སྲི་རྣམས༔ ཛཿཡིག་ལས་སྐྱེས་ཕོ་ཉ་ལྕགས་ཀྱུ་ཅན༔ གྲངས་མེད་འཕྲོས་པས་ལྕགས་ཀྱུས་སྙིང་ནས་བཟུང་༔ དམ་ཉམས་དགྲ་བགེགས་རང་དབང་མེད་པར་བཀུགས༔ དམིགས་རྟེན་གཟུགས་དང་དབྱེར་མེད་གཅིག་ཏུ་གྱུར༔ ཧཱུྃ་ཡིག་ལས་སྐྱེས་ཕོ་ཉ་ཞགས་པ་ཅན༔ བདག་མདུན་ཐུགས་ལས་གྲངས་མེད་འཕྲོས་པ་ཡིས༔ ཞགས་པ་ནག་པོས་ཡན་ལག་རབ་ཏུ་བསྡམ༔ དམིགས་རྟེན་གཟུགས་དང་ཐ་དད་མེད་པར་གྱུར༔ བཾ་ཡིག་ལས་སྐྱེས་ཕོ་ཉ་ལྕགས་སྒྲོག་ཅན༔ རྡུལ་དུ་འཚུབས་པས་རྐང་ལག་ལྕགས་སུ་བཅུག༔ དམིགས་པའི་གཟུགས་དང་དབྱེ་བ་མེད་པ་རུ༔ རབ་ཏུ་བསྡམ་པས་རང་དབང་མེད་པར་གྱུར༔ ཧོ་ལས་བྱུང་བའི་ཕོ་ཉ་དྲིལ་བུ་ཅན༔ གྲངས་མེད་འཕྲོས་པས་དགྲ་བགེགས་གང་ཡིན་གྱི༔ ཡིད་མྱོས་དྲན་པ་སྟོར་ཏེ་དབང་མེད་པར༔ གཟུགས་དང་དབྱེར་མེད་མཉམ་པ་ཉིད་དུ་གྱུར༔ རྩ་བའི་སྔགས་ཀྱི་ཤམ་བུ་རུ༔ བཛྲ་ཨངྐུ་ཤ་ཡ་ཛ༔ རཏྣ་པ་ཤ་ཧཱུྃ༔ པདྨ་སྥོ་ཊ་བཾ༔ ཀརྨ་གནྚེ་ཧོ༔ དེ་ནས་ལྷ་དང་དབྱེ་བ་ནི། དམར་གཏོར་དང་ཕུད་ཀོང་ཨ་ཀ་རོས་བྱིན་གྱིས་བརླབས་ལ། རྩ་སྔགས་དང་བཱ་ལིང་ཏའི་སྔགས་ཀྱིས་ཕུལ་ནས། ཧཱུྃ་བྷྱོ༔ ཡེ་ཤེས་སྤྱན་ལྡན་ལྷ་སྲུང་དམ་ཚིག་ཅན༔ ཁྱེད་རྣམས་ཐུགས་རྗེ་ཕྲིན་ལས་དུས་ལ་བབས། །ཞིང་བཅུ་ཉམས་པ་བདུན་ཚང་དགྲ་བོ་ལ། །བསྲུང་སྐྱོབས་བྱེད་པའི་ཡེ་ཤེས་ལྷ་ཡོད་ན། །མགོན་སྐྱབས་མ་མཛད་འགྲ་འདིའི་བདུད་དུ་ཕོབས༔ ཐུགས་རྗེ་ཆེན་པོས་ཆོས་ཀྱི་དབྱིངས་སུ་སྒྲོལ། །དགྲ་འདི་སྐྱོབས་བྱེད་འཇིག་རྟེན་ལྷ་འདྲེ་རྣམས། །དགྱེས་མཆོད་གཏོར་སྐྱེམས་བཞེས་ལ་རིང་དུ་སྤོངས། །ཕུང་བྱེད་དགྲ་འདྲེའི་སྲོག་གཤེད་མ་མཛད་ན། །བསྲུང་བྱ་སྲུང་བྱེད་ཆབ་གཅིག་འཇོམ་པར་འགྱུར། །དེ་བས་དམ་ཉམས་ཕུང་བྱེད་སྡིག་ཅན་དགྲ། །སྐྱོབས་བྱེད་ལྷ་དང་ཕྱེས་ལ་བདུད་དང་སྤྲོད། །ཞིང་བཅུ་ལྡན་པའི་དམ་ཉམས་དགྲ་བོ་རྣམས། །སྲུང་སྐྱོབས་བྱེད་པའི་ལྷ་དང་ད་ལྟ་ཕྲོལ། །བསྲུང་བཟློག་མཁན་གྱི་བན་བོན་རྡུལ་དུ་རློགས། །རུས་ནས་ཉེ་བའི་ཕ་སྤུན་ནང་ནས་ཤིག །ཤ་ནས་ཉེ་བའི་ཞང་པོ་གྲི་རུ་སོད། །མནའ་ཐོས་སྦྲེལ་བའི་གྲོགས་པོ་བདུད་དུ་ཕོབ། །ཕ་མིང་མ་སྲིང་བྱམས་པའི་མགོ་བོ་ཆོད། །བུ་ཚ་རིགས་རྒྱུད་འཛིན་པའི་སྙིང་ཁྲག་འཐུང་། །སྲིད་སྡེ་ཁྱིམ་ཚང་དགོས་ཚན་དགྲ་རུ་སློངས། །ཕོ་རྒྱུད་རབ་ཆད་སྒོང་ཚལ་ཧུར་ཐུམ་སོད། །མོ་རྒྱུད་མགོ་ལ་ཡུག་རབས་རྒྱུན་མ་གཅོད། །མགྱོགས་པའི་རྟ་སོད་སྲ་བའི་གོ་ཆ་ཤུས། །རྣོ་བའི་མཚོན་དབྲོག་དཔའ་བའི་དོན་སྙིང་ཕྱུངས། །རུ་བའི་སྦྲ་གཏུབ་ཐུ་བའི་སྒོ་ཁྱི་སོད། །སྡུག་བསྔལ་ཆར་དྲག་བཞིན་དུ་བར་མ་གཅོད། །མྱ་ངན་མེ་ཆེན་བཞིན་དུ་འབར་དུ་ཆུག །བསམ་པའི་དོན་རྣམས་འགྲུབ་པའི་སྐབས་མ་གཏོང་། །ཕོ་སྲི་མོ་སྲི་ཆེ་སྲི་ཆུང་སྲི་དང་། །རྒན་སྲི་གཞོན་སྲི་དར་སྲི་གོད་སྲི་དང་། །དགྲ་སྲི་མཚོན་སྲི་ནད་སྲི་མ་ལུས་ཕོབས། །ལྟས་ངན་གདོན་བགེགས་གློ་བུར་ཡེ་འདྲོག་དང་། །ནད་ཡམས་དུས་མིན་འཆི་བ་མཐའ་དག་ཀུན། །གནོད་སྡང་གདུག་སེམས་ལྡན་རྣམས་སྟེང་དུ་བཟློག །བཀྲ་མི་ཤིས་དང་མི་རུང་སྣ་ཚོགས་ཀྱིས། །ལོ་ཟླ་ཞག་དང་ཟ་མར་མ་འགྱང་བར། །མངོན་སྤྱོད་དྲག་པོས་མྱུར་སྒྲོལ་ཕྲིན་ལས་མཛོད། །དབྱེ་རྒྱ་བཅས། རྩ་སྔགས་མཐར། མ་མ་ཏྲག་རུ་ཏྲ་མ་ར་ཡ་ཕྱེ་ཕྱེ། ཨ་ནྲྀ་ཏྲག་རཀྴ་མ་ར་ཡ་ཕྱེ་ཕྱེ། ཡ་མ་ར་ཛ། ཀླུ་ལིང་ཡ་ཀུན་སང་། མོ་ལྕགས་སང་སང་ཀུ་ཏ་ཀུ་ཏ་ཧཱུྃ་ཕཊ། ཕུང་བྱེད་དམ་སྲི་དགྲ་ཇག་ཆོམ་རྐུན། མུ་སྟེགས་ཀླ་ཀློ་མཐའ་དམག་ཡུལ་འདྲེ་གདུག་པ་ཅན་རྣམས་ཀྱི་ཕ་ལྷ་མ་ལྷ་ཞང་ལྷ་ཡུལ་ལྷ་སྲོག་ལྷ་ཐམས་ཅད་དང་ཕྱེས་ཤིག ཕོ་སྲི་མོ་སྲི་ཞང་སྲི་དགྲ་སྲི་ཡུལ་འདྲེ་སྲོག་གཅོད་ཀྱི་ཤན་པ་རྣམས་དང་སྤྲོད་ཅིག ཅེས་བརྗོད་ཅིང་། བདག་གི་ཤངས་སྒྲོམ་དང་བ་སྤུའི་བུ་ག་ཐམས་ཅད་ནས་སྤྲུལ་པའི་ཁྲོ་ཚོགས་ནམ་མཁའ་གང་བར་འཕྲོས། ཁོའི་ལྷ་སྲུང་ཐམས་ཅད་བྱ་སྤུ་རླུང་གིས་ཁྱེར་བ་ལྟར་བསྐྲད་པར་བསམ་མོ། དེ་ནས་བསད་དམིགས་ནི། བདག་མདུན་ལྷ་ཚོགས་ཐུགས་ཀ་ནས། །བྷྲུཾ་འཕྲོས་དམིགས་བྱའི་སྙིང་གར་ཞུགས། །གནམ་ལྕགས་ཙཀྲ་རྩིབས་དྲུག་པ། །རྣོ་དབལ་གཅོད་པའི་དབལ་ངར་ཅན། །སྤུ་གྲི་རེག་གཅོད་རླུང་ལྟར་འཁོར། །ཤ་རུས་ནང་ཁྲོལ་དུམ་བུར་གཏུབ། །རྔམ་ཤིང་ཧབ་དིར་ཟ་བར་གྱུར། །ཨོཾ་མ་རི་ཙྱཻ་སྭཱཧཱ། ཞེས་དང་ལས་སྦྱོར་དྲག་སྔགས་མེ་དཔུང་མ་བཅས་པའི་མཐར། དགྲ་བགེགས་བྱད་མ་ཇག་ཆོམ་རྐུན་པོའི་ལུས་ངག་ཡིད་གསུམ་མ་ར་ཡ་རྦད། བྷྱོ་བཟློག་སོད་སྟྭཾ་བྷ་ཡ་ནན། ཅེས་ཏིང་འཛིན་གསལ་བཞིན་ངར་ལྡན་དུ་བཟླས་ནས་ཐུན་ལ་བསྔགས་ནས་བརྡེག་པར་བྱ། བསད་རྟགས་ཐོན་ནས་མནན་དམིགས་ནི། ཧཱུྃ་བྷྱོ༔ བདག་མདུན་ཐུགས་ལས་དཔའ་མོ་འོད་ཟེར་ཅན། །གསེར་མདོག་ཁབ་སྐུད་འཛིན་པ་གྲངས་མེད་འཕྲོས། བྱད་ཕུར་མཐུ་གཏད་རྦོད་གཏོང་རིགས་སྔགས་མཁན། །དགྲ་ཇག་ཆོམ་རྐུན་གནོད་སྡང་གདུག་སེམས་ཅན། །མཐོ་གནོན་སྨྲ་ལབ་ངན་བརྗོད་གྱོད་གླེང་མཁན། །ཐམས་ཅད་ཁ་མིག་བཙེམས་ནས་ནུས་མེད་བྱས། །སླར་ཡང་ཁྲོ་མཚོན་ཐུན་རྫས་ཆེས་ཆེར་འཕྲོས། །སྡང་བྱེད་དགྲ་དང་གནོད་བྱེད་བགེགས་རྣམས་ཀྱི། །བླ་སྲོག་རྣམ་ཤེས་གཟུགས་བྱང་ལིང་ཀ་དང་། །དབྱེར་མེད་བཀུག་བསྟིམ་བརྡེག་ཅིང་གཞོབ་ཏུ་བསྲེགས། །གཟིར་ཞིང་བཅོམ་པས་བག་ཆགས་སྣང་གཟུགས་ཀྱི། །དབང་པོའི་སྒོ་རྣམས་གནམ་ལྕགས་ཞུན་མས་གཡོག །གནས་ལྔར་གནམ་ལྕགས་འཁོར་ལོ་རྩིབས་བརྒྱད་པ། །ལྟེ་བར་སྣ་ཚོགས་རྡོ་རྗེས་མཚན་པ་དང་། །ཚིགས་བཞིར་རྒྱ་གྲམ་ལྕི་ཞིང་འཐས་པ་རེས། །སྒོ་གསུམ་གཡོ་འགུལ་སྨྲ་བསམ་མེད་པར་མནན། །དེ་སྟེང་འོད་ཟེར་ཅན་མའི་ལྷ་ཚོགས་ཀྱིས། །རྔམས་བརྗིད་བྲོ་གར་འཁྲབ་པས་ལྡང་མེད་གྱུར། ཨོཾ་མ་རི་ཙྱཻ་བ་ཏ་ལི་བ་ཏ་ལི་བ་ར་ཧ་མུ་ཁཾ་སརྦ་དུཥྚཾ་པྲ་དུཥྚཾ་གནོད་བྱེད་དགྲ་ཇག་ཆོམ་རྐུན་རྒྱལ་བསེན་ཡུལ་འདྲེ་འབྱུང་པོ་དམ་སྲི་ཀླ་ཀློ་མུ་སྟེགས་རྒྱ་འདྲེ་མཐའ་དམག་གདུག་པ་ཅན་ཐམས་ཅད་ཀྱི་ཙཀྵུ་མུ་ཁཾ་བྷནྡྷ་བྷནྡྷ་ཧཱུྃ་ཧཱུྃ་ཕཊ༔ ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན༔ སྟཾ་བྷ་ཡ་ནན་ནན༔ ཅེས་སོགས་མནན་རྟགས་ཐོན་བར་བཟླ་ཞིང་། ཐུན་རྫས་རྣམས་དྲེགས་པ་ལྷ་སྲིན་སྡེ་བརྒྱད་འདུས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོ་དམིགས་བྱའི་སྙིང་གར་གཟིར་ཞིང་བསྡིགས་པས་གཟུགས་ཕུང་བྱེ་མའི་མཁར་ཆུས་བཤིགས་པ་ལྟར་རྡུལ་དུ་བཅོམ་ནས་མཐར་རྣམ་ཤེས་ཀྱི་ངོ་བོ་ནྲྀ་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམ་གྱིས་བསད་པར་བསམ་ལ། ཧཱུྃ་བྷྱོ༔ དྲག་མོ་འོད་ཟེར་ཅན་མ་ཡི། །ཕོ་ཉར་བསྔགས་པ་ཐུན་གྱི་བདག །དགྲ་བགེགས་སྒྲོལ་ཕྱིར་ལས་ལ་ཡ། །སྣ་ཚོགས་དྲག་པོ་ཐུན་གྱི་རྫས། །གློག་ལྟར་འཁྱུག་ཅིང་ཐོག་ལྟར་འབེབ། །དགྲ་བགེགས་ལུས་སེམས་འབེན་ལ་ཡ། །རྩ་སྔགས་དང་དྲག་སྔགས་མེ་དཔུང་མའི་མཐར། དགྲ་བགེགས་བྱད་མ་ཇག་ཆོམ་རྐུན་པོ་དམ་སྲི་རྒྱ་འདྲེ་མཐའ་དམག་ཡིད་ལ་བརྣག་པ་ཐམས་ཅད་ཀྱི་ལུས་ངག་ཡིད་གསུམ་མ་ར་ཡ་རྦད། བྷྱོ་བཟློག་སོད་སྟྭཾ་བྷ་ཡ་ནན། ནྲྀ་ཏྲི་སརྦ་ཤ་ཏྲུཾ་མ་ར་ཡ་རྦད། ཅེས་ཐུན་བརྡེག་ཅིང་། གདབ་ཀ་དང་འབྲེལ་ཚེ། འབྱུང་བཞིའི་ཐུན་བརྡེགས་ནས་བཟུང་བསྟབ་པའི་མཇུག་ཡན་བཏང་། དེ་ནས་ཐུན་གཏོར་ལ་དགུག་གཞུག་དང་བྱིན་རླབས་བྱས་ཏེ། རྩ་སྔགས་དང་། ནྲྀ་ཏྲི་སརྦ་ཤ་ཏྲུཾ་མ་ར་ཡ་མ་ཧཱ་བཱ་ལིང་ཏ་ཁ་ཁ་ཁ་ཧཱི་ཁ་ཧཱི། ལན་གསུམ་གྱིས་ཕུལ་ལ། བཛྲ་པུཥྤེ་སོགས་ཀྱིས་མཆོད། གང་གི་མཚན་ཙམ་སོགས་ཀྱིས་བསྟོད། ཧཱུྃ་བྷྱོ༔ རྒྱལ་ཡུམ་ཁྲོ་མོ་འོད་ཟེར་ཅན། །འཁོར་ཚོགས་སྤྲུལ་པར་བཅས་པ་རྣམས། །དམར་གྱི་གཏོར་མ་འདི་བཞེས་ལ། །རྣལ་འབྱོར་དཔོན་སློབ་འཁོར་བཅས་ཀྱི། །མི་མཐུན་ཞི་ཞིང་ལེགས་ཚོགས་རྒྱས། །མོས་བཞི་དབང་སྡུད་ཕྲིན་ལས་མཛོད། །དགྲ་གདོན་བར་ཆད་དམ་སྲི་བདུད། །སྲོག་ལ་རྒོལ་བའི་གདུག་པ་ཅན། །མཐའ་དམག་སྣ་འདྲེན་སྡོང་ཟླར་བཅས། །མིང་ལྷག་མེད་པར་རྡུལ་དུ་རློགས། །མེ་ཆུ་ས་གཡོ་རླུང་འཇིགས་དང་། །ནད་མཚོན་མུ་གེ་ལྟ་ལོག་སོགས། །སྣོད་བཅུད་སྙིགས་མའི་འཕོ་འགྱུར་རྣམས། །བཟློག་བསྒྱུར་མནན་པའི་ཕྲིན་ལས་མཛོད། །ཅེས་བརྗོད། དེ་དང་འབྲེལ་བར། ཧཱུྃ་བྷྱོ༔ དཔའ་མོ་འོད་ཟེར་ཅན་མ་ཡི། །བསྙེན་བསྒྲུབ་གྲངས་ཐེམ་རྣལ་འབྱོར་བས། །བྱམས་བརྩེ་དྲིན་ལྡན་ཕ་དང་མས། །མཁས་པའི་ཐབས་ཀྱིས་བུ་བཅོས་བཞིན། །ཚར་གཅོད་དབྱིངས་སྒྲོལ་མངོན་སྤྱོད་ཀྱིས། །གདུལ་དཀའ་མ་ལུས་རྗེས་བཟུང་བའི། །དགེས་མཚོན་དུས་གསུམ་ལེགས་བྱས་ཀུན། །དམིགས་མེད་ངང་ནས་ཡོངས་ལ་བསྔོ། །དེ་མཐུས་བོད་དང་བོད་ཆེན་གྱིས། །མཚོན་པའི་ཡིད་ཅན་འགྲོ་བ་ཀུན། །མི་མཐུན་གཡུལ་ལས་རྣམ་རྒྱལ་ནས། །གཏན་བདེའི་དཔལ་ཡོན་ལོངས་སྤྱོད་ཤོག །ཅེས་དེ་ལྟར་ཉིན་མཚན་ཐུན་བཞིའམ་དྲུག་ཏུ་བསྒྲུབ་ཅིང་། དགུང་སྲོད་ཀྱི་ཐུན་ལ་ཚོགས་མཆོད་ཆོས་སྐྱོང་གི་བསྐང་གསོལ་དང་། སྒྲོལ་ལས་བཟློག་པའི་རིམ་པ་དང་གཞན་རྣམས་ལ་ཉེར་བསྡུ་ཙམ་བྱ། མནན་པའི་རྟགས་ཐོན་ནས་ཁ་བཅད་ཅིང་རེ་བས་དྲིལ་བ་སོགས་མན་ངག་ཟུར་རྒྱན་དུ་བཀོལ་བ་ལྟར་བྱའོ། །འཇིགས་བྱེད་ཡ་མནྟ་ཀའི་དགྱེས་སྐོང་ཡུམ། །ཁྲོ་མོ་འོད་ཟེར་སྟོང་འབར་དཔལ་ཆེན་མོའི། །ལས་མཐའ་དགྲ་མནན་ལྕགས་ཀྱི་མཆོད་སྡོང་ཆེ། །མུན་པའི་མདངས་ལྡན་སྟོབས་ནུས་རྔམས་ཤིང་བརྗིད། །འདི་ནི་སྐྱེས་མཆོག་དམ་པའི་ཐུགས་བཞེད་བཞིན། །སྔགས་གཟུགས་འཛིན་དེས་འདི་ཙམ་བཏུས་པའི་མཐུས། །བསམ་སྤྱོད་ལོག་པའི་ཞིང་གྱུར་དགྲ་སྡེའི་དཔུང་། །བདེ་སྟོང་མཉམ་པའི་དབྱིངས་ཀློང་བྱང་ཆུབ་ཤོག །ཅེས་དཔའ་མོ་འོད་ཟེར་ཅན་གྱི་ལས་ཚོགས་དགྲ་སྲི་ཐམས་ཅད་གནོན་པའི་ཐབས་ཚུལ་ལྕགས་ཀྱི་མཆོད་རྟེན་ནག་པོ་ཞེས་བྱ་བ་འདི་ནི་སྔ་སོར་རང་སློབ་མཆོག་ཏུ་གྱུར་པ་མཁན་ཆེན་སྐལ་བཟང་དར་རྒྱས་རིན་པོ་ཆེ་མཆོག་གི་ཐུགས་བཞེད་སྐོང་ཕྱིར་བྱས་པ་ལས་ཅུང་ཟད་རྒྱས་པར་བཏང་ཞིང་། མནན་པ་དངོས་སོགས་ཕལ་ཆེར་འཐད་འོས་རྣམས་ཟུར་རྒྱན་དུ་བཀོལ་ནས། ཕྱུག་ཤུལ་ཕུར་སྐོར་གྱི་རིགས་ལས་བལྟམས་པའི་སྔགས་རྒན་གཅོལ་པོ་འགྱུར་མེད་ཞིང་སྐྱོང་མགོན་པོའམ། གར་དབང་འཇིགས་མེད་རྣམ་རྒྱལ་བཟང་པོར་འབོད་པ་དེས་བླ་མ་དམ་པ་སྐྱིད་པ་མཁྱེན་རབ་རྒྱ་མཚོའི་བཀས་བསྐུལ་ངོར། སུག་ལས་སུ་བསྟར་བའི་དགེ་བས་བསྟན་འགྲོ་ཡོངས་ལ་ཕན་ཐོགས་རྒྱ་ཆེན་པོ་འབྱུང་བར་གྱུར་ཅིག སརྦ་མངྒ་ལཾ། ཟུར་ཡིག་ལིང་ཀ་བྲི་ཐབས།༄༅། འོད་ཟེར་ཅན་མའི་དགྲ་མནན་ལ་ཉེ་བར་མཁོ་བའི་ཟུར་ཡིག་ལིང་ཀ་བྲི་ཐབས་ནི། དེ་ལ་ཐོག་མར་ལིང་ཤོག ཁ་ཡོལ། ལག་གདན། དུག་ཁྲག་སྦྱར་བའི་སྣག་ཚ། སྨྱུ་གུ་རྣམས་འདུ་བར་བྱས་ལ། དགྲ་འདྲེའི་ལིང་ག་ནྲྀ་དང་ཏྲི་ཡིག་བྲིས་པའི་ཛ་བཞི་དང་ཁྲམ་བཞིས་གཟིར། དེའི་སྟེང་ནས་ཨེ་ཧུར་ཐུཾ་རྦད་ཀྱིས་ཕྱོགས་བཞིར་བསྐོར། དེའི་འོག་ནས་ཡིག་མགོ་ནང་བསྟན་གྱིས། དམིགས་པའི་དགྲ་བོ་མིང་འདི་ཞེས་བྱ་བའི་བླ་སྲོག་རྣམ་པར་ཤེས་པ་ཁུག་ཅིག་ནྲྀ་ཨ་ཀརྴ་ཡ་ཛ་ཛ༔ མ་ར་ཡ་རྦད་ནན། དམ་ཉམས་དགྲ་བགེགས་མིང་འདི་ཞེས་བྱ་བའི་ཀཱ་ཡ་ལུས་ཀྱི་དབང་པོ་སྟྭཾ་བྷ་ཡ་ནན་ནན༔ ཝཀྐ་ངག་གི་དབང་པོ་སྟྭཾ་བྷ་ཡ་ནན་ནན༔ ཙིཏྟ་ཡིད་ཀྱི་དབང་པོ་སྟྭཾ་བྷ་ཡ་ནན་ནན༔ དམ་ཉམས་དགྲ་བོ་ཆེ་གེ་མོའི་ཁ་རྗེ་དབང་ཐང་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ཚེ་བསོད་སྟོབས་འབྱོར་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ མཐུ་རྩལ་ནུས་པ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ མངའ་རིས་འཁོར་འབངས་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ འགོ་བའི་ལྷ་སྲུང་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ བླ་མཆོད་སྲུང་བྱེད་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ བར་བྲི། དེ་ནས་དགྲ་གཟུགས་སྐྱེ་མཆེད་དོད་པ་རིད་ཅིང་ཉམས་ཐག་པ་རྐང་ལག་ལྕགས་སྒྲོག་གིས་བསྡམ་པའི་དཔྲལ་བར། ཇི་འུ་གུང་ཀེག་ཤིང། སྤྱི་བོར་ནན། མིག་ལ་ལོང་། རྣ་བར་འོན། སྣ་ལ་འཚུབས། ཁ་ལ་ལྐུགས། ལག་པར་ཆག རྐང་པར་ཞ། ཚིགས་བཞིར་པུས་མོ་གཡས་ནས་ཛཿཧཱུཾ་བཾ་ཧོ་བྲི། དེའི་སྟེང་ནས་ཡིག་མགོ་ཕྱིར་བསྟན་གྱིས། ཨོཾ་སརྦ་ཛི་ན་ཧཱུྃ་ཛ༔ ཏྲི་ཛ་ཏྲིག་ནན༔ ནྲྀ་ཏྲི་མུ་ཏྲི་ལཾ་ནན༔ ཤནྟྲི་ག་ཏྲི་ནན༔ དགྲ་སྲི་ཕུང་སྲི་སརྦ་གུཾ་གུཾ་སྟྭཾ་བྷ་ཡ་ནན་ནན༔ སྔ་དགྲ་ལག་ཏུ་བརྡར་བ། ཕྱི་དགྲ་ཞེ་ལ་བརྣག་པ། ད་དགྲ་ཁྱི་བཞིན་སྡང་བ། མནའ་དང་ཆད་ལ་མི་སེམས་པའི་གཉེན་བཤེས་མཛའ་གྲོགས་སྨིན་གྲོལ་ཆོས་སྒོར་བཅུག་པའི་སློབ་བུ་དམ་ལས་ལོག་པ། ཟས་གོས་ནོར་གྱིས་བསྐྱངས་པའི་ཆུང་མ་སྙིང་རིང་ཕྱིར་ལ་འཁོར་བ། ཡུལ་སྡེར་མི་ཁའི་སྣ་འདྲེན་བྱེད་པ། དཀར་ནག་ལས་གཉིས་གོ་བརྗེ་བྱེད་པའི་ཁྲིམས་བདག་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་པའི་དགྲ་བོ་ཆེ་གེ་མོའི་མིག་གི་དབང་པོ། རྣ་བའི་དབང་པོ། སྣ་ཡི་དབང་པོ། ལྕེ་ཡི་དབང་པོ། ལུས་ཀྱི་དབང་པོ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་དགྲ་བགེགས་དམ་སྲིའི་ཀུན་གཞིའི་རྣམ་ཤེས། ཡིད་ཀྱི་རྣམ་ཤེས། ཉོན་མོངས་པའི་ཡིད་ཀྱི་རྣམ་པར་ཤེས་པ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་པའི་དགྲ་བགེགས་འབྱུང་པོའི་མ་རིག་པ། འདུ་བྱེད། རྣམ་པར་ཤེས་པ། མིང་དང་གཟུགས། སྐྱེ་མཆེད་དྲུག རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ སྟེང་ཕྱོགས་ལྷ་ཡི་རིགས་ལས་བྱུང་བའི་དགྲ་གདོན་དམ་སྲི། ཤར་ཕྱོགས་དྲི་ཟའི་རིགས་ལས་བྱུང་བའི་དགྲ་གདོན་དམ་སྲི། ལྷོ་ཕྱོགས་གཤིན་རྗེའི་རིགས་ལས་བྱུང་བའི་དགྲ་གདོན་དམ་སྲི། ནུབ་ཕྱོགས་ཀླུ་ཡི་རིགས་ལས་བྱུང་བའི་དགྲ་གདོན་དམ་སྲི། བྱང་ཕྱོགས་གནོད་སྦྱིན་གྱི་རིགས་ལས་བྱུང་བའི་དགྲ་གདོན་དམ་སྲི། ཤར་ལྷོ་མེ་ལྷའི་རིགས་ལས་བྱུང་བའི་དགྲ་གདོན་དམ་སྲི། ལྷོ་ནུབ་སྲིན་པོའི་རིགས་ལས་བྱུང་བའི་དགྲ་གདོན་དམ་སྲི། ནུབ་བྱང་རླུང་ལྷའི་རིགས་ལས་བྱུང་བའི་དགྲ་གདོན་དམ་སྲི། བྱང་ཤར་དབང་ལྡན་གྱི་རིགས་ལས་བྱུང་བའི་དགྲ་གདོན་དམ་སྲི། འོག་ཕྱོགས་ས་བདག་གི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ སྤྱིར་སངས་རྒྱས་བསྟན་པའི་སྤྱི་དགྲ། སྒོས་དཔལ་ལྡན་བླ་མའི་སྐུ་དགྲ། ཁྱད་པར་དུ་རྣལ་འབྱོར་པ་བདག་གི་སྒོས་དགྲ། གཞན་ཡང་ཉི་མ་ཕྱོགས་བཞི་མཚམས་བརྒྱད་ཀྱི་དགྲ་ཇག་ཆོམ་རྐུན་རྒྱལ་བསེན་ཡུལ་འདྲེ་འགོང་པོ་སྤུན་དགུ་ཐམས་ཅད་ཀྱི་ལུས་ངག་ཡིད་གསུམ་མཱ་ར་ཡ་སྟྭཾ་བྷ་ཡ་ནན་ནན༔ ཞེས་པའི་བར་ཚང་བར་བྲིས་ལ། ཕྱི་ནས་རིམ་པར་མེ་རི་གཡས་སྐོར་དང་། རླུང་རི་གཡོན་སྐོར་ཆུ་རི་དང་བཅས་པས་བསྐོར་བ་བྲིས་ནས་ལིང་ཁྲུས་སོགས་བྱའོ། །ཞེས་པ་འདི་ཡང་མགོ་སྤྲུལ་བས་བྲིས་པའོ།། དགེ་ལེགས་འཕེལ། འོད་ཟེར་ཅན་མའི་དགྲ་མནན་གྱི་ཟུར་རྒྱན་གནམ་ལྕགས་རྡོ་རྗེའི་དྲྭ་བ།༄༅། འོད་ཟེར་ཅན་མའི་དགྲ་མནན་གྱི་ཟུར་རྒྱན་གནམ་ལྕགས་རྡོ་རྗེའི་དྲྭ་བ་ཞེས་བྱ་བ་བཞུགས་སོ། ། ༄༅། གཏུམ་ཆེན་དཔའ་མོ་གདུལ་དཀའི་གཤེད། །འོད་ཟེར་ཅན་ལ་ཕྱག་བགྱིས་ནས། །ལས་སྦྱོར་ལྕགས་ཀྱི་མཆོད་རྟེན་ལ། །ཟུར་རྒྱན་ཉུང་ཞིག་སྤེལ་བར་སྤྲོ། །དེ་ལ་ཐོག་མར་ལིང་ཤོག ཁ་ཡོལ། ལག་གདན། དུག་ཁྲག་སྦྱར་བའི་སྣག་ཚ། སྨྱུ་གུ། ཟག་རྫས། ལིང་ཁྲུས་ཀྱི་ཡོ་བྱད། གཏོར་གདུགས། ལིང་ཁེབས། རིན་ཆེན་བརྡར་ཕྱེ། ཚོན་སྐུད། གཡག་རྭ་གཡོན་མ། རྩང་ཕུར། ཉིན་ནས་བླངས་པའི་སྟེང་རྡོ། སྲིབ་ནས་བླངས་པའི་འོག་རྡོ། བླ་རྡོ་ནག་པོ། བླ་ཤིང་གླང་མ། གཡེར་མ། ཚྭ་སྒོག་རམ་གསུམ། སྦང་ཕྱེ་དང་། ཐལ་འཇིམ། ལྷ་དབྱེའི་རྫས་སོགས་དང་པོར་དགོས་པའི་ཡོ་བྱད་རྣམས་བསགས་ལ། དགྲ་འདྲེའི་ལིང་ཀ་ཟུར་ཡིག་ལྟར་བྲིས་ལ། ལིང་ཁྲུས་བྱ་བ་ནི། ཟངས་སྣོད་དུ་ཆུ་གཙང་བཤམས་ལ། རང་ཉིད་འཇམ་དཔལ་གཤིན་རྗེར་གསལ་བ་ཡི། །མདུན་དུ་བདུད་རྩིའི་རང་བཞིན་ཉལ་འགྲོའི་དབུས། །བཾ་ལས་ཆུ་ཡི་ལྷ་མོ་སྐུ་མདོག་དཀར། །ཕྱག་གཡས་མཆོག་སྦྱིན་གཡོན་པ་པདྨ་དམར། །ཞབས་གཉིས་རྡོ་རྗེའི་སྐྱིལ་ཀྲུང་རིན་ཆེན་རྒྱན། །ཐུགས་ལས་འོད་འཕྲོས་རང་འདྲའི་ཡེ་ཤེས་དྲངས། །ཛཿཧཱུྃ་བཾ་ཧོཿགཉིས་སུ་མེད་པར་གྱུར། །དེ་ཡི་ཕྱག་གཡས་མཆོག་སྦྱིན་བཾ་ཡིག་ལས། །བདུད་རྩིའི་རྒྱུན་བབ་ལིང་ཀ་བཤལ་བ་ཡིས། །རྣལ་འབྱོར་བདག་ཅག་ཁ་རླང་ར་རི་རྡུལ། །གཟས་པོའི་ཁ་རྗེ་དབང་ཐང་ཚེ་དཔལ་འབྱོར། །མ་ལུས་ཆུ་ཡི་ནང་དུ་སིབ་ཀྱིས་ཐིམ། །སླར་ཡང་ཆུ་ཡི་ལྷ་མོ་འོད་དུ་ཞུ། །ཆུ་དང་དབྱེར་མེད་བདུད་རྩིའི་རང་བཞིན་གྱུར། །ཨོཾ་ཡ་མནྟ་ཀ་ནྲྀ་ཏྲི་སརྦ་ཤ་ཏྲུཾ་ཨ་ཡུ་པུཎྱཻ་མཱ་ར་ཡ་མ་མ་སརྦ་སིདྡྷི་སྭཱ་ཧཱ། ལན་གསུམ་བརྗོད་ཅིང་རང་གིས་ཆུ་ཧུབ་གཅིག་འཐུང་བས་ཚེ་བསོད་བཀྲག་མདངས་རྒྱས་པར་བསམ། ཆུ་ལྷག་གནས་ཁང་གི་ཕྱི་ནང་དུ་གཏོར་བས་བཀྲ་ཤིས་བྱིན་ཆགས་འབག་རྩོག་ཐམས་ཅད་དག་པར་བསམ། དེ་ནས་སྲིད་པའི་བྱེ་མའམ་ཞིང་ས་གཙང་མ་འཐོར་ཞིང་། ལཾ་ཧོ་ཤུདྡྷེ་སྭཱ་ཧཱ། ལན་གསུམ། ཆུ་ལྐུགས་རོ་སྐྲས་འཐོར་ཞིང་། བཾ་ཧོ་ཤུདྡྷེ་སྭཱ་ཧཱ། ལན་གསུམ། པྲ་རྐང་ངམ་ཤིང་ཚེ་ཟད་ཀྱི་མེས་བསྐོར་ཞིང་། རཾ་ཧོ་ཤུདྡྷེ་སྭཱ་ཧཱ། ལན་གསུམ། སྒྲོས་བྱབ་ཅིང་། ཡཾ་ཧོ་ཤུདྡྷེ་སྭཱ་ཧཱ། ལན་གསུམ། ལིང་ཀ་བར་སྣང་ལ་གཡུག་ཅིང་། ཨེ་ཧོ་རཾ་ཨེ་ན་རཾ་ཧོ་ཤུདྡྷེ་ཨ་ཨ། ཞེས་དང་། ཨ་རྐྱང་ཉེར་གཅིག་དབུགས་ཐེངས་གཅིག་ལ་བརྗོད་ནས། བདག་ཅག་གི་སྒོ་གསུམ་གྱི་དྲི་མས་གོས་པ་ཐམས་ཅད་བྱང་ཞིང་དག་པར་གྱུར་ཅིག ཞེས་བརྗོད་ཅིང་སྟོང་པར་བལྟའོ། །དེ་ནས་ཆས་གཞུག་ནི། ལིང་སྙིང་རིན་པོ་ཆེའི་ཕྱེ་མ་དང་། ཟག་རྫས་ཡོད་ན་མི་འཐོར་བར་བྱུགས་ལ་ཤི་ལྟེབ་བམ་ཚོན་ལྟེབ་བྱས་ལ། བྱད་ཐག་སྔོ་དམར་གྱིས་དཀྲིས་ཏེ་རང་འཐག་གི་ལྟེ་མིག་ཏུ་དྲངས་ཤིང་། སརྦ་ནྲྀ་ཏྲི་རྦད་རྦུད་ནྲྀ་ཏྲི་རྦད་རྦུད་ཡ༔ ལན་བདུན་དང་། མངོན་སྤྱོད་ཀྱི་ལས་འདི་ཕར་ཐེབས་ཤིང་ཚུར་མི་ཐེབས་པར་གྱུར་ཅིག ཅེས་བརྗོད། དེ་བཞིན་དུ་སྒོའི་མ་ཐེམ་གྱི་འོག་ཏུ་ཕྱིར་འདྲེན་ཞིང་། སརྦ་ནྲྀ་ཏྲི་ལཾ་ནན་མཱ་ར་ཡ་རྦད་ནན༔ ལན་བདུན། ལས་འདི་མི་འགྱངས་བར་མྱུར་དུ་འགྲུབ་པར་གྱུར་ཅིག ཁྱིའི་སྦོ་འོག་ཏུ་དྲངས་ཤིང་། སརྦ་ནྲྀ་ཏྲི་རྦད་རྨུག་རྦད་ཡ༔ ལན་བདུན། གཟས་པོའི་ཁ་རྗེ་དང་རླུང་རྟ་རྒུད་པར་གྱུར་ཅིག ཡག་ཤིང་གི་བུག་པར་དྲངས་ཤིང་། སརྦ་ནྲྀ་ཏྲི་རྦད་ཁ་ཤི་རྦད་ཁ་ཤི༔ ལན་བདུན། དགྲ་བོའི་ཚེ་དང་བསོད་ནམས་དབང་ཐང་ཟད་ཅིང་སྟོང་པར་གྱུར་ཅིག རང་གི་རྒྱིད་ཁུང་གཡོན་པར་ཕྱིར་དྲངས་ཤིང་། ཨོཾ་བཛྲ་དུཥྚཾ་མཱ་ར་ཡ་བྷྱོ༔ ནྲྀ་ཏྲི་སརྦ་ཤ་ཏྲུཾ་རྦད་རྦུད་སོད་ནན༔ ལན་བདུན། བདག་ཅག་དང་བསྲུང་བྱ་རྣམས་རྒྱལ་ཞིང་དགྲ་བོ་ཕམ་བརླག་ལྷག་མེད་དུ་ཐོངས་ཤིག ཅེས་བརྗོད་ལ་མནན་ཐོད་དམ་གཡག་རུར་བཅུག་ལ་མདུན་དུ་བཞག ཡུལ་སྲོལ་མ་ནུབ་པར་སྟབས་གང་བདེར་དམིགས་རྟེན་རིན་པོ་ཆེ་ཞིག་ཀྱང་འཇོག་ཏུ་བཅུག ཐལ་འཇིམ་དང་སྦང་ཟན། གཡེར་མ། ཚྭ་སྒོག་རམ་པ་རྣམས་ཚན་བཅུར་བསྒྲིགས། བླ་རྡོ་གཅོག་མ་རག་པ་དང་། བླ་ཤིང་གཅོད་མ་རག་པ་བྱས་ལ། བསྐུལ་བ་དང་གསེར་སྐྱེམས་ནས་ལྷ་དབྱེའི་མཇུག་བར་དཀྱུས་གཅིག་ཏུ་བྱས་ལ། སྐྱེས་པ་སྟག་ལོ་པའམ་མིན་ཀྱང་གཅིག་གིས་དཔའ་རྡོ་ཕྱར་ལ། ཧཱུྃ་བྷྱོ༔ འཇམ་དཔལ་གཤིན་རྗེའི་དགྱེས་སྐོང་ཡུམ། །གཏུམ་ཆེན་དཔའ་མོ་འོད་ཟེར་ཅན། །གཙོ་འཁོར་སྤྲུལ་པར་བཅས་རྣམས་ཀྱི། །བྱིན་རླབས་མཐུ་སྟོབས་མཁའ་ལྟར་བརྡལ། །དགྲ་དཔུང་ཕམ་བྱེད་འོག་གི་རྡོ། །སྲ་མཁྲེགས་རྡོ་རྗེའི་གཞི་ལྟར་བརྟན། །ལྷ་རྣམས་རྒྱལ་བྱེད་སྟེང་གི་རྡོ། །ཐོག་ལྟར་འདྲིལ་ཞིང་རྒྱོག་ལྟར་འཕེན། །བསམ་སྦྱོར་གནག་པའི་དགྲ་སྲི་ཡི། །བླ་རྡོ་ནག་པོ་ཟན་ལས་སྙི། །དཔའ་མོ་འཁོར་བཅས་བདེན་སྟོབས་ཀྱིས། །རྒྱལ་བའི་བསྟན་པ་བཤིགས་པ་དང་། །བླ་མའི་སྐུ་ལ་བརྡོ་བ་སོགས། །ཞིང་བཅུ་ཉམས་པ་བདུན་ཚངས་བའི། །མཐའ་བཞིའི་གདུག་པའི་དམག་དཔུང་དང་། །ཕུང་བྱེད་དགྲ་སྲི་ཐམས་ཅད་ཀྱི། །བླ་དང་བླ་རྡོ་ཆབ་གཅིག་ཏུ། །སྐད་ཅིག་ཉིད་ལ་སིལ་བུར་ཐོངས། །དྲག་སྔགས་སོ་ལྔ་པ་བརྗོད་ཅིང་བརྡུང་ལ། བྲུབ་རྫས་བཅུ་ཚན་གྱི་སྟེང་དུ་བགོའོ། །དེ་ནས་བླ་ཤིང་དང་གྲི་ཆུང་ཐོགས་ལ། ཧཱུྃ་བྷྱོ༔ དགྲ་དཔུང་འཇོམས་མཛད་འོད་ཟེར་ཅན། །གཙོ་འཁོར་སྤྲུལ་པར་བཅས་རྣམས་ཀྱི། །མཁྱེན་བརྩེ་ནུས་སྟོབས་ཕྲིན་ལས་ཀྱིས། །མ་རུང་གདུལ་དཀའི་བླ་ཚེ་སྲོག །ངམ་ཤིང་སེ་རོག་གླང་མ་ལ། །འགུགས་འཆིང་སྡོམ་མྱོས་དབྱེར་མེད་བྱས། །ཤིང་རྩེ་ཐུར་དུ་བསྟན་པ་ཡིས། །དགྲ་དཔུང་མྱུར་དུ་ཉམ་ཐག་རྒུད། །ཁ་རྗེ་རླུང་རྟ་ཉམས་གྱུར་ཅིག །རེག་གཅོད་མཚོན་གྱི་རྣོ་དབལ་གྱིས། །ཤིང་མགོ་ཐུར་དུ་བཅད་པ་ཡིས། །དགྲ་སྡེའི་གནམ་གྱི་འཇུ་ཐག་ཆོད། །རྩ་བ་གྱེན་ལ་བཅད་པ་ཡིས། །ས་ཡི་རྟེན་ཕུར་མྱུར་དུ་ཕྱུངས། །ལོ་འདབ་ཡན་ལག་བྲེག་པ་ཡིས། །དགྲ་སྡེའི་མཐའ་རྩ་སྐྱེ་རྒྱུད་ཆོད། །ལྤགས་བཤུས་སྙིང་པོ་བྲུས་པ་ཡིས། །སྣ་འདྲེན་རྒྱབ་དཔུང་སྡོང་ཟླ་ཕྲོལ། །སྐེད་པ་དུམ་བུར་གཏུབ་པ་ཡིས། །དགྲ་སྲི་མིང་མེད་རྡུལ་དུ་རློགས། ལས་སྦྱོར་སྔགས་དང་དྲག་སྔགས་བཟླ་ཞིང་གཏུབ་ལ་གླང་ཁྲམ་བྱ་ཞིང་། ཧཱུྃ་བྷྱོ༔ འོད་ཟེར་ཅན་མའི་བྱིན་རླབས་དང་། །རིགས་བཞིའི་མཁའ་འགྲོའི་བདེན་པ་དང་། །ཁྲོ་མོ་བརྒྱད་ཀྱི་མཐུ་སྟོབས་དང་། །སྒོ་བཞི་སྤྲུལ་འཁོར་ཕྲིན་ལས་ཀྱིས། །སྔ་དགྲ་ལག་གིས་བརྡར་བ་དང་། །ཕྱི་དགྲ་ཞེ་ལ་བརྣག་པ་དང་། །ད་དགྲ་ཐད་དུ་ལྡང་བ་རྣམས། །ལྷ་དང་དྲི་ཟའི་ཁྲམ་ལ་ཐོབ། །སངས་རྒྱས་བསྟན་པའི་སྤྱི་དགྲ་དང་། །དཔལ་ལྡན་བླ་མའི་སྐུ་དགྲ་དང་། །རྣལ་འབྱོར་བདག་གི་སྒོས་དགྲ་རྣམས། །འཆི་བདག་གཤིན་རྗེའི་ཁྲམ་ལ་ཐོབ། །གཏད་མནན་ཕུང་སེལ་ཧོམ་ཟོར་ཐུན། །ངན་སྔགས་རྫས་སྦྱོར་དམོད་མོ་མཐུ། །ངན་དགུ་རྩུབ་བཅུའི་རྦོད་གཏོང་རྣམས། །ཀླུ་གཉན་ས་བདག་ཁྲམ་ལ་ཐོབ། །དམག་ཇག་རྐུན་སྣ་གྱོད་འབེབ་དང་། །ཕོད་བཙུགས་དོ་བདོ་རྩོད་ཤག་འདེབས། །ངན་བརྗོད་མི་ཁ་གླེང་བ་རྣམས། །གནོད་སྦྱིན་གདུག་པའི་ཁྲམ་ལ་ཐོབ། །བཀའ་འགལ་དམ་ལོག་བྱེད་པ་དང་། །མནའ་ཆད་ཁྲིམས་ལས་འགལ་བ་དང་། །མགོ་གཡོག་མགོ་སྐོར་བྱེད་པ་རྣམས། །སྲོག་བདག་རྒྱལ་པོའི་ཁྲམ་ལ་ཐོབ། །ཆུང་མ་སྙིང་རིང་ཕྱིར་འཁོར་དང་། །གཉེན་གྲོགས་ཉེ་བ་བསམ་ལོག་དང་། །བསྲུང་བྱ་ཡ་མ་ཐར་ལོག་རྣམས། །ཤ་ཟ་མ་མོའི་ཁྲམ་ལ་ཐོབ། །སྔགས་འཆང་བདག་ལ་ལྷ་མེད་དང་། །ལྷ་སྲུང་རྣམས་ལ་མཐུ་མེད་ཟེར། །མཐུ་བྱད་བུ་ལོན་ལྟར་སྙོག་རྣམས། །སྲིན་པོ་གཟའ་ཡི་ཁྲམ་ལ་ཐོབ། །དཀར་ནག་གོ་བརྗེ་མི་དཔོན་དང་། །བསྟན་བླ་བཙོང་བའི་སྔགས་བཙུན་དང་། །བསམ་སྤྱོད་ལོག་པའི་དགྲ་སྡེའི་དཔུང་། །དམུ་དང་བཙན་གྱི་ཁྲམ་ལ་ཐོབ། །སྨོན་ལམ་ལོག་པའི་དམ་སྲི་དང་། །གོད་འདྲེ་བསེ་རག་ཕུང་བྱེད་སྲི། །བར་དུ་གཅོད་པའི་རྒབ་འདྲེ་རྣམས། །དྲེགས་བྱེད་བདུད་ཀྱི་ཁྲམ་ལ་ཐོབ། །མུ་སྟེགས་ཀླ་ཀློ་མཐའ་བཞིའི་དམག །སྣ་འདྲེན་རྒྱབ་བརྟེན་སྡོང་ཟླ་བཅས། །བསྟན་འགྲོ་ཡོངས་ལ་གནོད་བྱེད་རྣམས། །དམ་ཅན་སྲུང་མའི་ཁྲམ་ལ་ཐོབ། །མ་ནོར་མ་འཁྲུལ་རྩིས་ལ་ཐོབ། །མ་ཡོ་མ་བཟུར་ཁྲམ་ལ་ཐོབ། །དགྲ་དཔུང་ཆོམ་ལ་བགེགས་དཔུང་ཤིགས། །ལས་འདི་མ་འགྱང་མྱུར་འགྲུབ་མཛོད། །ལས་སྦྱོར་གྱི་དྲག་སྔགས་བཟླ་ཞིང་བྲུབ་རྫས་བཅུ་ཚན་གྱི་སྟེང་དུ་སོ་སོར་བཞག་ལ་སྔོན་རབས་ཀྱི་སྨྲེང་གྱེར་བ་ནི། ཀྱཻ། སྔོན་དུས་དགྲ་སྲི་བྲུབ་མནན་གར་སྲིད་ན། །གནམ་ས་ལྕགས་ཟངས་ལས་གྲུབ་ཁྱོ་ཤུགས་གཉིས། །བསྡེབ་ལས་སྲིད་པའི་སྒོ་ང་རྣམ་བཞི་བྱུང་། །དུང་སྒོང་ཤར་བརྡོལ་རྒྱ་ཡི་དགྲ་སྲི་དང་། །གཡུ་སྒོང་ལྷོར་བརྡོལ་འཇང་གི་དགྲ་སྲི་སྲིད། །ཟངས་སྒོང་ནུབ་བརྡོལ་མོན་གྱི་དགྲ་སྲི་དང་། །ལྕགས་སྒོང་བྱང་བརྡོལ་ཧོར་གྱི་དགྲ་སྲི་ལང་། །མཐའ་བཞིའི་དམག་འཁྲུགས་འཛམ་གླིང་སྟོང་ལ་ཐུག །ལས་སྨོན་མཐུ་ལྡན་མཁས་པ་མི་བཞི་ཡིས། །བཀའ་བགྲོས་ཁྲོ་ཆེན་རྣམ་བཞིའི་ལས་སྦྱོར་གྱིས། །ཤར་ཕྱོགས་རྒྱ་ཡི་དགྲ་སྲི་གཟུགས་བྱང་དང་། །བླ་རྡོ་གླང་ཁྲམ་དགྲ་བྲུབ་ཡས་རྫས་རྣམས། །འཆོར་མེད་འཕར་སྤྱང་ཐོད་པའི་ནང་དུ་བྲུབ། །ལྡང་མེད་རྒྱ་ལམ་ཆེན་པོའི་བཞི་མདོར་མནན། །ལྷོ་ཕྱོགས་འཇང་གི་དགྲ་སྲི་མིང་རུས་གཟུགས། །བླ་རྡོ་གླང་ཁྲམ་ལ་སོགས་རྫས་དང་བཅས། །འཆོར་མེད་ཁྱི་ཕག་ཐོད་པའི་ནང་དུ་བྲུབ། །ལྡང་མེད་ལྷ་ཁང་ཐེམ་པའི་འོག་ཏུ་མནན། །ནུབ་ཕྱོགས་མོན་གྱི་དགྲ་སྲི་མིང་གཟུགས་དང་། །བླ་རྡོ་གླང་ཁྲམ་དགྲ་བྲུབ་རྫས་དང་བཅས། །འཆོར་མེད་རྟ་རྨིག་ཐོད་པའི་ནང་དུ་བྲུབ། །ལྡང་མེད་ལུང་གསུམ་འདུས་པའི་མདོ་རུ་མནན། །བྱང་ཕྱོགས་ཧོར་གྱི་དགྲ་སྲི་གཟུགས་ལིང་དང་། །བླ་རྡོ་གླང་ཁྲམ་མི་ཁའི་རྫས་དང་བཅས། །འཆོར་མེད་གཡག་རྭ་གཡོན་པའི་ནང་དུ་བྲུབ། །ལྡང་མེད་མཆོད་རྟེན་བྱིན་ཅན་འོག་ཏུ་མནན། །དེ་ནས་ད་བར་ཕྱོགས་བཞིའི་དགྲ་ཚོགས་ཕམ། །འཛམ་གླིང་སྤྱི་དང་བོད་ཁམས་ལྷ་མི་རྒྱལ། །དེ་འོག་སྲིད་པ་ཡེ་སྨོན་རྒྱལ་པོ་ལ། །བདུད་རྒྱལ་ངམ་རྗེ་རྩོལ་པོ་དགྲར་ལང་ཚེ། །འཕྲུལ་གྱི་གཏོ་མཁན་སྔགས་འཆང་སྤྱན་དྲངས་ནས། །གཤིན་རྗེ་ནག་པོ་བསྒྲུབ་པའི་ལས་སྦྱོར་གྱིས། །ངམ་རྗེའི་བླ་བཟུང་བླ་རྟེན་རྫས་དང་བཅས། །མི་འཆོར་རོག་པོ་གཡག་གི་རྭ་གཡོན་ནང་། །ཚེ་བདུད་གཤིན་རྗེ་ནག་པོའི་ཕྲིན་ལས་ཀྱིས། །མི་ལྡང་རྒྱ་ལམ་སུམ་མདོར་དྲང་པོར་མནན། །དེ་ཡིས་ངམ་རྗེ་ཕམ་ནས་ངམ་ཁམས་བརླགས། །ཡེ་སྨོན་རྒྱལ་པོ་ཡོན་མཆོད་དགྲ་ལས་རྒྱལ། །ཡང་གཅིག་ཕྱྭ་རྗེ་ཡ་བརླ་བརྡལ་དྲུག་ལ། །ཁྱུང་རུ་ནག་པོས་བདུད་དམག་སྣ་དྲངས་ཚེ། །ལྷ་མཆོག་བདུད་དཔུང་ཀུན་འདུལ་སྤྱན་དྲངས་ནས། །དགྲ་གཟུགས་མིང་རུས་བླ་རྟེན་རྫས་དང་བཅས། །མི་འཆོར་གཡག་རྭ་གཡོན་པའི་ནང་དུ་བཅུག །མི་ལྡང་གསས་མཁར་ལ་བཙས་འོག་ཏུ་མནན། །དེ་ཡིས་ནག་པོ་བདུད་ཀྱི་དམག་ཚོགས་ཕམ། །ཡ་བརླ་བརྡལ་དྲུག་ལྷ་དང་བཅས་པ་རྒྱལ། །དེ་བཞིན་སྲིད་པའི་རྒྱལ་བུ་མཐིང་གྷེ་ལ། །སྲིན་པོ་སྙིང་དམར་དགྲར་ལང་དམག་བྱུང་ཚེ། །ཀོང་ཚེ་འཕྲུལ་རྒྱལ་འཇམ་དཔལ་ཁྲོས་པ་ཡི། །སྐུར་བཞེངས་དགྲ་ལིང་བླ་རྟེན་རྫས་དང་བཅས། །མི་འཆོར་གཡག་རྭ་གཡོན་པའི་ནང་དུ་བྲུབ། །མི་ལྡང་ཅ་ཏི་ནག་པོའི་འོག་ཏུ་མནན། །དེ་ཡིས་སྲིན་པོའི་དམག་དཔུང་གཏན་ནས་ཕམ། །རྒྱལ་བུ་ཡོན་མཆོད་ལྷ་སྲུང་དང་བཅས་རྒྱལ། །དེ་རྗེས་འཕགས་ཡུལ་ཆོས་ཀྱི་རྒྱལ་པོ་ལ། །མུ་སྟེགས་དགྲར་ལང་རྒྱལ་བསྟན་ལ་གནོད་ཚེ། །སློབ་དཔོན་ཆེན་པོ་ཤནྟིཾ་གརྦྷ་སོགས། །པཎ་གྲུབ་མང་པོས་དྲག་སྔགས་དམོད་པ་བསྒྲུབས། །བསྲེགས་དང་འཕང་དང་མནན་པའི་ལས་སྦྱོར་གྱིས། །དགྲ་གཟུགས་མིང་རུས་བླ་རྟེན་རྫས་དང་བཅས། །འཆོར་མེད་ཧོམ་ཁུང་གྲུ་གསུམ་ནང་དུ་བྲུབ། །ལྡང་མེད་གཙུག་ལག་ཁང་ཆེན་སྒོ་འོག་མནན། །མུ་སྟེགས་སྡེ་ཚོགས་ཕམ་ཏེ་ཆམ་ལ་ཕབ། །ཆོས་རྒྱལ་ཡོན་མཆོད་རྒྱལ་ཏེ་བསྟན་པ་དར། །བོད་རྗེ་ཚངས་པ་ལྷ་ཡི་མེ་ཏོག་ལ། །མཐའ་མིས་དགྲ་ལྡང་བོད་ཁམས་ཕུང་ཉེ་ཚེ། །སློབ་དཔོན་པདྨ་མཁས་པ་བཻ་རོ་སོགས། །ལོ་པཎ་རྣམས་ཀྱིས་དབང་ཆེན་རྟ་མཆོག་བསྒྲུབ། །དགྲ་ལིང་མིང་རུས་བླ་རྟེན་དགྲ་རྫས་རྣམས། །འཆོར་མེད་ཁྱི་ཕག་ཐོད་པའི་ནང་དུ་བྲུབ། །ལྡང་མེད་ལྷ་ཁང་ཐེམ་པའི་འོག་ཏུ་མནན། །མཐའ་དམག་ཕམ་ནས་ལོ་པཎ་ད་བར་བདེ། །ཚ་རོང་རྒྱལ་པོ་མདོ་གཞེར་བཙན་པོ་ལ། །ཤར་ནས་དགྲ་ལྡང་འཁྲུགས་རྩོད་མི་བདེ་བྱུང་། །བཻ་རོ་ཙ་ན་གཡུ་སྒྲ་སྙིང་པོ་གཉིས། །གྲོས་བྱས་མགོན་པོ་ནག་པོའི་དགྲ་ཆོས་མཛད། །རྩྭ་གཟུགས་ལིང་ཀ་དགྲ་རྫས་མིང་རུས་བཅས། །མི་འཆོར་གཡག་རྭ་གཡོན་པའི་གཏིང་དུ་བྲུབ། །ལྡང་མེད་སྒྲུབ་གནས་གཉན་པོའི་འོག་ཏུ་མནན། །དགྲ་ཕམ་ཟིན་རྒྱལ་དགྲ་ཆོས་གཏེར་དུ་སྦས། །དེ་བཞིན་དེ་རིང་བདག་དང་ཡོན་བདག་གིས། །སྲིད་པ་དེ་རྣམས་ཀུན་ལ་དཔེ་བླངས་ནས། །རྒྱལ་ཡུམ་ཁྲོ་མོ་འོད་ཟེར་ཅན་མ་ཡི། །དྲག་ཤུལ་ལས་ལ་སྦྱོར་བའི་མངོན་སྤྱོད་ཀྱིས། །ཞིང་བཅུ་ཉམས་པ་བདུན་ལྡན་མཐའ་བཞིའི་དམག །དགྲ་ཇག་ཆོམ་རྐུན་ཡིད་ལ་བརྣག་པ་རྣམས། །རྩྭ་གཟུགས་ལིང་ཀ་བླ་རྡོ་གླང་ནག་ཁྲམ། །ཚྭ་སྒོག་རམ་གཡེར་ཐལ་འཇིམ་འདི་རྣམས་ལ། །འགུགས་འཆིང་སྡོམ་མྱོས་བྱས་ནས་དབྱེར་མེད་དུ། །གཡག་རྭ་གཡོན་པ་འདི་ཡི་གཏིང་དུ་རྫོངས། །བྲུབ་བོ་དགྲ་བོ་ནམ་ཡང་མ་འཆོར་ཅིག །མནན་ནོ་དགྲ་བོ་ལྡང་བར་མ་གྱུར་ཅིག །ཅེས་བརྗོད་ལ་གོང་དུ་བཤམས་པའི་དགྲ་རྫས་ཚན་པ་བཅུ་པོ་དང་། གཡག་རྭའི་ནང་གི་ལིང་ཀ་ལ་དམིགས་ཏེ། ན་མོ། མཆོག་གསུམ་སྐུ་གསུམ་རྩ་གསུམ་བདེན་པ་དང་། །དཔའ་མོ་འོད་ཟེར་ཅན་གྱི་མཐུ་སྟོབས་དང་། །དོན་དམ་འགྱུར་མེད་རྟེན་འབྱུང་བསླུ་མེད་མཐུས། །དགྲ་ཇག་ཆོམ་རྐུན་མཐའ་དམག་དམ་སྲི་སོགས། །གནོད་སྡང་གདུག་པའི་བསམ་སྦྱོར་ཅན་རྣམས་ཀྱི། །བླ་སྲོག་རྣམ་ཤེས་དགྲ་གཟུགས་མིང་རུས་དང་། །བླ་རྡོ་གླང་ཁྲམ་དགྲ་རྫས་འདི་རྣམས་ལ། །ཁུག་ཅིག་ནྲྀ་ཏྲི་ཨ་ཀརྴ་ཡ་ཛ། །ཛཿཧཱུྃ་བཾ་ཧོ༔ ཞེས་མང་དུ་བརྗོད་ལ། སྐྱེས་པ་སྟག་ལོ་པ་འམ་གང་ཡིན་དེས་དམོད་ཚིག་གང་ཤེས་བརྗོད་བཞིན། དགྲ་རྫས་ཚན་པ་རེ་རེ་བཞིན་རང་གི་རྒྱིད་ཁུང་གཡོན་ནས་ཕྱིར་འདྲེན་ཞིང་གཡག་རྭའི་ནང་དུ་བྲུབ་ལ། ཀྱཻ། ད་ནི་དགྲ་བོ་བྲུབ་པའི་དུས་ལ་བབས། །ཇག་ཆོམ་རྐུན་པོ་འཆིང་བའི་དུས་ལ་བབས། གདོན་བགེགས་དམ་སྲི་འདུལ་བའི་དུས་ལ་བབས། །དུས་འཁྲུགས་མཐའ་དམག་བཟློག་པའི་དུས་ལ་བབས། །ཕུང་འདྲེ་རྦད་འདྲེ་གནོན་པའི་དུས་ལ་བབས། །རྣལ་འབྱོར་བདག་དང་རྒྱུ་སྦྱོར་ཡོན་བདག་ལ། །ཚེས་གཅིག་བཅུ་གཅིག་ཉི་ཤུ་གཅིག་རྣམས་ལ། །གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་གཉིས་བཅུ་གཉིས་ཉི་ཤུ་གཉིས་རྣམས་ལ། །གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་གསུམ་བཅུ་གསུམ་ཉི་ཤུ་གསུམ་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་བཞི་བཅུ་བཞི་ཉི་ཤུ་བཞི་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་ལྔ་བཅོ་ལྔ་ཉི་ཤུ་ལྔ་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་དྲུག་བཅུ་དྲུག་ཉི་ཤུ་དྲུག་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་བདུན་བཅུ་བདུན་ཉི་ཤུ་བདུན་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་བརྒྱད་བཅོ་བརྒྱད་ཉི་ཤུ་བརྒྱད་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་དགུ་བཅུ་དགུ་ཉི་ཤུ་དགུ་རྣམས་ལ། ། གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །ཚེས་བཅུ་ཉི་ཤུ་གནམ་སྟོང་གསུམ་པོ་ལ། །གནོད་པར་བྱེད་པའི་ཇག་ཆོམ་རྐུན་པོ་དང་། །བསམ་ངན་སྦྱོར་རྩུབ་ཤོམ་པའི་དགྲ་བོ་རྣམས། །དགྲ་གཟུགས་མིང་རུས་བླ་རྡོ་གླང་ཁྲམ་དང་། །ཚྭ་སྒོག་རམ་གཡེར་སོགས་དང་དབྱེར་མེད་དུ། །ཕོང་ཐོད་ཀུན་འདུས་གཡག་རྭའི་ནང་དུ་བྲུབ། །མི་འཕར་ཕྱག་རྒྱ་རྣམ་བཞིའི་དམ་རྒྱས་བཅིང་། །བཅིང་འོག་དེ་ནས་གྲོལ་བར་མ་གྱུར་ཅིག །མི་ལྡང་རི་རབ་ལྷུན་པོའི་ལྗིད་ཀྱིས་མནན། །མནན་འོག་དེ་ནས་ལྡང་བར་མ་གྱུར་ཅིག །ནྲྀ་ཏྲི་སརྦ་ཤ་ཏྲུཾ་མཱ་ར་ཡ་ནན། །སྟཾ་བྷ་ཡ་ནན་ནན། །བར་བརྗོད། །དེ་ནས་དགྲ་མནན་ཞག་གྲངས་བསྐྱར་རྒྱུ་ཡིན་ན་མདུན་དཀྱིལ་གྱི་འོག་སོགས་སྐབས་གང་བདེར་དོང་བྲུས་ལ་གཡག་རྭ་མི་འགུལ་བར་བཞག་པའི་ཁར། ས་ཧོམ་གྲུ་གསུམ་ཕྱི་ནག་ནང་དམར་གྱི་ཁ་ཁྱེར་ལ་ཕོ་རྩང་དགུ་གཡས་སྐོར་དང་། མི་རྩང་དགུ་གཡོན་སྐོར་རྩང་ཐུང་གསུམ་ཧོམ་ཟུར་གསུམ་དུ་བཙུགས་པའི་སྟེང་རྒྱ་གྲམ་བྲིས་པའི་རྡོ་ལེབ་དང་། ལིང་ཁེབ་ཀྱིས་འགེབ་མ་རག་པ་བྱས་ལ། བསད་དམིགས་ནས་ཐུན་བརྡེགས་ཀྱི་མཇུག་བར་བཏང་ལ། ཐུན་རྗེས་མ་རྣམས་ལ་དགྲ་མནན་གྱི་སྔགས་དཀྱུས་མ་དག་གི་མཐར། རྒྱས་པར་སྤྲོ་ན་དམ་ཆོས་ཡང་ཟབ་པདྨའི་ཐུགས་ཐིག་གི་ཆ་ལག་དགྲ་མནན་གྱི་སྔགས་དང་། ལོ་ཟླ་མར་གྲགས་པ་དང་། ཡི་དམ་གང་ཡིན་གྱི་རྩ་སྔགས་ཤམ་དུ་འགུགས་པ་བསྒྲལ་བ་མནན་པ་ཀུན་ལ་སྦྱོར་རྒྱུ་མི་ཕམ་པས་མཛད་པ་དང་། གནམ་ཆོས་ལས་བྱུང་བའི་དགྲ་ཆིང་སོགས་ཀྱང་བརྗོད་ནུས་ན་ལེགས་ཤིང་མིན་ཀྱང་རུང་ངོ། །ཐུན་ཐམས་ཅད་ཀྱི་མཐར་ཐུན་གཏོར་འབུལ་ཞིང་། བསྔོ་སྨོན་གྱིས་རྣམ་མཁྱེན་ཐོབ་པའི་ལམ་དུ་བསྒྱུར་བ་ནི་འདྲ་བར་བྱ། དེ་ནས་གོ་གསུམ་གྱི་ཐལ་བ་དང་སྒྱེད་གསུམ་གྱི་དྲེག་པ་བསྡུས་པའི་ཐལ་འཇིམ་རི་རབ་ཀྱི་གཟུགས་མགོ་དགུ་བཙུགས་པ་དང་། བྱད་ཐག་སྔོ་དམར་དང་། ཁྱི་སྤུ་ར་བལ་གྱི་སྐུད་པ། ཕུང་རེ་ནག་པོ། ས་གཞི་འགས་བྱེད་ཀྱི་རལ་གྲི། གསེར་སྐྱེམས། དཀར་གཏོར། དམར་གཏོར། རྡོ་རྗེ་རྒྱ་གྲམ་བྲིས་པའི་རྡོ་ལེབ། མནན་དོང་གྲུ་གསུམ་རྒྱར་ཁྲུ་གང་བ། དཔང་དུ་ཁྲུ་དོ་དང་ཕྱེད་ཙམ་ལས་མི་ཟབ་པ། འབྱུང་བ་གོ་ལྡོག་གི་རྒྱུ་རླུང་གཡབ་དང་། མེ་ཆུ་སོགས་རྗེས་མར་དགོས་པའི་ཆས་ཀ་རྣམས་བསགས་ལ། གཡག་རྭ་དེ་ཚུར་བླངས་ནས་སྔར་བྲུབ་མཁན་གྱི་མི་དེའམ། གཅིག་གིས་རྭ་རྩེ་པུས་མོ་གཡས་པས་མནན་ལ། ལག་གཡོན་པས་ཐལ་འཇིམ་བཏེག་ནས། ཧཱུྃ་བྷྱོ༔ ང་ནི་གཏུམ་ཆེན་ཁྲོ་མོ་འོད་ཟེར་ཅན། །སྤྲུལ་པའི་ཁྲོ་ཚོགས་ནམ་མཁའི་མཐའ་ལྟར་ཁྱབ། །ཁམས་གསུམ་དབང་བསྡུས་སྲིད་གསུམ་ཟིལ་འོག་གནོན། །དཔའ་མོ་ང་ལས་ཆེ་བཙན་སུ་ཡང་མེད། །རོག་པོ་ཞོལ་ཆེན་གཡག་གི་རྭ་གཡོན་འདི། །ལས་ཀྱི་ཧོམ་ཁུང་གནམ་ལྕགས་ཁང་སྒྲོམ་འབར། །འགུགས་གཞུག་འཆིང་སྡོམ་མྱོས་བརྒྱལ་རྨོངས་རེངས་སོགས། །ལས་ཆེན་མངོན་སྤྱོད་བཅུ་གཉིས་མ་ཚང་མེད། །ཕྱོགས་བཅུའི་སྡང་སེམས་གདུག་རྩུབ་ལྡན་པ་ཡི། །དགྲ་འདྲེ་བྱུར་སྲི་རང་དབང་མེད་པར་བྲུབ། །བུ་ཡུག་འཚུབ་འདྲའི་གོ་གསུམ་ཐལ་བ་དང་། །མུན་ནག་འཐིབ་འདྲའི་སྒྱེད་གསུམ་དྲེག་པ་རྣམས། །གཅིག་ཏུ་སྦྲུས་པའི་ཡས་ཀྱི་ཐལ་འཇིམ་འདི། །ལྡང་མེད་གནོན་པའི་རི་རབ་ཆེན་པོ་སྟེ། །སྲིད་པའི་ཐལ་འཇིམ་མགོ་དགུ་ལས་ལ་བསྐུལ། །མཛོ་འགར་དྲེལ་ཁྱི་ར་ཕག་བ་གླང་སོགས། །མགོ་དགུ་སྲིད་པའི་འདྲེ་དགུ་ལང་འདྲ་ཡི། །སྣ་དགུར་རླུང་འཚུབ་ཁ་དགུས་དགྲ་སྲི་ཟོ། །བཅོ་བརྒྱད་མིག་ནས་མེ་འབར་དགྲ་བོ་སྲེགས། །ཆས་ཤིག་ཐལ་བ་སྐྱ་བོའི་འཚུབ་མས་གཡོགས། །རྒྱུགས་ཤིག་མྱོས་འཐིབ་བརྒྱལ་འབོག་རྨུག་ཏུ་ཆུག །ནོན་ཅིག་དགྲ་སྲི་ཁྱོག་པ་མེད་པར་ནོན། །མནན་འོག་འདི་ནས་ལྡང་བར་མ་གྱུར་ཅིག །རེ་བ་ནག་པོས་འགེབ་སྟངས་བྱ་ཞིང་། ཧཱུྃ་བྷྱོ༔ ཁྲོ་རྒྱལ་ཀུན་ཡུམ་དཔའ་མོ་འོད་ཟེར་ཅན། །གཙོ་འཁོར་སྤྲུལ་པར་བཅས་པའི་མཐུ་སྟོབས་ཀྱིས། །སྔོན་ཚེ་སྲིད་པ་ཡེ་སྨོན་རྒྱལ་པོ་ཡི། །རྨུ་གབ་ངམ་རྗེ་རྩོལ་པོར་བཀབ་པ་དང་། །རྒྱ་གར་རྒྱལ་པོ་པཎ་གྲུབ་ཚོགས་བཅས་ཀྱི། །རྨུ་གབ་མུ་སྟེགས་རྣམས་ལ་བཀབ་པ་དང་། །སྤུ་རྒྱལ་བོད་རྗེ་བཙད་པོའི་རྨུ་གབ་དེ། །མཐའ་བཞིའི་དམག་ཚོགས་མགོ་ལ་ཇི་ལྟར་བཀབ། །དེ་བཞིན་འདིར་འདུས་རྣལ་འབྱོར་དཔོན་སློབ་ཀྱི། །རྨུ་གབ་བསྟན་དགྲ་ལས་ངན་མགོ་ལ་ཁོབ། །རྒྱུ་སྦྱོར་ཡོན་བདག་འདི་ཡི་རྨུ་གབ་དེ། །ཐད་དུ་ལང་བའི་དགྲ་བོའི་མགོ་ལ་ཁོབ། །འགོ་ཞིང་སྡོང་གྲོགས་མཛད་པའི་ལྷ་སྲུང་གི། །རྨུ་གབ་དགྲ་ཇག་ཆོམ་རྐུན་མགོ་ལ་ཁོབ། །དཀར་ཕྱོགས་སྐྱོང་བའི་ལྷ་སྲིན་སྡེ་བརྒྱད་ཀྱི། །རྨུ་གབ་ནག་ཕྱོགས་དགྲ་འདྲེའི་མགོ་ལ་ཁོབ། །རི་མགོ་སྨུག་པས་གཡོག་པར་མུན་འཐིབ་ལྟར། །དགྲ་མགོ་རེ་བ་ནག་པོས་ད་ཐུམས་ཤིག །ཉི་མ་གཟས་ཟིན་ལམ་མི་མཐོང་བ་ལྟར། །དགྲ་མིག་ཁྲག་གིས་ཁོངས་ལ་ལྡོང་བར་གྱིས། །བསྐལ་པའི་མུན་ནག་འཐིབ་བཞིན་རྨུགས་སུ་ཆུགས། །རྨུགས་འོག་དེ་ནས་སངས་བར་མ་གྱུར་ཅིག །བྱད་ཐག་གིས་དམ་པོར་བསྡམ་དེ་མདུད་སྟེང་ཐེལ་བརྒྱབ་ཅིང་། ཧཱུྃ་བྷྱོ༔ ཡེ་ཤེས་མཁའ་འགྲོའི་གཙོ་མཆོག་འོད་ཟེར་ཅན། །གཙོ་འཁོར་སྤྲུལ་པར་བཅས་པའི་ནུས་མཐུ་ཡིས། །ཉེས་བྱེད་དགྲ་བོ་མ་ཤོར་དམ་དུ་ཆིངས། །སྡེ་བརྒྱད་དྲེགས་པའི་བྱད་ཐག་ཞགས་པ་དང་། །དབྱེར་མེད་མ་མོའི་ནད་ཞགས་སྔོ་དམར་འདིས། །དམ་ཉམས་དགྲ་བོ་ལས་ངན་འཆོར་མེད་སྡོམས། །ཉེས་ཅན་རང་རང་ལས་ལས་གྲུབ་པ་ཡི། །བྱད་ཐག་ཁྱི་སྤུ་ར་བལ་སྐུད་པ་འདིས། །མ་འཆོར་དམ་དུ་ཟུངས་ལ་དྲག་ཏུ་སྡོམས། །ད་ལྟའི་བཟུང་འོག་འདི་ནས་མ་འཆོར་ཅིག །བཅིང་པ་མ་ཤིག་ཁྲོལ་བ་མེད་པར་ཆིངས། །ད་ལྟའི་བཅིང་འོག་འདི་ནས་མ་འགྲོལ་ཅིག །བསྡམ་པ་མ་ཀློད་ལྷོད་པ་མེད་པར་སྡོམས། །ད་ལྟའི་བསྡམ་འོག་འདི་ནས་མ་ལྷོད་ཅིག །མནན་པ་མ་བཀྱག་ཁྱོག་པ་མེད་པར་ནོན། །ད་ལྟའི་མནན་འོག་འདི་ནས་མ་འཕར་ཅིག །བྱང་ཆུབ་མཆོག་གི་སེམས་ལྡན་མ་གྱུར་བར། །བསྐལ་པ་སྟོང་ཡང་ལྡང་བར་མ་གྱུར་ཅིག །ཞེས་བརྗོད་དེ་སླ་ང་སོགས་སུ་བཞག་ལ། ཧཱུྃ་ཨེ་ཛ་བྷྲུཾ། ཐུགས་རྗེའི་རང་རྩལ་སྲིད་གསུམ་གང་བའི་ཚོགས། །གཅིག་ཏུ་དྲིལ་བའི་སྟོབས་ཤུགས་ནུས་པའི་དཔལ། །ཞིང་བཅུ་མཐར་བྱེད་གཤིན་ཡུལ་ཨེ་གསང་ཀློང་། །ཏིང་འཛིན་རྡོ་རྗེ་རྭ་རྣོན་བརྡ་རུ་སྣང་། །དབྱིངས་རྩལ་འགོག་མེད་དགྲ་འཇོམ་དཔའ་མོའི་སྤྲིན། །དྲག་སྔགས་ལུ་གུ་རྒྱུད་ཀྱི་ཐིག་ལེ་ཡིས། །ནམ་ཡང་གཞོམ་མེད་རྡོ་རྗེའི་ངོ་བོ་རུ། །སྲིད་པ་སྤུ་གྲིའི་འཁོར་ལོས་རྒྱས་ཐོབ་ཅིག །ཧཱ་སྭཱ་ཡེ་ཎ་མ་ཤྲ་ཧཱ་མ་དི་བཱ་ཝཾ་ཨེ་དྷ་རོ་ནི་ཡོ་ཙ་ཥན་ཏེ་དཏ་བཱ་ཧྱ་ཏོ་ག་ཐཱ་ཏ་ཥན་ཏེ་དུན་ཧེ་ཝ་བྷ་པྲ་ཏུ་ཧེ་མ་དྷར་ཡེ་ཨོཾ། བདུན་ནམ་ཉེར་གཅིག་དང་། ཨོཾ་ལཾ་ཨཱ༔ལཾ་ཧཱུྃ་ལཾ་སྟྭཾ་བྷ་ཡ་ནན། ཞེས་རྟེན་འབྲེལ་ནག་པོས་རབ་གནས་བྱས་ཤིང་ཐུན་རྡོ་ལྷག་མ་བྲབ་བོ། དེ་ནས་མནན་པ་དངོས་ལ་ཐུག་ཚེ། དཀར་གཏོར་དང་གསེར་སྐྱེམས་བཤམས་ལ། སྡེ་བརྒྱད་མཆོད་པ་འདོད་གསོལ་བཅས་བཏང་ལ། གཟུ་དཔང་ནི། ཧཱུྃ་བྷྱོ༔ མི་མངོན་དབྱིངས་ནས་དཀོན་མཆོག་གཟུ་དང་དཔང་། །རྩ་གསུམ་བསྲུང་མར་བཅས་པ་དགོངས་སུ་གསོལ། །བདག་ནི་སངས་རྒྱས་བསྟན་པའི་སྒོར་ཞུགས་ཤིང་། །སྒོ་གསུམ་རྒྱལ་བའི་བཀའ་ལྟར་དང་བླངས་ཀྱང་། །ཉམས་པའི་དགྲ་བོ་ལས་ངན་སྡིག་ཅན་འདིས། །བྱང་ཆུབ་སྒྲུབ་པའི་ཆོས་ལ་བར་བཅད་ཅིང་། །དང་པོ་སངས་རྒྱས་བསྟན་པ་གཉན་པོ་བཤིགས། །བར་དུ་གསང་སྔགས་ཐེག་པའི་དམ་ཡང་བཀྲལ། །ད་ལྟ་སྒྲུབ་པའི་རྣལ་འབྱོར་བདག་ལ་བསྡོས། །འདི་ལ་བསྒྲལ་བའི་ཞིང་བཅུ་ཚང་འདུག་པས། །རྩ་གསུམ་དཔའ་བོ་མཁའ་འགྲོ་ཆོས་སྐྱོང་རྣམས། །མ་གཡེལ་ཐུགས་དམ་ཕྲིན་ལས་དུས་ལ་བབས། །རེ་ཞིང་ལྟོས་པའི་ལྷ་ཚོགས་ར་མདར་བསྐུལ། །གནོད་སྡང་གདུག་སེམས་ལྡན་པའི་མཐའ་བཞིའི་དམག །དགྲ་ཇག་ཆོམ་རྐུན་ཡིད་ལ་བརྣག་པ་ཀུན། །ལྡོག་མེད་ཆོས་སྐུའི་གཞི་ཀློང་གནོན་པར་མཛོད། །ཅེས་བརྗོད་པས་འཐུས། ཀླུ་བདུད་གསལ་བ་ནི། རང་ཉིད་འོད་ཟེར་ཅན་མ་ཡི། །ཕྱག་གཡས་རལ་གྲི་སར་བཏབ་པས། །རྒྱ་མཚོ་ཆེན་པོ་སྔོ་མེར་འཁྲིགས། །དེ་ནང་ཀླུ་བདུད་མགོ་དགུ་པ། །རྩ་ཞལ་ཆུ་སྲིན་ཁ་གདངས་ཤིང་། །ཁ་རླངས་དུག་གི་སྤྲིན་ཕུང་འཁྲིགས། །ཞལ་ནས་ང་རོ་འབྲུག་སྟོང་ལྡིར། །ཕྱག་ནི་བཅོ་བརྒྱད་རྩ་ཕྱག་གིས། །དགྲ་བགེགས་ལེན་ཕྱིར་སྤར་བ་གདེངས། །ལྷག་མ་གཡས་རྣམས་ཆུ་གྲི་དང་། །གཡོན་པས་ནད་ཀྱི་རྐྱལ་བ་བསྣམས། །འཁོར་དུ་ཀླུ་རིགས་རྣམ་བཞིས་བསྐོར། །བདག་ཉིད་འཕགས་མའི་ཐུགས་ཀ་ནས། །འོད་ཟེར་འཕྲོས་པས་སྤྱན་དྲངས་གྱུར། །ནཱ་ག་ར་ཛ་བཛྲ་ས་མ་ཡཱ་ཛ༔ ཞེས་བསྡུ་རྒྱ་བྱ། བཛྲ་ས་མ་ཡཱ་ཧོ༔ ཏིཥྛན་ཏུ༔ ཞེས་རང་ཉིད་ལྷའི་ང་རྒྱལ་གྱིས་ཀླུ་བདུད་ཀྱི་མགོར་རྡོ་རྗེ་བཞག་སྟེ་དམ་ལ་བཞག་པར་མོས། དེ་ནས་རང་གི་ཐུགས་ཀ་ནས་སྒོ་མ་ཕྱག་རྒྱ་བཞི་སོགས་སྤྲོས་པས་དགྲ་བགེགས་ཐམས་ཅད་དབང་མེད་དུ་བཀུགས་ནས་ལིང་ཀ་ལ་བསྟིམ་པར་མོས་ལ། གོང་གི་འགུགས་ཐུང་དེའམ། ཡང་ན། ན་མོ། དཀོན་མཆོག་གསུམ་གྱི་བདེན་པ་དང་། །རྩ་བ་གསུམ་གྱི་བྱིན་རླབས་དང་། །མཁའ་འགྲོ་ཆོས་སྐྱོང་ནུས་མཐུ་ཡིས། །དུས་འཁྲུགས་ཀླ་ཀློ་མཐའ་བཞིའི་དམག །དགྲ་ཇག་ཆོམ་རྐུན་ཕུང་སྲི་རྣམས། །དགྲ་གཟུགས་རྫས་ལ་མྱུར་དུ་ཁུག །ལན་གསུམ་མམ་བདུན་སོགས་དང་། བཛྲ་ཨངྐུ་ཤ་ཡ་ཛ༔ བཛྲ་པ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གཎྚེ་ཧོ༔ བཛྲ་པྲ་ཝེ་ཤ་ཡ་ཕཊ༔ བཛྲ་ཨ་ཝེ་ཤ་ཡ་ཨཱ༔ ཞེས་འགུགས་གཞུག་བཅིང་མྱོས་བྱས་ལ་ལྷ་དང་དབྱེ་ཞིང་རྟེན་ལ་དབབ་ནས་བརྔན་གཏོར་ཤ་ཁྲག་གིས་བརྒྱན་པ་བཤམས་ལ། འགུགས་གཞུག་དང་བྱིན་རླབས་སྤྱི་ལྟར་བྱས་ནས། ནཱ་ག་དུ་ཛ༔མ་ར་ཡ་རྦད། དགྲ་བགེགས་ཀྱི་མཾ་ས་ཙིཏྟ་རཀྟ་ཀོ་རོ་ཙ་ན་ཀེཾ་ནི་རི་ཏི་གྷྲྀ་ཧྞ་ཁ་ཧཱི། ལན་གསུམ་སོགས་ཀྱིས་ཕུལ། ཧཱུྃ་བྷྱོ༔ ཀླུ་བདུད་ནག་པོ་ཏི་པ་ཙ། །དགྲ་བོའི་ཤ་ཁྲག་གཏོར་མ་འདི། །འབུལ་གྱིས་དགྱེས་པར་རོལ་ནས་ཀྱང་། །བསྟན་འགྲོར་གནོད་པའི་མཐའ་དམག་དང་། །ཞིང་གྱུར་དགྲ་ཇག་ཆོམ་རྐུན་རྣམས། །སྡོམ་འཛིན་མནན་པའི་ཕྲིན་ལས་མཛོད། །ཞེས་དམར་གཏོར་དོང་དུ་ཕུལ་ལ། མནན་བྱ་གཏད་པ་ནི། ཧཱུྃ་བྷྱོ༔ བདེ་གཤེགས་སྟོན་པ་སངས་རྒྱས་ཀྱི། །བསྟན་པ་རིན་ཆེན་འདི་ཉིད་ལ། །གནོད་ཅིང་འཚེ་བའི་དགྲ་བགེགས་སྲི། །ཀླུ་བདུད་ནག་པོ་ཁྱོད་ལ་གཏད། །ཕ་མ་འགྲོ་བ་སེམས་ཅན་ལ། །གནོད་སེམས་སྦྱོར་ངན་སྡུག་ལ་གཏད། །མ་རུང་བརླིང་སྙིང་དགྲ་གདོན་སྲི། །ཀླུ་བདུད་ནག་པོ་ཁྱོད་ལ་གཏད། །བསྟན་འཛིན་སྐྱེས་བུ་ཡོངས་ལ་འཚེ། །རྣལ་འབྱོར་བདག་ལ་བར་གཅོད་པའི། །དམ་ཉམས་སྡང་དགྲ་བགེགས་དང་སྲི། །ཀླུ་བདུད་ནག་པོ་ཁྱོད་ལ་གཏད། །ནམ་ཞིག་བྱང་ཆུབ་སེམས་ལྡན་ཞིང་། །འགྲོ་མང་བདེ་ལ་འགོད་ནུས་བར། །ཟུངས་ཤིག་ཆིངས་ཤིག་དྲག་ཏུ་སྡོམས། །བསྐལ་པའི་བར་དུ་མ་གཏིང་ཞིག །ཅེས་རང་གི་སྐེད་པར་གཡོན་དུ་ལན་གསུམ་བསྐོར་ནས་དོང་དུ་བསྐྱུར་ལ། རྭ་རྩེ་ཧོམ་ཟུར་མདུན་མར་བསྟན་ལ་བཞག་ཏེ། ཁུང་ཚུད་ས་བདགཀླུ་གཉན་རྣམས། །དགའ་ནས་ཙིར་སྒྲ་ཏི་རི་རི། །ཐར་མེད་ཀླུ་བདུད་ཁ་བསྡམ་ནས། །རང་གནས་ས་འོག་གྲོང་ཁྱེར་སོང་། །ཞེས་ཀླུ་བདུད་སླར་བཏང་ལ། །ཨོཾ་མ་རི་ཙྱཻ་མཱུཾ་སྭཱ་ཧཱ། ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྴ་ཀ་ལ་རུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ། དགྲ་བགེགས་བྱད་མ་ཀླ་ཀློ་མུ་སྟེགས་མཐའ་དམག་དམ་སྲི་ཇག་ཆོམ་རྐུན་པོའི་ལུས་ངག་ཡིད་གསུམ་མ་ར་ཡ་རྦད་བྷྱོ་བཟློག་སོད་སྟྭཾ་བྷ་ནན། དམ་ཉམས་དགྲ་བོ་མིང་འདི་ཞེས་བགྱི་བའི་ཁ་རྗེ་དབང་ཐང་ཐམས་ཅད་མཱ་ར་ཡ༴སོགས་ནས། སྟྭཾ་བྷ་ཡ་ནན་བར་སོགས་བར་བརྗོད་ལ། དེའི་རིང་ལ་མཆོད་གཡོག་པ་སོགས་ཀྱིས་ས་དང་རྡོས་དམ་པོར་བརྫངས་ལ་རླུང་གཡབ་ཀྱིས་གཡབ་ཅིང་། མེ་སྦར་ཆུ་བླུགས་སས་མནན་ཞིང་རི་རབ་དང་རྡོ་རྗེ་རྒྱ་གྲམ་བྲིས་པའི་རྡོས་མནན། སླར་ཡང་ས་རྡོའམ་སྤང་གྲུ་གསུམ་བཀོག་པ་ཡོད་ན་དེས་མནན་ཏེ་ལས་རྗེས་མི་མངོན་པར་བྱ་ཞིང་། ཧཱུྃ་བྷྱོ༔ ཁྲག་འཐུང་ཀུན་ཡུམ་དཔལ་ཆེན་མོའི། །ཡེ་ཤེས་ཐུགས་རྗེའི་སྒྱུ་འཕྲུལ་གཟུགས། །ནམ་མཁའ་རླུང་མེ་ཆུ་དང་ས། །རི་རབ་ལྷུན་པོའི་འོག་ཏུ་གནོན། །རྒྱ་གྲམ་འབར་བས་རྒྱས་གདབ་བོ། །ནྲྀ་ཏྲི་སྟྭཾ་བྷ་ཡ་ལཾ་ནན། ཞེས་བརྗོད་ལ་རྡོ་རྗེ་བྲོ་ཡི་རྒྱས་གདབ་ནི། ཧཱུྃ་བྷྱོ༔ ང་ནི་རྒྱལ་ཀུན་བསྐྱེད་པའི་ཡུམ། །ཐུགས་རྗེ་ཐབས་ཀྱི་སྤྲུལ་བསྒྱུར་འགྱེད། །སྒེག་དཔའ་འཇིགས་རུང་སྐུ་ཡི་གར། །དགོད་གཤེ་དྲག་ཤུལ་གསུང་གི་གར། །སྙིང་རྗེ་རྔམ་ཞི་ཐུགས་ཀྱི་གར། །ཉམས་དགུ་ལྡན་པའི་གར་བསྒྱུར་ཞིང་། །རྡོ་རྗེ་ཁྲོས་པའི་སྟངས་སྟབས་དང་། །ཉི་ཟླ་འབར་བའི་ལྟ་སྟངས་ཀྱིས། །གཡས་རོལ་བདེ་ཆེན་ཡེ་ཤེས་བྲོ། །གཡོན་རོལ་སྟོང་ཆེན་དབྱིངས་ཀྱི་བྲོ། །མཉམ་རོལ་ཐབས་ཤེས་ཟུང་འཇུག་བྲོ། །མ་བཅོས་འཁོར་གསུམ་བློ་འདས་བྲོ། །བློ་འདས་ཆོས་སྐུའི་བྲོ་བརྡུང་བས། །མཆོག་ཐུན་དངོས་གྲུབ་མྱུར་ཐོབ་ཤོག །ཞེས་བརྗོད་པས་ཆོས་སྐུའི་རང་ཞལ་ལ་བལྟའོ། །དྲག་མོ་འོད་ཟེར་ཅན་མའི་ལས་སྦྱོར་མཐིལ། །དགྲ་མནན་ལྕགས་ཀྱི་ནག་པོ་ལ། །ཟུར་རྒྱན་རྡོ་རྗེའི་དྲྭ་བ་འདི་བཀོད་མཐུས། །དགྲ་ཚོགས་བདག་མེད་གཞི་ཀློང་ནོན་གྱུར་ཅིག །ཅེས་འཕགས་མ་འོད་ཟེར་ཅན་གྱི་དྲག་པོའི་ལས་མཐའ་དགྲ་མནན་ལྕགས་ཀྱི་མཆོད་རྟེན་ནག་པོའི་ཟུར་རྒྱན་གནམ་ལྕགས་རྡོ་རྗེའི་དྲྭ་བ་ཞེས་བྱ་བ་འདི་ཡང་སྙིང་གྲོགས་དམ་པ་རྡོ་རྗེའི་མཆེད་པོ་རིན་པོ་ཆེ་སྐྱིད་པ་བླ་མ་མཁྱེན་རབ་རྒྱ་མཚོའི་བཀས་བསྐུལ་མ་གནང་བ་ལ་བརྟེན་པ་དང་། རང་གིས་ཀྱང་མུ་སྟེགས་ཀླ་ཀློའི་ངན་སྦྱོར་དང་། མཐའ་བཞིའི་དམག་གི་འཇིགས་པ་སོགས་ལའང་ཕན་དུ་རེ་བའི་བསམ་སྦྱོར་དག་པས། མཆོག་གྱུར་སྤྲུལ་པའི་གཏེར་ཆེན་འགྲོ་མགོན་ལུང་རིག་གླིང་པའི་ཟབ་གཏེར་གྱི་ཆ་ལག་དཔའ་མོ་འོད་ཟེར་ཅན་གྱི་དྲག་པོའི་ལས་མཐའ་དགྲ་མནན་ལྕགས་ཀྱི་མཆོད་རྟེན་ནག་པོ་ཞེས་བྱ་བ་སྔ་སོར་རང་གིས་བསྒྲིགས་པ་ཉིད་ཅུང་ཟད་རྒྱས་སུ་བཏང་ཞིང་། དེའི་ཟུར་རྒྱན་དུ་མོས་པས་སྔོན་བྱོན་མཁས་གྲུབ་རྣམས་ཀྱི་གསུང་སྒྲོས་དང་བསྟུན་ཏེ། མགོ་ལོག་ཕྱོགས་ཀྱི་སྤྲུལ་མིང་པ་ཆོས་དབྱིངས་ཀུན་གསལ་རྒྱ་མཚོའམ། མིང་གཞན་འགྱུར་མེད་ཞིང་སྐྱོང་མགོན་པོར་འབོད་པའི་སྔགས་རྒན་མགོ་དཀར་གཅོལ་པོ་དེས་ཁྲིགས་སུ་བསྡེབ་པའི་དགེ་བས་དགྲ་བདུད་དམ་སྲི་མ་ལུས་པ་གཞི་གདོད་མའི་རྒྱལ་ཐབས་ལ་མངའ་དབང་འབྱོར་བའི་རྒྱུར་གྱུར་ཅིག །སརྦ་མངྒ་ལཾ། དགེའོ། །དགེའོ། །དགེའོ། ། ཡང་ཟབ་པདྨའི་ཐུགས་ཐིག་གི་དགྲ་མནན་སྔགས།༄༅། དམ་ཆོས་ཡང་ཟབ་པདྨའི་ཐུགས་ཐིག་གི་དགྲ་མནན་སྔགས་ཁོལ་དུ་ཕྱུང་བ་ནི། ཨོཾ་མ་རི་ཙྱཻ་མཱུཾ་སྭཱ་ཧཱ། དམ་ཉམས་དགྲ་བོ་མུ་སྟེགས་ཀླ་ཀློ་མཐའ་བཞིའི་དམག་དཔུང་དམ་སྲི་ཇག་ཆོམ་རྐུན་པོ་ཐམས་ཅད་ཀྱི་ཀཱ་ཡ་ལུས་ཀྱི་དབང་པོ་སྟྭཾ་བྷ་ཡ་ནན་ནན༔ ཝཀྐ་ངག་གི་དབང་པོ་སྟྭཾ་བྷ་ཡ་ནན་ནན༔ ཙིཏྟ་ཡིད་ཀྱི་དབང་པོ་སྟྭཾ་བྷ་ཡ་ནན་ནན༔ དྲག་སྔགས་སོ་ལྔ་པ་དང་། དམ་ཉམས་དགྲ་བོ་དུས་འཁྲུགས་མཐའ་དམག་ཇག་ཆོམ་རྐུན་པོ་ཕུང་བྱེད་དམ་སྲི་ཐམས་ཅད་ཀྱི་ཁ་རྗེ་དབང་ཐང་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ཚེ་བསོད་སྟོབས་འབྱོར་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ མཐུ་རྩལ་ནུས་པ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ མངའ་རིས་འཁོར་འབངས་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ འགོ་བའི་ལྷ་སྲུང་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ བླ་མཆོད་སྲུང་བྱེད་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ཨོཾ་སརྦ་ཛི་ན་ཧཱུྃ་ཛ༔ ཏྲི་ཛ་ཏྲིག་ནན༔ ནྲྀ་ཏྲི་མུ་ཏྲི་ལཾ་ནན༔ ཤནྟྲི་ག་ཏྲི་ནན༔ དགྲ་སྲི་ཕུང་སྲི་སརྦ་གུཾ་གུཾ་སྟྭཾ་བྷ་ཡ་ནན་ནན༔ སྔ་དགྲ་ལག་ཏུ་བརྡར་བ། ཕྱི་དགྲ་ཞེ་ལ་བརྣག་པ། ད་དགྲ་ཁྱི་བཞིན་སྡང་བ། མནའ་དང་ཆད་ལ་མི་སེམས་པའི་གཉེན་བཤེས་མཛའ་གྲོགས། སྨིན་གྲོལ་ཆོས་སྒོར་བཅུག་པའི་སློབ་བུ་དམ་ལས་ལོག་པ། ཟས་གོས་ནོར་ནོར་གྱིས་བསྐྱངས་པའི་ཆུང་མ་སྙིང་རིང་ཕྱིར་ལ་འཁོར་བ། ཡུལ་སྡེར་མི་ཁའི་སྣ་འདྲེན་བྱེད་པ། དཀར་ནག་ལས་གཉིས་གོ་བརྗེ་བྱེད་པའི་ཁྲིམས་བདག་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་དགྲ་བོ་དུས་འཁྲུགས་མཐའ་དམག་ཇག་ཆོམ་རྐུན་པོ་ཕུང་བྱེད་དམ་སྲི་ཐམས་ཅད་ཀྱི་མིག་གི་དབང་པོ། རྣ་བའི་དབང་པོ། སྣ་ཡི་དབང་པོ། ལྕེ་ཡི་དབང་པོ། ལུས་ཀྱི་དབང་པོ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་དགྲ་བོའི་ཀུན་གཞིའི་རྣམ་ཤེས། ཡིད་ཀྱི་རྣམ་ཤེས། ཉོན་མོངས་པའི་ཡིད་ཀྱི་རྣམ་པར་ཤེས་པ་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ དམ་ཉམས་པའི་དགྲ་བགེགས་འབྱུང་པོའི་མ་རིག་པ། འདུ་བྱེད། རྣམ་པར་ཤེས་པ། མིང་དང་གཟུགས། སྐྱེ་མཆེད་དྲུག རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ སྟེང་ཕྱོགས་ལྷ་ཡི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ཤར་ཕྱོགས་དྲི་ཟའི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ལྷོ་ཕྱོགས་གཤིན་རྗེའི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ནུབ་ཕྱོགས་ཀླུ་ཡི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ བྱང་ཕྱོགས་གནོད་སྦྱིན་གྱི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ཤར་ལྷོ་མེ་ལྷའི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ལྷོ་ནུབ་སྲིན་པོའི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ ནུབ་བྱང་རླུང་ལྷའི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ བྱང་ཤར་དབང་ལྡན་གྱི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ འོག་ཕྱོགས་ས་བདག་གི་རིགས་ལས་བྱུང་བའི་དགྲ་གདོན་དམ་སྲི་ཐམས་ཅད་མཱ་ར་ཡ་སྟྭཾ་བྷ་ཡ་ནན་ནན༔ སྤྱིར་སངས་རྒྱས་བསྟན་པའི་སྤྱི་དགྲ། སྒོས་དཔལ་ལྡན་བླ་མའི་སྐུ་དགྲ། ཁྱད་པར་དུ་རྣལ་འབྱོར་པ་བདག་གི་སྒོས་དགྲ། གཞན་ཡང་ཉི་མ་ཕྱོགས་བཞི་མཚམས་བརྒྱད་ཀྱི་དགྲ་ཇག་ཆོམ་རྐུན་རྒྱལ་བསེན་ཡུལ་འདྲེ་འགོང་པོ་སྤུན་དགུ་ཐམས་ཅད་ཀྱི་ལུས་ངག་ཡིད་གསུམ་མཱ་ར་ཡ་སྟྭཾ་བྷ་ཡ་ནན་ནན༔ ༈ རྩ་སྔགས་དང་། ལོ་དང་ཟླ་བ་ལ་དགྲ་དར་བ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ ཞག་དང་ཟ་མ་ལ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ སྲོག་ལུས་དབང་ཐང་རླུང་རྟ་ལ་དགྲ་དར་བ་ཐམས་ཅད་མཱ་ར་ཡ་རྦད་ནན༔ དགྲ་མགོ་ཐོག་ཏུ་བབས་པ་ཐམས་ཅད་མཱ་ར་ཡ་རྦད་ནན༔ སྔ་དགྲ་ལག་ཏུ་བརྡར་བ་ཐམས་ཅད་མཱ་ར་ཡ་རྦད་ནན༔ ཕྱི་དགྲ་ཡིད་ལ་སེམས་པ་ཐམས་ཅད་མཱ་ར་ཡ་རྦད་ནན༔ ད་དགྲ་ཁྱི་ལྟར་ཟུག་པ་ཐམས་ཅད་མཱ་ར་ཡ་རྦད་ནན༔ མགོ་ལ་ཏིལ་བརྡུང་བྱེད་པ་ཐམས་ཅད་མཱ་ར་ཡ་རྦད་ནན༔ སེམས་ལ་སྡུག་བསྔལ་གཏོང་བ་ཐམས་ཅད་མཱ་ར་ཡ་རྦད་ནན༔ ལུས་ལ་ན་ཚ་གཏོང་བ་ཐམས་ཅད་མཱ་ར་ཡ་རྦད་ནན༔ སྲོག་ལ་བར་ཆད་གཏོང་བ་ཐམས་ཅད་མཱ་ར་ཡ་རྦད་ནན༔ ཟས་ནོར་ལ་གོད་ཁ་གཏོང་བ་ཐམས་ཅད་མཱ་ར་ཡ་རྦད་ནན༔ རྒྱབ་ནས་འདེད་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ མདུན་ནས་རྩང་བཞིན་འཛུག་པ་ཐམས་ཅད་མཱ་ར་ཡ་རྦད་ནན༔ ཟུར་ནས་གཅོད་དགོས་ཟེར་བ་ཐམས་ཅད་མཱ་ར་ཡ་རྦད་ནན༔ ཟ་ལམ་དུ་དུག་གཡོས་བྱེད་པ་ཐམས་ཅད་མཱ་ར་ཡ་རྦད་ནན༔ འགྲོ་ལམ་དུ་རྩང་འཛུག་པ་ཐམས་ཅད་མཱ་ར་ཡ་རྦད་ནན༔ བྱམས་པ་གཉེན་གྱི་ས་བརྗོད་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ སྡང་བ་དགྲ་ཡིས་སྒྲོག་ཏུ་མ་འཇུག་ཅིག་ཅིག་མཱ་ར་ཡ་རྦད་ནན༔ མཉན་པའི་གྲུ་ཚུགས་སུ་གླེང་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ མགར་གྱི་སོ་མལ་དུ་གླེང་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ དགེ་འདུན་གྱི་འཚོགས་གྲལ་དུ་གླེང་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ སྔགས་པའི་ཕུར་གྲལ་དུ་གླེང་དུ་མ་འཇུག་ཅིག་ཅིག་མཱ་ར་ཡ་རྦད་ནན༔ བརྒྱ་ཁ་མང་གི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ སྟོང་མིག་མང་གི་བྲ་མཆུ་ངན་པ་ཐམས་ཅད་མཱ་ར་ཡ་རྦད་ནན༔ གཙོ་བོའི་མདུན་གྲལ་དུ་གླེང་བ་ཐམས་ཅད་མཱ་ར་ཡ་རྦད་ནན༔ གསོད་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ རྐུ་ཤོམ་བྱེད་པ་ཐམས་ཅད་མཱ་ར་ཡ་རྦད་ནན༔ འཕྲོག་བཅོམ་བྱེད་པ་ཐམས་ཅད་མཱ་ར་ཡ་རྦད་ནན༔ དམག་ཇག་གྲོས་ངན་ཤོམ་པ་ཐམས་ཅད་མཱ་ར་ཡ་རྦད་ནན༔ ལྐོག་ནས་འབུ་བཞིན་འབུག་པ་ཐམས་ཅད་མཱ་ར་ཡ་རྦད་ནན༔ ངོ་ལ་སྤྲེལ་ལྟར་འཛེགས་པ་ཐམས་ཅད་མཱ་ར་ཡ་རྦད་ནན༔ ཀེག་བདུད་གཤེད་གསུམ་ལ་བབས་པ་ཐམས་ཅད་མཱ་ར་ཡ་རྦད་ནན༔ བྱད་ཁ་ཕུར་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ རྦད་འདྲེ་རྦོད་གཏོང་གཏོང་བ་ ཐམས་ཅད་མཱ་ར་ཡ་རྦད་ནན༔ མནན་སྲེག་འཕང་གསུམ་བྱེད་པ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་སྣ་རླུང་ལྟར་འཚུབ་པ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་སྣ་མེ་ལྟར་འབར་བ་ཐམས་ཅད་མཱ་ར་ཡ་རྦད་ནན༔ མི་ཁ་དང་དགྲ་ལྟར་ཆུ་ལྟར་འཁྲིགས་པ་ཐམས་ཅད་མཱ་ར་ཡ་རྦད་ནན༔ ཡུལ་མི་ཁྱིམ་མཚེས་ཀྱི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ རྗེ་ཁོལ་སྐྱ་སེར་གྱི་མི་ཁ་ཟུག་པ་ཐམས་ཅད་མཱ་ར་ཡ་རྦད་ནན༔ ཉི་མ་ཕྱོགས་བཞི་མཚམས་བརྒྱད་ཀྱི་དགྲ་འདྲེ་བྱུར་གསུམ་ཐམས་ཅད་མཱ་ར་ཡ་རྦད་ནན༔ རྨི་ལྟས་མཚན་ངན་ཐན་ལྟས་ངན་པ་ཐམས་ཅད་མཱ་ར་ཡ་རྦད་ནན༔ འགབ་འདྲེ་དམ་སྲི་ཟ་འདྲེ་ཤི་གཤེད་འགོང་པོ་སྲི་ངན་བསེ་རག་ངན་པ་ཐམས་ཅད་མཱ་ར་ཡ་རྦད་ནན༔ རྒྱལ་སྲི་བློན་སྲི་ཕོ་སྲི་མོ་སྲི་ཆེ་སྲི་ཆུང་སྲི་གཞོན་སྲི་ངན་པ་ཐམས་ཅད་མཱ་ར་ཡ་རྦད་ནན༔ གོད་སྲི་ཕུང་སྲི་གྱོད་སྲི་བྱེས་སྲི་དགྲ་སྲི་ངན་པ་ཐམས་ཅད་མཱ་ར་ཡ་རྦད་ནན༔ དཀར་འདྲེ་དབུལ་འདྲེ་བང་འདྲེ་ཐབ་འདྲེ་བསེ་རག་འགོང་པོ་ཐེའུ་རིང་གོད་འདྲེ་ཕུང་སྲི་ངན་པ་ཐམས་ཅད་མཱ་ར་ཡ་རྦད་ནན༔ སད་སེར་བཙའ་ཐན་འབུ་སྲིན་བྲ་བྱི་ལ་སོགས་གཏོང་བའི་ཟ་འདྲེ་ཕུང་སྲི་ཐམས་ཅད་མཱ་ར་ཡ་རྦད་ནན༔ གནོད་བྱེད་རྒྱལ་བསེན་ཐེའུ་རིང་ཤི་འདྲེ་གསོན་འདྲེ་གཅན་གཟན་ཕོ་མོ་ཐམས་ཅད་མཱ་ར་ཡ་རྦད་ནན༔ ནད་མཚོན་མུ་གེ་གཏོང་བའི་འདྲེ་གདོན་རྒྱལ་བསེན་འབྱུང་པོ་ཐམས་ཅད་མཱ་ར་ཡ་རྦད་ནན༔ བདུད་དང་རྣམ་རྟོག་དམ་སྲི་བར་དུ་གཅོད་པ་ཐམས་ཅད་མཱ་ར་ཡ་རྦད་ནན༔ བསྟན་དགྲའི་ལུས་ངག་ཡིད་གསུམ་ཚེ་བླ་སྲོག་གསུམ་དབང་ཐང་རླུང་རྟ་བསོད་ནམས་སྟོབས་ནུས་ལྷ་སྲུང་རྒྱབ་བརྟེན་དང་བཅས་པ་ཐམས་ཅད་མཱ་ར་ཡ་རྦད་ནན༔ གཞན་ཡང་སྣང་སྲིད་ལྷ་སྲིན་སྡེ་བརྒྱད་ཀྱི་ཟ་ཁ་སྟོན་པ་ཐམས་ཅད་མཱ་ར་ཡ་རྦད་ནན༔ བསྐལ་པ་སྟོང་གི་བར་དུ་མ་ལྡང་ཅིག་མཱ་ར་ཡ་རྦད་ནན། ཨོཾ་ལཾ་ཧཱུྃ་ལཾ་སྟྭཾ་བྷ་ཡ་ནན། དགྲ་བགེགས་སརྦ་ཤ་ཏྲུཾ་མཱ་ར་ཡ་རྦད་ནན། ཞེས་བརྗོད། དགྲ་མནན་འདོན་འགྲིགས།༄༅། འོད་ཟེར་ཅན་མའི་དགྲ་མནན་འདོན་འགྲིགས་ནི། བསྒྲུབ་པ་དང་འབྲེལ་ཚེ། སྨད་ཀྱི་བསྐུལ་བའི་འཕྲོས་བླ་གབ་མེད་པའི་སར་ལིང་ཁྲུས་དང་ཆས་གཞུག་བྱ། དེ་ནས་གསེར་གཟུ་ཧོམ་བསྐྱེད། འགུགས་པ་བཅས་སྤྱི་ལྟར་བཏང་མཐར། དགྲ་མནན་ལས། ཧཱུྃ་བྷྱོ། ད་ནི་དགྲ་བོ་བསྒྲལ་བའི་སོགས་ནས་ཁུག་ཅིག་ཅིག་ཛ་ཛ། དེ་ནས་སྨད་ལས་ཀྱི་ཧཱུྃ་ཧཱུྃ། དཀོན་མཆོག་བདེན་མཐུས་བཀུག་པའི་སོགས་ནས། གཞན་དོན་མཐར་ཕྱིན་རྒྱལ་བའི་སྲས་སུ་བསྐྱེད་བར་གཞུང་ལྟར་བཏང་། དེ་ནས་ཟུར་རྒྱན་ལས། བླ་རྡོ་གཅོག་པ། གླང་ཁྲམ། སྨྲེང་གྱེར། དགྲ་རྫས་བཅུ་ཚན་བྲུབ་པ་བཅས་བཏང་ནས། སྟཾ་བྷ་ཡ་ནན་ནན་བར་འདོན། དེ་ནས་དགྲ་མནན་གྱི་བསད་དམིགས། མནན་དམིགས། ནྲི་ཏྲི་ཤ་ཏྲུན་མ་ར་ཡ་རྦད་རྦད་བར་འདོན། དམ་ཆོས་པདྨའི་ཐུགས་ཐིག་གི་དགྲ་མནན་སྔགས། ལོ་ཟླ་མ་སོགས་འདོན། དེ་ནས་སྨད་ལས་ཀྱི་འབྱུང་བཞིའི་ཐུན་བརྡེག་ནས་བཟུང་ཞལ་བསྟབས་བཅས་འདོན། དེ་ནས་དགྲ་མནན་གྱི་ཐུན་གཏོར། དགེ་བསྔོ་བྱ། དྲང་བ་ལྷག་མ་སོགས་སྤྱི་ལྟར་རོ། དགུང་ཐུན་དང་སྲོད་ཐུན་ལ་རྒྱུན་ཁྱེར་ཉི་ཟླའི་ཞགས་པ་འདོན་ལ་བསྙེན་བསྟོད་མཇུག་དགྲ་མནན་གྱི་བསྐུལ་བ་ནས་བཟུང་དགེ་བསྔོའི་བར་ནག་འགྲོས་སུ་འདོན། ཟུར་རྒྱན་མི་དགོས། རྒྱུན་ཁྱེར་གྱི་བཟོད་གསོལ་ནས་བཀྲ་ཤིས་བར་བྱའོ།། ཉིན་ཐ་མ་ཆོ་གའི་བསྙེན་བསྟོད་མཇུག་དགྲ་མནན་ཚར་གཅིག་འདོན། སྨད་ལས་སྐབས་སུ་བླ་རྡོ་གླང་ཁྲམ་སོགས་ཟུར་རྒྱན་མི་དགོས། དགྲ་མནན་དང་སྨད་ལས་འདོན་ཚུལ་ཉིན་སྔ་མ་ལྟར་ལ། ཞལ་བསྟབས་མཇུག ཟུར་རྒྱན་ལས། ཧཱུྃ་བྷྱོ། ང་ནི་གཏུམ་ཆེན་ཁྲོ་མོ་འོད་ཟེར་ཅན། ཞེས་པ་ནས་བཟུང་། རྟེན་འབྲེལ་ནག་པོའི་རབ་གནས་བཅས་འདོན། དེ་ནས་དགྲ་མནན་གྱི་ཐུན་གཏོར། དགེ་བསྔོ། དྲང་བ། བཟློག་པ་སོགས་སྤྱི་ལྟར་རོ།། ༧ གཏོར་མ་འཕང་རྗེས། མནན་པ་བྱེད་སར་ཕྱིན་ལ། རང་ཉིད་འཕགས་པ་སྤྱན་རས་གཟིགས་སུ་སོགས། སྡེ་བརྒྱད་མཆོད་པ་འདོད་གསོལ་བཅས་བཏང་། དགྲ་མནན་གྱི་གཟུ་དཔང་ནས་བཟུང་། ནྲི་ཏྲི་སྟཾ་བྷ་ཡ་ལཾ་ནན་བར། དེ་ནས་བསྟན་མ། བྲོ་མནན། ཟུར་རྒྱན་ལས། ཧཱུྃ་བྷྱོ། ང་ནི་རྒྱལ་ཀུན་བསྐྱེད་པའི་ཡུམ། སོགས། དགྲ་མནན་མཇུག་གི་ཧཱུྃ་བྷྱོ། དཔའ་མོ་འོད་ཟེར་ཅན་མ་ཡི། སོགས། དགེ་བསྔོ་བྱ། ནང་དུ་ལོག་ནས་རྒྱལ་དབྱངས་སོགས་ཆོ་གའི་མཇུག་བསྡུའོ།། ༧ ཉིན་ཆོག་བྱེད་ན། འོད་ཟེར་ཅན་མའི་ལས་བྱང་། ཚོགས་བསྐང་། ལྷག་མའི་མཇུག ལིང་ཁྲུས། ཆས་གཞུག མནན་པ་དང་ཟུར་རྒྱན་སྦྱར་ཏེ་གཏོང་། ཐུན་གཏོར་མཇུག་ཆད་བསྐུལ། ཆད་ཐོ། མནན་པ་བྱ། བསྟན་མ་སོགས་སྤྱི་ལྟར་རོ།། རིག་བྱེད་མའི་དབང་གི་མཚམས་སྦྱོར།༄༅། ལྷ་མོ་རིག་བྱེད་མའི་ལོ་རྒྱུས་ནི། སྤྱིར་རྒྱུད་སྡེ་བཞི་ཀ་ནས་འདིའི་ལྷ་སྔགས་མང་དུ་གསུངས་ཤིང་། ཁྱད་པར་དཔལ་ཀྱཻ་རྡོ་རྗེའི་རྩ་བའི་རྒྱུད་བརྟག་པ་གཉིས་པ་ལས། ཧྲཱིཿལས་བྱུང་བའི་ལྷ་མོ་ནི། །ཁ་ཏོག་དམར་ཞིང་ཕྱག་བཞི་མ། །མདའ་དང་གཞུ་ཡི་ལག་པ་མ། །ཨུཏྤ་ལ་དང་ལྕགས་ཀྱུ་འཛིན། །འདི་ནི་བསྒོམ་པ་ཙམ་གྱིས་ནི། །འཇིག་རྟེན་གསུམ་པོ་དབང་དུ་བྱེད། །ཅེས་སོགས་ཀྱིས་ས་བོན་སྐུ་མདོག་ཕྱག་མཚན་སྔགས་དང་བཅས་པ་རྒྱས་པར་གསུངས་པ་བཞིན་བླ་མེད་ཀྱི་རྒྱུད་ཀྱི་ཁོངས་སུ་གཏོགས་པ་ཡིན། དེ་ལའང་བཀའ་གཏེར་གཉིས་ལས། བཀའ་མ་ནི། སྔོན་རྒྱལ་པོ་ལྷན་སྐྱེས་རོལ་པ་ཞེས་བྱ་བ་ལོངས་སྤྱོད་དང་མངའ་ཐང་བསམ་གྱིས་མི་ཁྱབ་པ་མངའ་ཞིང་། བཙུན་མོ་སྲས་དང་བྲན་འཁོར་མང་དུ་ཡོད་པ་ཞིག་ལ་བཙུན་མོ་སྣང་ཆེན་མ་བྱ་བ་ཞིག་ཡོད་པ་དེའི་དྲུང་དུ་རྒྱལ་པོ་ཡུན་རིང་དུ་མ་འཁོར་བས་བཙུན་མོ་དེས་གཡོག་མོ་ཞིག་ལ་རྒྱལ་པོ་དབང་དུ་བྱེད་པའི་རིག་པ་ཚོལ་ཅིག་ཅེས་སྨྲས་པས། གཡོག་མོ་དེས་སྤྱིར་ཚོང་འདུས་རྣམས་སུ་དྲིས་ཤིང་། བྱེ་བྲག་ཏུ་སྐུད་པ་འཚོང་བའི་ཚོང་འདུས་ཤིག་ཏུ་ཕྱིན་ཏེ་དྲིས་པ་ན། དེ་དག་གི་ནང་ནས་བུད་མེད་སྨུག་ནག་ཤིན་ཏུ་མཛེས་པ་ཞིག་པ་ན་རེ། རྒྱལ་པོ་དབང་དུ་བྱ་བའི་ཐབས་ང་ལ་ཡོད་པ་ཡིན་ཟེར། གཡོག་མོས་དེའི་ཞབས་ལ་གཏུགས་ཏེ་རྗེས་སུ་བཟུང་བར་གསོལ་བ་བཏབ་པས། དེའི་ཞལ་ནས་གང་དབང་དུ་བྱ་བ་དེ་ལ་འདི་བྱིན་ཅིག་ཅེས་ཁ་ཟས་ཀྱི་ཁྱད་པར་ཞིག་གནང་བ་ཁྱེར་ཏེ་བཙུན་མོ་སྣང་ཆེན་མ་ལ་རྒྱུ་མཚན་བརྗོད་ཅིང་གཏད་པ་ན། བཙུན་མོའི་བསམ་པར་འདི་རྒྱལ་པོ་ལ་བྱིན་ན་མི་ལེགས་པ་འབྱུང་སྲིད་སྙམ་ནས། ཁ་ཟས་དེ་བཤུལ་ཐག་མི་རིང་བའི་མཚོ་ཞིག་གི་ནང་དུ་འཕངས་བས། དེར་ཀླུའི་རྒྱལ་པོ་དེ་དབང་དུ་འདུས་ཏེ། དགུང་རེ་བཞིན་བཙུན་མོ་དེའི་དྲུང་དུ་འོང་ཞིང་དགའ་མགུར་བརྩེ་བས། མི་རིང་བ་ཞིག་ན་བཙུན་མོ་ལ་མངལ་ཆགས་པར་གྱུར་ཏོ། རྒྱལ་པོའི་བསམ་པར། ང་དེའི་དྲུང་དུ་མ་ཕྱིན་པས་སྐྱེས་པ་གཞན་དང་འགྲོགས་སོ་སྙམས་ནས་ཆད་པ་གཅོད་པར་བརྩམས་པ་ན། བཙུན་མོས་སྔར་གྱི་ཚུལ་རྣམས་རྒྱལ་པོ་ལ་བསྙད་པས། རྒྱལ་པོ་ན་རེ། བརྟགས་ཤིང་དཔྱད་པར་བྱའོ་ཟེར་ནས། གཡོག་མོ་དེ་སྐུད་འཚོང་གི་གནས་སུ་བལྟར་བཏང་བས། སྔར་གྱི་བུད་མེད་སྨུག་ནག་མཛེས་མ་དེ་བཞུགས་འདུག་པ་རྒྱལ་པོ་ལ་ཞུས་པས། རྒྱལ་པོ་དགྱེས་ནས་ཆད་པས་གཅོད་པ་བཏང་སྟེ་རྗེ་བཙུན་རིག་བྱེད་མ་ཡིན་པར་ཤེས་ནས་ཕོ་བྲང་དུ་གདན་དྲངས་ནས་ཞབས་ལ་གཏུགས། རྗེས་སུ་བཟུང་བར་གསོལ་བ་བཏབ་པ་བཞིན་བྱིན་གྱིས་བརླབས་པས་རྒྱལ་པོས་མི་རིང་བར་དངོས་གྲུབ་ཐོབ་ནས་གྲུབ་ཐོབ་ལྷན་སྐྱེས་རོལ་བ་ཞེས་བྱ་བར་གྲགས་ཤིང་། འདིའི་རྩ་བའི་སྒྲུབ་ཐབས་ཀྱང་མཛད། དེ་ནས་རིམ་པར་རྡོ་རྗེ་གདན་པ་ཆེ་ཆུང་། བ་རི་ལོཙྪ་བ། བླ་མ་ས་སྐྱ་བ་ཆེན་པོ་སོགས་ནས་བརྒྱུད་པ་ཡིན། གཏེར་མ་ལ་མང་དུ་ཡོད་པ་ལས། འདིར་གྲུབ་པའི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཀུ་རུ་ཀུལླེའི་སྒྲུབ་ཐབས་ལས་ཚོགས་དང་བཅས་པ་དཔག་ཏུ་མེད་པ་མཛད་ནས་ཕྱི་འབྱུང་ལྔའི་དབྱིངས་དང་། ནང་རིག་པའི་ཀློང་རྣམས་སུ་གཏེར་དུ་སྦས་པ་ལས། མཁར་ཆེན་ཡེ་ཤེས་མཚོ་རྒྱལ་གྱི་སྤྲུལ་པ་འགྲོ་འདུལ་ལུང་རིག་གླིང་པ་རྩལ་གྱིས་ཐུགས་རྒྱུད་དགོངས་པའི་ཀློང་སྒྲོམ་ནས་བཏོན་པའི་ཟབ་ཆོས་དབང་གི་རྒྱལ་པོའི་མཛོད་ལས་བྱུང་བའི་ལྷ་མོ་ཀུ་ཀུལླེའི་རྗེས་སུ་གནང་བ་བསྩལ་བའི་སྐབས་སུ་བབས་པ་ཡིན། ། ཞེས་སོགས་བརྗོད། མགོ་སྤྲུལ་བས་སོ།། མཁའ་འགྲོ་ཡེ་ཤེས་མཚོ་རྒྱལ་གྱི་རྗེས་གནང་ལག་ལེན་བྱིན་རླབས་ཆར་རྒྱུན།དག་སྣང་མཚོ་རྒྱལ་དགོངས་པའི་གསང་མཛོད་ལས། མཁའ་འགྲོ་ཡེ་ཤེས་མཚོ་རྒྱལ་གྱི་རྗེས་གནང་ལག་ལེན་བྱིན་རླབས་ཆར་རྒྱུན་ཞེས་བྱ་བ་བཞུགས་སོ། ། གུ་རུ་ཛྙཱ་ན་ཌཱཀྐཱི་ནི་སརྦ་སིདྡྷི་ཕ་ལ་ཧཱུྃ༔ ཤེས་རབ་ཕ་རོལ་ཕྱིན་མ་ནི༔ དུས་གསུམ་རྒྱལ་བ་ཀུན་གྱི་ཡུམ༔ འདུ་འབྲལ་མེད་པའི་རང་བཞིན་ལ༔ ཡེ་ནས་རང་ངོ་ཤེས་པས་འདུད༔ དུས་གསུམ་རྒྱལ་བའི་ཕྲིན་ལས་པ༔ བདག་ཉིད་ཆེན་པོ་པད་འབྱུང་གི༔ ཐུགས་ཀྱི་གཟུངས་མར་བསྔགས་པ་ཡི༔ མཁར་ཆེན་ཡེ་ཤེས་མཚོ་རྒྱལ་གྱི༔ སྒྲུབ་ཐབས་ཉམས་ལེན་གང་ཟག་དོན༔ རྗེས་གནང་བྱིན་རླབས་ཆར་རྒྱུན་བསྟན༔ ས་མ་ཡཱ༔ དེ་ལ་དོན་དང་མི་འགལ་བའི། །འཐད་འོས་ཁུངས་ལྡན་ཚིག་ཚོགས་འགས། །ཁ་བསྐང་ལྷན་ཐབས་ཉུང་ངུ་བཅས། །ལག་ལེན་ཁྲིགས་སུ་བསྡེབ་ནས་སྤེལ། །འདི་ལ་སྦྱོར་དངོས་རྗེས་དང་གསུམ༔ སྦྱོར་བ་ཡོ་བྱད་བཤམས་པ་ནི༔ དཀྱིལ་འཁོར་མདའ་གང་བཀོད་ལེགས་སྟེང་༔ རྡུལ་ཚོན་རས་བྲིས་ཚོམ་བུ་གསུམ༔ གང་འཛོམ་རབ་འབྲིང་ཐ་མར་དཔྱད༔ དབུས་སུ་སྐུ་རྟེན་བུམ་པ་དང་༔ མདུན་དུ་ཐུགས་རྟེན་ཤེལ་མེ་ལོང་༔ གཡས་སུ་ཡོན་ཏན་ཡིད་བཞིན་ནོར༔ རྒྱབ་ཏུ་གསུང་སྔགས་བགྲང་ཕྲེང་དམར༔ གཡོན་དུ་ཕྲིན་ལས་ཐོད་ཊཱ་དྲིལ༔ གཞན་ཡང་གསང་རྫས་བདུད་རྩི་དང་༔ གཏོར་མ་སྨན་རཀ་ཉེར་སྤྱོད་བཤམས༔ རང་གཞུང་སྐྱབས་སེམས་ནས་བཟུང་སྟེ༔ བདག་མདུན་དབྱེར་མེད་ལྷ་རུ་བསྒོམས༔ བསྙེན་པ་བརྒྱ་སྟོང་ཁ་ཡང་གསོ༔ དེ་ནས་བུམ་པ་བསྒྲུབ་པ་ནི༔ སྭ་བྷ་ཝ་ཡིས་སྟོང་པར་སྦྱངས༔ སྟོང་པའི་ངང་ལས་བྷྲུཾ་ཡིག་ལས༔ རིན་ཆེན་བུམ་པ་མཚན་ཉིད་ཀུན༔ ཡོངས་རྫོགས་གཞལ་མེད་ཁང་དབུས་སུ༔ ལྔ་ཚན་ལྔ་ཡི་བཅུད་རྣམས་ཀུན༔ ཡོངས་གྱུར་སྐད་ཅིག་དྲན་རྫོགས་སུ༔ པདྨ་ཉི་ཟླའི་གདན་གྱི་ཁར༔ དབུས་སུ་ཡེ་ཤེས་མཚོ་རྒྱལ་མཐིང༔ བཅུ་དྲུག་གཞོན་ཚུལ་ཆགས་པའི་ཉམས༔ འཛུམ་པའི་སྤྱན་དཀྱུས་ཐད་ཀར་གཟིགས༔ ཞལ་གཅིག་ཕྱག་གཉིས་ཞབས་ཕྱེད་སྐྱིལ༔ ཐོད་སྐམ་རྩེ་ཕྲན་རིན་ཆེན་རྒྱན༔ གནག་སྣུམ་དབུ་སྐྲའི་ལན་ཚར་མཛེས༔ ཕྱག་གཡས་ཐོད་རྔ་སྙན་ཐད་དཀྲོལ༔ གཡོན་པས་ཐོད་བུམ་བདུད་རྩིས་གཏམས༔ མེ་ཏོག་སྣ་ཚོགས་དོ་ཤལ་འཕྱངས༔ དར་དཀར་སྟོད་གཡོག་རླུང་གིས་བསྐྱོད༔ དམར་པོ་གསེར་རིས་ཤམས་ཐབས་ལ༔ ལྗང་ཁྲའི་འཕུར་མ་མུ་ཏིག་རྒྱན༔ གསེར་གྱི་སྙན་རྒྱན་དྲིལ་ཆུང་འཁྲོལ༔ གཙུག་ཏོར་ནོར་བུའི་ཏོག་གིས་མཛེས༔ ཤར་དུ་རྡོ་རྗེ་ཌཱཀྐི་དཀར༔ ལྷོ་རུ་རིན་ཆེན་ཌཱཀྐི་སེར༔ ནུབ་ཏུ་པདྨ་ཌཱཀྐི་དམར༔ བྱང་དུ་ཀརྨ་ཌཱཀྐི་ལྗང༔ གཅེར་མོ་དར་དང་རུས་པས་བརྒྱན༔ ཐོད་སྐམ་དབུ་རྒྱན་སྟག་གཟིག་ཤམས༔ གཡས་རྣམས་རིགས་ཀྱི་ཕྱག་མཚན་དང༔ གཡོན་རྣམས་དངུལ་དཀར་དྲིལ་བུ་འཁྲོལ༔ ཀུན་ཀྱང་གཞོན་ཚུལ་བདེ་བ་རྒྱས༔ ནུ་འབུར་ཆགས་པའི་ཆུ་སྐྱེས་བཞད༔ རྩ་གསུམ་རྒྱལ་ཀུན་འདུས་པའི་དཔྱིད༔ འཇའ་དང་འོད་ལྔ་འཁྲིགས་པའི་ཀློང༔ སྟེང་གི་ཆ་ལ་བརྒྱུད་གསུམ་གྱི༔ བླ་མ་བར་དུ་ཡི་དམ་ལྷ༔ སྒྲུབ་སྡེ་བརྒྱད་དང་རྒྱུད་སྡེ་བཞི༔ འོག་གི་ཆ་ལ་གནས་ཡུལ་གྱི༔ དཔའ་བོ་མཁའ་འགྲོ་བསྲུང་མར་བཅས༔ མ་འདྲེས་མཁའ་ལ་གཟའ་སྐར་བཞིན༔ ཡིད་ཡུལ་ལྷམ་མེ་ལྷང་ངེར་གསལ༔ རང་སྲོག་སྔགས་ཀྱི་འོད་ཟེར་ལས༔ རང་སྔགས་ཡི་གེའི་འབྲུ་རྣམས་ཀུན༔ འོད་ཀྱི་ལམ་ནས་རང་སྒྲར་བཅས༔ མདུན་བསྐྱེད་བུམ་ལྷའི་ཐུགས་ཀར་ཕོག༔ བཟླས་པ་སྔགས་ཀྱིས་རྒྱུད་བསྐུལ་བས༔ སྐུ་ལས་བདུད་རྩིའི་རྒྱུན་བབས་པས༔ བུམ་པ་ལྟེམ་གྱིས་གང་བར་དམིགས༔ ཨ་ཧ་རི་ནི་ས་བཾ་ཊཱཀྐི་ནཱི་ཛྙཱ་ན་སྭ་ར་སརྦ་སིདྡྷི་ཨ་བྷི་ཥིཉྩ་ཧཱུྃ༔ ཞེས་པ་ཅི་ནུས་བཟླས་པའི་མཐར། །མཆོད་བསྟོད་གཞུང་བཞིན་བྱས་པའི་རྗེས། །ཨོཾ་ཨཱཿཧཱུྃ་གིས་མཆོད་ཡོན་ཕུལ། །ལྷ་ཉིད་འོད་ཞུ་བདུད་རྩིར་བསམ༔ དེ་ནས་དངོས་གྲུབ་དབང་བཞི་ནི༔ བདག་འཇུག་རྒྱས་པར་བྱེད་པ་འམ༔ ཡང་ན་ཚིག་འདིས་ལེན་པར་བྱ༔ ཨེ་མ་ཧོ༔ སྐྱེ་མེད་ཤེས་རབ་ཕར་ཕྱིན་ཆོས་ཀྱི་སྐུ༔ འགགས་མེད་རྡོ་རྗེ་རྣལ་འབྱོར་ལོངས་སྤྱོད་རྫོགས༔ གང་འདུལ་སྤྲུལ་སྐུ་ཡེ་ཤེས་མཚོ་རྒྱལ་མ༔ དམིགས་མེད་བརྩེ་བ་ཆེན་པོའི་ངང་ཉིད་ལས༔ སྐུ་དང་ཡེ་ཤེས་འདུ་འབྲལ་མེད་པ་ཡི༔ དངོས་གྲུབ་མཆོག་གིས་བདག་རྒྱུད་སྨིན་པ་དང་༔ སྐལ་ལྡན་རྣམས་ཀྱི་སྒོ་གསུམ་བག་ཆགས་སྦྱངས༔ སྐུ་བཞིའི་གོ་འཕང་ཐོབ་པར་མཛད་དུ་གསོལ༔ ཨ་ཧ་རི་ནི་ས་བཾ་ཊཱཀྐི་ནཱི་ཛྙཱ་ན་སྭ་ར་ཀཱ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ སྒྲུབ་རྫས་བུམ་པ་གནས་གསུམ་གཏུགས༔ བུམ་ཆུ་བཏུང་ཞིང་དམིགས་པ་ནི༔ མདུན་བསྐྱེད་མཁའ་འགྲོའི་ལྷ་ཚོགས་དང་༔ ཕྱོགས་བཅུའི་སངས་རྒྱས་བྱང་སེམས་རྣམས༔ བདག་དང་སློབ་མར་བརྩེར་དགོངས་ནས༔ དབང་བཞིའི་ཡེ་ཤེས་སྩོལ་བར་བསམ༔ དེ་ནས་ལས་བུམ་སྒྲུབ་པ་ནི། །སྭ་བྷ་ཝ་ཡིས་སྟོང་པར་སྦྱང༔ སྟོང་པའི་ངང་ལས་སྐད་ཅིག་གིས། །ལས་བུམ་ཁྲོ་བོའི་གཞལ་ཡས་སུ། །ཁྲོ་ཆེན་བདུད་རྩི་འཁྱིལ་བ་ནི། །ལྗང་སྔོན་ཞལ་གཅིག་ཕྱག་གཉིས་པ། །ཕྱག་གཡས་སྣ་ཚོགས་རྡོ་རྗེ་དང་། །གཡོན་པས་བདུད་རྩིའི་ཐོད་པ་འཛིན། །ཞབས་གཉིས་གྱད་ཀྱི་འདོར་སྟབས་ཀྱིས། །པད་ཉིར་མེ་དཔུང་ཀློང་ན་འགྱིངས། །ཁྲོ་བོའི་རྒྱན་དང་ཆ་ལུགས་ཀུན། །མ་འདྲེས་ཡོངས་རྫོགས་ཆེན་པོར་བསྒོམ། །ཐུགས་སྲོག་སྔགས་ཀྱི་ཡི་གེ་ལས། །འོད་ཟེར་འཕྲོ་འདུས་དོན་གཉིས་བྱས། །སྐུ་ལས་བདུད་རྩིའི་རྒྱུན་བབས་པས། །བུམ་པ་ཡོངས་སུ་གང་བར་བསམ། །ཨོཾ་བཛྲ་ཨ་མྲྀ་ཏ་ཀུཎྚ་ལི་ཧ་ན་ཧ་ན་ཧཱུྃ་ཕཊ། ཞེས་སོགས་བདུད་རྩི་འཁྱིལ་བ་ཡི། །བསྙེན་པ་བཟླ་ཞིང་མཆོད་བསྟོད་ནི། །བཛྲ་ཨརྒྷཾ་སོགས་ཀྱིས་མཆོད། །ཧཱུྃ། རྒྱལ་ཀུན་ཐུགས་ཀྱི་ཕྲིན་ལས་ལས། །ཡོངས་ཤར་རྒྱལ་ཀུན་ཕྲིན་ལས་པ། །གདུལ་དཀའ་འདུལ་མཛད་ཧེ་རུ་ཀ །བདུད་རྩི་འཁྱིལ་ལ་ཕྱག་འཚལ་བསྟོད། །ཅེས་བསྟོད་ཨོཾ་ཨཱཿཧཱུྃ་བརྗོད་པས། །ཁྲོ་རྒྱལ་བདུད་རྩི་འཁྱིལ་བ་ཉིད། །འོད་ཞུ་བུམ་པའི་ཆུར་འདྲེས་པས༔ གདོན་བགེགས་མཐར་བྱེད་ནུས་ལྡན་བསམ༔ དེ་ཡན་སྦྱོར་བའི་རིམ་པའོ།། དངོས་གཞི་སློབ་མ་ཁྲུས་ནས་ཕྱུང་༔ བར་ཆད་བྱེད་པའི་གདོན་བགེགས་ལ༔ འབྲུ་གསུམ་སྔགས་ཀྱིས་གཏོར་མ་སྦྱིན༔ རང་ཉིད་བདུད་རྩི་འཁྱིལ་བ་ཡི༔ ང་རྒྱལ་ལྡན་པས་སྲིད་མཐར་བསྐྲད༔ སྐུ་ལས་ཁྲོ་བོ་མེ་དཔུང་འཕྲོས༔ སློབ་མ་བསྲུང་བའི་གུར་དུ་གཞུག༔ བཛྲ་རཀྵའི་སྔགས་ཤམ་གདགས༔ །ཞེས་པ་རྣམས་ཀྱི་དང་པོ་རུ། །སློབ་མ་རྣམས་ལ་ཁྲུས་བྱ་ཞིང་། །ཇི་ལྟར་བལྟམས་པ་ཙམ་གྱིས་ནི། །སོགས་དང་ཡི་གེ་བརྒྱ་པ་བརྗོད། །དེ་ནས་བགེགས་གཏོར་འདུ་བྱས་ལ༔ རཾ་ཡཾ་ཁཾ་གིས་བསྲེགས་གཏོར་བཀྲུས། །ཨོཾ་ཨཱ༔ཧཱུྃ་གིས་སྦྱངས་སྤེལ་བསྒྱུར། །སརྦ་བྷུ་ཏ་ལན་གསུམ་གྱིས། །བགེགས་རིགས་ལན་ཆགས་མགྲོན་རྣམས་བཀུག །ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོ༴སོགས། གསུམ་གྱིས་ཚིམ་པར་བསྔོས་བྱས་ལ། །བདུད་རྩི་འཁྱིལ་བའི་ཏིང་འཛིན་གྱིས། །ཧཱུྃ༔ དང་པོ་གཞི་ལས་གློ་བུར་དུ༔ འཁྲུལ་བའི་ལས་ཉོན་སྡིག་པའི་རྒྱུས༔ ལྷན་སྐྱེས་ཐོག་མའི་མ་རིག་གདོན༔ སེམས་བྱུང་འཁོར་བའི་འདྲེ་བགེགས་རྣམས༔ ཀུན་རྫོབ་གཏོར་མས་ཚིམས་ཀྱིས་ལ༔ དོན་དམ་ཡུམ་གྱི་མཁའ་ལ་དེངས༔ ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། མཆོག་གསུམ་རྩ་གསུམ་བསྟན་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་ཡང་སྐུ་གསུམ་མཁའ་འགྲོ་ཡོངས་ཀྱི་རྗེ་མོ་མཁར་ཆེན་ཡེ་ཤེས་མཚོ་རྒྱལ། མ་སྲིང་མཁའ་འགྲོ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། དོན་དམ་ཆོས་ཉིད་གདོད་ནས་དག་ཅིང་ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང་། སྔགས་འཆང་རྣལ་འབྱོར་བ་བདག་གི་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་པ་ལ་བརྟེན་ནས། དེང་འདིར་རིག་པ་འཛིན་པ་རྣམས་ཀྱི་གཙོས་རྡོ་རྗེ་སློབ་མ་རྣམས་ལ་སྨིན་བྱེད་ཀྱི་དབང་བསྐུར་ཟབ་མོ་བགྱི་བ་ལ་བར་དུ་གཅོད་པར་བྱེད་པའི་གནོད་བྱེད་བགེགས་ཀྱི་རིགས་སུ་གྱུར་པ་ཐམས་ཅད་མཆོད་སྦྱིན་གླུད་གཏོར་རྒྱ་ཆེན་པོ་སྦྱིན་པ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་བདག་སོགས་ཁྲོ་རྒྱལ་འབར་བའི་ཚོགས་རྣམས་རབ་ཏུ་ཁྲོས་ནས་ཡེ་ཤེས་ཀྱི་རྡོ་རྗེ་དང་མཚོན་ཆ་རྣོན་པོ་མེ་རབ་ཏུ་འབར་བ་རྣམས་ཀྱིས་མགོ་བོ་ཚལ་བ་བརྒྱ། ལུས་དུམ་བུ་སྟོང་དུ་གཏོང་བར་གདོན་མི་ཟ་བས་དེ་བས་ན་སོ་སོ་རང་རང་གི་གནས་སུ་བདེ་བར་དེངས་ཤིག དྲག་སྔགས་བརྗོད་ཅིང་ཐུན་གྱིས་བསྐྲད། །དེ་རྗེས་བསྲུང་འཁོར་བསྒོམ་པ་ནི། ཧཱུྃ༔ ཕྱི་སྣོད་འབྱུང་ལྔ་མཁའ་འགྲོའི་དལ༔ ནང་བཅུད་ཕུང་ཁམས་རྟོག་ཚོགས་ལྷ༔ ང་ཡི་སྒོ་གསུམ་རྒྱལ་བའི་ཡུམ༔ བདག་མེད་རྡོ་རྗེ་རྣལ་འབྱོར་མའི༔ སྐུ་ལས་ཁྲོ་བོ་མེ་དཔུང་འཕྲོས༔ སྲིད་གསུམ་ལོག་འདྲེན་ཐལ་བར་རློག༔ ལྷ་སྔགས་ཁྲོ་མཚོན་བསྲུང་བའི་གུར༔ མི་ཤིག་རྡོ་རྗེའི་ཆོས་བདུན་ལྡན༔ བཛྲ་རཀྵ་རཀྵ་ཧཱུྃ༔ ཞེས་བརྗོད་དེ་རྗེས་རང་གཞུང་ལས། །སློབ་མ་ཆོས་ལ་ཉན་པར་བསྐུལ༔ མི་རྟག་རྒྱུ་འབྲས་བསླུ་མེད་ཀྱིས༔ བློ་བཅོས་སྤྱི་དང་བྱེ་བྲག་གི༔ གསང་ཆེན་ཆོས་ཀྱི་ཆེ་བ་བརྗོད༔ ཅེས་པ་རྣམས་ནི་འདི་ལྟར་བྱ། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་སྐུ་བཞི་ཡེ་ཤེས་ལྔའི་བདག་ཉིད་ཁྱབ་བདག་གདོད་མའི་མགོན་པོའི་གོ་འཕང་ལ་འགོད་པར་བྱ། དེའི་ཆེད་དུ་གསང་ཆེན་རྡོ་རྗེ་ཐེག་པའི་ཆོས་ཚུལ་ཟབ་མོ་མཉན་ནས་ཉམས་སུ་ལེན་པར་བྱའོ་སྙམ་པའི་བསམ་པ་བྱང་ཆུབ་མཆོག་ཏུ་བསྐྱེད་པ་སྔོན་དུ་འགྲོ་བས་སྣོད་ཀྱི་སྐྱོན་གསུམ། དྲི་མ་དྲུག །མི་འཛིན་པ་ལྔ་དང་བཅས་པ་སྤངས་ཤིང་འདུ་ཤེས་བཞི་དང་། ཕ་རོལ་དུ་ཕྱིན་པ་དྲུག་ཚང་བའི་སྒོ་ནས་ལེགས་པར་ཉན་འཚལ། དེ་ཡང་རང་རེ་རྣམས་སྔོན་བསགས་བསོད་ནམས་བཟང་པོའི་མཐུ་ལས་ད་ལྟའི་སྐབས་འདིར་སྐྱེ་བར་དཀའ་བ་ལྷོ་རྒྱལ་འཛམ་བུའི་གླིང་ཆོས་ཟབ་དགུ་དར་བའི་ཡུལ་འདིར་སྐྱེས། ཐོབ་པར་དཀའ་བ་དལ་འབྱོར་བཅོ་བརྒྱད་ཚང་དུ་རུང་བའི་ལུས་རྟེན་ཁྱད་པར་ཅན་འདི་ལྟ་བུ་ཐོབ། འཕྲད་པར་དཀའ་བའི་དམ་པའི་ཆོས་ཀྱི་ཕུང་པོ་སྤྱི་དང་ཁྱད་པར་ཟབ་གསང་རྡོ་རྗེ་ཐེག་པའི་ཆོས་ཚུལ་ཟབ་མོ་རྣམས་དང་འཕྲད། མཇལ་བར་དཀའ་བ་མཚན་ལྡན་བླ་མ་དམ་པ་རྣམས་ཀྱིས་རྗེས་སུ་བཟུང་ནས་ཚེ་གཅིག་ལུས་གཅིག་ལ་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་སྒྲུབ་དུ་རུང་བའི་རྒྱུ་རྐྱེན་ལེགས་པར་འཛོམས་པའི་དུས་འདིར་དམ་པའི་ཆོས་ལ་མྱུར་དུ་འབད་རྩོལ་བྱེད་དགོས་པ་ཡིན། དེ་ལྟ་མ་ཡིན་པར་དལ་འབྱོར་དོན་མེད་སྟོང་ཟད་དུ་སོང་ན་ཕྱིས་འདི་ལྟ་བུའི་ལུས་རྟེན་བཟང་པོ་ཡང་ནས་ཡང་དུ་རྙེད་པ་མ་ཡིན་པའི་ཚུལ་ནི་དཔལ་མགོན་འཕགས་པ་ཀླུ་སྒྲུབ་ཀྱིས། རྒྱ་མཚོ་ཆེར་གནས་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་དེ་འབྲས་མཆིས་པར་མཛོད། །ཅེས་དང་། རྒྱལ་བའི་སྲས་པོ་ཞི་བ་ལྷས་ཀྱང་། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་བ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱི་ནས་ཡང་དག་འབྱོར་བར་ག་ལ་འགྱུར། །ཞེས་གསུངས་པ་ལྟར་ཡིན་ལ། ལན་གཅིག་ཐོབ་པ་དེ་ཡང་ཡུན་དུ་མི་གནས་པའི་ཚུལ་ནི་མདོ་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་དང་། བཤེས་སྤྲིང་ལས། ཚེ་འདི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་འབྱུང་དབུགས་རྔུབ་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་སོགས་གསུངས་པ་ལྟར། ཕྱི་བརྟན་པ་སྣོད་ཀྱི་འཇིག་རྟེན། ནང་གཡོ་བ་བཅུད་ཀྱི་སེམས་ཅན་སྤྱི་དང་། ཁྱད་པར་སྟོང་གསུམ་མི་མཇེད་ཀྱི་བདག་པོ་ཚངས་པ་ཆེན་པོ་སོགས་སྐྱེ་དགུའི་བདག་པོ་རྣམས་དང་། རྒྱལ་བ་རྫོགས་པའི་སངས་རྒྱས་སོགས་སྐྱེས་ཆེན་དམ་པ་རྣམས་ནས་བཟུང་། སྲིད་ཁམས་འདི་ན་གནས་སོ་ཅོག་ཐམས་ཅད་ལ་བརྟགས་ཤིང་དཔྱད་ན་མི་རྟག་ཅིང་མི་བརྟན་པའི་རང་བཞིན་ཅན་ཁོ་ན་ལས་རྟག་པར་གནས་པ་གཅིག་ཀྱང་མེད་ལ། ལྷག་པར་ཡང་ལོ་ཟླ་ཞག་དང་སྔ་དྲོ་ཕྱི་དྲོ་ཡུད་ཙམ་རེ་སོང་བཞིན་ཚེ་ཇེ་ཟད་དང་འཆི་བ་ལ་ཇེ་ཉེར་འགྲོ། ཚེ་ལ་ངེས་པ་མེད་པས་ནམ་འཆི་བའི་ཚོད་ནི་སུས་ཀྱང་མི་ཟིན། འཆི་རྐྱེན་ཤིན་ཏུ་མང་བས་ད་ལྟ་སྐད་ཅིག་མ་འདིར་ཡང་གློ་བུར་གྱི་རྐྱེན་དྲག་པོས་མི་འཆི་བའི་གདེངས་ཅུང་ཟད་ཀྱང་མེད་ཅིང་། དུས་ནམ་ཞིག་གི་ཚེ་ན་ཤིན་ཏུ་གཅེས་པར་བཟུང་བའི་ལུས་འདི་ཡང་སྦྲུལ་གྱི་ཤུན་པ་བརྗེས་པ་བཞིན་ཤུལ་དུ་བསྐྱུར་ནས་འགྲོ་དགོས་པས་དེའི་དུས་སུ་ཚེ་གང་བོར་འབད་རྩོལ་ཆེན་པོས་བསོགས་པའི་རྒྱུ་ནོར་ལོངས་སྤྱོད་དང་། གཉེན་གྲོགས་མཛའ་བཤེས་ཐམས་ཅད་ཤུལ་དུ་ལུས་པ་མ་གཏོགས་ཕན་པ་ཅུང་ཟད་ཀྱང་མེད་ལ། དགེ་སྡིག་གི་ལས་གང་དང་གང་བསགས་པ་རྣམས་བསྐྱུར་དུ་མེད་པར་རྗེས་སུ་འབྲངས་བའི་ཚུལ་ནི་རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་འགྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་ནི་གང་ནས་གར་འགྲོ་ཡང་། །ལས་ནི་ལུས་དང་གྲིབ་མ་བཞིན་དུ་འབྲང་། །ཞེས་དང་། མདོ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་ཤིང་དེ་བཞིན་དུ་ཡོན་ཏན་རིན་པོ་ཆེའི་མཛོད་ལས། ས་བླ་མཐོན་པོར་གཤེགས་པའི་མཁའ་ལྡིང་གི། །གྲིབ་མ་རེ་ཞིག་བལྟ་བར་མི་མངོན་ཡང་། །ལུས་ཅན་དག་དང་འདུ་འབྲལ་སྤངས་པ་བཞིན། །ཚོགས་ཤིང་དུས་ལ་བབ་ཚེ་ལྷག་པར་མངོན། །ཞེས་སོགས་གསུངས་པ་ལྟར། ད་ལྟ་དགེ་སྡིག་གང་དང་གང་བསགས་པ་དེ་དང་དེར་མཐུན་པའི་རྣམ་སྨིན་བདེ་སྡུག་སོ་སོར་མ་འདྲེས་པར་སྨིན་པར་ངེས་པས། ལུས་ངག་ཡིད་གསུམ་གྱི་མི་དགེ་བའི་བསམ་སྦྱོར་མཐའ་དག་སྤངས་ནས་ལེ་ལོ་དང་ཕྱི་བཤོལ་གྱི་དབང་དུ་མི་བཏང་བར་སྒོ་གསུམ་ཆིག་དྲིལ་གྱིས་རྣམ་པར་དཀར་བའི་ལས་ལ་བརྩོན་པར་བྱ་དགོས་པ་ཡིན། དེ་ལ་འདིར་སྟོན་པ་ཐུབ་པའི་དབང་པོ་དེ་ཉིད་ཀྱིས་གདུལ་བྱ་རྣམས་ཀྱི་ཁམས་དང་བསམ་པ་དང་། བག་ཉལ་གྱི་རིམ་པ་ལ་དགོངས་ནས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་དེ་རྣམས་བསྡུས་ན་གསུང་རབ་ཡན་ལག་བཅུ་གཉིས་སུ་འདུས། དེ་ཡང་ཚུར་བསྡུ་ན་ཐེག་པ་ཆེ་ཆུང་གི་ཆོས་གཉིས་སུ་འདུས་པ་ལས་འདིར་ཐེག་པ་ཆེན་པོའི་ཆོས་ཡིན། དེ་ལའང་རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་གསང་སྔགས་རྡོ་རྗེའི་ཐེག་པ་གཉིས་སུ་ཡོད་པ་ལས། ཇི་སྐད་དུ། ཚུལ་གསུམ་སྒྲོན་མེ་ལས། །དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་དང་། ཨོ་རྒྱན་ཆེན་པོས། ཐེག་པ་ཀུན་ལས་ཁྱད་འཕགས་པ༔ ཟབ་མོ་སྔགས་ཀྱི་ཐེག་པ་འདི༔ དཔེར་ན་སྐས་ཀྱི་ཐེམ་རིམ་བཞིན༔ དབང་པོའི་དོན་དུ་གསུངས་པ་དང༔ ཚད་པའི་ནད་ལ་ག་བུར་བཞིན༔ གཉེན་པོའི་དོན་དུ་གསུངས་པ་དང༔ འོ་མ་ལས་ནི་མར་བཞིན་དུ༔ སྙིང་པོའི་དོན་དུ་གསུངས་པའོ༔ ཞེས་གསུངས་པ་ལྟར་རྒྱུའི་ཐེག་པ་ལས་ཁྱད་པར་དུ་མས་འཕགས་པ་སྔགས་ཀྱི་ཐེག་པ་ཡིན། དེ་ལ་རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་གསུམ་ཡོད་པ་ལས་འདིར་བླ་མ་དགོངས་པ་འདུས་པ་ལས། སྤྱིར་ཡང་བོད་རྣམས་གསར་ངེས་ཆེ་བ་དང ༔ སྙིགས་མའི་འགྲོ་ལ་ལྷག་པར་ཐུགས་བརྩེ་བས༔ མཐའ་དབུས་ཐམས་ཅད་གཏེར་གྱིས་བཀང་ནས་བཞག༔ མ་འོངས་དུས་སུ་ཕྱོགས་རེའི་གྲགས་པ་ཅན༔ རང་ཆེ་འབྱིན་ཅིང་གཏེར་ལ་རྩོད་ན་ཡང༔ སྙིགས་མའི་ཆོས་བྱེད་ཕལ་ཆེར་གཏེར་གྱིས་འདྲེན༔ གདམས་པ་སྣ་རེས་གང་ཟག་གྲོལ་བར་ངེས༔ དེ་བས་ལས་སད་སྐལ་ལྡན་སྦྱང་བ་ཅན༔ འཆི་བ་དྲན་ན་གཏེར་ཆོས་ཉམས་སུ་ལོངས༔ ཚེ་གཅིག་སངས་རྒྱས་ཐོབ་བོ་རྗེས་འཇུག་རྣམས༔ ཞེས་སོགས་མང་དུ་གསུངས་པ་ལྟར་དུས་ལ་བབས་པའི་ཟབ་ཆོས་གཏེར་མར་གྲགས་པ་ཡིན། དེ་ལའང་ཀུན་རྫོབ་རྫས་ཀྱི་གཏེར་དང་། དོན་དམ་དགོངས་པའི་གཏེར་དང་གཉིས་ལས། འདི་ནི་ཟབ་གསང་བླ་ན་མེད་པ་དོན་དམ་དགོངས་པའི་གཏེར་ཞེས་བྱ་བ་ཡིན། དེ་ལའང་རྒྱུད་སྡེ་ཆེན་པོ་དྲུག་དང་བཞི་དང་གཉིས་སོགས་དབྱེ་ཚུལ་མང་ནའང་། འདིར་ཐབས་ཤེས་གཉིས་མེད་གསུམ་དུ་ཕྱེ་བ་ལས། འདི་ཉིད་ཤེས་རབ་ཀྱི་ཕྱོགས་སུ་གཏོགས་པ་ཡིན། དེ་ལའང་ལྔ་དང་སྔགས་ཀྱི་དབྱེ་བ་མཐའ་ཡས་པ་ལས་འདིར་མཁར་ཆེན་ཡེ་ཤེས་མཚོ་རྒྱལ་གྱི་སྤྲུལ་པའི་སྐུ་མཆོག་དམ་པ་རྩོད་མེད་གྲུབ་པའི་གཏེར་ཆེན་འགྲོ་འདུལ་ལུང་རིག་གླིང་པ་རྩལ་གྱི་གཏེར་བྱོན་མཚོ་རྒྱལ་དགོངས་པའི་གསང་མཛོད་ཀྱི་ཆོས་སྡེ་ལས་བྱུང་བ་ཡེ་ཤེས་མཁའ་འགྲོ་ཡོངས་ཀྱི་རྗེ་མོ། མཁར་ཆེན་ཡེ་ཤེས་མཚོ་རྒྱལ་གྱི་རྗེས་གནང་བསྐུར་བ་ལ། ཐོག་མར་གདམས་པ་ཟབ་མོ་འདི་ལ་ཡིད་ཆེས་པའི་ཕྱིར་ཆོས་འདིའི་བྱུང་ཁུངས་དང་། གསུམ་ལྡན་གྱི་བརྒྱུད་པ་ཁུངས་བཙུན་པའི་ལོ་རྒྱུས་མདོ་ཙམ་བརྗོད་པ་ནི། ཨེ་མ་ཧོ༔ རང་རིག་སྟོན་པ་ཀུན་བཟང་གིས༔ རང་ལས་མི་གཞན་འཁོར་རྣམས་ལ༔ ཤེས་རབ་ཕ་རོལ་ཕྱིན་པའི་དབང༔ འཕོ་མེད་དགོངས་པའི་ངང་ནས་བསྐུར༔ ལྔ་ལྡན་ལོངས་སྐུའི་ཞིང་ཁམས་སུ༔ གསལ་དག་རིགས་ལྔའི་སངས་རྒྱས་ཀྱིས༔ དག་པ་ས་གསུམ་འཁོར་རྣམས་ལ༔ རང་རིག་བརྡ་ཡི་དབང་ཆེན་བསྐུར༔ གང་འདུལ་སྤྲུལ་སྐུའི་ཞིང་ཁམས་སུ༔ མཛད་པ་ཡོངས་རྫོགས་སྟོན་པ་ཡིས༔ རིགས་ཅན་གསུམ་གྱི་སེམས་མ་ལ༔ རྒྱུད་ལུང་མན་ངག་འབྲས་བུའི་དབང་༔ རྫས་དང་སྔགས་ལ་བརྟེན་ནས་བསྐུར༔ ཞལ་ནས་སྙན་དུ་བརྒྱུད་པ་ཡི༔ བར་མ་ཆད་པའི་གདམས་པ་འོ༔ ཁྱད་པར་མཁའ་འགྲོའི་ཐུགས་བཅུད་འདི༔ ཆོས་སྐུའི་ཞིང་དུ་ཀུན་བཟང་མོས༔ རང་སྣང་སངས་རྒྱས་བྱང་སེམས་ལ༔ དབྱེར་མེད་དགོངས་པ་གཅིག་པར་བརྒྱུད༔ འོག་མིན་ལོངས་སྐུའི་ཞིང་ཁམས་སུ༔ རྒྱལ་ཡུམ་རྡོ་རྗེ་རྣལ་འབྱོར་མས༔ ས་དང་ལམ་ལ་གནས་པ་ཡི༔ གནས་ཡུལ་དུར་ཁྲོད་མཁའ་འགྲོ་ལ༔ སྒྲ་ཚིག་སྤངས་པའི་བརྡ་རུ་བསྟན༔ རང་བཞིན་སྤྲུལ་པའི་རྔ་ཡབ་གླིང་༔ རིག་འཛིན་པདྨ་ཐོད་ཕྲེང་གིས༔ མཁར་ཆེན་བཟའ་དང་མནྡྷ་ར༔ གསང་བའི་ཡུམ་ཆེན་སོ་སོ་ལ༔ རྒྱུད་དང་སྒྲུབ་ཐབས་གྲུབ་འབྲས་སོགས༔ གདུལ་བྱའི་དོན་དུ་སོ་སོར་བསྟན༔ དེ་ཡང་སྐུ་གསུམ་སྟོན་པ་རྣམས༔ ངོ་བོ་གཅིག་ལས་ཐ་དད་སྣང་༔ དཔེར་ན་མཁའ་ཡི་ཟླ་བ་དང་༔ ཆུ་ཟླ་སོ་སོར་དབྱེར་མེད་བཞིན༔ འདིར་ཡང་དག་སྣང་ཆོས་ཀྱི་སྡེ༔ མ་འོངས་སྐལ་བ་ལྡན་པ་ཡི༔ མཚོ་རྒྱལ་སྤྲུལ་པའི་གང་ཟག་ལ༔ སྨོན་ལམ་གཏད་རྒྱས་དབང་ཡང་བསྐུར༔ ལས་འཕྲོ་ལྡན་པར་ལུང་དུ་བསྟན༔ བརྒྱུད་པ་དམ་ལྡན་བྱིན་རླབས་མྱུར༔ དེ་ཕྱིར་ཌཱཀྐིའི་སྲོག་ཏིག་གོ༔ ཞེས་གསུངས་པ་ལྟར་སྐུ་གསུམ་རྒྱལ་བ་མ་ལུས་བསྐྱེད་པའི་ཡུམ་གཅིག་སྐྱེ་མེད་ཆོས་སྐུའི་ཀློང་ནས་འགགས་མེད་ལོངས་སྤྲུལ་སྒྱུ་མའི་སྣང་བརྙན་ཅིར་ཡང་བཀྲ་བ། མ་ཚོགས་མཁའ་འགྲོ་ཀུན་གྱི་གཙོ་མོ་ཡེ་ཤེས་མཚོ་རྒྱལ་གྱི་ནང་སྒྲུབ་དངོས་གྲུབ་རྒྱ་མཚོ་ཞེས་བྱ་བ་བརྒྱུད་གསུམ་བླ་མའི་བྱིན་རླབས་ཀྱི་ཆུ་བོ་གཅིག་ཏུ་འདུས་པའི་གཏེར་ཆེན་པོ་དེ་ཉིད་ལ་བརྟེན་ནས་སྨིན་བྱེད་ཀྱི་རྗེས་གནང་ཟབ་མོ་བསྐུར་བ་ལ། བདག་མདུན་བུམ་པ་བསྒྲུབ་པ་དང་། ལྷ་ལ་དབང་མི་ཟ་བའི་ཆེད་དུ་བདག་ཉིད་འཇུག་ཅིང་དབང་བླང་བ་སོགས་སློབ་དཔོན་གྱི་བྱ་བ་རྣམས་གྲུབ་ཟིན། ད་ཁྱོད་རང་སློབ་མ་རྣམས་ཀྱི་བྱ་བ་ལ་ཐོག་མར་སྨིན་བྱེད་ཀྱི་དབང་བསྐུར་ཟབ་མོ་ཞུ་བའི་ཡོན་དུ་མཎྚལ་ཞིག་ཕུལ། ཞེས་པ་ལ་སོགས་ཆོས་བཤད་མཐར༔ སློབ་བུས་གསེར་གཡུའི་མཎྜལ་ཕུལ༔ གདུང་བས་གསོལ་བ་འདི་ལྟར་ཐོབ༔ དེ་ལྟར་མཎྚལ་ཕུལ་ནས་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་གསོལ་བ་གདབ་པ་འདིའི་རྗེས་ཟློས་མཛོད། ཞེས་བསྐུལ་གསོལ་བ་འདི་ལྟར་གདབ། ཨེ་མ་ཧོ༔ སྐུ་བཞིའི་བདག་ཉིད་བླ་མ་རྗེས༔ རྒྱལ་ཡུམ་ཡེ་ཤེས་ཌཱཀྐི་མའི༔ སྐུ་གསུང་ཐུགས་ཀྱི་རྗེས་གནང་གིས༔ བདག་རྒྱུད་སྨིན་པར་མཛད་དུ་གསོལ༔ ཅེས་པས་ལན་གསུམ་གསོལ་བ་གདབ༔ གནང་བ་སྦྱིན་པ་འདི་སྐད་དོ༔ དེ་ལྟར་ལན་གསུམ་གྱིས་གསོལ་བ་བཏབ་ནས་གནང་བ་སྦྱིན་པ་འདི་ལ་གསན་འཚལ། ཨེ་མ་སྐལ་ལྡན་རིགས་ཀྱི་བུ༔ ངེས་པར་འཁོར་བའི་སྡུག་བསྔལ་ལས༔ འགྲོ་ཀུན་སྒྲོལ་བར་དམ་བཅས་ན༔ མཁའ་འགྲོའི་བྱིན་རླབས་རྗེས་གནང་བྱ༔ ཞེས་དྲིས་པའི་ལན་དུ་འདི་བཞིན་རྗེས་ཟློས་མཛོད། དེ་ནས་སློབ་བུས་འདི་སྐད་དོ༔ རྡོ་རྗེ་འཛིན་པ་ཁྱེད་ཉིད་ཀྱིས༔ ཇི་ལྟར་བཀའ་བསྒོ་མཛད་པ་བཞིན༔ བདག་གིས་ལུས་ངག་ཡིད་གསུམ་གྱིས༔ འགྲོ་བ་སྒྲོལ་བར་དམ་བཅའ་འོ༔ ཞེས་བརྗོད་བླ་མས་འདི་ལྟར་གདམས། མདུན་གྱི་ནམ་མཁར་བླ་མ་དང་གཉིས་སུ་མེད་པ་མཁར་ཆེན་ཡེ་ཤེས་མཚོ་རྒྱལ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ལུས་པས་བསྐོར་ནས་བཞུགས་པའི་སྤྱན་སྔར་ཚིག་དོན་ཡ་མ་བྲལ་བའི་ངང་ནས་སྐྱབས་སུ་འགྲོ་བ་འདིའི་རྗེས་ཟློས་མཛོད། ཨེ་མ་ཧོ༔ སྐྱེ་མེད་ཐུགས་ཀློང་རྣམ་མཁྱེན་རྫོགས་སངས་རྒྱས༔ འགགས་མེད་གསུང་མཆོག་བདེན་གཉིས་ཟུང་འཇུག་ཆོས༔ རྩོལ་མེད་སྐུ་ལ་ཐེག་གསུམ་དགེ་འདུན་རྫོགས༔ ཡེ་ཤེས་མཁའ་འགྲོའི་གཙོ་ལ་སྐྱབས་སུ་མཆི༔ ཞེས་བརྗོད་སླར་ཡང་འདི་ལྟར་གདམས༔ དེ་ནས་སྨོན་འཇུག་བྱང་ཆུབ་ཀྱི་མཆོག་ཏུ་སེམས་བསྐྱེད་པ་འདིའི་རྗེས་ཟློས་མཛོད། ཧོ་དུས་འདི་ནས་བཟུང་བྱང་ཆུབ་སྙིང་པོའི་བར༔ མཐའ་ཡས་འགྲོ་ཀུན་སྡུག་བསྔལ་མཐའ་དག་ལས༔ བསྒྲལ་ནས་ཡང་དག་གོ་འཕང་ལ་འགོད་ཕྱིར༔ མཁའ་འགྲོའི་གཙོ་མོ་མཚོ་རྒྱལ་བསྒྲུབ་པར་བགྱི༔ སོ་སོར་ལན་གྲངས་གསུམ་གསུམ་གྱིས། །སྐྱབས་སུ་འགྲོ་ཞིང་སེམས་ཀྱང་བསྐྱེད༔ མཁའ་འགྲོའི་སྡོམ་བཟུང་འདི་སྐད་དོ༔ ཡེ་ཤེས་མཁའ་འགྲོའི་སྐུ་གསུང་ཐུགས་ཀྱི་དམ་ཚིག་རྣམས་ཚུལ་བཞིན་དུ་འཛིན་པར་བྱ་སྙམ་པས་དམ་ཚིག་གསུམ་འཛིན་པ་འདིའི་རྗེས་ཟློས་མཛོད། ཨེ་མ་ཡེ་ཤེས་ཌཱཀྐི་མའི༔ སྐུ་གསུང་ཐུགས་ཀྱི་དམ་ཚིག་ཏུ༔ བསྐྱེད་རིམ་བསྒོམ་ཞིང་བཟླས་པ་བྱ༔ དག་སྣང་རྩལ་སྦྱང་སྟོང་ཉིད་བསྒོམ༔ དེ་སྐད་ལན་གསུམ་རྗེས་ཟློས་བྱ༔ བྱིན་རླབས་བསྒྲུབ་ཕྱིར་བྱིན་འབེབས་ནི༔ ད་ཁྱོད་རང་རྣམས་བྱིན་རླབས་ཐམས་ཅད་ཀྱི་གཞི་རྟེན་ཡེ་ཤེས་དབབ་པའི་སླད་དུ་དམིགས་པ་འདི་བཞིན་མཛད་པར་ཞུ། སྭ་བྷ་ཝ་ཡིས་སྟོང་པར་སྦྱངས༔ སྟོང་པའི་ངང་ལས་དྲན་རྫོགས་སུ༔ སློབ་མ་ཡེ་ཤེས་མཚོ་རྒྱལ་མཐིང༔ བཅུ་དྲུག་གཞོན་ཚུལ་ཆགས་པའི་ཉམས༔ འཛུམ་པའི་སྤྱན་དཀྱུས་ཐད་ཀར་གཟིགས༔ ཞལ་གཅིག་ཕྱག་གཉིས་ཞབས་ཕྱེད་སྐྱིལ༔ ཐོད་སྐམ་རྩེ་ཕྲན་རིན་ཆེན་རྒྱན༔ གནག་སྣུམ་དབུ་སྐྲའི་ལན་ཚར་མཛེས༔ ཕྱག་གཡས་ཐོད་རྔ་སྙན་ཐད་དཀྲོལ༔ གཡོན་པས་ཐོད་བུམ་བདུད་རྩིས་གཏམས༔ མེ་ཏོག་སྣ་ཚོགས་དོ་ཤལ་འཕྱངས༔ དར་དཀར་སྟོད་གཡོག་རླུང་གིས་བསྐྱོད༔ དམར་པོ་གསེར་རིས་ཤམས་ཐབས་ལ༔ ལྗང་ཁྲའི་འཕུར་མ་མུ་ཏིག་རྒྱན༔ གསེར་གྱི་སྙན་རྒྱན་དྲིལ་ཆུང་འཁྲོལ༔ གཙུག་ཏོར་ནོར་བུའི་ཏོག་གིས་སྤྲས༔ ནུ་འབུར་ཆགས་པའི་ཆུ་སྐྱེས་བཞད༔ རྩ་གསུམ་རྒྱལ་ཀུན་འདུས་པའི་དཔྱིད༔ འཇའ་དང་འོད་ལྔ་འཁྲིགས་པའི་ཀློང༔ པདྨ་ཉི་ཟླའི་གདན་གྱི་ཁར༔ དྭངས་པའི་མཁའ་ལ་གཟའ་སྐར་བཞིན༔ ཡིད་ཡུལ་ལྷམ་མེ་ལྷང་ངེར་གསལ༔ ཞེས་སོགས་རྒྱས་བསྡུས་བློས་དཔག་ཏེ། །མངོན་རྟོགས་གཞུང་དང་མཐུན་པར་བསྒོམ། །སྙིང་གར་གཡུང་དྲུང་དམར་པོ་ཡི༔ ལྟེ་བར་དགའ་འཁྱིལ་དབུས་སུ་བཾ༔ རྭ་བཞིར་ཧ་རི་ནི་ས་དང་༔ གནས་གསུམ་འབྲུ་གསུམ་འོད་ཟེར་གྱིས༔ སྐུ་གསུམ་ཞིང་དང་ཁྱད་པར་དུ༔ རྔ་ཡབ་ཟངས་མདོག་དཔལ་རི་ནས༔ མཁའ་འགྲོའི་གཙོ་མོ་མཚོ་རྒྱལ་མ༔ བུ་གཅིག་མ་ཡི་ངང་ཚུལ་གྱིས༔ སྐུ་དང་སྔགས་བྱང་ཕྱག་མཚན་ཚུལ༔ ཁ་བ་བུ་ཡུག་ཚུལ་ལྟར་བྱོན༔ སློབ་བུའི་ལུས་ངག་ཡིད་གསུམ་ལ༔ རྡོ་ཚན་སྟེང་དུ་མར་བཞག་བཞིན༔ དབྱེར་མེད་ཐིམ་པའི་མོས་འདུན་གྱིས༔ ཞེས་བརྗོད་སྦྱར་སྤོས་དུད་པས་བདུག ཐོད་པའི་རྔ་བརྡུང་དབྱངས་དང་བཅས༔ ཨེ་མ་ཧོ༔ ཡུལ་གྱི་མིང་ནི་ཨོ་རྒྱན་མཁའ་འགྲོའི་གླིང་༔ གནས་ཀྱི་མིང་ནི་ཟངས་མདོག་དཔལ་གྱི་རི༔ རང་བྱུང་པདྨས་སྤྲུལ་པའི་ཞིང་ཁམས་ནས༔ སྐུ་གསུམ་མཁའ་འགྲོའི་གཙོ་མོ་མཚོ་རྒྱལ་མ༔ མོས་གུས་གདུང་བས་གནས་འདིར་སྤྱན་འདྲེན་ན༔ ཚད་མེད་ཐུགས་རྗེ་ཆེན་པོས་ཉེར་དགོངས་ནས༔ འདིར་འདུས་བདག་ཅག་སྐལ་ལྡན་སྒོ་གསུམ་ལ༔ སྐུ་གསུང་ཐུགས་ཀྱི་བྱིན་ཆེན་དབབ་ཏུ་གསོལ༔ སྐུ་ཡི་བྱིན་ཕོབ་ལུས་ལ་བདེ་དྲོད་འབར༔ གསུང་གི་བྱིན་ཕོབ་ངག་ལ་ནུས་པ་འབྱོངས༔ ཐུགས་ཀྱི་བྱིན་ཕོབ་སེམས་ལ་རྟོགས་པ་བསྐྱེད༔ རང་བྱུང་ཡེ་ཤེས་ལྔ་ཡི་དབང་མཆོག་བསྐུར༔ ཚེ་འདིར་སྨིན་ཅིང་གྲོལ་བར་མཛད་དུ་གསོལ༔ ཨ་ཧ་རི་ནི་ས་བཾ་ཊཱཀྐི་ནཱི་ཛྙཱ་ན་སྭ་ར་སརྦ་སིདྡྷི་ཧཱུྃ༔ རྩ་བའི་སྔགས་ཀྱི་ཤམ་བུ་རུ༔ ཨོཾ་ཨཱཿཧཱུྃ་ཛྙཱ་ན་བཛྲ་ཨ་ཝེ་ཤ་ཡ་ཕེཾ་ཕེཾ༔ ཕེབས་རྟགས་ལུས་ངག་ཡིད་ལ་འབྱུང་༔ གནས་གསུམ་རྡོ་རྗེའི་རྒྱས་གདབ་ནས༔ བྱང་ཆུབ་བར་དུ་བརྟན་པར་བསམ༔ ཡེ་ཤེས་སེམས་དཔའི་ལྷ་ཚོགས་ཐམས་ཅད་བྱང་ཆུབ་མཆོག་གི་བར་དུ་བརྟན་པར་གྱུར་ཅིག ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་མི་དམིགས་ངང་ལ་བཞག༔ ས་མ་ཡཱ༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྗེས་གནང་རྣམ་པ་ལྔ་རུ་བསྟན༔ དང་པོ་སྐུ་ཡི་རྗེས་གནང་ནི༔ བུམ་པ་སློབ་མའི་སྤྱི་བོར་བཞག༔ དེ་ཡང་ཐོག་མར་འདི་བཞིན་བརྗོད། དེ་ལྟར་རྗེས་གནང་གི་གཞི་འགོད་པའི་རིམ་པ་རྣམས་སྔོན་དུ་འགྲོ་བས་རྗེས་གནང་དངོས་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལས། དང་པོ་སྐུའི་རྗེས་གནང་གི་སླད་དུ་དམིགས་པ་འདི་བཞིན་དུ་མཛོད་ཅིག བུམ་པ་འདི་ཉིད་ཕྱི་རིན་པོ་ཆེ་བུམ་པའི་དབྱིབས་ལ་ནང་གཞལ་ཡས་ཁང་མཚན་ཉིད་ཕུན་སུམ་ཚོགས་པའི་དབུས་སུ་སྐུ་གསུམ་ཀུན་དངོས་ཡེ་ཤེས་མཁའ་འགྲོའི་ལྷ་ཚོགས་རྣམས་དྭངས་པའི་མཚོ་ལ་གཟའ་སྐར་ཤར་བའམ་མཁའ་ལ་འཇའ་ཚོན་ཤར་བ་ལྟར་མངོན་སུམ་བཞིན་དུ་བཞུགས་པའི་སྤྱན་སྔར་མོས་གུས་དྲག་པོ་བྱས་པས་ལྷ་ཚོགས་ཐམས་ཅད་ཁྱོད་རང་གི་ཐད་ཀྱི་ནམ་མཁར་བྱོན་ནས་དབང་བསྐུར་བའི་མོས་པ་བརྟན་པོ་མཛོད་ཅིག ཨོཾ༔ སྟོང་གསལ་འགགས་མེད་ཆོས་ཀྱི་དབྱིངས༔ འཁོར་འདས་གཞི་རྫོགས་བུམ་པ་ནས༔ སྐུ་གསུམ་ཡེ་ཤེས་བདུད་རྩིའི་རྒྱུན༔ སྐལ་ལྡན་ལུས་ལ་དབང་བསྐུར་བས༔ མཁའ་འགྲོའི་སྐུ་རུ་སྨིན་པར་ཤོག༔ རྩ་སྔགས་ཤམ་དུ་འདི་བཞིན་བརྗོད༔ ཀཱ་ཡ་ཨ་བྷི་ཥིཉྩ་ཨོཾ༔ མཁའ་འགྲོའི་སྐུ་རྟེན་སྤྱི་བོར་བཞག༔ གནས་གསུམ་མཁའ་འགྲོ་ཡོངས་ཀྱི་གཙོ༔ སྣང་སྟོང་སྒྱུ་མའི་ལྷ་སྐུར་བསྒོམས༔ ལུས་ཀྱི་གཉིས་འཛིན་སྒྲིབ་དག་ནས༔ སྤྲུལ་པའི་སྐུ་རུ་སྨིན་པར་ཤོག༔ དེས་སྐུའི་རྗེས་གནང་ཐོབ། ལུས་ཀྱི་སྡིག་སྒྲིབ་དག །ལུས་ལྷ་སྐུ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་མངོན་དུ་བྱེད་པའི་སྐལ་བ་རྒྱུད་ལ་བཞག་པ་ཡིན་ནོ། །སྦྱང་བྱ་ལུས་ཀྱི་ཕུང་པོ་དང་༔ སྦྱོང་བྱེད་བསྐྱེད་རིམ་རྣམ་པ་བཞི༔ སྦྱངས་འབྲས་སངས་རྒྱས་སྤྲུལ་པའི་སྐུ༔ ངོ་བོ་གཅིག་ལས་ལྡོག་པ་བཞིན༔ གསུང་དབང་སྔགས་བྱང་མགྲིན་པར་བཞག༔ གཉིས་པ་གསུང་གི་རྗེས་གནང་ལ་དམིགས་པ་འདི་བཞིན་དུ་མཛོད་ཅིག སློབ་དཔོན་གྱི་མགྲིན་པ་ནས་ཕྱི་ལྟར་ཡིག་འབྲུའི་རྣམ་པ་ལ་ནང་ལྟར་རང་བྱུང་སྲོག་ཡིག་སྐུ་གསུམ་མཁའ་འགྲོ་ཡོངས་ཀྱི་གསུང་གི་ངོ་བོ་གཞོམ་མེད་སྔགས་ཀྱི་སྒྲ་དབྱངས་སྒྲོགས་པ་དཔག་ཏུ་མེད་པ་བྱོན་ནས་ཁྱོད་རང་གི་མགྲིན་པར་ཐིམ་བྱུང་སྙམ་པའི་མོས་པ་གྱིས་ཤིག ཨཱཿ མ་དག་འཁྲུལ་བའི་ལས་ཀྱི་རླུང་༔ སྦྱོང་བྱེད་རང་བྱུང་སྔགས་ཀྱི་སྒྲ༔ མཁའ་འགྲོའི་སྲོག་ཡིག་འདི་གཏད་པས༔ ཚངས་དབྱངས་གསུང་གི་དབང་ཐོབ་ཤོག༔ ཞེས་བརྗོད་རྩ་སྔགས་ཤམ་བུ་རུ༔ ཝཀྐཱ་ཨ་བྷི་ཥིཉྩ་ཨཱཿ དཔོན་སློབ་གཉིས་ཀ་ལྷ་རུ་གསལ༔ ཐུགས་ཀར་ཉི་ཟླའི་དལ་ལ་བཾ༔ སྲོག་སྔགས་འོད་ལྔའི་ཁ་དོག་ཅན༔ གཡོན་དུ་འཁོར་བའི་འོད་ཟེར་གྱིས༔ གནས་གསུམ་མཁའ་འགྲོའི་བྱིན་རླབས་བསྡུས༔ དཔོན་སློབ་གཉིས་ཀར་ཐིམ་པ་ཡིས༔ གསུང་གི་བྱིན་རླབས་ཐོབ་བསམ་ནས༔ དཔོན་སློབ་གཉིས་ཀ་མཁའ་འགྲོ་ཡེ་ཤེས་མཚོ་རྒྱལ་དུ་གསལ་བའི་ཐུགས་ཀར་ཉི་ཟླའི་དཀྱིལ་འཁོར་གྱི་སྟེང་དུ་བཾ་མཐིང་ཀའི་མཐའ་སྐོར་དུ་རང་བྱུང་དབྱིངས་ཀྱི་མཁའ་འགྲོའི་སྲོག་སྔགས་འོད་ལྔའི་ཁ་དོག་ཅན་གཡོན་དུ་འཁོར་བའི་འོད་ཟེར་གྱིས་གནས་གསུམ་གྱི་མ་ཚོགས་མཁའ་འགྲོ་རྒྱ་མཚོ་ཐམས་ཅད་ཀྱི་བྱིན་རླབས་སྔགས་ཕྲེང་གི་རྣམ་པར་བྱོན་ནས་དཔོན་སློབ་གཉིས་ཀའི་ཞལ་གྱི་སྒོ་ནས་ཞུགས་ཏེ་ཐུགས་ཀའི་སྔགས་ཕྲེང་ལ་ཐིམ་པས་སྐུ་གསུམ་མཁའ་འགྲོ་ཡོངས་ཀྱི་གསུང་གི་བྱིན་རླབས་མ་ལུས་པ་ཐོབ་བྱུང་སྙམ་དུ་མོས་ལ་སྔགས་འདིའི་རྗེས་ཟློས་མཛོད། སྔགས་ཀྱི་རྗེས་ཟློས་འདི་བཞིན་བྱ༔ ཨོཾ་ཨཱཿཧཱུྃ་སྭཱ་ཧཱ༔ དེ་དང་རང་སྔགས་ལན་གསུམ་བཟླས༔ སྔགས་ཕྲེང་སློབ་མའི་སྤྱི་བོར་བཞག༔ ཨེ་མ་ཧོ༔ མཁའ་འགྲོའི་གཙོ་མོ་མཚོ་རྒྱལ་མའི༔ དམིགས་མེད་མཁྱེན་དང་བརྩེ་བ་ཡིས༔ སློབ་མ་འདི་ལ་ལེགས་དགོངས་ནས༔ བྱང་ཆུབ་སྙིང་པོའི་བར་དག་ཏུ༔ རྗེས་སུ་འཛིན་པར་མཛད་དུ་གསོལ༔ མ་ཧཱ་མཎྚ་སརྦ་སིདྡྷི་ཕ་ལ་ཧཱུྃ་བྷྲུཾ༔ སློབ་བུའི་ལྕེ་ལ་བདུད་རྩི་བཞག༔ ཨོཾ་ཨཱཿཧཱུྃ༔ རྩ་ཁམས་ཀུན་རྫོབ་བྱང་ཆུབ་སེམས༔ ཡེ་ཤེས་རླུང་གི་འཕྲོ་འདུ་ལས༔ འཕོ་མེད་སྒྲ་གཅན་དབྱིངས་ཆུད་ནས༔ ལས་རླུང་སྔགས་སུ་རང་གྲོལ་ཤོག༔ དབྱངས་གསལ་བརྗོད་ཅིང་བརྗོད་བྲལ་ངང་༔ རང་བྱུང་རྡོ་རྗེའི་བཟླས་པ་བྱ༔ དེས་གསུང་གི་རྗེས་གནང་ཐོབ། ངག་གི་སྒྲིབ་པ་དག ངག་སྔགས་བཟླ་བ་ལ་དབང་། ལོངས་སྤྱོད་རྫོགས་པའི་སྐུ་མངོན་དུ་བྱེད་པའི་སྐལ་བ་རྒྱུད་ལ་བཞག་པ་ཡིན་ནོ། །ཐུགས་རྟེན་མན་ཤེལ་སྙིང་གར་བཞག༔ གསུམ་པ་ཐུགས་ཀྱི་རྗེས་གནང་གི་སླད་དུ་དམིགས་པ་འདི་ལྟར་དུ་མཛོད་ཅིག སློབ་དཔོན་གྱི་ཐུགས་ཀ་ནས་སྐུ་གསུམ་ཡེ་ཤེས་མཁའ་འགྲོའི་ཐུགས་ཆོས་དབྱིངས་འགྱུར་མེད་ཁྱབ་བརྡལ་ཆེན་པོའི་མཚོན་བྱེད་མན་ཤེལ་ཁ་ཏོག་ལྔ་པ་སྙིང་ཁར་བཞག་པས་གནས་གསུམ་མཁའ་འགྲོ་ཡོངས་ཀྱི་ཐུགས་ཀྱི་བྱིན་རླབས་སྐད་ཅིག་ཉིད་ལ་ཐོབ་བྱུང་སྙམ་དུ་མོས་མཛོད། ཨེ་མ་ཧོ༔ སྤྲོས་དང་བྲལ་བའི་རིག་པ་ནི༔ གདངས་གསལ་དྭངས་ཤེལ་སྒྲིབ་བྲལ་ལྟར༔ ངོ་བོ་སྟོང་ཞིང་རང་བཞིན་གསལ༔ ཀ་དག་སྒྲིབ་མེད་དབང་ཐོབ་ཤོག༔ ཞེས་དང་རྩ་སྔགས་ཤམ་བུ་ལ༔ ཙིཏྟ་ཨ་བྷི་ཥིཉྩ་ཧཱུྃ༔ མེ་ལོང་དྲི་བྲལ་མིག་ལ་བསྟན༔ ཨེ་མ་ཧོ༔ རྒྱལ་ཀུན་ཐུགས་ཀྱི་གསང་བའི་དབྱིངས༔ རྟོག་པ་མེད་ཀྱང་ཤེས་བྱའི་ཆོས༔ མ་འདྲེས་སོ་སོར་མཁྱེན་པ་ལྟར༔ མཁའ་འགྲོའི་ཐུགས་རྟེན་མེ་ལོང་གིས༔ སློབ་བུ་ཁྱོད་ལ་དབང་བསྐུར་བས༔ སྟོང་ཉིད་བསྒོམས་པའི་རང་རྩལ་གྱིས༔ ཆོས་ཀུན་མཁྱེན་པའི་རྩལ་རྫོགས་ཤོག༔ དེས་ཐུགས་ཀྱི་རྗེས་གནང་ཐོབ། ཡིད་ཀྱི་སྡིག་སྒྲིབ་དག ཡིད་ཏིང་ངེ་འཛིན་བསྒོམ་པ་ལ་དབང་། ཆོས་སྐུའི་གོ་འཕང་མངོན་དུ་བྱེད་པའི་སྐལ་བ་རྒྱུད་ལ་བཞག་པ་ཡིན་ནོ། །ཡོན་ཏན་ཡིད་བཞིན་ནོར་བུའི་གཟུགས༔ སློབ་བུའི་ལྟེ་བར་བཞག་བྱས་ཏེ༔ བཞི་པ་ཡོན་ཏན་གྱི་རྗེས་གནང་ལ་ཡང་དམིགས་པ་འདི་བཞིན་མཛོད། སློབ་དཔོན་ཡེ་ཤེས་མཚོ་རྒྱལ་དུ་གསལ་བའི་ལྟེ་བ་ནས་སྐུ་གསུམ་ཌཱཀྐི་ཡོངས་ཀྱི་གསང་བ་གསུམ་གྱི་ཡོན་ཏན་རྨད་དུ་བྱུང་བའི་མཚོན་བྱེད་ཡིད་བཞིན་དབང་གི་རྒྱལ་པོ་ལྟེ་བར་བཞག་པས་ཡེ་ཤེས་དབྱིངས་ཀྱི་མཁའ་འགྲོའི་གསང་གསུམ་མི་ཟད་པ་རྒྱན་གྱི་འཁོར་ལོ་དང་བྱིན་ནུས་མཉམ་པར་གྱུར་བྱུང་སྙམ་དུ་མོས་མཛོད། ཨེ་མ་ཧོ༔ རྟོག་མེད་ཡིད་བཞིན་ནོར་བུ་ལ༔ གསོལ་བཏབ་དགོས་འདོད་འབྱུང་བ་ལྟར༔ རྣམ་པར་རྟོག་པ་མི་མངའ་ཡང་༔ འགྲོ་ལ་འདོད་དགུའི་དཔལ་སྟེར་བའི༔ རྒྱལ་ཀུན་ཡོན་ཏན་དབང་བསྐུར་རོ༔ རྩ་སྔགས་ཤམ་དུ་འདི་ཉིད་བཏགས༔ གུ་ཎ་ཨ་བྷི་ཥིཉྩ་ཧཱུྃ༔ ཕྲིན་ལས་གཏོར་མ་ལག་ཏུ་གཏད༔ ལྔ་པ་ཕྲིན་ལས་ཀྱི་དབང་ལ་དམིགས་པ་འདི་བཞིན་མཛོད། གཏོར་མ་འདི་ཉིད་སྐུ་གསུམ་རྒྱལ་བའི་ཡུམ་གཅིག་ཡེ་ཤེས་དབྱིངས་ཀྱི་རྗེ་མོ་མཁར་ཆེན་ཡེ་ཤེས་མཚོ་རྒྱལ་གྱི་ལྷ་ཚོགས་དངོས་སུ་གསལ་བ་ཁྱོད་རང་གི་ལག་ཏུ་གཏད་པས་མཁའ་འགྲོའི་སྐུ་ལས་སྐུ་དང་ཡིག་འབྲུ་ཕྱག་མཚན་སྣ་ཚོགས་པ་དཔག་ཏུ་མེད་པ་ཆར་བབ་པ་ལྟར་བྱོན་ནས་ཁྱེད་རང་རྣམས་ཀྱི་ལུས་ལ་སིབ་སིབ་ཐིམ་པས་མ་ཅིག་ཡེ་ཤེས་མཁའ་འགྲོའི་མཛད་པའི་ཕྲིན་ལས་བསམ་གྱིས་མི་ཁྱབ་པའི་དངོས་གྲུབ་བྱིན་རླབས་ཐམས་ཅད་སྐད་ཅིག་ཉིད་ལ་ཐོབ་པའི་མོས་པ་མཛོད། ཧཱུྃ་ཧྲཱིཿ སྣ་ཚོགས་གཉིས་འཛིན་ཀུན་བརྟགས་ཆོས༔ དམིགས་པ་མེད་པའི་དབྱིངས་སུ་གཏོར༔ སྟོང་ཉིད་ཀུན་ལ་ཁྱབ་པའི་མ༔ རྒྱལ་བ་ཀུན་གྱི་ཕྲིན་ལས་ཏེ༔ སྐལ་ལྡན་ཁྱོད་ལ་དབང་བསྐུར་བས༔ ཤེས་པ་དྲུག་ལྡན་དབང་ཐོབ་ཤོག༔ རྩ་བའི་སྔགས་ཀྱི་ཤམ་བུ་རུ༔ ཀརྨཱ་ཨ་བྷི་ཥིཉྩ་ཧཱུྃ༔ དེས་ཡོན་ཏན་དང་ཕྲིན་ལས་ཀྱི་རྗེས་གནང་ཐོབ། སྒོ་གསུམ་ཆ་མཉམ་གྱི་སྒྲིབ་པ་དག །རང་གཞན་དོན་གཉིས་སྒྲུབ་པ་ལ་དབང་། ངོ་བོ་ཉིད་སྐུའི་གོ་འཕང་མངོན་དུ་བྱེད་པའི་སྐལ་བ་རྒྱུད་ལ་བཞག་པ་ཡིན་ནོ། །གཞན་ཡང་མཐའ་རྟེན་དབང་རྣམས་སྦྱིན༔ ས་མ་ཡཱ༔ རྗེས་ལ་དམ་ཚིག་བསྒྲགས་པ་ནི༔ ཨེ་མ༔ སྐལ་ལྡན་སྙིང་གི་བུ༔ མཁའ་འགྲོའི་སྐུ་ཡི་དམ་ཚིག་ཏུ༔ སྲོག་གཅོད་སྤངས་ཤིང་ཚངས་སྤྱོད་སྲུངས༔ གང་སྣང་སྒྱུ་མའི་ལྷ་སྐུར་སྦྱོངས༔ སློབ་དཔོན་སྐུ་དང་རང་གི་ལུས༔ རྟག་ཏུ་བརྙས་པར་མི་བྱའོ༔ མཁའ་འགྲོའི་གསུང་གི་དམ་ཚིག་ཏུ༔ རྫུན་ཕྲ་སྤངས་ཤིང་བཟླས་བརྗོད་བརྩོན༔ བུད་མེད་ཡོངས་ལ་མི་སྨོད་ཅིང་༔ བླ་མས་ཅི་གསུང་བཀའ་བསྒྲུབས་སོ༔ མཁའ་འགྲོའི་ཐུགས་ཀྱི་དམ་ཚིག་ཏུ༔ དངོས་འཛིན་འཁྲུལ་བའི་དབང་མི་གཏོང་༔ གང་ཤར་སྤང་བླང་མི་བྱ་ཞིང་༔ སྟོང་ཉིད་ལྟ་བའི་གདེང་ལྡན་པས༔ འགྲོ་ལ་སྙིང་རྗེ་རྒྱུན་མི་གཅོད༔ ཡོན་ཏན་ཕྲིན་ལས་དམ་ཚིག་ཏུ༔ ཡར་མར་ཚེས་བཅུ་རྒྱུན་མི་གཅོད༔ སྒོ་གསུམ་དཀྱིལ་འཁོར་གསུམ་ལྡན་པས༔ ཞེས་གསུངས་པ་ལྟར་མཁའ་འགྲོའི་དམ་ཚིག་སྤྱི་དང་བྱེ་བྲག་ཐམས་ཅད་བླ་མའི་བཀའ་ལས་ཇི་ལྟར་བྱུང་བ་བཞིན་ཚུལ་བཞིན་དུ་བསྲུང་བར་བྱ་སྙམ་པས་འདིའི་རྗེས་ཟློས་མཛོད། །གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ལན་གསུམ་བརྗོད་པས་དམ་ཚིག་བཟུང་། །དེ་བཞིན་སློབ་མས་ཁས་བླང་ཞིང་། ལུས་ལོངས་སྤྱོད་དུས་གསུམ་དགེ་བའི་དངོས་པོ་དང་བཅས་པ་ཐམས་ཅད་ལྷ་དང་བླ་མ་ལ་འབུལ། ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །ཆ་ཤས་ཀྱིས་ཀྱང་སྤྱད་དུ་གསོལ། །དགའ་སྟོན་ཚོགས་ཀྱི་འཁོར་ལོ་བསྐོར༔ དེ་རྣམས་ཀྱིས་ཡེ་ཤེས་ཀྱི་མཁའ་འགྲོའི་རྗེས་གནང་ཐོབ་པ་ལས་བྱུང་བའི་དགེ་བའི་རྩ་བ་འདིས་མཚོན་པའི་དུས་གསུམ་བསགས་ཡོད་ཀྱི་དགེ་ཚོགས་རྒྱ་མཚོ་ལྟ་བུ་མ་ལུས་པ་ཕྱོགས་གཅིག་ཏུ་བསྡོམས་ནས་མཁའ་མཉམ་གྱི་འགྲོ་བ་མཐའ་དག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་རླབས་འཁྲིགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག ཞེས་སོགས་བསྔོ་སྨོན་བཀྲ་ཤིས་བྱ། ཨེ་མ་ཧོ༔ ཤིན་ཏུ་ཟབ་གནད་མཁའ་འགྲོའི་སྲོག༔ སྐལ་ལྡན་བུ་མིན་ཀུན་ལ་གསོངས༔ བཀའ་སྲུང་ཁྱབ་འཇུག་ཆེན་པོ་ཡིས༔ བསྟན་པ་དཀྲུགས་པའི་གང་ཟག་དང་༔ ལོག་ལྟ་ཅན་གྱི་སྡིག་ཅན་གྱིས༔ དུས་མིན་ལེན་ན་སྲོག་དང་ཕྲོལ༔ རྩེ་གཅིག་ཆོས་ལ་མོས་པ་དང་༔ ཉམས་སུ་ལེན་ལ་རྟག་ཏུ་སྲུངས༔ གུ་ཧྱ༔ ཅེས་པའང་དག་སྣང་གི་ཆོས་ལ་དབང་བའི་སྐལ་ལྡན་ལུང་རིག་གླིང་པས་སྨྲས་པ་ལྟར་དད་བརྩོན་དང་ལྡན་པའི་བཙུན་ཆུང་ལུང་རྟོགས་མིང་གིས་ཡི་གེར་ཕབ་པ་ལ་བཅད་ལྷུག་གི་ཚིག་ཚོགས་འགས་ཁ་བསྐང་ཏེ་ལག་ལེན་ཁྲིགས་སུ་བསྡེབ་པ་པོ་ནི་ཡུལ་མགོ་ལོག་ཏུ་སྐྱེས་པའི་སྔགས་བཙུན་ཆོས་དབྱིངས་ཀུན་གསལ་རྒྱ་མཚོ་སྟེ། དཔལ་ལྡན་བླ་མ་དམ་པའི་ཐུགས་བཞེད་སྐོང་བའི་ཕྱིར་དུའོ།། སརྦ་དཱ་མངྒ་ལཾ།། དུད་སོལ་མའི་བརྒྱུད་འདེབས་སྐྱབས་སེམས་བདག་བསྐྱེད་ཀྱི་རིམ་པ་རྡོ་རྗེའི་ཕ་ལམ།༄༅། དུད་སོལ་ལྷ་མོའི་བརྒྱུད་འདེབས་སྐྱབས་སེམས་བདག་བསྐྱེད་ཀྱི་རིམ་པ་རྡོ་རྗེའི་ཕ་ལམ་ཞེས་བྱ་བ་བི་ཛ་ཧ་རཾ་རསྨི༔ སངས་རྒྱས་ཆོས་དང་དགེ་འདུན་སྡེ། །དབྱེར་མེད་དཔལ་ལྡན་བླ་མ་ལ། །བཏུད་དེ་དཔལ་ལྡན་དུད་སོལ་མའི། །ཆོ་གའི་ཡན་ལག་ཉུང་བསྡུས་སྤེལ། །ཐོག་མར་བརྒྱུད་པའི་གསོལ་འདེབས་ནི། །ཨོཾ་ཨཱ༔ཧཱུྃ། གདོད་མའི་མགོན་པོ་ཀུན་བཟང་ཧེ་རུ་ཀཿ ལོངས་སྤྱོད་རྫོགས་སྐུ་རིགས་ལྔའི་ཁྲོ་རྒྱལ་དང་། །སྤྲུལ་པའི་སྐུ་མཆོག་ཁྲག་འཐུང་ནག་པོ་ལ། །གསོལ་བ་འདེབས་སོ་ལས་བཞི་ལྷུན་གྲུབ་ཤོག །གསང་ཆེན་མཛོད་འཛིན་ཕྱག་ན་རྡོ་རྗེ་རྩལ། །གསང་བདག་རྣམ་རོལ་ཤནྟིཾ་གྷརྦྷ་རྗེ། །གསང་སྔགས་གྲུབ་བརྙེས་པདྨ་ཐོད་ཕྲེང་ལ། །གསོལ་བ་འདེབས་སོ་ལས་བཞི་ལྷུན་གྲུབ་ཤོག །བསྟན་འགྲོའི་གཙུག་རྒྱན་ཀུན་བཟང་གཞན་ཕན་པ། །བསྟན་ལ་རབ་དཀར་འགྲོ་འདུལ་ལུང་རིག་གླིང་། །བསྟན་འཛིན་ཆོས་བདག་སྐྱེས་མཆོག་ཐམས་ཅད་ལ། །གསོལ་བ་འདེབས་སོ་ལས་བཞི་ལྷུན་གྲུབ་ཤོག །དབྱིངས་ཀྱི་མ་མོ་སྔགས་སྲུང་རལ་གཅིག་དང་། །དབྱངས་ཅན་དྲག་མོ་དཔལ་ལྡན་དུད་སོལ་རྗེ། །དབྱིངས་ཀྱི་མདངས་ཤར་དྲེགས་པ་སྡེ་བརྒྱད་ལ། ། གསོལ་བ་འདེབས་སོ་ལས་བཞི་ལྷུན་གྲུབ་ཤོག །དེ་ལྟར་གསོལ་བཏབ་ནུས་པས་ནད་གདོན་ཞི། །ཚེ་བསོད་དཔལ་རྒྱས་མོས་ཚོགས་དབང་བསྡུས་ནས། །སྡང་དགྲ་མ་ལུས་རྡུལ་བརླག་མིང་མེད་པར། །ལས་བཞི་ལྷུན་གྲུབ་གདོད་མའི་དབྱིངས་གྲོལ་ཤོག །ཞེས་དང་། སྐྱབས་སེམས་ནི། ན་མོ། དེང་བཟུང་བྱང་ཆུབ་མ་ཐོབ་བར། །མཆོག་གསུམ་ལྷ་ལ་སྐྱབས་སུ་མཆི། །ཁམས་གསུམ་བདེ་ལ་འགོད་བྱའི་ཕྱིར། །རྩ་གསུམ་ཆོས་སྐྱོང་བསྒྲུབ་པར་བྱ། །ཞེས་དང་། བདག་ཉིད་ལྷར་བསྐྱེད་པ་ནི། ཏྲག་རཀྴ་ཨེ་ཀ་ཙ་ཊི་བྷྱོཿ ཞེས་བརྗོད་པས་ཕྱི་སྣོད་ཀྱི་འཇིག་རྟེན་གྲུ་གསུམ་མཐིང་ནག་འབར་བའི་དབུས་སུ་ཁྲག་གི་རྦ་རླབས་འཁྲིགས་པའི་དཀྱིལ། ཀེང་རུས་ཀྱི་རི་རབ་ཆེན་པོའི་རྩེར་པདྨ་ཉི་མ་ལ་གནོད་བྱེད་ཕོ་མོ་བསྣོལ་བའི་སྟེང་དུ་རང་གི་སེམས་ཉིད་ཀྱི་ངོ་བོ་ཏྲག་ཡིག་སྨུག་ནག་ཡོངས་སུ་གྱུར་པ་ལས། སྔགས་སྲུང་ཨེ་ཀ་ཙ་ཊི་རལ་གཅིག་མ་སྨུག་ནག་ཞལ་གཅིག་ཕྱག་གཉིས། གཡས་དགྲ་སྙིང་ཞལ་དུ་གསོལ་ཞིང་གཡོན་སྡིག་མཛུབ་ཀྱིས་ཞིང་དབྱུག་འཛིན་པའི་རྩེ་ལ་ལྕགས་སྤྱང་འགྱེད་པ། ཁྲོ་མོའི་ཆས་ཐམས་ཅད་ཀྱིས་བརྒྱན་པར་གསལ་བའི་སྤྱི་བོར་ཨོཾ། མགྲིན་པར་ཨཱ༔ སྙིང་ཀར་ཧཱུྃ་དང་ཏྲག་ཡིག་གིས་མཚན་པ་ལས་འོད་ཟེར་འཕྲོས་པས་ཡེ་ཤེས་ཀྱི་མཁའ་འགྲོའི་ཚོགས་ཐམས་ཅད་སྤྱན་དྲངས་བཛྲ་ས་མ་ཡཱ་ཛ་ཛཿ ཛཿཧཱུྃ་བཾ་ཧོ། གཉིས་སུ་མེད་པར་གྱུར། བཛྲ་ཨརྒྷཾ༴སོགས་ནས། ཤཔྟ་ཨ་མྲྀ་ཏ་རཀྟ་བྷ་ལིང་ཏ་པུ་ཙ་ཁ་ཁ་ཁ་ཧཱི་ཁ་ཧཱི། ཧཱུྃ་བྷྱོ༔ སྐྱེ་མེད་ཆོས་སྐུའི་མཁའ་དབྱིངས་ལས། །འགགས་མེད་གཟུགས་སྐུའི་རོལ་པ་ཡིས། །རྒྱལ་བསྟན་བསྲུང་དང་ལོག་རྟོག་འཇོམས། །སྔགས་སྲུང་མ་མོར་ཕྱག་འཚལ་བསྟོད། །ཐུགས་ཀར་ཉི་མ་ལ་གནས་པའི་ཏྲག་ཡིག་གི་མཐར་སྔགས་ཀྱི་ཕྲེང་བས་བསྐོར་བར་བསམ། ཨོཾ་ཏྲག་རཀྴ་ཨེ་ཀ་ཙ་ཊི་སརྦ་སིདྡྷི་སརྦ་ཕ་ལ་ཧཱུྃ༔ ཅི་མང་བཟླས་མཐར་མཆོད་བསྟོད་བྱས་རྗེས། སྭ་བྷ་ཝས་སྟོང་པར་སྦྱངས་ཏེ། སྟོང་པའི་ངང་ལས་རང་ཉིད་རལ་གཅིག་མར་གསལ་བའི་མདུན་དུ་དུར་ཁྲོད་ཀྱི༴སོགས་གཞུང་ལྟར་རོ། །མགོ་སྤྲུལ་པས་སོ།། སྒྲོལ་མ་འཇིགས་པ་ཀུན་སྐྱོབས་ཀྱི་ཚེ་དབང་མཚམས་སྦྱོར།༄༅། སྒྲོལ་མ་འཇིགས་པ་ཀུན་སྐྱོབས་ཀྱི་སྐོར་ལས༔ མཚམས་སྦྱོར་འཆི་མེད་ལམ་བཟང་བགྲོད་པའི་ཤིང་རྟ་བཟང་པོ་ཞེས་བྱ་བ་བཞུགས་སོ།། ༄༅། སྐུ་གསུམ་དགོངས་པའི་ལྷ་ལམ་ནས། །གང་འདུལ་ཕྲིན་ལས་འོད་སྟོང་གཟིས། །གདུལ་བྱའི་བློ་གྲོས་མུན་སེལ་བ། །གསང་སྔགས་གླིང་པ་དེ་ལ་འདུད། །གང་གི་ཕྲིན་ལས་ཟབ་མོའི་གཏེར། །གསུང་རབ་རྒྱ་མཚོའི་བཅུད་བསྡུས་པ། །འཇིགས་སྐྱོབས་འཕགས་མའི་ཚེ་དབང་གི། །མཚམས་སྦྱོར་ཉུང་གསལ་འགོད་ལ་སྤྲོ། །དེ་ཡང་དཀྱིལ་འཁོར་གྱི་མདུན་དུ་ཚེ་བུམ། ཚེ་རིལ། ཚེ་ཆང་། མདའ་དར་ཚེ་གཏོར་སོགས་བཤམས་ལ། ལས་གཞུང་བསྲང་མཐར། ཚེ་བསྙེན་གྲངས་ལྡན་དུ་བསགས་རྗེས། ཚེ་བུམ་ལ་དམིགས་ཏེ། ཧྲཱི༔ སྣོད་བཅུད་མི་དམིགས་སྟོང་པའི་ངང་། །བྷྲཱུཾ་ལས་རིན་ཆེན་བུམ་པ་ནི། །ཚད་དང་མཚན་ཉིད་ཀུན་རྫོགས་དབུས། །སྣ་ཚོགས་བཅུད་ཀྱིས་གཏམས་པའི་སྟེང་། །ལྷུན་གྲུབ་གཡུ་ལོ་བཀོད་པའི་ཞིང་། །དཔལ་ཡོན་བཀོད་པ་ཕུན་སུམ་ཚོགས། །དེ་དབུས་རང་བྱུང་གཞལ་མེད་ཁང་། །བརྡ་དོན་རྟགས་གསུམ་ཡོངས་རྫོགས་ནང་། །ཏཱཾཿལྗང་འཕྲོ་འདུ་ཡོངས་གྱུར་ལས། །སྐུ་གསུམ་བདེ་གཤེགས་མ་ལུས་པའི། །ཕྲིན་ལས་ཨཱརྱ་ཏཱ་རེ་མ། །རྒྱན་དང་ཆ་ལུགས་མ་འདྲེས་རྫོགས། །སྤྱི་བོར་འཕགས་མཆོག་སྤྱན་རས་གཟིགས། །རིགས་ཀྱི་བདག་པོ་སྣང་མཐའ་ཡས། །ལས་སྒྲུབ་འཇིགས་སྐྱོབས་སྒོ་སྲུང་ལྷ། །མ་འདྲེས་ཆུ་ཟླ་ལྟ་བུར་གསལ། ཨོཾ་ཨཱརྱ་ཏཱ་རེ་བཛྲ་ས་མ་ཡ་ཛ༔ ཞེས་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོ༔ ཞེས་གཉིས་སུ་མེད་པར་བསྟིམ། ས་མ་ཡ་ཏིཥྛ་ལྷན་གྱིས་གདན་ཕུལ། ན་མོ་པུ་རུ་ཤ་ཡ་ཧོ་ཞེས་ཕྱག་བྱས་ནས། ཨོཾ་བཛྲ་ཨརྒྷཾ་སོགས་ནས་ཤཔྟ་ཨ་མྲྀ་ཏ་རཀྟ་བྷ་ལིང་ཏ་གུ་ཧྱ་པཱུ་ཛ་ཧོ། ཞེས་མཆོད། པོ་ཊ་ལ་ཡི་གནས༴སོགས། སྒྲོལ་མ་འཁོར་དང་བཅས་ལ་བསྟོད། ཅེས་བསྟོད་ནས། ཐུགས་སྲོག་སྔགས་ལས་འོད་ཟེར་འཕྲོས། །བུམ་པའི་ལྷ་ཚོགས་ཐུགས་རྒྱུད་བསྐུལ། །སྐུ་ལས་ཡེ་ཤེས་བདུད་རྩིའི་རྒྱུན། །བབ་པས་བུམ་པ་གང་བར་དམིགས། ཚེ་སྒྲུབ་ཀྱི་བཟླས་པ་ཅི་ནུས་བྱ། ཚེ་རྫས་གཞན་རྣམས་ལ་དམིགས་ཏེ། ཧྲཱིཿ ཐམས་ཅད་སྟོང་པའི་ངང་ཉིད་ལས། །རྫས་རྣམས་འཕགས་མའི་རྣམ་པར་གསལ། །བདག་མདུན་བུམ་པའི་ལྷ་རྣམས་ཀྱི། །ཐུགས་ཀའི་འོད་ཀྱི་སྤྲོ་བསྡུ་ཡིས། །འཁོར་འདས་ཀུན་གྱི་ཚེ་བཅུད་བསྡུས། །ལྷ་ཚོགས་ཀུན་ཀྱང་བདུད་རྩིར་ཞུ། །ཚེ་ཡི་རྫས་རྣམས་ཀུན་ལ་ཐིམ། །འཆི་མེད་འགྲུབ་པའི་རྫས་སུ་གྱུར།། ཞེས་བསམ་རྩ་སྔགས་མང་དུ་བཟླ། ཐུན་མཐར་མཆོད་བསྟོད་བྱས་ལ། ཨོཾ་ཨཱཿཧཱུྃ་གིས་མཆོད་ཡོན་ཕུལ་ལ། ལྷ་ཚོགས་བདེ་སྟོང་བདུད་རྩིར་ཞུ། །བུམ་པའི་བཅུད་དང་གཉིས་མེད་གྱུར།། ཞེས་བསམ་ལ། ཧྲཱིཿ ཚེ་རབས་སྔོན་ནས་བརྟེན་པའི་ལྷ༔སོགས་ཀྱིས་དབང་དང་དངོས་གྲུབ་བླངས། ལས་བུམ་ལ་དམིགས་ཏེ། ཧྲཱིཿ དམིགས་མེད་ངང་ནས་དྲན་རྫོགས་སུ། །ལས་བུམ་བཅུད་དབུས་པད་ཉིའི་སྟེང་། །དབང་ཆེན་རྟ་མགྲིན་སྐུ་མདོག་དམར། །རལ་གྲི་གཡས་ལ་ཞགས་པ་གཡོན། །ཡེ་ཤེས་མེ་ཀློང་འདོར་སྟབས་བཞུགས། །ཁྲོ་ཆས་ཡོངས་སུ་རྫོགས་པར་གསལ། །དམ་ཚིག་ཡེ་ཤེས་གཉིས་སུ་མེད། །སྐུ་ལས་དག་བྱེད་བདུད་རྩིའི་རྒྱུན། །བབ་པས་བུམ་པ་ལྟེམས་ཀྱིས་གང་།། ཨོཾ་ཧྱཱ་གྷྲྀ་ཝ་ཧཱུྃ་ཕཊ༔ བརྒྱ་རྩ་བཟླ། ཨོཾ་ཨཱཿཧཱུྃ་གིས་མཆོད་ཡོན་ཕུལ་ནས། བུམ་ལྷ་བདུད་རྩིར་ཞུ་ནས་ཐིམ། །བུམ་ཆུ་དག་བྱེད་མཆོག་ཏུ་གྱུར།། ཡིག་བརྒྱ་ལན་གསུམ་གྱིས་བརྟན་པར་བྱའོ། །དབང་དངོས་ལ་ཐོག་མར་ཁྲུས་ནི། ཇི་ལྟར་བལྟམས་པ་ཙམ༴སོགས། ཁྲུས་བགྱིའོ།། ཡིག་བརྒྱ་བརྗོད། བགེགས་གཏོར། རཾ་ཡཾ་ཁཾ་གིས་བསང་། སྭ་བྷ་ཝས་སྦྱང་། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བར་འབྲུ་གསུམ་འོད་དུ་ཞུ་བ་ལས་བྱུང་བའི་བགེགས་ཀྱི་གཏོར་མ་ཁ་ཏོག་དྲི་རོ་བཅུད་དང་ནུས་པ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པར་གྱུར་བར་བསམ་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས་ནས། ཨོཾ་སརྦ་བྷུ་ཏ་ཨ་ཀར་ཤ་ཡ་ཛ་ཛཿས་བགེགས་རྣམས་དགུག ཨོཾ་སརྦ་བྷིགྷྣན༴སོགས་ལན་གསུམ་གྱིས་ཞི་སྦྱང་དང་། སུམ་བྷ་ནི་ལན་གསུམ་གྱིས་ཞི་དྲག་ཕྱེད་མ་དང་། རང་ཉིད་སྐད་ཅིག་གིས་རྒྱལ་ཡུམ་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོ་ཁྲོ་གཏུམ་བཟོད་པར་དཀའ་བ་བསྐལ་པའི་མེ་ལྟར་འབར་བའི་སྐུར་གྱུར་བར་བསམ་ལ། ཧཱུྃ། ང་ནི་ཁྲོས་མ་ནག་མོའི་སྐུ༔ སྣང་སྲིད་སྟོང་པ་ཡུམ་གྱི་ཀློང༔ གཟུང་འཛིན་རྣམ་རྟོག་འཁྲུལ་བའི་གདོན༔ ཆོས་ཀྱི་དབྱིངས་སུ་མཚམས་བཅད་དོ༔ ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རང་བཞིན་གྱི་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་འཕགས་མ་སྒྲོལ་མའི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུས། དེང་འདིར་སློབ་མ་རྣམས་ལ་དབང་གི་ཡེ་ཤེས་བསྐྱེད་པ་ལ་བར་དུ་གཅོད་པར་བྱེད་པའི་བགེགས་ཚོགས་ལོག་པར་འདྲེན་པ་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་བྱིན་པ་འདིས་ཚིམ་པར་གྱིས་ལ་དགའ་བདེ་བྱང་ཆུབ་ཀྱི་སེམས་དང་ལྡན་པས་གཞན་དུ་དེངས་ཤིག གལ་ཏེ་མི་འགྲོ་ན་ཡེ་ཤེས་ཀྱི་མཚོན་ཆ་མེ་དཔུང་འབར་བས་མགོ་བོ་ཚལ་བ་བརྒྱར་འགས་ཤིང་ལུས་དུམ་བུ་སྟོང་དུ་གཏུབ་པར་གདོན་མི་ཟའོ།། ཨོཾ་ཛྙ་ན་ཊཱཀྐི་ནི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊ་ཧཱུྃ་ཧཱུྃ། སརྦ་བྷིགྣན་ཨུ་ཙ་ཏ་ཡ་ཕཊ། ཅེས་དང་། ཧཱུྃ་བཞིའི་སྔགས་བརྗོད་ཅིང་ཐུན་ཡུངས་གིས་བསྐྲད་པ་དྲག་པོའི་སྦྱང་བའོ།། བསྲུང་འཁོར་ནི། ཨོཾ་བཛྲ་རཀྵ་རཀྵ་ཧཱུྃ། ཞེས་བརྗོད་པས་ཕྱོགས་མཚམས་སྟེང་འོག་ཐམས་ཅད་ཁྲོ་མཚོན་མེ་དཔུང་གི་གུར་ཁང་ཡངས་ཤིང་རྒྱ་ཆེ་བས་བསྐོར་ནས་ཅིས་ཀྱང་མི་ཤིགས་པར་གྱུར་པའི་མོས་པ་མཛོད། བྱས་ལ་མེ་ཏོག་བཀྱེ་བསྡུ་བྱ། དེ་ནས་བླ་མས། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་སྐུ་གསུམ་འོད་སྣང་མཐའ་ཡས་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་ལ་འགོད་པར་བྱ། དེའི་ཆེད་དུ་རབ་འབྱམས་རྒྱལ་བ་མ་ལུས་པའི་ཡུམ་གཅིག་རྗེ་བཙུན་འཕགས་མ་སྒྲོལ་མའི་དཀྱིལ་འཁོར་དུ་སྨིན་བྱེད་ཀྱི་དབང་མཆོག་ཟབ་མོ་ཞུ་སྙམ་པའི་ཐུགས་བསྐྱེད་དང་བཅས་ཏེ་གསན་འཚལ། གང་གསན་པར་བྱ་བའི་ཆོས་དེ་ཡང་སྟོན་པ་རྫོགས་པའི་སངས་རྒྱས་གདུལ་བྱ་སྣ་ཚོགས་འདུལ་བའི་ཐབས་ལ་མཁས་ཤིང་ཐུགས་རྗེ་དང་ཕྲིན་ལས་དཔག་ཏུ་མེད་པ་མངའ་བ་དེ་ཉིད་ཀྱིས་མཐའ་ཡས་པའི་འགྲོ་བ་རྣམས་ཀྱི་ཁམས་དང་བསམ་པ་དང་དབང་པོའི་ཁྱད་པར་ལ་དགོངས་ནས་ཐེག་པའི་བྱེ་བྲག་དང་། ལམ་གྱི་འཇུག་སྒོ་བསམ་གྱིས་མི་ཁྱབ་པ་ཞིག་བཀའ་བསྩལ་བ་དེ་རྣམས་རེ་རེ་ལ་ཡང་། ཞལ་ནས་གསུངས་པའི་བཀའ་མ། རྗེས་སུ་གནང་བའི་གཏེར་མ། བྱིན་གྱིས་བརླབས་པའི་དག་སྣང་མ་སྟེ། ལམ་ཟབ་མོ་སྐོར་ཚོ་གསུམ་དུ་བཞུགས་པ་ལས། དེང་སྐབས་ཀྱི་ཆོས་ཚུལ་འདི་ཉིད་ཟབ་མོ་གཏེར་གྱི་ཆོས་སྡེ་ལས་བྱུང་བ་ཡིན། དེ་ལའང་སྤྱིར་དངོས་གཏེར་དང་། དགོངས་པའི་གཏེར་གཉིས་ལས། བྱེ་བྲག་ཏུ་གཏེར་རིགས་བཅོ་བརྒྱད་ཀྱི་གྲངས་སུ་ཕྱེས་པའི་རེ་རེ་ལའང་རྒྱུད་དང་ཐེག་པའི་གོང་འོག བསྐྱེད་རྫོགས་དང་དགོངས་པའི་ཁྱད་པར། ཚིག་གི་ཚོགས་ཀྱི་རྒྱས་བསྡུས་སོགས་ཀྱི་བྱེ་བྲག་བརྗོད་ཀྱིས་མི་ལང་བ་རེ་མཆིས་མོད་ཀྱང་། འདིར་ད་ལམ་གྱི་ཆོས་དང་གང་ཟག་གི་ལོ་རྒྱུས་མདོ་ཙམ་བརྗོད་ན། སྔོན་དུས་གསུམ་གྱི་རྒྱལ་བ་མ་ལུས་པའི་མཁྱེན་གཉིས་ཡེ་ཤེས་ཀྱི་རང་གཟུགས་རྗེ་བཙུན་འཇམ་པའི་དབྱངས་མི་ཡི་རྣམ་པར་སྣང་བ། ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་ཚངས་པ་ལྷ་ཡི་མེ་ཏོག་ཅེས་བྱ་བའི་ཐུགས་བསྐྱེད་སྨོན་ལམ་དག་པའི་བཀའ་དྲིན་གྱིས་སྟོན་མཆོག་བུ་རམ་ཤིང་པའི་དབང་པོ་དོན་ཐམས་ཅད་གྲུབ་པ་དང་ཞལ་མི་གཉིས་པ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་དང་། ཟ་ཧོར་གྱི་མཁན་ཆེན་ཞི་བ་འཚོ་དང་། ཁ་ཆེའི་པཎ་ཆེན་བཱི་མ་མི་ཏྲ་སོགས་མཁས་ཤིང་གྲུབ་པ་བརྙེས་པའི་པཎྚི་ཏ་ཆེན་པོ་བརྒྱ་རྩ་བརྒྱད་བསིལ་ལྡན་བོད་ཀྱི་ལྗོངས་འདིར་གདན་དྲངས་ཤིང་། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་མཐའ་འདུལ་ཡང་འདུལ་དང་བཅས་པའི་རྟེན་བརྟེན་པ་ཡོངས་སུ་རྫོགས་པ་གྲུབ། སྤྲུལ་པའི་ལོ་པཎ་རྣམས་ཀྱིས་རྒྱ་གར་འཕགས་པའི་ཡུལ་ན་བཞུགས་ཚོགས་ཆེ་བའི་མདོ་སྔགས་ཀྱི་ཆོས་ཚུལ་མ་ལུས་པ་བསྒྱུར་ཞིང་གཏན་ལ་ཕབས། བླ་ན་མེད་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བས། བོད་ཀྱི་རྒྱལ་ཁམས་ཐམས་ཅད་དཀར་པོར་མཛད། སྒྲུབ་པ་ཉམས་ལེན་ལ་འབད་པས་རྗེ་འབངས་ཉེར་ལྔ་སོགས་ཀྱིས་སྒྲུབ་འབྲས་མཐའ་རུ་ཕྱིན་ཅིང་ཡི་དམ་གྱི་ལྷ་དང་དགོངས་པ་མཉམ་པར་གྱུར་པའི་ནང་ཚན་ལས། ཨོ་རྒྱན་རྡོ་རྗེ་འཆང་ཆེན་པོ་དེ་ཉིད་ཡེ་གདོད་མ་ནས་སྐུ་གསུམ་ལྷུན་གྲུབ་ཏུ་བཞུགས་ཀྱང་། བསྟན་པ་དང་སེམས་ཅན་གྱི་དོན་ལ་དགོངས་ཤིང་། ཆོས་སྐུའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས། ལོངས་སྐུའི་སངས་རྒྱས་ཐམས་ཅད་ཀྱིས་དབང་བསྐུར། སྤྲུལ་སྐུའི་སངས་རྒྱས་ཐམས་ཅད་ཀྱིས་བཀའ་བགྲོས་མཛད་ནས་མཁྱེན་བརྩེ་ནུས་པའི་སྤྱི་གཟུགས་སུ་གྲུབ་པའི་སློབ་དཔོན་མཆོག་གི་སྐུར་སྤྲུལ་པ་ཡིན་མོད་ཀྱང་། གདུལ་བྱའི་མཐུན་སྣང་ལ་འཕགས་ཡུལ་གྱི་པཎ་གྲུབ་དུ་མའི་ཞལ་སྔ་ནས་འཕགས་མ་སྒྲོལ་མའི་རྒྱུད་དང་སྒྲུབ་ཐབས་དབང་དང་མན་ངག་དཔག་ཏུ་མེད་པ་ལ་སོགས་ཟབ་ཅིང་རྒྱ་ཆེ་བའི་ཆོས་ཀྱི་མཛོད་ཆེན་པོ་བསམ་གྱིས་མི་ཁྱབ་པ་གསན་ཅིང་ཐུགས་ཉམས་སུ་བཞེས། དུར་ཁྲོད་ཆེན་པོ་བརྒྱད་དང་། རི་བོ་ཏ་ལའི་བྱང་ཤར་མ་ར་ཏི་ཀའི་བྲག་ཕུག་སོགས་སུ་སྒྲུབ་པ་མཛད་པས། ཐོག་མར་རྩ་གསུམ་ལྷག་པའི་ལྷ་རབ་འབྱམས་ཀྱི་ཞལ་མཐོང་། བར་དུ་རྗེས་སུ་བཟུང་ཞིང་ལུང་བསྟན་དང་དབུགས་དབྱུང་གཟེངས་བསྟོད་གནང་། མཐར་ཕྱོགས་དུས་ཀྱི་བདེ་བར་གཤེགས་པ་ཀུན་དང་དགོངས་པ་མཉམ་ཞིང་བླ་ན་མེད་པའི་ཡེ་ཤེས་མངོན་དུ་བརྙེས་ནས་ཟག་མེད་རྡོ་རྗེའི་སྐུ་མཆོག་འཇའ་འོད་ཀྱི་རང་བཞིན། གྲུབ་པའི་སློབ་དཔོན་མཆོག་གི་རྣམ་པ་ཅན་གཅིག་ཉིད་ལས་མ་གཡོས་བཞིན་དུ་གདུལ་བྱའི་མོས་ངོར་སྒྱུ་མའི་ཟློས་གར་མཚན་མཆོག་བརྒྱད་དང་འཕྲུལ་མཚན་ཉི་ཤུ་སོགས་སུ་བསྒྱུར་ནས་བསྟན་པ་དང་འགྲོ་བའི་དོན་དཔག་ཏུ་མེད་པ་མཛད་པའི་ཚུལ་བསྟན། སླར་ཡང་ཆོས་འཁོར་དཔལ་གྱི་བསམ་ཡས་སོགས་བོད་ཀྱི་སྒྲུབ་གནས་རྣམས་སུ་སྤྱིར་ཐེག་མཆོག་བླ་ན་མེད་པའི་ཟབ་ཆོས་མཐའ་ཡས་པ་དང་། ཁྱད་པར་འཕགས་མའི་གདམས་སྐོར་མང་དུ་གནང་བ་ལས། འདིར་མངའ་བདག་རྒྱལ་སྲས་དང་། མཁར་ཆུ་དཔལ་གྱི་དབང་ཕྱུག འཕགས་མ་སྒྲོལ་མ་ཉིད་མཁར་ཆེན་གྱི་རྒྱུད་དུ་མི་ཡི་རྗེ་མོའི་རྣམ་པར་རོལ་བ་རྒྱལ་ཡུམ་གསང་བའི་བདག་མོ་ཡེ་ཤེས་མཚོ་རྒྱལ་སོགས་ལ་གནང་བའི་ཟབ་ཆོས་སྐོར་ལས། ཇི་སྐད་དུ། ཨེ་མ༔ འདི་ལྟར་རྣལ་འབྱོར་སྟོབས་ཆེན་གྱིས༔ རྗེ་བཙུན་ཨཱརྱ་ཏཱ་རེ་ལ༔ ཐེ་ཚོམ་མེད་པར་གསོལ་འདེབས་བུས༔ མཆོག་དང་ཐུན་མོང་དངོས་གྲུབ་ཐོབ༔ ཚེ་འདིར་ནད་གདོན་བར་ཆད་དང༔ འཇིགས་པ་བརྒྱད་ལས་ཐར་བར་འགྱུར༔ ཚེ་བསོད་རྒྱས་ཤིང་སྣང་སྲིད་ཀུན༔ དབང་སྡུད་དགྲ་བགེགས་ཤུགས་ཀྱིས་ཐུལ༔ སྙིང་པོ་བཟླས་པའི་ཕན་ཡོན་ནི༔ བརྒྱ་བཟླས་ནད་གདོན་བར་གཅོད་ཞི༔ སྟོང་བཟླས་ལས་ངན་སྡིག་སྒྲིབ་འདག༔ ཁྲི་བཟླས་མི་གཡོ་ཏིང་འཛིན་བརྟན༔ ཚེ་གཅིག་སྒྲུབ་ལ་བརྩོན་ནུས་ན༔ ཕུང་པོ་བོར་ནས་མཁའ་སྤྱོད་འགྲོ༔ ཞེས་དང་། ཕྱི་ནང་སྣོད་བཅུད་ཚེ་དཔལ་དང༔ སྟོབས་དང་སྙན་གྲགས་རྒྱས་པར་འགྱུར༔ ཚེ་ཟད་ཡིན་ཀྱང་ལོ་གསུམ་བསྲིང༔ ཡང་ཟབ་འདི་ལས་ལྷག་པ་མེད༔ ཅེས་དང་། ཡོན་ཏན་བརྗོད་ཀྱིས་མི་ལང་ངོ༔ ཚེ་དང་དཔལ་ལ་དབང་འབྱོར་ཞིང༔ མཆོག་དང་ཐུན་མོང་དངོས་གྲུབ་ཐོབ༔ འཆི་མེད་རིག་འཛིན་འགྲུབ་པར་འགྱུར༔ ཞེས་སོགས་གསུངས་པ་ལྟར་ཕན་ཡོན་དང་ཟབ་ཁྱད་མཐའ་ཡས་པ་མངའ་བ་སྒྲོལ་མ་འཇིགས་པ་ཀུན་སྐྱོབས་ཀྱི་ཟབ་ཆོས་སྐོར་རྣམས་གཏེར་དུ་སྦ་བར་གདམས་ཚུལ་ནི། རང་གཞུང་ལས། ཟབ་པའི་ཡང་ཟབ་སྙིང་ལྟ་བུ༔ མཚོ་རྒྱལ་ལྕམ་དྲལ་གཉིས་ལ་གཏད༔ རང་ཉམས་ལོངས་ལ་བརྡ་རིས་ཐོབ༔ བྲག་དམར་གཡའ་མ་ལུང་གི་གནས༔ བྱ་ཁྱུང་གཤོག་བརྐྱང་འདྲ་བའི་བྲག༔ རྫུ་འཕྲུལ་བཀོད་པའི་རྒྱས་ཐོབ་ལ༔ ནུས་མཐུ་གྲུབ་པའི་སྨོན་ལམ་གྱིས༔ ནམ་ཞིག་སྙིགས་མ་ལྔ་བདོའི་དུས༔ ང་སྤྲུལ་ལས་ཅན་ཞིག་གིས་འདོན༔ དེ་ཚེ་རིག་འཛིན་དེ་ཉིད་ཀྱིས༔ མདོ་བྱང་ལྟར་དུ་སྤེལ་མཁས་ཀྱིས༔ འགྲོ་ཀུན་དུས་མིན་འཆི་བ་སྐྱོབས༔ འཆི་མེད་རྡོ་རྗེའི་སྲོག་འགྲུབ་འགྱུར༔ ས་མ་ཡཱ༔ ཞེས་གསུངས་པ་ལྟར། མཁར་ཆེན་ལྕམ་དྲལ་གྱིས་སྒྲུབ་གནས་སོ་སོར་རྩེ་གཅིག་ཏུ་བསྒྲུབ་པས་ཞལ་མངོན་དུ་མཇལ། གསུང་གིས་དབུགས་དབྱུང་ཤིང་ལུང་བསྟན། ཐུགས་ཀྱིས་དགོངས་ཤིང་བྱིན་གྱིས་བརླབས། མཚོ་རྒྱལ་གྱིས་གུ་རུའི་བཀའ་ལུང་ཇི་ལྟ་བ་བཞིན་མཁའ་འགྲོའི་བརྡ་རིས་སུ་ཕབ་ཏེ་མི་ཤིགས་པའི་རྒྱས་བཏབ་ཅིང་གཏེར་དུ་སྦས་ནས། དམ་ཅན་རྡོ་རྗེ་ལེགས་པ་སོགས་གཏེར་སྲུང་དུ་བསྐོས་ཤིང་བཅོལ་གཏམ་བྱས་པ་ལས་སླར་ཡང་འདོན་པའི་དུས་ལ་བབ་ཚེ། མ་ཧཱ་གུ་རུ་རིན་པོ་ཆེ་དང་། ཊཱཀྐི་ཡོངས་ཀྱི་གཙོ་མཆོག་ཡེ་ཤེས་མཚོ་རྒྱལ་ལྕམ་དྲལ་རྣམས་ཀྱི་ཡེ་ཤེས་སྒྱུ་འཕྲུལ་གྱི་བཀོད་པ་གཅིག་ཏུ་བསྡུས་པའི་སྐུ་མཆོག རྩོད་མེད་ཡོངས་གྲགས་ཀྱི་གཏེར་ཆེན་འགྲོ་མགོན་ཆོས་ཀྱི་རྒྱལ་པོ་རིག་འཛིན་གསང་སྔགས་གླིང་པ་ཞེས་བྱ་བ་དེ་ཉིད་དུས་རྟགས་མངོན་གྱུར་གྱི་ཆར་མདོ་ཁམས་སུ་བལྟམས་ཤིང་དགུང་ལོ་ཉེར་གཅིག་བཞེས་པ་རབ་ཚེས་མེ་གླང་གི་ལོ་ཧོར་ཟླ་དྲུག་པའི་ཚེས་ཉེར་ལྔ་ལ་བསིལ་ལྡན་བོད་ཀྱི་ཡུལ་དབུས། བྲག་དམར་གཡའ་མ་ལུང་གི་དབེན་གནས་བྲག་རི་ཁྱུང་གཤོག་བརྐྱང་འདྲའི་ངོས་ནས་སྤྱན་དྲངས་ཤིང་ཁམས་དབུས་གཙང་གསུམ་ཀུན་ལ་བསྟན་འགྲོའི་དཔལ་དུ་སྤེལ་བའི་ཟབ་ཆོས་ཀྱི་སྡེ་ཚན་ལས། དད་པ་ལྡན་པ་གང་དག་གིས༔ དབང་ཐོབ་ཙམ་གྱིས་བར་ཆད་སེལ༔ དུས་བབ་ཚེ་ཟད་ཡིན་གྱུར་ཀྱང་༔ འདི་ཐོབ་ལོ་གསུམ་བསྲིང་བར་འགྱུར༔ ཞེས་རང་གཞུང་ཉིད་དུ་རྡོ་རྗེའི་ལུང་གིས་བསྔགས་པ་ལྟར། སྒྲུབ་ཐབས་འཇིགས་པ་ཀུན་སྐྱོབས་དང་། ཚེ་དབང་འཆི་མེད་ལམ་བཟང་གཉིས་ལ་བརྟེན་ནས་འཕགས་མ་སྒྲོལ་མའི་དཀྱིལ་འཁོར་དུ་འཆི་མེད་ཚེ་ཡི་དབང་མཆོག་ཟབ་མོ་བསྐུར་བ་ལ། བདག་རྡོ་རྗེ་སློབ་དཔོན་གྱི་བྱ་བ་བདག་མདུན་བུམ་པ་བསྒྲུབ་པ། ཚེ་ཡི་རྫས་རྣམས་བསྒྲུབ་ཅིང་བྱིན་གྱིས་བརླབས་པ། དབང་དང་དངོས་གྲུབ་ལེན་པ་རྣམས་ལེགས་པར་གྲུབ་ཟིན་པས། ད་ཁྱེད་རང་རྡོ་རྗེ་སློབ་མ་རྣམས་ཀྱིས་ཀྱང་ཐོག་མར་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་སྨིན་བྱེད་ཚེ་དབང་ཟབ་མོ་ཞུ་བའི་ཡོན་དུ་མཎྚལ་ཕུལ་བར་མཛོད། མཎྚལ་ཕུལ། དེ་ལྟར་མཎྚལ་ཕུལ་ནས་ཕྱག་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱོར་དབང་དོན་དུ་གསོལ་བ་འདེབས་འདི་ཡི་རྗེས་ཟློས་མཛོད། ཀྱཻ་མ་བླ་མ་རྡོ་རྗེ་འཛིན༔ འཆི་མེད་ཚེ་ཡི་དཀྱིལ་འཁོར་དུ༔ བདག་ཞུགས་འགྲོ་དོན་མཐར་ཕྱིན་ཕྱིར༔ དབང་བསྐུར་དམ་པ་སྩལ་དུ་གསོལ༔ ལན་གསུམ། འདིར་དངོས་སུ་མ་གསུངས་ཀྱང་སྐྱབས་སེམས་དང་ཚོགས་བསགས་རྣམས་དབང་ཆོག་སྤྱི་དང་བསྟུན་ཚེ་དོན་གྱིས་ཐོབ་པས་སྤྲོ་ན། ཁྱེད་རང་རྣམས་ཀྱི་སྒོ་གསུམ་རྣལ་དུ་ཕོབས་ལ་བླ་མ་དང་གཉིས་སུ་མེད་པ་རྒྱལ་ཡུམ་འཕགས་མ་སྒྲོལ་མའི་ལྷ་ཚོགས་རྣམས་བྱང་ཆུབ་ཀྱི་བར་དུ་སྐྱབས་གནས་ཀྱི་མཆོག་ཏུ་འཛིན་སྙམ་པས་འདི་བཞིན་དུ་རྗེས་སུ་ཟློས་ཤིག ན་མོ༔ དཀོན་མཆོག་གསུམ་དང་རྩ་གསུམ་ལྷ༔ འཕགས་མ་སྒྲོལ་མའི་ལྷ་ཚོགས་ལ༔ མཁའ་མཉམ་འགྲོ་བ་ཀུན་དོན་དུ༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ། སྲིད་གསུམ་རྒྱ་མཚོ་ན་གནས་པའི་ཡིད་ཅན་གྱི་འགྲོ་བ་མཐའ་དག་མར་ཤེས་པས་ཉེ་རིང་ཆགས་སྡང་མེད་པར་བློ་ཡུལ་དུ་བླང་ནས་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་འདི་ཡི་རྗེས་ཟློས་ཀྱིས། ཧོ༔ བདག་ནི་དེང་བཟུང་སངས་རྒྱས་བར༔ ཏཱ་རེ་ལྷ་མོ་བསྒྲུབ་ནས་སུ༔ ཁམས་གསུམ་འགྲོ་བ་ཀུན་དོན་དུ༔ སྨོན་འཇུག་དོན་དམ་སེམས་བསྐྱེད་དོ༔ ལན་གསུམ། སླར་ཡང་ཚིག་དོན་དྲན་བཞིན་པས་ཚོགས་བསགས་ཡན་ལག་བདུན་པ་འདི་བཞིན་དུ་རྗེས་ཟློས་ཀྱིས། དཀོན་མཆོག་གསུམ་དང་རྩ་བ་གསུམ༔ ཚེ་རབས་སྔོན་ནས་འབྲེལ་བ་ཡི༔ འཕགས་མ་སྒྲོལ་མའི་ལྷ་ཚོགས་ལ༔ ལུས་ངག་ཡིད་ཀྱིས་ཕྱག་འཚལ་ལོ༔ ཞེན་མེད་རང་གྲོལ་མཆོད་པ་འབུལ༔ མི་དགེ་སྡིག་པའི་ལས་བགྱིས་བཤགས༔ དུས་གསུམ་དགེ་ལ་རྗེས་ཡི་རང༔ ཐེག་གསུམ་ཆོས་འཁོར་བསྐོར་བར་བསྐུལ༔ སྒོ་གསུམ་གུས་པས་གསོལ་བ་འདེབས༔ དགེ་རྩ་བྱང་ཆུབ་རྒྱུ་རུ་བསྔོ༔ དེ་ནས་སློབ་དཔོན་གྱིས་བཀའ་ཡི་གནང་བ་སྦྱིན་པ་འདི་ལ་གསན་པས་ཁྱབ་པར་གདའ། ཧཱུྃ༔ རིག་འཛིན་སྐལ་ལྡན་བུ་ཁྱོད་ལ༔ འཆི་མེད་དབང་བསྐུར་རྩལ་ལགས་ཀྱིས༔ འགྲོ་བའི་དོན་ཏུ་སེམས་བསྐྱེད་ལ༔ ཁྱོད་རང་ལྷ་རུ་གསལ་ཐོབ་ཅིག༔ དེ་ཡང་བྱིན་རླབས་ཐམས་ཅད་ཀྱི་གཞི་ཡེ་ཤེས་དབབ་པའི་དོན་དུ་དམིགས་པ་འདི་བཞིན་དུ་མཛད་འཚལ། ཨོཾ་མ་ཧཱ་ཤུ་ནྱ་ཏ༴སོགས་ལས་བུམ་གྱི་ཆུས་བསང་སྦྱང་། སྣོད་བཅུད་མི་དམིགས་སྟོང་པའི་ངང་། །བརྩེ་ཆེན་སྙིང་རྗེས་ཡོངས་སུ་ཁྱབ། །དོན་དམ་བྱང་ཆུབ་སེམས་ཀྱི་རྩལ། །ལྷུན་གྲུབ་འགག་པ་མེད་པའི་གདངས། །རིག་པ་ཏཱཾ་ཡིག་ལྗང་གུ་ལས། །སློབ་བུ་འཕགས་མ་སྒྲོལ་མའི་སྐུ། །བཅུ་དྲུག་གཞོན་ཚུལ་སྐུ་མདོག་ལྗང་། །ཞལ་གཅིག་ཕྱག་གཉིས་མཆོད་སྦྱིན་དང། །ཨུཏྤལ་སྔོན་པོའི་ཡུ་བ་འཛིན། །དབུ་ལ་རིན་ཆེན་རྒྱན་གྱིས་མཛེས། །གནག་སྣུམ་ལྕང་ལོའི་ལྷག་མ་གྲོལ། །སྙན་ཆ་མགུལ་རྒྱན་དོ་ཤལ་དང་། །ཕྱག་གདུབ་དཔུང་རྒྱན་ཞབས་གདུབ་དང་། །དར་དཔྱང་དཀར་པོས་སྟོད་གཡོག་ཅིང་། །སྨད་དཀྲིས་ཤ་ཝ་རི་དམར་པོ། །སྐ་རགས་གསེར་སྐ་དབང་གཞུ་བཅིང་། །མར་གད་གསང་གོས་པཉྩ་ལི། །ཞབས་གཉིས་གཡས་བརྐྱང་གཡོན་བསྐུམ་གྱིས། །ཉི་ཟླ་པདྨའི་གདན་ལ་བཞུགས། །གནས་གསུམ་ཡི་གེ་འབྲུ་གསུམ་དང་། །ཐུགས་སྲོག་སྔགས་ཀྱི་འཕྲོ་འདུ་ལས། །འོད་འཕྲོས་ཡེ་ཤེས་སྤྱན་དྲངས་བསྟིམ།། སྤོས་རོལ་དང་བཅས་བྱིན་འབེབ་ནི། ཧཱུྃ༔ སྣོད་བཅུད་དག་པའི་དཀྱིལ་འཁོར་འདིར༔ སྐུ་གསུམ་རང་བྱུང་སྤྲུལ་པའི་ལྷ༔ མྱུར་མ་དཔའ་མོ་རྒྱལ་བའི་ཡུམ༔ རྩ་གསུམ་སྲུང་མའི་ཚོགས་བཅས་ཀྱིས༔ སྐུ་གསུང་ཐུགས་ཀྱི་བྱིན་ཕོབས་ལ༔ ཡེ་ཤེས་ལྔ་ཡི་དབང་མཆོག་བསྐུར༔ ཛྙཱ་ན་བཛྲ་ཨ་ཝེ་ཤ་ཡ་ཨ་ཨཱཿ ཞེས་བརྗོད་ཅིང་མེ་ཏོག་འཐོར། དེ་ལྟར་བྱིན་ཕབས་པའི་ཡེ་ཤེས་པ་རྣམས་ཁྱེད་རང་རྣམས་ཀྱི་སྒོ་གསུམ་དང་དབྱེར་མེད་དུ་བརྟན་པར་གྱུར་ཅིག ཅེས་རྡོ་རྗེ་སྤྱི་བོར་བཞག་གོ དེ་ནས་ཚེ་བུམ་ཐོགས་ལ། བུམ་པ་འདི་ཉིད་ཕྱི་རིན་པོ་ཆེ་བུམ་པའི་དབྱིབས་ལ་ནང་བདེ་ཆེན་དག་པ་གཡུ་ལོ་བཀོད་པའི་ཞིང་ཁམས་རྒྱ་ཁྱོན་བཀོད་པ་བསམ་གྱིས་མི་ཁྱབ་པའི་དབུས་སུ། གཞལ་མེད་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། སྣ་ཚོགས་པདྨ་དང་ཉི་ཟླའི་གདན་ལ་དུས་གསུམ་རྒྱལ་བ་ཀུན་གྱི་ཕྲིན་ལས་ཀྱི་རང་གཟུགས་འཕགས་མ་སྒྲོལ་མའི་ལྷ་ཚོགས་རྣམས་མངོན་སུམ་ལྟ་བུར་བཞུགས་པའི་སྐུ་ལས་ཟག་མེད་ཡེ་ཤེས་ཀྱི་བདུད་རྩིའི་རྒྱུན་ཆེན་པོ་བབ་པས་ལུས་ཀུན་གང་ཞིང་འཆི་མེད་རྡོ་རྗེའི་སྲོག་ལ་དབང་ཐོབ་བྱུང་སྙམ་དུ་མོས་མཛོད། ཧྲཱིཿ འཆི་མེད་བུམ་པ་བདུད་རྩི་སྨན༔ ཚེ་ལྷ་རྗེ་བཙུན་སྒྲོལ་མ་བཞུགས༔ རིགས་ཀྱི་བུ་ལ་དབང་བསྐུར་བས༔ རྡོ་རྗེའི་སྲོག་ལ་དབང་ཐོབ་ཤོག༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་མ་མ་ཨ་ཡུརྫྙ་ན་ཚེ་བྷྲུཾ་ཎི་ཛ་སིདྡྷི་ཧཱུྃ་ཧྲཱི༔ ཚེ་བུམ་མགོར་བཞག་ཅིང་བུམ་ཆུ་བླུད། འོ་སྐལ་ལྡན་རིགས་ཀྱི་སློབ་བུ་ལ་འཆི་མེད་བདུད་རྩིའི་བུམ་པའི་དབང་བསྐུར་བས་འབྱུང་བ་ལྔས་བསྡུས་པའི་ཕུང་པོ་ཁམས་དང་སྐྱེ་མཆེད་ཀྱི་བཅུད་ཤོར་བ་ཐམས་ཅད་བསྡུས་ཤིང་ཐིམ་ནས་འཆི་མེད་རིག་འཛིན་འགྲུབ་པའི་དབང་དམ་པ་ཐོབ་པར་གྱུར་ཅིག ཚེ་རིལ་བྱིན་ཞིང་། ཧྲཱིཿ ཕྱི་ནང་སྣོད་བཅུད་ཀུན་གྱི་ཚེ༔ བཅུད་དུ་དྲིལ་བའི་རིལ་བུ་འདི༔ སྐལ་ལྡན་རྣམས་ལ་བྱིན་པ་ཡིས༔ མི་འགྱུར་ཚེ་ལ་དབང་ཐོབ་ཤོག༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་མ་མ་ཨ་ཡུརྫྙ་ན་ཚེ་བྷྲུཾ་ཎི་ཛ་སིདྡྷི་ཧཱུྃ་ཧྲཱི༔ ཨ་བྷི་ཥིཉྩ་མཾ༔ འོ་སྐལ་ལྡན་རིགས་ཀྱི་སློབ་བུ་ལ་འཆི་མེད་བཅུད་དྲིལ་ཚེ་ཡི་རིལ་བུའི་དབང་བསྐུར་བས་སྐྱེ་འཆི་མེད་པ་ཚེ་ཡི་རིག་འཛིན་བརྙེས་པའི་དབང་དམ་པ་ཐོབ་པར་གྱུར་ཅིག ཚེ་ཆང་བྱིན་ལ། ཧྲཱིཿ རྩ་བརྒྱད་ཡན་ལག་སྟོང་སྦྱར་བའི༔ ར་ས་ཡ་ན་འཆི་མེད་སྨན༔ བདུད་རྩི་ཚེ་ཆང་བྱིན་པ་ཡིས༔ འཇིགས་མེད་སྲོག་ལ་དབང་ཐོབ་ཤོག༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་མ་མ་ཨ་ཡུརྫྙ་ན་ཚེ་བྷྲུཾ་ཎི་ཛ་སིདྡྷི་ཧཱུྃ་ཧྲཱི༔ ཨ་བྷི་ཥིཉྩ་མཾ༔ འོ་སྐལ་ལྡན་རིགས་ཀྱི་སློབ་བུ་ལ་ཚེ་ཆང་བདུད་རྩིའི་དབང་བསྐུར་བས་ཚེ་ཆུ་བོའི་རྒྱུན་བཞིན་བརྟན་པའི་དབང་དམ་པ་ཐོབ་པར་གྱུར་ཅིག མི་འགྱུར་ལྷུན་པོ༴སོགས། བཀྲ་ཤིས་ཤོག གཏོར་མ་ཐོགས་ལ། གཏོར་མ་འདི་ཉིད་ཕྱི་ལྟར་སྣོད་བཅུད་རྣམ་པར་དག་པ་མཚོན་པའི་དཔལ་གཏོར་རྒྱན་དང་ལྡན་པ་ལ། ནང་ལྟར་རིན་པོ་ཆེའི་གཞལ་མེད་ཁང་ཆེན་པོ་འོད་ཟེར་སྣ་ལྔ་འཁྲིགས་པའི་དབུས་སུ་འཕགས་མ་སྒྲོལ་མའི་ལྷ་ཚོགས་རྣམས་བཞུགས་པའི་སྟེང་གི་ཆ་ལ་བརྒྱུད་ལྡན་བླ་མ། བར་གྱི་ཆ་ལ་ཡི་དམ་ལྷ་ཚོགས། འོག་གི་ཆ་ལ་མ་ཚོགས་མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་ཏིལ་གྱི་གང་བུ་ཁ་ཕྱེས་པ་ལྟར་གསལ་བ་རྣམས་ཁྱེད་རང་རྣམས་ཀྱི་སྤྱི་བོར་བྱོན་ནས་དབང་བསྐུར་བས་སྒོ་གསུམ་གྱི་ལས་ཉོན་བག་ཆགས་ཐམས་ཅད་བྱང་ཞིང་དག ལྷ་ཚོགས་ཐམས་ཅད་ཀྱང་འོད་དང་འོད་ཟེར་གྱི་རྣམ་པས་སྤྱི་བོ་ནས་ཞུགས་ཤིང་ཐིམ་པས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་བྱུང་སྙམ་པའི་མོས་པ་མཛོད། ཨོཾ། ཡོངས་ལ་གཏོར་བའི་རྣམ་རྟོག་གཏོར། །ཀུན་ལ་ཁྱབ་པའི་མ་དང་མཚུངས། །དེ་ལྟ་བུ་ཡི་དབང་བསྐུར་བས། །འཕགས་མའི་གསང་གསུམ་དབང་ཐོབ་ཤོག ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། བཱ་ལིང་ཏ་ཨ་བྷི་ཥིཉྩ་མཾ། དེས་འཕགས་མ་སྒྲོལ་མའི་དཀྱིལ་འཁོར་དུ་འཆི་མེད་ཚེ་ཡི་དབང་བསྐུར་ཟབ་མོ་ཐོབ། གནས་སྐབས་སུ་སྒོ་གསུམ་ལས་ཉོན་སྡིག་སྒྲིབ་སྦྱངས་ཤིང་ལྷ་སྔགས་ཏིང་འཛིན་སྒོམ་པ་ལ་དབང་། མཐར་ཐུག་ཏུ་འཕགས་མའི་གསང་བ་གསུམ་དང་དབྱེར་མེད་དུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། ཚེ་འགུགས་ནི། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་སྣ་ལྔ་ཕྱོགས་བཅུར་འཕྲོས་པས་རྒྱལ་བ་སྲས་དང་བཅས་པའི་བྱིན་རླབས་ནུས་མཐུ་ཚེ་བཅུད་དངོས་གྲུབ་དང་། ཕྱི་སྣོད་འབྱུང་ལྔའི་དྭངས་བཅུད། ནང་བཅུད་འགྲོ་བའི་ཚེ་དཔལ་སྟོབས་འབྱོར་ཐམས་ཅད་འོད་ལྔའི་རྣམ་པར་བསྡུས་ནས་ཁྱེད་རང་རྣམས་ལ་ཐིམ་པས་སྐྱེ་འཆི་མེད་པ་རྡོ་རྗེའི་སྲོག་ལ་དབང་ཐོབ་པར་མོས་མཛོད། མདའ་དར་ཐོགས་ལ། ཧྲཱིཿ ཆོས་དབྱིངས་མཐའ་བྲལ་ལྟ་བའི་ཀློང་༔ སོགས་ནས། ཛྙཱ་ན་སརྦ་སིདྡྷི་ཧྲཱི༔ ཞེས་པའི་བར་དང་། ཚེ་གཟུངས་མཐར། ཚེ་དབང་དུ་གྱུར་ཅིག༴སོགས། རྒྱས་གདབ་ནི། ཧྲཱིཿ ཆོས་དབྱིངས་མཐའ་དང་བྲལ་བའི་ཀློང༔ འགྱུར་མེད་རང་རྩལ་ཡེ་ཤེས་ལྔ༔ སྐྱེ་འཆི་འགག་པ་མེད་པའི་དབྱིངས༔ འཇིགས་མེད་རྡོ་རྗེའི་རྒྱས་གདབ་བོ༔ ཨ་ཡུརྫྙཱ་ན་མ་ཧཱ་པུཥྚིཾ་རཀྵ་རཀྵ་བྷྲུཾ༔ སྤྱི་བོར་ཚེ་མདའ་རྒྱ་གྲམ་བཞག༔ ཀུན་ཏུ་བཟང་མོ་ཕག་མོ་དབྱིངས་ཀྱི་ཡུམ༔ རྣམ་པར་རྒྱལ་མ་ཡུམ་ལྔ་མཁའ་སྤྱོད་མ༔ ཡེ་ཤེས་མཁའ་འགྲོ་ཡོངས་ཀྱི་ངོ་བོ་ཉིད༔ རྗེ་བཙུན་འཕགས་མ་སྒྲོལ་མའི་བཀྲ་ཤིས་ཤོག༔ དེ་ལྟར་འཕགས་མ་སྒྲོལ་མའི་དཀྱིལ་འཁོར་དུ་འཆི་མེད་ཚེ་ཡི་དབང་མཆོག་ཐོབ་པ་དང་འབྲེལ་བར། ཁྱེད་རང་རྣམས་ལ་རྒྱལ་སྲིད་སྣ་བདུན་ལ་སོགས་པས་ཀྱང་ཆོས་ཀྱི་རྒྱལ་པོར་མངའ་གསོལ་ཞིང་དབང་བསྐུར་བར་མོས་མཛོད། སྣ་བདུན་ནི། ཧཱུྃ་ཧྲཱིཿ སྲིད་ཞིའི་བསོད་ནམས་རྩལ་ལས་ལེགས་ཤར་བའི། །ངོ་མཚར་ཕུལ་བྱུང་རྒྱལ་སྲིད་རིན་ཆེན་བདུན། །སློབ་བུ་ཁྱོད་ལ་མངའ་གསོལ་དབང་བསྐུར་བས། །ཆོས་ཀྱི་འཁོར་ལོས་བསྒྱུར་རྒྱལ་ཉིད་ཐོབ་ཤོག །ཨོཾ་སཔྟ་རཏྣ་ཨ་བྷི་ཥིཉྩ་མཾ། རྫས་བརྒྱད་ནི། ཧཱུྃ་ཧྲཱིཿ འགྲོ་བའི་ཚོགས་གཉིས་སྤེལ་ཕྱིར་ཡོན་ཕུལ་བ། །དོན་རྣམས་གྲུབ་པས་བྱིན་རླབས་རྫས་མཆོག་བརྒྱད། །དེང་འདིར་རིགས་ཀྱི་བུ་ལ་མངའ་གསོལ་བས། །སྲིད་ཞིའི་དཔལ་ཡོན་ཕུན་ཚོགས་དབང་ཐོབ་ཤོག། ཨོཾ་མངྒ་ལ་ཨཥྚ་དྲ་བྱ་ཨ་བྷི་ཥིཉྩ་མཾ། རྟགས་བརྒྱད་ནི། ཧཱུྃ་ཧྲཱིཿ ཐུབ་པའི་དབང་པོའི་སྐུ་ཡི་ཆ་ཤས་ལས། །ལེགས་སྤྲུལ་བཀྲ་ཤིས་རྟགས་བརྒྱད་དགེ་མཚན་གྱིས། །དེང་འདིར་སྐལ་ལྡན་བུ་ལ་དབང་བསྐུར་བས། །བླ་མེད་མཚན་དཔེ་རྫོགས་པའི་སྐུ་ཐོབ་ཤོག །ཨོཾ་མངྒ་ལ་ཨཥྚ་ཨཾ་ག་ཨ་བྷི་ཥིཉྩ་མཾ། དེས་རྗེ་བཙུན་བཅོམ་ལྡན་འདས་མའི་གསང་བ་གསུམ་གྱི་དཀྱིལ་འཁོར་དུ་སྨིན་བྱེད་ཀྱི་ཚེ་དབང་ཟབ་མོ་མཐའ་རྟེན་དང་བཅས་པ་གྲུབ་ཟིན་པས། དེ་དག་གི་གནས་སྐབས་ཀྱི་དམ་ཚིག་ཏུ་སྤྱིར་འཕགས་མའི་སྐུ་བསྒོམ་པ། སྔགས་བཟླ་བ། ཡིད་ཀྱིས་ཏིང་ངེ་འཛིན་བསྒོམ་པ་སོགས་དང་། ཁྱད་པར་དུ་མཆོད་པ་དང་སྦྱིན་གཏོང་། ཚེ་ཐར་དང་སྲོག་བསླུ་ཉེའུ་འདོན་པ་སོགས་ཅི་ནུས་སུ་སྒྲུབ་དགོས་པ་ཡིན། འདིར་ཁས་ལེན་རེ་བྱེད་སྲོལ་སྣང་། དེ་ལྟར་ཁས་བླངས་པའི་དམ་ཚིག་དང་སྲུང་སྡོམ་རྣམས་ཚུལ་བཞིན་དུ་སྒྲུབ་སྙམ་པས་འདི་བཞིན་རྗེས་ཟློས་མཛོད། གཙོ་བོས་ཇི་ལྟར༴སོགས། དེ་ལྟར་ཚེ་དབང་ཟབ་མོ་ཐོབ་པའི་གཏང་རག་ཏུ་མཎྚལ་ཕུལ། མཎྚལ་འབུལ། སླར་ཡང་ལུས་ལོངས་སྤྱོད་དུས་གསུམ་དགེ་ཚོགས་དང་བཅས་པ་ལྷ་དང་བླ་མ་ལ་འབུལ་སྙམ་པས་འདིའི་རྗེས་ཟློས་ཀྱིས། དེང་ནས་བརྩམ་ཏེ༴སོགས། དེ་ལྟར་དབང་ཐོབ་པའི་དགེ་བའི་དངོས་པོ་རྣམས་མཁའ་ཁྱབ་ཀྱི་འགྲོ་བ་ཡོངས་ལ་བསྔོ་བའི་འདུན་པ་མཛད་འཚལ། བསོད་ནམས་འདི་ཡིས༴སོགས་དང་། ཆེ་བའི་ཆེ་མཆོག༴ སོགས་ཚིགས་སུ་བཅད་པ་བརྗོད་ཅིང་མེ་ཏོག་གི་སིལ་མ་འཐོར་ནས་མཐའ་བརྒྱན་པར་བྱའོ། ཞེས་སྙིགས་མའི་དུས་ཀྱི་འགྲོ་བའི་མགོན་པོ་སྤྲུལ་བའི་གཏེར་ཆེན་རིན་པོ་ཆེ། རིག་འཛིན་གསང་སྔགས་གླིང་པའི་གཏེར་བྱོན་སྒྲོལ་མ་འཇིགས་པ་ཀུན་སྐྱོབས་ཀྱི་ཚེ་དབང་འཆི་མེད་ལམ་བཟང་ཞེས་བྱ་བའི་མཚམས་སྦྱོར་མདོ་ཙམ་བརྗོད་པ་འཆི་མེད་ལམ་བཟང་བགྲོད་པའི་ཤིང་རྟ་བཟང་པོ་ཞེས་བྱ་བ་འདི་ཡང་། རྗེ་དེ་ཡི་ཆོས་བརྒྱུད་འཛིན་པ་གོས་དཀར་རལ་བའི་ཟུར་ཕུད་ཅན་བླ་མ་གསལ་སྟོབས་ནས་བསྐུལ་བ་མི་ལྡོག་ཙམ་དུ། སྔགས་གཟུགས་མདོ་མེད་མགོ་སྤྲུལ་ཀྱིས་བྲིས་པ་སྟེ། ཉེས་ཚོགས་རྩ་བ་གསུམ་ལ་བཤགས་ཤིང་དགེ་རྩ་གང་མཆིས་ཟབ་ཆོས་འདི་ཉིད་ཀྱི་བསྟན་པ་ཕྱོགས་བཅུར་རྒྱས་པ་དང་། འགྲོ་ཀུན་དུས་མ་ཡིན་པའི་འཆི་བ་ལས་ཐར་ནས་ཚེ་ཡི་རིག་འཛིན་མངོན་དུ་བརྙེས་པའི་རྒྱུར་བསྔོའོ།། དགེའོ།། དགེའོ།། དགེའོ།། འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ།༄༅། བཀའ་འདུས་ལས་ཟབ་ལམ་འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ་ཞེས་བྱ་བ་བཞུགས་སོ།། ༄༅། ན་མོ་གུ་རུ་ཨ་མི་ཏཱ་བྷ་ཡེ། ཆོས་ཀྱི་འབྱུང་གནས་ཐུགས་བསྐྱེད་སྨོན་ལམ་ལས། །ཡང་དག་སྣང་བ་བདེ་ཆེན་ཞིང་གི་དཔལ། །སྐུ་གསུམ་ཀུན་དངོས་འོད་སྣང་མཐའ་ཡས་དང་། །དབྱེར་མེད་བླ་མ་མཆོག་གིས་བརྩེ་བས་སྐྱོངས། །སྡུག་བསྔལ་སྲིད་པའི་འདམ་ཁྲོད་ཡ་ང་བར། །ཐར་མེད་ལས་ཀྱི་སྲད་བུས་བཅིངས་པ་ལས། །བཀྲོལ་ནས་ཐར་མཆོག་དགའ་བདེའི་གནས་སྦྱིན་པའི། །ཐབས་ལམ་ཁྱད་འཕགས་འཕོ་བའི་ཆོས་ཚུལ་རྨད། །མ་བསྒོམ་པར་ཡང་བཙན་ཐབས་སུ། །མངོན་སངས་རྒྱས་བྱེད་བརྗོད་གྲོལ་ཆོས། །ལེགས་བཤད་ཟབ་དགུའི་བཅུད་བསྡུས་པ། །འཕྲད་ཚད་མྱུར་གྲོལ་ལས་རིམ་སྤེལ། །དེ་ལ་འདིར་དུས་གསུམ་གྱི་བརྒྱུད་ལྡན་བླ་མ་དམ་པ་རྣམས་ཀྱིས་གཞན་ལ་ཕན་པའི་འགྲོ་དོན་རླབས་ཆེན་མཛད་པའི་ཐབས་ལམ་ཟབ་མོ་མཆོག་ཏུ་གྱུར་པ། ཉེས་ལྟུང་ཤིན་ཏུ་ལྕི་བའི་སྡིག་པོ་ཆེ་རྣམས་ཀྱང་ལས་དང་རྣམ་སྨིན་གྱི་དབང་དུ་མི་གཏོང་བར་སྟེང་སྒོ་རྣམ་པར་གྲོལ་བའི་ལམ་ནས་བཙན་ཐབས་སུ་འཚང་རྒྱ་བར་བྱེད་པའི་གདམས་པ་མྱུར་ལམ་འཕོ་བའི་ཟབ་ཆོས་ཉིད་ཉམས་སུ་ལེན་པར་འདོད་པས། ཐོག་མར་ཐེག་པ་ཐུན་མོང་དང་ཐུན་མོང་མ་ཡིན་པའི་སྔོན་འགྲོ་རྣམས་ཀྱི་ཉམས་བཞེས་དང་འབྲེལ་བའམ། སྐབས་གཞན་དུའང་རུང་བར་རང་ཉིད་ཀྱིས་ཟབ་ཆོས་འདི་ཉིད་ཀྱི་ཁྲིད་སྦྱངས་གནད་སྨིན་དུ་བྱས་པས། དངོས་སུ་བརྒྱལ་བ་དང་། ཐིམ་སྡུད་དང་། སྣང་མཆེད་ཀྱི་ཉམས་བན་བུན་འཆར་བ་དང་། རླུང་དང་རྟོག་པའི་འཕྲོ་འདུ་ཉུང་བ་དང་། དམིགས་པ་གསལ་བ་དང་། རིག་མདངས་ཀྱི་སྣང་བ་འཕེལ་བ་དང་། ཀླད་པ་ཁོལ་བུར་ན་ཞིང་ཚ་ཙག་བྱེད་པ་དང་། ཚངས་བུག་སྐྲང་ཞིང་ཆུ་སེར་རྡོལ་བ་དང་། གཙུག་སྐྲ་འགུལ་ཞིང་ཟ་བ་དང་། རྨི་ལམ་ལ་ཐེམ་སྐས་བགྲོད་པ་དང་། གྱེན་ལ་འགྲོ་བ་དང་། མཐོ་སར་སླེབས་པ་དང་། བདེ་ཞིང་སྐྱིད་པའི་གནས་སུ་ཕྱིན་པ་སོགས་ཡང་ཡང་བྱུང་བས་རྟགས་ཐོན་ཡིད་ཆེས་ངེས་ཤེས་འདྲོང་བར་བྱས་ལ། དེ་ནས་སྐབས་སུ་བབས་པ་ན། རབ་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། འབྲིང་ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། ཐ་མ་སྤྲུལ་སྐུ་ཚད་མེད་སྙིང་རྗེའི་འཕོ་བ་འདེབས་པའི་ཚུལ་ཏེ་གསུམ་གྱི་ནང་ཚན་ལས། སྔ་མ་གཉིས་དང་། ཕྱི་མ་ལ་ཡང་རང་དང་གཞན་གྱིས་འདེབས་ཚུལ་གཉིས་ལས་འཆི་ཁར་རང་ཉིད་ཀྱིས་འཕོ་བ་གསལ་འདེབས་བཅས་རེ་ཞིག་བཏང་སྙོམས་སུ་བཞག་ནས། འདིར་གཞན་གྱིས་འདེབས་པའི་ཚུལ། དེ་ལ་ཡང་འཆི་བའི་དུས་ལ་བབ་ངེས་པའི་རྟགས་བྱུང་ཞིང་། དེ་ཙམ་གྱི་ལོང་ཁོམ་ཡོད་ན་གསང་སྔགས་ཀྱི་དབང་བསྐུར་བས་དམ་སྡོམ་སོ་མ་ལ་ལས་འཕྲོ་བཟང་པོར་ཤི་བས་ངན་སོང་ལས་ཐར་ཞིང་ཡོན་ཏན་ཆེ་བར་གསུངས། དེ་མིན་ཡང་རིག་པ་ཅུང་ཟད་གསལ་ཞིང་ཁམས་ཀྱིས་ལྕོག་ན་འོག་ནས་བཤད་པའི་རྒྱུད་སྦྱོང་རྣམས་བྱེད་དུ་གཞུག དེ་ཡང་མི་ནུས་པ་ལ་དལ་བུས་མིང་ནས་འབོད་ཅིང་། ཁྱོད་རང་གི་སྤྱི་བོར་མགོན་པོ་འོད་དཔག་མེད་བཞུགས་ནས་ཡོད་དོ། །མོས་གུས་གྱིས་ཤིག བརྗོད་ལ་སྤྱི་བོར་རེག་ཅིང་ཚངས་བུག་གི་སྐྲ་ལ་རན་ཙམ་འཐེན་པས་རྣམ་ཤེས་ཚངས་བུག་ནས་ཐོན་ཅིང་། སངས་རྒྱས་རིན་ཆེན་གཙུག་ཏོར་ཅན་གྱི་མཚན་དང་། སྨན་བླའི་མཚན་སོགས་བརྗོད། དུས་དེ་ལས་འདས་པ་ན། བར་དོ་དང་ངན་སོང་གི་འགྲོ་བ་སྤྱི་དང་བྱེ་བྲག་ཏུ་གཤིན་པོ་གང་རུང་ལ་དམིགས་ནས་འཕོ་བ་འདེབས་པ་ཡིན་ལ། དེ་ཇི་ལྟར་གདབ་པའི་ཚུལ་ལ་ཡང་སྦྱོར་བ། དངོས་གཞི། རྗེས་དང་གསུམ་ལས། དང་པོ་སྦྱོར་བའི་རིམ་པ་ལ། །བདག་གསལ་བ། རྟེན་བསྐྱེད་དགུག གཤེད་སྦྱང་བ། ངོ་སྤྲོད་པ། རྒྱུད་སྦྱང་བ། ཟས་གཏད་པ་སྟེ་དྲུག་གོ །དང་པོ་བདག་ཉིད་ལྷར་གསལ་བ་ནི། རང་རྒྱུད་ལ་བྱམས་དང་སྙིང་རྗེ་འབྱོངས་ཤིང་། གཞན་ལ་ཕན་འདོགས་ནུས་པའི་ཕྱིར། ཐུགས་རྗེ་ཆེན་པོའི་བསྒོམ་བཟླས་རྒྱས་བསྡུས་གང་ཡང་རུང་བ་ཞིག་ཐུན་མཚམས་ཀྱི་ལྷར་ལྡང་བའི་བར་བྱའོ།། གཉིས་པ་རྟེན་བསྐྱེད་ཅིང་རྣམ་ཤེས་འགུགས་བསྟིམ་བྱ་བ་ནི། ཤི་ནས་ཞག་ཡུན་འགའ་མ་སོང་བའི་རོའམ། གཞན་དུ་དྲི་གོས་སམ། རུས་པའམ། མིང་བྱང་ལ་དམིགས་ཏེ། རཾ་ཡཾ་ཁཾ་གིས་མ་དག་པའི་འཁྲུལ་འཛིན་ཡེ་ཤེས་ཀྱི་མེ་རླུང་ཆུས་བསྲེག་གཏོར་བཀྲུས། སྭ་བྷཱ་ཝས་སྟོང་པར་སྦྱངས་ཏེ། མདུན་གྱི་རྟེན་སྣང་བ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ནྲྀ་ཡིག་ཡོངས་སུ་གྱུར་པ་ལས་འཇིག་རྟེན་འདི་ནས་ཕ་རོལ་དུ་ཚེ་ལས་འདས་པའམ་འདས་མ་དེ་ཉིད་གསོན་དུས་ཀྱི་རྣམ་པ་གཞོན་ནུའི་ཚུལ་ལ་མཛེས་ཤིང་ཡིད་དུ་འོང་བ་གོས་དཀར་པོ་དང་བཅས་ཏེ་ལུས་ངག་ཡིད་གསུམ་ཞི་ཞིང་དུལ་བ། དཀོན་མཆོག་གསུམ་དང་བླ་མའི་ངོ་བོ་ཐུགས་རྗེ་ཆེན་པོའི་དཀྱིལ་འཁོར་དུ་སྐྱབས་སུ་འགྲོ་སྙམ་པའི་མོས་གུས་དང་ལྡན་པ་གཅིག་ཏུ་གྱུར།བར་བསམ། དེ་ནས། བདག་ཉིད་ཐུགས་རྗེ་ཆེན་པོར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་གློག་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་བཀུག་ནས་ཕུང་པོའམ་མིང་བྱང་སོགས་གང་ཡིན་དང་དབྱེར་མེད་དུ་ཐིམ་པར་གྱུར་བར་བསམ་ཞིང་། ན་མོ་རྩ་བརྒྱུད་ཀྱི་བླ་མ་ཡི་དམ་ཞི་ཁྲོ་རབ་འབྱམས། དཔའ་བོ་མཁའ་འགྲོ། སྐུ་གསུམ་རྒྱལ་བ་རྒྱ་མཚོ། ལུང་དང་རྟོགས་པའི་ཆོས། བྱང་སེམས་ཉན་རང་དགྲ་བཅོམ། ལྷ་དང་དྲང་སྲོང་བདེན་ཚིག་གྲུབ་པ་རྣམས་ཀྱི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན། ཆོས་ཉིད་འགྱུར་མེད་རྟེན་འབྱུང་བསླུ་མེད། ལྷག་བསམ་རྣམ་དག་དང་བཅས་པའི་བདེན་པ་དང་། ཁྱད་པར་དུ་བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདེན་པ་དང་། རྒྱལ་བ་གང་གི་ཐུགས་བསྐྱེད་དང་སྨོན་ལམ་རྒྱ་ཆེན་པོའི་སྟོབས་ཀྱིས། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པའི་རྣམ་པར་ཤེས་པ་འཁོར་བ་སྡུག་བསྔལ་གྱི་གནས་ཡུལ་གང་ན་ཡོད་ཀྱང་སྐད་ཅིག་ཡུད་ཙམ་གྱིས་རྟེན་ཕུང་པོ་འདི་དང་དབྱེར་མེད་དུ་ཁུག་ཅིག ནྲྀ་ཨ་ཀརྴ་ཡ་ཛ་ཛཿ ལན་གྲངས་ཅི་ནུས་བརྗོད་མཐར། ཛཿཧཱུྃ་བཾ་ཧོ། ཆུ་ལ་ཆུ་བཞག་པ་བཞིན་དུ་གྱུར་ནས་དགའ་བ་དང་གུས་པ་དད་པའི་སེམས་ཀྱིས་བག་ཕེབས་བཞིན་དུ་གནས་པར་བསམ་མོ།། གསུམ་པ་གཤེད་སྦྱངས་བ་ནི། རྣམ་ཤེས་ཀྱི་རྗེས་སུ་གཤེད་མ་འབྲང་ཞིང་ཐར་ལམ་ལ་བར་དུ་གཅོད་པས་དེ་བསལ་བའི་ཕྱིར། སྦྱངས་གཏོར་གྱི་མཚན་འཛིན་ རཾ་ཡཾ་ཁཾ་གིས་བསངས། སྭ་བྷ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁཾ་ལས་གཤིན་བདུད་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཟག་མེད་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་འཕགས་མཆོག་ཐུགས་རྗེ་ཆེན་པོའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པའི་བདེན་པ་ཆེན་པོའི་མཐུས། དེང་འདིར་དམིགས་ཡུལ་ཚེ་ལས་འདས་པ་འདི་གསོན་གྱི་དུས་སུ་ཚེ་སྲོག་ལ་བར་དུ་གཅོད་པ་ཅིང་། གཤིན་གྱི་དུས་ན་ཐར་ལམ་ལ་བར་དུ་གཅོད་པའི་སྲོག་གཅོད་ཀྱི་གཤེད་མའི་རིགས་སུ་གྱུར་པ་ཐམས་ཅད་ལན་ཆགས་གླུད་གཏོར་ལེན་པའི་ཕྱིར་དུ་འདིར་འདུས་ཤིག ཨོཾ་སརྦ་བྷུ་ཏ་ཨ་ཀར་ཤ་ཡ་ཛ་ཛ། ལན་གསུམ་གྱིས་བགེགས་བཀུགས། ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཥེ་བྷྱ༔སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་གྷྲི་ཧྞ་ཨེ་དཾ་བྷ་ལིང་ཏ་ཡེ་སྭཱ་ཧཱ། ལན་གསུམ་གྱིས་ཞི་སྦྱངས་དང་། ཨོཾ་སུམ་བྷ་ནི་སུམ་བྷ་ནི་ཧཱུྃ། གྲིཧྞ་གྲྀཧྞ་ཧཱུྃ། གྲྀཧྞ་པ་ཡ་གྲྀཧྞ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝན། བིདྱཱ་རཱ་ཛ་ཡ་ཧཱུྃ་ཕཊ། ལན་གསུམ་གྱིས་ཕྱེད་མར་སྦྱངས། ཨོཾ་ཧྲཱིཿཔདྨ་ཏ་ཀྲིཏ་བཛྲ་ཀྲོ་ཏ་ཧྱཱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བྱིན་ཅན། དུར་ཁྲོད་རོལ་པའི་ཆས་ཀྱིས་བརྗིད་པ་བསྐལ་པའི་མེ་ལྟར་འབར་བར་གྱུར། ཧྲཱིཿ སྟོང་ཉིད་དབྱིངས་ལས་རང་ཤར་བའི། །སྙིང་རྗེ་ཆེན་པོའི་སྐུར་བཞེངས་པ། །བྱང་ཆུབ་མཆོག་གི་ལྷ་ཆེན་པོ། །ཉོན་མོངས་བདུད་སྡེ་འདུལ་བའི་སྐུ། །དབང་ཆེན་འབར་བའི་ཆོ་འཕྲུལ་གྱིས། །ཐར་པའི་ལམ་ལ་འཚེ་བྱེད་བདུད། །ཟ་འདྲེ་སྲོག་གཅོད་རྡུལ་དུ་རློགས། །ན་མོ་དཀོན་མཆོག་གསུམ་ལ༴སོགས་བདེན་བརྗོད་གོང་ལྟར་ལས། ཁྱད་པར་དུ་དབང་ཆེན་རྟ་མཆོག་རོལ་པའི་དཀྱིལ་འཁོར་གྱི་ལྷ་ཚོགས་སྤྲུལ་པ་ཡང་སྤྲུལ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་ཆེན་པོའི་མཐུས། དེང་འདིར་ཚེ་ལས་འདས་པ་འདི་གསོན་གྱི་དུས་སུ་གནས་བྱེད་ཀྱི་ཚེ་སྲོག་ལ་བར་དུ་གཅོད་ཅིང་། གཤིན་གྱི་དུས་ན་སྡིག་པ་སྦྱངས་བ་དང་། ས་ལམ་ལ་བར་དུ་གཅོད་པའི་སྲོག་གཅོད་ཀྱི་གཤེད་མ་འཆི་ཁར་དབུགས་སྡུད་ཅིང་ཕུང་པོ་བདག་ཏུ་འཛིན་པ། གཤིན་པོ་གནས་མི་བདེ་ཞིང་གསོན་པོ་བཀྲ་མི་ཤིས་པར་བྱེད་པ། ཡར་མཐོ་རིས་དང་ཐར་པའི་གེགས་བྱེད་ཅིང་། མར་འཁོར་བ་ད་ངན་སོང་གི་སྣ་འདྲེན་པ། བར་རིགས་དྲུག་གི་གཡང་ས་ཉམས་ང་བར་སྐྱུར་བར་བྱེད་པའི་ཟ་འདྲེ་ཤི་གཤེད་སྲོག་གཅོད་དབུགས་ལེན། ཤི་མིག་གསོན་ལ་བལྟ་བར་བྱེད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དུ་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང། དྲི་ཟ་པི་ཤ་ཙ་ན་དང་། གནོད་སྦྱིན་སྨྲ་འདོད་དང་། གནོད་སྦྱིན་ཝ་ར་ཧི་ཀུན་ཏུ་གཏོགས་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་ཏུ་དེངས་ཤིག །གལ་ཏེ་མི་འགྲོ་ན་བདག་ཉིད་འཁོར་འདས་ཀུན་གྱི་སྤྱི་དཔལ་ཆེན་པོའི་ཐུགས་ཀ་ནས་ཡེ་ཤེས་ཀྱི་ཁྲོ་མཚོན་མེ་དཔུང་འབར་བའི་ཚོགས་སྤྲོས་ཏེ་བགེགས་རྣམས་རྡུལ་དུ་བརླག་པར་གདོན་མི་ཟའོ།། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྚ་ལ་ཕཊ་ཕཊ་ཕཊ༔ ཧ་ལ་ཧ་ལ་ཧ་ལ་ཧཱུྃ༔ དྲག་སྔགས་བརྗོད། གུ་གུལ་བདུག་ཅིང་ཐུན་གྱིས་གཟིར་བས་དྲག་སྦྱངས་བྱའོ།། དེ་དང་རྗེས་འབྲེལ་དུ་བསྲུང་འཁོར་བསྒོམ་པ་ནི། སྲོག་གཅོད་གཤེད་མའི་རིགས་སུ་གྱུར་པ་ཐམས་ཅད་ཕྱིར་བསྐྲད། འོད་ཟེར་དང་ཁྲོ་ཚོགས་རྣམས་ཚུར་འདུས། སྟེང་འོག་ཕྱོགས་མཚམས་ཐམས་ཅད་མི་ཕྱེད་རྡོ་རྗེ་གུར་ཐབས་སུ་འཁྲིགས་པའི་བསྲུང་བའི་འཁོར་ལོ་ཡངས་ཤིང་རྒྱ་ཆེ་བར་གྱུར་པའི་ནང་དུ་ཚེ་ལས་འདས་པ་མིང་གཟུགས་དྲི་མའི་རྟེན་ལ་རྣམ་པར་ཤེས་པ་བག་ཕེབ་ཏེ་ཆོས་ཉན་པར་གྱུར། ཨོཾ་བཛྲ་རཀྵ་རཀྵ་ཧཱུྃ། ཞེས་བརྗོད་དོ། བཞི་པ་ངོ་སྤྲོད་པ་ནི། གཤེད་བྲལ་ཡང་ཤི་བར་མི་ཤེས་ཤིང་། གལ་ཏེ་ཤེས་ཀྱང་མྱ་ངན་དང་བར་དོའི་སྣང་བ་ངོ་མ་ཤེས་པས་འཇིགས་སྐྲག་སྣ་ཚོགས་འབྱུང་ངེས་ཕྱིར། འདུས་བྱས་མི་རྟག་པའི་གཏམ་གྱིས་མྱ་ངན་བསལ་ཞིང་བར་དོ་གསུམ་རིམ་པར་ངོ་སྤྲོད་པ་ལ། ཐོག་མར་མྱ་ངན་བསལ་ཕྱིར་བྱམས་དང་སྙིང་རྗེ་ཡ་མ་བྲལ་བའི་ངང་ནས། འོ་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པ་ཆེ་གེ་མོ་ཁྱོད་ཤི་བ་ཡིན་ནོ། །ཞེས་ལན་གསུམ་བོས་ལ། འོ། ཁྱོད་ལ་འཆི་བ་མི་རྟག་པ་ཞེས་བྱ་བ་དེ་ཉིད་གློ་བུར་དུ་བྱུང་བ་ལ་སྔང་སྐྲག་དང་མྱ་ངན་མ་བྱེད་པར་སེམས་ཡེང་འཁྲུལ་སྤོངས་ལ་ལེགས་པར་ཉོན་ཅིག དེ་ཡང་ཁྱོད་གཅིག་པུར་ཤི་འམ་སྙམ་ན་མ་ཡིན་ཏེ། སྤྱིར་འདུས་བྱས་ཐམས་ཅད་མི་རྟག་པའི་ཚུལ། བཅོམ་ལྡན་འདས་མཉམ་མེད་ཐུབ་པའི་དབང་པོས་མདོ་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་འདྲ་ཞིང་། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་པ་ལྟར་རོ། །ཁྱད་པར་དུ་ཕྱི་སྣོད་ཀྱི་འཇིག་རྟེན་ལ་བསམ་ཀྱང་མི་རྟག་སྟེ། འཛམ་གླིང་མཛེས་རྒྱན་ཀླུ་ཡི་དབང་པོའི་ཞལ་ནས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེག་པའི་ལུས་ཅན་འདི་དག་ནི། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམས་ཆུང་མི་ལྟ་སྨོས་ཅི་དགོས། །ཞེས་གསུངས་པ་ལྟར་ད་ལྟ་འགྲོ་བ་ཐམས་ཅད་ཀྱི་རྟེན་གཞི་ས་ཆེན་པོ་རི་རབ་གླིང་བཞི་གླིང་ཕྲན་བརྒྱད་ཁོར་ཡུག་དང་བཅས་པ་ཡང་མཐར་མེ་བདུན་གྱིས་བསྲེགས་པའི་ཐལ་བ་ཆུས་བཤལ། རླུང་གིས་གཏོར་ནས་ནམ་མཁའ་སྟོང་པར་འགྱུར་བའི་དུས་འབྱུང་དགོས་པ་ཡིན། དེ་བཞིན་དུ་ནང་བཅུད་ཀྱི་སེམས་ཅན་ལ་བསམ་ཀྱང་མི་རྟག་སྟེ། ཆེད་དུ་བརྗོད་པའི་ཚོམ་ལས། འདུས་བྱས་ཐམས་ཅད་མི་རྟག་སྟེ། །སྐྱེས་ནས་འཆི་བའི་ཆོས་ཅན་ཡིན། །གསུངས་པ་བཞིན་ཁྱོད་ཉིད་འཇིག་རྟེན་འདིར་གནས་པའི་ཚེ་ཡང་འགྲོ་བ་མཆོག་དམན་བར་བ་ཅི་ཙམ་ཞིག་ངེས་པ་མེད་པར་ཤི་བ་དེ་བཞིན་དུ་ད་འདི་ནས་ལོ་བརྒྱ་སོང་བའི་དུས་སུ་མ་འོངས་པ་ན་སྐྱེ་བར་འགྱུར་བའི་སེམས་ཅན་ཁོ་ན་ལས་ད་ལྟ་ས་སྟེང་འདི་ན་གནས་པའི་འགྲོ་བ་ཕོ་མོ་སྲོག་ཆགས་ཤིང་དབུགས་གནས་ཚད་འདི་ཐམས་ཅད་ལ་གཅིག་ཀྱང་མ་ལུས་པར་སྔ་ཕྱི་ངེས་མེད་དུ་མི་རྟག་འཆི་བའི་འཇིགས་པས་འཕྲལ་དང་འཕྲལ་དུ་བཅོམ་ནས། འཇིག་རྟེན་ཕ་རོལ་དུ་འགྲོ་བར་འགྱུར་བ་ཡིན། སྐྱེས་བུ་དམ་པ་ལ་བསམ་ཀྱང་མི་རྟག་སྟེ། །སློབ་དཔོན་དཔའ་བོས། ཇི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པའི། །རྡོ་རྗེའི་སྐུ་ཡང་མི་རྟག་ན། །ཕལ་བ་གཞན་ལ་སྨོས་ཅི་དགོས། །ཞེས་གསུངས་པ་བཞིན། སྔོན་དུས་སུ་འགྲོ་བ་ལྷ་དང་བཅས་པའི་སྟོན་པ་རྫོགས་པའི་སངས་རྒྱས་སྲས་དང་བཅས་པ་ཇི་སྙེད་ཅིག་བྱོན་པ་རྣམས་ཀྱང་། གདུལ་བྱའི་དབང་གིས་མྱ་ངན་ལས་འདས་པའི་ཚུལ་བསྟན་ཅིང་། གཞན་ཡང་འཕགས་ཡུལ་གྲུབ་ཆེན་བརྒྱད་ཅུ་དང་། འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་སོགས་པཎ་གྲུབ་ནམ་མཁའི་སྐར་ཚོགས་ཙམ་བྱོན་པ་རྣམས་དང་། གངས་ཅན་གྱི་ལྗོངས་འདིར་ཡང་ཆོས་རྒྱལ་མེས་དབོན་རྣམ་གསུམ་དང་མཁན་སློབ་རྣམ་གཉིས། གྲུབ་བརྙེས་རྗེ་འབངས་ཉེར་ལྔ། མཁས་པ་བུ་དོལ་རྣམ་གཉིས། བཀའ་བརྒྱུད་མར་མི་དྭགས་གསུམ། ཀུན་མཁྱེན་ཀློང་ཆེན་ཡབ་སྲས། སྨིན་གླིང་གཏེར་ཆེན་སྐུ་མཆེད། རྫོགས་ཆེན་སྐུ་ཕྲེང་རིམ་བྱོན། སངས་རྒྱས་མིའི་གཟུགས་སུ་བྱོན་པ་འགྲོ་འདུལ་ལུང་རིག་གླིང་པ་ཡབ་སྲས་སོགས་གསར་རྙིང་རིས་མེད་ཀྱི་སྐྱེས་ཆེན་གྲངས་མེད་པ་ཞིག་བྱོན་པ་རྣམས་ཀྱང་། དེང་སང་སྐུ་བརྙན་དང་རྣམ་ཐར་ཕྲན་བུ་ཙམ་ལས་མི་སྣང་ཞིང་། ད་ལྟ་ཚད་མའི་སྐྱེས་བུ་ཇི་སྙེད་ཅིག་བཞུགས་བཞིན་པ་འདི་རྣམས་ཀྱང་ཚུལ་དེ་ལས་མ་འདས་པ་ཡིན། སྐྱེ་དགུའི་བདག་པོ་ལ་བསམ་ཀྱང་མི་རྟག་སྟེ། ཀུན་མཁྱེན་ཀློང་ཆེན་པས། ཚངས་དང་བརྒྱ་བྱིན་དྲག་པོ་མིག་སྟོང་ལྡན། །སྲེད་མེད་བུ་ཡང་མི་རྟག་ཕ་རོལ་འགྲོ། །ཞེས་དང་། ཆེད་དུ་བརྗོད་པའི་ཚོམ་ལས། རིན་ཆེན་བདུན་ལྡན་རྒྱལ་པོ་དང་། །གཞན་ཡང་རྒྱལ་ཕྲན་བློན་པོ་དང་། །དགེ་སྦྱོང་བྲམ་ཟེ་ཁྱིམ་བདག་སོགས། །འགྲོ་བ་འདི་ཀུན་མི་རྟག་སྟེ། །རྨི་ལམ་འགྲོ་བ་ཇི་བཞིན་ནོ། །ཞེས་གསུངས་པ་ལྟར་སྲིད་པ་གསུམ་ན་ཆེ་བར་གྲགས་པའི་ཚངས་པ་དང་བརྒྱ་བྱིན། དབང་ཕྱུག་དང་ཁྱབ་འཇུག་ལ་སོགས་པའི་ལྷ་རྣམས་དང་། གླིང་བཞིར་དབང་བསྒྱུར་ནུས་པའི་འཁོར་ལོས་བསྒྱུར་བའི་རྒྱལ་པོ་རྣམས་ཀྱང་རྟག་པར་མི་གནས་ཏེ། མི་དབང་སྤྱི་བོས་སྐྱེས་དང་། མང་པོས་བཀུར་བའི་རྒྱལ་པོ། རྩིབས་ཀྱི་མུ་ཁྱུད་སོགས་ཀྱི་དཔེ་བཞིན་དུ་ད་ལྟ་མཐོ་ཞིང་དབང་ཆེ་བ་ལྟར་སྣང་བ་འདི་རྣམས་ཀྱང་ལོ་རྒྱུས་ཙམ་ཡང་མེད་པའི་དུས་འབྱུང་བར་འགྱུར་ངེས་པ་ཡིན། དཔེ་དོན་སྣ་ཚོགས་ལ་བསམ་ཀྱང་རྟག་པ་མེད་དེ། ཡིད་བཞིན་རིན་པོ་ཆེའི་མཛོད་ལས། ཕྱི་ནང་དུས་བཞི་ན་ཚོད་འགྱུར་བས་ན། །མི་རྟག་འཆི་བར་ངེས་ཀྱི་རྟག་འཛིན་སྤོངས། །གཟུགས་ནི་རྡུལ་ཕྲན་དུས་ནི་སྐད་ཅིག་མ། །བར་སྣང་གློག་འགྱུ་བཞིན་དུ་མི་རྟག་གིས། །ཞེས་གསུངས་པ་ལྟར། དུས་ཀྱང་སྔོན་བསྐལ་པ་རྫོགས་ལྡན། དེ་ནས་སུམ་ལྡན་དང་ཉིས་ལྡན། ད་ལྟ་རྩོད་ལྡན་དུ་གྱུར་པ་དང་། ན་ཚོད་ཀྱང་མངལ་ནས་སྐྱེས་པ། དར་ལ་བབས་པ། རྒས་ཤིང་རྒུད་པ། ན་ཞིང་ཤི་བ་སོགས་སུ་འགྱུར་བ་དང་། གཟུགས་སྣང་ཀྱང་ལོ་གཅིག་ལ། དཔྱིད་ས་བོན་རྨོ་འདེབས་ཀྱི་དུས། དབྱར་ལོ་འདབ་རྒྱས་པ། སྟོན་འབྲུ་བཅུད་སྨིན་པ། དགུན་ས་སྐམ་རྡོ་འཁྱག་སྟེ་རིམ་གྱིས་དུས་བཞིར་འགྱུར་བ་དང་། དེ་བཞིན་དུ་ཟླ་བའི་འཕེལ་འགྲིབ། ཞག་གི་ཉིན་མཚན། དུས་ཚོད་ཀྱི་སྔ་ཕྱི། འབྱུང་བའི་སྙོམ་མིན་སོགས་ཀྱང་མི་རྟག་ལ། རྡུལ་ཕྲན་ཚོགས་པ་ལས་གྲུབ་པའི་གཟུགས་སུ་སྣང་བ་ཕྲ་རགས་འདི་ཀུན་མཐར་རྡུལ་ཕྲན་ཆ་མེད་དུ་ཡལ་ནས་འགྲོ་ཞིང་། ནང་གི་སེམས་ཀྱང་དགེ་སེམས་དང་སྡིག་སེམས། ཆགས་སྡང་རྨོང་གསུམ་དང་། བདེ་སྡུག་གི་རྟོག་པ་སོགས་ཀྱིས་སྐད་ཅིག་ལ་མི་རྟག་པར་འགྱུར་བ་ཡིན་ཏེ། ཀུན་མཁྱེན་ཆོས་རྗེས། མཐའ་བཞིས་བསྡུས་ཕྱིར་རྟག་པ་འགའ་ཡང་མེད། །གསུངས་པ་ལྟར་སྐྱེས་པ་མི་རྟག་སྟེ་མཐའ་འཆི། འདུས་པ་མི་རྟག་སྟེ་མཐའ་འབྲལ། བསོགས་པ་མི་རྟག་སྟེ་མཐའ་འཛད། མཐོན་པོ་མི་རྟག་སྟེ་མཐའ་ལྟུང་བར་འགྱུར་བ་འདི་དག་ནི་འདུས་བྱས་སྤྱིའི་ངང་ཚུལ་ཡིན། མདོར་ན། དཔལ་མགོན་འཕགས་པ་ཀླུ་སྒྲུབ་ཀྱིས། སྐྱེ་རྒ་ན་འཆི་ཐགས་ཀྱི་རི་མོ་འདྲ། །འཆི་བདག་བདུད་ནི་སོ་བྱ་ཉ་གསོད་འདྲ། །འཇིག་རྟེན་འདི་ན་ཆེ་ཆུང་ཕྱུག་དབུལ་ཀུན། །འཆི་བདག་བདུད་ཀྱི་ལག་ཏུ་མི་འགྲོ་མེད། ཅེས་དང་། ཚེ་ནི་ཟིལ་བ་འདྲ་སྟེ་མེད་ལ་ཁད། །དབུགས་ནི་ན་བུན་འདྲ་སྟེ་ཡལ་ལ་ཁད། །ལུས་ནི་སྒྱུ་མ་འདྲ་སྟེ་སྣང་ལ་མེད། །སེམས་ནི་གློག་དང་འདྲ་སྟེ་སྐད་ཅིག་མ། །ཞེས་གསུངས་པ་བཞིན། སྤྱིར་དལ་འབྱོར་གྱི་མི་ལུས་འདི་ཉིད་རྙེད་པར་དཀའ་བ་ཨུ་དུམ་ཝ་རའི་མེ་ཏོག་དང་འདྲ་ལ། འཇིག་པར་སླ་བ་ཐང་དཀྱིལ་གྱི་མར་མེ་དང་མཚུངས་ཤིང་། ཁྱད་པར་དུ་རང་རང་སོ་སོའི་སྔོན་གྱི་ཚེ་རབས་རྣམས་སུ་དགེ་སྡིག་གི་ལས་བསགས་ཚུལ་གྱིས། ཚེ་ཚད་དང་འཆི་བའི་རྐྱེན་སོགས་མཐའ་གཅིག་ཏུ་མ་ངེས་ཏེ། རིན་ཆེན་ཕྲེང་བ་ལས། །འཆི་བའི་རྐྱེན་ནི་མང་བ་སྟེ། །གསོན་པོའི་རྐྱེན་ནི་ཉུང་ཟད་ཙམ། །ཞེས་དང་། རྒྱལ་སྲས་ཞི་བ་ལྷས། ཉིན་མཚན་སྡོད་པ་ཡོངས་མེད་པར། །ཚེ་འདི་རྟག་ཏུ་གོད་འགྱུར་ཞིང་། །སྣོན་པའང་གུད་ནས་འོང་མེད་ན། །བདག་ལྟ་འཆི་བར་ཅིའི་མི་འགྱུར། །ཞེས་གསུངས་པ་ལྟར། འཚོ་བའི་རྐྱེན་ཉུང་ཞིང་། འཆི་བའི་རྐྱེན་མང་བས། ལ་ལ་སྐྱེས་ཙམ་ཉིད་ནས་འཆི། ལ་ལ་བྱིས་པ་ཆུང་ངུ་དང་། ལ་ལ་དར་ལ་བབ་པ་དང་། ལ་ལ་རྒས་པའི་དུས་སུ་འཆི་བ་དང་། འགའ་ཞིག་ནད་དང་། འགའ་ཞིག་མཚོན་དང་། འགའ་ཞིག་མུ་གེས་འཆི་ཞིང་། ཁ་ཅིག་རང་གིས་བྱས་པ་དང་། ཁ་ཅིག་གཞན་གྱིས་བྱས་པའི་རྐྱེན་གྱིས་འགྲོ་བ་འདི་དག་ཐམས་ཅད་སོ་སོར་མི་འདོད་བཞིན་དུ་ལུས་སེམས་བྲལ་ནས་འགྲོ་དགོས་ཤིང་། དེ་ཐབས་གང་གིས་ཀྱང་བཟློག་པའི་མཐུ་མེད་དེ། སྲོག་གཅོད་ཀྱི་ནད་དེ་འཚོ་བྱེད་ཀྱི་སྨན་པས་མི་སོས། །འཆི་བདག་གི་གཤིན་རྗེ་ནི་གཟའ་ཁྱབ་འཇུག་གི་མདུང་ཐུང་གིས་མི་ཟློག །ལས་ཀྱི་རྣམ་པར་སྨིན་པ་ནི་དཔལ་ཕྱག་ན་རྡོ་རྗེའི་ནུས་པས་མི་ཁོག །དེ་ལྟར་འཆི་བའི་དུས་ལ་བབས་པ་ན། ཟས་ཀྱི་ཟ་འཕྲོ། གོས་ཀྱི་གྱོན་འཕྲོ། ལས་ཀྱི་བྱེད་འཕྲོ། གཅེས་པའི་སྒྱུ་ལུས་དང་བཅས་པ་དབང་མེད་དུ་བསྒྱུར། བརྩེ་བའི་ཕ། བྱམས་པའི་མ། སྙིང་སྡུག་གི་བུ། །ཚེ་རོག་གི་ཆུང་མ། བསགས་པའི་ནོར་སོགས་ཅི་འདྲ་ཞིག་ཡོད་ན་ཡང་ཐམས་ཅད་ལའང་མིག་གི་ལྟ་བའི་དབང་ཙམ་ཡང་མེད་པར་འཆི་དགོས་པ་ཡིན་ལ། དེ་བཞིན་དུ་ད་ལྟ་ཁྱོད་ཀྱང་སྐྱེ་འགྲོ་སེམས་ཅན་འགྲོ་བའི་ལམ་པོ་ཆེ་དེར་ཞུགས་པ་ཡིན་མ་གཏོགས། ཁྱོད་ཉིད་གཅིག་པུར་དགོས་སུ་འཆི་བའི་སྡུག་བསྔལ་གྱིས་མནར་བ་མ་ཡིན་པས་མྱ་ངན་དང་སྡུག་བསྔལ་གང་ཡང་མ་བྱེད། མ་སྐྲག་མ་སྔངས་མ་འཇིག་པར་ད་ལྟ་བདག་གིས་བསྟན་པའི་གདམས་ངག་གི་གནད་རྣམས་མ་བརྗེད་པར་ཡིད་ལ་ཟུངས་ཤིག བརྗོད་ལ། དབུགས་དང་བྲལ་མ་ཐག་པ་ལ་འཆི་ཁའི་བར་དོ་ངོ་སྤྲད་པར་བྱ་སྟེ། དེ་ཡང་ལུས་དང་སེམས་བྲལ་བའི་ཚེ་འཆི་ཁའི་བར་དོ་ཞེས་བྱ་བ་འདི་ལྟར་འབྱུང་བ་ཡིན་ཏེ། ཡེ་ཤེས་རོལ་པའི་རྒྱུད་ལས། དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་གྱུར་ཏེ། །མེ་ནི་རླུང་ལ་ཐིམ་གྱུར་ནས། །རླུང་ཡང་རྣམ་པར་ཤེས་ལ་ཐིམ། །རྣམ་ཤེས་གཟུང་བ་འདི་ཉིད་ནི། །འོད་གསལ་བར་དུ་འཇུག་པར་འགྱུར། །ཞེས་གསུངས་པས། ས་ཆུ་ལ་ཐིམ་པའི་དུས་སུ་འདེགས་བྱེད་ཀྱི་རླུང་བྲོས་པས་བསྒུལ་བསྐྱོད་མི་ནུས་ཤིང་། དོང་དུ་ལྷུང་བ་དང་རི་བོས་ནོན་པ་ལྟ་བུའི་ལྕི་སྣང་འབྱུང་། མིག་གིས་གཟུགས་མི་མཐོང་། ནང་རྟགས་སུ་ཕྱོགས་མཚམས་ཐམས་ཅད་སྨིག་སྒྱུ་ལྟ་བུའི་སྣང་བ་འཆར་ཞིང་། ཆུ་མེ་ལ་ཐིམ་པའི་དུས། དྭངས་སྙིགས་འབྱེད་པའི་རླུང་བྲོས་པས་ཟས་སྐོམ་མི་ལེན་ཅིང་ཁ་ཆུ་དང་སྣ་ཆུ་ལ་སོགས་པ་འཛགས། རྣ་བས་སྒྲ་མི་ཐོས། ནང་རྟགས་སུ་དུ་གདང་འཁྲིགས་པ་ལྟ་བུའི་སྣང་བ་དང་། མེ་རླུང་ལ་ཐིམ་སྐབས་མེ་མཉམ་གྱི་རླུང་བྲོས་པས་ལུས་ཀྱི་དྲོད་མཐའ་ནས་ཡལ། དངུལ་ཆུ་དང་ཁ་སྣ་ཐམས་ཅད་སྐམ། སྣས་དྲི་མི་ཚོར། ནང་རྟགས་སུ་སྲིན་བུ་མེ་ཁྱེར་བར་སྣང་ལ་རྒྱུ་བ་ལྟ་བུའི་སྣང་བ་དང་། རླུང་རྣམ་ཤེས་ལ་ཐིམ་སྐབས་གྱེན་རྒྱུ་དང་ཐུར་སེལ་ཁྱབ་བྱེད་ཀྱི་རླུང་རྣམས་སྲོག་འཛིན་གྱི་རླུང་ལ་འདུས་ནས་དབུགས་ནང་དུ་སྡུད་དཀའ་ཞིང་ཕྱིར་བརྩེགས་མར་འཕེན། ནང་རྟགས་སུ་མར་མེ་འབར་བ་དང་། སྒྲོན་མེའི་ཕྲེང་བ་བསྒྲིགས་པ་ལྟ་བུའི་སྣང་བ་འཆར། དུས་འདིར་མིག་ནས་རང་རིག་གི་འོད་ཟེར་དུང་གི་ཐག་པ་ལྟ་བུ་ཤར་བ་ལ་རྡོ་རྗེ་སེམས་དཔའི་ཐུགས་རྗེའི་འོད་ཟེར་བྱུང་བར་ངོ་ཤེས་ནས་རིག་པ་རྩེ་གཅིག་ཏུ་གཏོད་པའི་འདུན་པ་དྲག་པོས་ཡར་གྱི་ཟངས་ཐལ་དུ་སྐད་ཅིག་ལ་གྲོལ་བར་འགྱུར་རོ།། དུས་དེར་མ་གྲོལ་ན་རྣམ་ཤེས་ནམ་མཁའ་ལ་ཐིམ་པའི་ཚེ་ལས་ཀྱི་རླུང་བྲོས་པས་རླུང་སེམས་ཀྱི་འགྲོ་འོང་འགགས་ནས། ལུས་ཀྱི་ཁྲག་ཐམས་ཅད་སྲོག་རྩར་འདུས་ཏེ་སྙིང་དབུས་སུ་ཁྲག་གི་ཐིགས་པ་གསུམ་རིམ་པར་བརྒྱབ་པས། དབུགས་རིང་པོ་གསུམ་ཕྱིར་ལ་འཕེན་ཞིང་ཕྱི་དབུགས་ཁྲོག་གིས་ཆད། ནང་རྟགས་སུ་སྤྲིན་མེད་པའི་ནམ་མཁའ་ལྟ་བུ་འབྱུང་། དེ་ནས་ནམ་མཁའ་འོད་གསལ་ལ་ཐིམ་སྐབས་རོ་རྐྱང་གི་དྭངས་མ་རྣམས་ཨ་ཧཾ་ལ་འདུས་ཏེ་སྤྱི་བོར་ཕ་ལས་ཐོབ་པའི་སྲོག་འཛིན་གྱི་དྭངས་མ་ཐིག་ལེ་དཀར་ཆ་ཧཾ་གི་དབྱིབས་ཅན་ཐུར་དུ་བབས་པ་ན་སྣང་བ་ཞེས་བྱ་སྟེ། ཕྱི་རྟགས་སུ་སྣང་བ་ཐམས་ཅད་སྤྲིན་མེད་ཀྱི་ནམ་མཁའ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟ་བུ་དཀར་ལམ་མེ་བ་དང་། ནང་རྟགས་སུ་ཤེས་པ་གསལ་ཉམས་དང་ལྡན་ཞིང་ཞེ་སྡང་གི་རྟོག་པ་སོ་གསུམ་འགགས། དེ་རྗེས་སྣང་བ་མཆེད་པ་ལ་ཐིམ་པའི་ཚེ། ལྟེ་བ་ནས་མ་ལས་ཐོབ་པའི་མཉམ་གནས་ཀྱི་དྭངས་མ་རཀྟ་དམར་ཆ་ཨ་ཐུང་གི་དབྱིབས་ཅན་གྱེན་དུ་ལོག་པས་ཕྱི་རྟགས་སུ་ནམ་མཁར་ཉི་འོད་ཀྱིས་ཁྱབ་པ་ལྟ་བུ་དམར་ལམ་མེ་བ་དང་། ནང་རྟགས་སུ་ཤེས་པ་བདེ་ཉམས་དང་ལྡན་ཞིང་འདོད་ཆགས་ཀྱི་རྟོག་པ་བཞི་བཅུ་འགགས། མཆེད་པ་ཉེར་ཐོབ་ལ་ཐིམ་པས་སྙིང་དབུས་སུ་ཐིག་ལེ་དཀར་དམར་འཕྲད་པའི་བར་དུ་རྣམ་ཤེས་ཚུད་ནས་ཕྱི་རྟགས་སུ་ནམ་མཁའ་ལ་མུན་ནག་འཐིབ་པ་ལྟ་བུའི་ནག་ལམ་མེ་བ་དང་། ནང་རྟགས་སུ་མི་རྟོག་པའི་ཉམས་འཆར་ཞིང་གཏི་མུག་གི་རྟོག་པ་བདུན་འགགས། རྣམ་ཤེས་དབུ་མར་ཐིམ་པས་ནང་དབུགས་འཆད་ཅིང་རྟོག་མེད་ཀྱི་ངང་དུ་ནག་ཐིམ་གྱིས་བརྒྱལ་འགྲོའོ།། དེ་ནས་བརྒྱལ་བ་ལས་སངས་མ་ཁད་ལ་ཉེར་ཐོབ་འོད་གསལ་དང་འདྲེས་པས་ཟུང་འཇུག་ཡེ་ཤེས་ཞི་བ་ཆོས་སྐུའི་ནམ་མཁའ་ཞེས་བྱ་བ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུ། རིག་པ་སྟོང་གསལ་རྗེན་པ་ཉོན་མོངས་ཕྲ་རགས་ཀྱི་རྟོག་པ་རྡུལ་ཙམ་ཡང་མེད་པའི་སེམས་དྲི་མ་དང་བྲལ་བའི་ཉམས་འཆར་བ་དེ་ཉིད་འཆི་བ་ཆོས་ཀྱི་སྐུ་ཡེ་ནས་སེམས་ཅན་ལ་སངས་རྒྱས་རང་ཆས་སུ་ཡོད་པ་དེ་ཡིན་པས་ངོ་ཤེས་ནས་མཉམ་པར་བཞག་པས། སྒྱུ་འཕྲུལ་དྲྭ་བའི་རྒྱུད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པ་ལྟར་རབ་ཆོས་སྐུར་འཕོ་བ་ཞེས་བྱ་བ་ཡིན་ཏེ་བར་དོ་མེད་པར་གཞི་ཀ་དག་ཡེ་ཐོག་ཏུ་གྲོལ་བ་ཞེས་བྱ་སྟེ་མངོན་པར་འཚང་རྒྱ་བ་ཡིན་ནོ།། དབུགས་ཆད་མ་ཁད་ལ་འདི་ནས་རྒྱུད་སྦྱངས་བ་སོགས་དང་། འཕོ་བ་དངོས་ཀྱི་མཚམས་སྦྱོར་བྱས་ཀྱང་རུང་ལ། ཡང་ན་སྔར་གྱི་འཕྲོར་ཆོས་ཉིད་བར་དོའི་ངོ་སྤྲོད་བྱ་སྟེ། དེ་ཡང་། གལ་ཏེ་འཆི་ཁའི་བར་དོར་མ་གྲོལ་ན། དབྱིངས་སྣང་ལྷུན་གྲུབ་དང་འོད་གསལ་ཟུང་དུ་འཇུག་པ་ཞི་བ་ཆོས་ཀྱི་སྐུའི་ནམ་མཁའ་ལས། སླར་ཡང་དག་དང་མ་དག་གི་རྟོག་ཚོགས་མཆེད་པ་དང་། དེ་ལས་ཆོས་ཉིད་བར་དོའི་སྣང་བ་རྣམས་འཆར་བ་ཡིན་ཏེ། ཀློང་ཆེན་ནམ་མཁའི་རྣལ་འབྱོར་གྱིས། གལ་ཏེ་བར་དོ་དང་པོ་མ་གྲོལ་ན། །དབྱིངས་སྣང་ལྷུན་གྲུབ་འོད་གསལ་ལ་ཐིམ་ནས། །སྒྲ་འོད་ཟེར་དང་ཚོམ་བུའི་དཀྱིལ་འཁོར་སོགས། །ཐིམ་ལུགས་བརྒྱད་ཀྱི་སྣང་བ་འཆར་བའི་ཚེ། །ཆོས་ཉིད་བར་དོར་རང་སྣང་ངོ་ཤེས་ནས། །མ་པང་བུ་འཇུག་ལྟ་བུར་གྲོལ་བར་ཤོག །ཅེས་གསུངས་པ་ལྟར། ཁྱབ་བྱ་ཕུང་པོ་ལྔ་ལ་ཁྱབ་བྱེད་སངས་རྒྱས་ཀྱི་སྐུ་དང་། རིགས་དང་། ཞིང་ཁམས་ཐམས་ཅད་རང་ཆས་སུ་ཡོད་པའི་གནད་ཀྱིས་རང་གི་རིག་པའི་རྩལ་ལས་རང་སྣང་བ་དག་ཆེན་ཡེ་ཤེས་ཀྱི་མདངས་ལྔའི་ཟེར་ཐག་དུང་དང་། བཻཌཱུརྱ་དང་། གསེར་དང་། དངུལ་དང་། པངྨ་ར་ག་དང་། གཡུ་ཡི་སྐུད་པ་བརྐྱང་བ་ལྟ་བུ་གྲངས་མེད་བྱུང་བ་དང་འབྲེལ་བར་འོད་ལྔའི་ཕུང་པོ་བཟོད་མེད་དུ་འབར་བ། ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ལྟ་བུ་དང་བཅས་པས་སྣ་དྲངས་ནས་རྣམ་སྣང་། རྡོར་སེམས། རིན་འབྱུང་། སྣང་མཐའ། དོན་གྲུབ་རྣམས་ཡབ་ཡུམ་རིགས་ལྔ་སོ་སོའི་འཁོར་ཚོགས་དང་བཅས་པའི་ཚོམ་བུའི་དཀྱིལ་འཁོར་དང་། ཁྲག་འཐུང་རིགས་ལྔ་ཡབ་ཡུམ། ཀཽ་སེང་སྒོ་མ། དབང་ཕྱུག་མ་སོགས་ཞི་ཁྲོའི་ལྷ་ཚོགས། སྐུ་དང་ཞིང་ཁམས་ནམ་མཁའི་མཐའ་ལྟར་ཁྱབ་པ། གཟི་བཀྲག་དཔག་ཏུ་མེད་པ་རིམ་པར་འཆར་ཞིང་། དེ་དང་ལྷན་དུ་འོད་བཀྲག་མེད་པའི་རིགས་ཉམས་དགའ་བ་ལྟ་བུ་གང་ཤར་ན་ཡང་རིགས་དྲུག་གི་འོད་ལམ་ཡིན་པས། ཆགས་ཤིང་ཞེན་ན་རིགས་དྲུག་གི་གནས་རྣམས་སུ་སྐྱེ་ཞིང་སྡུག་བསྔལ་དཔག་ཏུ་མེད་པ་མྱོང་དགོས་པས་དགའ་སྤྲོ་དང་ཆགས་ཞེན་མ་བྱེད་པར་དག་པ་ཡེ་ཤེས་ཀྱི་སྒྲ་འོད་ཟེར་གསུམ་ཞི་ཁྲོའི་ལྷ་ཚོགས་འཇིགས་ཤིང་བལྟ་བར་མི་བཟོད་པ་དེ་རྣམས་རང་སྣང་དུ་ངོ་ཤེས་ཤིང་གསལ་སྟོང་གི་ངང་དུ་བཞག་པས་བར་དོ་ལོངས་སྤྱོད་རྫོགས་པའི་སྐུ་ཞི་ཁྲོའི་ལྷ་ཚོགས་དང་དབྱེར་མེད་དུ་སངས་རྒྱས་པར་འགྱུར་རོ། །དེ་ལྟར་འོད་གསལ་ཡེ་ཤེས་དང་ཟུང་འཇུག་གི་སྣང་བ་རྣམས་རང་སྣང་དུ་ངོ་ཤེས་པའི་གདེངས་མ་ཐོབ་ན། ཟུང་འཇུག་ཡེ་ཤེས་ལ་ཐིམ་པའི་དུས་སུ་སྙིང་ག་ནས་མདུན་གྱི་ནམ་མཁར་ཡེ་ཤེས་བཞི་ལྡན་གྱི་སྣང་བ་འོད་མཐིང་ག་དང་། དཀར་པོ། སེར་པོ་དང་། དམར་པོའི་གདན་ལ་རང་མདོག་དང་མཐུན་པའི་ཐིག་ལེ་དྭངས་གསལ་ཐིག་ཕྲན་ལྔ་ལྔས་བརྒྱན་པ་དང་། དེའི་སྟེང་དུ་འོད་ཟླུམ་རྨ་བྱའི་གདུགས་འཁོར་བ་ལྟ་བུ་འཆར་ཞིང་ཕུང་པོ་བདག་འཛིན་ལས་གྲོལ་བས་ལུས་འོད་གསལ་ཆོས་ཉིད་ཀྱི་རང་ངོ་ལ་གནས། འབྱུང་བ་དང་ཉོན་མོངས་པ་ཕྲ་རགས་ལས་གྲོལ་བའི་རང་སྣང་དེ་ཉིད་ངོ་ཤེས་པ་ནི་གྲོལ་བ་ལུས་ཀྱི་གནད་དོ། །དེ་ནས་ཡེ་ཤེས་ལྷུན་གྲུབ་ལ་ཐིམ་པའི་དུས་སུ་ཡེ་ཤེས་ཀྱི་སྣང་བ་དེ་རྣམས་སྟེང་གི་འོད་ཟླུམ་ལ་འདུས་ནས། ཀ་དག་གི་སྣང་བ་ནམ་མཁའ་སྤྲིན་བྲལ་ལྟ་བུའི་ངང་ལས་དག་པ་ཞི་ཁྲོའི་ཞིང་ཁམས་དང་། མ་དག་འགྲོ་དྲུག་གི་སྣང་བ་མཐའ་ཡས་པ་སྐད་ཅིག་ལ་འཆར་བ་དེ་རྣམས་རང་སྣང་དུ་སྒྲོ་འདོགས་ཆོད་པས་གྲོལ་བ་ཐོབ་པ་ནི་མཐར་ཕྱིན་པ་ངོ་ཤེས་པའི་གནད་དོ། །དེ་ལྟར་ཀ་དག་གི་རིག་གདངས་མ་ལྟ་བུའི་པང་དུ་ལྷུན་གྲུབ་ཀྱི་འོད་གདངས་བུ་ལྟ་བུ་དེ་ཐིམ་ལུགས་བརྒྱད་ཀྱི་སྒོ་ནས་དབྱིངས་རིག་མ་བུ་དབྱེར་མེད་དུ་འདྲེས་ཏེ་སངས་རྒྱས་པ་ཡིན་ནོ།། ཞེས་བརྗོད་ཅིང་ཤི་ནས་ཞག་ཡུན་མ་སོང་བ་ལ་འདི་ནས་རྒྱུད་སྦྱངས་སོགས་འཕོ་བའི་ལས་རིམ་སྦྱར་ཀྱང་ཆོག གཞན་ཞག་འགའ་སོང་བའི་རིགས་ལ་སྲིད་པ་བར་དོའི་ངོ་སྤྲོད་ཀྱང་བྱ་སྟེ། གལ་ཏེ་ཆོས་ཉིད་བར་དོར་བརྟན་པ་མ་ཐོབ་པས་མ་གྲོལ་ན། སྲིད་པ་བར་དོའི་ཡིད་ལུས་བླངས་ནས་འཁྲུལ་སྣང་སྣ་ཚོགས་འབྱུང་བ་ཡིན་ཏེ། སློབ་དཔོན་དབྱིག་གཉེན་གྱིས། སྔོན་འབྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་རྒྱུ། །ལས་ཀྱི་རྫུ་འཕྲུལ་ཤུགས་དང་ལྡན། །རིགས་མཐུན་ལྷ་མིག་དག་པས་མཐོང་། །མི་ལྡོག་དེ་ནི་དྲི་ཟའོ། །ཞེས་གསུངས་པ་བཞིན་བར་དོར་ཡིད་ཀྱི་ལུས་རྟེན། ས་ཁམས་ཤ་ཡི་གཟུགས་ཕུང་། ཆུ་ཁམས་ཁྲག་གི་ཚོར་བ། མེ་ཁམས་དྲོད་ཀྱི་འདུ་ཤེས། རླུང་ཁམས་དབུགས་ཀྱི་འདུ་བྱེད་དེ་འབྱུང་བཞིའི་ས་བོན་གྱི་ཆ་ལ་བརྟེན་པའི་མིང་བཞིའི་ཕུང་པོ། བར་དོར་ཡུན་ཅི་ཙམ་གནས་པའི་ཕྱེད་སྔ་མར་གསོན་དུས་ཀྱི་བྱད་གཟུགས་དང་། ཕྱེད་ཕྱི་མར་སྐྱེ་བ་ལེན་འགྱུར་གྱི་གཟུགས་དབྱིབས་སུ་གནས་པ་དེ་ཉིད། དབང་པོ་ཀུན་ཚང་བ་བྱ་སྤུ་རླུང་གིས་བསྐྱོད་པ་ལྟར། གང་དུ་ཡང་སྡོད་མི་ཚུགས་ཤིང་མ་ཡི་མངལ་དང་འོག་མིན་རྡོ་རྗེ་གདན་མ་གཏོགས་སྣོད་བཅུད་གང་ལ་ཡང་ཐོགས་པ་མེད་པའི་རྫུ་འཕྲུལ་གྱི་ཤུགས་དང་ལྡན་པས། འཛམ་བུའི་གླིང་པ་མི་ཡི་རྟེན་ཅན་རིགས་མཐུན་པའི་བར་དོའི་སེམས་ཅན་རྣམས་དང་། གང་ཟག་ལྷ་མིག་དག་པ་ཐོབ་པ་རྣམས་ཀྱིས་མཐོང་ལ། གཞན་གྱིས་མི་མཐོང་ཞིང་། དགེ་སྡིག་གི་ལས་ཀྱིས་དག་པའི་ཞིང་དང་། རིགས་དྲུག་གི་གནས་གང་དུ་འཕེན་པ་དེར་འགྲོ་བ་ལས། གསོན་གྲལ་དུ་སྔོན་བཞིན་ལྡོག་རྒྱུ་མེད་ཅིང་། ཟས་སུ་གསུར་གྱི་དྲི་ཙམ་གྱིས་ཚིམ་པ་ཡང་ཁྱོད་བར་དོ་ན་གནས་པའི་རྟགས་ཡིན། གཞན་ཡང་འབྱུང་བ་བཞིའི་རླུང་གི་ཆོ་འཕྲུལ་ལ་བརྟེན་ནས་རི་རབ་ཉིལ་བ་ལྟ་བུའི་སྒྲ་དང་། རྒྱ་མཚོ་ཆེན་པོ་རྦ་ཀློང་འཁྲུགས་པ་ལྟ་བུའི་སྒྲ་དང་། ནགས་ཚལ་ལ་མེ་མཆེད་པ་ལྟ་བུའི་སྒྲ་དང་། རླུང་ཆེན་པོ་འུར་བ་ལྟ་བུའི་སྒྲ་སྟེ་འཇིགས་པའི་སྒྲ་བཞི་དང་། ཕྱོགས་གང་དུ་ཕྱིན་ཀྱང་དུག་གསུམ་ལས་གྲུབ་པའི་འཁྲུལ་སྣང་འཇིགས་སུ་རུང་བའི་གཡང་ས་ཆེན་པོ་དམར་ཟེང་ངེ་བ་དང་། སྐྱ་ཆད་དེ་བ། ནག་ངམ་མེ་བ་གསུམ་འབྲལ་མེད་དུ་འོང་ནས་ལྟུང་ལ་ཁད་ཀྱི་འཇིགས་སྐྲག་འབྱུང་བ་ནི་ཡ་ང་བའི་གཡང་ས་གསུམ་དང་། ཤུལ་གྱི་ཉེ་འབྲེལ་རྣམས་ཀྱི་མྱ་ངན་དང་ངུ་ཆོམ་བྱེད་ཅིང་དྲུང་དུ་ཕྱིན་ནས་གཏམ་སྨྲས་ཀྱང་ལན་མི་འདེབས་པ་དང་། །ཁམས་དཀར་དམར་མེད་པས་ཉི་ཟླ་དང་སྐར་མའི་གཟུགས་དང་འོད་མི་མཐོང་བ་དང་། ལུས་ལ་གྲིབ་མ་དང་རྐང་རྗེས་མེད་པ་དང་། ཆུ་དང་རི་བྲག་རྩིགས་པ་སོགས་ལ་ཐོགས་མེད་དུ་འགྲོ་ནུས་པ་དང་། མངོན་ཤེས་ཕྲ་མོ་འཆར་བ་སྟེ་ངེས་པའི་རྟགས་ལྔ་དང་། གནས་མ་ངེས་པ་ཡུད་ཙམ་རེ་ལ་ཕྱོགས་སྣ་ཚོགས་སུ་སླེབ་པ་དང་། རྟེན་མ་ངེས་པ་མཆོད་རྟེན་དང་། ཟམ་འོག་དང་། ཕུག་པ་སོགས་ལ་སྐྱབས་སུ་རེ་བ་དང་། གྲོགས་མ་ངེས་པ་འབྱུང་པོ་ཡི་དྭགས་སོགས་འགྲོ་བ་སྣ་ཚོགས་པར་འགྲོགས་པ་དང་། ཁ་ཟས་མ་ངེས་པ་བཟང་ངན་སྣ་ཚོགས་མཐོང་ཡང་མ་བསྔོས་ན་བཟའ་མི་ནུས་པ་དང་། སྤྱོད་ལམ་མ་ངེས་པ་སྐད་ཅིག་རེ་ལ་འགྱུར་ཞིང་མི་ཐུབ་པའི་སྤྱོད་པ་སྣ་ཚོགས་བྱེད་པ་དང་། ཚོར་བ་མ་ངེས་པ་དགའ་སྡུག་དང་འཇིགས་སྐྲག་གི་སྣང་བ་སྣ་ཚོགས་འབྱུང་བ་སྟེ་མ་ངེས་པའི་རྟགས་དྲུག་རྣམས་དང་། གཞན་ཡང་ཞག་བདུན་རེའི་མཚམས་སུ་འཆི་བའི་སྣང་བ་རེ་འཆར་ཞིང་། གཤིན་རྗེའི་སྐྱེས་བུ་འཇིགས་པའི་མཚོན་ཆ་སྣ་ཚོགས་ཐོགས་པ་མང་པོས་རྒྱོབ་སོད་ཀྱི་སྒྲ་དང་བཅས་ཏེ་འདེད་པ་དང་། གཅན་གཟན་འཇིགས་སུ་རུང་བ་དང་། ཁ་ཆར་རླུང་དང་མུན་ནག་གིས་དེད་པ་དང་། ལས་ཀྱི་རྡེའུ་དཀར་ནག་བགྲང་བ་ལ་སོགས་པ་ཡ་ང་ཞིང་ཡི་མུག་པའི་སྔང་སྐྲག་འཇིགས་གསུམ་གྱི་སྣང་བ་སྣ་ཚོགས་འབྱུང་སྲིད་ཀྱང་། བར་དོར་གནས་པའི་རྟགས་དེ་རྣམས་འཁྲུལ་སྣང་ཁོ་ན་མ་གཏོགས་བདེན་པར་གྲུབ་པ་ཅུང་ཟད་ཀྱང་མེད་པས། དེ་ཐམས་ཅད་བར་དོའི་འཁྲུལ་སྣང་དུ་ངོ་ཤེས་པར་གྱིས་ལ་གང་ལའང་མ་འཇིགས་མ་སྐྲག་པར་རྨི་ལམ་གྱི་སྣང་བ་དང་ཁྱད་པར་མེད་པར་ཤེས་པར་གྱིས་ཤིག བར་དོའི་སྐབས་འདིར་སྲང་ཁའི་མཐོ་དམན་དང་རྟ་ཁ་སྲབ་ཀྱིས་བསྒྱུར་བ་འདྲ་བས་འཁྲུལ་ན་འཁྲུལ་ཚབ་ཆེ་སྟེ་ཆགས་སྡང་གི་རྣམ་རྟོག་ཕྲ་མོ་རེས་ཀྱང་ངན་སོང་དུ་སྐྱེ་ནུས། ལམ་བསྒོམ་ན་གྲོལ་ཚབ་ཆེ་སྟེ་དད་པ་དང་སྙིང་རྗེ་བསྐྱེད་རྫོགས་ཅུང་ཟད་རེ་བསྒོམ་པས་ཀྱང་གྲོལ་བ་ཐོབ་ནུས་ཏེ། བར་དོའི་རིག་པ་འདི་གསོན་དུས་ཀྱི་ཤེས་པ་བས་བདུན་འགྱུར་གྱིས་བསྒྱུར་བར་སླ་བས་མ་དད་པ་དང་ལོག་ལྟ་སོགས་མ་དག་པའི་བསམ་སྦྱོར་སྤོངས་ལ་འདུན་པ་བཟང་པོར་བསྒྱུར་ཞིང་། མ་དག་འཁོར་བའི་གནས་དང་མངལ་སྒོ་ངན་པ་རྣམས་སྤང་ནས། དཀོན་མཆོག་གསུམ་ལ་སྐྱབས་འགྲོ་དང་གསོལ་འདེབས་གྱིས་ལ་ཆོས་ལྡན་གྱི་ཕ་མ་བཟང་པོའི་མངལ་དུ་ཉིང་མཚམས་སྦྱོར་ཞིང་། སྐྱེས་མ་ཐག་ནས་རྒྱལ་བའི་བསྟན་པ་དང་མཇལ། དམ་པས་རྗེས་སུ་བཟུང་། ཆོས་ཉམས་སུ་བླངས་ནས་བསྟན་འགྲོའི་དོན་རྒྱ་ཆེན་འགྲུབ་པའི་འདུན་པ་དང་སྨོན་ལམ་དྲག་པོ་ཐོབ་ཅིག ཁྱོད་ཀྱི་ཤུལ་མི་རྣམས་ཀྱིས་ཀྱང་མཆོད་པ་དང་སྦྱིན་གཏོང་། བདུན་ཚིག་གི་ཆོ་ག་དང་། གཟུངས་སྔགས་ཟབ་མོ་སྒྲོགས་པ། རྟེན་བཞེངས་དང་། སྨོན་ལམ་འདེབས་པ་སོགས་དགེ་བ་གང་འགྲུབ་ལ་བརྩོན་པ་འདིས་ངན་སོང་ལས་ལྡོག་ནས་མཐོ་རིས་དང་ཐར་བའི་གོ་འཕང་ཐོབ་པར་འགྱུར་རོ།། ཞེས་ངོ་སྤྲད་པར་བྱའོ།། ལྔ་པ་རྒྱུད་སྦྱངས་པ་ནི། ངོ་ཅུང་ཟད་རེ་འཕྲོད་སྲིད་ཀྱང་རྒྱུད་མ་དག་ན་ལས་ཉོན་བག་ཆགས་ཀྱི་དབང་གིས་གྲོལ་བར་དཀའ་བས་དེས་ན་ངོ་སྤྲོད་དང་འབྲེལ་བར་འདི་ལྟར། ཁྱད་པར་ད་ལམ་ཚེ་འདས་ཁྱོད་རང་ཆོས་དར་བའི་ཡུལ་དུ་སྐྱེས། དལ་འབྱོར་གྱི་མི་ལུས་ཐོབ། སངས་རྒྱས་ཀྱི་བསྟན་པ་དང་མཇལ། དགེ་བའི་བཤེས་གཉེན་བླ་མ་དམ་པ་རྣམས་དང་འཕྲད། དཀོན་མཆོག་རིན་པོ་ཆེ་རྣམ་པ་གསུམ་ལ་དད་པ་ཐོབ། དམ་པའི་ཆོས་ཐོས་ཤིང་བསྟན་པ་མ་ནུབ་པའི་དུས་འདིར་འཆི་འཕོ་བའི་གནས་སྐབས་ཉམས་སུ་མྱོང་བ་ནི། བསྐལ་བ་བཟང་ཞིང་བསོད་ནམས་ཤིན་ཏུ་ཆེ་བ་ཡིན་པས་དགའ་བར་གྱིས་ཤིག དེའི་རྒྱུ་མཚན་གང་ཡིན་ཞེ་ན། སངས་རྒྱས་ཀྱི་མཚན་ཐོས་པ་ཡང་དོན་ཆེན་པོ་དང་ལྡན་པ་ཡིན་ཏེ། སངས་རྒྱས་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་ལས། གང་གིས་ཕྲ་རབ་རྡུལ་སྙེད་འཇིག་རྟེན་ཁམས། །བཤིགས་ཤིང་བཏགས་ཏེ་རྡུལ་དུ་བྱས་གྱུར་པ། །དེ་བས་མང་བའི་འཇིག་རྟེན་རྣམས་ཀྱི་ཁམས། །རིན་ཆེན་བཀང་སྟེ་སྦྱིན་པ་བྱིན་པས་ནི། །གང་གིས་འོད་དཔག་མེད་པའི་མཚན་དང་ནི། །བདེ་བ་ཅན་གྱི་ཡོན་ཏན་ཁྱད་འཕགས་རྣམས། །ཐོས་ནས་དགའ་སྟེ་ཐལ་མོ་སྦྱོར་བྱེད་པ། །བསོད་ནམས་འདི་ཡི་ཆར་ཡང་འགྱུར་མ་ཡིན། ཞེས་དང་། འདྲེན་པ་དེ་ཉིད་སྔོན་དགེ་སློང་ཆོས་ཀྱི་འབྱུང་གནས་ཞེས་བྱ་བར་གྱུར་ནས། བྱང་ཆུབ་ཏུ་ཐུགས་བསྐྱེད་ཅིང་སྨོན་ལམ་བཏབ་པའི་ཚེ། བདག་གི་མིང་ཐོས་ཏེ་སེམས་རབ་ཏུ་དད་པར་གྱུར་ལ་བདག་རྗེས་སུ་དྲན་པ་དེ་དག གལ་ཏེ་འགུམ་པའི་དུས་ཀྱི་ཚེ་བདག་དགེ་སློང་གི་དགེ་འདུན་གྱིས་ཡོངས་སུ་བསྐོར་བའི་མདུན་དུ་གཡེང་བ་མ་མཆིས་པའི་སེམས་ཀྱིས་གནས་པར་མ་གྱུར་པ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བགྱིའོ།། ཞེས་གསུངས་པ་ལྟར། སངས་རྒྱས་ཀྱི་མཚན་ལན་གཅིག་ཐོས་པ་དང་། ལན་གཅིག་དད་པའི་ཕན་ཡོན་ཡང་དེ་དང་འདྲ་ན། ཁྱོད་ཀྱང་སངས་རྒྱས་ཀྱི་མཚན་ཐོས་ཤིང་དད་པ་སྐྱེས། འཆི་འཕོས་པའི་དུས་འདིར་ཡང་། བླ་མ་དགེ་བའི་བཤེས་གཉེན་རྣམས་ཀྱི་གཙོས་འཕགས་པའི་གང་ཟག་རྣམས་ཀྱིས་རྗེས་སུ་བཟུང་ནས། རྣམ་གྲོལ་བྱང་ཆུབ་འཐོབ་པའི་རྒྱུ་རྐྱེན་ལེགས་པར་འཛོམས་པ་ལ་ཤིན་ཏུ་དགའ་བ་དང་སྤྲོ་བའི་ཡིད་ཀྱིས་བདག་གིས་ད་རེས་ཀྱི་འཆི་བ་འདི་ལ་བརྟེན་ནས་རང་ཉིད་རྣམ་པར་གྲོལ་ཞིང་། གཞན་ལ་ཕན་ཐོགས་ནུས་པ་ཞིག་བྱའོ་སྙམ་དུ་སེམས་བསྐྱེད་ལ། ཁྱོད་རང་གི་རྩ་བའི་བླ་མ་དང་སྟོན་པ་བདེ་བར་གཤེགས་པ་ལ་དད་པ་དང་མོས་གུས་བསྐྱེད་ནས་སྐྱབས་སུ་འགྲོ་དགོས་པ་ཡིན་ཏེ། བུ་མོ་རིན་ཆེན་གྱིས་ཞུས་པའི་མདོ་ལས། འདི་ན་ཕ་དང་མ་དང་བཤེས་རྣམས་དང་། །གཉེན་དང་རྩ་ལག་སྐྱབས་སུ་མི་འགྱུར་ཏེ། །བུ་དང་བུ་མོ་དེ་བཞིན་མགོན་སྐྱབས་མིན། །ཡོན་ཏན་ལྡན་པ་འདི་དག་མ་གཏོགས་པ། །འཇིག་རྟེན་མགོན་སྐྱབས་གྱུར་པ་གཞན་འགའ་མེད། །ཅེས་གསུངས་པ་བཞིན་འཁོར་བ་དང་ངན་སོང་གི་སྡུག་བསྔལ་ཆེན་པོ་ལས་སྐྱོབས་ནུས་པའི་སྐྱབས་དང་རེ་ས་མགོན་དང་དཔུང་གཉེན། བླ་མ་དང་དཀོན་མཆོག་གསུམ་པོ་མ་གཏོགས་གཞན་ན་མེད་པས་སྐྱིད་སྡུག་ལེགས་ཉེས་ཇི་ལྟར་བྱུང་ཡང་ཡིད་ཁྱེད་ཤེས་ཀྱི་དད་པས་བློ་རྩེ་གཅིག་ཏུ་གཏད་ནས་སྐྱབས་སུ་འགྲོ་དགོས་པ་ཡིན། དེ་ལའང་ཐར་པའི་ལམ་བགྲོད་པ་ལ་ལས་ཉོན་བག་ཆགས་ཀྱི་སྒྲིབ་པ་མ་སྦྱངས་ན་བྱ་གནམ་ལ་འཕུར་བའི་རྐང་པ་རྡོ་ལ་བཏགས་པ་དང་འདྲ་བས་རྒྱུད་སྦྱངས་པའི་ཐབས་ལ་བརྩོན་དགོས་ཏེ། དེ་ཡང་སྐྱབས་སུ་འགྲོ་དགོས་པའི་ཚུལ་ནི། ཕག་མོའི་རྟོགས་བརྗོད་ལས། དཀོན་མཆོག་གསུམ་ལ་སྐྱབས་སོང་ན། །མི་དེ་ངན་འགྲོར་མི་འགྲོ་ཞིང་། །མི་ཡི་ལུས་དག་བོར་ནས་ནི། །དེ་ནི་ལྷ་ཡི་ལུས་ཐོབ་བོ། །ལྷ་ཡི་ལུས་དག་བོར་ནས་ནི། །དེས་ནི་སངས་རྒྱས་བྱང་ཆུབ་འགྲུབ། ཅེས་དང་། སྐྱབས་འགྲོ་བདུན་ཅུ་པ་ལས། དཀོན་མཆོག་གསུམ་སྐྱབས་འགྲོ་བ། །དེ་ཡིས་མྱུར་དུ་སངས་རྒྱས་ཐོབ། །ཅེས་གསུངས་ཤིང་། དེ་བཞིན་དུ་སེམས་བསྐྱེད་སོགས་ཀྱང་། འོད་དཔག་མེད་ཀྱི་བཀོད་པའི་མདོ་ལས། སེམས་ཅན་གང་དག་ཁ་ཅིག་གིས་བཅོམ་ལྡན་འདས་འོད་དཔག་མེད་དེའི་མཚན་ཐོས་ལ་ཐོས་ནས་ཀྱང་ཐ་ན་སེམས་བསྐྱེད་པ་གཅིག་ཙམ་ཞིག་བསམ་པ་ཐག་པ་ནས་དད་པ་དང་དགའ་བ་བསྐྱེད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཞེས་དང་། ཀུན་དགའ་བོ་སེམས་ཅན་གང་དག་ཁ་ཅིག་ནི་དེ་བཞིན་གཤེགས་པ་དེ་རྣམ་པས་ཡང་དང་ཡང་དུ་ཡིད་ལ་བྱེད་པ་དང་། དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་དང་། བྱང་ཆུབ་ཏུ་སེམས་ཡོངས་སུ་བསྔོས་ཏེ། འཇིག་རྟེན་གྱི་ཁམས་དེར་སྐྱེས་པར་སྨོན་ལམ་འདེབས་པ་དེ་དག་འཆི་བའི་དུས་ཉེ་བར་གནས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་དགེ་སློང་གི་ཚོགས་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འདས་འོད་དཔག་མེད་དེ་མཐོང་ནས་རབ་ཏུ་དངས་བའི་སེམས་ཀྱིས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དེ་ཉིད་དུ་སྐྱེ་བར་འགྱུར་རོ། །ཞེས་གསུངས་པ་ལྟར་བདག་གིས་ཀྱང་ཁྱོད་རང་གི་རྒྱུད་དག་པར་བྱ་བའི་ཕྱིར་སྙིང་རྗེ་ཆེན་པོའི་ངང་ནས་བླ་མ་སངས་རྒྱས་རིན་པོ་ཆེ་ལ་སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ། ཡན་ལག་བདུན་གྱིས་ཚོགས་བསགས་པ། ལྟུང་བཤགས་སོགས་རྒྱུན་བཤགས་བརྗོད་པ། ཚད་མེད་པ་བཞི་བསྒོམ་པ། རྒྱལ་བའི་སྲས་ཀྱི་བསླབ་སྡོམ་བཟུང་བ་རྣམས་རིམ་པར་བགྱིད་པ་ཡིན་པས། ཁྱོད་ཀྱང་སེམས་གཞན་དུ་མ་ཡེང་བར་དད་པ་དང་མོས་གུས་མཆོག་ཏུ་བསྐྱེད་ལ། ༧ མདུན་གྱི་ནམ་མཁར་ནུབ་ཕྱོགས་བདེ་བ་ཅན་གྱི་ཞིང་ཁམས་ཞེས་བྱ་བ་གྲངས་དང་ཚད་ལས་འདས་པའི་སངས་རྒྱས་ཀྱིས་བསྐལ་པ་བྱེ་བར་ཡང་བརྗོད་མི་ནུས་པའི་དཔལ་དང་ཡོན་ཏན་གྱི་བཀོད་པ་ཕུན་སུམ་ཚོགས་པའི་རྟེན་གྱི་དབུས་སུ། བརྟེན་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ལ་འཁོར་ཉེ་བའི་སྲས་བརྒྱད་དང་། བྱང་ཆུབ་སེམས་དཔའི་དགེ་སློང་བྱེ་བ་འབུམ་སོགས་དང་། ཕྱོགས་བཅུའི་རྒྱལ་བ་སྲས་དང་བཅས་པས་བསྐོར་བ། ནམ་མཁའ་ལ་འཇའ་ཚོན་ལྟར་གསལ་བར་མོས་པ་ནི་རྟེན་གྱི་སྟོབས་དང་། ཚེ་རབས་ཐོག་མེད་ནས་སྡིག་པ་མི་དགེ་བའི་ལས་བྱས་ཤིང་བསགས་པ་རྣམས་ལ་འགྱོད་སེམས་བསྐྱེད་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་དུ་དམ་བཅའ་བ་སོར་ཆུད་པའི་སྟོབས། སྐྱབས་སུ་འགྲོ་བ་སོགས་རྒྱུད་སྦྱངས་བའི་རིམ་པ་རྣམས་ལ་ནན་ཏན་ཏུ་བྱ་བ་ནི་གཉེན་པོ་ཀུན་སྤྱོད་ཀྱི་སྟོབས་ཏེ་སྟོབས་བཞི་ཚངས་བའི་སྒོ་ནས་ལྷ་དང་བླ་མ་དབྱེར་མེད་པར་མངོན་སུམ་དུ་བཞུགས་སྙམ་པས་དད་མོས་གདུང་ཤུགས་དྲག་པོས་ཚིག་རྗེས་སུ་དོན་དྲན་བཞིན་བདག་གི་རྗེས་སུ་འཇུག་པར་གྱིས་ཤིག སྐྱབས་འགྲོ་ནི། ན་མོ། དེང་ནས་བཟུང་སྟེ་བླ་མེད་བྱང་ཆུབ་བར། །བདག་སོགས་རིགས་དྲུག་འཁོར་བའི་སེམས་ཅན་རྣམས། །མགོན་པོ་འོད་དཔག་མེད་པའི་ལྷ་ཚོགས་ལ། །ལུས་ངག་ཡིད་གསུམ་གུས་པས་སྐྱབས་སུ་མཆི།། ལན་གསུམ། སེམས་བསྐྱེད་ནི། ཧོ། ཐོག་མཐའ་མེད་པ་རིགས་དྲུག་རྒྱུད་ལྔའི་འགྲོ། །འོད་དཔག་མེད་པའི་གོ་འཕང་ལ་འགོད་ཕྱིར། །སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་ལམ་འཕོ་བའི་རྣལ་འབྱོར་བསྒོམ་པར་བྱ།། ལན་གསུམ། ཚོགས་བསགས་ནི། ན་མོ། བདག་ལུས་རབ་འབྱམས་རྒྱ་མཚོའི་རྡུལ་སྙེད་དུ། །སྤྲུལ་ནས་འཆི་མེད་མགོན་པོར་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་དཔག་མེད་ཀུན། །བདེ་ཆེན་ཞིང་གི་ལྷ་ཚོགས་རྣམས་ལ་འབུལ། །ལུས་ངག་ཡིད་གསུམ་སྡིག་སྒྲིབ་ཉེས་ལྟུང་ཀུན། །གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས། །བདེན་གཉིས་ཀྱིས་བསྡུས་དགེ་ཚོགས་ཇི་སྙེད་ལ། །སྙིང་ནས་དགའ་བས་རྗེས་སུ་ཡི་རང་ངོ་། །གདུལ་བྱའི་དབང་པོ་སྐལ་བར་འཚམས་པ་བཞིན། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །རྒྱལ་བ་སྲས་བཅས་མྱ་ངན་མི་འདའ་བར། །སྲིད་མཐའི་བར་དུ་བཞུགས་པར་གསོལ་བ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །འགྲོ་རྣམས་བདེ་ཆེན་ཞིང་ཁམས་ཐོབ་ཕྱིར་བསྔོ།། རྒྱུན་བཤགས་ནི། ལྟུང་བ་བཤགས་པ་སོགས་བརྗོད། ཚད་མེད་བཞི་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས། གྱུར་ཅིག ལན་གསུམ། བྱང་སྡོམ་ནི། བྱང་ཆུབ་སྙིང་བོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། སོགས་ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི།། ལན་གསུམ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་ཏོ། །བདག་གིས་དེ་རིང་སྐྱོབས་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། ཞེས་བརྗོད་དོ། དྲུག་པ་འདོད་ཡོན་བསྔོ་བ་ནི། དེ་ལྟར་རྒྱུད་སྦྱངས་ནས་ཤུལ་གྱི་ཟས་ནོར་ལོངས་སྤྱོད་སོགས་ལ་སྲེད་ལེན་གྱི་ཆགས་ཞེན་མ་སྤངས་ན་དེ་ཡང་ཐར་ལམ་གྱི་གེགས་སུ་འགྱུར་བས། དེ་བསལ་ནུས་པའི་མོས་འདུན་དྲག་པོས། དེ་ལྟར་རྒྱུད་དག་པར་བྱས་ནས་འཁོར་བར་འཁྱམས་པའི་རྩ་བ་ཆགས་ཞེན་ཡིན་པས་ཤུལ་དུ་ལུས་པའི་དངོས་རྫས་རྣམས་ལ་ཆགས་ཞེན་བྱས་ཀྱང་རང་གི་རྗེས་སུ་མི་འབྲངས། རང་དེ་རྣམས་དང་འགྲོགས་ཤིང་སྤྱོད་པའི་དུས་ལས་ཡོལ་བའི་ཚུལ། རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་འགྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲངས། །ཞེས་དང་། ཞི་བ་ལྷའི་སྤྱོད་འཇུག་ལས། །འཆི་བ་ཐོག་ཏུ་བབས་པའི་ཚེ། །ཚེ་འདིའི་དཔལ་འབྱོར་སྙན་གྲགས་དང་། །སྟོབས་འབྱོར་གང་གིས་མི་ཕན་ཞིང་། །ཕྱི་མར་གནོད་པའི་རྒྱུ་བྱས་པས། །བྱས་པ་དོན་མེད་སྟོང་ལོག་དང་། །ཤི་ཁར་ཆགས་སེམས་སེམས་ཁྲལ་རྒྱུ། །ཞེས་གསུངས་པ་ལྟར། བྱམས་ཤིང་བརྩེ་བའི་ཕ་མ་དང་བུ་ཚ། རྣམ་ཐོས་སྲས་ལྟ་བུའི་ནོར་དང་ལོངས་སྤྱོད། འཁོར་ལོས་བསྒྱུར་རྒྱལ་ལྟ་བུའི་གཉེན་གྲོགས་དང་འཁོར་འབངས། ལྷ་བུ་གཞོན་ནུ་ལྟ་བུའི་གཟུགས་དང་ལང་ཚོ། གེ་སར་རྒྱལ་པོ་ལྟ་བུའི་དཔའ་རྩལ་དང་སྙན་གྲགས་སོགས་ཡོད་ན་ཡང་ཕན་པ་སྤུ་ཙམ་མེད་པས། ཤུལ་གྱི་གཉེན་འཁོར་ཡུལ་གཞི་ནོར་རྫས་སོགས་ལ་ཆགས་ཀྱང་། ཁྱོད་རང་འཁོར་བར་འཁྱམས་པའི་རྒྱུ་ལས་མེད་ངེས་པས་ཞེན་ཆགས་ཀྱི་འཁྲི་བ་རྦད་ཀྱིས་གཅོད་པའི་དུས་ལ་བབས་པ་ཡིན་ཏེ། སྔོན་འདས་པའི་དུས་ན་སངས་རྒྱས་མར་མེ་མཛད་ཞལ་བཞུགས་པའི་ཚེ། རྒྱལ་པོ་སྣང་བ་འོད་ལྡན་ཚེ་འཕོས་པ་ལ། རྒྱལ་བུ་འཁོར་ལོ་སྟོང་ལྡན་གྱིས་གདུང་ཞིང་བརྩེ་བའི་སེམས་ཀྱིས་ཟས་གཏད་པས་ཡུན་གྱི་སྲིད་དང་དགེ་བའི་ཕུལ་དུ་གྱུར་པ་དང་། དེ་རྗེས་ཐུབ་པའི་དབང་པོའི་བསྟན་པ་ལ་རྒྱལ་པོ་མ་སྐྱེས་དགྲ་ཚེ་ལས་འདས་པའི་དུས་སུ་དགྲ་བཅོམ་གནས་བསྟན་ཆེན་པོ་ཤཱ་རིས་བུས་ཟས་གཏད་པས་ཆགས་པའི་མདུད་པ་གྲོལ་བ་དང་། རྒྱལ་པོ་སྐར་མ་འོད་བཟང་དུས་ལས་འདས་པའི་ཚེ། དགེ་སློང་མ་པདྨའི་སྤྱན་གྱིས་བྱམས་ཤིང་བརྩེ་བས་ཟས་གཏད། འཇམ་པའི་གཏམ་བཤད་ཅིང་བདེན་པའི་ཆོས་བསྟན་པས་འཁོར་བའི་སྒོ་བཅད་པ་དེ་བཞིན་དུ། ཉེ་དུ་འབྲེལ་བ་ཐམས་ཅད་ཀྱིས། གདུང་བའི་མཆི་མ་ཕྱུངས། བརྩེ་བས་སྨྲེ་སྔགས་བཏོན། དཀོན་པའི་ཟས་བཙལ། མོས་གུས་ཀྱི་ཤུགས་ཕྱུང་ནས་བཟའ་བཏུང་གོས་ནོར་ལ་སོགས་མཁོ་དགུའི་ལོངས་སྤྱོད་ཕུན་སུམ་ཚོགས་ཤིང་ཟད་པ་མེད་པའི་གཏེར་ཆེན་པོ་ནམ་མཁའི་མཛོད་ལྟ་བུར་བྱིན་གྱིས་བརླབས་ནས་གཏད་ཅིང་བདེན་པའི་ཆོས་བཤད། ཐར་པའི་ལམ་བསྟན་པས། ཡུན་གྱི་ལོངས་སྤྱོད། དགེ་བའི་མཆོག་ཏུ་གྱུར་ནས། ཆགས་པའི་མདུད་པ་གྲོལ། འཁོར་བའི་སྒོ་བཅད་དེ་རིགས་དྲུག་གི་སྡུག་བསྔལ་དང་བྲལ་ནས་བདེ་བའི་མཆོག་དང་ལྡན་པར་གྱུར་ཅིག གཤིན་གྱི་བརྩེ་གདུང་གསོན་ལ་གནོད་པའི་འདྲེ་རུ་འགྱུར་བས་གཤིན་མིག་གསོན་ལ་མ་བལྟ་བར། འཁོར་བའི་གནས་འདིར་ཉེ་འབྲེལ་དང་ནོར་རྫས་སོགས་འདོད་པའི་ལོངས་སྤྱོད་ལ་ཆགས་ཞེན་བྱས་ན། ཁྱོད་འཁོར་བའི་འདམ་དུ་བྱིང་ནས་སྡུག་བསྔལ་བཟོད་བླག་མེད་པར་མྱོང་དགོས་པས་མ་ཆགས་མ་ཞེན་ཅིག །གནས་འདིར་འདུག་པའི་ལས་ཟད་ནས་བྲལ་ཟིན་པ་ཡིན་པས་འདི་རུ་མ་འདུག་པར་ཇི་ལྟར་བསྟན་པའི་ལམ་ལ་ཐེ་ཚོམ་མེད་པར་བཞུད་ཅིག ཁྱད་པར་དུ་འདྲེན་མཆོག་གང་གི་མཚན་ལན་གཅིག་ཙམ་ཐོས་པ་དང་། དད་པ་ལན་གཅིག་སྐྱེས་ཤིང་གསོལ་བ་བཏབ་པ་དང་། གཟུགས་སྐུའི་རྣམ་པ་ལན་གཅིག་དྲན་པ་དང་། ཞིང་དེར་སྐྱེ་བའི་འདུན་པས་སྨོན་ལམ་ལན་གཅིག་བཏབ་པ་ཙམ་གྱིས་བར་དོའི་འཇིགས་པ་དང་། ངན་སོང་གི་རྒྱུན་ཡོངས་སུ་གཅོད་པ་དང་། ཞིང་དེར་འདྲེན་པར་ཞལ་གྱིས་བཞེས་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ཞེས་བྱ་བ་བྱང་ཆུབ་སེམས་དཔའ་སྤྱན་རས་གཟིགས་དང་། མཐུ་ཆེན་ཐོབ་ཀྱིས་ཡོངས་སུ་བསྟེན་པ་དང་། དེའི་ཞིང་ཁམས་བདེ་བ་ཅན་ཞེས་བྱ་བ་དེ་ཡིད་ལ་མ་བརྗེད་པར་ཟུངས་ལ་ཁྱོད་གདོས་བཅས་ཤ་ཁྲག་གི་ལུས་ལས་འདས་པའི་ཕྱིར་ཞིང་མཆོག་དེ་རུ་འདུན་པ་གཏོད་ལ་ཐེ་ཚོམ་མེད་པར་ཏ་ལ་ལ་སོངས་ཤིག རིག་པ་ཡེངས་འཁྲུལ་སྤོངས་ལ་ཕྱིར་མི་ལྡོག་པ་བདེ་ཆེན་གཏན་གྱི་ཞིང་ཁམས་དམ་པ་དེ་ཡིད་ལ་ཟུངས་ཤིག ཅེས་བརྗོད་ལ། འདོད་ཡོན་སྤྱི་ལྟར་བསྔོས་རྗེས་སུ། སྤྲོ་ན། སྲིད་པ་བར་མ་དོར་ཉམ་ང་བའི་འཕྲང་ལ་སྐྱབས་དང་སྐྱོབ་པ་མེད་པ། མགོན་དང་དཔུང་གཉེན་མེད་པ། སྔོན་གྱི་བསགས་རྒྱབ་མེད་པ། དགེ་བའི་ར་མདའ་ཉུང་བ། མིང་བཞི་འདུས་པའི་ཕུང་པོ། ཚོར་བ་སྡུག་བསྔལ་གྱི་རང་བཞིན། འཇིགས་སྐྲག་འཁྲུལ་སྣང་གིས་མནར་བ། འཁྱགས་ལྟོགས་སྐོམ་གསུམ་གྱིས་གདུང་བ། ཚེ་ཚད་ལ་ངེས་པ་མེད་པ། བྱ་སྒྲོ་རླུང་གིས་བཏེགས་པ་བཞིན། གར་འགྲོའི་རང་དབང་དང་བྲལ་བའི་སེམས་ཅན་ཚེ་ལས་འདས་པའི་ཐོག་དྲངས་བར་དོར་འཁྱམས་པའི་འགྲོ་བ་རྣམས་ཀྱི། མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེ་ཡི་ཡུལ་དུ་རོ་མངར་བ། ལུས་ཀྱི་ཡུལ་དུ་རེག་བྱ་འཇམ་པ། ཡིད་ཀྱི་ཡུལ་དུ་བདེ་སྐྱིད་ཕུན་སུམ་ཚོགས་པའི་སྣང་བ་མཆོག་དང་འབྲལ་བ་མེད་བཞིན། བཟའ་བ་རི་རབ། བཏུང་བ་རྒྱ་མཚོ། ན་བཟའ་ལྷོ་སྤྲིན་ཙམ་ལ་ཆགས་མེད་ཞེན་མེད་ཀྱི་ངང་ནས་ལོངས་སྤྱོད་པའི་སྐལ་བ་དང་ལྡན་བཞིན། འཕགས་པ་སྤྱན་རས་གཟིགས་དང་། བྱང་ཆུབ་སེམས་དཔའ་སྒྲིབ་པ་རྣམ་སེལ་མཐོང་ནས་བར་དོ་ལ་བར་དོ་ཡིན་པར་ངོ་ཤེས། འཁྲུལ་སྣང་ལ་རྒྱས་ཐེབས། བླ་མ་དང་དཀོན་མཆོག་ཡི་དམ་དང་ལྟ་བ་རྗེས་སུ་དྲན་ཏེ། ལས་ངན་པའི་སྒྲིབ་པ་སྐད་ཅིག་ལ་དག་ནས་རིག་པ་ལ་རང་དབང་ཐོབ། བདེ་བ་ཅན་དང་པདྨ་འོད་ལ་སོགས་པའི་ཞིང་ཁམས་ཁྱད་པར་ཅན་བཙན་ཐབས་སུ་བགྲོད་ནུས་པར་ཤོག་ཅིག །ཐམས་ཅད་ནམ་མཁའ༴སོགས་དང་། གང་དུ་ལུས་བླངས་སྐྱེ་གནས་ཐམས་ཅད་ལ། །རྟག་ཏུ་དཀོན་མཆོག་གསུམ་པོ་མཆོད་པ་དང་། །རྣམ་དག་ཐེག་ཆེན་ལམ་ལ་བློ་སྦྱངས་ནས། །རྒྱལ་བ་འོད་དཔག་མེད་པའི་ཞལ་མཐོང་ཤོག །ཅེས་བརྗོད་ཅིང་། དེའི་རྗེས་སུ་བདེ་སྡུག་གཏོང་ལེན་གྱི་དམིགས་པའང་བྱས་ན་ལེགས་པས། འགྲོ་བའི་སྡུག་བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་བ་ཡིས། །འགྲོ་ཀུན་བདེ་ལ་སྤྱོད་པར་ཤོག །ཅེས་དང་། མཉམ་བཞག་གི་ངང་ནས་རླུང་ནང་དུ་ལྡོག་པ་དང་ཆབ་གཅིག་ཏུ། ཚེ་འདས་ཀྱི་སྡིག་སྒྲིབ་ཉེས་ལྟུང་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བསྡུ་བ་བཞིན་དུ་རང་གི་སྒོ་གསུམ་ལ་ཐིམ་པས་སྒོ་གསུམ་གྱི་ཉེས་ཚོགས་ཤེལ་གོང་ཕྱིས་པ་ལྟར་དག་པར་བསམ། རླུང་ཕྱིར་འཕོས་པའི་ཚེ། བདག་གི་དུས་གསུམ་གྱི་དགེ་ཚོགས་བདེ་སྐྱིད་གང་ཡོད་རྣམས་དམིགས་ཡུལ་ལ་ཐིམ་པས་བདེ་བ་དང་ལྡན། སྡུག་བསྔལ་དང་བྲལ་བར་བསམ་མོ།། སྤྱི་དོན་གཉིས་པ་འཕོ་བ་དངོས་ལ། མཚན་བརྗོད་པ། ལོ་རྒྱུས་བཤད་པ། འཕོ་བའི་དམིགས་རིམ། འཇག་ཟུག་མའི་འཕོ་ལུང་དངོས། །སྤར་ཆོག་གཞན་མའི་སྐོར། ཕྱིར་མི་ལྡོག་པའི་རྒྱས་གདབ་པ་སྟེ་ས་བཅད་རྣམ་པ་དྲུག་གི། དང་པོ་རྒྱལ་བ་སྲས་བཅས་ཀྱི་མཚན་བརྗོད་ནས་རམ་ཟླར་སྦྲན་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོངས་སྐུ་རྣམ་པར་སྣང་མཛད་རིགས་ལྔའི་སངས་རྒྱས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་འཕགས་དྲན་པ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱི་ཕུད་སྟོང་གི་འཇིག་རྟེན་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་སྟོང་གི་ཡེ་སྲིད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་སྟོང་གི་རྒྱལ་བ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲྭ་བ་མགོན་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་སྟོང་གི་མུ་ཁྱུད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲུག་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འཇམ་དཔལ་འཇིགས་སྐྱོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་རོལ་བ་རྣམ་པར་བརྩེ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་དཔའ་བོ་སྟོབས་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དྲང་སྲོང་ཁྲོས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་བརྩེ་བས་རོལ་པའི་བློ་གྲོས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གསེར་འོད་དམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འོད་སྲུང་བགྲེས་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་མངོན་རྫོགས་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྒྱལ་བའི་མཛོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་ཀྱི་རྒྱལ་པོ་སྣང་བ་འོད་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་མེ་ཏོག་ལ་དབང་བ་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་དཔའ་བརྟན་ཞི་ཞིང་དུལ་བ་ཕ་རོལ་གྱི་སྟོབས་རབ་ཏུ་འཇོམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཟླ་འོད་སྐྱབས་གནས་དམ་པ་དགྲ་ལས་རྣམ་པར་རྒྱལ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ངེས་པར་གནོན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དཀྱིལ་འཁོར་རྣམ་པར་དག་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ཀྱི་ཚུལ་ལས་རྣམ་པར་འཕྲུལ་བ་ངེས་པ་གཟི་བརྗིད་འབྱུང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཀུན་ནས་འཕགས་པ་དཔལ་བརྩེགས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཤིན་ཏུ་བརྟན་པ་ནོར་བུ་བརྩེགས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་སེལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་དང་། ཁྱད་པར་དམིགས་ཡུལ་ཚེ་ལས་འདས་པ་འདི་ཉིད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་སྦར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེའི་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་གྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲོད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབས་པའི་ལྷ་དང་ལྷ་མོར་སྟོན་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་བར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། གཉིས་པ་ཟབ་ལམ་འཕོ་བའི་གདམས་པ་བྱུང་ཚུལ་གྱི་ལོ་རྒྱུས་ནི། འོ་ད་ནི་ཚེ་ལས་འདས་པ་ཁྱོད་ལ་བདག་གིས་མ་བསྒོམ་སངས་རྒྱས་ཆོས་དྲུག་གི་ནང་ཚན། སངས་རྒྱས་ལག་འཆང་གི་གདམས་པ་ལེ་ལོ་ཅན་འཆི་ཁར་གྲོལ་ཞིང་སྡིག་པོ་ཆེ་བཙན་ཐབས་སུ་འཚང་རྒྱ་བའི་མན་ངག ཟབ་ལམ་འཕོ་བའི་ཆོས་སྒོ་ཕྱེས་ནས། ཁྱོད་དག་པ་མཁའ་སྤྱོད་ཀྱི་ཞིང་ཁམས་སུ་གནས་སྤར་བའི་དུས་ལ་བབས་པ་ཡིན་པས་དགའ་བ་དང་སྤྲོ་བའི་སེམས་བསྐྱེད་ལ་མ་ཡེངས་བར་ལེགས་པར་ཉོན་ལ་ཡིད་ལ་ཟུངས་ཤིག དེ་ཡང་ཇི་སྐད་དུ། རྒྱུད་ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པ་ལྟར། བརྒྱུད་པ་ཁུངས་བཙུན་ཞིང་གདམས་ངག་ལ་ངེས་ཤེས་བསྐྱེད་ཕྱིར་ལོ་རྒྱུས་མདོ་ཙམ་བརྗོད་པར་བྱ་སྟེ། དེ་ལ་ཡང་མདོ་ལམ་གྱིས་གྲངས་མེད་གསུམ་དུ་དམ་བཅའ་བ། སྔགས་ཀྱིས་ཚེ་གཅིག་ལུས་གཅིག་ལ་གྲོལ་བ་ཐོབ་པར་གསུངས་ཤིང་། སྔགས་ཀྱི་ཚེ་གཅིག་གི་དམ་བཅའ་ལ་ཡང་བཏགས་གྲོལ་འཁོར་ལོ། མཐོང་གྲོལ་ཙཀྲ། རེག་གྲོལ་མུ་ཏྲ། མྱོང་གྲོལ་དམ་རྫས་སོགས་མང་དུ་ཡོད་ལ། སོ་སོར་འཕགས་ཆོས་རྨད་དུ་བྱུང་བ་སྣང་ཞིང་བཅོམ་ལྡན་འདས་ཀུན་རིག་རྣམ་པར་སྣང་མཛད་དང་། དེ་བཞིན་གཤེགས་པ་མི་འཁྲུགས་པ་དང་། སངས་རྒྱས་སྨན་གྱི་བླ་སོགས་ཀྱི་མཚན་ལན་རེ་ཐོས་པས་ཀྱང་། ངན་སོང་གི་སྡུག་བསྔལ་སེལ་བ་དང་། རིན་ཆེན་གཙུག་ཏོར་ཅན་གྱི་མཚན་འཆི་ཁ་མའི་རྣ་ལམ་དུ་བསྒྲགས་ན་སུམ་ཅུ་རྩ་གསུམ་གྱི་ལྷར་སྐྱེ་བ་དང་། སོར་འབྲང་འཁོར་ལོས་བར་དོའི་འཇིགས་པ་དང་སྡུག་བསྔལ་སེལ་བ་སོགས་སྔགས་གསར་རྙིང་གཉིས་ཀ་ན་མང་དུ་ཡོད་མོད་ཀྱང་། དེ་རྣམས་ཀུན་ལས་ཁྱད་པར་དུ་འཕགས་པ་ནི། ཟབ་ལམ་འཕོ་བའི་གདམས་པ་ཡིན་ཞིང་ཁྱད་པར་འཆི་བའི་དུས་ལ་བབས་པའམ། འཆི་འཕོས་པའི་འགྲོ་བ་རྣམས་ལ་ལམ་ཟབ་མོ་འདི་ཉིད་ལས་ཁྱད་པར་དུ་འཕགས་པའམ། འདི་དང་མཚུངས་པ་་གཞན་མ་མཆིས་ཏེ། དེ་ཡང་མཁའ་འགྲོ་མ་ཀུན་ཏུ་རྟོགས་པའི་རྒྱུད་ལས། རྣམ་ཤེས་རླུང་ལ་ཞོན་པ་ནི། །སྟེང་གི་ལམ་ལ་འཕོས་གྱུར་ན། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བ་མང་། །ཞེས་དང་། གདན་བཞིའི་རྒྱུད་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་ཀུན་ནས་མི་གོས་ཤིང་། །འཁོར་བའི་ཕ་རོལ་མཆོག་ཏུ་འགྲོ། །ཞེས་གསུངས་པ་ལྟར། སྟེང་སྒོ་བདེ་བ་ཆེན་པོའི་ལམ་ནས་རྣམ་པར་གྲོལ་ཞིང་ཐར་བ་ཐོབ་པ་ནི། ཟབ་ཆོས་འདི་ཁོ་ན་ལ་རག་ལས་པ་ཡིན་ཞིང་། དེ་ལྟ་བུའི་ཆོས་ཚུལ་ཟབ་མོ་འཕོ་བའི་གདམས་པ་དེ་ཡང་། གསང་སྔགས་གསར་རྙིང་བཀའ་གཏེར་དག་སྣང་ཅི་རིགས་པར་ཟབ་ཅིང་རྒྱ་ཆེ་ལ་ཡ་མཚན་རྨད་དུ་བྱུང་བ་མཐའ་ཡས་པ་ཞིག་བཞུགས་པ་ལས། ད་ལམ་སྐབས་སུ་བབས་པ་ཟབ་ལམ་འཕོ་བའི་མན་ངག་འཇག་ཟུག་མར་གྲགས་པ་འདི་ཉིད་ཇི་ལྟར་བྱུང་བའི་ལོ་རྒྱུས་ནི། སྔོན་ཆོས་རྒྱལ་ཁྲི་སྲོང་ལྡེའུ་བཙན་གྱིས། སྟོན་པ་ཤཱཀྱ་ཐུབ་པའི་ཞལ་སྐྱིན་ཨོ་རྒྱན་གྱི་སློབ་དཔོན་པདྨ་འབྱུང་གནས་སྤྱན་དྲངས་ནས་བསམ་ཡས་མཆིམས་ཕུ་ན་བཞུགས་པའི་སྐབས་ཤིག་ཏུ། བློན་པོ་ཉི་མ་ཞེས་བྱ་བ་འཇིག་རྟེན་ལུགས་ཀྱི་བྱ་བ་ལ་ཤིན་ཏུ་མཁས་པ་ཞིག་ཡོད་པ་དེ་ཉིད་ཀྱིས། རང་གི་གནས་ཁང་ནས་ཡོ་བྱད་འཇུག་ལེན་གྱི་ཕྱིར་དུ་མཚན་མོ་མེ་སྒྲོན་ཐོགས་ཏེ་ཁྱིམ་ཕུག་ཉུལ་བས་མེ་ཤོར་ནས། མཆོད་གནས་གཅིག་དང་ཕ་མའི་གཙོས་བྲན་འཁོར་སུམ་ཅུའི་སྐོར། རྐང་འགྲོས་དང་ནོར་རྫས་གང་ཡོད་རྣམས་ལྷག་མེད་དུ་ཚིག་པར་གྱུར་བས། བློན་པོ་བཟོད་བརླག་མེད་པའི་སྡུག་བསྔལ་གྱིས་ནོན་ཚེ། རྒྱལ་པོས་སློབ་དཔོན་རིན་པོ་ཆེ་ལ་དེ་ཚུལ་གྱི་ལོ་རྒྱུས་རྣམས་ཞིབ་ཏུ་གསོལ་ཞིང་བློན་པོ་ཉི་མ་སྡུག་བསྔལ་ལས་གྲོལ་བར་གསོལ་བ་བཏབ་པས། གུ་རུ་རིན་པོ་ཆེ་རྫུ་འཕྲུལ་གྱིས་སྐྱེས་བུའི་ལག་པ་བརྐྱང་བསྐུམ་ཙམ་ལ་བཅོམ་ལྡན་འདས་མགོན་པོ་འོད་དཔག་མེད་པའི་དྲུང་དུ་ཕྱིན་ནས། རྡོ་རྗེ་ཕག་མོས་བརྡ་སྤྲོད་བྱས་ཏེ། བློན་པོ་ཉི་མའི་ལོ་རྒྱུས་རྣམས་ཞུས་ནས་ཟབ་ལམ་འཕོ་བའི་གདམས་པ་འདི་ཉིད་གནང་ཞིང་། འོད་དཔག་མེད་ཀྱི་ཞལ་ནས། འཕོ་བའི་གདམས་པ་འདི་ལྟ་བུ་དུས་གསུམ་གྱི་སངས་རྒྱས་རྣམས་ཀྱིས་མ་གསུངས། མི་གསུང་། གསུང་བར་མི་འགྱུར་བས། ད་ལྟ་ཆོས་འདི་སྤེལ་བའི་དུས་མིན་ཅིང་མ་འོངས་སྙིགས་དུས་སུ་གཏེར་སྟོན་ཉི་ཟླ་སངས་རྒྱས་བྱ་བ་འབྱུང་བས་གཏེར་དུ་སྦོས་ཤིག ཅེས་བཀའ་རྒྱས་བཏབ་ཏེ་གནང་བ་བཞིན། བློན་པོས་གསེར་དངུལ་གྱི་ཉི་ཟླ་གཉིས་མཎྚལ་དུ་ཕུལ་ནས་སློབ་དཔོན་གྱིས་བློན་པོ་གཅིག་པུ་ལ་གནང་ཞིང་ཉམས་སུ་བླངས་བས། ཞག་གསུམ་ནས་སྡུག་བསྔལ་སངས། ཞག་ལྔ་ནས་ཚེ་འདས་རྣམས་སངས་རྒྱས་ཐོབ་པའི་རྟགས་ཁྱད་པར་ཅན་བྱུང་བར་གྱུར་ཏོ། །དེ་ནས་གདམས་པ་ཟབ་མོ་དེ་ཉིད་སློབ་དཔོན་གྱི་ཕྱག་གཡོན་པའི་སྲིན་ལག་ལས་ཕྱུང་བའི་སྐུ་མཚལ་གྱིས་ཏ་ལའི་ལོ་མར་བྲིས་ནས། གསང་འཛིན་ཡེ་ཤེས་མཚོ་རྒྱལ་གྱི་དབུ་སྐྲས་བཅིངས་ཏེ། གསེར་སོགས་རིན་པོ་སྣ་ལྔའི་སྒྲོམ་ཕྱི་ནང་གི་ཚུལ་དུ་བྱས་པར་ཆུ་དར་སྔོན་པོས་དྲིལ་ཏེ་བཅུག་ནས། དྭགས་ལྷ་སྒམ་པོ་གདར་རིའི་རྒྱབ། མཚོ་ནག་པོ་མཎྚལ་འདྲ་བའི་དབུས་སུ་གཏེར་དུ་སྦས་ཤིང་། ཀླུ་རྒྱལ་གཙུག་ན་རིན་ཆེན་གཏེར་གྱི་སྲུང་མར་བསྐོས། ཕྱིས་སུ་གཏེར་འདོན་པའི་དུས་ལ་བབས་ཚེ་སྔོན་གསེར་དངུལ་གྱི་ཉི་ཟླ་མཎྚལ་དུ་ཕུལ་བའི་རྟེན་འབྲེལ་གྱིས་བློན་པོ་ཉིད་གཏེར་སྟོན་ཉི་ཟླ་སངས་རྒྱས་ཞེས་བྱ་བར་སྐྱེ་བ་བཞེས་ནས་ཟབ་ཆོས་འདི་ཉིད་གདན་དྲངས་ཤིང་། ཐོག་མར་གདམས་པ་འདི་ཀླུ་རྒྱལ་འཁོར་བཅས་ལ་གནང་ནས་ཀླུ་རྣམས་ཀྱིས་སེམས་ཅན་ལ་གནོད་འཚེ་མི་བྱེད་པར་ཁས་བླངས་ཤིང་། མཚོ་དེར་གནས་པའི་སྲོག་ཆགས་ཐམས་ཅད་གྲོལ་ནས། ལུས་སེམས་བྲལ་མ་ཐག་ཏུ་སངས་རྒྱས་སོ། །དེ་ནས་དར་ཞིང་རྒྱས་པར་སྤེལ་བས་བོད་གངས་ཅན་སོགས་ཀྱི་མཆོག་དམན་བར་མའི་འགྲོ་བ་རྣམས་རང་སྐལ་དང་འཚམས་པའི་ཐར་ལམ་ལ་བཀོད་པ་མཐའ་ཡས་ཤིང་བསམ་གྱིས་མི་ཁྱབ་པ་ལ། དེ་ནས་བཟུང་སྟེ་ད་ལྟའི་བདག་ཅག་གི་རྩ་བའི་བླ་མའི་བར་དུ་རིམ་པར་བརྒྱུད་པའི་བླ་མ་དམ་པ་རྣམས་ཀྱིས་གཞན་དོན་གྱི་ཕྲིན་ལས་རླབ་པོ་ཆེ་མཛད་པའི་གཙོ་བོར་ཟབ་ཆོས་འདི་ཉིད་ཁོ་ན་ཐུགས་ཉམས་སུ་བཞེས་ཤིང་ཕྱག་ལེན་དུ་མཛད་པ་ཡིན་ནོ།། གསུམ་པ་འཕོ་བའི་དམིགས་རིམ་གསལ་གདབ་པ་ནི། ད་ནི་ཁྱོད་ལ་མྱུར་ལམ་འཕོ་བའི་གདམས་པ་ཟབ་མོ་དེ་ཉིད་འདེབས་པའི་སྐབས་སུ་བབས་པ་ཡིན་པས། དེ་ཡང་མ་དག་པའི་ལུས་རྟེན་ཐ་མལ་བ་ལྟར་དུ་འཕོས་ན་མི་རུང་བས། དག་པ་ལྷའི་རྣལ་འབྱོར་གསལ་འདེབས་པའི་ཕྱིར་དུ་ཡིད་གཞན་དུ་མ་ཡེངས་བར་དམིགས་པ་འདི་བཞིན་དུ་མཛོད་ཅིག ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ།གིས་སྦྱངས། སྟོང་པའི་ངང་ལས་དག་ཆེན་ཡེ་ཤེས་ཀྱི་རང་སྣང་ལས་གྲུབ་པའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་དང་ཉི་མའི་སྟེང་དུ་བམ་རོ་སེར་པོ་གན་རྐྱལ་གྱི་ཁྲི་ལ། ཁྱེད་རང་གི་ལུས་རྟེན་དེ་ཉིད་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་གསལ་བྱི་རུའི་སྡོང་པོ་ལ་ཏིལ་མར་གྱིས་བྱུག་པ་ལྟ་བུ། ཞལ་གཅིག་ཁྲོ་འཛུམ་ཆགས་པའི་ཉམས་ཅན། སྤྱན་གསུམ་དང་ལྡན་ཞིང་མཆེ་བའི་མྱུ་གུ་བཞི་ཅུང་ཟད་ངོམ་པ། རྣ་ལྟག་གཡས་སུ་ཕག་ཞལ་ནག་པོས་ངུར་སྒྲ་སྒྲོགས་པ། དབུ་སྐྲ་ཐོར་ཅོག་བྱས་ཤིང་ལྷག་མས་སྐུ་རྒྱབ་ཁེབ་པ། ཕྱག་གཡས་རྡོ་རྗེས་མཚན་པའི་གྲི་གུག་ཐུར་དུ་འཛིན་པ། གཡོན་ཐོད་ཁྲག་ཐུགས་ཀར་བསྣམས་ཤིང་ཡབ་ཧེ་རུ་ཀའི་ངོ་བོ་ཁ་ཊཱྃ་མཆན་ཁུང་གཡོན་ན་བསྒྲེང་ཚུལ་གྱིས་འཛིན་པ། ཞབས་གཡས་བསྐུམ་པའི་རྟིང་པ་གསང་བར་གཏད་ཅིང་གཡོན་བརྐྱང་བས་བམ་རོའི་སྙིང་གར་བརྫིས་པ། གཅེར་བུ་གཞོན་ཚུལ་ལང་ཚོ་དར་ལ་བབ་ཅིང་ནུ་འབུར་རྒྱས་པ། ཐོད་སྐམ་ལྔའི་དབུ་རྒྱན་དང་། ཐོད་རློན་ལྔ་བཅུའི་དོ་ཤལ། སྤྱི་བོར་འཁོར་ལོ། སྙན་ཆ། ཕྱག་ཞབས་ཀྱི་གདུ་བུ། མགུལ་རྒྱན། སྐ་རག་སྟེ་རུས་པའི་ཕྱག་རྒྱ་ལྔས་བརྒྱན་པ། མི་རོའི་སྐྲ་ལས་བྱས་པའི་ཚངས་སྐུད་ཕྲག་གོང་གཡོན་ནས་མཆན་ཁུང་གཡས་སུ་འཁྱུད་པ། བདེ་སྟོང་ཡེ་ཤེས་ཀྱི་ཉམས་རྒྱས་པའི་སྐུ་སྣང་ལ་རང་བཞིན་མེད་པ་ཆུ་ཟླ་ལྟ་བུ། དྭངས་གསལ་འོད་ཀྱི་རང་བཞིན་ཅན་ཐོགས་པ་དང་རེག་པའི་སྐྱོན་དང་བྲལ་བ་ཞིག་གསལ་ཐོབ་ལ། དེ་ནས་མ་དག་འཁོར་བའི་སྒོ་རྣམས་བཀག་དགོས་པར་སྔགས་གསར་རྙིང་ཀུན་ནས་གསུངས་ཏེ། རྡོ་རྗེ་གདན་བཞིའི་རྒྱུད་ལས། སྒོ་རྣམས་ཀྱིས་ནི་བྱེ་བྲག་ལས། །འཁོར་བའི་བྱེ་བྲག་འབྱུང་བ་ཡིན། །དེ་ཕྱིར་སྒོ་ཡི་བྱེ་བྲག་ལས། །བསྒྲུབ་པའི་ལམ་ནི་བཟང་པོ་ཡིན། །ཞེས་གསུངས་པ་ལྟར། མ་དག་པ་འཁོར་བའི་སྒོ་དགུ་པོ་ལས་རྣམ་ཤེས་སོང་ན། བཤང་ལམ་ནས་དམྱལ་བ། ཆུ་ལམ་ནས་དུད་འགྲོ། ཁ་ནས་ཡི་དྭགས། སྣ་ནས་ལྷ་མིན་དང་གནོད་སྦྱིན། མིག་ནས་མི་མཆོག་དམན། རྣ་བ་ནས་གྲུབ་པའི་ལྷ་དང་མིའམ་ཅི། ལྟེ་བ་ནས་འདོད་ཁམས། དཔྲལ་བ་ནས་གཟུགས་ཁམས། མཚོག་མ་ནས་གཟུགས་མེད་ཁམས་ཀྱི་ལྷ་རྣམས་སུ་འགྲོ་བས། དེ་དག་བཀག་དགོས་པར་ཡང་ཨོ་རྒྱན་སངས་རྒྱས་གཉིས་པའི་ཞལ་ནས། སྒོ་དགུ་བཀག་ནས་སྒོ་གཅིག་དབྱེ། །རྣམ་པར་ཤེས་པ་དེར་འཕོས་ན། །འགྲོ་དྲུག་གནས་ནས་རྒྱང་གིས་འཕགས། །མཆོག་གི་དངོས་གྲུབ་ཐོབ་པར་འགྱུར། ཞེས་གསུངས་པའི་ཕྱིར། ཚངས་བུག་མ་གཏོགས་པའི་སྒོ་དགུ་པོ་བུག་པ་འདག་ཞལ་བྱས་པ་ལྟར་ཧྲཱིཿཡིག་དམར་པོ་འོད་འབར་བ་དགུས་བཀག་པར་གྱུར་བར་བསམ་ལ། ཧྲཱིཿདགུ་བརྗོད། ད་ཁྱོད་རང་གི་ལུས་དབུས་དྲང་པོར་རྩ་གཞན་མི་དམིགས་པར་ཁང་སྟོང་ཀ་བ་གཅིག་པའི་ཚུལ་གྱིས་བྱང་ཆུབ་མཁའ་སྤྱོད་ཀྱི་ལམ། རྩ་དབུ་མ་ཕྱི་དཀར་ལ་ནང་དམར་ཞིང་སྔོ་བ། ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་ཞིང་རྒྱ་སྐྱེགས་ཀྱིས་བཙོས་པ་ལྟར་དམར་ལ་དྭངས་པ། པདྨའི་འདབ་མ་ལྟར་སྲབ་པ་སྟེ་མཚན་ཉིད་བཞི་དང་ལྡན་པ། སྦ་ལྕགས་འབྲིང་པོའི་ཚད་ཙམ་གྱི་ཡར་སྣེ་སྤྱི་གཙུག་ཚངས་པའི་བུ་གར་རྒྱ་མཐོངས་ལྟར་ཧར་རེ་གསལ་བ། མར་སྣེ་ལྟེ་འོག་སོར་བཞིའི་ཐད་དུ་ཁ་ཟུམ་ཞིང་ཕུགས་རྡུགས་སུ་འགགས་པ། སྙིང་གའི་ཐད་དུ་སྨྱུག་མ་ཚིགས་ཀྱིས་བཅད་པ་ལྟ་བུའི་ནང་དུ་པདྨ་དམར་པོ་འདབ་མ་བརྒྱད་པ་ཟེའུ་འབྲུ་དང་བཅས་པའི་དབུས་སུ། ཁྱོད་རང་གི་རླུང་སེམས་འདུས་པའི་ངོ་བོ་རྣམ་ཤེས་མི་འགྱུར་བའི་ཐིག་ལེ་སྲན་ཟླུམ་ཙམ། དཀར་ལ་དམར་བའི་མདངས་དང་ལྡན་པ། བྱ་མ་གསར་གྱི་སྒོ་ང་ལྟར་འོད་ཟེར་ཁ་ཏོག་ལྔ་དང་ལྡན་པ། གསལ་ལ་འཚེར་ཞིང་སྣུམ་ལ་འདྲིལ་བ་ཞིག་ཚངས་བུག་གི་ལམ་ནས་འཕུར་ལ་ཁད་ཀྱི་འདར་ཕྲིལ་གྱིས་གནས་པར་མོས་ལ། དེ་ཡང་ཕ་དམ་པས། །འཆི་བ་འཆི་བ་མ་ཡིན་ཏེ། །རྣལ་འབྱོར་སངས་ཆུང་རྒྱ་བ་ཡིན། །ཞེས་གསུངས་པ་ལྟར། ཁྱོད་རང་གི་རྣམ་ཤེས་འོད་དཔག་མེད་ཀྱི་ཐུགས་ཀར་གནས་སྤར་དགོས་པ་ལ། བདེ་ལྡན་ཞིང་བཀོད་ཀྱི་མདོ་ལས། སངས་རྒྱས་ཀྱི་ཞིང་དེར་སེམས་ཡང་དག་པར་གཏོད་པ་དེ་དག་འཆི་བའི་དུས་ཉེ་བར་གནས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་དེའི་ཁ་དོག་དང་། དབྱིབས་དང་། ཆུ་ཞེང་དང་། ཞབས་འབྲིང་བ་དགེ་སློང་གི་དགེ་འདུན་ཅི་འདྲ་བ་དེ་འདྲ་བའི་སངས་རྒྱས་ཀྱི་སྤྲུལ་པ་དག་མདུན་དུ་གནས་པར་འགྱུར་ཏེ། དེ་དག་དེ་བཞིན་གཤེགས་པ་མཐོང་བས་རབ་ཏུ་དད་ཅིང་དམིགས་པའི་ཏིང་ངེ་འཛིན་དེ་དང་། བརྗེད་པ་མེད་པའི་དྲན་པས་ཤི་འཕོས་ནས་སངས་རྒྱས་ཀྱི་ཞིང་དེ་ཉིད་དུ་སྐྱེ་བར་འགྱུར་རོ། །ཞེས་དང་། སེམས་ཅན་གང་དག་ང་ཡི་མིང་ཐོས་པའི། །འཇིག་རྟེན་ཁམས་མང་དག་གི་སེམས་ཅན་རྣམས། །དེ་དག་ང་ཡི་ཞིང་དུ་ལྷགས་ནས་ནི། །སྐྱེ་བ་གཅིག་ལས་ཕྱིར་མི་ལྡོག་པར་འགྱུར། །ཞེས་སོགས་གསུངས་པས། ཁྱོད་རང་གི་ཚངས་བུག་གི་སྟེང་ཐད་ཀྱི་གྲུ་གང་ཙམ་འཕགས་པའི་ནམ་མཁར། རྨ་བྱ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་དུ། པདྨ་དམར་པོ་འདབ་མ་སྟོང་དང་ལྡན་པའི་ལྟེ་བར་ཟླ་བའི་གདན་ལ། ངོ་བོ་དུས་གསུམ་སངས་རྒྱས་ཐམས་ཅད་འདུས་པའི་བདག་ཉིད། མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་ཡིན་པ་ལ། རྣམ་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་པདྨ་རཱ་གའི་ལྷུན་པོ་ལ་ཉི་གཞོན་བྱེ་བ་འབུམ་གྱིས་འཁྱུད་པ་ལྟ་བུ། འོད་དང་འོད་ཟེར་མུ་མཐའ་མེད་པར་འཕྲོ་བ། མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པས་མཛེས་པ། ན་བཟའ་ཆོས་གོས་རྣམ་གསུམ་གསོལ་ཞིང་། ཕྱག་གཉིས་མཉམ་བཞག་གི་ཕྱག་རྒྱས་ལྷུང་བཟེད་བདུད་རྩིས་བཀང་བ་བསྣམས་པ། སྲིད་ཞིའི་མཐའ་ལ་མི་གནས་པའི་ཕྱིར་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་གཡས་སུ་རྒྱལ་བ་ཀུན་གྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་དཀར་པོ། གཡོན་དུ་སངས་རྒྱས་ཐམས་ཅད་ཀྱི་མཐུ་སྟོབས་ནུས་པའི་བདག་ཉིད་སེམས་དཔའ་མཐུ་ཆེན་ཐོབ་སྐུ་མདོག་སྔོན་པོ། གཉིས་ཀའང་ཕྱག་གཡས་སྐྱབས་སྦྱིན། གཡོན་པས་པདྨ་དཀར་པོ་དང་། རྡོ་རྗེས་མཚན་པའི་ཨུཏྤལ་སྔོན་པོ་སྙན་གྱི་ཐད་ཀར་ཁ་ཕྱེ་བའི་ཡུ་བ་ཐུགས་ཀར་འཛིན་པ། སྐུ་ལ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་གྱིས་སྤྲས་ཤིང་། འགྲོ་དོན་སྐྱོ་དུབ་དང་བྲལ་བའི་ཕྱིར་ཞབས་གཉིས་བཞེངས་པའི་སྟབས་ཀྱིས་བཞུགས་པ། དེའི་མཐའ་བསྐོར་དུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དང་རང་རྒྱལ་བསམ་གྱིས་མི་ཁྱབ་པ་དང་། ཁྱད་པར་དུ་ལམ་ཟབ་མོ་འདི་ཉིད་ཀྱི་བརྒྱུད་པའི་བླ་མ་དམ་པ་རྣམས་དང་། རྩ་གསུམ་རྒྱལ་བ་རབ་འབྱམས་དམ་ཅན་བསྲུང་མའི་ཚོགས་དང་བཅས་པ། ཐམས་ཅད་ཀྱང་སྐུ་མཚན་དཔེའི་རོལ་གར་གང་ལ་གང་འདུལ་གདུལ་བྱའི་མོས་ངོར་ཅིར་ཡང་འཆར་བ། གསུང་གྲགས་སྟོང་ཆོས་ཉིད་ཀྱི་རང་སྒྲ་སྣ་ཚོགས་གདུལ་བྱའི་ཁམས་དང་དབང་པོ་དང་། བསམ་པའི་ཁྱད་པར་དང་མཐུན་པར་ཐ་དད་དུ་སྒྲོགས་པ། ཐུགས་ཟབ་གསལ་གཉིས་མེད་ཀྱི་ཏིང་ངེ་འཛིན་བརྒྱ་ཕྲག་དུ་མར་འཇུག་ཅིང་ལྡང་བ། ཡོན་ཏན་དང་ཕྲིན་ལས་བསམ་གྱིས་མི་ཁྱབ་པའི་འཇུག་པ་གློག་ལྟར་མྱུར་བས་མཁའ་མཉམ་གྱི་འགྲོ་ལ་སྐད་ཅིག་ཀྱང་མི་གཡེལ་བ། ཁྱད་པར་དུ་དམིགས་ཡུལ་ཆེ་གེ་མོ་ཁྱོད་ལ་མཁྱེན་པའི་ཡེ་ཤེས་ཀྱིས་དགོངས། བྱམས་བརྩེའི་ཐུགས་ཀྱིས་བརྩེ། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་ཏེ་ཁྱོད་རང་གཙོ་བོར་གྱུར་པའི་མཐོང་ཐོས་དྲན་རེག་གི་འགྲོ་བ་མ་ལུས་པ། བདེ་ཆེན་དག་པའི་ཞིང་དུ་འདྲེན་པའི་དེད་དཔོན་ཆེན་པོར་བྱོན་ནས་བཞུགས་པར་བསྒོམས་ལ། ལས་ངན་འཁྲུལ་བའི་དབང་དུ་མི་གཏོང་བར་མྱུར་དུ་འདྲེན་པའི་སྔོན་གྱི་ཐུགས་དམ་ཞལ་བཞེས་དུས་ལས་མི་ཡོལ་བ་ཞིག་ཁྱེད་མཁྱེན་ནོ། །ཁྱེད་ལ་བརྟེན་ནོ། །སྐྱབས་དང་རེ་ས་ཁྱེད་ལས་གཞན་མེད་པས་བཀའ་དྲིན་དང་ཐུགས་རྗེ་མ་ཆུང་ཤིག་སྙམ་པས་བློ་སེམས་རྩེ་གཅིག་ཏུ་གཏོད་ལ་ཁ་ཙམ་ཚིག་ཙམ་མ་ཡིན་པར་ཐུགས་རྗེ་དང་ཡོན་ཏན་རྗེས་སུ་དྲན་པའི་མོས་གུས་སྙིང་དཀྱིལ་ནས་བཟོད་མེད་དུ་འབར་ཞིང་གདུང་ཤུགས་དྲག་པོས་གསོལ་བ་འདི་ལྟར་དུ་ཐོབ་ཅིག ཅེས་བརྗོད། བཞི་པ་འཕོ་བ་འཇག་ཟུག་མར་གྲགས་པའི་དངོས་གཞིའི་འཕོ་ལུང་ཆེན་མོ་ནི། ཐོག་མར་དད་པ་དང་སྙིང་རྗེ་ཤུགས་བསྐྱེད་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། ཞེས་བརྒྱ་རྩ་བརྒྱད་སོགས་དལ་ཁོམ་དང་བསྟུན་དེ་བརྗོད་ལ། བདག་དང་འཕོ་བྱ་ཟུང་འཇུག་གི་རྣམ་པའམ་དབྱེར་མེད་དུ་མོས་པས་ཤིན་ཏུ་སྙན་པའི་དབྱངས་ཀྱིས། གསོལ་འདེབས་རྒྱས་པ་བྱ་བ་ནི། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། དེ་བཞིན་དུ་མཚན་གྱི་ཐོག་མཐའ་ཀུན་འདྲ་བར་སྦྱར་ལ། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །འཇིགས་མེད་ཆོས་དབྱིངས་འོད་གསལ་ལ་གསོལ་བ་འདེབས། །ཐུབ་བསྟན་ཆོས་ཀྱི་རྡོ་རྗེ་ལ་གསོལ་བ་འདེབས། །ཟབ་ལམ་འཕོ༴སོགས། དེས་འཕོ་བའི་བརྒྱུད་པ་དངོས་ཕྱོགས་གཅིག་ནས་ཚང་བ་ཡིན་ཀྱང་། བཀའ་དྲིན་གསུམ་ལྡན་གྱི་བརྒྱུད་པའི་བླ་མ་གཞན་ལ་ཡང་གསོལ་བ་བཏབ་ན་ལེགས་པས། རྒྱལ་སྲས་གཞན་ཕན་མཐའ་ཡས་ལ་གསོལ་བ་འདེབས། །མཁན་ཆེན་པདྨ་བཛྲ་ལ་གསོལ་བ་འདེབས། །ཀུན་བཟང་ཐེག་མཆོག་རྡོ་རྗེ་ལ་གསོལ་བ་འདེབས། །འགྲོ་འདུལ་ལུང་རིག་གླིང་པ་གསོལ་བ་འདེབས།། གང་ལྟར་ཡང་། དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་གསོལ་བ་རྩེ་གཅིག་ཏུ་ཐོབ་ལ། ཨོ་རྒྱན་ཆེན་པོས། རིག་པ་ཐིག་ལེའི་རྣམ་པ་རུ༔ སྤྱི་གཙུག་ཚངས་པའི་སྒོ་ནས་བྱུང་༔ འོད་དཔག་མེད་ཀྱི་ཐུགས་ཀ་རུ༔ ཧིཀ་གི་སྒྲ་དང་བཅས་པས་འཕང༔ གསུངས་པ་ལྟར་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་དབུ་མའི་ལམ་ནས་མེ་སྟག་འཕྲོ་བ་བཞིན་སྤྱི་གཙུག་ནས་རྒྱངས་ཀྱིས་ཡར་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་མོས་ཤིག བརྗོད་ལ། དམིགས་པའི་བབས་དང་བསྟུན་ཏེ་ཧིཀ་ལྔའམ་བདུན་ནམ་ཉེར་གཅིག་བརྗོད། དེ་ནས་འོད་མཚན་ལན་གསུམ་བརྗོད་ཅིང་གསོལ་འདེབས་གོང་ལྟར་ལས། ཐོག་མར་སངས་རྒྱས་འོད་དཔག་མེད་ལ་ཞེས་པ་ལན་གཅིག་དང་མཚན་རྣམས་ཀྱི་རྗེས་སུ་ཟབ་ལམ་འཕོ་བ་ཞེས་པའི་ཚིག་རྐང་དེ་སོ་སོར་སྦྱར་བའི་མཇུག་ཏུ། མྱུར་ལམ་འཕོ་བས་སོགས་ཀྱི་རྐང་པ་གསུམ་པོ་ལན་གཅིག་བརྗོད་ལ། རིག་པ་སེམས་ཀྱི་ངོ་བོ༴སོགས་ནས་སྤར་ཆོག་གོང་ལྟར་བྱས་པས་འཐུས། གསོལ་འདེབས་འབྲིང་པོ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །ལུང་རྟོགས་བསྟན་པའི་ཉིན་བྱེད་ལ་གསོལ་བ་འདེབས། །གསུམ་ལྡན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས །གོང་ལྟར་རོ།། གསོལ་འདེབས་བསྡུས་པ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུངས། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། ཧིཀ་གིས་སྤར་ཞིང་རྟགས་ཐོན་དུ་འབད་དོ།། ལྔ་པ་འཕོ་ཆོག་བྱིན་རླབས་ཅན་གཞན་གྱི་སྐོར་ལ། ཐོག་མར་རྫོགས་པ་ཆེན་པོ་མན་ངག་སྡེ་པའི་སྙིང་ཐིག་ཐུན་མོངས་མ་ཡིན་པའི་དོན་བརྒྱུད་རིན་པོ་ཆེའི་གསོལ་འདེབས་ནི། ཨེ་མ་ཧོ། སྟོན་མཆོག་ཀུན་བཟང་རིགས་ལྔ་ཞི་ཁྲོའི་ལྷ། །རྡོ་རྗེ་འཆང་དབང་རྡོར་སེམས་གསང་བའི་བདག །དགོངས་བརྒྱུད་རྒྱལ་བ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། །ཤྲཱི་སེང་ཛྙཱ་ན་སཱུ་ཏྲ་བཱི་མ་ལ། །བརྡ་བརྒྱུད་བླ་མ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །རྒྱལ་བ་ཀུན་དངོས་མཚོ་སྐྱེས་སྤྲུལ་པའི་སྐུ། །མཁར་ཆེན་མཚོ་རྒྱལ་མངའ་བདག་ཁྲི་སྲོང་རྗེ། །ཏིང་འཛིན་བཟང་པོ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ལྡང་མ་ལྷུན་རྒྱལ་ལྕེ་བཙུན་སེང་གེ་དབང་། །རྒྱལ་བ་ཞང་སྟོན་མཁས་པ་ཉི་འབུམ་རྗེ། །གུ་རུ་ཇོ་འབེར་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །སེང་གེ་རྒྱབ་པ་མེ་ལོང་རྡོ་རྗེའི་མཚན། །ཀུ་མ་ར་ཛ་པདྨ་ལས་འབྲེལ་རྩལ། །ཀློང་ཆེན་རབ་འབྱམས་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ཁྱབ་བདལ་ལྷུན་གྲུབ་འཇམ་དབྱངས་གྲགས་པའི་འོད། །འཁྲུལ་ཞིག་ཆེན་པོ་ཟླ་བ་གྲགས་པ་དང་། །ཀུན་བཟང་རྡོ་རྗེ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །རྒྱལ་མཚན་དཔལ་བཟང་སྣ་ཚོགས་རང་གྲོལ་བ། །བསྟན་འཛིན་གྲགས་པ་མདོ་སྔགས་བསྟན་འཛིན་རྗེ། །ཕྲིན་ལས་ལྷུན་གྲུབ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །འགྱུར་མེད་རྡོ་རྗེ་ཆོས་དཔལ་རྒྱ་མཚོའི་མཚན། །མི་འགྱུར་དཔལ་སྒྲོན་རིན་ཆེན་རྣམ་རྒྱལ་དང་། །པདྨ་དགྱེས་པ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །པདྨ་རིག་འཛིན་ནམ་མཁའ་འོད་གསལ་དང་། །ཐེག་མཆོག་བསྟན་འཛིན་ཀུན་གྲོལ་རྣམ་པར་རྒྱལ། །ངེས་དོན་བསྟན་འཛིན་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །ཚེ་དབང་མཆོག་གྲུབ་ཨོ་རྒྱན་ཆེ་མཆོག་དཔལ། །པདྨ་བཛྲ་ལུང་རིག་གླིང་པ་རྗེ། །རྩ་བའི་བླ་མ་རྣམས་ལ་གསོལ་བ་འདེབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །དོན་བརྒྱུད་རྫོགས་པ་ཆེན་པོའི་བྱིན་རླབས་ཀྱིས། །འཕོ་བྱ་འཕོ་བྱེད་འཕོ་ཡུལ་མི་དམིགས་པ། །འོད་སྣང་མཐའ་ཡས་དགོངས་པའི་ཀློང་ཆེན་པོར། །ཕྱིར་མི་ལྡོག་པའི་བྱང་ཆུབ་ཐོབ་པར་ཤོག །ཅེས་དང་ཧིཀ་ལྔ་ཚར་བརྗོད་དོ། །དེ་ནས་ཀློང་ཆེན་སྙིང་ཐིག་རང་ལུགས་ཀྱི་བརྒྱུད་པ་ནི། ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས། །ལོངས་སྐུ་རྡོ་རྗེ་སེམས་དཔའ་ལ་གསོལ་བ་འདེབས། །སྤྲུལ་སྐུ་དགའ་རབ་རྡོ་རྗེ་ལ་གསོལ་བ་འདེབས། །རིག་འཛིན་དཔལ་གྱི་སེང་གེ་ལ་གསོལ་བ་འདེབས། །སློབ་དཔོན་འཇམ་དཔལ་བཤེས་གཉེན་ལ་གསོལ་བ་འདེབས། །མཁས་པ་ཡེ་ཤེས་མདོ་མཆོག་ལ་གསོལ་བ་འདེབས། །པཎ་ཆེན་དྲི་མེད་བཤེས་གཉེན་ལ་གསོལ་བ་འདེབས། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །ཚངས་པ་ལྷ་ཡི་མེ་ཏོག་ལ་གསོལ་བ་འདེབས། །གསང་འཛིན་ཡེ་ཤེས་མཚོ་རྒྱལ་ལ་གསོལ་བ་འདེབས། །མཁས་པ་རྣམ་སྣང་ལོ་ཙཱ་ལ་གསོལ་བ་འདེབས། །ཀུན་མཁྱེན་དྲི་མེད་འོད་ཟེར་ལ་གསོལ་བ་འདེབས། །འགྲོ་མགོན་མཁྱེན་བརྩེའི་འོད་ཟེར་ལ་གསོལ་བ་འདེབས། །འཇིགས་མེད་ཕྲིན་ལས་འོད་ཟེར་ལ་གསོལ་བ་འདེབས། །འཇིགས་མེད་ཡེ་ཤེས་རྡོ་རྗེ་ལ་གསོལ་བ་འདེབས། །འཇིགས་མེད་མཁྱེན་བརྩེའི་དབང་ཕྱུག་ལ་གསོལ་བ་འདེབས། །ལུང་རྟོགས་བསྟན་པའི་ཉིན་བྱེད་ལ་གསོལ་བ་འདེབས། །དོན་བརྒྱུད་ཕྱོགས་གཅིག་ལ་དེ་ལྟར་དང་། བཀའ་བབས་ཀྱི་བརྒྱུད་པ་གཞན་ཡང་། འཇིགས་མེད་རྒྱལ་བའི་མྱུ་གུ་ལ་གསོལ་བ་འདེབས། །འཇིགས་མེད་ཆོས་ཀྱི་དབང་པོ་ལ་གསོལ་བ་འདེབས། །འཇིགས་མེད་མཁྱེན་བརྩེའི་དབང་པོ་ལ་གསོལ་བ་འདེབས། །འཇིགས་མེད་གཞན་ཕན་དབང་པོ་ལ་གསོལ་བ་འདེབས། །གང་ལྟར་ཡང་། དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པ་དང་། །ཕྱིར་མི་ལྡོག་པའི་ཆོས་སྐུ་ཐོབ་པར་ཤོག །ཧྲཱིཿ དང་ཧིཀ་ལྔ་ཚར་གྱི་སྒྲས་སྤར་རོ།། ཀློང་ཆེན་ནམ་མཁའི་རྣལ་འབྱོར་གྱི་ཐུགས་གཏེར་ལས་བྱུང་བའི་འཕོ་བ་ནི། ཨེ་མ་ཧོཿ གནས་རང་སྣང་དོན་གྱི་འོག་མིན་ནཿ ཡིད་དད་བརྒྱའི་འཇའ་གུར་འཁྲིགས་པའི་ཀློངཿ སྐྱབས་ཀུན་འདུས་རྩ་བའི་བླ་མ་ནིཿ་ སྐུ་ཐ་མལ་མ་ཡིན་དྭངས་མའི་ལུསཿ དཔལ་སངས་རྒྱས་སྣང་མཐའི་ངོ་བོར་བཞུགསཿ ཡིད་མོས་གུས་གདུང་བས་གསོལ་བ་འདེབསཿ ལམ་འཕོ་བ་འབྱོང་བར་བྱིན་གྱིས་རློབསཿ གནས་འོག་མིན་བགྲོད་པར་བྱིན་གྱིས་རློབསཿ དབྱིངས་ཆོས་སྐུའི་རྒྱལ་ཟིན་པར་ཤོགཿ ཧྲཱིཿལྔ་ཚར་དང་། ཧིཀ་དང་ཕཊ་ཀྱི་སྒྲས་སྤར་བར་བྱའོ།། ཡང་སྤྲུལ་སྐུ་མི་འགྱུར་རྡོ་རྗེའི་གནམ་གཏེར་གྱི་འཕོ་བ་ནི། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །འཇིག་རྟེན་ཕྱི་མར་སོང་བའི་ཚེ་འདས་ཀྱི། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཅེས་བརྗོད་ལ། ཧིཀ་དང་ཕཊ་ཀྱི་སྒྲ་བརྗོད་དོ། ། གཞན་ཡང་ཉམས་མྱོང་བྱིན་རླབས་བརྒྱུད་པའི་ཁྲིད་གང་ཐོས་པ་དང་། གང་ལ་མོས་པ་ཐོབ་པ་རྣམས་ལ་ཡང་ནན་ཏན་དུ་བྱའོ།། དྲུག་པ་ཕྱིར་མི་ལྡོག་སངས་རྒྱས་སྐུ་ལྔའི་ཀློང་དུ་རྒྱས་གདབ་ཅིང་སྐྱེ་མེད་ཀ་དག་གི་ངང་ལ་མཉམ་པར་འཇོག་པ་ནི། ཨེ་མ་ཧོ། སྔོན་འདས་དུས་བསྐལ་པའི་དགེ་སློང་མཆོག །དཔལ་རྒྱལ་སྲས་ཆོས་ཀྱི་འབྱུང་གནས་ཀྱིས། །མགོན་འཇིག་རྟེན་དབང་ཕྱུག་རྒྱལ་བའི་དྲུང་། །ཡོངས་འགྲོ་རྣམས་སྒྲོལ་ཕྱིར་དམ་བཅས་ནས། །ནུབ་བདེ་ཆེན་ཞིང་གི་རྟེན་བརྟེན་པར། །དབང་བསྒྱུར་བའི་ཐུགས་བསྐྱེད་སྨོན་པའི་འབྲས། །མགོན་ཚེ་མཐའ་ཡས་པ་སྟོན་འཁོར་བཅས། །མ་འགྲོ་བའི་དཔལ་དུ་ཡོངས་ཤར་བཞིན། །བདག་གསོལ་བ་འདེབས་སོ་མཁྱེན་བརྩེའི་གཏེར། །ཚེ་འདིར་སྣང་ལས་ཐལ་ཚེ་འདས་དེ། །སྲིད་འཁོར་བའི་འཇིགས་ལས་དབུགས་དབྱུང་ཞིང་། །ནུབ་བདེ་ཆེན་པདྨ་བཀོད་ཞིང་དུ། །དུས་སྐད་ཅིག་ཡུད་ཙམ་འདི་ཉིད་ལ། །མགོན་ཁྱེད་ཀྱི་ཐུགས་རྗེས་འདྲེན་པར་མཛོད། །ལས་ཉོན་མོངས་དབང་དུ་བཏང་གྱུར་ན། །མགོན་ཁྱེད་ཀྱི་དམ་བཅའ་གང་དུ་ཐལ། །གནས་ངན་འགྲོར་སྙོགས་ལས་མ་བཟློག་ན། །མགོན་ཐུགས་རྗེ་ཆེ་ཞེས་ཚིག་ཏུ་བས། །སེམས་གདུང་བས་གསོལ་འདེབས་འདིར་གསོན་ལ། །ཚེ་ཕྱི་མར་སོང་བའི་དམིགས་ཡུལ་དེ། །ནུབ་བདེ་ཆེན་ཞིང་དུ་འདྲེན་པར་མཛོད། །སྐྱབས་བསླུ་མེད་མགོན་པོ་འོད་དཔག་མེད། །ལྷ་ཐུགས་རྗེའི་གཏེར་མཛོད་སྤྱན་རས་གཟིགས། །སྟོབས་ནུས་པའི་མངའ་བདག་རྡོ་རྗེ་འཛིན། །དཔལ་འདྲེན་པ་སྟོང་རྩ་རྒྱལ་སྲས་ཚོགས། །ཚེ་ཕྱི་མའི་ལམ་ཞུགས་ཚེ་འདས་ཀྱི། །བཤེས་རམ་ཟླ་མཛོད་ཅིག་སྣང་མཐའ་ཡས། །འཁོར་སེམས་དཔའི་གྲལ་དུ་སྐྱེལ་བར་མཛོད། །སེམས་འོད་ཀྱི་ཐིག་ལེ་དཀར་དམར་མདངས། །དཔེ་མཁའ་ལ་སྐར་མདའ་རྒྱུག་པ་བཞིན། །དཔལ་འཆི་མེད་མགོན་པོའི་ཐུགས་ཀར་བསྟིམས། །སླར་ལྡོག་མེད་སྐུ་ལྔའི་རྒྱས་གདབ་བོ།། ཅེས་དང་། ཕཊཿསྤྲུལ་སྐུ། ཕཊཿལོངས་སྐུ། ཕཊཿཆོས་སྐུ། ཕཊཿམི་འགྱུར་རྡོ་རྗེའི་སྐུ། ཕཊཿམངོན་པར་བྱང་ཆུབ་པའི་སྐུ་ཐོབ་པར་བསམ་ལ། ཀྱཻ་མ་ཚེ་འདས་ཕུང་ཁམས་ལྷར་གསལ་རྟེན། །མགོན་འོད་དཔག་མེད་ཀྱི་གསང་གསུམ་ལ། །དཔེ་འཇའ་ཚོན་མཁའ་ལ་ཐིམ་བཞིན་དུ། །ཀློང་དབྱེར་མེད་རོ་གཅིག་འདྲེས་པར་གྱུར། །ཞེས་བརྗོད་ཅིང་། ཚེ་འདས་ཀྱི་ལུས་རྟེན་རྡོ་རྗེ་རྣལ་འབྱོར་མར་གསལ་བ་འཇའ་ཚོན་ནམ་མཁར་ཐིམ་པ་ལྟར་སྐྱབས་ཡུལ་གྱི་ལྷ་ལ་ཐིམ། དེ་ཉིད་འོད་ཀྱི་ཕུང་པོར་གྱུར་ཏེ་རང་སྣང་ལོངས་སྐུའི་ཞིང་དུ་བཅོམ་ལྡན་འདས་རྒྱལ་བ་འོད་མི་འགྱུར་བ་དང་དབྱེར་མེད་དུ་གྱུར་བར་བསམ་ལ། ཕཊཿཅེས་དམིགས་བསམ་སྤྲོས་པ་དང་བྲལ་བའི་ངང་ལ་ཅི་གནས་སུ་བཞག་གོ།། སྤྱི་དོན་གསུམ་པ་རྗེས་ཀྱི་བྱ་བ་ལ། བསྔོ་བ་དང་སྨོན་ལམ། ཤིས་བརྗོད་གསུམ་ལས། དང་པོ་བསྔོ་བ་ནི། དགེ་བ་འདིས་མཚོན་དུས་གསུམ་ལེགས་ཚོགས་རྣམས། །གཅིག་ཏུ་བསྡུས་ནས་མཁའ་མཉམ་འགྲོ་ཀུན་གྱི། །ཚོགས་རྫོགས་སྒྲིབ་དག་ས་ལམ་མྱུར་བགྲོད་ནས། །རྣམ་མཁྱེན་སངས་རྒྱས་ཐོབ་པའི་རྒྱུ་རུ་བསྔོ། ། ཞེས་དང་། ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་དག་ཞིང་རྣམས་ཡོངས་དག་དང་། །བསྔོ་བ་བཟང་པོ་མཁས་པ་ཅི་འདྲ་བ། །དེ་འདྲ་བདག་ཀྱང་དེ་དང་མཚུངས་པར་ཤོག །འཇམ་དཔལ་དཔའ་བོས་ཇི་ལྟར༴སོགས། རབ་ཏུ་བསྔོ།། གཉིས་པ་སྨོན་ལམ་ནི། བཅོམ་ལྡན་འདས་རྡུལ་བྲལ་ཤིན་ཏུ་རྣམ་པར་དག་པ་ལ་ཕྱག་འཚལ་ལོ། །སངས་རྒྱས་བསོད་ནམས་ཕུང་པོ་ལས་གྲུབ་པའི། །འོད་སྣང་མཐའ་ཡས་བདེ་བ་ཅན་གྱི་ཞིང་། །དེ་ན་བཞུགས་པའི་མགོན་པོ་འོད་དཔག་མེད། །སྐུ་ཚེ་དཔག་མེད་ཞབས་ལ་ཕྱག་འཚལ་ལོ། །བདེ་བ་ཅན་གྱི་ཞིང་དུ་སྐྱེ་བར་ཤོག །གང་ཁྱོད་འཇིག་རྟེན་དབང་ཕྱུག་རྒྱལ་པོའི་དྲུང་། །དགེ་སློང་ཆོས་ཀྱི་འབྱུང་གནས་ཞེས་གྲགས་ཚེ། །ཞིང་ཁམས་བཟུང་བར་སྨོན་པའི་དམ་བཅའ་ལ། །བླ་མར་བྱའོ་མྱུར་དུ་སྐབས་དབྱེར་གསོལ། །བདེ་བ་ཅན་གྱི་ཞིང་དུ་སྐྱེ་བར་ཤོག །གཞོན་ཤ་ཤིན་ཏུ་ཆགས་པའི་ལག་མཐིལ་དང་། །མཉམ་པའི་དཔེ་བྱར་འོས་པའི་འགལ་ཟླ་ནི། །ཆུ་ཞེང་སྲིད་དུ་མི་མངོན་ཐ་གྲུའི་ཁྱོན། །རིན་ཆེན་སྣ་ཚོགས་གཅལ་དུ་བཀྲམ་པས་བྱས། །བདེ་བ་ཅན་གྱི་ཞིང་དུ་སྐྱེ་བར་ཤོག །ལྷུན་པོ་ཆུ་གཏེར་ཁོར་ཡུག་རི་ནག་པོའི། །བསྟི་གནས་ཕལ་བ་མེད་པས་ཉམས་དགའ་ཞིང་། །རིན་ཆེན་སྣ་བདུན་ལས་གྲུབ་ལྗོན་པ་ནི། །དཔག་ཚད་སྟོང་དང་དྲུག་བརྒྱའི་འཕོངས་སུ་སྙེགས། །བདེ་བ་ཅན་གྱི་ཞིང་དུ་སྐྱེ་བར་ཤོག །ཡལ་འདབ་མེ་ཏོག་འབྲས་བུས་དུད་པ་ལ། །གསེར་གྱི་དྲ་བས་དཔྱངས་པར་དྲི་བཞོན་གྱིས། །བསྐུལ་ལས་ཆོག་མི་ཤེས་པའི་སྒྲ་དབྱངས་ཀུན། །ཡིད་འོང་སྙན་དང་མཐུན་པ་དར་དིར་སྒྲོག །བདེ་བ་ཅན་གྱི་ཞིང་དུ་སྐྱེ་བར་ཤོག །དྲི་བསུང་ལྷག་པར་རྒྱས་པའི་མེ་ཏོག་གིས། །ཀུན་ནས་ཀུན་ཏུ་བཀྲམ་པའི་བསྟི་སྟང་ནི། །མི་འགྲེང་བདུན་དུ་སྙེགས་པས་མི་ངོམས་པར། །མནན་ན་ནེམ་ལ་བཏེག་ན་སྤར་བས་འགྲན། །བདེ་བ་ཅན་གྱི་ཞིང་དུ་སྐྱེ་བར་ཤོག །ལྷ་དང་མི་ལས་ངན་སོང་ལྷ་མིན་གྱི། །མིང་ཙམ་མི་གྲགས་འབྱོར་ཞིང་རྒྱས་པ་དང་། །ལོ་ལེགས་ཕུན་སུམ་ཚོགས་པའི་བདེ་བ་ཡིས། །ངོམས་པ་མེད་པའི་དཔལ་ལ་མི་ཆགས་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །འབབ་སྟེགས་མཆོག་ཏུ་བདེ་བའི་སྤོས་ཆུའི་ཀླུང་། །ཅ་ཅོའི་གཞན་དབང་མ་ཡིན་ཡིད་ལ་འབབ། །རྣམ་པར་བདེ་དང་མཉན་པས་ཆོག་མི་ཤེས། །མི་རྟག་ཞི་དང་བདག་མེད་དོན་ལ་རྟོན། །བདེ་བ་ཅན་གྱི་ཞིང་དུ་སྐྱེ་བར་ཤོག། །འདམ་རྫབ་སྤངས་པའི་གསེར་གྱི་བྱེ་མ་ལ། །བཞད་དང་ཁྲུང་ཁྲུང་ངང་ངུར་ཀ་རན་ད། །ནེ་ཙོ་རི་སྐེགས་རྨ་བྱ་ཀུ་ལ་ན། །ཀ་ལ་པིང་ཀའི་རྒྱུད་མངས་ལ་བསྙེན་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །དེ་ལས་རྣ་བའི་འདུས་ཏེ་རེག་ཚོར་ཀུན། །རིན་ཆེན་རྣམ་གསུམ་སྒྲ་དང་ཚད་མེད་བཞི། །ས་དང་ཕར་ཕྱིན་སྟོབས་བཅུ་མི་འཇིགས་བཞི། །མ་འདྲེས་བཅོ་བརྒྱད་རྫོགས་པའི་དོན་དང་ལྡན། །བདེ་བ་ཅན་གྱི་ཞིང་དུ་སྐྱེ་བར་ཤོག །བལྟ་ན་སྡུག་པའི་སྐྱེད་ཚལ་ལྗོན་པ་ལས། །འདོད་པའི་ཡོན་ཏན་བརྒྱ་ཕྲག་མོད་ལ་འབྱུང་། །བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླར་མིན། །བདེ་བ་ཅན་གྱི་ཞིང་དུ་སྐྱེ་བར་ཤོག །དེ་ན་གཟའ་དང་རྒྱུ་སྐར་ཉིན་མཚན་ཆ། །ཁྱིམ་དང་དེ་ལ་ཡོངས་སུ་འཛིན་པའི་སེམས། །གཏན་ནས་མེད་ཀྱང་མཆོད་སྤྲིན་སྤྲོ་བ་ཡི། །ལྷ་ཡི་བུ་མོས་ཤིན་ཏུ་ཉམས་བདེ་བ། །བདེ་བ་ཅན་གྱི་ཞིང་དུ་སྐྱེ་བར་ཤོག །གང་ན་འཚོ་ཞིང་གཞེས་པའི་རྒྱལ་བ་དེའི། །བསྔགས་པ་བརྗོད་ལ་གངྒཱའི་རྡུལ་སྙེད་ཀྱི། །སངས་རྒྱས་རྣམས་ཀྱང་བརྩོན་པ་མི་འདོར་བས། །སྤྱན་རས་གཟིགས་དང་མཐུ་ཆེན་ཐོབ་པའང་བསྙེན། །བདེ་བ་ཅན་གྱི་ཞིང་དུ་སྐྱེ་བར་ཤོག། །ཞིང་ཁམས་འདིར་སོན་དགེ་བའི་རྩ་བ་ལ། །སྒྲིབ་པ་དང་བཅས་པདྨོའི་མངལ་འཛིན་དང་། སྐྱིལ་མོ་ཀྲུང་བཅས་མོད་ལ་སྐྱེ་གཉིས་ཀ །སྐྱེས་བུ་ཆེན་པོའི་མཚན་དང་ཡང་དག་ལྡན། །བདེ་བ་ཅན་གྱི་ཞིང་དུ་སྐྱེ་བར་ཤོག །ཉན་རང་བྱང་སེམས་ལྷ་མིའི་རྣམ་པ་ཅན། །ཀུན་ཀྱང་དབང་རྣོན་བཟོད་པ་ཐོབ་པ་སྟེ། །བར་སྣང་ལ་འགྲོ་ལོག་པར་མི་ལྟུང་ཞིང་། །སངས་རྒྱས་མཐོང་དང་མི་འབྲལ་དམ་ཆོས་ཉན། །བདེ་བ་ཅན་གྱི་ཞིང་དུ་སྐྱེ་བར་ཤོག །བསམ་གཏན་དང་ནི་མངོན་པར་ཤེས་པ་ལ། །མཁས་པའི་ཤེས་རབ་ཀྱིས་ནི་རྣམ་དབྱེ་བཟོད། །མ་བསྡམས་མི་མངའ་དབང་པོ་མི་གཡོ་ཞིང་། །ཀུན་ཤེས་ཡོན་ཏན་མཐའ་ཡས་མུ་མེད་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཀུན་འབྱུང་རྒྱུ་འབྲས་སྤངས་པའི་ལམ་བདེན་གྱིས། །འགོག་པ་མངོན་དུ་བྱས་པའི་དགྲ་བཅོམ་ཀྱང་། །རྣམ་ཐར་གསུམ་གྱི་དབྱིངས་ལ་དབུགས་ཕྱུང་ནས། །འོད་ཟེར་ཆེན་པོའི་དབང་བསྐུར་ལ་སྦྱོར་བ། །བདེ་བ་ཅན་གྱི་ཞིང་དུ་སྐྱེ་བར་ཤོག །སྐད་ཅིག་རེར་བསྟན་ཆོས་ཀྱི་རྣམ་གྲངས་ཀྱང་། །བགྲང་བར་མི་བཟོད་རྫུ་འཕྲུལ་ཆེན་པོ་ཡིས། །ཞིང་ཁམས་གཞན་ཉུལ་ཆོས་ལས་ཐོབ་པ་ཡི། །བྱེ་བ་ཕྲག་བརྒྱའི་ཏིང་འཛིན་སྒོ་འབྱེད་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །མདོར་ན་གང་གི་མཚན་དང་སྒྲ་དང་ནི། །ལྟ་བ་ཡིད་ལ་གོམས་པར་བྱས་པ་ཡང་། །ཞིང་ཁམས་བདེ་བ་ཅན་དུ་དབུགས་འབྱིན་པའི། །ཐུགས་བསྐྱེད་དམ་བཅའ་བསླུ་བ་མེད་པའི་ཕྱིར། ཁྱོད་ཀྱིས་གཞན་དོན་མཛད་པའི་དཔེ་ཟླ་ལ། །རྒྱ་མཚོའི་དུས་རླབས་ངལ་བའི་སྐབས་བསྟན་པས། །བུ་རམ་ཤིང་པའི་ཞལ་ནས་ཀུན་དགའ་བོ། ཁྱོད་ལོངས་ནུབ་ཀྱི་ཕྱོགས་སུ་ཁ་སྟོན་ལ། །མེ་ཏོག་གཏོར་ནས་ཐལ་མོ་སྦྱར་བྱས་ཏེ། །རྫོགས་པའི་སངས་རྒྱས་འོད་སྣང་དཔག་ཏུ་མེད། །རྡུལ་བྲལ་ཤིན་ཏུ་རྣམ་པར་དག་པ་ལ། །ཕྱག་འཚོལ་དེ་མཚན་སྒྲིབ་པ་མེད་པ་ནི། །ཕྱོགས་བཅུར་གྲགས་ནས་རྒྱལ་བ་དེ་རྣམས་ཀྱང་། །བསྔགས་པ་བརྗོད་པར་གསུངས་ན་བདག་ཅག་ནི། །ལུས་དང་ལོངས་སྤྱོད་ལྟོས་པ་མེད་པར་འབུལ། །བྱས་ཤིང་བསགས་པའི་སྡིག་སྒྲིབ་མཐོལ་བ་དང་། །ཆབས་གཅིག་མཛད་པ་རྒྱ་མཚོར་ཡི་རང་འབུལ། །རྟག་པར་ཆོས་འཁོར་དང་བཅས་བཞུགས་སུ་གསོལ། །དགེ་རྩ་ཇི་སྙེད་མཆིས་པ་འགྲོ་བ་ཀུན། །བདེ་བ་ཅན་དུ་སྐྱེ་བའི་རྒྱུར་བསྔོ་ན། །སྨོན་པ་ཇི་བཞིན་འགྲུབ་པའི་བཀྲ་ཤིས་ཤོག །ཅེས་དང་། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་ཚེ་འདས་དེར་ཐོབ་ཤོག །དེར་ནི་ཚེ་འདས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་བྱེད་ཤོག །སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང་། །ཀུན་ཏུ་བཟང་པོས་བརྒྱན་པའི་གཞུང་གྲུབ་སྟེ། །ངན་སོང་གནས་རྣམས་མ་ལུས་སྟོང་བར་ཤོག །ངན་སོང་སྡུག་བསྔལ་མི་མྱོང་ཞིང་། །དཀའ་བ་སྤྱད་པ་མེད་པར་ཡང་། །ལྷ་བས་ལྷག་པའི་ལུས་ཀྱིས་ནི། །དེ་དག་སངས་རྒྱས་མྱུར་འགྲུབ་ཤོག །གང་དུ་སྐྱེ་བའི༴སོགས། ཐོབ་པར་ཤོག །གསུམ་པ་ཤིས་བརྗོད་ནི། ཧཱུྃ་ཧྲཱིཿ ཕྱོགས་བཅུའི་རྒྱལ་བ་རྣམས་ཀྱི་ཐུགས་རྗེ་དང་། །བདག་ཅག་ལྷག་བསམ་དག་པའི་བདེན་སྟོབས་ཀྱིས། །རྒྱུ་སྦྱོར་ཡོན་བདག་མི་ནོར་འཁོར་བཅས་ལ། །བཀྲ་ཤིས་དཔལ་འབར་བདེ་ལེགས་ཕུན་ཚོགས་ཤོག །ཅེས་བརྗོད་ཅིང་མེ་ཏོག་གི་སིལ་མ་འཐོར་བར་བྱའོ།། རྣམ་དག་ལེགས་བཤད་ཉི་འོད་འབུམ་བརྡལ་བཞིན། །མེ་ཁྱེར་རང་འོད་འབྱིན་པ་ལེགས་མིན་ཡང་། །གསུང་རབས་རྒྱ་མཚོར་འཇུག་པའི་སྐལ་ལྡན་དུས། འདོད་དགུའི་ནོར་བུ་བླངས་འདིར་འགལ་མེད་སྙམས། །དེ་ཕྱིར་ཟབ་དོན་ཆུ་གཏེར་བྱེ་བའི་བཅུད། །འཕྲད་ཚད་མྱུར་གྲོལ་དབང་གི་རྒྱལ་པོའི་མཛོད། །སྤེལ་འདིས་ཡིད་ཅན་བདེ་བས་ཕོངས་པ་རྣམས་། །གཏན་བདེ་སྐུ་བཞིའི་རྒྱལ་སྲིད་མཆོག་ཐོབ་ཤོག །ཅེས་ཟབ་ལམ་འཕོ་བའི་ལས་རིམ་ཁྲིགས་སུ་བསྡེབ་པ་འཕྲད་ཚད་མྱུར་གྲོལ་ཞེས་བྱ་བ་འདི་ནི་གཏེར་སྟོན་ཉི་ཟླ་སངས་རྒྱས་ཀྱི་འཕོ་བའི་རྩ་བ་རྫོགས་ཆེན་ནས་བརྒྱུད་པའི་འཕོ་བའི་གདམས་པ་རྡོ་རྗེའི་ཐེམ་སྐས་དང་། འཇིགས་མེད་ཕྲིན་ལས་འོད་ཟེར་གྱིས་མཛད་པའི་འཕོ་བ་རྣམ་གྲོལ་མྱུར་ལམ་དང་། འགྱུར་མེད་རྒྱལ་མཚན་བཟང་པོའི་འཕོ་བ་འཁྲུལ་སྣང་རང་གྲོལ། གཏེར་ཆེན་ལུང་རིག་གླིང་པའི་འཕོ་བ་ཐུགས་རྗེའི་ལྕགས་ཀྱུ་ཞེས་བྱ་བ་སྲིད་གསུམ་རང་གྲོལ་རྣམས་ལ་གཞི་བྱས་ནས། སངས་རྒྱས་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་དང་། ཞི་ཁྲོ་དགོངས་པ་རང་གྲོལ་གྱི་བར་དོ་རྣམ་གསུམ་གྱི་ཁྲིད་ཡིག་རྒྱབ་ཆོས་བཅས་དང་། ཨོ་རྒྱན་འཇིགས་མེད་ཆོས་ཀྱི་དབང་པོའི་སྔོན་འགྲོའི་ཁྲིད་ཡིག་ལས་བྱུང་བའི་འཕོ་ཁྲིད་དང་། ཟེ་ཆེན་རྒྱལ་ཚབ་བསྟན་འཛིན་ཆོས་ཀྱི་རྒྱལ་པོས་མཛད་པའི་བར་དོའི་ངོ་སྤྲོད་ཐར་བའི་ལམ་སྟོན་དང་། གྲུབ་ཆེན་གྱིས་མཛད་པའི་བར་དོའི་ངོ་སྤྲོད་འཁྲུལ་སྣང་གདུང་སེལ་བདུད་རྩིའི་དགའ་སྟོན་དང་། བར་དོའི་རྣམ་བཤད་དྲན་པའི་མེ་ལོང་དང་། ཁོ་བོས་བྱས་པའི་འཕོ་ཡིག་ཐུགས་རྗེའི་ལྕགས་ཀྱུ་རྣོན་པོ་ཞེས་བྱ་བ་དང་། གཞན་ཡང་སྐྱེས་བུ་དམ་པ་རྣམས་ཀྱི་གསུང་ཚིག་ཚོགས་གང་ཟབ་ཀྱིས་ཁ་བསྐང་ནས། སྔ་སོར་གོས་དཀར་ལྕང་ལོའི་ཟུར་ཕུད་ཅན་བཛྲ་ཤྲཱི་དྷ་རས་ཀྱང་གསོལ་འདེབས་སོགས་བསྒྲིག་ཆོག་བྱས་པ་ཞིག་དགོས་ཞེས་བཀས་བསྐུལ་བ་དང་། །ཉེ་ཆར་མཆོག་སྤྲུལ་རིན་པོ་ཆེ་པདྨ་ཀལྤ་བྷ་དྲས་ཡང་ཡང་ནན་ཏན་ཆེན་པོས་བསྐུལ་བ་ལྡོག་ཏུ་མ་ནུས་པས། ཉིད་ཀྱི་ཐུགས་བཞེད་དང་བསྟུན་ནས། ཕྲན་གསང་སྔགས་ཀྱི་ལམ་ལ་ཞུགས་པར་མོས་པ་ཨ་བྷྱཱ་བི་ཛ་ཡ་ཕ་ལས་འཇུག་པ་བདེ་བའི་ཕྱིར། རང་ནུས་དང་བསྟུན་པའི་རྟོག་དཔྱོད་གང་འོས་ནན་ཏན་ཆེན་པོས་བྱས་ཏེ། ཁྲིགས་ཆོགས་སུ་ལེགས་པར་བསྡེབས་པ་ལ་ཡི་གེ་པའང་བསྐུལ་པོ་དེ་ཉིད་དོ།། ཚུལ་འདི་བསྒྲུབ་པ་ལ་ཉེས་ལྟུང་གི་ཆ་མཆིས་ན་ཕྱོགས་བཅུའི་རྒྱལ་བ་སྲས་དང་བཅས་པའི་སྤྱན་སྔར་བཟོད་པར་གསོལ་ཞིང་། རྣམ་དཀར་ལེགས་པའི་ཆ་སྲིད་ན་དེས་མཚོན་པའི་དུས་གསུམ་གྱི་དགེ་ཚོགས་རྒྱ་མཚོའི་མཐུས། ཕྱོགས་བཅུའི་ནམ་མཁའ་དང་མཉམ་པའི་ཡིད་ཅན་གྱི་འགྲོ་བ་མ་ལུས་པ་བར་དོ་དང་སྲིད་པའི་སྡུལ་བསྔལ་ལས་གྲོལ་ནས་ཞི་བདེ་བླ་ན་མེད་པ་གདོད་མའི་མགོན་པོ་འོད་སྣང་མཐའ་ཡས་ཀྱི་དགོངས་པའི་ཀློང་ཆེན་པོར་མངོན་པར་བྱང་ཆུབ་པའི་རྒྱུར་གྱུར་ཅིག སརྦ་དཱ་སུ་ཤྲཱེ་ཡོ་བྷ་བ་ཏུ།། ཤམ་བྷ་ལའི་ཆོས་རྒྱལ་རིགས་ལྡན་བརྒྱུད་པར་བཅས་ལ་གསོལ་བ་འདེབས་པའི་འཕོ་བ།༄༅། དཔལ་དུས་ཀྱི་འཁོར་ལོའི་རྒྱུད་ཀྱི་དགོངས་པ་ལྟར་བྱང་ཤམ་བྷ་ལའི་ཆོས་རྒྱལ་རིགས་ལྡན་བརྒྱུད་པར་བཅས་ལ་གསོལ་བ་འདེབས་པའི་འཕོ་བ་ནི། དང་པོའི་སངས་རྒྱས་དཔལ་ལྡན་རྡོ་རྗེ་འཆང་། །དུས་ཀྱི་འཁོར་ལོ་འདྲེན་མཆོག་ཤཱཀྱའི་ཏོག །ཉི་མའི་འོད་དང་གསང་བདག་ཟླ་བཟང་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ཆོས་རྒྱལ་ལྷ་ཡི་དབང་ལྡན་གཟི་བརྗིད་ཅན། །ཟླ་བས་བྱིན་དང་ལྷ་ཡི་དབང་ཕྱུག་ཆེ། །སྣ་ཚོགས་གཟུགས་དང་ཟླ་བའི་དབང་ལྡན་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །རིགས་ལྡན་འཇམ་དཔལ་གྲགས་དང་པདྨ་དཀར། །བཟང་པོ་རྣམ་རྒྱལ་བཤེས་གཉེན་བཟང་པོ་དང་། །ཕྱག་ན་རིན་ཆེན་ཁྱབ་འཇུག་སྦས་པ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ཉི་མ་གྲགས་པ་ཤིན་ཏུ་བཟང་པོ་དང་། །རྒྱ་མཚོ་རྣམ་རྒྱལ་རྒྱལ་དཀའ་ཉི་མའི་མཚན། །སྣ་ཚོགས་གཟུགས་དང་ཟླ་འོད་མཐའ་ཡས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ས་སྐྱོང་དཔལ་སྐྱོང་སེང་གེ་རྣམ་པར་གནོན། །སྟོབས་ཆེན་མ་འགག་པ་དང་མིའི་སེང་གེ། །དབང་ཕྱུག་ཆེ་དང་མཐའ་ཡས་དྲག་པོ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ས་ཡི་ཕྱེད་སྐྱོང་ཚངས་པ་ལྷ་དབང་དང་། །དུམ་བུར་སྐྱོང་བ་འོད་སྲུང་ལ་སོགས་བརྒྱད། །ཤམ་བྷ་ལར་བཞུགས་རིག་འཛིན་ཚོགས་བཅས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །དུས་ཞབས་ཆེ་ཆུང་ན་ལེནྟྲ་པ་དང་། །ཟླ་བ་མགོན་པོ་འབྲོ་སྟོན་ལོ་ཙཱ་པ། །སྒྲོལ་བའི་མགོན་པོ་ཉེ་བརྒྱུད་བླ་མར་བཅས། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །རྒྱ་བོད་རིག་འཛིན་བརྒྱུད་པར་བཅས་རྣམས་དང་། །དྲུག་བརྒྱ་སོ་དྲུག་དཀྱིལ་འཁོར་ལྷ་ཡི་ཚོགས། །རིགས་བརྒྱའི་རྣལ་འབྱོར་བསྟན་བསྲུང་བཅས་རྣམས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །གཞི་དབྱིངས་འགྱུར་མེད་བདེ་གཤེགས་སྙིང་པོ་དང་། །ལམ་མཆོག་རྡོ་རྗེ་རྣལ་འབྱོར་ཡན་ལག་དྲུག །འབྲས་བུ་ཁྱབ་རྟག་གདོད་མའི་ཆོས་སྐུ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །འབྱུང་འདུས་སྒྱུ་མའི་ཚོགས་པ་ཞིག་པའི་ཚེ། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །རང་རིག་དོན་གྱི་སྣང་མཐའི་ཐུགས་ཀློང་དུ། །མི་ལྡོག་གཉུག་མའི་གཏན་སྲིད་ཟིན་པར་ཤོག །ཞེས་བརྗོད་པས་བླ་མའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་ཁ་ཏོག་སྣ་ཚོགས་པ་བྱུང་ནས་རྣམ་ཤེས་ཧཱུྃ་ཡིག་གི་རྣམ་པས་དྲངས་ཏེ་བླ་མའི་ཐུགས་ཀར་འཕོས་པར་བསམ་ལ། ཧིཀ་དང་ཕཊ་ཀྱི་སྒྲས་སྤར་བའོ།། ཕྱག་ཆེན་འཕོ་བ།༄༅། ཕྱག་རྒྱ་ཆེན་པོའི་འཕོ་བ་ནི། ཁྱབ་བདག་རྡོ་རྗེ་འཆང་ཆེན་ལ་གསོལ་བ་འདེབས། །ཏེ་ལོ་ཤེས་རབ་བཟང་པོ་ལ་གསོལ་བ་འདེབས། །ནཱ་རོ་ཡེ་ཤེས་དངོས་གྲུབ་ལ་གསོལ་བ་འདེབས། །མར་པ་ཆོས་ཀྱི་བློ་གྲོས་ལ་གསོལ་བ་འདེབས། །མི་ལ་བཞད་པ་རྡོ་རྗེ་ལ་གསོལ་བ་འདེབས། །དྭགས་པོ་ཟླ་འོད་གཞོན་ནུ་ལ་གསོལ་བ་འདེབས། །མི་མཆོག་དུས་གསུམ་མཁྱེན་པ་ལ་གསོལ་བ་འདེབས། །འབྲུག་པ་པདྨ་དཀར་པོ་ལ་གསོལ་བ་འདེབས། །ཕྱག་ཆེན་བརྒྱུད་པའི་བླ་མ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཡི་དམ་རྒྱུད་སྡེ་བཞི་དྲུག་ལ་གསོལ་བ་འདེབས། །མཁའ་སྤྱོད་རྡོ་རྗེ་ཕག་མོ་ལ་གསོལ་བ་འདེབས། །ཕྱག་དྲུག་ཡེ་ཤེས་མགོན་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །སྒྱུ་མའི་གྲོང་ཁྱེར་མི་རྟག་ཆུ་བུར་ལུས། །མི་གཙང་ལས་ཉོན་འཁྲུལ་བའི་གནས་ཁང་ནས། །རང་རིག་འོད་གསལ་སེམས་ཉིད་ཆོས་ཀྱི་སྐུ། །སྣང་མཐའ་ཡས་པའི་ཞིང་དུ་འཕོ་བར་ཤོག །འཕོ་བྱ་འཕོ་བྱེད་འཕོ་ཡུལ་ཀུན་རྫོབ་ཆོས། །ཡོད་མེད་ལ་སོགས་མཐའ་ལ་མི་གནས་པ། །སྐུ་བཞི་ཡེ་ཤེས་ལྔ་ཡི་བདག་ཉིད་ཅན། །དོན་དམ་ཆོས་ཉིད་འཕོ་བ་མངོན་གྱུར་ཤོག ཅེས་གོང་བཞིན་སྤར་རོ།། ཡུལ་དམ་པ་རྣམས་ལ་གསོལ་འདེབས་འཕོ་བ།༄༅། ཡུལ་དམ་པ་རྣམས་ལ་གསོལ་འདེབས་འཕོ་བ་ནི། ཨེ་མ་ཧོ། སྟོང་གསུམ་མི་མཇེད་ཞིང་གི་དཔལ་གྱུར་པའི། །འདྲེན་མཆོག་བསྐལ་བ་བཟང་པོའི་སངས་རྒྱས་སྟོང་། །ཕྱོགས་བཅུའི་སངས་རྒྱས་ལུང་རྟོགས་དམ་པའི་ཆོས། །ཐེག་གསུམ་དགེ་འདུན་བཅས་ལ་གསོལ་བ་འདེབས། །གཏད་རབས་བདུན་དང་རིགས་ཅན་དྲྭ་མ་ལྔ། །རིག་འཛིན་བརྒྱད་དང་གྲུབ་ཆེན་བརྒྱད་ཅུ་བཞི། །འཛམ་གླིང་མཛེས་པའི་རྒྱན་དྲུག་མཆོག་གཉིས་སོགས། །འཕགས་ཡུལ་པཎ་གྲུབ་རྣམས་ལ་གསོལ་བ་འདེབས། །ཆོས་རྒྱལ་མེས་དབོན་སྐ་ཅོག་ཞང་གསུམ་དང་། །རྗེ་འབངས་ཉེར་ལྔ་འདུལ་འཛིན་སད་མི་བདུན། །དགེ་སློང་མི་ལྔ་ལོ་ཙཱ་བརྒྱ་རྩ་སོགས། །སྔ་འགྱུར་མཁས་གྲུབ་རྣམས་ལ་གསོལ་བ་འདེབས། །གནུབས་དང་སོ་ཟུར་ལ་སོགས་བསྟན་འཛིན་དང་། །མཆོག་གཉིས་གླིང་པ་བརྒྱད་སོགས་ཟབ་གཏེར་བདག །རིན་ཆེན་བཟང་པོ་རོང་ཟོམ་ཆོས་བཟང་སོགས། །བསྟན་པའི་སྲོལ་འབྱེད་རྣམས་ལ་གསོལ་བ་འདེབས། །ཐང་སྟོང་རྒྱལ་པོ་པཎ་ཆེན་པདྨ་དབང་། །གནམ་ལྕགས་མེ་འབར་ཤེས་རབ་འོད་ཟེར་དང་། །ས་ཆེན་ཡབ་སྲས་བུ་དོལ་ཙོང་ཁ་པ། །བསྟན་འཛིན་བརྒྱུད་པར་བཅས་ལ་གསོལ་བ་འདེབས། །དམ་གཙང་བྱམས་གསུམ་ཀུན་བཟང་ཤེས་རབ་དང་། །བསྟན་པའི་རྒྱལ་མཚན་གཏེར་ཆེན་ཉི་མ་གྲགས། །ཆོས་ཀྱི་འབྱུང་གནས་མཆོག་སྤྲུལ་རྣམ་གསུམ་སོགས། སྐྱེས་ཆེན་རིམ་བྱོན་རྣམས་ལ་གསོལ་བ་འདེབས། །དེ་ལྟར་གསོལ་བཏབ་ནུས་པས་དམིགས་ཡུལ་འདི། །འཇིགས་རུང་བར་དོའི་འཕྲང་ལས་བསྒྲལ་དུ་གསོལ། །བཟོད་དཀའ་ངན་སོང་གནས་ནས་དྲང་དུ་གསོལ། །བདེ་ཆེན་ཞིང་དུ་འདྲེན་པར་བྱིན་གྱིས་རློབས། །ཅེས་ཧིཀ་དང་ཕཊ་ཀྱི་སྒྲ་བརྗོད་དོ།། བླ་མ་སངས་རྒྱས་དབྱེར་མེད་ལ་གསོལ་འདེབས་ཀྱི་འཕོ་བ།༄༅། བླ་མ་སངས་རྒྱས་དབྱེར་མེད་ལ་གསོལ་འདེབས་ཀྱི་འཕོ་བ་ནི། ཨེ་མ་ཧོ། གནས་མཆོག་དག་པ་བདེ་ཆེན་འཁོར་ལོ་ན། །བརྒྱུད་པ་དགུ་ལྡན་བླ་མ་རིན་པོ་ཆེ། །སྐུ་གསུམ་ཡོངས་འདུས་མགོན་པོ་འོད་དཔག་མེད། །གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས། །སྐྱབས་གནས་གཞན་ན་མེད་དོ་བླ་མ་རྗེ། །རེ་ས་གཞན་ན་མེད་དོ་ཐུགས་རྗེས་ཟུངས། །རིག་པ་རང་ངོ་འཕྲོད་པར་བྱིན་གྱིས་རློབས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །རིགས་དྲུག་སྐྱེ་སྒོ་ཆོད་པར་བྱིན་གྱིས་རློབས། །ཟབ་ལམ་འཕོ་བ་ཐེབས་པར་བྱིན་གྱིས་རློབས། །འཕོ་ཆེན་འཇའ་ལུས་འགྲུབ་པར་བྱིན་གྱིས་རློབས། །སྐུ་བཞིའི་གོ་འཕང་ཐོབ་པར་བྱིན་གྱིས་རློབས། །ཅེས་ལན་མང་མཐར། དེ་ལྟར་གདུང་ཤུགས་དྲག་པོས་གསོལ་བཏབ་མཐུས། །བཤུལ་རིང་འཆི་བའི་ལམ་ཞུགས་ཚེ་འདས་ཀྱི། །མི་གཙང་ལས་ཉོན་ཕུང་པོའི་མགྲོན་ཁང་ནས། །རྣམ་ཤེས་མགྲོན་པོ་ཁ་སྦྱོར་རླུང་གི་རྟར། །ཞོན་ནས་དྷུ་ཏིའི་ལམ་བརྒྱུད་ཚངས་བུག་སྒོར། །དཔའ་བོ་མཁའ་འགྲོའི་ཚོགས་ཀྱིས་མདུན་བསུས་ཤིང་། །མི་ལྡོག་ཧིཀ་གི་སྐྱེལ་མ་དང་འགྲོགས་ནས། །གཏན་བདེའི་ཡུལ་བཟང་བླ་མའི་དགོངས་ཀློང་དུ། །ཐུགས་ཡིད་དབྱེར་མེད་གདོད་མའི་རྒྱལ་ཐབས་ལ། །འགྱུར་མེད་གཉུག་མའི་གཏན་སྲིད་ཟིན་པར་གྱུར། །ཞེས་བསམ་ལ་དམིགས་པ་དང་བཅས་ཏེ་ཧིཀ་གིས་སྤར་བར་བྱའོ།། སརྦ་མངྒ་ལཾ།། སྐྱེས་བུ་དམ་པ་ལ་འཆི་བ་གསལ་འདེབས་ཚུལ།༄༅། སྐྱེས་བུ་དམ་པ་ལ་གསལ་འདེབས་ཚུལ་ནི། འོ་དམ་པ་གང་ཉིད་འཇིག་རྟེན་ཚེ་འདིའི་སྣང་བ་ལས་ནི་འདས། འཇིག་རྟེན་ཕྱི་མའི་སྣང་བ་མ་ཤར་བར། ད་ལྟ་འཆི་བ་དང་པོ་འོད་གསལ་ཆོས་ཀྱི་སྐུ་ཞེས་སྐྱེ་འགགས་གནས་གསུམ་དང་བྲལ་བའི་ཡེ་ཤེས་སྤྲོས་པའི་མཐའ་ལས་འདས་པ་ཞིག་ཤར་ནས་ཡོད་པ་དེ་གདོད་མ་གཞིའི་གནས་ལུགས་ཡིན་པས་དེ་རྟོགས་པས་རང་ངོ་ཤེས་པར་གྱིས་ལ་ཀ་དག་གདོད་མའི་གཞི་དབྱིངས་སུ་བཙན་ས་ཟུངས་དང་འཕོ་མེད་ཆོས་སྐུའི་རྒྱལ་ས་ཟིན་པ་ཡིན་ནོ།། གལ་ཏེ་དེ་ལས་ཡོལ་ནས་བར་དོ་ལྷུན་གྲུབ་ལོངས་སྐུའི་སྣང་བ་ཞེས་བྱ་བ་དེ་ཤར་ན་སྣང་བ་གང་སྣང་ཐམས་ཅད་འོད་ལྔའི་ཁ་ཏོག་ཏུ་སྣང་ཞིང་། ཕྱོགས་མཚམས་སྟེང་འོག་གང་དུ་བལྟས་ཚད་ཟ་འོག་གི་གུར་ཁྱིམ་བཀྲམ་པ་བཞིན་འཇའ་འོད་ཀྱི་རང་བཞིན། ཐིག་ལེ་དང་ཐིག་ཕྲན་གྱི་རྣམ་པ་ཞི་བ་དང་། ཁྲོ་བོའི་སྣང་བརྙན། སྒྲ་འོད་ཟེར་གསུམ་གྱི་སྣང་བ་སོགས་གང་ལྟར་སྣང་བ་དེ་དག་ཐམས་ཅད་ཆོས་ཉིད་བར་དོའི་སྣང་བ་ཡིན་པས་དེ་དག་གཞན་དུ་མི་སེམས་པར་རང་སྣང་དུ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་ཐབས་མཆོག་ཏུ་དྲན་པར་གྱིས་དང་། ཀ་དག་གི་རིག་གདངས་མ་ལྟ་བུ་དེའི་པང་དུ་ལྷུན་གྲུབ་ཀྱི་འོད་གདངས་བུ་ལྟ་བུ་དེ་ཐིམ་ཞིང་གྲོལ་ནས་དབྱིངས་རིག་མ་བུ་དབྱེར་མེད་དུ་འདྲེས་ཏེ་སངས་རྒྱས་པ་ཡིན་ནོ།། གལ་ཏེ་དེ་དག་བརྟན་པ་མ་ཐོབ་སྲིད་ན་རང་བཞིན་སྤྲུལ་པ་སྐུའི་ཞིང་ཞེས་མཁའ་སྤྱོད་དག་པའི་ཞིང་དུ་ཐུགས་ཀྱི་འདུན་པ་གཏད་དགོས་པ་ལགས་ཏེ། དེའི་ཐབས་ཀྱི་ཡན་ལག་ཏུ་བཀའ་དྲིན་གསུམ་ལྡན་གྱི་སྐྱབས་མགོན་བླ་མ་དམ་པ་རྣམས་ཡིད་ལ་སྒོམས་ཤིག ཡི་དམ་དང་ལྟ་བ་དྲན་པར་གྱིས་ཤིག ཐེག་པ་ཆེན་པོའི་སྨོན་འཇུག་གི་སེམས་བསྐྱེད་སྒོམས་ཤིག དེ་དག་གནད་དུ་འགྲོ་བའི་རྟེན་འབྲེལ་དུ་མ་བསྒོམ་པར་སངས་རྒྱས་པ། སྐད་ཅིག་གཅིག་གིས་བྱེ་བྲག་ཕྱེད་ཅིང་སྐད་ཅིག་གཅིག་གིས་རྫོགས་སངས་རྒྱས་པའི་ཆོས། ཟབ་ལམ་འཕོ་བའི་གདམས་པ་ཟབ་མོ་བསྒོམ་ནས་སྒྲ་ཇི་བཞིན་པར་ལས་ལ་སྦྱར་བའི་སྐབས་སུ་བབས་པ་ཡིན་པས་ཐོག་མར་སྐྱབས་ཡུལ་གསལ་གདབ་པའི་ཐུགས་འདུན་འདི་བཞིན་མཛད་འཚལ། མདུན་གྱི་ནམ་མཁར༴སོགས། འཕོ་བ་བསྡུས་པ་འབྲེལ་ཚད་མྱུར་གྲོལ།༄༅། ཟབ་ལམ་འཕོ་བའི་མན་ངག་ཉུང་ངུར་བསྡུས་པ་འབྲེལ་ཚད་མྱུར་གྲོལ་ཞེས་བྱ་བ་བཞུགས་སོ།། ༄༅། སྨོན་ལམ་མཐའ་ཡས་རྫོགས་པའི་འདྲེན་མཆོག་དངོས། །སྐུ་གསུམ་ཡོངས་འདུས་རྩ་བའི་བླ་མར་འདུད། །མ་བསྒོམ་སངས་རྒྱས་འཕོ་བའི་གདམས་པ་མཆོག །འབྲེལ་ཚད་མྱུར་གྲོལ་ཞེས་བྱར་བསྡུས་ཏེ་སྤེལ། དེ་ཡང་ཐོག་མར་ཐུགས་རྗེ་ཆེན་པོའི་བསྒོམ་བཟླས་སྔོན་དུ་འགྲོ་བས། བྱམས་པ་དང་སྙིང་རྗེ་ཆེན་པོ་ཟུང་དུ་འཇུག་པས། མདུན་གྱི་རྟེན་དེ་ཉིད་ཤུ་ནྱ་ཏས་བསངས། སྭ་བྷ་ཝས་སྦྱངས། མདུན་གྱི་རྟེན་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཟླ་བའི་གདན་ལ་ནྲྀ་ཡོངས་སུ་གྱུར་པ་ལས། ཚེ་ལས་འདས་པའམ་འདས་མ་གསོན་དུས་ཀྱི་རྣམ་པ་གཞོན་ནུའི་ཚུལ་ཅན་མཛེས་ཤིང་ཡིད་དུ་འོང་བ་གོས་དཀར་དྲི་མེད་གསོལ་ཞིང་དད་མོས་གུས་པ་དང་ལྡན་པ་གཅིག་ཏུ་གྱུར། བདག་ཉིད་འཕགས་པར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་གློག་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་ཨ་ཡིག་དཀར་པོའི་རྣམ་པར་བཀུགས་ནས་རྟེན་ལ་ཐིམ་པར་གྱུར། ན་མོ་དྲིན་ཆེན་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས་ཞི་ཁྲོ་རབ་འབྱམས། དཔའ་བོ་མཁའ་འགྲོ་དམ་ཅན་བསྲུང་མའི་ཚོགས་དང་བཅས་པ་རྣམས་ཀྱི་བདེན་པ་དང་། ཕྱོགས་བཅུ་དུས་གསུམ་གྱི་སངས་རྒྱས། ལུང་དང་རྟོགས་པའི་ཆོས། ཉན་ཐོས་རང་རྒྱལ་བྱང་ཆུབ་སེམས་དཔའི་དགེ་འདུན་ཏེ། བླ་ན་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་གྱི་བདེན་པ་དང་། བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདེན་པ་དང་། ཁྱད་པར་དུ་སྐུ་གསུམ་ཡོངས་འདུས་གུ་རུ་རིན་པོ་ཆེ་དང་གཉིས་སུ་མེད་པ་དཔལ་ལྡན་རྩ་བའི་བླ་མ་རིན་པོ་ཆེའི་བདེན་པ་དང་། ཐུགས་བསྐྱེད་དང་སྨོན་ལམ་རྒྱ་ཆེན་པོའི་སྟོབས་ཀྱིས། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པ་འདི་ཉིད་ཀྱི་རྣམ་པར་ཤེས་པ་འཁོར་བ་སྡུག་བསྔལ་གྱི་གནས་ཡུལ་གང་ན་ཡོད་ཀྱང་རྟེན་ཕུང་པོའམ་མཚན་བྱང་འདི་ལ་ཁུག་ཅིག ནྲྀ་ཨ་ཀརྴ་ཡ་ཛ་ཛཿ ལན་གྲངས་མང་དུ་བརྗོད་ནས། ཛཿཧཱུྃ་བཾ་ཧོ། ཞེས་རྟེན་དང་དབྱེར་མེད་དུ་གྱུར་ནས་དགའ་བ་དང་གུས་པ་དད་པའི་སེམས་ཀྱིས་བག་ཕེབས་བཞིན་དུ་གནས་པར་མོས་ལ། སྦྱངས་གཏོར་རཾ་ཡཾ་ཁཾ་གིས་བསངས། སྭ་བྷ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་དུ་ལན་ཆགས་བགེགས་ཀྱི་གཏོར་མ་འདོད་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར། ཨོཾ་ཨཱཿཧཱུྃ།གིས་བྱིན་གྱིས་བརླབས། ཨོཾ་སརྦ་བྷུ་ཏ་ཨ་ཀར་ཤ་ཡ་ཛ་ཛ། ལན་གསུམ། ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཥེ་བྷྱ༔སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་གྷྲི་ཧྞ་ཨེ་དཾ་བྷ་ལིང་ཏ་ཡེ་སྭཱ་ཧཱ། ཞེས་ལན་གསུམ་དང་། ཨོཾ་སུམ་བྷ་ནི་སུམ་བྷ་ནི་ཧཱུྃ། གྲིཧྞ་གྲྀཧྞ་ཧཱུྃ། གྲྀཧྞ་པ་ཡ་གྲྀཧྞ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝན། བིདྱཱ་རཱ་ཛ་ཧཱུྃ་ཕཊ། ལན་གསུམ་གྱི་མཐར། ཨོཾ་བཛྲ་ཀྲོ་ཏ་ཧྱཱ་གྷྲི་ཝ་ཧཱུྃ་ཕཊ། རང་ཉིད་སྐད་ཅིག་གི་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བྱིན་བསྐལ་མེ་ལྟར་འབར་བར་གྱུར། ཧཱུྃ་ཧྲཱིཿ སྟོང་ཉིད་དབྱིངས་ལས་རང་ཤར་བའི། །སྙིང་རྗེ་ཆེན་པོའི་སྐུར་བཞེངས་པ། །བྱང་ཆུབ་མཆོག་གི་ལྷ་ཆེན་པོ། །ཉོན་མོངས་བདུད་སྡེ་འདུལ་བའི་སྐུ། །དབང་ཆེན་འབར་བའི་ཆོ་འཕྲུལ་གྱིས། །ཐར་པའི་ལམ་ལ་འཚེ་བྱེད་བདུད། །ཟ་འདྲེ་སྲོག་གཅོད་རྡུལ་དུ་རློགས། །ན་མོ་རྩ་རྒྱུད་ཀྱི་བླ་མ་མཆོག་གསུམ་སྐུ་གསུམ་རྒྱལ་བ་རྒྱ་མཚོ་དཔའ་བོ་མཁའ་འགྲོ་དམ་ཅན་བསྲུང་མའི་ཚོགས་དང་བཅས་པའི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་ཆོས་ཉིད་འགྱུར་མེད་རྟེན་འབྱུང་བསླུ་མེད་ལྷག་བསམ་རྣམ་དག་དང་བཅས་པའི་བདེན་སྟོབས་ཀྱིས། ཚེ་འདས་འདི་ཉིད་གསོན་གྱི་དུས་སུ་ཚེ་སྲོག་དང་། གཤིན་གྱི་དུས་སུ་ཐར་ལམ་ལ་བར་དུ་གཅོད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དུ་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང། པི་ཤ་ཙ་ན་དང་། ཝ་ར་ཧི་དང་། ཀུན་ཏུ་གཏོགས་འདོད་ཀྱི་རིགས་དང་། གནོད་སྦྱིན་སྨྲ་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་ཏུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་ཁྲོ་བོ་དང་ཁྲོ་མོ་མཚོན་ཆ་དང་མེ་དཔུང་འབར་བའི་ཚོགས་སྤྲོས་པས་རྡུལ་དུ་བརླག་པར་འགྱུར་ཏ་རེ། དྲག་སྔགས་ཐུན་དང་བཅས་པས་བགེགས་བསྐྲད། ཨོཾ་བཛྲ་རཀྵ་རཀྵ་ཧཱུྃ། གིས་བསྲུང་འཁོར་བྱས་ནས། སྤྲོ་ན་འདོད་ཡོན་བསྔོས་མཐར། འོ་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པའམ་འདས་མ་ཆེ་གེ་མོ་ཁྱོད་ཤི་བ་ཡིན་ནོ། །འོ་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པའམ་འདས་མ་ཆེ་གེ་མོ་ཁྱོད་ཤི་ནས་ད་ལྟ་འཆི་ཁའི་བར་དོའམ་ཆོས་ཉིད་ཀྱི་བར་དོ་འམ་སྲིད་པ་བར་དོ་ན་གནས་པའི་སྐབས་ཡིན་ནོ། །འོ་འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པའམ་འདས་མ་ཁྱོད་ལ་འཆི་བ་མི་རྟག་པའི་འཇིགས་པ་ཆེན་པོ་དེ་ཉིད་གློ་བུར་དུ་བྱུང་བ་ལ་སྔང་སྐྲག་དང་མྱ་ངན་མ་བྱེད་པར་སེམས་ཡེང་འཁྲུལ་སྤོངས་ལ་ལེགས་པར་ཉོན་ཅིག དེ་ཡང་འཆི་བ་ཟེར་བའི་སྡུག་བསྔལ་ཆེན་པོ་གཞན་ལ་མེད་པ་ཞིག་ཁྱོད་རང་གཅིག་པོ་ལ་བྱུང་བ་ནི་མ་ཡིན་ཏེ། གཟུང་འཛིན་སྣོད་བཅུད་འདི་དག་ཐམས་ཅད་མི་རྟག་ཅིང་མི་བརྟན་པ་མདང་སུམ་གྱི་རྨི་ལམ་ལྟ་བུ་ཤ་སྟག་ཡིན་པའི་ཚུལ་ནི། ཐེག་པ་ཆེན་པོའི་མདོ་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་འདྲ་ཞིང་། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་གསུངས་པ་ལྟར་ཕྱི་སྣོད་ཀྱི་འཇིག་རྟེན་མི་རྟག་སྟེ། ད་ལྟའི་འགྲོ་བ་ཐམས་ཅད་ཀྱི་རྟེན་གཞི་ས་ཆེན་པོ་རི་རབ་གླིང་བཞི་ཁོར་ཡུག་དང་བཅས་པ་ཡང་མཐར་མེ་བདུན་གྱིས་བསྲེགས་པའི་ཐལ་བ་ཆུས་བཤལ། རླུང་གིས་གཏོར་ནས་ནམ་མཁའ་སྟོང་པར་འགྱུར་བའི་དུས་འབྱུང་བ་ཡིན། ནང་བཅུད་ཀྱི་སེམས་ཅན་ཡང་མི་རྟག་སྟེ། ཁྱོད་ཉིད་གསོན་དུས་སུ་ཡང་ཡུལ་ཁམས་འདིའི་འགྲོ་བ་མཆོག་དམན་བར་གསུམ་ཅི་ཙམ་ཞིག་ཤི་བ་དེ་བཞིན་དུ། ས་སྟེང་འདི་ན་གནས་པའི་འགྲོ་བ་སེམས་ཅན་སྲོག་ཆགས་ཤིང་དབུགས་གནས་ཚད་ཐམས་ཅད་ལོ་བརྒྱ་ཚུན་ཆད་ནས་གཅིག་ཀྱང་མ་ལུས་པར་ཤི་ནས་འཇིག་རྟེན་ཕྱི་མར་འགྲོ་བར་འགྱུར་ངེས་པ་ཡིན། སྐྱེས་བུ་དམ་པ་ཡང་མི་རྟག་སྟེ། མཉམ་མེད་ཐུབ་པའི་དབང་པོ་དང་། རྒྱལ་དབང་པདྨ་འབྱུང་གནས། འཕགས་ཡུལ་མཛེས་པར་བྱེད་པའི་རྒྱན་དྲུག་མཆོག་གཉིས་དང་། གྲུབ་ཆེན་བརྒྱད་ཅུ། བོད་ཀྱི་ཆོས་རྒྱལ་མེས་དབོན་དང་རྗེ་འབངས་ཉེར་ལྔ་སོགས་དང་། གཞན་ཡང་གསར་རྙིང་གི་སྐྱེས་ཆེན་ཅི་ཙམ་ཞིག་བྱོན་པ་རྣམས་ད་ལྟ་སྐུ་བརྙན་དང་རྣམ་ཐར་ཙམ་ལས་མི་སྣང་ཞིང་། ད་ལྟ་བཞུགས་པ་རྣམས་ཀྱང་ཚུལ་དེ་ལས་མ་འདས་པ་ཡིན། སྐྱེ་དགུའི་བདག་པོ་ཡང་མི་རྟག་སྟེ། མང་པོས་བཀུར་བའི་རྒྱལ་པོ་དང་། རྩིབས་ཀྱི་མུ་ཁྱུད། སྤྱི་བོས་སྐྱེས་སོགས་གཏམ་རྒྱུད་ཙམ་ལས་མེད། དེ་བཞིན་དུ་ད་ལྟ་མཐོ་ཞིང་དབང་ཆེ་བའི་རྒྱལ་པོ་དང་རྒྱལ་ཕྲན་བློན་པོ་སོགས་ཀྱང་མིང་ཙམ་ཡང་མེད་པར་འགྱུར་བ་ཡིན། དེ་བཞིན་དུ་དུས་ཚོད་ཀྱི་སྔ་ཕྱི། ཞག་གི་ཉིན་མཚན། ཟླ་བའི་འཕེལ་འགྲིབ། ལོ་ཡི་དུས་བཞིའི་འགྱུར་ལྡོག འབྱུང་བའི་སྙོམ་མིན་སོགས་ཀྱིས། སྔོན་བསྐལ་བ་རྫོགས་ལྡན། དེ་ནས་གསུམ་ལྡན་དང་གཉིས་ལྡན། ད་ལྟ་རྩོད་ལྡན་སོགས་སུ་འགྱུར་བ་དང་། མི་གཅིག་ཁོ་ནའི་ན་ཚོད་ཀྱང་མངལ་ནས་སྐྱེས་པ། དར་ལ་བབ་པ། རྒས་ཤིང་འཁོག་པ། ན་ཞིང་ཤི་བ་སོགས་སུ་འགྱུར་བས་མཚོན། སྣང་སྲིད་འཁོར་བའི་ཆོས་ཐམས་ཅད་སྐད་ཅིག་སྐད་ཅིག་ལ་མི་རྟག་པར་འགྱུར་བ་ཡིན་ཏེ། སྐྱེས་པའི་མཐའ་འཆི་བ་དང་། འདུས་པའི་མཐའ་འབྲལ་བ། བསོགས་པའི་མཐའ་འཛད་པ། མཐོན་པོའི་མཐའ་ལྟུང་བ་རྣམས་ནི་འདུས་བྱས་ཐམས་ཅད་ཀྱི་རང་མཚང་ཡིན་པས་ཤེས་པར་གྱིས་ལ། མ་འཇིགས་མ་སྔངས་མ་སྐྲག་པར། ཁྱོད་རང་ཆོས་དར་བའི་ཡུལ་དུ་སྐྱེས་ནས་སངས་རྒྱས་ཀྱི་མཚན་ཐོས་ཤིང་དམ་པའི་ཆོས་དང་མཇལ། དཀོན་མཆོག་རིན་པོ་ཆེ་རྣམ་པ་གསུམ་ལ་དད་པ་ཐོབ། བླ་མ་དགེ་བའི་བཤེས་གཉེན་རྣམས་དང་འཕགས་པའི་གང་ཟག་རྣམས་ཀྱིས་རྗེས་སུ་བཟུང་། རྒྱལ་བའི་བསྟན་པ་རིན་པོ་ཆེ་མ་ནུབ་པས་རྣམ་གྲོལ་བྱང་ཆུབ་ཐོབ་པའི་རྒྱུ་རྐྱེན་ལེགས་པར་འཛོམས་པའི་དུས་འདིར་འཆི་འཕོ་བ་ནི་བསྐལ་བ་ཤིན་ཏུ་བཟང་ཞིང་བསོད་ནམས་ཤིན་ཏུ་ཆེ་བ་ཡིན་པས་དགའ་བ་དང་སྤྲོ་བའི་ངང་ནས་བདག་གིས་ད་རེས་ཀྱི་འཆི་བ་འདི་ལ་བརྟེན་ནས་རང་གཞན་ཀུན་ལ་ཐར་ལམ་ཐོབ་པ་ཞིག་ཨེ་འོང་བལྟ་དགོས་སྙམ་པས། བདག་གིས་ཇི་ལྟར་བསྟན་པའི་ལམ་ལ་ཐེ་ཚོམ་མེད་པར་འཇུག་པར་གྱིས་དང་། བདག་གིས་ཀྱང་ཁྱོད་རང་གི་རྒྱུད་དག་པར་བྱ་བའི་ཕྱིར་སྙིང་རྗེ་ཆེན་པོའི་ངང་ནས་བླ་མ་སངས་རྒྱས་རིན་པོ་ཆེ་ལ་སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ། ཡན་ལག་བདུན་གྱིས་ཚོགས་བསགས་པ། ཚད་མེད་པ་བཞི་བསྒོམ་པ། རྒྱལ་བའི་སྲས་ཀྱི་བསླབ་སྡོམ་བཟུང་བ་རྣམས་རིམ་པར་བགྱིད་པ་ཡིན་པས། ཁྱོད་ཀྱང་སེམས་གཞན་དུ་མ་ཡེང་བར་དད་པ་དང་མོས་དྲག་པོས། མདུན་གྱི་ནམ་མཁར་ནུབ་ཕྱོགས་བདེ་བ་ཅན་གྱི་ཞིང་ཁམས་ཞེས་བྱ་བ་གྲངས་མེད་པའི་སངས་རྒྱས་ཀྱིས་བསྐལ་པར་བརྗོད་མི་ནུས་པའི་དཔལ་དང་ཡོན་ཏན་གྱི་བཀོད་པ་ཕུན་སུམ་ཚོགས་པས་བརྒྱན་པའི་རྟེན་རྣམ་པར་དག་པའི་དབུས་སུ། བརྟེན་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ལ་འཁོར་ཉེ་བའི་སྲས་བརྒྱད་དང་། བྱང་ཆུབ་སེམས་དཔའི་དགེ་སློང་བྱེ་བ་འབུམ་སོགས་དང་། ཕྱོགས་བཅུའི་རྒྱལ་བ་སྲས་དང་བཅས་པས་བསྐོར་བ། ནམ་མཁའ་ལ་འཇའ་ཚོན་ལྟར་གསལ་བར་མོས་པ་ནི་རྟེན་གྱི་སྟོབས་དང་། ཚེ་རབས་ཐོག་མེད་ནས་སྡིག་པ་མི་དགེ་བའི་ལས་བྱས་ཤིང་བསགས་པ་རྣམས་ལ་འགྱོད་སེམས་བསྐྱེད་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབས་ཀྱང་མི་བགྱིད་སྙམ་དུ་དམ་བཅའ་བ་སོར་ཆུད་པའི་སྟོབས། སྐྱབས་སུ་འགྲོ་བ་སོགས་རྒྱུད་སྦྱངས་བའི་རིམ་པ་རྣམས་ལ་ནན་ཏན་ཏུ་བྱ་བ་ནི་གཉེན་པོ་ཀུན་སྤྱོད་ཀྱི་སྟོབས་ཏེ་སྟོབས་བཞི་ཚངས་བའི་སྒོ་ནས་ལྷ་དང་བླ་མ་དབྱེར་མེད་པར་མངོན་སུམ་དུ་བཞུགས་སྙམ་པས་དད་མོས་གདུང་ཤུགས་དྲག་པོས་ཚིག་རྗེས་སུ་དོན་དྲན་བཞིན་བདག་གི་རྗེས་སུ་སློབ་པར་གྱིས་ཤིག སྐྱབས་འགྲོ་ནི། ན་མོ། དེང་ནས་བཟུང་སྟེ་བླ་མེད་བྱང་ཆུབ་བར། །བདག་སོགས་རིགས་དྲུག་འཁོར་བའི་སེམས་ཅན་རྣམས། །མགོན་པོ་འོད་དཔག་མེད་པའི་ལྷ་ཚོགས་ལ། །ལུས་ངག་ཡིད་གསུམ་གུས་པས་སྐྱབས་སུ་མཆི།། ལན་གསུམ། སེམས་བསྐྱེད་ནི། ཧོ། ཐོག་མཐའ་མེད་པ་རིགས་དྲུག་རྒྱུད་ལྔའི་འགྲོ། །འོད་དཔག་མེད་པའི་གོ་འཕང་ལ་འགོད་ཕྱིར། །སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་ལམ་འཕོ་བའི་རྣལ་འབྱོར་བསྒོམ་པར་བྱ།། ལན་གསུམ། ཚོགས་བསགས་ནི། ན་མོ། བདག་ལུས་རབ་འབྱམས་རྒྱ་མཚོའི་རྡུལ་སྙེད་དུ། །སྤྲུལ་ནས་འཆི་མེད་མགོན་པོར་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་དཔག་མེད་ཀུན། །བདེ་ཆེན་ཞིང་གི་ལྷ་ཚོགས་རྣམས་ལ་འབུལ། །ལུས་ངག་ཡིད་གསུམ་སྡིག་སྒྲིབ་ཉེས་ལྟུང་ཀུན། །གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས། །བདེན་གཉིས་ཀྱིས་བསྡུས་དགེ་ཚོགས་ཇི་སྙེད་ལ། །སྙིང་ནས་དགའ་བས་རྗེས་སུ་ཡི་རང་ངོ་། །གདུལ་བྱའི་དབང་པོ་སྐལ་བར་འཚམས་པ་བཞིན། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །རྒྱལ་བ་སྲས་བཅས་མྱ་ངན་མི་འདའ་བར། །སྲིད་མཐའི་བར་དུ་བཞུགས་པར་གསོལ་བ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །འགྲོ་རྣམས་བདེ་ཆེན་ཞིང་ཁམས་ཐོབ་ཕྱིར་བསྔོ།། གསུམ་མམ་གཅིག ཚད་མེད་བཞི་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས། གྱུར་ཅིག ལན་གསུམ། བྱང་སྡོམ་ནི། བྱང་ཆུབ་སྙིང་བོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། སོགས་ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། ལན་གསུམ། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་ཏོ། །བདག་གིས་དེ་རིང་སྐྱོབས་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། ། ལྷ་དང་ལྷ་མིན་ལ་སོགས་དགའ་བར་གྱིས། ཞེས་བརྗོད་དོ། དེ་ནས་མཉམ་བཞག་གི་ངང་ནས་རླུང་ནང་དུ་ལྡོག་པ་དང་ཆབ་གཅིག་པར། ཚེ་འདས་ཀྱི་སྡིག་སྒྲིབ་ཉེས་ལྟུང་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བསྡུས་པ་བཞིན་དུ་རང་གི་སྒོ་གསུམ་ལ་ཐིམ་པས། སྒོ་གསུམ་གྱི་ཉེས་ཚོགས་ཐམས་ཅད་ཤེལ་གོང་ཕྱིས་པ་ལྟར་དག་པར་བསམ། རླུང་ཕྱིར་འཕོས་པའི་ཚེ། བདག་གི་དུས་གསུམ་གྱི་དགེ་ཚོགས་བདེ་སྐྱིད་གང་ཡོད་རྣམས་དམིགས་ཡུལ་ལ་ཐིམ་པས་བདེ་བ་དང་ལྡན་སྡུག་བསྔལ་དང་བྲལ་བར་བསམ་མོ། དེ་ནས་འཕོ་བ་དངོས་ལ། ཐོག་མར་མཚན་བརྗོད་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཀུན་ཏུ་བཟང་པོ་རིགས་བརྒྱ་ཞི་ཁྲོའི་ལྷ་ཚོགས་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་རིག་པ་རྣམ་པར་སྣང་མཛད་རིགས་ལྔ་གངས་ཆེན་མཚོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་འཕགས་དྲན་པ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱི་ཕུད་སྟོང་གི་འཇིག་རྟེན་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་སྟོང་གི་ཡེ་སྲིད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་སྟོང་གི་རྒྱལ་བ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲྭ་བ་མགོན་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་སྟོང་གི་མུ་ཁྱུད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲུག་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འཇམ་དཔལ་འཇིགས་སྐྱོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་རོལ་བ་རྣམ་པར་བརྩེ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་དཔའ་བོ་སྟོབས་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དྲང་སྲོང་ཁྲོས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་བརྩེ་བས་རོལ་པའི་བློ་གྲོས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གསེར་འོད་དམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འོད་སྲུང་བགྲེས་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་མངོན་རྫོགས་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དོན་ཐམས་ཅད་གྲུབ་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པརཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཡོན་ཏན་ཐམས་ཅད་འབྱུང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་སེམས་དཔའ་མི་བསྐྱོད་མི་འཁྲུགས་མི་བསྒུལ་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྣང་མཐའ་ཡས་ཚེ་དང་ཡེ་ཤེས་དཔག་ཏུ་མེད་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་སེལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང་། ཁྱད་པར་དམིགས་ཡུལ་ཚེ་ལས་འདས་པའམ་འདས་མ་འདི་ཉིད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་སྦར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེའི་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་གྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲོད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབས་པའི་ལྷ་དང་ལྷ་མོར་སྟོན་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་བར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། ཞེས་བརྗོད་ལ། དེ་དང་འབྲེལ་བར་ཟབ་ལམ་འཕོ་བའི་ལོ་རྒྱུས་ཅུང་ཟད་བརྗོད་པ་ནི། འོ། འཇིག་རྟེན་འདི་ནས་ཕ་རོལ་དུ་ཚེ་དུས་ལས་འདས་པའམ་འདས་མ་ཆེ་གེ་མོ་ཁྱོད་ལ་ད་ནི་མ་བསྒོམ་སངས་རྒྱས་ཆོས་དྲུག་གི་ནང་ཚན། སངས་རྒྱས་ལག་འཆང་གི་གདམས་པ་ལེ་ལོ་ཅན་འཆི་ཁར་གྲོལ་ཞིང་སྡིག་པོ་ཆེ་བཙན་ཐབས་སུ་འཚང་རྒྱ་བའི་གདམས་ངག སྟེང་སྒོ་རྣམ་པར་གྲོལ་བའི་ལམ་ཟབ་མོ། མྱུར་ལམ་འཕོ་བའི་ཆོས་སྒོ་ཕྱེས་ནས། ཁྱོད་བདེ་ཆེན་དག་པའི་ཞིང་ཁམས་སུ་གནས་སྤར་བའི་དུས་ལ་བབས་པ་ཡིན་པས་དགའ་བ་དང་སྤྲོ་བའི་སེམས་བསྐྱེད་ལ་མ་ཡེངས་བར་ཉོན་ལ་ཡིད་ལ་ཟུངས་ཤིག དེ་ལ་འཕོ་བ་དགོས་པའི་རྒྱུ་མཚན། གང་དུ་འཕོ་བའི་ལམ། མ་འཕོས་པའི་སྐྱོན། འཕོ་བ་དངོས་ཀྱི་ཁྱད་པར་བཤད་པ་དང་བཞི་ལས། དང་པོ་རྒྱུ་མཚན་ནི། ཨོ་རྒྱན་གྱི་སློབ་དཔོན་ཆེན་པོས། སྒོ་དགུ་འཁོར་བའི་སྐར་ཁུང་ཅན། །སྒོ་གཅིག་ཐར་པ་བྱང་ཆུབ་ལམ། །སྒོ་དགུ་བཀག་ནས་སྒོ་གཅིག་དབྱེ། །རྣམ་པར་ཤེས་པ་དེར་འཕོས་ན། །འགྲོ་དྲུག་གནས་ནས་རྒྱང་གིས་འཕགས། །མཆོག་གི་དངོས་གྲུབ་ཐོབ་པར་འགྱུར། །ཞེས་གསུངས་སོ། །གཉིས་པ་ལམ་ནི། མཁའ་འགྲོ་མ་ཀུན་ཏུ་རྟོགས་པའི་རྒྱུད་ལས། རྣམ་ཤེས་རླུང་ལ་ཞོན་ནས་ནི། །སྟེང་གི་ལམ་ལ་འཕོས་གྱུར་ན། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བ་མང་། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་། རྒྱུད་རྡོ་རྗེའི་གདན་བཞི་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་གོས་པར་མི་འགྱུར་རོ། །ཞེས་དང་། ཉེས་པ་ཀུན་གྱིས་གོས་པ་ནི། །འཕོ་བའི་སྦྱོར་བ་སྦྱར་བས་གྲོལ། །སྡིག་པས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། །ཞེས་སོགས་གསུངས་སོ། །གསུམ་པ་མ་འཕོས་པའི་སྐྱོན་ནི། རྣམ་ཤེས་རླུང་ལ་རྟ་བྱས་ནས། །འོག་གི་ལམ་ལ་ཕྱིན་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་གནས་སུ་ལྟུང་བ་མང་། །ཞེས་སོ། །བཞི་པ་ཁྱད་པར་བརྗོད་པ་ནི། ཕྱི་འདུས་བྱས་རྫས་ཀྱི་འཕོ་བ། ནང་བསྐྱེད་རིམ་གསལ་འདེབས་ཀྱི་འཕོ་བ། །གསང་བ་རླུང་རིག་ཁ་སྦྱོར་ལ་བརྟེན་ནས་འཕོ་བ། དེ་ཁོ་ན་ཉིད་ཆོས་ཉིད་དོན་གྱི་འཕོ་བ། ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། །སྤྲུལ་སྐུ་ཚད་མེད་སྙིང་རྗེའི་འཕོ་བ་སོགས་བཀའ་གཏེར་དག་སྣང་ཀུན་ནས་མང་དུ་གསུངས་ཀྱང་། ད་ལམ་འདིར་ནི་ཆོས་རྒྱལ་ཁྲི་སྲོང་ལྡེའུ་བཙན་གྱི་བློན་པོ་ཉི་མ་ཞེས་བྱ་བས། མཚན་མོ་རང་གི་ཁྱིམ་དུ་མེ་ཤོར་ནས། མཆོད་གནས་དང་ཕ་མ། བྲན་འཁོར་དང་རྟ་ཕྱུག ནོར་རྫས་དང་ལོངས་སྤྱོད་ཐམས་ཅད་ལྷག་མེད་དུ་ཚིག་ནས་བློན་པོ་བཟོད་བླག་མེད་པའི་སྡུག་བསྔལ་གྱིས་ནོན་ཚེ། རྒྱལ་པོས་སློབ་དཔོན་ཆེན་པོ་ལ་དེ་ཚུལ་ཞིབ་ཏུ་གསོལ་ཞིང་སྡུག་བསྔལ་ལས་གྲོལ་བར་གསོལ་བ་བཏབ་པས། སློབ་དཔོན་ཆེན་པོ་སྐད་ཅིག་ཉིད་ལ་འོད་དཔག་མེད་པའི་དྲུང་དུ་ཕྱིན་ནས་ཞུས་ཏེ། ཟབ་ལམ་འཕོ་བའི་གདམས་པ་འདི། བློན་པོ་ཁོ་ན་ལས་གཞན་ལ་མི་སྤེལ་བའི་བཀའ་རྒྱས་བཏབ་ཏེ་གནང་བ་བཞིན། བློན་པོས་གསེར་དངུལ་ཉི་ཟླའི་རྣམ་པ་སོགས་ཕུལ་ནས་ཞུས་ཤིང་ཉམས་སུ་བླངས་བས། ཞག་གསུམ་ནས་མྱ་ངན་སངས། ཞག་ལྔ་ནས་ཚེ་འདས་རྣམས་ཐར་ལམ་ཐོབ་པའི་རྟགས་ཁྱད་པར་ཅན་བྱུང་ངོ་། །དེ་ནས་ཏ་ལའི་ལོ་མར་གུ་རུའི་སྐུ་མཚལ་གྱིས་བྲིས་ནས་མཚོ་རྒྱལ་གྱི་དབུ་སྐྲས་བཅིངས་ཏེ། ཆུ་དར་སྔོན་པོས་དྲིལ་ནས་རིན་པོ་ཆེ་སྣ་ལྔའི་སྒྲོམ་དུ་བཅུག་ཏེ་མཚོ་ནག་པོ་མཎྚལ་འདྲ་བར་གཏེར་དུ་སྦས་པ། ཕྱིས་རྟེན་འབྲེལ་དུས་ལ་བབས་ཚེ་ཉི་ཟླ་སངས་རྒྱས་ཀྱིས་གཏེར་ནས་གདན་དྲངས་པའི་ཟབ་ལམ་འཕོ་བའི་གདམས་པ་འཇག་ཚུགས་མ་ཞེས་ནང་བསྐྱེད་རིམ་གསལ་འདེབས་ཀྱི་འཕོ་བ་འདི་ཉིད་ཉམས་སུ་ལེན་པ་ལ། འཕོ་བྱེད་ངེད་ཅག་གིས་སྟོང་ཉིད་སྙིང་རྗེ་ཟུང་འཇུག་དང་ལྡན་པའི་ངང་ནས་ཟབ་ལམ་འཕོ་བའི་གདམས་པ་འདི་ཉིད་འབོགས་པས། འཕོ་བྱ་ཁྱོད་རང་གི་རྣམ་ཤེས་བདེ་སྡུག་སྣ་ཚོགས་པའི་འཆར་གཞི་སྐད་ཅིག་ཀྱང་སྡོད་དབང་མེད་པ་འདི་ཉིད། འཕོ་ཡུལ་ནུབ་ཕྱོགས་བདེ་བ་ཅན་གྱི་ཞིང་གི་གཙོ་བོ་སངས་རྒྱས་འོད་དཔག་མེད་ཀྱི་ཐུགས་ཀར་འདུན་པ་རྩེ་གཅིག་ཏུ་གཏད་དེ་འཕོ་དགོས་པ་ཡིན་པས། ཁྱོད་ཀྱིས་ཚེ་འདིར་བདག་ཏུ་བཟུང་བའི་ས་ཆ། གནས་མལ་ཁང་ཁྱིམ། ཉེ་འབྲེལ་འཁོར་འབངས། ལུས་དང་ལོངས་སྤྱོད་ཐམས་ཅད་ལ་ཞེན་ཆགས་རྦད་ཀྱིས་ཆོད་ལ། བླ་མ་དང་མགོན་པོ་འོད་དཔག་ཏུ་མེད་པ་ལ་ཕྱག་རྟེན་མཎྚལ་གྱི་ཚུལ་དུ་ཕུལ་ནས། ལུས་འདི་ཉིད་གཞན་ལ་གཡར་པོའི་གནས་ཁང་ལྟ་བུའི་འདུ་ཤེས། རྣམ་པར་ཤེས་པ་ད་ལྟ་འགྲོ་རྒྱུའི་མགྲོན་པོ་ལྟ་བུའི་འདུ་ཤེས། རླུང་ནི་རྟ་གླང་ལྟ་བུ་ཞོན་པའི་འདུ་ཤེས། རྩ་དབུ་མ་ལ་འགྲོ་བའི་ལམ་གྱི་འདུ་ཤེས། སྤྱི་གཙུག་ཚངས་བུག་ནི་སྒོ་ཡི་འདུ་ཤེས། ཧིཀ་ནི་སྐྱེལ་མའི་འདུ་ཤེས། ཞིང་མཆོག་བདེ་བ་ཅན་ལ་རང་ཡུལ་གྱི་འདུ་ཤེས། དེར་བཞུགས་པའི་འཁོར་ཚོགས་རྣམས་ལ་བསུ་མའི་འདུ་ཤེས་རྣམས་བསྒོམ་ལ། ཚོང་པ་རང་ཁྱིམ་དུ་འགྲོ་བ་ལྟར་དགའ་སྤྲོ་དང་ལྡན་པས་ཡིད་གཞན་དུ་མ་ཡེང་བར་དམིགས་པ་འདི་བཞིན་དུ་མཛོད་ཅིག ཁྱོད་རང་གི་ལུས་འདི་ཉིད་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་གསལ་གྲི་ཐོད་ཅན། གཅེར་མོ་གཞོན་ཚུལ་རུས་པའི་རྒྱན་གྱིས་མཛེས་ཤིང་བཞེངས་སྟབས་ཀྱིས་སྤྱན་གསུམ་ནམ་མཁར་གཟིགས་པ། དྭངས་གསལ་འོད་ཀྱི་སྐུ་ཕྱི་བལྟས་ནང་གསལ་དུ་བསྒོམ་པའི་མིག་དང་རྣ་བ་ལྟེ་བ་དཔྲལ་བ་མཚོག་མ་ཁ་འོག་སྒོ་གཉིས་ཏེ་ངན་འགྲོའི་སྒོ་དགུ་པོ་ཧཱུྃ་དམར་པོ་རེ་རེས་བཀག་པའི་མོས་པ་མཛོད། བྱས་ལ་ཧཱུྃ་དགུ་བརྗོད། ལུས་ཀྱི་དབུས་དྲང་པོར་རྩ་དབུ་མ་སྦ་ལྕགས་འབྲིང་པོ་ཙམ། ཁྲག་དང་ཆུ་སེར་གྱིས་མ་གོས་པ་སྲབ་ལ་དྭངས་ཤིང་། གསལ་ལ་དྭངས་པ་སྟེ་མཚན་ཉིད་བཞི་དང་ལྡན་པ། ཡར་སྣེ་ཚངས་བུག་ཏུ་ཁ་ཧར་རེ་ཕྱེས་པ། མར་སྣ་ལྟེ་འོག་ཏུ་འགགས་པའི་སྙིང་གའི་ཐད་དུ། རླུང་གི་དཀྱིལ་འཁོར་གཡོ་བས་དཔག་ལ་ཁད་པའི་སྟེང་དུ། ཁྱོད་རང་གི་རྣམ་ཤེས་འོད་ཀྱི་ཐིག་ལེ་དཀར་ལ་དམར་བ། བྱ་མ་སར་གྱི་སྒོ་ང་ལྟ་བུ། གསལ་ལ་འཚེར་བ་སྣུམ་ལ་འདྲིལ་བ། འཕར་ལམ་ལམ་བྱེད་པ་ཞིག་གསལ་ཐོབ་ལ། ཚངས་བུག་དཀར་སང་ངེ་ཡོད་པའི་གྲུ་གང་ཙམ་གྱི་སྟེང་གི་ནམ་མཁར་པདྨ་དང་ཉི་ཟླ་བརྩེགས་པའི་གདན་ལ། སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མེད་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་གསལ་པདྨ་རཱ་གའི་ལྷུན་པོ་ལ་ཉི་མ་འབུམ་གྱི་འོད་ཕོག་པ་ལྟ་བུ། ཆོས་གོས་རྣམ་གསུམ་གསོལ་ཞིང་། མཉམ་བཞག་གིས་ལྷུང་བཟེད་བདུད་རྩིའི་གང་བ་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་མཚན་བཟང་དང་དཔེ་བྱད་ཀྱིས་མཛེས་པའི་མཐར། ཟབ་ལམ་འཕོ་བ་བརྒྱུད་པའི་བླ་མ་རྣམས་དང་། ཕྱོགས་བཅུའི་རྒྱལ་བ་སྲས་དང་བཅས་པས་བསྐོར་ནས། མཐོང་ཐོས་དྲན་རེག་གི་འགྲོ་བ་ཐམས་ཅད་འཁོར་བའི་སྡུག་བསྔལ་ལས་སྒྲོལ་ཕྱིར་བཞུགས་པ་ཐམས་ཅད་ཀྱང་། དམིགས་ཡུལ་ཁྱོད་རང་ལ་བརྩེ་བའི་ཐུགས་ཀྱིས་དགོངས། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་ཏེ། ཁྱོད་རང་བདེ་ཆེན་དག་པའི་ཞིང་དུ་འདྲེན་པའི་དེད་དཔོན་དུ་བྱོན་ཡོད་པར་བསྒོམ་ལ། ཐལ་མོ་སྦྱར་དེ་ཁ་ཙམ་མིན་པར་ཁྱེད་ཤེས་ཀྱི་དད་པ་དང་མོས་གུས་སྙིང་དཀྱིལ་ནས་བཟོད་མེད་དུ་འབར་ཞིང་དམིགས་རིམ་དང་གསོལ་འདེབས་འདི་དག་བྱེད་པའི་མོས་པ་མཛོད། ཅེས་བརྗོད་ལ། དད་པ་དང་སྙིང་རྗེ་ཤུགས་བསྐྱེད་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། ཞེས་བརྒྱ་རྩ་བརྒྱད་སོགས་སྐབས་དང་བསྟུན། མཐར་འཕོ་བྱ་དང་འཕོ་བྱེད་དབྱེར་མེད་དུ་མོས་ལ་སྙན་པའི་དབྱངས་ཀྱིས། འཕོ་བ་འཇག་ཚུགས་མའི་གསོལ་འདེབས་རྒྱས་པ་བྱ་བ་ནི། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། དེ་བཞིན་དུ་ཐོག་མཐའ་རྣམས་འདྲ་བར་སྦྱར་ལ། གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །ཟབ་ལམ༴སོགས། མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །འཇིགས་མེད་ཆོས་དབྱིངས་འོད་གསལ་ལ་གསོལ་བ་འདེབས། །རྒྱལ་སྲས་གཞན་ཕན་མཐའ་ཡས་ལ་གསོལ་བ་འདེབས། །མཁན་ཆེན་པདྨ་བཛྲ་ལ་གསོལ་བ་འདེབས། །ཀུན་བཟང་ཐེག་མཆོག་རྡོ་རྗེ་ལ་གསོལ་བ་འདེབས། །འགྲོ་མགོན་ལུང་རིག་གླིང་པ་ལ་གསོལ་བ་འདེབས། །འགྱུར་མེད་བློ་གྲོས་མཐའ་ཡས་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། ཁྱོད་རང་གི་སྙིང་གི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ཡར་བ་ལྟར་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་པར་གྱུར་བར་མོས་ལ། ཧྲཱིཿལྔ་ཚར་དང་ཧིཀ་བདུན་གྱིས་སྤར་རོ།། དེ་ནས་གསོལ་འདེབས་འབྲིང་པོ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །པདྨ་དམ་ཆོས་འོད་ཟེར་ལ་གསོལ་བ་འདེབས། །འཇིགས་མེད་ཆོས་དབྱིངས་འོད་གསལ་ལ་གསོལ་བ་འདེབས། །ཐུབ་བསྟན་ཆོས་ཀྱི་རྡོ་རྗེ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས །གོང་ལྟར་ཧིཀ་ལྔས་སྤར་རོ།། འོད་མཚན་ནམ་རིན་ཆེན་གཙུག་ཏོར་ཅན་གྱི་མཚན་ལན་གསུམ་དང་། གསོལ་འདེབས་བསྡུས་པ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུངས། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། ཅི་ནུས་དང་ཧིཀ་ལྔའོ།། འོད་མཚན་དང་། ཨོཾ་ཨཱཿཧཱུྃ། གནས་འོག་མིན་བདེ་ཆེན་ཞིང་ཁམས་སུ། །མགོན་བཅོམ་ལྡན་སྣང་བ་མཐའ་ཡས་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་པོ་ཏ་ལ་ཡི་ཞིང་ཁམས་སུ། །ལྷ་སྙིང་རྗེའི་གཏེར་མཛོད་སྤྱན་རས་གཟིགས། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་ཟངས་མདོག་དཔལ་རིའི་ཕོ་བྲང་དུ། །སྐྱབས་པདྨ་འབྱུང་གནས་སྤྲུལ་པའི་སྐུ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་རང་སྣང་རྣམ་དག་འོག་མིན་དུ། །རྗེ་མཁྱེན་བརྩེའི་འོད་ཟེར་འཇིགས་མེད་གླིང་། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་གང་ལ་གང་འདུལ་ཞིང་ཁམས་སུ། །དཔལ་འཇིགས་མེད་ཡེ་ཤེས་རྡོ་རྗེ་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་བདེ་ཆེན་པདྨ་བཀོད་ཞིང་དུ། །རྗེ་འཇིགས་མེད་ཕྲིན་ལས་འོད་ཟེར་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་ཕྱོགས་མེད་གདུལ་བྱ་འདུལ་ཞིང་དུ། །སྐྱབས་ཡོངས་འཛིན་བུདྡྷ་བྷ་དྲ་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་གར་བཞུགས་དག་པའི་ཞིང་ཁམས་སུ། །རྗེ་འགྲོ་མགོན་ལུང་རིག་གླིང་པ་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་འབྲལ་མེད་སྐུ་གསུམ་ཕོ་བྲང་དུ། །མགོན་འགྱུར་མེད་བློ་གྲོས་མཐའ་ཡས་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་སྤྱི་གཙུག་བདེ་ཆེན་འཁོར་ལོ་རུ། །སྐྱབས་ཀུན་འདུས་རྩ་བའི་བླ་མ་ལ། །བདག་སྒོ་གསུམ་གུས་པས་གསོལ་བ་འདེབས། །ལམ་འཕོ་བ་འབྱོང་བར་བྱིན་གྱིས་རློབས། །གནས་བདེ་ཆེན་ཞིང་དུ་འཕོ་བར་ཤོག །མགོན་སྣང་མཐའི་ཐུགས་དང་དབྱེར་མེད་ཤོག །ཧིཀ་གི་སྒྲས་སྤར་རོ།། ཡང་འོད་མཚན་དང་འཕོ་བ་བྱིན་རླབས་ཅན་གཞན་ཡང་སྦྱོར་ན་ལེགས་པས། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །འཇིག་རྟེན་ཕྱི་མར་སོང་བའི་ཚེ་འདས་ཀྱི། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ལན་གསུམ་མམ་བདུན་སོགས་ཀྱི་མཐར་ཕཊཿགསུམ་གྱིས་འཕང་ངོ་།། ཡང་འོད་མཚན་དང་། ཨེ་མ་ཧོཿ གནས་རང་སྣང་དོན་གྱི་འོག་མིན་ནཿ ཡིད་དད་བརྒྱའི་འཇའ་གུར་འཁྲིགས་པའི་ཀློངཿ སྐྱབས་ཀུན་འདུས་རྩ་བའི་བླ་མ་ནིཿ སྐུ་ཐ་མལ་མ་ཡིན་དྭངས་མའི་ལུསཿ དཔལ་སངས་རྒྱས་སྣང་མཐའི་ངོ་བོར་བཞུགསཿ ཡིད་མོས་གུས་གདུང་བས་གསོལ་བ་འདེབསཿ ལམ་འཕོ་བ་འབྱོང་བར་བྱིན་གྱིས་རློབསཿ གནས་འོག་མིན་བགྲོད་པར་བྱིན་གྱིས་རློབསཿ དབྱིངས་ཆོས་སྐུའི་རྒྱལ་ཟིན་པར་ཤོགཿ བདག་གིས་ཕཊཿཀྱི་སྒྲས་བསྐུལ་བས་ཁྱོད་རང་གི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་རླུང་གི་དཀྱིལ་འཁོར་ལྗང་སྐྱས་དཔག་ཏེ་མདའ་འཕང་བ་ལྟར་སྣང་བ་མཐའ་ཡས་ཀྱི་ཐུགས་ཀར་ཐིམ་པར་གྱུར།བར་མོས་ལ། ཧྲཱིཿལྔ་ཚར་དང་ཧིཀ་དང་ཕཊ་ཀྱི་སྒྲས་འཕོའོ།། དེ་ནས་ཕྱིར་མི་ལྡོག་པ་སྐུ་ལྔའི་ཀློང་དུ་རྒྱས་གདབ་པ་ནི། ཨེ་མ་ཧོ། སྔོན་འདས་དུས་བསྐལ་པའི་དགེ་སློང་མཆོག །དཔལ་རྒྱལ་སྲས་ཆོས་ཀྱི་འབྱུང་གནས་ཀྱིས། །མགོན་འཇིག་རྟེན་དབང་ཕྱུག་རྒྱལ་བའི་དྲུང་། །ཡོངས་འགྲོ་རྣམས་སྒྲོལ་ཕྱིར་དམ་བཅས་ནས། །ནུབ་བདེ་ཆེན་ཞིང་གི་རྟེན་བརྟེན་པར། །དབང་བསྒྱུར་བའི་ཐུགས་བསྐྱེད་སྨོན་པའི་འབྲས། །མགོན་ཚེ་མཐའ་ཡས་པ་སྟོན་འཁོར་བཅས། །མ་འགྲོ་བའི་དཔལ་དུ་ཡོངས་ཤར་བཞིན། །བདག་གསོལ་བ་འདེབས་སོ་མཁྱེན་བརྩེའི་གཏེར། །ཚེ་འདིར་སྣང་ལས་ཐལ་ཚེ་འདས་དེ། །སྲིད་འཁོར་བའི་འཇིགས་ལས་དབུགས་དབྱུང་ཞིང་། །ནུབ་བདེ་ཆེན་པདྨ་བཀོད་ཞིང་དུ། །དུས་སྐད་ཅིག་ཡུད་ཙམ་འདི་ཉིད་ལ། །མགོན་ཁྱེད་ཀྱི་ཐུགས་རྗེས་འདྲེན་པར་མཛོད། །ལས་ཉོན་མོངས་དབང་དུ་བཏང་གྱུར་ན། །མགོན་ཁྱེད་ཀྱི་དམ་བཅའ་གང་དུ་ཐལ། །གནས་ངན་འགྲོར་སྙོགས་ལས་མ་བཟློག་ན། །མགོན་ཐུགས་རྗེ་ཆེ་ཞེས་ཚིག་ཏུ་བས། །སེམས་གདུང་བས་གསོལ་འདེབས་འདིར་གསོན་ལ། །ཚེ་ཕྱི་མར་སོང་བའི་དམིགས་ཡུལ་དེ། །ནུབ་བདེ་ཆེན་ཞིང་དུ་འདྲེན་པར་མཛོད། །སྐྱབས་བསླུ་མེད་མགོན་པོ་འོད་དཔག་མེད། །ལྷ་ཐུགས་རྗེའི་གཏེར་མཛོད་སྤྱན་རས་གཟིགས། །སྟོབས་ནུས་པའི་མངའ་བདག་རྡོ་རྗེ་འཛིན། །དཔལ་འདྲེན་པ་སྟོང་རྩ་རྒྱལ་སྲས་ཚོགས། །ཚེ་ཕྱི་མའི་ལམ་ཞུགས་ཚེ་འདས་ཀྱི། །བཤེས་རམ་ཟླ་མཛོད་ཅིག་སྣང་མཐའ་ཡས། །འཁོར་སེམས་དཔའི་གྲལ་དུ་སྐྱེལ་བར་མཛོད། །སེམས་འོད་ཀྱི་ཐིག་ལེ་དཀར་དམར་མདངས། །དཔེ་མཁའ་ལ་སྐར་མདའ་རྒྱུག་པ་བཞིན། །དཔལ་འཆི་མེད་མགོན་པོའི་ཐུགས་ཀར་བསྟིམས། །སླར་ལྡོག་མེད་སྐུ་ལྔའི་རྒྱས་གདབ་བོ།། ཕཊཿསྤྲུལ་སྐུ། ཕཊཿལོངས་སྐུ། ཕཊཿཆོས་སྐུ། ཕཊཿམི་འགྱུར་རྡོ་རྗེའི་སྐུ། ཕཊཿམངོན་པར་བྱང་ཆུབ་པའི་སྐུ་ཐོབ་པར་བསམ་ལ། ཀྱཻ་མ་ཚེ་འདས་ཕུང་ཁམས་ལྷར་གསལ་རྟེན། །མགོན་འོད་དཔག་མེད་ཀྱི་གསང་གསུམ་ལ། །དཔེ་འཇའ་ཚོན་མཁའ་ལ་ཐིམ་བཞིན་དུ། །ཀློང་དབྱེར་མེད་རོ་གཅིག་འདྲེས་པར་གྱུར། །ཞེས་ཚེ་འདས་ཀྱི་ལུས་རྟེན་རྡོ་རྗེ་རྣལ་འབྱོར་མར་གསལ་བ་འཇའ་ཚོན་ནམ་མཁར་ཐིམ་པ་ལྟར་སྐྱབས་ཡུལ་གྱི་ལྷ་ལ་ཐིམ། དེ་ཉིད་འོད་ཀྱི་ཕུང་པོར་གྱུར་ཏེ་རང་སྣང་ལོངས་སྐུའི་ཞིང་དུ་བཅོམ་ལྡན་འདས་རྒྱལ་བ་འོད་མི་འགྱུར་བ་དང་དབྱེར་མེད་དུ་སངས་རྒྱས་པར་བསམ་ལ། ཕཊཿཅེས་དམིགས་མེད་ཀྱི་ངང་ལ་དར་ཅིག་བཞག དེ་ནས་བསྔོ་བ་ནི། དགེ་བ་འདིས་མཚོན་དུས་གསུམ་ལེགས་ཚོགས་རྣམས། །གཅིག་ཏུ་བསྡུས་ནས་མཁའ་མཉམ་འགྲོ་ཀུན་གྱི། །ཚོགས་རྫོགས་སྒྲིབ་དག་ས་ལམ་མྱུར་བགྲོད་ནས། །རྣམ་མཁྱེན་སངས་རྒྱས་ཐོབ་པའི་རྒྱུ་རུ་བསྔོ། །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །སྨོན་ལམ་ནི། ནུབ་ཀྱི་ཕྱོགས་ན་བདེ་བའི་འབྱུང་གནས་ཏེ། །རྡུལ་བྲལ་འཇིག་རྟེན་ཁམས་ནི་བདེ་བ་ཅན། །དེ་ན་སེམས་ཅན་ཁ་ལོ་བསྒྱུར་བ་ཡི། །འདྲེན་པ་ཚེ་མཐའ་ཡས་པ་ད་ལྟ་བཞུགས། །དེར་ནི་བུད་མེད་རྣམས་ཀྱང་མི་འབྱུང་སྟེ། །རྣམ་པ་ཀུན་ཏུ་གཡེམ་པའི་ཆོས་མེད་ལ། །རྒྱལ་བའི་སྲས་པོ་དེ་དག་བརྫུས་ཏེ་སྐྱེ། །དྲི་མ་མེད་པ་པདྨའི་སྙིང་པོར་འདུག །འདྲེན་པ་ཚེ་མཐའ་ཡས་པ་དེ་ཉིད་ཀྱང་། །པདྨའི་སྙིང་པོ་དྲི་མེད་དགའ་བ་ལ། །སེང་གེའི་ཁྲི་ལ་རབ་ཏུ་བཞུགས་པ་ཡང་། །ས་ལའི་རྒྱལ་པོ་ལྟ་བུར་རྣམ་པར་མཛེས། །འདྲེན་པ་འོད་དཔག་མེད་པའི་སངས་རྒྱས་ཞིང་། །བདེ་བ་ཅན་དུ་བརྫུས་ཏེ་སྐྱེ་བར་ཤོག །མདོ་པདྨ་དཀར་པོའི་ལེའུ་ཉེར་བཞི་པ་ནས་སོ།། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་བགྱིད་ཤོག །མི་གཙང་ལུས་འདི་བོར་བར་གྱུར་མ་ཐག །བདེ་བ་ཅན་དུ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་ས་བཅུ་རབ་བགྲོད་ནས། །སྤྲུལ་པས་ཕྱོགས་བཅུར་གཞན་དོན་བྱེད་པར་ཤོག །ཅེས་སོགས་བདེ་བ་ཅན་དུ་སྐྱེ་བའི་སྨོན་ལམ་གཞན་ཡང་གདབ་བོ།། གཤིན་རྒབ་གཅོད་པའི་ཤིས་བརྗོད་ནི། ཧཱུྃ་ཧྲཱིཿ ཕྱོགས་བཅུའི་རྒྱལ་བ་རྣམས་ཀྱི་ཐུགས་རྗེ་དང་། །བདག་ཅག་ལྷག་བསམ་དག་པའི་བདེན་སྟོབས་ཀྱིས། །རྒྱུ་སྦྱོར་ཡོན་བདག་མི་ནོར་འཁོར་བཅས་ལ། །བཀྲ་ཤིས་དཔལ་འབར་བདེ་ལེགས་ཕུན་ཚོགས་ཤོག །ཅེས་མེ་ཏོག་འཐོར་བའོ།། ཀུ༵ན་བཟ༵ང་སྣང་མཐའི་ཐུགས་བསྐྱེད་གསེར་མངལ་ཁྱོན། །གཞ༵ན་ཕ༵ན་དཔག་བསམ་སྙེ་མས་ཡོངས་གང་ཞིང་། །ལྷག་བསམ་ཉི༵་མ༵འི་ཟེར་གྱིས་ལེགས་སྨིན་ནས། །མར་གྱུར་འགྲོ་བའི་རེ་འདོད་མྱུར་སྐོང་ཤོག །ཅེས་མྱུར་ལམ་འཕོ་བའི་མན་ངག་ཉུང་གསལ་འཇུག་བདེར་བསྡུས་པ་འབྲེལ་ཚད་མྱུར་གྲོལ་ཞེས་བྱ་བ་འདི་ཡང་། ཕྱུག་ཤུལ་ཕུར་སྐོར་གྱི་རུས་ལས་ལེགས་པར་བལྟམས་པའི་རང་གི་རིགས་ཀྱི་མྱུ་གུ་ཐུ་བོ་མིང་ཀློང་ཆེན་ཡོན་ཏན་རྒྱ་མཚོར་འབོད་པ་གང་དེའི་ཐོག་མའི་སློབ་གཞིར་འདོད་པས། གཏེར་སྟོན་ཉི་ཟླ་སངས་རྒྱས་ཀྱི་འཕོ་བ་འཇག་ཚུགས་མ་གཞིར་བྱས་ཏེ། རྡོ་གྲུབ་ཆེན་དང་། གཡུ་ཁོག་རྒྱ་སྤྲུལ་སོགས་ཀྱིས་གསུངས་པའི་དོན་ལེགས་པར་བསྡུས་ནས། མགོ་སྤྲུལ་རྒན་པོས་རང་གི་སྡོད་གནས་སྐུ་གསུམ་དབེན་གྲོང་གི་གཟིམ་མལ་ནས་བྲིས་པ་མ་རྣམས་ཡོངས་ལ་ཕན་པའི་རྒྱུར་གྱུར་ཅིག དགེའོ།། དགེའོ།། དགེའོ།། འཕོ་བའི་ཉམས་ལེན་སྙིང་པོ་བཅུད་དྲིལ།༄༅། ཟབ་ལམ་འཕོ་བའི་ཉམས་ལེན་སྙིང་པོ་བཅུད་དྲིལ་ཞེས་བྱ་བ་བཞུགས། ན་མོ་གུ་རུ་ཨ་མི་ཏ་བྷ་ཡེ། འདིར་ཐོག་མར་རང་གིས་ཉམས་སུ་ལེན་པའམ། གཞན་སུ་ལའང་གདབ་ཏུ་རུང་བའི་འཕོ་བའི་གདམས་པ་རྣམས་ཀྱི་ཉམས་སུ་ལེན་ཚུལ་སྙིང་པོ་བཅུད་དུ་དྲིལ་བ་ནི། ཐུགས་རྗེ་ཆེན་པོའི་བསྒོམ་བཟླས་སྔོན་དུ་འགྲོ་བས། ཨོཾ་མ་ཧཱ་ཤུ་ནྱ་ཏ༴སོགས། མ་དག་ཐ་མལ་ལུས་རྟེན་སྟོང་པར་སྦྱངས། །དག་པའི་གཞི་ལུས་རྡོ་རྗེ་རྣལ་འབྱོར་མ། །ཞལ་གཅིག་ཕྱག་གཉིས་དམར་གསལ་གྲི་ཐོད་འཛིན། །ཞབས་གཉིས་བཞེངས་སྟབས་སྤྱན་གསུམ་ནམ་མཁར་གཟིགས། །དྭངས་གསལ་སྒྲིབ་མེད་འོད་སྐུར་ཡོངས་རྫོགས་པའི། །སྒོ་དགུ་མར་མེ་ལྟར་འབར་ཧཱུྃ་ཡིག་ལས། །འོད་འཕྲོས་ལུས་ཀུན་ཁྱབ་ཅིང་བརྟན་པར་བཀག །དེ་དབུས་སྙིང་པོའི་སྲོག་ཤིང་དབུ་མའི་རྩ། །མཚན་ཉིད་བཞི་ལྡན་མཐིང་དཀར་དམར་མདངས་ཅན། །རོ་རྐྱང་འཁོར་ལོ་བཞི་དང་བཅས་པ་ཡི། །སྙིང་གར་རླུང་དཀྱིལ་ཡངས་ཤིང་གཡོ་བའི་སྟེང་། །རྣམ་ཤེས་ཐིག་ལེ་འོད་མདངས་ལྡན་པར་གྱུར། །སྤྱི་བོར་པད་ཟླར་རྩ་བའི་བླ་མ་དང་། །དབྱེར་མེད་སངས་རྒྱས་འོད་དཔག་མེད་མགོན་ལ། །བརྒྱུད་ལྡན་བླ་མ་རྣམས་དང་ཕྱོགས་དུས་ཀྱི། །རྒྱལ་བ་རབ་འབྱམས་མ་ལུས་ཀུན་གྱིས་བསྐོར། །བདག་གཞན་མ་གྱུར་མཁའ་མཉམ་འགྲོ་ཀུན་ལ། །བྱམས་བརྩེའི་ཐུགས་ཀྱིས་དགོངས་བཞིན་བཞུགས་པར་གསལ། །སངས་རྒྱས་འོད་དཔག་མེད་ཀྱི་མཚན་བརྒྱ་རྩའམ་ཉེར་གཅིག བདུན་སོགས་སྐབས་བསྟུན་མཐར། འཇག་ཚུགས་མའི་གསོལ་འདེབས་ནི། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །པདྨ་དམ་ཆོས་འོད་ཟེར་ལ་གསོལ་བ་འདེབས། །འཇིགས་མེད་ཆོས་དབྱིངས་འོད་གསལ་ལ་གསོལ་བ་འདེབས། །ཐུབ་བསྟན་ཆོས་ཀྱི་རྡོ་རྗེ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། ནམ་ཞིག་མི་གནས་འཆི་བའི་དུས་བྱུང་ཚེ། །བདེ་བ་ཅན་དུ་སྐྱེ་བར་བྱིན་གྱིས་རློབས །ཅེས་བརྗོད་ཅིང་ཧིཀ་གི་སྒྲས་བསྐུལ་བས་རིག་པ་འོད་ཀྱི་ཐིག་ལེ་དེ་སྐར་མདའ་ཡལ་བ་ལྟར་འོད་དཔག་མེད་ཀྱི་ཐུགས་ཀར་ཐིམ་པར་མོས། ཧིཀ་ལྔའམ་བདུན་གྱིས་འཕོའོ།། འདི་མན་འོད་མཚན་ལན་བདུན་རེ་བརྗོད་པ་ཀུན་ལ་འགྲེ་ཞིང་། རྫོགས་ཆེན་བརྒྱུད་པའི་གསོལ་འདེབས་ནི། ཨེ་མ་ཧོ། ཆོས་སྐུ་སྣང་མཐའ་ལོངས་སྐུ་ཐུགས་རྗེའི་གཏེར། །སྤྲུལ་སྐུ་ཐུགས་རྗེའི་བདག་ཉིད་རྡོ་རྗེ་འཛིན། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །རིགས་བརྒྱའི་ཁྱབ་བདག་བཅོམ་ལྡན་རྡོ་རྗེ་སེམས། །དགའ་རབ་རྡོ་རྗེ་འཇམ་དཔལ་བཤེས་གཉེན་ལ། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །ཤྲཱི་སེང་ཧ་དྲི་མེད་བཤེས་གཉེན་ཞབས། །ཛྙཱ་ན་སུ་ཏྲ་སློབ་དཔོན་པདྨ་སྐྱེས། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །རྗེ་འབངས་གྲོགས་གསུམ་བརྒྱུད་འཛིན་མཁས་གྲུབ་ཚོགས། །པདྨ་ལས་འབྲེལ་ཀློང་ཆེན་རབ་འབྱམས་ལ། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །མཁྱེན་བརྩེའི་འོད་ཟེར་ཀུན་བཟང་གཞན་ཕན་རྗེ། །རྒྱལ་བའི་མྱུ་གུ་ཡེ་ཤེས་རྡོ་རྗེ་ལ། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །ནམ་མཁའི་རྡོ་རྗེ་གཞན་ཕན་མཐའ་ཡས་པ། །མཁྱེན་བརྩེའི་དབང་པོ་ཀུན་དགའ་དཔལ་འབར་རྗེ། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །མན་ངག་དོན་བརྒྱུད་ཤིན་ཏུ་རྣལ་འབྱོར་གྱི། །བྱིན་རླབས་སྒོ་འབྱེད་རྩ་བའི་བླ་མ་ལ། །གསོལ་བ་འདེབས་སོ་འཕོ་བའི་སྒོ་ཕྱེས་ལ། །སེམས་ཉིད་སྣང་མཐའི་ཐུགས་དང་དབྱེར་མེད་མཛོད། །གོང་ལྟར་ཧིཀ་གི་སྒྲས་འཕང་ངོ། །ཕྱག་ཆེན་བརྒྱུད་པའི་གསོལ་འདེབས་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །བཅོམ་ལྡན་རིགས་ཀུན་ཁྱབ་བདག་རྡོ་རྗེ་འཆང་། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །ཤར་ཟ་ཧོར་ནོར་བུའི་དགོན་པ་ན། །ཏེ་ལོ་ཤེས་རབ་བཟང་པོ་གསང་བའི་བདག །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །བྱང་ཕུ་ལ་ཧ་རིའི་དགོན་པ་ན། །ནཱ་རོ་ཡེ་ཤེས་དངོས་གྲུབ་པཎྜི་ཏ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །ལྷོ་གྲོ་བོ་ལུང་གི་དགོན་པ་ན། །སྒྲ་བསྒྱུར་མར་པ་ཆོས་ཀྱི་བློ་གྲོས་རྗེ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །ནུབ་ལ་ཕྱི་གངས་ཀྱི་ར་བ་ན། །མི་ལ་བཞད་པ་རྡོ་རྗེ་གྲུབ་པའི་གཙོ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །ཤར་དྭགས་ལྷ་སྒམ་པོའི་གནས་མཆོག་ན། །ཆོས་རྒྱལ་ཟླ་འོད་གཞོན་ནུ་རིན་པོ་ཆེ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །རྣམ་དག་བཤད་སྒྲུབ་རྒྱ་མཚོའི་ཕོ་བྲང་ན། །རྒྱལ་བསྟན་འཛིན་སྐྱོང་སྤེལ་མཛད་བརྒྱུད་འཛིན་སྡེ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མཆོག་ཐུན་དངོས་གྲུབ་རྒྱ་མཚོའི་མངའ་བདག་མཆོག །རྒྱུད་སྡེ་བཞི་དྲུག་ཡི་དམ་དཀྱིལ་འཁོར་ལྷ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །བཀའ་གསང་དམ་ཚིག་རྡོ་རྗེའི་གན་མཛོད་ལ། །དབང་བསྒྱུར་མཁའ་འགྲོ་ཆོས་སྐྱོང་མཐུ་སྟོབས་བདག །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཟབ་ལམ་འཕོབ་འབྱོང་བར་བྱིན་གྱིས་རློབས། །སྒྱུ་མའི་གྲོང་ཁྱེར་མི་རྟག་ཆུ་བུར་ལུས། །མི་གཙང་ལས་ཉོན་འཁྲུལ་པའི་གནས་ཁང་ན། །རང་རིག་འོད་གསལ་སེམས་ཉིད་ཆོས་ཀྱི་སྐུ། །སྣང་མཐའ་ཡས་པའི་ཞིང་དུ་འཕོ་བར་ཤོག །འཕོ་བྱ་འཕོ་བྱེད་འཕོ་ཡུལ་ཀུན་རྫོབ་ཆོས། །ཡོད་མེད་ལ་སོགས་མཐའ་ལ་མི་གནས་པ། །སྐུ་བཞི་ཡེ་ཤེས་ལྔ་ཡི་བདག་ཉིད་ཅན། །དོན་དམ་ཆོས་ཉིད་འཕོ་བ་མངོན་གྱུར་ཤོག ཧིཀ་ལྔས་འཕང་ངོ། །སྦྱོར་དྲུག་བརྒྱུད་པའི་གསོལ་འདེབས་ནི། དང་པོའི་སངས་རྒྱས་ཆོས་སྐུ་རྡོ་རྗེ་འཆང་། །ལོངས་སྐུ་དུས་འཁོར་སྤྲུལ་སྐུ་ཤཱཀྱའི་ཏོག །ཆོས་རྒྱལ་རིགས་ལྡན་རིམ་པར་བྱོན་རྣམས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །དུས་ཞབས་ཆེ་ཆུང་ན་ལེནྟྲ་པའི་ཞབས། །ཟླ་བ་མགོན་པོ་འབྲོ་སྟོན་ལོ་ཙཱ་དང་། །ལྷ་རྗེ་སྒོམ་པ་སྒྲོ་སྟོན་གནམ་བརྩེགས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །གྲུབ་ཆེན་ཡུ་མོ་ཆོས་ཀྱི་དབང་ཕྱུག་རྗེ། །ནམ་མཁའ་འོད་ཟེར་ཇོ་འབུམ་སེ་ཆེན་པ། །འཇམ་གསར་ཆོས་འོད་ཀུན་སྤངས་ཆེན་པོ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །བྱང་སེམས་ཆེན་པོ་མཁས་བཙུན་ཡོན་ཏན་མཚན། །ཀུན་མཁྱེན་དོལ་བོ་ཕྱོགས་རྒྱལ་ཉ་དབོན་པ། །ཀུན་དགའ་བློ་གྲོས་དཀོན་མཆོག་བཟང་པོ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ནམ་མཁའི་མཚན་དང་ག་ག་ཤྲཱི་བྷ་དྲ། །ལོ་ཆེན་རིན་བཟང་ཀུན་དགའ་གྲོལ་མཆོག་རྗེ། །ཐུགས་སྲས་རྣམ་གསུམ་ལྷ་དབང་གྲགས་པ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །སྒྲོལ་བའི་མགོན་པོ་རིན་ཆེན་རྒྱ་མཚོ་དང་། །བློ་གྲོས་རྣམ་རྒྱལ་ངག་དབང་ཕྲིན་ལས་མཚན། །ངག་དབང་རྣམ་རྒྱལ་ཀུན་བཟང་ཕྲིན་ལས་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །ངག་དབང་རྒྱལ་མཚན་འཇིགས་མེད་རྒྱལ་མཚན་ཞབས། །ངག་དབང་ཆོས་འཕེལ་ཡོན་ཏན་རྒྱ་མཚོའི་མཚན། །རྣམ་སྣང་རྡོ་རྗེ་རྩ་བའི་བླ་མ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །རྒྱ་བོད་རིག་འཛིན་བརྒྱུད་པར་བཅས་རྣམས་དང་། །དྲུག་བརྒྱ་སོ་དྲུག་དཀྱིལ་འཁོར་ལྷ་ཡི་ཚོགས། །རིགས་བརྒྱའི་རྣལ་འབྱོར་གནས་གསུམ་མཁའ་འགྲོར་བཅས། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །གཞི་དབྱིངས་འགྱུར་མེད་རྡོ་རྗེ་སྙིང་པོ་དང་། །ལམ་མཆོག་རྡོ་རྗེའི་རྣལ་འབྱོར་ཡན་ལག་དྲུག །འབྲས་བུ་ཁྱབ་རྟག་གདོད་མའི་ཆོས་སྐུ་ལ། །གསོལ་བ་འདེབས་སོ་འཕོ་བའི་དངོས་གྲུབ་སྩོལ། །འབྱུང་འདུས་སྒྱུ་མའི་ཚོགས་པ་ཞིག་པའི་ཚེ། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །རང་རིག་དོན་གྱི་སྣང་མཐའི་ཐུགས་ཀློང་དུ། །མི་ལྡོག་གཉུག་མའི་གཏན་སྲིད་ཟིན་པར་ཤོག ཧིཀ་དང་ཕཊཿཀྱི་སྒྲས་སྤར་རོ།། ཀློང་ཆེན་སྙིང་ཐིག་གི་འཕོ་བ་ནི། ཨེ་མ་ཧོཿ གནས་རང་སྣང་དོན་གྱི་འོག་མིན་ནཿ ཡིད་དད་བརྒྱའི་འཇའ་གུར་འཁྲིགས་པའི་ཀློངཿ སྐྱབས་ཀུན་འདུས་རྩ་བའི་བླ་མ་ནིཿ སྐུ་ཐ་མལ་མ་ཡིན་དྭངས་མའི་ལུསཿ དཔལ་སངས་རྒྱས་སྣང་མཐའི་ངོ་བོར་བཞུགསཿ ཡིད་མོས་གུས་གདུང་བས་གསོལ་བ་འདེབསཿ ལམ་འཕོ་བ་འབྱོང་བར་བྱིན་གྱིས་རློབསཿ གནས་འོག་མིན་བགྲོད་པར་བྱིན་གྱིས་རློབསཿ དབྱིངས་ཆོས་སྐུའི་རྒྱལ་ཟིན་པར་ཤོགཿ ཧྲཱིཿལྔ་དང་ཕཊཿལྔས་འཕོ་བའོ།། གནམ་ཆོས་ཀྱི་འཕོ་བ་ནི། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །ནམ་ཞིག་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཕཊཿགསུམ་གྱིས་འཕང་ངོ།། སྤྱི་བོར་ཐར་པའི་སྒོ་ཆེན་ཡངས་པ་རུ། །སྐྱབས་གནས་བསླུ་བ་མེད་པའི་འོད་དཔག་མེད། །ངེས་འབྱུང་གདུང་ཤུགས་དྲག་པོས་གསོལ་བ་འདེབས། །བླ་མའི་ཐུགས་ཀར་འཕོ་བར་བྱིན་གྱིས་རློབས། །ཕཊཿལྔའམ་གསུམ་གྱིས་འཕོས་ལ། སླར་ཡང་། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་བ་འབྱམས་ཀླས་པའི། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཕཊཿཅེས་འཁོར་གསུམ་མི་དམིགས་པའི་ངང་ལ་ཅུང་ཟད་མཉམ་པར་བཞག་ལ། མཐར། སྤྱི་བོའི་བླ་མ་སངས་རྒྱས་འོད་དུ་ཞུ། །སྙིང་དབུས་ཐིམ་པས་ཐུགས་ཡིད་དབྱེར་མེད་འདྲེས། །གདོས་བཅས་མི་དམིགས་ཨོ་རྒྱན་ཚེ་དཔག་མེད། །སྐྱེ་འགགས་མེད་པ་རྡོ་རྗེའི་སྐུ་ཐོབ་གྱུར། །ཨོཾ་ཨ་མ་ར་ཎ་ཛི་བནྟི་ཡེ་སྭཱ་ཧཱ། ཞེས་ཅི་ནུས་དང་། སྤྲོ་ན་ཚེ་གཟུངས་བཟླ་ཞིང་ཚེ་འགུགས་བྱའོ།། ཞེས་རང་གཞན་ཀུན་ལ་གདབ་ཏུ་རུང་བའི་ཟབ་ལམ་འཕོ་བའི་ཉམས་ལེན་སྙིང་པོར་དྲིལ་ནས་བརྗོད་པ་འདི་ཡང་། མགོ་ལོག་སྔགས་རྒན་གྱིས་མགྱོགས་པར་བྲིས་པ་རང་གཞན་ཡོངས་ལ་ཕན་ཐོགས་པའི་རྒྱུར་གྱུར་ཅིག །དགེའོ།། དགེའོ།། དགེའོ།། སྡིག་ཅན་གཤིན་པོའི་འཕོ་ལུང་།༄༅། དམ་ཆོས་ཡང་ཟབ་པདྨའི་ཐུག་ཐིག་གི་ཆ་ལག་སྡིག་ཅན་གཤིན་པོའི་འཕོ་ལུང་བཞུགས་སོ།། ༄༅། བདེ་ལྡན་ཞིང་གི་མགོན་པོ་དང་། །དབྱེར་མེད་དཔལ་ལྡན་བླ་མར་འདུད། །མཚམས་མེད་ལས་བསགས་སྡིག་པ་ཅན། །མྱུར་གྲོལ་ཉུང་ཞིག་བྲི། །དེ་ལ་ཐོག་མར་ཐུགས་རྗེ་ཆེན་པོའི་བསྒོམ་བཟླས་སྔོན་དུ་འགྲོ་བས་བྱམས་སྙིང་རྗེའི་ངང་ནས། མདུན་གྱི་རྟེན་དེ་ཉིད་ཤུ་ནྱ་ཏས་བསངས། སྭཱ་བྷ་ཝས་སྦྱངས། མདུན་གྱི་རྟེན་སྣང་བ་མི་དམིགས་པ་སྟོང་པ་ཉིད་དུ་གྱུར། །སྟོང་པའི་ངང་ལས་པདྨ་དང་ཟླ་བའི་གདན་ལ་ནྲྀཿཡིག་ཡོངས་སུ་གྱུར་པ་ལས། ཚེ་ལས་འདས་པ་གསོན་དུས་ཀྱི་རྣམ་པ་གཞོན་ནུའི་ཚུལ་ཅན་མཛེས་ཤིང་ཡིད་དུ་འོང་བ་གོས་དཀར་དྲི་མེད་གསོལ་ཞིང་དད་མོས་གུས་དང་ལྡན་པ་གཅིག་ཏུ་གྱུར། བདག་ཉིད་འཕགས་པར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་གློག་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་ཨཱ༔ཡིག་དཀར་པོའི་རྣམ་པར་བཀུགས་ནས་རྟེན་ལ་ཐིམ་པར་གྱུར་བར་མོས་ལ། ན་མོ། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་རྣམས་ཀྱི་བཀའ་བདེན་པ་དང་། ཡི་དམ་རྒྱུད་སྡེ་དྲུག་གི་དཀྱིལ་འཁོར་རྣམས་ཀྱི་བཀའ་བདེན་པ་དང་། གནས་གསུམ་གྱི་དཔའ་བོ་མཁའ་འགྲོ་དམ་ཅན་བསྲུང་མ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བཀའ་བདེན་པ་དང་། རྒྱལ་བ་གང་གི་ཐུགས་བསྐྱེད་སྨོན་ལམ་རྒྱ་ཆེན་པོའི་སྟོབས་ཀྱིས། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པའི་རྣམ་པར་ཤེས་པ་འཁོར་བ་སྡུག་བསྔལ་ཀྱི་གནས་ཡུལ་གང་ན་ཡོད་ཀྱང་རྟེན་ཕུང་པོ་འདི་ལ་ཁུག་ཅིག །ནྲྀཿཨ་ཀརྴ་ཡ་ཛ་ཛཿ ལན་གྲངས་མང་དུ་བརྗོད་ནས། ཛཿཧཱུྃ་བཾ་ཧོ༔ ཆུ་ལ་ཆུ་བཞག་པ་བཞིན་དབྱེར་མེད་དུ་གྱུར་ནས་དགའ་བ་དང་གུས་པའི་སེམས་ཀྱིས་བག་ཕེབས་བཞིན་གནས་པར་མོས་ལ། སྦྱངས་གཏོར། རཾ་ཡཾ་ཁཾ་གིས་བསངས། སྭཱ་བྷ་ཝས་སྦྱངས། སྟོང་པའི་ངང་ལས་བྷྲུྃ་ལས་རིན་པོ་ཆེའི་སྣོད་དུ་ལན་ཆགས་བགེགས་ཀྱི་གཏོར་མ་འདོད་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར། ཨོཾ་ཨཱ༔ཧཱུྃ་གིས་བྱིན་གྱིས་རླབས། ཨོཾ་སརྦ་བྷུ་ཏ་ཨ་ཀརྴ་ཡ་ཛ་ཛ༔ ལན་གསུམ། ཨོཾ་སརྦ་བིགྷྣན་ན་མཿསརྦ་ཏ་ཐཱ༴སོགས། གསུམ། ཨོཾ་སུམ་བྷ་ནི་སུམ་བྷ་ནི༴སོགས། གསུམ་གྱི་མཐར། ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿ རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་པའི་མེ་ལྟར་འབར་བར་གྱུར། ཧྲཱིཿ སྟོང་ཉིད་དབྱིངས་ལས་རང་ཤར་བའི༔ སྙིང་རྗེ་ཆེན་པོའི་སྐུར་བཞེངས་པ༔ བྱང་ཆུབ་མཆོག་གི་ལྷ་ཆེན་པོ༔ ཉོན་མོངས་བདུད་སྡེ་འདུལ་བའི་སྐུ༔ དབང་ཆེན་འབར་བའི་ཆོ་འཕྲུལ་གྱིས༔ ཐར་བའི་ལམ་ལ་འཚེ་བྱེད་བདུད༔ ཟ་འདྲེ་སྲོག་གཅོད་རྡུལ་དུ་རློགས༔ ན་མོ། རྩ་རྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོ་དམ་ཅན་བསྲུང་མའི་ཚོགས་དང་བཅས་པའི་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་ཆོས་ཉིད་འགྱུར་མེད་རྟེན་འབྱུང་བསླུ་མེད་ལྷག་བསམ་རྣམ་དག་དང་བཅས་པའི་བདེན་པ་དང་། བདེན་པ་ཆེན་པོའི་སྟོབས་ཀྱིས་ཚེ་ལས་འདས་པ་འདི་ཉིད་གསོན་གྱི་དུས་སུ་ཚེ་སྲོག་དང་། གཤིན་གྱི་དུས་སུ་ཐར་བའི་ལམ་ལ་བར་དུ་གཅོད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང་། གནོད་སྦྱིན་སྨྲ་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་ཁྲོ་བོ་དང་ཁྲོ་མོ་མཚོན་ཆ་མེ་དཔུང་འབར་བའི་ཚོགས་སྤྲོས་པས་རྡུལ་དུ་བརླག་པར་འགྱུར་ཏ་རེ། དྲག་སྔགས་ཐུན་དང་བཅས་པས་བགེགས་བསྐྲད། བཛྲ་རཀྵ་རཀྵ་ཧཱུྃ། གིས་བསྲུང་འཁོར་བྱས་ནས། སྤྲོ་ན་འདོད་ཡོན་བསྔོས་མཐར། འོ། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པ་ཆེ་གེ་མོ་ཁྱོད་ཤི་ནས་ད་ལྟ་བར་དོ་ན་གནས་པའི་སྐབས་ཡིན་ནོ། །དེ་ཡང་ཁྱོད་རང་ལ་འཆི་བ་མི་རྟག་པ་བྱུང་བས་སྔངས་སྐྲག་འཇིགས་གསུམ་དང་སེམས་ཁོང་དུ་ཆུད་པར་མ་བྱེད། མཐོ་བ་སྲིད་པའི་རྩེ་མོ་མན་ཆོད་ནས་དམའ་བ་ན་རཀ་འོག་མ་ཡན་ཆད་ཀྱི་སེམས་ཅན་སྲོག་ཆགས་ཤིང་དབུགས་གནས་ཚད་ལ་མི་འཆི་ཚེ་ཐར་དུ་ལུས་པ་གཅིག་ཀྱང་མེད་པའི་ཚུལ་དུ་སོམས་ལ་མྱ་ངན་དང་སྡུག་བསྔལ་གང་ཡང་མ་བྱེད། མ་སྐྲག་མ་སྔངས་མ་འཇིགས་པར་ད་ལྟ་བདག་གིས་བསྟན་པའི་གདམས་ངག་གི་གནད་རྣམས་ཡིད་ལ་མ་བརྗེད་པར་ཟུངས་ཤིག་དང་། བདག་གིས་མ་བསྒོམ་སངས་རྒྱས་ཆོས་དྲུག་གི་ནང་ཚན་སངས་རྒྱས་ལག་འཆང་གི་གདམས་པ་སྟེང་སྒོ་རྣམ་པར་གྲོལ་བའི་ལམ་ནས་ལེ་ལོ་ཅན་འཆི་ཁར་གྲོལ་ཞིང་། སྡིག་པོ་ཆེ་བཙན་ཐབས་སུ་འཚང་རྒྱ་བའི་མན་ངག་ཟབ་ལམ་འཕོ་བའི་ཆོས་སྒོ་ཕྱེས་ནས་ཁྱོད་རང་དག་པ་མཁའ་སྤྱོད་ཀྱི་ཞིང་ཁམས་སུ་གནས་སྤར་བ་ཡིན་པས་དགའ་བ་དང་སྤྲོ་བའི་སེམས་བསྐྱེད་ལ། ད་རེས་ཀྱི་འཆི་བ་འདི་ལ་བརྟེན་ནས་རང་ཉིད་རྣམ་པར་གྲོལ་ཞིང་གཞན་ལ་ཕན་ཐོགས་པ་ཞིག་བྱའོ་སྙམ་པས། འདྲེན་མཆོག་གང་གི་མཚན་ལན་གཅིག་ཐོས་ནས་དད་པ་སྐྱེས་པ་དང་། གཟུགས་སྐུའི་རྣམ་པ་ཡིད་ལ་དྲན་ནས་གསོལ་བ་ལན་གཅིག་བཏབ་པ་དང་། ཞིང་དེར་སྐྱེ་བར་མོས་པས་སྨོན་ལམ་ལན་གཅིག་བཏབ་པ་ཙམ་གྱིས་བར་དོའི་འཇིགས་པ་དང་། ངན་སོང་གི་རྒྱུན་ཡོངས་སུ་གཅོད་པ་དང་། ཞིང་དེར་འདྲེན་པར་ཞལ་གྱིས་བཞེས་པ་བཅོམ་ལྡན་འདས་མགོན་པོ་འོད་དཔག་ཏུ་མེད་པ་ཞེས་བྱ་བ་དང་། དེའི་ཞིང་ཁམས་བདེ་བ་ཅན་ཞེས་བྱ་བ་དེ་ཡིད་ལ་མ་བརྗེད་པར་ཟུངས་ལ། ཁྱོད་གདོས་བཅས་ཤ་ཁྲག་གི་ལུས་དང་བྲལ་བས་འགྲོ་སླ་བའི་ཕྱིར་ཞིང་མཆོག་དེ་རུ་འདུན་པ་ཐེ་ཚོམ་མེད་པར་གཏོད་ཅིག དེ་ཡང་སྒྱུ་འཕྲུལ་དྲྭ་བའི་རྒྱུད་ལས། སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པ་ལྟར། ཚེ་ལུས་འདི་ཉིད་ནས་འཚང་རྒྱ་བར་ནུས་པ་གསང་སྔགས་བླ་ན་མེད་པའི་ཉེ་ལམ་དེ་ཉིད་ལ། བཏགས་གྲོལ་དང་མཐོང་གྲོལ། མྱོང་གྲོལ་དང་རེག་གྲོལ། ཐོས་གྲོལ་དང་དྲན་གྲོལ་གྱི་མན་ངག་མང་པོ་སྣང་བ་རྣམས་སོ་སོར་འཕགས་ཆོས་རྨད་དུ་བྱུང་བ་མངའ་ཞིང་། བཅོམ་ལྡན་འདས་ཀུན་རིག་རྣམ་པར་སྣང་མཛད་དང་། དེ་བཞིན་གཤེགས་པ་མི་འཁྲུགས་པ་དང་། སངས་རྒྱས་སྨན་གྱི་བླ་མ་སོགས་ཀྱི་མཚན་ལན་རེ་ཐོས་པས་ཀྱང་ངན་སོང་གི་འཇིགས་པ་སེལ་བ་དང་། རིན་ཆེན་གཙུག་ཏོར་ཅན་གྱི་མཚན་འཆི་ཁ་མའི་རྣ་ལམ་དུ་བསྒྲགས་ན་སུམ་ཅུ་རྩ་གསུམ་གྱི་ལྷར་སྐྱེ་བ་དང་། སོར་འབྲང་འཁོར་ལོས་བར་དོའི་འཇིགས་པ་དང་བར་དོའི་སྡུག་བསྔལ་སེལ་བ་སོགས་སྔགས་གསར་རྙིང་ཀུན་ན་མང་དུ་ཡོད་ཀྱང་ཀུན་ལས་ཁྱད་པར་དུ་འཕགས་པ་ནི་ཟབ་ལམ་འཕོ་བའི་གདམས་པ་འདི་ཉིད་ཡིན་ཏེ། གདན་བཞིའི་རྒྱུད་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱེད་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་ཀུན་ནས་མི་གོས་ཤིང་། །འཁོར་བའི་ཕ་རོལ་མཆོག་ཏུ་འགྲོ། །ཞེས་དང་། དགེ་སྦྱོར་ཐམས་ཅད་གཞུ་དང་འདྲ། །འཕོ་བ་ཐེབས་པ་མདའ་དང་འདྲ། །ཞེས་སོགས་གསུངས་པ་ལྟར་རོ། །དེ་ལྟ་བུའི་ཆོས་ཚུལ་ཟབ་མོ་འཕོ་བའི་གདམས་པ་དེ་ཡང་སྔགས་གསར་རྙིང་བཀའ་གཏེར་དག་སྣང་ཀུན་ནས་མང་དུ་གསུངས་ཀྱང་། ད་ལམ་སྐབས་སུ་བབ་པ་ཟབ་ལམ་འཕོ་བའི་མན་ངག་སྡིག་ཅན་མྱུར་གྲོལ་ཞེས་བྱ་བ་འདི་ཉིད་ནི། མཁར་ཆེན་བཟའ་ཡེ་ཤེས་མཚོ་རྒྱལ་གྱི་ཕྲིན་ལས་ཀྱི་སྤྲུལ་པ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་ལུང་རིག་གླིང་པ་རྩལ་ཞེས་མཚན་སྙན་ལྷ་ཡི་རོལ་མོ་ཕྱོགས་བཅུར་གྲགས་པ་དེ་ཉིད་ཀྱི་ཐུགས་བརྒྱུད་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བ། དམ་ཆོས་ཡང་ཟབ་པདྨའི་ཐུགས་ཐིག་གི་ཆ་ལག་ཏུ་བརྗོད་པ་ཡི་གེའི་རིས་སུ་ཕབ་ནས། བོད་གངས་ཅན་ལྗོངས་ཀྱི་འགྲོ་བ་དཔག་ཏུ་མེད་པ་རང་སྐལ་དང་འཚམས་པར་ཐར་པ་དང་ཐམས་ཅད་མཁྱེན་པའི་ལམ་ལ་འགོད་པར་མཛད་ཅིང་། དེ་ནས་བཟུང་ད་ལྟའི་བདག་ཅག་གི་རྩ་བའི་བླ་མའི་བར་གྱི་རྩ་བ་དང་ཡན་ལག་གི་ཆོས་བདག་བརྒྱུད་པར་བཅས་པ་རྣམས་ཀྱིས་གཞན་དོན་གྱི་ཕྲིན་ལས་རླབ་པོ་ཆེ་མཛད་པའི་གཙོ་བོར་ཟབ་ཆོས་འདི་ཉིད་ཁོ་ན་ཐུགས་ཉམས་སུ་བཞེས་ཤིང་ཕྱག་ལེན་དུ་མཛད་པ་ཡིན། དེ་ལྟ་བུའི་ཟབ་ལམ་འཕོ་བའི་གདམས་པ་དེ་ཉིད་ཉམས་སུ་ལེན་པ་ལ། ཐོག་མར་རང་རྒྱུད་ཀྱི་ལས་ཉོན་བག་ཆགས་ལྷག་མེད་དུ་སྦྱངས་ཤིང་ཚོགས་གསོག་པའི་ཕྱིར་ཡིད་གཞན་དུ་མ་གཡེང་བར་སངས་རྒྱས་དང་བྱང་ཆུབ་སེམས་དཔའ་རྣམས་ལ་སྒོ་གསུམ་དད་པ་ཆིག་དྲིལ་གྱིས་ཕྱག་འཚལ་བའི་མོས་པ་བརྟན་པོ་མཛོད་ཅིག་བྱས་ལ། འཁོར་བར་མི་གཏོང་ཕྱིར་ར་མདའ་སྦྲན་པའི་བློས་མོས་གུས་དང་སྙིང་རྗེ་དྲག་པོ་ཟུང་དུ་འབྲེལ་བས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཀུན་ཏུ་བཟང་པོ་རིགས་བརྒྱ་ཞི་ཁྲོའི་ལྷ་ཚོགས་དང་བཅས་པ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་རིག་པ་རྣམ་པར་སྣང་མཛད་རིགས་ལྔ་གངས་ཆེན་མཚོ་རྒྱལ་བ་རྒྱ་མཚོ་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་འཕགས་དྲན་པ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱི་ཕུད་སྟོང་གི་འཇིག་རྟེན་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་སྟོང་གི་ཡེ་སྲིད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མ་སྟོང་གི་རྒྱལ་བ་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་སྟོང་གི་མུ་ཁྱུད་མགོན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲྭ་བ་མགོན་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཁྱེའུ་འོད་མི་འཁྲུགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འཇམ་དཔལ་འཇིགས་སྐྱོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་རོལ་བ་རྣམ་པར་བརྩེ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གཞོན་ནུ་དཔའ་བོ་སྟོབས་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་དྲང་སྲོང་ཁྲོས་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་བརྩེ་བས་རོལ་བའི་བློ་གྲོས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་གསེར་འོད་དམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་འོད་སྲུང་བགྲེས་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་མངོན་རྫོགས་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ཡོན་ཏན་ཐམས་ཅད་འབྱུང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྡོ་རྗེ་སེམས་དཔའ་མི་བསྐྱོད་མི་འཁྲུགས་མི་བསྒུལ་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྣང་མཐའ་ཡས་ཚེ་དང་ཡེ་ཤེས་དཔག་ཏུ་མེད་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་སེལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། ༧ ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་དང་། ཁྱད་པར་དམིགས་ཡུལ་ཚེ་ལས་འདས་པ་འདི་ཉིད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་སྦར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེའི་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་གྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲོད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབས་པའི་ལྷ་དང་ལྷ་མོར་སྟོན་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་བར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། ཅེས་བརྗོད་ལ། དེ་ནས། ད་ནི་ཁྱོད་ལ་མྱུར་ལམ་ཟབ་མོ་འཕོ་བའི་གདམས་པ་དངོས་འདེབས་པའི་སྐབས་སུ་བབ་པ་ཡིན་ཞིང་། དེ་ཡང་ལུས་རྟེན་ཐ་མལ་དུ་འཕོ་ན་མི་ལེགས་པས་ལྷག་པའི་ལྷའི་སྒོམ་ལུང་ཞིག་འབོག་དགོས་པར་གསུངས་ཕྱིར་ཡིད་མ་ཡེངས་བར་དམིགས་པ་འདི་བཞིན་དུ་མཛོད་ཅིག ཨོཾ་སྭ་བྷ་ཝ༴སོགས། གཟུང་བ་དང་འཛིན་པས་བསྡུས་པའི་ཐ་མལ་གྱི་སྣང་ཞེན་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པ་ཆེན་པོ་དེའི་ངང་ལས་སྐད་ཅིག་དྲན་རྫོགས་སུ། ཨེ་མ་ཧོ༔ ཁྱེད་རང་གནས་པའི་འཇིག་རྟེན་ཁམས་འདི་དག༔ སྡུག་བསྔལ་མིང་མེད་བདེ་བ་ཅན་གྱི་ཞིང་༔ སྨོན་ལམ་ཡོངས་རྫོགས་བཀོད་ལེགས་ཕོ་བྲང་དབུས༔ ཉོན་མོངས་སྐྱོན་བྲལ་པདྨ་ཟླ་བའི་སྟེང་༔ ཁྱོད་ལུས་གནས་འགྱུར་རྒྱལ་བ་ཀུན་གྱི་ཡུམ༔ སྒྲོལ་མ་དཔའ་མོ་མརྒད་ལྗང་གུའི་མདོག༔ ཞལ་གཅིག་བརྩེ་བའི་སྤྱན་དཀྱུས་འགྲོ་ལ་གཟིགས༔ ཕྱག་གཉིས་གཡས་པའི་མཆོག་སྦྱིན་པུས་སྟེང་སླེབས༔ གཡོན་པས་སྐྱབས་སྦྱིན་ཕྱག་རྒྱ་ཐུགས་ཀར་མཛད༔ ཨུཏྤལ་འདབ་སྟེང་བཻཌཱུར་སྤྱི་བླུགས་ནས༔ བདུད་རྩིའི་རྒྱུན་འབེབས་དམྱལ་བའི་མེ་མདག་གཞིལ༔ ལོངས་སྐུའི་རྒྱན་རྫོགས་མཉམ་པའི་སྟབས་ཀྱིས་བཞེངས༔ ལུས་དབུས་སྣང་སྟོང་འོད་ཀྱི་ཁང་པ་རུ༔ རྩ་གཞན་མི་དམིགས་དབུ་མ་ཀ་བའི་ཚུལ༔ ཕྱི་དཀར་ནང་དམར་ཐབས་ཤེས་ཟུང་དུ་འབྲེལ༔ མར་སྣ་ལྟེ་འོག་སོར་བཞིའི་ཐད་དུ་ཟླུམ༔ ངན་སོང་གསུམ་སོགས་འཁོར་བའི་སྐྱེ་སྒོ་གཅོད༔ ཡར་སྣ་དྲང་པོར་སྤྱི་གཙུག་ཚངས་པའི་སྒོ༔ སྐར་ཁུང་ཇི་བཞིན་དཀར་སེང་ཧ་རེ་སྒོམ༔ ཐུགས་ཀར་ཨུཏྤལ་སྔོན་པོ་འདབ་རྒྱས་སྟེང༔ རླུང་གི་དཀྱིལ་འཁོར་ལྗང་ཁུ་ཡངས་ཤིང་གཡོ༔ དེ་སྟེང་རང་སེམས་དྭངས་མ་ལྔ་ལྡན་གྱི༔ ཐིག་ལེ་མ་སར་བྱ་ཡི་སྒོ་ང་ལྟར༔ གསལ་ལ་འཚེར་བ་སྣུམ་ལ་འདྲིལ་བ་བསྒོམ༔ མིག་དང་རྣ་བ་ཁ་སྣ་འོག་སྒོ་གཉིས༔ ཏཱཾཿཡིག་ཁ་དོག་ལྔ་ལྡན་རེ་རེས་བཀག༔ སྤྱི་བོར་པདྨ་དམར་པོ་འདབ་བརྒྱད་སྟེང་༔ ཟླ་བའི་གདན་ལ་སྐྱབས་གནས་ཀུན་འདུས་པ༔ རྩ་བའི་བླ་མ་མགོན་པོ་འོད་དཔག་མེད༔ དམར་གསལ་བྱུ་རུར་ཉི་འོད་འཁྱུད་བཞིན་མཛེས༔ མཚན་དཔེ་ཡོངས་རྫོགས་རྡོ་རྗེའི་སྐྱིལ་ཀྲུང་བཞུགས༔ ཆོས་གོས་གསོལ་ཞིང་མཉམ་བཞག་ལྷུང་བཟེད་འཛིན༔ འཛུམ་པའི་སྤྱན་དཀྱུས་འགྲོ་བ་ཀུན་ལ་གཟིགས༔ གཡས་གཡོན་སྤྱན་རས་གཟིགས་དང་མཐུ་ཆེན་ཐོབ༔ སངས་རྒྱས་བྱང་སེམས་རྩ་བརྒྱུད་བླ་མས་བསྐོར༔ མཐོང་ཐོས་དྲན་རེག་འགྲོ་བ་མ་ལུས་པ༔ སྒྲོལ་བའི་དེད་དཔོན་ཆེན་པོར་བཞུགས་པར་དམིགས༔ སྤྲོ་ན་འོད་དཔག་མེད་ཀྱི་མཚན་ཅི་ནུས་བརྗོད་ཅིང་། ཨེ་མ་ཧོ༔ རྣམ་གྲོལ་བདེ་ཆེན་དག་པའི་ཞིང་ཁམས་ནས༔ རྒྱལ་ཀུན་སྤྱི་གཟུགས་འདྲེན་པ་འོད་དཔག་མེད༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ལྷུན་གྲུབ་འོད་གསལ་རི་བོ་ཏ་ལ་ནས༔ སྙིང་རྗེའི་གཏེར་མཛོད་འཕགས་པ་སྤྱན་རས་གཟིགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རང་སྣང་རྣམ་དག་གཡུ་ལོ་བཀོད་པ་ནས༔ འཁོར་བའི་འཇིགས་སྒྲོལ་རྗེ་བཙུན་འཕགས་མ་ཡུམ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྔ་ཡབ་དཔལ་རི་སྤྲུལ་པའི་ཕོ་བྲང་ནས༔ སྐྱབས་ཀུན་འདུས་པ་ཨོ་རྒྱན་ཐོད་ཕྲེང་རྩལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ དགའ་བཞི་བདེ་སྟོང་མཁའ་འགྲོའི་ཚོགས་ཁང་ན༔ མཁའ་སྤྱོད་གཙོ་མོ་ཡེ་ཤེས་མཚོ་རྒྱལ་རྗེ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྩ་ཐིག་རླུང་གསུམ་དག་པ་སྤྲུལ་པའི་གནས༔ གྲུབ་པའི་དབང་བསྒྱུར་རྗེ་འབངས་ཉི་ཤུ་ལྔ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ སྨོན་ལམ་དུས་བབས་ལས་ཀྱི་འཕྲོ་སད་པའི༔ སྤྲུལ་པའི་སྐུ་མཆོག་ལུང་རིག་གླིང་པ་ལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རྒྱལ་བའི་བསྟན་ལ་བྱ་བ་བྱེད་མཁས་པའི༔ ཆོས་བདག་སྐྱེས་ཆེན་རིག་པ་འཛིན་རྣམས་ལ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ངེས་མེད་གཅིག་ཏུ་འདྲེས་པ་རྡོ་རྗེའི་སྤུན༔ ཐེག་གསུམ་བསྒྲུབ་ལ་བརྩོན་པ་དགེ་འདུན་སྡེ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ རིམ་གཉིས་མཐར་ཕྱིན་སྐུ་གསུམ་དཀྱིལ་འཁོར་ནས༔ དངོས་གྲུབ་འདོད་སྟེར་ཡི་དམ་དཀྱིལ་འཁོར་ལྷ༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ ལེགས་ཉེས་སྟངས་འཛིན་མཁའ་སྤྱོད་ཕོ་བྲང་ནས༔ རྡོ་རྗེ་ཕག་མོ་མཁའ་འགྲོ་སྡེ་ལྔའི་ཚོགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ བཀའ་དང་དམ་ཚིག་གཉན་པོའི་ཕོ་བྲང་ནས༔ ཨེ་ཀ་ཛ་ཊི་བརྒྱུད་གསུམ་བསྲུང་མའི་ཚོགས༔ གསོལ་བ་འདེབས་སོ་བརྩེ་ཆེན་ཐུགས་རྗེས་དགོངས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ དེ་ལྟར་གསོལ་བ་བཏབ་པའི་བྱིན་རླབས་ཀྱིས༔ ལུས་རྟེན་མི་གཙང་སྒྱུ་མའི་མགྲོན་ཁང་ནས༔ སེམས་ཉིད་འཁྲུལ་མེད་རང་བྱུང་ཆོས་ཀྱི་སྐུ༔ མཐའ་བརྒྱད་བྲལ་བ་དབུ་མའི་ཀློང་ཡངས་ནས༔ འོད་གསལ་འདུས་མ་བྱས་པའི་གདངས་ཚད་ཀྱིས༔ སྐུ་གསུམ་བླ་མའི་ཐུགས་གར་འཕོ་བར་ཤོག༔ ཅེས་བརྗོད་ལ། འོག་རླུང་གྱེན་དུ་དྲངས་ཏེ་བསྡམས༔ བར་རླུང་བུམ་ཅན་ཐད་སོར་བརྒྱངས༔ སྟེང་རླུང་སྤྱི་གཙུག་མཁའ་ལ་འཕངས༔ མིག་ཀྱང་བར་སྣང་དབྱིངས་སུ་བལྟ༔ ཞེས་གསུངས་པ་ལྟར་རླུང་དང་མིག་གནད་གཅུན་ཏེ། ཚེ་འདས་ཀྱི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ཡར་བ་ལྟར་ཚངས་པའི་སྒོ་ནས་སངས་རྒྱས་འོད་དཔག་མེད་པའི་ཐུགས་ཀར་ཐིམ་པར་མོས་ཤིང་། ཧིཀ་གི་སྒྲ་གསུམ་ལྔ་བདུན་སོགས་བསྟུད་མར་བརྗོད་པས་སྤར་རོ། །ཡང་སངས་རྒྱས་འོད་དཔག་མེད་པའི་རྣམ་པ་གསལ། འོད་མཚན་དང་གསོལ་འདེབས་ཀྱིས་དགེ་རྩ་བསྐྱེད་པ། གཞན་དོན་བྱང་ཆུབ་སེམས་བསྐྱེད་པ། བསྔོ་སྨོན་དག་པས་རྒྱས་འདེབས་པ་སྟེ་བདེ་བ་ཅན་དུ་སྐྱེ་བའི་རྒྱུ་བཞི་པོ་ཡིད་ལ་བྱ་བ་དང་མ་བྲལ་བས། སངས་རྒྱས་འོད་དཔག་མེད་ལ་གསོལ་བ་འདེབས༔ འཕགས་མཆོག་ཐུགས་རྗེ་ཆེན་པོ་ལ་གསོལ་བ་འདེབས༔ རྗེ་བཙུན་འཕགས་མ་སྒྲོལ་མ་ལ་གསོལ་བ་འདེབས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས༔ གྲུབ་ཆེན་རྗེ་འབངས་ཉེར་ལྔ་ལ་གསོལ་བ་འདེབས༔ འགྲོ་མགོན་ལུང་རིག་གླིང་པ་ལ་གསོལ་བ་འདེབས༔ འཁྲུལ་ཞིག་འགྱུར་མེད་བློ་གྲོས་ལ་གསོལ་བ་འདེབས༔ དྲིན་ཆེན་རྩ་བའི་བླ་མ་ལ་གསོལ་བ་འདེབས༔ ཟབ་ལམ་འཕོ་བ་འབྱོང་བར་བྱིན་གྱིས་རློབས༔ བཟོད་དཀའ་ངན་འགྲོའི་གཡང་ལས་དྲང་དུ་གསོལ༔ མཁའ་སྤྱོད་གནས་སུ་འཕོ་བར་བྱིན་གྱིས་རློབས༔ མི་ལྡོག་བཙན་ས་ཟིན་པར་བྱིན་གྱིས་རློབས༔ ཅེས་གསོལ་འདེབས་བསྡུས་པ་དང་། གཞན་ཡང་། སངས་རྒྱས་འོད་དཔག་མེད་ལ་ཕྱག་འཚལ་ལོ༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ དྲིན་ཆེན་རྩ་བའི་བླ་མས་ཐུགས་རྗེས་ཟུངས༔ རྩ་བ་བརྒྱུད་པའི་བླ་མས་ལམ་སྣ་དྲོངས༔ ཟབ་ལམ་འཕོ་བ་འབྱོང་བར་བྱིན་གྱིས་རློབས༔ མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས༔ ཚེ་འདས་འདི་ནས་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་བར་བྱིན་གྱིས་རློབས༔ ཅེས་འཇག་ཟུག་མའི་འཕོ་བ་བསྡུས་པ་དང་། ཨེ་མ་ཧོ། ཤིན་ཏུ་ངོ་མཚར་འོད་དཔག་མེད་མགོན་དང་། །ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ། །ཚེ་འདས་རྩེ་གཅིག་ཡིད་ཀྱིས་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །འཇིག་རྟེན་ཕྱི་མར་སོང་བའི་ཚེ་འདས་ཀྱི། །རྣམ་ཤེས་བདེ་ཆེན་འཕོ་བར་བྱིན་གྱིས་རློབས། །ཅེས་གནམ་ཆོས་འཕོ་ལུང་སོགས་ཅི་རིགས་བརྗོད་ཅིང་སོ་སོའི་མཐར། བདག་གིས་ཧིཀ་དང་ཕཊ་ཀྱི་སྒྲས་བསྐུལ་བས་སྙིང་གི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ཡར་བ་ལྟར་འོད་དཔག་མེད་ཀྱི་ཐུགས་ཀར་ཐིམ་པར་མོས་ལ། ཧིཀ་དང་ཕཊ་ཀྱི་སྒྲས་སྤར་བར་བྱའོ། །མཇུག་ཏུ། ཨེ་མ་ཧོ། །འཕགས་མ་འོད་ཞུ་སྤྱི་བོའི་གཙོ་ལ་ཐིམ། །དེ་ཉིད་འོད་ཀྱི་ལམ་ནས་རྫུ་འཕྲུལ་གྱིས། །བདེ་ཆེན་ཞིང་གི་གཙོ་དང་འཁོར་ལ་འདྲེས། །མཐའ་ཡས་འགྲོ་བ་འདྲེན་པའི་དཔལ་དུ་གྱུར། །ཕཊ༔ ཅེས་གནས་ལུགས་མ་བཅོས་པའི་ངང་དུ་བཞག་མཐར། བསྔོ་སྨོན་རྣམ་དག་བརྗོད་པར་བྱ་བ་ཁོ་ནའོ། །ཞེས་འགྲོ་མགོན་ལུང་རིག་གླིང་པའི་དགོངས་གཏེར་གྱི་འཕོ་ལུང་གཤིན་པོར་འདེབས་ཚུལ་འདི་ནི་དགེ་རྒན་འཇམ་དབྱངས་བློ་འཕེལ་གྱི་ངོར། མགོ་སྤྲུལ་པས་སོ། ། ངོ་སྤྲོད་ཉུང་ངུ་ཐར་ལམ་གསལ་བྱེད།གཤིན་པོ་རྗེས་འཛིན་ཐུགས་རྗེའི་ལྕགས་ཀྱུ་ལས། ངོ་སྤྲོད་ཉུང་ངུ་ཐར་ལམ་གསལ་བྱེད་བཞུགས། འོ། འཇིག་རྟེན་འདི་ནས་ཕ་རོལ་དུ་སོང་བའི་ཚེ་དུས་ལས་འདས་པ་ཆེ་གེ་མོ་ཞེས་བྱ་བ་ཁྱོད་ལ་ད་ལྟ་མི་རྟག་འཆི་བ་ཞེས་བྱ་བ་དེ་སླེབས་ནས་འཇིག་རྟེན་ཚེ་འདིའི་སྣང་བ་ནི་ནུབ། འཇིག་རྟེན་ཕྱི་མའི་སྣང་བ་ནི་མ་ཤར་བར་ལྟ་ཆོས་ཉིད་བར་དོའམ་སྲིད་པ་བར་དོ་ན་གནས་པའི་སྐབས་ཡིན་པས་དྲི་གོས་དང་མིང་བྱང་འདི་ལ་རྣམ་ཤེས་ཀྱི་རྟེན་ཆོས་ལ་ཡིད་མ་ཡེངས་པར་ཉོན་ཅིག དེ་ཡང་ཁྱེད་རང་གཅིག་པུ་ཤི་བ་ཁོ་ན་ཙམ་དུ་མ་ཟད་དེ། མཁའ་མཉམ་གྱི་འགྲོ་བ་མཐའ་དག་སྔ་ཕྱི་ཙམ་མ་གཏོགས་འཆི་བ་ལས་ཐར་བ་གཅིག་ཀྱང་ཡོད་པ་མ་ཡིན་ཏེ། གནས་གང་དུ་འདུག་གམ་སོང་ཀྱང་འཆི་བས་མི་སླེབས་པའི་གནས་ཡུལ་མ་མཆིས་ཤིང་། གྲོགས་སུ་དང་འགྲོགས་ཀྱང་འཆི་བ་ལས་བཤོལ་བའི་ཐབས་མེད་ལ། སྟོང་གསུམ་འཁོར་ལོས་བསྒྱུར་བའི་རྒྱལ་པོ་མན་ཆད་ནས། སྲོག་ཆགས་པའི་གྲོགས་སྦུར་ཡན་ཆད་ལ་མ་ཤི་ཚེ་ཐར་དུ་སོང་བ་གཅིག་ཀྱང་མེད་པའི་ངང་ཚུལ་སོམས་ལ། ཁྱེད་རང་འཆི་བ་ཐོག་ཏུ་བབ་པ་ལ་སྔང་སྐྲག་དང་མྱ་ངན་ཆེན་པོ་མ་བྱེད་ཅིག ཁྱོད་ལ་སྔར་བྱུང་བའི་ཐིམ་སྡུད་ཀྱི་རྟགས་དང་སྣང་བ་སྣ་ཚོགས་ཤར་བའི་རྗེས་ཐོག་ཏུ་སྣང་མཆེད་ཐོབ་གསུམ་ཞེས་བྱ་བ་ལ། རང་བཞིན་བརྒྱད་ཅུའི་རྟོག་ཚོགས་མཐའ་དག་ཀུན་གཞི་ལ་ཐིམ་པའི་སྐབས་སུ་འོད་གསལ་ཆོས་ཀྱི་སྐུ་ཇི་ལྟ་བ་ཞིག་ཤར་བ་དེ་ག་ངོ་འཕྲོད་ཅིང་རང་སྣང་ཞི་ཁྲོའི་ལྷ་ཚོགས་ཅི་རིགས་སུ་ཤར་བ་དེ་རྣམས་ངོ་ཤེས་ན་དེ་མ་ཐག་སྐད་ཅིག་སྐད་ཅིག་ལ་གྲོལ་རྒྱུ་ཡིན་པ་ལ། རང་ངོ་མ་ཤེས་པའི་དབང་གིས་སླར་ཡང་བར་དོ་ཡིད་ཀྱི་ལུས་ཞེས་བྱ་བ་དེ་བླངས་ནས་བར་དོའི་འཁྲུལ་སྣང་དང་འཇིགས་སྐྲག་སྣ་ཚོགས་འཆར་བ་ཡིན། དེ་ཡང་བར་དོར་གནས་པའི་རྟགས་སུ་ཅི་འདྲ་ཡོད་ཅེ་ན། ད་ལྟ་ཁྱོད་ཀྱི་འཁྲུལ་སྣང་ལ་རི་རབ་ཆེན་པོ་ཉིལ་བ་ལྟ་བུ་དང་། རྒྱ་མཚོ་ཆེན་པོ་འཕྱུར་བ་ལྟ་བུ་དང་། ནགས་ཚལ་ཆེན་པོ་ལ་མེ་མཆེད་པ་ལྟ་བུ་དང་། རླུང་ཆེན་འུར་བ་ལྟ་བུའི་སྒྲ་རྣམས་འབྲུག་སྟོང་དུས་གཅིག་ལ་ལྡིར་བ་ལྟ་བུ་སྟེ། ཤིན་ཏུ་འཇིགས་པའི་སྒྲ་ཆེན་པོ་བཞི་གྲགས་པ་དང་། གང་དང་གང་དུ་བལྟས་པའི་གནས་དེ་དང་དེར་འོད་དཀར་པོ་དང་། སེར་པོ་དང་། དམར་པོ་དང་། ནག་པོའི་ལམ་ཆེན་པོ་བཞི་ལས་གང་ཡང་རུང་བ་མཐོང་བ་དང་། གང་དུ་ཕྱིན་པའི་ལམ་ཐམས་ཅད་དུ་ཤིན་ཏུ་སྐྲག་ཅིང་ཡ་ང་བར་བྱེད་པའི་གཡང་ས་ཆེན་པོ་སྐྱ་ཆད་དེ་བ་དང་། དམར་ཟིང་ངེ་བ་དང་། ནག་ངམ་མེ་བ་གསུམ་ལས་གང་ཡང་རུང་བས་ཆོད་པ་མཐོང་ན་དེ་ཡང་ཁྱོད་བར་དོ་ན་གནས་པའི་རྟགས་ཡིན། གཞན་ཡང་ཁྱོད་ཀྱི་ཉེ་དུ་འབྲེལ་བ་རྣམས་ཀྱིས་མྱ་ངན་དང་ངུ་ཆོམ་བྱེད་ཅིང་སྨྲེ་སྔགས་འདོན་པ་མ་བཟོད་པས་དྲུང་དུ་ཕྱིན་ནས་གཏམ་སྨྲས་ཀྱང་དེ་རྣམས་ཀྱིས་མ་མཐོང་ཞིང་མ་ཐོས་པ་དང་། རྐང་རྗེས་སོགས་མི་འབྱུང་བ་དང་། གཡས་གཡོན་མདུན་རྒྱབ་གང་དུ་བལྟས་ཀྱང་ལུས་ལ་གྲིབ་མ་མེད་པ་དང་། ཉི་ཟླ་དང་གཟའ་སྐར་མི་མཐོང་ཞིང་སྣང་མུན་འདྲེས་པའམ། སྐྱ་རེངས་ཤར་བ་ལྟ་བུའི་གསལ་སྣང་འབྱུང་བ་དང་། རྩིག་པ་དང་རི་བྲག་སོགས་ལ་ཐོགས་པ་མེད་པར་ཟངས་ཐལ་དུ་འགྲོ་བར་ནུས་པ་དང་། མངོན་ཤེས་ཅུང་ཟད་འཆར་བ་སྟེ་བར་དོ་མཐའ་གཅིག་ཏུ་ངེས་པའི་རྟགས་དྲུག་དང་། གནས་གཅིག་ཏུ་སྡོད་ལོང་མེད་པར་ཆ་མེད་ཀྱི་ཡུལ་ཕྱོགས་མང་པོ་མཐོང་ཞིང་བསམ་པ་ཙམ་གྱིས་སླེབས་པ་དང་། གྲོགས་ཤི་གསོན་གང་དང་ཡང་འགྲོགས་པ་དང་། ཟས་ཀྱང་བསྔོས་ན་ལྷ་ཡི་ཟས་རོ་བརྒྱ་པ་དང་། ཏིང་ངེ་འཛིན་གྱི་ཟས་ཀྱང་འཐོབ་ལ་མ་བསྔོས་པར་ཟས་ཕལ་བ་ཡང་ལོངས་སྤྱོད་མི་ནུས་པ་དང་། གོས་ཡོད་མེད་གོས་ཀྱི་ཁ་ཏོག་རེག་བྱ་འཇམ་རྩུབ་སོགས་ཀྱང་གཅིག་ཏུ་མ་ངེས་པ་དང་། ལས་དང་རྗེས་མཐུན་གྱི་སྤྱོད་པ་སྣ་ཚོགས་སྟོན་པ་དང་། སེམས་ཀྱི་འཆར་ཚུལ་ཡང་འཕྲལ་ནས་འཕྲལ་དུ་འགྱུར་ནས་འགྲོ་བ་སྟེ་གཅིག་ཏུ་མ་ངེས་པའི་རྟགས་དྲུག་པོ་དེ་རྣམས་སོ་སོར་འཆར་ཞིང་སྣང་བ་དེ་ཡང་ཁྱོད་བར་དོ་ན་གནས་པའི་རྟགས་ཡིན། གཞན་ཡང་གཤིན་རྗེའི་སྐྱེས་བུ་མཚོན་ཆ་སྣ་ཚོགས་ཐོགས་པ་རི་རབ་ཙམ་མང་པོས་སོད་སོད་དང་ཆོད་ཆོད་དང་། རྒྱོབ་རྒྱོབ་ཀྱི་སྒྲ་དང་བཅས་ཏེ་བདས་ཤིང་ཁྲིད་པ་དང་། ལས་ཀྱི་རྡེའུ་དཀར་ནག་བགྲང་བ་དང་། ཐོག་སེར་དང་བུ་ཡུག་འཚུབ་པས་བདས་ནས་ངལ་སྟེགས་དང་མཆོད་རྟེན་སོགས་ལ་སྐྱབས་འཚོལ་བ་དང་། ཞག་བདུན་ཕྲག་རེ་རེའི་མཚམས་སུ་སྐྱེ་སྲིད་དང་འཆི་སྲིད་ཀྱི་སྣང་བ་འབྱུང་བ་དང་། ནམ་མཁའ་ལ་འཕུར་བ་དང་། ས་འོག་ཏུ་འཛུལ་བ་དང་། མགོ་བོ་དུད་དེ་འགྲོ་བ་དང་། བྲང་གིས་འགྲོ་བ་དང་། མགོ་ཐུར་དུ་བསྟན་ནས་འགྲོ་བ་དང་། རླུང་དམར་དྲག་པོས་ཁྱེར་བ་དང་། ལུས་ལ་མེ་མཆེད་པ་དང་། ཆུ་ཀླུང་རྦ་རྒོད་འཁྲུགས་པས་ཁྱེར་བ་ལ་སོགས་པ་སྔར་གསོན་པོའི་དུས་དང་མི་འདྲ་བའི་སྣང་བ་སྣ་ཚོགས་འཆར་བ་དེ་ཡང་ཁྱོད་བར་དོ་ན་གནས་པའི་རྟགས་ཡིན། དེ་ལྟར་བར་དོར་གནས་པའི་རྟགས་དེ་རྣམས་ཐམས་ཅད་ཀྱང་ཁྱོད་རང་གི་སེམས་ཀྱི་བག་ཆགས་འཁྲུལ་བའི་སྣང་བ་ལས་བྱུང་བ་ཙམ་མ་གཏོགས་དོན་ལ་བདེན་པར་གྲུབ་པ་རྡུལ་ཙམ་ཡང་མེད་ཀྱང་། དེ་སྔ་ཕན་ཆད་བར་དོ་ལ་བར་དོ་ཡིན་པར་ངོ་མ་ཤེས་པའི་དབང་གིས་འཇིགས་སྐྲག་དང་འཁྲུལ་བའི་སྣང་བ་དེ་ཙམ་ཞིག་བྱུང་འདུག་ཀྱང་། ད་ནི་རང་གི་གྲིབ་མ་ལ་རང་སྐྲག་པ་ལྟ་བུའི་འཁྲུལ་སྣང་དེ་རྣམས་ལ་བདེན་པར་བཟུང་ནས་སེམས་ཞུམ་ཞིང་འཇིགས་སྐྲག་དང་མྱ་ངན་ཆེན་པོ་མ་བྱེད་ཅིག ད་ལྟ་ཁྱོད་རང་གི་ཤུལ་ན་ཡོད་པའི་གྲོགས་དང་མཛའ་བཤེས། གཉེན་དང་ཉེ་དུ་ནོར་རྫས་ཅ་ལག་ཡུལ་དང་ཁང་ཁྱིམ་སོགས་གང་ལའང་ཆགས་པ་དང་ཞེན་པའི་བློ་སྐྱེས་ནའང་། འདུས་བྱས་མི་རྟག་པའི་རང་མཚང་བསྟན་ནས་སོ་སོར་བྲལ་ཟིན་པ་ཡིན་པས་ད་ཕྱིན་ཆད་སྐད་ཅིག་ཀྱང་འགྲོགས་ཤིང་ལོངས་སྤྱོད་པའི་སྐལ་བ་ནི་མེད་ལ། ཆགས་ཀྱང་ཁྱོད་རང་འཁོར་བར་འཕྱན་པའི་རྒྱུ་ལས་མི་འདུག་པས་མ་ཆགས་མ་ཞེན་པར་དྲན་པའི་རང་སོ་ཟུངས་ལ། ཆགས་ཤིང་ཞེན་པའི་ཡུལ་ལོངས་སྤྱོད་ཀྱི་དངོས་པོ་དེ་དག་ཀྱང་ལེགས་པར་བརྟགས་ན་མེད་པ་ལ་ཡོད་པར་བཟུང་། མི་རྟག་པ་ལ་རྟག་པར་བཟུང་། མི་བདེན་པ་ལ་བདེན་པར་བཟུང་ནས། དཔེར་ན་སྒྱུ་མའི་མཁན་པོས་ཤིང་དུམ་དང་རྡེའུ་སོགས་ལ་བདེན་བདེན་ལྟ་བུའི་འགྲོ་བའི་མིག་བསླུ་བར་བྱེད་པའི་དངོས་པོ་སྣ་ཚོགས་སྤྲུལ་པ་ལ། བྱིས་པ་བླུན་པོ་མི་ཤེས་པའི་རང་བཞིན་ཅན་རྣམས་ཀྱིས་བདེན་གྲུབ་ཏུ་བཟུང་བ་དང་། ཉིང་འཁྲུལ་རྨི་ལམ་གྱི་སྐབས་སུ་བདེ་སྡུག་གི་འཁྲུལ་སྣང་སྣ་ཚོགས་ཅི་དང་ཅི་རྨིས་པ་དེ་ལ་དངོས་སུ་ཤེས་ཤིང་བདེན་པར་བཟུང་བ་ལ་གཉིད་ལས་སད་པ་ན་ཅི་ཡང་མ་ཡིན་པ་བཞིན་དུ། སྔར་གསོན་པོའི་དུས་སུ་སྐྱིད་སྡུག་ལེགས་ཉེས་གང་བྱུང་བ་རྣམས་ཀྱང་ད་ལྟ་གཉིད་ལས་སད་པའམ་ཡོད་མ་མྱོང་བ་ལྟ་བུར་གྱུར་ནས་འཁྲུལ་སྣང་གི་རྫུན་ཕུག་ལྡིབ་འདུག་པའི་ཚུལ་སོམས་ལ་མི་རྟག་ཅིང་མི་བརྟན་པའི་རང་བཞིན་ཅན་འདི་འདྲ་བ་ལ་ཆགས་པ་དང་ཞེན་པ་སྤུ་ཙམ་ཡང་བྱེད་རེ་ཀན་སྙམ་པ་གྱིས་ལ་ཆགས་མེད་ཞེན་མེད་ཀྱི་ངང་ལ་གནས་པར་གྱིས་ཤིག གཞན་ཡང་ཁྱོད་རང་གི་ཤུལ་མི་རྣམས་ཀྱིས་སྐུ་གསུང་ཐུགས་རྟེན་བཞེངས་པ། དགེ་འདུན་ལ་ཞབས་ཏོག སྐྱེ་བོ་ལ་སྦྱིན་གཏོང་སོགས་ཁྱོད་རང་ལ་གང་ཕན་གྱི་དགེ་སྦྱོར་བྱེད་པ་ལ། ཁྱོད་རང་བསམ་པ་མ་དག་པའི་དབང་གིས་ཡོན་གནས་རྣམས་ཀྱང་གཉིད་རྨུགས་དང་རྣམ་གཡེང་གི་དབང་དུ་གྱུར་པ་དང་། ཏིང་ངེ་འཛིན་མི་གསལ་བ་དང་། སྔགས་མ་དག་པ་དང་། ཆོ་ག་ལྷག་ཆད་དུ་གྱུར་པ་དང་། ཚུལ་ཁྲིམས་ཡོངས་སུ་མ་དག་པ་དང་། ཀུན་ཀྱང་ཡོ་བྱད་ལ་རློམས་སེམས་ཅན་དུ་གྱུར་པ་སོགས་བསམ་པ་དང་སྦྱོར་བ་ཡང་དག་མ་ཡིན་པ་ཕྱིན་ཅི་ལོག་ཏུ་གྱུར་པའི་ཆ་ཅན་སྣ་ཚོགས་ཀྱང་ཁྱོད་ཀྱིས་ཤེས་ཤིང་མཐོང་ནས་ཀྱཻ་མ་ཀྱེ་ཧུད་འདི་རྣམས་ཀྱིས་ནི་བདག་བསླུས་སོ། ངེས་པར་བསླུས་སོ། ཤིན་ཏུ་བསླུས་སོ། བསླུ་བར་འགྱུར་རོ་སྙམ་ནས་དད་པ་དང་མོས་གུས་མི་སྐྱེ་བའི་སྟེང་དུ་མ་དད་པ་དང་ལོག་ལྟ་ཡང་སྐྱེ་བ་སྲིད་པས་དེ་ནི་ཁྱོད་ལ་ཐར་བའི་ལམ་གྱི་གེགས་དང་བར་ཆད་ཆེ་ཤོས་ཡིན་པས་ན། དེ་ལྟར་ནམ་དྲན་གྱི་དུས་སུ་བདག་རང་གི་བསམ་པ་མ་དག་པའི་སྟོབས་ཀྱིས་དཔེར་ན། མཁྲིས་ནད་ཅན་གྱིས་དུང་སེར་པོ་དང་། མིག་སྐྱོན་ཅན་གྱིས་སྐྲ་ཤད་དང་། དྷ་དྷུ་ར་ཟོས་པས་ཐག་ཁྲ་ལ་སྦྲུལ་དུ་མཐོང་བ་བཞིན་འདི་ལྟར་སྣང་བ་ཡིན་པས། དེ་ལ་དོགས་པ་དང་མི་དགའ་བ་ཅུང་ཟད་ཀྱང་མི་བྱེད་དོ་སྙམ་པ་དང་། ཁྱད་པར་དུ་ཚེ་རབས་ཐོག་མ་མེད་པའི་དུས་ནས་ལས་དང་ཉོན་མོངས་པའི་སྡིག་ལྟུང་བསགས་སྟོབས་ཆེ་བས་འཁོར་བ་དང་ངན་སོང་གི་འཇིགས་པ་ཆེན་པོས་ནོན་ཅིང་རབ་ཏུ་མནར་བ་བདག་ལ་སྐྱབས་དང་སྐྱེལ་མ། མགོན་དང་དཔུང་གཉེན་བླ་མ་དང་དཀོན་མཆོག་གསུམ་པོ་མ་གཏོགས་གཞན་མེད་དོ་སྙམ་པས། བརྟེན་ན་བསླུ་བ་མེད་པ་བླ་མ་དང་དཀོན་མཆོག་གསུམ་ལ་ཁྱེད་ཤེས་བློ་ཡི་འདུན་པ་དྲག་པོ་རྩེ་གཅིག་ཏུ་གཏོད་ཅིག གཞན་ཡང་ཁྱོད་རང་གི་ཤུལ་གྱི་ཉེ་དུ་འབྲེལ་བ་རྣམས་ཀྱིས་ཁྱོད་རང་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་ནས་རྣམ་གྲོལ་ནོར་བུའི་གླིང་དུ་འདྲེན་པའི་དེད་དཔོན་དུ་ངེད་རྣམས་སྦྲན་པ་ཡིན་པས། ངེད་ཅག་རྣམས་ཀྱིས་ཀྱང་བསམ་པ་སྨོན་འཇུག་བྱང་ཆུབ་སེམས་ཀྱིས་གཞི་བཟུང་། སྦྱོར་བ་རྟེན་འབྲེལ་ཆོ་ག་ཟབ་མོས་མཚམས་སྦྱར། གསང་བའི་དཀྱིལ་འཁོར་གཉན་པོའི་དལ་ཞལ་ཕྱེས་ཏེ། དག་པ་རབ་འབྱམས་གདན་གསུམ་ཚང་བའི་དཀྱིལ་འཁོར་གྱི་འཁོར་ལོ་མཁའ་ཁྱབ་ཏུ་སད་པའི་སྤྱན་སྔར། ཁྱོད་རང་གི་ལས་ཉོན་སྡིག་སྒྲིབ་ཉེས་ལྟུང་ཕྲ་རགས་རྣམ་གསུམ་རིམ་བཞིན་དག་པའི་ཕྱིར་དུ་སྦྱངས་ཁྲུས་བྲབ་གསུམ་གྱི་བྱ་བ་མཐའ་དག་གྲུབ་ནས། གནས་འདྲེན་གྱི་སྐབས། རིགས་དྲུག་གི་གནས་ནས་དྲངས་ཤིང་སྨིན་བྱེད་ཀྱི་དབང་བསྐུར་བ་དང་། གྲོལ་བྱེད་ཀྱི་གདམས་པ་ཟབ་མོ་ལ་བརྟེན་ནས་བདེ་ཆེན་དག་པའི་ཞིང་དུ་གནས་སྤར་བའི་རིམ་པ་རྣམས་བགྱིད་པའི་སྐབས་སུ་བབ་པ་ལགས་པས། ཞེས་པའམ། ལྷོ་སྒོ་ལྟ་བུ་ལ། གྲུབ་ནས། སྟོབས་བཞིའི་བཤགས་བསྡམས་ལ་བརྟེན་ནས་སྡིག་ལྟུང་ལྷག་མེད་དུ་བྱ་བ་དང་། ངན་སོང་ལས་འདོན་པའི་སྐབས་ལགས་པས། ཁྱེད་རང་ཡིད་གཞན་དུ་མ་ཡེངས་བར་དམིགས་པ་བརྟན་པོ་འདི་བཞིན་དུ་མཛོད་ཅིག ཅེས་དང་། འཕོ་བའི་སྐབས་ཡིན་ན། ངེད་ཅག་རྣམས་ཀྱིས་ཀྱང་། བསམ་པ་བྱང་ཆུབ་ཀྱི་སེམས་བསྐྱེད་པ་སྔོན་དུ་འགྲོ་བས། སྦྱོར་བ་རྟེན་འབྲེལ་གྱི་གནད་ཟབ་མོ་སྡིག་པོ་ཆེ་བཙན་ཐབས་ཀྱིས་འཚང་རྒྱ་བའི་མན་ངག་ཟབ་ལམ་འཕོ་བའི་གདམས་པ་ལ་བརྟེན་ནས་ཁྱོད་རང་འཁོར་བ་དང་ངན་སོང་གི་འཇིགས་པ་ཆེན་པོ་ལས་བསྒྲལ་ནས་དག་པ་སྐུ་གསུམ་གྱི་གོ་འཕང་ལ་སྦྱོར་བའི་སྐབས་སུ་བབས་པ་ལགས་པས། གང་ལྟར་ཡང་མཇུག་ཏུ། དཀྱིལ་འཁོར་གྱི་ལྷ་ཚོགས་རྣམས་ལ་ལུས་ཞིང་གི་རྡུལ་སྙེད་དུ་སྤྲུལ་ཏེ་ལུས་ཀྱིས་ཕྱག་འཚལ་བ་དང་། ངག་གིས་གསོལ་བ་འདེབས་པ། ཡིད་ཀྱིས་མོས་གུས་དྲག་པོས་སྐྱབས་སུ་རེ་ལྟོས་འཆའ་བ་རྣམས་ཞེ་ཐག་པ་ནས་གྱིས་དང་དེས་ཁྱོད་བར་དོའི་སྡུག་བསྔལ་ལས་ངེས་པར་གྲོལ་བར་འགྱུར་རོ།། ཞེས་བརྗོད་ལ་རང་གཞུང་གི་དམིགས་པ་ལ་འཇུག་གོ། །འདིར་སྨྲས་པ། བན་མིན་བོན་མིན་གྲོང་པའི་ཟ་ཆོག་འདི། །སྐྱ་མིན་སེར་མིན་བླུན་པོ་མདོ་ཤོར་དེས། །འདི་མིན་ཕྱི་མིན་བར་སྲིད་འགྲོ་བ་ལ། །ཕན་དུ་རེ་བས་བརྗོད་བྱའི་ལམ་དུ་སྤེལ།། ཞེས་གཤིན་པོ་རྗེས་འཛིན་གྱི་ཆོ་ག་གསུམ་པོ་གང་ལའང་སྦྱར་དུ་རུང་བའི་བར་དོའི་ངོ་སྤྲོད་ཉུང་ངུ་ཐར་ལམ་སྣང་བྱེད་ཅེས་བྱ་བ་འདི་ཡང་ཁོ་བོ་སྔགས་བཙུན་བདུད་འཇོམས་རོལ་པའི་རྡོ་རྗེའི་བློ་མཚོ་ལས་བྱུང་བའོ།། ཞི་ཁྲོའི་དབང་གི་མཚམས་སྦྱོར་མདོར་བསྡུས།༄༅། ཞི་ཁྲོའི་དབང་གི་མཚམས་སྦྱོར་མདོར་བསྡུས་བཞུགས། འོ་སྐལ་ལྡན་རིགས་ཀྱི་བུ་མ་ཡེངས་བར་ཉོན་ཅིག དེ་ཡང་སྔོན་ཚེ་མོའུ་གལ་མ་ཞེས་བྱ་བ་འདོད་སྲེད་དང་ཕྲག་ཏོག་གི་དབང་གིས་ལས་ངན་གྱི་རྒྱུ་མང་པོ་བསགས་པས་དམྱལ་བར་སྐྱེས་སྒྲིབ་སྦྱང་གི་ཆོ་གས་གྲོལ་བ་དང་། བར་དུ་རྒྱལ་བུ་དགེ་སྦྱོང་ཞེས་བྱ་བ་བྲམ་ཟེ་དུང་གི་ཕྲེང་བ་ཅན་ནམ་མིའི་ཐོད་པ་ཅན་ལས་རིག་པའི་གནས་ཐམས་ཅད་བསླབས་ནས་མཁས་པར་སོང་ཚེ་འགྲན་སེམས་དང་ཕྲག་ཏོག་གི་བསམ་སྤྱོད་ཀྱིས་སློབ་དཔོན་མྱོས་བྱེད་ཀྱིས་ར་རོ་བར་བྱས་ཏེ་རྔན་བསད་བྱས་པས་སེམས་ཅན་ལུས་སྲུལ་པོ་རིགས་དྲུག་གི་སྡུག་བསྔལ་དུས་གཅིག་ཏུ་མྱོང་བ་ཞིག་ཏུ་གྱུར་པ་དང་། སློབ་དཔོན་ཡང་བྱང་ཆུབ་ཀྱི་སེམས་ཉམས་ཤིང་སྨོན་ལམ་ལོག་པས་ངན་སོང་དུ་སྐྱེས་པ་ཡང་ཞི་ཁྲོའི་ལྷ་ཚོགས་ཀྱི་མཚན་བསྒྲགས་ཤིང་ཕྱག་འཚལ་དུ་བཅུག་པས་དམ་ཚིག་ཉམས་པ་སོར་ཆུད་ནས་རིག་འཛིན་གྱི་སར་བཀོད་པ་དང་། ཐ་མ་མཁའ་འགྲོ་མཚོ་རྒྱལ་གྱིས་ཆོས་བྱས་པ་ལ་བདུད་བློན་ཤནྟ་ཞེས་བྱ་བས་ཆད་པ་མང་པོ་བཅད་པའི་རྣམ་སྨིན་གྱིས་མནར་མེད་དུ་སྐྱེས་པ་འདྲེན་ཕྱིར་མཚོ་རྒྱལ་བྱོན་ཚེ་ལྕགས་སྲེག་གི་ཁང་པའི་སྒོ་ཕྱེ་མ་ནུས་པ་ལ་ལས་མཁན་རྣམས་ཀྱིསཞི་ཁྲོའི་ཆོ་ག་མ་གཏོགས་ཐར་ཐབས་མེད་པར་སྨྲས་པས་ཞི་ཁྲོའི་ཆོ་ག་མཛད་པས་ལྕགས་སྲེག་གི་ཁང་པ་རང་ཞིག་ལ་སོང་ནས་བློན་པོ་ཤནྟ་སོགས་སེམས་ཅན་འབུམ་ཚོ་ལྔ་དྲངས་པ་ལྟར། ཞི་ཁྲོའི་ལྷ་ཚོགས་ཀྱི་མཚན་འདི་རྣམས་མཚམས་མེད་པ་ལྔ་བསགས་པའི་མིའི་རྣ་ལམ་དུ་ལན་གཅིག་ཐོས་པས་ཀྱང་ན་རཀ་ཆེན་པོར་མི་ལྟུང་ངེས་པར་མྱུར་དུ་གྲོལ་བའི་ཚུལ་ནི། འགྱོད་ཚངས་ཀྱི་རྒྱལ་པོ་འབྱུང་ཁུངས་ཀྱི་རྒྱུད་ལས། ཞི་བའི་ལྷ་ཚོགས་བུདྡྷ་བཞི་བཅུ་རྩ་གཉིས་ཀྱི་མཚན་བརྗོད་པས་མཚམས་མེད་པ་ལྔ་དང་སྡིག་པ་ལྕི་བ་ཐམས་ཅད་བྱང་བར་འགྱུར་རོ། །ཁྲག་འཐུང་གི་ལྷ་ཚོགས་དྲུག་ཅུའི་མཚན་བརྗོད་ཅིང་ཕྱག་འཚལ་བས་སྡིག་སྒྲིབ་ཐམས་ཅད་བྱང་བར་འགྱུར་རོ། །ཞེས་དང་། སྒྱུ་འཕྲུལ་ཞི་ཁྲོའི་རྒྱུད་གསང་བ་སྙིང་པོ་ལས། གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆགས་མ་ལུས་ཀུན་བྱང་ནས། །མཚམས་མེད་ལྔ་ལ་སྨོས་ཅི་དགོས། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། ཞེས་དང་། དྲི་མེད་རྒྱལ་པོ་བཤགས་པའི་རྒྱུད་ལས། གལ་ཏེ་རྣལ་འབྱོར་བ་གང་ཞིག་གིས་དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་གཅིག་ཐོས་པ་ཙམ་གྱིས་ཀྱང་ན་རཀ་ཆེན་པོར་མི་ལྟུང་ངོ་། །དེ་བས་གུས་པས་ཕྱག་འཚལ་ལོ། །ཞེས་དང་། རང་བཞིན་སྒྱུ་འཕྲུལ་དཀྱིལ་འཁོར་ལ། །གང་གིས་གུས་པས་ཕྱག་འཚལ་ན། །ཉམས་ཆགས་ཀུན་ཀྱང་བྱང་བར་འགྱུར། །དམ་ཚིག་སྐོངས་ནས་དངོས་གྲུབ་འཐོབ། ཅེས་སོགས་གསུངས་པའི་དོན་དེར་དགའ་སྤྲོ་གྱིས་ལ་ཁྱེད་རང་རིགས་དྲུག་གི་གནས་ནས་དྲངས་བའི་ཆེད་དུ་འདིའི་རྗེས་ཟློས་མཛོད། ཀྱཻ་མ་མགོན་པོ༴སོགས། ༈ དེ་ནས་ཆས་སུ་གཞུག་པ་ནི། ཁྱེད་རང་རྣམས་སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་འཐིབ་ཏེ་གསང་བ་སྔགས་ཀྱི་དཀྱིལ་འཁོར་མཇལ་མ་མྱོང་བའམ། གལ་ཏེ་མྱོང་ནའང་དཀྱིལ་འཁོར་སོ་མ་འདི་ཉིད་མཇལ་མ་མྱོང་བའི་མཚོན་བྱེད་དུ་དར་ཡུག་དམར་པོ་རེས་གདོང་གཡོག་བཅིང་བའི་མོས་པ་མཛོད། ཨོཾ་ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་རུང་བས། ཕྱག་རྟེན་གྱི་སླད་དུ་ཨུ་དུམ་ཝ་ར་ལ་སོགས་པའི་མེ་ཏོག་གི་ཕྲེང་བ་ཁ་ཏོག་ལྔ་བ་རེ་བྱིན་པའི་མོས་པ་མཛོད་ལ། ཨོཾ་ཨ་ཁཾ་ཝི་ར་ཧཱུྃ། གཞུང་གང་ཡིན་གྱི་ཚིག་བརྗོད། དེ་ནས་རིགས་བརྟགས་པའི་ཕྱིར་མེ་ཏོག་དོར་བ་ནི། མདུན་འདི་ན་བཞུགས་པའི་སྒྱུ་འཕྲུལ་ཞི་ཁྲོ་རབ་འབྱམས་ཀྱི་ལྷ་ཚོགས་གཙོ་དང་འཁོར་གྱི་རྣམ་པར་བཞུགས་པ་ཡེ་ཤེས་གཅིག་གི་རོལ་པ་ལ་མཆོག་དམན་དང་བཟང་ངན་མ་མཆིས་མོད། འོན་ཀྱང་རང་རང་གི་སྔོན་གྱི་ལས་འབྲེལ་ཡོད་པའི་ལྷ་ཞིག་ལ་འབབ་པར་ཤོག་ཅིག་སྙམས་པས་ཚིག་འདིའི་རྗེས་ཟློས་དང་བཅས་ཏེ་དོར་བར་མཛོད། ཧོ། བདག་ཅག་རིག་པའི༴སོགས། དེ་ལྟར་མེ་ཏོག་གང་ལ་བབས་པའི་རིགས་དང་མཐུན་པའི་མིང་བཏགས་པ་ཡིན་དེ། དབུས་སུ་བབས་ན་ཆོས་དབྱིངས་རང་གྲོལ། ཤར་དུ་བབས་ན་འགྱུར་མེད་རྡོ་རྗེ། དེ་བཞིན་དུ་ལྷོར་རིན་ཆེན་རྒྱལ་པོ། ནུབ་ཏུ་པདྨ་བཞད་པ། བྱང་དུ་ཀརྨ་དོན་ཡོད། མཚམས་བཞིར་སྣ་ཚོགས་རང་གྲོལ། མོ་རིགས་རྣམས་ལ་དབུས་སུ་ཆོས་དབྱིངས་དཔའ་མོ། དེ་བཞིན་དེ་བཞིན་དུ་རྡོ་རྗེ་སྤྱན་མ། རིན་ཆེན་སྒེག་མོ། བདེ་ཆེན་དབང་མོ། ལས་རབ་སྒྲོལ་མ། ལྷག་བསམ་བཟང་མོ་ལ་སོགས་པ་རྣམས་དབང་གི་གསང་མཚན་ཡིན་པས་འཛིན་པར་ཞུ། |