 མགོ་ལོག་སྤྲུལ་སྐུའམ་གར་དབང་འཇིགས་མེད་རྣམ་རྒྱལ་་གྱི་གསུང་འབུམ།གླེགས་བམ། ཧཱུྃ༽གཡུ་ཁོག་མགོ་ལོག་སྤྲུལ་སྐུའམ་གར་དབང་འཇིགས་མེད་རྣམ་རྒྱལ་བཟང་པོ།སྔ་འགྱུར་མདོ་ཁམས་གཡུ་ཁོག་དཔེ་ཚོགས།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྐྱེ་ཕྲེང་གསོལ་འདེབས་བཟང་པོ་ཀུན་འདུས།༄༅། སྐྱེ་ཕྲེང་གསོལ་འདེབས་བཟང་པོ་ཀུན་འདུས་བཞུགས། ཨེ་མ་ཧོ། འཕགས་མཆོག་ཕྱག་ན་པདྨོའི་ཐུགས་རྗེ་ལས། །ལེགས་འཁྲུངས་གསེར་གྱི་ལག་དང་མཛེས་པའི་ཏོག །གནག་རྫི་གྲུབ་ཆེན་ནོར་བུ་གོ་ལེབ་དང་། །པཎ་ཆེན་ནག་མོའི་ཁོལ་ལ་གསོལ་བ་འདེབས། །བོད་ཡུལ་མཁས་དབང་ཐུ་མི་ཨ་ནུའི་སྲས། །ལ་སུམ་རྒྱལ་བ་བྱང་ཆུབ་གྲུབ་པའི་རྗེ། །པུཎྱེ་ཤྲཱི་ཡེ་རེང་མི་ཡི་དབང་། །བློ་གསལ་བསྟན་སྐྱོང་རྣམས་ལ་གསོལ་བ་འདེབས། །ཀོང་མོ་ཚེ་ལྷ་གང་འབྲེལ་དོན་དང་ལྡན། །སྲིད་སྡེ་དགེ་བའི་ས་སྐྱོང་རྒྱལ་བསྟན་འཛིན། །བློ་གྲོས་རིན་ཆེན་ཟབ་ཆོས་གཏེར་ལ་དབང་། །དབོན་སྤྲུལ་ཀུན་བཟང་གཉིས་པར་གསོལ་བ་འདེབས། །གང་དེའི་ཡང་སྲིད་རབ་བྱུང་གསར་རྙིང་གཉིས། །སྔགས་སྤྱོད་གཅིག་བཅས་གསུམ་གྱི་རྗེས་མ་ཉིད། །སྦས་ཚུལ་བསྟན་འགྲོར་ཕན་པའི་ལྷག་བསམ་ཅན། །འཇིགས་མེད་རྣམ་རྒྱལ་བཟང་པོར་གསོལ་བ་འདེབས། །དེ་ལྟར་ཡིད་གཉིས་སྤངས་ནས་གསོལ་བཏབ་མཐུས། །བདག་སོགས་དཀར་ནག་ལས་སྨོན་འབྲེལ་བ་ཀུན། །གནས་སྐབས་ཀེགས་ཞི་བསམ་དོན་ཡིད་བཞིན་འགྲུབ། །མཐར་ཐུག་དོན་གཉིས་འབྱུང་བར་བྱིན་གྱིས་རློབས།། ཞེས་འདི་གཡུང་དྲུང་སྐལ་བཟང་ནན་བསྐུལ་ངོར། །ཀུ་ཀུའི་མཆེ་བར་གསོལ་བཏབ་རྒན་མོ་གྲོལ། །ཁྱི་སོར་རིང་བསྲེལ་བྱུང་བའི་དཔེ་བཞིན་དུ། །གཞན་ལ་ཕན་ཕྱིར་སྔགས་སྨྱོན་རང་གིས་བྲིས།། སྐྱེ་ཕྲེང་གསོལ་འདེབས་དུས་གསུམ་གསལ་བྱེད།སྐྱེ་ཕྲེང་གསོལ་འདེབས་དུས་གསུམ་གསལ་བྱེད་བཞུགས། ཨེ་མ་ཧོ། སྔོན་དུས་བསྐལ་བར་གསེར་གྱི་ལག་པའི་དབང་། །ཐུབ་པའི་སྤྱན་སྔར་རྒྱལ་སྲས་མཛེས་པའི་ཏོག །དབྱངས་ཅན་འཕགས་མས་རྗེས་བཟུང་ནག་མོའི་ཁོལ། །མཁས་ཤིང་གྲུབ་བརྙེས་ནོར་བུ་ཧཱུྃ་ཀཱ་ར། །བྲམ་ཟེའི་སློབ་དཔོན་སུ་ཝརྞ་དཱི་པ། །སྨྲི་ཏི་ཛྙ་ན་རྣམས་ལ་གསོལ་བ་འདེབས། །བྷོ་ཊར་པདྨས་རྗེས་བཟུང་ལ་སུམ་པ། །སྙེ་ཐང་ཡང་དབེན་མུས་ཆེན་རྣམ་རྒྱལ་བཟང་། །ཟབ་གཏེར་མངའ་བདག་རཏྣ་ཀརྨ་གླིང་། །དབུ་མའི་སྲོལ་འཛིན་དགའ་བའི་རྡོ་རྗེའི་མཚན། །བསམ་གཏན་ཆོས་གླིང་མཆོག་སྤྲུལ་ཀུན་བཟང་པ། །དེ་སྤྲུལ་གསར་རྙིང་བསྟན་འཛིན་གསུམ་ལ་འདུད། །འདི་འོག་ཟབ་གཏེར་མངའ་བདག་ལམ་སྟོན་གླིང་། །མ་འོངས་འདྲེན་མཆོག་ཡོན་ཏན་རྒྱ་མཚོ་ཞེས། །སླར་ཡང་འགྲོ་ཕན་བྱེད་པོ་མཐའ་ཡས་ཀྱིས། །མཁའ་ཁྱབ་འགྲོ་དོན་མཛད་ལ་གསོལ་བ་འདེབས། །ཞེས་པ་འདི་པདྨ་དངོས་གྲུབ། རིག་འཛིན་རྒྱ་མཚོ། ཨོ་རྒྱན་བདེ་ཆེན། ཀློང་ཆེན། དངོས་གྲུབ་རྣམས་ནས་བསྐུལ་ངོར། མགོ་ལོག་ཨ་མྱེ་རང་གིས་བྲིས་པའོ།། སྐྱེ་ཕྲེང་གསོལ་འདེབས་བསྡུས་པ།༄༅། སྐྱེ་ཕྲེང་གསོལ་འདེབས་བསྡུས་པ་ནི། སྔོན་ཚེ་ཐུབ་དབང་དགེ་བསྙེན་མཛེས་པའི་ཏོག །བར་དུ་པད་འབྱུང་དངོས་སློབ་ལ་སུམ་པ། །མ་འོངས་འདྲེན་མཆོག་ཡོན་ཏན་རྒྱ་མཚོ་རུ། །ལུང་ཟིན་སྤྲུལ་པའི་སྐུ་ལ་གསོལ་བ་འདེབས། ཅེས་སམ། ཡང་ན། གུ་རུས་རྗེས་བཟུང་སྐུ་གསུམ་དགོངས་མཛོད་གནང་། །རྫོངས་བདུན་གནས་ཀྱིས་འགྲོ་དོན་སྒོ་འཕར་ཕྱེས། །གླིང་པ་རྣམ་གསུམ་ཆོས་བདག་ལུང་ཟིན་པ། །ཆོས་དབྱིངས་ཀུན་གསལ་རྒྱ་མཚོར་གསོལ་བ་འདེབས།། ཅེས་བརྗོད་ཀྱང་ཆོག ཡང་ན། སྐྱེས་མ་ཐག་ནས་དམ་པའི་ཆོས་དང་འཕྲད། །ཚད་མའི་སྐྱེས་ཆེན་ལྔ་བཅུའི་བྱིན་རླབས་ཐོབ། །ཞི་ལྷག་དབྱེར་མེད་རིག་པའི་རང་ཞལ་མཇལ། །གྲོལ་ཞིག་ཞིང་སྐྱོང་མགོན་པོར་གསོལ་བ་འདེབས།། ཞེས་ཚིགས་བཞི་གསུམ་པོ་འདི་ཁོ་བོའི་རྣམ་ཐར་ཡིན་ལ་གསོལ་འདེབས་ཀྱང་ཡིན། འདིར་མ་འདུས་པའི་ཡོན་ཏན་ནི་སྔགས་རྒན་གཅོལ་པོ་རང་ལ་སྣ་གཅིག་ཀྱང་མེད་པས། འདི་ཙམ་གྱིས་དད་ཅན་རྣམས་ཆོག་ཤེས་པར་མཛོད་ཅིག ཅེས་རང་སློབ་དམ་པ་འཇམ་དབྱངས་བློ་འཕེལ་དང་འོད་ཟེར་མཐའ་ཡས་གཉིས་ཀྱི་ངོར། མགོ་སྤྲུལ་རྒན་པོ་རང་གིས་བྲིས་པ་དགེའོ།། མགོ་སྤྲུལ་རང་རྣམ་ཚིགས་བཅད་མ།རང་བསྟོད་ཀྱི་གཏམ་ཉུང་ངུར་བརྗོད་པ་ལེགས་ལམ་ཁོལ་ཕྱུང་བུང་བའི་རྩི་བཅུད་ཞེས་བྱ་བ་བཞུགས། ཨོཾ་སྭ་སྟི། མཚུངས་མེད་གྲུབ་དབང་རྣམ་སྣང་རྡོ་རྗེ་ལ། །བཏུད་ནས་རང་བསྟོད་ཉུང་ངུར་བརྗོད་ལ་སྤྲོ། །ཨ་ཏིའི་རྣལ་འབྱོར་གསུམ་གྱི་སྒྱུ་འཕྲུལ་གར། །སྔགས་རིགས་འཆང་བ་བདུད་འཇོམས་རོལ་རྡོར་ང་། །སྐྱེས་མ་ཐག་ཏུ་དམ་པའི་ཆོས་དང་འཕྲད། །ཞག་བདུན་ལོན་དུས་ཡང་སྲིད་བཟུང་ཚུལ་བཤད། །ལོ་གསུམ་དུས་སུ་དམ་པའི་ཆོས་ལ་དད། །ལོ་བཞིའི་དུས་ནས་བྱང་ཆུབ་སེམས་མཆོག་སྐྱེས། །ལོ་ལྔའི་དུས་སུ་ཀློག་བསླབ་མཁས་པར་གྲགས། །ལོ་དྲུག་ནས་བཟུང་གཅིག་པུར་ཀློག་འདོན་ནུས། །ལོ་བརྒྱད་དུས་སུ་པད་འབྱུང་དངོས་སུ་མཇལ། །ལོ་གྲངས་དགུ་པར་སྨིན་གྲོལ་བདུད་རྩི་ཐོབ། །བཅུ་པར་མཁའ་འགྲོས་ལུང་བསྟན་གསལ་པོར་གནང་། །བཅུ་གཅིག་ལོ་ནས་ཟབ་ཆོས་ཉམས་སུ་བླངས། །བཅུ་བཞི་ལོ་ལ་སེམས་ཉིད་རང་ངོ་འཕྲོད། །བཅོ་ལྔའི་དུས་སུ་བསྟན་ལ་རབ་ཏུ་བྱུང་། །ཉི་ཤུའི་ལོ་ལ་ཆོས་ཁྲི་མཐོན་པོར་བཀོད། །སྐྱེས་ནས་ད་བར་གསར་རྙིང་རིས་མེད་ཀྱི། །བླ་མ་དམ་པ་ཉི་ཤུ་རྩ་གྲངས་ལས། །མདོ་སྔགས་ཟབ་དགུའི་ཆོས་ཀྱི་བདུད་རྩི་ཐོབ། །གཤིན་རྗེ་གཤེད་པོས་ཞལ་གཟིགས་བྱིན་རླབས་ཐོབ། །མ་གཤིན་ཐེའུ་རིང་རྒྱལ་བསེན་སྲོག་སྙིང་ཕུལ། །གུར་མགོན་དྲག་ཤད་ལྷ་མོ་གནོད་སྦྱིན་བཟང་། །སོ་སོས་བཀའ་བཞིན་སྒྲུབ་པའི་དམ་ཡང་བཅས། །ད་ལྟ་ལོ་གྲངས་ཉེར་དྲུག་ལོན་པ་སྟེ། །ཉེར་བརྒྱད་ལོན་དུས་ལས་ཀྱིས་ལྷོ་རུ་བགྲོད། །གཡས་འཁྱིལ་ཉལ་འགྲོ་ཟུང་གིས་ཉེ་བའི་ཆར། །ཕྱེད་བཅས་ལོ་དྲུག་བར་དུ་དམན་སྤྱོད་སྐྱོང་། །སོ་གསུམ་ནས་བཟུང་སླར་ཡང་མི་ངོ་འཕྲོད། །སོ་བདུན་དུས་སུ་ཚེ་གེགས་སེལ་བ་ན། །བཞི་བཅུའི་ལོ་ལ་ཡོ་བྱད་སྟ་གོན་བྱེད། །ཞེ་གཅིག་ནས་བཟུང་ཕྱོགས་གཉིས་གང་རུང་ལ། །རྒྱལ་བའི་ཐུགས་རྟེན་མཐོང་ཚད་རང་གྲོལ་བཞེངས། །དེ་སོགས་ཡ་མཚན་ཆེ་བའི་རྟེན་མང་པོ། །ལོ་གྲངས་ཞེ་དགུའི་བར་དུ་བསྒྲུབ་པའི་མཐར། །ལྔ་བཅུའི་ལོ་ནས་སྒྲུབ་པའི་གྲོགས་དང་བཅས། །འདག་སྦྱར་སྒྲུབ་ལ་བརྩོན་པའི་དམ་བཅའ་མཛད། །རེ་གཅིག་དོན་གསུམ་དག་གི་ཚེ་འཕྲང་ལས། །ཐར་ན་བརྒྱད་ཅུའི་བར་དུ་ངེས་པར་འཚོ། །དེ་ནས་ཞིང་མཆོག་ལྔ་རུ་ལན་གཅིག་འགྲོ། །སླར་ཡང་བྱང་ནས་དགེ་ལུགས་བསྟན་པ་འཛིན། །དེ་རྗེས་མངའ་རིས་ཕྱོགས་ནས་རྙིང་བསྟན་འཛིན། །དེ་མཐར་ཚེ་རབས་གཉིས་ཙམ་ཁམས་སུ་འོང་། །དེ་རྗེས་བོད་དུ་བརྟུལ་ཞུགས་སྤྱོད་པ་སྐྱོང་། །དེ་དང་བཀོད་ཆེན་གནས་སྒོ་ཕྱེ་བ་མཉམ། །དེ་སོགས་སྤྲུལ་པའི་བྱེ་བྲག་བསམ་མི་ཁྱབ། །ཚུལ་འདི་ཡོན་ཏན་ལེགས་པའི་ངོས་ནས་སྨྲས། །སྐྱོན་རྣམས་དཀར་ནག་གསལ་བཞིན་འདིར་མ་བཀོད། །འདི་ཉིད་སྨྲས་པའི་དགེ་བས་འགྲོ་རྣམས་ཀུན། །རིང་མིན་སྲིད་པའི་མཚོ་ལས་སྒྲོལ་བར་ཤོག །ཅེས་རང་བསྟོད་ཀྱི་ཚིག་ཉུང་ངུར་བསྡུས་པ་ལེགས་ལམ་ཁོལ་ཕྱུང་བུང་བའི་རྩི་བཅུད་ཅེས་བྱ་བ་འདི་ཡང་སྔགས་ནག་བདུད་འཇོམས་རོལ་པའི་རྡོ་རྗེས་ཤར་མར་བྲིས་པ་མངྒ་ལཾ། ། རྩིས་ཀྱི་མན་ངག་བློ་དམན་ཉེར་འཚོ།སྐབས་དང་པོ།༄༅། དཔལ་མཆོག་གི་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་རྩིས་ཀྱི་མན་ངག་བློ་དམན་ཉེར་འཚོ་ཞེས་བྱ་བ་བཞུགས།། ༄༅། ཨོཾ་སྭ་སྟི། དཔལ་མཆོག་གི་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་རྩིས་ཀྱི་མན་ངག་བློ་དམན་ཉེར་འཚོ་ཞེས་བྱ་བ། བླ་མ་དང་ངག་གི་དབང་ཕྱུག་སྨྲ་བའི་སེང་གེ་ལ་ཕྱག་འཚལ་ལོ།། ཁྱབ་བདག་སྐུ་བཞི་དབྱེར་མེད་རྡོ་རྗེ་འཆང་དབང་རིགས་དཀྱིལ་རྒྱ་མཚོའི་གཙོ། །དཔལ་ལྡན་ཨེ་ཝཾ་ཟུང་འཇུག་དུས་ཀྱི་འཁོར་ལོ་སྲིད་ཞི་ཀུན་བདག་ཉིད། །འདྲེན་མཆོག་མི་ཡི་སེང་གེ་དོན་ཀུན་གྲུབ་པ་མི་མཇེད་ཞིང་གི་དཔལ། །དབྱེར་མེད་གསུམ་ལྡན་བླ་མ་རྣམ་སྣང་རྡོ་རྗེ་གཙུག་གི་ནོར་བུར་བརྟེན། །དོན་གཉིས་ལྷུན་གྲུབ་སྟོན་པ་རྫོགས་སངས་རྒྱས། །བདེན་གཉིས་ཟུང་འཇུག་ཞི་བསིལ་དམ་པའི་ཆོས། །ཚོགས་གཉིས་ཞིང་གྱུར་ཐེག་གསུམ་དགེ་འདུན་ཏེ། །མཆོག་གསུམ་ཐུགས་རྗེས་རྨད་བྱུང་དགེ་ལེགས་སྩོལ། །སྤྲོས་བྲལ་ཤེས་རབ་ཕར་ཕྱིན་རྒྱལ་བའི་ཡུམ། །མཁྱེན་པའི་གཏེར་འཆང་རྗེ་བཙུན་འཇམ་དཔལ་དབྱངས། །ངག་གི་དབང་ཕྱུག་མཚོ་བྱུང་ལྷ་མོ་སྟེ། །ལྷ་མཆོག་གསུམ་གྱིས་བློ་གྲོས་སྤོབས་པ་སྩོལ། །རྣམ་གསུམ་དུས་ཀྱི་འཁོར་ལོའི་དགོངས་དོན་སྤྱི། །ཁྱད་པར་འཇིག་རྟེན་ཁམས་ཀྱི་རྣམ་གཞག་ཀུན། །སྐར་རྩིས་རི་མོས་གཏན་ལ་དབབ་པའི་ཚུལ། །འདོམས་མཛད་དེ་ལ་གུས་པས་སོར་བཅུ་ཟླུམ། །དུས་འཁོར་དགོངས་འགྲེལ་མ་དྲོས་མཚོ་ཆེན་ནས། །ལེགས་བཤད་རྩིས་ཀྱི་ཉལ་འགྲོ་དལ་བབས་ཚེ། །འཇུག་བདེ་སྐར་རྩིས་འཆི་འཕྲོག་ཟེགས་མ་འདི། །ཡིད་ཅན་ཉེ་བར་འཚོ་ཕྱིར་ཁོ་བོས་ལེན། །རྣམ་མང་མཁས་པའི་མཁྱེན་བཟང་ཉི་གཞོན་ལས། །རྣམ་དག་ལེགས་བཤད་འོད་ཟེར་སྟོང་བརྡལ་བཞིན། །མེ་ཁྱེར་སྲིན་བུའི་རང་འོད་འབྱིན་པའི་དཔེས། །བདག་གིས་རྟོག་གེས་བློ་ཡིས་འདི་བྱས་མོད། །ཚིག་ཉུང་དོན་གསལ་འཇུག་བདེར་ཉེར་མཁོ་འགའ། །བསྡུས་ཕྱིར་དཔེ་མང་ཁུར་གྱིས་ངལ་མི་དགོས། །མཁས་པའི་གསུང་དང་བསྟུན་ཀྱང་ངེས་པར་མཚུངས། །དེ་ཕྱིར་འདི་ནི་བློ་དམན་ཉེར་འཚོར་གྱུར། །དེ་ལ་དང་པོ་སྦྱོར་བའི་རིམ་པ་དང་། །ལྔ་བསྡུས་གསུམ་དང་སྒྲ་གཅན་མྱུར་བའི་རྩིས། །རེའུ་མིག་སྤེལ་འཛིན་རྩིས་ཕྲན་ཉེར་མཁོ་ཟུང་། །བླང་དོར་རྩིས་འབྲས་ཉུང་ངུ་རྣམས་སུ་བསྡུས། །དང་པོ་སྦྱོར་བའི་རིམ་པ་ལ། །འབྲི་བགྲང་སྣོན་གསུམ་མཐའ་ནས་སྟེ། །བསྒྱུར་བགོད་འབྲི་གསུམ་མགོ་ནས་བྱ། །སྒྱུར་བྱེད་ཐིག་ལེ་གྲལ་མཐར་འགོད། །བགོད་བྱེད་ཐིག་ལེ་མས་མཐའ་བཀག །བསྒྱུར་བྱ་སྟོང་པར་བསྒྱུར་རྒྱུ་མེད། །བསྒྱུར་བྱེད་སྟོང་ན་བསྒྱུར་གཞི་དབྱེ། །གཅིག་བསྒྱུར་བ་ལ་འཕེལ་འགྲིབ་མེད། །གཉིས་བསྒྱུར་ལ་སོགས་གོང་དུ་འཕེལ། །བསྒྱུར་ཞེས་བསྒྱུར་བྱེད་གྲངས་སུ་སྤེལ། །བགོད་པ་བགོ་བྱེད་གྲངས་སུ་སྡུད། །བསྒྱུར་བགོད་བར་སྟོང་ཐིག་ལེས་འཛིན། །རྐྱང་བགོ་རང་གིས་ཅི་ཐོབ་འཁྱེར། །སྦྲག་བགོད་འོག་མར་བསྟུན་ཏེ་བྱ། །ཐིག་ལེ་གྲལ་མགོར་བྱུང་མི་སྲིད། །བགོད་བྱེད་ཐིག་ལེས་རང་གནས་འཛིན། །མ་ཐོབ་ནོར་སྐལ་ཐིག་ལེ་བྱིན། །མ་ལྡང་གོང་ནས་བཅུ་སོགས་ཕབ། །ལྷག་རྣམས་མ་ནོར་རང་གནས་བཞག །ཨང་གྲངས་ཐིག་ནས་དགུ་ཡི་བར། །རབ་འབྱམས་ཤེས་བྱ་བརྩི་ན་ཡང་། །མ་འདུས་ཡི་གེའི་རྣམ་པ་མེད། །གྲངས་ནི་༡གཅིག་༢བཅུ་༣བརྒྱ་༤སྟོང་༥ཁྲི། །༦འབུམ་དང་༧ས་ཡ་༨བྱེ་བ་དང་། །༩དུང་ཕྱུར་རྐྱང་པ་དགུ་ཞེས་གྲགས། །དེ་རྗེས་༡ཐེར་འབུམ་༣ཁྲག་ཁྲིག་དང་། །༥རབ་བཀྲམ་༧གཏམ་པ་༩དཀྲིག་པ་དང་། །༡༡མི་འཁྲུགས་༡༣ཁྱད་འབྱིན་༡༥སྤང་རྟེན་དང་། །༡༧དེད་འདྲེན་༡༩མཐའ་སྣང་༢༡རྒྱུ་རིགས་དང་། །༢༣འོད་མཛེས་༣༥དབང་པོ་༢༧ལེགས་ཕྱིན་དང་། །༢༩རྟོགས་འགྲོ་༣༡འབྱིན་རྡུལ་༣༣རྒྱ་རྟགས་དང་། །༣༥སྟོབས་འཁོར་༣༧བརྡ་ཤེས་༣༩རྣམ་བྱུང་དང་། །༤༡སྟོབས་མིག་༤༣བྱམས་པ་༤༥སྙིང་རྗེ་དང་། །༤༧དགའ་བ་༤༩བཏང་སྙོམས་ཉེར་ལྔ་ལ། །༢ཆེན་པོ་སྦྱར་བས་༥༠ལྔ་བཅུ་འབྱུང་། །དེ་ལྟར་གྲངས་མེད་པ་རུ་བརྗོད། །མིང་གི་རྣམ་གྲངས་༡རང་བཞིན་གཟུགས། །བསེ་རུ་ཟླ་བ་རི་བོང་ཅན། །འོད་དཀར་ལ་སོགས་གཅིག་གི་མིང་། །༢ལག་མིག་ཟུང་འཁྲིག་གཤིན་རྗེ་བགྲོད། །སྦྱོར་བ་མཚེ་མ་གཉིས་སུ་ཤེས། །༣འཇིག་རྟེན་ཚ་བ་རྩེ་མོ་དང་། །ཡོན་ཏན་མེ་རྣམས་གསུམ་ལ་ཟེར། །༤ཆུ་གཏེར་རྒྱ་མཚོ་ཆུ་བོ་བདུད། །ཟུང་ལྡན་རིག་བྱེད་སྡེ་བ་བཞི། །༥ཕུང་པོ་ཉེར་སྤྱོད་འདོད་ཡོན་མདའ། །འབྱུང་བ་དབང་པོ་ཡན་ལག་ལྔ། །༦བྲོ་བ་རོ་དུས་མཚམས་རྣམས་དྲུག །༧རིན་ཆེན་ཐུབ་པ་དྲང་སྲོང་གཟའ། །ས་འཛིན་རི་གླིང་རྟ་རྣམས་བདུན། །༨གདེངས་ཅན་ལྷ་ཀླུ་ལྟོ་འགྲོ་སྦྲུལ། །ནོར་ལྷ་ནོར་དབྱིག་བཀྲ་ཤིས་བརྒྱད། །༩གཏེར་བུག་སྲིན་པོ་རྩ་སོགས་དགུ། །༡༠སྒྲ་སྒྲོགས་ཡུལ་ས་ཁྲོ་བོ་ཕྱོགས། །སོར་མོ་འབྱོར་བ་འཇུག་པ་སྟོབས། །བཅུ་ཡིན་༡༡དྲག་པོ་བདེ་བྱེད་དང་། །དབང་ཕྱུག་འཕྲོག་བྱེད་བདེ་འབྱུང་རྣམས། །བཅུ་གཅིག་གི་ནི་མིང་དུ་རྟོགས། །༡༢ཉི་མ་རྟེན་འབྲེལ་ཁྱིམ་བཅུ་གཉིས། །༡༣ལུས་མེད་སྣ་ཚོགས་གདུགས་རིམ་དང་། །མྱོས་བྱེད་འདོད་པ་བཅུ་གསུམ་ཡིན། །༡༤ཤེད་བུ་མ་ནུ་སྲིད་པའི་གནས། །ཡིད་རྣམས་བཅུ་བཞི་༡༥ཚེས་བཅོ་ལྔ། །༡༦ཆ་ཤས་རྒྱལ་པོ་མི་བདག་རྣམས། །བཅུ་དྲུག་༡༨ཉེས་སྐྱོན་ཁམས་བཅོ་བརྒྱད། །༢༤ཡུལ་དང་རྒྱལ་བ་ཉེར་བཞིའི་མིང་། །༢༥དེ་ཉིད་ཉེར་ལྔ་༢༧རྒྱུ་སྐར་དང་། །འཁོར་ལོ་སྐར་མ་ཉེར་བདུན་མིང་། །༣༢སོ་དང་གཉིས་སྐྱེས་སུམ་ཅུ་གཉིས། །༦༠ཆུ་ཚོད་དབྱུག་གུ་དྲུག་ཅུ་སྟེ། །༠སྟོང་པ་ནམ་མཁའ་ཐིག་ལེར་བརྗོད། །དོན་གཅིག་མིང་གི་རྣམ་གྲངས་གཞན། །གསིལ་སྤེལ་བགྲེས་བསྣུན་བསྒྱུར་བའི་མིང་། །སྣོན་སྦྱིན་སྟེར་འབུལ་ནོར་དུ་འགྱུར། །བསྣན་ཕུལ་ཁན་ལྡན་བསྲེ་བའི་མིང་། །སྦྱངས་འཕྲོག་ཞུ་འཕྲལ་བུ་ལོན་འགྱུར། །ཕྲི་དམན་དབེན་འབྲིད་ཕབ་པའི་མིང་། །བགོ་ཕྱེ་བསལ་བཅད་བགོད་པའི་མིང་། །དབྱི་བསུབ་ཕྱི་བ་དོར་བའི་མིང་། །རྙེད་པ་ཐོབ་པ་ནོར་ཡིན་ནོ། །ཆ་ནས་རང་འཁོར་གང་ལོངས་པ། །ཕུད་པའི་ནོར་དེ་རང་ཐད་ནས། །དམིགས་བསལ་མ་གཏོགས་གོང་མར་བསྲེ། །སྟེང་མའི་ཐོབ་ནོར་ཤས་ཆེར་དོར། །ནོར་དེ་དོར་བའི་གོ་ཤུགས་ཀྱིས། །བགོད་ལ་དོར་བ་འཇུག་པའང་སྲིད། །སོ་སོའི་འཁོར་ལོའི་ངེས་པ་ནི། །ལོ་ཡི་འཁོར་ལོ་༦༠དྲུག་ཅུ་ལ། །༥འབྱུང་ལྔ་༨སྤར་བརྒྱད་༩སྨེ་བ་དགུ། །༡༢ཟླ་༡༢ཁྱིམ་༡༢རྟེན་འབྲེལ་༡༢ལོ་སྐོར་དང་། །༡༢དུས་ཚོད་འཁོར་ལོ་བཅུ་གཉིས་ཡིན། །ཚེས་ནི་༥ལྔའམ་༣༠སུམ་ཅུ་སྟེ། །༧གཟའ་དང་༧བྱེད་པའི་འཁོར་ལོ་བདུན། །༢༧རྒྱུ་སྐར་༢༧སྦྱོར་བ་ཉེར་བདུན་ཏེ། །༦༠ཆུ་ཚོད་༦༠ཆུ་སྲང་དྲུག་ཅུ་ཡིན། །༦དབུགས་དྲུག་ཆ་ཤས་ངེས་པ་མེད། །སོ་སོའི་མིང་གི་ངེས་པ་ནི། །༡ཉི་༢ཟླ་༣དམར་༤ལྷག་༥ཕུར་༦སངས་༠སྤེན། །རེས་གཟའ་བདུན་ཏེ་སྒྲ་དུས་མཇུག །བསྣན་པས་གཟའ་ནི་བཅུ་རུ་ངེས། །༠ཐ་སྐར་༡བྲ་ཉེ་༢སྨིན་དྲུག་དང་། །༣སྣར་མ་༤མགོ་༥ལག་༦ནབ་སོ་༧རྒྱལ། །༩སྐག་༡༠མཆུ་༡༡གྲེ་༡༢དབོ་༡༢མེ་བཞི་༡༣ནག །༡༤ས་རི་༡༥ས་ག་༡༦ལྷ་མཚམས་༡༧སྣྲོན། །༡༨སྣུབས་༡༩ཆུ་སྟོད་༢༠སྨད་༢༡གྲོ་བཞིན་དང་། །༢༢མོན་གྲེ་༢༣མོན་གྲུ་༢༤ཁྲུམ་སྟོད་༢༥སྨད། །༢༦ནམ་གྲུ་རྒྱུ་སྐར་ཉེར་བདུན་ཏེ། །བྱི་བཞིན་སྦྱར་བས་ཉེར་བརྒྱད་དོ། །༠སེལ་༡མཛའ་༢ཚེ་ལྡན་༣སྐལ་བཟང་དང་། །༤བཟང་པོ་༥ཤིན་སྐྲངས་༦ལས་བཟང་༧འཛིན། །༨ཟུག་རྔུ་༩སྐྲངས་༡༠འཕེལ་༡༡ངེས་༡༢ཀུན་འཇོམས། །༡༣དགའ་བ་༡༤རྡོ་རྗེ་༡༥དངོས་༡༦ཤིན་ལྟུང་། །༡༧མཆོག་ཅན་༡༨ཡོངས་འཇོམས་༡༩ཞི་བ་༢༠གྲུབ། །༢༡བསྒྲུབ་༢༢དགེ་༢༣དཀར་པོ་༢༤ཚངས་པ་དང་། །༢༥ཁོན་འཛིན་༢༦སྦྱོར་བ་ཉེར་བདུན་ནོ། །༡གདབ་༢བྱིས་༣རིགས་ཅན་༤ཏིལ་རྡུང་དང་། །༥ཁྱིམ་སྐྱེས་༦ཚོང་པ་༠བིཥྚི་བདུན། །༡བཀྲ་ཤིས་༢རྐང་བཞི་༣ཀླུ་༤མི་སྡུག །བཞི་སྟེ་བྱེད་པ་བཅུ་གཅིག་གོ། །༠ལུག་༡གླང་༢འཁྲིག་༣ཀར་༤སེང་༥བུ་མོ། །༦སྲང་༧སྡིག་༨གཞུ་༩སྲིན་༡༠བུམ་༡༡ཉ་ཁྱིམ། །༡དགའ་༢བཟང་༣རྒྱལ་༤སྟོང་༥རྫོགས་ལྔ་ཚེས། །མེ་ས་ལྕགས་ཆུ་ཤིང་འབྱུང་ཁམས། །ལི་ཁོན་ཏྭ་ཁེན་ཁམ་གིན་ཙིན། །ཟོན་བརྒྱད་སྤར་ཁའི་གྲངས་སུ་ངེས། །གཅིག་དཀར་གཉིས་ནག་གསུམ་མཐིང་དང་། །བཞི་ལྗང་ལྔ་སེར་དྲུག་དཀར་དང་། །བདུན་དམར་བརྒྱད་དཀར་དགུ་སྨུག་སྨེ། །ནམ་ལངས་ཤར་དྲོས་ཕྱེད་ཕྱེད་ཡོལ། །ཉི་ནུབ་མུན་རུབ་སྲོད་སྲོད་འཁོར། །ནམ་ཕྱེད་ཕྱེད་ཡོལ་ཐོ་རེངས་བར། །ཡོས་སོགས་རིམ་སྦྱར་དུས་ཚོད་ཡིན། །མ་རིག་འདུ་བྱེད་རྣམ་ཤེས་དང་། །མིང་གཟུགས་སྐྱེ་མཆེད་རེག་ཚོར་སྲེད། །ལེན་སྲིད་སྐྱེ་བ་རྒ་ཤི་རྣམས། །རྟེན་འབྲེལ་བཅུ་གཉིས་ཞེས་བྱར་བརྗོད། །ཚེས་གཅིག་ནས་བཟུང་སུམ་ཅུའི་བར། །ཟླ་གཅིག་ཞག་གྲངས་ངེས་པ་ཡིན། །ནག་པ་ས་ག་སྣྲོན་ཆུ་སྟོད། །གྲོ་ཁྲུམས་ཐ་སྐར་སྨིན་དྲུག་མགོ། །རྒྱལ་མཆུ་དབོ་ཡི་ཟླ་བ་རྣམས། །ལོ་གཅིག་ཟླ་གྲངས་ངེས་པར་བརྗོད། །༠རབ་བྱུང་༡རྣམ་བྱུང་༢དཀར་པོ་དང་། །རབ་མྱོས་སྐྱེས་བདག་ཨངྐི་ར། །དཔལ་གདོང་དངོས་པོ་ན་ཚོད་ལྡན། །འཛིན་བྱེད་དབང་ཕྱུག་འབྲུ་མང་པོ། །མྱོས་ལྡན་རྣམ་གནོན་ཁྱུ་མཆོག་དང་། །སྣ་ཚོགས་ཉི་མ་ཉི་སྒྲོལ་བྱེད། །ས་སྐྱོང་མི་ཟད་ཐམས་ཅད་འདུལ། །ཀུན་འཛིན་འགལ་བ་རྣམ་འགྱུར་དང་། །བོང་བུ་དགའ་བ་རྣམ་རྒྱལ་ཉིད། །རྒྱལ་བ་མྱོས་བྱེད་གདོང་ངན་དང་། །གསེར་འཕྱང་རྣམ་འཕྱང་སྒྱུར་བྱེད་དང་། །ཀུན་ལྡན་འཕར་བ་དགེ་བྱེད་དང་། །མཛེས་བྱེད་ཁྲོ་མོ་སྣ་ཚོགས་དབྱིག །ཟིལ་གནོན་སྤྲེའུ་ཕུར་བུ་དང་། །ཞི་བ་ཐུན་མོང་འགལ་བྱེད་དང་། །ཡོངས་འཛིན་བག་ཡོད་ཀུན་དགའ་དང་། །སྲིན་པོ་མེ་དང་དམར་སེར་ཅན། །དུས་ཀྱི་ཕོ་ཉ་དོན་གྲུབ་དྲག །བློ་ངན་རྔ་ཆེན་ཁྲག་སྐྱུག་པ། །མིག་དམར་ཁྲོ་བོ་ཟད་པ་རྣམས། །ལོ་གྲངས་དྲུག་ཅུའི་ངེས་པའོ། །སྐྱེས་བུའི་དབུགས་དྲུག་ཆུ་སྲང་གཅིག །དེ་ལ་དྲུག་ཅུ་ཆུ་ཚོད་གཅིག །དབྱུག་གུ་ལྔ་ལྔ་དུས་ཚོད་རེ། །དུས་ཚོད་བཅུ་གཉིས་ཞག་གཅིག་བརྗོད། །ཟླ་བའི་དཀར་ནག་ཕྱོགས་རེ་ལ། །དགའ་སོགས་གསུམ་གསུམ་དྲུག་ཏུ་འཁོར། །བཅོ་ལྔར་འཕེལ་ཞིང་བཅོ་ལྔའི་འགྲིབ། །བསྡོམས་ལ་ཟླ་བའི་ཐ་སྙད་བརྗོད། །ཉི་མའི་ལྷོ་བྱང་བསྒྲོད་གཉིས་ལ། །ཟླ་ཁྱིམ་གཟའ་སྐར་དུས་བཞི་ཡི། །འཁོར་ལོ་རྫོགས་པར་འཁོར་བ་ལ། །ལོ་གཅིག་ཞེས་བྱར་བརྗོད་པ་ཡིན། །ཁམས་འདིར་ཟླ་བ་སྐྱེས་མ་ཐག །དཀར་ཆ་དང་པོར་འཕེལ་བའི་ཕྱིར། །ལུགས་འདིར་ཡར་ངོ་ཚེས་གཅིག་ནས། །ཚེས་ཞག་སུམ་ཅུའི་མགོ་བོ་འཛིན། །གཟའ་ཀུན་རྟག་ལོངས་ལུག་ཁྱིམ་ནས། །ཐོག་མར་སྤྱོད་ཅིང་དུས་འཁོར་རྒྱུད། །གསུངས་པའི་དུས་ཟླ་ཡིན་པའི་ཕྱིར། །རང་ལུགས་ནག་པ་ཟླ་མགོ་འཛིན། །ལོ་ཡི་ཐོག་མ་རབ་བྱུང་ཞེས། །རིགས་བྱེད་གཞུང་དང་སྟོད་འགྲེལ་ལས། །གསུངས་བཞིན་འདིར་ཡང་ལོ་ཡི་མགོ། །རབ་བྱུང་ཉིད་ནས་འཛིན་པར་བཞེད། །ཧོར་གྱི་གསན་ཡོལ་རྒྱའི་མཱ་ཡོལ། །ལེགས་སྦྱར་ཙཻ་ཏྲི་ནག་པ་རྣམས། །གཅིག་ཡིན་མིང་གཟུགས་ལུག་གི་ཁྱིམ། །གཞན་རྣམས་དེ་ཡི་རིགས་པས་དཔག །ཁམས་ལྔ་ཕོ་མོའི་དབྱེ་བ་ཡིས། །རྒྱ་རྩིས་ལོ་རྒན་དྲུག་ཅུ་ལས། །མེ་མོ་ཡོས་དང་རབ་བྱུང་གཉིས། །གཅིག་སྟེ་ལྷག་རྣམས་རིམ་བཞིན་སྦྱར། །ཚེས་གཅིག་ཕྱི་ཆ་ནས་བརྩམས་ཏེ། །ཉེར་དགུའི་སྔ་ཆའི་བར་རྣམས་སུ། །འཕོ་བྱེད་བདུན་པོ་བཞི་བཞིར་རྒྱུ། །དེ་ལྷག་བཞི་ལ་རྟག་བྱེད་རྣམས། །རིམ་བཞིན་རྒྱུན་དུ་རྒྱུ་བར་ངེས། །རྒྱུ་སྐར་རེ་རེར་རྐང་པ་བཞི། །ཀུན་བསྡོམས་བརྒྱ་དང་བརྒྱད་འབྱུང་བ། །རྐང་པ་དགུ་དགུར་ཁྱིམ་རེར་གྲགས། །ལུག་ཁྱིམ་ཐ་སྐར་མགོ་ནས་སྟེ། །ནམ་གྲུའི་རྐང་པ་ཉ་ཡིས་རྫོགས། །བར་རྣམས་དེར་མཚུངས་རིག་པས་དཔྱད། །བཅུ་གཉིས་ཁྱིམ་གྱི་ཞིང་བདག་གཟའ། །ལུག་སྡིག་མིག་དམར་གླང་སྲང་སངས། །འཁྲིག་པ་བུ་མོ་ལྷག་པ་སྟེ། །ཀར་ཟླ་སེང་ཉི་གཞུ་ཉའི་ཕུར། །ཆུ་སྲིན་བུམ་པའི་སྤེན་པའོ། །གཞན་ཡང་གཟའ་ཡི་མིང་གི་གྲངས། །ནམ་མཁའི་ནོར་བུ་ནབས་སོ་སྐྱེས། །འོད་སྟོང་ཉིན་བྱེད་ཚ་ཟེར་ཅན། །ཉིན་མོའི་དབང་ཕྱུག་མི་སྦྱིན་སྐྱེས། །འོད་ལྡན་པད་གཉེན་ཀུ་མུད་དགྲ། །རྟ་བདུན་རྟ་ལྗང་ཉི་མའི་མིང་། །མཚན་མོའི་མགོན་པོ་བསིལ་ཟེར་ཅན། །རྒྱུ་སྐར་བདག་པོ་རི་བོང་ཅན། །འོད་དཀར་འོད་བརྒྱ་ཀུ་མུད་གཉེན། །པདྨའི་དགྲ་རྣམས་ཟླ་བར་བརྗོད། །མཆུ་སྐྱེས་ས་སྐྱེས་ས་ལྷའི་བུ། །དམར་པོ་ལུས་དམར་ཡན་ལག་དམར། །གཞོན་ནུ་བཀྲ་ཤིས་མིག་དམར་ཡིན། །ཟླ་སྐྱེས་ཟླ་སྲས་ཟླ་བའི་བུ། །ལག་པ་སྔོ་སངས་ལྷ་མཚམས་སྐྱེས། །གཟའ་ལྷག་རྣམས་ནི་ལྷག་པའི་མིང་། །རྒྱལ་བར་སྤྱོད་དང་ལྷའི་བླ་མ། །བློ་ལྡན་སྒྲ་མཁན་སྨྲ་མཁས་དང་། །བླ་མ་ལྡན་བྱེད་ཕུར་བུར་ཤེས། །དཀར་པོ་ཁུ་བ་ནབས་སོ་སྐྱེས། །ལྷ་མིན་བླ་མ་སྙན་དངགས་མཁན། །སྦྱིན་བྱེད་པ་ཝ་སངས་ལ་ཟེར། །གཤིན་རྗེའི་བ་དན་ཉི་མའི་བུ། །ཉི་སྐྱེས་དལ་འགྲོ་ཞི་འགྲོ་རྣམས། །སྤེན་པའི་མིང་དུ་འབོད་པ་ཡིན། །སྲིད་གསུམ་རྣམ་རྒྱལ་བདུད་རྩི་ཟ། །སྐབས་གསུམ་འཇིགས་བྱེད་ནག་པ་སྐྱེས། །དྲག་པོའི་གཟུགས་ཅན་ཉི་ཟླ་ཟ། །མིག་སྨན་མདོག་རྣམས་སྒྲ་གཅན་ཡིན། །མེ་བུལ་མཇུག་མ་དུས་མེར་དྲན། །མཇུག་ཕོད་དུ་བ་ཁྲུ་དོ་ཅན། །ཀེ་ཏུ་མཇུག་རིང་ཉིད་ཡིན་ནོ། །སྐར་མའི་རྣམ་གྲངས་༠དབྱུག་པ་༡བྲ། །༢ཇ་མིའམ་༢སྤུན་དྲུག་༣བི་རྫི་དང་། །༤སྨལ་པོ་༥ལག་པ་རྒྱལ་༦སྟོད་༧སྨད། །༨ཝ་དང་༩རྟ་ཆེན་༡༠རྟ་ཆུང་༡༡ཁྲ། །༡༢བྱ་མ་༡༣བྱིའུ་༡༤ནམ་གོང་༡༥འོག །༡༦ལག་སོར་༡༧གདུ་བུ་༡༨སོག་པ་དང་། །༡༩བྲེ་༢༠ཕུལ་༢༡བྱ་ཕོ་༢༢སྒྲོག་སྟོད་༢༣སྨད། །༢༤སེ་སྟོད་༢༥སེ་སྨད་༢༦ཤེ་སར་མིང་། །གཞན་ཡང་མང་སྟེ་འདིར་མ་བརྗོད། །ཁྱིམ་ཀྱང་གདན་བཞིར་རྒྱལ་ཟླ་ནས། །༩འཕེལ་བ་༡༠གཏི་མུག་༡༡བཟང་༠ཁྱུ་མཆོག །༡རུས་སྦལ་༢ཆུ་སྲིན་༣ཡུག་ས་མོ། །༤སྨེ་༥འབུག་༦འཕྱོ་བ་༧རྨི་ལམ་དང་། །༨ས་ཡི་དབང་ཕྱུག་རྣམས་སུ་གསུངས། །དེ་ཀུན་བློ་ལ་ངེས་པར་བྱ། །དཔེ་ཡོད་ཙམ་གྱིས་ཅི་ཞིག་ཕན། །ཚིག་ཙམ་གྱིས་ཀྱང་དགོས་པ་ཆུང་། །ལག་ལེན་རྒྱུད་ལ་འབྱོར་ངེས་བྱོས། །གོང་མའི་རྩིས་གཞུང་དཔག་བསམ་འཁྲི་ཤིང་ལས། །ལེགས་འཁྲུངས་རྩིས་ཀྱི་སྔོན་འགྲོ་མེ་ཏོག་ཕྲེང་། །འཇུག་བདེ་ཚིག་གི་སྲད་བུར་ལེགས་བརྒྱུས་ཏེ། །བྱིས་བློ་དགའ་བ་སྐྱེད་པའི་རྒྱན་དུ་སྦྱིན། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབས་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། སྦྱོར་བ་རྩིས་ཀྱི་སྔོན་འགྲོ་བློ་ལ་ངེས་པར་བྱ་བ་རྣམས་མདོར་བསྡུས་སུ་བརྗོད་པའི་སྐབས་ཏེ་དང་པོའོ།། སྐབས་གཉིས་པ།༈ མཁྱེན་གཟིགས་ཡེ་ཤེས་རལ་གྲི་གླེགས་བམ་གྱིས། །ཉོན་མོངས་རྒྱ་འགྲོལ་བློ་གྲོས་དཔལ་སྦྱིན་པ། །རྒྱལ་སྲས་ཐུ་བོ་ཟུར་ཕུད་ལྔ་པ་ལ། །འདུད་དོ་ཐོགས་མེད་མཁྱེན་རབ་མྱུར་དུ་སྩོལ། །རྩ་རྒྱུད་སྟོང་ཕྲག་བཅུ་གཉིས་པའི། །དགོངས་དོན་ནང་པ་སངས་རྒྱས་པའི། །རིང་ལུགས་རྣམ་དག་གྲུབ་པའི་མཐའི། །ལྔ་བསྡུས་རི་མོའི་ཁྱད་ཆོས་སྤྲོ། །རབ་བྱུང་བཅོ་ལྔའི་སྒྱུར་བྱེད་སོགས། །འདས་ལོ་༡༢ཉིས་བསྒྱུར་༠ནག་པ་སོགས། །འདས་ཟླ་བསྲེས་ལ་གནས་གཉིས་བཞག །འོག་མ་༠མིག་བསྒྱུར་༣༣མེ་རྩེས་བརྒྱན། །མདའ་རོས་ཐོབ་པ་སྟེང་མར་བསྲེ། །དེ་ཡིས་ཟླ་བ་རྣམ་པར་དག །ལྷག་མ་དབུགས་ཁྱིམ་སྒང་ལ་སོགས། །དུས་གཟེར་བརྟགས་པའི་གཞི་རུ་བཟུང་། །ཟླ་དག་གནས་ལྔ་སྟེང་རིམ་བཞིན། །༡གཟུགས་དང་༣༡ཟླ་མེ་༥༠མཁའ་མདའ་༠ཐིག ༡ ༣༡ ༥༠ ༠ ༤༨༠ །༤༨༠མཁའ་ནོར་ཆུ་བོས་རིམ་བསྒྱུར་ལ། །༢ཟུང་དང་༢༢ལག་མིག་༥༤མཚོ་དབང་༡གཟུགས། ༢ ༢༢ ༥༤ ༡ །༧༠༧རི་མཁའ་རི་དང་༦དུས་༦༠མཁའ་རོ། ༧ ༦༠ ༦༠ ༦ ༧༠༧ །༦༠ཐིག་མཚམས་༧ཐུབ་པས་དོར་བའི་ལྷག །གཟའ་ཡི་དྷྲུ་ཝ་རྣམ་པར་དག །ཟླ་དག་གནས་གཉིས་༢ཟུང་༡ཟླས་བསྒྱུར། ༢ ༡ ༡༩ ༩ །སྟེང་འོག་༡༩བུག་གཟུགས་༩སྲིན་པོ་བྱིན། ༢༨ ༡༢༦ །རིལ་ཆའི་དྷྲུ་ཝ་རྣམ་པར་དག །ཟླ་དག་གནས་ལྔ་སྟེང་རིམ་བཞིན། །༢མིག་༡༠ཕྱོགས་༥༨ཀླུ་དབང་༡གཟུགས་༡༧རི་ཟླས། ༢ ༡༠ ༥༨ ༡ ༡༧ །བསྒྱུར་ལ་༢༥དེ་ཉིད་མེ་མདའ་༥༣དང་།༢༥ ༥༣ ༣༠ ༢ ༤༦ །༣༠མཁའ་ཡོན་༢བསྒྲོད་པ་༤༦དུས་མཚོ་བྱིན། །༦༧རི་རོ་༦བྲོ་བ་༦༠མཁའ་རོ་དང་། ༢༧ ༦༠ ༦༠ ༦ ༦༠།༦༠མཁའ་རོ་༢༧འཁོར་ལོས་བསྒྲིལ་བའི་ལྷག །ཉི་མའི་དྷྲུ་ཝ་རྣམ་དག་འགྲུབ། །བསྒྱུར་བྱེད་རིམ་བྱིན་ཕྱི་དྷྲུ་འཆར། །དེ་ནས་ཉིན་རྩིས་ལ་འཇུག་ཕྱིར། །གཟའ་དྷྲུར་ཆུ་ཚོད་༥༩བུག་མདའ་དང་། །སྲང་༣མེ་དབུགས་༤མཚོ་ཆ་༡༦མི་བདག ༠ ༥༩ ༣ ༤ ༡༦།ཉི་དྷྲུར་དབྱུག་༤མཚོ་༢༡ཟླ་མིག་སྲང་། །དབུགས་༥མདའ་ཆ་ཤས་༤༣རྩེ་སྡེ་རྣམས།༠ ༤ ༢༡ ༥ ༤༣། གང་བརྩིའི་ཚེས་བསྒྱུར་ཁན་པའམ། །ཡང་ན་རྟག་ལོངས་རེའུ་མིག་འདི། །བསྣན་ལ་རང་འཁོར་བསྒྲིལ་བའི་ལྷག །གཟའ་ཉི་བར་བ་གྲུབ་པའོ། །རིལ་པོར་ཚེས་བསྲེས་༡༤མ་ནུས་བགོ། །ཐོབ་ནོར་༡ཟླ་༣མེ་མི་མཉམ་ལ། །༠ཐིག་༢མིག་༤ཆུ་བོ་མཉམ་པ་སྟེ། །མི་མཉམ་རིམ་མིན་མཉམ་རིམ་པ། །ནོར་དེ་རེ་ཞིག་ཟུར་དུ་བཀོད། །ལྷག་མས་ཟླ་མའི་རྐང་པ་བཟུང་། །༥མདའ་༥དབང་༥འབྱུང་༤ཆུ་༣མེ་༢ཟུང་༡ཟླ། །ལྡོག་པ་དང་བཅས་༡༤ཡིད་ཀྱི་གནས། །སྔ་ཕྱིར་ཟོས་དང་ཟ་རྒྱུ་སྡོམ། །༡གཟུགས་༡༣འདོད་༥འབྱུང་བ་༢ཟུང་༡༢ཉིར་༡༠ཕྱོགས། །༣མེ་༡༡དྲག་༡༥ཚེས་སྡོམ་༤མཚོ་༡༠ཕྱོགས་ལ། །༡༩བུག་ཟླ་༥མདའ་༩རྩར་༢འཁྲིག་༢ཟུང་སྡོམ། །༦དུས་༨ཀླུར་༢༤རྒྱལ་བ་༧རིར་༢༥དེ་ཉིད། །༠ཐིག་ལ་༠ཐིག་བསྡམས་རྣམ་དག་གྲུབ། །རྐང་འཛིན་བསུབ་ལ་རྐང་སྡོམ་བཀོད། །རྐང་བཟུང་སྔོན་མས་ཆ་ཤས་བསྒྱུར། །མ་ཟིན་༠ཐིག་ཤར་སྡོམ་ཀྱང་༠ཐིག །ཆ་ཤས་སྔ་རྐང་༥དང་པོས་བསྒྱུར། །༡༢༦དུས་ཉིས་རྙེད་པ་ཡང་རྒྱུའི་དབྱུག །བགོས་ལྷག་༦༠མཁའ་རོས་༡༢༦བསྒྱུར་ཐོབ་སྲང་། །ཡང་ལྷག་༦དུས་ཀྱི་༡༢༦བསྒྱུར་ཐོབ་དབུགས། །སླར་ལྷག་༧༠༧རི་མཁའ་རི་ཡིས་བསྒྱུར། །༡༢༦དུས་ཉིས་རྙེད་པ་ཆ་ཤས་ཏེ། །ལྷག་མེད་རྣམ་དག་༠ཐིག་ལེ་འཆར། །སྡོམ་ལ་ཡང་རྒྱུའི་ཆུ་ཚོད་སོགས། །སྔ་རྐང་བསྣན་ལ་ཕྱི་རྐང་ཕྲི། །མ་ཟིན་སྒྱུར་བྱེད་སྔ་རྐང་ལ། །བབས་ཕྱིར་ཆུ་ཚོད་གོང་མར་བསྣན། །བདུན་པའི་སྒྱུར་བྱེད་ཕྱི་རྐང་ལ། །བབས་ཕྱིར་འོག་མའི་ཚོགས་ཀྱིས་ཕྲི། །དེས་ནི་རྐང་ལོངས་རྣམ་པར་དག །དེ་ལྟར་རྐང་ལོངས་དག་པ་རྣམས། །གཟའ་བར་ཆུ་ཚོད་མན་ཆད་དུ། །ནོར་མཉམ་བསྣན་ལ་མི་མཉམ་ཕྲི། །དེ་ཡིས་གཟའ་ཕྱེད་དག་པར་འགྱུར། །གཟའ་ཉིའི་ཆ་ཤས་ཤེད་སྙོམས་ཕྱིར། །ཕྱེད་དག་ཆ་ཤས་༦༧རི་རོས་བསྒྱུར། །༧༠༧རི་མཁའ་རིས་ཐོབ་ནོར་ལྔ་པ། །ལྷག་དེ་ཆ་ཤས་དྲུག་པ་ཡིན། །ཉི་བར་གཉིས་བཀོད་གཅིག་ལ་ནི། །སྐར་༦མཚམས་ཆུ་ཚོད་༤༥འབྱུང་ཆུས་སྦྱངས། །མ་ལྡང་༢༧འཁོར་ལོ་བསྣན་ལ་སྦྱངས། །སྦྱངས་ཤུལ་༡༣ ༣༠འཁོར་ཕྱེད་ལོངས་ན་དོར། །དོར་དང་མ་དོར་མཚན་མ་བྲི། །དོར་ལྷག་སྐར་གནས་༦༠མཁའ་རོས་བསྒྱུར། །ཆུ་ཚོད་བཅུག་ལ་༡༣༥མདའ་ཡོན་ཟླས། །བགོས་པའི་ནོར་དེས་ཉི་རྐང་བཟུང་། །༡གཟུགས་༤མཚོ་༦རོ་ལྡོག་དྲུག་གི་གནས། །སྔ་ཕྱིར་ཟིན་དང་མ་ཟིན་སྡོམ། །༡ཟླ་༥དབང་༦རོ་དང་༤མཚོ་༢མིག་༡༠ཕྱོགས། །༣མེ་ལ་༡༡དྲག་པོ་༠ཐིག་དང་༠ཐིག །བསྡོམས་པས་ཉི་རྐང་རྣམ་དག་འགྲུབ། །བསྡོམས་ཏེ་ཆུ་ཚོད་གནས་སུ་བཀོད། །རྐང་བཟུང་སྔོན་མས་ལྷག་རྣམས་བསྒྱུར། ཆ་ཤས་བར། མཆན།༦༠ ༦ ༦༧།རང་རང་འཁོར་ལོས་དབྱུག་ལ་བསྒྲིལ། །༡༣༥འབྱུང་མེ་ཟླས་ཐོབ་ཡང་རྒྱུའི་དབྱུག །ལྷག་མ་༦༠མཁའ་རོས་བསྒྱུར་སྲང་བཅུག །༡༣༥འབྱུང་མེ་ཟླས་ཐོབ་ཡང་རྒྱུའི་སྲང་། །དེ་ལྷག་༦རོས་བསྒྱུར་དབུགས་བཅུག་པར། །༡༣༥འབྱུང་མེ་ཟླས་ཐོབ་ཡང་རྒྱུའི་དབུགས། །སླར་ལྷག་༦༧རི་རོས་བསྒྱུར་ཆ་བཅུག །༡༣༥འབྱུང་མེ་ཟླས་ཐོབ་ཆ་ཤས་ཏེ། །ལྷག་མེད་རྣམ་དག་༠ཐིག་ལེ་འཆར། །སྔ་ཕྱིར་སྣོན་འབྲི་གོང་ལྟར་བྱ། །ཚོགས་དེ་གཟའ་ཉིའི་ལོངས་སྤྱོད་ལ། །འཁོར་ཕྱེད་དོར་བསྣན་མ་དོར་ཕྲི། །དེ་ཡིས་གཟའ་ཉི་རྣམ་པར་དག །ཉི་དག་གཉིས་བཀོད་གཅིག་ལ་ནི། །༥༤མཚོ་དབང་ཚེས་བསྒྱུར་༦༠མཁའ་རོ་ཡིས། །རྙེད་པ་དང་བཅས་སྐར་དབྱུག་ལ། །སྟེར་རམ་ཡང་ན་རྟག་ལོངས་འདི། །བྱིན་ལ་རང་འཁོར་བསྒྲིལ་བའི་ལྷག །ཚེས་འཁྱུད་ཟླ་སྐར་དག་པའོ། །དེ་ལ་གཟའ་དབྱུག་མན་ཆད་ཀྱིས། །སྦྱངས་ལྷག་ཚེས་འཕྲོག་རྣམ་པར་དག །དེ་ལ་ཉི་མ་དག་པ་བསྲེ། །རང་འཁོར་བསྒྲིལ་ལྷག་སྦྱོར་བ་དག །ཚེས་གྲངས་༢མིག་བསྒྱུར་ཟླ་བས་དམན། །༧རིས་དོར་ལྷག་དེ་ཕྱི་ཕྱེད་ཡིན། །སྔ་ཆའི་བྱེད་པ་ཤུགས་ལས་རྟོགས། །དེ་ཡིས་ཡན་ལག་ལྔ་བསྡུས་གྲུབ། །རྩ་རྒྱུད་རྗེས་འབྲང་གྲུབ་རྩིས་ཀྱི། །ལྔ་བསྡུས་ལག་ལེན་ཉུང་ངུར་བྲིས། །རྒྱས་པར་གཞན་དང་གཞན་རྣམས་ནས། །བརྟགས་ཏེ་བློ་ལ་འབྱོར་ངེས་བྱ། །རྒྱུད་དོན་ལེགས་བཤད་འདོད་དགུའི་བང་མཛོད་ནས། །རྣམ་མང་སྐར་རྩིས་རིན་ཆེན་གཏེར་བརྡོལ་ཚེ། །རྣམ་དག་གྲུབ་རྩིས་ཤེལ་དཀར་ཕྲེང་བ་འདི། །ཉུང་གསལ་ཚིག་གི་སྲད་བུར་བསྒྱུས་ནས་སྤེལ། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབས་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། རྩ་རྒྱུད་སྟོང་ཕྲག་བཅུ་གཉིས་པའི་རྗེས་སུ་འབྲངས་བ་རང་ཅག་ནང་པ་སངས་རྒྱས་ཀྱི་ལུགས་བཟང་རྣམ་པར་དག་པའི་ཁྱད་ཆོས་རྣམ་དག་གྲུབ་པའི་མཐའི་ཡན་ལག་ལྔ་བསྡུས་མདོ་ཙམ་བརྗོད་པའི་སྐབས་ཏེ་གཉིས་པའོ།། སྐབས་གསུམ་པ།༈ རྒྱལ་ཀུན་མཁྱེན་གཉིས་ཕྱོགས་ཀྱི་འཁོར་ལོ་ལས། །མ་འདྲེས་མཚན་དཔེ་བཀྲ་བ་དབང་པོའི་གཞུ། །བློ་ལྡན་ཀུན་གྱི་མིག་གི་གསོས་གྱུར་པ། །འཇམ་པའི་དཔལ་དེར་འདུད་དོ་རྣམ་དཔྱོད་སྩོལ། །རྒྱལ་བའི་ལུང་བཞིན་འཇམ་དབྱངས་ཀྱིས། །ཀ་ལཱ་པ་རུ་ལེགས་བཏུས་པ། །བསྡུས་རྒྱུད་རྩ་འགྲེལ་དགོངས་པའི་དོན། །ཉུང་ངུ་བྱེད་པའི་ལྔ་བསྡུས་སྤྲོ། །དེ་ཡང་༡༥རབ་ཚེས་སྒྱུར་བྱེད་སོགས། །འདས་ལོ་༡༢ཉིས་བསྒྱུར་ནག་པ་སོགས། །འདས་ཟླ་བསྲེས་ལ་གནས་གཉིས་བཞག །འོག་མ་༢མིག་བསྒྱུར་༣༧རི་རྩེས་བརྒྱན། །༦༥མདའ་རོས་རྙེད་ཕུལ་ཚེས་ཟླ་དག །འོག་མ་ཟླ་བཤོལ་ལོངས་མཚམས་དང་། །དུས་གཟེར་བརྟགས་ཕྱིར་འདིར་ཡང་བཟུང་། །ཟླ་དག་གནས་གསུམ་རིམ་པ་བཞིན། །༡བསེ་རུ་༣༡ཟླ་མེ་༥༠མཁའ་མདས་བསྒྱུར། །༢བགྲོད་པ་༤རིག་བྱེད་༥༠མཁའ་དབང་བསྲེ། །༦༠ཐིག་མཚམས་༦༠སྟོང་དུས་༧དྲང་སྲོང་གིས། །བསྒྲིལ་ལྷག་གཟའ་ཡི་དྷྲུ་བ་ཀ །ཟླ་དག་སྟེང་༢མིག་འོག་༡ཟླས་སྤེལ། ༢ ༡།སྟེང་ནས་༡༩བུག་གཟུགས་༢༣མེ་མིག་བསྣན། ༡༩ ༢༣།འོག་ནས་༡༢༦དུས་ཁྱིམ་༢༨ནོར་མིག་གིས། ༢༨ ༡༢༦།བསྒྲིལ་ལྷག་རིལ་པོ་ཆ་ཤས་དག །ཟླ་དག་གནས་ལྔ་སྟེང་རིམ་བཞིན། །༢མིག་༡༠ཕྱོགས་༥༨ཀླུ་དབང་༢ཟུང་༡༠ཕྱོགས་བསྒྱུར། ༢ ༡༠ ༥༨ ༢ ༡༠།༣རྩེས་བརྒྱན་༡༣འདོད་༦རོ་༦༠མཁའ་དུས་དང་། ༢༧ ༦༠ ༦༠ ༦ ༡༣།༦༠ཐིག་མཚམས་༢༧སྐར་དོར་ཉི་དྷྲུའོ། །སྔ་དྷྲུར་རང་རང་བསྒྱུར་བྱེད་བྱིན། །ཕྱི་དྷྲུ་ཚེག་མེད་རིམ་བཞིན་འཆར། །ཉིན་རེས་རྩིས་ལ་འཇུག་པའི་ཕྱིར། །གཟའ་ཉིའི་དྷྲུ་བར་རྟག་ལོངས་འདི། །བསྲེས་པས་གཟའ་ཉི་བར་བ་འགྲུབ། །རིལ་པོར་ཚེས་བསྲེས་༡༤ཆུ་ཟླས་བགོ། །༢༤༠ནོར་མཉམ་༡༣མི་མཉམ་མཚན་མ་བཀོད། །ལྷག་དེས་གོང་བཞིན་ཟླ་རྐང་བཟུང་། །རྐང་སྡོམ་ཆུ་ཚོད་གནས་སུ་བཀོད། །རྐང་བཟུང་སྔོན་མས་ཆ་ཤས་བསྒྱུར། །༡༢༦དུས་ཁྱིམ་ཐོབ་པ་ཡང་དག་ཏུ། །བགོས་ལྷག་༦༠མཁའ་རོས་བསྒྱུར་༡༢༦ཐོབ་སྲང་། །དེ་ལྷག་༦དུས་ཀྱི་བསྒྱུར་༡༢༦ནོར་དབུགས། །ཡང་ལྷག་༡༣འདོད་པས་བསྒྱུར་༡༢༦ཐོབ་ཆ། །ལྷག་མ་དག་པའི་ངེས་པ་མེད། །ཡང་རྒྱུའི་ཆུ་ཚོད་རྗེས་འབྲང་བཅས། །སྔ་རྐང་བསྣན་ལ་ཕྱི་རྐང་ཕྲི། །དེ་རྣམས་གཟའ་བར་ལོངས་སྤྱོད་ལ། །ནོར་མཉམ་བསྣན་ལ་མི་མཉམ་སྦྱངས། །དེ་ཡིས་གཟའ་ཕྱེད་དག་པར་འགྱུར། །ཉི་བར་གཉིས་བཀོད་གཅིག་ལ་ནི། །སྐར་༦དྲུག་དབྱུག་གུར་༤༥མདའ་མཚོས་ཕྲི། །ཕྲི་ལྷག་འཁོར་ཕྱེད་༡༣ ༣༠ལྡང་ན་དོར། །༚༝དོར་དང་༝མ་དོར་མཚན་མ་བཀོད། །དོར་ལྷག་སྐར་མ་༦༠མཁའ་རོས་བསྒྱུར། །ཆུ་ཚོད་བཅུག་ལ་༡༣༥མདའ་ཡོན་ཟླས། །བགོས་ཐོབ་ནོར་དེས་ཉི་རྐང་བཟུང་། །སྐང་སྡོམ་དབྱུག་གུའི་གནས་སུ་བཞག །རྐང་བཟུང་མདུན་མས་ལྷག་རྣམས་བསྒྱུར། ༦༠ ༦ ༡༣།སོ་སོའི་འཁོར་ལོས་དབྱུག་ལ་བསྒྲིལ། །༡༣༥འབྱུང་མེ་ཟླས་ཐོབ་ཡང་རྒྱུའི་དབྱུག །ལྷག་༦༠མཁའ་རོས་བསྒྱུར་བསྲེ་༡༣༥ཐོབ་སྲང་། །དེ་ལྷག་༦དུས་བསྒྱུར་བསྲེས་༡༣༥ཐོབ་ཆ། །སླར་ལྷག་༡༣འདོད་བསྒྱུར་བསྲེས་༡༣༥ཐོབ་ཆ། །ལྷག་མ་གང་ལུས་དོར་བས་ཆོག །ཡང་ན་རྐང་ལོངས་ལྷག་མ་གཉིས། །རིམ་བཞིན་༡༥ཚེས་དང་༡༨སྐྱོན་གྱིས་བསྒྲིལ། །རྙེད་པ་དོར་བས་ལྷག་མེད་འཆར། །སྔ་ཕྱིར་བསྲེ་དམན་གོང་ལྟར་བྱ། །དེ་རྣམས་གཟའ་ཉིའི་ལོངས་སྤྱོད་ལ། །འཁོར་ཕྱེད་དོར་བསྣན་མ་དོར་ཕྲི། །གཟའ་དང་ཉི་མ་དག་པ་ཡིན། །ཉི་དག་གཉིས་བཀོད་ཅིག་ཤོས་ལ། །ཟླ་བའི་ཐུན་མིན་རྟག་ལོངས་བྱིན། །ཚེས་འཁྱུད་ཟླ་བའི་སྐར་མ་དག །དེ་ལ་གཟའ་དག་ལོངས་སྤྱོད་ཀྱིས། །ཕྲི་ལྷག་རེས་འགྲོགས་ཟླ་སྐར་ཡིན། །དེ་དང་ཉི་དག་གནས་རྣམས་བསྲེ། །རང་འཁོར་བསྒྲིལ་ལྷག་སྦྱོར་བ་གྲུབ། །ཚེས་གྲངས་༢ཟུང་བསྒྱུར་༡ཟླ་བས་དམན། །༧ཐུབ་པས་དོར་བའི་ལྷག་མ་དེར། །ཕྱི་ཆའི་བྱེད་པ་ཞེས་སུ་གྲགས། །སྔ་ཆའི་བྱེད་པ་ཤུགས་ལས་རྟོགས། །དེ་ཡིས་བྱེད་པའི་ལྔ་བསྡུས་གྲུབ། །ཕུག་པའི་ལུགས་སུ་ཡོངས་གྲགས་པ། །རྒྱ་མཚོའི་མཚན་ཅན་རྣམ་གསུམ་གྱི། །ཕྱག་བཞེས་ཉུང་ངུ་བྱེད་པའི་རྩིས། །མ་ནོར་ཉུང་གསལ་འཇུག་བདེར་བསྡུས། །བསྡུས་རྒྱུད་དོན་འགྲེལ་དཔག་བསམ་ཡལ་ག་ནས། །མཁས་མང་བཞེད་གཞུང་འདབ་སྟོང་འཛུམ་པ་ལས། །གནད་དོན་མ་འདྲེས་སྙིང་པོ་རོ་བརྒྱ་པ། །བློ་ལྡན་བསོད་ནམས་དཔལ་དུ་བླངས་ནས་སྤེལ། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབས་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། བསྡུས་པའི་རྒྱུད་ཀྱི་རྒྱལ་པོ་རྩ་འགྲེལ་གྱི་དགོངས་པའི་དོན་ཇི་བཞིན་མ་ནོར་བར་བཀྲལ་བ་ཉུང་ངུ་བྱེད་པའི་རྩིས་ཀྱི་ལྔ་བསྡུས་རི་མོའི་ཁྱད་པར་མདོ་ཙམ་བརྗོད་པ་བརྗོད་པའི་སྐབས་ཏེ་གསུམ་པའོ།། སྐབས་བཞི་པ།༈ གཞན་ཕན་བསིལ་རིར་མཁྱེན་གཉིས་རྩལ་རྫོགས་ཤིང་། །ལེགས་གསུང་ང་རོས་ལྟ་ངན་དྲུང་འབྱིན་པ། །ངག་གི་དབང་ཕྱུག་སྨྲ་བའི་སེང་གེ་ཡིས། །མི་འཇིགས་ཐོགས་མེད་སྤོབས་པ་སྩོལ་ཅིག་ཀྱཻ། །དགོངས་པ་ཅན་གྱི་སྐྱོན་བཏོན་ཕྱིར། །རྩ་བསྡུས་དགོངས་དོན་གཅིག་དྲིལ་ནས། །མཁས་དབང་གོང་མས་ཕྱག་བཞེས་ཚུལ། །མྱོང་རྩིས་རི་མོའི་ཁྱད་པར་སྤྲོ། །༡༥རབ་ཚེས་སྒྱུར་བྱེད་འདས་པའི་ལོ། །༡༢ཉིས་བསྒྱུར་༠ནག་སོགས་འདས་ཟླ་བསྲེ། །འོག་མ་༢མིག་འཁྱུད་༣༣རྩེ་ཡོན་བསྣན། །༦༥མདའ་རོས་རྙེད་ཕུལ་ཚེས་ཟླ་དག །སྟེང་༡ཟླ་འོག་མར་༢ཟུང་རིམ་བྱིན། ༡ ༢། རྗེས་མའི་ཟླ་དག་རྩིས་འཕྲོ་འཆར། །ཟླ་དག་གནས་དྲུག་སྟེང་རིམ་བཞིན། །༡བསེ་རུ་༣༡ཟླ་ཡོན་༥༠མཁའ་ཕུང་༠ཐིག ༡ ༣༡ ༥༠ ༠ ༤༥ ༣༤༥།༤༥མདའ་མཚོ་༣༤༥འབྱུང་མཚོ་མེས་བསྒྱུར་༢ལག །༢༢ཟུང་འཁྲིག་༥༤མཚོ་དབང་༡བསེ་རུ་༨ཀླུ། ༢ ༢༢ ༥༤ ༡ ༨ ༣༩།༣༩བུག་མེ་བྱིན་ལ་༧༠༧རི་མཁའ་རི། ༧ ༦༠ ༦༠ ༦ ༦༧ ༧༠༧།༦༧རི་རོ་༦དུས་དང་༦༠ཐིག་རོ་དང་། །༦༠མཁའ་རོ་༧རིས་དོར་གཟའ་དྷྲུའོ། །ཟླ་དག་སྟེ་༢མིག་འོག་༡གཟུགས་བསྒྱུར། ༢ ༡ ༡༩ ༩། རྩ་ཟླ་བུག་བྱིན་༡༢༦དུས་ཁྱིམ་དང་། ༢༨ ༡༢༦།༢༨ཀླུ་ཟུང་གིས་བསྒྲིལ་རིལ་ཆ་དག །གནས་ལྔ་༢མིག་༡༠ཕྱོགས་༥༨ཀླུ་དབང་༢ལག ༢ ༡༠ ༥༨ ༢ ༡༠།༡༠ཕྱོགས་ཀྱིས་རིམ་བསྒྱུར་༢༦དུས་མིག་དང་། །༤༠ཐིག་མཚོ་༢༡ཟླ་ཟུང་༣མེ་༣མེ་བྱིན། ༢༦ ༤༠ ༢༡ ༣ ༣།༡༣འདོད་༦རོ་༦༠མཁའ་རོ་༦༠ཐིག་མཚམས་དང་། ༢༧ ༦༠ ༦༠ ༦ ༡༣།༢༧རྒྱུ་སྐར་གྱིས་བསྒྲིལ་ཉི་དྷྲུའོ། །སྔ་དྷྲུར་རང་རང་སྒྱུར་བྱེད་བྱིན། །ཕྱི་མའི་དྷྲུ་བ་འཁྲུལ་མེད་རྟོགས། །གཟའ་དྷྲུར་༠ཐིག་ལེ་༥༩བུག་མདའ་༣མེ། ༠ ༥༩ ༣ ༣༦༥།༤མཚོ་༡གཟུགས་༣༦༥མདའ་རོ་མེ་ཉི་དྷྲུར། །༠ཐིག་༤མཚོ་༢༡ཟླ་མིག་༥དབང་༩བུག་རྣམས། ༠ ༤ ༢༡ ༥ ༩ །གང་བརྩིའི་ཚེས་བསྒྱུར་བསྣན་པའམ། །ཡང་ན་རྟག་ལོངས་རེའུ་མིག་འདི། །བྱིན་པས་གཟའ་ཉི་བར་བ་གྲུབ། །རིལ་པོར་ཚེས་བསྲེས་ཡིད་ཀྱིས་བགོ། །རྙེད་པ་མཉམ་དང་མི་མཉམ་འབྲི། །ལྷག་མས་ཟླ་རྐང་སྔར་བཞིན་བཟུང་། །འཛིན་བྱེད་དོར་ལ་རྐང་སྡོམ་བཀོད། །གདོང་མས་ཆ་བསྒྱུར་༡༢༦དུས་ཉིས་བགོ། །ཐོབ་པ་ཡང་རྒྱུ་ལྷག་རིམ་བཞིན། །༦༠མཁའ་རོ་༦དུས་དང་༦༧རི་རོས་བསྒྱུར། །༡༢༦དུས་ཉིས་རིམ་ཐོབ་སྲང་དབུགས་ཆ། །སྡོམ་ལ་ཡང་རྒྱུའི་ཆུ་ཚོད་སོགས། །སྔ་རྐང་བསྣན་ལ་ཕྱི་རྐང་ཕྲི། །རྐང་ལོངས་ཡིན་ཏེ་གཟའ་བར་གྱི། །ཆུ་ཚོད་མན་ལ་ནོར་མཉམ་བསྣན། །མི་མཉམ་ཕྲི་བས་གཟའ་ཕྱེད་དག །ཉི་བར་གཉིས་ལས་ཅིག་ཤོས་ལ། ༦ ༤༥།སྐར་༦མཚམས་དབྱུག་གུར་༤༥མདའ་མཚོས་ཕྲི། །མ་ལོངས་སྐར་འཁོར་༢༧བསྣན་ལ་དོར། །དེ་ལྷག་འཁོར་ཕྱེད་༡༣ ༣༠ལྡང་ན་དོར། །མཚན་མ་མ་ནོར་ཟུར་དུ་བཀོད། །དོར་ལྷག་སྐར་མ་༦༠ཐིག་མཚམས་ཀྱིས། །སྤེལ་ལ་དབྱུག་ཕུལ་༡༣༥མདའ་ཡོན་ཟླས། །རྙེད་པས་ཉི་རྐང་གོང་ལྟར་བཟུང་། །སྡོམ་བཀོད་གདོང་མས་ལྷག་ཀུན་བསྒྱུར། ༦༠ ༦ ༦༧།རང་རང་འཁོར་ལོས་དབྱུག་ལ་བྱིན། །༡༣༥མདའ་ཡོན་ཟླས་རྙེད་ཡང་རྒྱུའི་དབུགས། །ལྷག་རིམ་༦༠སྲང་༦དབུགས་༦༧ཆ་འཁོར་གསིལ། །འོག་གི་སྲང་དབུགས་ཆ་རིམ་བསྣན། །༡༣༥མདའ་ཡོན་ཟླས་རྙེད་སྲང་དབུགས་ཆ། །ཚོགས་དེ་གཟའ་ཉིའི་དབྱུག་མན་ལ། །འཁོར་ཕྱེད་དོར་བྱིན་མ་དོར་འཕྲོག །དེ་ཡིས་གཟའ་དང་ཉི་མ་དག །ཉི་དག་གཉིས་བྲི་ཕྱོགས་གཅིག་ལ། །ཐུན་མིན་རེའུ་མིག་བསྣན་ཚེས་འཁྱུད། །གཟའ་ལོངས་ཀྱིས་སྦྱངས་རེས་འགྲོགས་དག །ཉི་ཟླ་བསྲེས་བསྒྲིལ་སྦྱོར་བ་གྲུབ། །ཚེས་གྲངས་༢མིག་བསྒྱུར་༡གཟུགས་ཕྲི་༧རིས། །དོར་ལྷག་ཕྱི་ཆའི་བྱེད་པ་སྟེ། །བྱེད་གྲུབ་ཟུང་འབྲེལ་ལྔ་བསྡུས་གྲུབ། །གྲུབ་པར་གཟའ་དང་བྱེད་པ་ཡི། །སྐར་མ་དག་པ་ལ་དགོངས་ནས། །གཉིས་ཀ་ཟུང་དུ་འབྲེལ་བའི་རྩིས། །ལག་ལེན་ཉུང་གསལ་གོ་བདེར་ལྟོས། །རྒྱུད་རྒྱལ་དགོངས་ཟབ་ཡོངས་འདུས་འཁྲི་ཤིང་ནས། །ཞལ་ལུང་ཟབ་བརྒྱའི་ཡལ་འདབ་གྱེས་པ་ལས། །སྔོན་མེད་ལེགས་བཤད་འབྲས་བཟང་ཆེར་དུད་པ། །བློ་གསལ་སྐྱེས་བུའི་དགའ་སྟོན་རྨད་དུ་བྱུང་། ། དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབས་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། མྱོང་རྩིས་ཞལ་རྒྱུན་དག་པ་བྱེད་གྲུབ་དགོངས་པ་གཅིག་དྲིལ་གྱི་ཡན་ལག་ལྔ་ཕྱོགས་ཙམ་བརྗོད་པའི་སྐབས་ཏེ་བཞི་པའོ།། སྐབས་ལྔ་པ།༈ རིགས་ཅན་གདུལ་བྱའི་སྒྲ་འཛིན་ཞིང་ས་ལ། །གང་གསུང་བདུད་རྩིའི་ཆ་ཤས་ལྷུང་བས་ཀྱང་། །བློ་གྲོས་སྙེ་མ་གཡུར་མཛད་འཇམ་དཔལ་དབྱངས། །ཡིན་པར་ཤེས་ནས་ལག་པའི་པདྨོ་ཟུམ། །ཕྱོགས་ཞག་ཟླ་བའི་སྒྲ་གཅན་གྱི། །རྩ་གདོང་མཇུག་གསུམ་ངེས་པ་དང་། །ཟླ་ཉིར་སྒྲ་གཅན་འཇུག་པའི་ཚུལ། །ཉུང་ངུ་རྣམ་གསལ་ལུང་བཞིན་འབྲི། །རབ་ཚེས་སྒྱུར་བྱེད་འདས་པའི་ལོར། །བྱས་པའི་ཟླ་དག་༧༡གཟུགས་རིས་བརྒྱན། །ངེས་པ་གསུམ་པོ་གང་འདོད་ཀྱི། །གཞིར་བཀོད་དང་པོ་ཕྱོགས་ཀྱི་ཆེད། །༢ཟུང་བསྒྱུར་ཉར་༡གཟུགས་སྟོང་༢མིག་བྱིན། །༤༦༠མཁའ་རོ་ཆུ་ཡིས་ཐོབ་པ་དོར། །ལྷག་མ་རིམ་བཞིན་༢༧འཁོར་ལོ་དང་། །༦༠མཁའ་རོ་༦༠ཐིག་མཚམས་༦དུས་༢༣མེ་མིག །རིམ་བསྒྱུར་༤༦༠མཁའ་དུས་ཆུས་རྙེད་པ། །སྟེང་རིམ་བཀོད་པ་རྩ་བ་སྟེ། །དེ་ཡིས་༢༧འཁོར་ལོར་རིམ་ཕྲི་གདོང་། །འཁོར་ཕྱེད་༡༣ ༣༠སྟེར་རམ་དམན་པ་འཇུག །ཟླ་བ་ཕྱེད་པའི་སྒྲ་གཅན་དག །ཡང་ན་སྒྱུར་བྱེད་ཟླ་དག་ལ། །༧༡གཟུགས་རི་བྱིན་ལ་༢༣༠མཁའ་མེ་མཚེས། །དོར་ལྷག་༣༠མཁའ་མེས་བསྒྱུར་བ་ལ། །ཉར་༡༥ཚེས་སྟོང་ལ་༣༠ཐིག་རྩེ་བསྣན། །གནས་ལྔ་སྟེང་རིམ་༠མཁའ་༠ཐིག་༡༤ཡིད། །༠ ༠ ༡༤ ༠ ༡༢།༠མཁའ་༡༢ཉིས་བསྒྲེས་ལ་རང་འཁོར་གྱིས། །༢༧ ༦༠ ༦༠ ༦ ༢༣།བསྒྲིལ་ལྷག་རྩ་བ་རྣམ་པར་དག །གདོང་མཇུག་གཉིས་པོ་སྔར་ལྟར་བྱ། །གཉིས་པ་གཞི་དེ་༣༠མཁའ་མེས་སྤེལ། །ཚེས་བསྲེ་༦༩༠༠མཁའ་ཐིག་བུག་རོས་དོར། །ལྷག་མ་༢༧སྐར་མས་བསྒྱུར་བ་སོགས། །༦༩༠༠མཁའ་ཐིག་བུག་རོས་རྙེད་པ་བརྩེགས། །ཡང་ན་ཟླ་དག་༣༠མཁའ་མེས་བསྒྱུར། །གང་བརྩིའི་ཚེས་བྱིན་སླར་ཡང་དེར། །༢༡༠༠མཁའ་མེ་ཟླ་ཟུང་མ་ནོར་བྱིན། །༦༩༠༠མཁའ་ཐིག་བུག་རོས་རྙེད་དོར་ལྷག །གོང་ལྟར་བྱས་པས་རྩ་བ་རྟོགས། །གཉིས་ཀར་གདོང་མཇུག་སྔར་བཞིན་བསྒྲུབ། །ཚེས་ཞག་གང་འཕོ་ངེས་པར་རྟོགས། །གསུམ་པ་༢༣༠མཁའ་མེ་ལག་པས་དོར། །༢༧སྐར་མས་བསྒྱུར་སོགས་འདྲ་བར་བྱ། །༢༣༠མཁའ་མེ་ལག་པས་རྙེད་པ་བརྩེགས། །དེས་ནི་ཟླ་བའི་སྒྲ་གཅན་རྟོགས། །དེ་རྣམས་དབུགས་ལྷག་༢༣མེ་མིག་གིས། །བསྒྱུར་ཐོབ་ཆར་བཀོད་རི་མོའི་ཁྱད། །གཞན་ཡང་ངེས་པ་གང་འདོད་ཀྱི། །དཀྱིལ་འཁོར་སོ་སོར་དོར་བའི་བར། །སྔོན་བཞིན་བྱས་ལྷག་གང་ཡིན་ཏེ། །༨༡གཟུགས་ཀླུས་བསྒྱུར་ལ་༢༣མེ་མིག་གིས། །ནོར་དེ་༦༠མཁའ་རོས་བགོས་ཐོབ་པ། །སྐར་མ་དེ་ལྷག་ཆུ་ཚོད་ཡིན། །འོག་གི་ལྷག་མ་༦༠མཁའ་རོས་བསྒྱུར། །༢༣མེ་མིག་རྙེད་སྲང་ལྷག་༦རོས་སྤེལ། །༢༣ནོར་དབུགས་ལྷག་ཆ་རྩ་བ་སྟེ། །གདོང་མཇུག་གོང་ལྟར་བྱས་པས་འགྲུབ། །དབྱུག་༣མེ་༣༡ཟླ་ཡོན་སྲང་དབུགས་༡གཟུགས། ༠ ༣ ༣༡ ༡ ༡༩།༡༩བུག་གཟུགས་ཆར་བཀོད་ཕྱོགས་ལོངས་ཏེ། །སྲང་ཆར་༡༤ཡིད་ཁྱིམ་༡༢ཞག་ལོངས་ཡིན། ༠ ༠ ༡༤ ༠ ༡༢།དབྱུག་༧རི་སྲང་༢ཟུང་དབུགས་༣ཡོན་ཏན། །ཆ་ཤས་༡༥ཚེས་རྣམས་ཟླ་ལོངས་ཏེ། ༠ ༧ ༢ ༣ ༡༥།སོ་སོར་རྟག་ལོངས་བུལ་བར་བྱིན། །གདོང་མཇུག་ལ་ཕྲི་ཕྱི་མར་ངེས། །ཟླ་ཉིར་སྒྲ་གཅན་འཇུག་ཚུལ་གྱི། །ངེས་པ་དཀར་ནག་ཚིག་མཚམས་སུ། །ཟླ་བ་སྔར་བཟུང་ཟླ་དྲུག་དང་། །ཉི་མར་བཅུ་གཉིས་འདས་མཐར་བརྟགས། །གསུངས་ཀྱང་མཐའ་གཅིག་མ་ངེས་པར། །མྱོང་གྲུབ་སྔ་ཕྱི་གཉིས་ལའང་བརྟགས། །དེ་ཡང་སྒྲ་གཅན་སྐར་གནས་༠ཐིག །ཆུ་ཚོད་༣༡གཟུགས་མེ་སྲང་༤༡ཟླ་མཚོ། །དབུགས་༤ཆུ་ཆ་ཤས་༡༠མཁའ་ཟླ་རྣམས། ༠ ༣༡ ༤༡ ༤ ༡༠།རྩ་བར་བྱིན་ཞིང་གདོང་མཇུག་ཕྲི། །ནམ་ཡང་བསླུ་མེད་བརྟགས་པའི་གཟེར། །དེ་དང་ཟླ་ཉིའི་ལོངས་སྤྱོད་དག །གང་ཉེ་དེར་བསྟུན་བརྟགས་པ་གནད། །ཟླ་འཛིན་བརྟགས་ཕྱིར་གདོང་མཇུག་དང་། །གྲུབ་མཐའི་བཅོ་ལྔའི་ཚེས་འཁྱུད་དག །གང་ཉེར་ཉུང་གིས་མང་སྦྱངས་ལྷག །སྐར་༠སྟོང་ཆུ་ཚོད་༥༠མཁའ་དབང་མན། ༠ ༥༠།ཤར་ཚེ་ངེས་པར་འཛིན་པ་ཡིན། །སྦྱང་ལྷག་ཆུ་ཚོད་༥མདའ་ཡིས་བགོས། །ནོར་གྱི་རེའུ་མིག་འདི་བཟུང་བས། །སྒྲིབ་ཡུན་འཛིན་ཆ་འཁྲུལ་མེད་ཤེས། །ཕྱོགས་ནི་ཟླ་གདོང་དུས་མེས་ཟླར། །སྦྱངས་ཚེ་ནམ་ཕྱེད་དབང་ལྡན་དང་། །ནམ་སྟོད་བྱང་ཉེ་ནམ་སྨད་ལ། །དབང་ལྡན་ཤར་ཉེའི་ཕྱོགས་ནས་འཛིན། །གདོང་ཟླ་ཟླ་བས་མཇུག་སྦྱངས་ཚེ། །ནམ་ཕྱེད་ཤར་ལྷོ་སྲོད་ཤར་ཉེ། །ཐོ་རངས་ཤར་ལྷོ་ཤར་ཉེ་ནས། །མཉམ་ན་ནམ་ཕྱེད་ཤར་དྲང་པོ། །སྲོད་ལ་དབང་ལྡན་ཐོ་རེངས་ལ། །ཤར་ལྷོར་ཉེ་བའི་ཤར་ནས་འཛིན། །དུས་ནི་ཚེས་གཟའི་ལོངས་སྤྱོད་གྲངས། །ཟད་ཚེ་ཚེས་འཕོ་ཟླ་ཉི་འཛིན། །ཁྱད་པར་ཚེས་ལོངས་སྔ་མ་དེས། །༦༠མཁའ་རོར་བསྒྲིལ་ལྷག་ད་ལྟ་བར། །བསྲེས་པའི་ཆུ་ཚད་༦༤མཚོ་དུས་ནས། །༥༤མཚོ་དབང་བར་ཤར་གཟའ་ལོངས་ལ། །རེའུ་མིག་འདི་ཕྱིན་ཟད་ཚེ་འཛིན། །ཁ་ཏོག་རིལ་འཛིན་གདོང་དམར་ནག །མཇུག་དམར་ཡང་ན་དམར་སྐྱ་དང་། །འཛིན་ཆ་ཆུང་ན་ནག་པོར་སྣང་། །མགོ་ལག་སྟེང་བཟུང་ནམ་མཁའི་མདོག །དེ་སོགས་ཞིབ་མོར་བརྟགས་ལ་སྨྲ། །ཉི་འཛིན་གྲུབ་མཐའི་གནམ་སྟོང་གི། །ཉི་དག་གཅིག་དང་བུལ་བ་བསྲེ། །གཅིག་དང་གདོང་མཇུག་གང་ཉེ་བ། །ཉུང་གིས་མང་སྦྱངས་ལྷག་མར་བརྟགས། །གདོང་གིས་ཉི་སྦྱང་སྐར་གནས་༠ཐིག ༠ ༥༠།ཆུ་ཚོད་༥༠མཁའ་དབང་མན་ཤར་འཛིན། །ཉི་མས་གདོང་སྦྱངས་དབྱུག་༥མདའ་མན། ༠ ༥།ཟེར་ཡང་གོ་ལོག་འཛིན་མི་སྲིད། །མཇུག་མས་ཉི་སྦྱངས་སྐར་༠ཐིག་དབྱུག ༠ ༨།༨ཀླུ་མན་གོ་ལོག་ཡིན་ཀྱང་འཛིན། །ཉི་མས་མཇུག་སྦྱངས་སྐར་༠མཁའ་དབྱུག ༠ ༤༠།༤༠མཁའ་ཆུ་མན་ཤར་ངེས་པར་འཛིན། །སྔར་གྱི་ཉི་བུལ་བསྲེས་པ་དེར། །སྦྱངས་ལྷག་གདོང་ཕྲི་མཇུག་མར་བསྣན། །རང་འཁོར་བསྒྲིལ་ལ་༡༣ ༣༠འཁོར་ཕྱེད་དོར། གནས་ཀུན་སྟོང་ན་ངེས་ཀྱང་ཟེར། །མྱོང་རྩིས་བསྒྲོད་གཉིས་མཐར་ཉེ་ཚེ། །འཆར་ཀ་ནུབ་ཀར་ཉེ་བ་དང་། །དཔྱིད་མཉམ་ཕྱེད་གོང་སྟོན་ཕྱེད་འོག །འཛིན་པའི་རི་མོ་ཤར་ན་ངེས། །བར་རྣམས་དེར་བརྟགས་རིགས་པས་འཕྲུལ། །སྦྱངས་ལྷག་དབྱུག་གུའི་རེའུ་མིག་འདི། །སོ་སོར་སྔ་ཕྱི་བསྟུན་ནས་བཟུང་། །འཛིན་ཆ་སྒྲིབ་ཡུན་རག་པ་ཤེས། །ཕྱོགས་ནི་ཉི་མར་གདོང་མཇུག་གིས། །སྦྱངས་ཚེ་ཉིན་ཕྱེད་ལྷོ་ནུབ་དང་། །སྔ་དྲོར་ལྷོར་ཉེ་ཕྱི་དྲོ་ལ། །ནུབ་ཉེ་ནས་འཛིན་ཉི་མས་མཇུག །སྦྱངས་ཚེ་ཉིན་ཕྱེད་ནུབ་བྱང་དང་། །སྔ་དྲོ་བྱང་ཉེ་ཕྱི་དྲོའི་དུས། །ནུབ་ལ་ཉེ་བའི་ཕྱོགས་ནས་འཛིན། །ཁ་ཏོག་མཇུག་དམར་གདོང་དམར་ནག །དུམ་འཛིན་སྔོ་ནག་ཕྱེད་དམར་ནག །རིལ་འཛིན་དམར་ནག་མགོ་ལག་སྟེང་། །ནམ་མཁའི་མདོག་ཏུ་སྣང་ཞེས་གསུངས། །དུས་ནི་ཚེས་ལོངས་ཟད་ཚེ་འཛིན། །ཞིབ་མོར་ཟླ་འཛིན་སྐབས་བཞིན་བརྟགས། །གཉིས་ཀ་བྱེད་པ་ལ་ཡང་བསྟུན། །ཆད་ལྷག་ཉིན་མཚན་རིང་ཐུང་ཚད། །ཤར་ནུབ་རི་བོའི་མཐོ་དམའ་སོགས། །སྒྲིམ་པོའི་བློ་ཡིས་བརྟགས་པ་གནད། །ཉ་སྟོང་ཆད་དུས་མི་འཛིན་ཞེས། །སྨྲ་ཡང་འཛིན་པ་མྱོང་བས་གྲུབ། །རབ་ཡིད་ཉི་མའི་ཟླ་ཚེས་ནུབ། །ཟླ་འཛིན་བྱུང་འདྲ་འགའ་མ་གཏོགས། །ཆོ་ག་འདི་ཡིས་འཁྲུལ་མེད་རྟོགས། །དེ་ཕྱིར་འདི་ཉིད་ཉེར་མཁོར་སྤེལ། །གོང་མའི་བཞེད་སྲོལ་ཤེལ་དཀར་མེ་ལོང་ལ། །རྣམ་དཔྱོད་དར་གྱིས་བྱི་དོར་ལེགས་བགྱིས་ནས། །རིགས་མཐུན་འགའ་ལ་ཕན་པའི་བློ་ཡིས་བྱིན། །གནས་ཚུལ་ཇི་བཞིན་གསལ་ལོ་དགའ་བར་གྱིས། ། དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབས་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ཕྱོགས་ཞག་ཟླ་བའི་སྒྲ་གཅན་གྱི་ངེས་པ་ཟླ་ཉིར་སྒྲ་གཅན་འཇུག་ཚུལ་བཅས་བསྲེ་བསླད་མེད་པར་གོང་མའི་གསུང་བཞིན་ཉུང་ངུར་བརྗོད་པའི་སྐབས་ཏེ་ལྔ་པའོ།། སྐབས་དྲུག་པ།༈ གང་གི་མཚན་མཆོག་དབྱར་སྐྱེས་རོལ་མོའི་སྒྲ། །སྐལ་བཟང་སྒྲ་འཛིན་དཔལ་དུ་སོན་པས་ཀྱང་། །དཔག་མེད་བློ་གྲོས་སྤོབས་པ་རྒྱས་མཛད་པ། །བླ་མ་འཇམ་པའི་དབྱངས་ཀྱིས་བདག་བློ་སྤེལ། །ཡན་ལག་ལྔ་བསྡུས་རྣམ་དག་པ། །བལྟས་ཆོག་རེའུ་མིག་ལ་བརྟེན་ནས། །ཚེག་མེད་རྟོགས་ཕྱིར་མྱུར་བའི་རྩིས། །ཉེར་མཁོ་ལུང་བཞིན་འགོད་ལ་སྤྲོ། །བྱེད་གྲུབ་གང་འདོད་༣ནག་ཟླའམ། །ཟླ་བཤོལ་བྱུང་རྗེས་དབོ་ཟླ་ཡི། །༦༠མདའ་རོའི་ལྷག་མ་༦དུས་ཀྱིས་བསྒྱུར། །༡༣འདོད་བགོས་ལྷག་བྱུང་ནོར་ལ་༡གཅིག །བྱིན་པས་རགས་ཟིན་ཚེས་གྲངས་སྟོན། །ཡང་ན་སྔ་ལོའི་ཚེས་གྲངས་ལ། །༡༡དྲག་བསྣན་རགས་ཟིན་ཚེས་གྲངས་འཆར། །ཉི་རགས་སྟོང་པའི་ཕྱི་ལོར་བཅུ་གཉིས་སྣོན་དགོས། མཆན། བྱེད་གྲུབ་སོ་སོའི་༣ནག་ཟླའམ། །བཤོལ་རྗེས་༢དབོ་ཟླའི་ཉི་དྷྲུ་ལ། །གང་ཟིན་ཚེས་དེའི་ཉི་ལོངས་ཉི་མའི་རྟགས། མཆན།བྱིན། ༢༧ ༦༠ ༤༡ ༤ ༢༦ ༣༧༨།རང་འཁོར་བསྒྲིལ་ལྷག་སྐར་༠ཐིག་དབྱུག །༠ ༤།༤མཚོ་ཚུན་ཤར་ཚེ་གཟའ་དྷྲུ་ལ། །ཉིན་དེའི་གཟའ་ལོངས་བསྲེ་འཁོར་བསྒྲིལ། ༧ ༦༠ ༦༠ ༦ ༧༠༧།ལོ་དེའི་གཟའ་ཉི་རགས་པ་འགྲུབ། །གཟའ་ཉིའི་ཆ་ཤས་ཤེད་སྙོམས་ཕྱིར། །གཟའ་ཆ་བསྒྱུར་བཀོད་དཀྱུས་བཞིན་བྱ། །སྔ་ལོའི་རགས་པ་རྣམ་དག་ལ། །བྱེད་པར་༡གཟུགས་༡༡དྲག་༤༠ཐིག་མཚོ་༢ལག། ༡ ༡༡ ༤༠ ༢ ༠།༠ཐིག་རྣམས་གཟར་བྱིན་ཉི་མ་ལ། །༠ ༠ ༡༧ ༠ ༢།༠མཁའ་༠ཐིག་༡༧རི་ཟླ་༠སྟོང་༢མིག་ཕྲི། །གྲུབ་པར་གཟའ་ཡི་རགས་པ་ལ། །༡གཟུགས་༡༡དྲག་༤༡ཟླ་མཚོ་༤ཆུ་༢༦དུས་མིག ༡ ༡༡ ༤༡ ༤ ༢༦ ༣༧༨།༣༧༨ཀླུ་གཟའ་མེ་བསྣན་ཉི་རགས་ནས། །༠མཁའ་༠མཁའ་༢༠སྟོང་མིག་༠ཐིག་༦༠མཁའ་རོ། ༠ ༠ ༢༠ ༠ ༦༠།ཕྲི་བས་ཕྱི་ལོའི་རགས་པ་འགྲུབ། །གཟའ་ཉི་མ་ལྡང་སོ་སོའི་ཚེས་གཅིག་གི་རྟག་ལོངས་བསྣན། །ཕྱི་ལོའི་གཟའ་ཉི་རགས་པ་འཆར། །ཉི་རགས་ཆུ་ཚོད་༦༠མཁའ་རོས་བསྒྱུར། །སྲང་བཅུག་༡༣༥མདའ་ཡོན་ཟླས་ཐོབ་སྲང་། །དེ་ལྷག་༦རོས་བསྒྱུར་བཅུག་རྙེད་༡༣༥ཆ། །གྲུབ་པར་ལྷག་མེད་བྱེད་ལྷག་བཅས། །སྐར་དབྱུག་གནས་སུ་༠ ༠ཐིག་ལེ་བཀོད། །ཚར་གསུམ་༡ཟླ་༤ཆུ་༦དུས་ཀྱིས་བསྒྱུར། །བྱེད་པོར་ཆ་ལྷག་༦༤ཆུ་རོས་སྤེལ། །༡༣༥མདའ་ཡོན་ཟླས་ཐོབ་འདོད་ཆར་བསྲེ། ༢༧ ༦༠ ༦༠ ༦ ༦༧།འཁོར་བསྒྲིལ་མི་ནོར་ཁ་བྱང་འབྲི། །༡༤༦ཟླ་ཆུ་དུས་ཀྱི་འབྲས་བུ་གྲུབ། །གཟའ་ཉི་རགས་པ་གནས་དྲུག་བཞག །ཁྱིམ་གྱི་ཁ་བྱང་གཉིས་རེ་བཀོད། །ལུག་དང་བུ་མོར་ཟླ་འབྲས་ཕྲི། །ཉ་སྲང་ལ་བྱིན་གླང་སེང་ལ། །ཆུ་འབྲས་དམན་ཞིང་བུམ་སྡིག་བརྒྱན། །འཁྲིག་ཀར་དུས་འབྲས་དབྲི་ཆུ་གཞུར། །བསྣན་པས་ཁྱིམ་དྲུག་སྤྱི་ནོར་འགྲུབ། །བྱེད་གྲུབ་གང་ཡིན་ཉི་དྷྲུ་ལ། །གང་བརྩིས་རྩིས་ཀྱི་རྟག་ལོངས་བྱིན། །དེ་ལ་ཉི་མ་རགས་པས་ཕྲི། །དེ་ཡིས་ཕྱེད་དག་རེའུ་མིག་བཟུང་། །རགས་ཟིན་ཚེས་ཚུན་ཉི་བར་ལ། །སྔ་ལོའི་རགས་པས་སྦྱངས་ཏེ་བཟུང་། །དེ་མཐུན་བར་འོག་གཟའ་ཉི་ལ། །ཁྱིམ་མཐུན་སྤྱི་ནོར་བྱིན་པ་ཡིས། །གཟའ་ཕྱེད་ཉི་མ་དག་པར་འགྱུར། །རགས་པ་ཟིན་ཡན་སྔ་ལོ་ཡི། །སྤྱི་ནོར་བྱིན་པས་གོང་ལྟར་གྲུབ། །རིལ་པོར་ཚེས་བྱིན་༡༤ཡིད་ཀྱིས་བགོ། །ནོར་གཅིག་ཞག་གྲངས་བཅུ་བཞི་རེས། །སྣོན་འབྲིད་མཚན་མར་མ་ནོར་བཀོད། །ལྷག་མས་རིལ་པོའི་འོག་གི་ཆ་ཤས་ཀྱིས། །ཟིན་པའི་ཆ་ཤས་རེའུ་མིག་བཟུང་། །ཕྱེད་དག་གཟའ་ཡི་ལོངས་སྤྱོད་ལ། །ནོར་མཉམ་བསྣན་ལ་མི་མཉམ་ཕྲི། །རེས་གཟའ་དག་འགྱུར་ཚེས་འཁྱུད་དང་། །སྐར་སྦྱོར་གཞུང་བསྟུན་བྱེད་པ་ནི། །རེའུ་མིག་བཞིན་དུ་བཀོད་པས་གྲུབ། །གཟའ་གཅིག་ལན་གཉིས་བྱུང་བ་ན། །ཆུ་ཚོད་མང་བའི་ཚེས་དེ་ཆད། །གཟའ་གཅིག་བར་སྟོང་བྱུང་བའི་ཚེ། །ཆུ་ཚོད་གང་ཉུང་ལྷག་པར་བཞེད། །ཡང་ན་སྔ་ལོའི་གཟའ་རགས་དང་། །ཉི་རགས་ཟླ་ཆུ་དུས་ཀྱི་འབྲས། །ཁྱིམ་དྲུག་སྤྱི་ནོར་དང་བཅས་ལ། །རེའུ་མིག་འདི་ཡིས་སོ་སོར་སྦྱངས། །མ་ལྡང་བསྣན་བྱ་བསྣན་ལ་སྦྱངས། །ལོ་དེའི་སྤྱི་ནོར་རྣམ་དག་འགྲུབ། །ཉི་རགས་སྟོང་ལོ་སྤྱི་ནོར་གཞན། །མེད་ཕྱིར་གཟའ་རགས་ཁོ་ནས་ཆོག །གཟའ་རགས་སྟོང་ལོ་གཟའ་༧འཁོར་ལ། །སྐྱེས་བུ་གསུམ་ཟླ་ཆུ་དུས་འབྲས་གྱིས་རིམ་ཕབ་བསྒྲུབ། །གཉིས་པོ་ལྷན་ཅིག་སྟོང་ཞུགས་ལོར། །སྤྱི་ནོར་མེད་ཕྱིར་ངལ་བ་སྤངས། །བྱེད་པར་༡༥ཚེས་སམ་༡༦མི་བདག་ལོའི། །མཇུག་ཏུ་ཉི་སྲང་༡༧རི་ཟླ་ལས། །ཉུང་ཚེ་སྟོང་པར་ཞུགས་ཅེས་བརྗོད། །གྲུབ་པར་༡༣མྱོས་བྱེད་ལོ་མཐར་སྟོང་། །རགས་གཉིས་སྟོང་ཞུགས་ཕྱི་ལོར་གཟའི། །སྤྱི་ནོར་སྔོན་མར་རེའུ་མིག་འདིས། །མ་ནོར་སྦྱངས་པས་རྣམ་དག་འགྲུབ། །བསྐལ་ལི་འཛིན་ཚུལ་འདས་པའི་ཟླ། །༣༠ཐིག་རྩེས་བསྒྱུར་ལ་ཚེས་གྲངས་བསྲེ། །ཉི་རགས་ཟིན་པའི་ཞག་གིས་ཕྲི། །མ་ལྡང་༣༠༡གཟུགས་རི་མེ་བསྣན་སྦྱངས། །ལྷག་མས་བསྐལ་ལིའི་བྱ་ར་བཟུང་། །བར་འོག་གཟའ་དང་ཉི་མ་ལ། །ཁྱིམ་མཐུན་སྤྱི་ནོར་བསྣན་བྱས་ལ། །རིལ་བོར་ཚེས་བསྲེས་བགོས་ནོར་དང་། །འོག་གི་ཆར་བསྟུན་ཆ་ཤས་ཀྱི། །རེའུ་མིག་སྐབས་དེའི་གཟའ་ལོངས་ལ། །བསྲེས་པས་གཟའ་དང་ཉི་མ་དག །ཟླ་སྐར་སྦྱོར་བྱེད་སྔར་ལྟར་བྱ། །དེ་ཡིས་མགྱོགས་རྩིས་ལྔ་བསྡུས་གྲུབ། །ཡང་ན་མྱུར་རྩིས་གནས་གཉིས་ནི། །གཟའ་ཉི་བར་པ་དཀྱུས་བཞིན་བྱ། །རིལ་པོར་ཚེས་བསྲེས་མ་ནུས་བགོ། །རྙེད་པ་མཉམ་དང་མི་མཉམ་བྲི། །ལྷག་མས་སྟེང་གི་བྱ་ར་བཟུང་། །ཆ་ཤས་གྲངས་ཡིག་དང་བསྟུན་ལ། །རྙེད་མཉམ་གཟའ་བར་ཆུ་ཚོད་ལ། །བསྣན་ཞིང་མི་མཉམ་སྦྱངས་ནས་སུ། །ཉི་བར་བྱ་ར་དང་བསྟུན་པའི། །རེའུ་མིག་གཟའ་ཉིའི་ལོངས་སྤྱོད་ལ། །ལྷོ་བསྒྲོད་ཕྲི་ཞིང་བྱང་བགྲོད་བྱིན། །དེ་ཡིས་གཟའ་དང་ཉི་མ་དག །ཟླ་སྐར་སྦྱོར་བྱེད་སྔར་ལྟར་བྱ། །དེས་ཀྱང་ལྔ་བསྡུས་ཕྱོགས་ཙམ་གྲུབ། །ཀུན་ཀྱང་གསར་བྱས་རང་བཟོ་མིན། །དམ་པའི་ལེགས་བཤད་ཁོ་ན་སྟེ། །དེ་ཕྱིར་བློ་ལྡན་གང་ཞིག་གིས། །ཕྱག་ལེན་མཛད་ཀྱང་ཐུགས་མི་ཁྲེལ། །རྒྱུད་རྒྱལ་དགོངས་དོན་ཡོངས་འདུས་འཁྲི་ཤིང་ལས། །མཁས་མང་གཞུང་ལུགས་ཡལ་འདབ་འབུམ་དཀྲིགས་ཤིང་། །དམ་པའི་མན་ངག་འབྲས་བུ་མང་གཡུར་ཚེ། །བློ་ཅན་སྐྱེས་བུའི་བསྟི་གནས་ཤུགས་ལས་བྱུང་། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། རེའུ་མིག་ལ་བརྟེན་པའི་ཡན་ལག་ལྔ་བསྡུས་མྱུར་རྩིས་ཀྱི་རྣམ་གྲངས་ཉེར་མཁོ་རྒྱུན་ཁྱེར་གྱི་རིམ་པ་མདོ་ཙམ་བརྗོད་པའི་སྐབས་ཏེ་དྲུག་པའོ།། སྐབས་བདུན་པ།༈ གང་གིས་ལེགས་གསུང་དྲི་བཞོན་རེག་བྱ་ཡིས། །འགྲོ་བློའི་མི་ཤེས་ཆུ་འཛིན་འཐུག་པོའི་དཔུང་། །ཆོས་དབྱིངས་ནམ་མཁའི་ངོ་བོར་དག་བྱེད་པ། །མཁྱེན་པའི་གཏེར་ཆེན་ཁྱོད་ལ་སྙིང་ནས་འདུད། །གཉིས་མེད་དུས་ཀྱི་འཁོར་ལོའི་དོན། །འཕགས་བོད་མཁས་པས་ལེགས་བཀྲལ་བའི། །བཀའ་སྲོལ་དག་པ་ལས་འཕྲོས་དོན། །ཉེར་མཁོའི་རེའུ་མིག་སྤེལ་འཛིན་སྤྲོ། །བསྡུས་དོན་ཁྱིམ་དྲུག་སྤེལ་བའི་ཕྱིར། །བྱེད་གྲུབ་གང་ཡིན་ཉི་ལོངས་ཀྱི། །ཆུ་ཚོད་༦༠མཁའ་རོས་བསྒྱུར་སྲང་བཅུག །༡༣༥མདའ་ཡོན་ཟླས་ཐོབ་སྲང་དུ་བཀོད། །དེ་ལྷག་༦རོས་བསྒྱུར་བཅུག་༡༣༥ཐོབ་དབུགས། །སླར་ལྷག་གྲུབ་པར་༦༧རི་རོས་བསྒྱུར། །ཆ་བསྲེས་༡༣༥རྙེད་བཀོད་ལྷག་མེད་འཆར། །བྱེད་པར་༡༣འདོད་བསྒྱུར་༡༣༥ཐོབ་པ་ཆ། །ལྷག་མ་དག་པའི་ངེས་པ་མེད། །གསུམ་བཀོད་༡ཟླ་༤ཆུ་༦དུས་ཀྱིས་བསྣུན། །དེ་ཡིས་ཞག་གཅིག་ཡུལ་དུས་ཀྱི། །ལོངས་སྤྱོད་དག་ལ་མགྱོགས་རྩིས་ལྟར། །དབྲི་བསྣན་བྱས་པས་ཁྱིམ་དྲུག་དག །བསྐལ་ལིའི་རེའུ་མིག་༣༧༢ལག་ཐུབ་ཡོན། །བཞི་བརྩེགས་ཐོག་མར་བྱར་གྲངས་བཀོད། །དེ་འོག་གནས་གསུམ་སྟེང་མ་ལ། །ཉི་ལོངས་བྱ་རའི་གྲངས་ཀྱིས་སྤེལ། །བར་འོག་གཉིས་ལ་ཁྱིམ་རེའི་མགོར། །གྲངས་བསྒྱུར་གཟའ་ཉིའི་རྟག་ལོངས་ལ། །ཉི་མའི་རྐང་ལོངས་དཀྱུས་བཞིན་བཙལ། །སྣོན་འབྲིད་བྱས་པས་དང་པོ་འགྲུབ། །དེ་ཉིད་བསྡུས་དོན་ཁྱིམ་དྲུག་གིས། །སོ་སོའི་རྐང་མཚམས་བར་དུ་སྤེལ། །འཁོར་རྫོགས་རྐང་ཆོག་བྱས་ཏེ་འགོད། །ལུག་ལ་སུམ་ཅུ་གཞན་སོ་གཅིག །ཐོག་མར་ཁ་བྱང་སོ་སོར་འབྲི། །བྱེད་གྲུབ་རི་མོའི་ཁྱད་པར་འགའ། །མ་གཏོགས་སྤེལ་ལུགས་འདྲ་བ་ཡིན། །དེ་ཡིས་བསྐལ་ལིའི་རེའུ་མིག་འགྲུབ། །ཞག་གཅིག་ཉི་ཚེས་ཡུལ་ལོངས་ལ། །ལོ་རེར་བཅུ་གསུམ་ཆ་རེ་རེ། །དམན་པའི་ཉི་རགས་བཅུ་གསུམ་པོར། །ཟླ་ཆུ་དུས་རྐང་དོན་ཁྱིམ་བཙལ། །དེ་ཡིས་གཟའ་འཁོར་ཉི་རགས་ལ། །སྔར་བཞིན་ཁྱིམ་དྲུག་སྤྱི་ནོར་བཟོ། །བྱ་ར་བཅུ་གསུམ་དམར་པོ་ནག་པོ་དང་། །ནག་པོ་དམར་པོ་ལུགས་འབྱུང་ལུགས་ལྡོག་བཀོད། །དེ་ཡིས་སྤྱི་ནོར་རེའུ་མིག་འགྲུབ། །ཆ་ཤས་རེའུ་མིག་སོ་གཉིས་པ། །བཞི་བརྩེགས་ཐད་ཀར་བཅུ་བཞི་པའི། །སྟེང་འོག་ཐིག་ནས་བཅུ་གསུམ་བར། །གྲངས་འཛིན་དམར་ནག་འབྱུང་ལྡོག་བཀོད། །སྡེ་ཚན་རེ་བཞིན་སྟེང་འོག་གི། །ཐོག་མར་༡གཟུགས་ནས་དུས་མེ་དང་། །༢ཟུང་ནས་༠ཐིག་བར་ལུགས་འབྱུང་དམར། །༦༡ཟླ་མཚམས་༦༢ཟུང་དུས་བྱ་རའི་འོག །སྟེང་རི་༦༥མདའ་རོ་༦༤ཆུ་དུས་ནས། །༡༢༥མདའ་མིག་ཟླ་དང་༡༢༤མཚོ་མིག་གཟུགས། །བར་ལ་ལུགས་ལྡོག་ནག་པོ་འབྲི། །སྤེལ་ཚུལ་སྟེང་འོག་བྱ་ར་ཡིས། །ཟླ་རྐང་བཟུང་ལ་རྐང་སྡོམ་བཀོད། །གདོང་མས་ཆ་ཤས་བྱ་ར་བསྒྱུར། །དུས་ཉིས་༡༢༦ཐོབ་པ་ཡང་རྒྱུའི་དབྱུག །ལྷག་རྣམས་༦༠མཁའ་རོ་༦དུས་༦༧རི་རོ། །༧༠༧རི་མཁའ་རི་ཡིས་རིམ་བསྒྱུར་ལ། །དུས་ཁྱིམ་གྱིས་ཐོབ་སྲང་དབུགས་ཆ། །ཡང་ཆ་རིམ་བཀོད་ལྷག་མེད་འཆར། །སྔ་ཕྱིར་སྣོན་འབྲིད་དཀྱུས་ལྟར་བྱ། །རིམ་བཞིན་དེ་ལྟར་བཀོད་པས་འགྲུབ། །བྱེད་པར་དབུགས་ལྷག་དགུས་ཐོབ་ཆར། །བཞག་པ་ཆ་ཤས་གཅིག་པ་ཡི། །བྱ་ར་དྲུག་པའི་ལོངས་སྤྱོད་ཡིན། །སོ་སོའི་ཆས་བསྒྱུར་དྲུག་པར་བཀོད། །ཆ་འཁོར་ཡིད་མ་གཏོགས་པ་གཞན། །སྔར་བཤད་གྲུབ་མཐའ་བཞིན་དུ་སྤེལ། །དམར་ནག་བྱེད་འཁོར་གཉིས་པོ་གྲུབ། །སྒྲ་གཅན་རེའུ་མིག་༢༣༠མཁའ་མེ་ལག །སྟེང་འོག་སུམ་བརྩེགས་བྱས་ཏེ་བཀོད། །དང་པོར་གྲངས་ཀྱི་བྱ་ར་བཀོད། །བར་འོག་གཉིས་ཀྱི་ཐོག་མ་ལ། །ཕྱོགས་དང་ཟླ་བའི་ལོངས་སྤྱོད་བཀོད། །སླར་ཡང་སྟེང་འོག་སོ་སོ་ལ། །ཟླ་ལོངས་མ་ནོར་སོ་སོར་བསྣན། །རང་འཁོར་བསྒྲིལ་ལྷག་རྩ་བ་སྟེ། །དེ་ཡིས་འཁོར་ལོར་སྦྱངས་ལྷག་གདོང་། །འཁོར་ཕྱེད་སྟེར་རམ་དམན་པ་མཇུག །རིམ་བཞིན་བཀོད་པས་རྣམ་དག་འགྲུབ། །བྱེད་ལོ་སྐྱོན་བྲལ་ཟླ་འཕོར་བཅས། །ལྷན་ཅིག་རྟོགས་པའི་རེའུ་མིག་ནི། །སྟེང་རིམ་ཚེས་དང་ཐད་ཀ་ལ། །རི་ཟླ་མེ་ཡི་བར་དུ་སྤེལ། །ཐོག་མར་གྲངས་ཀྱི་བྱ་ར་སྤེལ། །གཉིས་པར་སྟེང་ནས་རིམ་བཞིན་མེ། །མདའ་མཚོ་ཟླ་མེ་གཟུགས་ཟླ་ཉི། །གསུམ་པར་མཚེ་མ་ཟླ་ཆུ་དང་། །རི་མཚོ་ཆུ་བོ་ཀླུ་བུག་ལག ༢ ༢༡ ༤༧ ༤ ༢༩༨།གཟུགས་ཚེས་གཟུགས་མེ་གཟུགས་ཟླ་ཉི། །སྟེང་འོག་སོ་སོར་རིམ་བྱིན་བཀོད། །རང་ཐད་བྱེད་པ་ལོ་བདག་གི། །གཟའ་དབྱུག་བཅུ་གཉིས་སྟེང་རིམ་བཞིན། །ལུག་གླང་འཁྲིག་ཀར་སེང་བུ་མོ། །སྲང་སྡིག་གཞུ་སྲིན་བུམ་ཉ་ལ། །རིམ་བཞིན་གཟའ་དབྱུག་གཟུགས་རི་དབང་། །རིག་བྱེད་མེ་དབང་གཟུགས་རི་ཟླ། །ཆུ་བོ་མེ་མདའ་གཟུགས་ལག་མིག །སྡེ་བ་མཚོ་མིག་དུས་ཟླ་དབང་། །བསེ་རུ་གླིང་མཚོ་མེ་མི་བདག །ཟུང་ལྡན་ཐུབ་རྩེ་དུས་རྒྱ་མཚོ། །ཐིག་དང་མིག་འབྱུང་རིམ་བྱིན་ལ། །རང་འཁོར་བསྒྲིལ་ལ་སོ་སོར་བཀོད། །མི་ནོར་ཁ་བྱང་བྲིས་པས་འགྲུབ། །ལྡོག་གཉིས་རི་ཥི་ཕག་ཞག་རྣམས། །ཕྱོགས་གཅིག་རྟོགས་པའི་རེའུ་མིག་ནི། །ལྔ་བརྩེགས་མདའ་རོའི་བར་དུ་སྤེལ། །དབུས་མར་གྲངས་ཀྱི་བྱ་ར་འབྲི། །སྟེང་མའི་དང་པོར་རྩ་ཐིག་ཆུ། །གཉིས་པའི་དང་པོར་ཡིད་རི་མཚོ། །གྲངས་འོག་དང་པོར་སྐར་མདའ་གཟུགས། །འོག་མར་བུག་གཟུགས་ཆུ་མཚོ་བཀོད། །སོ་སོར་སྟེང་རིམ་དྲག་གཟུགས་བྱིན། །འདོད་དང་མཁའ་མེས་བསྒྲིལ་བཀོད་གྲུབ། །དབུགས་ཁྱིམ་སྒང་གསུམ་རེའུ་མིག་ནི། །བརྒྱད་བརྩེགས་མེ་རྩེའི་བར་དུ་སྤེལ། །དང་པོ་ཐོག་སོགས་མཉམ་རིམ་དང་། །ལྔ་པར་ཟླ་སོགས་མི་མཉམ་པའི། །བྱ་ར་སོ་སོར་རིམ་བཞིན་བཀོད། །གྲངས་འཛིན་རོ་བསྒྱུར་འདོད་པས་བགོ། །ཚར་གསུམ་སྟེང་མར་ཐུབ་ལག་ཆུས། །རིམ་ཕྲི་མ་ལྡང་མཁའ་མེ་སྣོན། །གཅིག་ལ་ཀླུ་མེ་གཟུགས་རིམ་བྱིན། །ཚེས་ལ་མཁའ་མེ་ལོངས་ན་དོར། །བསྣན་དོར་མཚན་མར་སྒོ་རྟགས་བཅས། །སྟེང་དབུགས་བར་ཁྱིམ་འོག་མར་སྒང་། །རིམ་བཀོད་རྣམ་པར་དག་པ་འགྲུབ། །ལོ་བདག་རྒྱལ་བློན་རེའུ་མིག་བདུན། །གཟུགས་ནས་ཐིག་བར་བྱ་ར་འབྲི། །སྟེང་གཟུགས་འོག་མཚོ་དང་པོར་བཀོད། །སོ་སོར་མེས་བརྒྱན་རིམ་སྤེལ་དག །ཀར་མྱང་རེའུ་མིག་བདུན་པ་ནི། །ཐིག་ནས་དྲུག་བར་བྱ་ར་དང་། །སོ་སོར་མིག་བསྒྱུར་མདའ་བསྲེས་པ། །མ་ནོར་བཀོད་པས་འགྲུབ་པ་ཡིན། །འདོད་ཆའི་རེའུ་མིག་༡༣བཅུ་གསུམ་༣ཡོན། །སྟེང་མར་གཅིག་ནས་ཐིག་བར་འབྲི། །བར་བར་སྟེང་རིམ་༠ཐིག་༤མཚོ་༣༢སོ། །༣ཚ་བ་༣༨༡ཟླ་ནོར་མེ་རྣམས་དང་། །འོག་མར་༠མཁའ་༠མཁའ་༢༠སྟོང་མིག་༠ཐིག །༦༠མཁའ་རོ་གྲངས་བསྒྱུར་བཀོད་པར་འགྲུབ། །ལྔ་ཆའི་རེའུ་མིག་མདའ་ཡི་གྲངས། །གསུམ་བརྩེགས་ཐོག་མར་བྱ་ར་འབྲི། །གཉིས་པར་༠མཁའ་༠མཁའ་༥༤མཚོ་དབང་༣རྩེ། །༧༦དུས་གཟའ་གསུམ་པར་༠ཐིག་༠ཐིག་༤མཚོ། །༠ཐིག་༡༢ཉི་གྲངས་བསྒྱུར་བཀོད་པས་འགྲུབ། །སོ་སོར་ཁ་བྱང་མ་ནོར་བྱ། །རེའུ་མིག་དེ་རྣམས་འཛིན་བྱེད་ནི། །འདས་ཟླ་མཁའ་མེས་བསྒྱུར་ཚེས་བསྲེ། །ཉི་རགས་ཟིན་པའི་ཞག་གིས་ཕྲི། །ལྷག་མས་བསྐལ་ལིའི་བྱ་ར་བཟུང་། །བྱེད་གྲུབ་སོ་སོའི་ནག་ཟླ་འམ། །བཤོལ་རྗེས་དབོ་ཟླའི་ཉི་དྷྲུ་ལ། །རགས་ཟིན་ཚེས་ཀྱི་ཉི་ལོངས་བསྲེ། །སྤྱི་ནོར་གང་ཡིན་ཉི་རགས་ཟིན། །རིལ་པོར་ཚེས་བྱིན་མ་ནུས་བགོ། །ནོར་དེ་སྣོན་འབྲིད་མཚན་མར་བྱ། །ལྷག་དང་དེ་ཡི་ཆ་ཤས་ཀྱི། །གང་བརྩིའི་ཆ་ཤས་རེའུ་མིག་ཟིན། །སྒྱུར་བྱེད་ཟླ་དག་༧༢མིག་རིས་བརྒྱན། །༧༣༠མཁའ་མེ་ལག་པས་དོར་ལྷག་གིས། །སྟེང་འོག་ཉ་སྟོང་སྒྲ་གཅན་འཛིན། །སྒྱུར་བྱེད་འདས་ལོར་༡༥༠ཐིག་ཚེས་བསྣན། །རི་ཟླ་མེ་ཡིས་དོར་ལྷག་གིས། །ལོ་འཕོ་ཟླ་འཕོའི་རེའུ་མིག་ཟིན། །ལྡོག་གཉིས་སོགས་དང་དབུགས་ཁྱིམ་སྒང་། །ཟླ་བཤོལ་རྩིས་འཕྲོ་ཟིན་མོད་ཀྱང་། །བཤོལ་རྗེས་ཟླ་དག་མ་འཕར་བར། །ཟླ་བ་སྔོན་མའི་རྩིས་འཕྲོས་ཟིན། །འདས་ལོར་མཚོ་བྱིན་ཐུབ་པས་དོར། །ལྷག་མས་རྒྱལ་བློན་རེའུ་མིག་རྟོགས། །གཟུགས་མིག་སྐྱོན་ལ་རབ་ཚེས་ཀྱི། །ས་ཕག་སོགས་བསྲེ་མེ་ཡིས་བསྒྱུར། །རིས་བགོ་སླར་ཡང་ལན་བརྒྱད་བར། །ནོར་རྣམས་མེས་བསྒྱུར་རིས་བགོས་ལྷག །དགུ་པོས་རིམ་བཞིན་བྱ་ར་བཟུང་། །ཀར་མྱང་རྩིས་ཀྱི་རེའུ་མིག་སྟོན། །བརྩི་བྱ་སོ་སོའི་འདོད་ལྔ་ཆས། །འདོད་ཆ་ལྔ་ཆའི་རེའུ་མིག་ཟིན། །རྩོད་མེད་ལེགས་བཤད་སྔ་མ་འགའི། །དགོངས་པའི་གནད་རྣམས་མ་འཆུག་པར། །བསྡུས་ཏེ་ལག་ལེན་བདེ་བར་བྲིས། །འདི་ཙམ་གྱིས་ཀྱང་དོན་ཆེན་འགྲུབ། །སྔོན་བྱོན་དམ་པའི་བཞེད་སྲོལ་ཆུ་གཏེར་ནས། །ཐོན་པའི་རྩིས་ཀྱི་བསྟན་བཅོས་རཏྣའི་ཕོག །གསར་བུ་འགའ་ལ་ངེས་པར་བརྩེ་བའི་བློས། །འགྱེད་དོ་རིགས་མཐུན་སྐྱེ་བོ་དགའ་བར་གྱིས། ། དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ཉེ་བར་མཁོ་བའི་རེའུ་མིག་རྣམས་ཇི་ལྟར་སྤེལ་ཚུལ་དང་འཛིན་ཚུལ་འཁྲུལ་མེད་རྣམ་པར་དག་པ་མདོར་བསྡུས་བརྗོད་པའི་སྐབས་ཏེ་བདུན་པའོ།། སྐབས་བརྒྱད་པ།༈ གང་སྐུ་མཚན་དཔེའི་འོད་ཟེར་ལྷག་འབར་བའི། །རྒྱལ་ཀུན་མཁྱེན་གཉིས་རང་གཟུགས་ཉིན་བྱེད་ཀྱིས། །མི་ཤེས་བློ་མུན་དྲུང་འབྱིན་འཇམ་པའི་དཔལ། །ངེས་པར་དྲན་ནོ་བློ་ཡི་མུན་པ་སོལ། །བླང་དོར་རབ་གསལ་སྐར་རྩིས་ཀྱི། །ཡན་ལག་མཁས་པའི་བསྟན་བཅོས་ལས། །བྱུང་བཞིན་རང་བཟོས་མ་བསླད་པར། །རྣམ་དག་རྩིས་ཕྲན་ཉེར་མཁོ་འབྲི། །སྒྱུར་བྱེད་འདས་ལོ་གནས་ལྔར་བཞག །༡ཟླ་༡༥ཚེས་༣༡གཟུགས་མེ་༡གཟུགས་༡༢༡ཟླ་ཉིས། ༡ ༡༥ ༣༡ ༡ ༡༢༡།བསྒྱུར་ལ་༢མིག་༡༨ཁམས་༤ཆུ་༣མེ་དང་། ༢ ༡༨ ༤ ༣ ༨༡།༨༡ཟླ་ནོར་བྱིན་ལ་༣༡༧རི་ཟླ་མེ། །༦བྲོ་བ་༦༠མཁའ་རོ་༦༠མཁའ་རོ་༧རིས། ༧ ༦༠ ༦༠ ༦ ༣༡༧།བསྒྲིལ་ལྷག་བྱེད་པའི་ལོ་བདག་གྲུབ། །ཡང་ན་རབ་ཚེས་སྒྱུར་བྱེད་ཀྱི། །འདས་ལོ་གནས་གཉིས་སྟེང་མ་དེ། །༤༠༠མཁའ་ཐིག་ཆུས་བསྒྱུར་འོག་མ་ལ། །༦༣མེ་དུས་བསྣན་པས་སྟེང་མར་སྦྱངས། །༢༢༡༩བུག་གཟུགས་ལག་མིག་ལོངས་ན་དོར། །ལྷག་མ་༣༡༧རི་ཟླ་མེས་རྙེད་གཟའི། །གནས་བཞག་ཡང་ལྷག་རིམ་པ་བཞིན། །༦༠མཁའ་རོ་༦༠མཁའ་རོ་༦དུས་ཀྱིས་བསྒྱུར། །༣༡༧རི་ཟླ་མེས་ཐོབ་དབྱུག་སྲང་དབུགས། །དེ་ལྷག་ཆར་བཀོད་གཟའ་དབྱུག་ལ། །༢ཟུང་དང་༣༠མཁའ་མེ་བསྣན་གོང་བཞིན། ༧ ༦༠།བསྒྲིལ་ལྷག་བྱེད་པ་ལོ་འཕོ་གྲུབ། །སྐྱོན་བྲལ་ལོ་འཕོ་རྟོགས་པའི་ཕྱིར། །སྒྱུར་བྱེད་འདས་ལོ་གནས་གཉིས་བཞག །སྟེང་མ་༤༠༠ཐིག་སྟོང་རྒྱ་མཚོས་སྤེལ། །འོག་མས་སྦྱངས་ལ་༢༥༤མཚོ་མདའ་མིག །བསྲེས་ལ་༣༡༧རི་ཟླ་མེས་ཐོབ་གཟའ། །ལྷག་རིམ་༦༠མཁའ་རོ་༦༠ཐིག་མཚམས་༦དུས། །རིམ་བསྒྱུར་༣༡༧རི་ཟླ་མེས་ཐོབ་བརྩེགས། །དེ་ལྷག་ཆ་ཤས་གནས་སུ་བཀོད། །༠མཁའ་དང་༢༦དུས་མིག་༡༦མི་བདག་༣ཡོན། ༠ ༢༦ ༡༦ ༣ ༡༧༧།༡༧༧ཐུབ་རི་གཟུགས་བསྣན་རང་འཁོར་བསྒྲིལ། ༧ ༦༠ ༦༠ ༦ ༣༡༧།སྐྱོན་བྲལ་ལོ་འཕོ་རྣམ་དག་འགྲུབ། །ཡང་ན་བྱེད་པའི་ལོ་འཕོ་ལ། །སྟེང་ནས་༡གཟུགས་༡༢ཉི་༢༡ཟླ་མིག་བརྒྱན། ༧ ༦༠ ༦༠།འཁོར་བསྒྲིལ་སྐྱོན་བྲལ་ལོ་འཕོར་ངེས། །ལོ་འཕོ་གཉིས་ཀར་སྟེང་རིམ་བཞིན། །༡གཟུགས་༡༢ཚེས་༣༡ཟླ་ཡོན་༡གཟུགས་༡༢༡ཟླ་ཉི། ༡ ༡༥ ༣༡ ༡ ༡༢༡།བསྣན་བསྒྲིལ་ཕྱི་མའི་ལོ་བདག་འཆར། །ལོ་འཕོའི་གཟའ་དབྱུག་བཅུ་གཉིས་བཀོད། །ལུག་ལ་གཟར་༡ཟླ་༥༧རི་དབང་དབྱུག །གླང་ལ་༤རིག་བྱེད་༥༣མེ་དབང་པོ། །འཁྲིག་པར་༡གཟུགས་དང་༡༧རི་ཟླ་བ། །ཀརྐ་ཊར་༤མཚོ་༥༣མེ་མདའ་སྟེ། །སེང་གེར་༡རང་བཞིན་༢༢ལག་བགྲོད་པ། །བུ་མོར་༤སྡེ་བ་༢༤མཚོ་མིག་དང་། །སྲང་ལ་༦བྲོ་བ་༥༡གཟུགས་ཕུང་པོ། །སྡིག་པར་༡བསེ་རུ་༤༧གླིང་ཆུ་གཏེར། །གཞུ་ལ་༣ཡོན་ཏན་༡༦དུས་ཟླ་བ། །ཆུ་སྲིན་༤རྒྱ་མཚོ་༣༧རི་རྩེ་མོ། །བུམ་པར་༦རོ་དང་༤ཟུང་ལྡན་ཏེ། །ཉ་ལ་༠སྟོང་པ་༥༢ལག་འབྱུང་རྣམས། །བྱིན་ལ་༧ ༦༠བསྒྲིལ་ལྷག་ཟླ་འཕོ་འགྲུབ། །རྣམ་དག་གྲུབ་པའི་ལོ་བདག་ནི། །ཉ་རྫོགས་ལུག་ཁྱིམ་ལ་སླེབས་པའི། །ཉིན་དེའི་གཟའ་དེས་ལོ་གཟའ་དང་། །ཟླ་བ་དེ་ཡི་ཚེས་བཅོ་ལྔ། །དངོས་སམ་དེ་ཡི་ཉེ་བའི་ཆར། །ཕུར་བུས་སྤྱོད་པའི་སྐར་མ་དེ། །གྲུབ་པའི་སྐར་མ་དག་པར་ངེས། །འདས་ལོར་༥མདའ་བསྲེ་༢༧འཁོར་ལོས་དོར། །ལྷག་མ་བྱེད་པའི་ལོ་སྐར་ཡིན། །སྒྱུར་བྱེད་འདས་ལོ་༡༢ཉི་མས་དོར། །ལྷག་མས་ལོ་ཁྱིམ་རྣམ་དག་རྟོགས། །སྒྱུར་བྱེད་འདས་ལོ་༣རྩེ་མོས་བསྒྱུར། །གནས་གཉིས་སྟེང་༢མིག་འོག་༥མདའ་བསྲེ། །སོ་སོར་༧རིས་བགོ་རྙེད་པ་དོར། །ལོ་བདག་རྒྱལ་བློན་རྣམ་པར་དག །༤ཆུ་ཡིས་ཕྲིའམ་༣མེས་བརྒྱན་པས། །ཕྱི་མའི་རྒྱལ་བློན་ངེས་པ་འཆར། །ས་ཕག་བྱེད་པའི་ཟླ་དག་ལ། །༤༣མེ་ཆུ་བསྲེས་ལ་༧༥མདའ་རིས་བགོ། །༠ལྷག་མེད་གྱུར་ཚེ་དུ་བ་མཐོང་། །རྙེད་པ་མི་མཉམ་སྲོད་དུས་ནུབ། །མཉམ་ན་ཐོ་རངས་ཤར་དུ་བརྟགས། །མཇུག་རིང་ངེས་པ་འཁྲུལ་མེད་འཆར། །༡༨༢༡གཟུགས་མིག་སྐྱོན་ལ་སྒྱུར་བྱེད་སོགས། །བསྲེས་པ་ཤ་ཀའི་ལོ་རུ་གྲགས། །དེ་ཉིད་༣མེས་བསྒྱུར་༧རིས་བགོས་ལྷག །ལོགས་བཀོད་སླར་ཡང་ཐོབ་ནོར་དེ། །ལན་བརྒྱད་༣མེས་བསྒྱུར་༧རི་ཡིས་བགོ། །ལྷག་རྣམས་སོ་སོར་༢མིག་གིས་སྤེལ། །༥མདའ་བྱིན་རིམ་བཞིན་ཆར་འབྲུ་རྩ། །བསིལ་དྲོད་རླུང་འཕེལ་ཟད་འཁྲུགས་རྣམས། །མང་མཐའ་༡༧རི་ཟླ་ཉུང་མཐའ་༥མདའ། །འབྲིང་པོ་༡༡བདེ་འབྱུང་སོགས་སུ་ཤེས། །ཡང་ན་སྒྱུར་བྱེད་འདས་པའི་ལོར། །༡གཟུགས་བསྣན་༣མེས་བསྒྱུར་༧རིས་དོར་ལྷག །ཟུར་བཞག་ནོར་ལ་༧༨༠མཁའ་ཀླུ་རི། །བསྣན་ལ་༣མེས་བསྒྱུར་༧རིས་བགོས་ལྷག །སྔ་མའི་ཟུར་བཀོད་ཐོབ་པའི་ནོར། །ལན་བདུན་༣མེས་བསྒྱུར་༧རིས་བགོས་ལྷག །རིམ་བཞིན་༢མིག་བསྒྱུར་༥མདའ་བྱིན་པས། །ཆར་འབྲུ་རྩ་བསིལ་དྲོད་རླུང་འཕེལ། །ཟད་འཁྲུགས་རིམ་པ་བཞིན་དུ་འཆར། །ཤ་ཀའི་འདས་ལོ་༡༡དྲག་པོས་སྦྱངས། །༤མཚོ་ཡིས་བགོས་ལྷག་བཞི་པ་དང་། །ནོར་ལ་དེ་ལྟར་ལན་གསུམ་བར། །༡༡དྲག་སྦྱངས་༤མཚོས་བགོ་ལྷག་རིམ་པར། །ལྔ་དྲུག་བདུན་པའི་ཆར་ཚད་ཡིན། །ཡང་ན་ས་ཕག་འདས་པའི་ལོར། །༢ཟུང་བྱིན་༤མཚོས་བགོ་ལྷག་བཞི་པ། །ནོར་ལ་༤༤༡གཟུགས་མཚོ་ཆུ་བོ་བསྣན། །༤མཚོ་ཡིས་བགོ་ལྷག་ལྔ་པའི་ཆར། །རྙེད་པ་༡༡དྲག་སྦྱངས་༤མཚོས་བགོས་ལྷག །དྲུག་པའི་ཆར་ཚད་སླར་ཡང་ནོར། །༡༡དྲག་སྦྱངས་༤མཚོས་དོར་ལྷག་མ་དེས། །བདུན་པའི་ཆར་ཚད་འཁྲུལ་མེད་འཆར། །གནས་ཚུལ་ཇི་བཞིན་མ་རྟོགས་པར། །རྟོག་གེའི་བློ་ཡིས་འདི་བྱས་མིན། །སྔོན་བྱོན་མཁས་པའི་ཕྱག་སྲོལ་ལས། །བྱུང་བཞིན་འདིར་ཡང་བདག་གིས་བརྗོད། །ལོ་པཎ་མཁས་པའི་བློ་གྲོས་ཆུ་གཏེར་ནས། །ལེགས་འཁྲུངས་རྩིས་ཕྲན་ནོར་བུའི་དོ་ཤལ་ཕྲེང་། །བློ་གྲོས་ནོར་གྱིས་ཕོངས་པ་སེལ་བྱེད་འདི། །བཤེས་གཉེན་དེད་དཔོན་མཆོག་གི་དྲིན་ལས་བྱུང་། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ཉུང་ངུའི་བྱེད་པའི་རྩིས་ཀྱི་ལོ་འཕོ་དང་ཟླ་འཕོ་བྱེད་གྲུབ་སོ་སོའི་ལོ་བདག་གཟའ་སྐར་ལོ་ཁྱིམ་རྒྱལ་བློན་དུ་བ་མཇུག་རིང་སོགས་ཀྱི་རི་མོའི་ངེས་པ་ཀ་ར་མྱང་རྩིས་དང་བཅས་མདོ་ཙམ་ཉེ་བར་བརྗོད་པའི་སྐབས་ཏེ་བརྒྱད་པའོ།། སྐབས་དགུ་པ།༈ དུས་གསུམ་རྒྱལ་བའི་མཁྱེན་གཟིགས་ཡེ་ཤེས་ཀྱི། །རང་གཟུགས་འགྲོ་བློའི་མུན་སེལ་ཀུ་མུད་གཉེན། །འཇམ་པའི་དཔལ་ཁྱོད་བདག་ཡིད་པདྨའི་མཚོར། །བསྟེན་ནོ་སྒྲིབ་མེད་བློ་གྲོས་ཉ་གང་སྩོལ། །རྒྱ་བོད་མཁས་གྲུབ་སྔ་མ་ཡི། །ཕྱག་བཞེས་རི་མོ་རྣམ་དག་པ། །དུས་གཟེར་སྤོར་ཐང་གསེར་རྩིས་སོགས། །ཉེར་མཁོའི་རྩིས་ཕྲན་རྣམ་གསལ་སྤྲོ། །གང་བརྩིའི་ཟླ་བ་སོ་སོ་ཡི། །༦༥མདའ་རོའི་ལྷག་མ་༦དུས་ཀྱིས་བསྒྱུར། །༡༣འདོད་པས་བགོས་ནོར་ཚེས་གྲངས་དང་། །ལྷག་མ་འདོད་ཆའི་གནས་སུ་བཞག །ལྔ་ཆར་༠ཐིག་འབྲི་གནས་གསུམ་བཀོད། །སྔ་མར་༧རི་༢མིག་༤མཚོ་ཕྲི་བར། ༧ ༢ ༤།མ་ལྡང་ཚེས་ལ་༣༠མཁའ་མེ་སྣོན། །ཕྲི་ལྷག་སོ་སོའི་དབུགས་ཐོབ་འཆར། །ཚེས་ལ་མཁའ་མེ་བསྣན་པ་ཡི། །ཟླ་བ་དེའི་དབུགས་སྔོན་མར་ཐོབ། །བར་མ་དཀྲི་བསྣན་མེད་པར་བཞག །ཟླ་བ་སོ་སོའི་ཁྱིམ་སླེབས་སྟོན། །གནམ་སྟོང་ལ་སླེབས་རྒྱའི་ལུགས་ཀྱི། །ཟླ་ལྷག་དུས་དེར་ཡོད་པར་བཤད། །ཟླ་ལྷག་ཡོད་ཚེ་གྲུབ་རྩིས་ཀྱི། །རྗེས་མར་༨ནོར་༣རྩེ་༡ཟླ་རིམ་བྱིན།༨ ༣ ༡།མཁའ་མེ་ལས་ལྷག་༣༠མཁའ་མེ་དོར། །ཟླ་བ་སོ་སོའི་སྒང་ཚད་རྟོགས། །༣༠མཁའ་མེ་དོར་ཚེ་རྗེས་མ་དང་། །གནམ་སྟོང་སྒང་ཤར་ཟླ་བ་དེ། །བཤོལ་ཞེས་གྲུབ་རྩིས་པ་རྣམས་སྨྲ། །ཟླ་དག་འཕར་བ་དང་བསྟུན་ཏེ། །ལྷག་པའི་ཕྱི་མར་བལྡབས་ཏེ་འདྲི།། ཉི་སྣང་ལས་སོ།། མཆན། ཡང་ན་རྩིས་འཕྲོ་མཁའ་མེས་སྤེལ། །གནས་གསུམ་སྔོན་མར་༡༤༨༡གཟུགས་ཀླུ་ཡིད། །བར་མ་བྲི་བསྣན་མེད་པར་བཞག །རྗེས་མར་༥༣༦མཚམས་རྩེ་མདའ་བསྲེ་ལ། །༦༥མདའ་རོས་རྙེད་པས་ཚེས་གྲངས་དང་། །ལྷག་མས་རེ་ལྔའི་བྱ་ར་སྟོན། །ཡང་ན་སོ་སོའི་ལྷག་མ་རྣམས། །སོ་སོར་མ་ནོར་༥མདས་བགོས་པའི། །ནོར་དང་ལྷག་མས་སོ་སོ་ཡི། །འདོད་ཆ་ལྔ་ཆ་འཁྲུལ་མེད་སྟོན། །རིམ་བཞིན་སྔོན་དབུགས་བར་མས་ཁྱིམ། །རྗེས་མས་སྒང་ཚད་འཁྲུལ་མེད་ཤེས། །སྣྲོན་དང་མགོ་ཟླའི་ཟླ་བཤོལ་གྱི། །རྩིས་འཕྲོ་༣༠མཁའ་མེས་བསྒྱུར་བ་ལ། །༢༦༨ཀླུ་དུས་ལག་བསྣན་༦༥མདའ་རོས་བགོ། །རྙེད་པས་ལྡོག་གཉིས་ཚེས་གྲངས་དང་། །ལྷག་མས་རེ་ལྔའི་བྱ་ར་སྟོན། །འདོད་ལྔ་རྟོགས་འདོད་སྔར་ལྟར་བྱ། །ཡང་ན་ལྔ་པ་བཅུ་གཅིག་པའི། །ཁྱིམ་སླེབས་ཚེས་འདོད་ལྔ་ཆ་ལ།༤ ༡ ༣།༤མཚོ་དང་༡གཟུགས་དང་༣མེ་བྱིན་པས། །རང་ལུགས་དབྱར་དགུན་ཉི་ལྡོག་འཆར། །རང་ལུགས་ཚེས་འདོད་ལྔ་ཆ་ལ། ༡ ༠ ༢ །༡གཟུགས་༠མཁའ་༢མཚེ་བསྣན་ཉི་སྣང་ལུགས། ༣ ༡ ༡།༣མེ་༡གཟུགས་༡ཟླ་བསྣན་བཻཌཱུར་ཏེ།༤ ༡ ༣།༤ཆུ་༡ཟླ་༣མེ་བསྣན་བུམ་བཟང་ལུགས། །རང་ལུགས་རྣམ་པར་དག་པ་ལ།༤ ༡ ༣།༤མཚོ་༡གཟུགས་༣མེ་ཕྲི་རྒྱ་ཡི་ལུགས། ༢༦ ༡༠ ༢།རང་ལུགས་༢༦དུས་མིག་༡༠ཕྱོགས་༢མཚེས་བརྒྱན། །ཀ་ལཱ་པ་རུ་ཉི་མ་ལྡོག །སྣྲོན་ཟླའི་རྩིས་འཕྲོ་༣༠མཁའ་མེར་སྤེལ། །༡༡༣༩རྩ་ཡོན་དྲག་བྱིན་གོང་ལྟར་བགོད། །ཕག་ཞག་འཆར་བའི་ཚེས་གྲངས་དང་། །རེ་ལྔའི་ཆའམ་འདོད་ལྔ་སྟོན། །ཡང་ན་ལྔ་པའི་སྒང་ཚད་ཀྱི། །ཚེས་གྲངས་འདོད་ཆ་ལྔ་ཆ་ལ། །༩བུག་༣མེ་༣རྩེ་མོ་རིམ་པར་བསྣན། ༩ ༣ ༣།ཕག་ཞག་ཚེས་འདོད་ལྔ་ཆ་སྟོན། །དྲང་སྲོང་རྀ་ཥིའི་སྐར་མ་ནི། །རང་ལུགས་ཁྲུམ་ཟླའི་དབུགས་ཐོབ་ཀྱི། །ཉིན་དེ་ནས་བཟུང་ཞག་བདུན་བར། །འཆར་ལ་འགའ་ཞིག་བཞེད་པ་མཐུན། །གཞན་ཡང་མཚུར་ཕུ་འཇམ་དབྱངས་པའི། །བཞེད་དོན་དབུགས་ཁྱིམ་སྒང་བརྟགས་ཚུལ། །ཉེར་མཁོ་བུམ་བཟང་ནས་བཤད་དོན། །གྲུབ་པའི་ཉི་དག་སྐར་དབྱུག་ལ། །༢༦དུས་མིག་༣༥མདའ་ཡོན་ཤར་བ་ན། །གསུམ་པའི་དབུགས་ཐོབ་སྐར་དབྱུག་ཐིག ༠ ༠།ཉ་རྫོགས་ལུག་གི་ཁྱིམ་དུ་སླེབས། །༠ཐིག་དང་༤༢མིག་མཚོ་གསུམ་པའི་སྒང་། །གསུམ་ཀ་སོ་སོར་མ་ནོར་བར། །སྐར་མིག་༢ ༡༥དབྱུག་ཚེས་རིམ་པར་བསྣན། །དབུགས་ཁྱིམ་སྒང་དང་གསུམ་པོའི་ཚད། །མ་ནོར་སོ་སོར་རིམ་པར་འཆར། །གཞན་ཡང་༡༥རབ་ཚེས་སྒྱུར་བྱེད་སོགས། །འདས་ལོ་༡༢ཉིས་བསྒྱུར་མཆུ་ཟླ་སོགས། །འདས་ཟླ་བསྲེ་ལ་གནས་གཉིས་བཞག །འོག་མ་༢མིག་བསྒྱུར་༤༡ཟླ་མཚོ་བསྣན། །༦༥མདའ་རོས་ཐོབ་བྱིན་ཟླ་དག་གོ། །དེ་ཉིད་༣༠མཁའ་མེས་བསྒྱུར་ཚེས་བསྲེ། །གནས་གསུམ་བར་མར་༤༣མེ་ཆུ་དང་། །འོག་མར་༣༤༣མེ་མཚོ་མེ་བསྣན་ལ། །༧༠༧རི་མཁའ་རིས་རྙེད་བར་མར་བྱིན། །༦༤ཆུ་རོས་བགོས་ལྷག་༠ཐིག་ཤར་ན། །ཞག་དེ་ཆད་པས་ཟླ་ཆུང་ཟེར། །ནོར་གྱིས་སྟེང་མར་སྦྱངས་པའི་ལྷག །འདས་པའི་ཞག་གམ་སྤྱི་དྷྲུ་དག །དེ་ཉིད་ལྔར་བཀོད་རིམ་པ་བཞིན། །དང་པོར་༧རི་བྱིན་༧རི་ཡིས་དོར། །ལྷག་མས་ཉིན་དེའི་རེས་གཟའ་ཤེས། །གྱོ་ཁང་དང་མཐུན་རྒྱ་བོད་འགྲིགས། །གཉིས་པར་༦དུས་བསྣན་༡༢ཉི་མས་དོར། །ལྷག་མས་ཉི་མ་གང་ཡིན་རྟོགས། །༡གཟུགས་ཤར་འབྲུག་ནས་མགོ་འདྲེན་ལ། །༠ཐིག་ལེ་ཤར་བ་ཡོས་སུ་བཞེད། །གསུམ་པར་༤ཆུས་བརྒྱན་༡༠ཕྱོགས་ཀྱིས་བགོ། །ལྷག་མས་འབྱུང་ཁམས་གང་ཡིན་སྟོན། །གཅིག་གཉིས་མེ་སོགས་ས་ལྕགས་ཆུར། །གཉིས་སྦྲག་དགུ་༠ཐིག་ཤིང་དུ་འདོད། །བཞི་པར་༤མཚོ་བསྲེ་༩བུ་གས་དོར། །ལྷག་དེས་༡༠ཕྱོགས་སྦྱངས་ལྷག་མེད་༠དུས། །༩བུ་གས་༡༠ཕྱོགས་ལ་སྦྱངས་ལྷག་གིས། །ཉི་མའི་སྨེ་བ་གང་ཡིན་རྟོགས། །ལྔ་པར་༢མིག་བྱིན་༨ཀླུས་དོར་ལྷག །ཉིན་དེའི་སྤར་ཁ་གང་ཡིན་ཤེས། །༡གཅིག་ཤར་ལི་ནས་རིམ་པ་བཞིན། །༠ཐིག་ལེ་ཤར་བ་ཟོན་དུ་ངེས། །ཡང་ན་འདས་ཞག་སྤྱི་དྷྲུ་ལ། །༢༥༢༠མཁའ་མིག་དེ་ཉིད་ཀྱིས་བགོད་ལྷག །གནས་ལྔར་བཀོད་སོགས་སྔར་ལྟར་བྱ། །དེས་ཀྱང་མ་ནོར་རྣམ་པར་རྟོགས། །འདས་ཞག་རྣམ་པར་དག་པ་ལ། །༡༦མི་བདག་བསྣན་ལ་༢༨ཀླུ་ལག་གིས། །དོར་ལྷག་གྱོ་ཁང་རེའུ་མིག་འཛིན། །རེས་གཟའ་དང་མཐུན་རྒྱ་བོད་འགྲིགས། །ཡང་ན་༢༥༢༠མཁའ་མིག་དེ་ཉིད་དམ། །༤༢༠མཁའ་མིག་ཆུ་བོས་སྤྱི་དྷྲུ་ལ། །དོར་བའི་ལྷག་དེ་༢༨ཀླུ་ལག་གིས། །བགོས་པའི་ལྷག་མས་གྱོ་ཁང་ཟིན། །གཞན་ཡང་དུས་བརྟག་མཐའ་ཡས་ཀྱང་། །ཡི་གེ་མང་དོགས་བཏང་སྙོམས་སུ། །བཞག་ནས་རེ་ཞིག་འདི་ཙམ་གྱིས། །བརྗོད་བྱའི་དོན་རྣམས་གྲུབ་པར་སེམས། །ཟབ་རྒྱས་ལེགས་བཤད་རིན་ཆེན་གསེར་གླིང་ནས། །ཉེར་མཁོའི་རྩིས་ཕྲན་ས་ལེ་སྦྲམ་གྱི་ཕྲེང་། །སྒྲིམ་པོའི་རྣམ་དཔྱོད་སྲད་བུར་ལེགས་བརྒྱུས་ནས། །རིགས་མཐུན་མགྲིན་པའི་རྒྱན་དུ་ཁོ་བོས་སྦྱིན། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ཉུང་ངུའི་ངག་གིས་དབུགས་ཐོབ་ཁྱིམ་སླེབས་སྒང་ཚད་ཕག་ཞག་རྀ་ཥི་ཉི་ལྡོག་སྤོར་ཐང་གསེར་རྩིས་ཐོར་བུ་རྣམས་གསལ་བར་བརྗོད་པའི་སྐབས་ཏེ་དགུ་པའོ།། སྐབས་བཅུ་པ།༈ རྨད་བྱུང་མཁྱེན་གཉིས་གསེར་གྱི་སྤྱན་དབྱེ་ཡིས། །ལས་ཉོན་མི་ཤེས་ལིང་ཐོག་དྲུང་འབྱིན་པ། །འཇམ་མགོན་བླ་མ་མིག་མཁན་རྒྱལ་པོ་ལ། །འདུད་དོ་བདག་བློའི་མ་རིག་སྒྲིབ་པ་སོལ། །ལིའུ་ཐོ་སྦྱོར་ཚུལ་མདོར་བསྡུས་སོགས། །སྐར་རྩིས་པ་ལ་ཉེར་མཁོ་བའི། །བླང་དོར་རྩིས་འབྲས་ཉུང་ཤས་ཞིག །ལྷག་བསམ་དག་པས་འགོད་ལ་སྤྲོ། །བྱེད་གྲུབ་ཟུང་འབྲེལ་གང་སྤེལ་ཀྱང་། །མཆོད་བརྗོད་དམ་བཅས་མདུན་བསུས་ནས། །གནམ་ལོའི་སྲོག་ལུས་དབང་ཀླུང་གི། །ཁམས་དང་སྨེ་ཕྲེང་སེ་ཞིག་ཀླུང་། །བྱེད་གྲུབ་སོ་སོའི་ལོ་གཟའ་དང་། །ལོ་སྐར་ལོ་ཁྱིམ་རྒྱལ་བློན་དང་། །ཀར་མྱང་དྲག་སྦྱངས་འབྱུང་གྲངས་སོགས། །སོ་སོའི་འབྲས་བཤད་ལེགས་པར་འབྲི། །དེ་ནས་ངན་པ་བཟློག་ཐབས་ཀྱི། །རྣམ་དཀར་སྒྲུབ་དང་བཟང་པོའི་འབྲས། །འབྱུང་བའི་རྟེན་འབྲེལ་བདེན་ཚིག་དང་། །བསྔོ་སྨོན་ཤིས་པའི་ཚིག་གིས་བརྒྱན། །སླར་ཡང་གནམ་ལོ་ལ་སོགས་པའི། །གོང་སྨྲོས་རྣམས་ཀྱི་ཨང་ཀིའི་གྲངས། །སོ་སོའི་ཁ་བྱང་དང་བཅས་འབྲི། །གཞན་ཡང་སྨེ་བ་དགུ་གླིང་དང་། །ས་བདག་ལོ་འཁོར་དཔེ་ཞལ་བཤུ། །ལོ་དེའི་གཟའ་རགས་ཉི་རགས་དང་། །ཟླ་ཆུ་དུས་འབྲས་ཁྱིམ་དྲུག་གི། །སྤྱི་ནོར་དང་བཅས་གསལ་པོར་འབྲི། །དེ་ནས་ཟླ་བ་སོ་སོ་ཡི། །ཟླ་བདག་ཟླ་འཁོར་དྷྲུ་བ་དང་། །དབང་ཕྱུག་བཞེངས་བཞུགས་ཉ་སྟོང་གི། །སྒྲ་གཅན་དར་ཞུད་ལ་སོགས་སྤེལ། །དེ་ནས་ཚེས་ཁང་སོ་སོ་ལ། །ཡན་ལག་ལྔ་བསྡུས་རེའུ་མིག་སྤེལ། །དུས་གཟེར་དུས་བརྟགས་གཟའ་འཛིན་སོགས། །རང་རང་ཚེས་ཁང་ཉིད་དུ་འབྲི། །བཀྲ་ཤིས་ཟླ་དང་དཔལ་ཐོབ་ཟླ། །རབ་ཆད་ཟླ་ནག་ཕུང་ཟླ་ནག །དེ་ཡང་སྟོད་སྨད་གང་ནག་དང་། །ཟླ་བ་ཆེ་ཆུང་སོགས་ཀྱང་བྲི། །ཉི་ནག་བསྲེག་ཚེས་ཞག་ངན་དང་། །འགྲུབ་སྦྱོར་སོགས་ཀྱང་འཛོམས་ན་བྲི། །མིན་ཡང་འཕྲོད་སྦྱོར་ཆེན་མོར་བལྟ། །ལིའུ་ཐོ་སྤེལ་ཚུལ་མདོ་ཙམ་གྲུབ། །གནམ་ལོའི་སྲོག་ལུས་དབང་ཀླུང་སྨེ། །ལོ་བདག་གཟའ་སྐར་ལོ་འཁོར་སོགས། །དཔེར་ན་རྒྱལ་པོ་བཞིན་དུ་བལྟ། །ཟླ་འཕོ་དབང་ཕྱུག་མཇལ་ཕྲད་དང་། །ཟླ་བདག་གཟའ་སྐར་ཟླ་འཁོར་སོགས། །དཔེར་ན་བློན་པོ་བཞིན་དུ་བལྟ། །རྒྱལ་པོ་བྱམས་སེམས་ལྡན་པ་ཡང་། །བློན་པོ་གདུག་པས་ཕུང་ལ་སྦྱོར། །རྒྱལ་པོ་གདུག་པའི་སེམས་ལྡན་ཡང་། །འཕྲུལ་གྱི་བློན་པོས་ཁ་ལོ་བསྒྱུར། །དེ་བཞིན་འབྲས་བུ་ལེགས་ཉེས་ཀུན། །ཕལ་ཆེར་ལོ་ལས་ཟླ་བ་གཙོ། །ཚེས་དབྱངས་གཟའ་སྐར་སྦྱོར་བྱེད་སོགས། །ཞག་བདག་མངག་གཞུག་སྐྱེ་བོ་འདྲ། །གང་བབས་སོ་སོའི་འབྲས་སྟེར་བས། །ཟླ་བ་ལས་ཀྱང་ཞག་དེ་གཙོ། །ཀར་མྱང་རྒྱལ་བློན་མཇུག་རིང་དང་། །སྒྲ་གཅན་ཕག་ཞག་རྀ་ཥི་སོགས། །ལྡོག་གཉིས་བསྒྲོད་གཉིས་ལོའི་དུས་ཚོད། །རྒྱལ་པོའི་མཚོན་དང་ཡོ་བྱད་འདྲ། །ཕྱོགས་ཀྱི་སྒྲ་གཅན་དབུགས་ཁྱིམ་སྒང་། །ཟླ་ནག་དཔལ་ཐོབ་བཀྲ་ཤིས་ཟླ། །ཉིན་མཚན་ཆུ་ཚོད་ཟླ་བའི་དུས། །བློན་པོའི་མཚོན་དང་ལོངས་སྤྱོད་འདྲ། །གཟའ་ཡི་དར་གུད་འཕྲོད་སྦྱོར་དང་། །བསྲེག་སྦྱོར་ཉི་ནག་ཞག་ངན་དང་། །ཐེབས་ལྡོག་རྒྱུ་བ་དུས་ཚོད་སོགས། །དམག་མིའི་མཚོན་དང་ཡོ་བྱད་འདྲ། །ཀུན་ཀྱང་སྒྲིམ་པོའི་བློས་བརྟགས་ནས། །བླང་དོར་ཚུལ་བཞིན་བྱས་པ་ན། །ལས་དང་བྱ་བ་གང་བསྒྲུབ་ཀྱང་། །ཉེས་པ་མི་འབྱུང་བདེ་ལེགས་འགྲུབ། །ལོ་ཟླ་ཞག་དུས་སོ་སོ་ཡི། །འབྲས་བུ་ངན་ཡང་བཅོས་པ་ན། །དཔེར་ན་བཙན་རྫོང་བཟུང་བ་དང་། །ནོར་གྱིས་མགུ་བར་བརྫངས་བ་འདྲ། །དེ་ཕྱིར་རང་རང་ངོ་ལོན་གྱི། །བྱ་བ་དེ་དང་དེ་བསྒྲུབ་ནས། །ངན་འཛིན་རྣམ་རྟོག་སེལ་གྱུར་ན། །ངན་པ་ཀུན་ཀྱང་བཟང་པོར་འགྱུར། །རྟེན་འབྱུང་རྒྱུ་འབྲས་བདེན་པའི་ཕྱིར། །བླང་དོར་གནས་ལ་བརྩོན་གྱུར་ན། །ལས་ཀྱི་རྣམ་སྨིན་མ་གཏོགས་པའི། །རྐྱེན་ངན་སེལ་བ་སྨོས་ཅི་དགོས། །དྲང་དང་ངེས་པའི་ཐབས་ཚུལ་གྱིས། །དུག་ལྔའི་རྒྱུ་དང་ངན་སོང་འབྲས། །བསལ་ནས་མྱང་འདས་ལ་འགོད་པ། །རང་སྡེ་ནང་པའི་ཁྱད་ཆོས་ཡིན། །ལིའུ་ཐོ་སྦྱོར་དགྲོལ་འབྲས་བཤད་སོགས། །ཚིག་ཚོགས་མང་དོགས་འདིར་ནི་བསྡུས། །ཟུར་རྒྱན་མཁས་པའི་འཇུག་ངོགས་སུ། །གསལ་བར་བཀོད་པས་གཟིགས་པར་ཞུ། །རྨད་བྱུང་ཕྲིན་ལས་ལྷ་ཡི་ལམ་ཡངས་པར། །སྔོན་མེད་ལེགས་བཤད་རི་དྭགས་མཚན་མ་ཅན། །ཟབ་ཡངས་རྣམ་དཔྱོད་ཤར་རིའི་རྩེར་སོན་པ། །རིགས་མཐུན་བློ་ཡི་དྭངས་མཚོར་འཇུག་འདི་རྨད། །དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རི་མོས་གཏན་ལ་འབེབ་པའི་མན་ངག་བློ་དམན་ཉེར་འཚོ་ཞེས་བྱ་བ་ལས། ལིའུ་ཐོ་དགྲོལ་ཚུལ་དང་བླང་དོར་གྱི་གནས་ཁ་ཅིག་མདོ་ཙམ་དུ་བསྡུས་ནས་ཉེ་བར་བརྗོད་པའི་སྐབས་ཏེ་བཅུ་པས་རེ་ཞིག་རྫོགས་སོ།། ༧ དེ་ལྟར་གཉིས་མེད་རྒྱུད་ཀྱི་རྒྱལ་པོའི་དགོངས་འགྲེལ་ཟབ་བརྒྱའི་རྒྱ་མཚོ་གཏིང་དཔག་དཀའ་བ་ལ། །ཕྱི་ནང་གཞན་གསུམ་དུས་ཀྱི་འཁོར་ལོའི་དགོངས་དོན་བླ་མེད་ནོར་བུའི་ཚོགས་ཀྱིས་གཏམས་པ་ལས། །བླང་དོར་སྐར་རྩིས་ཉུང་གསལ་འཇུག་བདེ་བློ་དམན་ཉེར་འཚོ་དབང་གི་རྒྱལ་པོའི་དོ་ཤལ་འདི། །སྤྲོས་ཆུང་རྣམས་དང་རིགས་མཐུན་ཡོངས་ལ་ཕན་འདོད་བློ་ཡིས་ཚིག་གི་སྲད་བུར་ཁོ་བོས་བརྒྱུས། །མཁས་དབང་གོང་མའི་ལེགས་གསུང་ཨ་དརྴ། །རྣམ་དཔྱོད་དར་གྱིས་བྱི་དོར་བགྱིས་འདི་ལ། །ཉེས་ཆ་སྲིད་ན་སྨྲ་བའི་སེང་གེ་སོགས། །སྤྱན་ལྡན་རྣམས་ལ་བཤགས་སོ་དག་ཚང་སྩོལ། །འདིར་བྱུང་ལེགས་ཚོགས་རྣམ་དཀར་འོད་བརྒྱ་ཡིས། །སྐྱེ་དགུའི་མ་རིག་བློ་མུན་དྲུང་ཕྱུང་ནས། །ཡང་དག་ཡེ་ཤེས་ཀུན་དའི་ཚལ་ཆེན་པོས། །མཁའ་མཉམ་འགྲོ་བློའི་གསེར་ལྡན་ཡོངས་ཁྱབ་ཤོག །འདིར་ཞུགས་ཀུན་ཀྱང་དཔལ་ལྡན་ཤམ་བྷ་ལར། །རིགས་ལྡན་ཆོས་ཀྱི་རྒྱལ་པོས་རྗེས་བཟུང་ཞིང་། །ཕྱི་ནང་གཞན་གསུམ་དུས་འཁོར་ཉེ་ལམ་ནས། །རིང་མིན་ཆོས་སྐུའི་རྒྱལ་ཐབས་ལ་འགོད་ཤོག །འདི་སྦྱར་དགེ་བས་བདག་ཀྱང་སྲིད་ཁམས་རྒྱ་མཚོར་ཇི་སྲིད་གནས་པ་དེ་སྲིད་དུ། །རྒྱལ་དང་དེ་སྲས་ལ་སོགས་སྣ་ཚོགས་གཟུགས་ཀྱིས་བསྟན་འགྲོའི་ཕན་བདེ་སྒྲུབ་པ་ལ། །རྒྱལ་སྲས་ཐུ་བོ་རྣམས་ཀྱི་མཛད་སྤྱོད་ཇི་བཞིན་སྐྱོ་ངལ་མེད་པར་འཇུག་པ་ལས། །ནམ་ཡང་ཞི་བའི་དབྱིངས་ལ་རང་གི་དོན་ཕྱིར་གནས་པ་མིན་པ་ཉིད་གྱུར་ཅིག། ཅེས་དཔལ་མཆོག་དང་པོའི་སངས་རྒྱས་གཉིས་སུ་མེད་པའི་རྒྱུད་ཀྱི་རྒྱལ་པོའི་དགོངས་དོན་རྣམ་པར་དག་པ་ཕྱི་ནང་གཞན་གསུམ་ལས། ཕྱི་དུས་ཀྱི་འཁོར་ལོའི་དགོངས་པ་ཟབ་མོའི་ནང་ཚན་འཇིག་རྟེན་ཁམས་ཀྱི་རྣམ་བཞག་བསྟན་པའི་ལེའུ་ལས་བྱུང་བ་སྐར་རྩིས་ཀྱི་རི་མོ་ཡང་དག་པ་རྒྱུད་ལུང་མན་ངག་གསུམ་གྱི་གནད་ཟབ་མོ་མ་ནོར་བར་བསྡུས་པ་བློ་དམན་ཉེར་འཚོ་ཞེས་བྱ་བ་འདི་ནི། རྩ་བསྡུས་དགོངས་པ་ཕྱོགས་གཅིག་ཏུ་བཀྲལ་བ་དཔལ་ལྡན་ཕུག་པའི་ལུགས་བཟང་རིན་ཆེན་བཻཌཱུར་དཀར་པོའི་དོ་ཤལ་དང་། རྩིས་ཀྱི་མན་ངག་གཙུག་ལག་ཉིན་མོར་བྱེད་པའི་སྣང་བ་དང་། ཉེར་མཁོ་འདོད་པ་འཇོ་བའི་བུམ་བཟང་སོགས་རྩིས་ཀྱི་ལེགས་བཤད་ཟབ་མོ་ཁུངས་ལྡན་དུ་འདོད་པ་དུ་མ་ཞིག་གི་དོན་གྱི་ཆ་ལ་ཞིབ་པར་ཞིབ་པར་བརྟགས་ཤིང་དཔྱད་ནས་དེ་དག་གི་དོན་ཁ་ཤས་མ་ནོར་བར་ཀུན་གྱིས་འཇུག་བདེ་བར་བསྡུས་ཏེ། མིང་ཆོས་དབྱིངས་ཀུན་གསལ་བློ་གྲོས་རྒྱ་མཚོར་འབོད་པའི་དུས་མཐའི་བཙུན་གཟུགས་ཐ་ཤལ་བ་ཞིག་གིས། རབ་བྱུང་བཅོ་ལྔ་པའི་ནང་ཚན་སྒྱུར་བྱེད་ཅེས་པ་ས་མོ་ཕག་གི་ལོ་ཧོར་ཟླ་དང་པོའི་དཀར་པོའི་ཕྱོགས་ཀྱི་རྒྱལ་བ་གཉིས་པ་ལ་མགོ་བརྩམས་ནས། རེ་ཞིག་བཏང་སྙོམས་སུ་ལུས་པ་ལ་སླར་ཡང་འཕར་བ་ཞེས་པ་ལྕགས་མོ་གླང་གི་ལོ་ཧོར་ཟླ་བརྒྱད་པའི་དཀར་ཕྱོགས་ཀྱི་རྒྱལ་བ་དང་པོ་གཟའ་ཉི་མ་དང་། སྐར་མ་མེ་བཞིའི་འགྲུབ་སྦྱོར་ལ་མཇུག་གྲུབ་པར་བགྱིས་པའོ།། སརྦ་ཐཱ་ཀ་ལྱཱ་ན་དིཀྵ་ཤྲཱེ་ཡཾ་སི་སྥོ་ཊ་བྷ་ཝནྟུ། དགེའོ།། རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ།སྐབས་དང་པོ།༄༅། དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་བཞུགས་སོ།། ༄༅། ན་མཿཤྲཱི་ཀཱ་ལ་ཙཀྲ་ཡ། ཁྱབ་བདག་དང་པོའི་སངས་རྒྱས་ཆོས་ཀྱི་སྐུ། །བདེ་སྟོང་དུས་ཀྱི་འཁོར་ལོ་ལོངས་སྤྱོད་རྫོགས། །འདྲེན་མཆོག་མི་ཡི་སེང་གེ་སྤྲུལ་པའི་སྐུ། །དབྱེར་མེད་རིགས་ཀྱི་བདག་པོར་གུས་བཏུད་ནས། །མཆོག་གི་དང་པོའི་རྒྱུད་རྒྱལ་ལས་བྱུང་བ། །འཕགས་བོད་ཤིང་རྟ་ཆེ་དགུའི་བཞེད་པའི་སྲོལ། །རྩིས་ཀྱི་ལག་ལེན་ཉུང་ངུ་རྣམ་གསལ་འདི། །རིགས་མཐུན་འགའ་ལ་ཕན་ཕྱིར་བསྡུས་ཏེ་འབྲི། །དེ་ཡང་རབ་ཚེས་སྒྱུར་བྱེད་ཀྱི། །འདས་ལོ་ཉིས་བསྒྱུར་འདས་ཟླ་བསྲེ། །གནས་གཉིས་འོག་མ་མིག་གིས་སྤེལ། །མེ་རྩེ་བསྣན་ལ་མདའ་རོས་བགོ། །རྙེད་པ་སྟེང་ཕུལ་ཟླ་བ་དག །ལྷག་མ་དུས་གཟེར་བརྟགས་ཕྱིར་བཀོད། །ཟླ་དག་གནས་ལྔ་༡གཟུགས་༣༡ཟླ་མེ། །༥༠མཁའ་དབང་༠སྟོང་པ་༤༨༠མཁའ་ནོར་ཆུས། ༡ ༣༡ ༥༠ ༠ ༤༨༠།སྟེང་ནས་རིམ་བསྒྱུར་༢ཟུང་༢༢ལག་མིག ༢ ༢༢ ༤༥ ༨༥།༤༥མཚོ་དབང་༡ཟླ་བ་༨༥མདའ་ནོར་བྱིན། །༧༠༧རི་མཁའ་རི་དང་༦དུས་༦༠མཁའ་རོ། ༧ ༦༠ ༦༠ ༦ ༧༠༧།༦༠ཐིག་མཚམས་༧གླིང་དོར་གཟའ་དྷྲུ་དག །ཟླ་དག་སྟེང་༢མིག་འོག་༡ཟླས་གསིལ། ༢ ༡ ༡༩ ༩།༡༩བུག་གཟུགས་༩རྩ་བསྣན་༡༢༦དུས་ཁྱིམ་དང་། ༢༨ ༡༢༦།༢༨ནོར་ལག་གིས་བསྒྲིལ་རིལ་ཆ་དག །ཟླ་དག་གནས་ལྔ་༢བསྒྲོད་པ་༡༠ཕྱོགས། ༢ ༡༠ ༥༨ ༡ ༡༧།༥༨ཀླུ་དབང་༡གཟུགས་དང་༡༧རི་ཟླས་སྤེལ། །༢༥དེ་ཉིད་༥༣མེ་མདའ་༣༠མཁའ་ཡོན་༢ཟུང་། ༢༥ ༥༣ ༣༠ ༢ ༤༦།༤༦དུས་མཚོ་བྱིན་ལ་༦༧རི་རོ་དང་། །༦བྲོ་བ་༦༠ཐིག་མཚམས་༦༠མཁའ་རོ་དང་། ༢༧ ༦༠ ༦༠ ༦ ༦༧།༢༧འཁོར་ལོས་བསྒྲིལ་ལྷག་ཉི་དྷྲུ་དག །སྔ་དྷྲུར་སོ་སོའི་བསྒྱུར་བྱེད་བསྣན། །ཕྱི་དྷྲུ་ཚེགས་མེད་རིམ་པར་རྟོགས། །གཟའ་ཉིའི་དྷྲུ་བར་རྟག་ལོངས་བྱིན། །འཁོར་བསྒྲིལ་གཟའ་ཉི་བར་བ་འགྲུབ། །རིལ་པོར་ཚེས་བསྲེ་༡༤མ་ནུས་བགོ། །ནོར་མཉམ་མི་མཉམ་མཚན་མ་འབྲི། །ལྷག་མས་ཟླ་བའི་རྐང་པ་བཟུང་། །རྐང་སྡོམ་ཆུ་ཚོད་གནས་སུ་བཀོད། །རྐང་བཟུང་སྔོན་མས་ཆ་ཤས་བསྒྱུར། །མ་ཟིན་སྔ་རྐང་དང་པོས་བསྒྱུར། །༡༢༦དུས་ཉིས་རྙེད་པ་ཡང་རྒྱུའི་དབྱུག །བགོས་ལྷག་རིམ་བཞིན་༦༠མཁའ་རོ་༦དུས། །༧༠༧རི་མཁའ་རིས་བསྒྱུར་༡༢༦དུས་ཉིས་ནོར། །སྲང་དབུགས་ཆ་སྟེ་ལྷག་མེད་༠དག །སྡོམ་ལ་ཡང་རྒྱུའི་ཆུ་ཚོད་སོགས། །སྔ་རྐང་བསྣན་ལ་ཕྱི་རྐང་ཕྲི། །ཚོགས་དེ་གཟའ་བར་ལོངས་སྤྱོད་ལ། །ནོར་མཉམ་བསྣན་ལ་མི་མཉམ་ཕྲི། །གྲུབ་པར་གཟའ་ཉིའི་ཆ་ཤས་དག །སྙོམ་ཕྱིར་གཟའ་ཆ་༦༧རི་རོས་གསིལ། །༧༠༧རི་མཁའ་རིས་བགོ་གནས་དྲུག་བྱ། །དེ་ཡིས་གཟའ་ཕྱེད་རྣམ་པར་དག །ཉི་བར་གཉིས་བཀོད་ཅིག་ཤོས་ལ། །སྐར་དབྱུག་༦དུས་དང་༦༥མདའ་མཚོ་ཕྲི། ༦ ༤༥།མ་ལྡང་༢༧སྐར་བསྣན་ཤུལ་འཁོར་ཕྱེད། ༡༣ ༣༠།ལོངས་ན་དོར་ཞིང་༚༝མཚན་མ་བྲི། །ལྷག་སྐར་༦༠མཁའ་རོས་སྤེལ་དབྱུག་བསྲེ། །༡༣༥མདའ་འདོད་ཀྱིས་ཐོབ་ཉི་རྐང་བཟུང་། །སྡོམ་བཀོད་སྔོན་མས་ལྷག་རྣམས་བསྒྲེས།༦༠ ༦ ༦༧།དབྱུག་བར་བསྒྲིལ་ལ་༡༣༥མདའ་འདོད་ཀྱིས། །ཐོབ་པ་ཡང་རྒྱུའི་དབྱུག་ལྷག་དེ། །༦༠མཁའ་རོ་༦དུས་དང་༦༧རི་རོས་སྤེལ། །རིམ་བཞིན་སྲང་དབུགས་ཆ་ཤས་བསྣན། །༡༢༥མདའ་འདོད་ཀྱིས་རྙེད་རིམ་པ་བཞིན། །སྲང་དབུགས་ཆ་སྟེ་ལྷག་མེད་༠དག །སྡོམ་ལ་ཡང་རྒྱུའི་ཆུ་ཚོད་སོགས། །སྔ་རྐང་བསྣན་ལ་ཕྱི་རྐང་ཕྲི། །ཚོགས་དེ་གཟའ་ཉིའི་ལོངས་སྤྱོད་ལ། །འཁོར་ཕྱེད་དོར་༚༝བསྣན་མ་དོར་༝ཕྲི། །གཟའ་ཉི་དག་འགྱུར་ཉི་དག་གཉིས། །གཅིག་ལ་ཐུན་མིན་རྟག་ལོངས་བསྣན། །ཚེས་འཁྱུད་དེ་ལ་གཟའ་ལོངས་ཀྱིས། །དམན་ལྷག་ཚེས་འཕྲོག་རྣམ་པར་དག །དེ་ལ་ཉི་དག་བསྲེ་སྦྱོར་བ། །ཚེས་གྲངས་༢མིག་བསྒྱུར་༡གཟུགས་དམན་༧རིས། །དོར་ལྷག་ཕྱི་ཆའི་བྱེད་པ་རྟོགས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། རྣམ་དག་གྲུབ་མཐའི་ལྔ་བསྡུས་བཤད་པའི་སྐབས་ཏེ་དང་པོའོ།། སྐབས་གཉིས་པ།༈ ཉུང་ངུ་བྱེད་པའི་ལྔ་བསྡུས་ཀྱི། །རི་མོའི་ཁྱད་པར་རྟོགས་འདོད་ན། །གྲུབ་རྩིས་ཇི་བཞིན་ཟླ་དག་དང་། །ཟླ་བཤོལ་རྩིས་འཕྲོའི་ངེས་པ་འཚོལ། །ཟླ་དག་གནས་གསུམ་རིམ་པ་བཞིན། །༡བསེ་རུ་༣༡ཟླ་མེ་༥༠མཁའ་མདས་བསྒྱུར། ༡ ༣༡ ༥༠། ༢བསྒྲོད་པ་༤ཆུ་གཏེར་༥༠མཁའ་མདའ་བྱིན།༢ ༤ ༥༠།༦༠མཁའ་རོ་༦༠ཐིག་མཚམས་༧རིས་བསྒྲིལ་གཟའ། །ཟླ་དག་སྟེང་༢མིག་འོག་༡ཟླས་སྤེལ།༢ ༡།སྟེང་ནས་༡༩བུག་གཟུགས་༢༣མེ་མིག་བསྣན།༡༩ ༢༣།འོག་ནས་༡༢༦དུས་ཁྱིམ་༢༨ནོར་མིག་གིས།༢༨ ༡༢༦།བསྒྲིལ་ལྷག་རིལ་ཆའི་དྷྲུ་བར་ཤེས། །ཟླ་དག་གནས་ལྔ་སྟེང་རིམ་བཞིན། །༢མིག་༡༠ཕྱོགས་༥༨ཀླུ་དབང་༢ཟུང་༡༠ཕྱོགས་གསིལ། ༢ ༡༠ ༥༨ ༢ ༡༠།༢༦དུས་མིག་༤༠མཁའ་ཆུ་༢༡ཟླ་ཟུང་༣མེ།༢༦ ༤༠ ༢༡ ༣ ༣།༣རྩེས་བརྒྱན་༡༣འདོད་༦དུས་༦༠མཁའ་རོ་དང་། །༦༠ཐིག་མཚམས་༢༧སྐར་དོར་ཉི་དྷྲུའོ།༢༧ ༦༠ ༦༠ ༦ ༡༣།གཟའ་ཉིའི་ཆ་ཤས་༡༣འདོད་པས་བྱ། །རྐང་ལོངས་རྩིས་འཕྲོ་དག་པ་དཀོན། །ཆ་ཤས་ཤེད་སྙོམས་འཚོལ་མི་དགོས། །གཟའ་ཉིའི་རྟག་ལོངས་ཁྱད་པར་ཙམ། །མ་གཏོགས་གཞན་རྣམས་གོང་སྨྲོས་པའི། །རྣམ་དག་གྲུབ་པའི་རྩིས་ལྟར་བཀྲལ། །དེ་ཡིས་བྱེད་པའི་ལྔ་བསྡུས་གྲུབ། ། དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། བྱེད་རྩིས་ཀྱི་རི་མོའི་ཁྱད་པར་བཤད་པའི་སྐབས་ཏེ་གཉིས་པའོ།། སྐབས་གསུམ་པ།༈ སྒྱུར་བྱེད་ཟླ་དག་༧༡གཟུགས་རིས་བརྒྱན། །༢ཟུང་བསྒྱུར་ཉར་༡གཟུགས་སྟོང་༢མིག་བྱིན། །༤༦༠མཁའ་དུས་ཆུ་ཡིས་ཐོབ་པ་དོར། །ལྷག་མ་རིམ་བཞིན་༢༧འཁོར་ལོ་དང་། །༦༠མཁའ་རོ་༦༠ཐིག་མཚམས་༦དུས་༢༣མེ་མིག །གསིལ་ལ་༤༦༠མཁའ་དུས་ཆུས་རྙེད་པ། །རིམ་བརྩེགས་སྒྲ་གཅན་རྩ་བ་སྟེ། །དེ་ཡིས་༢༧འཁོར་ལོར་སྦྱངས་ལྷག་གདོང་། །འཁོར་ཕྱེད་༡༣ ༣༠ཁན་ནམ་ཕྲི་བ་མཇུག །ཕྱོགས་ཀྱི་སྒྲ་གཅན་རྣམ་པར་དག །ཡང་ན་སྒྱུར་བྱེད་ཟླ་དག་ལ། །༧༡གཟུགས་རི་བྱིན་ལ་༢༣༠མཁའ་མེ་མཚེས། །དོར་ལྷག་༣༠མཁའ་མེས་བསྒྱུར་བ་ལ། །ཉར་༡༥ཚེས་སྟོང་ལ་༣༠ཐིག་རྩེ་བསྣན། །གནས་ལྔ་སྟེང་རིམ་༠མཁའ་༠ཐིག་༡༤ཡིད།༠ ༠ ༡༤ ༠ ༡༢།༠མཁའ་༡༢ཉིས་བསྒྱུར་ལ་༡༣མེ་མིག་༦རོ།༢༧ ༦༠ ༦༠ ༦ ༢༣།༦༠ཐིག་མཚམས་༦༠མཁའ་རོ་༢༧སྐར་མ་ཡིས། །བསྒྲིལ་ལྷག་རྩ་བ་རྣམ་པར་དག །གདོང་མཇུག་ཆོ་ག་སྔར་ལྟར་བྱ། །ཕྱོགས་ཀྱི་སྒྲ་གཅན་ངེས་པ་འཆར། །ཉ་སྟོང་སོ་སོའི་ངེས་པ་ལ། །སྟེང་རིམ་༠ཐིག་༧རི་༢ཟུང་༣མེ་༡༥ཚེས།༠ ༧ ༢ ༣ ༡༥།བུལ་བར་བྱིན་ཞིང་གདོང་མཇུག་ཕྲི། །རྗེས་མའི་ཉ་སྟོང་སྒྲ་གཅན་འཆར། །སྒྱུར་བྱེད་ཟླ་དག་༤༣མེ་མཚོས་བརྒྱན། །༧༥མདའ་རིས་བགོས་པ་ལྷག་༠མེད་ཚེ། །རྙེད་མཉམ་སྲོད་ནུབ་མི་མཉམ་ན། །ཐོ་རངས་ཤར་བརྟགས་དུ་མཇུག་མཐོང་། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ཕྱོགས་ཀྱི་སྒྲ་གཅན་དང་མཇུག་རིང་གི་ངེས་པ་བཤད་པའི་སྐབས་ཏེ་གསུམ་པའོ།། སྐབས་བཞི་པ།༈ ཟླ་ཉི་འཛིན་ཚུལ་བརྟགས་པའི་ཕྱིར། །༠ཐིག་དང་༣༡གཟུགས་མེ་༤༡ཟླ་མཚོ་༤ཆུ། །༡༠ཕྱོགས་རྣམས་བུལ་བྱིན་གདོང་མཇུག་ཕྲི། །དེ་དང་ཟླ་ཉི་གང་ཉེ་བསྟུན། །ཟླ་འཛིན་བཅོ་ལྔའི་ཚེས་འཁྱུད་དང་། །གདོང་མཇུག་ཉུང་གིས་མང་སྦྱངས་ལྷག །སྐར་༠སྟོང་ཆུ་ཚོད་༥༠མཁའ་དབང་མན།༠ ༥༠།ཤར་ཚེ་སྦྱངས་ལྷག་ཆུ་ཚོད་དེ། །༥མདས་བགོ་ནོར་གྱིས་རེའུ་མིག་བཟུང་། །འཛིན་ཆ་སྒྲིབ་ཡུན་འཁྲུལ་མེད་ཤེས། །ཉི་འཛིན་གནམ་སྟོང་ཉི་དག་དང་། །གདོང་མཇུག་གང་སྦྱངས་གདོང་གིས་ཉི། །སྦྱངས་ལྷག་སྐར་༠སྟོང་དབྱུག་༥༠མཁའ་དབང་།༠ ༥༠།ཉི་མས་གདོང་སྦྱངས་༠ ༥འཛིན་པ་མེད། །ཉི་མས་མཇུག་སྦྱངས་དབྱུག་༤༠མཁའ་མཚོ།༠ ༤༠།མཇུག་མས་སྦྱངས་ལྷག་དབྱུག་༨ཀླུ་མན།༠ ༨།ཤར་ཚེ་སྦྱངས་ལྷག་རེའུ་མིག་བཟུང་། །འཛིན་ཆ་སྒྲིབ་ཡུན་དང་བཅས་རྟོགས། །ཉི་དག་གཅིག་དང་བུལ་བ་བསྲེ། །སྦྱངས་ལྷག་གདོང་ཕྲི་མཇུག་མར་བསྣན།༢༧ ༦༠ ༦༠ ༦ ༦༧།རང་འཁོར་གྱིས་བསྒྲིལ་༡༣ ༣༠འཁོར་ཕྱེད་དོར།༣ ༣༠།གནས་རྣམས་སྟོང་ན་ངེས་ཀྱང་ཟེར།༠ ༠ ༠ ༠ ༠།མྱོང་རྩིས་བསྒྲོད་གཉིས་མཐར་ཉེ་ཚེ། །འཆར་ཀ་ནུབ་ཀར་ཉེ་བ་དང་། །དཔྱིད་མཉམ་ཕྱེད་གོང་སྟོན་ཕྱེད་འོག །འཛིན་པའི་རི་མོ་ཤར་ན་ངེས། །དུས་ནི་ཚེས་ལོངས་སྔ་མ་ཡིས།༦༠ ༠ ༠ ༠།༦༠མཁའ་རོར་ཕྲི་ལྷག་ད་ལྟ་བར། ༦༠ ༦ ༦༧།བསྲེས་ལ་ཆུ་ཚོད་བར་དུ་བསྒྲིལ། །༦༤མཚོ་དུས་ནས་བཟུང་༥༤མཚོ་དབང་བར། །རེའུ་མིག་ཚེས་གཟའི་དབྱུག་ལ་ཉ་སྟོང་གང་ཡིན་གྱི་གཟའི་ཆུ་ཚོད་ཕྲི་བསྣན་གང་ཡང་མ་བྱས་པ་དེ་ལ་བསྣན། །ཟད་ཚེ་ཚེས་འཕོ་ཟླ་ཉི་འཛིན། །ཕྱོགས་དང་ཁ་ཏོག་རེའུ་མིག་བཞིན། །ཞིབ་མོར་བརྟགས་ནས་སྨྲ་བར་བྱ། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ཟླ་ཉིར་ནུར་བྱིན་འཇུག་ཚུལ་བཤད་པའི་སྐབས་དེ་བཞི་པའོ།། སྐབས་ལྔ་པ།༈ སྒྱུར་བྱེད་འདས་ལོ་གནས་ལྔར་བཞག །༡གཟུགས་༡༥ཚེས་༣༡གཟུགས་མེ་༡གཟུགས་༡༢༡ཟླ་ཉིས།༡ ༡༥ ༣༡ ༡ ༡༢༡།བསྒྱུར་ལ་༢མིག་༡༨ཁམས་༤ཆུ་༣མེ་དང་།༢ ༡༨ ༤ ༣ ༨༡།༨༡ཟླ་ནོར་བྱིན་ལ་༣༡༧རི་ཟླ་མེ། །༦བྲོ་བ་༦༠མཁའ་རོ་༦༠ཐིག་མཚམས་༧རིས།༧ ༦༠ ༦༠ ༦ ༣༡༧།བསྒྲིལ་ལྷག་བྱེད་པའི་ལོ་འཕོ་གྲུབ། །སྟེང་ནས་༡གཟུགས་༡༢ཁྱིམ་༢༡ཟླ་མིག་བརྒྱན། ༡ ༡༢ ༢༡ ༠ ༠ ༧ ༦༠ ༦༠ ༦ ༣༡༧།འཁོར་བསྒྲིལ་སྐྱོན་བྲལ་ལོ་འཕོར་ངེས། །ལོ་བདག་གཟའ་དབྱུག་བཅུ་གཉིས་བཀོད། །ལུག་གླང་འཁྲིག་ཀར་སེང་བུ་མོ། །སྲང་སྡིག་གཞུ་སྲིན་བུམ་ཉ་རྣམས། །རིམ་བཞིན་གཟའ་དབྱུག་༡གཟུགས་༥༧རི་དབང་། །༡ ༥༧ ༤ ༥༣།ཟུང་ལྡན་༥༣མེ་དབང་༡གཟུགས་༡༧རི་ཟླ། །༤ཆུ་གཏེར་༥༣རྩེ་འབྱུང་༡གཟུགས་༢༢ལག་མིག ༡ ༢༢ ༤ ༢༤།༤སྡེ་བ་༢༤མཚོ་མིག་༦དུས་༥༡གཟུགས་ཕུང་། ༦ ༥༡ ༡ ༤༠།ཟླ་བ་༤༧རི་མཚོ་༣མེ་༡༦དུས་ཟླ།༣ ༡༦ ༤ ༣༧།༤ཆུ་བོ་༣༧རི་རྩེ་༦མཚམས་༤རིག་བྱེད།༦ ༤ ༠ ༥༢།༠ཐིག་དང་༥༢མིག་དབང་བསྣན་བྱས་ལ།༧ ༦༠།བསྒྲིལ་ལྷག་ཟླ་འཕོ་བཅུ་གཉིས་འགྲུབ། །འདས་ལོར་༥མདའ་བསྲེ་༢༧སྐར་མས་དོར། །ལྷག་མ་བྱེད་པའི་ལོ་སྐར་ཡིན། །ཉ་རྫོགས་ལུག་ཁྱིམ་ལ་སླེབས་པའི། །ཉིན་དེའི་གཟའ་དང་ཟླ་བ་དེའི། །བཅོ་ལྔའི་ཚེས་སམ་དེར་ཉེ་བར། །ཕུར་བུས་སྤྱོད་པའི་སྐར་མ་དེ། །གྲུབ་པའི་ལོ་བདག་གཟའ་སྐར་ཡིན། །སྒྱུར་བྱེད་འདས་ལོ་༡༢ཉི་མས་དོར། །ལྷག་མས་ལོ་ཁྱིམ་རྣམ་དག་རྟོགས། །འདས་ལོ་༨ཀླུས་བརྒྱན་༩བུ་གས་དོར། །ལྷག་མས་༡༠ཕྱོགས་ལ་སྦྱངས་བའམ། །༠ལྷག་མེད་༩བུག་གས་༡༠ཕྱོགས་ལ་སྦྱངས། །དེ་ལྷག་ལོ་སྨེ་དག་པའོ། །སྒྱུར་བྱེད་འདས་ལོ་༣རྩེ་མོས་བསྒྱུར། །གནས་གཉིས་སྟེང་༢ཟུང་འོག་༥མདའ་བསྲེ། །༢ ༥།སོ་སོར་༧རིས་བགོ་རྙེད་པ་དོར། །ལོ་བདག་རྒྱལ་བློན་རྣམ་པར་དག །༤མཚོ་ཡིས་ཕྲི་འམ་༣རྩེ་མོ་བསྣན། །རྗེས་མའི་ལོ་བདག་རྒྱལ་བློན་འཆར། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ལོ་བདག་དང་ཟླ་བདག་གི་ངེས་པ་བཤད་པའི་སྐབས་ཏེ་ལྔ་པའོ།། སྐབས་དྲུག་པ།༈ ༡༨༢༡ ཟླ་ཟུང་ཁམས་ལ་སྒྱུར་བྱེད་སོགས། །བསྲེས་པ་ཤ་ཀའི་ལོ་རུ་གྲགས། །དེ་ཉིད་༣མེས་བསྒྱུར་༧རིས་བགོས་ལྷག །ཟུར་བཀོད་སླར་ཡང་ཐོབ་པའི་ནོར། །ལན་བརྒྱད་༣མེས་བསྒྱུར་༧རིས་བགོས་ལྷག །རིམ་བཀོད་སོ་སོར་༢མིག་གིས་སྤེལ། །༥མདའ་བྱིན་རིམ་པར་ཆར་འབྲུ་རྩ། །བསིལ་དྲོད་རླུང་འཕེལ་ཟད་འཁྲུགས་རྣམས། །མང་བ་༡༧རི་ཟླ་ཉུང་མཐའ་༥མདའ། །བར་མ་༡༡དྲག་པོ་སོགས་སུ་ཤེས། །ཤ་ཀའི་འདས་ལོ་༡༡དྲག་པོས་སྦྱངས། །༤མཚོ་ཡིས་བགོས་ལྷག་ཟུར་དུ་བཀོད། །ནོར་ལ་དེ་ལྟར་ལན་གསུམ་བར། །༡༡དྲག་སྦྱངས་༤མཚོས་བགོ་ལྷག་མ་རྣམས། །རིམ་པར་ཧོར་ཟླ་བཞི་པ་དང་། །ལྔ་དྲུག་བདུན་པའི་ཆར་ཚད་ཡིན། །༦༥ མདའ་རོའི་ལྷག་རྣམས་༣༠མཁའ་མེས་བསྒྱུར། །གནས་གསུམ་སྔོན་མར་༡༤༨༡ཟླ་ནོར་ཡིད། །བསྲེ་ཞིང་བར་མར་༠ཐིག་ལེ་བྱིན། །རྗེས་མར་༥༣༦དུས་མེ་མདའ་བསྣན་ལ། །༦༥མདའ་རོས་རྙེད་པ་ཚེས་གྲངས་སྟོན། །ལྷག་མ་༥མདའ་ཡིས་བགོས་ནོར་དང་། །དེ་ལྷག་འདོད་ལྔའི་བྱ་ར་སྟོན། །སྔོན་མས་དབུགས་ཐོབ་བར་མས་ཁྱིམ། །རྗེས་མས་སྒང་ཚད་འཁྲུལ་མེད་ཤེས། །ལྔ་པ་བཅུ་གཅིག་སྒང་ཚད་ཀྱི། །ཚེས་གྲངས་འདོད་ཆ་ལྔ་ཆ་ལ། །༡གཟུགས་༠མཁའ་༢མིག་དམན་༡ ༠ ༢ བཻ་ཌཱུར་ལུགས། །ཉི་ལྡོག་ཡིན་ཏེ་དེ་ལ་སླར། །༢ཟུང་༠མཁའ་༤མཚོ་ཕྲི་༢ ༠ ༤ ཉི་སྣང་ལུགས། །དེ་ལ་༡ཟླ་༠ཐིག་༢མཚེ་མ་༡ ༠ ༢ སྦྱངས། །རང་ལུགས་དབྱར་དགུན་ཉི་ལྡོག་འཆར། །ལྔ་པའི་སྒང་ཚད་འཁྲུལ་མེད་ཀྱི། །ཚེས་གྲངས་འདོད་ལྔ་དག་པ་ལ། །སྟེང་ནས་༩བུག་༣མེ་༣རྩེ་མོ་བྱིན།༩ ༣ ༣ །ཕག་ཞག་འཆར་བའི་ཚེས་གྲངས་སྟོན། །བརྒྱད་པའི་དབུགས་ཐོབ་རྣམ་དག་གིས། །ཚེས་གྲངས་འདོད་ཆ་ལྔ་ཆ་དེས། །རྀ་ཥི་འཆར་བའི་ཚེས་གྲངས་དང་། །འདོད་ཆ་ལྔ་ཆ་འཁྲུལ་མེད་རྟོགས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ཀར་མྱང་དང་དུས་གཟེར་བཤད་པའི་སྐབས་ཏེ་དྲུག་པའོ།། སྐབས་བདུན་པ།༈ བྱེད་གྲུབ་སོ་སོའི་ནག་ཟླའམ། །བཤོལ་རྗེས་དབོ་ཟླའི་མདའ་རོའི་ལྷག །༦རོས་བསྒྱུར་༡༣འདོད་བགོས་ལྷག་ལུས་ན། །ནོར་ལ་༡གཟུགས་བསྣན་རགས་ཟིན་སྟོན། །ཡང་ན་སྔ་ལོའི་རགས་ཟིན་ལ། །༡༡དྲག་བསྣན་ཉི་རགས་སྟོང་པའི་ཕྱི་ལོ་བཅུ་གཉིས་བསྣན་དགོས། མཆན།ཕྱི་ལོའི་རགས་ཟིན་འཆར། །དེར་མཐུན་ཟླ་བའི་ཉི་དྷྲུ་ལ། །གང་ཟིན་ཚེས་དེའི་ཉི་བར་བྱ། །སྐར་༠ཐིག་དབྱུག་༤མཚོ་ཚུན་ཤར་ཚེ། ༠ ༤།གཟའ་དྷྲུར་ཉིན་དེའི་གཟའ་བར་བསྒྲུབ།གཟའ་རགས་ཀྱི་ཆ་ཤས་ཤེད་སྙོམས་བྱས་ལ་གནས་དྲུག་བྱ། མཆན། །ལོ་དེའི་གཟའ་ཉི་རགས་པ་འགྲུབ། །ཉི་རགས་དབྱུག་སྲང་དབུགས་རིམ་བཞིན། །༦༠མཁའ་རོ་༦དུས་དང་༦༧ཆ་ཡིས་༡༣གསིལ། །མ་ནོར་སྲང་དབུགས་ཆ་རིམ་བསྣན། །༡༣༥མདའ་ཡོན་ཟླས་ཐོབ་སྲང་དབུགས་ཆ། །གྲུབ་པར་ལྷག་༠མེད་བྱེད་ལྷག་བཅས། །གསུམ་བཀོད་༡ཟླ་༤ཆུ་༦དུས་ཀྱིས་སྤེལ། །བྱེད་པར་ལྷག་༡༣བསྒྱུར་༡༣༥མདའ་འདོད་ཀྱིས། །རྙེད་པ་འདོད་ཆར་བསྲེ་འཁོར་བསྒྲིལ། །ཟླ་ཆུ་དུས་འབྲས་འཁྲུལ་མེད་གྲུབ། །རགས་གཉིས་དྲུག་བཀོད་ཁ་བྱང་འབྲི། །ལུག་དང་བུ་མོར་ཟླ་འབྲས་དམན། །ཉ་སྲང་ལ་བྱིན་གླང་སེང་ལ། །ཆུ་འབྲས་ཕྲི་ཞིང་བུམ་སྡིག་བརྒྱན། །འཁྲིག་ཀར་དུས་འབྲས་འཕྲོག་ཆུ་གཞུར། །བསྣན་པས་ཁྱིམ་དྲུག་སྤྱི་ནོར་འགྲུབ། །འདས་ཟླ་ ༣༠ཐིག་མེས་བསྒྱུར་ཚེས་བསྲེ། །རགས་ཟིན་ཕྲི་ལྷག་བསྐལ་ལི་བཟུང་། །གཟའ་ཉིར་ཁྱིམ་མཐུན་ཕྱི་ནོར་བསྣན། །རིལ་པོར་ཚེས་བྱིན་༡༤ཆུ་ཟླས་བགོ། །རྙེད་པ་སྣོན་འབྲིད་མཚན་མ་སྟེ། །ལྷག་དེས་ཆ་ཤས་ཀྱིས་ཟིན་པའི། །བྱ་ར་བཟུང་ལ་ཕྱེད་དག་གཟར། །ཆ་ཤས་རེའུ་མིག་ནོར་མཉམ་བྱིན། །མི་མཉམ་ཕྲི་བས་རེས་གཟའ་དག །ཟླ་སྐར་སྦྱོར་བྱེད་སྔར་ལྟར་བྱ། །དེས་ཀྱང་ལྔ་བསྡུས་ཚེགས་མེད་རྟོགས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ལྔ་བསྡུས་མྱུར་རྩིས་བཤད་པའི་སྐབས་ཏེ་བདུན་པའོ།། སྐབས་བརྒྱད་པ།༈ རེའུ་མིག་༣༠མཁའ་མེའི་གྲངས་ལྔ་བརྩེགས། །དབུས་མར་ཚེས་གྲངས་བྱ་ར་འབྲི། །སྟེང་མའི་དང་པོར་༠ཐིག་༩བུག་༥མདའ། །༣མེ་༤མཚོ་༡༦མི་བདག་དེ་འོག་ལ། །༠མཁའ་༤མཚོ་༢༡ཟླ་མིག་༥མདའ་༤༣མེ་ཆུ། །གྲངས་འོག་དང་པོར་༠མཁའ་༥༩བུག་མདའ། །༣མེ་༤མཚོ་༠ཐིག་ལེ་འོག་མ་ལ། །༠མཁའ་༤ཆུ་༢༡ཟླ་ཟུང་༥མདའ་༩རྩ་རྣམས། །གྲངས་བརྩིའི་ཚེས་ཀྱིས་བསྒྱུར་ལ་བཀོད། །བྱེད་གྲུབ་གཟའ་ཉིའི་རྟག་ལོངས་གྲུབ། །རེའུ་མིག་བཅུ་བཞི་སུམ་བརྩེགས་ཀྱི། །སྟེང་མར་༡གཅིག་ནས་༠ཐིག་བར་བཀོད། །བར་མར་༥མདའ་༡༠ཕྱོགས་༡༥ཚེས་༡༩བུག་གཟུགས། །༢༢ལག་མིག་༢༤རྒྱལ་བ་༢༥དེ་ཉིད་སྔ། །ཕྱི་རྐང་༢༤རྒྱལ་བ་༢༢ལག་མིག་དང་། །༡༩བུག་གཟུགས་༡༥ཚེས་༡༠ཕྱོགས་༥མདའ་༠ཐིག་བསྡོམས། །འོག་མར་༥མདའ་༥དབང་༥འབྱུང་༤མཚོ་༣མེ། །༢མིག་༡གཟུགས་འབྱུང་ལྡོག་བཀོད་ཟླ་རྐང་། །ཉི་རྐང་རེའུ་མིག་དྲུག་སུམ་བརྩེགས། །སྟེང་མར་༡གཅིག་ནས་༠ཐིག་བར་བྲི། །བར་མར་༦རོ་༡༠ཕྱོགས་༡༡དྲག་སྔ་རྐང་། །ཕྱི་རྐང་༡༠ཕྱོགས་༦མཚམས་༠ཐིག་བསྡམས་གྲུབ། །རེའུ་མིག་མཁའ་མེའི་གྲངས་གཉིས་བརྩེགས། །སྟེང་མར་༡ཚེས་༣༠གྲངས་བྱ་ར་སྤེལ། །འོག་དབྱུག་༠ ༥༤མཚོ་དབང་ཚེས་བསྒྱུར་ལ།༢༧ ༦༠ །བསྒྲིལ་བཀོད་ཟླ་བའི་རྟག་ལོངས་འགྲུབ། །རེའུ་མིག་བརྒྱད་བཞི་ཐོག་མ་ལ། །ནོར་གྲངས་དེ་འོག་འཛིན་ཆ་དང་། །གདོང་དང་དུས་མེས་སྒྲིབ་ཡུན་རྣམས། །རིམ་བཀོད་སྦྱངས་ལྷག་སྔོན་མ་འགྲུབ། །དྲག་གཉིས་སྟེང་མར་༦༤མཚོ་དུས་ནས། །༥༤མཚོ་དབང་བར་དུ་༡གཟུགས་དམན་བྲི། །འོག་མར་དབྱུག་༥མདའ་རིམ་བཞིན་སྲང་། །༣༠མཁའ་མེས་ཕྲི་བཀོད་སྦྱིན་བྱེད་གྲུབ། །བཅུ་གཉིས་དྲུག་བརྩེགས་རེའུ་མིག་གི། །གསུམ་པར་འཛིན་ཆ་སྒྲིབ་ཡུན་བཀོད། །དང་པོ་བཞི་པར་གདོང་སྦྱངས་ལྷག །གཉིས་བཞིར་མཇུག་གི་སྦྱངས་ལྷག་དང་། །དྲུག་པར་ཉི་མས་མཇུག་སྦྱངས་འབྲི། །དེ་ཡིས་སྦྱངས་ལྷག་རྗེས་མ་འགྲུབ། །རེའུ་མིག་གསུམ་པ་བདུན་བརྩེགས་གཉིས། །སྔ་ཕྱིའི་དང་པོར་དུས་འཛིན་བཀོད། །གཉིས་གསུམ་བཞི་པར་འཛིན་ཕྱོགས་འབྲི། །ལྔ་པར་མདོག་གི་བྱ་ར་དང་། །དྲུག་བདུན་གདོང་མཇུག་ཁ་ཏོག་སྤེལ། །དུས་ཕྱོགས་མདོག་གི་རེའུ་མིག་འགྲུབ། །གོང་སྨོས་ལྔ་བསྡུས་ནུར་བྱིན་ལ། །འདི་རྣམས་མེད་ཐབས་མེད་ཕྱིར་སྤེལ། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། ལྔ་བསྡུས་སྒྲ་གཅན་གྱི་རེའུ་མིག་བཤད་པའི་སྐབས་ཏེ་བརྒྱད་པའོ།། སྐབས་དགུ་པ།༈ འདོད་ཆའི་རེའུ་མིག་བཅུ་གསུམ་ཡོན། །ཐོག་༡མར་ ༠ཐིག་བར་གྲངས་འཛིན་འོག །༠ཐིག་༤མཚོ་༣༢སོ་༣ཡོན་༣༨༡གཟུགས་ཀླུ་མེ། ༠ ༤ ༣༢ ༣ ༣༨༡།༠ཐིག་༠སྟོང་༢༠མཁའ་མིག་༠ཐིག་༦༠མཁའ་རོ།༠ ༠ ༢༠ ༠ ༦༠།གྲངས་འཛིན་གྱིས་བསྒྱུར་བསྒྲིལ་བཀོད་འགྲུབ། །ལྔ་ཆ་སུམ་བརྩེགས་གྲངས་འཛིན་འོག །༠མཁའ་༠ཐིག་༥༤མཚོ་དབང་༣མེ་༧༦དུས་རི།༠ ༠ ༥༤ ༣ ༧༦།དེ་འོག་༠ཐིག་༠སྟོང་༤མཚོ་༠མཁའ་༡༢ཉི།༠ ༠ ༥༤ ༣ ༧༦།གྲངས་བསྒྱུར་བསྒྲིལ་བཀོད་ལྔ་ཆ་འགྲུབ། །ཟླ་བ་སོ་སོའི་ཉི་དྷྲུ་ལ། །སོ་སོའི་ཚེས་འདོད་ལྔ་ཆ་ཡི། །རེའུ་མིག་བྱིན་བསྒྲིལ་སོ་སོར་བཀོད། །སོ་སོའི་ཚད་སྟོན་རེའུ་མིག་འགྲུབ། །བསྐལ་ལི་གཟུགས་རི་མེ་ལྔ་བརྩེགས། །དབུས་གྲངས་སྟེང་གྲུབ་འོག་བྱེད་པའི། །གཟའ་ཉི་སྤྱི་མཐུན་བཀོད་པས་འགྲུབ། །ཆ་ཤས་བཅུ་བཞི་དྲུག་བརྩེགས་སོ། །སྟེང་འོག་གྲངས་འཛིན་གཉིས་བཞིར་གྲུབ། །གསུམ་ལྔར་བྱེད་པའི་རེའུ་མིག་སྤེལ། །ཐོག་མར་དམར་ནག་བྱ་ར་བཀོད། །མེ་རྩེ་བརྒྱད་བརྩེགས་དབུས་གཉིས་ལ། །༠མཉམ་དང་༡མི་མཉམ་གྲངས་སོ་སོར། །དམར་ནག་བྱ་ར་སྟེང་འོག་བཀོད། །སྟེང་རིམ་༢༢ཟུང་མིག་༡༠ཕྱོགས་༡གཟུགས་དང་།༢༢ ༡༠ ༡།༣༠མཁའ་མེ་༠ཐིག་༠སྟོང་༨ཀླུ་༣མེ་༡གཟུགས། ༣༠ ༠ ༠ ༨ ༣ ༡།གྲངས་འོག་༢༣མེ་མིག་༣རྩེ་མོ་༡གཟུགས། ༢༣ ༣ ༡།༣༠ཐིག་རྩེ་༦དུས་༠མཁའ་༨ནོར་༩གཏེར་༡ཟླ།༣༠ ༦ ༠ ༨ ༠ ༡།དབུགས་ཁྱིམ་སྒང་གསུམ་མ་ནོར་བཀོད། །སོ་སོར་འདོད་ཆར་༡༢ཁྱིམ་བསྣན་བསྒྲིལ། །རིམ་བཞིན་བཀོད་པས་རྣམ་དག་འགྲུབ། །མེ་རྩེ་བདུན་བརྩེགས་རེའུ་མིག་གཉིས། །སྟེང་མར་༠མཉམ་དང་༡མི་མཉམ་པའི། །བྱ་ར་བཀོད་ལ་སྟེང་རིམ་བཞིན། །༥མདའ་༢ལག་༠ཐིག་དང་༧རི་༢མིག་༤མཚོ། །༥ ༢ ༠ ༧ ༢ ༤།༠ཐིག་དང་༡༧རི་ཟླ་༦དུས་༤རིག་བྱེད། །༡༧ ༦ ༤།༢༢ལག་མིག་༡༠ཕྱོགས་༡གཟུགས་སྔ་མར་བཀོད།༢༢ ༡༠ ༡།རྗེས་མའི་དང་པོར་༥མདའ་༨ནོར་༠ཐིག༥ ༨ ༠།༧རི་༨ཀླུ་༤མཚོ་དང་༤ཆུ་༧གླིང་༣རྩེ།༧ ༨ ༤ ༤ ༧ ༣།༣༠མཁའ་མེ་༦རོ་༠ཐིག་༡༧རི་ཟླ་༡༢ཁྱིམ།༣༠ ༦ ༠ ༡༧ ༡༢ ༤།༤མཚོ་དང་༢༣མེ་མིག་༣ཡོན་༡གཟུགས་བཀོད།༢༣ ༣ ༡།སོ་སོའི་འདོད་ཆར་༡༢ཁྱིམ་བསྣན་བསྒྲིལ། །ཚེས་ལ་༣༠མཁའ་མེ་ལས་༣༡ལྷག་ན། །༣༠མཁའ་མེ་དོར་རྟགས་བཅས་བཀོད་འགྲུབ།། དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། རེའུ་མིག་ཉེར་མཁོ་བཤད་པའི་སྐབས་ཏེ་དགུ་པའོ།། སྐབས་བཅུ་པ།༈ སྒྱུར་བྱེད་ཟླ་དག་༧༢མིག་རིས་བརྒྱན། །༢༣༠མཁའ་མེ་ལག་པས་དོར་ལྷག་གིས། །སྟེང་འོག་ཉ་སྟོང་སྒྲ་གཅན་འཛིན། །སྒྱུར་བྱེད་འདས་ལོར་༡༥༠ཐིག་ཚེས་བྱིན། །༣༡༧རི་ཟླ་མེ་ཡིས་དོར་ལྷག་གིས། །ལོ་འཕོ་ཟླ་འཕོའི་རེའུ་མིག་ཟིན། །༡༨༢༡ཟླ་ཟུང་ཁམས་ལ་སྒྱུར་བྱེད་སོགས། །བསྲེས་ལ་༣མེས་བསྒྱུར་༧རིས་བགོ་སླར། །ནོར་ལ་དེ་ལྟར་ལན་བརྒྱད་བྱ། །དགུ་པོའི་ཀར་མྱང་རེའུ་མིག་ཟིན། །སྒྱུར་བྱེད་འདས་ལོར་༤མཚོ་བྱིན་༧རིས། །དོར་ལྷག་རྒྱལ་བློན་རེའུ་མིག་འཛིན། །སོ་སོའི་༦༥མདའ་རོའི་ལྷག་རྣམས་ཀྱིས། །འདིར་སྨྲོས་དབུགས་ཁྱིམ་སྒང་གསུམ་དང་། །ལྡོག་གཉིས་ཕག་ཞག་རྀ་ཥི་ཟིན། །དབུགས་ཁྱིམ་སྒང་ལ་རང་ཟླ་དང་། །ལྡོག་གཉིས་༥སྣྲོན་དང་༡༡མགོ་ཡི་ཟླ། །ཕག་ཞག་རྀ་ཥི་༥སྣྲོན་༨ཁྲུམས་ཟླའི། །ཉི་དྷྲུར་སོ་སོའི་ཉི་ལོངས་དང་། །འདོད་ལྔ་གང་ཟིན་ཉི་རྟགས་བསྣན། །འཁོར་བསྒྲིལ་སོ་སོའི་ཚད་རྣམས་འཆར། །སྔོན་རྗེས་རྟགས་ཅན་ལ་བབས་ཚེ། །དེར་མཐུན་ཉི་མའི་དྷྲུ་བ་ལ། །ཚེས་འདོད་ལྔ་ཆའི་ཉི་ལོངས་བྱིན། །བསྒྲིལ་ལྷག་སོ་སོའི་ཚད་རྣམས་འཆར། །གཞན་དུ་དབྱར་རྔ་ཁུ་བྱུག་སོགས། །དུས་བརྟགས་རི་མོ་ཁྱད་པར་རྣམས། །ལོགས་སུ་བཀོད་ལས་ཤེས་པར་གྱིས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། རེའུ་མིག་འཛིན་ཚུལ་དང་དུས་གཟེར་སོ་སོའི་ཚད་བཤད་པའི་སྐབས་ཏེ་བཅུ་པའོ།། སྐབས་བཅུ་གཅིག་པ།༈ རབ་ཚེས་སྒྱུར་བྱེད་འདས་པའི་ལོ། །༡༢ཉི་མས་བསྒྱུར་ལ་༠མཆུ་ཟླ་སོགས། །འདས་ཟླ་བསྲེ་ལ་གནས་གཉིས་བཞག །འོག་མ་༢མིག་བསྒྱུར་༤༡ཟླ་མཚོ་བསྣན། །༦༥མདའ་རོས་ཐོབ་བྱིན་ཟླ་དག་གོ། །དེ་ཉིད་༣༠མཁའ་མེས་བསྒྱུར་ཚེས་བསྲེ། །གནས་གསུམ་བར་མར་༤༣མེ་ཆུ་དང་། །འོག་མར་༣༤༣མེ་མཚོ་མེ་བསྣན་ལ། །༧༠༧རི་མཁའ་རིས་རྙེད་བར་མར་བྱིན། །༦༤ཆུ་རོས་བགོས་ལྷག་༠ཐིག་ཤར་ན། །ཞག་དེ་ཆད་པས་ཟླ་ཆུང་ཟེར། །རྙེད་པས་སྟེང་སྦྱངས་ལྷག་སྤྱི་དྷྲུ། །དེ་ཉིད་ལྔར་བཀོད་རིམ་པ་བཞིན། །དང་པོར་༦མཚམས་བྱིན་༧རི་ཡིས་དོར། །ལྷག་མས་ཉིན་དེའི་རེས་གཟའ་ཤེས། །གཉིས་པར་༦མཚམས་བསྣན་༡༢ཉི་མས་དོར། །ལྷག་མས་ཉི་མ་གང་ཡིན་རྟོགས། །༡གཟུགས་ཤར་འབྲུག་ནས་མགོ་འདྲེན་ལ། །༠ཐིག་ལེ་ཤར་བ་ཡོས་སུ་བཞེད། །གསུམ་པར་༤ཆུས་བརྒྱན་༡༠ཕྱོགས་ཀྱིས་བགོ། །ལྷག་མས་འབྱུང་ཁམས་གང་ཡིན་སྟོན། །༡གཅིག་༢གཉིས་༣མེ་ནས་༣༤ས་༥༦ལྕགས་༧༨ཆུར། །གཉིས་སྦྲག་༩དགུ་༠ཐིག་ཤིང་དུ་འདོད། །བཞི་པར་༤མཚོ་བསྲེ་༩བུ་གས་དོར། །ལྷག་དེ་༡༠ཕྱོགས་སྦྱངས་༠ལྷག་མེད་དུས། །༩བུ་གས་༡༠ཕྱོགས་སྦྱངས་ལྷག་མ་ཡིས། །ཉིན་དེའི་སྨེ་བ་གང་ཡིན་རྟོགས། །ལྔ་པར་༢མིག་བྱིན་༨ཀླུས་དོར་ལྷག །ཉིན་དེའི་སྤར་ཁ་གང་ཡིན་ཤེས། །གཅིག་ཤར་༡ལི་ནས་རིམ་པ་བཞིན། །༠ཐིག་ཤར་ཟོན་དུ་ངེས་པར་སྨྲ། །འདས་པའི་ཞག་མ་སྤྱི་དྷྲུ་ལ། །༡༦མི་བདག་བསྣན་ལ་༢༨ཀླུ་ལག་གིས། །དོར་ལྷག་གྱོ་ཁང་རེའུ་མིག་ཟིན། །རེས་གཟའ་དང་མཐུན་རྒྱ་བོད་འགྲིགས། །གོང་གི་བགོས་ལྷག་གྲངས་རྣམས་ཀྱིས། །རང་རང་སོ་སོའི་རེའུ་མིག་རྟོགས། །འདི་ནི་ཚེས་མགོ་སྟག་སྤྲེལ་ནས། །བཟུང་བའི་ཉིན་ཞག་རེ་བཞིན་དུ། །དབང་བྱེད་གཟའ་ཉི་ཁམས་སྤར་སྨེ། །ངོས་འཛིན་ཙི་ནའི་མཁས་རྣམས་ཀྱིས། །བཞེད་བཞིན་མེར་ཀན་དཀའ་བཅུ་སོགས། །མང་པོའི་ཕྱག་ལེན་འདིར་ཡང་སྨྲས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་ལས། སྤོར་ཐང་གསེར་རྩིས་ཐོར་བུ་བཤད་པའི་སྐབས་ཏེ་བཅུ་གཅིག་པའོ།། ༈ འདིར་སྨྲས་པ། ཟབ་ཡངས་དུས་འཁོར་རྒྱུད་རྒྱལ་མ་དྲོས་མཚོར། །ལེགས་བཤད་རྩིས་ཀྱི་ནོར་བུའི་གཏེར་བརྡོལ་ཚེ། །བཤེས་གཉེན་དེད་དཔོན་མཆོག་གི་བཀའ་དྲིན་གྱིས། །སྐར་རྩིས་རཏྣའི་བགོ་སྐལ་མང་དུ་ཐོབ། །དེ་ལས་རྩིས་ཀྱི་མན་ངག་གསེར་གྱི་ཕྲེང་། །ཉུང་ངུ་རྣམ་གསལ་མཁས་པའི་མགུལ་རྒྱན་འདི། །བློ་གསལ་འགའ་ལ་ཕན་འདོད་ལྷག་བསམ་གྱིས། །འཇུག་བདེའི་རི་མོའི་སྲད་བུར་བརྒྱུས་འདི་ལགས། །འདིར་འབད་ལས་བྱུང་རྣམ་དཀར་འོད་བརྒྱ་ཡིས། །འདིར་འཇུག་ཀུན་གྱི་མ་རིག་དྲུང་ཕྱུངས་ནས། །ཡང་དག་ཡེ་ཤེས་སྣང་བའི་འོད་དཀར་གྱིས། །ས་གསུམ་འགྲོ་བའི་བློ་མུན་སེལ་བར་ཤོག །ཅེས་དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཉེར་མཁོའི་ལག་ལེན་ཉུང་ངུ་རྣམ་གསལ་ཞེས་བྱ་བ་འདི་ཡང་དཱ་རི་དྲ་ཆོས་དབྱིངས་ཀུན་གསལ་བློ་གྲོས་རྒྱ་མཚོས་རང་ལོ་ཉེར་དགུ་པ་རབ་ཚེས་སྒྱུར་བྱེད་རྒྱལ་ཟླའི་དཀར་ཕྱོགས་ཀྱི་དགའ་བ་དང་པོ་ལ་མགོ་བརྩམས་ཏེ་དམར་ཕྱོགས་བཟང་པོ་གཉིས་པ་ལ་མཇུག་གྲུབ་པར་བགྱིས་པ་སྟེ་དགེ་བས་རིགས་མཐུན་གསར་བུ་འགའ་ལ་ཕན་ཐོགས་ཆེན་པོ་འབྱུང་བ་དང་། ལམ་འདིར་ཞུགས་ཀྱི་བློ་གསལ་མཐའ་དག་རིགས་ལྡན་ཆོས་ཀྱི་རྒྱལ་པོས་རྗེས་སུ་འཛིན་པའི་རྒྱུར་གྱུར་ཅིག སརྦ་མངྒ་ལཾ། ཉིན་ཞག་གཟའ་ལྔ།༄༅། ཀུན་གཟིགས་འཇམ་དབྱངས་བླ་མ་ལ། །བཏུད་ནས་ཉིན་ཞག་གཟའ་ལྔ་སྤེལ། །སྒྱུར་བྱེད་ཟླ་དག་༣༠མཁའ་མེས་བསྒྱུར། །གང་བརྩིའི་ཚེས་བསྣན་གནས་གསུམ་བཀོད། །བར་འོག་༣༩རྩ་ཡོན་༤༠༣མེ་ཐིག་མཚོ། ༣༩ ༤༠༣།བསྲེས་ལ་འོག་མར་༧༠༧རི་མཁའ་རིས། །རྙེད་པ་བར་བྱིན་དེར་༦༤ཆུ་རོས། །ཐོབ་པས་སྟེང་སྦྱང་མི་གསལ་ཞག །གསལ་ཕྱིར་གཉིས་བཀོད་ཅིག་ཤོས་ལ། །༢ཟུང་བསྣན་༧རིས་དོར་རེས་གཟའ་དང་། །མཐུན་ན་དག་མོད་མ་མཐུན་ཚེ། །ཉུང་ན་གཅིག་བསྣན་མང་ན་ཕྲི། །དེ་ལྟར་མཐུན་བྱས་གསལ་ཞག་སྟེ། །གཟའ་ལྔ་སྤྱི་ཡི་ཉིན་ཞག་གོ།། འདིའི་བར་ནས་ལྡེབ་རེ་ཟུང་ཆད། འདིར་འབད་དགེ་བ་གང་མཆིས་དེས། །ཡིད་ཅན་འགྲོ་བ་མ་ལུས་པ། །ཕྱམ་གཅིག་ཤམ་བྷ་ལར་སྐྱེས་ནས། །དུས་འཁོར་བསྟན་པ་སྤེལ་བར་ཤོག །མཐར་ཡང་དེ་ཀུན་ཕྱམ་གཅིག་ཏུ། །ཁྱབ་བདག་དང་པོའི་སངས་རྒྱས་ཀྱི། །གོ་འཕང་བླ་ན་མེད་ཐོབ་ནས། །སྐུ་གསུམ་མཛད་ཕྲིན་སྟོན་གྱུར་ཅིག །ཅེས་པ་འདི་ཡང་དུས་ཐ་མའི་བཙུན་གཟུགས་རྟགས་ཙམ་འཛིན་པ་ཆོས་དབྱིངས་ཀུན་གསལ་བློ་གྲོས་རྒྱ་མཚོར་འབོད་པ་ཞིག་གིས་སུག་ལས་སུ་བསྟར་བ་སྟེ། རིགས་མཐུན་རྣམས་ལ་ཕན་ཐོགས་རྒྱ་ཆེན་པོ་འབྱུང་བར་གྱུར་ཅིག དགེའོ།། གླང་རྩིས།༄༅། གླང་གཟུགས་འདོམ་གང་ཁྲུ་བཞི་པས། །དུས་བཞི་མཚོན་ལ་རྔ་མ་ཚོན། །བཅུ་གཉིས་དུས་ཚོད་བཅུ་གཉིས་མཚོན། །རྫི་བོ་ཁྲུ་གསུམ་ཚོན་དྲུག་པས། །ཞག་པོ་སུམ་བརྒྱ་དྲུག་ཅུ་དང་། །རྒྱ་ལྕགས་ཁྲུ་དོ་ཚོན་བཞི་པ། །དུས་གཟེར་ཉེར་བཞི་མཚོན་པའོ། །དེ་ལྟར་བརྡ་ཡི་གཟུགས་ཀྱིས་ནི། །ལེགས་ཉེས་ལུང་དུ་སྟོན་པ་སྟེ། །དེ་ཡང་བཟང་སྟོབས་ཕོ་ཁམས་ཆེ། །ངན་སྟོབས་མོ་ཁམས་གཙོར་འབྱུང་བས། །དེ་ཕྱིར་ཁ་ཏོག་མང་ཉུང་བཤད། །ལྗང་ཁུ་རླུང་ལྡང་རྩི་ཤིང་དང་། །ལོ་མ་ལྗང་ཀུའི་རིགས་རྣམས་རྒྱས། །མི་ཕྱུགས་དག་ལ་རླུང་ནད་ལྡང་། །དམར་པོ་མེ་ཐན་བཙའ་དང་ནི། །ཚ་ནད་འབྲུ་སྨིན་འབྲུ་གྲངས་ཉུང་། །ཁོལ་བུར་སེར་རྒོད་ལྕེ་ཡང་འབེབས། །དཀར་པོ་སད་སེར་བཀྲེས་དབུལ་དང་། །ཤི་ཆད་གཉན་སྐྲང་ལྷོག་པ་འབྱུང་། །ནག་པོ་ཆར་ཆེ་སྤྲིན་ཕུང་རྒྱས། །མེ་ཏོག་བཀྲག་མདངས་ཆེ་བ་དང་། །གྲང་བ་པད་ཀན་ཀླུ་ནད་ལྡང་། །སེར་པོ་ལོ་ཏོག་རྩི་ཤིང་རྒྱས། །འབྲུ་འཕེལ་སྐྱེ་བོ་དགའ་སྤྲོ་སྤྱོད། །འདུ་བའི་ནད་ཀྱིས་ཅུང་ཟད་ཉེན། །དེ་ཀུན་སྤྱི་ཡི་བཤད་བྱ་ཡིན།། ༧ བྱེ་བྲག་རྭ་ཅོ་དཀར་བ་ན། །མི་ཤི་མང་ཞིང་རྣ་མཇུག་དཀར། །ཡུལ་སྤྱིར་སད་སེར་ལྡང་ཞིང་མགོ། །ཁ་དཀར་ས་སྟོད་སྔ་སད་ལྡང་། །ལུས་པོ་དཀར་བ་བར་སད་དང་། །སུག་བཞི་རོང་ཆེན་ཕྱི་སད་འོང་། །མགོ་དང་རྭ་ཅོ་རྒྱལ་པོ་དང་། །ལུས་པོ་ས་བར་བློན་པོར་དཔྱད། །སུག་བཞི་ཆབ་འབངས་དག་ལ་གནོད། །གང་ལའང་དཀར་པོ་ངན་པར་བཤད། །རྭ་རྣ་མཇུག་དམར་ཚད་རིམ་དང་། །ཡུལ་རྣམས་སྤྱི་ཡི་ཐན་པར་ཤེས། །མགོ་མཚུལ་སོ་དམར་མི་ཆེན་གྱི། །མཁར་ཁང་ལ་ལྡང་ས་སྟོད་ཕྱོགས། །ཐན་ཆེ་དཔྱིད་གསུམ་ར་བཞིའང་གདུང་། །ལུས་དམར་བར་ཕྱོགས་བཙའ་སད་འོང་། །དབྱར་སྟོན་འབྲིང་བཞིར་གྲོང་འཚིག་ཅིང་། །སུག་བཞི་དམར་བས་རོང་ཆེན་དང་། །རྒྱ་ཤོད་དགུན་དུས་ཐ་མ་བཞིར། །ཐན་པས་གདུང་ཞིང་དམངས་གྲོང་འཚིག །ལར་ནི་དམར་ཆ་ངན་མོད་ཀྱང་། །ཕོ་མཚུལ་དམར་ན་ལེགས་པར་བཤད། །རྭ་རྣ་མཇུག་སེར་ཡུལ་སྤྱིར་དགེ། །མགོ་སེར་ས་མཐོའི་རྒྱལ་ཁམས་བདེ། །ཁྱད་པར་ཁ་ལུང་ཞིང་སྐྱེད་བཟང་། །ལུས་དང་ལྟོ་སེར་བར་ཁམས་བདེ། །བློན་རིགས་ཞིང་ལ་སྐྱེད་དུ་ཆེ། །འབྲོག་གནས་ཕྱུགས་དང་དཀར་གསུམ་འཕེལ། །སུག་བཞིས་རོང་ཆེན་རྒྱ་ཤོད་ལེགས། །རྭ་རྣ་མཇུག་ལྗང་ཡུལ་སྤྱིར་དགེ། །མགོ་དང་མཚུལ་བས་སྟོད་རྣམས་བཟང་། །མགོ་བོ་ལྗང་གུས་རླུང་ལྡང་ཞིང་། །ལྷག་པར་རྩི་ཤིང་སྐྱེ་འཕེལ་ཆེ། །ལུས་དང་བར་དཀྲིས་ལྗང་བ་ན། །གནས་དུས་བར་དང་འབྲིང་བཞིར་ལེགས། །སུག་བཞིས་རོང་ཆེན་ས་སྨད་དང་། །དུས་སྨད་ཐ་བཞི་དགེ་བར་ཤིས། །རྭ་རྣ་མཇུག་ནག་ཆུ་ཁམས་ལ་སྔོན་པོའམ་ནག་པོ་གང་ཡིན་དེའོ།། མཆན།ཡུལ་སྤྱིར་རྒུད། །མགོ་ནག་བྱང་དང་སྟོད་ཕྱོགས་ངན། ཁྱད་པར་་་་མཇུག་མ་ཚང་། ༧ དུས་ཚོད་ནམ་ཡང་ཡོས་ནས་བརྩི། །དཔྱིད་དབུགས་ཟུག་པའི་ཉི་མའི་བུས། །དབང་ཐང་ཞྭ་ཡིས་ཆར་བརྟགས་ཏེ། །ཞིང་ལ་ཞྭ་དེ་མཆན་དུ་བཟང་། །རླུང་ཆེ་ཆར་བ་འབྲིང་ཙམ་འབེབས། །མེ་ལ་སར་བཞག་ཆར་མེད་བརྡ། །ས་ལ་ཕྲག་བཀལ་བདེ་ཞིང་དལ། །དུས་བབ་ཆར་གྱིས་འབྲུ་དྲུག་གསོ། །ལྕགས་ལ་གློར་བཏགས་དུས་མིན་ཆར། །མི་སྙོམ་ཡུལ་ཁམས་བདེ་མིན་ཉམས། །ཆུ་ལ་ཞྭ་གྱོན་ཆར་ཆུ་མོད།། ༧ ལུས་ཁམས་ཞྭ་ཡི་མདོག་གང་གིས། །ཡང་རབས་ཚོང་ཟོང་དཀོན་མོད་བརྟགས། ༧ སྲོག་ཁམས་ཏོག་མདུན་མདོག་དག་གིས། །མི་ཡི་སྐྱེ་འཆི་སྐྱིད་སྡུག་སྟོན། །ཏོག་གི་གཡས་སམ་འོག་ཕྱོགས་མདོག །སྲོག་དེའི་མ་ཡིན་ན་ཚ་བརྟགས། །ཏོག་སྟེང་སྲོག་གི་བུ་ཡི་མདོག །སྲིད་ཀྱི་འཕེལ་རྒྱུན་རབ་ཏུ་ཤེས། །མི་ཡི་དར་གུད་གྲོགས་ཏེ་གཡོན། །དགྲ་རྒྱབ་དགྲ་ཟླས་འཚེ་མིན་བརྟགས། །དེ་ཡང་ས་ཁམས་སེར་པོ་སྟེ། །ཡང་རབ་ཤིང་ལྗང་རབ་ཏུ་བཤད། །མེ་ཁམས་དམར་པོ་འབྲིང་པོ་ལ། །ཆུ་ཐ་ལྕགས་དཀར་ཡང་ཐར་བཞེད།། ༧ དབྱུག་སྲང་དཀར་ནག་ཟས་སྐལ་སྟེ། །དཀར་པོ་ལེབ་ཤར་ཆ་ལྔའི་ཐུད། །དབྱུག་མདའི་གྲངས་ཀྱི་བྱེ་བྲག་གི། །དཀར་གསུམ་དཀོན་མོད་དུས་ཚོད་དེ། །ཐིག་མཚོ་ཡང་རབ་རབ་ཏུ་འདོད། །རྩེ་འབྲིང་བགྲོད་ཐ་གཟུགས་ཀྱང་ཐ། །ལེགས་ཉེས་ལུང་དུ་སྟོན་པའོ།། ༧ དཀར་སེར་ཟླུམ་པོ་ཆ་དྲུག་ཟན། །ཆུ་སྲང་བཅུ་བཅུའི་གྲངས་དག་གིས། །འབྲུ་དྲུག་ཟས་ཀྱི་དཀོན་མོད་བརྟགས། །དེ་ཡང་གྲངས་ཡར་འབྲུ་དཀར་དཀར། །ཆ་ལ་འབྲུ་ནག་སེར་པོ་སྟེ། །སྟོང་མདའ་ཡང་རབ་རབ་ཏུ་ཤེས། །མཚོ་མེ་འབྲིང་གི་སྟོད་སྨད་དེ། །བགྲོད་ཟླ་ཐ་མ་ཡང་ཐར་བཤད།། ༧ གླང་གི་གསང་བ་དབུགས་གྲངས་ཀྱི། །རྐང་འགྲོས་ཕྱུགས་ཀྱི་འཕེལ་ཟད་བལྟ། །ཡང་རབ་རབ་དང་འབྲིང་སྟོད་སྨད། །ཐ་མ་ཡང་ཐས་སོ་སོར་དབྱེ།། ༧ གླང་གི་གསང་འབྲས་ཆ་ཤས་ཏེ། །གྲངས་ཀྱི་ཟས་བཅུད་ཆེ་ཆུང་བརྟགས། །མཁའ་འཕེལ་ཟླ་བ་ཟད་པར་སྟོན།། ༧ དེ་ཡི་རྟེན་འབྲེལ་བརྡ་རྟགས་ནི། །ཞྭ་མོ་ཚོན་ལྔ་འབྱུང་ལྔའི་ཁམས། །ཏོག་ནི་ཚོན་གཉིས་ཉིན་མཚན་ཆ། །ཐུད་ལ་ཚོན་ལྔ་འོ་ཞོ་མར། །དར་དང་ཆུར་བ་ལྔ་རུ་མཚོན། །ཟན་ལ་ཚོན་དྲུག་ནས་འབྲས་གྲོ། །སོ་སྲན་བྲ་བོ་འབྲུ་དྲུག་མཚོན། །གསང་བ་ཚོན་དྲུག་དུས་དྲུག་སྟེ། །གསང་འབྲས་ཚོན་གཉིས་དཀར་དམར་ཕྱོགས།། ༧ གླང་རྩིས་གཞན་གྱི་ཁྱད་པར་ལ། །རྣ་བ་ཕོ་གྱོག་མོ་གཡས་གྱོག །ལྟག་སྐྲ་དབུགས་ཉིའི་སྲོག་གི་ཁམས། །ཁྱད་པར་ས་ལ་ཚོ་གཅིག་བྱ། །ལྕགས་ཡུ་དུས་ཀུན་མི་འགྱུར་སྦ། །དུས་བཞི་མཚོན་བྱེད་ཚིགས་པ་བཞི། །གླང་རྫི་ཕོ་གཡོན་མོ་གཡས་ཕྱོགས། །བྱིས་པར་གཞོན་རྩུབ་རྒན་པར་ངན། །དར་མས་རྒན་རྩུབ་བྱིས་པར་ངན། །རྒན་པས་བྱིས་རྩུབ་དར་མར་ངན། །ཁ་སུག་དམར་ན་ཁ་ཉིང་ནད། །རྭ་མཇུག་དམར་ན་དམེ་འཁྲུགས་འོང་། །ཚོ་གཅིག་ཐོར་ཅོག་མཆོག་ཏུ་བཟང་། །གཡས་གཡོན་ཚོ་ནང་ཕོ་མོར་རྩུབ། །དཔྱིད་མགོ་ཟུག་ཉིན་མེ་ཐན་མེ། །ཆུ་ལ་ཆུ་འཇིགས་ལྕགས་མི་མཐུན། །ས་བཟང་ཤིང་ལ་ལོ་ཏོག་རྒྱས། །འབྲས་བུ་གཞན་རྣམས་མཚུངས་པ་འདྲ།། ༧ འབྲུག་ཉིའི་དབང་ཐང་རླུང་སོགས་འབྲས། །ལྗང་གུས་འཐོར་རླུང་ཆུ་འཛིན་གཏོར། །ཆར་བ་འབབ་ཏུ་མི་སྟེར་ལ། །དམར་པོ་ཐོག་གློག་སེར་བ་རྒོད། །སེར་པོ་སྤྲིན་འཐུག་སྦྲང་ཆར་འབྲིང་། །དཀར་པོ་གྲངས་ལྷག་ཁ་གོམ་འཐུལ། །ཞེད་ཆུང་སད་ལྡང་སྔོན་པོ་ཆར། །ཆུ་རྒྱས་ས་འཛིན་ཀུན་གྱིས་འཇིགས། །དབྱར་རྔའི་རྩིས་འབྲས་ཕྱོགས་ཙམ་མོ།། སྨིན་གླིང་གཏེར་ཆེན་རྣམ་ཐར།༄༅། གཏེར་ཆེན་ཆོས་ཀྱི་རྒྱལ་པོའི་རྣམ་ཐར་ཉུང་ངུར་བསྡུས་པ་ངོ་མཚར་སྤྲིན་གྱི་ རོལ་མོ་བཞུགས། ༄༅། ན་མོ་གུ་རུ་བཛྲ་དྷཱ་ར་ཡ། ཚོགས་གཉིས་བྱེ་བའི་ཆུ་གཏེར་ལས་བྱུང་བའི། །རྣམ་གྲོལ་ཡོན་ཏན་མཆོག་གི་རིན་པོ་ཆེ། །མདོ་སྔགས་ལྷ་ཡི་གོས་བཟང་རྩེར་མཛེས་པའི། །སྔ་འགྱུར་བསྟན་པའི་རྒྱལ་མཚན་གཏེར་བདག་གླིང་། །གང་གི་རྣམ་ཐར་ལྷ་ཡི་རྔ་བོ་ཆེའི། །སྒྲ་དབྱངས་ནམ་མཁའི་ར་བར་སྙན་མོད་དེ། །བློ་ལྡན་སྐྱེ་བོས་ལེགས་པར་སྨྲས་པའི་སྒྲ། །བྲག་ཆའི་རྗེས་སུ་བསྒྲགས་ལ་དོན་ཅི་ཞིག །འོན་ཀྱང་རྣམ་གཡེང་ཚལ་ལ་རྟག་གབ་པས། །རྟོགས་བརྗོད་གངས་རིར་བལྟ་བར་མི་མོས་པའི། །བློ་དམན་མདོངས་ཅན་གཞོན་ནུའི་རྣ་ལམ་ན། །འདི་འདྲའང་ངོ་མཚར་སྤྲིན་གྱི་རོལ་མོ་ཡིན།། དེ་ལྟར་ན་སྔ་འགྱུར་རྡོ་རྗེ་ཐེག་པའི་བསྟན་པའི་མངའ་བདག་ཆེན་པོ་ཨོ་རྒྱན་གཏེར་བདག་གླིང་པའམ། རིག་པ་འཛིན་པ་འགྱུར་མེད་རྡོ་རྗེ་ཞེས་ཡོངས་སུ་གྲགས་པ་དེ་ཉིད་ཀྱི་རྟོགས་བརྗོད་འགའ་ཞིག་རྣམ་ཐར་རྒྱས་པ་རྣམས་ལས་མདོར་བསྡུས་ཏེ་གོ་བདེར་བརྗོད་པར་བྱ་སྟེ། བདག་ཉིད་ཆེན་པོ་འདི་བྱོན་པའི་གནས་དུས་གདུལ་བྱ་ལ་སོགས་པ་ནི་ཚད་མར་གྲུབ་པའི་ལུང་གིས་བསྟན་པ་ཡིན་ཏེ། གང་ཞེ་ན། བཀའ་ཐང་ལས། ཆོས་ལོག་ཁྲིམས་རལ་དམ་ཉམས་ལུང་པ་གང༔ ལྷ་མིའི་གནས་སུ་གཏམ་ངན་གྲགས་པས་ཁྱབ༔ ཤ་འུག་ལྟག་སྒོར་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང༔ ཨོ་རྒྱན་གཏེར་བདག་གླིང་པ་ཞེས་བྱ་འབྱུང༔ ཞེས་དང་། རྡོ་རྗེ་གླིང་པའི་འདའ་ཀའི་ཞལ་ཆེམས་ལས། །དེ་ནས་ཕྱི་མའི་ཕྱི་མ་ན། །ཡར་འབྲོག་དབུ་གཡོར་སྡེ་གཉིས་ཀྱི། །མཚམས་སུ་བདག་ནི་སྐྱེ་བ་ལེན། །འགྲོ་འདུལ་ཞེས་གྲགས་རྒྱལ་བའི་སྲས། །མངོན་ཤེས་རྫུ་འཕྲུལ་ལྡན་པ་འབྱུང་།། ཞེས་དང་། ཤ་འུག་རང་གཏེར་གྱི་ལུང་བྱང་ལས། །ཁྱད་པར་སུམ་ཅུར་ཉེ་བ་ན། །དམུ་རྒོད་སེམས་ཅན་གདུལ་དཀའི་དུས། །གདུལ་བྱའི་ཐབས་མཁས་ཐུགས་རྗེའི་བདག །ཐོག་བབས་ཚུལ་དུ་འབྱུང་བར་འགྱུར།། ཞེས་དང་། གབ་རྒྱ་ཅན་ལས། སུམ་ཅུ་ཁ་རལ་སྙིགས་མ་ལྔ་བདོའི་དུས༔ བསམ་ཡས་ལྷོ་ནུབ་གྲྭ་ཞེས་གཡོ་རུའི་ས༔ ལུང་པ་བྱང་བལྟས་དོར་མ་བརྐྱངས་འདྲའི་ཚིགས༔ སྲིན་མོ་འཛེགས་འདྲའི་དགེ་བསྙེན་སྔགས་ཞོལ་དུ༔ བུདྡྷ་ཛྙཱ་ནའི་སྤྲུལ་པ་ཚེ་མིང་ཕ༔ ཤེལ་དཀར་སྒྲོལ་མཚོའི་སྤྲུལ་པ་དབྱངས་མིང་མས༔ བསྐྱེད་པའི་རྣལ་འབྱོར་སྔགས་ཀྱི་བརྟུལ་ཞུགས་ཅན༔ མེ་ཁམས་ཁྱི་ཡི་ལོ་པ་པདྨའི་མིང་༔ ཞེས་སོགས་གསུངས། གཞན་ཡང་ཚད་མའི་ལུང་མང་དུ་ཡོད་ཀྱང་འདིར་དེ་ཙམ་མོ།། དེ་ལྟ་བུའི་དུས་རྟགས་མངོན་དུ་གྱུར་པ་ན། རིགས་རུས་ཆོ་འབྲང་ཕུན་སུམ་ཚོགས་པ་ཆེ་ཞིང་མཐོ་བ་བོད་མིའུ་གདུང་དྲུག་གི་ཡ་གྱལ་གཉོས་རིགས་གྲུབ་པའི་གདུང་དུ་བྱོན་པ་ཡིན་ཏེ། འདི་ལྟར་སྔོན་གྱི་དུས་སུ་རིགས་གཟུགས་དང་བློ་གྲོས། ལས་དབང་དང་བསོད་ནམས་ཤིན་ཏུ་ཆེ་བའི་ལྷའི་བུ་ཞིག་དམུ་ཐག་ལ་བརྟེན་ནས། རུ་མཚམས་ཁ་རག་གི་རི་བོའི་རྩེར་བབས། དེ་ལ་མི་རྣམས་ཀྱིས་བཀུར་སྟི་བྱས་པས་མིའི་གྲིབ་ཀྱིས་མྱོས་པས་ན། རིགས་རྒྱུད་ལ་གཉོས་ཞེས་མིང་དུ་ཆགས་ཤིང་དེ་ལ་གཉོས་བྱ་ཁྱུང་དཀར་པོ་ཟེར། དེས་རྨུ་ལྕམ་ཏིང་མོ་བཙུན་ཁབ་ཏུ་བཞེས་པ་ལས་སྲས་མྱོས་རྗེ་བཙན་པོ་བྱུང་། དེ་ལས་རིམ་པ་བཞིན་གདུང་རྒྱུད་མཆེད་པ་ལས་གདུང་རབས་སོ་གཅིག་པ་གཉོས་སྟོན་ཚེ་དབང་རྡོ་རྗེ། དེའི་སྲས་ལང་གྲོ་ལོ་ཙཱའི་སྤྲུལ་པ་ཀུན་མཁྱེན་མདོ་སྔགས་བསྟན་འཛིན། དེའི་སྲས་གནུབས་ཆེན་སངས་རྒྱས་ཡེ་ཤེས་ཀྱི་སྤྲུལ་པ་གསང་བདག་ཆེན་པོ་ཕྲིན་ལས་ལྷུན་གྲུབ་དཔལ་བཟང་པོའམ། ཨོ་རྒྱན་ཚེ་འཕེལ་ཞེས་བྱ་བ་ནི་རྗེ་འདིའི་ཡབ་ལགས་སོ།། ༼ཐམས་ཅད་ཀྱང་འགྲན་ཟླ་དང་བྲལ་བའི་མཁས་གྲུབ་ཆེན་པོ་ཤ་སྟག་གོ།༽ ཡུམ་ནི་བོད་ཆོས་རྒྱལ་གྱི་གདུང་ལས་མཆེད་པ་ཟླུམ་པོ་བ་དོན་གྲུབ་དབང་རྒྱལ་བྱ་བའི་སྲས་མོ་ལྷ་འཛིན་དབྱངས་ཅན་སྒྲོལ་མ་ཞེས་བྱ་བ་སྟེ། ཡབ་ཡུམ་དེ་གཉིས་ཀྱི་སྲས་སུ་མེ་ཕོ་ཁྱིའི་ལོ་དབོ་ཟླ་བའི་ཡར་ཚེས་དགུའི་མཚན་ཐུན་ཐ་མར་ངོ་མཚར་བའི་ལྟས་དུ་མ་དང་བཅས་ཏེ་ཡབ་མེས་ཀྱི་གདན་ས་གྲྭ་ནང་དར་རྒྱས་ཆོས་གླིང་དུ་སྐུ་བལྟམས་སོ།། འཕྲལ་དུ་རྟེན་འབྲེལ་དང་བྱིན་རླབས་སྣ་ཚོགས་བྱས། མཚན་ཀུན་དགའ་དོན་གྲུབ་རིན་ཆེན་དབང་གི་རྒྱལ་པོ་ཞེས་གསོལ། སྐུ་སྐྱེད་རིམ་གྱིས་བསྲིང་པ་ན་རྫིང་ན་གནས་པའི་པདྨ་བཞིན་ལེགས་པའི་དཔལ་དང་ཡོན་ཏན་ཐམས་ཅད་ཆེས་ཆེར་འཕེལ་བར་གྱུར་ཏོ།། དེ་ནས་བཤད་སྒྲུབ་ལས་གསུམ་གྱི་སྒོ་ནས་རྒྱལ་བསྟན་རིན་པོ་ཆེ་ལ་འཛིན་སྐྱོང་སྤེལ་གསུམ་དང་། གདུལ་བྱ་མཐའ་དག་སྨིན་ཅིང་གྲོལ་བའི་ཕྲིན་ལས་རླབ་པོ་ཆེ་མཛད་པའི་ཚུལ་ཆེ་ལོང་ཙམ་ནི། དགུང་ལོ་བཞི་པའི་དུས་ཡབ་རྗེ་གསང་བདག་ཆེན་པོ་ལས་བཀའ་བརྒྱད་གསང་རྫོགས་ཀྱི་དབང་གསན་སྐབས། ཡུལ་སྣང་ཐམས་ཅད་ཚོམ་བུ་དགུའི་དཀྱིལ་འཁོར་དུ་ཤར། བླ་མ་ཉིད་དཀྱིལ་འཁོར་གྱི་གཙོ་བོ་དཔལ་ཆེན་པོར་གཟིགས། དྲེགས་པ་རྣམས་ཟིལ་གྱིས་མནན། ཐུགས་རྒྱུད་ལ་དབང་གི་ས་བོན་ཐེབས། དགུང་ལོ་དགུ་པའི་དུས་ཡབ་རྗེ་ལས་སྐྱབས་གསུམ་འཛིན་པའི་དགེ་བསྙེན་དང་། བཅུ་གཅིག་པ་ལ་ཀུན་མཁྱེན་ལྔ་པ་ཆེན་པོའི་མདུན་དུ་གཙུག་ཕུད་ཕུལ་ནས་ཡོངས་རྫོགས་དགེ་བསྙེན་གྱི་སྡོམ་པ་བླངས། མཚན་ངག་དབང་པདྨ་བསྟན་འཛིན་ཞེས་གནང་། སོ་སོར་ཐར་བའི་ཁྲིམས་ཀྱི་སྤང་བླངས་མཐའ་དག་ལ་གཅེས་སྤྲས་སྤྱན་གྱི་འབྲས་བུ་ལྟར་མཛད། དགུང་ལོ་བཅུ་པར་ཡབ་རྗེ་ལས་ལུགས་གསུམ་གྱི་བྱང་སྡོམ་བླངས། རྡོ་རྗེ་བྲག་རིག་འཛིན་སྤྲུལ་པའི་སྐུ་མཆོག་པདྨ་ཕྲིན་ལས་དང་། སྤྲུལ་པའི་སྐུ་མཆོག་བཟང་པོ་དཔལ་ལས་བྱང་ཆུབ་སེམས་བསྐྱེད་ཀྱི་ཆོ་ག་བཀའ་སྲོལ་གཉིས་ཀ་གསན། བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་བཅོས་མ་མ་ཡིན་པ་ཐུགས་རྒྱུད་ལ་འཁྲུངས། ཡང་དགུང་ལོ་བཅུ་པའི་དུས་ཡབ་རྗེ་ལས་བཀའ་བརྒྱད་བདེར་འདུས་ཀྱི་དབང་གསན་དུས་འོད་གསལ་ཉམས་ཀྱི་སྣང་བ་ཤིན་ཏུ་ངོ་མཚར་བ་གཟིགས་པའི་རྐྱེན་གྱིས་དབང་དོན་གྱི་ཡེ་ཤེས་མངོན་དུ་རྟོགས། གཞན་ཡང་སྔ་ཕྱི་ཅི་རིགས་པར་བླ་མ་བརྟེན་པའང་རགས་རིམ་ཞིག་སྨོས་ན། ལྷོ་བྲག་གསུང་སྤྲུལ་ཚུལ་ཁྲིམས་རྡོ་རྗེ། ཟུར་ཆེན་ཆོས་དབྱིངས་རང་གྲོལ། རིག་འཛིན་དཀོན་མཆོག་ལྷུན་གྲུབ། ཐུགས་སྲས་སྤྲུལ་པའི་སྐུ་བསྟན་འཛིན་འགྱུར་མེད། མདོ་ལུང་ཚུལ་ཁྲིམས་རྒྱལ་མཚན། རས་ཆེན་ཀརྨ་གསང་སྔགས། ཀ་བཅུ་ཀརྨ་ཚེ་མཆོག ལུང་མང་སྡོམ་བརྩོན་ཀུན་དགའ་དར་རྒྱས། བླ་མ་བསྟན་འཛིན་ལུང་རིག གྲུབ་ཆེན་དམ་པ་མགོན་པོ་བསོད་ནམས་མཆོག་ལྡན། ལྕགས་ཟམ་པ་ཀུན་དགའ་བསོད་ནམས། སྤ་གྲོ་བ་ཆོས་དབང་ལྷུན་གྲུབ། མཚུར་ཕུ་རྒྱལ་ཚབ་གྲགས་པ་མཆོག་དབྱངས། སྒོ་མོ་ཆོས་རྗེ་ཤཱཀྱ་རིན་ཆེན། རྟོགས་ལྡན་པདྨ་ཡེ་ཤེས། ལྷ་རྩེ་སྤྲུལ་པའི་སྐུ། སེམས་དཔའ་ཕྲིན་ལས་རྒྱ་མཚོ། གོང་ར་ལོ་ཆེན། གུང་ཐང་པཎ་ཆེན། པཎ་ཆེན་ལུང་རིག་རྒྱ་མཚོ་སྟེ་གསར་རྙིང་གི་མཁས་གྲུབ་གྲངས་མང་པོ་བརྟེན་ནས་དམ་པའི་ཆོས་ཀྱི་བདུད་རྩི་ནོད་པའི་རིམ་པ་ལའང་། དང་པོ་ཐོས་བསམ་ལ་བསླབ་སྦྱང་དང་རྩོལ་བ་ནན་ཆེར་མཛད་དེ། ཐུན་མོང་གི་རིག་པ་ཡི་གེའི་བརྡ་དག་ཡན་ཆོད་ནས་ཐུན་མིན་གྱི་གཞུང་ལུགས་རྒྱུད་ཀྱི་བཤད་པ་མན་ཆོད་གསར་རྙིང་གི་ཕལ་མོ་ཆེ་དང་། རང་གཞན་གྱི་གྲུབ་མཐའི་འདོད་ལུགས་སོགས་ལ་མི་མཁྱེན་པ་མེད་པ་ལྟ་བུ་ཤེས་རབ་གསུམ་གྱི་སྟོབས་ཀྱིས་གཏན་ཕབས་ཏེ་སྒྲོ་འདོག་ནང་ནས་ཆོད་པར་མཛད་དོ།། སྨིན་གྲོལ་རྒྱབ་བརྟེན་དང་བཅས་པ་གསན་པའི་རིམ་པ་ནི། རྒྱས་པར་གསན་ཡིག་དང་རྣམ་ཐར་དུ་གསལ་ལ། མདོར་བསྡུས་ན་གསང་སྔགས་སྔ་འགྱུར་བའི་ཕྱོགས་འདིར་བཀའ་གཏེར་མན་ངག་གི་ཟབ་ཆོས་དབང་ལུང་ཁྲིད། བཀའ་གཏད་བྱིན་རླབས་རྗེས་གནང་སོགས་ཀྱི་རྒྱུན་ཞིག་བཞུགས་སོ་འཚལ་ལ་བདག་ཉིད་ཆེན་པོ་འདིས་མ་གསན་པ་གཅིག་ཀྱང་ཨེ་ཡོད་ན་སྙམ་པ་འདུག་ལ། གསར་མའི་ཆོས་སྐོར་ཀྱང་ཚན་ཆེ་གསན་པར་སྣང་། དེ་དག་གི་སྐབས་དང་བར་མཚམས་སྔ་ཕྱི་རྣམས་སུ་ཐོས་དོན་ཉམས་སུ་བཞེས་ཏེ་སྐུ་མཚམས་ཀྱི་བཅད་རྒྱ་བསྡམ་པའང་། རེས་ལོ་འཁོར་སྦྲེལ་མ་དང་། རེས་ཟླ་གཅིག་གིས་མཐའ་བརྟེན་པ་ཡན་ཆད་ལ་བཞུགས་པ་བརྩིས་ན་སྐུ་ཚེ་གང་པོ་དེ་ལ་བསྙེན་བསྒྲུབ་མཛད་པ་འདྲ་ལ། དེའི་ཚེ་དང་དེའི་དུས་རྣམས་སུ་མ་དག་འཁྲུལ་བའི་ཀུན་རྟོག་དབྱིངས་སུ་ནུབ་པའི་རང་རིག་འོད་གསལ་དག་པ་ཡེ་ཤེས་ཀྱི་སྣང་བ་འབྱམས་སུ་ཀླས་པའི་སྣང་ངོར། བླ་མ་དང་ཡི་དམ། སངས་རྒྱས་དང་བྱང་སེམས། མཁའ་འགྲོ་དང་ཆོས་སྐྱོང་། དཀོར་བདག་དང་གཞི་བདག་ལ་སོགས་པས་ཞལ་གཟིགས་པ་དང་། ལུང་བསྟན་པ་དང་། དབང་བསྐུར་བ་དང་། བྱིན་གྱིས་བརླབས་པ་དང་། དམ་མནོས་པ་དང་། ཕྲིན་ལས་བསྒྲུབ་པ་ལ་སོགས་པའི་ཚུལ་ནི་བསམ་གྱིས་མི་ཁྱབ་པ་རྣམ་ཐར་དུ་གསལ་ལོ། །སྔར་སྨོས་པའི་བླ་མ་དེ་རྣམས་ཀྱི་ནང་ནས་ཁྱད་པར་བཀའ་དྲིན་མཚུངས་པ་མེད་པའི་མཆོག་གི་བླ་མ་རྣམ་གཉིས་ཞེས་གསུངས་པའི་གཅིག་ནི་གསང་བདག་དཔའ་བོ་ཕྲིན་ལས་ལྷུན་གྲུབ་སྟེ་གསང་གསུམ་རྒྱན་གྱི་འཁོར་ལོའི་ཡེ་ཤེས་དང་ཡོན་ཏན་ཐམས་ཅད་ཡབ་རྗེ་འདི་ལས་འཁྲུངས་པའི་ཕྱིར་སྨྲ་མ་དགོས་ལ། གཅིག་ནི་ལྷ་མིའི་སྟོན་པ་ཀུན་མཁྱེན་རྒྱལ་བའི་དབང་པོ་གོང་ས་ལྔ་པ་ཆེན་པོ་སྟེ། དེ་ནི་རེས་འགའ་འཕགས་མཆོག་སྤྱན་རས་གཟིགས་དང་། རེས་འགའ་ཆོས་རྒྱལ་ཁྲི་སྲོང་ལྡེའུ་བཙན་དུ་མཐོང་ཞིང་། ཟབ་པ་དང་རྒྱ་ཆེ་བའི་ཆོས་ཕལ་ཆེ་བ་དང་། གཙོ་བོ་རྒྱལ་བའི་དབང་པོ་ཉིད་ཀྱི་དག་སྣང་གི་ཟབ་ཆོས་རྒྱ་ཅན་དུ་གྲགས་པ་རྩ་བ་བུ་ཡིག་དང་བཅས་པ་བུམ་པ་གང་བྱོའི་ཚུལ་དུ་གསན། སངས་རྒྱས་དངོས་ལྟ་བུའི་གུས་འདུད་དང་བཀུར་སྟི་མཛད། ཟང་ཟིང་གི་དངོས་པོ་གྱ་ནོམ་པས་མཆོད། ཁྱད་པར་ཤ་འུག་གཏེར་བྱོན་གྱི་རྫས་ཛྷཻ་ཀྵིམ་ལས་གྲུབ་པའི་ཐུགས་རྗེ་ཆེན་པོ་གསང་སྒྲུབ་ཀྱི་སྐུ་དང་། ཐབས་ཤེས་བདེ་ཆེན་རིལ་བུ་བརྒྱ་ཕྲག་ལྷག་བཅས་ཕུལ་བས་མཉེས་པའི་མཆོག་ཏུ་གྱུར། སྐུ་དངོས་ཀྱི་བཀའ་དྲིན་གྱིས་བསྐྱང་བར་མ་ཟད། ཡེ་ཤེས་སྒྱུ་མའི་སྐུས་ཀྱང་ཡང་ཡང་རྗེས་སུ་བཟུང་ནས་བྱིན་གྱིས་བརླབས་སོ།། དེ་ཡང་དེ་ཙམ་འབའ་ཞིག་ཏུ་ནི་མ་ཟད་དེ། རྒྱལ་དབང་རིན་པོ་ཆེ་དེ་ཉིད་ཀྱི་རྩ་བའི་བླ་མ་ཐུན་མོང་མ་ཡིན་པ་ཡང་རྗེ་འདི་པ་ལགས་ཏེ། ཐོག་མདའི་རྒྱ་ཅན་ལས། རྣལ་འབྱོར་རྡོ་རྗེའི་སྤྲུལ་པ་མེ་ཡི་ཁམས། །ལྷོའམ་ཤར་ལྷོའི་ཕྱོགས་ནས་འབྱུང་བར་ངེས། །ཞེས་དང་། ནོར་བུའི་རྒྱ་ཅན་ལས། ཨོ་རྒྱན་ཐུགས་སྤྲུལ་སྦས་ཚུལ་མ་ངེས་པ། །བྱུང་དང་རྟེན་འབྲེལ་འགྲིགས་ན་བོད་འདིར་བདེ། །ཞེས་དང་། གཞན་ཡང་དཔལ་བེའུ་དང་རྒྱལ་མཚན་གྱི་རྒྱ་ཅན་ལ་སོགས་པའི་ཆོས་ཚན་མང་པོར་གཟིགས་སྣང་བྱུང་ཚུལ་དུ་མ་སྣང་ལ། གྲུ་འཛིན་གྱི་རྒྱལ་ཁབ་ཆེན་པོ་ཁོ་ན་ལའང་ལན་ཉི་ཤུ་རྩ་གྲངས་ཤིག་སྤྱན་དྲངས་ཏེ་ཟབ་རྒྱས་སྨིན་གྲོལ་གྱི་ཆོས་མཛོད་རྒྱ་མཚོ་ལྟ་བུ་གསན། ལས་བཞི་བསྲུང་བཟློག་གི་སྐུ་རིམ་མཐའ་ཡས་པ་བསྒྲུབ་པར་ཞུས། ཟང་ཟིང་ལོངས་སྤྱོད་ཀྱི་དངོས་པོ་ཕུལ་བ་ཙམ་ཡང་རིན་ཐང་གིས་མི་ཆོད་དེ། དཔེར་ན་ལན་རེ་ལ་དངུལ་སྲང་བརྒྱད་བརྒྱ་དང་བརྒྱད་ཅུ་རྩ་བཞི་ཙམ་གྱི་རིན་ཐང་གི་ཡོ་བྱད་དང་། ཡང་ལན་གཉིས་གསུམ་ལ། དངུལ་གྱི་མཎྚལ་ལ་གསེར་ཞོ་སོ་བདུན་གྱི་ཚོམ་བུ་བཀོད་པ། ཆེན་པོ་ལ་འོས་པའི་ན་བཟའ་ཆ་འགྲིག བཟང་གོས་བྱིང་ཡུག་སྣ་ལྔ་དང་བཅས་པ་ལྟ་བུ་དང་། གཞན་ཡང་སྔ་ཕྱི་ཅི་རིགས་པར་དངུལ་བྲེ་ཆེན་གྱིས་མགོ་བྱས་པའི་ཚན་གྲངས་སྣ་བྲག་ཕུལ་བ་ལྟ་བུ་ལ་བརྩིར་ཅི་ཡོད། གདན་ས་དང་ཞབས་ཏོག་གི་གཞིར་ཡང་བཟང་ཡུལ་བཀྲ་ཤིས་སྟོང་སྐོར་གྱི་ས་ཆ་དང་། གྲྭ་ཕྱི་འབྲས་ཀྱི་ཕུ་ཐར་པ་གླིང་གི་དགོན་སྡེ་ལྷ་འབངས་དང་བཅས་པ་དང་། སྐྱི་རུ་དར་རྒྱས་ཁང་གསར་སྐོར་གྱི་སྡེ་དུད་ས་རིས་དང་བཅས་པ་རྣམས་མཆོད་གཞིས་སུ་སྦྱོར་འཇགས་ཀྱི་བཀའ་དྲིན་བསྩལ། གཞན་ཡང་སྡེ་སྲིད་སངས་རྒྱས་རྒྱ་མཚོ། བློ་བཟང་མཐུ་སྟོབས། བློ་བཟང་སྦྱིན་པ་རྣམས་དང་། མཚོ་སྔོན་རྒྱལ་ཞབས། གོང་ས་ལྔ་པའི་ཡང་སྲིད་སྔ་ཕྱི་གཉིས་ཀ་སོགས་བོད་ཀྱི་གོང་མ་མི་ཆེན་ཐམས་ཅད་ཀྱིས་གཙུག་གི་བླ་མར་བརྟེན། དེར་མ་ཟད་གོང་མའི་ལུང་གིས་ཏཱི་ཤྲཱི་ཏུ་བཀུར་ནས་མདུན་ན་འདོན་གྱི་གཙོ་བོ་ཡང་ཡིན་ཏེ། སྡེ་སྲིད་རྣམས་ལ་ཁྲི་འབུལ་སོགས་དགྱེས་སྟོན་དང་། ལྷན་རྒྱས་ཀྱི་གྲལ་དབུར་བཞུགས་པ་དང་། ཚོམས་ཆེན་དང་། རྫོང་རྒྱབ་དག་ཏུ་མཆོག་དམན་མཐའ་དག་འདུས་པའི་བཞུགས་གྲལ་གྱི་ཐོག་ལུང་རིགས་ཀྱི་ལམ་ནས་དྲངས་པའི་གཏམ་རྒྱལ་ཞབས་རིན་པོ་ཆེ་ནས་གྲུབ་མཐའ་རིས་མེད་སྐྱོང་བའི་ལུང་བཟང་པོ་བསྒྲགས་པ་བཀའ་དྲིན་ཆེ་ཚུལ་གྱི་སྙན་ཞུས་རེ་ཕུལ་དུས། གོང་མ་ཤིན་ཏུ་མཉེས་ཤིང་གྲལ་འཁོད་ཀྱི་དཔྱོད་ལྡན་རྣམས་ཡི་རང་མཛད། རྒྱུ་མཚན་དེས་ན་དེང་སང་གཞུང་ས་དགའ་ལྡན་ཕོ་བྲང་གི་གོང་མ་རྩེ་ཤོད་བཀའ་བློན་དང་བཅས་པས་སྨིན་གླིང་ཁྲི་རབས་གྲྭ་འབངས་སློབ་རྒྱུད་དང་བཅས་པ་ལ་བརྩི་མཐོང་དང་བདག་རྐྱེན་གྱི་སྔར་རྒྱུན་བཟང་པོ་མ་ཉམས་པར་ཡོད་པ་ནི། རྗེ་དེ་ཉིད་ཀྱི་བཀའ་དྲིན་དང་ཕྱག་རྗེས་སོ།། དེ་ལྟར་དམ་པ་འདི་ཉིད་ཀྱི་སྐུ་ཚེའི་སྟོད་སྨད་ཅི་རིགས་པར་ཆོས་འཁོར་རྣམ་གསུམ་གྱི་གཙོས་དབུས་གཙང་རུ་བཞིའི་གནས་རྟེན་ཆེ་ཕྲ་ཀུན་ཏུ་བྱོན་ནས་མཆོད་སྦྱིན་དང་འབྲེལ་འཇོག་བགྱིས་པའི་ཚེ། བཻ་རོ་དང་ཟུར་ཆེན་ལ་སོགས་པའི་དུས་ཀྱི་བཟང་པོའི་བག་ཆགས་མང་པོ་སྔོན་གནས་རྗེས་དྲན་དུ་མདངས་སུམ་ཀྱི་རྨི་ལམ་ལྟར་སད། ཁྱད་པར་གངས་ཅན་སྟོན་པའི་ཞལ་སྐྱིན་ལྷ་ལྡན་ཇོ་བོ་རིན་པོ་ཆེ་མཇལ་དུས་དེ་ཉིད་ནམ་མཁའ་ལ་འཕགས་ཤིང་། ཞལ་ནས་གཟུངས་སྔགས་ཀྱི་སྒྲ་དང་ཐུགས་ཀ་ནས་འོད་ཟེར་སྤྲོ་བ་སོགས་མཛད་ནས་བྱིན་གྱིས་བརླབས། གཞན་ཡང་ས་སྐྱ་དང་། བཀྲ་ཤིས་ལྷུན་པོ། འབྲི་གུང་དང་བདེ་ཆེན་ཆོས་འཁོར་སོགས་རིས་མེད་པའི་ཆོས་སྡེ་ཆེན་པོ་རྣམས་དང་། དཔོན་ཁག་དང་ཡུལ་གྲོང་སོ་སོས་སྤྱན་དྲངས་ཤིང་དེ་དག་ཏུ་ཆིབས་བསྐྱོད་དེ་མཆོག་དམན་བར་མའི་གདུལ་བྱ་བསམ་གྱིས་མི་ཁྱབ་པ་ཐེག་པ་གསུམ་གྱི་ལམ་དང་བདེ་འགྲོར་བཀོད་པ་དང་། ངན་སོང་ནས་དྲངས་ཤིང་འཁོར་བ་མཐའ་ཅན་དུ་མཛད་པ་ནི་འདིར་བརྗོད་ཀྱིས་མི་ལངས་ཏེ། མདོར་ན་སྐྱེས་བུ་ཆེན་པོ་འདི་མཐོང་ཐོས་དྲན་རེག་གི་སེམས་ཅན་ཐམས་ཅད་འབྲེལ་ཚད་དོན་ལྡན་ཁོ་ན་ཡིན་པར་ངེས་ཏེ། རྡོར་གླིང་ཞལ་ཆེམས་ལས། དེ་དུས་ལུས་ངག་ཡིད་གསུམ་གྱིས། །འབྲེལ་བ་གང་ལྟར་ཐོགས་པ་ཡང་། །རིགས་དྲུག་འཁོར་བ་དོང་ནས་སྤྲུགས། ཅེས་སོགས་དང་། གབ་རྒྱ་ཅན་གྱི་ལུང་བྱང་ལས། འདི་འདྲའི་སྐྱེས་བུ་འབྲེལ་ཚད་དོན་དང་ལྡན༔ བཟང་ངན་འབྲེལ་ཚད་དཔལ་རིའི་ཞིང་དུ་ཁྲིད༔ ཅེས་སོགས་རྒྱ་ཆེར་གསུངས་པས་མཚོན་ཏེ་ཤེས་པར་བྱའོ།། དེ་ལས་ཀྱང་ཨོ་རྒྱན་གཏེར་བདག་གླིང་པ་ཞེས་མཚན་གྱི་གྲགས་པ་སྙན་པོས་རྣམ་པར་དཀར་བའི་འཇིག་རྟེན་ཀུན་ནས་མཛེས་པ་ལྟར། ཟབ་གཏེར་གྱི་སྐལ་བ་བཟང་པོ་ལ་ཇི་ལྟར་སྤྱད་པའི་ཚུལ་ནི། ཤིན་ཏུ་མདོར་བསྡུ་ན། དགུང་ལོ་བཅུ་བདུན་བཞེས་པ་ཆུ་ཕོ་སྟག་གི་ལོ་ཧོར་ཟླ་དགུ་པའི་ཚེས་བཅུའི་ནུབ་རང་གནས་དར་རྒྱས་གླིང་གི་གཟིམ་ཆུང་བསམ་གཏན་སྦུག་ཏུ་བཞུགས་པའི་མནལ་ལམ་དུ་གཏེར་ཆེན་རྡོ་རྗེ་གླིང་པ་དཔའ་བོ་མཁའ་འགྲོའི་འཁོར་དང་བཅས་པས་བྱིན་གྱིས་བརླབས་ཤིང་། ཟབ་མོའི་གཏེར་ལ་དབང་བར་བརྡ་ཐབས་དུ་མའི་སྒོ་ནས་ལུང་བསྟན། ཧོར་ཟླ་བཅུ་པའི་ནང་ལྷོ་བྲག་ཆག་གི་བྱང་ཆུབ་གླིང་ན་བཞུགས་པའི་སྐབས། ཚེས་ཉེར་ལྔའི་ཉིན་བྲག་སྐྱིབས་ཤིག་ཏུ་ཟབ་གཏེར་དང་པོའི་ཁ་བྱང་མངོན་སུམ་དུ་རྙེད། བཅོ་བརྒྱད་པ་ཆུ་མོ་ཡོས་ཀྱི་ལོ་ཧོར་ཟླ་བཞི་པའི་ཚེས་ཉེར་ལྔའི་ནུབ་མ་དང་མཁའ་འགྲོས་གཏེར་འདོན་པའི་དུས་དང་ཚེས་གྲངས་ལུང་བསྟན། ཧོར་ཟླ་ལྔ་པའི་ཚེས་ལྔའི་ནམ་སྟོད་ལ་བབས་པ་ན་ཞབས་ཕྱི་དབང་ཕྱུག་རྒྱལ་ཞེས་པ་ཁྲིད་དེ། ཤིན་ཏུ་གསང་ཐབས་ཀྱིས་དགོན་པ་ནས་ཞབས་ཐང་གིས་ཕེབས། ཚེས་བདུན་ལ་བྲག་དམར་གཡའ་མ་ལུང་དུ་འབྱོར། བརྒྱད་དང་དགུ་ལ་བསང་དང་གཏོར་བསྔོ་ཚོགས་མཆོད་དང་གསོལ་འདེབས་མཛད། ཚེས་བཅུའི་ཉི་ཤར་ཙམ་ལ་གནས་དེ་ཉིད་ཀྱི་ཚེ་ཆུ་བྲག་གི་ལྷོ་ངོས། བྲག་རྒྱ་སྟག་ཉལ་བ་ལྟ་བུའི་ལོགས་ནས་བསེ་སྒྲོམ་དམར་སྨུག་ཆག་གང་བ་ཞིག་དང་། ལ་བསེའི་གའུ་མཁྱུད་གང་བ་ཞིག་གསང་གཏེར་དུ་བཞེས། གཏེར་ཤུལ་དུ་རིན་པོ་ཆེ་འབྲུ་སྨན་སོགས་ཀྱི་དཀོར་ཆས་གཏམས། གཏང་རག་གི་ཚོགས་འཁོར་ཕུལ། ཚེས་བཅུ་གཉིས་ཀྱི་ནམ་སྟོད་སྔར་ལྟར་དགོན་ནང་དུ་ཕྱིར་བྱོན། བཅུ་གསུམ་ལ་བསེ་སྒྲོམ་ཞལ་དབྱེ་བས་ཚེ་སྒྲུབ་ཡང་སྙིང་ཀུན་འདུས་ཀྱི་ཆོས་ཚན་དང་། ཚེ་རིལ་ཧྲཱིཿརྒྱ་ཅན་རྣམས་བྱུང་། ཤིང་འབྲུག་ལོ་བསམ་ཡས་མཆིམས་ཕུར་བཅད་རྒྱ་ལ་བཞུགས་པའི་སྐབས་ཤིག་གཏེར་སྣོད་གའུ་ཞལ་དབྱེ་བ་ལས་ཟབ་ཆོས་རིག་འཛིན་ཐུགས་ཐིག་གི་ཆོས་སྐོར་དང་། གུ་རུའི་སྐུ་ཚབ་ཆེ་ཆུང་གཉིས། དམ་རྫས་མྱོང་གྲོལ་ལེའུ་གསུམ་བཅས་བྱུང་། དེ་དུས་སྐབས་ཤིག་ཨོ་རྒྱན་ཡབ་ཡུམ་གྱིས་ཚེ་ཡི་བྱིན་རླབས་དང་དབང་བསྐུར་སོགས་གནང་། ཤིང་སྦྲུལ་ཟླ་བ་དྲུག་པའི་ནང་གཡའ་མ་ལུང་དུ་བྱོན་ནས་ཚེ་སྒྲུབ་ཞག་བདུན་མཛད། ཟླ་བ་བརྒྱད་པའི་ནང་དར་རྒྱས་གླིང་གཟིམ་ཆུང་དུ་རིག་འཛིན་བསྙེན་བསྒྲུབ་ཟླ་བ་གཅིག་ལ་མཛད། དེ་ནས་རྩ་བའི་ཆོས་བདག་ལོ་ཆེན་རིན་པོ་ཆེ་དང་། དཔལ་རི་སྤྲུལ་པའི་སྐུ་སོགས་ལ་གཏད། དགུང་ལོ་ཉེར་གཉིས་བཞེས་པ་མེ་ལུག་ཟླ་བ་གསུམ་པའི་ཚེས་བཅུའི་ཐོ་རེངས་ལ་མཁའ་སྤྱོད་ཞིང་སྐྱོང་གི་དགའ་མས་དགའ་བཞིའི་བདེ་བས་མཆོད་ཅིང་ཟབ་གཏེར་གཉིས་པའི་ཁ་བྱང་ཕུལ། འདི་དར་རྒྱས་གཟིམ་ཆུང་དུ་བཅད་རྒྱར་བཞུགས་སྐབས་ལགས། ཟླ་བ་བརྒྱད་པའི་ཚེས་གསུམ་གྱི་ནུབ་མནལ་ལམ་དུ་གཏེར་སྲུང་རྡོ་རྗེ་ལེགས་པས་གཏེར་འདོན་པའི་དུས་སོགས་བསྐུལ་མ་བྱས། ཚེས་ལྔའི་ཐོ་རེངས་ཀྱི་དུས་ཚོད་ལ་བབས་ཚེ་ཉེ་གནས་ཕྲིན་ལས་མཐར་ཕྱིན་དང་། གཉེར་པ་བསྟན་རྒྱས་ཏེ་དཔོན་གཡོག་གསུམ་རྣལ་འབྱོར་པའི་ཆས་སུ་ཞུགས་ཏེ་གཞན་གྱིས་ལྐོག་གྱུར་དུ་གདན་ས་ནས་ཞབས་བསྐྱོད་དེ་ཕེབས། བདུན་གྱི་མུན་རུབ་ཙམ་ལ་ཡར་ལུང་ཤེལ་བྲག་གི་གནས་ནང་དུ་ཕེབས། བརྒྱད་ཀྱི་སྔ་དྲོ་དེར་བཞུགས་ཀྱི་བླ་སློབ་རྣམས་དང་མཉམ་དུ་ཚོགས་མཆོད་མཛད། དགུང་མོའི་དུས་སུ་གནས་དེའི་ཤར་ལོགས་ཀྱི་བྲག་རི་རྒྱལ་མཚན་འདྲ་བའི་ངོས་མེ་ལོང་ལྟ་བུ་མཐོང་ན་འཇིགས་པའི་སར་རྫུ་འཕྲུལ་གྱིས་གཤེགས་ཏེ་གུར་ཕུབ་པ་ལྟ་བུའི་ཕུག་པ་ཞིག་གི་ནང་དུ་བྱོན་པ་ན། བུད་མེད་གཞོན་ནུ་མཛེས་སྡུག་ཅན་ཞིག་གིས་ཤོག་དྲིལ་གཉིས་དང་། སྐྱེས་པ་བཞིན་བཟང་ཆས་གོས་དཀར་པོ་ཅན་ཞིག་གིས་བསེ་ཡི་གའུ་གྲུ་གསུམ་པ་མཁྱུད་གང་བ་ཞིག་ཕྱག་ཏུ་ཕུལ་བ་བཞེས་ཏེ། སླར་ཡང་ཕྱིར་ལམ་ལ་སྔར་ལྟར་བྱོན་ནས་གནས་ནང་དུ་བཞུགས། ནང་བར་རིམ་བཞིན་བྱོན་ནས་བཅུ་གཉིས་ཀྱི་སྲོད་ཡོལ་ཙམ་ལ་གདན་སར་བྱོན། ཤོག་དྲིལ་དང་གའུ་ཞལ་དབྱེ་བ་འཇམ་དཔལ་ཞི་ཁྲོའི་ཆོས་སྐོར་རོ།། ཟླ་བ་དེའི་ཚེས་ཉི་ཤུ་ནས་ཟླ་བ་གཉིས་ལ་གཟིམ་ཆུང་དུ་འཇམ་དཔལ་གཤིན་རྗེའི་བསྙེན་བསྒྲུབ་མཛད་པའི་སྐབས་ཤིག་དངོས་ཀྱི་སྣང་བར་དཔལ་རི་པདྨ་འོད་ཀྱི་ཞིང་ཁམས་སུ་གཤེགས་ཏེ། ཨོ་རྒྱན་པདྨ་བཛྲ་རྗེ་བཙུན་འཇམ་དཔལ་དབྱངས་ཀྱི་སྐུར་བཞེངས་ཤིང་། ནམ་མཁའ་ཐམས་ཅད་འཇམ་དཔལ་ཁྲོ་བོའི་དཀྱིལ་འཁོར་དུ་ཤར་བའི་དྲུང་དུ་ལོ་ཆེན་བཻ་རོ་དང་། མཁར་ཆེན་མཚོ་རྒྱལ་གཉིས་ཀྱིས་ལས་རྡོར་གྱི་བྱ་བ་མཛད་དེ་དབང་བཞི་ཡོངས་རྫོགས་དང་། སླར་དཀྱིལ་འཁོར་གྱི་སྣང་ཆ་འོད་དུ་ཡལ་བ་ཨོ་རྒྱན་ཆེན་པོ་དངོས་སུ་གྱུར་པ་དང་། བཻ་རོ་དང་། མཚོ་རྒྱལ་གསུམ་གྱིས་མན་ངག་གི་ཟབ་དོན་རྣམས་གདམས་ཤིང་གནང་ངོ།། དེ་ནས་ཆོས་ཀྱི་བདག་པོ་སྐྱབས་མཆོག་ལྔ་པ་དང་གཅུང་། རྒྱལ་བའི་སྲས་པོ་ལ་སོགས་པར་གཏད་དོ།། དགུང་ལོ་ཉེར་དགུ་པ་ཤིང་སྟག་གི་ལོ་ཟླ་བ་བཅུ་གཅིག་པའི་ནང་། ལྷོ་བྲག་དཀར་པོ་ཟངས་ཞེས་བྱ་བ་ན་བཞུགས་སྐབས། ཚེས་བཅུའི་ཐོ་རེངས་ལ་གཟིམ་ལམ་གྱི་ངོགས་སུ་མཁའ་སྤྱོད་ཀྱི་མཁའ་འགྲོ་མ་མོན་མོའི་ཆས་ཅན་ཞིག་གིས་ཟབ་གཏེར་གསུམ་པ་དང་བཞི་པ་གཉིས་ཀྱི་ཁ་བྱང་མཉམ་དུ་ཕྱག་ཁར་ཕུལ། སུམ་ཅུ་པ་ཤིང་ཡོས་སྦྲུལ་གྱི་ཟླ་བ་ནི། དཔལ་བསམ་ཡས་དབུ་རྩེའི་སྟེང་ཁང་ནས། ཡང་དག་གི་སྒྲུབ་སྐོར་སོགས་ཀྱི་ཟབ་གཏེར་འདོན་པའི་དུས་ཡིན་ཅིང་དེ་བཞེས་རྒྱུ་ཞིག་བྱུང་ན་དེའི་རྟེན་འབྲེལ་གྱིས་རྒྱ་ནག་རི་བོ་རྩེ་ལྔ་ན་གཏེར་ཆེན་རྡོ་རྗེ་གླིང་པའི་གཏེར་ཞབས་ཤིག་འདོན་རྒྱུ་ཡོད་ཅིང་། དེ་དུས་གོང་མ་ཆེན་པོའི་དབུའི་མཆོད་གནས་སུ་བཀུར་བར་འགྱུར་ཞིང་། བོད་འདིར་ཡང་ཕན་བདེ་ཆེར་འབྱུང་བ་སོགས་ཡིན་པའི་ངེས་པ་ནི། རྡོར་གླིང་ཞལ་ཆེམས་ལས། སྔར་དྲངས་པའི། །རྫུ་འཕྲུལ་མངོན་ཤེས་ལྡན་པ་འབྱུང།་། ཞེས་པའི་འཕྲོར། བན་བོན་གཏེར་ལྷག་མ་ལུས་འབྱིན། །སྨྱོ་སྤྱོད་བརྟུལ་ཞུགས་མཐར་ཕྱིན་ནས། །དུག་ལྔས་བསེ་ལྟར་རངས་པ་ཡི། །དཔོན་སྐྱ་མི་ཆེན་ཐམས་ཅད་དང་། །རྒྱ་ནག་ཧོར་གྱི་རྒྱལ་པོ་ཡང་། །ཞི་རྒྱས་དབང་དྲག་མངོན་སྤྱོད་ཀྱིས། །མ་ལུས་ཁོ་བོས་དབང་དུ་སྡུད།། ཞེས་སོགས་དང་། རང་གཏེར་ཤ་འུག་གཏེར་བྱོན་གྱི་ལུང་བྱང་ལས། ཚེ་མཇུག་དམ་གཙང་ཡོན་བདག་དང་༔ གསང་སྤྱོད་རྟེན་འབྲེལ་འཛོམས་པ་ན༔ རི་བོ་རྩེ་ལྔའི་ཟབ་གཏེར་འདོན༔ མཐའ་དམག་ལོ་བརྒྱའི་བར་དུ་བཟློག༔ ཅེས་སོགས་གསུངས་ཀྱང་། དེ་ནི་སྤྱི་དུས་དང་། སྒོས་སྐབས་ཀྱི་རྟེན་འབྲེལ་འགའ་ཞིག་འཆུགས་པའི་རྐྱེན་གྱིས་འདོན་མ་གྲུབ་པར་འདུག་ཀྱང་། དེའི་རབས་ཀྱིས་འདིར་ཅི་ཞིག་བྱ་སྟེ་ཆོག་གོ ། དགུང་ལོ་སོ་གཅིག་བཞེས་པ་མེ་འབྲུག་གི་ལོ་ཟབ་གཏེར་བཞི་པ་འདོན་པའི་དུས། ལྷ་དང་བླ་མས་བསྐུལ་བ་ལྟར་སྟག་གི་ཟླ་བའི་ཚེས་བཅུ་བཞིའི་སྲོད་ཡོལ་ཙམ་གྱི་དུས་སུ། གཟིམ་དཔོན་བསྟན་འཛིན་དཔལ་བཟང་། དགེ་སློང་ངག་དབང་ཀུན་དགའ། ཇོ་ཇོ་ཨ་བཀྲ། ཨ་དྲུང་ཀུན་དགའ་བཅས་གྲྭ་སློབ་ལྔས་ཆིབས་འགྲོས་ཀྱིས་གདན་ས་ནས་སྦ་གསང་གིས་ཕེབས། དེ་ནུབ་ངམ་ཤོད་ཨོ་དཀར་བྲག་གི་གནས་རིའི་མགོན་པོ་གདོང་ཞེས་བྱ་བའི་བྲག་ཞོལ་དུ་བཞུགས། བཅོ་ལྔའི་ནང་བར་འཇའ་སྤྲིན་འཐིབ་པ་དང་ས་གཡོ་བ་སོགས་ཀྱི་ལྟས་བྱུང་། ཉིན་གུང་ཙམ་ལ་གནས་ཀྱི་སྙིང་པོ་གནམ་སྒོ་ཅན་དུ་གྲགས་པའི་ཕུག་པ་སྟེང་མའི་ནང་དེར་ཚོགས་མཆོད་དང་། གསོལ་འདེབས་སོགས་མཛད་ནས་གཏེར་སྒོ་ཕྱེ་ཚེ། གཏེར་གྱི་སྒྲོམ་བུ་ཚ་དྲོད་དང་ལྡན་པ་ཆེ་ཆུང་གཉིས་སྔགས་སྲུང་མས་མངོན་སུམ་ཕྱག་ཏུ་གཏད། གཏེར་ཁུང་དུ་རིན་ཆེན་འབྲུ་སྨན་ཤིས་བརྗོད་སོགས་དར་གྱིས་དྲིལ་བ་བཅུག །དེ་ནུབ་དེ་གར་བཞུགས་པའི་མནལ་ལམ་གྱི་སྣང་བར། རྔ་ཡབ་དཔལ་གྱི་རི་བོར་གཤེགས་ཏེ་གུ་རུ་པདྨ་རྒྱལ་པོ་རིག་འཛིན་མཁའ་འགྲོའི་འཁོར་དང་བཅས་པ་ལས་བླ་མ་དྲག་པོ་དང་། རྡོ་རྗེ་སེམས་དཔའ། ཨ་ཏི་ཟབ་དོན་དང་བཅས་པའི་ལམ་རིམ་པ་གཉིས་ཀྱི་གདམས་ངག་ཟབ་རྒྱས་སུ་ནོད། བཅུ་དྲུག་གི་ནམ་སྲོད་ཡོལ་ཙམ་ལ་གདན་སར་ཕེབས། གཏེར་སྒྲོམ་རྣམས་ཞལ་དབྱེ་བ་ལས་གུ་དྲག་དང་། རྡོར་སེམས་རྫོགས་ཆེན་དང་བཅས་པའི་ཆོས་སྐོར་རྣམས་བྱོན། བསྐྱེད་རྫོགས་ཀྱི་རིམ་པ་རྣམས་ཐུགས་ཉམས་སུ་བཞེས་ཏེ། ལོ་ཆེན་རིན་པོ་ཆེ་སོགས་ལ་གཏད་དོ།། དེ་ནས་གབ་རྒྱ་ཅན་གྱི་ལུང་བྱང་ལས། ཁྱད་པར་གནད་ཀྱི་རྟེན་འབྲེལ་འགྲིགས་གྱུར་ན༔ སོ་ལྔའི་ལོ་ལ་མན་ངག་ཟབ་མོའི་གནད༔ པདྨ་བདག་གི་སྙིང་ཁྲག་གཏེར་སྒོ་ཕྱེ༔ ཞེས་གསུངས་པ་ལྟར་དགུང་ལོ་སོ་ལྔ་པ་ལྕགས་ཕོ་སྤྲེལ་གྱི་ལོ་ཧོར་ཟླ་དང་པོ་ནས་བརྩམས། ཟབ་གཏེར་གྱི་བར་ཆད་བཟློག་པ་དང་། རྟེན་འབྲེལ་འགྲིགས་པའི་ཆེད་དུ་རིམ་གྲོ་རྒྱ་ཆེར་བསྒྲུབ། རྗེ་ཉིད་ཀྱང་སྐུ་མཚམས་དམ་པོར་བཞུགས་པ་ན། ཟླ་བ་དེའི་ཉེར་ལྔའི་ཉིན་ཉམས་ཀྱི་སྣང་བར་མཁའ་འགྲོ་ཡེ་ཤེས་མཚོ་རྒྱལ་གྱིས་ཟབ་གཏེར་ལྔ་པའི་ཁ་བྱང་ཕྱག་ཏུ་ལེགས་པར་གཏད། དེ་ལྟར་མཐུན་རྐྱེན་ལེགས་ཚོགས་རྟེན་འབྲེལ་ཐམས་ཅད་ཡིད་བཞིན་དུ་འགྲིགས་ནས་ཡང་བྱང་ལྟར། ཧོར་ཟླ་བདུན་པའི་ཚེས་བཅོ་ལྔ་ལ་སྟོན་འཁོར་ཉི་ཤུ་སྐོར་གྱིས་ཆིབས་ཁལ་སྒར་བཀོད་སོགས་ངོ་མཚར་བ་བསྒྲིགས་ནས་ལྷོ་མོན་གྱི་ཕྱོགས་སུ་ཆིབས་བསྐྱོད་དེ་བྱོན་པ་ན། དགེ་ཞིང་ཤིས་པའི་དུས་ཚེས་ཉེར་བརྒྱད་ཀྱི་ཉིན་པར་ཤ་འུག་ལྟག་སྒོ་བདེ་ཆེན་ཡེ་ཤེས་ཀྱི་འཁོར་ལོར་ཕྱག་ཕེབས། དེ་འཕྲལ་རྩ་གསུམ་དཀྱིལ་འཁོར་རབ་འབྱམས་ཚོགས་ཀྱི་འཁོར་ལོ་རྒྱ་ཆེན་པོས་མཆོད། ཉེར་དགུའི་ནང་བར་བསང་མཆོད་གསེར་སྐྱེམས་ཚོགས་གཏོར་རྒྱས་པར་གནང་ནས། བུ་མོ་སྤྲེལ་ལོ་མས་ལམ་སྣ་མཛད། ཐམས་ཅད་ཀྱིས་ལུས་ལ་རྫི་དུག་བསྲུང་བའི་སྨན་བྱུགས་ཏེ། གནས་ཀྱི་ལྟེ་བ་དཔལ་ཆེན་ཡབ་ཡུམ་གྱི་རྣམ་པ་ཅན་གྱི་བྲག་ངོས་སུ་ཕེབས། དེར་ཡང་གཏེར་སྲུང་སྤྱི་སྒོས་ལ་མཐུན་རྫས་མཆོད། ཨོ་རྒྱན་ལ་གསོལ་འདེབས་མཛད་ཅིང་བདེན་པའི་ཚིག་གི་བཀའ་བསྒོས། གཏེར་གནས་ཀྱི་ས་དམིགས་བཙལ། ལྟ་བའི་གདེངས་བསྐྱེད། རིག་པ་ཧུར་ཕྱུངས་ཏེ་བྲག་གསེང་མཁའ་གསང་འདྲ་བའི་ལྷོ་ངོས་ནས་གཏེར་སྒོ་རིམ་པ་གསུམ་ཕྱེ་བའི་ནང་ནས་གསེར་གཡུ་ལ་སོགས་པའི་རྫས་དང་། ཁྲོ་ལས་གྲུབ་པའི་སྒྲོམ་བུ་སྦུབ་རིལ་ཞིག་དང་། རང་གཏེར་གྱི་སྒྲོམ་བུ་གྲུ་བཞི་པ་ཞིག་ལེགས་པར་སྤྱན་དྲངས། དེ་དུས་ནམ་མཁའ་ལ་འཇའ་ཚོན་གྱི་གུར་ཕུབ་པ་དང་། མེ་ཏོག་གི་ཆར་བབས་པ་སོགས་ངོ་མཚར་བའི་ལྟས་དང་བཅས་ཏེ་ཟབ་གཏེར་བཞེས་པ་མོན་དང་བོད་ཀྱི་སྐྱེ་བོའི་ཁྲོམ་ཚོགས་ཁྲི་ཕྲག་ལྷག་ཙམ་གྱི་མིག་སྔར་མངོན་སུམ་མཐོང་བའི་ཆོས་སུ་མཛད་དོ།། སླར་ཡང་གཏེར་ཁུང་དུ་དཀོར་ཆ་དང་གཏེར་བུམ་སོགས་བཞག་ནས་སྔར་ལྟར་མཛད། གཏེར་སྲུང་རྣམས་ལ་གཏང་རག་དང་། འདུས་པ་རྣམས་ལ་བྱིན་རླབས་གནང་། གནས་རིའི་ཕྱོགས་མཚམས་སུ་རྒྱལ་མཚན་དར་འཕན་རྣམས་ཀྱིས་མཛེས་པར་བརྒྱན། ཚོགས་མཆོད་གསོལ་འདེབས་སོགས་ཀྱིས་ཐམས་ཅད་སྣང་བ་འགྱུར་བའི་བྱིན་རླབས་ཐོབ། བརྒྱད་པའི་ཡར་ཚེས་ཀྱི་སྐོར་རིམ་གྱིས་ཐེགས་ཏེ་སྒང་ལ་རང་གནས་སུ་བསུ་བའི་བཀོད་པ་ཡ་མཚན་པས་གདན་དྲངས་ཏེ་བཞུགས་འཇག་མཛད། སླར་ཡང་ལེགས་སྤྲོའི་ཚོགས་མཆོད་བསྐང་གསོ་རྒྱ་ཆེར་མཛད་དེ། གཏེར་གྱི་སྒྲོམ་བུ་དག་ཞལ་དབྱེ་བ་ལས། གུ་རུའི་སྐུ་ཚབ་མཐོང་བ་རང་གྲོལ་དང་། གསང་འདུས་ཀྱི་སྐུ། ཟབ་ལམ་བདེ་གཤེགས་ཀུན་འདུས་ཀྱི་ཆོས་སྐོར་ཆ་ལག་དང་བཅས་པའི་ཤོག་དྲིལ་བཅུ་གསུམ། ཐབས་ཤེས་བདེ་ཆེན་རིལ་བུ་སུམ་སྟོང་ལྷག་བཅས་རྩ་དར་གྱིས་དྲིལ་ཞིང་། དྲི་བཟང་གི་ཕུར་མས་གཏམས་པ་རྣམས་བྱོན་པར་གྱུར་ཏོ།། ལྕགས་བྱ་གསར་ཚེས་ཀྱི་མགོར། ཟླ་བ་གསུམ་དུ་གཏེར་སྒྲུབ་ལ་བཞུགས་སྐབས་ཤིག་ཏུ་གཟིམ་ལམ་གྱི་སྣང་བར་འོག་མིན་པདྨ་བཀོད་པར་གཤེགས་ཏེ་མ་ཧཱ་གུ་རུ་པདྨ་ཀཱ་ར་དང་། ཐུགས་རྗེ་ཆེན་པོའི་རང་བཞིན་འབྲས་བུའི་དཀྱིལ་འཁོར་རྟེན་དང་བརྟེན་པར་བཅས་པའི་དྲུང་དུ་སྨིན་བྱེད་ཀྱི་དབང་བཞི་ཆ་ཚང་བ་དང་། གྲོལ་བྱེད་ཀྱི་ཟབ་ཁྲིད་རྣམས་སྨིན་རྒྱས་སུ་གསན། སླར་ཡང་ནུབ་ཕྱོགས་མཁའ་སྤྱོད་ཀྱི་ཞིང་ཁམས་སུ་གཤེགས་ཏེ་བདེ་ཆེན་གསང་བ་ཡེ་ཤེས་ལས་བདུད་རྩིའི་དྭངས་མ་ནོད་པ་སོགས་མཛད། དེ་ནས་གོང་ས་ཡས་ལྗང་སོགས་ལ་གཏད་དེ་དར་རྒྱས་སུ་སྤེལ། དེ་ལྟར་ཟབ་གཏེར་འདི་རྣམས་ཀྱང་། དང་པོ་ལུང་བསྟན་དང་ཁ་བྱང་བྱུང་བ། བར་དུ་དངོས་སུ་བཞེས་ཤིང་གཏེར་སྒྲུབ་མཛད་པ། ཐ་མ་བུ་དཔེར་ཕབ་ཅིང་ཆོས་བདག་ལ་གཏད་པའི་དུས་སོགས་སྐབས་དང་སྐབས་སུ་དངོས་དང་། ཉམས་དང་། གཟིམ་ལམ་གྱི་སྣང་བ་གསུམ་ཇི་སྙེད་པར། ཨོ་རྒྱན་མུན་པ་མི་ཟད་པའི་དུར་ཁྲོད་སོགས་མཁའ་སྤྱོད་གནས་ཡུལ་གྱི་ཞིང་ཁམས་སུ་བྱོན་ནས་བརྟུལ་ཞུགས་ཀྱི་སྤྱོད་པ་མཛད་པ་དང་། དངོས་གྲུབ་ཀྱི་སྐལ་བ་ཐོབ་པ་དང་། འབྱུང་འགྱུར་གྱི་ལེགས་ཉེས་གཟིགས་པ་ལ་སོགས་པ་ངོ་མཚར་རྨད་དུ་བྱུང་བའི་ཆོ་འཕྲུལ་གྱི་བཀོད་པ་བྱིས་པའི་བློ་ལས་འདས་པ། འཕགས་ཆེན་ཡེ་ཤེས་སྒྱུ་མའི་རྣམ་རོལ་མཐའ་ཡས་པ་ལ་མངའ་དབང་མཛད་ཅིང་བདག་གིར་བཞེས་པའི་ཚུལ་ནི། འདིར་ཡི་གེ་མང་ཆེ་བས་རྣམ་ཐར་རྣམས་དང་། གཏེར་འབྱུང་ལོ་རྒྱུས་སུ་བལྟའོ།། དེ་ལྟར་ཨོ་རྒྱན་རྡོ་རྗེ་འཆང་དང་ཞལ་མི་གཉིས་པའི་མཆོག་གི་རྡོ་རྗེ་འཛིན་པ་ཆེན་པོ་འདིས་བཀའ་དང་གཏེར་གྱི་ཟབ་ཆོས་མང་པོ་ཆོ་ག་དང་ཆོག་བསྒྲིགས་སུ་སྤེལ་བའང་གསང་བའི་བདག་པོ་རྡོ་རྗེ་འཛིན་པ་ཉིད་བཀའ་གཏེར་གྱི་མེ་རོ་བསླངས་ནས། གསང་ཆེན་གྱི་སྒྲོན་མེ་སྦར་བའི་བྱེད་པོར་ཆེད་དུ་བྱོན་པ་རྣམ་དག་ཡེ་ཤེས་ཀྱི་སྤྱན་ལྡན་རྣམས་ཀྱིས་བཀའ་དང་ལུང་གིས་ཚད་མར་གྲུབ་མོད་དེ། དེར་མ་ཟད་ལྷ་དང་བླ་མས་རྗེས་སུ་གནང་ཤིང་། ཆེད་དུ་གཏད་པའི་ཚུལ་གསང་བའི་རྣམ་ཐར་ལས་གསལ་བ་ལྟར་ཡབ་རྗེ་གསང་བདག་ཆེན་པོ་དང་། མངའ་བདག་ཉང་ལ་སོགས་པས་ཡེ་ཤེས་ཀྱི་སྐུས་རྗེས་སུ་བཟུང་ཞིང་ལུང་བསྟན་དང་བཅས་ཏེ་བསྟན་པ་གཏད་པའི་ཕྱིར་རྡོ་རྗེ་འཆང་གི་བཀའ་དང་ཁྱད་པར་ཅུང་ཟད་མེད་ལ། དེའི་རྒྱུ་མཚན་བཀའ་འབུམ་དཀར་ཆགས་སོགས་གཞན་དུ་ཤེས་སོ།། ཁྱད་པར་དུ་བཤད་སྒྲུབ་བསྟན་པའི་འབྱུང་གནས་གངས་རིའི་ཁྲོད་ཀྱི་འོག་མིན་གཉིས་པ་ཨོ་རྒྱན་སྨིན་གྲོལ་གླིང་ཞེས་ཡོངས་སུ་གྲགས་པའི་ཆོས་སྡེ་ཆེན་པོ་དེ་ཉིད་ཇི་ལྟར་བསྐྲུན་པའི་ཚུལ་ནི། སྙིང་གཏམ་གསང་བའི་ཡི་གེ་ལས། ཁྱད་པར་གཡོ་རུ་གཙང་མའི་སར༔ འདི་ཉིད་འཆད་ཅིང་སྒྲུབ་པའི་སྡེ༔ ཚོམ་བུ་གཅིག་ཏུ་འདུ་བའི་གནས༔ བརྩོན་པས་བསྒྲུབ་ན་འགྲུབ་འགྱུར་ཞིང་༔ མ་འོངས་བསྟན་པ་ཆེར་འཕེལ་ཏེ༔ བོད་ཀྱི་བསྟན་པ་དགུང་དུ་སྤེལ༔ ཞེས་སོགས་གསུངས་པ་ལྟར། སྔར་སྨྲས་པའི་ཐར་བ་གླིང་དེར་རྟེན་འབྲེལ་དང་ས་དཔྱད་བགྱི་བའི་ཆེད་དུ། ཤིང་ཡོས་ཧོར་ཟླ་བཅུ་གཅིག་པའི་ཚེས་དྲུག་གི་ནང་པར་སྐུ་ཞབས་གྲྭ་གཙང་དང་བཅས་བྱོན་པ་ན། དཀར་ཕྱོགས་ཀྱི་སྲུང་མ་རྣམས་དགའ་བའི་ལྟས་དང་ལྷ་མི་ཀུན་གྱིས་བསུ་བའི་བཀོད་པས་མདུན་བསྟར་ཏེ་ཕྱག་ཕེབས། དེར་ཚེས་བཅུའི་གཟིམ་ལམ་དུ། རྒྱབ་རིའི་རྩེར་གདུགས་དང་གཡས་གཡོན་གྱི་རིའི་རྩེར་རྒྱལ་མཚན་སོགས་གནས་དེ་ཉིད་དག་པའི་ཞིང་བཀོད་ལྟ་བུར་གྱུར་པའི་མདུན་གྱི་ནམ་མཁར་ཨོ་རྒྱན་ཆེན་པོ་བཞུགས་པ་ལ་གསོལ་བ་བཏབ་པས། གཡས་རིའི་རྒྱལ་མཚན་གྱི་རྩ་བར་བུད་མེད་ཞིག་གིས་འདི་སྐད་ཅེས། ཞིང་འདི་ནི་ངོ་མཚར་དཔལ་གྱི་ཞིང་། །གནས་འདི་ནི་བདེ་ལྡན་པདྨ་འོད། །མགོན་འདི་ནི་འགྲོ་འདུལ་པདྨ་རྩལ། །འཁོར་དག་པ་ཞིང་སྐྱེས་མཁའ་འགྲོའི་ཚོགས། །ཆོས་ཐེག་མཆོག་ལམ་གྱི་མྱུར་ལམ་ཡིན། །ལས་བསྐལ་པ་བཟང་ངམ་མི་བཟང་ཡང་། །དུས་ལན་གཅིག་འབྲེལ་ན་དོན་ལྡན་ཡིན། །དེ་གོའམ་ཆགས་མེད་རྡོ་རྗེ་རྩལ།། ཟེར་བ་དང་། གཡོན་རིའི་རྒྱལ་མཚན་གྱི་རྩ་བར་ཡང་བུད་མེད་ཞིག་གིས། ཞིང་འདིར་དཀའ་བའི་འཕྲང་དམ་པོས། །འབད་པས་བསྒྲུབ་ན་དོན་ལྡན་ཡིན། །འདི་ནས་བཅུ་ཕྲག་འགའ་འདས་མཐའི། །སྒྲ་སྒྲོགས་ཅན་གྱི་ལོ་ཚུན་ལ། །དབྱར་གྱི་དུས་ཀྱི་ཆུ་བོ་བཞིན། །རྒྱས་པར་འགྱུར་ལ་པདྨའི་བསྟན། །ཕྱོགས་མཐར་འདྲེན་པའི་ཆུ་མགོ་བྱེད། །དེ་ནས་ལོག་ཅན་སྨོན་ལམ་མཐུས། །ཅུང་ཟད་ཉམས་པ་ལྟར་བྱེད་ཀྱང་། །སླར་ཡང་སྒྲ་གཅན་ལས་ཐར་བའི། །ཉི་ཟླ་བཞིན་དུ་འཆར་བར་འགྱུར།། ཞེས་སོགས་ནས། གཡོ་རུ་གཙང་མའི་ས་གཞི་ཡིན། །ཁྱོད་ཀྱི་རིང་ལུགས་རྒྱས་པར་འགྱུར། །ཅེས་པའི་བར་ལུང་བསྟན་པའི་མཐར་མནལ་སད་པས་ཤིན་ཏུ་རྟེན་འབྲེལ་ལེགས་པར་དགོངས། དེ་ནས་མེ་འབྲུག་ཧོར་ཟླ་དང་པོའི་ཉེར་དགུའི་ཉིན། རྡོ་རྗེ་ཕུར་པའི་དཀྱིལ་འཁོར་ལ་བརྟེན་ནས་གཙུག་ལག་ཁང་གི་ས་ཆོག་མཛད། ས་བཟུང་བའི་ཚེ་དཔལ་ཆེན་རྡོ་རྗེ་གཞོན་ནུའི་གསལ་སྣང་རེག་མཐོང་གི་ཡུལ་དུ་གྱུར། བརྟགས་པའི་ཚེ་ཤིན་ཏུ་དགེ་བའི་མཚན་མ་རྙེད། འཕྲལ་དུ་ཨར་ལས་ཀྱི་མགོ་བཙུགས་ཏེ་བཟོ་བོ་ལས་བྱེད་མང་པོས་མུ་བཞིན་བསྒྲུབ་པ་ལས། ཨོ་རྒྱན་སྨིན་གྲོལ་གླིང་གི་དགོན་པ་གཙུག་ལག་ཆེན་མོ་རྒྱར་ཀ་བ་བརྒྱད་ཅུ་རྩ་བཞིའི་ཁྱོན་དང་། ཐོགས་བརྩེགས་རིམ་པ་གསུམ་པ་རྩེར་གསེར་གྱི་གཉྫི་ར་ལྔ་ཕྲག སྒྲུབ་མཆོད་ཁང་པ། གསང་སྔགས་ཕོ་བྲང་། བླ་བྲང་ཆོས་འཁོར་ལྷུན་པོ། བླ་མ་ལྷ་ཁང་། ལི་མ་ལྷ་ཁང་། མགོན་ཁང་སོགས། འོག་མིན་ཡང་རྩེ་མན་ཆད་ཀྱི་མིག་ཤག་ལྷ་ཁང་ཆེ་ཆུང་། གཟིམ་ཆུང་རྣམས་དང་བཅས་པ་དང་། ཕྱི་ཁྱམས་ཀུན་དགའ་ར་བ། དགེ་འདུན་སུམ་བརྒྱ་ལྷག་ཙམ་གྱི་གྲྭ་ཤག རུང་ཁང་ལ་སོགས་པ་ནས་ཁོར་ཡུག་ལྕགས་རིའི་བར་དང་། དེ་དག་ཏུ་བཞུགས་པའི་རྟེན་གསུམ་གྱི་རིམ་པ་གསེར་དང་། དངུལ་དང་། སྨན་འདམ་དང་། ཙན་དན་ལས་བཞེངས་པ་དང་། བྲིས་སྐུ་སོགས་སྐུ་བརྙན་ལྔ་སྟོང་དུ་ཉེ་བ་དང་། རྒྱ་དཔེའི་བཀའ་འགྱུར་གྱི་གཙོས་གླེགས་བམ་གསར་བཞེངས་བདུན་བརྒྱར་ཉེ་བ་དང་། སྐུ་འབུམ་མཐོང་གྲོལ་ཆེན་པོའི་གཙོས་སྐུ་གདུང་ཆ་བརྒྱད། དངུལ་གྱི་མཆོད་རྟེན་ཆ་བརྒྱད། གཞན་ཡང་བློས་བསླང་ལ་སོགས་པའི་རྟེན་གསུམ་ཆེ་ཕྲ་མཐའ་ཡས་པ་དང་། དེ་རྣམས་ཀྱི་སྤྱན་སྔར་མཆོད་རྫས་འདོད་ཡོན་སྤྱན་གཟིགས་ཀྱི་བྱེ་བྲག་མཛེས་ཤིང་གྱ་ནོམ་པ། གཞན་ཡང་རྒྱན་ཁང་གི་ལོངས་སྤྱོད་སོགས་ཡོ་བྱད་ཆ་ལག་གི་དགོས་ཆས་མཐའ་དག་མ་ཚངས་པ་མེད་པ་ཐམས་ཅད་ཀྱང་དངོས་པོ་བཟང་ཞིང་རིན་ཐང་ཆེ་བ། བཀོད་ལེགས་ཤིང་སྤུས་དག་པ་དུ་མས་ཕྱུར་བུར་གཏམས་པའི་གནས། ལྷ་དང་བཅས་པའི་བསོད་ནམས་ཀྱི་ཞིང་དུ་མངོན་པར་འདུ་མཛད་པ་ཉིད་ཕྱི་ནང་རྩེ་ཤོད་བར་གསུམ་གྱི་བྱ་བ་ཐམས་ཅད་ལོ་དྲུག་གིས་ལེགས་པར་གྲུབ་ཅིང་མཐར་ཕྱིན་ཏེ། སོ་བདུན་པ་ཆུ་ཁྱི་ས་ག་ཟླ་བའི་ཡར་ཚེས་ནས་དཔལ་ཆེན་བདེ་གཤེགས་འདུས་པའི་སྒྲུབ་པ་ཆེན་པོའི་ལས་རིམ་རྒྱས་པ་དང་འབྲེལ་རབ་ཏུ་གནས་པའི་ཆོ་ག་མཛད་དེ། བཅུ་དྲུག་ལ་མེ་ཏོག་འཐོར་བའི་ཚེ་མེ་ཏོག་གི་ཆར་བབས་པ་སོགས་ཡ་མཚན་པའི་ལྟས་ཀྱིས་ཐམས་ཅད་ཡི་རང་བར་བྱས། བཅུ་དགུ་ལ་རང་དགོན་གྱི་སྟེང་གྲྭ་ཕྱི་ནང་གི་དགོན་ཁག་ལྔའི་གྲྭ་རྒྱུན་བསྣན་པ་དང་། ཡུལ་མིའི་ཁྲོམ་ཚོགས་ཁྲི་ཕྲག་ལྷག་བཅས་ལ་བཞེས་སྤྲོའི་བཟའ་བཏུང་དང་། དགྱེས་པའི་དགའ་སྟོན། སྤྱི་འགྱེད། གྲལ་རྒྱུག ལག་འགྱེད་དང་བཅས་པས་དགའ་རབ་ཏུ་ཚིམ་པར་མཛད། གཞན་ཡང་གྲྭ་ནང་དང་འཕྱོང་རྒྱས། ལྷོ་བྲག་སོགས་རང་ལུགས་ཀྱི་ཆོས་སྡེ་མང་པོར་དགའ་སྟོན་གྱི་དངོས་པོ་བསྟབས། ཉེར་གཉིས་རྡུལ་ཚོན་ཆུ་བོར་གཤེགས་པ་སོགས་དགེ་ཞིང་ཤིས་པའི་བྱ་བ་མཐའ་རྒྱས་སུ་མཛད་དོ།། དེ་ལྟར་བསྒྲུབ་པའི་ཆོས་ཀྱི་རྒྱལ་ཁབ་ཆེན་པོ་དེ་ནི་སྔ་འགྱུར་གྱི་བསྟན་པ་བཤད་སྒྲུབ་ཀྱིས་འཛིན་པའི་དགོན་སྡེ་རྣམས་ཀྱི་གྲྭ་སའི་ཕུག་སོ། བསྟན་པའི་གཞི་མ། ཆོས་ཀྱི་འབྱུང་ཁུངས་ཡིན་ཏེ། ཅིའི་ཕྱིར་ཞེ་ན། རང་ལུགས་ཀྱི་བསྟན་པ་ཉམས་དམའ་ཞིང་ཉག་ཕྲ་བའི་དུས་ཤིག་ན། འདི་ལྟར་དགེ་འདུན་མཁས་བཙུན་གྱི་ཚོགས་བསྡུས། རྒྱལ་བསྟན་གཞི་གསུམ་གྱི་སྲོལ་བཏོད། སློབ་བཤད་འཆད་ཉན་གྱི་གླེང་བསླངས། སྨིན་གྲོལ་གདམས་ངག་གི་རྒྱུན་སྤེལ། རིམ་གཉིས་ཉམས་ལེན་གྱི་སྡེ་བསྐྱངས། དུས་བཞིའི་སྒྲུབ་མཆོད་ཀྱི་མགོ་བཙུགས། རྣམ་དག་ཕྱག་བཞེས་ཀྱི་མིག་ཕྱེ། བསླབ་བྱ་བཅའ་བསྒྲིགས་ཀྱི་ཁྲིམས་བསྡམས། མདོར་ན་མངའ་འབྲུག དབུས་གཙང་། ལྷོ་མོན། ཁམས་ཀོང་། རྒྱལ་རོང་དང་བཅས་པར་ཆོས་རྒྱུན་གྱིས་ཁྱབ། གྲུབ་མཐའ་གཞན་གྱིས་ཀྱང་ཚད་མར་འཛིན་ཅིང་བསྔགས་པར་འོས་ལ། རང་རེ་རྣམས་ཀྱི་ནི་སྔགས་རྫོགས་ཆེན་གྱི་ལྟ་གྲུབ་མན་ཆད་ནས། གདོན་ཡི་དྭགས་ཀྱི་ཆུ་སྦྱིན་ཡན་ཆད་ལ་གཞན་དྲིང་འཇོག་མི་དགོས་པར་སྨིན་གྲོལ་གླིང་པའི་རིང་ལུགས་ཞེས་མགོ་འཕང་མཐོན་པོར་སྨྲ་ཆོག་པ་ནི་བླ་མ་འདི་དང་མཁན་ཆེན་ཆོས་དཔལ་རྒྱ་མཚོ་སྐུ་མཆེད་ཀྱི་བཀའ་དྲིན་འབའ་ཞིག་ཡིན་པར་ཤེས་ཤིང་དྲན་པར་བྱའོ།། དེས་ན་མཆོག་གི་བདག་ཉིད་ཆེན་པོ་འདི་ལ་སློབ་མའང་བསྟན་འཛིན་གྱི་སྐྱེས་བུ་བསམ་གྱིས་མི་ཁྱབ་པ་བྱོན་ཏེ། གཙོ་བོ་ནི་སྔར་སྨྲོས་པ་རྒྱལ་དབང་རིན་པོ་ཆེ་དང་། རྡོ་བྲག་རིག་འཛིན་ཆེན་པོ། རྗེ་རང་གི་སྐུ་མཆེད་དང་། གདུང་སྲས་རྣམས་སོགས་མཐའ་ཡས་ཀྱང་མདོར་བསྡུས་ན། ཤ་འུག་རང་གཏེར་གྱི་ལུང་བྱང་ལས། འགྲོ་དོན་ནུས་པ་སུམ་ཅུ་ལྔ༔ རང་དོན་གྱུར་པ་བརྒྱ་རྩ་བརྒྱད༔ ཆོས་ཀྱི་འབྲེལ་ཐོག་སྟོང་ཚོ་གཉིས༔ སྨོན་ལམ་འབྲེལ་བ་ཁྲི་ཕྲག་ལྔ༔ ལས་ཀྱིས་འབྲེལ་བ་དྲུག་ཅུ་བདུན༔ གདུགས་ཐོགས་བདུན་གྱིས་ཞབས་ནས་འདེགས༔ མི་ཆེན་གསུམ་གྱིས་མངའ་ཐང་སྤེལ༔ བཟང་པོའི་འབྲེལ་ཅན་ཁྲི་ཕྲག་གཉིས༔ ཞེས་སོགས་དང་། གཞན་ཡང་རྣམ་གྲངས་མང་དུ་གསུངས་ན་ཡང་འདིས་ཀྱང་ཕྱོགས་ཙམ་ཤེས་སོ།། དེ་ལྟར་བཀའ་དྲིན་ནམ་མཁའི་མཐས་ཀྱང་གཞལ་དུ་མེད་པའི་གཏེར་ཆེན་བླ་མ་རིན་པོ་ཆེ་དེ་ཉིད་ཀྱིས་བསྟན་པ་དང་སེམས་ཅན་གྱི་དོན་རླབ་པོ་ཆེའི་ལེགས་སྤྱོད་མ་ལུས་པ་རེ་ཞིག་མཐར་ཕྱིན་ནས། དགུང་ལོ་དྲུག་ཅུ་རེ་དགུར་སོན་པ་ཤིང་ཕོ་རྟ་ཡི་ལོ་ཧོར་ཟླ་དང་པོ་ནས་ཅུང་ཟད་བསྙུན་པའི་ཚུལ་བསྟན། ཁྱད་པར་ཚེས་ཉེར་ལྔ་ལ་ལོ་ཆེན་རིན་པོ་ཆེ་ཁུ་དབོན་རྣམས་ལ་ཞལ་གདམས་དང་། ཕྱི་མའི་བསླབ་བྱ་རྣམས་གསུངས། དེ་ནས་བཟུང་ཞབས་རིམ་དུ་གནས་པ་རྣམས་ཀྱི་སྣང་ངོར། ནུབ་ཀྱི་རྩིགས་པའི་ཕྱི་ངོས་ན་ཡོད་པ་འདྲ་བའི་རྒྱ་གླིང་ལྟ་བུའི་སྒྲ་ཤིན་ཏུ་སྙན་པ་རྒྱུན་ཆགས་སུ་བྱུང་། དེ་མཚུངས་ག་བུར་ལྟ་བུའི་དྲི་ཞིམ་པོའི་ངད་ཀྱིས་གཟིམ་ཆུང་ཕྱི་ནང་ཐམས་ཅད་ཁྱབ་པ་བྱུང་། དེ་ནས་ཧོར་ཟླ་གཉིས་པའི་ཚེས་གཉིས་ཀྱི་ཉི་དྲོས་ལ་བབས་པ་ན། ད་ལྟ་རྔ་ཡབ་གླིང་ནས་མཁའ་འགྲོའི་བསུ་མ་ཡང་སླེབ་བྱུང་གསུངས། དེ་འཕྲལ་བཞེངས་ཏེ་སྤྱན་གྱིས་གཟིགས་སྟངས་དང་། ཕྱག་གིས་ཊཱ་དྲིལ་འཁྲོལ་བའི་སྟངས་སྟབས་མཛད་དེ། ད་ཤར་ཕྱོགས་སུ་གོམ་པ་བདུན་འགྲོ་དགོས་པ་ཡོད་གསུངས་ནས་ཤར་ཕྱོགས་སུ་གོམ་པ་བདུན་བྱོན་པའི་སར་གདན་ལ་སྐྱིལ་མོ་ཀྲུང་གིས་བཞུགས་ཏེ། སྣང་གྲགས་རིག་གསུམ་སོགས་འདའ་ཀ་ཞལ་ཆེམས་ཀྱི་ཚུལ་དུ་གསུངས་ནས་འོག་མིན་མཁའ་སྤྱོད་ཀྱི་ཞིང་ཁམས་སུ་གཤེགས་སོ།། སླར་ཡང་སྔར་གྱི་རྟེན་འབྲེལ་ལས་མདོ་ཁམས་ཤར་གྱི་ཕྱོགས་སུ་སྤྲུལ་པའི་སྐུ་འབྱུང་ཞིང་རི་བོ་རྩེ་ལྔའི་ཟབ་གཏེར་བཏོན་ཏེ་བསྟན་འགྲོར་ཕན་བདེའི་ཕྲིན་ལས་སྤེལ་བར་འགྱུར་བ་སོགས་ནི་ངེས་པའོ།། དེ་ཡང་སྐལ་ཆེན་ཉིན་མོའི་སྣང་བར་རྩྭ་སྒྲོན་ལ། །གཟུགས་འཛིན་བཟང་ལྡན་སྐྱེ་བོའི་ཚོགས་ཀུན་མི་ལྟོས་ཀྱང་། །དར་ཅིག་ཕབ་པའི་ཆར་གྱི་ཐིགས་པས་མཚོ་དང་ཆབ། །དབྱར་དུས་རྒྱས་ལྟར་འདིས་ཀྱང་ཁྱོད་བློ་དེ་བཞིན་ནོ། །མཆོག་གི་རྣམ་ཐར་རྒྱ་མཚོ་ཆེན་པོ་ལས། །མཆོག་ཏུ་དད་པའི་བློ་ཡིས་བླངས་པ་ཡི། །མཆོག་ལྡན་ངོ་མཚར་ཟེག་མ་འདི་མཆོད་པས། །མཆོག་ཆེན་དེ་ཡིས་རྟག་ཏུ་རྗེས་འཛིན་མཛོད།། ཅེས་པའང་ཀླུང་མཆོག་བདེ་ལེགས་བྲག་གི་ལྷ་ཞོལ། བཟང་ཤིང་སྣ་ཚོགས་པའི་ཚལ་དུ་མོས་ལྡན་རིག་པ་འཛིན་པས་༼མགོ་སྤྲུལ་འཇིགས་རྣམ་པས་༽རྣམ་ཐར་རྒྱས་པ་རྣམས་ལས་མདོ་ཙམ་ཉུང་ངུར་བསྡུས་ཏེ། བཙུན་ཆུང་༼སོག་པོ་མཁན་ཆེན་༽སྐལ་བཟང་དར་རྒྱས་དགྱེས་པའི་སྐྱེས་སུ་ཕུལ་བའོ།། དགེའོ།། དགེའོ།། དགེའོ།། སྔ་འགྱུར་རྙིང་མའི་ཆེ་བ་དྲུག༄༅། གསང་སྔགས་གསར་མ་ལས་ཆེ་བ་དྲུག་གིས་ཁྱད་པར་དུ་འཕགས་པར་གསུངས་པ་ནི། གནས་གཞི་གཙུག་ལག་ཁང་གི་ཆེ་བ་དང་། ཡོན་སྦྱོར་སྦྱིན་བདག་གི་ཆེ་བ་དང་། མེ་ཏོག་ཡོན་གྱི་ཆེ་བ་དང་། འཆད་བྱེད་པཎ་གྲུབ་ཀྱི་ཆེ་བ་དང་། སྒྱུར་བྱེད་ལོ་ཙ་བའི་ཆེ་བ་དང་། བསྒྱུར་བྱ་ཆོས་ཀྱི་ཆེ་བ་སྟེ་དྲུག་གིས་འཕགས་པ་ཡིན་ལ། དེ་ཡང་ཚུལ་ཇི་ལྟ་བུས་ཁྱད་དུ་འཕགས་ཤེ་ན། དང་པོ་ནི། སྔགས་གསར་མའི་ཆོས་ཕལ་ཆེར་ཚང་ཚིང་དང་། བྱ་སྐྱིབས་དང་། གྲོང་འདབས་སོགས་ཕལ་གྱི་གནས་ངེས་མེད་དུ་བསྒྱུར་ལ། རྙིང་མའི་ཆོས་རྣམས་རྒྱལ་བའི་ལུང་གིས་བསྔགས་ཤིང་། འཕགས་བོད་ཀྱི་པཎ་གྲུབ་མང་པོས་བྱིན་གྱིས་བརླབས་པའི་གནས་མཆོག་དཔལ་གྱི་བསམ་ཡས་སོགས་སུ་བསྒྱུར་བས་གནས་ཀྱི་བྱིན་རླབས་ཀྱིས་ཁྱད་པར་དུ་འཕགས་པའོ།། གཉིས་པ་ནི། ཕྱི་དུས་ཀྱི་ཡོན་སྦྱོར་ཕལ་ཆེར་བསམ་སྤྱོད་གཉིས་ཀའི་ཆ་ནས་རྒྱ་ཆུང་ཞིང་། སྔོན་དུས་ཀྱི་མངའ་བདག་འཇམ་པའི་དབྱངས་སོགས་ནི་གཏོང་ཕོད་དང་ཐུགས་བསྐྱེད་སྨོན་ལམ་རྒྱ་ཆེ་བས་བསྟན་བདག་གི་སྤོབས་པས་ཁྱད་པར་དུ་འཕགས་པའོ།། གསུམ་པ་ནི། དེང་དུས་གསེར་ཞོ་རེ་ཟུང་ཙམ་དང་། ནོར་སྣ་ཅུང་ཟད་ཙམ་རེ་ཕུལ་བའང་མཆོག་འཛིན་དང་སེར་སྣས་སྦག་པ་ཤས་ཆེ་ལ། སྔོན་དུས་སུ་ཆོས་རྒྱལ་ཚངས་པ་ལྷ་ཡི་མེ་ཏོག་སོགས་གྱིས་གསེར་ཕྱེ་བྲེ་བོ་ཆེ་དང་། ཤ་བའི་རླུད་བུ་ལ་གཞལ། ཐེར་ཕྲུག་དོས་དང་གོས་དར་ཡུག་ཏུ་བགྲངས། ལོངས་སྤྱོད་གཅེས་དགུ་ཕངས་མེད་དུ་ཕུལ་ནས་ཞུས་པས་ཞབས་ཏོག་དངོས་རྫས་ཀྱིས་ཁྱད་པར་དུ་འཕགས་པའོ།། བཞི་པ་ནི། དེང་དུས་ཀྱི་མཁས་རློམས་ཁ་ཅིག་གིས་མིག་སེར་གྱིས་དཔེ་མཁྱུད་དང་ཆོས་བརྒྱད། འདོད་པའི་བཟང་རྫུས། ཆོས་ནོར་ཕྱིར་འཚོང་པའི་སྐྱོན་སོགས་འབྱུང་ལ། སྔོན་གྱི་མཁན་སློབ་རྣམ་གཉིས་དང་མཁས་གྲུབ་ཉེར་ལྔ་སོགས་བོད་དུ་བྱོན་ནོ་ཅོག་ཀུན་སོ་སོ་ནས་སྐྱོན་བྲལ་ཡོན་ཏན་རྫོགས་པའི་བདག་ཉིད་བསྟན་པ་དང་འགྲོ་བའི་དོན་ཁོ་ན་ལ་བརྩོན་པ་ཤ་སྟག་ཡིན་པས་གཏུག་ས་ཁྱད་པར་དུ་འཕགས་པའོ།། ལྔ་པ་ནི། དེང་སང་གི་སྒྲ་བསྒྱུར་ཁ་ཅིག་ལ་ཁྱད་གསོད་དང་འགྲན་སེམས། ཐུགས་རྒྱལ་དང་ཕྱོགས་ཞེན་སོགས་ཀྱང་མངའ་ལ། སྔར་གྱི་ལོ་ཆེན་བཻ་རོ་ཙ་ན་དང་། སྐ་ཅོག་རྣམ་གཉིས་སོགས་སྤྲུལ་པའི་ལོ་ཙཱ་པ་ཆེན་པོ་རྣམས་ནི་མཁྱེན་བརྩེ་ནུས་བྱིན་མཐའ་ཡས་པ་ནམ་མཁའ་ལྟ་བུ་ཤ་སྟག་ལགས་པས་བསྒྱུར་བྱེད་ཁྱད་པར་དུ་འཕགས་པའོ།། དྲུག་པ་ནི། ཕྱིས་བྱུང་བའི་ཆོས་རྣམས་འཕགས་ཡུལ་དུ་མུ་སྟེགས་པའི་དགྲ་ལན་གསུམ་བྱུང་ནས་བསྟན་པ་ཉམས་པར་བྱས་རྗེས་སུ་འཐོར་བ་སྡུད་པའི་ཚུལ་གྱིས་བསྒྱུར་བ་ཡིན་ལ། སྔ་འགྱུར་གྱི་ཆོས་རྣམས་རྒྱ་གར་དུ་བསྟན་པ་གྲྭ་མ་ཉམས་པའི་དུས་སུ་ཆོས་གང་ཟབ་དང་བརྒྱུད་ཐག་གང་ཉེ་དང་། བྱིན་རླབས་གང་ཆེ་སོགས་ལ་བརྟགས་ཤིང་གཞིགས་ནས་བསྒྱུར་བ་གསེར་གྱི་ཡང་ཞུན་དང་བཅུད་ཀྱི་ཉིང་ཁུ་ལྟ་བུ་ལགས་པས་ཆོས་ཁྱད་པར་དུ་འཕགས་པའོ།། དེ་ལྟར་ཆེ་བ་དྲུག་གིས་ཁྱད་པར་དུ་འཕགས་པ་དེ་ལ་གསང་ཆེན་སྔ་འགྱུར་གྱི་བསྟན་པ་ཞེས་གྲགས་སོ།། གནས་གཞིའི་བྱིན་རླབས་དང་། བསྟན་བདག་གི་སྤོབས་པ། ཞབས་ཏོག་གི་དངོས་པོ། གཏུགས་སའི་པཎ་གྲུབ། བསྒྱུར་བྱེད་ལོ་ཙཱ་བ། བསྒྱུར་བྱའི་ཟབ་ཆོས་རྣམས་ཀྱི་ཆེ་བས་ཁྱད་པར་དུ་འཕགས་པར་བཤད་པའང་མིང་གི་རྣམ་གྲངས་སོ།། ཞེས་པ་འདི་ནི་མགོ་སྤྲུལ་གྱི་གཏམ་སྟེ་ཡིད་བརྟོན་མ་མཆིས་སོ།། འོན་ཀྱང་གློག་ཤུལ་འཇམ་དཔལ་ལ་ཕུལ་ལོ།། ཕྱི་ནང་གི་ཁྱད་པར་ལྔ།༄༅། ཕྱི་རོལ་མུ་སྟེགས་པའི་ལུགས་ལས་ནང་པ་སངས་རྒྱས་པའི་ལུགས་ཁྱད་པར་ལྔས་འཕགས་ཚུལ་ནི། བརྟེན་ཡུལ་སྐྱབས་ཀྱི་ཁྱད་པར། གནས་ལུགས་ལྟ་བའི་ཁྱད་པར། གོམས་པ་བསྒོམ་པའི་ཁྱད་པར། བྱ་བ་སྤྱོད་པའི་ཁྱད་པར། ཐོབ་པ་འབྲས་བུའི་ཁྱད་པར་རྣམས་ཀྱིས་ཆེས་ཆེར་ལྷག་པར་འཕགས་པ་ཡིན་ལ། དེ་ཡང་སྐྱབས་ནི། བླ་ན་མེད་པའི་དཀོན་མཆོག་གསུམ་སྐྱབས་སུ་འཛིན་ན་ནང་པ། དེ་མི་འཛིན་པར་ཚངས་པ་དང་། དབང་ཕྱུག་ལ་སོགས་པ་འཇིག་རྟེན་པའི་ལྷ་གཞན་འཛིན་ན་ཕྱི་པའོ།། དེ་ལ་ཚུལ་ཇི་ལྟ་བུས་ནང་པ་འཕགས་པ་ཡིན་སྙམ་ན། ལྷ་གཞན་རྣམས་རང་ཉིད་འཁོར་བའི་རྒྱ་མཚོར་བྱིང་ཞིང་སྲིད་པའི་སྡུག་བསྔལ་ལས་མ་གྲོལ་བར་གཞན་སྒྲོལ་བར་མི་ནུས་ལ། སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་བྱང་ཆུབ་ཀྱི་གྲོགས་སུ་བཟུང་ན་སྡུག་བསྔལ་མཐའ་དག་ལས་སྐྱོབས་ཤིང་ཐར་བ་དང་ཐམས་ཅད་མཁྱེན་པའི་གོ་འཕང་ལ་འགོད་ནུས་པས་འཕགས་པ་ཡིན་ནོ།། ལྟ་བ་ནི་ཐུན་མོང་པ་ཆོས་ཀྱི་སྡོམ་བཞི། ཐུན་མོང་མ་ཡིན་པ་མཐའ་བྲལ་བསམ་བརྗོད་ལས་འདས་པ་ཁས་ལེན་པ་ནང་པ། དེ་མི་ལེན་པར་རྟག་ཆད་ཀྱི་མཐར་ལྟུང་པ་ཁས་ལེན་ན་ཕྱི་པའོ།། དེ་ལའང་ཇི་ལྟ་བུས་འཕགས་ཚུལ་བཤད་ན། རྟག་ཆད་ཀྱི་མུར་བལྟས་པས་ཡང་དག་པའི་དོན་ལ་རྨོངས་ཤིང་ཆོས་ཀྱི་མིག་ལྡོང་ནས་སླར་ཡང་སྲིད་པའི་མུན་པར་འཕྱན་ལ། མཐའ་བྲལ་བདག་མེད་ནམ་མཁའ་ལྟ་བུའི་དོན་ལ་ནན་ཏན་དུ་བྱས་པས་ཤེས་བྱའི་གནས་ལ་མི་རྨོངས་ཤིང་ཆོས་ཐམས་ཅད་ཀྱི་དེ་ཉིད་ཆགས་ཐོགས་མེད་པར་མཁྱེན་པའི་བློའི་སྤྱན་ཟུང་རྒྱས་པས་འཁོར་འདས་ཀྱི་མཚང་རིག་ནས་སྲིད་ཞི་གཉིས་ཀའི་མཐའ་ལ་མི་གནས་པས་འཕགས་སོ།། སྒོམ་པ་ནི། ཐུན་མོང་པ་བདག་མེད་པའི་དོན་ཆོས་སུམ་ཅུ་རྩ་བདུན་གྱི་རིམ་པས་བསྒོམ་ཞིང་། ཐུན་མོང་མ་ཡིན་པ་ཆོས་ཐམས་ཅད་ནམ་མཁའི་རང་བཞིན་དུ་རྟོགས་ནས་སྟོང་ཉིད་སྙིང་རྗེའི་སྙིང་པོ་ཅན་བསྒོམ་པ་ནང་པ། དེ་མི་བསྒོམ་པར་སེམས་རྟོག་པ་བཀག་པ་ཙམ་དང་། བདེ་གསལ་མི་རྟོག་པ་ཕྱོགས་རེའི་ངང་ལ་སེམས་འཛིན་པ་ཕྱི་པའོ།། དེ་ཡང་ཇི་ལྟ་བུས་འཕགས་སྙམ་ན། སེམས་འཛིན་ཉི་ཚེ་བས་སྒྲིབ་གཉིས་མི་བྱང་ཞིང་འཁོར་བ་མི་ཁེགས་ལ། སྟོང་ཉིད་སྙིང་རྗེའི་སྙིང་པོ་ཅན་བསྒོམ་པས་དྲོད་རྟགས་མཐར་ཕྱིན། ལམ་ལྔ་དང་ས་བཅུ་རིམ་གྱིས་བགྲོད། ཆོས་ཅན་ཆོས་ཉིད་གནས་འགྱུར་ནས་མི་ལྡོག་གཉུག་མའི་བཙན་ས་ཟིན་པར་བྱེད་པ་ན་འཕགས་སོ།། སྤྱོད་པ་ནི། ཆགས་སྡང་གཏི་མུག་གི་རང་བཞིན་ཡུལ་ལ་ཞེན་པ་དང་། གཞན་ལ་འཚེ་བ་ལམ་གྱི་གེགས་སུ་འདོད་པ་ནང་པ། དེ་མི་འདོད་པར་གོ་ལྡོག་ཏུ་སྤྱོད་ན་ཕྱི་པའོ།། དེ་ལ་ཇི་ཞིག་གིས་འཕགས་ན་འཚེ་བས་ནི་ཐར་བ་ཐོབ་པ་ལྟ་ཅི། བྱང་ཆུབ་ཀྱི་གེགས་དང་ངན་སོང་ལྟུང་བྱེད་ཀྱི་རྒྱུར་འགྱུར་ཞིང་། ཡུལ་གང་ལའང་ཞེན་འཛིན་མི་བྱ་ཞིང་ཁྱད་པར་གཞན་གནོད་གཞི་དང་བཅས་པ་སྤངས་པས་ནི། གནས་སྐབས་སུ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་རྒྱུད་ལ་སྐྱེ་ཞིང་། མཐར་ཐུག་སྐྱེ་དགུ་ཐམས་ཅད་ཀྱི་གནས་དང་རྟེན་དང་གླིང་དང་མགོན་དང་སྐྱབས་དང་དཔུང་གཉེན་དུ་འགྱུར་བར་ངེས་པས་འཕགས་སོ།། འབྲས་བུ་ནི། ལམ་དེ་ཉིད་ཀྱིས་དངོས་སུ་ཐུན་མོང་དུ་ཐར་བ་གསུམ་གང་རུང་དང་། ཐུན་མོང་མ་ཡིན་པར་སྐུ་གསུམ་ལྷུན་གྱིས་གྲུབ་པ་མཐར་ཐུག་དོན་གྱི་སངས་རྒྱས་མངོན་གྱུར་དུ་ཐོབ་པ་ནི་ནང་པ་ཡིན་ལ། དེ་མི་ཐོབ་པར་ཐར་པ་ཡིད་སྨོན་ཙམ་དུ་ལུས་པ་ནི་ཕྱི་བའོ།། དེར་ནི་འཕགས་ཚུལ་དེ་ཁོ་ན་ལྟ་བུ་སྟེ། ཕྱི་པ་རྣམས་ལམ་ལོག་པ་ལ་ཞུགས་པས་འབྲས་བུ་ཡང་ལོག་པ་འོག་ནས་འོག་ཏུ་ལྟུང་བར་འགྱུར་བ་ལས་འོས་མེད་ལ། ནང་པ་རྣམས་སྐས་ཀྱི་ཐེམ་རིམ་ལྟར་དབང་པོའི་རིམ་པ་དང་མཐུན་པའི་ཐེག་པ་གོང་འོག་གི་ཆོས་ཚུལ་གང་ལ་ཞུགས་ཀྱང་རང་ལམ་དང་མཐུན་པའི་འབྲས་བུ་དངོས་སུ་འཐོབ་པ་མཐོང་བའི་ཆོས་ལ་མངོན་གྱུར་དུ་སྣང་བས་ཤིན་ཏུ་ཁྱད་པར་འཕགས་པའོ།། ཞེས་པ་འདི་ཡང་མགོ་སྤྲུལ་གྱིས་བཏུས་པའོ།། ཆེན་པོ་བདུན།༄༅། ཐེག་པ་ཆུང་ངུ་ལས་ཆེན་པོ་བདུན་གྱིས་ཐེག་ཆེན་ཁྱད་པར་དུ་འཕགས་ཚུལ་ནི། དམིགས་པ་ཆེན་པོ་དང་། སྒྲུབ་པ་ཆེན་པོ་དང་། ཡེ་ཤེས་ཆེན་པོ་དང་། བརྩོན་འགྲུས་ཆེན་པོ་དང་། ཐབས་ལ་མཁས་པ་ཆེན་པོ་དང་། ཐུབ་པ་ཆེན་པོ་དང་། ཕྲིན་ལས་ཆེན་པོ་སྟེ་བདུན་གྱིས་འཕགས་པ་ཡིན། དེ་ལ་དམིགས་པ་ཆེན་པོ་ནི། ཐེག་ཆེན་པས་ཆོས་ཉིད་ནམ་མཁའ་འདྲ་བ་ལ་དམིགས་པར་ནུས་ལ་ཆུང་ངུ་པས་མི་ནུས་སོ།། སྒྲུབ་པ་ཆེན་པོ་ནི། ལམ་དང་སྤྱོད་པའི་དུས་རང་གཞན་གཉིས་ཀའི་དོན་ཐེག་ཆེན་པས་སྒྲུབ་པ་ཉིད། ཉན་རང་ལ་རང་དོན་ལས་མེད་དོ།། ཡེ་ཤེས་ཆེན་པོ་ནི། བདག་གཉིས་ཀྱིས་སྟོང་པའི་ཆོས་ཉིད་སྙིང་རྗེ་དང་ཟུང་དུ་འཇུག་པའི་ཡེ་ཤེས་ཡོད་པ་ཐེག་དམན་ལ་མེད་དོ། །བརྩོན་འགྲུས་ཆེན་པོ་བསྐལ་པ་གྲངས་མེད་པར་སེམས་ཅན་གྱི་དོན་ལ་སྤྲོ་བའང་ཉན་རང་ལ་མེད་དོ།། ཐབས་མཁས་པ་ཆེན་པོ་སྲིད་ཞི་གཉིས་ཀྱི་མཐའ་ལ་མི་གནས་པས་དོན་སྒྲུབ་པ་ཡང་ཐེག་དམན་ལ་མེད་དོ།། ཐུབ་པ་ཆེན་པོ་ནི། སངས་རྒྱས་ནས་གཞན་དོན་དང་སྟོབས་སོགས་ཀྱི་ཡོན་ཏན་མཐའ་ཡས་པ་དང་ལྡན་པའང་འབྱུང་བར་ངེས་ལ་ཐེག་དམན་ལ་མ་ཡིན་ནོ།། ཕྲིན་ལས་ཆེན་པོ་འཁོར་བ་ཇི་སྲིད་ཀྱི་བར་དུ་གཞན་དོན་ལྷུན་གྲུབ་ཏུ་འབྱུང་བ་ཉིད་ཀྱང་ཉན་རང་ལ་མེད་པས། དེས་ན་ཐེག་དམན་ཉན་རང་དང་། ཐེག་ཆེན་བྱང་ཆུབ་སེམས་དཔའ་ལ་དཔེར་ན་བ་གླང་གི་རྨིག་རྗེས་ཀྱི་ཆུ་དང་། གངས་ཆེན་མཚོའི་ཁྱད་པར་དང་། མེ་ཁྱེར་དང་ཉི་ཟླའི་ཁྱད་པར་དང་། གྲོག་མཁར་དང་རི་རབ་ཀྱི་ཁྱད་པར་ལྟ་བུས་འཕགས་ཁྱད་ཡོད་པར་མདོ་རྒྱུད་བསྟན་བཅོས་ཇི་སྙེད་པ་ནས་གསུངས་པ་མངོན་སུམ་དེ་ཀའོ།། ཞེས་མགོ་སྤྲུལ་པས་སོ།། ཇོ་བོ་རྣམ་གསུམ་ཇི་ལྟར་བཞེངས་ཚུལ།༄༅། ཇོ་བོ་བཞེངས་ཚུལ་ནི། སྔོན་ཐུབ་པའི་དབང་པོ་རྒྱལ་བྱེད་ཀྱི་ཚལ་ན་འཁོར་རྣམ་པ་བཞིས་བསྐོར་ཏེ་བཞུགས་པའི་དུས་སུ། འཕགས་པ་འཇམ་དཔལ་གྱིས་གསོལ་བ། བཅོམ་ལྡན་འདས་ད་ལྟའི་དུས་སུ་འགྲོ་བ་སེམས་ཅན་རྣམས་ཞལ་ཡང་ཁྱེད་ལ་ལྟ། མཆོད་པ་ཡང་ཁྱོད་ལ་འབུལ། བསོད་ནམས་ཀྱང་དེ་ལ་བརྟེན་ནས་བསོག་པ་ལ། ཁྱེད་དགོངས་པ་མྱ་ངན་ལས་འདས་ནས་སེམས་ཅན་རྣམས་ཚོགས་བསགས་པའི་རྟེན་ཞིག་བསྟན་དུ་གསོལ། ཞེས་གསོལ་བ་བཏབ་པས། བཅོམ་ལྡན་འདས་ཀྱིས་ཞལ་འཛུམ་པ་དང་བཅས་པའི་སྒོ་ནས་འོད་ཟེར་རྣམ་པ་བཞི་འཕྲོས་ཏེ། གཅིག་ལྷ་ཆེན་པོ་ཚངས་པ་ལ་ཕོག གཅིག་གཟའ་ཆེན་པོ་ཁྱབ་འཇུག་ལ། གཅིག་ལྷའི་དབང་པོ་བརྒྱ་བྱིན་ལ་ཕོག གཅིག་བཟོ་བོ་བཱི་ཤྭོ་ཀརྨ་ལ་ཕོག་པས། ཁོང་རྣམས་སྤོབས་པ་བསྐྱེད་དེ་ལྷ་ཆེན་པོ་ཚངས་པས་ཐལ་མོ་སྦྱར་ཏེ་གསོལ་བ། ཡོན་ཏན་མཐའ་ཡས་བསམ་གྱིས་མི་ཁྱབ་པའི། །རྒྱལ་བ་འཇིག་རྟེན་མགོན་པོ་ཐུབ་པ་ཡི། །རིན་ཆེན་ལྔ་ལས་གྲུབ་པའི་ཆོས་ཀྱི་སྐུ། །དགེ་ལེགས་ཕྱོགས་བཅུར་རྒྱས་ཕྱིར་བདག་གིས་བཞེངས། །ཞེས་དང་། ཁྱབ་འཇུག་གིས། རྣམ་དག་སྐུ་མངའ་རྐང་གཉིས་གཙོ་བོ་ཡི། །རིན་ཆེན་ལས་གྲུབ་ལོངས་སྤྱོད་རྫོགས་པའི་སྐུ། །གངས་ཅན་མཆོད་ཡུལ་འདོད་དགུ་འབྱུང་བའི་གཏེར། །སེམས་ཅན་དབུལ་བ་སེལ་ཕྱིར་བདག་གིས་བཞེངས། །ཞེས་དང་། བརྒྱ་བྱིན་གྱིས། ཐུབ་པའི་དབང་པོ་ལྷ་དབང་ལྷ་ཡི་ལྷ། །གསེར་གྱི་ལྷུན་པོ་མཚན་དཔེའི་རྒྱན་གྱིས་སྤྲས། །རིན་ཆེན་ལྔ་ལས་གྲུབ་པའི་་སྤྲུལ་པའི་སྐུ། །འགྲོ་ཀུན་བསོད་ནམས་གསོག་ཕྱིར་བདག་གིས་བཞེངས། །ཞེས་དང་། བི་ཤྭ་ཀརྨས། ལྷ་མིའི་སྟོན་པ་ཤཱཀྱའི་རྒྱལ་པོ་ཡིས། །མ་འོངས་སེམས་ཅན་བསོད་ནམས་བསགས་པའི་ཕྱིར། །རིན་ཆེན་ལྔ་ལས་གྲུབ་པའི་ངོ་མཚར་ཅན། །སྐུ་གསུམ་བཞེངས་པའི་ལྷ་བཟོ་བདག་གིས་བགྱིད། ཅེས་ཞུས་སོ།། དེ་ནས་ལྷ་ཆེན་པོ་ཚངས་པས། རིན་པོ་ཆེ་ཨིནྟྲ་ནི་ལའི་ཕུང་པོ་ཆེན་པོ་གཅིག གསེར་ཞུན་མའི་ཕུང་པོ་ཆེན་པོ་གཅིག ཆུ་ཤེལ་ཞུན་མའི་ཕུང་པོ་ཆེན་པོ་གཅིག་རྣམས་བཟོ་བོ་བཱི་ཤྭ་ཀརྨའི་མདུན་དུ་སྤུངས་སོ། །བི་ཤྭ་ཀརྨས་ཀྱང་རིན་པོ་ཆེ་རྣམས་བཞུ་བཏུལ་ལུགས་སུ་བླུགས་ཏེ། བཅོམ་ལྡན་འདས་ཀྱི་ཆོས་སྐུའི་རྟེན་དབྱིབས་མཆོད་རྟེན། ཆེ་ཆུང་ཚངས་པའི་འདོམས་གང་། ཁ་ཏོག་དུ་བ་ལྟ་བུ་ཡོད་པ་གཅིག་བཞེངས། དེ་ལ་རབ་གནས་སངས་རྒྱས་ཉིད་ཀྱིས་མཛད་དེ་བྱིན་གྱིས་བརླབས་ཤིང་མེ་ཏོག་འཐོར་བར་མཛད་དོ།། དེ་ནས་མཆོད་རྟེན་དེ་ལྷའི་ཡུལ་དུ་གདན་དྲངས་ཏེ་བཞུགས་པ་ལས། ཡེ་ཤེས་ཀྱི་མཁའ་འགྲོ་མ་རྣམས་ཀྱིས་ནུབ་ཕྱོགས་ཨུ་རྒྱན་གྱི་ཡུལ་དུ་གདན་དྲངས་ཏེ་ས་ལ་མ་བབས་པར་བར་སྣང་གི་ནམ་མཁའ་ལ་བཞུགས་སོ།། དཔལ་རེག་པ་མེད་པའི་མཆོད་རྟེན་ཞེས་གྲགས་སོ།། ལྷའི་ཡུལ་ནས་བྱོན་པས་ལྷ་ལས་བབས་པའི་མཆོད་རྟེན་ཞེས་ཀྱང་བྱ་ལ། ཁ་ཏོག་དུ་བ་ལྟར་ཡོད་པས་དུ་བ་ལྟ་བུའི་མཆོད་རྟེན་ཞེས་ཀྱང་བྱའོ།། དེ་ནས་ཁྱབ་འཇུག་གིས་རིན་པོ་ཨིནྟྲ་ནི་ལ། མརྒད་ཞུན་མ། ཆུ་ཤེལ་ཞུན་མ་རྣམས་ཀྱི་ཕུང་པོ་རེ་རེ་བཟོ་བོའི་མདུན་དུ་སྤུངས་སོ།། དེར་བི་ཤྭ་ཀརྨས་རིན་པོ་ཆེ་དེ་རྣམས་བཞུ་བཏུལ་ལུགས་སུ་བླུགས་ནས་ལོངས་སྐུའི་རྟེན་གངས་ཅན་མཚོ་རྒྱལ་ཆུ་ཞེང་གབ་པ་དཔག་ཚད་བརྒྱད་ཅུ་ཡོད་པ། ཕྱག་གཉིས་མཉམ་བཞག་མཛད་པ། སྐུ་མདོག་མཐིང་ཀ་དབུའི་སྤྱི་གཙུག་ན་ཆུ་ཤེལ་བུམ་པ་ཙམ་ཡོད་པ་ཞིག་བཞེངས་སོ།། བཞུགས་གནས་ཕྱིའི་རྒྱ་མཚོ་ཆེན་པོར་བཞུགས་ཤིང་། ལྟེ་བ་མན་ཆད་ཆུ་ནང་དུ་ནུབ་སྟེ། མཚོ་ནང་གི་སེམས་ཅན་གྱི་དོན་མཛད། ལྟེ་བ་ཡན་ཆད་སྟེང་ན་ཡོད་དེ་སྐམ་ན་ཡོད་པའི་སེམས་ཅན་གྱི་དོན་མཛད། བྱ་རྣམས་དབུ་ཐོག་དང་དཔུང་ཁར་བསྡད། བྱ་ཐལ་བརྡལ་བས་སྐུ་མདོག་མཐིང་ཀར་ཡོད་ཀྱང་དཀར་ཅོག་གེར་བཞུགས་སོ།། ཚེས་བཅོ་ལྔའི་ནུབ་མོ་དབུའི་ཆུ་ཤེལ་ལ་འོད་ཕོག་པས་ཆུ་མཚན་མ་མེད་པས་སྐུ་ཁྲུས་གསོལ་ལོ།། ཕྱིའི་རྒྱ་མཚོ་ལ་ནོར་བུ་ལེན་པའི་དེད་དཔོན་གྱིས་རྟེན་དེའི་གྲུ་མོ་ཁུག་གི་ནང་ལ་གཟིངས་བཅུག་སྟེ་མཆོད་པ་ཕུལ་བས་ཅི་འདོད་པའི་ནོར་བུ་ལོན་ནོ།། རྟེན་དེའི་རྒྱབ་མདུན་གཉིས་ལ་གྲོ་སྐད་རེ་རེ་ཡོད་དོ། དེ་ལ་ཡང་སངས་རྒྱས་ཀྱིས་རབ་གནས་མཛད་ཅིང་མེ་ཏོག་འཐོར་ཞིང་བྱིན་གྱིས་རླབས་པར་མཛད་དོ།། དེ་ནས་བརྒྱ་བྱིན་གྱིས་ལྷའི་རིན་པོ་ཆེ་ཨིནྟྲ་ནི་ལ། ཨིནྟྲ་གོ་བ། མཐོན་ཀ མཐོན་ཀ་ཆེན་པོ། བཀོད་མཛེས་དང་ལྔ། མིའི་རིན་པོ་ཆེ་རྣམ་པ་ལྔ་ནི། གསེར། དངུལ། མུ་ཏིག མུ་མེན། བྱི་རུ་དང་ལྔ་སྟེ་བཅུ། གཞན་ཡང་རིན་པོ་ཆེ་སྣ་ཚོགས་བསགས་ཏེ། སྟོན་པ་དགུང་ལོ་བཅུ་གཉིས་པའི་སྐུ་ཚད་བཞེངས་བར་འདོད་པ་ལ། ཡུམ་སྐྱེ་དགུའི་བདག་མོ་ན་རེ། དགུང་ལོ་བརྒྱད་ལོན་དུས་ལུམ་བིའི་ཚལ་གྱི་ཁྲིའི་མཐོ་དམན་དང་། དགུང་ལོ་བཅུ་གཉིས་ལོན་དུས་མཉན་ཡོད་ཀྱི་སྒོ་མོ་ཆེའི་མ་ཐེམ་ལ་ཞབས་རེག་པས་ཡ་ཐེམ་ལ་དབུ་རེག་པ་ཡིན་ཞེས་ཚད་བསྟན་པས་དེར་བཟོ་བོས་རིན་པོ་རྣམས་ལུགས་སུ་བླུགས་ནས་སྤྲུལ་སྐུའི་རྟེན་ཇོ་བོ་ཤཱཀྱ་མུ་ནེ་སྐུ་མདོག་གསེར་བཙོ་མ་ལྟ་བུ་ཕྱག་གཡས་ས་གནོན་དང་མཉམ་བཞག་མཛད་པ། མཚན་དཔེས་སྤྲས་པ། ཞལ་མཐོང་བ་ཙམ་གྱིས་དུག་གསུམ་གྱི་ནད་ཞི་ནས་བཅོས་མིན་གྱི་ངེས་འབྱུང་དང་མོས་གུས་སྐྱེ་བ། མཐོང་ཐོས་དྲན་རེག་གི་ཡོན་ཏན་དུ་མ་དང་ལྡན་པ་སྟོན་པ་དངོས་དང་ཁྱད་པར་མ་མཆིས་པའི་རྟེན་མཆོག་ལྷ་མི་ཀུན་གྱི་དཔལ་དུ་བཞེངས་སོ།། དེར་ཡང་སངས་རྒྱས་ཀྱིས་རབ་གནས་མཛད་མེ་ཏོག་འཐོར་བྱིན་གྱིས་བརླབས་སོ།། དེ་ནས་རྟེན་དེ་ལྷ་རྣམས་ཀྱིས་སྤྱན་དྲངས་ཏེ་ལྷ་ཡུལ་ལོ་བརྒྱར་བཞུགས། ཡང་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་ནུབ་ཕྱོགས་ཨུ་རྒྱན་གྱི་ཡུལ་དུ་གདན་དྲངས། དེར་ལོ་བརྒྱར་བཞུགས། དེ་ནས་རྫུ་འཕྲུལ་གྱིས་ནམ་མཁའ་ནས་བྱོན་ཏེ། རྒྱ་གར་རྡོ་རྗེ་གདན་དུ་ལོ་ལྔ་བརྒྱར་བཞུགས། དེ་ནས་ཡུལ་མ་ག་དྷ་ན་བྲམ་ཟེ་ཁྱིམ་བདག་མ་ཧཱ་བ་ལ་ཞེས་པ་དང་། དེའི་ཡུམ་ཡེ་ཤེས་ཀྱི་མཁའ་འགྲོ་མ་ཞིག་གཉིས་ལ་བུ་གསུམ་ཡོད་པ་ལས། ཆེ་བ་གཉིས་ཕྱི་པ་དང་། ཆུང་བ་ནི་ནང་པ་དགའ་བས། གྲུབ་མཐའ་ལ་མ་འཆམ་པར་འཐབ་པས། མས་ཁྱེད་རྣམས་འཁྱག་ན་ནི་རས་གོས་གྱོན། ལྟོག་ན་ནི་འབྲས་ཆན་ཟོ། ཅི་ཞིག་ལ་འཐབ་ཟེར་བས། བུ་ཆུང་བ་ན་རེ། ངེད་རྣམས་ཕྱི་ནང་གི་གྲུབ་མཐའ་ལ་མ་འཆམ་པ་ཡིན། ཕྱི་ནང་གཉིས་ལ་གང་བཟང་ཟེར། མ་ན་རེ། གངས་རི་ཏི་སེ་ལ་ལྷ་མ་ཧཱ་དེ་བ་བཞུགས་པ་དེར་དྲིས་ཤིག་ཟེར་ལྷྭམ་རྣམས་ལ་རྐང་མགྱོག་གི་རྫས་བྱུགས་ཏེ་བཏང་བས་བུ་རྣམས་སྐད་ཅིག་ལ་གངས་རྩེར་སླེབས། བུ་མོ་མཛེས་མ་ཞིག་རིན་པོ་ཆེའི་སྣོད་དུ་མེ་ཏོག་འཐུ་ཞིང་འདུག་པ་ལ། ཁྱོད་སུ་ཡིན་མེ་ཏོག་འདིས་ཅི་བྱེད་བྱས་པས། ངེད་ལྷ་མོ་ཨུ་མ་དེ་ཝིའི་གཡོག་མོ་ཡིན། མེ་ཏོག་གིས་ཚེས་བཅོ་ལྔའི་ཉིན་འཕགས་པ་དགྲ་བཅོམ་པ་རྣམས་རྫུ་འཕྲུལ་གྱིས་ནམ་མཁའ་ལ་གཤེགས་ཏེ་ངེད་ཀྱི་ཕོ་བྲང་དུ་བྱོན་ནས་ཆོས་སྟོན་པས། དེ་ལ་གཏོར་བ་ཡིན་ཟེར། དེར་བུ་མོ་དང་འགྲོགས་ཏེ་ལྷ་མ་ཧཱ་དེ་བའི་ཕོ་བྲང་དུ་ཕྱིན་པས། ཚེས་བཅོ་ལྔ་དང་དུས་འཛོམས་པས་རིན་པོ་ཆེའི་གདན་བཤམས། འཕགས་པ་དགྲ་བཅོམ་པ་རྣམས་རྫུ་འཕྲུལ་གྱིས་ནམ་མཁའ་ལ་བྱོན་ཏེ། རིན་པོ་ཆེའི་གདན་ལ་བཞུགས་པ་ལ། མ་ཧཱ་དེ་བ་དང་། ཨུ་མ་དེ་ཝི་གཉིས་ཀྱིས་མེ་ཏོག་གཏོར་ཞིང་ཆོས་སྟོན་དྲངས་ནས་སྨོན་ལམ་བཏབ། སླར་ཡང་འཕགས་པ་དགྲ་བཅོམ་པ་རྣམས་ནམ་མཁའ་ལ་གཤེགས་པ་མཐོང་ངོ།། དེ་ནས་བུ་གསུམ་གྱིས་མ་ཧཱ་དེ་བ་ལ་ཕྱི་ནང་གཉིས་ཀྱི་ཆོས་ལུགས་གང་བཟང་དྲིས་པས། མ་ཧཱ་དེ་བས། ཆོས་ལུགས་ནང་པ་སངས་རྒྱས་པ་བཟང་བས་ང་ཡང་ནང་པ་ལ་བརྟེན་ནས་སངས་རྒྱས་པར་འདོད་པ་ཡིན། ཕྱི་རོལ་མུ་སྟེགས་པ་ལ་གནས་སྐབས་ཀྱི་བདེ་བ་ཙམ་མ་གཏོགས་མཐར་ཐུག་གི་སྙིང་པོ་མེད་ཟེར་བས། ཁོང་གསུམ་བློ་ཐག་ཆོད་དེ་ཡུལ་དུ་འོང་ནས། མ་ལ་ངེད་གསུམ་པོ་ནང་པའི་བསྟན་ལ་ཞུགས་པ་ཡིན་བྱས་པས། མ་ན་རེ། ལེགས་ཀྱིས་ཁྱེད་གསུམ་པོས་ལྷ་ཁང་རེ་རེ་བཞེངས་དགོས་གསུངས་སོ།། དེ་ལ་བུ་ཆེ་བ་མ་ཧཱ་མ་སེས་ལྷ་ཁང་ཝ་ར་ཎ་སིར་བཞེངས་ཤིག བུ་འབྲིང་པོ་སི་བ་ས་མེས་ལྷ་ཁང་ཛེ་ཏའི་ཚལ་དུ་བཞེངས་ཤིག ཆུང་བ་སྤྲ་ཏ་ས་མེས་ལྷ་ཁང་རྡོ་རྗེ་གདན་དུ་རྩིགས་ཤིག་གསུངས་པས། ཆེ་བ་གཉིས་ཀྱིས་དེ་བཞིན་བརྩིགས། ཆུང་བས་རྡོ་རྗེ་གདན་དུ་ཕྱི་གནྡྷོ་ལ། ནང་དུ་ལྷ་ཁང་བྱས་པ་དེའི་ནང་དུ་བཅོམ་ལྡན་འདས་དགུང་ལོ་སུམ་ཅུ་པའི་སྐུ་ཚད་ཅིག་བཞེངས་འདོད་དེ་རྒྱུ་ཙན་དན་བདར་དེ་འཇིམ་པའི་ཕུང་པོ་བྱས་ཚེ། མ་ན་རེ། ལྷ་བཟོ་དང་ཁྱོད་གཉིས། བརྒྱག་ཆུ་དང་གསུམ་པོ་ནང་དུ་སྡོད། སྒོ་ལ་ལྕགས་གཟེར་རྒྱོབས་ལ་ཟླ་བ་གསུམ་དང་ཞག་གསུམ་ལ་གྲུབ་པར་གྱིས་ཤིག་ཟེར་རོ།། དེར་ཟླ་བ་གསུམ་དང་ཞག་གཉིས་སོང་དུས་སུ་ཨ་མ་བྱུང་སྟེ་སྒོ་ཕྱེས་ཤིག་ཟེར། བུ་ན་རེ། ཟླ་གསུམ་ཞག་གཉིས་སོང་། ད་དུང་ཞག་གཅིག་མ་ཐེམས་ཟེར། མས་ཞག་གཅིག་མ་ཐེམས་ཀྱང་དབང་མེད། ད་ལྟ་སངས་རྒྱས་ཀྱི་ཞལ་མཐོང་བ་ང་ལས་མི་འདུག་པས་ངས་ཨེ་འདྲ་མ་བལྟས་ན་གཞན་གྱིས་ཤན་མི་ཕྱེད། ང་ཡང་སང་འཆི་བར་འདུག་པས་སྒོ་ཕྱེས་ཤིག་ངས་བལྟ་དགོས་གསུངས་བཞིན་སྒོ་ཕྱེ་བ་དང་། ལྷ་བཟོ་དེ་སྤྲུལ་པར་འདུག་པས་འཇའ་ལྟར་ཡལ་སོང་། ཞག་གཅིག་མ་ཐེམས་པའི་སྐྱོན་གྱིས་ཞབས་གཡས་པའི་མཐེའུ་ཆུང་མ་ཐེམས་པར་བཤད། ལར་སྐུ་གཟུགས་དེ་ཉིད་མཚན་དཔེས་བརྒྱན་པ། མི་རྣམས་ཀྱིས་རྟེན་དེ་དང་མཇལ་ཚེ་ལྟོག་སྐོམ་བརྗེད་ནས་བཟའ་བཏུང་གཞན་གྱིས་སྟེར་དགོས་པ། མཇལ་ནས་ཕྱིར་འོང་དུས་རྒྱབ་སྟོན་མི་ཕོད་པར་ཕྱི་འགྲོས་སུ་གྱེད་ནས་འགྲོ་དགོས་པ། མི་རྣམས་གློ་བུར་དུ་ན་བར་གྱུར་ན་ཞལ་མཐོང་བ་ཙམ་གྱིས་ནད་སོས་པ། འཐབ་རྩོད་ཞེ་སྡང་རབ་ཏུ་འབར་བའི་མིས་མཐོང་ན་ཞེ་སྡང་རབ་ཏུ་ཞི་ནས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་འགྱུར་བ་ཞིག་གོ།། དེ་དང་ཇོ་བོ་ཤཱཀྱ་མུ་ནེ་རྣམ་གཉིས་རྒྱ་གར་རྡོ་རྗེ་གདན་དུ་བཞུགས་པ་ལས། རྒྱ་གར་ན་ཆོས་རྒྱལ་དྷརྨ་ཕ་ལ་བྱ་བ་དང་། རྒྱ་ནག་ཏུ་རྒྱ་རྗེ་སྤྲི་སྟི་མ་ཛ་ཡ་བྱ་བ་གཉིས་ཡོད་པ། མ་མཐོང་མ་འཕྲད་པའི་གྲོགས་པོ་བྱས་སོ།། དེར་རྒྱ་ནག་གི་རྒྱལ་པོས་རྒྱ་གར་གྱི་རྒྱལ་པོ་ལ་སྐྱེས་གསུམ་བསྐུར་བའི་ཐ་མ་ལ། ཟ་འོག་གི་གོས་སྲུབ་མེད་པ་དཔལ་བེའུ་བཞི་སྙིང་གར་སྤུད་ཡོད་པ་ཞིག་བསྐུར་ནས། ཡི་གེ་ལ། རྒྱ་གར་ཆོས་སྐྱོང་རྒྱལ་པོ་བསྟན་པའི་བདག །སྔོན་བསགས་བསོད་ནམས་འབྲས་བུ་ཐོབ་པའི་མཐུས། །མངའ་ཐང་དཔལ་འབྱོར་དཔག་མེད་ཆོས་ཀྱི་གཏེར། །འདོད་དགུའི་ལོངས་སྤྱོད་མངའ་ཐང་ཕན་བདེས་སྐྱོང་། །ཡུལ་ལས་ཁྱད་འཕགས་རྒྱ་གར་ཡུལ་དུ་བཞུགས། །བསོད་ནམས་བསགས་པས་རྟེན་གྱིས་ཕངས་པ་མེད། །བདག་ཅག་མཐའ་འཁོབ་རྒྱ་ནག་རྒྱལ་པོ་ལ། །རྒྱལ་བའི་བཀའ་མེད་སྟོན་པའི་སྐུ་མེད་ཅིང་། །བདག་གི་ཡུལ་ན་ཆོས་ཀྱི་སྐབས་མེད་པས། །ཁྱེད་ཀྱིས་བདག་ལ་བཅོམ་ལྡན་འདས་ཀྱི་སྐུ། །དགུང་ལོ་བཅུ་གཉིས་བཞེས་པའི་སྐུ་ཚད་དང་། །མདོ་ལྔ་དག་དང་དགེ་སློང་བཞི་གྲྭ་གཅིག །བརྩེ་བས་བདག་ལ་གནང་བར་མཛད་དུ་གསོལ།། ཟེར་བ་འདུག་པས། རྒྱལ་པོའི་ཐུགས་ལ། ངའི་ཡུལ་ན་ཐེག་པ་ཆེན་པོའི་ཆོས་ཡོད། སངས་རྒྱས་ཀྱི་སྐུ་གདུང་རིང་བསྲེལ་དང་། ཉན་ཐོས་དགྲ་བཅོམ་པ་ཡང་མང་དུ་བཞུགས། ཁོའི་ཡུལ་ན་དེ་རྣམས་མེད་པས་ངའི་ཡུལ་དུ་ཆོས་མི་ནུབ། ཁོའི་ཡུལ་དུ་ཆོས་དར་འོང་ཐག་ཆོད་པས། ཇོ་བོ་རང་ལ་གསོལ་བ་བཏབ་ལ་སྐུར་དགོས་བསམ་ཏེ། ཇོ་བོའི་དྲུང་དུ་བྱོན་པ་དང་། ཇོ་བོའི་ཞལ་ལྷོར་གཟིགས་ནས་ཡོད་པ་ཤར་དུ་གཟིགས་འདུག་པས། རྒྱ་ནག་ཏུ་འབྱོན་པར་ཐུགས་དགྱེས་པར་གོ་ནས། གཟིངས་ཆེན་པོ་གཅིག་གི་སྟེང་དུ་ཇོ་བོ་དང་། དཀོན་མཆོག་གསུམ་བཞུགས། སྟེང་དུ་དར་དང་རིན་པོ་ཆེའི་གུར་ཕུབ། རོལ་མོ་དང་དར་པོ་ཆེ་ལ་སོགས་དཔག་ཏུ་མེད་པ་བྱས་ཏེ། རྒྱ་ནག་ལ་འབབ་པའི་ཀླུང་ཆེན་པོ་ཞིག་ནས་གཟིངས་བཏང་ནས་རྒྱལ་པོས་ལན་མཛད་པ། ཀྱེ་མ་རྒྱ་ནག་རྒྱལ་པོ་གསན་མཛོད་ཅིག །བདག་གི་མཆོད་གནས་སྟོན་པའི་ཞལ་སྐྱིན་འདི། །ཡོན་བདག་ལྷ་དབང་བརྒྱ་བྱིན་ཁོང་གིས་མཛད། །རྒྱུ་ནི་རིན་ཆེན་རྣམ་པ་བཅུ་ལས་གྲུབ། །འདི་ཡི་བཟོ་བོ་བི་ཤྭ་ཀརྨས་མཛད། །རབ་གནས་སངས་རྒྱས་ཉིད་ཀྱིས་མཛད་པ་ལགས། །དེ་ལྟར་འགྲན་མེད་རྒྱལ་བའི་དབང་པོ་འདི། །མཐོང་ཐོས་དྲན་རེག་གསོལ་བ་བཏབ་གྱུར་ན། །སངས་རྒྱས་མྱུར་དུ་ཐོབ་པར་རྒྱལ་བས་གསུངས། །དེ་ལྟར་ཡོན་ཏན་ལྡན་པའི་ཇོ་བོ་འདི། །བདག་གི་ལུས་ཀྱི་སྙིང་ལྟར་གཅེས་ན་ཡང་། །ཁྱེད་ཀྱི་སྐྱེས་དང་བཀའ་བསྩལ་ལྕི་བ་དེས། །ཡུལ་དེའི་སེམས་ཅན་དགེ་ལ་བཀོད་ཕྱིར་དུ། །བདག་གིས་ཁྱེད་ལ་མཆོད་གནས་དབུལ་བར་བགྱི། །ཁྱེད་ཀྱིས་དད་ཅིང་གུས་པས་ཕྱག་འཚོལ་ཅིག །ཅེས་སྤྲིངས་སོ།། དེ་ནས་རྒྱ་ནག་གི་རྒྱལ་པོ་དགའ་མགུ་རང་ནས་བསུ་བ་རྒྱ་ཆེན་པོས་བསུས་ཏེ་སྤྱན་དྲངས་མཐའ་འཁོབ་ཐུལ་དེ་དམ་ཆོས་དར་བར་མཛད་དོ།། དེ་ནས་ལོ་སྟོང་འདས་པ་ན། བོད་འདིར་འཕགས་པ་ཐུགས་རྗེ་ཆེན་པོའི་སྤྲུལ་པ་ཆོས་རྒྱལ་སྲོང་བཙན་སྒམ་པོ་བྱོན་ནས་རྒྱ་རྗེ་ཐའེ་ཛུང་རྒྱལ་པོའི་སྲས་མོ་སྒྲོལ་མའི་སྤྲུལ་པ་འུན་ཤིང་ཀོང་ཇོ་ཁབ་ཏུ་བཞེས་དུས་རྫོངས་ཀྱི་ཚུལ་དུ་བྱོན་པ་ཡིན་ཏེ། དེ་ཡང་། ལྷ་ཅིག་ཀོང་ཇོས་ཡབ་རྒྱལ་པོ་ལ་ཞུས་པ། བོད་ཀྱི་ཡུལ་དུ་བདག་གཏོང་ན། །ཁ་བ་ཅན་གྱི་ཡུལ་ཕྱོགས་དེར། །བསིལ་ཞིང་གྲང་ལ་ས་རོང་རྩུབ། །གངས་རི་གཅན་གཟན་མཆེ་བ་འདྲ། །བྲག་རི་འབྲོང་གི་རྭ་དང་འདྲ། །འབྲུ་སྣ་མི་འཁྲུངས་མུ་གེ་གནས། །གདོལ་བ་ཤ་ཟན་སྲིན་པོའི་རིགས། །སྤྱོད་པ་རྩིང་པ་ཀླ་ཀློའི་མི། །མཐའ་འཁོབ་སངས་རྒྱས་ཞབས་མ་བཅག །ཆོས་མེད་མ་རིག་མུན་པའི་གླིང་། །མཆོད་པའི་རྟེན་དང་གནས་མེད་ཅིང་། །བསོད་ནམས་གསོག་པའི་རྟེན་མེད་པས། །དེ་འདྲའི་ཡུལ་དུ་འགྲོ་དགོས་ན། །ཡབ་ཀྱི་མཆོད་གནས་ཡི་དམ་ལྷ། །ཤཱཀྱ་མུ་ནེ་བདག་ལ་ཞུ། །ཁ་བ་ཅན་ནི་བཀྲེས་པའི་ཡུལ། །རིན་ཆེན་བང་མཛོད་བདག་ལ་ཞུ། །ཚེ་གཅིག་དྲོ་བའི་གོས་ཀྱང་ཞུ། །བོད་ནི་གདོལ་བ་གཙང་རྩོག་མེད། །གཡོག་མོའི་སྐྱོ་གྲོགས་བདག་ལ་ཞུ། །དེ་ལྟར་མཐའ་འཁོབ་ཡུལ་ཕྱོགས་དེར། །བདག་གིས་སྤྱོད་ལམ་ཇི་ལྟར་བྱ། །ཞེས་ཞུས་པས། རྒྱལ་པོས་བཀའ་སྩལ་པ། ང་ཡི་མིག་དང་འདྲ་བའི་བུ་མོ་ཁྱོད། །བོད་ཅེས་བྱ་བ་གཞན་ལས་ཁྱད་འཕགས་ཡུལ། །གངས་རི་རིན་ཆེན་ཤེལ་གྱི་མཆོད་རྟེན་འདྲ། །མཚོ་བཞི་གཡུ་ཡི་མཎྚལ་བཀྲམ་པ་འདྲ། །ཡ་མཚན་གསེར་གྱི་མེ་ཏོག་རྒྱས་པའི་གླིང་། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཆེན་སྣ་ཚོགས་འབྱུང་། །རྐང་བཞི་ཀུན་ཁྱབ་རྩི་ཐོག་མར་ལ་སྤྱོད། །ངོ་མཚར་ཡུལ་དེར་མཛེས་པའི་ཕོ་བྲང་ན། །མི་རྗེ་ལྷས་མཛད་རྒྱལ་པོ་སྤྱན་རས་གཟིགས། །དཔའ་མཛངས་ཀུན་འཛོམས་འཁོར་རྣམས་བྱང་ཆུབ་སེམས། །དགེ་བཅུའི་ཁྲིམས་གནས་མངའ་ཐང་དཔལ་འབྱོར་རྒྱས། །དེ་འདྲའི་ཡུལ་དུ་བུ་མོ་ཁྱོད་སོང་ཅིག །བདག་གི་མཆོད་གནས་སྟོན་པའི་སྐུ་གཟུགས་འདི། །ཡོན་བདག་ལྷ་དབང་བརྒྱ་བྱིན་ཁོང་གིས་མཛད། །རྒྱུ་ནི་རིན་ཆེན་རྣམ་པ་བཅུ་ལས་གྲུབ། །འདི་ཡི་བཟོ་བོ་བི་ཤྭ་ཀརྨས་མཛད། །རབ་གནས་སངས་རྒྱས་ཉིད་ཀྱིས་མཛད་པ་ལགས། །དེ་ལྟར་འགྲན་མེད་རྒྱལ་བའི་སྐུ་གཟུགས་འདི། །མཐོང་ཐོས་དྲན་རེག་གསོལ་བ་བཏབ་གྱུར་ན། །སངས་རྒྱས་མྱུར་དུ་ཐོབ་པར་རྒྱལ་བས་གསུངས། །དེ་ལྟར་ཕན་བདེ་འབྱུང་བའི་ཇོ་བོ་འདི། །བདག་གི་སྙིང་དང་འདྲ་བར་ཕང་ན་ཡང་། །མཛེས་པའི་བུ་མོ་ཁྱོད་ལ་བདག་གིས་བརྫངས། །གཅེས་པའི་རིན་ཆེན་བང་མཛོད་ནོར་གྱི་གཏེར། །བཟའ་བཏུང་སྐོམ་གྱི་སྦྱོར་ཐབས་མང་པོ་དང་། །ཟ་འོག་སྟན་ཐུལ་སེང་གེ་བྱ་བརྒྱད་མ། །ལྗོན་ཤིང་ཆོ་ལོ་ནོར་བུ་རིས་སུ་བྲིས། །གསེར་སྒ་གཡུ་ཡི་ཀ་ལེབ་ཅན་ལ་སོགས། །རྒྱལ་པོ་ངོ་མཚར་སྐྱེ་ཕྱིར་ཁྱོད་ལ་བརྫངས། །གསེར་གཡུ་བརྩེགས་པའི་ཡིག་ཚང་ཆེན་མོ་དང་། །གཙུག་ལག་གབ་ཙེ་སུམ་བརྒྱ་དྲུག་ཅུ་དང་། །བཟོ་ཡི་རིགས་བྱེད་དྲུག་ཅུ་སྦྱོར་སྡེ་བཞི། །སྤྱད་དྲུག་དཔྱད་ལྔ་ནད་སེལ་བརྟགས་ཐབས་བརྒྱ། །ཡིད་འོང་རྒྱན་གྱི་རྣམ་པ་མང་པོ་དང་། །དར་ཟབ་གོས་བཟང་སྟོང་ཕྲག་ཉི་ཤུའི་གྲངས། །རིགས་བཟང་མཛེས་སྡུག་ལང་ཚོས་སྒེག་པ་ཡི། །སེམས་མཐུན་སྐྱོ་གྲོགས་བུ་མོ་ཉེར་ལྔ་བརྫངས། །ཨེ་མ་འབྲལ་བར་མི་ཕོད་བུ་མོ་ཁྱོད། །ཁ་བ་ཅན་པའི་མི་རྣམས་འདུལ་དོན་དུ། །ཁྱོད་ཀྱི་བྱ་བ་སྤྱོད་ལམ་འདི་བཞིན་གྱིས། །ལྟ་བ་ཡངས་ཤིང་སྤྱོད་ལམ་ཞིབ་པར་མཛོད། །ཕྱི་ནང་བྱ་བ་ཀུན་ལ་མཁས་པར་མཛོད། །ངག་འཇམ་སྨྲ་མཁས་གཞི་མ་ལེགས་པར་མཛོད། །རྗེ་ལ་གུས་ཤིང་འཁོར་ལ་བྱམས་པར་མཛོད། །ཁྲེལ་ཡོད་ངོ་ཚ་བག་དང་ལྡན་པར་མཛོད། །ཅེས་སོགས་གསུངས་ཤིང་གནང་ངོ།། དེ་ནས་ཤིང་རྟའི་འཁོར་ལོའི་སྟེང་དུ་ཇོ་བོ་ཤཱཀྱ་མུ་ནེ་བཞུགས། རྒྱ་ནག་ན་གྱད་སྟོབས་ཆེ་བ་ལྷ་དགའ་དང་ཀླུ་དགའ་གཉིས་ཀྱིས་དྲངས། རིན་པོ་ཆེ་དང་གོས་དང་རྒྱན་སོགས་ཡོ་བྱད་གཞན་རྣམས་རྟ་དྲེལ་རྔ་མོང་སོགས་ལ་བཀལ་ནས་ལྷ་ཅིག་ཀོང་ཇོ་ཡང་རིན་པོ་ཆེའི་རྒྱན་མང་པོས་བརྒྱན་ནས་དཔོན་གཡོག་ཀུན་རང་རང་གི་རྟ་ལ་བཅིབ་ནས་བོད་དུ་ཕེབས་སོ།། ཇོ་བོ་མི་བསྐྱོད་རྡོ་རྗེ་ཇི་ལྟར་བཞེངས་ཚུལ།༄༅། ཇོ་བོ་མི་བསྐྱོད་རྡོ་རྗེ་ནི། བཞེངས་ཚུལ་རྒྱས་པར་མ་མཐོང་ཡང་། བསྡུས་ཙམ་བོད་དུ་བྱོན་ཚུལ་ལས་ཤེས་པས། དེ་ཡང་ཆོས་རྒྱལ་སྲོང་བཙན་སྒམ་པོས་བལ་མོ་བཟའ་ཁྲི་བཙུན་ཁབ་ཏུ་བཞེས་དུས་སུ་རྫོངས་ཀྱི་ཚུལ་དུ་བྱོན་ཏེ། དེར་བལ་ཡུལ་གྱི་རྒྱལ་པོ་དེ་བ་ལྷ་ལ་ལྷ་གཅིག་ཁྲི་བཙུན་གྱིས་ཞུས་པ། ཀྱེ་མ་ཡབ་གཅིག་རྒྱལ་པོ་ཆེན་པོ་ལགས། །ཁ་བ་ཅན་ནི་མཐའ་འཁོབ་ཀླ་ཀློའི་ཡུལ། །དམ་ཆོས་མ་དར་བོད་ཡུལ་མུན་པའི་གླིང་། །མི་ནི་རིགས་ངན་གདོལ་བ་ཤ་ཟའི་རིགས། །བཀྲེས་ཤིང་དབུལ་བ་ཡི་དྭགས་རྒྱལ་ཁམས་འདྲ། །དེ་འདྲའི་གནས་སུ་བུ་མོ་འགྲོ་དགོས་ན། །ཡབ་ཀྱི་མཆོད་གནས་དཀོན་མཆོག་འབྱུང་བའི་ལྷ། །མཐོང་ཐོས་དྲན་རེག་ཡོན་ཏན་བསམ་མི་ཁྱབ། །ཇོ་བོ་མི་བསྐྱོད་རྡོ་རྗེ་བདག་ལ་ཞུ། །ཐུབ་པའི་རྒྱལ་ཚབ་བྱམས་མགོན་རིན་པོ་ཆེ། །མཚན་དཔེས་རབ་བརྒྱན་ཕན་བདེ་འབྱུང་བའི་གཏེར། །བྱམས་པ་ཆོས་ཀྱི་འཁོར་ལོ་བདག་ལ་ཞུ། །ཙན་དན་ཇོ་མོ་སྒྲོལ་མ་ཐུགས་རྗེ་ཅན། །འགལ་རྐྱེན་བར་ཆད་སེལ་ཕྱིར་བདག་ལ་ཞུ། །རིན་ཆེན་སྟག་ཤ་དེབ་དང་རཏྣ་དེ། །བོད་ཡུལ་དབུལ་བ་སེལ་ཕྱིར་བདག་ལ་ཞུ། །རིན་ཆེན་འདོད་དགུ་འབྱུང་བའི་ལོངས་སྤྱོད་དང་། །ཟས་སྐོམ་བདུད་རྩིའི་དཔལ་ལ་སྤྱོད་པའི་གཞི། །བཻཌཱུརྱ་ཡི་ལྷུང་བཟེད་བདག་ལ་ཞུ། །ཁ་བ་ཅན་ནི་བཀྲེས་ཤིང་སྐོམ་པའི་གནས། །རིན་ཆེན་བང་མཛོད་མང་པོ་བདག་ལ་ཞུ། །ཁ་བ་ཅན་ནི་བསིལ་ཞིང་གྲང་བའི་ཡུལ། །ཚེ་གཅིག་དྲོ་བའི་གོས་བྱད་བདག་ལ་ཞུ། །དེ་ལྟར་མཐའ་འཁོབ་བོད་ཀྱི་རྒྱལ་ཁམས་དེར། །བདག་གི་སྤྱོད་ལམ་བྱ་བ་ཇི་ལྟར་བྱ། །ཡབ་གཅིག་རྒྱལ་པོས་བདག་ལ་བཀའ་སྩོལ་ཅོག །ཅེས་ཞུས་པས། རྒྱལ་པོའི་ཞལ་ནས། ང་ཡི་སྙིང་དང་འདྲ་བའི་བུ་མོ་ཁྱོད། །བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་ཡས་ཁང་། །ངོ་མཚར་རྨད་བྱུང་ཕན་བདེ་འབྱུང་བའི་གཞི། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཆེན་སྣ་ཚོགས་འབྱུང་། །རྐང་བཞི་ཀུན་ཁྱབ་རྩི་ཐོག་མར་ལ་སྤྱོད། །རྒྱལ་པོ་ལྷ་ཡིན་འཁོར་རྣམས་བྱང་ཆུབ་སེམས། །དམ་ཆོས་མེད་ཀྱང་རྒྱལ་པོའི་བཀའ་ཁྲིམས་ཡོད། །དེ་འདྲའི་གནས་སུ་བུ་མོ་ཁྱོད་སོང་ཤིག །བདག་གི་ཡི་དམ་མི་བསྐྱོད་རྡོ་རྗེ་དང་། །རྗེ་བཙུན་བྱམས་པ་ཆོས་ཀྱི་འཁོར་ལོ་འདི། །འཛམ་བུའི་གླིང་པ་ཚེ་ལོ་ཉི་ཁྲིའི་དུས། །རྒྱ་གར་ཆོས་རྒྱལ་ཀྲྀ་ཀྲྀའི་ཐུགས་དམ་དུ། །རིན་ཆེན་སྣ་ཚོགས་འདུས་པའི་ཕུང་པོ་ལ། །སངས་རྒྱས་འོད་སྲུང་གིས་ནི་རབ་གནས་མཛད། །སྤྲུལ་པའི་ལྷ་བཟོས་ལུགས་སུ་བླུགས་པ་ལས། །ཐོག་མར་བྱམས་པ་ཆོས་ཀྱི་འཁོར་ལོ་བཞེངས། །དེ་ཡི་རྗེས་ལ་མི་བསྐྱོད་རྡོ་རྗེ་ནི། །ངོ་མཚར་དཔག་མེད་མཚན་དཔེའི་རྒྱན་གྱིས་སྤྲས། །ཕན་བདེའི་འབྱུང་གནས་དད་ལྡན་རྟེན་དུ་བཞེངས། །མཐོང་ཐོས་དྲན་རེག་ཡོན་ཏན་བསམ་མི་ཁྱབ། །ས་སྟེང་འགྲན་ཟླ་ཀུན་དང་བྲལ་བ་འདི། །མ་འོངས་སེམས་ཅན་བསོད་ནམས་བསགས་པའི་ཕྱིར། །ལྷ་མིའི་སྟོན་པ་ཤཱཀྱའི་རྒྱལ་པོ་དེའི། །དགུང་ལོ་བརྒྱད་པའི་སྐུ་ཚབ་ལུང་བསྟན་མཛད། །དེ་ཡི་དུས་སུ་འོད་ཀྱིས་འཇིག་རྟེན་ཁྱབ། །ལྷ་རྣམས་ཀུན་གྱིས་མེ་ཏོག་ཆར་པ་ཕབས། །དེ་ལྟར་ཡོན་ཏན་ལྡན་པའི་རྟེན་མཆོག་འདི། །བདག་གི་མིག་གི་འབྲས་ལྟར་གཅེས་ན་ཡང་། །མཛེས་པའི་བུ་མོ་ཁྱོད་ལ་བདག་གིས་བརྫངས། །རྗེ་བཙུན་བྱམས་པ་ཆོས་ཀྱི་འཁོར་ལོ་འདི། །འགྲོ་ཀུན་བདེ་ལ་འགོད་ཕྱིར་བདག་གིས་བརྫངས། །ཙན་དན་ཇོ་མོ་སྒྲོལ་མ་རང་བྱོན་དང་། །རིན་ཆེན་སྟག་ཤ་དེ་དང་རཏྣ་དེ། །འདོད་འབྱུང་བཻཌཱུརྱ་ཡི་ལྷུང་བཟེད་དང་། །རིན་ཆེན་གསེར་དངུལ་དར་ཟབ་རྒྱན་དང་བཅས། །གཞན་ཡང་མཁོ་བའི་ཡོ་བྱད་ཟས་གོས་རྣམས། །གང་ལ་ཅི་འདོད་བུ་མོ་ཁྱོད་ལ་བསྐུར། །རིགས་བཟང་ཡིད་འོང་གཅེས་པའི་བུ་མོ་བཅུ། །ཁྱོད་ཀྱི་སྐྱོ་གྲོགས་བྱེད་པའི་འཁོར་དུ་བརྫངས། །ཨེ་མ་འབྲལ་བར་མི་ཕོད་བུ་མོ་ཁྱོད། །གཏམ་གྱི་རྟིང་མ་ཡིན་ནོ་ཡིད་ལ་ཆོངས། །ཁ་བ་ཅན་གྱི་མི་དང་འགྲོགས་པའི་དུས། །ཁྱོད་ཀྱི་སྤྱོད་ལམ་བྱ་བ་འདི་བཞིན་གྱིས།། ཞེས་མི་ཆོས་བསླབ་བྱ་མང་དུ་གསུངས་སོ།། དེ་ནས་ཇོ་བོ་དང་བྱམས་མགོན་གཉིས་ཤིང་རྟས་བགྲོད་པར་དཀའ་བས་ཁལ་གྱིས་འདྲེན་འདོད་ཀྱང་མ་ཐེག སྤྲུལ་པའི་མཛོ་བོ་གཉིས་ཀྱིས་ཐེག་པས་དྲངས། གཞན་ཡང་ཁལ་དུ་མ་དང་བཅས་ལྷ་གཅིག་དྲེལ་དཀར་མོ་ཅིག་ལ་བཅིབས་ནས་བོད་དུ་འོངས། ཐུན་མཚམས་ཀྱི་སྤྱོད་ལམ།༄༅། ཐུན་མཚམས་ཀྱི་སྤྱོད་ལམ་ཀུན་ལ་སྣང་གྲགས་རྟོག་པ་ཐམས་ཅད་བླ་མའི་གསང་གསུམ་གྱི་རོལ་བར་བལྟ་ཞིང་ཁྲེགས་ཆོད་ཀྱི་ཉམས་ལེན་སྤྲོས་པ་ཐམས་ཅད་རང་སར་ཞི་བའི་གནས་ལུགས་རིག་པ་རྟོག་མེད་སྟོང་དངས་སང་ངེ་བ་འདི་དང་། ཐོད་རྒལ་གྱི་རིག་གདངས་འོད་གསལ་ལྷག་མཐོང་གི་སྣང་ཆ་གསལ་ལམ་མེ་བ་གཉིས་ཟུང་དུ་འབྲེལ་བར། དགག་སྒྲུབ་བླང་དོར་རེ་དོགས་འཛིན་ཞེན་སོགས་གང་ཡང་མེད་པར་དུས་རྒྱུན་དུ་སྐྱོང་བ་ནི། མན་ངག་གནད་ཟབ་མོ་ཉམས་སུ་ལེན་པའི་མཐིལ་གལ་པོ་ཆེ་ལགས་པས་ཐུགས་དམ་མཛད་འཚལ། འདི་ལས་ལྷག་པའི་གདམས་ངག་ཞིག །ཁ་དང་སྙིང་ན་མེད་ངེས་ཕྱིར། །འདི་ཙམ་བྲིས་པས་ཆོས་མཐུན་གྲོགས། །ཐུགས་ཀྱི་བཞེད་པ་སྐོང་བར་ཤོག །ཅེས་པ་འདི་ཡང་རྡོ་རྗེའི་མཆེད་པོ་མགོན་སྐོར་དབོན་འགྱུར་མེད་ཆོས་བསྟན་ནས་བཞེད་ངོར། མགོ་ལོག་སྔགས་རྒན་གྱིས་བྲིས་པ་སརྦ་མངྒ་ལཾ།། རྫ་བྲག་མདོའི་གནས་ཡིགདག་སྣང་སྐུ་གསུམ་དགོངས་མཛོད་ལས། གནས་བསྟོད་འབྲེལ་ཚད་མྱུར་གྲོལ་བཞུགས། སྐུ་གསུམ་ཡོངས་འདུས་གུ་རུ་རྗེར། །རང་རིག་རང་ངོ་ཤེས་པས་འདུད། །འབྲེལ་ཚད་འགྲོ་རྣམས་མྱུར་གྲོལ་ཕྱིར། །གནས་ཆེན་རྒྱལ་མོ་མུ་རྡོ་དང། །ཝ་སེང་བྲག་སོགས་ལྔ་ཚན་ལྔའི། །གནས་རྣམས་བྱིན་གྱིས་བརླབས་པའི་ཚེ། །མཁས་པ་བཻ་རོ་ཙ་ན་དང་། །གཡུ་སྒྲ་སྙིང་པོ་སོགས་བཅས་བྱོན། །རྫ་བྲག་རིན་ཆེན་འབུམ་བརྩེགས་མདོར། །མ་རུང་གདུལ་བར་དཀའ་བ་རྣམས། །འཆོར་མེད་བཅིང་པ་ལྔས་བཅིངས་ཏེ། །དམ་སྲི་སྔགས་པའི་གཟུགས་ཅན་དང་། །བདུད་སྲིན་ཕག་གདོང་དབྱིངས་སུ་བསྒྲལ། །སྙིགས་མའི་ལུས་གཟུགས་ཐབས་མཁས་ཀྱིས། །སྲ་མཁྲེགས་རྡོ་ཡི་རྣམ་པར་བཞག །དེ་འཁོར་ཀླུ་འབུམ་གཉན་ཁྲི་དང་། །ས་བདག་སྟོང་དང་ལྷ་རིགས་བརྒྱ། །སྡེ་བརྒྱད་དཔུང་བཅས་མ་ལུས་པ། །དམ་བཏགས་རང་རྟགས་སྲོག་སྙིང་ཕུལ། །དཀར་ཕྱོགས་སྐྱོང་རྣམས་འཁོར་དུ་བཀོད། །ནག་ཕྱོགས་སྐྱོང་རྣམས་གདན་བྱས་སྟེང་། །བྲག་དམར་བདེ་གཤེགས་འབུམ་རྫོངས་ཞེས། །འགྱུར་མེད་སྲ་བརྟན་རྡོ་རྗེའི་བྲག །སྐུ་གསུམ་ཡོངས་རྫོགས་ཕོ་བྲང་བཀོད། །ས་རྡོ་རི་བྲག་རྩི་ཤིང་ཆབ། །ཐམས་ཅད་ཁྱད་འཕགས་སྒྲུབ་གནས་སུ། །བྱིན་གྱིས་བརླབས་ཤིང་རབ་གནས་མཛད། །ངོ་མཚར་གཏེར་ཁ་མང་དུ་སྦས། །གསང་གསུམ་བརྡ་རྟགས་རྒྱ་ཡིས་བཏབ།། བར་དུ་དཔལ་ཆེན་དགའ་ལོ་དང་། །རྒྱལ་སྲས་མདོ་གཞེར་ནག་པོའི་མཚན། །ཧཱུྃ་ནག་མེ་འབར་ཀརྨ་པ། །ཧཱུྃ་རལ་ཁྲག་འཐུང་དཔའ་བོ་སོགས། །ཞབས་ཀྱིས་བཅགས་ཤིང་བྱིན་རླབས་མཛད། །ཡ་མཚན་ཆེ་བའི་གྲུབ་རྟགས་བཞག །དེ་རྗེས་གནམ་མཚོ་གདན་རབས་དང་། །ཁམས་གཏེར་གླིང་པ་རྣམ་གསུམ་སོགས། །མཁས་གྲུབ་མང་པོས་སྒྲུབ་གནས་དང་། །སྐུ་གསུམ་ཞི་ཁྲོ་རབ་འབྱམས་ཀྱི། །ཡེ་ཤེས་ཐུགས་རྗེའི་སྒྱུ་འཕྲུལ་ལས། །རང་བྱུང་རང་ཤར་སྤྲུལ་པའི་གནས། །འོག་མིན་ཞིང་དང་གཉིས་སུ་མེད། །ས་སྤྱོད་གནས་ཡུལ་ཞིང་ཀུན་གྱི། །དངོས་གྲུབ་བྱིན་རླབས་ཡོངས་སུ་རྫོགས། །ཕྱི་ལྟར་ཕུན་ཚོགས་ལྔ་ལྡན་ཞིང་། །བྱ་རྒོད་ཕུང་པོའི་རི་དང་མཚུངས། །དབུས་དང་གཡས་གཡོན་རི་བོ་གསུམ། །དུས་གསུམ་སངས་རྒྱས་བཞུགས་པའི་ཚུལ། །ཕྱོགས་མཚམས་རི་བྲག་ཐམས་ཅད་ནི། །ཕྱོགས་བཅུའི་སངས་རྒྱས་འདྲེན་མཆོག་སྟོང་། །སེམས་དཔའ་སེམས་མས་བསྐོར་བ་དང་། །ཆོས་ཕུང་གླེགས་བམ་བརྩེགས་པའི་ཚུལ། །ནགས་ཚལ་ལྗོན་ཤིང་གནས་བརྟན་ཚོགས། །རྣམ་བཞིའི་འཁོར་དང་བཅས་པའི་ཚུལ། །ནང་ལྟར་ངེས་པ་ལྔ་ལྡན་ཞིང་། །ཞི་བས་འདུལ་བའི་སྣང་ཡུལ་དུ། །རྡོར་དབྱིངས་དཀྱིལ་འཁོར་དང་མཚུངས་ཕྱིར། །རི་རྣམས་གཤེགས་པ་གཤེགས་མ་དང་། །བྲག་རྣམས་སེམས་དཔའ་སེམས་མ་དང་། །ཁྲོ་རྒྱལ་ཡབ་ཡུམ་ཐུབ་པ་དྲུག །ནགས་དང་ཚལ་རྣམས་སྤྲུལ་པ་ལ། །རྡོ་ཤིང་ཕལ་རྣམས་ཡང་སྤྲུལ་ཚུལ། །གདུལ་དཀའ་ཁྲོ་བོས་འདུལ་བའི་ངོར། །ཁྲག་འཐུང་རོལ་བའི་དཀྱིལ་འཁོར་དངོས། །བདེ་གཤེགས་ཡོངས་རྫོགས་སྒྲུབ་སྡེ་དགུའི། །བརྡ་རྟགས་སོ་སོར་མ་འདྲེས་གསལ། །འཕགས་པ་མཆོག་གི་གདུལ་བྱ་ལ། །རྒྱབ་རི་པོ་ཊ་ལ་ཡི་གནས། །སེམས་ཉིད་ངལ་བསོའི་སྐུའི་བཀོད་པ། །གདན་ཁྲི་དང་བཅས་རི་རབ་གཟུགས། །གཡས་ཕྱོགས་གདགས་རི་ལྕང་ལོ་ཅན། །ཤིང་བྲག་རྡོ་རྗེ་དྲིལ་བུའི་དབྱིབས། །ནུས་བསྐྱེད་གྲུབ་ཆུ་ཕྱག་རྡོར་ཕུག །ཀླུ་ཆེན་བརྒྱད་གནས་ཆུ་མིག་བརྒྱད། །གཡོན་ཕྱོགས་ཀེའུ་དེ་ཤན་རིར། །བློ་འཕེལ་སྒྲུབ་ཕུག་གྲུབ་ཆུ་དང་། །བྲག་དང་ཤིང་ཚལ་རལ་གྲི་དང་། །ཨུཏྤལ་པོ་ཏི་མཚན་ཉིད་ལྡན། །བྱེ་བྲག་ནུབ་ཀྱི་མཚན་གསོལ་གནས། །ཆོས་སྐུའི་ཞིང་མཚོན་ཟླ་གམ་འཁྱིལ། །སྐུ་ཡིག་ཕྱག་མཚན་གྲུབ་པའི་རྟགས། །ཆོས་ནོར་གཏེར་གྱི་སྒོ་རྟགས་བཅས། །གནས་དངོས་རྨོག་བརྩེགས་མཐོན་པོའི་རི།།ཆོས་འཁོར་གདུག་ཏོག་དང་བཅས་དབྱིབས། །རིགས་ལྔའི་ཞིང་དང་དབྱེར་མེད་རྟགས། །སོ་སོའི་ས་བོན་ཕྱག་མཚན་དང་། །བཻ་རོའི་སྐུ་བརྙན་ཕྱག་ཞབས་རྗེས། །ཉི་ཟླ་ནོར་བུ་ཟླ་ཚེས་ཐིག །གནམ་ལྕགས་རལ་གྲིའི་ཡུ་བ་ལ། །ར་ཡིག་དཀར་པོས་མཚན་པ་བཅས། །སྟེང་བར་དཔའ་བོའི་བྲོ་ར་ལ། །ཧཱུྃ་ཧཱུྃ་ཨཾ་ལཾ་རཾ་ཏཱ་ཧཱ། །བཛྲ་གུ་རུ་ངོ་མཚར་ཅན། །སྤྲིན་འབྲུག་པི་ཝཾ་རུ་མཚོན་ལྡན། །སྟེང་གཡས་རྟ་ཕག་སེང་གསུམ་གནས། །རྟ་མགྲིན་གནས་སུ་ཧྲཱི༔ལཾ་ཧ། །བཻ་རོའི་ཞབས་རྗེས་ཐོད་སྐམ་འབྲུག །བརྡ་ཡིག་མདའ་རལ་སྐྱབས་སྦྱིན་རིས། །མི་འཇིགས་སྐྱབས་སྦྱིན་ཕུག་རྣམས་ཡོད། །ཕག་མོ་མཁའ་འགྲོའི་ཞབས་རྗེས་བཾ། །གསང་ཆེན་ཕུག་རིང་རང་བྱོན་བཅས། །སེང་གདོང་མ་ཡི་སེང་ཞལ་དང་། །བིལྦ་རླུང་རིས་རྐང་གླིང་དང་། །བཾ་ཏྭ་ཙ་ར་ཛཾ་ཡིག་བྷྲུཾ། །བཻ་རོའི་རྣམ་རྒྱལ་ཕུག་དང་བཅས། །གཡས་འོག་རྐྱེན་སེལ་གྲུབ་པའི་ཆུ། །ཉེ་ཆར་ཧོར་ཡིག་སྤྲིན་རིས་ཐ། །གཞུ་ཤུབ་དང་ནི་མཆོད་རྟེན་རིས། །ཕྱག་རྗེས་བཻ་རོའི་གྲུ་མོའི་རྗེས། །སྟེང་གཡོན་མ་གཤིན་ཕུར་གསུམ་གནས། །ཕུར་བར་ཕུར་བུ་ཁྲོ་ཞལ་ཅན། །ལས་བཞིའི་ཕུར་བུ་ཁྱུང་གཤོག་ཧྲཱིཿ །པོ་ཏི་དྷིས་མཚན་བ་དན་ཏྲ། །ནོར་བུ་བར་ཆད་ཀུན་སེལ་ཕུག །གཤིན་རྗེར་ལཉྫའི་དྷི་དབྱིབས་བྲག །རལ་གྲི་བེ་ཅོན་ཐོད་དབྱུག་གཤོལ། །མ་ཧེ་སྦལ་སྡིག་སྦྲུལ་གྱི་གདན། །ཡ་ཡིག་འཆི་བདག་ཟིལ་གནོན་ཕུག །མ་མོར་དྲག་སྤྱན་འོ་འཛིན་ཚེམ། །ཞིང་དབྱུག་ཁ་ཊཱཾ་རུ་མཚོན་སྙིང་། །ཐོད་ཁྲག་རྨ་བྱའི་རྒྱལ་མཚན་ཏྲག །སྤྱང་གདོང་གློ་སྙིང་ཤིང་ཨོ་ཀེང་། །རྔ་ཡབ་དཔལ་བེའུ་མི་གསལ་ཙམ། །ཐོད་རྔ་ཀེང་མཚན་བཾ་ཧཱུྃ་ཧཱུྃ། །ཝ་ཁ་རི་ཥ་ཤྲཱི་ནྲྀ་ཧོ། །དགའ་བཞི་མངོན་རྫོགས་ཕུག་རིང་གསལ། །རིགས་གསུམ་སྐུ་མཚོན་བྲག་ངོས་སུ། །པད་འབྱུང་སྐུ་དང་པད་གདན་ལེགས། །ཧྲི་ཧྲི་ཧཱུྃ་ཧཱུྃ་མཱུཾ་པྱཾ་རཾ། །ད་ནྲྀ་ད་ཆ་བསེ་རུའི་མགོ། །འཁོར་ལོ་འཇའ་གུར་རྐང་གླིང་མེ། །གྱེན་བརྩེགས་མཁའ་འགྲོའི་ཕུག་དང་བཅས། །གཡོན་འོག་ཚེ་སྤེལ་གྲུབ་པའི་ཆུ། །ཕུ་ཡིག་ཆུ་སྲིན་རྨ་བྱ་འབྲུག །གསེར་སྦལ་གསེར་ཉ་དུང་སྦྲུལ་སོགས། །ཆུ་གནས་ཚོགས་དང་ཕྱག་ཞབས་རྗེས། །རྔ་ཡབ་ཆུ་རི་སྲིན་མོའི་རྗེས། །ནོར་སྤུང་ནོར་བུ་དགའ་འཁྱིལ་བཅས། །མདུན་ངོས་རིག་འཛིན་ཞི་དྲག་དང་། །མཁའ་འགྲོ་སྡེ་ལྔ་སོགས་ཀྱི་གནས། །ཕག་ཞལ་དར་ཐག་བསེ་རུའི་མགོ། །སྤྱི་བླུགས་མཆོད་རྟེན་སྤྲིན་དཀར་རིས། །བརྡ་ཡིག་ཉི་ཟླ་ནོར་བུ་མེ། །ཁ་ཊཱཾ་ཕུར་བུ་རྒྱལ་མཚན་གདུགས། །ལྷ་ཆེན་སྲིད་མེ་ཨཾ་ཡིག་མཚན། །པདྨ་བུམ་པ་ཧྲི་ཅན་སྒོ། །སློབ་དཔོན་སྐུ་རྗེས་གཏེར་བུམ་ཞོ། །གནམ་ལྕགས་རྡོ་རྗེ་ཐོད་པ་སྙིང་། །རྩེ་མོ་རྡོར་ཕྱེད་རྩེ་གཅིག་ཕྱེད། །ཆུ་གྲི་གྲི་ཐོད་ཙི་ཏྲ་མེ། །ཟླ་ཚེས་གདན་ཁྲི་བྱང་ཆུབ་ཤིང་། །བོད་དབྱངས་བཞི་སོགས་བུ་དྲུག་དང་། །གསལ་བྱེད་སུམ་ཅུ་ཐོར་བུའི་ཚུལ། །ཧྲི་བཾ་ཨ་ཧ་རི་ནི་ས། །བཾ་ཊ་ཧྱ་ཧཾ་ཏ་རེ་ཏཾ། །དྷ་ཨྃ་དྷི་ཤྲི་བཻ་ཌ་ཡཾ། །བར་འོག་མ་ཚོགས་དཔའ་མོ་རྣམས། །བྲོ་གར་མཛད་པའི་དོ་ར་ལ། །འོད་སྲུང་འཕེལ་གདུང་བཅུ་གསུམ་རྟགས། །མཁའ་འགྲོ་སྡེ་ལྔའི་ཞབས་རྗེས་ཅན། །སྟག་སྒྲོ་ཏྲིས་མཚན་ནོར་བུ་དང་། །སྤྲིན་འབྲུག་ཧ་དང་ཛས་བརྒྱན་པ། །བྲོ་ར་ཞེས་གྲགས་ཚོགས་གཞོང་དང་། །སྐྲ་རྗེས་ནོར་སྤུང་ཀལ་པིངྒ་། །བཻ་རོའི་མཐའ་འདུལ་མཆོད་རྟེན་དང་། །ཟོམ་ལྷམ་གཡས་པ་བསེ་རུའི་རྭ། །འོད་གླིང་ཞབས་རྗེས་གཡུང་དྲུང་སོགས། །དྲན་པ་ཡབ་སྲས་སྐུ་ཡི་རྗེས། །དུང་དང་རལ་གྲི་མཆོད་རྟེན་འབྲུག །ངོ་མཚར་ཆེ་བའི་རྫས་རྟགས་ལྡན།། ༈ པད་འབྱུང་འཇའ་ལུས་རྡོ་རྗེ་ཡིས། །བུ་ཤིང་ལྕུགས་མའི་ཕོན་པོ་ལས། །བརྟགས་པའི་རྟེན་འབྲེལ་ལུང་བསྟན་དང་། །ཐུགས་བསྐྱེད་སྨོན་ལམ་ཞལ་བཞེས་ལྟར། །འགྱུ༵ར་མེ༵ད་བློ་གྲོས་རྒྱ་མཚོ་ལས། །ལེགས་འཁྲུངས་གཞ༵ན་ཕ༵ན་དབང་གི་རྒྱལ། །བྲག་དམར་མདོ་སྔགས་ཆོས་གླིང་མཆོག །བསྟན་འགྲོ་ཡོངས་ཀྱི་དཔལ་དུ་ཤར། །གནས་དངོས་རིན་ཆེན་རང་བཞིན་བྲག །སྐུ་གསུམ་ཡོངས་འདུས་འགྲོ་བའི་དཔལ། །རིག་འཛིན་གཙོ་བོ་་པདྨ་འབྱུང་། །རྒྱལ་བསེན་གདུལ་དཀའ་འདུལ་བའི་ཕྱིར། །བཅོམ་ལྡན་པདྨ་དྲག་པོ་རྩལ། །བར་གཅོད་དམ་སྲི་ཚར་གཅོད་ཕྱིར། །རྡོ་རྗེ་གཞོན་ནུ་ཁྲོ་བོའི་རྒྱལ། །རྣམ་འགྱུར་ཙམ་ལ་དབྱེར་མེད་པས། །རྡོ་རྗེའི་དབྱིབས་དང་སྡིག་པའི་གཟུགས། །གནམ་ལྕགས་ཕུར་བུའི་རྣམ་པར་སྣང་། །ཡང་དག་བྲག་ལ་གཡས་ངོས་ནས། །བཻ་རོ་གཡུ་སྒྲའི་ཞབས་རྗེས་དང་། །འཆི་ཁའི་བར་དོ་གྲོལ་བྱེད་འཕྲང་། །ཐང་རྒྱལ་མི་གཡོ་དཀར་པོའི་སྐུ། །བྱ་ཕག་གླང་ཆེན་གདོང་གསུམ་ཡོད། །ཀླུ་གཟུགས་གཉིས་དང་འཐོར་སྟབས་སུ། །ཨོཾ་ཨཱཿཧཱུཾ་ཧྲཱི་བཾ་ཕཊ་བྷྱོ། །ཨ་ཀ་ཙ་ཊ་ར་ས་ཡ། །ཤ་ཧཾ་ཏཾ་བྷྲུཾ་ཝ་དུ་ཏི། །ནེ་ཙོ་དང་ནི་ཁུ་བྱུག་གཟུགས། །ཧ་བརྒྱད་ཉ་ད་བ་ལ་ཨ། །ར་ཡུ་ན་གྃ་ཟླ་གམ་གཉིས། །གྲི་བདུན་རྡོ་རྗེ་རྡོ་ར་སྦྲུལ། །གླེགས་བམ་པད་གདན་དར་ཁེབ་ཅན། །རྒྱལ་མཚན་པི་ཝཾ་ཤིང་ལེར་ཁཾ། །ནོར་བུ་ཏྲཾ་མཚན་རྩེ་གསུམ་བྲག །མི་གཡོ་སྒྲུབ་ཕུག་ཡང་དག་ཕུག །ཀླུ་དབང་ཕུག་དང་དྲང་སྲོང་ཕུག །ཉེ་ཆར་ཤ་མགོ་འབྲུག་སོགས་སྣང་། །རྟ་མགྲིན་བྲག་ལ་གནས་བདག་གི། །སྤྲུལ་པ་གནོད་སྦྱིན་གཉན་རྗེའི་གཟུགས། །ཧྲཱི༔དགུ་སྤྲིན་རིས་ཧྲཱི༔དང་བཅུ། །ཨོཾ་ཨཱཿ་བཾ་སེཾ་ཧ་ཡ་ཧྱ། །བྷ་བྷྲུཾ་ཌ་ཆ་རལ་གྲིར་ཧ། །ཙིཏྟ་ཨཾ་མཚན་རཾ་ཅན་མེ། །ཟླ་གམ་གཏེར་སྒྲོམ་ནོར་སྤུང་གདུགས། །ཐོད་པ་དབང་ཆེན་ཡབ་ཡུམ་ཕུག།ཉེ་ཞོལ་སེང་གདོང་སྐུ་དང་ནི། །གྲིབ་གདོན་འཇོམ་པའི་གྲིབ་ཆུ་ཡོད། །མགོན་པོའི་བྲག་ལ་བིང་དབྱུག་དང་། །ཨོཾ་ཤྲཱི་མ་ཧཱ་ཀཱ་ལ་ཡ། །བཛྲ་ཡཀྴ་བེ་ཏ་ལི། །ཧཱུྃ་ཕཊ་བཾ་ཏྭ་ཐོར་བུའི་ཚུལ། །སྙིང་ཐོད་མེ་ལོང་དཔལ་མགོན་ཕུག །གཤིན་རྗེ་མ་མོའི་བྲག་དག་ལ། །བཻ་རོའི་ཞབས་རྗེས་ཨ་དྷིས་མཚན། །གཞན་ཡང་ཞབས་རྗེས་ཕྱག་རྗེས་དང་། །ཤྲཱི་ཡིག་ལྔ་དང་དྷི་གསུམ་ཨ། །ཡ་མནྟ་ཀ་ཧཱུྃ་ཛ་ཤྲཱི། །ཤྲཱི་བཾ་སེང་ཧ་རི་ཊཱཀྐི། །འབྲུག་གསུམ་ཧེ་བརྒྱད་བྷྱོ་བརྩེགས་བཞི། །འབྲུ་བརྒྱད་ཨོཾ་ཨཱཿཧཱུྃ་རཾ་ཛ། །རིན་ཆེན་སྭ་མཚན་ནོར་སྤུང་ཏྲཾ། །ལྗོན་ཤིང་ལྕགས་ཀྱུ་ཆུ་གྲི་མེ། །རྒྱ་གྲམ་རྡོ་རྗེ་རྩེ་གཅིག་མགོ། །དབང་པོ་དོན་སྙིང་མ་གཤིན་ཕུག །ཕག་གཟུགས་ཏྲི་མཚན་སྦལ་ཁྱུང་འབྲུག །མ་རུང་བསྒྲལ་ཕུག་འདུས་བྱེད་ཆ། །བདུད་མོའི་སྤར་རྗེས་བསྒྲལ་ཕུག་རོ། །བཻ་རོས་ཕྱག་མཛུབ་ཀྱིས་ཕུག་བྲག །དུང་དང་སྒྲོམ་བུ་ཧྲཱི༔ཡིག་མཚན། །སྟོབས་ལྡན་བྲག་ལ་གུ་རུའི་སྐུ། །ཁ་ཊཱཾ་ཐོད་པ་སུམ་བརྩེགས་ལྡན།།སྦྲུལ་ཆེན་སྟོད་དང་སྦྲུལ་དཀར་བརྒྱད། །ལྗོན་ཤིང་ནོར་བུའི་འབྲས་བུ་ཅན། །རྡོ་བྲག་ལས་བཞིའི་དབྱིབས་ཅན་དང་། །ཚོགས་བདག་གླང་པོའི་གདོང་ཅན་སྐུ། །ནོར་བུས་མཚན་པ་གྲུ་བཞི་སེར། །ཆུ་ཡིག་སྙིང་པོ་རྣམ་གསུམ་དང་། །འབྲུ་དྲུག་དང་བཅས་ལེགས་པར་གསལ། །མ་ཧེ་སྦྲུལ་གཟིག་སོགས་ཀྱི་གདན། །དཔུང་རྗེས་བཞུགས་གདན་དྲིལ་བུ་མེ། །སྙིང་བརྒྱད་ཐུན་རྭ་དྲག་སྔགས་ཕུག །གཏེར་སྒྲོམ་གཏེར་གྱི་བརྡ་རྟགས་སྒོ། །ཧྲཱི༔ཧཾ་ཏཾ་བཾ་བ་ར་ལ། །ཡ་ཞ་ད་ཧ་པ་ཙ་ཕཊ། །རྩ་གསུམ་ཡོངས་རྫོགས་བྲག་རིང་ལ། །རིག་འཛིན་ཡོངས་རྫོགས་པད་འབྱུང་སྐུ། །སྲ་མཁྲེགས་རྡོ་ཡི་རྣམ་པར་བཞུགས། །སྡེ་བརྒྱད་ཀླུ་གཉན་དབང་དུ་སྡུད། །དབུ་ཕྱག་མི་སྣང་འོད་དུ་གསལ། །སྣང་སྲིད་མ་ལུས་ཟིལ་གྱིས་གནོན། །དེ་བཞིན་སྣང་མིན་བཻ་རོའི་སྐུ། །ཐུགས་ཀར་དྷི་ཡིས་མཚན་པ་དང་། །བདུད་སྲིན་ཆུ་སྲིན་གདོང་ཅན་སྟེང་། །ཆོས་ཉིད་བར་དོ་གྲོལ་བྱེད་འཕྲང་། །བཻ་རོ་ཙ་ནའི་སྐུ་རྗེས་དང་། །ཡེ་ཤེས་མཚོ་རྒྱལ་ཞབས་ཀྱི་རྗེས། །གཞན་ཡང་ཕྱག་ཞབས་སྐུ་ཡི་རྗེས། །སྨན་དང་རཀྟ་གཏོར་མ་དང་། །ཤིང་ལོ་ཧྲཱི༔ཡིས་མཚན་པ་དང་། །ཨ་ཡིག་ཟླ་བ་ལ་སོགས་གསལ། །ཕུར་བའི་གནས་མཚོན་ཕུར་བུའི་དབལ། །རྩེ་གསུམ་ཐོད་ཁྲག་བཞད་བྱ་བཾ། །སྒྲོལ་མའི་གནས་མཚོན་ཨུཏྤལ་དང་། །དགའ་འཁྱིལ་དུང་དཀར་ཁྱུང་གདོང་ཕུག །ཏཾ་བདུན་ད་ཨ་ཀཱི་ལ་ཡ། །མདུན་སྟོད་ཆེ་མཆོག་བྲག་གི་ངོར། །རྩེ་གསུམ་ཨ་མཚན་ཐོད་ཁྲག་སྙིང་། །ཧཱུྃ་ལྔ་ཤྲཱི་ཏཾ་ཧྲཱི༔ཧ་ཧྱ། །ཨུ་ཙ་ཏ་མ་ར་ཡ་ཕཊ། །ཤང་ཤང་སྨན་སྣ་རི་དྭགས་མགོ། །སྨན་སྡོང་བདུད་རྩི་སྨན་ཕུག་བཅས། །མདུན་སྨད་མཆོད་བསྟོད་བྲག་ངོས་ལ། །མཁར་སིལ་ལྷུང་བཟེད་རྔ་ལྕགས་རྔ། །ཀེང་སྟོད་ཀེང་རུས་སྒྲོ་དར་ཅན། །རལ་གྲི་མདུང་དར་གྲི་ཐོད་སྙིང་། །ར་མགོ་ར་སྐྱེས་དཀར་ནག་དང་། །དུང་ཉ་ཨུ་མའི་གསང་རྟགས་བཅས། །པ་ཊ་པྲ་བཻ་ཏྱྃ་ཨོཾ་ཏྲཾ། །བཛྲ་ས་དྷུ་ས་མ་ཡ། །ཧཱུྃ་བཾ་ཧྲཱི༔ཧ་ཧཱུྃ་ཏཾ་ཤྲི། །བྲག་མདུན་ཛཱ༔ཧཱུྃ་བཾ་ཧོའི་དབྱིབས། །མདུན་གཡས་མཐའ་སྐོར་ཐང་ཡངས་པར། །མཆོད་བསྟོད་གནས་ཏེ་ཕུག་པ་དང་། །ལས་བཞི་མྱུར་འགྲུབ་བྱ་སྐྱིབས་དང་། །ཧྲཱི༔ཧཱུྃ་བཻ་རོའི་ངལ་བསོའི་རྗེས། །སྐུ་རྒྱབ་རྗེས་དང་ཕྱག་ཞབས་རྗེས། །བདུད་མོའི་འཕོང་རྗེས་ལུས་ཀྱི་རྗེས། །དམ་སྲིའི་རོ་ཕྱེད་དུར་ཁྲོད་རྟགས། །བམ་རོ་གར་བྱེད་རོ་གཞོང་བྱ། །བམ་ཆེན་ལྷུ་དུམ་ནང་ཁྲོལ་དང་། །མཁའ་འགྲོས་བྲོ་གར་མཛད་པའི་རྗེས། །རི་ངོས་བྲག་གི་ངོས་ལོག་ལ། །གྲོ་ལོད་སོགས་ཀྱི་ཞབས་རྗེས་དྲུག །མེ་ཆུ་རླུང་རི་གཏེར་གྱི་སྒོ། །གནས་རིའི་སྟོད་ཕྱོགས་གཡས་ཀྱི་ཆར། །ནད་སེལ་གྲུབ་པའི་ཆུ་དང་ནི། །ད་གཉིས་རི་སྐེགས་བྱ་དང་ནི། །བྷྱོ་དང་ཊ་སོགས་གསལ་པོར་སྣང་། །གཞན་ཡང་མི་མཐོང་མཐོང་འགྱུར་གྱི། །རང་བྱུང་གྲུབ་རྟགས་དཔག་མེད་བཞུགས། །གཡས་ཕྱོགས་གདག་རིར་ཐུབ་དྲུག་བྲག །བཻ་རོའི་ཟོམ་ལྷམ་ཡ་གཅིག་དང་། །སྲིད་པ་བར་དོ་ལས་གྲོལ་འཕྲང་། །འཇིགས་སྐྱོབས་ཕུག་སོགས་རང་བྱུང་མང་། །གཡོན་ཕྱོགས་སྲིབ་རིར་སྒོ་སྐྱོང་བྲག །དེར་ཡང་རང་རྟགས་ཕྱག་མཚན་དང་། །སོ་སོའི་ས་བོན་ཡིག་འབྲུ་སོགས། །རང་བྱུང་གྲུབ་རྟགས་མང་དུ་གསལ།། ༈ ཕྱི་ཡི་མཚམས་བཞིར་སྒྲུབ་གནས་བཞི། །ཕྱོགས་བཞི་སྐྱོང་བའི་ཟོ་དོར་བཞི། །མཆོད་རྟེན་བདུད་རྩི་འབྱུང་བའི་བྲག །སྐུ་གསུམ་སྙིང་པོ་རང་བྱུང་གསལ། །དགའ་གཤོང་རིན་ཆེན་འཁྱིལ་བའི་གནས། །ངོ་མཚར་སྦས་ཡུལ་ལྟ་བུར་གབ། །རྫ་ཁྲ་སྤོས་ངད་ལྡང་བའི་རིར། །ཆོས་ནོར་གཏེར་ཁ་གྲངས་མེད་བཞུགས། །དཔལ་རི་བདེ་ཆེན་རྫོངས་བྲག་ལ། །རང་བྱུང་རྟེན་དང་གྲུབ་རྟགས་མང་། །རི་དཀར་རྡོ་རྗེ་རྒྱལ་མཚན་ལ། །ལུགས་གཉིས་སྐྱོང་བའི་དཔལ་ཡོན་མངའ། །སྭ་ལེགས་དཔའ་བོ་ཟངས་རྩེ་ལ། །ལས་བཞི་ཐོག་མེད་བརྡ་རྟགས་མངོན། །ཁྱུང་རི་ས་འཛིན་རྒྱལ་པོ་ནི། །བཀའ་གཏེར་བསྟན་པ་སྲུང་ལ་དགྱེས། །ལྷ་ལུང་མུ་ལ་འོད་དཀར་ནི། །ཆོས་བོན་བཀའ་གཏེར་སྐྱོང་བའི་མགོན། །གནས་བདག་བྲག་དམར་རྨོག་མཐོ་ལ། །རྣམ་འགྱུར་སྤྲུལ་པ་བསམ་ལས་འདས། །ཡུམ་མཆོག་མཚོ་སྨན་ཕྱུག་མོ་ནི། །ཕྱྭ་གཡང་གཏེར་ལ་མངའ་དབང་མཛད། །ཕྱི་སྐོར་རྒྱང་མཐོང་མུ་ཁྱུད་ཚུན། །རྡོ་ཤིང་རི་བྲག་ཐམས་ཅད་ལ། །རང་བྱུང་རྟེན་མཆོག་བགྲང་ལས་འདས།། ༈ བོན་གྱི་གདུལ་བྱ་འདུལ་བའི་ཕྱིར། །བླ་ཆེན་དྲན་པ་ཡབ་སྲས་དང་། །མཁའ་འགྲོ་ཀྱེ་མ་འོད་མཛེས་དང་། །སྟག་ལྷ་མེ་འབར་ཨ་མི་འདྲེ། །ཀན་ཇག་ཐང་ཏ་ཀུན་གྲོལ་གྲགས། །འཁྲུལ་རྟོག་རང་སངས་འོད་ཟེར་གླིང་། །རྒྱལ་བ་གཡུང་དྲུང་སོགས་ཀུན་གྱིས། །འགྲོ་ལ་ཕན་ཕྱིར་གནས་མཆོག་འདི། །བྱིན་གྱིས་བརླབས་ཤིང་བརྟན་བཞུགས་མཛད། །རི་བྲག་ཤིང་སོགས་ཕྱི་ལྟར་ན། །ལྷ་སྟོང་གཤེན་སྟོང་སྲིད་པ་སྟོང་། །ལྷ་མོ་སྟོང་དང་ནང་ལྟར་ན། །ཀློང་རྒྱས་ཞི་དང་ཁྲོ་བོའི་ལྷ། །ཞི་ལྡན་རིགས་བརྒྱའི་དཀྱིལ་འཁོར་རྫོགས། །གསང་བ་དབལ་གསས་དྲག་པོ་དགུའི། །དཀྱིལ་འཁོར་ལྷ་ཡི་ཚུལ་དུ་གནས། །ཡང་གསང་སྐུ་གསུམ་བདེ་གཤེགས་ཀྱི། །ཞིང་ཁམས་ཀུན་གྱི་བྱིན་རླབས་འདུས། །རང་བྱུང་རྣམས་ཀྱི་བྱིན་རླབས་ལ། །བན་བོན་ཁྱད་པར་མ་མཆིས་ཕྱིར། །གནས་ཀྱི་སྙིང་པོར་ནང་སྐོར་ལ། །གཡས་སུ་བདུན་བསྐོར་ཡིག་དྲུག་དང་། །གཡོན་དུ་བདུན་བསྐོར་འབྲུ་བརྒྱད་པ། །དུང་ཕྱུར་རེ་རེའི་ཕན་ཡོན་འཐོབ། །དེ་བཞིན་བརྒྱ་རྩ་བརྒྱད་བསྐོར་ན། །དུང་ཕྱུར་བཅུ་གསུམ་བཟླས་དང་མཉམ། །བསྐལ་ཆེན་བརྒྱ་ཡི་སྡིག་སྒྲིབ་འདག །གློ་བུར་རྐྱེན་རྣམས་ཕལ་ཆེར་སེལ། །སྟོང་རྩ་བརྒྱད་ཀྱི་གྲངས་བསྐོར་ན། །བསྐལ་བ་སྟོང་གི་ལས་སྒྲིབ་བྱང་། །སྔོན་ལས་མ་གཏོགས་ནད་གདོན་བགེགས། །དུས་མིན་འཆི་སོགས་ཀུན་ལས་རྒྱལ། །རྨོངས་པ་དད་མེད་དུད་འགྲོས་ཀྱང་། །བཏང་སྙོམ་ལན་གཅིག་བསྐོར་བ་ཡིས། །ཚེ་རབས་ལྔ་བརྒྱའི་སྒྲིབ་དག་ནས། །མི་ལུས་གཙང་མ་འཐོབ་འགྱུར་ན། །དད་པས་ཕྱག་མཆོད་ཕུལ་བ་ཡིས། །ཕན་པའི་ཡོན་ཏན་ལྟ་ཅི་སྨྲོས། །དཔའ་བོའི་བྲོ་ར་ཐུབ་དྲུག་དང་། །སྒོ་བཞིའི་བྲག་བཅས་རྒྱང་གྲགས་ཙམ། །བསྐོར་བ་ནང་སྐོར་ཕྱི་མ་ཞེས། །དུང་ཕྱུར་རེ་དང་ཕན་ཡོན་མཉམ། །དེ་ལ་བརྒྱ་དང་བརྒྱད་བསྐོར་ན། །འཕྲལ་རྐྱེན་འཇིག་པ་བཅུ་དྲུག་སེལ། །རྒྱབ་རི་དང་བཅས་བསྐོར་བ་ལ། །བར་སྐོར་ཞེས་སུ་གྲགས་པ་ཡིན། །བདུན་བསྐོར་བཅུ་དྲུག་རྟེན་ཚུན་གྲོལ། །གང་ཞིག་དད་ལྡན་ལྷག་བསམ་ཅན། །ཏིང་འཛིན་ལྡན་རྣམས་གནས་མཆོག་འདིར། །ནང་སྐོར་ལན་གཅིག་བྱས་ཙམ་ཡང་། །བྱིན་རླབས་ཡོན་ཏན་དཔག་ཏུ་མེད། །ཁྱད་པར་རྟ་ལོ་རྟ་ཟླ་ལ། །གནས་འདིར་དགེ་སྡིག་གྲངས་མེད་འཕེལ། །དུས་ཆེན་རྣམས་ལ་འབུམ་ཕྲག་དང་། །རྒྱུན་དུ་བརྒྱའམ་སྟོང་འགྱུར་འཕེལ། །དེ་ཕྱིར་མཆོག་དམན་ཐམས་ཅད་ཀྱིས། །བྲག་དམར་བདེ་གཤེགས་འབུམ་རྫོངས་ཀྱི། །གནས་འདིར་ཕྱག་མཆོད་བསྐོར་བ་དང་། །དད་གུས་རྟེན་བཞེངས་འབྲེལ་འཇོག་རེམ། །དེ་ལྟར་དུས་བབ་རྟེན་འབྲེལ་གྱི། །ཐབས་སྤྱོད་མཚམས་སྦྱོར་བཟང་པོར་བརྟེན། །འདིར་བརྩོན་དུས་གསུམ་རྣམ་དཀར་བཅས། །འཁོར་གསུམ་དམིགས་མེད་དབྱིངས་སུ་བསྡོམ། །དེ་མཐུས་མཁའ་ཁྱབ་འགྲོ་བ་ཀུན།།ལས་ཉོན་སྡུག་བསྔལ་ཀུན་གྲོལ་ནས། །སྐུ་གསུམ་ཡོངས་འདུས་གོ་འཕང་མཆོག །རིང་མིན་མྱུར་དུ་འགྲུབ་གྱུར་ཅིག །བདག་ཀྱང་ནམ་མཁའ་ཇི་སྲིད་བར། །འདོད་འབྱུང་ཡིད་བཞིན་ནོར་བུ་ལྟར། །ཡིད་ཅན་སྐྱེ་དགུ་མ་ལུས་པའི། །ཕན་བདེའི་འབྱུང་གནས་ཉིད་གྱུར་ཅིག །ཞེས་མདོ་ཁམས་རྒྱལ་མོ་ཚ་བ་རོང་གི་གནས་མཆོག་ཆེན་པོ་རྫ་བྲག་རྨོག་མཐོའམ་བྲག་དམར་བདེ་གཤེགས་འབུམ་རྫོངས་ཀྱི་གནས་ཚུལ་དང་། རང་བྱུང་རྣམ་གྲངས་དང་དང་བཅས་པ་ལ་བསྟོད་པའི་གཏམ་ཆ་ཡི་ཆ་ཙམ་བརྗོད་པ་འབྲེལ་ཚད་མྱུར་གྲོལ་ཞེས་བྱ་བ་འདི་ཡང་བསྟན་འགྲོའི་དཔལ་མགོན་དམ་པ་གནམ་མཚོ་མཆོག་སྤྲུལ་རིན་པོ་ཆེ་ནས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྟེན་མཆོག་བཟང་ལེགས། དྲི་བྲལ་ལྷ་རེག་དང་བཅས་ཏེ་བཀའ་གནང་བསྩལ་བ་སྤྱི་བོར་མཆོད་པ་དང་། བཤེས་གཉེན་དམ་པ་སྐལ་བཟང་དར་རྒྱས་དང་། ཡོངས་འཛིན་སྐྱེས་མཆོག་བསྟན་འཕེལ་སོགས་བློ་གསལ་དཔྱོད་ལྡན་གྱི་གྲྭ་སློབ་ཡོངས་ཀྱིས་བསྐུལ་བའི་ངོ་མི་ལྡོག་ཆེད་ཙམ་དུ་དམིགས་ནས། སྔགས་བན་གར་དབང་འཇིགས་མེད་རྣམ་རྒྱལ་བས་བྲིས་པའི་དགེ་བས་གནས་དགོན་མཆོག་སྤྲུལ་བླ་སློབ་གྲྭ་འབངས་དང་བཅས་པའི་ཞབས་པད་བརྟན་ཅིང་། བཞེད་དོན་ཡིད་བཞིན་དུ་འགྲུབ་པ་དང་། འགྲོ་ཀུན་སངས་རྒྱས་འགྲུབ་པའི་རྒྱུར་འགྱུར་བར་ཤོག སརྦ་མངྒ་ལཾ།། ས་མུ་ངོས་ཀྱི་གནས་ཡིགགནས་མཆོག་རྡོ་རྗེའི་བྲག་རྫོངས་ལ་ཆ་ཙམ་བསྔགས་པ་ཐར་ལམ་མྱུར་བགྲོད་བཞུགས་སོ།། ཨེ་མ་ཧོ། ཆོས་སྐུའི་སྟོན་མཆོག་ཀུན་བཟང་ཚེ་མཐའ་ཡས། །ལོངས་སྤྱོད་རྫོགས་སྐུ་རིགས་ལྔ་གངས་ཆེན་མཚོ། །སྤྲུལ་སྐུ་རབ་བདུན་མཆེད་བརྒྱད་བདེ་གཤེགས་སྟོང་། །ཡོངས་འདུས་གུ་རུ་རིན་པོ་ཆེ་ལ་འདུད། །གངས་ཅན་བོད་ཀྱི་ལྷ་སྐལ་སྤྱན་རས་གཟིགས། །འགྲོ་བློའི་མ་རིག་མུན་སེལ་འཇམ་པའི་དབྱངས། །གསང་ཆེན་རྒྱ་མཚོའི་མངའ་བདག་རྡོ་རྗེ་འཆང་། །རིགས་གསུམ་འགྲོ་བའི་མགོན་པོ་ལ་ཕྱག་འཚལ། །རྒྱལ་བ་ཀུན་འདུས་གུ་རུ་གྲོ་བོ་ལོད། །ཡེ་ཤེས་སྤྱན་ལྡན་ལོ་ཆེན་བཻ་རོ་དང་། །བྲག་རིར་ཐོག་མེད་དཔལ་ཆེན་དགའ་ལོ་སོགས། །དཔོན་སློབ་བརྒྱུད་པར་བཅས་ལ་ཕྱག་འཚལ་ནས། །རིགས་གསུམ་འཕགས་པས་བྱིན་གྱིས་བརླབས་པའི་གནས། །ཨོ་རྒྱན་པདྨས་ཞབས་ཀྱིས་བཅགས་པའི་རི། །བཻ་རོ་ཙ་ནས་སྒྲུབ་པ་མཛད་པའི་བྲག །དཔལ་ཆེན་དགའ་ལོས་གྲུབ་རྟགས་བསྟན་པའི་རྫོངས། །ཕྱི་ལྟར་ས་སྤྱོད་གནས་མཆོག་པོ་ཏ་ལ། །ནང་ལྟར་མཁའ་སྤྱོད་དཔལ་རི་པདྨ་འོད། །གསང་བ་འོག་མིན་ཞིང་མཆོག་བདེ་བ་ཅན། །མཐུན་སྣང་མངོན་གྲུབ་རྡོ་རྗེའི་བྲག་རྫོངས་གནས། །མཆོག་དམན་བར་མའི་གདུལ་བྱའི་བློ་ཁྱད་བཞིན། །སྣང་ཚུལ་མ་ངེས་ཡོན་ཏན་བསམ་མི་ཁྱབ། །དེ་ཕྱིར་མཐའ་དག་བརྗོད་པར་སྤོབས་མིན་ཡང་། །དད་ལྡན་དྭངས་བ་འདྲེན་ཕྱིར་ཆ་ཙམ་འབྲི། །སྤྱིར་ནི་བསྐལ་བཟང་འབྱུང་གནས་འཛམ་གླིང་འདིར། །གནས་ཆེན་ཉེར་བཞི་ཡུལ་ཆེན་སུམ་ཅུ་གཉིས། །ཧེ་རུ་ཀ་ཡི་གནས་བཅུ་དུར་ཁྲོད་བརྒྱད། །གྲུ་འཛིན་རི་བོ་རྩེ་ལྔ་ཤམྦྷ་ལ། །ཙ་རི་འབྲས་ལྗོངས་ཏན་ཏིག་ཡང་ཏིག་སོགས། །སྦས་ཡུལ་སྒྲུབ་གནས་མང་བས་བྱིན་རླབས་ཆེ། །ཁྱད་པར་རྒྱལ་མོ་རོང་འདིར་ཐུགས་ཆེན་སོགས། །གནས་ཆེན་ཉེར་ལྔ་གནས་ལག་ལྔ་བཅུ་གཉིས། །ཡང་ལག་བརྒྱ་རྩ་ལ་སོགས་མང་བཞུགས་ཕྱིར། །དག་སྣང་ཅན་ལ་གང་བཞུད་སྐོར་ལམ་ཡིན། །ཡང་སྒོས་གསང་ཆེན་རྡོ་རྗེའི་བྲག་རྫོངས་འདིར། །སྔོན་ཚེ་པད་འབྱུང་སྟག་ལ་ཆིབས་ནས་བྱོན། །བྱིན་ཆེན་དབབ་ཅིང་ཆོས་ནོར་གཏེར་མང་སྦས། །སྡེ་བརྒྱད་དམ་བཏགས་གནས་གཏེར་སྲུང་མར་བསྐོས། །བཻ་རོ་ཙཱ་ན་དཔོན་སློབ་སྒྲུབ་གནས་མཛད། །གྲུབ་པའི་ཆུ་མིག་གཏེར་ནས་བཏོན་པ་དང་། །སོ་སོའི་སྒྲུབ་ཕུག་ཡི་གེ་རང་བྱོན་མང་། །གྲུབ་པའི་རྟགས་བཞག་བྱིན་དབབ་རབ་ཏུ་གནས། །དགའ་ལོ་པ་ཞེས་ལྷ་ལུང་དཔལ་རྡོར་བྱོན། །གནས་དབུས་ལྷ་ལུང་ཕུག་ཏུ་ཞག་བདུན་བཞུགས། །གནས་འདིར་བྱིན་དབབ་ལྷ་འདྲེ་དམ་ལ་བཏགས། །བཀའ་རྟགས་ཕྱག་གི་རི་མོ་རྡོ་ལ་བཀོད། །རྔུལ་གཟན་བྱབས་པའི་རི་མོ་བྲག་ལ་དོད། །སྲིན་མོ་བྲེད་སྔངས་བཤང་གཅི་ཤོར་རྗེས་ཡོད། །མདུན་ཟུར་ནང་སྐོར་བྲག་གི་ངོས་གཡས་ལ། །དགའ་ལོའི་ཕྱག་བྲིས་རྡོ་དཀར་ཡིག་དྲུག་དང་། །དེ་འཕྲོར་རྡོ་བརྐོས་སྐུ་བརྙན་གསུང་བྱོན་མ། །ཁྱད་འཕགས་བྱིན་རླབས་ལྡན་པའི་རྟེན་མཆོག་ཡིན། །ཆུ་ཁར་སྲིན་མོ་ཕ་ཝཾ་ནང་གབ་ཚེ། །དཔལ་ཆེན་དགའ་ལོས་ཕ་ཝཾ་འདམ་ལྟར་བརྫིས།། གནས་ཡིག་འདིའི་མ་དཔེར་འདི་མན་མ་ཚང་།། གནས་སྒོ་ཕྱེས་མཁན་དང་གནས་ཡིག་མཛད་པ་པོ་ནི་མགོ་སྤྲུལ་གར་དབང་འཇིགས་མེད་རྣམ་རྒྱལ་ལོ།། སྦས་གནས་གསོལ་འདེབས།༄༅། སྦས་གནས་གསོལ་འདེབས་བསྡུས་པ་ནི། ཨེ་མ་ཧོ༔ སྔོན་དུས་རིག་འཛིན་པདྨ་རྒྱལ་པོ་དང་། །གྲུབ་ཐོབ་མང་པོས་བྱིན་གྱིས་བརླབས་པའི་གནས། །མ་སྲིང་དཔའ་བོ་ཌཱཀྐི་འདུ་བའི་གྲོང་། །སྦས་གནས་རི་བོ་ཏ་ལར་གསོལ་བ་འདེབས། །དེ་ལྟར་རྩེ་གཅིག་མོས་པས་གསོལ་བཏབ་མཐུས། །ད་ལྟའི་ནད་གདོན་བར་ཆད་བྱད་ཕུར་ལྟས། །མ་རུངས་སྨོན་ལོག་བདུད་དགྲའི་འཚེ་བ་བཟློག །རྒྱལ་ཁམས་ཐམས་ཅད་བདེ་ཞིང་སྐྱིད་པར་ཤོག །འཕོས་ཚེ་མཁའ་སྤྱོད་མཁའ་འགྲོའི་ཕོ་བྲང་དུ། །ཕྱིར་མི་ལྡོག་པའི་ས་མཆོག་རབ་བརྙེས་ཏེ། །བཅུ་གསུམ་རྡོ་རྗེ་འཛིན་པའི་ས་ཐོབ་ཤོག །མགོ་སྤྲུལ་བས་སོ།། གནས་སྒོ་འབྱེད་པའི་སྨོན་ཚིག༄༅། གནས་མཆོག་སྒོ་འབྱེད་ཀྱི་སྨོན་ཚིག་རེ་འདོད་མྱུར་སྐོང་ཞེས་བྱ་བ་བཞུགས། རབ་འབྱམས་ཕྱོགས་དུས་རྒྱལ་བ་སྲས་དང་བཅས། །སྐུ་གསུམ་ཡོངས་འདུས་ཀུན་མཁྱེན་པདྨ་འབྱུང་། །རྩ་གསུམ་བསྲུང་མར་བཅས་པའི་བྱིན་རླབས་ཀྱིས། །རིགས་གསུམ་འཕགས་པས་བྱིན་བརླབ་གནས་མཆོག་འདིའི། །སྒོ་འཕར་ཕྱེ་བའི་རྟེན་འབྲེལ་མྱུར་འགྲིག་ནས། །རྨད་བྱུང་ངོ་མཚར་སྣང་བ་སྣ་ཚོགས་ཀྱིས། །གདུལ་བྱའི་འགྲོ་ཚོགས་གྲངས་མེད་ཐར་ལམ་ལ། །འགོད་པའི་རེ་སྨོན་གེགས་མེད་འགྲུབ་གྱུར་ཅིག །ཅེས་གནས་མཆོག་སྒོ་འབྱེད་ཀྱི་སྨོན་ཚིག་རེ་འདོད་མྱུར་སྐོང་ཞེས་བྱ་བ་འདི་ཡང་་། སྒྲུབ་བརྩོན་དམ་པའི་རིགས་ཅན་པདྨ་ཚེ་མཆོག་གིས་བསྐུལ་ངོར་མགོ་སྤྲུལ་འཆོལ་བོས་བྲིས་པ་དགེ་ལེགས་འཕེལ་ཞིང་བརྟན་པའི་རྒྱུར་གྱུར་ཅིག སརྦ་མང་ག་ལཾ། སྒྲིབ་སེལ་མཆོད་རྟེན་ཐིག་ཡིག༄༅། སྒྲིབ་པ་ཐམས་ཅད་རྣམ་པར་སེལ་བའི་མཆོད་རྟེན་གྱི་ཐིག་གདབ་ཚུལ་ཅུང་ཟད་བརྗོད་པ་འབྲེལ་ཚད་མྱུར་གྲོལ་བྱ་བ་བཞུགས། ཀུན་མཁྱེན་བླ་མར་ཕྱག་བགྱིས་ནས། །སྒྲིབ་སེལ་མཆོད་རྟེན་ཆ་ཚད་འབྲི། །ཚངས་ཐིག་ལ་སོགས་བརྒྱད་པོ་གདབ། །མ་འཕྱུག་རེ་ཁ་གྲུ་བཞིར་བཅད། །ཕྱོགས་བཞིར་ཆ་ཆེན་བཅུ་བཅུར་བགོ། །དཔངས་ལ་དེ་སྟེང་ཆ་དྲུག་ཕྱེད། །ཁྱོན་བསྡོམ་བཅུ་དྲུག་ཕྱེད་དང་བཅས། །ཀུན་ཀྱང་ཆ་ཕྲན་བཞི་བཞིར་གསིལ། །རྨང་གཞིའི་ཚངས་ཐིག་གཡས་གཡོན་ནས། །ས་འཛིན་དཔངས་ལ་ཆ་ཕྲན་གསུམ། །ཞེང་ལ་ཆ་ཕྲན་ཉི་ཤུའོ། །སྐས་གདན་དཔངས་གཅིག་ཞེང་བཅོ་བརྒྱད། །ཐེམ་སྐས་གཉིས་པོ་དཔངས་རེ་རེ། །ཞེང་དག་བཅུ་དྲུག་བཅོ་ལྔའི་ཚད། །སེང་ཁྲི་དཔངས་དྲུག་ཞེང་བཅུ་བཞི། །འཛིན་བྱེད་གཉིས་པོ་དཔངས་རེ་རེ། །ཞེང་ཚད་བཅོ་ལྔ་བཅུ་དྲུག་བསྐྱེད། །སྟེང་གཡེལ་པདྨའི་དབྱིབས་ལྟར་བཅད། །བ་གམ་དཔངས་གཉིས་རྒྱར་བཅུ་བདུན། །དགེ་བཅུ་དཔངས་གཅིག་ཞེང་ཕྱེད་བཅས། །བཅོ་ལྔ་སྟེང་ཞུམ་པདྨའི་དབྱིབས། །ཚད་མེད་བཞི་པོ་དཔངས་གཉིས་གཉིས། །ཞེང་དུ་ཕྱེད་ཕྱེད་དང་བཅས་པའི། །བཅུ་གསུམ་བཅུ་གཉིས་བཅུ་གཅིག་བཅུ། །བུམ་གདན་དཔངས་གཅིག་ཞེང་ལ་དགུ། །སྟེང་ཞུམ་པདྨའི་དབྱིབས་སུ་བྱ། །བུམ་དཔངས་བཅུ་བཞི་ཞེང་ལ་བརྒྱད། །རྒྱར་གསུམ་བུམ་སྟོད་གསུམ་མཛེས་གཡེལ། །བྲེ་མགུལ་བྲེ་སྟན་དཔངས་ཕྱེད་ཕྱེད། །རྒྱར་ནི་གསུམ་དང་གཉིས་དག་གོ། །བྲེ་དངོས་དཔངས་གཉིས་ཞེང་ལ་གསུམ། །གདུགས་འདེགས་དཔངས་ཕྱེད་ཞེང་དུ་གཉིས། །བཅད་སྟེང་དཔངས་གཅིག་ཞེང་ཕྱེད་གསུམ། །གཡེལ་ཞིང་པདྨའི་དབྱིབས་སུ་འབྲི། །ཆོས་འཁོར་དཔངས་ལ་བཅུ་གསུམ་སྟེང་། །རྩ་བར་ཆ་གསུམ་རྩེ་རྒྱར་གཅིག །མོ་འཁོར་ཐིག་ཡིན་བཞི་ཆར་བསྐྱེད། །ཕོ་འཁོར་ཚད་སྟོན་རེ་རེ་བཞིན། །སུམ་ཆར་བགོས་པའི་འོག་མོ་འཁོར། །སྟེང་མ་གཉིས་གཉིས་ཕོ་འཁོར་ཡིན། །མདོ་གཟུངས་དཔངས་ཕྱེད་བཅད་པའི་སྟེང་། །དཔངས་གཅིག་ཨུཏྤལ་སུལ་ལྟར་གཡེལ། །ཞེང་ཚད་མོ་འཁོར་ཕོ་འཁོར་གྱི། །ཐིག་གི་རྩེ་མོ་དག་དང་བསྟུན། །གདུགས་དཔངས་བཞི་ཆས་དམན་པའི་ཆ། །ཞེང་གཉིས་ཕྱི་འོག་བཞི་ཆ་ནས། །ཟར་ཚགས་ཕོ་འཁོར་གཉིས་མཚམས་ཕྱིར། །ཆ་ཕྲན་གསུམ་གཡེལ་ཐད་ཀར་བཅད། །གདུགས་ཀྱི་ཕྱི་སྟེང་བཞི་ཆ་ནས། །གདུགས་ཁེབ་དཔངས་སུ་གཅིག་དང་ཕྱེད། །ཞེང་ཚད་གཉིས་སྟེང་ཅུང་ཟད་གཡེལ། །ཟླ་དཔངས་ཕྱེད་གཉིས་ཞེང་གཉིས་གཡེལ། །ཟླ་རྩེ་ཉི་མའི་ཕྱེད་དང་མཉམ། །ཉི་དཔངས་གཉིས་ཟླུམ་ཏོག་གི་དཔངས། །གཅིག་དང་བཞི་ཆ་ནོར་བུའི་དབྱིབས། །སྔགས་དང་ཕན་ཡོན་ཚོན་རྩི་བཅས། །མ་ནོར་འབྲི་ཞིང་ལེགས་བཞེངས་གྲུབ། །མཐོང་ཐོས་དྲན་རེག་དོན་ལྡན་པའི། །གྲོང་གྲོལ་ཆོས་སྐུའི་མཆོད་རྟེན་གྱི། །ཆ་ཚད་ལེགས་བྲིས་དགེ་བའི་མཐུས། །འབྲེལ་ཚད་འགྲོ་ཀུན་མྱུར་གྲོལ་ཤོག །ཅེས་གྲོང་གྲོལ་བའི་འཁོར་ལོ་ཞེས་བྱ་བ་སྒྲིབ་པ་རྣམ་པར་སེལ་བའི་མཆོད་རྟེན་གྱི་ཐིག་གདབ་ཚུལ་ཅུང་ཟད་བརྗོད་པ་འབྲེལ་ཚད་མྱུར་གྲོལ་ཞེས་བྱ་བ་འདི་ཡང་། རང་གཞན་འགས་གནས་མཆོག་གྲུ་འཛིན་བདེ་ཆེན་འགྱུར་མེད་རྫོངས། དཔལ་ལྡན་ཡོན་ཏན་བརྩེགས་པའི་དགའ་ཚལ་ཆེན་པོར་གནས་འབྲེལ་དུ་མཆོད་རྟེན་འདི་ཉིད་རྡོ་བརྐོས་མཛད་སྐབས་སུ། སྔགས་ནག་འཇིགས་མེད་རྣམ་རྒྱལ་གྱིས་ཀུན་མཁྱེན་འཇིགས་མེད་གླིང་པས་བཞེད་པའི་མཆོད་རྟེན་སྤྱིའི་དཔངས་ཚད་དང་ཅུང་ཟད་བསྟུན་ནས་བྲིས་པ་སརྦ་མངྒ་ལཾ། དགེའོ།། དགེའོ།། དགེའོ།། སྤྲིངས་ཡིག་བདེན་པའི་རང་སྒྲ།༄༅། སྤྲིངས་ཡིག་བདེན་པའི་རང་སྒྲ་བཞུགས། སྐྱབས་ཀུན་ཡོངས་འདུས་རྩ་བའི་བླ་མ་རྗེ། །འབྲལ་མེད་སྙིང་གི་པདྨོར་རྟག་མཆོད་ནས། །གྲོགས་དག་གཞི་མེད་ངན་སྒྲོགས་གཏམ་ཐོས་ཚེ། །ཡིན་ལུགས་དྲང་པོའི་གཏམ་ལན་ཉུང་ཞིག་ཞུ། །ཁོ་བོས་སྐྱེས་ཆེན་ཁྱད་འཕགས་སོ་ལྔ་ཡི། །གསུང་གསང་བདུད་རྩི་ལོངས་སུ་སྤྱོད་མྱོང་བས། །ཚེ་གཅིག་འཇའ་ལུས་འགྲུབ་པར་མ་ནུས་ཀྱང་། །ལྷ་འདྲེ་བརྒྱ་ཡི་ཕན་གནོད་རེ་དོགས་མེད། །ཞྭ་ལྟར་མཐོ་བའི་མཆོག་གསུམ་རྩ་གསུམ་མན། །ཟ་འདྲེ་གྲོང་རྒྱུག་ཐེའུ་རིང་རྐང་གཅིག་ཡན། །བརྗོད་ཚེ་མགྲོན་བཞིའི་གྲལ་འདྲ་མ་གཏོགས་པའི། །རྫེ་རྒྱལ་དངོས་སུ་མཆོད་དང་བཀར་མ་མྱོང་། །ལྟུང་བཤགས་གསེར་སྐུ་རྔ་རྒན་གཉིས་མཚོན་པའི། །དངོས་དང་སར་བརྐུང་བཅོམ་བརླག་ཁྱེར་སོང་ཚེ། །རྫེ་རྒྱལ་དེ་རྗེས་འབྲང་བར་མ་ནུས་ན། །སྤྲང་པོ་ང་རྗེས་འོང་དོན་གཏན་ནས་མེད། །དུས་ངན་སྙིགས་མའི་མི་ལ་བློ་གཏད་མེད། །སྨྲས་ཚད་བདེན་མེད་བརྟགས་ན་རི་བོང་ཅལ། །དམ་པ་སྟག་སེང་འདྲ་རྣམས་བརྟགས་དཔྱད་མཛོད། །ཟོའི་༼གཞི་མེད་ཅེས་པའི་དོན་༽མེད་ཅལ་རྗེས་མ་འབྲང་སྐུ་ཚེ་རིང་། །འགྲོ་མགོན་གླིང་པ་རྣམ་གསུམ་ཟབ་གཏེར་སྒོར། །དབང་ཁྲིད་ལུང་མ་ཐོབ་མཁན་འགའ་མེད་པས། །འུ་ཅག་རྡོ་རྗེའི་མཆེད་གྲོགས་ཡིན་ལགས་ཕྱིར། །མཆེད་གྲོགས་དམ་ཉམས་མ་མཛད་སྐུ་ཚེ་རིང་། །གསེར་ཁོག་མན་ཆད་མདོ་མུར་ཡན་ཆད་ལ། །ཆོས་དང་ཟང་ཟིང་འབྲེལ་ཐོག་མང་ཡོད་པས། །བདེན་མེད་རྫུན་གྱིས་ཐམས་ཅད་མགོ་བསྐོར་ནས། །དད་དམ་འབྲེལ་བ་མ་འཕྲོག་སྐུ་ཚེ་རིང་། །ཞེས་འདི་མགོ་ལོག་ཨ་མྱེ་འཆི་ཁ་མས། །ཆོས་གྲོགས་སྙིང་འདྲ་རྣམས་ལ་སྙིང་ནས་ཞུས། །འབྲེལ་ཐོག་འདི་མཐོང་ཐོས་པ་ཐམས་ཅད་ལ། །མི་ལྡོག་དད་གུས་རྟག་ཏུ་བརྟན་པར་ཤོག ། བུད་མེད་ཀྱི་ཉེས་སྐྱོན་བརྗོད་པའི་གཏམ་འདུལ་འཛིན་དགྱེས་བྱེད།༄༅། བུད་མེད་ཀྱི་ཉེས་སྐྱོན་བརྗོད་པའི་གཏམ་འདུལ་འཛིན་དགྱེས་བྱེད་ཅེས་བྱ་བ་བཞུགས། ཨོཾ་སྭ་སྟི། རྒྱལ་ཀུན་ཡེ་ཤེས་ངུར་སྨྲིག་གར། །མཚུངས་མེད་མཁན་པོ་མཆོག་ཉིད་ལ། །བཏུད་ནས་རྒྱལ་བསྟན་མཛེས་པའི་ཕྱིར། །འདུལ་འཛིན་དགྱེས་བྱེད་འབེལ་གཏམ་སྤྲོ། །ལང་ཚོ་རྒྱས་པའི་བུད་མེད་རྣམས། །སྡོམ་པ་འཕྲོག་པའི་ཇག་པ་ཡིན། །ངན་སོང་གསུམ་གྱི་ས་བོན་ཡིན། །ཐར་ལམ་བཀག་པའི་དགྲ་བོ་ཡིན། །བཙན་དུག་ཧ་ལ་ནག་པོ་ནི། །ཟོས་ཀྱང་ལན་གཅིག་ཁོ་ནར་འཆི། །བུད་མེད་དུག་ཆེན་སྤྱོད་པས་ནི། །ཡང་ནས་ཡང་དུ་འཆི་བར་བྱེད། །མི་གཙང་འདམ་དུ་ལྷུང་གྱུར་ཀྱང་། །ཆུ་ཡིས་བཀྲུས་པས་འདག་པར་འགྱུར། །བུད་མེད་དམྱལ་བའི་འདམ་རྫབ་ལ། །གང་འབག་ཡུན་རིང་ཕུང་བར་བྱེད། །ཕུང་བྱེད་བདུད་མོ་མཛེས་མ་ལ། །འགྲོགས་ཤིང་བརྟེན་པ་སྨོས་ཅི་དགོས། །བལྟས་ཤིང་གཏམ་གྱིས་འདྲེས་པས་ཀྱང་། །ཐོག་མར་འདོད་ཆགས་དུག་རོ་ལྡང་། །བར་དུ་ཕུང་ཁྲོལ་སྣ་ཚོགས་འབྱུང་། །ཐ་མར་ངན་འགྲོར་ལྟུང་བར་བྱེད། །འདོད་ལྡན་ཆུང་མ་ལ་ཞེན་པས། །ཕ་དང་མ་ཡང་གསོད་པ་སྲིད། །གཉེན་གྲོགས་མཛའ་བཤེས་དང་ཡང་འབྲལ། །མཁན་སློབ་མཆེད་གྲོགས་ཐུགས་དང་འགལ། །བསྲུང་སྡོམ་བསླབ་བྱ་དམ་ཚིག་ཉམས། །བློ་སེམས་ཡང་དག་ལམ་ལས་ལྡོག །དགེ་སྦྱོར་འཆག་ཅིང་སྡིག་ལས་འཕེལ། །བྱ་སྤྱོད་དམན་ཞིང་མི་ཁ་སྡུད། །བརྙས་ཤིང་བཞད་གད་གནས་སུ་འགྱུར། །ལོངས་སྤྱོད་དག་ཀྱང་ཉམས་པར་འགྱུར། །དང་པོ་བདུད་མོ་བསླུ་ཐབས་མཁས། །ཁ་དཀར་ངོ་འཛུམ་བཞིན་མདངས་བསྒྱུར། །གཡོ་ཟོལ་སྒྱུ་མའི་སྤྱོད་ལམ་གྱིས། །དབང་མེད་གཞན་སེམས་བསླུ་ཞིང་བསྒྱུར། །ངུ་ཞིང་དགོད་པ་སོགས་ཀྱིས་ཀྱང་། །སྐྱེས་བུ་འཆིང་ཞིང་དབང་དུ་བྱེད། །མཐོང་དང་རེག་དང་འགྲོགས་པ་ཀུན། །ཆགས་བྲལ་མ་གཏོགས་ཐམས་ཅད་འཆིང་། །བར་དུ་མནའ་སྡིག་རྫུན་ལ་དགའ། །སྤྲོ་ཐུང་གཡོ་སྒྱུ་མིག་སེར་ཆེ། །གསར་འགྲོགས་ཆེ་ཞིང་གཡེམ་ལ་དགའ། །ཁ་སེམས་མི་མཐུན་བླ་བཙག་རྒོད། །རང་འདོད་ཆེ་ཞིང་བློ་སྣ་མང་། །སྙིང་གཏམ་མི་བརྩི་གསང་གྲོས་སྤེལ། །འཐབ་རྩོད་ལ་དགའ་ངུ་འཁང་རྒོད། །མགུ་བའི་དུས་མེད་ཕྱི་ཐག་ཐུང་། །ཐ་མ་རླན་གྱིས་རུལ་བའམ། །རྩྭ་སྦུར་མེ་ཡིས་ཚིག་པ་ལྟར། །ཚེ་འདིར་བདེ་དགེ་མེད་པར་བྱེད། །ཕྱི་མ་ཤལ་མ་རི་ལ་འཁྲིད། །ཐར་མེད་འཁོར་བའི་རྒྱ་མཚོར་འཕེན། །བཟོད་མེད་སྡུག་བསྔལ་མྱོང་བར་བྱེད། །མདོར་ན་བུད་མེད་དབང་སོང་ན། །བདུད་ཀྱི་དབང་དུ་སོང་བ་ཡིན། །གཟུགས་དང་ལང་ཚོ་པགས་པའི་མདོག །ལེགས་ཀྱང་ནང་ནི་མི་གཙང་མཛོད། །ཁ་རུ་ཟོས་ཚད་ཁོང་དུ་རུལ། །རྐུབ་ནས་ཟག་པ་མི་ཤེས་སམ། །མཛེས་པར་སྣང་བ་གོས་རྒྱན་མདངས། །ལུས་ནི་བམ་རོ་རུལ་བ་དང་། །ཁྱད་པར་མེད་ཕྱིར་ཁ་རྐུབ་ནས། །རུལ་དྲི་བྲོ་བ་མ་ཚོར་རམ། །ཕྱག་དར་ལ་སོགས་རྫས་གཞན་ལས། །བཤང་གཅི་དག་ལ་རྩོག་བལྟ་ན། །ཆགས་པ་སྐྱེ་ཡུལ་མངལ་གྱི་སྒོར། །གཅི་བ་འབྱུང་བ་མི་ཤེས་སམ། །འཁྲིག་པ་སྤྱད་པས་ཁུ་རྡུལ་འཛག །དེ་ཟག་རྩ་ཉམས་རླུང་སྐྱོན་འབྱུང་། །རྐྱེན་དེས་ཚེ་ཉམས་དབུགས་ཀྱང་སྡུད། །གྲང་ནད་ལྷག་པར་སྡང་བར་འགྱུར། །གཉིས་སྦྱོར་འདོད་པའི་བདེ་བ་ནི། །ཡུད་ཙམ་ཞིག་གིས་མེད་པར་འགྱུར། །མི་ཚངས་སྤྱོད་པའི་འབྲས་བུ་ནི། །མ་མྱོང་བར་དུ་ཆུད་མི་ཟ། །འདོད་སྲེད་ལན་ཚྭའི་བཏུང་བ་འདྲ། །ཇི་ཙམ་སྤྱད་ཀྱང་ངོམས་དུས་མེད། །དེ་ཕྱིར་བག་ཡོད་ཁྲེལ་ལྡན་པས། །ཆོག་ཤེས་ཤིང་ལྟར་གནས་པར་འཚལ། །གསང་ཆེན་ལམ་ཞུགས་རྣལ་འབྱོར་བས། །རླུང་སེམས་ཐིག་ལེ་ལས་སུ་རུང་། །འཕོ་མེད་ཡེ་ཤེས་བསྐྱེད་པའི་ཕྱིར། །ལས་རྒྱ་བརྟེན་པ་མ་གཏོགས་པ། །རྒྱལ་བསྟན་སྒོར་ཞུགས་བཙུན་པ་རྣམས། །དུས་དང་རྣམ་པ་ཐམས་ཅད་དུ། །ཕུང་ཁྲོལ་ཆེ་ཞིང་མནོག་ཆུང་བའི། །འདོད་པ་དོན་དུ་མི་གཉེར་བར། །དགའ་དང་གུས་དང་དད་པའི་བློས། །དྲན་དང་ཤེས་བཞིན་བག་ཡོད་པས། །ཚུལ་ཁྲིམས་བསླབ་པ་རིན་པོ་ཆེ། །དང་དུ་བླངས་ནས་འབད་པར་རིགས། །ཚུལ་འདི་རང་དང་རང་འདྲ་བའི། །ཉན་ཐོས་བྱིས་པའི་བློ་ཅན་འགའ། །བུད་མེད་བརྟེན་པས་ཉམས་གྱུར་པ། །མཐོང་ཚེ་གཞན་ལ་ཕན་ཕྱིར་བྲིས། །གསང་སྔགས་ལམ་ལ་རྗེས་སློབ་ཕྱིར། །ཤེས་རབ་རང་བཞིན་བུད་མེད་ལ། །སྨོད་པའི་ལྟུང་བ་ཕོག་གྱུར་ན། །སྐུ་གསུམ་ཡེ་ཤེས་མཁའ་འགྲོར་བཤགས། །འདུལ་བ་ཆོས་འཁོར་ཐོག་མ་དང་། །ཚུལ་ཁྲིམས་བསླབ་གསུམ་དང་པོ་རུ། །གསུངས་ཕྱིར་ལེགས་ཆ་ཅུང་སྲིད་ན། །བསྟན་འགྲོའི་ཕུན་ཚོགས་རྒྱུ་རུ་བསྔོ། །དེ་མཐུས་ཐུབ་པའི་དབང་པོ་ཡི། །བསྟན་ལ་རབ་ཏུ་བྱུང་བ་ཀུན། །ཚངས་སྤྱོད་བརྟུལ་ཞུགས་མི་ཉམས་ཤིང་། །ཚུལ་ཁྲིམས་རྣམ་པར་དག་གྱུར་ཅིག །ཅེས་ཉེས་སྤྱོད་སྡོམ་པའི་ཚུལ་ཁྲིམས་ཀྱི་ནང་ཚན་བསླབ་པའི་གཞི་གསུམ་པ་ཚངས་པར་སྤྱོད་པའི་ཡན་ལག་ལས་བྱུང་བ་བུད་མེད་ཀྱི་ཉེས་པ་བརྗོད་པའི་གཏམ་འདུལ་འཛིན་དགྱེས་བྱེད་ཅེས་བྱ་བ་འདི་ཡང་། རང་ཉིད་ཀྱིས་ལམ་སྦྱངས་སྟོབས་ཆུང་ཞིང་དུས་ལ་མ་བབས་པར་ལས་རྒྱ་བརྟེན་པས་ཉེས་ལྟུང་མང་པོ་བྱུང་བ་དང་། གཞན་རང་དང་འདྲ་བའི་བློ་དམན་མང་པོ་རྐྱེན་དེ་དང་དེ་ལྟ་བུས་ཉམས་ཤིང་སྨད་པར་གྱུར་པ་མཐོང་ནས། སོ་སྐྱེས་གཞན་དང་གཞན་དག་ལ་ཕན་དུ་རེ་བའི་བསམ་པས་ཀུན་ནས་བསླངས་ཏེ། ཤཱཀྱའི་དགེ་སྦྱོང་ཤིན་ཏེ་མ་ཆོས་དབྱིངས་ཀུན་གསལ་མིང་ཅན་གྱིས་ཤར་མར་བྲིས་པ་དགེ་ཞིང་བཀྲ་ཤིས་པར་གྱུར་ཅིག དགེའོ།། དགེའོ།། དགེའོ།། སྐལ་ལྡན་ཆོས་དབྱིངས་བཟང་མོ་ལ་གདམས་པ།༄༅། སྐལ་ལྡན་ཆོས་དབྱིངས་བཟང་མོ་ལ་གདམས་པ། ཨོཾ་སྭ་སྟི། རྗེ་མཚུངས་མེད་དཔལ་ལྡན་བླ་མ་ལ། །བུས་སྙིང་ནས་འདུད་དོ་ཐུགས་རྗེས་གཟིགས། །སྲིང་དགེ་མ་ཆོས་དབྱིངས་བཟང་མོ་ཁྱོད། །ཆོས་སྙིང་ནས་བྱེད་ན་འདི་བཞིན་མཛོད། །རྟེན་དལ་འབྱོར་ནམ་མཁའི་པདྨོ་འདྲ། །ལས་བཟང་པོས་ལན་གཅིག་ཐོབ་ན་ཡང་། །དེ་མི་རྟག་རླུང་ནང་མར་མེ་འདྲ། །ཆོས་ཕྱི་བཤོལ་མ་བྱེད་བཙུན་ཆུང་མ། །ལས་རྒྱུ་འབྲས་དཔྱིད་ཀའི་ས་བོན་འདྲ། །རྒྱུ་གང་བསྒྲུབས་དེ་མཚུངས་འབྲས་བུ་སྨིན། །འགྲོ་དྲུག་པོ་ཐར་མེད་བཙོན་དོང་འདྲ། །དེར་འཇུག་བློ་མ་སྐྱེ་བཙུན་ཆུང་མ། །ཆོས་ཟབ་མོ་ནད་སེལ་བདུད་རྩི་འདྲ། །བསྟེན་ནུས་ཚད་གཏན་བདེའི་རྒྱལ་སྲིད་ཐོབ། །རྗེ་བླ་མ་ཡིད་བཞིན་དབང་རྒྱལ་འདྲ། །དེས་ཅི་གསུང་སྒྲུབས་ཤིག་བཙུན་ཆུང་མ། །ཚེ་འཁོར་བ་ཐོག་མེད་གདོད་མ་ནས། །དུས་ད་བར་འཇིག་རྟེན་གཡེང་བས་བསླུས། །ད་བདེ་འདོད་སྡུག་བསྔལ་མི་འདོད་ན། །བློ་ཆོས་ལ་གཏོད་ཅིག་བཙུན་ཆུང་མ། །སྐྱབས་བསླུ་མེད་དཀོན་མཆོག་རྣམ་གསུམ་ལ། །བློ་བཀལ་ནས་སྐྱབས་སུ་འགྲོ་བ་འདི། །ཆོས་ཀུན་གྱི་རྩ་བར་རྒྱལ་བས་གསུངས། །འདི་མེད་ཐབས་མེད་དོ་བཙུན་ཆུང་མ། །ཡོངས་མཁའ་མཉམ་སྐྱེ་དགུའི་འགྲོ་བ་རྣམས། །སྔོན་ཕ་མར་མ་གྱུར་གཅིག་ཀྱང་མེད། །རང་གཅེས་བསྐྱངས་ད་ལྟའི་ཕ་མ་འདྲ། །བྱམས་སྙིང་རྗེ་སྒོམས་ཤིག་བཙུན་ཆུང་མ། །སྒོས་གསང་ཆེན་མཆོག་གི་ལམ་བཟང་འདིར། །སྐྱབས་ཀུན་འདུས་བླ་མའི་རྣལ་འབྱོར་ལ། །དུས་རྒྱུན་དུ་བརྩོན་པ་ལྷུར་ལེན་དགོས། །འདིས་བྱིན་རླབས་འཇུག་གོ་བཙུན་ཆུང་མ། །ད་ཡན་ཆད་བློ་སྣ་ཕྱིར་ཤོར་ནས། །དོན་མེད་པའི་རྣམ་གཡེང་འབའ་ཞིག་བསྒྲུབ། །དུས་ད་ནི་བློ་ཁ་ནང་ལོག་ནས། །སེམས་རྩད་གདར་ཆོད་ཅིག་བཙུན་ཆུང་མ། །ལར་ཕྱི་ནང་གཟུང་འཛིན་གཉིས་ཤེས་མཁན། །གཟུགས་དངོས་པོ་ཁ་ཏོག་མ་གྲུབ་པ། །རྐྱེན་བདེ་སྡུག་བཏང་སྙོམ་ཚོར་མཁན་དེ། །མིང་སེམས་སུ་བཏགས་སོ་བཙུན་ཆུང་མ། །དེ་སྒོ་ལྔ་གང་རུང་ལམ་བརྒྱུད་ནས། །ཕྱི་ཡུལ་ལྔའི་རྟོག་ཚོགས་ཤར་བ་ན། །དེ་རྣམ་རྟོག་ཐོལ་སྐྱེས་བྱ་བ་ཡིན། །འཕྲོ་རྦད་ཆོད་གྱིས་དང་བཙུན་ཆུང་མ། །སེམས་ཅུང་ཟད་གནས་པའི་ནང་ཞིག་ཏུ། །རྟོག་ཕྲ་བ་གཅིག་རྗེས་གཅིག་མཐུད་པ། །ངོས་ཟིན་དཀའ་འདྲ་དེ་ལྐོག་འགྱུ་ཟེར། །དེ་དྲན་པས་ཟིན་དགོས་བཙུན་ཆུང་མ། །སེམས་རྣམ་རྟོག་ཕྲ་རགས་གང་སྐྱེས་ཀྱང་། །དྲན་ཙམ་ནས་རང་སར་མ་བཅོམ་ན། །རྗེས་གཅོད་དམ་རྣམ་རྟོག་མཐའ་དེད་ཡིན། །རྟོག་རྗེས་དཔྱོད་མ་བྱེད་བཙུན་ཆུང་མ། །སྔར་མ་དྲན་རྟོག་པ་ཕྲ་རགས་ལ། །ཡིད་སེམས་པ་རྣམ་རྟོག་སྔོན་བསུ་ཡིན། །དེ་བསུས་ན་མི་ཟད་ཇེ་འཕེལ་འགྲོ། །ད་མདུན་མ་བསུ་ཞིག་བཙུན་ཆུང་མ། །དུས་ད་ལྟའི་ཤེས་པ་རང་བབས་སུ། །བློས་བཟོ་བཅོས་མེད་པར་འཇོག་ཤེས་ན། །མིང་ཤེས་པ་མ་བཅོས་སོ་མ་ཟེར། །སྒོམ་འདི་ལས་འབྱུང་ངོ་བཙུན་ཆུང་མ། །སེམས་འགྱུ་བ་ཕྲ་རགས་མ་སྐྱེས་ཀྱང་། །དེ་རང་ངོ་མ་ཟིན་ཐོམ་མེ་བ། །དེར་ཁ་ཅིག་ཧྭ་ཤང་ལྟ་བ་ཟེར། །འདི་གོལ་ས་ཡིན་ནོ་བཙུན་ཆུང་མ། །དཔེ་སེར་བུས་མ་བསྐྱོད་རྒྱ་མཚོ་བཞིན། །སེམས་ཕྲ་རགས་འགྱུ་བས་མ་བསྐྱོད་པར། །གཡོ་མེད་པར་གྱི་ལེར་གནས་གྱུར་ན། །དེ་ཞི་གནས་ཡིན་ནོ་བཙུན་ཆུང་མ། །སེམས་གསལ་སྟོང་བརྗོད་བྲལ་བློ་འདས་ཀྱང་། །གདངས་འགགས་མེད་རང་ངོ་རང་གིས་རིག །དཔེ་བྱིས་པས་མ་ངོ་མཐོང་བ་བཞིན། །འདི་རིག་པ་ཡིན་ནོ་བཙུན་ཆུང་མ། །དབྱིངས་བློ་འདས་ཀ་དག་སྤྲོས་བྲལ་ལ། །གཤིས་གསལ་སྟོང་རིག་པའི་གདངས་ཤར་བ། །དཔེ་སྤྲིན་མེད་མཁའ་ལ་ཉི་ཤར་འདྲ། །འདི་ལྷག་མཐོང་ཟེར་རོ་བཙུན་ཆུང་མ། །བློ་ཀུན་རྟོག་སྤྲིན་ཚོགས་དབྱིངས་སུ་དེངས། །དབྱིངས་སྟོང་གསལ་རིག་པའི་རང་འོད་འབར། །ཉམས་གང་ཤར་བཟོ་མེད་གཉུག་མའི་ངང་། །མིང་ཟུང་འཇུག་ཡིན་ནོ་བཙུན་ཆུང་མ། །ལས་གང་བྱེད་རྟོག་ཚོགས་ཅི་ཤར་ཡང་། །གཤིས་རིག་པའི་ངོ་བོ་མ་འགྱུར་བ། །རྗེ་བླ་མས་རྟོག་གྲོལ་རིས་མེད་ཟེར། །ཤར་ཙམ་ནས་གྲོལ་ལོ་བཙུན་ཆུང་མ། །ཐུན་ཐུན་མཚམས་སྤྱོད་ལམ་རྣམ་བཞི་རུ། །དབྱིངས་སྤྲོས་བྲལ་ངང་དུ་ལྷུན་འབྱམས་ན། །རྗེ་བླ་མས་མཉམ་རྗེས་དབྱེར་མེད་ཟེར། །འདི་ཡོད་པས་འཚེང་ངོ་བཙུན་ཆུང་མ། །རྐྱེན་བདེ་སྡུག་བཏང་སྙོམ་གང་བྱུང་ཡང་། །དོན་འགྱུར་མེད་རིག་པའི་རྩལ་དུ་གོ། །འདི་ཡོད་ན་རྐྱེན་ཐུབ་སྒོམ་པ་ཟེར། །གལ་ཤིན་ཏུ་ཆེའོ་བཙུན་ཆུང་མ། །བདེ་གསལ་དང་མི་རྟོག་སྟོང་པའི་ཉམས། །ལེགས་ལེགས་དང་བཟང་བཟང་ཅི་བྱུང་ཡང་། །དོན་ནང་རིག་གཉུག་མའི་ཡོ་ལང་གོ། །འདི་ཀུན་ལ་དགོས་སོ་བཙུན་ཆུང་མ། །རྐྱེན་བཟང་ངན་ཅི་བྱུང་དབྱིངས་སུ་གཅིག །དོན་གནས་ལུགས་སྤངས་བླང་བྲལ་ཐོབ་མེད། །ཉམས་གང་ཤར་སྤྱོད་པ་ཤུགས་འབྱུང་སྐྱོངས། །མིང་སྒོམ་ཆེན་ཟེར་རོ་བཙུན་ཆུང་མ། །ཆོས་སྦྱོར་བ་དྲུག་དང་རྫོགས་ཆེན་གྱི། །ལམ་ཟབ་མོའི་རྣམ་བཞག་མཐའ་ཡས་ཀྱང་། །འདི་ཙམ་ལས་དུས་མ་ཡིན་པས་གསང་། །དུས་བབས་ན་སྨྲའོ་བཙུན་ཆུང་མ། །མགོ་སྐྲ་ལོ་དཀོན་མཆོག་དྲུང་ཕུལ་ནས། །མིང་བརྗེས་ནས་ཆོས་པའི་གཟུགས་བཟུང་ཕྱིན། །བློ་དཀར་པོའི་ལས་ལ་ཕྱོགས་ནས་སུ། །དགེ་ཅི་འགྲུབ་དགོས་སོ་བཙུན་ཆུང་མ། །ལུས་མཛེས་མཛེས་ཆོས་པའི་གཟུགས་བཟུང་ཀྱང་། །སེམས་འཁོར་བའི་ཆོས་ལ་ཕྱིར་ཕྱོགས་ནས། །དུག་གསུམ་གྱི་ལས་ལ་གཡོ་ཟོལ་མཁན། །དེས་ངན་སོང་མྱོང་ངོ་བཙུན་ཆུང་མ། །ཐར་འདོད་ན་འཁོར་བར་ངེས་འབྱུང་དང་། །སྡོམ་དམ་ཚིག་མིག་དང་སྙིང་ལྟར་སྲུངས། །རྗེ་བླ་མ་རྒྱུན་དུ་འབྲལ་མེད་སྒོམ། །གནད་འདི་ལ་ཚང་ངོ་བཙུན་ཆུང་མ། །ལར་འཁོར་བའི་གནས་ལ་ཞེན་ལོག་དང་། །ལས་རྒྱུ་འབྲས་བསླུ་མེད་ཡིད་ཆེས་དང་། །ཆོས་ཟབ་མོ་སྒྲུབ་པའི་སྐལ་ལྡན་ན། །དོན་དེ་ལས་མེད་དོ་བཙུན་ཆུང་མ། །ང་ཨ་བུ་བླུན་རྒན་ཅོལ་ཆུང་ལ། །ཚིག་དེ་ལས་ལྷག་པའི་སྙིང་གཏམ་མེད། །ཁྱོད་སྲིང་མོའི་སེམས་ལ་ཕན་ཕྱིར་སྨྲས། །དོན་ཉམས་སུ་ལོངས་ཤིག་བཙུན་ཆུང་མ། །གླུ་འདི་ཐོས་འགྲོ་བ་ཕོ་མོ་ཀུན། །བསྐལ་མང་པོའི་སྡིག་སྒྲིབ་མྱུར་དག་ནས། །ཆོས་རྡོ་རྗེ་ཐེག་པའི་ལམ་བཟང་ལས། །གཞི་གདོད་མའི་སངས་རྒྱས་མྱུར་ཐོབ་ཤོག །ཅེས་པ་འདི་ནི་དོན་ལ་ཉོན་མོངས་དུག་ལྔའི་རྟོག་པ་མེ་ལྟར་འབར་ཡང་། མིང་སྤྲུལ་མིང་དུ་འབོད་པ་ཆོས་དབྱིངས་ཀུན་གསལ་རྒྱ་མཚོས་རང་ལོ་ཉེར་ལྔ་པ་ཤིང་མོ་ལུག་གི་ལོ་མཇུག་མགོ་ཟླའི་ཡར་ངོ་ཚེས་བཅུར་སྐལ་ལྡན་ཆོས་དབྱིངས་བཟང་མོ་ལ་གདམས་པའོ།། སརྦ་མངྒ་ལཾ།། བཀྲ་ཤིས་བརྩེགས་པ།༄༅། འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ་སྡེ་ཡོན་ཏན་བཀོད་པའི་རྒྱལ་པོ་བཞུགས་སོ།། ༄༅། རྒྱ་གར་སྐད་དུ། ཨརྱ་མངྒ་ལཾ་ཀཱུ་ཊ་ན་མ་མ་ཧཱ་ཡ་ན་སཱུ་ཏྲ་གུ་ཎ་བྷྱུ་ཧ་ར་ཛ། བོད་སྐད་དུ། འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ་སྡེ་ཡོན་ཏན་བཀོད་པའི་རྒྱལ་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བོ་མཆོག་གི་གནས། བཀྲ་ཤིས་བརྩེགས་པའི་ཕོ་བྲང་། མེ་ཏོག་བརྩེགས་པའི་ཚལ། རྡོ་རྗེ་བརྩེགས་པའི་གུར་ཁང་། རིན་པོ་ཆེ་སྤུངས་པའི་ཁྲིར་གེ་སར་པདྨའི་གདན་ལ་བཞུགས་ཏེ། བཀྲ་ཤིས་དོན་གྱི་ལྷ་རྒྱལ་བ་རིགས་ལྔ་དང་། བཀྲ་ཤིས་འབྱུང་བའི་དཔལ་རྣམ་པར་གཟིགས་དང་། བློ་གྲོས་མཆོག་དང་། ཚེ་དཔག་མེད་དང་། བཀྲ་ཤིས་འོད་སྲུང་དང་། བཀྲ་ཤིས་དམ་པའི་ཏོག་ཅན་སོགས་བཀྲ་ཤིས་པའི་འཁོར་ཕྱོགས་བཅུའི་བདེ་གཤེགས་མང་པོ་དང་། བྱང་ཆུབ་སེམས་དཔའ་བཀྲ་ཤིས་མཆོག་དང་། བྱང་ཆུབ་སེམས་དཔའ་བཀྲ་ཤིས་སྡུད་དང་། བྱང་ཆུབ་སེམས་དཔའ་བཀྲ་ཤིས་རྒྱན་དང་། བྱང་ཆུབ་སེམས་དཔའ་བཀྲ་ཤིས་ཀུན་ཏུ་གཟིགས་དང་། བྱང་ཆུབ་སེམས་དཔའ་བཀྲ་ཤིས་ཡོངས་སུ་ཁྱབ་དང་། བཀྲ་ཤིས་བྱང་ཆུབ་སེམས་དཔའ་ནམ་མཁའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་སའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་ཆུའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་མེའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་རླུང་གི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་རྡོ་རྗེའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་རིན་པོ་ཆེའི་སྙིང་པོ་དང་། བཀྲ་ཤིས་བྱང་ཆུབ་སེམས་དཔའ་བཀོད་པ་མཐའ་ཡས་དང་། བཀྲ་ཤིས་མཁྱེན་པ་དང་ལྡན་པ་འཇམ་དཔལ་དང་། བཀྲ་ཤིས་ཐུགས་རྗེ་དང་ལྡན་པ་སྤྱན་རས་གཟིགས་དབང་ཕྱུག་དང་། བཀྲ་ཤིས་མཐུ་སྟོབས་དང་ལྡན་པ་ལག་ན་རྡོ་རྗེ་སོགས་བྱང་ཆུབ་སེམས་དཔའ་ཆེན་པོ་སྟོང་རྩ་བརྒྱད་དང་། བཀྲ་ཤིས་དང་ལྡན་པ་ཤཱ་རིའི་བུ་དང་། མཽའུ་གལ་གྱི་བུ་དང་། རབ་འབྱོར་དང་། འོད་སྲུང་ཆེན་པོ་དང་ཀུན་དགའ་བོ་སོགས་བཀྲ་ཤིས་པའི་འཁོར་སྟོང་ཕྲག་བརྒྱད་དང་། གཞན་ཡང་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། གྲུལ་བུམ་དང་། མི་དང་མི་མ་ཡིན་པའི་ཚོགས་རབ་ཏུ་མང་པོ་དང་ཐབས་གཅིག་ཏུའོ།། དེའི་ཚེ་དེའི་དུས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ལ་བསྐོར་བ་མང་དུ་མཛད་དེ། དེ་བཞིན་གཤེགས་པའི་དྲུང་དུ་པུས་མོ་གཡས་པའི་ལྷ་ང་ས་ལ་བཙུགས་ཏེ་འདི་སྐད་ཅེས་གསོལ་ཏོ།། བཅོམ་ལྡན་འདས། བཀྲ་ཤིས་དང་ལྡན་པའི་འཁོར་དཔག་ཏུ་མེད་པ་རྣམས་ལ། ཐོག་མཐའ་བར་དུ་དགེ་བ། བཀྲ་མི་ཤིས་པ་ཐམས་ཅད་རབ་ཏུ་ཞི་ཞིང་བཀྲ་ཤིས་པ་ཐམས་ཅད་ཡོངས་སུ་འདུ་བར་བྱེད་པ། ཉེས་སྐྱོན་ཐམས་ཅད་སེལ་ཞིང་ལེགས་པའི་ཡོན་ཏན་ཐམས་ཅད་ཡོངས་སུ་སྡུད་པ། དཔལ་དང་སྐལ་བ་བཟང་པོར་བྱེད་པའི་མདོ་ཞིག་བསྟན་ཏུ་གསོལ། ཞེས་ཞུས་པ་དང་། བཅོམ་ལྡན་འདས་ཀྱིས་ཞལ་འཛུམ་པ་དང་བཅས་པས་འདི་སྐད་ཅེས་བཀའ་སྩལ་ཏོ། །འཇམ་དཔལ་དང་གཞན་ཡང་བཀྲ་ཤིས་པར་བྱེད་པའི་འཁོར་རྣམས་ཉོན་ཅིག ངས་སྔོན་བྲམ་ཟེའི་ལུས་ཀྱིས་མི་མཇེད་འཇིག་རྟེན་གྱི་ཁམས་འདིར་ཚེ་ལོ་སྟོང་ཐུབ་པའི་ཚེ། ཡང་དག་པར་རྫོགས་པའི་སངས་རྒྱས་བཀྲ་ཤིས་ཐམས་ཅད་འབྱུང་བའི་དཔལ་གཟི་བརྗིད་འོད་ཅེས་བྱ་བ་ལས་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ། ཡོན་ཏན་སྟོང་དང་ལྡན་པའི་ཆོས་ཀྱི་རྣམ་གྲངས་འདི་ཐོས་ནས་བཟུངས་ཤིང་བཅངས་ལ་བཀླགས་ཤིང་བཤད་དེ། དེ་ནི་ཐོས་ཤིང་བརྗོད་པ་ཙམ་གྱིས་ཀྱང་། ཐོག་མར་བཀྲ་ཤིས་ཤིང་དགེ་བ། བར་དུ་བཀྲ་ཤིས་ཤིང་དགེ་བ། ཐ་མར་བཀྲ་ཤིས་ཤིང་དགེ་བ་སྟེ་སྐྱེ་འགྲོ་མཐའ་དག་ལས་དང་རྐྱེན་གྱི་དབང་གིས་ཚེ་ཐུང་ཞིང་ནད་མང་བ་དང་། དམུས་ལོང་ལྐུགས་པ་གཟི་མིག་ཤོ་ཏིག་དང་། ཞ་སྒུར་ཤ་བཀྲ་དྭ་སྒལ་ལྦ་བ་དང་། ཤ་རོ་ཤ་ལྷག་ཤ་འཛེར་ཅན་དང་། ཡན་ལག་དང་ཉིང་ལག་དང་དབང་པོ་ལ་ཆད་ལྷག་སོགས་མཚན་རྟགས་ངན་པ་དང་། མོ་ངན་པ་དང་། རྨི་ལྟས་དང་པྲ་ལྟས་ངན་པ་དང་། ལྟས་ངན་པ་སོགས་བཀྲ་མི་ཤིས་པ་ཐམས་ཅད་རབ་ཏུ་ཞི་ཞིང་། བཀྲ་ཤིས་པ་དང་དཔལ་དང་བསོད་ནམས་ཐམས་ཅད་ཡོངས་སུ་འདུ་བར་བྱེད་པ། ལོ་ཟླ་དུས་ཚོད་ཚེས་གྲངས་དང་། གཟའ་སྐར་ཉེས་པ་དང་། འབྲི་ཀློག་དང་འཆད་སྒོམ་ཉེས་པ་དང་། ལས་བྱ་བ་དང་ཟས་ཟ་བ། གོས་བཙེམ་པ་དང་ཁྱིམ་དབུབ་པ། ལམ་དུ་འཇུག་པ་རྣམས་ཉེས་པ་དང་། གྲོགས་བཙལ་བ་དང་ཁྱིམ་དབུབ་པ། བགྲོད་པ་དང་བཙའ་བ། ནོར་དང་རྟ་ཕྱུག་བསྲེལ་བ་རྣམས་ཉེས་པ་དང་། ན་བ་ཤི་བ་རོ་དྲང་བ། དུར་གདབ་པ་ཤིད་བྱ་བ་ཉེས་པ་སོགས་ཀྱི་ཉེས་སྐྱོན་ཐམས་ཅད་སེལ་ཞིང་ལེགས་པའི་ཡོན་ཏན་ཐམས་ཅད་ཡོངས་སུ་སྡུད་པར་བྱེད་པ། དཔལ་དང་སྐལ་བ་བཟང་པོར་བྱེད་པའོ། །འཇམ་དཔལ་དེ་ལྟ་བུའི་བཀྲ་ཤིས་བརྩེགས་པ་ཆེན་པོའི་མདོ་སྡེ་ཡོན་ཏན་བཀོད་པའི་རྒྱལ་པོ་ཆོས་ཀྱི་ཕུང་པོ་དེ་ཉིད་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཁྱོད་ལ་ངས་བསྟན་གྱིས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག ཅེས་བཀའ་སྩལ་ཏོ། །དེ་ནས་འཇམ་དཔལ་གྱིས་དེ་ལ་ལེགས་སོ་ལེགས་སོ་ཞེས་གསོལ་ནས་མཉན་པ་དང་། བཅོམ་ལྡན་འདས་གྱིས་བཀའ་སྩལ་པ། འཇམ་དཔལ་དེ་ལྟ་བུའི་ཡོན་ཏན་དེ་མཐའ་ཡས་ཤིང་དཔག་ཏུ་མེད་པ་དང་ལྡན་པར་འདོད་པ་དེས། ཐོག་མར་བཀྲ་ཤིས་པར་བྱེད་པའི་རིགས་སྔགས་འདི་ལྟར་བརྗོད་པར་བྱའོ། །བཀྲ་ཤིས་དོན་གྱི་ལྷ་རྒྱལ་བ་རིགས་ལྔ་ལ་ཕྱག་འཚལ་ལོ། །བཀྲ་ཤིས་མཆོག་གི་ལྷ་འཕགས་པ་དཀོན་མཆོག་གསུམ་ལ་ཕྱག་འཚལ་ལོ། །བཀྲ་ཤིས་དཔལ་གྱི་ལྷ་ཕྱོགས་སྐྱོང་བའི་མགོན་པོ་རྣམས་ལ་ཕྱག་འཚལ་ལོ། །བཀྲ་ཤིས་ཐམས་ཅད་འབྱུང་བའི་དཔལ་གཟི་བརྗིད་འོད་ལ་ཕྱག་འཚལ་ལོ། །བཀྲ་ཤིས་མཆོག་གི་འབྱུང་གནས་དོན་ཐམས་ཅད་གྲུབ་པའི་རྒྱལ་པོ་ལ་ཕྱག་འཚལ་ལོ། །སཱདྱ་ཐེ་དན། བྷི་ཛཱ་ཡ་བྷི་ཛཱ་ཡ། ཨུག་ཀེ་ཨུག་ཀེ། སྭ་སྟི་སྭ་སྟི། ཀྲ་པ་ཏི་ཀྲ་པ་ཏི། ཨ་མུ་ཁེ་ཧ་ཨ་མུ་ཁེ་ཧ། བི་པྲ་པཱ་ར་དྷ་སྭ་སྟི་མ་ཧཱ་ཀྵེ། མུ་ནེ་མུ་ནེ། གུ་ར་ཎེ་གུ་ར་ཎེ། ཨ་ཁེ་མུ་ཁེ་མུ་ར་ཁེ་མུ་ར་ཁེ། ཨ་པྲ་མ་ཏི་མུནྟེ། གུར་ཎ་ཡ། སྭ་སྟི་སྭ་སྟི། སརྦ་སིདྡྷི་བྷྲུཾ་བྷྲུཾ་བྷྲུཾ། མུ་ལེ་མུ་ལེ། ཀེ་ཤེ་ཀེ་ཤེ། ཙུརྞ་ཙུརྞ། བྷེ་ར་མ་ལེ་སྭཱ་ཧཱ། ཞེས་བརྗོད་པར་བྱའོ། །དེ་ནས་ཚིག་འདི་ཡང་རབ་ཏུ་བརྗོད་དོ། །སངས་རྒྱས་དང་ཆོས་དང་དགེ་འདུན་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །བསྲུང་དུ་གསོལ། སྐྱབ་ཏུ་གསོལ། བཀྲ་ཤིས་པར་གྱུར་ཅིག ཕྱི་རུ་བཀྲ་ཤིས་རྣམ་པར་དག་པའི་མཁའ། །ནང་དུ་བཀྲ་ཤིས་སེམས་ཉིད་དག་པའི་ཀློང་། །གསང་བའི་བཀྲ་ཤིས་ཆོས་ཉིད་དག་པའི་དབྱིངས། །མཁའ་ཀློང་དབྱིངས་གསུམ་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གནམ་ལ་བཀྲ་ཤིས་ཉི་ཟླ་གཉིས། །གཟའ་དང་སྒྱུ་སྐར་མང་པོའི་ཚོགས་ཀྱིས་བསྐོར། །ས་ལ་བཀྲ་ཤིས་འབྱུང་བ་ལྔ། །རྩི་ཤིང་ལོ་འབྲས་མེ་ཏོག་རྒྱས་པར་བཀྲམ། །བར་ན་བཀྲ་ཤིས་དཀོན་མཆོག་གསུམ། །ཕུན་ཚོགས་དཔལ་གྱི་སྣང་བས་ཕྱོགས་ཀུན་ཁྱབ། །གནམ་ས་བར་གྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ན་མོ་བུདྡྷ་ཡ་ཨོཾ། ན་མོ་དྷརྨ་ཡ་ཨཱཿ ན་མོ་སཾ་གྷ་ཡ་ཧཱུྃ། དབུས་ན་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་དོན་གྱི་ལྷ། །ཆོས་དབྱིངས་ཡེ་ཤེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཤར་ན་བཀྲ་ཤིས་དོན་གྱི་ལྷ། །རྡོ་རྗེ་སེམས་དཔའ་བཀྲ་ཤིས་དོན་གྱི་ལྷ།།མེ་ལོང་ཡེ་ཤེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྷོ་ན་བཀྲ་ཤིས་དོན་གྱི་ལྷ། །རིན་ཆེན་འབྱུང་གནས་བཀྲ་ཤིས་དོན་གྱི་ལྷ། །མཉམ་ཉིད་ཡེ་ཤེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་ན་བཀྲ་ཤིས་དོན་གྱི་ལྷ། །སྣང་བ་མཐའ་ཡས་བཀྲ་ཤིས་དོན་གྱི་ལྷ། །སོར་རྟོག་ཡེ་ཤེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ན་བཀྲ་ཤིས་དོན་གྱི་ལྷ། །དོན་ཡོད་གྲུབ་པ་བཀྲ་ཤིས་དཔལ་གྱི་ལྷ། །བྱ་གྲུབ་ཡེ་ཤེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་བུདྡྷ་ཡ་དྷུ། ཧཱུྃ་བཛྲ་ཡ་དྷུ། སྭཱ་རཏྣ་ཡ་དྷུ། ཨཾ་པདྨ་ཡ་དྷུ། ཧཱ་ཀརྨ་ཡ་དྷུ། བདག་དང་སྒྱུ་སྦྱོར་ཡོན་བདག་གིས། །སངས་རྒྱས་རྣམས་ཀྱིས་བྱིན་རླབས་པའི། །མདོ་སྡེ་འདི་བརྗོད་བསོད་ནམས་ཀྱིས། །ནམ་མཁའ་ལྟ་བུར་ཀུན་ཁྱབ་ཅིང་། །ཉི་ཟླ་ལྟ་བུར་ཀུན་གསལ་ལ། །སྐར་ཚོགས་ལྟ་བུར་གྲངས་མང་ཞིང་། །སྤྲིན་ཕུང་ལྟ་བུར་ལྷུན་འཐུག་སྟེ། །འཇའ་ཚོན་ལྟ་བུར་རབ་མཛེས་ཤིང་། །རི་རབ་ལྟ་བུར་བརྗིད་ཅིང་བརྟན། །ས་གཞི་ལྟ་བུར་ཀུན་བསྐྱེད་ཅིང་། །རྒྱ་མཚོ་ལྟ་བུར་གཏིང་ཟབ་སྟེ། །ལྗོན་ཤིང་ལྟ་བུར་རབ་རྒྱས་ཤིང་། །ཡིད་བཞིན་ནོར་བུ་རིན་ཆེན་ལྟར། །དགོས་འདོད་བཀྲ་ཤིས་ཆར་བཞིན་འབེབ་གྱུར་ཅིག། ཨོཾ་ཨཱཿཧཱུྃ་རཏྣ་བྷྲུཾ་ཧྲཱི༔ནྲི་ཨ། ཤར་ཕྱོགས་བཀྲ་ཤིས་རིན་ཆེན་ཡོད་པའི་དཔལ། །རིན་ཆེན་འབྱུང་གནས་བཀྲ་ཤིས་དཔལ་གྱི་ལྷ། །འོད་ཟེར་ཀུན་ནས་འབྱུང་སོགས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྷོ་ཕྱོགས་བཀྲ་ཤིས་མྱ་ངན་མེད་པ་ནས། །མྱ་ངན་མེད་དཔལ་བཀྲ་ཤིས་འབྱུང་བའི་ལྷ། །མྱ་ངན་མེད་སོགས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་ཕྱོགས་བཀྲ་ཤིས་ཉེ་བར་ཞི་བ་ནས། །རིན་ཆེན་འོད་འཕྲོ་བཀྲ་ཤིས་དཔལ་གྱི་ལྷ། །སྤྱོད་པའི་བློ་གྲོས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ཕྱོགས་བཀྲ་ཤིས་རྒྱལ་བའི་ཞིང་གི་རྒྱན། །རྒྱལ་བའི་དབང་པོ་བཀྲ་ཤིས་དཔལ་གྱི་ལྷ། །རྒྱལ་བས་བྱིན་སོགས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཤར་ལྷོ་བྱང་ཆུབ་རྒྱན་ཡིད་འོང་བ་ནས། །པདྨོ་དམ་པ་བཀྲ་ཤིས་དཔལ་གྱི་ལྷ། །ལག་ན་པདྨོ་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྷོ་ནུབ་བཀྲ་ཤིས་རྡུལ་དང་བྲལ་བ་རུ། །ཉི་དཀྱིལ་སྣང་བ་དམ་པ་དཔལ་གྱི་ལྷ། །ཉི་མ་རབ་སྣང་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་བྱང་བཀྲ་ཤིས་དབང་དུ་གྱུར་པ་ནས། །གདུགས་མཆོག་དམ་པ་བཀྲ་ཤིས་དཔལ་གྱི་ལྷ། །རིན་ཆེན་མཆོག་སོགས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ཤར་བཀྲ་ཤིས་ཏིང་འཛིན་རྒྱན་ཞིང་ནས། །ཏིང་འཛིན་གླང་པོ་དམ་པ་དཔལ་གྱི་ལྷ། །རྣམ་རྒྱལ་གནོན་སོགས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འོག་ཕྱོགས་བཀྲ་ཤིས་པདྨོའི་ཞིང་མཆོག་ནས། །པདྨོའི་དཔལ་ཞེས་བཀྲ་ཤིས་འབྱུང་བའི་ལྷ། །པདྨོ་དམ་པ་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྟེང་ཕྱོགས་བཀྲ་ཤིས་མདངས་ལྡན་དགའ་བ་ནས། །དགའ་བའི་དཔལ་ཞེས་བཀྲ་ཤིས་འབྱུང་བའི་ལྷ། །དགའ་བས་བྱིན་སོགས་འཁོར་བཅས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །མི་མཇེད་བཀྲ་ཤིས་བྱ་རྒོད་ཕུང་པོའི་རིར། །ཤཱཀྱ་ཐུབ་པ་བཀྲ་ཤིས་དཔལ་གྱི་ལྷ། །སྐུ་གསུམ་ལྷུན་གྱིས་གྲུབ་པའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་མཆོད་སྦྱིན་བརྒྱ་ལྡན་ཡུལ་སོགས་ནས། །འབུམ་ཕྲག་བརྒྱ་པ་བཀྲ་ཤིས་འབྱུང་བའི་གནས། །ཆོས་ཕུང་བརྒྱད་ཁྲི་ཡོངས་རྫོགས་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གནས་མཆོག་བཀྲ་ཤིས་ལྷ་ཀླུ་མིའི་ཡུལ་ནས། །ཉེ་སྲས་དགྲ་བཅོམ་བཀྲ་ཤིས་མངའ་བའི་ལྷ། །ཐེག་གསུམ་ལམ་གནས་འཁོར་བཞིའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་སརྦ་ཏ་ཐཱ་ག་ཏ་མངྒ་ལཾ་སྭཱ་སྟི་སིདྡྷི་ཏིཥྛ་བཛྲ་ཡེ་སྭཱ་ཧཱ། །དམིགས་པ་མེད་པ་སྦྱིན་པའི་ཕ་རོལ་ཕྱིན། །སྦྱིན་པ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འཆལ་བ་མེད་པ་ཚུལ་ཁྲིམས་ཕ་རོལ་ཕྱིན། །ཚུལ་ཁྲིམས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱུང་ཚོར་མེད་པ་བཟོད་པའི་ཕ་རོལ་ཕྱིན། །བཟོད་པ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལེ་ལོ་མེད་པ་བརྩོན་འགྲུས་ཕ་རོལ་ཕྱིན། །བརྩོན་འགྲུས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འགྱུར་ལྡོག་མེད་པ་བསམ་གཏན་ཕ་རོལ་ཕྱིན། །བསམ་གཏན་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འཁྲུལ་བ་མེད་པ་ཤེས་རབ་ཕ་རོལ་ཕྱིན། །ཤེས་རབ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གང་ཡང་མ་འགགས་ཐབས་ཀྱི་ཕ་རོལ་ཕྱིན། །ཐབས་མཁས་མཆོག་གི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །མ་ཆགས་ཐོགས་མེད་སྟོབས་ཀྱི་ཕ་རོལ་ཕྱིན། །སྟོབས་ཆེན་ཤུགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རེ་དོགས་མེད་པ་སྨོན་ལམ་ཕ་རོལ་ཕྱིན། །སྨོན་ལམ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རྨོངས་པ་མེད་པ་ཡེ་ཤེས་ཕ་རོལ་ཕྱིན། །ཡེ་ཤེས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐབས་ཤེས་མཐར་ཕྱིན་ཕ་རོལ་ཕྱིན་པ་བཅུ། །ཕ་རོལ་ཕྱིན་བཅུའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ལེགས་ཡོན་ཏན་ཐམས་ཅད་མྱུར་ཐོབ་ཤོག །ཨོཾ་སྭཱ་སྟི། ཏདྱ་ཐཱ། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་ཡེ་སྭཱ་ཧཱ། །མ་ཆགས་ཐོགས་མེད་འཁོར་ལོ་རིན་པོ་ཆེ། །འཁོར་ལོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐེག་ཆེན་སྟོབས་ལྡན་གླང་པོ་རིན་པོ་ཆེ། །གླང་པོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅང་ཤེས་ཤུགས་ལྡན་རྟ་མཆོག་རིན་པོ་ཆེ། །རྟ་མཆོག་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཀུན་ལ་དབང་བསྒྱུར་བློན་པོ་རིན་པོ་ཆེ། །བློན་པོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལོག་རྟོག་དཔུང་འཇོམ་དམག་དཔོན་རིན་པོ་ཆེ། །དམག་དཔོན་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐམས་ཅད་ཀུན་བསྐྱེད་བཙུན་མོ་རིན་པོ་ཆེ། །བཙུན་མོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བསམ་འཕེལ་དོན་གྲུབ་ནོར་བུ་རིན་པོ་ཆེ། །ནོར་བུ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ལེགས་ཡོན་ཏན་མ་ལུས་མྱུར་ཐོབ་ཤོག། ཨོཾ་བྷེ་ཤ་ཏེ་རཏྣ་བྷེ་ཤ་ཏེ་ས་མུཏྒ་ཏེ་ཡེ་སྭཱ་ཧཱ། ཨོཾ་བཻཌཱུརྱ་ས་ལེ་སྦྲཾ་ཁྲོཾ་རྩེ་སྨ་རཙྪ་དྷ་ནཉྩེ་ཡེ་སྭཱ་ཧཱ། ན་མོ། སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག །གསུང་ལ་བཀྲ་ཤིས་ཆོས་དུང་གཡས་སུ་འཁྱིལ། །ཐུགས་ལ་བཀྲ་ཤིས་དཔལ་གྱི་བེའུ་གསལ། །དབུ་ལ་བཀྲ་ཤིས་གདུགས་མཆོག་ཉོན་མོངས་སྐྱོབས། །སྤྱན་ལ་བཀྲ་ཤིས་རིན་ཆེན་གསེར་གྱི་ཉ། །ལྗགས་ལ་བཀྲ་ཤིས་པདྨོ་ལོ་འདབ་རྒྱས། །མགུལ་ལ་བཀྲ་ཤིས་རིན་ཆེན་བུམ་པ་འཁྱིལ། །ཕྱག་ལ་བཀྲ་ཤིས་ཡོན་ཏན་ནོར་བུ་མཆོག །ཞབས་ལ་བཀྲ་ཤིས་ཕྲིན་ལས་འཁོར་ལོ་མངའ། །སྟོན་པའི་མཚན་དཔེ་ལས་བྱུང་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདག་ཅག་རྣམས་ལ་རྟག་ཏུ་བཀྲ་ཤིས་ཤོག །དྲི་མེད་རྣམ་དག་བཀྲ་ཤིས་མེ་ལོང་དང་། །ཚེ་སྤེལ་གདོན་སྐྱོབས་བཀྲ་ཤིས་དུར་ཝའི་རྩྭ། །དུག་འཇོམ་ནད་སེལ་བཀྲ་ཤིས་གི་ཧཾ་སྨན། །གཟི་འོད་མདངས་འཕེལ་བཀྲ་ཤིས་འོ་ཐུག་ཞོ། །སྙན་གྲགས་རྒྱས་བྱེད་བཀྲ་ཤིས་གཡས་འཁྱིལ་དུང་། །དབང་གི་རྫས་མཆོག་བཀྲ་ཤིས་ལི་ཁྲི་དང་། །བཅུད་ལྡན་སྙིང་པོ་བཀྲ་ཤིས་བིལ་བའི་འབྲས། །བདུད་བགེགས་མཐར་བྱེད་བཀྲ་ཤིས་ཡུངས་དཀར་སྟེ། །སྟོན་པས་བྱིན་རླབས་བཀྲ་ཤིས་རྫས་མཆོག་བརྒྱད། །བཀྲ་ཤིས་རྫས་བརྒྱད་དངོས་གྲུབ་དམ་པའི་མཆོག །དངོས་གྲུབ་མཆོག་བརྙེས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་རྟག་ཏུ་བདེ་ལེགས་ཤོག །ཨོཾ་སརྦ་ཨ་ཡུརྫྙ་ན་རཏྣ་ཧ་མུ་ཀི་བྷྲུཾ་བྷྲུཾ་བྷྲུཾ་ཧཱུྃ་ཧཱུྃ་ཧཱུྃ་སྭ་སྟི་སྭ་སྟི་སྭ་སྟི། སྐུ་ཡི་བཀྲ་ཤིས་སྐྱེ་མེད་ཆོས་ཀྱི་སྐུ། །གསུང་གི་བཀྲ་ཤིས་དམ་ཆོས་བདུད་རྩིའི་སྒྲ། །ཐུགས་ཀྱི་བཀྲ་ཤིས་མཉམ་ཉིད་འཁྲུལ་བ་མེད། །ཡོན་ཏན་བཀྲ་ཤིས་འགྲོ་དྲུག་སྡུག་བསྔལ་སེལ། །ཕྲིན་ལས་བཀྲ་ཤིས་རྩོལ་མེད་ལྷུན་གྱིས་གྲུབ། །སྐུ་གསུང་ཐུགས་ཡོན་ཕྲིན་ལས་བཀྲ་ཤིས་གང་། །དམ་པ་དེས་ཀྱང་རྟག་ཏུ་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལ་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །སྣོད་བཅུད་མ་ལུས་བདེ་ལེགས་ཤོག །ཀུན་ཀྱང་བདེ་སྐྱིད་མཆོག་ཐོབ་ཤོག །ཨོཾ་སྐཾ་ཀཱ་ར་སྐཾ་ཀཱ་ར་ནིརྒཙྪ་ཏ་ནིརྒཙྪ་ཏ་ཨོཾ་སྭ་སྟི་སིདྡྷིཾ། ཞེས་བཀའ་སྩལ་ཏོ། །ཡང་དེའི་ཚེ་བཅོམ་ལྡན་འདས་ལ་འཇམ་དཔལ་གྱིས་གསོལ་བ། བཅོམ་ལྡན་འདས་མདོ་སྡེ་འདིའི་མིང་ཅི་ལགས། ཇི་ལྟར་གཟུང་བར་བགྱི། འདིའི་ཆོ་ག་ཡང་ཇི་ལྟར་བགྱི། ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ནི་སྡིག་སྒྲིབ་དང་སྡུག་བསྔལ་དང་གནོད་པ་ཐམས་ཅད་རབ་ཏུ་ཞི་ཞིང་མེད་པར་བྱེད་པ། བསོད་ནམས་དང་ལེགས་པའི་ཡོན་ཏན་དང་བཀྲ་ཤིས་ཀྱི་ཚོགས་ཐམས་ཅད་སྡུད་པར་བྱེད་པའི་མདོ་སྡེ་ཡོན་ཏན་བརྩེགས་པ་ཆེན་པོ་ཞེས་བྱ་བ་སྟེ། འདི་དེ་ལྟར་ཟུངས་ཤིག འཇམ་དཔལ་འདིའི་ཆོ་ག་ནི། དཀོན་མཆོག་གསུམ་གྱི་ཕོ་བྲང་དང་གཙུག་ལག་ཁང་བཞེངས་པ་དང་། མཆོད་རྟེན་དང་འབུམ་པ་བཞེངས་པ་དང་། སྐུ་གདུང་དང་གསུང་རབ་བཞེངས་པ་དང་། གླེགས་བམ་སོགས་ལ་རབ་གནས་བྱེད་པ་དང་། ཡུལ་མཁར་དང་ཁང་ཁྱིམ་གསར་དུ་བརྩིགས་ཤིང་དབུབ་པ་དང་། བུ་ཚ་ཁྱེའུ་བཙས་པ་དང་། བུ་མོ་བག་མ་གཏོང་ལེན་བྱེད་པ་དང་། རོ་འདོན་པ་དང་། ཤིད་བྱེད་པ་དང་། དུར་འདེབས་པ་དང་། གཞན་ཡང་བཀྲ་མི་ཤིས་པ་དང་། ལྟས་ངན་པ་སོགས་ཉེས་སྐྱོན་ཐམས་ཅད་བཟློག་ཅིང་བསྒྱུར་བར་བྱེད་པའི་ཕྱིར། ཁ་ཟས་གཙང་ཞིང་བསོད་པ་རོ་བྲོ་བའམ། ནས་འབྲས་ཏིལ་ལ་སོགས་པའི་འབྲུ་སྣའམ། ཤིང་ཏོག་གམ། འབྲུ་བཅུད་སྦྲང་རྩིའམ། ཞུན་མར་རམ། འབྲང་རྒྱས་ལྟ་བུ་ལ་བརྗོད་པར་བྱའོ། །དེས་ཕན་པའི་ཡོན་ཏན་གང་གིས་བཀྲ་མི་ཤིས་པ་ཐམས་ཅད་རབ་ཏུ་ཞི་ནས་འདི་ལྟར། སངས་རྒྱས་ཞལ་ནས་གསུངས་པ་ཡི། །བཀྲ་ཤིས་བརྩེགས་པའི་སྨོན་ལམ་མདོ། །ལེགས་པར་བརྗོད་པའི་བསོད་ནམས་ཀྱིས། །མི་ཤེས་ཉེས་སྐྱོན་ཀུན་ཞི་ནས། །ཚེ་འདིར་བདེ་སྐྱིད་ཚེ་རིང་ཞིང་། །བཀྲ་ཤིས་དཔལ་དང་བསོད་ནམས་འཐོབ། །ལོངས་སྤྱོད་ཕུན་སུམ་ཚོགས་ལྡན་ཞིང་། །ཕྱི་མ་བླ་མེད་འབྲས་བུ་ཐོབ། །ཅེས་དེ་སྐད་ཅེས་བཀའ་སྩལ་པ་དང་། བཀྲ་ཤིས་དང་ལྡན་པའི་འཁོར་འཇིག་རྟེན་ལས་འདས་པ་དེ་དག་དང་། ལྷ་དང་། མི་དང་། ལྷ་མ་ཡིན་དང་བཅས་པའི་འཁོར་དེ་དག་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ནས་དེ་བཞིན་གཤེགས་པ་ལ་མངོན་པར་བསྟོད་དོ། །འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ་སྡེ་ཡོན་ཏན་བཀོད་པའི་རྒྱལ་པོ་རྫོགས་སོ། །རྒྱ་གར་གྱི་མཁན་པོ་ཛི་ན་མི་ཏྲ་དང་།སུ་རེནྟྲ་བོ་དྷི་དང་། ཞུ་ཆེན་གྱི་ལོ་ཙཱ་བ་ཡེ་ཤེས་སྡེས་བསྒྱུར་ཞིང་ཕབ་པའོ།། ༈ ཞེས་པ་འདིའི་ཁྱད་པར་དཔེ་སྔ་མ་དང་མི་མཐུན་པ་རྣམས་སྔར་གྱི་རྒྱ་ཇའི་ཤོག་སེར་ལྟ་བུ་ཞིག་ལ་བྲིས་པ་བྲག་རྡོའི་སེར་ཀ་ཞིག་ནས་ལུང་མ་བསྟན་དུ་རྙེད་པ་ལ་ཞིབ་ཏུ་བལྟས་པས་འདི་ལྟ་བུར་འདུག་པ་མགོ་སྔགས་འཇིགས་རྣམ་པས་ཨ་མཚར་དུ་བྲིས་པ་དུས་རྣམས་ཀུན་དུ་བཀྲ་ཤིས་བདེ་ལེགས་འཕེལ་ཞིང་བརྟན་པའི་རྒྱུར་གྱུར་ཅིག བསྐལ་བཟང་སངས་རྒྱས་སྟོང་རྩའི་མཚན་བརྗོད་ངན་སོང་འཇིགས་སྒྲོལ།༄༅། བསྐལ་བཟང་སངས་རྒྱས་སྟོང་རྩའི་མཚན་བརྗོད་ངན་སོང་འཇིགས་སྒྲོལ་བཞུགས། ། ༄༅། ན་མོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། སྤྲོ་ན་དེ་བཞིན་དུ་སྦྱར་ཏེ། སངས་རྒྱས་གསེར་ཐུབ་ལ་ཕྱག་འཚལ་ལོ། །སངས་རྒྱས་འོད་སྲུང་ལ་ཕྱག་འཚལ་ལོ། །སངས་རྒྱས་ཤཱཀྱ་ཐུབ་པ་དོན་ཐམས་ཅད་གྲུབ་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བྱམས་པ་མགོན་པོ་ལ་ཕྱག་འཚལ་ལོ། །སངས་རྒྱས་སེང་གེ་ལ་ཕྱག་འཚལ་ལོ། །སངས་རྒྱས་རབ་གསལ་ལ་ཕྱག་འཚལ་ལོ། །སངས་རྒྱས་ཐུབ་པ་ལ་ཕྱག་འཚལ་ལོ། །སངས་རྒྱས་མེ་ཏོག་ལ་ཕྱག་འཚལ་ལོ། །སངས་རྒྱས་མེ་ཏོག་གཉིས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ལེགས་རྒྱུ་སྐར་བཟང་པོ་ལ་ཕྱག་འཚལ་ལོ། །སངས་རྒྱས་འགྲོ་བའི་དེད་དཔོན་ལ་ཕྱག་འཚལ་ལོ། །སངས་རྒྱས་ལག་ཆེན་ལ་ཕྱག་འཚལ་ལོ། །སངས་རྒྱས་སྟོབས་ཆེན་པོ་ལ་ཕྱག་འཚལ་ལོ། །སངས་རྒྱས་རྒྱུ་སྐར་རྒྱལ་པོ་ལ་ཕྱག་འཚལ་ལོ། །སངས་རྒྱས་རྩི་སྨན་ལ་ཕྱག་འཚལ་ལོ། །སངས་རྒྱས་སྙན་པའི་ཏོག་ལ་ཕྱག་འཚལ་ལོ། །སངས་རྒྱས་འོད་ཆེན་པོ་ལ་ཕྱག་འཚལ་ལོ། །སངས་རྒྱས་གྲོལ་བའི་ཕུང་པོ་ལ་ཕྱག་འཚལ་ལོ། །སངས་རྒྱས་རྣམ་པར་སྣང་མཛད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་སྙིང་པོ་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། །སངས་རྒྱས་འོད་འཕྲོ་ལ་ཕྱག་འཚལ་ལོ། །སངས་རྒྱས་འོད་བཟང་ལ་ཕྱག་འཚལ་ལོ། །སངས་རྒྱས་མྱ་ངན་མེད་པ་ལ་ཕྱག་འཚལ་ལོ། །སངས་རྒྱས་སྐར་རྒྱལ་ལ་ཕྱག་འཚལ་ལོ། །སངས་རྒྱས་རབ་གསལ་ལ་ཕྱག་འཚལ་ལོ། །སངས་རྒྱས་ཕྲེང་ཐོགས་ལ་ཕྱག་འཚལ་ལོ། །སངས་རྒྱས་ཡོན་ཏན་འོད་ལ་ཕྱག་འཚལ་ལོ། །སངས་རྒྱས་དོན་གཟིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་ལ་ཕྱག་འཚལ་ལོ། །སངས་རྒྱས་མཐུ་ལྡན་ལ་ཕྱག་འཚལ་ལོ། །སངས་རྒྱས་སྨན་པ་ལ་ཕྱག་འཚལ་ལོ། །སངས་རྒྱས་དེས་པ་ལ་ཕྱག་འཚལ་ལོ། །སངས་རྒྱས་མཛོད་སྤུ་ལ་ཕྱག་འཚལ་ལོ། །སངས་རྒྱས་བརྟན་ལྡན་ལ་ཕྱག་འཚལ་ལོ། །སངས་རྒྱས་ལྷའི་དཔལ་ལ་ཕྱག་འཚལ་ལོ། །སངས་རྒྱས་གདུལ་དཀའ་ལ་ཕྱག་འཚལ་ལོ། །སངས་རྒྱས་ཡོན་ཏན་རྒྱལ་མཚན་ལ་ཕྱག་འཚལ་ལོ། །སངས་རྒྱས་སྒྲ་གཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚོགས་ཅན་ལ་ཕྱག་འཚལ་ལོ། །སངས་རྒྱས་ཚངས་པའི་དབྱངས་ལ་ཕྱག་འཚལ་ལོ། །སངས་རྒྱས་ཚིགས་བརྟན་ལ་ཕྱག་འཚལ་ལོ། །སངས་རྒྱས་མི་འགྱིང་པ་ལ་ཕྱག་འཚལ་ལོ། །སངས་རྒྱས་འོད་མཛད་ལ་ཕྱག་འཚལ་ལོ། །སངས་རྒྱས་ལྷུན་པོ་ཆེན་པོ་ལ་ཕྱག་འཚལ་ལོ། །སངས་རྒྱས་རྡོ་རྗེ་ལ་ཕྱག་འཚལ་ལོ། །སངས་རྒྱས་སྡོམ་པ་ཅན་ལ་ཕྱག་འཚལ་ལོ། །སངས་རྒྱས་མི་བསྙེངས་པ་ལ་ཕྱག་འཚལ་ལོ། །སངས་རྒྱས་རིན་ཆེན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་སྤྱན་ལ་ཕྱག་འཚལ་ལོ། །སངས་རྒྱས་སྟོབས་ཀྱི་སྡེ་ལ་ཕྱག་འཚལ་ལོ། །སངས་རྒྱས་མེ་ཏོག་འོད་ཟེར་ལ་ཕྱག་འཚལ་ལོ། །སངས་རྒྱས་ཡེ་ཤེས་དགྱེས་ལ་ཕྱག་འཚལ་ལོ། །སངས་རྒྱས་གཟི་བྱིན་ཆེན་པོ་ལ་ཕྱག་འཚལ་ལོ། །སངས་རྒྱས་ཚངས་པ་ལ་ཕྱག་འཚལ་ལོ། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སངས་རྒྱས་ཀླུས་བྱིན་ལ་ཕྱག་འཚལ་ལོ། །སངས་རྒྱས་བརྟན་པར་གཤེགས་ལ་ཕྱག་འཚལ་ལོ། །སངས་རྒྱས་དོན་ཡོད་མཐོང་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་བྱིན་ལ་ཕྱག་འཚལ་ལོ། །སངས་རྒྱས་བཟང་སྐྱོང་ལ་ཕྱག་འཚལ་ལོ། །སངས་རྒྱས་དགའ་བོ་ལ་ཕྱག་འཚལ་ལོ། སངས་རྒྱས་འཆི་མེད་ལ་ཕྱག་འཚལ་ལོ། །སངས་རྒྱས་སེང་གེའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་རྒྱལ་བ་ལ་ཕྱག་འཚལ་ལོ། །སངས་རྒྱས་ཆོས་ལྡན་ལ་ཕྱག་འཚལ་ལོ། །སངས་རྒྱས་མཆོག་ཏུ་དགའ་བའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཁ་ལོ་སྒྱུར་བ་ལ་ཕྱག་འཚལ་ལོ། །སངས་རྒྱས་དགྱེས་པར་གཤེགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆུ་ལྷ་ལ་ཕྱག་འཚལ་ལོ། །སངས་རྒྱས་ཡོན་ཏན་ལག་ལ་ཕྱག་འཚལ་ལོ། །སངས་རྒྱས་སྤོས་ཀྱི་གླང་པོ་ལ་ཕྱག་འཚལ་ལོ། སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །སངས་རྒྱས་འབྲུག་སྒྲ་ལ་ཕྱག་འཚལ་ལོ། །སངས་རྒྱས་ལེགས་པར་སེམས་ལ་ཕྱག་འཚལ་ལོ། །སངས་རྒྱས་ཡིད་བཟང་ལ་ཕྱག་འཚལ་ལོ། །སངས་རྒྱས་དྲི་མ་མེད་པ་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། །སངས་རྒྱས་གྲགས་པ་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ན་ནོར་བུ་ལ་ཕྱག་འཚལ་ལོ། །སངས་རྒྱས་དྲག་ཤུལ་ཅན་ལ་ཕྱག་འཚལ་ལོ། །སངས་རྒྱས་སེང་གེའི་སྟབས་ལ་ཕྱག་འཚལ་ལོ། །སངས་རྒྱས་ལྗོན་པ་ལ་ཕྱག་འཚལ་ལོ། །སངས་རྒྱས་རྣམ་པར་རྒྱལ་བ་ཅན་ལ་ཕྱག་འཚལ་ལོ། །སངས་རྒྱས་ཤེས་རབ་བརྩེགས་ལ་ཕྱག་འཚལ་ལོ། །སངས་རྒྱས་ལེགས་གནས་ལ་ཕྱག་འཚལ་ལོ། །སངས་རྒྱས་བློ་གྲོས་མཆོག་ལ་ཕྱག་འཚལ་ལོ། །སངས་རྒྱས་ཡན་ལག་སྐྱེས་ལ་ཕྱག་འཚལ་ལོ། །སངས་རྒྱས་བློ་གྲོས་མཐའ་ཡས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟུགས་བཟང་ལ་ཕྱག་འཚལ་ལོ། །སངས་རྒྱས་མཁྱེན་ལྡན་ལ་ཕྱག་འཚལ་ལོ། །སངས་རྒྱས་འོད་ཟེར་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་བརྟན་ལ་ཕྱག་འཚལ་ལོ། །སངས་རྒྱས་བཀྲ་ཤིས་ལ་ཕྱག་འཚལ་ལོ། །སངས་རྒྱས་བདེན་པའི་ཏོག་ལ་ཕྱག་འཚལ་ལོ། །སངས་རྒྱས་པདྨ་ལ་ཕྱག་འཚལ་ལོ། །སངས་རྒྱས་སྲེད་མེད་ཀྱི་བུ་ལ་ཕྱག་འཚལ་ལོ། །སངས་རྒྱས་ལག་བཟང་ལ་ཕྱག་འཚལ་ལོ། །སངས་རྒྱས་ཡེ་ཤེས་འབྱུང་གནས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་འོད་འཕྲོ་ལ་ཕྱག་འཚལ་ལོ། །སངས་རྒྱས་ཚངས་པས་བྱིན་པ་ལ་ཕྱག་འཚལ་ལོ། །སངས་རྒྱས་རིན་ཆེན་འབྱུང་གནས་ལ་ཕྱག་འཚལ་ལོ། །སངས་རྒྱས་ལྷ་ཡི་མེ་ཏོག་ལ་ཕྱག་འཚལ་ལོ། །སངས་རྒྱས་དོན་ལེགས་སེམས་ལ་ཕྱག་འཚལ་ལོ། །སངས་རྒྱས་ཆོས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་བློ་གྲོས་གྲགས་པ་ལ་ཕྱག་འཚལ་ལོ། །སངས་རྒྱས་སྤོབས་པ་བརྩེགས་པ་ལ་ཕྱག་འཚལ་ལོ། །སངས་རྒྱས་རྡོ་རྗེ་རྒྱལ་མཚན་ལ་ཕྱག་འཚལ་ལོ། །སངས་རྒྱས་ཕན་པར་བཞེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རོལ་བར་ལྡན་པ་ལ་ཕྱག་འཚལ་ལོ། །སངས་རྒྱས་མུན་པ་དང་བྲལ་བ་ལ་ཕྱག་འཚལ་ལོ། །སངས་རྒྱས་སྒྲ་གཅན་ལྷ་ལ་ཕྱག་འཚལ་ལོ། །སངས་རྒྱས་རི་བོའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་ཚོགས་ཅན་འོད་ལ་ཕྱག་འཚལ་ལོ། །སངས་རྒྱས་རིན་ཆེན་སྙིང་པོ་ལ་ཕྱག་འཚལ་ལོ། །སངས་རྒྱས་ཤིན་ཏུ་མཐོ་བར་གཤེགས་ལ་ཕྱག་འཚལ་ལོ། །སངས་རྒྱས་སྐར་རྒྱལ་ལ་ཕྱག་འཚལ་ལོ། །སངས་རྒྱས་རུ་རིང་ལ་ཕྱག་འཚལ་ལོ། །སངས་རྒྱས་ཡོན་ཏན་གྲགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ལྡན་ཉི་ཟླ་ལ་ཕྱག་འཚལ་ལོ། །སངས་རྒྱས་ཉི་མའི་འོད་ལ་ཕྱག་འཚལ་ལོ། །སངས་རྒྱས་སྐར་མཁན་ལ་ཕྱག་འཚལ་ལོ། །སངས་རྒྱས་སེང་གེའི་ཏོག་ལ་ཕྱག་འཚལ་ལོ། །སངས་རྒྱས་དུས་མཁྱེན་རྒྱལ་པོ་ལ་ཕྱག་འཚལ་ལོ། །སངས་རྒྱས་དཔལ་གྱི་སྙིང་པོ་ལ་ཕྱག་འཚལ་ལོ། སངས་རྒྱས་སྲིད་མཐའ་གཟིགས་པ་ལ་ཕྱག་འཚལ་ལོ། །སངས་རྒྱས་གློག་གི་འོད་ལ་ཕྱག་འཚལ་ལོ། །སངས་རྒྱས་གསེར་གྱི་རི་བོ་ལ་ཕྱག་འཚལ་ལོ། །སངས་རྒྱས་སེང་གེས་བྱིན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཞན་གྱིས་མི་ཐུབ་པའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་མཆོག་ཏུ་དགའ་བར་གྲགས་པ་ལ་ཕྱག་འཚལ་ལོ། །སངས་རྒྱས་བརྩོན་འགྲུས་བརྟན་པ་ལ་ཕྱག་འཚལ་ལོ། །སངས་རྒྱས་གྲགས་པར་རྫོགས་པ་ལ་ཕྱག་འཚལ་ལོ། །སངས་རྒྱས་བསྙེངས་དང་བྲལ་བ་ལ་ཕྱག་འཚལ་ལོ། །སངས་རྒྱས་མཆོད་འོས་ལྷ་ལ་ཕྱག་འཚལ་ལོ། །སངས་རྒྱས་སྒྲོན་མ་ཆེན་པོ་ལ་ཕྱག་འཚལ་ལོ། །སངས་རྒྱས་འཇིག་རྟེན་འོད་ལ་ཕྱག་འཚལ་ལོ། །སངས་རྒྱས་སྤོས་དྲི་ཞིམ་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་མཆོག་འཛིན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མུན་པ་དང་རྣམ་པར་བྲལ་བ་ལ་ཕྱག་འཚལ་ལོ། །སངས་རྒྱས་སེང་གེའི་འགྲམ་པ་ལ་ཕྱག་འཚལ་ལོ། །སངས་རྒྱས་རིན་ཆེན་གྲགས་པ་ལ་ཕྱག་འཚལ་ལོ། །སངས་རྒྱས་སྐྱོན་རབ་ཏུ་ཞི་བ་ལ་ཕྱག་འཚལ་ལོ། །སངས་རྒྱས་བདུད་རྩི་འཆང་བ་ལ་ཕྱག་འཚལ་ལོ། །སངས་རྒྱས་མི་ཡི་ཟླ་བ་ལ་ཕྱག་འཚལ་ལོ། །སངས་རྒྱས་ཤིན་ཏུ་གཟིགས་པ་ལ་ཕྱག་འཚལ་ལོ། །སངས་རྒྱས་རབ་ཏུ་བརྒྱན་པ་ལ་ཕྱག་འཚལ་ལོ། །སངས་རྒྱས་ནོར་བུའི་འོད་ལ་ཕྱག་འཚལ་ལོ། །སངས་རྒྱས་རི་བོ་བརྩེགས་པའི་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འབྱུང་གནས་ལ་ཕྱག་འཚལ་ལོ། །སངས་རྒྱས་དོན་ངེས་པར་ལྡན་པ་ལ་ཕྱག་འཚལ་ལོ། །སངས་རྒྱས་ཆོས་སྦྱིན་ལ་ཕྱག་འཚལ་ལོ། །སངས་རྒྱས་རིན་ཆེན་འབྱུང་གནས་ལ་ཕྱག་འཚལ་ལོ། །སངས་རྒྱས་སྐྱེ་དབང་མཚུངས་པ་ལ་ཕྱག་འཚལ་ལོ། །སངས་རྒྱས་སྟོབས་ཀྱིས་གཤེགས་པ་ལ་ཕྱག་འཚལ་ལོ། །སངས་རྒྱས་བློ་གནས་པ་ལ་ཕྱག་འཚལ་ལོ། །སངས་རྒྱས་གདུགས་མཛེས་ལ་ཕྱག་འཚལ་ལོ། །སངས་རྒྱས་གཙོ་བོ་ལ་ཕྱག་འཚལ་ལོ། །སངས་རྒྱས་ཤིན་ཏུ་འཕགས་པའི་དཔལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྒྲ་ལ་ཕྱག་འཚལ་ལོ། །སངས་རྒྱས་རྣམ་རོལ་ལྡན་པ་ལ་ཕྱག་འཚལ་ལོ། །སངས་རྒྱས་ཀླུ་ཡི་འོད་ལ་ཕྱག་འཚལ་ལོ། །སངས་རྒྱས་མེ་ཏོག་རི་བོ་ལ་ཕྱག་འཚལ་ལོ། །སངས་རྒྱས་ཀླུ་དགའ་བ་ལ་ཕྱག་འཚལ་ལོ། །སངས་རྒྱས་སྤོས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཤིན་ཏུ་གྲགས་པ་ལ་ཕྱག་འཚལ་ལོ། །སངས་རྒྱས་སྟོབས་ཀྱི་ལྷ་ལ་ཕྱག་འཚལ་ལོ། །སངས་རྒྱས་ཡོན་ཏན་ཕྲེང་ལྡན་ལ་ཕྱག་འཚལ་ལོ། །སངས་རྒྱས་ཀླུ་ཡི་ལག་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མིག་བརྒྱན་ལ་ཕྱག་འཚལ་ལོ། །སངས་རྒྱས་ལེགས་པར་སྦྱངས་པའི་བློ་ལ་ཕྱག་འཚལ་ལོ། །སངས་རྒྱས་ཟིལ་གནོན་ཡེ་ཤེས་ལ་ཕྱག་འཚལ་ལོ། །སངས་རྒྱས་མཐའ་ཡས་པའི་སྤྱན་ལ་ཕྱག་འཚལ་ལོ། །སངས་རྒྱས་བདེན་པར་གསུང་པ་ལ་ཕྱག་འཚལ་ལོ། །སངས་རྒྱས་ཉི་མའི་འོད་ལ་ཕྱག་འཚལ་ལོ། །སངས་རྒྱས་ངེས་པའི་བློ་ལ་ཕྱག་འཚལ་ལོ། །སངས་རྒྱས་མཐའ་ཡས་པའི་གཟུགས་ལ་ཕྱག་འཚལ་ལོ། །སངས་རྒྱས་རྣམ་པར་སྣང་མཛད་ལ་ཕྱག་འཚལ་ལོ། །སངས་རྒྱས་རིན་ཆེན་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐེ་ཚོམ་རྣམ་པར་སྤངས་པ་ལ་ཕྱག་འཚལ་ལོ། །སངས་རྒྱས་འཇིག་རྟེན་ལས་འདས་པ་ལ་ཕྱག་འཚལ་ལོ། །སངས་རྒྱས་དོན་ཡོད་རྣམ་པར་གནོན་པ་ལ་ཕྱག་འཚལ་ལོ། །སངས་རྒྱས་རྟོགས་པར་མཛད་པ་ལ་ཕྱག་འཚལ་ལོ། །སངས་རྒྱས་མེ་ཏོག་རྒྱལ་མཚན་ལ་ཕྱག་འཚལ་ལོ། །སངས་རྒྱས་རི་དབང་རྒྱལ་པོ་ལ་ཕྱག་འཚལ་ལོ། །སངས་རྒྱས་གཟི་བརྗིད་ཆེན་པོ་ལ་ཕྱག་འཚལ་ལོ། །སངས་རྒྱས་དོན་མཛད་གཟིགས་པ་ལ་ཕྱག་འཚལ་ལོ། །སངས་རྒྱས་གྲགས་པ་མཐའ་ཡས་ལ་ཕྱག་འཚལ་ལོ། །སངས་རྒྱས་རིན་ཆེན་ལྷ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གནས་མཁྱེན་པ་ལ་ཕྱག་འཚལ་ལོ། །སངས་རྒྱས་བློ་ཡོངས་སུ་རྫོགས་པ་ལ་ཕྱག་འཚལ་ལོ། །སངས་རྒྱས་མྱ་ངན་མེད་པ་ལ་ཕྱག་འཚལ་ལོ། །སངས་རྒྱས་དྲི་མ་བྲལ་བ་ལ་ཕྱག་འཚལ་ལོ། །སངས་རྒྱས་ཚངས་པའི་ལྷ་ལ་ཕྱག་འཚལ་ལོ། །སངས་རྒྱས་ས་ཡི་དབང་ཕྱུག་ལ་ཕྱག་འཚལ་ལོ། །སངས་རྒྱས་མེ་ཏོག་སྤྱན་ལ་ཕྱག་འཚལ་ལོ། །སངས་རྒྱས་རྣམ་པར་འབྱེས་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་འོད་ལ་ཕྱག་འཚལ་ལོ། །སངས་རྒྱས་ཀུན་གཟིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་འོད་གསལ་ལ་ཕྱག་འཚལ་ལོ། །སངས་རྒྱས་དྲི་མེད་ཟླ་བའི་ཞལ་ལ་ཕྱག་འཚལ་ལོ། །སངས་རྒྱས་རིན་ཆེན་འོད་ལ་ཕྱག་འཚལ་ལོ། །སངས་རྒྱས་རིན་ཆེན་ཏོག་ལ་ཕྱག་འཚལ་ལོ། །སངས་རྒྱས་གྲགས་པའི་བླ་མ་ལ་ཕྱག་འཚལ་ལོ། །སངས་རྒྱས་འོད་བྱེད་ལ་ཕྱག་འཚལ་ལོ། །སངས་རྒྱས་གཟི་བརྗིད་དཔག་མེད་ལ་ཕྱག་འཚལ་ལོ། །སངས་རྒྱས་དུས་མཁྱེན་པ་ལ་ཕྱག་འཚལ་ལོ། །སངས་རྒྱས་སེང་གེའི་སྐུ་ལ་ཕྱག་འཚལ་ལོ། །སངས་རྒྱས་མཁས་བློ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་བར་དཀའ་བ་ལ་ཕྱག་འཚལ་ལོ། །སངས་རྒྱས་ཡོན་ཏན་ཕུང་པོ་ལ་ཕྱག་འཚལ་ལོ། །སངས་རྒྱས་ཟླ་བའི་ཏོག་ལ་ཕྱག་འཚལ་ལོ། །སངས་རྒྱས་མཐུ་ཐོབ་པ་ལ་ཕྱག་འཚལ་ལོ། །སངས་རྒྱས་མཐུ་རྩལ་མཐའ་ཡས་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། །སངས་རྒྱས་དྲི་མེད་ལ་ཕྱག་འཚལ་ལོ། །སངས་རྒྱས་དོན་ཐམས་ཅད་གཟིགས་པ་ལ་ཕྱག་འཚལ་ལོ། །སངས་རྒྱས་དཔའ་བོ་ལ་ཕྱག་འཚལ་ལོ། །སངས་རྒྱས་འབྱོར་བ་ལྡན་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསོད་ནམས་ལ་ཕྱག་འཚལ་ལོ། །སངས་རྒྱས་སྒྲོན་མ་ལ་ཕྱག་འཚལ་ལོ། །སངས་རྒྱས་ཡོན་ཏན་འོད་འཕྲོ་ལ་ཕྱག་འཚལ་ལོ། །སངས་རྒྱས་བློ་ཡངས་པ་ལ་ཕྱག་འཚལ་ལོ། །སངས་རྒྱས་ལེགས་སྐྱེས་ལ་ཕྱག་འཚལ་ལོ། །སངས་རྒྱས་ནོར་ལྷ་ལ་ཕྱག་འཚལ་ལོ། །སངས་རྒྱས་ཡིད་གཉིས་སྤོང་པ་ལ་ཕྱག་འཚལ་ལོ། །སངས་རྒྱས་འཛིན་པ་དཔག་མེད་ལ་ཕྱག་འཚལ་ལོ། །སངས་རྒྱས་མཆོག་སྲེད་ལ་ཕྱག་འཚལ་ལོ། །སངས་རྒྱས་ཆོམས་མེད་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་གནས་པ་ལ་ཕྱག་འཚལ་ལོ། །སངས་རྒྱས་བདེར་གནས་ལ་ཕྱག་འཚལ་ལོ། །སངས་རྒྱས་ཚོགས་ཅན་གཙོ་བོ་ལ་ཕྱག་འཚལ་ལོ། །སངས་རྒྱས་འགྲོ་བའི་འོད་ཟེར་ལ་ཕྱག་འཚལ་ལོ། །སངས་རྒྱས་ཕལ་ཆེན་རྒྱལ་བ་ལ་ཕྱག་འཚལ་ལོ། །སངས་རྒྱས་རྒྱལ་བ་ལ་ཕྱག་འཚལ་ལོ། །སངས་རྒྱས་གཟི་བརྗིད་མཐའ་ཡས་ལ་ཕྱག་འཚལ་ལོ། །སངས་རྒྱས་དོན་གྱི་བློ་གྲོས་ལ་ཕྱག་འཚལ་ལོ། །སངས་རྒྱས་སྨན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཐ་བ་སྤངས་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིམ་ནད་མེད་པ་ལ་ཕྱག་འཚལ་ལོ། །སངས་རྒྱས་ལེགས་བྱིན་ལ་ཕྱག་འཚལ་ལོ། །སངས་རྒྱས་གྲགས་བྱིན་ལ་ཕྱག་འཚལ་ལོ། །སངས་རྒྱས་མེ་ཏོག་བྱིན་ལ་ཕྱག་འཚལ་ལོ། །སངས་རྒྱས་སྐྱེས་བུས་བྱིན་ལ་ཕྱག་འཚལ་ལོ། །སངས་རྒྱས་རྡོ་རྗེའི་སྡེ་ལ་ཕྱག་འཚལ་ལོ། །སངས་རྒྱས་ཕན་ཆེན་བྱིན་པ་ལ་ཕྱག་འཚལ་ལོ། །སངས་རྒྱས་ཞི་བའི་བློ་གྲོས་ལ་ཕྱག་འཚལ་ལོ། །སངས་རྒྱས་སྤོས་ཀྱི་གླང་པོ་ལ་ཕྱག་འཚལ་ལོ། །སངས་རྒྱས་སྲེད་མེད་ཀྱི་བུ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་པ་ལ་ཕྱག་འཚལ་ལོ། །སངས་རྒྱས་མི་ཚུགས་པ་ལ་ཕྱག་འཚལ་ལོ། །སངས་རྒྱས་ཉི་ཟླ་ལ་ཕྱག་འཚལ་ལོ། །སངས་རྒྱས་གློག་གི་ཏོག་ལ་ཕྱག་འཚལ་ལོ། །སངས་རྒྱས་མཆོད་པ་ལ་ཕྱག་འཚལ་ལོ། །སངས་རྒྱས་དཔལ་སྦས་ལ་ཕྱག་འཚལ་ལོ། །སངས་རྒྱས་ཡེ་ཤེས་ཉི་མ་ལ་ཕྱག་འཚལ་ལོ། །སངས་རྒྱས་དོན་གྲུབ་ལ་ཕྱག་འཚལ་ལོ། །སངས་རྒྱས་ལྷུན་པོ་བརྩེགས་ལ་ཕྱག་འཚལ་ལོ། །སངས་རྒྱས་དགྲ་འདུལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་ལ་ཕྱག་འཚལ་ལོ། །སངས་རྒྱས་དགྲ་བཅོམ་གྲགས་པ་ལ་ཕྱག་འཚལ་ལོ། །སངས་རྒྱས་ཡེ་ཤེས་འགྲོས་ལ་ཕྱག་འཚལ་ལོ། །སངས་རྒྱས་ཉོན་མོངས་བྲལ་བ་ལ་ཕྱག་འཚལ་ལོ། །སངས་རྒྱས་འདམ་བུ་ལ་ཕྱག་འཚལ་ལོ། །སངས་རྒྱས་སྤོས་བཟང་ལ་ཕྱག་འཚལ་ལོ། །སངས་རྒྱས་ཡུལ་འཁོར་རངས་ལ་ཕྱག་འཚལ་ལོ། །སངས་རྒྱས་ལྷ་གྲགས་ལ་ཕྱག་འཚལ་ལོ། །སངས་རྒྱས་སྲིད་མཐའ་གཟིགས་པ་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་བསམ་གཏན་དགྱེས་ལ་ཕྱག་འཚལ་ལོ། །སངས་རྒྱས་རྫོགས་ལྡན་ལ་ཕྱག་འཚལ་ལོ། །སངས་རྒྱས་རྣམ་པར་རོལ་པ་ལ་ཕྱག་འཚལ་ལོ། །སངས་རྒྱས་ཡོན་ཏན་རིན་ཆེན་ལ་ཕྱག་འཚལ་ལོ། །སངས་རྒྱས་དགྲ་བཅོམ་གྲགས་ལ་ཕྱག་འཚལ་ལོ། །སངས་རྒྱས་པདྨའི་ངོས་ལ་ཕྱག་འཚལ་ལོ། །སངས་རྒྱས་མཛོད་སྤུ་ལྡན་ལ་ཕྱག་འཚལ་ལོ། །སངས་རྒྱས་སྤོབས་པ་གྲགས་ལ་ཕྱག་འཚལ་ལོ། །སངས་རྒྱས་རྡོ་རྗེ་ནོར་བུ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ལ་ཕྱག་འཚལ་ལོ། །སངས་རྒྱས་ནོར་བུ་བཀོད་པ་ལ་ཕྱག་འཚལ་ལོ། །སངས་རྒྱས་དབང་ཆེན་ལ་ཕྱག་འཚལ་ལོ། །སངས་རྒྱས་ཡོན་ཏན་འབྱུང་གནས་ལ་ཕྱག་འཚལ་ལོ། །སངས་རྒྱས་ལྷུན་པོ་གྲགས་པ་ལ་ཕྱག་འཚལ་ལོ། །སངས་རྒྱས་འོད་ཟེར་བཅུ་པ་ལ་ཕྱག་འཚལ་ལོ། །སངས་རྒྱས་མ་སྨད་པ་ལ་ཕྱག་འཚལ་ལོ། །སངས་རྒྱས་གླང་པོའི་འགྲོས་ལ་ཕྱག་འཚལ་ལོ། །སངས་རྒྱས་ཡིད་དུ་འཐད་པ་ལ་ཕྱག་འཚལ་ལོ། །སངས་རྒྱས་རིན་ཆེན་ཟླ་བ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞི་བ་ལ་ཕྱག་འཚལ་ལོ། །སངས་རྒྱས་རབ་གསལ་རྒྱལ་པོ་ལ་ཕྱག་འཚལ་ལོ། །སངས་རྒྱས་ཁ་ལོ་སྒྱུར་བ་ལ་ཕྱག་འཚལ་ལོ། །སངས་རྒྱས་དགའ་བའི་དབང་ཕྱུག་ལ་ཕྱག་འཚལ་ལོ། །སངས་རྒྱས་གཙུག་ན་རིན་པོ་ཆེ་ལ་ཕྱག་འཚལ་ལོ། །སངས་རྒྱས་བསྙེངས་བྲལ་ལ་ཕྱག་འཚལ་ལོ། །སངས་རྒྱས་རིན་ཆེན་སྙིང་པོ་ལ་ཕྱག་འཚལ་ལོ། །སངས་རྒྱས་ཟླ་བའི་ཞལ་ལ་ཕྱག་འཚལ་ལོ། །སངས་རྒྱས་དྲི་མ་མེད་པར་གྲགས་པ་ལ་ཕྱག་འཚལ་ལོ། །སངས་རྒྱས་ཞི་བའི་གཟི་བརྗིད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བའི་ཏོག་ལ་ཕྱག་འཚལ་ལོ། །སངས་རྒྱས་སྒྲ་གཅན་ལྷ་ལ་ཕྱག་འཚལ་ལོ། །སངས་རྒྱས་ན་ཚོད་བཟང་པོ་ལ་ཕྱག་འཚལ་ལོ། །སངས་རྒྱས་ལྷ་རྣམས་དགའ་བ་ལ་ཕྱག་འཚལ་ལོ། །སངས་རྒྱས་རིན་ཆེན་ཕུང་པོ་ལ་ཕྱག་འཚལ་ལོ། །སངས་རྒྱས་མཛེས་པར་གཤེགས་ལ་ཕྱག་འཚལ་ལོ། །སངས་རྒྱས་སེང་གེས་ཕྱོགས་པ་ལ་ཕྱག་འཚལ་ལོ། །སངས་རྒྱས་ཤིན་ཏུ་མཐོ་བར་གཤེགས་པ་ལ་ཕྱག་འཚལ་ལོ། །སངས་རྒྱས་སྐྱེ་བོའི་དབང་པོ་ལ་ཕྱག་འཚལ་ལོ། །སངས་རྒྱས་བློ་གྲོས་བཟང་པོ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་འོད་ལ་ཕྱག་འཚལ་ལོ། །སངས་རྒྱས་རིན་ཆེན་གཟི་བརྗིད་ལ་ཕྱག་འཚལ་ལོ། །སངས་རྒྱས་སྐལ་ལྡན་ཤིང་རྟ་ལ་ཕྱག་འཚལ་ལོ། །སངས་རྒྱས་ཀུན་ཏུ་རྒྱལ་བ་ལ་ཕྱག་འཚལ་ལོ། །སངས་རྒྱས་དགའ་བ་བཀོད་པ་ལ་ཕྱག་འཚལ་ལོ། །སངས་རྒྱས་སྟེགས་མཛད་པ་ལ་ཕྱག་འཚལ་ལོ། །སངས་རྒྱས་སྤོས་ཀྱི་གླང་པོ་ལ་ཕྱག་འཚལ་ལོ། །སངས་རྒྱས་བློ་གྲོས་འོད་འཕྲོ་ལ་ཕྱག་འཚལ་ལོ། །སངས་རྒྱས་རི་བོའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་རིན་ཆེན་སྤོས་བཟང་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རབ་བརྟན་ལ་ཕྱག་འཚལ་ལོ། །སངས་རྒྱས་གཟི་བརྗིད་དྲག་ཤུལ་ཅན་ལ་ཕྱག་འཚལ་ལོ། །སངས་རྒྱས་ཆོས་ཀྱི་ནོར་བུ་ལ་ཕྱག་འཚལ་ལོ། །སངས་རྒྱས་བཟང་པོ་བྱིན་པ་ལ་ཕྱག་འཚལ་ལོ། །སངས་རྒྱས་བདེ་གཤེགས་ཟླ་བ་ལ་ཕྱག་འཚལ་ལོ། །སངས་རྒྱས་ཚངས་པའི་དབྱངས་ལ་ཕྱག་འཚལ་ལོ། །སངས་རྒྱས་སེང་གེའི་ཟླ་བ་ལ་ཕྱག་འཚལ་ལོ། །སངས་རྒྱས་མཚུངས་པ་མེད་པའི་དཔལ་ལ་ཕྱག་འཚལ་ལོ། །སངས་རྒྱས་ལེགས་པར་སྐྱེས་པ་ལ་ཕྱག་འཚལ་ལོ། །སངས་རྒྱས་ཐུབ་པ་མེད་པའི་ཚོགས་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པའི་བཤེས་གཉེན་ལ་ཕྱག་འཚལ་ལོ། །སངས་རྒྱས་བདེན་པ་ལ་ཕྱག་འཚལ་ལོ། །སངས་རྒྱས་དཀའ་ཐུབ་ཆེན་པོ་ལ་ཕྱག་འཚལ་ལོ། །སངས་རྒྱས་ལྷུན་པོའི་འོད་ཟེར་ལ་ཕྱག་འཚལ་ལོ། །སངས་རྒྱས་ཡོན་ཏན་བརྩེགས་པ་ལ་ཕྱག་འཚལ་ལོ། །སངས་རྒྱས་མཆོད་པ་གྲགས་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་གྲགས་པ་ལ་ཕྱག་འཚལ་ལོ། །སངས་རྒྱས་སྦྱིན་པའི་ཏོག་ལ་ཕྱག་འཚལ་ལོ། །སངས་རྒྱས་གློག་འབྱིན་ལ་ཕྱག་འཚལ་ལོ། །སངས་རྒྱས་བདེན་པར་གསུངས་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཚོ་བྱེད་ལ་ཕྱག་འཚལ་ལོ། །སངས་རྒྱས་ན་ཚོད་བཟང་པོ་ལ་ཕྱག་འཚལ་ལོ། །སངས་རྒྱས་ལེགས་པའི་ཚོགས་ཅན་ལ་ཕྱག་འཚལ་ལོ། །སངས་རྒྱས་རྣམ་པར་ངེས་པའི་བློ་གྲོས་ལ་ཕྱག་འཚལ་ལོ། །སངས་རྒྱས་སྲིད་མཐའ་ནོར་བུའི་སྤོས་ལ་ཕྱག་འཚལ་ལོ། །སངས་རྒྱས་རྒྱལ་བས་དགྱེས་པ་ལ་ཕྱག་འཚལ་ལོ། །སངས་རྒྱས་སེང་གེའི་འོད་ཟེར་ལ་ཕྱག་འཚལ་ལོ། །སངས་རྒྱས་རྣམ་པར་སྣང་མཛད་ལ་ཕྱག་འཚལ་ལོ། །སངས་རྒྱས་གྲགས་པ་མཆོག་ལ་ཕྱག་འཚལ་ལོ། །སངས་རྒྱས་ཐུགས་རབ་གཞུངས་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་ཟླ་བ་ལ་ཕྱག་འཚལ་ལོ། །སངས་རྒྱས་དྲག་ཤུལ་འོད་ཟེར་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་ཐུབ་མེད་ལ་ཕྱག་འཚལ་ལོ། །སངས་རྒྱས་འགྲོ་བས་མཆོད་པ་ལ་ཕྱག་འཚལ་ལོ། །སངས་རྒྱས་ནོར་བུའི་ཚོགས་ཅན་ལ་ཕྱག་འཚལ་ལོ། །སངས་རྒྱས་འཇིག་རྟེན་བླ་མ་ལ་ཕྱག་འཚལ་ལོ། །སངས་རྒྱས་གླང་ཆེན་སེང་གེ་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། །སངས་རྒྱས་རིན་ཆེན་འོད་ཟེར་ལ་ཕྱག་འཚལ་ལོ། །སངས་རྒྱས་སྒྲ་གཅན་སྦེད་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རྒྱ་མཚོ་ལ་ཕྱག་འཚལ་ལོ། །སངས་རྒྱས་འོད་ཟེར་ལྡན་པ་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་སྟབས་ལ་ཕྱག་འཚལ་ལོ། །སངས་རྒྱས་འཇིག་རྟེན་བཟང་པོ་ལ་ཕྱག་འཚལ་ལོ། །སངས་རྒྱས་མྱ་ངན་མེད་པ་ལ་ཕྱག་འཚལ་ལོ། །སངས་རྒྱས་ཤུགས་བཅུ་པ་ལ་ཕྱག་འཚལ་ལོ། །སངས་རྒྱས་སྟོབས་ལ་དགྱེས་པ་ལ་ཕྱག་འཚལ་ལོ། །སངས་རྒྱས་མཐུ་དཔལ་ལ་ཕྱག་འཚལ་ལོ། །སངས་རྒྱས་མཐུ་ཐོབ་པ་ལ་ཕྱག་འཚལ་ལོ། །སངས་རྒྱས་མཐུ་ཆེན་པོ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་སྙིང་པོ་ལ་ཕྱག་འཚལ་ལོ། །སངས་རྒྱས་བདེན་པར་སྤྱོད་པ་ལ་ཕྱག་འཚལ་ལོ། །སངས་རྒྱས་དགེ་མཆོག་རྒྱལ་པོ་ལ་ཕྱག་འཚལ་ལོ། །སངས་རྒྱས་སྐར་རྒྱལ་ལ་ཕྱག་འཚལ་ལོ། །སངས་རྒྱས་འོད་ཟེར་ཆེན་པོ་ལ་ཕྱག་འཚལ་ལོ། །སངས་རྒྱས་གློག་གི་འོད་ལ་ཕྱག་འཚལ་ལོ། །སངས་རྒྱས་ཡོན་ཏན་རྒྱ་ཆེན་པོ་ལ་ཕྱག་འཚལ་ལོ། །སངས་རྒྱས་རིན་པོ་ཆེ་ལ་ཕྱག་འཚལ་ལོ། །སངས་རྒྱས་དཔལ་འོད་ལ་ཕྱག་འཚལ་ལོ། །སངས་རྒྱས་བདུད་འདུལ་བར་མཛད་པ་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གོ་ཆ་བགོས་པ་ལ་ཕྱག་འཚལ་ལོ། །སངས་རྒྱས་སེང་གེའི་ཕྱག་ལ་ཕྱག་འཚལ་ལོ། །སངས་རྒྱས་མེ་ཏོག་བཟང་པོ་ལ་ཕྱག་འཚལ་ལོ། །སངས་རྒྱས་རིན་ཆེན་མཐོན་པོ་ལ་ཕྱག་འཚལ་ལོ། །སངས་རྒྱས་རྒྱ་མཚོ་ལ་ཕྱག་འཚལ་ལོ། །སངས་རྒྱས་ས་འཛིན་ལ་ཕྱག་འཚལ་ལོ། །སངས་རྒྱས་དོན་གྱི་བློ་མངའ་བ་ལ་ཕྱག་འཚལ་ལོ། །སངས་རྒྱས་ཡོན་ཏན་བསགས་པ་ལ་ཕྱག་འཚལ་ལོ། །སངས་རྒྱས་ཡོན་ཏན་ཚོགས་ལ་ཕྱག་འཚལ་ལོ། །སངས་རྒྱས་རིན་ཆེན་མེ་ཏོག་ལ་ཕྱག་འཚལ་ལོ། ། མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་འདས་པ་ལ་ཕྱག་འཚལ་ལོ། །སངས་རྒྱས་འཇིག་རྟེན་ཟླ་བ་ལ་ཕྱག་འཚལ་ལོ། །སངས་རྒྱས་དབྱངས་སྙན་ལ་ཕྱག་འཚལ་ལོ། །སངས་རྒྱས་ཚངས་པའི་ཏོག་ལ་ཕྱག་འཚལ་ལོ། །སངས་རྒྱས་ཚོགས་ཅན་གཙོ་བོ་ལ་ཕྱག་འཚལ་ལོ། །སངས་རྒྱས་སེང་གེའི་སྟབས་ལ་ཕྱག་འཚལ་ལོ། །སངས་རྒྱས་དྲག་ཤུལ་ཅན་གྱིས་བྱིན་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་གཟི་བརྗིད་འོད་ལ་ཕྱག་འཚལ་ལོ། །སངས་རྒྱས་འོད་ཟེར་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གྲགས་པ་ལ་ཕྱག་འཚལ་ལོ། །སངས་རྒྱས་ཚོགས་ཅན་གསལ་བ་ལ་ཕྱག་འཚལ་ལོ། །སངས་རྒྱས་གྲགས་པ་མཐའ་ཡས་ལ་ཕྱག་འཚལ་ལོ། །སངས་རྒྱས་འོད་ཟེར་དོན་ཡོད་ལ་ཕྱག་འཚལ་ལོ། །སངས་རྒྱས་ལྷའི་དྲང་སྲོང་ལ་ཕྱག་འཚལ་ལོ། །སངས་རྒྱས་སྐྱེ་བའི་དབང་པོ་ལ་ཕྱག་འཚལ་ལོ། །སངས་རྒྱས་དགེ་འདུན་བརྟན་ལ་ཕྱག་འཚལ་ལོ། །སངས་རྒྱས་ཕྱོགས་བཟང་ལ་ཕྱག་འཚལ་ལོ། །སངས་རྒྱས་ཏོག་ཆེན་པོ་ལ་ཕྱག་འཚལ་ལོ། །སངས་རྒྱས་ཡུལ་འཁོར་མེ་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་བློ་གྲོས་ལ་ཕྱག་འཚལ་ལོ། །སངས་རྒྱས་རླུང་གི་ཤུགས་ལྟར་གཤེགས་པ་ལ་ཕྱག་འཚལ་ལོ། །སངས་རྒྱས་ལེགས་བསམ་གྲགས་པ་ལ་ཕྱག་འཚལ་ལོ། །སངས་རྒྱས་སྣང་ལྡན་ལ་ཕྱག་འཚལ་ལོ། །སངས་རྒྱས་ལྷ་ཚོགས་པ་ལ་ཕྱག་འཚལ་ལོ། །སངས་རྒྱས་ཡོན་ཏན་བསྲུང་བ་ལ་ཕྱག་འཚལ་ལོ། །སངས་རྒྱས་དོན་གྱི་བློ་གྲོས་ལ་ཕྱག་འཚལ་ལོ། །སངས་རྒྱས་བསྙེངས་པ་མེད་པ་ལ་ཕྱག་འཚལ་ལོ། །སངས་རྒྱས་གྲོགས་བརྟན་ལ་ཕྱག་འཚལ་ལོ། །སངས་རྒྱས་འོད་གནས་མཚུངས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུའི་ཞབས་ལ་ཕྱག་འཚལ་ལོ། །སངས་རྒྱས་ཐར་བའི་གཟི་བརྗིད་ལ་ཕྱག་འཚལ་ལོ། །སངས་རྒྱས་ངོས་བཟང་ལ་ཕྱག་འཚལ་ལོ། །སངས་རྒྱས་བློ་བཟང་ལ་ཕྱག་འཚལ་ལོ། །སངས་རྒྱས་ཀུན་ཏུ་གཟི་བརྗིད་ལ་ཕྱག་འཚལ་ལོ། །སངས་རྒྱས་ཡེ་ཤེས་མཆོག་མ་ལ་ཕྱག་འཚལ་ལོ། །སངས་རྒྱས་ཚངས་པར་གནས་ལ་ཕྱག་འཚལ་ལོ། །སངས་རྒྱས་བདེན་པ་གསུང་བ་ལ་ཕྱག་འཚལ་ལོ། །སངས་རྒྱས་བློ་གྲོས་བཟང་པོ་ལ་ཕྱག་འཚལ་ལོ། །སངས་རྒྱས་སྟོབས་བྱིན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྟབས་ལ་ཕྱག་འཚལ་ལོ། །སངས་རྒྱས་མེ་ཏོག་གི་ཏོག་ལ་ཕྱག་འཚལ་ལོ། །སངས་རྒྱས་ཡེ་ཤེས་འབྱུང་གནས་ལ་ཕྱག་འཚལ་ལོ། །སངས་རྒྱས་མེ་ཏོག་བྱིན་ལ་ཕྱག་འཚལ་ལོ། །སངས་རྒྱས་ཡོན་ཏན་སྙིང་པོ་ལ་ཕྱག་འཚལ་ལོ། །སངས་རྒྱས་རིན་ཆེན་གྲགས་པ་ལ་ཕྱག་འཚལ་ལོ། །སངས་རྒྱས་གྲགས་པ་རྨད་དུ་བྱུང་བ་ལ་ཕྱག་འཚལ་ལོ། །སངས་རྒྱས་མི་ཚུགས་པ་ལ་ཕྱག་འཚལ་ལོ། །སངས་རྒྱས་བསྙེངས་མེད་ལ་ཕྱག་འཚལ་ལོ། །སངས་རྒྱས་ཉི་མའི་འོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པར་གཤེགས་པ་ལ་ཕྱག་འཚལ་ལོ། །སངས་རྒྱས་ལྷའི་མཐུ་རྩལ་ལ་ཕྱག་འཚལ་ལོ། །སངས་རྒྱས་ཡེ་ཤེས་དགྱེས་པ་ལ་ཕྱག་འཚལ་ལོ། །སངས་རྒྱས་ལྷ་བདེན་ལ་ཕྱག་འཚལ་ལོ། །སངས་རྒྱས་ནོར་བུའི་སྙིང་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་གྲགས་པ་ལ་ཕྱག་འཚལ་ལོ། །སངས་རྒྱས་ཡེ་ཤེས་དཔལ་ལ་ཕྱག་འཚལ་ལོ། །སངས་རྒྱས་བཅིངས་པ་མེད་པ་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་བརྟན་པ་ལ་ཕྱག་འཚལ་ལོ། །སངས་རྒྱས་ལྷའི་གཟི་བརྗིད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པ་ཐུབ་པ་ལ་ཕྱག་འཚལ་ལོ། །སངས་རྒྱས་དལ་གྱིས་བཞུད་པ་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་དཀའ་ཐུབ་ལ་ཕྱག་འཚལ་ལོ། །སངས་རྒྱས་འོད་ཟེར་ཕུང་པོ་ལ་ཕྱག་འཚལ་ལོ། །སངས་རྒྱས་གཟི་བརྗིད་ཆེན་པོ་ལ་ཕྱག་འཚལ་ལོ། །སངས་རྒྱས་ཙམ་པ་ཀ་ལ་ཕྱག་འཚལ་ལོ། །སངས་རྒྱས་དགའ་མཛད་ལ་ཕྱག་འཚལ་ལོ། །སངས་རྒྱས་ཚོགས་ཅན་བཟང་པོ་ལ་ཕྱག་འཚལ་ལོ། །སངས་རྒྱས་དབང་པོའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་དགྱེས་པ་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣ་མའི་མེ་ཏོག་ལ་ཕྱག་འཚལ་ལོ། །སངས་རྒྱས་ཚོགས་ཅན་འོད་ལ་ཕྱག་འཚལ་ལོ། །སངས་རྒྱས་བསྐྲུན་པར་མཛད་པ་ལ་ཕྱག་འཚལ་ལོ། །སངས་རྒྱས་མདངས་འགྲོ་ལ་ཕྱག་འཚལ་ལོ། །སངས་རྒྱས་དོན་ལེགས་ངེས་པ་ལ་ཕྱག་འཚལ་ལོ། །སངས་རྒྱས་ཁྱུ་མཆོག་ལ་ཕྱག་འཚལ་ལོ། །སངས་རྒྱས་ལག་བཟང་ལ་ཕྱག་འཚལ་ལོ། །སངས་རྒྱས་འོད་ཟེར་ཆེན་པོ་ལ་ཕྱག་འཚལ་ལོ། །སངས་རྒྱས་བསམ་པས་བྱིན་པ་ལ་ཕྱག་འཚལ་ལོ། །སངས་རྒྱས་བསོད་ནམས་འོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དབྱངས་ལ་ཕྱག་འཚལ་ལོ། །སངས་རྒྱས་རྡོ་རྗེའི་སྡེ་ལ་ཕྱག་འཚལ་ལོ། །སངས་རྒྱས་འབྱོར་ལྡན་ལ་ཕྱག་འཚལ་ལོ། །སངས་རྒྱས་སེང་གེའི་སྟོབས་ལ་ཕྱག་འཚལ་ལོ། །སངས་རྒྱས་དྲི་མ་མེད་པའི་སྤྱན་ལ་ཕྱག་འཚལ་ལོ། །སངས་རྒྱས་འོད་སྲུང་ལ་ཕྱག་འཚལ་ལོ། །སངས་རྒྱས་བློ་གསལ་བ་ལ་ཕྱག་འཚལ་ལོ། །སངས་རྒྱས་ཡེ་ཤེས་འགྲོས་ལ་ཕྱག་འཚལ་ལོ། །སངས་རྒྱས་གཟི་བརྗིད་དྲག་ཤུལ་ཅན་ལ་ཕྱག་འཚལ་ལོ། །སངས་རྒྱས་འོད་ཟེར་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་འོད་ལ་ཕྱག་འཚལ་ལོ། །སངས་རྒྱས་དྲི་མ་མེད་པའི་འོད་ལ་ཕྱག་འཚལ་ལོ། །སངས་རྒྱས་གཟི་བརྗིད་རྣམ་འབྱེས་ལ་ཕྱག་འཚལ་ལོ། །སངས་རྒྱས་ཁེངས་མེད་ལ་ཕྱག་འཚལ་ལོ། །སངས་རྒྱས་སྦྲང་རྩིའི་ཞལ་ལ་ཕྱག་འཚལ་ལོ། །སངས་རྒྱས་ཟླ་འོད་ལ་ཕྱག་འཚལ་ལོ། །སངས་རྒྱས་གློག་འབྱིན་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་བར་གཤེགས་ལ་ཕྱག་འཚལ་ལོ། །སངས་རྒྱས་མི་འཁྲུགས་པ་ལ་ཕྱག་འཚལ་ལོ། །སངས་རྒྱས་དགྲ་བཅོམ་གྲགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་ཡོན་ཏན་ལ་ཕྱག་འཚལ་ལོ། །སངས་རྒྱས་ཞིང་བཟང་པོ་ལ་ཕྱག་འཚལ་ལོ། །སངས་རྒྱས་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་མངོན་པར་འཕགས་པ་ལ་ཕྱག་འཚལ་ལོ། །སངས་རྒྱས་སྦྱིན་སྲེག་འོད་འཕྲོ་ལ་ཕྱག་འཚལ་ལོ། །སངས་རྒྱས་པདྨའི་དཔལ་ལ་ཕྱག་འཚལ་ལོ། །སངས་རྒྱས་རིན་པོ་ཆེ་བཀོད་པ་ལ་ཕྱག་འཚལ་ལོ། །སངས་རྒྱས་ཤིན་ཏུ་བཟང་པོ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མཆོག་ལ་ཕྱག་འཚལ་ལོ། །སངས་རྒྱས་ཐུགས་རབ་ཏུ་གཞུངས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ལ་ཕྱག་འཚལ་ལོ། །སངས་རྒྱས་རྒྱ་མཚོའི་བྱིན་པ་ལ་ཕྱག་འཚལ་ལོ། །སངས་རྒྱས་ཚངས་པའི་ཏོག་ལ་ཕྱག་འཚལ་ལོ། །སངས་རྒྱས་ཟླ་བ་གདུགས་ལ་ཕྱག་འཚལ་ལོ། །སངས་རྒྱས་འོད་འཕྲོ་བ་ལ་ཕྱག་འཚལ་ལོ། །སངས་རྒྱས་དྲི་མེད་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡེ་ཤེས་གྲགས་པ་ལ་ཕྱག་འཚལ་ལོ། །སངས་རྒྱས་ཀུན་ཏུ་རྒྱལ་བ་ལ་ཕྱག་འཚལ་ལོ། །སངས་རྒྱས་ཡོན་ཏན་འོད་ལ་ཕྱག་འཚལ་ལོ། །སངས་རྒྱས་སྒྲ་རྣམ་པར་གྲགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་རྒྱས་པ་ལ་ཕྱག་འཚལ་ལོ། །སངས་རྒྱས་པདྨའི་འོད་ཟེར་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་བཟང་པོ་ལ་ཕྱག་འཚལ་ལོ། །སངས་རྒྱས་སྒྲོན་མའི་རྒྱལ་པོ་ལ་ཕྱག་འཚལ་ལོ། །སངས་རྒྱས་གློག་གི་ཏོག་ལ་ཕྱག་འཚལ་ལོ། །སངས་རྒྱས་འོད་ཟེར་རྒྱལ་པོ་ལ་ཕྱག་འཚལ་ལོ། །སངས་རྒྱས་སྐར་མཁན་ལ་ཕྱག་འཚལ་ལོ། །སངས་རྒྱས་གྲགས་པ་རྫོགས་ལྡན་ལ་ཕྱག་འཚལ་ལོ། །སངས་རྒྱས་པདྨའི་སྙིང་པོ་ལ་ཕྱག་འཚལ་ལོ། །སངས་རྒྱས་རྒྱལ་ཞེས་བྱ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་མཛེས་ལ་ཕྱག་འཚལ་ལོ། །སངས་རྒྱས་རྙོག་པ་མེད་པའི་དོན་ལ་ཕྱག་འཚལ་ལོ། །སངས་རྒྱས་དྲག་ཤུལ་སྡེ་ལ་ཕྱག་འཚལ་ལོ། །སངས་རྒྱས་བསོད་ནམས་གཟི་བརྗིད་ལ་ཕྱག་འཚལ་ལོ། །སངས་རྒྱས་མཐུ་རྩལ་ཅན་ལ་ཕྱག་འཚལ་ལོ། །སངས་རྒྱས་ཐོགས་མེད་བློ་ལ་ཕྱག་འཚལ་ལོ། །སངས་རྒྱས་སྒྲ་གཅན་ལྷ་ལ་ཕྱག་འཚལ་ལོ། །སངས་རྒྱས་ཡེ་ཤེས་ཕུང་པོ་ལ་ཕྱག་འཚལ་ལོ། །སངས་རྒྱས་ཁ་ལོ་སྒྱུར་བ་ལ་ཕྱག་འཚལ་ལོ། །སངས་རྒྱས་སྐྱེ་དབང་མཚུངས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་གི་ཏོག་ལ་ཕྱག་འཚལ་ལོ། །སངས་རྒྱས་སྒྲ་གཅན་འཛིན་ལ་ཕྱག་འཚལ་ལོ། །སངས་རྒྱས་རྩི་སྨན་ཆེན་པོ་ལ་ཕྱག་འཚལ་ལོ། །སངས་རྒྱས་རྒྱུ་སྐར་རྒྱལ་པོ་ལ་ཕྱག་འཚལ་ལོ། །སངས་རྒྱས་སྨན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བསོད་ནམས་གླང་པོ་ལ་ཕྱག་འཚལ་ལོ། །སངས་རྒྱས་གཅོད་པར་མཛད་པ་ལ་ཕྱག་འཚལ་ལོ། །སངས་རྒྱས་རྣམ་པར་གྲགས་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཉི་མའི་འོད་ཟེར་ལ་ཕྱག་འཚལ་ལོ། །སངས་རྒྱས་ཆོས་ཀྱི་མཛོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བློ་གྲོས་བཟང་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་དབང་མཚུངས་ལ་ཕྱག་འཚལ་ལོ། །སངས་རྒྱས་རྡོ་རྗེའི་སྡེ་ལ་ཕྱག་འཚལ་ལོ། །སངས་རྒྱས་ཤེས་རབ་བརྩེགས་ལ་ཕྱག་འཚལ་ལོ། །སངས་རྒྱས་ལེགས་པར་གནས་པ་ལ་ཕྱག་འཚལ་ལོ། །སངས་རྒྱས་བློ་སྦྱངས་པ་ལ་ཕྱག་འཚལ་ལོ། །སངས་རྒྱས་ཚངས་པའི་དབྱངས་ལ་ཕྱག་འཚལ་ལོ། །སངས་རྒྱས་ཡོན་ཏན་མཆོག་མ་ལ་ཕྱག་འཚལ་ལོ། །སངས་རྒྱས་འབྲུག་གི་སྒྲ་དབྱངས་ལ་ཕྱག་འཚལ་ལོ། །སངས་རྒྱས་མངོན་པར་ཤེས་པའི་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏོག་གི་འོད་ལ་ཕྱག་འཚལ་ལོ། །སངས་རྒྱས་དགེ་བ་མཆོག་ལྡན་ལ་ཕྱག་འཚལ་ལོ། །སངས་རྒྱས་ཚངས་པ་ཆེན་པོ་ལ་ཕྱག་འཚལ་ལོ། །སངས་རྒྱས་སྐྱེས་བུའི་མཆོག་ལ་ཕྱག་འཚལ་ལོ། །སངས་རྒྱས་སྤྱན་སྡུག་པ་ལ་ཕྱག་འཚལ་ལོ། །སངས་རྒྱས་ཀླུས་བྱིན་པ་ལ་ཕྱག་འཚལ་ལོ། །སངས་རྒྱས་བདེན་པའི་ཏོག་ལ་ཕྱག་འཚལ་ལོ། །སངས་རྒྱས་བརྒྱན་པ་ལ་ཕྱག་འཚལ་ལོ། །སངས་རྒྱས་ཞུམ་པ་མེད་པའི་དབྱངས་ལ་ཕྱག་འཚལ་ལོ། །སངས་རྒྱས་རིན་ཆེན་འོད་འཕྲོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་བྱིན་ལ་ཕྱག་འཚལ་ལོ། །སངས་རྒྱས་སེང་གེ་ལ་ཕྱག་འཚལ་ལོ། །སངས་རྒྱས་འོད་ཟེར་སྣ་ཚོགས་ལ་ཕྱག་འཚལ་ལོ། །སངས་རྒྱས་ཡེ་ཤེས་དཔའ་བོ་ལ་ཕྱག་འཚལ་ལོ། །སངས་རྒྱས་པདྨའི་ཕུང་པོ་ལ་ཕྱག་འཚལ་ལོ། །སངས་རྒྱས་མེ་ཏོག་རྒྱས་པ་ལ་ཕྱག་འཚལ་ལོ། །སངས་རྒྱས་མཐུ་རྩལ་སྟོབས་ལ་ཕྱག་འཚལ་ལོ། །སངས་རྒྱས་བསོད་ནམས་ཕུང་པོ་ལ་ཕྱག་འཚལ་ལོ། །སངས་རྒྱས་གཟུགས་མཆོག་ལ་ཕྱག་འཚལ་ལོ། །སངས་རྒྱས་སྐར་མཁན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་སྒྲོན་མ་ལ་ཕྱག་འཚལ་ལོ། །སངས་རྒྱས་གཟི་བརྗིད་ཕུང་པོ་ལ་ཕྱག་འཚལ་ལོ། །སངས་རྒྱས་བྱང་ཆུབ་རྒྱལ་པོ་ལ་ཕྱག་འཚལ་ལོ། །སངས་རྒྱས་མི་ཟད་པ་ལ་ཕྱག་འཚལ་ལོ། །སངས་རྒྱས་མངོན་པར་རྟོགས་པའི་སྤྱན་ལ་ཕྱག་འཚལ་ལོ། །སངས་རྒྱས་ཡན་ལག་རྒྱས་པ་ལ་ཕྱག་འཚལ་ལོ། །སངས་རྒྱས་ཡུལ་འཁོར་ཤེས་རབ་ལ་ཕྱག་འཚལ་ལོ། །སངས་རྒྱས་འགྲོ་མགོན་མཆོག་མ་ལ་ཕྱག་འཚལ་ལོ། །སངས་རྒྱས་གཟི་བརྗིད་ཚིམ་མཛད་ལ་ཕྱག་འཚལ་ལོ། །སངས་རྒྱས་ཤེས་རབ་བྱིན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇམ་པའི་དབྱངས་ལ་ཕྱག་འཚལ་ལོ། །སངས་རྒྱས་ཆགས་པ་མེད་པའི་མཛོད་ལ་ཕྱག་འཚལ་ལོ། །སངས་རྒྱས་གཙོ་བོས་བྱིན་ལ་ཕྱག་འཚལ་ལོ། །སངས་རྒྱས་གཙོ་བོ་མཆོག་ལ་ཕྱག་འཚལ་ལོ། །སངས་རྒྱས་ཡེ་ཤེས་མཐུ་རྩལ་ལ་ཕྱག་འཚལ་ལོ། །སངས་རྒྱས་འོད་འཕྲོ་བ་ཅན་ལ་ཕྱག་འཚལ་ལོ། །སངས་རྒྱས་དབང་པོ་ཏོག་ལ་ཕྱག་འཚལ་ལོ། །སངས་རྒྱས་ཤུགས་འཆང་ལ་ཕྱག་འཚལ་ལོ། །སངས་རྒྱས་སྐར་རྒྱལ་ལ་ཕྱག་འཚལ་ལོ། །སངས་རྒྱས་འོད་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་བྱིན་ལ་ཕྱག་འཚལ་ལོ། །སངས་རྒྱས་གཟུགས་བཟང་པོ་ལ་ཕྱག་འཚལ་ལོ། །སངས་རྒྱས་རྒྱལ་པོ་མཆོག་ལ་ཕྱག་འཚལ་ལོ། །སངས་རྒྱས་དོན་གྲུབ་པ་ལ་ཕྱག་འཚལ་ལོ། །སངས་རྒྱས་སེང་གེའི་སྡེ་ལ་ཕྱག་འཚལ་ལོ། །སངས་རྒྱས་ནོར་ལྷའི་བུ་ལ་ཕྱག་འཚལ་ལོ། །སངས་རྒྱས་གྲགས་པ་ལ་ཕྱག་འཚལ་ལོ། །སངས་རྒྱས་རྒྱལ་བ་ལ་ཕྱག་འཚལ་ལོ། །སངས་རྒྱས་རྒྱ་ཆེན་སྙིང་པོ་ལ་ཕྱག་འཚལ་ལོ། །སངས་རྒྱས་བསོད་ནམས་འོད་ཟེར་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་བཟང་པོ་ལ་ཕྱག་འཚལ་ལོ། །སངས་རྒྱས་སྨྲེང་འདོན་པ་ལ་ཕྱག་འཚལ་ལོ། །སངས་རྒྱས་སྒྲོན་མའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡེ་ཤེས་བརྩེགས་ལ་ཕྱག་འཚལ་ལོ། །སངས་རྒྱས་ལྷ་མཆོག་ལ་ཕྱག་འཚལ་ལོ། །སངས་རྒྱས་སའི་བདག་པོ་ལ་ཕྱག་འཚལ་ལོ། །སངས་རྒྱས་རྣམ་གྲོལ་བརྙེས་པ་ལ་ཕྱག་འཚལ་ལོ། །སངས་རྒྱས་གཙུག་གི་གསེར་ལ་ཕྱག་འཚལ་ལོ། །སངས་རྒྱས་སྒྲ་གཅན་བཟང་པོ་ལ་ཕྱག་འཚལ་ལོ། །སངས་རྒྱས་ཐུབ་པར་དཀའ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐུབ་གསལ་ལ་ཕྱག་འཚལ་ལོ། །སངས་རྒྱས་ཟླ་བའི་འོད་ཟེར་ལ་ཕྱག་འཚལ་ལོ། །སངས་རྒྱས་གསེར་གྱི་འོད་ལ་ཕྱག་འཚལ་ལོ། །སངས་རྒྱས་ལེགས་བྱིན་ལ་ཕྱག་འཚལ་ལོ། །སངས་རྒྱས་ལྷའི་ཡོན་ཏན་དབང་པོ་ལ་ཕྱག་འཚལ་ལོ། །སངས་རྒྱས་ཆོས་ཀྱི་གདུགས་ལ་ཕྱག་འཚལ་ལོ། །སངས་རྒྱས་བསོད་ནམས་ལག་ལ་ཕྱག་འཚལ་ལོ། །སངས་རྒྱས་ཆགས་པ་མེད་པ་ལ་ཕྱག་འཚལ་ལོ། །སངས་རྒྱས་ཡེ་ཤེས་གྱ་ནོམ་ལ་ཕྱག་འཚལ་ལོ། །སངས་རྒྱས་བློ་གྲོས་ཞིབ་མོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བྱིན་ཐམས་ཅད་པ་ལ་ཕྱག་འཚལ་ལོ། །སངས་རྒྱས་རྩི་སྨན་ལ་ཕྱག་འཚལ་ལོ། །སངས་རྒྱས་རྣམ་པར་གྲོལ་བའི་ཏོག་ལ་ཕྱག་འཚལ་ལོ། །སངས་རྒྱས་འོད་ཀྱི་མཛོད་ལ་ཕྱག་འཚལ་ལོ། །སངས་རྒྱས་ཡེ་ཤེས་རྒྱལ་པོ་ལ་ཕྱག་འཚལ་ལོ། །སངས་རྒྱས་འཇིགས་མཛད་ལ་ཕྱག་འཚལ་ལོ། །སངས་རྒྱས་ཆུ་བོ་སྤོང་བ་ལ་ཕྱག་འཚལ་ལོ། །སངས་རྒྱས་ཐོགས་མེད་གྲགས་པ་ལ་ཕྱག་འཚལ་ལོ། །སངས་རྒྱས་བདེན་པའི་ཕུང་པོ་ལ་ཕྱག་འཚལ་ལོ། །སངས་རྒྱས་དབྱངས་སྙན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་དབང་དང་མཚུངས་པ་ལ་ཕྱག་འཚལ་ལོ། །སངས་རྒྱས་ཆོས་བརྩེགས་ལ་ཕྱག་འཚལ་ལོ། །སངས་རྒྱས་ཐར་པའི་གཟི་བྱིན་ལ་ཕྱག་འཚལ་ལོ། །སངས་རྒྱས་ལེགས་པར་མཛད་པ་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་བའི་སྐུ་ལ་ཕྱག་འཚལ་ལོ། །སངས་རྒྱས་ཡིད་དུ་འོང་བའི་གསུང་ལ་ཕྱག་འཚལ་ལོ། །སངས་རྒྱས་བློ་སྦྱངས་པ་ལ་ཕྱག་འཚལ་ལོ། །སངས་རྒྱས་ཆུ་ལྷ་ལ་ཕྱག་འཚལ་ལོ། །སངས་རྒྱས་འགྲོ་བས་མཆོད་པ་ལ་ཕྱག་འཚལ་ལོ། །སངས་རྒྱས་སེང་གེའི་ལོགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་མཐུ་རྩལ་ལ་ཕྱག་འཚལ་ལོ། །སངས་རྒྱས་བསྐལ་པ་བཟང་པོ་ལ་ཕྱག་འཚལ་ལོ། །སངས་རྒྱས་མི་འཁྲུགས་པའི་མདོག་ལ་ཕྱག་འཚལ་ལོ། །སངས་རྒྱས་གཟི་བརྗིད་རྒྱལ་པོ་ལ་ཕྱག་འཚལ་ལོ། །སངས་རྒྱས་རྟོགས་མཛད་ལ་ཕྱག་འཚལ་ལོ། །སངས་རྒྱས་སྤྱན་ལེགས་ལ་ཕྱག་འཚལ་ལོ། །སངས་རྒྱས་དོན་ལ་གནས་པའི་བློ་ལ་ཕྱག་འཚལ་ལོ། །སངས་རྒྱས་སྣང་བའི་འོད་ཟེར་ལ་ཕྱག་འཚལ་ལོ། །སངས་རྒྱས་སྤོས་ཀྱི་གཟི་བརྗིད་ལ་ཕྱག་འཚལ་ལོ། །སངས་རྒྱས་ཀུན་ཏུ་དགའ་བར་མཛད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཡོད་པར་གཤེགས་པ་ལ་ཕྱག་འཚལ་ལོ། །སངས་རྒྱས་ཁྲོ་བ་བཅོམ་པ་ལ་ཕྱག་འཚལ་ལོ། །སངས་རྒྱས་གཟུགས་མཆོག་ལ་ཕྱག་འཚལ་ལོ། །སངས་རྒྱས་ལེགས་པར་གཤེགས་པ་ལ་ཕྱག་འཚལ་ལོ། །སངས་རྒྱས་རབ་ཏུ་སྦྱིན་པར་གྲགས་པ་ལ་ཕྱག་འཚལ་ལོ། །སངས་རྒྱས་འོད་གཙང་ལ་ཕྱག་འཚལ་ལོ། །སངས་རྒྱས་ལྷའི་ཉི་མ་ལ་ཕྱག་འཚལ་ལོ། །སངས་རྒྱས་ཤེས་རབ་བྱིན་ལ་ཕྱག་འཚལ་ལོ། །སངས་རྒྱས་མཉམ་པར་བཞག་པའི་བདག་ཉིད་ལ་ཕྱག་འཚལ་ལོ། །སངས་རྒྱས་གཟི་མདངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་རིགས་གཙོ་ལ་ཕྱག་འཚལ་ལོ། །སངས་རྒྱས་སྐལ་ལྡན་ཤིང་རྟ་ལ་ཕྱག་འཚལ་ལོ། །སངས་རྒྱས་གསེར་མཆོག་ལ་ཕྱག་འཚལ་ལོ། །སངས་རྒྱས་རྣམ་པར་གྲོལ་བའི་གཙུག་ལ་ཕྱག་འཚལ་ལོ། །སངས་རྒྱས་ཆོས་ལྡན་ལ་ཕྱག་འཚལ་ལོ། །སངས་རྒྱས་སྤོས་གནས་ལ་ཕྱག་འཚལ་ལོ། །སངས་རྒྱས་དྲེག་པ་སྤང་པ་ལ་ཕྱག་འཚལ་ལོ། །སངས་རྒྱས་ཡེ་ཤེས་ཀྱི་མཛོད་ལ་ཕྱག་འཚལ་ལོ། །སངས་རྒྱས་ཚངས་པར་གཤེགས་ལ་ཕྱག་འཚལ་ལོ། །སངས་རྒྱས་ཙན་ཏན་དཔལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་པ་ལ་ཕྱག་འཚལ་ལོ། །སངས་རྒྱས་སེང་གེའི་འོད་ཟེར་ལ་ཕྱག་འཚལ་ལོ། །སངས་རྒྱས་ཡུལ་འཁོར་ཏོག་ལ་ཕྱག་འཚལ་ལོ། །སངས་རྒྱས་པདྨའི་སྙིང་པོ་གཟི་བརྗིད་མཐའ་ཡས་ལ་ཕྱག་འཚལ་ལོ། །སངས་རྒྱས་ལྷའི་འོད་ཟེར་ལ་ཕྱག་འཚལ་ལོ། །སངས་རྒྱས་ཤེས་རབ་མེ་ཏོག་ལ་ཕྱག་འཚལ་ལོ། །སངས་རྒྱས་མཁས་པ་ཆེན་པོ་ལ་ཕྱག་འཚལ་ལོ། །སངས་རྒྱས་ཡེ་ཤེས་འབྱོར་ལྡན་ལ་ཕྱག་འཚལ་ལོ། །སངས་རྒྱས་ཚངས་པའི་དབྱིག་ལ་ཕྱག་འཚལ་ལོ། །སངས་རྒྱས་ཕྱག་ན་རིན་ཆེན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ལྡན་ལ་ཕྱག་འཚལ་ལོ། །སངས་རྒྱས་རྫོགས་པར་གསུངས་པ་ལ་ཕྱག་འཚལ་ལོ། །སངས་རྒྱས་མཆོག་གསུངས་པ་ལ་ཕྱག་འཚལ་ལོ། །སངས་རྒྱས་མཆོད་འོས་ལ་ཕྱག་འཚལ་ལོ། །སངས་རྒྱས་སྐར་རྒྱལ་ལ་ཕྱག་འཚལ་ལོ། །སངས་རྒྱས་ཉི་མ་ལ་ཕྱག་འཚལ་ལོ། །སངས་རྒྱས་འདམ་ལས་བརྒལ་བ་ལ་ཕྱག་འཚལ་ལོ། །སངས་རྒྱས་ཡེ་ཤེས་བརྙེས་ལ་ཕྱག་འཚལ་ལོ། །སངས་རྒྱས་གྲུབ་པ་ལ་ཕྱག་འཚལ་ལོ། །སངས་རྒྱས་རྨ་བྱ་ཆེན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་བྱིན་པ་ལ་ཕྱག་འཚལ་ལོ། །སངས་རྒྱས་ཕན་པར་བཞེད་པ་ལ་ཕྱག་འཚལ་ལོ། །སངས་རྒྱས་ཡེ་ཤེས་ལྡན་པ་ལ་ཕྱག་འཚལ་ལོ། །སངས་རྒྱས་གྲགས་པ་ལ་ཕྱག་འཚལ་ལོ། །སངས་རྒྱས་འོད་ཟེར་གྱི་དྲྭ་བ་ལ་ཕྱག་འཚལ་ལོ། །སངས་རྒྱས་རྣམ་པར་བཅོམ་པ་ལ་ཕྱག་འཚལ་ལོ། །སངས་རྒྱས་བཻ་ཌཱུརྱའི་སྙིང་པོ་ལ་ཕྱག་འཚལ་ལོ། །སངས་རྒྱས་མེ་ཏོག་ཆེན་པོ་ལ་ཕྱག་འཚལ་ལོ། །སངས་རྒྱས་ལྷའི་སྙིང་པོ་ལ་ཕྱག་འཚལ་ལོ། །སངས་རྒྱས་ཟླ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པའི་འོད་ལ་ཕྱག་འཚལ་ལོ། །སངས་རྒྱས་ལ་དགེ་བའི་འོད་ཕྱག་འཚལ་ལོ། །སངས་རྒྱས་ཡོན་ཏན་མཆོག་མ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་དཔལ་ལ་ཕྱག་འཚལ་ལོ། །སངས་རྒྱས་སྐྱེས་བུ་ཟླ་བ་ལ་ཕྱག་འཚལ་ལོ། །སངས་རྒྱས་སྒྲ་གཅན་ཆེ་ལ་ཕྱག་འཚལ་ལོ། །སངས་རྒྱས་བདུད་རྩིའི་འོད་ལ་ཕྱག་འཚལ་ལོ། །སངས་རྒྱས་འཇིག་རྟེན་མཆོག་མ་ལ་ཕྱག་འཚལ་ལོ། །སངས་རྒྱས་སྐར་མའི་འོད་ལ་ཕྱག་འཚལ་ལོ། །སངས་རྒྱས་ཞི་བའི་སྟོབས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་རྒྱ་མཚོ་ལ་ཕྱག་འཚལ་ལོ། །སངས་རྒྱས་རི་ཡི་དབང་པོ་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་བ་ལ་ཕྱག་འཚལ་ལོ། །སངས་རྒྱས་ཡོན་ཏན་མཐུ་སྟོབས་ལ་ཕྱག་འཚལ་ལོ། །སངས་རྒྱས་ལྷའི་དབང་པོ་ལ་ཕྱག་འཚལ་ལོ། །སངས་རྒྱས་དབྱངས་སྙན་པ་ལ་ཕྱག་འཚལ་ལོ། །སངས་རྒྱས་ངོས་བཟང་པོ་ལ་ཕྱག་འཚལ་ལོ། །སངས་རྒྱས་དོན་ལ་གནས་པ་ལ་ཕྱག་འཚལ་ལོ། །སངས་རྒྱས་ཡོན་ཏན་གཟི་བརྗིད་དཔལ་ལ་ཕྱག་འཚལ་ལོ། །སངས་རྒྱས་མཁྱེན་ལྡན་ཟླ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ང་རོ་དཔག་མེད་ལ་ཕྱག་འཚལ་ལོ། །སངས་རྒྱས་འོད་བཟང་ལ་ཕྱག་འཚལ་ལོ། །སངས་རྒྱས་ཤིན་ཏུ་ཐུགས་གཞུང་པ་ལ་ཕྱག་འཚལ་ལོ། །སངས་རྒྱས་དོན་དགོངས་གཏི་མུག་བྲལ་བ་ལ་ཕྱག་འཚལ་ལོ། །སངས་རྒྱས་དབྱངས་ཀྱི་ཡན་ལག་ཁྱད་པར་འཕགས་པ་ལ་ཕྱག་འཚལ་ལོ། །སངས་རྒྱས་མཆོག་ཏུ་མཛེས་པར་གཤེགས་པ་ལ་ཕྱག་འཚལ་ལོ། །སངས་རྒྱས་ཞི་བའི་དོན་ལ་ཕྱག་འཚལ་ལོ། །སངས་རྒྱས་སྐྱོན་མེད་པ་ལ་ཕྱག་འཚལ་ལོ། །སངས་རྒྱས་བློ་སྦྱངས་དགེ་བ་ལ་ཕྱག་འཚལ་ལོ། །སངས་རྒྱས་པདྨའི་མཛོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་བཟང་པོ་ལ་ཕྱག་འཚལ་ལོ། །སངས་རྒྱས་སྤོབས་པའི་མདོག་མཆོག་ལ་ཕྱག་འཚལ་ལོ། །སངས་རྒྱས་སྟེགས་བཟང་པོ་ལ་ཕྱག་འཚལ་ལོ། །སངས་རྒྱས་ཚོགས་ཀྱི་དབང་པོ་ལ་ཕྱག་འཚལ་ལོ། །སངས་རྒྱས་བསྙེངས་པ་དང་བྲལ་བ་ལ་ཕྱག་འཚལ་ལོ། །སངས་རྒྱས་ཡེ་ཤེས་བཞེད་པ་ལ་ཕྱག་འཚལ་ལོ། །སངས་རྒྱས་སྤོབས་པའི་སྤྱན་ལ་ཕྱག་འཚལ་ལོ། །སངས་རྒྱས་བློ་ཡི་མཆོག་མ་ལ་ཕྱག་འཚལ་ལོ། །སངས་རྒྱས་ཟླ་བ་མཆོག་ལ་ཕྱག་འཚལ་ལོ། །སངས་རྒྱས་རིན་ཆེན་ཟླ་འོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྙེངས་པ་མེད་པ་ལ་ཕྱག་འཚལ་ལོ། །སངས་རྒྱས་གཟིགས་པ་ཆེན་པོ་ལ་ཕྱག་འཚལ་ལོ། །སངས་རྒྱས་ཚངས་པའི་དབྱངས་ལྡན་ལ་ཕྱག་འཚལ་ལོ། །སངས་རྒྱས་དབྱངས་བཟང་པོ་ལ་ཕྱག་འཚལ་ལོ། །སངས་རྒྱས་ཤེས་རབ་ཆེན་པོའི་སྟེགས་ལ་ཕྱག་འཚལ་ལོ། །སངས་རྒྱས་བློ་གྲོས་ཟླ་མེད་ལ་ཕྱག་འཚལ་ལོ། །སངས་རྒྱས་རྡོ་རྗེ་མཁྲེགས་པ་ལ་ཕྱག་འཚལ་ལོ། །སངས་རྒྱས་བྱང་ཆུབ་བློ་གྲོས་ལ་ཕྱག་འཚལ་ལོ། །སངས་རྒྱས་ལྗོན་ཤིང་དབང་པོ་ལ་ཕྱག་འཚལ་ལོ། །སངས་རྒྱས་གདངས་སྙན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསོད་ནམས་སྟོབས་ལ་ཕྱག་འཚལ་ལོ། །སངས་རྒྱས་མཐུ་དཔལ་ཆེན་པོ་ལ་ཕྱག་འཚལ་ལོ། །སངས་རྒྱས་འཕགས་པ་དགྱེས་པ་ལ་ཕྱག་འཚལ་ལོ། །སངས་རྒྱས་མཐུ་སྟོབས་ཆེན་པོ་ལ་ཕྱག་འཚལ་ལོ། །སངས་རྒྱས་སྐར་མ་ལ་དགྱེས་པ་ལ་ཕྱག་འཚལ་ལོ། །སངས་རྒྱས་སྤྲིན་གྱི་རྔ་སྒྲ་ལ་ཕྱག་འཚལ་ལོ། །སངས་རྒྱས་སྤྱན་སྟུག་པའི་ཞལ་ལ་ཕྱག་འཚལ་ལོ། །སངས་རྒྱས་ཡེ་ཤེས་བཟང་ལྡན་ལ་ཕྱག་འཚལ་ལོ། །སངས་རྒྱས་འབྱོར་བར་ལྡན་པ་ལ་ཕྱག་འཚལ་ལོ། །སངས་རྒྱས་ཡོན་ཏན་ཕུང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་གསལ་བ་ལ་ཕྱག་འཚལ་ལོ། །སངས་རྒྱས་ཆོས་ཀྱི་རྒྱལ་མཚན་ལ་ཕྱག་འཚལ་ལོ། །སངས་རྒྱས་ལ་ཡེ་ཤེས་ང་རོ་ཕྱག་འཚལ་ལོ། །སངས་རྒྱས་ནམ་མཁའ་ལ་ཕྱག་འཚལ་ལོ། །སངས་རྒྱས་མཆོད་སྦྱིན་ང་རོ་ལ་ཕྱག་འཚལ་ལོ། །སངས་རྒྱས་ཤེས་རབ་རྣམ་འགོད་ང་རོ་ལ་ཕྱག་འཚལ་ལོ། །སངས་རྒྱས་ཡོན་ཏན་འོད་ཟེར་གཟི་བརྗིད་ལ་ཕྱག་འཚལ་ལོ། །སངས་རྒྱས་དྲང་སྲོང་དབང་པོ་ལ་ཕྱག་འཚལ་ལོ། །སངས་རྒྱས་བློ་དང་ལྡན་པ་ལ་ཕྱག་འཚལ་ལོ། །སངས་རྒྱས་སྤོབས་པའི་ཚོགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཆོད་སྦྱིན་བཟང་པོ་ལ་ཕྱག་འཚལ་ལོ། །སངས་རྒྱས་ཟླ་བའི་ཞལ་ལ་ཕྱག་འཚལ་ལོ། །སངས་རྒྱས་ཤིན་ཏུ་གཟིགས་པ་ལ་ཕྱག་འཚལ་ལོ། །སངས་རྒྱས་རྡུལ་དང་བྲལ་བ་ལ་ཕྱག་འཚལ་ལོ། །སངས་རྒྱས་ཡོན་ཏན་ཚོགས་ལ་ཕྱག་འཚལ་ལོ། །སངས་རྒྱས་ཏོག་དང་ལྡན་པ་ལ་ཕྱག་འཚལ་ལོ། །སངས་རྒྱས་བསོད་ནམས་རྒྱལ་མཚན་ལ་ཕྱག་འཚལ་ལོ། །སངས་རྒྱས་ཡུལ་འཁོར་སྤོབས་པ་ལ་ཕྱག་འཚལ་ལོ། །སངས་རྒྱས་རིན་ཆེན་རབ་སྦྱིན་ལ་ཕྱག་འཚལ་ལོ། །སངས་རྒྱས་ཟླ་བ་དགྱེས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྟོབས་ལ་ཕྱག་འཚལ་ལོ། །སངས་རྒྱས་དབང་བསྒྱུར་རྒྱལ་པོ་ལ་ཕྱག་འཚལ་ལོ། །སངས་རྒྱས་བདུད་རྩི་གསལ་བ་ལ་ཕྱག་འཚལ་ལོ། །སངས་རྒྱས་བསམ་གཏན་སྙོམས་པ་ལ་ཕྱག་འཚལ་ལོ། །སངས་རྒྱས་འཁྲུགས་པ་མེད་པ་ལ་ཕྱག་འཚལ་ལོ། །སངས་རྒྱས་དྲི་མ་རབ་ཞི་ལ་ཕྱག་འཚལ་ལོ། །སངས་རྒྱས་ཕྱོགས་མ་བསླད་པ་ལ་ཕྱག་འཚལ་ལོ། །སངས་རྒྱས་མཛེས་པ་ལ་ཕྱག་འཚལ་ལོ། །སངས་རྒྱས་ཞལ་བཟང་ལ་ཕྱག་འཚལ་ལོ། །སངས་རྒྱས་ཤུགས་གནས་ཡེ་ཤེས་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསུང་བའི་དབང་པོ་ལ་ཕྱག་འཚལ་ལོ། །སངས་རྒྱས་གཟི་བརྗིད་ཆེན་པོ་ལ་ཕྱག་འཚལ་ལོ། །སངས་རྒྱས་བློ་གྲོས་ཟབ་མོ་ལ་ཕྱག་འཚལ་ལོ། །སངས་རྒྱས་བདུད་རྩི་ཆེ་ལ་ཕྱག་འཚལ་ལོ། །སངས་རྒྱས་ཆོས་ཀྱི་སྟོབས་ལ་ཕྱག་འཚལ་ལོ། །སངས་རྒྱས་མཆོད་པར་ལྡན་ལ་ཕྱག་འཚལ་ལོ། །སངས་རྒྱས་མེ་ཏོག་གི་འོད་ལ་ཕྱག་འཚལ་ལོ། །སངས་རྒྱས་ཁམས་གསུམ་གྱི་མཆོད་གནས་ལ་ཕྱག་འཚལ་ལོ། །སངས་རྒྱས་སྒྲ་གཅན་ཉི་མའི་སྙིང་པོ་ལ་ཕྱག་འཚལ་ལོ། །སངས་རྒྱས་ལྷས་མཆོད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐར་པའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་དགེ་བའི་གཙུག་ལ་ཕྱག་འཚལ་ལོ། །སངས་རྒྱས་བདུད་རྩིའི་འོད་ལ་ཕྱག་འཚལ་ལོ། །སངས་རྒྱས་རྡོ་རྗེ་ལ་ཕྱག་འཚལ་ལོ། །སངས་རྒྱས་བརྟན་པ་ལ་ཕྱག་འཚལ་ལོ། །སངས་རྒྱས་རིན་ཆེན་ཕུང་པོ་ལ་ཕྱག་འཚལ་ལོ། །སངས་རྒྱས་མཛེས་པར་གཤེགས་པ་ལ་ཕྱག་འཚལ་ལོ། །སངས་རྒྱས་ཉི་མ་ལྟར་གཤེགས་པ་ལ་ཕྱག་འཚལ་ལོ། །སངས་རྒྱས་དག་པའི་འོད་ལ་ཕྱག་འཚལ་ལོ། །སངས་རྒྱས་ཡོན་ཏན་གཙུག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྫོགས་པ་ལ་ཕྱག་འཚལ་ལོ། །སངས་རྒྱས་སེང་གེའི་སྟབས་ལ་ཕྱག་འཚལ་ལོ། །སངས་རྒྱས་གྱེན་དུ་འཕགས་ལ་ཕྱག་འཚལ་ལོ། །སངས་རྒྱས་མེ་ཏོག་བྱིན་ལ་ཕྱག་འཚལ་ལོ། །སངས་རྒྱས་འོད་འགྱེད་པ་ལ་ཕྱག་འཚལ་ལོ། །སངས་རྒྱས་པདྨ་ལ་ཕྱག་འཚལ་ལོ། །སངས་རྒྱས་ཡེ་ཤེས་དགྱེས་པ་ལ་ཕྱག་འཚལ་ལོ། །སངས་རྒྱས་བཀོད་པ་མཛེས་ལ་ཕྱག་འཚལ་ལོ། །སངས་རྒྱས་གཏི་མུག་མེད་པར་གནས་པ་ལ་ཕྱག་འཚལ་ལོ། །སངས་རྒྱས་རྨ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏོག་གི་རྒྱལ་མཚན་ལ་ཕྱག་འཚལ་ལོ། །སངས་རྒྱས་བདེ་བར་དགོངས་ལ་ཕྱག་འཚལ་ལོ། །སངས་རྒྱས་གཏི་མུག་མེད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཆོ་ག་མཁྱེན་ལ་ཕྱག་འཚལ་ལོ། །སངས་རྒྱས་དག་པའི་རྒྱ་མཚོ་ལ་ཕྱག་འཚལ་ལོ། །སངས་རྒྱས་རིན་ཆེན་མངའ་བ་ལ་ཕྱག་འཚལ་ལོ། །སངས་རྒྱས་མི་དམའ་བ་ལ་ཕྱག་འཚལ་ལོ། །སངས་རྒྱས་སྐྱེ་བོ་དགའ་བར་མཛད་པ་ལ་ཕྱག་འཚལ་ལོ། །སངས་རྒྱས་རྨ་བྱའི་ང་རོ་ལ་ཕྱག་འཚལ་ལོ། །སངས་རྒྱས་མ་ཞུམ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྲིད་པའི་སྲེད་པ་དྲི་མ་སྤངས་པ་ལ་ཕྱག་འཚལ་ལོ། །སངས་རྒྱས་སྤྱོད་པའི་སྟེགས་ལ་ཕྱག་འཚལ་ལོ། །སངས་རྒྱས་ལྷ་མང་པོས་སྙན་པར་བསྒྲགས་པ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་སྟབས་ལ་ཕྱག་འཚལ་ལོ། །སངས་རྒྱས་ཕྱག་ན་པདྨ་བསྣམས་པ་ལ་ཕྱག་འཚལ་ལོ། །སངས་རྒྱས་དཔལ་ཞེས་བྱ་བ་ལ་ཕྱག་འཚལ་ལོ། །སངས་རྒྱས་དགྲ་ལས་རྒྱལ་བ་ལ་ཕྱག་འཚལ་ལོ། །སངས་རྒྱས་འབྱོར་ལྡན་གྲགས་པ་ལ་ཕྱག་འཚལ་ལོ། །སངས་རྒྱས་ཡུལ་འཁོར་བཟང་པོ་ལ་ཕྱག་འཚལ་ལོ། །སངས་རྒྱས་མེ་ཏོག་འོད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་ང་རོ་ལ་ཕྱག་འཚལ་ལོ། །སངས་རྒྱས་ཟླ་བ་ལྟར་ཤར་བ་ལ་ཕྱག་འཚལ་ལོ། །སངས་རྒྱས་འཇོམས་པའི་མཆོག་ལ་ཕྱག་འཚལ་ལོ། །སངས་རྒྱས་མི་གཡོ་བ་ལ་ཕྱག་འཚལ་ལོ། །སངས་རྒྱས་ཕན་པ་དང་ལྡན་པར་གཤེགས་པ་ལ་ཕྱག་འཚལ་ལོ། །སངས་རྒྱས་བསོད་ནམས་སྒྲོན་མའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དབྱངས་ཀྱིས་བསྐུལ་བ་ལ་ཕྱག་འཚལ་ལོ། །སངས་རྒྱས་གོའུ་ཏ་མ་ལ་ཕྱག་འཚལ་ལོ། །སངས་རྒྱས་མདངས་སྟོབས་ལ་ཕྱག་འཚལ་ལོ། །སངས་རྒྱས་བློ་གནས་པའི་རང་བཞིན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་བཟང་པོ་ལ་ཕྱག་འཚལ་ལོ། །སངས་རྒྱས་བྱང་ཆུབ་ཡན་ལག་མེ་ཏོག་ལ་ཕྱག་འཚལ་ལོ། །སངས་རྒྱས་བཀྲ་ཤིས་ལ་ཕྱག་འཚལ་ལོ། །སངས་རྒྱས་ལེགས་པར་སྟོན་ལ་ཕྱག་འཚལ་ལོ། །སངས་རྒྱས་ཡེ་ཤེས་གཟི་བརྗིད་སྟོབས་ལ་ཕྱག་འཚལ་ལོ། །སངས་རྒྱས་དགེ་བའི་སྒྲོན་མ་ལ་ཕྱག་འཚལ་ལོ། །སངས་རྒྱས་མཐུ་རྩལ་བརྟན་པོ་ལ་ཕྱག་འཚལ་ལོ། །སངས་རྒྱས་ལྷའི་སྒྲ་ཆེན་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་བ་ལ་ཕྱག་འཚལ་ལོ། །སངས་རྒྱས་ཉི་མའི་ཞལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐར་བའི་བརྟུལ་ཞུགས་ལ་ཕྱག་འཚལ་ལོ། །སངས་རྒྱས་ཚུལ་ཁྲིམས་འོད་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་གནས་ལ་ཕྱག་འཚལ་ལོ། །སངས་རྒྱས་རྡུལ་མེད་ལ་ཕྱག་འཚལ་ལོ། །སངས་རྒྱས་སྙིང་པོ་འཕགས་ལ་ཕྱག་འཚལ་ལོ། །སངས་རྒྱས་མིག་སྨན་ལ་ཕྱག་འཚལ་ལོ། །སངས་རྒྱས་འཕེལ་བར་མཛད་པ་ལ་ཕྱག་འཚལ་ལོ། །སངས་རྒྱས་སྤོས་ཀྱི་འོད་ལ་ཕྱག་འཚལ་ལོ། །སངས་རྒྱས་དུས་མཁྱེན་འོད་ལ་ཕྱག་འཚལ་ལོ། །སངས་རྒྱས་དྲན་པའི་དབང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐོགས་མེད་རྒྱལ་མཚན་ལ་ཕྱག་འཚལ་ལོ། །སངས་རྒྱས་བྱང་ཆུབ་མཆོག་བགྲོད་ལ་ཕྱག་འཚལ་ལོ། །སངས་རྒྱས་སྤྱོད་པ་གསལ་བ་ལ་ཕྱག་འཚལ་ལོ། །སངས་རྒྱས་རིན་ཆེན་དགྱེས་ལ་ཕྱག་འཚལ་ལོ། །སངས་རྒྱས་ཆོས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ལྷ་ཐམས་ཅད་པ་ལ་ཕྱག་འཚལ་ལོ། །སངས་རྒྱས་བཤེས་གཉེན་ཆེན་པོ་ལ་ཕྱག་འཚལ་ལོ། །སངས་རྒྱས་བཤེས་གཉེན་བཟང་པོ་ལ་ཕྱག་འཚལ་ལོ། །སངས་རྒྱས་རབ་ཏུ་ཞི་བའི་སྟབས་ལ་ཕྱག་འཚལ་ལོ། །སངས་རྒྱས་བདུད་རྩིའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོའི་འོད་ལ་ཕྱག་འཚལ་ལོ། །སངས་རྒྱས་འཕགས་པས་བསྟོད་པ་ལ་ཕྱག་འཚལ་ལོ། །སངས་རྒྱས་སྣང་ལྡན་མཛད་ལ་ཕྱག་འཚལ་ལོ། །སངས་རྒྱས་གཟི་བརྗིད་འབར་བ་ལ་ཕྱག་འཚལ་ལོ། །སངས་རྒྱས་སྣང་བ་གཟིགས་ལ་ཕྱག་འཚལ་ལོ། །སངས་རྒྱས་ལེགས་སྤྱད་རྣམ་པར་སྨིན་པ་ལ་ཕྱག་འཚལ་ལོ། །སངས་རྒྱས་ལེགས་པར་དགྱེས་ལ་ཕྱག་འཚལ་ལོ། །སངས་རྒྱས་མྱ་ངན་བྲལ་ལ་ཕྱག་འཚལ་ལོ། །སངས་རྒྱས་རིན་ཆེན་འོད་ལ་ཕྱག་འཚལ་ལོ། །སངས་རྒྱས་སྤྱོད་པ་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསོད་ནམས་སྟོབས་ལ་ཕྱག་འཚལ་ལོ། །སངས་རྒྱས་ཡོན་ཏན་རྒྱ་མཚོ་ལ་ཕྱག་འཚལ་ལོ། །སངས་རྒྱས་རྨད་དུ་བྱུང་བ་ལ་ཕྱག་འཚལ་ལོ། །སངས་རྒྱས་ང་རྒྱལ་སྤོངས་བ་ལ་ཕྱག་འཚལ་ལོ། །སངས་རྒྱས་བདུད་བརླག་པར་མཛད་པ་ལ་ཕྱག་འཚལ་ལོ། །སངས་རྒྱས་བག་ཆགས་ལས་བརྒལ་བའི་སྟབས་ལ་ཕྱག་འཚལ་ལོ། །སངས་རྒྱས་མི་ཕྱེད་པའི་བློ་མངའ་བ་ལ་ཕྱག་འཚལ་ལོ། །སངས་རྒྱས་རྒྱ་མཚོ་ལ་ཕྱག་འཚལ་ལོ། །སངས་རྒྱས་དག་པར་མཛད་པ་ལ་ཕྱག་འཚལ་ལོ། །སངས་རྒྱས་ཚོགས་ཅན་གྲོལ་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བའི་འོད་ལ་ཕྱག་འཚལ་ལོ། །སངས་རྒྱས་བྱང་ཆུབ་རྒྱལ་མཚན་ལ་ཕྱག་འཚལ་ལོ། །སངས་རྒྱས་ཡེ་ཤེས་རིན་ཆེན་ལ་ཕྱག་འཚལ་ལོ། །སངས་རྒྱས་ཤིན་ཏུ་བསིལ་བ་ལ་ཕྱག་འཚལ་ལོ། །སངས་རྒྱས་ཚངས་པ་རྒྱལ་བ་ལ་ཕྱག་འཚལ་ལོ། །སངས་རྒྱས་ཡེ་ཤེས་དགྱེས་པ་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་ཏོག་ལ་ཕྱག་འཚལ་ལོ། །སངས་རྒྱས་སྐྱེ་དབང་མཚུངས་པ་ལ་ཕྱག་འཚལ་ལོ། །སངས་རྒྱས་སའི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཉི་མ་དགྱེས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲ་གཅན་ཟླ་བ་ལ་ཕྱག་འཚལ་ལོ། །སངས་རྒྱས་མེ་ཏོག་འོད་འབར་ལ་ཕྱག་འཚལ་ལོ། །སངས་རྒྱས་སྨན་པའི་བདག་པོ་ལ་ཕྱག་འཚལ་ལོ། །སངས་རྒྱས་མདངས་མངའ་བ་ལ་ཕྱག་འཚལ་ལོ། །སངས་རྒྱས་བསོད་ནམས་དགྱེས་པ་ལ་ཕྱག་འཚལ་ལོ། །སངས་རྒྱས་དགའ་བའི་སྟོབས་ལ་ཕྱག་འཚལ་ལོ། །སངས་རྒྱས་དབྱངས་སྙན་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཚངས་པའི་དབྱངས་ལ་ཕྱག་འཚལ་ལོ། །སངས་རྒྱས་སྤྱོད་པ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁྲུལ་བ་མེད་པའི་བློ་ལ་ཕྱག་འཚལ་ལོ། །སངས་རྒྱས་དབྱངས་ཆེན་པོ་ལ་ཕྱག་འཚལ་ལོ། །སངས་རྒྱས་སྙན་པར་གྲགས་པ་ལ་ཕྱག་འཚལ་ལོ། །སངས་རྒྱས་ཏོག་ལྡན་ཆེན་པོ་ལ་ཕྱག་འཚལ་ལོ། །སངས་རྒྱས་གཟི་བརྗིད་རྣམ་པར་གྲགས་པ་ལ་ཕྱག་འཚལ་ལོ། །སངས་རྒྱས་འགྲོ་བའི་དབང་ཕྱུག་ལ་ཕྱག་འཚལ་ལོ། །སངས་རྒྱས་ལྗོན་པ་ཆེ་ལ་ཕྱག་འཚལ་ལོ། །སངས་རྒྱས་གཏི་མུག་རབ་ཟད་ལ་ཕྱག་འཚལ་ལོ། །སངས་རྒྱས་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་ཟླ་བ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་མཐའ་ཡས་པའི་ཏོག་ལ་ཕྱག་འཚལ་ལོ། །སངས་རྒྱས་བརྟུལ་ཞུགས་བསྟར་བ་ལ་ཕྱག་འཚལ་ལོ། །སངས་རྒྱས་མཆོད་པའི་གནས་ལ་ཕྱག་འཚལ་ལོ། །སངས་རྒྱས་མྱ་ངན་བརྒལ་བ་ལ་ཕྱག་འཚལ་ལོ། །སངས་རྒྱས་དགེ་བ་རྒྱས་པ་ལ་ཕྱག་འཚལ་ལོ། །སངས་རྒྱས་འགྲོ་བའི་བློ་གྲོས་ལ་ཕྱག་འཚལ་ལོ། །སངས་རྒྱས་དགྱེས་པར་གཤེགས་པ་ལ་ཕྱག་འཚལ་ལོ། །སངས་རྒྱས་ཞབས་མཛེས་པ་ལ་ཕྱག་འཚལ་ལོ། །སངས་རྒྱས་ཨུཏྤལ་མཆོག་ལ་ཕྱག་འཚལ་ལོ། །སངས་རྒྱས་དུལ་གནས་མེ་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་མཐའ་ཡས་འོད་ཟེར་ལ་ཕྱག་འཚལ་ལོ། །སངས་རྒྱས་དྲང་སྲོང་གསལ་བ་ལ་ཕྱག་འཚལ་ལོ། །སངས་རྒྱས་ཡོན་ཏན་བརྩོན་འགྲུས་ལ་ཕྱག་འཚལ་ལོ། །སངས་རྒྱས་སྙིང་པོ་མཆོག་ལ་ཕྱག་འཚལ་ལོ། །སངས་རྒྱས་ལྷའི་བདག་པོ་ལ་ཕྱག་འཚལ་ལོ། །སངས་རྒྱས་རིན་ཆེན་མཐོན་པོ་ལ་ཕྱག་འཚལ་ལོ། །སངས་རྒྱས་གསལ་བ་ལ་ཕྱག་འཚལ་ལོ། །སངས་རྒྱས་སྐལ་ལྡན་ཤིང་རྟ་ཅན་ལ་ཕྱག་འཚལ་ལོ། །སངས་རྒྱས་བསོད་ནམས་བློ་གྲོས་ལ་ཕྱག་འཚལ་ལོ། །སངས་རྒྱས་སྦྱིན་སྲེག་འོད་འཕྲོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་མཐའ་ཡས་གཟི་བརྗིད་ཕུང་པོ་ལ་ཕྱག་འཚལ་ལོ། །སངས་རྒྱས་སེང་གེའི་སྟབས་ལ་ཕྱག་འཚལ་ལོ། །སངས་རྒྱས་མི་གཡོ་བ་ལ་ཕྱག་འཚལ་ལོ། །སངས་རྒྱས་རབ་གསལ་ལ་ཕྱག་འཚལ་ལོ། །སངས་རྒྱས་འོད་སྤྱོད་པ་ལ་ཕྱག་འཚལ་ལོ། །སངས་རྒྱས་ཀླུའི་དབྱངས་ལ་ཕྱག་འཚལ་ལོ། །སངས་རྒྱས་གླུ་དབྱངས་ཟབ་སྒྲོགས་ལ་ཕྱག་འཚལ་ལོ། །སངས་རྒྱས་འཁོར་ལོ་འཛིན་པ་ལ་ཕྱག་འཚལ་ལོ། །སངས་རྒྱས་དབྱིག་གི་མཆོག་ལ་ཕྱག་འཚལ་ལོ། །སངས་རྒྱས་འཇིག་རྟེན་དགའ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་ཟླ་བ་ལ་ཕྱག་འཚལ་ལོ། །སངས་རྒྱས་དགའ་བ་མཐའ་ཡས་གྲགས་པ་ལ་ཕྱག་འཚལ་ལོ། །སངས་རྒྱས་སྤྲིན་གྱི་ཏོག་ལ་ཕྱག་འཚལ་ལོ། །སངས་རྒྱས་ཤེས་རབ་འགྲོས་ལ་ཕྱག་འཚལ་ལོ། །སངས་རྒྱས་སྤོས་བཟང་ལ་ཕྱག་འཚལ་ལོ། །སངས་རྒྱས་ནམ་མཁའི་དབྱངས་ལ་ཕྱག་འཚལ་ལོ། །སངས་རྒྱས་ལྷ་ཞེས་བྱ་བ་ལ་ཕྱག་འཚལ་ལོ། །སངས་རྒྱས་ལྷའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ནོར་བུ་གསལ་བ་ལ་ཕྱག་འཚལ་ལོ། །སངས་རྒྱས་ནོར་བཟང་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མ་ཆེ་ལ་ཕྱག་འཚལ་ལོ། །སངས་རྒྱས་རིན་ཆེན་ང་རོ་དབྱངས་ལ་ཕྱག་འཚལ་ལོ། །སངས་རྒྱས་སྐྱེ་དབང་རྒྱལ་པོ་ལ་ཕྱག་འཚལ་ལོ། །སངས་རྒྱས་སྒྲ་གཅན་སྦེད་པ་ལ་ཕྱག་འཚལ་ལོ། །སངས་རྒྱས་དགེ་བ་མཛད་པ་ལ་ཕྱག་འཚལ་ལོ། །སངས་རྒྱས་སེང་གེའི་བློ་གྲོས་ལ་ཕྱག་འཚལ་ལོ། །སངས་རྒྱས་རིན་ཆེན་གྲགས་པ་ལ་ཕྱག་འཚལ་ལོ། །སངས་རྒྱས་དོན་མཛད་པ་ལ་ཕྱག་འཚལ་ལོ། །སངས་རྒྱས་མཛད་མཐའ་གཟིགས་པ་ལ་ཕྱག་འཚལ་ལོ། །སངས་རྒྱས་སྲིད་པའི་མེ་ཏོག་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཛོད་སྤུ་ལྡན་པ་ལ་ཕྱག་འཚལ་ལོ། །སངས་རྒྱས་སྤོབས་པ་མཚུངས་མེད་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡེ་ཤེས་རྣམ་འབྱེད་ང་རོ་ལ་ཕྱག་འཚལ་ལོ། །སངས་རྒྱས་སེང་གེའི་མཆེ་བ་ལ་ཕྱག་འཚལ་ལོ། །སངས་རྒྱས་མཛེས་པར་གཤེགས་པ་ལ་ཕྱག་འཚལ་ལོ། །སངས་རྒྱས་བསོད་ནམས་སྒྲོན་མེ་ལ་ཕྱག་འཚལ་ལོ། །སངས་རྒྱས་བཀྲ་ཤིས་ལྡན་པ་ལ་ཕྱག་འཚལ་ལོ། །སངས་རྒྱས་ཡུལ་འཁོར་མྱ་ངན་མེད་པ་ལ་ཕྱག་འཚལ་ལོ། །སངས་རྒྱས་བློ་གྲོས་སེམས་པ་ལ་ཕྱག་འཚལ་ལོ། །སངས་རྒྱས་བློ་དང་ལྡན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་སྒྲོན་མའི་སྤྱན་ལ་ཕྱག་འཚལ་ལོ། །སངས་རྒྱས་ཤིན་ཏུ་གཟིགས་པ་ལ་ཕྱག་འཚལ་ལོ། །སངས་རྒྱས་ཤུགས་ཀྱིས་འདོར་བ་ལ་ཕྱག་འཚལ་ལོ། །སངས་རྒྱས་སྟོབས་ཆེན་ལ་ཕྱག་འཚལ་ལོ། །སངས་རྒྱས་ཤེས་རབ་མེ་ཏོག་ལ་ཕྱག་འཚལ་ལོ། །སངས་རྒྱས་བརྟན་པའི་དབྱངས་ལ་ཕྱག་འཚལ་ལོ། །སངས་རྒྱས་བདེ་བ་དང་ལྡན་པ་ལ་ཕྱག་འཚལ་ལོ། །སངས་རྒྱས་དོན་གསུང་པ་ལ་ཕྱག་འཚལ་ལོ། །སངས་རྒྱས་དགྱེས་པ་གསལ་བ་ལ་ཕྱག་འཚལ་ལོ། །སངས་རྒྱས་སེང་གེའི་ཞལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཕུད་ཅན་ལ་ཕྱག་འཚལ་ལོ། །སངས་རྒྱས་མི་ཡི་སེང་གེ་མོས་པ་མཐའ་ཡས་སྣང་བར་མཛད་པ་ལ་ཕྱག་འཚལ་ལོ། མཆོད་དོ་སྐྱབས་སུ་མཆིའོ། །སངས་རྒྱས་སྟོང་གི་ཆོས་ཀྱི་འཁོར་ལོ་བསྐོར་བར་བསྐུལ་བ་པོ་ཚངས་པ་ཆེན་པོ་ལ་ཕྱག་འཚལ་ལོ། །སངས་རྒྱས་སྟོང་གི་བར་ཆད་བསྲུང་ཞིང་གསང་མཛོད་སྡུད་པ་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །སྟོང་གསུམ་གྱི་སྟོང་ཆེན་པོའི་མི་མཇེད་འཇིག་རྟེན་ཁམས་བྱེ་བ་ཕྲག་བརྒྱའི་གྲངས་དང་མཉམ་པའི་སངས་རྒྱས་སྟོང་དང་རྩ་གཉིས་འཁོར་ཚོགས་དང་བཅས་པ་ཐམས་ཅད་ལ་ཕྱག་འཚལ་ལོ། །དེ་དག་ལ་སོགས་པ་ཕྱོགས་བཅུ་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཐུགས་བརྩེ་བ་ཆེན་པོས་དམིགས་ཡུལ་ཚེ་འདས་མིང་འདི་ཞེས་བྱ་བའི་གཙོར་བྱས་པའི་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་རྟག་པར་རྗེས་སུ་བཟུང་དུ་གསོལ། །ཐུགས་རྗེས་རྗེས་སུ་བཟུང་ནས་ཀྱང་མར་གྱུར་སེམས་ཅན་མ་ལུས་ཤིང་ལུས་པ་མེད་པ་སྐུ་གསུམ་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པའི་བཀའ་དྲིན་བླ་ན་མེད་པ་སྩལ་དུ་གསོལ།། ཞེས་འདི་དགའ་དབང་འཛིན་མ་སོགས། །འགྲོ་མང་ཐར་པའི་ལམ་རྙེད་ཕྱིར། །མགོ་སྤྲུལ་ཆོས་དབྱིངས་མིང་ཅན་གྱིས། །སེམས་དཔའ་ཟླ་བའི་སྙིང་པོ་ཡི། །མདོ་ནས་གསུངས་བཞིན་བྲིས་པ་དགེ།། བླ་མ་འཇམ་པའི་དབྱངས་ཀྱི་རྣལ་འབྱོར་དགོས་འདོད་ཀུན་འབྱུང་།དཔལ་ལྡན་བླ་མ་འཇམ་པའི་དབྱངས་ཀྱི་རྣལ་འབྱོར་དགོས་འདོད་ཀུན་འབྱུང་དབང་གི་རྒྱལ་པོ་ཞེས་བྱ་བ་བི་ཛ་ཧ་རཾ། ཨོཾ་སྭ་སྟི། མཆོག་གི་དང་པོ་སྐུ་གསུམ་འཆང་། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔའི་བདག་ཉིད། །བླ་མ་འཇམ་དབྱངས་ལ་བཏུད་ནས། །སྤྲོས་མེད་དབེན་པའི་རྣལ་འབྱོར་པས། །རྒྱུན་གྱི་ཉམས་ལེན་འཁྱེར་བདེ་བར། །བླ་མ་དཔལ་ལྡན་འཇམ་དབྱངས་ཀྱི། །རྣལ་འབྱོར་འདོད་འབྱུང་དབང་རྒྱལ་སྤྲོ། །དེ་ལ་སྦྱོར་དངོས་རྗེས་དང་གསུམ། །དང་པོ་སྐྱབས་སེམས་ཚད་མེད་བཞི། །གཞན་ལྟར་ཡང་དག་བསྒོམ་པ་ནི། །ལུས་སེམས་རྣལ་དུ་གནས་བྱས་ལ། །འགྲོ་རྣམས་བསྒྲལ་འདོད༴སོགས། སེམས་བསྐྱེད་བགྱི། །སེམས་ཅན་བདེ་དང༴སོགས། རྟོགས་པར་ཤོག །གཉིས་པ་དངོས་གཞི་ལ་ཡང་བཞི། །ཐོག་མར་ཚོགས་ཞིང་གསལ་གདབ་ནི། །མདུན་མཁར་མཆོད་སྤྲིན་རྒྱ་མཚོའི་དབུས། །འདབ་སྟོང་པདྨ་ཟླ་གདན་ལ། །སྐྱབས་གནས་མ་ལུས་འདུས་པའི་དཔལ། །བཀའ་དྲིན་གསུམ་ལྡན་བླ་མ་རྗེ། །རྣམ་སྣང་རྡོ་རྗེ་འཇམ་པའི་དབྱངས། །གུར་གུམ་མདངས་ལྡན་མཚན་དཔེས་སྤྲས། །ཕྱག་གཡས་ཤེས་རབ་རལ་གྲི་བསྣམས། །གཡོན་པས་གླེགས་བམ་ཐུགས་ཀར་འཛིན། །ལོངས་སྐུའི་རྒྱན་དང་ཆ་ལུགས་ཀུན། །མ་འདྲེས་ཡོངས་རྫོགས་སྐྱིལ་ཀྲུང་བཞུགས། །གནས་གསུམ་རྡོ་རྗེའི་ཡིག་འབྲུ་ལས། །འོད་འཕྲོས་དོན་གཉིས་བྱས་ནས་སླར། །ཕྱོགས་བཅུའི་རྒྱལ་བ་སྲས་བཅས་ཀྱི། །སྐུ་གསུང་ཐུགས་ཡོན་ཕྲིན་ལས་ཀྱི། །ནུས་བྱིན་འོད་ལྔའི་རྣམ་པར་བསྡུས། །བླ་མའི་སྐུ་ཡི་གནས་ལྔར་ཐིམ།། གཉིས་པ་ཚོགས་བསགས་ཡན་ལག་བདུན། །རིམ་པར་ཚིག་ཕྱིར་སེམས་གཞོལ་བས། །སྐྱབས་ཀུན་ངོ་བོ་བླ་མ་ལྷར། །སྒོ་གསུམ་དད་པས་ཕྱག་འཚལ་ལོ། །དངོས་བཤམས་ཡིད་སྤྲུལ་མཆོད་ཚོགས་འབུལ། །ཉེས་ལྟུང་སྒྲིབ་ཚོགས་དབྱིངས་སུ་བཤགས། །བླ་མེད་དགེ་ལ་རྗེས་ཡི་རང་། །ཐེག་མཆོག་ཆོས་འཁོར་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་འདེབས། །དགེ་ཚོགས་མི་གནས་ཆོས་སྐུར་བསྔོ།། གསུམ་པ་མོས་གུས་རྩེ་གཅིག་པས། །བསྟོད་ཅིང་གསོལ་བ་གདབ་པ་ནི།། གང་གི་བློ་གྲོས༴སོགས། དབྱངས་ལ་འདུད།། མ་ཡེངས་ངང་ནས་ཅི་ནུས་བསྟོད། །སླར་ཡང་དད་གུས་གཏིང་ཚུགས་པས།། རིགས་རྣམས་མ་ལུས་པའི་ཁྱབ་བདག །དཀྱིལ་འཁོར་ཐམས་ཅད་ཀྱི་གཙོ་བོ། །མ་ཚོགས་རྒྱ་མཚོ་ཡི་སྤྱི་དཔལ། །བླ་མ་འཇམ་པའི་དབྱངས་མཁྱེན་ནོ། །ངོ་བོ་སྤྲོས་བྲལ་གྱི་ཆོས་དབྱིངས། །རང་བཞིན་གསལ་སྟོང་གི་རིག་པ། །ཐུགས་རྗེ་ཀུན་ཁྱབ་ཀྱི་ཡེ་ཤེས། །བླ་མ་འཇམ་པའི་དབྱངས་མཁྱེན་ནོ། །རྒྱལ་བ་ཐམས་ཅད་ཀྱི་ཡབ་གཅིག །དམ་ཆོས་མ་ལུས་པའི་འབྱུང་གནས། །རྒྱལ་སྲས་འཕགས་ཚོགས་ཀྱི་འདྲེན་པ། །བླ་མ་འཇམ་པའི་དབྱངས་མཁྱེན་ནོ། །དགོས་འདོད་ཀུན་འབྱུང་གི་ནོར་བུ། །ཉོན་སྒྲིབ་ཀུན་བསྲེག་གི་ཞུགས་ཆེན། །མ་རིག་མུན་སེལ་གྱི་ཉི་མ། །བླ་མ་འཇམ་པའི་དབྱངས་མཁྱེན་ནོ། །ངན་འགྲོའི་གཡུལ་ཟློག་གི་དཔའ་བོ། །ཡང་དག་ལམ་སྟོན་གྱི་ས་མཁན། །འགྲོ་བ་ཀུན་སྒྲོལ་གྱི་དེད་དཔོན། །བླ་མ་འཇམ་པའི་དབྱངས་མཁྱེན་ནོ། །སྔོན་བྱོན་སངས་རྒྱས་ཀྱི་རྒྱལ་ཚབ། །དེང་བཞུགས་རྒྱལ་ཀུན་གྱི་སྤྲུལ་པ། །མ་འོངས་སངས་རྒྱས་ཀྱི་འབྱུང་གནས། །བླ་མ་འཇམ་པའི་དབྱངས་མཁྱེན་ནོ། །མཁྱེན་བརྩེ་ནུས་པ་ཡི་བདག་ཉིད། །རང་རིག་དོན་སྟོན་གྱི་བླ་མ། །སངས་རྒྱས་མི་གཟུགས་སུ་སྣང་བ། །བླ་མ་འཇམ་པའི་དབྱངས་མཁྱེན་ནོ།། ཞེས་སོགས་ཁྱེད་ཤེས་བློ་བརྟན་པོས། །གསོལ་བ་དྲག་པོ་ཡང་ཡང་གདབ། །བཞི་པ་དབང་དང་བྱིན་རླབས་ཀྱི། །དངོས་གྲུབ་ཞུ་བའི་དམིགས་པ་ནི།། བདེ་གཤེགས་ཡོངས་འདུས་བླ་མ་ལ། །བསྟོད་ཅིང་གསོལ་བ་བཏབ་པའི་མཐུས། །བླ་མའི་སྐུ་ཡི་གནས་ལྔ་ནས། །བདུད་རྩི་འོད་ཟེར་སྣ་ལྔ་འཕྲོས། །བདག་གི་གནས་ལྔར་ཐིམ་པ་དང་། །ཆབ་གཅིག་སྒོ་ལྔའི་ལས་ཉོན་སྒྲིབ། །དྭངས་ཤེལ་མེ་ལོང་ཕྱིས་པ་ལྟར། །ལྷག་མེད་བྱང་ཞིང་ཡོངས་སུ་དག །སྐུ་གསུང་ཐུགས་ཡོན་ཕྲིན་ལས་ཀྱི། །དབང་དང་བྱིན་རླབས་དངོས་གྲུབ་བརྙེས། །སྐྱབས་གཅིག་འཇམ་མགོན་བླ་མ་དང་། །མཚུངས་པའི་གསང་གསུམ་དཔལ་ཡོན་ཐོབ། །སླར་ཡང་བླ་མ་འཇམ་པའི་དབྱངས། །འོད་དུ་ཞུ་ནས་རང་ལ་ཐིམ། །དེ་མཐུས་སྟོན་འཁོར་དགོངས་པ་མཉམ། །འཇམ་མགོན་གོ་འཕང་ཐོབ་པར་བསམ།། གང་ཤར་མ་བཅོས་རང་བབས་ལ། །གཏད་མེད་ཞེན་པར་རྒྱ་ཡན་བཞག །དམིགས་གཏད་ཡོད་ན་ལྟ་བ་གོལ། །ཐོབ་ཤོར་ཡོད་ན་བསྒོམ་པ་འཁྲུལ། །བླང་དོར་ཡོད་ན་སྤྱོད་པ་ནོར། །གྲོལ་འཁྲུལ་ཡོད་ན་འབྲས་བུ་འཆུག །གོལ་འཁྲུལ་ནོར་འཆུག་མེད་པའི་ཕྱིར། །བླ་མའི་རྣལ་འབྱོར་ཡང་ཡང་བསྒོམ། །རྗེས་ཐོབ་སྤྱོད་ལམ་རྣམ་པ་བཞིར། །གསང་གསུམ་བླ་མའི་རོལ་བར་བལྟ། །གསུམ་པ་རྗེས་ཀྱང་གསུམ་དུ་འདུས། །དེ་ཡི་དང་པོ་བསྔོ་བ་ནི།། སྐྱབས་གཅིག་བླ་མ་འཇམ་དབྱངས་ལ། །བསྟོད་ཅིང་གསོལ་བཏབ་དགེ་འདིས་མཚོན། །དུས་གསུམ་བསགས་པའི་དགེ་རྩ་ཀུན། །འཁོར་གསུམ་དམིགས་མེད་དབྱིངས་སུ་བསྔོ།། ཞེས་བརྗོད་དམིགས་མེད་ངང་དུ་བཞག །གཉིས་པ་སྨོན་ལམ་གདབ་པ་ནི།། བླ་མེད་བླ་མ་བསྒྲུབ་པའི་མཐུས། །གཟུང་འཛིན་སྣང་གྲགས་རྟོག་པ་ལ། །འཁྲུལ་ཞིང་འཕྱན་པའི་འགྲོ་བ་ཀུན། །གཉིས་མེད་ཆོས་སྐུ་ཐོབ་པར་ཤོག །ཞེས་སོགས་རྣམ་དག་སྨོན་ལམ་བརྗོད། །གསུམ་པ་བཀྲ་ཤིས་བྱ་བ་ནི།། ངོ་བོ་སྟོང་ཞིང་རང་བཞིན་གསལ། །ཐུགས་རྗེ་ཀུན་ཁྱབ་དཔལ་ཡོན་རྫོགས། །གཞི་ལམ་འབྲས་བུ་དབྱེར་མེད་པ། །འཇམ་མགོན་བླ་མའི་བཀྲ་ཤིས་ཤོག །ཅེས་བླ་མ་དང་འཇམ་པའི་དབྱངས་གཉིས་སུ་མེད་པ་ལ་བསྟོད་ཅིང་གསོལ་བ་འདེབས་པའི་ཚུལ་འདི་ཡང་མགོ་སྤྲུལ་ནག་སྦར་གྱིས་བྲིས་པ་སྟེ། འདིའི་དགེ་བས་འགྲོ་བ་ཀུན་གྱིས་གདོད་མ་ཉིད་ནས་རང་རྒྱུད་ལ་བཞུགས་པའི་བདེ་གཤེགས་སྙིང་པོ་དོན་གྱི་བླ་མ་འཇམ་པའི་དབྱངས་ཀྱི་རང་ཞལ་མངོན་སུམ་དུ་མཇལ་བར་གྱུར་ཅིག མི་འཁྲུགས་པའི་བསྒོམ་བཟླས་ཐར་ལམ་ཤིང་རྟ།མི་འཁྲུགས་པའི་བསྒོམ་བཟླས་ཐར་ལམ་ཤིང་རྟ་བཞུགས། ན་མོ་གུ་རུ་བཛྲ་ཨཀྵོ་བྷྱཿ དུས་གསུམ་རྒྱལ་ཀུན་འདུས་པའི་དཔལ། །བླ་མ་མཆོག་ལ་ལེགས་བཏུད་ནས། །ངན་སོང་སྦྱོང་མཛད་བཅོམ་ལྡན་འདས། །མི་བསྐྱོད་རྡོ་རྗེའི་བསྒོམ་བཟླས་སྟོན། །དེ་ལ་ཐོག་མར་སྐྱབས་སེམས་ནི།། རང་རིག་དོན་གྱི་བླ་མ་ལ། །དབྱེར་མེད་ཀློང་ནས་སྐྱབས་སུ་མཆི། །ཡང་དག་དོན་ལ་རྨོངས་པ་རྣམས། །བསྒྲལ་ཕྱིར་དོན་དམ་སེམས་བསྐྱེད་བགྱི།། ལན་གསུམ་བརྗོད་རྗེས་བསྒོམ་བཟླས་དངོས།། ཨཱཿ སྐྱེ་མེད་དབྱིངས་ལས་རང་ཤར་བ། །དཔལ་ཡོན་ཕུན་ཚོགས་མངོན་དགའི་ཞིང་། །རྒྱལ་བའི་གནས་མཆོག་ཉམས་དགའ་བར། །མཚན་ཉིད་ཡོངས་རྫོགས་གཞལ་ཡས་དབུས། །གཉིས་འཐུང་ཁྲི་རྐང་པད་ཟླའི་སྟེང་། །ཧཱུྃ་ལས་བཅོམ་ལྡན་མི་འཁྲུགས་པ། །སྔོན་པོ་ཕྱག་གཡས་ས་གནོན་མཛད། །གཡོན་པས་མཉམ་བཞག་རྡོ་རྗེ་བསྣམས། །ལོངས་སྐུའི་ཆས་རྫོགས་མཚན་དཔེ་འབར། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །གདོད་ནས་དམ་ཡེ་དབྱེར་མེད་ལྷ། །མ་བཅོས་རང་བྱུང་ཆེན་པོར་བསྒོམ། །ཐུགས་དབུས་ཟླ་སྟེང་ཧཱུྃ་མཐིང་མཐར། །སྔགས་ཀྱིས་བསྐོར་བའི་འོད་ཟེར་གྱིས། །འགྲོ་བའི་ལས་ཉོན་ཤེས་སྒྲིབ་དག །ཚོགས་རྫོགས་སྐུ་གཉིས་མངོན་གྱུར་བསམ།། ན་མོ་རཏྣ་དྲ་ཡ་ཡ། ཨོཾ་ཀཾ་ཀ་ནི། ཀཾ་ཀ་ནི། རོ་ཙ་ནི། རོ་ཙ་ནི། དྲོ་ཊ་ནི་དྲོ་ཊ་ནི། དྲཱ་ས་ནི་དྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་ཡེ་སྭཱ་ཧཱ། ཨོཾ་ཨཀྵོ་བྷྱ་ཨཱཿཧཱུྃ། གཟུངས་སྔགས་བརྒྱ་སྟོང་ལ་སོགས་དང་། །སྙིང་པོ་ཅི་ནུས་བཟླས་པའི་མཐར། །ཧཱུྃ་གིས་བསྡུ་ཞིང་ཨཱཿཡིས་ལྡང་། །མཇུག་ཏུ་བསྔོ་སྨོན་བྱ་བ་ནི།། དུས་གསུམ་བསགས་པའི་དགེ་ཚོགས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །དེ་མཐུས་མཁའ་མཉམ་འགྲོ་བ་ཀུན། །མི་བསྐྱོད་མགོན་དང་གཉིས་མེད་ཤོག །ཞེས་དང་གཞན་ཡང་བསྔོ་སྨོན་བྱ། །དེས་ཀྱང་བསྒོམ་བཟླས་མདོར་བསྡུས་གྲུབ། །ཞེས་འདི་སྔགས་གཟུགས་མགོ་ལོག་པས། །རང་གྲོགས་དགའ་མའི་དོན་ཕྱིར་བྲིས། །འདི་སྦྱར་དགེ་བས་འགྲོ་ཀུན་གྱི། །ལས་ཉོན་བག་ཆགས་བྱང་གྱུར་ཅིག །དགེའོ།། དགེའོ།། དགེའོ།། ཀུན་རིག་བསྒོམ་བཟླས་ཐར་ལམ་སྣང་བྱེད།ཐམས་ཅད་རིག་པའི་བསྒོམ་བཟླས་ཐར་ལམ་སྣང་བྱེད་ཅེས་བྱ་བ་བཞུགས། ན་མོ་གུ་རུ་བཻ་རོ་ཙ་ན་ཡེ། བཀའ་དྲིན་འཁོར་མེད་བླ་མ་ལ། །སྒོ་གསུམ་གུས་པས་ལེགས་བཏུད་ནས། །ངན་སོང་ཐམས་ཅད་སྦྱོང་མཛད་པ། །ཐམས་ཅད་རིག་པའི་བསྒོམ་བཟླས་འབྲི། །ཐོག་མར་སྐྱབས་འགྲོ་སེམས་བསྐྱེད་ནི།། སྐྱབས་ཀུན་ངོ་བོ་བླ་མ་ལ། །རྣམ་གསུམ་དད་པས་སྐྱབས་སུ་མཆི། །འགྲོ་ཀུན་རྣམ་མཁྱེན་སར་འགོད་ཕྱིར། །སྨོན་འཇུག་དོན་དམ་སེམས་བསྐྱེད་དོ། །ལན་གསུམ་གཉིས་པ་བསྒོམ་བཟླས་དངོས།། ཨཱཿ ཆོས་ཀུན་མི་དམིགས་ངང་ཉིད་ལས། །རང་སྣང་རྣམ་དག་འོག་མིན་ཞིང་། །བཀོད་པ་དཔག་མེད་རྒྱལ་བའི་གནས། །མཚན་རྫོགས་གཞལ་མེད་ཉམས་དགའ་བར། །རིན་ཆེན་སེང་ཁྲི་པད་ཟླ་ལ། །ཨོཾ་དཀར་ཡོངས་སུ་གྱུར་པ་ལས། །ཐམས་ཅད་རིག་པ་རྣམ་སྣང་མཛད། །དཀར་གསལ་མཉམ་བཞག་འཁོར་ལོ་བསྣམས། །ཞལ་བཞིའི་རྩ་ཞལ་ཤར་དུ་གཟིགས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །ལོངས་སྤྱོད་རྫོགས་སྐུའི་རྒྱན་དང་ཆས། །མ་འདྲེས་ཡོངས་རྫོགས་རང་བྱུང་སྐུ། །གསལ་སྟོང་འཛིན་མེད་དབང་གཞུ་ལྟར། །མ་བཅོས་རིག་པའི་ཀློང་དུ་གསལ། །ཐུགས་དབུས་ཟླ་སྟེང་ཨོཾ་དཀར་པོ། །སྔགས་ཀྱིས་གཡས་སུ་འཁོར་བ་ལས། །འོད་འཕྲོས་མཁའ་མཉམ་འགྲོ་ཀུན་གྱི། །སྒྲིབ་ཚོགས་མ་ལུས་སྟོང་པར་སྦྱངས། །ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏེ་པ་རི་ཤོ་དྷ་ནི་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱཱཐ། ཨོཾ་ཤོ་དྷ་ནི་ཤོ་དྷ་ནི། སརྦ་པཱ་པཾ་བི་ཤོ་དྷ་ནི། ཤུདྡྷེ་བི་ཤུདྡྷེ་སརྦ་ཀརྨ་ཨ་ཝ་ར་ཎ་བི་ཤོ་དྷ་ན་ཡེ་སྭཱཧཱ། ཨོཾ་སརྦ་བིད་སརྦ་ཀརྨ་ཨ་ཝ་ར་ཎ་བི་ཤོ་དྷ་ཡ་ཧ་ན་ཧཱུྃ་ཕཊ། རྩ་བའི་རིག་པ་ཅི་ནུས་དང་། སྙིང་པོ་མང་དུ་བཟླས་པའི་མཐར། ཧཱུྃ་ཧཱུྃ་ཧཱུྃ།གིས་དབྱིངས་སུ་བསྡུ། །ཨ་ཨ་ཨཿཞེས་ལྷ་རུ་གསལ། གསུམ་པ་བསྔོ་སྨོན་བྱ་བ་ནི། འདིས་མཚོན་དུས་གསུམ་དགེ་བ་ཀུན། །མཁའ་ཁྱབ་འགྲོ་ལ་བསྔོས་པའི་མཐུས། །ངན་སོང་རྒྱུ་འབྲས་ཀུན་བྱང་ནས། །རྣམ་སྣང་གོ་འཕང་མངོན་གྱུར་ཤོག །ཅེས་སོགས་བསྔོ་སྨོན་ཅི་རིགས་བྱ། །དུས་དང་གནས་སྐབས་ཐམས་ཅད་དུ། །སྒོ་གསུམ་ལྷ་སྔགས་ཆོས་སྐུར་བལྟ། །རྒྱུན་གྱི་ཉམས་ལེན་མདོར་བསྡུས་གྲུབ། །ཞེས་པ་སྤྲོས་མེད་རྣལ་འབྱོར་གྱིས། །ཀུན་རིག་ཉམས་སུ་ལེན་པའི་ཚུལ། །བསྒོམ་བཟླས་ཐར་ལམ་སྣང་བྱེད་འདི། །མུ་ཏོ་ཆོས་དབྱིངས་མིང་གིས་བྲིས།། དགེའོ།། དགེའོ།། དགེའོ།། དྲི་མེད་བཤགས་རྒྱུད་བཀླག་ཐབས།༄༅། དྲི་མེད་བཤགས་རྒྱུད་བཀླག་ཐབས་བཞུགས། ན་མོ་མ་ཧཱ་གུ་རུ་བཛྲ་དྷ་ར་ཡེ། འདིར་གསང་ཆེན་རྡོ་རྗེ་ཐེག་པའི་ལམ་ལ་ཞུགས་པའི་རྣལ་འབྱོར་བ་རྣམས་ཀྱིས་དམ་ཚིག་ཉམས་ཆགས་སྐོང་ཞིང་བཤགས་པའི་ཐབས་ལ་གསུམ་གྱི་དང་པོ་སྦྱོར་བའི་རིམ་པ་ནི། ན་མོ། དུས་གསུམ་བདེ་གཤེགས་མ་ལུས་པའི། །སྐུ་གསུང་ཐུགས་ཡོན་ཕྲིན་ལས་ཀུན། །གཅིག་བསྡུས་རང་རིག་རྡོ་རྗེ་སེམས། །དེང་ནས་བཟུང་སྟེ་སྐྱབས་སུ་བསྙེན། །འགྲོ་ཀུན་སྐུ་གསུམ་གོ་འཕང་ལ། །འགོད་ཕྱིར་བྱང་ཆུབ་སེམས་བསྐྱེད་བགྱིད། །རིགས་འདུས་དོན་གྱི་རྡོར་སེམས་ལ། །གཉིས་མེད་ངང་ནས་ཕྱག་འཚལ་ཞིང་། །རྨད་བྱུང་མཆོད་པའི་སྤྲིན་ཆེན་པོ། །སྒྱུ་འཕྲུལ་རོལ་པའི་རྒྱན་དུ་འབུལ། །ཉམས་ཆགས་ཉེས་ལྟུང་འགལ་བགྱིས་ཀུན། །དམིགས་མེད་ཆོས་དབྱིངས་ཀློང་དུ་བཤགས། །འཁོར་གསུམ་དག་པའི་དགེ་ཀུན་ལ། །མ་ཆགས་སྤྱོད་ལ་རྗེས་ཡི་རང་། །ཟབ་གསང་རྡོ་རྗེ་སྙིང་པོའི་དོན། །སྣ་ཚོགས་དབྱངས་ཀྱིས་སྟོན་པར་བསྐུལ། །མཁའ་ཁྱབ་ཞིང་གི་རྡུལ་སྙེད་ཀྱི། །རྒྱལ་རྣམས་སྲས་བཅས་རྟག་བཞུགས་གསོལ། །ཟག་བཅས་ཟག་མེད་དགེ་ཚོགས་ཀུན། །བསྡོམ་ཏེ་བྱང་ཆུབ་ཆེན་པོར་བསྔོ།། གཉིས་པ་བཤགས་སྡོམ་དངོས་ནི། ཨཱཿ བདག་ཉིད་ཐ་མལ་མདུན་གྱི་མཁར། །མཁའ་སྤྱོད་འོག་མིན་དག་པའི་ཞིང་། །བླ་མེད་བཀོད་པ་ཕུན་སུམ་ཚོགས། །དེ་དབུས་འཇའ་ཚོན་འོད་ལྔའི་ཀློང་། །གླང་ཆེན་བརྒྱད་ཀྱིས་བཏེག་པའི་ཁྲི། །འདབ་སྟོང་པད་ཉི་ཟླ་གདན་ལ། །ཕྱི་ལྟར་འདྲེན་པ་ཤཱཀྱའི་ཏོག །ནང་ལྟར་གསང་བདག་རྡོ་རྗེ་འཆང་། །གསང་བ་མཚོ་སྐྱེས་ཐོད་ཕྲེང་རྩལ། །ཡང་གསང་རིགས་འདུས་རྡོ་རྗེ་སེམས། །དཀར་གསལ་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པས་དྲིལ་བུ་དཀུ་ལ་བརྟེན། །ལོངས་སྐུའི་རྒྱན་རྫོགས་སྐྱིལ་ཀྲུང་བཞུགས། །དབུ་གཙུག་རལ་བའི་ཅོད་པཎ་རྩེར། །ལོངས་སྐུ་བདེ་གཤེགས་རིགས་མཆོག་ལྔ། །སླར་ཡང་སྟེང་གི་ནམ་མཁའ་ལ། །ཆོས་སྐུའི་སྟོན་མཆོག་དང་བཅས་གསལ། །སྟེང་འོག་ཕྱོགས་མཚམས་ཐམས་ཅད་དུ། །སྐུ་གསུམ་ལྷ་ཚོགས་མ་ལུས་ཀུན། །སྐུ་ཡི་རྣམ་འགྱུར་ཅིར་ཡང་སྟོན། །གསུང་གིས་ཐེག་མཆོག་ཆོས་སྒྲ་སྒྲོག །ཐུགས་ནི་འགྲོ་བ་ཡོངས་ལ་དགོངས། །མ་བསྐྱེད་རང་བྱུང་ཡེ་ཤེས་ལྷ། །མ་བཅོས་རིག་པའི་ཀློང་ཆེན་པོར། །གདོད་ནས་དམ་ཡེ་དབྱེར་མེད་གསལ། །དེ་མདུན་རང་དང་དམིགས་པའི་ཡུལ། །ཉམས་ཆགས་ཉེས་ལྟུང་ཅན་རྣམས་ཀུན། །གཙོར་གྱུར་མཁའ་མཉམ་འགྲོ་རྣམས་ཀྱིས། །རྡུལ་སྙེད་ལུས་སྤྲུལ་ཕྱག་འཚལ་ཞིང་། །ཁ་ཙམ་མིན་པར་སྙིང་ཐག་པས། །རྩ་བ་ཡན་ལག་དམ་ཚིག་ལས། །འགལ་ཉམས་འདས་རལ་གྱུར་པ་ཀུན། །བཤགས་ཕྱིར་ཐབས་ལམ་འདིར་བརྩོན་བྱ། །ཞེས་བརྗོད་ཅིང་བསམ་ལ། དྲི་མེད་བཤགས་པའི་རྒྱུད་སོགས་བཀླགས་ཅིང་མཐར། བླ་མ་རྡོ་རྗེ་སེམས་དཔའ་ཡི། །ཐུགས་ཀར་གསེར་རྡོར་རྩེ་ལྔ་པའི། །ལྟེ་བར་ཟླ་སྟེང་ཧཱུྃ་དཀར་མཐར། །བཟླ་བྱའི་སྔགས་ཀྱིས་བསྐོར་བ་ལས། །ཡེ་ཤེས་བདུད་རྩིའི་རྒྱུན་བབས་པས། །འབྲེལ་ཐོགས་གཙོར་གྱུར་འགྲོ་རྣམས་ཀྱི། །ཉམས་ཆགས་ཉེས་ལྟུང་སྒྲིབ་དག་ནས། །རྡོར་སེམས་གོ་འཕང་ཐོབ་པར་གྱུར། ཞེས་སེམས་ལ། ཐུགས་ཡིད་བསྲེ་ཞིང་ཉམས་ལེན་གྱི་ངང་མདངས་བསྐྱངས་བཞིན་པས་ཡིག་བརྒྱ་ནུས་བསྟུན་བཟླས་པས། རྡོ་རྗེ་སེམས་དཔའི་ཞལ་ནས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་གོ་ཞེས་གསུངས་ཤིང་ལྷ་ཚོགས་རྣམས་འོད་དུ་ཞུ་ནས་རང་ལ་ཐིམ་པར་བསམ་ལ། དམིགས་མེད་ཀྱི་ངང་ལ་བཞག་གོ།། གསུམ་པ་རྗེས་ཀྱི་བྱ་བ་ནི། འཁོར་གསུམ་དག་པའི་དགེ་ཚོགས་ཀུན། །དམིགས་མེད་ངང་ནས་འགྲོ་ལ་བསྔོ། །དེ་མཐུས་འགྲོ་ཀུན་ཕྱམ་གཅིག་ཏུ། །སྐུ་གསུམ་རྡོ་རྗེ་འཆང་འགྲུབ་ཤོག། ཅེས་སོགས་བསྔོ་སྨོན་རྣམ་དག་གིས་མཐའ་བརྒྱན་པར་བྱའོ།། ཞེས་པ་འདི་ཡང་ས་སྐྱོང་མི་ཡི་དབང་པོ་བསོད་ནམས་དབང་འདུས་ཞི་བར་གཟིགས་པའི་དགོངས་རྫོགས་སུ་དྲི་མེད་བཤགས་རྒྱུད་ཁྲི་ཕྲག་བསྒྲུབ་པའི་སྐབས་སུ། ཆོས་གྲོགས་རཏྣ་ཤཱ་ས་ནའི་མིང་ཅན་གྱིས་བཞེད་ངོར་སྙོམ་ལས་པ་མགོ་སྤྲུལ་དྷརྨའི་མིང་གིས་སྤེལ་བ་དུས་གསུམ་དགེ་བར་གྱུར་ཅིག གྲུབ་ཆེན་བརྒྱད་ཅུ་རྩ་ལྔའི་གསོལ་འདེབས་ཐུགས་རྗེ་རྒྱུད་བསྐུལ།༄༅། གྲུབ་ཆེན་བརྒྱད་ཅུ་རྩ་ལྔའི་གསོལ་འདེབས་ཐུགས་རྗེ་རྒྱུད་བསྐུལ་ཞེས་བྱ་བ་བཞུགས་སོ།། ཆོས་སྐུ་སྐྱེ་མེད་སྤྲོས་པའི་མཐའ་བྲལ་ཡང་། །ལོངས་སྐུ་འགགས་མེད་ངེས་པ་ལྔ་དང་ལྡན། །སྤུལ་སྐུ་རྩོལ་མེད་ཐུགས་རྗེ་མཁའ་ལྟར་བརྡལ། །དཔལ་ལྡན་རྡོ་རྗེ་འཆང་ལ་གསོལ་བ་འདེབས། །དགེ་སློང་ནཱ་གརྫུ་ན་མཁས་གྲུབ་མཆོག །བརྫུས་སྐྱེས་ཨཱརྱ་དེ་བ་འཛམ་གླིང་རྒྱན། །ཡིག་མཁན་ཉ་ལྟོ་གསོལ་མཛད་ལཱུ་ཡི་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ཁྱིམ་པའི་ཚུལ་འཛིན་པདྨ་བཛྲ་མཚན། །བྲམ་ཟེ་མདའ་ཐོགས་གར་མཁན་ས་ར་ཧ། །ཟླ་རིགས་མཚོ་སྐྱེས་རྡོ་རྗེ་ཕྱག་རྒྱར་བཅས། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །སྟག་ཞོན་ཆུ་བོར་གདན་འདིང་ཌོཾ་བྷི་པ། །ཉི་གནོན་ཆུ་བོ་གྱེན་ཟློག་བི་རཱུ་པ། །བུ་སུ་ཀུ་ར་མཁའ་ནས་བསྟན་བཅོས་རྩོམ། ། ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ཡུམ་བཅས་མཁར་སྤྱོད་རྡོ་རྗེ་དྲིལ་བུ་པ། །དཀའ་ཐུབ་མཁར་གཤེགས་གྲི་ཐོགས་ན་ལེནྟྲ། །གདོལ་རིགས་ཀུ་ཀུ་རི་པ་དགེ་སློང་ཚུལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །དགེ་སློང་སངས་རྒྱས་ཡེ་ཤེས་མཁྱེན་སྤྱན་ལྡན། །ཀུན་སྤྱོད་ནག་པོ་རྡོ་རྗེ་ལྟ་སྟངས་ཅན། །ཨོ་རྒྱན་རྒྱལ་པོ་ཨིནྟྲ་བྷུ་ཏི་ལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བྲམ་ཟེ་རྡོར་བསྣུན་སར་སྤྱོད་ན་རོ་པ། །ཤིང་མཁན་ཡུམ་བཅས་གྲུབ་བརྙེས་ཏོག་ཙེ་པ། །བྲམ་ཟེ་དམན་སྤྱོད་ཐགས་པ་ཏནྟྲ་ལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །འཇག་སྤྱིལ་དགེ་སློང་སྤྲོས་མེད་ལྭ་བ་པ། །ཙནྟྲ་གོ་མི་རྩོད་དང་མཚོ་ལས་རྒྱལ། །རྒྱལ་རིགས་དམན་སྤྱོད་འབྲས་འདྲུ་ཤཱནྟི་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ལྔ་རིག་བདག་གཞན་གཉིས་མེད་མར་མེ་མཛད། །ཏིལ་བརྡུང་སངས་རྒྱས་དངོས་མཇལ་ཏེ་ལོ་པ། །སྣང་མིན་འཁོར་འདས་ནག་པོ་སྤྱོད་པའི་མཚན། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བྲམ་ཟེ་དགེ་བསྙེན་ཐུབ་སྲས་ཕག་ཚང་པ། །ཉེར་བཞིའི་གནས་བགྲོད་སྒྲ་སྒྲོགས་བཟང་པོ་པ། །གར་མཁན་ལྕམ་དྲལ་གྲུབ་བརྙེས་ཤ་བ་རིར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་རིགས་སྨད་འཚོང་བཅས་གྲོལ་ད་རི་ཀ། །བ་ལང་སྤྱོད་མཛད་ནཱ་ག་བོ་དྷི་དང་། །དུར་ཁྲོད་རུས་པའི་རྒྱན་ལྡན་མར་མེ་ལྷ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །མདའ་འཚོང་འཁོར་བཅས་མཁར་གཤེགས་ད་ཀི་པ། །གཞན་གྱི་རྒོལ་རྩོད་ལས་རྒྱལ་ཛཻ་ཏ་རི། །ཐུགས་དམ་མངོན་གྱུར་ས་ར་ཀ་པ་ལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་རིགས་སྤྱོད་འཆང་འདུལ་འཛིན་ཤཱནྟི་པ། །གདོལ་བ་ཐགས་མཁན་ཟུང་གྲོལ་ཐ་ག་པ། །རྒྱུད་སྡེ་བཞིར་མཁས་ཛཱ་ལནྡྷ་རའི་མཚན། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ཀུན་གཟིགས་འཆི་མེད་མཆོག་གྲུབ་ཀ་མ་ལ། །མདོ་རྒྱུད་ཀུན་མཁྱེན་ཇོ་བོ་གསེར་གླིང་པ། །གདོལ་རིགས་མར་ནག་མཁན་ཟུང་བཱིརྱ་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བྲམ་ཟེ་ཡུམ་བཅས་མཁར་གཤེགས་ཀོང་ཀ་ན། །པ་ཀ་པཱ་ལ་རྒྱལ་རིགས་ལྐུགས་སྤྱོད་མཛད། །བྲམ་ཟེ་ཟངས་མགར་རྐང་མགྱོགས་ཏཾ་པ་ཀར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་རིགས་པི་ཝཾ་སྙན་སྒྲོགས་བྷི་ན་ས། །བྲམ་ཟེ་སུ་ཏ་ལོ་ཀི་སྨད་འཚོང་བཅས། །མུ་སྟེགས་སྒྲ་མཁན་དྷརྨྨ་ཀིརྟིའི་མཚན། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ལྷྭམ་མཁན་དུར་ཁྲོད་གནས་བཞུགས་ཀུ་མ་ར། །ཡུམ་ཁུར་ཆུར་བཞུགས་མཁར་བགྲོད་ཚེམ་བུ་པ། །རམས་མཁན་དགེ་བསྙེན་ཚངས་སྤྱོད་ནཱི་ལ་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །སྐྱེ་འགགས་འགྱུར་མེད་པདྨ་ཀཱ་ར་དང་། །ཤན་རིགས་བརྟུལ་ཞུགས་སྤྱོད་མཛད་སིང་ཧ་པ། །དགེ་བསྙེན་མི་ན་ར་པ་ཉ་པའི་རིགས། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་རིགས་སྤྲིན་གྱི་ཤུགས་འཆང་ལྷ་རྣམས་དང་། །མཉན་པ་ཀ་རུ་པ་ཀ་ཐ་རུའི་རིགས། །མཁའ་སྤྱོད་ད་སི་རི་པ་རྒྱུད་ཀུན་མཁྱེན། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བྲམ་ཟེ་ཨ་ནནྟ་ཞེས་སྤྱོད་པ་པ། །སྤྱན་གཟིགས་བྱིན་ཐོབ་བུམ་ཐོགས་སེང་གེ་པ། །བྲམ་ཟེ་ཟླ་བ་བཟང་པོ་ལྡོམ་བུ་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ཏཱ་རེས་བྱིན་རླབས་ཨ་ནནྟ་གརྦྷ། །འཇམ་པའི་དབྱངས་སྤྲུལ་ཙནྟྲ་ཀིརྟི་དང་། །མི་གཡོ་ཞལ་མཐོང་གཅེར་བུ་སྨད་དཀྲིས་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་པོ་རིགས་ངན་རྒྱར་བརྟེན་ཀརྞ་པ། །འཇིགས་བརྒྱད་ལས་གྲོལ་ཨ་ཝ་དྷུ་ཏི་པ། །རྩ་རླུང་ཐབས་ལམ་མཁས་དབང་ཙརྱ་པར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ཤིང་ཐུན་གྲུབ་བརྙེས་ཤཱཀྱ་བཤེས་གཉེན་མཚན། །ཉ་བ་བདེ་སྤྱོད་གཅེར་བུ་ཙཎྚ་ལི། །རང་བྱུང་རྟེན་བསྐོར་མཁར་གཤེགས་གླུ་དབྱངས་མཁན། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བྲམ་ཟེ་བྷ་ག་ལ་ན་སྦྱངས་ཡོན་ལྡན། །རི་ཁྲོད་མཻ་ཏྲིའི་བརྒྱུད་འཛིན་སྒྲ་མཁན་ཞབས། །མ་ངེས་ཚོགས་འཁོར་འདུལ་སྤྱོད་ཀོནྟཾ་ལིར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྟ་མགྲིན་གཟིགས་གཤེགས་འདོད་སྤྱོད་ཙ་པ་རི། །རྒྱལ་རིགས་དུར་ཁྲོད་དམན་སྤྱོད་སི་ཡ་ལི། །སྒྲོལ་མས་རྗེས་བཟུང་སཱུརྱ་གུཔྟ་ལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །རྒྱལ་རིགས་ངག་གི་དབང་ཕྱུག་ཉི་ཟེར་བཅིབས། །དམན་རིགས་དགེ་སློང་གདན་གཅིག་ཧི་ལ་པ། །གླང་ཞོན་མཁར་གཤེགས་རྒྱལ་བཏུལ་ཀ་ལ་ཀར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །དུག་སྦྲུལ་དབུར་བཅིངས་བདེ་མཆོག་ཀུ་བྷུ་ཙ། །མཚོ་གླིང་དཀའ་སྤྱད་དབང་རྫོགས་སེང་ཧ་པ། །བྱམས་པས་རྗེས་བཟུང་ཐོགས་མེད་ཤིང་རྟའི་མཆོག །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །བསྐོར་དང་དཀའ་ཐུབ་ཀུན་བཟོད་ན་ཏ་པ། །ཀྱཻ་རྡོར་བྱིན་ཐོབ་གླིང་མཁན་ཨོ་ཏ་པ། །བྷཾ་ཡུལ་དཀའ་སྤྱད་ལྷས་བཟུང་ས་ར་ཧར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །མཁའ་འགྲོས་བྱིན་རླབས་ས་ར་སུ་ཀའི་མཚན། །གཤེད་དམར་བྱིན་ཐོབ་ཀ་ལ་ལཾ་གེ་དང་། །སེང་ལྡིང་ནགས་ནས་འཕགས་མཐོང་བྷ་ཡ་ནིར། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །མ་གྷ་དྷ་ཡི་རྒྱལ་བཏུལ་མེ་ཏོག་པ། །བརྒྱད་ཅུ་རྩ་ལྔའི་གྲངས་སུ་ངེས་རྣམས་དང་། །མ་ངེས་གྲུབ་ཆེན་སྐར་ཚོགས་གྲངས་མཉམ་ལ། །ཕྱག་འཚལ་གསོལ་བ་འདེབས་སོ་བྱིན་གྱིས་རློབས། །ལུས་ལ་བདེ་དྲོད་འབར་བར་བྱིན་གྱིས་རློབས། །ངག་ལ་ནུས་པ་ཐོན་པར་བྱིན་གྱིས་རློབས། །སེམས་ལ་ཉམས་རྟོགས་རྒྱས་པར་བྱིན་གྱིས་རློབས། །ལྟ་སྒོམ་སྤྱོད་འབྲས་མཐའ་རུ་ཕྱིན་པར་ཤོག །གནས་སྐབས་འཇིགས་ཚོགས་བར་ཆད་ཞི་བ་དང་། །ཚེ་བསོད་དཔལ་འབྱོར་ཆོས་སྲིད་རྒྱས་པ་དང་། །མོས་བཞི་རླུང་སེམས་སྣང་བ་དབང་དུ་འདུས། །བདུད་བགེགས་ལོག་འདྲེན་ཚར་གཅོད་དངོས་གྲུབ་སྩོལ། །མཐར་ཐུག་སྐུ་བཞི་ཡེ་ཤེས་ལྔའི་བདག་ཉིད། །དཔལ་ལྡན་རྡོ་རྗེ་འཆང་དང་དབྱེར་མེད་པའི། །གོ་འཕང་ཚེ་འདི་ཉིད་ལ་མྱུར་ཐོབ་ནས། །མཁའ་མཉམ་འགྲོ་ཀུན་སྨིན་ཅིང་གྲོལ་བགྱིད་ཤོག །ཅེས་གྲུབ་ཆེན་བརྒྱད་ཅུ་རྩ་ལྔའི་གསོལ་འདེབས་ཐུགས་རྗེ་རྒྱུད་བསྐུལ་ཞེས་བྱ་བ་འདི་ནི། བླ་མ་རྡོ་རྗེ་གདན་པས་མཛད་པ་ལ་གཞི་བྱས་ཏེ། རྣལ་འབྱོར་པ་འཇམ་དབྱངས་བློ་འཕེལ་གྱི་བཞེད་ངོར། མགོ་སྤྲུལ་གྱིས་བསྡུས་པ་དུས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག ། སྒྲོལ་མ་བསྡུས་པ།ཏཾཿ འཇིགས་ཚོགས་སྡུག་བསྔལ་ཀུན་ལས་མྱུར་སྒྲོལ་མ། །འགྲོ་དོན་སྐུར་སྣང་ལྷ་མོ་ཉེར་གཅིག་ལ། །གསོལ་བ་འདེབས་སོ་འཇིགས་བརྒྱད་བར་ཆད་སོལ། །དགོས་འདོད་རེ་སྐོང་མཆོག་ཐུན་དངོས་གྲུབ་སྩོལ། །ཨོཾ་ཏཱ་རེ་ཏུཏྟཱ་རེ་མ་མ་ཨ་ཡུར་པུཎྱཻ་ཛྙཱ་ན་པུཥྚིཾ་ཀུ་རུ་ཡེ་སྭཱཧཱ། ཞེས་པ་འདི་རབ་བྱུང་བཅུ་དྲུག་པའི་སྟོན་འབྲིང་རྒྱལ་བ་དང་པོའི་ཐོ་རེངས་ཁར་འཕགས་མ་ཐུགས་རྗེ་ཅན་གྱིས་མགོ་སྤྲུལ་བ་བདག་ལ་བཀའ་དྲིན་དུ་བསྩལ་བའོ།། པདྨ་འབྱུང་གནས་དང་རྩ་བའི་བླ་མ་གཉིས་སུ་མེད་པ་ལ་གསོལ་བ་འདེབས་པ།ཨེ་མ་ཧོ། སྐུ་གསུམ་ཡོངས་འདུས་རྫོགས་སངས་རྒྱས། །པད་འབྱུང་རྣམ་སྣང་གངས་ཆེན་མཁྱེན། །རྩ་གསུམ་ཡོངས་འདུས་ལྷག་པའི་ལྷ། །པད་འབྱུང་རྡོ་རྗེ་འཆང་ཆེན་མཁྱེན། །མཆོག་གསུམ་ཡོངས་འདུས་སྤྲུལ་པའི་སྐུ། །པད་འབྱུང་ཤཱཀྱའི་རྒྱལ་པོ་མཁྱེན། །སྐྱབས་ཀུན་ཡོངས་འདུས་བླ་མ་རྗེ། །པད་འབྱུང་རྣམ་སྣང་རྡོ་རྗེ་མཁྱེན། །གཅིག་ཆོག་རྒྱལ་པོ་བླ་མ་རྗེ། །ཐུགས་རྗེས་དགོངས་ལ་བྱིན་གྱིས་རློབས། །ཚེ་གཅིག་སངས་རྒྱས་དངོས་གྲུབ་སྩོལ། །ཁྱེད་དང་དབྱེར་མེད་མྱུར་འགྲུབ་ཤོག །ཅེས་རབ་བྱུང་བཅུ་དྲུག་པའི་རྒྱལ་ཟླའི་ཚེས་བཅོ་ལྔའི་ཐོ་རེངས་ཁར་སྔགས་རྒན་འཆོལ་བོ་བདག་ལ་པདྨ་འབྱུང་གནས་དང་རྩ་བའི་བླ་མ་གཉིས་སུ་མེད་པས་བཀའ་དྲིན་དུ་གནང་བའོ།། ཧྲཱིཿ སྐུ་གསུམ་ཡོངས་འདུས་ཨོ་རྒྱན་རྡོ་རྗེ་འཆང་། །རྩ་གསུམ་ཡོངས་འདུས་གུ་རུ་དྲག་པོ་རྩལ། །མཆོག་གསུམ་ཡོངས་འདུས་རྒྱལ་དབང་པདྨ་འབྱུང་། །སྐྱབས་ཀུན་ཡོངས་འདུས་རྩ་བའི་བླ་མ་ལ། །གསོལ་བ་འདེབས་སོ་ལས་ངན་བར་ཆད་སོལ། །ཅི་བསམ་ཡིད་བཞིན་འགྲུབ་པར་བྱིན་གྱིས་རློབས། །ཞེས་པའང་མགོ་སྤྲུལ་གྱིས་གསོལ་བ་བཏབ་པའོ།། ཚོགས་བསྡུས།ཚོགས་མཆོད་བསྡུས་པ་ནི། རཾ་ཡཾ་ཁཾ། བཟའ་བཏུང་རོ་མཆོག་དྲུག་ལྡན་ཚོགས་ཀྱི་རྫས། །ཟག་མེད་ཡེ་ཤེས་བདུད་རྩིར་སྦྱངས་སྤེལ་བསྒྱུར། །ཨོཾ་ཨཱཿཧཱུྃ། མཁའ་ཁྱབ་སྐུ་གསུམ་བླ་མའི་ལྷ་ཚོགས་རྣམས། །རྣལ་འབྱོར་བསོད་ནམས་ཞིང་སླད་འདིར་གཤེགས་བཞུགས། །སྲེད་ལེན་ཞེན་པའི་རྟོག་འཁྲུལ་མི་མངའ་ཡང་། །འདོད་ཡོན་གཙང་སྦྱར་དགའ་སྟོན་ཚོགས་མཆོད་བཞེས། །ཐུགས་དམ་གཉན་པོ་ཆོས་ཀྱི་དབྱིངས་སུ་བསྐང་། །ཉམས་ཆགས་ཉེས་ལྟུང་མཐོལ་བཤགས་དག་ཚངས་སྩོལ། །ལོག་འདྲེན་དགྲ་བདུད་བར་གཅོད་དམ་སྲི་ཀུན། །ཚར་གཅོད་སྒྲོལ་འདྲེན་ཐབས་མཁས་འགྲོ་དོན་མཛོད། །མཆོད་ཡུལ་ཚོགས་ཞིང་མ་ལུས་མཉེས་གྱུར་ཅིག །སྦྱིན་ཡུལ་ལྷག་མགྲོན་མ་ལུས་ཚིམ་གྱུར་ཅིག །རྣལ་འབྱོར་བསོད་ནམས་ཡེ་ཤེས་ཚོགས་རྫོགས་ནས། །མཁའ་མཉམ་འགྲོ་བའི་དཔལ་དུ་འགྱུར་བར་ཤོག །ཞེས་པའང་ཆུ་ཁྱི་མགོ་ཟླའི་ཚེས་བཅུའི་ནུབ་འཇིགས་རྣམ་པས་ཤར་མར་བྲིས་པ་དགེའོ།། དགེའོ།། དགེའོ།། ཉེར་ལྔའི་གསོལ་འདེབས་མཁའ་འགྲོའི་རྒྱུད་བསྐུལ།༄༅། དམར་ཕྱོགས་ཉེར་ལྔའི་གསོལ་འདེབས་མཁའ་འགྲོའི་རྒྱུད་བསྐུལ་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་བི་ཛ་ཧ་རཾ། མ་ཚོགས་མཁའ་འགྲོ་འདུ་བའི་དུས། །དམར་ཕྱོགས་ཚེས་བཅུ་ཉེར་ལྔ་ལ། །གནས་ཁང་བྱི་དོར་མཆོད་པའི་རྫས། །རང་ནུས་འབྱོར་ཚད་རྣམ་དག་བཤམས། །ཆོ་གའི་གཞུང་བསྲངས་བསྐང་བའི་མཚམས། །དད་མོས་དབྱངས་ཀྱིས་འདི་བཞིན་བརྗོད།། ཨེ་མ་ཧོ། རང་བྱུང་སྤྲོས་བྲལ་ཆོས་དབྱིངས་ཕོ་བྲང་ནས། །སྟོང་གསལ་བརྗོད་བྲལ་ཀུན་ཏུ་བཟང་མོ་ལ། །ཆོས་སྐུའི་མཁའ་འགྲོ་དཔག་མེད་འཁོར་གྱིས་བསྐོར། །དད་མོས་དྲག་པོའི་ངང་ནས་གསོལ་འདེབས་ན། །བརྩེ་ཆེན་ཐུགས་ཀྱིས་གནས་འདིར་གཤེགས་ནས་ཀྱང་། །དུས་ཆེན་ཉེར་ལྔའི་མཆོད་པ་འདི་བཞེས་ལ། །མ་རིག་རྨོངས་པའི་བདག་སོགས་འགྲོ་ཀུན་གྱིས། །རང་སེམས་ཆོས་སྐུར་རྟོགས་པའི་དངོས་གྲུབ་ཞུ། །རང་བཞིན་གསལ་དག་རིགས་ལྔའི་ཞིང་ཁམས་ནས། །འབྱུང་ལྔ་གནས་དག་རིགས་ཀྱི་ཡུམ་ལྔ་ལ། །ལོངས་སྐུའི་མཁའ་འགྲོ་གྲངས་མེད་འཁོར་གྱིས་བསྐོར། །དད་མོས་དྲག་པོའི་ངང་ནས་གསོལ་འདེབས་ན། །བརྩེ་ཆེན་ཐུགས་ཀྱིས་གནས་འདིར་གཤེགས་ནས་ཀྱང་། །དུས་ཆེན་ཉེར་ལྔའི་མཆོད་པ་འདི་བཞེས་ལ། །ལོག་རྟོག་འཁོར་བར་འཁྱམས་པའི་འགྲོ་ཀུན་གྱིས། །སྐུ་ལྔ་ཚེ་འདིར་གྲུབ་པའི་དངོས་གྲུབ་ཞུ། །ཐུགས་རྗེ་འགགས་མེད་གང་འདུལ་སྤྲུལ་པའི་གྲོང་། །ཡུལ་ཆེན་ཉེར་བཞིའི་གནས་ཀྱི་མཁའ་འགྲོ་ལ། །སྤྲུལ་སྐུའི་མཁའ་འགྲོ་ཞིང་རྡུལ་གྲངས་ཀྱིས་བསྐོར། །དད་མོས་དྲག་པོའི་ངང་ནས་གསོལ་འདེབས་ན། །བརྩེ་ཆེན་ཐུགས་ཀྱིས་གནས་འདིར་གཤེགས་ནས་ཀྱང་། །དུས་ཆེན་ཉེར་ལྔའི་མཆོད་པ་འདི་བཞེས་ལ། །མ་རིག་འཁྲུལ་བས་འཁོར་བར་འཁྱམས་པའི་འགྲོ། །ཚེ་འདིར་མཁའ་སྤྱོད་བགྲོད་པའི་དངོས་གྲུབ་ཞུ། །རང་སྣང་རྣམ་དག་ཟངས་མདོག་དཔལ་རི་ནས། །མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་ལ། །གནས་ཡུལ་མ་ཚོགས་མཁའ་འགྲོའི་འཁོར་གྱིས་བསྐོར། །དད་མོས་དྲག་པོའི་ངང་ནས་གསོལ་འདེབས་ན། །བརྩེ་ཆེན་ཐུགས་ཀྱིས་གནས་འདིར་གཤེགས་ནས་ཀྱང་། །དུས་ཆེན་ཉེར་ལྔའི་མཆོད་པ་འདི་བཞེས་ལ། །ངན་སོང་གནས་སུ་འཁྱམས་པའི་མ་རྒན་འགྲོ། །རྣམ་མཁྱེན་སངས་རྒྱས་ཐོབ་པའི་དངོས་གྲུབ་ཞུ། །ཁྱད་པར་རྨད་བྱུང་ཚོགས་ཁང་བཀོད་ལེགས་དབུས། །སྤངས་བླང་བྲལ་བའི་ཚོགས་ཀྱི་འཁོར་ལོ་འདིས། །ཡུམ་ཆེན་ཤེར་ཕྱིན་ཕག་མོ་རིགས་ལྔ་དང་། །ཏཱ་རེ་ཉེར་གཅིག་སེང་ཧ་མུ་ཁ་སོགས། །གནས་གསུམ་མ་སྲིང་མཁའ་འགྲོ་རྒྱ་མཚོ་ལ། །འདོད་ཡོན་ལྔ་ལྡན་ཉེར་ལྔའི་ཚོགས་མཆོད་འབུལ། །ཐུགས་རྒྱུད་རབ་མཉེས་བདེ་སྟོང་དགའ་བ་བཞིས། །བདག་རྒྱུད་སྨིན་ཅིང་གྲོལ་བར་མཛད་དུ་གསོལ། །ཁྱད་པར་མཁའ་འགྲོ་ཡོངས་ཀྱི་ཚོགས་དཔོན་རྗེ། །འཆི་མེད་རིག་འཛིན་པདྨ་ཐོད་ཕྲེང་རྩལ། །བཅུ་གཉིས་ཟླ་བའི་དུས་བཟང་ཉེར་ལྔ་ལ། །ངོ་མཚར་མཛད་པ་བཅུ་གཉིས་བསྟན་ལ་བསྟོད། །སྤྲེལ་ཟླའི་ཉེར་ལྔར་རྒྱ་མཚོའི་གླིང་ཉིད་དུ། །མཁའ་འགྲོ་འབུམ་ལ་ཟབ་གསང་ཆོས་འཁོར་བསྐོར། །ཕག་ཟླའི་ཉེར་ལྔར་ཟ་ཧོར་ཡུལ་དབུས་སུ། །འོད་འཆང་སོགས་ལ་བདེ་སྟོང་ཆོས་ཆར་ཕབ། །བྱ་ཟླའི་ཉེར་ལྔར་བསིལ་ཚལ་དུར་ཁྲོད་དུ། །མཁའ་འགྲོ་ཡོངས་ལ་སྦྱོར་སྒྲོལ་ཆོས་འཁོར་བསྐོར། །ཁྱི་ཟླའི་ཉེར་ལྔར་སྐྲ་ཡི་ལྭ་བ་སོགས། །མཁའ་འགྲོ་སྡེ་བཞིར་ཡོ་གའི་ཆོས་རྣམས་གསུངས། །བྱི་ཟླའི་ཉེར་ལྔར་མནྡྷ་ར་ལ་སོགས། །གསང་ཡུམ་མང་བརྟེན་ཟུང་འཇུག་སྐུ་མཆོག་བརྙེས། །གླང་ཟླའི་ཉེར་ལྔར་ཡབ་ཡུམ་ནམ་མཁར་ཕེབས། །ཨོ་རྒྱན་ཡུལ་དུ་ཆུ་ཡི་རྒྱུན་ཕབ་བཏུལ། །སྟག་ཟླའི་ཉེར་ཟླར་སེང་གདོང་དངོས་ཞལ་མཇལ། །མུ་སྟེགས་བཏུལ་ཞིང་དྲག་སྔགས་ཆོས་ཆར་ཕབ། །ཡོས་ཟླའི་ཉེར་ལྔར་ཟངས་གླིང་རྒྱལ་ཁབ་ཏུ། །རྫུ་འཕྲུལ་མཁའ་ལ་མེ་ཡི་འཁོར་ལོ་བསྐོར། །འབྲུག་ཟླའི་ཉེར་ལྔར་སྨན་གྱི་ལྷ་མོ་བདུན། །དངོས་སུ་དབང་བསྡུས་དུག་སེལ་མུ་སྟེགས་བཏུལ། །སྦྲུལ་ཟླའི་ཉེར་ལྔར་བསེ་མོ་མཆེད་བཞི་སོགས། །དབང་བསྡུས་བདུད་དང་དམ་སྲི་མ་ལུས་བཏུལ། །རྟ་ཟླའི་ཉེར་ལྔར་བོད་ཡུལ་བསམ་ཡས་སུ། །མཚོ་རྒྱལ་ལ་སོགས་སྨིན་གྲོལ་ལམ་ལ་བཀོད། །ལུག་ཟླའི་ཉེར་ལྔར་བོད་ཡུལ་གཏེར་མཇུག་རྫོགས། །བོད་ཡུལ་བསྐྱབས་ཕྱིར་སྲིན་ཡུལ་ཆོས་ལ་བཀོད། །བཀའ་དྲིན་བརྗོད་འདས་པདྨ་མཚན་བརྒྱད་ལ། །དགའ་སྟོན་མར་ངོའི་ཚེས་བཅུའི་ཚོགས་ཀྱིས་མཆོད། །ཁྱད་པར་པད་འབྱུང་ཐུགས་རྗེས་ལེགས་བསྐྱངས་བའི། །བདེ་ལམ་གྲོགས་མཆོག་མ་རྒྱུད་མཁའ་འགྲོ་ལ། །དགའ་སྟོན་ཚོགས་ཀྱི་མཆོད་པ་འདི་ཕུལ་མཐུས། །སངས་རྒྱས་བསྟན་དར་བསྟན་འཛིན་སྐུ་ཚེ་བརྟན། །ཡངས་པའི་རྒྱལ་ཁམས་མི་ཕྱུགས་ནད་ཡམས་ཞི། །རྫོགས་ལྡན་བསྐལ་པའི་དཔལ་ལ་ལོངས་སྤྱོད་བཞིན། །མཐར་ཐུག་མཁའ་མཉམ་ལུས་ཅན་འགྲོ་བ་རྣམས། །གདོད་མའི་དབྱིངས་ཀྱི་རྒྱལ་སྲིད་ཆེན་པོ་རུ། །སྟོན་འཁོར་དགོངས་མཉམ་མངོན་པར་སངས་རྒྱས་ཏེ། །འཁོར་མཚོ་དོང་ནས་སྤྲུགས་པའི་ཤིས་པ་སྩོལ།། ཡར་ངོ་དཔའ་བོའི་ཚོགས་མཆོད་ལ། །ཚེས་བཅུའི་གསོལ་འདེབས་མང་མཆིས་ཀྱང་། །མར་ངོ་མཁའ་འགྲོའི་ཉེར་ལྔ་ལ། །གསོལ་འདེབས་གཅིག་ཀྱང་མ་མཆིས་པས། །ཉེར་ལྔ་མཁའ་འགྲོའི་གསོལ་འདེབས་འདི། །ཏཱ་རེ་ཡུམ་གྱི་གནས་ཞོལ་དུ། །རྨོངས་པ་ཨ་བྷྱའི་མིང་འཛིན་པས། །ཨ་མཚར་རྩེད་མོའི་ཚུལ་བཞིན་དུ། །ཐུན་མཚམས་མགྱོགས་པར་བྲིས་པ་འདི། །ཐོག་ཐ་བར་དུ་དགེ་ལེགས་འཕེལ།། སྐུ་གསུམ་རིག་པའི་གསོལ་འདེབས་འཁྲུལ་རྟོག་རང་གྲོལ།སྐུ་གསུམ་རིག་པའི་གསོལ་འདེབས་འཁྲུལ་རྟོག་རང་གྲོལ་བཞུགས། ཨེ་མ་ཧོ། ཡེ་གྲོལ་སྟོང་པ་ཆོས་ཀྱི་སྐུ། །ཀུན་བཟང་དགོངས་པ་དབྱེར་མེད་ཐུགས། །གཅིག་འདུས་བླ་མར་གསོལ་བ་འདེབས། །ཀ་དག་རྟོགས་པར་བྱིན་གྱིས་རློབས། །སྣང་ཆ་འགགས་མེད་ལོངས་སྤྱོད་རྫོགས། །ཡེ་ཤེས་འཁོར་ལོ་གཅིག་རྫོགས་པ། །ཧེ་རུ་ཀ་དཔལ་རྡོ་རྗེ་ཆོས། །སྤྲོས་བྲལ་རྟོགས་པར་བྱིན་གྱིས་རློབས། །རང་གྲོལ་ཆེན་པོར་རང་ཤར་བ། །རྒྱུན་ཆད་མེད་པ་སྤྲུལ་པའི་སྐུ། །པད་འབྱུང་བླ་མར་གསོལ་བ་འདེབས། །ལྷུན་གྲུབ་རྟོགས་པར་བྱིན་གྱིས་རློབས། །འཁོར་འདས་འུབ་ཆུབ་ལྟ་བའི་ཀློང་། །དབྱེར་མེད་འདྲེས་པར་བྱིན་གྱིས་རློབས། །རིག་ཁྱབ་བརྡལ་བ་ཆེན་པོ་རུ། །ཧེ་རུ་ཀ་དཔལ་བྱིན་གྱིས་རློབས། །ལུས་གནས་རྩ་ཡི་ཕོ་བྲང་དུ། །བདེ་དྲོད་འབར་བར་བྱིན་གྱིས་རློབས། །འཁོར་ལོ་ལྔ་ལྡན་དཀྱིལ་འཁོར་དུ། །དགའ་བཞི་ཡེ་ཤེས་མངོན་གྱུར་ནས། །སྐུ་ལྔ་ཡེ་ཤེས་དབང་ཐོབ་ཤོག །སྐལ་ལྡན་རིག་པ་འཛིན་རྣམས་དང་། །དམ་གཙང་རྡོ་རྗེའི་མཆེད་གྲོགས་བཅས། །རྡོ་རྗེ་ཐེག་པའི་ལམ་རྒྱུད་ལ། །བརྟེན་ནས་སྐུ་གསུམ་ཞིང་ཁམས་སུ། །དབུགས་ཆེན་འབྱིན་པར་བྱིན་གྱིས་རློབས། །ཁམས་གསུམ་རོལ་པ་དབྱིངས་ཀྱི་ཡུམ། །རང་བཞིན་ཀུན་ཏུ་བཟང་མོ་དང་། །བདེ་ཆེན་གཉིས་མེད་མཉམ་སྦྱོར་ནས། །མཐར་ཐུག་ཟུང་འཇུག་སྐུ་འགྲུབ་ཤོག །རྣལ་འབྱོར་ཉམས་ཀྱི་སྣང་བ་ཀུན། །ཆོས་རྣམས་སྤྲོས་པ་ལས་འདས་པའི། །གདོད་མའི་གཞི་དབྱིངས་ཡེ་ཤེས་ཆེ། །འབྲས་བུ་རང་གྲོལ་རྒྱལ་བའི་ཐུགས། །འཁོར་འདས་དག་མཉམ་ལྟ་བའི་གདེངས། །ཐིག་ལེ་ལྔ་ལྡན་དབྱིངས་སུ་ཨཱཿ ཞེས་པ་འདི་ཡང་འཇིགས་རྣམ་པས་གང་ཤར་སྨྲས་པའོ།། བླ་མ་རྒྱང་འབོད་བསྡུས་པ།བླ་མ་རྒྱང་འབོད་བསྡུས་པ་ནི། ན་མོ་གུ་རུ། ཚེ་རབས་འཁོར་བའི་སྡུག་བསྔལ་རྒྱ་མཚོ་ཆེ། །སྒྲོལ་བའི་དེད་དཔོན་ཡིད་བཞིན་དབང་རྒྱལ་ལས། །ལྷག་པའི་བཀའ་དྲིན་གསུམ་ལྡན་རྡོ་རྗེ་འཆང་། །འགྱུ༵ར་བ་མེ༵ད་པ་སེམས་ཉིད་ཆོས་ཀྱི་སྐུ། །བདེ་སྟོང་བློ༵་འདས་ཐབས་ལམ་དགའ་བ་བཞིའི། །གདམས་ངག་གྲོ༵ས་འདེབས་ཐར་བའི་ལམ་སྟོན་མཁན། །མཐ༵འ་ཡ༵ས་འགྲོ་བའི་གཉེན་མཆོག་འགྲན་བྲལ་བར། །སྐལ་ལྡན་བདག་གིས་འོ་དོད་སྙིང་ནས་འབོད། །མགོན་ཁྱོད་ལྷ་ཡི་སྙན་གྱིས་རབ་གསན་ཏེ། །བཏང་སྙོམ་མ་མཛད་འཁྲུལ་བའི་འཁོར་མཚོ་ལས། །ད་ལྟ་ཉིད་དུ་ཐུགས་རྗེའི་ལྕགས་ཀྱུ་ཡིས། །དྲངས་ཏེ་ཐར་ལམ་སྟོན་པར་ཁྱེད་རང་མཁྱེན། །སྒོ་གསུམ་དགེ་ལ་སྦྱོར་བར་ཁྱེད་རང་མཁྱེན། །ཚེ་འདིར་འོད་སྐུར་གྲོལ་བར་ཁྱེད་རང་མཁྱེན། །མཐའ་ཡས་འགྲོ་རྣམས་འཁོར་མཚོ་ལས་བསྒྲལ་ཏེ། །ཁམས་གསུམ་འགྲོ་བའི་བླ་མར་བདག་འགྱུར་ཤོག །ཅེས་འདི་ཚུལ་ཁྲིམས་བཟང་པོ་སོགས། །དད་ལྡན་འགའ་ཡིས་བསྐུལ་བའི་ངོར། །གང་གི་གསུང་གིས་འཚོ་བ་ཡི། །སྔགས་རྒན་གྲོལ་ཞིག་པ་དེས་བྲིས། །སརྦ་མངྒ་ལཾ། གླིང་པ་རྣམ་གསུམ་གསོལ་འདེབས།༄༅། གླིང་པ་རྣམ་གསུམ་གྱི་གསོལ་འདེབས་ནི། འགྲོ༵་མགོ༵ན་པདྨའི་ཐུགས་རྗེའི་འོད་ཟེར་ལས། །ལུ༵ང་དང་རི༵ག་པའི་རྩལ་ཆེན་རབ་རྫོགས་ནས། །རྣམ་གྲོལ་རིན་ཆེན་གླི༵ང་དུ་འགྲོ་བ་ཀུན། །སྒྲོལ་བ༵འི་དེད་དཔོན་མཆོག་ལ་གསོལ་བ་འདེབས།། ༧ རི༵ག་འཛི༵ན་གྲུབ་བརྒྱའི་གཙོ་བོ་པད་འབྱུང་གིས། །གས༵ང་སྔ༵གས་བསྟན་པའི་བདག་པོར་མངའ་གསོལ་ནས། །འཛམ་གླི༵ང་མཁས་པ་ཡོངས་ཀྱིས་བསྔགས་པ༵འི་གནས། །གཏེར་ཆེན་འགྲོ་བའི་མགོན་ལ་གསོལ་བ་འདེབས།། ༧ རྒྱལ་དབང་པདྨ་ཡབ་ཡུམ་བྱིན་རླབས་ལས། །མངོན་བྱུང་བས༵མ་གཏ༵ན་ཟབ་མོའི་དེ་ཉིད་མཐོང་། །ཡེ༵་ཤེ༵ས་གཟིགས་པའི་དགོངས་གཏེར་མཛོད་འཆང་བ། །ཐར་གླི༵ང་དེད་དཔོན་དམ་པར་གསོལ་བ་འདེབས།། ཞེས་པ་འདི་ཡང་མགོ་སྤྲུལ་བས་སོ།། ཕུང་པོའི་མཆོད་སྦྱིན་འདོད་འཇོའི་འཁྲི་ཤིང་།༄༅། རྒྱུན་ཁྱེར་ཕུང་པོའི་མཆོད་སྦྱིན་འདོད་འཇོའི་འཁྲི་ཤིང་ཞེས་བྱ་བ་བཞུགས། ན་མོ་གུ་རུ་ཛྙ་ན་ཊཱཀྐི་ཡེ། །སྐྱབས་ཀུན་འདུས་ཞལ་གསུམ་ལྡན་བླ་མ་ལ། །བཏུད་ནས་ཚོགས་གཉིས་རྒྱ་ཆེར་སྤེལ་བའི་ཐབས། །སྤྲོས་མེད་ཀུན་སྤང་དག་གི་ཉམས་ལེན་ཚུལ། །ཕུང་པོའི་མཆོད་སྦྱིན་འདོད་འཇོའི་འཁྲི་ཤིང་ཤར། །དེ་ཡང་རྣམ་གྲངས་བདུན་དུ་འདུས་པ་ལས། །ཐོག་མར་དབང་བསྡུད་ཟིལ་གནོན་འདི་བཞིན་བྱ།། ཕཊ་ཕཊ་ཕཊཿ དབྱིངས་ཕྱོགས་ལྷུང་བྲལ་བའི་མཁའ་ཀློང་ནས། །གདངས་འགགས་མེད་རང་བྱུང་རིག་པའི་རྩལ། །མ་གསང་བ་ཡེ་ཤེས་ཌཱཀྐི་མས། །དོན་ཡེ་ཤེས་ལྔ་ཡི་བརྟུལ་ཞུགས་ཀྱིས། །སེམས་དུག་ལྔའི་འཁྲུལ་རྟོག་ལས་བྱུང་བའི། །རྐྱེན་ཕྱི་ནང་གསང་བའི་ནད་གདོན་བགེགས། །གཤིས་མ་བཅོས་གཉུག་མའི་ཀློང་དུ་བསྡུ། །གཏིང་ཡེ་གསལ་དགོངས་པས་ཟིལ་གྱིས་གནོན།། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊཿ གཉིས་པ་སྐྱབས་སེམས་ཚོགས་བསགས་རིམ་པ་ནི། ཕཊཿ སྐྱབས་ཀུན་འདུས་རང་རིག་ཡུམ་ཆེན་མོར། །དོན་རང་ངོ་ཤེས་པས་སྐྱབས་སུ་མཆི། །མ་མཁའ་མཉམ་འགྲོ་བ་སེམས་ཅན་ཀུན། །དབྱིངས་ཆོས་སྐུའི་རྒྱལ་ཐབས་ལ་འགོད་བྱ། ཕཊཿ རང་བྱུང་གི་རིག་པ་དོན་གྱི་ལྷར། །འདུ་འབྲལ་དང་བྲལ་བར་ཕྱག་འཚལ་ལོ། །ཉམས་སྣང་དང་འོད་གསལ་མཆོད་པ་འབུལ། །རེ་དོགས་དང་གཉིས་འཛིན་དབྱིངས་སུ་བཤགས། །མཐའ་བྲལ་གྱི་དོན་ལ་རྗེས་ཡི་རང་། །ཉམས་རྟོགས་ཀྱི་རྩལ་ཆེན་སྦར་དུ་གསོལ། །སྐྱེ་འགགས་དང་བྲལ་བར་བཞུགས་གསོལ་འདེབས། །དམིགས་གཏད་དང་བྲལ་བའི་ངང་ནས་བསྔོ། །ཡང་དག་གི་གནས་ལུགས་རྟོགས་ནས་ཀྱང་། །མ་ཁྱེད་དང་དགོངས་པ་མཉམ་པར་ཤོག ཕཊཿ གསུམ་པ་འཕོ་ཞིང་བདུད་རྩིར་སྤེལ་བ་ནི། ཕཊཿ སེམས་རང་བྱུང་ཕག་མོ་ནམ་མཁར་ཐོན། །ལུས་ཚོ་བརྗིད་ཆེ་སྣུམ་ཐོད་པར་བསྐྱིལ། །སྔགས་ཏིང་འཛིན་ཟབ་མོས་རབ་སྤེལ་བའི། །རྫས་འདོད་འབྱུང་བདུད་རྩིའི་ཕུང་པོར་གྱུར། ཨོཾ་ཨཱཿཧཱུྃ།མང་དུ་བརྗོད། བཞི་པ་མཆོད་སྤྲིན་དཀར་འགྱེད་ནི། ཕཊཿ ལུས་ཀུན་བཟང་མཆོད་པའི་སྤྲིན་ཕུང་གིས། །ཕ་བླ་མ་ཡི་དམ་དཀོན་མཆོག་གསུམ། །མ་མཁའ་འགྲོ་བཀའ་གཏེར་སྲུང་མར་བཅས། །ཐུགས་དགོངས་བཞེད་སྐོང་ཞིང་མཉེས་གྱུར་ཅིག །ཕཊཿ ལྔ་པ་ཤ་ཁྲག་སྟོན་མོར་འགྱེད་པ་ནི།། ཕཊཿ ཡེ་གདོད་མའི་དུས་ནས་ད་ལྟའི་བར། །ངས་གཅེས་པར་བཟུང་བའི་སྒྱུ་ལུས་འདི། །དུས་དེ་རིང་ལྷ་འདྲེའི་ཚོགས་ལ་སྦྱིན། །ད་ཟོ་ཞིག་ཁྱེར་ཅིག་སྟོབས་ལྡན་རྣམས། ཕཊཿ དྲུག་པ་ལྷག་མགྲོན་ཚིམ་ཕྱིར་ཁྲ་འགྱེད་ནི།། ཕཊཿ ལུས་འདོད་པ་ཀུན་འབྱུང་སྦྱིན་པ་འདིས། །གློ་བུར་དུ་ལྷག་དང་ཁས་ཞན་རིགས། །མ་སླེབས་དང་ཤ་འཁོན་ལན་ཆགས་རིགས། །ཀུན་རེ་འདོད་ཡིད་བཞིན་འབྱུང་གྱུར་ཅིག ཕཊཿ བདུན་པ་རྗེས་ཀྱི་རིམ་པ་འདི་བཞིན་བྱ། ཕཊཿ ལུས་མཆོད་སྦྱིན་འདིས་མཚོན་བདེ་དགེ་རྣམས། །དམིགས་མེད་ཀྱི་ངང་ནས་ཡོངས་ལ་བསྔོ། །དེ་ཀུན་གྱི་སྡུག་བསྔལ་རྒྱུ་འབྲས་ཀུན། །ངས་བླང་ངོ་ཕྱམ་གཅིག་འཚང་རྒྱ་ཤོག ཕཊཿ ཅེས་བདེ་དགེ་གཏོང་བའི་མོས་འདུན་དང་།། ཕཊཿ ཅེས་སྡིག་སྡུག་ལེན་པའི་དམིགས་པ་བྱ།། ཕཊཿ སྦྱིན་བྱ་ཡི་དངོས་པོ་མཆོག་དམན་དང་། །སྦྱིན་ཡུལ་གྱི་མགྲོན་རིགས་རྣམ་པ་བཞི། །སྦྱིན་གཏོང་གི་མཁན་པོ་རང་དང་བཅས། །གདོད་མ་ནས་དམིགས་པའི་བློ་ལས་འདས།། ཕཊ༔བརྗོད་བཟོ་མེད་གཉུག་མའི་རང་ཞལ་བལྟ། །དེ་ལྟར་ཕུང་པོ་མཆོད་སྦྱིན་རྒྱུན་ཁྱེར་འདི། །གཅོད་མཁན་སྔགས་རིགས་བཛྲ་ཤྲཱི་དྷ་རས། །རཏྣའི་རྟེན་བཅས་བསྐུལ་ངོར་སྙོམ་ལས་པ། །ཡན་ལག་དང་པོའི་མིང་གི་ས་ཆ་ནས། །ཕྱོགས་སུ་འཁྱམས་པའི་སྤྲུལ་མིང་གང་དེས་བྲིས།། སརྦ་མངྒ་ལཾ།། རྒྱ་ལྷའི་ཡང་སྲིད་མྱུར་འབྱོན་གསོལ་འདེབས།༄༅། རྩ་བའི་བླ་མ་འགྱུར་མེད་བློ་གྲོས་མཐའ་ཡས་ཀྱི་ཡང་སྲིད་མྱུར་འབྱོན་གསོལ་འདེབས་བརྩེ་ཆེན་ཐུགས་རྗེའི་བསྐུལ་མ་བཞུགས། ཨོཾ་འགྲུབ་པར་གྱུར་ཅིག ཟས་གཙང་སྲས་མཆོག་གཉིས་པ་གཅུང་མཛེས་དགའ། །དཔལ་བརྩེགས་ཀུན་ལེགས་རྡོ་རྗེ་ལྷུན་གྲུབ་དང་། །ལྕམ་གྲུབ་དཀོན་མཆོག་སོགས་ཀྱི་ཡེ་ཤེས་སྐུ། །དབང་ཆེན་དགའ་བཞི་བཞད་པར་གསོལ་བ་འདེབས། །བཀའ་དྲིན་ཅན་ཁྱེད་འཁོར་བ་ཇི་སྲིད་བར། །ལས་སྨོན་ཐུགས་རྗེས་འབྲེལ་བའི་གདུལ་བྱ་རྣམས། །ཡལ་བར་མི་འདོར་ངེས་ཕྱིར་ཐུགས་དམ་བསྐུལ། །ཆོས་སྐུའི་དབྱིངས་ནས་གཟུགས་སྐུར་བཞེངས་སུ་གསོལ། །ཐ་གྲུ་མི་གཞན་གཡུ་ལུང་འཛིན་མའི་གཞིར། །རབ་བྱུང་རྣམ་བྱུང་གོ་འབྱེད་གསལ་བའི་རྒྱན། །ཐེག་མཆོག་ལ་མོས་འདྲེན་བྱེད་དགའ་སྟོན་དུ། །གསེར་ཞལ་མུ་ཁྱུད་ལྷག་ལྷག་བསྟན་དུ་གསོལ། །གསང་གསུམ་ཡོན་ཏན་མཚུངས་ཟླ་མ་མཆིས་པས། །གདུལ་བྱ་ཡོངས་ཀྱི་རེ་སྨོན་མྱུར་སྐོངས་ཤིང་། །ཕྱོགས་ལས་རྣམ་པར་རྒྱལ་བའི་མཛད་ཕྲིན་གྱིས། །དུས་སྙིགས་ཕོང་རྒུད་མུན་ཚོགས་བསལ་དུ་གསོལ། །ཆོས་འདུལ་བསླབ་སྡོམ་གསེར་གྱི་སྲོག་ཤིང་ལ། །བྱང་ཆུབ་སེམས་ཀྱི་པཉྩ་ལི་ཀ་བཟླུམ། །ཐེག་རྩེའི་དགོངས་བརྒྱུད་ནོར་བུའི་ཏོག་ལྡན་པའི། །བསྟན་པའི་རྒྱལ་མཚན་ཕྱོགས་བཅུར་སྒྲེང་དུ་གསོལ། །སྐུ་གསུམ་མཆོག་གསུམ་རྩ་གསུམ་སྲུང་མའི་ཚོགས། །བདེན་གསུང་སྨོན་ལམ་གྲུབ་ཀུན་བདེན་སྟོབས་ཀྱིས། །བདག་གི་འདོད་དོན་ཡིད་ལ་སྨོན་པ་རྣམས། །གེགས་མེད་ལྷུན་གྱིས་འགྲུབ་པར་བྱིན་གྱིས་རློབས།། ཅེས་འདི་གང་གི་སློབ་འབངས་པ། །པདྨས་ལུང་ཟིན་ཀུ་སཱ་ལུ། །ཆོས་དབྱིངས་ཀུན་གསལ་རྒྱ་མཚོས་བྲིས། །རེ་སྨོན་དོན་དང་ལྡན་གྱུར་ཅིག ། ཇོ་ནང་དཀོན་མཆོག་ཆོས་བཟང་གི་གསོལ་འདེབས།༄༅། དཔལ་ལྡན་བླ་མ་དམ་པའི་གསོལ་འདེབས་མཆོག་ཐུན་དངོས་གྲུབ་མྱུར་དུ་འགུགས་པའི་ལྕགས་ཀྱུ་ཞེས་བྱ་བ་བཞུགས། ན་མོ་གུ་རུ་རཏྣ་དྷརྨ་བྷ་དྲ་ཡེ། །འགྱུར་མེད་དཀོ༵ན་མཆོ༵ག་ཀུན་འདུས་སེམས་ཀྱི་གཤིས། །འཁོར་ལོ་ཐ་མའི་ཆོ༵ས་ཚུལ་རྨ་མེད་པའི། །ལམ་བཟ༵ང་གསལ་བར་འདོམས་པའི་བཀའ་དྲིན་ཅན། །མཚུངས་མེད་བླ་མའི་ཞབས་ལ་གསོལ་བ་འདེབས། །རྒྱལ་ཀུན་སྤྱི་གཟུགས་དཔལ་ལྡན་བླ་མ་མཆོག །སྐྱབས་ཀུན་འདུས་པའི་ངོ་བོར་ཡོངས་ཤེས་ཤིང་། །བདག་ལུས་རབ་འབྱམས་ཞིང་གི་རྡུལ་སྙེད་དུ། །རྣམ་སྤྲུལ་རྩེ་གཅིག་གུས་པས་ཕྱག་འཚལ་ལོ། །བདག་པོས་ཡོངས་སུ་བཟུང་དང་མ་བཟུང་བའི། །དངོས་འབྱོར་ཡིད་ཀྱིས་སྤྲུལ་པའི་མཆོད་ཚོགས་དང་། །ལུས་དང་ལོངས་སྤྱོད་དུས་གསུམ་དགེ་བ་རྣམས། །ཀུན་བཟང་མཆོད་པའི་སྤྲིན་དུ་དམིགས་ནས་འབུལ། །བདག་གིས་ཐོག་མེད་དུས་ནས་ད་ལྟའི་བར། །བསགས་པའི་མི་དགེ་སྡིག་པའི་ཚོགས་ཀུན་དང་། །ཁྱད་པར་ཁྱེད་ཀྱི་ཐུགས་དང་འགལ་བགྱིས་ཀུན། །དེང་ནས་གནོང་འགྱོད་དྲག་པོས་བཤགས་ཤིང་སྡོམ། །ཕྱོགས་བཅུའི་རྒྱལ་དང་རྒྱལ་སྲས་སློབ་ཚོགས་ཀྱིས། །དུས་གསུམ་རྣམ་དཀར་བྱ་བ་མ་ལུས་དང་། །མགོན་པོ་ཁྱེད་ཀྱི་མཛད་ཕྲིན་མཐའ་ཡས་ལ། །ལྷག་པར་དགའ་བས་རྗེས་སུ་ཡི་རང་ངོ། །མི་བཟད་འཁོར་བའི་འདམ་དུ་བྱིང་བ་ཡི། །བགྲང་ཡས་འགྲོ་རྣམས་སངས་རྒྱས་སར་འགོད་ཕྱིར། །རྨད་བྱུང་ཐེག་པ་མཆོག་གི་དགའ་སྟོན་ཆེ། །ཟབ་ཅིང་རྒྱུན་མི་ཆད་པར་སྩལ་དུ་གསོལ། །ཆོས་ཀྱི་སྐུ་ལ་འཕེལ་འགྲིབ་མི་མངའ་ཡང་། །བློ་དམན་བདག་སོགས་གདུལ་བྱའི་སྣང་ངོ་རུ། །མགོན་ཁྱོད་ཞབས་པད་མི་འགྱུར་རྡོ་རྗེའི་ཁྲིར། །བསྐལ་བརྒྱའི་བར་དུ་བརྟན་པར་བཞུགས་སུ་གསོལ། །བསྟན་པའི་མངའ་བདག་དཔལ་ལྡན་བླ་མ་རྗེ། །རབ་བརྟན་རྡོ་རྗེའི་སྐུ་རུ་མངའ་བརྙེས་ཤིང་། །གསང་ཆེན་ངེས་དོན་བསྟན་པའི་རྒྱལ་མཚན་ཆེ། །ཕྱོགས་བརྒྱར་སྲིད་མཐའི་བར་དུ་བསྒྲེང་དུ་གསོལ། །བསླུ་མེད་དཀོན་མཆོག་གསུམ་གྱི་བདེན་པ་དང་། །ཆོས་སྲུང་དམ་ཅན་རྒྱ་མཚོའི་མཐུ་སྟོབས་དང་། །ལམ་བཟང་རིན་ཆེན་རྩེ་གཅིག་བསྒྲུབ་པའི་མཐུས། །དཔལ་ལྡན་བླ་མ་མཆོག་གི་ཞབས་བརྟན་ཤོག །དེ་ལྟར་གཅིག་ཆོག་རྒྱལ་པོ་བླ་མ་ལ། །གསོལ་བཏབ་ལས་བྱུང་རྣམ་དཀར་དགེ་དེའི་མཐུས། །མཁའ་མཉམ་མ་རྣམས་སྡུག་བསྔལ་རྒྱ་མཚོ་ལས། །གྲོལ་ནས་རྣམ་མཁྱེན་སངས་རྒྱས་ཐོབ་པར་ཤོག །ཇི་སྲིད་དེ་མ་ཐོབ་ཀྱི་བར་དུ་ཡང་། །མཚུངས་མེད་རྗེ་བཙུན་བླ་མས་རྗེས་བཟུང་ནས། །ཐེག་ཆེན་དམ་ཆོས་བདུད་རྩིའི་རྒྱུན་བཟང་གིས། །རྣམ་ཀུན་ཡོངས་སུ་འཚོ་བའི་བཀྲ་ཤིས་སྩོལ།། ཅེས་དཔལ་ལྡན་བླ་མ་དམ་པའི་གསོལ་འདེབས་མཆོག་ཐུན་དངོས་གྲུབ་མྱུར་དུ་འགུགས་པའི་ལྕགས་ཀྱུ་ཞེས་བྱ་བ་འདི་ཡང་། བསེ་སྤྲུལ་ཆོས་དབྱིངས་ཀུན་གསལ་རྒྱ་མཚོར་འབོད་པས་རང་ལོ་ཉེར་ལྔ་པ་ཤིང་མོ་ལུག་གི་ལོའི་ཧོར་ཟླ་གསུམ་པ་ནག་པ་ཟླ་བའི་ཡར་ཚེས་ལ་དཔལ་ལྡན་འཛམ་ཐང་ཆོས་ཀྱི་ཕོ་བྲང་ནས་ཐུན་མཚམས་སུ་ཐོལ་བྱུང་བྲིས་པ་མངྒ་ལཾ། བྲོ་གླུ་བདུད་རྩིའི་མཆོད་པ།༄༅། བྲོ་གླུ་བདུད་རྩིའི་མཆོད་པ་ནི། ཨེ་མ་ཧོ། མགོན་རྒྱལ་བའི་དབང་པོ་དོན་ཐམས་ཅད་གྲུབ་པ་དང་། །དེ་འཇའ་སྐུར་བཞེངས་པ་མཚན་བརྒྱད་ལྡན་པདྨ་འབྱུང་། །འཁོར་རྒྱལ་སྲས་རིག་འཛིན་མཁའ་འགྲོ་དང་དམ་ཅན་ཚོགས། །ཐུགས་བརྩེ་བས་དགོངས་ལ་གླུ་བྲོ་གར་མཆོད་པ་བཞེས། །དོན་ཆོས་བཞིན་འགྲུབ་པའི་བྱིན་རླབས་དང་དངོས་གྲུབ་ཞུ། །སྐྱབས་མཚན་ལྡན་བླ་མ་བརྒྱུད་གསུམ་གྱི་རིག་འཛིན་ཚོགས། །གླུ་བྲོ་གར་བཞེས་ལ་ཕྲིན་ལས་ཀྱི་གཏེར་ཆེན་སྩོལ། །བཀའ་གཏེར་གྱི་སྲུང་མ་དམ་ཚིག་ཅན་རྒྱ་མཚོའི་ཚོགས། །གླུ་བྲོ་གར་བཞེས་ལ་ས་ལམ་གྱི་བར་ཆད་སོལ། །དཔལ་རྣམ་མང་ཐོས་སྲས་ནོར་ལྷ་དང་གཏེར་བདག་ཚོགས། །གླུ་བྲོ་གར་བཞེས་ལ་ཚེ་བསོད་ནམས་རྒྱས་པར་མཛོད། །ཡུལ་ས་གཞིའི་བདག་པོ་དཀར་པོའི་ཕྱོགས་སྐྱོང་བ་རྣམས། །གླུ་བྲོ་གར་བཞེས་ལ་སྲུང་སྐྱོབས་དང་སྡོང་གྲོགས་མཛོད། །མི་བདག་ལ་འགོ་བའི་ལྷ་ལྔ་དང་སྐྱོབས་པའི་ལྷ། །ཚེ་སྔོན་ནས་འབྲེལ་བའི་བཟང་བྱེད་དང་གྲོགས་བྱེད་ལྷས། །གླུ་བྲོ་གར་བཞེས་ལ་རང་རང་གི་ནུས་སྟོབས་བཞིན། །ཕྲིན་ལས་དང་དངོས་གྲུབ་དུས་འདི་ནས་སྩལ་དུ་གསོལ། །ཆོས་མདོ་སྔགས་བསྟན་པ་ཉི་ཟླ་ལྟར་གསལ་བར་ཤོག །བསྟན་འཛིན་གྱི་སྐྱེས་བུ་སྐར་ཚོགས་ལྟར་རྒྱས་པར་ཤོག །ཡོན་སྦྱོར་བའི་སྦྱིན་བདག་དབྱར་ཚལ་ལྟར་རྒྱས་པར་ཤོག །ཚེ་བསོད་ནམས་ལོངས་སྤྱོད་དབྱར་མཚོ་ལྟར་རྒྱས་པར་ཤོག །འཁོར་རིགས་རྒྱུད་མི་མཐའ་ཆུ་རྒྱུན་བཞིན་རིང་བར་ཤོག །རྟ་གནག་ལུག་རྐང་འགྲོས་ཀླུ་ནོར་ལྟར་འཕེལ་བར་ཤོག །ཞིང་འབྲུ་དྲུག་ལོ་ཏོག་རྩི་ཤིང་བཞིན་རྒྱས་པར་ཤོག །ལྗོངས་ཡུལ་གྲུ་འདི་ཉིད་ལྷ་ཁམས་བཞིན་རྟག་བརྟན་ཤོག །ངག་སྙན་པའི་གླུ་དབྱངས་དབྱར་རྔ་ལྟར་འུ་རུ་རུ། །སེམས་དགའ་བའི་ལྷ་གྲོགས་ཡལ་འདབ་བཞིན་ལྡེམས་སེ་ལྡེམ། །ལུས་མོས་པའི་གར་བསྒྱུར་སྙེ་མ་ལྟར་ཤིགས་སེ་ཤིག །ཉམས་བདེ་བའི་དགའ་སྟོན་རྒྱ་མཚོ་བཞིན་གྱི་ལི་ལི། །རྒྱལ་རོང་གི་ཡུལ་གྲུ་བདེ་སྐྱིད་ཀྱི་དཔལ་ལ་སྤྱོད། །ཡོངས་འགྲོ་བ་འདི་ཀུན་དཔའ་བོ་དང་མཁའ་འགྲོར་གྱུར། །མཐར་བདེ་ཆེན་ཞིང་ལ་ཚོམ་གཅིག་ཏུ་གྲོལ་བར་ཤོག །སེམས་དགའ་སྤྲོའི་ངང་ནས་ཛ་གད་ཀྱི་ཞལ་སྐྱེམས་བཞེས། །ཞེས་པ་འདི་ཡང་མགོ་སྤྲུལ་འཇིགས་རྣམ་པས་བྲིས་པ་དགེ་ཞིང་བཀྲ་ཤིས་པར་གྱུར་ཅིག །མངྒ་ལཾ། ཆང་མཆོད།༄༅། ཆང་མཆོད་ནི། ཨོཾ་ཨཱཿཧཱུྃ་ཧྲཱི༔ ཞལ་སྣོད་ཡེ་ཤེས་ཀ་པ་ལ་ཡི་ནང་། །དྲི་རོ་ཁ་ཏོག་ནུས་བཅུད་ཕུན་སུམ་ཚོགས། །ཡེ་ཤེས་བདུད་རྩིའི་རང་བཞིན་རྣམ་དག་རྫས། །ཟག་མེད་མཆོད་པའི་སྤྲིན་ཕུང་མི་ཟད་གཏེར། །སྤྱི་བོར་རྩ་བ་བརྒྱུད་པའི་བླ་མ་དང་། །སྙིང་གར་ཡི་དམ་ཞི་བའི་དཀྱིལ་འཁོར་ལྷ། །དུང་ཁང་ཁྲག་འཐུང་འབར་བའི་ཁྲོ་བོའི་ཚོགས། །རྩ་གནས་དཔའ་བོ་མཁའ་འགྲོའི་ཚོགས་དང་བཅས། །ཟག་མེད་བདུད་རྩིའི་མཆོད་པ་འདི་འབུལ་བས། །ཚོགས་རྫོགས་སྒྲིབ་དག་འགལ་འཁྲུལ་ཉམས་ཆགས་བྱང་། །རྩ་གནས་བདེ་བ་ཆེན་པོའི་རོས་གང་ཞིང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། སརྦ་པཉྩ་ཨ་མྲྀ་ཏ་ཁ་ཧཱི། ཞེས་པའང་མགོ་སྤྲུལ་བས་སོ།། གཟན་དཀར་རིན་པོ་ཆེའི་ཞབས་བརྟན་བྲོ་གླུ།༄༅། གཟན་དཀར་རིན་པོ་ཆེའི་ཞབས་བརྟན་སྨོན་བྲོ་མི་ཤིགས་ན་དཱའི་སྒྲ་དབྱངས་བཞུགས། ཨེ་མ་ཧོ། མཁའ་སྤྱོད་འོག་མིན་གྱི་ཞིང་བཞུགས་དགའ་རབ་རྗེ། །གངས་ཅན་མཁས་གྲུབ་ཀྱི་གཙུག་རྒྱན་ལྕེ་བཙུན་པ། །པ༵དྨ༵་འབྱུང་གནས་དང་དབྱེར་མེད་མཁྱེན་བརྩེའི་ཞབས། །བྱིན་རླབས་དངོ༵ས་གྲུ༵བ་ཀྱི་གཏེར་མཛོད་རྡོ༵་རྗེ༵་འཆང་། །མོས་གུས་སྙིང་དཀྱིལ་ནས་འབར་ཞིང་གསོལ་བ་འདེབས། །བསྟོད་དབྱངས་བྲོ་གར་དང་སྦྲེལ་བའི་མཆོད་པ་འབུལ། །བདག་སོགས་མཁའ་མཉམ་གྱི་འགྲོ་ལ་བརྩེར་དགོངས་ནས། །ཟག་མེད་རྡོ་རྗེའི་སྐུར་རྟག་ཏུ་བརྟན་བཞུགས་གསོལ། །ལས་ཅན་གདུལ་བྱ་ཀུན་གཅིག་ཀྱང་མ་ལུས་པ། །གང་འདུལ་ཕྲིན་ལས་ཀྱིས་སྨིན་ཅིང་གྲོལ་མཛད་ནས། །ནམ་ཞིག་དཔོན་སློབ་ཀུན་པདྨ་འོད་གླིང་དུ། །མི་འབྲལ་ཚོམ་གཅིག་ཏུ་འཁོད་པར་བྱིན་གྱིས་རློབས། །ཅེས་བྱ་བྲལ་ཆེན་པོའི་ཞབས་བརྟན་བྲོ་ཚིག་འདི་ཡང་གར་དབང་འཇིགས་རྣམ་གྱིས་བྲིས་པའོ།། ཐོག་མའི་ཀློག་སློབ་པ་རྣམས་ཀྱི་ཆེད་དུ་མཛད་པའི་གསོལ་འདེབས།༄༅། ཀུན་མཁྱེན་བསྟན་པའི་བདག་པོ་ལ་གསོལ་བ་འདེབས། །མཁས་པ་བློ་ལྡན་མཆོག་སྲེད་ལ་གསོལ་བ་འདེབས། །འཇམ་དཔལ་སྨྲ་བའི་སེང་གེ་ལ་གསོལ་བ་འདེབས། །དབྱངས་ཅན་ངག་དབང་ལྷ་མོ་ལ་གསོལ་བ་འདེབས། །བདག་ཉིད་སྨྲ་མཁས་ལྗགས་བདེ་བརྗོད་པ་དག །བློ་གྲོས་ཤེས་རབ་མྱུར་དུ་འཕེལ་བ་དང་། །ཐོས་པ་འཛིན་ལ་མི་བརྗེད་གཟུངས་ཐོབ་ཅིང་། །ཆོས་སྤྱོད་སྒྲུབ་ལ་ཐོགས་མེད་འཇུག་པར་ཤོག །ཨ་ར་པ་ཙ་ཅི་ནུས་བཟླ། དང་པོའི་ཀློག་སློབ་པ་རྣམས་ལ་ཕན་ཕྱིར་མགོ་སྤྲུལ་བས་བྲིས་པའོ།། ཆང་བུ་རྒྱུན་བསྔོ།༄༅། ཆང་བུ་རྒྱུན་བསྔོ་བགེགས་ཚོགས་མྱུར་གྲོལ་བཞུགས། སྐྱབས་གནས་ཀུན་འདུས་བླ་མ་ལ། །སྐྱབས་སུ་མཆིའོ་ཐུགས་རྗེས་ཟུངས། །བགེགས་ཚོགས་མ་ལུས་ཕྱམ་གཅིག་ཏུ། །སངས་རྒྱས་གོ་འཕང་མྱུར་ཐོབ་ཤོག །རང་ཉིད་ཁ་སར་པ་ཎིར་གསལ། །ཆང་བུ་འདོད་དགུའི་གཏེར་དུ་གྱུར། །ཨོཾ་ཨཱཿཧཱུྃ།དང་། སཾ་བྷ་ར་དང་། དེ་བཞིན་གཤེགས་པ་བཞིའི་མཚན་བརྗོད་ལ། ཆང་བུ་ལོངས་སྤྱོད་ཀུན་ལྡན་འདི། །བགེགས་རིགས་སྟོང་ཕྲག་བརྒྱད་ཅུ་དང་། །བདུད་ཆེན་བཞི་དང་གདོན་བཅོ་ལྔ་། །ཕྲོག་མ་བུ་དང་བཅས་པ་སོགས། །གཞི་ཐོག་འཁྲུལ་ནས་ད་ལྟའི་བར། །གྲོགས་དང་ཁྱིམ་ཐབས་གནས་ཁང་ཞིང་། །གསེར་དངུལ་གཡུ་དང་བྱི་རུ་ཤེལ། །རྟ་གླང་གནག་ལུག་དཀོར་ཆེ་ཕྲ། །བརྐུས་ཕྲོག་བཅོམ་བརླག་བརྡེག་བསད་དང་། །ཞོན་བཀལ་བུ་ལོན་མ་འཁོར་བ། །ལན་ཆགས་ཤ་འཁོན་གཉེར་བ་རྣམས། །ཐམས་ཅད་ངོམས་ཤིང་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །ཤ་འཁོན་སྡིག་སྒྲིབ་དག་གྱུར་ཅིག །ཐམས་ཅད་མྱུར་དུ་འཁོར་བ་ལས། །ཐར་ནས་མངོན་སངས་རྒྱས་གྱུར་ཅིག །ཨོཾ་ཨུཥྩི་ཊ་པནྟྲ་ཨ་ཤི་བྷྱ་སྭཱཧཱ། ཆོས་རྣམས་ཐམས་ཅད༴སོགས། སྦྱིན་པ་རྒྱ་ཆེན༴སོགས། ཞེས་རྒྱུན་གྱི་ཆང་བུ་བསྔོ་ཚུལ་འདི་ཡང་ཀློང་ཆེན་ཡོན་ཏན་རྒྱ་མཚོའི་ངོར་མགོ་སྤྲུལ་ཨ་མྱེས་བྲིས་པ་དགེའོ།། ཆབ་གཏོར་བསྡུས་པ།སྐུ་གསུམ་དགོངས་མཛོད་ཀྱི་ཆ་ལག་ཆབ་གཏོར་འདོད་དགུའི་ཆར་འབེབས་བཞུགས། སྐྱབས་ཀུན་ཡོངས་འདུས་བླ་མར་སྐྱབས་སུ་མཆི། །འགྲོ་ཀུན་བདེ་ཆེན་གནས་ལ་འགོད་པར་བགྱི། །རྒྱུ་འབྲས་དགེ་ལྡན་མི་དགེའི་རྒྱུ་འབྲས་སྟོང་། །བདེ་དགའི་དཔལ་འབྱོར་མཉམ་པ་ཉིད་རྟོགས་ཤོག །ཧྲཱིཿ བདག་ཉིད་ཐུགས་རྗེ་ཆེན་པོའི་སྐུར་གསལ་བའི། །ཕྱག་སོར་རྩེ་ནས་བདུད་རྩིའི་རྒྱུན་བབས་པས། །ཆུ་རྒྱུན་ཟག་མེད་ཡེ་ཤེས་བདུད་རྩིའི་མཚོ། །ཀུན་བཟང་མཆོད་སྦྱིན་སྤྲིན་ཚོགས་འཕྲོ་བར་གྱུར། །ཨོཾ་ཨཱཿཧཱུྃ། ལན་གསུམ། སྐུ་གསུམ་ཡོངས་འདུས་རྩ་བརྒྱུད་བླ་མ་མཆོད། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་མཆོད། །དཀོན་མཆོག་སྲི་ཞུའི་མགྲོན་ལ་མཆོད་པ་འབུལ། །འགྲོ་ཀུན་ཚོགས་རྫོགས་སྒྲིབ་དག་སངས་རྒྱས་ཤོག །མགོན་པོ་ཡོན་ཏན་མགྲོན་ལ་མཆོད་པ་འབུལ། །དངོས་གྲུབ་ཕྲིན་ལས་འདོད་དགུ་འབྱུང་བར་ཤོག །བགེགས་རིགས་ལན་ཆགས་མགྲོན་རྣམས་ཀུན་ལ་བསྔོ། །བུ་ལོན་ལན་ཆགས་ཤ་འཁོན་བྱང་གྱུར་ཅིག །རིགས་དྲུག་སེམས་ཅན་སྙིང་རྗེའི་མགྲོན་ལ་བསྔོ། །ཐམས་ཅད་མྱུར་དུ་སྐུ་གསུམ་ཐོབ་པར་ཤོག །ཁས་ཞན་དབང་ཆུང་མ་ཐོབ་མ་ནུས་མགྲོན། །ཐམས་ཅད་མཉེས་ཚིམ་བདེ་སྐྱིད་ལྡན་པར་ཤོག །བཟའ་བཏུང་ལོངས་སྤྱོད་མི་དབང་འཇུར་གེགས་རྣམས། །བྱིན་རླབས་ཆུ་རྒྱུན་ལྷག་མས་མཉེས་ཚིམ་ནས། །འདོད་ཞེན་སེར་སྣའི་རྒྱུ་འབྲས་ལྷག་མེད་སྟོང་། །ཞེན་མེད་ནམ་མཁའ་མཛོད་ལ་ལོངས་སྤྱོད་ཤོག །ཨོཾ་ཡེ་དྷརྨ་ཧེ་ཏུ་པྲ་བྷ་ཝ་ཧེ་ཏུནྟེ། ཥཱནྟ་ཐཱ་ག་ཏོ་ཧྱ་བ་དཏ་ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བ་དི་མ་ཧཱ་ཤྲ་མ་ཎཿཡེ་སྭཱ་ཧཱ། ཨོཾ་བཛྲ་མུཿ ཡ་ཧི་གཙྪ། མཆོད་སྦྱིན་རྒྱ་ཆེན་བགྱིས་པ་འདི་ཡི་མཐུས། །འགྲོ་རྣམས་མ་ལུས་མྱུར་དུ་སངས་རྒྱས་ཤོག །སྔོན་ཚེ་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་དགུའི་ཚོགས་རྣམས་སྦྱིན་པས་གྲོལ་གྱུར་ཅིག །ཆུ་རྣམས་མཆོད་སྦྱིན་དུ་བྱེད་པའི་ལམ་ཁྱེར་འདོད་དགུའི་ཆར་འབེབས་ཞེས་བྱ་བ་འདི་ཡང་མགོ་སྤྲུལ་པས་སོ།། བདེན་བརྗོད་སྤྱི་འགྲོས།༄༅། བདེན་བརྗོད་སྤྱི་འགྲོས་གདོན་བགེགས་མཐར་བྱེད་བཞུགས། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། ཕྱོགས་བཅུ་དུས་གསུམ་གྱི་སངས་རྒྱས་རྣམས་ཀྱི་བཀའ་བདེན་པ་དང་། ལུང་དང་རྟོགས་པས་བསྡུས་པའི་དམ་པའི་ཆོས་རྣམས་ཀྱི་བཀའ་བདེན་པ་དང་། ཐེག་པ་གསུམ་ལ་གནས་པའི་འཕགས་པའི་དགེ་འདུན་རྣམས་ཀྱི་བཀའ་བདེན་པ་དང་། རྒྱུད་སྡེ་བཞི་དང་ཐེག་པ་དགུས་བསྡུས་པའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། གནས་ཡུལ་དུར་ཁྲོད་ཀྱི་མཁའ་འགྲོ་དང་། དཔའ་བོ་དཔའ་མོ་ཆོས་སྐྱོང་བའི་སྲུང་མ་དང་བཅས་པ་རྣམས་ཀྱི་བཀའ་བདེན་པ་དང་། དོན་དམ་ཆོས་ཉིད་འགྱུར་བ་མེད་པ་དང་། ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པ་དང་། ཞེས་སྤྱི་འགྲོས་ཀྱི་མགོར་སྦྱར་ནས། ཅུང་ཟད་རྒྱས་པར་འདོད་ན། ཁྱད་པར་དུ་གནས་འོག་མིན་དག་པ་སྐུ་གསུམ་གྱི་ཞིང་ཁམས་ནས། ཆོས་སྐུ་ཀུན་བཟང་ཡབ་ཡུམ། དྲུག་པ་རྡོ་རྗེ་འཆང་ཆེན། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་ཤཱཀྱ་ཐུབ་པ། རྒྱལ་སྲས་རིགས་གསུམ་མགོན་པོ། རིག་འཛིན་དགའ་རབ་རྡོ་རྗེ། མཁའ་འགྲོ་ལས་ཀྱི་དབང་མོ། མཁས་པ་དཔལ་གྱི་སེང་གེ། གྲུབ་དབང་རིག་འཛིན་མཆོག་བརྒྱད། འཕགས་ཡུལ་རྒྱན་དྲུག་མཆོག་གཉིས། གྲུབ་ཆེན་བརྒྱད་ཅུ་རྩ་བཞི། མཁན་སློབ་ཉི་ཟླ་རྣམ་གཉིས། བོད་ཀྱི་རྗེ་འབངས་ཉེར་ལྔ། ལོ་པཎ་བརྒྱ་རྩ་ཟུང་འབྲེལ། བཀའ་བབ་སོ་ཟུར་གནུབས་གསུམ། །གཏེར་སྟོན་མཆོག་གཉིས་གླིང་པ་བརྒྱད་ལ་སོགས་པའི་རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ནས་བརྒྱུད་པ། བཀའ་བབ་ལུང་བསྟན་བརྒྱུད་པ། གཏད་རྒྱ་སྨོན་ལམ་བརྒྱུད་པ། ཤོག་སེར་ཚིག་གི་བརྒྱུད་པ། སྨིན་བྱེད་དབང་གི་བརྒྱུད་པ། གྲོལ་བྱེད་ལམ་གྱི་བརྒྱུད་པ། བྱིན་རླབས་དོན་གྱི་བརྒྱུད་པ་སྟེ་དགུ་ལྡན་བརྒྱུད་པའི་བླ་མ། བཀའ་དྲིན་གསུམ་ལྡན་རྩ་བའི་བླ་མ་རིན་པོ་ཆེའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བདེན་པ་དང་། པདྨ་འོད་ཀྱི་གཞལ་ཡས་ཆེན་པོ་ནས། བླ་མ་སྐུ་གསུམ་ཡོངས་འདུས་རྒྱལ་དབང་པདྨ་འོད་འབར། རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེ་ཆེན་དབང་དྲག་རོལ་པའི་གཞལ་ཡས་ཆེན་པོ་ནས། འཇམ་དཔལ་སྐུ། པདྨ་གསུང་། ཡང་དག་ཐུགས། བདུད་རྩི་ཡོན་ཏན། ཕུར་པ་ཕྲིན་ལས། མ་མོ་རྦོད་གཏོང་། རིག་འཛིན་སློབ་དཔོན། འཇིག་རྟེན་མཆོད་བསྟོད། དམོད་པ་དྲག་སྔགས་ཏེ་སྒྲུབ་སྡེ་ཆེན་པོ་དགུ་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས། བདུན་བརྒྱ་ཉེར་ལྔ་སྤྲུལ་པ་ཡང་སྤྲུལ་བཀའ་སྡོད་ཕྱག་བརྙན་དང་བཅས་པ་རྣམས་ཀྱི་བཀའ་བདེན་པ་དང་། མཁའ་སྤྱོད་ཨོ་རྒྱན་གསང་ཆེན་རོལ་པའི་དུར་ཁྲོད་ནས། ཌཱཀྐི་ཕག་ཁྲོས་སེང་གསུམ། སྤྲུལ་པའི་མཁའ་འགྲོ་སྡེ་ལྔ། ཡེ་ཤེས་དབྱིངས་ཀྱི་མཁའ་འགྲོ། འཇིག་རྟེན་ལས་ཀྱི་མཁའ་འགྲོ། འབུམ་ཕྲག་ཡངས་པའི་ཌཱཀྐི་འཁོར་ཚོགས་ཡང་འཁོར་དང་བཅས་པ་རྣམས་ཀྱི་བདེན་པ་དང་། བཀའ་གསང་དམ་ཚིག་གཉན་པོའི་ཕོ་བྲང་ནས། རྒྱུད་མགོན་ལེགས་ལྡན་ནག་པོ་དང་། ཕྱག་བཞི་ཡེ་ཤེས་ཀྱི་མགོན་པོ་ལ་སོགས་པའི་མགོན་པོ་ཕོ་རྒྱུད། སྔགས་སྲུང་ཨེ་ཀ་ཛ་ཏི་དང་། དཔལ་ལྡན་སྔགས་ཀྱི་བདག་མོ་ལ་སོགས་པའི་ལྷ་མོ་མོ་རྒྱུད། དྲང་སྲོང་གཟའ་མཆོག་ཆེན་པོ་དང་། དམ་ཅན་རྡོ་རྗེ་ལེགས་པ་ལ་སོགས་སྔགས་བདག་དྲེགས་པའི་ཚོགས་དང་བཅས་པའི་བདེན་པ་དང་། དམ་ལྡན་རྣལ་འབྱོར་པ་བདག་གི་སྔགས་དང་ཕྱག་རྒྱ་ཏིང་ངེ་འཛིན་ཆོས་ཉིད་འགྱུར་བ་མེད་པ་ཆོས་ཅན་རྒྱུ་འབྲས་ལྷག་བསམ་རྣམ་དག་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། ཞེས་སམ། ༧ ཅུང་ཟད་བསྡུ་བར་འདོད་ན། ཁྱད་པར་དུ་ཆོས་སྐུ་ཀུན་ཏུ་བཟང་པོ་ནས་གསུམ་ལྡན་རྩ་བའི་བླ་མའི་བར་དུ་བརྒྱུད་པའི་རྫོགས་ཆེན་བརྒྱུད་པའི་བླ་མ། སྙིང་ཐིག་བརྒྱུད་པའི་བླ་མ། ཕྱག་ཆེན་བརྒྱུད་པའི་བླ་མ། སྦྱོར་དྲུག་བརྒྱུད་པའི་བླ་མ། དབུ་མ་བརྒྱུད་པའི་བླ་མ། དབུ་སེམས་བརྒྱུད་པའི་བླ་མ། ཞི་གཅོད་བརྒྱུད་པའི་བླ་མ། བཀའ་མ་བརྒྱུད་པའི་བླ་མ། དག་སྣང་བརྒྱུད་པའི་བླ་མ། མཁས་གྲུབ་རིག་འཛིན་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ཡི་དམ་གུ་རུ་ཞི་དྲག དགོངས་འདུས་དཀྱིལ་འཁོར་དགུ་ལྡན། བདེ་གཤེགས་སྒྲུབ་པ་བཀའ་བརྒྱད། བདུད་འདུལ་རྡོ་རྗེ་གཞོན་ནུ་ལ་སོགས་པའི་རྒྱུད་སྡེ་ཆེན་པོ་བཞི་དང་། ཐེག་པ་རིམ་པ་དགུས་བསྡུས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། མཁའ་འགྲོ་རྡོ་རྗེ་ཕག་མོ། བདུད་འདུལ་ཁྲོས་མ་ལྷ་ལྔ། ཌཱཀྐི་སེང་གདོང་དམར་ནག སྤྲུལ་པའི་མཁའ་འགྲོ་སྡེ་ལྔ་ལ་སོགས་པའི་ཡེ་ཤེས་དང་འཇིག་རྟེན་གྱི་མ་སྲིང་མཁའ་འགྲོ་རྒྱ་མཚོའི་ཚོགས་འཁོར་དང་བཅས་པ་རྣམས་ཀྱི་བཀའ་བདེན་པ་དང་། མགོན་པོ་ཕོ་རྒྱུད། ལྷ་མོ་མོ་རྒྱུད། ལས་བྱེད་དྲེགས་ཚོགས་ཡེ་ཤེས་ཀྱི་སྤྱན་དང་ལྡན་པ། རྫུ་འཕྲུལ་གྱི་ཤུགས་དང་ལྡན་པ། མཐུ་སྟོབས་ཀྱི་རྩལ་དང་ལྡན་པའི་བསྲུང་མ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ཀྱི་བདེན་པ་དང་། རྣལ་འབྱོར་བ་བདག་གི་ལྷ་སྔགས་ཏིང་འཛིན་དང་བཅས་པའི་བདེན་པའི་སྟོབས་ཀྱིས། ཞེས་སམ། ༧ ཤིན་ཏུ་བསྡུ་ན། ཁྱད་པར་དུ་བརྒྱུད་གསུམ་རིག་འཛིན་བླ་མ། ཡི་དམ་བདེ་གཤེགས་ཞི་ཁྲོ། གནས་གསུམ་དཔའ་བོ་མཁའ་འགྲོ། རྡོ་རྗེ་ཆོས་སྐྱོང་བའི་བསྲུང་མ། བཀའ་སྡོད་དམ་ཅན་རྒྱ་མཚོ། ནོར་ལྷ་གཏེར་བདག ཕྱོགས་སྐྱོང་ཞིང་སྐྱོང་། དཀར་ཕྱོགས་སྐྱོང་བའི་ཚོགས་དང་བཅས་པ་རྣམས་ཀྱི་བདེན་པ་དང་། ལྷ་སྔགས་ཕྱག་རྒྱ་ཏིང་ངེ་འཛིན་གྱི་བདེན་པ་དང་། བདེན་པ་ཆེན་པོའི་མཐུས། ཞེས་སོགས་སྦྱོར་ལ། ༧ གང་ལྟར་ཡང་མཇུག་ཏུ། དེང་འདིར་བསྲུང་བྱ་མི་ནོར་འཁོར་དང་བཅས་པ་རྣམས་ཀྱི་ལུས་སྲོག་ཚེ་ལ་བར་དུ་གཅོད་པ། དབང་ཐང་གི་རོལ་མཚོ་དཀྲུག་པ། ཀླུང་རྟའི་རི་བོ་སྒུལ་བ། བསོད་ནམས་ཀྱི་ཉི་ཟླ་བསྒྲིབ་པ། སྙན་གྲགས་ཀྱི་བ་དན་དབྲལ་བ། བླ་ཚེ་སྲོག་དབུགས་ལ་འཇབ་པར་བྱེད་པའི་ལྷ་གདོན་ཕོ་མོ་ལ་སོགས་པའི་གདོན་རིགས་སུམ་བརྒྱ་དྲུག་ཅུ། བྱི་ན་ཡ་ག་ལ་སོགས་པའི་བགེགས་རིགས་སྟོང་ཕྲག་བརྒྱད་ཅུ། ཛ་མི་ཀ་ལ་སོགས་པའི་བྱིས་པའི་གདོན་ཆེན་བཅོ་ལྔ། གཟའ་ཀླུ་རྒྱལ་བསེན། གྲི་བོ་གྲི་མོ། ཤི་འདྲེ་གསོན་འདྲེ། དམ་སྲི་ཐེའུ་རིང་། སྔར་ཡོད་ཀྱི་སྔར་འདྲེ། གསར་བྱུང་གི་ཕྱིར་འདྲེ། ལྷ་སྲུང་གི་རྒབ་འདྲེ། གློ་བུར་གྱི་གཤེད་འཁྱམས། ནོར་རྫས་ཀྱི་གོད་འདྲེ་ལ་སོགས་པ། སྔོན་གྱི་ལས་དང་། འཕྲལ་གྱི་རྐྱེན་གྱིས་བསླངས་པའི་གདོན་བགེགས་འབྱུང་པོའི་རིགས་སུ་གྱུར་པ་ཐམས་ཅད་ཀྱིས། ༧ མདོས་གཏོང་གི་སྐབས་ཡིན་ན། ལོངས་སྤྱོད་མདོས་ཆེན་རབ་འབྱམས་ནམ་མཁའི་དབྱིངས་རྒྱས་པར་འགེང་བ་འདི་བཞེས་ལ། ཞེས་དང་། ༧ གླུད་དང་ཆང་བུ་སོགས་ཀྱི་སྐབས་སུ། འདོད་ཡོན་གླུད་ཀྱི་གཏོར་མ་རྒྱ་ཆེན་པོ་བྱིན་པ་འདིས་མགུ་ཞིང་ཚིམ་པར་གྱིས་ལ། ཞེས་དང་། ༧ བཀའ་བསྒོ་བྱེད་པའི་སྐབས་ཡིན་ན། སྐུ་གསུམ་རྒྱལ་བ་ཞི་ཁྲོ་རབ་འབྱམས་ཀྱི་ཐུགས་རྗེ་དང་ཡེ་ཤེས། ཕྲིན་ལས་དང་ནུས་སྟོབས་ཐམས་ཅད་གཅིག་ཏུ་འདུས་པའི་བདག་ཉིད་རྡོ་རྗེ་ཁྲོ་རྒྱལ་ཆེན་པོའི་བཀའ་ཐོས་པ་ཙམ་གྱིས། ཞེས་སྦྱར་ལ། ༧ གང་ལྟར་ཡང་མཇུག་ཏུ། ས་ཡི་ཕྱོགས་འདིར་མ་གནས་པར་གཞན་དུ་དེངས་ཤིག གལ་ཏེ་མི་འགྲོ་ན་ཡེ་ཤེས་ཀྱི་ཁྲོ་བོ་དང་མཚོན་ཆ། མེ་དཔུང་འབར་བའི་ཚོགས་རབ་ཏུ་སྤྲོས་ཏེ་བགེགས་ཚོགས་ཁྱེད་རྣམས་ཀྱི་མགོ་བོ་ཚལ་བ་བརྒྱར་འགས་ཤིང་། ལུས་དུམ་བུ་སྟོང་དུ་གཏོང་བར་འགྱུར་ཏ་རེ། ཧཱུྃ་ཧཱུྃ་ཧཱུྃ་བི་ཤྭོ་བཛྲ༴སོགས། གུ་གུལ་གྱིས་བདུག་ཅིང་ཡུངས་དཀར་སོགས་ཀྱིས་བྲབ། ཡི་དམ་གང་ཡིན་གྱི་རྩ་སྔགས་དང་ཧཱུྃ་བཞིའི་སྔགས་སོགས་བརྗོད་ཅིང་། དེ་ནས། བགེགས་ཚོགས་ལོག་པར་འདྲེན་པ་ཐམས་ཅད་ཕྱིར་བསྐྲད། ཁྲོ་མཚོན་མེ་དཔུང་གི་ཚོགས་རྣམས་ཚུར་འདུས་པ་ལས། བསྲུང་བའི་གུར་ཁང་ཡངས་ཤིང་རྒྱ་ཆེ་བར་གྱུར་བར་བསམ་ལ་བསྲུང་འཁོར་དམིགས་བསལ་ཡོད་ན་དེ་དང་། མེད་ན་འདི་ལྟར་བརྗོད། ཧྲཱིཿ ཕྱི་སྣོད་གཞལ་ཡས་ནང་བཅུད་སྐུ་གསུམ་ལྷ། །དག་པ་རབ་འབྱམས་བསྲུང་གུར་འགྱུར་བ་མེད། །མཚམས་ཀྱི་དཀྱིལ་འཁོར་ཡེ་ནས་ལྷུན་གྱིས་གྲུབ། །གློ་བུར་འཁྲུལ་རྟོགས་བདུད་བགེགས་དབྱིངས་སུ་སྒྲོལ། ཨོཾ་ཨཱཿཧཱུྃ་བཛྲ་རཀྵ་རཀྵ་ཧཱུྃ། སོགས་བསྲུང་བའི་ཚིགས་ཅི་རིགས་པ་བརྗོད་པར་བྱའོ།། ཞེས་པའང་རྡོ་རྗེའི་མཆེད་གྲོགས་དམ་པ་འཇམ་དབྱངས་བློ་འཕེལ་ནས་ཡང་ཡང་བསྐུལ་ངོར། མགོ་སྤྲུལ་གྱིས་བྲིས་པ་ལ་སླར་ཡང་འོད་ཟེར་མཐའ་ཡས་ཀྱི་མོས་ངོར་མགོ་མཇུག་གི་ཚིག་ཚོགས་ཁ་ཤས་བསྣན་ནས་བྲིས་པའོ།། ཡིག་དྲུག་བསྐུལ་མ་མེས་དབོན་དགྱེས་གླུ།༄༅། ཡིག་དྲུག་བསྐུལ་མ་མེས་དབོན་དགྱེས་གླུ་བཞུགས། གནས་འདིར་ལྷན་ཅིག་འཚོགས་པའི་ཡོན་མཆོད་ཀུན། །མ་གྱུར་ནམ་མཁའི་མཐའ་མཉམ་སེམས་ཅན་དང་། །ཁྱད་པར་དམིགས་ཡུལ་ཚོགས་རྫོགས་སྒྲིབ་དག་ཕྱིར། །གསུང་མཆོག་ཡིག་དྲུག་ཛཔ྄་དབྱངས་སྒྲོགས་པར་ཞུ། །ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ་ཧྲཱིཿ གང་ཞིག་དྲན་པས་སྡུག་བསྔལ་ཀུན་སེལ་ཞིང་། །གུས་པས་བརྟེན་ན་བླ་མེད་མཆོག་སྩོལ་བ། །དབང་རྒྱུད་མན་ངག་དོན་སྟོན་ལ་སོགས་པའི། །རྩ་བའི་བླ་མ་རྣམས་ལ་གསོལ་བ་འདེབས།། ༴༴ དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །བསྐལ་བ་སྟོང་དུ་ཚོགས་བསགས་སྒྲིབ་གཉིས་སྦྱངས། །སྡེ་སྣོད་གསུམ་སོགས་ཆོས་ཀྱི་འཁོར་ལོ་བསྐོར། །སངས་རྒྱས་ཤཱཀྱ་ཐུབ་པར་གསོལ་བ་འདེབས།། ༴༴ སེམས་ཅན་དོན་ལ་ཐུགས་རྗེའི་སྤྱན་རས་གཟིགས། །འགྲོ་དོན་དམིགས་མེད་ཕྱག་སྟོང་སྤྱན་སྟོང་སྤྲུལ། །སངས་རྒྱས་རབ་བདུན་བདེ་གཤེགས་བཅུ་གཅིག་ཞལ། །ཐུགས་རྗེ་ཆེན་པོ་ཉིད་ལ་གསོལ་བ་འདེབས།། ༴༴ ཆོས་དབྱིངས་ཡེ་ཤེས་ཆེ་ལ་མངའ་བརྙེས་པ། །དུས་གསུམ་བདེ་གཤེགས་རྒྱལ་བ་སྲས་བཅས་ཀྱི། །ཐབས་དང་ཤེས་རབ་གཉིས་མེད་ཡུམ་གྱི་ཚུལ། །ལྷ་མོ་ཡིག་དྲུག་མ་ལ་གསོལ་བ་འདེབས།། ༴༴ འགྲོ་བ་ཐུགས་རྗེས་སྒྲོལ་བར་དམ་བཅས་ནས། །ལྷ་མོའི་ཚུལ་གྱིས་འཇིགས་པ་བརྒྱད་ལས་སྐྱོབས། །ཆགས་པའི་ཚུལ་གྱིས་ཐུགས་རྗེ་ཆེན་པོའི་ཡུམ། །ལྷ་མོ་སྒྲོལ་མ་ཉིད་ལ་གསོལ་བ་འདེབས།། ༴༴ ཡེ་ཤེས་རིག་པ་ཉིད་ལས་བསྐྱེད་པའི་ལྷ། །འགྲོ་བ་འདུལ་ཕྱིར་རྟགས་ཀྱི་སྐུར་བསྟན་ནས། །སེམས་ཅན་ཀུན་གྱི་རེ་བ་སྐོང་མཛད་པ། །སྲས་པོ་ནོར་བུ་འཛིན་ལ་གསོལ་བ་འདེབས།། ༴༴ ཆོས་ཉིད་དབྱིངས་ལས་རྟགས་ཀྱི་ལྷ་མོའི་སྐུ། །བུད་མེད་གཟུགས་ཀྱིས་འགྲོ་བ་འདུལ་མཛད་ཅིང་། །འཁོར་བ་དབང་བསྡུད་ཐུགས་རྗེས་འཛིན་མཛད་པའི། །སྲས་མོ་རིགས་སྔགས་འཛིན་ལ་གསོལ་བ་འདེབས།། ༴༴ ཐུགས་རྗེའི་སྤྲུལ་པ་སྣ་ཚོགས་ཐབས་ལ་མཁས། །འགྲོ་དྲུག་གནས་སུ་ཐུབ་དྲུག་སྐུར་སྤྲུལ་ནས། །གང་ལ་གང་འདུལ་དེ་ལ་དེ་འདུལ་མཛད། །སྤྲུལ་སྐུ་ཐུབ་པ་དྲུག་ལ་གསོལ་བ་འདེབས།། ༴༴ ཆོས་རྒྱལ་མེས་དབོན་གསུམ་དང་པདྨ་འབྱུང་། །བཱི་མ་མི་ཏྲ་མཁན་ཆེན་ཞི་བ་འཚོ། །བཻ་རོ་ལ་སོགས་རྗེ་འབངས་མཁས་གྲུབ་སོགས། །བསྟན་འཛིན་བརྒྱུད་པར་བཅས་ལ་གསོལ་བ་འདེབས།། ༴༴ ཡི་གེ་དྲུག་མ་ཐུགས་རྗེས་སྤྲུལ་པའི་སྐུ། །འགྲོ་དྲུག་སྒྲིབ་སྦྱོང་འཁོར་བའི་གཡང་ས་གཅོད། །བྱང་ཆུབ་ལམ་འདྲེན་སྐུ་གསུམ་ས་ལ་འགོད། །སྙིང་པོ་ཡི་གེ་དྲུག་ལ་གསོལ་བ་འདེབས།། ༴༴ སྒོ་གསུམ་འཁྲུལ་བའི་རྟོག་ཚོགས་དབྱིངས་སུ་དག །མ་འཁྲུལ་ལྷ་སྔགས་ཡེ་ཤེས་རོལ་བར་རྫོགས། །གྲོལ་འཁྲུལ་བློ་འདས་སྐུ་གསུམ་ངོ་བོར་སྨིན། །འཕགས་པའི་གསང་བ་གསུམ་དང་དབྱེར་མེད་ཤོག །༴༴ བདེ་གཤེགས་རིགས་དྲུག་གི་གསུང་སྤྲུལ་ཡི་གེ་དྲུག །ཉོན་མོངས་རྣམ་དྲུག་སྦྱོང་རིགས་དྲུག་སྡུག་བསྔལ་སེལ། ། ༴༴ འགྲོ་དྲུག་སྐྱེ་རྒྱུན་གཅོད་ཕ་རོལ་ཕྱིན་དྲུག་རྫོགས། །ཡེ་ཤེས་རྣམ་དྲུག་འདྲེས་སྐུ་དྲུག་གོ་འཕང་སྩོལ། །༴༴ མགོན་པོ་སྤྱན་རས་གཟིགས་དེ་ལྟར་ངོ་མཚར་ཆེ། །མ་ཎི་ཡི་གེ་དྲུག་འདི་ལྟར་བྱིན་རླབས་ཆེ། །༴༴ ཀུ་མུད་གཅིག་ཉིད་ལས་ས་བོན་གྲངས་མེད་འཕེལ། །དཔག་བསམ་ཤིང་ཆེན་རེར་ལོ་འབྲས་གྲངས་མེད་འཕེལ། །༴༴ རི་བོ་གཅིག་ལ་ཡང་རྩྭ་རྩི་གྲངས་མེད་འཕེལ། །རྒྱ་མཚོ་ཆེན་པོ་ལས་ཆུ་ཕྲན་གྲངས་མེད་འཕེལ། །༴༴ དེ་རྣམས་ཐམས་ཅད་ལས་མ་ཎིའི་ཡོན་ཏན་འཕེལ། །འདིར་འདུས་སྐལ་ལྡན་ཀུན་མ་ཎི་པདྨེ་སྒྲོངས། །༴༴ ས་ལུ་འབྲས་ཀྱི་ཞིང་མ་བཏབ་མ་རྨོས་འཁྲུངས། །འདོད་འཇོའི་བ་མོ་ལས་ཅི་བསམ་བཞོས་པས་འཇོ། །༴༴ དཔག་བསམ་ཤིང་ཆེན་ལ་དགོས་འདོད་ཐམས་ཅད་སྐྱེ། །ཡིད་བཞིན་ནོར་བུ་ལས་གསོལ་བ་གང་བཏབ་འབྱུང་། །༴༴ དེ་རྣམས་ཐམས་ཅད་ལས་མ་ཎིའི་ཕན་ཡོན་ཆེ། །འདིར་འདུས་སྐལ་ལྡན་ཀུན་མ་ཎི་པདྨེ་སྒྲོངས། །༴༴ བར་སྣང་སྦྲང་ཆར་གྱི་ཟེགས་མ་གྲངས་ཀྱིས་ཆོད། །གླིང་བཞིའི་འབྲུ་དྲུག་ཀུན་བགྲང་ན་གྲངས་ཀྱིས་ཆོད། །༴༴ ས་ཆེན་སྲང་ཚད་ལ་གཞལ་ཡང་གྲངས་ཀྱིས་ཆོད། །རྒྱ་མཚོ་ཐིགས་པ་རེར་བགྲང་ཡང་གྲངས་ཀྱིས་ཆོད། །༴༴ མ་ཎིའི་ཡོན་ཏན་ལ་བགྲང་ཡང་ཟད་མཐའ་མེད། ། འདིར་འདུས་སྐལ་ལྡན་ཀུན་མ་ཎི་པདྨེ་སྒྲོངས། །༴༴ རྡོ་རྗེ་ལྕགས་ཀྱི་རི་ཀ་ཤིས་ཕྱིས་ཀྱང་འཛད། །གངྒའི་བྱེ་མ་ཀུན་ཏི་ཏོས་གཏོར་ཀྱང་འཛད། །༴༴ བྱེའུ་ཟིན་ཏོའི་སྒྲོས་གཏོར་ན་རྒྱ་མཚོ་འཛད། །སྐྱི་སེར་རླུང་རེག་གིས་གླིང་བཞི་རིར་བཅས་འཛད། །༴༴ མ་ཎིའི་ཡོན་ཏན་ལ་ཟད་པ་མི་སྲིད་པས། །གསུང་མཆོག་ཡིག་དྲུག་གི་སྒྲ་དབྱངས་སྒྲོག་པར་ཞུ། །༴༴ འདིས་མཚོན་འཁོར་གསུམ་ཡོངས་དག་དགེ་བ་ཀུན། །མ་གྱུར་ཁམས་གསུམ་སྲིད་པའི་འགྲོ་ལ་བསྔོ། །དག་པ་སྐུ་གསུམ་ཞིང་མཆོག་པོ་ཏ་ལར། །རྣམ་གསུམ་དག་པའི་འཁོར་གྱི་གྲལ་འཁོད་ཤོག །༴༴ ཕྱི་སྣོད་རྣམ་དག་བདེ་སྐྱིད་དཔལ་ཡོན་བརྡལ། །མཁའ་སྤྱོད་གཞལ་ཡས་འོད་ལྔ་ཟངས་ཐལ་གསལ། །ནང་བཅུད་དག་པ་ས་བཅུའི་བྱང་སེམས་ཀྱིས། །ཡོངས་གང་རི་བོ་ཏ་ལར་སྐྱེ་བར་ཤོག །༴༴ སྣང་ཚད་སྤྱན་རས་གཟིགས་ཀྱི་དཀྱིལ་འཁོར་ལྷ། །གྲགས་ཚད་མ་ཎི་པདྨེ་རྡོ་རྗེའི་སྒྲ། །དྲན་ཚད་རང་རིག་ཡེ་ཤེས་འོད་གསལ་བ། །ཞིང་མཆོག་རི་བོ་ཏ་ལར་སྐྱེ་བར་ཤོག །༴༴ འབྱུང་ལྔའི་མིང་མེད་ཡེ་ཤེས་རང་མདངས་གསལ། །ཉིན་མཚན་མིང་མེད་ཆོས་ཀྱི་སྣང་བས་ཁྱབ། །སྐྱེ་འཆིའི་མིང་མེད་པདྨོ་ལས་འཁྲུངས་པའི། །ཞིང་མཆོག་རི་བོ་ཏ་ལར་སྐྱེ་བར་ཤོག །༴༴ ཟས་གཞན་མི་དམིགས་འཆི་མེད་བདུད་རྩིའི་ཟས། །སྐོམ་གཞན་མི་དམིགས་བདེ་ཆེན་རྒྱུན་བཟང་འཐུང་། །གོས་གཞན་མི་དམིགས་མཉམ་པ་རིས་མེད་གྱོན། །ཞིང་མཆོག་རི་བོ་ཏ་ལར་སྐྱེ་བར་ཤོག །༴༴ བཞོན་པ་གཞན་མིན་བརྩོན་འགྲུས་མྱུར་མགྱོགས་ལྡན། །དམན་པའི་གྲོགས་མིན་ཐབས་ཤེས་གཉིས་སུ་མེད། །འཁོར་སློབ་དམངས་མིན་རང་བཞིན་ཤར་གྲོལ་མཉམ། །ཞིང་མཆོག་རི་བོ་ཏ་ལར་སྐྱེ་བར་ཤོག །༴༴ རྒྱལ་བློན་གཞན་མེད་འཕགས་པས་ཐུགས་རྗེས་སྐྱོངས། །འདོད་ཡོན་ཏིང་འཛིན་ལོངས་སྤྱོད་འཛད་མེད་འབྱུང་། །བྱ་སྤྱོད་གཞན་མེད་འགྲོ་དོན་ལྷུན་གྱིས་གྲུབ། །ཞིང་མཆོག་རི་བོ་ཏ་ལར་སྐྱེ་བར་ཤོག །༴༴ སྐྱེས་མ་ཐག་ནས་བྱང་ཆུབ་སེམས་མཆོག་བསྐྱེད། །སྦྱང་བགྲོད་མཐར་སོན་ཕ་རོལ་ཕྱིན་བཅུ་རྫོགས། །ས་བཅུ་དབང་བཅུ་སྟོབས་བཅུར་མངའ་དབང་བརྙེས། །འཁོར་བ་དོང་སྤྲུག་འགྲོ་དོན་བྱེད་པར་ཤོག །༴༴ སྤྱན་རས་གཟིགས་མགོན་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཇི་འདྲ་བ། །དེ་འདྲ་ཁོ་ནར་ཐམས་ཅད་འགྱུར་བར་ཤོག །༴༴ ཆོས་སྐུའི་བཀྲ་ཤིས་ངོ་བོ་ཀ་དག་ཀློང་། །ལོངས་སྐུའི་བཀྲ་ཤིས་རང་བཞིན་རང་འོད་གསལ། །སྤྲུལ་སྐུའི་བཀྲ་ཤིས་ཐུགས་རྗེས་ཡོངས་ཁྱབ་པའི། །སྐུ་གསུམ་སྙིང་པོ་མ་ཎི་ལན་གསུམ་གསུང་། །༴༴ ཞེས་ཡིག་དྲུག་བསྐུལ་མ་མེས་དབོན་དགྱེས་གླུ་ཞེས་བྱ་བ་འདི་ཡང་། དགེ་རྒན་བློ་འཕེལ་ནས་བསྐུལ་ངོར། ཆོས་རྒྱལ་སྲོང་བཙན་སྒམ་པོའི་ཞལ་གདམས་མངའ་བདག་ཉང་གི་གཏེར་མ་ནས། མགོ་སྤྲུལ་གྱིས་བཏུས་པའོ།། བདེ་སྨོན་བསྡུས་པ།༄༅། བདེ་ཆེན་ཞིང་གི་སྨོན་ལམ་བསྡུས་པ་བཞུགས། ཨེ་མ་ཧོ། རང་སྣང་རྣམ་དག་ཞིང་ཁམས་བདེ་བ་ཅན། །རང་རིག་དབྱེར་མེད་འོད་དཔག་མེད་པའི་སྐུ། །ངོ་མཚར་རྨད་བྱུང་ཐུགས་རྗེས་འོད་སྟོང་འགྱེད། །ཞིང་ཁམས་རྣམ་དག་ཡིད་འོང་སྐྱེད་མོས་ཚལ། །དཔག་བསམ་ལྗོན་ཤིང་ལོ་འདབ་འབྲས་བུ་བརྒྱན། །མེ་ཏོག་སྣ་ཚོགས་མཛེས་ཤིང་ཡིད་འོང་ལྡན། །སྤོས་ཆུའི་དྲི་བསུང་ཁྲུས་ཀྱི་རྫིང་བུ་རུ། །བྱ་ཚོགས་སྐད་སྙན་སྣ་ཚོགས་སྒྲོགས་པའི་གནས། །དཔལ་འབྱོར་ལོངས་སྤྱོད་འཛད་མེད་རིན་ཆེན་གཏེར། །ང་བདག་འཛིན་མེད་དགོས་འདོད་ལྷུན་གྱིས་གྲུབ། །དབྱངས་སྙན་རོལ་མོ་སྣ་ཚོགས་རྒྱུན་མི་ཆད། །ཞིང་དེར་སྐྱེ་རྒ་ན་འཆིའི་མིང་ཡང་མེད། །ཉོན་མོངས་དགྲ་དང་སྡུག་བསྔལ་ཐོས་མ་མྱོང་། །བདེ་སྐྱིད་ཀུན་ལྡན་ཞིང་དེར་སྐྱེ་བར་ཤོག །དེ་ན་སྤྲུལ་པའི་སངས་རྒྱས་འོད་དཔག་མེད། །འོད་ནི་དཔག་མེད་ཐུགས་རྗེ་ཀུན་ལ་ཁྱབ། །མཚན་དཔེ་རབ་རྫོགས་པདྨ་རཱ་གའི་མདོག །ཞལ་གཅིག་ཕྱག་གཉིས་ཆོས་གོས་རྣམ་གསུམ་གསོལ། །པད་ཟླའི་གདན་ལ་རྡོ་རྗེ་སྐྱིལ་ཀྲུང་བཞུགས། །ཕྱག་གཉིས་མཉམ་བཞག་བཻ་ཌཱུར་ལྷུང་བཟེད་བསྣམས། །ཐུགས་རྗེ་བརྩེ་བའི་སྤྱན་གྱིས་བདག་ལ་གཟིགས། །གཡས་གཡོན་ཐུགས་རྗེ་ཆེན་པོ་མཐུ་ཆེན་ཐོབ། །བྱང་ཆུབ་སེམས་དཔའ་བྱེ་བ་འབུམ་གྱིས་བསྐོར། །ཡང་སྤྲུལ་སེམས་དཔའ་སེམས་མ་བསམ་མི་ཁྱབ། །ཀུན་ཀྱང་ཐེག་ཆེན་ཆོས་ལ་སྤྱོད་པ་ཡིས། །ཐེག་དམན་ཉན་རང་སོ་སྐྱེས་མིང་ཡང་མེད། །ཐེག་ཆེན་ཡོངས་རྫོགས་ཞིང་དེར་སྐྱེ་བར་ཤོག །བདག་ལ་འབྲེལ་ཚད་ཕ་མའི་གཙོར་བྱས་པའི། །དགྲ་གཉེན་མེད་པའི་ཁམས་གསུམ་སེམས་ཅན་ཀུན། །འདི་ནས་ཚེ་འཕོས་བདེ་ཆེན་དག་པའི་ཞིང་། །སྐད་ཅིག་གཅིག་ལ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་མེ་ཏོག་ཁ་ཕྱེས་ནས། སངས་རྒྱས་མཇལ་ཞིང་དམ་ཆོས་མཉན་པ་དང་། །མངོན་ཤེས་རྫུ་འཕྲུལ་སྤྱན་ལྔ་ཀུན་ལ་འབྱུང་། །མཚན་དཔེས་བརྒྱན་པའི་ལུས་མཆོག་ཐོབ་པར་ཤོག །འོད་དཔག་མེད་མགོན་སྤྱན་རས་གཟིགས་དབང་དང་། །མཐུ་ཆེན་ཐོབ་ཀྱི་བསྟན་པ་མ་རྫོགས་བར། །ཞིང་དེར་རྟག་ཏུ་མི་འབྲལ་གནས་པ་དང་། །དེ་ནས་ཚེ་འཕོས་ལུས་བརྗེས་ཞིང་གཞན་དུ། །བླ་མེད་སྐུ་གསུམ་སངས་རྒྱས་ཐོབ་པར་ཤོག །བསླུ་མེད་དཀོན་མཆོག་གསུམ་གྱི་བྱིན་རླབས་དང་། །ཆོས་ཉིད་རྣམ་པར་དག་པའི་བདེན་པ་དང་། །རྒྱུ་འབྲས་ཆོས་ཅན་བསླུ་བ་མེད་པའི་མཐུས། །སྨོན་ལམ་བཏབ་པ་དེང་འདིར་འགྲུབ་པར་ཤོག །ཅེས་པ་འདི་ཡང་ཆོས་དབྱིངས་མིང་གིས་རྦ་གནས་བྲག་དམར་རྫོང་ནས་སྤེལ་བ་ཀུན་གྱིས་ཁ་ཏོན་ཏུ་ཉིན་རེ་ཚར་རེ་མ་ཆགས་པ་བྱས་ན་ཕྱི་མ་བདེ་ཆེན་དག་པའི་ཞིང་དུ་སྐྱེ་བའི་རྒྱུར་གྱུར་ཅིག ། ནོར་བདག་གཏོར་འབུལ་དངོས་གྲུབ་འདོད་སྟེར།༄༅། སྐུ་གསུམ་དགོངས་མཛོད་ལས། ནོར་བདག་གཏོར་འབུལ་དངོས་གྲུབ་འདོད་སྟེར་བཞུགས། སྐུ་གསུམ་བདེ་གཤེགས་ཐམས་ཅད་ཀྱི། །མཐུ་སྟོབས་ཀུན་རྫོགས་ལྷ་ལ་འདུད། །ནོར་བདག་རྒྱལ་ཆེན་རྣམ་སྲས་ཀྱི། །སྦྱོར་ཆོག་དངོས་གྲུབ་འདོད་སྟེར་བསྟན། །རིན་ཆེན་སྣོད་དུ་འབྲུ་སྨན་བཤོས། །ནོར་ལྷའི་སྤྱི་གཏོར་རྒྱས་པའི་དབྱིབས། །རྒྱན་སྤྲོས་གཙོ་འཁོར་དགུ་པ་ལ། །དཀར་མངར་རྫས་ཀྱིས་སྦྲན་པ་དང་། །ཕྱེ་མར་ཇ་ཆང་སྐྱེམས་སོགས་བཤམས། །གསང་འཛིན་མཆོག་གི་ས་མ་དྷིས། །བསང་སྦྱང་བྱིན་གྱིས་རླབས་བྱས་ནས། །སྦྱར་སྤོས་བདུག་ཅིང་བསང་གཏོར་བྱ། ཨོཾ་བཛྲ་ཡཀྴ་ཀྲོ་ཏ་ཛྭ་ལ་རཾ་ཛྭ་ལ་རཾ་ཕཊ་རཾ་ཕཊ་རཾ།གྱིས་བསང་། སྭ་བྷ་ཝས་སྦྱང་། སྟོང་པའི་ངང་ལས་བྷྲུཾ་ལས་རིན་པོ་ཆེའི་གཞལ་མེད་ཁང་ཆེན་པོ། ཤར་ཤེལ། ལྷོ་བཻཌཱུར་ཡ། ནུབ་པདྨ་རཱ་ག བྱང་གསེར་ལས་གྲུབ་པ། ཕྱོགས་རེར་ཀ་བ་ཉིས་སྟོང་ལྔ་བརྒྱ་ལྔ་བརྒྱས་བཏེགས་ཤིང་། དྲྭ་བ་དང་དྲྭ་ཕྱེད་ཐོག་ཕུབ་སོགས་རྒྱན་དང་བཀོད་པ་བསམ་གྱིས་མི་ཁྱབ་པའི་དབུས་སུ་རིན་པོ་ཆེའི་ཁང་བཟང་སུམ་བརྩེགས་དང་། ས་འོག་ཏུ་གཏེར་གྱི་ཁང་པ་བཅོ་ལྔ་དང་བཅས་པའི་ཕྱི་རོལ་དུ་འཁོར་ས་རིམ་པ་གསུམ་དང་ལྡན་པ། འཁོར་ས་དང་པོ་ལ་རིན་པོ་ཆེའི་ཁང་བཟང་བརྒྱད། གཏེར་གྱི་བུམ་བཟང་བརྒྱད། དཔག་བསམ་གྱི་ཤིང་བརྒྱད། རིན་པོ་ཆེའི་ཚལ་བརྒྱད། ལྗོན་ཤིང་དང་མེ་ཏོག་བཀྲ་བའི་རྫིང་བུ་བརྒྱད། འདོད་པ་འཇོ་བའི་བ་མོ་བརྒྱད་རྣམས་སྤེལ་མར་གནས་པའི་ཕྱི་རོལ་དུ་འདོད་དགུ་འབྱུང་བའི་ནོར་བུའི་ཀ་བ་དང་བཅས་པ། དེའི་དབུས་སུ་འཛམ་བུའི་ཆུ་བོའི་གསེར་ལས་གྲུབ་པའི་པདྨ་དང་། ནོར་བུ་ཆུ་ཤེལ་གྱི་ཟླ་བ་རྒྱས་པའི་སྟེང་དུ། སེང་གེ་དཀར་མོ་གཡུ་རལ་རྒྱས་ཤིང་ཉམས་རྩལ་རྫོགས་པ་ཉལ་སྟབས་སུ་གནས་པ། དེའི་སྟེང་དུ་བཻ་སེར་པོ་ཡོངས་སུ་གྱུར་པ་ལས་རྒྱལ་པོ་ཆེན་པོ་རྣམ་ཐོས་སྲས་གསེར་བཙོ་མའི་མདོག་ལྟར་གསལ་འཚེར་འོད་དུ་འབར་བ་ཁྲོ་འཛུམ་སྒེག་པའི་ཉམས་ཅན། ཕྱག་གཡས་འདོད་འབྱུང་དབང་གི་རྒྱལ་པོའི་ཏོག་ཅན་གྱི་རྒྱལ་མཚན་དང་། གཡོན་གཏེར་གྱི་ནེའུ་ལེ་བསྣམས་པ། སྐུ་ལ་པཉྩ་ལི་ཀའི་བེར་ཆེན་དགུ་བརྩེགས་དང་རིན་པོ་ཆེའི་པྲོག་ཞུ་སོགས་རྒྱན་དང་ཆ་ལུགས་རྨད་དུ་བྱུང་བས་བརྒྱན་པ། ཕྲག་པ་གཡས་ན་ཉི་མ་དང་གཡོན་ན་ཟླ་བ་འཆར་བ། ཉི་མ་འབུམ་ལས་ལྷག་པའི་གཟི་བརྗིད་ཅན། མི་ཟད་ནམ་མཁའི་མཛོད་ལ་མངའ་མཛད་པ། བཙུན་མོ་བཞི་དང་སྲས་བཞི་སོགས་གནོད་སྦྱིན་བྱེ་བས་བསྐོར་བ། ཕྱི་རིམ་འཁོར་ས་དང་པོའི་ཕྱོགས་མཚམས་ཀྱི་ཁང་བཟང་བརྒྱད་ལ། ཤར་དུ་ཛམ་བྷ་ལ་སེར་པོ་རིན་པོ་ཆེ་བསྣམས་པ། ལྷོར་གང་བ་བཟང་པོ་སེར་པོ་གཏེར་བུམ་འཛིན་པ། ནུབ་ཏུ་ནོར་བུ་བཟང་པོ་དཀར་པོ་ནོར་བུ་འཛིན་པ། བྱང་དུ་ཀུ་བཻ་ར་ནག་པོ་རལ་གྲི་འཕྱར་བ། ཤར་ལྷོར་ཡང་དག་ཤེས་སེར་པོ་རལ་གྲི་ཐོགས་པ། ལྷོ་ནུབ་ཏུ་འབྲོག་གནས་ནག་པོ་མདུང་དམར་འཛིན་པ། ནུབ་བྱང་དུ་ལྔས་རྩེན་སེར་སྐྱ་ཁང་བརྩེགས་བསྣམས་པ། བྱང་ཤར་དུ་འཇམ་པོ་འཁྱིལ་བ་དཀར་པོ་གཡས་རལ་གྲི་དང་གཡོན་ཕུབ་འཛིན་པ། ཐམས་ཅད་ཀྱང་གཡོན་ན་གཏེར་གྱི་ནེའུ་ལེ་བསྣམས་ཤིང་རང་མདོག་དང་མཚུངས་པའི་རྟ་ལ་བཅིབས་པ། དར་དང་རིན་པོ་ཆེའི་རྒྱན་དང་དཔའ་བོའི་ཆས་ཀྱིས་བརྗིད་པ། སོ་སོའི་བཙུན་མོ་སྲས་བློན་འཁོར་ཚོགས་དང་བཅས་པ། འཁོར་ས་བར་བ་ན་ཀླུ་ཆེན་བརྒྱད་འཁོར་འབུམ་འབུམ་དང་བཅས་པ། འཁོར་ས་ཐ་མ་ན་དེད་དཔོན་ཉེར་བརྒྱད། སྟོབས་ཆེན་སོ་གཉིས། ལྷ་སྲིན་སྡེ་བརྒྱད་སོགས་འཁོར་ཚོགས་བསམ་གྱིས་མི་ཁྱབ་པས་བསྐོར་བ། ཀུན་ཀྱང་སྒྲུབ་པ་པོ་ལ་དངོས་གྲུབ་དང་ཕྱྭ་གཡང་གི་ཆར་འབེབས་པའོ།། དེ་ཐམས་ཅད་ཀྱི་གནས་གསུམ་ཨོཾ་ཨཱཿཧཱུྃ་གིས་མཚན་པ་ལས་འཕྲོས་པའི་འོད་ཀྱིས་ཡེ་ཤེས་པ་རྣམས་སྤྱན་དྲངས་ཏེ་བསྐྱེད་པའི་ལྷ་དང་དབྱེར་མེད་དུ་གྱུར་བར་བསམ་ལ། ཧཱུྃ་བཻ། རི་རབ་ལྷུན་པོའི་བྱང་གི་ཕྱོགས། །ལྕང་ལོ་ཅན་གྱི་ཕོ་བྲང་ན། །རིན་ཆེན་གཏེར་གྱི་གཞལ་ཡས་ནས། །རིན་ཆེན་མང་སྤྲུལ་རྣམ་ཐོས་སྲས། །བཙུན་མོ་སྲས་དང་བློན་པོའི་ཚོགས། །སྤྲུལ་པ་ཡང་སྤྲུལ་བཀའ་སྡོད་བཅས། །བསྟན་དང་འགྲོ་ལ་ཕན་གདགས་ཕྱིར། །འདིར་གཤེགས་བརྟན་པར་བཞུགས་སུ་གསོལ།། ཨོཾ་བཻ་ཤྲ་མ་ཎ་ས་པཱ་རི་ཝ་ར་བཛྲ་ས་མ་ཡཱ་ཛ༔ ཛ༔ཧཱུྃ་བཾ་ཧོ༔ བཛྲ་ས་མ་ཡ་རཀྵནྟུ། འཁྱིལ་བའི་སྔགས་ཀྱིས་ཕྱིར་འབྲང་གི་བགེགས་བསྐྲད། བཻ། གནོད་སྦྱིན་ཡོངས་ཀྱི་རྒྱལ་པོ་ཁྱོད། །རིན་ཆེན་མིང་དང་གཉིས་མེད་ཕྱིར། །སྒོ་གསུམ་གུས་པས་རབ་བཏུད་ཏེ། །མཆོད་པ་ཀུན་གྱིས་ཡང་དག་མཆོད། ཨོཾ་མ་ཧཱ་ཡཀྴ་རཱ་ཛ་ན་མོ། ཨོཾ་བཛྲ་ཨརྒྷཾ་ནས་ཤཔྟ་ཨ་མྲི་ཏ་སརྦ་པཱུ་ཛ་ཧོ། ཁྱད་པར་དུ་རྒྱལ་ཆེན་འཁོར་བཅས་ཀྱི་ལྗགས་རིན་པོ་ཆེའི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམ་ལ། ཨོཾ་བཻ་ཤྲ་མ་ཎ་ས་པཱ་རི་ཝ་ར་ཨེ་དམ་བཱ་ལིངྟ་གྷྲྀཧྞ་ཏུ། ས་མ་ཡ་རཀྵནྟུ་མ་མ་སརྦ་སིདྡྷི་མེ་པྲ་ཡཙྪ། མ་མ་སརྦ་ཀརྨ་ས་དྷ་ཨ་མོ་གྷ་ཡ་སྭ་ཧཱ། ལན་གསུམ་མམ་བདུན་གྱིས་ཕུལ། དཔལ་ལྡན་རྒྱལ་པོ་ཆེན་པོ་རྣམ་ཐོས་སྲས་བཙུན་མོ་སྲས་དང་སྤྲུལ་འཁོར་གནོད་སྦྱིན་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་དམ་རྫས་ཀྱི་གཏོར་མ་འདི་བཞེས་ལ་བསྟན་པ་དང་བསྟན་འཛིན་སྤེལ་ཅིག རྣལ་འབྱོར་བའི་མགོན་སྐྱབས་མཛོད་ཅིག འཇིག་རྟེན་གྱི་རྒུད་པ་སོལ་ཅིག ནད་མུག་དང་མཚོན་འཁྲུག་ཟློག་ཅིག ཆོས་སྲིད་ཀྱི་འདོད་དོན་སྤེལ་ཅིག མདོར་ན་ཞི་རྒྱས་དབང་དྲག་གི་ཕྲིན་ལས་གང་བཅོལ་ཐོགས་མེད་དུ་སྒྲུབ་ཅིང་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པར་མཛོད་ཅིག ཅེས་འདོད་དོན་གསོལ། བསྟོད་པ་ནི། བཻ། རི་རབ་ལྷུན་པོའི་བྱང་ཕྱོགས་ངོས། །ལྕང་ལོ་ཅན་གྱི་ཕོ་བྲང་དབུས། །རིན་ཆེན་གཏེར་གྱི་གཞལ་ཡས་ན། །གནོད་སྦྱིན་སྡེ་དཔོན་སྟོབས་པོ་ཆེ། །མགོན་པོ་གནས་སྲུང་རྣམ་ཐོས་སྲས། །ངལ་བསོས་དགེ་བ་གཏེར་གྱི་བདག །རིན་ཆེན་མང་སྤྲུལ་ནོར་ལྷའི་གཙོ། །ས་བརྒྱད་དབང་ཕྱུག་ཁྱོད་ལ་བསྟོད། །བཙུན་མོ་བཞི་དང་སྲས་མཆོག་བཞི། །དངོས་གྲུབ་མཆོག་རྩོལ་རྟ་བདག་བརྒྱད། །འདོད་དགུའི་དཔལ་སྟེར་ཀླུ་ཆེན་བརྒྱད། །ནོར་ལྷ་འཁོར་དང་བཅས་རྣམས་བསྟོད། །གནོད་སྦྱིན་དེད་དཔོན་ཉི་ཤུ་བརྒྱད། །སྟོབས་ཆེན་སུམ་ཅུ་རྩ་གཉིས་སོགས། །བྱང་ཕྱོགས་གནས་ན་བཞུགས་པ་རྣམས། །མ་ལུས་ཀུན་ལ་བདག་བསྟོད་དོ།། ཞེས་དང་། བཻ། ནོར་བདག་རྒྱལ་ཆེན་རྣམ་ཐོས་སྲས། །བཙུན་མོ་སྲས་བློན་འཁོར་བཅས་རྣམས། །བཤོས་དང་སྐྱེམས་ཀྱིས་གསོལ་ཞིང་མཆོད། །མཐུན་པའི་རྫས་ཀྱིས་ཐུགས་དམ་བསྐང་། །ཉམས་ཆགས་ཅི་མཆིས་དབྱིངས་སུ་བཤགས། །བསྟན་སྲུང་མཆོག་ཏུ་མངའ་གསོལ་ལོ། །འཁོར་དང་ལོངས་སྤྱོད་གཉེར་དུ་གཏད། །ཐུགས་བསྐྱེད་དམ་བཅས་གནད་ནས་བསྐུལ། །ཆོས་དང་སྲིད་ཀྱི་ལས་ཀུན་བཅོལ། །ཚེ་བསོད་དབང་ཐང་དངོས་གྲུབ་ཞུ། །མ་གཡེལ་རེ་ཞིང་སྨོན་པ་ཀུན། །གེགས་མེད་ལྷུན་གྱིས་འགྲུབ་པར་མཛོད།། ཞེས་བསྟོད་ཅིང་ཕྲིན་ལས་བཅོལ་བར་བྱའོ།། གསང་བདག་མཐུ་སྟོབས་ཀུན་རྫོགས་ཀྱི་བཀའ་སྲུང་རྒྱལ་ཆེན་ནོར་ལྷའི་དབང་པོའི་གཏོར་འབུལ་དངོས་གྲུབ་འདོད་སྟེར་ཞེས་བྱ་བ་འདི་ཡང་སྒྲུབ་བརྩོན་དམ་པ་པདྨ་ཨ་ཡུརྨཱ་དང་། ཤཱི་ལ་བྷ་དྲཱ་གཉིས་ཀྱི་བཞེད་ངོར་མགོ་སྤྲུལ་དྷརྨཱ་དྷ་ཏུའི་མིང་ཅན་གྱིས་ཤར་མར་ཕབས་པ་སརྦ་མངྒ་ལཾ། དགེའོ།། དགེའོ།། དགེའོ།། རྣམ་སྲས་བསྐང་བསྡུས།༄༅། རྣམ་སྲས་ཀྱི་བསྐང་བསྡུས་ནི། བསྐང་རྫས་རྣམས་སྔགས་དྲུག་ཕྱག་རྒྱ་དྲུག་གམ། ནམ་མཁའ་མཛོད་ཀྱི་སྔགས་རྒྱས་སྤེལ་ལ། བཻ། རིན་ཆེན་མིང་སྤྲུལ་རྣམ་ཐོས་སྲས། །འཁོར་བཅས་ཐུགས་དམ་བསྐང་བའི་རྫས། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྫས་རྟགས་བཅུ་དྲུག་དང་། །རྒྱལ་སྲིད་ཉེ་བའི་རིན་ཆེན་ཚོགས། །ལྷ་ཀླུ་མི་ཡི་རིན་པོ་ཆེ། །གོས་སྔོན་ལུང་ཐང་ཕྲེང་བ་དང་། །ཅང་ཤེས་རྟ་མཆོག་འདོད་འཇོའི་བ། །གཏེར་བུམ་སྐྱེད་ཚལ་དཔག་བསམ་ཤིང་། །མ་རྨོས་ལོ་ཏོག་གཞལ་མེད་ཁང་། །ལྔ་ཚན་ལྔ་སོགས་ལོངས་སྤྱོད་ནོར། །བདོག་པའི་ཡོ་བྱད་ཀ་ཆ་དཀོར། །དཔལ་འབྱོར་དང་བཅས་འཇིག་རྟེན་ཁམས། །གཞན་ཡང་མཐུན་རྫས་དཔག་མེད་ཀྱིས། །རྒྱལ་ཆེན་ནོར་མང་རྣམ་ཐོས་སྲས། །བཙུན་མོ་བཞི་དང་སྲས་མཆོག་བཞི། །ནོར་ལྷ་མཆེད་བརྒྱད་ཀླུ་དབང་བརྒྱད། །ཕྲིན་ལས་སྒྲུབ་མཛད་སྡེ་བརྒྱད་ཚོགས། །དེད་དཔོན་ཉི་ཤུ་རྩ་བརྒྱད་དང་། །སྟོབས་ཆེན་སུམ་ཅུ་རྩ་གཉིས་སོགས། །འཁོར་ཚོགས་མ་ལུས་སྤྲུལ་པར་བཅས། །ཐུགས་དམ་གཉན་པོ་བསྐང་གྱུར་ཅིག །ཉམས་ཆགས་འཁོན་གྲིབ་དག་གྱུར་ཅིག །དངོས་གྲུབ་མ་ལུས་འགྲུབ་གྱུར་ཅིག །ཁྱད་པར་ནད་མེད་ཚེ་རིང་ཞིང་། །དབང་ཕྱུག་སྙན་གྲགས་ལོངས་སྤྱོད་རྒྱས། །སྐལ་བཟང་ནོར་ཆོས་ཐར་པའི་དཔལ། །འདོད་དགུའི་ཡོན་ཏན་གོང་འཕེལ་མཛོད། །ཅེས་དང་ཡིག་བརྒྱ་བརྗོད། འདི་ཉིད་ཀྱི་བསྐང་བཤགས་མངའ་གསོལ་རྒྱས་པར་སྤྲོ་མིན་གང་ལྟར་ཡང་རུང་། གྲངས་བསོག་དགོས་པའམ། རྒྱུན་དུ་འདོན་རྒྱུར་ཉེར་མཁོར་མཐོང་ནས་འཇིགས་རྣམ་མིང་གིས་ཤར་མར་བྲིས་པ་མངྒ་ལཾ། དགེའོ།། དགེའོ།། དགེའོ།། རྣམ་སྲས་གཏོར་འབུལ་རྒྱུན་ཁྱེར།༄༅། རྒྱལ་ཆེན་རྣམ་སྲས་ཀྱི་གཏོར་འབུལ་རྒྱུན་ཁྱེར་ནི། ན་མོ་གུ་རུ་བཛྲ་དྷ་ར་ཡ། འདིར་རྒྱལ་ཆེན་རྣམ་སྲས་འཁོར་བཅས་རྒྱུན་དུ་མཆོད་པར་འདོད་པས་མཆོད་པར་འོས་པའི་རྫས་རྣམས། རཾ་ཡཾ་ཁཾ་གིས་བསྲེག་གཏོར་བཀྲུས། ཨོཾ་ཨཱཿཧཱུྃ་གིས་སྦྱངས་སྤེལ་བསྒྱུར་ལ། བཻ། རི་རབ་ལྷུན་པོའི་ལྷུན་པོའི་བྱང་ཕྱོགས་ནོར་འཛིན་གྲོང་། །རིན་ཆེན་སྣ་བདུན་ལས་གྲུབ་གཞལ་ཡས་དབུས། །ཛམ་ལྷ་རིགས་བཞི་ནོར་རྒྱུན་དཔལ་ཆེན་མོ། །སྤྲུལ་པའི་ནོར་ལྷ་མཆེད་བརྒྱད་དགྱེས་སྡེར་བཅས། །ཀླུ་ཆེན་བརྒྱད་དང་དེད་དཔོན་ཉི་ཤུ་བརྒྱད། །སྟོབས་ཆེན་སོ་གཉིས་གནོད་སྦྱིན་བྱེ་བ་འབུམ། །མ་ལུས་འདིར་བྱོན་དགྱེས་པའི་གདན་བཞུགས་ནས། །དངོས་ཡིད་སྔགས་རྒྱ་ཏིང་འཛིན་གྱིས་སྤེལ་བའི། །རྨད་བྱུང་ཕྱི་ནང་གསང་བའི་མཆོད་སྤྲིན་རྣམས། །དགྱེས་པར་རོལ་ལ་རྣམ་བཞིའི་ཕྲིན་ལས་ཀྱིས། །སྒྲུབ་པའི་འབྲས་བུ་མཐར་ཕྱིན་དངོས་གྲུབ་སྩོལ། །རིན་ཆེན་མང་སྤྲུལ་གནས་སྲུང་འཁོར་བཅས་རྣམས། །སྔོན་གྱི་ཐུགས་བསྐྱེད་ཞལ་བཞེས་ཉེར་དགོངས་ལ། །ཆོས་དང་སྲིད་ཀྱི་འདོད་དོན་མ་ལུས་པ། །འབད་མེད་ཡིད་བཞིན་འགྲུབ་པའི་ཕྲིན་ལས་མཛོད།། ཅེས་ནོར་བདག་ཡིད་བཞིན་ནོར་བུའི་མཆོད་ཐབས་བསྡུས་པ་འདི་ཡང་ལྷ་མཆོག་འདི་ཉིད་མཉེས་པའི་ཐབས་ལ་བརྩོན་པའི་རྣལ་འབྱོར་བ་དད་ལྡན་ཚུལ་ཁྲིམས་བཟང་པོ་ནས་ཡང་ཡང་བསྐུལ་ངོར། འདུ་ཤེས་གསུམ་པ་སྔགས་བན་ཆོས་དབྱིངས་མིང་གིས་བྲིས་པ་སརྦ་མངྒ་ལཾ། དྲང་སྲོང་གསོལ་མཆོད་ཕྲིན་ལས་མྱུར་མཛད།༄༅། བཀའ་འདུས་ལས་དྲང་སྲོང་གསོལ་མཆོད་ཕྲིན་ལས་མྱུར་མཛད་བཞུགས། ཨོཾ་ཨཱཿཧཱུྃ། ཧྲཱིཿ ངོ་བོ་ཀ་དག་ཁྱབ་བདལ་ཆོས་དབྱིངས་རྩལ། །རང་བཞིན་ལྷུན་གྲུབ་གསང་བདག་རྡོ་རྗེ་འཆང་། །ཡེ་ཤེས་ཐུགས་རྗེའི་སྒྱུ་འཕྲུལ་གང་འདུལ་གཟུགས། །ཞི་དྲག་མ་ངེས་སྣ་ཚོགས་ཅིར་ཡང་སྣང་། །ཐུབ་བསྟན་མདོ་རྒྱུད་བཀའ་གཏེར་དག་སྣང་སྤྱི། །ཁྱད་པར་ཨ་ཏི་ཡོ་གའི་བསྲུང་མ་མཆོག །གློག་ལྟར་མངོན་རྒྱུག་ཁྱབ་འཇུག་རྫུ་འཕྲུལ་ཅན། །དྲང་སྲོང་གཟའ་མཆོག་ཆེན་པོ་རཱ་ཧུ་ལ། །ཡབ་རྗེ་སྲིན་པོ་ཡུམ་མཆོག་གློག་འགྱུ་མ། །ལས་ཀུན་མྱུར་མཛད་གདོང་ཅན་སྲིང་མོ་བཞི། །གཉིས་མེད་སྤྲུལ་པའི་གཟའ་མཆོག་ཆེན་པོ་བཅུ། །སྒྲ་གཅན་དུས་མེ་ཟླ་བ་ཉི་མ་དང་། །མིག་དམར་ལྷག་པ་ཕུར་བུ་པ་ཝ་སངས། །སྤེན་པ་དུ་བ་མཇུག་རིང་འཁོར་བཅས་དང་། །བི་སྣུ་དམུ་བདུད་མཇུག་རིང་གཤིན་རྗེའི་གཟའ། །ཁྱབ་འཇུག་ཀླུ་བདུད་སྒྲ་གཅན་སྡེ་བརྒྱད་གཙོ། །ལྗང་སྔོན་མ་མོ་དྲང་སྲོང་དགྲ་ལྷའི་གཟའ། །རོག་ཏི་བདུད་དང་བིཥྚི་སྲིན་པོའི་གཙོ། །གཞན་ཡང་སྤྲུལ་པ་ཡང་སྤྲུལ་གཟའ་ཡི་ཚོགས། །ཕྱི་ནང་གསང་བ་མཆོག་དང་སྤྲུལ་པའི་སྡེ། །སྣང་སྲིད་སྡེ་བརྒྱད་འཁོར་དང་ཡང་འཁོར་བཅས། །གཙང་རིས་དཔལ་མགོན་བདུན་ཅུ་རྩ་ལྔ་སོགས། །ལྷོ་ནུབ་ལངྒ་པུ་རིའི་གྲོང་ཁྱེར་དགུ། །རྩུབ་འགྱུར་བསིལ་ཚལ་ཞྭ་ཡི་ལྷ་ཁང་སོགས། །གར་བཞུགས་གནས་ནས་གློག་ལྟར་མྱུར་བྱོན་ལ། །གཏོར་སྐྱེམས་འདི་བཞེས་གང་བཅོལ་ལས་འགྲུབ་མཛོད།། ཨོཾ་རཱ་ཧུ་ལ་སརྦ་ས་པཱ་རི་ཝ་ར་མ་ཧཱ་མཾ་ས་རཀྟ་ཙིཏྟ་ཀེཾ་ནི་རི་ཏི་བཱ་ལིང་ཏ་ལ་ཁ་རཾ་ཁཱ་ཧི། རཱ་ཧུ་ཀ་ལ་ཨ་མྲྀ་ཏ་ཨོཾ་ཨཱཿཧཱུྃ། ཧཱུྃ། རྡོ་རྗེ་འཆང་དབང་ཐུགས་ཀྱི་སྤྲུལ་པ་ལས། །ཡང་སྤྲུལ་མི་བཟད་འབར་བའི་སྐུར་བཞེངས་པ། །ཡབ་ཡུམ་སྲིང་བཞི་སྤྲུལ་པ་ཡང་སྤྲུལ་སོགས། །དྲང་སྲོང་ཁྲོ་ཚོགས་འཁོར་དང་བཅས་ལ་བསྟོད། །གསང་བ་ཀུན་བདག་རྡོ་རྗེ་འཆང་། །གདུལ་དཀའ་འདུལ་ཕྱིར་སྲིན་པོའི་གཟུགས། །མངོན་རྒྱུག་ལས་མྱུར་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ཁ་དཀར་སྙིང་ནག་གཡོ་སྒྱུ་ཅན། །བསམ་ངན་སྦྱོར་རྩུབ་དགྲ་རྐུན་རྣམས། །གློག་ལྟར་མྱུར་མགྱོགས་ཕྲིན་ལས་ཀྱིས། །མིང་མེད་བརླག་པའི་ཕྲིན་ལས་མཛོད། །དྲང་སྲོང་ཁྱབ་འཇུག་འཁོར་བཅས་རྣམས། །ཟ་ཁ་འཐུང་ཁ་དགྲ་ལ་སྟོན། །དགྲ་བོའི་ཤ་ཁྲག་རྔམ་ཟས་ཀྱིས། །བསད་རྟགས་དོན་སྙིང་ཁྱེར་ལ་ཤོག །གལ་ཏེ་བདག་དང་སྲུང་མ་ལ། །ཞུ་བཤགས་འཇལ་བ་བྱས་ན་ཡང་། །ཟ་ངུའི་དམག་ཚོགས་སླར་མ་ལྡོག །སྒྲོལ་འདྲེན་སྟོབས་ལ་ལྷག་མེད་མཛོད། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། སོགས། ཀུན་འགྲུབ་ཤོག ཅེས་གཟའ་གསོལ་ཕྲིན་ལས་མྱུར་མགྱོགས་འདི་ཡང་གར་དབང་འཇིགས་མེད་རྣམ་རྒྱལ་བས་མགྱོགས་པར་བྲིས་པ་དགེའོ།། དཔལ་མགོན་ཕྱག་བཞི་པའི་གཏོར་འབུལ།༄༅། དཔལ་མགོན་ཕྱག་བཞི་པའི་གཏོར་འབུལ་ནི། མདུན་དུ་བསྲུང་འཁོར་དུར་ཁྲོད་གཞལ་ཡས་དབུས། །རྩིབས་བཞི་ཨེ་མཐིང་པད་ཉི་བམ་ཆེན་སྟེང་། །གྲི་གུག་ཧཱུྃ་མཚན་ཡོངས་སུ་གྱུར་པ་ལས། །ཡེ་ཤེས་མགོན་པོ་མཐིང་ནག་ཁྲོ་ཆས་རྫོགས། །གྲི་གུག་ཐོད་ཁྲག་རལ་གྲི་རྩེ་གསུམ་བསྣམས། །ཡེ་ཤེས་མེ་ཀློང་རོལ་པའི་སྟབས་ཀྱིས་བཞུགས། །མདུན་དུ་ཤ་ཟ་ནག་མོ་སེང་གེའི་གདོང་། །དར་ནག་གོས་གསོལ་རལ་གྲི་ཐོད་ཁྲག་འཛིན། །གཡས་སུ་ལས་མགོན་ནག་པོ་བྱ་རོག་གདོང་། །སྤྱན་གསུམ་དུར་ཁྲོད་ཆས་ལྡན་གྲི་ཐོད་བསྣམས། །རྒྱབ་ཏུ་ལེགས་ལྡན་ནག་པོ་འཇོལ་བེར་དང་། །སག་ལྷྭམ་གསོལ་ཞིང་བིང་ཆེན་ལྕགས་པར་ཐོགས། །གཡོན་དུ་ཙཎྚི་ནག་མོ་རུས་རྒྱན་ཅན། །རལ་གྲི་ཐོད་ཁྲག་མི་མགོ་མདའ་གཞུ་འཛིན། །ཕྱི་རིམ་འཁོར་གྱི་ཕྲ་མེན་ཆེན་མོ་བརྒྱད། །ནག་པོ་ཤ་ཟ་མ་མོ་སྡེ་བརྒྱད་ཚོགས། །ཀུན་གྱི་གནས་གསུམ་ཨོཾ་ཨཱཿཧཱུྃ་གིས་མཚན། །གཙོ་བོའི་རིགས་བདག་མི་བསྐྱོད་རྡོ་རྗེ་བཞུགས། །འོད་འཕྲོས་འོག་མིན་བསིལ་ཚལ་ནཱ་ལེནྟྲ། །དཔལ་རི་སོགས་ནས་འཁོར་བཅས་སྤྱན་དྲངས་བསྟིམ། ཨོཾ་བཛྲ་མ་ཧཱ་ཀཱ་ལ་ས་པ་རི་ཝཱ་ར་ཨེ་ཧྱ་ཧི། བཛྲ་ས་མ་ཛཿ པདྨ་ཀ་མ་ལ་ཡེ་སྟྭཾ། ཛཿཧཱུྃ་བཾ་ཧོཿ ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྃ། ཨོཾ་མ་ཧཱ་ཀཱ་ལ་ས་མ་ཡ་ཧ་ན་ཧ་ན་ཧཱུྃ་ཕཊཿ ཨོཾ་བཛྲ་ཨརྒྷཾ། པ་དྱཾ། ཨཉྩ་ལ་ནཾ། པྲོཀྵ་ནཾ། པུཥྤཾ། དྷུ་པཾ། དཱི་པཾ། གནྡྷཾ། ནེ་ཝི་ཏྱཾ། ཤཔྟ་ཨཱཿཧཱུྃ་སྭཱ་ཧཱ། ཨོཾ་ཨཱཿཧཱུྃ་ཧ་ཧོ་ཧྲཱིཿ མགོན་པོ་འཁོར་བཅས་ཀྱི་ལྗགས་རྡོ་རྗེའི་སྦུ་གུས་གཏོར་མ་དྲངས་ཏེ་གསོལ་བར་གྱུར། ཨོཾ་བཛྲ་ཀ་ཝུ་ཝ་ཝ་པ་ཤ་ཡ་པ་ཤ་ཡ་མ་ཧཱ་ཀ་ལ་ཡ་ཧཱུྃ་ཧཱུྃ་ཕཊ། ཧཱུྃ་ཧཱུྃ་ཀྵ་བྷྱོཿ སརྦ་ས་པཱ་རི་ཝ་ར་ཨེ་དམ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། ཧཱུྃ་ཧཱུྃ་ཕཊ། བདུན་ནམ་ལྔས་འབུལ། ཨོཾ་བཛྲ་མ་ཧཱ་ཀ་ལ་ཧཱུྃ་ཧཱུྃ་ཕཊ། ཨོཾ་ཨཱཿཧཱུྃ་གིས་ནང་མཆོད་འབུལ། ཧཱུྃ། གཟི་བརྗིད་སྐུ་ཡིས་སྲིད་གསུམ་ཟིལ་གྱིས་གནོན། །གསུང་གི་བཞད་སྒྲས་སྡེ་བརྒྱད་བྲན་དུ་འཁོལ། །བརྩེ་བའི་ཐུགས་ཀྱིས་འགྲོ་དྲུག་དབང་དུ་བསྡུས། །ལྷ་ཆེན་དཔལ་འབར་ནག་པོ་ཁྱོད་ལ་བསྟོད། །བདུད་པོ་སེང་ཞལ་ལས་མགོན་བྱ་རོག་གདོང་། །དཔལ་མགོན་ལེགས་ལྡན་ཡུམ་མཆོག་ཙནྟི་ཀ །ཕྲ་མེན་ནག་པོ་ཤ་ཟ་མ་མོའི་ཚོགས། །སྡེ་བརྒྱད་འཁོར་བཅས་ཀུན་ལ་བསྟོད་པར་བགྱི། །དཔལ་ལྡན་ཕྱག་བཞི་མགོན་པོ་འཁོར་བཅས་ཀྱིས། །དམ་རྫས་མཆོད་གཏོར་ཕུལ་བ་འདི་བཞེས་ལ། །སངས་རྒྱས་བསྟན་བསྲུང་སེམས་ཅན་བདེ་སྐྱིད་སྤེལ། །རྣལ་འབྱོར་འཁོར་སྲུང་རྐྱེན་གེགས་བར་ཆད་སོལ། །རབ་འབྱམས་ལས་སྒྲུབ་མཐུན་པའི་དངོས་གྲུབ་སྩོལ། །ཞེས་པའང་འཇིགས་རྣམ་པས་བྲིས་པ་དགེ་ཞིང་བཀྲ་ཤིས་འཕེལ་བའི་རྒྱུར་གྱུར་ཅིག་གུ། གེ་སར་རྒྱུན་གཏོར་འདོད་དགུ་མྱུར་སྩོལ།༄༅། འཛམ་གླིང་སྐྱེས་བུའི་རྒྱུན་གཏོར་འདོད་དགུ་མྱུར་སྩོལ་ཞེས་བྱ་བ་བཞུགས་སོ། གཏོར་སྐྱེམས་སོགས་རཾ་ཡཾ་ཁཾ་དང་། ཨོཾ་ཨཱཿཧཱུྃ་གིས་བྱིན་གྱིས་བརླབས་ནས། ཀྱཻ་བསྭོ་བསྭོ་བསྭོ་ཕཻཾ། རྩ་གསུམ་རྒྱལ་བ་རྒྱ་མཚོའི་ཕྲིན་ལས་ལ། །འཛམ་གླིང་སྐྱེས་བུ་ཆེན་པོར་མཚན་གསོལ་བ། །དཔའ་ཐུལ་སུམ་ཅུ་དགྱེས་སྡེ་སྤྲུལ་འཁོར་སོགས། །སྐྱེས་བུའི་ལྷ་འཁོར་བསམ་མི་ཁྱབ་པའི་ཚོགས། །རྔ་ཡབ་གླིང་སོགས་གར་བཞུགས་ཞིང་རྣམས་ནས། །ཀི་བསྭོ་ཕེམ་སྒྲ་སྒྲོགས་ཤིང་ད་ཚུར་བྱོན། །བསྒྲུབ་པའི་གནས་འདིར་བྱམས་བརྩེའི་བག་ཕོབས་ལ། །ཕྱག་མཆོད་མཐོལ་བཤགས་བཞེས་ལ་ཕྲིན་ལས་མཛོད། །བཛྲ་ས་མ་ཡཱ་ཛ་ཛཿ ཏིཥྛ་ཨ་ས་ན་སྟྭཾ། ས་མ་ཡ་ན་མོ་ཧཱུྃ། བཛྲ་ས་མ་ཡ་ཤུདྡྷེ་ཨ། ས་མ་ཡ་ན་མོ་ཧཱུྃ། བཛྲ་ས་མ་ཡ་ཤུདྡྷེ་ཨ། མ་ཧཱ་སརྦ་པཱུ་ཙ་ཧོ། ཨོཾ་མ་ཧཱ་པཱུ་རུ་ཥ་སེང་ཧ་རཱ་ཛ་ས་པཱ་རི་ཝ་ར་ཨེ་དཾ་བྷ་ལིང་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། བསྟོད་ཅིང་ཕྲིན་ལས་བཅོལ་བ་ནི། མཱུཾ་ཧྲཱིཿ རྒྱལ་ཀུན་ཡེ་ཤེས་རང་གཟུགས་འཇམ་པའི་དབྱངས། །མ་རུང་འདུལ་ཕྱིར་མི་དབང་དཔའ་བོའི་སྐུར། །སྟོན་མཛད་འཛམ་གླིང་སྐྱེས་མཆོག་སེང་ཆེན་རྒྱལ། །དངོས་འབྱོར་ཡིད་སྤྲུལ་མཆོད་གཏོར་འདི་བཞེས་ལ། །ཐུགས་བསྐྱེད་དམ་བཅས་མ་གཡེལ་རྗེས་སུ་དགོངས། །སྒྲུབ་ལ་མཆོག་ཐུན་ལས་བཞིའི་དངོས་གྲུབ་སྩོལ། །ཆོས་སྲིད་དཔལ་འབྱོར་རྒྱས་པའི་ཕྲིན་ལས་མཛོད། །ཅེས་སོ།། འཛམ་གླིང་སྐྱེས་བུའི་རྒྱུན་གཏོར་འདོད་དགུ་མྱུར་སྩོལ་ཞེས་བྱ་བ་འདི་ཡང་། མགོ་སྤྲུལ་རྒྱ་རས་བྲིས་པ་དགེ་བར་གྱུར་ཅིག ། གེ་སར་གཡང་འགུགས་དགོས་འདོད་ཀུན་འབྱུང་།༄༅། གེ་སར་སྐྱེས་བུའི་གཡང་འགུགས་དགོས་འདོད་ཀུན་འབྱུང་བཞུགས་སོ།། ཧཱུྃ་ཧྲཱིཿ རང་རིག་སྣང་བ་དག་པའི་ཞིང་ཁམས་ནས། །སྐུ་གསུམ་ཀུན་འདུས་ནོར་བུ་དགྲ་འདུལ་རྩལ། །འཇིགས་བརྒྱད་གཡུལ་ལས་རྒྱལ་བའི་དཔའ་བོ་མཆོག །ཞིང་ཁམས་གར་བཞུགས་གནས་འདིར་བྱིན་གཡང་ཕོབས། །ཏཱ་རེའི་སྤྲུལ་པ་ཡེ་ཤེས་མཁའ་འགྲོ་མ། །རང་སྣང་གཡུ་ལོ་བཀོད་པའི་གཞལ་ཡས་ཁང་། །རྩ་ཐིག་རླུང་གསུམ་དཔའ་བོ་མཁའ་འགྲོའི་གནས། །སྐུ་གསུམ་ཀུན་འདུས་ལྷ་ཚོགས་གཡང་ཁུག་ཅིག །གཞི་སྣང་འཕོ་འགྱུར་མེད་པའི་གཞལ་ཡས་ནས། །དགོས་འདོད་ཀུན་འབྱུང་ནོར་བུ་རིན་པོ་ཆེ། །བདག་གཞན་རྣམས་ཀྱི་དབུལ་བའི་སྡུག་བསྔལ་སེལ། །དངོས་གྲུབ་རྣམ་གཉིས་མཆོག་གི་གཡང་ཁུག་ཅིག །གནས་སྐབས་ཕྱི་ནང་བར་ཆད་ཞི་བ་དང་། །མཐར་ཐུག་རྣམ་མཁྱེན་དོན་གཉིས་ལྷུན་གྱིས་གྲུབ། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །གང་བསམ་འབད་མེད་རྫོགས་ལྡན་དཔལ་ཐོབ་ཤོག །གཡང་འགུགས་དགོས་འདོད་ཀུན་འབྱུང་འདི། །རྨི་ལམ་སྣང་ངོར་ཤར་བ་ལྟར། །སྔགས་བན་ཆོས་དབྱིངས་མིང་ཅན་དེས། །བྲིས་པས་འགལ་འཁྲུལ་ལྷ་ལ་བཤགས།། ༄༅། དམ་ཆོས་སྐུ་གསུམ་དགོངས་མཛོད་ལས། །ལྷ་ཆེན་གསོལ་མཆོད་འགྲོ་བ་དབང་བསྡུད་བཞུགས།། སྐུ་གསུམ་བདེར་གཤེགས་ཡོངས་རྫོགས་དཔལ། །དབང་ཆེན་ཧེ་རུ་ཀ་ལ་འདུད། །ཟབ་གསང་བསྟན་དང་འགྲོ་ཕན་ཕྱིར། །གསོལ་མཆོད་འགྲོ་བ་དབང་བསྡུད་བསྟན། །ཟངས་སོགས་རིན་ཆེན་སྣོད་གཙང་དུ། །འབྲུ་སྨན་རྩི་བཅུད་དཀར་མངར་རིགས། །ཆང་གིས་སྦྲུས་ཏེ་གདན་ཟླུམ་སྟེང་། །དབང་གི་གཏོར་མ་ཟླ་གམ་དབྱིབས། །དེ་འཁོར་རང་འདྲ་ཆུང་བ་བཞི། །གཏོར་སྐྱུ་བཅུ་གཉིས་སུམ་བརྩེགས་བསྐོར། །སྣ་ཚོགས་རྒྱན་གྱིས་མཛེས་བྱས་བཀོད། །འོ་སྦྲང་ཆང་བྲན་ཕུད་སྐྱེམས་བཤམས། །དབང་དྲག་རོལ་བའི་ཏིང་འཛིན་གྱིས། །འབྲུ་གསུམ་སྔགས་རྒྱས་བྱིན་གྱིས་བརླབས།། ཧཱུྃ་ཧྲཱིཿ རང་ཉིད་དབང་ཆེན་སྐུར་གསལ་བའི། །ཐུགས་སྲོག་འོད་ཀྱི་འཕྲོ་འདུ་ལས། །མདུན་དུ་པད་རག་གཞལ་ཡས་ཁང་། །ཚད་དང་མཚན་ཉིད་རྒྱན་བཀོད་རྫོགས། །དེ་དབུས་པད་ཉི་ཟླ་ཕྱེད་སྟེང་། །ཐུགས་ཀྱི་དབང་ཕྱུག་ལྷ་ཆེན་པོ། །སྔོ་སྐྱ་གཡས་དཀར་གཡོན་དམར་ཞལ། །གྲི་གུག་ཊཱ་རུ་ལྕགས་ཀྱུ་གཡས། །ཐོད་ཁྲག་རྩེ་གསུམ་ཞགས་པ་གཡོན། །ཞབས་བཞི་འདོར་སྟབས་བདུད་བཞི་གནོན། །ཕྱོགས་བཞིར་ཨུ་མ་གྲི་ཐོད་སྔོ། །དགའ་བདེར་སྟེར་མ་ནོར་བུམ་སེར། །རིག་བྱེད་མདའ་གཞུ་འགེངས་མ་དམར། །འཇོམས་བྱེད་སྟྭ་རེ་ཐོ་བ་ལྗང་། །བཞི་ཀའི་ཕྱག་བཞིའི་འོག་མ་དག །ལྕགས་ཀྱུ་ཞགས་པ་བསྣམས་པའོ། །ཤར་དུ་སྐུ་ཡི་དབང་ཕྱུག་དང་། །རྨོངས་བྱེད་ཆུ་ཡི་ཨུ་མ་དཀར། །ལྷོ་རུ་ཡོན་ཏན་དབང་ཕྱུག་དང་། །འདོད་བྱེད་ས་ཡི་ཨུ་མ་སེར། །ནུབ་ཏུ་གསུང་གི་དབང་ཕྱུག་དང་། །ཆགས་བྱེད་མེ་ཡི་ཨུ་མ་དམར། །བྱང་དུ་ཕྲིན་ལས་དབང་ཕྱུག་དང་། །གཡོ་བྱེད་རླུང་གི་ཨུ་མ་ལྗང་། །ཡབ་རྣམས་ལྕགས་ཀྱུ་ཞགས་པ་དང་། །ཡུམ་རྣམས་གྲི་ཐོད་འཛིན་ཅིང་སྟོབས། །སྒོ་བཞིར་འགུགས་འཆིང་སྡོམ་མྱོས་མ། །ཕྱོགས་མདོག་རང་རྟགས་ཕྱག་རྒྱར་ལྡན། །ཀུན་ཀྱང་རིན་ཆེན་རུས་རྒྱན་དང་། །མེ་ཏོག་ཐོད་བཅིང་དོ་ཤལ་མཛེས། །ཐབས་རྣམས་ཁྲོ་འཛུམ་སྦོམ་ཐུང་སྒེག །སྤྱན་གསུམ་མཆེ་གཙིགས་མཚན་རྟགས་བསྒྲེངས། །ཤེས་རབ་ཆུ་སྐྱེས་འོ་འཛིན་རྒྱས། །ཞི་ཆགས་མཛེས་འཛུམ་སྤྱན་གསུམ་གཡོ། །སོ་སོའི་གནས་གསུམ་ཡི་གེ་གསུམ། །ཐུགས་སྲོག་འོད་ཀྱི་འཕྲོ་འདུ་ཡིས། །ཁམས་གསུམ་སྲིད་པའི་གནས་རྣམས་ནས། །ཡེ་ཤེས་ལྷ་ཚོགས་སྤྱན་དྲངས་བསྟིམས། ཞེས་བསམ་སྤོས་རོལ་དར་དམར་བཅས། ཧཱུྃ་ཧྲཱིཿ འཇིག་རྟེན་དབང་ཕྱུག་སྤྱན་རས་གཟིགས། །ཐུགས་རྗེའི་རོལ་པ་རྟ་མཆོག་དཔལ། །བཀའ་སྡོད་ཚུལ་འཛིན་ལྷ་ཆེན་པོ། །མགྲིན་སྔོན་དྲག་པོ་གནས་འདིར་སྤྱོན། །སྐུ་གསུང་ཐུགས་ཡོན་ཕྲིན་ལས་ཀྱི། །དབང་ཕྱུག་ལྕམ་དྲལ་བཀའ་འཁོར་བཅས། །ལས་སྒྲུབ་དངོས་གྲུབ་སྩོལ་བའི་ཕྱིར། །འདིར་བྱོན་རྟེན་ལ་བཞུགས་སུ་གསོལ།། ཨོཾ་མ་ཧཱེ་ཤྭ་ར་བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ ཏིཥྛ་ལྷན། ཧཱུྃ་ཧྲཱིཿ སྐུ་གསུམ་ཕྲིན་ལས་དབང་ཕྱུག་ཆེ། །ལྷ་ཆེན་ལྕམ་དྲལ་འཁོར་བཅས་ལ། །སངས་རྒྱས་བསྟན་པ་བསྲུང་བའི་ཕྱིར། །དམ་ཚིག་བསྲེ་ཞིང་དགའ་བས་འདུད། །ལྷ་དང་མི་ཡི་འཇིག་རྟེན་ན། །བདག་པོས་བཟུང་དང་དེར་གཞན་པའི། །ཕྱི་ནང་གསང་བའི་མཆོད་བསྐང་རྫས། །དཔག་མེད་བློ་ཡིས་བླངས་ཏེ་འབུལ། །དགྱེས་པར་བཞེས་ལ་བདག་ཅག་གི། །ཡིད་ལ་རེ་ཞིང་སྨོན་པ་ཡི། །ཆོས་སྲིད་འདོད་དོན་མ་ལུས་ཀུན། །གེགས་མེད་མྱུར་འགྲུབ་དངོས་གྲུབ་རྩོལ།། ཨོཾ་མ་ཧཱེ་ཤྭ་ར་ས་པ་རི་ཝ་ར་ཨརྒྷཾ་པཱདྱཾ༴སོགས། ཤཔྟ་མ་ཧཱ་སརྦ་པཱུ་ཛ་ཧོ། ཞེས་དང་། ལྷ་ཆེན་འཁོར་བཅས་ཀྱི་ལྗགས་འོད་དམར་ལྕགས་ཀྱུའི་དབྱིབས་ཅན་གྱི་སྦུ་གུས་དྲངས་ཏེ་གསོལ་བར་བསམ་ལ། ཨོཾ་མ་ཧཱ་དཱེ་ཝ་སརྦ་ས་པཱ་རི་ཝ་ར་ཨ་མྲྀ་ཏ་རཀྟ་བཱ་ལིང་ཏ་ཁཱ་ཧི་ཁཱ་ཧི། ལན་གསུམ། ཁམས་གསུམ་གྱི་དབང་ཕྱུག་ཆེན་པོ་མགྲིན་སྔོན་དྲག་པོ་ལྕམ་དྲལ་བཀའ་སྡོད་འཁོར་ཚོགས་དང་བཅས་པ་རྣམས་ཀྱིས་དམ་རྫས་ཀྱི་གཏོར་མ་འདི་བཞེས་ལ། བསྟན་པ་དང་བསྟན་འཛིན་སྤེལ་ཅིག རྣལ་འབྱོར་བའི་མགོན་སྐྱབས་མཛོད་ཅིག འཇིག་རྟེན་གྱི་རྒུད་པ་སོལ་ཅིག ནད་མུག་དང་མཚོན་འཁྲུག་ཟློག་ཅིག ཆོས་སྲིད་ཀྱི་འདོད་དོན་སྤེལ་ཅིག མདོར་ན་ཞི་རྒྱས་དབང་དྲག་གི་ཕྲིན་ལས་གང་བཅོལ་ཐོགས་མེད་དུ་སྒྲུབ་ཅིང་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པར་མཛོད་ཅིག ཅེས་གསོལ། ཧྲཱིཿ དབང་དྲག་རོལ་པའི་བཀའ་ཉན་གཙོ། །དབང་ཕྱུག་མགྲིན་སྔོན་ནག་པོ་ཆེ། །དབང་ལྷ་རིགས་ལྔ་སྟངས་དཔྱལ་བཅས། །དབང་གི་ཕྲིན་ལས་མཛད་ཕྱིར་བསྟོད། །དབང་ཕྱུག་ཆེན་པོའི་བཀའ་འཁོར་དུ། །དབང་དྲག་ལས་ལ་དགྱེས་པ་ཡི། །དབང་ཆེན་ལྷ་ཚོགས་མ་ལུས་ལ། །དབང་སྡུད་མཛད་ཕྱིར་བསྟོད་པ་འབུལ། ཧྲཱིཿ མ་ཧཱ་དཱེ་ཝ་དབང་གི་ལྷ། །ལྕམ་དྲལ་སྤྲུལ་འཁོར་བཅས་པ་རྣམས། །བཤོས་དང་སྐྱེམས་ཀྱིས་གསོལ་ཞིང་མཆོད། །མཐུན་པའི་རྫས་ཀྱིས་ཐུགས་དམ་བསྐང་། །ཉམས་ཆགས་ཅི་མཆིས་དབྱིངས་སུ་བཤགས། །བསྟན་སྲུང་མཆོག་ཏུ་མངའ་གསོལ་ལོ། །འཁོར་དང་ལོངས་སྤྱོད་གཉེར་དུ་གཏད། །ཐུགས་བསྐྱེད་དམ་བཅས་གནད་ནས་བསྐུལ། །ཆོས་དང་སྲིད་ཀྱི་ལས་ཀུན་བཅོལ། །ཁམས་གསུམ་དབང་སྡུད་དངོས་གྲུབ་ཞུ། །མ་གཡེལ་རེ་ཞིང་སྨོན་པ་ཀུན། །གེགས་མེད་ལྷུན་གྱིས་གྲུབ་པར་མཛོད། ཞེས་བསྟོད་ཅིང་ཕྲིན་ལས་བཅོལ་ལོ།། དབང་ཆེན་གསང་བ་ཀུན་རྫོགས་ཀྱི་བཀའ་སྲུང་ལྷ་ཆེན་མགྲིན་སྔོན་གྱི་གསོལ་མཆོད་འགྲོ་བ་དབང་སྡུད་ཅེས་བྱ་བ་འདི་ཡང་། སྙིང་གྲོགས་དམ་པའི་ངོར་སྔགས་ནག་འཇིགས་མེད་རྣམ་རྒྱལ་གྱིས་ཤར་མར་སྤེལ་བ་དགེའོ།། དགེའོ།། དགེའོ།། དགོངས་འདུས་བཀའ་སྲུང་གསོལ་བསྡུས།༄༅། དགོངས་འདུས་བཀའ་བསྲུང་གསོལ་བསྡུས་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཧྲཱིཿ བླ་མ་དགོངས་པ་འདུས་པའི་བཀའ་སྲུང་གཙོ། །དབང་ཆེན་རྟ་མགྲིན་ནག་པོ་ཡབ་ཡུམ་སྲས། །སྡེ་བརྒྱད་དྲེགས་པའི་འཁོར་བཅས་ད་ཚུར་བྱོན། །མཆོད་གཏོར་འདི་བཞེས་མཆོག་ཐུན་དངོས་གྲུབ་སྩོལ། །ཟབ་གཏེར་བསྲུང་མ་བཙན་རྒོད་མཆེད་སྡེ་བདུན། །ཕྱི་ནང་གསང་སོགས་སྤྲུལ་པ་ཡང་སྤྲུལ་རྣམས། །འདིར་བྱོན་དམ་རྫས་མཆོད་གཏོར་དགྱེས་པར་རོལ། །རྣམ་བཞིའི་ཕྲིན་ལས་གང་བཅོལ་འགྲུབ་པར་མཛོད། །དཔལ་ཆེན་བཀའ་སྡོད་དབང་ཕྱུག་ལྕམ་དྲལ་སོགས། །དྲེགས་པ་ཉེར་གཅིག་རང་རང་འཁོར་བཅས་རྣམས། །སོ་སོའི་གནས་ནས་འདིར་གཤེགས་མཆོད་གཏོར་བཞེས། །བསམ་དོན་ཆོས་བཞིན་འགྲུབ་པའི་ཕྲིན་ལས་མཛོད། །ཁྱད་པར་ཟབ་གསང་སྙིང་པོའི་བྱ་ར་བ། །ལས་བྱེད་ཌཱཀྐི་ཤ་ཟ་ཁ་མོ་ཆེ། །འཁོར་བཅས་འདིར་བྱོན་དམ་རྫས་གཏོར་མ་ལོངས། །འདོད་དགུ་ཡིད་བཞིན་འགྲུབ་པའི་ཕྲིན་ལས་མཛོད། །ནད་གདོན་བར་ཆད་འཇིགས་ཚོགས་ཞི་བ་དང་། །ཚེ་བསོད་དཔལ་འབྱོར་ཡོན་ཏན་རྒྱས་པ་དང་། །མོས་བཞི་རླུང་སེམས་སྣང་བ་དབང་དུ་འདུས། །བདུད་བགེགས་དམ་སྲི་ཀླ་ཀློ་རྨིང་མེད་རློགས། །མདོར་ན་ཇི་ལྟར་རེ་ཞིང་སྨོན་པ་ཀུན། །གེགས་མེད་ལྷུན་གྱིས་གྲུབ་པའི་ཕྲིན་ལས་མཛོད།། ཅེས་པ་འདི་ཡང་བླ་མ་རིན་པོ་ཆེ་འགྱུར་མེད་བློ་གྲོས་མཐའ་ཡས་ཀྱིས་དགོངས་འདུས་ཀྱི་དབང་ལུང་གནང་སྐབས། གསོལ་མཆོད་འདི་ལྟ་བུ་དགོས་ཞེས་ཀུན་གྱིས་བསྐུལ་ངོར། བླ་མའི་བཀའ་བཞིན་མགོ་སྤྲུལ་བས་བྲིས་པ་དགེའོ།། བསང་གི་ཁ་སྨོན་དགེ་ལེགས་ཀུན་འབྱུང་།༄༅། བསང་གི་ཁ་སྨོན་དགེ་ལེགས་ཀུན་འབྱུང་བཞུགས། རཾ་ཡཾ་ཁཾ། ལན་གསུམ། ཨོཾ་ཨཱཿཧཱུྃ། ལན་གསུམ། བདུད་རྩི་བསང་གི་མཆོད་པ་འདོད་ཡོན་ལྔ་ཡི་འོད་ཟེར་འཕྲོ་བ། བཟའ་བ་རི་རབ་བས་དཔང་མཐོ་བ། བཏུང་བ་རྒྱ་མཚོ་བས་གཏིང་ཟབ་པ། འདོད་པའི་ལོངས་སྤྱོད་བསམ་གྱིས་མི་ཁྱབ་པའི་གཏེར་ཆེན་པོ་གཅིག་ཏུ་གྱུར། ཧོ་དགོངས་སུ་གསོལ་ལོ། ལན་གསུམ། མཐོ་བ་མི་མངོན་ནམ་མཁའི་དབྱིངས་རུམ་མན་ཆད། དམའ་བ་དོག་མོ་ས་ཡི་ཁོར་ཡུག་ཡན་ཆད། ཡངས་པ་བར་སྣང་ཁམས་ཀྱི་ཀློང་དཀྱིལ་ཚུན་ཆད་ན་བཞུགས་པའི་སྐུ་རི་རྒྱལ་ལྷུན་པོ་བས་ཀྱང་བརྗིད་ཆེ་བ། གསུང་ནམ་མཁའི་འབྲུག་སྒྲ་བས་ཀྱང་གདངས་ཟབ་པ། ཐུགས་མཁྱེན་བརྩེ་ཉི་ཟླ་བས་ཀྱང་འོད་གསལ་བ། གཟིགས་པ་སྤྱན་གྱི་དབང་པོ་ཤེལ་ལས་གསལ་བ། གསན་པ་སྙན་གྱི་དབང་པོ་དར་ལས་སྲབ་པ། དགོངས་པ་མངོན་ཤེས་ཀྱི་ཐུགས་ནི་ལྷ་བས་ལྷག་པ། བརྟེན་ན་ཐུགས་རྗེ་ཆེ་བ། སྐྱབས་ན་ནུས་མཐུ་མངའ་བ། ཞུས་ན་བྱིན་རླབས་མྱུར་བ། ཁམས་གསུམ་འགྲོ་བའི་དེད་དཔོན། སྲིད་གསུམ་སྐྱེ་དགུའི་གཙུག་ནོར། གཞི་བྱེས་ཀུན་གྱི་བསྲུང་མ། མཆོད་པ་ཕུད་ཀྱི་མངའ་བདག འབོད་པ་མགྲོན་གྱི་གཙོ་བོ། བསྟོད་པ་ཕྱག་གི་ཕུལ་ས། བསླུ་མེད་གཏན་གྱི་སྐྱབས་གནས་དཀོན་མཆོག་རྣམ་གསུམ། བྱིན་རླབས་ཐུགས་རྗེའི་གཏེར་མཛོད་བཀའ་བརྒྱུད་བླ་མ། དངོས་གྲུབ་ཀུན་གྱི་འབྱུང་གནས་ཡི་དམ་ཞི་ཁྲོ། ཕྲིན་ལས་ཐོགས་མེད་སྒྲུབ་མཛད་མ་སྲིང་མཁའ་འགྲོ། འགལ་རྐྱེན་བར་ཆད་སེལ་མཛད་ཆོས་སྐྱོང་བསྲུང་མ། མཐུན་རྐྱེན་ཡིད་བཞིན་སྒྲུབ་པའི་ནོར་ལྷ་གཏེར་བདག ཁ་འཛིན་སྡོང་གྲོགས་བྱེད་པའི་ཡུལ་ལྷ་གཞི་བདག ༧ ཨ་མྱེ་རྡོ་རྗེ་གཡུ་ཁྲོམ། ཡུམ་ཆེན་བག་མ་ཞྭ་མེད། ལྕམ་སྲིང་རྡོ་རྗེ་གཡུ་སྒྲོན། དགྲ་བླ་མི་མགོན་དཀར་པོ། གནས་ལུང་དབང་བསྡུད་ལྷ་རྩེ། གདུགས་ཆེན་དཔའ་བོ་སྟག་འཕྲུ། ཐང་སྟོད་ཀྱི་ནོར་བུ་ལྷ་རྩེ། ཐང་སྨད་ཀྱི་གཉན་པོ་གཡུ་རྩེ། དཔའ་བོ་རྡོ་རྗེ་ལྷ་རྩེ། ཆུ་ལུང་གླང་པོ་དམ་བསྟན། ཁྱབ་འཇུག་ཟླ་བ་ཐོད་དཀར། འཁྱིལ་ཆེན་རྟ་ཤར་རྨོག་མཐོ། སྲས་མཆོག་རྡོ་རྗེ་ཞལ་དཀར། མཚོ་ལུང་མཚོ་སྨན་རྒྱལ་མོ། བཀའ་བློན་སེང་གེ་གནམ་རྫོང་། ནགས་ལུང་བཀྲ་ཤིས་ལྷ་རྩེ། ལྡོང་རི་མགོན་པོ་ལེགས་ལྡན། ངེས་ལེགས་སྐུ་བླ་དུང་རྩེ། ཏཱ་རེ་རི་རྒྱལ་འཕན་ཕྱུག གནས་བདག་རྡོ་རྗེ་དྲག་རྩལ། དངུལ་རྫི་གཡུ་མཚོ་ཕྱུག་མོ། ཁྱད་པར་དུ་ས་ཆ་ཡུལ་རི་འདི་ལ་གནས་པའི་ཡུལ་ལྷ་གཞི་བདག་འཁོར་དང་བཅས་པ་སྙན་གསན་ཅིང་དགོངས་སུ་གསོལ། ཧོ། དེ་རིང་བཀྲ་ཤིས་ལྷ་ཡི་ཉི་མ། ལྷ་མིའི་བདེ་སྐྱིད་དར་བ། སྟེང་ལྷ་ཡི་དབུ་འཕང་མཐོ་ཞིང་རྒྱལ་རྔ་སྒྲོགས་པ། བར་མི་ཡི་བསམ་པ་འགྲུབ་ཅིང་བདེ་སྐྱིད་དར་བ། འོག་ཀླུ་ཡི་དཔལ་འབྱོར་རྒྱས་ཤིང་འཁྲུགས་རྩོད་ཞི་བ། གནམ་ལ་བཀྲ་ཤིས་ཤིང་ས་ལ་བྱིན་ཆགས་པ། བར་སྣང་ལ་གཟའ་སྐར་དར་བ། དུས་བཟང་དང་རྟེན་འབྲེལ་ཕུན་སུམ་ཚོགས་པའི་ཉི་མ་འདི་ལ། བདག་གིས་ནམ་མཁའ་གང་བའི་ལྷ་ཚོགས་ཁྱེད་རྣམས་ཀྱི་ཐུགས་རྗེ་དང་བྱིན་རླབས་ཡིད་ལ་དྲན་བཞིན། གུས་པའི་ལུས་ཀྱི་རྣམ་འགྱུར་ངོམ། བཟའ་བཏུང་ཕུད་ཀྱི་མཆོད་པ་ཕུལ། བདེན་པའི་ཚིག་གིས་ཞུ་བ་གསོལ་བ་ཡིན་པས་མངོན་ཤེས་ཀྱི་ཐུགས་ཀྱིས་དགོངས་ཤིག ཡེ་ཤེས་ཀྱི་སྤྱན་གྱིས་གཟིགས་ཤིག རྫུ་འཕྲུལ་གྱི་སྙན་གྱིས་གསོན་ཅིག ཐུགས་རྗེ་ཡི་ཕྱག་ཡངས་རྐྱོངས་ཤིག མགོ་བརྒྱས་ཞྭ་ཕུད་ས། ལག་བརྒྱས་ཇ་ཕུད་མཆོད་ས། ཁ་བརྒྱས་ཞུ་བ་འབུལ་ས། སྙིང་ནས་རེ་བའི་ལྷ་ཚོགས་ཁྱེད་རྣམས་ཀྱིས་བདག་ཅག་རེ་ལྟོས་ཀུན་གྱི་ལས་ཉོན་སྒྲིབ་གཉིས་ཀྱི་བག་ཆགས་བྱང་བར་མཛོད་ཅིག བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པར་མཛོད་ཅིག དགྲ་ཉོན་མོངས་པ་རྡུལ་དུ་རློགས་ལ་གྲོགས་དགེ་བའི་བཤེས་གཉེན་མགོན་དུ་སྤྲོད་ཅིག གནོད་བྱེད་སྡིག་པའི་གྲོགས་དང་བྱེ་བྲལ་དུ་ཐོངས་ལ་ཕན་བྱེད་དགེ་བའི་གྲོགས་དང་འབྲལ་མེད་དུ་མཛོད་ཅིག ཆོས་མིན་ཉེས་པའི་བྱ་བ་ཤུལ་མེད་དུ་ཐོངས་ལ་ཆོས་མཐུན་ལེགས་པའི་སྤྱོད་པ་གོང་འཕེལ་དུ་མཛོད་ཅིག གཉེན་གྱི་གྲོགས་བྱུང་ན་བརྒྱ་ནས་སྟོང་དུ་སྤེལ་ཅིག སྡང་བའི་དགྲ་བྱུང་ན་གཉིས་ནས་གཅིག་ཏུ་སྡུས་ཤིག སྔ་དགྲ་བྱས་པའི་ལས་འཕྲོ་གཉེན་དུ་སྦྱོར་ཅིག ད་དགྲ་བརྩམ་པའི་སྒོ་གསུམ་བྲན་དུ་ཁོལ་ཅིག ཕྱི་དགྲ་ཤོམ་པའི་བློ་སེམས་དགེ་ལ་སྒྱུར་ཅིག བྱེས་སུ་འགྲོ་བའི་ལམ་སྣ་དྲོངས་ཤིག གཞི་རུ་སྡོད་པའི་བསྲུང་སྐྱོབས་མཛོད་ཅིག ཁ་ཡི་ཟས་འདོད་ཟས་དང་སྤྲོད་ཅིག ལག་པའི་ནོར་འདོད་ནོར་དང་སྤྲོད་ཅིག རྒྱབ་ཀྱི་གོས་འདོད་གོས་དང་སྤྲོད་ཅིག རྐང་པའི་རྟ་འདོད་རྟ་དང་སྤྲོད་ཅིག སྙིང་གི་ཆོས་འདོད་ཆོས་དང་སྤྲོད་ཅིག དཔའ་བའི་མི་ལ་དཔུང་མཛོད་ཅིག ཞོན་པའི་རྟ་ལ་མགྱོགས་བང་སྣོན་ཅིག སྲ་བའི་གོས་ལ་འཛིན་ཐག་མཛོད་ཅིག རྣོ་བའི་མཚོན་ལ་སོ་ཞག་བཏོན་ཅིག བཙན་པའི་མཁར་ལ་བ་གམ་ཐོག་ཅིག དགྲ་བྱུང་ན་བྱ་ར་གྱིས་ཤིག བྱད་བྱུང་ན་ཕྱིར་ལ་བཟློག་ཅིག བགེགས་བྱུང་ན་དབང་དུ་སྡུས་ཤིག གདོན་བྱུང་ན་དྲག་པོས་ཐུལ་ཅིག དུག་བྱུང་ན་སྨན་གྱིས་གསོས་ཤིག ཆུ་ཟམ་པ་མེད་པ་ལ་གྲུ་ཟམ་ཚུགས་ཤིག བྲག་ཐེམ་པ་མེད་པ་ལ་ཐེམ་སྐས་གྱིས་ཤིག ཐང་བླ་གབ་མེད་པ་ལ་རྫོང་ར་གྱིས་ཤིག སྔ་སོ་ནས་བརྩན་པའི་ས་ཟུངས་ཤིག ཕྱི་སོ་ནས་མང་པོའི་དཔུང་སྣོན་ཅིག གཞན་ཡུལ་དུ་བགྲོད་པའི་སྐྱེལ་མ་གྱིས་ཤིག རང་ཡུལ་དུ་འོང་བའི་བསུ་མ་མཛོད་ཅིག ལྟ་བའི་མིག་ལ་དར་ཕྱོར་ཅིག ཉན་པའི་རྣ་ལ་དུང་བུས་ཤིག ཁྱིམ་གང་མི་ཡི་བསྲུང་མ་གྱིས་ཤིག ར་གང་ནོར་གྱི་རྫི་བོ་གྱིས་ཤིག གྲལ་གང་ལུས་ཀྱི་བཀྲག་མདངས་སྩོལ་ཅིག གཟུགས་མཛེས་ཅན་གྱི་གྲོགས་དང་སྤྲོད་ཅིག མཛོད་གང་ནོར་གྱི་དངོས་གྲུབ་སྩོལ་ཅིག སྣོད་གང་ཟས་ཀྱི་བཅུད་ཆེན་ཕོབ་ཅིག སྐྱེ་འགྲོ་ཕོ་མོ་དབང་དུ་སྡུས་ཤིག བསམ་པའི་དོན་ཀུན་འགྲུབ་པར་མཛོད་ཅིག ལེགས་པའི་ཚོགས་ཐམས་ཅད་ལ་ཁ་ནས་སྤྲོད་ལ་ཉེས་པའི་ཚོགས་ཐམས་ཅད་ལུང་ཁུང་ནས་སྣོལ་ཅིག ཉིན་གྱི་བྱ་ར་གྱིས་ཤིག མཚན་གྱི་མེལ་ཚེ་མཛོད་ཅིག དགྲ་ཇག་གཉའ་ནོན་མཛོད་ཅིག ཆོམ་རྐུན་ཆམ་ལ་ཕོབ་ཅིག འདྲེ་གདོན་རྡུལ་དུ་རློགས་ཤིག མིང་གི་ལྷག་མར་མཛོད་ཅིག བདག་ཅག་གཞི་མགྲོན་འཁོར་དང་བཅས་པ་ཕྱོགས་བཞི་མཚམས་བརྒྱད་གར་འགྲོ་གར་འདུག་གར་གནས་ཀྱང་སྔོན་ནས་བསུ་མ་མཛོད་ཅིག རྒྱབ་ནས་སྐྱེལ་མ་མཛོད་ཅིག བར་དུ་སྡོང་གྲོགས་དམ་པ་མཛོད་ཅིག ཅི་བསམ་པ་དང་ཅི་རེ་བ་དང་། ཅི་འདོད་པ་ཐམས་ཅད་དཀར་པོའི་ཆོས་དང་མཐུན་པར་མཛོད་ཅིག ཆོས་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛོད་ཅིག བསྟན་འཛིན་སྐྱེས་བུའི་ཚོགས་ཀྱི་སྐུ་ཚེ་བསྲིང་བར་མཛོད་ཅིག སེམས་ཅན་གྱི་བདེ་སྐྱིད་རྫོགས་ལྡན་གྱི་དུས་ལྟར་འབྱུང་བར་མཛོད་ཅིག སྔོན་བཟང་པོ་བྱས་པའི་གཏང་རག་གཏོང་ངོ་། །ད་བཟང་པོ་བྱེད་པའི་ཞུ་བ་འབུལ་ལོ། །ཚེ་རྫི་དང་སྲོག་སྐྱོབས་མཛོད་ཅིག ཁ་འཛིན་དང་སྡོང་གྲོགས་མཛོད་ཅིག མཆོད་པ་འབུལ་ལོ། །གཏང་རག་གཏོང་ངོ། །ངོ་སོ་བསྟོད་དོ། །ཀི་ཀི་བསྭོ་བསྭོ་ལྷ་རྒྱལ་ལོ། །ཅེས་པ་འདི་ཡང་འཇིགས་མེད་རྣམ་རྒྱལ་བས་བྲིས་པ་དགེ་ལེགས་འཕེལ།། བསང་གི་ཁ་སྨོན་གནའ་བོའི་ལུགས་བཟང་།༄༅། བསང་གི་ཁ་སྨོན་གནའ་བོའི་ལུགས་བཟང་བཞུགས། རཾ་ཡཾ་ཁཾ། ལན་གསུམ། བསང་རྫས་ཀྱི་འབག་རྩོག་མནོལ་གྲིབ་མི་གཙང་ཐམས་ཅད་རཾ་གྱིས་བསྲེགས། ཡཾ་ལས་རླུང་གིས་གཏོར། ཁཾ་ལས་ཆུ་བྱུང་བས་བཀྲུས། སླར་ཡང་བཟང་ངན་དང་གཙང་དམེ་འཛིན་པའི་རྣམ་རྟོག་བག་ཆགས་དང་བཅས་པ་ཨོཾ་གྱིས་སྟོང་པ་ཉིད་ཀྱི་དབྱིངས་སུ་སྦྱངས། ཨཱཿཡིས་མཆོད་སྤྲིན་ནམ་མཁའ་གང་བར་སྤེལ། ཧཱུྃ་གིས་མྱོང་གྲོལ་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུྃ། ལན་གསུམ། བསང་དུད་འདོད་དགུའི་སྤྲིན་ཕུང་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་སྤྲིན་དང་མཉམ་པ་འདིས་བསང་ཞིང་མཆོད་པའི་ཡུལ་ནི། བརྒྱུད་གསུམ་རིག་འཛིན་བླ་མ། ཡི་དམ་ཞི་ཁྲོ་རབ་འབྱམས། གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས། དུར་ཁྲོད་ཆེན་པོ་བརྒྱད་ན་བཞུགས་པའི་དཔའ་བོ་དང་མཁའ་འགྲོ། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་སྲུང་མ། ཆོས་འཁོར་ལྷ་སའི་སྲུང་མ། ཨོ་རྒྱན་སྨིན་གྲོལ་གླིང་དང་རྡོ་བྲག་སྟོད་སྨད་ཀྱི་སྲུང་མ། ཀཿདཔལ་རྫོགས་གསུམ་གྱི་སྲུང་མ། ཇོ་ཤང་ཀར་འབྲུག་གི་སྲུང་མ། སེར་འབྲས་དགའ་གསུམ་གྱི་སྲུང་མ། བོད་ཆབ་དཀར་དང་འདྲ་བསྒྱུར་གྱི་སྲུང་མ། བཀའ་གཏེར་གནས་གསུམ་གྱི་བདག་པོ། རྡོ་རྗེ་ཆོས་སྐྱོང་བའི་སྲུང་མ་དམ་ཅན་རྒྱ་མཚོའི་ཚོགས་འཁོར་དང་བཅས་པ་ཐམས་ཅད་བསང་ངོ། །གསོལ་ལོ། །མཆོད་དོ།། དཔལ་མགོན་བདུན་ཅུ་རྩ་ལྔ། སྲིད་པ་ཆགས་པའི་ལྷ་དགུ། རང་ལ་འགོ་བའི་ལྷ་ལྔ། སྲུང་ཞིང་སྐྱོབས་པའི་ལྷ་དགུ། དགྲ་ལྷ་བཅུ་གསུམ། མགུར་ལྷ་བཅུ་གསུམ། རྩེ་ལྷ་བཅུ་གསུམ། བསྟན་མ་བཅུ་གཉིས། སྐྱོང་མ་བཅུ་གཉིས། ཡང་མ་བཅུ་གཉིས། གླིང་རྗེ་གེ་སར་རྒྱལ་པོ། དཔའ་འཁོར་སྡེ་དཔོན་སུམ་ཅུ། ཡང་ཐུལ་གྲུབ་ཆེན་མི་བདུན། ཞེ་ཐུལ་ཁྲ་གླག་སྤྱང་གསུམ། ལྷོ་འཛམ་བུ་གླིང་། སྟོད་མངའ་རིའི་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ལ་གནས་པའི་ལྷ་སྲིན་སྡེ་བརྒྱད། མངོན་ཤེས་རྫུ་འཕྲུལ་ཅན། མཐུ་སྟོབས་དཔའ་རྩལ་ཅན་ཁྱེད་རྣམས་རང་རང་སོ་སོའི་འཁོར་དང་བཅས་པ་ཐམས་ཅད་བསང་ངོ་། །གསོལ་ལོ། །མཆོད་དོ།། སྟོད་ཀྱི་གངས་རི་ཏི་སེ། ཡར་སྟོད་ཤམ་པོ་གངས་རི། གཉན་ཆེན་ཐང་ལྷ་ཡར་ཞུ། གཏེར་བདག་རྨ་རྒྱལ་སྤོམ་ར། ཤར་གྱི་གཉན་པོ་གཡུ་རྩེ། མགོན་པོ་འབྲོང་རི་སྨུག་པོ། ཉག་སྟོད་ཁ་བ་ལབ་རི། དགེ་བསྙེན་བཞག་ར་ལྷ་རྩེ། གནས་ཆེན་རྒྱལ་མོ་མུ་རྡོ། རོང་བཙན་ཁ་བ་དཀར་པོ། འབོ་གངས་དཀར། ཤར་དུང་རི། དཔལ་རི་བདེ་ཆེན་རྫོངས་སོགས་ལ་གནས་པའི་ས་བདག གཞི་བདག གནས་བདག་ཐམས་ཅད་བསང་ངོ། །གསོལ་ལོ། །མཆོད་དོ། །རྨ་རྫ་འབྲི་གསུམ་ལ་གནས་ལ། རྡོ་འཛི་སྨར་གསུམ་ལ་གནས་པ། ཏྲེ་ཧོར་སྙི་གསུམ་ལ་གནས་པ། རྫ་མདོ་མུར་ཤོག་གསུམ་ལ་གནས་པའི་ས་བདག་གཞི་བདག་གནས་བདག་ཐམས་ཅད་བསང་ངོ་། །གསོལ་ལོ། །མཆོད་དོ།། གཡུ་སྟོད་རྡོ་རྗེ་གཡུ་ཁྲོམ། གཡུ་སྨད་དངུལ་རྫི་གཡུ་མཚོ། གཡུ་སྙིང་དགྲ་བླ་མི་མགོན། གནས་ལུང་དབང་བསྡུད་ལྷ་རྩེ། གདུགས་ཆེན་དཔའ་བོ་སྟག་འཕྲུ། གཡུ་མཁར་ནོར་བུ་ལྷ་རྩེ། དཔའ་བོ་རྡོ་རྗེ་ལྷ་རྩེ། དགྲ་འདུལ་གཉན་པོ་གཡུ་རྩེ། ཆུ་ལུང་གླང་པོ་དམ་བརྟན། མཚོ་ལུང་མཚོ་སྨན་རྒྱལ་མོ། འཁྱིལ་ཆེན་རྟ་ཤར་རྨོག་མཐོ། བསྟན་བསྲུང་སྐུ་བླ་དུང་རྩེ། སྐུ་བླ་ར་ཁང་། སྲིད་པའི་བ་སྦལ་ཁྱུང་གསུམ། སྒ་ནུབ་མཚོ་སྨན་སྤུན་གསུམ། ཉིན་གྱི་བཙན་རྒོད་མཆེད་གསུམ། སྲིབ་ཀྱི་སྐུ་བླ་ཉྭ་དཀར། ལོ་མཆོག་རྡོ་རྗེ་ཞལ་དཀར། གཡུ་རོང་སྙི་བོ་སྤུན་གསུམ། གནས་སྲུང་གསང་སྔགས་བསྟན་སྐྱོང་། བསྟན་འཛིན་སོ་ཀོ་དགའ་ལྡན། རྒུ་རྡབ་ཕོ་བཟོ་མོ་བཟོ། སྐུ་བླ་སྲིད་རྒྱལ། རྨ་ལུང་ལྷ་བཙན་ལ་སོགས་པའི། ཕ་རི་གཡས་ལ་གནས་པ། ཚུ་རི་གཡོན་ལ་གནས་པ། ཉིན་རི་དཀར་ལ་གནས་པ། སྲིབ་རི་ནགས་ལ་གནས་པ། མཐོ་བ་རྫ་ལ་གནས་པ། འཁྱིལ་བ་མཚོ་ལ་གནས་པ། སྲ་བ་བྲག་ལ་གནས་པ། འབབ་པ་ཆུ་ལ་གནས་པ། སྐྱེས་པ་ཤིང་ལ་གནས་པ། འགྲོ་བ་ལམ་ལ་གནས་པ། ཟུག་པ་རྡོ་ལ་གནས་པ། མཚེར་ས་ཆུ་མིག་ལ་གནས་པ། ཞིང་དང་ཁང་ཁྱིམ་ལ་གནས་པ། ཐབ་དང་བང་བ་ལ་གནས་པ། ཕ་མྱེས་བརྒྱུད་པའི་ལྷ་བསྲུང་། ཚེ་རབས་ལས་ཀྱི་ལྷ་བསྲུང་། བརྟེན་བསྒྲུབ་མཆོད་པའི་ལྷ་བསྲུང་། མ་བརྟེན་རང་འཁོར་གྱི་ལྷ་བསྲུང་། ས་འདིའི་ས་བདག ཡུལ་འདིའི་ཡུལ་བདག ཨེ་མཆོད་དང་ཨེ་བསྟོད་ལ་རེ་བ་ཁྱེད་རྣམས་བསང་ངོ། །གསོལ་ལོ། །མཆོད་དོ།། དམ་ཚིག་གི་རྗེས་གཅོད་པ། ལེགས་ཉེས་ཀྱི་སྟངས་འཛིན་པ། བླང་དོར་གྱི་ཤན་འབྱེད་པ། བདེན་རྫུན་གྱི་དཔང་པོ་མཛད་པ། མངོན་ཤེས་ཀྱི་སྤྱན་དང་ལྡན་པ། རྫུ་འཕྲུལ་གྱི་ཤུགས་དང་ལྡན་པ། མཐུ་སྟོབས་ཀྱི་རྩལ་དང་ལྡན་པ་ཁྱེད་རྣམས་ཀྱིས་བསང་མཆོད་དམ་པ་རྒྱ་ཆེན་པོ་འདི་བཞེས་ལ། བདག་ཅག་འཁོར་དང་བཅས་པའི་ནད་དང་གནོད་པ་སོལ་ཅིག རྐྱེན་དང་བར་ཆད་ཟློག་ཅིག སྲོག་ལུས་དབང་ཐང་སྐྱེད་ཅིག ཁ་རྗེ་རླུང་རྟ་སྤེལ་ཅིག སྙན་པའི་དར་ཕྱོར་ཅིག གྲགས་པའི་དུང་བུས་ཤིག བཟང་པོ་བརྒྱ་དང་སྤྲོད་ཅིག ངན་པ་སྟོང་དང་སྣོལ་ཅིག ཆུ་ཟམ་པ་མེད་པ་ལ་རབ་ཕྱེས། བྲག་ཐེམ་སྐས་མེད་པ་ལ་ཐེམ་ལམ་གྱིས། གཞི་ལ་འདུག་པའི་བྱ་ར་གྱིས། བྱེས་སུ་འགྲོ་བའི་བསུ་སྐྱེལ་གྱིས། ཉིན་ལ་བྱ་ར་གྱིས། མཚན་ལ་མེལ་ཚེ་གྱིས། མི་ལ་ན་ཚ་མ་གཏོང་། ཕྱུགས་ལ་གོད་ཁ་མ་གཏོང་། ཟས་ནོར་ལ་ཇག་རྐུན་མ་གཏོང་། ཞིང་ལ་བཙའ་སད་སེར་གསུམ་མ་གཏོང་། ཁ་སྨྲས་དང་གླེང་བརྗོད་མ་གཏོང་། དགྲ་གྱོད་དང་འདྲེ་གདོན་མ་གཏོང་། གཅན་གཟན་འཕར་སྤྱང་གི་ཁ་མ་གཏོང་། དགྲ་ཡོང་ན་བྱ་ཐོངས། ནད་ཡོང་ན་སྨན་ཐོངས། དུག་ཡོང་ན་རྩི་སྐྱོལ། བྱད་ཡོངས་ན་རང་གཤེད་དུ་ཕོབས། ཁ་ཡི་ཟས་འདོད་ཟས་དང་སྤྲོད། རྐང་པའི་རྟ་འདོད་རྟ་དང་སྤྲོད། སྙིང་གི་ཆོས་འདོད་ཆོས་དང་སྤྲོད། དབུལ་པོ་ནོར་འདོད་ནོར་དང་སྤྲོད། དམངས་པོ་བུ་འདོད་བུ་དང་སྤྲོད། ཅི་བསམ་པའི་དོན་སྒྲུབ། ཅི་འདོད་པའི་རེ་བ་སྐོངས། ཅི་བཅོལ་པའི་ཕྲིན་ལས་ཐམས་ཅད་སྒྲུབས་ཤིག ལྷ་དང་སྲུང་མ་གཉན་པོ་ཁྱེད་རྣམས་ལ། སྔོན་ཆད་བཟང་པོ་བྱས་པའི་གཏང་རག ཕྱིན་ཆད་བཟང་པོ་བྱེད་པའི་ཞུ་སྐྱེམས་སུ་བསང་མཆོད་རྒྱན་ཆེན་པོ་འདིས་བསང་ངོ། བརྔན་ནོ། །གསོལ་ལོ། །མཆོད་དོ།། ཨོཾ་ཨཱཿཧཱུྃ། ཞེས་བསང་གི་ཁ་སྨོན་གནའ་ལུགས་བཟང་པོའི་རྗེས་སུ་ཟློས་ཚུལ་འདི་ཡང་ཆོས་གྲོགས་ཚེ་རིང་དོན་གྲུབ་ཀྱིས་བསྐུལ་ངོར། མགོ་སྤྲུལ་གྱིས་བྲིས་པའོ།། ༧ ཚེ་དང་བསོད་ནམས་དཔལ་འབྱོར་སྙན་གྲགས་དང་། །ནོར་དང་ལོངས་སྤྱོད་འདོད་དགུ་ཕང་མེད་པར། །གོང་ནས་གོང་དུ་མི་ཟད་གཏེར་ལ་སྤྱོད། །སྦྱིན་པའི་ཕར་ཕྱིན་རྫོགས་པའི་བཀྲ་ཤིས་ཤོག ། #div1 ཕུར་སྲུང་བསང་བསྡུས། ༄༅། ཕུར་སྲུང་བསང་བསྡུས་ནི། ཧཱུྃ། རྡོ་རྗེ་ཕུར་པའི་བཀའ་སྲུང་གཙོ། །དཔལ་ལྡན་དཀར་མོ་ཉི་ཟླ་དང་། །བདུད་རྒྱལ་ཐོད་པའི་ཕྲེང་བ་ཅན། །ཤྭ་ན་ས་བདག་བདག་ཉིད་མ། །སྐྱེས་བུ་གིང་ཆེན་བདུད་པོའི་ཚོགས། །དབང་ཕྱུག་ཆེན་པོ་བྱིས་པའི་ལྷ། །དྲཀྴད་བདུད་ཀྱི་མགོན་པོ་དང་། །མ་མོ་ཙིཏྟ་དུག་ཐུར་མ། །གཏེར་གྱི་བདག་པོ་འཁོར་བཅས་རྣམས། །བསང་མཆོད་བདུད་རྩིའི་སྤྲིན་ཕུང་གིས། །བསང་ངོ་མཆོད་དོ་མངའ་གསོལ་ལོ། །ཁྱེད་རྣམས་ཐུགས་དམ་དགྱེས་སྐོང་ནས། །བདག་ཅག་ཡོན་མཆོད་སྲུང་ཞིང་སྐྱོབས། །ལས་བཞི་གང་བརྩམས་མྱུར་འགྲུབ་མཛོད།། ཅེས་ཕུར་སྒྲུབ་ཀུན་ལ་འཐད་འོས་སུ་སྔགས་བན་དྷརྨའི་མིང་གིས་བྲིས་པའོ།། དགེའོ།། རྡོ་རྗེ་སྡེར་མོའི་བསང་བསྡུས་དགྲ་འཇོམས་འཕྲུལ་རྒྱོགས།༄༅། རྡོ་རྗེ་སྡེར་མོའི་བསང་བསྡུས་དགྲ་འཇོམས་འཕྲུལ་རྒྱོགས་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། སྟོང་ཆེན་དབྱིངས་ཀྱི་ཡུམ་ལྔའི་མཁའ་ཀློང་ནས། །བདེ་མཆོག་ཡེ་ཤེས་སྒྱུ་འཕྲུལ་རྣམ་རོལ་གར། །དགའ་བཞིའི་དཔལ་སྟེར་ཟག་མེད་བདུད་རྩིའི་སྤྲིན། །འཆི་མེད་ལམ་ཡངས་མཛེས་པར་བྱེད་པ་འདིས། །སྐུ་གསུམ་ཡོངས་འདུས་པད་འབྱུང་གཙོ་འཁོར་བསང་། །བདེ་གཤེགས་ཡོངས་རྫོགས་བཀའ་དགོངས་ཕུར་གསུམ་བསང་། །མ་མོ་མངོན་རྫོགས་ཕག་ཁྲོས་སེང་གསུམ་བསང་། །འཇིགས་པ་ཀུན་སྐྱོབས་ཏཱ་རེ་ཉེར་གཅིག་བསང་། །ཁྱད་པར་བདེ་གཤེགས་མཚོན་ཆའི་རྒྱལ་པོའི་དྲུང་། །ཐུགས་བསྐྱེད་ཞལ་བཞེས་ཕྲིན་ལས་དུས་བབས་ཕྱིར། །འགྲོ་རྣམས་དགྲ་ཇག་ཆོམ་རྐུན་འཇིགས་པ་ལས། །སྒྲོལ་མཛད་འཕགས་མ་རྡོ་རྗེ་སྡེར་མོ་བསང་། །དུས་གསུམ་བདེ་གཤེགས་ཀུན་གྱི་སྤྲུལ་པའི་སྲས། །སྐུ་གསུམ་རྒྱལ་བ་རྒྱ་མཚོའི་ཕྲིན་ལས་མ། །གནས་གསུམ་མཁའ་འགྲོ་ཡོངས་ཀྱི་ཚོགས་རྗེ་མོ། །སྲིད་གསུམ་རྣམ་རྒྱལ་རྡོ་རྗེ་སྡེར་མོ་བསང་། །དཔལ་ཆེན་ཁྲོ་རྒྱལ་ཡོངས་ཀྱི་དགྱེས་སྐོང་ཡུམ། །རིག་འཛིན་རྣལ་འབྱོར་ཀུན་གྱི་གྲོགས་མཛད་མ། །ཐེག་དགུའི་བསྟན་པ་སྲུང་བའི་མངའ་བདག་མོ། །དཔལ་ལྡན་མཁའ་འགྲོ་རྡོ་རྗེ་སྡེར་མོ་བསང་། །ཆགས་པའི་མདངས་ཀྱིས་ཡིད་ཅན་དབང་དུ་སྡུད། །ཁྲོ་གཉེར་གཡོ་བས་འཇིགས་ཚོགས་ཟིལ་གྱིས་གནོན། །རྡོ་རྗེ་རལ་གྲི་ཐོ་བ་ཕུར་བུ་ཡིས། །དགྲ་བགེགས་དཔུང་འཇོམས་རྡོ་རྗེ་སྡེར་མོ་བསང་། །ཡེ་ཤེས་དབྱིངས་ཀྱི་ཌཱཀྐི་འཇིགས་སྒྲོལ་མ། །ཟག་མེད་བདུད་རྩིའི་མཆོད་པས་མཉེས་ཚིམ་ནས། །རྣལ་འབྱོར་དཔོན་སློབ་ཡོན་མཆོད་འཁོར་བཅས་ལ། །ནད་གདོན་འཇིགས་དང་བར་ཆད་གནོད་པ་སོལ། །ཚེ་བསོད་ལོངས་སྤྱོད་དཔལ་འབྱོར་རྒྱས་པ་དང་། །རེ་སྨོན་མོས་པ་དབང་དུ་འབྱོར་བ་དང་། །ཟ་བྱེད་མཆེ་སྡེར་གདུག་པའི་གནོད་འཚེ་བཟློག །དགྲ་ཇག་ཆོམ་རྐུན་མིང་ཡང་མེད་པར་མཛོད། །ནད་མཚོན་མུ་གེ་འབྱུང་བའི་གཡོ་འཁྲུགས་སོགས། །འཇིགས་དང་གནོད་པ་ཀུན་ལས་བསྲུང་ཞིང་སྐྱོབས། །གནས་སྐབས་མི་མཐུན་གཡུལ་ལས་རྒྱལ་བ་དང་། །མཐར་ཐུག་འཕགས་མའི་གོ་འཕང་མངོན་གྱུར་མཛོད། །ཅེས་འདི་ལྷ་གྲོགས་རྣམ་གྲོལ་རྡོ་རྗེའི་ངོར། །མགོ་སྤྲུལ་དྷརྨའི་མིང་གིས་ཤར་མར་བྲིས། །དགེ་བས་ཡིད་ཅན་འཇིགས་ལས་རྣ༵མ་པར་གྲོ༵ལ། །རིང་མིན་རྡོ༵་རྗེ༵་འཆང་བ་ཉིད་གྱུར་ཅིག །དགེའོ།། རྡོ་རྗེ་སྡེར་མོའི་བསང་བསྡུས།༄༅། རྡོ་རྗེ་སྡེར་མོའི་བསང་བསྡུས་བཞུགས། ཏཱཾ། རབ་འབྱམས་རྒྱལ་ཀུན་ཡུམ་གཅིག་རྗེ་བཙུན་མ། །དགྲ་རྐུན་འཇོམས་མཛད་དཔའ་མོ་འཇིགས་སྒྲོལ་མ། །རྡོ་རྗེ་སྡེར་མོ་མཁྱེན་བརྩེའི་དཔལ་ལྡན་མ། །ཉི་ཤུ་རྩ་གཅིག་འཕགས་མའི་ཚོགས་བཅས་བསང་། །བསང་དུད་འདོད་འབྱུང་བདུད་རྩིའི་སྤྲིན་ཕུང་གིས། །ཐུགས་རྒྱུད་ཟག་མེད་དགའ་བདེས་རབ་གང་ནས། །རྣམ་བཞིའི་ཕྲིན་ལས་གང་བརྩམས་མྱུར་འགྲུབ་ཅིང་། །གཏན་བདེ་རྒྱལ་བའི་ལམ་བཟང་རྙེད་མཛད་གསོལ།། ཞེས་པའང་མགོ་སྤྲུལ་གྱིས་བྲིས་པའོ།། རྒྱལ་མཚན་རྩེ་མོའི་དཔུང་རྒྱན་གྱི་བསང་བསྡུས་དབང་པོའི་རྒྱལ་རྔ།༄༅། འཕགས་མ་རྒྱལ་མཚན་རྩེ་མོའི་དཔུང་རྒྱན་གྱི་བསང་བསྡུས་དབང་པོའི་རྒྱལ་རྔ་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀྱེ། བདེ་སྟོང་ཡེ་ཤེས་ཆེན་པོའི་མཁའ་དབྱིངས་ལས། །ལེགས་འཁྲུངས་ཟད་མེད་བསང་མཆོད་བདུད་རྩིའི་སྤྲིན། །ནམ་མཁའི་ཁྱོན་དང་མཉམ་པར་བརྡལ་བ་འདིས། །རྒྱལ་མཚན་རྩེ་མོའི་དཔུང་རྒྱན་འཕགས་མ་བསང་། །དུར་ཁྲོད་ཆས་ལྡན་ནག་དམར་ལྗང་བའི་ཞལ། །ཁྲོ་འཛུམ་པད་ཉིར་གཡོན་བརྐྱང་རོལ་པའི་གར། །རལ་གྲི་ཁ་ཊཱཾ་ཞགས་པ་འཁོར་ལོ་ཡིས། །ལྷ་རྣམས་རྒྱལ་བྱེད་འཇིགས་སྒྲོལ་འཕགས་མ་བསང་། །ཕས་རྒོལ་རྩ་ལག་སྡེར་བཅས་ཕམ་པར་མཛོད། །ཕྱོགས་ལས་རྣམ་རྒྱལ་མཚན་རྟགས་བསྒྲེང་བའི་རྩེར། །ཡིད་བཞིན་ནོར་བུ་བཀུར་མཆོད་གསོལ་བཏབ་ལྟར། །འདོད་དགུའི་ཆར་འབེབ་དཔལ་ལྡན་རྒྱལ་མོ་བསང་། །ནག་ཕྱོགས་བདུད་དང་ལྷ་མིན་རྒྱལ་མཚན་སྙིལ། །དཀར་ཕྱོགས་ལྷ་མིའི་རྒྱལ་མཚན་སྲིད་རྩེར་སྒྲེངས། །བསྟན་པའི་སྙིང་པོ་ཡེ་ཤེས་མ་ཎི་ཀས། །འགྲོ་ཁམས་སྣང་བྱེད་རྒྱལ་ཡུམ་དཔའ་མོ་བསང་། །རྒྱལ་མཚན་རྩེ་མོའི་དཔུང་རྒྱན་ལྷ་ཆེན་མོ། །བསང་མཆོད་ཀུན་བཟང་སྤྲིན་གྱིས་རབ་མཉེས་མཐུས། །འཇིགས་ཆེན་བརྒྱད་དང་བཅུ་དྲུག་དབྱིངས་སུ་ཞི། །ཆོས་སྲིད་དཔལ་ཡོན་འབྱོར་བ་འཕེལ་རྒྱས་བརྟན། །སྲིད་གསུམ་མོས་པ་བཞི་སོགས་དབང་དུ་གྱུར། །ཞིང་བཅུ་ཉམས་པ་བདུན་ལྡན་མིང་མེད་ཐོངས། །ནད་མཚོན་མུ་གེ་སྡུག་བསྔལ་རྒྱུན་ཆད་ནས། །དབང་ཐང་བང་མཛོད་བསོད་ནམས་ནོར་གྱིས་གང་། །བླ་སྲོག་རྟེན་ཕུར་རླུང་རྟའི་ཀ་བ་ཚུགས། །ཚེ་གཡང་མཁར་བརྟེན་སྙན་གྲགས་བ་དན་སྐྱེད། །ཡུལ་རི་འདི་སོགས་བསིལ་ལྡན་ལྗོངས་ཀུན་དུ། །བདེ་དགེ་རྒྱུན་མི་ཆད་པའི་བཀྲ་ཤིས་སྩོལ།། ཞེས་པའང་རྣམ་གྲོལ་རྡོ་རྗེའི་ངོར་མགོ་སྤྲུལ་པས་སོ། འཛམ་གླིང་སྤྱི་བསང་ཟག་མེད་བདུད་རྩིའི་སྤྲིན་ཕུང་།༄༅། འཛམ་གླིང་སྤྱི་ཡི་བསང་བསྡུས་ཟག་མེད་བདུད་རྩིའི་སྤྲིན་ཕུང་ཞེས་བྱ་བ་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། བསང་མཆོད་ཡེ་ཤེས་ཟག་མེད་བདུད་རྩིའི་སྤྲིན། །བཞེད་དགུའི་ལོངས་སྤྱོད་ཆར་ལྟར་འབེབས་པ་འདིས། །སྦྱོར་དྲུག་རྫོགས་ཆེན་ཕྱག་ཆེན་དབུ་མ་ཆེ། །སེམས་ཙམ་ཕར་ཕྱིན་ཚད་མ་ཞི་གཅོད་ལམ། །རིམ་ལྔ་ལམ་འབྲས་བསྐྱེད་རྫོགས་ཐབས་ལམ་རླུང་། །བཀའ་གཏེར་དག་སྣང་དབུས་མཐའི་སྲུང་མ་རྣམས། །བསང་ངོ་མཆོད་དོ་བསྟན་སྲིད་མངའ་ཐང་སྤེལ། །དགྲ་སྒྲོལ་བགེགས་ཐུལ་བར་ཆད་དབྱིངས་སུ་སོལ། །སེར་སྐྱའི་གཞི་དང་བྱ་རྒོད་ཕུང་པོའི་རི། །རྡོར་གདན་སྤོས་ངད་ལྡང་རི་རྒྱལ་བྱེད་ཚལ། །ཀྲ་མ་ཤི་ལ་དང་ནི་ན་ལེན་ཏྲ། །དབུས་འགྱུར་གྲོང་ཁྱེར་དྲུག་དང་རྩྭ་མཆོག་གྲོང་། །བྱ་རུང་ཁ་ཤོར་ཨ་སུ་རའི་བྲག་སོགས། །རྒྱ་བལ་ཁ་ཆེའི་གནས་དགོན་ཡུལ་ལྷ་རྣམས། །བསང་ངོ་མཆོད་དོ་ཐུབ་བསྟན་སྲུང་ཞིང་སྤེལ། །དགྲ་བགེགས་དམ་སྲི་བར་གཅོད་མིང་མེད་མཛོད། །ས་སྐྱ་དགེ་ལྡན་ཀར་འབྲུག་ཇོ་ནང་པ། །སྨིན་གླིང་རྡོར་བྲག་མཚུར་ཐེལ་འུག་པ་ལུང་། །ཀཿཐོག་དཔལ་ཡུལ་དཔལ་སྤུང་དཔལ་འབྱུང་དགོན། །རྫོགས་ཆེན་ཟེ་ཆེན་རྩང་ཆེན་འཁོར་ལོ་གདོང་། །ལྷ་རྩེ་ལྷ་སྒང་ལྷ་སྟེང་ལྷ་རི་ཡག །འཛམ་ཐང་ཡར་ཐང་དར་ཐང་མེ་ལོང་ཐང་། །ཀ་བཞི་རྒྱལ་འཕགས་གཡུ་མཁར་ལྕུམ་ལུང་མདོ། །གནས་དགོན་མ་ལུས་ཀུན་གྱི་སྲུང་མ་རྣམས། །བསང་ངོ་མཆོད་དོ་མདོ་སྔགས་བསྟན་པ་སྲུངས། །དགྲ་སོད་བདུད་ཟློག་རབ་འབྱམས་ལས་འགྲུབ་མཛོད། །བླ་སྒང་ལྷ་ལྡན་བསམ་ཡས་ཁྲ་འབྲུག་དང་། །ལྷོ་བྲག་ཡར་ལུང་གུང་ཐང་མཆིམས་བྲག་གནུབས། །ཙ་རི་ཙ་གོང་ཙར་ཡ་ཙ་འདྲ་ལག །རྫོང་གནས་གཙོ་གནས་བ་གནས་བསོ་ཐོག་གནས། །ཐུགས་ཆེན་མུ་རྡོ་ཁོང་ཡུལ་ཝ་སེང་བྲག །ཁྱད་འཕགས་གནས་ཡུལ་གཏེར་གྱི་སྲུང་མ་རྣམས། །བསང་ངོ་མཆོད་དོ་དགྲ་གདོན་དམ་སྲི་ཟློག །ཆོས་མཐུན་བསམ་པ་ཡིད་བཞིན་མྱུར་འགྲུབ་མཛོད། །བདེ་གཤེགས་འབུམ་རྫོངས་དཔལ་རི་བདེ་ཆེན་རྫོངས། །ལྷུན་གྲུབ་རྫོངས་དང་དབང་དྲག་རོལ་བའི་རྫོངས། །འཆི་མེད་གྲུབ་རྫོངས་གསང་ཆེན་རྡོ་བྲག་རྫོངས། །རྨོག་ཆེན་རྣམ་རྒྱལ་བྲག་རྫོངས་བདུན་གྱིས་མཚོན། །ཁྱད་འཕགས་གནས་ཆེན་ཉེར་ལྔ་འདབ་འབྲེལ་བའི། །གནས་སྲུང་གཏེར་བདག་ཡུལ་ལྷ་གཞི་བདག་རྣམས། །བསང་ངོ་མཆོད་དོ་འབྲལ་མེད་སྲུང་ཞིང་སྐྱོབས། །དགྲ་སོད་བགེགས་ཐུལ་རབ་འབྱམས་ལས་འགྲུབ་མཛོད། །མགུར་ལྷ་དགེ་བསྙེན་བསྟན་སྐྱོང་ཡང་མའི་ཚོགས། །ལྗོངས་ལྔ་གླིང་གསུམ་མཚོ་བཞི་གངས་ཉེར་གཅིག །མངའ་རི་སྐོར་གསུམ་དབུས་གཙང་རི་བཞི་དང་། །མདོ་ཁམས་སྒང་དྲུག་གནས་གཏེར་ཡུལ་གཞིའི་བདག །བསང་ངོ་མཆོད་དོ་འབྱོར་དྲུག་འཕེལ་རྒྱས་བསྟན། །དགྲ་གདོན་བརླག་སོགས་གང་བརྩམས་ལས་འགྲུབ་མཛོད། །རྨ་རྒྱལ་སྤོམ་ར་རྡོ་རྗེ་དྲག་མོ་ཡུམ། །དགྲ་འདུལ་དབང་ཕྱུག་རྨ་སྡེ་རོལ་པ་དགུ། །རྩེ་བླ་བཅུ་གསུམ་གྲོགས་རི་དྲལ་ལྕམ་སོགས། །རྨ་ལུང་ཁུག་གསུམ་རྒྱུད་ཀྱི་ཡུལ་ལྷ་རྣམས། །བསང་ངོ་མཆོད་དོ་རྨ་གཡང་ཆར་ལྟར་ཕོབས། །དགྲ་གདོན་དམ་སྲི་མིང་མེད་བརླག་པར་མཛོད། །གཉན་པོ་གཡུ་རྩེ་བཙུན་མོ་སྲས་བློན་འབངས། །སྔོ་མཚོ་བྱིས་མཚོ་ལུང་མཚོ་རྡོ་རའི་མཚོ། །མཚོ་སྨན་ཡང་སྨན་གཉན་གྱི་དམག་དཔུང་ཚོགས། །སྒོ་སྲུང་རྣམ་བཞི་འཁོར་དང་ཡང་འཁོར་བཅས། །བསང་ངོ་མཆོད་དོ་དགྲ་རྐུན་འཚེ་བ་ཟློག །མགོན་སྐྱབས་སྡོང་གྲོགས་གཡེལ་བ་མེད་པར་མཛོད། །ལྷ་ཡོན་ཐོད་དཀར་ཥེ་རྩེ་གཉན་ཆེན་དང་། །སྦྲང་གཉན་བསེ་ཁྲབ་བན་འབྱུང་ཁྱོ་མཆོག་དང་། །ཡོ་ཀི་དཀར་ཆེན་ངེ་དོང་སྤུན་གསུམ་སོགས། །རྔ་ཡུལ་སྟོད་སྨད་བར་གསུམ་ཡུལ་ལྷ་རྣམས། །བསང་ངོ་མཆོད་དོ་རྟག་ཏུ་སྲུང་ཞིང་སྐྱོབས། །དགྲ་རྐུན་བར་ཆད་དམ་སྲི་མིང་མེད་མཛོད། །རྫ་ཆེན་གསེར་ཁྲབ་ལྕགས་རྩེ་ལྷ་ཡེར་སྤུན། །འཛམ་རི་སྟོང་དཔོན་དར་ཐང་འབའ་ལྷ་རྩེ། །རྡོ་བླ་མོ་རྣོན་རི་བཟང་ཐང་ཡག་སོགས། །རྡོ་འཛི་སྨར་གསུམ་ཡུལ་སྐྱོང་གནས་གཞིའི་བདག །བསང་ངོ་མཆོད་དོ་མགོན་སྐྱབས་སྲུང་མ་གྱིས། །དགྲ་ཇག་ཆོམ་རྐུན་རྡུལ་དུ་བརླག་པར་མཛོད། །པདྨ་རི་མཐོ་སྟག་རྣ་རྨ་སྡེ་དགུ། །གཉན་རྗེ་སྟོང་དཔོན་སྨན་རྩེ་ཨ་ལྕགས་གངས། །མཚོ་སྙིང་སྤྲེལ་རྫོང་དུང་རི་འབུམ་གླིང་བདག །སྐུ་འབུམ་སྲུང་མ་བྱང་རྒྱུད་ཡུལ་ལྷ་རྣམས། །བསང་ངོ་མཆོད་དོ་དཔལ་འབྱོར་འཕེལ་དར་བརྟན། །དགྲ་གདོན་དམ་སྲི་མིང་ལྷག་མེད་པར་མཛོད། །ཟིལ་ཕྲོམ་གེར་འཛོ་གཟི་འབར་རྫ་འཕན་ཕྱུག །ཁ་བ་ལབ་རི་འབྲོང་རི་སྤེན་ནེ་རི། །སྦ་རོང་བྲག་དཀར་བཞག་ར་ལྷ་རྩེ་དང་། །ཕག་མོ་རི་སོགས་ལྷོ་རྒྱུད་སྲུང་མ་རྣམས། །བསང་ངོ་མཆོད་དོ་དགྲ་རྐུན་ཐལ་བར་རློགས། །བར་ཆད་ཀུན་སོལ་འབྲལ་མེད་སྡོང་གྲོགས་མཛོད། །རྡོ་རྗེ་གཡུ་ཕྲོམ་ཡུམ་བཞི་སྲས་དགུ་དང་། །གནས་ལུང་གདུགས་ཆེན་གཡུ་སྙིང་མཁར་སྟོད་སྨད། །དུང་རྩེ་དྲལ་ལྕམ་སྐུ་བླ་དངུལ་རྫི་སོགས། །གཡུ་འཁོར་སུམ་བརྒྱ་དྲུག་ཅུ་ཡང་འཁོར་བཅས། །བསང་ངོ་མཆོད་དོ་དགྲ་རྐུན་ཆམ་ལ་ཕོབས། །གཞིར་སྡོད་སྲུང་མ་བྱེས་བགྲོད་ལམ་ལྷ་མཛོད། །ནོར་བུ་རྩེ་རྒྱལ་གནས་སྲུང་གཏེར་གྱི་བདག །བྲག་དམར་རྨོག་མཐོ་རྡོ་རྗེ་དགྲ་འཇོམ་རྩལ། །རི་དཀར་བཀྲ་ཤིས་གནས་རྫོངས་རྒོད་ལྡེམ་ཅན། །རྡོ་རྗེ་རབ་བརྟན་ཤ་ཁྲོན་སྟག་རྣ་སོགས། །ཆུ་དབར་རྫ་བྲག་མདོ་མུར་ཙ་ཡུལ་ལྷ། །གནས་གཏེར་སྲུང་མ་ཟོ་དོར་འཁོར་བཅས་རྣམས། །བསང་ངོ་མཆོད་དོ་གནས་མགྲོན་དམ་ཚིག་སྲུང་། །ཁྱུང་འབྲུག་སེང་སྟག་ར་ཁང་ཁྲབ་གྱོན་དང། །སྙེ་ནམ་བབ་ཟིལ་གནས་གསར་གནས་རྫོངས་མཚོ། །མཚོ་མཐོན་ཁྲོ་ཆེན་ཁྲོ་ཆུ་དམ་པ་དང་། །ཚ་བ་ཁག་གསུམ་པ་ཝཾ་ཆུ་བྲག་སོགས། །རྒྱལ་མོ་ཚ་རོང་སྟོད་སྨད་བར་གསུམ་གྱི། །གནས་བདག་གཏེར་སྲུང་ཡུལ་ལྷ་ཟོ་དོར་རྣམས། །བསང་ངོ་མཆོད་དོ་དགྲ་རྐུན་མིང་མེད་ཐོངས། །རེ་སྨོན་མྱུར་དུ་འགྲུབ་པའི་བཀྲ་ཤིས་སྩོལ། །བེ་ཏ་རྩེ་སོགས་ལྔ་ལྡན་གོའུ་དེ་ཤན། །འོ་མེས་ཤན་དང་གྱིམ་ཤན་ཅ་ཏིས་ཧྭ། །ཁྲི་སྒོ་མ་ཧ་ཙྭི་ན་པེ་ཀྱང་པོ། །རི་བོ་གྲུ་འཛིན་དུང་རི་འོད་དེ་ཤན། །ལྕང་སྐྱ་ཇོ་ནེ་ཁལ་ཁ་ཏན་ཏིག་སོགས། །རྒྱ་ནག་སོག་ཡུལ་གནས་དགོན་གཞི་བདག་རྣམས། །བསང་ངོ་མཆོད་དོ་དགྲ་གདོན་མིང་མེད་ཐོངས། །མདོ་སྔགས་བསྟན་པ་མི་ཉམས་གོང་འཕེལ་མཛོད། །ཀློ་མོན་ཧོར་སོགས་འཛམ་གླིང་སྲིད་པ་གསུམ། །མི་མཇེད་འཇིག་རྟེན་བསྐལ་པ་བཟང་པོ་པའི། །སྟོང་གསུམ་འཇིག་རྟེན་བྱེ་བ་ཕྲག་བརྒྱས་མཚོན། །མཁའ་མཉམ་ཞིང་གི་མགྲོན་བཞི་མ་ལུས་ཀུན། །བསང་ངོ་མཆོད་དོ་ཐམས་ཅད་མཉེས་ཚིམས་ནས། །འགྲོ་ཀུན་རྟག་ཏུ་ཕུན་ཚོགས་དཔལ་ལ་རོལ། །འགལ་རྐྱེན་ཕྱི་ནང་གསང་བའི་བར་ཆད་ཞི། །མཐུན་རྐྱེན་བསམ་དོན་ཆོས་བཞིན་འགྲུབ་གྱུར་ཅིག། ཅེས་འཛམ་གླིང་སྤྱི་བསང་ཟག་མེད་བདུད་རྩིའི་སྤྲིན་ཕུང་ཞེས་བྱ་བ་འདི་ཡང་། སྔགས་ནག་འཇིགས་མེད་རྣམ་རྒྱལ་བས་བྲིས་པ་དགེ་བར་གྱུར་ཅིག། དུད་སོལ་མའི་བསང་བསྡུས།༄༅། དུད་སོལ་མའི་བསང་བསྡུས་ནི། བྷྱོཿ རབ་འབྱམས་རྒྱལ་བ་ཀུན་གྱི་བསྟན་སྲུང་གཙོ། །དབྱངས་ཅན་དྲག་མོ་དཔལ་ལྡན་དུད་སོལ་མ། །འཁོར་དང་ཡང་སྤྲུལ་མ་ལུས་འདིར་གཤེགས་ལ། །རྣམ་དག་བདུད་རྩི་བསང་གི་མཆོད་པ་བཞེས། །སངས་རྒྱས་བསྟན་དང་འགྲོ་བའི་བདེ་སྐྱིད་སྤེལ། །ལས་བཞིའི་ཕྲིན་ལས་ཐོགས་མེད་མྱུར་འགྲུབ་མཛོད།། མགོ་སྤྲུལ་པས་སོ།། དྲེགས་སྡེའི་བསང་བསྡུས།༧ སྡེ་དཔོན་སུམ་ཅུའི་བསང་བསྡུས། ཧཱུྃ། ཟབ་གསང་བསྟན་པའི་སྲུང་མ་དམ་ཚིག་ཅན། །དྲེགས་པའི་སྡེ་དཔོན་སུམ་ཅུ་སྤྲུལ་འཁོར་བཅས། །རྨད་བྱུང་བསང་མཆོད་དམ་པ་འདི་བཞེས་ལ། །ཐེག་མཆོག་བསྟན་པ་དར་ཞིང་རྒྱས་པར་མཛོད། མགོ་སྤྲུལ་པས་སོ།། ལྷ་བཙན་བསྡུས།༧ ལྷ་བཙན་བསང་བསྡུས། ཧྲཱིཿ པདྨ་དབང་གི་བཀའ་ཉན་དྲེགས་པའི་གཙོ། །ཏི་སེའི་ཞིང་སྐྱོང་ལྷ་བཙན་རྡོ་རྗེ་འབར། །འཁོར་བཅས་བསང་གསུར་བདུད་རྩིའི་མཆོད་སྤྲིན་བཞེས། །དམ་ཚིག་དགོངས་ལ་རབ་འབྱམས་ལས་འགྲུབ་མཛོད།། མགོ་སྤྲུལ་པས་སོ།། ཐང་ལྷའི་བསང་བསྡུས།༧ ཐང་ལྷའི་བསང་བསྡུས་ནི། ཧྲཱིཿ ས་བརྒྱད་སེམས་དཔའ་སྲིད་པའི་ལྷ་གཉན་རྗེ། །ཐང་ལྷ་ཡར་བཞུད་ཡུམ་སྲས་བློན་འཁོར་ཚོགས། །བསང་མཆོད་བཞེས་ལ་བསྟན་འགྲོའི་རྒུད་པ་སོལ། །ཆོས་སྲིད་དཔལ་འབྱོར་རྒྱས་པའི་ཕྲིན་ལས་མཛོད། །མགོ་སྤྲུལ་པས་སོ།། རྟ་ལྷའི་བསང་བསྡུས།༧ རྟ་ལྷའི་བསང་བསྡུས། ཀྱཻ། རྟ་ལྷའི་རྒྱལ་པོ་ཨཱརྱ་རེ་མནྟ། །འཁོར་བཅས་མ་ལུས་བསང་མཆོད་འདི་བཞེས་ལ། །རྟ་ལ་གནོད་པའི་ནད་གདོན་དགྲ་བགེགས་སོལ། །རྔོག་ཆགས་འཕེལ་ཞིང་རྒྱས་པའི་ཕྲིན་ལས་མཛོད།། མགོ་སྤྲུལ་པས་སོ།། གུ་དྲག་བཀའ་སྲུང་བསང་བསྡུས།༧ གུ་དྲག་བཀའ་སྲུང་བསང་བསྡུས། ཧཱུྃ། བཅོམ་ལྡན་གུ་རུ་དྲག་པོའི་བཀའ་སྡོད་གཙོ། །བདུད་མགོན་ལྕམ་དྲལ་སྤུ་གྲི་མཆེད་གསུམ་དང་། །སྨྱོན་ཁ་འཁོར་བཅས་བསང་མཆོད་འདི་བཞེས་ལ། །ལས་བཞི་ཐོགས་མེད་འགྲུབ་པའི་སྡོང་གྲོགས་མཛོད།། མགོ་སྤྲུལ་པས་སོ།། འདོད་གསོལ།༧ འདོད་གསོལ་ནི། ཧོ་བཀའ་གཏེར་སྲུང་མ་ཡུལ་ལྷ་གཞི་བདག་ལ། །ཟག་མེད་བདུད་རྩིའི་བསང་མཆོད་ཕུལ་བའི་མཐུས། །འདོད་པའི་དོན་དང་གཉེར་བའི་ལས་རྣམས་ཀུན། །གེགས་མེད་མྱུར་དུ་འགྲུབ་པའི་ཕྲིན་ལས་མཛོད།། མགོ་སྤྲུལ་པས་སོ།། གངས་དཀར་ཏི་སེའི་བསང་བསྡུས་འདོད་འབྱུང་དབང་རྒྱལ།༄༅། གངས་དཀར་ཏི་སེའི་བསང་བསྡུས་འདོད་འབྱུང་དབང་རྒྱལ་བཞུགས། ན་མོ་སརྦ་མ་ཧཱ་གུ་རུ་པདྨ་ཀཱ་ར་ཡེ། འདིར་ཡུལ་སྐྱོང་དྲེགས་པའི་གཙོ་བོ་གངས་དཀར་ཏི་སེ་ལ་བསང་མཆོད་འབུལ་བར་འདོད་པས། བཟང་ཤིང་ཕྱེ་མར་འབྲུ་སྣ་དར་ཟབ་སོགས་བསྲེགས་པའི་བསང་དུད་གཏོང་ཞིང་། བཤོས་དཀར་འདབ་ལྡན་རྒྱན་སྤྲོས་དང་། སྐྱེམས་ཕུད་བཤམས་ལ། སྔགས་དང་ཕྱག་རྒྱས་བྱིན་གྱིས་བརླབས། ཧྲཱིཿ རང་ཉིད་སྐད་ཅིག་དྲན་རྫོགས་སུ། །དུས་གསུམ་རྒྱལ་བ་མ་ལུས་པའི། །ཐུགས་རྗེ་ཕྲིན་ལས་འདུས་པའི་དཔལ། །སྣང་སྲིད་ཟིལ་གནོན་བླ་མའི་སྐུར། །གསལ་བའི་ཐུགས་ལས་འོད་ཟེར་འཕྲོས། །གངས་དཀར་ཏི་སེ་འཁོར་བཅས་ཀྱི། །སྔོན་གྱི་ཐུགས་དམ་རྒྱུད་བསྐུལ་བས། །མཁའ་ལ་ཆུ་འཛིན་འཁྲིགས་པའམ། །ཏིལ་གྱི་གང་བུ་ཕྱེས་པ་བཞིན། །གནས་འདིར་ཐོགས་མེད་བྱོན་པར་གྱུར།། ཞེས་བསམ། སྤོས་རོལ་དར་དམར་གྱི་གཡབ་མོ་བཅས། ཀྱཻ། པདྨའི་བཀའ་ཉན་ཟོ་དོར་གཙོ། །ལྷ་གཉན་གངས་དཀར་ཏི་སེ་ཞེས། །འཛམ་གླིང་སྤྱི་དང་གངས་ཅན་གྱི། །རྒྱལ་བསྟན་འཛིན་སྐྱོང་སྤེལ་མཛད་ལྷ། །ཁྱོད་ཀྱི་སྐུ་མདོག་ཕྱག་མཚན་སོགས། །རྣམ་པ་གཅིག་ཏུ་མ་ངེས་ཀྱང་། །ཟབ་གསང་བསྟན་པ་སྤེལ་བ་དང་། །དེ་འཛིན་བུ་བཞིན་སྐྱོང་བའི་ཕྱིར། །གཙོ་བོ་གངས་དཀར་ཏི་སེ་ནི། །ཡ་མཚན་དུང་གི་མི་ཕོ་ཡིས། །སྐུ་ལ་དར་དཀར་བེར་ཆེན་གསོལ། །དབུ་ལ་གཡུ་ཡི་གདུགས་ཆེན་བསྐོར། །ཕྱག་གཡས་རྒྱལ་མཚན་དཀར་པོ་ཕྱར། །གཡོན་པས་གཏེར་སྒྲོམ་ངོམས་ཤིང་སྟེར། །གངས་ཀྱི་སེང་གེ་ཆིབས་སུ་བཅིབས། །ཕྱོགས་རྣམས་ཀུན་ཏུ་སྤྲུལ་པའི་འཁོར། །མི་དཀར་རྟ་དཀར་ཞོན་པ་གསུམ། །དུང་ཁྲབ་དུང་རྨོག་རྒོད་འཕྲུས་བརྒྱན། །ཕྱག་ན་མདུང་དར་བ་དན་ཕྱར། །གཞན་ཡང་སྤྲུལ་པ་ཡང་སྤྲུལ་གྱི། །འཁོར་ཚོགས་བསམ་མི་ཁྱབ་པས་བསྐོར། །ཁྱེད་རྣམས་སྔོན་གྱི་ཐ་ཚིག་བཞིན། །འདིར་བྱོན་དགྱེས་པའི་གདན་ལ་བཞུགས། །གུས་པས་ཕྱག་འཚལ་བསྟོད་པར་བགྱི། །ཕྱི་ནང་གསང་བ་ཡང་གསང་གི། །མཆོད་པའི་སྤྲིན་ཕུང་བསམ་ཡས་པ། །དངོས་ཡིད་སྔགས་རྒྱས་སྤེལ་བ་འདིས། །ཐུགས་དམ་བསྐང་ལ་ཉམས་ཆགས་བཤགས། །ཁྱད་པར་བཟང་ཤིང་སྨན་སྤོས་འབྲུ། །རིན་ཆེན་དར་ཟབ་ཕྱེ་མར་སོགས། །འབར་བ་མེ་ཡིས་བཞུས་པ་ཡི། །བསང་དུད་འདོད་དགུའི་སྤྲིན་ཕུང་གིས། །གངས་རི་ཆེན་པོ་ཏི་སེ་ལ། །གནས་བཅས་སྲིད་པའི་ལྷ་ཆེན་པོ། །དགྱེས་སྡེ་ཡུམ་འཁོར་སྤྲུལ་པར་བཅས། ཐུགས་རྒྱུད་མཉེས་ཤིང་ཚིམ་གྱུར་ནས། །རྒྱལ་དབང་པདྨ་སཾ་བྷ་ཝ། །གྲུབ་མཆོག་བཞད་པ་རྡོ་རྗེ་དང་། །ཀུན་མཁྱེན་འཇིགས་མེད་གླིང་པ་སོགས། །ཡབ་སྲས་བརྒྱུད་པར་བཅས་རྣམས་དང་། །ཁྱད་པར་འགྲོ་འདུལ་ལུང་རིག་གླིང་། །དབང་ཆེན་དགའ་བཞི་བཞད་པ་སོགས། །རྩ་རྒྱུད་རིག་འཛིན་བླ་མ་ཡིས། །ཇི་ལྟར་བཀའ་བསྒོས་དམ་བཞག་ལྟར། །རྣལ་འབྱོར་དཔོན་སློབ་འཁོར་བཅས་ཀྱི། །འདོད་པའི་དོན་དང་གཉེར་བའི་ལས། །ཐུན་མཆོག་རིགས་ཀྱི་དངོས་གྲུབ་ཀུན། །འབད་མེད་འགྲུབ་པའི་སྡོང་གྲོགས་མཛོད། །ནད་གདོན་འཇིགས་བརྒྱད་མི་མཐུན་ཚོགས། །ལྷག་མེད་དབྱིངས་སུ་ཞི་བ་དང་། །ཚེ་བསོད་དཔལ་འབྱོར་སྙན་གྲགས་དང་། །ཉམས་རྟོགས་ཡོན་ཏན་རྒྱས་པར་མཛོད། སྲིད་གསུམ་ཆེ་དགུ་མོས་པ་བཞི། །རླུང་སེམས་སྣང་བ་དབང་དུ་བསྡུས། །དགྲ་བགེགས་ལོག་འདྲེན་དམ་སྲི་བདུད། །དབྱིངས་སྒྲོལ་དྲག་པོའི་ཕྲིན་ལས་མཛོད། །མདོར་ན་རིག་འཛིན་བླ་མ་ཡིས། །ཐུགས་ལ་དགོངས་ཤིང་བཞེད་པའི་དོན། །རབ་འབྱམས་ལས་དང་དངོས་གྲུབ་ཀུན། །ཐོགས་མེད་མྱུར་འགྲུབ་ཤིས་པ་སྩོལ།། ཞེས་པ་འདི་ནི་སྐྱབས་མཆོག་དམ་པ་གང་གིས་བཀའ་ལུང་ལྷ་རྫས་བཅས་གནང་བ་སྤྱི་བོར་མཆོད་དེ་རྗེ་ཉིད་ཀྱི་དག་ཆེན་ཡེ་ཤེས་སྒྱུ་མའི་གཟིགས་སྣང་བཞིན་མགོ་སྤྲུལ་གྱིས་མེ་ལུག་ཐ་སྐར་ཟླ་བའི་རྒྱལ་བ་དང་པོའི་ཉིན་བྲིས་པ་དགེའོ།། ཟོ་དོར་སྤྱི་བསང་འདོད་པ་ཀུན་འབྱུང་།ཟོ་དོར་སྤྱི་བསང་འདོད་པ་ཀུན་འབྱུང་ཞེས་བྱ་བ་བཞུགས། བསང་རྫས་རྣམས་རཾ་ཡཾ་ཁཾ་དང་། ཨོཾ་ཨཱཿཧཱུྃ་གིས་བྱིན་གྱིས་བརླབས་ལ། ཧཱུྃ། སྔོན་ཚེ་རྒྱལ་བའི་དབང་པོ་པདྨ་འབྱུང་། །བཻ་རོ་ཡབ་སྲས་དགའ་ལོ་ཀརྨ་པ། །ཁྲག་འཐུང་དཔའ་བོ་སྙིང་པོ་རྣམ་གཉིས་སོགས། །རིག་འཛིན་བརྒྱུད་པའི་བཀའ་དམ་ལ་གནས་གཙོ། །རྡོ་རྗེ་གཡུ་ཁྲོམ་དགྲ་བླ་མི་མགོན་དཀར། །དབང་སྡུད་ལྷ་རྩེ་དུང་རྩེ་དྲལ་ལྕམ་དང་། །རྡོ་རྗེ་རབ་བརྟན་དངུལ་རྫི་གཡུ་མཚོ་སོགས། །མི་མིན་དྲེགས་ཚོགས་གཉུག་མར་གནས་སོ་ཅོག །འཁོར་ཚོགས་སྤྲུལ་པ་ཡང་སྤྲུལ་དཔུང་དང་བཅས། །གློག་འགྱུའི་རྩལ་བཞིན་ཡིད་མྱུར་རྫུ་འཕྲུལ་གྱིས། །བརྩེ་བས་འདིར་གཤེགས་དགྱེས་པའི་གདན་ལ་བཞུགས། །དགའ་བས་ལུས་བཏུད་དམ་ཚིག་བསྲེ་བས་བསྟོད། །སྤྱན་མའི་ཀློང་དུ་བཟང་ཤིང་སྨན་སྤོས་དྲི། །ཟས་སྣ་ཕྱེ་མར་ཤེལ་ཚིག་འབྱོར་དགུ་སྤུངས། །མ་མ་ཀིས་སྦྱངས་དཀར་མོས་ལེགས་བཞུས་པའི། །ལོངས་སྤྱོད་ཀུན་འབྱུང་ཟག་མེད་དངས་མའི་སྤྲིན། །དབྱིངས་ཕྱུག་མཁའ་ལམ་ཡོངས་སུ་ཡོངས་སུ་འགེངས་བ་འདིས། །རྒྱལ་མོ་ཚ་རོང་ཟོ་དོར་མ་ལུས་བསང་། །ཁྱད་པར་ཕྱོགས་འདིར་དབང་མཛད་ཡུལ་ལྷའི་གཙོ། །དགེ་བསྙེན་རྡོ་རྗེ་གཡུ་ཁྲོམ་འཁོར་བཅས་བསང་། །བུ་ཆུང་ལྷ་རྩེ་ཆོས་རྔའི་བཙན་རྒོད་མཆེད། །ཆུ་དཀར་ཕྱོགས་ཀྱི་ལྷ་ཀླུ་དྲེགས་ཚོགས་བསང་། །གཡུ་མཚོ་དམ་བརྟན་རྡོ་རྗེ་དྲག་མོ་སོགས། །ཆུ་དམར་ཕྱོགས་ཀྱི་ཀླུ་གཉན་སྡེ་བརྒྱད་བསང་། །རིགས་གསུམ་སེམས་དཔའི་གནས་ཀྱི་བསྲུང་མ་མཆོག །ཟབ་གཏེར་བདག་པོ་དབང་བསྡུད་ལྷ་རྩེ་བསང་། །བཀའ་སྡོད་ལས་མྱུར་དཔའ་བོ་སྟག་འཕྲུ་སོགས། །ཤུག་འདབས་སྟོད་སྨད་ལ་གནས་དྲེགས་ཚོགས་བསང་། །འཛད་མེད་གཏེར་གྱི་བདག་པོ་མཐུ་རྩལ་ཅན། །གཡུ་སྙིང་དགྲ་བླ་མི་མགོན་དཀར་པོ་བསང་། །རྡོ་རྗེ་ལྷ་རྩེ་གཡུ་རྩེ་ནོར་བུའི་རི། །གཡུ་ལུང་སྟོད་སྨད་ཉིན་སྲིབ་བདག་པོ་བསང་། །རྒྱལ་མཚན་རྣམ་གཉིས་སྒང་བཙན་རི་བཙན་སོགས། །སྦས་ལུང་སྟོད་སྨད་ལ་གནས་སྡེ་བརྒྱད་བསང་། །སྙུག་ལ་དུང་རྩེ་ཡིག་དྲུག་བསྲུང་མ་སོགས། །སྒེག་ལུང་སྟོད་སྨད་ཉིན་སྲིབ་བདག་པོ་བསང་། །རྟ་ཤར་མཚོ་ལུང་བྲག་དཀར་དུང་མཚོ་སོགས། །འཁྱིལ་ཆེན་སྟོད་ཕྱོགས་ཀླུ་གཉན་ས་བདག་བསང་། །སེང་རྫོང་ཟངས་ཁྲི་སྨར་གྱི་གཞི་བདག་སོགས། །འཁྱིལ་ཆེན་སྨད་ཕྱོགས་མི་མིན་སྡེ་ཚོགས་བསང་། །ལེགས་ཉེས་ཤན་འབྱེད་བསྟན་པའི་བསྲུང་མ་ཆེ། །གནས་བདག་སྐུ་བླ་དུང་རྩེ་འཁོར་བཅས་བསང་། །པདྨ་དྲེགས་འདུལ་ལྷ་རྒོད་དགྲ་འདུལ་དང་། །ཝ་རུ་ཎ་སོགས་ངེས་ལེགས་བསྲུང་མ་བསང་། །དུང་ལྕམ་སྨན་བཙུན་ཀླུ་རྒྱལ་ལྕམ་དྲལ་སོགས། །སྐུ༵་གསུམ་དབེ༵ན་གནས་སྐྱོང་མཛད་མ་ལུས་བསང་། །གནས་གཏེར་བདག་མོ་ཀུན་སྐྱོང་ལྕམ་དྲལ་དང་། །རྨོག་མཐོ་རྩེ་རྒྱལ་ཙིག་ཙིག་སྤུན་གསུམ་བསང་། །བྲེང་ངེ་གཡག་ཕྱུག་བྱ་ཁྱུང་བ་སྦལ་སོགས། །ནུ་དབྱིག་རྒྱ་འུ་གསེར་ཙིར་ལ་གནས་བསང་། །ལྷ་རྗེ་གཙུག་ཏོར་ར་མཁར་ར་མ་གྱོ། །སྤ་ལུང་སྒ་རི་སྒང་གཤོང་ལ་གནས་བསང་། །མོར་ཁྱ་ཀྱུས་བྲག་ཉིན་སྲིབ་ལ་གནས་དང་། །ཡིག་རིའི་བྲག་བཙན་སྨན་མོ་འཁོར་བཅས་བསང་། །མཚོ་སྨན་སྤུན་གསུམ་བཙན་རྒོད་མཆེད་གསུམ་སོགས། །ཕྱོགས་དེར་གནས་པའི་ས་བདག་ཀླུ་གཉན་བསང་། །སྟོབས་ཆེན་སྐུ་བླ་ཉྭ་དཀར་ཉྭ་ལྕམ་དང་། །བ་དཀར་རྡོ་འབྲུག་རྔོན་བྲག་ལ་གནས་བསང་། །ལོངས་སྤྱོད་མཛོད་ལྡན་ལོ༵་ཕྱུགས་དཔལ་སྟེར་མཆོ༵ག །དགེ་བསྙེན་རྡོ་རྗེ་རབ་བརྟན་འཁོར་བཅས་བསང་། །རྡོ་རྗེ་རྩེ་རྒྱལ་གསང་སྔགས་བསྟན་སྐྱོང་དང་། །གྲུབ་པའི་ཆུ་མིག་སོགས་ལ་གནས་ཀུན་བསང་། །སེང་གེ་དཀར་མོ་དགའ་ལྡན་སོ་ཁ་བ། །བྲག་ལྷ་དཀར་མོ་གཡུང་དྲུང་རྒྱལ་བ་དང་། །བསྐོས་ལེགས་ཆུ་མིག་མི་གཉན་ཡུ་ཆོ་དང་། །རི་ཥེའི་ཆུ་མིག་སོགས་ཀྱི་ཀླུ་གཉན་བསང་། །ཙཱ་རིའི་ཡ་ཐུབ་བྲག་དཀར་གནས་གཏེར་བདག །ལྷ་བཙན་ལྕམ་དྲལ་ཞིང་སྐྱོང་ཡབ་ཡུམ་བསང་། །མགོན་ནག་ལྕམ་དྲལ་ཉིན་ལེགས་ཡག་ཐོག་བཙན། །སྙིང་བྱམས་ར་ཆེན་བཙན་ཁང་ལ་གནས་བསང་། །མངའ་རིའི་ཙན་དན་སྡོང་པོ་དམ་དཀར་བྲག །རྨ་ལུང་ཕྱུག་མགོན་གནས་སྲུང་ཀླུ་བཅས་བསང་། །སྐུ་ལྷ་སྲས་རྒྱལ་རྡོ་གཉན་རྡོ་རྗེ་རྒྱལ། །དཀར་ལིང་མཚོ་སྨན་སྡེ་བརྒྱད་འཁོར་བཅས་བསང་། །དགའ་གདོང་ལ་བརྟེན་ཀླུ་བཙན་བདུད་དང་གསུམ། །སོ་སོའི་བཙུན་མོ་འཁོར་བཅས་མ་ལུས་བསང་། །གཡུ་ལུང་ས་ཡི་རྟེན་ཕུར་གནས་གཏེར་བདག །སྐུ་བླ་དངུལ་རྫི་གཡུ་མཚོ་འཁོར་བཅས་བསང་། །ཡུལ་ཕྱོགས་འདིར་གནས་ལྷ་སྲིན་སྡེ་བརྒྱད་ཀུན། །ཟག་མེད་བདུད་རྩིའི་བསང་མཆོད་འདི་ཕུལ་བས། །ནད་གདོན་འཇིགས་བརྒྱད་ཞི་ཞིང་ཚེ་བསོད་རྒྱས། །འདོད་དགུ་དབང་འབྱོར་ལོག་འདྲེན་དྲག་པོས་སྒྲོལ། །མི་ནོར་ལོངས་སྤྱོད་འབྲུ་དྲུག་བསྲུང་སྤེལ་མཛོད། །ཅི་བསམ་ཡིད་བཞིན་འགྲུབ་པའི་དགེ་ལེགས་སྩོལ།། ཞེས་གཡུ་ལུང་ཟོ་དོར་སྤྱིའི་བསང་བསྡུས་འདོད་པ་ཀུན་འབྱུང་ཞེས་བྱ་བ་འདི་ཡང་སྒོས་བསང་རྒྱས་པ་མི་ལྕོགས་ཚེ་འདོན་རྒྱུར་མགོ་སྤྲུལ་གྱིས་བྲིས་པ་འདི་ཡང་བསྟན་འགྲོའི་ཕན་བདེ་འབྱུང་བའི་རྒྱུར་གྱུར་ཅིག སརྦ་དཱ་ཀ་ལྱཱ་ཎཾ་བྷ་ཝནྟུ། དགེའོ།། ཆུ་དབར་ཡུལ་ལྷ་སྤྱི་བསང་།༄༅། ཏཱ་རེའི་གཞི་བདག་སོགས་ཆུ་དབར་གྱི་ཡུལ་ལྷ་སྤྱི་ཡི་བསང་བསྡུས་འདོད་པ་ཀུན་འབྱུང་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། ཀ་དག་ངོ་བོ་བློ་འདས་ཀྱང་། །ལྷུན་གྲུབ་རང་བཞིན་མ་འགགས་མདངས། །སྲིད་ཞིའི་སྒྱུ་འཕྲུལ་ཐུགས་རྗེའི་གར། །སྣ་ཚོགས་མ་འདྲེས་ཅིར་ཡང་སྣང་། །རྫ་བྲག་མི་རྒོད་གདོང་འདྲ་ལ། །བརྟེན་བཅས་ཡུལ་སའི་བདག་པོ་ནི། །ལས་ཀྱི་དབང་གིས་མཚོ་སྨན་དང་། །གཟའ་བཙན་ཀླུ་དབང་ཚོགས་པའི་སྲས། །སྤྲིན་དབང་འོད་ཁྲོམ་དབང་མཆོག་སྩལ། །མཐིང་དམར་ཤེལ་གྲི་སྦྲུལ་ཞགས་བསྣམས། །དཔའ་བོའི་ཆས་ལྡན་རྟ་སྔོན་བཅིབས། །ཀླུ་བཙན་མཆེད་དགུ་བཙུན་མོར་བཅས། །འབྱུང་བ་ས་ཆུ་རྡོ་ཤིང་ལ། །དབང་མཛད་འཁོར་ཚོགས་མང་པོས་བསྐོར། །ཁྱོད་རྣམས་ཡིད་མྱུར་རྫུ་འཕྲུལ་གྱིས། །འདིར་བྱོན་བསང་དུད་བདུད་རྩིའི་སྤྲིན། །འདོད་དགུའི་ལོངས་སྤྱོད་ནམ་མཁའི་མཛོད། །དགྱེས་ཤིང་བརྩེ་བས་བཞེས་སུ་གསོལ། །མི་གཙང་རྨོངས་འཐིབས་སངས་བྱེད་པའི། །བཟང་ཤིང་སྣ་ཚོགས་དུད་པ་འདིས། །མགྲོན་རིགས་སྤྱི་དང་ཁྱད་པར་དུ། །ཡུལ་ཕྱོགས་འདིར་གནས་བསྲུང་མ་བསང་། །ཡུལ་སྐྱོང་དཔའ་བོ་འོད་ཁྲོམ་བསང་། །གནས་སྲུང་རྡོ་རྗེ་དྲག་རྩལ་བསང་། །གཉན་རི་ནོར་བུ་རྩེ་རྒྱལ་བསང་། །ཆུ་དཀར་གཡུང་དྲུང་དུང་རྩེ་བསང་། །ཀླུ་སྨན་ནོར་བུ་དུང་མཚོ་བསང་། །གཏེར་སྲུང་རྫ་རི་དུང་ཕྲེང་བསང་། །མཚོ་སྨན་རྡོ་རྗེ་དྲག་མོ་བསང་། །དཔའ་མོ་གཡུ་སྒྲོན་ཐོད་དཀར་བསང་། །རྫ་ཁྲ་སྤོས་ཀྱི་དྲི་ལྡན་བསང་། །མཐོ་མཛེས་དཀྱིལ་རི་ཕྱུག་མོ་བསང་། །ཀླུ་ཆུ་ཉིན་སྲིབ་ལ་གནས་བསང་། །ཡུལ་སྐྱོང་རི་རྒྱལ་འཕན་ཕྱུག་བསང་། །ཆུ་དབར་སྟོད་སྨད་ཉིན་སྲིབ་ལ། །གནས་པའི་སྡེ་བརྒྱད་འཁོར་བཅས་བསང་། །བསང་ངོ་བརྔན་ནོ་མངའ་གསོལ་ལོ། །གསོལ་ལོ་མཆོད་དོ་མཉེས་ཚིམ་ནས། །མི་ཕྱུགས་གོད་ཡམས་ཞི་བ་དང་། །ཚེ་དཔལ་ལེགས་ཚོགས་གོང་འཕེལ་མཛོད། །གང་བསམ་དབང་དུ་འབྱོར་བ་དང་། །དགྲ་བགེགས་འབྱུང་པོའི་གནོད་པ་སོལ། །འཕར་སྤྱང་གཅན་གཟན་ཁ་ཆིངས་ཤིག །གཞི་བྱེས་ཀུན་ཏུ་སྡོང་གྲོགས་མཛོད། །རེ་ཞིང་ལྟོས་པའི་ཡོན་སྦྱོར་ཀུན། །མི་མཐུན་གཡུལ་ལས་རྒྱལ་བར་མཛོད།། ཅེས་ཆུ་དབར་གྱི་ཡུལ་ལྷ་སྤྱིའི་བསང་བསྡུས་འདོད་པ་ཀུན་འབྱུང་ཞེས་བྱ་བ་འདི་ཡང་ཕྲན་སྔགས་འཇིགས་རྣམ་པས་བྲིས་པ་དགེའོ།། དགེའོ།། དགེའོ།། རྫ་བྲག་མདོའི་ཕྱོགས་ཀྱི་ཡུལ་ལྷ་སྤྱི་བསང་།༄༅། ལྷ་ལུང་བྲག་མདོའི་ཕྱོགས་ཀྱི་ཡུལ་ལྷ་སྤྱིའི་བསང་བསྡུས་དགོས་འདོད་ཀུན་འབྱུང་ཞེས་བྱ་བ་བཞུགས། རཾ་ཡཾ་ཁཾ། བསང་རྫས་མ་དག་དམེ་མནོལ་བསྲེག་གཏོར་བཀྲུས། རྣམ་དག་ཟག་མེད་བདུད་རྩིར་སྦྱངས་སྤེལ་བསྒྱུར། །གནས་སྲུང་ཡུལ་ལྷ་སོ་སོའི་དགྱེས་སྐོང་སྤྲིན། །བཞེད་དགུའི་ཆར་འབེབས་མཁའ་དབྱིངས་མཛོད་དུ་གྱུར།། ཨོཾ་ཨཱཿཧཱུྃ། བཛྲ་སྥ་ར་ཎ་ཁཾ། ཀྱཻ། འགྱུར་མེད་མཐའ་བྲལ་གཉུག་མའི་དེ་བཞིན་ཉིད། །བདེ་སྟོང་ཡེ་ཤེས་མ་འགགས་རང་གསལ་མདངས། །སྲིད་ཞི་མཉམ་བརྡལ་ཀུན་ཁྱབ་ཐུགས་རྗེའི་རྩལ། །སྒྱུ་འཕྲུལ་རྣམ་རོལ་མ་འདྲེས་ཅིར་ཡང་སྣང་། །སྐལ་བཟང་འདྲེན་མཆོག་ཆོས་ཀྱི་བློ་གྲོས་ཀྱིས། །དབང་བསྒྱུར་མི་མཇེད་ཐུགས་ཀྱི་འཇིག་རྟེན་དབུས། །འཛམ་གླིང་ལས་ཀྱི་ས་གཞིའི་བོད་ཆེན་ཤར། །བཀྲ་ཤིས་གཡས་འཁྱིལ་རྒྱལ་རོང་རྫ་བྲག་ལྗོངས། །ཕྱོགས་ཞེན་རྩོད་བྲལ་བདེ་གཤེགས་འབུམ་རྫོངས་ཞེས། །གནས་མཆོག་རྒྱལ་མོ་མུ་རྡོའི་དབུ་རྩེའི་ཆར། །ལས་སྨོན་ཐུགས་རྗེའི་ཚོགས་པའི་ཕན་མཛད་ལྷ། །ལུགས་གཉིས་ཕྱོགས་འཛིན་གཉུག་མར་གནས་སོ་ཅོག །སོ་སོའི་འཁོར་བཅས་ཡིད་མྱུར་རྫུ་འཕྲུལ་གྱིས། །འདིར་བྱོན་བསང་མཆོད་བདག་གིར་བཞེས་སུ་གསོལ། །ཀྱཻ། བསང་མཆོད་ཟག་མེད་བདུད་རྩིའི་སྤྲིན། །ལྷ་ལམ་བཞེད་དགུའི་གང་བ་འདིས། །རྩ་གསུམ་དམ་ཅན་བསྲུང་མ་བསང་། །ནོར་ལྷ་གཡང་ལྷ་གཏེར་བདག་བསང་། །མདོ་སྔགས་བཤད་སྒྲུབ་ཆོས་གླིང་གི། །ལྷ་དང་བསྲུང་མ་ཐམས་ཅད་བསང་། །བྲག་དམར་བདེ་གཤེགས་འབུམ་རྫོངས་ཀྱི། །རྟེན་གསུམ་རང་བྱུང་ཐམས་ཅད་བསང་། །དབུས་རི་སྐུ་གསུམ་གཞལ་ཡས་ནས། །བདེ་གཤེགས་ཞི་ཁྲོ་རབ་འབྱམས་བསང་། །རྒྱབ་རི་བདེ་ཆེན་པོ་ཊ་ལར། །སྤྱན་རས་གཟིགས་ཀྱི་ལྷ་ཚོགས་བསང་། །གཡས་རི་ལྕང་ལོ་ཅན་གནས་ནས། །གསང་བའི་བདག་པོའི་ལྷ་ཚོགས་བསང་། །གཡོན་རི་གེའུ་དེ་ཤན་ནས། །འཇམ་པའི་དབྱངས་ཀྱི་ལྷ་ཚོགས་བསང་། །གནས་གཏེར་བསྟན་པའི་སྲུང་མ་མཆོག །ལྷ་ཆེན་བྲག་དམར་རྨོག་མཐོ་བསང་། །བདེ་གཤེགས་ལྔ་སོགས་རྒྱབ་དང་མདུན། །ཐུགས་དྲུག་གདག་ཕྱོགས་གཡས་ཀྱི་རི། །སྒོ་སྲུང་སྲིབ་རི་གཡོན་ཕྱོགས་ལ། །གནས་པའི་ས་བདག་ཀླུ་གཉན་བསང་། །གྲུབ་ཆུ་ཚེ་ཆུ་ངོས་ཤོད་དང་། །བྱ་སྐྱིབས་ཕུག་པ་ལ་གནས་བསང་། །རྒྱལ་རིགས་ས་འོག་མཛོད་བདག་མོ། །གནས་སྲུང་མཚོ་སྨན་ཕྱུག་མོ་བསང་། །མིང་པོ་སྲས་འཁོར་བྲན་རྣམས་བསང་། །ཆུ་མིག་ལ་གནས་ཀླུ་འཁོར་བསང་། །བྲག་ལ་གནས་པའི་བཙན་རྣམས་བསང་། །རྡོ་ཤིང་ལ་གནས་གཉན་རྣམས་བསང་། །ཕུར་སྲུང་བདུད་ནག་དགྲ་བླའི་གཙོ། །རི་དཀར་རྡོ་རྗེ་རྒྱལ་མཚན་བསང་། །དགྱེས་སྐོང་དཀྱིལ་རི་ཕྱུག་མོ་བསང་། །སྐྱོ་གྲོགས་ཀླུ་མོ་ཡུམ་སྲས་བསང་། །ཀླུ་བཙན་གདུག་པའི་འཁོར་ཚོགས་བསང་། །བ་སྦལ་ཁྱུང་གསུམ་ལ་གནས་བསང་། །མཛོད་སྒོ་བཙན་ལམ་སྒང་གཤོང་ལ། །གནས་དང་རྒྱུ་བ་ཐམས་ཅད་བསང་། །གནས་གཏེར་བསྟན་བསྲུང་ཡུལ་གྱི་ལྷ། །དམ་ལྡན་རྡོ་རྗེ་དགྲ་འཇོམས་བསང་། །དགྱེས་སྐོང་ཀླུ་མོ་བདེ་དབང་བསང་། །སྐུ་ཡི་མཆེད་པོ་རྣམ་གཉིས་བསང་། །བཙན་ཁང་རྒྱལ་བ་གློག་ཕྲེང་བསང་། །ལས་བཞིའི་སྐུ་མཆོག་རྣམ་བཞི་བསང་། །སྤྲུལ་པ་སྲིན་པོ་མ་སང་བཙན། །ནོར་བདག་ཤན་པ་བདུན་ཚོགས་བསང་། །རཱ་གའི་མདངས་ལྡན་ཡུལ་གྱི་ལྷ། །ཁྱུང་རིའི་ས་འཛིན་རྒྱལ་པོ་བསང་། །དགྱེས་སྡེ་མཚོ་ཆུང་སྲས་འཁོར་བསང་། །ཚ་རིའི་འདོད་འཇོའི་བ་དཀར་བསང་། །སྦལ་རིའི་སྲིད་པའི་རུས་སྦལ་ལ། །གནས་པའི་ཀླུ་གཉན་ས་བདག་བསང་། །ཡུལ་སྐྱོང་དུང་ཕྲེང་ཕྱུག་མོ་བསང་། །བདེ་སྟེར་གཡུ་ཡི་མཚོ་མོ་བསང་། །རི་གཤིས་དུང་རྡོ་དཀར་པོ་བསང་། །དུང་ལུང་རི་རྫོང་ཟོ་དོར་སོགས། །གཡས་ལུང་སྟོད་སྨད་ཉིན་སྲིབ་ལ། །གཉུག་མར་གནས་པ་ཐམས་ཅད་བསང་། །རི་དར་ཕྱུག་མོ་དུང་མཚོ་སོགས། །ནུབ་ཝོར་སྐོར་གྱི་གནས་བདག་བསང་། །བསྟན་གཉིས་དབྱེར་མེད་སྐྱོང་མཛད་པའི། །ལྷ་ལུང་མུ་ལ་འོད་དཀར་བསང་། །མ་སང་དཀར་ལ་ཡར་རྩེ་བསང་། །གཡུ་སྙིང་ནོར་བུའི་རིར་གནས་བསང་། །རྨོག་ཆེན་རྣམ་རྒྱལ་བྲག་རྫོང་གི། །གནས་གཏེར་སྲུང་མ་དང་བཅས་བསང་། །གནས་བདག་ནོར་བུ་བསམ་འཕེལ་བསང་། །མཇིང་ཟབ་མཐིང་མཚོ་སྔོན་མོ་བསང་། །འབྲུག་གོང་ཁྱེའུ་སྟག་ཐུལ་ཅན། །ལུང་རྒན་མཚོ་བྲག་གསེར་རི་སོགས། །གཡུ་འབྲུག་ཆེ་ཆུང་ལ་གནས་པའི། །དྲེགས་ཚོགས་མ་ལུས་འཁོར་བཅས་བསང་། །སེང་རི་ཆེ་ཆུང་མཚོ་ལུང་དང་། །སྦལ་ལུང་མཚོ་ནག་ཀླུ་རྣམས་བསང་། །ལྗགས་ལུང་སྟོད་སྨད་བར་གསུམ་ལ། །གནས་པའི་སྡེ་བརྒྱད་འཁོར་བཅས་བསང་། །ཕུག་རིང་ལ་གནས་ཡུལ་ལྷའི་གཙོ། །བསྟན་སྲུང་བཀྲ་ཤིས་ལྷ་རྩེ་བསང་། །དགྱེས་བྱེད་མཚོ་ལུང་རྗེ་མོ་བསང་། །ཡོལ་རི་ནོར་བུ་ཆེ་ཆུང་བསང་། །དུང་ཆུ་རླངས་ཅན་ཆུ་བདག་བསང་། །གླག་ཚང་བྲག་གི་སྲུང་མ་བསང་། །ཟོ་དོར་དཔའ་བོ་མདུང་ཡག་བསང་། །རྫིང་བུ་ཉམས་དགའི་ཀླུ་རྣམས་བསང་། །ལུགས་གཉིས་སྲུང་དང་སྤེལ་མཛད་པའི། །གཉན་ཆེན་ནོར་བུ་ལྷ་རྩེ་བསང་། །དགྱེས་སྡེ་ཀླུ་བྲག་སྨན་མོ་བསང་། །གཉན་རི་བོན་ལ་གནས་པ་བསང་། །གཡོན་ལུང་སྟོད་སྨད་ཉིན་སྲིབ་ལ། །གཉུག་མར་གནས་པ་ཐམས་ཅད་བསང་། །ཇོ་རི་ཟུར་གསུམ་དུང་རི་དང་། །ཆུ་མིག་སོགས་ལ་གནས་པ་བསང་། །གནས་སྲུང་གཏེར་བདག་ཟོ་དོར་གཙོ། །བཙན་རྒོད་རྨ་རི་ལྷ་ཕྱུག་བསང་། །སིདྡྷིའི་གནས་ཀྱི་རང་བྱུང་དང་། །ཟབ་གཏེར་རྟེན་གསུམ་ཐམས་ཅད་བསང་། །བཙན་རྒོད་དཔའ་བོ་ཟངས་རྩེ་བསང་། །ལྷ་སྨན་དགྱེས་ལྕམ་ཕྱུག་མོ་བསང་། །བ་མིག་མཚོ་མོ་ཟུང་བདག་བསང་། །གསེར་ཤར་རྡོ་རྗེ་དཔའ་རབ་བརྩེགས། །བདུད་བཙན་ཀླུ་གསུམ་འཁོར་བཅས་བསང་། །སྦས་གནས་དགའ་བ་ལྗོངས་ཀྱི་ཀླུ། །ས་བདག་གནས་བདག་གཏེར་བདག་བསང་། །དཀར་ཕྱོགས་སྐྱོང་མཛད་སྐུ་ལྷ་ཆེ། །རབ་ཁྲོ་རྡོ་རྗེ་དབང་རྒྱལ་བསང་། །བདེ་སྐྱོང་ཀླུ་མོ་སྨན་གཅིག་མ། །དུས་བཞིར་དབང་བསྒྱུར་སྤྲུལ་ཚོགས་བསང་། །གཡས་ཕྱོགས་ལྷ་ཆེན་གོང་རྒྱལ་གཙོ། །གཡོན་ཟུར་ལས་མཁན་སྐྱེས་བུ་དང་། །མདུན་གྱི་སྨན་ཕྲན་མྱུར་མགྱོགས་ཅན། །ལྷ་ཀླུ་གཉན་གྱི་འཁོར་ཚོགས་བསང་། །སྨར་མདོའི་ཟོ་དོར་དྲེགས་ཚོགས་རྗེ། །ལྷ་ཆེན་གཞུ་རྒྱལ་འཁོར་དང་བཅས། །ནུབ་རིའི་མཚོར་གནས་ཀླུ་ལ་སོགས། །ཕུ་མདར་གནས་ཤིང་དབང་མཛད་བསང་། །མདོར་ན་རྫ་ཡུལ་འཛིན་མའི་ཁྱོན། །གདག་སྲིབ་སྟོད་སྨད་བར་གསུམ་གྱི། །རྫ་བྲག་གཡའ་རི་ནགས་ཚལ་སྤང་། །མཚོ་རྫིང་ཆུ་མིག་ནེའུ་ཐང་ལ། །གཉུག་མར་གནས་ཤིང་བརྟེན་པའི་ལྷ། །དྲི་ཟ་གནོད་སྦྱིན་མི་མ་ཡིན། །རྒྱལ་བཙན་གཟའ་བདུད་ཀླུ་བདག་གཉན། །སྲིན་བདུད་དམུ་གཤིན་འགོང་ཐེའུ་གཏོད། །མ་སྨན་འདྲེ་བསེན་ཡིད་གཟུགས་ཅན། །འཁོར་བཅས་མ་ལུས་ཐམས་ཅད་བསང་། །དམེ་རྩོག་མནོལ་གྲིབ་བསང་གྱུར་ཅིག །ཕོག་ཐུག་རྨས་འགྲམ་གསོས་གྱུར་ཅིག །འཁྲུགས་རྩོད་འཁོན་འགྲས་བྱང་གྱུར་ཅིག །ཀོ་ལོང་ཕྲག་ཏོག་ཞི་གྱུར་ཅིག །བཞེད་དགུའི་ལོངས་སྤྱོད་འབྱུང་གྱུར་ཅིག །སོ་སོའི་དགྱེས་པ་སྐོང་གྱུར་ཅིག །ཀྱཻ། གནས་ཡུལ་ཞིང་སྐྱོང་དྲེགས་པ་ཅན་རྣམས་ལ། །མཐུན་པའི་དངོས་གྲུབ་འདོད་དོན་གསོལ་བ་ནི། །བདག་ཀྱང་དམ་ལས་མི་འདའ་ཁྱོད་མཆོད་ན། །ཁྱེད་རྣམས་སྔོན་ཚེ་རྡོ་རྗེ་གྲོ་ལོད་དང་། །དཔལ་རྡོར་བཻ་རོ་ཡབ་སྲས་བཀའ་དམ་བཞིན། །རྣལ་འབྱོར་ཕྲིན་ལས་གང་བཅོལ་འགྲུབ་པར་མཛོད། །ཆོས་སྲུང་རྣམས་ཀྱིས་བཤད་སྒྲུབ་སྡེ་འདི་སྐྱོངས། །ཐོས་བསམ་སྒོམ་པའི་བྱ་བ་གོང་འཕེལ་མཛོད། །གནས་གཏེར་སྲུང་མ་དཀར་ཕྱོགས་སྐྱོང་རྣམས་ཀྱིས། །ལྗོངས་འདིའི་འགྲོ་ཀུན་ཆོས་ལ་སྤྱོད་པ་དང་། །མགོན་སྐྱབས་གྲོགས་མཛོད་གཞིར་སྡོད་སྲུང་མ་རྣམས། །མི་ཕྱུགས་དཀོར་ནོར་ལོངས་སྤྱོད་བསྲུང་སྤེལ་མཛོད། །བྱེས་བགྲོད་དོན་གཉེར་རྒྱལ་བྱེད་ལམ་ལྷ་མཛོད། །ཉེས་པ་ཀུན་སོལ་དོན་གྲུབ་བདེ་ལེགས་མཛོད། །མཐུ་སྟོབས་རྩལ་ལྡན་དྲེགས་པ་ཅན་རྣམས་ཀྱིས། །མི་མཐུན་ཕྱོགས་ལས་རྣམ་པར་རྒྱལ་བར་མཛོད། །རེ་ལྟོས་འོས་པའི་ཕོ་ལྷ་དགྲ་ལྷ་རྣམས། །མངའ་ཐང་རླུང་རྟ་སྙན་གྲགས་རྒྱས་པར་མཛོད། །ནད་གདོན་འཇིགས་བརྒྱད་བར་ཆད་མི་མཐུན་ཕྱོགས། །མ་ལུས་ལྷག་མེད་དབྱིངས་སུ་ཞི་བ་དང་། །ཚེ་བསོད་དཔལ་འབྱོར་ལེགས་པའི་ཡོན་ཏན་རྣམས། །གོང་ནས་གོང་དུ་འཕེལ་རྒྱས་བརྟན་པར་མཛོད། །ཟས་གོས་ལོངས་སྤྱོད་ཡིད་ལ་འདོད་པ་ཀུན། །འབད་རྩོལ་མེད་པར་དབང་དུ་འདུ་བ་དང་། །གནོད་སེམས་གདུག་པའི་བསམ་སྦྱོར་ཤོམ་པ་རྣམས། །དྲག་པོའི་ལས་ཀྱིས་ལྷག་མེད་བསྒྲལ་འདྲེན་མཛོད། །ཆོས་དང་སྲིད་ཀྱི་འདོད་དོན་གཉེར་བའི་ལས། །ཡིད་ལ་རེ་ཞིང་སྨོན་པ་མཐའ་དག་ཀུན། །ཆོས་དང་མཐུན་པར་གེགས་མེད་ཡིད་བཞིན་དུ། །འགྲུབ་པའི་ཕྲིན་ལས་རབ་འབྱམས་མ་གཡེལ་མཛོད།། ཅེས་ལྷ་ལུང་བྲག་མདོའི་ཕྱོགས་ཀྱི་ཡུལ་ལྷའི་སྤྱི་བསང་བསྡུས་པ་དགོས་འདོད་ཀུན་འབྱུང་ཞེས་བྱ་བ་འདི་ཡང་། རྡོ་རྗེའི་མཆེད་གྲོགས་དམ་པར་གྱུར་པ་མཁན་པོ་སྐལ་བཟང་དར་རྒྱས་ནས་འབྲི་ཤོག་དང་། གནང་སྦྱིན་ལྷ་རེག་བཅས་འདི་འདྲ་ཞིག་དགོས་ཞེས་བསྐུལ་ངོ་མི་ལྡོག་ཙམ་དུ། སྔགས་རྒན་གར་དབང་འཇིགས་མེད་རྣམ་རྒྱལ་གྱིས་བྲིས་པ་དགེའོ།། དགེའོ།། དགེའོ།། ས་དམར་དགོན་ཤར་གནས་བདག་གི་བསང་མཆོད།༄༅། ས་དམར་དགོན་ཤར་གྱི་གནས་བདག་མཆོད་ཐབས་བསྡུས་པ་འདོད་དོན་མྱུར་འགྲུབ་ཅེས་བྱ་བ་བཞུགས་སོ།། ཧྱ་གྷྲྀ་ཝ་ལ་ན་མོ། འདིར་དཔལ་རི་བདེ་ཆེན་རྫོངས་ཀྱི་གནས་བདག་དབང་དྲག་རོལ་པའི་བཀའ་ཉན་སྐྱེས་བུ་མཆེད་གསུམ་ལ་བསང་མཆོད་བྱེད་པར་འདོད་པས། བསང་རྫས་འབྱོར་དཔག་བསྲེགས་པའི་དུད་སྤྲིན་གཏོང་ཞིང་། ནམ་མཁའ་མཛོད་ཀྱི་སྔགས་རྒྱས་སྤེལ་ལ་རིམ་གཉིས་ཏིང་འཛིན་བརྟན་པོས་འདི་སྐད་བརྗོད་པར་བྱའོ།། ཀྱཻ། མདོ་སྨད་ཟལ་མོ་སྒང་གི་འདབ། །རྒྱལ་མོ་རོང་གི་ཡུལ་གྲུའི་ཆར། །གནས་ཆེན་ཉེར་ལྔ་འདབ་འབྲེལ་བའི། །ནང་ཚན་དབང་མདོག་ལྗོངས་ཀྱི་ཉིན། །རཱ་གའི་མདངས་ལྡན་ལྷུན་པོའི་སྤོར། །གནས་བཅས་ཡུལ་སའི་དབང་པོ་ཡི། །མཚན་དང་སྐུ་ཡི་རྣམ་འགྱུར་ནི། །གཅིག་ཉིད་ཁོ་ནར་མ་ངེས་ཏེ། །བསྟན་དང་དེ་འཛིན་སྐྱོང་བའི་ཕྱིར། །དཀར་གསལ་མཛེས་འཛུམ་རབ་བྱུང་ཆས། །རབ་འབྱམས་ཕྲིན་ལས་མཛད་པའི་ཕྱིར། །རེས་འགའ་བྲམ་ཟེ་ཨ་ཙ་ར། །དུང་མདོག་དབུ་སྐྲ་ཨག་ཚོམ་ཅན། །གོས་དཀར་གྱོན་པའི་གཟུགས་སུ་སྟོན། །ཕལ་ཆེར་རྟ་པ་ཞུབ་ཅན་སོགས། །སྣང་ཚུལ་སྣ་ཚོགས་ཅིར་ཡང་སྟོན། །ད་ལྟ་རྣལ་འབྱོར་བློ་ངོ་རུ། །རྟེན་འབྱུང་སྣང་ཆ་སྒྱུ་མའི་འཕྲུལ། །དབུས་དང་གཡས་གཡོན་རི་བོ་གསུམ། །ཕྱི་བལྟས་རྩེ་མོ་དགུང་ལ་རེག །རྩ་བ་ནེའུ་ཐང་འབབ་ཆུས་བརྒྱན། །རྐེད་པར་རྫ་སྤང་བྲག་རི་མཛེས། །ནང་ལྟར་བཀོད་ལེགས་ཕོ་བྲང་དབུས། །སྣ་ཚོགས་རཏྣའི་ཁྲི་སྟེང་དུ། །ལྷ་བཙན་སྐྱེས་བུ་དཀར་དམར་མདངས། །དར་དམར་གོས་སྟེང་བེར་སྨུག་གསོལ། །ཕྱག་གཡས་ཆོས་ཀྱི་གཏེར་སྒྲོམ་དང་། །གཡོན་པས་ནོར་གྱི་སྒྲོམ་བུ་བསྣམས། །རིན་ཆེན་པྲོག་ཞུ་རྒྱན་ཕྲེང་མཛེས། །ཞི་འཛུམ་རོལ་པའི་སྟབས་ཀྱིས་བཞུགས། །དེ་ཡི་གཡས་སུ་དངུལ་གྱི་ཁྲིར། །ལྷ་ཡི་སྐྱེས་བུ་གངས་རིའི་མདོག །ཕྱག་གཉིས་རྒྱལ་མཚན་ནོར་བུ་འཛིན། །དར་དཀར་བེར་གསོལ་ཕྱེད་སྐྱིལ་བཞུགས། །གཡོན་དུ་རིན་ཆེན་གསེར་གྱི་ཁྲིར། །ས་བདག་གཉན་གྱི་སྐྱེས་བུ་ནི། །ལྗང་སེར་རལ་གྲི་ནོར་བུ་འཛིན། །བེར་སྔོན་གསོལ་ཞིང་རོལ་སྟབས་བཞུགས། །ཁྱེད་རྣམས་རང་རང་སོ་སོ་ཡི། །དགྱེས་སྡེ་བཀའ་ཉན་སྤྲུལ་འཁོར་བཅས། །རྫུ་འཕྲུལ་སྟོབས་ཀྱིས་འདིར་བྱོན་ལ། །རང་རང་དགྱེས་པའི་གདན་ལ་བཞུགས། །གཡུ་ཤུག་ཕྱེ་མར་དུད་པའི་སྤྲིན། །སྔགས་དང་ཕྱག་རྒྱ་ཏིང་འཛིན་གྱིས། །འདོད་འབྱུང་ནམ་མཁའི་མཛོད་ཆེན་པོར། །སྤེལ་ཞིང་བསྒྱུར་ཏེ་མཆོད་པ་འབུལ། །བསང་ངོ་བརྔན་ནོ་མངའ་གསོལ་ལོ། །ཐུགས་རྒྱུད་དགྱེས་ཤིང་ཚིམ་གྱུར་ཅིག །ཁྱེད་རྣམས་སྔོན་ཚེ་ཡུལ་ཁམས་འདིར། །རྣམ་སྣང་ལོ་ཙཱ་བྱོན་པའི་ཚེ། །དབང་ཆེན་དཀྱིལ་འཁོར་ཞལ་ཕྱེས་ནས། །དབང་བསྐུར་དམ་ཚིག་བསྩལ་བའི་དུས། །ལྷ་བཙན་མེ་ཏོག་དབུས་སུ་བབས། །དབང་ཆེན་མཆོག་གྲུབ་རྩལ་དུ་བཏགས། །ལྷ་དབང་མེ་ཏོག་ཤར་དུ་བབས། །རྡོ་རྗེ་དགའ་བ་ཞེས་སུ་གསོལ། །གཉན་རྗེ་མེ་ཏོག་བྱང་དུ་བབས། །ཕྲིན་ལས་ཐོགས་མེད་ཅེས་སུ་བཏགས། །དེ་ཚེ་རང་རང་སྲོག་སྙིང་ཕུལ། །གསང་ཆེན་བསྟནཔའི་བསྲུང་མར་བསྐོས། །ཟབ་གཏེར་སྟོང་དང་ལྔ་བརྒྱ་གཏད། །ལས་བཞི་བསྒྲུབ་པའི་དངོས་གྲུབ་བརྙེས། །བསྟན་འགྲོའི་དོན་ལ་བརྩོན་པར་ཆད། །ཐུགས་དམ་ཞལ་བཞེས་དེ་དགོངས་ལ། །བསྟན་གཞི་གཙུག་ལག་དགོན་གནས་སྲུངས། །བསྟན་འཛིན་འདུས་པའི་སྡེ་ཚོགས་སྤེལ། །བསྟན་པའི་སྦྱིན་བདག་དཔལ་འབྱོར་རྒྱས། །བསྟན་འགྲོ་ལེགས་ཚོགས་གོང་འཕེལ་ཤོག །རྣལ་འབྱོར་བདག་ཅག་འཁོར་བཅས་ཀྱི། །ནད་གདོན་རྐྱེན་དང་བར་ཆད་སོལ། །ཚེ་བསོད་དཔལ་འབྱོར་སྙན་གྲགས་དང་། །ཉམས་རྟོགས་ཡོན་ཏན་འཕེལ་བར་མཛོད། །སྣ་ཚོགས་སྣང་བ་དབང་འདུས་ཤིང་། །ལོག་འདྲེན་ཚར་གཅོད་ཕྲིན་ལས་མཛོད། །མདོར་ན་ཆོས་སྲིད་འདོད་པའི་དོན། །ཇི་ལྟར་རེ་ཞིང་སྨོན་པ་ཀུན། །ཆོས་དང་མཐུན་པར་འབད་མེད་དུ། །འགྲུབ་པའི་སྡོང་གྲོགས་གཡེལ་མེད་མཛོད།། ཅེས་ས་དམར་དགོན་ཤར་གྱི་གནས་བདག་གི་བསང་བསྡུས་འདོད་དོན་མྱུར་འགྲུབ་ཅེས་བྱ་བ་འདི་ཡང་བཙུན་ཆུང་པདྨའི་མིང་ཅན་གྱིས་ལྷ་རྫས་དྲི་བྲལ་བཅས་བསྐུལ་ངོར། སྙོམ་ལས་པ་ཆོས་དབྱིངས་ཀུན་གསལ་ལམ་གར་དབང་འཇིགས་མེད་རྣམ་རྒྱལ་གྱིས་བྲིས་པ་དགེ་བར་གྱུར་ཅིག དགེའོ།། དགེའོ།། དགེའོ།། དགོན་ཤར་གནས་བདག་བསང་བསྡུས།༄༅། གནས་སྲུང་བཙན་རྒོད་ཀྱི་གཏོར་འབུལ་རྒྱུན་ཁྱེར་ནི། གསེར་སྐྱེམས་རཾ་ཡཾ་ཁཾ་གིས་བསང་སྦྱངས། ཨོཾ་ཨཱཿཧཱུྃ་གིས་བྱིན་གྱིས་བརླབས། ཧྲཱིཿ པདྨ་དབང་གི་བཀའ་ཉན་དྲེགས་པའི་གཙོ། །ཟབ་གསང་གཉན་གྱི་བསྲུང་མ་གནས་གཏེར་བདག །རྡོ་རྗེ་དགྲ་འཇོམས་དབང་ཆེན་མཆོག་གྲུབ་རྩལ། །འཁོར་བཅས་ཡིད་ལྟར་མྱུར་བའི་རྫུ་འཕྲུལ་གྱིས། །དཔལ་རི་བདེ་ཆེན་རྫོངས་ཀྱི་གནས་མཆོག་ནས། །འདིར་གཤེགས་རང་རང་དགྱེས་པའི་གདན་ལ་བཞུགས། །དངོས་འབྱོར་ཡིད་སྤྲུལ་བརྟེན་བསྒྲུབ་བསྐང་བའི་རྫས། །ཕྱི་ནང་གསང་བ་ཡང་གསང་མཆོད་པའི་སྤྲིན། །ཁྱད་པར་རྨད་བྱུང་དམ་རྫས་བཱ་ལིང་ཏ། །འདོད་འབྱུང་བདུད་རྩིའི་སྐྱེམས་ཕུད་དང་བཅས་འབུལ། །དགྱེས་པར་བཞེས་ལ་པ་གོར་བཻ་རོ་དང་། །དཔལ་ཆེན་དགའ་ལོ་ཀརྨ་པ་ལ་སོགས། །རིག་འཛིན་བརྒྱུད་པའི་དམ་ལས་མ་འདའ་བར། །ལྗོངས་འདིར་སྣོད་བཅུད་བསྟན་འགྲོའི་ལེགས་ཚོགས་སྤེལ། །རྣལ་འབྱོར་ཆོས་སྲིད་རེ་ཞིང་སྨོན་པའི་ལས། །གེགས་མེད་འགྲུབ་པའི་སྡོང་གྲོགས་མ་གཡེལ་མཛོད། །ཅེས་རང་གཞན་ལ་ཕན་ཕྱིར་མགོ་སྤྲུལ་གྱིས་བྲིས་པ་དགེའོ།། རྫ་བྲག་བསང་བསྡུས།༄༅། ཡུལ་ལྷའི་བསང་བསྡུས་བསམ་དོན་མྱུར་སྩོལ་བཞུགས། ཀྱཻ། རྫ་ཡུལ་འཛིན་མའི་ཁྱོན་ལ་དབང་བསྒྱུར་ཞིང་། །གནས་ཤིང་བརྟེན་པའི་ཟོ་དོར་ཡུལ་ལྷའི་ཚོགས། །བྲག་དམར་རྨོག་མཐོ་རྡོ་རྗེ་དགྲ་འཇོམས་རྩལ། །ས་འཛིན་རྒྱལ་པོ་བ་སྦལ་ཁྱུང་གི་རི། །དུང་ཕྲེང་དཀར་མོ་རི་དར་ཕྱུག་མོ་སོགས། །མཚོ་སྨན་རྒྱལ་མོ་དུང་ལུང་རི་རྫོང་ཕྱུག །བཀྲ་ཤིས་ལྷ་རྩེ་མཚོ་སྨན་ཕྱུག་མོ་དང་། དཔའ་བོ་མདུང་ཡག་དཀར་ལ་ཡར་རྩེ་དང་། །ནོར་བུ་ལྷ་རྩེ་བན་དང་བོན་གྱི་རི། །རྡོ་རྗེ་རྒྱལ་མཚན་རྡོ་རྗེ་དཔའ་རབ་བརྩེགས། །རྡོ་རྗེ་དྲག་རྩལ་རྡོ་རྗེ་དབང་རྒྱལ་རྩལ། །བཀྲ་ཤིས་དུང་སྙན་རྨ་གཡང་ལྷ་ཕྱུག་དང་། །དུང་མཚོ་ཕྱུག་མོ་དགྱེས་ལྕམ་ཕྱུག་མོ་དང་། །གཉན་པོ་སོ་ལེགས་ལ་སོགས་གཉུག་གནས་ཚོགས། །རྫ་བྲག་སྟོད་སྨད་གནས་བདག་ཡུལ་ལྷ་རྣམས། །བསང་ངོ་མཆོད་དོ་ལས་བཞི་མྱུར་འགྲུབ་མཛོད། །ཅེས་པ་འདི་ཡང་མགོ་སྤྲུལ་པས་སོ།། རྫ་བྲག་སྤྱི་བསང་བསྡུས་པ།༄༅། རྫ་བྲག་སྟོད་སྨད་ཀྱི་གཞི་བདག་བསང་བསྡུས་བཞུགས་སོ།། བྲག་དམར་རྨོག་མཐོ་རྡོ་རྗེ་དགྲ་འཇོམས་རྩལ། །ས་འཛིན་རྒྱལ་པོ་བ་སྦལ་ཁྱུང་གི་རི། །དུང་ཕྲེང་ཕྱུག་མོ་ནོར་བུ་ལྷ་རྩེ་དང་། །དཔའ་བོ་མདུང་ཡག་མཚོ་ལུང་རི་དཀར་སོགས། །རྫ་བྲག་སྟོད་སྨད་གནས་བདག་ཡུལ་ལྷ་རྣམས། །བསང་ངོ་མཆོད་དོ་ལས་བཞི་མྱུར་འགྲུབ་མཛོད།། མགོ་སྤྲུལ་པས་སོ།། #div1 གཡུ་སྟོད་སྨད་ཀྱི་བསང་བསྡུས། ༄༅། གཡུ་སྟོད་སྨད་ཀྱི་བསང་བསྡུས་ནི། ཧཱུྃ། མཆོག་གསུམ་རྩ་གསུམ་སྲུང་མའི་ཚོགས་སྤྱི་དང་། །ཁྱད་པར་གཡུ་ཕྲོམ་གཡུ་སྙིང་གནས་ལུང་སོགས། །གཡུ་སྟོད་གཞི་བདག་རྣམས་དང་གཡུ་རོང་གི། །རྡོ་རྗེ་རབ་བརྟན་སྦས་གནས་རྡོ་རྗེ་རྩེ། །སོ་གོ་དགའ་ལྡན་སེང་གེ་དཀར་མོ་དང་། །དངུལ་རྫི་གཡུ་མཚོ་སྲས་རྒྱལ་བྲག་དཀར་སོགས། །ཡུལ་ཕྱོགས་འདི་ཡི་གཞི་བདག་མ་ལུས་པ། །བསང་ངོ་མཆོད་དོ་བསམ་དོན་ལྷུན་གྲུབ་མཛོད།། མགོ་སྤྲུལ་བས་སོ།། བོལ་གོང་ལྡོང་རིའི་གནས་བསང་བསམ་འཕེལ་ནོར་བུ།༄༅། བོལ་གོང་ལྡོང་རིའི་གནས་བསང་བསམ་འཕེལ་ནོར་བུ་བཞུགས། རཾ་ཡཾ་ཁཾ་གིས་བསང་རྫས་ཀྱི་སྨེ་བཙོག་སྦྱངས། ཨོཾ་ཨཱཿཧཱུྃ་གིས་བདུད་རྩིའི་སྤྲིན་དུ་སྤེལ་ལ། ཧྲཱིཿ བདག་ཉིད་པདྨ་དབང་ཆེན་སྐུར་གསལ་བའི། །ཐུགས་སྲོག་འོད་ཀྱིས་སྤྱན་རས་གཟིགས་དབང་གི། །གསུང་སྤྲུལ་ཡིག་དྲུག་ལྷ་ལུང་དཔལ་རྡོར་གྱི། །ཕྱག་སོར་རྩེར་བྱུང་གནས་མཆོག་བསྲུང་མའི་གཙོ། །ལེགས་ལྡན་ནག་པོ་ཀླུ་དང་གཉན་གྱི་རྗེ། །སོ་སོའི་འཁོར་བཅས་མྱུར་དུ་འདིར་བྱོན་ལ། །དངོས་བཤམས་ཡིད་སྤྲུལ་སྔགས་རྒྱས་ལེགས་སྤེལ་བའི། །བསང་མཆོད་འདོད་དགུའི་སྤྲིན་ཕུང་བཞེས་སུ་གསོལ། །འདོད་གཟུགས་ལྷ་ལ་དབང་བསྒྱུར་ལྷ་ཡི་གཙོ། །ཚོགས་རྗེ་ཚོགས་བདག་ལེགས་ལྡན་ནག་པོ་བསང་། །དགྲ་ཇག་ཆོམ་རྐུན་གནོད་སྡང་གདུག་སེམས་ཅན། །མ་ལུས་འོག་མིན་གནས་སུ་སྒྲོལ་འདྲེན་མཛོད། །ཆུ་བདག་ཀླུ་ལ་དབང་མཛད་ཀླུ་ཡི་གཙོ། །གཡས་ཕྱོགས་གྲུབ་པའི་ཆུ་མིག་ལ་གནས་བསང་། །རྟ་དྲེལ་གནག་ལེགས་ལོ་ཏོག་མངའ་ཐང་རྒྱས། །བཙན་ཕྱུག་འཕན་དར་འཛོམ་པའི་ཕྲིན་ལས་མཛོད། །གཏོད་དང་གཉན་ལ་དབང་མཛད་གཉན་རིགས་གཙོ། །གཡོན་ཕྱོགས་བྲག་རྒྱུད་རྡོ་ལ་གནས་པ་བསང་། །ཉིན་གྱི་བྱ་ར་མཚན་གྱི་མེལ་ཚེ་དང་། །བྱེས་བགྲོད་ལམ་ལྷ་གཞིར་སྡོད་བསྲུང་མ་མཛོད། །བོལ་གོང་ལྡོང་རིའི་ཡིག་དྲུག་སྲུང་མ་རྣམས། །སྔོན་ཚེ་པད་འབྱུང་རྡོ་རྗེ་གྲོ་བོ་ལོད། །བར་དུ་པ་གོར་བཻ་རོ་ཙ་ནའི་མཚན། །དེ་རྗེས་ལྷ་ལུང་དཔལ་ཆེན་དགའ་ལོ་པའི། །བཀའ་དམ་ཐ་ཚིག་མ་གཡེལ་རྗེས་དགོངས་ལ། །རྒྱལ་བའི་བསྟན་བསྲུང་འགྲོ་བའི་བདེ་སྐྱིད་སྤེལ། །ལྗོངས་འདིའི་ནད་གདོན་གོད་ཡམས་བར་ཆད་སོལ། །སད་སེར་བཙའ་ཐན་མུ་གེའི་འཇིགས་པ་སོལ། །མཐའ་དམག་དུས་འཁྲུགས་མཚོན་ཁ་དར་བ་ཟློག །མི་འདོད་དུས་ཀྱི་རྒུད་པ་དབྱིངས་སུ་སོལ། །མདོར་ན་འཕྲལ་ཕུག་རེ་ཞིང་སྨོན་པའི་དོན། །མ་ལུས་ཡིད་བཞིན་འགྲུབ་པའི་ཕྲིན་ལས་མཛོད།། གནས་སྲུང་གི་བསང་བསྡུས་བསམ་འཕེལ་ནོར་བུ་ཞེས་བྱ་བ་འདི་ཡང་དོན་གཉེར་ཅན་འགའི་ངོར། མགོ་སྤྲུལ་གྱིས་གང་དྲན་ཤར་མར་བྲིས་པ་དགེ་ལེགས་འཕེལ། དགའ་མ་གདོང་གི་གནས་བདག་ལྷ་སྨན་ཆེན་མོའི་བསང་མཆོད།༄༅། དགའ་མ་གདོང་གི་གནས་བདག་ལྷ་སྨན་ཆེན་མོའི་བསང་མཆོད་ལྷ་མིའི་འདོད་འབྱུང་བཞུགས། ཨོཾ་སྭ་སྟི་སིདྡྷཾ། འདིར་ལྷ་སྨན་དུང་ལྕམ་དཀར་མོ་ལ་བསང་མཆོད་བྱེད་པར་འདོད་པས། རིན་པོ་ཆེའི་སྣོད་དུ་གཙང་ཕྱེ་འོ་ཆབ་ཀྱིས་སྦྲུས་པས་དཀར་ཟླུམ་རྒྱན་ལྡན་བཤོས་ཕྲན་བཞིས་བསྐོར་བ་བཅས་ལ། དཀར་མངར་ཟས་སྣ་ཤེལ་ཚིག་འབྲུ་སྨན་སོགས་ཀྱིས་བརྒྱན་པ་དང་། ཕུད་སྐྱེམས་འོ་ཆོལ་བཤམས། བཟང་ཤིང་སྣ་དགུའི་དུད་སྤྲིན་རྒྱ་ཆེར་བཏང་ལ། འབྲུ་གསུམ་དང་ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ་ནས། ཀྱཻ། ཀ་དག་གཞི་དབྱིངས་འཕོ་འགྱུར་བྲལ་བའི་གདངས། །ལྷུན་གྲུབ་འགགས་མེད་ཡེ་ཤེས་རོལ་པའི་རྩལ། །ཐུགས་རྗེའི་སྒྱུ་འཕྲུལ་སྲིད་ཞིའི་ཟློས་གར་མདངས། །བསམ་བརྗོད་བློ་ཡིས་དཔོག་མིན་མཁའ་དང་མཉམ། །འཁོར་ལོས་བསྒྱུར་རྒྱལ་ཡུལ་འཁོར་སྲུང་གི་སྲས། །ཆོས་ཀྱི་བློ་གྲོས་སྲིད་ཁམས་དབང་པོར་བསྟན། །འདྲེན་མཆོག་སྟོང་གི་ཆོས་འཁོར་ཞུ་བ་པོ། །བསྐལ་བཟང་སངས་རྒྱས་ཚངས་པ་ཆེན་པོ་ཡིས། །དབང་བསྒྱུར་སྟོང་གསུམ་མི་མཇེད་བྱེ་བ་བརྒྱའི། །ནང་ཚན་འཇིག་རྟེན་ཁམས་འདིའི་ལྷོ་ཕྱོགས་གླིང་། །གངས་ཅན་བོད་ཀྱི་ཤར་ཕྱོགས་རྒྱལ་མོ་རོང་། །གཡི་ལུང་ཉིན་གྱི་ཆར་གཏོགས་དགའ་མ་གདོང་། །ཡིད་སྨོན་བཀྲ་ཤིས་ཚལ་ལ་བརྟེན་གནས་པའི། །སྨན་བཙུན་དུང་ལྕམ་དཀར་མོ་འདོད་སྟེར་མ། །ཡིད་འོང་མཛེས་འཛུམ་ལྗང་སྔོན་གོ་ཟུ་དང་། །བེར་དཀར་གསེར་ཚོམ་ཅན་གསོལ་དར་སྐེད་བཅིང་། །གོས་མཆོག་སྔོ་ལྗང་ཐུ་བ་འཇའ་རིས་བཀྲ། །མཐོན་མཐིང་དབུ་སྐྲའི་ལན་ཕྲེང་མཛེས་པའི་སྟེང་། །སྦུར་ལེན་ལྷ་ཀླུ་མི་ཡི་ནོར་བུས་བརྒྱན། །གཡུ་བྱུར་སྤེལ་མའི་དོ་ཤལ་མེ་ཏོག་ཕྲེང་། །རིན་ཆེན་སྣ་ཚོགས་རྒྱན་སྤྲས་མཆོག་སྦྱིན་གྱིས། །བླང་དོར་ཀུན་གསལ་འཕྲུལ་གྱི་མེ་ལོང་དང་། །འདོད་འབྱུང་གཡུ་ཡི་བུམ་པ་ཐུགས་ཀར་འཛིན། །དར་འབོལ་སུམ་བརྩེགས་ཟ་འོག་ཁེབས་ལྡན་སྟེང་། །ལེགས་པར་བརྟན་བཞུགས་ཞི་རྒྱས་ཕྲིན་ལས་སྩོལ། །ཕལ་ཆེར་དབང་མདོག་དབང་གི་གོས་རྒྱན་ཅན། །ལྕགས་ཀྱུ་ཞགས་བསྣམས་གསེར་ཤ་ཡུ་མོ་བཅིབས། །དབང་དང་དྲག་པོའི་ལས་ཀྱིས་རེ་བ་སྐོངས། །ཡུལ་གཞི་ས་ཡི་བདག་མོ་ལས་ཀྱི་ལྷ། །འདིར་བྱོན་མོས་བཤམས་གསས་མཁར་ལ་བཙས་དང་། །གཏེར་གྱི་བུམ་པ་སྲོག་བྱང་སྐུ་ཡི་རྟེན། །མཐུན་རྫས་རྟེན་ལ་དགྱེས་ཤིང་བརྟན་པར་བཞུགས། །སྔོན་ཚེ་རྟ་རྣ་རི་ལ་སྨན་སྤོས་ཤིང་། །རྩ་བ་ཙན་དན་སྡོང་པོའི་རྩེ་མོ་ལ། །ལྷ་ཤིང་སྣ་ཚོགས་གྱེས་པའི་འབྲས་བུ་རྣམས། །འཛམ་གླིང་ཁྱབ་པར་སྨིན་ཅིང་བརྡོལ་བ་ལས། །སྟག་པ་ཤུག་པ་མཁན་པ་ཕ་ཤིང་དང་། །སྤེན་མ་ལྗང་མ་བྲ་མ་མ་ཤིང་རིགས། །བལ་བུ་འོམ་བུ་སུར་བུ་བུ་ཤིང་ཚོགས། །གཞན་ཡང་དྲི་ལྡན་སྨན་སྤོས་བཟང་ཤིང་རིགས། །དབྱིངས་ཡུམ་འབྱུང་ལྔའི་ལྷ་མོའི་བྱིན་རླབས་ལས། །ལེགས་འཁྲུངས་སྔགས་རྒྱ་ཏིང་འཛིན་གྱིས་སྤེལ་བའི། །དགོས་འདོད་ཀུན་འབྱུང་ཡེ་ཤེས་བདུད་རྩིའི་སྤྲིན། །རབ་དཀར་ཆུ་འཛིན་ཕུང་པོར་ཅོ་འདྲི་བས། །འདིར་ཚོགས་ལྷ་མིའི་ཡོ་བྱད་རྫས་ཀུན་གྱིས། །མནོལ་རྩོག་གྲིབ་དང་མ་དག་མི་གཙང་རྣམས། །ཆོས་དབྱིངས་རྣམ་དག་རྒྱུ་འབྲས་བསླུ་མེད་མཐུས། །ལྷག་མེད་དབྱིངས་སུ་བསང་ཞིང་དག་གྱུར་ཅིག །ཤིང་རིས་རླུང་རྟ་ནམ་རྒྱང་མདའ་དང་འཕང་། །དར་ཚོན་བལ་ཚོན་བྱ་སྤུ་དགྱེས་མཐུན་རྫས། །གཏོར་སྐྱེམས་ཕྱེ་མར་ཤེལ་ཚིག་ཟས་སྣའི་ཕུད། །མཆོད་རྫས་འདི་རྣམས་དགྱེས་པར་བཞེས་སུ་གསོལ། །ཀི་བསྭོ་དུང་གླིང་དབྱངས་རོལ་བརྡས་བསྐུལ་ཚེ། །ཁུ་བྱུག་སོས་ཀའི་མགྲོན་ལ་ཆས་པ་བཞིན། །གེ་སར་གསར་དུ་བཞད་པའི་ལང་ཚོ་ལྟར། །ངོ་དཀར་འཛུམ་པའི་མདངས་ཀྱིས་ད་ཚུར་བྱོན། །ཅི་འདོད་མི་ཟད་སྣང་བ་རོལ་མོའི་སྤྲིན། །ཆུ་བྲག་དགའ་ཚལ་བདག་མོས་ཡོངས་བཞེས་ལ། །ཇེ་ཉེ་ཇེ་གདུང་མི་འབྲལ་གྲོགས་བགྱིད་ཅིང་། །ཉོ་ཚོང་རྒྱན་སོགས་དོན་གཉེར་རྒྱལ་ཁ་ལོངས། །ཏི་རའི་ཁྲོད་དང་དབེན་སྟོང་སྲང་ནས་ཀྱང་། །ཐུ་བ་ལོངས་སྤྱོད་ནོར་གྱིས་གང་མཛོད་ལ། །དེ་ལ་ཕྲག་ཏོག་གནོད་པའི་བསམ་སྤྱོད་ཅན། །ནོ་པི་ཀ་ཡི་སྦུར་མ་རླུང་ལ་སྐུར། །པི་ཝཾ་གདངས་བཞིན་གཡོ་ཟོལ་སྙན་སྒྲོགས་ཤིང་། །ཕུ་ནས་ཤྭ་འུད་བརྡོལ་འདྲའི་ངན་ཤོམ་རྣམས། །བེ་ཤིང་ཚལ་ལ་ཞུགས་ཆེན་མཆེད་པ་བཞིན། །མོ་རྒྱུད་སྡེ་བརྒྱད་རྗེ་མོས་ཕུངས་སུ་ཆུགས། །ཙི་ན་ཧོར་སོག་ཀློ་མོན་དགྲ་སྡེའི་དཔུང་། །ཚུ་རོལ་འདིར་སྣང་བདེ་སྐྱིད་འཇོམས་པའི་རིགས། །ཛེ་ཏའི་ཚལ་དབུས་མུ་སྟེགས་དཔུང་བཅོམ་ལྟར། །ཝོ་རེ་བསྡུས་ལ་བསྲུང་མཚམས་ཕ་མཐར་སྐྲོད། །ཞི་བས་མི་ཐུལ་མུ་སྟེགས་མཐའ་བཞིའི་དམག །ཟུ་ལེ་སྨན་སོགས་བསྟན་མའི་གཡར་དམ་བཞིན། །འེ་ཞེས་འབོད་ཀྱིན་བྲོས་འཐོར་བྱེར་བར་གྱིས། །ཡོ་ལངས་ཆོ་འཕྲུལ་སྟོན་ལ་ལྷག་མེད་ཐོངས། །རི་དབང་ལྟ་བུར་ཡུལ་གྲོགས་རྟག་བརྟན་ཞིང་། །ལུ་མའི་རྒྱུན་ལྟར་བསྟན་སྲིད་རིང་དུ་གནས། །ཤེ་འཕེལ་བཞོན་ལེགས་མི་ཕྱུགས་བདེ་ཞིང་སྐྱིད། །སོ་ནམ་ལས་ཀ་ཅི་བཞེད་མྱུར་འགྲུབ་མཛོད། །ཧི་མ་ལའི་མཚོན་ཉེར་བཞིའི་གནས་ཀྱི་དཔལ། །ཨུ་ཙ་ལ་སོགས་དུར་ཁྲོད་བརྒྱད་ཀྱི་དཔལ། །ཧེ་རུ་ཀ་ཡི་གནས་བཅུའི་དཔལ་ཀུན་འབྱོར། །ཨོ་རྒྱན་གླིང་བཞིན་ལྗོངས་འདི་འཕེལ་བརྟན་མཛོད། །ལྷ་ཤིང་དུད་པས་མི་བསང་གང་ཡང་མེད། །བདུད་རྩིའི་ཆབ་ཀྱིས་མི་འདག་གང་ཡང་མེད། །འཆི་མེད་སྨན་གྱིས་མི་འཚོ་གང་ཡང་མེད། །བཟང་ཤིང་སྨན་སྤོས་བསྲེགས་པའི་དུད་སྤྲིན་འདིས། །འདོད་དགུའི་དཔལ་སྟེར་ལྷ་སྨན་གཙོ་མོ་བསང་། །དགྱེས་སྐོང་ཀླུ་དང་བཙན་གྱི་རྗེ་བོ་བསང་། །འབྲུ་བཅུད་དཔལ་འཛིན་ཀླུ་ཡི་སྲས་མོ་བསང་། །ཟས་སྐོམ་གྲོགས་སྦྱིན་བཙན་གྱི་སྲས་པོ་བསང་། །བཀའ་ཉན་ཀླུ་གཉན་བཙན་གཏོད་འཁོར་ཚོགས་བསང་། །མནོལ་གྲིབ་བསངས་ཤིང་རྨོངས་འཐིབ་སངས་གྱུར་ཅིག །ཉམས་པ་གསོས་ལ་རྒུད་པ་དར་གྱུར་ཅིག །དགྱེས་པ་སྐོངས་ལ་བཞེད་པ་འགྲུབ་གྱུར་ཅིག །ཕོག་ཐུག་འཁོན་འགྲམ་འཁྲུགས་པ་ཞི་གྱུར་ཅིག །ལྷ་མི་མཐུན་འགྲོགས་བྱམས་བརྩེ་རྒྱུན་ལྡན་ཤོག །དེ་ལྟར་བསང་མཆོད་ཕུལ་བའི་ཡོན་ཏན་གྱིས། །ནད་གདོན་འཇིགས་བརྒྱད་བར་ཆད་དབྱིངས་སུ་ཞི༵། །ཚེ་བསོད་དཔལ་འབྱོར་ལེགས་ཚོགས་འཕེལ་ཞིང་རྒྱ༵ས། །ལྷ་འདྲེ་མི་གསུམ་བསྐུལ་མངག་བཀོལ་སོགས་དབ༵ང་། །དགྲ་ཇག་ཆོམ་རྐུན་གཅན་གཟན་གནོད་སེམས་བྲལ། །སད་སེར་བཙའ་ཐན་མི་འབྱུང་ལོ་ཏོག་ལེགས། །གོད་ཡམས་མི་འོང་མི་ཕྱུགས་ཟས་ནོར་འཛོམས། །མནའ་ལྐུགས་རྔོན་སོགས་མི་དགེ་རིམ་གྱིས་ཉམས། །བཤད་སྒྲུབ་རྟོགས་གྲོལ་དགེ་ལས་རིམ་གྱིས་འཕེལ། །བསྟན་སྐྱོང་རྒྱལ་པོའི་མངའ་ཐང་དར་ཞིང་རྒྱས། །བསྟན་སྲིད་ཡར་འཕེལ་དོན་གཉིས་ཆོས་བཞིན་འགྲུབ། །བསྟན་བཅུད་ཉམས་ལོན་འོད་ལུས་མྱུར་འགྲུབ་ཤོག །སྔོན་ཚེ་པད་འབྱུང་བཻ་རོ་ཡབ་སྲས་དང་། །བར་དུ་དཔལ་གྱི་རྡོ་རྗེ་ཀརྨ་པ། །དེ་རྗེས་སྙིང་པོའི་མཚན་ཅན་རྣམ་གཉིས་ཀྱིས། །བཀའ་བསྒོས་དམ་བསྒྲགས་ཁས་བླངས་མཛད་པ་ལྟར། །མཛེས་མཛེས་ལང་ཚོས་སྒེག་པའི་ལྷ་སྨན་ཁྱོད། །དུང་དུང་གདུང་བས་བྱམས་ཤིང་བརྩེར་དགོངས་ནས། །ལྷག་ལྷག་བལྟ་བས་མི་ངོམས་སྦྱིན་སྐྱེས་ཞལ། །ཡང་ཡང་སྟོན་ལ་གཡེལ་མེད་སྡོང་གྲོགས་མཛོད། །བསང་བྱའི་ལྷར་འཛིན་རིག་རྩལ་སྒྱུ་མའི་འཕྲུལ། །བསང་བྱེད་བདག་འཛིན་འཁྲུལ་རྟོག་རྨི་ལམ་གཟུགས། །བསང་ཡུལ་བཟང་ཞེན་མཁའ་ལྟར་ཡེ་ནས་སྟོང་། །འཁོར་གསུམ་བརྟགས་ན་བསམ་བརྗོད་གཞི་རྩ་བྲལ། །འོན་ཀྱང་རྨི་ལམ་ལྟ་བུའི་ལྗོངས་འདི་རུ། །སྒྱུ་མ་ལྟ་བུའི་བསང་མཆོད་འབྲས་སྨིན་ནས། །གཟུགས་བརྙན་ལྟ་བུའི་རང་གཞན་སེམས་ལྡན་ཀུན། །སྤྲུལ་པ་ལྟ་བུའི་དཔལ་ཡོན་རྟག་སྤྱོད་ཤོག །ཅེས་དགའ་མ་གདོང་གི་ལྷ་སྨན་མའི་བསང་མཆོད་ལྷ་མིའི་འདོད་འབྱུང་ཞེས་བྱ་བ་འདི་ཡང་མགོ་སྤྲུལ་གྱིས་རང་ལ་མཁོ་ཕྱིར་ཤར་མར་བྲིས་པའོ།། གནས་གཞིའི་བདག་མོའི་བསང་བསྡུས།༄༅། གནས་གཞིའི་བདག་མོའི་བསང་བསྡུས་སྨོན་པ་མྱུར་འགྲུབ་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཧྲཱིཿ གཡི་རོང་སྲིབ་ཕྱོགས་མཐོ་བརྗིད་དབེན་པའི་རིར། །བརྟེན་མཛད་ཡུལ་སའི་དབང་པོ་ལྷ་གཉན་རྗེ། །སྐུ་བླ་དུང་རྩེ་བསྟན་པའི་བསྲུང་མ་ཆེ། །སྐུ་ཡི་མཆེད་པོ་གསེས་མཁར་མཁར་བདུད་བཙན་དང་། །གཉན་སྲས་གཟི་བརྗིད་མཆོག་ལྡན་དཔའ་རྩལ་ཅན། །པདྨ་དྲེགས་འདུལ་ལྷ་རྒོད་དགྲ་འདུལ་དང་། །ངེས་ལེགས་སྲུང་མ་ཝ་རུ་ཎ་ལ་སོགས། །བཙུན་མོ་སྲས་བློན་འཁོར་བཅས་འདིར་བྱོན་ལ། །འདོད་འབྱུང་ཟག་མེད་བདུད་རྩིའི་བསང་མཆོད་བཞེས། །རྣལ་འབྱོར་བསམ་དོན་མ་ལུས་མྱུར་འགྲུབ་མཛོད། །ཀྱཻ། མདོ་ཁམས་ཟལ་མོ་སྒང་འདབས་རྒྱལ་མོ་རོང་། །གཡི་ལུང་ཉིན་རི་མཐོ་མཛེས་དགའ་མ་གདོང་། །ཡིད་སྨོན་བཀྲ་ཤིས་ཚལ་གནས་ལྷ་སྨན་གཙོ། །དུང་ལྕམ་དཀར་མོ་འདོད་དགུའི་དཔལ་སྟེར་མ། །ལས་བཞི་སྒྲུབ་མཛད་འཁོར་བཅས་འདིར་བྱོན་ལ། །འདོད་འབྱུང་ཟག་མེད་བདུད་རྩིའི་བསང་མཆོད་བཞེས། །རེ་སྨོན་ཡིད་བཞིན་མྱུར་དུ་འགྲུབ་པ་དང་། །ལྷ་མི་མཐུན་འགྲོགས་བྱམས་བརྩེ་རྒྱུན་ལྡན་མཛོད། །རྒྱལ་རིགས་ཀླུ་ཆེན་བསོད་ནམས་དཔལ་འབྱུང་དང་། །སྲས་མོ་དཔལ་འཛིན་མཚོ་མོ་འཁོར་བཅས་བྱོན། །འདོད་འབྱུང་ཡེ་ཤེས་བདུད་རྩིའི་བསང་སྤྲིན་བཞེས། །ཕྱྭ་འཁོར་གཡང་ཆགས་ལོ་ལེགས་འབྲུ་འཕེལ་མཛོད། །བཀྲ་ཤིས་ཚལ་བཙན་དབང་ཆེན་རབ་འབར་དང་། །བཙན་སྲས་ཟས་སྐོམ་གྲོགས་སྦྱིན་འཁོར་བཅས་བྱོན། །འདོད་འབྱུང་ཟག་མེད་བདུད་རྩིའི་བསང་མཆོད་བཞེས། །མི་དར་ཕྱུགས་འཕེལ་ལོངས་སྤྱོད་རྒྱས་པར་མཛོད། །ལྷ་སྨན་འདོད་དགུའི་དཔལ་སྟེར་བཀའ་སྒྲུབ་པའི། །སྨན་མོ་ཡང་སྨན་ཀླུ་གཉན་བཙན་དང་གཏོད། །ཐམས་ཅད་འདིར་བྱོན་འདོད་འབྱུང་བསང་སྤྲིན་བཞེས། །བསམ་པའི་དོན་རྣམས་མྱུར་དུ་འགྲུབ་པར་མཛོད། །སྨན་བཙུན་དུང་ལྕམ་དཀར་མོ་འཁོར་བཅས་རྣམས། །བསང་མཆོད་འདོད་དགུའི་སྤྲིན་འདིས་དགྱེས་མཛོད་ལ། །ཕྱྭ་གཡང་འཕེལ་བརྟན་བཙན་ཕྱུག་འཕན་དར་འཛོམས། །རེ་ཞིང་སྨོན་པ་མཐའ་དག་མྱུར་འགྲུབ་མཛོད། །ཅེས་གནས་གཞིའི་བདག་མོའི་བསང་བསྡུས་སྨོན་པ་མྱུར་འགྲུབ་འདི་ཡང་མགོ་སྤྲུལ་གྱིས་རང་གི་རྒྱུན་བསང་དུ་འཛུད་རྒྱུར་བྲིས་པ་དགེའོ།། ནུའི་བྲེང་ངེ་གཡག་ཕྱུག་གི་བསང་བསྡུས།༄༅། གཡི་ཉིན་ནུའི་ཡུལ་ལྷའི་བསང་བསྡུས་བསམ་དོན་མྱུར་འགྲུབ་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། ཀ་དག་སྐྱེ་མེད་གདོད་མའི་གཞི་དབྱིངས་ནས། །ལྷུན་གྲུབ་འགགས་མེད་ཡེ་ཤེས་རིག་པའི་གདངས། །ཐུགས་རྗེའི་རོལ་གར་མ་འདྲེས་སྒྱུ་མའི་འཕྲུལ། །རྒྱུ་འབྲས་ཕན་གནོད་སྟོན་ཕྱིར་ཅིར་ཡང་སྣང་། །གཡི་ལུང་དགའ་བ་ལྗོངས་ཀྱི་སྨད་ཕྱོགས་ཉིན། །ནུ་ཞེས་གྲགས་པའི་ཡུལ་སྐྱོང་ལྷ་རིགས་བཙན། །ཡོངས་གྲགས་མཚན་ལ་ནུ་བུ་གཡག་ཕྱུག་ཞེས། །དྲེགས་པའི་གཙོ་བོ་རྡོ་རྗེ་ལྷ་བཞད་རྩལ། །རེས་འགའ་ལྷ་གཡག་ཁམས་སྔོན་དུང་རུ་ཅན། །གསེར་གྱི་སྣ་འགུགས་ལ་སོགས་རྒྱན་ལྡན་དང་། །ཕལ་ཆེར་དུང་རྟ་གཡུ་རྔོག་གློག་བང་ཅན། །རིན་ཆེན་སྣ་ཚོགས་རྒྱན་ལྡན་མ་ངེས་སྟེང་། །སྐྱེས་བུ་དཀར་དམར་དཔའ་བོའི་ཆས་ཀྱིས་བརྗིད། །ཕྱག་གཡས་དགྲ་སྲོག་གཅོད་པའི་གྲི་རིང་ཕྱར། །གཡོན་པས་ལོག་འདྲེན་ཀུན་འཆིང་ཞགས་པ་འཕེན། །ལྷ་ཁྱོད་ཡུམ་སྲས་འཁོར་བཅས་མྱུར་བྱོན་ལ། །བསང་མཆོད་འདོད་དགུ་ཀུན་འབྱུང་བདུད་རྩིའི་སྤྲིན། །ཟག་མེད་ནམ་མཁའི་དབྱིངས་མཛོད་འདི་བཞེས་ལ། །ཁྱོད་ལ་རེ་ཞིང་ལྟོས་པའི་ཡོན་མཆོད་རྣམས། །བསྲུང་སྐྱོབས་བྱ་ར་མེལ་ཚེ་རྟག་ཏུ་མཛོད། །ཕུ་ཡི་འབྲོག་འཛིན་རྟ་ནོར་ར་ལུག་སྲུང་། །མདའ་ཡི་རོང་འཛིན་ལོ་ལེགས་འབྲུ་དྲུག་སྤེལ། །གཞི་བྱེས་ལམ་གསུམ་དགེ་བའི་སྡོང་གྲོགས་གྱིས། །ཆོས་སྲིད་བསམ་དོན་མ་ལུས་མྱུར་འགྲུབ་མཛོད།། ཅེས་གཡི་ལུང་ནུའི་ཡུལ་ལྷའི་བསང་བསྡུས་བསམ་དོན་མྱུར་འགྲུབ་ཞེས་བྱ་བ་འདི་ཡང་བླ་མ་བློ་གྲོས་བཟང་པོའི་ཐུགས་བཞེད་བཞིན། མགོ་སྤྲུལ་གྱིས་ཤར་མར་བྲིས་པ་དགེའོ།། སྤའི་ར་མ་གྱོ་བཙན་གྱི་བསང་མཆོད།༄༅། ཡུལ་ལྷའི་བསང་བསྡུས་དགོས་འབྱུང་ནོར་བུ་ཞེས་བྱ་བ་བཞུགས། བསང་རྫས་ཀྱི་དངོས་འཛིན་རཾ་ཡཾ་ཁཾ་བརྗོད་པས་བསྲེགས་གཏོར་བཀྲུས། ཨོཾ་ཨཱཿཧཱུྃ་གིས་སྦྱངས་སྤེལ་བསྒྱུར། སླར་ཡང་ནམ་མཁའ་མཛོད་ཀྱི་སྔགས་གསུམ་མ་བདུན་སོགས་བརྗོད་པས་མཐུན་རྫས་བསམ་གྱིས་མི་ཁྱབ་པར་བསྒྱུར་ལ། ཧྲཱིཿ སྣོད་བཅུད་ཐ་མལ་མ་ཡིན་རྔ་ཡབ་གླིང་། །དག་པ་རབ་འབྱམས་མཁའ་སྤྱོད་དཔལ་རིའི་གླིང་། །སྐུ་གསུམ་ཡོངས་རྫོགས་རྡོ་རྗེ་དྲག་པོ་རྩལ། །རིག་འཛིན་དཔའ་བོ་མཁའ་འགྲོའི་འཁོར་བཅས་གསལ། །བསང་མཆོད་མཚོན་ཙམ་མ་ཡིན་མཁའ་དབྱིངས་མཛོད། །ཟག་མེད་བདེ་སྟོང་ཡེ་ཤེས་བདུད་རྩིའི་སྤྲིན། །ཅི་འདོད་ལོངས་སྤྱོད་མི་ཟད་ཆར་འབེབས་པས། །ཡུལ་ལྷ་འཁོར་བཅས་དགྱེས་སྐོང་དམ་པར་གྱུར། །མ་དག་འཇིག་རྟེན་གཞན་ལས་ཁྱད་འཕགས་པ། །རྣམ་སྣང་གངས་ཆེན་ཐུགས་དབུས་པདྨོའི་སྟེང་། །འདྲེན་མཆོག་སྟོང་གིས་ཆོས་སྟོན་བསྐུལ་བ་པོ། །ཚངས་ཆེན་དབང་པོ་ཆོས་ཀྱི་བློ་གྲོས་ཀྱིས། །དབང་བསྒྱུར་སངས་རྒྱས་སྟོང་རྩའི་གདུལ་བྱའི་ཞིང་། །སྟོང་གསུམ་མི་མཇེད་བྱེ་བ་ཕྲག་བརྒྱ་ཡི། །དབུས་ཀྱི་འཇིག་རྟེན་ཁམས་འདིའི་ལྷོ་ཡི་ཆ། །འཛམ་གླིང་ལས་ཀྱི་ས་ཡི་བོད་ཆེན་ལྗོངས། །མདོ་ཁམས་ཟལ་མོ་སྒང་མཇུག་ཚ་བ་རོང་། །སྦས་གནས་དགའ་བ་ལྗོངས་འདབས་གཡི་རོང་ཉིན། །སྤ་ལུང་སྒ་རི་མཐོན་པོར་བརྟན་བཞུགས་པའི། །གཟའ་བཙན་ཀླུ་ལས་མཆེད་པའི་དྲེགས་པ་ཅན། །འབྱུང་པོ་ཕལ་པ་མ་ཡིན་སྤྲུལ་པའི་ལྷ། །སྤྱིར་སྣང་སྐུ་ལྷ་མཁའ་རི་གཉན་གྱི་རྗེ། །སྒོས་སུ་ཐང་ལྷ་རྡོ་རྗེ་འབར་བ་རྩལ། །ཡང་སྒོས་དགེ་བསྙེན་བསྙོན་ཁ་ནག་པོ་དངོས། །ར་མ་གྱོ་བཙན་ཕྲིན་ལས་དབང་ལྡན་རྩལ། །ཆ་ལུགས་མ་ངེས་འབྲོག་གནས་ཕལ་བའི་ཆས། །སྦ་ལྕགས་ཞགས་པས་གང་དམིག་སྡུད་ཅིང་འཆིང་། །ཅང་ཤེས་མོག་དཀར་བཅིབས་ནས་ཕྱོགས་ཀུན་ཉུལ། །ལྷ་ཁྱོད་འཁོར་བཅས་གནོད་སྡང་སེམས་བོར་ལ། །བྱམས་བརྩེའི་ཐུགས་ཀྱིས་བསང་མཆོད་མགྲོན་ལ་སྤྱོན། །བཞེད་དགུའི་ལོངས་སྤྱོད་འཛད་མེད་བསང་མཆོད་སྤྲིན། །དགྱེས་པ་ཆེན་པོས་བདག་གིར་བཞེས་སུ་གསོལ། །བཟང་ཤིང་དྲི་སྨན་བསྲེགས་པའི་བསང་དུད་ཀྱིས། །མི་གཙང་སྨེ་བཙོག་མནོལ་གྲིབ་དག་གྱུར་ཅིག །རྨོངས་འཁྲུལ་བྱིང་རྨུགས་འཐིབ་པ་སངས་གྱུར་ཅིག །བར་ཆད་རྐྱེན་གེགས་ནད་རིགས་ཞི་གྱུར་ཅིག །མཐུན་རྫས་འབྱོར་ཚོགས་བཞུས་པའི་དུད་སྤྲིན་ལས། །རྐང་འགྲོས་ནོར་རྫས་ཡོ་བྱད་ཟས་གོས་རྒྱན། །སྐྱེད་ཚལ་གནས་གཞི་ཁང་ཁྱིམ་བྲན་འཁོར་སོགས། །ཅི་འདོད་ལོངས་སྤྱོད་ཆར་ལྟར་འབབ་གྱུར་ཅིག །འདོད་སྲེད་སེར་སྣས་མ་སྦག་བཟང་ཤིང་དང་། །ཤེལ་ཚིག་ཟས་སྣ་ཕྱེ་མར་སྐྱེམས་ཕུད་སོགས། །དངོས་བཤམས་ཡིད་སྤྲུལ་སྔགས་རྒྱ་ཏིང་འཛིན་གྱིས། །འཛད་མེད་ནམ་མཁའ་མཛོད་དུ་བྱིན་རླབས་པའི། །ཕན་བདེའི་འབྱུང་གནས་བསང་མཆོད་རིན་ཆེན་གཏེར། །སྐུ་གསུམ་རྒྱལ་བ་སྲས་བཅས་སྦྱིན་སྟོབས་དང་། །ཆོས་ཉིད་འགྱུར་མེད་རྒྱུ་འབྲས་བསླུ་མེད་མཐུས། །སྨོན་བཞིན་ཐོབ་ནས་རྟག་ཏུ་ལོངས་སྤྱོད་ཤོག །བསོད་ནམས་ཚོགས་ཆེན་རྨད་བྱུང་འདི་ཡི་མཐུས། །ཡུལ་ལྷ་འཁོར་བཅས་མི་དང་ཐུགས་ཡིད་མཐུན། །ཚེ་བསོད་དཔལ་འབྱོར་དབང་ཐང་འཕེལ་ཞིང་རྒྱས། །འཕྲལ་ཡུན་ཕུན་ཚོགས་དཔལ་ལ་ལོངས་སྤྱོད་ཤོག །ཅེས་ཡུལ་ལྷའི་བསང་བསྡུས་དགོས་འབྱུང་ནོར་བུ་ཞེས་བྱ་བ་འདི་ཡང་རྡོ་རྗེ་ཚེ་དབང་ནས་ཡང་ཡང་བསྐུལ་ངོར། མགོ་སྤྲུལ་ཀུན་བཟང་གཞན་ཕན་ཉི་མས་སྤེལ་བ་མངྒ་ལཾ། དགེའོ།། གངས་སེང་བསྡུས།༄༅། གངས་སེང་བསང་བསྡུས་ནི། ཀྱཻ། ཡུལ་ལྷ་གཉན་པོ་རྡོ་རྗེ་གཡུ་ཁྲོམ་གྱི། །བཀའ་སྡོད་བྱ་ར་གངས་ཀྱི་སེང་གེ་ཞེས། །ལྕམ་དྲལ་འཁོར་ཚོགས་སྤྲུལ་པར་བཅས་ཀུན་བསང་། །རྣམ་བཞིའི་ཕྲིན་ལས་གང་བཅོལ་འགྲུབ་པར་མཛོད། །མགོ་སྤྲུལ་བས་སོ།། གདུགས་ཆེན་བསང་བསྡུས།༧ དཔའ་བོ་སྟག་འཕྲུ་ནི། ཀྱཻ། མཐུ་སྟོབས་ཐོགས་མེད་བདུད་སྲིན་དྲེགས་པ་ཅན། །གནས་གཏེར་སྲུང་མ་དཔའ་བོ་སྟག་འཕྲུ་ཞེས། །མཚོ་སྨན་སྤུན་བདུན་བདུད་བཙན་སྲིན་མོའི་ཚོགས། །བསང་ངོ་མཆོད་དོ་གང་བཅོལ་ལས་འགྲུབ་མཛོད།། མགོ་སྤྲུལ་པས་སོ།། དགྲ་བླའི་བསང་བསྡུས།༧ དགྲ་བླ་མི་མགོན་ནི། ཀྱཻ། ལྷུན་ཆགས་གཡུ་ལུང་སྙིང་པོར་རྟག་བརྟེན་པའི། །དགྲ་བླ་མི་མགོན་དཀར་པོ་གཏེར་མཛོད་བདག །བཀའ་སྡོད་མཆེད་གསུམ་དགྱེས་སྡེ་འཁོར་ཚོགས་བཅས། །བསང་ངོ་མཆོད་དོ་བསམ་དོན་ལྷུན་གྲུབ་མཛོད། །མགོ་སྤྲུལ་པས་སོ།། ནོར་བུ་ལྷ་རྩེའི་བསང་བསྡུས།༧ ནོར་བུ་ལྷ་རྩེ་ནི། ཧྲཱིཿ ནོར་བུའི་རི་ལ་བརྟེན་ནས་ཆོས་འཁོར་གླིང་། །སྐྱོང་མཛད་རྒྱལ་ཆེན་ནོར་བུ་ལྷ་རྩེ་ཞེས། །དབྱངས་རོལ་མཁན་སོགས་མཁས་པའི་འཁོར་ཚོགས་བཅས། །བསང་ངོ་མཆོད་དོ་ཆོས་སྲིད་དར་རྒྱས་མཛོད། །མགོ་སྤྲུལ་པས་སོ།། གཉན་པོ་གཡུ་རྩེའི་བསང་བསྡུས།༧ གཉན་པོ་གཡུ་རྩེ་ནི། ཀྱཻ། པདྨའི་དམ་འཛིན་བཙན་རྒོད་ཟབ་གཏེར་བདག །གཉན་པོ་གཡུ་རྩེ་ཡུམ་འཁོར་སྤྲུལ་པར་བཅས། །བསང་མཆོད་བཞེས་ལ་དགྲ་རྐུན་གཅན་གཟན་སོགས། །ཉེར་འཚེ་ཀུན་སོལ་ལས་བཞི་ལྷུན་གྲུབ་མཛོད།། མགོ་སྤྲུལ་པས་སོ།། མཚོ་ལུང་བསང་བསྡུས།༧ མཚོ་སྨན་རྒྱལ་མོ་ནི། ཀྱཻ། རྒྱལ་རིགས་ཀླུ་དབང་སྲས་མོ་ཡིད་འོང་མ། །པད་འབྱུང་ཡབ་སྲས་དམ་མནོས་ཐ་ཚིག་ཅན། །མཚོ་སྨན་རྒྱལ་མོ་ཀླུ་འཁོར་འབུམ་དང་བཅས། །བསང་ངོ་མཆོད་དོ་ཆོས་མཐུན་ལོངས་སྤྱོད་སྤེལ།། མགོ་སྤྲུལ་བས་སོ།། དགེ་འོ།། འཁྱིལ་ཆེན་སྤྱི་བསང་བསྡུས་པ།༄༅། འཁྱིལ་ཆེན་གཞི་བདག་རྣམས་ཀྱི་བསང་བསྡུས་ནི། ཀྱཻ། རྨོག་མཐོ་བྲག་དཀར་དུང་མཚོ་མཚོ་སྨན་རྒྱལ། །བཀྲ་ཤིས་ལྷ་རྩེ་ཟངས་ཁྲབ་སེང་གེ་རྫོང་། །ཤྭོ་རྡེལ་སྟག་ཞོན་སྨར་གྱི་མཛོ་ཞོན་སོགས། །འཁྱིལ་ཆེན་སྟོད་སྨད་ཉིན་སྲིབ་ལ་གནས་ཀུན། །གཡུ་ཤུག་ཕྱེ་མར་ཤིང་སྣའི་དུད་པས་བསང་། །མི་འདོད་ཉེར་འཚེ་ཞི་བའི་ཕྲིན་ལས་མཛོད།། ཅེས་པ་འདི་ཡང་མགོ་སྤྲུལ་པས་སོ།། ཆུ་དབར་མཚོ་ལུང་གི་བསང་བསྡུས།༄༅། ཆུ་དབར་མཚོ་ལུང་གཡུང་དྲུང་དུང་རྩེའི་བསང་མཆོད་འདོད་དོན་མྱུར་འགྲུབ་བཞུགས། མཚོ་ལུང་གཡུང་དྲུང་དུང་རྩེ་ལ་བསང་མཆོད་འབུལ་བར་འདོད་པས། བསང་རྫས་རྣམས་རཾ་ཡཾ་ཁཾ། ཨོཾ་ཨཱཿཧཱུྃ་གིས་བྱིན་གྱིས་བརླབས། ཀྱཻ། དོན་དམ་བློ་འདས་ཆོས་དབྱིངས་ཀློང་། །མཚན་འཛིན་སྤྲོས་པ་ལས་འདས་ཀྱང་། །ཀུན་རྫོབ་འཁྲུལ་བའི་སྣང་ཆ་ལས། །པྲ་ཕབ་བཞིན་དུ་ཅིར་ཡང་སྣང་། །གངས་ལྗོངས་མདོ་གཡི་གཉིས་ཀྱི་མཚམས། །རབ་དཀར་ཉལ་འགྲོ་ཟུང་གི་དབུས། །མཚོ་ལྡན་ལྷུན་ཆགས་རི་བོ་ལ། །རྟེན་མཛད་འབྲོག་གནས་གཉན་པོ་ནི། །གཡུང་དྲུང་དུང་རྩེ་གངས་རིའི་མདོག །སྐུ་ལ་དུང་གི་ཁྲབ་རྨོག་གསོལ། །ཕྱག་གཡས་རུ་མཚོན་དཀར་པོ་ཕྱར། །ཕྱག་གཡོན་ཀླུ་ཡི་ནོར་བུ་བསྣམས། །དུང་རྟ་དངུལ་གྱི་སྒ་སྲབ་ཅན། །བཅིབས་ཤིང་དཔའ་བོའི་ཆས་ཀྱིས་བརྗིད། །རྒྱལ་རིགས་ཀླུ་ཡི་སྲས་མོ་གསུམ། །མཛེས་སྡུག་ངོམས་ཤིང་མདུན་ན་འགྲོ། །སྲས་མཆོག་སྒྲོ་བྲག་ལྷ་གཉན་ནི། །རལ་གྲི་འཕྱར་ཞིང་གཡས་ན་འགྱིང་། །བཀའ་ཉན་མཆེ་བའི་བདུད་སྲིན་ནི། །ཨམ་གཙིགས་བསྡམས་ཤིང་གཡོན་ན་རྔམས། །ལས་མཁན་བཙན་རྒོད་དམར་ནག་ནི། །མདའ་གཞུ་འགེངས་ཤིང་ཕྱི་ནས་འབྲང་། །ཁྱེད་རྣམས་རང་རང་འཁོར་དང་བཅས། །རྫུ་འཕྲུལ་སྟོབས་ཀྱིས་འདིར་བྱོན་ལ། །རྨད་བྱུང་འདོད་དགུ་འབྱུང་བའི་གནས། །བསང་མཆོད་ཡེ་ཤེས་བདུད་རྩིའི་སྤྲིན། །དགྱེས་ཤིང་ཚིམ་པར་བཞེས་མཛོད་ལ། །རྣམ་བཞིའི་ཕྲིན་ལས་ཐོགས་མེད་སྒྲུབས། །བསྟན་དང་འགྲོ་བའི་ཕུན་ཚོགས་སྤེལ། །མི་མཐུན་དུས་ཀྱི་རྒུད་པ་སོལ། །རྣལ་འབྱོར་ཆོས་སྲིད་འདོད་པའི་དོན། །མ་ལུས་ཡིད་བཞིན་འགྲུབ་པར་མཛོད།། ཅེས་ཆུ་དབར་མཚོ་ལུང་གཡུང་དྲུང་དུང་རྩེའི་བསང་མཆོད་འདོད་དོན་མྱུར་འགྲུབ་ཅེས་བྱ་བ་འདི་ཡང་སྔགས་མིང་པ་གར་དབང་འཇིགས་མེད་རྣམ་རྒྱལ་ལམ་རོལ་བའི་རྡོ་རྗེ་ཞེས་བྱ་བའི་བློ་མཚོ་ལས་བྱུང་བའོ།། གྱུ་ཁུག་ཆུ་དཀར་གྱི་བསང་།༄༅། ཡུལ་ལྷའི་བསང་མཆོད་བཀྲ་ཤིས་ཆར་འབེབས་བཞུགས། ཀྱཻ། མདོ་སྨད་རྒྱལ་མོ་རོང་གི་སྟོད། །བདུད་རྩིའི་འོ་ཆབ་ཟུང་འབྲེལ་དབུས། །འཁྱིལ་བ་མཚོ་ལ་མངའ་མཛད་ཅིང་། །སྲ་བ་རྫ་བྲག་ལ་བརྟེན་པའི། །གཉན་སྲས་གཡུང་དྲུང་ལྷ་རྩེ་ཞེས། །མི་དཀར་རྟ་དཀར་དཔའ་ཆས་ཅན། །དར་དཀར་རུ་མཚོན་ནོར་བུ་བསྣམས། །དཀར་ཕྱོགས་སྐྱོང་བའི་འཁོར་དང་བཅས། །འདིར་སྤྱོན་བསང་གི་མཆོད་པ་བཞེས། །ལྷ་གཉན་རྡོ་རྗེ་ཞལ་དཀར་དང་། །རྗེས་རིགས་ཀླུ་མོ་དུང་མཚོ་དང་། །འབྲི་བོམ་ནས་ཏེའུ་ཕྱུག་མོ་སོགས། །ཡུལ་འདིར་གཉུག་མར་གནས་པ་རྣམས། །འཁོར་བཅས་འདིར་བྱོན་བསང་མཆོད་བཞེས། །ཐམས་ཅད་མཉེས་ཤིང་ཚིམ་གྱུར་ནས། །བདག་ཅག་ཡོན་མཆོད་འཁོར་བཅས་ཀྱི། །ནད་གདོན་འཐབ་འཛིང་རྩོད་པ་སོལ། །དགྲ་རྐུན་གཅན་གཟན་གནོད་པ་ཟློག །བེའུ་ལུག་རྟ་ཕྱུག་འཕེལ་བར་མཛོད། །ཅི་བསམ་ཡིད་བཞིན་འགྲུབ་པར་མཛོད།། ཅེས་པའང་མགོ་སྤྲུལ་བས་བྲིས་པ་དགེ་ལེགས་འཕེལ།། སྒེག་གི་གནས་སྲུང་ཀླུ་རྒྱལ་ཟླ་སྐྱོང་གི་བསང་མཆོད།༄༅། ཡིག་དྲུག་གནས་ཀྱི་སྲུང་མ་ཀླུ་རྒྱལ་དྲག་པོ་ཟླ་སྐྱོང་གི་བསང་མཆོད་ཡིད་བཞིན་ཆར་འབེབས་བཞུགས། རིན་པོ་ཆེའི་སྣོད་དུ་བཤོས་ཟླུམ་དཀར་པོ་རྒྱབ་ཡོལ་སྦྲུལ་མགོ་བདུན་གྱི་གདེངས་ཀ་ཅན། དཀར་མངར་ཀླུ་ནོར་ཀླུ་སྨན་དར་སྔོན་ཕུད་སྐྱེམས་སོགས་མཆོད་རྫས་གྱ་ནོམ་པ་གཙང་བར་འདུ་བྱས་ལ། རྣལ་འབྱོར་བས་བྱང་ཆུབ་ཀྱི་སེམས་དང་ལྡན་པའི་ངང་བསང་རྫས་རཾ་ཡཾ་ཁཾ་གིས་བསྲེག་གཏོར་བཀྲུས། ཨོཾ་ཨཱ༔ཧཱུྃ་གིས་སྦྱངས་སྤེལ་བསྒྱུར་ལ། ཀྱཻ། ཤིང་གཅིག་སྡོང་པོ་གསེར་སླག་ཅན་གྱི་དྲུང་། །ཆུ་མིག་དྲག་པོ་གནམ་དུ་འཕྱུར་བའི་ནང་། །ཡིད་བཞིན་རིན་ཆེན་ལས་གྲུབ་གཞལ་ཡས་ཁང་། །པད་ཟླ་མ་ཧཱ་གསེར་གྱི་རུས་སྦལ་སྟེང་། །སྣང་སྲིད་ལྷ་སྲིན་སྡེ་བརྒྱད་ཀུན་གྱི་གཙོ། །གདུག་པ་ཀླུ་རྒྱལ་དྲག་པོ་ཟླ་བ་སྐྱོང་། །སྐུ་མདོག་དཀར་ལ་སྔོ་བསང་འཇའ་འོད་འཕྲོ། །སྦྲུལ་མགོ་འབར་བ་བདུན་གྱི་གདེངས་ཀ་མཛེས། །ཕྱག་གཉིས་ཐལ་སྦྱར་ཡིད་བཞིན་ནོར་བུ་འཛིན། །དར་དང་རིན་ཆེན་ནོར་བུའི་རྒྱན་ཆས་སྤུད། །སྐུ་སྨད་ལྟོ་འཕྱེ་གདུག་པ་སྦྲུལ་དུ་འཁྱིལ། །རྒྱལ་རིགས་རྗེ་རིགས་དམངས་རིགས་གདོལ་བ་སོགས། །ས་བདག་ཀླུ་གཉན་བྱེ་བ་དུང་ཕྱུར་བཅས། །སྣ་ཚོགས་ཤིང་སྣ་བསྲེགས་པའི་དུད་སྤྲིན་དང་། །གཏོར་མ་དཀར་མངར་འོ་ཞོ་གསེར་གཡུའི་སྐྱེམས། །མེ་ཏོག་ནེའུ་སིང་ལྗོན་པ་སྐྱེད་མོས་ཚལ། །ཚ་བའི་གདུང་བསིལ་གྲང་བའི་ཆབ་གཏོར་སོགས། །གང་ཡང་མ་ཚང་མེད་པའི་མཐུན་རྫས་ཀྱིས། །བསང་ངོ་མཆོད་དོ་བསྟོད་དོ་མངའ་གསོལ་ལོ། །སྔོན་ཚེ་རྒྱལ་བའི་དབང་པོ་པདྨ་འབྱུང་། །བར་དུ་པ་གོར་བཻ་རོ་ཡབ་སྲས་དང་། །ཐ་མ་བསམ་གཏན་ཡེ་ཤེས་གླིང་པ་སོགས། །རིག་འཛིན་རྩ་བརྒྱུད་བླ་མའི་ཚོགས་རྣམས་ཀྱིས། །བཀའ་དང་དམ་ཚིག་བསྒྲགས་པ་དྲན་མཛོད་ལ། །སངས་རྒྱས་བསྟན་དང་ཡིག་དྲུག་གནས་རི་སྲུངས། །ཁྱད་པར་བདག་ཅག་དཔོན་སློབ་ཡོན་མཆོད་ལ། །གཉན་ལྷོག་མཛེ་རིགས་ནད་རྣམས་ཞི་བ་དང་། །ཆར་ཆུ་དུས་འབབ་ལོ་ཕྱུགས་ཕུན་སུམ་ཚོགས། །ཀླུ་ཡི་ཕྱྭ་གཡང་དཔལ་གྱི་དངོས་གྲུབ་སྩོལ། །བདག་དང་བསྟན་ལ་སྡང་བའི་དགྲ་བོ་ལ། མཛེ་ནད་ལྷོག་རྒོད་འབེབ་པས་དུས་མཐའ་སྟུངས། །གང་བཅོལ་ལས་རྣམས་འགྲུབ་པར་མཛད་དུ་གསོལ།། ཅེས་ཡིག་དྲུག་གནས་སྲུང་ཀླུ་རྒྱལ་དྲག་པོ་ཟླ་སྐྱོང་གི་བསང་མཆོད་ཡིད་བཞིན་ཆར་འབེབས་ཅེས་བྱ་བ་འདི་ཡང་བསམ་གཏན་ཡེ་ཤེས་གླིང་པའི་གསུང་གཞིར་བྱས་ནས་མགོ་སྤྲུལ་རྒྱ་རས་བྲིས་པ་དགེ་ལེགས་འཕེལ། གཡུ་རོང་གླ་ཡུམ་གནས་བདག་གི་བསང་མཆོད།སྐུ་གསུམ་དགོངས་མཛོད་ཀྱི་ཆ་རྐྱེན་གཡི་སྨད་གནས་བདག་གི་བསང་མཆོད་ཕྲིན་ལས་ཀུན་འབྱུང་བཞུགས། སྐུ་གསུམ་ཡོངས་འདུས་པད་འབྱུང་ལ། །འདུ་འབྲལ་མེད་པར་ཕྱག་བགྱིས་ནས། །པདྨའི་དམ་འཛིན་འགོ་བའི་ལྷ། །མཆོད་ཐབས་བསང་གི་ལས་ཚོགས་སྤྲོ། །མཆོད་སྟེགས་གཙང་མར་འབྲུ་དཀར་གྱི། །ཚོམ་བུ་བཀོད་སྟེགས་སྣོད་གཙང་ལ། །འབྲུ་དཀར་ཕྱེ་མས་གདན་གྲུ་བཞི། །བང་རིམ་གསུམ་བཀོད་དེ་ཡི་སྟེང་། །ཆོས་སྲུང་སྤྱི་ཡི་དཔལ་གཏོར་རམ། །དཀར་གཏོར་འདབ་ལྡན་རྒྱན་སྤྲོས་འགོད། །དེ་མདུན་སྲས་བཤོས་དམར་གཏོར་གསུམ། །གཡས་སུ་ཡུམ་གཏོར་ཀླུ་བཤོས་གསུམ། །རྒྱབ་ཏུ་བཀའ་བློན་བཤོས་དཀར་གསུམ། །གཡོན་དུ་ལས་བྱེད་བཤོས་ནག་གསུམ། །དེ་མཐར་གཡག་ལུག་ར་གསུམ་སོགས། །ལྷ་ཀླུ་དགྱེས་པའི་མཐུན་རྫས་བཀྲམ། །འབྲུ་ཡི་ཕྱེ་མར་ཕུད་སྐྱེམས་བསགས། །བཟང་ཤིང་སྣ་ཚོགས་དུད་སྤྲིན་གཏོང་། །དར་ཕྱར་དུང་འབུད་རྔ་གཤང་བསྒྲགས། །སྙན་པའི་དབྱངས་ཀྱིས་འདི་ལྟར་བརྗོད།། ཨེ་མ་ཧོ། རང་སྣང་དག་པ་རབ་འབྱམས་དབྱིངས་བཞུགས་ལྷ། །རང་དང་འབྲལ་མེད་ཤེས་པས་སྐྱབས་སུ་མཆི། །རང་ངོ་མ་ཤེས་འཁྲུལ་བའི་སེམས་ཅན་རྣམས། །རང་རིག་སྐུ་གསུམ་རྟོགས་པར་སེམས་བསྐྱེད་དོ།། ཨཱཿ ཀུན་བརྟགས་གཞན་དབང་འཁྲུལ་ཞེན་ཀ་ནས་དག །ཡེ་གདངས་རིག་པ་བདེ་གཤེགས་སྙིང་པོའི་ལྷ། །སྐུ་གསུམ་ཡོངས་འདུས་དོན་གྱི་པདྨ་འབྱུང་། །ཡེ་ནས་མ་བསྐྱེད་ཡོངས་གྲུབ་དྲན་རྫོགས་གསལ། །ཐུགས་ཀའི་འོད་ཀྱིས་སྲིད་ཞིའི་དྭངས་བཅུད་བསྡུས། །བསང་རྫས་ཟག་མེད་ཡེ་ཤེས་བདུད་རྩིའི་སྤྲིན། །དཔག་ཡས་ཀུན་བཟང་རྣམ་འཕྲུལ་རྗེས་འགྲོ་བ། །གནས་སྲུང་འཁོར་བཅས་དགྱེས་སྐོང་དམ་པར་གྱུར། །ཨོཾ་ཨཱཿཧཱུྃ་ན་མཿསརྦ་ཏ་ཐཱ་ག་ཏ་བྷྱོཿ༴སོགས་ནས། ཁཾ་སྭཱ་ཧཱ། ལན་གསུམ། ཀྱཻ། གླིང་གི་མཆོག་གྱུར་འཛམ་བུའི་གླིང་། །ཡུལ་བཟང་གངས་ཅན་བོད་ཀྱི་ལྗོངས། །ཤར་ཕྱོགས་མདོ་ཁམས་སྨད་ཀྱི་ཆར། །རྩུབ་འགྱུར་རྒྱལ་མོ་ཚ་བ་རོང་། །གཡི་ལུང་རྟེན་ཕུར་འཕགས་པའི་གནས། །གྲུ་འཛིན་བདེ་ཆེན་ཡང་རྫོངས་ལ། །རྟེན་བཅས་ཡུལ་ལྷ་གཉན་པོ་ནི། །སྐུ་བླ་དངུལ་རྫི་གཡུ་མཚོ་ཞེས། །གནས་གཏེར་བསྟན་པའི་བསྲུང་མ་མཆོག །དཔའ་བོ་རྡོ་རྗེ་དབང་བསྡུད་རྩལ། །བཙུན་མོ་སྲས་བློན་ལས་བྱེད་འབངས། །འཁོར་ཚོགས་སྤྲུལ་པ་ཡང་སྤྲུལ་བཅས། །སྔོན་ཚེ་རྡོ་རྗེ་གྲོ་ལོད་དང་། །སྟོབས་ལྡན་དངོས་བྱོན་བཻ་རོའི་བཀའ། །བར་དུ་ལྷ་ལུང་དཔལ་རྡོར་དང་། །བཀའ་བརྒྱུད་ཤིང་རྟ་ཀརྨ་པ། །དེ་རྗེས་ཉི་ཟླ་སྙིང་པོ་དང་། །འགྲོ་མགོན་ལུང་རིག་གླིང་པ་སོགས། །མཁས་གྲུབ་རིག་པ་འཛིན་རྣམས་ཀྱི། །བཀའ་དམ་རྡོ་རྗེའི་ཡལ་གམ་བཞིན། །མ་ཐོགས་ཡིད་མྱུར་རྫུ་འཕྲུལ་གྱིས། །དེ་རིང་བསང་གི་མགྲོན་ལ་བྱོན། །རིན་ཆེན་པད་ཉི་དར་ཟབ་སོགས། །རང་རང་དགྱེས་པའི་གདན་ལ་བཞུགས། །དམ་ཚིག་བསྲེ་ཞིང་གདུང་བས་འདུད། །རང་རང་མཉེས་པའི་དམ་རྫས་འབུལ། །བྱམས་བརྩེའི་ཐུགས་ཀྱིས་དགོངས་ཤིང་བཞེས། །རེ་བ་སྐོངས་ལ་སྨོན་པ་སྒྲུབས། །ཀྱཻ། ཆོས་ཉིད་འགྱུར་མེད་སྤྲོས་ཀུན་ཉེར་ཞི་ཡང་། །ཆོས་ཅན་རྟེན་འབྲེལ་སྣང་སྲིད་སྒྱུ་མའི་གར། །འཁོར་འདས་མཉམ་བརྡལ་ཀུན་བྱེད་རྒྱལ་པོའི་མདངས། །གཅིག་ཏུ་མ་ངེས་ལས་བཞིའི་སྤྲུལ་བསྒྱུར་ངོམས། །རང་རྒྱུད་འབྱུང་ལུས་ཞོ་ཤའི་རྟེན་མིན་ཡང་། །ཡིད་ལུས་ཅིས་བསྐྲུན་རིགས་དེའི་མཐུན་སྣང་གཟུགས། །མཐིང་གསལ་ཁྲོ་འཛུམ་རལ་གྲི་གློག་ཞགས་བསྣམས། །གདེངས་རལ་སྦྲུལ་ཆུན་ཆུ་དར་ནོར་བུ་སོགས། །ཀླུ་བཙན་ཆས་རྫོགས་བཻཌཱུར་གོ་ཆས་བརྗིད། །གཡུ་འབྲུག་བཅིབས་ནས་སྡེ་བརྒྱད་ལས་ལ་འགྱེད། །ལན་རེར་དུང་མདོག་དངུལ་གྱི་ཁྲབ་རྨོག་གསོལ། །བ་དན་མེ་ལོང་བསྣམས་ནས་དུང་རྟ་བཅིབས། །རེས་འགའ་གསེར་མདོག་གསེར་གཡུའི་ཁྲབ་རྨོག་ཅན། །གཏེར་སྒྲོམ་ནོར་བུ་བསྣམས་ནས་དུང་སེང་རོལ། །ལན་འགར་དཀར་དམར་བསེ་ཡི་ཁྲབ་རྨོག་གསོལ། །མདུང་དམར་ཞགས་བསྣམས་བཙན་རྟ་ཆས་ལྡན་ཞོན། །སྐུ་བླ་དངུལ་རྫི་གཡུ་མཚོ་སྲིད་པའི་ལྷ། །གནས་སྲུང་དཔའ་བོ་རྡོ་རྗེ་དབང་བསྡུད་རྩལ། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ནས། །ཡངས་པའི་རྒྱལ་ཁམས་སྤྱི་དང་ལྗོངས་འདི་རུ། །ཀུན་མཁྱེན་རྒྱལ་བའི་བསྟན་པ་འཕེལ་རྒྱས་བརྟན། །ཆོས་ལྡན་རྒྱལ་པོའི་ཆབ་སྲིད་མངའ་ཐང་འཕེལ། །གཡི་ལུང་རྒྱལ་འབངས་ཆོས་དང་མཐུན་པར་མཛོད། །བདེ་སྟེར་ཡུམ་མཆོག་གསེར་གཡུ་དུང་མཚོའི་བདག །སྣ་ཚོགས་གོས་རྒྱན་གདེངས་མཇུག་གཡོ་བས་མཛེས། །རིན་ཆེན་གཏེར་བུམ་འཕྲུལ་གྱི་མེ་ལོང་བསྣམས། །ཉི་ཟླས་མི་མཚོན་རང་མདོག་འོད་སྣང་ཅན། །ནོར་འཛིན་ནོར་བུའི་འོད་འཆང་ནོར་བུ་སྒྲོན། །རྒྱལ་རིགས་ཀླུ་ཡི་སྲས་མོ་མཚོ་སྨན་གསུམ། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ནས། །སད་སེར་བཙའ་ཐན་ལོ་ནད་ཁོལ་སྟོང་དང་། །འབུ་སྲིན་བྱ་སྤྲེལ་རྐང་འགྲོས་གནོད་པ་སོལ། །མི་ཕྱུགས་འབྲུ་ནོར་རྩི་བཅུད་ལོ་འབྲས་རྒྱས། །ཕྱྭ་གཡང་ལོངས་སྤྱོད་དཔལ་འབྱོར་གོང་འཕེལ་མཛོད། །སྤྲིན་གྱི་ཤུགས་ལྡན་དུང་རྟ་གཡུ་རྔོག་སྟེང་། །སྲས་མཆོག་ཤེལ་རྩེ་ཟངས་རྩེ་དུང་རྩེ་གསུམ། །སྣ་ཚོགས་གོས་རྒྱན་དཔའ་བོའི་ཡ་ལད་ལྡན། །རང་མདོག་བ་དན་འཕྲུལ་གྱི་ཞགས་པ་བསྣམས། །གཟི་བརྗིད་དཔལ་འབར་སྣང་བྱེད་ཟིལ་འོག་གནོན། །གཅིག་ཏུ་མ་ངེས་རྫུ་འཕྲུལ་ཅིར་ཡང་སྟོན། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ནས། །ཁྱེད་རྣམས་བརྟེན་གསོལ་གནས་འདིར་འབྲེལ་ཀུན་གྱི། །ནད་ཡམས་གོད་རྐྱེན་བར་ཆད་འཇིགས་པ་སོལ། །བདེ་དགེའི་དཔལ་སྤྱོད་ཚོགས་རྫོགས་སྒྲིབ་དག་ནས། །མཐོ་རིས་ཐར་ལམ་བགྲོད་པའི་གྲོགས་ལྡན་མཛོད། །རབ་འཇིགས་གཏུམ་རྔམས་འབར་བ་མིག་སྨན་མདོག །ལྕགས་རལ་གསེབ་ནས་ཐོག་གློག་མེ་འོད་ཕྲོམ། །བེར་ནག་སག་ལྷྭམ་སྟག་རལ་གཟིག་ཤུབ་བརྗིད། །བདུད་མདའ་འགེངས་འཕེན་རྟ་ནག་རྟིང་དཀར་བཅིབས། །གཟུགས་དང་ཆོ་འཕྲུལ་མ་ངེས་སྣ་ཚོགས་སྟོན། །ལས་མཁན་འབར་བ་གཏུམ་པ་རྔམས་པ་གསུམ། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ནས། །ཟ་བྱེད་མཆེ་སྡེར་གནོད་སྡང་གདུག་པ་སོལ། །དགྲ་ཇག་ཆོམ་རྐུན་མིང་གི་ལྷག་མར་ཐོངས། །རྒྱལ་བསེན་དམ་སྲི་བདུད་བགེགས་འཚེ་བ་སྲུངས། །གཞིར་སྡོད་བསྲུང་མ་བྱེས་བགྲོད་ལམ་ལྷ་མཛོད། །བཀའ་བློན་མཆེད་གསུམ་གཏེར་བདག་མི་དབང་ཚུལ། །དཀར་འཛུམ་གཡང་སྡུད་བ་དན་གཏེར་བུམ་བསྣམས། །མི་དང་ལྷ་ཀླུའི་ནོར་བུས་ཐོད་དུ་བརྒྱན། །སྟག་གཡག་ཀླུ་རྟ་བཅིབས་ནས་ལས་བཞི་སྒྲུབས། །མི་གཉན་ཀུན་སྐྱོབས་ལྷ་ཕྱུག་ཀླུ་དར་ཞེས། །མཚན་དང་རྣམ་འགྱུར་སྣ་ཚོགས་སྤྲུལ་པར་བཅས། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ནས། །འབྱུང་བའི་བཅུད་གསོས་སྐྱེ་འགྲོའི་ཚེ་གཡང་སྤེལ། །ནད་མཚོན་མུ་གེ་དུས་སྐྱོན་རྒུད་པ་སོལ། །ཕྱུགས་ནོར་འབྲུ་འཕེལ་མི་རྣམས་བདེ་ཞིང་སྐྱིད། །བསམ་སྦྱོར་ཆོས་མཐུན་དགེ་ལ་འདུན་པར་མཛོད། །གཞན་ཡང་ཕྱོགས་མཚམས་ཁོར་ཡུག་ཉེ་བའི་ཆར། །འཁོར་དུ་གཏོགས་ཤིང་གཉུག་མར་གནས་པ་ཡི། །རང་མཐུན་ལས་དབང་སྡེ་བརྒྱད་ལྷ་མ་སྲིན། །ཞི་དང་ཁྲོ་ཚུལ་ཕྲ་མེན་གདོང་བརྙན་ཅན། །འདབ་ཆགས་སྡེར་ཆགས་རི་དྭགས་ཆུ་གནས་སོགས། །ཆ་ལུགས་སྤྲུལ་བསྒྱུར་གཟུགས་བརྙན་ཅི་མཆིས་ཀུན། །བསང་ངོ་མཆོད་དོ་བརྔན་ནོ་མངའ་གསོལ་ལོ། །སྐུ་གསུང་ཐུགས་ཀྱི་དགྱེས་པ་སྐོངས་གྱུར་ཅིག །ནོངས་པ་བཤགས་ཤིང་འཁོན་འགྲམ་འཁྲུགས་པ་བཅོས། །ཀོ་ལོང་རུ་ང་ཕྲག་ཏོག་མ་མཛད་པར། །རང་རང་ནུས་བསྟན་ཕྲིན་ལས་སྣ་ཚོགས་ཀྱིས། །མི་ཕྱུགས་བདེ་ཞིང་ལོ་ལེགས་འབྲུ་འཕེལ་མཛོད། །ཀྱཻ། གནས་གཏེར་བསྲུང་མ་ཡུལ་ལྷའི་དབང་པོ་ནི། །དངུལ་རྫི་གཡུ་མཚོ་རྡོ་རྗེ་དབང་བསྡུད་རྩལ། །བཙུན་མོ་སྲས་བློན་ལས་བྱེད་འཁོར་བཅས་ལ། །གསས་མཁར་ལ་བཙས་དར་ཚོན་རླུང་རྟ་འབུལ། །མཐུན་རྫས་ལོངས་སྤྱོད་མཉེས་པའི་ཡོ་བྱད་འབུལ། །ཁྲབ་རྨོག་ཕུབ་སོགས་སྲ་བའི་གོ་ཆ་འབུལ། །མདའ་མདུང་གྲི་སོགས་རྣོ་བའི་མཚོན་ཆ་འབུལ། །རྔ་གཤང་དུང་སོགས་སྙན་པའི་རོལ་མོ་འབུལ། །གཡག་ལུག་ར་སོགས་གཡང་ནོར་སྣ་ཚོགས་འབུལ། །བྱ་གཅན་རི་དྭགས་ཆུ་གནས་སྣ་ཚོགས་འབུལ། །གཞན་ཡང་མཐུན་རྫས་ལོངས་སྤྱོད་རྨད་བྱུང་རྣམས། །ཏིང་འཛིན་སྔགས་དང་མོས་པའི་སྟོབས་ཀྱིས་འབུལ། །འཁོར་བཅས་ཐུགས་དམ་དགྱེས་པར་བསྐང་གྱུར་ནས། །ལུས་སྲོག་མཁར་བརྩིགས་བླ་ཚེའི་ཀ་བ་ཚུགས། །དབང་ཐང་བང་མཛོད་ཕྱྭ་གཡང་བཅུད་ཀྱིས་ཁོངས། །བསོད་ནམས་ཏོག་ཚུགས་རླུང་རྟའི་བ་དན་ཕྱོར། །ཉམས་རྟོགས་གདུགས་ཕུབ་བཤད་སྒྲུབ་རྒྱལ་མཚན་སྒྲེངས། །སྙན་པའི་རྔ་རྡུངས་གྲགས་པའི་དུང་བུས་ལ། །ཚོགས་གཉིས་དབང་གི་རྒྱལ་པོའི་དཔལ་ཡོན་གྱིས། །བསམ་དོན་ཡིད་བཞིན་འགྲུབ་པའི་ཕྲིན་ལས་མཛོད། །ནད་གདོན་འཇིགས་བརྒྱད་ཞི་བའི་དངོས་གྲུབ་སྩོལ། །ཚེ་དཔལ་འབྱོར་དྲུག་རྒྱས་པའི་དངོས་གྲུབ་སྩོལ། །མོས་བཞི་དབང་དུ་འདུ་བའི་དངོས་གྲུབ་སྩོལ། །ལོག་འདྲེན་ཚར་གཅོད་དྲག་པོའི་དངོས་གྲུབ་སྩོལ། །ལས་སྨོན་དུས་བབས་ཐུན་མོང་དངོས་གྲུབ་སྩོལ། །སྦྱངས་བགྲོད་མངོན་གྱུར་མཆོག་གི་དངོས་གྲུབ་སྩོལ། །ཆོས་དང་སྲིད་ཀྱི་ཕུན་སུམ་ཚོགས་པའི་དཔལ། །མ་ལུས་དབྱར་གྱི་མཚོ་ལྟར་རྒྱས་པར་མཛོད།། ཅེས་བརྗོད་བཤོས་དང་སྐྱེམས་ཕུད་སོགས། །བསང་ནང་ཕུལ་ལ་གཤེགས་གསོལ་དང་། །བསྔོ་སྨོན་བཀྲ་ཤིས་སྤྱི་ལྟར་བྱ། །དེ་ཡིས་ལྷ་མིའི་དཔལ་ཡོན་འཕེལ།། གུ་ཧྱཿ ཞེས་པའང་ཆོས་གྲོགས་དམ་པ་ཀརྨ་བསྟན་འཕེལ་ནས་ཡང་ཡང་ནན་བསྐུལ་མི་ལྡོག་ཙམ་དུ། སྔགས་བཙུན་གར་དབང་འཇིགས་མེད་རྣམ་རྒྱལ་བཟང་པོས་བྲིས་པ་དགེའོ།། དགེའོ།། དགེའོ།། དངུལ་རྫིའི་བསང་བསྡུས།༄༅། ཡུལ་སྐྱོང་དངུལ་རྫིའི་རྒྱུན་བསང་འདོད་རྒུ་མྱུར་འགྲུབ་ཅེས་བྱ་བ་བཞུགས་སོ།། ཨོཾ་སྭ་སྟི། འདིར་ཡུལ་སའི་དབང་པོ་ལ་བསང་མཆོད་རྒྱུན་ཁྱེར་བྱེད་པར་འདོད་པས། བཟང་ཤིང་སྣ་ཚོགས་ཀྱི་དུད་སྤྲིན་གཏོང་ཞིང་། བསང་རྫས་འབྱོར་དཔག་བསྲེག་ལ། ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ་ནས་འདི་སྐད་དོ།། ཀྱཻ། མདོ་ཁམས་རྩུབ་འགྱུར་དབྱི་རོང་འཛིན་མའི་གཞི། །སྐྱོང་མཛད་བཀའ་གསང་གཉན་གྱི་བསྲུང་མ་ཆེ། །སྦས་པའི་གནས་སྲུང་ཆོས་ནོར་གཏེར་གྱི་བདག །ལྷ་གཉན་དངུལ་རྫི་གཡུ་མཚོ་ཡབ་ཡུམ་སྲས། །བཀའ་ཉན་དགྱེས་སྡེ་སྡོང་ཟླ་སྤྲུལ་འཁོར་སྤྱི། །ཁྱད་པར་སྐུ་ལྷ་དུང་རྩེ་བ་སྦལ་ཁྱུང་། །མཚོ་སྨན་སྤུན་གསུམ་ཉ་དཀར་རྙི་བོ་མཆེད། །གསང་སྔགས་བསྟན་སྐྱོང་ལོ་མཆོག་དགའ་ལྡན་དང་། །ར་ཁང་ཁྲབ་གྱོན་རྨོག་རི་རྫ་ཁྲ་སོགས། །ཡུལ་སྐྱོང་དངུལ་རྫིའི་ཉེ་ཆར་བརྟེན་ནོ་ཅོག །མ་ལུས་རང་རང་སོ་སོའི་འཁོར་ཚོགས་བཅས། །ཐོགས་མེད་རྫུ་འཕྲུལ་ཤུགས་ཀྱིས་འདིར་བྱོན་ལ། །བསང་དུད་འདོད་འབྱུང་ཟག་མེད་བདུད་རྩིའི་སྤྲིན། །དར་ཚོན་རླུང་རྟ་སྤྱན་གཟིགས་ཀ་ཆ་དཀོར། །ལོངས་སྤྱོད་འཛད་མེད་ནམ་མཁའི་མཛོད་ཆེན་པོ། །དགྱེས་ཤིང་བརྩེ་བའི་ཐུགས་ཀྱིས་ཡོངས་བཞེས་ནས། །བདག་དང་བསྲུང་བྱར་གྱུར་པའི་ཡུལ་ལྗོངས་འདིར། །མི་མཐུན་གནོད་པའི་ཕྱོགས་ཀུན་ཞི་བ་དང་། །ཚེ་དཔལ་ཆོས་སྲིད་འབྲུ་ནོར་གོང་འཕེལ་ཞིང་། །ཕུན་ཚོགས་འདོད་དགུ་སྤྲིན་བཞིན་འདུ་བར་མཛོད། །ཁྱད་པར་ཕུང་བྱེད་མཐའ་མི་ཁ་དར་ནས། །བོད་ཁམས་ལྷ་མིའི་བཅུད་གཡང་སྡུད་པའི་ཚེ། །དེ་རྣམས་མགོ་སྐོར་མིག་སྒྲིབ་འདུན་གྲོས་ཤིག །མིག་འཕྲུལ་སྣ་ཚོགས་སྟོན་ལ་ཟློག་པར་མཛོད། །གསར་བྱུང་རྒྱལ་བསེན་དམ་སྲི་འབྱུང་པོ་ཡིས། །སྐྱེ་འགྲོའི་རྒྱུད་བརླམ་བར་གཅོད་རྩོམ་བྱེད་ན། །སྣ་ཚོགས་ཐབས་ཚུལ་ཕྲིན་ལས་དཔག་མེད་ཀྱིས། །ལྷག་མེད་མཁའ་ལ་སྤྲིན་བཞིན་དེང་བར་མཛོད། །ཀླ་ཀློ་ལ་སོགས་མཐའ་བཞིའི་དམག་དཔུང་གིས། །བསམ་སྤྱོད་ལོག་པས་བསྟན་འགྲོར་གནོད་བྱེད་དུས། །མངོན་སྤྱོད་ཕྲིན་ལས་རྣམ་པ་བཅུ་གཉིས་ཀྱིས། །མིང་ལྷག་མེད་པར་བརླག་པའི་ཕྲིན་ལས་མཛོད། །མདོར་ན་སྔོན་ཚེ་པདྨ་ཐོད་ཕྲེང་དང་། །ལྷ་ལུང་དཔལ་རྡོར་ལུང་རིག་གླིང་པ་སོགས། །རིག་འཛིན་ཡབ་སྲས་བརྒྱུད་པར་བཅས་རྣམས་ཀྱི། །བཀའ་དང་དམ་ཚིག་གཉན་པོ་རྗེས་དགོངས་ལ། །རྣལ་འབྱོར་འདོད་པའི་དོན་དང་བཅོལ་པའི་ལས། །མ་ལུས་གེགས་མེད་ལྷུན་གྱིས་འགྲུབ་པར་མཛོད།། ཅེས་ཡུལ་སྐྱོང་དངུལ་རྫིའི་རྒྱུན་བསང་འདོད་རྒུ་མྱུར་འགྲུབ་འདི་ཡང་ཆོས་གྲོགས་རྡོ་རྗེ་དབང་ཕྱུག་གི་ངོར། མགོ་སྤྲུལ་གར་དབང་འཇིགས་མེད་རྣམ་རྒྱལ་ལམ་ཆོས་དབྱིངས་མིང་གིས་ཤར་མར་བྲིས་པ་དགེའོ། མངའ་རིའི་ཙན་དན་སྡོང་པོའི་བསང་མཆོད།༄༅། གཡི་རོང་ཡུལ་ལྷ་མངའ་རིའི་ཙན་དན་སྡོང་པོའི་བསང་མཆོད་འདོད་དོན་ཀུན་འབྱུང་བཞུགས། །དུས་བཟང་ཡར་ངོ་གཟའ་སྐར་དགེ་བའི་ཆར། །སྟེགས་མཐོན་གྲུ་བཞི་བདུད་རྩི་ཤིང་ལྔ་སོགས། །བཟང་ཤིང་གྱ་ནོམ་སྣ་ཚོགས་ཟས་སྐོམ་ཕུད། །དཀར་གསུམ་མངར་གསུམ་བསང་རྫས་བརྒྱ་རྩ་བསྲེག །རིན་ཆེན་སྣོད་དུ་དཀར་གཏོར་གླིང་བཞིའི་མཐར། །བཤོས་ཕྲན་བརྒྱད་དང་གཡག་ལུག་ར་གསུམ་བསྐོར། །དཀར་རྒྱན་དར་ཚོན་རྫས་སྣས་བརྒྱན་པ་དང་། །གསེར་གཡུའི་སྐྱེམས་ཕུད་ལ་སོགས་གང་འབྱོར་བཤམས། །སྐྱབས་གནས་ཀུན་འདུས་པད་འབྱུང་ལ། །སྒོ་གསུམ་གུས་པས་སྐྱབས་སུ་མཆི། །འཁོར་བར་འཁྱམས་པའི་ཕ་མ་ཀུན། །སངས་རྒྱས་ཐོབ་པར་སེམས་བསྐྱེད་དོ། །བདག་ཉིད་པད་འབྱུང་སྐུར་གསལ་བའི། །གསང་གསུམ་ཡི་གེའི་འོད་ཟེར་གྱིས། །བསང་རྫས་མཆོད་པའི་ཡོ་བྱད་རྣམས། །དཔག་མེད་ནམ་མཁའི་མཛོད་དུ་བསྒྱུར། །ན་མཿསརྦ་ཏ་ཐཱ་ག་ཏ༴སོགས། ཁཾ་སྭཱ་ཧཱ། ལན་གསུམ། ཀྱཻ། ཡུལ་ནི་གངས་ཅན་བོད་ཀྱི་སྟོད། །མངའ་རིའི་སྐུ་གསུང་ཐུགས་ཀྱི་གནས། །གསུང་གི་གནས་ཀྱི་སྲུང་མ་མཆོག །སློབ་དཔོན་བཻ་རོ་ཙ་ན་ཡིས། །རྩུབ་འགྱུར་རྒྱལ་མོ་ཚ་བ་རོང་། །གནས་ཆེན་ཉེར་ལྔའི་ནང་ཚན་ལས། །གཡི་རོང་ཕྱོགས་ཀྱི་གནས་ལྔ་དང་། །ཁྱད་པར་བྲག་དཀར་སྒོ་སྲུང་བསྐོས། །བྷོ་ཊའི་ཙན་དན་རྐང་འཐུང་གིས། །ལེགས་མཛེས་གདག་རིར་རྟེན་བཅས་པ། །མངའ་རིའི་ཙན་དན་སྡོང་པོ་ཞེས། །གནས་སྲུང་རྡོ་རྗེ་དབང་སྡུད་རྩལ།། ཞེས་པའི་ཚབ་ཏུ། ལྷ་མགོན་རྡོ་རྗེ་འོད་རབ་འབར། འདིར་དེ་ཡི་རྗེས་སུ་བདག་གི་ཉམས་སྣང་ལ་ཡུལ་ལྷ་རང་ནས་ཁྱོད་ཀྱིས་བསང་མཆོད་བྲིས་པ་བཀའ་དྲིན་ཆེ་ཡང་། མིང་ནོར་འདུག གནས་ཚང་གཅིག་ལ་ཐོན་ཚད་མིང་གཅིག་ཡིན་མི་ཁྲིམས་ཞེས་ཁ་མཚར་སྨྲ་ཞིང་དགའ་དགའ་ལྟར་འདུག བདག་གིས་ཁྱེད་ཀྱི་ཅི་ཡིན་དྲིས་པ་ལ། ས་ཡར་སྟོད་ཀྱི་མིས་བདག་ལ་མངའ་རིའི་ལྷ་མགོན་དཀར་པོ་ཟེར། གསང་མིང་། བཛྲ་པྲ་ཝ་ཛྭ་ལ་ཡིན་ཞེས་ཟེར་བར་སྣང་བ་ཤར་གསུངས། །སྐུ་མདོག་དཀར་པོ་དུང་གི་མདོག །དངུལ་གྱི་ཁྲབ་རྨོག་དཔའ་ཆས་བརྗིད། །ངང་དཀར་སེར་ཆེན་འཇའ་སྟན་དང་། །གསེར་གྱི་སྒ་སྲབ་ཅན་ལ་བཅིབས། །ཕྱག་གཡས་གནམ་ལྕགས་རལ་གྲི་ཕྱར། །ཕྱག་གཡོན་ནོར་བུ་སྐུ་ལ་བརྟེན། །གསང་ཡུམ་དུང་མཚོ་ནོར་བུ་སྒྲོན། །སྐུ་མདོག་དཀར་ལ་འོད་ཟེར་འབར། །ཕྱག་གཡས་ཡིད་བཞིན་ནོར་བུ་བསྣམས། །གཡོན་པས་ནས་ཀྱི་སྙེ་མ་འཛིན། །སྐུ་ལ་ཟ་འོག་ན་བཟའ་གསོལ། །ལྷ་རྟ་དཀར་པོ་རྒྱན་ལྡན་བཅིབས། །འཁོར་གྱི་བཀའ་ཉན་ལས་བྱེད་གཙོ། །བདུད་རྗེ་མི་སྔོན་རྟ་སྔོན་ཅན། །གསེར་གཡུའི་སྲབ་མཐུར་གསེར་ཁྲབ་བརྗིད། །གཡས་ན་བ་དན་སྔོན་པོ་འཕྱར། །གཡོན་པས་གསེར་གྱི་སྒྲོམ་བུ་བསྣམས། །བཙན་རྗེ་མི་དམར་རྟ་ཡང་དམར། །སྐུ་ལ་ལྕགས་ཀྱི་ཁྲབ་རྨོག་གསོལ། །ཕྱག་གཡས་བ་དན་དམར་པོ་ཕྱར། །གཡོན་པས་བྷནྡྷ་ཁྲག་བཀང་འཛིན། །ཀླུ་རྗེ་མི་དཀར་རྟ་དཀར་ཅན། །ལྕགས་ཀྱི་གོ་ཁྲབ་མཛེས་པར་གསོལ། །ཕྱག་གཡས་བ་དན་དཀར་པོ་ཕྱར། །གཡོན་ན་གསེར་གྱི་བུམ་པ་འཛིན། །རླུང་མེ་ཆུ་སའི་འཇིགས་སྐྱོབས་པའི། །བདུད་བཙན་ཀླུ་དང་ས་བདག་བཞི། །དཔའ་བོའིཆས་ལྡན་རླུང་དང་མེ། །བདུད་རྩི་བུམ་པ་རི་དབང་འཛིན། །གཞན་ཡང་འཁོར་ཚོགས་སྤྲུལ་པར་བཅས། །ཁྱེད་རྣམས་སྔོན་ཚེ་པད་འབྱུང་དང་། །རྣམ་སྣང་ལོ་ཙཱ་དགའ་ལོ་པ། །ཡབ་སྲས་བརྒྱུད་པར་བཅས་པ་ཡི། །སྤྱན་སྔར་ཁས་བླང་དམ་བཅས་བཞིན། །འདིར་སྤྱོན་དགྱེས་པའི་གདན་ལ་བཞུགས། །གུས་པས་ཕྱག་བགྱི་བསྟོད་བཤགས་འབུལ། །མཆོད་སྤྲིན་ནམ་མཁའི་མཛོད་ཆེན་པོས། །མཆོད་དོ་བསྐང་ངོ་མངའ་གསོལ་ལོ། །ཁྱད་པར་གོ་འབྱེད་ཁྱོན་འགེང་བའི། །བསང་དུད་བདུད་རྩིའི་སྤྲིན་ཕུང་གིས། །མངའ་རིས་སྐོར་གསུམ་གནས་བདག་བསང་། །དབུས་གཙང་རུ་བཞིའི་བསྲུང་མ་བསང་། །མདོ་ཁམས་སྒང་དྲུག་ཟོ་དོར་བསང་། །རྒྱལ་མོ་རོང་གི་གཞི་བདག་བསང་། །ཡུལ་རི་འདི་ཡི་གནས་བདག་བསང་། །ཙ་རིའི་ཡ་གཅིག་གནས་སྲུང་བསང་། །མངའ་རིའི་ཙན་དན་སྡོང་པོ་བསང་། །བཙན་བདུད་ཀླུ་ཡི་འཁོར་ཚོགས་བསང་། །འཇིགས་སྐྱོབས་ལས་མཁན་སྡེ་བཞི་བསང་། །བཀའ་སྡོད་དྲེགས་པའི་འཁོར་ཚོགས་བསང་། །བསངས་ཤིང་མཆོད་པའི་བྱིན་རླབས་ཀྱིས། །མནོལ་གྲིབ་སངས་ཤིང་རྨོངས་འཐིབ་བྱང་། །གསང་གསུམ་དཔལ་ཡོན་ཕྲིན་ལས་རྒྱས། །ཐུགས་ལ་བཞེད་དགུ་འགྲུབ་གྱུར་ཅིག །དེ་མཐུས་བདག་དང་བསྲུང་བྱ་ཡི། །ནད་གདོན་འཇིགས་བརྒྱད་ཞི་བ་དང་། །ཚེ་བསོད་དཔལ་འབྱོར་རྒྱས་ཤིང་འཕེལ། །བཞེད་དགུ་དབང་དུ་འདུ་བར་མཛོད། །ཡིད་ལ་དམིགས་པའི་དགྲ་བགེགས་སྒྲོལ། །འཕར་སྤྱང་གཅན་གཟན་གནོད་པ་སོལ། །ཇག་ཆོམ་རྐུན་པོ་རྒྱང་རིང་སྐྲོད། །བྱད་ཕུར་རྦོད་གཏོང་རྡུལ་དུ་རློགས། །མི་ཕྱུགས་གོད་ཡམས་མེད་པར་མཛོད། །བར་གཅོད་དམ་སྲིའི་འཚེ་བ་སོལ། །ནད་མཚོན་མུ་གེའི་འཇིགས་ལས་སྐྱོབས། །དུས་འཁྲུགས་རྒུད་པ་ཞི་བར་མཛོད། །གཞི་སྡོད་མེལ་ཚེ་བྱ་ར་གྱིས། །བྱེས་བགྲོད་ལམ་ལྷ་བསུ་སྐྱེལ་མཛོད། །ལ་ཆུ་འཕྲང་སྒྲོལ་ཉེས་པ་སོལ། །དོན་གཉེར་ཀུན་ལ་རྒྱལ་ཁ་ལོངས། །རྒྱལ་བསྟན་སྤེལ་ལ་དེ་འཛིན་སྐྱོངས། །རྒྱལ་ཁམས་སྤྱི་དང་ལྗོངས་འདི་སྲུངས། །བསམ་པའི་དོན་དང་གཉེར་བའི་ལས། །གེགས་མེད་འགྲུབ་པའི་སྡོང་གྲོགས་མཛོད།། ཅེས་འདི་དོན་གཉེར་ཅན་འགས་བསྐུལ་བའི་ངོར། །མཁའ་འགྲོ་གླིང་པའི་༼རྨི་ལམ་བླ་མ་བསྟན་པ་དར་རྒྱས་རེད།༽རྨི་ལམ་གཟིགས་སྣང་བཞིན། །འཇིགས་མེད་རྣམ་རྒྱལ་བཟང་པོས་སོར་རྩེས་བསྐྲུན། །དགེ་བས་འདོད་དགུ་ཡིད་བཞིན་འགྲུབ་གྱུར་ཅིག ། སྐུ་བླ་སྲིད་རྒྱལ་གྱི་བསང་མཆོད།༄༅། སྐུ་བླ་སྲིད་རྒྱལ་གྱི་བསང་མཆོད་ནི། ཀྱཻ། ཡུལ་ནི་སྐུ་རྒྱལ་བོད་ཀྱི་ཡུལ། །ཁ་བ་ཅན་གྱི་རྒྱལ་མོ་རོང་། །རི་རྒྱལ་རྡོ་རྗེ་གཡུ་ཁྲོམ་མདུན། །སྐུ་བླ་སྲིད་རྒྱལ་གཉན་པོ་ནི། །སྐུ་མདོག་དཀར་ལ་ཅུང་ཟད་དམར། །དར་དཀར་གོ་བེར་དུང་ཁྲབ་དང་། །དུང་རྨོག་རྒོད་ཀྱི་རྨོག་ཞུ་གསོལ། །གཡས་ན་དར་དཀར་རུ་མཚོན་ཕྱར། །གཡོན་པས་གཏེར་གྱི་བུམ་པ་བསྣམས། །སྟག་རལ་གཡས་ལ་གཟིག་ཤུབ་གཡོན། །འཁོར་གསུམ་བསྐོར་ཞིང་བཞད་སྒྲ་སྒྲོགས། །ལྷ་གཡག་གྭ་པ་ཆིབས་སུ་བཅིབས། །མྱུར་མགྱོག་བར་སྣང་གློག་ལྟར་མགྱོགས། །ཡབ་ཡུམ་བཙུན་མོ་བློན་འབངས་བཅས། །འཁོར་བཅས་གནས་འདིར་སྤྱན་འདྲེན་ནོ། །བསང་ཤིང་ལྷ་ཤིང་སྣ་ཚོགས་དང་། །ཕྱེ་མར་འོ་སྐོལ་ཤ་མར་ཆང་། །དཀར་གསུམ་མངར་གསུམ་ཟས་སྣའི་ཕུད། །མདའ་དར་བལ་ཚོན་བྱ་སྤུ་དང་། །ཤེལ་ཚིག་ཁྲི་དཀར་སྟོང་ནག་དང་། །གཡག་ལུག་ར་གསུམ་རྐང་འགྲོས་ཚོགས། །དངོས་འབྱོར་ཡིད་སྤྲུལ་མཆོད་པ་འབུལ། །ཟོ་དོར་སྐུ་བླ་སྲིད་རྒྱལ་གྱི། །གཡས་རི་གཡོན་རི་མདུན་རྒྱབ་རི། །གཞི་བདག་གནས་བདག་དཀོར་བདག་དང་། །ཁྱད་པར་བདག་ཅག་དཔོན་སློབ་ཀྱི། །མགོན་སྐྱབས་དཔུང་གཉེན་མཛད་པའི་ལྷ། །མགྲོན་རྣམས་མ་ལུས་ཐམས་ཅད་བསང་། །གནས་འདིར་ས་བདག་ཀླུ་དང་གཉན། །དཀོར་ནོར་བསྲུང་བྱེད་ལྷ་རྣམས་བསང་། །ཁྱེད་རྣམས་མཉེས་ཤིང་ཚིམ་གྱུར་ཅིག །བདག་ཅག་རྣལ་འབྱོར་འཁོར་བཅས་ལ། །མི་ནད་ཕྱུགས་ནད་མ་བཏང་ཅིག །བཙའ་སད་སེར་གསུམ་བསྲུང་དུ་གསོལ། །མགོན་སྐྱབས་དཔུང་གཉེན་དམ་པ་མཛོད། །གཞི་བྱེས་འགྲོ་འདུག་གང་བྱེད་ཀྱང་། །རྐུན་འདྲེ་རྐྱལ་ཁ་མ་བྱེད་ཅིག །སྔོན་བསུ་རྒྱབ་སྐྱོལ་ཟ་ཐང་སྤྲོད། །རྟ་ནོར་ཕྱུགས་གསུམ་འཕེལ་བར་མཛོད། །བསྟན་པ་ཕྱོགས་མེད་དར་བར་མཛོད། །འགྲོ་ན་མ་བཀག་སྡོད་མ་འཚེ། །ཅི་བསམ་འགྲུབ་པའི་སྡོང་གྲོགས་མཛོད། །གང་བཅོལ་ཕྲིན་ལས་འགྲུབ་པར་མཛོད། ། ཁོ་ཁོའི་རི་ཕྱུགས་མགོན་གྱི་བསང་མཆོད།༄༅། རི་ཕྱུགས་མགོན་གྱི་བསང་མཆོད་དགོས་འདོད་རེ་སྐོང་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀ་དག་བློ་འདས་ཆོས་དབྱིངས་ལས། །ལྷུན་གྲུབ་ཡེ་ཤེས་མ་འགགས་མདངས། །ཐུགས་རྗེའི་རོལ་རྩལ་སྒྱུ་མའི་འཕྲུལ། །ཕན་གནོད་བྱེད་པོར་ཅིར་ཡང་སྣང་། །ཁྱད་འཕགས་གནས་ཆེན་བཞི་ཡི་དབུས། །མིག་སྨན་མདངས་འཛིན་རི་གཉན་སྤོར། །བརྟེན་བཅས་བདུད་གཤིན་རྗེ་བོ་ནི། །མི་ནག་རྟ་ནག་གོས་ནག་ཅན། །མདུང་ནག་བ་དན་ཞགས་པ་ཡིས། །ལོག་འདྲེན་མ་ལུས་མྱོས་སྡོམ་བྱེད། །བཙན་བདུད་གྲི་བོ་གཤིན་རྗེ་དང་། །བྲག་སྲིན་གདུག་པའི་འཁོར་དང་བཅས། །འདིར་བྱོན་བསང་གསུར་མཆོད་པ་བཞེས། །རྣལ་འབྱོར་བསམ་པ་སྒྲུབ་ཏུ་གསོལ། །ཕྱུགས་མགོན་གཡུ་རྩེ་དགྲ་ལྷའི་གཙོ། །དགྱེས་སྡེ་བཀའ་ཉན་འཁོར་བཅས་རྣམས། །བཟང་ཤིང་ཕྱེ་མར་ཕུད་སྐྱེམས་ཀྱིས། །གསོལ་ལོ་མཆོད་དོ་མངའ་དབུལ་ལོ། །འདོད་འབྱུང་བདུད་རྩིའི་དུད་སྤྲིན་གྱིས། །བསང་ངོ་བརྔན་ནོ་མཉེས་གྱུར་ཅིག །ལྟོས་བཅས་ཡོན་སྦྱོར་འཁོར་བཅས་ལ། །བསྲུང་སྐྱོབས་བྱ་ར་མེལ་ཚེ་མཛོད། །དགྲ་རྐུན་གཅན་གཟན་གནོད་པ་སོལ། །ནད་གདོན་གོད་ཡམས་ཞི་བར་མཛོད། །གནག་ཕྱུག་ཟས་ནོར་འཕེལ་བར་མཛོད། །གང་བཅོལ་ལས་རྣམས་མྱུར་འགྲུབ་མཛོད།། ཅེས་རྣལ་འབྱོར་གྱི་དབང་ཕྱུག་ཆེན་པོ་བསྟན་པ་དར་རྒྱས་དང་། གཞན་ཡང་ཆོས་གྲོགས་དམ་པ་འགས་བསྐུལ་ངོར་མགོ་སྤྲུལ་གྱིས་བྲིས་པ་དགེའོ།། ཁོ་ཁོའི་གནས་བདག་གི་བསང་མཆོད།༄༅། གནས་མཆོག་འཆི་མེད་དཔལ་གྱི་སེང་གེ་ཀེའུ་ཚང་གི་གནས་བདག་བསང་མཆོད་འདོད་དོན་ལྷུན་གྲུབ་ཞེས་བྱ་བ་བཞུགས་སོ།། ན་མོ་གུ་རུ་བྷྱཿ སྐུ་གསུམ་ཡོངས་འདུས་ཨོ་རྒྱན་ཐོད་ཕྲེང་རྩལ། །གང་དང་དབྱེར་མེད་ཀུན་མཁྱེན་འཇིགས་མེད་གླིང་། །སྐྱབས་གནས་ཀུན་འདུས་རྩ་བའི་བླ་མ་ལ། །རྡུལ་སྙེད་ལུས་སྤྲུལ་སྒོ་གསུམ་གུས་པས་འདུད། །དེ་ལ་འདིར་གནས་ཆེན་དཔལ་གྱི་སེང་གེ་ཀེའུ་ཚང་གི་གཏེར་བདག་བསང་མཆོད་བྱེད་པར་འདོད་པས་བཟང་ཤིང་སྣ་ཚོགས་དང་ཀླུ་སྨན་ཕྱེ་མར་ཇ་ཆང་འོ་ཞོ་སོགས་བཤམས་ལ། རང་ཉིད་ལྷའི་རྣལ་འབྱོར་དུ་གསལ་བའི་ངང་ནས། རཾ་ཡཾ་ཁཾ་གིས་བསངས། ཨོཾ་ཨཱཿཧཱུྃ་གིས་སྦྱངས་ཏེ་བདུད་རྩིའི་སྤྲིན་ཕུང་དུ་བསྒྱུར་ལ། ཀྱཻ། ཡུལ་ནི་བྱང་ཕྱོགས་གཡི་རོང་སྨད། །གནས་ཆེན་འཆི་མེད་དཔལ་གྱི་རི། །གནས་བདག་ཀླུ་མོ་དུང་སྐྱོང་ནི། །སྐུ་མདོག་དཀར་ལ་འོད་ཟེར་འཕྲོ། །སྦྲུལ་མགོ་བདུན་གྱི་གདེངས་ཀ་ཅན། །ཕྱག་གཡས་ནོར་བུས་དགོས་འདོད་འབྱུང་། །གཡོན་པས་ཤེལ་གྱི་བུམ་པ་འཛིན། །རིན་ཆེན་རྒྱན་ཆ་སྣ་ཚོགས་གསོལ། །སྐུ་སྨད་སྦྲུལ་མཇུག་རྒྱ་མཚོར་འཁྱིལ། །ཀླུ་ཆེན་བརྒྱད་ཀྱི་འཁོར་གྱིས་བསྐོར། །བསང་མཆོད་གནས་འདིར་གཤེགས་སུ་གསོལ།། བཛྲ་ས་མ་ཡཱ་ཛཿ ཛཿཧཱུྃ་བཾ་ཧོ། ཀྱཻ། དེ་རིང་དུས་བཟང་ཕུན་ཚོགས་ལ། །མཆོད་རྫས་ཡོ་བྱད་འདོད་དགུ་ནི། །ཕྱེ་མར་ཀླུ་བཤོས་གཡག་ལུག་ར། །ཇ་ཆང་འོ་ཞོ་ཀླུ་སྨན་དང་། །དཀར་གསུམ་མངར་གསུམ་བཟའ་བཏུང་རིགས། །བདུད་རྩི་ཤིང་སྣའི་དུད་སྤྲིན་དང་། །རི་དྭགས་གཡང་དྭགས་ཆུ་གནས་སོགས། །ཀུན་བཟང་མཆོད་སྤྲིན་རྒྱ་མཚོ་འདིས། །གནས་བདག་ནོར་བུ་དུང་སྐྱོང་བསང་། །འཁོར་གྱི་ཀླུ་ཆེན་བརྒྱད་པོ་བསང་། །གཏེར་བདག་བསྲུང་མ་འཁོར་བཅས་བསང་། །མཆོད་དོ་བརྔན་ནོ་མངའ་གསོལ་ལོ། །ཐུགས་རྒྱུད་མཉེས་ཤིང་ཚིམ་གྱུར་ཅིག །ཁྱེད་ལ་ཕྲིན་ལས་བཅོལ་བ་ནི། །རྩ་བརྒྱུད་བླ་མས་བཀའ་བསྒོས་བཞིན། །སངས་རྒྱས་བསྟན་པ་དར་བ་དང་། །བསྟན་འཛིན་སྐྱེས་བུའི་སྐུ་ཚེ་སྲིངས། །སྦྱིན་བདག་བར་ཆད་ཞི་བ་དང་། །ཚེ་བསོད་ལོངས་སྤྱོད་རྒྱས་པ་དང་། །འཁོར་འདས་དབང་དུ་འདུ་བ་དང་། །དགྲ་སྒྲོལ་བགེགས་ཟློག་ཕྲིན་ལས་མཛོད། །གཅན་སྤྱང་གནོད་པ་ཚར་ཆོད་ཅིག །མི་ནད་ཕྱུགས་ནད་ཞི་བ་དང་། །སྒྲུབ་པ་པོ་ལ་སྡོང་གྲོགས་མཛོད། །ཅི་བཅོལ་ཕྲིན་ལས་འགྲུབ་པར་མཛོད། །བདེ་སྐྱིད་ཕུན་ཚོགས་བཀྲ་ཤིས་ཤོག། ཅེས་དད་ལྡན་པདྨའི་མིང་གིས་བསྐུལ་ངོར་མགོ་སྤྲུལ་རྒན་པོས་བྲིས་པ་དགེའོ།། ལོ་མཆོག་རྡོ་རྗེ་རབ་བརྟན་གྱི་བསང་མཆོད།ཡུལ་སྐྱོང་རྡོ་རྗེ་རབ་བརྟན་གྱི་བསང་བསྡུས་འདོད་དགུའི་འཁྲི་ཤིང་བཞུགས། བསང་རྫས་ཀྱི་མ་དག་པའི་དངོས་འཛིན་རཾ་ཡཾ་ཁཾ་གིས་བསྲེག་གཏོར་བཀྲུས། ཨོཾ་ཨཱཿཧཱུྃ་གིས་སྦྱངས་སྤེལ་བསྒྱུར་ལ། ཀྱཻ། ཡེ་གཞི་ཀ་དག་ཆོས་དབྱིངས་ལས། །ལྷུན་གྲུབ་འགགས་མེད་ཤར་བའི་མདངས། །སྲིད་ཞི་ཟུང་འཇུག་རོལ་པའི་རྩལ། །མ་འདྲེས་ཅིར་ཡང་འཆར་བའི་གར། །ལོ༵་ཕྱུགས་སྲུང་དང་སྤེལ་མཛད་མཆོ༵ག །རྡོ༵་རྗེ༵་འཛིན་དབང་མ་ལུས་པའི། །བཀའ་དང་དམ་ལ་ར༵བ་གནས་ཤིང་། །ཆོས་སྲིད་དཔལ་ཡོན་བརྟ༵ན་བྱེད་པའི། །ཡུལ་སྐྱོང་དྲེགས་པའི་གཙོ་བོ་ནི། །ལམ་ཞུགས་གང་ཟག་བློ་ཁྱད་བཞིན། །རྣམ་འགྱུར་ཆ་ལུགས་སྣ་ཚོགས་སྟོན། །རིག་འཛིན་སྤྱི་ཡི་གཟིགས་སྣང་ངོར། །དམར་སྨུག་གཡུ་ཡི་ཁྲབ་རྨོག་ཅན། །རྟ་དམར་གསེར་དངུལ་རྒྱན་ལྡན་བཅིབས། །ཟངས་ཀྱི་མདུང་དམར་བ་དན་ཅན། །འཁོར་གསུམ་ལ་སོགས་དཔའ་ཆས་བརྗིད། །དགྱེས་སྡེ་ཀླུ་དང་སྨན་མོ་རྩེན། །བཙན་བདུད་ཀླུ་སྲིན་ཕོ་ཉར་འགྱེད། །འཁོར་ཚོགས་སྤྲུལ་པ་མང་དུ་སྟོན། །ཀུན་ཀྱང་འདིར་བྱོན་དགྱེས་པར་བཞུགས། །རྨད་བྱུང་ཤིང་སྣ་ཕྱེ་མར་སོགས། །ལོངས་སྤྱོད་འབྱོར་རྒུའི་དུད་པའི་སྤྲིན། །སྔགས་དང་ཕྱག་རྒྱ་ཏིང་འཛིན་གྱིས། །ཟག་མེད་བདུད་རྩིར་བསྒྱུར་བ་འདིས། །དཀར་པོའི་ཕྱོགས་སྐྱོང་ཟོ་དོར་གཙོ། །ལོ་མཆོག་རྡོ་རྗེ་རབ་བརྟན་བསང་། །དགྱེས་སྐོང་ཀླུ་མོ་འོད་ལྡན་བསང་། །ལྷ་སྨན་དགྲ་བླའི་རྒྱལ་མོ་བསང་། །བཀའ་བློན་གནོད་སྦྱིན་དགྲ་འདུལ་བསང་། །གནས་སྲུང་གསང་སྔགས་བསྟན་སྐྱོང་བསང་། །སྦྲུལ་ཟོམ་རྡོ་རྗེ་རྩེ་རྒྱལ་བསང་། །གྲུབ་ཆུའི་རྗེ་རིགས་ཀླུ་རྣམས་བསང་། །བཙན་བདུད་ཀླུ་སྲིན་བརྒྱད་ཚན་བཞི། །འཁོར་ཚོགས་སྤྲུལ་པར་བཅས་རྣམས་བསང་། །མཁའ་དབྱིངས་དོགས་པོར་བྱེད་འདྲ་བའི། །འདོད་འབྱུང་བསང་གི་མཆོད་སྤྲིན་གྱིས། །ཐུགས་རྒྱུད་མཉེས་ཤིང་ཚིམ་མཛད་པ། །པད་འབྱུང་རྣམ་སྣང་ལོ་ཙཱ་དང་། །དཔལ་ཆེན་དགའ་ལོ་ཀརྨ་པ། །བསམ་གཏན་སྙིང་པོ་ལྷ་དབང་མཚན། །དཀོན་མཆོག་དབང་ཕྱུག་ཧཱུྃ་རལ་རྗེ། །འགྱུར་མེད་རྒྱལ་མཚན་ལུང་རིག་གླིང་། །གྲུབ་མཆོག་རིག་འཛིན་མཆོག་རྣམས་ཀྱིས། །ཇི་ལྟར་བཀའ་བསྒོས་དམ་བཞག་བཞིན། །བསྟན་སྲིད་སྤྱི་དང་ཁྱད་པར་དུ། །ཁྱེད་ལ་རེ་ཞིང་ལྟོས་རྣམས་ལ། །བསྲུང་སྐྱོབས་བྱ་ར་མེལ་ཚེ་མཛོད། །ཕྲིན་ལས་རྣམ་བཞི་མྱུར་དུ་སྒྲུབ། །མཐུན་པའི་དངོས་གྲུབ་གང་ཡོད་རྣམས། །ནུས་སྟོབས་འབད་མེད་མྱུར་སྩོལ་མཛོད།། ཅེས་ཡུལ་སྐྱོང་རྡོ་རྗེ་རབ་བརྟན་གྱི་བསང་བསྡུས་འདོད་དགུའི་འཁྲི་ཤིང་ཞེས་བྱ་བ་འདི་ཡང་བཙུན་པ་ཚུལ་ཁྲིམས་བཟང་པོའི་ངོར། མགོ་སྤྲུལ་འཇིགས་རྣམ་པས་ཤར་མར་བྲིས་པ་དགེའོ།། དགེའོ།། དགེའོ།། དགའ་བ་གདོང་གི་ཡུལ་ལྷའི་འགྲས་བསྡུམ་ལྷ་མིའི་མཐུན་སྦྱོར།བཀའ་འདུས་ལས་བསང་མཆོད་རྣམས་ཀྱི་ཆ་ལག་ཡུལ་ལྷའི་འགྲས་བསྡུམ་ལྷ་མིའི་མཐུན་སྦྱོར་ཞེས་བྱ་བ་བཞུགས་སོ།། ན་མོ་གུ་རུ། འདིར་བསང་མཆོད་ཀྱི་མཐར་ཡུལ་ལྷ་དང་འཁོན་འགྲས་སོང་བ་བསྡུམ་པར་འདོད་པས། ཐོག་མར་ཀླུ་བཤོས་གཉིས་དང་། བཙན་བཤོས། བདུད་བཤོས། དཀར་གཏོར་རྣམས་རང་རང་གི་འདོད་རྫས་དང་བཅས་པ་བཤམས་ལ། འབྲུ་གསུམ་དང་། ཨ་ཀ་རོས་བྱིན་གྱིས་བརླབས། ནམ་མཁའ་མཛོད་ཀྱི་སྔགས་བརྗོད་པས་མགྲོན་རིགས་སྤྱིར་ཕུལ་ལ། ཨོཾ་མ་ཧཱ་ནཱ་ག་ར་ཙ་མ་ཎི་ཀ་དཱི་པཾ་སརྦ་ས་པཱ་རི་ཝ་ར་བཛྲ་ས་མ་ཛཿ ཞེས་སྤྱན་དྲངས། ས་མ་ཡཱ་སྟྭཾ།གྱིས་བཞུགས་སུ་གསོལ། བཛྲ་ས་མ་ཡཱ་རཀྵནྟུ། ཞེས་དམ་ཚིག་དྲན་པར་བྱས་ལ། ཨོཾ་མ་ཧཱ་ནཱ་ག་ར་ཛི་མ་ཎི་ཀ་དཱི་པཾ་བཱ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ། ཨོཾ་རྒྱལ་རིགས་ཀླུ་ཡི་སྲས་མོ་ནི། །དཀར་མོ་ལོ་ཏོག་འབྲུ་སྤེལ་མ། །མདའ་དར་བུམ་པའི་ཕྱག་ཆ་ཅན། །དུང་མཚོའི་མངའ་བདག་ནོར་བུ་སྒྲོན། །འདིར་སྤྱོན་མཐུན་རྫས་རྟེན་ལ་བཞུགས། །བསང་མཆོད་ཟག་མེད་བདུད་རྩིའི་སྤྲིན། །དཀར་མངར་རྒྱན་སྤྲས་ཀླུ་ཡི་བཤོས། །ཀླུ་ཡི་ཡིད་ལ་འཐད་པའི་ནོར། །དུང་སྦྲུལ་ལ་སོགས་ཉེར་གཅིག་དང་། །ཕྱེ་མར་ཟས་སྣ་འོ་ཕུད་སྐྱེམས། །ནམ་མཁའ་མཛོད་དུ་བསྒྱུར་ནས་འབུལ། །དགྱེས་པ་ཆེན་པོས་བཞེས་སུ་གསོལ། །ཡུལ་སྐྱོང་དངུལ་རྫིའི་དགྱེས་སྡེ་མོ། །གངས་རི་ལྟར་དཀར་ཉི་བཞིན་གསལ། །གདེངས་ཀ་སྦྲུལ་མཇུག་ལྷབ་ལྷུབ་གོས། །རིན་ཆེན་ནོར་བུའི་དོ་ཤལ་གྱིས། །མཛེས་སྒེག་ཀླུ་ཡི་བརྟན་པ་འཕྲོག །གསོལ་ཞིང་མཆོད་ལ་མ་ལྟར་བྱམས། །དཔའ་ཞིང་འདུད་ལ་གྲོགས་ལྟར་བརྩེ། །རྣམ་འགྱུར་གཅིག་ཏུ་མ་ངེས་ཏེ། །རེས་འགའ་སྨན་བཙུན་མཛེས་མའི་ཚུལ། །དུང་རྟ་བཅིབས་ནས་ལ་ལུང་རྒྱུ། །ཡུལ་ལྷ་ཀླུ་གཉན་མང་པོས་བསྐོར། །ཁྲོས་ན་ལོ་ཉེས་ཐན་ལྟས་གཏོང་། །དགའ་ན་དཔལ་གཡང་དངོས་གྲུབ་སྡུད། །ཁྱོད་སྔོན་གྲོང་འདིར་འཁོན་མཆིས་ཀྱང་། །བདག་ལ་སྔོན་ཡང་ནོངས་མ་མཆིས། །ད་ཡང་བསང་མཆོད་ནུས་བསྟུན་བགྱི། །ཞི་བ་བྱང་ཆུབ་སེམས་ལྡན་པས། །བསང་མཆོད་དམ་པ་འདི་བཞེས་ནས། །ཕྱིན་ཆད་གནས་འདིར་བག་ཕོབས་ལ། །བདག་ཅག་འཁོར་བཅས་བརྩེ་བས་སྐྱོངས། །ལྷ་མིའི་ཞལ་སེམས་མཐུན་པར་མཛོད། །ལོ་ལེགས་འབྲུ་འཕེལ་དངོས་གྲུབ་སྩོལ།། ཞེས་ཀླུ་གཏོར་སྔོན་མ་གཏོར་སྟེགས་སོགས་གཙང་སར་འབུལ། ༧ ཨོཾ་མ་ཧཱ་ནཱ་ག་སིདྡྷི་ལཀྵིཾ་སརྦ་ས་པཱ་རི་ཝ་ར་བཛྲ་ས་མ་ཛཿ ས་མ་ཡཱ་སྟྭཾ། བཛྲ་ས་མ་ཡཱ་རཀྵནྟུ། ཨོཾ་མ་ཧཱ་ནཱ་ག་སིདྡྷི་ལཀྵིཾ་བཱ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ། ཕུ་ཛཿ སྐྱིད་ཀྱི་ཆུ་མིག་གཉན་པོ་ནས། །དངོས་གྲུབ་ཕུན་ཚོགས་ཀླུ་ཡི་རྗེ། །སྐུ་མདོག་དཀར་ལ་སྦྲུལ་མཇུག་སེར། །ནོར་བུ་དང་བཅས་མཆོག་སྦྱིན་གཡས། །སྟ་ཟུར་མཐེབ་མཛུབ་སྙེ་མ་གཡོན། །གདེངས་སྦྲུལ་ཀླུ་ཡི་གོས་རྒྱན་མཛེས། །གསེར་མདོག་པདྨའི་གདན་ལ་བཞུགས། །ཡུམ་མཆོག་རང་འདྲ་ཟས་གཞོང་ཐོགས། །མི་འདོད་ཚེ་ན་ཀོ་ལོང་སྡོམ། །དགྱེས་ན་ལོ་ཏོག་འབྲུ་བཅུད་སྤེལ། །ཁྱེད་ཅག་སྤྲུལ་འཁོར་དང་བཅས་ལ། །བསང་མཆོད་ཟག་མེད་ཡེ་ཤེས་སྤྲིན། །ཀླུ་བཤོས་ཀླུ་སྨན་བྲན་པ་དང་། །མར་གྱི་ཉ་སྦལ་སྦྲུལ་གླང་དང་། །ཤེལ་ཚིག་དཀར་མངར་འོ་ཆོལ་འབུལ། །དགྱེས་ཤིང་བརྩེ་བས་བཞེས་མཛོད་ལ། །སྲུང་སྐྱོབས་གྲོགས་ལྡན་གཡེལ་མེད་མཛོད། །ལོ་ཉེས་མ་གཏོང་ལོ་བཅུད་སྤེལ། །རྣམ་བཞིའི་ཕྲིན་ལས་གང་བརྩམས་ཀུན། །ཡིད་ལ་སྨོན་བཞིན་འགྲུབ་པར་མཛོད།། ཅེས་ཀླུ་གཏོར་གཅིག་ཆུ་མིག་གི་ཉེ་ཆར་འབུལ། ༧ ཨོཾ་དེ་བ་ཤུ་ལ་བྷུ་བ་ནཾ་ཤཾ་ཀ་ར་སརྦ་ས་པཱ་རི་ཝ་ར་བཛྲ་ས་མ་ཡཱ་ཛཿ ས་མ་ཡཱ་སྟྭཾ། བཛྲ་ས་མ་ཡཱ་རཀྵནྟུ། ཨོཾ་དེ་བ་ཤུ་ལ་བྷུ་བ་ནཾ་ཤཾ་ཀ་ར་བཱ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ། ཏྲི་ཛཿ རིན་ཆེན་མཆོང་བྲག་འབར་བ་ནས། །སྲིད་པ་བདེ་བྱེད་བཙན་གྱི་རྗེ། །མདོག་དམར་རལ་གྲི་ཞགས་པ་བསྣམས། །གཟིག་ཆེན་ངར་མའི་སྟེང་ན་འགྱིང་། །ཟངས་ཀྱི་ཡ་ལད་རྨོག་ཕུབ་སོགས། །དཔའ་བོའི་ཆས་ལྡན་འཁོར་གསུམ་བརྗིད། །དགྱེས་སྐོང་སྨན་མོ་མཛེས་མ་ནི། །ཕྱག་གཉིས་གྲུ་གུ་འཐུལ་དང་རྩེན། །ཁྲོས་ན་གཅན་གཟན་འཚེ་བ་གཏོང་། །དགའ་ན་སྲུང་སྐྱོབས་སྡོང་གྲོགས་མཛད། །ཁྱེད་ཅག་འཁོར་དང་བཅས་པ་ལ། །བསང་མཆོད་ཟག་མེད་འདོད་དགུའི་སྤྲིན། །བཙན་བཤོས་དམར་གྱིས་བརྒྱན་པ་དང་། །མི་རྟ་བྱ་ཁྱི་དམར་པོ་དང་། །གསེར་གཡུའི་སྐྱེམས་དང་ཟས་སྣ་འབུལ། །དགྱེས་ཤིང་བརྩེ་བས་བཞེས་མཛོད་ལ། །བྱ་ར་མེལ་ཚེ་མ་གཡེལ་མཛོད། །ལོ་ཕྱུག་རྟག་ཏུ་ལེགས་པར་མཛོད། །རྣམ་བཞིའི་ཕྲིན་ལས་གང་བཅོལ་རྣམས། །གེགས་མེད་ཡིད་བཞིན་འགྲུབ་པར་མཛོད།། ཞེས་བཙན་བཤོས་ལྷོར་འབུལ། ༧ ཨོཾ་དུ་ཏྲི་བྷཱི་མཾ་ཀཱ་ལ་ཨཾ་ཤུ་མནྟ་སརྦ་ས་པཱ་རི་ཝ་ར་བཛྲ་ས་མ་ཡཱ་ཛཿ ས་མ་ཡཱ་སྟྭཾ། བཛྲ་ས་མ་ཡཱ་རཀྵནྟུ། ཨོཾ་དུ་ཏྲི་བྷཱི་མཾ་ཀཱ་ལ་ཨཾ་ཤུ་མནྟ་བཱ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ། དུ་ཛཿ སྲིབ་ཀྱི་བྲག་ནག་ཕུག་པ་ནས། །འཇིགས་བྱེད་འོད་ལྡན་བདུད་སྲིན་རྗེ། །བཤའ་གྲི་སྙིང་འཛིན་མིག་སྨན་མདོག །རུས་རྒྱན་གོས་ནག་སྙིང་ཕྲེང་བརྗིད། །འཕར་སྤྱང་དྲེད་སོགས་མ་ངེས་བཅིབ། བྲག་སྲིན་དམར་ནག་དགྱེས་སྐོང་མཛད། །མ་མགུ་མི་རྒོད་ཆོ་འཕྲུལ་སྟོན། །མཉེས་ན་རེ་ཞིང་སྨོན་པ་སྒྲུབ། །ཁྱེད་ཅག་འཁོར་དང་བཅས་པ་ལ། །བསང་མཆོད་འདོད་དགུའི་ལོངས་སྤྱོད་སྤྲིན། །ཤ་ཁྲག་སྙིང་སྣས་བརྒྱན་པའི་བཤོས། །བྱ་ཁྱི་རྟ་གཡག་ལུག་ནག་དང་། །ཕུད་རྒོད་འབྲུ་སྣ་ཟས་ཕུད་འབུལ། །བཞེས་ནས་ཚིམ་ཞིང་དགྱེས་པར་མཛོད། །ལོ་ལེགས་ཕྱུགས་འཕེལ་གང་བཅོལ་ལས། །འབད་མེད་འགྲུབ་པའི་སྡོང་གྲོགས་མཛོད།། ཅེས་བདུད་བཤོས་ཕ་རིའི་ཕྱོགས་སུ་མཆོད། ༧ ཨོཾ་ཀཱ་ཡ་དཱེ་བ་པ་ར་ཨརྫུ་ན་སརྦ་ས་པཱ་རི་ཝ་ར་བཛྲ་ས་མ་ཡཱ་ཛཿ ས་མ་ཡཱ་སྟྭཾ། བཛྲ་ས་མ་ཡཱ་རཀྵནྟུ། ཨོཾ་ཀཱ་ཡ་དཱེ་བ་པ་ར་ཨརྫུ་ན་བཱ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ། ཛ། ནགས་རི་མཐོ་བརྗིད་ལ་བརྟེན་པའི། །ཡུལ་སྐྱོང་སྐུ་ལྷ་ཉག་དཀར་ཅན། །དཀར་འཛུམ་དུང་རྟ་གཡུ་རྔོག་བཅིབས། །དངུལ་ཁྲབ་དངུལ་རྨོག་ལྕགས་ཕུབ་མཛེས། །དར་དཀར་བ་དན་གཏེར་བུམ་བསྣམས། །རེས་འགའ་ཤེལ་གྱི་ཉག་ཕྲན་དང་། །སྦ་དཀར་གནམ་རུ་ཟུང་དུ་སྦྱོར། །ཡུམ་མཆོག་ཉ་ལྕམ་དཀར་མོ་ནི། །མདའ་དར་གཏེར་བུམ་ཉ་སྦལ་ཞོན། །དགའ་ན་འབྲུ་ནོར་ལོངས་སྤྱོད་སྤེལ། །ཁྲོས་ན་ལོ་ཉེས་ནོར་གོད་གཏོང་། །ཁྱེད་ཅག་འཁོར་དང་བཅས་རྣམས་ལ། །བསང་མཆོད་ཡེ་ཤེས་བདུད་རྩིའི་སྤྲིན། །དཀར་གཏོར་རྩི་བཅུད་བྲན་པ་དང་། །གཡག་ལུག་བྱ་ར་གཟུགས་འགྲོས་དང་། །ཆང་ཕུད་འོ་སྐྱེམས་འབྲུ་ཟས་འབུལ། །བཞེས་ནས་རབ་ཏུ་དགྱེས་མཛོད་ལ། །གཞི་བྱེས་ཀུན་གྱི་བསྲུང་མ་གྱིས། །ལོ་ལེགས་ཕྱུགས་ནོར་འཕེལ་བ་དང་། །བསམ་དོན་འགྲུབ་པའི་ཕྲིན་ལས་མཛོད།། ཅེས་དཀར་གཏོར་ལྷོ་ནུབ་མཚམས་སུ་ཡར་མཆོད། ཡང་ན་སོ་སོར་བྲན་གསོ་བྱ་ཞིང་ཚར་གྲངས་ཅི་ལྕོགས་རྗེས་སུ་ཐམས་ཅད་བསང་ཐབ་ཏུ་འབུལ་ལོ། ཞེས་ཡུལ་ལྷ་དང་འཁོན་འགྲས་སོང་བ་སླར་བསྡུམ་པའི་ཐབས་ཟབ་མོ་ལྷ་མིའི་མཐུན་སྦྱོར་ཞེས་བྱ་བ་འདི་ཡང་ཆོས་གྲོགས་རྡོ་རྗེའི་མཆེད་པོ་བཛྲ་ཤྲཱི་དྷ་རས་ནན་ཆེར་བསྐུལ་ངོར། ཡན་ལག་དང་པོའི་མིང་ཅན་སྤྲུལ་ཟོབ་དེས་ཕུལ་བ་དོན་དང་ལྡན་པར་གྱུར་ཅིག དགེའོ།། དགེའོ།། དགེའོ།། མཆོད་རྟེན་ཡུལ་ལྷ་སྤྱི་བསང་།༄༅། མཆོད་རྟེན་ཡུལ་ལྷའི་བསང་བསྡུས་འདོད་དོན་ལྷུན་གྲུབ་བཞུགས། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། མདོ་སྨད་རྒྱལ་མོ་ཚ་བ་རོང་། །མཆོད་རྟེན་ཞེས་གྲགས་འཛིན་མའི་ཆར། །གནས་ཤིང་བརྟེན་པའི་ཟོ་དོར་གཙོ། །བཀྲ་ཤིས་སྟ་སྙན་རྨ་ལྷ་ཕྱུག །གཉན་པོ་སོ་ལོ་རྨ་དུང་མཚོ། །དགྱེས་ལྕམ་ཕྱུག་མོ་ལ་སོགས་པའི། །ཕྱོགས་འདིར་གཉུག་མར་གནས་པ་རྣམས། །འཁོར་དང་བཅས་ཏེ་འདིར་བྱོན་ལ། །བསང་མཆོད་འདོད་དགུའི་སྤྲིན་ཆེན་པོ། །དགྱེས་ཤིང་བརྩེ་བས་བཞེས་སུ་གསོལ། །བཞེས་ནས་དུས་མིན་ཁ་ཆར་རླུང་། །གཅན་སྤྱང་གག་པ་ལ་སོགས་པའི། །གདུག་རྩུབ་གནོད་པའི་སྦྱོར་བ་སོལ། །ཆོས་དང་མཐུན་པའི་སྡོང་གྲོགས་མཛོད། །ཁྱེད་རྣམས་རྣམ་སྣང་ལོ་ཙཱ་དང་། །གཡུ་སྒྲ་སྙིང་པོ་ཀརྨ་པ། །ཁྲག་འཐུང་དཔའ་བོ་ཡབ་སྲས་སོགས། །རིག་འཛིན་བརྒྱུད་པའི་བཀའ་དམ་བཞིན། །སྔ་འགྱུར་བསྟན་དང་དེ་འཛིན་སྤེལ། །ལྗོངས་འདིའི་མི་ནོར་བསྲུང་སྐྱོབས་མཛོད། །ཁྱད་པར་རྣལ་འབྱོར་ཡོན་མཆོད་ཀྱིས། །གང་བརྩམས་འདོད་དོན་ལྷུན་གྲུབ་མཛོད།། ཅེས་མཆོད་རྟེན་ཡུལ་ལྷའི་བསང་བསྡུས་འདོད་དོན་ལྷུན་གྲུབ་འདི་ནི་སྔགས་བན་འཇིགས་རྣམ་པས་བྲིས། ཤོག་བཞིའི་ཡུལ་ལྷ་སྤྱི་བསང་།༄༅། ཤོག་བཞི་ཡུལ་ལྷའི་བསང་བསྡུས་འདོད་འབྱུང་ནོར་བུ་བཞུགས། བསང་རྫས་རྣམས་རཾ་ཡཾ་ཁཾ་གིས་སྦྱང་། ཨོཾ་ཨཱཿཧཱུྃ། ཀྱེ། ངོ་བོ་ཀ་དག་སྐྱེ་མེད་ཆོས་སྐུའི་དབྱིངས། །སྲིད་ཞི་མི་དམིགས་ཡེ་ནས་མཉམ་ཉིད་ངང་། །རང་བཞིན་འགྱུར་མེད་ལྷུན་གྱིས་གྲུབ་པའི་གདངས། །དབྱིངས་དང་ཡེ་ཤེས་ལོངས་སྤྱོད་མ་འདྲེས་རྫོགས། །ཐུགས་རྗེ་འགགས་མེད་ཁྱབ་བརྡལ་རོལ་བའི་རྩལ། །འཁོར་འདས་སྒྱུ་མའི་ཆོ་འཕྲུལ་ཅིར་ཡང་སྣང་། །སྲིད་པའི་འཇིགས་སྒྲོལ་དཀོན་མཆོག་སྲིད་ཞིའི་མགྲོན། །བར་ཆད་ཀུན་སེལ་མགོན་པོ་ཡོན་ཏན་མགྲོན། །དྲིན་ལན་ཆགས་པའི་རིགས་དྲུག་སྙིང་རྗེའི་མགྲོན། །ཤ་མཁོན་གཉེར་བའི་བགེགས་རིགས་ལན་ཆགས་མགྲོན། །མཆོད་དང་སྦྱིན་པའི་ལོངས་སྤྱོད་བཞེད་དགུའི་སྤྲིན། །རྣམ་སྨིན་ལན་ལ་རེ་བའི་ཡོན་མཆོད་ཀུན། །ཡང་དག་དོན་ལ་གཅིག་ལས་ཐ་མི་དད། །སྐྱེ་འགག་གནས་མེད་དངོས་ཞེན་སྤྲོས་ལས་འདས། །འོན་ཀྱང་རྟེན་འབྲེལ་སྤྲོས་པ་མི་འགལ་ཕྱིར། །ཡུམ་ལྔའི་མཁའ་ལས་བྱུང་བའི་མཆོད་སྦྱིན་རྫས། །དབྱིངས་ལྔའི་རང་རྩལ་འབྱུང་བའི་སྤྲོ་བསྡུ་ཡིས། །མཚན་འཛིན་གཙང་དམེའི་རྟོག་པ་དངོས་མེད་སྦྱོང་། །སྐུ་གསུམ་ཡོངས་འདུས་རྡོ་རྗེ་འབྲུ་གསུམ་གྱིས། །ཟག་མེད་བདུད་རྩིར་བྱིན་གྱིས་བརླབ་པ་ཡིས། །བསང་མཆོད་བརྔན་སྦྱིན་འདོད་འབྱུང་དུད་པའི་སྤྲིན། །འཆི་མེད་ལམ་ཡངས་དོག་པོར་བྱེད་པ་འདིས། །མཆོད་ཡུལ་སྲིད་ཞི་ཡོན་ཏན་མགྲོན་རྣམས་བསང་། །སྦྱིན་ཡུལ་རིགས་དྲུག་ལན་ཆགས་མགྲོན་རྣམས་བསང། །གངས་ཅན་བོད་ཀྱི་སྲུང་མ་ཐམས་ཅད་བསང་། །མདོ་ཁམས་ཟལ་མོ་སྒང་གི་ཟོ་དོར་བསང་། །ཡུལ་སྐྱོང་གཙོ་བོ་རྡོ་རྗེ་གཡུ་ཁྲོམ་བསང་། །གཡུ་སྙིང་དགྲ་བླ་མི་མགོན་དཀར་པོ་བསང་། །གཡུ་ཉིན་གནས་སྲུང་དངུལ་རྫི་གཡུ་མཚོ་བསང་། །གཡུ་སྲིབ་གཏེར་བདག་སྐུ་བླ་སྲིད་རྒྱལ་བསང་། །སྲས་མཆོག་སྟོབས་ལྡན་ར་མཁར་སྨུག་པོ་བསང་། །ལོངས་སྤྱོད་མཛོད་འཛིན་རྡོ་རྗེ་གྲགས་པ་བསང་། །ཆོས་འཁོར་སྐྱོང་མཛད་རྒྱལ་བ་སེང་གེ་བསང་། །ས་གཞིར་དབང་མཛད་མཛོད་གླང་སྨུག་པོ་བསང་། །ལོ་ཏོག་སྤེལ་སྲུང་རི་བྲོའི་མཚོ་བདག་བསང་། །ར་ཁང་ལ་སོགས་ཡུལ་ལྷ་གཞི་བདག་བསང་། །ཁྱད་པར་སྐྱིད་ཀྱི་ཆུ་མིག་ལ་གནས་པའི། །རྗེ་རིགས་ཀླུ་ཡི་སྲས་མོ་བདེ་ལྡན་མ། །དཀར་སེར་ཀླུ་ཤིང་མེ་ཏོག་ཟས་གཞོང་བསྣམས། །སྦྲུལ་མཇུག་སྔོ་ལྗང་ཨུཏྤལ་སྟེང་དུ་འཁྱིལ། །གཡས་སུ་ཡབ་རྗེ་ཆར་འབེབས་དཀར་སྔོན་མདོག །ནོར་བུ་བུམ་འཛིན་གསེར་མདོག་སྦྲུལ་མཇུག་ལྡན། །གཡོན་གྱི་ཡུམ་ཆེན་སྤྲིན་གྱི་ལྷ་མོ་དཀར། །ནོར་བུ་སྤྲིན་གྱི་རྡུལ་འཛིན་སྦྲུལ་མཇུག་སྔོ། །གསུམ་ག་དར་དང་རིན་ཆེན་རྒྱན་གྱིས་མཛེས། །རང་མདོག་སྦྲུལ་གྱི་གདེངས་ཀ་ལྔ་ཡིས་བརྒྱན། །ཁྱེད་རྣམས་སོ་སོར་ཆུ་བདག་འཁོར་དང་བཅས། །མཐུན་རྫས་བཟང་ཤིང་སྣ་ཚོགས་དུད་པས་བསང་། །འཁོར་འདས་མགྲོན་རིགས་འདིར་གནས་ཀླུ་དང་བཅས། །འདོད་དགུ་འབྱུང་ཞིང་རེ་བ་སྐོང་གྱུར་ཅིག །ཀོ་ལོང་ཕྲག་ཏོག་གདུག་རྩུབ་ཞི་གྱུར་ཅིག །ལོ་ཉེས་སད་སེར་མུ་གེ་མེད་པར་ཤོག །ལོ་འཁྲུགས་གོད་ཡམ་དུས་འཁྲུགས་མི་འབྱུང་ཤོག །ལོ་ལེགས་ཕྱུགས་འཕེལ་བསམ་དོན་ལྷུན་གྲུབ་མཛོད། །བདེ་སྐྱིད་རྫོགས་ལྡན་དཔལ་ལ་རྟག་སྤྱོད་ཤོག །ཅེས་ཡུལ་ལྷའི་བསང་བསྡུས་འདོད་འབྱུང་ནོར་བུ་ཞེས་པ་འདི་ཡང་བླ་མ་དོན་གསལ་གྱིས་བསྐུལ་ངོར། མགོ་སྤྲུལ་བས་སྤེལ་བ་དགེའོ།། མུ་རྡོའི་བསང་བསྡུས།༄༅། ལྷ་སྲས་རྨུ་རྡོའི་བསང་བསྡུས་ནི། ཀྱཻ། རྒྱལ་དབང་པདྨ་བཻ་རོ་ཡི། །བཀའ་ཉན་རིག་པའི་དབང་ཕྱུག་མཆོག །ལྷ་སྲས་མུ་རྡོ་གཉན་པོ་ཆེ། །གསང་ཡུམ་འཁོར་ཚོགས་མ་ལུས་ཀུན། །གསོལ་ལོ་མཆོད་དོ་ཐུགས་དམ་བསྐང་། །ཕྲིན་ལས་རྣམ་བཞི་ལྷུན་གྲུབ་མཛོད།། ཅེས་པ་འདི་མུ་རྡོ་ལ་བསྐོར་བར་སོང་སྐབས། གནས་མཆོག་དེ་ཉིད་ཀྱི་ལྷ་ཞལ་ཕྲིན་ལས་སུ་གསོལ་བ་དགེ་ཞིང་བཀྲ་ཤིས་པར་གྱུར་ཅིག །། ཚེ་རབས་རྗེས་འཛིན་གསོལ་འདེབས།༄༅། ཚེ་རབས་རྗེས་འཛིན་གསོལ་འདེབས་འབད་མེད་མྱུར་གྲོལ་བཞུགས། ཨེ་མ་ཧོ། དཀོན་མཆོག་རྒྱལ་ཀུན་ཡེ་ཤེས་མཁའ་དབྱིངས་ལས། །བརྩེ་ཆེན་ཐུགས་རྗེའི་དཀྱིལ་འཁོར་ཡོངས་རྫོགས་ཤིང་། །ཕུན་ཚོགས་ཡོངས་འདུས་སྣང་བ་འབུམ་བརྡལ་བས། །ལྷུན་གྲུབ་འགྲོ་དོན་མཛད་ལ་གསོལ་བ་འདེབས། །དབྱངས་ཅན་ངག་ལ་དབང་འབྱོར་ཟིལ་གནོན་དང་། །བསོད་ནམས་སྟོབས་ཀྱིས་ཆོས་སྐལ་འབད་མེད་ཐོབ། །མཁྱེན་བརྩེ་ནུས་ལྡན་ཐབས་ཀྱིས་རྒྱལ་བསྟན་འཛིན། །ཕྱོགས་ལས་རྣམ་རྒྱལ་ཁྱེད་ལ་གསོལ་བ་འདེབས། །ཆོ༵ས་དབྱི༵ངས་ཡེ་མཛོད་ཀུ༵ན་གས༵ལ་ཡིད་བཞིན་དབང་། །བློ༵་གྲོ༵ས་དཔལ་ཡོན་རྒྱ༵་མཚོ༵འི་འབྱུང་གནས་མཆོག །དག་སྣང་ཆོས་དབང་ལུང་ཟིན་སྤྲུལ་པའི་སྐུ། །འཇིགས་མེད་རྣམ་རྒྱལ་བཟང་པོར་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཚེ་རབས་སྐྱེ་བའི་ཕྲེང་བ་ཐམས་ཅད་དུ། །མི་འབྲལ་ཐེག་ཆེན་ཆོས་ལ་ལོངས་སྤྱོད་ནས། །སྐུ་གསུམ་རྫོགས་པའི་སངས་རྒྱས་མྱུར་ཐོབ་ཤོག །ཅེས་པའང་དད་ལྡན་འགའ་ཡིས་ནན་བསྐུལ་ངོ་མི་ལྡོག་ཙམ་དུ་མགོ་སྤྲུལ་འཇིགས་རྣམ་པས་སོ། |