 རྒྱལ་དབང་ལྔ་པ་ཆེན་པོའི་གསུང་འབུམ།གླེགས་བམ། ཞ༽ངག་དབང་བློ་བཟང་རྒྱ་མཚོ།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐམས་ཅད་མཁྱེན་པ་ལྔ་པ་ཆེན་པོའི་གསུང་འབུམ་པོད་ཞ་པའི་དཀར་ཆག― GLG021_Page_0001 ―
[མ་དཔེ་གཟིགས་ན་འདིར་གནོན།]
ཐམས་ཅད་མཁྱེན་པ་ལྔ་པ་ཆེན་པོའི་གསུང་འབུམ་པོད་ཞ་པའི་དཀར་ཆག་བཞུགས་སོ། ། ― GLG021_Page_0002 ―
[མ་དཔེ་གཟིགས་ན་འདིར་གནོན།]
སྨོན་ལམ་ཤིས་བརྗོད་བརྟན་བཞུགས་སོགས་ཀྱི་ཚིགས་སུ་བཅད་པ་རབ་དཀར་དགེ་བའི་ཆུ་ཀླུང་ལས་གླེགས་བམ་དང་པོར་ཤོག་གྲངས། ༢༩༣ སྨོན་ལམ་ཤིས་བརྗོད་བརྟན་བཞུགས་སོགས་ཀྱི་ཚིགས་སུ་བཅད་པ་རབ་དཀར་དགེ་བའི་ཆུ་ཀླུང་ལས་གླེགས་བམ་གཉིས་པར་ཤོག་གྲངས། ༡༠༨ ༧རྒྱལ་བ་ཐམས་ཅད་མཁྱེན་པ་བཅུ་བཞི་པ་ཆེན་པོའི་མཛད་པའི་སྨོན་ཚིགས་ལ་ཤོག་གྲངས། ༣ ཁྱོན་བསྡོམས། ༤༠༤ དྲིན་ཅན་བླ་མ་དཀོན་མཆོག་ཆོས་འཕེལ་གྱིས་རྒྱལ་དབང་བཙོང་ཁ་པ་ཆེན་པོའི་སྐུ་བརྙན་བཞེངས་པའི་བསྟོད་སྨོན་སོགས།― GLG021_Page_0003 ―
[མ་དཔེ་གཟིགས་ན་འདིར་གནོན།]
སྨོན་ལམ་ཤིས་བརྗོད་བརྟན་བཞུགས་སོགས་ཀྱི་ཚིགས་སུ་བཅད་པ་རབ་དཀར་དགེ་བའི་ཆུ་ཀླུང་ལས་གླེགས་བམ་དང་པོ་བཞུགས་སོ། ། ― GLG021_Page_0004 ―
[མ་དཔེ་གཟིགས་ན་འདིར་གནོན།]
པྲཾ ཤུ བྷཱ ནཱཾ ན དྱ ཀྵ ཡ སྱ ནི དྷེ རཱ དི པུ སྟ ཀ པྲ ཎི དྷི རྨཾ གལ ཙྱཿ སྠི རཱ སཱི ན དྲེ རྒཱ། བི ཧ ར ཏི སྨ། །རྒྱལ་ཀུན་མཁྱེན་པའི་རང་བཞིན་ཀུནྡའི་དཔྱིད། །བསིལ་ལྡན་ལུས་ཕྲའི་མངལ་དུ་ལྕི་བའི་ཁུར། །ཟུར་ཕུད་ལྔ་པ་མི་ཡི་ལང་ཚོའི་རྩལ། །གྲུབ་པའི་རྣམ་འདྲེན་འཇམ་དཔལ་སྙིང་པོ་རྒྱལ། །མཐའ་ཡས་ཆོས་ཀྱི་གནས་ལུགས་བསིལ་ཟེར་ཅན། །རྙོག་བྲལ་བློ་གྲོས་ཆུ་མཚོར་རབ་ཤར་བས། །སྐལ་བཟང་དབུས་གྱུར་བྲམ་ཟེ་རི་བོང་འཛིན། །མཆིས་ཞེས་གྲགས་པའི་(༡ན) ― GLG021_Page_0005 ―
[མ་དཔེ་གཟིགས་ན་འདིར་གནོན།]
དབྱངས་སྙན་མགྲིན་པར་ལེན། །སྟོབས་བཅུ་མངའ་བའི་གསུང་རབ་ཟ་མ་ཏོག །དྲང་ངེས་སྲ་བ་མི་ཕྱེད་ཕྱག་རྒྱའི་མདུད། །ཅིག་ཅར་འགྲོལ་མཁས་ཀུན་མཁྱེན་བཙོང་ཁ་པ། ཁྱོད་ཀྱི་དཔེ་ཟླར་འོས་པ་སྲིད་འདིར་ཅི། །གང་གི་སྣང་བརྙན་སྔོན་མེད་མགྲིན་བཅུའི་གཟུགས། །སྟོང་ཁུན་སྒེག་མོས་ལེགས་བསྐྲུན་གན་གོས་ཀྱི། །མན་ཤེལ་གསར་པའི་རྩིག་ངོས་ལ་ཤར་འདི། །དཔྱོད་ལྡན་ཧ་ནུ་མནྠ་གཟིགས་མོར་མཚར། །མཚན་དཔེའི་དཔལ་ཀུན་ཡོངས་རྫོགས་ས་འཛིན་དབང༌། །མཚམས་སྤྲིན་ཞུན་མས་ལན་བརྒྱར་བྱུགས་སོ་ཞེས། །ལྷུན་པོ་སྐྲག་སྟེ་རྒྱ་མཚོའི་ཚོགས་རྣམས་ཀྱི། །ཕྱོགས་ཀུན་མ་ལུས་དོག་པོར་བགྱིས་སམ་སྙམ། །ཕུལ་བྱུང་དགེ་མཚན་འཁྲི་ཤིང་གིས་འཁྱུད་པའི། །ཕུན་ཚོགས་གཟུགས་སྐུའི་ཡོངས་འདུ་ས་བརྟོལ་འདི། །ཐུབ་བསྟན་འཛིན་མར་གནས་པ་དེ་སྲིད་དུ། །འགྱུར་མེད་གཡུང་དྲུང་གཞི་ལ་གནས་གྱུར་ཅིག །ཚུལ་འདིར་ཨུཏྤལ་དཀར་པོའི་འདབ་མ་བཞིན། །(༢བ) ― GLG021_Page_0006 ―
[མ་དཔེ་གཟིགས་ན་འདིར་གནོན།]
མི་དམན་ལྷག་པའི་བསམ་པས་ཡོངས་ཟིན་ནས། །ལུས་ངག་ཡིད་ཀྱི་ངལ་བསྟེན་བདོག་པ་ཡི། །ཕན་པར་རབ་བསྒྲུབས་འབྱམས་ཀླས་སྐྱེ་རྒུའི་ཚོགས། །དག་པའི་རང་བཞིན་ངོ་མཚར་རྒྱ་མཚོ་ཡི། །ཡོངས་གང་རྨད་བྱུང་བཀོད་པས་ཁྱད་འཕགས་པའི། །ཞིང་ཁམས་མཆོག་དེར་མ་ལུས་ཉེར་དྲངས་ནས། །ཟབ་རྒྱས་ཆོས་ཀྱི་རོ་ལ་སྤྱོད་གྱུར་ཅིག །དགེ་ཚོགས་འོད་ཟེར་འབུམ་ཕྲག་འཕྲོས་པ་ཡིས། །བསྟན་འགྲོའི་ཕན་བདེའི་པད་ཚལ་ལེགས་རྒྱས་ཤིང༌། །རབ་དཀོན་རྒྱལ་བ་མཆོག་གི་དམ་པའི་ཆོས། །ཡོངས་འཕེལ་འཇམ་མགོན་བླ་མ་ཞབས་བརྟན་ཤོག །ཅེས་འཇམ་དབྱངས་གཞོན་ནུ་ངུར་མིག་གི་རྣམ་རོལ་ཅན་རྒྱལ་བའི་གསུང་རབས་ཀྱི་དྲང་ངེས་འབྱེད་པ་ལ་གཞན་དྲིང་མི་འཇོག་པ་མཁས་པའི་དབང་ཕྱུག་དྲིན་ཅན་བླ་མ་དཀོན་མཆོག་ཆོས་འཕེལ་གྱིས་རྒྱལ་བའི་དབང་པོ་ཙོང་ཁ་པ་ཆེན་པོའི་སྐུ་བརྙན་གན་གོས་བཟང་བསྒྲིགས་ཀྱི་རྒྱུ་ལས་བཞེངས་པ་གནང་བའི་དུས། བསྟོད་པ་སྨོན་ལམ་ཟུང་འབྲེལ་ཞིག་དགོས་ཞེས་བཀའ་གནང་བ་སྤྱི་བོས་ནོད་དེ། ཡུལ་ལྷོ་ཕྱོགས་སྨན་ལྗོངས་སུ་བྱུང་བའི་སྙན་ངག་མཁན་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཇ་ཡུན་གཅིག་ལ་ཕྲལ་དུ་སྦྱར་བའོ། །དགེ་ལེགས་ཆུ་གཏེར་ཆེན་པོའི་ཀློངས་ཡངས་ལས། །རབ་མཛེས་མཚན་དཔེའི་འོད་ཟེར་སྟོང་འབར་བ། །ཕུལ་བྱུང་གཟུགས་སྐུའི་རྟ་(༣ན) ― GLG021_Page_0007 ―
[མ་དཔེ་གཟིགས་ན་འདིར་གནོན།]
ལྗང་དབང་པོ་ཁྱོད། །ལུས་ཅན་སྦྲང་རྩིའི་རྒྱལ་མཚན་ཀུན་གྱི་གཉེན། །རྒྱུད་མངས་གླུ་ལས་ཇི་སྙེད་ཆོས་ཀྱི་སྒྲ། །སྐལ་བཟང་རྣ་བར་སྒྲོག་པ་གནྡྷ་རྦྷ། །མེས་པོའི་མཐུ་ལས་སྤྲུལ་སྙམ་འཕྱང་མོ་ཉུག །སྟེར་བྱེད་གསུང་དེ་ཡན་ལག་དྲུག་ཅུའི་དབྱངས། །རྒྱལ་ཀུན་མཁྱེན་རྩེའི་རང་བཞིན་ལུས་འདེགས་ཀྱི། །ཕ་མཐའ་གཟིགས་མོར་སྤྱོད་ཕྱིར་ངལ་བའི་ཁུར། །ཁྱེར་ན་བརྗོད་བྲལ་གང་ཐུགས་འཇལ་བྱེད་པ། །བྱིས་པའི་ངང་ཚུལ་ཅན་གྱི་བློ་འདི་མཚར། །རྒྱལ་སྲས་དམ་པ་ཡོངས་ཀྱི་ཏོག་གྱུར་པའི། །རྣམ་དཀར་ལེགས་ལམ་འབུམ་དུ་འཛག་པ་ཅན། །གང་གི་མི་འཇིགས་ཁྲི་ལ་བགྲོད༌བྱེད་ཟུང༌། །རབ་བཀོད་མི་ཕམ་མགོན་པོའི་སྣང་རྙན་དྲུང༌། །མཆོག་ཏུ་གུས་པའི་བློ་ཡི་དགེ་སྦྱོང་དཔལ། །དཔལ་ལྡན་ཤཱཀྱའི་སྲས་མཆོག་ཡོ་བྱད་ཀུན། །ཀུན་ནས་ལུས་པ་མེད་པར་ཕུལ་བའི་དགེ །དགེ་ཚོགས་རྒྱ་མཚོའི་གཏིང་མཐར་བསྙེགས་པ་འདིས། །བློ་གྲོས་གསེར་ཟངས་ཐོག་མེད་འཁོར་ལོ་ཡིས། །ཐུབ་བསྟན་གླིང་བཞིར་དབང་བསྒྱུར་གྲགས་པའི་རྔ། །སྲིད་འདིའི་ཁྱོན་ཀུན་ཁྱབ་པ་ལུང་རྟོགས་ཀྱི། །རིང་ལུགས་སྡེ་བཞིའི་དཔལ་འབྱོར་རབ་རྒྱས་ཤིང༌། །ལེགས་བྱས་ལུས་ཕྲའི་ལྕགས་ཀྱུས་བཀུག་པ་ཡིས། །གངས་ཅན་ཕན་བདེའི་འདོད་པ་རབ་འཇོ་བ། །རྣམ་པར་དོད་པ་རྫོགས་ལྡན་གསར་པའི་མགྲོན། །བརྒྱ་ཕྲག་སྒོ་འཕར་ཕྱེ་བས་ཁྱབ་གྱུར་ཅིག །(༣བ) ― GLG021_Page_0008 ―
[མ་དཔེ་གཟིགས་ན་འདིར་གནོན།]
ཅེས་པ་འདི་ནི་ལོ་པ་ཆོས་རྗེ་དགེ་འདུན་རྣམ་རྒྱལ་འོལ་ཁ་རྫིང་ཕྱིའི་མཁན་ཐོག་འབྱོར་ཕྲལ་བྱམས་པའི་སྐུ་བརྙན་ཡེ་ཤེས་སེམས་པ་དངོས་སུ་བཞུགས་པ་གང་དེ་ལ། སྣམ་སྦྱར་སོགས་དགེ་སྦྱོང་གི་རྟགས་འགའ་ཞིག་འབུལ་བར་སྨོན་ལམ་ཞིག་དགོས་ཞེས་བསྐུལ་བའི་ངོར། ཡུལ་ལྷོ་ཕྱོགས་གི་སྨན་ལྗོངས་སུ་བྱུང་བའི་སྙན་ངག་མཁན་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་འཕྲལ་དུ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ། །ན་མཿ སཾ་བུདྡྷཱ་མི་ཏཱ་བྷཱ་ཡ། །མདུན་གྱི་ནམ་མཁར་རང་སྣང་ཞིང་ཁམས་མཆོག །ཡིད་འོང་ལྗོན་ཤིང་དག་གིས་རབ་མཛེས་ཤིང༌། །དགའ་བདེར་ལོངས་སྤྱོད་ལྷ་མིས་ཡོངས་གང་བའི། །དབུས་སུ་རིན་ཆེན་ཁྲི་སྟེང་ཆུ་སྐྱེས་དང༌། །ཉི་ཟླའི་དཀྱིལ་འཁོར་རབ་ཏུ་རྒྱས་པའི་རྩེར། །སྟོབས་བཅུ་མངའ་བ་མགོན་པོ་འོད་དཔག་མེད། །མཚན་དཔེའི་རྒྱན་ལྡན་སྤྲུལ་སྐུའི་སྣང་བརྙན་ཅན། །པདྨ་རཱ་གའི་མདངས་ལྟར་དམར་བའི་སྐུ། །ཕྱག་གཉིས་མཉམ་བཞག་རྡོ་རྗེ་དཀྱིལ་མོ་ཀྲུང༌། །བཟོད་པར་དཀའ་བ་ཕུལ་བྱུང་གཟི་བརྗིད་ཀྱིས། །འདོམ་གང་འོད་ཟེར་ཁོར་ཡུག་དྲ་བའི་དབུས། །རྒྱལ་སྲས་རྒྱ་མཚོའི་འཁོར་གྱིས་མཛེས་པར་གྱུར། །ཆོས་དབྱིངས་བདེ་བའི་མཁའ་ལ་གནས་བཞིན་དུ། །གྲངས་མེད་འགྲོ་ལ་རྗེས་བརྩེའི་རླུང་ཤུགས་ཀྱིས། །གཞན་དོན་དུས་ལས་ཡོལ་བ་མེད་གྱུར་པ། །བཅོམ་ལྡན(༤ན) ― GLG021_Page_0009 ―
[མ་དཔེ་གཟིགས་ན་འདིར་གནོན།]
འཁོར་བཅས་འདིར་གཤེགས་གཉིས་མེད་གྱུར། །མཐའ་ཡས་ཚོགས་གཉིས་ཆུ་གཏེར་ཆེན་པོ་ལས། །ཡེ་ཤེས་མཆོག་གི་བདུད་རྩིའི་ཟ་མ་ཏོག །མཐའ་བྲལ་འགྲོ་བ་ཀུན་གྱི་སྨན་ཡོན་དུ། །སྩོལ་མཛད་རྐང་གཉིས་གཙོ་བོར་གུས་ཕྱག་འཚལ། །ཨུཏྤལ་སྡོང་བུ་བཟང་པོའི་དྲི་ཚོགས་བསྟར། །གསལ་བྱེད་མར་མེ་དྲི་ཆབ་རྦ་རླབས་འཁྲུག །རོ་བརྒྱའི་ཟས་དང་སྙན་འགྱུར་རོལ་མོ་སོགས། །དངོས་བཤམས་ཡིད་སྤྲུལ་མཆོད་པའི་ཚོགས་རྣམས་འབུལ། །ཐོག་མ་མེད་ནས་ད་ལྟའི་བར་དག་ཏུ། །སྡོམ་གསུམ་རྩ་བ་ཡན་ལག་དམ་ཚིག་ལས། །ཉམས་པས་མཚོན་ཏེ་མདོར་ན་མཚམས་མེད་ལྔ། །མི་དགེ་བཅུ་སོགས་སྡིག་པའི་ལས་ཀུན་བཤགས། །རྣམ་འདྲེན་ཐེག་གསུམ་སློབ་མའི་ཚོགས་རྣམས་ཀྱིས། །རང་གཞན་དོན་ཕྱིར་བསྒྲུབ་པའི་ལུང་རྟོགས་ཆོས། །སྐྱེ་དགུའི་ལྷག་བསམ་གྱིས་བསྐྲུན་དགེ་ཚོགས་ལ། །བཅོས་མིན་བསམ་པ་ཐག་པས་རྗེས་ཡིད་རང༌། །གདུལ་བྱའི་ཁམས་དང་བསམ་པ་ཇི་བཞིན་དུ། །སྟོན་མཛད་སངས་རྒྱས་སྲས་དང་བཅས་པ་རྣམས། །མི་འགྱུར་རྡོ་རྗེའི་གཞི་ལ་རྟག་བཞུགས་ཤིང༌། །རྒྱུ་འབྲས་ཐེག་པའི་ཆོས་འཁོར་བསྐོར་དུ་གསོལ། །ཐུན་མོང་ཐུན་མོང་མིན་པའི་གསུང་རབ་རྣམས། །ཐོས་བསམ་སྒོམ་སོགས་རབ་དཀར་དགེ་ལེགས་ཚོགས། །འདི་དང་ཚེ་རབས་དུ་མར་བསགས་པ་རྣམས། །ཀུན་མཁྱེན་ཡེ་ཤེས་ཐོབ་པའི་རྒྱུ་རུ་བསྔོ། །མི་འཛད་གཏིང་མཐའ་(༤བ) ― GLG021_Page_0010 ―
[མ་དཔེ་གཟིགས་ན་འདིར་གནོན།]
བྲལ་བ་འཁོར་བའི་མཚོར། །ཉམ་ཐག་ལུས་ཅན་བྱང་གྲོལ་ལ་འགོད་པའི། །དམ་བཅའི་ཁུར་ལྡན་མགོན་པོ་འོད་དཔག་མེད། །སྨྲེང་གི་གསོལ་ལ་རྣམ་དག་སྙན་གྱིས་གསོན། །བདག་དང་རིང་ནས་ཕན་བྱེད་མར་གྱུར་ཚོགས། །བླང་དོར་ཚུལ་བཞིན་བལྟ་ལ་མིག་ལྡོང་སྟེ། །དུག་གསུམ་ཟས་ལ་སྲེད་པས་ཐར་པའི་སྲོག །ཡོངས་བྲལ་དུཿཁས་མནར་འདིར་བརྩེ་བས་དགོངས། །གང་ཞིག་རྒྱལ་རྣམས་ཆོས་དབྱིངས་ཞི་བའི་རོར། །དབྱེར་མེད་བཞུགས་ལ་དག་པའི་གནས་ཀྱིས་ཅི། །དེ་ཕྱིར་འཁོར་འཁྱམ་སྐྱེ་བོ་འདྲེན་སླད་དུ། །ངོ་མཚར་རྒྱ་མཚོའི་གནས་དེ་བསྟན་མིན་ནམ། །སྤྲུལ་པའི་ཞིང་ལ་ཚད་བཟུང་མ་མཆིས་ཀྱང༌། །མི་མཇེད་ཁམས་ནས་ཆུ་ལྷའི་ཕྱོགས་ཉིད་དུ། །འཁོད་མཉམ་རིན་ཅེན་དུ་མས་སྤྲས་པའི་གཞིར། །ནོར་བུའི་རྡུལ་མངས་མཐོར་བརྩེགས་ས་འཛིན་ཅན། །གསེར་དངུལ་བཻཌཱུར་ཤེལ་སྤུག་མུ་ཏིག་རྡོའི། །རྩ་སྡོང་ཡལ་ག་ལོ་འདབ་མེ་ཏོག་འབྲས། །དེ་ལྟའི་ལྗོན་ཤིང་གསེར་བུས་བསྐུལ་བ་ལས། །དྲི་ཡིས་ཡོངས་ཁྱབ་མེ་ཏོག་ཕྱོགས་ཀུན་འགེངས། ཁ་ཞེང་གཏིང་ཟབ་དལ་གྱིས་འབབ་པའི་ཀླུང༌། །རྙོག་མེད་གསེར་གྱི་བྱེ་མ་ཡོངས་བརྡལ་བ། །ཆུ་སྐྱེས་ཚོགས་སྤུད་འདབ་ཆགས་འཕུར་ལྡིང་རོལ། །ཙནྡན་ལ་སོགས་རྐང་འཐུང་འཕྲེང་བར་འཁྲིགས། །རྒྱལ་མཚན་བ་དན་བླ་བྲེ་རྔ་ཡབ་དང༌། །སྙན་པའི་རོལ་མོའི་ཚོགས་ཀྱིས་རབ་ཏུ་ཁེངས། །མཚན་དཔེའི་དཔལ་ལྡན་མངོན་ཤེས་རྫུ་འཕྲུལ་ཅན། །མི་ཟད་འདོད་པའི་ལོངས་(༥ན) ― GLG021_Page_0011 ―
[མ་དཔེ་གཟིགས་ན་འདིར་གནོན།]
སྤྱོད་མཐའ་ཀླས་པའི། །ལྷ་མིར་བཅས་དང་ཉན་ཐོས་བྱང་ཆུབ་སེམས། །དཔག་ཚད་སྟོང་དང་དྲུག་བརྒྱའི་བོང་ཚོད་ལྡན། །བརྗོད་བྲལ་རྒྱན་གྱིས་ལེགས་སྤྲས་ངོ་མཚར་ཤིང༌། །བྱང་ཆུབ་ལྗོན་པའི་དབང་པོ་གང་གི་དྲུང༌། །བདག་སོགས་འགྲོ་རྣམས་ལྔ་པའི་ལམ་ཞུགས་ཚེ། །ཐུགས་རྗེས་ཐོག་པ་མེད་པར་མི་འདྲེན་ན། །དག་ཞིང་འགྲུབ་བྱེད་ཚོགས་གསོག་སྨོན་ལམ་རྣམས། །བརྒྱ་ཕྲག་དཀའ་སྤྱད་མཛད་པའི་དགོས་པ་ཅི། །དྲི་མེད་འདབ་སྟོང་རྒྱས་པའི་སྦུབ་དག་ལས། །རྫུས་སྟེ་སྐྱེ་བ་བླངས་ནས་མགོན་ཁྱོད་ཀྱི། །ཡན་ལག་དྲུག་ཅུའི་དབྱངས་ཀྱི་བཀའ་སྩལ་ཆོས། །ཇི་བཞིན་ཐོས་བསམ་སྒོམ་པ་བྱེད་པར་ཤོག །གངས་རི་ཟླ་བ་ཆུ་སྐྱེས་རྩ་བ་ཡིས། །བསྒྲུན་མིན་རབ་དཀར་ལྷག་བསམ་ལས་འོངས་པ། །རྣམ་དག་སྨོན་པའི་གནས་འདི་མཆོག་གསུམ་གྱི། །ཐུགས་རྗེའི་མཐུ་ཡི་ཐོག་མེད་འགྲུབ་གྱུར་ཅིག །ཅེས་དག་པའི་ཞིང་བདེ་བ་ཅན་དུ་སྐྱེ་བའི་སྨོན་ལམ་འདི་ཡང༌། མཆོད་དཔོན་གྱི་ལས་འཛིན་དགེ་འདུན་དར་རྒྱས་ཀྱིས་བསྐུལ་བའི་ངོར། ཁམས་གསུམ་ཆོས་ཀྱི་རྒྱལ་པོ་བཙོང་ཁ་པའི་གསུང་སྒྲོས་ལས་བཏུས་སྟེ་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའོ། །ཕུལ་བྱུང་མཚན་དཔེ་དར་བབས་ཟ་མ་ཏོག །འཆི་བའི་དངོས་པོ་འཇོམ་བྱེད་ཟིལ་མངར་ཚོགས། །རབ་ཕྱུར་འདྲེན་མཆོག་ཚེ་དཔག་མེད་མགོན་གྱིས། །(༥བ) ― GLG021_Page_0012 ―
[མ་དཔེ་གཟིགས་ན་འདིར་གནོན།]
དེང་འདིར་སྨོན་པའི་འབྲས་བུ་སྩོལ་བར་མཛོད། །ཐུབ་བསྟན་དྲི་མེད་བློ་བཟང་རྒྱལ་བའི་བསྟན། །འཛིན་སྐྱོང་ལེགས་སྤེལ་སྙིང་སྟོབས་གོ་ཆ་ཅན། །ཆོས་སྲིད་འབྱོར་པའི་དཔལ་གྱུར་ཕྱོགས་ཀུན་ལས། །རྣམ་པར་རྒྱལ་འདི་རྡོ་རྗེ་ལྟར་བརྟན་ཤོག །རབ་དཀར་བདེ་ལེགས་སྐབས་གསུམ་དགའ་ཚལ་དུ། །བསོད་ནམས་ལང་ཚོ་རྒྱས་པ་དཔག་བསམ་ལྗོན། །གཡོ་མེད་རབ་ཏུ་བརྟན་པའི་ཁྲིམས་གཉིས་འབྲས། །སྐྱོང་མཁས་ས་དབང་འགྱུར་མེད་གནས་གྱུར་ཅིག །རྣམ་འདྲེན་མཆོག་གྱུར་རྒྱལ་དབང་བཙོང་ཁ་པའི། །དྲི་མེད་རིང་ལུགས་འདེགས་པ་སྲིད་ཀྱི་སྡེ། །རྩོད་དུས་འཁོར་ལོས་བསྒྱུར་རྒྱལ་ཆབ་སྲིད་རྣམས། །བརྟན་ཅིང་མངའ་ཐང་མཚན་ཇུས་རྒྱལ་གྱུར་ཅིག །བསླུ་མེད་མཆོག་གསུམ་ཆོས་སྲུང་རྒྱ་མཚོ་དང༌། །ཁྲིམས་ལྡན་འདུས་ཚོགས་སྨོན་གནས་ཉིན་བྱེད་ཀྱིས། །མི་མཐུན་མུན་པའི་སྨག་རུམ་དྲུང་ཕྱུང་ནས། །འདོད་དོན་འདབ་བརྒྱ་བཞད་པའི་བཀྲ་ཤིས་ཤོག །ཅེས་མཆོད་ཡོན་གཉིས་ཀྱི་བརྟན་བཞུགས་སྨོན་ལམ་ཚིགས་སུ་བཅད་པ་འདི་ཡང༌། རབ་འབྱམས་སྨྲ་བ་བློ་བཟང་ཆོས་གྲགས་ཀྱིས་བསྐུལ་བ་ལྟར། ཡུལ་ལྷོ་ཕྱོགས་སྨན་ལྗོངས་ཀྱི་ལྟེ་བར་སྐྱེས་པའི་བནྡེ་སྙན་ངག་མཁན་ངག་དབང་བློ་བཟང་རྒྱ་མཚོས་སྦྱར་བའོ། །དགེ་ལེགས་གཏེར་ཆེན་སླུ་མེད་མཆོག་གསུམགྱི། །མཁྱེན་བརྩེ་ནུས་པའི་མཐུ་ཡིས་ལུས་ཅན་ལ། བྱམས་པའི་བློ་ལྡན་ལེགས་བྱས་ཀུན་དགའི་དཔྱིད། །(༦ན) ― GLG021_Page_0013 ―
[མ་དཔེ་གཟིགས་ན་འདིར་གནོན།]
རྨད་བྱུང་ཡེ་ཤེས་ལྗོན་པ་གསར་པ་གང༌། །རྣམ་དཀར་དམ་ཆོས་སྒྲུབ་པའི་དགའ་སྟོན་ཆེད། །ཕུན་ཚོགས་བཟང་པོའི་ལས་ཀྱི་འཕྲོ་འཐུད་དེ། །ཆོས་ལྡན་རྟེན་གྱི་འབྲས་བུ་རབ་སྨིན་པའི། །བདེན་ཚིག་བརྗོད་དོན་ཇི་བཞིན་འགྲུབ་གྱུར་ཅིག །ཅེས་རྨོག་ལྕོག་པ་བྱམས་པ་ཀུན་དགའ་ཡེ་ཤེས་ཀྱི་སྐྱེ་སྲིད་མྱུར་དུ་འཛིན་པའི་སྨོན་ལམ་འདི་ཡང་ཐར་པ་མཁན་པོ་བློ་བཟང་འཇམ་དབྱངས་འཇིགས་མེད་ཀྱི་ངོར་ཟ་ཧོར་གྱི་བནྡེས་སྦྱར་བའོ། །དཔལ་ལྡན་འདབ་བརྒྱའི་རིགས་ལས་རྒྱལ་བའི་ཏོག །འཆི་མེད་སྦྲང་རྩིའི་བཅུད་ཀྱི་གཏེར་གྱུར་ཚེ། །རབ་སྤེལ་ཡེ་ཤེས་མཆོག་གི་སྣང་བ་ཅན། །དཔག་མེད་འབྱུང་གནས་གང་གི་ཐུགས་རྗེའི་མཐུས། །རྒྱལ་བསྟན་དྲི་མ་མེད་པའི་སྒོ་འཕར་ལས། །སྡོམ་བརྩོན་ལང་ཚོ་རབ་ཏུ་རྒྱས་པ་གང༌། །ཉི་བུའི་མཆེ་རྣོན་ཕྲག་ལས་རིང་བརྒལ་ཏེ། །ཡུན་དུ་བདེ་བར་སྤྱོད་པ་འགྲུབ་གྱུར་ཅིག །ཅེས་རོང་པོ་ཀིརྟི་སྐུ་སྐྱེ་བསྟན་པ་རབ་རྒྱས་ཀྱི་བརྟན་བཞུགས་ཚིགས་བཅད་འདི་ནི་དེ་ཉིད་ཀྱི་ནུ་བོ་དཀའ་བཅུ་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །ཕུན་ཚོགས་མཐའ་དག་གཟུགས་ཅན། འདབས་སྟོང་འོད་སྲུང་བྱིན་ཡངས་པར། །མཛེས་སྡུག་ལང་ཚོའི་གཟི་འོད་མན་ཤེལ་མདངས། །མཚན་བཟང་རླུང་གི་རྒྱལ་མཚན་གྱིས་འཁྱུད་པ། །བློ་གཏེར་བསིལ་ལྡན་ལྷུན་པོས་དགེ་ལེགས་(༦བ) ― GLG021_Page_0014 ―
[མ་དཔེ་གཟིགས་ན་འདིར་གནོན།]
སྩོལ། །དཔལ་སྟུག་གསང་གསུམ་ཟླ་བའི་མ་མ་ལས། །རབ་ཤློ་ཀ་འདི་གཉིས་སྔོན་མ་ལྡན་པའི་གཟུགས་ཅན་དང་འོག་མ་འགལ་བའི་གཟུགས་ཅན། ཡངས་མཁྱེན་པའི་བློ་གྲོས་བཅུ་གཉིས་བདག །སྣ་ཚོགས་བཟང་པོའི་མཛད་པ་ཚ་ཟེར་གྱིས། །ཤེས་བྱའི་གནད་དོན་ལྟ་བའི་ཀུན་ཏུ་སེམས། །ལུས་མེད་ཉག་ཕྲན་གྱིས་བཅོམ་ཕྱོགས་ཀྱི་གོས། །ལེགས་བསལ་ཆོས་ཀྱི་སྦྲང་རྩིའི་རྒྱལ་མཚན་ཚལ། །རབ་རྒྱས་གཅིག་ཏུ་མཛད་པ་ཀརྞི་ཀ །ཕྱོགས་བྲལ་རྣ་བར་འགོད་མཁས་རྟགས་ཏུ་རྒྱལ། །ལུས་གཟུགས་ཅན་གྱི་ཤིས་བརྗོད། ཅན་བསོད་ནམས་མེ་ཞལ་སྒྱུ་རྩལ་སར། །ཐུབ་བསྟན་ནགས་ཀྱི་བདག་པོའི་འཕྲེང་ཚོགས་དབུས། །གྲངས་མེད་རྒྱལ་བ་ཀུན་དངོས་དཔག་བསམ་ལྗོན། །ཕན་བདེའི་དྲི་བསུང་རྒྱས་ཕྱིར་བརྟན་གྱུར་ཅིག །བློ་གཟུགས་ཅན་གྱི་ཤིས་བརྗོད་བཟང་རྒྱལ་བསྟན་ཤེལ་གྱི་བ་གམ་དུ། །ལུང་རྟོགས་ཆོས་ཀྱི་འཛམ་བུ་ནཱ་དའི་ཁྲིར། །རྒོལ་ངན་སྦྱིན་སྐྱེས་བཅོམ་པའི་རྒྱལ་མཚན་མཆོག །སྟེར་འཛིན་བཤེས་གཉེན་ལྷ་དབང་རྟག་བཞུགས་གསོལ། ཁྱད་རང་བཞིན་བརྗོད་པ་ལ་གྲངས་ཀྱི་གབ་ཚིག་གི་བརྒྱན་པ། པར་ནག་ཕྱོགས་སྡེ་བཅས་འཇོམས་པའི་ཆེད། །ཕྱག་ན་འཁོར་ལོ་མི་རྗེའི་ཚུལ་འཛིན་པར། །ཐུབ་ཀླུ་དུས་ཀྱི་ཟླ་འཕྲེང་རྫོགས་མིན་དུ། །བགྲོད་བྱེད་རྡོ་རྗེའི་རང་བཞིན་ལྟར་གྱུར་ཅིག །གྲངས་མེད་རྣམ་འདྲེན་སྟོབས་བཅུ་མངའ་བ་འགའ། །ཤེས་ལྡན་རྗེས་བརྩེ་བོར་ཏེ་སྙོམས་ཞུགས་པ། །འབྱུང་འགྱུར་འགོག་པ།(༧ན) ― GLG021_Page_0015 ―
[མ་དཔེ་གཟིགས་ན་འདིར་གནོན།]
མགོན་ཁྱོད་ཆེད་དུ་ཞིང་འདིར་སྲིད་བཟུང་ན། །ཞི་བདེར་བཞུགས་པའི་མཛད་པ་རིགས་སམ་ཅི། །མཐའ་ཐོག་སྦྱར་བའི་ཟུང་ལྡན། འཇམ་མགོན་ཆོས་ཀྱི་རྒྱལ་པོ་གྲོང་གསུམ་ལྷ་དབང་ཕྱུག་ཆེན་པོའི་མིག་གི་མེས་འདོད་ལྷའི་ལུས་བསྲེགས་པའི་གཏམ་རྒྱུད་དང་སྦྱར། འཇོམས། །འཇོམས་བྱེད་མི་མཐུན་ཆུ་སྲིན་རྒྱལ་མཚན་སྡེ། །སྡེ་བཅས་འཕྲིན་ལས་འདྲེན་བྱེད་ཞུགས་ཀྱི་ཐབ། །ཐབས་འཕྲུལ་མཆོག་དེས་རྟག་ཏུ་རྒྱལ་བའི་དཔལ། །དཔལ་གྱི་དུམ་བུ་ལྟར་དཀར་འཆི་མེད་ལྷ། །ལྷ་མཆོག་ཡིད་བཞིན་འཁོར་ལོ་དབང་གི་རྒྱལ། །རྒྱལ་ཡུམ་དེས་ཀྱང་སྙན་ཚིག་དབྱར་གྱི་རྔ། །རྔ་གསང་ཆེས་ཆེར་སྒྲོག་པའི་དགའ་སྟོན་སྩོལ། །རིགས་གཟུགས་ཅན་གྱི་ཤིས་བརྗོད། བརྒྱའི་ཁྱབ་བདག་དངོས་གྱུར་གནམ་བསྐོས་ལྷ། །བསྟན་འགྲོའི་ཕུན་ཚོགས་གླིང་བཞིའི་དཔལ་མགོན་དུ། །གཡོ་མེད་ལུང་རྟོགས་གངྒཱ་སྐྱེས་འཁོར་ལོ། །ཀུན་ཁྱབ་ཤིས་བརྗོད་འཕྲེང་བ་འགྲུབ་གྱུར་ཅིག །རྒྱལ་བ་མཆོག་ཉིད་ཞབས་ཟུང་རྡོ་རྗེ་ལྟར། །བདེ་ལེགས་དཔལ་དུ་བརྟན་ཕྱིར་ཤིས་བརྗོད་འཕྲེང༌། །ཡན་ལག་མཆོག་བསྟན་པད་དཀར་འདབ་སྟོང་དབུས། །དབྱངས་ཅན་བཞུགས་ནས་གསུང་ལས་གཞན་དུ་ཅི། །འོན་ཀྱང་སྐྱེས་ཐོབ་བློ་གྲོས་གང་བུ་ལས། །གྲོང་གཏམ་རིང་དོར་དཎྜཱིའི་གཞུང་བཞིན་དུ། །ཚངས་སྲས་བཞད་པའི་རྡོ་རྗེ་དཔལ་བཟང་པོ། །མེ་སྐྱེས་དགའ་བའི་ལང་ཚོ་མཆོག་དེས་སྦྱར། །ཉི་མའི་(༧བ) ― GLG021_Page_0016 ―
[མ་དཔེ་གཟིགས་ན་འདིར་གནོན།]
གཉེན་གྱི་བསྟན་པའི་བ་གམ་སྤོར། །བློ་བཟང་གྲངས་མེད་ཆོས་ཀྱི་གླེགས་བུའི་ཚོགས། །ལུས་ཅན་བསོད་ནམས་རྒྱལ་མཚན་རྩེར་འགོད་པ། །རྒྱལ་བ་གང་དེའི་ཞབས་པད་བརྟན་གྱུར་ཅིག །མཚོ་བྱུང་དྲིན་ལས་ངག་གི་དབང་ཕྱུགས་གི །བློ་གྲོས་མཆོག་ཐོབ་བཟང་པོའི་འཕྲིན་ལས་ཀྱང༌། །རྒྱ་མཚོའི་གོས་ཅན་མཐར་ཁྱབ་ཞི་འཚོའི་དབོན། །ཚངས་སྲས་བཞད་པའི་རྡོ་རྗེ་བརྟན་གྱུར་ཅིག །དལ་བའི་རྟེན་ལ་ཤེས་རབ་འདབ་བརྒྱའི་ཚལ། །ཐོས་བསམ་ཉི་མའི་འོད་ཀྱིས་ལེགས་བསྐྱངས་པ། །གང་འདི་སྐྱབས་གསུམ་དྲང་སྲོང་ཚོགས་བཅས་ཀྱིས། །རྟག་ཏུ་སྲུང་ཞིང་སྐྱོང་བ་ཉིད་གྱུར་ཅིག །ཅེས་མཁན་ཆེན་ཆོས་ཀྱི་རྒྱལ་པོའི་མཚན་དང་ངེད་རང་གི་མིང་སྒྲ་གཉིས་ཀ་ཚང་བ་འདི་ལྟ་བུ་ཞིག་དགོས་ཞེས་རབ་འབྱམས་པ་ངག་དབང་དོན་གྲུབ་ཀྱི་ངོར་བྲིས་སོ། །རྒྱལ་བའི་གསུང་གི་གསང་མཛོད་རྒྱུད་མང་གླུར། །ཞི་བ་མཆོག་གི་ཡོན་ཏན་གྲེ་འགྱུར་ཚིག །ལེགས་ལྡན་ཐུགས་རྗེའི་སྨན་གྱི་སྡོམ་གསུམ་སྲོག །འཚོ་མཛད་བསྟན་པའི་རྩ་ལག་དམ་པར་འདུད། །གང་དེའི་ཕུལ་བྱུང་རིགས་ཀྱི་ལྷ་ལམ་ངོས། །དབྱངས་ཅན་བྱེད་པོས་ངག་དབང་ཏི་མིའི་འཇིང༌། །འཕྲུལ་ལས་བློ་བཟང་སྣང་གཏེར་འཕྲིན་ལས་འོད། །ལེགས་འོང་རྒྱ་མཚོའི་གོས་ཅན་ཀུན་ཁྱབ་འདི། །འགྱུར་མེད་རྡོ་རྗེ་ལྟར་བརྟན་ཚིག་གི་ཚལ། །དཔལ་ལྡན་ལྷ་མཆོག་བསིལ་སྦྱིན་མཁན་པོའི་མཐུས། །(༨ན) ― GLG021_Page_0017 ―
[མ་དཔེ་གཟིགས་ན་འདིར་གནོན།]
རབ་རྒྱས་ཐོག་མེད་འགྲུབ་པའི་དགའ་སྟོན་གྱི། །དཔལ་འབྱོར་བཟང་པོ་རྟག་ཏུ་སྐྱོང་གྱུར་ཅིག །ཅེས་པ་འདི་ཡང་ལོ་པ་ཆོས་རྗེ་དགེ་འདུན་རྣམ་རྒྱལ་གྱིས་ངེད་རང་གི་མིང་སྒྲ་ཚང་བའི་བརྟན་བཞུགས་ཚིགས་བཅད་མ་ཞིག་ནན་གྱིས་བསྐུལ་བ་ལ་རྟེན་ནས། སྙོམ་ལས་པ་རིག་བྱེད་འཛིན་པ་གང་དེས་བྲིས། །འགྱུར་མེད་ཀུན་ཏུ་བཟང་པོའི་མཁའ་དབྱིངས་ལས། །སྤྲུལ་པའི་ཟློས་གར་བསྒྱུར་བ་ཉིན་བྱེད་དབང༌། །ཕན་དང་བདེ་བའི་འདབ་སྟོང་རྒྱས་མཛད་པ། །པདྨ་འབྱུང་གནས་ཐུགས་རྗེས་རྟག་ཏུ་སྐྱོངས། །གང་དང་དབྱེར་མེད་དུ་མར་སྣང་བའི་གཟུགས། །རབ་འབྱམས་རྒྱལ་བ་ཞི་ཁྲོ་འཁོར་ལོའི་ལྷ། །ཆོས་སྲུང་རྒྱ་མཚོར་བཅས་པའི་ཚོགས་རྣམས་ཀྱིས། །བདུད་དཔུང་ཐུལ་ལ་དངོས་གྲུབ་ཆར་ལྟར་ཕོབ། །བཀྲ་ཤིས་ཡོན་ཏན་འཁྱིལ་བའི་མཐུ་སྟོབས་ཀྱིས། །རྣམ་པར་རྒྱལ་བའི་རིག་འཛིན་དབང་པོའི་སྡེའི། །བཀའ་གཏེར་བཤད་དང་སྒྲུབ་པའི་རིག་ལུགས་རྣམས། །སྔ་འགྱུར་བསྟན་པའི་བཙས་སུ་སྤེལ་བ་ལ། །བློ་གྲོས་བཟང་པོས་པདྨའི་འཕྲིན་ལས་རྣམས། །ཐེག་མཆོག་དབང་གི་རྒྱལ་པོར་གྲུབ་པའི་གཟུགས། །ཡོངས་འདུའི་ལྗོན་པའི་སྡེ་ལྟར་དགེ་ལེགས་སུ། །ལྷུན་གྱིས་གྲུབ་པའི་བདེན་ཚིག་འགྲུབ་གྱུར་ཅིག །ཅེས་བྱང་པ་རིག་འཛིན་ཆེན་པོ་ངག་གི་དབང་པོའི་སྤྲུལ་པའི་སྐུ་མཆོག་བློ་བཟང་པདྨ་འཕྲིན་ལས་ཐེག་མཆོག་(༨བ) ― GLG021_Page_0018 ―
[མ་དཔེ་གཟིགས་ན་འདིར་གནོན།]
དབང་གི་རྒྱལ་པོ་ཡོངས་འདུའི་སྡེས་སྔ་འགྱུར་བཤད་སྒྲུབ་ཀྱི་བསྟན་པ་སྤེལ་བའི་བཞེད་དོན་འགྲུབ་བྱེད་ཀྱི་བདེན་ཚིག་འདི་ལྟ་བུ་ཞིག་དགོས་ཞེས་གསུང་གི་བསྐུལ་བ་ལྟར་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའོ། །ཕུལ་བྱུང་ངོ་མཚར་རྒྱ་མཚོའི་རང་བཞིན་ཀུན། །མཚན་དཔེའི་གཟུགས་སྐུར་འཁྱིལ་བ་ཚེ་དཔག་མེད། །རྒྱལ་ཡུམ་ཡིད་བཞིན་འཁོར་ལོས་དུས་ཀུན་ཏུ། །རླངས་སྟོན་དམ་པར་དགེ་ལེགས་སྩལ་དུ་གསོལ། །དྲི་མེད་ལྷ་རིགས་རླངས་ཀྱི་གངས་རི་ལས། །དཔལ་ལྡན་ཕག་གྲུ་བློ་བཟང་རྒྱལ་བའི་བསྟན། །ཟུང་འབྲེལ་ཆུ་ཀླུང་སྤེལ་བ་མཁྱེན་བརྩེའི་བདག །དབང་ཕྱུག་ཡོན་ཏན་བརྒྱད་ཀྱིས་ཉེར་མཛེས་པ། །ནོར་འཛིན་ལྟེ་བར་ལུགས་གཉིས་ཡོངས་འདུའི་ལྗོན། །གྲངས་མེད་ལེགས་བྱས་འབྲས་བུའི་ཁུར་ལྡན་པ། །ཆོས་ཀྱིས་སྐྱོང་བའི་རྒྱལ་པོ་ངག་གི་ལྷ། །མི་འགྱུར་རྡོ་རྗེའི་ཁྲི་ལ་བརྟན་གྱུར་ཅིག །ཅེས་དཔལ་ལྡན་མིའི་དབང་པོ་ལྷ་གཟིགས་ཕག་མོ་གྲུ་པ་བློ་བཟང་མཁྱེན་བརྩེའི་དབང་ཕྱུག་ནོར་འཛིན་ཆོས་ཀྱི་རྒྱལ་པོ་ངག་གི་ལྷ་ལུགས་ཟུང་གི་འདུན་ས་ཆེན་པོའི་ཁྲིར་ཞབས་པད་བརྟན་པར་བཞུགས་པའི་ཚིགས་སུ་བཅད་པ་འདི་ཡང༌། གོང་དཀར་སྐུ་གཉེར་དཔོན་དགེ་སྟེང་བླ་མ་བྱམས་པ་ཀུན་དགའ་འབྱུང་གནས་ཀྱིས་བསྐུལ་བ་ལྟར། ༸ཤཱཀྱའི་བཙུན་པ་ངག་དབང་བློ་བཟང་རྒྱ་མཚོས་སྦྱར། །མི་འགྱུར་རྡོ་རྗེའི་རང་བཞིན་གྲུབ་པའི་ཚེ། །(༩ན) ― GLG021_Page_0019 ―
[མ་དཔེ་གཟིགས་ན་འདིར་གནོན།]
དང་པོའི་མགོན་པོ་ཡེ་ཤེས་མཆོག་གི་དཔལ། །བདེ་ལེགས་དཔག་ཏུ་མེད་པ་སྟེར་མཁས་ལྷས། །ཡངས་པའི་ནོར་འཛིན་བདག་པོར་ཤིས་པ་སྩོལ། །ངག་གི་དཔལ་མངའ་དབང་ཕྱུག་ཡོན་ཏན་གྱི། །ཆ་ཤས་ཡོངས་གང་འཇམ་དཔལ་སྙིང་པོའི་བསྟན། །གྱེན་དུ་བཏེག་པས་དགའ་ལྡན་ཕྱོགས་ཀུན་ལས། །རྣམ་པར་རྒྱལ་གང་རབ་ཏུ་བརྟན་གྱུར་ཅིག །ངག་དབང་དབྱངས་ཅན་རབ་རྒྱས་མཁྱེན་པ་དང༌། །བརྩེ་ཆེན་མངའ་འབང་དགའ་བདེར་སྤྱོད་པའི་དཔྱིད། །སྙིང་སྟོབས་ནུས་པས་གཞན་སྡེ་ཚར་གཅོད་པ། །དཔལ་ལྡན་དབྱིག་འཛིན་སྐྱོང་བ་རབ་བརྟན་ཤོག །བློ་བཟང་རྒྱལ་བསྟན་རྨད་བྱུང་གྲགས་པའི་ནོར། །རིན་ཆེན་གཅོད་པཎ་རྒྱན་དུ་འཆིང་བའི་ལྷ། །རྗེ་བློན་འབངས་བཅས་མངའ་ཐང་ཆབ་སྲིད་ཀུན། །སྲིད་པའི་རྩེ་མོར་འཕྱུར་ཞིང་འཕེལ་གྱུར་ཅིག །མཆོག་གསུམ་དབྱར་སྐྱེས་ཆུ་འཛིན་ཕྲེང་བ་ལས། །ཕུལ་བྱུང་ཐུགས་རྗེའི་གྲུ་ཆར་ལེགས་བབས་པས། །འདོད་དོན་དཔག་བསམ་ཡོངས་འདུ་གསར་པའི་ལྗོན། །སྡེ་བཞིའི་འབྲས་བུ་སྨིན་པའི་བཀྲ་ཤིས་ཤོག །ཅེས་རྗེ་རྒྱལ་བ་གཉིས་པའི་བསྟན་པ་ལ་གཅིག་ཏུ་གུས་པ་ལྷུར་ལེན་པའི་ས་སྐྱོང་རྒྱ་རི་བ་ལྷ་ངག་དབང་དགའ་ལྡན་རབ་བརྟན་གྱི་བརྟན་གཞུགས་ཀྱི་ཤིས་པ་བརྗོད་པ་འདི་ཡང་འོད་འབར་གྱིས་བསྐུལ་བ་ལྟར། ཡུལ་ལྷོ་ཕྱོགས་སྨན་ལྗོངས་སུ་སྐྱེས་པའི་སྙན་ངག་མཁན་ངག་དབང་བློ་བཟང་རྒྱ་མཚོས་སྦྱར་བའོ། །རྒྱལ་ཀུན་མཁྱེན་(༩བ) ― GLG021_Page_0020 ―
[མ་དཔེ་གཟིགས་ན་འདིར་གནོན།]
རབ་གར་མཁན་འཇམ་དཔལ་དབྱངས། །མི་ཡི་སྲིད་པའི་རྣམ་རོལ་བཙོང་ཁ་པ། །དངོས་རྒྱུད་བླ་མ་ཡི་དམ་དཀྱིལ་འཁོར་ལྷ། །བསྟན་སྲུང་རྒྱ་མཚོར་བཅས་པའི་བྱིན་རླབས་ཀྱིས། །རྣམ་དཀར་དགེ་བས་འཕངས་པ་དལ་འབྱོར་རྟེན། །དོན་ལྡན་སྒྲུབ་ལ་འདུན་པ་དགེ་བའི་བཤེས། །མི་མཐུན་ཕྱོགས་ལས་རྣམ་པར་རབ་རྒྱལ་ཞིང༌། །ཚེ་དཔལ་ལེགས་ཚོགས་འཕེལ་བའི་བཀྲ་ཤིས་ཤོག །ཅེས་རྫིང་ཕྱི་མཁན་པོ་དགེ་འདུན་རྣམ་རྒྱལ་བར་ཆད་ཀྱི་གཡུལ་ལས་རྒྱལ་བའི་ཚིགས་སུ་བཅད་པ་འདི་ནི་དོན་གཉེར་ཅན་འགས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །ཕུན་ཚོགས་བསོད་ནམས་ཆུ་གཏེར་ལས་འོངས་ཤིང༌། །དགེ་བའི་བཀྲ་ཤིས་རླབས་འཕྲེང་རབ་གཡོག་པས། །གདུལ་བྱའི་རེ་བ་ཡོངས་སུ་སྐོང་བའི་རྗེ། །མཚུངས་མེད་དཔལ་ལྡན་བླ་མར་གསོལ་བ་འདེབས། །བསོད་ནམས་ཡེ་ཤེས་ཚོགས་གཉིས་ལས་གྲུབ་མཐུས། །དལ་བརྒྱད་འབྱོར་བཅུའི་རྟེན་བཟང་རིན་ཆེན་སྣོད། །བྱང་ཆུབ་མཆོག་གི་བཀྲ་ཤིས་འཁྱིལ་བ་ཡིས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཞེས་ཇ་སང་ཆོས་རྗེ་བསོད་ནམས་བཀྲ་ཤིས་ལྔ་པའི་ལམ་དུ་སོང་བའི་ཚེ་ཆོས་རྗེ་ཉིད་ཀྱི་གསོལ་འདེབས་དང་དལ་འབྱོར་གྱི་རྟེན་བཟང་ཐོབ་པའི་སྨོན་ལམ་གྱི་ཚིགས་བཅད་དགོས་ཚུལ་དབོན་པོ་ནང་སོས་ནན་ཏན་གྱིས་བསྐུལ་བའི་ངོར་བྲིས། །མི་འགྱུར་(༡༠ན) ― GLG021_Page_0021 ―
[མ་དཔེ་གཟིགས་ན་འདིར་གནོན།]
འཆི་བ་མེད་པ་བདུད་རྩིའི་སྲོག །རབ་བརྟན་རྡོ་རྗེའི་ཁམས་སུ་གྲུབ་པའི་དཔལ། །རྒྱལ་ཡུམ་ཚེ་སྦྱིན་ཡིད་བཞིན་འཁོར་ལོ་ཡིས། །དུས་ཀུན་དགེ་བའི་དངོས་གྲུབ་ཆར་དུ་ཕོབས། །མཆོག་གསུམ་ཐུགས་རྗེ་ཆེན་པོའི་ས་བོན་ཚོགས། རྣམ་དག་སྨོན་ལམ་ཆར་གྱིས་སྐྲུན་པ་ལས། །དེང་འདིར་འདོད་པའི་དོན་བཟང་ཨ་མྲའི་འབྲས། །ལྷུན་གྲུབ་རོ་བརྒྱའི་ལང་ཚོར་སྨིན་གྱུར་ཅིག །ངག་གི་དབང་ཕྱུགས་བློ་གྲོས་བྱེ་བའི་ནོར། །གྲངས་མེད་སྐལ་བཟང་གདུལ་བྱར་རབ་སྩོལ་བ། །ལེགས་བྱས་རྒྱ་མཚོའི་གཞིར་གྱུར་རྡོ་རྗེ་འཛིན། །གཡོ་མེད་བསྐལ་བརྒྱའི་བར་དུ་བརྟན་གྱུར་ཅིག །འཁོན་རིགས་གྲུབ་པའི་དཔའ་བོ་ཀུན་སྙིང་རྗེ། །ངུར་སྨྲིག་ཟློས་གར་བློ་གྲོས་རྒྱ་མཚན་གྱི། །སློབ་བཤད་ཆོས་ཀྱི་སྲོག་ཤིང་ཁའུ་པའི། །ལུགས་བཟང་སྲིད་མཐའི་བར་དུ་རབ་འཕེལ་ཞིང༌། ཁྱད་པར་ངེས་བཟང་ཐེག་པའི་འོད་སྟོང་གིས། །སྐུ་བཞིའི་སྣང་བ་བརྒྱད་མཛད་མཚར་པ་རྗེ། །ཡབ་སྲས་རྒྱུད་པར་བཅས་པའི་རིང་ལུགས་མཆོག །བརྩེ་ཆེན་སྙིང་པོའི་བསྟན་ལ་རྒྱས་པར་ཤོག །གུར་མགོན་ལྕམ་དྲལ་སྟོབས་འཕྲོག་དབང་པོ་དང༌། །པུ་པྲ་མིང་སྲིང་གནོད་སྦྱིན་བེག་ཙེ་སོགས། །བསྟན་སྲུང་རྣམས་ཀྱིས་སྨོན་པའི་འདོད་དོན་ཀུན། །ཐོགས་མེད་ལྷུན་གྱིས་ལེགས་འགྲུབ་འཕྲིན་ལས་མཛོད། །ཅེས་ངེད་རང་གི་མིང་སྒྲ་ཡོད་པའི་བརྟན་བཞུགས་དང༌། གསང་ཆེན་སློབ་བཤད་ཀྱི་བསྟན་པ་རྒྱས་པའི་སྨོན་ལམ་དང་བཅས་པ་འདི་(༡༠བ) ― GLG021_Page_0022 ―
[མ་དཔེ་གཟིགས་ན་འདིར་གནོན།]
ཡང་ཡར་ཀླུང་བཀྲ་ཤིས་ཆོས་སྡེའི་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་འཕྱིང་བ་སྟག་རྩེའི་ཕོ་བྲང་དུ་སྦྱར་བའོ། །རྒྱལ་བ་ཀུན་དངོས་རིག་འཛིན་པདྨ་ཡི། །རྡོ་རྗེ་ཐེག་མཆོག་བསྟན་པ་ཡིད་བཞིན་ནོར། །བཤད་སྒྲུབ་རྒྱལ་མཚན་རྩེ་མོར་འཛིན་མཛད་པ། །རིག་སྔགས་འཆང་བའི་དཔལ་དེ་རྟག་བཞུགས་གསོལ། །དཔལ་ལྡན་ཟབ་དང་རྒྱ་ཆེ་དམ་ཆོས་ཀྱི། །འབྱོར་པར་མངའ་སྒྱུར་འཕྲིན་ལས་འོད་སྟོང་གིས། །ཕན་བདེའི་སྣང་བ་རབ་ཏུ་རྒྱས་མཛད་པའི། །རྡོ་རྗེ་འཛིན་དབང་བསྐལ་བརྒྱར་ཞབས་བརྟན་ཤོག །ངག་གི་དབང་ཕྱུག་འཇམ་དབྱངས་གཞོན་ནུ་དང༌། །དབྱེར་མེད་རྣམ་པར་དཔྱོད་པའི་བཀྲ་ཤིས་དུང༌། །ལེགས་བཤད་གཡས་སུ་འཁྱིལ་བ་ཀུན་དགའི་དཔལ། །ལྷུན་གྱི་གྲུབ་ཁྱོད་རྟག་ཏུ་བརྟན་གྱུར་ཅིག །ཚེ་དབང་རིགས་འཛིན་པདྨ་ཀ་ར་དང༌། །ཡི་དམ་སྒྲུབ་སྡེ་བརྒྱད་ཀྱི་ལྷ་ཡི་ཚོགས། །འདོད་ཁམས་དབང་ཕྱུག་ལ་སོགས་ཆོས་སྲུང་ཀྱིས། །རིག་པ་འཛིན་མཆོག་རྟག་ཏུ་སྲུང་གྱུར་ཅིག །རྨད་བྱུང་དགེ་ལེགས་ཡིད་བཞིན་དབང་གི་རྒྱལ། །དངོས་གྲུབ་ཆར་དུ་འབེབས་པའི་དགའ་སྟོན་ཅན། །ཕུན་ཚོགས་བཀྲ་ཤིས་མཆོག་གི་དུས་ཀུན་ཏུ། །རྣམ་པར་རྒྱལ་བའི་དཔལ་དུ་འགྲུབ་གྱུར་ཅིག །ཅེས་ཁྱབ་བདག་འཁོར་ལོའི་དབང་ཕྱུག་ཟུར་ཆེན་བླ་མ་ཆོས་དབྱིངས་རང་གྲོལ་གྱི་བརྟན་བཞུགས་ཚིགས་སུ་བཅད་པ་འདི་ནི་ཟ་ཧོར་གྱི་བནྡེས་སྦྱར་བ་སིདྡྷི་རསྟུ། །སྭསྟི་(༡༡ན) ― GLG021_Page_0023 ―
[མ་དཔེ་གཟིགས་ན་འདིར་གནོན།]
པྲ་ཛཱབྷྱཿ མཆོག་གསུམ་ཐུགས་རྗེའི་དབྱར་གྱི་རྔ་གསང་སྒྲས། །ཕུན་ཚོགས་སྤུ་སྡུག་རྣམ་བཀྲ་གཙུག་ཕུད་ཅན། །བདེ་སྐྱེད་གར་བསྒྱུར་དབང་ཕྱུག་བརྒྱད་ལྡན་པའི། །མངལ་འཛིན་བསྐལ་པ་བཟང་པོར་སྤྱོད་གྱུར་ཅིག །དལ་འབྱོར་རྟེན་གྱི་ཆུ་གཏེར་ཆེན་པོ་ལ། །ལེགས་བྱས་རླུང་ཤུགས་དྲག་པོས་ཉེར་བསྐྱོད་པས། །ཚེ་དཔལ་སྟོབས་འབྱོར་རྦ་རླབས་སྲིད་པའི་རྩེར། །རབ་འཕྱུར་གཟེགས་མ་ཕྱོགས་བརྒྱར་འཐོར་གྱུར་ཅིག །མཐོ་རིས་ཐར་པའི་རིན་ཅེན་ཐེམ་སྐས་ལ། །འཛེགས་ཏེ་ཟུང་འཇུག་གྲུབ་པ་མཆོག་གི་ས། །དཔལ་ལྡན་སྟོབས་བཅུ་མངའ་བའི་གྲོང་ཁྱེར་དུ། །ལེགས་བཞུགས་དོན་གཉིས་ལྷུན་གྲུབ་དགེ་ལེགས་སྩོལ། །ཅེས་པ་འདི་ཡང་རྣམ་སྲས་གླིང་པ་ཕུན་ཚོགས་དབང་པོས་བསྐུལ་བའི་ངོར་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་ཕོ་བྲང་ཆེན་པོ་པོ་ཏཱ་ལའི་གཟིམས་ཆུང་ཁམས་གསུམ་གཟིལ་གནོན་དུ་སྦྱར་བའོ། །འཇམ་མགོན་ངག་དབང་བློ་ཡི་དགའ་ཚལ་དུ། །ཕུན་ཚོགས་འབྲས་བཟང་དུད་པ་ཨ་མྲའི་ལྗོན། །རྒྱ་ཆེན་ཕན་དང་བདེ་བའི་གྲིབ་བསིལ་གང༌། །དབྱར་མཚོ་ལྟ་བུར་འཕེལ་མཛད་འོད་དཀར་ཅན། །སླུ་མེད་རྟེན་ཅིང་འབྲེལ་འབྱུང་ནམ་མཁའ་ལ། །མཆོག་གསུམ་ཐུགས་རྗེའི་རླུང་ཤུགས་ཀྱིས་དྲངས་ནས། །གངས་ཅན་ཕན་བདེའི་སྣང་བ་མ་ལུས་པ། །མྱུར་དུ་འགྱེད་པའི་དགའ་སྟོན་རྒྱས་པར་ཤོག །སྲིད་གསུམ་གཙོ་མོའི་འདོད་(༡༡བ) ― GLG021_Page_0024 ―
[མ་དཔེ་གཟིགས་ན་འདིར་གནོན།]
ཁམས་དབང་ཕྱུག་སོགས། །བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། །དེང་འདིར་ཡིད་ལ་སྨོན་པའི་འདོད་དོན་འབྲས། །ཐོགས་པ་མེད་པར་ལྷུན་གྱིས་གྲུབ་པར་མཛོད། །ཅེས་པ་འདི་ཡང་བི་རི་སྟོད་པ་དགེ་རྒྱས་ཀྱི་ཆོས་མཛད་མ་བསོད་ནམས་ཆོས་སྒྲོན་གྱིས་བསྐུལ་བའི་ངོར་ཟ་ཧོར་གྱི་བནྡེས་གཡགས་གཞུང་དུ་སྦྱར་བའོ། །ཕུལ་བྱུང་བདུད་རྩིའི་དཔལ་སྟེར་ཚེ་དཔག་མེད། །རྒྱལ་བ་ཀུན་ཡུམ་ཡིད་བཞིན་འཁོར་ལོའི་ཞབས། །འཛད་མེད་ཐུགས་རྗེ་ཆེན་པོའི་བྱིན་རླབས་ཀྱིས། །དེང་འདིར་སྨོན་པའི་འབྲས་བུ་འགྲུབ་པར་མཛོད། །དཀྱིལ་འཁོར་འཁོར་ལོའི་མགོན་པོ་རྡོ་རྗེ་འཛིན། །རྨད་བྱུང་བསོད་ནམས་དམ་པའི་གཞིར་གྱུར་པ། །རྣམ་ཀུན་མཆོག་དང་ལྡན་པའི་རིག་པ་འཛིན། །བསྐལ་པ་རྒྱ་མཚོར་མི་གཡོ་ཞབས་བརྟན་ཤོག །སློབ་བཤད་ཟབ་མོའི་ཆོས་ཀྱི་གངྒཱའི་རྒྱུན། །ནམ་ཡང་ཆད་པ་མེད་པའི་ལེགས་བཤད་ཀྱི། །གངས་ཅན་བློ་བསལ་བྱེ་བའི་ཚོགས་རྣམས་ལ། །ཕན་དང་བདེ་བའི་དགའ་སྟོན་རྒྱས་གྱུར་ཅིག །ཅེས་རྗེ་བཙུན་བླ་མ་འ་ཞྭའི་རྡོ་རྗེ་འཆང་མགོན་པོ་བསོད་ནམས་མཆོག་ལྡན་གྱི་བརྟན་བཞུགས་ཚིགས་སུ་བཅད་པ་འདི་ཡང་ཟ་ཧོར་གྱི་བནྡེས་སྦྱར་བའོ། །ཨཱ སི དྡྷི ར སྟུ ཀཱ ལཻ སྶ རྦྦ སྨཻ། བློ་གྲོས་རབ་ཡངས་བསྐལ་བཟང་དགའ་བའི་དཔལ། །ལུང་རྟོགས་བསྟན་པའི་རྗེས་སུ་ཉེར་ཞུགས་པས། །ཆུ་སྲིན་རྒྱལ་མཚན་སྡེ་ལས་རིང་གྱུར་ཅིག །གནས་ལྔར་མོས་བློ་འཛིན་པའི་རྗེ་འབངས་ ― GLG021_Page_0025 ―
[མ་དཔེ་གཟིགས་ན་འདིར་གནོན།]
བཅས། །བྱང་ཆུབ་སྙིང་པོའི་བདུད་རྩི་ཨ་མྲའི་བཅུད། །མྱོང་མིན་དེ་སྲིད་ཕན་པ་སྒྲུབ་པའི་སེམས། །ལྷག་བསམ་ཟླ་གཞོན་ལྟ་བུར་ཆེས་དཀར་བ། །རྒྱུན་ཆད་མེད་པར་ཡིད་ལ་འགྲོག་པར་བྱེད། །སརྦ་དཱཐཛཡནྟུ། །པདྨ་སྐུ་སྐྱེ་བློ་བཟང་བསྟན་པའི་རྒྱལ་མཚན་སངས་རྒྱས་མ་ཐོབ་ཀྱི་བར་དུ་རྗེས་སུ་འཛིན་པར་ཁས་འཆེ་བའི་སྨོན་ལམ་ཚིགས་བཅད་ཅིག་དགོས་ཚུལ་བྱུང་བ་ཁས་ལེན་པ་པོ་དང་ལེན་ཡུལ་གཉིས་གང་སྔོན་དུ་འཚང་རྒྱ་མི་ཤེས་པར་ནམ་མཁའ་སྟོང་པར་སྦར་ཚོད་འདི་རིགས་དཔྱོད་ལྡན་ཁྲེལ་བའི་གནས་ལས་མི་འདུག་རུང༌། སློབ་མ་ལ་སྙིང་ནས་མི་ཕྱེད་པའི་དད་པ་ཡོད་ན་བླ་མ་དེ་ངན་འགྲོར་ཡོད་ཀྱང་སློབ་མར་བྱིན་རླབས་འཇུག་པ་རྟེན་འབྲེལ་གྱི་ཆོས་ཉིད་དུ་བཤད་འདུག་ཅིང༌། དད་མོས་ཀྱི་རྟེན་འབྲེལ་མ་འགྲིག་ཀྱང་སྟོང་ཤོག་གི་ཧམ་པ་འདི་བླ་ཆེན་རྣམས་ཀྱི་སྤྱི་ཟོག་དྲག་ཤོས་ཡིན་པས་ཁོང་པ་ནན་ཆེས་པས་བྲིས་པ་ཡིན་ནོ། །ཡེ་ཤེས་མཆོག་གི་བཻཌཱུར་ཞུན་མའི་ཁམས། །དཔག་ཡས་ཚེ་ཡི་གཟུགས་སུ་གྲུབ་པའི་སྣོད། །འཆི་མེད་བདུད་རྩིའི་བཅུད་ཀྱི་ལེགས་གང་བ། །ལྷག་པའི་ལྷ་ཡི་བཀྲ་ཤིས་རྒྱ་མཚོ་སྩོལ། །ངག་གི་དབང་ཕྱུག་བློ་ལྡན་སྐལ་བཟང་ཀུན། །དགའ་སྐྱེད་ཐུབ་པའི་བསྟན་པ་རྒྱ་མཚོ་ཆེ། །བཤད་སྒྲུབ་རླབས་ཕྲེང་དུས་ལས་ཡོལ་མེད་པ། །བཤེས་གཉེན་གདེངས་ཅན་དབང་པོ་ཞབས་བརྟན་ཤོག །ངག་གི་དཔལ་མངའ་དབང་ཕྱུག་ཡོན་ཏན་(༡༢བ) ― GLG021_Page_0026 ―
[མ་དཔེ་གཟིགས་ན་འདིར་གནོན།]
བརྒྱད། །ལེགས་ལྡན་མི་འཛད་བློ་གྲོས་གཏེར་ཆེན་པོ། །འགྲོ་རྣམས་སྐལ་བ་བཟང་པོར་ལེགས་བསྒྱུར་བ། །ཐུབ་བསྟན་རྒྱ་མཚོའི་སྡེ་གང་ཞབས་བརྟན་ཤོག །ཕུན་ཚོགས་ཀུན་ནས་ཡངས་པའི་གྲོང་ཁྱེར་ཅན། །ངེས་དོན་སྒྲུབ་བརྒྱུད་རིང་ལུགས་འདུས་ཚོགས་སྡེ། །སྲིད་མཐར་ཉམས་པ་མེད་པའི་ངོ་མཚར་གྱིས། །འགྲོ་བའི་བསོད་ནམས་མཆོད་སྡོང་ཆེར་རྒྱས་ཤོག །ཟླ་བ་བཞུན་མའི་འོད་ཀྱིས་བསྒྲུན་མིན་པ། །རྣམ་སྨིན་དཀར་པོར་འཛག་བྱེད་དགེ་བའི་དུང༌། །ལེགས་བྱས་གཡས་སུ་རབ་འཁྱིལ་དབྱངས་སྙན་པོ། །ཚངས་པའི་འཇིག་རྟེན་བར་དུ་སྒྲོག་གྱུར་ཅིག །ཅེས་པ་འདི་ཡང་ཡངས་པ་ཅན་གྱི་སྤྱན་སྔ་ཀརྨ་ཉི་མས་ཐོག་དྲངས་ཆོས་སྡེ་སྤྱི་ཚོགས་ཀྱིས་ནན་གྱིས་བསྐུལ་བ་ལ་རྟེན་ནས་ཟ་ཧོར་གྱི་བནྡེས་ཆོས་སྡེ་དེ་ཉིད་ཀྱི་ཉེ་འདབས་སུ་སྦྱར་བའོ། །རྩ་གསུམ་ཐུགས་རྗེ་ཆེན་པོའི་བྱིན་རླབས་ཀྱིས། །ངག་གི་དབང་ཕྱུག་བློ་གྲོས་བྱེ་བའི་གཏེར། །ཕན་བདེའི་འབྲས་བཟང་རབ་སྨིན་ཡོངས་འདུའི་ལྗོན། །བསྐལ་པ་རྒྱ་མཚོའི་བར་དུ་བརྟན་གྱུར་ཅིག །ངག་དབང་འཇམ་དཔལ་དབྱངས་དངོས་འཛད་མེད་ཀྱི། །ཕུལ་བྱུང་བློ་གྲོས་མཆོག་ཏུ་རྒྱས་པའི་སྡེ། །གནས་སྐབས་ཚེ་དང་དཔལ་འབྱོར་ཀུན་འཕེལ་ཞིང༌། །མཐར་ཐུག་གདོད་མའི་ཡེ་ཤེས་མངོན་གྱུར་ཤོག །ཅེས་པ་འདི་ཡང་གཙུག་ལག་རྩིས་ཀྱི་གཞུང་ལུགས་ལ་རྣམ་དཔྱོད་ཅན་ནང་ར་ཆོས་མཛད་ངག་དབང་འཇམ་དཔལ་བློ་གྲོས་(༡༣ན) ― GLG021_Page_0027 ―
[མ་དཔེ་གཟིགས་ན་འདིར་གནོན།]
མཆོག་གི་སྡེས་བསྐུལ་བ་བརྟེན་ནས། ཟ་ཧོར་གྱི་བནྡེས་དྲི་ཟའི་རྒྱལ་པོ་ཟུར་ཕུད་ལྔ་པའི་ཕོ་བྲང་གི་མདུན་དུ་སྦྱར་བའོ། །ཐུགས་རྗེའི་གཏེར་གྱུར་བླ་མ་ཡི་དམ་དང༌། །ཆོས་སྐྱོང་སྲུང་མའི་བྱིན་རླབས་ནུས་མཐུ་ཡིས། །མགོན་ཁྱེད་གངས་ཅན་བསྟན་འགྲོའི་ཉེར་འཚོའི་གཞིར། །མྱུར་དུ་ཕེབས་པའི་དོན་ཀུན་འགྲུབ་པར་མཛོད། །བདག་སོགས་འགྲོ་ཀུན་བར་ཆད་མི་མཐུན་ཕྱོགས། །ཀུན་ལས་རབ་རྒྱལ་ཚེ་དཔལ་ལོངས་སྤྱོད་རྒྱས། །མཐར་ཐུག་རྣམ་མཁྱེན་ཡེ་ཤེས་མངོན་བྱས་ཏེ། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་པ་འདི་ཡང་བི་རི་སྟོད་པ་དགེ་རྒྱས་ཀྱི་ཆོས་མཛད་མ་བསོད་ནམས་དཔལ་བཟང་གི་བསྐུལ་བའི་ངོར། ཟ་ཧོར་གྱི་བནྡེས་གཡགས་གཞུང་དུ་སྦྱར། །ཕུན་ཚོགས་དགེ་མཚན་རྒྱ་མཚོར་འཁྱིལ་བའི་དུང༌། །ངག་དབང་ཚངས་པའི་དབྱངས་སུ་འགྲན་བཟོད་པ། །བློ་གྲོས་མཆོག་གིས་སྐལ་བཟང་དགའ་བྱེད་པ། །ཐུབ་བསྟན་རྒྱ་མཚོའི་སྡེ་ལ་གསོལ་འདེབས། །མཆོག་གསུམ་ཐུགས་རྗེའི་ཟློས་གར་རྡོ་རྗེའི་ཁམས། །མི་འགྱུར་སེང་གེའི་གདན་ཁྲིར་གྲུབ་པའི་སྟེང༌། །རྗེ་བཙུན་བླ་མ་ཁྱབ་བདག་འཁོར་ལོའི་མགོན། །བསྐལ་པ་རྒྱ་མཚོར་མི་གཡོ་བརྟན་གྱུར་ཅིག །མཐུ་ལྡན་ཆོས་སྲུང་ནུས་པའི་ཤིང་རྟ་ཡིས། །དབང་ཕྱོགས་ལྷ་ཡི་ལམ་ལས་ཐོགས་མེད་དུ། །དྲངས་ཏེ་གངས་ཅན་ཕན་དང་བདེ་བའི་འོད། །(༡༣བ) ― GLG021_Page_0028 ―
[མ་དཔེ་གཟིགས་ན་འདིར་གནོན།]
སྣང་བ་དམ་པའི་གཟི་བྱིན་འབར་གྱུར་ཅིག །སྒར་ཆེན་གོང་དུ་འདེགས་པའི་བཤུལ་དུ་ཐོག་མར་ཞུགས་ཉིན་གངས་ཅན་གྱི་ལྗོངས་སུ་གེགས་མེད་མྱུར་དུ་འབྱོར་བའི་སྨོན་ལམ་ཚིགས་སུ་བཅད་འདི་ཡང་ས་སྐྱོང་རྒྱ་རི་བ་ངག་དབང་དགའ་ལྡན་རབ་བརྟན་གྱིས་བསྐུལ་བའི་ངོར་ཟ་ཧོར་གྱི་བནྡེས་ལྷུན་གྲུབ་རབ་བརྟན་དུ་སྦྱར་བའོ། །དལ་འབྱོར་རྟེན་ལ་ཤེས་རབ་དཔྱོད་ལྡན་ཅན། །འཁོར་བའི་མཚོ་ལས་སྒྲོལ་འདོད་བློ་ལྡན་མ། །ཚེ་འདིར་ཉེར་འཚེ་བར་ཆད་ཀུན་ཞི་ཞིང༌། །ཕྱི་མ་བདེ་བ་ཅན་དུ་སྐྱེ་བར་ཤོག །ཅེས་པ་ཡང་ཨོ་རོད་གཡོན་རུའི་དཔོན་མོ་ཤེས་རབ་སྒྲོལ་མའི་ངོར་ཟ་ཧོར་གྱི་བནྡེས་འདམ་དོན་གཉིས་ལྷུན་གྲུབ་གླིང་དུ་སྦྱར་བའོ། །སྲིད་ཞིའི་གཙུག་ཏོར་བདེ་འབྱུང་རལ་པའི་རྩེར། །ཞབས་སེན་ཟླ་བའི་གཅོད་པཎ་འགོད་མཛད་པ། །བརྟན་པའི་འཁོར་ལོ་མི་ཡི་སྲིད་བཟུང་གར། །སྒྱུར་མཛད་ཀུན་མཁྱེན་ཙོང་ཁ་པ་ལ་འདུད། །གང་གི་ལུང་རྟོགས་བསྟན་པའི་ཤིང་རྟ་ཆེ། །ངག་གི་དབང་ཕྱུག་ལེགས་གྲུབ་རྣམ་དཔྱོད་ཀྱིས། །འདྲེན་མཛད་བློ་བསལ་འགྲོ་ལ་བཟང་པོའི་ལམ། །སྟོན་མཁས་ཐུབ་བསྟན་རྒྱ་མཚོའི་སྡེ་ལ་འདུད། །བྱིན་རླབས་གཏེར་གྱུར་རྩ་རྒྱུད་བླ་མ་དང༌། །དངོས་གྲུབ་འབྱུང་གནས་ཡི་དམ་ཞི་ཁྲོའི་ཚོགས། །བདུད་དཔུང་འདུལ་མཛད་ཆོས་སྐྱོང་སྲུང་མ་ཡི། །རྨད་བྱུང་མཁྱེན་བརྩེ་ནུས་པའི་མཐུ་སྟོབས་ཀྱིས། །ངག་གི་དབང་ཕྱུག་མི་ཟད་བློ་གྲོས་གཏེར། །སྐལ་བཟང་འགྲོ་ལ་(༡༤ན) ― GLG021_Page_0029 ―
[མ་དཔེ་གཟིགས་ན་འདིར་གནོན།]
ལེགས་བཤད་བདུད་རྩིའི་དཔྱིད། །རྒྱ་ཆེན་བསྟན་འགྲོའི་ཕན་བདེ་དབྱར་མཚོ་ལྟར། །རྒྱས་མཛད་རྗེ་བཙུན་བླ་མ་ཉི་མོར་བྱེད། །ཤར་ཕྱོགས་རྒྱལ་པོའི་འདུན་སའི་ཕངས་པ་ཡི། །ཐུན་མཚམས་སྟེག་ལས་མྱུར་དུ་རབ་བབས་ཏེ། །དབུས་འགྱུར་ཁ་བས་བསྐོར་བ་བོད་ཡུལ་གྱི། །མཁའ་ལ་ཐོག་པ་མེད་པར་བགྲོད་པར་ཤོག །གངས་ཅན་འཛིན་མའི་ལྟོ་བར་སེང་གེའི་ཁྲིར། །མི་འགྱུར་རྡོ་རྗེ་ལྟ་བུར་རྟག་བཞུགས་ནས། །འཆད་རྩོད་རྩོམ་པས་ཐུབ་བསྟན་འཕེལ་མཛད་པའི། །འཕྲིན་ལས་སྲིད་མཐའི་བར་དུ་རྒྱས་གྱུར་ཅིག །མི་ཕྱེད་དད་པའི་གདུང་ཤུགས་དྲག་པོ་ཡིས། །མཆོག་གསུམ་རིན་ཆེན་ཐུགས་རྗེ་རབ་སྐུལ་ནས། །དེང་འདིར་འདོད་དོན་རེ་བ་ཡོངས་སྐོང་བར། །དཔག་བསམ་ཡོངས་འདུའི་དབང་པོ་ལྟར་གྱུར་ཅིག །དགེ་བ་དེས་ཀྱང་བདག་སོགས་འགྲོ་བ་རྣམས། །ཚེ་རབས་ཀུན་ཏུ་བཤེས་གཉེན་དམ་པ་ཡིས། །རྗེས་སུ་བཟུང་སྟེ་ཟབ་དང་རྒྱ་ཆེ་བ། །དམ་པའི་ཆོས་ལ་ལོངས་སུ་སྤྱོད་གྱུར་ཅིག །ཅེས་པ་འདི་ཡང་མདོ་རྒྱུད་རྒྱ་མཚོའི་ཕ་རོལ་དུ་སོན་པས་ཐུབ་བསྟན་ཡོངས་སུ་རྫོགས་པའི་དགེ་བའི་བཤེས་གཉེན་ཆོས་རྗེ་དོན་གྲུབ་རྒྱ་མཚོས་ནན་ཏན་དུ་བསྐུལ་བ་ལྟར་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་དཀར་ཐང་མར་ཁུའི་མཚོ་མོར་སྦྱར་བའི་ཡི་གེའི་ཟློས་གར་བསྒྱུར་བ་པོ་ནི་སློབ་དཔོན་མཁས་པའི་དབང་(༡༤བ) ― GLG021_Page_0030 ―
[མ་དཔེ་གཟིགས་ན་འདིར་གནོན།]
པོ་སྨོན་འགྲོ་པཎ་ཆེན་ནོ། །སླུ་མེད་མཆོག་གསུམ་ཐུགས་རྗེའི་བྱིན་རླབས་དང༌། །བསྟན་སྲུང་རྒྱ་མཚོའི་ཚོགས་ཀྱི་ནུས་སྟོབས་དཔུང༌། །རྒྱུ་འབྲས་རྟེན་འབྲེལ་བསླུ་བ་མེད་པའི་མཐུ། །ཁྲིམས་ལྡན་འདུས་སྡེའི་ཤུགས་དྲག་སྨོན་ལམ་ལས། །ངག་དབང་དབྱངས་ཅན་ལྷ་མོས་རྗེས་བཟུང་བའི། །བློ་གྲོས་བཟང་པོས་རྒྱ་ཆེན་གཙུག་ལག་ཀུན། །མགྲིན་པར་ལེགས་བཤད་ཡིད་བཞིན་མཚོ་འཁྱིལ་བ། །འཇམ་དབྱངས་དགའ་བའི་བཤེས་གཉེན་དམ་པ་གང༌། །དབུས་འགྱུར་ལུང་རྟོགས་བསྟན་པའི་འབྲས་བཟང་ཀུན། །འཕྱུར་བུར་ལེགས་སྤུངས་དགའ་བདེར་ལེགས་སྤྱད་ནས། །དཔལ་ལྡན་གྲུ་འཛིན་གཉིས་པའི་ཕོ་བྲང་ཆེར། །མི་འགྱུར་རྡོ་རྗེའི་ཁྲི་ལ་བརྟན་གྱུར་ཅིག །འཆད་རྩོད་རྩོམ་དང་ཐོས་བསམ་སྒོམ་ལ་སོགས། །ཕུལ་བྱུང་རྣམ་པར་དཀར་བའི་འཕྲིན་ལས་ཀྱིས། །མཁའ་ཁྱབ་འགྲོ་ཀུན་ཕན་བདེའི་སར་འགོད་པའི། །བཞེད་དོན་མ་ལུས་གེགས་མེད་འགྲུབ་གྱུར་ཅིག །ཅེས་པ་འདི་ཡང་རྒྱ་ནག་ཕོ་བྲང་ཆེན་པོའི་བྱ་འདབས་ཀྱི་ལྷ་ཁང་སེར་པོའི་སློབ་དཔོན་བསམ་བློ་སྦྱིན་པ་རྒྱ་མཚོས་བསྐུལ་བ་ལ་རྟེན་ནས་ཟ་ཧོར་གྱི་བནྡེས་བྲིས་པའོ། །རྒྱལ་བ་སྲས་བཅས་ཉན་རང་འཕགས་པ་དང༌། །རིག་འཛིན་ལྷ་དང་དྲང་སྲོང་གྲུབ་པ་སོགས། །སླུ་མེད་བདེན་པའི་ཚིག་ལ་དབང་ཐོབ་པ། །ཀུན་གྱི་སྨོན་ལམ་འགྲུབ་པའི་གྲོགས་མཛོད་ཅིག །སྦྱིན་སོགས་ཕྱིན་དྲུག་རྒྱལ་སྲས་སྤྱོད་པ་ལ། །(༡༥ན) ― GLG021_Page_0031 ―
[མ་དཔེ་གཟིགས་ན་འདིར་གནོན།]
མོས་པའི་བློ་ལྡན་འདུས་ཚོགས་རྒྱ་མཚོ་རྣམས། །ཚེ་རབས་ཀུན་ཏུ་དལ་འབྱོར་རྟེན་ཐོབ་ཅིང༌། །དགེ་བའི་བཤེས་ཀྱི་རྗེས་སུ་འཛིན་པར་ཤོག །མཐའ་ཡས་ཆོས་ཀུན་ཐོས་པས་སྒྲོ་འདོགས་བཅད། །དེ་དོན་རྣམ་འབྱེད་ཤེས་རབ་རྩལ་གྱི་བསམས། །ཚུལ་བཞིན་བསྒྲུབས་པས་རྣམ་པ་ཐམས་ཅད་མཁྱེན། །མངོན་དུ་བྱས་ནས་དོན་གཉིས་འགྲུབ་པར་ཤོག །དེ་ཐོབ་མ་གྱུར་ཚེ་རབས་ཐམས་ཅད་དུ། །དམ་ཆོས་སྣོད་ལྡན་གདུལ་བྱ་གཟུར་གནས་ཅན། །དགེ་བའི་བཤེས་ཀྱི་རྗེས་སུ་འབྲང་བ་ལ། །རྟག་ཏུ་ངུ་ཡི་རྣམ་ཐར་འཛིན་པར་ཤོག །རྣམ་དག་ཚུལ་ཁྲིམས་རྩ་བ་རབ་ཏུ་བརྟན། །བྱང་ཆུབ་སེམས་ཀྱི་ལོ་འདབས་ཕང་ཕུང་གཡོ། །རྡོ་རྗེ་རྣལ་འབྱོར་འབྲས་བུའི་ཁུར་དུད་པ། །སྔོན་མེད་ཡོངས་འདུའི་དབང་པོ་ལྟར་གྱུར་ཅིག །དེ་ལྟར་སྨོན་ལམ་ཡིད་བཞིན་ནོར་བུ་མཆོག །དད་པའི་རྒྱལ་མཚན་རྩེ་མོར་རབ་བཀོད་ནས། །ཅི་བསམ་རེ་བ་ལེགས་སྐོང་འདོད་དགུའི་ཆར། །ས་སྟེང་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་པ་འདི་ཡང་ལྷ་ཁང་སེར་པོའི་བླ་མ་བསམ་བློ་རབ་འབྱམས་པ་སྦྱིན་པ་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་བྲིས། །བླ་མ་ཡི་དམ་མཁའ་འགྲོ་ཆོས་སྐྱོང་དང༌། །ལྷ་མིའི་དྲང་སྲོང་བདེན་ཚིག་གྲུབ་རྣམས་ཀྱིས། །ངག་དབང་བློ་བསལ་སྐལ་བཟང་རྒྱ་མཚོའི་སྡེ། །རྡོ་རྗེ་ལྟ་བུར་སྐུ་ཚེ་བརྟན་པར་ཤོག །མྱུར་དུ་གངས་ཅན་ལྗོངས་དེར་ཐོག་མེད་དུ། །བགྲོད་(༡༥བ) ― GLG021_Page_0032 ―
[མ་དཔེ་གཟིགས་ན་འདིར་གནོན།]
པར་གེགས་མེད་བསམ་པ་ལྷུན་གྲུབ་ཅིང༌། །བདག་སོགས་རྣམས་ཀྱི་ནད་གདོན་བར་གཅོད་ཀུན། །ཞི་ཞིང་ཕན་བདེའི་དཔལ་ལ་སྤྱོད་པར་ཤོག །དཀར་ཕྱོགས་མཐུ་སྟོབས་རྒྱལ་མཚན་སྲིད་རྩེར་བསྒྲེངས། །ནག་ཕྱོགས་མི་ཕྱུགས་ནད་རིམ་འཁྲུག་རྩོད་ཞི། །བདེ་སྐྱིད་ཉི་མོའི་སྣང་བ་རབ་རྒྱས་པའི། །སྨོན་ལམ་མ་ལུས་ཐོག་མེད་འགྲུབ་གྱུར་ཅིག །ཅེས་པ་འདི་ཡང་སྒར་ཆེན་ཕོ་བྲང་ནས་ཡར་བཏེག་པའི་བྱང་ཏལ་སྒར་ཡོད་སྐབས་སྒར་སྤྱི་སོའི་འདོད་པ་ལྟར་ཁྲོམ་དབང་བསྐུར་ཅིང་བརྟན་བཞུགས་ཀྱི་རྟེན་འབྲེལ་བསྒྲིག་དུས་སྒར་དམངས་རྣམས་ཀྱིས་ངེད་ཡུན་དུ་འཚོ་བ་དང་སྤྱི་སྒེར་གྱི་བར་ཆད་སེལ་བའི་སྨོན་ལམ་ཚིགས་བཅད་འདི་བཞིན་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །སླུ་མེད་དཀོན་མཆོག་རིན་ཆེན་རྣམ་གསུམ་གྱི། །དམིགས་མེད་ཐུགས་རྗེ་ཆེན་པོའི་བྱིན་རླབས་པས། །མཐའ་མེད་འཁོར་བར་འཁྱམ་པའི་བདག་སོགས་འགྲོ། །འཇིགས་མེད་སྟོབས་བཅུའི་གོ་འཕང་ཐོབ་པར་ཤོག །ཚུལ་དེ་མ་ཐོབ་ཚེ་རབ་ཐམས་ཅད་དུ། །དལ་བརྒྱད་འབྱོར་བཅུ་ཚང་བའི་སྲིད་བཟུང་ནས། །རྗེ་བཙུན་བླ་མ་མཆོག་གི་ཞབས་དྲུང་དུ། །འབྲལ་མེད་དམ་པའི་ཆོས་ལ་སྤྱོད་པར་ཤོག །ཁྱད་པར་གཞོན་ནུ་རབ་བྱུང་ཚངས་སྤྱོད་ཀྱི། །ཚུལ་ཁྲིམས་མིག་འབྲས་ལྟར་སྲུང་བསླབ་གསུམ་ལྡན། །འགྲོ་བའི་བསོད་ནམས་ཞིང་གི་མཆོག་གྱུར་ནས། །(༡༦ན) ― GLG021_Page_0033 ―
[མ་དཔེ་གཟིགས་ན་འདིར་གནོན།]
མྱང་འདས་རིན་ཆེན་གླིང་དུ་བགྲོད་པར་ཤོག །ནད་གདོན་བར་ཆད་མི་མཐུན་ཕྱོགས་ཀུན་གྱིས། །སྐད་ཅིག་ཙམ་ཡང་འཚེ་བར་མི་ནུས་ཤིང༌། །ཚེ་དང་བསོད་ནམས་ལུང་རྟོགས་ཡོན་ཏན་སོགས། །ལེགས་ཚོགས་མ་ལུས་འཕེལ་བར་བྱིན་གྱིས་རློབས། །ཞེས་པ་འདི་ཡང་རྒྱ་ནག་གི་རྒྱལ་ཁམས་མྱུལ་བའི་ཚེ་མགོན་པོ་གུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །འཇམ་མགོན་ལང་ཚོ་དར་བབས་མཁྱེན་པའི་གཞིར། །ཐུབ་བསྟན་དཔག་བསམ་སྡོང་པོ་རབ་རྒྱས་པ། །བློ་བཟང་གྲགས་སྙན་རིང་ལུགས་གྲིབ་བསིལ་ལ། །འགྲོ་ཀུན་ལོངས་སུ་སྤྱོད་པའི་བཀྲ་ཤིས་ཤོག །ཕུལ་བྱུང་བསོད་ནམས་མཆོག་ཏུ་རབ་བརྟན་ཅིང༌། །ཐུབ་བསྟན་ལེགས་སྐྱོང་ས་དབང་ཆོས་ཀྱི་རྒྱལ། །གནམ་སྐོས་ས་ཡི་ཚངས་པའི་སྐུ་ཚེ་དང༌། །མཚན་ཇུས་མངའ་ཐང་ཕྱོགས་བཅུར་རྒྱས་པར་ཤོག །ལེགས་བྱས་བྱེ་བའི་ཡིད་བཞིན་དབང་གི་རྒྱལ། །སྡེ་བཞིའི་འདོད་རྒུ་ཆར་དུ་བསྙིལ་བའི་འབྲས། །རབ་ཡངས་ནོར་འཛིན་ཁྱོན་ཀུན་ཡོངས་ཁྱབ་པའི། །ཕན་བདེའི་དཔལ་གྱིས་དུས་ཀུན་ཁྱབ་གྱུར་ཅིག །ཅེས་སྨོན་ལམ་ཆེན་མོའི་དམ་བཅའི་སྐབས་མ་ཎི་བསྐུལ་རྒྱུའི་ཚིགས་བཅད་བརྟན་བཞུགས་འདི་ནི་དཀོན་མཆོག་བློ་གྲོས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །འཇའ་འོད་གུར་ནང་པད་དཀར་ཟླ་བའི་སྟེང༌། །འཆི་མེད་དཔལ་སྟེར་(༡༦བ) ― GLG021_Page_0034 ―
[མ་དཔེ་གཟིགས་ན་འདིར་གནོན།]
འཇོ་སྒེག་ལྷ་མོའི་གཟུགས། །རྒྱལ་ཡུམ་ཡིད་བཞིན་འཁོར་ལོའི་བསིལ་བྱིན་མཁན། །ཡིད་མཁར་འགོག་མེད་རྟག་པར་འཆར་དུ་གསོལ། །རྨད་བྱུང་མཆོད་ཚོགས་སྤྲིན་ཕུང་འཁྲིགས་པ་ལས། དངོས་གྲུབ་འཛད་པ་མེད་པའི་ཆར་རྒྱུན་གྱིས། །ཕན་བདེ་མྱུ་གུའི་ཁྲི་ཤིང་གཡུར་ཟ་བའི། །དོན་གཉིས་འབྲས་བུར་སྤྱོད་པའི་དགའ་སྟོན་སྩོལ། ཁྱད་པར་བློ་བཟང་གྲགས་སྙན་རབ་འབར་བསྟན། །སྟོབས་ཀྱི་འཁོར་ལོས་ལེགས་འཛིན་ཆོད་ཀྱི་རྒྱལ། །གནམ་སའི་དབང་ཕྱུག་སྦྱིན་པའི་བདག་པོ་ལ། །ཚེ་དཔལ་དངོས་གྲུབ་མ་ལུས་སྩལ་དུ་གསོལ། །ཨོཾ་ཏཱ་རེ་ཏུ་ཏྟ་རེ་ཏུ་རེ་དཱ་ན་པ་ཏཱེ་རཱ་ཡུཿཔུཎྱ་པུཥྟིཾ་ཀུ་རུ་སྭཱཧཱ། ཞེས་པ་འདི་ནི་བསྟན་པ་རིན་པོ་ཆེ་ལ་མི་ཕྱེད་པའི་དད་པའི་རྒྱན་གྱིས་མཛེས་ཤིང་ཡངས་པའི་ས་ཆེན་པོ་སྐྱོང་བར་དཔའ་མཛངས་རྟུལ་ཕོད་པའི་རྣམ་དཔྱོད་ཅན་བསྟན་འཛིན་ཆོས་ཀྱི་རྒྱལ་པོ་བྲོ་འཚལ་བའི་སྐབས། བར་ཆད་སེལ་བའི་རིམ་གྲོར་དམིགས་སྟེ་ཟ་ཧོར་གྱི་བནྡེས་ཆོས་སྡེ་ཆེན་པོ་སེ་འབྲས་གཉིས་ཀྱི་དགེ་འདུན་འདུས་པའི་ཞལ་འདོན་དུ་སྦྱར་བའོ། །ཐབས་ཤེས་ཟུང་འཇུག་འཆི་མེད་བདུད་རྩིའི་དཔྱིད། །རྒྱལ་ཀུན་གསང་བ་རབ་འབྱམས་འཁོར་ལོའི་མཛོད། །རིགས་བརྒྱའི་ཁྱབ་བདག་དབང་པོར་ལྷུན་གྲུབ་པ། །ལྷར་བཅས་འགྲོ་བའི་གཙུག་ན་རྒྱས་གྱུར་ཅིག །དུས་གསུམ་རྒྱལ་ཀུན་ཐུགས་རྗེའི་རང་གཟུགས་གར། །མཐའ་ཡས་གདུལ་བྱའི་ཡིད་མཁར་ལེགས་ཤར་བ། །མཁས་བཙུན་གྲུབ་པའི་འཁོར་ལོས་བསྒྱུར་བ་(༡༧ན) ― GLG021_Page_0035 ―
[མ་དཔེ་གཟིགས་ན་འདིར་གནོན།]
མཆོག །གྲངས་མེད་སྐྱེ་དགུའི་ཉེར་འཚོར་རྟག་བཞུགས་གསོལ། །ཡེ་ཤེས་འཇའ་ཚོན་རྣམ་བཀྲའི་གུར་ཁྱིམ་ནས། །སིནྡུ་ཝ་རའི་མདངས་འཛིན་ངག་གི་ལྷ། །བསྟན་པའི་འཁོར་ལོ་ཀུན་མཁྱེན་ཙོང་ཁ་པའི། །དྲི་མེད་རིང་ལུགས་སྤེལ་ཕྱིར་རྟག་བཞུགས་གསོལ། །ངོ་མཚར་དག་པ་འོག་མིན་ཞིང་ཁམས་ནས། །ལྷག་བསམ་རིན་ཆེན་ཐེམ་སྐས་ལས་བབས་ཏེ། །ཁ་བའི་ལྗོངས་འདིར་བསྒྱུར་བའི་ངུར་མིག་གར། །གྲངས་མེད་གདུལ་བྱའི་མགོན་དུ་རྟག་བཞུགས་གསོལ། །མཁའ་ཁྱབ་དག་པ་དོན་དམ་དབྱིངས་ཉིད་ནས། །ཀུན་རྫོབ་སྤྲོས་པའི་སྣང་བ་འཆར་བཞིན་དུ། །དམན་པའི་ལམ་གྱི་རྗེས་འགྲོ་ཞི་བདེའི་ཚུལ། །རྣམ་འདྲེན་མཛད་པ་མིན་ཕྱིར་རྟག་བཞུགས་གསོལ། །ལེགས་པའི་ཆ་བསགས་དཔལ་ལྡན་ཀ་ལ་པར། །འཇམ་དཔལ་དབྱངས་དངོས་སྙན་པའི་གྲགས་འབར་བ། །བསམ་བཞིན་ས་ལའི་ལྗོངས་སུ་སྲིད་བཟུང་བ། །མི་འགྱུར་རྡོ་རྗེའི་གདན་ལ་རྟག་བཞུགས་གསོལ། །སྡེ་བཞིའི་དཔལ་ལྡན་དྲག་པོའི་བརྟུལ་ཞུགས་ཀྱིས། །ཀླ་ཀློ་མཐར་བྱེད་སྟོབས་ཀྱིས་འཁོར་ལོས་བསྒྱུར། །དུམ་བུ་བཅུ་གཉིས་ས་ལ་སྤྱོད་མིན་པར། །འགྲོ་ལ་ཆོས་འཁོར་སྐོར་ཕྱིར་རྟག་བཞུགས་གསོལ། །དགེ་བཅུའི་མངལ་ཁུར་ནོར་འཛིན་ལུས་ཕྲའི་ལྟོར། །ཡང་དག་ལམ་དུ་སྲིད་འཁྱམས་འགྲོ་བ་རྣམས། །རྗེས་སུ་བཟུང་བ་ནོར་བུའི་དོ་ཤལ་གྱིས། །སྐལ་བཟང་རྒྱན་དུ་སྤུད་པའི་བཀའ་དྲིན་སྩོལལ། །བློ་གྲོས་རབ་ཡངས་མཁས་བཙུན་(༡༧བ) ― GLG021_Page_0036 ―
[མ་དཔེ་གཟིགས་ན་འདིར་གནོན།]
བཟང་པོ་ཡིས། །ལུང་རྟོགས་ཆོས་ཀྱི་དགའ་སྟོན་སྩོལ་མཁས་པ། །འཇམ་དཔལ་སྙིང་པོའི་རིང་ལུགས་རྒྱལ་མཚན་མཆོག །སྲིད་པའི་རྩེ་མོའི་བར་དུ་བསྒྲེང་བར་ཤོག །དགེ་ལེགས་ས་བོན་དར་ལ་ཡོངས་བབས་པ། །འགྲོ་བའི་ལེགས་བྱས་འཛམྦུའི་ལྗོན་ཤིང་འབྲས། །མི་འཛད་ལོངས་སུ་སྤྱོད་པའི་སུ་ཝརྞས། །སྲིད་ཞིའི་དབུལ་བ་དྲུང་ནས་འབྱིན་པར་ཤོག །ཚེ་དཔག་མེད་མགོན་རྣམ་པར་རྒྱལ་མ་དང༌། །རྗེ་བཙུན་ཡིད་བཞིན་འཁོར་ལོ་ལ་སོགས་པ། །མཆོག་གསུམ་དམ་པའི་བཀྲ་ཤིས་ནཱ་དའི་སྒྲ། །གཞོམ་མེད་དབྱངས་ཀྱི་ང་རོ་སྒྲོག་གྱུར་ཅིག །ཅེས་དོན་གྱི་སླད་དུ་མཚན་ནས་སྨོས་ཏེ་མཁན་པོ་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་དཔལ་བཟང་པོ་བསྟན་འགྲོའི་ཉེར་འཚོར་ཞབས་པད་བརྟན་པའི་རྟེན་འབྱུང་གི་ཚིགས་སུ་བཅད་པ་འདི་ནི་ཟ་ཧོར་གྱི་བནྡེས་ཕོ་བྲང་བསམ་གྲུབ་རྩེར་བྲིས་ཏེ་ཕུལ་བ་སིདྡྷི་རསྟུ། །དཔལ་ལྡན་མི་ཕམ་ཐུགས་རྗེའི་རིན་ཅེན་ཁམས། །རྒྱ་བོད་གནས་ལྔ་རིག་པའི་པཎྜི་ཏར། །ལེགས་གྲུབ་རྒྱལ་བ་གཉིས་པ་བུ་སྟོན་རྗེའི། །མཁྱེན་བརྩེ་ནུས་པས་ཕན་བདེའི་དཔལ་སྩོལ་ཅིག །རྨད་བྱུང་འཆི་མེད་བདུད་རྩིའི་ཆུ་གཏེར་ཆེ། །ནམ་ཡང་འཇིགས་པ་མེད་པའི་རླབས་ཕྲེང་ཅན། །ཚེ་དཔལ་ཡིད་བཞིན་ནོར་བུའི་འདོད་འཇོ་མཁན། །འཁོར་ལོའི་མགོན་གྱི་ཡུམ་དེས་རྟག་ཏུ་སྐྱོངས། །གསུང་ངག་རྡོ་རྗེའི་དབྱངས་ལྡན་དབང་ཕྱུག་བརྒྱད། །ལྷུན་གྲུབ་བློ་གསལ་སྐལ་བཟང་དགའ་བའི་བཤེས།(༡༨ན) ― GLG021_Page_0037 ―
[མ་དཔེ་གཟིགས་ན་འདིར་གནོན།]
།རྒྱ་ཆེན་གསུང་རབ་འཆད་ལ་མཚོ་བྱུང་མའི། །རྗེས་འགྲོ་རྡོ་རྗེའི་ཁྲི་ལ་བརྟན་གྱུར་ཅིག །འཆད་རྩོད་རྩོམ་པར་འཇིག་བྲལ་སེང་གེའི་སྒྲ། །གཞོམ་མེད་རྣམ་པར་དཔྱོད་པའི་གོ་ཆ་ཅན། །ཐུབ་བསྟན་ཐོས་བསམ་སྒོམ་པ་ལང་ཚོའི་སྡེ། །སྲིད་མཐའི་བར་དུ་གཡོ་མེད་བརྟན་གྱུར་ཅིག །ཕུན་ཚོགས་རབ་དཀར་དགེ་བའི་ཀེ་ལ་ཤ །མ་རྨད་སྨོན་ལམ་ཚ་ཟེར་གྱིས་ཞུ་བའི། །ལེགས་བྱས་འཛད་པ་མེད་པ་ཆུ་བོའི་རྒྱུན། །བྱང་ཆུབ་མཆོག་གི་རྒྱ་མཚོར་བབས་གྱུར་ཅིག །མ་འདྲིས་འགྲོ་བ་ཀུན་ལ་མཛའ་བའི་གཉེན། །སྟོབས་བཅུའི་རྩལ་འཆང་ཟས་གཙང་སྲས་པོ་ཡི། །ལུང་དང་རྟོགས་པའི་རིང་ལུགས་གདུག་དཀར་པོ། །སྲིད་པའི་རྩེ་མོའི་བར་དུ་འཁོར་གྱུར་ཅིག །ཁྱད་པར་རྣལ་འབྱོར་དབང་ཕྱུག་སྠ་བི་ར། །གནས་ལྔ་ཀུན་མཁྱེན་ཤཱཀྱ་ཤྲཱིའི་ཞབས། །བསམ་བཞིན་སྐྱེ་བའི་ཟློས་གར་བུ་སྟོན་རྗེའི། །མདོ་སྔགས་བཤད་སྒྲུབ་བསྟན་པ་རྒྱས་གྱུར་ཅིག །རིང་ལུགས་གསེར་གྱི་ཤིང་རྟ་འདྲེན་པའི་གྱད། །བཟང་པོའི་བག་ཆགས་ཡོངས་སད་ལྡོང་གི་རིགས། །ལས་དང་བསྐལ་བར་ལྡན་པའི་རྗེས་འཇུག་གི །བསྟན་འཛིན་དབྱར་གྱི་མཚོ་ལྟར་འཕེལ་གྱུར་ཅིག །སུམ་རྩེན་ས་ལ་འཕོས་འདྲ་གསེར་བཀང་ཞེས། །ངོ་མཚར་རྟེན་དང་བརྟེན་པའི་འཁོར་ལོ་ཅན། །གངས་ཅན་རི་བོའི་ཕུག་ན་དབེན་པའི་གནས། །ཁྲིམས་ལྡན་འདུས་སྡེ་རྟག་ཏུ་རྒྱས་གྱུར་ཅིག །བསྐལ་བ་བཟང་པོའི་རྣམ་འདྲེན་བདུན་པ་མཆོག །དམ་པའི་ཆོས་ཀྱི་ཉི་འོད་རབ་གསལ་བ། །(༡༨བ) ― GLG021_Page_0038 ―
[མ་དཔེ་གཟིགས་ན་འདིར་གནོན།]
སྔོན་མེད་རྫོགས་ལྡན་གསར་པའི་དགའ་སྟོན་ལ། །འགྲོ་ཀུན་ལོངས་སུ་ལེགས་སྤྱོད་བཀྲ་ཤིས་ཤོག །ཅེས་ངེད་རང་གི་མིང་སྒྲ་ཐོན་པའི་གསོལ་འདེབས་བརྟན་བཞུགས་བསྟན་པ་སྤྱི་དང་བྱེ་བྲག་ཞ་ལུ་བའི་རིང་ལུགས་འཕེལ་བའི་སྨོན་ལམ་དང་བཅས་པ་འདི་ནི། ཆོས་སྡེ་ཆེན་པོ་ཞ་ལུ་རི་མཐིལ་གྱི་སྤྱི་ཚོགས་ཀྱིས་བསྐུལ་བའི་ངོར། ཟ་ཧོར་གྱི་བནྡེས་གསེར་བཀང་གི་ཉེ་འདབས་སུ་སྦྱར་བའོ། །བདག་དང་འགྲོ་བ་སེམས་ཅན་མ་ལུས་པ། །དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །འགྲོ་ཀུན་སྲིད་པའི་རྒྱ་མཚོ་ལས་སྒྲལ་ཕྱིར། །སྨོན་འཇུག་བྱང་ཆུབ་མཆོག་ཏུ་སེམས་སྐྱེད་དོ། །མདུན་གྱི་ནམ་མཁར་སེང་གེས་བཏེག་པ་ཡི། །པད་དཀར་ཟླ་བའི་དཀྱིལ་འཁོར་རྒྱས་པའི་སྟེང༌། །རྩ་རྒྱུད་བླ་མ་དུས་གསུམ་རྒྱས་སྲས་དང༌། །དཔའ་བོ་མཁའ་འགྲོ་ཆོས་སྐྱོང་ཀུན་འདུས་པའི། །སྐྱབས་གསུམ་ངོ་བོ་འཕགས་མཆོག་སྤྱན་རས་གཟིགས། །ཞལ་གཅིག་ཕྱག་བཞི་ཞི་ཞིང་འཛུམ་པའི་ཉམས། །རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར། །ལྷག་མ་གཉིས་ཀྱི་ཤེལ་འཕྲེང་པད་ཀར་འཛིན། །རིན་ཆེན་རྒྱན་དང་དར་གྱི་ན་བཟའ་གསོལ། །ཀྲི་ཥྞ་སཱ་རའི་པགས་པ་ཕྲག་པར་བཀལ། །བལྟ་བས་མི་ངོམས་མཚན་དཔེའི་ལང་ཚོ་ཅན། །ཞབས་གཉིས་མི་ཕྱེད་རྡོ་རྗེའི་སྐྱིལ་ཀྲུང་བཞུགས། །སྟེང་འོག་ཕྱོགས་མཚམས་བླ་མ་ཡི་དམ་ལྷ། །སངས་རྒྱས་བྱང་སེམས་ཉན་ཐོས་རང་རྒྱལ་དང༌། །དཔའ་བོ་མཁའ་འགྲོ་(༡༩ན) ― GLG021_Page_0039 ―
[མ་དཔེ་གཟིགས་ན་འདིར་གནོན།]
ཆོས་སྐྱོང་སྲུང་མ་སོགས། །སྤྲིན་གྱི་ཕུང་པོ་ལྟ་བུར་བཞུགས་སུ་གསོལ། །རང་ལུས་བྱེ་བ་ཕྲག་བརྒྱའི་ཞིང་ཁམས་ཀྱི། །རྡུལ་གྱི་གྲངས་དང་མཉམ་པར་རབ་སྤྲུལ་ནས། །བསླུ་བ་མེད་པའི་སྐྱབས་གནས་ཚོགས་རྣམས་ལ། །མི་ཕྱེད་དང་བའི་ཡིད་ཀྱི་ཕྱག་འཚལ་ལོ། །ཀུན་ཏུ་བཟང་པོའི་མཆོད་པའི་སྤྲིན་ཆེན་པོ། །ས་དང་བར་སྣང་མ་ལུས་ཡོངས་བཀང་སྟེ། །དུས་གསུམ་བསགས་དང་བསག་འགྱུར་དགེ་ཚོགས་དང༌། །ལྷན་ཅིག་གུས་པའི་ཡིད་ཀྱིས་དབུལ་བར་བགྱི། །ཐོག་མེད་དུས་ནས་ད་ལྟའི་བར་དག་ཏུ། །མི་བཟད་ཉོན་མོངས་དུག་གསུམ་དབང་གྱུར་ཏེ། །གྲངས་མེད་བསགས་པའི་ནག་པོའི་ལས་རྣམས་ཀུན། །གཉེན་པོ་སྟོབས་བཞིའི་སྒོ་ནས་ལེགས་པར་བཤགས། །བདག་གཞན་རྣམས་ཀྱི་ད་ལྟ་དུས་གསུམ་དུ། །བྱས་དང་བྱེད་བཞིན་བྱེད་པར་འགྱུར་བ་ཡི། །ཕུན་ཚོགས་རྣམ་དཀར་དགེ་བ་ཅི་མཆིས་པར། །སྙིང་ནས་དང་བས་རྗེས་སུ་ཡིད་རང་ངོ༌། །དུས་གསུམ་བྱོན་དང་འབྱོན་འགྱུར་བྱོན་བཞིན་པ། །རྣམ་འདྲེན་སློབ་མར་བཅས་པའི་ཚོགས་རྣམས་ཀྱིས། །ལུས་ཅན་རྣམས་ལ་ཟབ་དང་རྒྱ་ཆེ་བའི། །དམ་ཆོས་རྒྱུན་ཆད་མེད་པར་བསྐོར་བར་བསྐུལ། །མཆོག་དམན་སྐྱེ་དགུ་ཀུན་གྱིས་མངོན་སུམ་དུ། །མཐོང་བའི་བསྐལ་བ་ཅན་གྱུར་གཟུགས་ཀྱི་སྐུ། །ཉི་ཟླའི་འོད་ཀྱིས་འཇིག་རྟེན་མུན་པའི་དཔུང༌། །སེལ་བ་ཇི་སྲིད་བརྟན་པར་བཞུགས་སུ་གསོལ། །འབད་པ་ཆེན་པོས་ལུས་ངག་ཡིད་གསུམ་གྱིས། །ཇི་སྙེད་བསགས་པའི་དགེ་ཚོགས་མ་ལུས་པ། །མཁའ་མཉམ་མར་(༡༩བ) ― GLG021_Page_0040 ―
[མ་དཔེ་གཟིགས་ན་འདིར་གནོན།]
གྱུར་འགྲོ་བ་སྒྲོལ་སླད་དུ། །རྣམ་པ་ཐམས་ཅད་མཁྱེན་པ་ཐོབ་ཕྱིར་བསྔོ། །གྲངས་མེད་རྒྱལ་བ་ཀུན་གྱི་ཐུགས་རྗེའི་གཏེར། །བཞིན་ལག་གཟུགས་སུ་ཤར་བ་པད་དཀར་འཆང༌། །མ་འདྲིས་འགྲོ་བ་ཀུན་གྱི་མཛའ་བའི་བཤེས། །སླུ་མེད་གཏན་གྱི་སྐྱབས་ཁྱོད་བདག་ལ་དགོངས། །ཐོག་མེད་དུས་ནས་གཏི་མུག་མུན་པས་བསྒྲིབས། །བླངས་དང་དོར་བྱར་བལྟ་བའི་བློ་མིག་ལྡོངས། །མི་དགེའི་ལས་ལ་བག་མེད་སྤྱད་པའི་མཐུས། །མི་ཟད་འཁོར་བའི་རྒྱ་མཚོའི་ནང་དུ་བྱིང༌། །དངོས་སུ་བཟོད་པར་དཀའ་བའི་སྡུག་བསྔལ་ཅན། །ཉམ་ཐག་དམྱལ་བ་ཡི་དྭགས་དུད་འགྲོའི་རྟེན། །སྡུག་བསྔལ་བདེ་བར་རློམས་པ་ལྷ་མིའི་ལུས། །འདབ་ཆགས་མཁའ་ལ་འཕུར་བ་ཇི་བཞིན་དུ། །འདུ་བྱེད་གྱིས་མནར་གཟུགས་དང་གཟུགས་མེད་ལྷ། །སྐྱེ་རྒ་ན་འཆིའི་རྒྱ་ལས་མ་གྲོལ་བའི། །ཚུལ་འདི་བསམས་ཚེ་སྒོ་གསུམ་ངལ་བའི་གནས། །དེ་ཕྱིར་མཆོག་གསུམ་ངོ་བོར་གསོལ་འདེབས་ན། །འཁོར་བ་མེ་ཡི་དོང་ལས་སྐྱབས་ཏུ་གསོལ། །སྲིད་པའི་དཔལ་འབྱོར་ཆུ་བོ་ཆེ་ལས་སྒྲོལ། །རང་བདེ་ཞི་བའི་འབྲོག་དགོན་གནས་ལས་དྲོངས། །རྣམ་མཁྱེན་རིན་ཆེན་གླིང་དུ་ཉེར་ཁྲིད་གསོལ། །གལ་ཏེ་ཚེ་འདིར་སྟོབས་བཅུ་མངའ་བ་ཡི། །གོ་འཕང་ཐོབ་པའི་སྐལ་པ་དམན་གྱུར་ན། །འཆི་ཚེ་གཏན་གྱི་སྐྱབས་ཁྱོད་དངོས་བྱོན་ནས། །བདེ་བ་ཅན་གྱི་ཞིང་དུ་དྲངས་དུ་གསོལ། །རྒྱས་པར་འདོད་ན། ཐེག་གསུམ་དམ་པའི་ཆོས་རྣམས་མ་ལུས་པ། །སྩོལ་མཛད་དངོས་གྲུབ་ཀུན་གྱི་འབྱུང་གནས་མཆོག །(༢༠ན) ― GLG021_Page_0041 ―
[མ་དཔེ་གཟིགས་ན་འདིར་གནོན།]
བཤེས་གཉེན་དམ་པ་གཙུག་གི་ནོར་བུ་ལྟར། །འབྲལ་མེད་ཚུལ་བཞིན་བསྟེན་པར་བྱིན་གྱིས་རློབས། །དལ་འབྱོར་ཡིད་བཞིན་ནོར་ལྟར་རྙེད་པ་དཀའ། །རྙེད་ཀྱང་ཆུ་ལྦུར་བཞིན་དུ་འཇིག་པར་སླ། །ཤི་བའི་འོག་ཏུ་ལས་ཀྱི་གཞན་དབང་ཅན། །རྒྱུ་འབྲས་ཚུལ་ལ་ངེས་ཤེས་འདྲོངས་བར་ཤོག །མ་རིག་འཁྲུལ་པའི་དབང་གིས་སྡིག་པའི་ལས། །དངོས་དང་བརྒྱུད་པའི་སྒོ་ནས་རབ་བསགས་པས། །ངན་སོང་གནས་སུ་སྐྱེ་བར་འགྱུར་བའི་ཚུལ། །རྟོགས་ཏེ་སྐྱབས་གནས་འཚོལ་བར་བྱིན་གྱིས་རློབས། །གདུལ་བྱ་རྗེས་སུ་འཛིན་པའི་ཡོན་ཏན་ཀུན། །མངོན་གྱུར་བསླུ་བ་མེད་པའི་མགོན་གཅིག་པུ། །དཀོན་མཆོག་གསུམ་ལ་སྙིང་ནས་སྐྱབས་འགྲོ་ཞིང༌། །བསླབ་བྱར་ཉམས་པ་མེད་པར་སློབ་པར་ཤོག །ཤེས་བཞིན་བརྟན་པོས་ལུས་ངག་ཡིད་ཀྱི་སྒོར། །མི་དགེ་བཅུ་ཡི་རྒྱུ་བ་ལེགས་སྲུང་ཞིང༌། །རྣམ་དཀར་དགེ་བའི་ཡོན་ཏན་མ་ལུས་པ། །དབྱར་གྱི་ཆུ་གཏེར་ལྟ་བུར་འཕེལ་བྱེད་ཤོག །ཚངས་པ་བརྒྱ་བྱིན་འཁོར་ལོས་བསྒྱུར་བ་སོགས། །སྲིད་པའི་ཕུན་ཚོགས་དཔལ་ལ་ལོངས་སྤྱོད་རྣམས། །སླར་ཡང་ངན་སོང་གནས་སུ་ལྷུང་བ་དག །ཤེས་ནས་འཁོར་བར་ངེས་པར་འབྱུང་བར་ཤོག །སྡུག་བསྔལ་མྱུ་གུ་མ་ལུས་སྐྱེད་བྱེད་པའི། །ས་བོན་ཀུན་འབྱུང་ཡིན་པར་རབ་རྟོགས་ནས། །ཕྲ་རག་ཉོན་མོངས་མ་ལུས་སྤོང་བའི་ཕྱིར། །རྟེན་འབྲེལ་ལུགས་འབྱུང་ལུགས་ལྡོག་སྒོམ་པར་ཤོག །ཞི་བདེ་དམན་པའི་ལམ་དུ་གོལ་ཤེས་ནས། །མ་གྱུར་འགྲོ་བ་(༢༠བ) བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་གནང་བ་སོགས།― GLG021_Page_0042 ―
[མ་དཔེ་གཟིགས་ན་འདིར་གནོན།]
བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་གནང་བ་སོགས། སྤངས་རྟོགས་ཡོན་ཏན་མཐར་ཕྱིན་རྫོགས་སངས་རྒྱས། །སྲིད་ཞིའི་འཇིགས་པ་ཀུན་སེལ་དམ་པའི་ཆོས། །ཐེག་གསུམ་སྐྱེ་འཕགས་དགེ་འདུན་ཚོགས་རྣམས་ཀྱིས། །མཁྱེན་བརྩེ་ནུས་པའི་མཐུ་དཔུང་སྐྱེད་དུ་གསོལ། །ས་ཆེན་ལེགས་སྐྱོང་བསྟན་འཛིན་ཆོས་རྒྱལ་གྱིས། །ཐོག་མེད་དུས་ནས་བསགས་པའི་སྡིག་པའི་ལས། །རྣམ་སྨིན་ནག་པོའི་འབྲས་འབྱིན་མུན་པའི་དཔུང༌། །ཐུགས་རྗེ་ཉི་མའི་འོད་ཀྱིས་བསལ་དུ་གསོལ། །མི་ཁོམ་གནས་ཀྱི་འཁྱོག་པོའི་ཡལ་ག་ཅན། །མ་དག་སྐྱེ་སྲིད་ནག་ཀླུང་ཡོངས་སྤངས་ནས། །དལ་འབྱོར་ཚང་བའི་འཆི་མེད་དགའ་ཚལ་དུ། །ཕན་བདེའི་དཔག་བསམ་ལྗོན་པར་སྤྱོད་གྱུར་ཅིག །གནས་སྐབས་སུ་ཡང་མངོན་མཐོའི་རྟེན་ཐོབ་ནས། །བསྟན་ལ་ལེགས་ཞུགས་དྲི་མེད་ཚུལ་ཁྲིམས་ལྡན། །ཐོས་བསམ་སྒོམ་གསུམ་ནོར་ལ་ལོངས་སྤྱད་དེ། །ངེས་པར་ལེགས་པའི་ལམ་མཆོག་(༢༡ན) ― GLG021_Page_0043 ―
[མ་དཔེ་གཟིགས་ན་འདིར་གནོན།]
སྒྲུབ་པར་ཤོག །དགེ་བཅུའི་རྫོགས་ལྡན་ཚེ་ལོ་བརྒྱད་ཁྲིའི་དུས། །འཛམ་བུའི་གླིང་འདིར་མི་ཕམ་མགོན་ཕེབས་ཚེ། །འཁོར་གྱི་ཐོག་མར་སྐྱེས་ནས་སྲིད་པ་ལས། །ཡོངས་གྲོལ་མྱང་འདས་བདུད་རྩིར་སྤྱོད་གྱུར་ཅིག །དུས་གསུམ་བསགས་དང་བསག་འགྱུར་དགེ་ཚོགས་ཀྱིས། །ཐར་པའི་རིན་ཆེན་ཐེམ་སྐས་ལ་འཛེགས་ནས། །དཔལ་ལྡན་སྟོབས་བཅུའི་རྩལ་འཆང་སངས་རྒྱས་ཀྱི། །གོ་འཕང་བདེ་ཆེན་གནས་སུ་བགྲོད་པར་ཤོག །ཅེས་པ་འདི་ནི་གནམ་སའི་དབང་ཕྱུག་བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་ཤཱཀྱའི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་འཇམ་དཔལ་ལོ། །ངག་དབང་བློ་གྲོས་དང་མཚུངས་ཟབ་ཅིང་ཡངས། །པད་དཀར་འཛིན་ལྟར་བཟང་པོའི་ལྷག་བསམ་ཅན། །རྒྱ་མཚོའི་རླབས་བཞིན་འཕྲིན་ལས་ཡོལ་མེད་པ། །ལག་ན་རྡོ་རྗེའི་རྗེས་འགྲོར་གསོལ་བ་འདེབས། །མི་མཐུན་ཕྱོགས་ལ་འཇིགས་མེད་གོ་ཆ་ཅན། །ཐུབ་བསྟན་ལང་ཚོ་རྒྱས་པའི་རྣམ་དཔྱོད་སྡེ། །སྐལ་བཟང་འགྲོ་བའི་ཉེར་འཚོ་བླ་ན་མེད། །རྗེ་བཙུན་བླ་མའི་ཞབས་ལ་གསོལ་བ་འདེབས། །དགེ་དེས་གནས་སྐབས་འདོད་པའི་དོན་རྣམས་འགྲུབ། །ཚེ་རབས་ཀུན་ཏུ་མགོན་ཁྱོད་ཞབས་དྲུང་དུ། །སྐྱེས་ནས་མངོན་པར་མཐོ་དང་ངེས་ལེགས་ཀྱི། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །སྲིད་ཞིའི་ཕུན་ཚོགས་སྩོལ་བའི་(༢༡བ) ― GLG021_Page_0044 ―
[མ་དཔེ་གཟིགས་ན་འདིར་གནོན།]
ཡི་དམ་ལྷ། །རྒྱལ་བ་ཀུན་ཡུམ་རྗེ་བཙུན་སྒྲོལ་མ་ཡི། །རྨད་བྱུང་མཚན་གྱི་མིང་ལྡན་རྗེ་འབངས་རྣམས། །ལྷག་པའི་ལྷ་དེས་རྗེས་སུ་འཛིན་པར་ཤོག །བཅོམ་ལྡན་ལྷ་མོ་གཟུངས་ཆེན་གྲྭ་ལྔ་ཡི། །ཐུགས་རྗེའི་འོད་ཀྱིས་བར་ཆད་མུན་བསལ་ཏེ། །རིགས་བརྒྱུད་འཕེལ་ཞིང་བདེ་བར་བཙའ་བ་སོགས། །ལེགས་ཚོགས་བྱེ་བའི་སྣང་བ་འབར་གྱུར་ཅིག །ཅེས་གསོལ་འདེབས་སྨོན་ལམ་དང་བཅས་པ་ཞིག་དགོས་ཞེས་དཔོན་མོ་ཕུན་ཚོགས་སྒྲོལ་མས་སྐུལ་བའི་ངོར་ཟ་ཧོར་གྱི་བནྡེས་སྦྱར། །རྩ་བརྒྱུད་བླ་མ་ཡི་དམ་ལྷ་ཚོགས་དང༌། །དཔའ་བོ་མཁའ་འགྲོ་ཆོས་སྐྱོང་སྲུང་མ་ཡིས། །བདག་གི་ནད་གདོན་བར་ཆད་ཀུན་ཞི་ཞིང༌། །བསམ་པའི་དོན་ཀུན་ལྷུན་གྱིས་གྲུབ་པར་མཛོད། །ཅེས་པ་འདི་ནི་མདར་པ་ངག་དབང་ཕུན་ཚོགས་ལྷུན་གྲུབ་བརྡ་སྤྲོད་པ་ཙནྡྲ་པའི་སློབ་གཉེར་སྐབས་བར་ཆད་མི་འཇུག་པའི་ངག་འདོན་ཞིག་དགོས་ཚུལ་བྱུང་བ་ལྟར་བྲིས། །བཟང་པོའི་བསྐལ་པ་ཚིག་མདའི་ལམ་ཡངས་པོར། །མཛད་བཟང་ཡོངས་འདུའི་འཁྲི་ཤིང་གཡུར་ཟ་བ། །བྱམས་བརྩེའི་མཚན་གྱི་ལོ་འདབས་ཕང་ཕུང་ཅན། །མི་ཕམ་ཕན་དང་བདེ་བའི་གྲིབ་བསིལ་གནས། །མཐའ་ཡས་སྲིད་ཞི་དངས་པའི་ཉལ་འགྲོའི་མཚོར། །ཐུགས་རྗེའི་ཟླ་གཟུགས་བགྲང་ཡས་ལེགས་འཆར་བ། །རྩོལ་བྲལ་ལྷུན་གྱིས་གྲུབ་པ་སྟོབས་བཅུའི་རྩལ། །རྫོགས་པའི་གསང་གསུམ་སྒྱུ་འཕྲུལ་ཚད་བཟུང་ཅི། །འབྲུག་སྒྲ་དལ་གྱིས་རྒོད་ཚེ་གཙུག་ཕུད་ཅན། །དགའ་(༢༢ན) ― GLG021_Page_0045 ―
[མ་དཔེ་གཟིགས་ན་འདིར་གནོན།]
བའི་སྒྲོ་གཤོག་ཟླུམ་པོར་སྒྱུར་བྱེད་ན། །བདེན་ཚིག་སྨྲེང་དུ་གསོལ་ཚེ་རྒྱལ་བ་ཀུན། །བྱིན་རླབས་འཇུག་པའི་སྣང་བ་ཅིས་མི་དཀར། །སྣ་ཚོགས་ཆུ་སྐྱེས་གྲངས་བཞིན་འགྲོ་བའི་བློ། །མཆོག་དམན་བར་མའི་ངང་ཚུལ་ཇི་སྙེད་པ། །བརྒྱད་ཁྲི་བཞི་སྟོང་ཆོས་ཀྱི་གྲུ་ཆར་ཆེས། །གཏན་བདེའི་སྣང་བ་རབ་བཀྲའི་འདབ་མ་འཛུམ། །དེ་ཕྱིར་སྲིད་མཚོ་སྒྲོལ་བའི་གྲུ་བོ་ཆེ། །ཐུབ་དབང་རྗེས་ཞུགས་རིས་མེད་གྲུབ་པའི་མཐའ། །ངེས་ལེགས་ནོར་བུ་འདྲེན་པའི་སྙིང་སྟོབས་ཅན། །མ་ལུས་ཐོས་བསམ་རིན་ཅེན་གླིང་བགྲོད་ཤོག །འཇམ་དཔལ་རྡོ་རྗེ་ཀུན་མཁྱེན་ཙོང་ཁ་པའི། །མཁྱེན་དཔྱོད་རྣམ་པར་རབ་ཡངས་མཚོན་རྣོན་པོས། །སྲིད་ཞིའི་འཆིང་རྒྱ་གཅོད་པའི་རིང་ལུགས་མཆོག །དཀར་ཕྱོགས་ཟླ་བའི་ཆ་ལྟར་འཕེལ་བར་ཤོག །ལེགས་བཤད་ནོར་བུ་སྐྱུག་ལ་འཆད་པའི་མགྲིན། །ཤེས་རབ་རྣམ་ཐོས་བུ་ཡིས་ཉེར་བཙིར་བས། །འབད་མེད་ཆར་འབེབ་ཡིད་བཞིན་དབང་གི་རྒྱལ། །མི་ཤེས་དབུལ་ཕོངས་སེལ་བའི་གན་མཛོད་ཅན། །མཁས་དབང་བིཤྭ་ཀརྨའི་ལག་ཉལ་གྱིས། །ལོག་རྟོགས་ཉི་མའི་དཀྱིལ་འཁོར་བཅུ་གཉིས་འཆར། །རྡར་བྱེད་དངོས་སྟོབས་རིགས་ལམ་རྩོད་པའི་མཚོན། །ཐུབ་བསྟན་ནི་རུ་ཀ་ཡི་འདོད་པ་འཇོ། །ངོ་མཚར་ཙྪནྡྷའི་སྲད་བུ་ལ་བརྒྱུས་པ། །གཙུག་ལག་བཻཌཱུར་སེར་པོ་སྤེལ་བའི་ཕྲེང༌། །ལེགས་བཤད་རྩོམ་ལ་སྤོབས་པ་དགེ་བ་ཅན། །བློ་བསལ་བསྟན་འཛིན་དབྱར་མཚོ་ལྟར་འཕེལ་ཤོག །ཚེ་རིང་གནམ་གྱི་ཤེ་མོང་དཔུང་པ་ཡིས། །ཡངས་པའི་ནོར་འཛིན་(༢༢བ) ― GLG021_Page_0046 ―
[མ་དཔེ་གཟིགས་ན་འདིར་གནོན།]
ཁྱོན་ལ་དབང་བསྒྱུར་བ། །ཆོས་ལྡན་རྒྱལ་པོའི་ཆབ་སྲིད་མངའ་ཐང་ཀུན། །ཉི་མོར་བྱེད་པའི་འོད་ལྟར་གསལ་གྱུར་ཅིག །གཞུང་མང་བརྒལ་བརྟག་དཔྱད་ལ་ཉེར་བཟོད་པ། །ལུང་རིགས་སྨྲ་བ་མངའ་རིས་འདུས་པའི་གྲྭ །དགེ་འདུན་ཚོགས་བརྒྱས་ཐོས་བསམ་དཔལ་བེའུའི། །རི་མོ་སྙིང་ཁའི་ངོས་སུ་འཛིན་གྱུར་ཅིག །མཐུན་རྐྱེན་སོར་མོས་ལེགས་བསྐུལ་དགེ་བའི་རྒྱུད། །རྟག་ཏུ་སྙན་པར་སྒྲོག་པའི་གླུ་དབྱངས་ཅན། །རབ་འབྱམས་སྨྲ་བ་དགེ་ལེགས་དཔལ་ལྡན་སོགས། །ཕན་པར་སྒྲུབ་ཀུན་ཆེས་དཀར་འབྲས་སྨིན་ཤོག །ཀུན་གསལ་སྒེག་མོའི་དཀྱུས་རིང་མིག་ཟུར་གྱིས། །ཕ་མཐའ་རྙེད་མིན་བགྲང་ཡས་འགྲོ་བ་རྣམས། །ཚེ་རབ་ཀུན་ཏུ་ཕན་བདེའི་སྲོག་འཚོ་བ། །མཆོག་གསུམ་ཐུགས་རྗེའི་བདུད་རྩིས་སྦྲན་གྱུར་ཅིག །ཅེས་འོན་མདའ་སས་ཁང་རྩེའི་མངའ་རིས་གྲྭ་ཚང་གི་ཀུན་དགའ་ར་བར་ལྔ་པ་ནོ་མོན་ཁང་དགེ་ལེགས་དཔལ་ལྡན་གྱིས་བྱམས་མགོན་གྱི་སྐུ་བརྙན་བཞེངས་དུས་འདོད་གསོལ་གྱི་སྨོན་ལམ་ཤིས་བརྗོད་དང་བཅས་པ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་དེ་ཕྲལ་དུ་བྲིས། །མཆོག་གསུམ་ཐུགས་རྗེའི་སྙིང་པོ་དཔག་བསམ་ལྗོན། །དངོས་གྲུབ་འདོད་པ་འཇོ་བ་དབང་གི་རྒྱལ། །བསམ་པའི་རེ་སྐོང་ཡིད་བཞིན་ནོར་བུའི་ཆར། །རྒྱ་མཚོའི་རླབས་ལྟར་ཡོལ་བ་མེད་གྱུར་ཅིག །ཕུལ་བྱུང་ལེགས་བྱས་རླུང་གིས་ཉེར་དྲངས་པ། །ཚེ་དཔལ་སྟོབས་འབྱོར་མ་ལ་ཡ་ཡི་དྲི། །རྒུད་པའི་ཚ་གདུང་མ་ལུས་རབ་བཅོམ་ནས། །ཕན་(༢༣ན) ― GLG021_Page_0047 ―
[མ་དཔེ་གཟིགས་ན་འདིར་གནོན།]
བདེའི་གྲིབ་སིལ་དག་ལ་ངལ་གསོར་ཤོག །མངོན་པར་མཐོ་རྟེན་རིན་ཆེན་ཐེམ་སྐས་ལ། །འཛེགས་ནས་ངེས་པར་ལེགས་པའི་ཁང་བཟང་དུ། །རབ་ཞུགས་རང་གཞན་དོན་གཉིས་ལྷུན་གྲུབ་པ། །དཔལ་ལྡན་སྟོབས་བཅུའི་གོ་འཕང་ཐོབ་པར་ཤོག །ལེགས་བྱས་རྒྱ་མཚོར་བྱིང་བ་གདེང་ཅན་དབང༌། །རྨད་བྱུང་འདོད་རྒུ་མ་ལུས་འབྱུང་བའི་གཏེར། །ལུས་སེམས་བདེ་བའི་དཔལ་ལ་ལོངས་སྤྱོད་པ། །ལེགས་ལྡན་དཔྱིད་ཀྱི་དཔལ་མོ་བཞད་པར་ཤོག །དག་པ་དོན་དམ་མཁའ་ཁྱབ་སྤྲོས་བྲལ་ཡང༌། །ཀུན་རྫོབ་རྟེན་ཅིང་འབྲེལ་འབྱུང་སླུ་མེད་པས། །བླ་མ་ཡི་དམ་ཆོས་སྲུང་བྱིན་རླབས་ཀྱིས། །སྨོན་པའི་གནས་ཀུན་ཇི་བཞིན་འགྲུབ་པར་ཤོག །ཅེས་པ་འདི་ཡང་ཡར་ཀླུངས་སྡེ་པ་བྱིང་པ་བདེ་ལེགས་ཀྱི་སྐུལ་བའི་ངོར་ཟ་ཧོར་གྱི་བནྡེས་ཆོ་འཕྲུལ་མཆོད་པའི་དུས་ཀྱི་ཐུན་མཚམས་ཀྱི་ངེས་པ་ཞིག་ལ་བྲིས། །བགྲང་ཡས་མཉམ་མེད་སངས་རྒྱས་དེའི་གསུང་ཆོས། །དགེ་འདུན་ཚངས་དབང་དྲག་པོ་གཙུག་ན་ཟླ། །ལྷ་མིའི་དྲང་སྲོང་བདེན་ཚིགས་གྲུབ་རྣམས་ཀྱིས། །སྨོན་པའི་འབྲས་བུ་ཇི་བཞིན་སྨིན་པར་མཛོད། །སྣ་མང་གྲགས་པའི་རྔ་གསང་ཆེར་སྒྲོག་པ། །ངོ་མཚར་སྤྲུལ་པའི་དབྱར་གྱི་ལང་ཚོའི་འབྲས། །འཇམ་མཉེན་ཕང་ཕུང་གཡོ་བའི་རྒྱལ་མཚན་མཆོག །སྐྱེ་སྲིད་ཟློས་གར་གཡུར་དུ་ཟ་བར་ཤོག །གཞན་ཕན་འགྲོ་ལ་རྗེས་སུ་ཆགས་པའི་འཕྲུལ། །ལེགས་བྱས་གན་མཛོད་རྣམས་ལ་དབང་བསྒྱུར་ནས། །ཡང་སྲིད་ས་(༢༣བ) ― GLG021_Page_0048 ―
[མ་དཔེ་གཟིགས་ན་འདིར་གནོན།]
མོས་འདབ་བརྒྱ་གྲོལ་བྱེད་པ། །བདག་གཞན་དོན་གྱི་སྙིང་པོ་ལྷུན་གྲུབ་ཤོག །མོས་ལྡན་གདུལ་བྱའི་དགའ་སྟོན་རབ་འཕེལ་བ། །ཕུན་སུམ་ཚོགས་པའི་དབང་ཕྱུག་ཡོན་ཏན་མཐུས། །ཞི་བའི་ཚུལ་ལས་ཉེར་འགོང་འཕྲིན་ལས་ཀྱི། །ཀུནྡའི་ཕོན་པོའི་དོ་ཤལ་མཛེས་གྱུར་ཅིག །ཕུལ་བྱུང་རྣམ་པར་དཀར་བའི་ཀུན་གསལ་ངོས། །ངོ་མཚར་སྐྱེས་རབས་དབང་པོའི་གཞུ་རིས་ཅན། །འདྲེན་བྱེད་ཡུལ་གྱི་བདུད་རྩི་བླ་ན་མེད། །ཡིད་ཀྱི་མོས་ངོར་འགྲུབ་པའི་བཀྲ་ཤིས་ཤོག །ཅེས་སྤྲུལ་སྐུ་གྲགས་པ་རྒྱལ་མཚན་གྱི་སྐུ་སྐྱེ་མྱུར་བྱོན་གྱི་སྨོན་ལམ་ཚིགས་བཅད་འདི་ནི་བྱམས་པ་ཀུན་བཟང་གིས་ནན་གིས་སྐུལ་བའི་ངོར་ཟ་ཧོར་གྱི་བནྡེས་བྲིས། །རྒྱལ་ཀུན་གསང་གསུམ་འཁོར་ལོའི་གན་མཛོད་ནས། །རྨད་བྱུང་འཕྲིན་ལས་ཡིད་བཞིན་དབང་གི་རྒྱལ། །རིས་མེད་འགྲོ་བ་ཀུན་ལ་འཇུག་པའི་རྫས། །རྒྱ་མཚོའི་རླབས་ལྟར་ཡོལ་བ་མེད་གྱུར་ཅིག །ཁྱད་པར་སངས་རྒྱས་གཉིས་པ་པདྨ་འབྱུང༌། །བདེ་ཆེན་གར་གྱི་ཉམས་ལྡན་བཀའ་བརྒྱད་ལྷ། །སྟོང་ཉིད་སྙིང་རྗེའི་རང་གཟུགས་གནམ་ཞལ་ཡུམ། །རྩ་གསུམ་ཐུགས་རྗེའི་དངོས་གྲུབ་ཆར་ལྟར་ཕོབ། །སྐྱབས་མཆོག་ཀུན་འདུས་མཁྱེན་བརྩེ་ནུས་པའི་སྨན། །སྣ་ཚོགས་ཐབས་ཀྱི་རོ་ནུས་ལེགས་བསྡེབས་པས། །མཁའ་མཉམ་རིགས་དྲུག་སེམས་ཅན་མ་ལུས་པའི། །སྡུག་བསྔལ་གསུམ་གྱི་ནད་ཀུན་དྲུངས་འབྱིན་ཤོག །རང་བདེ་དམན་ལམ་ཞི་བའི་ཆུ་འཛིན་ཀུན། །རབ་དཀར་ལྷག་བསམ་རླུང་(༢༤ན) ― GLG021_Page_0049 ―
[མ་དཔེ་གཟིགས་ན་འདིར་གནོན།]
གིས་མཐར་བསྐྲད་ནས། །ཚོགས་གཉིས་མཁའ་ལ་སྐུ་གསུམ་ཉི་མོར་བྱེད། དོན་གཉིས་སྣང་བ་རྒྱས་པའི་དཔལ་ཐོབ་ཤོག །དཀོན་མཆོག་རིན་ཆེན་གསུམ་གྱི་བདེན་པའི་མཐུས། །རྣམ་དཀར་འཕྲིན་ལས་སྤེལ་བའི་རིག་པ་འཛིན། །འདི་ཕྱིའི་ལེགས་ཚོགས་མདུན་མ་ལྷུན་གྲུབ་པར། །སྨོན་ལམ་ཡོངས་འདུ་གཡུར་དུ་ཟ་གྱུར་ཅིག །རེ་ཞིང་བལྟོས་བྱར་གྱུར་པའི་སྐྱེ་བོ་ཀུན། །སྲིད་ཞིའི་རྒྱ་མཚོ་ཆེ་ལས་རབ་བསྒྲལ་ནས། །ཕན་དང་བདེ་བའི་འབྱུང་གནས་སངས་རྒྱས་ཀྱི། །གོ་འཕང་རིན་ཆེན་གླིང་དུ་བགྲོད་གྱུར་ཅིག །སྨོན་ལམ་ཚིགས་བཅད་མ་འདི་ལྟ་བུ་ཞིག་དགོས་ཞེས་འབྲི་གུང་པའི་ཆོས་བརྒྱུད་འཛིན་པ་རིག་འཛིན་དཀོན་མཆོག་འཕྲིན་ལས་ཀྱིས་སྐུལ་བའི་ངོར་ཟ་ཧོར་གྱི་བནྡེས་བྲིས། །མཁྱེན་བརྩེ་ནུས་པའི་མངའ་བདག་རྫོགས་སངས་རྒྱས། །དེའི་གསུང་སྙིང་པོ་ཞི་བ་ཆགས་བྲལ་ཆོས། །རིག་གྲོལ་གཉིས་ལྡན་འཕགས་མཆོག་དགེ་འདུན་སོགས། །མཆོག་གསུམ་དམ་པའི་མ་རྨད་ཐུགས་རྗེའི་མཐུས། །ངག་གི་དབང་ཕྱུག་རྗེ་བཙུན་ཙོང་ཁ་པའི། །གདུང་འཚོབ་འཇམ་དབྱངས་བདུན་བརྒྱུད་རིམ་བྱོན་ལས། །ཆོས་ཀྱི་རྒྱལ་མཚན་རྣམ་སྤྲུལ་ཉི་མོར་བྱེད། །ཐུབ་བསྟན་མཁའ་ལ་མྱུར་དུ་འཆར་བར་ཤོག །རྒྱལ་བའི་རིང་ལུགས་འཆི་མེད་དགའ་ཚལ་གྱི། །ངོ་མཚར་རྒྱན་མཆོག་སྐྱེས་རབས་ཡོངས་འདུའི་ཕྲེང༌། །སྐལ་ལྡན་གདུལ་བྱར་དབང་ཕྱུག་ཡོན་ཏན་གྱི། །འབྲས་བཟང་དགའ་སྟོན་(༢༤བ) ― GLG021_Page_0050 ―
[མ་དཔེ་གཟིགས་ན་འདིར་གནོན།]
སྩོལ་ཕྱིར་ཆད་མེད་ཤོག །རྒྱལ་བསྟན་འོ་མའི་ཆུ་གཏེར་བསྲུབས་པ་ལས། །དགའ་ལྡན་བཤད་སྒྲུབ་རྩི་བཅུད་སྙིང་པོའི་གཏེར། །ཐོས་བསམ་སྒོམ་པས་ལོངས་སྤྱོད་འདུས་ཚོགས་ཀྱི། །རྣམ་དག་སྨོན་པའི་རེ་བ་སྐོང་བར་ཤོག །མཆེད་ཟླ་གཉིས་མེད་ཡིད་བཞིན་དབང་གི་ནོར། །རྒྱལ་མཚན་རྩེ་མོར་བཀོད་པ་ཇི་བཞིན་དུ། །སོམ་ཉི་དབུལ་ཕོང་སེལ་བའི་ཡང་སྲིད་ཀྱི། །རྣམ་འཕྲུལ་འདོད་རྒུའི་ཆར་ཆེན་འབེབས་པར་ཤོག །ལྷག་བསམ་ཆ་ཤས་རྫོགས་པ་ཟླ་བའི་གཟུགས། །རྙོག་བྲལ་འཕྲིན་ལས་རྫིང་བུར་རབ་བསལ་བས། །ཕན་དང་བདེ་སྐྱིད་ཨུཏྤལ་དཀར་པོའི་ཚལ། །དགའ་སྟོན་བསུ་བའི་འཛུམ་རླབས་བཞད་པར་ཤོག །རྩ་རྒྱུད་བླ་མ་ཡི་དམ་དཀྱིལ་འཁོར་ལྷ། །དམ་ཅན་ཆོས་སྐྱོང་སྲུང་མའི་ཚོགས་རྣམས་ཀྱིས། །དཔལ་ལྡན་བླ་མ་སྐལ་བཟང་སྐྱེ་དགུ་ཡི། །མགོན་དུ་བྱོན་པའི་བདེན་ཚིག་འགྲུབ་གྱུར་ཅིག །ཅེས་བ་སོ་སྤྲུལ་པའི་སྐུ་ངག་དབང་ཆོས་ཀྱི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་སྤྲུལ་སྐུ་གསལ་པོར་བྱོན་པའི་བདེན་ཚིགས་ཏུ་བརྗོད་པ་འདི་ནི་དམ་པ་གང་དེའི་སློབ་བུ་དད་ལྡན་འགའ་ཞིག་གིས་བསྐུལ་བར་བརྟེན་ཟ་ཧོར་གྱི་བནྡེས་དགའ་ལྡན་ཕོ་བྲང་དུ་སྦྱར། །ཆུ་གཏེར་རླབས་ལྟར་དུས་ལས་ཡོལ་མེད་པ། །མཆོག་གསུམ་ཐུགས་རྗེ་ཆེན་པོའི་བྱིན་རླབས་དང༌། །གྲངས་མེད་རྣམ་དཀར་དགེ་ཚོགས་བསྐྲུན་པ་སོགས། །མ་ལུས་སྡོམས་པ་དཔྱིད་ཀྱི་མངལ་ཡངས་པོར། །ཐབས་ཤེས་ཟུང་དུ་འཇུག་པའི་ཟ་མ་(༢༥ན) ― GLG021_Page_0051 ―
[མ་དཔེ་གཟིགས་ན་འདིར་གནོན།]
ཏོག །ལེགས་བྱས་དང་མའི་ལང་ཚོ་དར་བབ་འབྲས། །གྲངས་མེད་སྤྲུལ་སྐུའི་མྱུ་གུ་གཡུར་ཟ་བ། །རིང་མིན་དུས་སུ་སྨིན་པའི་དགའ་སྟོན་སྩོལ། །རྣམ་པར་ལེགས་སྨོན་འདོད་དོན་མཁའ་དབྱིངས་ལ། །རྒྱལ་དང་དེ་སྲས་ཉན་རང་སློབ་མར་བཅས། །ཀུན་གྱི་བདེན་ཚིགས་བསིལ་བྱིན་མཁན་པོ་ཡི། །ངལ་གསོའི་ག་བུར་གཟེགས་མ་སྤྲོ་བར་ཤོག །ཅེས་སེམས་དཔའ་ཆེན་པོ་ངག་དབང་ཕུན་ཚོགས་ཀྱི་སྤྲུལ་པའི་སྐུ་མྱུར་དུ་བྱོན་པའི་ཚིགས་སུ་བཅད་པ་འདི་ནི་གང་དེའི་གདན་ས་པ་ཏྲེ་བོ་སྐུ་སྐྱེ་དང་དབོན་པོ་རྒྱ་མཚོ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །འཆི་མེད་གྲུབ་པ་པདྨ་འབྱུང་གནས་དང༌། །འཁོར་ལོའི་བདག་ཉིད་བདེ་གཤེགས་ཀུན་འདུས་ལྷ། །བདུད་དཔུང་ཚར་གཅོད་ཆོས་སྲུང་གཏེར་བདག་ཚོགས། །རྨད་བྱུང་བྱིན་རླབས་ཐུགས་རྗེའི་མཐུ་དཔུང་གིས། །རིག་འཛིན་པདྨ་དབང་གི་གྲོང་ཁྱེར་མཆོག །དཔལ་འབྱོར་འཕྲིན་ལས་རབ་ཏུ་རྒྱས་པའི་སྡེར། །ཉེར་འཚེས་གླགས་ལྟའི་བར་ཆོད་ཀུན་ཆོམས་ལ། །འཆི་མེད་རྡོ་རྗེའི་སྲོག་ཤིང་བརྟན་པར་མཛོད། །མཆོག་གསུམ་ཐུགས་རྗེའི་བདུད་རྩི་གཟེགས་མ་ཡིས། །བཞི་བརྒྱ་རྩ་བཞིའི་ནད་རྣམས་ཡོངས་བཀྲུས་ནས། །ཕུན་ཚོགས་ལང་ཚོའི་གཟུགས་སྐུར་རབ་རྒྱས་པས། །དུས་ཀུན་བདེ་བའི་དཔལ་ལ་སྤྱོད་གྱུར་ཅིག །ཐུགས་རྗེའི་འོད་སྟོང་འབར་བ་གཏན་གྱི་སྐྱབས། །བདེན་ཚིག་སྨོད་པ་གྲུབ་པའི་དྲང་(༢༥བ) ― GLG021_Page_0052 ―
[མ་དཔེ་གཟིགས་ན་འདིར་གནོན།]
སྲོང་དང༌། །མཐུ་ལྡན་སྲུང་མ་སྡེ་བརྒྱད་ཚོགས་རྣམས་ཀྱིས། །དེང་འདིར་འདོད་པའི་རེ་བ་སྐོང་བར་མཛོད། །བཀྲ་ཤིས་ཟླ་བ་རྒྱས་པ་ཡར་གྱི་ངོར། །བཟའ་སྐར་འཕྲོད་ཀྱི་དགེ་བའི་དུས་བཟང་པོར། །རྩ་གསུམ་ཐུགས་རྗེ་བསྐུལ་བའི་བདེན་ཚིགས་དབྱངས། །རབ་སྙན་ཡིད་ཀྱི་འདོད་པ་འཇོ་བར་ཤོག །དཀྱིལ་འཁོར་རྒྱ་མཚོའི་བདག་ཉིད་རིག་འཛིན་ཆེན་པོ་ཟུར་འཇམ་དབྱངས་ཀུན་དགའི་མཚན་ཅན་གཞན་སྣང་དུ་བསྙུན་པའི་ཚུལ་བསྟན་པར་བར་ཆད་ཀྱི་གཡུལ་ལས་རྒྱལ་བའི་བདེན་ཚིག་གི་སྨོན་ལམ་འདི་ནི་ཟ་ཧོར་གྱི་བནྡེས་སྒོ་གསུམ་མི་འདའ་བའི་བཅད་རྒྱའི་སྐབས་ཐུན་མཚམས་ཀྱི་ངེས་པ་ཞིག་ལ་སྦྱར་བའོ། །ཐུབ་པའི་བསྟན་ལ་འཆད་རྩོད་རྩོམ་པའི་ངག །སྨྲ་བའི་དབང་ཕྱུག་པིར་གྱི་སྒྱུ་དྲའི་གར། །ལེགས་བཤད་རི་མོ་རྣམ་བཀྲའི་དམ་ཆོས་ཀྱི། །དུས་ཀུན་དགེ་ཞིང་ཤིས་དེར་གསོལ་བ་འདེབས། །ལེགས་པར་བཤད་པ་ཆོས་འཁོར་འདུས་སྡེའི་གླིང༌། །གང་གི་དམ་པའི་ཆོས་ཀྱི་ཁྲི་ཆེན་པོར། །མགོན་ཁྱོད་ཡུན་དུ་འཚོ་ཞིང་རབ་བཞེས་ནས། །ཆོས་ཚུལ་རྒྱུན་ཆད་མེད་པར་སྤེལ་གྱུར་ཅིག །ལེགས་བཤད་ཆོས་འཁོར་གླིང་པའི་སློབ་དཔོན་ངག་དབང་བཀྲ་ཤིས་ཀྱི་གསོལ་འདེབས་བརྟན་བཞུགས་དང་བཅས་པ་འདི་ནི་གྲྭ་དམངས་གཉེར་པ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །བློ་ཆེན་མཆོག་གིས་སྐལ་བཟང་འགྲོ་བ་ཀུན། །བྱང་གྲོལ་ལམ་དུ་འཁྲིད་པའི་གྲགས་སྙན་རྔ། །སྲིད་(༢༦ན) ― GLG021_Page_0053 ―
[མ་དཔེ་གཟིགས་ན་འདིར་གནོན།]
རྩེར་བརྡུང་བ་འཇམ་དཔལ་སྙིང་པོ་ལ། །གསོལ་བ་འདེབས་སོ་ཐུགས་རྗེའི་ལྕགས་ཀྱུས་བཟུང༌། །ངག་གི་དབང་ཕྱུག་རྒྱལ་བ་གཉིས་པ་དེའི། །རིང་ལུགས་འཛིན་པའི་དབྱིག་གི་བློ་གྲོས་མར། །རྣམ་དཀར་བཟང་པོའི་འཕྲིན་ལས་ནོར་བུའི་དཔྱ། །རྒྱ་མཚོའི་གོས་ཅན་ཀུན་ཏུ་ཁྱབ་དེར་འདུད། །མི་ཕྱེད་དང་བས་སྙིང་ནས་གསོལ་འདེབས་ན། །གནས་སྐབས་འགལ་རྐྱེན་ཉེར་འཚེ་ཀུན་ཞི་ཞིང༌། །མཐར་ཐུག་བླ་ན་མེད་པའི་ཡེ་ཤེས་ས། །མངོན་དུ་འགྱུར་བའི་དགེ་ལེགས་འཐོབ་པར་ཤོག །ཅེས་པ་ཡང་ཇ་སག་ཐུ་ཧོང་ཐའི་ཇིས་བསྐུལ་བ་ལྟར་ངག་དབང་བློ་བཟང་རྒྱ་མཚོས་སྦྱར་བའོ། །ཁྱབ་བདག་གར་གྱི་དབང་ཕྱུག་འཆི་མེད་ལྷ། །ཚེ་མཐའ་རྣམ་པར་ཡས་པའི་མགོན་མཆོག་གི །མ་རྨད་ཐུགས་རྗེའི་ག་བུར་གཟེགས་མ་ཡིས། །འཆི་བདག་ཚ་གདུང་གཡུལ་ལས་རྒྱལ་བར་མཛོད། །བསོད་ནམས་དཔུང་གིས་ནོར་འཛིན་ཡངས་པའི་ཁྱོན། །མངོན་པར་འདེགས་ལ་རྣམ་དཔྱོད་བརྩོན་པ་ཅན། །ནམ་ཡང་གཡོ་མེད་རི་དབང་ལྷུན་པོ་ལྟར། །རབ་བརྟན་རྡོ་རྗེའི་མཆེད་ཟླར་གྲུབ་གྱུར་ཅིག །སྲིད་མུན་ཉི་ཟླས་རབ་བཅིལ་བདེ་སྐྱིད་ཀྱི། །འོད་སྣང་བསྐལ་བར་ཡོངས་གསལ་དེ་སྲིད་དུ། ཁྲིམས་གཉིས་གདུག་དཀར་འཛིན་པ་མི་ཡི་དབང༌། །འགྱུར་མེད་གཡུང་དྲུང་ཁྲི་ལ་བརྟན་གྱུར་ཅིག །ཅེས་ཕྱག་མཛོད་ས་སྐྱོང་བསོད་ནམས་རབ་བརྟན་གྱི་བརྟན་བཞུགས་ཚིགས་སུ་བཅད་པ་འདི་ནི་ངམ་རིང་མཁན་པོ་ཆོས་རྗེ་ལོ་(༢༦བ) ― GLG021_Page_0054 ―
[མ་དཔེ་གཟིགས་ན་འདིར་གནོན།]
ཆེན་གྱིས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །དཀོན་མཆོག་ཐུགས་རྗེ་ཆེན་པོའི་ནམ་མཁའ་ལས། །མངོན་མཐོའི་རྟེན་བཟང་རླུང་གི་རྒྱལ་མཚན་ཅན། །ཕན་དང་བདེ་ཆེན་འོད་མདངས་ཡོངས་འཚེར་བའི། །དགའ་སྟོན་མཆོག་ལ་མྱུར་དུ་སྤྱོད་པར་ཤོག །ཁྱད་པར་གར་གྱི་དབང་ཕྱུག་འོད་དཔག་མེད། །གཉིས་མེད་སྤྲུལ་པའི་རྣམ་རོལ་པད་དཀར་འཆང༌། །རྨད་བྱུང་བྱིན་རླབས་ཤིང་རྟས་ཉེར་དྲངས་ཏེ། །བདེ་བ་ཅན་དུ་སྲིད་པ་འཛིན་པར་ཤོག །ཞིང་དེར་སྐྱེས་ནས་སྣང་བ་མཐའ་ཡས་ཀྱི། །མཚན་དཔེའི་སྣང་བརྙན་མིག་གི་བདུད་རྩིར་བྱས། །དྲུག་བཅུའི་གསུང་དབྱངས་ལས་འོངས་ཐེག་པ་ཆེའི། །ཆོས་ལ་ཐོས་བསམ་སྒོམ་པས་སྤྱོད་པར་ཤོག །ཚུལ་དེས་ཁྱོད་ཐུགས་བླ་མེད་ཡེ་ཤེས་ཆེ། །རྣམ་པ་ཐམས་ཅད་མཁྱེན་པ་མངོན་བྱས་ཏེ། །འགྲོ་རྣམས་སྲིད་པའི་རྒྱ་མཚོ་ལས་སྒྲོལ་བ། །ཆོས་ཀྱི་རྒྱལ་སྲིད་ཆེན་པོ་ཐོབ་པར་ཤོག །སླུ་མེད་སྐྱབས་ཀུན་དབང་པོར་ལེགས་བཞུགས་ནས། །བདེན་པའི་ཚིགས་ཏུ་རབ་བརྗོད་ནུས་པ་དང༌། །རྟེན་ཅིང་འབྲེལ་བར་འབྱུང་བའི་རྒྱུ་འབྲས་མཐུས། །ཇི་ལྟར་སྨོན་པ་དེ་བཞིན་འགྲུབ་གྱུར་ཅིག །ཅེས་དཔོན་ནམ་མཁའ་རྒྱལ་མཚན་དག་པའི་ཞིང་དུ་སྐྱེ་བའི་སྨོན་ལམ་འདི་ནི་ཧོར་ཆོས་རྗེ་ངག་དབང་ཕུན་ཚོགས་སྤུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཇའི་སང་སྡེ་པའོ། །ཕྱག་ན་འཆི་བ་མེད་པའི་བདུད་རྩིའི་རྒྱུན། །ལེགས་(༢༧ན) ― GLG021_Page_0055 ―
[མ་དཔེ་གཟིགས་ན་འདིར་གནོན།]
འཁྱིལ་བུམ་པ་བཟང་པོས་འགྲོ་བ་ཀུན། །བདེ་བའི་ངལ་གསོར་དབུངས་ཕྱུང་བཅོམ་ལྡན་འདས། །ཚེ་མཐའ་ཡས་དེའི་ཐུགས་རྗེའི་བྱིན་རླབས་དང༌། །མོས་ལྡན་རྣམས་ཀྱི་བསམ་པ་རྩེ་གཅིག་ཏུ། །གདུང་ཤུགས་དྲག་པོས་བདེན་པའི་ཚིག་བརྗོད་ཅིང༌། །འདུས་སྡེའི་ཚོགས་ཀྱིས་སྨོན་ལམ་ལེགས་བཏབས་པ། །སླུ་མེད་རྟེན་ཅིང་འབྲེལ་བར་འབྱུང་བའི་མཐུས། །ངག་གི་རང་བཞིན་མཐའ་ཡས་ཆོས་ཀྱི་སྒྲར། །སྒྲོག་ལ་རབ་དབང་ཡང་དག་དགེ་བའི་བཤེས། །ལེགས་ཚོགས་ལམ་སྟོན་མི་མཐུན་ལས་རྒྱལ་བའི། །མཚན་ལྡན་མགོན་ཁྱོད་རྟག་ཏུ་ཞབས་བརྟན་ཤོག །སེང་གེས་བཏེག་པའི་འགྱུར་མེད་གཡུང་དྲུང་ཁྲི། །རྟག་བརྟན་སྣ་ཚོགས་རྡོ་རྗེས་ལེགས་མཚན་པར། །ལྷ་དབང་ཕྱོགས་ལས་རྣམ་པར་རྒྱལ་བ་ཡི། །ཡང་སྲིད་སྤྲུལ་པའི་ཟློས་གར་ཞབས་བརྟན་ཤོག །དཀོན་མཆོག་བྱིན་རླབས་ཆོས་སྐྱོང་སྲུང་མའི་མཐུ། །དྲང་སྲོང་རིག་འཛིན་གྲུབ་པའི་བདེན་ཚིགས་གིས། །འདོད་དོན་ཨ་མྲའི་འབྲས་བཟང་ཡོངས་སྨིན་པར། །སྤྱོད་པའི་བསྐལ་པ་བཟང་པོ་བདག་གྱུར་ཤོག །ཅེས་དེ་མོ་སྤྲུལ་སྐུ་ངག་དབང་དགེ་ལེགས་རྒྱལ་མཚན་གྱི་བརྟན་བཞུགས་ཤློ་ཀ་ལྔ་ཙམ་ཡོད་པ་ཞིག་དགོས་ཞེས་དེ་མོ་དབོན་པོ་ཕུན་ཚོགས་དང་ནོར་བུ་སྤུན་གཉིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་དགའ་ལྡན་ཕོ་བྲང་དུ་སྦྱར། །མཐོང་ཐོས་དྲན་དང་རེག་པས་ཕན་བདེའི་དཔལ། །སྩོལ་མཛད་སངས་རྒྱས་དེ་གསུང་སློབ་མར་བཅས།(༢༧བ) ― GLG021_Page_0056 ―
[མ་དཔེ་གཟིགས་ན་འདིར་གནོན།]
།བདེན་ཚིག་གྲུབ་པ་ལྷ་དང་དྲང་སྲོང་སོགས། །ཕུལ་བྱུང་ཐུགས་རྗེ་ནུས་པར་ལྡན་པའི་མཐུས། །རབ་ཡངས་ནོར་འཛིན་ཁྱོན་ལ་བསོད་ནམས་ཀྱིས། །མངོན་པར་དབང་བསྐུར་ཆོས་སྲིད་ལེགས་ཚོགས་རྣམས། །དཀར་ཆའི་ཟླ་བ་ལྟ་བུར་འཕེལ་མཛད་པ། །མི་དབང་མཆོག་དེ་ཞབས་པད་བརྟན་པར་ཤོག །རྩ་གསུམ་བྱིན་རླབས་རླུང་གིས་བགེགས་རིགས་རྣམས། །ལེགས་བསལ་ཆོས་ལྡན་རྒྱལ་པོའི་ཉི་འོད་ཀྱིས། །མངའ་འབངས་བདེ་སྐྱིད་པད་དཀར་རབ་བཞད་ནས། །ཕུན་ཚོགས་དགའ་སྟོན་སྦྲང་རྩིར་སྤྱོད་གྱུར་ཅིག །ཅེས་ཕྱག་མཛོད་ས་སྐྱོང་བསོད་ནམས་ཆོས་འཕེལ་གྱི་བརྟན་བཞུགས་ཚིགས་སུ་བཅད་པ་འདི་ནི་བོད་ཡུལ་གྱི་རྡོ་རྗེ་གདན་ཕུན་ཚོགས་འདོད་རྒུའི་འབྱུང་གནས་ཆོས་འཁོར་དཔལ་གྱི་ལྷ་ས་བ་རུ་བཞི་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །ན་མ་ཨཱཪྻ་ཛི་ཏ་ནཱ་ཐེནཱརྠཱཿསི་དྡྷི་ཀུ་རྦནྟུ། བྱམས་བརྩེའི་ས་བོན་ཡོངས་སུ་སྨིན་པ་ལས། །གསེར་སྦྱངས་ཞུན་མའི་འཁྲི་ཤིང་གཡུར་ཟ་བ། །ངོ་མཚར་མཚན་དཔེའི་མེ་ཏོག་རྣམ་བཀྲའི་གཟུགས། །སྟོན་མཛད་རྒྱལ་ཚབ་མི་ཕམ་མགོན་པོ་ཀྱེ། །འཆར་ནུབ་སྤངས་པ་ཐུགས་རྗེའི་རྟ་ལྗང་འོད། །ཉེ་རིང་དང་བྲལ་སྐྱེ་རྒུའི་པད་ཚལ་ལ། །འཇུག་པ་མ་འདྲིས་མཛའ་བའི་དམ་བཅའ་གང༌། །ནམ་ཡང་གཏོང་བ་མིན་དེ་ཕན་བདེའི་དཔྱིད། །དེ་ཕྱིར་ཟླ་འོད་པད་རྩ་གངས་ཀྱི་རིས། །བསྒྲུན་པར་ནུས་མིན་རབ་དཀར་ལྷག་བསམ་གྱིས། །ཉེར་དྲངས་སྨོན་ལམ་བཏབ་པའི་འབྲས་(༢༨ན) ― GLG021_Page_0057 ―
[མ་དཔེ་གཟིགས་ན་འདིར་གནོན།]
བུ་ཀུན། །རེ་བ་དོན་ལྡན་མཛོད་ཅིག་ལྷ་ཡི་ལྷ། །ཚེ་རིང་གནམ་གྱི་བརྒྱུད་འཛིན་ས་སྐྱོང་རིགས། །རིན་ཅེན་མིག་གི་མཚན་པའི་ཧོང་ཐའི་ཇི། །མཐོ་རིས་རྟེན་གྱི་ཐེམ་སྐས་ལ་འཛེགས་ནས། །གནས་ངན་འབྲས་བུར་སྤྱོད་ལས་ཐར་བར་ཤོག །མི་ཁོམ་གནས་སྤངས་དལ་འབྱོར་བཅོ་བརྒྱད་ཀྱི། །དམ་ཆོས་བསྒྲུབ་པའི་རྟེན་བཟང་ལུས་རྙེད་དེ། །སྡིག་ལྟུང་དྲི་མ་དྲུངས་ནས་ཕྱུང་བྱེད་པ། །དགེ་ཚོགས་གངྒའི་རྒྱུན་ལ་སྤྱོད་པར་ཤོག །ཁྱད་པར་སངས་རྒྱས་བསྒྲུབ་པའི་རྟེན་གྱི་མཆོག །མཐོ་རིས་ཡོན་ཏན་བདུན་དང་ལྡན་པའི་ལུས། །འགྲུབ་བྱེད་རྒྱུ་ལས་སླུ་མེད་འབྱུང་བའི་འབྲས། །མི་འཛད་ཁུར་གྱིས་དུད་པའི་དཔལ་ཐོབ་ཤོག །བདེ་བར་རློམ་ཡང་འགྱུར་བའི་སྡུག་བསྔལ་ཅན། །སྲིད་པ་འཁོར་བའི་རྒྱ་མཚོ་ཆེན་པོ་ལས། །ཐབས་ཤེས་གཟིངས་ཀྱིས་བསྒྲལ་ཏེ་གཏན་བདེའི་ལམ། །ཐར་པའི་རིན་ཆེན་གླིང་དུ་བགྲོད་པར་ཤོག །ཕ་མཐའ་རྙེད་མིན་དྲིན་གྱིས་བསྐྱངས་པའི་མ། །འགྲོ་རྣམས་འདོར་བར་མ་བཟོད་ཐེག་པ་ཆེའི། །རླབས་ཆེན་རྒྱལ་སྲས་སྤྱོད་པའི་གོམ་གཅིག་གིས། །རྣམ་པ་ཐམས་ཅད་མཁྱེན་པའི་སར་བགྲོད་ཤོག །ཟབ་ཡངས་རྒྱུད་སྡེའི་མ་དྲོས་མཚོ་ཆེན་ལས། །སྨིན་བྱེད་དབང་གི་ཆུ་བོ་རྣམ་པ་བཞི། །བགྲོད་བྱེད་རིམ་གཉིས་རྒྱ་མཚོར་ལེགས་འཁྱིལ་བས། །ལྔ་ལྡན་ཡེ་ཤེས་རླབས་ཕྲེང་ཡོལ་མེད་ཤོག །ཟུང་འཇུག་ཡིད་བཞིན་ནོར་བུའི་ཟ་མ་ཏོག །སྐུ་བཞི་བདུད་རྩིའི་བཅུད་ཀྱིས་རབ་གཏམས་ནས། །རང་གཞན་དོན་གཉིས་འཆི་བ་མེད་པའི་སྲོག །ལེགས་གྲུབ་རིགས་ཀུན་བདག་པོར་(༢༨བ) ― GLG021_Page_0058 ―
[མ་དཔེ་གཟིགས་ན་འདིར་གནོན།]
འགྱུར་བར་ཤོག །དྲི་མེད་རྣམ་པར་སྨོན་པ་དབང་གི་རྒྱལ། །མཆོག་གསུམ་ཀླུ་དབང་གདེངས་ཀར་མཛེས་པའི་ནོར། །འདོད་པའི་རེ་བ་མ་ལུས་སྐོང་བ་ཡིས། །དགའ་སྟོན་མཆོག་དེས་ནོར་འཛིན་ཁྱབ་གྱུར་ཅིག །ཅེས་རྒྱལ་བའི་བསྟན་པ་ལ་མི་ཕྱེད་པའི་དད་པ་ཅན་ནོར་འཛིན་སྐྱོང་བ་ཁར་ཁ་ཨེར་ཏི་ན་ཧོང་ཐའི་ཇི་ལྔ་པའི་ལམ་དུ་གྱུར་པའི་ཚེ་སྨོན་ལམ་ཚིགས་བཅད་བཅུ་སྐོར་ཞིག་དགོས་ཞེས་རྒྱལ་ཁང་རྩེ་སྤྲུལ་སྐུ་བློ་བཟང་བསྟན་འཛིན་རྒྱ་མཚོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །པྲ ཤྭེ ཏཱ ནྟཱ ཕ ལ པྲ ཎི དྷི། ཨ ཡཾ ཙ ནི ཛཱ ནཱཾ སུ ཁེ། པཱ ཀྭཱ ནྲ ཝ ཏི ཀྭཱ མ ཙ ། ཏྲི ར ཏྣེ ན སཽ ནྱཱ ཀུ རུ། རབ་དཀར་ཡིད་དགེའི་སྨོན་ལམ་འབྲས། །འདི་དང་གཏན་གྱི་བདེ་བ་རུ། །སྨིན་པའི་རེ་བ་དོན་ལྡན་པར། །མཛོད་ཅིག་སླུ་མེད་དཀོན་མཆོག་གསུམ།(༢༩ན) ― GLG021_Page_0059 ―
[མ་དཔེ་གཟིགས་ན་འདིར་གནོན།]
།ཞེས་པ་འདི་ནི་སྟག་ལུང་ཕྱག་མཛོད་ངག་དབང་བཟང་སྦྱིན་གྱི་དད་རྟེན་དུ་ངེད་ཀྱི་འདྲ་འབག་སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་ཀྱི་ཕྱག་བྲིས་མ་ཞིག་འདུག་པའི་རྒྱབ་ངོས་སུ་སྨོན་ལམ་ཚིགས་བཅད་ལག་བྲིས་མ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སུག་བྲིས་བྱས་པ་ཡིན་ནོ། །མཁྱེན་བརྩེ་ནུས་ལྡན་སངས་རྒྱས་དེ་གསུང་ཆོས། །སློབ་མར་བཅས་པའི་དཀོན་མཆོག་རིན་ཆེན་གསུམ། །སླུ་མེད་སྐྱབས་མགོན་ཐུགས་རྗེའི་བྱིན་རླབས་མཐུས། །རྣམ་དག་སྨོན་པའི་རེ་འབྲས་དོན་ལྡན་མཛོད། །དངོས་འབྱོར་གྱིས་མཚོན་དུས་གསུམ་བསགས་པ་ཡི། །རྣམ་དཀར་དགེ་ཚོགས་ས་བོན་ལེགས་སྨིན་པས། །བསོད་ནམས་མཐོ་རིས་ཚལ་དུ་མངོན་མཐོའི་རྟེན། །རབ་བརྟན་ཡོངས་འདུའི་ཁྲི་ཤིང་གཡུར་ཟར་ཤོག །ལས་ཉོན་མ་དག་དཀར་མིན་ལྕགས་ཀྱི་ཁམས། །ཐར་ལམ་གསེར་དུ་བསྒྱུར་བྱེད་དགེ་བའི་རྩིས། །གཏན་བདེ་ཟད་མི་ཤེས་པའི་འབྱོར་པའི་མཛོད། །ལོངས་སུ་སྤྱོད་པའི་སྐལ་བཟང་ཐོབ་པར་ཤོག །སྲིད་ཞིའི་མཐའ་བྲལ་སེམས་སྐྱེད་ཆུ་གཏེར་དབུས། །ཕྱིན་དྲུག་སྤྱོད་པའི་གདེངས་ཀ་གཡོ་བའི་རྩེར། །རྣམ་མཁྱེན་ནོར་བུའི་གཅོད་པན་འབར་བའི་གཟིས། །མཁའ་མཉམ་འགྲོ་ཀུན་འདོད་འཇོའི་བྱེད་པོར་ཤོག །བསོད་ནམས་དཔུང་པས་ས་ཆེན་ཆོས་བཞིན་དུ། །སྐྱོང་བའི་མཛད་བཟང་འཕེལ་ཞིང་རབ་བརྟན་པ། །གྲངས་རིང་སྐྱེ་བར་མངོན་མཐོ་ངེས་ལེགས་རྟེན། །ལེགས་བརྒྱུད་(༢༩བ) ― GLG021_Page_0060 ―
[མ་དཔེ་གཟིགས་ན་འདིར་གནོན།]
བླ་མེད་བྱང་ཆུབ་ཐོབ་པར་ཤོག །ཅེས་པ་འདི་ཡང་ས་སྐྱོང་ཕྱག་མཛོད་བསོད་ནམས་རབ་བརྟན་དུས་ཀྱི་ཆོས་ཉིད་དུ་གྱུར་པའི་ཚེ་དབུས་གཙང་དུ་སེར་ཚོགས་ཁག་བརྒྱད་བཙུགས་སྐབས་འདུས་ཚོགས་རྣམས་ཀྱི་ཞལ་འདོན་དུ་ཟ་ཧོར་གྱི་བནྡེས་སྦྱར། །བདེ་བ་ཅན་དུ་གར་དབང་འོད་མཚན་འབར། །གྲུ་འཛིན་རྩེ་ན་འཕགས་མཆོག་འཇིག་རྟེན་དབང༌། །སིནྡྷུའི་རྒྱ་མཚོར་རིགས་འཛིན་པདྨ་འབྱུང༌། །སྐུ་གསུམ་དབྱེར་མེད་འཕྲིན་ལས་གངྒཱའི་རྒྱུན། །ཕྱག་ན་རྡོར་འཛིན་ནོར་བུའི་མཚན་འཆང་བའི། །ལྷག་བསམ་སྐལ་ལྡན་ཤིང་རྟས་ལེགས་དྲགས་པས། །སྒྲིབ་གཉིས་འབྲས་བུའི་དྲི་མ་ཀུན་བཀྲུས་ནས། །ཕན་བདེའི་རྒྱལ་མཚན་ཏོག་གི་འོད་འབར་ཤོག །རྒྱལ་དང་དེ་སྲས་སྐུ་གསུང་ཐུགས་རྟེན་བཞེངས། །འགྲོ་རྣམས་བདེ་བར་བགྲོད་བྱེད་ཟམ་པ་བཙུགས། །ཐོས་གྲོལ་ཡི་གེ་དྲུག་པའི་འཕྲིན་ལས་ཀྱི། །དགེ་དེས་མཁའ་མཉམ་འགྲོ་རྣམས་སྒྲོལ་བར་ཤོག །གནས་སྐབས་དམ་ཆོས་སྒྲུབ་པའི་མཐུན་རྐྱེན་འཕེལ། །མཐར་ཐུག་ཀ་དག་རིག་པའི་རང་ཞལ་མཐོང༌། །ལྷུན་གྲུབ་བྱ་རྩོལ་བྲལ་བའི་ཐུགས་རྗེ་ཡིས། །ཀུན་གྱི་འདོད་འཇོའི་ཡིད་བཞིན་དབང་པོར་ཤོག །དེ་ལྟར་སྒོ་གསུམ་གུས་འདུད་མཆོད་སྤྲིན་སྤྲོ། །སྡིག་བཤགས་དགེ་བ་ཀུན་ལ་རྗེས་ཡི་རང༌། །ཆོས་འཁོར་བསྐོར་བསྐུལ་རྟག་བཞུགས་གསོལ་བ་འདེབས། །དགེ་བ་མ་ལུས་རྣམ་མཁྱེན་རྒྱུ་རུ་བསྔོ། །ཞེས་པ་འདི་ནི་སྤྲུལ་སྐུ་ཕྱག་རྡོར་ནོར་བུས་བཀའ་འགྱུར་དང༌། སྤྱན་རས་གཟིགས་ཀྱི་གསེར་སྐུ་བཞེངས་ཤིང༌། མ་ཎི་དུང་(༣༠ན) ― GLG021_Page_0061 ―
[མ་དཔེ་གཟིགས་ན་འདིར་གནོན།]
ཕྱུར་ཉི་ཤུ་རྩ་ལྔ་བཙུགས་པ། ལྕགས་ཟམ་མང་པོའི་ཞིག་གསོ་གྲུབ་པའི་དགེ་བ་རྫོགས་བྱང་དུ་སྤེལ་བའི་ཆེད་དུ་ཟ་ཧོར་གྱི་བནྡེས་སྦྱར་བའོ། །བྱིན་རླབས་འོད་དུ་འབར་བ་ཐུགས་རྗེའི་གཟིས། །འཁོར་མུན་གདུང་བ་འཕྲོག་པ་རིན་ཆེན་གསུམ། །བདེན་ཚིགས་ཆར་གྱིས་བསྐྲུན་པའི་ལེགས་བྱས་ཀྱིས། །གསེར་གྱི་མྱུ་གུ་ཡོངས་སྨིན་འབྲས་བཟང་སྩོལ། །བློ་གྲོས་རྣམ་པར་རབ་ཡངས་མངལ་ནང་དུ། །བསོད་ནམས་གསེར་སྒོང་སྦྲུམས་པའི་གདོང་བཞི་པ། །ཟླ་བ་རྒྱ་མཚོ་ལས་འཁྲུང་ཇི་བཞིན་དུ། །ཡོན་ཏན་བདུན་དང་ལྡན་པའི་སྲིད་འཛིན་ཤོག །ཁྲིམས་གཉིས་འདུས་པའི་ཚོགས་ཀྱི་རྩེ་གཅིག་ཏུ། །སྨོན་ལམ་རྣམ་དག་སྟོབས་ཀྱིས་མཚམས་སྦྱར་བ། །ཇི་བཞིན་ལྷུན་གྱིས་གྲུབ་པའི་སྐལ་བཟང་ལ། །མོས་ལྡན་སློབ་མར་བཅས་པས་སྤྱོད་གྱུར་ཅིག །ཅེས་ཆ་དཀར་ནོ་མོན་ཁང་བློ་གྲོས་རྒྱ་མཚོའི་སྤྲུལ་སྐུ་མྱུར་བྱོན་གྱི་སྨོན་ལམ་ཚིགས་སུ་བཅད་པ་འདི་ནི་དགེ་སློང་འོད་ཟེར་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ཕྱག་ན་འཆི་བ་མེད་པའི་བདུད་རྩིའི་བཅུད། །ལེགས་འཁྱིལ་པདྨ་རཱ་གའི་བུམ་བཟང་གིས། །ཚེ་མཐའ་ཡས་པའི་དཔལ་སྟེར་བཅོམ་ལྡན་འདས། །བདེ་ལྡན་ཞིང་གི་མགོན་དེས་དགེ་ལེགས་སྩོལ། །ངག་གི་འདོད་འཇོ་དབང་ཕྱུག་ཡོན་ཏན་གྱིས། །བློ་བསལ་སྐལ་བཟང་རེ་སྐོང་ཡོངས་འཛིན་མཆོག །རྒྱ་མཚོའི་གོས་ཅན་ཉི་ཟླའི་འོད་སྣང་གིས། །(༣༠བ) ― GLG021_Page_0062 ―
[མ་དཔེ་གཟིགས་ན་འདིར་གནོན།]
གསལ་བ་དེ་སྲིད་རྡོ་རྗེ་ལྟར་བརྟན་ཤོག །བདུད་སྡེའི་གཡུལ་ལས་རྒྱལ་བ་འཇིགས་མེད་ཀྱི། །བརྩེ་ལྡན་བྱམས་པའི་གོ་ཆ་རབ་བགོ་བ། །ཐུབ་བསྟན་བཤད་གྲུབ་ལང་ཚོ་རྒྱས་པའི་སྡེ། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །དུས་དགྲའི་དབང་པོ་སྨྲ་མཁས་འཇམ་དཔལ་དབྱངས། །ཐུགས་གསང་དཔལ་གྱི་བེའུ་དགའ་བའི་ཉམས། །འཛུམ་ལྡན་ཚེམས་དཀར་མུ་ཏིག་འཕྲེང་མཛེས་པའི། །བཤེས་གཉེན་དམ་པ་ནམ་ཡང་གཡོ་མེད་ཤོག །སངས་རྒྱས་དེ་གསུང་སྲས་བཅས་བྱིན་རླབས་དང༌། །སླུ་མེད་ཕུན་ཚོགས་རྟེན་འབྲེལ་སྒོ་འཕར་ཕྱེ། །ལྷག་བསམ་དག་པའི་སྨོན་ལམ་མཚམས་སྦྱོར་གྱིས། །འདོད་པའི་འབྲས་བུ་ཡོངས་སུ་སྨིན་གྱུར་ཅིག །ཅེས་པ་འདི་ནི་གྲྭ་བསམ་དར་བ་བློ་བཟང་བསྟན་འཛིན་གྱིས་ཆེད་གཉེར་དུ་བསྐུལ་བ་ལྟར་ཟ་ཧོརགྱི་བནྡེས་པོ་ཏཱ་ལར་སྦྱར་བའི་ཡི་གེ་པ་ནི་འཇམ་དཔལ་ལོ། །ཨོཾ་ཨ་ཐ་ལཀྵྨི་སིདྡྷི་རསྟུ། བདེ་ལྡན་ངོ་མཚར་བཀོད་པའི་ཞིང་གི་མགོན། །གར་དབང་མཛོད་སྤུའི་འོད་ཟེར་སྟོང་འབར་གཟིས། །འཆི་བདག་བདུད་ཀྱི་མུན་འཇོམས་འཁོར་ལོ་གསུམ། །མི་གཤིག་རྡོ་རྗེའི་དཔལ་དུ་འགྲུབ་གྱུར་ཅིག །ངག་ལ་སྨྲ་བའི་ཆོས་ཀྱི་བཀྲ་ཤིས་དུང༌། །མགྲིན་པའི་འཁོར་ལོའི་དབུས་ན་གཡས་འཁྱིལ་བ། །དབང་ཕྱུག་བློ་བསལ་སྐལ་བཟང་རྒྱ་མཚོ་ལ། །ཐེག་གསུམ་ཆོས་འཁོར་བསྐོར་ཕྱིར་ཞབས་བརྟན་ཤོག །ཆེས་ཆེར་སྙིགས་པའི་དུས་ཀྱི་གླང་པོའི་དགྲར། །འཇིགས་མེད་ལྷག་བསམ་གདོང་ལྔའི་ང་རོའི་རྒྱུད། །ཞི་བདེའི་མཚོན་གྱིས་(༣༡ན) ― GLG021_Page_0063 ―
[མ་དཔེ་གཟིགས་ན་འདིར་གནོན།]
གཞོམ་མིན་གོ་ཆ་མཆོག །ཐུབ་བསྟན་གངས་རིའི་སྤོ་ལ་བརྟན་པར་ཤོག །ལས་རླུང་དག་པ་དྷུ་ཏཱིའི་ལམ་ཡངས་པོར། །ཨ་ཧཾ་མི་གཤིགས་སྲོག་གི་ཀ་བ་ཅན། །འཇའ་ལུས་རྡོ་རྗེའི་ལང་ཚོ་རྒྱས་པའི་སྡེ། །གྲུབ་པའི་སྐལ་བ་བཟང་པོར་གཡོ་མེད་ཤོག །དུས་གསུམ་མ་ལ་ཡ་ཡི་ནགས་ཀླུང་ནས། །བསགས་པའི་དགེ་ཚོགས་ཀཏྤུ་ར་ཡི་དྲིས། །དཀར་མིན་འབྲས་བུའི་ཚ་གདུང་ཀུན་བཅིལ་ནས། །འགྲོ་རྣམས་བདེ་བའི་ངལ་གསོར་སྤྱོད་པར་ཤོག །ཆོས་སྲིད་ཟུང་དུ་འབྲེལ་བའི་ཉི་ཟླ་ཡི། །རྫོགས་ལྡན་སྣང་བ་གསར་པ་འོད་པོ་ཆེས། །ཡངས་པའི་ནོར་འཛིན་མ་ལུས་ཀུན་ཁྱབ་པས། །འདི་དང་གཏན་གྱི་ལེགས་ཚོགས་ལྷུན་གྲུབ་ཤོག །ཅེས་པ་འདི་ནི་དུས་ཞབས་པ་ཆེན་པོ་གྲྭ་ཕུག་པ་དཔལ་གྱི་སེང་གེའི་སྤྲུལ་པའི་སྐུ་ངག་དབང་སྙན་གྲགས་དཔལ་བཟང་པོའི་གསུང་གིས་ཉེ་བར་བསྐུལ་བ་ལ་རྟེན་ནས་ཟ་ཧོར་གྱི་བནྡེས་གཡར་ཁྲལ་ཙམ་དུ་བྲིས། །ཀུན་བཟང་སྣང་བ་མཐའ་ཡས་ཐུགས་རྗེའི་གར། །སིནྡྷུའི་རྒྱ་མཚོར་ལེགས་བསྒྱུར་པདྨ་འབྱུང༌། །རྩ་གསུམ་དཀོན་མཆོག་འདུས་པའི་བདག་ཉིད་ཀྱིས། །ཕུན་ཚོགས་སྨོན་ལམ་འབྲས་བུ་གྲུབ་པར་མཛོད། །གངས་ཅན་ལྷ་ཅིག་སྲས་པོ་ཏི་མུག་བཙན། །སྣ་ཚོགས་རང་སར་གྲོལ་བའི་ཡང་སྲིད་ཅན། །ཐེག་མཆོག་ཆོས་ཀྱི་སྙན་གྲགས་སྲིད་གསུམ་དུ། །ཁྱབ་མཛད་སྤྲུལ་སྐུའི་ཟླ་ཚེས་མངོན་གྱུར་ཤོག །བཀའ་ཕྱག་ཟུང་དུ་འཇུག་པའི་ཆུ་བོ་ཀུན། །མཁྱེན་(༣༡བ) ― GLG021_Page_0064 ―
[མ་དཔེ་གཟིགས་ན་འདིར་གནོན།]
དཔྱོད་འཕྲིན་ལས་རྒྱ་མཚོ་ཆེར་བབས་པས། །ཡིད་སྲུབས་གཡུལ་ལས་རྣམ་པར་རྒྱལ་བའི་སྡེ། །སླར་ཡང་ཞིང་འདིར་སྲིད་པ་འཛིན་པར་ཤོག །དཀོན་མཆོག་གསུམ་དངོས་རིག་འཛིན་ཐོད་ཕྲེང་རྩལ། །འཇིག་རྟེན་གསུམ་མགོན་ཀྱུ་ར་རིན་པོ་ཆེ། །ཕུན་ཚོགས་བསྟན་པ་རིན་ཆེན་སྤེལ་བའི་ཕྱིར། །མཆོག་སྤྲུལ་གདུལ་བྱར་མངོན་སུམ་བསྟན་དུ་གསོལ། །སྙིགས་མར་སྤྱོད་པ་ལུས་མེད་གླགས་ལྟའི་དཔུང༌། །ནག་པོ་བདུད་ཀྱི་སྡེ་དང་བཅས་པ་རྣམས། །འཁོར་འདས་ཕྱག་རྒྱ་ཟིལ་གནོན་དུས་ཀྱི་དགྲར། །འཇམ་དཔལ་དྲག་པོ་ཁྲོས་པས་འཇོམ་པར་ཤོག །བླ་མ་ཡི་དམ་མཁའ་འགྲོ་ཆོས་སྲུང་དང༌། །དྲང་སྲོང་རིག་འཛིན་གྲུབ་པའི་མཐུ་སྟོབས་ཀྱིས། །སྨོན་ལམ་བཏབ་པའི་འབྲས་བུ་ཇི་བཞིན་དུ། །ལྷུན་གྲུབ་སྐལ་བ་བཟང་པོར་བདག་གྱུར་ཅིག །ཅེས་དཔལ་འབྲི་གུང་སྐྱུ་རའི་གདུང་ལས་སྐུ་འཁྲུང་ཤིང་རྒྱལ་དབང་པདྨའི་གདུང་འཚོབ་རིགས་འཛིན་ཆེན་པོ་ཆོས་ཀྱི་གྲགས་པ་འཕྲིན་ལས་རྣམ་པར་རྒྱལ་བ་དབང་པོའི་སྡེའི་མཆོག་གི་སྤྲུལ་སྐུ་མྱུར་བྱོན་གྱི་སྨོན་ལམ་ཚིགས་སུ་བཅད་པ་འདི་ནི། དམ་པ་གང་གི་ཞམ་འབྲིང་བ་ཕྱག་མཛོད་དཀོན་མཆོག་རྒྱལ་མཚན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་པོ་ཏཱ་ལར་སྦྱར་བའོ། །དུས་གསུམ་སངས་རྒྱས་རྡོ་རྗེ་ཐོད་ཕྲེང་རྩལ། །བརྩེ་ཆེན་སྙིང་པོའི་ཞབས་དང་ཚར་པ་རྗེ། དགྱེས་མཛད་རྡོ་རྗེ་གུར་མགོན་གདོང་བཞི་པ། །(༣༢ན) ― GLG021_Page_0065 ―
[མ་དཔེ་གཟིགས་ན་འདིར་གནོན།]
བླ་མ་ཡི་དམ་སྲུང་མར་བཅས་པ་དགོངས། འཁོར་ལོའི་མགོན་པོ་གདུལ་བྱའི་བསོད་ནམས་ཀྱི། །ཞིང་དུ་རྣམ་ཀུན་མཆོག་ལྡན་རྡོ་རྗེ་འཛིན། །མཁའ་སྤྱོད་འཆི་མེད་དགའ་མའི་གནས་ཆེན་ནས། །ཞིང་འདིར་སྲིད་པ་འཛིན་པར་བདག་བྱིན་རློབས། ཁྱད་པར་སྙན་རྒྱུད་ཟབ་མོ་སློབ་བཤད་ཆོས། ཁའུ་བྲག་རྫོང་བཞེད་སྲོལ་རིང་ལུགས་མཆོག །སྤེལ་ཕྱིར་མ་དག་འགྲོ་བ་མི་འདྲེན་ན། །ཐུགས་སྐྱེད་དམ་བཅའ་ཉམས་པར་མི་འགྱུར་རམ། །རྡོ་རྗེའི་རྣལ་འབྱོར་དབང་མོའི་ཞིང་ཁམས་དང༌། །ཟང་མདོག་དཔལ་གྱི་རི་བོའི་ཕོ་བྲང་ན། །བདེ་ཆེན་ཀློང་དུ་བཞུགས་ལས་བསྐུལ་བའི་གླུ། །གསོལ་འདེབས་དབྱངས་སུ་འཚེར་ལ་ཉེར་དགོངས་ཀྱེ། །གངས་ཅན་ཞིང་འདིར་སྤྲུལ་སྐུ་མྱུར་བྱོན་སྟེ། །སྤྱི་དང་བྱེ་བྲག་ཐུབ་བསྟན་རབ་སྤེལ་ནས། །བདག་སོགས་གདུལ་བྱའི་རེ་བ་ལེགས་སྐོང་བ། །ཡིད་བཞིན་དབང་གི་རྒྱལ་པོ་འགྲུབ་པར་ཤོག །འ་ཞའི་རིགས་ལས་ཁྱབ་བདག་རྡོ་རྗེ་འཛིན་པ་མགོན་པོ་བསོད་ནམས་མཆོག་ལྡན་ཞིང་འདིའི་སྐུའི་བཀོད་པ་ཉེ་བར་བསྡུས་པའི་དུས་འཕགས་པ་མཆེད་ཀྱི་དྲུང་དུ་སྤྲུལ་སྐུ་འབྱོན་མི་འབྱོན་གྱི་བརྟག་པ་ལན་གཉིས་སུ་བྱས་པར་མཁའ་སྤྱོད་སོགས་དག་པའི་ཞིང་ལས་བོད་ཡུལ་འདིར་འབྱོན་པའི་རྟེན་འབྲེལ་གྱི་སྒོ་ཕྱཻ་བ་ཞིག་མ་བྱུང་རུང་ཉང་སྟོན་རིགས་སྔགས་འཆང་བ་མཁས་གྲུབ་ཆེན་པོ་སྨན་ལུང་པ་བློ་གྲོས་མཆོག་གི་རྡོ་རྗེའི་གསུང་གིས་ནན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་འཕགས་པ་མཆེད་དང༌། ཨྱོན་ཆེན་པོའི་(༣༢བ) ― GLG021_Page_0066 ―
[མ་དཔེ་གཟིགས་ན་འདིར་གནོན།]
སྐུ་རྟེན་བསོད་ནམས་དཔལ་འབར་གྱི་དྲུང་དུ་གསོལ་བ་བཏབ་ཏེ་སྦྱར་བའོ། །གསུང་ངག་ཆད་མེད་དབང་བཞིའི་མཐོ་རིས་ཆབ། །རྣམ་དཔྱོད་བློ་གྲོས་ལྟོ་བར་དོག་མིན་ཀྱང༌། །སྐལ་བཟང་རྒྱ་ཆེན་གདུལ་བྱའི་མཚོར་འབབ་པ། །དྲང་སྲོང་རྡོ་རྗེ་འཛིན་པར་གསོལ་བ་འདེབས། །ཨ་ཧཾ་མི་ཤིགས་འཆི་མེད་རྡོ་རྗེའི་སྲོག །གྲུབ་པའི་རིགས་འཛིན་སྐུ་རུ་བཤེས་གཉེན་ཁྱོད། །བཞེངས་ཏེ་སྟུག་པོ་བཀོད་པའི་མགོན་པོ་བཞིན། །འཁོར་བ་མཐའ་ཅན་དེ་སྲིད་བཞུགས་གྱུར་ཅིག །ཅེས་པ་འདི་ནི་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མང་པོར་བལྟ་བའི་བློ་མིག་རྣམ་པར་ཡངས་པའི་གླང་བུ་བ་དགྲ་འདུལ་ཚེ་རིང་གིས་རྒྱུན་ཁྱེར་ཉུང་ངུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་རང་བྱུང་འཕགས་པ་མཆེད་ཀྱི་དྲུང་དུ་དགེ་སྦྱོར་གྱི་ལུགས་སུ་གནས་པའི་ཐུན་མཚམས་ཞིག་ལ་བྲིས་པ་སིདྡྷི་རསྟུ། །བདུད་བཞིའི་གཡུལ་ལས་རྣམ་པར་རྒྱལ་བ་ཡི། །ཚེ་མཐའ་ཡས་དང་ཡིད་བཞིན་འཁོར་ལོ་སོགས། །འཆི་མེད་འདོད་པའི་འབྲས་སྟེར་དཔག་བསམ་དབང༌། །ལྷ་མཆོག་རྣམས་ཀྱིས་བསམ་དོན་ལྷུན་གྲུབ་མཛོད། །ལུས་ངག་ཡིད་གསུམ་སྨིན་ནུས་དབང་གི་ཆུ། །རྒྱུན་ཆད་མེད་པས་བློ་གསལ་སྐལ་བཟང་རྣམས། །ཚིམ་བྱེད་རྣམ་དཀར་འཕྲིན་ལས་རྒྱ་མཚོ་ཡི། །རླབས་ཕྲེང་ཡོལ་བ་མེད་པར་ཞབས་བརྟན་ཤོག །རབ་བརྟན་སྣ་ཚོགས་རྡོ་རྗེ་གཡུང་དྲུང་གིས། །ལེགས་མཛེས་སེང་གེས་བཏེག་པའི་ཁྲི་ཆེན་པོར། །བསྐལ་པ་(༣༣ན) ― GLG021_Page_0067 ―
[མ་དཔེ་གཟིགས་ན་འདིར་གནོན།]
བྱེ་བར་མི་གཡོ་རྟག་བཞུགས་ནས། །འགྲོ་ཀུན་ཕན་བདེའི་དཔལ་ལ་སྤྱོད་པར་ཤོག །ཅེས་པ་འདི་ནི་ལྷ་ལྡན་སྤྲུལ་པའི་གཙུག་ལག་ཁང་གི་བྱ་འདབས་སུ་འཁོད་པའི་ཚེས་བཅུ་མ་ཎི་དམིགས་བརྩེ་མ་བསྙེན་གནས་མ་ཁག་བཞིས་བསྐུལ་བའི་ངོར་ཟ་ཧོར་གྱི་བནྡེས་བྲིས། །སྭསྟི་པྲ་ཛཱ་བྷྱཿ མཆོག་གསུམ་རིན་ཆེན་ཐུགས་རྗེ་ཆེན་པོ་ཡིས། །འདི་ཕྱིའི་གཏན་འདུན་འགྲུབ་པའི་བསོད་ནམས་ཀྱི། །མ་རྨད་འབྱོར་བ་རབ་ཏུ་རྒྱས་གྱུར་བའི། །ཕུན་ཚོགས་དགའ་སྟོན་དཔལ་ལ་སྤྱོད་གྱུར་ཅིག །བསོད་ནམས་དབང་གི་ལྕགས་ཀྱུས་བརྟན་གཡོ་རྣམས། །བཀུག་དང་ལྷན་ཅིག་དབྱངས་ཅན་ངག་གི་དཔྱིད། །ངག་ལ་འཇུག་པའི་སྐལ་བཟང་ཉེར་འགྲུབ་པ། །སྨྲ་བ་ཀུན་ལས་རྒྱལ་བའི་དཔལ་ཐོབ་ཤོག །སྨོན་ལམ་ཚིགས་བཅད་འདི་ནི་མོན་མཁར་རྣམ་སྲས་གླིང་པ་འབྱོར་རྒྱས་དང་བསོད་དབང་སྤུན་གཉིས་ཀྱིས་ངག་འདོན་ཞིག་དགོས་ཚུལ་ལྟར་ཟ་ཧོར་གྱི་བནྡེས་སུག་བྲིས་སུ་བགྱིས་པའོ། །དཀོན་མཆོག་རིན་ཆེན་གསུམ་གྱི་བདག་ཉིད་ཅན། །དངོས་གྲུབ་འབྱུང་གནས་དཔལ་ལྡན་བླ་མ་མཆོག །ངག་གི་དབང་ཕྱུག་འཇམ་དབྱངས་དགའ་བའི་བཤེས། །བློ་བསལ་སྐལ་བཟང་རྒྱ་མཚོའི་མགོན་ཁྱོད་ཀྱིས། །བདག་སོགས་དེང་ནས་བྱང་ཆུབ་མ་ཐོབ་བར། །རྨད་བྱུང་ཐུགས་རྗེ་ཆེན་པོས་རྗེས་བཟུང་སྟེ། །འདི་དང་གཏན་གྱི་འདུན་མ་མ་ལུས་པ། །བསམ་པ་ཇི་བཞིན་ལྷུན་གྱིས་འགྲུབ་པར་ཤོག །(༣༣བ) ― GLG021_Page_0068 ―
[མ་དཔེ་གཟིགས་ན་འདིར་གནོན།]
སྲིད་གསུམ་བདག་མོ་འདོད་ཁམས་དབང་ཕྱུག་མ། །སྟོབས་འཕྲོག་ནག་པོ་ལྷ་ཆེན་གདོང་བཞི་སོགས། །བསྟེན་ཅིང་བསྒྲུབས་པའི་ཆོས་སྲུང་ཚོགས་རྣམས་ཀྱིས། །འཕྲིན་ལས་སྒྲུབ་ལ་གཡེལ་བ་མེད་གྱུར་ཅིག །ཅེས་པ་འདི་ཡང་དེ་མོ་དབོན་པོ་ཕུན་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །བློ་གསལ་སྐལ་བཟང་འཕྲིན་ལས་ཐོས་བསམ་དང༌། །སྒོམ་པའི་ཚུལ་ལ་གེགས་བྱེད་མུན་པའི་དཔུང༌། །དཀོན་མཆོག་ཐུགས་རྗེ་ཉི་མའི་འོད་ཟེར་གྱིས། །རབ་གསལ་བརྩོན་འགྲུས་སྣང་བ་འབར་གྱུར་ཅིག །ཅེས་པ་འདི་ཡང་ཁར་ཁ་ཁུ་འདུ་ལུ་ཆུ་ཁུར་གྱི་སྐུ་སྐྱེ་བློ་བཟང་འཕྲིན་ལས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །སྣང་སྲིད་ཟིལ་གནོན་འཆི་མེད་སྐུ་བརྙེས་པ། །སངས་རྒྱས་གཉིས་པ་ཨྱོན་ཐོད་ཕྲེང་རྩལ། །འཛམ་བུ་གླིང་ན་ཆེ་བའི་རིགས་སྔགས་ཀྱི། །བརྟུལ་ཞུགས་གྲུབ་པའི་དབང་པོས་དགེ་ལེགས་སྩོལ། །ཆོས་ཀུན་གང་ཤར་དབྱིངས་ནས་རང་གྲོལ་བ། །ལྷུན་གྲུབ་འོད་ལྔའི་མདངས་གསལ་དྲག་པོ་རྩལ། །ཐུགས་རྗེའི་སྣང་བ་ཀུན་ཁྱབ་རྡོ་རྗེ་འཛིན། །བསྐལ་བརྒྱར་མི་འགྱུར་ཆོས་འཁོར་བསྐོར་དུ་གསོལ། །ན་བཟང་ཐུགས་ཀྱི་ཡང་ཏིག་རྫོགས་པ་ཆེ། །འཇིག་མེད་སྨྲ་ལ་སྤོབས་པའི་དབང་པོ་མཆོག །ངོ་མཚར་རྣམ་སྤྲུལ་སྒྱུ་འཕྲུལ་དྲ་བའི་གར། །བདུད་སྡེའི་གཡུལ་ལས་རྣམ་རྒྱལ་བརྟན་གྱུར་ཅིག །ཞི་ཁྲོ་རབ་འབྱམས་ཀུན་འདུས་བཀའ་བརྒྱད་ལྷ། །ངེས་གསང་སྙིང་པོའི་བཀའ་སྐྱོང་རལ་(༣༤ན) ― GLG021_Page_0069 ―
[མ་དཔེ་གཟིགས་ན་འདིར་གནོན།]
གཅིག་མ། །ཟབ་དོན་གཏེར་སྲུང་རྒྱ་མཚོའི་ཚོགས་རྣམས་ཀྱིས། །འགལ་རྐྱེན་ཀུན་གསོལ་མཐུན་རྐྱེན་མ་ལུས་སྒྲུབས། །ཉན་རང་བྱང་སེམས་ཐེག་པའི་རྩ་བ་བརྟན། །ཀྲི་ཡོག་སྡེ་གསུམ་སྡོང་པོ་ཡལ་འདབ་འཕེལ། །རྣམ་གསུམ་ཡོ་གའི་འབྲས་བུ་ཁུར་དུད་པ། །ཐེག་མཆོག་ཡོངས་འདུའི་དབང་པོ་རྒྱལ་གྱུར་ཅིག །ཅེས་ངེད་རང་ཡུན་དུ་འཚོ་བ་དང་ཆོས་རྗེ་རྫོགས་ཆེན་པ་ཀུན་བཟང་རྣམ་རྒྱལ་གྱི་སྐུ་སྐྱེའི་བརྟན་བཞུགས་དང་བཅས་པ་འདི་ལྟ་བུ་ཞིག་དགོས་ཞེས་དབོན་པོ་ཆོས་དབྱིངས་ལྷུན་གྲུབ་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྔགས་བན་ངག་དབང་འཕྲིན་ལས་སོ། །སྭསྟི། འཆི་མེད་ཚེ་དབང་གྲུབ་པའི་རིགས་འཛིན་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །བསྟན་འགྲོའི་དཔྱིད་དུ་བསྐལ་བརྒྱར་འཚོ་བཞེས་ནས། །ཆོས་འཁོར་རྒྱུན་མི་འཆད་པར་སྐོར་གྱུར་ཅིག །སྡེ་བཞིའི་འཕྲིན་ལས་སྒོ་འཕར་ལེགས་ཕྱེ་ནས། །ཕུན་ཚོགས་བདེ་སྐྱིད་རྒྱ་མཚོའི་རླབས་ཀྱི་འཕྲེང༌། །ནམ་ཡང་ཡོལ་བ་མེད་པའི་ནོར་འཛིན་བདག །རྡོ་རྗེ་ལྟ་བུར་མི་འགྱུར་བརྟན་པར་ཤོག །ཅེས་ངེད་རང་དང་ཕྱག་མཛོད་འཕྲིན་ལས་རྒྱ་མཚོ་ཡུན་རིང་འཚོ་བའི་བདེན་ཚིགས་སྤེལ་བའི་ཚིགས་སུ་བཅད་པ་འདི་ནི་ལྷ་ལྡན་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་བྲིས། །ངག་དབང་རྣམ་པར་རྒྱལ་བའི་རིང་ལུགས་མཆོག །བཀྲ་ཤིས་ཐུགས་གསང་དཔལ་གྱི་བེའུ་རུ། །ལེགས་གཏམས་དཔལ་ལྡན་གྲུབ་བརྒྱུད་གཙུག་གི་རྒྱན། །བསྐལ་པ་རྒྱ་མཚོར་(༣༤བ) ― GLG021_Page_0070 ―
[མ་དཔེ་གཟིགས་ན་འདིར་གནོན།]
ཞབས་པད་བརྟན་གྱུར་ཅིག །ཆོས་ཀུན་ཕྱག་རྒྱ་ཆེན་པོར་རྒྱས་འདེབས་པའི། །ངེས་དོན་ཆོས་ཀྱི་ཉི་མ་འོད་པོ་ཆེས། །སྐལ་ལྡན་པདྨའི་འདབ་བརྒྱ་རྣམ་གྲོལ་བ། །མཆོག་གི་དང་པོའི་སངས་རྒྱས་ལྟར་བརྟན་ཤོག །གངས་ཅན་གྲུབ་རིགས་སྨྲ་བ་ཡོངས་ཀྱི་སྡེའི། །གཙུག་རྒྱན་རྗེ་བཙུན་སྟག་ལུང་རིན་པོ་ཆེ། །དཔལ་ལྡན་ཕག་གྲུའི་རིང་ལུགས་དྲི་མེད་པ། །སྤེལ་ཕྱིར་བསྐལ་བརྒྱར་ཆོས་འཁོར་སྐོར་དུ་གསོལ། །ཞེས་རྗེ་བཙུན་སྟག་ལུང་པ་ཆེན་པོ་ངག་དབང་བཀྲ་ཤིས་དཔལ་གྲུབ་ཀྱི་བརྟན་བཞུགས་འདི་ནི་དབུ་མ་ཕྱག་མཛོད་ངག་དབང་བཟང་སྦྱིན་གྱིས་བསྐུལ་བའི་མཚམས་སྦྱར་ལས་ཟ་ཧོར་གྱི་བནྡེས་སྦྱར་བའོ། །ངག་གི་དབང་ཕྱུག་ལེགས་བྱས་ཕུན་ཚོགས་པ། །རྣམ་རོལ་བསོད་ནམས་བྱེ་བའི་མྱུ་གུ་ལས། །ངོ་མཚར་འབྲས་བུ་དཔལ་གྱི་ཡོངས་དུད་པ། །སྐལ་བཟང་གདུལ་བྱའི་ཉེར་འཚོར་བརྟན་གྱུར་ཅིག །ཕུན་ཚོགས་རྣམ་པར་དཀར་བའི་འཕྲིན་ལས་རྣམས། །ཆད་པ་མེད་པའི་གངྒཱའི་ཆུ་བོའི་རྒྱུན། །ལུས་ཅན་བསོད་ནམས་ཞིང་གི་རྒྱ་མཚོ་ཆེར། །ལེགས་འབབ་སྐལ་བ་བཟང་པོ་འགྱུར་བར་ཤོག །བསླུ་བ་མེད་པའི་དཀོན་མཆོག་རིན་ཆེན་གསུམ། །དྲང་སྲོང་རིག་འཛིན་བདེན་ཚིགས་གྲུབ་རྣམས་ཀྱིས། །མགོན་ཁྱེད་མི་འགྱུར་ཆོས་ཀྱི་ཁྲི་ཆེན་པོར། །རྡོ་རྗེ་ལྟ་བུར་བརྟན་པར་བྱིན་གྱིས་རློབས། །ཞེས་སེམས་དཔའ་ཆེན་པོ་ངག་དབང་ཕུན་ཚོགས་ཀྱི་སྤྲུལ་སྐུ་ཕུན་ཚོགས་བསོད་ནམས་དཔལ་བཟང་གི་བརྟན་བཞུགས་ཤིག་(༣༥ན) ― GLG021_Page_0071 ―
[མ་དཔེ་གཟིགས་ན་འདིར་གནོན།]
དགོས་ཞེས་ཏྲེ་བོ་སྐུ་སྐྱེ་ནམ་མཁའ་བསམ་གྲུབ་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །རྣམ་འདྲེན་དེ་གསུང་སྲས་དང་སློབ་མར་བཅས། །སྐྱབས་མཆོག་མཁྱེན་བརྩེ་ནུས་པའི་འོད་སྟོང་གིས། །ངག་དབང་དགེ་ལེགས་རྒྱལ་མཚན་དཔལ་བཟང་པོར། །བདུད་བཞི་མུན་པའི་སྨག་རུམ་ཞི་བར་མཛོད། །ངག་གི་དབང་ཕྱུག་དགེ་ཚོགས་རྒྱ་མཚོའི་གཏེར། །ལེགས་པའི་ལམ་སྟོན་ཆོས་ཀྱི་རྒྱལ་མཚན་ཆེ། །རྨད་བྱུང་དམ་པའི་ཆོས་ཀྱི་ཁྲི་ཆེན་པོར། །མི་འགྱུར་རྡོ་རྗེ་ལྟ་བུར་བརྟན་པར་ཤོག །བསྟན་སྲུང་དམ་ཅན་རྒྱ་མཚོའི་མཐུ་སྟོབས་དང༌། །དྲང་སྲོང་རིགས་འཛིན་ཚོགས་ཀྱི་བདེན་པའི་ཚིགས། །ཁྲིམས་ལྡན་འདུས་ཚོགས་སྨོན་ལམ་རྣམ་དག་མཐུས། །ཇི་ལྟར་བསམ་པ་ཡིད་བཞིན་འགྲུབ་པར་ཤོག །དེ་མོ་སྤྲུལ་སྐུ་ངག་དབང་དགེ་ལེགས་རྒྱལ་མཚན་གྱི་བརྟན་བཞུགས་འདི་ཡང་དེ་མོ་དབོན་པོ་ཕུན་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །བཀོད་ལེགས་རིན་ཆེན་ཕྲས་མཛེས་གསེར་སྦྱངས་ཀྱི། །ཅོད་པན་ཕུལ་བས་ཐུབ་བསྟན་གནས་པའི་བར། །ཟས་གཙང་སྲས་ཀྱི་སྐུ་གཟུགས་དབང་གི་རྒྱལ། །གངས་ཅན་ལྗོངས་འདིར་བརྟན་པར་བཞུགས་གྱུར་ཅིག །སྒོ་གསུམ་འབད་དང་མཐུན་རྐྱེན་བྱེད་པོ་རྣམས། །འདི་དང་གཏན་གྱི་མདུན་མ་ལྷུན་འགྲུབ་ཅིང༌། །མཁའ་མཉམ་འགྲོ་ཀུན་སྲིད་ཞིའི་རྒྱ་མཚོ་ལས། །བསྒྲལ་ཏེ་རྣམ་པ་ཐམས་ཅད་མཁྱེན་ཐོབ་ཤོག །རྒྱ་ཧོར་བོད་སོགས་ཡངས་པའི་འཇིག་རྟེན་དུ། །(༣༥བ) ― GLG021_Page_0072 ―
[མ་དཔེ་གཟིགས་ན་འདིར་གནོན།]
འཁྲུག་རྩོད་ནད་མུག་དུས་ཀྱི་ཆད་པ་ཀུན། །རབ་ཞི་ཆོས་དང་སྲིད་ཀྱི་བདེ་སྐྱིད་ལ། །རྫོགས་ལྡན་བཞིན་དུ་སྤྱོད་པའི་སྐལ་བཟང་ཤོག །ཅེས་ལྷ་ལྡན་སྤྲུལ་པའི་གཙུག་ལག་ཁང་དུ་ཇོ་བོ་རིན་པོ་ཆེ་ཤཱཀྱ་མུ་ནིར་དབུ་རྒྱན་གསར་བཟོས་ལྕགས་གླང་ཧོར་ཟླ་བདུན་པའི་ཚེས་ལྔའི་ཉིན་ཕུལ་སྐབས་དཔལ་ལྡན་སྟོད་རྒྱུད་གྲྭ་ཚང་པ་རྣམས་སྨོན་ལམ་གྱི་མཚམས་སྦྱོར་མཛད་བཅུག་པའི་ཚེ་ཞལ་འདོན་དུ་ཟ་ཧོར་གྱི་བནྡེས་སྦྱར། །ཕུན་ཚོགས་མཁྱེན་བརྩེ་ནུས་པ་གངྒཱའི་ཆུས། །སྙིགས་མར་སྤྱོད་པའི་ཉེས་ཚོགས་ཀུན་འཁྲུད་པར། །ཐུགས་རྗེའི་མཐུ་དཔུང་ལྷག་པར་ཆེ་བའི་མགོན། །རྣམ་འདྲེན་སྨན་གྱི་བླ་མ་མཆེད་བརྒྱད་ཀྱིས། །ངག་དབང་འཇམ་མགོན་བློ་བཟང་གྲགས་པ་ཡི། །རྒྱ་ཆེན་ཆོས་སྲིད་ཟུང་དུ་འཇུག་པའི་བསྟན། །དབྱར་མཚོ་ལྟ་བུར་ལེགས་འཕེལ་བྱེད་པོ་མཆོག །བསྐལ་བརྒྱར་གཡོ་མེད་སྨོན་ལམ་འགྲུབ་བྱིན་རློབས། །འཇིག་རྟེན་སྤྱི་དང་ཁྱད་པར་བོད་ཡུལ་འདིར། །ནད་རིམས་འཁྲུག་རྩོད་མུ་གེ་ལ་སོགས་པ། །དུས་ཀྱི་ཆད་པ་མ་ལུས་ཀུན་ཞི་ནས། །ཕན་བདེའི་དགའ་སྟོན་དཔལ་ལ་སྤྱོད་གྱུར་ཅིག །ཅེས་སྨན་བླའི་མདོ་ཆོག་གི་སྨོན་ལམ་འཇུག་ཏུ་འདོགས་རྒྱུའི་འདོད་གསོལ་འདི་ལྟ་བུ་ཞིག་དགོས་ཞེས་གཉལ་སྡེ་དྲུག་མཁན་པོ་བློ་བཟང་དར་རྒྱས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ནོར་འཛིན་ལྟོ་བར་ལྷ་མིའི་སྣོད་བཅུད་ཀྱི། །ཕུན་ཚོགས་ངོ་མཚར་བཀོད་པའི་མཎྜལ། །ཞིང་ཁམས་རྒྱ་མཚོའི་(༣༦ན) ― GLG021_Page_0073 ―
[མ་དཔེ་གཟིགས་ན་འདིར་གནོན།]
རྡུལ་སྙེད་རྒྱལ་བ་དང༌། །དེ་སྲས་སློབ་མར་བཅས་ལ་ལེགས་ཕུལ་བས། །ཐུབ་པའི་རིང་ལུགས་ཆོས་སྤྱོད་རྣམ་བཅུ་དང༌། །འཇིག་རྟེན་ཁམས་སུ་བདེ་སྐྱིད་དགའ་སྟོན་འཕེལ། ཁྱད་པར་ཀུན་མཁྱེན་བློ་བཟང་གྲགས་པ་ཡི། །ཆོས་སྲིད་བསྟན་པ་དར་ཞིང་རྒྱས་པར་ཤོག །དགེ་ཚོགས་ཚུལ་འདི་སྒྲུབ་ལ་གཏོགས་སོ་ཅོག །གནས་སྐབས་མཐར་ཐུག་དོན་གཉིས་ལྷུན་གྲུབ་ཅིང༌། །ནམ་མཁའི་མཐའ་མཉམ་འགྲོ་བ་མ་ལུས་པ། །བླ་མེད་བྱང་ཆུབ་ཐོབ་པའི་རྒྱུར་གྱུར་ཅིག །ཅེས་པ་འདི་ཡང་འཕྲུལ་སྣང་དུ་བསོད་ནམས་རྒྱ་མཚོའི་ཞིང་མཆོག་དམ་པར་དངུལ་གྱི་མཎྜལ་ཟུང་ལྡན་གསར་བཟོས་ཆུ་སྟག་ཧོར་ཟླ་བཅུ་པའི་ཚེས་ཉི་ཤུའི་ཉིན་ཕུལ་སྐབས་སྐྱོར་ལུང་གསུང་སྒྲོགས་པ་རྣམས་སྨོན་ལམ་གྱི་མཚམས་སྦྱོར་སྤེལ་བཅུག་པའི་དུས་ཀྱི་ཞལ་འདོན་དུ་ཟ་ཧོར་གྱི་བནྡེས་སྦྱར། །མཆོག་གསུམ་འཆི་མེད་གར་དབང་སྣང་མཐའ་ཡས། །བྱིན་རླབས་འོད་གཟིས་ངག་དབང་བློ་གསལ་བ། །སྐལ་བཟང་དགའ་བའི་བཤེས་གཉེན་རྡོ་རྗེའི་ཁྲིར། །བསྐལ་པ་རྒྱ་མཚོར་ཞབས་པད་བརྟན་པར་ཤོག །ཅེས་པ་འདི་ཡང་ཆོས་འཁོར་དཔལ་གྱི་ལྷ་ས་བ་སྤྱི་ཚོགས་ཀྱིས་བསྐུལ་བའི་ངོར་བྲིས། །ཚོགས་གཉིས་ཡོངས་སུ་རྫོགས་པའི་རྣམ་འདྲེན་དང༌། །ལུང་དང་མངོན་པར་རྟོགས་པའི་ཆོས་དཀོན་མཆོག །ཚུལ་བཞིན་སྒྲུབ་མཛད་སློབ་མར་བཅས་པ་ཡི། །ཐུགས་རྗེའི་རླུང་གི་ཤིང་རྟས་རབ་དྲངས་ཏེ། །རྨད་བྱུང་ཐུབ་བསྟན་(༣༦བ) ― GLG021_Page_0074 ―
[མ་དཔེ་གཟིགས་ན་འདིར་གནོན།]
ལྷ་ཡི་ལམ་ཡངས་པར། །ངོ་མཚར་སྤྲུལ་སྐུའི་ཟླ་བ་ཡོངས་ཚེས་པའི། །ཟློས་གར་ལྷར་བཅས་སྐྱེ་དགུའི་ཀུནྡའི་ཚལ། །འཛུམ་པའི་རེ་བ་མྱུར་དུ་སྐོང་བར་ཤོག །བློ་བསལ་སྐལ་བཟང་གདུལ་བྱར་དམ་པའི་ཆོས། །ཟུང་འཇུག་དབང་གི་རྒྱལ་པོའི་ཟ་མ་ཏོག །ཐོས་བསམ་སྒོམ་གསུམ་རྒྱལ་མཚན་རྩེར་བསྒྲེང་བའི། །ཡང་སྲིད་བསྟན་འགྲོའི་ཉེར་འཚོར་འཛིན་པར་ཤོག །ངག་གི་དབང་ཕྱུག་འཇམ་དཔལ་གྲགས་པའི་ལྷ། །ལུས་ཅན་བསོད་ནམས་ཞིང་དུ་ངུར་མིག་གར། །རྣམ་པར་ཡོངས་བསྒྱུར་མ་སྨད་མཛད་པའི་དཔྱིད། །ལྷུན་གྲུབ་འཕྲིན་ལས་ཆད་མེད་འཇུག་གྱུར་ཅིག །མཆོག་གསུམ་མཐུ་དང་རྟེན་འབྲེལ་བསླུ་བ་མེད། །མོས་ལྡན་འདུས་པའི་ཚོགས་ཀྱིས་རྩེ་གཅིག་ཏུ། །སྙིང་ནས་གསོལ་བ་བཏབ་པའི་བདེན་ཚིག་གིས། །རེ་བའི་འབྲས་བུ་དུས་སུ་སྨིན་གྱུར་ཅིག །ཅེས་དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་མཁན་ཆེན་བློ་བཟང་ཆོས་ཀྱི་རྒྱལ་མཚན་དཔལ་བཟང་པོ་སྐུའི་བཀོད་པ་བསྡུས་པའི་གནས་ཚུལ་ཐོས་འཕྲལ་དུ་སྤྲུལ་སྐུའི་ཡང་སྲིད་མྱུར་དུ་འཛིན་པའི་གསོལ་འདེབས་སུ་ཟ་ཧོར་གྱི་བནྡེས་དང་བའི་ཡིད་ཀྱི་སྦྱར་བའོ། །རྣམ་འདྲེན་དེ་གསུང་སློབ་མར་བཅས་པ་ཡི། །རྨད་བྱུང་ཐུགས་རྗེའི་རྟེན་འབྲེལ་སླུ་མེད་མཐུས། །བློ་བཟང་དམ་པའི་ཆོས་ཀྱི་རྒྱལ་མཚན་ཆེའི། །ཡང་སྲིད་སྤྲུལ་པའི་ཟློས་གར་མྱུར་སྟོན་ཤོག །དག་པའི་ཞིང་དང་གནས་ངན་འཁོར་བའི་གྲོང༌། །འཕགས་ཆེན་དམ་པར་བདེ་སྡུག་ཡོངས་(༣༧ན) ― GLG021_Page_0075 ―
[མ་དཔེ་གཟིགས་ན་འདིར་གནོན།]
བྲལ་ཕྱིར། །སྔོན་གྱི་ཐུགས་བསྐྱེད་ཇི་བཞིན་གངས་ཅན་འདིར། །མཆོག་སྤྲུལ་ཟླ་བ་གསར་པ་མྱུར་ཚེས་ཤོག །སྨོན་འཇུག་སེམས་ཀྱི་ཚངས་པའི་རལ་ཀླུང་ནས། །གཞན་ཕན་འཕྲིན་ལས་ཆད་མེད་གངྒཱའི་རྒྱུན། །གངས་ཅན་ར་བ་དཀར་པོའི་རྒྱ་མཚོ་ཆེར། །ནམ་ཡང་ཆད་པ་མེད་པར་འབབ་གྱུར་ཅིག །རང་དོན་ཉི་ཟླའི་འོད་ཀྱིས་ཕྱེད་མིན་པའི། །མ་འདྲིས་འགྲོ་ལ་རྗེས་བརྩེའི་བ་ཀཱུ་ལ། །ལྷག་བསམ་ལུས་ཕྲའི་སྦྲང་ཆང་དངར་པོ་ཡིས། །སྤྲུལ་པའི་འདབས་རྒྱ་ཡོངས་སུ་གྲོལ་གྱུར་ཅིག །ཕྱག་དྲུག་ལེགས་ལྡན་མ་ཧེའི་ཞལ་ཅན་སོགས། །ཞྭ་སེར་མནབས་པའི་བསྟན་སྲུང་ཚོགས་རྣམས་ཀྱིས། །འདོད་དོན་འབྲས་སུ་ཡོངས་སུ་ལེགས་ལེགས་སྨིན་པའི། །རེ་བ་ཇི་བཞིན་ལྷུན་གྲུབ་འཕྲིན་ལས་མཛོད། །ཅེས་དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་བློ་བཟང་ཆོས་ཀྱི་རྒྱལ་མཚན་དཔལ་བཟང་པོའི་སྤྲུལ་པའི་ཟློས་གར་ཞིང་འདིར་མྱུར་དུ་ཕེབས་པའི་སྨོན་ལམ་གྱི་རིམ་པ་འདི་ནི་ཆོས་སྡེ་ཆེན་པོ་བཀྲ་ཤིས་ལྷུན་པོ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །མཆོག་དང་ཐུན་མོང་དངོས་གྲུབ་མ་ལུས་པ། །སྩོལ་མཛད་འདོད་དོན་རེ་སྐོང་ཡིད་བཞིན་ནོར། །དཀོན་མཆོག་གསུམ་དངོས་རྩ་རྒྱུད་བླ་མ་ལ། །གསོལ་བ་འདེབས་སོ་སྒོ་གསུམ་བྱིན་གྱིས་རློབས། །འཁོར་བ་སྡུག་བསྔལ་རྒྱ་མཚོ་ཆེན་པོ་ལས། །ཐུགས་རྗེའི་ལྕགས་ཀྱུས་ཉེ་བར་རབ་དྲངས་ནས། །(༣༧བ) ― GLG021_Page_0076 ―
[མ་དཔེ་གཟིགས་ན་འདིར་གནོན།]
བདེ་ཆེན་ཐར་པའི་གྲོང་ཁྱེར་ཉམས་དགའ་བར། །བདག་སོགས་འགྲོ་ཀུན་འཇུག་པར་བྱིན་གྱིས་རློབས། །སྡུག་སྔལ་གསུམ་གྱིས་མནར་བའི་སེམས་ཅན་ལ། །ད་ལྟ་བདག་གིས་ཕན་ཐོག་མ་ནུས་པས། །རྫོགས་པའི་སངས་རྒྱས་གོ་འཕང་ཚེ་འདི་ལ། །ཐོབ་པའི་སྨོན་ལམ་ཅི་བཏབ་འགྲུབ་གྱུར་ཅིག །ཅེས་པ་འདི་ཡང་ཨེར་ཏི་ནི་ཐ་ཡན་ཕྱིས་སྙིང་ནས་གསོལ་བ་འདེབས་པ་ལ་ཐག་ཉེ་རིང་མེད་ཅིང་གོ་གསལ་བ་ཞིག་དགོས་ཞེས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དཔལ་ལོ། །ངག་དབང་བློ་གྲོས་མཆོག་གྱུར་འཇམ་དཔལ་དབྱངས། །བརྩེ་ཆེན་བཟང་པོའི་བྱམས་ལྡན་པད་དཀར་འཆང༌། །མཐུ་སྟོབས་རྒྱ་མཚོ་ལྟར་ཟབ་གསང་བའི་བདག །རིགས་གསུམ་ཀུན་གྱི་ངོ་བོར་གསོལ་བ་འདེབས། །དེ་ལྟར་གསོལ་བཏབ་བྱིན་རླབས་བདག་སྙིང་ལ། །ཞུགས་ནས་ཚེ་འདིའི་བར་ཆད་ཀུན་ཞི་ཞིང༌། །ཕྱི་མ་ངེས་ལེགས་གཏན་འདུན་ལྷུན་གྲུབ་པའི། །སྨོན་ལམ་གང་བཏབ་འབྲས་བུ་སྨིན་པར་ཤོག །ཅེས་པ་འདི་ཡང་མགོན་ཁང་བླ་མ་དཔལ་འབྱོར་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །མཁྱེན་བརྩེ་ནུས་མངའ་སངས་རྒྱས་བདག་ཉིད་ཆོས། རིགས་གྲོལ་དཔལ་ལྡན་དགེ་འདུན་བྱིན་རླབས་ཀྱིས། །བདག་སོགས་འགྲོ་ཀུན་སྲིད་ཞིའི་རྒུད་པ་ལས། །ལེགས་ཐར་འདི་ཕྱིའི་གཏན་འདུན་ལྷུན་གྲུབ་ཤོག །སྨོན་ལམ་ཚིགས་སུ་བཅད་པ་འདི་(༣༨ན) ― GLG021_Page_0077 ―
[མ་དཔེ་གཟིགས་ན་འདིར་གནོན།]
ནི་བདེ་ཆེན་ཡངས་པ་ཅན་གྱི་སྤྱན་སྔ་ཀརྨ་ཉི་མ་བྲོ་ཚལ་བའི་དུས་ངག་འདོན་དུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་བྲིས། །དཔལ་ལྡན་ངག་དབང་བློ་བཟང་རྒྱ་མཚོའི་སྡེ། །མཆོག་གསུམ་ཀུན་འདུས་ངོ་བོར་ཡིད་ཆེས་པས། །སྙིང་ནས་གསོལ་བ་འདེབས་ན་འདི་ཕྱིའི་དོན། །བསམ་པ་ཇི་བཞིན་འགྲུབ་པར་བདག་བྱིན་རློབས། །འདི་ལྟ་བུ་ཞིག་དགོས་ཞེས་ལྷ་ས་བ་བྱམས་རྒྱབ་གཞི་དགས་བསྐུལ་བའི་ངོར་ཟ་ཧོར་གྱི་བནྡེས་བྲིས། །ཞི་ཁྲོ་རབ་འབྱམས་འདུས་པའི་དཀྱིལ་འཁོར་ཀུན། །སྤྲོ་ཞིང་སྡུད་མཛད་རིགས་བརྒྱའི་ཁྱབ་བདག་མཆོག །དཔལ་ལྡན་ཆོས་ཀྱི་འབྱོར་པའི་འཕྲིན་ལས་རྣམས། །རབ་རྒྱས་བྱེད་པོ་རྡོ་རྗེ་སློབ་དཔོན་ཆེ། །ཆོས་སྐུ་ཀ་ནས་ཡེ་དག་དབྱིངས་ཆེན་པོར། །རང་གྲོལ་ཀུན་ཏུ་བཟང་པོའི་ཀློང་ཉིད་ནས། །ལྷུན་གྲུབ་གཟུགས་སྐུའི་བཀོད་པར་ཡོངས་བཞེངས་ཏེ། །ངོ་མཚར་སྤྲུལ་པའི་རོལ་གར་མྱུར་བསྟན་གསོལ། །སངས་རྒྱས་གཉིས་པ་པདྨ་ཐོད་ཕྲེང་གི །དྲི་མེད་རིང་ལུགས་ནོར་བུ་བསམ་འཕེལ་དབང༌། །སྤེལ་བར་གཉག་བན་སྔོན་དུས་ཐུགས་སྐྱེད་པ། །དུས་ལས་ཡོལ་མེད་ཞིང་འདིར་མངོན་གྱུར་ཤོག །རྔ་ཡབ་དཔལ་རིར་རྡོ་རྗེ་རྒྱལ་ཚབ་ཏུ། །ལེགས་བཞུགས་དག་པའི་རྣམ་རོལ་ངོ་མཚར་ཡང༌། །བཀའ་གཏེར་བཤད་སྒྲུབ་གནའ་བོའི་རིང་ལུགས་མཆོག །སྤེལ་བའི་གདུལ་བྱ་གངས་ཅན་ལྗོངས་འདིར་མང༌། (༣༨བ) ― GLG021_Page_0078 ―
[མ་དཔེ་གཟིགས་ན་འདིར་གནོན།]
།དེ་ཕྱིར་ཡར་ཀླུང་ཤེལ་གྱི་བྲག་ཕུག་ཏུ། །མགོན་ཁྱོད་པད་འབྱུང་རྡོ་རྗེ་འཆང་གི་སྐུར། །རིག་པའི་རྩལ་དུ་རྫོགས་པར་འཛབ་བསྙེན་གྱིས། །རྒྱུད་བསྐུལ་རྟེན་འབྲེལ་བསྒྲིག་དོན་ལྟར་འགྲུབ་ཤོག །རིགས་འཛིན་བརྒྱུད་པའི་བླ་མ་དམ་པ་དང༌། །སྒྲུབ་སྡེ་བརྒྱད་སོགས་ཡི་དམ་དཀྱིལ་འཁོར་ལྷ། །མ་ནིང་དྲེགས་པའི་སྡེ་དཔོན་སྲུང་མ་ཡིས། །འགལ་རྐྱེན་ཀུན་གསོལ་མཐུན་རྐྱེན་མ་ལུས་སྒྲུབས། །པདྨ་རྒྱལ་པོའི་ཞལ་བཞེས་ཇི་བཞིན་དུ། །གསོལ་བ་གང་བཏབ་ལྷུན་གྱིས་ལེགས་འགྲུབ་པར། །རྩ་གསུམ་ཀུན་འདུས་མཚོ་སྐྱེས་རྡོ་རྗེ་ཡིས། །རྨད་བྱུང་བྱིན་རླབས་སྙིང་ལ་འཇུག་གྱུར་ཅིག །ཅེས་དཀྱིལ་འཁོར་རྒྱ་མཚོའི་ཁྱབ་བདག་ཟུར་ཀུན་མཁྱེན་ཆོས་དབྱིངས་རང་གྲོལ་གྱི་སྤྲུལ་པའི་ཟླ་ཚེས་འཆར་བའི་གསོལ་འདེབས་འདི་ནི་སྨོན་སྒོམ་འབྲང་རྒྱས་པ་དགེ་སློང་ངག་དབང་དོན་གྲུབ་ཡར་ཀླུང་ཤེལ་གྱི་བྲག་ཕུག་ཏུ་བླ་མ་དམ་པ་གང་དེའི་སྤྲུལ་སྐུ་མྱུར་ཕེབས་ཀྱི་རྟེན་འབྲེལ་སྒྲིག་པའི་གསོལ་འདེབས་བགྱིད་ཚེ་ཁ་འདོན་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །རྡོ་རྗེའི་སྐུ་བརྙེས་ཚེ་དང་ཡེ་ཤེས་རྣམས། །དཔག་མེད་ལྷུན་གྱིས་གྲུབ་པའི་མགོན་པོ་དང༌། །སངས་རྒྱས་ཀུན་གྱི་འཕྲིན་ལས་གཅིག་བསྡུས་མ། །བཅོམ་ལྡན་ཡིད་བཞིན་འཁོར་ལོའི་བྱིན་རླབས་ཀྱིས། །ངག་དབང་འཇམ་མགོན་ལྷ་ཡིས་རྗེས་བཟུང་བ། །བློ་ལྡན་སྐལ་བཟང་རྒྱ་མཚོའི་དགེ་བའི་བཤེས། །འཆི་བདག་གཡུལ་(༣༩ན) ― GLG021_Page_0079 ―
[མ་དཔེ་གཟིགས་ན་འདིར་གནོན།]
ལས་རྒྱལ་ཏེ་ཡུན་རིང་དུ། །གནས་ཤིང་རྣམ་དཀར་འཕྲིན་ལས་རྒྱལ་གྱུར་ཅིག །བདུད་སྡེའི་དཔུང་ལ་འཇིག་པ་མེད་པ་ཡི། །མཐུ་སྟོབས་བཙན་པོའི་གོ་ཆ་རབ་བགོས་ནས། །ཐུབ་བསྟན་ལང་ཚོ་རྒྱས་པའི་སྡེ་ཆེན་པོར། །གཡུང་དྲུང་ལྟ་བུར་མི་འགྱུར་བརྟན་པར་བཞུགས། །མཆོག་གསུམ་ཐུགས་རྗེའི་རྟེན་ཅིང་འབྲེལ་འབྱུང་མཐུས། །ཟླ་བའི་མ་མ་ལས་འོངས་འཆི་མེད་ཀྱི། །མ་སྨད་བདུད་རྩི་ཐུགས་ཀྱི་ཟ་མ་ཏོག །ལེགས་པར་འཁྱིལ་བའི་དགའ་སྟོན་འགྲུབ་པར་ཤོག །ཁྲིམས་ལྡན་མང་དུ་ཐོས་པའི་འདུས་ཚོགས་ཀྱིས། །རབ་དཀར་ལྷག་བསམ་དག་པའི་རྒྱལ་མཚན་རྩེར། །རྩེ་གཅིག་སྨོན་ལམ་བཏབ་པ་ཡིད་བཞིན་ནོར། །བསམ་པའི་འབྲས་བུ་དུས་སུ་སྨིན་པར་ཤོག །འཁོར་བའི་ཡང་སྲིད་སྐྱེ་ཞིང་སྐྱེ་བ་རུ། །དམ་པའི་མགོན་མཆོག་ཁྱོད་ཀྱིས་རྗེས་བཟུང་ཞིང༌། །འདི་དང་གཏན་གྱི་འདུན་མ་མ་ལུས་ཀུན། །ཚུལ་བཞིན་སྒྲུབ་པའི་རེ་བ་སྐོང་བར་ཤོག །མཐོ་རིས་བདུན་དང་ལྡན་པའི་རྟེན་བཟང་པོར། །མངོན་པར་མཐོ་དང་ངེས་པར་ལེགས་པའི་ལམ། །རབ་ཏུ་སྒྲུབ་པས་ཕན་དང་བདེ་བ་ཡི། །རྨད་བྱུང་རོ་བརྒྱའི་དཔལ་ལ་སྤྱོད་པར་ཤོག །སྒྲིབ་བྲལ་དོན་གཉིས་ལྡན་པ་སངས་རྒྱས་དང༌། །སྤངས་རྟོགས་ཡོན་ཏན་འབྱུང་གནས་དམ་པའི་ཆོས། །རིག་དང་གྲོལ་བའི་དཔལ་ལྡན་དགེ་འདུན་ཏེ། །དཀོན་མཆོག་མཐུ་ཡིས་བདེན་ཚིགས་འགྲུབ་གྱུར་ཅིག །དུས་གསུམ་རྒྱལ་བ་སྲས་བཅས་ཐུགས་རྗེ་དང༌། །བསྟན་པ་སྐྱོང་བར་ཞལ་བཞེས་སྲུང་མའི་ཚོགས། །ཁྱད་པར་འདོད་ཁམས་དབང་ཕྱུག་(༣༩བ) ― GLG021_Page_0080 ―
[མ་དཔེ་གཟིགས་ན་འདིར་གནོན།]
ནུས་མཐུ་ཡིས། །འདོད་པའི་དོན་རྣམས་ལྷུན་གྱི་འགྲུབ་པར་ཤོག །གསེར་མངལ་ཅན་དང་མགྲིན་སྔོན་པད་དཀར་མིག །འཆི་མེད་དབང་པོ་དྲང་སྲོང་རིག་པ་འཛིན། །བདེན་ཚིགས་གྲུབ་པ་རྣམས་ཀྱིས་དུས་ཀུན་ཏུ། །ཕུན་སུམ་ཚོགས་པའི་བཀྲ་ཤིས་སྤེལ་བར་ཤོག །ཐུབ་པའི་བསྟན་དང་བསྟན་འཛིན་དགེ་འདུན་སྡེ། །བསྙེན་བཀུར་ཕུ་དུད་སྒྲུབ་པའི་སྦྱིན་པའི་བདག །འགྲོ་བའི་བདེ་སྐྱིད་མ་ལུས་འཕེལ་བ་ཡི། །བདེ་ལེགས་ཆེན་པོས་ནོར་འཛིན་ཀུན་ཁྱབ་ཤོག །ཅེས་བརྟན་བཞུགས་དང་སྨོན་ལམ་གཉིས་ཀ་ཚང་བ་ཤློ་ཀ་བཅུ་ཙམ་ཞིག་དགོས་ཞེས་ཉུང་ཇ་ཁང་པ་རྣམས་ཀྱིས་ནན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུང་རྟོགས་བསྟན་པ་འཛིན་ཅིང་རབ་སྤེལ་བར། །རྨད་བྱུང་འཕྲིན་ལས་བཟང་པོའི་བཤེས་གཉེན་མཆོག །གང་དེའི་མཆེད་གྲོགས་ཟུང་དང་བཅས་པ་རྣམས། །དེང་ནས་བྱང་ཆུབ་སྙིང་པོ་མ་ཐོབ་བར། །དྲིན་ཅན་བླ་མ་མཆོག་དང་མི་འབྲལ་ཞིང༌། །རྟག་ཏུ་དགྱེས་པ་ཆེན་པོས་རྗེས་བཟུང་ཏེ། །དམ་པའི་ཆོས་ཀྱི་བདུད་རྩིས་ཚིམས་པར་ཤོག །དཀོན་མཆོག་རིན་ཆེན་གསུམ་གྱི་བྱིན་རླབས་དང༌། །རྒྱུ་འབྲས་རྟེན་འབྲེལ་བསླུ་བ་མེད་པའི་མཐུས། །ཇི་ལྟར་སྨོན་ལམ་བཏབ་པའི་འབྲས་བུ་ནི། །རེ་བ་ཇི་བཞིན་ཡོངས་སུ་སྨིན་གྱུར་ཅིག །ཅེས་པ་འདི་ཡང་སྐྱིད་ཤོད་ཆོས་རྗེའི་སྤྲུལ་པའི་སྐུ་ངག་དབང་བསྟན་འཛིན་འཕྲིན་ལས་ཀྱི་གསུང་གི་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར། །དམ་པ་ཏོག་དཀར་རྒྱལ་བའི་རྒྱལ་ཚབ་ཏུ། །རིན་(༤༠ན) ― GLG021_Page_0081 ―
[མ་དཔེ་གཟིགས་ན་འདིར་གནོན།]
ཅེན་ཅོད་པན་བཅིངས་ཏེ་དབང་བསྐུར་བས། །དགའ་ལྡན་ཞིང་ཁམས་ཞིང་གི་གཙོར་བཞེངས་ཏེ། །ཐེག་ཆེན་ཆོས་སྒྲ་ལེགས་སྒྲོག་མི་ཕམ་པས། །བྱམས་པ་ཆེན་པོ་རྡོ་རྗེ་རྩེ་བརྒྱའི་མཚོན། །གདེངས་པས་བདུད་བཞིའི་ནུས་སྟོབས་ལྷ་མིན་མོའི། །མངལ་ལྷུང་རྣམ་པར་རྒྱལ་བའི་དགེ་ཚོགས་དར། །སྲིད་པའི་རྩེ་མོར་འཕྱར་བའི་མགོན་པོ་ཀྱེ། །ཕུན་ཚོགས་རིན་ཅེན་དངུལ་དཀར་ཞུན་མའི་ཁམས། །རྣམ་རྒྱལ་སོར་མོའི་འཕྲུལ་ལྡན་ནཻ་པ་ལས། །འདྲེན་བྱེད་བདུད་རྩིར་བསྐྲུན་པའི་སྐུ་རྙན་གྱིས། །བྱམས་མགོན་མངོན་སུམ་བལྟ་བའི་སྐལ་བཟང་བཞིན། །བསོད་ནམས་ཚོགས་འདི་མཐའ་འཁོབ་ཧོར་ཡུལ་དུ། །ཐུབ་བསྟན་ལེགས་སྤེལ་རབ་འབྱམས་ཆོས་ཀྱི་རྒྱལ། །ནམ་མཁའ་རྒྱ་མཚོ་མངོན་པར་མཐོ་བའི་རྟེན། །རིམ་བརྒྱུད་མྱུར་དུ་ཀུན་མཁྱེན་མྱུར་ཐོབ་ཤོག །དགེ་བའི་བཤེས་གཉེན་ངག་དབང་དཔལ་འབྱོར་དང༌། །གུང་ཐང་དཀའ་བཅུ་བློ་བཟང་ལ་སོགས་པ། །ཚུལ་འདིར་སྒོ་གསུམ་འབད་པར་གཏོགས་སོ་ཅོག །ཡང་སྲིད་ཀུན་ཏུ་ཁྱོད་ཀྱིས་རྗེས་འཛིན་ཤོག །ཇི་སྲིད་ཉི་ཟླའི་འོད་ཀྱིས་གླིང་བཞིའི་མུན། །སེལ་བ་དེ་སྲིད་ལུས་ཅན་བསོད་ནམས་ཀྱི། །ཞིང་དུ་རྗེ་བཙུན་སྐུ་གཟུགས་ཡིད་བཞིན་ནོར། །གཡོ་མེད་རྡོ་རྗེ་ལྟ་བུར་བརྟན་པར་ཤོག །དགའ་ལྡན་བསྟན་པ་སྤྱི་དང་ཁྱད་པར་དུ། །བཀྲ་ཤིས་སྒོ་མང་ཡར་ངོའི་ཟླ་ལྟར་འཕེལ། །མཁའ་མཉམ་འགྲོ་ཀུན་མངོན་མཐོ་ངེས་ལེགས་ཀྱི། །ཕན་བདེའི་བདུད་རྩིར་རྟག་ཏུ་སྤྱོད་གྱུར་ཅིག །ཅེས་སྔགས་པ་ནོ་མོན་ཁང་རབ་འབྱམས་(༤༠བ) ― GLG021_Page_0082 ―
[མ་དཔེ་གཟིགས་ན་འདིར་གནོན།]
ཆོས་རྗེ་ནམ་མཁའ་རྒྱ་མཚོའི་ཕྱི་རྟེན་དུ་དངུལ་དཀར་ལས་གྲུབ་པའི་བྱམས་པའི་སྐུ་ཐོག་ཚད་མ་སྒོ་མང་སློབ་དཔོན་ཟུར་པ་ངག་དབང་དཔལ་འབྱོར་དང་གུང་ཐང་དཀའ་བཅུ་བློ་བཟང་སོགས་ཀྱིས་དོ་དམ་བྱས་ནས་བཞེངས་པའི་དུས་བརྟན་བཞུགས་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །མདུན་གྱི་ནམ་མཁར་རྩ་བའི་བླ་མ་དང༌། །གཉིས་སུ་མེད་པ་བཅོམ་ལྡན་སྨན་གྱི་བླ། །བདེ་བར་གཤེགས་པ་བརྒྱད་ཀྱི་ལྷ་ཚོགས་རྣམས། །ཐོགས་མེད་བརྩེ་བས་འདིར་སྤྱོན་ཉེ་བར་དགོངས། །ཐུགས་རྗེའི་མཐུ་ཡིས་སྲིད་ཞིའི་འཇིགས་པ་སེལ། །མཚན་ཐོས་ཙམ་གྱིས་ངན་སོང་ལས་སྐྱོབ་པའི། །བཅོམ་ལྡན་བདེ་བར་གཤེགས་པ་མཆེད་བརྒྱད་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །འགྲོ་བའི་ལུས་ངག་ཡིད་གསུམ་དགེ་ཚོགས་ལ། ཁམས་དང་དབང་པོ་བློ་གྲོས་དང་མཚམས་པར། །བཀོད་དེ་སྐལ་བཟང་གདུལ་བྱ་རྒྱ་མཚོའི་མགོན། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །རྣམ་བཀྲའི་མེ་ཏོག་ཆེས་དངར་བདུག་སྤོས་དང༌། །ཉི་ཟླ་ལྟར་གསལ་མར་མེ་བྱུག་པའི་དྲི། །ཕུན་ཚོགས་རོ་བརྒྱའི་དཔལ་ལྡན་ལྷ་བཤོས་སོགས། །ལུས་ངག་ཡིད་ཀྱིས་ཇི་ལྟར་ནུས་བཞིན་འབུལ། །ཐོག་མེད་དུས་ནས་ད་ལྟའི་བར་དག་ཏུ། །བསགས་པའི་མི་དགེ་བཅུ་ཡི་ལས་ངན་རྣམས། །སྔར་བྱས་ལ་འགྱོད་ཕྱིས་ནས་སྡོམ་སེམས་ཀྱི། །བསམ་པ་ཐག་པས་སྙིང་ནས་མཐོལ་ལོ་བཤགས། །སངས་རྒྱས་སྲས་བཅས་ཉན་རང་སོ་སྐྱེ་ཡིས། །བསགས་དང་(༤༡ན) ― GLG021_Page_0083 ―
[མ་དཔེ་གཟིགས་ན་འདིར་གནོན།]
གསོག་བཞིན་གསོག་པར་ཡོངས་འགྱུར་པའི། །མཐའ་ཀླས་རྣམ་དཀར་དགེ་བའི་ཚོགས་རྣམས་ལ། །ལེགས་སྨོན་དགའ་ཞིང་སྤྲོ་བས་རྗེས་ཡི་རང༌། །མཆོག་དམན་སྐྱེ་རྒུའི་མོས་པ་དང་མཚམས་པར། །རྡོ་རྗེ་ཐེག་ནས་སོ་སོ་ཐར་པའི་བར། །ཆགས་བྲལ་རླབས་ཆེན་སྤྱོད་དང་འདོད་ཡོན་རྣམས། །ལམ་བྱེད་ཆོས་ཀྱི་འཁོར་ལོ་བསྐོར་བར་བཀུལ། །སྙིགས་མ་ལྔ་ཡི་ཆེར་སྦགས་གདུལ་དཀའ་འགྲོའི། །ཚུལ་ལ་བརྣག་ནུས་ཞུམ་མེད་སྙིང་སྟོབས་ཀྱིས། །ཆོས་དབྱིངས་ཞི་བའི་ཀློང་དུ་མི་མནལ་བར། །བསྐལ་བརྒྱར་མྱ་ངན་མི་འདའ་རྟག་བཞུགས་གསོལ། །མདོར་ན་མཐའ་བྲལ་བསོད་ནམས་ཚོགས་ཆེན་ནས། །གཟན་ཆངས་གཅིག་ཙམ་བྱིན་པ་ཡན་ཆད་ཀྱི། །བདག་གིས་བསགས་པའི་དགེ་འབྲས་མཁའ་མཉམ་གྱི། །མ་རྒན་དོན་དུ་སངས་རྒྱས་འཐོབ་ཕྱིར་བསྔོ། །ཞེས་པ་འདིའང་ཇུ་རིག་ཐུ་དབོན་པོ་ངག་དབང་བློ་གྲོས་དང་འོལ་དགའ་བ་འབྲི་ལུང་པ་བློ་བཟང་དཔལ་འབྱོར་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །ངོ་མཚར་བདེ་ལྡན་ཞིང་ན་ཚེ་མཐའ་ཡས། །འཆི་མེད་པདྨ་ཐོད་ཕྲེང་རྣམ་རོལ་ཅན། །མཆོག་གསུམ་རྒྱ་མཚོའི་ངོ་བོར་ལྷུན་གྲུབ་པའི། །བྱིན་རླབས་ནུས་མཐུའི་ཉིན་བྱེད་འོད་དཔུང་གིས། །ཡིད་སྲུབས་ནག་པོའི་མུན་པ་མཐར་བསྐྲད་དེ། །ངག་གི་དབང་ཕྱུག་བློ་བཟང་རྒྱ་མཚོའི་དཔལ། །བསྐལ་བརྒྱར་རྡོ་རྗེས་མཚན་པའི་ཁྲི་ཆེན་པོར། །རབ་བརྟན་ཕན་བདེའི་སྣང་བ་ཆེས་དཀར་ཤོག །དཀར་(༤༡བ) ― GLG021_Page_0084 ―
[མ་དཔེ་གཟིགས་ན་འདིར་གནོན།]
ཆ་ཡར་ལ་ཆེས་འཕེལ་བཀྲ་ཤིས་ཚེས། །མཁའ་ལ་གཟའ་སྐར་བཟང་པོའི་འཕྲོད་ཀྱི་དགེ །གནས་འདིར་རྒྱུ་རྐྱེན་འཛོམས་པའི་རྟེན་འབྱུང་གིས། །བསམ་པའི་དོན་ཀུན་ལྷུན་གྱིས་འགྲུབ་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ར་ས་འཕྲུལ་སྣང་གི་རུ་བཞི་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ཕུན་ཚོགས་བཀོད་ལེགས་བདེ་ཆེན་ཞིང་གི་གཙོ། །གར་དབང་ཚེ་དང་ཡེ་ཤེས་དཔག་ཏུ་མེད། །རྣམ་པར་རྒྱལ་མ་ཡིད་བཞིན་འཁོར་ལོ་སོགས། །འཆི་མེད་གྲུབ་པའི་ལྷ་ཚོགས་རྣམས་ཀྱིས་སྐྱོང༌། །སྲ་བརྟན་རྡོ་རྗེས་ལེགས་བསྡམས་རིན་ཆེན་ཁྲི། །མི་འགྱུར་ཚེ་ཡི་གཡུང་དྲུང་འཁྱིལ་བའི་སྟེང༌། །ངག་གི་དབང་ཕྱུག་བློ་བཟང་རྒྱ་མཚོ་དཔལ། །བསྐལ་བརྒྱར་བརྟན་བཞུགས་ཆོས་འཁོར་སྐོར་གྱུར་ཅིག །འཇིགས་མེད་དུས་དགྲའི་དབང་པོ་ཁྲོས་པའི་གར། །བདུད་བཞི་གཡུལ་ལས་རྒྱལ་བའི་དཔའ་བོའི་རྟགས། །མི་ཤིགས་ཏིང་འཛིན་གོ་ཆ་ཆེར་བགོས་ནས། །བགྲང་ཡས་སྐྱེ་རྒུའི་གཉེན་དུ་བརྟན་གྱུར་ཅིག །ཐུབ་བསྟན་ལང་ཚོ་དར་བའི་ནག་ཀླུང་སྡེར། །ཞྭ་སེར་འཆང་བའི་རིང་ལུགས་ཡོངས་འདུའི་ལྗོན། །ཐོས་བསམ་རོ་བརྒྱའི་འབྲས་བུ་སྨིན་པའི་ཆེད། །ཞིང་འདིར་རྡོ་རྗེ་ལྟ་བུར་གཡོ་མེད་ཤོག །ཨ་ཧཾ་མི་འགྱུར་ཀ་བ་དྷཱུ་ཏིའི་ལམ། །ལས་རླུང་དག་པའི་འཆི་མེད་རྡོ་རྗེའི་སྐུར། །བཞེངས་ནས་འོག་མིན་ཞིང་གི་མགོན་པོ་ལྟར། །བདག་སོགས་གདུལ་བྱའི་དཔལ་དུ་བཞུགས་གྱུར་ཅིག །དགའ་ལྡན་ཕྱོགས་ལས་རྣམ་རྒྱལ་ཕོ་བྲང་ཆེའི། །བསྟན་སྲིད་འཕྲིན་ལས་དབྱར་གྱི་རྒྱ་མཚོ་ལྟར། །ཆེས་ཆེར་རྒྱས་(༤༢ན) ― GLG021_Page_0085 ―
[མ་དཔེ་གཟིགས་ན་འདིར་གནོན།]
མཛད་ནོར་འཛིན་སྐྱོང་བའི་དབང༌། །རྡོ་རྗེ་ལྟ་བུར་མི་འགྱུར་ཞབས་བརྟན་ཤོག །བཀའ་ཁྲིམས་གསེར་སྦྱང་ཞུན་མའི་གཉའ་ཤིང་རི། །འཛམ་གླིང་ཡོངས་ཀྱི་ཕྲག་པར་རབ་ལྕི་ཞིང༌། །འབངས་རྣམས་རྫོགས་ལྡན་དགའ་སྟོན་ལ་སྤྱོད་པ། །མང་བཀུར་རྒྱལ་པོའི་རྣམ་ཐར་འཛིན་པར་ཤོག །མཁྱེན་བརྩེ་ནུས་ལྡན་སངས་རྒྱས་བདེན་གཉིས་ཆོས། །རིག་གྲོལ་ཡོན་ཏན་གཏེར་གྱུར་དགེ་འདུན་སྟེ། །མཆོག་གསུམ་བྱིན་རླབས་བསྟན་སྲུང་རྒྱ་མཚོའི་མཐུས། །སྨོན་པ་ཇི་བཞིན་འགྲུབ་པར་བདག་བྱིན་རློབས། །རྒྱུ་འབྲས་རྟེན་འབྱུང་ནམ་ཡང་མི་བསླུ་ཞིང༌། །དྲང་སྲོང་རིག་འཛིན་གྲུབ་པའི་བདེན་ཚིག་དང༌། ཁྲིམས་ལྡན་འདུས་པས་སྨོན་ལམ་རྩེ་གཅིག་ཏུ། །བཏབ་པའི་འདོད་དོན་རེ་བ་ཡོངས་སྐོང་ཤོག །ཅེས་པ་འདིའང་ཆོས་འཁོར་རྒྱལ་ནས་ཆོས་རྗེ་ལེགས་བཤད་གླིང་པ་བློ་བཟང་ཆོས་འཛིན་གྱིས་དོན་གཉེར་ཆེན་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །བདེ་ལྡན་ཞིང་གི་འདབ་སྟོང་ཟིའུ་འབྲུར། །འཆི་མེད་བདུད་རྩི་བཞུ་བླུག་འཁྱིལ་བའི་ཧྲཱིཿ། །ཚེ་མཐའ་ཡས་པའི་མགོན་པོའི་བཞིན་ལག་སྐུར། །རྣམ་རོལ་ཐུགས་རྗེའི་མཐུ་དཔུང་དེང་འདིར་སྐྱེད། །མགྲིན་པའི་པད་མཚོར་ངག་དབང་དབྱངས་ཅན་ལྷས། །སྤོབས་པ་དགེ་བའི་རྒྱུད་མངས་འཁྲོལ་བ་ལས། །བློ་བསལ་སྐལ་བཟང་དགའ་བྱེད་ལེགས་བཤད་གཏེར། །རྒྱ་མཚོའི་གོས་ཅན་གཞི་འདིར་རབ་བརྟན་ཤོག །འགྲོ་ལ་རྗེས་ཆགས་སྙིང་རྗེས་སྲིད་པ་ལ། །འཇིགས་མེད་ལྷག་བསམ་(༤༢བ) ― GLG021_Page_0086 ―
[མ་དཔེ་གཟིགས་ན་འདིར་གནོན།]
བཙན་པོའི་གོ་ཆ་ཅན། །ཡིད་སྲུབ་དཔུང་གིས་ནམ་ཡང་གཞོམ་མིན་པར། །རྡོ་རྗེའི་ཁྲི་ལ་རྟག་ཏུ་བཞུགས་གྱུར་ཅིག །ཐུབ་དབང་བསྟན་པའི་ལང་ཚོ་དར་དྲག་པ། །རྒྱ་ཆེན་ཐོས་པའི་སྡེ་སྣོད་སྡོང་པོའི་རྩེར། །བསླབ་གསུམ་སྒོམ་པའི་འབྲས་བུ་གཡུར་ཟ་བ། །བསྐལ་བ་རྒྱ་མཚོར་ཆོས་འཁོར་བསྐོར་དུ་གསོལ། །སྙིང་དབུས་དྲི་ཟའི་བུ་མོའི་འཇོ་སྒེག་ལ། །དགའ་བས་ལེགས་འཁྱུད་འཇམ་དབྱངས་མཁྱེན་པའི་འོད། །རྣམ་དཔྱོད་དཔུང་གི་རྒྱན་དུ་རབ་འཚེར་བ། །བཤེས་གཉེན་དམ་པ་གཡོ་མེད་བརྟན་གྱུར་ཅིག །བཤད་སྒྲུབ་དར་ཞིང་རྒྱས་པའི་ཁྲིམས་ལྡན་གླིང༌། །ཆ་དཀར་བྲག་དབར་གསུང་རབ་འཆད་ཉན་གྲྭ། །རྣམ་གསུམ་འཁོར་ལོའི་བྱ་བ་དབྱར་དུས་ཀྱི། །ཆུ་གཏེར་བཞིན་དུ་ཆེས་ཆེར་འཕེལ་བར་ཤོག །སླུ་མེད་རྟེན་འབྲེལ་ཆུ་འཛིན་ལང་ལོང་འཁྲིགས། །འདུས་སྡེའི་བདེན་ཚིགས་དབྱར་རྔ་ལྡིར་བ་ལས། །བྱིན་རླབས་ཆར་གྱི་འདོད་དོན་སྙེ་མ་རྣམས། །རབ་སྨིན་ཕན་བདེའི་འབྲས་བཟང་དུད་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ཆ་དཀར་བྲག་དབར་བ་གྲྭ་ཚང་བཤད་སྒྲུབ་དར་རྒྱས་གླིང་པའི་སློབ་དཔོན་ངག་དབང་ནོར་བུས་ཐོག་དྲངས་གྲྭ་དམངས་རྣམས་ཀྱིས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །སྔོན་བྱོན་ད་ལྟ་བཞུགས་དང་འབྱོན་གྱུར་གྱི། །སངས་རྒྱས་བྱང་སེམས་སློབ་མར་བཅས་རྣམས་དགོངས། །བདག་སོགས་མ་རྒན་སེམས་ཅན་ཐམས་ཅད་ཀུན། །མཁྱེན་བརྩེས་ཉེར་གཟིགས་ནུས་མཐུས་(༤༣ན) ― GLG021_Page_0087 ―
[མ་དཔེ་གཟིགས་ན་འདིར་གནོན།]
སྐྱབས་ཏུ་གསོལ། །དེང་ནས་ཚེ་རབས་ཀུན་ཏུ་མཐོ་རིས་ཀྱི། །ཡོན་ཏན་བདུན་དང་ལྡན་པའི་རྟེན་ཐོབ་ཅིང༌། །རྒྱལ་སྲས་སྤྱོད་པས་ཚོགས་གཉིས་མྱུར་རྫོགས་ནས། །རྣམ་པ་ཐམས་ཅད་མཁྱེན་པར་བདག་གྱུར་ཅིག །དགེ་བ་ཕྲ་མོ་ནས་བཟུང་ལུས་སྲོག་ཀྱང༌། །གཞན་ཕྱིར་གཏོང་བའི་བར་གྱི་རྣམ་དཀར་ཀུན། །ནམ་མཁའི་མཐའ་དང་མཉམ་པའི་སྐྱེ་རྒུ་རྣམས། །བླ་མེད་བྱང་ཆུབ་འཐོབ་པའི་རྒྱུ་རུ་བསྔོ། །ཞེས་པ་འདིའང་ར་ཁོ་ཆོས་རྗེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དཔལ་ལོ། །འཆི་མེད་གྲུབ་པ་མགོན་པོ་འོད་མཐའ་ཡས། །ཚེ་དབང་རིག་འཛིན་སྐུར་བསྟན་པདྨ་འབྱུང༌། །མཆོག་གསུམ་ཀུན་འདུས་ཐུགས་རྗེ་དཔག་བསམ་ལྗོན། །ཕན་བདེའི་འབྲས་བཟང་བྱིན་ཆེན་ཆར་དུ་ཕོབས། །འགྲོ་བའི་ལུས་ངག་ཡིད་གསུམ་སྨིན་བྱེད་དབང༌། །ཆད་མེད་བློ་ཡི་བུམ་བཟང་ལེགས་བཀང་སྟེ། །རྒྱ་ཆེན་མཚོ་ལྟར་གཏིང་ཟབ་གྲོལ་བྱེད་ལམ། །སྟོན་མཛད་རྡོ་རྗེའི་སློབ་དཔོན་ཞབས་བརྟན་ཤོག །དུས་ཀྱི་དགྲ་བོར་འཇིགས་མེད་འཇམ་དཔལ་དབྱངས། །མཐུ་སྟོབས་བཙན་པོའི་གོ་ཆར་འཁོར་འདས་ཀྱི། །ཕྱག་རྒྱ་མ་ལུས་ཟིལ་གནོན་བརྟུལ་ཞུགས་རྩལ། །ལྷུན་གྲུབ་གདོད་མའི་ངོ་བོར་རྟག་བཞུགས་གསོལ། །ཐུབ་བསྟན་ཡང་སྙིང་འོད་གསལ་རྡོ་རྗེའི་ཐེག །ཐོས་བསམ་སྒོམ་པའི་ལང་ཚོ་དར་དྲག་པས། །སྐལ་ལྡན་སྐྱེ་རྒུའི་འདོད་འཇོ་ཡོངས་འདུས་སྡེ། །མི་འགྱུར་རྡོ་རྗེའི་ཁྲི་ལ་བརྟན་པར་ཤོག །ཡིས་སྲུབས་ལ་ཁྲོས་གཏུམ་དྲག་རབ་འབར་བ། །ཆེ་མཆོག་འདུས་པའི་བླ་མེད་རྡོ་རྗེ་རྩལ། །(༤༣བ) ― GLG021_Page_0088 ―
[མ་དཔེ་གཟིགས་ན་འདིར་གནོན།]
ཆོས་ཀུན་གང་ཤར་ཀ་ནས་དག་པའི་དབྱིངས། །རང་སར་གྲོལ་བའི་མགོན་ཁྱོད་རྟག་བརྟན་ཤོག །བཀའ་གཏེར་རིགས་འཛིན་རྩ་རྒྱུད་བླ་མ་དང༌། །ཡི་དམ་བཀའ་བརྒྱད་ཞི་ཁྲོ་རྒྱ་མཚོའི་ལྷ། །མ་ནིང་རལ་གཅིག་མ་སོགས་ཆོས་སྲུང་གིས། །སྨོན་པའི་རེ་བ་ཀུན་འགྲུབ་འཕྲིན་ལས་མཛོད། །རྩ་གསུམ་འདུས་པའི་ངོ་བོ་ཐོད་ཕྲེང་རྩལ། །བདག་སོགས་སྙིང་གི་ཟེའུ་འབྲུར་རྟག་བཞུགས་ནས། །མཆོག་ཐུན་དངོས་གྲུབ་གང་བསམ་ལྷུན་གྲུབ་པ། །ནོར་བུ་དབང་གི་རྒྱལ་པོའི་སྐལ་བཟང་སྩོལ། །ཞེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ཤམྦྷ་ལར་ཆོས་རྗེ་སྔགས་འཆང་བྲག་ལྷ་བ་དོན་གྲུབ་རྒྱལ་མཚན་གྱིས་ཆེད་གཉེར་དུ་བསྐུལ་བ་ལ་བརྟེན་ནས་ཟ་ཧོར་གྱི་བཙུན་པ་གང་ཤར་རང་གྲོལ་གྱིས་སྦྱར་བའི་ཡི་གེ་པ་ནི་གནས་བན་འཇམ་དབྱངས་བསྟན་འཛིན་ནོ། །ཞི་ཁྲོ་རྒྱ་མཚོའི་དཀྱིལ་འཁོར་འཁོར་ལོའི་གཙོ། །མཆོག་གསུམ་ཀུན་འདུས་པདྨ་ཐོད་ཕྲེང་རྩལ། །མགོན་ཁྱོད་ཕུལ་བྱུང་ཐུགས་རྗེའི་བྱིན་རླབས་དང༌། །རྟེན་འབྲེལ་སླུ་མེད་བདེན་པ་ཆེན་པོའི་མཐུས། །ཕྱག་ན་མཐུ་སྟོབས་རྡོ་རྗེ་འབར་བའི་མཚོན། །རྣོན་པོས་ཡིས་སྲུབས་སྡེ་ལས་རབ་རྒྱལ་ཡང༌། །ནོར་བུ་པདྨའི་འཕྲིན་ལས་འོད་དཀར་གྱིས། །འགྲོ་ལ་ཕན་བདེའི་སྣང་བ་སྟེར་མཁས་མཆོག །སླད་མར་མ་དག་ཞིང་གི་གདུལ་བྱའི་ཚོགས། །འདྲེན་ཕྱིར་ངོ་མཚར་སྤྲུལ་སྐུའི་སྲིད་འཛིན་པར། །གླགས་ལྟའི་བདུད་སྡེས་འཚེ་བར་མི་ནུས་ཞིང༌། །བཞེད་པའི་རེ་བ་ཇི་བཞིན་ལྷུན་གྲུབ་ཤོག །ལྷག་བསམ་གངྒཱའི་ཡབ་ཅིག་ལས་འོངས་པ། །གཞན་(༤༤ན) ― GLG021_Page_0089 ―
[མ་དཔེ་གཟིགས་ན་འདིར་གནོན།]
ཕན་འཕྲིན་ལས་ཆད་མེད་ཆུ་བོའི་རྒྱུན། །རིས་མེད་སྐྱེ་རྒུའི་ཕན་བདེ་རྒྱ་མཚོ་ཆེར། །འབབ་པའི་བྱེད་པོ་ཁྱོད་བཞེད་འགྲུབ་གྱུར་ཅིག །རྩ་གསུམ་བྱིན་རླབས་ལྷ་དང་དྲང་སྲོང་སོགས། །བདེན་ཚིག་གྲུབ་པ་རྣམས་ཀྱི་སྨོན་ལམ་དང༌། །ཟབ་གཏེར་ཆོས་སྲུང་རྒྱ་མཚོའི་ནུས་མཐུ་ཡིས། །བསམ་པའི་རེ་བ་ལྷུན་གྱིས་འགྲུབ་གྱུར་ཅིག །ཅེས་སྤྲུལ་སྐུ་ཕྱག་རྡོར་ནོར་བུའི་སྤྲུལ་སྐུ་མྱུར་འབྱོན་གྱི་བདེན་ཚིགས་བརྗོད་པའི་སྨོན་ལམ་འདི་ནི་བླ་མ་མངའ་བདག་པ་དང་སྐྱི་སྟོན་པ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །འཆི་མེད་མཆོག་སྦྱིན་ཚེ་མཐའ་ཡས་པའི་མགོན། །མགོན་དེས་ལེགས་བསྔགས་བཅོམ་ལྡན་རྣམ་པར་རྒྱལ། །རྒྱལ་ཡུམ་སྒྲོལ་དཀར་ཡིད་བཞིན་འཁོར་ལོའི་ཞབས། །ཞབས་པད་དུས་ཀུན་བསྟེན་ནོ་དངོས་གྲུབ་སྩོལ། །ངག་ལ་དབྱངས་ཅན་ཉེར་ཞུགས་སྨྲ་བའི་དབང༌། །གྲུབ་པའི་བློ་གྲོས་རྩལ་ལྡན་ཁྲིམས་ཀྱིས་བཙུན། །བཟང་པོའི་ལྷག་བསམ་རྒྱ་ཆེན་རིས་མེད་འགྲོར། །དབྱར་མཚོ་ལྟ་བུར་སྐྱེད་མཛད་ཞབས་བརྟན་ཤོག །འཇིགས་བྲལ་སྤོབས་པས་བུ་རམ་ཤིང་པའི་གཞུང༌། །དཀའ་གནད་འཁྲུལ་མེད་གོ་རིམ་ཇི་བཞིན་དུ། །ཆ་ཤས་གང་བའི་ཟླ་ལྟར་གསལ་མཛད་པ། །རྗེ་བཙུན་བླ་མ་བསྐལ་བརྒྱར་བཞུགས་གྱུར་ཅིག །ཐུབ་པས་ལེགས་བསྟན་བདེན་གཉིས་ཟུང་འཇུག་མདས། །བདག་འཛིན་ལངྐ་རྣམ་གནོན་འཕོང་སྐྱེན་ཚོའི། །རྩེར་སོན་གཞན་ཕན་སྙིང་སྟོབས་དགའ་བྱེད་ལྷ། །སྡེ་བཞིའི་མཆོད་སྦྱིན་སྤེལ་ཕྱིར་གཡོ་མེད་(༤༤བ) ― GLG021_Page_0090 ―
[མ་དཔེ་གཟིགས་ན་འདིར་གནོན།]
ཤོག །འཇམ་དཔལ་རྡོ་རྗེའི་ཞལ་ལུང་དབྱངས་འདུན་གླུར། །བླངས་པས་དཔྱོད་ལྡན་དགའ་བ་བསྐྱེད་པའི་བཤེས། །བསྟན་དང་ཡིད་ཅན་ཀུན་གྱི་དཔུང་གཉེན་ཤོག །མི་འགྱུར་རྡོ་རྗེའི་ཁྲི་ལ་རྟག་བཞུགས་གསོལ། །ཞྭ་སེར་ཅོད་པཎ་འཆང་བའི་ཆོས་སྲིད་ཀྱི། །བསྟན་པའི་གདུག་དཀར་གཅིག་གིས་ནོར་འཛིན་ཁྱོན། །ཀུན་ཁྱབ་ཕན་བདེའི་གྲིབ་མ་ཉེར་བསིལ་བར། །ལུས་ཅན་མཐའ་དག་ངལ་གསོར་སྤྱོད་གྱུར་ཅིག །དཀོན་མཆོག་སྲི་ཞུར་གཟུགས་ཅན་སྙིང་པོའི་གྲོགས། །དད་དང་གཏོང་བས་མགོན་མེད་ཟས་སྦྱིན་རིགས། །དཔའ་མཛངས་རྟུལ་ཕོད་ས་སྐྱོང་སྦྱིན་པའི་བདག །ཚེ་དཔལ་སྟོབས་འབྱོར་རྣམ་ཐོས་བུར་འགྲན་ཤོག །འཇིག་རྟེན་སྤྱི་དང་ཁྱད་པར་རྒྱ་ནག་ཧོར། །བོད་ཡུལ་ཀུན་ཏུ་སྡིག་ཏོའི་འབྲས་ཞི་ཞིང༌། །རྫོགས་ལྡན་དུས་ཀྱི་འཛམ་གླིང་སྐྱེ་རྒུ་དང༌། །བསོད་ནམས་མཉམ་པོར་ཐོབ་པའི་སྐལ་བཟང་ཤོག །མཁྱེན་བརྩེ་ནུས་མངའ་འགོག་ལམ་གཉིས་དང་ལྡན། །རིག་གྲོལ་རྒྱན་མཛེས་སླུ་མེད་གཏན་གྱི་སྐྱབས། །ལྷ་དང་དྲང་སྲོང་བདེན་ཚིག་ལ་དབང་མཐུས། །ལེགས་བཏབ་སྨོན་པའི་དོན་ཀུན་ལྷུན་གྲུབ་ཤོག །ཅེས་རིང་པོར་འཚོ་བའི་ཤིས་བརྗོད་ཀྱི་ཚིགས་སུ་བཅད་པ་དང་འབྲེལ་བར་རྒྱ་བོད་ཧོར་གསུམ་གྱི་སྐྱ་སེར་གང་གི་ངག་འདོན་དུ་བྱེད་ཀྱང་རིས་བཅད་ཀྱི་ཁ་གསལ་མེད་པའི་བསྟན་འགྲོ་སྤྱི་བྱེ་བྲག་གི་སྨོན་ལམ་བཅས་པ་འདི་ལྟ་བུ་ཞིག་དགོས་ཞེས་ལུགས་ཟུང་གི་ཚུལ་ལ་བལྟ་བའི་རྣམ་དཔྱོད་ཀྱི་མིག་ཡངས་པ་དཔོན་མཁའ་འགྲོ་བློ་བཟང་བསྟན་སྐྱོང་གི་དང་བའི་ཡིད་ཀྱིས་དོན་གཉེར་ཆེན་པོས་བསྐུལ་བའི་ངོར་ཤཱ་ཀྱའི་བཙུན་པ་ངག་དབང་བློ་བཟང་རྒྱ་མཚོས་ཐུན་(༤༥ན) ― GLG021_Page_0091 ―
[མ་དཔེ་གཟིགས་ན་འདིར་གནོན།]
མཚམས་ཀྱི་ངེས་པ་ཞིག་ལ་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །མཚན་ཙམ་རྣ་བར་ཐོས་པའི་བདུད་རྩིའི་བཅུད། །སྙིང་དབུས་འཆི་མེད་དགའ་བ་གཡས་འཁྱིལ་དུང༌། །སྲིད་ཞིའི་ཕུན་ཚོགས་འབོད་བྱེད་སྒྲ་སྙན་ལྷ། །ཚེ་སྦྱིན་ཡིད་བཞིན་འཁོར་ལོས་ཤིས་པ་སྩོལ། །ངག་དབང་འཇམ་མགོན་མཁྱེན་པའི་བློ་གྲོས་རྒྱས། །བཟང་པོའི་བརྩེ་ཆེན་ཕྱག་ན་པད་མའི་གར། །རྒྱ་མཚོ་ལྟར་ཟབ་ནུས་ལྡན་རྡོ་རྗེ་འཛིན། །འོག་མིན་ཞིང་གི་མགོན་ལྟར་བརྟན་གྱུར་ཅིག །ཞྭ་སེར་འཆང་བའི་ཆོས་སྲིད་འཕྲིན་ལས་རྒྱུན། །རྒྱ་ཆེན་ནམ་མཁའི་མཐའ་ཀླས་དེ་སྙེད་དུ། །དབྱར་མཚོ་ལྟ་བུར་རབ་སྤེལ་ནོར་འཛིན་དབང༌། །འགྱུར་མེད་གཡུང་དྲུང་གཞི་ལ་བརྟན་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་གོང་དཀར་རྫོང་སྡོད་སྒེམ་བུ་བ་དང་གེ་ར་བ་ཐུན་མོང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བའོ། །མི་འགྱུར་དད་པའི་གཡུང་དྲུང་ཁམས་ལས་གྲུབ། །ཤུགས་དྲག་སྨོན་ལམ་གདན་ཁྲིའི་གཟུགས་སུ་ཤར། །བདེན་ཚིགས་རྡོ་རྗེའི་རི་བོ་བཀྲ་བའི་སྟེང༌། །རྗེ་བཙུན་བླ་མ་བསྐལ་བརྒྱར་བཞུགས་གྱུར་ཅིག །ཆོས་དབྱིངས་འགྱུར་བ་མེད་པ་གནས་ལུགས་གཤིས། །ཆོས་ཅན་རྒྱུ་འབྲས་རྟེན་འབྲེལ་མི་བསླུ་ཞིང༌། །དཀོན་མཆོག་ཐུགས་རྗེའི་མཐུ་དཔུང་འཛད་མེད་ཀྱིས། །དེང་འདིར་སྨོན་ལམ་ཅི་བཏབ་ལྷུན་འགྲུབ་ཤོག །རྩ་རྒྱུད་བླ་མ་ཡི་དམ་ཆོས་སྲུང་ཚོགས། །དྲང་སྲོང་རིགས་འཛིན་ཚིག་ལ་དབང་བ་དང༌། །དཀར་པོའི་ཕྱོགས་ལ་མངོན་པར་དགའ་བའི་ལྷས། །(༤༥བ) ― GLG021_Page_0092 ―
[མ་དཔེ་གཟིགས་ན་འདིར་གནོན།]
འདོད་དོན་ཡོངས་འདུའི་འབྲས་བཟང་སྨིན་པར་མཛོད། །ཅེས་བདེན་ཚིགས་བརྗོད་པའི་རིམ་པ་འདི་ནི་སྤྲུལ་པའི་ཆོས་རྒྱལ་ཆེན་པོའི་གསུང་བཞིན་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྤྱི་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །མཛོད་སྤུའི་ཟེར་འཕྲེང་ལས་འཕྲོས་བདུད་རྩི་ཡིས། །འཆི་མེད་མཆོག་སྦྱིན་སྤོབས་པ་སྨོན་ལམ་མཐུས། །ཐོས་པས་དཔག་མེད་ཚེ་ཡི་མགོན་པོ་ཞེས། །བདེ་ལྡན་དག་པའི་ཞིང་གི་གཙོ་དེས་སྐྱོངས། །མཆོག་གསུམ་ཐུགས་རྗེ་མཐུ་དཔུང་བསྐུལ་བའི་ཚིག །མི་ཤིགས་རྡོ་རྗེའི་དབྱངས་སུ་ཉེར་བླངས་པས། །རྒྱལ་བ་སྲས་བཅས་སློབ་མའི་ཚོགས་རྣམས་ཀྱིས། །དོན་ཀུན་འགྲུབ་པའི་བདེན་ཚིག་བརྗོད་དུ་གསོལ། །ངག་དབང་འཇམ་མགོན་བློ་གྲོས་རྩལ་ལྡན་གང༌། །བསྐལ་བཟང་འདྲེན་མཆོག་བཞི་པའི་བསྟན་པ་ལ། །རྣམ་གསུམ་འཁོར་ལོས་རི་མོར་བྱ་བའི་ཆེད། །རྒྱ་མཚོའི་གོས་ཅན་བཞིན་དུ་བརྟན་གྱུར་ཅིག །མཁའ་མཉམ་ལུས་ཅན་ཡོངས་ཀྱི་མགོན་སྐྱབས་དང༌། །དཔུང་གཉེན་གླིང་ལས་གུད་ན་མཛད་པ་གཞན། །མེད་ཕྱིར་ཆེས་ཆེར་སྙིགས་མ་ལྔ་བདོ་བའི། །འགྲོ་རྣམས་ཕན་བདེར་སྦྱོར་ཕྱིར་རྟག་བཞུགས་གསོལ། །འཇིག་རྟེན་གསུམ་མགོན་སྐྱོབ་པའི་རིང་ལུགས་སྤྱི། །ཐེག་མཆོག་དགོངས་པ་ཡང་ཟབ་རིན་ཆེན་གཏེར། །ཕུན་ཚོགས་སྨིན་གྲོལ་ཆད་མེད་གངྒའི་རྒྱུན། །སྐལ་ལྡན་ཆུ་གཏེར་གློང་དུ་རྟག་བབས་ཤོག །གངས་ཅན་ས་ལའི་འཁྲི་ཤིང་ཉེར་འཁྲིགས་པའི། །ལྗོངས་འདིའི་སྡིག་ཏོའི་རྣམ་པར་སྨིན་པའི་འབྲས། །མིག་གི་ལྷག་མར་བྱས་ནས་(༤༦ན) བཀའ་བརྒྱད་སྦུག་པའི་དཀའ་བཅུ་བསོད་ནམས་ཕུན་ཚོགས་དུས་ལས་འདས་པའི་དགེ་བར་རྨེ་རུ་གཙང་ཁང་སྦུག་ཏུ་ལྡེབས་བྲིས་བྱས་པའི་ཚེ་སྨོན་ལམ་ཚིགས་བཅད་སོགས།― GLG021_Page_0093 ―
[མ་དཔེ་གཟིགས་ན་འདིར་གནོན།]
བཀའ་བརྒྱད་སྦུག་པའི་དཀའ་བཅུ་བསོད་ནམས་ཕུན་ཚོགས་དུས་ལས་འདས་པའི་དགེ་བར་རྨེ་རུ་གཙང་ཁང་སྦུག་ཏུ་ལྡེབས་བྲིས་བྱས་པའི་ཚེ་སྨོན་ལམ་ཚིགས་བཅད་སོགས། །མ་སྨད་དད་པ་གནམ་སྔོན་ཞུན་མའི་མཚོར། །བགྲང་ཡས་རྒྱལ་བའི་སྣང་རྙན་ཟླ་བའི་གཟུགས། །སོར་མོའི་འཕྲུལ་དང་གཏོང་བའི་བདོག་པ་ཡིས། །འདྲེན་བྱེད་བདུད་རྩིར་སྤེལ་བའི་དགེ་ཚོགས་མཐུས། །བསོད་ནམས་ཕུང་པོར་སྤུངས་པའི་ལྗོན་པའི་ཤིང༌། །ཕུན་ཚོགས་སྨོན་ལམ་རྩ་བ་རབ་བརྟན་གང༌། །མངོན་པར་མཐོ་བའི་ཐེམ་སྐས་ལ་འཛེགས་ནས། །ངེས་ལེགས་ཐར་པའི་གྲོང་དུ་འཇུག་པར་ཤོག །ལུས་ངག་ཡིད་གསུམ་ཚུལ་འདིར་ཉེར་འབད་ལ། །བཅོས་མིན་བསམ་པས་སྒྲུབ་པར་གཏོགས་སོ་ཅོག །འདི་དང་གཏན་དུ་ཕན་བདེའི་དགའ་སྟོན་ལ། །ལོངས་སུ་སྤྱོད་པའི་བསྐལ་བཟང་ཐོབ་པར་ཤོག །ཅེས་བཀའ་བརྒྱད་སྦུག་པའི་དཀའ་བཅུ་བསོད་ནམས་ཕུན་ཚོགས་དུས་ལས་འདས་པའི་དགེ་བར་རྨི་རུ་གཙང་ཁང་སྦུག་ཏུ་ལྡེབས་བྲིས་བྱས་པའི་ཚེ་སྨོན་ལམ་ཚིགས་བཅད་དགོས་ཚུལ་(༤༦བ) ― GLG021_Page_0094 ―
[མ་དཔེ་གཟིགས་ན་འདིར་གནོན།]
བྱུང་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་སོ། །སྙིང་དབུས་འདབ་སྟོང་བཞད་པའི་གེ་སར་རྩེར། །རབ་དཀར་དད་པའི་ཟླ་རྒྱས་གདན་སྟེང་དུ། །རང་སྣང་རིག་པའི་ངོ་བོ་དམར་སེར་དྡྷཱིཿ །ཡོངས་གྱུར་ཟུར་ཕུད་ལྔ་པ་འཇོ་སྒེག་ཅན། །རྒྱུན་དུ་ཁྱོད་སྐུ་ཡིད་ལ་འབྲལ་མེད་དང༌། །གཟུངས་སྔགས་ཟབ་མོ་ཁ་ཏོན་བགྱིས་པའི་མཐུས། །དེང་ནས་བྱང་ཆུབ་བར་དུ་མགོན་ཁྱོད་ཀྱིས། །མི་འབྲལ་རྟག་ཏུ་དགེ་བའི་བཤེས་མཛོད་ཅིག །འཆད་རྩོད་རྩོམ་ལ་བློ་གྲོས་ཉེར་རྟུལ་ཚེ། །ངག་ལ་ངག་དབང་བརྟན་པའི་འཁོར་ལོ་ཁྱོད། །ཞུགས་ནས་སྨྲ་བའི་སྤོབས་པ་ཉེར་ཐོབ་སྟེ། །མཁས་མང་བྱེ་བའི་དབུས་ན་གཟེངས་མཐོར་ཤོག །ཅེས་པ་འདི་ཡང་གོང་ནས་ལོ་ཙཱ་སློབ་པར་མངགས་པའི་པཀྴི་ས་ན་ཕྱག་གིས་ཤེས་རབ་ལ་ཕན་པའི་ཁ་ཏོན་བྱེད་རྒྱུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བའོ། །རྒྱལ་ཀུན་ཐུགས་རྗེའི་བདུད་རྩི་འཁྱིལ་བའི་ཁམས། །རྨད་བྱུང་མཚན་དཔེའི་སྒྱུ་འཕྲུལ་གར་དབང་ལྷ། །བདེ་ལྡན་མགོན་གྱི་མཛོད་སྤུའི་ཟེར་འཕྲེང་འོད། །ཆེས་འབར་སྣང་བས་འཆི་བདག་མུན་ཐར་མཛོད། །རྣམ་པར་དཔྱོད་ལ་འཇམ་དབྱངས་རབ་དགའ་བའི། །བཤེས་གཉེན་ངུར་སྨྲིག་གོས་ཀྱིས་ཀླུབས་པའི་གཟུགས། །བསྐལ་བརྒྱར་སྐྱེ་རྒུའི་མིག་ལ་མངོན་སུམ་དུ། །གཟིགས་མོར་ཚར་དུ་དངར་བའི་དཔལ་ཐོབ་ཤོག །སྒྲ་ཚད་བཟོ་གསོ་ནང་རིག་གནད་གསང་ཀུན། །ངག་ལ་སྨྲ་བའི་དབང་པོར་ལྷུན་གྲུབ་པས། །ལེགས་བཤད་(༤༧ན) ― GLG021_Page_0095 ―
[མ་དཔེ་གཟིགས་ན་འདིར་གནོན།]
དྲི་ཟའི་རྒྱུད་ལས་དྲངས་པའི་གླུ། །སྐལ་ལྡན་རྣ་བར་ཆད་མེད་ལེན་པར་ཤོག །རང་བཞིན་དག་པའི་སྣང་ཆ་སྙིང་རྗེ་ཆེ། །ཟུང་འཇུག་བློ་གྲོས་ལྷག་བསམ་བཟང་པོའི་ཐུགས། །རྒྱ་མཚོའི་གོས་ཅན་ལྟེ་བ་གངས་ཅན་འགྲོ། །འདྲེན་ལ་སྐྱེད་པའི་གཟིགས་པ་གཡེལ་མེད་ཤོག །དྲི་མེད་དཔལ་ལྡན་ས་ཞལ་དགེ་གསུམ་བསྟན། །ཀློག་དང་སྤོང་བ་ལས་ཀྱི་འཁོར་ལོ་ཡིས། །འགྲོ་རྣམས་བདེ་ཆེན་སར་བཀྲི་འདུས་པའི་གླིང༌། །ཉི་ཟླས་མུན་སེལ་དེ་སྲིད་རྒྱས་པར་ཤོག །ལེགས་བྱས་ཞིང་གྱུར་ཆུ་གཏེར་ཆེན་པོའི་བཅུད། །དགེ་ཚོགས་ཛམྦུའི་སྙེ་མས་ཉེར་འཐུང་བའི། །བྱེད་པོར་གཏོགས་ཀུན་སྲིད་ཞིའི་བདེ་སྐྱིད་གསེར། །བྱང་ཆུབ་བར་དུ་སྤྱོད་པའི་སྐལ་ཐོབ་ཤོག །བསོད་ནམས་ས་མཆོག་ལྗོན་པའི་དྲི་དངར་པོར། །འཐུལ་བའི་ངད་ཀྱིས་རང་བདེ་ཙམ་མིན་པར། །ཡིད་ཅན་མཐའ་དག་སྒྲིབ་གཉིས་ཚ་གདུང་ཚོགས། །གཞིལ་སྟེ་རྣམ་པ་ཐམས་ཅད་མཁྱེན་རྒྱུར་བསྔོ། །རིང་པོར་འཚོ་བའི་སྨོན་ལམ་ཚིགས་སུ་བཅད་པ་ཞིག་དགོས་ཞེས་མདའ་དཔོན་གཟེར་ཆེན་པ་རྣམ་རྒྱལ་ཚེ་རིང་གིས་དོན་གཉེར་ཆེན་པོས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །ཡེ་ཤེས་བཞུ་བླུག་གཞོམས་མེད་སྲུང་འཁོར་དབུས། །གདན་གསུམ་ཚང་བའི་གཙོ་བོ་རིགས་ཀུན་བདག །བཅོམ་ལྡན་མི་སྐྱོད་རྡོ་རྗེའི་ལྷ་ཚོགས་མཐུས། །ཅི་བཏབ་སྨོན་ལམ་འགྲུབ་པར་བདག་བྱིན་རློབས། །སྐུ་བཞིའི་ས་བོན་ལུས་ངག་ཡིད་གསུམ་ལ། །སྨིན་བྱེད་དབང་ཆུ་རིན་ཆེན་གདུལ་བྱའི་ཚོགས། །གྲོལ་བཞིའི་(༤༧བ) ― GLG021_Page_0096 ―
[མ་དཔེ་གཟིགས་ན་འདིར་གནོན།]
བློ་ཆེན་བསྐལ་བཟང་རྒྱ་མཚོ་ཆེར། །འབེབས་མཁས་རིགས་ཀུན་ཁྱབ་བདག་ཞབས་བརྟན་ཤོག །སྔོན་ནས་ཆོས་ལོངས་ལམ་དུ་འཁྱེར་བའི་འབྲས། མ་སྨད་སྤྲུལ་སྐུའི་མཚན་དཔེའི་སྒྱུ་འཕྲུལ་གར། དཀྱིལ་འཁོར་བྱེ་བ་ཕྲག་བརྒྱའི་མགོན་པོ་རུ། །སྒྱུར་བའི་བཀའ་དྲིན་ནམ་ཡང་གཡོ་མེད་སྩོལ། །ཐ་མལ་དྲིས་དབེན་གསང་གསུམ་རྡོ་རྗེའི་ཁམས། །རླུང་སེམས་སྒྱུ་ལུས་འོད་གསལ་དབྱིངས་དག་ལས། །ཟུང་འཇུག་ཁ་སྦྱོར་བདུན་ལྡན་སྐུར་བཞེངས་ནས། །འཁོར་བ་མ་སྟོང་བར་དུ་བཞུགས་གྱུར་ཅིག །མྱ་ངན་མེད་ལྗོན་གྱིས་མཚན་འཕགས་ཡུལ་ནས། །ཤར་ཕྱོགས་རྒྱ་མཚོའི་མཐས་གཏུགས་དབྱིགས་འཛིན་ཁྱོན། །ཞྭ་སེར་མནབས་པའི་ཐོས་བསམ་དོན་བསྒོམས་བསྟན། །ཉི་ཟླས་མུན་སེལ་དེ་སྲིད་ཁྱབ་པར་ཤོག །མདོ་སྡེ་ཟ་མ་ཏོག་གྱུར་རྒྱུད་ཀྱི་རྒྱལ། །ངེས་གསང་འདུས་པའི་ལུང་རྟོགས་ཆོས་འཛིན་པ། །དགེ་འདུན་དཀོན་མཆོག་སྟོད་རྒྱུད་མཁས་འདུས་སྡེ། །དབྱར་གྱི་ཆུ་གཏེར་ལྟ་བུར་འཕེལ་བར་ཤོག །རྒྱུད་ལྔའི་འགྲོ་ལ་རྒྱལ་ཀུན་ཐུགས་རྗེ་ཆེ། །རབ་བཞུགས་མངོན་སུམ་བདེ་བའི་དཔལ་ཐོབ་ཅིང༌། །ཁྱད་པར་རྒྱ་ཧོར་གངས་ཅན་ཡུལ་ལྗོངས་སུ། །རྫོགས་ལྡན་གསར་པའི་རྩེ་དགའ་དགོད་པར་ཤོག །ཅེས་ཡུན་དུ་འཚོ་བའི་ཆེད་དུ་བདེན་ཚིག་བརྗོད་པའི་ཚིགས་འདི་ནི་གངས་རིའི་ལྗོངས་འདིར་རིགས་སྔགས་འཆང་བ་རྣམས་ཀྱི་གཙུག་ན་མངོན་པར་མཐོ་བ་དཔལ་ལྡན་སྟོད་རྒྱུད་གྲྭ་ཚང་གི་ཞལ་འདོན་དུ་རྒྱུད་པ་སློབ་དཔོན་དགེ་བའི་བཤེས་གཉེན་བྱམས་པ་བཀྲ་ཤིས་ཀྱིས་དོན་གཉེར་ཆེན་པོས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་(༤༨ན) ― GLG021_Page_0097 ―
[མ་དཔེ་གཟིགས་ན་འདིར་གནོན།]
དཔལ་བཟང་ངོ༌། །འདུས་པ་གསང་ཆེན་རྟེན་དང་བརྟེན་པའི་གཙོ། །ཚེ་མཐའ་ཡས་པའི་ངོ་བོ་འཇིག་རྟེན་དབང༌། །མཆོག་གསུམ་མཁྱེན་བརྩེ་ནུས་པའི་བདག་ཉིད་ཅན། །འཆི་མེད་དངོས་གྲུབ་འདོད་འཇོའི་ཆར་སྩོལ་ཞིག །སྡེ་བཞིའི་མཐོ་རིས་ཆུ་བོའི་འཕྲིན་ལས་རྒྱུན། །དགའ་ལྡན་ཆོས་སྲིད་རྒྱ་མཚོར་འཁྱིལ་མཛད་པས། །གཙུག་ལག་ལུགས་བརྒྱའི་རླབས་ཕྲེང་ཡོལ་མེད་ཅན། །ནོར་འཛིན་སྐྱོང་བ་རྡོ་རྗེ་ལྟར་བརྟན་ཤོག །གནམ་གྱི་ཤེ་མོང་དཔུང་པས་རྩོད་པའི་དུས། །འཁོར་ལོས་བསྒྱུར་རྒྱལ་མཆོད་ཡོན་ཟུང་འཇུག་གི །བཀའ་ཁྲིམས་གདུགས་དཀར་གཅིག་གི་གྲིབ་བསིལ་ལ། །འབངས་ཀུན་ངལ་གསོའི་བདེ་སྐྱིད་དཔལ་ཐོབ་ཤོག །ཅེས་ས་སྐྱོང་ཕྱག་མཛོད་འཕྲིན་ལས་རྒྱ་མཚོའི་བརྟན་བཞུགས་ཚིགས་བཅད་འདི་ནི་སྟོད་རྒྱུད་འདུས་སྡེའི་ཞལ་འདོན་དུ་གྲྭ་ཚང་སློབ་དཔོན་བཤེས་གཉེན་བྱམས་པ་བཀྲ་ཤིས་ཀྱིས་འབད་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དཔལ་ལོ། །དཔག་མེད་ཡོན་ཏན་བཀོད་པའི་ཞིང་གི་མགོན། །གཟི་བརྗིད་རྒྱལ་པོའི་བརྒྱ་རྩ་བརྒྱད་ཀྱི་མཚན། །ཐོས་འཆང་འབྲི་ཀློག་བྱེད་རྣམས་མཐར་ཕྱིན་ཚེ། །འབྱུང་བར་ཞལ་འཆེས་བདེན་ཚིགས་འགྲུབ་གྱུར་ཅིག །ངག་དབང་ཚངས་པའི་བུ་མོའི་བློ་གྲོས་ནོར། །རབ་ཐོབ་སྐལ་བཟང་མགྲིན་པར་འཇམ་དཔལ་དབྱངས། །ལེགས་འཁྱུད་དགྱེས་ཞལ་རྩེ་དགའ་དགོད་པ་ཅན། །ཐུབ་བསྟན་རྒྱ་མཚོའི་དཔྱིད་དུ་བརྟན་པར་ཤོག །རྣམ་གསུམ་སྡེ་གནོད་སྙིང་པོ་ཕ་རོལ་ཕྱིན། །འདུལ་མངོན་ཚད་མས་གཏན་ཕབ་(༤༨བ) ― GLG021_Page_0098 ―
[མ་དཔེ་གཟིགས་ན་འདིར་གནོན།]
ཐོས་བསམ་གྱི། །སྒྲོ་འདོགས་ལེགས་གཅོད་གསང་ཕུ་ནེའུ་ཐོག །ཁྲིམས་ལྡན་འདུས་སྡེ་སྲིད་མཐར་རྒྱས་གྱུར་ཅིག །གནམ་སྐོས་མཆོད་ཡོན་ཁྲིམས་གཉིས་དྲང་པོའི་ཐིག །ཆོས་རྒྱལ་མེ་ལོང་གདོང་གི་རྣམ་པར་ཐར། །ནོར་འཛིན་པདྨོའི་མངལ་ཁུར་རབ་ལྕི་བའི། །བདེ་སྐྱིད་ཉི་མ་གུང་ནས་རྟག་འཆར་ཤོག །འགྲོ་རྣམས་རྒྱུད་ལྔའི་སར་འཁྱམས་རྐང་འོག་ཏུ། །མཛད་མེད་ཕན་བདེའི་གོས་ཁྱབ་བྱེད་པོར་དགེ །བསྔོས་འབྲས་གྲོ་བཞིན་བྱེ་བ་ཉི་ཤུ་པའི། །ངང་ཚུལ་ཀུན་གྱི་མངོན་སུམ་མྱོང་གྱུར་ཅིག །ཅེས་ཚིགས་སུ་བཅད་པ་འདི་ནི་གངས་རིའི་ལྗོངས་འདིར་ལུང་དང་རིག་པ་སྨྲ་བ་ཀུན་གྱི་འབྱུང་ཁུངས་གཅིག་པུ་བ་གསང་ནེའུ་ཐོག་གི་མཁན་སློབ་སྤྱི་ཚོགས་ཀྱིས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །རྟེན་འབྲེལ་བསླུ་བ་མེད་པ་རྡོ་རྗེའི་ཁྲིར། །མཆོག་གསུམ་འདུས་པའི་བདག་ཉིད་བཤེས་གཉེན་ཚུལ། །ཚེ་དང་ཡེ་ཤེས་དཔག་མེད་ངོ་བོ་རུ། །མི་ཕྱེད་དད་པའི་ཡིད་ཀྱིས་གུས་ཕྱག་འཚལ། །དངོས་སུ་བཤམས་དང་ལྷ་མིའི་དཔལ་འབྱོར་རྣམས། །ཡིད་ཀྱིས་སྤྲུལ་པའི་བསོད་ནམས་ཆེར་སྤུངས་པ། །ཀུན་ཏུ་བཟང་པོའི་མཆོད་སྤྲིན་ནམ་མཁའ་མཛོད། །འཛད་མེད་སྒོ་འཕར་བརྒྱ་ཕྲག་ཕྱེ་ནས་འབུལ། །རང་རྒྱུད་ནག་པོ་བརྩེགས་པའི་སྡིག་ཏོའི་དྲི། །ཞིང་མཆོག་ལ་བརྟེན་འགྱོད་སྡོམ་ཀུན་ཏུ་སྤྱོད། །མཐོ་རིས་ཆུ་བོས་ལན་བརྒྱར་རབ་བཀྲུས་ཏེ། །བཅོས་མིན་བསམ་པ་ཐག་པས་སྙིང་ནས་བཤགས། །ཐུབ་རྣམས་ཚོགས་རྫོགས་བྱང་སེམས་ཕྱིན་དྲུག་སྤྱོད། (༤༩ན) ― GLG021_Page_0099 ―
[མ་དཔེ་གཟིགས་ན་འདིར་གནོན།]
།ཉན་རང་བདེར་གཞོལ་སྐྱེ་ཕལ་མ་ལུས་པས། །བྱས་ཟིན་བསྒྲུབ་འགྱུར་ད་ལྟ་སྤེལ་བཞིན་པའི། །རྣམ་དཀར་དགེ་ཚོགས་རྒྱ་མཚོར་བདག་ཡི་རང༌། །བློ་དང་འཚམས་པར་འཇུག་བྱེད་ས་འཛིན་དབང༌། །གཙུག་ལག་ཟླ་བའི་མ་མར་འཁྱིལ་བ་ལས། །ལེགས་བཤད་བདུད་རྩི་ཆོས་ཀྱི་འཁོར་ལོ་ཆེ། །གངས་ཅན་སྐལ་ལྡན་གདུལ་བྱར་བསྐོར་བར་བསྐུལ། །སངས་རྒྱས་སྲས་བཅས་ཀུན་གྱིས་ལུས་ཅན་རྣམས། །བྱང་ཆུབ་མཆོག་ལ་སྦྱོར་བཞེད་དམ་བཅའི་ཁུར། །མགོན་ཁྱོད་ལྷག་བསམ་དཔུང་པས་རབ་བཏེག་ནས། །བསྐལ་བརྒྱར་མྱ་ངན་མི་འདའ་བཞུགས་སུ་གསོལ། །འདི་སྣང་བདེ་སྐྱིད་ཡང་སྲིད་ལྷ་མིའི་རྟེན། །དམན་པའི་ལམ་ཙམ་དོན་དུ་གཉེར་མིན་པར། །དུས་གསུམ་བསགས་པའི་ལས་དཀར་ས་བོན་ཚོགས། །ཀུན་མཁྱེན་ཡོངས་འདུའི་འཁྲི་ཤིང་སྤེལ་ཕྱིར་བསྔོ། །ཞེས་བརྟན་བཞུགས་ཀྱི་ཚིགས་བཅད་འདི་ནི་སྟོད་ལུང་ཆུ་ལམ་སྡིངས་གསུམ་སྤྱི་སོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །འགྲོ་ཀུན་གཙུག་ན་བསྐལ་བརྒྱར་མི་ཤིགས་པའི། །རྡོ་རྗེའི་སྐྱིལ་ཀྲུང་གཅིག་གིས་འཆི་བདག་བདུད། །སྡེ་བཅས་ལས་རྒྱལ་འོད་མཚན་ཆེས་འབར་བ། །མ་སྨད་སྣང་བའི་དགའ་སྟོན་རྟག་ཏུ་སྩོལ། །དཔལ་ལྡན་ཞྭ་སེར་ཅོད་པཎ་ལེགས་འཆང་བའི། །ཆོས་སྲིད་བསྟན་པ་ས་མཆོག་ལྗོན་པའི་དྲི། །ལུས་ཅན་བསོད་ནམས་རླུང་གིས་ཉེར་དྲངས་ཏེ། །རྒུད་པའི་ཚ་གདུང་མ་ལུས་སེལ་བར་ཤོག །འཛམ་གླིང་སྤྱི་དང་བྱེ་བྲག་སཱ་ལའི་ནགས། །འཕྲེང་བར་འཁྲིགས་པའི་ལྗོངས་འདིར་སྡིག་ཏོའི་འབྲས། །མིང་གི་(༤༩བ) ― GLG021_Page_0100 ―
[མ་དཔེ་གཟིགས་ན་འདིར་གནོན།]
ལྷག་མར་བྱས་ཏེ་སུམ་རྩེན་པའི། །དགའ་སྟོན་མངོན་སུམ་ཉམས་སུ་མྱོང་བར་ཤོག །ཅེས་པ་འདི་ཡང་ར་ས་འཕྲུལ་སྣང་བའི་རུ་བཞི་སྤྱི་ཚོགས་ཀྱིས་བརྟན་བཞུགས་སྔོན་མའི་མཇུག་ཏུ་འཐུད་རྒྱུ་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བའོ། །ཨོཾ་སྭསྟི་སིདྡྷཾ། བྱེ་བ་ཕྲག་བརྒྱའི་དཀྱིལ་འཁོར་རྒྱ་མཚོའི་མགོན། །རྒྱལ་དབང་པདྨའི་བཀའ་གཏེར་བཤད་སྒྲུབ་བསྟན། །བློ་གྲོས་མཆོག་གིས་སྤེལ་བའི་རིགས་ཀུན་བདག །རྡོ་རྗེའི་སློབ་དཔོན་དམ་པར་གསོལ་བ་འདེབས། །ཐུབ་གསུང་འགྱུར་རོ་ཅོག་གི་རྒྱུན་འཛིན་ཅིང༌། །བསྟན་བཅོས་དགོངས་དོན་འགྲེལ་ལ་བློ་གྲོས་རྒྱས། །ཁྱད་པར་ཐེག་མཆོག་བསྟན་པའི་སྲོག་གི་ཤིང༌། །རྡོ་རྗེའི་ངོ་བོར་གྲུབ་ལ་གསོལ་བ་འདེབས། །ལྷ་སྲས་ཁྲི་སྲོང་རྣམ་སྤྲུལ་ཉང་རལ་པ། །ཡང་སྤྲུལ་ཆོས་ཀྱི་དབང་ཕྱུག་ཟབ་གཏེར་གྱི། །སྨིན་གྲོལ་གདམས་པའི་བང་མཛོད་སྒོ་ཕྱེ་ནས། །གདུལ་བྱའི་དགའ་སྟོན་སྤེལ་ལ་གསོལ་བ་འདེབས། །ཚེ་མཐའ་ཡས་པའི་ངོ་བོ་ཐོད་ཕྲེང་རྩལ། །འཆི་མེད་རིག་འཛིན་གྲུབ་པའི་ཐུགས་རྗེ་ཡིས། །ཤེས་བྱ་ཀུན་ལ་བློ་གྲོས་རབ་ཡངས་པ། །མཆོག་གི་རྡོ་རྗེ་འཛིན་མཁས་རྟན་གྱུར་ཅིག །བདུད་བཞི་ཀ་ནས་དག་པའི་གཞོམ་མེད་ཁྲིར། །ལྷུན་གྲུབ་སྲ་མཁྲེགས་གཡུང་དྲུང་འཁྱིལ་བའི་སྟེང༌། །བློ་མཆོག་རྩལ་གྱི་རིག་སྔགས་བརྟུལ་ཞུགས་མཐུ། །གྲུབ་པའི་དབང་ཕྱུག་རྡོ་རྗེ་ལྟར་བརྟན་ཤོག །རྩ་བརྒྱུད་བླ་མའི་བདག་ཉིད་ཚེ་དབང་རྩལ། །བདེ་གཤེགས་རྒྱལ་བ་ཀུན་འདུས་བཀའ་བརྒྱད་ལྷ། །མ་ནིང་སྡེ་དཔོན་སུམ་ཅུར་བཅས་པའི་མཐུས། །སྨོན་པའི་རེ་བ་(༥༠ན) ― GLG021_Page_0101 ―
[མ་དཔེ་གཟིགས་ན་འདིར་གནོན།]
ཡིད་བཞིན་འགྲུབ་བྱིན་རློབས། །མ་དག་དྲི་སྦྱངས་ངེས་གསང་གསེར་ཞུན་ཁམས། །འོད་གསལ་རྡོ་རྗེ་སྙིང་པོར་ལྷུན་གྲུབ་པ། །བཀའ་གཏེར་བཤད་སྒྲུབ་ཁྲིམས་ལྡན་འདུས་པའི་གླིང༌། །མཚོ་སྐྱེས་བསྟན་པའི་དཔྱིད་དུ་རྒྱས་གྱུར་ཅིག །ཅེས་རིག་སྔགས་འཆང་བའི་དབང་ཕྱུག་ཉང་སྟོན་མཁས་ཤིང་གྲུབ་བརྙེས་ཆེན་པོ་སྨན་ལུང་པ་བློ་གྲོས་མཆོག་གི་རྡོ་རྗེའི་བརྟན་བཞུགས་ཀྱི་ཚིགས་སུ་བཅད་པ་འདི་ནི་གོང་ར་ངེས་གསང་རྡོ་རྗེ་གླིང་པའི་ཚོགས་འདོན་དུ་ཟ་ཧོར་གྱི་བནྡེས་དང་བའི་ཡིད་ཀྱིས་སྦྱར་བའོ། །བསམ་པའི་རེ་བ་ཡོངས་སྐོང་ཚེ་སྦྱིན་མའི། །ཞབས་སེན་བརྟན་གཡོ་ཀུན་གྱི་བཏུད་བྱའི་གནས། །སངས་རྒྱས་ཀུན་ཡུམ་ཡིད་བཞིན་འཁོར་ལོ་ཡི། །མཁྱེན་བརྩེ་ནུས་པའི་མཐུ་དཔུང་དེང་འདིར་སྐྱེད། །ངག་གི་དབང་ཕྱུག་བློ་བཟང་གྲགས་པའི་བསྟན། །ཛཱ་ཏིའི་དྲི་ངད་འཐུལ་ནས་རྒྱ་མཚོའི་མཐར། །སྤེལ་མཛད་མགོན་ཁྱོད་ལྷར་བཅས་སྐྱེ་རྒུའི་གཙུག །རྡོ་རྗེའི་སྐྱིལ་ཀྲུང་གཡོ་མེད་རྟག་བརྟན་ཤོག །རབ་དཀར་ལྷག་བསམ་འོ་མཚོ་ལས་འཐོན་པའི། །དགེ་ཚོགས་ཟླ་བ་གསར་པའི་འོད་སྣང་གིས། །སྲིད་ཞིའི་གདུང་མུན་མ་ལུས་གཞིལ་བྱས་ཏེ། །གཏན་བདེའི་མགྲིན་སྔོན་རལ་པར་མཛེས་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་གོང་གསེར་ཡིག་པ་མཆོད་རྟེན་བླ་མ་དང་དགེ་སློང་ཆོས་འཕེལ་གཉིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་འཕྲིན་ལས་སོ། །སྲས་བཅས་རྒྱལ་ཀུན་གསང་གསུམ་རྡོ་རྗེའི་གར། །ཚེ་དཔག་མེད་མགོན་ངོ་བོར་ལེགས་བཞེངས་ནས། །(༥༠བ) ― GLG021_Page_0102 ―
[མ་དཔེ་གཟིགས་ན་འདིར་གནོན།]
ངག་དབང་ལྷ་མོས་མགྲིན་འཁྱུད་བློ་གྲོས་ཀྱི། །སྐལ་བཟང་རྒྱ་མཚོའི་དགའ་སྟོན་བརྟན་པར་མཛོད། །རྟེན་འབྲེལ་སླུ་མེད་སྣ་ཚོགས་རྡོ་རྗེའི་ཁམས། །དཀོན་མཆོག་མཐུ་ཡིས་བཞུ་བླུག་གཞོམ་མེད་ཁྲིར། །མགོན་ཁྱོད་གངས་ཅན་བསྟན་འགྲོའི་ཕན་བདེའི་དཔྱིད། །བསྐལ་བརྒྱར་ཆོས་འཁོར་སྐོར་ཕྱིར་བཞུགས་གྱུར་ཅིག །ངེས་པར་ཐམས་ཅད་མཁྱེན་པ་བུ་སྟོན་རྗེའི། །བསྟན་པ་རྣམ་གསུམ་འཁོར་ལོ་འཕེལ་རྒྱས་ཤིང༌། །སྲིད་མཐར་གཡོ་མེད་སྒྲུབ་ནུས་བདག་རྒྱུད་ལ། །མཆོག་གསུམ་ཐུགས་རྗེ་ཆེན་པོས་འགྲུབ་བྱིན་རློབས། །ཞེས་བརྟན་བཞུགས་སྨོན་ལམ་གྱི་ཚིགས་སུ་བཅད་པ་འདི་ནི་ཞ་ལུ་གདན་ས་པ་མཁས་གྲུབ་ཆེན་པོ་རིན་ཆེན་བསོད་ནམས་མཆོག་གྲུབ་ཀྱི་གསུང་གི་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སུག་བྲིས་སུ་བྱས་སོ། །སྭསྟི་སི་དྡྷཾ། བྱམས་མགོན་མི་ཡི་སྲིད་བཟུང་བུ་སྟོན་རྗེའི། །བསྟན་པ་རིན་ཆེན་འཛིན་ལ་བསོད་ནམས་དང༌། །ཡེ་ཤེས་ཚོགས་གཉིས་མཆོག་ཏུ་ལྷུན་གྲུབ་པ། །གདན་གསུམ་ཚང་བའི་མགོན་པོར་གསོལ་བ་འདེབས། །བདེ་ལྡན་ཞིང་གི་དབང་ཕྱུག་གར་དབང་ལྷའི། །མཛོད་སྤུའི་ཟེར་གྱིས་འཆི་བདག་སྨག་རུམ་མུན། །མཐར་བྱས་བསྐལ་བརྒྱར་འཚོ་བཞེས་སྣང་བའི་གཏེར། །འཛད་མེད་དགའ་སྟོན་བཤེས་གཉེན་དམ་པར་སྩོལ། །མ་བྱོན་རྣམ་འདྲེན་རབ་གསལ་ཀུན་མཁྱེན་བུའི། །རིན་ཅེན་རང་བཞིན་རྡོ་རྗེས་མཚན་པའི་ཁྲིར། །བསོད་ནམས་ཞིང་མཆོག་རིགས་ཀུན་ཁྱབ་བདག་ཏུ། །གྲུབ་པའི་ཟློས་གར་གཡུང་དྲུང་ལྟར་བརྟན་ཤོག །གུར་ཞལ་གཙོར་གྱུར་ཆོས་སྲུང་ཚོགས་སྤྱི་དང༌། །ཁྱད་པར་ཉི་མ་གྲུབ་སོགས་བསྟན་དགྲ་རྣམས།(༥༡ན) ― GLG021_Page_0103 ―
[མ་དཔེ་གཟིགས་ན་འདིར་གནོན།]
།ཚར་གཅོད་རྣམ་ཐོས་སྲས་དང་རབ་བརྟན་མས། །མགོན་ཁྱོད་བསྐལ་བརྒྱར་བརྟན་པའི་འཕྲིན་ལས་མཛོད། །གནས་ལྔ་མཁྱེན་པའི་པཎ་ཆེན་རིན་ཅེན་གྲུབ། །གང་དེའི་རྣམ་སྤྲུལ་འཁྲུལ་མེད་མཚར་ཆེན་ཞབས། །བརྒྱུད་པར་བཅས་པའི་བསྟན་འཛིན་ཞ་ལུ་པའི། །རིང་ལུགས་ཕྱོགས་བཅུར་རྒྱས་པའི་བཀྲ་ཤིས་ཤོག །ཅེས་ཞ་ལུ་མཁན་ཆེན་མཁས་ཤིང་གྲུབ་པ་བརྙེས་པ་རིན་ཅེན་བསོད་ནམས་མཆོག་གྲུབ་རྒྱལ་བ་གཉིས་པ་བུ་སྟོན་རིན་ཆེན་གྲུབ་དང་རྡོ་རྗེ་འཆང་མཚར་པ་ཆོས་རྗེའི་བསྟན་པའི་སྲོག་ཤིང་ལྟ་བུར་གྱུར་པའི་ཚུལ་ལ་བསམས་ཏེ་ཟ་ཧོར་གྱི་བནྡེས་ལྷག་པའི་བསམ་པས་སུག་བྲིས་སུ་བགྱིས། ཏཏརྠ་སི་དྡྷིརསྟུ། །ངག་དབང་ལྷ་ཡིས་རྗེས་བཟུང་བློ་གྲོས་གཟིངས། །སྐལ་བཟང་རྒྱ་མཚོར་འཇུག་ལ་འཇིགས་མེད་པས། །ཡིད་སྲུབ་མཚོན་གྱིས་གཞོམ་མིན་གོ་ཆ་ཅན། །ཐུབ་བསྟན་ལང་ཚོའི་སྡེ་ལ་གསོལ་བ་འདེབས། །འཁོར་བའི་མྱ་ངམ་ཐང་རྒྱུ་བགྲང་ཡས་འགྲོན། །བདེ་བར་དབུག་དབྱུང་སླད་དུ་མགོན་པོ་ཁྱོད། །མི་ཤིགས་སྐྱིལ་ཀྲུང་གཅིག་གིས་བསྐལ་པ་བརྒྱར། །རྡོ་རྗེའི་ཁྲི་ལ་གཡོ་མེད་བཞུགས་གྱུར་ཅིག །བློ་གྲོས་བཟང་པོའི་བག་ཆགས་སད་པའི་སྣོད། །བཅུ་ཕྲག་རིག་གནས་ནོར་བུས་ཡོངས་གཏམས་ཏེ། །གྲགས་པ་དོན་ལྡན་སྔོན་བྱོན་ལོ་པཎ་གྱི། །རྣམ་ཐར་ཐམས་ཅད་བདག་གིས་འཛིན་གྱུར་ཅིག །ཅེས་གསོལ་འདེབས་སྨོན་ལམ་ཚིགས་སུ་བཅད་པ་འདི་ནི་ཉང་སྟོད་འབྲོང་རྩེ་ལྷུན་གྲུབ་གླིང་པའི་རིག་བྱེད་པ་བློ་བཟང་ནོར་བུས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་(༥༡བ) ― GLG021_Page_0104 ―
[མ་དཔེ་གཟིགས་ན་འདིར་གནོན།]
འཇམ་དབྱངས་སོ། །མཆོག་གསུམ་ཐུགས་རྗེ་ཞུན་མར་འཁྱིལ་བའི་ཁམས། །སྣ་ཚོགས་རྡོ་རྗེའི་གཟུགས་སུ་གྲུབ་པའི་ཁྲིར། །ངག་དབང་ལྷ་ཡིས་རྗེས་བཟུང་བློ་གྲོས་གཏེར། །སྐལ་བཟང་རྒྱ་མཚོའི་མགོན་ཁྱོད་ཞབས་བརྟན་ཤོག །ཐུབ་བསྟན་སྙིང་པོ་ཀུན་མཁྱེན་ཙོང་ཁ་པའི། །རིང་ལུགས་དེ་འཛིན་ཆོས་དང་སྲིད་ཀྱི་བསྟན། །རབ་རྒྱས་ཡོངས་འདུའི་གྲིབ་མར་བོད་འབངས་རྣམས། །སྒོ་གསུམ་སྐྱིད་པའི་ངལ་གསོ་ཐོབ་པར་ཤོག །སྐྱེ་འཕགས་ཀུན་གྱིས་བསགས་དང་གསོག་འགྱུར་དགེ །ཆེས་དཀར་གངྒའི་ཡབ་གཅིག་ལས་བབས་པ། །ཕན་བདེའི་ཡན་ལག་བརྒྱད་ལྡན་ཆུ་བོའི་རྒྱུན། །རྣམ་མཁྱེན་ཡེ་ཤེས་རྒྱ་མཚོར་འབབ་གྱུར་ཅིག །ཅེས་པ་འདི་ཡང་སྣེའུ་རྫོང་སྡོད་མངའ་ཁུལ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །མགྲིན་པར་ངག་དབང་ལྷ་མོ་བཞུགས་པའི་བློར། །འཇམ་དབྱངས་དགྱེས་པའི་སྐལ་བཟང་རབ་ཐོབ་པས། །ལྔ་རིག་རྒྱ་མཚོར་ཙནྡྲ་གོ་མི་ཡི། །རྣམ་དཔྱོད་དཔལ་ཀུན་འཛིན་ལ་གསོལ་བ་འདེབས། །བཞེད་པའི་ཕྱིན་དྲུག་ཕ་མཐའ་རྫོགས་མིན་པར། །འཆི་བདག་བདུད་མུན་མཛོད་སྤུའི་ཟེར་ཙམ་གྱིས། །མཐར་བྱེད་པདྨ་གར་དབང་ངོ་བོ་རུ། །བཞེངས་ཏེ་སཱ་ལའི་ལྗོངས་འདིར་རྟག་བཞུགས་གསོལ། །མ་རྒན་སྐྱེ་རྒུའི་ཆོས་དཀར་ས་གཞི་ལ། །རྒྱལ་ཀུན་ཐུགས་བསྐྱེད་ས་བོན་ལེགས་སྨིན་པའི། །ས་ལམ་ཡོན་ཏན་མཐར་ཕྱིན་ཡོངས་འདུའི་ལྗོན། །བྱང་ཆུབ་སྙིང་པོའི་འབྲས་བུས་དུད་གྱུར་ཅིག །ཅེས་གསོལ་འདེབས་སྨོན་ལམ་ཟུང་འབྲེལ་གྱི་ཚིགས་བཅད་འདི་ནི་ལྷོ་བྲག་ལྷ་ཁང་པ་(༥༢ན) ― GLG021_Page_0105 ―
[མ་དཔེ་གཟིགས་ན་འདིར་གནོན།]
རྡོ་རྗེ་ནོར་བུས་ནན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །བློ་གསལ་སྐལ་བཟང་གདུལ་བྱའི་ཚོགས་རྣམས་ལ། །གར་དབང་ཆོས་ཀྱི་གྲགས་པའི་རིང་ལུགས་མཆོག །སྤེལ་ཕྱིར་སྤྲུལ་སྐུའི་ཟླ་ཚེས་དབང་པོའི་སྡེ། །མཆོག་གསུམ་མཐུ་ཡི་རྡོ་རྗེ་ལྟར་བརྟན་ཤོག །ཅེས་པ་འདི་ནི་དགེ་འཕེལ་དབོན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །བདེ་ལྡན་ངོ་མཚར་བཀོད་པའི་ཞིང་ཁམས་ན། །ལྔ་ལྡན་ལོངས་སྤྱོད་རྫོགས་སྐུ་ཚེ་མཐའ་ཡས། །དྲན་པས་སྲིད་ཞིའི་གདུང་སེལ་མགོན་པོ་ལ། །གསོལ་བ་འདེབས་སོ་དག་པའི་ཞིང་དུ་དྲོངས། །པད་རཱག་ལྷུན་པོ་དུས་མཐའི་མེས་ཀླུབ་པའི། །རྟ་མགྲིན་མི་བཟད་གསང་གསུམ་འཁོར་ལོའི་གར། །བྱང་ཆུབ་བར་དུ་སྒྲུབ་ཐབས་ལྷུར་ལེན་ན། །ཡི་སྲུབས་ནག་པོའི་སྡེ་ལས་རྒྱལ་བར་མཛོད། །ལྷ་ཆེན་མཧཱ་དེ་བའི་ཐུགས་ཀྱི་སྲས། །བསྟན་སྲུང་གནོད་སྦྱིན་བེག་ཙེ་ལྕམ་དྲལ་ལ། །རྟག་ཏུ་གསོལ་མཆོད་བསྟེན་ན་ཞི་རྒྱས་དབང༌། །མངོན་སྤྱོད་འཕྲིན་ལས་ལྷུན་གྱིས་འགྲུབ་པར་མཛོད། །ཅེས་ཁར་ཁ་སྐུ་སྐྱེ་བློ་བཟང་བསྟན་འཛིན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །ངག་དབང་འཇམ་མགོན་བློ་བཟང་གྲགས་པའི་བསྟན། །འཆད་རྩོད་རྩོམ་པས་རྒྱ་ཆེར་སྤེལ་བ་ལ། །མཚོ་བྱུང་ལྷ་མོས་རྒྱུད་མངས་མགྲིན་པ་ནས། །ལེགས་འཁྲོལ་བཤེས་གཉེན་དམ་པར་གསོལ་བ་འདེབས། །ངག་ལ་སྨྲ་བའི་དབང་ཕྱུག་གྲུབ་པའི་བློ། །བསྐལ་བཟང་རྣམ་(༥༢བ) ― GLG021_Page_0106 ―
[མ་དཔེ་གཟིགས་ན་འདིར་གནོན།]
འདྲེན་བཞི་པའི་རིང་ལུགས་ཀྱི། །གནད་གསང་རྒྱ་བཀྲོལ་དབྱར་མཚོ་ཇི་བཞིན་དུ། །འཕེལ་མཛད་རྡོ་རྗེ་ལྟ་བུར་ཞབས་བརྟན་ཤོག །སྒོ་གསུམ་ཉེར་འབད་རྒྱུ་སྦྱོར་སྦྱིན་པའི་བདག །འདི་ཕྱིའི་བདེ་སྐྱིད་དཔག་བསམ་ཡོངས་འདུའི་འབྲས། །རྟག་ཏུ་སྤྱོད་ལ་དགེ་བའི་བརྒྱ་བྱིན་གྱི། །གཙུག་ཏོར་རེག་པས་འཆི་མེད་ལུས་གྲུབ་ཤོག །ཅེས་པ་འདི་ཡང་ཉ་ཤུལ་སྐྱ་རིལ་གྱིས་སོག་དགའ་ལྡན་ལྷུན་པོར་འཛུགས་རྒྱུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སུག་བྲིས་བགྱིས་སོ། །འཇིགས་མེད་དུས་གསུམ་རྒྱལ་བ་མ་ལུས་ཡུམ། །འཇིགས་བརྒྱད་གཉེན་པོར་འཕགས་མའི་སྐུར་བསྟན་ནས། །འཇིག་པ་ཀུན་ལ་སྐྱེ་རྒུ་རྣམས་བསྒྲལ་ཏེ། །འཇིག་བྲལ་སར་འགོད་ལེགས་སྦྱིན་ལྷ་མོས་སྐྱོངས། །རབ་ལྗང་འཁྲི་ཤིང་ལྟར་མཉེན་སྐྱབས་སྦྱིན་ཕྱག །རབ་མང་ཡིད་ཅན་དབུག་དབྱུང་ཆེད་སྐྱོང་ཡང༌། །རབ་དཀར་མཛེས་སྡུག་ཟླ་བཞིན་འཛུམ་ཞལ་ཅན། །རབ་གསལ་སྤྱན་བདུན་ཉེར་གཟིགས་འཆི་མེད་ལྷས། །གནས་ལྔ་རིག་པར་མང་ཐོས་མཁས་གྲལ་སྙེག །ལུས་ངག་ཡིད་གསུམ་བག་ཡོད་ལ་དབང་བློས། །ཉེར་བཙུན་བརྩེ་ལྡན་བཟང་པོ་རྒྱ་ཆེན་འགྲོར། །དབྱར་མཚོ་ལྟ་བུར་འཕེལ་ཏེ་བརྟན་གྱུར་ཅིག །བློ་བཟང་གྲགས་སྙན་རབ་འབར་འཕྲིན་ལས་ཀྱི། །མ་སྨད་བསྟན་པ་རྒྱ་མཚོའི་གོས་ཅན་གཞི། །སྙིང་སྟོབས་རུས་སྦལ་གྱིས་འདེགས་མི་ཡི་བདག །སུམ་རྩེན་དབང་པོ་རྡོ་རྗེ་ལྟར་བརྟན་ཤོག །མང་ཐོས་ལུང་གི་ནགས་ཚལ་སྟུག་པོའི་དབུས། །རིག་པའི་སྐད་གསང་ཆེར་སྒྲོགས་སྟག་གི་ཚང༌། །གངས་ཅན་ར་བའི་སྟོད་སྨད་བར་གསུམ་གྱི། །བློ་གསལ་འདུས་གྲྭ་སྲིད་མཐར་རྒྱས་གྱུར་(༥༣ན) ― GLG021_Page_0107 ―
[མ་དཔེ་གཟིགས་ན་འདིར་གནོན།]
ཅིག །ཅེས་བརྟན་བཞུགས་སྨོན་ལམ་གྱི་ཚིགས་སུ་བཅད་པ་འདི་ནི་སྐལ་བཟང་སྐྱེ་རྒུའི་འཇུག་ངོགས་གསང་ཕུ་ར་སྟོད་པ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །ངག་དབང་བློ་གྲོས་བྱེ་བའི་གཏེར་མཛོད་མཆོག །བཟང་པོའི་སྐལ་ལྡན་རྒྱ་མཚོའི་དཔལ་མགོན་དུ། །འོག་མིན་ཞིང་གཙོ་ངེས་པ་ལྔ་ལྡན་ལྟར། །རྟག་ཏུ་གཡོ་བ་མེད་པར་བཞུགས་གྱུར་ཅིག །ནམ་ཡང་ཡོལ་མེད་དཀོན་མཆོག་ཐུགས་རྗེའི་རླབས། །བདེ་ལེགས་ཆུ་གཏེར་འབུམ་འཁྲིགས་མཚོ་གློང་ནས། །ཅི་བསམ་འདོད་འཇོ་ཡིད་བཞིན་དབང་གི་རྒྱལ། །གཙུག་ཏོར་རྩེ་མོར་འབྲལ་མེད་མཛེས་གྱུར་ཅིག །ཅེས་སྨོན་ལམ་གྱི་ཚིགས་སུ་བཅད་པ་འདི་ནི་དགའ་ལྡན་འཕེལ་རྒྱས་གླིང་སློབ་དཔོན་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །བདེ་ཆེན་ཞིང་གི་མགོན་པོ་ཚེ་མཐའ་ཡས། །ལྔ་ལྡན་ལོངས་སྤྱོད་རྫོགས་སྐུའི་རྣམ་རོལ་ཅན། །མཛོད་སྤུའི་ཟེར་འཕྲེང་འབར་བས་འཆི་བདག་མུན། །མཐར་བྱས་སྣང་བའི་ཕུན་ཚོགས་དགའ་སྟོན་སྩོལ། །རྣམ་འདྲེན་དེ་གསུང་སྲས་དང་ཉན་རང་སོགས། །སླུ་མེད་གཏན་གྱི་སྐྱབས་སུ་གྱུར་ཏོ་ཅོག །རྟག་ཏུ་བདེན་པའི་མཐུ་དང་ཐུགས་རྗེ་ཆེས། །དེང་འདིར་སྨོན་པའི་རེ་འབྲས་སྨིན་གྱུར་ཅིག །ངག་དབང་དབྱངས་ཅན་བློ་གྲོས་ལ་སྤྱོད་པའི། །སྐལ་བཟང་ཐོབ་པས་རྒྱ་ཆེན་ཤེས་བྱའི་གནད། །མཚོ་ནང་གཟུགས་ལྟར་མངོན་སུམ་གཟིགས་པའི་མགོན། །ཉི་ཟླས་མུན་སེལ་དེ་སྲིད་ཆོས་བསྟན་གསོལ། །དུས་དགྲའི་བརྟུལ་ཞུགས་འཇིགས་མེད་སེང་གེའི་སྩལ། །ཡིད་སྲུབ་གཅན་གཟན་མཆེ་བས་འབུབ་མིན་(༥༣བ) ― GLG021_Page_0108 ―
[མ་དཔེ་གཟིགས་ན་འདིར་གནོན།]
གོ ། དཀར་ཆའི་ཆུ་ཤེལ་དབང་པོ་ལྟར་འཕེལ་ཏེ། །ཐུབ་བསྟན་ཡོངས་འདུའི་དཔལ་དུ་བརྟན་གྱུར་ཅིག །རྣམ་དཔྱོད་ལང་ཚོ་དར་བའི་ལྕགས་ཀྱུ་ཡིས། །ཕུན་ཚོགས་སྡེ་བཞིའི་དངོས་ཀུན་ཡོངས་བསྡུས་པར། །འཇམ་དབྱངས་དགའ་བས་མགྲིན་པ་པདྨོའི་མཚོར། །ལེགས་བཞུགས་བཤེས་གཉེན་དམ་པ་ཞབས་བརྟན་ཤོག །མི་འགྱུར་ཆོས་ཉིད་གསེར་ལྡན་ལྟོ་བ་རུ། །ཆོས་ཅན་རྒྱུ་ཚོགས་ས་བོན་ལེགས་བཏབ་པས། །རེ་བ་ཇི་བཞིན་འགྲུབ་པའི་དཔག་བསམ་ལྗོན། །ཕན་བདེའི་འབྲས་བུས་ཡོངས་སུ་དུད་གྱུར་ཅིག །ལྷག་བསམ་གངས་ཀྱི་རྡུལ་བརྩེགས་ལས་བབས་པའི། །ཆོས་དཀར་གངྒཱའི་ཆུ་རྒྱུན་འཛད་མི་ཤེས། །བྱང་ཆུབ་སྙིང་པོའི་ཟླ་བའི་མ་མ་དང༌། །རོ་གཅིག་འགྲོ་རྣམས་ཀུན་མཁྱེན་ཐོབ་ཕྱིར་བསྔོ། །ཞེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་གཟིམས་དཔོན་གྱི་ལས་འཛིན་རི་ཁྲོད་དགའ་ལྡན་སློབ་དཔོན་ཟུར་པ་བྱམས་པ་རིན་ཆེན་སོགས་ངེད་རང་གི་ཉེ་སྐོར་དུ་རྒྱུན་སྡོད་ཀྱི་དྲུང་འཁོར་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་བློ་བཟང་དངོས་གྲུབ་བོ། །ཡིད་བཞིན་མཚོར་འཁྲུངས་འདབ་བརྒྱའི་ཟེའུ་འབྲུའི་རྩེར། །རབ་དཀར་ཆ་ཤས་འཁོར་ལོ་ཉ་གང་སྟེང༌། །ཡིད་འཕྲོག་བལྟ་བས་ངོམས་མིན་ཚེ་སྦྱིན་ལྷ། །བཅོམ་ལྡན་འདས་མས་འཆི་མེད་དངོས་གྲུབ་སྩོལ། །གནམ་གྱི་ཤེ་མོང་དཔུང་པའི་ལྡེ་མིག་གིས། །ཞྭ་སེར་ཆོས་སྲིད་འཕྲིན་ལས་སྡེ་བཞིའི་སྒོ། །རྒྱ་མཚོའི་གོས་ཅན་མཐར་ཁྱབ་ལེགས་འབྱེད་པ། །ནོར་འཛིན་སྐྱོང་བའི་དབང་པོ་ཞབས་བརྟན་ཤོག །སླུ་མེད་དཀོན་མཆོག་རྣམ་གསུམ་ཐུགས་རྗེའི་གཟི། །སྟོབས་ལྡན་དམ་པ་ཆོས་ཀྱི་སྲུང་མའི་མཐུ། །ལྷར་བཅས་(༥༤ན) ― GLG021_Page_0109 ―
[མ་དཔེ་གཟིགས་ན་འདིར་གནོན།]
བདེན་ཚིགས་ས་བོན་ཡོངས་བཏབ་པའི། །འབྲས་བཟང་ལེགས་སྨིན་དགའ་སྟོན་དེང་འགྲུབ་ཤོག །ཅེས་ས་སྐྱོང་ཕྱག་མཛོད་འཕྲིན་ལས་རྒྱ་མཚོའི་བརྟན་བཞུགས་འདི་ནི་རི་ཁྲོད་དགའ་ལྡན་སློབ་དཔོན་གཙོ་བོས་གྱུར་པའི་ཉེ་འཁོར་དྲུང་འཁོར་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །ལས་ཀྱི་མེ་ལོང་རི་མོ་ལྟར་བཀོད་ནས། །འཁོར་བ་མཐའ་ཅན་དེ་སྲིད་རྡོ་རྗེའི་སྐུ། །ངེས་པ་ལྔ་ལྡན་ཇི་བཞིན་སྟོན་མཛད་པ། །པདྨ་ཐོད་ཕྲེང་ཐུགས་རྗེའི་མཐུ་དཔུང་བསྐྱེད། །ཁྲི་སྲོང་རིགས་སྲས་ལྷ་ལྕམ་པདྨ་གསལ། །ཟབ་གཏེར་སྒོ་འབྱེད་དོན་དུ་ལས་བྲེལ་རྩལ། །ཀློང་ཆེན་ཆོས་ཀྱི་རྒྱལ་པོ་པད་གླིང་སོགས། །རིམ་བྱོན་སྤྲུལ་པའི་ཟློས་གར་ཆད་མེད་ཤོག །མགོན་ཁྱོད་གསུང་གསང་རྡོ་རྗེའི་རང་བཞིན་གང༌། །མཆོག་དམན་གདུལ་བྱའི་སྤྱོད་ཡུལ་སྐྱེད་ཚལ་དུ། །ངོ་མཚར་སྤྲུལ་པའི་འདབས་སྟོང་རབ་བཞད་པ། །ཐུགས་སྐྱེད་ཉིན་བྱེད་མངོན་སུམ་འཆར་བར་ཤོག །བག་ཡོད་ཚུལ་ཁྲིམས་རྣམ་དག་ངུར་སྨྲིག་འཆང༌། །གསང་ཆེན་རྡོ་རྗེ་ཐེག་མཆོག་སྙིང་པོར་འཛིན། །སྔ་འགྱུར་བསྟན་པའི་སྲོག་ཤིང་དམ་པ་ཡི། །ཡང་སྲིད་ཁ་བའི་ལྗོངས་འདིར་མྱུར་བྱོན་ཤོག །ཟང་མདོག་དཔལ་རིར་པད་གླིང་དངོས་བཞུགས་ཀྱང༌། །སླར་སྤྲུལ་རང་བསྟན་ཆོས་ཀྱི་རྒྱལ་སྲིད་དུ། །ཐེག་མཆོག་རིན་ཅེན་ཅོད་པཎ་ལེགས་བཅིང་ནས། །རིང་མིན་དབང་སྐུར་བཀྲ་ཤིས་བྱིན་ཆེན་ཕོབ། །ཚོགས་གཉིས་རྒྱ་མཚོའི་ཉ་ཕྱིས་ཁོག་ཡངས་ལས། །རྟག་ཏུ་བམས་འདོད་འབྲས་ཡོངས་སྨིན་ཤོག །སྲས་བཅས་རྒྱལ་བའི་ངོ་བོ་པདྨ་འབྱུང༌། །བདེ་གཤེགས་ཞི་ཁྲོ་ཀུན་འདུས་བཀའ་(༥༤བ) བི་ཤཱ་ཀརྨ་ལྟ་བུའི་རི་མོ་བ་ཆོས་དབྱིངས་རྒྱ་མཚོས་ཤར་གླིང་ཆོས་སྡེའི་གནས་བཅུ་ཁང་ལ་ཞིག་གསོས་བྱས་པའི་དགེ་བསྔོའི་སྨོན་ལམ་ཚིགས་བཅད་སོགས།― GLG021_Page_0110 ―
[མ་དཔེ་གཟིགས་ན་འདིར་གནོན།]
བི་ཤཱ་ཀརྨ་ལྟ་བུའི་རི་མོ་བ་ཆོས་དབྱིངས་རྒྱ་མཚོས་ཤར་གླིང་ཆོས་སྡེའི་གནས་བཅུ་ཁང་ལ་ཞིག་གསོས་བྱས་པའི་དགེ་བསྔོའི་སྨོན་ལམ་ཚིགས་བཅད་སོགས།བུ དྡྷཱ ནཱཾ པྲ ཀྲྀ ཡ དྷ རྨ སྱ དྒཱ ཏུཿ དྲྀ ཥྟི རྒྷཱ གི རྒ ནུ ཙ བྷྲཱ མི ཏཱ གཾ །སངས་རྒྱས་ཀུན་གྱི་རང་བཞིན་ཆོས་ཀྱི་དབྱིངས། །མཐོང་བའི་སྐལ་ཕྲ་འཁོར་འཁྱམས་འགྲོ་བ་ལ། །ནཻ མི ཏྟོ དྱཾ རུ པི དྲྀ ཏ བྲ ཏྱ ཙ ཀྵུ སཱུ ཪྻ རྨྀ ཏྲཾ ས ཧ ཧེ ཡཱ ད ཤི ཥྱཾ །མཚན་དཔེའི་སྣང་བརྙན་དངོས་སྟོན་ཉི་མའི་གཉེན། །གང་གི་སྲས་དང་སློབ་མར་བཅས་པ་ཀྱེ། །(༥༥ན) ― GLG021_Page_0111 ―
[མ་དཔེ་གཟིགས་ན་འདིར་གནོན།]
ཡིད་སྲུབས་རྩོད་ལ་ཚད་མར་གྱུར་པའི་དཔང༌། །ས་ཡི་ལྷ་མོ་གསེར་ལྡན་ལས་འཕགས་བཞིན། །ལྷག་བསམ་དག་པས་བསྐྲུན་པའི་ཆོས་དཀར་གྱི། །ཕུང་པོ་བྱང་ཆུབ་སྙིང་པོར་བསྒྱུར་ཆེད་དགོངས། །སྣང་སྲིད་གཟུགས་སུ་འཆར་བའི་སྒྱུ་མ་མཁན། །ཆོས་དབྱིངས་རྒྱ་མཚོར་ཉེར་གྲགས་རི་མོ་བས། །རབ་བསྒྲུབས་རྟེན་དང་བརྟེན་པའི་ཉལ་འགྲོའི་ཚོགས། །རྣམ་མཁྱེན་རྒྱ་མཚོའི་ཀློང་དུ་རོ་གཅིག་ཤོག །སྐྱེ་རྒུའི་ཕན་བདེ་བླ་ནས་བླར་འདེགས་པ། །སྙིང་སྟོབས་ཀུན་བཟོད་མ་ཡི་རྗེ་འགྲོ་གང༌། །སྲིད་ཞིའི་སྐྱེ་བརྒྱུད་འཛད་མེད་མཐའ་ཅན་བར། །མི་འབྲལ་རླབས་ཆེན་སྤྱོད་པས་དུས་འདར་ཤོག །དགེ་བའི་མཐུན་རྐྱེན་བསྒྲུབ་པར་གཏོགས་སོ་ཅོག །མི་ཟད་སྡིག་ཏོའི་སྨག་རུམ་ལས་སློང་བ། །ཐབས་ཤེས་ཉི་ཟླ་ཟུངགི་གནས་སྐབས་དང༌། །གཏན་འདུན་སྣང་བའི་འོད་ཆེན་འབར་གྱུར་ཅིག །ཅེས་པ་འདི་ནི་བི་ཤཱ་ཀརྨ་ལྟ་བུའི་རི་མོ་བ་ཆོས་དབྱིངས་རྒྱ་མཚོས་ཤར་གླིང་ཆོས་སྡེའི་གནས་བཅུ་ཁང་ལ་ཞིག་གསོས་བྱས་པ་སོགས་ཀྱིས་མཚོན་ཏེ་བྱ་བ་ལས་ཀྱི་འཁོར་ལོའི་དགེ་ཚོགས་བགྱིས་པ་རྣམས་བྱང་ཆུབ་ཀྱི་རྒྱུར་བསྔོ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །བདུད་བཞིའི་དཔུང་ཚོགས་ཚོགས་གཉིས་མཐུས་བཅིལ་སྟེ། །མཚན་ཙམ་ཐོས་ཚེ་ཚེ་ཡི་དཔལ་སྟེར་བ། །བདེ་ལྡན་དག་ཞིང་ཞིང་ཁམས་གཙོ་བོའི་མགོན། །ཐུགས་རྗེའི་སྤྱན་དཀྱུས་དཀྱུས་རིང་ལྷུར་གཟིགས་གསོལ། །དབྱངས་ཅན་མགྲིན་འཁྱུད་བརྗོད་པ་རྣམ་དག་ངག །དབང་ཕྱུག་གྲུབ་པའི་བློ་གྲོས་བཟང་པོ་ཡིས། །རྒྱ་ཆེན་ཤེས་བྱ་རྒྱ་མཚོ་ལྟར་ཟབ་ཡངས་པར། །སྤོབས་པ་(༥༥བ) ― GLG021_Page_0112 ―
[མ་དཔེ་གཟིགས་ན་འདིར་གནོན།]
དགེ་བའི་བཤེས་ཁྱོད་བརྟན་པར་ཤོག །ཞྭ་སེར་འཆང་བའི་བཤད་དང་སྒྲུབ་པའི་བསྟན། །དེ་འཛིན་འདུས་སྡེ་ཆོས་སྲིད་བླ་ནས་བླར། །རབ་འདེགས་ནོར་འཛིན་སྐྱོངས་བའི་མངའ་ཐང་སོགས། །ཕུན་ཚོགས་སྐྱིད་པའི་ཉི་མ་དགུང་འཆར་ཤོག །འཇིག་རྟེན་སྤྱི་དང་གངས་ཅན་སྐྱེ་རྒུ་ཡི། །དུས་གསུམ་བསགས་དང་གསོག་འགྱུར་སྒྲུབ་བཞིན་པ། །རབ་དཀར་དགེ་བའི་འབྲས་བུ་མུ་སྟི་ཀའི། །འཛད་མེད་ཆར་ཆེན་རྟག་ཏུ་འབབ་པར་ཤོག །ལྷག་བསམ་གངྒའི་ཡབཅིག་ལས་འོངས་པ། །བསོད་ནམས་བྱས་པའི་ཆུ་ཀླུང་འབབ་པའི་རྒྱུན། །མཁའ་མཉམ་མ་རྒན་ཡིད་ཅན་མ་ལུས་པ། །བྱང་ཆུབ་སྙིང་པོའི་རྒྱ་མཚོ་རྒྱས་ཕྱིར་བསྔོ། །ཞེས་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱིའི་གདན་ས་པ་མཁན་ཆེན་ཚུལ་ཁྲིམས་རྒྱ་མཚོས་འཕྱོང་རྒྱས་སྐྱ་སེར་སྤྱིའི་ངག་འདོན་དུ་བདེན་པ་བརྗོད་པའི་ཚིགས་བཅད་གཅིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོས་ཆང་ཁྱིམ་པ་བློ་བཟང་དངོས་གྲུབ་བོ། །བརྒྱ་རྩ་བརྒྱད་པའི་མཚན་སྙན་གྲུ་གཟིངས་ཀྱིས། །འཁོར་མཚོར་འཆི་བདག་རྦ་ཀློང་ལས་བསྒྲལ་ཏེ། །བདེ་སྐྱིད་རིན་ཆེན་གླིང་འཁྲིད་དེད་དཔོན་ཆེ། །ཚེ་མཐའ་ཡས་པའི་མགོན་དེ་འདིར་གཤེགས་ཤིག །གྲངས་མེད་ལུས་སྤྲུལ་ཕྱག་འཚལ་མཆོད་སྤྲིན་སྤྲོ། །ཉེས་ཚོགས་ཀུན་བཤགས་དགེ་ལ་རྗེས་ཡི་རང༌། །ཆོས་འཁོར་བསྐོར་ཕྱིར་མྱ་ངན་མི་འདར་བཞུགས། །བདག་སོགས་སྨོན་ལམ་ཅི་བཏབ་འགྲུབ་བྱིན་རློབས། །གདངས་སྙན་ངག་གི་དབང་ཕྱུག་བརྒྱད་ལྡན་ལྷའི། །ཐུགས་རྗེས་བསྐུལ་བྱེད་མོས་བློས་གསོལ་བཏབ་མཐུས། །བསྐལ་བཟང་གདུལ་བྱ་རྒྱ་མཚོའི་བཤེས་གཉེན་མཆོག །ངེས་པ་ལྔ་ལྡན་བཞིན་དུ་(༥༦ན) ― GLG021_Page_0113 ―
[མ་དཔེ་གཟིགས་ན་འདིར་གནོན།]
བརྟན་པར་ཤོག །འཇམ་དཔལ་རྡོ་རྗེ་ཀུན་མཁྱེན་བཙོང་ཁ་པའི། །བསྟན་པ་རིན་ཆེན་རྣམ་གསུམ་འཁོར་ལོ་ཡིས། །དཀར་ཆ་འཕེལ་བའི་བསིལ་ཟེར་རྗེས་འགྲོ་བས། །འཛམ་གླིང་སྐྱེ་རྒུའི་གདུང་བའི་མུན་བསེལ་ཤོག །ཚེ་རིང་གནམ་གྱི་ཤེ་མོང་དཔུང་པ་ཡིས། །དུས་ཀྱི་བདག་པོར་གྲུབ་པའི་ལས་ཤུགས་རྗེས། །བོད་ཆེན་ནོར་འཛིན་འབྲང་བའི་མི་ཡི་བདག །སྐུ་ཚེ་ཆབ་སྲིད་མངའ་ཐང་འཕེལ་བར་ཤོག །བརྒལ་བརྟག་དཔྱད་བཟོད་ལུང་རིགས་ཤིང་རྟ་ཡིས། །ལེགས་བཤད་ཡིད་བཞིན་ནོར་བུ་འདྲེན་མཁས་པའི། །བློ་གསལ་དྭགས་པོ་གྲ་ཚང་སྲིད་མཐའི་བར། །ཡོངས་རྒྱས་ཐོས་བསམ་བསྟན་པ་དར་བར་ཤོག །བསོད་ནམས་ཞིང་ལ་སྲི་ཞུ་ཡི་གེ་དྲུག །བྱེ་བ་དུང་ཕྱུར་གྲངས་སྤེལ་སྦྱིན་པའི་བདག །ལུས་ངག་ཡིད་ཀྱིས་མཐུན་རྐྱེན་སྦྱོར་བ་རྣམས། །འདི་ཕྱི་གཏན་གྱི་འདུན་མ་ལྷུན་གྲུབ་ཤོག །སྤྱི་དང་ཁྱད་པར་གངས་ཅན་སྨན་ལྗོངས་འདིར། །ནད་མུག་འཁྲུག་རྩོད་དུས་ཀྱི་ཆད་པའི་ཚོགས། །རབ་ཞི་ཚེ་འབྱོར་བདེ་སྐྱིད་བརྒྱད་ཁྲིའི་ལོར། །སྤྱོད་པའི་འཛམ་གླིང་ཡིད་ཅན་སྤུན་ཟླར་ཤོག །མདོར་ན་བསགས་དང་གསོག་འགྱུར་བྱེད་བཞིན་པ། །རྣམ་སྨིན་དཀར་པོར་འཛག་པའི་ལས་བཟང་ཀུན། །ལྷ་ལམ་མཐའ་བཞི་ཚད་བཟུང་ནུས་མིན་པ། །མ་རྒན་འགྲོ་རྣམས་སངས་རྒྱས་འཐོབ་ཕྱིར་བསྔོ། །ཞེས་པ་འདི་ནི་སྟག་རུ་བ་ནོར་བུས་བདེ་ཆེན་ཁང་གསར་དུ་ཡིག་དྲུག་དུང་ཕྱུར་བཙུགས་སྐབས་དྭགས་པོ་གྲྭ་ཚང་གི་ཞལ་འདོན་དུ་འཛུགས་རྒྱུའི་བརྟན་བཞུགས་ཤིག་དགོས་ཚུལ་བྱུང་བ་ལྟར་མགོན་པོ་ཚེ་དཔག་མེད་ལ་ཡན་ལག་བདུན་པ་དང་འབྲེལ་བར་རིང་འཚོ་བདེན་ཚིག་སྤྱི་སྒོས་ཀྱི་སྨོན་ལམ་དང་བཅས་ཏེ་ཟ་ཧོར་གྱི་(༥༦ན) ― GLG021_Page_0114 ―
[མ་དཔེ་གཟིགས་ན་འདིར་གནོན།]
བནྡེས་སུག་བྲིས་སུ་བྱས་སོ། །དུས་གསུམ་རྒྱལ་ཀུན་སྲས་བཅས་ངོ་བོ་ཉིད། །མཚར་ཆེན་རྡོ་རྗེ་འཆང་དབང་སྦྱང་གཞིའི་སྐུ། །སྦྱངས་འབྲས་ཚེ་མཐའ་ཡས་པའི་མགོན་པོ་མཆོག །དབྱིངས་རིགས་དག་པའི་ཀློང་འདིར་གཤེགས་ཤིང་བཞུགས། །གངྒཱའི་རྡུལ་གྲངས་ལུས་སྤྲུལ་གུས་ཕྱག་འཚལ། །ཕྱི་ནང་གསང་མཆོད་ནམ་མཁའ་མཛོད་ཕྱེ་འབུལ། །བསགས་པའི་སྡིག་ཚོགས་སྟོབས་བཞིའི་སྒོ་ནས་བཤགས། །སྲིད་ཞིའི་མཐའ་ཀླས་དགེ་ལ་རྗེས་ཡི་རང༌། །མགོན་རྣམས་འགྲོ་བློར་འཚམས་ཆོས་སྟོན་པས་སྤྲུལ། །ཆོས་ཀྱི་དབྱིངས་སུ་ཉི་ཟླ་རྟག་བཞུགས་གསོལ། །རང་བཞན་ཀུན་གྱི་ལེགས་བྱས་ས་བོན་ཚོགས། །བྱང་ཆུབ་མཆོག་གི་མྱུ་གུ་སྐྱེ་རྒྱུར་བསྔོ། །སླུ་མེད་གཏན་གྱི་སྐྱབས་གནས་ཁྱེད་རྣམས་ལ། །དབང་རྣོན་ཆོས་རྗེས་འབྲང་ཏེ་བཅད་བརྡར་བས། །རྒྱུ་མཚན་རབ་ངེས་མི་ཕྱེད་དད་པ་ཡིས། །སྙིང་ནས་གསོལ་བ་འདེབས་ན་བདག་བྱིན་རློབས། །གདོན་བགེགས་འབྱུང་པོའི་གནོད་འཚེའི་ཀེག་སྲི་ལངས། །ནད་རིམ་དུས་མིན་འཆི་དབུལ་ཞལ་ལྕེ་བབས། །སེང་གླང་དུག་སྦྲུལ་ཆོམ་རྐུན་མེ་ཆུ་དང༌། །ལྕག་སྒྲོག་ཤ་ཟའི་འཇིགས་ཀུན་ལས་ཐར་ཤོག །རྩོད་པའི་ལྕགས་ཁམས་རྫོགས་ལྡན་སུ་ཝརྞར། །ལེགས་བསྒྱུར་ཚེ་དང་དཔལ་དང་ལོངས་སྤྱོད་སོགས། །མངོན་སུམ་ཉམས་སུ་མྱོང་བ་སུན་རྩེན་གྱི། །དབང་ཕྱུག་བརྙེས་པའི་སྐལ་བཟང་ལྷུན་གྲུབ་ཤོག །འདི་ནས་འཕོས་ཚེ་བདེ་ལྡན་ཞིང་ཁམས་སུ། །ཐོགས་པ་མེད་བགྲོད་རྒྱལ་བའི་སྲས་གྱུར་ཏེ། །རང་གཞན་དོན་གཉིས་བསྒྲུབ་ཕྱིར་ཕྱིན་དྲུག་གི །རླབས་ཆེན་སྤྱོད་པའི་ཚོགས་ལ་འཇུག་པར་ཤོག །མ་རྒན་སྐྱེ་རྒུར་བརྩེ་བས་འཁོར་བ་ལས། །མི་སྐྱོའི་ཡང་སྲིད་འཛིན་ཚེ་སློབ་བཤད་ཆོས། །(༥༧ན) ― GLG021_Page_0115 ―
[མ་དཔེ་གཟིགས་ན་འདིར་གནོན།]
སྙན་བརྒྱུད་ཚད་མ་བཞི་ལྡན་ལེགས་སྟོན་པའི། །ཡོངས་འཛིན་རྣམས་ཀྱི་རྟག་ཏུ་རྗེས་འཛིན་ཤོག །ངེས་གསང་སྨིན་གྲོལ་འབྲས་བུ་ཡོངས་དུད་པ། །ཟུང་འཇུག་སྐུ་བཞིའི་དཔག་བསམ་ལྗོན་པ༌ཡི། །གྲིབ་མ་ནམ་མཁའི་ཕ་མཐའ་གཞལ་ནུས་པའི། །ཡིད་ཅན་མཐའ་དག་ངལ་གསོར་སྤྱོད་གྱུར་ཅིག །ཅེས་པ་མཚར་ཆེན་ཆོས་ཀྱི་རྒྱལ་པོ་ལ་སྦྱར་བ་ཡིན་ཅིང༌། རིགས་འཛིན་ཆེན་པོ་ལ་སྦྱོར་ན། མཚར་ཆེན་རྡོ་རྗེ་འཆང་དབང་སྦྱང་གཞིའི་སྐུ། །ཞེས་པ། རིགས་འཛིན་ལེགས་ལྡན་རྡོ་རྗེ་སྦྱང་གཞིའི་སྐུ། །ཞེས་པ་དང༌། མི་སྐྱོའི་ཡང་སྲིད་འཛིན་ཚེ་སློབ་བཤད་ཆོས། །སྙན་བརྒྱུད་ཚད་མ་བཞི་ལྡན་ལེགས་སྟོན་པ། །ཞེས་པ། མོ་སྐྱོའི་ཡང་སྲིད་འཛིན་ཚེ་ཀ་དག་དབྱིངས། །ལྷུན་གྲུབ་འོད་ལྔ་མངོན་སུམ་ངོ་སྤྲོད་པའི། །ཞེས་འདོན་པ་བསྒྱུར་བས་འགྲུབ་བོ། །གནས་སྐབས་མཐར་ཐུག་གི་རྒུད་པ་ཞི་ཞིང༌། མཆོག་ཐུན་གྱི་དངོས་གྲུབ་འགྲུབ་པའི་སྨོན་ལམ་ཞིག་དགོས་ཞེས་ཁའུ་བྲག་རྫོང་པ་དང་རིགས་འཛིན་ལེགས་ལྡན་རྡོ་རྗེའི་རིང་ལུགས་ལ་མི་ཕྱེད་པའི་དད་པ་ཅན་མང་དུ་ཐོས་པའི་དཔྱོད་ལྡན་གླང་ཕུ་ནས་དགྲ་འདུལ་ཚེ་རིང་གིས་བསྐུལ་བ་ལ་བརྟེན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བློ་བཟང་དངོས་གྲུབ་བོ། །དགེ་བའི་ཞིང་སར་སྨོན་ལམ་ལེགས་བཏབ་འབྲས། །འདྲེན་མཆོག་བླ་མ་ཞབས་པད་རབ་བརྟན་ཞིང༌། །ས་སྐྱོང་མི་དབང་སྐུ་ཚེ་ཆབ་སྲིད་དར། །འབངས་རྣམས་བདེ་སྐྱིད་དཔལ་ལ་སྤྱོད་པར་ཤོག །ཅེས་བརྟན་བཞུགས་སྨོན་ལམ་ཚིགས་བཅད་འདིའང་ལྷ་ས་སྤྱི་ཚོགས་ཀྱི་ངོར་ཟ་ཧོར་གྱི་བནྡེས་སྦྱར། །མི་ཤིགས་སྐྱིལ་ཀྲུང་གཅིག་བཅས་ཏིང་འཛིན་གྱིས། །བདུད་སྡེའི་དཔུང་ཚོགས་ཞིག་(༥༧བ) ― GLG021_Page_0116 ―
[མ་དཔེ་གཟིགས་ན་འདིར་གནོན།]
པའི་སྒྲ་སྙན་པ། །ཚངས་པའི་ཡུལ་སར་སྒྲོག་མཛད་དོན་ཀུན་གྲུབ། །དཀྱུས་རིང་སྤྱན་གྱིས་རྟག་ཏུ་བཙའ་བར་མཛོད། །འཁོར་རྩ་དུག་གསུམ་ནད་རྣམས་གསོ་བྱད་སྨན། །ཆོས་ཕུང་གངྒཱའི་ཡབ་གཅིག་ལས་བབས་པ། །མདོ་རྒྱུད་གླེགས་བམ་ཡན་ལག་བརྒྱད་ལྡན་ཆབ། །གངས་ལྗོངས་ཟླ་བའི་མ་མར་འཁྱིལ་འདི་སྨད། །བརྡ་དག་དབྱིབས་ལེགས་གཟུགས་སུ་གསུང་རབ་རྣམས། །སོར་མོས་གར་བསྒྱུར་རྣམ་དཔྱོད་སི་ཏ་མ། །འཕྲོག་བྱེད་ཡིད་སྲུབས་ལངྒའི་མགྲིན་གཅོད་པའི། །མཐུ་རྩལ་དགའ་བྱེད་ལྷ་དང་མཉམ་འཐོབ་ཤོག །འཕེལ་ཟད་འདུ་བ་འཁྲུགས་དང་གདོན་གྱི་བྱ། །དཀོན་ཅོག་ཐུགས་རྗེའི་ནགས་ལ་སྦར་བའི་མེ། །གསོལ་འདེབས་རླུང་གིས་བདས་པས་ལུས་སེམས་རྣམས། །མནར་བྱེད་ཟུག་རྔུ་མིང་གི་ལྷག་མར་ཤོག །དཀར་ཕྱོགས་སྐྱོང་བར་ཞལ་འཆེས་ཕྱི་ནང་མགོན། །བྱེ་བྲག་གནས་ཡུལ་ལྷ་སྲུང་རླུང་ཤུགས་ཀྱིས། །གེགས་བྱེད་འཐིབས་པོའི་སྤྲིན་ནག་ག་གཤེད་དུ། །གཏོར་ཏེ་བཙལ་ཡང་དམིགས་སུ་མེད་པར་མཛོད། །རྒྱུད་ལྔའི་མྱ་ངམ་ཐང་དུ་ལས་ཉོན་མེས། །ཚ་གདུང་རིས་མེད་ཡིད་ཅན་མ་ལུས་པ། །རྒྱལ་བསྟན་ཡོངས་འདུ་དར་དྲག་གྲིབ་བསིལ་ལ། །བདེ་སྐྱིད་རྩེ་དགའ་གཞལ་ནུས་ངལ་གསོར་ཤོག །སེམས་ཅན་བསམ་པའི་ནམ་མཁའ་ཟད་མིན་བར། །འཆར་དང་ནུབ་སྤངས་དམ་བཅའ་འོག་མིན་གྱི། །ངེས་པ་ལྔ་ལྡན་མགོན་བཞིན་བཤེས་གཉེན་མཆོག །རྟག་ཏུ་ཆད་མེད་ཆོས་འཁོར་བསྐོར་བར་ཤོག །ཚངས་པས་ཀ་བ་མེད་པར་གནམ་གྱི་སྒོ། །ཕྱེ་ནས་མང་བཀུར་རྒྱལ་ཁབ་ཡངས་པའི་ཁྲིར། །དུས་ཀྱི་བདག་པོར་ཉེར་བཀོད་མི་ཡི་བདག །ཆབ་སྲིད་མངའ་ཐང་དགུང་དང་མཉམ་པར་ཤོག །རྩོད་དུས་(༥༨ན) ― GLG021_Page_0117 ―
[མ་དཔེ་གཟིགས་ན་འདིར་གནོན།]
ལུས་ཕྲའི་མིག་ཟུམ་ཕྲ་མོས་ཀྱང༌། །རེག་མིན་རྫོགས་ལྡན་སྐྱེ་རྒུའི་དཔལ་འབྱོར་ཚེ། །སྤྱི་དང་ཁྱད་པར་རྒྱ་ཧོར་བོད་འབངས་ཀྱི། །མངོན་སུམ་ཉམས་སུ་མྱོང་བའི་སྐལ་བཟང་ཤོག །རྟེན་འབྲེལ་རྒྱུ་འབྲས་སླུ་མེད་ཆེ་བ་འདས། །འདྲི་ཀློག་ལས་བྱེད་རྒྱུ་སྦྱོར་སྦྱིན་བདག་རྣམས། །རིང་འཚོའི་སྲོག་གི་ཀ་བ་བརྟན་པོ་ཡིས། །ལས་ཀྱི་མེ་ལོང་འཛིན་པའི་ངལ་བསྟེན་ཤོག །གཉིས་མི་ཟ་བ་དད་པའི་མངལ་ཡངས་པོར། །དགེ་ཚོགས་ཕུང་པོའི་གསེར་སྒོང་སྨིན་པ་ཡིས། །ཆོས་ནོར་འདོད་ཐར་འཛུམ་ཞལ་བཞི་ལྡན་པ། །གྲུབ་པའི་མེས་པོའི་མཆེད་ཟླར་གྱུར་བར་ཤོག །ལེགས་བྱས་སྤེལ་བའི་མཆོད་སྦྱིན་བརྒྱ་ཕྲག་གིས། །ལྷ་མིའི་རྟེན་བཟང་འཁོར་མོ་ཡུག་མྱོང་མཐར། །མྱ་ངན་ལས་འདས་འཆི་མེད་བདག་པོའི་ཁྲི། །རྣམ་པར་གནོན་པའི་དབང་ཐང་ཆེས་འབར་ཤོག །ཡེ་ཤེས་ཚོགས་ཀྱི་གྱད་རིགས་དཔའ་བོའི་གཡུལ། །བསོད་ནམས་རུ་ལྡན་གོ་མཚོན་མཐོར་བསྒྲེངས་ཏེ། །ལུས་མེད་འཇུག་པ་བཞི་ཡི་དཔུང་བཅོམ་པའི། །རྒྱལ་རྔ་སྐུ་གསུམ་ཁང་རྩེར་རྡུང་གྱུར་ཅིག །ཅེས་པ་འདི་ཡང་གནམ་སའི་དབང་ཕྱུག་བསྟན་འཛིན་དཱ་ཡན་རྒྱལ་པོ་དང༌། སྟོབས་ཀྱི་དཔུང་པས་སའི་དཀྱིལ་འཁོར་རྣམ་པར་གནོན་པ་ཨོ་ཆི་ཐུ་ཐའི་ཇི་གཉིས་ཀྱིས་ལུང་སྡེ་བཞི། ཤེར་ཕྱོགས། མདོ་སྡེ་རྣམས་གངས་ལྗོངས་སུ་འགྱུར་རོ་ཚལ་དང༌། རྒྱུད་འབུམ་ཐོར་བུ་བཅས་པའི་གླེགས་བམ་བརྒྱ་ཕྲག་བཞེངས་པའི་དུས། སྤྱི་སྒོས་ཀྱི་སྨོན་ལམ་དཔོན་ཡིག་པ་རྣམས་ཀྱི་ཁ་ཏོན་བྱེད་རྒྱུ་ཞིག་དགོས་ཞེས་ནང་སོ་དཀོན་མཆོག་དར་རྒྱས་ཀྱིས་བསྐུལ་བའི་ངོར་ལྷ་སྡེ་མི་སྡེ་གང་གིས་ཆོས་བཞེངས་སར་ཡང་བཏོན་ཆོག་(༥༨བ) ― GLG021_Page_0118 ―
[མ་དཔེ་གཟིགས་ན་འདིར་གནོན།]
རྩིས་ཀྱི་སྤྱི་ཁྱབ་ལས་དམིགས་གསལ་མེད་པའི་སྙན་ཚིག་གི་སྦྱོར་བ་འདི་ནི་ཟ་ཧོར་གྱི་བནྡེས་སྦྱར་བའི་ཡི་གེའི་འདུ་བྱེད་པ་ཆང་ཁྱིམ་པ་བློ་བཟང་དངོས་གྲུབ་བོ། །བསྐལ་བརྒྱར་མི་ཤིགས་མཆོག་གསུམ་ཐུགས་རྗེའི་གར། །རྒྱལ་བ་ཀུན་ཡུམ་རྣམ་རོལ་ཚེ་སྦྱིན་མ། །ཡིད་བཞིན་འཁོར་ལོའི་དཀྱུས་རིང་སྤྱན་རས་ཀྱིས། །མི་གཡེལ་གཟིགས་པས་བདེན་ཚིག་འགྲུབ་བྱིན་རློབས། །ངག་དབང་འཇམ་དབྱངས་དགྱེས་པའི་བཤེས་གཉེན་མཆོག །བློ་གསལ་སྐལ་བཟང་རྒྱ་མཚོའི་རྣམ་འདྲེན་དུ། །ཇི་སྲིད་འཁོར་བ་མཐའ་ཅན་གྱུར་མིན་བར། །ངེས་པ་ལྔ་ལྡན་བཞིན་དུ་བརྟན་པར་ཤོག །ཁ་བའི་ལྗོངས་འདིར་ཐུབ་བསྟན་རབ་རྒྱས་ཤིང༌། །ས་སྐྱོང་རྒྱལ་པོའི་མངའ་ཐང་ཆབ་སྲིད་འཕེལ། །འགྲོ་ཀུན་རྫོགས་ལྡན་དུས་ཀྱི་བདེ་སྐྱིད་ལ། །ལྷན་ཅིག་ལོངས་སུ་སྤྱོད་པའི་སྐལ་ལྡན་ཤོག །ཅེས་སྨོན་ལམ་ཚིགས་སུ་བཅད་པ་འདི་ནི་གྲི་གུ་རྫོང་སྡོད་ཚེ་བདག་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །སྲིད་ན་མཚུངས་མེད་བསོད་ནམས་བརྒྱ་པའི་འོད། །མངོན་སུམ་རབ་འབར་ཤཱཀྱ་སེང་གེ་ཡི། །བསྟན་ལ་ཡང་དག་རི་མོར་བགྱིད་ཀུན་གྱི། །འཁྲུལ་མེད་ལམ་དུ་འཇུག་ངོག་བརྡའ་སྤྲོད་གཞུང༌། །ཤེས་བྱར་སྲིད་པའི་གནས་ལུགས་རྟོགས་བྱེད་པ། །སྒྲ་རིག་རྒྱ་མཚོའི་སྙིང་པོ་བསྲུབས་པའི་འབྲས། །དབྱངས་ཅན་གཙུག་ལག་ཡོངས་འདུའི་ལྗོན་པ་ལས། །འཛད་མེད་ལེགས་བཤད་འདོད་པ་ཅི་ཡང་འཇོ། །ཆ་བསགས་མདོ་ལྟར་རྟོགས་སླ་བརྡ་ཆད་རྣམས། །བཙུན་པ་ཟླ་བའི་གཞུང་ལ་ཉེར་འཁུ་བ། །ཚིག་ཉུང་དོན་རྒྱས་འཕངས་འགྲོའི་དབྱངས་ཀྱི་སྒྲ། །དཔྱོད་ལྡན་ཡོངས་ཀྱི་རྣ་བའི་རྒྱན་(༥༩ན) ― GLG021_Page_0119 ―
[མ་དཔེ་གཟིགས་ན་འདིར་གནོན།]
དུ་འཇེབས། །ཚངས་སྲས་ལྷ་མོའི་རོལ་མོ་གཡས་འཁྱིལ་མགྲིན། །བྱིངས་དང་རྣམ་འགྱུར་རྐྱེན་གྱི་སྐད་སྙན་པོས། །འཕགས་ཡུལ་མཁས་རྣམས་དགའ་སྐྱེད་པཎྜི་ཏ། །ཨ་ནུ་བྷུ་ཏིའི་གྲགས་པ་ཕྱོགས་ཀུན་དཀར། །ལུགས་འཛིན་དོན་གྱི་པཎ་ཆེན་ཁ་སྤུ་ཅན། །བ་ལ་བྷ་དྲ་མཆེད་གཉིས་ལེགས་བཤད་སྒོ། །ཐོས་བརྩོན་ལྡེ་མིག་གིས་འབྱེད་སེ་དཀར་རིགས། །འདར་ལོ་ངག་དབང་ཕུན་ཚོགས་འཇིག་རྟེན་མིག །གང་དེས་ལྗོངས་འདིར་མངོན་མེད་བསྟན་བཅོས་ཆེ། །འཁྲུལ་བྲལ་དཔྱད་གསུམ་དག་པའི་ཞུས་ཆེན་གྱིས། །བསྒྱུར་ཚེ་ཤོང་དཔང་བསྟན་པ་ཆ་ཕྲའི་ཟླ། །གང་བྱེད་ལྔ་རིག་རྫོགས་ལྡན་གསར་པ་བཞིན། །བསྟན་ལ་གཅེས་པར་འཛིན་པའི་ཤེས་ལྡན་རྣམས། །ཡིད་ལ་ཀུན་དགའི་མཛའ་བོས་དམ་འཁྱུད་པའི། །དགེ་ཚོགས་རྩ་བ་སྦོམ་པོར་སྐྱེད་བསྲིངས་རྩེར། །ཚོགས་གཉིས་དར་དྲག་འབྲས་བུ་འགྲུབ་པར་ཤོག །ལེགས་སྦྱར་གཙུག་ལག་འདི་ལ་སྒོ་གསུམ་དུ། །འབད་པས་ཐོས་དང་བསམ་པར་བྱེད་རྣམས་ཀྱི། །སྙིང་ལ་ངག་དབང་དབྱངས་ཅན་ལྷག་པའི་ལྷ། །ཞུགས་ནས་སྨྲ་བའི་རྒྱལ་པོ་འགྲུབ་པར་ཤོག །གངས་ཅན་ལྗོངས་འདིར་ཀླ་ཀློ་བླུན་སྐད་ཀྱིས། །བརྡ་དོན་འཚོལ་ལ་དམ་པའི་རྣམ་ཐར་དུ། །མི་འཛིན་ཚུལ་འདིར་སྦྱངས་པའི་དཔྱོད་ལྡན་གྱི། །དོག་པོར་འགོད་པའི་སྐལ་བཟང་ཐོབ་གྱུར་ཅིག །ཆོས་ཀུན་བལྟ་བའི་རིག་གནས་མིག་སྟོང་ཅན། །སྒྲ་དོན་རྡོ་རྗེ་རྩེ་བརྒྱ་གདེངས་ཙམ་གྱིས། །དྲི་བཅས་བསྟན་པའི་ས་འཛིན་བགྲོད་བྱེད་དང༌། །ལྷན་ཅིག་རྨོངས་ཆེན་ལྷ་མིན་དཔུང་འཇོམས་ཤོག །དབྱངས་ཅན་བརྡ་སྤྲོད་རྩ་འགྲེལ་ཉི་ཟླ་ཟུང༌། །དོན་ཀུན་རབ་གསལ་(༥༩བ) ― GLG021_Page_0120 ―
[མ་དཔེ་གཟིགས་ན་འདིར་གནོན།]
སྣང་བ་འོད་པོ་ཆེས། །བྱམས་མགོན་མཆོག་སྤྲུལ་ཟློས་གར་བསྒྱུར་མིན་བར། །འཇིག་རྟེན་ཀུན་གྱི་མུན་སེལ་སྒྲོན་མེར་ཤོག །ཅེས་ལེགས་པར་སྦྱར་བའི་བསྟན་བཅོས་དབྱངས་ཅན་བྱཱ་ཀ་རའི་རྩ་བའི་སྟོད་ཆ་ཙམ་ཞིག་ལྷ་མཐོང་ལོ་ཆེན་གྱིས་བལ་ཡུལ་དུ་བསྒྱུར་འདུག་ནའང་དུས་དབང་གིས་ལེགས་བཤད་དོན་དུ་གཉེར་བ་ཉུང་བས་མ་འཕེལ་ཞིང༌། ཕྱིས་རྟག་བརྟན་སྤྲུལ་སྐུས་པཎྜི་ཏར་འཕྲལ་སྐད་ཀྱི་དྲི་གཏུགས་ཙམ་ལ་བརྟེན་ནས་རྩ་བ་བསྒྱུར་ཞིང་བོད་འགྲེལ་ཞིག་བརྩམས་འདུག་ནའང་འགྱུར་སྐྱོན་དང་འགྲེལ་པ་འདྲེ་ཤར་སྒོ་དང་གླུད་ནུབ་སྒོ་བཞིན་དོན་ཐོག་ཏུ་ཕེབས་པར་མ་མཐོང་བས། རྩ་བ་ལ་འགྱུར་བཅོས་དང་པཎྜི་ཏ་ཨ་ནུ་བྷཱུ་ཏིས་མཛད་པའི་འགྲེལ་པ་རབ་ཏུ་བྱ་བ་གསལ་ལྡན་ཞེས་པ་གསར་དུ་བསྒྱུར་ན་བསྟན་རྒྱུན་ལ་ཕན་པར་བསམས་ནས་པཱ་ཎཱི་སོགས་ཀྱིས་བསྐུལ་བ་ལྟར་བརྡ་སྤྲོད་ཀྱི་གཞུང་ལུགས་མང་པོར་སྦྱངས་པའི་སེ་དཀར་རིགས་ཀྱི་འདར་ལོ་ངག་དབང་ཕུན་ཚོགས་ལྷུན་གྲུབ་ལ་ཚུལ་འདི་བསྒྲུབ་པར་རིགས་ཞེས་མཚམས་སྦྱར་བར་བརྟེན་གེགས་མེད་གྲུབ་པའི་ཚེ་སྨོན་ལམ་གྱི་ཚིགས་བཅས་གཅིག་དགོས་ཞེས་ལོ་ཙཱ་བ་ཉིད་ཀྱིས་བསྐུལ་བ་ལྟར་བདེན་ཚིགས་བརྗོད་པ་ཡོངས་འདུའི་ལྗོན་པ་འདི་ནི་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །དཀོན་མཆོག་ཐུགས་རྗེ་ཆེན་པོའི་བྱིན་རླབས་དང༌། །རྟེན་འབྲེལ་སླུ་མེད་ཆོས་སྲུང་མཐུ་སྟོབས་ཀྱིས། །སྤྲུལ་སྐུ་བློ་བཟང་ངག་དབང་གཡུང་དྲུང་ལྟར། །ནམ་ཡང་གཞོམ་ཞིག་མེད་པར་བརྟན་གྱུར་ཅིག །ཅེས་ཆ་དཀར་ནོ་མོན་ཁང་གི་སྤྲུལ་སྐུའི་བརྟན་བཞུགས་འདིའང་འོད་ཟེར་གྱིས་བསྐུལ་བ་ལྟར་ཟ་ཧོར་གྱི་བནྡེས་སུག་བྲིས་སུ་བྱས་སོ། །རྐང་(༦༠ན) ― GLG021_Page_0121 ―
[མ་དཔེ་གཟིགས་ན་འདིར་གནོན།]
གཉིས་གཙོ་བོ་སངས་རྒྱས་དང༌། །འདོད་ཆགས་དང་བྲལ་དམ་པའི་ཆོས། །ཚོགས་མཆོག་འཕགས་པའི་དགེ་འདུན་ལ། །བྱང་ཆུབ་བར་དུ་སྐྱབས་སུ་མཆིས། །བདག་གིས་འགྲོ་རྣམས་དོན་ཆེན་དུ། །དཀོན་མཆོག་གསུམ་པོ་མ་ལུས་པ། །ཀུན་འདུས་བླ་མའི་ངོ་བོ་རུ། །བསོད་ནམས་ཚོགས་ཆེན་བསགས་པར་བྱ། །མདུན་གྱི་ནམ་མཁར་སེང་གེའི་ཁྲི། །པདྨ་ཉི་ཟླའི་གདན་སྟེང་དུ། །དྲིན་ཅན་རྩ་བའི་བླ་མ་ནི། །སྐུ་མདོག་དཀར་དམར་རབ་བྱུང་ཚུལ། །གཡས་པ་ཆོས་འཆད་གཡོན་གླེགས་བམ། །དབུ་ལ་པཎ་ཞྭ་གསེར་མདོག་གསོལ། །ཞབས་གཉིས་རྡོ་རྗེ་དཀྱིལ་ཀྲུང་བཞུགས། །དེ་ཡི་སྐུ་ལ་དུས་གསུམ་གྱི། །སངས་རྒྱས་བྱང་ཆུབ་སེམས་དཔའི་ཚོགས། །ཉན་རང་དཔའ་བོ་མཁའ་འགྲོ་དང༌། །དམ་ཅན་ཆོས་སྐྱོང་སྲུང་མ་སོགས། །སྐྱབས་གནས་ཀུན་འདུས་ངོ་བོར་གྱུར། །བདེ་གཤེགས་སྲས་དང་སློབ་མར་བཅས། །འཁོར་བཅས་ཐུགས་རྗེ་ཆེན་པོའི་མཐུས། །ཐོག་མེད་འདིར་གཤེགས་མཆོད་ཡུལ་དུ། །རབ་བཞུགས་བདག་ལ་དགོངས་པར་མཛོད། །སྨན་སྤོས་ཆབ་ཀྱི་ཁྲུས་གསོལ་བས། །བདག་སོགས་འགྲོ་ཀུན་ཉོན་མོངས་དང༌། །ཤེས་བྱའི་སྒྲིབ་པ་རབ་བཀྲུས་ཏེ། །སྲིད་ཞིའི་དངོས་གྲུབ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཨཱཿཧཱུྃ། རེག་ན་བདེ་ཞིང་འཇམ་པ་ཡི། །ལྷ་རྫས་དར་དཀར་བཟང་པོའི་དྲི། །ཡོངས་སུ་བགོས་པས་རབ་དབྱི་ན། །དྲི་མེད་སྐུ་མཆོག་ཐོབ་པར་ཤོག །ཨོཾཧཱུྃཏྲཱཾཧྲིཿཨཱཀར་ཥ་ཡ་བི་ཤོ་དྷན་ཡེ་སྭཱཧཱ། སྲབ་འཇམ་གོས་བཟང་རིན་ཅེན་རྒྱན། །གདུགས་དང་བ་དན་བླ་བྲེ་དང༌། །བུམ་བཟང་བདུད་རྩིའི་ཆུས་བཀང་(༦༠བ) ― GLG021_Page_0122 ―
[མ་དཔེ་གཟིགས་ན་འདིར་གནོན།]
བ། །དཀོན་མཆོག་རྒྱ་མཚོའི་ཚོགས་ལ་འབུལ། །མཆོད་ཡོན་ཞབས་བསིལ་མེ་ཏོག་སྤོས། །མར་མེ་དྲི་ཆབ་ཞལ་ཟས་དང༌། །གདངས་སྙན་གླུ་དབྱངས་རོལ་མོར་བཅས། །དཀོན་མཆོག་རྒྱ་མཚོའི་ཚོགས་ལ་འབུལ། །འཁོར་ལོ་ནོར་བུ་བཙུན་མོ་དང༌། །བློན་པོ་གླང་ཆེན་ཅང་ཤེས་རྟ། །དམག་དཔོན་འདོད་ཡོན་རྣམ་པ་ལྔ། །དཀོན་ཅོག་རྒྱ་མཚོའི་ཚོགས་ལ་འབུལ། །ཁོད་སྙོམས་གསེར་གྱི་ས་གཞིའི་སྟེང༌། །ལྷུན་པོ་གླིང་བཞི་གླིང་ཕྲན་བརྒྱད། །རིན་ཆེན་རི་བོ་དཔག་བསམ་ཤིང༌། །འདོད་འཇོའི་བ་དང་མ་རྨོས་པའི། །ལོ་ཏོག་རྒྱལ་སྲིད་སྣ་བདུན་དང༌། །གཏེར་བུམ་སྒེག་ཕྲེང་གླུ་གར་མ། །མེ་ཏོག་བདུག་སྤོས་མར་མེ་དྲི། །ཉི་ཟླ་གདུགས་དང་རྒྱལ་མཚན་སོགས། །དངོས་བཤམས་ཡིད་ཀྱིས་རྣམ་སྤྲུལ་པའི། །མཆོད་སྤྲིན་རྒྱ་མཚོ་བཞེས་ནས་ཀྱང༌། །བདག་སོགས་འགྲོ་བ་མ་ལུས་པའི། །བསོད་ནམས་ཚོགས་ཆེན་རྫོགས་པར་ཤོག །འདས་དང་མ་བྱོན་ད་ལྟར་གྱི། །སྟོབས་བཅུ་མངའ་བའི་ཚོགས་རྣམས་དང༌། །བྱང་སེམས་རང་རྒྱལ་ཉན་ཐོས་ལ། །གུས་པས་ཕྱག་འཚལ་གསོལ་བ་འདེབས། །སྐུ་གསུམ་ཐུགས་ཡོན་འཕྲིན་ལས་རྣམས། །མཐོང་ཐོས་དྲན་པས་དོན་ལྡན་པར། །འགོད་མཛད་ཟས་གཙང་སྲས་པོ་ལ། །གུས་པས་ཕྱག་འཚལ་གསོལ་བ་འདེབས། །སངས་རྒྱས་ཀུན་གྱི་མཁྱེན་བརྩེ་དང༌། །ནུས་མཐུ་མ་ལུས་གཅིག་བསྡུས་པ། །འཕགས་པ་རིགས་གསུམ་མགོན་པོ་ལ། །གུས་པས་ཕྱག་འཚལ་གསོལ་བ་འདེབས། །གཟོད་མ་ཉིད་ནས་སངས་རྒྱས་ཀྱང༌། །ཉན་ཐོས་ཚུལ་གྱིས་འགྲོ་འདྲེན་པ། །གནས་བརྟན་ཆེན་པོ་བཅུ་དྲུག་ལ། །གུས་པས་ཕྱག་འཚལ་གསོལ་བ་འདེབས། །བསྟན་པ་རིམ་བརྒྱུད་ཆད་མེད་དུ། །འཛིན་མཛད་འོད་སྲུང་ཆེན་པོ་སོགས། །གཏད་རབ་བདུན་གྱི་འཕགས་ཚོགས་ལ། །གུས་(༦༡ན) ― GLG021_Page_0123 ―
[མ་དཔེ་གཟིགས་ན་འདིར་གནོན།]
པས་ཕྱག་འཚལ་གསོལ་བ་འདེབས། །གསང་སྔགས་ཉེ་ལམ་ཟབ་མོ་ལ། །བརྟེན་ནས་དངོས་གྲུབ་མཆོག་བསྙེས་པ། །གྲུབ་ཆེན་བརྒྱད་བཅུ་རྩ་བཞི་ལ། །གུས་པས་ཕྱག་འཚལ་གསོལ་བ་འདེབས། །ཤིང་རྟ་ཆེན་པོ་ཟུང་ལྡན་གྱིས། །ཐོག་དྲངས་རྒྱན་དྲུག་མཆོག་གཉིས་སོགས། །འཕགས་ཡུལ་པཎ་ཆེན་ཐམས་ཅད་ལ། །གུས་པས་ཕྱག་འཚལ་གསོལ་བ་འདེབས། །གངས་ཅན་མགོན་མེད་རྣམས་ཀྱི་མགོན། །ཆོས་རྒྱལ་མེས་དབོན་རིམ་བྱོན་དང༌། །མཁན་སློབ་པདྨའི་ངང་ཚུལ་ལ། །གུས་པས་ཕྱག་འཚལ་གསོལ་བ་འདེབས། །དམ་ཆོས་རྒྱ་ནས་གངས་ཅན་དུ། །བསྒྱུར་མཛད་འཇིག་རྟེན་མིག་གཅིག་པོ། །སྐད་གཉིས་སྨྲ་བའི་ཚོགས་རྣམས་ལ། །གུས་པས་ཕྱག་འཚལ་གསོལ་བ་འདེབས། །སྐྱེས་བུ་གསུམ་གྱི་རིམ་པ་ཡིས། །ཐུབ་བསྟན་ཉི་ལྟར་གསལ་མཛད་པ། །མཉམ་མེད་ཇོ་བོ་ཡབ་སྲས་ལ། །གུས་པས་ཕྱག་འཚལ་གསོལ་བ་འདེབས། །འཇམ་དབྱངས་གཞོན་ནུ་ངུར་མིག་གི །རྣམ་རོལ་བོད་ཡུལ་བསྟན་པའི་བདག །ཀུན་མཁྱེན་བློ་བཟང་གྲགས་པ་ལ། །གུས་པས་ཕྱག་འཚལ་གསོལ་བ་འདེབས། །མཐའ་འཁོབ་ཧོར་ཡུལ་མུན་པའི་གླིང༌། །དམ་ཆོས་སྣང་བས་གསལ་མཛད་པ། །རྒྱལ་དབང་བསོད་ནམས་རྒྱ་མཚོ་ལ། །གུས་པས་ཕྱག་འཚལ་གསོལ་བ་འདེབས། །དྲན་པ་ཙམ་གྱིས་དངོས་གྲུབ་ཀུན། །སྩོལ་མཛད་ཡིད་བཞིན་དབང་གི་རྒྱལ། །དྲིན་ཅན་རྩ་བའི་བླ་མ་ལ། །གུས་པས་ཕྱག་འཚལ་གསོལ་བ་འདེབས། །ཡི་དམ་དཀྱིལ་འཁོར་ལྷ་ཚོགས་དང༌། །དཔའ་བོ་མཁའ་འགྲོ་སྲུང་མའི་ཚོགས། །སླུ་མེད་སྐྱབས་མགོན་ཐམས་ཅད་ལ། །གུས་པས་ཕྱག་འཚལ་གསོལ་བ་འདེབས། །བདག་གི་ལུས་ངག་ཡིད་གསུམ་གྱི། །འབད་པས་བསགས་པའི་དགེ་བའི་འབྲས། །ཐེག་ཆེན་སེམས་བསྐྱེད་མཐུས་སྤེལ་ནས། །ནམ་ཡང་འཛད་པ་མེད་(༦༡བ) ― GLG021_Page_0124 ―
[མ་དཔེ་གཟིགས་ན་འདིར་གནོན།]
པར་ཤོག །དེ་ལྟར་བསོད་ནམས་ཕུང་པོའི་མཐུས། །དམྱལ་བའི་འགྲོ་རྣམས་ཚ་གྲང་གི །སྡུག་བསྔལ་ལས་ཐར་གནས་ངན་ཀུན། །མཐོ་རིས་སྐྱེད་ཚལ་ལྟར་འགྲུབ་ཤོག །ཡི་དྭགས་རྣམས་ཀྱང་བཀྲེས་སྐོམ་ལས། །རྣམ་གྲོལ་ཟས་སྐོམ་འབྱོར་བའི་ཚོགས། །གནོད་སྦྱིན་བང་མཛོད་ལྟར་རྙེད་ཅིང༌། །ལོངས་སུ་སྤྱོད་ནུས་བདེ་ལྡན་ཤོག །གསོད་སྤྱོད་བཀོལ་ཞིང་བརྡེག་དང་བརྡུང༌། །གཅིག་ལ་གཅིག་ཟ་ལ་སོགས་པའི། །སྡུག་བསྔལ་ཀུན་ལས་དུད་འགྲོ་རྣམས། །ཐར་ནས་བདེ་དང་ལྡན་པར་ཤོག །མི་རྣམས་ནད་ཀྱིས་མནར་བ་དང༌། །དབང་པོ་མ་ཚང་དབུལ་ཞིང་ཕོངས། །མི་རྒོད་གཅན་གཟན་དུག་མཚོན་གཡུལ། །འཇིགས་པ་ཀུན་ལས་ཐར་བར་ཤོག །ཁ་ན་མ་མཐོ་མེད་པ་ཡི། །ལོངས་སྤྱོད་ལྡན་ཞིང་རིང་པོར་འཚོ། །དམ་ཆོས་བསྒྲུབ་པའི་མཐུན་རྐྱེན་རྣམས། །འབད་པ་མེད་པར་ཚང་བར་ཤོག །ལུས་གཅད་གཏུབ་ཅིང་དྲིལ་བ་སོགས། །འཐབ་ཅིང་རྩོད་པའི་སྡུག་བསྔལ་ལས། །ལྷ་མིན་ཚོགས་རྣམས་རབ་ཐར་ནས། །བྱམས་པའི་སེམས་དང་ལྡན་པར་ཤོག །འཆི་འཕོ་ལྟུང་བར་བྱེད་པ་དང༌། ཁྱབ་པ་འདུ་བྱེད་སྡུག་བསྔལ་ལས། །འདོད་དང་གཟུགས་ཁམས་གཟུགས་མེད་ལྷ། །ཐར་ནས་གཏན་བདེར་སྤྱོད་པར་ཤོག །བདག་ཀྱང་དེང་ནས་སངས་རྒྱས་ཀྱི། །བྱང་ཆུབ་མ་ཐོབ་དེ་སྲིད་བར། །མི་ཁོམ་གནས་སུ་མི་སྐྱེ་ཞིང༌། །དལ་འབྱོར་རྟེན་བཟང་ཐོབ་པར་ཤོག །དགེ་བའི་བཤེས་ཀྱིས་རྗེས་འཛིན་ཅིང༌། །བསྟན་ལ་རབ་ཞུགས་ཁྲིམས་དང་ལྡན། །སྡེ་སྣོད་རྣམ་གསུམ་ཐོས་པ་དང༌། །དེ་དོན་བསམ་ཞིང་སྒོམ་པར་ཤོག །ལུས་བདེ་བློ་གསལ་རིག་པ་རྣོ། །མཐུན་པའི་རྐྱེན་ཀུན་ངང་གིས་ཚང༌། །མི་འདོད་ཉེར་འཚེ་མིང་ཙམ་ཡང༌། །མི་འབྱུང་རྟག་ཏུ་སྤྱོད་པར་ཤོག །ཐོག་མེད་ནས་བགོས་སྒྲིབ་གཉིས་ཚོགས། །རབ་བྱང་ས་ལམ་ཡོན་ཏན་ཀུན། །རང་སེམས་(༦༢ན) ― GLG021_Page_0125 ―
[མ་དཔེ་གཟིགས་ན་འདིར་གནོན།]
ལ་རྫོགས་ཆོས་གཟུགས་སྐུ། །ལུས་ཅན་ཀུན་དོན་འཐོབ་པར་ཤོག །མདོར་ན་བདག་གིས་བསྒྲུབས་པ་དང༌། །གཞན་གྱི་དགེ་ལ་ཡི་རང་སོགས། །ལེགས་བྱས་རྒྱ་མཚོ་གང་ཐོབ་དེ། །རྣམ་པ་ཐམས་ཅད་མཁྱེན་རྒྱུར་བསྔོ། །ཞེས་རྒྱུན་འཁྱེར་ཉམས་ལེན་གྱི་རིམ་པ་དོན་ཚང་ཞིང་ཚིགས་ཉུང་ངུར་བྱས་པ་འདི་ལྟ་བུ་ཞིག་དགོས་ཞེས་དཀོན་མཆོག་གསུམ་ལ་མི་ཕྱེད་པའི་དད་པ་དང་ལྡན་པ་དཔོན་མོ་སཱ་ཁན་ཇུས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །ངག་དབང་ལྷག་པའི་ལྷ་ཡི་བློ་གྲོས་གཏེར། །ཐོབ་པའི་བསྐལ་བཟང་ལེགས་བཤད་རྒྱ་མཚོའི་སྡེ། །འཇམ་དབྱངས་དགེ་བའི་བཤེས་གཉེན་དམ་པ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །མི་ཁོམ་གནས་སུ་ནམ་ཡང་མི་སྐྱེ་ཞིང༌། །མཐོ་རིས་ཡོན་ཏན་བདུན་ཚང་རྟེན་བཟང་ཐོབ། །སྲིད་ཞིའི་བདེ་སྐྱིད་བརྒྱུད་མར་མྱོང་བཞིན་ནས། །མྱུར་དུ་རྫོགས་པའི་བྱང་ཆུབ་ཐོབ་པར་ཤོག །དཀོན་མཆོག་ལ་མཆོད་དབུལ་ཕོངས་ཚོགས་ལ་སྦྱིན། །སྲོག་སྐྱོབ་ཁ་ཏོན་ཕྱག་སྐོར་ཁྲིམས་བསྲུང་འདེབས་སོགས། །ཅི་ནུས་བགྱིས་པའི་དགེ་བ་མ་ལུས་པ། །ཀུན་མཁྱེན་ཡེ་ཤེས་ཐོབ་པའི་རྒྱུ་རུ་བསྔོ། །ཞེས་གསོལ་སྨོན་ལམ་བསྔོ་བའི་ཚིགས་སུ་བཅད་པ་འདི་ནི་དཔོན་མོ་བསོད་ནམས་སྒྲོན་མས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །ངག་དབང་འཇམ་མགོན་བློ་གྲོས་བཟང་པོ་ཡིས། །གསུང་རབ་རྒྱ་མཚོའི་མཐར་སོན་དགེ་བའི་བཤེས། །ལྷག་པའི་ལྷ་མཆོག་ཟུར་ཕུད་ལྔ་པ་དང༌། །དབྱེར་མེད་ངོ་བོ་གཅིག་ལ་གསོལ་བ་འདེབས། །བདག་སོགས་གདུལ་བྱའི་དཔལ་དུ་གཟུགས་ཀྱི་སྐུ། །ངེས་པ་ལྔ་ལྡན་ཇི་བཞིན་འཁོར་བའི་མཐའ། །(༦༢བ) ― GLG021_Page_0126 ―
[མ་དཔེ་གཟིགས་ན་འདིར་གནོན།]
རྫོགས་མིན་དེ་སྲིད་བཞུགས་ནས་ཟབ་རྒྱས་ཀྱི། །ཆོས་འཁོར་བླ་ན་མེད་པར་བསྐོར་བར་གསོལ ། །མགོན་ཁྱོད་ཐུགས་རྗེ་ཆེན་པོའི་བདུད་རྩི་ཡིས། །བདག་སྙིང་ཟ་མ་ཏོག་ཏུ་རྟག་འཁྱིལ་བས། །འདི་ཕྱི་ཀུན་ཏུ་དགེ་བའི་བསོད་ནམས་གཟུགས། །ནོར་འཛིན་ལྟོ་བར་ཡངས་མིན་དོགས་པོར་ཤོག །ཅེས་པའི་ཚིགས་སུ་བཅད་པ་འདི་ནི་གོང་ནས་ཆོས་བསྒྱུར་བའི་ལོ་ཙཱ་སློབ་པ་སོགས་མང་དུ་ཐོས་པར་འོངས་པའི་སན་ཆག་པཀྴིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་བློ་བཟང་དངོས་གྲུབ་བོ། །སོམ་ཉི་དང་བྲལ་ངེས་པར་སྐྱབས་སོང་ན། །སླུ་མེད་སངས་རྒྱས་དམ་ཆོས་འདུས་པའི་ཚོགས། །ཁྱད་པར་ཀུན་བཟང་རིགས་གསུམ་མགོན་པོ་ལ། །འོ་དོད་དྲག་པོས་གསོལ་ན་འཇིགས་ཆེན་སྐྱོབས། །ཇི་སྙེད་ཕྱོགས་བཅུའི་འཇིག་རྟེན་ཁམས་བཞུགས་པའི། །རྒྱལ་བ་སྲས་དང་སློབ་མར་བཅས་རྣམས་དགོངས། །བདག་གིས་ཐོག་མ་མེད་ནས་ད་ལྟའི་བར། །རྗེ་བོ་ཕ་མ་མཆིས་འདྲང་བུ་ཚ་དང༌། །མཛའ་གྲོགས་གཉེན་བཤེས་མངའ་འབངས་ལོངས་སྤྱོད་དོན། །འདོད་ཆགས་དབང་གིས་བསགས་པའི་སྡིག་པ་དང༌། །དགྲ་དང་མི་མཛའ་འཇོམས་བྱེད་ངན་གཡོའི་འཕྲུལ། །དུག་སྦྱོར་མཚོན་སྣུན་གཞན་དག་རྦད་པ་སོགས། །ཚེ་སྲོག་ལོངས་སྤྱོད་བདེ་སྐྱིད་འཕྲོག་ནུས་པའི། །ཞེ་སྡང་དབང་གིས་བསྒྲུབས་པའི་སྡིག་ལས་ཚོགས། །བྱོལ་སོང་བཀོལ་སྤྱོད་གསོད་དང་རི་དྭགས་རྔོན། །ཕ་མ་ནད་པ་བཀྲེས་སྐོམ་ཕོངས་སོགས་ལ། །ཕན་གདགས་མི་བྱེད་མི་གུས་འཚེ་ཞིང་འདོར། །བླ་མ་དཀོན་མཆོག་རྣམ་གསུམ་རྒྱུ་འབྲས་ལ། །ཐེ་ཚོམ་ལོག་པར་བལྟ་དང་སྤོངས་སེམས་བྱེད། །རྒྱགས་པའི་སྙེམས་དང་དངོས་པོར་འཇུངས་པ་སོགས། །ཉེས་ཀུན་རྩ་བ་གཏི་མུག་མ་རིག་སྟེ། །མདོར་ན་དུག་ལྔའི་རྒྱུ་ལས་(༦༣ན) ― GLG021_Page_0127 ―
[མ་དཔེ་གཟིགས་ན་འདིར་གནོན།]
སྒོ་གསུམ་གྱིས། །བསགས་པའི་སྡིག་ལྟུང་ཉེས་པའི་ཚོགས་རྣམས་ཀུན། །མགོན་པོ་ཐུགས་རྗེ་ཆེ་ལྡན་ཁྱེད་རྣམས་ཀྱི། །སྤྱན་སྔར་མི་འཆབ་མི་སྦེད་རབ་བསྒྲགས་ཏེ། །འགྱོད་པ་དྲག་པོས་ནོངས་རྣམས་མ་ལུས་བཤགས། །ཇི་སྲིད་འཚོ་དང་ལོ་ཟླ་ཞག་དུས་སོགས། །གང་ནུས་དེ་སྲིད་ནག་པོའི་ལས་རྣམས་སྡོམ། །སྡིག་པའི་གཉེན་པོར་བསྒྲུབས་པའི་དགེ་ཚོགས་ཀྱི། །འབྲས་བུ་ཚེ་འདིར་བདེ་ཞིང་སྐྱིད་པ་དང༌། །ཡང་སྲིད་ཀུན་ཏུ་མི་ཁོམ་གནས་སྤངས་ནས། །མཐོ་རིས་རྟེན་ཐོབ་དམ་པའི་ཆོས་དང་མཇལ། །ས་དང་ལམ་གྱི་ཡོན་ཏན་གོང་དུ་འཕེལ། །ངན་སོང་གནས་སྟོངས་འགྲོ་ཀུན་བདེ་འགྲོར་སྤྱོད། །རིང་པོར་མི་ཐོག་བདག་གིས་གཙོ་བྱས་པའི། །ཡིད་ཅན་མ་ལུས་སངས་རྒྱས་འཐོབ་པར་ཤོག །ཅེས་གཉེན་པོ་སྟོབས་བཞིའི་བཤགས་པ་ཐམས་ཅད་མཁྱེན་པ་ཙོང་ཁ་པ་ཆེན་པོའི་བཀའ་འབུམ་དུ་བཞུགས་པ་དེ་ཅུང་ཟད་མ་འཁྱོངས་པར་ཤིན་ཏུ་མདོར་བསྡུས་ཤིང་དོན་ཚང་བ་འདི་ལྟ་བུ་ཞིག་དགོས་ཞེས་དད་སྟོབས་ཀྱི་དབང་ཕྱུག་ཨུ་ཆིར་དུ་ཐའི་ཇིའི་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །མང་ཐོས་དོན་ཀུན་གྲུབ་པའི་གྲུ་གཟིངས་ཀྱིས། །གསུང་རབ་རྒྱ་མཚོའི་མཐར་བགྲོད་དགེ་བའི་བཤེས། །མཆོག་གསུམ་ཐུགས་རྗེའི་མཐོ་རིས་ཡོན་ཏན་བདུན། །ཚང་བའི་རྟེན་བཟང་འཛིན་སྨོན་འགྲུབ་བྱིན་རློབས། །ཞེས་ཆོས་རྗེ་དོན་གྲུབ་རྒྱ་མཚོའི་སྐྱེ་སྲིད་མྱུར་དུ་འཛིན་པའི་སྨོན་ལམ་འདིའང་དབོན་པོ་གྲྭ་རིས་ཀྱི་འདོད་པ་ལྟར་ཟ་ཧོར་གྱི་བནྡེས་བྲིས། །གཞི་ལམ་འབྲས་སྟོན་དངོས་བརྒྱུད་རྡོ་རྗེ་འཛིན། །དགྱེས་མཛད་རྡོ་རྗེའི་ཁྲག་འཐུང་ཀུན་གྱི་གཙོ། །བསྟན་སྲུང་མཆོག་གྱུར་གུར་མགོན་སྟོབས་འཕྲོག་དབང༌། །དེང་འདིར་བྱིན་རླབས་ནུས་པའི་མཐུ་(༦༣བ) ― GLG021_Page_0128 ―
[མ་དཔེ་གཟིགས་ན་འདིར་གནོན།]
ཇ་མ་ཡི་དམ་སྲུང་མར་གསོལ་བ་འདེབས་པ་དང་མཆོད་པ་འབུལ་བ་གང་འདོད་བསྒྱུར་ཆོག་རྩིས་ཡིན། དཔུང་བསྐྱེད། །སྣོད་ལྡན་ཀུན་ལ་དགའ་བཞིའི་ཡེ་ཤེས་མཆོག །ལེགས་སྩོལ་ཧེ་རུ་ཀ་དཔལ་རྟུལ་ཞུགས་ཀྱིས། །ཡིད་སྲུབ་གཡུལ་ལས་རྣམ་པར་རྒྱལ་བ་ཡི། །རིང་ལུགས་རྡོ་རྗེ་འཆང་དངོས་ཇ་མར་གསོལ་བ་འདེབས་དང་མཆོད་པ་འབུལ་གང་འདོད་དུ་སྒྱུར། ཉི་ཟླའི་སྣང་བ་ལྟར་གསལ་ཤོག །གསུང་ངག་དབང་བཞིའི་མཐོ་རིས་ཆུ་བོའི་རྒྱུན། །ཇོ་གྲོས་ཟ་མ་ཏོག་འཁྱིལ་སྐལ་བཟང་ཅན། །རྒྱ་ཆེན་ཐུབ་བསྟན་དབྱར་མཚོ་ལྟར་འཕེལ་བའི། །གདན་གསོལ་བ་འདེབས་དང་མཆོད་པ་འབུལ་གང་འདོད་དུ་སྒྱུར་ཆོག །གསུམ་ཚང་བའི་མགོན་དེ་ཞབས་བརྟན་ཤོག །རྡོ་རྗེ་ཐེག་པའི་སྨིན་གྲོལ་ཕྱག་བཞེད་རྣམས། །འཛིན་མཁས་གདན་གསུམ་ངོ་བོའི་བཤེས་གཉེན་གྱིས། །སྡེ་འདི་ཡོངས་གང་འཇམ་མགོན་ས་སྐྱ་པའི། །བསྟན་པ་རིན་པོ་ཆེ་ལ་གསོལ་བ་འདེབས་དང་མཆོད་པ་འབུལ་གང་འདོད་དུ་སྒྱུར། རིན་ཆེན་ཕྱོགས་བཅུར་རྒྱས་པར་ཤོག །ཁམས་གསུམ་དབང་སྡུད་རྗེ་བཙུན་རིག་བྱེད་མ། །དངོས་གྲུབ་མཆོག་སྩོལ་ལྷ་ཆེན་ཚོགས་ཀྱི་བདག །བསམ་པའི་རེ་བ་ཡོངས་སྐོང་འདོད་པའི་རྒྱལ། །སྲིད་ཞིའི་ཕུན་ཚོགས་སྩོལ་ལ་གསོལ་བ་འདེབས་དང་མཆོད་པ་འབུལ་གང་འདོད་དུ་སྒྱུར། ཀུན་སྩོལ་བཀྲ་ཤིས་ཤོག །ཅེས་རིང་པོར་འཚོ་བའི་རྟེན་འབྱུང་གི་ཚིགས་བཅད་ཤློ་ཀ་གཅིག་ལ་གསོལ་འདེབས་ཇ་མཆོད་སོགས་གང་འདོད་དུ་བསྒྱུར་ཆོག་པ་ཞིག་དགོས་ཞེས་རྒྱུད་སྡེ་བཞིའི་སྨིན་གྲོལ་ཕྱག་བཞེས་ཀྱི་རྒྱུན་བཟང་པོ་མ་ཉམས་པར་འཛིན་པའི་འདུས་གྲྭ་གོང་དཀར་རྡོ་རྗེ་གདན་པ་སྤྱི་ཚོགས་ཀྱིས་བསྐུལ་བ་ལྟར་གསོལ་འདེབས་སྨོན་ལམ་ཇ་མཆོད་སོགས་རྒྱ་འབག་གི་མིག་བཞིན་འཕྲུལ་ཆོག་པ་འདི་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །རྙེད་རྒྱུད་འབུམ་རྫོགས་འཚམས་སུ་འདྲི། །དཀའ་གསང་ཆེན་སྨིན་གྲོལ་ལམ་ཟབ་མོས། །(༦༤ན) ― GLG021_Page_0129 ―
[མ་དཔེ་གཟིགས་ན་འདིར་གནོན།]
རྒྱུ་སྦྱོར་གཙོར་གྱུར་མཁའ་མཉམ་ལུས་ཅན་ཀུན། །འདིའམ་ཡང་སྲིད་བདུན་དང་བཅུ་དྲུག་ལས། །མི་འདའ་བཅུ་གསུམ་རྡོ་རྗེའི་སར་བགྲོད་ཤོག །ཤེར་ཕྱོགས་རྫོགས་མཚམས་སུ་འདྲི། །རྟག་དང་ཆད་པའི་མཐའ་ལས་རྣམ་གྲོལ་བ། །ཆོས་ཀུན་རང་བཞིན་གྱིས་སྟོངས་དབུ་མའི་ལམ། །ཡོན་སྦྱོར་དང་བཅས་འགྲོ་རྣམས་ཀྱིས་རྟོགས་ནས། །སྲིད་རྫུན་ཚང་རྡིབ་འཁོར་མཚོ་ལས་སྒྲོལ་ཤོག །བྱེ་བ་ཕལ་ཆེན་རྫོགས་མཚམམས་སུ་འདྲི། ཕྲག་བརྒྱའི་རྡུལ་རྙེད་སངས་རྒྱས་ཀྱི། །ཞིང་ཁམས་རྒྱ་མཚོར་མཐའ་མེད་མ་རྒན་ཚོགས། །འཁྲིད་པའི་ས་མཁན་བྱེད་ནུས་རང་རྒྱུད་ལ། །འཇུག་པར་རྒྱལ་བ་ཀུན་གྱིས་བྱིན་བརླབས་གསོལ། །ཟབ་དཀོན་བརྩེགས་རྫོགས་མཚམས་སུ་འདྲི།ཅིང་རྒྱ་ཆེ་འཁོར་ལོ་མཐའ་མའི་དོན། །བདག་སོགས་སྐྱེ་རྒུ་ཡོངས་ཀྱིས་ལེགས་རྟོགས་ཤིང༌། །སྣང་མཐའི་མི་འཁྲུག་འཇམ་དཔལ་ཞིང་ཁམས་དེར། །སྲིད་བཟུང་ཐེག་ཆེན་ཆོས་ལ་ལོངས་སྤྱོད་ཤོག །རྟུལ་མདོ་མང་རྫོགས་མཚམས་སུ་འདྲི། འབྲིང་རྣོན་པོའི་གདུལ་བྱ་འཇུག་པའི་སྒོ། །མཆོག་དམན་ཐེག་པ་སྣ་ཚོགས་མདོ་ཡི་དོན། །སྨན་གྱི་ལྗོན་པས་སྦྱིན་བདག་གིས་མཚོན་འགྲོའི། །སྒྲིབ་གཉིས་བག་ཆགས་བཅས་པའི་གཉེན་པོར་ཤོག །སྐྱེ་བར་འདུལ་ལུང་རྫོགས་མཚམས་སུ་འདྲི། ཚུལ་ཁྲིམས་གཙང་མའི་ཞིང་ས་ལ། །ཐར་པའི་མྱུ་གུ་དར་དྲག་སྨིན་པའི་རྩེར། །རྣམ་གྲོལ་དགྲ་བཅོམ་སྙེ་མས་ཡོངས་དུད་པར། །བདག་སོགས་འགྲོ་རྣམས་ལོངས་སུ་སྤྱོད་གྱུར་ཅིག །ཅེས་རྒྱུད། ཤེར་ཕྱོགས། མདོ་མང༌། འདུལ་ལུང་རྣམས་སྡེ་ཚན་སོ་སོའི་རྫོགས་མཚམས་སུ་འདྲི་རྒྱུའི་སྨོན་ལམ་གྱི་ཚིགས་སུ་བཅད་པ་འདི་ནི་མདའ་དཔོན་བསམ་དར་བ་བློ་བཟང་བསྟན་འཛིན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །(༦༤བ) ― GLG021_Page_0130 ―
[མ་དཔེ་གཟིགས་ན་འདིར་གནོན།]
ཁྱད་མཚན་བསིལ་ཟེར་ཙམ་གྱིས་སྲིད་གདུང་མུན། །སེལ་ན་ཐུགས་རྗེའི་དཀྱིལ་འཁོར་ཉ་རྒྱས་པ། །དད་པའི་ཡིད་མཁར་ཤར་ཚེ་བདེ་སྐྱིད་ཀྱི། །ག་བུར་ཟེག་མ་སྩོལ་བའི་མཆོག་གསུམ་གྱི། །བདེན་པར་གསུང་བ་ཟས་གཙང་སྲས་ཀྱི་བཀའ། །ལུང་ནོད་ཁ་ཏོན་འདྲི་ཀློག་བྱང་ཆུབ་པར། །བྱེད་པོར་གཏོགས་སོ་ཅོག་ལ་ཡིད་སྲུབ་མདས། །ནམ་ཡང་འབིགས་པར་ནུས་མིན་བྱིན་གྱིས་རློབས། །སྐྱེ་རྒུའི་ས་ཆེན་བདེ་བྱེད་གྲིབ་བསིལ་བར། །ཐུབ་བསྟན་ཡོངས་འདུའི་ལོ་འདབས་རབ་རྒྱས་རྩེར། །དེ་འཛིན་སྐྱེས་བུ་ཁྲིམས་ལྡན་འདུས་པའི་སྡེ། །ཕུན་ཚོགས་འབྲས་བུའི་དཔལ་གྱིས་ཉེར་དུད་ཤོག །ཡངས་པའི་ས་ལ་ལེགས་བྱས་གསེར་འཁོར་གྱིས། །དབང་སྒྱུར་ས་སྤྱོད་སྐུ་ཚེ་མངའ་ཐང་རྒྱས། །རྒྱུ་སྦྱོར་སྦྱིན་པའི་བདག་པོའི་འདི་དང་ཕྱིའི། །བསོད་ནམས་ཉི་མའི་དངོས་བརྒྱ་འབར་བར་ཤོག །རྒྱལ་གསུང་ཐོས་བསམ་མཆོད་དང་རི་མོ་རུ། །བྱེད་རྣམས་བསྲུངས་བར་ཞལ་འཆེས་གསང་བདག་དང༌། །འཇིག་རྟེན་སྐྱོང་བའི་དབང་པོ་མཐའ་དག་གིས། །རྟག་ཏུ་གྲོགས་བྱེད་བཀྲ་ཤིས་དགའ་སྟོན་སྩོལ། །ཞེས་པ་འདིའང་ལྷ་ས་བྱང་གླིང་བསམ་གྲུབ་རྒྱལ་པོས་རྒྱུད་སྡེ་ཐོར་བུ་དང༌། འདུལ་བ་ཤེར་ཕྱོགས་མདོ་མང་རྣམས་གངས་ལྗོངས་སུ་འགྱུར་རོ་ཅོག་བཞེངས་པའི་དུས་ཡི་གེ་བ་རྣམས་ཀྱིས་ཁ་ཏོན་དུ་བྱེད་རྒྱུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །དམ་པ་རིགས་བརྒྱའི་ཐུགས་རྗེའི་ཆུ་རྒྱུན་གྱིས། །བཀྲ་ཤིས་ཆོས་ལྡན་ལས་ཉོན་དྲི་མ་ཀུན། །རབ་བཀྲུས་བདེ་ཆེན་དག་པའི་ཞིང་ཁམས་སུ། །རྫུས་སྟེ་སྐྱེས་ནས་བྱང་ཆུབ་འཐོབ་པར་ཤོག །ཅེས་པ་འདིའང་སྔགས་བན་ངག་དབང་འཕྲིན་ལས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །ཐུབ་བསྟན་འཕེལ་ཞིང་དེ་འཛིན་(༦༥ན) ― GLG021_Page_0131 ―
[མ་དཔེ་གཟིགས་ན་འདིར་གནོན།]
སྐྱེས་བུ་དང༌། །ས་ཆེན་བྱམས་པས་སྐྱོང་རྣམས་རབ་ཏུ་བརྟན། །འཇིག་རྟེན་ཀུན་བདེ་བདག་སོགས་སྨོན་པ་རྣམས། །འགྲུབ་པར་མཆོག་གསུམ་ཐུགས་རྗེས་བྱིན་གྱིས་རློབས། །ཞེས་པ་འདིའང་ལྷ་ས་བ་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །དཀོན་མཆོག་རིན་ཅེན་གསུམ་གྱི་བདེན་པ་དང༌། །རྒྱུ་འབྲས་རྟེན་ཅིང་འབྲེལ་འབྱུང་སླུ་མེད་མཐུས། །ཅི་བཏབ་སྨོན་ལམ་དཔག་བསམ་ཡོངས་འདུའི་འབྲས། །ལེགས་སྨིན་རོ་བརྒྱའི་དཔལ་ལ་སྤྱོད་པར་ཤོག །ཅེས་པ་འདིའང་ལེགས་གླིང་པས་བསྐུལ་བ་ལྟར་ཟ་ཧོར་གྱི་བནྡེས་བྲིས། །འཇིག་བརྒྱད་ལས་སྒྲོལ་རྒྱལ་ཡུམ་འཕགས་མ་དང༌། །དབྱེར་མེད་དཔལ་ལྡན་བླ་མར་གསོལ་འདེབས་ན། །སྙིང་དབུས་ཟེའུ་འབྲུར་རྟག་བཞུགས་དེང་ནས་བཟུང༌། །བྱང་ཆུབ་བར་དུ་འབྲལ་མེད་རྗེས་འཛིན་ཤོག །ཅེས་པ་འདིའང་ཨོ་རོད་གཡོན་རུ་ཨཱ་ནནྟའི་ཁ་ཏོན་དུ་ཟ་ཧོར་གྱི་བནྡེས་སྦྱར། །ཟག་མེད་བདེ་ཆེན་གར་བསྒྱུར་ཐོད་ཕྲེང་རྩལ། །སྟོང་པའི་རང་མདང་ཡིད་འཛིན་འཚོ་རྒྱལ་གཉིས། །གང་འདུལ་སྣ་ཚོགས་སྤྲུལ་པ་མཚན་བརྒྱད་སོགས། །རྩ་གསུམ་མཁྱེན་ནུས་ཐབས་ཤེས་ཟུང་འཇུག་མཐུས། །རིགས་བརྒྱའི་ཁྱབ་བདག་བཤེས་གཉེན་རྡོ་རྗེ་འཛིན། །ཟུར་ཆེན་ཆོས་དབྱིངས་རང་སར་རྣམ་གྲོལ་བའི། །ངོ་མཚར་སྤྲུལ་པའི་སྐུ་མཆོག་གངས་ལྗོངས་འདིར། །རིང་མིན་འཁྲུལ་མེད་མངོན་སུམ་བསྟན་དུ་གསོལ། །ཨ་ཧཾ་མི་གཤིགས་འཆི་བ་མེད་པའི་སྐུ། །རྒྱ་ཆེན་ཆོས་འཁོར་བསྐོར་བ་ཚངས་པའི་གསུང༌། །མཁྱེན་བརྩེ་ནུས་ལྡན་རྡོ་རྗེའི་ཐུགས་མངའ་བས། །བཀའ་གཏེར་བསྟན་པའི་(༦༥བ) ― GLG021_Page_0132 ―
[མ་དཔེ་གཟིགས་ན་འདིར་གནོན།]
སྲོག་ཏུ་འགྱུར་བྱིན་རློབས། །ཞེས་པ་འདིའང་སྨན་སྒོམ་འབྲང་རྒྱས་པ་ངག་དབང་དོན་གྲུབ་གྱིས་ཟུར་ཆེན་རྡོ་རྗེ་འཆང་ཆོས་དབྱིངས་རང་གྲོལ་གྱི་སྤྲུལ་པའི་སྐུ་མཆོག་མྱུར་འབྱོན་གྱི་རྟེན་འབྲེལ་དུ་དཔལ་ཨྱོན་ཡབ་ཡུམ་མཚན་བརྒྱད་རྣམས་བཞེངས་པའི་གཟུངས་འབུལ་གྱི་སྨོན་ལམ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །པདྨ་ཐོད་ཕྲེང་ཐུགས་རྗེའི་ཉི་ཟེར་གྱིས། །ངག་དབང་ཤེས་རབ་ཕན་བདེ་འདབས་བརྒྱའི་ཚལ། །རབ་བཞད་འདི་དང་གཏན་འདུན་སྣང་བའི་རྩེར། །འབྲལ་མེད་སྙིང་གི་དབུས་སུ་རྟག་འཆར་ཤོག །ཅེས་པའང་ཟ་ཧོར་གྱི་བནྡེས་སུག་བྲིས་སུ་བྱས་སོ། །མདུན་གྱི་ནམ་མཁར་རྩ་བརྒྱུད་བླ་མ་དང༌། །ཡི་དམ་མཁའ་འགྲོ་ཆོས་སྐྱོང་སྲུང་མ་སོགས། །དཀོན་མཆོག་གསུམ་འདུས་རྣམ་པ་སྤྱན་རས་གཟིགས། །བདག་ལ་དགྱེས་པའི་ཚུལ་གྱིས་བཞུགས་པར་གྱུར། །བརྒྱ་ཕྲག་ལུས་སྤྲུལ་གུས་པས་ཕྱག་འཚལ་ཞིང༌། །དངོས་འབྱོར་ཡིད་སྤྲུལ་ཀུན་བཟང་མཆོད་སྤྲིན་འབུལ། །བྱས་དང་བྱེད་བཞིན་བྱེད་འགྱུར་སྡིག་ཚོགས་བཤགས། །སྲིད་ཞིའི་དགེ་ཚོགས་རྣམས་ལ་རྗེས་ཡི་རང༌། །ཆོས་འཁོར་ཆད་པ་མེད་པར་བསྐོར་བར་བསྐུལ། །བསྐལ་བརྒྱར་མྱ་ངན་མི་འདའ་བཞུགས་གསོལ་འདེབས། །དགེ་བའི་འབྲས་བུ་མཁའ་མཉམ་སེམས་ཅན་རྣམས། །མི་གནས་མྱ་ངན་འདས་པ་ཐོབ་ཕྱིར་བསྔོ། །བདག་སོགས་སྙིང་ནས་ཁྱེད་ལ་གསོལ་འདེབས་ན། །ཚེ་འདིའི་སྣང་བ་འགག་དང་ལྷན་ཅིག་ཏུ། །མགོན་ཁྱོད་མངོན་སུམ་བྱོན་ནས་དག་པའི་ཞིང༌། །བདེ་བ་ཅན་གྱི་གནས་སུ་དྲང་དུ་གསོལ། །དེར་ནི་སྒྲིབ་བྲལ་མེ་ཏོག་པདྨའི་སྦུབས། །བརྫུས་ཏེ་སྐྱེ་བ་བླངས་ནས་འོད་དཔག་མེད། །སྲས་བཅས་མངོན་སུམ་(༦༦ན) ― GLG021_Page_0133 ―
[མ་དཔེ་གཟིགས་ན་འདིར་གནོན།]
མཇལ་ཞིང་དམ་པའི་ཆོས། །ལེགས་ཐོས་ཐེག་ཆེན་ལམ་གྱི་རྒྱུད་སྨིན་ཤོག །གལ་ཏེ་སྔོན་བསགས་ལས་ངན་སྟུག་པོ་ཡིས། །དེ་འདྲ་མྱོང་བའི་སྐལ་བཟང་མ་ཐོབ་ན། །བྱང་ཆུབ་སྙིང་པོར་མཆིས་མིན་དེ་སྲིད་དུ། །དལ་འབྱོར་ཚང་བའི་རྟེན་བཟང་རྙེད་པར་ཤོག །སྐྱེ་བར་མགོན་པོ་ཁྱོད་ཀྱིས་བཤེས་མཛད་ནས། །ཆུང་འབྲིང་ལམ་གྱི་རྒྱུད་སྦྱང་གཞན་དོན་དུ། སྨོན་འཇུག་སེམས་སྐྱེད་རྒྱལ་སྲས་སྤྱོད་ལ་བསླབ། །རིང་པོར་མི་ཐོགས་སངས་རྒྱས་ཐོབ་པར་ཤོག །མདོར་ན་འདི་ཕྱི་བར་དོ་མ་ལུས་པར། །སྐྱབས་དང་དཔུང་གཉེན་གཞན་དུ་མི་ཚོལ་ན། །འཁོར་འདས་ཀུན་གྱི་གདུང་བ་རབ་བཅིལ་ནས། །ཕན་བདེའི་དཔལ་ལ་སྤྱོད་པར་བདག་བྱིན་རློབས། །ཞེས་ཉམས་ལེན་གྱི་སྙིང་པོ་བསྡུས་པ་འདི་ནི་ཨུ་རང་ཁང་བསྟན་འཛིན་ཐོ་ཡོན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །འཕགས་བོད་མཁས་གྲུབ་གསུང་ངག་ཆད་མེད་དབང༌། །མཐོ་རིས་ཆུ་བོས་བློ་གྲོས་ཟ་མ་ཏོག །ལེགས་གཏམ་སྐུ་བཞིའི་ས་བོན་རབ་ཐེབ་པའི། །སྐལ་བཟང་ཐེག་མཆོག་སྣོད་ལ་གསོལ་བ་འདེབས། །ལྟ་བར་སྒྲོ་བཏགས་གཞན་བློ་བྲིད་མིན་པའི། །དོན་གྱི་ཕྱག་རྒྱ་ཆེན་པོ་སྐྱེད་རྫོགས་ཀྱི། །ཟབ་ལམ་ལས་འོངས་རང་བྱུང་ཡེ་ཤེས་མཆོག །དབྱར་མཚོ་ལྟ་བུར་འཕེལ་ལ་གསོལ་བ་འདེབས། །སྒྲ་ཚད་བཟོ་གསོ་ནང་རིག་སྨྲ་བ་ལ། །འཇིགས་པའི་རྔུལ་ཆུ་འགྲམ་པར་མི་འཆང་བར། །ཕྱོགས་མེད་སྦྱངས་པའི་ཐོས་བསམ་གོ་ཆ་ཅན། །སྤོབས་པ་དགེ་བའི་དབང་པོར་གསོལ་བ་འདེབས། །སྒྲིབ་གཉིས་ཀུན་ཐུབ་ཉི་མའི་གཉེན་གྱི་བསྟན། །འཁྲུལ་མེད་ཞྭ་སེར་འཆང་བའི་རིང་ལུགས་ཀྱི། །གསར་པའི་ལང་ཚོ་མ་ཉམས་དར་བའི་སྡེ། །ཚངས་སྲས་(༦༦བ) ― GLG021_Page_0134 ―
[མ་དཔེ་གཟིགས་ན་འདིར་གནོན།]
བཞད་པའི་རྡོ་རྗེར་གསོལ་བ་འདེབས། །བདེ་ལྡན་དག་ཞིང་མགོན་པོའི་མཛོད་སྤུ་ལས། །འཕྲོས་པའི་ཐུགས་རྗེའི་ཟེར་ཕྲེང་འོད་འབར་བས། །འཆི་བདག་བདུད་སྡེའི་སྨག་རུམ་མཐར་བྱས་ཏེ། །རིང་པོར་འཚོ་བཞེས་སྣང་བ་གསལ་བར་ཤོག །བདེ་སྐྱིད་རྩེ་འཇོར་རྟག་ཏུ་རོལ་བའི་གཞི། །ལེགས་བྱས་མཆོག་ཏུ་ཡངས་པའི་ཐང་ཆེན་པོར། །ལྔ་བརྒྱའི་གཉེན་དུ་དཀོན་མཆོག་མཆོད་པའི་སྡེ། །ཆོས་སྲིད་ཡོན་ཏན་བླ་ནས་བླར་འབར་ཤོག །བསོད་ནམས་རྩ་བ་སྦོམ་པོར་སྐྱེད་སྲིང་བའི། འདོད་དོན་ཡོངས་འདུའི་འབྲས་བུས་སྨོན་ལམ་མཚོར། །ཉེར་ལྷུང་རེ་སྐོང་ཛམྦུ་ཆུ་བོའི་གསེར། །འགྲོ་ཀུན་རྣ་བའི་བརྒྱན་དུ་འོད་འབར་ཤོག །ཅེས་གསོལ་འདེབས་བརྟན་བཞུགས་ཀྱི་ཚིགས་སུ་བཅད་པ་འདི་ལྟ་བུ་ཞིག་དགོས་ཞེས་ངག་དབང་དཔལ་འབྱོར་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །མ་འདྲིས་འགྲོ་བ་མཐའ་དག་རྗེས་འཛིན་པར། །འཆར་ནུབ་མེད་པའི་དམ་བཅའ་སྲོག་གི་ཤིང༌། །སྲིད་ཞིའི་གཉེན་པོར་སྐྱེད་པའི་ལྗོན་པའི་རྩ། །རབ་བརྟན་ཟས་གཙང་སྲས་པོར་གསོལ་བ་འདེབས། །ཟབ་དང་རྒྱ་ཆེའི་གཞུང་ལུགས་ཤིང་རྟ་ཆེ། །དམན་ལམ་འདམ་ལས་འདྲེན་པའི་ཁ་ལོ་བ། །ཀླུ་སྒྲུབ་ཐོགས་མེད་སྨྲ་བའི་ཉི་ཟླ་ཟུང༌། །བསྟན་འཛིན་ཡོངས་ཀྱི་དབང་པོར་གསོལ་བ་འདེབས། །སྟོང་ཉིད་སྡེར་མོས་གཉིས་འཛིན་གླང་པོའི་སྲོག །ཡོངས་ཕྲལ་རྐང་པ་བརྒྱད་པ་འཕགས་པ་ལྷ། །གསུང་རབ་རྒྱ་མཚོའི་མཐར་སོན་དབྱིག་གི་གཉེན། །ཤིང་རྟའི་སྲོལ་འཛིན་ཟུང་ལ་གསོལ་བ་འདེབས། །ཚད་མ་རིག་པའི་ཐོག་མདས་རྒོལ་ངན་བྲག །ཕྱེར་འཐག་ཕྱོགས་གླང་ཆོས་གྲགས་སྨྲ་བའི་དབང༌། །ཚུལ་ཁྲིམས་དྲི་ལྡན་ཡོན་ཤཱཀ་ཙན་དན་ལྗོན། །འཕགས་ཡུལ་མཛེས་བྱེད་རྣམས་ལ་གསོལ་བ་འདེབས། །དྲི་བཅས་བོད་ཡུལ་བསྟན་(༦༧ན) ― GLG021_Page_0135 ―
[མ་དཔེ་གཟིགས་ན་འདིར་གནོན།]
ལ་ཁྱབ་འཇུག་རྐང༌། །དཔྱད་གསུམ་མཐོ་རིས་ཆུ་བོས་རབ་བཀྲུས་པར། །ཕྱག་དང་ལེགས་སོ་བདེ་བར་གཤེགས་ཀུན་གྱི། །རབ་བྱིན་མར་མེ་མཛད་ལ་གསོལ་བ་འདེབས། །ཆེས་ཕྲའི་ན་ཚོད་མྱུ་གུའི་དུས་ཉིད་ནས། །རྒན་པོའི་མཁྱེན་དཔྱོད་སྙེ་མ་ཡོངས་སྨིན་པས། །བོད་ཡུལ་མཁས་མང་དབུས་ན་ཟླ་མེད་པའི། །ཚད་མའི་སྟོན་པ་ཙོང་ཁ་པ་ལ་འདུད། །འཇམ་མགོན་བླ་མའི་གསུང་རབ་འཁྲུལ་མེད་གང༌། །སྟོན་ལ་སངས་རྒྱས་ཀུན་གྱི་རྒྱལ་ཚབ་ཏུ། །དབང་སྐུར་རྣམ་དཔྱོད་ལང་ཚོ་དར་དྲག་པ། །མ་སྨད་རིན་ཅེན་གཏེར་ལ་གསོལ་བ་འདེབས། །ངལ་བརྒྱས་འབད་པས་སྒྲུབ་མིན་མགྲིན་པའི་དབུས། །དབྱངས་ཅན་ལྷ་མོས་རྒྱུད་མང་རྟག་འཁྲོལ་བས། །དགེ་འདུན་འདུས་པའི་ཚོགས་ལ་ལེགས་བཤད་རྒྱུན། །རྒྱ་མཚོ་ལྟ་བུར་སྤེལ་ལ་གསོལ་བ་འདེབས། །ངག་ལ་སྨྲ་བའི་དབང་ཐོབ་བློ་གྲོས་ཀྱིས། །དོན་བཟང་ཚིགས་རླིང་རྒྱལ་གསུང་དགོངས་འགྲེལ་ཚོགས། །རྒྱ་ཆེན་མཚོ་ལྟར་གཏིང་ཟབ་དཀའ་བའི་མདུད། །ཐོས་བརྩོན་སོར་མོས་འགྲོལ་ལ་གསོལ་བ་འདེབས། །འཆད་རྩོད་རྩོམ་ལ་འཇིགས་མེད་སྤོབས་པའི་ག །རྣམ་དཔྱོད་ཆ་ཤས་ཉ་གང་ཟླ་འདྲ་ཡིས། །ཐུབ་བསྟན་ཆུ་གཏེར་ལང་ཚོ་འཕེལ་བའི་སྡེ། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །སྐྱེ་རྒུའི་གདུང་བའི་ནད་བརྒྱ་སེལ་བའི་སྨན། །བུ་རམ་ཤིང་པའི་རིང་ལུགས་རྩི་སྨན་ལྗོན། །བྱང་ཕྱོགས་ས་ལའི་ལྗོངས་འདིར་རབ་རྒྱས་པའི། །ཕན་བདེའི་ནགས་ཀླུང་སྟུག་པོ་འཁྲིག་པར་ཤོག །ཁྱད་པར་འཇམ་མགོན་བློ་བཟང་གྲགས་པ་ཡི། །ཆོས་སྲིད་ཟུང་འབྲེལ་བསྟན་པའི་གདུགས་དཀར་པོ། །ཚངས་པའི་ཡུལ་སར་འཁོར་བའི་གྲིབ་བསིལ་ལ། །ཡིད་ཅན་མཐའ་དག་ངལ་གསོར་སྤྱོད་པར་ཤོག །ངག་དབང་འཇམ་དབྱངས་དགྱེས་པའི་བློ་གྲོས་ཀྱིས། །བསྐལ་བཟང་འདྲེན་པ་བཞི་པའི་(༦༧བ) ― GLG021_Page_0136 ―
[མ་དཔེ་གཟིགས་ན་འདིར་གནོན།]
བསྟན་པ་མཆོག །རྒྱ་མཚོའི་གོས་ཅན་ཀུན་ཁྱབ་སྤེལ་བའི་སླད། །མི་འགྱུར་རྡོ་རྗེ་ལྟ་བུར་བརྟན་གྱུར་ཅིག །མེས་པོ་ཚངས་པའི་ལུང་གིས་མང་བཀུར་ཁྲིར། །ཉེར་བསྐོས་ནོར་འཛིན་དབང་པོ་མཆོད་ཡོན་ཟུང༌། །སྐུ་ཚེ་ཆབ་སྲིད་མངའ་ཐང་དབྱར་དུས་ཀྱི། །ཆུ་གཏེར་བཞིན་དུ་འཕེལ་ཞིང་རྒྱས་པར་ཤོག །བོད་ཡུལ་གླིང་དགུའི་ཡངས་པའི་རྒྱལ་ཁམས་སུ། །ནད་འཁྲུག་དབུལ་ཕོངས་ཉེས་ཚོགས་ཀུན་ཞི་ཞིང༌། །རིང་པོའི་ཚེ་དང་ནད་མེད་བདེ་བའི་ལུས། །འབྱོར་པ་སྨུགས་འཛིན་དཔལ་ལ་འགྲན་ནུས་ཤོག །དགའ་བའི་དཔལ་ལྡན་ཞྭ་སེར་ལུགས་འཛིན་སྡེར། །མ་སྨད་བཤད་དང་སྒྲུབ་པའི་བྱ་བ་རྣམས། །རབ་འཕེལ་བློ་བསལ་མཚོ་གླིང་ངང་མོ་ལྟར། །འདུས་ཏེ་ལེགས་བཤད་དབྱངས་སྙན་རྟག་སྒྲོག་ཤོག །ཆོས་ཉིད་འགྱུར་བ་མེད་པའི་ནམ་མཁའ་ལ། །ཆོས་ཅན་རྟེན་འབྲེལ་མི་སླུ་དབང་གཞུ་བཞིན། །འགོག་མེད་འཆར་བའི་བདེན་པའི་བྱིན་རླབས་ཀྱིས། །སྨོན་པའི་རེ་བ་མ་ལུས་འབྲས་ལྡན་ཤོག །ཅེས་གསོལ་འདེབས་སྨོན་ལམ་གྱི་ཚིགས་སུ་བཅད་པ་མ་ཉུང་ཙམ་ཞིག་དགོས་ཞེས་གོང་དཀར་ཐོད་རི་དགའ་ལྡན་བཤད་སྒྲུབ་གླིང་གི་སློབ་དཔོན་བཟོད་པ་རྒྱ་མཚོ་གྲྭ་དམངས་དང་བཅས་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །དུས་མུན་མཐར་བྱེད་སྨོན་ལམ་སྐྱ་རེངས་ཀྱིས། །འཆི་མེད་ཉིན་བྱེད་དངོས་འདྲེན་བདེ་ལྡན་མགོན། །ཁྱོད་མཚན་ཐོས་དང་གཟུངས་སྔགས་ཀླགས་ཙམ་གྱིས། །འཆི་བདག་ལས་རྒྱལ་ཞལ་འཆེས་མངོན་སུམ་སྟོན། །ལུས་ངག་ཡིད་གསུམ་རྡོ་རྗེའི་རྣལ་འབྱོར་ལ། །རབ་དབང་བློ་གྲོས་ཏིང་འཛིན་བཟང་པོའི་གྲུས། །བསྐྱེད་རྫོགས་རྒྱ་མཚོ་ལས་བརྒལ་ཟུང་འཇུག་ནོར། །འདྲེན་པའི་དེད་དཔོན་མཆོག་ཁྱོད་ཞབས་བརྟན་ཤོག །ཞྭ་སེར་འཆང་(༦༨ན) ― GLG021_Page_0137 ―
[མ་དཔེ་གཟིགས་ན་འདིར་གནོན།]
བའི་བསྟན་སྲིད་བླ་ནས་བླར། །འདེགས་པའི་གནམ་བསྐོས་མཆོད་ཡོན་ཉི་ཟླ་ཟུང༌། །སྐུ་ཚེ་མངའ་ཐང་ཆབ་སྲིད་དབྱར་དུས་ཀྱི། །ཆུ་གཏེར་ལྟ་བུར་གྱེན་དུ་འཕྱུར་བར་ཤོག །ལུས་ཅན་དགའ་བདེར་སྤྱོད་པའི་དཔལ་ལྡན་པ། །ཐུབ་བསྟན་སྙིང་པོ་གསང་སྔགས་འདུས་པའི་སྡེ། །ཐེག་པ་ཀུན་གྱི་ཡང་རྩེར་ཉེར་སོན་པ། །སྲིད་མཐའི་བར་དུ་དར་ཞིང་རྒྱས་པར་ཤོག །འཇམ་མགོན་བློ་བཟང་གྲགས་པའི་རིང་ལུགས་འཕེལ། །ཡངས་པའི་འཇིག་རྟེན་ཐམས་ཅད་བདེ་སྐྱིད་ལྡན། །རྩོད་པའི་དུས་རྣམས་རྫོགས་ལྡན་བཞིན་འགྱུར་བའི། །སྨོན་པའི་འབྲས་དུད་ཡོངས་འདུའི་མཆེད་ཟླར་ཤོག །ཅེས་པ་འདིའང་ཡེར་པ་གྲྭ་ཚང་དགའ་ལྡན་གསང་སྔགས་ཡང་རྩེ་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དབྱངས་སོ། །ལྟ་ན་སྡུག་པ་བདེ་ལྡན་དག་པའི་གནས། །ངོ་མཚར་རྒྱ་མཚོའི་ཞིང་གི་གཙོར་གྱུར་མགོན། །མཛོད་སྤུའི་ཟེར་གྱིས་ཡིད་སྲུབས་སྨག་རུམ་བཅིལ། །དགའ་སྐྱིད་སྣང་བས་ཡོངས་ཁྱབ་དགེ་ལེགས་སྩོལ། །ལྷུན་གྲུབ་མཁྱེན་བརྩེ་ནུས་མངའ་རྫོགས་སངས་རྒྱས། །འགོག་ལམ་བདེན་པ་གཉིས་ལྡན་དམ་པའི་ཆོས། །རིག་དང་གྲོལ་བའི་དཔལ་གྱུར་དགེ་འདུན་ཏེ། །དཀོན་མཆོག་རིན་ཆེན་ཐུགས་རྗེའི་མཐུ་དཔུང་སྐྱེད། །རིགས་གསུམ་སྒྱུ་དྲའི་ས་སྐྱོང་མེས་དབོན་གསུམ། །གངས་ཅན་བསྟན་པའི་རྩ་ལག་མཁན་སློབ་གཉིས། །ར་སར་སྲི་ཞུ་ཟླ་མེད་ཙོང་ཁ་པ། །སྒྲིབ་མེད་སྤྱན་གྱིས་རྟག་ཏུ་བཙའ་བར་མཛོད། །ཆོས་ཉིད་འགྱུར་བ་མེད་པའི་ལྷ་ལམ་དབྱིངས། །ཆོས་ཅན་རྟེན་ཅིང་འབྲེལ་འབྱུང་ཆུ་འཛིན་ལས། །སླུ་མེད་བདེན་པའི་མི་འཛད་ཆར་རྒྱུན་གྱིས། །ཇི་བཞིན་སྨོན་པའི་མྱུ་གུ་གཡུར་ཟར་ཤོག །བརྗོད་པ་རྣམ་དག་དམོད་པ་གང་བོར་(༦༨བ) ― GLG021_Page_0138 ―
[མ་དཔེ་གཟིགས་ན་འདིར་གནོན།]
བ། །ཐོག་མེད་འགྲུབ་པའི་ལྷ་མིའི་དྲང་སྲོང་དང༌། །རིགས་འཛིན་སར་བཞུགས་མཐུ་སྟོབས་ཅན་རྣམས་ཀྱིས། །བདེན་པའི་ཚིགས་གིས་སྨོན་ལམ་གདབ་ཏུ་གསོལ། །ཕན་དང་བདེ་བ་མ་ལུས་འབྱུང་བའི་སྒོ། །དོན་ཀུན་འགྲུབ་པ་ཤཱཀྱའི་རིང་ལུགས་སྤྱི། ཁྱད་པར་ཞྭ་སེར་ཅོད་པཎ་འཆང་བའི་བསྟན། །འཇིག་རྟེན་སྣང་བྱེད་སྒྲོན་མེར་འབར་གྱུར་ཅིག །དྲི་མེད་རྣམ་གསུམ་འཁོར་ལོའི་མཛད་བཟང་གིས། །རྒྱལ་བསྟན་ཚུལ་བཞིན་མངོན་གྱུར་བག་ལ་ཞས། །འཛིན་མཛད་གྲགས་པ་དོན་ལྡན་བཤེས་གཉེན་རྣམས། །ཞབས་བརྟན་ཆེས་དཀར་འཕྲིན་ལས་རྒྱས་གྱུར་ཅིག །འཕགས་བོད་མཁས་གྲུབ་གསུང་ངག་འཆད་པ་ལ། །རབ་དབང་བློ་གྲོས་མཆོག་གི་སྐལ་བཟང་ཅན། །རྒྱ་ཆེན་སྡེ་གནོད་གསུམ་གྱི་གནད་གྲོལ་བར། །མཚོ་བྱུང་སྙིང་གར་རོལ་གང་ཞབས་བརྟན་ཤོག །ཚེ་རིང་གནམ་གྱི་ཤེ་མོང་དཔུང་པ་ཡིས། །མངའ་འབངས་སྐྱིད་པའི་ཉི་མ་དགུང་འཆར་བའི། །མཆོད་ཡོན་ཉི་ཟླ་ཟུང་གི་སྐུ་ཚེ་དང༌། །མཚན་ཇུས་མངའ་ཐང་དབྱར་མཚོ་ལྟར་འཕེལ་ཤོག །སྲིད་ན་གཏོགས་སོ་ཅོག་གི་ལུས་ཅན་སྤྱི། །བྱེ་བྲག་གངས་ཅན་སཱ་ལའི་ལྗོངས་ཀྱི་འགྲོ། །ལེགས་བྱས་འབྲས་བུ་རྫོགས་ལྡན་སྐྱེ་རྒུ་དང༌། །ལྷན་ཅིག་ལོངས་སུ་སྤྱོད་པའི་སྐལ་བཟང་ཤོག །ཁྱད་པར་ཚོང་ཟོང་སྐྱེད་འཕེལ་རྒྱུ་བའི་ལས། །མི་རྒྱུ་སོ་ནམ་འབྲས་བུ་དུས་སུ་སྨིན། །ཕན་ཚུན་མཉེས་གཤིན་འཐབ་རྩོད་མཚང་འབྲུ་མེད། །ཡམས་ནད་འཚེ་བྲལ་སྒོ་གསུམ་བདེ་ལྡན་ཤོག །ཡང་སྒོས་ལྷ་ཅིག་སྲོང་བཙན་བཞེད་པ་ལྟར། །ཤཱཀྱའི་ཕོ་བྲང་འཕྲུལ་སྣང་སྡེ་བཅས་སུ། །མཐའ་བཞིའི་ལས་སྒོ་མ་ལུས་ཀུན་འདུ་བ། །སྨུག་འཛིན་དབང་པོའི་མཛོད་ལ་འགྲན་ནུས་ཤོག །ལུས་ཀྱི་ཉེར་འབད་མགྲིན་པའི་རྒྱུད་མངས་ལས། །ལེགས་དྲངས་བདེན་པའི་ཚིག་ཏུ་བརྗོད་པའི་གླུ། །རྩེ་གཅིག་ཡིད་(༦༩ན) ― GLG021_Page_0139 ―
[མ་དཔེ་གཟིགས་ན་འདིར་གནོན།]
ཀྱི་སོར་མོས་ལེགས་བསྐུལ་བའི། །དབྱངས་སྙན་རྟག་ཏུ་རྣ་བའི་བཅུད་ལེན་ཤོག །ཅེས་ཆོས་འཁོར་ལྷ་ས་བ་སྤྱི་ཚོགས་ཀྱིས་བསྐུལ་བ་ལ་བརྟེན་ནས་ཇོ་ཤཱཀ་གི་མཆོད་འབུལ་སོགས་རྣམ་དཀར་གྱི་བྱ་བ་དང་སྲིད་ཀྱི་འདོད་དོན་བསྒྲུབ་པ་སོགས་གང་གི་ཚེ་ཡང་བཏོན་ཆོག་པའི་སྨོན་ལམ་རབ་སྙན་རྒྱུད་མངས་འདིའང་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །ཤཱཀྱ་མུ་ནིའི་ཞལ་སྐྱིན་མཇལ་བ་སོགས། །དབུས་གཙང་དག་ཞིང་ཡང་ཡང་བསྐོར་བ་ལ། །ཡིད་ལ་བསམ་པ་སྔི་བཞིན་མཆོག་གསུམ་གྱི། །ཐུགས་རྗེ་ཆེན་པོས་ལྷུན་གྱིས་འགྲུབ་བྱིན་རློབས། །ཞེས་པ་འདི་ཡང་དཔོན་མོ་ཚེ་རིང་གིས་བསྐུལ་བ་ལྟར་ཟ་ཧོར་གྱི་བནྡེས་བྲིས། །ཀུན་རྒྱུད་འབུམ་ལ་འདྲི། ལ་ཁྱབ་པར་འསྔུག་པ་རང་སེམས་རྐང༌། །སྨིན་གྲོལ་མཐོ་རིས་ཆུ་བོའི་ལྷབ་ལྷུབ་རྩེར། །ཟུང་འཇུག་ཏོག་གི་འོད་སྟོང་ཆེར་འབར་བའི། །རྒྱལ་མཚན་ཐེག་ཀུན་ཁང་བཟང་རྩེར་འཛུགས་ཤོག །ཆགས་ཤེར་ཕྱོགས་ལ་འདྲི། སྡང་འཁྲུལ་པའི་ནགས་ཀླུང་སྟུག་པོ་ཀུན། །མཐའ་བྲལ་ལམ་བཟང་ཞུགས་ཀྱི་ཉེར་བསྲེགས་པས། །འཁོར་བའི་འབྲོག་དགོན་འབླིགས་པ་དང་བྲལ་ཏེ། །ཞི་བའི་སྤངས་ལྗོངས་ཡངས་པར་བདེར་སྤྱོད་ཤོག །སྟོང་དཀོན་བརྩེགས་ལ་འདྲི། ཕྲག་བརྒྱ་པའི་ལེའུ་གངས་ལྡན་ཅན། །ཆེས་དཀོན་མཆོག་གི་ཐེག་པ་ཡོངས་རྩེགས་པ། །བྲིས་འབྲས་འོད་དཔག་མེད་དང་མི་འཁྲུགས་པའི། །ཞིང་ཁམས་བསྟན་པ་ཇི་བཞིན་དེར་སྐྱེ་ཤོག །ཕལ་ཆེར་ལ་འདྲི། ཉན་རང་ཀུན་དང་ཐུན་མོང་མ་ཡིན་པ། །ཤིན་ཏུ་དགེ་བའི་སྡེ་སྣོད་ཕལ་མོ་ཆེ། །འཁོར་ལོ་མཐའ་མའི་ཡང་ཟབ་སྙིང་པོའི་དོན། །ཚེ་རབས་ཀུན་ཏུ་ཉམས་སུ་ལེན་ནུས་ཤོག །སྐྱེ་མདོ་མང་ལ་འདྲི། རྒུའི་ཁམས་དང་བསམ་པའི་ཚད་དེ་སྙེད། །ཉོན་མོངས་གཉེན་པོར་གསུངས་པ་དྲང་ངེས་ཆོས། །(༦༩བ) ― GLG021_Page_0140 ―
[མ་དཔེ་གཟིགས་ན་འདིར་གནོན།]
མཆོག་དམན་དང་མཚམས་རྩི་སྨན་ལྗོན་པ་ཆེས། །བརྒྱད་ཁྲི་བཞི་སྟོང་ནད་ཀུན་དྲུངས་འབྱིན་ཤོག །རང་འདུལ་ལུང་ལ་འདྲི། རྒྱུད་ཐ་རྒོད་ལྟར་རེངས་གླང་པོ་ཆེ། །ཚུལ་ཁྲིམས་ལྕགས་ཀྱུ་གཉེན་པོས་ཉེར་བཏབ་ནས། །བག་ཡོད་ར་བར་བཅུག་སྟེ་ཡོངས་དུལ་བར། །ཏིང་འཛིན་ཤེས་རབ་གསེར་རྒྱན་གྱིས་སྤྲས་ཤོག །འདིར་བསྟན་པོ་ཏི་རེ་རེ་བཞིན་ལ་སྨོན་ལམ་དགོས་མདོག་མ་ཁའང་བྱེད་ཚེ་འདི་ཁ་བལྡབས་པས་འཐུས་པ་ཡོད། བརྗོད་ཚིགས་ཐོས་པ་ས་བོན་ཚོགས། །དོན་བསམས་ཆར་གྱིས་སྐྱེད་བསྲིངས་མྱུ་གུ་རྣམས། །བསྒོམས་པའི་སྙེ་མ་སྨིན་པས་རང་རྒྱུད་ཞིང༌། །གཤིན་པོར་ཚེ་རབས་སོ་ནམ་བྱེད་པར་ཤོག །ཅེས་རྒྱུད། ཤེར་ཕྱོགས། མདོ་མང༌། ལུང་སྡེ་བཞི་སོགས་སོ་སོའི་རྫོགས་མཚམས་སུ་འདྲི་རྒྱུའི་སྨོན་ལམ་འདིའང་ཕྱག་མཛོད་ཕུན་ཚོགས་རབ་བརྟན་གྱིས་བསྐུལ་བ་ལྟར་ཟ་ཧོར་གྱི་བནྡེས་བཀོད། །ཆད་མེད་རྒྱུད་འབུམ་ལ་འདྲི། དབང་ཆུས་རང་སེམས་ཞིང་ས་བརླན། །འཁྲུལ་མེད་སྐུ་བཞིའི་ས་བོན་རྒྱུད་ལ་བཏབ། །གཉིས་མེད་བསྐྱེད་རྫོགས་ལམ་གྱི་དམར་ཁྲིད་ནོར། །འབད་མེད་ཕུང་པོ་འོད་སྐུར་གྲོལ་བར་ཤོག །ཤེས་རབ་ཤེར་ཕྱོགས་ལ་འདྲི། མཚོན་ཆ་རྣོན་པོས་ཉོན་སྒྲིབ་སྲོག །རབ་བཅད་བཅིངས་ལས་རྣམ་པར་གྲོལ་བའི་ལམ། །གཏན་དུ་བདེ་བ་ཞི་བའི་གྲོང་ཁྱེར་གྱི། །འཇུག་ངོག་ཡངས་པའི་ལམ་བཟང་བརྙེད་པར་ཤོག །ཡིད་དཀོན་བརྩེགས་ལ་འདྲི། བཞིན་ནོར་ལྟར་ཆེས་དཀོན་མཆོག་གི་ལམ། །ས་བཅུ་རིམ་བརྩེགས་ལ་འཛེགས་སངས་རྒྱས་སར། །བགྲོད་ནུས་ཟབ་ལས་ཆེས་ཟབ་ཐེག་པ་ཆེ། །དགོངས་དོན་འཁྲུལ་པ་མེད་པར་ཉམས་ལེན་ཤོག །ཤིན་ཏུ་ཕལ་ཆེན་ལ་འདྲི། རྒྱས་པ་ཆེན་པོའི་སྡེ་སྣོད་གཞུང༌། །ཐེག་ཆེན་ཐུན་མོང་མ་ཡིན་ཕལ་པོ་ཆེ། །བཞེངས་པས་བཟང་པོར་སྤྱོད་པ་ལས་བྱུང་བའི། །སྨོན་ལམ་འབྲས་བུའི་རོ་བརྒྱ་བདག་མྱོང་ཤོག །ཕྲ་རག་མདོ་མང་ལ་འདྲི་ལས། འབྲས་མི་བསླུར་ངེས་པ་བརྙེད། །ལས་ཉོན་བག་ལ་ཞ་བའི་ཏིང་ངེ་འཛིན། །(༧༠ན) ཡན་ལག་བདུན་པ་དང་འབྲེལ་བའི་གསོལ་འདེབས་ཚིག་ཉུང་ལ་དོན་རྒྱས་པ་སོགས།― GLG021_Page_0141 ―
[མ་དཔེ་གཟིགས་ན་འདིར་གནོན།]
ཡན་ལག་བདུན་པ་དང་འབྲེལ་བའི་གསོལ་འདེབས་ཚིག་ཉུང་ལ་དོན་རྒྱས་པ་སོགས། །པ ཤྩི མྱ པ ཀྵཱ སུ ཁ བ ཤྴུ དྷི སྠི ཏྱ ཧོ ནྱ ས ཀྵ ཏྲེ ཙ ན རྨི དྷཱ ཏོཿ །ནུབ་ཕྱོགས་བདེ་བ་ཀུན་ལྡན་དག་པའི་གནས། །བཀོད་ལེགས་ངོ་མཚར་སྤྲུལ་པའི་ཞིང་ཁམས་ནས། །ནོ མྲྀ ཏྱ སི དྡྷཱ ཡུ ར ཐ རྣཱ མ ནྟཾ ཀ རུ ཎྱ དཱི རྒྷཱ ཀྵི ཀ སེ ད པ ཤྱ། འཆི་མེད་གྲུབ་པའི་མགོན་པོ་ཚེ་མཐའ་ཡས། །ཐུགས་རྗེའི་སྤྱན་དཀྱུས་རིང་པོས་དེང་འདིར་གཟིགས། །(༧༠བ) ― GLG021_Page_0142 ―
[མ་དཔེ་གཟིགས་ན་འདིར་གནོན།]
མཐོ་རིས་འོད་གསལ་ལྷ་ཡི་གདུང་གིས་བཙུན། །ནོར་འཛིན་ས་ལ་སྤྱོད་པ་སྟོབས་ཀྱི་མཆེ། །ཡ་རབས་སྒྲིགས་སྲོལ་གོང་མའི་རྒྱན་གྱིས་མཛེས། །ནོར་འཛིན་སྐྱོང་བའི་དབང་པོ་ཞབསབརྟན་ཤོག །ངག་དབང་དབྱངས་ཅན་ལྷ་མོའི་ཡབ་གྱུར་པ། །དགའ་བ་བརྒྱ་པ་ལ་སོགས་ལེགས་བྲིས་གཙོས། །སྟོབས་ལྡན་མི་ཡི་བདག་པོར་དབང་བསྐུར་བ། །རྡོ་རྗེ་ལྟ་བུར་རབ་ཏུ་བརྟན་པར་ཤོག །ངག་གི་དབང་ཕྱུག་བློ་བཟང་གྲགས་པ་ཞེས། །ཞྭ་སེར་འཆང་བ་དགའ་ལྡན་རིང་ལུགས་མཆོག །སྙིང་དབུས་ཐེག་ལེར་འཛིན་ལ་རབ་བརྟན་པ། །མི་འགྱུར་རྡོ་རྗེའི་ཁྲི་ལ་གཡོ་མེད་ཤོག །རྒྱལ་ཀུན་ཐུགས་རྗེ་བསྐུལ་བའི་ཚ་སྲེག་གིས། །བྱིན་རླབས་བཞུ་བླུག་སྲོག་གི་ཀ་བ་ཡི། །ཐབས་ཤེས་ཨ་ཧཾ་ཉི་ཟླ་འཕོ་མེད་དུ། །ཟུང་འཇུག་མངོན་སུམ་འཕེལ་གྲིབ་མེད་པར་ཤོག །ཀེག་འཕྲེང་ཆོམ་པོའི་འཇིག་ལས་བསུ་བའི་གྲོགས། །བདེན་ཚིག་རྟུལ་ཕོད་དཔའ་བོ་སྟག་ཤར་གྱིས། །འཇིགས་མེད་བཙན་པོའི་མཁར་དུ་རབ་བསྐྱལ་ཏེ། །འདི་ནང་བག་ཕེབས་རྩེ་དགའ་དགོད་གྱུར་ཅིག །ལྷ་ཅིག་ཞབས་བརྟན་བཀའ་དྲིན་ཉི་ཟེར་གྱིས། །མངའ་འབངས་པད་དཀར་རྫིང་བུ་ཆེས་ཆེར་དར། །ལོག་སྤྱོད་གཉིས་འཐུང་གོམ་པ་མི་འགོད་པར། །སྐྱིད་པའི་བུང་བ་གླུ་དབྱངས་ལེན་པར་ཤོག །མཚུན་ལྷས་མེ་ལོང་འཛིན་པ་སྙིང་གི་ལས། །ཐུང་ངུར་བྱེད་པ་བསྐལ་བརྒྱར་འཚོ་བའི་ཚེ། །སྨོན་ལམ་ཅི་བཏབ་འགྲུབ་པ་དཀོན་མཆོག་གསུམ། །ལྷ་དང་དྲང་སྲོང་སྲུང་མས་བདག་བྱིན་རློབས། །ཞེས་འོད་གསལ་ལྷ་ཡི་གདུང་ས་སྐྱོང་རྒྱ་རི་བ་ངག་དབང་དགའ་ལྡན་རབ་བརྟན་གྱི་དགུང་ཀག་ལ་དམིགས་པའི་བརྟན་བཞུགས་འདི་ལྟ་བུ་ཞིག་དགོས་ཞེས་རྣམ་རྒྱལ་རབ་བརྟན་གཞིས་སྡོད་ཨ་བར་དགོས་དགོས་ཀྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་(༧༡ན) ― GLG021_Page_0143 ―
[མ་དཔེ་གཟིགས་ན་འདིར་གནོན།]
སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །སྐྱབས་གནས་ཀུན་འདུས་དཀོན་མཆོག་རྣམ་གསུམ་ལ། །ཕྱག་འཚལ་མཆོད་པ་འབུལ་ཞིང་སྡིག་ཚོགས་བཤགས། །མཛད་པར་ཡི་རང་ཆོས་འཁོར་བསྐོར་བར་བསྐུལ། །མྱ་ངན་མི་འདའ་འགྲོ་བའི་དོན་ཕྱིར་བཞུགས། །སྐུ་གསུང་ཐུགས་ཀྱིས་བདག་རྒྱུད་བྱིན་བརླབས་ནས། །འདི་ཕྱིའི་གཏན་འདུན་འགྲུབ་པར་གསོལ་བ་འདེབས། །བསགས་དང་གསོག་འགྱུར་སྒྲུབ་པའི་དགེ་བ་རྣམས། །མཁའ་མཉམ་མ་གྱུར་སེམས་ཅན་དོན་དུ་བསྔོ། །ཞེས་ཡན་ལག་བདུན་པ་དང་འབྲེལ་བའི་གསོལ་འདེབས་ཚིག་ཉུང་ལ་དོན་རྒྱས་འདི་ནི་ཆོས་སྐྱབས་ཐ་ཡན་ཆིས་བསྐུལ་བའི་ངོར་ཟ་ཧོར་གྱི་བནྡེས་བྲིས། །གྲུབ་པའི་འཁོར་ལོས་བསྒྱུར་བ་ཐང་སྟོང་པས། །བྱིན་རླབས་ཉི་ཟླ་ལྟར་གསལ་འགྲོ་ཀུན་ལ། །འཇུག་པའི་དགའ་སྟོན་བསོད་ནམས་བྱེ་བའི་གཏེར། །དབང་ཕྱུག་དམ་པའི་སྤྲུལ་པ་མྱུར་བྱོན་ཤོག །ཀུན་བཟང་དགའ་ཆེན་ཁྱབ་བདག་ཧེ་རུ་ཀཿ །ལུས་ཅན་བསོད་ནམས་ཞིང་དུ་ངུར་སྨྲིག་གར། །ལེགས་བསྒྱུར་དབང་ཕྱུག་བརྒྱད་ལྡན་རྡོ་རྗེ་འཛིན། །ཞིང་འདིར་གཟུགས་སྐུའི་བཀོད་པ་མྱུར་སྟོན་ཤོག །ངག་དབང་སྤོབས་པ་དགེ་བའི་ཉི་ཟླ་ཟུང༌། །འཁོར་མུན་གདུང་སེལ་སླད་དུ་དཔལ་འབར་བ། །འཕྲིན་ལས་རྒྱ་མཚོའི་རླབས་ལྟར་ཡོལ་མེད་པའི། །ཤིང་རྟ་ཆད་མེད་རྟག་ཏུ་རྒྱུ་བར་ཤོག །རྩ་བརྒྱུད་བླ་མ་དཀོན་མཆོག་རིན་ཅེན་གསུམ། །བསྟན་སྲུང་དབང་ཕྱུག་གུར་མགོན་གདོང་བཞི་པ། །ལྷ་དང་དྲང་སྲོང་རིག་པ་འཛིན་རྣམས་ཀྱིས། །ཇི་ལྟར་སྨོན་པ་འགྲུབ་པའི་འཕྲིན་ལས་མཛོད། །ཅེས་གྲུབ་པའི་དབང་ཕྱུག་ལྕགས་ཟམ་སྤྲུལ་པའི་སྐུ་བསོད་ནམས་དབང་ཕྱུག་གི་སྤྲུལ་པའི་སྐུ་ཞིང་འདིར་མྱུར་(༧༡བ) ― GLG021_Page_0144 ―
[མ་དཔེ་གཟིགས་ན་འདིར་གནོན།]
དུ་འབྱོན་པའི་སྨོན་ལམ་འདི་ལྟ་བུ་ཞིག་དགོས་ཞེས་དམ་པ་གང་དེའི་ཞམས་རིང་བ་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །རབ་གསལ་ཡེ་ཤེས་སྤྱན་བདུན་གཡེལ་མེད་དུ། །གཟིགས་ནས་འཆི་བདག་བདུད་སྡེ་མཐར་མཛད་པ། །རྒྱལ་ཡུམ་ཡིད་བཞིན་འཁོར་ལོ་ཚེ་སྦྱིན་མ། །རྨད་བྱུང་ཐུགས་རྗེ་ཆེན་པོའི་མཐུ་དཔུང་བསྐྱེད། །ངག་དབང་ཟུར་ཕུད་ལྔ་པ་མིའི་གཟུགས་སུ། །འགྲོ་ལ་སྟོན་མཛད་བློ་བཟང་གྲགས་པ་ཡི། །བསྟན་པ་རྒྱ་མཚོའི་གོས་ཅན་མཐའ་སྙེད་དུ། །སྤེལ་ཕྱིར་ཡོངས་འཛིན་བླ་མ་ཞབས་བརྟན་ཤོག །བགྲང་ཡས་རྒྱལ་བའི་གསུང་རབ་མང་ཐོས་ཤིང༌། །དེ་དོན་བསམ་པས་གཏན་ལ་འབེབས་མཁས་སྡེ། །དབྱར་མཚོ་ལྟ་བུར་དར་དྲག་རབ་རྒྱས་ཏེ། །འཛམ་གླིང་ཀུན་གྱི་རྒྱན་དུ་འགྱུར་བར་ཤོག །མར་གད་གདངས་འཛིན་འཁོར་བ་ལས་སྒྲོལ་མས། །རིང་པོའི་ཕྱག་བརྐྱངས་བདག་སོགས་སེམས་ཅན་རྣམས། །འཇིག་ཆེན་བརྒྱད་ལས་རབ་བསྐྱབས་དབུག་དབྱུང་སྟེ། །ངེས་པར་ལེགས་པའི་ལམ་ལ་འཁྲིད་དུ་གསོལ། །སྒོ་གསུམ་བག་དང་ལྡན་པས་ཚུལ་ཁྲིམས་གཙང༌། །དངོས་སྟོབས་རིགས་པས་རྒོལ་ངན་སྤོབས་པ་འཕྲོག །ལུང་དོན་ཐུབ་གསུང་དགོངས་པ་ཇི་བཞིན་དུ། །བཀྲལ་ཏེ་བསྟན་པ་ཕྱོགས་བཅུར་རྒྱས་པར་ཤོག །ཅེས་རིང་པོར་འཚོ་བའི་རྟེན་འབྱུང་གི་ཚིགས་སུ་བཅད་པ་འདིའང་ཐོས་བསམ་དར་རྒྱས་གླིང་གི་སློབ་དཔོན་འདུས་པའི་སྡེ་དང་བཅས་པ་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ཚོགས་གཉིས་ཟུང་དུ་འཇུག་པའི་ཆུ་གཏེར་ཆེར། །བརྩོན་པའི་(༧༢ན) ― GLG021_Page_0145 ―
[མ་དཔེ་གཟིགས་ན་འདིར་གནོན།]
རི་བོ་སྒྲིལ་ལས་ཡོངས་ཐོན་པའི། །མཚན་དཔེའི་འོད་གཟིས་འཁོར་མུན་གཞིལ་མཛད་པ། །ཐུབ་བསྟན་ཉིན་མོར་བྱེད་ལ་གསོལ་བ་འདེབས། །སྣང་བ་མཐའ་ཡས་ཐུགས་རྗེ་སིནྡྷུའི་མཚོར། །ངོ་མཚར་སྤྲུལ་སྐུའི་སྒྱུ་དྲའི་གར་མཁན་ཅན། །འཛམ་གླིང་བརྟུལ་ཞུགས་གྲུབ་པའི་རིག་སྔགས་འཆང༌། །ཨྱོན་སངས་རྒྱས་གཉིས་པར་གསོལ་བ་འདེབས། །ངག་དབང་ལྷ་ཡིས་རྗེས་བཟུང་བློ་གྲོས་ལ། །སྤྱོད་པའི་སྐལ་བཟང་ཐུབ་བསྟན་རྒྱ་མཚོའི་སྡེ། །བསྐྱེད་རྫོགས་ཟུང་འཇུག་རྡོ་རྗེའི་རྣལ་འབྱོར་ཅན། །གང་ཤར་རང་སར་གྲོལ་ལ་གསོལ་བ་འདེབས། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །སངས་རྒྱས་བྱང་སེམས་དཔའ་བོ་མཁའ་འགྲོ་སོགས། །སྐྱབས་གནས་མ་ལུས་འདུས་པའི་ངོ་བོ་རུ། །གྲངས་མེད་ལུས་སྤྲུལ་གུས་པས་ཕྱག་འཚལ་ལོ། །ལྷུན་པོ་གླིང་བཞི་གླིང་ཕྲན་ལྕགས་རི་ཡིས། ཁོར་ཡུག་གཅིག་གྱུར་ཉི་ཟླ་ཟུང་དུ་འཇུག །ཕུན་ཚོགས་ལྷ་མིའི་འབྱོར་པས་ཡོངས་གང་བའི། །དངོས་བཤམས་ཡིད་ཀྱིས་སྤྲུལ་པའི་མཆོད་པ་འབུལ། །ཐོག་མེད་འཁོར་བར་འཁྱམ་པ་དེ་སྲིད་ནས། །ད་ལྟ་ཡན་ཆད་བསགས་པའི་ནག་པོའི་ལས། །ཀུན་ལ་གནོང་འགྱོད་ཕྱིན་ཆད་སྡོམ་སེམས་ཀྱིས། །བཅོས་མིན་བསམ་པ་ཐག་པས་མཐོལ་ལོ་བཤགས། །སྲིད་དང་ཞི་བའི་ཁོངས་འདིར་རྣམ་དཀར་ལས། །སྐྱེ་འཕགས་གང་གིས་བསྒྲུབས་ཟིན་སྒྲུབ་འགྱུར་དང༌། །ད་ལྟར་མཛད་པ་མཐོང་ཐོས་རྗེས་དཔག་ནས། །དགའ་དང་སྤྲོ་བའི་སེམས་ཀྱིས་ཡི་རང་ངོ། །ལུས་ཅན་བསམ་པའི་ཁྱད་པར་མཐའ་(༧༢བ) ― GLG021_Page_0146 ―
[མ་དཔེ་གཟིགས་ན་འདིར་གནོན།]
ཀླས་པ། །དེ་སྙེད་དང་མཚུངས་ཉོན་མོངས་འདུལ་བའི་གཉེན། །དམ་པའི་ཆོས་ཀྱི་འཁོར་ལོ་ཆད་མེད་དུ། །རྒྱལ་སྲས་སློབ་མར་བཅས་པས་བསྐོར་བར་བསྐུལ། །སྙིགས་མ་ལྔ་བདོ་ངན་པའི་སྤྱོད་ཚུལ་ལ། །མགོན་རྣམས་སྐྱོ་ངལ་སྤངས་ཏེ་ལྷག་པར་ཡང༌། །ཐུགས་རྗེའི་མཐུ་དཔུང་བསྐྱེད་དེ་འགྲོ་འདྲེན་སླད། །བསྐལ་བརྒྱར་མྱ་ངན་མི་འདའ་བཞུགས་སུ་གསོལ། །གནས་སྐབས་སུ་ཡང་ནད་གདོན་བར་གཅོད་སོགས། །འཁོར་བའི་ཟུག་རྔུ་ནམ་ཡང་མི་ལྡང་ཞིང༌། །རིང་པོའི་ཚེ་དང་དཔལ་འབྱོར་ཕུན་ཚོགས་རྣམས། །འཆི་མེད་བདག་པོའི་རྗེས་སུ་འགྲོ་བར་ཤོག །མྱུར་དུ་སྲིད་པ་འཁོར་བའི་ཕྲང་རིང་པོ། །བརྒལ་ཏེ་གཏན་གྱི་བདེ་བ་བླ་ན་མེད། །སྐུ་བཞི་ཡེ་ཤེས་ལྔ་ལྡན་རྡོ་རྗེ་སེམས། །མངོན་གྱུར་དོན་གཉིས་འགྲུབ་པར་བྱིན་གྱིས་རློབས། །སྒོ་གསུམ་འབད་པས་བསགས་པའི་ཆོས་དཀར་ལས། །མ་ལུས་རང་དོན་ཁོ་ནའི་ཆེད་མིན་པར། །ནམ་མཁའི་མཐའ་མཉམ་མ་རྒན་འགྲོ་བའི་ཚོགས། །རྣམ་པ་ཐམས་ཅད་མཁྱེན་པ་ཐོབ་རྒྱུར་བསྔོ། །ནམ་ཡང་སླུ་མེད་དཀོན་མཆོག་རིན་ཅེན་གྱིས། །ཐོག་མཐའ་བར་དུ་རྟག་པར་རབ་དགེ་བ། །ཕུན་སུམ་ཚོགས་པའི་བཀྲ་ཤིས་རྒྱ་མཚོ་ཡིས། །འཁོར་འདས་ཀུན་ལ་ཡོངས་སུ་ཁྱབ་པར་ཤོག །ཅེས་བདེ་ཆེན་ཁང་གསར་བ་ནོར་བུས་དད་རྟེན་གྱི་སྐུ་བརྙན་གསུམ་བཞེངས་པ་བསོད་ནམས་ཀྱི་ཡུལ་དུ་བྱས་པའི་གསོལ་འདེབས་སྨོན་ལམ་དང་བཅས་པ་ཞིག་དགོས་ཞེས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ཕྲག་(༧༣ན) ― GLG021_Page_0147 ―
[མ་དཔེ་གཟིགས་ན་འདིར་གནོན།]
དོག་དག་པའི་དབྱིངས་ལས་འདུ་བྱེད་ཀྱི། །ཕུང་པོ་གནས་གྱུར་བྱེ་བ་ལྷུན་གྲུབ་པའི། །ཡེ་ཤེས་ཐུགས་རྗེའི་ཉི་མས་འཁོར་བའི་མུན། །རབ་གསང་མཐོ་རིས་སྣང་བ་གསལ་བྱིན་རློབས། །སྐྱེ་བར་བསགས་པའི་བསོད་ནམས་མྱུ་གུའི་ཚོགས། །སྨོན་ལམ་རླན་གཤེར་དྲོད་ཀྱིས་རབ་བསྐྱེད་པས། །མངོན་མཐོ་ངེས་ལེགས་སྙེ་མ་དར་དྲག་པར། །རབ་སྨིན་རྒྱས་པའི་འབྲས་བུས་དུད་པར་ཤོག །སྲིད་ཞིའི་མཐར་ལྷུང་འདམ་རྫབ་ཆེན་པོ་ལས། །དགེ་ཚོགས་ཤིང་རྟ་སྟོང་གིས་རབ་དྲངས་ཏེ། །བླ་མེད་ཡེ་ཤེས་གྲོང་ཁྱེར་ཉམས་དགའ་བར། །མ་རྒན་འགྲོ་རྣམས་འཇུག་པའི་རྒྱུ་རུ་བསྔོ། །ཞེས་པ་འདིའང་སྐྱར་པོ་བ་བློ་བཟང་ལེགས་ལྡན་གྱིས་ཕའི་དོན་དུ་དོན་གྲུབ་ཀྱི་སྐུ་བརྙན་བཞེངས་པའི་རྒྱབ་ཡིག་ཏུ་སྨོན་ལམ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །དཔལ་ལྡན་ཐང་པའི་ཆོས་དང་སྲིད་ཀྱི་རིགས། །ལེགས་འཛིན་ངག་གི་དབང་ཕྱུག་འགྲོ་ཀུན་ལ། །མ་སྨད་དགའ་སྟོན་འབད་མེད་ལྷུན་གྲུབ་ཏུ། །སྩོལ་དེས་འདིས་མཚོན་དུས་གསུམ་བསགས་པའི་དགེས། །རྒྱལ་རྣམས་བཞེད་པའི་དམ་བཅའི་ཁུར་ལྕི་བ། །ནམ་ཡང་གཏོང་མིན་ལྷག་བསམ་གྲུ་གཟིངས་ཀྱིས། །མཁའ་མཉམ་མ་རྒན་འཁོར་བའི་རྒྱ་མཚོ་ལས། །སྒྲོལ་བའི་དེད་དཔོན་ཆེན་པོར་འགྱུར་བར་ཤོག །འདི་སྣང་རིང་པོའི་ཚེ་དང་ཕུན་ཚོགས་སྟོབས། །འཆི་མེད་བདག་པོའི་རྗེས་སུ་ཉེར་འགྲོ་ཞིང༌། །ཡང་སྲིད་རྒྱུད་མར་ཕན་བདེའི་ཐེམ་སྐས་ལ། །འཛེགས་ནས་བླ་མེད་ཡེ་ཤེས་མྱུར་ཐོབ་ཤོག །ཅེས་(༧༣བ) ― GLG021_Page_0148 ―
[མ་དཔེ་གཟིགས་ན་འདིར་གནོན།]
སྟག་ལུང་ཞབས་དྲུང་ངག་དབང་ཀུན་དགའ་ལྷུན་གྲུབ་ཀྱི་ཐུགས་དམ་ཐང་སྐུའི་རྒྱབ་ཡིག་ཏུ་འདི་ལྟ་བུ་ཞིག་དགོས་ཞེས་གསུང་གིས་བསྐུལ་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །བདེ་ལྡན་འོད་མཚན་མཚན་དཔེས་མཛེས་པའི་ཞིང༌། །ཞིང་མཆོག་རྣམ་འདྲེན་འདྲེན་པ་འོད་མི་འགྱུར། །འགྱུར་མེད་སྐུ་ཚེ་ཚེ་མཐའ་ཡས་པའི་མགོན། །མགོན་གྱི་ཐུགས་རྗེས་རྗེས་སུ་འཛིན་པར་མཛོད། །ངག་ལ་སྨྲ་བའི་སྤོབས་པ་དགེ་བའི་དབང༌། །དབང་ཕྱུག་བློ་གྲོས་ཆེས་བཟང་ལྷག་པའི་སེམས། །སེམས་ཅན་ཡོངས་ལ་རབ་དཀར་འཕྲིན་ལས་རྒྱུན། །རྒྱུན་ཆད་མེད་པར་རྟག་ཏུ་འཇུག་པར་ཤོག །ཤེས་བྱའི་རྒྱ་མཚོར་འཇིགས་མེད་ཐོས་བརྩོན་ཟུང༌། །ཟུང་འཇུག་གོ་ཆའི་གཟིངས་ཀྱིས་ཐུབ་བསྟན་གླིང༌། །གླིང་ཡངས་བདེར་བགྲོད་སྤངས་རྟོགས་ལང་ཚོའི་དཔྱིད། །དཔྱིད་ཀྱི་དཔལ་མོའི་དགའ་སྟོན་བཞད་པར་ཤོག །ཆོས་ནོར་འདོད་དང་ཐར་པ་སྡེ་བཞིའི་སྒོ། །སྒོ་འཕར་ལས་འོང་རྫོགས་ལྡན་ཕན་བདེའི་ནོར། །ནོར་བུ་དབང་རྒྱལ་ཇི་བཞིན་བསམ་པའི་དོན། །དོན་གཉིས་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་གཞན་འདྲེས་མེད་པའི་བརྟན་བཞུགས་ཀྱི་ཚིགས་བཅད་འདི་ལྟ་བུ་ཞིག་དགོས་ཞེས་ཨེ་གཟིམས་ཤག་བྱང་མ་བ་མགོན་པོ་རབ་བརྟན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །བསྐལ་བཟང་འདི་ལ་སྲས་བཅས་རྒྱལ་བ་ཡི། །མགྲིན་གཅིག་མཆོག་གི་སྙིང་སྟོབས་ལ་བསྔགས་པ། །(༧༤ན) ― GLG021_Page_0149 ―
[མ་དཔེ་གཟིགས་ན་འདིར་གནོན།]
ལྷ་ཡི་ལྷར་གྱུར་ཤཱཀྱ་སེང་གེ་ཞེས། །དོན་ཀུན་གྲུབ་པའི་དཔལ་དེར་གསོལ་བ་འདེབས། །གང་གི་མགུར་ནས་གསུང་པའི་ཆོས་ཕུང་ཆེ། །འཁྲུལ་མེད་ཚུལ་བཞིན་སྡུད་མཛད་དགྲ་བཅོམ་དང༌། །ཤིང་རྟ་ཆེན་པོ་ཀླུ་སྒྲུབ་ཐོག་མེད་སོགས། །འཕགས་ཡུལ་པཎ་གྲུབ་རྣམས་ལ་གསོལ་བ་འདེབས། །སྒོ་གསུམ་བག་ཡོད་དྲི་བསུང་ཆེས་མངར་བ། །ཚུལ་འཆལ་ཚ་བའི་རེག་བྱ་མཐར་བཅིལ་བའི། །སྡོམ་རྩོན་མ་ལ་ཡ་རླུང་དབང་པོ་ཆེ། །པཎ་ཆེན་ཤཱཀྱ་ཤྲཱི་ལ་གསོལ་བ་འདེབས། །གང་གི་རིང་ལུགས་རུ་བཞིའི་རྒྱལ་ཁམས་སུ། །སྤེལ་བའི་འཕྲིན་ལས་སྒོ་བརྒྱ་འབྱེད་མཛད་པ། །བྱང་རྡོར་རྣམ་གཉིས་རྗེས་འབྲང་རྣམ་པར་ཐར། །གཙང་མའི་མཁན་བརྒྱུད་ཚོགས་ལ་གསོལ་བ་འདེབས། །རིགས་གསུམ་སྒྱུ་འཕྲུལ་དྲ་བའི་གར་མཁན་གཟུགས། །འཇམ་མགོན་འཁོན་གྱི་མེ་ལོང་ངོས་ཤར་བའི། །ཡབ་སྲས་རྣམ་གསུམ་ཁུ་དབོན་དོན་ཡོད་པ། །བསོད་ནམས་རྒྱལ་མཚན་ཞབས་ལ་གསོལ་བ་འདེབས། །སངས་རྒྱས་ཀུན་གྱི་མཁྱེན་བརྩེ་ནུས་པའི་ཕུལ། །ངུར་སྨྲིག་གར་སྒྱུར་བློ་བཟང་གྲགས་པའི་དཔལ། །སྲས་ཀྱི་ཐུ་བོ་དར་མ་རིན་ཆེན་སོགས། །བསྟན་འཛིན་མུ་ཏིག་ཕྲེང་བར་གསོལ་བ་འདེབས། །བརྗོད་པ་རྣམ་དག་ངག་གི་རྒྱུད་མངས་སྒྲ། །ལེགས་དྲངས་མཁས་དབང་བརྟན་པ་འཕྲོག་པའི་གླུས། །བློ་ཆེན་མེས་པོའི་རྗེས་འགྲོ་སྐལ་བཟང་རྣམས། །ཆོས་ཚུལ་རྒྱ་མཚོས་འདོད་འཇོར་གསོལ་བ་འདེབས། །མང་ཐོས་ཁྲིམས་ལྡན་འདུས་པའི་ཚོགས་རྣམས་ཀྱིས། །མཆོག་གསུམ་དཔང་(༧༤བ) ― GLG021_Page_0150 ―
[མ་དཔེ་གཟིགས་ན་འདིར་གནོན།]
པོར་བྱས་ཏེ་རྩེ་གཅིག་ཏུ། །གསོལ་བཏབ་འབྲས་བུ་བཤེས་གཉེན་དམ་པ་ཁྱོད། །རྡོ་རྗེའི་ཁྲི་ལ་བསྐལ་བརྒྱར་བརྟན་པར་ཤོག །གངས་ཅན་བསྟན་པའི་མངའ་བདག་ཙོང་ཁ་པའི། །ཆོས་སྲིད་རིང་ལུགས་ཛཱ་ཏིའི་འབྲས་སྨིན་ནས། །ཟ་འོག་ཐགས་སུ་བསྐྲུན་པའི་རྒྱལ་ཁམས་བར། །སྤེལ་མཛད་ཡོངས་འཛིན་བླ་མ་ཞབས་བརྟན་ཤོག །ཆེན་པོ་བོད་ཀྱི་གཞིར་འཁོད་སྐྱེ་རྒུ་ཡི། །གཉའ་བར་རབ་ལྕི་ས་སྤྱོད་བཀའ་ཡི་རྟགས། །མེ་ལོང་གདོང་གི་རྣམ་པར་ཐར་པ་བཞིན། །གནམ་གྱི་ཤེ་མོང་དྲང་ཐིག་འདེབས་པར་ཤོག །ས་འོག་ས་སྟེང་ས་བླར་རྒྱུ་བ་དང༌། །མི་རྒྱུའི་སྐྱེ་རྒུ་ཀུན་གྱི་སྒོ་གསུམ་ལ། །བདེ་བའི་རོ་བརྒྱ་མྱོང་བ་མཐོ་རིས་ཀྱི། །དཔལ་མོའི་ཁེངས་པ་ཡོངས་སུ་འཕྲོག་པར་ཤོག །ཚུལ་ཁྲིམས་གཙང་མའི་ཞིང་ས་གཤིན་པོ་ལ། །ཐོས་བསམ་སྒོམ་པའི་སྙེ་མ་གཡུར་ཟ་བ། །ཇོ་བོ་སྟན་གཅིག་དཔལ་ལྡན་ཚོགས་ཀྱི་སྡེ། །སྲིད་མཐའི་བར་དུ་འཕེལ་ཞིང་རྒྱས་པར་ཤོག །དྲི་མེད་ཀསྨི་ར་པའི་པཎ་ཆེན་གྱི། །རྣམ་དག་སྡོམ་པའི་རྒྱུན་གྱིས་གངས་ཅན་འདི། །ཡོངས་ཁྱབ་ཐུབ་བསྟན་རིན་ཆེན་མི་ཕམ་མགོན། །གླིང་འདིར་འབྱོན་མིན་བར་དུ་དར་གྱུར་ཅིག །ཅེས་རིང་འཚོའི་རྟེན་འབྱུང་གི་ཚིགས་སུ་བཅད་པ་ཞིག་དགོས་ཞེས་པཎ་ཆེན་ཤཱཀྱ་ཤྲཱིའི་རིང་ལུགས་འཛིན་པའི་རྩེ་ཚོགས་ཀྱི་མཁན་ཆེན་བསོད་ནམས་རྒྱལ་མཚན་དང་ས་དགེ་སྤྱི་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །སྙིགས་མ་ལྔ་བདོའི་དུས་འདིར་ཐུགས་རྗེའི་མཐུ། །ཆེས་ཆེར་སྟོན་མཛད་མགོན་པོ་བདེ་གཤེགས་བདུན། །ཟས་(༧༥ན) ― GLG021_Page_0151 ―
[མ་དཔེ་གཟིགས་ན་འདིར་གནོན།]
གཙང་སྲས་བཅས་བརྩེ་བའི་སྤྱན་གྱི་ཟུར། །ལྷུང་བའི་མོད་ལ་ཉེས་བརྒྱའི་གདུང་སེལ་མཛོད། །ཚུལ་གནས་ཐོས་པའི་ཀུན་བཟོད་ཆེར་ཡངས་པ། །འདེགས་ལ་སྙིང་སྟོབས་རྒྱ་མཚོ་ལྟར་ཟབ་གང༌། །འཁོར་བའི་གནས་ལས་བརྒལ་ཏེ་བཻ་ཌུཪྻ། །ངོ་མཚར་སྣང་བའི་ཞིང་དུ་སྲིད་འཛིན་ཤོག །དྲི་མེད་སྨོན་ལམ་དག་པའི་ས་བོན་ཚོགས། །ཡོངས་སུ་སྨིན་པའི་ཨ་སྨྲའི་ལྗོན་པ་ཡི། །ཕན་བདེའི་འདབ་སྟོང་གྲིབ་ཏུ་ཉེར་བསིལ་བར། །གནས་ཏེ་བླ་མེད་འབྲས་བུར་ལོངས་སྤྱོད་ཤོག །ཅེས་པ་འདིའང་སློབ་དཔོན་བཟོད་པ་རྒྱ་མཚོའི་ཉེ་དུ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །མཚན་བཟང་མཛོད་སྤུའི་ཟེར་སྣང་འཕྲོས་ཙམ་གྱིས། །འཆི་བདག་བདུད་མུན་མཐར་བྱེད་གར་གྱི་དབང༌། །བདེ་ལྡན་ཞིང་ནས་འཛམ་གླིང་སྐྱེ་རྒུ་ལ། །དཀྱུས་རིང་དགྱེས་སྤྱན་རྟག་ཏུ་གཟིགས་པར་མཛོད། །གངྒཱའི་ཡབ་གཅིག་མཛེས་པ་འཕྲོག་པའི་སྐུ། །ལེགས་བྲིས་ལུས་ཕྲའི་གཟུགས་ཀྱི་འཇོ་སྒེག་ཅན། །མཆོག་སྦྱིན་ཕྱག་རྒྱས་འགྲོ་ལ་ཚེ་སྦྱིན་མ། །བཅོམ་ལྡན་ཡིད་བཞིན་འཁོར་ལོས་རྟག་ཏུ་བསྲུངས། །ཡིད་སྲུབ་སྡེ་ལས་རྣམ་པར་རབ་རྒྱལ་མ། །ཕྱག་ཟོར་གྱིས་བཏེག་རིན་ཆེན་བུམ་བཟང་གི །བདུད་རྩིའི་རྒྱུན་གྱིས་ཡིད་ཅན་མ་ལུས་པའི། །མི་ཤིག་སྲོག་གི་ཀ་བ་ལེགས་ཚུགས་མཛོད། །ཨ་འདུས་ཀ་ཕྲེང་བརྗོད་པ་ངག་གི་གདངས། །ཐུབ་དབང་གསུང་རབ་ཚིག་གི་སྒྲར་ཤར་བ། །བློ་བསལ་རྣར་འབབ་དོན་བཟང་རྒྱ་མཚོ་ཆེ། །སྙིང་གི་འཛིན་མར་འཁྱིལ་བྱེད་རབ་བརྟན་ཤོག །ཁྲིམས་(༧༥བ) ― GLG021_Page_0152 ―
[མ་དཔེ་གཟིགས་ན་འདིར་གནོན།]
གཉིས་ལྕིད་ཀྱིས་མཚན་པའི་ས་གཞིའི་བཞིན། །རྫོགས་ལྡན་རྔུལ་ཆུའི་མུ་ཏིག་འཕྲེང་མཛེས་པ། །སྩོལ་བྱེད་མཆོད་ཡོན་ས་དབང་ཉི་ཟླ་ཟུང༌། །སྐུ་ཚེ་ཆབ་སྲིད་མངའ་ཐང་རྒྱས་པར་ཤོག །འཇིག་རྟེན་སྤྱི་དང་ཁྱད་པར་གངས་ལྗོངས་འདིར། །མི་ཕྱུགས་ནད་འཚེ་འཁྲུག་རྩོད་དབུལ་ཕོངས་སོགས། །དུས་ཀྱི་ཆད་པ་ཀུན་ཞི་འཆི་མེད་ལྷའི། །བདེ་སྐྱིད་མངོན་སུམ་ཉམས་སུ་མྱོང་བར་ཤོག །ཆོས་ཉིད་འགྱུར་བ་མེད་པའི་ཀུན་གསལ་ངོས། །ཆོས་ཅན་རྟེན་འབྲེལ་མི་བསླུ་རྒྱུ་འབྲས་གཉིས། །སྲིད་ཞིའི་དགེ་ལེགས་སྣང་བ་བླ་ནས་བླར། །འབར་བའི་ཕུན་ཚོགས་དགའ་སྟོན་འཕེལ་བར་ཤོག །ཅེས་བདེན་པའི་ཚིགས་ཏུ་བརྗོད་པའི་སྨོན་ལམ་འདི་ནི་ཕོ་བྲང་བསམ་གྲུབ་རྩེའི་མངའ་འབངས་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ངག་དབང་ལྷག་པའི་ལྷ་མོ་ཡིས། །རྗེས་སུ་བཟུང་བའི་བློ་གྲོས་མཐུས། །བསྐལ་བཟང་གདུལ་བྱ་རྒྱ་མཚོ་ཡི། །རེ་བ་སྐོང་ལ་གསོལ་བ་འདེབས། །རྒྱ་ཆེ་ཟབ་མོའི་ལམ་རྣམས་ཀུན། །བསྟན་ནས་ལུས་ཅན་ངེས་ལེགས་སུ། །འདྲེན་མཛད་དངོས་དང་བརྒྱུད་པ་ཡི། །ཡོངས་འཛིན་ཚོགས་ལ་གསོལ་བ་འདེབས། །གསང་འདུས་ཟླ་བའི་ཅོད་པཎ་ལྷ། །མ་ཧེའི་ཞལ་ཅན་གྱིས་མཚོན་པའི། །རྒྱུད་སྡེ་བཞི་ཡི་དཀྱིལ་འཁོར་ཆེའི། །ལྷ་ཚོགས་རྣམས་ལ་གསོལ་བ་འདེབས། །མར་མེ་མཛད་དང་ཤཱཀྱའི་རྒྱལ། །མི་ཕམ་པ་སོགས་དུས་གསུམ་དུ། །བྱོན་ཟིན་འབྱོན་དང་འབྱོན་འགྱུར་དང༌། །བདེ་གཤེགས་ཀུན་ལ་གསོལ་བ་འདེབས། །ཟས་གཙང་སྲས་པོ་བཅུ་གཉིས་ལོར།(༧༦ན) ― GLG021_Page_0153 ―
[མ་དཔེ་གཟིགས་ན་འདིར་གནོན།]
།བསླེབས་པའི་སྐུ་ཚད་གསེར་གྱི་ལྷ། །མཐོང་བས་དོན་ལྡན་སྣང་བརྙན་མཆོག །ཤཱཀྱ་མུ་ནིར་གསོལ་བ་འདེབས། །ཟུར་ཕུད་ལྔ་ལྡན་འཇིག་རྟེན་དབང༌། །ལག་ན་རྡོ་རྗེ་ལེགས་བྱིན་མ། །ལ་སོགས་རྒྱལ་སྲས་མཐུ་བོ་ཆེ། །བྱང་སེམས་ཚོགས་ལ་གསོལ་བ་འདེབས། །བྱ་རོག་མ་དང་མྱུར་མཛད་མགོན། །གུར་ཞལ་དུད་གསོལ་དམག་གཟོར་མས། །མཚོན་པའི་དམ་པ་ཆོས་སྐྱོང་བའི། །སྲུང་མ་རྣམས་ལ་གསོལ་བ་འདེབས། །སྐྱབས་མགོན་ལུས་པ་མེད་པ་ལ། །སྒོ་གསུམ་གུས་པས་ཕྱག་འཚལ་ཞིང༌། །དངོས་བཤམས་ཡིད་སྤྲུལ་མཆོད་པ་འབུལ། །ནག་པོའི་ཚོགས་ཀུན་སྙིང་ནས་བཤགས། །བདག་གཞན་དགེ་ལ་ཡི་རང་ཞིང༌། །ཆོས་འཁོར་རྒྱུན་ཆད་མེད་སྐོར་བསྐུལ། །མྱ་ངན་མི་འདར་བཞུགས་གསོལ་འདེབས། །ལེགས་བྱས་བྱང་ཆུབ་ཆེན་པོར་བསྔོ། ཁྱད་པར་ཐོག་མེད་ཚེ་རབས་ནས། །ད་ལྟའི་བར་དུ་སྡིག་པའི་ཚོགས། །རང་གིས་བསགས་ཤིང་གཞན་དག་བསྐུལ། །མཐོང་ཐོས་རྣམས་ལ་ཡི་རང་སོགས། །བསགས་པའི་ཉེས་ཚོགས་མ་ལུས་པ། །མི་འཆབ་མི་སྦེད་ཡོངས་བསྒྲགས་ཏེ། །སྙིང་ནས་བཤགས་སོ་སླན་ཆད་སྲོག །ཕྱིར་ཡང་མི་བྱའི་སྡོམ་སེམས་བགྱིད། །ཕྱག་སྐོར་བཟླས་བརྗོད་གསོལ་འདེབས་དང༌། །དད་པ་སྙིང་རྗེ་ཏིང་ངེ་འཛིན། །བསྒོམ་ཞིང་མཆོད་པ་སྦྱིན་གཏོང་སོགས། །དགེ་ཚོགས་རང་གིས་དངོས་སུ་བསྒྲུབ། །གཞན་དག་ནུས་པས་དེ་ལ་སྦྱོར། །ཐབས་ཀྱིས་ལེགས་བསྐུལ་ངང་ཚུལ་དང༌། །མཚུངས་པར་སྤྱོད་པའི་རྣམ་པར་ཐར། །རྣར་སོན་མངོན་སུམ་གྱུར་པ་ལ། །བདག་གིས་ལག་ཏུ་བསྟར་བ་དང༌། །(༧༦བ) ― GLG021_Page_0154 ―
[མ་དཔེ་གཟིགས་ན་འདིར་གནོན།]
མཉམ་པའི་དགའ་བདེའི་སྤྲོ་ཤུགས་སོགས། །བསོད་ནམས་ཕུང་པོ་ཅི་བསག་མཐུས། །འདི་ནང་རྫོགས་ལྡན་དགའ་སྟོན་ཐོབ། །མཐའ་མེད་སྲིད་པའི་ལམ་རིང་པོར། །བགྲོད་ཚེ་གནས་ངན་ལེན་སྤོངས་ཞིང༌། །བཤེས་གཉེན་དམ་པའི་མགོན་གྱིས་ཟིན། །དྲི་མེད་རྒྱལ་བའི་བསྟན་དང་མཇལ། །ཐོས་བསམ་སྒོམ་པ་ལྷུར་བླངས་པས། །མཁའ་མཉམ་མ་རྒན་སེམས་ཅན་ཆེད། །རིང་པོར་མི་ཐོག་ཆོས་གཟུགས་སྐུ། །ཐོབ་ནས་འགྲོ་བ་འདྲེན་པར་ཤོག །ཅེས་ངེད་རང་གི་མིང་སྒྲ་ཡོད་པ་དང༌། ལམ་རིམ་བརྒྱུད་པ་སོགས་བླ་མ་སྤྱི་གཉིས་སོ་སོ། གསང་བདེ་འཇིགས་གསུམ་སོགས་ཡི་དམ། དུས་གསུམ་སངས་རྒྱས་སྤྱི་དང་ཇོ་ཤཱཀ་སོ་སོ། རིགས་གསུམ་མགོན་པོ། སྒྲོལ་མ་སོགས་བྱང་སེམས་སྤྱི། ཕྱག་བཞི་དྲུག་གུར་ཞལ། ལྷ་མོ་རྗེ་ཁོལ་སོགས་ཆོས་སྐྱོང་སྤྱི་རྣམས་ལ་ཤློ་ཀ་རེས་ཐུས་པའི་གསོལ་འདེབས་ཡན་ལག་བདུན་པ་སྤྱི་དང༌། བྱེ་བྲག་སྡིག་བཤགས་གཉིས་སོ་སོར་ཤློ་ཀ་གཉིས་རེ། སྨོན་ལམ་ཤློ་ཀ་ལྔ་རྣམས་ཡོད་པའི་ལྷ་སར་ཞབས་སྐོར་བསག་དུས་ཞལ་འདོན་མཛད་རྒྱུ་ཞིག་དགོས་ཞེས་དཔོན་ས་ཆོས་ལྡན་དབང་མོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །དཀོན་མཆོག་གསུམ་འདུས་པདྨ་ཐོད་ཕྲེང་གི །ཐུགས་རྗེའི་འོད་ཀྱིས་སྣ་ཚོགས་འཁོར་འདས་ཆོས། །རང་སར་གྲོལ་བའི་ཡང་སྲིད་གངས་ལྗོངས་འདིར། །འཁྲུལ་མེད་མྱུར་དུ་འབྱུང་བར་བྱིན་གྱིས་རློབས། །ཞེས་པ་འདི་ནི་བླ་མ་སྣ་ཚོགས་རང་གྲོལ་གྱི་གྲྭ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་(༧༧ན) ― GLG021_Page_0155 ―
[མ་དཔེ་གཟིགས་ན་འདིར་གནོན།]
ཆང་ཁྱིམ་པ་ངག་དབང་མཁྱེན་བརྩེའོ། །ངག་ལ་སྨྲ་བའི་རྩལ་ལྡན་རྐང་སེན་ཟླ། །རྣམ་དཔྱོད་དབང་ཕྱུག་རལ་པའི་རྩེར་ཤར་ཚེ། །བློ་ཆེན་རྒན་པོ་ཆོས་བཟང་བདག་པོ་སོགས། །འགྲོ་ཀུན་བསྙེན་སྲིད་མེད་པའི་སྲི་ཞུ་སྤེལ། །སོམ་ཉིའི་རྒྱ་བྲལ་དྭངས་མཚོར་བྱད་བཞིན་ལྟར། །ཆོས་ཀུན་གནས་ལུགས་མཐོང་ལ་མི་འཇིགས་པས། །ཡོད་མེད་མཐའ་བྲལ་ལྟ་དང་ལྷག་བསམ་གོ །ཆ་ཤས་གང་བའི་ཟླ་བ་ཇི་བཞིན་འཕེལ། །ཐུབ་པའི་བཞེད་གཞུངས་བློ་བཟང་གྲགས་པའི་བསྟན། །ཐོས་བསམ་མེ་ཏོག་མ་རྙིགས་ཆུན་པོ་ཡིས། །སྐལ་ལྡན་ལང་ཚོ་དར་བའི་ཐོད་ཆིངས་སུ། །སྤེལ་མཁས་འཆི་མེད་སྡེ་ལ་གསོལ་བ་འདེབས། །མཆོག་གསུམ་ཐུགས་རྗེ་བསྐུལ་བའི་བདེན་ཚིགས་བཞིན། །ཕུན་ཚོགས་རྟེན་འབྱུང་སྒོ་བརྒྱ་འགྲིག་པའི་ཁྲི། །མི་ཕྱེད་དད་པའི་གཟེར་གྱིས་ཡོངས་བཏབ་པར། །མགོན་ཁྱོད་བསྐལ་བརྒྱར་ཡུན་རིང་བཞུགས་གྱུར་ཅིག །བསོད་ནམས་གསེར་གྱི་འཁོར་ལོས་ཡངས་པའི་སར། །དབང་བསྒྱུར་སྐྱེ་རྒུའི་བདག་པོ་མཆོད་ཡོན་ཟུང༌། །ཉི་ཟླ་དང་མཉམ་རིང་འཚོའི་སྐུ་ཚེ་ཡིས། །ཆབ་འབངས་བདེ་སྐྱིད་སྣང་བ་ཆེས་འབར་ཤོག །བུ་རམ་ཤིང་པའི་རྗེས་སུ་ཉེར་ཞུགས་ཀུན། །ཚུལ་གནས་རྩ་བ་རབ་བརྟན་ཐོས་བསམ་གྱི། །ཡལ་འདབས་རབ་རྒྱས་སྒོམ་པའི་འབྲས་དུད་པའི། །དཔག་བསམ་ཡོངས་འདུའི་མཆེད་ཟླར་འགྱུར་བར་ཤོག །ཁྱད་པར་གསེར་མདོག་ཞྭ་ཡི་ཅོད་པཎ་གྱི། །གཟི་བྱིན་ཉི་མ་འབུམ་ཕྲག་ལུས་འཛིན་པས། ཁམས་གསུམ་ཉེས་བརྒྱའི་མུན་པ་དྲུང་ཕྱུང་སྟེ། །ངེས་པར་ལེགས་པའི་འོད་ཀྱིས་ཁྱབ་པར་ཤོག །རྒྱལ་གསུང་(༧༧བ) ― GLG021_Page_0156 ―
[མ་དཔེ་གཟིགས་ན་འདིར་གནོན།]
འགྲེལ་པར་བཅས་ལ་བརྒལ་བརྟག་གིས། །དཔྱད་དོན་ཉམས་སུ་བསྟར་འབྲས་དགའ་བདེའི་དཔལ། །ལེགས་ལྡན་འོག་མིན་དག་པའི་གླིང་ཡངས་པོར། །རང་གཞན་དོན་གཉིས་འགྲུབ་སྨོན་མཐར་ཕྱིན་ཤོག །མཆོག་དམན་ཡོངས་ཀྱི་ཕྲག་པར་རབ་ལྕི་བ། །དྲང་ཐིག་གསེར་གྱི་གཉའ་ཤིང་འཛིན་རི་ཡི། །མང་བཀུར་རྒྱལ་པོའི་བཀའ་བཏགས་མངོན་སུམ་དུ། །རྩོད་ལྡན་ཡིད་ཅན་ཀུན་གྱིས་ཉམས་མྱོང་ཤོག །འཇིག་རྟེན་སྤྱི་དང་ཁྱད་པར་བོད་ཡུལ་འདིར། །རྫོགས་ལྡན་རྗེས་འགྲོའི་བདེ་སྐྱིད་དཔལ་ལ་སྤྱོད། །རིང་མིན་འགྲོ་རྣམས་ཀུན་མཁྱེན་ཡེ་ཤེས་ཆེ། །འཐོབ་ཕྱིར་བསགས་པའི་དགེ་ཚོགས་མ་ལུས་བསྔོ། །དཀོན་མཆོག་ཡོན་ཏན་བརྗོད་པ་རྣམ་དག་གླུ། །སྙན་གྱུར་རྒྱུད་མངས་སྒྲ་ལས་ཉེར་དྲངས་དང༌། །ལྷན་ཅིག་མེ་ཏོག་མནྡ་ར་ཡི་ཆར། །ཡོངས་བབས་ཕྱོགས་དུས་ཀུན་ཏུ་བཀྲ་ཤིས་ཤོག །ཅེས་གསོལ་འདེབས་བརྟན་བཞུགས་སྨོན་ལམ་དང་བཅས་པའི་ཤློ་ཀ་བཅུ་གཅིག་ཡོད་པ་ཞིག་དགོས་ཞེས་དགའ་ལྡན་འོག་མིན་གླིང་པའི་སློབ་དཔོན་བསྟན་པ་རྒྱ་མཚོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །གསུང་ངག་ཆད་མེད་དབང་བཞིས་མོས་ལྡན་བློ། །ལེགས་སྨིན་སྐལ་བཟང་རྒྱ་མཚོར་བསྒྱུར་བྱེད་པ། །དཔལ་ལྡན་རྡོ་རྗེ་སེམས་པའི་ངོ་བོ་རུ། །སྒོ་འདོན་པ་བསྒྱུར་ན། སྒོ་གསུམ་གུས་པའི་སྒོ་ནས་མཆོད་པ་འབུལ། །གསལ་བའི་སྤྱན་སྔར་སྡིག་ལྟུང་མ་ལུས་བཤགས། །དཔང་པོར་བྱས་ཏེ་རང་གཞན་དགེ་ལ་རང༌། །མངོན་སུམ་བསྟན་ནས་ཆོས་འཁོར་སྐོར་བར་བསྐུལ། །སྒོ་གསུམ་གུས་པའི་སྒོ་ནས་གསོལ་བ་འདེབས། །གཡོ་མེད་མྱ་ངན་མི་འདར་བཞུགས་སུ་གསོལ། །སྒོ་གསུམ་གུས་པས་གསོལ་(༧༨ན) ― GLG021_Page_0157 ―
[མ་དཔེ་གཟིགས་ན་འདིར་གནོན།]
འདེབས་བདག་བྱིན་རློབས། །མེས་བློས་བསག་པའི་དགེ་ཚོགས་བྱང་ཆུབ་བསྔོ། །གསུམ་གུས་པའི་སྒོ་ནས་ཕྱག་འཚལ་ལོ། །ཞེས་ཚིག་རྐང་ཕྱི་མ་འདི་གང་འདོད་དུ་འདོན་པ་བསྒྱུར་ཆོག་པ་ཞིག་དགོས་ཞེས་བཟོ་དང་གསོ་བ་རྩིས་སྐར་ནག་སོགས་ལ་བློ་གྲོས་ཀྱི་འཇུག་པ་རྒྱས་པའི་འབྲོམ་སྡིང་པ་ནམ་མཁའ་རྒྱལ་མཚན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །ཡངས་པའི་བྱང་ཕྱོགས་ཧོར་གྱི་རྒྱལ་ཁམས་སུ། །དགའ་ལྡན་མིང་འཛིན་ས་སྐྱོང་མི་ཡི་རྗེ། །མཆོག་གསུམ་ཐུགས་རྗེས་བདེ་བ་ཅན་ཞིང་དུ། །དྲངས་ཏེ་པདྨའི་སྦུབས་སུ་སྐྱེ་བར་ཤོག །གར་དབང་སྣང་མཐའ་ཡས་པའི་མགོན་པོ་ཡི། །མངོན་སུམ་ཞལ་མཐོང་ཚངས་པའི་དབྱངས་སྙན་པོས། །ཐེག་ཆེན་ཟབ་དང་རྒྱ་ཆེ་དམ་པའི་ཆོས། །ལེགས་བསྟན་དེ་དོན་ཉམས་སུ་ལོངས་པར་ཤོག །ཚོགས་སྦྱོར་ལམ་གྱི་རྐང་སྟེགས་ལ་བརྟེན་ནས། །ས་བཅུའི་རིན་ཅེན་ཐེམ་སྐས་རིམ་འཛེགས་ཏེ། །རྣམ་པར་གྲོལ་བ་མཆོག་གི་སྒོ་ཕྱེ་ནས། །མི་གནས་མྱང་འདས་ཁང་པར་འཇུག་པར་ཤོག །ཆོས་གཟུགས་ཟུང་འཇུག་ངེས་པ་ལྔ་ལྡན་སྐུ། །འོག་མིན་ཞིང་ལས་འཕོ་འགྱུར་མེད་བཞིན་དུ། །སྣ་ཚོགས་སྤྲུལ་པའི་རོལ་གར་མཐའ་ཀླས་པས། །མཁའ་མཉམ་ལུས་ཅན་ཀུན་གྱི་མགོན་བྱེད་ཤོག །ཆོས་ཉིད་དག་པ་དོན་དམ་འགྱུར་མེད་ཆོས། །ཆོས་ཅན་རྒྱུ་འབྲས་འཇའ་མཚོན་ལྟར་བཀྲ་བའི། །སླུ་མེད་རྟེན་ཅིང་འབྲེལ་བར་འབྱུང་བའི་མཐུས། །སྨོན་ལམ་བཏབས་པ་ཇི་བཞིན་ལྷུན་གྲུབ་ཤོག །ཅེས་པ་འདིའང་ཧོར་གྱི་རྒྱལ་ཁམས་ཆེན་པོར་སྟོབས་ཀྱི་དབང་ཕྱུག་དགའ་ལྡན་(༧༨བ) ― GLG021_Page_0158 ―
[མ་དཔེ་གཟིགས་ན་འདིར་གནོན།]
པ་དུས་ཀྱི་ཆོས་ཉིད་དུ་གྱུར་སྐབས་སྐྱིད་ཤོད་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །གང་ཤར་ཀུན་རྫོབ་ཆོས་རྣམས་རིགཔའི་དབྱིངས། །རང་སར་གྲོལ་བའི་ཆེ་མཆོག་འདུས་པ་རྩལ། །ངག་དབང་བློ་གསལ་སྐལ་བཟང་རྒྱ་མཚོའི་སྡེར། །མི་ཕྱེད་དད་པའི་ཡིད་ཀྱིས་གསོལ་བ་འདེབས། །ཨ་ཧཾ་སྲོག་གི་ཀ་བ་དྷཱུ་ཏཱིའི་རྩ། །གཞོམ་མེད་རྡོ་རྗེའི་ཁམས་སུ་ལེགས་གྲུབ་ནས། །ལྔ་ལྡན་ལོངས་སྐུ་ཇི་བཞིན་རྟག་བཞུགས་པར། །མཆོག་གསུམ་ཐུགས་རྗེའི་མཐུ་ཡིས་འགྲུབ་བྱིན་རློབས། །བདག་སོགས་གྲངས་མེད་སྐྱེ་བར་མགོན་ཁྱོད་ཀྱི། །འཁོར་གྱུར་རྗེས་སུ་བཟུང་ནས་ཟབ་རྒྱས་ཆོས། །ཉམས་སུ་བླངས་ཏེ་ཟུང་འཇུག་རྡོ་རྗེ་འཆང༌། །རིང་པོར་མི་ཐོག་མངོན་དུ་འགྱུར་བར་ཤོག །ཅེས་གསོལ་འདེབས་སྨོན་ལམ་འདི་ལྟ་བུ་ཞིག་དགོས་ཞེས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་དབུ་མཛད་བློ་བཟང་བསྟན་འཛིན་གྱིས་དོན་གཉེར་ཆེན་པོས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །གར་དབང་མཛོད་སྤུ་ནས་སྤྲོས་ཟེར་ཕྲེང་འོད། །སྟོང་ཕྲག་ཉི་མ་བཞུ་བའི་གཟི་བྱིན་གྱིས། །འཆི་བདག་སྨག་རུམ་མིང་གི་ལྷག་མར་ཡང༌། །རྙེད་སྐབས་བྲལ་ཏེ་ཚེ་བྱིན་རློབ་ཏུ་གསོལ། །ངག་དབང་འཇམ་མགོན་བློ་ཡི་ལང་ཚོའི་དཔྱིད། །དར་དྲག་མཚན་བཟང་དཔེ་བྱད་འབར་བའི་སྐུ། །མགྲིན་པའི་འཁོར་ལོར་འགྱིང་བས་རིག་པའི་གནས། །རྒྱ་མཚོའི་ཕ་མཐར་བགྲོད་ལ་གསོལ་བ་འདེབས། །(༧༩ན) ― GLG021_Page_0159 ―
[མ་དཔེ་གཟིགས་ན་འདིར་གནོན།]
ཆོས་ཀུན་གདོད་ནས་སྟོངས་པའི་ནམ་མཁའ་ལ། །ཆོས་ཅན་རྒྱུ་འབྲས་ཉི་ཟླ་ཟུང་འབྲེལ་བས། །བསྐལ་བརྒྱར་གཡོ་མེད་བཞུགས་གསོལ་ས་བོན་ཚོགས། །རེ་བ་ཇི་བཞིན་སྨིན་པར་བྱིན་གྱིས་རློབས། །གནམ་གྱི་ཤེ་མོང་དཔུང་པས་ས་ཆེན་ལ། །དབང་བསྒྱུར་མི་ཡི་བདག་པོ་མཆོད་ཡོན་ཟུང༌། །ཞབས་བརྟན་ཆབ་སྲིད་ཉ་ཆེན་ཁོག་ཡངས་པོར། །མངའ་འབངས་ཕན་བདེའི་མུ་ཏིག་འཕྱུར་བར་ཤོག །འཇིག་རྟེན་སྤྱི་དང་ཁྱད་པར་ཁ་བའི་ལྗོངས། །བྱེ་བྲག་ཕྱོགས་འདིའི་དགོན་གནས་གྲོང་ཁྱེར་བ། །མཐའ་དག་བདེ་སྐྱིད་སྟེགས་ལ་ངལ་གསོ་ཞིང༌། །རིང་མིན་ཀུན་མཁྱེན་ཡེ་ཤེས་འཐོབ་པར་ཤོག །ཅེས་པའི་ཚིགས་སུ་བཅད་པ་འདི་ནི་རོང་རིན་སྤུངས་མངའ་ཁུལ་གྱི་ཆོས་སྡེ་ཁག་དང་དྲུང་གཟིམས་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །ཚེ་དཔག་མེད་མགོན་ཕྱག་གི་བུམ་པ་ལས། །ལེགས་འབབ་འཆི་བ་མེད་པའི་བདུད་རྩིའི་རྒྱུན། །དཔལ་ལྡན་བླ་མའི་ཐུགས་ཀའི་དཔལ་བེའུར། །རབ་འཁྱིལ་མི་ཤིག་སྲོག་གི་ཀ་བ་ཚུགས། །རྒྱལ་ཀུན་ངོ་བོ་བློ་བཟང་གྲགས་པ་ཡི། །ཐུབ་བསྟན་ཤར་ཕྱོགས་ལྗོན་པའི་ཚལ་ཆེན་པོར། །སྤེལ་ཞིང་འཛིན་མཁས་བཤེས་གཉེན་དམ་པ་མཆོག །རྡོ་རྗེ་ལྟ་བུར་གཡོ་མེད་ཞབས་བརྟན་ཤོག །ཞྭ་སེར་མནབ་པའི་ཆོས་སྐྱོང་སྲུང་མ་དང༌། །ཁྱད་པར་འདོད་ཁམས་དབང་ཕྱུག་རེ་མ་ཏཱིས། །མགོན་འདི་བསྐལ་བརྒྱར་བཞུགས་ནས་གདུལ་བྱའི་ཚོགས། །འདོད་པའི་རེ་བ་བསྐོང་བའི་འཕྲིན་ལས་མཛོད། །དྭགས་པོ་དགའ་ལྡན་རབ་བརྟན་གྱི་མཁན་པོ་སྒྲོམ་མདའ་ཆོས་རྗེ་བློ་(༧༩བ) ― GLG021_Page_0160 ―
[མ་དཔེ་གཟིགས་ན་འདིར་གནོན།]
བཟང་བསྟན་འཛིན་གྱི་བརྟན་བཞུགས་འདི་ནི་སེ་ར་ཐེག་ཆེན་གླིང་དུ་སྡོད་མིའི་གྲྭ་རིགས་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །སླུ་མེད་མཆོག་གསུམ་ཐུགས་རྗེའི་བདེན་ཚིག་གིས། །ངག་དབང་འཇམ་མགོན་བློ་བཟང་གྲགས་པ་ཡི། །བསྟན་པ་རྒྱ་མཚོའི་ཕ་མཐར་ཡོངས་སྤེལ་བའི། །འཇམ་དབྱངས་དགའ་བའི་བཤེས་ཁྱོད་ཞབས་བརྟན་ཤོག །བློ་ལྡན་སྐལ་བཟང་ཡིད་ཀྱི་མུན་པ་ཀུན། །དམ་པའི་ཆོས་ཀྱི་སྒྲོན་མེས་རབ་གསལ་ཏེ། །ངོ་མཚར་སྨད་བྱུང་བཀོད་པའི་ཞིང་ཁམས་སུ། །སེང་གེའི་ང་རོའི་དྲུང་དུ་སྐྱེ་བར་ཤོག །ཅེས་པ་འདིའང་ཤངས་བཀྲ་ཤིས་རྩེ་པའི་མ་བློ་བཟང་ཆོས་སྒྲོན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ལྷག་བསམ་དག་པའི་ལེགས་བྱས་ས་བོན་ཚོགས། །སྨོན་ལམ་དྲོད་གཤེར་རྐྱེན་གྱིས་སྐྱེད་བསྲིངས་པའི། །གྲངས་མེད་སྐྱེ་བའི་ལྗོན་ཤིང་ཡལ་འདབ་རྩེར། །དམ་པའི་མགོན་གྱི་འབྲས་བུས་དུད་པར་ཤོག །འཁོར་བར་རྟག་རྒྱུའི་ཡང་སྲིད་མཁའ་ལྡིང་དང༌། །མགོན་ཁྱོད་གྲིབ་མ་གཉིས་པའི་གྲོགས་བཞིན་དུ། །ནམ་ཡང་མི་འབྲལ་ངེས་པར་ལེགས་པ་ཡི། །དཔག་བསམ་ཡོངས་འདུའི་རྩེ་མོར་བདེར་བགྲོད་ཤོག །ཆོས་ཅན་རྒྱུ་འབྲས་མི་བསླུའི་ཉི་ཟླ་ཟུང༌། །ཆོས་ཉིད་འགྱུར་མེད་མཁའ་ལ་ཡོངས་ཤར་བས། །ཇི་ལྟར་སྨོན་པའི་སྣང་བ་རབ་རྒྱས་དཔུང༌། །མཆོག་གསུམ་ཐུགས་རྗེའི་གཟི་བྱིན་འབར་བར་ཤོག །(༨༠ན) ― GLG021_Page_0161 ―
[མ་དཔེ་གཟིགས་ན་འདིར་གནོན།]
ཤྲཱ ཝ ཎྱ ནཱ མཻ སྟ བ དེ ཤ བྷཱུ ཏཻ རྦྷ བྱཱ དུ ཁཱཿ སུ ཪྻ ཤི ཝཱ ནྡྷ ཀཱ ར། ཁྱོད་མཚན་སྒྲ་འཛིན་ཡུལ་དུ་གྱུར་ཙམ་གྱི། །འཁོར་བའི་སྡུག་བསྔལ་མུན་སེལ་ཉི་མ་ཆེ། །པཱ ཤྱེ ན ཨ རྠི ན པྲ ཏི བི མྤ ཡཽ གི ཀྱཱ པ ཉྩ ཏི ཤྩཱ ད ཤ བྷཱུ མི ཨི ཤྱ། །བདེ་བར་གཤེགས་པ་སུམ་ཅུ་རྩ་ལྔ་ཡི། །སྣང་བརྙན་མཐོང་བས་དོན་ལྡན་ལ་སྦྱོར་བ། །གསེར་ཞུན་པད་རཱག་ཐགས་རིས་ངོས་འཁྱིལ་བས། །འགྲོ་ཀུན་རྒྱུད་ལ་བཏབ་པའི་བྱང་ཆེན་གྱི། །ས་བོན་རྣམ་སྨིན་དཀར་པོ་གངྒཱའི་རྒྱུན། །ཡེ་ཤེས་མཆོག་གི་ཆུ་གཏེར་ཆེར་འབབ་ཤོག །ས་སྐྱོང་འཕྲིན་ལས་རྒྱ་མཚོ་ཡང་སྲིད་ཀུན། །ལྷ་མིའི་རིན་ཆེན་སྐས་ལ་གྱེན་འཛེགས་ནས། །རིང་མིན་ཐར་པའི་སྒོ་འཕར་ལ་བརྒྱུད་དེ། །སྐུ་གསུམ་བ་གམ་ཡང་རྩེར་འཇུག་པར་ཤོག །འདིའི་ཆེད་སྒོ་གསུམ་ངལ་བསྟེན་ཤིང་རྟ་ཡིས། །བསོད་ནམས་ཟླ་བའི་ཕུང་པོ་འདྲེན་བྱེད་པར། །རྟོགས་ཀུན་ཚེ་དཔལ་འབྱོར་བའི་འོད་འབར་(༨༠བ) ― GLG021_Page_0162 ―
[མ་དཔེ་གཟིགས་ན་འདིར་གནོན།]
ཏེ། །ངེས་ལེགས་ཀུནྡའི་ཆུན་པོ་ཐོད་འཆིང་ཤོག །སྤྱི་དང་ཁྱད་པར་གངས་ལྗོངས་མགྲིན་སྔོན་གྱི། །གནག་སྣུམ་རལ་པའི་རྩེ་ན་ཕན་དང་བདེ། །འབྱུང་གནས་ཐུབ་བསྟན་ཟླ་བ་རྟག་ཚེས་པའི། །ཆ་ཤས་སྲིད་མཐའི་བར་དུ་འཕེལ་བར་ཤོག །ཅེས་ས་སྐྱོང་ཕྱག་མཛོད་འཕྲིན་ལས་རྒྱ་མཚོ་དུས་ཀྱི་ཆོས་ཉིད་དུ་གྱུར་པའི་ཚེ་གཙུག་ལག་གཉིས་པ་ཤེས་པའི་མིག་ཡངས་སྟག་ལུང་དཔལ་མགོན་གཙོ་བོར་གྱུར་པའི་འོ་རློན་པ། རགས་ཁ་འཇམ་དབྱངས་དབང་པོ། ཤར་གླིང་དཀོན་མཆོག །དར་གླིང་འཇམ་དབྱངས་དབང་པོ། སྐྱིད་རོང་དགོས་ཕྲུག །ཁང་གསར་དགོས་བསམ། སེ་ར་ངག་དབང་དར་རྒྱས། རགས་ཁ་རྟ་མགྲིན། རམ་པ་བྲག་ལོགས་པ། ཁང་གསར་ལྷོ་འཇམ་དབྱངས་དོན་གྲུབ། ལྕང་སྲུངས་ཁང་རིན་ཅེན་རྡོ་རྗེ། བན་རྩ་བློ་བཟང༌། ཤུན་ཤག་ཨ་ཁྱག །འབྲང་ཤག་སྐོས་པ། བྱང་སྟེང་བཀྲ་ཤིས་རྣམས་ཀྱིས་ཕུང་པོ་གསུམ་པའི་མདོ་ནས་བསྟན་པའི་བདེ་བར་གཤེགས་པ་སུམ་ཅུ་རྩ་ལྔའི་སྐུ་བརྙན་གྱི་གསེར་ཐང་བསྐྲུན་པའི་ཚེ་ཟ་ཧོར་གྱི་བནྡེས་སྦྱར་བའི་སྨོན་ལམ་འདི་དང་ལྷ་ཚོགས་རྣམས་ཀྱི་ཞལ་བྱང་གི་ཡི་གེ་པ་ནི་ལྕང་གསེབ་པ་འཇམ་དབྱངས་དཔལ་བཟང༌། ཨེ་པ་ངག་དབང་ཚེ་རིང༌། གྲྭ་ནང་བསོད་ནམས་ལྷུན་གྲུབ་རྣམས་ཀྱིས་བགྱིས་པ་སིདྡྷ་རསྟུ། །གསོལ་འདེབས་ཏམྦུ་ར་ཡི་དབྱངས་སྙན་གླུ། །མི་ཕྱེད་དད་པའི་རྒྱུད་ལས་ཉེར་འདྲེན་ན། །རྣམ་མཁྱེན་ཐོབ་མིན་བར་གྱི་ཚེ་རབས་སུ། །བཤེས་གཉེན་དམ་པའི་མགོན་གྱིས་རྗེས་འཛིན་ཤོག །ཅེས་པ་འདིའང་སྐྱིད་ཤོད་ཆོས་རྗེའི་གྲྭ་པ་ཞིག་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །འཁོར་བའི་ཕ་མཐར་རྫོགས་མིན་དེ་སྲིད་དུ། །གཟུགས་སྐུ་མི་ཟད་རྒྱན་གྱི་འཁོར་ལོ་ཆེ། །འཆར་དང་ནུབ་པ་སྤངས་པའི་དམ་བཅའ་ཅན། །འཁོར་འདས་མུན་སེལ་སྔོན་མེད་ཉི་(༨༡ན) ― GLG021_Page_0163 ―
[མ་དཔེ་གཟིགས་ན་འདིར་གནོན།]
མ་ཀྱེ། །ཀུན་ཡགས་མིང་འཛིན་དུས་ཀྱི་མཆེ་བའི་ཕྲག །མི་ཟད་ཤུགས་དྲག་ལས་ཉོན་དབང་སོང་བས། །བཅོམ་ལྡན་རྣམ་པར་སྣང་མཛད་གངས་ཅན་མཚོའི། །ཐུགས་རྗེའི་ཟེར་གྱིས་འོག་མིན་གནས་སུ་དྲོངས། །བསོད་ནམས་བྱས་པའི་མེ་ལོང་གཙང་མའི་ངོས། །མཁའ་མཉམ་མར་གྱུར་སྐྱེ་རྒུར་གཏོགས་སོ་ཅོག །འདི་ཕྱི་ཡང་སྲིད་ཀུན་བདེ་མྱང་འདས་ཀྱི། །བཞིན་རས་རྟག་ཏུ་འགོག་མེད་གསལ་འཆར་ཤོག །ཅེས་དར་འབག་དགོས་པས་རྣམ་སྣང་གི་བརྒྱ་ཐང་བཞེངས་པའི་རྒྱབ་ཡིག་ཏུ་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ཀཱ ལོ ད ཡྻ ན ཀུ ལྱ ཙེ ཏ ནཱ ནུ བྱ ཉྫ ནྱ ནི མི ཏྟ ར སྨི ཙ། སོ་གཉིས་མཚན་བཟང་བརྒྱད་ཅུའི་དཔེ་བྱད་ཟེར། །ཤར་ཚེ་རིགས་སུ་མ་ཆད་ལུས་ཅན་གྱི། ཨཱ ནཱ ཤ ཡྻ ག །ཎཱ རྠ པཱ ཤྱ ཡོ གཱ པ ཏྶོ བྷ ཝ ཨ ནྡྷ ཀཱ ར ཙ། འཁོར་འདས་རྒུད་པའི་སྨག་རུམ་ཀུན་གཞིལ་བའི། །ཞལ་སྐྱིན་མཐོང་བས་དོན་ལྡན་ལ་སྦྱོར་བས། །བསྟན་འཛིན་དཱ་ཡན་རྒྱལ་(༨༡བ) ― GLG021_Page_0164 ―
[མ་དཔེ་གཟིགས་ན་འདིར་གནོན།]
པོར་ཉེར་འབོད་པའི། །གནམ་གྱི་ཤེ་མོས་ས་ལ་དབང་བསྒྱུར་བ། །བསོད་ནམས་བྱང་ཆུབ་མཆོག་གི་སྙིང་པོའི་བར། །མི་འཛད་གཏེར་གྱི་བུམ་བཟང་དེང་འདིར་འགྲུབ། །སྣང་སྲིད་གཟུགས་རྙན་མཐའ་དག་རི་མོ་རུ། །འདྲི་བར་སྨན་མཁྱེན་ཉི་ཟླ་ཟུང་འཇུག་ལས། །སྨན་ཐང་ལུགས་སྲོལ་འཛིན་ལ་རྩེར་སོན་པའི། །དཔལ་མགོན་གཙོར་གྱུར་སོར་མོའི་ཟློས་གར་སྤེལ། །ཆོས་དཀརཏེ་སིའི་གཙུག་ཏོར་ལས་འབབ་པ། །རྟག་ཏུ་ཕན་བདེའི་ཡན་ལག་བརྒྱད་ལྡན་ཆབ། །དམིགས་ཡུལ་གྱིས་མཚོན་འདི་སྒྲུབ་བྱེད་པ་པོ། །ཛཧྣུ་ཡིས་ངོམས་མེད་འཐུང་བར་ཤོག །མཁའ་མཉམ་མ་རྒན་སྲིད་པའི་རྒྱ་མཚོ་ལས། །སྒྲོལ་བའི་གཟིངས་གྱུར་དེང་བསྒྲུབས་དགེ་ཚོགས་རྣམས། །བསྔོས་འབྲས་ཆོས་གཟུགས་སྐུ་གཉིས་ཟུང་འཇུག་པའི། །རིན་ཆེན་གླིང་དུ་འགྲོ་རྣམས་སྒྲོལ་བར་ཤོག །ཅེས་གནམ་གྱིས་བསྐོས་པའི་སའི་ཚངས་པ་བསྟན་འཛིན་དཱ་ཡན་རྒྱལ་པོ་དུས་ཀྱི་ཆོས་ཉིད་དུ་གྱུར་པ་མཐོ་རིས་ཀྱི་སྲིད་པ་འཛིན་པའི་ཆེད་དུ་སྟག་ལུང་དཔལ་མགོན་གྱིས་ཐོག་དྲངས་པའི་རགས་ཁ་འཇམ་དབྱངས་དབང་པོ། ཤར་གླིང་དཀོན་མཆོག །དར་གླིང་འཇམ་དབྱངས་དབང་པོ། སྐྱིད་རོང་དགོས་ཕྲུག །ཁང་གསར་སྦུག་དགོས་བསམ། རམ་པ་བྲག་ལོགས་པ། རགས་ཁ་རྟ་མགྲིན། ཁང་གསར་ལྷོ་འཇམ་དབྱངས་དོན་གྲུབ། ལྕང་སྲུངས་ཁང་རིན་ཆེན་རྡོ་རྗེ་རྣམས་བཞེང་བཅུག་པའི་རྣམ་པར་སྣང་མཛད་དང་སྨན་བླ་བདེ་གཤེགས་བརྒྱད་གཙོ་བོར་གྱུར་བའི་རྣམ་སྣང་སྟོང་ཐང་གི་རྒྱབ་ཡིག་སྨོན་ལམ་ཏུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །མཚན་སྙན་སྐྱེ་རྒུའི་གཙུག་ཕུད་ཅན་གྱི་རྣར། །ཐོས་པའི་མོད་ལ་འཆི་མེད་མངལ་སྦྲུམ་(༨༢ན) ― GLG021_Page_0165 ―
[མ་དཔེ་གཟིགས་ན་འདིར་གནོན།]
པའི། །བྱེད་པོ་ཚེ་མཐའ་ཡས་པ་དབྱར་རྔའི་སྒྲ། །བྱང་ཆུབ་མཐའ་སྙེད་ཐོས་འཛིན་རྒྱན་དུ་སྤུད། །རྨ་བྱས་བཏེགས་པའི་མི་འགྱུར་གཡུང་དྲུང་ཁྲི། །འཁོར་སྐྱོན་དག་པའི་འདབ་སྟོང་ཟེའུ་འབྲུ། །ཐབས་ཤེས་ཉི་ཟླ་ཟུང་འཇུག་གདན་སྟེང་དུ། །བཤེས་གཉེན་དམ་པ་རྡོ་རྗེ་ལྟར་བརྟན་ཤོག །ངག་དབང་འཇམ་དཔལ་ཐུན་མཚམས་བླ་གོས་ཅན། །བློ་བཟང་གྲགས་འབར་རིང་ལུགས་འཛིན་མའི་མཐའ། །ཟད་མིན་དེ་སྲིད་སྤེལ་བའི་འཕྲིན་ལས་རྒྱུན། །ལྷ་བཅས་འགྲོ་བའི་རྒྱ་མཚོར་རྟག་འབབ་ཤོག །རྣམ་འདྲེན་བུ་རམ་ཤིང་པའི་རྒྱལ་ཚབ་ཏུ། །ཞྭ་སེར་ཅོད་པཎ་བཅིངས་ནས་དབང་བསྐུར་བའི། །འཇམ་དཔལ་སྙིང་པོའི་རིང་ལུགས་རྩིབས་སྟོང་ཤུགས། །ཐུབ་བསྟན་གླིང་བཞིར་ཐོག་མེད་འཁོར་བར་ཤོག །འཛམ་བུའི་གྲིབ་ཏུ་ངལ་གསོའི་ཡིད་ཅན་གཉར། ཁྲིམས་གཉིས་གསེར་ཤིང་དྲང་པོའི་ཐིག་འདེབས་པའི། །ས་དབང་ཆབ་སྲིད་ལེགས་འཕེལ་མངའ་འབངས་ཀུན། །རྫོགས་ལྡན་དགའ་སྟོན་བཞིན་དུ་སྤྱོད་པར་ཤོག །ཐོག་མཐའ་བར་དུ་བཀྲ་ཤིས་ཆོས་ཀྱི་དུང༌། །གཡས་འཁྱིལ་ཕན་དང་བདེ་ཆེན་འབྱུང་བའི་གླིང༌། །ཐུབ་བསྟན་སྒྲོན་མེས་འཇིག་རྟེན་མུན་སེལ་བར། །རྣམ་གསུམ་འཁོར་ལོའི་སྒོ་ནས་འཕེལ་བར་ཤོག །འགྲོ་ཀུན་རྒྱུད་ལ་གོས་པའི་བསོད་ནམས་གཞིར། །སྨོན་ལམ་ས་བོན་བཏབ་ལས་བདེ་སྐྱིད་འབྲས། །ཐར་པའི་སྲོག་འཚོའི་ཟུང་གྱུར་ས་བཅུ་ཡི། །ཐེམ་སྐས་ལ་འཛེགས་བྱང་ཆེན་བགྲོད་པར་ཤོག །ཅེས་པའི་ཚིགས་སུ་བཅད་པ་འདི་ནི་འཕྱོས་བཀྲ་ཤིས་བདེ་ཆེན་སྤྱི་སོས་ནན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་(༨༢བ) ― GLG021_Page_0166 ―
[མ་དཔེ་གཟིགས་ན་འདིར་གནོན།]
སོ། །ཐུབ་བསྟན་རྡུལ་བྲལ་སྟོན་མཚན་ཟླ་བ་ལས། །ཞྭ་སེར་འཆང་བའི་རིང་ལུགས་བསིལ་བའི་ཟེར། །སྣང་བ་འབུམ་དུ་ཆེས་ཆེར་འབར་བའི་ཞར། །འགྲོ་རྣམས་ཕན་བདེའི་ཀུནྡ་བཞད་པར་ཤོག །ཁྱད་པར་སྐོར་གསུམ་མངའ་རིས་རྒྱལ་ཁམས་སུ། །འཇམ་མགོན་བློ་བཟང་གྲགས་པའི་རྗེས་འཇུག་ཚོགས། །མང་ཐོས་ལུང་གི་བརྒྱ་ཕྲག་ཆུ་བོ་རྣམས། །གཅིག་འདུས་དབྱར་མཚོ་ལྟ་བུར་འཕེལ་བར་ཤོག །དེ་འཛིན་དགེ་བའི་བཤེས་དང་འདུས་པའི་གྲྭ། །དར་ཞིང་རབ་བརྟན་ཡངས་པའི་འཇིག་རྟེན་གསུམ། །སྤྱི་དང་ཁྱད་པར་པུར་རྒྱལ་བོད་ཡུལ་འདིར། །བདེ་སྐྱིད་སྙན་པའི་དུང་དཀར་གཡས་འཁྱིལ་ཤོག །ཅེས་པ་འདིའང་རབ་འབྱམས་པ་བློ་བཟང་བརྩོན་འགྲུས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །རྒྱལ་རྣམས་མཁྱེན་བརྩེ་ནུས་ཀུན་ཁྱོད་ཡོན་དུ། །ལྷུན་གྲུབ་འཛམ་གླིང་ཆེ་བའི་རིགས་སྔགས་འཆང༌། །དཀྱིལ་འཁོར་རྒྱ་མཚོའི་གཙོ་མཆོག་ཐོད་ཕྲེང་རྩལ། །བོད་འབངས་བདེ་སྐྱིད་ཉི་མ་རྟག་འཆར་མཛོད། །གང་དང་མངའ་བདག་རྗེ་ལ་ལས་སྨོན་འབྲས། །ཅུང་ཟད་སྨིན་པར་སྤྲུལ་པའི་དབུག་དབྱུང་གི །ལུང་ཟིན་ཟ་ཧོར་སྔགས་སྨྱོན་བཞད་པ་རྩལ། །གང་ཤར་རང་སར་གྲོལ་ལ་གསོལ་བ་འདེབས། །རབ་བཏགས་སྙན་དངགས་ཇི་བཞིན་གཅམ་བུའི་ཚིག །མ་ཡིན་གསོང་པོར་བརྗོད་པའི་བདེན་སྟོབས་མཐུས། །སཱ་ལའི་ལྗོངས་ཀྱི་སྐྱེ་རྒུར་གཏོགས་སོ་ཅོག །རྫོགས་ལྡན་དུས་ཀྱི་དགའ་སྟོན་ལྟར་སྤྱོད་ཤོག །ཅེས་པ་འདི་ནི་གཡས་རུ་གཙང་བསམ་གྲུབ་རྩེའི་རྫོང་སྡོད་མངའ་ཁུལ་རྣམས་ཀྱིས་རིང་འཚོའི་རྟེན་འབྲེལ་བསྒྲིགས་ཤིང་(༨༣ན) ― GLG021_Page_0167 ―
[མ་དཔེ་གཟིགས་ན་འདིར་གནོན།]
དེ་བསྟུན་བཞི་སྡེ་ཁང་དུ་འཇོག་འདུན་གྱི་གསོལ་འདེབས་ལེའུ་བདུན་པ་བསམ་པ་ལྷུན་གྲུབ་མ་དང་བཅས་པ་པར་དུ་བརྐོས་ཚེ་ཐག་ཁྲའི་སྦྲུལ་ལྟར་ལུང་བསྟན་ཞིག་ལ་སྒྲོ་བརྟགས་ཀྱིས་བསྙད་ནས་ཚིགས་བཅད་དགོས་ཚུལ་བཞིན་ཟ་ཧོར་གྱི་བནྡེས་སུག་བྲིས་སུ་བགྱིས་སོ། །ཕྱག་ན་པད་དཀར་འཆང་བའི་ཚངས་དབྱངས་གསུང༌། །ཡིག་དྲུག་གཟུགས་ཤར་རྒྱུན་ཆད་མེད་འཁོར་བས། །བཤེས་གཉེན་དམ་པ་བསྐལ་བརྒྱར་ཞབས་བརྟན་ཅིང༌། །བསྟན་འགྲོའི་བདེ་སྐྱིད་ཉི་མ་གུང་འཆར་ཤོག །བྱང་གླིང་བསམ་གྲུབ་རྒྱལ་པོ་གཉེན་བཤེས་སོགས། །ལུས་ངག་ཡིད་ཀྱིས་སྒྲུབ་ལ་གཏོགས་སོ་ཅོག །འདི་སྣང་ལྷ་ཡི་ཚེ་འབྱོར་རྗེས་འགྲོ་ཞིང༌། །ཕྱི་མ་གྲུ་འཛིན་ཞིང་དུ་སྐྱེ་བར་ཤོག །ཁོར་ཡུག་གངས་ཀྱི་ར་བས་ཡོངས་བསྐོར་འདིར། །དབུལ་ཕོངས་ནད་འཁྲུག་དུས་ཀྱི་ཆད་པ་ཀུན། །མིང་གི་ལྷག་མར་གྱུར་ཏེ་བདེ་སྐྱིད་ལ། །སྒོ་གསུམ་སྤྱོད་པར་བཅུད་རྣམས་སྐལ་མཉམ་ཤོག །ཅེས་པའི་སྨོན་ལམ་ཚིགས་བཅད་འདིའང་བྱང་གླིང་བསམ་གྲུབ་རྒྱལ་པོས་མ་ཎི་དུང་ཕྱུར་གྱི་ཆོས་འཁོར་འཛུགས་སྐབས་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །བདེ་བ་ཅན་ཞིང་མགོན་པོ་འོད་མཐའ་ཡས། །རྒྱ་གར་པཎ་ཆེན་ཚུལ་བཟུང་ཐོད་ཕྲེང་རྩལ། །ཞི་ཁྲོ་རིགས་ཀུན་ཁྱབ་བདག་དབང་པོ་ཡིས། །དྲི་མེད་སྤྱན་རས་གཟིགས་པ་ལྷུར་མཛོད་ཅིག །སྟོང་ཉིད་སྙིང་རྗེའི་རང་མདངས་ཨ་ཡིག་སྟེང༌། །དྷུ་ཏིའི་ཀ་བས་བདེ་ཆེན་ཧམ་གཏེག་ནས། །རྡོ་རྗེའི་སྲོག་ཏུ་བྱིན་བརླབས་བཞད་པ་རྩལ། །ཆེ་མཆོག་འདུས་པའི་ངོ་བོར་རྟག་བཞུགས་གསོལ། །(༨༣བ) ― GLG021_Page_0168 ―
[མ་དཔེ་གཟིགས་ན་འདིར་གནོན།]
གཞོན་ནུ་བུས་སྐུ་འཇའ་ཚོན་འོད་ཀྱི་མདངས། །བཞིན་ལག་རྣམ་པར་ཤར་བའི་ལོངས་སྤྱོད་རྫོགས། །ངེས་པ་ལྔ་དང་ལྡན་ཕྱིར་བསྐལ་བ་འདི། །སྟོང་མིན་དེ་སྲིད་བར་དུ་བརྟན་པར་བཞུགས། །འཁོར་འདས་ཕྱག་རྒྱ་ཟིལ་གནོན་དུས་དགྲའི་དབང༌། །དྲག་རྩལ་རྡོ་རྗེ་འབར་བའི་རྭ་གདེངས་ནས། །བདུད་སྡེ་དཔུང་བཅས་སྙིང་ལ་རབ་བསྣུན་ཏེ། །བསམ་སྦྱོར་ངན་པའི་ནུས་པ་ཐལ་བར་རློག །གསུང་ངག་ཆད་མེད་ཐེག་དགུ་དབང་གི་རྒྱུན། །བློ་གྲོས་བུམ་པར་ཡོངས་གཏམས་སྐལ་བཟང་གི །གདུལ་བྱ་རྒྱ་མཚོ་སྨིན་གྲོལ་ལམ་འགོད་པའི། །འཇམ་དབྱང་དགའ་བའི་བཤེས་གཉེན་ཞབས་བརྟན་ཤོག །ཨྱོན་ཡུལ་མཚུངས་མཆིམས་ཕུ་གསུང་གི་གནས། །དགེ་བཅུ་ཀུན་ཚང་ཡར་ཀླུང་སྨན་ལྗོངས་སུ། །ཟངས་མདོག་དཔལ་གྱི་རི་བོ་མངོན་སུམ་དུ། །འཕོས་འདྲའི་འདུས་སྡེ་དར་ཞིང་རྒྱས་པར་ཤོག །རྩ་བརྒྱུད་བླ་མ་བཀའ་བརྒྱད་དཀྱིལ་འཁོར་ལྷ། །མ་ནིང་ནག་པོ་སྡེ་དཔོན་སུམ་ཅུ་དང༌། ཁྱད་པར་བསྟན་སྲུང་རྡོ་རྗེ་གཤོག་རྒོད་མས། །འདི་ཕྱིའི་གཏན་གྱི་འདུན་མ་ལྷུན་གྲུབ་མཛོད། །ཅེས་རིང་འཚོའི་རྟེན་འབྱུང་གི་ཚིགས་སུ་བཅད་པ་འདི་ནི་བཻ་རོའི་ཐུགས་སྤྲུལ་གཏེར་སྟོན་པྲ་ཛྙཱ་ར་སྨིའི་ཡང་སྲིད་ངག་དབང་པདྨ་འཕྲིན་ལས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །མཁྱེན་བརྩེ་ནུས་པའི་ཆ་ཤས་ཡོངས་རྫོགས་པ། །མཆོག་གསུམ་ཐུགས་རྗེ་ཆེན་པོའི་བསིལ་ཟེར་གྱིས། །ཡོངས་བཏབ་སྨོན་ལམ་ཀུ་མུ་ད་ཡི་ཚལ། །འཇམ་མཉེན་འདབ་སྟོང་ཀུན་ནས་བཞད་པར་མཛོད། །ངག་དབང་བརྟན་པའི་འཁོར་ལོ་ཙོང་ཁ་པའི། །རབ་དཀར་དགེ་བའི་རིང་ལུགས་ལེགས་པའི་ལམ། །རྒྱལ་མཚན་(༨༤ན) ― GLG021_Page_0169 ―
[མ་དཔེ་གཟིགས་ན་འདིར་གནོན།]
རྩེ་མོར་བསྒྲེངས་པའི་བཤེས་གཉེན་མཆོག །མྱུར་དུ་ཞིང་འདིར་སྲིད་པ་འཛིན་པར་ཤོག །སྤྲུལ་པའི་ཟློས་གར་ཉིན་མོར་བྱེད་པ་ཡིས། །ཡིད་སྲུབས་མུན་པའི་སྨག་རུམ་མཐར་བྱས་ནས། །ཐུབ་བསྟན་སྣང་བ་ཆེས་དར་གསེར་ལྡན་ཁྱོན། །ཡོངས་ཁྱབ་བཞེད་པའི་འབྲས་བུ་ལྷུན་གྲུབ་ཤོག །དེ་ཚུལ་འགྲུབ་ལ་སྡིག་ཏོའི་ལྷ་མིན་མངལ། །ཆོས་སྲུང་འཆི་མེད་དབང་པོས་རྡོ་རྗེའི་རྭ། །གདེངས་པའི་མོད་ལ་ལྷུང་དང་ལྷན་ཅིག་ཏུ། །བརླང་པོར་སྤྱོད་པའི་བསམ་སྦྱོར་ཀུན་ཞི་ཤོག །རྒྱུ་དང་འབྲས་བུའི་ངང་ཚུལ་སླུ་མེད་དུ། །དེ་བཞིན་གཤེགས་པས་ཉེར་གསུངས་བདེན་པའི་བཀའ། །ཚད་མར་གྱུར་པ་ཇི་ལྟར་སྨོན་པའི་དོན། །རེ་བ་མ་ལུས་ལྷུན་གྱིས་འགྲུབ་པར་ཤོག །ཅེས་དེ་མོ་སྤྲུལ་པའི་སྐུ་ངག་དབང་དགེ་ལེགས་རྒྱལ་མཚན་གྱིས་སྤྲུལ་སྐུ་མྱུར་དུ་བྱོན་པའི་སྨོན་ལམ་ཚིགས་སུ་བཅད་པ་འདི་ལྟ་བུ་ཞིག་དགོས་ཞེས་དབོན་པོ་བསོད་ནམས་ནོར་བུས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །བརྗོད་པ་རྣམ་དག་ངག་ལ་སྨྲ་བའི་དབང༌། །གྲུབ་པའི་བློ་ཡིས་སྐལ་བཟང་འགྲོ་བ་ལ། །རྒྱ་ཆེན་སྤྱོད་དང་ཟབ་མོ་ལྟ་བའི་ཆོས། །དབྱར་མཚོ་ལྟ་བུར་སྤེལ་ལ་གསོལ་བ་འདེབས། །མི་འཇིག་སྤོབས་པས་གཉིས་མེད་གསུང་བའི་གཞུང༌། །འཆད་རྩོད་རྩོམ་པའི་གོ་ལྡན་ལྔ་རིག་ཆས། །ཐུབ་བསྟན་ཐོས་དོན་བསམ་སྒོམ་ལང་ཚོའི་དཔྱིད། །འཇམ་དབྱངས་དགྱེས་པའི་སྡེ་ལ་གསོལ་བ་འདེབས། །དད་དང་དམ་ཚིག་རྩ་བ་རབ་བརྟན་ཁྲིར། །ཤུགས་དྲག་སྨོན་ལམ་མེ་ཏོག་རབ་གཏོར་ནས། །མགོན་ཁྱོད་སྐལ་བརྒྱར་བཞུགས་གསོལ་ལེགས་འདེབས་ན། །འགྲུབ་པར་མཆོག་གསུམ་ཐུགས་རྗེས་བྱིན་གྱིས་རློབས། །བདག་གིས་(༨༤བ) ― GLG021_Page_0170 ―
[མ་དཔེ་གཟིགས་ན་འདིར་གནོན།]
བགྱིས་དང་བགྱིད་གྱུར་བགྱིད་བཞིན་པའི། །དགེ་ཚོགས་ཛམྦུའི་འབྲས་བུ་སེམས་བསྐྱེད་མཚོར། །ལྷུང་བའི་སྙེ་མ་བྱང་ཆེན་གསེར་སྦྱངས་སུ། །རབ་སྨིན་ལུས་ཅན་ཀུན་ལ་གཏོང་བར་ཤོག །ཉེས་བརྒྱའི་དྲི་མ་སྨོན་ལམ་ཆུས་བཀྲུས་པའི། །བསྟན་འགྲོའི་བདེ་སྐྱིད་སྟོན་མཚན་ཟླ་བའི་བཞིན། །རྒྱུད་ལྔའི་བསོད་ནམས་མེ་ལོང་གསལ་བའི་ངོས། །རྟག་ཏུ་འགོག་པ་མེད་པར་འཆར་བར་ཤོག །ཅེས་སྨོན་ལམ་གྱི་ཚིགས་སུ་བཅད་པ་འདི་ནི་རྒྱལ་སྲས་ཤེས་རབ་འཕེལ་བའི་སྤྲུལ་སྐུ་བློ་བཟང་བསྟན་འཛིན་གྱིས་དོན་གཉེར་ཆེན་པོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །བསྐལ་མང་རླབས་ཆེན་སྤྱོད་པའི་གོམ་སྟབས་ཀྱིས། །ཚོགས་སྦྱོར་ས་བཅུའི་ཐེམ་སྐས་ལ་འཛེགས་ནས། །བླ་མེད་སྐུ་གསུམ་ཁང་པར་ལེགས་བཞུགས་ཏེ། །ལྔ་ལྡན་ལོངས་སྤྱོད་རྫོགས་སྐུའི་ཟློས་གར་ཅན། །ཆེས་ཆེར་གདུལ་དཀའི་འགྲོ་བ་འདྲེན་པའི་སླད། །འཛམ་གླིང་དབུས་འགྱུར་སྤོ་ལ་མཆོག་སྤྲུལ་དུ། །ཡོངས་བསྟན་སྐལ་བཟང་འདྲེན་པ་ཤཱཀྱའི་རྒྱལ། །མ་འདྲིས་ལུས་ཅན་ཀུན་གྱི་མགོན་གཅིག་པུ། །གང་གི་སྣང་བརྙན་མ་ལ་ལ་སྐྱེས་ལས། །ལེགས་གྲུབ་གྲོང་འཁྱེར་བསོད་སྙོམས་གཤེགས་པའི་ཚུལ། །ཡེ་ཤེས་སེམས་དཔའི་གཟི་བྱིན་རབ་འབར་བ། །བཐོང་བས་དོན་ལྡན་ས་ལ་སྦྱོར་མཛད་ཀྱེ། ཁྱོད་དྲུང་དངོས་བཤམས་ཡིད་སྤྲུལ་མཆོད་པ་དང༌། །བསྟོད་ཅིང་གསོལ་འདེབས་སྨོན་ལམ་བྱེད་པ་ཀུན། །བགྲོད་དཀའ་སྲིད་པའི་འཕྲང་རིང་ལས་བསྒྲལ་ནས། །བདེ་ཆེན་ཐར་པའི་གླིང་དུ་དབུགས་དབྱུང་དྲོངས། །དཀར་མིན་ལས་ངན་འབྲས་བུ་ཉེར་ཞི་ཞིང༌། །ཚེ་དཔལ་སྟོབས་(༨༥ན) ― GLG021_Page_0171 ―
[མ་དཔེ་གཟིགས་ན་འདིར་གནོན།]
འབྱོར་ལེགས་པའི་ཡོན་ཏན་རྣམས། །ཡིད་ལ་འདོད་པ་ཇི་བཞིན་ལྷུན་གྲུབ་པར། །མགོན་པོ་ཐུགས་རྗེ་ཆེན་པོས་བྱིན་གྱི་རློབས། །ཞེས་ཙནྡན་ལས་གྲུབ་པའི་ཐུབ་དབང་གྲོང་ཁྱེར་དུ་གཤེགས་པའི་སྐུ་བརྙན་ལ་བསྟོད་ཅིང་སྨོན་ལམ་འདེབས་པ་འདི་ལྟ་བུ་ཞིག་དགོས་ཞེས་སན་ཆག་པཀྴིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །བདེ་ལྡན་ཞིང་ན་འོད་སྣང་མཐའ་ཡས་མགོན། །གྲུ་འཛིན་གནས་སུ་འཕགས་མཆོག་སྙིང་རྗེའི་གཏེར། །སིནྡྷུའི་རྒྱ་མཚོར་ཚེ་དབང་ཐོད་འཕྲེང་རྩལ། །དབྱེར་མེད་སྐུ་གསུམ་ངོ་བོར་གསོལ་བ་འདེབས། །གང་བྱིན་སྙིང་ལ་སིམ་པའི་ལས་སྨོན་མཐུས། །བོད་འབངས་ཕན་བདེ་སྒྲུབ་ཁུར་ལྷག་བསམ་གྱིས། །གྱེན་འདེགས་ངག་དབང་བློ་གྲོས་རབ་ཡངས་པ། །སྐལ་བཟང་རྒྱ་མཚོའི་གཉེན་ལ་གསོལ་བ་འདེབས། །ཡེ་ཤེས་འོད་ལྔ་གསལ་བའི་དཀྱིལ་འཁོར་དབུས། །སེང་ཁྲི་པད་ཉི་ཟླ་སྟེང་མགོན་པོ་ཁྱོད། །ཚེ་མཐའ་ཡས་པའི་སྐུར་བཞེངས་སྲིད་པའི་མཐའ། །རྫོགས་མིན་བར་དུ་གཡོ་མེད་བཞུགས་གྱུར་ཅིག །ནོར་འཛིན་ལུས་ཕྲའི་མངལ་དུ་ལེགས་སྦྲུམས་པའི། ཁྲིམས་གཉིས་གསེར་ཤིང་ཡིད་ཅན་ཡོངས་ཀྱི་གཉར། །ལྕི་བས་ཕན་བདེའི་མཆོད་སྦྱིན་མི་བདག་གི །སྐུ་ཚེ་མངའ་ཐང་ཆབ་སྲིད་རྒྱས་གྱུར་ཅིག །གསེར་མདོག་ཞྭ་ཡི་ཅོད་པན་འཆང་བའི་བསྟན། །འཕགས་ཡུལ་ནས་བཟུང་ཤར་ཕྱོགས་རྒྱ་མཚོའི་བར། །ཡོངས་ཁྱབ་ལུགས་གཉིས་འདོད་རྒུའི་ཆར་ཆེན་པོས། །ཕན་བདེའི་སྙེ་མ་གཡུར་དུ་ཟ་བར་ཤོག །རྟག་ཏུ་དགའ་བདེར་སྤྱོད་པའི་དཔལ་ལྡན་པ། །མ་སྨད་ཐར་པའི་འབྲས་བུ་རིན་ཆེན་གླིང༌། །རྣམ་གསུམ་འཁོར་(༨༥བ) ― GLG021_Page_0172 ―
[མ་དཔེ་གཟིགས་ན་འདིར་གནོན།]
ལོའི་བྱ་བས་དབྱར་མཚོ་ལྟར། །གྱེན་ནས་གྱེན་དུ་འཕེལ་ཞིང་རྒྱས་གྱུར་ཅིག །ས་འོག་ས་སྟེང་ས་བླར་གནས་སོ་ཅོག །ཁྱད་པར་པུར་རྒྱལ་བོད་ཀྱི་རྒྱལ་ཁམས་འདིར། །འཐབ་རྩོད་ནད་གདོན་དབུལ་ཕོང་ཉེར་ཞི་ཞིང༌། །བདེ་སྐྱིད་གསུམ་རྩེན་བཞིན་དུ་སྤྱོད་པར་ཤོག །རྡུལ་བྲལ་སྟོན་ཟླ་ལྟར་དཀར་ལྷག་བསམ་གྱིས། །ལེགས་བསྐྲུན་དུས་གསུམ་བསགས་པའི་དགེ་ཚོགས་འབྲས། །ནམ་མཁའི་མཐའ་མཉམ་འགྲོ་ལ་ཡོངས་སྨིན་ནས། །མི་གནས་མྱང་འདས་གྲོང་ཁྱེར་ལ་འཇུག་ཤོག །བྱིན་རླབས་མྱུར་འཇུག་རྩ་རྒྱུད་བླ་མ་དང༌། །དངོས་གྲུབ་སྩོལ་བའི་ཡི་དམ་དཀྱིལ་འཁོར་ལྷ། །ལས་བཞི་ཀུན་སྒྲུབ་ཆོས་སྐྱོང་སྲུང་མ་ཡིས། །བསམ་པ་ཇི་བཞིན་འགྲུབ་པའི་བཀྲ་ཤིས་ཤོག །ཅེས་རིང་འཚོའི་རྟེན་འབྱུང་དང་འབྲེལ་བའི་ཚིགས་སུ་བཅད་པ་འདི་ནི་ཆུ་ཤུར་དགའ་ལྡན་ཐར་པ་གླིང་གི་སློབ་དཔོན་གྲྭ་མང་དང་བཅས་པས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ངག་དབང་བློ་ཡི་བུམ་བཟང་དངོས་གྲུབ་ཀྱི། །རྒྱ་མཚོ་ལེགས་འཁྱིལ་བདག་གི་སྤྱི་བོའི་གཙུག །རབ་བཞུགས་བདུད་རྩི་སྙིང་ལ་ཡོངས་སིམ་པས། །འདི་ཕྱིའི་འདུན་མ་འགྲུབ་པར་བྱིན་གྱིས་རློབས། །ཞེས་ཆ་ཀར་ཐ་ཡང་ཆི་དབང་ཕྱུག་དགེ་སློང་གི་ཁ་ཏོན་དུ་བྱས་མཆོག་པ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །རྣམ་འདྲེན་སྐུ་གསུང་ཐུགས་ཀྱི་ཕུང་པོ་ཀུན། །མཛེས་སྡུག་ལུས་ཕྲར་ཤར་བའི་འཇོ་སྒེག་ཅན། །ཚེ་དཔལ་སྦྱིན་ལ་ཡིབཞིན་འཁོར་ལོའི་ལྷ། །(༨༦ན) ― GLG021_Page_0173 ―
[མ་དཔེ་གཟིགས་ན་འདིར་གནོན།]
རྒྱལ་ཡུམ་འཕགས་མས་དེང་འདིར་མཐུ་དཔུང་སྐྱེ། །ལུས་ངག་ཡིད་གསུམ་དལ་འབྱོར་དོན་ལྡན་དུ། །སྒྲུབ་ལ་དབང་བྱེད་བློ་གྲོས་བུམ་པ་བཟང༌། །འཆི་མེད་ཟིལ་མངར་རྒྱ་མཚོས་ཡོངས་བཀང་སྟེ། །བསྐལ་བརྒྱར་མི་གཡོ་བརྟན་པར་བྱིན་གྱི་རློབས། །སྲབ་གཉེན་སྟོད་གཡོགས་པ་ཉྩ་ལི་ཀའི་དར། །མཚམས་སྤྲིན་རུང་མཐུན་གོས་སུ་ཉེར་བསྒྱུར་ནས། །འཇམ་མགོན་མི་ཡི་གཟུགས་འཛིན་བཙོང་ཁ་པའི། །རིང་ལུགས་བསྐལ་པའི་བར་དུ་རྒྱས་པར་ཤོག །དགའ་སྐྱིད་ཀུན་ལྡན་སྡེ་བཞིའི་ཕོ་བྲང་ཆེའི། །ཞྭ་སེར་མནབས་པའི་ཆོས་དང་སྲིད་ཀྱི་བསྟན། ཁྲིམས་གཉིས་འཇིགས་རྟེན་ཡོངས་ཀྱི་གཉར་ལྕི་བ། །མང་བཀུར་རྗེས་འགྲོའི་ངང་ཚུལ་དར་དྲག་ཤོག །མི་ཟད་གནས་ངན་ལེན་གྱི་ཚ་གདུང་རྣམས། །རྒྱལ་མཚན་རབ་སྒྲོག་མ་ལ་ཡར་སྐྱེས་དང༌། །འཐུལ་བའི་མོད་ལ་སོ་སྐྱེ་ལས་འཕགས་པའི། །འདུས་སྡེ་འཁོར་ལོ་གསུམ་གྱི་ཡར་འཕེལ་ཤོག །སེམས་ཅན་ཅི་དང་ཁྱད་པར་རྒྱ་ཧོར་བོད། །རྒྱུ་དང་མི་རྒྱུའི་ལུས་ཅན་རྟག་བདེ་ཞིང༌། །སྡིག་སྡོའི་བསམ་སྦྱོར་ཀུན་སྤངས་རྣམ་པར་སྨིན། །ཟླ་ཞུན་ཁུ་བ་ཇི་བཞིན་འཛག་པར་ཤོག །རང་གི་རྒྱུད་ལ་གོས་སོ་ཅོག་གི་དགེ །སྐྱེ་རྒུ་མཐའ་དག་སངས་རྒྱས་ཐོབ་པའི་རྒྱུར། །ལེགས་བསྔོས་ཛཧྣུ་ཡི་བུ་མོའི་རྒྱུན། །བྱང་ཆུབ་རྒྱ་མཚོ་ཟད་མིན་འཕེལ་བར་ཤོག །ཅེས་རིང་འཚོའི་རྟེན་འབྱུང་སྨོན་ལམ་གྱི་ཚིགས་སུ་བཅད་པ་འདི་ནི་མཚན་སྒྲོག་མཁན་པོ་སྔགས་རམས་པ་ངག་དབང་འཕྲིན་ལས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །དབུས་འགྱུར་དག་པའི་ཞིང་གི་རྟེན་བརྟེན་(༨༦བ) ― GLG021_Page_0174 ―
[མ་དཔེ་གཟིགས་ན་འདིར་གནོན།]
པ། །མངོན་གསུམ་མིག་གི་ཡུལ་དུ་ལེགས་བསྟར་ནས། །རྣམ་དཀར་ལས་འབྲེལ་འཇོག་འདོད་བསམ་པ་བཞིན། །འགྲུབ་པར་དཀོན་མཆོག་གསུམ་གྱིས་བྱིན་གྱིས་རློབས། །ཞེས་ཕ་མ་གཉིས་དབུས་ཕྱོགས་ལ་ཡོང་བ་འདུན་པ་བཞིན་འགྲུབ་པའི་སྨོན་ལམ་ཚིག་བཅད་འདི་ལྟ་བུ་མགོན་པོ་ཡི་དིང་གི་ཚ་བོ་རབ་འབྱམས་པ་བློ་བཟང་བསྟན་འཛིན་གྱི་བསྐུལ་ངོར་ཟ་ཧོར་གྱི་བནྡེས་སྦྱར། །འོད་མཚན་དཔག་མེད་སྟོང་དུ་འབར་བའི་གཟིས། །འཆི་བདག་སྨག་རུམ་མཐར་བྱེད་གར་གྱི་དབང༌། །བདེ་ལྡན་ཞིང་ནས་ཐུགས་རྗེའི་སྤྱན་གྱི་དཀྱུས། །རིང་པོར་དེང་འདིར་རྟག་ཏུ་བཙའ་བར་མཛོད། །ཐུབ་པའི་གསུང་ངག་སྡེ་གནོད་རྣམ་པ་གསུམ། །འཆད་རྩོད་རྩོམ་པར་དབང་བའི་བློ་གྲོས་ཅན། །བག་ཡོད་གོས་ཀླུབས་བཟང་པོའི་ལྷག་བསམ་གྱིས། །རིས་མེད་འགྲོ་བའི་གཉེན་གྱུར་གཡོ་མེད་ཤོག །ཡངས་པའི་རྒྱ་མཚོའི་གོས་ཅན་ཁྱོན་ཀུན་ལ། །འཇིགས་མེད་བཙན་པོའི་གོ་ཆའི་ཐུབ་པའི་བསྟན། །ཡོངས་འདུལ་ལང་ཚོ་རྒྱས་པའི་གྲིབ་བསིལ་སྡེར། །ལུས་ཅན་ངལ་གསོར་འགོད་མཛད་ཞབས་བརྟན་ཤོག །མགྲིན་པར་འཇམ་དབྱངས་དབྱངས་ཅན་ངག་གི་ལྷ། །ཟུང་འཇུག་ཟློས་གར་གར་གྱིས་ཡོངས་བཙན་པས། །མ་སྨད་རྣམ་དཔྱོད་དཔྱོད་ལྡན་ཚོགས་འགའ་བའི། །བྱེད་པོ་བཤེས་གཉེན་གཉེན་འགྱུར་བཞུགས་གསོལ་འདེབས། །དུས་གསུམ་རྒྱལ་བས་ཇི་ལྟར་མཁྱེན་པའི་ཆོས། །དྲི་མེད་སྤྱན་གྱིས་མངོན་གསུམ་ཉེར་གཟིགས་པ། །ཀུན་མཁྱེན་ཆོས་ཀྱི་རྒྱལ་པོ་ཙོང་ཁ་པའི། །ལུགས་ཟུང་བསྟན་པ་དབྱར་མཚོ་ལྟར་འཕེལ་ཤོག །དཔལ་ལྡན་གྲགས་པའི་རིགས་གཞུང་ཐོས་བསམ་གྱིས།(༨༧ན) ― GLG021_Page_0175 ―
[མ་དཔེ་གཟིགས་ན་འདིར་གནོན།]
།གཏན་ལ་འབེབས་པའི་མངའ་རིས་འདུས་པའི་སྡེ། །ཉི་ཟླའི་འོད་ཀྱི་འཇིགས་རྟེན་སྣང་བའི་བར། །ཐུབ་བསྟན་མཛེས་པའི་རྒྱན་དུ་འཕེལ་གྱུར་ཅིག །སྲིད་འདིར་གནས་སོ་ཅོག་གི་ལུས་ཅན་སྤྱི། །ཁྱད་པར་ཁ་བས་བསྐོར་བའི་སྨན་ལྗོངས་འདིར། །འཆི་མེད་བདག་པོའི་འདུན་ས་དང་མཚུངས་པར། །སྒོ་གསུམ་ཕན་བདེའི་དཔལ་ལ་སྤྱོད་པར་ཤོག །རྡུལ་དྲལ་སྟོན་མཚན་ཟླ་བའི་རྗེས་འགྲོ་བ། །ཆེས་དཀར་དག་པའི་སེམས་ཀྱི་རབ་བཏབ་པའི། །སྨོན་ལམ་ཇི་བཞིན་འགྲུབ་པར་དམ་པའི་ཆོས། །བསྲུང་བར་ཞལ་ཆེས་རྣམས་ཀྱི་གྲོགས་མཛོད་ཅིག །དུས་གསུམ་བསགས་པའི་ལེགས་བྱས་ས་བོན་ཚོགས། །གཞན་ཕན་ཆེད་དམིགས་ས་ལུས་དྲོད་གཤེར་གྱིས། །སྨིན་པའི་མྱུ་གུ་བྱང་ཆུབ་སྙིང་པོའི་བར། །སྤྱོད་པའི་སྐལ་པ་བཟང་པོར་བདག་བྱིན་རློབས། །ཞེས་རིང་པོར་འཚོ་བའི་སྨོན་ལམ་དང་འབྲེལ་བའི་ཚིགས་སུ་བཅད་པ་འདི་ནི་རིགས་གཞུང་སྨྲ་བའི་འདུས་སྡེ་མངའ་རིས་གྲྭ་ཚང་གི་སློབ་དཔོན་བསྟན་མཛེས་གྲྭ་རིགས་དང་བཅས་པ་རྣམས་ཀྱི་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །བདེ་ལྡན་ཞིང་གི་མགོན་པོ་འོད་མཐའ་ཡས། །འཆི་མེད་ཚེ་སྦྱིན་ཡེ་ཤེས་འཁོར་ལོ་མ། །དྲན་པས་གདུང་སེལ་གཙུག་གཏོར་འཕགས་མའི་ཞབས། །མི་གཟད་ཐུགས་རྗེའི་མཐུ་དཔུང་དེང་འདིར་སྐྱེད། །ལྷ་མཆོག་རྣམ་གསུམ་མཛོད་སྤུ་འོད་ཟེར་འཕྲེང༌། །རྡུལ་བྲལ་སྟོན་ཟླ་ལྟར་དཀར་ཉེར་འཕྲོས་པས། །ཉི་བུའི་སྨག་རུམ་མཐར་བྱས་རིགས་བརྒྱའི་བདག །རྡོ་རྗེའི་ཁྲི་ལ་གཡོ་མེད་བརྟན་པར་མཛོད། །ཐུབ་བསྟན་རིན་ཆེན་འཛིན་པ་འཁོར་(༨༧བ) ― GLG021_Page_0176 ―
[མ་དཔེ་གཟིགས་ན་འདིར་གནོན།]
ལོའི་མགོན། །གྲངས་མེད་གདུལ་བྱའི་བསོད་ནམས་ཞིང་གི་མཆོག །མཁས་ཤིང་གྲུབ་པའི་དབང་ཕྱུག་གཤེས་གཉེན་ཆེ། །བསྐལ་བརྒྱར་གཡུ་དྲུང་ལྟ་བུར་རྟག་བརྟན་ཤོག །གུར་མགོན་ལེགས་ལྡན་གདོང་གཞི་རྣམ་ཐོས་སྲས། །ལས་ཤིན་རབ་བརྟན་མ་སོགས་སྲུང་མ་ཡིས། །བགེགས་རིགས་ཡིད་སྲུབས་སྡེ་དཔུངས་ཚར་ཆོད་ལ། །འདོད་པའི་འབྲས་བཟང་སྨིན་པའི་འཕྲིན་ལས་སྒྲུབས། །ཆོས་ཉིད་འགྱུར་བ་མེད་པ་གདོད་མའི་ཤིས། །ཆོས་ཅན་རྒྱུ་འབྲས་སླུ་མེད་རྟེན་འབྲེལ་མཐུས། །སྨོན་པ་ཇི་བཞིན་འགྲུབ་པ་མཆོག་གསུམ་གྱི། །ཐུགས་རྗེས་མྱུར་དུ་འགྲུབ་པའི་བཀྲ་ཤིས་ཤོག །ཅེས་དཀྱིལ་འཁོར་རྒྱ་མཚོའི་ཁྱབ་བདག་མཁན་ཆེན་ཞྭ་ལུ་བ་རིན་ཆེན་བསོད་ནམས་མཆོག་གྲུབ་ཅུང་ཟད་སྙུན་ཚུལ་གྱི་ཚེ། བརྟན་བཞུགས་ཀྱི་ཆེད་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ། །སྙིགས་མའི་འགྲོ་འདྲེན་མཐུ་སྟོབས་རྒྱལ་གཞན་ལས། །ཆེས་ལྷག་བདེ་གཤེགས་བདུན་དང་འོད་མཚན་མགོན། །ཐུགས་རྗེས་བདག་སོགས་བྱང་ཆུབ་མ་རྙེས་བར། །མངོན་མཐོའི་རྟེན་བཟང་བརྒྱུད་མར་ཐོབ་བྱིན་རློབས། །ཞེས་པ་འདི་ཡང་ཚོགས་གསོག་པ་རྒྱལ་མཚན་གྱི་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །ཐུབ་གསུང་འགྲེལ་པར་བཅས་པ་མང་ཐོས་འབྲས། །དེང་ནས་རྣམ་པ་ཐམས་ཅད་མཁྱེན་མིན་པར། །ཡང་དག་དགེ་བའི་གཤེས་ཀྱི་རྗེས་བཟུང་སྟེ། །ས་ལམ་ཡོན་ཏན་བླ་ནས་བླར་འཕེལ་ཤོག །ཅེས་པ་འདིའང་རིན་ཅེན་རྒྱལ་མཚན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །ཞི་ཁྲོ་བཀའ་བརྒྱད་(༨༨ན) ― GLG021_Page_0177 ―
[མ་དཔེ་གཟིགས་ན་འདིར་གནོན།]
ཀུན་འདུས་དཀྱིལ་འཁོར་གཙོ། །རིགས་འཛིན་བླ་མ་རྡོ་རྗེ་དྲག་པོ་རྩལ། །མ་སྨད་ཐུགས་རྗེའི་བདུད་རྩི་བདག་སྙིང་ལ། །ལེགས་ཞུགས་དངོས་གྲུབ་རྣམ་གཉིས་མྱུར་སྩོལ་ཅིག །ཅེས་རྡོ་རྗེ་དྲག་པོ་རྩལ་གྱི་སྐུ་ཐང་རྒྱབ་ཡིག་གཅིག་དགོས་ཞེས་ཐོན་ལེགས་ལྡན་དབང་པོས་བསྐུལ་བ་ལྟར་ཟ་ཧོར་གྱི་བནྡེས་བྲིས་པའོ། །གར་དབང་མཛོད་སྤུའི་འོད་ཟེར་ཉི་བརྒྱའི་ལུས། །འབར་བས་ཚིག་བདག་སྨག་རུམ་མཐར་བྱས་ནས། །བློ་བཟང་གྲགས་སྙན་ཆོས་སྲིད་ལེགས་འཛིན་པས། །ས་དབང་མཐུ་ཐོབ་སྲིད་མཐར་རྒྱས་གྱུར་ཅིག །སླུ་མེད་མཆོག་གསུམ་ཐུགས་རྗེས་མི་ཡི་བདག །རྡོ་རྗེའི་ཁྲི་ལ་འགྱུར་མེད་རབ་བརྟན་ཞིང༌། །གསེར་རིའི་རྗེས་འགྲོ་ཁྲིམས་གཉིས་བཙན་པོའི་ལྗིད། །རིས་མེད་སྐྱེ་རྒུའི་གཉའ་བར་མཛེས་གྱུར་ཅིག །དགའ་བའི་དཔལ་ལྡན་བྱམས་ཆེན་འདུས་པའི་གླིང༌། །ཀུན་མཁྱེན་བསྟན་པ་ཇི་སྲིད་གནས་ཀྱི་བར། །རྣམ་གསུམ་འཁོར་ལོའི་བྱ་བ་དར་རྒྱས་ཤོག །ཇི་ལྟར་སྨོན་པའི་རེ་བ་ལྷུན་གྲུབ་ཤོག །ཅེས་པ་ས་སྐྱོང་ཕྱག་མཛོད་བློ་བཟང་མཐུ་སྟོབས་ཀྱི་བརྟན་བཞུགས་འདི་ནི་རོང་བྱམས་ཆེན་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །སྣང་བ་མཐའ་ཡས་ཡེ་ཤེས་གཟིགས་པའི་དཀྱུས། །རིང་པོར་བརྐྱངས་ནས་མང་ཐོས་སྡོམ་བརྩོན་ཅན། །ངག་དབང་དཔལ་འབྱོར་ལེགས་དྲངས་གདུལ་བྱའི་གཙོར། །མཛད་དེ་ཐེག་ཆེན་ལམ་དུ་འཁྲིད་པར་གསོལ། །རང་བདེ་དོར་ནས་གཞན་དོན་ཉེར་བསྒྲུབ་པའི། །རྒྱལ་བའི་སྲས་ཀྱི་ཕྱིན་དྲུག་སྤྱོད་པ་ལ། །(༨༨བ) ― GLG021_Page_0178 ―
[མ་དཔེ་གཟིགས་ན་འདིར་གནོན།]
ཁྱུ་མཆོག་བགྲོད་པ་ཇི་བཞིན་ཐོགས་མེད་དུ། །འཇུག་པ་མགོན་པོས་བདག་རྒྱུད་བྱིན་གྱིས་རློབས། །འདིས་མཚོན་དུས་གསུམ་རབ་བསགས་དགེ་བ་ཀུན། །མི་མཛད་མཐོ་རིས་ཆུ་བོའི་སྤུན་ཟླ་ལྟར། །རྣམ་པ་ཐམས་བཅད་མཁྱེན་པའི་ཆུ་གཏེར་གློང༌། །འབབ་པའི་སྐལ་བ་བཟང་པོར་འགྱུར་བར་ཤོག །ཅེས་པ་འདི་ཡང་དཔལ་ལྡན་འབྲས་སྤུངས་ཀྱི་གྲྭ་ཚང་བཀྲ་ཤིས་སྒོ་མང་པའི་སློབ་དཔོན་ཟུར་པ་ངག་དབང་དཔལ་འབྱོར་གྱི་ཕྱི་རྟེན་དུ་འོད་དཔག་མེད་ཀྱི་སྟོང་ཐང་བཞེངས་པའི་རྒྱབ་ཡིག་དུ་ཉེ་གནས་ཀྱི་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །བདེ་གཤེགས་སྲས་དང་སློབ་མར་བཅས་པ་ཡི། །དྲི་བྲལ་ཡེ་ཤེས་སྤྱན་གྱིས་ཉེར་གཟིགས་ཏེ། །དུས་ཀྱི་ཆོས་ཉིད་གྱུར་པ་ཨཱ་ནནྡ། །ཐུགས་རྗེའི་ཕྱག་གིས་དག་པའི་ཞིང་དུ་དྲངས། །བདེ་ལྡན་ངོ་མཚར་བཀོད་པའི་དགའ་ཚལ་དུ། །འཇམ་མཉེན་པདྨའི་སྦུབས་སུ་ཉེར་བཙས་ཏེ། །རྣམ་འདྲེན་འོད་དཔག་མེད་ཞལ་མངོན་སུམ་མཐོང༌། །དེས་གསུང་ཆོས་ཀྱི་བདུད་རྩིར་ལོངས་སྤྱོད་ཤོག །རབ་དཀར་ལྷག་པའི་བསམ་པ་དར་དྲག་པོས། །ས་ལམ་སྤངས་རྟོགས་བླ་ནས་བླར་སྤེལ་ནས། །མ་འདྲིས་འགྲོ་ཀུན་འདྲེན་པའི་དེད་དཔོན་མཆོག །ཀུན་མཁྱེན་ཡེ་ཤེས་གྲོང་དུ་འཇུག་པར་ཤོག །ཅེས་ཨོ་རོད་གཡོན་རུའི་དཔོན་པོ་ཨཱ་ནནྡ་འཇིག་རྟེན་ཕ་རོལ་དུ་དུས་ཀྱི་ཆོས་ཉིད་དུ་གྱུར་པའི་ཚེ་སྨོན་ལམ་འདི་ལྟ་བུ་ཞིག་དགོས་ཞེས་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །གར་དབང་འོད་མཚན་དྲོད་ཀྱིས་སྦྲུམས་པའི་མངལ། །(༨༩ན) ― GLG021_Page_0179 ―
[མ་དཔེ་གཟིགས་ན་འདིར་གནོན།]
དཔག་མེད་ཚེ་ཡི་གསེར་སྒོང་ཡོངས་སྨིན་ཅན། །ཆོས་ནོར་འདོད་ཐར་སྒོ་བཞི་ལེགས་ཕྱེ་ནས། །འགྲོ་ཀུན་རྫོགས་ལྡན་དགའ་སྟོན་མཆོག་ལ་སྦྱོར། །ཡིད་སྲུབས་སྡེ་ལས་རྣམ་པར་རྒྱལ་བའི་ལྷ། །སྐྱེ་རྒུར་རྗེས་བརྩེའི་ཐུགས་གསང་དཔལ་བེའུར། །ཚེ་ཡི་གཡུང་དྲུང་འཁྱིལ་ལས་ཟིལ་དངར་ཆུས། །གཞོམ་མེད་སྲོག་གི་སྙེ་མ་སྨིན་པར་མཛོད། །ཐུབ་གསུང་སློབ་མར་བཅས་ཞལ་འདབ་བརྒྱའི་སྒོ། །ཡོངས་གྲོལ་བདེན་པར་བརྗོད་པའི་དབྱངས་སྙན་པོས། །མཐའ་ཡས་ལུས་ཅན་ཀུན་ལ་རབ་དགེ་བའི། །བཀྲ་ཤིས་མེ་ཏོག་འཕྲེང་མཛེས་ཆར་དུ་སྙིལ། །ངག་དབང་ཚངས་སྲས་ལྷ་མོའི་པི་ཝང་རྒྱུད། །བློ་གྲོས་སོར་མོས་བསྐུལ་བའི་ལེགས་བཤད་སྒྲར། །སྐལ་བཟང་རྒྱ་མཚོའི་ཐོས་འཛིན་མཚར་དངར་བ། །འཇམ་དབྱངས་དགའ་བའི་བཤེས་ཁྱོད་བརྟན་གྱུར་ཅིག །ཡངས་པའི་གྲོང་ཁྱེར་ལས་འཕགས་རི་བོའི་སྤོ། །ཁྲིམས་ལྡན་དམ་པའི་ཆོས་ལ་སྤྱོད་པའི་གླིང༌། །རྣམ་གསུམ་འཁོར་ལོའི་བྱ་བ་མི་ཕམ་མགོན། །དབུས་འགྱུར་འབྱོན་མིན་དེ་སྲིད་འཕེལ་བར་ཤོག །རྩོད་ལྡན་དུས་ཀྱི་ཆད་པའི་ཟུག་རྔུ་ཡིས། །ཡངས་པའི་འཇིག་རྟེན་ཀུན་ནས་མི་མནར་ཞིང༌། །བརྒྱད་ཁྲིའི་བགྲང་བྱར་སྤྱོད་པ་འཛམ་གླིང་མིའི། །ལེགས་བྱས་བགོ་བཤར་བྱེད་ལ་དབང་བསྒྱུར་ཤོག །ཐོས་བསམ་སྒོམ་པའི་རིན་ཅེན་ཡུ་བ་ཡིས། །ཞྭ་སེར་ལུང་རྟོགས་བསྟན་པའི་གདུག་དཀར་པོ། །རབ་བཏེག་ཚངས་པའི་ཡུལ་སར་ཡོངས་འཁོར་བའི། །གྲིབ་ཏུ་ཉེར་བསིལ་འགྲོ་འདིའི་གདུང་སྐྱོབ་ཤོག །ཅེས་རིང་འཚོའི་རྟེན་འབྱུང་ཚིགས་སུ་བཅད་པ་འདི་ནི་རི་བོ་ཆོས་གླིང་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་(༨༩བ) ― GLG021_Page_0180 ―
[མ་དཔེ་གཟིགས་ན་འདིར་གནོན།]
བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ཉི་མའི་འོད་བརྒྱ་འབར་བའི་ཐུགས་རྗེའི་འོད། །རིས་མེད་འགྲོ་བའི་ཁམས་དང་བསམ་པ་བཞིན། །འཇུག་མཛད་དཀོན་ཅོག་རིན་ཅེན་རྣམ་གསུམ་གྱིས། །བདེན་ཚིགས་བརྗོད་པའི་འབྲས་བུ་སྨིན་པར་མཛོད། །སྟོན་མཚན་ཟླ་ཞལ་ཤར་བའི་མོད་ཉིད་ལ། །འཆི་བདག་སྨག་རུམ་མིང་ཡང་མཐར་བྱས་ཏེ། །ཡུན་འཚོའི་སྣང་སྟེར་ཡིད་བཞིན་འཁོར་ལོ་མས། །དཀྱུས་རིང་བདུན་ལྡན་སྤྱན་གྱིས་བཙའ་བར་མཛོད། །བློ་དང་བརྩོན་པ་མི་དམན་བཟང་པོའི་ལས། །བསོད་ནམས་རི་བོ་དངོས་སུ་རྒྱུ་འདྲའི་མཐུས། །སྟོབས་ལྡན་ས་ལ་སྤྱོད་པ་མི་ཡི་བདག །རྡོ་རྗེའི་ཁྲི་ལ་འགྱུར་མེད་རབ་བརྟན་ཤོག །ཚེ་རིང་གནམ་གྱི་ཤེ་མོང་ཤུགས་དྲག་པོས། །ཁྲིམས་གཉིས་རྩིབས་སྟོང་འབར་བའི་འཁོར་ལོ་གང༌། །ཡངས་པའི་ནོར་འཛིན་ཁྱོན་ལ་རྟག་འཁོར་བ། །མང་བཀུར་རྒྱལ་པོའི་རྣམ་ཐར་འཁྱོངས་བར་ཤོག །ཛཱ་ཏིའི་མེ་ཏོག་འཛུམ་པའི་སྨན་ལྗོངས་ནས། །ཟ་འོག་ཐགས་སུ་བསྐྲུན་པའི་གྲོང་ཁྱེར་བར། །འཁོད་པའི་སྐྱེ་རྒུའི་ཕྲག་པར་འགོད་པའི་ཁྲིམས། །གསེར་གྱི་གཉའ་ཤིང་རྟག་ཏུ་ལྕི་གྱུར་ཅིག །གངས་ཀྱི་ར་བས་ཡོངས་སྐོར་རུ་བཞིའི་ཆར། །གཡུལ་འཁྲུག་དབུལ་ཕོངས་ནད་རིམ་ཀུན་ཞི་ཞིང༌། །མ་སྨད་རྣམ་སྨིན་དཀར་པོར་འཛག་པའི་རྒྱུན། །བདེ་སྐྱིད་དགའ་སྟོན་དཔལ་ལ་སྤྱོད་པར་ཤོག །དོན་དམ་འགྱུར་བ་མེད་པའི་མཁའ་དབྱིངས་ལ། །ཀུན་རྫོབ་རྟེན་འབྲེལ་ཉི་ཟླ་ཟུང་འབྲེལ་བས། །ཇི་ལྟར་སྨོན་པ་ལྷུན་གྲུབ་སྣང་བའི་གཏེར། །འཛད་མེད་ནམ་མཁའ་མཛོད་ལ་དབང་འབྱོར་ཤོག །ཅེས་ས་(༩༠ན) ― GLG021_Page_0181 ―
[མ་དཔེ་གཟིགས་ན་འདིར་གནོན།]
སྐྱོང་བློ་བཟང་མཐུ་སྟོབས་ཀྱི་བརྟན་བཞུགས་ཀྱི་ཚིགས་བཅད་འདི་ལྟ་བུ་ཞིག་དགོས་ཞེས་ཡར་ཀླུངས་རི་བོ་ཆོས་གླིང་པ་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །གང་མཚན་རྣ་བར་ཐོས་པའི་མོད་ཉིད་ལ། །འཁོར་བའི་ཟུག་རྔུ་གཞིལ་བའི་རྩི་སྨན་ལྗོན། །དཀོན་ཅོག་རྣམ་གསུམ་ཐུགས་རྗེ་ཀ་སུ་རའི། །གཟེགས་མས་བདག་སྙིང་ཀུནྡ་བཞད་དུ་གསོལ། །ཤཱཀྱའི་བསྟན་པ་རིན་ཅེན་གནས་པའི་ཞིང༌། །གངས་ཅན་ལྗོངས་སོན་རྒྱལ་དང་རྒྱལ་སྲས་ཀྱི། །རྟེན་དང་བརྟན་པ་ཁྲིམས་ལྡན་འདུས་པའི་སྡེ། །རིང་མིན་བལྟ་བའི་སྐལ་བཟང་ཐོབ་པར་ཤོག །རྣམ་འདྲེན་སློབ་མར་བཅས་པའི་བྱིན་རླབས་དང༌། །ལྷ་དང་དྲང་སྲོང་བདེན་ཚིག་གྲུབ་པའི་མཐུ། །རྨད་བྱུང་རྟེན་ཅིང་འབྲེལ་འབྱུང་སླུ་མེད་པས། །སྨོན་ལམ་བཏབ་པ་ཇི་བཞིན་མྱུར་འགྲུབ་ཤོག །ཅེས་པའི་ཚིགས་སུ་བཅད་པ་འདི་ནི་བསོད་ནམས་སྒྲོལ་མས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དབྱངས་དཔལ་བཟང་ངོ༌། །ངེས་པར་སྒྲིབ་གཉིས་སྤངས་པའི་རྫོགས་སངས་རྒྱས། །མུ་ཐི་ལ་ཕྲེང་ཇི་བཞིན་བསྐལ་པ་འདིར། །བྱོན་དང་འབྱོན་གྱུར་ནང་ནས་སྙིང་སྟོབས་ལ། །རྒྱལ་རྣམས་ལེགས་གསོའི་མེ་ཏོག་འཐོར་བའི་ཡུལ། །ཉི་མའི་གཉེན་གྱི་གསུང་རབ་ཆུ་གཏེར་ལས། །སྟོང་ཉིད་སེང་གེའི་རྒྱུད་ཀྱི་ང་རོ་ཡིས། །མཐའ་འཛིན་རི་དྭགས་ལྐོག་མར་སྙིང་འབྱིན་པ། །ཡུམ་སྲས་བཅུ་བདུན་ཞེས་སུ་མཁས་རྣམས་གླེང༌། །དེའི་ནང་ཤློ་ཀར་བགྲང་གཅོད་མཚམས་འབུམ། །ཚིག་གི་ཉེར་བསྟན་དོན་གྱི་ས་བོན་ལས། །རྣམ་(༩༠བ) ― GLG021_Page_0182 ―
[མ་དཔེ་གཟིགས་ན་འདིར་གནོན།]
འདྲེན་སྲས་སློབ་མ་ལུས་བསྐྱེད་པའི་ཡུམ། །འབྲི་ཀློག་མཆོད་པས་སྲིད་པ་ཧྲུལ་པོར་བྱེད། །དེ་ཕྱིར་གླེགས་བམ་བསྐྲུན་འདིའི་ལེགས་བྱས་ཀྱིས། །བློ་བཟང་དབང་རྒྱལ་བཀྲ་ཤིས་ཕོ་ནུ་ཟུང༌། །ས་ལམ་རིན་ཅེན་སྐས་ལ་ཉེར་འཛེགས་ཏེ། །བླ་མེད་སྐུ་གསུམ་ཁང་པར་འཇུག་གྱུར་ཅིག །ཅེས་པ་འདི་ཡང་ཤངས་བཀྲ་ཤིས་རྩེ་པས་འབུམ་དུམ་པ་བཅུ་དྲུག་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དབྱངས་དཔལ་བཟང་ངོ༌། །ངག་དབང་འཇམ་མགོན་བློ་བཟང་གྲགས་པའི་བསྟན། །འཛིན་ཆེད་བསྐལ་པ་རྒྱ་མཚོར་རྟག་བཞུགས་པའི། །བདེན་ཚིག་ཕྱོགས་བཅུའི་རྒྱལ་བས་མགྲིན་གཅིག་ཏུ། །ལེགས་གསུང་བཀྲ་ཤིས་མེ་ཏོག་ཆར་དུ་ཕོབ། །ཚེ་ཡི་གཡུང་དྲུང་ཉ་ཕྱིས་ཁོག་ཡངས་པོར། །སྲོག་རྟེན་དཀར་དམར་ཨ་ཧཾ་མུ་ཐི་ལ། །འབུམ་ཕྲག་བགྲང་བྱའི་སྲད་བུར་ཡོངས་བརྒྱུས་ཏེ། །དོ་ཤལ་མཛེས་པའི་རྒྱན་དུ་རྟག་འཆང་ཤོག །གཏན་བདེའི་གཟུགས་ཤར་རྐང་སེན་མེ་ལོང་རྡུལ། །རྡོ་རྗེའི་གདན་ལ་བཀོད་ཚེ་ཉི་མའི་བུ། །སྒྱིད་ལུག་བསྐལ་པར་འགོག་པའི་ཏིང་འཛིན་ལ། །གཡུར་ནས་བདེ་ལྡན་མགོན་དེའི་རྗེས་འགྲོར་ཤོག །ཅེས་རིང་འཚོའི་རྟེན་འབྱུང་གི་ཚིགས་སུ་བཅད་པ་འདི་ནི་གནམ་གྱི་བསྐོས་པའི་རྒྱལ་པོ་ལྷ་གཟིགས་ཕག་མོ་གྲུ་པ་བློ་བཟང་མཁྱེན་བརྩེའི་དབང་ཕྱུག་ནོར་འཛིན་ཆོས་ཀྱི་རྒྱལ་པོ་ངག་གི་ལྷའི་བཀའ་གནང་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །མཆོག་གསུམ་བྱིན་རླབས་རླབས་ཕྲེང་ཡོལ་མེད་མཚོར། །བདེན་ཚིག་རང་བརྗོད་བརྗོད་པ་རྣམ་(༩༡ན) ― GLG021_Page_0183 ―
[མ་དཔེ་གཟིགས་ན་འདིར་གནོན།]
དག་ཟླ། །ཤར་བའི་འོད་སྣང་སྣང་བ་འབུམ་སྡེའི་གཟིས། །ལྔ་པའི་མུན་སྟུག་སྟུག་པོ་ཕ་མཐར་སྐྲོད། །བློ་བཟང་གྲགས་སྙན་སྙན་པའི་གདུགས་དཀར་པོ། །སྲིད་པའི་རྩེར་འཁོར་འཁོར་ལོས་ནོར་འཛིན་ལ། །མངའ་སྒྱུར་མི་དབང་དབང་ཕྱུག་བརྒྱད་ལྡན་གང༌། །དཀོན་མཆོག་མཐུ་སྟོབས་སྟོབས་ཀྱི་རབ་བརྟན་ཤོག །ལྷ་དང་དྲང་སྲོང་སྲོང་པོར་སྨྲ་རྣམས་ཀྱིས། །བཀྲ་ཤིས་གླུ་དབྱངས་གླུ་རུ་རབ་བླངས་ཏེ། །དུས་ཀུན་དགེ་བའི་དགེ་ལེགས་ཆར་ཆེན་པོ། །ས་སྟེང་ཀུན་ཁྱབ་ཀུན་ཏུ་དགའ་བར་ཤོག །ཅེས་ས་སྐྱོང་བློ་བཟང་མཐུ་སྟོབས་ཀྱི་བརྟན་བཞུགས་ཀྱི་བདེན་ཚིག་བརྗོད་པ་འདི་ནི་གངས་ཅན་གྱི་ལྷ་གཅིག་པུ་དཔལ་ཕག་མོ་གྲུ་པ་བློ་བཟང་མཁྱེན་བརྩེའི་དབང་ཕྱུག་ནོར་འཛིན་ཆོས་ཀྱི་རྒྱལ་པོ་ངག་གི་ལྷས་བཀའ་སྩལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་གནས་བན་འཇམ་དབྱངས་སོ། །ངག་ལ་སྨྲ་དབང་བློ་ལྡན་སྐལ་བཟང་མཐུས། །གཙུག་ལག་རྒྱ་མཚོར་འཇིགས་མེད་གོ་ཆ་ཡིས། །ཐུབ་བསྟན་ལང་ཚོ་བླ་ན་འཕེལ་བའི་སྡེ། །འཇམ་དབྱངས་དགའ་བའི་བཤེས་གཉེན་སྣང་བརྙན་འདི། །སྒྱུ་མ་མཁན་པོའི་ཁེངས་འཕྲོག་རི་མོ་བ། །ཇ་ཆང་འདོད་རྒུ་ཚིམ་བྱེད་ཁྱིམ་གྱི་བདག །བློ་བཟང་མཁྱེན་བརྩེའི་ལྷག་བསམ་སྟོན་ཟླ་ལྟར། །ཆེས་དཀར་གྱིས་བསྐུལ་སྒོ་གསུམ་རབ་འབད་པའི། །ལེགས་བྱས་ཛམྦུའི་ཆུ་བོས་ཉེར་སྨིན་པའི། །རང་སེམས་ཀུན་མཁྱེན་གསེར་གྱི་སྙེ་མ་རུ། །གྱུར་མིན་དེ་སྲིད་ཀུན་ཏུ་མི་འབྲལ་བའི། །རེ་འབྲས་འགྲུབ་པའི་འདུན་པ་ནན་ཏར་བགྱིད། །ངེས་པར་ལེགས་པའི་ལམ་དུ་མ་ཞུགས་པར། །ལྷ་མིའི་རྟེན་བཟང་བརྒྱུད་མར་རབ་(༩༡བ) ― GLG021_Page_0184 ―
[མ་དཔེ་གཟིགས་ན་འདིར་གནོན།]
ཐོབ་ཅིང༌། །འཇིགས་ཆེན་བརྒྱད་སོགས་ཟུག་རྔུ་འཚེ་བ་བྲལ། །རྫོགས་ལྡན་དུས་བཞིན་མཐུན་རྐྱེན་ཀུན་ཚང་ཤོག །རྒྱལ་དང་དེས་གསུང་སྲས་སློབ་བདེན་པ་ཆེ། །རྟེན་ཅིང་འབྲེལ་བར་འབྱུང་བ་བསླུ་བ་མེད། །མ་དང་མཁའ་འགྲོ་སྲུང་མའི་མཐུ་སྟོབས་ཀྱིས། །ཇི་ལྟར་བསམས་པ་ལྷུན་གྱིས་འགྲུབ་པར་ཤོག །ཅེས་པ་འདི་ཡང་འཕྱོས་ཆང་ཁྱིམ་པ་བློ་བཟང་མཁྱེན་བརྩེས་ཐང་གའི་རྒྱབ་ཡིག་ཏུ་དགོས་ཚུལ་ལྟར་ཟ་ཧོར་གྱི་བནྡེས་སུག་བྲིས་སུ་བགྱིས་སོ། །གངས་ཅན་བསྟན་འགྲོའི་ལེགས་བྱས་ནོར་འཛིན་ལྟོར། །ཚེ་དབང་རིགས་འཛིན་ཐུགས་རྗེའི་ས་བོན་འབྲས། །རབ་སྨིན་སྤྲུལ་པའི་སྐུ་མཆོག་ཡོངས་འདུའི་ལྗོན། །འགྱུར་མེད་རྡོ་རྗེའི་རང་བཞིན་འགྲུབ་གྱུར་ཅིག །སྒྲ་བསྒྱུར་བཻ་རོ་གྲྭ་པ་མངོན་ཤེས་ཞབས། །ར་ཤག་གཏེར་སྟོན་ཤར་ཕྱོགས་ཟབ་གཏེར་བདག །རྡོ་རྗེ་གླིང་དང་ཀུན་སྐྱོང་མདོ་སྔགས་གླིང༌། །སྐྱེས་རབས་རིན་ཅེན་ཕྲེང་ལ་གསོལ་བ་འདེབས། །དགོངས་དང་བརྡ་ལས་སྙན་བརྒྱུད་གསུང་ངག་ལ། །དབང་འབྱོར་འཇིག་རྟེན་མིག་གཅིག་རྣམ་སྣང་མཛད། །པདྨ་ཐོད་ཕྲེང་བསྟན་པ་འཛིན་པའི་ཆེད། །སྤྲུལ་པའི་ཟློས་གར་བསྒྱུར་ལ་གསོལ་བ་འདེབས། །རྨད་བྱུང་ཀུན་དགའི་འབྱུང་གནས་རིན་ཆེན་གཏེར། །དངོས་གྲུབ་རྒྱ་མཚོའི་མཛོད་ལ་མངའ་སྒྱུར་ཞེས། །ཨྱོན་ལུང་ཟིན་འགྲོ་འདུལ་གཏེར་བདག་གླིང༌། །བོད་ཡུལ་ཕན་བདེའི་ཉེར་འཚོར་གསོལ་བ་འདེབས། །མ་དང་མཁའ་འགྲོའི་ཞལ་རླང་ཚ་དྲོད་ཅན། །དངོས་གྲུབ་ཟབ་གཏེར་ཡིད་བཞིན་དབང་གི་རྒྱལ། །ལས་འཕྲོ་སྐལ་བཟང་ཉིན་བྱེད་དཔལ་འབར་གཟི། །ཡིད་སྲུབས་སྨག་རུམ་(༩༢ན) ― GLG021_Page_0185 ―
[མ་དཔེ་གཟིགས་ན་འདིར་གནོན།]
འཇོམ་ལ་གསོལ་བ་འདེབས། །འཕོ་བ་ཆེན་པོའི་གཟུགས་སྐུ་ནོར་བུའི་ཏོག །གོས་དཀར་རལ་པའི་ཐོར་ཚུགས་ཅོད་པན་རྩེར། །རབ་མཛེས་གར་དགུའི་ཉམས་ལྡན་ཧེ་རུ་ཀཿ། ཁྱབ་བདག་འཁོར་ལོའོ་མགོན་པོར་གསོལ་བ་འདེབས། །ལོག་རྟོག་རྙོག་བྲལ་དད་མཚོར་རྒྱལ་ཀུན་མདངས། །འོད་མཚན་སྟོང་འབར་པདྨ་གར་དབང་ཟླའི། །འགྱུར་མེད་ཐུགས་རྗེའི་བདུད་རྩི་ག་བུར་ངད། །འཐུལ་བས་མགོན་ཁྱོད་རྡོ་རྗེའི་རྩལ་ལྡན་ཤོག །པདྨ་ཐོད་ཕྲེང་མེ་ཏོག་མནྡ་ར། །སྙོམ་འཇུག་དགའ་བཞིའི་ཟིལ་དངར་གྱིས་སྦྲན་པ། །དབུ་མ་མི་ཤིགས་རྡོ་རྗེའི་ཀ་བ་ཡིས། །ཐབས་ཤེས་ཉི་ཟླ་གཡོ་མེད་བརྟན་པར་ཤོག །ངོ་བོ་ཀ་ནས་དག་པའི་ཀུན་བཟང་གློང༌། །རང་བཞིན་དགའ་བདེའི་ལྷུན་གྲུབ་མ་འགགས་རྩལ། །ཐུགས་རྗེ་རིན་ཅེན་འདོད་འཇོའི་བུམ་པ་བཟང༌། །དངོས་གྲུབ་རྒྱ་མཚོའི་བྱེད་པོར་རྟག་བརྟན་ཤོག །ངག་དབང་ལྷ་ཡིས་རྗེས་བཟུང་ཆོས་ཀུན་ལ། །སྤོབས་པ་གཟེངས་མཐོ་གན་ཇག་ཐང་ཐ་ཡི། །སྒྱུ་འཕྲུལ་གར་ཁྱོད་རྒྱལ་དབང་པད་མའི་བསྟན། །སཱ་ལའི་ལྗོངས་འདིར་འཛིན་ཕྱིར་ཞབས་བརྟན་ཤོག །པད་འབྱུང་མཁར་ཆེན་བཟའ་དང་བཻ་རོ་ཡི། །སྨོན་ལམ་གཏད་རྒྱས་ཉེར་དབང་རང་སྐལ་གཏེར། །བགེགས་བྲལ་མ་ལུས་ཐོན་ནས་བཀའ་བབས་ཀྱི། །ལས་ཅན་རྣམས་དང་རྟེན་འབྲེལ་ལྷུན་གྲུབ་ཤོག །ཨྱོན་དུས་གསུམ་མཁྱེན་པའི་སྨིན་གྲོལ་གྱི། །བསྟན་པ་ཉེར་འཛིན་རིག་སྔགས་འཆང་བའི་གླིང༌། །བཀའ་གཏེར་ཟུང་འཇུག་བཤད་དང་སྒྲུབ་པ་ཀུན། །སྲིད་མཐའི་བར་དུ་དབྱར་མཚོ་ལྟར་འཕེལ་ཤོག །རྟེན་ཅིང་འབྲེལ་འབྱུང་ནམ་མཁའ་གསལ་གྲིབ་མེད། །དཀོན་མཆོག་ཐུགས་(༩༢བ) ― GLG021_Page_0186 ―
[མ་དཔེ་གཟིགས་ན་འདིར་གནོན།]
རྗེ་ཉི་མའི་དཀྱིལ་འཁོར་རྒྱས། །ཆོས་སྲུང་གཏེར་བདག་མཐུ་སྟོབས་ཚ་ཟེར་གྱིས། །ཇི་ལྟར་སྨོན་པའི་སྣང་བ་འབར་གྱུར་ཅིག །ཅེས་སྤྲུལ་པའི་སྐུ་རིགས་འཛིན་ཆེན་པོ་གཏེར་བདག་གླིང་པའི་གསོལ་འདེབས་བརྟན་བཞུགས་ཀྱི་རིམ་པ་འདི་ནི་རང་བཞིན་རྫོགས་པ་ཆེན་པོའི་རྣལ་འབྱོར་པ་ཀློང་ཡངས་འོད་གསལ་གྱིས་དོན་གཉེར་ཆེན་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །དཀོན་མཆོག་གསུམ་དངོས་ཚེ་དབང་ཐོད་འཕྲེང་རྩལ། །སྒྲུབ་པ་སྡེ་བརྒྱད་ཡི་དམ་དཀྱིལ་འཁོར་ལྷ། །བསྟན་སྲུང་དྲེགས་པའི་སྡེ་དཔོན་སུམ་ཅུ་སོགས། །རྩ་གསུམ་བདེན་སྟོབས་རྟེན་འབྱུང་སླུ་མེད་མཐུས། །ཆོས་ཀུན་གང་ཤར་རང་སར་གྲོལ་བའི་མཁར། །ཆེ་མཆོག་འདུས་པའི་ལྷུན་གྲུབ་འོད་ལྔའི་རྩལ། །འགག་མེད་ཡོངས་ཤར་བཤེས་གཉེན་རྡོ་རྗེ་འཛིན། །བསྐལ་བརྒྱར་རྟག་བཞུགས་ཆོས་འཁོར་སྐོར་བར་ཤོག །དད་དང་དམ་ཚིག་ཞིང་ས་གཤིན་པ་ལ། །བདེན་ཚིགས་སྨོན་ལམ་ས་བོན་ཡོངས་བཏབ་པ། །མཆོག་གསུམ་ཐུགས་རྗེའི་ཆུ་ལུད་དྲོད་གཤེར་གྱིས། །ལིང་ལིང་འདོད་པའི་སྙེ་མ་གཡུར་ཟ་ཤོག །ཅེས་རིང་པོར་འཚོ་བའི་རྟེན་འབྱུང་གི་ཚིགས་སུ་བཅད་པ་འདི་ནི་ཟབ་མོའི་གཏེར་ལ་དབང་བའི་གཉོས་ཀྱི་རིགས་འཛིན་སྤྲུལ་སྐུ་ངག་དབང་པདྨའི་གསུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །མི་འགྱུར་ཆོས་དབྱིངས་དག་པའི་ལྷ་ལམ་ངོས། །རབ་བསགས་རྒྱུ་ཚོགས་ཆུ་འཛིན་འཁྲིགས་པ་ལས། །བསླུ་མེད་འབྲས་བུའི་ཆར་གྱི་དམིགས་ཡུལ་འགྲོའི། །(༩༣ན) ― GLG021_Page_0187 ―
[མ་དཔེ་གཟིགས་ན་འདིར་གནོན།]
།མངོན་མཐོ་ངེས་ལེགས་སྙེ་མ་སྨིན་པར་ཤོག །སྐུ་གསུང་ཐུགས་རྟེན་བཞེངས་མཆོད་བཀླགས་པ་དང༌། །འདུས་སྡེར་བསྙེན་བཀུར་ངན་སློང་སྦྱིན་གཏོང་སོགས། །བསོད་ནམས་བྱས་མཐུས་དོན་གྲུབ་རྒྱལ་མཚན་གྱིས། །ཡང་སྲིད་ཀུན་ཏུ་རྣམ་སྨིན་ཆེས་དཀར་ཤོག །དུས་ལས་ཉེར་འདས་བྱང་ཆུབ་མཆོག་ཐོབ་དང༌། །མཆིས་བྲང་རིགས་ཀྱི་བུ་དང་བརྒྱུད་པར་བཅས། །འདི་དང་གཏན་གྱི་འདུན་མ་ཡོངས་འགྲུབ་རྒྱུར། །དུས་གསུམ་བསགས་པའི་དགེ་ཚོགས་མ་ལུས་བསྔོ། །ཞེས་མགྲོན་གཉེར་དོན་གྲུབ་རྒྱལ་མཚན་གྱིས་དོན་དུ་སྙན་དར་ཞལ་བྱང་དང༌། འདུས་ཚོགས་ཀྱི་ཞལ་འདོན་གང་འོས་ལ་བྱས་ཆོག་པ་འདི་ལྟ་བུ་ཞིག་དགོས་ཞེས་ཤུལ་མི་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །འཇའ་ལུས་འཕོ་བ་ཆེན་པོའི་སྐུ་བརྙེས་ནས། །འཁོར་བ་སྟོང་མིན་དེ་སྲིད་འགྲོ་ཀུན་གྱི། །གཙུག་ན་རྡོ་རྗེའི་སྐྱིལ་མོ་ཀྲུང་བཅས་པ། །ཚེ་དབང་རིགས་འཛིན་ཐུགས་རྗེའི་མཐུ་དཔུང་སྐྱེད། །བློ་གསལ་སྐལ་བཟང་གདུལ་བྱར་ཉེར་འཇུག་པའི། །པདྨ་ཐོད་ཕྲེང་འཕྲིན་ལས་གངྒཱའི་ཀླུང༌། །ཐེག་མཆོག་ཡིད་བཞིན་དབང་གི་རྒྱལ་པོའི་རླབས། །འཕྲེང་བ་སྲིད་མཐར་དུས་ལས་ཡོལ་མེད་ཤོག །མཁྱེན་བརྩེ་ནུས་པའི་དཔག་བསམ་ཡོངས་འདུའི་སྡེ། །བཀའ་གཏེར་བཤད་སྒྲུབ་འབྲས་བུ་གཡུར་ཟ་བའི། །རིང་ལུགས་ཡལ་འདབས་ཕང་ཕུང་གྲིབ་བསིལ་དུ། །འགྲོ་རྣམས་བདེ་བའི་ངལ་གསོར་སྤྱོད་པར་ཤོག །རྩ་གསུམ་ཐུགས་རྗེའི་ཉི་འོད་འབར་བའི་གཟིས། །ཡིད་སྲུབས་སྡེ་བཅས་སྨག་རུམ་མཐར་བསྐྲད་ནས། །(༩༣བ) ― GLG021_Page_0188 ―
[མ་དཔེ་གཟིགས་ན་འདིར་གནོན།]
མགོན་ཁྱོད་ངེས་པ་ལྔ་ལྡན་ལོངས་སྐུ་བཞིན། །རྡོ་རྗེའི་ཁྲི་ལ་གཡོ་མེད་ཞབས་བརྟན་ཤོག །སྣ་ནམ་རྒོད་ལྡེམ་ལེགས་ལྡན་ངག་གི་དབང༌། །དམ་པའི་ཡང་སྲིད་བསམ་བཞིན་སྤྲུལ་པའི་གར། །ཉེར་བསྟན་ཐུགས་བསྐྱེད་དོན་བཞིན་བསྟན་དང་འགྲོའི། །ཕན་བདེའི་རྩ་ལག་དམ་པར་ཞབས་བརྟན་ཤོག །རྒྱལ་ཀུན་ངོ་བོ་རིགས་འཛིན་པདྨ་འབྱུང༌། །ཞི་ཁྲོ་རབ་འབྱམས་ཀུན་འདུས་བཀའ་བརྒྱད་ལྷ། །མ་ནིང་བཀའ་སྐྱོང་དྲེགས་པའི་སྡེ་དཔོན་གྱིས། །སྨོན་པ་ཇི་བཞིན་འགྲུབ་པའི་འཕྲིན་ལས་མཛོད། ཁྱོད་མཚན་ཐོས་པ་ཙམ་གྱིས་དུས་མིན་གྱི། །འཆི་བདག་གཡུལ་ལས་རྣམ་རྒྱལ་གར་གྱི་དབང༌། །དགྱེས་ཞལ་འཛུམ་འཕྲེང་ཟེར་གྱིས་ཉེར་བསུས་པའི། །བཀྲ་ཤིས་རྒྱ་མཚོས་ནོར་འཛིན་ཀུན་ཁྱབ་ཤོག །ཅེས་རིགས་འཛིན་སྤྲུལ་པའི་སྐུ་བློ་བཟང་པདྨ་འཕྲིན་ལས་ཐེག་མཆོག་དབང་གི་རྒྱལ་པོ་ཡོངས་འདུའི་སྡེ་ཕྱི་ནང་གི་མཚན་ལྟས་རྩུབ་པ་བྱུང་ཚུལ་ཐོས་པས་རིང་པོར་འཚོ་བཞེས་ཀྱི་བདེན་ཚིག་ཏུ་ཟ་ཧོར་གྱི་བནྡེས་ཐུན་མོང་ཞེས་པ་ལྕགས་ཁྱི་སྤྲེའུ་ཟླ་བའི་ཚེས་བཅུར་བརྗོད་པའི་ཡི་གེ་པ་ནི་གནས་གསར་འཇམ་དབྱངས་སོ། །རྩ་གསུམ་བྱིན་རླབས་བཞུ་བླུགས་རྡོ་རྗེའི་ཁྲིར། །བློ་ཆེན་མེས་པོའི་ཆེད་གྱུར་ནོར་འཛིན་བདག །ལུགས་ཟུང་ཁྲིམས་ཀྱིས་འགྲོ་རྣམས་སྐལ་བཟང་དུ། །འགོད་མཛད་མཐུ་སྟོབས་དབང་པོ་ཞབས་བརྟན་ཤོག །ཚེ་དབང་རིགས་འཛིན་བདེ་གཤེགས་ཀུན་འདུས་ཀྱི། །རྒྱལ་བའི་འཁོར་ལོར་མི་ཕྱེད་མོས་པ་ཡིས། །གསོལ་བཏབ་བདེན་པའི་ཚིག་ཏུ་ཉེར་བརྗོད་པའི། །རེ་བ་ཇི་བཞིན་ཡོངས་སུ་སྐོང་བར་ཤོག །ཆོས་(༩༤ན) ― GLG021_Page_0189 ―
[མ་དཔེ་གཟིགས་ན་འདིར་གནོན།]
ཉིད་ངོ་བོ་ཀ་དག་མཁའ་དབྱིངས་ངོས། །ཆོས་ཚན་རྒྱུ་འབྲས་ཉི་ཟླ་ཟུང་འཇུག་པས། །འཛམ་གླིང་སྐྱེ་རྒུར་ཕན་བདེའི་སྣང་བ་ཡིས། །ཁྱབ་ཕྱིར་འགྲོ་ཡོངས་འཕེལ་གྲིབ་མེད་བརྟན་ཤོག །ཅེས་ས་སྐྱོང་བློ་བཟང་མཐུ་སྟོབས་ཀྱི་བརྟན་བཞུགས་འདི་ནི་དཀྱིལ་འཁོར་རྒྱ་མཚོའི་ཁྱབ་བདག་རྡོ་རྗེ་སློབ་དཔོན་ཆེན་པོ་བློ་གྲོས་མཆོག་གི་རྡོ་རྗེས་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་བསྟན་ནོ། །བཟང་པོ་སྤྱོད་པའི་སྨོན་ལམ་ལ་སོགས་ཀྱིས། །རྨད་བྱུང་ཐུགས་རྗེ་ཆེན་པོ་ཉེར་བསྐུལ་ན། །དྲི་བྲལ་དག་པའི་ཐུགས་ཀྱིས་རབ་དགོངས་ནས། །འོད་དཔག་མེད་མགོན་འཁོར་བཅས་འདིར་གཤེགས་ཤིག །བསོད་ནམས་རབ་བརྟན་དད་དུས་ལྔ་པ་ཡི། །ལམ་གྱུར་བར་དོའི་འཇིགས་སྐྲག་གིས་མནར་བ། །མགོན་ཁྱོད་མཁྱེན་བརྩེའི་ཕྱག་གིས་དབུག་དབྱུངས་ནས། །བདེ་ལྡན་དག་པའི་ཞིང་དུ་དྲང་དུ་གསོལ། །བདག་གིར་བཟུང་དང་ཉེ་དུ་བཅས་རྣམས་ཀྱིས། །དཀོན་མཆོག་མཆོད་དང་ངན་སློང་སྦྱིན་གཏོང་སོགས། །རྣམ་དཀར་བགྱིས་སོ་ཅོག་གི་འབྲས་བུ་ཀུན། །གང་དམིགས་དེང་སྨིན་བདེ་སྐྱིད་ལྡན་པར་ཤོག །གནས་ངན་ལེན་པའི་རྒྱུ་སྦྱང་ལྷ་དང་མིའི། །སྲིད་པ་ཉེར་བརྒྱུད་སྒྲིབ་གཉིས་བག་ཆགས་བཅས། །དྲུངས་ཕྱུང་རིང་པོར་མི་ཐོགས་སྟོབས་བཅུའི་རྩལ། །ལྷུན་གྲུབ་རྫོགས་པའི་སངས་རྒྱས་འཐོབ་པར་ཤོག །དུས་ལས་འདས་དང་ཤུལ་དུ་མཆིས་རྣམས་ཀྱིས། །འདི་ཕྱིར་ཕན་བདེའི་ས་བོན་དུས་གསུམ་དུ། །བཏབ་པ་དེང་འདིར་བསོད་ནམས་ཡོངས་སྤེལ་བའི། །(༩༤བ) ― GLG021_Page_0190 ―
[མ་དཔེ་གཟིགས་ན་འདིར་གནོན།]
འཛད་མེད་ཆར་གྱིས་སྨིན་པར་བྱིན་གྱིས་རློབས། །ཞེས་པ་འདིའང་སྐྱར་པོ་བསོད་ནམས་རབ་བརྟན་ལྔ་པའི་ཆོས་ཉིད་དུ་གྱུར་པའི་དུས་དགེ་འདུན་གྱི་ཞལ་འདོན་དུ་མཛད་རྒྱུའི་སྨོན་ལམ་ཚིགས་བཅད་ཅིག་དགོས་ཞེས་སྐྱར་བཙུན་རྡོ་རྗེ་དབང་ཕྱུག་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །སངས་རྒྱས་དེ་གསུང་བྱང་སེམས་སློབ་མར་བཅས། །མཆོག་གསུམ་དམ་པར་སྙིང་ནས་སྐྱབས་འགྲོ་ན། །བྱང་ཆུབ་མཆོག་ཐོབ་མ་གྱུར་དེ་སྲིད་དུ། །རྨད་བྱུང་ཐུགས་རྗེ་ཆེན་པོས་འཛིན་པར་ཤོག །ཅེས་པ་འདི་ནི་ཨལ་དར་ཐའི་ཇིས་སྡེ་དམངས་དང་བཅས་པའི་ཁ་ཏོན་དུ་བྱེད་རྒྱུའི་ཤློ་ཀ་གཅིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའོ། །བསླུ་བ་མེད་པའི་དཀོན་མཆོག་རྣམ་གསུམ་ལ། །མི་ཕྱེད་དད་པས་གསོལ་བ་བཏབ་པའི་མཐུས། །བདག་ཅག་གངས་ཅན་བོད་ཀྱི་ཡུལ་བགྲོད་ནས། །བསམ་པའི་རེ་བ་སྐོང་བར་བྱིན་གྱིས་རློབས། །ཞེས་པ་འདི་ནི་ཐོར་གོད་ཀྱི་དཔོན་མོ་མཁའ་འགྲོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །ཐེག་པ་ཆེན་པོའི་མདོ་སྡེ་ཕལ་ཆེན་ལས། །རྨད་བྱུང་བཟང་སྤྱོད་སྨོན་ལམ་འཚམས་སྦྱོར་མཐུས། །འདི་ནས་ཤི་འཕོས་སྐད་ཅིག་གཉིས་པ་ལ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཚེ་རབས་ཀུན་ཏུ་བཤེས་གཉེན་དམ་པ་ཡིས། །འབྲལ་བ་མེད་པར་བརྩེ་བས་རྗེས་བཟུང་སྟེ། །ཟབ་རྒྱས་ཆོས་ཀྱི་བདུད་རྩིས་རབ་ཚིམས་ནས། །མྱུར་དུ་སྟོབས་བཅུ་མངའ་བ་ཐོབ་པར་ཤོག །ཅེས་པའི་སྨོན་ལམ་ཚིགས་བཅད་འདི་ནི་མཎ་རབ་(༩༥ན) ― GLG021_Page_0191 ―
[མ་དཔེ་གཟིགས་ན་འདིར་གནོན།]
འབྱམས་པའི་ངོར་ཟ་ཧོར་གྱི་བནྡེས་སྦྱར་བའོ། །ཁྱོད་མཚན་སྐྱེ་རྒུའི་ཐོས་འཛིན་དུ། །ལེགས་པར་ཡོངས་སུ་རབ་བསྒྲགས་པས། །སྲིད་གདུང་སྨག་རུམ་ཉེར་བཅིལ་ཏེ། །གཏན་བདེའི་སྣང་བ་གསལ་བར་ཤོག །མཚན་དཔེའི་གཟི་བརྗིད་འབར་བའི་སྒྲ། །དབྱངས་ཀྱི་རྒྱལ་པོ་སེང་གེ་ཡི། །ང་རོ་བསྒྲགས་པས་འཁོར་འདས་ཀྱི། །སྡུག་བསྔལ་རི་དྭགས་མཐར་བྱེད་ཤོག །འགྲོ་བའི་མ་དག་ཁམས་ཀྱི་ལྕགས། །བླ་མེད་ཡེ་ཤེས་གསེར་བཟང་པོ། །སྒྲིབ་གཉིས་དྲི་མེད་རིན་ཅེན་གྱི། །སྣང་བ་དམ་པའི་འོད་འབར་ཤོག །འཁོར་བའི་འབྲོག་དགོན་ལ་གནས་འགྲོའི། །མྱ་ངན་མཐའ་དག་མེད་མཛད་ནས། །བྱང་ཆུབ་མཆོག་གི་དཔལ་ཆེན་པོར། །ཐུགས་རྗེ་ཆེན་པོས་སྦྱོར་བར་ཤོག །གང་གི་དཔལ་གྱི་མགུར་ཡངས་ནས། །དམ་པའི་ཆོས་ཀྱི་གྲགས་པ་ཡིས། །འགྲོ་ཀུན་འཁོར་བའི་རྒྱ་མཚོ་ལས། །སྒྲོལ་བའི་དབྱངས་སྙན་རྣར་འཇེབ་ཤོག །ཇི་ལྟ་ཇི་སྙེད་ཆོས་རྣམས་ཀུན། །མངོན་སུམ་མཁྱེན་པས་ལུས་ཅན་ཚོགས། །ཆོས་ཀྱི་རྒྱལ་སྲིད་ཆེན་པོ་ཡི། །གོ་འཕང་མཆོག་ལ་འགོད་པར་ཤོག །ཀུན་ལ་སྨན་མཛད་བླ་ན་མེད། །བཻཌཱུཪྻ་འོད་རྒྱལ་པོའི་མཐུས། །འགྲོ་རྣམས་སྡུག་བསྔལ་རབ་ཞི་ནས། །བདེ་བ་ཅན་དུ་སྐྱེ་བར་ཤོག །རྣམ་འདྲེན་ཟས་གཙང་སྲས་གང་གིས། །བཀའ་སྩལ་སྨན་མདོ་ལས་བྱུང་བའི། །ཕན་ཡོན་འབྲས་བུར་ལྔ་བརྒྱ་པའི། །ལུས་ཅན་ཡོངས་ཀྱིས་སྤྱོད་པར་ཤོག །དོན་ཀུན་གྲུབ་པས་བྱང་ཆུབ་མཆོག །བརྙེས་ནས་འགྲོ་བའི་མཆོད་རྟེན་དུ། །གྱུར་ལྟར་མཁའ་(༩༥བ) ― GLG021_Page_0192 ―
[མ་དཔེ་གཟིགས་ན་འདིར་གནོན།]
མཉམ་མ་རྒན་ཀུན། །གང་གི་མཆེད་ཟླར་མྱུར་འགྱུར་ཤོག །འཇིགས་པ་བརྒྱད་སོགས་རྒུད་པའི་རྒྱ། །ཐུགས་རྗེའི་མཚོན་གྱིས་ཉེར་བཅད་ནས། །བདེ་སྐྱིད་དཔལ་ལ་ལུས་ཅན་ཀུན། །སྦྱོར་ཞིག་ཨཱཪྻ་ཏཱ་རཱེ་མ། །ངག་ལ་སྨྲ་བའི་དབང་ཕྱུག་གིས། །བློ་གསལ་སྐལ་བཟང་རེ་སྐོང་བ། །རྒྱ་མཚོའི་རླབས་ལྟར་ཐོས་བསམ་སྒོམ། །དུས་ལས་ཡོལ་བ་མེད་དེ་རྒྱལ། །ཞེས་པ་འདིའང་ལྷ་ས་ཟུར་ཁང་པ་དོན་གྲུབ་དབང་རྒྱལ་གྱིས་མགྲོན་གཉེར་དོན་གྲུབ་རྒྱལ་མཚན་གྱི་དོན་དུ་བདེ་བར་གཤེགས་པ་བརྒྱད། བྱང་ཆུབ་མཆོད་རྟེན། སེང་ལྡེང་ནག་སྒྲོལ། ངེད་རང་གི་འདྲ་འབག་དང་བཅས་བཞེངས་པའི་རྒྱབ་ཏུ་གཟོང་འཕྲུལ་གྱིས་བརྐོས་ཆོག་པའི་ཞལ་བྱང་སྨོན་ལམ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །ལུས་ཅན་ཀུན་ལ་བྱམས་ལྡན་མི་ཕམ་མགོན། །དུས་གསུམ་རྒྱལ་བའི་ཡབ་གྱུར་འཇམ་དཔལ་དབྱངས། །གངས་ཅན་ལྷ་གཅིག་འཕགས་མཆོག་སྤྱན་རས་གཟིགས། །ཕུལ་བྱུང་ཐུགས་རྗེ་ཆེན་པོས་ཉེ་བར་དགོངས། །ཇི་ལྟ་ཇི་སྙེད་ཤེས་བྱའི་གནས་ལུགས་ཀུན། །མངོན་སུམ་གཟིགས་པའི་སྟོན་པ་བཙོང་ཁ་པའི། །ལུགས་འཛིན་ངག་གི་དབང་ཕྱུག་བློ་གྲོས་གཏེར། །སྐལ་བཟང་རྒྱ་མཚོའི་མགོན་ལ་གསོལ་བ་འདེབས། །ཐུབ་གསུང་མཆོག་གྱུར་སྟོང་ཕྲག་བརྒྱ་པ་དང༌། །བརྒྱད་སྟོང་བསྐལ་བཟང་གཟུངས་འདུས་གྲ་ཏོག་གསེར། །དགོངས་འགྲེལ་བཀའ་གདམས་གླེགས་བམ་ལམ་རིམ་སོགས། །གསེར་དངུལ་སྣག་ཚས་རྒྱུ་བྱས་པུ་སྟ་ཀཿ། །སངས་རྒྱས་སྟོང་རྩ་གནས་བརྟན་བཅུ་དྲུག་སྐུ། །གུ་རུ་མཚན་བརྒྱད་ཟབ་མོ་ལྟ་བ་དང༌། །རྒྱ་ཆེན་(༩༦ན) ― GLG021_Page_0193 ―
[མ་དཔེ་གཟིགས་ན་འདིར་གནོན།]
སྤྱོད་རྒྱུད་འཁྲུངས་རབས་ལ་སོགས་པའི། །སངས་རྒྱས་བྱང་སེམས་སྐུ་བརྙན་བྲིས་ཐང་རྣམས། །ཡུལ་དབྱིབས་ཨེ་གཟུགས་ཆོས་ལུང་དཀར་མོ་ཡི། །དཔོན་ཡིག་ངག་དབང་དཔལ་འབྱོར་ཞེས་བྱ་བས། །རྡུལ་བྲལ་སྟོན་ཟླ་ལྟར་དཀར་ལྷག་བསམ་གྱིས། །སྒོ་གསུམ་འབད་པ་ཆེན་པོས་ཉེ་བར་བསྐྲུན། །ལེགས་བྱས་འབྲས་བུས་བཟོད་དཀའི་སྡུག་བསྔལ་ཀུན། །མིང་ཡང་མི་བསྒྲག་ཚེ་འབྱོར་བདེ་སྐྱིད་རྒྱས། །འཁོར་འཁྱམས་དེ་སྲིད་ངན་སོང་གནས་གསུམ་དུ། །ནམ་ཡང་མི་སྐྱེ་མངོན་མཐོའི་རྟེན་ཐོབ་ཤོག །རིང་པོར་མི་ཐོགས་སྲིད་པའི་འཆིང་རྒྱ་ལས། །ཉེར་གྲོལ་ཐར་པ་ཐམས་ཅད་མཁྱེན་པའི་ལམ། །མངོན་གྱུར་གཏན་གྱི་བདེ་བ་བླ་ན་མེད། །ཉམས་སུ་མྱོང་བའི་སྐལ་བཟང་འཐོབ་པར་ཤོག །ནམ་མཁའི་མཐའ་མཉམ་སེམས་ཅན་མ་ལུས་པ། །གནས་སྐབས་སྲིད་པའི་ཟུང་རྔུ་རབ་ཞི་ཞིང༌། །རིང་མིན་མཐར་ཐུག་སྲིད་ཞིར་མི་གནས་པའི། །སྟོབས་བཅུ་མངའ་བའི་གོ་འཕང་རྒྱུ་རུ་བསྔོ། །ཞེས་པ་འདིའང་ཨེ་པ་ཡིག་མཁན་ངག་དབང་དཔལ་འབྱོར་གྱིས་གོང་གསལ་གྱི་རྟེན་རྣམས་བཞེངས་པའི་ཁ་བྱང་དང་རྒྱུན་གྱི་ངག་འདོན་སོགས་གང་འོས་ལ་བྱས་ཆོག་པའི་ཚིགས་བཅད་སྨོན་ལམ་འདི་ལྟ་བུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །འཇམ་དབྱངས་མཐོན་མཐིང་རལ་པའི་ཁུར་དོར་ནས། །ངུར་སྨྲིག་གར་གྱི་རྣམ་རོལ་བཙོང་ཁ་པའི། །སྐུ་བརྙན་ངག་གི་དབང་ཕྱུག་ནམ་མཁའ་ཡིས། །ཆོས་དཀར་ཞིང་དུ་འབད་པས་བསྐྲུན་པའི་མཐུས། །འདི་ནང་ཆོས་དང་སྲིད་ཀྱི་ལེགས་ཚོགས་(༩༦བ) ― GLG021_Page_0194 ―
[མ་དཔེ་གཟིགས་ན་འདིར་གནོན།]
རྒྱས། །ཡང་སྲིད་ཀུན་ཏུ་ལྷ་མིའི་རྟེན་བཟང་རྙེད། །སྒྲིབ་གཉིས་འཆིང་བའི་རྒྱ་ལས་རིང་མིན་དུ། །རྣམ་གྲོལ་མི་གནས་མྱ་ངན་འདས་ཐོབ་ཤོག །ཅེས་པ་འདིའང་རིག་བྱེད་པ་ཏྲེ་བོ་ངག་དབང་ནམ་མཁས་རྗེ་བཙུན་ཙོང་ཁ་པ་ཆེན་པོའི་སྐུ་ཐང་བཞེངས་པར་རྒྱབ་ཡིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར། །དགེ་དགེ་འདུན་གྲུབ་ཚོགས་རྒྱ་མཚོར་འདུན་པའི་བསོད་ནམས་གྲུས། །ཕུན་ཚོགས་དབང་པོ་རིགས་བརྒྱུད་མངའ་འབངས་རྣམས། །སྲིད་ཞིའི་སྡུ་བསྔལ་མཚོ་བསྒྲལ་ཕན་དང་བདེའི། །རིན་ཅེན་གླིང་བགྲོད་བསམ་དོན་ལྷུན་གྲུབ་ཤོག །ཐུབ་རྗེ་དགེ་འདུན་རྒྱ་མཚོ་དབང་དེ་གསུང་དགེ་འདུན་ཚོགས་བཅས་ཀྱིས། །ཐུགས་རྗེ་རྒྱ་མཚོའི་རླབས་ཕྲེང་ཡོལ་མེད་མཐུས། །རྣམ་སྲས་གླིང་པ་མི་ནོར་འཁོར་བཅས་ཀྱི། །འདི་ཕྱིའི་དོན་ཀུན་ལྷུན་གྱིས་འགྲུབ་བྱིན་རློབས། །བསོད་ནམས་བསོད་ནམས་རྒྱ་མཚོ།ནམས་ཉེར་བསགས་ཕུང་པོ་རྒྱ་ཆེ་ཞིང༌། །མཚོ་ལྟར་གཏིང་ཟབ་ཨ་སྨྲའི་འབྲས་སྨིན་པ། །བདེ་སྐྱིད་རོ་བརྒྱར་ཕུན་ཚོགས་དབང་གི་རྒྱལ། །བརྒྱུད་པར་བཅས་པས་རྟག་ཏུ་ཉམས་མྱོང་ཤོག །དབང་རྗེ་ཡོན་ཏན་རྒྱ་མཚོ།ཕྱུག་ཡོན་ཏན་བརྒྱད་ཀྱིས་རྒྱ་མཚོའི་གོས། །ཡོངས་གཏམས་ཕུན་ཚོགས་དབང་པོ་རིགས་བརྒྱུད་ཀྱིས། །རྟག་པར་མྱོང་བའི་ལེགས་བྱས་ཉལ་འགྲོའི་རྒྱུན། །བྱང་ཆུབ་མཆོག་གི་ཆུ་གཏེར་ཆེར་འབབ་ཤོག །ངག་དབང་ཚངས་སྲས་ལྷ་མོའི་བློ་གྲོས་ལ། །མཉམ་དུ་སྤྱོད་པའི་སྐལ་བཟང་རྒྱ་མཚོའི་སྡེ། །དེང་འདིར་བདེན་པ་བརྗོད་པའི་ཚིགས་ཇི་བཞིན། །ཕུན་ཚོགས་དབང་པོར་ལྷུན་གྱིས་གྲུབ་གྱུར་ཅིག །ཅེས་པ་འདི་འང་རྣམ་སྲས་གླིང་པ་ཕུན་ཚོགས་དབང་པོས་ཞལ་ཐང་གྲ་ཚར་བཞེངས་པར་(༩༧ན) ― GLG021_Page_0195 ―
[མ་དཔེ་གཟིགས་ན་འདིར་གནོན།]
རྒྱབ་ཡིག་སྨོན་ལམ་ཞིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །དཀོན་མཆོག་གསུམ་འདུས་རྩ་བའི་བླ་མ་ལ། །བྱང་ཆུབ་མ་ཐོབ་བར་དུ་གསོལ་བ་འདེབས། །ཚེ་འདིར་འགལ་རྐྱེན་བར་ཆད་ཀུན་ཞི་ཞིང༌། །རིང་འཚོ་མངའ་ཐང་དཔལ་འབྱོར་རྒྱས་པར་ཤོག །དེ་ནས་ཉིང་མཚམས་སྦྱར་ཚེ་བར་དོ་ཡི། །འཇིགས་སྐྲག་སྡུག་བསྔལ་ཉམས་སུ་མི་མྱོང་བར། །འོད་ཀྱི་ལམ་ནས་བདེ་བ་ཅན་ཞིང་དུ། །པདྨའི་སྦུབས་སུ་རྫུས་ཏེ་སྐྱེ་བར་ཤོག །སྣང་བ་མཐའ་ཡས་ཞལ་མཐོང་དེ་གསུང་ཆོས། །ཉམས་སུ་བླངས་པས་སྲིད་ཞི་ལས་འདས་པའི། །རྣམ་པ་ཐམས་ཅད་མཁྱེན་པ་མྱུར་ཐོབ་སྟེ། །འགྲོ་ཀུན་འདྲེན་པའི་དེད་དཔོན་བྱེད་པར་ཤོག །ཅེས་པའི་གསོལ་འདེབས་སྨོན་ལམ་འདི་ནི་བསོད་ནམས་ཇ་ལང་ཇང་ཀིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །འགྲོ་ལ་མངོན་སུམ་སྣང་བ་དགེ་བའི་བཤེས། །སངས་རྒྱས་ཀུན་གྱི་ངོ་བོར་ངེས་བརྙེད་ནས། །མི་ཕྱེད་དད་པས་སྙིང་ནས་གསོལ་འདེབས་ན། །གང་བྱིན་བདག་གི་སྙིང་ལ་མྱུར་འཇུག་ཤོག །ལྷ་དང་སྐལ་མཉམ་བདེ་སྐྱིད་ཚེ་ལ་དབང༌། །རྣམ་ཐོས་བུ་ཡི་དཔལ་དང་འབྱོར་པ་རྙེད། །ཤི་འཕོས་བདེ་བ་ཅན་དུ་རྫུས་སྐྱེས་ནས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཅེས་པ་འདིའང་མོ་གོལ་སྦི་ཆལ་ཆིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །མཐོང་ཐོས་དྲན་པས་རྣམ་གྲོལ་བདེ་གཤེགས་སྐུ། །རི་མོ་རབ་བཀྲ་མེས་པོའི་ཐོང་ཡངས་ནས། །བསོད་ནམས་མཐོ་རིས་ཆུ་བོའི་རྒྱུན་འཁྱིལ་བའི། །རྟེན་(༩༧བ) ― GLG021_Page_0196 ―
[མ་དཔེ་གཟིགས་ན་འདིར་གནོན།]
བཟང་རིན་ཅེན་ཡོལ་གོར་རབ་བརྟན་ཤོག །དགེ་བའི་འབྲས་བུ་ནམ་ཡང་མི་འཛད་པའི། །བྱང་ཆུབ་མཆོག་གྱུར་ཡོངས་བསྔག་གཏེར་ཆེན་པོའི། །ཕུན་ཚོགས་བུམ་པ་བཟང་པོར་ལོངས་སྤྱོད་པའི། །བཟང་པོའི་བསྐལ་བ་ཅན་དུ་འགྱུར་བར་ཤོག །ཅེས་སྐྱར་པོ་བ་བསོད་ནམས་རབ་བརྟན་གྱི་ཕྱི་རྟེན་དུ་བཞེངས་པའི་ཐང་སྐུའི་རྒྱབ་ཡིག་ཚིགས་བཅད་འདི་ནི་རྡོ་རྗེ་དབང་ཕྱུག་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །རྩ་བའི་བླ་མ་མགོན་པོ་འོད་དཔག་མེད། །དབྱེར་མེད་བདག་སྙིང་པདྨོའི་དབུས་བཞུགས་ནས། །ཉིང་མཚམས་སྦྱར་ཚེ་བདེ་བ་ཅན་ཞིང་དུ། །པདྨའི་སྦུབས་སུ་སྐྱེ་བ་ལེན་པར་ཤོག །ཅེས་པ་འདིའང་ཁལ་ཁ་གུ་ཡང་ཇིའི་སང་གི་ཁ་ཏོན་དུ་ཟ་ཧོར་གྱི་བནྡེས་སྦྱར། །སྙིང་དབུས་འདབ་སྟོང་རྒྱས་པའི་ཟེའུ་འབྲུའི་སྟེང༌། །དཀོན་མཆོག་ཀུན་འདུས་རྩ་བའི་བླ་མ་ལ། །མི་ཕྱེད་གདུང་ཤུགས་དྲག་པོས་གསོལ་བ་འདེབས། །ཐུགས་རྗེ་བདག་གི་རྒྱུད་ལ་འཇུག་བྱིན་རློབས། །འདི་སྣང་དམ་ཆོས་སྒྲུབ་པའི་ཉེས་ཚོགས་ཞི། །ཉིང་མཚམས་སྦྱར་ཚེ་བདེ་བ་ཅན་ཞིང་དུ། །ལེགས་སྐྱེས་འོད་དཔག་མེད་ཀྱིས་རྗེས་བཟུང་སྟེ། །མཁའ་མཉམ་འགྲོ་བ་འདྲེན་པའི་དཔལ་གྱུར་ཅིག །ཅེས་པ་འདི་ཡང་བསམ་བློ་དཀའ་བཅུ་ཆོས་བཟང་རྣམ་རྒྱལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །གཟོད་མ་ཉིད་ནས་ལུས་ཅན་མ་ལུས་པ། །འདྲེན་པ་ཞལ་འཆེས་རྒྱལ་ཚབ་མི་ཕམ་མགོན། །ཐུགས་རྗེའི་འོད་ཀྱི་སྦུ་གུའི་ལམ་ཡངས་པོར། །ས་སྤྱོད་སེང་གེ་དགྲ་འདུལ་ཉེར་དྲངས་གསོལ། །ཞིང་ཁམས་རྒྱ་མཚོའི་རྡུལ་ཀྱི་རྩེར་སོན་པ། །དགའ་ལྡན་ཡིད་དགའ་ཆོས་འཛིན་གནས་མཆོག་ཏུ། །པདྨའི་སྦུབས་སྐྱེས་མགོན་(༩༨ན) ― GLG021_Page_0197 ―
[མ་དཔེ་གཟིགས་ན་འདིར་གནོན།]
ཁྱོད་ཞལ་གྱི་ལུང༌། །ཐེག་ཆེན་ཆོས་ཀྱི་བདུད་རྩི་འཐུང་བར་ཤོག །ས་བཅུ་ལམ་ལྔའི་རིན་ཅེན་ཐེམ་སྐས་ལ། །འཛེགས་ནས་རིང་མིན་སྟུག་པོ་བཀོད་པ་རུ། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུར། །སྔོན་སངས་རྒྱས་ནས་འགྲོ་ཀུན་འདྲེན་པར་ཤོག །ཉེ་དུ་འབངས་འཁོར་རྣམས་ཀྱིས་ལེགས་དམིགས་ནས། །རྟེན་བཞེངས་དཀོན་ཅོག་མཆོད་དང་ཐུབ་གསུང་བཀླགས། །སྦྱིན་སོགས་དགེ་བའི་ས་བོན་ཡོངས་སྨིན་པའི། །ཨ་སྨྲའི་འབྲས་བཟང་ཉམས་སུ་མྱོང་བར་ཤོག །ཆོས་ཉིད་དོན་དམ་གདོད་ནས་འགྱུར་བ་མེད། །ཆོས་ཅན་རྒྱུ་དང་འབྲས་བུ་སླུ་མེད་ཀྱིས། །ཇི་ལྟར་སྨོན་པ་ཡིད་བཞིན་ལྷུན་འགྲུབ་པར། །རྒྱལ་སྲས་སློབ་མར་བཅས་པས་བདག་བྱིན་རློབས། །ཞེས་ཨོ་རོད་གཡོན་རུའི་དཔོན་པོ་སེང་གེ་དགྲ་འདུལ་དུས་ཀྱི་ཆོས་ཉིད་དུ་གྱུར་པའི་ཚེ་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །མཁྱེན་བརྩེ་ནུས་པར་ལྡན་པ་རྫོགས་སངས་རྒྱས། །དེ་གསུང་བདེན་པ་གཉིས་ལྡན་དམ་པའི་ཆོས། །ལེགས་བསྒྲུབས་རིག་གྲོལ་གཉིས་ལྡན་དགེ་འདུན་ཏེ། །མཆོག་གསུམ་ཐུགས་རྗེའི་མཐུ་དཔུང་དེང་འདིར་སྐྱེད། །བཱ་ཁན་བནྡེ་མཆིས་འབྲང་བཅས་པ་རྣམས། །ཤཱཀྱ་མུ་ནི་གཙོ་གྱུར་རྟེན་བརྟན་པ། །འདུས་སྡེར་བཅས་སོགས་བལྟ་ཕྱིར་གངས་ལྗོངས་སུ། །བགྲོད་པའི་འདུན་པ་བགེགས་མེད་འགྲུབ་པར་ཤོག །སྒོ་གསུམ་ཟུག་རྔུར་བྱེད་པ་ལས་ཉོན་གདོན། །མཐར་བྱེད་ལེགས་བྱས་ལག་ན་རྡོ་རྗེ་མཚོན། །རབ་འབར་གསང་བ་ཀུན་འཛིན་རྣམ་པར་ཐར། །བསྒྲུབས་(༩༨བ) ― GLG021_Page_0198 ―
[མ་དཔེ་གཟིགས་ན་འདིར་གནོན།]
པའི་སྐལ་བ་བཟང་པོ་འགྱུར་བར་ཤོག །ཅེས་པ་འདིའང་ཨོ་རོད་གཡོན་རུའི་དཔོན་པོ་བཱ་ཁན་བནྡེ་དང་དཔོན་མོ་ཚེ་རིང་རྒྱལ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །དཔལ་ལྡན་ཤཱཀྱའི་འཕྲིན་ལས་གངས་རི་ལས། །གྲུབ་མཐའ་རྣམ་བཞིའི་ལེགས་བཤད་གངྒཱའི་རྒྱུན། །སྐལ་བཟང་གདུལ་བྱའི་རྒྱ་མཚོར་འབེབས་མཁས་པ། །བཤེས་གཉེན་དྲང་སྲོང་མཆོག་ལ་གསོལ་བ་འདེབས། །མགོན་ཁྱོད་ཡོངས་བཞེད་དག་པའི་ཞིང་བྱོན་ནས། །ས་ལམ་མངོན་པར་རྟོགས་པའི་ཡོན་ཏན་ཀུན། །གོང་དུ་སྤེལ་ལ་སྒྲུབ་པའི་བགེགས་བྲལ་ཞིང༌། །གཞན་དོན་རླབས་ཆེན་ལྷུན་གྱིས་འགྲུབ་པར་ཤོག །སྙིང་ནས་མོས་པར་ལྡན་པའི་བུ་སློབ་རྣམས། །མཁྱེན་བརྩེའི་མཛའ་བས་ནམ་ཡང་མི་གཏོང་བར། །སྐྱེ་བར་རྗེས་སུ་བཟུང་སྟེ་ངེས་ལེགས་སུ། །འདྲེན་པའི་སྨོན་ལམ་ལྷུན་གྱིས་འགྲུབ་པར་ཤོག །ཅེས་སློབ་དཔོན་ལྕང་ལོ་ཅན་པ་འཕྲིན་ལས་རྒྱ་མཚོར་གསོལ་འདེབས་སྨོན་ལམ་འདི་ལྟ་བུ་ཞིག་དགོས་ཞེས་ཐོས་བསམ་དར་རྒྱས་གླིང་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །ཆོས་ཉིད་དག་པའི་ཞིང་ས་རབ་གཤིན་པར། །བདེན་ཚིག་རྒྱུ་འབྲས་ས་བོན་ལེགས་སྨིན་པའི། །འདོད་དོན་དཔག་བསམ་ཡོངས་འདུའི་གྲིབ་བསིལ་ལ། །སྤྱོད་པའི་སྐལ་བ་བཟང་པོར་བདག་གྱུར་ཅིག །ངག་དབང་འཇམ་དབྱངས་དགྱེས་པའི་བློ་གྲོས་ཀྱིས། །སྐལ་བཟང་གདུལ་བྱ་རྒྱ་མཚོའི་རེ་སྐོང་བའི། །ཡང་དག་དགེ་བའི་བཤེས་ཁྱོད་སྲིད་པའི་མཐའ། །རྫོགས་མིན་རྡོ་རྗེ་ལྟ་བུར་(༩༩ན) ― GLG021_Page_0199 ―
[མ་དཔེ་གཟིགས་ན་འདིར་གནོན།]
བརྟན་གྱུར་ཅིག །བློ་བཟང་གྲགས་སྙན་ལུགས་ཟུང་བསྟན་པའི་སྲོག །མཐུ་སྟོབས་ནུས་པས་ལེགས་འཛིན་ཡངས་པའི་ས། །སྐྱོང་མཛད་མི་དབང་སྐུ་ཚེ་ཆབ་སྲིད་རྣམས། །དབྱར་གྱི་ཆུ་གཏེར་ཇི་བཞིན་འཕེལ་བར་ཤོག །འདུས་པའི་སྡེ་འདི་ཁྲིམས་གཙང་ཐོས་བསམ་སྒོམ། །བྱ་བ་ལས་ཀྱི་འཁོར་ལོར་བཅས་པ་ཡི། །སྲིད་ཞིའི་ཡོན་ཏན་མ་ལུས་བླ་ནས་བླར། །འཕེལ་བའི་དགའ་སྟོན་རྟག་ཏུ་མྱོང་བར་ཤོག །རིག་འཛིན་རྩ་བརྒྱུད་བླ་མའི་བྱིན་རླབས་དང༌། །དཔལ་ཆེན་འཕྲིན་ལས་འཁོར་ལོའི་མཐུ་སྟོབས་ཀྱིས། །དུས་རྣམས་རྟག་ཏུ་ཤིས་པའི་གྲུ་ཆར་གྱིས། །ཡངས་པའི་ནོར་འཛིན་ཁྱོན་ཀུན་ཁྱབ་གྱུར་ཅིག །ཅེས་པ་འདི་ཡང་ཕོ་བྲང་གོང་རི་དཀར་པོའི་དཀོན་གཉེར་དགེ་སྟེང་བླ་མ་ངག་དབང་ཀུན་བཟང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་ནོ། །དྲི་མེད་ཀཱ་ཤིའི་མན་ཤེལ་ངོས་ཡངས་པར། །བླ་མ་ཡི་དམ་སྲུང་མའི་སྣང་བརྙན་ཚོན། །རྣམ་བཀྲ་ཇི་བཞིན་རང་སེམས་དག་པའི་སྐུར། །ཡོངས་ཤར་འདི་ཕྱིའི་དོན་ཀུན་འགྲུབ་པར་ཤོག །ཅེས་མདོ་བཙུན་ངག་དབང་ལྷུན་གྲུབ་ཀྱིས་ཐང་སྐུའི་རྒྱབ་ཡིག་ཏུ་འདྲི་རྒྱུའི་ཚིགས་བཅད་ཅིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའོ། །དཔལ་ལྡན་རྩ་གསུམ་འཁོར་ལོའི་བྱིན་རླབས་ཀྱིས། །འཁོར་འདས་ཕྱག་རྒྱ་གཟིལ་གནོན་བཞད་པ་རྩལ། །གང་ཤར་རང་སར་གྲོལ་བའི་རིག་པ་འཛིན། །བསྟན་འགྲོའི་ཉེར་འཚོར་གཡོ་མེད་བརྟན་གྱུར་ཅིག །མེས་པོ་ཚངས་པའི་བློ་དང་བརྩོན་པ་ཡིས། །འབངས་རྣམས་རྫོགས་ལྡན་(༩༩བ) ― GLG021_Page_0200 ―
[མ་དཔེ་གཟིགས་ན་འདིར་གནོན།]
སྐལ་བཟང་ལ་སྦྱོར་བས། །གནམ་གྱི་ཤེ་མོང་དཔུང་པའི་མཐུ་སྟོབས་ཀྱིས། །ཡངས་པའི་ནོར་འཛིན་སྐྱོང་བ་ཞབས་བརྟན་ཤོག །དགའ་ལྡན་ཕྱོགས་ལས་རྣམ་པར་རྒྱལ་བ་ཡི། །འཆི་མེད་དབང་པོའི་འདུན་ས་ཕོ་བྲང་ཆེའི། །ཆོས་སྲིད་བསྟན་པ་མུ་ཏི་ཀ་ཡི་འཕྲེང༌། །ཡིད་ཅན་བསོད་ནམས་སྲད་བུར་རྟག་རྒྱུ་ཤོག །ཨྱོན་སངས་རྒྱས་གཉིས་པའི་སྨིན་གྲོལ་གྱི། །བཤད་སྒྲུབ་སྔ་འགྱུར་བསྟན་པའི་མཛེས་རྒྱན་དུ། །སྤྲུལ་པའི་སྐུ་མཆོག་གཏེར་བདག་གླིང་པ་ཡི། །བཞེད་པ་ཇི་བཞིན་བླ་ནས་བླར་འཕེལ་ཤོག །ཆོས་ཉིད་ཀ་ནས་དག་པའི་མཁའ་དབྱིངས་ངོས། །ཆོས་ཅན་རྒྱུ་འབྲས་ལྷུན་གྲུབ་ཆུ་འཛིན་ལས། །འཛད་མེད་བྱིན་རླབས་ཆར་གྱིས་ཕན་དང་བདེའི། །གསེར་གྱི་སྙེ་མ་གཡུར་དུ་ཟ་བར་ཤོག །ཅེས་བརྟན་བཞུགས་སྨོན་ལམ་གྱི་ཚིགས་སུ་བཅད་པ་འདི་ནི་ལུང་བསྟན་དུས་ལ་བབ་པའི་རྩོད་བྲལ་གྱི་གཏེར་སྟོན་སྤྲུལ་པའི་སྐུ་གཏེར་བདག་གླིང་པའི་གསུང་གིས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་ངག་དབང་ནམ་མཁའོ། །འོད་མཚན་དཔག་ཏུ་མེད་པ་སྣང་མཐའ་ཡས། །ཚེ་དབང་རིག་འཛིན་གྲུབ་པ་ཐོད་ཕྲེང་རྩལ། །མ་སྨད་ཐུགས་རྗེའི་བུམ་པ་བཟང་པོ་ལས། །འཆི་མེད་བདུད་རྩིའི་ཆུ་རྒྱུན་རྟག་ཏུ་སྩོལ། །ངག་དབང་འཇམ་དཔལ་ཞི་ཁྲོས་རྗེས་བཟུང་བས། །འཁོར་འདས་ཕྱག་རྒྱ་ཟིལ་གནོན་བཞད་པ་རྩལ། །བློ་བསལ་སྐལ་བཟང་རྒྱ་མཚོའི་དཔལ་མགོན་དུ། །ངེས་པ་ལྔ་ལྡན་ཇི་བཞིན་གཡོ་མེད་ཤོག །རྒྱལ་དབང་བློ་བཟང་གྲགས་པའི་ཆོས་སྲིད་བསྟན། །མཐུ་སྟོབས་ནུས་པས་གྱེན་དུ་རབ་འདེགས་པ། །དཔལ་ལྡན་(༡༠༠ན) ― GLG021_Page_0201 ―
[མ་དཔེ་གཟིགས་ན་འདིར་གནོན།]
ནོར་འཛིན་སྐྱོང་བ་མི་ཡི་རྗེ། །གཞོམ་མེད་རྡོ་རྗེའི་ཁྲི་ལ་རྟག་བརྟན་ཤོག །ཛཱ་ཏིའི་དྲི་བསུང་འཐུལ་བའི་ཡུལ་གྲུ་ནས། །རྣམ་བཀྲ་ཟ་འོག་འཐག་པའི་རྒྱལ་ཁམས་བར། །ཁྲིམས་གཉིས་གསེར་གྱི་གཉའ་ཤིང་རབ་ལྕི་བས། །འགྲོ་རྣམས་རྫོགས་ལྡན་དགའ་སྟོན་ལ་སྤྱོད་ཤོག །ཕྱོགས་ལས་རྣམ་རྒྱལ་ཕན་བདེ་འབྱུང་བའི་གནས། །སྨིན་གྲོལ་རྒྱུད་འབྲེལ་མན་ངག་རྡོ་རྗེའི་ཐེག །ལེགས་པར་བཤད་པའི་ཁྲིམས་ལྡན་རིགས་འཛིན་གླིང༌། །སྲིད་མཐའི་བར་དུ་བླ་ནས་བླར་འཕེལ་ཤོག །ལྷག་བསམ་ཞིང་སར་དགེ་བའི་ས་བོན་ཚོགས། །ལེགས་བཏབ་འབྲས་བཟང་སྙེ་མ་རོ་བདའི་བཅུད། །བདག་སོགས་མཁའ་མཉམ་སྐྱེ་རྒུ་མ་ལུས་པས། །བྱང་ཆུབ་སྙིང་པོའི་བར་དུ་མྱོང་བར་ཤོག །དངོས་གྲུབ་འབྱུང་གནས་རྩ་རྒྱུད་བླ་མ་དང༌། །བྱིན་རླབས་གཏེར་མཛོད་བདེ་གཤེགས་ཞི་ཁྲོའི་ལྷ། །འཕྲིན་ལས་ཀུན་སྒྲུབ་འདོད་ཁམས་དབང་ཕྱུག་མས། །བསམ་པའི་དོན་ཀུན་ལྷུན་གྱིས་གྲུབ་པར་མཛོད། །ཅེས་མཆོད་དཔོན་ངག་དབང་ཤེས་རབ་ཀྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་སྙན་དར་སུམ་བརྒྱ་སྐོར་གོང་བཅས་ཕུལ་དུས་ངེད་རང་དང་སྡེ་པ་གཉིས་ཀའི་རིང་འཚོའི་སྨོན་ལམ་ཚིགས་བཅད་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཏྲེ་བོ་ངག་དབང་ནམ་མཁའོ། །བདེ་ལེགས་དབྱར་སྐྱེས་གསར་པའི་སྒྲིབ་བསིལ་ལས། །ཕན་བདེའི་ལ་བ་དཀར་པོར་སྟེགས་བཅས་པའི། །སྐལ་ལྡན་ལེགས་བྲིས་ཚོགས་ཀྱི་དགའ་སྟོན་ཅན། །བློ་བཟང་གྲགས་པ་མཆོད་སྦྱིན་བརྒྱ་པར་འདུད། །ཡུན་དུ་མི་དམན་གོམས་པའི་བསོད་ནམས་ཀྱི། །(༡༠༠བ) ― GLG021_Page_0202 ―
[མ་དཔེ་གཟིགས་ན་འདིར་གནོན།]
ངག་དབང་འཇམ་མགོན་བློ་གྲོས་བཟང་པོ་ཡི། །རིང་ལུགས་རྒྱ་མཚོའི་གོས་ཅན་ཁྱབ་པའི་ཁུར། །འཛིན་མཛད་ཡོངས་འཛིན་དམ་པར་གསོལ་བ་འདེབས། །ཚེ་རབས་ཀུན་ཏུ་དལ་བའི་རྟེན་ཐོབ་ནས། །བཤེས་གཉེན་མཆོག་གི་མགོན་གྱིས་ལེགས་བཟུང་སྟེ། །འཇམ་དཔལ་སྙིང་པོའི་བསྟན་པ་དྲི་མེད་ལ། །ཐོས་བསམ་སྒོམ་པ་བྱེད་པར་བྱིན་གྱིས་རློབས། །གནས་སྐབས་དམ་ཆོས་སྒྲུབ་པར་བྱེད་པའི་དུས། །ཉེར་འཚེའི་མི་མཐུན་དགྲ་ལས་རྣམ་རྒྱལ་ཞིང༌། །མཐར་ཐུག་མོས་པས་སྤྱོད་དང་འཕགས་ལམ་ལ། །བསླབ་ཅིང་བགྲོད་ཚེ་ཐོགས་པ་མེད་པར་ཤོག །གང་ཞིག་སངས་རྒྱས་དེ་གསུང་སྒྲུབ་པའི་ཚོགས། །སླུ་མེད་དམ་པའི་མཐུ་ཡི་ལེགས་བྱས་ཀྱི། །བརྒྱ་ཕྲག་སྒོ་གླེག་བཀྲལ་ལས་དུས་ཀུན་ཏུ། །དོན་གཉིས་ལྷུན་གྱིས་གྲུབ་པའི་བཀྲ་ཤིས་སྩོལ། །ཅེས་པ་འདི་ཡང་ཁལ་ཁ་དཔོན་པོ་བསྟན་འཛིན་གྱིས་བསྐུལ་བ་ལ་རྟེན་ནས་ངག་དབང་བློ་བཟང་རྒྱ་མཚོས་སྦྱར་བའོ། །བློ་ལྡན་ཐོས་འཛིན་བཻཌཱུར་དཀར་པོའི་སྣོད། །ལེགས་བཤད་བཟང་པོའི་བདུད་རྩི་རབ་འཁྱིལ་བའི། །བྱེད་པོ་འཇམ་དབྱངས་བླ་མ་བཙོང་ཁ་པ། །གྲགས་པ་དོན་ལྡན་ཁྱོད་ཀྱི་ཐུགས་རྗེ་དང༌། །རྒྱལ་ཀུན་ཡུམ་གཅིག་ངག་དབང་དབྱངས་ཅན་ལྷ། །འདོད་ཁམས་དབང་ཕྱུག་གཙོ་མོའི་སྐུར་བསྟན་པའི། །སྲིད་གསུམ་བདག་མོ་དཔལ་ལྡན་རེ་མ་ཏི། །གང་གི་ཐོགས་པ་མེད་པའི་འཕྲིན་ལས་མཐུས། །ཉི་མའི་གཉེན་གྱི་གསུང་རབ་ཇི་སྙེད་རྣམས། །འཁྲུལ་མེད་དགོངས་འགྲེལ་བསྟན་བཅོས་གླེག་བམ་ཚོགས། །མི་ཟད་ཆོས་སྦྱིན་པར་གྱི་སྦྱོར་བ་དང༌། །སྙིམ་པའི་འཕྲུལ་གྱིས་མང་དུ་སྤེལ་བ་ལ། །ཉེར་འཚེའི་ནད་གདོན་(༡༠༡ན) ― GLG021_Page_0203 ―
[མ་དཔེ་གཟིགས་ན་འདིར་གནོན།]
བགེགས་དང་བར་ཆད་སོགས། །མི་མཐུན་ཕྱོགས་རྣམས་མ་ལུས་རབ་ཞི་ཞིང༌། །བསམ་དོན་ལྷུན་གྱིས་འགྲུབ་པའི་དགེ་ལེགས་གང༌། །འབད་མེད་ལག་རྩེར་སྩོལ་བའི་དཔལ་ཐོབ་ཤོག །གང་དེ་བསྒྲུབ་པའི་སྒོ་ནས་སྦྱིན་པའི་བདག །སོར་མོའི་སྒྱུ་འཕྲུལ་དྲྭ་བའི་བྱེད་པོ་དང༌། །ཕྱོགས་འདིར་ལུས་ངག་ཡིད་ཀྱི་ངལ་བ་དག །བསྟེན་ཀུན་དོན་གཉིས་མ་ལུས་འགྲུབ་གྱུར་ཅིག །ཅེས་པ་ཡང་ས་སྐྱོང་མིའི་དབང་ཕྱུག་ངག་དབང་དགའ་ལྡན་རབ་ལྡན་གྱིས་ངེད་རང་གི་བརྩམས་ཆོས་ཕར་ཕྱིན་མཛོད་སོགས་པོ་ཏི་འགའ་ཞིག་པར་དུ་བཞེངས་པའི་ཚེ་པར་ཡིག་པ་གཉིས་ཀྱིས་བསྐུལ་བའི་ངོར་སྦྱར། །དཔལ་ལྡན་དུས་གསུམ་རྒྱལ་བ་མ་ལུས་པ། །གཅིག་ཏུ་བསྡོམས་པ་ཁྱབ་བདག་འཁོར་ལོའི་མགོན། །གདན་གསུམ་ཚང་བའི་སྡེ་དཔོན་རྡོ་རྗེ་འཛིན། །བཀའ་དྲིན་མཉམ་མེད་རྩ་བའི་བླ་མ་ལ། །འདི་ནས་བླ་མེད་བྱང་ཆུབ་མ་ཐོབ་བར། །ཚིག་ཙམ་མིན་པར་སྙིང་ནས་གསོལ་འདེབས་ན། །རྫོགས་སངས་རྒྱས་པར་དྲི་མེད་སྤྱན་གྱིས་གཟིགས། །རེ་ས་གཞན་ན་མེད་དོ་ཐུགས་རྗེའི་གཏེར། །ལས་དང་ཉོན་མོངས་དབང་གིས་འཁོར་བ་འདིར། །སྐྱེ་སྲིད་གྲངས་མེད་བླངས་ཀྱང་སྟོང་པར་ལོག །དལ་འབྱོར་རྟེན་བཟང་ལན་གཅིག་ཐོབ་པ་གང༌། །དོན་ལྡན་སྙིང་པོ་ལེན་པར་བྱིན་གྱིས་རློབས། །སྔོན་ཆད་རྟག་པར་འཛིན་པའི་གདོན་ཆེན་འདིས། །དགྲ་འདུལ་གཉེན་སྐྱོང་ཚེ་འདིའི་བྱ་བས་གཡེངས། །ད་ནི་ངེས་མེད་མྱུར་དུ་འཆི་སྙམ་པའི། །ལོང་མེད་རྒྱུད་ལ་སྐྱེ་བར་བྱིན་གྱིས་རློབས། །དེ་ལྟའི་བདེ་དང་སྡུག་བསྔལ་མ་ལུས་པ། །རིང་ནས་དགེ་དང་མི་དགེའི་ལས་བསགས་པའི། །འབྲས་བུར་ཤེས་ནས་(༡༠༡བ) ― GLG021_Page_0204 ―
[མ་དཔེ་གཟིགས་ན་འདིར་གནོན།]
རྒྱུ་འབྲས་ཕྲ་མོ་ལ། །བླང་དོར་ཚུལ་བཞིན་བསྒྲུབ་པར་བྱིན་གྱིས་རློབས། །ཚངས་དང་བརྒྱ་བྱིན་འཁོར་ལོས་སྒྱུར་རྒྱལ་སོགས། །ཆེན་པོའི་གོ་འཕང་གྲངས་མེད་མྱོང་བའི་མཐར། །བཟོད་དཀའ་ངན་སོང་སྐྱེ་མང་བརྒྱུད་པ་འདིས། །རྣམ་དག་ངེས་འབྱུང་སྐྱེ་བར་བྱིན་གྱིས་རློབས། །སྡུག་བསྔལ་གསུམ་གྱིས་ཡ་ངའི་གཡང་ས་ལས། །རྣམ་པར་གྲོལ་བའི་ཞི་བའི་གླིང་མཆོག་ཏུ། །བགྲོད་ཀྱང་འགྲོ་རྣམས་ཉམ་ཐག་ཚུལ་བསམ་ནས། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །གྲངས་རིང་སྒྲུབ་དཀའ་བསྐལ་ཆེན་གསུམ་གྱི་ཚོགས། །སྙིགས་དུས་ཚེ་ཐུང་གཅིག་ལ་རྫོགས་ནུས་པའི། །ཟབ་མོ་ཉེ་བའི་ལམ་གྱིས་ཡིད་ཕྲོགས་ཏེ། །རྡོ་རྗེའི་ཐེག་ལ་འཇུག་པར་བྱིན་གྱིས་རློབས། །མདོར་ན་དེང་ནས་ཚེ་རབས་ཐམས་ཅད་དུ། །འཇམ་མགོན་བློ་བཟང་གྲགས་པའི་བསྟན་པ་ལ། །ཞུགས་ནས་མཐའ་བྲལ་ལྟ་དང་རིམ་གཉིས་ལམ། །ཟུང་འབྲེལ་ཉམས་སུ་ལེན་པར་བྱིན་གྱིས་རློབས། །གནས་སྐབས་སུ་ཡང་ཚེ་དང་བསོད་ནམས་དང༌། །དཔལ་འབྱོར་ལོངས་སྤྱོད་སྙན་གྲགས་རབ་རྒྱས་ཤིང༌། །མཐར་ཐུག་སྐུ་བཞིའི་བདག་ཉིད་རྡོ་རྗེ་འཆང༌། །མངོན་དུ་གྱུར་བའི་དགའ་སྟོན་རྒྱས་པར་ཤོག །ཅེས་པ་འདི་ཡང་ཧོར་དཀའ་བཅུ་ངག་དབང་ཕུན་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །དེ་བཞིན་གཤེགས་པའི་གཙུག་ཏོར་ལས་བྱུང་བའི། །བཅོམ་ལྡན་གདུག་དཀར་ལྷ་ཡི་མཐུ་སྟོབས་ཀྱིས། །བདུད་བཞིའི་དཔུང་ཚོགས་མ་ལུས་ཚར་བཅད་དེ། །མི་མཐུན་རྒོལ་བ་ཀུན་ལས་རྒྱལ་བར་མཛོད། །མཚན་ཙམ་ཐོས་པས་འཆི་བདག་དཔུང་འཇོམས་པ། །ནུབ་ཕྱོགས་བདེ་བ་ཅན་གྱི་ཞིང་གི་མགོན། །བཅོམ་(༡༠༢ན) ― GLG021_Page_0205 ―
[མ་དཔེ་གཟིགས་ན་འདིར་གནོན།]
ལྡན་ཚེ་དང་ཡེ་ཤེས་དཔག་མེད་པའི། །ཐུགས་རྗེ་ཆེན་པོས་དེང་འདིར་བྱིན་གྱིས་རློབས། །རྒྱལ་བའི་དབང་པོ་བློ་བཟང་གྲགས་པ་ཡི། །བསྟན་པ་རིན་ཅེན་ཡར་ངོའི་ཟླ་བ་ལྟར། །སྤེལ་ཕྱིར་ངག་དབང་བློ་བཟང་རྒྱ་མཚོའི་སྡེ། །འགྱུར་མེད་སེང་གེའི་ཁྲི་ལ་ཞབས་བརྟན་ཤོག །དེ་ལྟར་གསོལ་བ་ཇི་བཞིན་བཏབ་པ་ཡིས། །བསམ་པའི་རེ་བ་དོན་དང་ལྡན་པའི་ཆེད། །དེང་ནས་བཟུང་སྟེ་ཁྲི་ཁྲག་ལོ་ཡི་བར། །ནམ་ཡང་གཡོ་བ་མེད་པར་ཁས་ལེན་འཆའ། །གངས་ཀྱི་ར་བས་བསྐོར་བའི་བོད་ཡུལ་འདིར། །བཀའ་ཁྲིམས་བཙན་པོས་རྒྱལ་པོའི་སྲིད་འཛིན་པ། །ས་ཆེན་སྐྱོང་བ་བློ་བཟང་མཐུ་སྟོབས་ཀྱི། །ཞབས་པད་རྡོ་རྗེ་ལྟ་བུར་བརྟན་པར་ཤོག །ཞྭ་སེར་འཆང་བའི་དགེ་འདུན་འདུས་པའི་སྡེ། །དཔལ་ལྡན་མཉམ་མེད་རི་བོ་དགའ་ལྡན་པའི། །རིང་ལུགས་གོང་ནས་གོང་དུ་ལེགས་འཕེལ་ཞིང༌། །སྲིད་མཐའི་བར་དུ་བརྟན་པར་གནས་གྱུར་ཅིག །ཤིན་ཏུ་དཀར་བའི་བསམ་པ་རྣམ་དག་གིས། །སྨོན་ལམ་འདི་སྐུལ་དགེ་འདུན་འདུས་ཚོགས་ལ། །ཉེར་འཛུགས་སྦྱོར་བའི་བརྩོན་འགྲུས་བྱེད་པ་པོ། །འདི་ཕྱི་ཀུན་བདེ་སངས་རྒྱས་མྱུར་ཐོབ་ཤོག །འཇིག་རྟེན་ཁམས་སུ་ནད་ཡམས་འཐབ་རྩོད་དང༌། །དབུལ་ཕོངས་ལ་སོགས་མི་མཐུན་ཀུན་ཞི་ཞིང༌། །ལོ་ཏོག་དུས་སྨིན་ཚོང་པ་ཁེ་སྤོག་སོགས། །མཐུན་རྐྱེན་ཐམས་ཅད་བསམ་པ་ལྟར་འགྲུབ་ཤོག །སླུ་མེད་དཀོན་མཆོག་རྣམ་གསུམ་བྱིན་རླབས་དང༌། །དམ་ཅན་ཆོས་སྐྱོང་སྲུང་མའི་མཐུ་སྟོབས་རྩལ། །དགེ་འདུན་རྣམས་ཀྱི་བདེན་ཚིག་བརྗོད་པའི་མཐུས། །སྨོན་ལམ་བཏབ་པ་ཇི་བཞིན་འགྲུབ་གྱུར་ཅིག །ཅེས་སྙན་(༡༠༢བ) ― GLG021_Page_0206 ―
[མ་དཔེ་གཟིགས་ན་འདིར་གནོན།]
ངག་གི་ལམ་ནས་མ་དྲངས་པར་འབོལ་རྩོམ་གོ་བདེ་ཞིང་འདི་ཙམ་འཚོ་ཞེས་པའི་ཚིགས་བཅད་ཞིག་དགོས་ཞེས་གསོལ་དཔོན་གེ་ར་བ་བློ་བཟང་མཁྱེན་བརྩེ་དང་བློ་བཟང་དགེ་འདུན་སྤུན་གཉིས་ཀྱིས་ནན་གྱིས་བསྐུལ་བ་ལ་བརྟེན་ནས་དུས་དང་བསྟུན་པའི་ལོ་གྲངས་ཀྱི་མཐའ་འཛིན་པ་ནི་རྒྱལ་སྲས་ལག་ལེན་གྱི་དོན་བཞིན་འདྲི་མ་ནུས། འོན་ཀྱང་བླ་ཆེན་སྤྱིའི་ཕྱག་མཛོད་ནས་བཏོན་ཏེ་ཁྲི་ཁྲག་ལོའི་གྲངས་གསལ་བ་དང་བཅས་གྲོང་ཚིག་རྐང་པར་བཅད་དེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །བྱམས་པས་ཉེར་དྲངས་སེམས་སྐྱེད་ཛམྦུའི་འབྲས། །ཕུལ་བྱུང་ཚོགས་གཉིས་རྒྱ་མཚོས་ཡོངས་བསྒྱུར་བས། །ཆོས་གཟུགས་གསེར་གྱི་སྙེ་མ་དར་དྲག་པ། །དཔལ་ལྡན་བླ་མ་དམ་པར་གསོལ་བ་འདེབས། །ངག་དབང་འཇམ་དབྱངས་གཞོན་ནུ་འཁོན་རིགས་སུ། །རིམ་བྱོན་བསྟན་པའི་སྙིང་པོ་རྡོ་རྗེའི་ཐེག །བསྐལ་པར་བསྒྲུབས་པའི་བསོད་ནམས་ཚོང་ཟོང་གིས། །ལེགས་རྙེད་བཤེས་གཉེན་དམ་པར་གསོལ་བ་འདེབས། །རྒྱལ་བ་ཀུན་དངོས་དཔལ་ལྡན་ཆོས་སྐྱོང་གི །གསུང་ངག་ཟབ་མོའི་སྨིན་གྲོལ་ལམ་སྟོན་པར། །མཚན་ཉིད་ཀུན་ལྡན་རྡོ་རྗེ་སློབ་དཔོན་ཆེ། །དཔལ་ལྡན་སྐལ་བ་བཟང་པོར་གསོལ་བ་འདེབས། །བྱམས་པའི་ཆུས་བརླན་བརྩེ་ཆེན་སྙིང་པོའི་ཞབས། །ངུར་སྨྲིག་གོས་བཀླུབས་བློ་གྲོས་རྒྱལ་མཚན་དཔལ། །ངག་གི་དབང་ཕྱུག་གྲུབ་པའི་དཔའ་བོ་ཡི། །དྲི་མེད་རིང་ལུགས་འཛིན་ལ་གསོལ་བ་འདེབས། །བསོད་ནམས་ཡེ་ཤེས་ཟུང་འཇུག་སྐུ་བཞིའི་བདག །ཚར་ཆེན་ཆོས་ཀྱི་རྒྱལ་པོ་ཡབ་སྲས་ཀྱི། །བསྟན་པའི་རྒྱལ་མཚན་ཕྱོགས་(༡༠༣ན) ― GLG021_Page_0207 ―
[མ་དཔེ་གཟིགས་ན་འདིར་གནོན།]
བཅུར་འཛུག་པའི་དཔལ། །སྐལ་བཟང་གདུལ་བྱའི་མགོན་པོར་གསོལ་བ་འདེབས། །གར་གྱི་དབང་ཕྱུག་བཅོམ་ལྡན་རྣམ་པར་རྒྱལ། །ཚེ་སྦྱིན་ཡིད་བཞིན་འཁོར་ལོ་བཅས་རྣམས་ཀྱི། །རྨད་བྱུང་ཐུགས་རྗེའི་ཉི་མ་འོད་པོ་ཆེས། །བདུད་བཞིའི་སྨག་རུམ་མིང་གི་ལྷག་མར་མཛོད། །བྱམས་པའི་ཐུགས་ཀྱིས་འགྲོ་ཀུན་འདྲེན་སླད་དུ། །ངག་ལ་སྨྲ་བའི་དབང་ཕྱུག་ཞལ་སྒོ་ནས། །ཟབ་རྒྱས་ཆོས་ཚུལ་དབྱངས་ཅན་རྒྱུད་མངས་གླུ། །ལེན་ཕྱིར་རྡོ་རྗེའི་ཁྲི་ལ་ཞབས་བརྟན་ཤོག །ལུས་ཅན་བསོད་ནམས་རྒྱ་མཚོའི་ཞིང་མཆོག་ཏུ། །ངེས་པ་ལྔ་ལྡན་ལྟ་བུར་རྟག་བཞུགས་ནས། །གསང་ཆེན་སློབ་བཤད་བསྟན་པའི་རྒྱལ་མཚན་དཔལ། །བཟང་པོའི་སྐལ་ལྡན་དོན་དུ་བསྒྲེང་བར་གསོལ། །ཐབས་ཤེས་ཉི་ཟླ་ཟུང་འཇུག་ཨ་ཧཾ་གཟུགས། །བརྟན་བྱེད་ཀ་བ་ཨ་ཝ་དྷཱུ་ཏིའི་རྩ། །གཞོམ་མེད་རྡོ་རྗེའི་སྲོག་ཏུ་ལེགས་སོང་ནས། །འཇའ་ལུས་གཟུགས་སྐུས་འགྲོ་འདི་རྟག་སྐྱོང་ཤོག །རྩ་རྒྱུད་བླ་མ་རྡོ་རྗེ་འཆང་དབང་དངོས། །དགྱེས་མཛད་རྡོ་རྗེ་དཀྱིལ་འཁོར་རྒྱ་མཚོའི་བདག །གུར་མགོན་ཞལ་བཞི་བསྟན་སྲུང་ཀུན་གྱི་གཙོ། །དེང་འདིར་སྨོན་པ་ཇི་བཞིན་འགྲུབ་བྱིན་རློབས། ཁམས་གསུམ་དབང་བྱེད་རྗེ་བཙུན་རིགས་བྱེད་མ། །ལྷ་ཆེན་ཚོགས་བདག་འདོད་པའི་རྒྱལ་པོ་ཡིས། །ཆོས་དང་སྲིད་ཀྱི་ལེགས་ཚོགས་མ་ལུས་པ། །དབང་བསྡུས་དུས་ཀུན་དགེ་བའི་བཀྲ་ཤིས་ཤོག །ཅེས་ཚར་ཆེན་ཆོས་ཀྱི་རྒྱལ་པོའི་རིང་ལུགས་འཛིན་པ་ཆེན་པོ་བདག་པོ་རྒྱལ་རྩེ་བ་མཁན་ཆེན་བྱམས་པ་ངག་དབང་བསོད་ནམས་རྒྱལ་མཚན་དཔལ་བཟང་པོའི་གསོལ་འདེབས་བརྟན་བཞུགས་ཚིགས་སུ་བཅད་པ་འདི་(༡༠༣བ) ― GLG021_Page_0208 ―
[མ་དཔེ་གཟིགས་ན་འདིར་གནོན།]
ནི་པཱ་ཎཱི་བྱཱ་ཀ་ར་ཎ་ཀ་ཙན་སྭ་ར་སྭསྟཱི་སོགས་བརྡ་སྤྲོད་རྒྱ་མཚོའི་ཕ་རོལ་ཏུ་སོན་པ་སེ་དཀར་རིགས་ཀྱི་ཐེག་ལེ་འདར་པ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ་ཀྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །བྱིན་རླབས་གཏེར་གྱུར་རྩ་བརྒྱུད་བླ་མ་དང༌། །དངོས་གྲུབ་སྩོལ་མཛད་སྒྲུབ་སྡེ་བརྒྱད་ཀྱི་ལྷ། །འཕྲིན་ལས་ཀུན་སྒྲུབ་ལེགས་ལྡན་མ་ནིང་སོགས། །རྩ་གསུམ་ཐུགས་རྗེའི་མཐུ་དཔུང་དིང་འདིར་བསྐྱེད། །རྨད་བྱུང་མཁྱེན་ཁྱོད་བློ་གྲོས་རབ་ཡངས་ཤིང༌། །མཆོག་གི་རྡོ་རྗེའི་སློབ་དཔོན་རིག་ཀུན་བདག །མཁའ་ཁྱབ་འགྲོ་འདྲེན་བཞེད་པ་མྱུར་འགྲུབ་ནས། །ལྗོངས་འདིར་སྤྲུལ་སྐུའི་ཡང་སྲིད་གསལ་བར་ཤོག །གདུལ་དཀའི་འགྲོ་རྣམས་ཡལ་བོར་ཞི་བའི་ཀློང༌། །བཞུགས་པ་རྒྱལ་སྲས་རྣམ་ཐར་མ་ཡིན་ཕྱིར། །སྤྱི་དང་ཁྱད་པར་ཆོས་ཀྱི་དབང་ཕྱུག་གི །བསྟན་པའི་སྲོག་ཤིང་ཆེད་དུ་མྱུར་འབྱོན་གསོལ། །པདྨ་འོད་ཀྱི་གཞལ་ཡས་ཉམས་དགའ་ཡང༌། །ཉང་སྟོན་རིགས་སྔགས་འཆང་བའི་སྨིན་གྲོལ་རྒྱུན། །སྤེལ་བའི་སྙིང་སྟོབས་གཟེངས་མཐོ་ཁྱོད་ཙམ་དུ། །ངེས་ཕྱིར་ཡང་སྲིད་ཞིང་འདིར་འཛིན་བྱིན་རློབས། །ཆོས་ཉིད་གདོད་ནས་མི་འགྱུར་ལྷ་ལམ་གཤིས། །ཆོས་ཅན་རྒྱུ་འབྲས་སླུ་མེད་མཁའ་གླང་ལས། །བདེན་ཚིགས་ཆར་རྒྱུན་གྱིས་བསྐྱེད་རེ་བའི་འབྲས། །དུས་སུ་ཡོལ་བ་མེད་པར་སྨིན་པར་ཤོག །ཅེས་པ་འདི་ཡང་རིག་སྔགས་འཆང་བའི་འཁོར་ལོས་སྒྱུར་བ་ཁྱབ་བདག་བློ་གྲོས་མཆོག་གི་རྡོ་རྗེ་ཞིང་འདིའི་སྐུའི་བཀོད་པ་བསྡུས་པའི་ཚེ་ཆོས་རྗེ་ཐུབ་བསྟན་པ་སོགས་སྤྲུལ་སྐུའི་བཀོད་པ་མྱུར་(༡༠༤ན) ― GLG021_Page_0209 ―
[མ་དཔེ་གཟིགས་ན་འདིར་གནོན།]
འབྱོན་གྱི་མོས་པ་ཆེར་འདུག་པ་དང་བཅས་ཐོག་མ་ཉིད་ནས་གསོལ་བ་བཏབ་པའི་རྟེན་འབྲེལ་གྱི་སྒོ་མ་ལོག་པ་གལ་ཆེ་བར་མངོན་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །སངས་རྒྱས་ཀུན་གྱི་མཐུ་སྟོབས་བཞུ་བླུགས་སུ། །རྣམ་པར་འཁྱིལ་བས་འཇིགས་མེད་རྡོ་རྗེའི་མཚོན། །གདེངས་ནས་ཡིད་སྲུབས་སྡེ་དང་བཅས་པའི་དཔུང༌། །ཕྱེ་མར་ཐོགས་ཤིག་དཔལ་ལྡན་གསང་བའི་བདག །བདེ་ལྡན་ཞིང་གི་འདྲེན་པ་གར་གྱི་དབང༌། །མགོན་དེས་བསྔགས་པའི་མེ་ཏོག་མནྡ་རས། །ལེགས་བརྒྱན་རྣམ་པར་རྒྱལ་མ་བཅོམ་ལྡན་འདས། །དགྱེས་ཞལ་འཛུམ་གྱིས་འགྲོ་འདི་དབུགས་དབྱུངས་ཞིག །འཆལ་བའི་དྲི་བྲལ་ཁྲིམས་ཀྱི་རྩ་བ་བརྟན། །རྒྱ་ཆེན་གསུང་རབ་ཐོས་པའི་འདབ་སྟོང་བཞད། །བསམ་གཏན་རོ་ཡི་མྱོས་པའི་ཟེའུ་འབྲུ་རྒོད། །འདུས་པའི་ཚོགས་ཀྱིས་བདེན་པའི་ཚིགས་བརྗོད་ན། །འཆད་རྩོད་རྩོམ་པའི་དཀྱུས་རིང་ཟུར་མིག་གིས། །འཇམ་དབྱངས་གཞོན་ནུའི་བརྟན་པ་ཉེར་ཕྲོགས་ནས། །དགའ་བའི་ཟློས་གར་མགྲིན་པའི་པད་མཚོ་རུ། །སྒྱུར་མཛད་བཤེས་གཉེན་རྡོ་རྗེ་ལྟར་བརྟན་ཤོག །བསོད་ནམས་དཔུང་པས་བགྲོད་ཤུལ་རྗེས་སྙེག་པར། །ཀུན་བཟོད་དཀྱིལ་འཁོར་འབྲེང་བའི་མི་ཡི་བདག །ཉི་བུའི་མཆེ་བའི་ཕྲག་ལས་རིང་བརྒལ་ཏེ། །སྐུ་ཚེའི་གཡུང་དྲུང་རྟག་ཏུ་འཁྱིལ་བར་ཤོག །དགའ་བ་བརྒྱ་པ་ལ་སོགས་དྲེགས་ལྡན་གྱི། །གཙུག་ན་ཞབས་རྡུལ་ཉེར་བཀོད་ཙོང་ཁ་པའི། །གསང་ཆེན་སྔགས་ཀྱི་ཡང་རྩེ་འདུས་པའི་ལམ། །ལེགས་འཛིན་སྡེ་འདི་སྲིད་མཐར་འཕེལ་བར་ཤོག །ས་(༡༠༤བ) ― GLG021_Page_0210 ―
[མ་དཔེ་གཟིགས་ན་འདིར་གནོན།]
ཟླ་ཞུན་མའི་མདངས་འཛིན་ཞྭ་སེར་བསྟན། །ཆོས་སྲིད་བླ་ནས་བླར་འབར་འོད་སྟོང་གིས། །ལུས་མེད་མཆིས་འབྲང་སྡེ་དང་བཅས་པའི་དཔུང༌། །ཕ་མཐར་བྱེད་པའི་དགའ་སྟོན་རྟག་མྱོང་ཤོག །མང་པོར་ཕན་པ་བསྒྲུབས་ཀྱང་སྒྲིབ་གཡོགས་ཀྱིས། །ད་དུང་ངོ་འཕྲོད་མ་གྱུར་རིས་བྲལ་འགྲོ། །མི་བཟད་སྡུག་བསྔལ་གསུམ་ལས་ཉེར་ཐར་ནས། །གཏན་བདེའི་རོ་བརྒྱའི་བཅུད་ཀྱིས་ཚིམ་པར་ཤོག །ཁྱད་པར་རྒྱ་ཧོར་བོད་ཀྱི་ས་ཆེན་ལ། །གནས་སོ་ཅོག་གི་ལུས་ཅན་མ་ལུས་པ། །རྫོགས་ལྡན་བདེ་སྐྱིད་དངོས་མྱོང་ལྔ་བདོ་བ། །མངོན་སུམ་ལྟ་ཞོག་མིང་ཡང་མི་གྲགས་ཤོག །རང་སེམས་སོམ་ཉི་བྲལ་བས་གསོལ་བཏབ་ན། །རང་གཞན་ལུས་ཅན་ཐམས་ཅད་སྲིད་མཚོ་ལས། །རང་དབང་མེད་པར་ཉེར་སྒྲོལ་དཀོན་མཆོག་གསུམ། །རང་སྣང་མོས་ངོར་འདིར་སྤྱོན་བྱིན་གྱིས་རློབས། །མཐོང་ཐོས་དྲན་རེག་དོན་ལྡན་མཛད་པའི་མགོན། །མགོན་པོ་བསླུ་བ་མེད་པའི་བདེན་པའི་སྟོབས། །སྟོབས་དང་ནུས་པས་བསམ་པའི་དོན་རྣམས་ཀུན། །ཀུན་ཏུ་སྨོན་པ་ཇི་བཞིན་འགྲུབ་གྱུར་ཅིག །ཅེས་པ་འདིའང་ཡེར་པ་དགའ་ལྡན་གསང་སྔགས་གླིང་པའི་སློབ་དཔོན་གྲྭ་བཅས་ཀྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །བདེ་བར་གཤེགས་པ་ཀུན་གྱི་གསང་བའི་མཛོད། །ལེགས་འཛིན་སྟོབས་ཆེན་གཏུམ་པོའི་གད་བརྒྱངས་ཀྱིས། །མེ་ཏོག་མདའ་ཅན་སྡེ་བཅས་བྱེར་བ་དང༌། །ལྷན་ཅིག་སྲ་མཁྲེགས་རྡོ་རྗེའི་གུར་ཆེན་ཕུབ། །བདེ་ལྡན་ཞིང་གི་མགོན་དེས་དགོངས་པ་མཛད། །རྣམ་པར་རྒྱལ་དང་བཅོམ་ལྡན་ཚེ་སྦྱིན་མས། །བདུད་(༡༠༥ན) ― GLG021_Page_0211 ―
[མ་དཔེ་གཟིགས་ན་འདིར་གནོན།]
རྩིའི་བཅུད་ཀྱིས་གཏམ་པའི་བུམ་པ་ཡིས། །ལུས་ཅན་ཀུན་ལ་འཆི་མེད་དབང་སྐུར་སྩོལ། ཁྲིམས་ལྡན་འདུས་པའི་ཚོགས་རྣམས་མགྲིན་གཅིག་ཏུ། །མཆོག་གསུམ་ཐུགས་རྗེས་བསྐུལ་བའི་རྒྱུད་མངས་གླུ། །བདེན་པའི་ཚིག་ཏུ་བརྗོད་པའི་འགྱུར་ཁུག་སྒྲ། །རྣ་བར་ཟིལ་དངར་སྙན་པོས་ཚིམ་པར་ཤོག །འཁོར་འདས་ཟིལ་གནོན་འཇམ་དཔལ་རྡོ་རྗེ་ཡི། །རིམ་གཉིས་ཟབ་མོའི་དགའ་བས་རྟག་མོས་པ། །ཡང་དག་ལམ་བཟང་སྟོན་པ་དགེ་བའི་བཤེས། །བསྟན་འགྲོའི་དཔུང་གཉེན་དམ་པར་ཞབས་བརྟན་ཤོག །ངག་དབང་ཟུར་ཕུད་ལྔ་ལྡན་མིའི་ཟློས་གར། །ལེགས་བསྒྱུར་བློ་བཟང་གྲགས་པའི་རིང་ལུགས་མཆོག །རྒྱ་ཆེན་ནམ་མཁའི་ཕ་མཐར་སྤེལ་སླད་དུ། །མཚོ་བྱུང་སྙིང་གར་རོལ་ཁྱོད་བརྟན་པར་ཤོག །རབ་ཡངས་བློ་གྲོས་ཏེ་སེ་ལས་འོངས་ཀླུང༌། །ལུགས་ཟུང་ཁྲིམས་ཀྱི་རྒྱ་མཚོར་ཉེར་བབས་ནས། །རྟག་ཏུ་སྐལ་བཟང་ལ་སྦྱོར་མཐུ་སྟོབས་དབང༌། རྡོ་རྗེའི་ཁྲི་ལ་གཡོ་མེད་བརྟན་པར་ཤོག །བུ་རམ་ཤིང་པའི་ལུང་རྟོགས་ས་ཆེན་པོ། །འདེགས་པའི་རྣམ་དཔྱོད་རུས་སྦལ་སྙིང་སྟོབས་ཅན། །ཀུན་མཁྱེན་ཆོས་ཀྱི་རྒྱལ་པོ་བཙོང་ཁ་པའི། །བསྟན་པ་འཛམ་གླིང་ཀུན་ལ་ཁྱབ་པར་ཤོག །རྒྱང་གྲགས་གྲོང་ལས་དབེན་པ་རི་བོའི་སྤོར། །ཆོས་དང་སྲིད་ཀྱི་ལེགས་ཚོགས་མ་ལུས་པ། །ཡོངས་འདུས་ཐོས་བསམ་སྒོམ་པའི་སྒྲོན་མེ་ཡིས། །གླིང་བཞི་མུན་པ་སེལ་བའི་དཔལ་འབར་ཤོག །འགྲོ་དང་མི་འགྲོའི་ཡིད་ཅན་ཐ་དག་གི །རྒྱུད་ལ་གོས་པར་ཀུན་འབྱུང་ཉེར་ཞི་བས། །འབྲས་བུ་སྡུག་བསྔལ་བདེན་པ་དང་བྲལ་ཏེ། །ངེས་པར་ལེགས་པའི་དགའ་སྟོན་སྤྱོད་པར་ཤོག །བཅོམ་ལྡན་མ་ཧེའི་ཞལ་ཅན་(༡༠༥བ) ― GLG021_Page_0212 ―
[མ་དཔེ་གཟིགས་ན་འདིར་གནོན།]
བཀའ་སྡོད་བཅས། །མྱུར་མཛད་མགོན་པོ་འདོད་ཁམས་དབང་ཕྱུག་མ། །བསྟན་སྲུང་རྒྱ་མཚོས་འཕྲིན་ལས་ལྷུན་གྲུབ་ཅིང༌། །དུས་རྣམས་ཀུན་ཏུ་དགེ་ཞིང་ཤིས་པར་མཛོད། །རྫོགས་སངས་རྒྱས་དང་ཆགས་བྲལ་དམ་པའི་ཆོས། །ཐེག་གསུམ་དགེ་འདུན་ཆོས་ཉིད་འགྱུར་བ་མེད། །ཆོས་ཅན་རྒྱུ་འབྲས་མི་བསླུ་རྟེན་འབྲེལ་མཐུས། །ཇི་ལྟར་སྨོན་པ་དེ་བཞིན་འགྲུབ་པར་ཤོག །ཅེས་བརྟན་བཞུགས་སྨོན་ལམ་གྱི་ཚིགས་སུ་བཅད་པ་འདི་ནི་རྒྱལ་དར་གོང་པ་མཆོད་དཔོན་ངག་དབང་ཤེས་རབ་ཀྱིས་རི་བོ་ཆོས་གླིང་དུ་འཛུགས་རྒྱུར་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །འཁོར་ལོས་སྒྱུར་རྒྱལ་སྟོབས་ལྡན་ཁྲོ་བོ་བཅུའི། །ཡེ་ཤེས་རང་སྣང་སྲུང་འཁོར་རྩིབས་རྣོན་པོས། །གནོད་བྱེད་བགེགས་ཀྱི་དཔུང་ཚོགས་ཕྱེར་བཏགས་ནས། །གཞོམ་མེད་རྡོ་རྗེ་འབར་བའི་གུར་ཁང་དབུས། །དཔལ་ལྡན་བླ་མ་རིགས་རྣམས་ཀུན་གྱི་བདག །སྤྲུལ་པའི་སྒྱུ་འཕྲུལ་གར་མཁན་ཧེ་བཛྲཿ། ལོངས་སྤྱོད་རྫོགས་སྐུ་ཇི་བཞིན་སྲིད་མཐའི་བར། །དཀྱིལ་འཁོར་འཁོར་ལོའི་མགོན་པོར་བཞུགས་པར་གསོལ། །གསུང་ངག་ཆད་མེད་དབང་བཞིས་རྒྱུད་སྨིན་བློས། །ལམ་བཞིའི་འགྲོས་ཀྱིས་རྣམ་གྲོལ་རྣལ་འབྱོར་ཅན། །སྐལ་བཟང་གདུལ་བྱ་རྒྱ་མཚོའི་དཔལ་མགོན་དུ། །དྷཱུ་ཏཱིའི་ཀ་བ་རྡོ་རྗེར་འགྲུབ་པར་ཤོག །བློ་གྲོས་བཟང་པོས་འབངས་རྣམས་བྱམས་པས་སྐྱོང༌། །མཐུ་སྟོབས་ནུས་པས་གཞན་སྡེ་ཚར་གཅོད་པ། །ས་སྤྱོད་དབང་ཕྱུག་སྐུ་ཚེ་ཆབ་སྲིད་བརྟན། །ལུགས་ཟུང་ཁྲིམས་ཀྱིས་འགྲོ་རྣམས་བདེ་བར་ཤོག །ཚུལ་ལྡན་རིག་འཛིན་བཀྲ་ཤིས་གཡས་འཁྱིལ་དུང༌། །(༡༠༦ན) མཆིམས་ཕུ་གསུང་གི་ཡང་དབེན་གྱི་གནས་འཛིན་སྒྲུབ་སྡེ་བ་རྣམས་ལ་སྟག་རུ་བ་བློ་བཟང་དངོས་གྲུབ་ཀྱིས་བསྙེན་བཀུར་བའི་ཚེ་ཞལ་འདོན་དུ་གནང་བའི་སྨོན་ལམ་ཚིགས་བཅད་སོགས།― GLG021_Page_0213 ―
[མ་དཔེ་གཟིགས་ན་འདིར་གནོན།]
མཆིམས་ཕུ་གསུང་གི་ཡང་དབེན་གྱི་གནས་འཛིན་སྒྲུབ་སྡེ་བ་རྣམས་ལ་སྟག་རུ་བ་བློ་བཟང་དངོས་གྲུབ་ཀྱིས་བསྙེན་བཀུར་བའི་ཚེ་ཞལ་འདོན་དུ་གནང་བའི་སྨོན་ལམ་ཚིགས་བཅད་སོགས།རྒྱ་བོད་བཀའ་གཏེར་རིག་པ་འཛིན་པའི་ཚོགས། ཁྱད་པར་པདྨ་ཐོད་འཕྲེང་བཻ་རོའི་ཞབས། །ལེགས་ལྡན་རྡོ་རྗེ་གནམ་ལྕགས་མེ་འབར་རྗེ། །པྲཛྙ་རསྨི་རྩ་བརྒྱུད་བླ་མ་དང༌། །ཞི་ཁྲོ་ཀུན་འདུས་སྒྲུབ་པ་བཀའ་བརྒྱད་ལྷ། །རྩ་གསུམ་སྤྱན་གྱིས་མ་རྒན་ལུས་ཅན་ཀུན། ཁྱད་པར་རྒྱུ་སྦྱོར་ཡོན་མཆོད་བདག་སོགས་ལ། །(༡༠༦བ) ― GLG021_Page_0214 ―
[མ་དཔེ་གཟིགས་ན་འདིར་གནོན།]
གཟིགས་པ་ལྷུར་མཛད་ཐུགས་རྗེས་རྟག་ཏུ་སྐྱོངས། །ཐོག་མེད་དུས་ནས་ད་ལྟའི་བར་བསགས་པའི། །མི་དགེ་བཅུ་དང་མཚམས་མེད་ཉེ་བ་ལྔ། །སོ་ཐར་བྱང་སེམས་སྔགས་སྡོམ་ཉམས་པ་སོགས། །མདོར་ན་སྡིག་པ་བྱས་ཀུན་སྙིང་ནས་བཤགས། །དེ་འབྲས་མི་ཁོམ་གནས་སུ་མི་སྐྱེ་ཞིང༌། །ཆོས་ལྡན་བསྒྲུབ་ནུས་ལྷ་མིའི་རྟེན་བཟང་རྙེད། །རིང་མིན་རང་རིག་དག་པའི་རྡོ་རྗེ་སེམས། །མངོན་གྱུར་འགྲོ་རྣམས་འདྲེན་པར་བདག་བྱིན་རློབས། །བླ་མ་ཡི་དམ་མཁའ་འགྲོའི་སྤྱན་སྔ་རུ། །སྙིང་ནས་བཤགས་སྡོམ་གསོལ་བ་ཉེར་བཏབ་པ། །རྒྱུ་འབྲས་རྟེན་འབྲེལ་བསླུ་བ་མེད་པའི་མཐུས། །ཐོགས་པ་མེད་པར་ལྷུན་གྱིས་གྲུབ་པར་ཤོག །ཅེས་པ་འདིའང་མཆིམས་ཕུ་གསུང་གི་ཡང་དབེན་གྱི་གནས་འཛིན་སྒྲུབ་སྡེ་བ་རྣམས་ལ་སྟག་རུ་བ་བློ་བཟང་དངོས་གྲུབ་ཀྱིས་བསྙེན་བཀུར་བའི་ཚེ་ཞལ་འདོན་དུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་འཛིན་པ་ངག་དབང་ནམ་མཁའོ། །སྲས་བཅས་རྒྱལ་བ་སློབ་མར་བཅས་པ་ཡི། །རྨད་བྱུང་ཐུགས་རྗེ་ཆེན་པོའི་ཆར་རྒྱུན་གྱིས། །མ་དག་ལས་ཉོན་དྲི་མ་ཀུན་བཀྲུས་ནས། །ངེས་པར་ལེགས་པའི་ལམ་དུ་བཀྲི་བར་གསོལ། །དུག་གསུམ་ལང་ཚོ་དར་བའི་གླང་པོ་ཡིས། །དགེ་ཚོགས་པདྨ་དཀར་པོའི་རྫིང་བཅོམ་ནས། །སྡིག་ལྟུང་རྙོག་མར་བྱས་པའི་ཉེས་པ་ཀུན། །འགྱོད་སྡོམ་བསམ་པ་ཐག་པས་སྙིང་ནས་བཤགས། །ཕྱག་སྐོར་བཟླས་བརྗོད་གསུང་རབ་ཀློག་པ་དང༌། །སཱཙྪ་སྦྱིན་གཏོང་ལ་སོགས་ལེགས་བྱས་རྒྱུ། །གཉེན་པོ་ཀུན་ཏུ་སྤྱོད་པའི་ཉིན་བྱེད་ཀྱིས། །མི་དགེའི་སྨག་རུམ་དྲུང་ནས་འབྱིན་པར་ཤོག །ཅེས་པ་འདིའང་དཔོན་ས་བསོད་ནམས་རྒྱལ་མོས་(༡༠༧ན) ― GLG021_Page_0215 ―
[མ་དཔེ་གཟིགས་ན་འདིར་གནོན།]
བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་ངག་དབང་ནམ་མཁའོ། །ལག་ན་གདེངས་པའི་རྡོ་རྗེ་ལས་འཕྲོས་གུར། །སྲ་མཁྲེགས་དུམ་བུ་གཅིག་དབུས་ཚེ་མཐའ་ཡས། །གོས་དཀར་ཡུམ་གྱིས་བཏེགས་པའི་བུམ་པའི་རྒྱུན། །བདུད་རྩིས་འཆི་བ་མེད་པའི་དབང་བསྐུར་སྩོལ། །ཐུབ་པའི་གསུང་ངག་མདོ་རྒྱུད་ལ་དབང་བའི། །བློ་གྲོས་སྐལ་བཟང་དགའ་བ་བསྐྱེད་པ་ལ། །རྒྱ་ཆེན་རྣམ་དཔྱོད་སྩོལ་བར་མཚོ་བྱུང་མ། །མགྲིན་ཞུགས་བཤེས་གཉེན་བསྐལ་བརྒྱར་ཞབས་བརྟན་ཤོག །གླང་ཆེན་གདན་ལ་ཉལ་འདྲའི་རི་བོའི་སྤོར། །ཕན་དང་བདེ་བ་ཆེན་པོ་འབྱུང་བའི་གཞིར། །ཁྲིམས་ལྡན་འདུས་པས་ཡོངས་གང་བཤད་སྒྲུབ་ཀྱི། །ལུང་རྟོགས་བསྟན་པ་སྲིད་མཐར་རྒྱས་པར་ཤོག །དོན་ཀུན་གྲུབ་པའི་རིང་ལུགས་ཟ་འོག་གདུགས། །མཛེས་བྱེད་ཞྭ་སེར་བསྟན་པའི་གསེར་ཏོག་ཅན། །ཆོས་སྲིད་ཟུང་འཇུག་ཁྲིམས་ཀྱི་ཡུ་བ་ཡིས། །ཉེར་བཏེག་གྲིབ་མར་འགྲོ་རྣམས་ངལ་གསོར་ཤོག །གཏན་གྱི་སྐྱབས་གཅིག་སླུ་མེད་དཀོན་ཅོག་གསུམ། །ལྷ་དང་དྲང་སྲོང་རིག་འཛིན་བདེན་པའི་ཚིག །ལེགས་གྲུབ་ཀུན་གྱིས་མགྲིན་གཅིག་གླུར་བླངས་པས། །རེ་བའི་འབྲས་བུ་ཇི་བཞིན་སྨིན་པར་ཤོག །ཅེས་པ་འདིའང་ཆོས་སྡེ་རི་བོ་བདེ་ཆེན་དུ་འཛུགས་རྩིས་ཀྱི་དགེ་སློང་འཇམ་དབྱངས་གྲགས་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་ངག་དབང་ནམ་མཁའོ། །རྣམ་འདྲེན་ཐུགས་རྗེའི་འཇུག་པ་ནམ་དུ་ཡང༌། །ཡོལ་བ་མེད་མོད་ཁྱད་པར་སྙིགས་མ་ལྔ། །ཆེས་ཆེར་བདོ་བའི་དུས་འདིར་མཐུ་སྟོབས་དཔུང༌། །མྱུར་བར་སྨན་གྱི་བླ་ཞེས་གྲགས་(༡༠༧བ) ― GLG021_Page_0216 ―
[མ་དཔེ་གཟིགས་ན་འདིར་གནོན།]
པ་དཀར། །དེ་ཕྱིར་མཆོད་བསྟོད་གཟུངས་སྔགས་བཀླགས་བྲིས་པས། །འབྲས་བུ་བདེ་ལྡན་ཞིང་གི་མགོན་པོའི་དྲུང༌། །པདྨའི་སྦུབས་སུ་ཆོས་ལྡན་དབང་མོའི་སྲིད། །འཛིན་པར་མགོན་ཀྱེ་བརྩེ་བས་རྗེས་བཟུང་སྟེ། །རྣམ་དག་སྨོན་པའི་ཞིང་ས་གཤིན་པོ་ལ། །ཉེར་བཏབ་ལེགས་བྱས་ས་བོན་ཡོངས་སྨིན་པས། །གཏན་མདུན་གསེར་གྱི་སྙེ་མས་སྲིད་དང་ཞིའི། །དབུལ་བའི་སྡུག་བསྔལ་དྲུང་ནས་འབྱིན་པར་ཤོག །ཅེས་པ་འདི་ཡང་གདོང་ཁ་ཆོས་མཛད་བློ་བཟང་བསྟན་འཛིན་དབང་རྒྱལ་གྱིས་ལྕམ་ཆོས་ལྡན་དབང་མོའི་ཕྱི་རྟེན་དུ་འོད་དཔག་མེད་ཀྱི་བྲིས་ཐང་བཞེངས་པའི་རྒྱབ་ཡིག་ཏུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །རྡོ་རྗེའི་སློབ་དཔོན་ལུས་ལ་གདན་གསུམ་རྣམས། །ཚང་བར་ཀུན་བཟང་མཆོད་སྤྲིན་ཉེར་སྤྲོས་མཐུས། །དཔལ་ལྡན་བླ་མ་བསྐལ་བརྒྱར་ཞབས་བརྟན་ཅིང༌། །བདག་སོགས་འདི་ཕྱིའི་དོན་ཀུན་འགྲུབ་པར་ཤོག །ཅེས་པ་འདིའང་ལྷ་ལྡན་གཙང་ཁང་ལྷོ་སྟེང་ན་ངེད་རང་གི་འདྲ་འབག་ཅིག་འདུག་པར་བྱང་གླིང་བསམ་གྲུབ་རྒྱལ་པོས་མཆོད་རྒྱུན་བཙུགས་པའི་ཚེ་ཁ་ཏོན་དུ་སྨོན་ལམ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །འཇམ་དཔལ་རྡོ་རྗེ་ཁྲི་སྲོང་ལྡེའུ་བཙན་གྱིས། །བརྒྱ་ཕྲག་ལོ་པཎ་སྤྱན་དྲངས་བསྙེན་བཀུར་ནས། །གྲངས་མེད་ཆོས་ཕུང་བསྒྱུར་རྩེ་ཐེག་དགུའི་རྒྱུད། །ཟབ་ལས་ཆེས་ཟབ་སྔ་འགྱུར་རིན་ཆེན་འཕྲེང༌། །བྱང་གླིང་བསམ་གྲུབ་རྒྱལ་པོའི་སྙིང་སྟོབས་ཀྱིས། །བཞེངས་ལ་མཐུན་རྐྱེན་བསྒྲུབ་ཀུན་གནས་སྐབས་སུ། །རྨུགས་འཛིན་དབང་པོའི་ཚེ་འབྱོར་ལ་(༡༠༨ན) ― GLG021_Page_0217 ―
[མ་དཔེ་གཟིགས་ན་འདིར་གནོན།]
སྤྱོད་ཅིང༌། །རིང་མིན་ཀུན་བཟང་རང་ངོ་རང་འཕྲོད་ཤོག །ཆེ་མཆོག་ཞི་ཁྲོ་འདུས་པའི་རྩལ་ཆེན་པོས། །སྣང་སྲིད་འཁོར་འདས་ཕྱག་རྒྱ་ཟིལ་གནོན་པའི། །རྡོ་རྗེའི་སློབ་དཔོན་དཀྱིལ་འཁོར་རྒྱ་མཚོའི་གཙོར། །འཕོ་འགྱུར་མེད་པར་རྟག་ཏུ་བརྟན་པར་ཤོག །ཅེས་པ་འདི་ཡང་བྱང་གླིང་བསམ་གྲུབ་རྒྱལ་པོས་རྙིང་མ་རྒྱུད་འབུམ་བཞེངས་པའི་དུས་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དབྱངས་དཔལ་བཟང་ངོ༌། །བསྐལ་བཟང་འདི་ལ་མུ་ཐི་ལ་འཕྲེང་ལྟར། །ཆད་མེད་ཉེར་བྱོན་བདེ་གཤེགས་སྟོང་ཕྲག་གི །སྣང་བརྙན་མཐོང་བས་དོན་ལྡན་ཐོས་པས་གྲོལ། །ཤེས་ཅན་ཡིད་ཀྱི་ཤིང་རྟ་ཚར་དངར་བ། །དགེ་སློང་དཔལ་འབྱོར་རྒྱ་མཚོའི་བློ་བརྩོན་མཐུས། །བཞེངས་པའི་དགེ་འབྲས་བསྟན་དང་བསྟན་འཛིན་རྒྱས། །བདག་སོགས་འགྲོ་ཀུན་བླ་མེད་བྱང་ཆུབ་ཆེ། །རིང་པོར་མི་ཐོགས་མངོན་དུ་འགྱུར་བར་ཤོག །འདྲེན་པ་གཞན་ལས་ཐུགས་རྗེ་ཁྱད་པར་དུ། །སྙིགས་མའི་དུས་འདིར་བླ་ལྷག་བདེ་གཤེགས་བདུན། །སངས་རྒྱས་སུམ་ཅུ་རྩ་ལྔའི་སྣང་བརྙན་ཚོགས། །བཞེངས་པས་དོན་གཉིས་ལྷུན་གྱིས་གྲུབ་པར་ཤོག །རྒྱ་ཆེན་སྤྱོད་དང་ཟབ་མོ་ལྟ་བའི་ལམ། །ཆད་མེད་བརྒྱུད་པ་སུམ་ལྡན་རིན་ཆེན་འཕྲེང༌། །གང་གི་རྣམ་ཐར་ཚེ་རབས་ཐམས་ཅད་དུ། །འཛིན་པའི་སྐལ་བ་མཆོག་ཏུ་བདག་བྱིན་རློབས། །རྒྱལ་རྣམས་དངོས་ལྟའི་སྐལ་དམན་འགྲོ་བ་ལ། །བཤེས་གཉེན་གཟུགས་སུ་ཤར་བར་ངེས་རྙེད་ནས། །མི་ཕྱེད་སྙིང་ནས་གསོལ་བ་འདེབས་བྱེད་ན། །མ་སྨད་བྱིན་རླབས་སེམས་ལ་འཇུག་པར་ཤོག །ཅེས་དགེ་སློང་དཔལ་འབྱོར་རྒྱ་མཚོས་སངས་རྒྱས་སྟོང་སྐུ། (༡༠༨བ) ― GLG021_Page_0218 ―
[མ་དཔེ་གཟིགས་ན་འདིར་གནོན།]
བདེ་གཤེགས་བདུན། ཕུང་པོ་གསུམ་པའི་མདོ་ལས་བྱུང་བའི་སངས་རྒྱས། ལམ་རིམ་བརྒྱུད་པ། ངེད་རང་གི་འདྲ་འབག་རྣམས་བཞེངས་པའི་རྒྱབ་ཡིག་སྨོན་ལམ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །རྡོ་རྗེ་དྲིལ་བུ་པ་དང་རྩེ་མོའི་ཞབས། །སྐུ་དངོས་དག་ཞིང་གཤེགས་འདྲའི་སྐལ་ཞན་ཡང༌། །འཆི་བ་འོད་གསལ་དོན་གྱི་རྣལ་འབྱོར་མ། །རང་ངོ་འཕྲོད་ནས་མཁའ་སྤྱོད་གནས་འདྲེན་ཤོག །སྨིན་ཟིན་སློབ་མ་སྣོད་རུང་བྱིན་རླབས་ཀྱིས། །རས་བྲིས་སྐུ་དཀྱིལ་འདི་རུ་རྗེས་བཟུང་ནས། །བསྐྱེད་རྫོགས་གདམས་པ་ལ་བརྟེན་གྲོལ་བའི་ལམ། །མངོན་གྱུར་དལ་འབྱོར་དོན་ལྡན་བསྒྲུབ་ནུས་ཤོག །ཚོགས་བཤད་ཟ་ཟི་ཙམ་མིན་ནཱ་རོ་པའི། །གསང་ཆེན་སློབ་བཤད་འདི་སྟོན་བླ་མར་བཅས། །བྱང་ཆུབ་སྙིང་པོའི་བར་དུ་མི་འབྲལ་བའི། །སྨོན་ལམ་རྡོ་རྗེ་བཙུན་མོས་འགྲུབ་བྱིན་རློབས། །ཞེས་ནཱ་རོ་མཁའ་སྤྱོད་ཀྱི་སྐུའི་དཀྱིལ་འཁོར་ཚར་ཆེན་ཡབ་སྲས་ཀྱི་གཟིགས་སྣང་ཞིང་བཀོད་དང་བཅས་པ་ངེད་རང་གི་དམིགས་རྟེན་ལ་དབུ་མཛད་དཔལ་མགོན་གྱིས་བྲིས་པའི་ཚེ་སྨོན་ལམ་མཚམས་སྦྱོར་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་ཕུན་ཚོགས་དབང་པོའོ། །གཤིན་པོའི་ཞིང་སར་བསྐྲུན་པའི་འབྲུ་ཚོགས་རྒྱུན། །ནམ་ཡང་ཆད་མེད་དགེ་བའི་ས་བོན་དུ། །བཏབ་པས་འདི་ཕྱི་གཉིས་སུ་དགའ་བའི་དཔལ། །མུ་ཏིག་འཁྲི་ཤིང་རྣམ་ཐར་འཛིན་པར་ཤོག །བསྔོ་བའི་རྒྱས་ཐེབས་ལེགས་བྱས་གངྒཱའི་ཀླུང༌། །དམིགས་ཡུལ་བྱང་ཆུབ་རྒྱ་མཚོར་རྟག་འབབ་ཞར། །རྗེས་འཇུག་ཉེ་དུར་བཅས་པའི་བསོད་ནམས་དཔུང༌། །ཉི་མའི་དངོས་བརྒྱ་འཛིན་པའི་རྗེས་འགྲོར་ཤོག །ཅེས་པ་འདིའང་ལྷ་ས་ཁང་གསར་བས་མ་གཉིས་དགའི། (༡༠༩ན) ― GLG021_Page_0219 ―
[མ་དཔེ་གཟིགས་ན་འདིར་གནོན།]
ཆེད་དུ་དམིགས་ནས་རྨེ་རུར་ཞིང་ཕུལ་བའི་དགེ་བ་རྫོགས་བྱང་དུ་བསྔོ་བ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །ཐུབ་དབང་བསོད་ནམས་དཔུང་གིས་བརྟན་གཡོ་དབང་འདུས་ཤིང༌། །སྲས་བཅས་རྒྱལ་བར་མོས་པའི་དཔྱོད་ལྡན་མས། །དད་རྟེན་ཐུབ་དབང་བྱང་སེམས་ཉན་ཐོས་ཀྱི། །སྣང་བརྙན་དབང་པོའི་གྲངས་སུ་ཚར་དངར་བ། །པིར་ཐོགས་རྩེར་སོན་སྟག་ལུང་དཔལ་མགོན་གྱི། །སོར་མོའི་ཟློས་གར་འཕྲུལ་ལས་ངོ་མཚར་གཟུགས། །ཤེལ་ལ་འཇའ་ཚོན་བཞིན་དུ་རྣམ་བཀྲ་བས། །སྒྱུ་མ་མཁན་གྱི་ཁེངས་པ་ཐུང་ངུར་བྱེད། །ལེགས་བྱས་ས་བོན་དར་དྲག་ལྗོན་པའི་རྩེར། །དེང་ནས་བྱང་ཆུབ་བར་གྱི་ཕན་བདེའི་འབྲས། །ཡོངས་སྨིན་རོ་བརྒྱ་བདའ་བའི་དགའ་སྟོན་ལ། །སྤྱོད་པའི་སྐལ་བཟང་ཉམས་སུ་མྱོང་བར་ཤོག །ཨྱོན་རིན་པོ་ཆེ། འཛམ་གླིང་ལུས་མེད་དྲེགས་པ་མཐའ་དག་གི །གདུག་པའི་ཚ་ངར་དབལ་གྱི་མེ་ལྕེ་ཀུན། །མཐུ་སྟོབས་གཤེར་གྱིས་བཅིལ་མཛད་ཐོད་འཕྲེང་རྩལ། །ཐུགས་རྗེའི་ཉི་མས་ཡིད་ཀྱི་འདབ་རྒྱ་ཕྱེ། །ཇོ་བོ་རྗེ། འོད་མཚན་སྟོང་དུ་འབར་བའི་སྒྱུ་མའི་འཕྲུལ། །ལྔ་རིག་པཎ་ཆེན་ཚུལ་དུ་ཡོངས་བསྒྱུར་བ། །མཁྱེན་བརྩེ་ནུས་པའི་མར་མེས་གངས་ཅན་མུན། །སེལ་མཛད་མགོན་ཀྱེ་སྒོ་གསུམ་བྱིན་གྱིས་རློབས། །རྗེ་རིན་པོ་ཆེ། གང་གི་དཔུང་པས་ཉེར་བཏེག་ཨུཏྤལ་རྩེར། །ཤེས་རབ་རལ་གྲིས་ལོག་རྟོག་དྲ་བ་ཀུན། །གཅོད་མཛད་འཇམ་དཔལ་རྡོ་རྗེ་ཙོང་ཁ་པའི། །བརྩེ་བའི་སྤྱན་གྱིས་རྟག་ཏུ་བཙའ་བར་མཛོད། །ངག་འདྲ་འབག་དབང་འདོད་འཇོའི་བློ་གྲོས་དཔལ་བཟང་པོས། །རྒྱ་ཆེན་ཤེས་བྱ་མཚོ་ལྟར་གཏིང་ཟབ་པ། །ལེགས་དཔོགས་འཇམ་མགོན་དགྱེས་པའི་(༡༠༩བ) ― GLG021_Page_0220 ―
[མ་དཔེ་གཟིགས་ན་འདིར་གནོན།]
བཤེས་གཉེན་གྱིས། །ནོར་འཛིན་ཀུན་ཏུ་དགེ་བའི་བཀྲ་ཤིས་ཤོག །ཅེས་སྣེའུ་སྡོང་བདག་མོ་བསོད་ནམས་དབང་འདུས་རྒྱལ་མོས་དད་རྟེན་གྲ་ཚར་བཞེངས་པའི་རྒྱབ་ཡིག་སྨོན་ལམ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཀར་བྲག་པ་ངག་དབང་བྱམས་པའོ། །མེ་དཔུང་རྡོ་རྗེ་རྩིབས་བཅུའི་སྲུང་འཁོར་ནང༌། །ལྔ་ལྡན་ཡེ་ཤེས་གཞལ་ཡས་ཁང་གི་དབུས། །གདན་གསུམ་ཚང་བའི་བཤེས་གཉེན་ཧེ་རུ་ཀཿ། །ཞལ་བརྒྱད་རྡོ་རྗེའི་ངོ་བོར་རྟག་བཞུགས་གསོལ། །གསུང་ངག་དབང་བཞིའི་གྲོལ་ལམ་མཐོ་རིས་ཆབ། །བློ་གྲོས་ལང་ཚོ་དར་དྲག་བཅུད་བཟང་རྒྱུན། །སྐུ་བཞིའི་རྒྱ་མཚོར་རོ་གཅིག་བླ་མ་རྗེ། །བགྲང་ཡས་གདུལ་བྱའི་དཔལ་དུ་བརྟན་པར་ཤོག །རིགས་ཀུན་ཁྱབ་བདག་དགའ་ཆེན་ཡེ་ཤེས་མཆོག །བཟང་པོའི་སྐལ་ལྡན་གདུལ་བྱར་སྟོན་མཁས་པ། །རྡོ་རྗེ་འཆང་དབང་རྗེ་བཙུན་ཨེ་ཝཾ་པའི། །རིང་ལུགས་སྲིད་མཐའི་བར་དུ་རྒྱས་པར་ཤོག །བསྟན་སྲུང་ཡོངས་ཀྱི་འཁོར་ལོས་སྒྱུར་བའི་རྒྱལ། །གུར་གྱི་མགོན་པོ་ལེགས་ལྡན་གདོང་བཞི་པ། །བཀའ་ཉན་དམ་ཅན་རྒྱ་མཚོར་བཅས་པ་ཡིས། །བསམ་པའི་རེ་བ་སྐོང་བའི་འཕྲིན་ལས་སྒྲུབས། །བཅོམ་ལྡན་རིགས་བྱེད་མ་དང་ཚོགས་ཀྱི་བདག །ལྷ་ཆེན་འདོད་པའི་རྒྱལ་པོའི་གཟི་བྱིན་གྱིས། །ཆོས་སྲིད་ཡོན་ཏན་མ་ལུས་དབང་སྡུས་ལ། །ཡར་ངོའི་ཟླ་ལྟར་འཕེལ་བའི་བཀྲ་ཤིས་ཤོག །ཅེས་པ་འདི་ཡང་སྨིན་གྲོལ་ཆོས་ཀྱི་འབྱུང་གནས་ངོར་ཨེ་ཝཾ་ཆོས་ལྡན་གྱི་མཁན་ཆེན་གདན་ས་པ་ནམ་མཁའ་དཔལ་བཟང་གི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །རིགས་ཀུན་འཁོར་ལོས་སྒྱུར་བའི་གྲགས་པའི་སྒྲས། །བསྟན་པའི་རྒྱལ་མཚན་འཛིན་པའི་བཤེས་ཁྱོད་ཀྱིས། །(༡༡༠ན) ― GLG021_Page_0221 ―
[མ་དཔེ་གཟིགས་ན་འདིར་གནོན།]
དེང་ནས་བྱང་ཆུབ་བར་དུ་རྗེས་བཟུང་སྟེ། །འདི་ཕྱིའི་གཏན་མདུན་འགྲུབ་པར་བདག་བྱིན་རློབས། །དགྱེས་མཛད་རྡོ་རྗེ་ངུར་སྨྲིག་སྒྱུ་འཕྲུལ་གར། །ལེགས་བསྒྱུར་ཚར་ཆེན་འཁོར་ལོའི་མགོན་པོ་ཡིས། །ཐུགས་རྗེའི་བདུད་རྩིས་སྙིང་གི་ཟ་མ་ཏོག །རབ་གཏམས་མཆོག་ཐུན་དངོས་གྲུབ་སྩལ་དུ་གསོལ། །ཞེས་ས་སྐྱོང་བློ་བཟང་མཐུ་སྟོབས་ཀྱིས་རྗེ་བཙུན་རིན་པོ་ཆེ་དང་ཚར་ཆེན་རྡོ་རྗེ་འཆང་གི་སྐུ་བརྙན་དད་རྟེན་བཞེངས་པའི་ཁ་ཡིག་ཏུ་ཟ་ཧོར་བནྡེས་སུག་བྲིས་བྱས་པ་སརྦྦེ་དིཀྐཱ་ལེམཾགལཾ། །མཱ ཏཱ ཙ ཌཱ ཀྱཱ མུ ཁ བཱ ཤ སཽ དྷྱ ཡོ གཱི ཤྭ ཪྻ མ ཏྶུ ཏྲི ཡ ཙོ པ དཻ ཤི ཀཾ །མ་དང་མཁའ་འགྲོའི་ཁ་རླང་ཟིལ་དངར་ཅན། །རྣལ་འབྱོར་དབང་ཕྱུག་བཞེད་གཞུང་མན་ངག་ལུགས། །བཛྲ མ ཎྜ ལྱ ཧི ཙ ཀྲ ཡཱ ཏྲ ཡཱ ཧཾ ཙཱ པ རཾ མུ ཀྟ པ ཙཻ ར དྷི ཥྛ ཎ། དགྱེས་མཛད་རྡོ་རྗེའི་དཀྱིལ་འཁོར་འཁོར་ལོ་འདིར། །བདག་གཞན་སྨིན་ཅིང་གྲོལ་བར་བྱིན་གྱིས་རློབས། །(༡༡༠བ) ― GLG021_Page_0222 ―
[མ་དཔེ་གཟིགས་ན་འདིར་གནོན།]
ཡོ གཱ ནྟ གུ ཧྱཱ ཏི ཤ རཱ ས གྷཱ། ཎྜ སཱུ ཏྲ ཤྩ ཀྲ སཾ བཱ རྦ ཧི མ ཎྜ ཧེ རུ། རྣལ་འབྱོར་གསང་མཐའི་ཡང་བཅུད་དྲིལ་བུའི་གཞུང༌། །བདེ་མཆོག་འཁོར་ལོའི་ཕྱི་དཀྱིལ་ཧེ་རུ་ཀའི། ཀཾ མཱ ཧཱ ན གཱ ར སྭ ཙ དཻ ཧ སརྦ གཱ ཏ ཏྭཱ ཡུ ར ཏྲེ དྭྱ བ ཏཱ ར ལཱེ བྷ ཏུ། །གྲོང་ཁྱེར་ཆེན་པོར་བདག་དང་ལུས་ཅན་ཀུན། །ཞུགས་ནས་ཚེ་འདིར་ཟུང་འཇུག་ཐོབ་པར་ཤོག །ཅེས་རྣལ་འབྱོར་དབང་ཕྱུག་གི་བཞེད་གཞུང་ཀྱེ་རྡོར་མན་ངག་ལུགས་ལ་བཀྲམ་གདན་དང་བརྩེགས་གདན་གཉིས་སུ་ཡོད་པའི་ཕྱི་མ་དང༌། གྲུབ་ཆེན་དྲིལ་བུ་པའི་བཞེད་སྲོལ་འཁོར་ལོ་སྡོམ་པ་ལྷ་ལྔའི་དཀྱིལ་ཐང་གཉིས་རང་ཉིད་ཀྱི་དམིགས་རྟེན་དུ་བཞེངས་པའི་ཞལ་བྱང་སྨོམ་ལམ་དུ་ཟ་ཧོར་གྱིས་བནྡེས་བཀོད་པ་ཛགཱཿཔཙམུཀྟེབྷཝནྟུ། །བསྙེན་སྲིང་བྲལ་ཡང་ལྔ་བདོའི་འགྲོ་བ་ལ། །ལྷག་པར་ཆེ་བའི་ཐུགས་རྗེ་ཀཏྤུ་རཿ། །སྡུག་བསྔལ་སྒྲིབ་གཉིས་ཚ་གདུང་བཅིལ་མཛད་པའི། །བཅོམ་ལྡན་སྨན་གྱི་བླ་མ་བདེ་གཤེགས་བརྒྱད། །སྣང་བརྙན་མིག་གི་བདུད་རྩིར་ཚར་(༡༡༡ན) ― GLG021_Page_0223 ―
[མ་དཔེ་གཟིགས་ན་འདིར་གནོན།]
དངར་བ། །ཡར་ཤར་གསོ་རིག་འཛིན་མཁས་དར་མོ་བ། །བློ་བཟང་ཆོས་གྲགས་དང་བའི་དད་པ་ཡིས། །དགོས་དགོས་གཙོར་གྱུར་རྩ་ལག་དོན་དུ་བཞེངས། །འཛད་མེད་དགེ་བའི་མཛོད་ཀྱི་སྲིད་དང་ཞིའི། །ཡོན་ཏན་འབྱོར་པས་དུཿཁའི་དབུལ་བ་ཀུན། །ལྷག་མར་བྱས་ཏེ་ཉིང་མཚམས་སྦྱར་མ་ཐག །བཻཌཱུར་སྣང་བའི་ཞིང་དུ་སྐྱེ་བར་ཤོག །སུམ་ཅུ་རྩ་ལྔ་བདེ་བར་གཤེགས་པའི་སྐུ། །མཐོང་བས་དོན་ལྡན་ཐོས་པས་རྣམ་གྲོལ་བ། །གསོ་རིག་འཛིན་པ་བློ་བཟང་ཆོས་གྲགས་ཀྱིས། །མ་རྒན་ལྷ་ལྷས་ཐོག་དྲངས་ཉེ་འབྲེལ་ཆེད། །པད་རྩ་ལྟར་དཀར་ལྷག་བསམ་དག་པའི་མཐུས། །སྒོ་གསུམ་འབད་པའི་འབྲས་བུ་དམིགས་ཡུལ་རྣམས། །གཙོར་གྱུར་མཁའ་མཉམ་སྐྱེ་རྒུ་ཇི་སྙེད་པ། །རྣམ་པ་ཐམས་ཅད་མཁྱེན་པ་མངོན་གྱུར་ཤོག །མ་ཐོབ་དེ་སྲིད་སྐྱེ་བའི་འཕྲེང་རིང་པོར། །མི་ཁོམས་གནས་ཀྱི་འཇིགས་པ་ཀུན་བྲལ་ཏེ། །ལྷ་མིའི་བདེ་སྐྱིད་ཁོ་ནས་ཉེར་འཚོ་ཞིང༌། །ངེས་ལེགས་ལམ་བཟང་བགྲོད་པའི་སྐལ་ལྡན་ཤོག །རང་སྣང་དག་པའི་ངོ་བོར་གདན་གསུམ་ལྷ། །རྡོ་རྗེ་སློབ་དཔོན་ལུས་ལ་ཡོངས་ཚང་བར། །ངེས་རྙེད་སྣང་བརྙན་འདི་ཀོ་ཚེའི་རིག་བྱེད། །འཛིན་པའི་ཚངས་རིས་བློ་བཟང་ཆོས་གྲགས་ཀྱིས། །རང་དང་ཉེ་དུའི་ཆེད་དུ་རབ་བཞེངས་པའི། །ཆོས་དཀར་ཆད་པ་མེད་པ་གངྒཱའི་རྒྱུན། །བྱང་ཆུབ་སྙིང་པོའི་ཟླ་བའི་མ་མ་རུ། །རོ་གཅིག་དོན་གཉིས་རླབས་འཕྲེང་ཡོལ་མེད་ཤོག །ཐར་པའི་ཁང་བཟང་ནང་དུ་ཆུད་མིན་བར། །ལེགས་བྲིས་ཚེ་དང་རྨུགས་འཛིན་དབང་པོའི་ནོར། །མཆོད་སྦྱིན་བརྒྱ་པའི་དབང་ཐང་ལ་སོགས་པར། །སྤྱོད་པའི་སྐལ་བ་བཟང་པོར་འགྱུར་བར་ཤོག །ཅེས་གསོ་བ་(༡༡༡བ) ― GLG021_Page_0224 ―
[མ་དཔེ་གཟིགས་ན་འདིར་གནོན།]
རིག་པའི་གཞུང་ལ་སྦྱངས་པ་དར་མོ་རབ་འབྱམས་པ་བློ་བཟང་ཆོས་གྲགས་རང་ཉིད་ཀྱིས་གཙོ་བྱས། ཕ་དགོས་དགོས། མ་ལྷ་ལྷ། དབང་འདུས། བསྟན་འཛིན། བསམ་གྲུབ། གསལ་སྒྲོན་རྣམས་ཀྱི་ཆེད་དུ་བདེ་གཤེགས་བརྒྱད། སངས་རྒྱས་སུམ་ཅུ་སོ་ལྔ། འདི་གའི་འདྲ་འབག་རྣམས་བཞེངས་པའི་ཐང་ཀ་གསུམ་གྱི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་རིག་པ་འཛིན་པ་འཇམ་དབྱངས་གྲགས་པས་བགྱིས་སོ། །དཔལ་ལྡན་རྩ་བ་གསུམ་གྱི་ཐུགས་རྗེའི་མཐུས། །འཁོར་འདས་ཕྱག་རྒྱ་ཟིལ་གནོན་བཞད་པ་རྩལ། །ཡིད་སྲུབས་གཡུལ་ལས་རྣམ་པར་རབ་རྒྱལ་ཏེ། །བསྐལ་བརྒྱར་རྡོ་རྗེ་ལྟ་བུར་བརྟན་པར་ཤོག །ཅེས་པ་འདིའང་རིམ་གྲོའི་སྐབས་ཐུན་འཚམས་ཞལ་འདོན་དུ་རིག་འཛིན་ཆེན་པོ་དཀོན་ཅོག་ལྷུན་གྲུབ་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །འཆི་མེད་གྲུབ་པ་སྣང་མཐའ་ཡས་པའི་མགོན། །འཕགས་ཡུལ་པཎ་ཆེན་གར་སྒྱུར་ཨ་ཏི་ཤ །དབྱེར་མེད་སངས་རྒྱས་ཀུན་འདུས་ཙོང་ཁ་པའི། །ཐུགས་རྗེ་གངྒཱའི་ཀླུང་རྒྱུན་རྟག་འབབ་མཛོད། །ངག་དབང་དགྱེས་ཞལ་ཚེམས་འཕྲེང་ཟེའུ་འབྲུ་གང༌། །བཞད་ནུས་བློ་གྲོས་ཉིན་བྱེད་སྐལ་བཟང་འགྲོའི། །གདུང་བའི་སྨག་རུམ་མཐར་བྱེད་སྣང་བའི་འོད། །རྒྱ་མཚོའི་མཐའ་ཀླས་ཀུན་ཁྱབ་བརྟན་པར་ཤོག །འཇམ་དཔལ་རྡོ་རྗེ་མི་ཡི་ཟོལ་བཟུང་བློས། །མཁས་བཙུན་བཟང་པོའི་རྩེར་སོན་གྲགས་པའི་སྒྲ། ཁམས་གསུམ་ཡོངས་ལ་དར་བའི་ཆོས་སྲིད་བསྟན། །སྤེལ་ཕྱིར་མགོན་ཁྱོད་རྡོ་རྗེ་ལྟར་འགྱུར་ཤོག །མྱུར་མཛད་སྤྱན་རས་གཟིགས་དབང་ནག་པོ་ཆེ། །དུས་ཀྱི་དགྲ་བོར་གར་མཛད་མ་ཧེའི་(༡༡༢ན) ― GLG021_Page_0225 ―
[མ་དཔེ་གཟིགས་ན་འདིར་གནོན།]
ཞལ། །སྲིད་གསུམ་དབང་མོ་ལ་སོགས་སྲུང་མ་ཡིས། །སྨོན་པའི་རེ་བ་ཇི་བཞིན་ལྷུན་གྲུབ་མཛོད། །ནམ་ཡང་བསླུ་མེད་དཀོན་ཅོག་རྣམ་པ་གསུམ། །ལྷ་དང་རིག་འཛིན་ས་བརྙེས་དྲང་སྲོང་གིས། །བདེན་པའི་ཚིག་ཏུ་བརྗོད་པའི་དབྱངས་སྙན་པོའི། །འབྲས་བུ་མངོན་སུམ་ཉིད་དུ་མྱོང་བར་ཤོག །ཅེས་ཚེ་རིང་གནམ་གྱི་ཤེ་མོང་གིས་མང་བཀུར་རྒྱལ་ཁབ་ཆེན་པོ་ཕོ་བྲང་པི་ཅིང་གི་སེར་མོ་བ་རྣམས་ཀྱིས་བཏོན་ཆོག་པའི་རིང་འཚོའི་ཚིགས་བཅད་དགོས་ཞེས་བྱམས་གླིང་ཨེམ་ཆི་སངས་རྒྱས་འབྱུང་གནས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་རིག་པ་འཛིན་པ་འཇམ་དབྱངས་གྲགས་པས་བགྱིས་སོ། །མངོན་མཐོའི་ཐེམ་སྐས་ལ་བརྟེན་ངེས་ལེགས་ཀྱི། ཁང་པར་འཁྲིད་པའི་བྱེད་པོ་མཁན་སློབ་དྲིན། །དྲན་པས་གསོལ་བ་འདེབས་ན་ཐུགས་རྗེ་ཡི། །བདུད་རྩིས་བདག་སྙིང་ཟ་མ་ཏོག་འགེང་ཤོག །དེང་ནས་སངས་རྒྱས་མ་ཐོབ་དེ་སྲིད་དུ། །ཚད་ལྡན་དག་པའི་བཤེས་ཀྱིས་རྗེས་བཟུང་སྟེ། །སྤང་དང་རྟོགས་པའི་ས་ལམ་ཡོན་ཏན་ཀུན། །དཀར་ཆའི་ཟླ་བ་ཇི་བཞིན་འཕེལ་བར་ཤོག །མི་འཇིགས་བཞི་ལྡན་ཀུན་མཁྱེན་གདོང་ལྔའི་རྩལ། །ལྷུན་གྲུབ་དམ་པའི་ཆོས་ཀྱི་སེང་གེའི་རྒྱུད། །སྒྲ་དབྱངས་འགྲོ་ཀུན་རྣ་བར་ཡོངས་བསྒྲགས་པས། །ཡིད་སྲུབས་གཉིས་འཐུང་གཡུལ་ལས་རྒྱལ་བར་ཤོག །ཅེས་པ་འདི་ནི་དགེ་སློང་ཡོན་ཏན་བཀྲ་ཤིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་ཕུན་ཚོགས་དབང་པོའོ། །འཁོར་འདས་ཕྱག་རྒྱ་ཟིལ་གནོན་བཞད་པ་རྩལ། །རྡོ་རྗེ་སློབ་དཔོན་ཁྱོད་སྐུར་ཞི་དང་ཁྲོའི། །དཀྱིལ་འཁོར་(༡༡༢བ) ― GLG021_Page_0226 ―
[མ་དཔེ་གཟིགས་ན་འདིར་གནོན།]
ཀུན་ཚང་རྩ་གསུམ་ངོ་བོ་རུ། །ཡིད་ཆེས་དད་པས་གསོལ་འདེབས་བདག་བྱིན་རློབས། །ཁྲི་སྲོང་སྤྲུལ་པའི་ཟླ་གཟུགས་བགྲང་ཡས་ལས། །འགྲོ་ངོའི་རྫིང་བུར་ཤར་བ་ངག་གི་དབང༌། །བློ་གསལ་སྐལ་བཟང་ཐུབ་བསྟན་རྒྱ་མཚོའི་སྡེས། །དེང་ནས་བྱང་ཆུབ་བར་དུ་རྗེས་བཟུང་གསོལ། །ཟུར་རིགས་གུ་རུ་རྟ་དཔལ་ལྡན་ནོར་བུ་དང་འཕྲིན་ལས་རྣམ་རྒྱལ་ཞེས་འདོན་པ་བསྒྱུར། མགྲིན་མིང་འཛིན་བདག །ཡང་སྲིད་འཁོར་བའི་འཕྲང་ལ་བཤེས་ཁྱོད་ཀྱིས། །ས་མཁན་མཛད་དེ་མཐོ་རིས་ཐར་ལམ་ལ། །ཁྲིད་ནས་རིང་མིན་ཀུན་མཁྱེན་ཐོབ་བྱིན་རློབས། །རྩེ་གཅིག་གསོལ་འདེབས་དད་མོས་འགུགས་པའི་ལུང༌། །ཐུགས་རྗེའི་ལྕགས་ཀྱུས་འདྲེན་ནུས་རྟེན་འབྲེལ་གཤིས། །དེ་ཕྱིར་ཁས་ལེན་འབྲས་སྨིན་མཆོག་གསུམ་མཐུས། །འགྲུབ་པར་ངེས་པ་རྙེད་པས་གཡར་དམ་འཆའ། །རྒྱལ་སྲས་སློབ་མར་བཅས་པའི་བྱིན་རླབས་དང༌། །ལྷ་དང་དྲང་སྲོང་བདེན་ཚིག་ཆར་ཆེན་པོས། །ཕན་དང་བདེ་བའི་ལོ་ཏོག་དར་དྲག་པའི། །འདོད་དོན་རེ་བའི་སྙེ་མ་གཡུར་ཟ་ཤོག །གསོལ་འདེབས་སྨོན་ལམ་གྱི་ཚིགས་བཅད་འདི་ལྟ་བུ་ཞིག་དགོས་ཞེས་ལྷ་ལྡན་གཞིས་ཀ་ཤར་པ་སྤུན་རིགས་ཀྱི་བུ་དང་བཅས་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པས་བགྱིས་པ་སིདྡྷི་རསྟུ། །དུས་ཀྱི་དགྲ་བོ་ཁྲོས་པ་ཟིལ་གནོན་ལྷའི། །ཡེ་ཤེས་སེམས་དཔའ་བཅོམ་ལྡན་ཚེ་དཔག་མེད། །ཐུགས་ཀར་བྷྲུཾ་དབུས་རྡོ་རྗེ་སློབ་དཔོན་མཆོག །ངེས་པ་ལྔ་ལྡན་ངོ་བོར་རྟག་བཞུགས་གསོལ། །གནམ་ལྕགས་དྲག་པོ་འབེབས་པའི་མཐུ་སྟོབས་ཞལ། །ཧ་ཧར་བཞད་པས་ས་གསུམ་(༡༡༣ན) ― GLG021_Page_0227 ―
[མ་དཔེ་གཟིགས་ན་འདིར་གནོན།]
ཆེར་གཡོ་བ། །ཆེ་ཆོག་ཞི་དང་ཁྲོ་བོ་འདུས་པའི་རྩལ། །དཀྱིལ་འཁོར་རྒྱ་མཚོའི་གཙོ་བོར་ཞབས་བརྟན་ཤོག །ལྷ་སྔགས་ཡེ་ཤེས་རྡོ་རྗེ་རྣོན་པོའི་མཚོན། །གདེངས་ནས་ཡིད་སྲུབས་ཀླད་པ་འགེམས་བྱེད་པ། །སྐལ་བཟང་གདུལ་བྱའི་མགོན་དུ་བཤེས་གཉེན་གར། །ནམ་ཡང་ཡོལ་མེད་བསྒྱུར་བའི་བཀའ་དྲིན་སྩོལ། །དགའ་ཆེན་ཁྱབ་བདག་ཁྲག་འཐུང་རྣལ་འབྱོར་དང༌། །ལེགས་ལྡན་གསང་བ་སྔགས་ཀྱི་འདུས་པའི་གླིང༌། །སྨིན་གྲོལ་རྒྱུད་བཤད་གདམས་པར་ཐོས་བསམ་སྒོམ། །ཡར་འཕེལ་བསྐལ་པའི་བར་དུ་ཞབས་བརྟན་ཤོག །སྲིད་གསུམ་དབང་སྒྱུར་འདོད་ཁམས་དབང་ཕྱུག་མ། །དྲེགས་པའི་སྡེ་དཔོན་དཔལ་མགོན་མ་ནིང་ནག །ལྷ་དང་དྲང་སྲོང་རིག་འཛིན་ཚོགས་རྣམས་ཀྱིས། །བདེན་པའི་ཚིག་འདི་ལྷུན་གྲུབ་འཕྲིན་ལས་མཛོད། །ཅེས་པ་འདིའང་གོང་དཀར་བློ་བཟང་བསོད་ནམས་ཀྱིས་དགའ་ལྡན་གསང་སྔགས་གླིང་དུ་འཛུགས་རྩིས་ཀྱི་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྡོ་རྗེ་རྭ་གུར་རིན་ཆེན་ཟུར་བརྒྱད་ཀྱི། །ལྟེ་བར་སེང་ཁྲི་པདྨ་ཉི་ཟླའི་སྟེང༌། །རྩ་བའི་བླ་མ་ཚེ་དབང་རིགས་འཛིན་རྩལ། །འཆི་མེད་གྲུབ་པའི་ངོ་བོར་རྟག་བཞུགས་གསོལ། །ཟ་ཧོར་གདུང་འཚོབ་ཟིལ་གནོན་བཞད་པ་རྩལ། །པདྨ་ཐོད་འཕྲེང་ཡབ་ཡུམ་གྱིས་བཏགས་མིང༌། །རྡོ་རྗེ་ཐོགས་མེད་རྩལ་ཁྱོད་གདུལ་བྱའི་དོན། །གངས་ལྗོངས་སེང་གེའི་ཁྲི་ལ་རྟག་བརྟན་བཞུགས། །སྒྲ་སྒྱུར་བཻ་རོ་དྲི་མེད་བཛྲ་ཞབས། །ངོ་མཚར་སྐྱེས་རབས་འཕྲེང་འཛིན་དུས་བབས་ཀྱི། །ཟབ་(༡༡༣བ) ― GLG021_Page_0228 ―
[མ་དཔེ་གཟིགས་ན་འདིར་གནོན།]
བགཏེར་སྒོ་འབྱེད་ཆོས་རྒྱལ་གཏེར་བདག་གླིང༌། །བོད་འབངས་ཕན་བདེའི་གཉེན་དུ་ཞབས་བརྟན་ཤོག །པདྨ་ལས་འཁྲུངས་གར་དབང་ཐོད་འཕྲེང་གིས། །ནམ་ཡང་འགྱུར་བ་མེད་པར་རྗེས་བཟུང་ནས། །རྡོ་རྗེའི་ཐེག་མཆོག་ཆོས་གཏེར་བདག་པོ་རུ། །མངའ་གསོལ་མཁྱེན་བརྩེ་ནུས་རྩལ་རྟག་བརྟན་ཤོག །བཀའ་བབས་གཏོར་ཁ་མ་ལུས་གེགས་མེད་དུ། །ལུས་ཅན་བསོད་ནམས་ཞིང་དུ་ལེགས་ཐོན་ཏེ། །དེ་འབྲས་སྐོར་གསུམ་སཱ་ལའི་ལྗོངས་ཆེན་པོར། །བདེ་སྐྱིད་དཔལ་གྱི་རྩེ་དགའ་རྒོད་པར་ཤོག །གྲ་ནང་ཕུན་ཚོགས་དགེ་བའི་ཡུལ་གྲུ་འདིར། །སྔ་འགྱུར་བསྟན་པ་རྒྱས་པའི་སྲོག་ཤིང་དུ། །ཨྱོན་སྨིན་ཅིང་གྲོལ་བའི་སྔགས་འཆང་གླིང༌། །ཆོས་སྲིད་ཡར་ངོའི་ཟླ་ལྟར་འཕེལ་བར་ཤོག །རིགས་འཛིན་རྩ་བརྒྱུད་བླ་མའི་ཐུགས་རྗེ་དང༌། །ཡི་དམ་སྒྲུབ་པ་བཀའ་བརྒྱད་ནུས་མཐུའི་སྟོབས། །སྡེ་དགུ་བསྟན་སྲུང་རྒྱ་མཚོའི་ཚོགས་ཀུན་གྱིས། །ཇི་ལྟར་སྨོན་པ་འགྲུབ་པའི་འཕྲིན་ལས་མཛོད། །དཀོན་ཅོག་རྣམ་གསུམ་ལྷ་དང་དྲང་སྲོང་སོགས། །དཀར་ཕྱོགས་སྐྱོང་བ་རྣམས་ཀྱིས་བཀྲ་ཤིས་གླུ། །རབ་སྙན་རྒྱུད་མངས་སྒྲ་ལས་ཉེར་དྲངས་ཏེ། །ཕུན་ཚོགས་མེ་ཏོག་སིལ་མ་ཆར་དུ་ཕབ། །རྩ་གསུམ་དཔང་པོར་བྱས་པའི་བདེན་ཚིག་དང༌། །ཆོས་ཉིད་ཀ་ནས་དག་པས་འགྱུར་བ་མེད། །ཆོས་ཅན་རྒྱུ་འབྲས་བསླུ་བ་མེད་པའི་ཕྱིར། །སྨོན་ལམ་བཏབ་བས་དོན་ཀུན་འགྲུབ་གྱུར་ཅིག །ཅེས་ཨྱོན་སྨིན་གྲོལ་གླིང་གི་དབུ་མཛད་ངག་དབང་བཟོད་པས་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་གོ་བདེ་བར་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །(༡༡༤ན) ― GLG021_Page_0229 ―
[མ་དཔེ་གཟིགས་ན་འདིར་གནོན།]
རྣམ་འདྲེན་རྒྱ་མཚོའི་ཐུགས་རྗེ་བསྐུལ་བའི་དབྱངས། །མགྲིན་པའི་རྒྱུད་ལས་ལེགས་དྲངས་གསོལ་བའི་དོན། །རེ་བའི་འབྲས་ལྡན་མཆོག་གསུམ་ཡོངས་འདུའི་ལྗོན། །ཕན་བདེའི་གྲིབ་ཏུ་འགྲོ་འདི་ཉེར་བསིལ་མཛོད། །ཐུབ་བསྟན་དེ་འཛིན་ཀློག་དང་སྤོང་བའི་སྡེ། །ཡིད་ཅན་ཆོས་དཀར་ཡུལ་དུ་ཉི་ཟླ་ཡིས། །སྨག་རུམ་མཐར་བྱེད་དེ་སྲིད་རབ་བརྟན་ཅིང༌། །དར་བས་ཀུན་བཟོད་དགའ་མ་མངལ་ལྕིར་ཤོག །ལྷག་བསམ་དག་པའི་ས་གཞི་གཤིན་པ་ལ། །རྩེ་གཅིག་སྨོན་པའི་ས་བོན་ཡོངས་བཏབ་པ། །རྒྱུ་འབྲས་རྟེན་འབྲེལ་ཆུ་ལུད་དྲོད་གཤེར་གྱིས། །སྨིན་པའི་སྐལ་བཟང་མངོན་སུམ་ཉམས་མྱོང་ཤོག །ཅེས་པ་འདིའང་བཀྲ་ཤིས་ལྗོངས་དགེ་འདུན་སྤྱི་སོའི་ཞལ་འདོན་དུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །ངེས་པའི་དོན་དུ་གསང་ཡུམ་དབྱིངས་ཕྱུག་ལྷ། །ངག་དབང་ཚངས་པའི་བུ་མོ་འཇོ་སྒེག་ཅན། །དྲེགས་པའི་གཙོ་མོར་དཔལ་ལྡན་སྲིད་རྒྱལ་མ། །ཀུན་ཀྱང་སེམས་ཀྱི་རྣམ་པར་འཕྲུལ་པ་ཙམ། །རྡོ་རྗེ་འཆང་དབང་པདྨ་ཐོད་འཕྲེང་རྩལ། །གསང་བ་ཤེས་རབ་རྩ་བརྒྱུད་བླ་མ་ཡི། །བཀའ་དང་དམ་ཚིག་གཉེན་པོ་ཉེར་དགོངས་ལ། །ཚུལ་འདིའི་རྒྱུ་སྦྱོར་རིག་འཛིན་རྟག་ཏུ་སྐྱོངས། །ཉིན་མཚན་དུས་ཀུན་གཡེལ་བ་མེད་བསྲུངས་ནས། །མི་མཐུན་དགྲ་བགེགས་ཉེར་འཚེ་རབ་བཞི་ཞིང༌། །ཚེ་འབྱོར་ལུང་རྟོགས་རྒྱས་པའི་ལས་བསྒྲུབ་ལྷར། །དེང་ནས་བྱང་ཆུབ་བར་དུ་མངའ་གསོལ་ལོ། །ཞེས་པ་འདིའང་མཆོད་དཔོན་ངག་དབང་ཤེས་རབ་ཀྱིས་སྐུ་བརྙན་བཞེངས་པའི་འཕྲིན་བཅོལ་དགོས་ཚུལ་ལྟར་(༡༡༤བ) ― GLG021_Page_0230 ―
[མ་དཔེ་གཟིགས་ན་འདིར་གནོན།]
ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་ཕུན་ཚོགས་དབང་པོའོ། །རྡོ་རྗེའི་སྤོ་མཐོར་སྔོ་ལྗང་རྩྭ་ཡི་སྟེང༌། །སྐྱིལ་ཀྲུང་གཅིག་བཅས་མོད་ལ་བདུད་བཞིའི་མུན། །མཐར་བྱེད་ཉི་མའི་དངོས་བརྒྱ་འཛིན་པའི་གཉེན། །ངོ་མཚར་མཚན་དཔེའི་སྣང་འོད་ཀུན་ཁྱབ་མཛོད། །བཀྲ་ཤིས་རི་མོ་གཡས་སུ་འཁྱིལ་བའི་དུང༌། །ཆོས་ཕུང་རྒྱ་མཚོའི་མི་ཟད་སྒྲ་དབྱངས་ཀྱིས། །འཇིག་རྟེན་གསུམ་རྣར་ཆེས་དངར་ཕན་དང་བདེའི། །གྲངས་མེད་རོ་བདར་རྟག་ཏུ་སྤྱོད་བྱིན་རློབས། །དེ་གསུང་བླང་བྱར་བྱས་ནས་བདེན་པ་གཉིས། །སྒྲུབ་གྲོགས་ཉན་རང་བྱང་སེམས་སྐྱེ་འཕགས་ཟླའི། །སྤང་རྟོགས་ག་པུར་གཟེགས་མ་ཉེར་འཐུལ་བས། །ལུས་ཅན་ཀུནྡའི་དགེ་ལེགས་འདབ་བཞད་མཛོད། །དམར་བའི་ལྗགས་ཆེན་རིང་དུ་བརྐྱངས་པའི་གླུར། །ཆེར་བསྔགས་བདེ་ལྡན་ཞིང་ཁམས་ཞིང་གི་མགོན། །མཛོད་སྤུའི་འོད་གཟིས་མཚུན་ལྷའི་ལྐོག་མར་སྙིང༌། །ཉེར་བསྐྲད་འཆི་མེད་བདུད་རྩིས་འགྲོ་འདི་སོས། །ངག་ལ་འཆད་རྩོད་རྩོམ་པ་དབང་ཕྱུག་བློས། །སྐལ་བཟང་རྒྱ་ཆེན་ཀུན་བཟོད་ཡོངས་ཁྱབ་པར། །འཕྲིན་ལས་དབྱར་མཚོའི་རླབས་འཕྲེང་སྲིད་པའི་མཐར། །རྫོགས་མིན་དེ་སྲིད་ཡོལ་བ་མེད་གྱུར་ཅིག །འཇིགས་པ་མེད་པ་རྣམ་དཔྱོད་སྤོབས་པའི་གོས། །དཀར་ཆའི་ཟླ་བཞིན་ཐུབ་པའི་ལུང་རྟོགས་བསྟན། །ལང་ཚོ་དར་དྲག་ཐོས་བསམ་སྒོམ་པའི་སྡེ། །འཇམ་དབྱངས་དགའ་བའི་བཤེས་གཉེན་བརྟན་གྱུར་ཅིག །རྣམ་འདྲེན་ཀུན་ཡབ་ཟུར་ཕུད་ལྔས་མཚན་ལྷ། །གངས་ལྗོངས་བསྟན་པའི་བདག་པོར་དབང་སྒྱུར་ཚེ། །བླ་དྭགས་མཚན་གྱི་ཁྱད་པར་ཙོང་ཁ་པའི། །ཆོས་སྲིད་མངའ་ཐང་བླ་ནས་བླར་(༡༡༥ན) ― GLG021_Page_0231 ―
[མ་དཔེ་གཟིགས་ན་འདིར་གནོན།]
འཕེལ་ཤོག །བཀྲ་ཤིས་དགེ་མཚན་གཡང་ཆགས་གཡས་རུའི་ཆར། །འདུས་གླིང་དབུས་ན་ལྷུན་པོ་ལྟར་བརྗིད་པ། །འཕགས་ཡུལ་མ་ཕམ་མགོན་པོ་འབྱོན་མིན་བར། །ལྷ་ཆོས་བདུན་ལྡན་རིང་ལུགས་དར་བར་ཤོག །མི་དགེ་ལས་བཅུ་དྲང་སྲོང་དམོད་པའི་མཐུས། །བརྣག་དཀའ་ཟུག་རྔུའི་ལྕགས་ཀྱི་གཏུན་བུ་ཡིས། །གཙེས་པའི་འགྲོ་བརྒྱུད་དེ་རྒྱུ་ཉོན་མོངས་དྲི། །འཁྲུད་ལ་སྐལ་ལྡན་ཤིང་རྟའི་ཁེངས་འཕྲོག་ཤོག །འགྲོ་བའི་ལེགས་བྱས་རི་བོ་མཐོ་རིས་རྟེན། །བསྐྱེད་པའི་ཆུ་གཏེར་ནང་དུ་བསྒྲིལ་བ་ལས། །སྲིད་ཞིའི་བདེ་སྐྱིད་ས་སྲུངས་ལྷོད་ལྷོད་པོར། །རྒྱུ་བའི་གོམས་པས་བྱང་ཆུབ་སར་བགྲོད་ཤོག །རབ་བརྟན་མོས་པའི་མེའི་ཞལ་རྫིངས་རིང་དུ། །མཆོག་གསུམ་ཐུགས་རྗེའི་མཁའ་གླང་འཁྲིགས་པ་ལས། །བྱིན་རླབས་འཛད་པ་མེད་པའི་ཆར་རྒྱུན་གྱིས། །འདོད་པའི་སྙེ་མ་འབྲས་བུས་ཡོངས་དུད་ཤོག །ཅེས་རིང་འཚོའི་སྨོན་ལམ་དང་འབྲེལ་བའི་ཤླཽ་ཀ་བཅུ་ལྷག་ཙམ་ཞིག་དགོས་ཞེས་ཆོས་སྡེ་ཆེན་པོ་བཀྲ་ཤིས་ལྷུན་པོ་ནས་ཕྱག་མཛོད་ཕུན་ཚོགས་རབ་བརྟན་གྲྭ་ཚང་ཁག་གསུམ་སྔགས་པ་གྲྭ་ཚང་དང་ཐོབ་རྒྱལ་དགའ་ལྡན་རབ་རྒྱས་གླིང་གི་སློབ་དཔོན་པ་རྣམས་ཀྱིས་གྲོས་ཐོག་ནས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ཡིད་སྲུབས་སྡེ་བཅས་གཡུལ་ངོར་བསད་པའི་ཁྲག །མཆུ་སྒྲོས་མཚམས་སྤྲིན་མདངས་སུ་རྗེས་ཆགས་པ། །རྣམ་པར་རྒྱལ་མ་རྗེ་བཙུན་བཅོམ་ལྡན་འདས། །ཟིལ་དངར་ཆུ་རྒྱུན་ཚངས་བུག་ནས་འགེང་མཛོད། །འཇམ་དབྱངས་ཀུན་ཏུ་དགའ་བའི་བཤེས་(༡༡༥བ) ― GLG021_Page_0232 ―
[མ་དཔེ་གཟིགས་ན་འདིར་གནོན།]
གཉེན་གང༌། །རྡོ་རྗེ་བཞུ་བླུགས་སྟན་ལ་ཞབས་རྡུལ་འཕྲེང༌། །ལེགས་བཀོད་སངས་རྒྱས་སྟོང་གི་འཕྲིན་ལས་གཟིས། །འཛམ་གླིང་མུན་སེལ་དེ་སྲིད་བརྟན་པར་ཤོག །ཀ་བ་མེད་པ་གནམ་གྱི་སྒོ་འཕར་ནས། །མེས་པོས་ས་སྤྱོད་བདག་པོར་དབང་བསྐུར་བའི། །སྐུ་ཚེ་མངའ་ཐང་ཆབ་སྲིད་མ་ལུས་པ། །ང་ལས་ནུས་ཀྱི་རྗེས་སུ་འབྲང་བར་ཤོག །དགའ་བ་བརྒྱ་པའི་ཚེམས་ལས་ཉེར་འཁྲུངས་ལྷའི། །འདུལ་ཞིང་གངས་རི་དཔལ་དང་ལྡན་པ་ཡི། །བྱེ་བྲག་འཕན་ཡུལ་ས་ཡི་ཐིག་ལེ་རུ། །དམ་ཆོས་ཆད་པ་མེད་པར་འཁོར་བར་ཤོག །འདྲེན་པ་སྲས་སློབ་བདེན་པའི་ཀཏྤུརཿ། །ཚུལ་བཞིན་བརྗོད་པའི་དྲི་བསུང་རབ་འཐུལ་བ། །ཉེས་བརྒྱའི་གདུང་སེལ་སིམ་པའི་ཚོར་བའི་རོ། །ཡིད་ཀྱིས་རྟག་ཏུ་ཉམས་སུ་མྱོང་བར་ཤོག །ཅེས་པ་འདི་ཡང་ཐང་སག་དགའ་ལྡན་ཆོས་འཁོར་གླིང་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ཚེ་མཐའ་ཡས་པའི་མགོན་པོ་འཛམ་གླིང་འདིར། །བརྟུལ་ཞུགས་གྲུབ་པའི་རིག་སྔགས་འཆང་བའི་སྐུར། །ལེགས་བསྟན་དུས་གསུམ་སངས་རྒྱས་པདྨ་འབྱུང༌། །ཐུགས་རྗེའི་སྤྱན་གྱིས་གཟིགས་པ་ལྷུར་སྩོལ་ཀྱེ། །ཆེ་མཆོག་འདུས་པའི་ཟིལ་གནོན་བཞད་པ་རྩལ། །ཨ་ཧཾ་མི་ཤིགས་ཀ་བ་རྡོ་རྗེའི་སྲོག །འགྱུར་མེད་ཞབས་རྡུལ་རྒྱ་ཧོར་བོད་འབངས་འགྲོའི། །གཙུག་ཏོར་རྩེ་མོར་རྟག་ཏུ་འགོད་པར་ཤོག །ཟབ་གཏེར་མཁའ་འགྲོའི་ཞལ་རླངས་འཐུལ་བའི་སྒོ། །འབྱེད་མཛད་པད་གླིང་སྨིན་གྲོལ་གདམས་པའི་དཔྱ། །གངས་ཅན་སྐལ་བཟང་གདུལ་བྱའི་སྙིང་ནོར་དུ། །སྤྱོད་པའི་དགའ་སྟོན་དབྱར་མཚོ་ལྟར་འཕེལ་ཤོག །(༡༡༦ན) ― GLG021_Page_0233 ―
[མ་དཔེ་གཟིགས་ན་འདིར་གནོན།]
ཐེག་དགུའི་མཆོག་གྱུར་རྣམ་གསུམ་ཡོ་གའི་ཆོས། །ཚུལ་བཞིན་ཐོས་བསམ་སྒོམ་པས་ཉམས་བསྟར་བའི། །སྔ་འགྱུར་བསྟན་པ་རབ་ཏུ་རྒྱས་བྱེད་གླིང༌། །ཆོས་སྲིད་ཟུང་དུ་འཇུག་པས་འཕེལ་བར་ཤོག །བདེ་གཤེགས་ཀུན་འདུས་བཀའ་བརྒྱད་དཀྱིལ་འཁོར་ལྷ། །དམ་ཅན་སྡེ་དགུ་བསྟན་སྲུང་རྒྱ་མཚོ་ཡིས། །ཞི་རྒྱས་དབང་དང་མངོན་སྤྱོད་རྫུ་འཕྲུལ་མཐུས། །བསམས་པའི་དོན་ཀུན་སྒྲུབ་པའི་གྲོགས་མཛོད་ཅིག །ཅེས་ཐུགས་སྲས་སྤྲུལ་སྐུ་བསྟན་འཛིན་འགྱུར་མེད་རྡོ་རྗེས་སྔ་འགྱུར་བསྟན་པའི་བཙས་སུ་ཐེག་མཆོག་རབ་རྒྱས་གླིང་བཙུགས་པའི་ཚེ་སྨོན་ལམ་འདི་ལྟ་བུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་འཛིན་གྱི་བཙུན་པ་འཇམ་དབྱངས་གྲགས་པའོ། །རྣམ་འདྲེན་ཤཱཀྱ་སེང་གེས་བདུད་བཞིའི་སྡེ། །བྱམས་པའི་དཔུང་གིས་ཉེར་བཅོམས་བདེན་པའི་མཐུས། །འདུས་པའི་གྲ་འདིར་དམ་སྲིའི་འཚེ་བ་ཀུན། །རབ་ཞི་ཐོས་བསམ་དབྱར་མཚོ་ལྟར་འཕེལ་ཤོག །ཐུབ་པས་སློབ་ལམ་རང་གི་དབུ་དང་སྤྱན། །བཏང་བ་བདེན་པའི་ཚིག་གིས་བསོས་པའི་མཐུས། །དེང་འདིར་དམ་སྲིའི་གནོད་པ་ཡོངས་ཞི་ནས། །ཚེ་རིང་ནད་མེད་དཔལ་འབྱོར་རྒྱས་པར་ཤོག །ཡིད་སྲུབས་མཚོན་ཆ་སངས་རྒྱས་ལ་འཕངས་པ། །མེ་ཏོག་ཆར་དུ་གྱུར་པའི་རྟེན་འབྲེལ་མཐུས། །འབྱུང་པོའི་གནག་པའི་སེམས་ཀྱང་མཉེས་གཤིན་པར། །འགྱུར་ནུས་དཀོན་ཅོག་མཐུ་ཡིས་འགྲུབ་བྱིན་རློབས། །ཞེས་པ་འདིའང་སྐྱོར་ལུང་མཚན་ཉིད་གྲྭ་ཚང་གི་ཞལ་འདོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །(༡༡༦བ) ― GLG021_Page_0234 ―
[མ་དཔེ་གཟིགས་ན་འདིར་གནོན།]
ལེགས་བྱས་སྟོབས་ཀྱིས་རྩིབས་སྟོང་འཁོར་ལོའི་ཤུགས། །ཀུན་བཟོད་ཡངས་པའི་གཞི་ལ་དབང་སྒྱུར་ནས། ཁྲིམས་གཉིས་གསེར་གྱི་གཉའ་ཤིང་ཡོངས་ལྕི་བས། །འབངས་རྣམས་བདེ་བར་རབ་སྐྱོང་ཞབས་བརྟན་ཤོག །རིས་མེད་ཐུབ་པའི་བསྟན་ལ་ཞུགས་སོ་ཅོག །སྤྱི་དང་ཁྱད་པར་འཇམ་དཔལ་སྙིང་པོ་ཡི། །ལུགས་འཛིན་མ་ལུས་སྲིད་ཞུས་གྱེན་འདེགས་པའི། །གཟུགས་ཅན་སྙིང་པོའི་མཆེད་ཟླ་རྟག་བརྟན་ཤོག །སྟོབས་ལྡན་རྒྱལ་པོའི་བསོད་ནམས་རྩ་བའི་ཁྱོན། །སྦོམ་པོར་བསྐྱེད་དུ་བསྲིངས་པའི་གྲིབ་མ་ལ། །སྐོར་གསུམ་རུ་བཞི་སྒང་དྲུག་ལུས་ཅན་ཀུན། །བདེ་བའི་སྟེགས་ལ་ངལ་གསོར་སྤྱོད་པར་ཤོག །ཀསྨི་ར་པའི་པཎ་ཆེན་བསོད་སྙོམས་པའི། །སོ་ཐར་སྡོམ་རྒྱུན་པདྨའི་སྐུད་པ་ལྟར། །ཆེས་ཕྲ་རྡོ་རྗེའི་སྲོག་ཏུ་བྱིན་བརླབས་ནས། །སྡེ་འདིར་དར་བར་མཆོག་གསུམ་མཐུས་བྱིན་རློབས། །བདེ་གཤེགས་བརྒྱད་ཀྱི་བྱིན་རླབས་རྨད་པོ་ཆེས། །གཙང་རིས་མགོན་པོ་བདུན་ཅུ་རྩ་ལྔ་སོགས། །དཀར་ཕྱོགས་སྐྱོང་བའི་སྲུང་མའི་ཚོགས་རྣམས་ཀྱིས། །བདག་གི་སྨོན་ལམ་འགྲུབ་པའི་གྲོགས་མཛོད་ཅིག །ཅེས་པ་འདིའང་ཆག་མིག་ཚོགས་སྤྱི་སོའི་ཞལ་འདོན་དུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ལྷན་སྐྱེས་ཌཱ་ཀི་གཙོ་མོས་མངོན་སུམ་དུ། །མཁའ་སྤྱོད་ཞིང་དུ་འཁྲིད་པའི་སྐལ་དམན་ཡང༌། །སྒྱུ་མའི་བསྐྱས་ཆེན་འདེགས་ཚེ་ཉེར་བསུས་ནས། །བདེ་ཆེན་དག་པའི་ཞིང་དེར་ཐོགས་མེད་དྲོངས། །བགྲང་ཡས་ཞིང་བཞུགས་ཕྱི་ཡི་རྣལ་འབྱོར་མ། །བཾ་ཡིག་ནང་གི་ཡིད་འོང་མཛའ་ན་མོ། །སེམས་ཉིད་གསལ་སྟོང་གསང་བའི་མཁའ་སྤྱོད་མར། །(༡༡༧ན) ― GLG021_Page_0235 ―
[མ་དཔེ་གཟིགས་ན་འདིར་གནོན།]
ངེས་རྙེད་བཀའ་དྲིན་འཁོར་མེད་བླ་མའི་དྲིན། །དེང་ནས་འཇའ་ལུས་རྡོ་རྗེ་བཙུན་མོའི་སྐུར། །མངོན་གྱུར་གནས་ལུགས་རང་ངོ་འཕྲོད་དེ་སྲིད། །ཟབ་ཆོས་འདི་སྟོན་བླ་མ་དམ་ཆོས་དང༌། །འབྲལ་མེད་སྤྱོད་པའི་སྨོན་ལམ་ལྷུན་གྲུབ་ཤོག །ཅེས་པ་འདིའང་ངེད་རང་གི་དགེ་སྦྱོར་གྱི་རྟེན་དུ་རྗེ་བཙུན་ནཱ་རོ་མཁའ་སྤྱོད་ཀྱི་སྐུ་བརྙན་ས་མོ་གླང་ལོ་དབུ་མཛད་སྐལ་ལྡན་གྱིས་བྲིས་པའི་ཚེ་སྨོན་ལམ་གྱིས་འཚམས་སྦྱར་ཆེད་དུ་ཟ་ཧོར་གྱི་བནྡེས་བཀོད་པའོ། །འོག་མིན་ཞིང་ཁམས་ཞིང་གི་གཙོ་བོ་མཆོག །རྒྱལ་བ་རྣམ་པར་སྣང་མཛད་གངས་ཅན་མཚོ། །དཀྱིལ་འཁོར་བདག་པོར་ཡོངས་བཞེངས་སྤྲུལ་སྐུ་ཡིས། །དམིགས་ཡུལ་གནས་ངན་ལེན་ལས་དྲང་དུ་གསོལ། །བློ་དང་བརྩོན་པ་བཟང་པོའི་བག་ཆགས་ཀྱིས། །དགེ་ལ་རབ་ཏུ་འདུན་པའི་ལེགས་བྱས་འབྲས། །མངོན་མཐོའི་ལམ་བརྒྱུད་ཐར་པའི་ཁང་བཟང་དུ། །མྱུར་བགྲོད་ཐུགས་རྗེ་སྙིང་ལ་འཇུག་བྱིན་རློབས། །ཞེས་པ་འདི་ཡང་གེ་ར་ཆོས་མཛད་བློ་བཟང་དགེ་འདུན་གྱི་ཕྱི་རྟེན་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ཆོས་མཛད་བློ་བཟང་མཁྱེན་བརྩེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འོད་མཚན་སྟོང་འབར་ཟེར་འཕྲེང་བདེ་ལྡན་ནས། །འཛམ་གླིང་སྨག་རུམ་བཅིལ་ལ་འཕྲོས་པའི་གཟིས། །ལྷ་ཆེན་ཉི་བུའི་མེ་ལོང་འཛིན་པའི་ཁུར། །བོར་བའི་ཆོས་དཀར་སྣང་བ་འགྲོ་ལ་སྩོལ། །འདུས་ཚོགས་བདེན་པ་བརྗོད་མཐུས་ངག་གི་དབང༌། །དབྱངས་ཅན་དགྱེས་པའི་བློ་གཏེར་སྐལ་བཟང་ཅན། །ནམ་མཁའ་རང་གི་ངོ་བོ་གཏོང་མིན་བར། །ཐུབ་བསྟན་རྒྱ་མཚོའི་དཔྱིད་དུ་བརྟན་གྱུར་ཅིག །ཐོས་བསམ་(༡༡༧བ) ― GLG021_Page_0236 ―
[མ་དཔེ་གཟིགས་ན་འདིར་གནོན།]
འབྲས་དཀར་སྨིན་པ་ཡུལ་གྱི་ལྗོངས། །གཏན་འདུན་བདེ་སྐྱིད་འགྲུབ་པའི་དགའ་ཚལ་དུ། ཁྲིམས་ལྡན་བློ་གསལ་ཡོངས་ཀྱིས་རབ་གང་སྟེ། །གཞུང་བརྒྱར་འཆད་ཉན་སྤོབས་པ་གཟེངས་མཐོར་ཤོག །རྒྱན་དྲུག་མཆོག་ཟུང་ཚངས་པའི་རལ་ཀླུང་ནས། །ཉེར་བབས་གངྒཱ་ལྟོར་འཆང་ས་རྔོག་གི །ལུགས་འཛིན་ཀུན་མཁྱེན་སངས་རྒྱས་འཕེལ་གྱི་བསྟན། །དབྱར་གྱི་ཆུ་གཏེར་ཇི་བཞིན་འཕེལ་བར་ཤོག །ཡེ་དག་རྟེན་འབྲེལ་མཁའ་ལ་རྒྱུ་འབྲས་ཀྱི། །ཉི་ཟླ་བཅུ་གཉིས་ཁྱིམ་གྱི་ལམ་བགྲོད་པ། །དངོས་པོའི་གཤིས་ཕྱིར་སྨོན་པའི་དཔག་བསམ་གྱི། །ངོ་མཚར་སྙེ་མའི་འབྲས་བཟང་དུད་པར་ཤོག །ཅེས་སྨོན་ལམ་གྱི་ཚིགས་སུ་བཅད་པ་འདི་ནི་འབྲས་ཡུལ་སྐྱེད་མོས་ཚལ་གྱི་མཁན་ཆེན་བཀྲ་ཤིས་རྒྱལ་མཚན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །རྒྱལ་ཀུན་མཁྱེན་བརྩེ་ནུས་པ་བཞུ་བླུགས་སུ། །ཁོལ་བའི་མཐུ་སྟོབས་རྡོ་རྗེའི་ཚ་ཚ་ཅན། །འཛམ་གླིང་བརྟུལ་ཞུགས་གྲུབ་དབང་པདྨ་འབྱུང༌། །ལྟ་སྟངས་ཙམ་གྱིས་ཡིད་སྲུབས་ལས་རྒྱལ་མཛོད། །ཆེ་མཆོག་ཞི་ཁྲོའི་ལྷ་ཚོགས་འདུས་པ་ལས། །འཁོར་འདས་ཕྱག་རྒྱ་ཟིལ་གནོན་དུས་ཀྱི་དགྲ །གྲུབ་པའི་རྣལ་འབྱོར་འཆང་བ་བཞད་པ་རྩལ། །སྐལ་ལྡན་གདུལ་བྱའི་མགོན་དུ་ཞབས་བརྟན་ཤོག །དབང་གི་རྒྱུད་སྨིན་ཟབ་མོའི་ལམ་གྱིས་གྲོལ། །འཕྲིན་ལས་ཐོགས་མེད་ལྷ་སྲིན་བྲན་དུ་འཁོལ། །གོས་དཀར་ལྕང་ལོའི་འཕྲེང་ཅན་སྔགས་འཆང་གིས། །ལྗོངས་འདིར་སོ་ཟུར་གནུབས་བསྟན་འཛིན་པར་ཤོག །ཅེས་པ་འདི་ཡང་སོ་ཡེ་ཤེས་དབང་ཕྱུག་དང༌། (༡༡༨ན) ― GLG021_Page_0237 ―
[མ་དཔེ་གཟིགས་ན་འདིར་གནོན།]
སོ་ཤཱཀྱ་དཔལ་སོགས་སྔགས་འཆང་རིམ་པར་བྱོན་པའི་གདུང་ལས་སྙེ་མདོ་ཆོས་རྗེ་ངག་དབང་ཤཱཀྱ་དཔལ་འབར་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །སྭསྟི་སིདྡྷཾ། རྡོ་རྗེའི་གུར་ནང་གཞལ་ཡས་ཁང་གི་དབུས། །དཔལ་ལྡན་བླ་མ་དགྱེས་མཛད་ཧེ་རུ་ཀར། །གླུས་བསྐུལ་གསོལ་བ་བཏབ་ལས་རབ་བཞེངས་སྐུ། །དཀྱིལ་འཁོར་རྒྱ་མཚོའི་མགོན་དུ་ཞབས་བརྟན་ཤོག །ངག་གི་དབང་ཕྱུག་འཁོན་རིགས་ཀུན་གསལ་ངོས། །དགའ་ཆེན་ཁྱབ་བདག་རྡུལ་བྲལ་སྟོན་གྱི་ཟླ། །ཡིད་ཅན་བསོད་ནམས་ཀུནྡ་བཞད་པའི་གཉེན། །དབང་ཕྱུག་བརྒྱད་ལྡན་ཞིང་འདིར་གཡོ་མེད་ཤོག །བཀྲ་ཤིས་གཡས་འཁྱིལ་ཆོས་ཀྱི་གྲགས་པའི་སྒྲ། །དཔྱོད་ལྡན་གདུལ་བྱའི་རྣ་བར་རབ་འཇེབས་པས། །བསྟན་པའི་རྒྱལ་མཚན་སྲིད་རྩེར་བསྒྲེང་བའི་དཔལ། །སྐལ་བཟང་གདུལ་བྱའི་དཔལ་དུ་རྟག་བཞུགས་གསོ། །རྡོ་རྗེ་འཆང་དབང་བླ་ཆེན་ས་སྐྱ་པའི། །ཆོས་སྲིད་ལེགས་ཚོགས་དབྱར་མཚོ་ལྟར་རྒྱས་ཤིང༌། །མ་རིག་ལས་འཁོན་འཇམ་དབྱངས་གཞོན་ནུའི་གདུང༌། །བསྟན་དང་འགྲོ་བའི་རྒྱུན་དུ་འཕེལ་བར་ཤོག །རིགས་བྱེད་ཚོགས་བདག་འདོད་པའི་རྒྱལ་པོ་ཡིས། །ཕུན་ཚོགས་དཔལ་འབྱོར་མ་ལུས་དབང་བསྡུ་ཞིང༌། ཁྲག་འཐུང་ལྕམ་དྲལ་ལེགས་ལྡན་གདོང་བཞི་པས། །འཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ཅེས་དཔལ་ལྡན་ས་སྐྱ་པ་འཇམ་དབྱངས་ངག་དབང་ཀུན་དགའ་བསོད་ནམས་དབང་ཕྱུག་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་བསྟན་འགྲོའི་མགོན་དུ་འཚོ་ཞིང་གཞེས་པའི་བརྟན་བཞུགས་འཇམ་དཔལ་དབྱངས་ཀྱི་(༡༡༨བ) ― GLG021_Page_0238 ―
[མ་དཔེ་གཟིགས་ན་འདིར་གནོན།]
གདུང་ཆད་པ་མེད་པ་དང་བསྟན་པ་རྒྱས་པའི་སྨོན་ལམ་དང་བཅས་པ་འདི་ནི་ཁྱབ་བདག་རྡོ་རྗེ་སེམས་དཔའི་ངོ་བོ་མཁན་ཆེན་ཞ་ལུ་ཀུན་སྤངས་པ་ཚེ་དབང་ལྷུན་གྲུབ་བསྟན་པའི་རྒྱལ་མཚན་དཔལ་བཟང་པོའི་བཀས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །སྭསྟི་པྲ་ཛ་བྷྱཿ ཕྱོགས་ལས་རྣམ་རྒྱལ་རྡོ་རྗེ་བྲག་རྫོང་རྩེར། །གཞོམ་ཞིག་བྲལ་བ་ཁྲོ་བཅུའི་གུར་ཁང་དབུས། །རྗེ་བཙུན་བླ་མ་འཇིགས་མེད་དཔའ་བོ་ཆེ། །ཡིད་སྲུབས་སྡེ་བཅས་གཉེན་པོར་ཞབས་བརྟན་ཤོག །ངག་གི་དབང་ཕྱུག་རིགས་ཀུན་ཁྱབ་བདག་ཆེ། །བཅུ་དྲུག་དགའ་བཞིའི་ཉ་གང་བཀྲ་ཤིས་གླུ། །རབ་སྙན་གྲགས་པའི་རྒྱལ་མཚན་སྒྲེང་མཛད་པ། །དཔལ་ལྡན་སྐལ་བ་བཟང་པོ་རྟག་བརྟན་ཤོག །ཚོགས་སློབ་སྨིན་གྲོལ་རྒྱུད་བཤད་མན་ངག་ལུང༌། །ཚད་མ་བཞི་ལྡན་སྔགས་དང་སྡེ་སྣོད་གསུམ། །འཇམ་མགོན་བླ་མ་རིམ་བྱོན་རྗེས་འབྲངས་ཀྱི། །འཁྲུལ་མེད་བཞེད་སྲོལ་བསྟན་པ་དར་བར་ཤོག །འོད་གསལ་འཆི་མེད་དམུ་ཐག་ལས་བབས་བཙུན། །བརྟན་པའི་འཁོར་ལོས་བྱིན་བརླབས་རིགས་ཀྱི་ཆེ། །འཁོན་བརྒྱུད་གདུང་འཚོབ་ཡིད་བཞིན་རིན་ཆེན་འཕྲེང༌། །འཆད་མེད་བླ་ནས་བླར་ཡང་འཕེལ་བར་ཤོག །དཀོན་ཅོག་ཐུགས་རྗེས་འཇུག་ལ་གཡེལ་བ་མེད། །དབང་ལྷ་རྣམས་ཀྱིས་ཁམས་གསུམ་རང་གིར་སྡུད། །དཔལ་མགོན་ལྕམ་དྲལ་ལས་ཀུན་མྱུར་བསྒྲུབས་པས། །བརྩེ་ཆེན་སྙིང་པོའི་རིང་ལུགས་རྒྱས་པར་ཤོག །ཅེས་དཔལ་ལྡན་ས་སྐྱ་པའི་གདུང་བརྒྱུད་རིན་པོ་ཆེ་འཇམ་དབྱངས་ངག་དབང་ཀུན་དགའ་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་རྡོ་རྗེའི་ཁྲི་ལ་(༡༡༩ན) ― GLG021_Page_0239 ―
[མ་དཔེ་གཟིགས་ན་འདིར་གནོན།]
བསྐལ་བརྒྱར་གཡོ་མེད་དུ་བཞུགས་པའི་བརྟན་བཞུགས་འཇམ་དབྱངས་འཁོན་གྱི་གདུང་ཆད་པ་མེད་ཅིང་བསྟན་པ་འཕེལ་བའི་སྨོན་ལམ་དང་བཅས་པའི་འདི་ནི་རིགས་ཀུན་ཁྱབ་བདག་ཞ་ལུ་མཁན་ཆེན་ཀུན་སྤངས་པ་ཚེ་དབང་ལྷུན་གྲུབ་བསྟན་པའི་རྒྱལ་མཚན་དཔལ་བཟང་པོའི་བཞེད་པ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །འོག་མིན་ཞིང་གི་གཙོ་བོ་གངས་ཅན་མཚོ། །དཀྱིལ་འཁོར་བྱེ་བའི་མགོན་དུ་སྤྲུལ་པའི་གར། །རྣམ་པར་སྣང་མཛད་ངོ་མཚར་སྐུ་བརྙན་འཕྲེང༌། །པད་རྩ་ལྟར་དཀར་ལྷག་བསམ་གྱིས་བཞེངས་མཐུས། །ངག་དབང་ཁྲ་ཧྲིག་ཐོག་དྲངས་མཁའ་མཉམ་འགྲོའི། །ལས་ཉོན་ཤེས་བྱའི་སྒྲིབ་པ་དྲུང་ཕྱུང་སྟེ། །ཚོགས་གཉིས་རྫིངས་ཀྱིས་སྐུ་གསུམ་རིན་ཆེན་གླིང༌། །ཕྱིན་ནས་སྐྱེ་རྒུ་མ་ལུས་འདྲེན་པར་ཤོག །རབ་དཀར་ཀཱ་ཤིའི་ངོས་ལ་དབང་པོའི་གཞུ། །ཚོན་བརྒྱར་ཉེ་བའི་ཤེལ་གྱི་རྗེས་འགྲོ་མཁན། །རྨད་བྱུང་དམ་པའི་སྣང་བརྙན་ཚར་དངར་བའི། །བྱེད་པོས་སྒྱུ་མའི་ཁེངས་པ་བག་ལ་ཞ། །དགེ་འབྲས་ཕུན་ཚོགས་དབང་པོ་སུམ་ཡགས་སོགས། །ཚུལ་འདིར་འབད་དོ་ཅོག་རྣམས་སྟོབས་འབྱོར་ཚེ། །ཡར་འཕེལ་ཡང་སྲིད་ཀུན་ཏུ་མངོན་མཐོའི་རྟེན། །རིམ་བརྒྱུད་ངེས་ལེགས་གྲོང་དུ་འཇུག་པར་ཤོག །ཅེས་པ་འདི་ཡང་འཕྱོང་རྒྱས་ལྐོག་པ་ཕུན་ཚོགས་དབང་པོས་ཕ་མའི་དོན་དུ་རྣམ་སྣང་གི་བརྒྱ་ཐང་དང་ཁོ་རང་དང་སྤུན་གྱི་དོན་དུ་བླ་བརྒྱུད་བཞེངས་པའི་རྒྱབ་ཡིག་སྨོན་ལམ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་(༡༡༩བ) ― GLG021_Page_0240 ―
[མ་དཔེ་གཟིགས་ན་འདིར་གནོན།]
སློང་འཇམ་དབྱངས་གྲགས་པའོ། །ཐུབ་པའི་གསུང་ངག་ཆད་མེད་མདོ་རྒྱུད་ལ། །དབང་བའི་བློ་གྲོས་བཟང་པོའི་སྤོབས་པ་ཅན། །རྒྱ་ཆེན་རྣམ་དཔྱོད་མཚོ་བྱུང་ལྷ་མོ་ཡིས། །ལེགས་སྩལ་བཤེས་གཉེན་དམ་པར་གསོལ་བ་འདེབས། །སེང་གེས་ཉེར་བཏེག་སྣ་ཚོགས་རྡོ་རྗེ་ཡི། །རི་མོ་རབ་འབར་འགྱུར་བ་མེད་སྟན་ལ། །བསྐལ་བརྒྱར་མྱ་ངན་མི་འདའ་གསོལ་འདེབས་ན། །སྨོན་པ་བཞིན་འགྲུབ་མཆོག་གསུམ་མཐུས་བྱིན་རློབས། །ཚེ་ཡི་གཡུང་དྲུང་ཉ་ཕྱིས་ཁོག་པ་རུ། །དཔལ་འབྱོར་མུ་ཐི་ལ་ཡིས་ཉེར་གཏམས་པས། །འདི་སྣང་ཕན་དང་བདེ་བར་ལོངས་སྤྱོད་ཚོགས། །རྫོགས་ལྡན་གསར་པའི་དགའ་སྟོན་རྒྱས་པར་ཤོག །འཁོར་བའི་ཡང་སྲིད་གོ་ལའི་ལམ་ཡངས་པོར། །ལྷ་མིའི་རྟེན་བཟང་ཉི་ཟླའི་བགྲཽད་པ་ཟུང༌། །ནམ་ཡང་ཆད་མེད་ཐར་པའི་འོད་སྟོང་གིས། །བྱང་ཆེན་སྣང་བ་རབ་ཏུ་གསལ་བར་ཤོག །དུས་གསུམ་བསགས་དང་གསོག་འགྱུར་བསོད་ནམས་ཀྱིས། །ས་བོན་དར་བབས་དགེ་ལེགས་ཨ་མྲའི་འབྲས། །མཐའ་ཀླས་འགྲོ་བ་ཀུན་དང་ལྷན་ཅིག་ཏུ། །འཛད་མེད་རྟག་ཏུ་སྤྱོད་པའི་རྒྱུ་རུ་བསྔོ། །ཞེས་གསོལ་འདེབས་སྨོན་ལམ་དང་བཅས་པ་འདི་ནི་འཕྱོང་རྒྱས་ལྐོག་པ་ཕུན་ཚོགས་དབང་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མཆོག་གསུམ་ཐུགས་རྗེ་ནུས་རླུང་གིས་དྲངས་པའི། །ལམ་བཟང་མ་ལ་ཡ་ཡི་དྲི་བསུང་གིས། །འཁོར་བའི་ཚ་གདུང་འཇིགས་ལས་མཁའ་འགྲོ་སྐྱབས། །ཉེར་དྲངས་ཐར་པའི་བདེ་ལ་སྤྱོད་བྱིན་རློབས། །ཤེས་སྒྲིབ་ཡལ་འདབ་གཟིངས་པའི་ནགས་ཀྱི་ཀླུང༌། །ཐབས་ཤེས་ཞུགས་ཀྱིས་སྦར་བའི་ཐང་ཡངས་པོར། །ཀུན་(༡༢༠ན) ― GLG021_Page_0241 ―
[མ་དཔེ་གཟིགས་ན་འདིར་གནོན།]
མཁྱེན་ཡེ་ཤེས་རྟ་ཡི་གསར་འགྲོས་གོམ། །དོན་གཉིས་དཀྱུས་ཐོག་གཅོད་པར་བྱིན་གྱིས་རློབས། །རྩ་ལག་འཁོར་འབངས་རྣམས་ཀྱི་གང་གི་ཆེད། །བསྒྲུབས་པའི་དགེ་ཚོགས་འཛམ་བུའི་འབྲས་བུ་རྣམས། །བསྔོ་སྨོན་རྒྱ་མཚོར་ལྷུངས་པ་གཏན་མདུན་གྱི། །གསེར་གྱི་སྙེ་མ་ཡོངས་སུ་དར་དྲག་ཤོག །ཅེས་བི་ཇི་མཁའ་འགྲོ་སྐྱབས་ལ་དམིགས་པའི་སྨོན་ལམ་ཞིག་དགོས་ཞེས་རྒྱལ་ཁང་རྩེའི་སྤྲུལ་སྐུའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །བློ་བཟང་གྲགས་སྙན་འབར་བའི་ཆོས་སྲིད་བསྟན། །ཟུང་འབྲེལ་ཁྲིམས་ཀྱིས་བླ་ནས་བླར་འདེགས་པའི། །མཐུ་སྟོབས་ནུས་མངའ་ནོར་འཛིན་སྐྱོང་བའི་རྗེ། །མཆོག་གསུམ་ཐུགས་རྗེས་རྡོ་རྗེ་ལྟར་བྱིན་རློབས། །ཛཱ་ཏིའི་འབྲས་བུས་དུད་པའི་ཡུལ་གྲུ་ནས། །འཇམ་མཉེན་དར་ཟབ་ཐགས་སུ་འཐག་པའི་བར། །བཙན་པོའི་ལུང་གིས་འབངས་རིགས་གཅིག་གྱུར་ཏེ། །རྫོགས་ལྡན་ལ་འཁུ་བདེ་སྐྱིད་དར་དྲག་ཤོག །ངེས་པར་ཤཱཀྱའི་རིང་ལུགས་ཐོས་བསམ་སྒོམ། །ཚུལ་བཞིན་སྒྲུབ་སོ་ཅོག་གི་གྲ་རྣམས་ཀུན། །སྡིག་ཏོའི་འཕྲུལ་གྱིས་ནམ་ཡང་མི་བརྫི་བར། །ལུས་ཅན་བསོད་ནམས་ཞིང་དུ་འཕེལ་བར་ཤོག །ཅེས་པ་འདིའང་ཡར་སྟོད་ཐོས་བསམ་དར་རྒྱས་གླིང་གི་སློབ་དཔོན་གྲགས་པ་རྣམ་རྒྱལ་དང་གཉེར་པ་བློ་བཟང་རབ་རྒྱས་གཉིས་ཀྱིས་གཙོས་པའི་གྲྭ་དམངས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །ལུས་ངག་ཡིད་གསུམ་དགེ་ལ་ཉེར་བཀོལ་ཏེ། །ངེས་པར་ལེགས་ལ་དབང་དུ་ཕྱུག་པའི་ལམ། །(༡༢༠བ) ― GLG021_Page_0242 ―
[མ་དཔེ་གཟིགས་ན་འདིར་གནོན།]
སྒྲུབ་བློའི་མིག་ཡངས་བཟང་པོའི་སྤྱོད་པ་ཡིས། །རྒྱ་ཆེན་ཆོས་དཀར་མཚོ་ལྟར་འཕེལ་བའི་རྟེན། །སྲས་བཅས་རྒྱལ་ཀུན་འདུས་པའི་ངོ་བོ་ཉིད། །རྡོ་རྗེ་སློབ་དཔོན་སྣང་བརྙན་བསྐྲུན་པའི་དགེས། །བྱེད་པོ་སྐྱེ་བར་བཤེས་གཉེན་དམ་པ་ཡིས། །རྗེས་བཟུང་བླ་མེད་བྱང་ཆུབ་མངོན་འགྱུར་ཤོག །ཅེས་པ་འདིའང་གསོལ་དཔོན་གེ་ར་བ་བློ་བཟང་མཁྱེན་བརྩེས་འདི་གའི་འདྲག་འབག་ཅིག་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །ཀུན་ཏུ་བཟང་པོའི་སྨོན་ལམ་བཏབ་པའི་དགེས། །ཤེས་རབ་དང་ལྡན་དལ་འབྱོར་རིན་ཆེན་རྟེན། །གངས་ཅན་ལྗོངས་སུ་ཉེར་ཐོབ་མགོན་ཁྱོད་ཀྱི། །འཁོར་དུ་སྐྱེས་ནས་ཆོས་ལ་སྤྲོད་པར་ཤོག །ཅེས་པ་འདི་ཡང་དཀའ་བཅུ་ཤེས་རབ་རིན་ཆེན་གྱི་ཁ་ཏོན་དུ་བྲིས། །རྒྱལ་ཀུན་ཐུགས་རྗེ་བཞུ་བླུགས་རྡོ་རྗེའི་ཁམས། །གཞོམ་མེད་སྲོག་གི་ཟུངས་སུ་ཉེར་སོང་སྟེ། །ནམ་མཁའ་གཟུགས་གཞན་གྱུར་མིན་དེ་སྲིད་དུ། །མགོན་ཁྱོད་རྡོ་རྗེའི་ཁྲི་ལ་ཞབས་བརྟན་གསོལ། །ལུས་ངག་ཡིད་གསུམ་གཅིག་ཏུ་རབ་འབད་ནས། །དབང་ཕྱུག་བརྒྱད་ལྡན་བློ་གསལ་མགོན་གཅིག་པུ། །སྐལ་བཟང་གཉེན་དུ་རྒྱ་མཚོ་དུས་ཀྱི་མེས། །སྐེམས་མིན་བར་དུ་གཡུང་དྲུང་ལྟར་བརྟན་ཤོག །འཇིགས་རུང་ལུས་མེད་གཤེད་དུ་ཚོགས་གཉིས་ཀྱི། །བཙན་པོའི་གོ་ཆ་བགོས་མཛད་ཐུབ་པའི་བསྟན། །ལུང་རྟོགས་ལང་ཚོ་ཆེས་ཆེར་རྒྱས་པའི་སྡེ། །འོག་མིན་ཞིང་གི་གཙོ་ལྟར་བརྟན་པར་ཤོག །དགའ་བའི་དཔལ་སྟེར་ལེགས་ལྡན་ཆོས་ཀྱི་དཔྱིད། །རྣམ་གསུམ་འཁོར་ལོས་ཕན་བདེའི་འདོད་པ་ཀུན། །འཇོ་(༡༢༡ན) ― GLG021_Page_0243 ―
[མ་དཔེ་གཟིགས་ན་འདིར་གནོན།]
བའི་འདུས་གྲྭ་ཀུན་གྱི་ཡང་རྩེ་རུ། །ཉེར་སོན་སྲིད་མཐའི་བར་དུ་རྒྱས་པར་ཤོག །ཚངས་པར་མཚུངས་པར་སྤྱོད་པའི་སྡོམ་བརྩོན་ཅན། །མི་ཕྱེད་རྩེ་གཅིག་གདུང་བའི་ཤུགས་དྲག་པོས། །ཇི་ལྟར་སྨོན་པ་ལྷུན་གྲུབ་རྒྱུ་འབྲས་ཀྱི། བསླུ་མེད་རྟེན་འབྲེལ་ངོ་མཚར་རྨད་དུ་བྱུང༌། །ཞེས་པ་འདི་ཡང་དགའ་ལྡན་ཆོས་འཁོར་ཡང་རྩེ་བླ་གཉེར་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ཡངས་པའི་ས་ཆེན་བྱམས་པས་ལེགས་སྐྱོང་བ། །དཔལ་ལྡན་མི་ཡི་དབང་པོ་ཚངས་པ་ཆེའི། །ངང་ཚུལ་ཇི་བཞིན་ཉི་ཟླས་མུན་སེལ་བ། །དེ་སྲིད་འབངས་རྣམས་བདེ་བར་སྐྱོང་གྱུར་ཅིག །འཇིག་རྟེན་གསུམ་གྱི་ཉ་ཕྱིས་ཁོག་པ་རུ། །ཕན་བདེའི་མུ་ཏིག་ཕུང་པོར་ཆེར་སྤུངས་པ། །བསོད་ནམས་བསགས་འགྲོའི་རྒྱན་དུ་འཁྲི་ཤིང་གི །མཛེས་པའི་དོ་ཤལ་རིང་པོར་འཕྱང་བར་ཤོག །ཁྱད་པར་གངས་ཅན་ལུས་ཕྲའི་ལྟོ་བ་རུ། །ནད་མཚོན་དབུལ་ཕོངས་དང་བྲལ་རིང་པོའི་ཚེ། །ཚོང་པ་ཁེ་སྤོགས་ཐོན་ཞིང་ལོ་ཏོག་སྦྲུམས། །ཕུན་ཚོགས་བསམ་ཀུན་འདོད་པ་འཇོ་བར་ཤོག །ཅེས་པ་འདིའང་དགའ་ལྡན་ཆོས་འཁོར་ཡང་རྩེ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །གདོང་ལྔས་བཏེག་པའི་རིན་ཆེན་པད་ཉིའི་ཁྲིར། །དཔལ་ལྡན་བླ་མ་མི་བསྐྱོད་ཚེ་དཔག་མེད། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔེའི་སྣང་བ་ཞིང་འདིར་གཡོ་མེད་ཤོག །གཉིས་འཐུང་གིས་བཏེག་རིན་ཆེན་པད་ཉིའི་ཁྲིར། །དཔལ་ལྡན་བླ་མ་སྣང་མཛད་ཚེ་དཔག་(༡༢༡བ) ― GLG021_Page_0244 ―
[མ་དཔེ་གཟིགས་ན་འདིར་གནོན།]
མེད། ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔེའི་སྣང་བ་ཞིང་འདིར་གཡོ་མེད་ཤོག །རྟ་མཆོག་གིས་བཏེག་རིན་ཆེན་པད་ཉིའི་ཁྲིར། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔེའི་སྣང་བ་ཞིང་འདིར་གཡོ་མེད་ཤོག །དཔལ་ལྡན་བླ་མ་རིན་འབྱུང་ཚེ་དཔག་མེད། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔེའི་སྣང་བ་ཞིང་འདིར་གཡོ་མེད་ཤོག །མདོངས་མཐའ་ཡིས་བཏེག་རིན་ཆེན་པད་ཉིའི་ཁྲིར། །དཔལ་ལྡན་བླ་མ་སྣང་མཐའ་ཚེ་དཔག་མེད། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔེའི་སྣང་བ་ཞིང་འདིར་གཡོ་མེད་ཤོག །ཤང་ཤང་གིས་བཏེག་རིན་ཆེན་པད་ཉིའི་ཁྲིར། །དཔལ་ལྡན་བླ་མ་དོན་གྲུབ་ཚེ་དཔག་མེད། །ངེས་པ་ལྔ་ལྡན་ལོངས་སྤྱོད་རྫོགས་པའི་སྐུ། །མཚན་དཔའི་སྣང་བ་ཞིང་འདིར་གཡོ་མེད་ཤོག །ཅེས་པ་འདི་ནི་དགའ་ལྡན་གསུང་རབ་གླིང་བླ་སྤྱི་ཐུན་མོང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ངོ་མཚར་དག་པའི་ཞིང་ཁམས་ཀུན་གྱི་གཙོ། །བདེ་ལྡན་མགོན་པོ་གར་གྱི་དབང་ཕྱུག་གིས། །ཡངས་པའི་ནོར་འཛིན་སྐྱོང་བ་མི་ཡི་རྗེར། །ཕུན་ཚོགས་དགེ་ལེགས་དཔལ་གྱི་འབར་བར་མཛོད། །རི་བོང་འཛིན་པའི་དཀྱིལ་འཁོར་རྒྱབ་ཡོལ་ཅན། །ཚེ་སྦྱིན་དཔལ་ལྡན་ཡིད་བཞིན་འཁོར་ལོ་མས། །ཡངས་པའི་ནོར་འཛིན་སྐྱོང་བ་མི་ཡི་རྗེར། །ཕུན་ཚོགས་དགེ་ལེགས་དཔལ་གྱི་འབར་བར་མཛོད། །སྲིད་པའི་ཉེས་བརྒྱ་ཀུན་འཇོམས་གཙུག་ཏོར་ལྷ། །བཅོམ་ལྡན་རྣམ་པར་རྒྱལ་མའི་ལྷ་ཚོགས་ཀྱིས། །ཡངས་པའི་ནོར་འཛིན་སྐྱོང་བ་མི་ཡི་རྗེར། །ཕུན་ཚོགས་དགེ་ལེགས་དཔལ་གྱི་འབར་བར་མཛོད། །ཅེས་པ་འདིའང་དགའ་ལྡན་གསུང་རབ་གླིང་བླ་སྤྱི་ཐུན་མོང་གིས་བསྐུལ་(༡༢༢ན) ― GLG021_Page_0245 ―
[མ་དཔེ་གཟིགས་ན་འདིར་གནོན།]
བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ཆེ་མཆོག་འདུས་པའི་ལྷུན་གྲུབ་འོད་ལྔའི་རྩལ། །ཀ་དག་དབྱིངས་སུ་འགྱུར་མེད་རྡོ་རྗེའི་ལུས། །འཁོར་འདས་ཕྱག་རྒྱས་ཟིལ་གནོན་སྐུར་བཞེངས་གར། །ལས་ཅན་སྐལ་ལྡན་འགྲོ་ངོར་རྟག་སྒྱུར་ཤོག །ལོ་ཆེན་བཻ་རོ་བསམས་བཞིན་ཟབ་ཆོས་སྒོ། །འབྱེད་ལ་དུས་བབས་དངོས་བྱོན་གཏེར་བདག་གླིང༌། །དཀྱིལ་འཁོར་རྒྱ་མཚོའི་གཙོར་བརྟན་རང་དབང་གཏེར། །མ་ལུས་འདྲེན་པའི་རྟེན་འབྲེལ་ལྷུན་གྲུབ་ཤོག །སྔོན་གོམས་མཐུ་ཡིས་ཐེག་མཆོག་སྨྲ་བའི་ངག །དབང་ཕྱུག་ཀུན་བཟང་རྣམ་པར་རྒྱལ་བ་ལྷའི། །འཕྲིན་ལས་ཉིན་མོར་བྱེད་པའི་འོད་ཟེར་གྱིས། །སྔ་འགྱུར་བསྟན་པའི་འདབ་བརྒྱ་བཞད་པར་ཤོག །ཅེས་པ་འདི་ཡང་དབོན་པོ་ཆོས་དབྱིངས་རང་གྲོལ་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །དཀོན་ཅོག་མཐུ་ཡིས་བསོད་ནམས་ཞིང་གྱུར་པའི། །ངོ་མཚར་སྤྲུལ་སྐུའི་ཟླ་བ་ཡོངས་ཚེས་པ། །རབ་བརྟན་དབང་ཕྱུག་བརྒྱད་མངའི་འཕྲིན་ལས་ཀྱི། །སྣང་བ་གསར་པའི་དགའ་སྟོན་རྒྱས་པར་ཤོག །ཚེ་དཔག་མེད་དང་ཡིད་བཞིན་འཁོར་ལོ་སོགས། །འཆི་མེད་ལྷ་ཚོགས་ཐུགས་རྗེ་ཆུ་བོའི་རྒྱུན། །གཙུག་ཏོར་རྩེ་ནས་ཆད་མེད་རབ་བབས་པས། །མི་འགྱུར་སྲོག་གི་ཀ་བ་ཚུགས་པར་ཤོག །ཡི་དམ་དཀྱིལ་འཁོར་རྒྱ་མཚོའི་བྱིན་རླབས་དང༌། །དམ་ཅན་ཆོས་སྐྱོང་སྲུང་མའི་འཕྲིན་ལས་རྩལ། །རྟེན་འབྲེལ་བསླུ་བ་མེད་པའི་བདེན་ཚིག་མཐུས། །ཇི་ལྟར་སྨོན་པ་ཡིད་བཞིན་ལྷུན་གྲུབ་ཤོག །ཅེས་ཀོང་(༡༢༢བ) ― GLG021_Page_0246 ―
[མ་དཔེ་གཟིགས་ན་འདིར་གནོན།]
པོ་ཡུལ་སྨད་གྲོང་དུ་ཁྱུང་རྒྱལ་མཚན་གྱི་སྲས་སུ་དེ་མོ་སྤྲུལ་པའི་སྐུ་གསར་དུ་འཁྲུངས་པར་མཚན་དཀོན་ཅོག་བསོད་ནམས་དབང་ཕྱུག་ཏུ་གསོལ་བའི་བརྟན་བཞུགས་ཞིག་དགོས་ཞེས་དེ་མོ་དཔོན་པོ་བསོད་ནམས་ནོར་བུས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །ཆུ་བྱི་ངེད་རང་གི་དད་རྟེན་དུ་སྨན་བླ་བདེ་གཤེགས་བརྒྱད་ཀྱི་སྐུ་ལི་བརྫུས་གྲ་ཚར་ཆེ་ཆུང་གཉིས་བཞེངས་པའི་ཆེ་བའི་ཁ་བྱང་སྨོན་ལམ་སྲིད་ཞི་བདེ་ལེགས་ལྷུན་གྲུབ།ནཱ མི ཀྱ མཱ ཏྲ ཤྲུ ཏ མ ནྱ སཽ ནྱཱ སེ པཱ རི ཀཱི རྟི ཤྲིཡ རཱ ཛ ཧཱི ཙ། ཨཱ དེ། མཚན་ཙམ་ཐོས་པས་ཡིད་ཅན་བདེ་བ་ལ། །ལེགས་པར་འགོད་པ་ཡོངས་གྲགས་དཔལ་གྱི་རྒྱལ། །ྉྤ྄ ར ཎི དྷྱཻ ྈྐ ར ཏ ྉྥ ལཾ པྲ ཏྱ ཀྵཱ ཧ མཱ དེ ྈྑ ས མཱ ཉྩ ཡ ཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༣ན) ― GLG021_Page_0247 ―
[མ་དཔེ་གཟིགས་ན་འདིར་གནོན།]
ར ཏྣེ ནྡུ པ དྨཻ ྉྤ྄ བྷུ ཥེ ཎ ཏཻ ཛྱཾ གྷོ ཥ སྭ རཻ རྡཱ ཤ དི ཀེ ཡ ཤེ །རིན་ཆེན་ཟླ་དང་པདྨས་རབ་བརྒྱན་གཟི། །གཟི་ལྡན་སྒྲ་དབྱངས་ཕྱོགས་བཅུར་སྒྲོགས་པ་ཡིས། །ན ཨཱ དེ ྉྤ྄ ཎི དྷྱཻ ྈྐ ར ཏ ྉྥ ལཾ པྲ ཏྱ ཀྵཱ ཧ མཱ དེ ྈྑ ས མཱ ཉྩ ཡ ཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༣བ) ― GLG021_Page_0248 ―
[མ་དཔེ་གཟིགས་ན་འདིར་གནོན།]
ཏ བྱཱ ལི ལྷ དྲཽ ཛི ཀ ནོ མ ལོ ར ཏྣ དྱུ པྲ ཏ སིདྡྷ ཀ ཧི ཏྭ ཡཱ ཙ། གསེར་སྦྱངས་བཟང་པོའི་མདངས་ལྟར་དྲི་མ་མེད། །རིན་ཆེན་སྣང་བའི་བརྟུལ་ཞུགས་གྲུབ་ཁྱོད་ཀྱིས། །ཨཱ དེ ྉྤ྄ ཎ དྷྱཻ ྈྐ ར ཏ ྉྥ ལཾ པྲ ཏྱ ཀྵཱ ཧ མཱ དེ ྈྑ ས མཱ ཉྩ ཡཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༤ན) ― GLG021_Page_0249 ―
[མ་དཔེ་གཟིགས་ན་འདིར་གནོན།]
ནོ ཤ ཀ དུཿ ཁ སྱ ས རཱ ཏྤྲ ཛནྨི ནྱཱ སྟཱ ར ཏོ པྲཱ ནུ བྷ བ ཤྲི ཡ ཤྩ། མྱ་ངན་མེད་པས་སྡུག་བསྔལ་རྒྱ་མཚོ་ལས། །སྐྱེ་ལྡན་སྒྲོལ་བའི་མཆོག་གི་མཐུ་དཔལ་གྱིས། །ཨཱ དེ ྉྤ྄ ཎི དྷྱཻ ྈྐ ར ཏ ྉྥ ལཾ པྲ ཏྱ ཀྵཱ ཧ མཱ དེ ྈྑ ས མཱ ཉྩ ཡ ཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༤བ) ― GLG021_Page_0250 ―
[མ་དཔེ་གཟིགས་ན་འདིར་གནོན།]
གཱ མྦྷི ཪྻ དྷ རྨ སྭ ར ཀཱ ཡ ཀ རྞེ ཀཱི རྟེ སྶུ ཧི ཏྱཻ སྶ ར གྷོ ཥ གཻ ཏྱཻཿ ཟབ་རྒྱས་ཆོས་སྒྲ་ལུས་ཅན་རྣར་བསྒྲགས་པའི། །ཕན་བདེ་རྒྱ་མཚོའི་དབྱངས་སྙན་གླུར་འབབ་པས། །ཨཱ དེ ྉྤ྄ ཎི དྷྱཻ ྈྐ ར ཏ ྉྥ ལཾ པྲ ཏྱ ཀྵཱ ཧཱ མཱ དེ ྈྑ ས མཱ ཉྩ ཡ ཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༥ན) ― GLG021_Page_0251 ―
[མ་དཔེ་གཟིགས་ན་འདིར་གནོན།]
ས དྡྷ རྨ སཱ ག ཪྻ བ ར སྱ མཱ ཏཱ ནཱ ཧཱི བི ལཱ ལི ཏྱ ཨ བྷི ཛྷ རཱ ཛྙཱ། དམ་ཆོས་རྒྱ་མཚོ་མཆོག་གི་བློ་གྲོས་ཀྱི། །རྣམ་པར་རོལ་པ་མངོན་མཁྱེན་རྒྱལ་པོ་ཡིས། །ཨཱ དེ ྉྤ྄ ཎི དྷྱཻ ྈྐ ར ྉྥ ལཾ པྲ ཏྱ ཀྵཱ ཧ མཱ དེ ྈྑ ས མཱ ཉྩ ཡ ཙྪ། །སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༥བ) ― GLG021_Page_0252 ―
[མ་དཔེ་གཟིགས་ན་འདིར་གནོན།]
མཱ ཧ དྨ ཧཱ ཀ ལྐ ག མེད ཡཽ ཥ དྷྱུ ཏྟཱ ར བ ཌཱུ ཪྻ ཀེ རཱ ལྱ རཱ ཛྙཱ། ཆེས་ཆེར་སྙིགས་མའི་འགྲོར་བརྩེ་སྨན་གྱི་བླ། །བཻཌཱུཪྻ་ཡི་འོད་ལྡན་རྒྱལ་པོ་ཡིས། །ཨཱ ད ྉྤ྄ ཎི དྷྱཻ ྈྐ ར ཏ ྉྥ ལཾ པྲ ཏྱ ཀྵ ཧ མཱ དེ ྈྑ ས མཱ ཉྩ ཡ ཙྪ། སྔོན་གྱི་སྨོན་ལམ་མཛད་པའི་འབྲས་བུ་རྣམས། །མངོན་སུམ་བདག་སོགས་མཁའ་མཉམ་འགྲོ་ལ་སྩོལ། །(༡༢༦ན) ― GLG021_Page_0253 ―
[མ་དཔེ་གཟིགས་ན་འདིར་གནོན།]
ཤྲཱི ཀཱི བ ཏ སྶཽ ག ཏ ཏ ཤྩ སཱུ ཏྲེ སཱུ ཀྟེ ཀྵུ ཀོ རྫཾ བ ར ནོ སུ ནཱ ཁྱཱ། དཔལ་གྱི་མགུར་ནས་བདེ་བར་གཤེགས་པའི་མདོ། །ལེགས་གསུངས་ཤཱཀྱའི་སྐྱེས་མཆོག་སླུ་མེད་བཀའ། །ཡ སྨི ཉྩ ས པྟ མྦྷ ཏ རཱ ཛྙཱ མཱ དཱ རྠཱ ྉྤ ཉྩ ཤཱ དཱ ྉྤ྄ ཏི ནེ ཏྲ ནཱ དྱཾ། །ཇི་བཞིན་ཐུབ་ཆེན་མཆེད་བདུན་བཞེད་པའི་དོན། །ལྔ་བརྒྱའི་འགྲོ་རྣམས་མངོན་སུམ་ཉམས་མྱོང་ཤོག །(༡༢༦བ) སོག་ཙནྡན་དགོན་ཕྱོགས་སུ་ཡོན་བདག་རྣམས་ཀྱི་སྲོག་བླུ་ཚེ་ཐར་མང་པོ་བྱེད་ཡོང་འདུག་པ་དེའི་དུས་སུ་འདོན་རྒྱུ་གནང་བའི་སྨོན་ལམ་ཚིགས་བཅད་སོགས།― GLG021_Page_0254 ―
[མ་དཔེ་གཟིགས་ན་འདིར་གནོན།]
ཀུན་ལ་སྲོག་གཅེས་དེ་ཕྱིར་ར་ལུགས་ཕྱུགས། །འཆི་བདག་ལག་ནས་བླུས་ཏེ་རིང་པོ་རུ། །འཚོ་ཐབས་མི་འཇིགས་སྐྱབས་ཀྱི་སྦྱིན་པའི་སྒོ། །རྒྱུ་སྦྱོར་ཡོན་གྱི་བདག་པོས་ཆེ་བའི་དགེ །རབ་དཀར་ལེགས་བྱས་ཀ་པུ་ར་ཡི་རྡུལ། །འབུམ་ཕྲག་ལྷག་བསམ་ཟླ་བ་ལས་འཛགས་པས། །མཁའ་མཉམ་སྐྱེ་རྒུའི་ཚ་གདུང་མ་ལུས་པ། །ཡོངས་བཅིལ་ཕན་བདེའི་སྣང་བས་ཀུན་ཁྱབ་ཤོག །ཁྱད་པར་དངོས་ཀྱི་བྱེད་པོ་ཡང་སྲིད་ཀུན། །མི་ཡི་ལུས་ཐོབ་ཚེ་ཡང་རིང་དུ་འཚོ། །ལོ་ཏོག་སྨན་རྣམས་མཐུ་ལྡན་རྣམ་སྨིན་དང༌། །རྒྱུ་མཐུན་བདག་པོའི་འབྲས་བུས་ཆེས་དཀར་ཤོག །དཀོན་ཅོག་གསུམ་གྱི་ཐུགས་རྗེ་ཐོགས་པ་མེད། །ཆོས་ཉིད་གདོད་ནས་དག་པ་འགྱུར་བ་བྲལ། །ཆོས་ཅན་རྒྱུ་འབྲས་ནམ་ཡང་སླུ་མེད་ཕྱིར། །ཇི་ལྟར་སྨོན་པ་ལྷུན་གྱིས་གྲུབ་པར་ཤོག །གནས་སྐབས་སུ་ཡང་ཡུལ་ཕྱོགས་འདི་དག་ཏུ། །མི་ནད་ཕྱུགས་ནད་འཐབ་རྩོད་འཁྲུག་སློང་སོགས། །དུས་ཀྱི་ཆད་པ་མ་ལུས་ཀུན་ཞི་ཞིང༌། །བཀྲ་ཤིས་དགའ་སྟོན་དཔལ་གྱིས་ཁྱབ་པར་ཤོག །ཅེས་སོག་ཙནྡན་དགོན་ཕྱོགས་སུ་ཡོན་བདག་རྣམས་ཀྱི་སྲོག་བླུ་ཚེ་ཐར་མང་པོ་བྱེད་ཡོང་འདུག་པ་དེའི་དུས་སུ་འདོན་རྒྱུའི་སྨོན་ལམ་ཞིག་དགོས་ཞེས་བླ་མ་བློ་བཟང་ཆོས་དཔལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །མདུན་གྱི་ནམ་མཁར་པད་ཟླའི་གདན་སྟེང་དུ། །སྒྲོལ་དཀར་ཡིད་བཞིན་འཁོར་ལོ་མངོན་སུམ་དུ། །བཞུགས་ནས་འཇམ་དབྱངས་དགའ་བའི་བཤེས་གཉེན་ཞབས། །འཆི་མེད་རྡོ་རྗེའི་སྐུ་རུ་འགྲུབ་བྱིན་རློབས། །ཐུབ་པའི་གསུང་རབ་དེ་དོན་དགོངས་འགྲེལ་བའི། །རྒྱ་བོད་(༡༢༧ན) ― GLG021_Page_0255 ―
[མ་དཔེ་གཟིགས་ན་འདིར་གནོན།]
མཁས་པའི་བསྟན་བཅོས་དང་བཅས་པ། །འཛད་མེད་པར་དུ་བརྐོས་ནས་མཆོད་སྦྱིན་སྒོ། །འབྱེད་ལ་ཐུགས་རྗེའི་སྤྱན་གྱིས་ཉེ་བར་གཟིགས། །འགྲོ་བའི་དབང་པོར་རྣམ་འཕྲུལ་མཐའ་ཀླས་ཀྱང༌། །ངོ་བོ་གཅིག་ལས་མི་གཡོ་རྒྱལ་བའི་ཡུམ། །སེང་ལྡེང་ནགས་ཀྱི་སྒྲོལ་མའི་ཟློས་གར་གྱིས། །འཇིགས་ཆེན་བརྒྱད་སོགས་འཚེ་བ་ཀུན་ལས་སྐྱོབས། །བསྐལ་འཚོའི་ཚེ་དང་རྨུགས་འཛིན་བང་མཛོད་ནོར། །ལྷ་དབང་བསོད་ནམས་གཙུག་ན་ཟླ་བའི་སྟོབས། །མདོར་ན་སྲིད་གཞིའི་ལེགས་ཚོགས་ཡོད་དོ་ཅོག །ལྷན་ཅིག་ལོངས་སུ་སྤྱོད་པའི་སྐལ་ཐོབ་མཛོད། །ཡིག་རྐོས་ལས་རྣམས་གེགས་མེད་ཚེགས་ཆུང་འགྲུབ། །འབྲས་བུ་གནས་སྐབས་ལྷ་མིའི་གོ་འཕང་ཐོབ། །རིང་མིན་བྱང་ཆུབ་ཆེན་པོའི་རྒྱལ་སྲིད་ལ། །དབང་སྒྱུར་འགྲོ་རྣམས་ཕན་བདེའི་སར་སྦྱོར་ཤོག །ཅེས་པ་འདི་ཡང་དགའ་ལྡན་ཕུན་ཚོགས་གླིང་གི་པར་རྐོས་པ་རྣམས་ཀྱི་ཁ་ཏོན་དུ་དགོས་ཞེས་པར་ཞུས་རབ་འབྱམས་པ་དགེ་འདུན་ཆོས་འཕེལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །གང་གི་ཆེད་དུ་བྱས་དང་བྱེད་འགྱུར་བའི། །དགེ་བས་བློ་བཟང་བསྟན་པ་རྒྱ་མཚོའི་མིང༌། །འཛིན་པ་གནས་ངན་འཆིང་གྲོལ་མངོན་མཐོའི་རྟེན། །མྱུར་དུ་ཐོབ་པའི་སྐལ་བ་ལྡན་པར་ཤོག །ཅེས་པ་འདི་ནི་མཚོ་སྣ་སྐུ་སྐྱེ་དུས་ཀྱི་ཆོས་ཉིད་དུ་གྱུར་པའི་ཚེ་གྲྭ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །(༡༢༧བ) ― GLG021_Page_0256 ―
[མ་དཔེ་གཟིགས་ན་འདིར་གནོན།]
ནཱ ཋ ཨཱ ཤྩ ཪྻ མཱུ རྟི སྶུ ཁཱི སྠཱ ན ཡོཿ ། བདེ་ལྡན་ཞིང་གི་མགོན་པོའི་ངོ་མཚར་སྐུ། །རི་མོར་བྲིས་པའི་བསོད་ནམས་གང་ཐོབ་དེས། རེ ཁ ལེ ཁཱི ནི པུ ཎྱཱ ཡ ཡོ ཡཱ སྟ ཐཱ། བྱེད་པོ་ཉིང་མཚམས་སྦྱར་ཚེ་འོད་དཔག་མེད། །མངོན་སུམ་ལྟ་ཞིང་དམ་པའི་ཆོས་མྱོང་ཤོག །ཀཱ རུ ཀཱ ལ མྲྀ ཏོ ཨཱ ཡུ ནོ མེ ཡ ཡོཿ ། བདེ་བ་ཅན་ཞིང་བཀོད་པ་རྒྱལ་བའི་གསུང༌། །གསེར་སྦྱངས་ཞུན་མས་བྲིས་འདིས་སྦྱིན་པའི་བདག །བྷཱ ཏོ དྲྀ ཥྟ སཱ དྡྷ རྨ ཡོ སྭཱ ད ཡཱ ཏུ། ཕྱི་མ་བར་དོ་མེད་པར་པདྨའི་སྦུབས། །རྫུས་སྐྱེས་ཐེག་མཆོག་ཆོས་ལ་སྤྱོད་པར་ཤོག །ཅེས་པ་འདི་ནི་དགེ་སློང་ཕུན་ཚོགས་རྒྱ་མཚོས་འོད་དཔག་མེད་ཀྱི་སྐུ་བརྙན་དང་བདེ་བ་ཅན་གྱི་ཞིང་བཀོད་བཞེངས་པའི་ཚེ་སྨོན་ལམ་གྱི་ཚིགས་བཅད་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །བློ་ཆེན་བསྐལ་བཟང་རྣམ་འདྲེན་ཙོང་ཁ་པའི། །བསྟན་འཛིན་བདེ་ལྡན་ཞིང་(༡༢༨ན) ― GLG021_Page_0257 ―
[མ་དཔེ་གཟིགས་ན་འདིར་གནོན།]
ཁམས་མྱུལ་བཞེད་པ། །ཕྱོགས་འདིར་འགྲོ་དོན་དུས་ལ་བབས་གྱུར་ན། །སྤྲུལ་སྐུའི་གར་བསྒྱུར་དེ་སྨོན་ལྷུན་གྲུབ་ཤོག །ཅེས་པ་འདི་ཡང་རྒྱལ་ཁང་རྩེ་བའི་རྗེས་འཇུག་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའ། །རྣམ་པར་སྣང་མཛད་ཐུགས་རྗེའི་ཆུ་རྒྱུན་གྱིས། །ཐོག་མེད་བསགས་པའི་སྡིག་ལྟུང་དྲི་མ་ཀུན། །རབ་བཀྲུས་བློ་བཟང་དངོས་གྲུབ་མངོན་མཐོའི་རྟེན། །ལེགས་ཐོབ་རིང་མིན་བྱང་ཆེན་སར་བགྲོད་ཤོག །ཅེས་སྟག་རུ་བ་བློ་བཟང་དངོས་གྲུབ་ཀྱི་ཕྱི་རྟེན་ཐང་ཀའི་རྒྱབ་ཡིག་ཏུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་ཕུན་ཚོགས་དབང་པོའོ། །མཁྱེན་བརྩེ་ནུས་པ་མངའ་བའི་བདེ་བར་གཤེགས། །བདེན་པ་གཉིས་དང་ལྡན་པ་དམ་པའི་ཆོས། །བྱང་འཕགས་དགེ་འདུན་རྣམས་ལ་སྐྱབས་སུ་མཆི། །སྨོན་དང་འཇུག་པའི་བྱང་ཆུབ་སེམས་མཆོག་བསྐྱེད། །གསང་བ་ཀུན་འདུས་མི་བསྐྱོད་ཚེ་དཔག་མེད། །རང་བཞིན་གནས་ནས་གཟུགས་ཀྱི་སྐུར་ཤར་བའི། །སྤྱན་སྔར་བསོད་ནམས་ཚོགས་གསོག་རིག་འཛིན་གྱི། །སྤྱི་དང་བྱེ་བྲག་སྡོམ་ལ་བརྩོན་པར་བགྱི། །གདོད་ནས་དག་པའི་རྩིབས་སྟེང་ཁྲོ་བོ་བཅུས། །བསྐོར་དབུས་ཞེ་སྡང་རྡོ་རྗེའི་ལྟ་སྟངས་མཐུས། །གནོད་མཛེས་དྲག་ཤུལ་སྤྱོད་པས་བགེགས་ཀྱི་དཔུང༌། །མཐར་བྱས་སྲུང་བའི་གུར་ཁང་ལྷུན་གྲུབ་བཞུགས། །འཁོར་འདས་ཆོས་ཀུན་སྟོང་མཚན་སྨོན་མེད་དང༌། །ཡེ་ཤེས་ཚོན་རིས་གཞལ་ཡས་གདན་བཅས་སྟེང༌། །ལྷག་མོས་འོད་གསལ་ཆོས་སྐུའི་ལམ་ཁྱེར་ལས། །དང་པོའི་(༡༢༨བ) ― GLG021_Page_0258 ―
[མ་དཔེ་གཟིགས་ན་འདིར་གནོན།]
མགོན་པོ་ལོངས་སྤྱོད་རྫོགས་སྐུར་བཞུགས། །མཁའ་ཁྱབ་འགྲོ་བྱིན་བརླབ་སྤྲུལ་མི་བསྐྱོད་ཚོགས། །དབྱེར་མེད་རྡོར་སེམས་སྤྲུལ་སྐུའི་ཕུང་པོ་ཁམས། །སྐྱེ་མཆེད་གཤེགས་སེམས་ཁྲོ་བོར་ཡོངས་རྫོགས་པ། །བདག་ཉིད་རྗེ་བཙུན་བླ་མར་གསོལ་བ་འདེབས། །གསང་གསུམ་བདེ་བ་ཆེན་པོར་ཞུ་བའི་དཔྱིད། །གནས་གསུམ་རྩ་འཁོར་ལ་ཐིམ་བྱིན་བརླབས་པས། །སྒོ་གསུམ་མི་ཤིགས་རྡོ་རྗེའི་རང་བཞིན་དུ། །གདན་གསུམ་ཚང་བའི་མགོན་ཁྱོད་བརྟན་པར་བཞུགས། །མཁའ་དང་མཁའ་སྦྱོར་ཇི་བཞིན་སྙོམས་བཞུགས་པས། །ཟག་མེད་བདེ་ཆེན་དྲངས་པའི་བདུད་རྩིའི་རྒྱུན། །བརྟེན་པའི་ལྷ་རྣམས་ཚིམ་བཅུད་སྲོག་ཟུངས་སུ། །གྱུར་ནས་རང་དོན་ཕུན་ཚོགས་གྲུབ་ཁྱོད་བཞུགས། །རྗེས་ཆགས་ལྷ་ཚོགས་ལྷག་བསམ་གྱིས་བཞུའི་ཁམས། །བཙུན་མོའི་མཁའ་ནང་གཞན་དོན་དཀྱིལ་འཁོར་པ། །འཕྲོ་འདུའི་རྒྱལ་པོ་མཆོག་གིས་འགྲོ་བའི་རྒྱུད། །སྦྱངས་ནས་ངེས་ལེགས་ས་ལ་འགོད་དེ་བཞུགས། །བརྟན་པའི་ང་རྒྱལ་ཕྲ་རགས་གསལ་སྣང་ཚོགས། །མགོན་ཁྱོད་ཡིད་ངོར་ཞེ་སྡང་རྡོ་རྗེའི་གར། །བསྒྱུར་བའི་གོམ་སྟབས་གཅིག་གིས་བདུད་བཞིའི་དཔུང༌། །ཟིལ་མནན་གདུལ་བྱའི་དཔལ་དུ་འཚོ་གཞེས་བཞུགས། །ལྷ་སྔགས་ཡེ་ཤེས་འཇུག་པ་གཅིག་པའི་གདངས། །སྤྲོ་དང་བསྡུ་བའི་ཞི་རྒྱས་དབང་དང་དྲག །གྲུབ་པ་ཆེ་བརྒྱད་འཕྲིན་ལས་རྒྱལ་མཆོག་གི །འགྲོ་འདྲེན་དམ་བཅའ་ཡོལ་བ་མེད་དེ་བཞུགས། །གཞན་རྐྱེན་ཞི་བདེའི་དབྱིངས་འཇུག་ཉེར་བསྡོག་པར། ཁྲིམས་ལྡན་འདུས་པའི་ཚད་མེད་ལྷ་མོ་བཞིས། །བསྐུལ་འབྲས་བསྐལ་བརྒྱར་མངོན་སུམ་སྤྱོད་ཡུལ་དུ། །ཞལ་(༡༢༩ན) ― GLG021_Page_0259 ―
[མ་དཔེ་གཟིགས་ན་འདིར་གནོན།]
འཆེས་རྡོ་བའི་རི་མོ་ཇི་བཞིན་བཞུགས། །བགྲང་ཡས་ལུས་སྤྲུལ་སྒོ་གསུམ་གུས་ཕྱག་འཚལ། །ཕྱི་ནང་གསང་བ་དེ་ཉིད་མཆོད་སྤྲིན་འབུལ། །སྡིག་ལྟུང་ཉེས་པ་ཅི་མཆིས་སྙིང་ནས་བཤགས། །ཚོགས་གཉིས་ཕུང་པོ་བསགས་སོ་ཅོག་ལ་རངས། །རྡོ་རྗེ་ཐེག་པའི་ཆོས་འཁོར་བསྐོར་བར་བསྐུལ། །བསྐལ་མཐའི་བར་དུ་མྱ་ངན་མི་འདར་གསོལ། །འདིས་མཚོན་དུས་གསུམ་བསགས་དང་གསོག་འགྱུར་དགེ །འགྲོ་ཀུན་ཟུང་འཇུག་སྐུ་བཞི་ཐོབ་ཕྱིར་བསྔོ། །དྷཱུ་ཏཱིའི་མས་སྣར་དཀར་དམར་ཐིག་ལེར་སེམས། །བཟུང་བས་དབབ་ལྡོག་དགའ་བཞི་ཉེར་དྲངས་པས། །རིགས་བརྒྱ་ལ་སོགས་ལུས་དབེན་སྐུ་རྡོ་རྗེའི། །མི་གཡོ་ཏིང་འཛིན་བརྟན་པོར་རྟག་ཏུ་བཞུགས། །སྔགས་བཟླས་རྫས་ཀྱི་སོག་སྩོལ་རྣམ་གསུམ་གྱིས། །ལས་རླུང་མི་ཤིགས་ཐིག་ལེར་རབ་བསྡུས་པས། །རྩ་མདུད་གྲོལ་དབུས་འོད་གསལ་ངག་དབེན་པ། །གསུང་གི་རྡོ་རྗེའི་ངོ་བོ་ཉིད་དུ་བཞུགས། །སྙིང་གའི་ཨ་དང་རྗེས་གཞི་བུམ་ཅན་ལ། །གནད་དུ་བསྣུན་པས་སྟོང་པ་གསུམ་གྱི་སེམས། །རྣམ་པར་དབེན་པའི་དཔེ་ཡི་འོད་གསལ་བ། །ཐུགས་ཀྱི་རྡོ་རྗེའི་རང་བཞིན་གཡོ་མེད་བཞུགས། །འོད་ཟེར་ལྔ་ལྡན་རླུང་སེམས་རོ་གཅིག་ལས། །མཚན་དཔེའི་རྒྱན་སྤྲས་མ་དག་སྒྱུ་འཕྲུལ་གར། །བཅུ་གཉིས་དཔེས་མཚོན་བགྲང་ཡས་གདུལ་བྱ་ལ། །ངོ་མཚར་སྤྲུལ་པའི་བཀོད་པ་བརྟན་པར་བཞུགས། །སྟོང་ཉིད་ཨེ་དབྱིངས་ཝཾ་ཡིག་འཇའ་ཚོན་ལུས། །ཞུགས་ཏེ་དབྱེར་མེད་སྦྱངས་པས་ལྷན་སྐྱེས་ཀྱི། །དོན་དམ་འོད་གསལ་གནས་ལུགས་མངོན་སུམ་དུ། །རྟོགས་པས་གཞོམ་ཞིག་བྲལ་བའི་སྐུ་(༡༢༩བ) ― GLG021_Page_0260 ―
[མ་དཔེ་གཟིགས་ན་འདིར་གནོན།]
རུ་བཞུགས། །བཞོན་པའི་རླུང་ལས་དག་པ་སྒྱུ་ལུས་སུ། །ལངས་མཐར་རྣམ་གྲོལ་དོན་གྱི་འོད་གསལ་དང༌། །མཚན་དཔེའི་སྐུ་གཉིས་དངོས་པོ་གཅིག་པ་ཡི། །སློབ་པའི་ཟུང་འཇུག་མངོན་དུ་མཛད་ཁྱོད་བཞུགས། །ཕྱི་ནང་རྐྱེན་གྱི་ཤེས་སྒྲིབ་དྲུང་ཕྱུངས་ཏེ། །མི་སློབ་ཟུང་འཇུག་ཁ་སྦྱོར་ཡན་ལག་བདུན། །ལྷུན་གྲུབ་དཀྱིལ་འཁོར་རྒྱ་མཚོ་སྤྲོ་བསྡུའི་ཆེད། །འཁོར་བ་སྟོངས་མིན་ཆོས་འཁོར་བསྐོར་ཕྱིར་བཞུགས། །མ་དག་གདུལ་བྱར་ལོངས་སྤྱོད་རྫོགས་པའི་སྐུ། །སྣང་བར་མ་གྱུར་ངག་དབང་བློ་ཡི་གཏེར། །མཁས་བཙུན་བཟང་པོས་རྒྱ་མཚོའི་གོས་ཅན་གཞིར། །འཁོད་པའི་སྐྱེ་རྒུའི་གཉེན་ཁྱོད་ཞབས་བརྟན་ཤོག །སྲིད་ཞིའི་ལེགས་ཚོགས་ཀུན་གྱི་སྲོག་གཅིག་པུར། །རབ་སོང་རྒྱལ་བའི་ཡབ་ཅིག་ཙོང་ཁ་པའི། །ལུང་རྟོགས་བསྟན་པ་རྒྱ་ཧོར་བོད་ཡུལ་གྱིས། །མཚོན་པའི་འཇིག་རྟེན་ཁམས་སུ་རྒྱས་པར་ཤོག །གངས་ཅན་རིག་འཛིན་མགྲིན་སྔོན་རལ་པའི་རྩེར། །འདུས་པའི་དགེ་འདུན་དཀོན་ཅོག་ཟླ་ཚེས་པ། །དཔལ་ལྡན་སྨད་རྒྱུད་གྲྭ་ཚང་ས་གསུམ་གྱི། །འགྲོ་བའི་བསོད་ནམས་ཞིང་དུ་འཕེལ་བར་ཤོག །འཇམ་དཔལ་རྡོ་རྗེ་ཁྲོས་པ་མ་ཧེའི་ཞལ། །བླ་མགོན་དབྱེར་མེད་མྱུར་མཛད་ཕྱག་དྲུག་པ། །ལས་ཀྱི་གཤིན་རྗེ་ལྷ་ཆེན་ཉི་མའི་སྲས། །དམ་ཅན་སྲུང་མས་འདོད་པའི་དོན་ཀུན་སྒྲུབས། །མཁའ་ལ་གཟའ་སྐར་བཟང་བ་འཕྲོད་ཀྱི་དགེ །འཛིན་མར་བཀྲ་ཤིས་གཡང་དུ་ཆགས་པའི་དུས། །མཆོག་གསུམ་ཐུགས་རྗེ་བསྐུལ་བའི་བདེན་པའི་ཚིག །བསླུ་མེད་རྟེན་འབྲེལ་མཐུ་ལས་འགྲུབ་བྱིན་རློབས། །ཞེས་དཔལ་ལྡན་འདུས་པའི་རིམ་པ་གཉིས་ཀྱི་ལམ་ལ་གསོལ་འདེབས་དང་རིང་འཚོའི་བརྗོད་(༡༣༠ན) ― GLG021_Page_0261 ―
[མ་དཔེ་གཟིགས་ན་འདིར་གནོན།]
དོན་སྦྱར་བ་ཞིག་དགོས་ཞེས་ཁ་བའི་ལྗོངས་འདིར་རིག་སྔགས་འཆང་བའི་གཙུག་རྒྱན་དཔལ་ལྡན་སྨད་རྒྱུད་གྲྭ་ཚང་གི་སློབ་དཔོན་ངག་དབང་བློ་གྲོས་རྒྱ་མཚོས་ཐོག་དྲངས་འདུས་ཚོགས་རྣམས་ཀྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །བདུད་བཞིའི་དཔུང་གིས་མི་གཡོ་གཏུམ་པོ་ཆེར། ཁྲག་འཐུང་ཕྱག་དྲུག་མྱུར་མཛད་མགོན་པོ་སོགས། །སྣ་ཚོགས་འདོད་ལྷས་ཡོངས་བསྐོར་བཞེངས་པའི་འབྲས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ཞེས་སྡེ་པ་གདོང་ནས་བློ་བཟང་བསྟན་འཛིན་དབང་རྒྱལ་གྱིས་རྗེ་བཙུན་མི་གཡོ་མགོན་པོའི་བྲིས་ཐང་བཞེངས་པའི་རྒྱབ་ཡིག་ཏུ་ཟ་ཧོར་གྱི་བནྡེས་བྲིས། །འཁོར་འདས་ཡོངས་ཀྱི་ཕྱག་རྒྱ་གླང་པོའི་མགོར། །འཇམ་མགོན་གདོང་ལྔའི་དབང་པོའི་མཐུ་སྟོབས་སྡེར། །བསྣུན་པས་སྣང་སྲིད་ཟིལ་གནོན་ཚེ་བདག་གིས། །མཆོག་དང་ཐུན་མོང་དངོས་གྲུབ་མ་ལུས་སྩོལ། །རབ་དཀར་ཀཱ་ཤི་ཀ་ཡི་མཚོ་ནང་དུ། །རྒྱ་བོད་མཁས་གྲུབ་དུ་མའི་རྒྱུ་སྐར་གཟུགས། །ཤར་བའི་མོད་ལ་སྐྱེ་རྒ་ན་འཆིའི་མུན། །རབ་སངས་གཏན་བདེའི་ཉི་འོད་ལྡེ་བར་ཤོག །བརྒྱ་ཕྲག་རྗེ་བཙུན་བརྟན་པའི་འཁོར་ལོའི་སྐུ། །བཞེང་པའི་རྒྱུ་སྦྱར་ཏེ་སེའི་ཡབ་གཅིག་གི །གཙུག་ཏོར་ལས་བབས་དགེ་ཚོགས་གངྒཱའི་ཆབ། །རང་རྒྱུད་སྒྲིབ་བཀྲུའི་ཞབས་བསིལ་སྦྲེང་བར་ཤོག །ཅེས་ཡར་སྟོད་སྐྱམ་པ་སྔགས་བཙུན་ངག་དབང་ཆོས་འཛིན་གྱིས་རྗེ་དགེ་འདུན་གྲུབ་ཀྱི་འཁྲུངས་རབ་གྲ་ཚར། འཇམ་དབྱངས་ཀྱི་བརྒྱ་ཐང༌། འཇམ་དཔལ་ཚེ་(༡༣༠བ) ― GLG021_Page_0262 ―
[མ་དཔེ་གཟིགས་ན་འདིར་གནོན།]
བདག་གི་སྐུ་ཐང་རྣམས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་ཕུན་ཚོགས་དབང་པོའོ། །ཁྱོད་བསྒྲུབས་ཞི་ཁྲོ་ཀུན་བསྙེན་ཆིག་ཐུབ་སྨན། །པདྨ་ཐོད་འཕྲེང་ཡབ་ཡུམ་རྡོ་རྗེ་འཆང༌། །སྐྱབས་མཆོག་གསང་འདུས་བླ་མའི་བརྒྱ་ཕྲག་སྐུ། །བཞེངས་པས་བསམས་དོན་ལྷུན་གྲུབ་རྩེ་དགོད་ཤོག །ཅེས་ཆོས་དབང་རིན་པོ་ཆེའི་ཐུགས་སྲས་མཚན་ལྡན་ཉི་མའི་གདུང་འཛིན་བྲག་སྣ་ཆོས་རྗེ་བློ་བཟང་ངག་དབང་གིས་བླ་མ་གསང་འདུས་ཀྱི་བརྒྱ་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བྲིས། །སངས་རྒྱས་ཀུན་གྱི་མཁྱེན་དང་བརྩེ། །ནུས་མཐུའི་བདག་ཉིད་རིགས་གསུམ་མགོན། །དབྱེར་མེད་རྗེ་བཙུན་བཙོང་ཁ་པས། །བྱིན་རླབས་དངོས་གྲུབ་ཆར་ཆེན་སྩོལ། །མོས་པའི་དབང་གིས་གོར་མའི་ངོས། །ཤཱ་རཱི་རམ་བཞིན་འདྲེན་པ་རུ། །ངེས་རྙེད་འདྲ་འབག་བཞེངས་པའི་དགེས། །འདི་ཕྱིའི་གཏན་མདུན་འགྲུབ་པར་ཤོག །ཅེས་ཧོར་བར་ཏ་ཆོས་མཛད་ཀྱིས་རྒྱལ་བ་ཙོང་ཁ་པའི་སྐུ་དང་འདི་ཀའི་གཟུགས་བརྙན་བྲིས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་དབང་ངོ༌། །བསྐལ་བཟང་འདྲེན་པ་བཞི་པའི་སྣང་བརྙན་ལ། །རྒྱལ་དང་དེ་སྲས་དུ་མས་ཡོངས་བསྐོར་བ། །བཞེངས་འབྲས་འཁོར་ལོས་མཚན་པའི་ཕྱག་གི་མཐིལ། །སྤྱི་བོར་བཞག་ནས་བདག་བྱིན་བརླབ་ཏུ་གསོལ། །གངས་ཅན་བློ་གསལ་ཡོངས་ཀྱི་བསྙེམས་པའི་རྐང༌། །མཁས་བཙུན་བཟང་པོའི་རྡོ་རྗེ་གདེངས་ཙམ་གྱིས། །མཐར་བྱེད་ཐུབ་བསྟན་འཆི་མེད་ཡོངས་ཀྱི་བདག །གྲགས་པའི་མུ་ཁྱུད་ཁྱོད་(༡༣༡ན) ― GLG021_Page_0263 ―
[མ་དཔེ་གཟིགས་ན་འདིར་གནོན།]
ཀྱིས་བདག་རྗེས་ཟུངས། །ཞེས་གོང་དཀར་མདོ་པ་ཆོས་མཛད་ངག་དབང་ལྷུན་གྲུབ་ཀྱིས་རྒྱལ་བ་བུ་རམ་ཤིང་པ་དང་ཀུན་མཁྱེན་བཙོང་ཁ་པ་ཆེན་པོའི་སྐུ་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །འཕྲོག་བྱེད་ཀྱིས་བཏེག་རིན་ཅེན་ཕྲས་བརྒྱན་ཁྲི། །འདབ་སྟོང་ཉི་ཟླ་ཟུང་འཇུག་གདན་སྟེང་དུ། །སྲས་བཅས་རྒྱལ་བའི་ངོ་བོར་རིགས་ཀུན་གྱི། །དབང་ཕྱུག་རྗེ་བཙུན་བླ་མ་བརྟན་གྱུར་ཅིག །དག་པའི་མཚམས་སྦྱོར་སྨོན་ལམ་ཆུ་གཏེར་གློང༌། །སྔོན་གོམས་ལེགས་བྱས་ཛམྦུའི་ལྗོན་པའི་འབྲས། །རོ་གཅིག་ཕན་བདེའི་གསེར་གྱི་སྙེ་མ་ལ། །སྤྱོད་པའི་སྐལ་པ་བཟང་པོར་འགྱུར་བར་ཤོག །ཅེས་པ་འདི་ཡང་ཡར་འབྲོག་དཔལ་དེ་བ་བསོད་ནམས་རྒྱལ་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་ཕུན་ཚོགས་དབང་པོའོ། །ནུབ་ཕྱོགས་བདེ་ལྡན་ཞིང་གི་འདྲེན་པ་མཆོག །ཚེ་དང་འོད་སྣང་དཔག་མེད་པདྨའི་ལྗགས། །ལྡེམ་ལྡེམ་བརྐྱངས་རྩེར་བསྟོད་བསྔགས་བུང་བའི་དབྱངས། །རབ་བླང་རྗེ་བཙུན་རྣམ་པར་རྒྱལ་མའི་ཞབས། །གང་གི་གཟུངས་སྔགས་བཀླགས་དང་དྲན་པས་ཀྱང༌། །གཏན་བདེའི་བདུད་རྩེའི་མཆོག་སྦྱིན་སྩལ་བའི་མོད། །མེ་ལོང་ངོས་སུ་ལས་ཀྱི་དཀར་ནག་གཟུགས། །མ་ཤར་ཆི་བདག་སྐྱེངས་པས་ས་འོག་བྲོས། །དེ་ཕྱིར་དང་བའི་ཡིད་ཀྱིས་གསོལ་འདེབས་ན། །ཕན་བདེའི་རྩ་ལག་རྒྱལ་བའི་བསྟན་པ་རྒྱས། །རྗེས་འཛིན་དམ་པའི་མགོན་མཆོག་ཞབས་པད་བརྟན། །འགྲོ་ཀུན་བདེ་སྐྱིད་ནོར་ལ་སྤྱོད་པར་ཤོག །(༡༣༡བ) ― GLG021_Page_0264 ―
[མ་དཔེ་གཟིགས་ན་འདིར་གནོན།]
དགའ་བའི་དཔལ་ལྡན་རྣམ་པར་རྒྱལ་བའི་སྡེར། །ཚུལ་ཁྲིམས་དག་པའི་ཞིང་ས་གཤིན་པ་ལ། །ཆོས་སྤྱོད་རྣམ་བཅུའི་མྱུ་གུ་རྒྱས་པའི་རྩེར། །ངེས་པར་ལེགས་པའི་སྙེ་མ་སྨིན་པར་ཤོག །དམ་པ་ཆོས་བཞིན་བསྲུང་བར་ཞལ་འཆེས་དང༌། །ལྷ་དང་དྲང་སྲོང་རིག་པ་འཛིན་པ་སོགས། །བདེན་ཚིག་གྲུབ་པ་རྣམས་ཀྱི་ནུས་མཐུ་ཡིས། །ཇི་ལྟར་སྨོན་པ་ལྷུན་གྱིས་གྲུབ་པར་ཤོག །ཅེས་བརྟན་བཞུགས་སྨོན་ལམ་གྱི་རིམ་པ་འདི་ནི་རྡོ་དགའ་ལྡན་རྣམ་རྒྱལ་དུ་འཛུགས་རྩིས་ཀྱི་བསྟན་པ་དར་རྒྱས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །བདེ་བར་གཤེགས་པ་སུམ་ཅུ་རྩ་ལྔའི་སྐུ། །རབ་བཞེངས་བསོད་ནམས་ས་བོན་ཡོངས་སྨིན་པས། །དམིགས་ཡུལ་གྱུར་པའི་ལུས་ཅན་མངོན་མཐོ་དང༌། །ངེས་ལེགས་སྙེ་མ་གཡུལ་དུ་ཟ་བར་ཤོག །ལྔ་པར་སོང་རྣམས་སྡུག་ཀུན་ལས་ཐར་ཕྱིན། །དགེ་འདུན་འདུས་པའི་གཙུག་ན་མཁས་གྲུབ་དབང༌། །ངོ་མཚར་སྤྲུལ་པའི་སྣང་བརྙན་ཚེས་ཀྱི་གྲངས། །བསྐྲུན་པའི་འབྲས་བུ་ཡོལ་མེད་སྨིན་པར་ཤོག །ཤེས་རབ་ཕ་རོལ་ཕྱིན་ཡུམ་འདུ་བྱས་པའི། །དགེ་བས་ཚ་དུས་འདས་རྣམས་སྡུག་བསྔལ་ཚོགས། །དོན་དམ་སྤྲོས་བྲལ་དབྱིངས་སུ་ཡོངས་དག་ནས། །ཀུན་རྫོབ་སྲིད་ཞིའི་སིམ་པ་མྱོང་བར་ཤོག །རྡོ་རྗེ་བཙུན་མོས་རྗེས་སུ་གནང་བའི་མཐུས། །པཎ་ཆེན་འཇིགས་མེད་ཀྱིས་བཀྲལ་རྒྱུད་སྡེ་བཞིའི། །ཆུ་ཚོན་དཀྱིལ་འཁོར་བྲིས་ལས་ཆེད་གཏད་རྣམས། །རིང་མིན་བཅུ་གསུམ་ས་ཆེན་བརྙེས་པར་ཤོག །ཅེས་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱིས་རང་གི་མཆེད་པོ་རྣམས་ཀྱི་དོན་དུ་བྲིས་ ― GLG021_Page_0265 ―
[མ་དཔེ་གཟིགས་ན་འདིར་གནོན།]
འབུར་གྱི་རྟེན་བཞེངས་པའི་དགེ་བ་བསྔོ་བའི་ཚིགས་བཅད་དགོས་ཚུལ་བྱུང་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །བུ་རམ་ཤིང་པའི་གསུང་རབ་ཀུན་གྱི་བཅུད། །འཁོར་ལོ་བར་པའི་སྙིང་པོ་ཤོ་ལོ་ཀ །ཁྲི་ཕྲག་གཉིས་དང་ཆིག་སྟོང་བརྒྱད་བརྒྱ་པ། །ངོ་མཚར་གླེགས་བམ་བཞེངས་པའི་ལེགས་བྱས་མཐུས། །བློ་བཟང་དངོས་གྲུབ་ཐོག་མེད་ཚེ་རབས་ནས། །ད་ལྟའི་བར་བསགས་སྡིག་ལྟུང་ཀུན་བྱང་སྟེ། །ངན་སོང་གསུམ་གྱི་དུ༔ཁས་མི་བརྫི་བར། །མངོན་མཐོའི་རྟེན་བཟང་བརྒྱུད་མར་འཐོབ་པར་ཤོག །ལྷ་དང་མི་ཡི་ཐེམ་སྐས་ལ་བརྟེན་པར། །དགེ་བའི་གོམ་སྟབས་ལྷོད་པོར་ཉེར་འཛེགས་ཏེ། །ཐར་པ་མྱ་ངན་འདས་པའི་ཁང་བཟང་དུ། །བགྲོད་ནས་གཏན་བདེའི་དགའ་སྟོན་ལ་སྤྱོད་ཤོག །རང་ཉིད་ཞི་བ་དོན་གཉེར་ཙམ་མིན་པའི། །ནམ་མཁའ་དང་མཉམ་སེམས་ཅན་དོན་གྱི་ཆེད། །རྣམ་པ་ཐམས་ཅད་མཁྱེན་པའི་གོ་འཕང་མཆོག །རིང་པོར་མི་ཐོགས་མྱུར་བར་མངོན་འགྱུར་ཤོག །འདི་དང་ཚེ་རབས་དུ་མར་ཉེ་འབྲེལ་ཀུན། །བྱང་ཆེན་བརྙེས་པའི་ཐོག་མའི་འདུས་པ་རུ། །གྱུར་ནས་དམ་པའི་ཆོས་ཀྱི་བདུད་རྩི་ཡིས། །ཚིམ་པར་བྱས་ཏེ་སྲིད་མཚོ་ལས་སྒྲོལ་ཤོག །ཅེས་སྟག་རུ་བ་བློ་བཟང་དངོས་གྲུབ་ཀྱི་ཕྱི་རྟེན་དུ་དེ་བཞིན་གཤེགས་པའི་གསུང་རབ་ཉི་ཁྲི་དང་བརྒྱད་སྟོང་པ་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །ཁྱད་མཚན་ཙནྡན་དྲི་བསུང་འཐུལ་བའི་མོད། །འཆི་བདག་ཚ་བའི་གདུང་བ་རབ་བཅིལ་བའི། །ཚེ་མཐའ་ཡས་དང་བཅོམ་ལྡན་ ― GLG021_Page_0266 ―
[མ་དཔེ་གཟིགས་ན་འདིར་གནོན།]
རྣམ་རྒྱལ་མ། །ཡིད་བཞིན་འཁོར་ལོའི་སྤྱན་གྱིས་བཙའ་བར་མཛོད། །ཐུབ་པའི་བསྟན་ལ་རྗེས་ཞུགས་ཀློག་པ་མཁན། །ཞྭ་སེར་རིང་ལུགས་དར་ཞིང་རྒྱས་མཛད་པ། །དུས་ཀྱི་ཕོ་ཉའི་མཆེ་བ་ལས་ཐར་ཏེ། །རྡོ་རྗེ་ལྟ་བུར་གཡོ་མེད་ཞབས་བརྟན་ཤོག །དཀོན་ཅོག་རིན་ཅེན་རྣམ་གསུམ་མཐུ་སྟོབས་ཀྱིས། །འགྲོ་བའི་བླ་མ་མཁན་ཆེན་དམ་པ་གང༌། །བསྐལ་པ་རྒྱ་མཚོར་འཚོ་ཞིང་རབ་གཞེས་པར། །སྨོན་ལམ་བཏབ་པའི་རེ་འབྲས་ལྷུན་གྲུབ་ཤོག །ཅེས་ར་སྒྲེང་མཁན་ཟུར་པ་བསྟན་པ་དར་རྒྱས་ཀྱི་བརྟན་བཞུགས་ཀྱི་བདེན་པ་བརྗོད་པ་འདི་ནི་གྲྭ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་ནམ་མཁའོ། །བདེ་བར་གཤེགས་པ་ཀུན་གྱི་ཐུགས་རྗེ་རྣམས། །སྙིགས་དུས་འགྲོ་ངོར་བཤེས་གཉེན་ཚུལ་འཛིན་པ། །རྗེ་བཙུན་བླ་མ་དམ་པར་གསོལ་བ་འདེབས། །བྱིན་རླབས་བདག་གི་སྙིང་ལ་འཇུག་པར་མཛོད། །བཟོད་དཀའ་ངན་སོང་སྡུག་བསྔལ་གནས་ནས་དྲོངས། །མངོན་མཐོ་ལྷ་མིའི་རྟེན་བཟང་དག་ལ་སྦྱོར། །སངས་རྒྱས་བསྟན་དང་མཇལ་ཞིང་དམ་པའི་ཆོས། །རྩེ་གཅིག་ཉམས་སུ་ལེན་པར་བྱིན་གྱིས་རློབས། །སྐྱེ་སྲིད་རིམ་བཞིན་ཐར་པའི་ལམ་ལ་ཞུགས། །མཁའ་ཉམས་འགྲོ་ལ་མ་བཟོད་སྙིང་རྗེའི་མཐུས། །རྒྱུ་འབྲས་ཐེག་པའི་གོམ་སྟབས་ལ་བརྟེན་ནས། །རིང་མིན་བླ་མེད་བྱང་ཆུབ་ཐོབ་པར་ཤོག །ཅེས་པའི་གསོལ་འདེབས་སྨོན་ལམ་འདི་ནི་ཆ་ཀར་ཐི་ཡན་ཆིའི་ཚབ་དགེ་འདུན་རྒྱལ་མཚན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འཇམ་དཔལ་(༡༣༣ན) ― GLG021_Page_0267 ―
[མ་དཔེ་གཟིགས་ན་འདིར་གནོན།]
རྡོ་རྗེའི་ངག་ལ་དབང་འབྱོར་བློ། །སྐལ་བཟང་གདུལ་བྱ་རྒྱ་མཚོའི་མགོན་གྱུར་པ། །དཔལ་ལྡན་བླ་མའི་ཞབས་སེན་ཟླ་ཚེས་བར། །མོས་པའི་གཙུག་ཏོར་གྱིས་འདུད་གསོལ་བར་འདེབས། །སྐྱེ་བར་ཞྭ་སེར་ཅོད་པན་འཛིན་པ་ཡི། །བསྟན་ལ་རྗེས་ཞུགས་ཚུལ་ཁྲིམས་རྣམ་པར་དག །མདོ་དང་སྔགས་ཀྱི་ཆོས་ཚུལ་མ་ལུས་པ། །སྟོན་པའི་བཤེས་གཉེན་དམ་པས་རྗེས་འཛིན་ཤོག །དབུ་མའི་ལྟ་དང་ཟབ་ལམ་རིམ་པ་ལྔ། །ཟུང་དུ་འབྲེལ་བའི་རྣལ་འབྱོར་ལ་བརྟེན་ནས། ཁ་སྦྱོར་བདུན་ལྡན་གོ་འཕང་མངོན་གྱུར་ཏེ། །འགྲོ་ཀུན་འདྲེན་པའི་དེད་དཔོན་བྱེད་པར་ཤོག །ཅེས་པའི་གསོལ་འདེབས་སྨོན་ལམ་དང་འབྲེལ་བ་འདི་ནི་དགེ་སློང་ཤེས་རབ་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བདེ་ལྡན་ཞིང་གི་མགོན་པོ་ཚེ་དཔག་མེད། །རྨད་བྱུང་ཐུགས་རྗེ་ལུས་ཕྲའི་འགྲམ་ཆང་གིས། །བཤེས་གཉེན་དམ་པའི་སྐུ་ཚེ་བ་ཀཱུ་ལ། །རབ་རྒྱས་སྲིད་མཐའི་བར་དུ་བརྟན་པར་ཤོག །གང་དེས་ལེགས་བསྔགས་གཙུག་ཏོར་རྣམ་པར་རྒྱལ། །རྨད་བྱུང་ཐུགས་རྗེ་ལུས་ཕྲའི་འགྲམ་ཆང་གིས། །བཤེས་གཉེན་དམ་པའི་སྐུ་ཚེ་བ་ཀཱུ་ལ། །རབ་རྒྱས་སྲིད་མཐའི་བར་དུ་བརྟན་པར་ཤོག །སངས་རྒྱས་ཀུན་གྱི་ཡིད་བཞིན་འཁོར་ལོ་མ། །རྨད་བྱུང་ཐུགས་རྗེ་ལུས་ཕྲའི་འགྲམ་ཆང་གིས། །བཤེས་གཉེན་དམ་པའི་སྐུ་ཚེ་བ་ཀཱུ་ལ། །རབ་རྒྱས་སྲིད་མཐའི་བར་དུ་བརྟན་པར་ཤོག །རྗེ་བཙུན་བཅོམ་ལྡན་སེང་ལྡེང་ནགས་སྒྲོལ་མས། །བདག་ཅག་དཔོན་སློབ་ཆོས་སྲིད་འཕེལ་བ་དང༌། །ཇི་ལྟར་སྨོན་པ་བཞིན་ལ་བར་གཅོད་པའི། །བགེགས་རིགས་ཀུན་ཞི་བསམས་དོན་འགྲུབ་པར་ཤོག །ལེགས་ལྡན་ནག་པོ་ལྷ་ཆེན་ཕྱག་དྲུག་པས། །བདག་ཅག་དཔོན་སློབ་ཆོས་སྲིད་འཕེལ་བ་དང༌། །ཇི་ལྟར་སྨོན་པ་བཞིན་ལ་བར་གཅོད་པའི། །བགེགས་རིགས་ཀུན་ཞི་བསམས་དོན་འགྲུབ་པར་ཤོག །ལས་ཀྱི་གཤིན་(༡༣༣བ) ― GLG021_Page_0268 ―
[མ་དཔེ་གཟིགས་ན་འདིར་གནོན།]
རྗེ་ཆོས་ཀྱི་རྒྱལ་པོ་ཡིས། །བདག་ཅག་དཔོན་སློབ་ཆོས་སྲིད་འཕེལ་བ་དང༌། །ཇི་ལྟར་སྨོན་པ་བཞིན་ལ་བར་གཅོད་པའི། །བགེགས་རིགས་ཀུན་ཞི་བསམས་དོན་འགྲུབ་པར་ཤོག །དཔལ་ལྡན་ལྷ་མོ་འདོད་ཁམས་དབང་ཕྱུག་མས། །བདག་ཅག་དཔོན་སློབ་ཆོས་སྲིད་འཕེལ་བ་དང༌། །ཇི་ལྟར་སྨོན་པ་བཞིན་ལ་བར་གཅོད་པའི། །བགེགས་རིགས་ཀུན་ཞི་བསམས་དོན་འགྲུབ་པར་ཤོག །ཅེས་རིང་འཚོའི་ཚིགས་བཅད་སྨོན་ལམ་དང་བཅས་པ་འདི་ནི་མྱུག་ལེགས་བཤད་ཆོས་གླིང་གི་སློབ་དཔོན་ཕུན་ཚོགས་ཆོས་འཕེལ། གཉེར་པ་དཀའ་བཅུ་བློ་བཟང་ཚེ་རིང༌། བློ་བཟང་རྣམ་རྒྱལ། འདུས་ཚོགས་སྤྱི་དང་བཅས་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དཀོན་ཅོག་རིན་ཅེན་རྣམ་གསུམ་ཐུགས་རྗེ་ཡིས། །ཡངས་པའི་ནོར་འཛིན་ཁྱོན་ལ་དབང་སྒྱུར་བ། །མི་ཡི་བདག་པོ་འགྱུར་མེད་རབ་བརྟན་ཅིང༌། །མངའ་འབངས་མ་ལུས་བདེ་བར་ལོངས་སྤྱོད་ཤོག །མཐུ་སྟོབས་རྩལ་ལྡན་དམ་ཅན་སྲུང་མ་ཡིས། །རྨད་བྱུང་ཐུགས་རྗེ་ལུས་ཕྲའི་འགྲམ་ཆང་གིས། །བཤེས་གཉེན་དམ་པའི་སྐུ་ཚེ་བ་ཀཱུ་ལ། །རབ་རྒྱས་སྲིད་མཐའི་བར་དུ་བརྟན་པར་ཤོག །དགེ་འདུན་འདུས་པའི་ཚོགས་ཀྱིས་བདེན་བརྗོད་མཐུས། །ཡངས་པའི་ནོར་འཛིན་ཁྱོན་ལ་དབང་སྒྱུར་པ། །མི་ཡི་བདག་པོ་འགྱུར་མེད་རབ་བརྟན་ཅིང༌། །མངའ་འབངས་མ་ལུས་བདེ་བར་ལོངས་སྤྱོད་ཤོག །ས་ཆེན་སྐྱོང་བའི་བརྟན་བཞུགས་འདི་ནི་སློབ་དཔོན་གཉེར་བ་གཉིས་དང་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཨོཾ་སྭ་སྟི། དཀོན་ཅོག་རིན་ཅེན་གསུམ་གྱི་ཐུགས་རྗེ་ཡིས། །ཨུ་ཆུ་མུ་ཆུ་ཆེ་ཆེན་ཆིང་ཝང་གང༌། །སྐྱེ་བར་འབྲལ་མེད་རྗེས་སུ་འཛིན་པ་ཡི། །སྨོན་པ་(༡༣༤ན) ― GLG021_Page_0269 ―
[མ་དཔེ་གཟིགས་ན་འདིར་གནོན།]
ཇི་བཞིན་ལྷུན་གྱིས་འགྲུབ་བྱིན་རློབས། །ཞེས་པ་འདི་ཡང་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་འཇམ་དཔལ་ལོ། །སྒོ་གསུམ་བག་ཡོད་བསྡམས་པའི་ཞིང་ས་རུ། །ཚུལ་ཁྲིམས་སྙེ་མ་གཡུར་ཟའི་མནྜལ་འདི། །ཡང་དག་བཤེས་གཉེན་དམ་པར་འབུལ་ལགས་ན། །ཐུབ་བསྟན་གནས་པ་དེ་སྲིད་བརྟན་པར་ཤོག །བྱིང་རྒོད་གཡེང་བྲལ་རྟ་ལྗང་གིས་དྲངས་པའི། །རྩེ་གཅིག་ཏིང་འཛིན་ཟླ་ཤེལ་མནྜལ་འདི། །ཡང་དག་བཤེས་གཉེན་དམ་པར་འབུལ་ལགས་ན། །ཐུབ་བསྟན་གནས་པ་དེ་སྲིད་བརྟན་པར་ཤོག །ཆོས་ཉིད་འགྱུར་མེད་ཆོས་ཅན་རྒྱུ་འབྲས་ཀྱི། །འབྱུང་ཚུལ་གཡོ་མེད་རྟེན་འབྲེལ་མཎྜལ་འདི། །ཡང་དག་བཤེས་གཉེན་དམ་པར་འབུལ་ལགས་ན། །ཐུབ་བསྟན་གནས་པ་དེ་སྲིད་བརྟན་པར་ཤོག །རྒྱལ་རྣམས་སྤང་རྟོགས་མཉམ་ཡང་སྙིགས་དུས་འདིར། །ཐུགས་རྗེ་ལྷག་པར་ཆེ་བའི་བདེ་གཤེགས་བརྒྱད། །བདེན་པའི་ཚིག་གི་དཔང་པོར་གསོལ་འདེབས་ན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །ལྔ་སྟོང་བཞི་བརྒྱ་ང་གསུམ་མཚན་སྙན་གྱིས། །འགྲོ་བའི་དབུགས་འབྱིན་མཐས་ཀླས་བདེ་གཤེགས་ཀྱི། །བདེན་པའི་ཚིག་གི་དཔང་པོར་གསོལ་འདེབས་ན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །བསྐལ་བཟང་འདི་ཡི་སྒྲོན་མེ་ཐམས་ཅད་མཁྱེན། །བྱོན་དང་འབྱུང་འགྱུར་སྟོང་ཕྲག་ཐུབ་པ་ཆེ། །བདེན་པའི་ཚིག་གི་དཔང་པོར་གསོལ་འདེབས་ན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །(༡༣༤བ) ― GLG021_Page_0270 ―
[མ་དཔེ་གཟིགས་ན་འདིར་གནོན།]
རྒྱལ་བསྟན་དེ་སྲིད་མྱ་ངན་མི་འདའ་བར། །འགྲོ་བའི་མགོན་མཛད་གནས་བརྟན་བཅུ་དྲུག་གོ །བདེན་པའི་ཚིག་གི་དཔང་པོར་གསོལ་འདེབས་ན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །སྤྲུལ་པའི་དགེ་བསྙེན་ཆོས་འཕེལ་ཧཱ་ཤང་དང༌། །སྟོབས་ལྡན་རྒྱལ་པོ་ཆེན་པོ་སྡེ་བཞིའི་ཚོགས། །བདེན་པའི་ཚིག་གི་གྲོགས་སུ་གསོལ་འདེབས་ན། །བསམས་པ་ཇི་བཞིན་འགྲུབ་པའི་འཕྲིན་ལས་མཛོད། །གཙང་རིས་དཔལ་མགོན་བདུན་ཅུ་རྩ་ལྔ་སོགས། །དཀར་ཕྱོགས་སྐྱོང་བའི་སྲུང་མ་མཐུ་རྩལ་ཅན། །བདེན་པའི་ཚིག་གི་དཔང་པོར་གསོལ་འདེབས་ན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །འཇིག་རྟེན་ཁམས་སུ་ནད་མུག་འཐབ་རྩོད་པའི། །དུས་ཀྱི་ཆད་པ་ནམ་ཡང་མི་འབྱུང་ཞིང༌། །རིང་པོར་འཚོ་བའི་ཚེ་དང་ལོངས་སྤྱོད་ཀྱི། །ཕུན་ཚོགས་དགའ་སྟོན་ཆེན་པོས་ཁྱབ་པར་ཤོག །དགེ་འདུན་སྡེ་རྣམས་ཁྲིམས་གཙང་ཆོས་སྤྱོད་འཕེལ། །མི་བདག་ཚོགས་ཀུན་བརྟན་ཅིང་མངའ་ཐང་རྒྱས། །ལྷ་སྲིན་འབྱུང་པོ་རྩུབ་སེམས་རབ་ཞི་ནས། ཁམས་གསུམ་མ་ལུས་བདེ་བའི་བཀྲ་ཤིས་ཤོག །ཅེས་རིང་འཚོའི་ཚིགས་བཅད་སྨོན་ལམ་དང་བཅས་པ་འདི་ནི་མ་བྱོན་སངས་རྒྱས་ལྔ་པ་ཁ་ཆེའི་པཎྜི་ཏ་ཆེན་པོ་བསོད་སྙོམས་པ་ཤཱཀྱ་ཤྲིའི་རིང་ལུགས་འཛིན་པ་མཚན་སྒྲོག་མཁན་ཆེན་ངག་དབང་འཕྲིན་ལས་ཀྱི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དཔལ་གྲགས་པའོ། །ཆོས་ཀུན་ཟད་མཐར་འཁྱོལ་བ་རྡོ་རྗེའི་སྐུ། །གཞོམ་མེད་འཇའ་ལུས་མཚན་དཔེའི་གར་མཁན་མ། །འཇམ་མཉེན་འདབ་བརྒྱའི་སྦུབས་ནས་ཐོན་པའི་མོད། །གྲུབ་པའི་ཚེ་དབང་རིགས་འཛིན་བདག་ལ་སྩོལ། །པདྨའི་ཟེའུ་འབྲུར་ཡིད་འོང་མཛེས་པའི་སྐུ། །(༡༣༥ན) གནས་བརྟན་བཅུ་དྲུག་ལས་བརྩམས་པའི་རིང་འཚོའི་ཚིགས་བཅད་སོགས་བཞུགས་སོ།།― GLG021_Page_0271 ―
[མ་དཔེ་གཟིགས་ན་འདིར་གནོན།]
གནས་བརྟན་བཅུ་དྲུག་ལས་བརྩམས་པའི་རིང་འཚོའི་ཚིགས་བཅད་སོགས་བཞུགས་སོ།།རང་བཞིན་གནས་ནས་ཐུབ་དབང་ཤཱཀྱའི་རྒྱལ། །ཐེག་པ་གསུམ་གྱི་དགེ་འདུན་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་འཁོར་འདས་གདུང་ཞི་དར་རྒྱས་ཤིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །གངས་ཅན་རི་ནས་གནས་བརྟན་ཡན་ལག་འབྱུང༌། །ཆིག་སྟོང་གསུམ་བརྒྱའི་དགྲ་བཅོམ་འཁོར་(༡༣༥བ) ― GLG021_Page_0272 ―
[མ་དཔེ་གཟིགས་ན་འདིར་གནོན།]
དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ཁྲིམས་དག་ཉོན་མོངས་ཉེར་ཞི་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །དྲང་སྲོང་རི་ཡི་ངོས་ནས་མ་ཕམ་པ། །བརྒྱ་ཕྲག་གཅིག་གི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་སྤངས་རྟོགས་ཡོན་ཏན་འཐོབ་འགྱུར་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །ལོ་མ་བདུན་པའི་ཕུག་ནས་ནགས་ན་གནས། །ཆིག་སྟོང་བཞི་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་གནོད་བྲལ་ལོག་རྟོག་མུན་སེལ་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །འཛམ་བུའི་ཟངས་ཀྱི་གླིང་ནས་དུས་ལྡན་ནི། །བརྒྱ་(༡༣༦ན) ― GLG021_Page_0273 ―
[མ་དཔེ་གཟིགས་ན་འདིར་གནོན།]
ཕྲག་གཅིག་གི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་སྤངས་རྟོག་ཡོན་ཏན་ཐོབ་འགྱུར་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །སིངྒཱའི་གླིང་ནས་རྡོ་རྗེ་མ་ཡི་བུ། །སྟོང་ཕྲག་གཅིག་གི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ཞི་འདུན་དོན་རྣམས་ལེགས་འགྲུབ་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །ཆུ་བོ་ཡ་མུའི་གླིང་ནས་བཟང་པོ་ནི། །ཆིག་སྟོང་ཉིས་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ཆོས་མཁས་ཏིང་འཛིན་འབྲས་སྨིན་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། ཁ་ཆེའི་ཡུལ་ནས་གནས་བརྟན་གསེར་གྱི་བེའུ། །བརྒྱ་ཕྲག་ལྔ་ཡི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་གཟུངས་སྤོབས་ཡོན་ཏན་འཐོབ་བྱེད་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །བ་ལང་སྤྱོད་ནས་བྷ་ར་དྷཱ་ཛ་གསེར། །བརྒྱ་ཕྲག་བདུན་གྱི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་འབྱོར་རྒྱས་གནས་ལུགས་མངོན་གྱུར་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །པྲི་ཡངྐུ་ཡི་གླིང་ནས་སྒྲ་གཅན་འཛིན། །ཆིག་སྟོང་ཆིག་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ཉེས་འཇོམས་ཆོས་ཀུན་དོན་རྟོགས་ཤིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །བྱ་རྒོད་ཕུང་པོའི་རི་ནས་ལམ་ཕྲན་བསྟན། །སྟོང་དང་དྲུག་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ཉོན་མོངས་སྡུག་བསྔལ་མེ་ཞི་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །ལུས་འཕགས་གླིང་ནས་དྷཱ་ཛ་བསོད་སྙོམས་ལེན། །སྟོང་ཕྲག་གཅིག་གི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་བཟོད་དཀའི་སྡུག་བསྔལ་དང་བྲལ་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །སུམ་ཅུ་རྩ་གསུམ་ཡུལ་ནས་ལམ་བསྟན་ནི། །བརྒྱ་ཕྲག་དགུ་ཡི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་སྤོབས་མཐོ་བློ་གྲོས་རབ་འཕེལ་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་(༡༣༦བ) ― GLG021_Page_0274 ―
[མ་དཔེ་གཟིགས་ན་འདིར་གནོན།]
དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །རི་རྒྱལ་ངོས་ནས་གནས་བརྟན་ཀླུ་ཡི་སྡེ། །ཆིག་སྟོང་ཉིས་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་འདོད་ཡོན་བསམ་འཕེལ་ནད་རྣམས་ཞི། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །རི་རྒྱལ་བི་ཧུ་ལ་ནས་སྦེད་བྱེད་ནི། །ཆིག་སྟོང་བཞི་བརྒྱའི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་ལྔ་རིག་ཉོན་མོངས་དག་འགྱུར་ཞིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །གངས་ཅན་རི་ནས་གནས་བརྟན་མི་ཕྱེད་པ། །སྟོང་ཕྲག་གཅིག་གི་དགྲ་བཅོམ་འཁོར་དང་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་སྡིག་ཞི་འདོད་དོན་ཀུན་འགྲུབ་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །གནས་བརྟན་རྣམས་ཀྱི་ཉེ་བར་གནས་པ་རུ། །དགེ་བསྙེན་ཆོས་འཕེལ་རྫུ་འཕྲུལ་མཐུ་ལྡན་པ། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་གདུལ་བྱ་མ་ལུས་ཡོངས་སྨིན་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །ཕྱོགས་བཞིའི་གནས་ནས་རྒྱལ་ཆེན་སྡེ་བཞི་པོ། །རྩལ་སྟོབས་ལྡན་པའི་འཁོར་ཚོགས་རྒྱ་མཚོར་བཅས། །འདིར་སྤྱོན་བསྟན་དང་འགྲོ་བའི་བདེ་སྐྱིད་སྤེལ། །སྡེ་འདིར་བསྲུང་སྐྱོབ་མཐུན་རྐྱེན་སྒྲུབ་མཛད་ཅིང༌། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུགས་འཛིན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་རབ་བརྟན་ཅིང༌། །བཞེད་པའི་དོན་ཀུན་ལྷུན་གྱིས་འགྲུབ་བྱིན་རློབས། །སྙིང་ནས་མི་ཕྱེད་དད་པས་ལེགས་བཏབ་པའི། །སྨོན་ལམ་ས་ཧ་ཀ་རའི་སྡོང་པོ་ལ། །འདོད་དོན་རོ་བདའི་འབྲས་བུ་ཡོངས་སྨིན་ཏེ། །དུས་ཀུན་ཚར་དུ་དངར་བའི་(༡༣༧ན) ― GLG021_Page_0275 ―
[མ་དཔེ་གཟིགས་ན་འདིར་གནོན།]
བཀྲ་ཤིས་ཤོག །ཅེས་གནས་བརྟན་བཅུ་དྲུག་ལས་བརྩམས་པའི་རིང་འཚོའི་ཚིགས་བཅད་འདི་ནི་བསམ་གཏན་རྩེར་འཛུགས་རྩིས་ཀྱི་བྱིང་པ་བློ་བཟང་ཆོས་ལྡན་གྱིས་བསྐུལ་བ་ལ་བརྟེན་ནས་འདོད་སྦྱར་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །སྒྲིབ་གསུམ་རྒྱ་ལས་རྣམ་གྲོལ་སྤང་རྟོགས་ཀྱི། །ཡོན་ཏན་མཐར་ཕྱིན་སངས་རྒྱས་བདེན་པའི་མཐུས། །འཇམ་དབྱངས་དགའ་བའི་བཤེས་གཉེན་རབ་བརྟན་ཅིང༌། །འཁོར་བ་དེ་སྲིད་འཕྲིན་ལས་ཆད་མེད་ཤོག །འགྲོ་ཀུན་ཞི་བ་ལ་སྦྱོར་ཐེག་གསུམ་གྱི། །ལུང་དང་རྟོགས་པའི་དམ་ཆོས་བདེན་པའི་མཐུས། །འཇམ་དབྱངས་དགའ་བའི་བཤེས་གཉེན་རབ་བརྟན་ཅིང༌། །འཁོར་བ་དེ་སྲིད་འཕྲིན་ལས་ཆད་མེད་ཤོག །མྱང་འདས་སྒྲུབ་གྲོགས་མཛད་ཅིང་ལུས་ཅན་གྱི། །བསོད་ནམས་ཞིང་གྱུར་དགེ་འདུན་བདེན་པའི་མཐུས། །འཇམ་དབྱངས་དགའ་བའི་བཤེས་གཉེན་རབ་བརྟན་ཅིང༌། །འཁོར་བ་དེ་སྲིད་འཕྲིན་ལས་ཆད་མེད་ཤོག །མཆོག་གསུམ་བདེན་པ་ནམ་ཡང་མི་སླུ་བའི། །རྒྱུ་འབྲས་རྟེན་ཅིང་འབྲེལ་བར་འབྱུང་བའི་མཐུས། །འཇམ་དབྱངས་དགའ་བའི་བཤེས་གཉེན་རབ་བརྟན་ཅིང༌། །འཁོར་བ་དེ་སྲིད་འཕྲིན་ལས་ཆད་མེད་ཤོག །ཐུབ་བསྟན་ལེགས་དར་རྒྱལ་བའི་བཀའ་ཁྲིམས་བཙན། །འཇིག་རྟེན་པ་རྣམས་རྟག་ཏུ་བདེ་ཞིང་སྐྱིད། །རྫོགས་ལྡན་བསྐལ་པ་གསར་དུ་དང་ཤར་པའི། །དགའ་སྟོན་མངོན་སུམ་མྱོང་བའི་བཀྲ་ཤིས་ཤོག །ཅེས་བདེན་པ་བརྗོད་པའི་ཚིགས་སུ་བཅད་པ་འདི་ནི་ངམ་རིང་མཁན་པོ་ངག་དབང་འོད་ཟེར་གྱི་གསུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་གྲགས་པའོ། །སྣོད་བཅུད་བདེ་ལྡན་(༡༣༧བ) ― GLG021_Page_0276 ―
[མ་དཔེ་གཟིགས་ན་འདིར་གནོན།]
ཞིང་ཁམས་སྐྱེ་འཕགས་གར། །སྣང་དབུས་ཁྲི་པད་ཉི་ཟླའི་གདན་སྟེང་དུ། །དཔལ་ལྡན་བླ་མ་ཚེ་དཔག་མེད་མགོན་སྐུར། །རབ་གསལ་འཁོར་བ་སྟོངས་མིན་རྟག་བརྟན་ཤོག །ཨ་ཧཾ་མི་འགྱུར་རྡོ་རྗེའི་ཀ་བ་ཅན། །སྙིང་དབུས་ཐབས་ཤེས་ཟླ་ཉིའི་གའུའི་ནང༌། །དངས་མའི་ཚེ་སྲོག་ཡིག་གཟུགས་འོད་བཀྲག་འཚེར། །བསྐལ་བརྒྱར་མི་ཕྱེད་གཡུང་དྲུང་ལྟར་བརྟན་ཤོག །པད་འབྱུང་ཡབ་ཡུམ་ཞལ་ལུང་ཆེས་མངར་བས། །ལེགས་བཏགས་གསང་མཚན་རྡོ་རྗེ་ཐོག་མེད་རྩལ། །སཱ་ལའི་སྨན་ལྗོངས་ཕན་བདེའི་ཉེར་འཚོ་རུ། །མི་འགྱུར་སྨོན་པའི་བདེན་ཚིག་ལྷུན་གྲུབ་ཤོག །ནོར་འཛིན་སྐྱོང་བའི་མི་དབང་ཞབས་བརྟན་ཅིང༌། །ཆོས་ལྡན་རྒྱལ་པོའི་ཁྲིམས་ཀྱིས་འཛམ་གླིང་ཁྱབ། །ཐུབ་བསྟན་བཤད་སྒྲུབ་དབྱར་མཚོ་ལྟ་བུར་འཕེལ། །འབངས་རྣམས་ལྷ་ཡི་དགའ་སྟོན་ལ་སྤྱོད་ཤོག །སླུ་མེད་དཀོན་ཅོག་གསུམ་གྱི་ཐུགས་རྗེ་དང༌། །བདེ་གཤེགས་རྒྱལ་བ་ཞི་ཁྲོའི་བྱིན་རླབས་སྟོབས། །འདོད་ཁམས་དབང་ཕྱུག་ལ་སོགས་སྲུང་མའི་མཐུས། །བསམས་པའི་དོན་ཀུན་ལྷུན་གྱིས་གྲུབ་པར་ཤོག །ཅེས་ངེད་རང་དང་སྡེ་པའི་རིང་འཚོ་བསྟན་འགྲོ་རྒྱས་པའི་སྨོན་ལམ་དང་བཅས་པ་འདི་ནི་གྲོང་སྨད་པ་སངས་རྒྱས་རྒྱ་མཚོས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་འཛུགས་རྒྱུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །རྒྱལ་བ་ཀུན་ཡུམ་ཡིད་བཞིན་འཁོར་ལོ་ཡི། །རབ་གསལ་ཡེ་ཤེས་སྤྱན་བདུན་རྟག་གཟིགས་ནས། །ངག་དབང་བློ་ལྡན་སྐལ་བཟང་སྐྱེ་རྒུའི་གཉེན། །བསྐལ་(༡༣༨ན) ― GLG021_Page_0277 ―
[མ་དཔེ་གཟིགས་ན་འདིར་གནོན།]
པ་རྒྱ་མཚོར་མི་གཡོ་ཞབས་བརྟན་ཤོག །སྤྱི་དང་ཁྱད་པར་འཇམ་མགོན་བཙོང་ཁ་པའི། །ལུགས་གཉིས་བསྟན་པ་རྒྱ་ཧོར་བོད་ཡུལ་སོགས། །འཛམ་གླིང་ཀུན་ཁྱབ་རྒྱས་པའི་བྱེད་པོ་རུ། །ངེས་པ་ལྔ་ལྡན་ཇི་བཞིན་བཞུགས་གྱུར་ཅིག །ཞྭ་སེར་ཅོད་པན་འཆང་བའི་སྲིད་ཀྱི་སྡེ། །གྱེན་དུ་བཏེག་པའི་ཕན་བདེའི་གདུགས་དཀར་པོའི། །གྲིབ་མར་འབངས་ཀུན་ངལ་གསོ་ལ་སྦྱོར་བའི། །ས་སྐྱོང་བློ་བཟང་མཐུ་སྟོབས་ཞབས་བརྟན་ཤོག །ལྗོངས་འདིར་ཐུབ་པའི་རིང་ལུགས་རབ་དར་བའི། །དཀོན་ཅོག་རྣམ་གསུམ་ཐུགས་རྗེའི་བྱིན་རླབས་ཀྱིས། །འགྲོ་རྣམས་དབུལ་ཕོངས་ནད་འཁྲུག་དང་བྲལ་ཞིང༌། །ཕུན་ཚོགས་བདེ་སྐྱིད་འདོད་དོན་ལྷུན་གྲུབ་ཤོག །ཡི་དམ་འཇམ་དཔལ་ཞི་དང་ཁྲོ་བོའི་གར། །ལེགས་ལྡན་ཕྱག་དྲུག་བསམ་འཕེལ་དབང་གི་རྒྱལ། །ལྷ་དང་དྲང་སྲོང་བདེན་ཚིག་འགྲུབ་པའི་མཐུས། །ཇི་ལྟར་སྨོན་པའི་འབྲས་བུ་ཡོངས་སྨིན་ཤོག །ཅེས་པ་འདི་ནི་གྲོང་སྨད་པ་སངས་རྒྱས་རྒྱ་མཚོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །མར་ཁུའི་རྒྱ་མཚོ་ཡོངས་སུ་འཁྱིལ་བའི་ཀོང༌། །ཕུན་ཚོགས་འོད་སྟོང་འབར་བའི་སྒྲོན་མེ་ཡིས། །མུན་པའི་བསྐལ་པ་མ་ལུས་མཐར་བྱས་ནས། །འགྲོ་རྣམས་སངས་རྒྱས་མངོན་སུམ་མཐོང་བར་ཤོག །ཅེས་ཀོང་རྒྱ་མཚོ་འོད་འབར་འདི་ནི་ས་སྐྱོང་བློ་བཟང་མཐུ་སྟོབས་ཀྱིས་ཕུལ་སྐབས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །རྩ་བརྒྱུད་བླ་མ་རྣམས་ཀྱི་བྱིན་རླབས་མཐུས། །ངག་དབང་བློ་གསལ་སྐལ་བཟང་རྒྱ་མཚོའི་སྡེ། །བསྐལ་བརྒྱའི་བར་དུ་རྡོ་རྗེ་ལྟར་བརྟན་ཅིང༌། །རྣམ་དཀར་འཕྲིན་ལས་ཕྱོགས་བཅུར་རྒྱས་པར་ཤོག །ཡི་དམ་ལྷ་ཚོགས་རྣམས་ཀྱི་བྱིན་རླབས་མཐུས། །ངག་དབང་བློ་གསལ་སྐལ་བཟང་རྒྱ་མཚོའི་སྡེ། །བསྐལ་བརྒྱའི་བར་དུ་རྡོ་རྗེ་ལྟར་བརྟན་ཅིང༌། །རྣམ་དཀར་འཕྲིན་ལས་ཕྱོགས་བཅུར་རྒྱས་པར་ཤོག །དམ་ཅན་ཆོས་སྐྱོང་སྲུང་མའི་མཐུ་རྩལ་གྱིས། །ངག་དབང་བློ་གསལ་(༡༣༨བ) ― GLG021_Page_0278 ―
[མ་དཔེ་གཟིགས་ན་འདིར་གནོན།]
སྐལ་བཟང་རྒྱ་མཚོའི་སྡེ། །བསྐལ་བརྒྱའི་བར་དུ་རྡོ་རྗེ་ལྟར་བརྟན་ཅིང༌། །རྣམ་དཀར་འཕྲིན་ལས་ཕྱོགས་བཅུར་རྒྱས་པར་ཤོག །བླ་མ་ཡི་དམ་སྲུང་མའི་བྱིན་རླབས་ཀྱིས། །མཁན་ཆེན་བསྟན་པ་དར་རྒྱས་གཡུང་དྲུང་ལྟར། །མི་འགྱུར་འདིར་འདུས་དགེ་འདུན་སྡེ་རྣམས་ཀྱི། །ཆོས་སྲིད་ལེགས་ཚོགས་ཟླ་བཞིན་འཕེལ་བར་ཤོག །ཇི་ལྟར་སྨོན་ལམ་བཏབ་པའི་འབྲས་བུ་ཀུན། །རབ་ཏུ་སྨིན་པའི་བསོད་ནམས་ཕུང་པོ་གང༌། །ནམ་མཁའི་མཐའ་དང་མཉམ་པའི་སེམས་ཅན་རྣམས། །བླ་མེད་བྱང་ཆུབ་འཐོབ་པའི་རྒྱུ་རུ་བསྔོ། །ཞེས་པ་འདི་ཡང་རྭ་སྒྲེང་མཁན་ཟུར་པའི་གྲྭ་མང་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྔོན་གོམས་སྨོན་ལམ་རྣམ་དག་མཐུ་བཙན་པས། །བསམས་བཞིན་སྤྲུལ་པའི་ཟློས་གར་ཟླ་ཚེས་པ། །ཉེས་བརྒྱ་སྒྲ་གཅན་མཆེ་བ་ལས་གྲོལ་ནས། །ཡོན་ཏན་ཆ་གང་གཡོ་མེད་བརྟན་པར་ཤོག །ཅེས་པ་འདི་ཡང་ཞབས་དྲུང་ངག་གི་དབང་ཕྱུག་གི་བཞེད་པ་བཞིན་བྲིས། །རྒྱལ་རྣམས་མངོན་སུམ་མཐོང་བའི་སྐལ་ཕྲ་བར། །དེ་གསུང་སྟོན་མཛད་དགེ་བའི་བཤེས་གཉེན་སྐུ། །རི་མོར་བྱས་པའི་བསོད་ནམས་རྒྱ་མཚོ་ཡིས། །སྐྱེ་བར་དམ་པའི་མགོན་གྱིས་རྗེས་འཛིན་ཤོག །ལྷ་སྔགས་གཞན་གྱི་ནུས་མཐུ་ཇེ་ཞན་ཚེ། །སྙིགས་དུས་བྱིན་རླབས་ཆེར་འབར་བདེར་གཤེགས་བརྒྱད། །ལེགས་(༡༣༩ན) ― GLG021_Page_0279 ―
[མ་དཔེ་གཟིགས་ན་འདིར་གནོན།]
བྱས་ཞིང་དུ་བསྐྲུན་འདིས་འཁོར་བ་ལས། །ཉེར་ཐར་མྱང་འདས་བདེ་ཆེན་སར་བགྲོད་ཤོག །རྣམ་འདྲེན་བཞི་པའི་བསྟན་པ་དེ་སྲིད་བར། །གཟུགས་སྐུའི་བཀོད་པ་མ་བསྡུས་ལུས་ཅན་དོན། །རབ་མཛད་འཕགས་པའི་གནས་བརྟན་ཚོགས་རྣམས་ཀྱི། །བྱིན་རླབས་རྒྱུ་སྦྱོར་བདག་སྙིང་ལ་སིམ་མཛོད། །རྒྱལ་འགོང་དམ་སྲིའི་ཚ་ངར་སྙིགས་དུས་འདིར། །བདོ་བའི་གཉེན་པོར་དབང་ཆེན་རྟ་མཆོག་དཔལ། །གར་དགུའི་ཉམས་ཀྱིས་རོལ་བའི་བརྟུལ་ཞུགས་རྩལ། །རྫོགས་པའི་ཁྲག་འཐུང་དཔའ་བོས་བྱིན་གྱིས་རློབས། །ཞེས་རྡོ་དགོན་པ་བ་བློ་བཟང་དོན་ལྡན་གྱིས་བླ་མ། སྨན་བླ། གནས་བཅུ། རྟ་མགྲིན་རྣམས་ཀྱི་ཞལ་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱིབནྡེས་སྦྱར་བའི་ཡི་གེ་པ་ནི་བཀྲས་རབ་པ་ཕུན་དབང་ངོ༌། །རྣམ་འདྲེན་ཡོངས་ཀྱི་མཁྱེན་བརྩེ་ནུས་པའི་དཔྱིད། །གསེར་ཞུན་ཅོད་པན་འཆང་བའི་ཟློས་གར་གྱིས། །ས་གསུམ་སྐྱེ་རྒུའི་མཆོད་སྡོང་གཅིག་པུ་པ། །བློ་བཟང་གྲགས་པས་དེང་འདིར་དགེ་ལེགས་སྩོལ། །གང་གི་ཐུགས་རྗེ་མཐའ་ཀླས་ཚེ་ཡི་ཁམས། །གཞུ་བླུགས་གཡུང་དྲུང་སྲོག་ཏུ་བཤེས་གཉེན་མཆོག །བྱིན་རླབས་འོད་མཚན་སྟོང་དུ་རབ་འབར་མགོན། །ཇི་བཞིན་བརྟན་པའི་སྨོན་པ་ལྷུན་གྲུབ་ཤོག །ངག་ལ་དབང་ཕྱུག་བརྗོད་པ་རྣམ་དག་སྒྲས། །བློ་ལྡན་ཀུན་གྱི་བསྙེམས་འཕྲོག་སྐལ་བཟང་ཅན། །རྒྱ་ཆེན་ཆོས་ཚུལ་མཚོ་བཞིན་གཏིང་ཟབ་པ། །སྟོན་མཛད་འོག་མིན་ཞིང་གཙོ་ལྟར་བརྟན་ཤོག །སྡེ་བཞི་གར་དུ་རྩེ་བའི་ཐང་ཡངས་པོར། །ལྔ་བརྒྱའི་དཔུང་གཉེན་འཇམ་མགོན་ཙོང་ཁ་པར། །(༡༣༩བ) ― GLG021_Page_0280 ―
[མ་དཔེ་གཟིགས་ན་འདིར་གནོན།]
ཀུན་བཟང་མཆོད་སྤྲིན་སྤྲོ་བའི་འདུས་པའི་གླིང༌། །སྲིད་མཐའི་བར་དུ་མི་ཉམས་འཕེལ་བར་ཤོག །བདུད་སྡེ་འཇིགས་བྱེད་འཇམ་དཔལ་གཤིན་རྗེ་གཤེད། །ལེགས་ལྡན་ཕྱག་དྲུག་ལྷ་ཆེན་ཉི་མའི་སྲས། །འདོད་ཁམས་དབང་ཕྱུག་ལ་སོགས་སྲུང་མ་ཡིས། །བསམས་པ་ཇི་བཞིན་འཕྲིན་ལས་ལྷུན་གྲུབ་མཛོད། །ཅེས་སྨོན་པ་འགྲུབ་པའི་ཚིགས་བཅད་འདི་ལྟ་བུ་ཞིག་དགོས་ཞེས་རྩེས་དང་ལྔ་མཆོད་པའི་འདུས་ཚོགས་སྤྱི་སོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །ཟས་གཙང་སྲས་ཀྱིས་ཆེད་དུ་བསྔགས་པའི་དབྱངས། །སྲིད་གསུམ་རྣ་བའི་རྒྱན་དུ་འབར་བའི་གཟིས། །འཆི་བདག་མུན་མཐར་བྱེད་པའི་བཅོམ་ལྡན་མ། །གཙུག་ཏོར་རྣམ་པར་རྒྱལ་མས་རིང་དུ་སྐྱོངས། །བློ་བཟང་སྙན་པའི་གྲགས་ལྡན་བཙོང་ཁ་པའི། །ཆོས་སྲིད་བླ་ནས་བླར་འདེགས་མཐུ་སྟོབས་ཅན། །ས་དབང་ཁྲིམས་ཀྱི་ཉི་མས་ཕན་དང་བདེའི། །འདབ་བརྒྱ་བསྐལ་པར་བཞད་ཕྱིར་ཞབས་བརྟན་ཤོག །དེང་འདིར་རྩེ་གཅིག་སྨོན་ལམ་ཡོངས་བཏབ་པའི། །འབྲས་བུ་བསམས་པ་ཇི་བཞིན་ལེགས་སྨིན་པར། །ལྷ་དང་དྲང་སྲོང་རིག་པ་འཛིན་རྣམས་ཀྱིས། །ལྷུན་གྱིས་གྲུབ་པའི་བདེན་ཚིག་བརྗོད་པར་ཤོག །ཅེས་བརྟན་བཞུགས་ཀྱི་ཚིགས་བཅད་འདི་ནི་རྩེས་དང་ལྔ་མཆོད་པ་སྤྱི་སོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །བློ་ལྡན་སྐལ་བཟང་རྣམ་པར་འདྲེན་པའི་གཙོ། །ཤཱཀྱ་སེང་གེའི་བསྟན་པ་རིན་པོ་ཆེར། །ཐོས་དང་བསམ་པའི་འཕྲིན་ལས་རྒྱུད་ཞུགས་(༡༤༠ན) ― GLG021_Page_0281 ―
[མ་དཔེ་གཟིགས་ན་འདིར་གནོན།]
པའི། །སྔོན་གོམས་བག་ཆགས་སད་ལ་གསོལ་བ་འདེབས། །རིང་བསགས་ལེགས་བྱས་ཟླ་བའི་མ་མ་ལ། །མཆོག་གསུམ་ཐུགས་རྗེ་བསྐུལ་བའི་ས་འཛིན་མས། །ཡོངས་བསྒྲིལ་མི་འགྱུར་བརྟན་པའི་ཉི་འོད་ཀྱིས། །རེ་འདོད་འདབ་བརྒྱ་བཞད་པའི་བཀྲ་ཤིས་ཤོག །ཅེས་པ་འདི་ལྟ་བུ་ཞིག་དགོས་ཞེས་ཤེས་རབ་བཟང་པོའི་ངོར་སྦྱར། །སྙིང་དབུས་རླུང་སེམས་དག་པའི་འོད་མཐའ་ཡས། །ཡབ་ཡུམ་དགའ་བཞིའི་འཆི་མེད་བྱང་སེམས་རྒྱུན། །རྩ་ཁམས་ལུས་ཁྱབ་བདེ་སྟོང་ཟུང་འཇུག་པས། །ཚེ་ལ་དབང་བའི་རིགས་འཛིན་འགྲུབ་པར་ཤོག །ཅེས་ཤླཽ་ཀ་གཅིག་ལ་འཆི་མེད་སྒྲུབ་ཚུལ་ཡོད་པ་ཞིག་དགོས་ཞེས་ཟུར་མངས་ཆོས་རྗེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བཀྲས་རབ་པ་ཕུན་དབང་ངོ༌། །ཆོས་རྣམས་ཀུན་གྱི་འབྱུང་གནས་རྒྱལ་བའི་ཡུམ། །གདོད་ནས་རང་བཞིན་དག་པ་སྤྲོས་བྲལ་མཁར། །སླུ་མེད་རྒྱུ་དང་འབྲས་བུ་དབང་པོའི་གཞུ། །འགོག་མེད་འཆར་བའི་རྟེན་འབྲེལ་བདེན་པའི་མཐུས། །བློ་བཟང་བསྟན་འཛིན་དལ་བའི་རྟེན་གྱི་གཟིངས། །ལེགས་རྙེད་སྲིད་པའི་མཚོ་ཆེན་ལས་བསྒྲལ་ཏེ། །མ་སྨད་ཐར་པའི་རིན་ཆེན་གླིང་མཆོག་ཏུ། །སྤྱོད་པའི་སྐལ་བ་བཟང་པོར་འགྱུར་བར་ཤོག །ཅེས་པ་འདིའང་དགེ་གཞོན་རྣམས་ཀྱིས་དབུ་མཛད་བློ་བཟང་བསྟན་འཛིན་གྱི་ཆེད་དུ་ཡུམ་ཆེན་མོའི་སྟོང་ཐང་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །རྒྱལ་ཀུན་ཡབ་ཅིག་མགོན་པོ་ཀུན་ཏུ་གཟིགས། །མཚམས་སྤྲིན་(༡༤༠བ) ― GLG021_Page_0282 ―
[མ་དཔེ་གཟིགས་ན་འདིར་གནོན།]
གོས་འཆང་བློ་བཟང་གྲགས་པའི་ཞབས། །དིང་དུས་ངོ་མཚར་རྨད་བྱུང་བཀོད་ཞིང་གཙོར། །འཇིགས་མེད་སེང་གེའི་ང་རོའི་དབྱངས་སྙན་ཀྱེ། །ཉེ་རིང་མེད་པ་ཐུགས་རྗེ་ཉི་མའི་ཟེར། །བདག་སོགས་མོས་བློའི་འདབ་སྟོང་ཡོངས་བཞད་ནས། །འདོད་དོན་སྦྲང་རྩི་དངར་པོའི་རོ་བདའ་བར། །འཛད་མེད་ལོངས་སུ་སྤྱོད་པར་བདག་བྱིན་རློབས། །མགོན་ཁྱོད་རིང་ལུགས་འཆད་རྩོད་རྩོམ་པ་ལ། །ངག་གི་དབང་ཕྱུག་གྲུབ་པའི་བློ་གྲོས་གཏེར། །མཁས་བཙུན་བཟང་པོའི་འཕྲིན་ལས་རྒྱ་མཚོའི་མཐར། །ཡོངས་ཁྱབ་བཤེས་གཉེན་དམ་པ་ཞབས་རྟན་ཤོག །ནོར་འཛིན་སྐྱོང་ལ་བློ་དང་བརྩོན་པ་ཡིས། །བསྐལ་བཟང་རྣམ་འདྲེན་བཞི་པའི་བསྟན་པ་མཆོག །འདེགས་པའི་མཐུ་ལྡན་སྟོབས་ཀྱིས་དབང་ཕྱུག་ཆེ། །རྡོ་རྗེ་ལྟ་བུར་ནམ་ཡང་གཡོ་མེད་ཤོག །གཏན་གྱི་སྐྱབས་གནས་རིན་ཆེན་རྣམ་པ་གསུམ། །བདེན་ཚིག་གྲུབ་པའི་ལྷ་དང་དྲང་སྲོང་རྣམས། །དཔང་པོར་བྱས་ཏེ་སྨོན་ལམ་བཏབ་པ་ཡིས། །འབྲས་བུ་ཇི་བཞིན་ལྷུན་གྱིས་འགྲུབ་པར་ཤོག །ཅེས་པ་འདི་ཡང་སྐུ་སྐྱེ་བློ་བཟང་བསྟན་འཛིན་གྱིས་ཤར་ཕྱོགས་བསྟན་པའི་སྒྲོན་མེ་དྭགས་པོ་གྲྭ་ཚང་དུ་འཛུགས་རྩིས་ཀྱི་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །འཛམ་གླིང་ཡོངས་ཀྱི་ཕུན་ཚོགས་ལོངས་སྤྱོད་རྣམས། །གཡས་འཁྱིལ་རིན་ཅེན་འདུས་པའི་ཡོལ་གོ་འདི། །བསྐྲུན་པས་དེང་ནས་བླ་མེད་བྱང་ཆུབ་བར། །ཆོས་སྲིད་འབྱོར་པའི་བཅུད་ཀུན་མྱང་བར་ཤོག །ཅེས་མཁས་མང་བློ་གསལ་གླིང་གི་ཚོགས་ཁྲོ་འཛམ་གླིང་གཡས་འཁྱིལ་དབུ་མཛད་བློ་བཟང་ཡོན་ཏན་གྱིས་བཞེངས་པར་ངག་དབང་བཟང་པོའི་(༡༤༡ན) ― GLG021_Page_0283 ―
[མ་དཔེ་གཟིགས་ན་འདིར་གནོན།]
གསེར་ཞོ་གང་གི་ཞལ་འདེབས་དང་བཅས་བཟོ་བྱེད་པའི་དོ་དམ་སྡེ་པ་འབོག་གོང་དབང་རྒྱལ་གྱིས་བགྱིས་པ་མངྒ་ལཾ། །རྒྱལ་ཀུན་འཆི་བདག་བདུད་བཅོམ་ས་བོན་རྣམས། །ཚེ་མཐའ་ཡས་སྐུར་སྨིན་པའི་ཐུགས་རྗེའི་འབྲས། །བསྐལ་བརྒྱར་རབ་འཚོའི་རོ་བདའ་རྟག་མྱོང་བའི། །བྱིན་རླབས་ཡོངས་འདུའི་གྲིབ་ཏུ་ངལ་གསོར་ཤོག །མཛོད་སྤུ་གཡས་འཁྱིལ་འོད་འབར་ཟེར་འཕྲེང་གིས། །ལྷ་ཆེན་ཉི་བུའི་སྨག་རུམ་མཐར་བྱས་ཏེ། །གཞོམ་མེད་སྲོག་གི་ཀ་བ་མི་འགྱུར་བའི། །གཏན་བདེའི་སྣང་བས་ཁྱབ་པའི་བཀའ་དྲིན་སྩོལ། །ངག་གི་དབང་ཕྱུག་བློ་བཟང་གྲགས་པ་ཡི། །རིང་ལུགས་རྒྱ་མཚོའི་ཕ་མཐའ་ཡོངས་བརྒལ་བའི། །ནོར་འཛིན་དཔལ་མོའི་མངལ་དུ་ལེགས་སྦྲུམས་པ། །འཇམ་དབྱངས་དགའ་བའི་བཤེས་གཉེན་ཞབས་བརྟན་ཤོག །ཚངས་པའི་བློ་དང་དབང་ཕྱུག་སྐལ་བཟང་ལྡན། ཁྱབ་འཇུག་མཐུ་རྩལ་བརྒྱ་བྱིན་སྟོབས་མངའ་བའི། །མི་ཡི་བདག་པོ་ཉི་འོག་རྒྱལ་ཁམས་ཀྱི། །མགོན་སྐྱབས་དཔུང་གཉེན་གླིང་དུ་བརྟན་པར་ཤོག །བོད་ཆེན་སྐྱེ་རྒུའི་གཉའ་བར་ཁྲིམས་ཀྱི་ཤིང༌། །རབ་ལྕིའི་ཆོས་སྲིད་ཟུང་འབྲེལ་གསེར་མདོག་ཞྭའི། །བསྟན་པ་བྱམས་མགོན་དབུས་འགྱུར་འབྱོན་མིན་བར། །གྱེན་ནས་གྱེན་དུ་འཕྱུར་ཏེ་འཕེལ་བར་ཤོག །ནད་མཚོན་མུ་གེ་དང་བྲལ་འཇིག་རྟེན་བདེ། །ཆོས་སྤྱོད་རྣམ་བཅུས་དགེ་འདུན་སྡེ་རྣམས་དར། །འདིའི་ཆེད་འབད་དོ་ཅོག་ཀུན་འདོད་པའི་དོན། །རྩོལ་བར་བལྟོས་མིན་ངང་གིས་འགྲུབ་པར་ཤོག །ཕུན་ཚོགས་བསིལ་ཟེར་ཉ་གང་ཡར་གྱི་ངོ༌། །གཟའ་སྐར་སྦྱོར་བྱེད་(༡༤༡བ) ― GLG021_Page_0284 ―
[མ་དཔེ་གཟིགས་ན་འདིར་གནོན།]
བཟང་བའི་ཚེས་ཀྱི་དུས། །མཆོག་གསུམ་ཐུགས་རྗེས་སྨིན་པའི་རེ་སྐོང་བའི། །བཀྲ་ཤིས་རྒྱུད་མངས་དབྱངས་སུ་འཁྲོལ་བར་ཤོག །ཅེས་པའི་སྨོན་ལམ་ཚིགས་བཅད་འདི་ནི་འོལ་ཁ་འབྲི་ལུང་པ་བློ་བཟང་དཔལ་འབྱོར་གྱིས་རྫིང་ཕྱི་སོགས་འོལ་ཁའི་དགོན་ཁག་རྣམས་ལ་འཛུགས་རྩིས་ཀྱི་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །དགེ་འདུན་འདུས་པའི་སྒྲ་འཛིན་ཡོལ་གོའི་ནང༌། །གསུང་རབ་སྦྲང་རྩི་བཅུད་དུ་འཁྱིལ་མཛད་པས། །གྲངས་མེད་བློ་གསལ་རྒྱ་མཚོའི་འདོད་པའི་དོན། །གྲུབ་མཛད་བཤེས་གཉེན་དམ་པར་གསོལ་བ་འདེབས། །རྣམ་གསུམ་དཀོན་ཅོག་རིན་ཆེན་ཐུགས་རྗེའི་མཐུས། །མགོན་ཁྱོད་རྡོ་རྗེའི་སྟན་ལ་བསྐལ་པའི་བར། །ཚེ་མཐའ་ཡས་པ་ཇི་བཞིན་ལེགས་བཞུགས་ནས། །མོས་ལྡན་གདུལ་བྱའི་རེ་བ་སྐོང་གྱུར་ཅིག །ཅེས་དགའ་ལྡན་ཐོས་བསམ་གླིང་སློབ་དཔོན་དགེ་འདུན་དོན་གྲུབ་ཀྱི་གསོལ་འདེབས་བརྟན་བཞུགས་འདི་ནི་བློ་བཟང་ཆོས་འཕེལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །ཆོས་ཉིད་འགྱུར་བ་མེད་པའི་གདན་ཁྲི་ལ། །ཆོས་ཅན་རྒྱུ་འབྲས་ཟུང་འབྲེལ་ཉི་ཟླའི་སྟེང༌། །དཔལ་ལྡན་བླ་མ་ཚེ་མཐའ་ཡས་པའི་མགོན། །གཡུང་དྲུང་མཚན་པའི་གཟུགས་སྐུ་བརྟན་པར་ཤོག །ངག་དབང་ཚངས་པའི་སྲས་མོ་བཞད་པའི་བློས། །མཁས་བཙུན་བཟང་པོའི་སྤོབས་པ་ཡོངས་དགེ་བ། །རྒྱ་མཚོའི་གོས་ཅན་གཞན་དུ་འགྱུར་མིན་བར། །རབ་བཞུགས་འགྲོ་བའི་གདུང་བ་(༡༤༢ན) ― GLG021_Page_0285 ―
[མ་དཔེ་གཟིགས་ན་འདིར་གནོན།]
སེལ་བར་ཤོག །དབྱིངས་ཕྱུག་རྡོ་རྗེ་བཙུན་མོ་སྲིད་གསུམ་ལ། །དབང་སྒྱུར་རྣམ་བཞིའི་ལས་ཀྱི་འཕྲུལ་མོ་ཆེའི། །བྱིན་རླབས་དྲོད་ཀྱིས་སྨོན་པའི་ཛམྦུའི་འབྲས། །གསེར་གྱི་སྙེ་མ་སྨིན་པའི་དགའ་སྟོན་སྩོལ། །ཅེས་རེ་སྨོན་འགྲུབ་པའི་ཚིགས་བཅད་འདི་ནི་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་གྲྭ་རྒྱུན་རི་བོ་བདེ་ཆེན་པ་རྣམས་ཀྱི་འབད་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །ཚེ་དཔག་མེད་མགོན་ཏིང་འཛིན་ཕྱག་རྒྱ་ཡིས། །ལེགས་བཏེག་བུམ་བཟང་ལས་འོངས་བདུད་རྩིའི་རྒྱུན། །སྲོག་ཟུངས་གྱུར་ཏེ་སྒྲིབ་པའི་ལུས་ཅན་ཀུན། །ལྷ་ཆེན་ཉི་བུའི་གཡུལ་ལས་རྒྱལ་བར་མཛོད། །དེ་ལྟར་ཟླ་ཞུན་རྗེས་འགྲོ་ལྷག་བསམ་གྱིས། །རབ་བསྐྲུན་ལེགས་བྱས་ཕུང་པོར་སྤུངས་པའི་གཟིས། །ཡིད་སྲུབས་སྡེ་དཔུང་བག་ལ་ཡོངས་ཞ་ནས། །དཀར་ཕྱོགས་རྒྱལ་བའི་བ་དན་བསྒྲེང་བར་ཤོག །ཁྲིམས་ལྡན་ངུར་སྨྲིག་འཆང་རྣམས་མགྲིན་གཅིག་ཏུ། །ཉེར་བརྗོད་བདེན་པའི་ཚིག་གིས་རྡོ་རྗེའི་ཁྲིར། །འཇམ་དབྱངས་དགའ་བའི་བཤེས་གཉེན་སྲིད་མཐའི་བར། །རྟག་བཞུགས་འཁོར་ལོ་གསུམ་གྱིས་འགྲོ་འདྲེན་ཤོག །གཉིས་འཐུང་འགྱིང་འདྲའི་རི་བོར་གཏན་གྱི་བདེ། །དོན་ཆེན་སྒྲུབ་པའི་དགེ་འདུན་འདུས་པའི་གླིང༌། །ཆོས་སྲིད་ཟུང་ལྡན་དཀར་ཆའི་ཟླ་བ་བཞིན། །བླ་ནས་བླར་འཕེལ་བསྐལ་བརྒྱར་འགྱུར་མེད་ཤོག །ཅེས་ལེགས་སྨོན་གྱི་ཚིགས་བཅད་འདི་ནི་ཆོས་སྡེ་ཆེན་པོ་རི་བོ་བདེ་ཆེན་སྤྱི་ཚོགས་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་(༡༤༢བ) ― GLG021_Page_0286 ―
[མ་དཔེ་གཟིགས་ན་འདིར་གནོན།]
དབང་པོའོ། །སྐབས་གསུམ་དྲང་སྲོང་རིག་འཛིན་གྲུབ་པ་སོགས། །སྲིད་དང་ཞི་བའི་དབངཕྱུག་བརྒྱད་ལྡན་རྣམས། །ཕུན་ཚོགས་ཤིས་པ་བརྗོད་པའི་དབྱངས་སྙན་དང༌། །ཆབས་ཅིག་མེ་ཏོག་ཆར་པ་དེང་འདིར་ཕོབ། །ཀུན་བཟོད་ཡངས་པའི་ཁྱོན་རྣམས་བསོད་ནམས་མཐུས། །གཅིག་ཏུ་བཅིངས་པའི་རྒྱལ་ཁབ་ཆེན་པོའི་ཁྲིར། །གནམ་སའི་དཀྱིལ་འཁོར་ཡོངས་ལ་མངའ་སྒྱུར་བའི། །མི་ཡི་བདག་པོ་རྡོ་རྗེ་ལྟར་བརྟན་ཤོག །མཆོག་གསུམ་ཐུགས་རྗེ་ནམ་ཡང་གསལ་འགྲིབ་མེད། །བདེན་ཚིག་གྲུབ་པའི་བརྗོད་པ་དོན་དང་མཐུན། །ཚུལ་ལྡན་སྨོན་པའི་རེ་བ་ལྷུན་འགྲུབ་པའི། །ངོ་མཚར་སྐལ་བཟང་སྙེ་མ་དེང་སྨིན་ཤོག །ཅེས་མིའི་དབང་ཕྱུག་གི་བརྟན་བཞུགས་ཚིགས་བཅད་འདི་ནི་ཡུལ་ལྷོ་ཕྱོགས་སྨན་ལྗོངས་ཀྱི་འདུས་པའི་ཁྱུ་རྒྱན་རི་བོ་བདེ་ཆེན་སྤྱི་སོའི་གསུང་གིས་བསྐུལ་བ་ལྟར་སྙོམ་ལས་པ་ཟ་ཧོར་བྷུ་སུ་ཀུས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །མཐོང་བའི་མིག་གི་བདུད་རྩི་མཚན་དཔེའི་སྐུ། །ཐོས་པས་རྣ་བའི་བཅུད་ལེན་ཚངས་པའི་གསུང༌། །དྲན་པས་སྲིད་ཞིའི་གདུང་སེལ་ཀུན་མཁྱེན་ཐུགས། །གསང་གསུམ་འཁོར་ལོའི་མགོན་པོར་གསོལ་བ་འདེབས། །མཆོག་དམན་གདུལ་བྱའི་སྣང་ངོར་རྒྱལ་བ་ཀུན། །བཤེས་གཉེན་ངུར་སྨྲིག་འཛིན་པའི་ཟློས་གར་དུ། །ངེས་རྙེད་གསོལ་བ་འདེབས་ན་འདི་ཕྱི་དང༌། །གཏན་མདུན་ལྷུན་གྱིས་གྲུབ་པར་བདག་བྱིན་རློབས། །རྡུལ་བྲལ་སྟོན་ཟླ་ལྟར་དཀར་ལེགས་བྱས་མཐས། །ནམ་མཁའི་མཐའ་བཞིན་གཞལ་དཀའི་མ་རྒན་འགྲོ། །འདྲེན་ཕྱིར་ཚོགས་གཉིས་ས་བོན་བཏབ་པའི་འབྲས། །ཆོས་གཟུགས་སྙེ་མ་གཡུར་(༡༤༣ན) ― GLG021_Page_0287 ―
[མ་དཔེ་གཟིགས་ན་འདིར་གནོན།]
དུ་ཟ་བར་ཤོག །ཅེས་པ་འདིའང་བཀྲ་ཤིས་ཆོས་འཕེལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་ཚོགས་དབང་པོའོ། །གར་དབང་འོད་མཚན་འབར་བའི་སྣང་བ་ཡིས། །གངྒཱའི་ཀླུང་རྡུལ་ཇི་སྙེད་འཇིག་རྟེན་ཁམས། །གསལ་མཚོན་རྣོན་པོས་ལྷ་ཆེན་ཉི་བུའི་ཞགས། །བཅད་དེ་འགྲོ་ཚོགས་འཆི་མེད་གྲོང་འཇུག་མཛོད། །རང་སེམས་དག་པའི་ཀུན་བཟོད་མཎྜ་ལར། །དུས་གསུམ་བསགས་དགེའི་རི་རབ་གླིང་བཞི་སོགས། །ལྷ་མིའི་དཔལ་འབྱོར་ཚོམ་བུར་ཡོངས་བཀོད་ནས། །འབུལ་ན་བདེ་ལྡན་ཞིང་མགོན་ལྟར་བཞུགས་གསོལ། །རྗེས་ཆགས་སྙིང་རྗེའི་འཛུམ་གྱིས་ལུས་ཅན་རྣམས། །ངེས་ལེགས་ཁང་པར་བསུས་ཟིན་དེ་སྲིད་བར། །མི་གཡོ་རྡོ་རྗེའི་སྐྱིལ་མོ་ཀྲུང་གཅིག་གིས། །གདོང་ལྔས་བཏེག་ཁྲི་རྟག་ཏུ་གནོན་གསོལ་འདེབས། །གསུང་ངག་ཆད་མེད་དབང་བཞི་མཐོ་རིས་ཆུ། །བློ་ལྡན་སྐལ་བཟང་ཡིད་ཀྱི་རྒྱ་མཚོ་ཆེར། །ལེགས་འབེབས་འཇམ་དབྱངས་དགའ་བའི་བཤེས་གཉེན་མཆོག །འོག་མིན་ཞིང་གཙོ་ཇི་བཞིན་བརྟན་གྱུར་ཅིག །ཐུབ་དབང་དཔལ་གྱི་མགུར་ནས་འཁོར་ལོ་གསུམ། །རབ་གསུངས་མདོ་དང་བདེ་ཆེན་འདྲེས་ནུས་པའི། །ངེས་གསང་ཐེག་པར་བཅས་པའི་ཆོས་ཀྱི་སྡེ། །ཐོས་བསམ་སྒོམ་པས་སྲིད་མཐར་རྒྱས་གྱུར་ཅིག །ཆེས་ཆེར་སྙིགས་མའི་དུས་འདིར་རྒྱལ་གཞན་པས། །ཐུགས་རྗེ་བླ་ལྷག་བདེར་གཤེགས་མཆེད་བརྒྱད་ཀྱིས། །བྱིན་རླབས་འཆི་གསོས་རྩི་སྨན་ལྗོན་པ་ཡིས། །མཁའ་མཉམ་ཡིད་ཅན་རིམ་པའི་སྲོག་འཚོར་ཤོག །དཀོན་ཅོག་བདེན་པའི་ཉི་མ་འཆར་ནུབ་སྤངས། །རྒྱུ་ལས་མི་འཆོལ་(༡༤༣བ) ― GLG021_Page_0288 ―
[མ་དཔེ་གཟིགས་ན་འདིར་གནོན།]
འབྲས་བུ་དུས་སུ་སྨིན། །ཚུལ་ལྡན་དགེ་འདུན་སྨོན་པ་ལྷུན་གྲུབ་པའི། །སླུ་མེད་རྟེན་ཅིང་འབྲེལ་འབྱུང་ལ་སྤྱོད་ཤོག །ཅེས་སུམ་རྩེན་ཡུལ་ལ་འགྲན་པ་རུ་ལག་མྱང་སྟོད་ཀྱི་སའི་ཆ་ནས་ཆོས་སྡེ་དཔལ་འཁོར་བདེ་བ་ཆེན་པོའི་མཁན་སློབ་སྤྱི་ཚོགས་ཀྱི་གསུང་གིས་བསྐུལ་བ་ལྟར་སྡོམ་བརྩོན་སྡེ་སྣོད་གསུམ་པ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །བློ་གྲོས་བཟང་པོའི་གྲགས་པ་ཡོངས་འབར་བའི། །བསྟན་པའི་རྒྱལ་མཚན་ལེགས་འཛིན་སྤྲུལ་པའི་སྐུ། །མཆོག་གསུམ་བདེན་པས་ཡིད་སྲུབས་ལས་རྒྱལ་ནས། །གཡུང་དྲུང་ཁྲི་ལ་གཡོ་མེད་བརྟན་པར་ཤོག །མི་ཕྱེད་དད་དང་སྟོབས་ལྡན་སའི་བརྒྱ་བྱིན། །རྡོ་རྗེ་ཐུ་ཤེ་ཡེ་ཐུ་རྒྱལ་པོ་ཆེ། །བླ་མ་ཡི་དམ་ཆོས་སྐྱོང་སྲུང་མ་ཡིས། །སྐུ་ཚེ་རབ་བརྟན་མངའ་ཐང་རྒྱས་པར་ཤོག །ཅེས་ཁལ་ཁ་འཇམ་དབྱངས་སྤྲུལ་པའི་སྐུ་བློ་བཟང་བསྟན་པའི་རྒྱལ་མཚན་དང་དད་སྟོབས་ལྡན་པ་རྡོ་རྗེ་ཐུ་ཤེ་ཡེ་ཐུ་རྒྱལ་པོ་གཉིས་ཀྱི་བརྟན་བཞུགས་ཤླཽ་ཀ་རེ་ཡོད་པ་ཞིག་དགོས་ཞེས་སྐུ་སྐྱེ་བློ་བཟང་འཕྲིན་ལས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །ངག་གི་དབང་ཕྱུག་བློ་གྲོས་བྱེ་བའི་གཏེར། །བཤེས་གཉེན་དམ་པའི་ཞབས་ལ་གསོལ་འདེབས་ན། །རྡོ་རྗེའི་ཁྲི་ལ་བསྐལ་པ་རྒྱ་མཚོ་རུ། །ལེགས་བཞུགས་གདུལ་བྱའི་རེ་བ་ཡོངས་སྐང་ཤོག །ཅེས་བྱང་རྩེ་ཆོས་རྗེ་ངག་དབང་བློ་གྲོས་རྒྱ་མཚོ་ལ་བརྟན་བཞུགས་གསོལ་འདེབས་ཤླཽ་ཀ་གཅིག་ལ་ཚང་བ་ཞིག་དགོས་ཞེས་སྨད་རྒྱུད་དབུ་མཛད་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་ནི་ཕུན་(༡༤༤ན) ― GLG021_Page_0289 ―
[མ་དཔེ་གཟིགས་ན་འདིར་གནོན།]
དབང་ངོ༌། །མཁྱེན་བརྩེ་ནུས་ལྡན་སངས་རྒྱས་ཀུན་འདུས་ཤིང༌། །བདེན་པ་གཉིས་ལྡན་དམ་པ་ཆོས་ཀྱི་མཛོད། །རིག་གྲོལ་དཔལ་ལྡན་དགེ་འདུན་ཀུན་གྱི་གཙོ། །སྐྱབས་གསོལ་དོན་ལྡན་བླ་མར་གསོལ་བ་འདེབས། །ངག་དབང་འཇམ་དབྱངས་དབྱངས་ཅན་ལྷས་རྗེས་བཟུང༌། །བློ་གསལ་སྐལ་བཟང་བཟང་པོའི་བག་ཆགས་སད། །རྒྱ་མཚོ་ལྟར་ཟབ་ཟབ་རྒྱས་ཆོས་ཀུན་སྟོན། །གཏན་གྱི་མགོན་སྐྱབས་སྐྱབས་གསུམ་ངོ་བོར་འདུད། །བཤེས་གཉེན་མཐུ་ལས་མངོན་མཐོའི་རྟེན་བཟང་རྙེད། །ཐོས་བསམ་སྒོམ་པས་དལ་འབྱོར་དོན་དང་ལྡན། །འདི་ཕྱི་བར་གྱི་གཏན་མདུན་ཀུན་འགྲུབ་པའི། །བཀའ་དྲིན་དྲན་ནོ་སྙིང་ནས་གསོལ་བ་འདེབས། །སྔོན་ནས་དེང་བར་ཡང་སྲིད་ཐམས་ཅད་དུ། །ཉེས་བརྒྱ་ལས་བསྐྱབས་ཕན་བདེ་ལ་སྦྱོར་བ། །དམ་པའི་མགོན་གྱི་ཐུགས་རྗེ་མཐའ་ཀླས་ན། །མི་ཕྱེད་གདུང་བ་དྲག་པོས་གསོལ་བ་འདེབས། །འདི་ནས་འཕོས་ཏེ་བྱང་ཆུབ་སྙིང་པོའི་བར། །མངོན་མཐོ་ངེས་ལེགས་མྱུ་གུ་ཡོངས་སྨིན་པའི། །བསོད་ནམས་ས་བོན་ཁྱོད་དྲིན་ལས་རྙེད་ན། །ཞབས་ཀྱི་པདྨར་མགོ་བོས་བཏུད་ཕྱག་འཚལ། །དངོས་བཤམས་ཡིད་སྤྲུལ་ཀུན་བཟང་མཆོད་སྤྲིན་དབུལ། །སྡིག་ལྟུང་ཉེས་ཚོགས་བསགས་སོ་ཅོག་རྣམས་བཤགས། །སྐྱེ་འཕགས་ཀྱིས་བསྐྲུན་དགེ་བའི་ཚོགས་ལ་རངས། །སྲས་བཅས་རྒྱལ་སློབ་ཆོས་འཁོར་བསྐོར་བར་བསྐུལ། །འཁོར་མཐའ་རྙེད་མིན་མྱ་ངན་མི་འདར་བཞུགས། །རང་གཞན་ཀུན་གྱིས་བསགས་པའི་འདུས་བྱས་ཀྱི། །དགེ་ཚོགས་མ་ལུས་ཀུན་མཁྱེན་ཐོབ་ཕྱིར་བསྔོ། །བདག་སོགས་འགྲོ་རྣམས་བྱང་ཆུབ་ཐོབ་པར་ཤོག །སྔོན་དང་(༡༤༤བ) ― GLG021_Page_0290 ―
[མ་དཔེ་གཟིགས་ན་འདིར་གནོན།]
འཕྲལ་གྱི་རྒྱུ་རྐྱེན་ལས་བྱུང་བའི། །འཇིགས་ཆེན་བརྒྱད་སོགས་དགྲ་གདོན་ནད་རིམས་གེགས། །དམ་ཆོས་ཚུལ་བཞིན་བསྒྲུབ་ལ་ཉེར་འཚེ་བའི། །འགལ་རྐྱེན་བར་གཅོད་ཉེ་བར་ཞི་བར་ཤོག །དལ་བའི་རྟེན་བཟང་ཡུན་གནས་རིང་པོའི་ཚེ། །ཁ་ན་མ་ཐོ་སྤངས་པའི་ཟས་ནོར་གོས། །དཔལ་འབྱོར་སྙན་གྲགས་མཐུན་པའི་ཡོན་ཏན་རྣམས། །འབད་རྩོལ་མེད་པར་ངང་གིས་འགྲུབ་པར་ཤོག །བདག་ཉིད་མཐོང་ཐོས་དྲན་རེག་སྐྱེ་བོ་ཀུན། །ཕན་དང་བདེ་བའི་དཔལ་ལ་ལེགས་སྦྱོར་ཞིང༌། །མངོན་སངས་རྒྱས་ཚེ་འཁོར་དུ་ཡོངས་བསྡུས་ནས། །དམ་པའི་ཆོས་ཀྱི་བདུད་རྩི་སྟེར་བར་ཤོག །མདོར་ན་སོམ་ཉི་དང་བྲལ་དད་པ་ཡིས། །ཉིན་མཚན་དུས་ཀུན་གསོལ་འདེབས་ལྷུར་ལེན་ན། །དམ་པའི་མགོན་གྱི་ཐུགས་རྗེ་བདག་སྙིང་ལ། །འཇུག་པའི་སྐལ་བ་བཟང་པོར་འགྱུར་བར་ཤོག །ཅེས་དགེ་སྦྱོར་གང་བྱེད་ཀྱི་བར་མཚམས་སུ་སྦྱར་ཆོག་པའི་བཀའ་དྲིན་དྲན་པའི་གསོལ་འདེབས་སྨོན་ལམ་འདི་ལྟ་བུ་ཞིག་དགོས་ཞེས་རྒྱལ་བའི་སྲས་པོ་བློ་བཟང་བསྟན་འཛིན་གྱི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་ཏྲེ་བོ་ངག་དབང་ནམ་མཁའོ། །འགྲོ་བའི་ཕན་བདེའི་རྩ་ལག་སངས་རྒྱས་བསྟན། །རིང་པོར་གནས་པའི་བཀྲ་ཤིས་བརྒྱ་ཕྲག་སྒོ། །འབྱེད་པའི་ཕུལ་བྱུང་རྣམ་དཔྱོད་རབ་ཡངས་པ། །དཔལ་ལྡན་བླ་མ་དམ་པར་གསོལ་བ་འདེབས། །བྱང་ཕྱོགས་འཛིན་མའི་གཞི་འདིར་བདག་སོགས་ལ། །སངས་རྒྱས་ཀྱིས་གསུངས་ཡང་དག་དམ་པའི་ཆོས། །བསྟན་པས་འདི་ཕྱི་ཀུན་ཏུ་བཀྲ་ཤིས་པའི། །ཕུན་ཚོགས་དགའ་སྟོན་སྩོལ་ལ་གསོལ་བ་འདེབས། །བདེ་བ་ཅན་གྱི་ཞིང་ན་ཚེ་(༡༤༥ན) ― GLG021_Page_0291 ―
[མ་དཔེ་གཟིགས་ན་འདིར་གནོན།]
དཔག་མེད། །དགྱེས་ཞལ་འཛུམ་བསྟན་དཀྱུས་རིང་སྤྱན་རས་ཀྱིས། །ལེགས་གཟིགས་ཕྱག་ན་བུམ་པའི་བདུད་རྩིའི་ཆུས། །དབང་བསྐུར་འཆི་བ་མེད་པའི་དགའ་སྟོན་སྩོལ། །མ་རིག་སྟུག་པོའི་གཉིད་ལས་ཉེར་སངས་ཤིང༌། །བླང་དོར་ལྟ་བའི་བློ་གྲོས་ཡོངས་རྒྱས་པ། །རབ་བཀྲ་སྣ་ཚོགས་རྡོ་རྗེའི་རེ་ཁཱའི་སྟེང༌། །མི་འགྱུར་ཤིས་པའི་བདེ་ལེགས་ལྷུན་གྲུབ་ཤོག །སངས་རྒྱས་སློབ་མར་བཅས་པའི་ཐུགས་རྗེ་བསྐུལ། །ལྷ་དང་དྲང་སྲོང་བདེན་པ་བརྗོད་པར་གསོལ། །བཀྲ་ཤིས་དགེ་བའི་དུས་འདིར་བདག་སོགས་ཀྱི། །སྨོན་ལམ་བཏབ་པས་ཇི་བཞིན་བཞུགས་གྱུར་ཅིག །པ་སངས་ལྟར་དཀར་དགེ་ཚོགས་ཨ་མྲའི་ཤིང༌། །ཕན་བདེའི་ལོ་ཏོག་ཕང་ཕུང་རབ་རྒྱས་པར། །ལེགས་སྨོན་རྣམ་བཀྲའི་མེ་ཏོག་སྒྲུབ་པའི་འབྲས། །ཡོངས་དུད་ཤིས་པའི་དཔལ་གྱིས་འབར་བར་ཤོག །སངས་རྒྱས་ཀྱིས་བསྟན་ལུང་རྟོགས་ཡོན་ཏན་རྣམས། །ཚུལ་བཞིན་འཛིན་པའི་ཐེག་གསུམ་དགེ་འདུན་ཚོགས། །དཀོན་ཅོག་རིན་ཆེན་བཀྲ་ཤིས་སྙན་པའི་གླུས། །ཡངས་པའི་ནོར་འཛིན་ཁྱོན་གྱིས་འཚོ་བར་ཤོག །ཅེས་ཤི་རལ་ཐུ་སངས་རྒྱས་བཀྲ་ཤིས་ཀྱི་གསོལ་འདེབས་སྨོན་ལམ་དང་བཅས་པ་ཤླཽ་ཀ་ཁ་ཤས་ཡོད་པ་ཞིག་དགོས་ཞེས་ཁལ་ཁ་རྡོ་རྗེ་རྒྱལ་པོའི་རིགས་ལས་པཎྜི་ཏ་ཨེར་ཏེ་ནི་ཐས་ཇིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགོན་གསར་སྦུག་པ་ངག་དབང་རབ་བརྟན་ནོ། །རང་བྱུང་ལྷུན་གྲུབ་ལུས་ཀྱི་དཀྱིལ་འཁོར་ལ། །གདན་གསུམ་ཚང་བའི་ལྷ་ཚོགས་ཡོངས་རྫོགས་པ། །རྡོ་རྗེ་སློབ་དཔོན་ངག་གི་དབང་ཕྱུག་དཔལ། །བློ་གསལ་སྐལ་བཟང་རྒྱ་མཚོར་གསོལ(༡༤༥བ) ― GLG021_Page_0292 ―
[མ་དཔེ་གཟིགས་ན་འདིར་གནོན།]
བ་འདེབས། །རིན་ཅེན་ཁྲིས་བཏེག་པདྨ་ཉི་ཟླའི་སྟེང༌། །གཡུང་དྲུང་ལྟ་བུར་མི་འགྱུར་རྟག་བརྟན་ཅིང༌། །རྣམ་གསུམ་འཁོར་ལོའི་བྱ་བས་བདག་གཞན་འགྲོ །རབ་དྲངས་ངེས་པར་ལེགས་པའི་ལམ་འཇུག་ཤོག །ཅེས་པ་འདི་ནི་པཎྜི་ཏ་ཨེར་ཏེ་ནི་ཐའི་ཇི་དང་བི་ལིག་ཐུ་ཇའི་སང་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །བདེན་པ་ཡོངས་བརྗོད་སྨོན་ལམ་ནམ་མཁའ་ལ། །འཕེལ་འགྲིབ་མེད་འཆར་དཀོན་ཅོག་ཐུགས་རྗེའི་ཉིས། །སྲིད་ཞིའི་གདུང་མུན་མཐར་བྱས་ཕན་དང་བདེའི། །སྣང་བའི་འོད་ཀྱིས་འཇིག་རྟེན་ཀུན་ཁྱབ་མཛོད། །ངག་དབང་འཇམ་དབྱངས་དགྱེས་པའི་བློ་གྲོས་ཅན། །སྐལ་བཟང་གདུལ་བྱ་རྒྱ་མཚོའི་མགོན་གྱུར་པ། །འགྱུར་མེད་གཡུང་དྲུང་འཁྱིལ་བའི་ཁྲིར་བཞུགས་ནས། །བསྐལ་བརྒྱར་རྣམ་གསུམ་འཁོར་ལོས་འགྲོ་འདྲེན་ཤོག །ལྷག་བསམ་ཞིང་སར་ས་བོན་དགེ་བའི་ཚོགས། །སྨོན་འབྲས་བདག་སོགས་མཁའ་མཉམ་སེམས་ཅན་ཀུན། །ལྷ་མིའི་དགའ་སྟོན་ཆད་མེད་མྱོང་བཞིན་དུ། །རིང་པོར་མི་ཐོགས་བྱང་ཆེན་མངོན་འགྱུར་ཤོག །ཅེས་བདེན་པ་བརྗོད་པའི་ཚིགས་བཅད་འདི་ནི་གུ་ཡང་དརྑན་ནང་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མཚན་ལེགས་ཡོངས་བསྒྲགས་དཔལ་གྱི་རྒྱལ་པོ་ཡིས། །ཕུལ་བྱུང་ཐུགས་རྗེ་ཆེན་པོའི་དཔུང་བསྐྱེད་ནས། །བློ་བཟང་དངོས་གྲུབ་མི་ཁོམ་གནས་བརྒྱད་ལས། །དྲངས་ཏེ་དལ་འབྱོར་ཚང་བའི་རྟེན་ཐོབ་ཤོག །རིན་ཆེན་ཟླ་དང་པདྨས་རབ་བརྒྱན་པས། །ཕུལ་བྱུང་༝། བློ་བཟང་༝། དྲངས་ཏེ༝། གསེར་བཟང་དྲི་མེད་རིན་ཅེན་སྣང་བ་ཡིས། །(༡༤༦ན) ― GLG021_Page_0293 ―
[མ་དཔེ་གཟིགས་ན་འདིར་གནོན།]
ཕུལ་བྱུང་༝། བློ་བཟང་༝། དྲངས་ཏེ་༝། བདེ་བར་གཤེགས་པ་མྱ་ངན་མེད་དཔལ་གྱིས། །ཕུལ་བྱུང་༝། བློ་བཟང་༝། དྲངས་ཏེ་༝། བདེ་གཤེགས་ཆོས་བསྒྲགས་རྒྱ་མཚོའི་དབྱངས་སྙན་གྱིས། །ཕུལ་བྱུང་༝། བློ་བཟང་༝། དྲངས་ཏེ་༝། ཆོས་ཀྱི་རྒྱ་མཚོ་མཆོག་གི་མངོན་མཁྱེན་པས། །ཕུལ་བྱུང་༝། བློ་བཟང་༝། དྲངས་ཏེ་༝། སྨན་གྱི་བླ་མ་བཻཌཱུཪྻ་འོད་ཀྱིས། །ཕུལ་བྱུང་༝། བློ་བཟང་༝། དྲངས་ཏེ་༝། དེ་བཞིན་གཤེགས་པ་ཤཱཀྱ་སེང་གེ་ཡིས། །ཕུལ་བྱུང་ཐུགས་རྗེ་ཆེན་པོའི་དཔུང་བསྐྱེད་ནས། །བློ་བཟང་དངོས་གྲུབ་མི་ཁོམ་གནས་བརྒྱད་ལས། །དྲངས་ཏེ་དལ་འབྱོར་ཚང་བའི་རྟེན་ཐོབ་ཤོག །ཅེས་སྟག་རུ་བ་བློ་བཟང་དངོས་གྲུབ་ཀྱི་དོན་དུ་ཚེ་དབང་བཀྲ་ཤིས་ཀྱིས་བདེར་གཤེགས་བརྒྱད་སོ་སོའི་བརྒྱ་ཐང་བཞེངས་པའི་རྒྱབ་ཡིག་གི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །རང་སེམས་དད་པའི་ཟླ་ཤེལ་གཙང་མའི་ངོས། །མཚན་དཔེའི་གཟུགས་བརྙན་རི་མོ་རྣམ་བཀྲ་བ། །བདེ་བར་གཤེགས་པ་ཀུན་འདུས་བླ་མ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །གང་གི་སྐུ་ལ་གདན་གསུམ་མ་ལུས་པ། །ལེགས་ཚང་དཀྱིལ་འཁོར་རྒྱ་མཚོའི་བདག་ཉིད་ཅན། །སྨིན་གྲོལ་གདམས་པའི་འདོད་དགུ་མ་ལུས་ཆར། །གྲངས་མེད་སྐྱེ་བ་ཀུན་ཏུ་འབེབས་བྱིན་རློབས། །གང་ལ་གསོལ་བཏབ་དཀོན་ཅོག་རྣམ་གསུམ་གྱི། །ཐུགས་རྗེ་ཤུགས་ལ་འཇུག་པ་དངོས་པོའི་གཤིས། །དེ་ཕྱིར་སྙིང་ནས་གསོལ་བ་འདེབས་བྱེད་ན། །བྱང་ཆུབ་བར་དུ་འབྲལ་མེད་རྗེས་འཛིན་ཤོག །ཅེས་པ་འདི་ནི་བསམ་བློ་ཨ་ཞང་རབ་འབྱམས་(༡༤༦བ) ― GLG021_Page_0294 ―
[མ་དཔེ་གཟིགས་ན་འདིར་གནོན།]
པ་བློ་བཟང་འཇམ་དབྱངས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་ཚོགས་དབང་པོའོ། །གདན་གསུམ་ཚང་བའི་རྡོ་རྗེ་སློབ་དཔོན་མཆོག །ངག་དབང་བློ་གསལ་མཁས་བཙུན་བཟང་པོ་ཡིས། །རྒྱ་མཚོའི་གོས་ཅན་ཀུན་ཁྱབ་འགྲོ་འདྲེན་པར། །གསོལ་བ་འདེབས་སོ་བདག་བྱིན་བརླབ་ཏུ་གསོལ། །ཞེས་པ་འདི་ནི་མཁན་ཆེན་ངག་དབང་འཕྲིན་ལས་ཀྱི་ཞལ་འདོན་དུ་དེ་འཕྲལ་དུ་བྲིས། །བསོད་ནམས་རྩིབས་སྟོང་འཁོར་ལོས་ནོར་འཛིན་ལ། །དབང་སྒྱུར་མི་ཡི་བདག་པོ་རབ་བརྟན་ཅིང༌། །འཇིག་རྟེན་ཀུན་ཏུ་རྫོགས་ལྡན་དགའ་སྟོན་ལ། །སྤྱོད་པར་དཀོན་ཅོག་གསུམ་གྱིས་བྱིན་གྱིས་རློབས། །ཞེས་སྡེ་པའི་བརྟན་བཞུགས་འདི་ནི་སྐྱིད་ཚལ་མཁན་ཆེན་བཀྲ་ཤིས་རྒྱལ་མཚན་གྱི་ཞལ་ངོར་བཀོད། །དཀོན་ཅོག་རིན་ཆེན་རྣམ་གསུམ་མཁའ་དབྱིངས་ངོས། །ཐུགས་རྗེ་འཛད་པ་མེད་པའི་ཆུ་འཛིན་ལས། །ཕུལ་བྱུང་བྱིན་རླབས་ཆར་གྱིས་སྐྱེད་བསྲིངས་པའི། །ཕན་བདེའི་སྙེ་མ་གཡུར་དུ་ཟ་བར་ཤོག །གཡུང་དྲུང་འཁྱིལ་བའི་ཉ་ཕྱིས་ཁོག་ཡངས་པར། །མི་འགྱུར་ཚེ་ཡི་མུ་ཐི་ལའི་ཕུང་པོ། །བགྲང་རིང་བསྐལ་པའི་སྲད་བུར་རྒྱུ་ནུས་པར། །སྨོན་པའི་རེ་བ་ཡིད་བཞིན་འགྲུབ་པར་ཤོག །ངག་དབང་འཇམ་དབྱངས་དགྱེས་པའི་བློ་གྲོས་ཀྱིས། །སྐལ་བཟང་གདུལ་བྱ་འདྲེན་པའི་མགོན་གཅིག་པུར། །རྒྱ་མཚོའི་གོས་ཅན་གཟུགས་གཞན་བསྒྱུར་མིན་པར། །སྣང་མཐའ་ཡས་པ་ལྟ་བུར་བརྟན་པར་བཞུགས། །བདག་ཀྱང་ཚེ་འདིར་ཆོས་བཞིན་བསྒྲུབ་པའི་རྐྱེན། །མ་ལུས་ཀུན་ཚང་ཡང་སྲིད་ཐམས་ཅད་དུ། །དམ་པའི་མགོན་གྱིས་རྗེས་སུ་ཉེར་བཟུང་སྟེ། །གཏན་གྱི་མདུན་(༡༤༧ན) ― GLG021_Page_0295 ―
[མ་དཔེ་གཟིགས་ན་འདིར་གནོན།]
མ་ལྷུན་གྱིས་གྲུབ་པར་ཤོག །ཐོགས་མེད་དུས་ནས་ད་ལྟ་ཕྱིན་ཆད་དུ། །བསགས་པའི་དགེ་བ་ཇི་སྙེད་མཆིས་པ་རྣམས། །སེམས་ཅན་མཐའ་དག་སྲིད་པའི་འཆིང་བ་ལས། །རྣམ་གྲོལ་སྟོབས་བཅུ་མངའ་བ་ཐོབ་པར་ཤོག །ཅེས་པ་འདི་ནི་ཀླུ་འབུམ་ཆོས་རྗེ་རིན་ཆེན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་གྲགས་པའོ། །བསོད་ནམས་ཚོགས་ཀྱིས་ཡོངས་བསྐྲུན་ངོ་མཚར་གནས། །བཀོད་པ་རྒྱ་མཚོའི་རྡུལ་གྱི་རྩེར་སོན་པ། །གཏན་བདེའི་དགའ་བར་སྐལ་བཟང་ཡིད་ཅན་རྣམས། །སྤྱོད་པའི་ཞིང་གི་མགོན་པོས་དེང་འདིར་དགོངས། །ཀུན་ཁྱབ་མཛོད་སྤུའི་འོད་ཟེར་འབར་བའི་གཟིས། །འཆི་བདག་བདུད་ཀྱི་སྨག་རུམ་མཐར་བྱས་ནས། །གཤིན་རྗེའི་ཕོ་ཉ་ལས་ཀྱི་མེ་ལོང་ཁུར། །འཛིན་པའི་ངལ་བཏང་གཉིད་ལ་གཡུར་བྱིན་རློབས། །དགའ་བ་བརྒྱ་པའི་ཚེམས་དཀར་ཉ་ཕྱིས་ཁོག །ཡངས་པོ་ལས་སྦྲུམ་མཛེས་སྡུག་ལང་ཚོ་ཅན། །དྲི་ཟའི་བུ་མོ་ངག་གི་དབང་ཕྱུག་མས། །རྗེས་བཟུང་ཚངས་སྲས་བཞད་པ་རབ་བརྟན་ཤོག །ཇི་ལྟ་ཇི་སྙེད་ཤེས་བྱ་ལ་འཇུག་བློར། །འཇམ་དབྱངས་དགྱེས་པའི་འཛུམ་ཞལ་ལྷུག་པ་རུ། །སྟོན་པའི་དཔལ་ལྡན་སྐལ་པ་བཟང་པོ་ཅན། །བཤེས་གཉེན་དམ་པའི་མགོན་དེ་ཞབས་བརྟན་ཤོག །ཟབ་དང་རྒྱ་ཆེའི་ཆོས་ཀུན་མཐོང་བའི་མོད། །མཚོ་བྱུང་དྲིན་ལས་སྨྲ་བའི་སྤོབས་པ་ཡིས། །མཁས་རློམ་གཞན་ལ་འཇིགས་པ་མེད་པའི་གོ །ཆ་གང་ཟླ་བ་འཕེལ་འགྲིབ་བྲལ་བར་ཤོག །ཐུབ་པ་ཆེན་པོའི་བཞེད་གཞུང་ཇི་བཞིན་དུ། །རབ་འཛིན་ཞྭ་སེར་ཅོད་པན་འཆང་བའི་བསྟན། །མ་སྙིགས་འདབ་སྟོང་ལང་ཚོའི་བཅུད་ཀྱི་སྡེ། །ཤེས་ལྡན་བུང་བའི་དགའ་སྟོན་རྟག་(༡༤༧བ) ― GLG021_Page_0296 ―
[མ་དཔེ་གཟིགས་ན་འདིར་གནོན།]
མྱོང་ཤོག །སྟོབས་ཀྱི་འཁོར་ལོ་མཁའ་ལ་ཉེར་འཕགས་པའི། །ལེགས་བྱས་དཔྱིད་ཀྱི་ནོར་འཛིན་དཔལ་མོའི་མངལ། །རབ་ལྕི་གངས་ཅན་ལྷ་གཅིག་མི་ཡི་རྗེ། །སྐུ་ཚེ་མཚན་ཇུས་ཆབ་སྲིད་འཕེལ་བར་ཤོག །རྣམ་འདྲེན་ཀུན་གང་གཟིགས་པའི་ཤེས་བྱའི་ཁྱོན། །མངོན་སུམ་ཚད་མས་ཡོངས་གཞལ་ཙོང་ཁ་པའི། །བསྟན་པའི་གདུགས་དཀར་གཅིག་གི་གྲིབ་བསིལ་དུ། །འཛམ་གླིང་སྐྱེ་རྒུ་བདེ་བའི་ངལ་གསོར་ཤོག །ཆེས་དཀོན་དལ་བའི་རྟེན་བཟང་མཆོག་གསུམ་གྱི། །དྲིན་ལས་ཉེར་ཐོབ་དཔའ་མཛངས་རྟུལ་ཕོད་ཅན། །མི་ཡི་རྗེ་བོའི་ཚེ་དཔལ་མངའ་ཐང་ཀུན། །དར་དྲག་དབྱར་གྱི་མཚོ་ལྟར་རྒྱས་པར་ཤོག །ཐོས་བསམ་དཔྱིད་ཀྱི་དགའ་སྤྲོ་ཡོངས་འཕེལ་བའི། །ཉམས་ལྡན་མིག་སྟོང་ཅན་བཞིན་སྦྱིན་སྐྱེས་མས། །རྣམ་པར་རྒྱལ་བ་འཚམས་སྤྲིན་གོས་ཅན་གླིང༌། །ཉི་ཟླ་མུན་སེལ་བར་དུ་དར་བར་ཤོག །འགྲོ་རྣམས་སྔོན་བསགས་ཆོས་དཀར་ནུ་མའི་ཞོ། །དེང་ནས་བྱང་ཆེན་བར་དུ་ཆད་མེད་པར། །བཏུངས་པས་སྤང་རྟོགས་ལང་ཚོ་རྒྱས་པ་བཞིན། །ཆོས་གཟུགས་སྨིན་ལེགས་མ་འགུགས་ལྕགས་ཀྱུར་ཤོག །ལྷོ་བརྒྱུད་ཀུན་བཟོད་ཡུལ་གྲུ་ཨེ་ཡིག་དབྱིབས། །གྲངས་མེད་འགྲོ་བའི་འདུ་འཁོད་ཡངས་པ་ཅན། །ལོ་ཏོག་དུས་སྦྲུམ་ཁེ་སྤོགས་མཁོ་དགུས་ཚིམ། །ནད་འཁྲུག་དང་བྲལ་ཚེ་ཡང་འཕེལ་བར་ཤོག །སྲས་བཅས་རྒྱལ་བ་ཉན་རང་རིག་པ་འཛིན། །ལྷ་དང་དྲང་སྲོང་ཚིག་བཙན་དམོད་པའི་མཐུས། །དེང་འདིར་གང་བཏབ་སྨོན་པ་ལྷུན་གྲུབ་པ། །ཡོངས་འདུའི་ཚལ་བཞིན་རེ་བ་སྐོང་བར་ཤོག །ཅེས་འདི་གའི་མིང་སྒྲ་སོགས་ཚང་བའི་བདེན་བརྗོད་ཀྱི་ཚིགས་བཅད་ཤླཽ་ཀ་བཅུ་གསུམ་ཙམ་ཡོད་པ་ཞིག་སེ་མདོ་དགའ་(༡༤༨ན) ― GLG021_Page_0297 ―
[མ་དཔེ་གཟིགས་ན་འདིར་གནོན།]
ལྡན་རྣམ་རྒྱལ་དུ་འཛུགས་པའི་ཆེད་ནང་སོ་དཀོན་ཅོག་དར་རྒྱས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །བདེ་ལྡན་ཞིང་དུ་འོད་ཟེར་སྟོང་འབར་བས། །ཆེས་ཆེར་བསྔགས་པའི་གཙུག་ཏོར་རྣམ་པར་རྒྱལ། །མཚན་གྱི་སྒྲས་ཀྱང་ལྷ་ཆེན་ཉི་མའི་བུ། །མཐར་བྱེད་དུས་གསུམ་སངས་རྒྱས་ཀུན་ཡུམ་ཀྱེ། །དཀར་སེར་སྔོ་བའི་ཞལ་ལྡན་ཕྱག་བརྒྱད་ཀྱི། །ཐ་མས་ལེགས་བཏེག་བུམ་བཟང་ལས་འོངས་པའི། །ཟིལ་དངར་བཅུད་ཀྱིས་ཕུང་ཁམས་གཏམས་པའི་མོད། །མཚུན་ལྷ་སྐྱེངས་ཏེ་བག་ལ་ཞ་བར་མཛོད། །རྒྱལ་བའི་སྲས་གཉིས་དགྱེས་པས་མེ་ཏོག་འཐོར། །གཏུམ་ཆེན་ཁྲོ་བོ་རྣམ་བཞི་བགེགས་ཚོགས་སྐྲོད། །ལེགས་བྲིས་བུ་ཡིས་མཐོ་རིས་ཨརྒྷའི་ཆབ། །སྦྲེངས་ཏེ་མ་དག་དྲི་མ་ཀུན་ཁྲུས་ཤིག །བདེན་བརྗོད་ལྷུན་གྱིས་གྲུབ་པའི་སྔོན་འགྲོའི་སྒོར། །བཅོམ་ལྡན་འདས་མར་སྙན་གསན་གསོལ་བཏབ་ནས། །ཡིད་ལ་རེ་བའི་འབྲས་བུ་དེང་གི་དུས། །འབད་མེད་ལག་རྩེར་སྩོལ་བར་བྱིན་གྱིས་རློབས། །བགྲང་ཡས་གདན་གསུམ་ཚང་བའི་ལྷ་ཚོགས་རྣམས། །རང་བྱུང་ལྷུན་གྲུབ་ལུས་ཀྱི་དཀྱིལ་འཁོར་དུ། །ཡོངས་ཚང་དཔལ་ལྡན་བླ་མ་རྡོ་རྗེ་འཛིན། །མཆོག་གསུམ་འདུས་པའི་ངོ་བོར་གསོལ་བ་འདེབས། །འཇམ་དབྱངས་གཞོན་ནུ་དགྱེས་པའི་བཤེས་གཉེན་རྗེ། །ཚང་སྲས་ལྷ་མོ་བཞད་པའི་ངག་དབང་བློ། །མཁས་བཙུན་བཟང་པོ་གདུལ་བྱ་རྒྱ་མཚོ་ཡི། །འདྲེན་མཆོག་དམ་པ་བསྐལ་པར་ཞབས་བརྟན་ཤོག །རྒྱལ་བ་སེང་གེའི་ང་རོ་བཙོང་ཁ་པའི། །བསྟན་པའི་སྒྲོན་མེས་འཇིག་རྟེན་གསུམ་གྱི་མུན། །རབ་སེལ་སྐྱེ་རྒུ་(༡༤༨བ) ― GLG021_Page_0298 ―
[མ་དཔེ་གཟིགས་ན་འདིར་གནོན།]
མཐའ་དག་བདེ་སྐྱིད་ཀྱི། །དགའ་སྟོན་མཆོག་ལ་རྟག་ཏུ་སྤྱོད་པར་ཤོག །འབྲས་དཀར་རིན་ཆེན་སྤུངས་པ་གསུམ་པའི་གླིང༌། །ལྷོ་བརྒྱུད་ཞྭ་སེར་འཆང་བ་བསྟན་པའི་སྲོག །གླང་ཆེན་ཉལ་འདྲའི་རི་བོར་ཆོས་ཀྱི་གྲྭ །བདེ་ཆེན་འདུས་ཚོགས་སྲིད་མཐར་རྒྱས་གྱུར་ཅིག །རྡོ་རྗེ་སྲིན་པོ་ལེགས་ལྡན་ཕྱག་དྲུག་པ། །འཇམ་དཔལ་བཀའ་སྡོད་དུས་དགྲ་མ་ཧེའི་ཞལ། །འདོད་ཁམས་དབང་ཕྱུག་མ་སོགས་སྲུང་མ་ཡིས། །འཕྲིན་ལས་རྣམ་བཞི་འགྲུབ་པའི་བཀྲ་ཤིས་ཤོག །ཅེས་པ་འདིའང་ངག་དབང་ནམ་མཁས་རི་བོ་བདེ་ཆེན་དུ་འཛུགས་རྩིས་ཀྱི་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་ཚོགས་དབང་པོའོ། །མོས་དགེའི་དཔག་བསམ་ལྗོན་པའི་རྩེར། །ཡོངས་དུད་བདེ་སྐྱིད་འབྲས་བུའི་ཁུར། །ལེགས་སྨིན་རོ་བརྒྱ་བདའ་བའི་ཟས། །ཚེ་རབས་ཀུན་ཏུ་མྱོང་བར་ཤོག །འཁྲུངས་རབས། ཤིང་རྟ་ཆེན་པོ་རྣམ་གཉིས་ཀྱི། །གཞུང་ལུགས་གངས་ཅན་ལས་བབས་ཆུས། །ས་ལམ་མྱུ་གུ་སྐྱེད་བསྲིངས་ནས། །ཀུན་མཁྱེན་ཡེ་ཤེས་ཐོབ་པར་ཤོག །ལམ་རིམ། ངོ་མཚར་ཞིང་གི་བཀོད་པའི་ཕུལ། །བདེ་བ་ཅན་དུ་འདབ་བརྒྱའི་སྦུབས། །བརྫུས་ཏེ་སྐྱེས་ནས་འོད་དཔག་མེད། །ཞལ་མཇལ་ཆོས་ཀྱི་སྨིན་གྲོལ་ཤོག་བདེ་བ་ཅན། ལོག་པར་བལྟ་བའི་མུ་སྟེགས་སྡེ། །སྣ་ཚོགས་ཆོ་འཕྲུལ་གྱིས་བཏུལ་བ། །ཇི་བཞིན་རང་རྒྱུད་བདུད་བཞི་ལས། །རྣམ་པར་རྒྱལ་བར་བདག་བྱིན་རློབས། ཆོ་འཕྲུལ། ཐུན་མོང་གདུལ་བར་མཛད་པ་བཅུའི། །ཚུལ་བསྟན་ཇི་ལྟར་བདག་གཞན་འགྲོ། །རིང་པོར་མི་ཐོགས་མགོན་ཁྱོད་དང༌། །མཚུངས་པར་འགྲོ་བ་ཀུན་སྒྲོལ་ཤོག་མཛད་བཅུ། སྐུ་དངོས་དེང་བཞུགས་མཁའ་ཁྱབ་ཀྱི། །(༡༤༩ན) ― GLG021_Page_0299 ―
[མ་དཔེ་གཟིགས་ན་འདིར་གནོན།]
སེམས་ཅན་མ་ལུས་དོན་མཛད་པ། །འཕགས་པའི་གནས་བརྟན་བཅུ་དྲུག་གི །བྱིན་རླབས་བདག་སྙིང་ལ་ཞུགས་མཛོད་གནས་བཅུ། རྒྱལ་ཡུམ་འཕགས་མས་གླང་སེང་སྦྲུལ། །མེ་ཆུ་ལྕགས་སྒྲོག་ཤ་ཟ་དང༌། །རྐུན་པོར་མཚུངས་པའི་འཇིགས་བརྒྱད་ལས། །ལེགས་སྐྱོབས་ཕན་དང་བདེ་ལ་སྦྱོར་སྒྲོལ་མ། དུས་གསུམ་བསགས་དང་བསག་བཞིན་པའི། །དགེ་བས་རྡོ་རྗེ་སློབ་དཔོན་མཆོག །བསྐལ་བརྒྱར་མྱ་ངན་མི་འདའ་བར། །ཆོས་ཀྱི་འཁོར་ལོ་སྐོར་གྱུར་ཅིག་འདྲ་འབག །ཅེས་པའང་བློ་གྲོས་རྒྱ་མཚོས་ཐད་ཀའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་དབང་ངོ༌། །གཡུ་ལྗང་ལོ་འདབ་ཕང་ཕུང་གཡོ་བ་ཕུལ་བྱུང་བཀོད་པའི་ཞིང་ཁམས་ནས། །དྲི་མེད་རབ་གསལ་ཡེ་ཤེས་སྤྱན་བདུན་དུས་གསུམ་གྲངས་མེད་ཉེར་གཟིགས་མ། །མཐའ་ཡས་རྒྱལ་བ་ཀུན་གྱི་ཡུམ་གཅིག་ཚེ་སྦྱིན་ཡིད་བཞིན་འཁོར་ལོ་མས། །མཁའ་མཉམ་སྐྱེ་རྒུ་བདུད་བཞིའི་གཡུལ་ལས་རྣམ་པར་རྒྱལ་བའི་དགའ་སྟོན་སྩོལ། །གང་ལ་བརྟེན་ན་བསླུ་བ་མེད་པ་དཀོན་མཆོག་རིན་ཆེན་ཐུགས་རྗེ་ཡིས། །ངག་དབང་འཇམ་དབྱངས་དགྱེས་པའི་བཤེས་གཉེན་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་གཞོམ་ཞིག་དང་བྲལ་གར་གྱི་དབང་ཕྱུག་ཇི་བཞིན་དུ། །འཆི་བ་མེད་པའི་ཚེ་ལ་མངའ་བརྙེས་འགྲོ་བ་མ་ལུས་འདྲེན་པར་ཤོག །དགའ་བ་བརྒྱ་པ་མགྲིན་སྔོན་ཅན་དང་འཁོར་ལོའི་ལག་སོགས་མེ་ཞལ་གྱི། །གཙོ་བོ་རྣམས་དང་བདེན་པའི་ངག་གིས་དམོད་པའི་ཚིག་མངར་དབང་བ་ཡིས། །ས་འོག་ས་སྟེང་ས་བླ་གནས་པའི་སྐྱེ་རྒུ་ཡོངས་ལ་གནས་སྐབས་དང༌། །མཐར་ཐུག་བསམས་(༡༤༩བ) ― GLG021_Page_0300 ―
[མ་དཔེ་གཟིགས་ན་འདིར་གནོན།]
དོན་ལྷུན་གྱིས་གྲུབ་པའི་སྨོན་ལམ་བཟང་པོའི་འབྲས་སྨིན་ཤོག །ཅེས་པའང་ངག་དབང་མཁས་བཙུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །གསུང་དང་དབང་བཞིའི་ཆུ་རྒྱུན་བློ་གྲོས་ཀྱིས། །བུམ་བཟང་ཡོངས་གཏམ་ཟབ་དང་རྒྱ་ཆེའི་ཆོས། །དབྱར་མཚོ་ལྟ་བུར་འཕེལ་བ་དགའ་བའི་བཤེས། །རབ་བརྟན་དཀོན་ཅོག་འཕྲིན་ལས་འཇུག་པར་ཤོག །འཕགས་ཡུལ་ཤྲཱི་ན་ལནྡྲ་གཉིས་པར། །ཤེས་བྱ་ཀུན་རིག་རོང་སྟོན་ཆོས་རྗེ་དང༌། །མཁྱེན་རབ་རིན་ཆེན་མཆོག་ཏུ་གྲུབ་པ་ཡིས། །རིང་ལུགས་སྲིད་མཐའི་བར་དུ་འཕེལ་བར་ཤོག །འཁོན་རིགས་འཇམ་དབྱངས་མ་དྲོས་ཆུ་བོ་ལས། །ངོར་རྫོང་ཐུ་སྟོན་སྨིན་གྲོལ་ཆོས་ཀྱི་མཛོད། །གོང་མའི་སྙན་བརྒྱུད་སློབ་བཤད་ཟབ་དོན་གྱི། །རྣམ་བཞིའི་ཉལ་འགྲོ་ཆད་མེད་འབབ་པར་ཤོག །རྨད་བྱུང་མཁྱེན་པའི་རབ་དང་ཕུལ་གྱུར་པས། །ངག་དབང་འཇམ་དབྱངས་དགྱེས་པའི་རྣམ་དཔྱོད་མཐུས། །ལྷུན་གྲུབ་ཆོས་དང་རིགས་ཀྱི་བསྟན་པའི་རྒྱུན། །བླ་ནས་བླར་འཕེལ་གངྒཱའི་ཀླུང་ལྟར་ཤོག །གུར་མགོན་ལྕམ་དྲལ་སྟོབས་འཕྲོག་དབང་པོ་སོགས། །རྡོ་རྗེ་ཆོས་སྐྱོང་རྣམས་ཀྱིས་གྲོགས་མཛད་ཅིང༌། །རིགས་བྱེད་མ་དང་ཚོགས་བདག་འདོད་རྒྱལ་གྱིས། །སྲིད་ཞིའི་དཔལ་འབྱོར་ཆར་དུ་སྙིལ་བར་མཛོད། །ཅེས་པ་འདིའང་གསང་ཆེན་རྒྱུད་སྡེ་རྒྱ་མཚོའི་སྨིན་གྲོལ་གདམས་པའི་བང་མཛོད་བཅོ་བརྒྱད་ཆོས་རྗེ་མཁྱེན་རབ་ངག་དབང་ལྷུན་གྲུབ་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །ཚེ་དཔག་མེད་མགོན་ཡིད་བཞིན་འཁོར་ལོ་དང༌། །(༡༥༠ན) ― GLG021_Page_0301 ―
[མ་དཔེ་གཟིགས་ན་འདིར་གནོན།]
གཙུག་ཏོར་རྣམ་པར་རྒྱལ་མ་ལ་སོགས་པ། །འཆི་མེད་གྲུབ་པའི་རིག་འཛིན་ལྷ་ཚོགས་ཀྱིས། །དེང་འདིར་ཚེ་ཡི་དངོས་གྲུབ་ལེགས་སྩོལ་ཅིག །ཀུན་མཁྱེན་བུ་སྟོན་རིང་ལུགས་སྤེལ་བ་ལ། །རིན་ཆེན་དབང་རྒྱལ་ལྟ་བུར་གདུལ་བྱ་ཡི། །བསོད་ནམས་ཞིང་གྱུར་རྣམ་ཀུན་མཆོག་ལྡན་པའི། །གྲུབ་པའི་རྡོ་རྗེ་འཛིན་ལ་གསོལ་བ་འདེབས། །མགོན་ཁྱོད་འཆི་མེད་ཚེ་ལ་དབང་འབྱོར་ཏེ། །གཡུང་དྲུང་ལྟ་བུར་མི་ཤིགས་ལྷུན་གྲུབ་སྐུ། །བསྐལ་བརྒྱར་གཞོམ་མེད་རབ་ཏུ་བརྟན་གྱུར་ནས། །རྒྱ་ཆེན་ཆོས་ཀྱི་འཁོར་ལོ་སྐོར་བར་ཤོག །ཅེས་མཁན་ཆེན་རྡོ་རྗེ་འཆང་རིན་ཆེན་བསོད་ནམས་མཆོག་གྲུབ་ཀྱི་གསོལ་འདེབས་བརྟན་བཞུགས་འདིའང་མཁས་ཤིང་གྲུབ་བརྙེས་མཁྱེན་རབ་ངག་དབང་ལྷུན་གྲུབ་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་དབང་ངོ༌། །ཚེ་དཔག་མེད་དངོས་སྙིགས་དུས་འགྲོ་བའི་དོན། །འཛམ་གླིང་ཆེ་བའི་རིག་སྔགས་འཆང་བའི་གར། །ལེགས་བསྒྱུར་མཚོ་ལས་སྐྱེས་པའི་རྡོ་རྗེ་ཡི། །རྨད་བྱུང་ཟད་མི་ཤེས་པའི་བྱིན་རླབས་མཐུས། །ཟིལ་གནོན་འཇམ་དཔལ་གྲུབ་པའི་རིག་པ་འཛིན། །པདྨས་མིང་བཏགས་རྡོ་རྗེ་ཐོགས་མེད་རྩལ། །འོག་མིན་ཞིང་ཁམས་ཞིང་གཙོའི་མགོན་པོ་བཞིན། །ནམ་ཡང་གཡོ་མེད་གཡུང་དྲུང་ལྟར་བརྟན་ཤོག །བདག་སོགས་འོད་གསལ་རྡོ་རྗེ་སྙིང་པོ་ཡི། །གསང་ལས་ཡང་གསང་ཉེ་བའི་ལམ་བཟང་ལ། །བརྟེན་ནས་ཚེ་འདིར་འཕོ་བ་ཆེན་པོའི་སྐུ། །ཡོངས་གྲུབ་མཁའ་ཁྱབ་འགྲོ་བ་སྒྲོལ་བར་ཤོག །ཅེས་པ་འདིའང་སྔ་འགྱུར་གྱི་བསྟན་འཛིན་བྲེས་པ་བླ་ཆེན་ཆོས་རྒྱལ་རྡོ་རྗེས་ཆེད་དུ་བསྐུལ་བ་ལྟར་ཟ་(༡༥༠བ) ― GLG021_Page_0302 ―
[མ་དཔེ་གཟིགས་ན་འདིར་གནོན།]
ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མི་ཕྱེད་དད་པའི་ཡིད་ཀྱི་ནམ་མཁའ་ལ། །སྲས་བཅས་རྒྱལ་བ་ཀུན་འདུས་ངག་གི་དབང༌། །བློ་གསལ་སྐལ་བཟང་རྒྱ་མཚོའི་གཉེན་གཅིག་པུ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཚེ་རབས་བརྒྱུད་མར་དལ་འབྱོར་རྟེན་རྙེད་ཅིང༌། །བཤེས་གཉེན་དམ་པའི་མགོན་གྱིས་རྟག་ཏུ་ཟིན། །ཚད་ལྡན་ཆོས་ལ་ཐོས་བསམ་སྒོམ་གསུམ་གྱིས། །མྱུར་དུ་འགྲོ་བ་འདྲེན་པའི་དཔལ་དུ་ཤོག །ཅེས་པ་འདིའང་རབ་འབྱམས་པ་ཚུལ་ཁྲིམས་རྒྱ་མཚོ་དང་མགོན་པོ་དོན་གྲུབ་གཉིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་དབང་ངོ༌། །སྙིགས་མའི་སེམས་ཅན་རྣམས་ལ་ཐུགས་རྗེའི་མཐུ། །རྣམ་འདྲེན་གཞན་ལས་ཆེས་ལྷག་བདེར་གཤེགས་བརྒྱད། །མ་སྨད་ཐུགས་རྗེ་བསྐུལ་བ་མདོ་ཆོག་གཞུང༌། །བསྟན་པའི་རྩ་ལག་ཞི་འཚོ་བཞེད་པའི་སྲོལ། །ཉེར་མཁོའི་ཕོ་བྲང་དེར་འགོད་སྐུ་བརྙན་སོགས། །ལྷག་བསམ་སྟོན་གྱི་ཟླ་བ་ལྟར་དཀར་བས། །སྒྲུབ་འབྲས་རྨེ་རུའི་འདུས་སྡེ་སྲིད་མཐའི་བར། །ཆོས་དང་འབྱོར་པ་དབྱར་མཚོ་ལྟར་འཕེལ་ཤོག །བྱེད་པོར་གཏོགས་ཀུན་བདེར་གཤེགས་འཁོར་བཅས་ཀྱིས། །སྨོན་པ་ཇི་ལྟར་རྟག་ཏུ་བདེ་ཞིང་སྐྱིད། །རང་དོན་ཙམ་མིན་རྒྱུད་ལྔའི་ཡིད་ཅན་རྣམས། །བྱང་ཆུབ་མཆོག་ལ་སྦྱོར་བའི་རྒྱུ་རུ་བསྔོ། །ཞེས་པ་ཡང་མངའ་བདག་ཁྲི་ལྡེ་གཙུག་བརྟན་གྱི་དུས་ཚུགས་པའི་འདུས་སྡེ་རྨེ་རུ་བ་རྣམས་ཀྱིས་བདེར་གཤེགས་བརྒྱད་ཀྱི་ཆོ་ག་ལ་མཁོ་བའི་ཕོ་བྲང་དང་ལྷ་ཚོགས་རྣམས་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་(༡༥༡ན) ― GLG021_Page_0303 ―
[མ་དཔེ་གཟིགས་ན་འདིར་གནོན།]
རབ་པ་ཕུན་ཚོགས་དབང་པོའོ། །དགེ་བསྙེན་མིང་འཛིན་དུས་ཀྱི་ཆོས་ཉིད་ཅན། །མུ་མེད་འཁོར་བའི་གློང་དུ་ཡོངས་ཆུད་ལས། །སྒྲོལ་བའི་དེད་དཔོན་མཚན་ལེགས་ཡོངས་བསྒྲགས་ལྡན། །ཐུགས་རྗེ་ཉེར་བསྐུལ་མཐུ་དཔུང་བསྐྱེད་དུ་གསོལ། །དགེ་བསྙེན་༝། མུ་མེད་༝། སྒྲོལ་བའི་དེད་དཔོན་རིན་ཆེན་ཟླ་བ་ཡི། །ཐུགས་རྗེ་༝། དགེ་བསྙེན་༝། མུ་མེད་༝། སྒྲོལ་བའི་དེད་དཔོན་གསེར་བཟང་དྲི་མ་མེད། །ཐུགས་རྗེ་༝། དགེ་བསྙེན་༝། མུ་མེད་༝། སྒྲོལ་བའི་དེད་པོན་མྱ་ངན་མེད་པའི་མཆོག །ཐུགས་རྗེ་༝། དགེ་བསྙེན་༝། མུ་མེད་༝། སྒྲོལ་བའི་དེད་དཔོན་ཆོས་བསྒྲགས་རྒྱ་མཚོའི་དབྱངས། །ཐུགས་རྗེ་༝། དགེ་བསྙེན་༝། མུ་མེད་༝། སྒྲོལ་བའི་དེད་དཔོན་མངོན་པར་མཁྱེན་པ་རྒྱལ། །ཐུགས་རྗེ་༝། དགེ་བསྙེན་༝། མུ་མེད་༝། སྒྲོལ་བའི་དེད་དཔོན་བཅོམ་ལྡན་སྨན་གྱི་བླ། །ཐུགས་རྗེ་༝། དགེ་བསྙེན་མིང་འཛིན་དུས་ཀྱི་ཆོས་ཉིད་ཅན། །མུ་མེད་འཁོར་བའི་གློང་དུ་ཡོངས་ཆུད་ལས། །སྒྲོལ་བའི་དེད་དཔོན་དོན་ཀུན་གྲུབ་པའི་དཔལ། །ཐུགས་རྗེ་ཉེར་བསྐུལ་མཐུ་དཔུང་བསྐྱེད་དུ་གསོལ། །ཞེས་ཁང་གསར་དགེ་བསྙེན་གྱི་དོན་དུ་བདེ་བར་གཤེགས་པ་བརྒྱད་ཀྱི་སྐུ་བརྙན་བཞེངས་པའི་རྒྱབ་ཡིག་བྱང་གླིང་བསམ་གྲུབ་རྒྱལ་པོས་དོ་དམ་བྱས་ནས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །བདེ་དགྱེས་གཤིན་རྗེ་གཤེད་སོགས་དཀྱིལ་འཁོར་ལྷ། །ཚེ་མཐའ་ཡས་པའི་ངོ་བོར་ལེགས་བཞེངས་ནས། །བདུད་རྩིའི་བུམ་པས་མགོན་ཁྱོད་སྲིད་མཐའི་བར། །མི་འགྱུར་འཆི་བ་མེད་པའི་དབང་བསྐུར(༡༥༡བ) ― GLG021_Page_0304 ―
[མ་དཔེ་གཟིགས་ན་འདིར་གནོན།]
ཞིག །རིན་ཅེན་རྣམ་གསུམ་ཀུན་འདུས་བསོད་ནམས་ཞིང༌། །མཆོག་ཏུ་སྐུ་ཚེ་གཡུང་དྲུང་རང་བཞིན་དུ། །དབང་ཕྱུག་ལྷུན་གྱིས་གྲུབ་པས་སེང་གེའི་ཁྲིར། །རབ་བརྟན་ཟབ་རྒྱས་ཆོས་འཁོར་སྐོར་བར་བསྐུལ། །གུར་མགོན་སྟོབས་འཕྲོག་དབང་པོ་རྣམ་ཐོས་སྲས། །དཔལ་ལྡན་མ་དང་པུ་ཏྲ་བེག་ཙེ་སོགས། །རྡོ་རྗེའི་ཆོས་སྐྱོང་སྲུང་མས་ཞི་རྒྱས་དང༌། །དབང་དྲག་འཕྲིན་ལས་མ་ལུས་སྒྲུབ་པར་མཛོད། །ཅེས་ཁྱབ་བདག་ཞ་ལུ་པ་ཆེན་པོ་རིན་ཆེན་བསོད་ནམས་མཆོག་གྲུབ་བརྟན་པར་བཞུགས་པའི་ཚིགས་སུ་བཅད་པ་འདི་ནི་ཟ་ཧོར་གྱི་བནྡེས་དང་བའི་ཡིད་ཀྱིས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་ཚོགས་དབང་པོའོ། །གང་གི་མཚན་སྙན་ཐོས་པའི་མོད་ལ་ལྷ་ཆེན་ཉི་བུའི་ཕོ་ཉ་རྣམས། །ལེགས་ཉེས་ཡོངས་གསལ་མེ་ལོང་འཛིན་པའི་ངལ་ཁུར་བཏང་ནས་ཅི་བདེར་གཉིད། །སྟུག་པོར་གཡུར་མཛད་ནུབ་ཕྱོགས་བདེ་བ་ཅན་ཞིང་མགོན་པོ་འོད་མཐའ་ཡས། །པདྨ་རཱ་གའི་བུམ་བཟང་ལས་འོངས་བདུད་རྩིའི་རྒྱུན་གྱིས་ཚིམ་པར་མཛོད། །ཆོས་རྣམས་ཡོངས་ཡེ་སྤྲོས་པའི་མཚན་བྲལ་འགྱུར་བ་མེད་པའི་ངང་ཉིད་ནས། །ཀུན་རྫོབ་རྒྱུ་འབྲས་ངེས་པར་མི་བསླུ་རྟེན་ཅིང་འབྲེལ་བར་འབྱུང་བའི་མཐུས། །འཆི་བདག་བདུད་ཀྱི་ལྕགས་ཁམས་མ་ལུས་གཞོམ་མེད་སྲོག་གི་གསེར་བསྒྱུར་བར། །སྨོན་པའི་རེ་བ་ཇི་བཞིན་སྐོངས་ཤིག་སངས་རྒྱས་ཆོས་དང་དགེ་འདུན་ཚོགས། །དུས་གསུམ་བདེ་གཤེགས་གངྒཱའི་རྡུལ་སྙེད་འགྲོ་ལ་རྗེས་སུ་ཉེར་བརྩེ་ཡང༌། །བདག་སོགས་མ་རིག་འཐུག་པོས་ཡོངས་བསྒྲིབས་མངོན་སུམ་མཐོང་བའི་སྐལ་ཕྲ་བར། །རྒྱལ་ཀུན་ཐུགས་རྗེ་བཤེས་གཉེན་གཟུགས་ཀྱིས་གདུལ་བྱའི་མིག་ངོར་རབ་(༡༥༢ན) ― GLG021_Page_0305 ―
[མ་དཔེ་གཟིགས་ན་འདིར་གནོན།]
བསྒྱུར་ཕྱིར། །གསོལ་བའི་རེ་འབྲས་དོན་གྲུབ་ཆེད་དུ་རྡོ་རྗེ་ཁྲི་ལ་རྟག་བརྟན་ཤོག །ལེགས་བྱས་ཕུང་པོར་སྤུངས་པའི་རི་བོ་ས་ལ་རྒྱུ་བའི་ཤུགས་ཆེན་པོས། །འཇིག་རྟེན་གསུམ་པོ་རང་བྱན་བྱེད་པའི་མི་ཡི་བདག་པོའི་གྲིབ་བསིལ་དུ། །འབངས་རྣམས་རྫོགས་ལྡན་ལྟ་བུར་སྤྱོད་པ་ཕན་དང་བདེ་བའི་རྩི་སྨན་གྱི། །ལྗོན་པའི་ཤིང་གི་ཡལ་ག་རབ་རྒྱས་ཕུན་ཚོགས་འབྲས་བུ་དུས་སྨིན་ཤོག །ཆོས་གྲགས་རིགས་གཞུང་གཙོ་བོར་གྱུར་པའི་མཐའ་ཀླས་བཀའ་དང་དགོངས་འགྲེལ་ལ། །མང་དུ་ཐོས་ཤིང་དེ་དོན་ལེགས་བསམས་ལྷག་པའི་བསླབ་པ་གསུམ་ལྡན་པའི། །ཉི་ཟླའི་འོད་ཀྱིས་མུན་པ་སེལ་བར་ཆོས་སྲིད་མ་ལུས་དར་རྒྱས་པ། །འདུས་པའི་གླིང་གྱུར་སྨོན་པ་ལྷ་དང་དྲང་སྲོང་ཚོགས་ཀྱིས་གྲུབ་པར་མཛོད། །ཅེས་པ་འདི་ཡང་ཐོས་བསམ་དར་རྒྱས་གླིང་སྤྱི་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྣམ་སྣང་ཐུགས་རྗེའི་ལྕགས་ཀྱུ་ཡིས། །ཚེ་རིང་བསམ་གྲུབ་ངན་སོང་ལས། །དྲངས་ཏེ་མངོན་མཐོ་ངེས་ལེགས་སར། །བཀོད་ནས་དོན་གཉིས་འགྲུབ་བྱིན་རློབས། །ཞེས་པའང་ཆེ་ཆེན་དབོན་པོས་བསྐུལ་བ་ལྟར་ཟ་ཧོར་གྱི་བནྡེས་བྲིས། །སྭསྟི་པྲ་ཛཱ་བྷྱཿ ཕུན་ཚོགས་བློ་གྲོས་བུམ་པར་འཁྱིལ་བའི་བཅུད། །སྐལ་བཟང་གདུལ་བྱར་སྩོལ་མཛད་བཤེས་གཉེན་མཆོག །ཚེ་དང་ཡེ་ཤེས་དཔག་མེད་མགོན་པོ་བཞིན། །རྡོ་རྗེའི་ཁྲི་ལ་གཡོ་བ་མེད་པར་ཤོག །བློ་བཟང་གྲགས་སྙན་འབར་བའི་བསྟན་སྲུང་ཆེ། །ཡེ་ཤེས་མགོན་པོ་ལས་ཀྱི་གཤིན་རྗེ་ཡིས། །མགོན་ཁྱོད་སྐྱེ་རྒུའི་ལེགས་བྱས་རབ་སྤེལ་བ། །ཞིང་དུ་སྐུ་ཚེ་གཡུང་དྲུང་ལྟ་བུར་མཛོད། །ཇི་ལྟར་(༡༥༢བ) ― GLG021_Page_0306 ―
[མ་དཔེ་གཟིགས་ན་འདིར་གནོན།]
སྨོན་ལམ་ལེགས་བཏབ་དཔག་བསམ་གྱི། །ལྗོན་པ་དར་ལ་བབས་པའི་གྲིབ་བསིལ་དུ། །བདག་སོགས་རིང་པོར་ཕན་བདེ་ལ་སྤྱོད་བདེ། །རེ་བའི་འབྲས་བུ་ཡོངས་སུ་སྨིན་པར་ཤོག །ཅེས་སྤྲུལ་སྐུ་རིན་པོ་ཆེ་བློ་བཟང་ཡེ་ཤེས་ཀྱི་བརྟན་བཞུགས་འདི་ནི་ཤེས་རབ་བཟང་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཕུན་ཚོགས་དགེ་འདུན་རྣམས་ཀྱི་བཞེད་པའི་དོན། །གྲུབ་མཛད་ཡོངས་འཛིན་དམ་པར་གསོལ་འདེབས་ན། །བདག་སོགས་གདུལ་བྱའི་མགོན་དུ་བསྐལ་བརྒྱའི་བར། །རྡོ་རྗེ་ལྟ་བུར་བརྟན་པར་བཞུགས་གྱུར་ཅིག །སྐུ་སྐྱེ་བློ་བཟང་འཕྲིན་ལས་ཀྱི་ངོར་ཟ་ཧོར་གྱི་བནྡེས་བྲིས། །འཁོར་འདས་ཆོས་ཀུན་ཡེ་ནས་རོ་གཅིག་དབྱིངས། །རྩ་བའི་བླ་མ་འཕགས་མཆོག་སྤྱན་རས་གཟིགས། །བཅུ་གཅིག་ཞལ་ལྡན་ནམ་མཁའ་རྒྱལ་པོ་ཡི། །ངོ་བོར་གསོལ་བ་འདེབས་སོ་བྱིན་གྱིས་རློབས། །བཟོད་དཀའ་ངན་སོང་གསུམ་གྱི་སྡུག་བསྔལ་མེ། །སྤྱི་བླུགས་བདུད་རྩིའི་རྒྱུན་གྱིས་རབ་བཅིལ་ཅིང༌། །བདེ་འགྲོར་རློམ་ཡང་འགྱུར་བའི་སྡུག་བསྔལ་རྣམས། །ཐུགས་རྗེའི་ཕྱག་གིས་བསལ་ནས་དབུགས་དབྱུང་གསོལ། །བརྒྱ་ཕྲག་ལུས་ཀྱིས་ཕྱག་འཚལ་མཆོད་པ་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རང༌། །ཆོས་འཁོར་བསྐོར་ཅིང་བསྐལ་བརྒྱར་རྡོ་རྗེའི་ཁྲིར། །མྱ་ངན་མི་འདའ་བརྟན་པར་བཞུགས་གསོལ་འདེབས། །ལྷ་དང་བླ་མ་གཉིས་སུ་མེད་པའི་སྐུ། །འཇིག་རྟེན་དབང་ཕྱུག་རྣམ་པར་ཡོངས་ཤར་བ། །མཐོང་བས་དོན་ལྡན་སྣོད་བཅུད་མ་ལུས་པ། །རྟེན་དང་བརྟེན་པའི་རྣམ་པར་འཆར་བར་ཤོག །ཁྱོད་གསུང་ཡི་གེ་དྲུག་པའི་སྒྲ་དབྱངས་སུ། །ཐོས་པས་སྲིད་ཞིའི་འཇིགས་(༡༥༣ན) ― GLG021_Page_0307 ―
[མ་དཔེ་གཟིགས་ན་འདིར་གནོན།]
ལས་རྣམ་གྲོལ་ཏེ། །སྙན་དང་མི་སྙན་གྲག་སྟོང་སྐྱེ་བ་མེད། །གསང་སྔགས་ཟབ་མོའི་གདངས་སུ་བསྒྲག་པར་ཤོག །བདེ་སྟོང་ཟུང་དུ་འཇུག་པ་གང་གི་ཐུགས། །དྲན་པས་ཆོས་རྣམས་གདོད་ནས་ཉེར་སྟོངས་པ། །བློ་འདས་རང་སེམས་ཐུགས་རྗེ་ཆེན་པོ་རུ། །ངེས་རྙེད་ཚེ་འདིར་གྲོལ་བར་བྱིན་གྱིས་རློབས། །ཉ་སྟོང་བརྒྱད་གསུམ་དགེ་བའི་ཚོགས་གསོ་ཞིང༌། །སྡིག་སྒྲིབ་ལེགས་སྦྱོང་ཡན་ལག་བརྒྱད་པའི་ཁྲིམས། །ཚུལ་བཞིན་བསྲུངས་བས་ཡང་སྲིད་མཐའ་དག་ཏུ། །ལྷ་མིའི་ལུས་ཐོབ་ཆོས་དང་མཇལ་བར་ཤོག །མངོན་མཐོའི་རྟེན་ལ་སྡིག་སྤོང་དགེ་བའི་ཚོགས། །སྒྲུབ་པའི་གྲུ་རྫིངས་ལ་བརྟེན་འཁོར་བ་ཡི། །རྒྱ་མཚོ་ལས་བསྒྲལ་ཐར་པ་རིན་ཆེན་གླིང༌། །མྱ་ངན་འདས་པའི་གྲོང་དུ་འཇུག་པར་ཤོག །སངས་རྒྱས་དངོས་བྱོན་ལྟ་བུའི་ཇོ་ཤཱཀ་སོགས། །ཡེ་ཤེས་སེམས་དཔའ་བཞུགས་པའི་སྣང་བརྙན་ལ། །གདུང་ཤུགས་དྲག་པོས་ཕྱག་དང་སྐོར་བ་རྣམས། །བྱས་འབྲས་ཐུགས་རྗེའི་སྤྱན་གྱིས་གཟིགས་པར་ཤོག །མེ་ཏོག་བདུག་སྤོས་མར་མེ་དྲི་ཆབ་དང་། །ན་བཟའ་ལྡ་ལྡི་ཕྱེ་མ་ཕུར་མའི་ཚོགས། །སྲི་ཞུར་བགྱིས་མཐུས་འདི་དང་ཕྱི་མ་ཀུན། །ལྷ་མིའི་བདེ་སྐྱིད་དཔལ་ལ་ལོངས་སྤྱོད་ཤོག །དགེ་འདུན་མཆོད་ཅིང་དབུལ་འཕོངས་སྦྱིན་པ་གཏོང༌། །ཕ་མ་ཉམ་ཐག་ནད་པར་རིམ་གྲོ་སོགས། །མདོར་ན་བསོད་ནམས་བསགས་རྣམས་རང་དོན་ཙམ། །མ་ཡིན་འགྲོ་ཀུན་སངས་རྒྱས་འཐོབ་རྒྱུར་བསྔོ། །དེང་ནས་བླ་མ་ཕྱག་ན་པདྨ་གཉིས། །གཅིག་པུ་ཉིད་ལས་དུ་མའི་གར་བཞིན་དུ། །དབྱེར་མེད་གསོལ་བ་བཏབ་པས་གྲུ་འཛིན་དུ། །སྐྱེས་ནས་ཐེག་ཆེན་ཆོས་ལ་སྤྱོད་པར་ཤོག །རྒྱལ་བ་སྲས་བཅས་ཐུགས་རྗེའི་བྱིན་རླབས་(༡༥༣བ) ― GLG021_Page_0308 ―
[མ་དཔེ་གཟིགས་ན་འདིར་གནོན།]
དང༌། །ལྷ་དང་དྲང་སྲོང་བདེན་ཚིག་གྲུབ་པའི་མཐུས། །བསྟན་པ་དར་ཞིང་སེམས་ཅན་བདེ་སྐྱིད་ལྡན། །ཕྱོགས་དུས་གནས་སྐབས་ཀུན་ཏུ་བཀྲ་ཤིས་ཤོག །ཅེས་རང་གང་མོས་ཀྱི་བླ་མ་སྤྱན་རས་གཟིགས་དང་ངོ་བོ་དབྱེར་མེད་དུ་གསོལ་འདེབས་ཡན་ལག་བདུན་པ་དང་འབྲེལ་བའི་བརྟན་བཞུགས་སྨོན་ལམ་ཤིས་བརྗོད་དང་བཅས་པ་འདི་ནི་འཕྲུལ་སྣང་བསྙེན་གནས་མ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འཕགས་བོད་པཎ་གྲུབ་དག་ལས་དབང་ཆུའི་རྒྱུན། །བློ་གྲོས་སྐལ་བཟང་རྒྱ་མཚོར་རབ་འཁྱིལ་བས། །ཡིད་སྲུབས་དཔུང་ལ་འཇིགས་མེད་གོ་ཆ་ཅན། །ཐུབ་བསྟན་ལང་ཚོའི་སྡེ་ལ་གསོལ་བ་འདེབས། །ཧེ་རུ་ཀཿདངོས་དམ་པའི་བདེན་ཚིག་དང༌། །རྡོ་རྗེའི་སྲུང་མར་བཀའ་བསྒོས་ནུས་མཐུ་ཡིས། །མགོན་ཁྱོད་འོག་མིན་ཞིང་གི་གཙོ་བོ་ལྟར། །འཁོར་བ་མ་སྟོངས་བར་དུ་བརྟན་པར་ཤོག །པང་ནས་སྐྱེས་དང་ཉེ་རྒྱལ་ཇི་བཞིན་དུ། །གྲུབ་མཐའ་སྙོགས་མིན་དེ་སྲིད་མི་འབྲལ་བར། །ཡང་དག་བཤེས་མཛད་དགེ་ལེགས་ཕུན་ཚོགས་ལ། །སྦྱོར་བའི་མཛའ་གྲོགས་དམ་པར་འགྱུར་བར་ཤོག །འཇམ་དབྱངས་འཁོན་གྱི་གདུང་བརྒྱུད་དྲི་བྲལ་བ། །སྐྱེ་རྒུའི་མཆོད་སྡོང་ཞིང་དུ་མི་ཆད་ཅིང༌། །རྡོ་རྗེ་འཆང་དངོས་བླ་ཆེན་ས་སྐྱ་པའི། །མདོ་སྔགས་བསྟན་པ་སྲིད་མཐར་རྒྱས་པར་ཤོག །ཁྱད་པར་གསུང་ངག་གསེར་ཆོས་བཅུ་བཞི་དང༌། །མགོན་པོ་ཆེ་ཆུང་མན་ངག་སྙན་ནས་སྙན། །ལེགས་བརྒྱུད་སློབ་བུ་མཆོག་ལ་བཤད་བྱ་ཀུན། །མཐོ་རིས་ཆུ་བོའི་རྒྱུན་བཞིན་ཆད་མེད་ཤོག །བདེ་དགྱེས་ཡང་ཕུར་ཡི་དམ་དཀྱིལ་འཁོར་ལྷ། །གུར་མགོན་ལྷ་ཆེན་གདོང་བཞི་ལས་མཁན་བཅས། །ཆོས་སྲུང་རྣམས་ཀྱིས་(༡༥༤ན) ― GLG021_Page_0309 ―
[མ་དཔེ་གཟིགས་ན་འདིར་གནོན།]
འཕྲིན་ལས་མ་ལུས་པ། །བསམས་པ་ཇི་བཞིན་ལྷུན་གྱིས་གྲུབ་པར་མཛོད། ཁམས་གསུམ་བརྟན་པ་འཕྲོག་མཛད་རིགས་བྱེད་མ། །སྟོབས་ལྡན་གླང་པོའི་གདོང་པ་ཚོགས་ཀྱི་བདག །འདོད་པའི་རྒྱལ་པོས་སྲིད་ཞིའི་དགེ་ལེགས་ཀུན། །དབང་སྡུས་བཀྲ་ཤིས་དཔལ་གྱིས་ཁྱབ་པར་ཤོག །ཅེས་གསོལ་འདེབས་རིང་འཚོའི་བདེན་བརྗོད་བྱང་ཆུབ་བར་དུ་མི་འབྲལ་ཞིང་བསྟན་པ་རྒྱས་པའི་ཚིགས་བཅད་འདི་ལྟ་བུ་ཞིག་རྩོམས་ཞེས། བསྟན་པའི་མངའ་བདག་རྗེ་བཙུན་ས་སྐྱ་བ་འཇམ་དབྱངས་འཁོན་གྱི་གདུང་ལས་འཁྲུངས་ཤིང་དཀྱིལ་འཁོར་རྒྱ་མཚོའི་བདག་ཉིད་ཡབ་རྗེ་ངག་དབང་བསོད་ནམས་དབང་ཕྱུག་གྲགས་པ་རྒྱལ་མཚན་དཔལ་བཟང་པོ་དང་དེ་སྲས་ཁྲི་ཆེན་ཀུན་དགའ་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་ཡབ་སྲས་ཀྱིས་བཀའ་སྩལ་པ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །རྒྱལ་ཀུན་འདུས་པ་རྔ་ཡབ་གླིང་པ་ཡིས། །རྗེས་བཟུང་གན་ཇག་ཐང་ཏ་སྤྲུལ་པའི་གར། །པྲཛྙ་ར་སྨིས་སྤྱན་དྲངས་ཟབ་གཏེར་ལས། །ལག་ན་པདྨ་ཞི་ཁྲོ་བསྒྲུབས་པའི་མཐུས། །སྤྱི་དང་བྱེ་བྲག་ཐུབ་བསྟན་དེ་འཛིན་རྒྱས། །འགྲོ་རྣམས་རྫོགས་ལྡན་དུས་ཀྱི་རིང་པོའི་ཚེ། །ལེགས་བྲིས་དགའ་སྟོན་གནོད་སྦྱིན་ལོངས་སྤྱོད་ཚོགས། །བདེ་ཞིང་སྐྱིད་པའི་དཔལ་གྱིས་རྟག་འཚོར་ཤོག །ཡང་སྒོས་སཱ་ལའི་ལྗོངས་འདིར་འཐབ་རྩོད་གཡུལ། །ནད་རིམས་དབུལ་ཕོངས་བསྐྱེད་པའི་འབྱུང་པོའི་གདོན། །གངས་ཅན་འགྲོ་སྙིང་ཞུགས་པའི་བརླང་སྤྱོད་སོགས། །དགྲ་བགེགས་དེ་འབྲས་བཅས་པ་ཞི་བར་ཤོག །ཁྱད་པར་ལྔ་བདོའི་མཐུ་ཡིས་སྔོན་དུས་ནས། །སྨོན་ལམ་ལོག་དང་གློ་བུར་དམ་སྲིའི་འཕྲུལ། །འཇིག་རྟེན་ཕུང་(༡༥༤བ) ― GLG021_Page_0310 ―
[མ་དཔེ་གཟིགས་ན་འདིར་གནོན།]
བར་བྱེད་པའི་མུན་པའི་རུམ། །བྱིན་རླབས་རྟ་བདུན་དབང་པོས་སངས་པར་ཤོག །ལྷོ་བྱང་སྟོད་སྨད་ཕྱོགས་མཚམས་ནས་ལངས་ཏེ། །ལུས་ཅན་མནར་ནུས་དམག་དང་རྗེས་འབྲངས་འདྲེའི། །ཉེར་འཚེ་ན་བུན་དེངས་པའི་ནམ་མཁའ་ལ། །བདེ་སྐྱིད་ཉི་ཟླ་ཟུང་འབྲེལ་འཆར་བར་ཤོག །ཐེག་མཆོག་དཔལ་གྱི་རི་བོའི་རྩེ་མོ་ནས། །སྒྲུབ་པའི་འདུས་སྡེས་རབ་མཚོན་ཟབ་ཆོས་འདི། །ཉམས་སུ་ལེན་ནོ་ཅོག་གི་བསོད་ནམས་ལས། །སྲིད་ཞིའི་འདུན་མའི་འབྲས་བུ་ཡོངས་སྨིན་ཤོག །དཔལ་ལྡན་རྡོ་རྗེ་གཤོག་རྒོད་མ་ལ་སོགས། །ཟབ་གཏེར་བསྟན་སྐྱོང་ཚོགས་ཀྱིས་སྲུང་སྐྱོབ་ཅིང༌། །རྩ་གསུམ་དྲང་སྲོང་ལྷ་དང་རིགས་འཛིན་གྱི། །བདེན་པས་དུས་ཀུན་དགེ་བའི་བཀྲ་ཤིས་ཤོག །སྤྲུལ་པའི་གཏེར་སྟོན་རྒྱལ་སྲས་ཤེས་རབ་འོད་ཟེར་གྱི་གཏེར་བྱོན་ཐུགས་རྗེ་ཆེན་པོ་པདྨའི་དབང་ཕྱུག་དང༌། རྟ་མགྲིན་དྲེགས་པ་ཀུན་འདུལ་གཉིས་ཀྱི་འཕྲིན་ལས་བོད་འབངས་བདེ་ཐབས་ཀྱི་ལུང་བསྟན་དང་བསྟུན་དཔལ་རི་སྒྲུབ་སྡེར་འཛུགས་པའི་བཀོད་པ་བགྱིས་སྐབས་ཚིགས་བཅད་འདི་ལྟ་བུ་ཞིག་དགོས་ཞེས་མཁར་ཆེན་བཟའི་སྤྲུལ་པར་རིགས་འཛིན་སྲོག་སྒྲུབ་དང༌། རིགས་འཛིན་ཐུགས་ཏིག་གཉིས་ཀྱི་ལུང་ཟིན་སྤྲུལ་སྐུ་ངག་དབང་པདྨ་འཕྲིན་ལས་ཀྱིས་ཆེད་དུ་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སངས་རྒྱས་ཀུན་དངོས་པདྨ་ཐོད་འཕྲེང་གིས། །ཐུགས་རྗེ་ཉི་མའི་འོད་ཟེར་རབ་སྦར་ནས། །མངའ་བདག་བསྟན་པ་འཛིན་པའི་ཆོས་ཀྱི་དབང༌། །མཁའ་ཁྱབ་འགྲོ་འདྲེན་བཞེད་པ་འགྲུབ་གྱུར་ཅིག །སྔ་འགྱུར་སྤྱི་དང་ཁྱད་པར་ཉང་རལ་གྱི། །ཟབ་གཏེར་སྨིན་གྲོལ་གདམས་པའི་ནམ་མཁའ་མཛོད། །སྐལ་བཟང་གདུལ་(༡༥༥ན) ― GLG021_Page_0311 ―
[མ་དཔེ་གཟིགས་ན་འདིར་གནོན།]
བྱར་སླར་ཡང་ཆད་མེད་དུ། །རྗེས་འཇུག་སློབ་བུའི་ཚོགས་ཀྱིས་སྤེལ་ནུས་ཤོག །རྩ་བརྒྱུད་བླ་མ་སྒྲུབ་སྡེ་བརྒྱད་ཀྱི་ལྷ། །དཔལ་མགོན་འབར་བ་དྲེགས་པའི་སྡེ་དཔོན་སོགས། །བསྟན་སྐྱོང་གཏེར་སྲུང་རྒྱ་མཚོས་བསམ་པ་ཡི། །རེ་བ་ཇི་བཞིན་འགྲུབ་པའི་འཕྲིན་ལས་མཛོད། །ཅེས་མངའ་བདག་གདུང་བརྒྱུད་ཐ་མ་ཆོས་རྗེ་བསྟན་འཛིན་ཆོས་དབང་གི་དགོངས་པ་རྫོགས་ཤིང་ཆོས་རྒྱུན་མི་ཆད་པའི་བདེན་བརྗོད་ཀྱི་སྨོན་ལམ་འདི་ནི་སྤང་སྟོན་ངག་དབང་ཆོས་རྒྱལ་གཙོ་བོར་གྱུར་པའི་བུ་སློབ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་པ་ཕུན་དབང་ངོ༌། །བླ་མེད་ཁྱབ་བདག་རྡོ་རྗེ་སེམས་དཔའི་ངོར། །ཡོངས་བལྟས་ཡི་གེ་བརྒྱ་པའི་སྒོམ་བཟླས་ཀྱིས། །སྔོན་བསགས་སྡིག་ལྟུང་དྲི་མ་ཡོད་དོ་ཅོག །མུན་ཁུངས་སྒྲོན་མེ་བཏེག་ལྟར་སངས་པར་ཤོག །སྙིང་ནས་སྡིག་བཤགས་དགེ་ཚོགས་སྤྱད་པའི་མཐུས། །ངན་འགྲོའི་གནས་སུ་ནམ་ཡང་མི་སྐྱེ་ཞིང༌། །དལ་བརྒྱད་འབྱོར་བཅུ་ཚང་བའི་མི་ཡི་ལུས། །ཐོབ་ནས་དམ་པའི་མགོན་གྱིས་བཟུང་བར་ཤོག །གསང་སྔགས་ཐེག་པ་མཆོག་གི་ལམ་ཟབ་མོ། །ཉམས་སུ་བླངས་པས་སྲིད་པའི་རྒྱ་མཚོ་ལས། །བརྒལ་ཏེ་བཅུ་གསུམ་རྡོ་རྗེ་འཛིན་པའི་ས། །བརྙེས་ནས་རང་གཞན་དོན་གཉིས་ལྷུན་གྲུབ་ཤོག །ཅེས་པ་འདི་ཡང་ས་སྐྱོང་བློ་བཟང་མཐུ་སྟོབས་ཀྱི་ཞལ་འདོན་དུ་དགོས་ཚུལ་ལྟར་ཟ་ཧོར་གྱི་བནྡེས་བཀོད། །དང་པའི་རྫིང་བུར་རྒྱལ་ཀུན་འདུས་པའི་ཟླ། །མཚན་དཔེའི་ཆ་གང་ངག་དབང་བློ་(༡༥༥བ) ― GLG021_Page_0312 ―
[མ་དཔེ་གཟིགས་ན་འདིར་གནོན།]
ཡི་གཏེར། །མཁས་བཙུན་བཟང་པོའི་འཕྲིན་ལས་རླབས་ཀྱི་ཕྲེང༌། །ཡོལ་མེད་ཐུབ་བསྟན་རྒྱ་མཚོར་གསོལ་བ་འདེབས། །མཆོག་གསུམ་བྱིན་རླབས་རྡོ་རྗེ་རྩེ་བརྒྱ་པས། །ཉི་བུ་ལྷ་མིན་མོ་དངངས་འཆི་བའི་མངལ། །ཉེར་ལྷུངས་རབ་བརྟན་ས་སྲུངས་ཁྲི་སྟེང་དུ། །འགྲོ་བའི་དཔུང་གཉེན་དམ་པར་གཡོ་མེད་ཤོག །མི་ཡི་བདག་པོ་མངའ་འབངས་བཅས་པ་ལ། །རྒུད་པ་ཟུག་རྔུའི་ཚེར་མ་དྲུངས་ཕྱུངས་ཏེ། །ཚེ་དཔལ་སྟོབས་འབྱོར་རྫོགས་ལྡན་དུས་ཀྱི་མིའི། །བགོ་སྐལ་མཉམ་པོར་ཉམས་སུ་མྱོང་བར་ཤོག །གསོལ་འདེབས་བརྟན་སྡོད་དཔོན་པོ་སྡེ་དམངས་དང་བཅས་པ་དར་བའི་སྨོན་ལམ་ཞིག་དགོས་ཞེས་བཀྲ་ཤིས་སྒོ་མངས་ཀྱི་དབུ་མཛད་ཨལ་དར་དཀའ་བཅུས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བླ་དཔོན་ཆེ་དགུ་གང་ལའང་ཕུལ་ཆོག་པའི་བརྟན་བཞུགས་ཀྱི་ཡི་གེ་ཐུགས་རྗེ་མྱུར་འཇུག །སྭསྟི་པྲ་ཛཱ་བྷྱཿ མགོན་ཁྱོད་མཁྱེན་པའི་མེ་ལོང་གཙང་མའི་ངོས། །རྒྱལ་ཀུན་ཡོན་ཏན་གཟུགས་བརྙན་རྟག་འཆར་བ། །བློ་ལྡན་སྐལ་བཟང་དཔྱིད་གྱུར་གྲགས་པའི་སྒྲས། །ཡོངས་ཁྱབ་འཇམ་དབྱངས་བླ་མ་གཙུག་ན་མཛེས། །བསླུ་མེད་མཆོག་གསུམ་དཔང་དུ་ལེགས་བཞུགས་པར། །དད་པས་གསོལ་གདབ་བདེན་པའི་ཚིག་བརྗོད་དང༌། །ཕུན་ཚོགས་རྟེན་ཅིང་འབྲེལ་བར་འབྱུང་བའི་སྒོ། །འགྲིག་པའི་རྒྱུ་ལས་འབྲས་བུ་ངེས་པར་སྨིན། །དེ་ཕྱིར་དགེ་བའི་བཤེས་དང་མི་བདག་སོགས། །རང་ཉིད་མོས་ཡུལ་གྱུར་ཏོ་ཅོག་རྣམས་ལ། །བརྟེན་ནས་ལེགས་བྱས་ཕུང་པོ་མཐོ་རིས་ཆབ། །འབེབས་(༡༥༦ན) ― GLG021_Page_0313 ―
[མ་དཔེ་གཟིགས་ན་འདིར་གནོན།]
བྱེད་སྐལ་ལྡན་ཤིང་རྟ་འདི་ནའོ། །དེ་ལ་འདིར་མཆོད་བཀུར་གྱི་ཡུལ་དུ་གྱུར་པའི་ཆེ་རྒུ་རྣམས་གཡུང་དྲུང་གི་རང་བཞིན་དུ་བརྟན་པར་བྱ་བའི་ཆེད་དུ་ཕུན་ཚོགས་རྟེན་འབྲེལ་གྱི་སྒོ་བརྒྱ་འབྱེད་པའི་བརྗོད་དོན་ཁྲིགས་རིམ་དུ་བཀོད་པ་ལ། སངས་རྒྱས་ཆོས་ཚོགས་མ་ཚར་གསུམ་གྱིས་སྐྱབས་སེམས་སྔོན་དུ་བཏང་སྟེ་རང་ཉིད་ཇི་ལྟར་འདོད་པའི་དོན་བསྒྲུབ་པའི་ཆེད་དུ་ས་གཞི་བྱིན་གྱིས་བརླབ་ཅིང་གསོལ་གདབ་དཔང་པོའི་ཡུལ་གྱི་ཚོགས་སྤྱན་དྲང་བ་ནི། ཐམས་ཅད་དུ་ནི་ས་གཞི་དག །གསེག་མ་ལ་སོགས་མེད་པ་དང༌། །ལག་མཐིལ་ལྟར་མཉམ་བཻ་ཌཱུཪྻའི། །རང་བཞིན་འཇམ་པོར་གནས་གྱུར་ཅིག །མ་ལུས་སེམས་ཅན་ཀུན་གྱི་མགོན་གྱུར་ཅིང༌། །བདུད་སྡེ་དཔུང་བཅས་མི་བཟད་འཇོམས་མཛད་ལ། །དངོས་རྣམས་མ་ལུས་ཡང་དག་མཁྱེན་གྱུར་པའི། །ཤཱཀྱ་སེང་གེ་གནས་འདིར་གཤེགས་སུ་གསོལ། །ཕྱོགས་བཅུར་བཞུགས་པའི་རྣམ་འདྲེན་ཡོད་དོ་ཅོག །ཁྱད་པར་སྙིགས་མའི་དུས་འདིར་ཐུགས་རྗེའི་མཐུ། །ལྷག་པར་ཆེ་བའི་བཅོམ་ལྡན་སྨན་གྱི་བླ། །བདེ་བར་གཤེགས་པ་མཆེད་བདུན་༝། མ་ཕམ་འཇམ་དཔལ་དབྱངས་སོགས་རྒྱལ་བའི་སྲས། །ཚོགས་སྤྱོད་བསེ་རུ་ལྟ་བུའི་རང་སངས་རྒྱས། །འོད་སྲུངས་མཆོག་ཟུང་གིས་མཚོན་ཉན་ཐོས་སྡེ། །ཐེག་གསུམ་སྐྱེ་འཕགས་གནས་འདིར་༝། འགྲོ་བའི་མགོན་པོ་ཤཱཀྱ་སེང་གེ་ཡིས། །སངས་རྒྱས་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་ཁ་འབྱེད་པ། །ཆོས་སྐྱོང་དགྲ་བཅོམ་ཆེན་པོ་བཞུགས་(༡༥༦བ) ― GLG021_Page_0314 ―
[མ་དཔེ་གཟིགས་ན་འདིར་གནོན།]
སོ་འཚལ། །དམ་ཆོས་སྤེལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་༝། ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོའི་བུ་བཟང་པོ་དང༌། །གསེར་བེའུ་བྷ་ར་དྷྭ་ཛ་གསེར་ཅན་མཆོག །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་ཕྲན་བྷ་ར་དྷྭ་ཛ་བསོད་སྙོམས་ལེན། །ལམ་བསྟན་ཀླུའི་སྡེ་སྦེད་བྱེད་མི་ཕྱེད་པ། །འཁོར་དང་བཅས་པ་གནས་འདིར་༝། ཆོས་སྐུ་ཞི་བའི་མཁའ་ལ་གཡོ་མེད་ཀྱང༌། །ལས་བཞི་འཕྲིན་ལས་དབང་གཞུ་ལྟར་བཀྲ་བ། །དཔལ་ལྡན་ཡེ་ཤེས་མགོན་པོ་ལྕམ་དྲལ་སོགས། །ཆོས་སྐྱོང་བསྟན་སྲུང་འཁོར་བཅས་༝། ཚིག་ལ་དབང་ཞིང་དམོད་པ་མཐུ་བཙན་པ། །ལྷ་དང་རིག་འཛིན་དྲང་སྲོང་གྲུབ་པའི་ཚོགས། །དེང་འདིར་བདེན་བརྗོད་སྨོན་པའི་རེ་སྐོང་བར། །རྫུ་འཕྲུལ་ཤུགས་ཀྱིས་ཐོགས་མེད་འདིར་༝། སྤྱན་དྲང་བའི་ལྷ་ཚོགས་རྣམས་ལ་མཆོད་ཡོན་དབུལ་ཞིང་བཞུགས་སུ་གསོལ་བ་ནི། །བཅོམ་ལྡན་འཁོར་བཅས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང༌། །ཐུགས་ལ་དགོངས་ཤིང་གནང་བར་མཛོད། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་འཁོར་བཅས་བཞུགས། ཁྲུས་ཁང་བསྐྱེད་ཅིང་སྐུ་ཁྲུས་གསོལ་བ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་(༡༥༧ན) ― GLG021_Page_0315 ―
[མ་དཔེ་གཟིགས་ན་འདིར་གནོན།]
བ་ཡིད་འོང་ལྡན། །མུ་ཏིག་འོད་ཆགས་བླ་བྲེ་བྲེས་པ་དེར། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང༌། །སེམས་ཅན་ལུས་ངག་ཡིད་གསུམ་དྲི་མ་སྦྱང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་དྲི་མ་དག་གྱུར་ཅིག །དེ་དག་སྐུ་ལ་༝། ཁྱེད་སྐུ་རང་བཞིན་ཡོངས་དག་པས། །སྲེད་སོགས་འཆིང་བ་མི་མངའ་ཡང༌། །བདག་ཅག་སྒྲིབ་པ་སྦྱང་སླད་དུ། །གཙང་མ་ཆབ་ཀྱིས་སྐུ་ཁྲུས་གསོལ། །དེ་དག་སྐུ་ལ་༝། དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་༝། ཆུ་བོ་དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱོང་མཛད་ཅིང༌། །རྒྱ་ཆེན་ཡོན་ཏན་དྲུག་ལྡན་པ། ཁྲུས་ལེགས་མཛད་ལ་སྐུ་ཁྲུས་གསོལ། །དེ་དག་སྐུ་ལ་༝། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩལ་དུ་གསོལ། །དེ་དག་སྐུ་ལ་༝། སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་(༡༥༧བ) ― GLG021_Page_0316 ―
[མ་དཔེ་གཟིགས་ན་འདིར་གནོན།]
དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང༌། །གང་ལ་རེག་ན་བདེ་བའི་རྒྱུར་འགྱུར་བ། །གོས་བཟང་རིན་ཆེན་བདག་བློ་སྦྱང་ཕྱིར་དབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པ་མི་འཚལ་ཡང༌། །རིན་ཆེན་རྒྱན་མཆོག་ཕུལ་བས་འགྲོ་བ་ཀུན། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །བརྩེ་བའི་ཁོར་ཡུག་སྙན་པའི་བ་དན་ཅན། །ཏིང་འཛིན་བླ་བྲེ་སྤོབས་པའི་འོད་གསལ་བ། །མཆོག་རྐྱེན་འོས་པའི་ཉེར་མཁོ་འདི་དག་དབུལ། །སྐྱེ་བོས་རྣམ་དག་ཡེ་ཤེས་ཐོབ་པར་ཤོག །རིན་ཆེན་མཛེས་པའི་བཀྲ་ཤིས་བུམ་པ་འདི། །སྣ་ཚོགས་བཅུད་ཀྱིས་བཀང་སྟེ་ཕུལ་བ་ཡིས། །ལས་དང་ཉོན་མོངས་དྲི་མ་ཀུན་བྱང་ནས། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །སྐྱབས་ཡུལ་རྣམས་ལ་ཡན་ལག་བདུན་གྱི་སྒོ་ནས་ཚོགས་གསོག་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག(༡༥༨ན) ― GLG021_Page_0317 ―
[མ་དཔེ་གཟིགས་ན་འདིར་གནོན།]
།དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང༌། །སིལ་སྙན་རྣམས་དང་བྱུག་པ་བདུག་མཆོག་དང༌། །མར་མེ་མཆོག་དག་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང༌། །ཕྱེ་མ་ཕུར་མ་རི་རབ་མཉམ་པ་དང༌། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །རྒྱལ་བ་རྒྱ་མཚོའི་མཆོད་རྫས་ལས་གྲུབ་པའི། །ཞིང་ཁམས་རྒྱ་མཚོའི་མཆོད་ཡོན་རྒྱ་མཚོའི་ཚོགས། །ཡོན་ཏན་རྒྱ་མཚོའི་རྒྱལ་བ་འཁོར་བཅས་ལ། །དད་པ་རྒྱ་མཚོས་འབུལ་ལོ་བཞེས་སུ་གསོལ། །རྒྱལ་བ་༝། ཞིང་ཁམས་རྒྱ་མཚོའི་ཞབས་བསིལ་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་མེ་ཏོག་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་བདུག་སྤོས་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་(༡༥༨བ) ― GLG021_Page_0318 ―
[མ་དཔེ་གཟིགས་ན་འདིར་གནོན།]
སྣང་གསལ་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་དྲི་ཆབ་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་ཞལ་ཟས་རྒྱ་མཚོའི་ཚོགས། །ཡོན་ཏན་༝། དད་པ་༝། རྒྱལ་བ་༝། ཞིང་ཁམས་རྒྱ་མཚོའི་རོལ་མོ་རྒྱ་མཚོའི་ཚོགས། །ཡོན་ཏན་༝། དད་པ་༝། ཨེ་མ་ཧོ་མཆོད་པ་བླ་ན་མེད། །རང་བྱུང་མཆོད་པ་ཆེན་པོ་སྟེ། །གཟུགས་ཀྱི་ལྷ་མོ་མེ་ལོང་འཛིན། །གཟུགས་ཀྱི་མཆོད་པ་སྤྱན་ལ་དབུལ། །ཨེ་མ་ཧོ་༝། རང་བྱུང་༝། སྒྲ་ཡི་ལྷ་མོ་པི་ཝཾ་སྒྲོག །སྒྲ་ཡི་མཆོད་པ་སྙན་ལ་དབུལ། །ཨེ་མ་ཧོ་༝། རང་བྱུང་༝། དྲི་ཡི་ལྷ་མོ་དུང་ཆོས་འཛིན། །དྲི་ཡི་མཆོད་པ་ཤངས་ལ་དབུལ། །ཨེ་མ་ཧོ་༝། རང་བྱུང་༝། རོ་ཡི་ལྷ་མོ་བཤོས་བཟང་འཛིན། །རོ་ཡི་མཆོད་པ་ལྗགས་ལ་འབུལ། །ཨེ་མ་ཧོ༝། རང་བྱུང་༝། རེག་བྱའི་ལྷ་མོ་ན་བཟའ་འཛིན། །རེག་བྱའི་མཆོད་པ་སྐུ་ལ་དབུལ། །ཞིང་འདི་འཁོར་ལོ་རིན་ཆེན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རབ་ཅན་གྱིས་དབུལ། །ཞིང་འདི་ནོར་༝། མཁས་པ་༝། དངོས་གྲུབ་༝། ཉིན་རེ་༝། ཞིང་འདི་བཙུན་མོ་༝། མཁས་པ་༝། དངོས་གྲུབ་༝། ཉིན་རེ་༝། ཞིང་འདི་བློན་པོ་༝། མཁས་པ་༝། དངོས་གྲུབ་༝། ཉིན་རེ་༝། ཞིང་འདི་གླང་པོ་༝། མཁས་པ༝། དངོས་གྲུབ༝། ཉིན་རེ༝། ཞིང་འདི་རྟ་མཆོག་༝། མཁས་པ་༝། དངོས་གྲུབ་༝། ཉིན་རེ་༝། ཞིང་འདི་དམག་དཔོན་༝། མཁས་པ་༝། དངོས་གྲུབ་༝། ཉིན་རེ་༝། དེ་ལས་གཞན་(༡༥༩ན) ― GLG021_Page_0319 ―
[མ་དཔེ་གཟིགས་ན་འདིར་གནོན།]
ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོངས་ལྡན། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །དམ་ཆོས་དཀོན་མཆོག་ཐམས་ཅད་དང༌། །མཆོད་རྟེན་རྣམས་དང་སྐུ་གཟུགས་ལ། །རིན་ཅེན་མེ་ཏོག་ལ་སོགས་ཆར། །རྒྱུན་མི་ཆད་པར་འབབ་པར་ཤོག །ཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་སྤྱོད་དང༌། །དུས་གསུམ་དགེ་བའི་དངོས་པོ་རྣམས། །སེམས་ཅན་ཀུན་གྱི་དོན་གྱི་ཕྱིར། །གུས་པས་ཁྱེད་ལ་དབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པ། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བས་ཉེར་དགོངས་ནས། །བདག་གི་འདི་དག་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང༌། །སྡིག་པ་བདག་གིས་(༡༥༩བ) ― GLG021_Page_0320 ―
[མ་དཔེ་གཟིགས་ན་འདིར་གནོན།]
བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་ཀུན་གྱི་བསོད་ནམས་གང་ལ་ཡང༌། །དེ་དག་ཀུན་གྱི་རྗེས་སུ་བདག་ཡི་རང༌། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །ཆོས་འཁོར་བླ་ན་མེད་པ་སྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཅིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང༌། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང༌། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་པ་སྔོན་དུ་བཏང་ནས། །དངོས་གཞི་བརྟན་བཞུགས་འབུལ་བའི་ཡུལ་ལ་བརྟན་པར་བཞུགས་པའི་གསོལ་གདབ་ཀྱི་ཆེད་དུ་མཎྜལ་ནི། དབང་ཆེན་གསེར་གྱི་ས་གཞི། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང༌། འདོད་འཇོའི་བ། མ་རྨོས་པའི་ལོ་ཏོག །(༡༦༠ན) ― GLG021_Page_0321 ―
[མ་དཔེ་གཟིགས་ན་འདིར་གནོན།]
འཁོར་ལོ་རིན་པོ་ཆེ། བཙུན་མོ་རིན་པོ་ཆེ། བློན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་མོ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་དག་བླ་མ་འམ་སྦྱིན་བདག་ཆེ་གེ་མོ་ཞབས་པད་བསྐལ་བརྒྱའི་བར་དུ་བརྟན་པར་བཞུགས་པའི་ཡོན་དུ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་དང་སེམས་ཅན་ཐམས་ཅད་ཀྱི་མགོན་དང་སྐྱབས་དང་དཔུང་གཉེན་དམ་པ་མཛད་དུ་གསོལ། ཐོས་པ་རྒྱ་མཚོའི་མཆོད་ཡོན་ཀུན་ནས་འཁྱིལ། །ཡོན་ཏན་མེ་ཏོག་ཚུལ་ཁྲིམས་བདུག་སྤོས་སྤྲིན། །ཤེས་རབ་སྒྲོན་མེ་དད་པ་སྤོས་ཆུའི་མཚོ། །ཏིང་འཛིན་བདུད་རྩིའི་ཞལ་ཟས་དམ་པ་དང༌། །བསྟོད་དབྱངས་སྙན་པའི་སིལ་སྙན་སྒྲ་འབྱིན་ཅིང༌། །ཀུན་ནས་སྙིང་བརྩེ་རྣམ་དཔྱོད་སྤོབས་པ་ཡི། །གདུགས་དང་རྒྱལ་མཚན་བ་དན་བསྒྲེངས་བྱས་པས། །བདག་ལུས་གཞལ་མེད་ཁང་བརྩེགས་རབ་བརྒྱན་ནས། །སྙིང་དབུས་ཆུ་སྐྱེས་ཐིག་ལེ་འདབ་རྒྱས་ལ། །བརྟན་པར་བཞུགས་པའི་ཆོས་རྗེ་མཆོད་བྱེད་ཅིང༌། །ངེས་པར་འདུན་པའི་ཡིད་ཀྱིས་གསོལ་འདེབས་ན། །འགྲོ་བའི་བླ་མ་རྟག་ཏུ་མཉེས་གྱུར་ཅིག །ཆོས་ཀྱི་རྒྱལ་པོ་རྟག་ཏུ་མཉེས་གྱུར་(༡༦༠བ) ― GLG021_Page_0322 ―
[མ་དཔེ་གཟིགས་ན་འདིར་གནོན།]
ཅིག །བླ་མ་སྤྱི་ལ་བསྟོད་པ་ནི། མངོན་མཐོ་ངེས་ལེགས་ལེགས་ཚོགས་མ་ལུས་པ། །གང་གི་ཞབས་པད་ཁོ་ནར་རག་ལས་ཞེས། །རྒྱལ་བས་མདོ་རྒྱུད་ཀུན་ལས་ཆེར་བསྔགས་པ། །བླ་མ་རིན་པོ་ཆེ་ལ་གསོལ་བ་འདེབས། །ཐོག་མེད་དུས་ནས་མི་ཁོམས་གནས་བརྒྱད་འཁྱམས། །ད་ལན་གཅིག་པུ་དལ་བ་རྙེད་དུས་འདིར། །དོན་ལྡན་སྙིང་པོ་ལེན་པའི་ཐབས་སྟོན་པ། །བླ་མ་རིན་པོ་ཆེ་ལ་༝། ལས་ངན་མི་དགེ་སྡིག་པའི་རླུང་ཤུགས་ཀྱིས། །བཟོད་དཀའ་ངན་འགྲོའི་གཡང་དུ་མངོན་ཕྱོགས་ཚེ། །ཐུགས་རྗེའི་ཕྱག་གིས་ཉེ་བར་འཛིན་མཛད་པ། །བླ་མ་རིན་པོ་ཆེ་༝། སྡུག་བསྔལ་གསུམ་གྱི་རླབས་ཕྲེང་གཡོ་བ་ཅན། །འཇིགས་རུང་འཁོར་བ་ཆུ་སྲིན་འབྱུང་གནས་ལས། །འགྲོ་ཀུན་ཐབས་མཁས་གྲུ་ཡིས་སྒྲོལ་མཛད་པ། །བླ་མ་རིན་པོ་ཆེ་༝། རང་ཉིད་གཅེས་པར་འཛིན་པའི་གདོན་གྱིས་བཟུང༌། །རྣམ་མང་ཟུག་རྔུས་ཉམ་ཐག་གྱུར་པའི་ཚེ། །བྱང་ཆུབ་སེམས་ཀྱི་བདུད་རྩིས་གསོ་མཛད་པ། །བླ་མ་རིན་པོ་ཆ་༝།མྱང་འདས་དམན་པའི་མྱ་ངམ་ཐང་ལ་འཁྱམས། །ཉེས་བརྒྱ་སྲིད་པའི་ཆོམ་རྐུན་གྱིས་བཅོམ་རྣམས། །ཕྱིན་དྲུག་ལམ་བཟང་མཆོག་ཏུ་འཁྲིད་མཛད་པ། །བླ་མ་རིན་པོ་ཆེ་༝། ཕྱོགས་བཅུའི་ཞིང་གི་རྒྱལ་བ་མ་ལུས་པ། །སྐལ་དམན་སྙིགས་དུས་སྐྱེ་བོ་འདུལ་བའི་ཕྱིར། །ཐབས་ལ་མཁས་པས་བཤེས་གཉེན་ཚུལ་འཛིན་པ། །སངས་རྒྱས་ཀུན་འདུས་ཁྱོད་ལ༝། དཀྱིལ་འཁོར་འཁོར་ལོ་བྱེ་བ་ཕྲག་བརྒྱ་ཡང༌། ཁྱོད་ཐུགས་ལྷན་སྐྱེས་ངང་དུ་རོ་གཅིག་ཅིང༌། །དངོས་གྲུབ་རྣམ་གཉིས་འདོད་དགུའི་ཆར་འབེབས་པ། །ཡི་དམ་(༡༦༡ན) ― GLG021_Page_0323 ―
[མ་དཔེ་གཟིགས་ན་འདིར་གནོན།]
ཀུན་འདུས་ཁྱོད་ལ་༝། དྲན་པ་ཙམ་གྱིས་བར་ཆད་མ་ལུས་སེལ། །འཕྲིན་ལས་རྣམ་བཞི་ལྷུན་གྱིས་གྲུབ་མཛད་ཅིང༌། །མཐུ་ལྡན་ཡེ་ཤེས་སྲུང་མ་ཀུན་གྱི་དངོས། །ཆོས་སྐྱོང་ཀུན་འདུས་ཁྱོད་ལ་༝། སྐུ་གཉིས་མངོན་གྱུར་ཡང་དག་རྫོགས་སངས་རྒྱས། །བདེན་གཉིས་ཟུང་འཇུག་དམ་ཆོས་ཀུན་གྱི་མཛོད། །རིག་གྲོལ་གཉིས་ལྡན་འཕགས་ཚོགས་ཀུན་གྱི་རྗེ། །སྐྱབས་གསུམ་ཀུན་འདུས་ཁྱོད་ལ་༝། དེ་ལྟར་ཞིང་གི་དམ་པ་བླ་མ་ལ། །ཞིང་རྡུལ་མཉམ་པའི་ལུས་ཀྱིས་ཕྱག་འཚལ་ཞིང༌། །དངོས་བཤམས་ཡིད་ཀྱིས་སྤྲུལ་པའི་མཆོད་སྤྲིན་དང༌། །བླ་མེད་སྒྲུབ་པའི་མཆོད་པས་རྟག་ཏུ་མཆོད། །ཐོག་མེད་དུས་ནས་དུག་གསུམ་ཉོན་མོངས་ཀྱིས། །སྒོ་གསུམ་སྦགས་པའི་ཉེས་ལྟུང་ཐམས་ཅད་བཤགས། །འཁོར་འདས་ཀུན་གྱི་དགེ་ལ་ཡི་རང་ཞིང༌། །ཟབ་ཡངས་ཆོས་འཁོར་རྟག་ཏུ་བསྐོར་དུ་གསོལ། །ལུས་ཅན་ཀུན་གྱི་ཕན་བདེ་མ་ལུས་པ། །རྒྱལ་བའི་བསྟན་ལ་རག་ལས་དེ་ཡང་ནི། །བསྟན་འཛིན་སྐྱེས་བུ་རྣམས་ལ་རག་ལས་ཕྱིར། །མྱ་ངན་མི་འདའ་རྟག་ཏུ་བཞུགས་སུ་གསོལ། །སྐྱེ་འཆི་སྤངས་པ་རྡོ་རྗེའི་སྐུ་བརྙེས་ཀྱང༌། །གདུལ་བྱའི་དོན་དུ་སྐྱེ་འཆི་སྣ་ཚོགས་པ། །སྟོན་མཛད་ཕྱོགས་བཅུའི་ཞིང་བཞུགས་བླ་མ་རྣམས། །འཁོར་བ་མ་སྟོངས་བར་དུ་བཞུགས་སུ་གསོལ། །རྣམ་དག་མི་ཕྱེད་དད་པ་རྡོ་རྗེའི་གདན། །ལྷག་བསམ་རྣམ་པར་དཀར་བ་ཟླ་བའི་གདན། །ཤུགས་དྲག་སྨོན་ལམ་པདྨའི་ཟེའུ་འབྲུ་ལ། །སྲིད་མཐའི་བར་དུ་བརྟན་པར་བཞུགས་སུ་གསོལ། ཁྱོད་(༡༦༡བ) ― GLG021_Page_0324 ―
[མ་དཔེ་གཟིགས་ན་འདིར་གནོན།]
སྐུ་མིག་གི་བདུད་རྩིར་མི་འབྲལ་ཞིང༌། །ཐེག་མཆོག་གསུང་གིས་རྟག་ཏུ་འཚོ་བ་དང༌། །སྐུ་གསུང་ཐུགས་ཀྱིས་ངེས་པར་བྱིན་བརླབས་ནས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །སྐྱབས་མགོན་བླ་མ་རྣམས་ཀྱི་བཀའ་དྲིན་ལས། །འགལ་རྐྱེན་བདུད་སྡེའི་བར་ཆད་ཀུན་ལས་རྒྱལ། །གནས་སྐབས་མཐར་ཐུག་བསམས་པའི་དོན་ཀུན་འགྲུབ། །རྒྱལ་བའི་བསྟན་པ་ཕྱོགས་བཅུར་རྒྱས་པར་ཤོག །ཅེས་དང༌། བླ་མ་སྒོས་ཀྱི་གསོལ་འདེབས་བྱ་བར་འདོད་ན་སྐབས་དང་བསྟུན། སྐུ་ཚེ་སྤེལ་བའི་རྟེན་འབྲེལ་དུ་ཚེ་དཔག་མེད་ལ་གསོལ་བ་གདབ་པ་ནི། ཉི་གཞོན་འཆར་ཀའི་གདངས་ལྡན་ལི་ཁྲི་ལྟར། །ཡིད་འོང་དམར་སེར་དྲ་བས་ཁེབས་པ་ཡི། །འདབ་སྟོང་གེ་སར་རྩེ་ན་ཟླ་གདན་ལ། །ཧྲཱིཿལས་བྱུང་བའི་མགོན་པོ་ཚེ་དཔག་མེད། །པདྨ་རཱ་གའི་ལྷུན་པོ་དབང་པོའི་གཞུས། །ཀུན་ནས་ཀླུབས་པ་ཇི་བཞིན་ཁྱོད་ཀྱི་སྐུ། །སྣ་ཚོགས་གོས་དང་ནོར་བུའི་རྒྱན་མང་གིས། །ཀུན་ནས་མཛེས་པར་བྱས་ལ་ཕྱག་འཚལ་ལོ། །འཁྲི་ཤིང་གཞོན་ནུའི་ཡལ་གདབ་ལྟར་མཉེན་པའི། །ཕྱག་གཉིས་དབུས་ན་འཆི་མེད་བདུད་རྩི་ཡིས། །ལེགས་པར་གང་བའི་ལྷུང་བཟེད་རབ་བསྣམས་ནས། །ཚེ་ཡི་དངོས་གྲུབ་སྩོལ་ལ་ཕྱག་འཚལ་ལོ། །བུང་བ་ལྟར་གནག་རལ་པའི་ཐོར་ཅོག་ནི། །སྤྱི་བོར་མཛེས་པའི་ལན་བུ་རིང་དུ་འཕྱང༌། །འཇམ་མཉེན་སྣ་ཚོགས་དར་གྱི་སྨད་གཡོགས་ཅན། །མཚན་དཔེའི་གཟི་བརྗིད་འབར་ལ་ཕྱག་འཚལ་ལོ། །ཤུགས་དྲག་དད་པས་བསྐྱོད་པའི་ཐལ་སྦྱར་ཞིང༌། །ཡིད་འཕྲོག་ཤིན་ཏུ་སྙན་པའི་ང་(༡༦༢ན) ― GLG021_Page_0325 ―
[མ་དཔེ་གཟིགས་ན་འདིར་གནོན།]
རོ་ཡིས། ཁྱོད་ཀྱིས་ཡོན་ཏན་ལེགས་པར་བརྗོད་པ་ལ། །ལེགས་ཚོགས་ཐམས་ཅད་སྩོལ་ལ་ཕྱག་འཚལ་ལོ། །ཡེ་ཤེས་མཚོན་གྱིས་མི་ཤེས་དྲ་བ་བཅད། །སེམས་ཅན་ཀུན་ལ་ཐུགས་རྗེ་རྒྱུན་ཆད་མེད། །འགྲོ་ཀུན་འདྲེན་པའི་ཁུར་གྱིས་མི་ངལ་བ། །གཏན་གྱི་སྐྱབས་གནས་ཁྱོད་ལ་ཕྱག་འཚལ་ལོ། །མཚན་ཙམ་བཟུང་བས་དུས་མིན་འཆི་བ་འཇོམས། །ཡིད་ལ་དྲན་པས་སྲིད་པའི་འཇིགས་ལས་སྐྱོབ། །སྐྱབས་སུ་བསྟེན་ན་གཏན་གྱི་བདེ་སྟེར་བ། ཁྱོད་ལ་རྣམ་པ་ཀུན་ཏུ་ཕྱག་འཚལ་ལོ། །སྐྱོན་བྲལ་ཁྱོད་ལ་གུས་པས་བསྟེན་པ་བདག །གནས་སྐབས་མི་འདོད་ཉེར་འཚེ་ཞི་བ་དང༌། །མཐར་ཐུག་བདེ་བ་ཅན་དུ་པདྨོ་ལས། །བརྫུས་ཏེ་སྐྱེས་ནས་ཁྱོད་མཉེས་བགྱིད་པར་ཤོག །ཐེག་པ་གསུམ་གྱི་དགེ་འདུན་སྤྱིར་གསོལ་བ་བཏབ་སྟེ་རྟེན་འབྲེལ་བསྒྲིགས་པ་ནི། མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང༌། །དེ་བཞིན་གཤེགས་ལ་ཕྱག་འཚལ་ལོ། །མི་འགྱུར་བརྟན་པར་བྱིན་གྱིས་རློབས། །དག་པས་འདོད་ཆགས་བྲལ་བར་གྱུར། །དགེ་བས་ངན་སོང་ལས་གྲོལ་ཅིང༌། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་༝། མི་འགྱུར་༝། གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་ལྡན། །ཚོགས་མཆོག་དགེ་འདུན་ལ་ཕྱག་འཚལ། །མི་འགྱུར་༝། མཚུངས་མེད་ལྟ་བས་མི་ངོམས་ཤིང༌། །གསེར་གྱི་(༡༦༢བ) ― GLG021_Page_0326 ―
[མ་དཔེ་གཟིགས་ན་འདིར་གནོན།]
མདོག་ཅན་མཛེས་པའི་སྐུ། །ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །ས་གནོན་མཉམ་གཞག་མཛད་ཕྱག་འཚལ། །མི་འགྱུར་༝། དུས་གསུམ་སངས་རྒྱས་ཚོགས་སྤྱི་དང༌། ཁྱད་པར་སྙིགས་མ་ལྔ་བདོ་ཡི། །འདྲེན་པ་བཅོམ་ལྡན་སྨན་གྱི་བླ། །བདེ་གཤེགས་མཆེད་བདུན་ལ་ཕྱག་འཚལ། །མི་འགྱུར་༝། ཉེ་བའི་སྲས་ཆེན་ལ་སོགས་པའི། །བྱང་ཆུབ་སེམས་དཔའ་མ་ལུས་དང༌། །རང་རྒྱལ་ཉམ་ཐོས་སྐྱེ་འཕགས་ཀྱི། །ཐེག་གསུམ་དགེ་འདུན་ལ་ཕྱག་འཚལ། །མི་འགྱུར་༝། གངས་རི་ཆེན་པོ་ཏེ་སེ་ལ། །འཕགས་པ་གནས་བརྟན་ཡན་ལག་འབྱུང༌། །དགྲ་བཅོམ་སྟོང་དང་སུམ་བརྒྱས་བསྐོར། །སྤོས་ཕོར་རྔ་ཡབ་འཛིན་ཕྱག་འཚལ། །མི་འགྱུར་༝། དྲང་སྲོང་རི་ཡི་ངོས་ཤེལ་ན། །འཕགས་པ་གནས་བརྟན་མ་ཕམ་པ། །དགྲ་བཅོམ་བརྒྱ་ཕྲག་གཅིག་གིས་བསྐོར། །ཕྱག་གཉིས་མཉམ་གཞག་མཛད་ཕྱག་འཚལ། །མི་འགྱུར་༝། ལོ་མ་བདུན་པའི་རི་ཕུག་ན། །འཕགས་པ་གནས་བརྟན་ནགས་ན་གནས། །དགྲ་བཅོམ་སྟོང་དང་བཞི་བརྒྱས་བསྐོར། །སྡིགས་མཛུབ་རྔ་ཡབ་འཛིན་ཕྱག་འཚལ། །མི་འགྱུར་༝། འཛམ་བུ་གླིང་གི་ཟངས་གླིང་ན། །འཕགས་པ་གནས་བརྟན་དུས་ལྡན་ནི། །དགྲ་བཅོམ་སྟོང་དང་བཞི་བརྒྱས་བསྐོར། །གསེར་གྱི་རྣ་ཀོར་འཛིན་ཕྱག་འཚལ། །མི་འགྱུར་༝། སིངྒ་ལ་ཡི་གླིང་ན་ནི། །གནས་བརྟན་རྡོ་རྗེ་མོ་ཡི་བུ། །དགྲ་བཅོམ་སྟོང་ཕྲག་གཅིག་གིས་བསྐོར། །སྡིགས་མཛུབ་རྔ་ཡབ་འཛིན་ཕྱག་འཚལ། །མི་འགྱུར་༝། ཆུ་བོ་(༡༦༣ན) ― GLG021_Page_0327 ―
[མ་དཔེ་གཟིགས་ན་འདིར་གནོན།]
ཡ་མུ་ནའི་གླིང་ན། །འཕགས་པ་གནས་བརྟན་བཟང་པོ་ནི། །དགྲ་བཅོམ་སྟོང་དང་ཉིས་བརྒྱས་བསྐོར། །ཆོས་འཆད་མཉམ་གཞག་མཛད་ཕྱག་འཚལ། །མི་འགྱུར་༝། གནས་མཆོག་དམ་པ་ཁ་ཆེ་ན། །འཕགས་པ་གནས་བརྟན་གསེར་བེའུ། །དགྲ་བཅོམ་ཆེན་པོ་ལྔ་བརྒྱས་བསྐོར། །རིན་ཆེན་ཞགས་པ་འཛིན་ཕྱག་འཚལ། །མི་འགྱུར་༝། ནུབ་ཀྱི་བ་ལང་སྤྱོད་གླིང་ན། །བྷ་ར་དྷྭ་ཛ་གསེར་ཅན་ནི། །དགྲ་བཅོམ་ཆེན་པོ་བདུན་བརྒྱས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །མི་འགྱུར་༝། བྱང་གི་སྒྲ་མི་སྙན་ན་ནི། །འཕགས་པ་གནས་བརྟན་བ་ཀུ་ལ། །དགྲ་བཅོམ་ཆེན་པོ་དགུ་བརྒྱས་བསྐོར། །ཕྱག་གཉིས་ནེའུ་ལེ་འཛིན་ཕྱག་འཚལ། །མི་འགྱུར་༝། པྲི་ཡངྐུ་ཡི་གླིང་ན་ནི། །འཕགས་པ་གནས་བརྟན་སྒྲ་གཅན་འཛིན། །དགྲ་བཅོམ་སྟོང་དང་ཆིག་བརྒྱས་བསྐོར། །རིན་ཆེན་པྲོག་ཞུ་འཛིན་ཕྱག་འཚལ། །མི་འགྱུར་༝། བྱ་རྒོད་ཕུང་པོའི་རི་བོ་ལ། །འཕགས་པ་གནས་བརྟན་ལམ་ཕྲན་བསྟན། །དགྲ་བཅོམ་སྟོང་དང་དྲུག་བརྒྱས་བསྐོར། །ཕྱག་གཉིས་མཉམ་གཞག་མཛད་ཕྱག་འཚལ། །མི་འགྱུར༝། ཤར་གྱི་ལུས་འཕགས་གླིང་ན་ནི། །བྷ་ར་དྷྭ་ཛ་བསོད་སྙོམས་ལེན། །དགྲ་བཅོམ་སྟོང་ཕྲག་གཅིག་གིས་བསྐོར། །གླེགས་བམ་ལྷུང་བཟེད་འཛིན་ཕྱག་འཚལ། །མི་འགྱུར་༝། ལྷ་གནས་སུམ་ཅུ་རྩ་གསུམ་ན། །འཕགས་པ་གནས་བརྟན་ལམ་བསྟན་ནི། །དགྲ་བཅོམ་ཆེན་པོ་དགུ་བརྒྱས་བསྐོར། །གླེགས་བམ་ཆོས་འཆད་མཛད་ཕྱག་འཚལ། །མི་འགྱུར་༝། (༡༦༣བ) ― GLG021_Page_0328 ―
[མ་དཔེ་གཟིགས་ན་འདིར་གནོན།]
རི་ཡི་རྒྱལ་པོ་ངོས་ཡངས་ལ། །འཕགས་པ་གནས་བརྟན་ཀླུ་ཡི་སྡེ། །དགྲ་བཅོམ་སྟོང་དང་ཉིས་བརྒྱས་བསྐོར། །བུམ་པ་འཁར་གསིལ་འཛིན་ཕྱག་འཚལ། །མི་འགྱུར་༝། རི་ཡི་རྒྱལ་པོ་བི་ཧུ་ལ། །འཕགས་པ་གནས་བརྟན་སྦེད་བྱེད་ནི། །དགྲ་བཅོམ་སྟོང་དང་བཞི་བརྒྱས་བསྐོར། །ཕྱག་གཉིས་གླེགས་བམ་འཛིན་ཕྱག་འཚལ། །མི་འགྱུར་༝། གངས་ཅན་རི་ཡི་རྒྱལ་པོ་ལ། །འཕགས་པ་གནས་བརྟན་མི་ཕྱེད་པ། །དགྲ་བཅོམ་སྟོང་ཕྲག་གཅིག་གིས་བསྐོར། །བྱང་ཆུབ་མཆོད་རྟེན་འཛིན་ཕྱག་འཚལ། །མི་འགྱུར་༝། དགེ་བསྙེན་དྷརྨཱ་ཏ་ལ་ནི། །རལ་པའི་ཐོད་བཅིངས་གླེགས་བམ་ཁུར། །སྣང་བ་མཐའ་ཡས་མདུན་གནས་ཤིང༌། །རྔ་ཡབ་བུམ་པ་འཛིན་ཕྱག་འཚལ། །མི་འགྱུར་༝། ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རང་རང་འཁོར་འདུལ་སྒོ་བཞི་བསྲུང༌། །རྒྱལ་ཆེན་བཞི་ལ་ཕྱག་འཚལ་ལོ། །མི་འགྱུར་༝། ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །མི་འགྱུར་༝། བདེན་བརྗོད་སྨོན་ལམ་དངོས་ནི། །སངས་རྒྱས་སྲས་སློབ་མངོན་སུམ་མཐོང་བ་ཡི། །སྐལ་དམན་འགྲོ་ངོར་མགོན་སྐྱབས་གླིང་གཉེན་དུ། །ཡོངས་འཛིན་དམ་པའི་ཟློས་གར་ལེགས་བསྒྱུར་བ། །ངེས་པ་ལྔ་ལྡན་ལྟ་བུར་བརྟན་པར་ཤོག །མདོ་དང་རྒྱུད་སྡེའི་ཆོས་ཀྱི་བཤད་ཉན་རྒྱུན། །འཇིགས་ལས་དབུགས་དབྱུང་ཟང་ཟིང་གཏོང་བ་སོགས། །སྣ་ཚོགས་ཐབས་ཀྱིས་འགྲོ་བ་འདྲེན་མཛད་པའི། །(༡༦༤ན) ― GLG021_Page_0329 ―
[མ་དཔེ་གཟིགས་ན་འདིར་གནོན།]
སྐྱབས་མཆོག་བླ་མ་ཞབས་པད་བརྟན་པར་ཤོག །རང་ཉིད་ཞི་བདེ་བསྒྲུབ་ན་དམན་པར་གོལ། །གཞན་ཕན་ཁུར་གྱིས་ཞུམ་པའི་ཐེག་ཆེན་སུ། །དེ་ཕྱིར་སྙིགས་མར་སྤྱོད་ལ་ལྷག་པར་དུ། །བརྩེ་ཆེན་སྙིང་སྟོབས་བསྐྱེད་ལ་རྟག་བཞུགས་གསོལ། །དག་ཞིང་གནས་རྣམས་བདེ་བའི་རོ་ཡིས་མྱོས། །ཐུགས་རྗེའི་དཔྱད་ཀྱིས་ཉེས་བརྒྱའི་ཟུང་རྔུའི་ཚོགས། །འབྱིན་ཡུལ་མ་དག་གནས་འདིར་ངེས་ལེགས་ན། །དུཿཁས་མནར་བའི་འགྲོ་ལ་དགོངས་ཏེ་བཞུགས། །འཕྲོག་བྱེད་སྡེར་མོས་གྱེན་དུ་བཏེག་པའི་ཁྲི། །རབ་བཀྲ་ཟ་འོག་འབོལ་སྟན་བརྩེགས་པའི་སྟེང༌། །སྣ་ཚོགས་རྡོ་རྗེས་མཚན་པའི་རེ་ཁཱ་ལ། །ཞབས་སེན་དམར་བའི་འོད་ཆགས་རྟག་འགོད་གསོལ། །རྣམ་རྒྱལ་ཚེ་སྦྱིན་ཡིད་བཞིན་འཁོར་ལོ་མའི། །ཐུགས་གསུང་སྐུ་ཡི་གཟི་བྱིན་ལེགས་འབར་བས། །ཡིད་སྲུབས་ལོག་པར་གསོལ་འདེབས་མུན་སངས་ནས། །འཆི་མེད་གཟུགས་སྐུའི་སྣང་བ་ཆེས་དཀར་ཤོག །ཀུན་ལ་ཞི་ཡང་བདུད་སྡེར་རབ་ཁྲོས་པ། །ལེགས་ལྡན་ནག་པོ་ལྕམ་དྲལ་ཚོགས་བཅས་ཀྱིས། །བགེགས་རིགས་མཐར་བསྐྲད་མགོན་ཁྱོད་ཤཱཀྱའི་བསྟན། །གནས་པ་དེ་སྲིད་བསྟན་པའི་འཕྲིན་ལས་མཛོད། །བར་སྣང་ལམ་དུ་ལྷ་རྣམས་གོམ་བཀོད་དེ། །རྟག་པར་བཞུགས་གསོལ་བདེན་པའི་ཚིག་བརྗོད་དང༌། །ལྷན་ཅིག་མེ་ཏོག་ཆར་འབེབས་རོལ་མོའི་སྒྲ། །སྙན་པར་འཁྲོལ་བའི་རེ་བ་དོན་ལྡན་ཤོག །ཀློག་པ་ཐོས་བསམ་སྤོང་བ་བསམ་གཏན་དང༌། །བྱ་བ་ལས་ཀྱི་འཁོར་ལོས་གདུལ་བྱ་རྣམས། །ཡང་དག་ལམ་ལ་བཀྲི་ཕྱིར་ཚེ་མཐའ་ཡས། །ཇི་བཞིན་བཞུགས་པར་(༡༦༤བ) ― GLG021_Page_0330 ―
[མ་དཔེ་གཟིགས་ན་འདིར་གནོན།]
མཆོག་གསུམ་མཐུས་བྱིན་རློབས། །ཞེས་དང༌། འདྲེན་པ་སྲས་བཅས་དངོས་ཀྱིས་ཐུལ་མིན་པའི། །གདུལ་བྱའི་སྐྱེ་རྒུ་ཕན་བདེ་ལ་འགོད་ཆེད། །བསོད་ནམས་སྟོབས་ཀྱི་དཔུང་པས་ས་ཆེན་པོར། །དབང་སྒྱུར་ནོར་འཛིན་སྐྱོང་བ་ཞབས་བརྟན་ཤོག །མི་བསྲུན་རྩུབ་མོར་སྤྱོད་པའི་གླང་ཆེན་སྣར། །བཀའ་ནན་རྣོན་པོའི་ལྕགས་ཀྱུས་རབ་བཏབ་ནས། །དུལ་བའི་ར་བར་བཅུག་སྟེ་སིམ་པའི་རོ། །གསེར་ཞུན་རྒྱན་གྱིས་ཀླུབས་ཆེད་གཡོ་མེད་ཤོག །ལྟ་སྤྱོད་ངན་པས་དབྱེན་བཅོས་ལོག་ལམ་དུ། །འཇུག་ལས་ཕྱིར་ལྡོག་དགེ་བཅུའི་ས་ཆེན་པོར། །བཙན་པོའི་ཤུགས་ཀྱིས་ཁྲིད་ནས་མཐའ་ཀླས་འགྲོ། །བདེ་བར་ཉེར་འགོད་དོན་དུ་བཞུགས་གསོལ་འདེབས། །སྐུ་གསུང་ཐུགས་རྟེན་འདུས་པའི་གྲྭ་མང་སྤེལ། །མདོ་སྔགས་སྡེ་གཉིས་མཆོད་ཅིང་བཤད་སྒྲུབ་བསྟན། །ལུས་ཅན་བསོད་ནམས་ཞིང་དུ་དར་མཛད་ཆེད། །གནམ་སའི་དབང་ཕྱུག་རྡོ་རྗེ་ལྟར་བརྟན་ཤོག །མ་རུངས་བརླང་པོར་སྤྱོད་པའི་གཉའ་བ་རུ། ཁྲིམས་གཉིས་གསེར་ཤིང་གཅིག་ཏུ་རབ་ལྕི་བས། །འབངས་རྣམས་རྫོགས་ལྡན་དཔལ་ལ་འགོད་བྱའི་ཕྱིར། །མི་བདག་སྐུ་ཚེ་ཉི་ཟླ་དང་མཉམ་ཤོག །བདེ་ལྡན་མགོན་པོ་གར་དབང་ཕྱག་སོར་གྱིས། །ལེགས་བཏེག་བུམ་པ་ལྷ་ཁྱོད་གཙུག་ཏོར་རྩེར། །བཀོད་ནས་འཆི་བ་མེད་པའི་རང་བཞིན་དུ། །དབང་བསྐུར་རིགས་ཀྱི་ཅོད་པན་འཆིང་བར་ཤོག །ཀུན་གྱིས་ཡོངས་བཀུར་གཡུང་དྲུང་འཁྱིལ་བའི་ཁྲིར། །ས་ཡི་བརྒྱ་བྱིན་བསྐལ་བརྒྱར་འཚོ་གཞེས་ཤིང༌། །མངའ་ཐང་ཆབ་སྲིད་ཕྱོགས་བཅུར་རབ་རྒྱས་པ། །དཀོན་མཆོག་བདེན་པའི་མཐུ་ཡིས་འགྲུབ་གྱུར་ཅིག །ཅེས་དགེ་བའི་བཤེས་གཉེན་(༡༦༥ན) ― GLG021_Page_0331 ―
[མ་དཔེ་གཟིགས་ན་འདིར་གནོན།]
དང་ས་སྐྱོང་བའི་རིགས་སྤྱི་ཁྱབ་ལ་འདི་ལྟར་དུ་བྱས་ནས་དམིགས་བསལ་གྱི་ཆེད་དུ་བྱ་བར་འདོད་ན་བླ་དཔོན་གྱི་བརྟན་བཞུགས་ཚིགས་བཅད་ཅི་རིགས་པ་སྦྱོར། མཇུག་བཟོད་པར་གསོལ་ཞིང་དཔང་པོར་སྤྱན་དྲངས་པ་རྣམས་གཤེགས་སུ་གསོལ་བ་ནི། མ་འབྱོར་བ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་གང༌། །དེ་ཡང་བཟོད་པར་མཛད་དུ་གསོལ། །ལྷག་པ་དང་ནི་ཆད་པ་དང༌། །ཆོ་གའི་ཡན་ལག་ཉམས་པ་དང༌། །བདག་གིས་བརྗེད་ངས་ཅི་མཆིས་པ། །དེ་ཡང་བཟོད་པར་མཛད་དུ་གསོལ། ཁྱེད་ཀྱིས་སེམས་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་ཐུགས་རྗེས་འབྱོན་པར་མཛོད། །མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་བརྟན་པར་བཞུགས་པའི་རྟེན་འབྲེལ་འགྲིག་པར་མཛད་པ་ལེགས་ཀྱི་སོ་སོའི་ཞིང་ཁམས་སུ་རྫུ་འཕྲུལ་གྱི་འཁོར་དང་བཅས་པ་གཤེགས་སུ་གསོལ་ལོ། །རྟེན་འབྲེལ་ལེགས་པར་འགྲིག་པའི་གཏང་རག་གི་མཎྜལ་དབུལ། ཤིས་པ་བརྗོད་པ་ནི། རྒྱལ་མཚན་རྩེ་མོར་དབང་གི་རྒྱལ་པོ་ལྟར། །ལྷག་པའི་ལྷ་ཡི་གཙུག་གི་རྒྱན་གྱུར་པ། །སྒྲུབ་པ་པོ་ལ་དངོས་གྲུབ་མཆོག་སྩོལ་བའི། །དཔལ་ལྡན་བླ་མ་རྣམས་ཀྱི་བཀྲ་ཤིས་ཤོག །རྒྱལ་བའི་མདུན་ན་རྒྱལ་སྲས་བཟང་པོ་སྐྱོང༌། ཁ་བ་ཅན་འདིར་དཔལ་ལྡན་མར་མེ་མཛད། །དགའ་ལྡན་གནས་ན་ནམ་མཁའ་དྲི་མ་མེད། །ཡིད་བཞིན་ནོར་བུ་ལྟ་བུར་གཞན་དོན་མཛད། །དཔལ་ལྡན་ཨ་ཏི་ཤ་ཡི་༝། ཡོངས་ཀྱི་དགེ་བའི་བཤེས་གཉེན་ཡོངས་ཀྱི་མགོན། །རྒྱལ་བའི་གདུང་འཚོབ་(༡༦༥བ) ― GLG021_Page_0332 ―
[མ་དཔེ་གཟིགས་ན་འདིར་གནོན།]
གྱུར་པ་རྒྱལ་བའི་སྲས། །རང་གཞན་དོན་གཉིས་འབྱུང་གནས་རིན་པོ་ཆེ། །བཤེས་གཉེན་སྟོན་པའི་ཞབས་ཀྱི་༝། དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་དཔལ་དབྱངས། །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ཀྱྀ་༝། རབ་འབྱམས་གསུང་རབ་ཀུན་ལ་ལྟ་བའི་མིག །སྐལ་བཟང་ཐར་བར་བགྲོད་པའི་འཇུག་ངོགས་མཆོག །བརྩེ་བས་བསྐྱོད་པའི་ཐབས་མཁས་མཛད་པ་ཡི། །གསལ་མཛད་བཤེས་གཉེན་རྣམས་ཀྱི་༝། ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང༌། །ཉིན་མཚན་རྟག་ཏུ་བདེ་ལེགས་པའི། །དཀོན་མཆོག་གསུམ་གྱི་༝། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་བཅོམ་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོའི་དཔལ་གྱི་༝། མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་སྒྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ཀྱི་༝། འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་མཛད་ཅིང༌། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །སངས་རྒྱས་ཚེ་དཔག་མེད་ཀྱི༴ །མཐུན་པའི་དགེ་ཚོགས་སྨོན་ལམ་རྨད་བྱུང་ཞིང༌། །སྤྱད་པ་སྤྱོད་ཚེ་ནམ་ཡང་མཆེད་གྱུར་ལ། །བསྐལ་བཟང་འདི་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་གི་༝། གདུལ་བྱའི་ཁམས་དང་དབང་པོར་འཚམ་པ་ཡི། །ཐབས་མཁས་མཛད་པ་མཆོག་གིས་འགྲོ་བ་རྣམས། །ཕན་དང་བདེ་(༡༦༦ན) ― GLG021_Page_0333 ―
[མ་དཔེ་གཟིགས་ན་འདིར་གནོན།]
བའི་དཔལ་ལ་འགོད་མཛད་པའི། །ཕྱོགས་བཅུའི་སངས་རྒྱས་རྣམས་ཀྱི་༝། མ་ཕམ་འཇམ་དཔལ་དབྱངས་སོགས་རྒྱལ་བའི་སྲས། །ཚོགས་སྦྱོར་བསེ་རུ་ལྟ་བུའི་རང་སངས་རྒྱས། །འོད་སྲུངས་མཆོག་ཟུང་གིས་མཚོན་ཉན་ཐོས་སྡེ། །ཐེག་གསུམ་སྐྱེ་འཕགས་ཚོགས་ཀྱི་༝། སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །འགྲོ་བའི་དོན་དུ་བསྟན་པ་སྐྱོང་མཛད་པ། །དཀོན་མཆོག་གསུམ་དངོས་གནས་བརྟན་བཅུ་དྲུག་གིས། །བསྟན་པ་ཡུན་རིང་གནས་པའི་༝། བཅོམ་ལྡན་འདས་ཀྱི་སྤྱན་སྔ་རུ། །སྒྲུབ་པ་མཛད་པའི་གང་ཟག་ལ། །བུ་བཞིན་སྐྱོང་བར་ཞལ་བཞེས་པའི། །ཆོས་སྐྱོང་སྲུང་མའི་༝། ནོར་གྱི་དབང་ཕྱུག་རིན་ཆེན་གཏེར་མངའ་ཞིང༌། །གནོད་སྦྱིན་ནོར་འཆང་མང་པོ་ཀུན་གྱི་གཙོ། །བྱང་ཕྱོགས་སྐྱོང་བའི་གནོད་སྦྱིན་ཛམྦྷ་ལ། །དངོས་གྲུབ་མཆོག་སྩོལ་ནོར་ལྷའི་༝། སྟོན་པ་འཇིག་རྟེན་ཁམས་སུ་འབྱོན་པ་དང༌། །བསྟན་པ་ཉི་འོད་བཞིན་དུ་གསལ་བ་དང༌། །བསྟན་འཛིན་ཕུ་ནུ་བཞིན་དུ་མཐུན་པ་ཡིས། །བསྟན་པ་ཡུན་རིང་གནས་པའི་༝། འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཆོས་འཕེལ་དང༌། །བདེ་ལེགས་ཐམས་ཅད་འབྱུང་བ་དང༌། །ཡིད་ལ་འདོད་པ་ཀུན་འགྲུབ་ཤོག །སྡེ་འདིར་བྱིན་རླབས་དཔལ་འབྱོར་མི་ཉམས་ཤིང༌། །བསམ་སྦྱོར་ངན་པའི་གདུག་རྩུབ་ཞི་བ་དང༌། །བསླབ་གསུམ་རྣམ་དག་བསྟན་པའི་ཁུར་འཛིན་པའི། །དགེ་འདུན་ཚོགས་ཀྱིས་གང་བའི་༝། བསྟན་པའི་དཔལ་གྱུར་བླ་མའི་ཞབས་པད་བརྟན། །བསྟན་འཛིན་སྐྱེས་བུས་ས་སྟེང་ཀུན་ཏུ་ཁྱབ། །བསྟན་པའི་སྦྱིན་བདག་མངའ་ཐང་འབྱོར་པ་རྒྱས། །(༡༦༦བ) ― GLG021_Page_0334 ―
[མ་དཔེ་གཟིགས་ན་འདིར་གནོན།]
བསྟན་པ་ཡུན་རིང་གནས་པའི་བཀྲ་ཤིས་ཤོག །བསྟན་འབར་མ་ནི། སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུངས་དང༌། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །སངས་རྒྱས་དཔའ་བོ་བདུན་ལ་༝། སེམས་ཅན་དོན་དུ་བདག་གིས་སྔོན། །དཀའ་བ་གང་ཞིག་སྤྱད་གྱུར་པ། །བདག་གི་བདེ་བ་བཏང་བ་ཡིས། །བསྟན་པ་ཡུན་རིང་འབར་གྱུར་ཅིག །ངས་སྔོན་ནད་པའི་ཆེད་དག་ཏུ། །རང་གི་འཚོ་བ་ཡོངས་བཏང་བས། །སེམས་ཅན་ཕོངས་པ་བསྐྱབ་པའི་ཕྱིར། །ཡུན་རིང་བསྟན་པ་འབར་༝། བུ་དང་བུ་མོ་ཆུང་མ་དང༌། །ནོར་དང་གླང་ཆེན་ཤིང་རྟ་དང༌། །རིན་ཆེན་བྱང་ཆུབ་ཕྱིར་བཏང་བས། །བསྟན་པ་༝། བདག་གིས་སངས་རྒྱས་རང་སངས་རྒྱས། །ཉན་ཐོས་ཕ་དང་མ་དང་ནི། །དྲང་སྲོང་དག་ལ་མཆོད་བྱས་པས། །བསྟན་པ་༝། བསྐལ་པ་བྱེ་བ་དུ་མར་བདག །སྡུག་བསྔལ་སྣ་ཚོགས་མྱོང་གྱུར་ཅིང༌། །བྱང་ཆུབ་དོན་དུ་ཐོས་བཙལ་བས། །བསྟན་པ་༝། བདག་གིས་ཚུལ་ཁྲིམས་བརྟུལ་ཞུགས་དང༌། །དཀའ་ཐུབ་ཡུན་རིང་བསྟེན་བྱས་ཤིང༌། །ཕྱོགས་བཅུའི་སངས་རྒྱས་ངས་མཆོད་པས། །བསྟན་པ་༝། བདག་སྔོན་བརྩོན་འགྲུས་དང་ལྡན་པས། །རྟག་ཏུ་བརྟན་ཅིང་ཕ་རོལ་གནོན། །སེམས་ཅན་ཐམས་ཅད་བསྒྲལ་དོན་དུ། །བདག་བསྟན་ཡུན་རིང་འབར་༝། བཟོད་བརྟུལ་རྟག་ཏུ་བསྟེན་བྱས་ཤིང༌། །སེམས་ཅན་ཉོན་མོངས་སྙིགས་མ་ཡི། །སེམས་ཅན་ངན་བཟོད་བྱས་གྱུར་པས། །བསྟན་པ་༝། བསམ་གཏན་རྣམས་ཐར་གཟུགས་མེད་དང༌། །ཏིང་འཛིན་གངྒཱའི་བྱེ་སྙེད་པ། །བསྒོམས་པས་དེ་མཐུས་བདག་གི་ནི། །བསྟན་པ་༝། ཡེ་ཤེས་དོན་དུ་བདག་གིས་(༡༦༧ན) ― GLG021_Page_0335 ―
[མ་དཔེ་གཟིགས་ན་འདིར་གནོན།]
སྔོན། །དཀའ་ཐུབ་ནགས་དག་བསྟེན་བྱས་ཤིང༌། །བསྟན་བཅོས་དུ་མ་ཉེར་བསྟན་པས། །བདག་གི་བསྟན་པ་འབར་༝། བརྩེ་བའི་རྒྱུ་ཡི་ཤ་ཁྲག་དང༌། །འཚོ་བ་ཡོངས་སུ་བཏང་གྱུར་ཅིང༌། །ཡན་ལག་ཉིང་ལག་བཏང་བ་ཡིས། །ཆོས་ཚུལ་རྣམ་པར་འཕེལ་གྱུར་ཅིག །བདག་སྔོན་བསྡིགས་པའི་སེམས་ཅན་རྣམས། །བྱམས་པས་གསལ་བར་སྨིན་བྱས་ཤིང༌། །ཐེག་པ་གསུམ་ལ་རབ་བཀོད་པས། །ཆོས་ཀྱི་སྦྱིན་པ་རྒྱས་གྱུར་ཅིག །བདག་སྔོན་ཐབས་ཤེས་གྱུར་པ་ན། །སེམས་ཅན་ལྟ་ངན་ལས་བསྒྲལ་ཅིང༌། །ཡང་དག་ལྟ་ལ་བཀོད་བྱས་པས། །ཆོས་ནི་རྣམ་པར་འཕེལ་གྱུར་ཅིག །བདག་གིས་སེམས་ཅན་བསྡུ་དངོས་བཞིས། །ཉོན་མོངས་མེ་ལས་ཐར་བྱས་ཤིང༌། །བདག་གིས་འཕེལ་སྡིག་ཕམ་བྱས་པས། །བདག་འཁོར་ཡུན་རིང་གནས་གྱུར་ཅིག །བདག་གིས་མུ་སྟེགས་ཅན་གཞན་དག །ལྟ་བའི་ཆུ་ལས་བསྒྲལ་བྱས་ཏེ། །ཡང་དག་ལྟ་ལ་བཀོད་གྱུར་པས། །བདག་འཁོར་རྟག་ཏུ་གུས་གྱུར་ཅིག །ཡུན་རིང་བསྟན་པ་འབར་གྱུར་ཅིག །ཆོས་ཀྱི་རྒྱལ་པོ་བཙོང་ཁ་པའི། །ཆོས་ཚུལ་རྣམ་པར་འཕེལ་བ་ལ། །གེགས་བྱེད་མཚན་མ་ཞི་བ་དང༌། །མཐུན་རྐྱེན་མ་ལུས་ཚང་བར་ཤོག །བདག་དང་གཞན་གྱི་དུས་གསུམ་དང༌། །འབྲེལ་པའི་ཚོགས་གཉིས་ལ་བརྟེན་ནས། །རྒྱལ་བ་བློ་བཟང་གྲགས་པ་ཡི། །བསྟན་པ་ཡུན་རིང་འབར་གྱུར་ཅིག །ཕན་བདེ་འབྱུང་བའི་གནས་གཅིག་པུ། །བསྟན་པ་ཡུན་རིང་གནས་པ་དང༌། །བསྟན་འཛིན་སྐྱེས་བུ་དམ་པ་རྣམས། །སྐུ་ཚེའི་རྒྱལ་མཚན་བརྟན་གྱུར་ཅིག །གཞན་ཡང་ཚིགས་བཅད་ཅི་རིགས་པ་བྱའོ། །ཆོས་སྐུ་སྤྲོས་བྲལ་འདུས་མ་བྱས་པའི་ཁམས། །ལོངས་སྐུ་འཁོར་མཐའ་དེ་སྲིད་འཕོ་འགྱུར་འདས། །སྤྲོ་(༡༦༧བ) ― GLG021_Page_0336 ―
[མ་དཔེ་གཟིགས་ན་འདིར་གནོན།]
བསྡུའི་སྤྲུལ་སྐུ་རང་དབང་ཉེར་ཐོབ་ཕྱིར། །རབ་བརྟན་རྟེན་འབྲེལ་བསྒྲིགས་བར་འབྲས་སྨིན་ངེས། །སྐྱེ་རྒ་ན་འཆིའི་རི་གཟར་ལས་འབབ་ཆུ། །གྱེན་བཟློག་ནུས་མིན་བདག་འདྲའི་ཆེར་རློམ་ཚོར། །ཚུལ་འདི་མིག་ངོར་མཛེས་པ་ནམ་མཁའི་འཇར། །བྱིས་པས་སྦར་འཛིན་བྱེད་པའི་རྣམ་ཐར་བཞིན། །འོན་ཏེ་རིན་ཆེན་རྣམ་གསུམ་དཔང་པོར་བྱས། །ཐུགས་རྗེ་བསྐུལ་ལས་བྱིན་རླབས་ཆར་རྒྱུན་གྱིས། །ཡོངས་སྨོན་ས་བོན་སྨིན་པའི་མྱུ་གུའི་སྐྱེད། །བསྲིངས་མཐར་འབྲས་བུ་གཡུར་དུ་ཅིས་མི་ཟ། །སྨིན་གྲོལ་ཆོ་ག་ལས་སྦྱོར་མཚན་ཉིད་དང༌། །མི་ལྡན་ཚིག་སྐམ་ནེའུ་ཙོའི་ཁ་ཏོན་འདྲ། །དེ་ཕྱིར་བརྗོད་པ་ཨ་འདུས་ཀ་འཕྲེང་ཅན། །མདོ་དང་འབྲེལ་འདི་དོན་དུ་འགྱུར་བར་སེམས། །བསོད་ནམས་བྱས་འདིས་མངོན་མཐོའི་རྟེན་བཟང་པོ། །རྙེད་པའི་སྐྱེ་རྒུ་མཐའ་དག་དུས་མིན་དུ། །ལྷ་ཆེན་ཉི་བུའི་ཞགས་པས་མི་འཛིན་པར། །འཚོ་བའི་རེ་བ་ཡོངས་སུ་སྐོང་བར་ཤོག །བླ་དཔོན་ཆེ་རྒུ་གང་ལའང་ཕུལ་ཆོག་པའི་བརྟན་ཞུགས་གོ་རིམ་ཁྲིགས་སུ་བསྒྲིགས་པ་ཞིག་དགོས་ཞེས་ཚེ་རིང་གནམ་གྱི་ཤེ་མོང་ལས་མང་པོས་བཀུར་བ་ཆིང་གིས་ཀྱི་རིགས་ལས་ཁལ་ཁ་དད་སྟོབས་ལྡན་པ་རྡོ་རྗེ་ཐུ་ཤེ་ཡེ་ཐུ་རྒྱལ་པོའི་གསུང་གིས་བསྐུལ་བ་ལ་བརྟེན་ནས་ཤིན་ཏུ་རྒྱས་པའི་སྡེ་སྣོད་སངས་རྒྱས་ཕལ་པོ་ཆེ་སོགས་བཀའ་ལས་བྱུང་བ། རྒྱལ་བའི་སྲས་པོ་ཞི་བ་ལྷ། ཆོས་ཀྱི་རྒྱལ་པོ་འཕགས་པ། རྒྱལ་བ་ཙོང་ཁ་པ་ཆེན་པོ། ཐམས་ཅད་མཁྱེན་པ་དགེ་འདུན་རྒྱ་མཚོ་རྣམས་ཀྱི་གསུང་བྱིན་རླབས་ཀྱི་མཐུ་དཔུང་ཆེ་བས་གཙོ་བོར་གཟུང་ཚིག་ཕྲད་ཅུང་ཟད་བསྒྱུར་དགོས་དང་སྤྱིའི་བརྟན་བཞུགས་ཤློ་ཀ་བཅུ་དྲུག་གསར་དུ་བསྣན་(༡༦༨ན) ― GLG021_Page_0337 ―
[མ་དཔེ་གཟིགས་ན་འདིར་གནོན།]
པའི་བརྟན་བཞུགས་ཀྱི་ཡི་གེ་ཐུགས་རྗེ་མྱུར་འཇུག་ཅེས་པ་འདི་ནི་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་རང་བྱུང་འཕགས་པའི་གཙུག་ལག་ཁང་དུ་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པས་བགྱིས་སོ། །འཇིག་རྟེན་དབང་ཕྱུག་སྤྱན་ཟུར་འགྲོ་ཀུན་ལ། །རྟག་པར་བཙའ་ཡང་བློ་བཟང་ཆོས་འཕེལ་བདག །འདི་སྣང་བདེ་སྐྱིད་ལ་སྤྱོད་ཕྱི་མའི་ཚེ། །བདེ་བ་ཅན་གྱི་ཞིང་དུ་འདྲེན་པར་མཛོད། །ཅེས་འཕགས་པ་ལོ་ཀེ་ཤྭ་རར་སེ་ཆེན་དབོན་པོས་ཕྱེ་ཕུར་ཕུལ་བའི་ཁ་བྱང་སྨོན་ལམ་དགོས་ཚུལ་ལྟར་ཟ་ཧོར་བནྡེས་སྦྱར། །རྫོགས་སངས་རྒྱས་ཞལ་འདབ་སྟོང་ཟེའུ་འབྲུའི་རྩེར། །ཞི་བ་དམ་ཆོས་བུང་བའི་དབྱངས་སྙན་པོ། །འཛིན་མཛད་ངོ་ཚ་ཤེས་པ་དགེ་འདུན་ཏེ། །དཀོན་མཆོག་གསུམ་གྱི་ངོ་བོར་གསོལ་བ་འདེབས། །འཇིགས་ཆེན་བརྒྱད་སོགས་མི་བཟད་ཟུག་རྔུ་ཡིས། །ལུས་ངག་ཡིད་ལ་འཚེ་བ་ཀུན་ཞི་ཞིང༌། །སིམ་པའི་ཚོར་བ་འཆི་མེད་བདག་པོ་ལྟར། །ཚེ་འདིར་ཉམས་སུ་མྱོང་བར་བྱིན་གྱིས་རློབས། །བར་དོར་མི་སྡུག་ཡ་ངའི་འཁྲུལ་པ་ཡི། །སྣང་བ་སྣ་ཚོགས་ཤར་བའི་རོལ་པ་ཀུན། །རང་ངོ་འཕྲོད་དེ་མངོན་མཐོའི་རྟེན་བཟང་པོ། །ཐོབ་པའི་ཡུལ་དུ་མ་ནོར་འཇུག་བྱིན་རློབས། །ཡང་སྲིད་ཕྱི་མ་རྣམས་སུ་བསྟན་དང་མཇལ། །ཐོས་བསམ་སྒོམ་པ་ཚུལ་བཞིན་བསྒྲུབས་པ་ཡིས། །རིང་པོར་མི་ཐོགས་མི་གནས་མྱང་འདས་སར། །བགྲོད་ནུས་འགྲོ་བ་མ་ལུས་སྒྲོལ་བྱིན་རློབས། །ཞེས་པ་འདི་ཡང་འདི་ཕྱི་བར་དོ་གསུམ་དུ་སྐྱོབ་པའི་གསོལ་འདེབས་ཤིག་དགོས་ཞེས་ཆེན་པོ་ཧོར་(༡༦༨བ) ― GLG021_Page_0338 ―
[མ་དཔེ་གཟིགས་ན་འདིར་གནོན།]
གྱི་རྒྱལ་ཁམས་ནས་བློ་བཟང་དར་རྒྱས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མགོན་པོར་མཆོད་བསྟོད་སྨོན་ལམ་བཏབ་པའི་འབྲས། །བསྐལ་བཟང་མཆོག་གི་སྤྲུལ་སྐུ་ལྔ་པ་རུ། །གྱུར་ཚེ་བདག་སོགས་འདུས་པར་རབ་སྐྱེས་ནས། །དམ་པའི་ཆོས་ཀྱིས་གྲོལ་ཞིང་ཚིམ་པར་ཤོག །ཅེས་པ་འདི་ཡང་ཆོས་རྗེ་དགེ་འདུན་དཔལ་འབྱོར་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །རྩ་གསུམ་འདུས་པའི་ཕོ་བྲང་བཀོད་ལེགས་རྒྱན། །བཟང་གོས་བར་སྣང་མཛོད་ཀྱི་རི་མོ་ཅན། །ཕུལ་བས་བསོད་ནམས་འཛད་པ་མེད་པའི་འབྲས། །བྱང་ཆེན་མ་ཐོབ་དེ་སྲིད་མྱོང་བར་ཤོག །ཨེ་ཝཾ་ཟུང་འཇུག་རིགས་འཛིན་གྲོང་ཁྱེར་གྱི། །མཛེས་རྒྱན་ཡལ་བ་ཀུན་བཟང་མཆོད་པའི་སྤྲིན། །རི་མོ་རྣམ་བཀྲ་ཕུལ་བས་གནས་སྐབས་དང༌། །མཐར་ཐུག་དོན་གཉིས་ལྷུན་གྱིས་གྲུབ་པར་ཤོག །ཅེས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་འདུ་ཁང་དུ་འགྲམ་རྒྱུའི་ཡོལ་བ་གོས་དམར་རྒྱན་བཞི་རྣམ་པ་བཅུ་དྲུག །གན་གོས་ཚོན་ཁྲའི་གོང་བ། འཇའ་གོས་གསེར་མ་དམར་སེར་སྔོ་གསུམ་གྱིས་བྱས་པ་དང༌། ཡང་མ་གོས་དམར་རྒྱན་བཞི་རྣམ་པ་བཅོ་ལྔ། གོང་བ་ཐོན་ཐི་འཇའ་གོས་གསེར་མ་སུམ་གཤིབས་ཅན་གཅིག་བཅས་ཤིང་ཡོས་མཆོད་དཔོན་རྒྱལ་དར་གོང་པ་ངག་དབང་ཤེས་རབ་ཀྱིས་ཕུལ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་བཀོད་པ་མངྒ་ལཾ་བྷ་ཝནྟུ། །དར་ཚོན་འཇའ་རིས་དྲ་བ་དྲ་ཕྱེད་ཀྱི། །གོང་པ་གོས་སྔོན་རྡོ་རྗེ་གསང་ལམ་ཕྲེང༌། །རྩ་གསུམ་སྤྱན་(༡༦༩ན) ― GLG021_Page_0339 ―
[མ་དཔེ་གཟིགས་ན་འདིར་གནོན།]
སྔར་ཕུལ་དགེས་མཆོག་ཐུན་གྱི། །དངོས་གྲུབ་ནམ་མཁའ་མཛོད་ཀྱི་སྒོ་འབྱེད་གསལ། །ཞེས་རྣམ་པར་རྒྱལ་བའི་ཕན་བདེ་ལེགས་བཤད་གླིང་གི་འདུ་ཁང་དུ་མཁའ་འགྲོ་རྣམ་ལྔ་དགྱེས་བསྐྱེད་སྙན་དར་གྱི་གོང་པ་གླིང་བཞི་མ་མཆོད་དཔོན་རྒྱལ་དར་གོང་པ་ངག་དབང་ཤེས་རབ་ཀྱིས་ཤིང་ཡོས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་བྱིནྡས་བྲིས་པ་བི་ཙ་ཏུརྐརྨ་ནི་རཱ་བྷོ་ག་བྷ་ཝནྟུ། །གོས་སྔོན་རྡོ་རྗེ་ཕྲེང་ལས་ཉེར་བརྒྱུས་པ། །དབང་གཞུ་ལྟར་བཀྲ་དར་ཚོན་ལྡ་ལྡིར་བཅས། །བསྟན་སྲུང་དམ་ཅན་རྒྱ་མཚོར་ལེགས་ཕུལ་བས། །འདི་ཕྱིར་དགེ་བའི་བསམ་དོན་ལྷུན་གྲུབ་མཛོད། །ཅེས་རི་བོ་ཆོས་གླིང་གི་འདུ་ཁང་དུ་བསྐང་གསོའི་དུས་འགྲམ་རྒྱུའི་སྙན་དར་སུམ་བརྒྱ་སྐོར་གོང་བ་གླིང་བཞི་མ་དང་བཅས་མཆོད་དཔོན་རྒྱལ་དར་གོང་པ་ངག་དབང་ཤེས་རབ་ཀྱིས་ཤིང་ཡོས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བ་སིདྡྷི་རསྟུ། །བཅོམ་ལྡན་ཚེ་མཐའ་ཡས་པའི་ཕྱག་སོར་གྱིས། །ལེགས་བཏེག་བདུད་རྩིའི་བུམ་པས་དབབ་བསྐུར་པས། །བློ་བཟང་གྲགས་པའི་བསྟན་ལ་མི་འཇིགས་པ། །སྦྱིན་པའི་སྒོ་འཕར་འབྱེད་ཁྱོད་ཞས་བརྟན་ཤོག །རྣམ་བཞིའི་འཕྲིན་ལས་རྡོ་རྗེ་རྩེ་བརྒྱ་པས། །རྒོལ་ངན་བཅུད་བྲལ་འཇོམས་དང་ལྷན་ཅིག་ཏུ། །རང་སྲིད་སྐབས་གསུམ་པ་རྣམས་ཕན་དང་བདེར། །སྤྱོད་པའི་སྐལ་བ་མངོན་སུམ་ཉམས་མྱོང་ཤོག །ཅེས་ས་སྐྱོང་བློ་བཟང་སྦྱིན་པའི་བརྟན་བཞུགས་ཤློ་ཀ་གཅིག་གཉིས་ཙམ་ཞིག་དགོས་ཞེས་ཆོས་འཁོར་རྒྱལ་བླ་སྤྱི་ཐུན་མོང་ནས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །(༡༦༩བ) ― GLG021_Page_0340 ―
[མ་དཔེ་གཟིགས་ན་འདིར་གནོན།]
ཀཱ རུ ཎ སྱཱ ཀྵ ཥཱུ ཎྜ རྡྷུ ཏོ ནོ ཀྵ རེ པཱ ད མ ཏྲེ བྷ བཻ རྴ ཉྩ ཏ སྱཱ སཾ ཝཿཐུགས་རྗེའི་སྤྱན་ཟུར་དུས་ལས་ཡོལ་མེད་དུ། །ལྷུངས་པའི་མོད་ལ་སྲིད་ཞིའི་གདུང་སེལ་བ། །སཱུ ཪྻ བི ནྡྷོ དྡྷུ ཛཻ ཏ ཙ ཀྲ རཻ ཁཱ ཙ མཱུ རྡྷེ སྠི ཏེ ཧཱི ག །མ ཎྱཱ ག །ཎ ཤྭཱ ས ཏུ། །ཉི་མའི་གཉེན་ཕྱག་འཁོར་ལོའི་རི་མོ་ཅན། །སྤྱི་བོར་ཞོག་ལ་འགྲོ་ཚོགས་དབུགས་དབྱུང་ཞིག །ནང་པ་མུ་སྟེགས་ཀླ་ཀློ་དྲང་སྲོང་གི །སྟོན་རློམ་མང་ཡང་ལྷ་མོ་བསྟན་མ་ཡིས། །ལུས་ཕྱེད་འཛིན་མ་ནས་ཐོན་དཔང་བྱས་པའི། །སྐྱོབ་པ་ཁྱོད་ལས་གཞན་ན་དམིགས་སུ་མེད། །གང་གསུང་གཞོན་ནུ་ནམ་མཁའ་མཛེས་མ་དང༌། །དགྱེས་མགུར་སྤྱོད་འདོད་གཟུགས་ཁྱོན་ཕ་མཐའི་ཚད། །མ་ཉམས་ཚངས་པས་དགུ་ཚིགས་སྐ་རགས་ཀྱིས། །འཆིང་བའི་ནུས་བྲལ་ཟག་བཅས་གཉིད་ཀྱི་ཡུར། །འོན་ཏེ་རྒྱལ་བློན་ལོ་པཎ་མཛད་བཟང་གྲུས། །འཕགས་ཡུལ་ཆུ་གཏེར་ལས་བསྒྲལ་གངས་ལྗོངས་འདིར། །མདོ་འདུལ་(༡༧༠ན) ― GLG021_Page_0341 ―
[མ་དཔེ་གཟིགས་ན་འདིར་གནོན།]
ཤེར་ཕྱོགས་རྒྱུད་སྡེ་ཡིད་བཞིན་དབང༌། །ལེགས་དྲངས་བསོད་ནམས་ཞིང་གི་ཡང་རྩེར་སོན། །མདོ་སྟོད་ལྷོ་རོང་རྫོང་དུ་སྒྱུ་མའི་ནོར། །སྙིང་མེད་སྙིང་པོ་ལེན་ཕྱིར་བརྒྱ་ཕྲག་གི །གླེགས་བམ་ཚར་དུ་དངར་བའི་མུ་ཏིག་ཕྲེང༌། །འབད་རྩོལ་སྲད་བུར་ལན་གྲངས་གཉིས་སུ་བརྒྱུས། །དེ་ཚུལ་ས་སྐྱོང་བློ་བཟང་མཐུ་སྟོབས་ཀྱི། །རྣམ་དཔྱོད་བཀོད་པ་ཁྱད་པར་ལས་བྱུང་བ། །རྫོང་གཉེར་ངག་དབང་ཕུན་ཚོགས་བསམ་མཁར་བ། །ཟུང་གིས་བརྩོན་པའི་བྱེད་པོས་རབ་ཏུ་བསྒྲུབས། །དཀར་པོར་འཛག་པའི་རྣམ་སྨིན་དངོས་པོ་ལ། །དོ་དམ་དཔོན་ཡིག་བཟོ་རིགས་ཀྱིས་མཚོན་པའི། །ལུས་ངག་ཡིད་གསུམ་ངལ་བ་བརྟེན་པ་རྣམས། །འདི་ཕྱིའི་མདུན་མ་ལྷུན་གྱིས་གྲུབ་པར་ཤོག །ཐུབ་བསྟན་སྤྱི་དང་ཁྱད་པར་དུས་གསུམ་གྱི། །རྒྱལ་ཀུན་འདུས་པའི་ངོ་བོ་བཙོང་ཁ་པའི། །ཆོས་སྲིད་རིང་ལུགས་ཡོངས་འདུ་ས་བརྟོལ་གྱི། །ཕན་བདེའི་འབྲས་བུ་རྟག་ཏུ་མྱོང་བར་ཤོག །མདོ་སྔགས་ལུང་གི་དོན་ལ་ཐོས་བསམ་སྒོམ། །གོམས་ནས་རྟོགས་པའི་ཡོན་ཏན་དཀར་ཆའི་ཟླ། །ཇི་བཞིན་འཕེལ་བའི་འདུས་སྡེ་དེ་འཛིན་ཚོགས། །རྒྱས་ཤིང་སྲིད་མཐའི་བར་དུ་བརྟན་པར་ཤོག །ས་དབང་བཀའ་ཁྲིམས་གསེར་ཤིང་ཆེས་སྦོམ་པས། །མཆོག་དམན་གཉའ་བ་མནན་ཏེ་ནག་པོའི་དཔུང༌། །འཇོམས་པའི་རྡོ་རྗེ་རྩེ་བརྒྱ་གདེངས་པ་དང༌། །ལྷན་ཅིག་སྐྱིད་པའི་བ་དན་སྒྲེང་བར་ཤོག །ནམ་ཡང་བསླུ་བ་མེད་པའི་དཀོན་མཆོག་གསུམ། །སྐབས་གསུམ་དྲང་སྲོང་རིག་པ་འཛིན་རྣམས་ཀྱིས། །ས་སྟེང་ཁྱབ་པའི་བཀྲ་ཤིས་མེ་ཏོག་ཆར། །ཡོངས་ཕོབ་དགེ་ཚོགས་བྱང་ཆུབ་མཆོག་ཏུ་བསྔོ། །(༡༧༠བ) ― GLG021_Page_0342 ―
[མ་དཔེ་གཟིགས་ན་འདིར་གནོན།]
ས་སྐྱོང་བློ་བཟང་མཐུ་སྟོབས་ཀྱིས་ཞལ་བཀོད་མཛད་ནས་མདོ་སྟོད་ལྷོ་རོང་རྫོང་དུ་རྫོང་སྡོད་རྡོ་པ་ངག་དབང་ཕུན་ཚོགས་དང་ཆུ་ཤུར་བསམ་མཁར་བ་གཉིས་ཀྱིས་དོ་དམ་བྱས་ཏེ་བཀའ་འགྱུར་རིན་པོ་ཆེ་ཚར་གཉིས་བཞེངས་པའི་སྨོན་ལམ་ཚིགས་བཅད་དགོས་ཞེས་ངག་དབང་ཕུན་ཚོགས་ཀྱིས་ཡི་གེ་བསྐུར་བྱུང་བ་ལྟར་བ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྒྱལ་དབང་བཙོང་ཁ་པ་ཡི་སྐུ་བརྙན་དྲུང༌། །ཉེར་སྤྱོད་མཆོད་པའི་སྤྲིན་ཕུང་རབ་སྤྲོས་པས། །རྒྱུ་སྦྱོར་འཁོར་བཅས་འགལ་རྐྱེན་ཀུན་ཞི་ཞིང༌། །འདོད་པའི་རེ་མ་མ་ལུས་སྐོང་བར་ཤོག །ཅེས་པ་འདི་ཡང་བྱང་གླིང་མཆིས་བྲང་བྲོ་འཚལ་སྐབས་བསམ་འགྲུབ་རྒྱལ་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །དྷཱི་ཡིག་ཞུན་འཁྱིལ་ངག་དབང་ཐུགས་རྗེའི་ཟླ། །ཉ་རྒྱས་ཟེར་གྱིས་བློ་གྲོས་ས་མོས་ཚལ། །བཞད་པའི་སྐལ་བ་བཟང་པོས་རྒྱ་ཆེན་ཆོས། །སྨྲ་ལ་མཚོ་བྱུང་མགྲིན་པར་འཁྱུད་དེར་འདུད། །དོན་མིན་སྒྲོ་ཙམ་བཏགས་ཀྱང་དུས་མཁྱེན་རྒྱལ། །ཇི་བཞིན་དད་མཐུས་བརྗོད་པ་རྣམ་དག་ལས། །ལེགས་བྱས་རྣམ་སྨིན་མཁྲིས་ཅན་གངས་རི་ལྟར། །དངོས་མྱོང་མཐོང་འབྲས་རོ་བདར་ལོངས་སྤྱོད་ཤོག །རྫོགས་ལྡན་སྐྱེ་རྒུའི་བདེ་གཟུགས་འདི་སྣང་གི །རྙོག་བྲལ་རྫིང་བུར་འཆར་དང་ལྷན་ཅིག་ཏུ། །མི་གནས་མྱང་འདས་བརྒྱ་ཕྲག་རི་མོའི་གར། །གཏན་མདུན་ཆུ་གཏེར་ངོས་སུ་གསལ་བར་ཤོག །ཅེས་པའང་བྱ་ནག་རིགས་ཀྱི་ཐིག་ལེ་རྣམ་གླིང་པཎ་ཆེན་དཀོན་མཆོག་ཆོས་གྲགས་ཀྱིས་ངེད་རང་གི་འདྲ་འབག་བཞེངས་པའི་རྒྱབ་ཡིག་དགོས་ཚུལ་ལྟར་ཚངས་སྲས་བཞད་པའི་(༡༧༡ན) ― GLG021_Page_0343 ―
[མ་དཔེ་གཟིགས་ན་འདིར་གནོན།]
སྡེས་སྦྱར་བ་སིདྡྷི་རསྟུ། །ངོ་མཚར་བདེ་ལྡན་ཞིང་ཁམས་རྒྱ་མཚོ་ཡི། །འདབ་སྟོང་སྦུབས་སུ་རྫུས་ཏེ་ཉེར་སྐྱེས་ནས། །གར་དབང་མགོན་པོའི་ཞལ་མཐོང་དམ་པའི་ཆོས། །ལེགས་ཐོས་ས་ལམ་ཕ་རོལ་ཕྱིན་རྫོགས་ཤོག །འཁོར་ལོ་ཐ་མའི་ཡང་སྙིང་དཀོན་བརྩེགས་ལས། །རབ་བསྟན་སུམ་ཅུ་རྩ་ལྔའི་བདེར་གཤེགས་ཀྱི། །ཐུགས་རྗེའི་ཆབ་ཀྱིས་ཉེས་ལྟུང་དྲི་མའི་ཚོགས། །ཡོངས་བཀྲུས་མངོན་མཐོ་ངེས་ལེགས་སར་བགྲོད་ཤོག །སྔོན་ནས་སྒྲིབ་གཉིས་འཆིང་རྒྱ་ལས་གྲོལ་ཀྱང༌། །འགྲོ་ངོར་ཉན་ཐོས་ཚུལ་གྱིས་རྒྱལ་བའི་བསྟན། །དར་མཛད་འཕགས་པའི་གནས་བརྟན་བཅུ་དྲུག་གིས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཤིང་རྟ་ཆེ་གཉིས་ནས་བརྒྱུད་ཟབ་རྒྱས་ཀྱིས། །རྣམ་གསུམ་སྐྱེས་བུའི་ལམ་གྱི་འགྲོས་མ་ལུས། །རབ་སྤེལ་བཤེས་གཉེན་མུ་ཐི་ལ་ཡི་འཕྲེང༌། །ཆད་མེད་བྱོན་པའི་ཚོགས་ཀྱིས་བདག་བྱིན་རློབས། །རིམ་པར་བྱོན་དང་སྤྲུལ་པ་སྣ་ཚོགས་སུ། །བསྟན་ལས་སྐྱེ་བའི་རབས་ཞེས་ཉེར་བཏགས་ནས། །མོས་པ་རྡོ་བའི་རིང་བསྲེལ་ཇི་བཞིན་དུ། །སླུ་མེད་རྒྱུ་ལས་འབྲས་བུ་ཡོངས་སྨིན་ཤོག །ཅེས་པ་ལྷ་ས་བ་བློ་བཟང་དཔལ་འབྱོར་གྱིས་བདེ་བ་ཅན་གྱི་ཞིང་བཀོད། སངས་རྒྱས་སུམ་ཅུ་སོ་ལྔ། གནས་བཅུ། ལམ་རིམ་བརྒྱུད་པ། སྐྱེས་རབས་འགྲོ་ལ་རྗེས་བརྩེ་མ་རྣམས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་གྲགས་སོ། །ཟིལ་གནོན་ཀུན་བཟང་འཇམ་མགོན་ཁྲོ་རྒྱལ་ལམ། །སྟོན་མཛད་རྩ་བའི་བླ་མ་བཞད་པ་(༡༧༡བ) ― GLG021_Page_0344 ―
[མ་དཔེ་གཟིགས་ན་འདིར་གནོན།]
རྩལ། །རང་རིག་དག་པའི་ངོ་བོ་དབྱེར་མེད་པར། །མི་ཕྱེད་གདུང་བའི་ཡིད་ཀྱིས་གསོལ་བ་འདེབས། །སྔགས་འཆང་བློ་གྲོས་རྒྱལ་བས་ལེགས་བྱས་མཐུས། །རྡོ་རྗེ་སློབ་དཔོན་བསྐལ་པ་མཐའ་ཀླས་པར། །པདྨཱ་ཀ་ར་ལྟ་བུར་འགྱུར་མེད་དུ། །རབ་བཞུགས་ཆོས་ཀྱི་འཁོར་ལོ་བསྐོར་བར་ཤོག །སྙིང་དབུས་གཞོན་ནུ་བུམ་སྐུར་རིག་པའི་རྩལ། །སྒྲིབ་བྲལ་ཆོས་སྐུ་རང་བཅས་མངོན་སུམ་དུ། །ངོ་འཕྲོད་གྱུར་མིན་དེ་སྲིད་བླ་མ་ལྷས། །ནམ་ཡང་འབྲལ་བ་མེད་པར་རྗེས་འཛིན་ཤོག །ཅེས་སྔགས་འཆང་བློ་གྲོས་རྒྱལ་བས་འཇམ་དཔལ་གཤིན་རྗེ་ཚེ་བདག་ཡང་བཟློག་གི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་གྲགས་པའོ། །འདིས་མཚོན་དུས་གསུམ་བསགས་པའི་དགེ་ཚོགས་ཀྱིས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །རབ་བརྟན་དོན་གྲུབ་རྒྱ་མཚོ་བྱང་ཆུབ་བར། །རྗེས་བཟུང་རིང་མིན་རྣམ་མཁྱེན་སར་འགོད་ཤོག །ཅེས་པ་འདིའང་དགའ་གདོང་སྔགས་རམས་པས་ངེད་རང་གི་འདྲ་འབག་བཞེངས་པའི་ཚེ་དགོས་ཚུལ་ལྟར་ཟ་ཧོར་གྱི་བནྡེས་སྦྱར། །འོག་མིན་ཞིང་གི་མགོན་པོ་རྣམ་སྣང་མཛད། །འཁོར་བ་མཐའ་ཅན་དེ་སྲིད་གཡོ་མེད་དུ། །རྗེ་བཙུན་བླ་མ་གར་གྱི་དབང་ཕྱུག་སྐུ། །བཞེངས་ཏེ་བསྐལ་བཟང་གདུལ་བྱའི་རེ་སྐོང་ཤོག །མི་འཇིགས་གདོང་ལྔས་ཡོངས་བཏེག་རིན་ཆེན་ཁྲིར། །སྣ་ཚོགས་རྡོ་རྗེའི་རི་མོ་རབ་བཀྲའི་སྟེང༌། །ནམ་ཡང་མི་ཤིགས་སྐྱིལ་མོ་ཀྲུང་བཅས་ནས། །བགྲང་ཡས་ཆོས་ཀྱི་འཁོར་ལོ་བསྐོར་བར་གསོལ། །རྒྱལ་ཀུན་ཡབ་གཅིག་འཇམ་(༡༧༢ན) ― GLG021_Page_0345 ―
[མ་དཔེ་གཟིགས་ན་འདིར་གནོན།]
མགོན་ངག་གི་ལྷ། །དབང་ཕྱུག་བརྒྱད་ལྡན་བློ་བཟང་གྲགས་པ་ཡི། །རིང་ལུགས་རྒྱ་མཚོའི་ཕ་མཐའ་ཡོངས་ཁྱབ་ཕྱིར། །ཚངས་སྲས་བཞད་པའི་རྡོ་རྗེ་ཞབས་བརྟན་ཤོག །མཁྱེན་བརྩེ་ནུས་པའི་དཔལ་ལྡན་རྫོགས་སངས་རྒྱས། །དེས་གསུངས་བདེན་པ་གཉིས་ལྡན་དམ་པའི་ཆོས། །རིག་གྲོལ་ཡོན་ཏན་བརྒྱད་ལྡན་དགེ་འདུན་ཏེ། །མཆོག་གསུམ་མཐུ་ཡིས་འདོད་དོན་ལྷུན་གྲུབ་ཤོག །འདོད་པ་ཁམས་ཀྱི་དབང་ཕྱུག་དམག་ཟོར་མ། །བོད་སྐྱོང་སྨན་གཅིག་རྡོ་རྗེ་གཡའ་མ་སྐྱོང༌། །ལྷ་དང་དྲང་སྲོང་རིག་འཛིན་ཚོགས་རྣམས་ཀྱིས། །རེ་འབྲས་འགྲུབ་པའི་བཀྲ་ཤིས་དགེ་ལེགས་སྩོལ། །ཆོས་གྲ་ཆེན་པོ་དཔལ་གྱི་རྩེས་དང་གི་སྲུང་མ་རྡོ་རྗེ་གཡའ་མ་སྐྱོང་ངམ་གཡུ་སྒྲོན་མས་མངའ་རིས་གྲ་ཚང་གི་གཉེར་པ་འཇམ་དབྱངས་དཔལ་འབྱོར་ལ་འདི་ལྟ་བུ་བསྐུལ་ནས་ཚུགས་ཤིག་ཅེས་གསུངས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །མཆོག་གསུམ་སྤྱན་སྔར་བཟང་གོས་འཕན་ཕུལ་བའི། །འབྲས་བུ་འགྲོ་ཀུན་བྱང་ཆུབ་སར་བརྙེས་ཤིང༌། །རོ་ནུས་ཞུ་རྗེས་སྨན་གྱིས་སྐྱེ་རྒུའི་སྲོག །ཉེར་འཚོ་མེས་པོའི་རྣམ་ཐར་འཛིན་པར་ཤོག །འཚོ་བྱེད་ངག་དབང་ལྷག་བསམ་གྱིས་མཁར་སྐྱར་འཕན་ཕུལ་བའི་ཚེ་ཁ་བྱང་སྨོན་ལམ་དགོས་ཚུལ་སྟར་ཟ་ཧོར་གྱི་བནྡེས་བཀོད་པའོ། །ཁྲིམས་ལྡན་འདུས་པའི་ཀུན་དགའ་ར་བ་ཡི། །གནམ་རྒྱན་བཟང་གོས་ལས་གྲུབ་ཡོངས་བྲེས་པས། །བདག་སོགས་འགྲོ་རྣམས་སྲིད་ཞིའི་བདེ་བ་ལ། །འབྲལ་(༡༧༢བ) ― GLG021_Page_0346 ―
[མ་དཔེ་གཟིགས་ན་འདིར་གནོན།]
མེད་སྤྱོད་པའི་དགའ་སྟོན་མྱོང་བར་ཤོག །བཀྲ་ཤིས་རྟགས་མཚན་ཟ་འོག་རྒྱལ་མཚན་བཞི། །རྒྱལ་སྲས་སློབ་མར་བཅས་ལ་ལེགས་ཕུལ་བའི། །དགེ་ཚོགས་མཐོ་རིས་ཆུ་བོ་ཟད་མི་ཤེས། །བྱང་ཆེན་ཟླ་བའི་མ་མར་འབབ་གྱུར་ཅིག །མཆོད་དཔོན་ངག་དབང་ཤེས་རབ་ཀྱིས་རི་བོ་ཆོས་གླིང་དུ་བཀྲ་ཤིས་རྟགས་བརྒྱད་ཀྱི་རི་མོ་ཅན་གྱི་བཟང་གོས་ལེགས་པའི་གནམ་རྒྱན་དང་གོས་འབྲུག་རིས་མའི་རྒྱལ་མཚན་བཞི་ཕུལ་བའི་ཁ་བྱང་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བ་ཛ་ཡནྟུ། །མ་རིག་མུན་སེལ་ཤེས་རབ་མར་མེ་ཡིས། །སྐྱེ་བར་རྒྱལ་ཀུན་མཆོད་ནུས་བསོད་ནམས་ཆེད། །རིན་ཆེན་གཉིས་པའི་ཀོང་བུ་འདི་ཕུལ་བས། །འགྲོ་རྣམས་འདྲེན་པའི་དེད་དཔོན་མྱུར་ཐོབ་ཤོག །ཅེས་པ་འདིའང་འཕྱོང་རྒྱས་པ་བློ་བཟང་ཆོས་ལྡན་གྱིས་སྨོན་ལམ་ཆེན་མོར་སྔགས་རམས་པ་བྱས་པའི་ཚེ་གྲ་ཚང་དུ་དངུལ་སྲང་ཉེར་གསུམ་ལས་གྲུབ་པའི་ཀོང་ཕུལ་བའི་ཁ་བྱང་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་བྲིས་པ་སིདྡྷི་རསྟུ། །དཔལ་གྱི་རི་བོའི་དབྱིབས་ཅན་གཏོར་མའི་སྣོད། །དངུལ་དཀར་ཞུན་མ་ལས་གྲུབ་ཕུལ་བའི་འབྲས། །སྐྱེ་བར་ཐོད་འཕྲེང་རྩལ་གྱིས་རྗེས་བཟུང་ནས། །མཆོག་དང་ཐུན་མོང་དངོས་གྲུབ་འགྲུབ་པར་ཤོག །རྡོ་པ་བློ་བཟང་མཐུ་སྟོབས་ཀྱིས་གྲ་ཚང་དགེ་བསྐོས་བྱས་པའི་འཇོག་ལ་དངུལ་སྲང་བཅོ་ལྔའི་པད་སྡེར་ཕུལ་བའི་ཁ་བྱང་སྨོན་ལམ་དགོས་ཚུལ་བཞིན་ཟ་ཧོར་གྱི་བནྡེས་བྲིས་པ་ཤུ་བྷཾ། །ཐུགས་རྗེ་ཉི་མའི་འོད་སྟོང་རབ་འབར་བས། །ཆེས་སྙེགས་ལུས་ཅན་སྡུག་བསྔལ་མཐར་མཛད་པ། །རྒྱལ་བ་སྨན་(༡༧༣ན) ― GLG021_Page_0347 ―
[མ་དཔེ་གཟིགས་ན་འདིར་གནོན།]
གྱི་བླ་ཡིས་འདི་སྣང་སྤུན། །དང་མཚུངས་མ་རྒན་འགྲོ་ཀུན་ཐར་པར་དྲོངས། །འདིས་མཚོན་སྐྱེ་བར་འབྲེལ་བའི་ཉེ་དུ་རྣམས། །སྲིད་འཁྱམས་དུབ་ལ་བདེ་སྐྱིད་གྲིབ་མ་རུ། །བསིལ་བྱེད་བཅོམ་ལྡན་མགོན་པོ་མི་བསྐྱོད་པ། །མི་འཁྲུགས་རྒྱལ་པོས་དེང་འདིར་བྱིན་གྱིས་རློབས། ཁྱོད་ཞལ་འཛུམ་པའི་བརྒྱ་ཕྲག་འོད་ཀྱི་སྣེར། །རིན་ཆེན་ཆར་གྱིས་འཇུངས་པའི་སྡུག་བསྔལ་ཀུན། །བཅིལ་ནུས་ཡོན་ཏན་ཚོགས་ཀྱི་འབྱུང་གནས་ཆེ། །འགྲོ་རྣམས་ངེས་པར་ལེགས་པའི་སར་སྒྲོལ་ཤོག །ཅེས་དགེ་སློང་འཇམ་དབྱངས་གྲགས་པས་ནུ་བོ་བཀྲ་ཤིས་ཐོག་གཅོད་ཀྱི་དོན་དུ་སྨན་བླ། མི་འཁྲུགས་པ། རིན་འབྱུང་གསུམ་གྱི་བརྒྱ་ཐང་བཞེངས་པའི་ཚེ་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པའང་བསྐུལ་བ་པོ་ཉིད་དོ། །ཡེ་ཤེས་མཆོག་གི་བདུད་རྩིས་གཟོད་མ་ནས། །མཚན་དཔེའི་ལང་ཚོ་དར་བབ་སྤྲུལ་པའི་གར། །རྣམ་འདྲེན་སྨན་གྱི་བླ་མ་མཆེད་བདུན་ཞེས། །ལུས་ཅན་བསོད་ནམས་སྲོག་ཟུངས་རྨད་པོ་ཆེ། །འཕྲིན་ལས་སྐྱེ་རྒུའི་ཁམས་དང་ཉེར་འཚམ་པར། །འཇུག་ཚུལ་བརྒྱད་བརྒྱའི་གྲངས་ལྡན་ཤློ་ཀ །སྨན་མདོ་ཤཱཀྱ་སེང་གེའི་ལྗགས་རིང་པོར། །བརྐྱང་སྟེ་སྐལ་བཟང་རྣ་བའི་བཅུད་དུ་འཕེལ། །ཐུབ་གསུང་འདྲི་ཀློག་འཆང་བའི་ལེགས་བྱས་ཆབ། །བློ་བརྩོན་མ་དྲོས་མཚོ་ཆེན་ལས་བབས་པ། །བྱང་ཆུབ་ཟླ་བའི་མ་མ་འཛད་མིན་པར། །རོ་གཅིག་འབྲས་བུ་བླ་ནས་བླར་འཕེལ་ཤོག །འཆི་མེད་སྨན་པ་སྐྱེ་རྒུའི་བདག་པོའི་གཟུགས། །གངས་ལྗོངས་ལྷ་རྗེར་ཡོངས་(༡༧༣བ) ― GLG021_Page_0348 ―
[མ་དཔེ་གཟིགས་ན་འདིར་གནོན།]
བསྒྱུར་བྱང་ངོས་པ། །བསོད་ནམས་དར་རྒྱས་བཻཌཱུར་སྣང་བའི་ཞིང༌། །པདྨའི་སྦུབས་སུ་སྲིད་པ་འཛིན་པར་ཤོག །རང་དོན་གཅིག་པུའི་ཆེད་མིན་ནམ་མཁའི་མཐའ། །འཇལ་ནུས་སེམས་ཅན་ཡོངས་ཀྱི་ཕན་དང་བདེ། །ཀུན་མཁྱེན་ཡེ་ཤེས་མ་ཐོབ་དེ་སྲིད་དུ། །ནམ་ཡང་ཟད་པ་མེད་པའི་རྒྱུ་རུ་བསྔོ། །གསོ་རིག་སྨྲ་བ་ཀུན་གྱི་གཙུག་གི་ནོར་བུ་བྱང་ངོས་དྲང་སྲོང་ནང་སོ་དར་རྒྱས་ཀྱི་ཕྱི་རྟེན་དུ་རིགས་ཆོས་འཛིན་པ་ནང་སོ་སྨན་རྒྱལ་ཚེ་དབང་གིས་སྨན་མདོ་བརྒྱད་བརྒྱ་པ་བཞེངས་པའི་ཚེ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ང་རྒྱལ་སེར་སྣ་ཡོངས་དག་མཉམ་ཉིད་ཀྱི། །ཡེ་ཤེས་རང་གཟུགས་རིན་ཆེན་འབྱུང་ལྡན་ཆེའི། །ཐུགས་རྗེའི་འོད་ཀྱིས་མི་ཤེས་མུན་སངས་དང༌། །བསྒྲུབ་བྱ་ཕྱི་མའི་ཡང་སྲིད་གསལ་འཆར་ཤོག །མི་ཁོམ་གནས་བརྒྱད་འདམ་གྱིས་མ་གོས་པའི། །དལ་འབྱོར་པད་ཚལ་རབ་བཞད་ཟེའུ་འབྲུའི་དབུས། །དམིགས་ཡུལ་རིགས་གཟུགས་འབྱོར་དབང་ཤེས་རབ་དང༌། །ཚེ་རིང་ནད་མེད་མཐོ་རིས་དཔལ་འབར་ཤོག །བགྲང་ཡས་སྐྱེ་བར་ཉེར་བསགས་བརྣག་དཀའི་དྲི། །འཁྲུད་བྱེད་དགེ་ཚོགས་འཆི་མེད་ཆུ་རྒྱུན་གྱིས། །མངོན་མཐོ་ཁྱབ་འཇུག་རྐང་སོར་གྱེན་བཏེག་རྩེར། །ངེས་ལེགས་རྒྱལ་མཚན་ཏོག་འོད་གསལ་བར་ཤོག །ཁྱད་པར་སཱ་ལའི་ནགས་ལྡན་གངས་ལྗོངས་འདིར། །བསོད་ནམས་ལྷུན་གྲུབ་རྡོ་རྗེ་མི་ལུས་རྟེན། །ཡོངས་འཐོབ་གཉེན་འདུན་རྩ་ལག་བཅས་རྣམས་ཀྱིས། །མངོན་སུམ་ཡིད་ཆེས་གནས་སུ་འགྱུར་(༡༧༤ན) ― GLG021_Page_0349 ―
[མ་དཔེ་གཟིགས་ན་འདིར་གནོན།]
བར་ཤོག །ཆེད་དུ་སྨོན་ལམ་བཏབ་པའི་ཨ་མྲ་ལ། །འདོད་དོན་འབྲས་བུ་སྨིན་པ་རོ་བདའི་བཅུད། །མྱོང་བར་རྒྱལ་དང་དེ་གསུང་སློབ་མར་བཅས། །དཀོན་མཆོག་ཐུགས་རྗེའི་མཐུ་ཡིས་འགྲུབ་བྱིན་རློབས། །སེ་དཀར་རིགས་ཀྱི་ཐིག་ལེ་འདར་བ་བསོད་ནམས་ལྷུན་གྲུབ་རྡོ་རྗེའི་ཕྱི་རྟེན་དུ་རིན་འབྱུང་གི་བརྒྱ་ཐང་བཞེངས་པའི་ཚེ་སྨོན་ལམ་འདི་ལྟ་བུ་ཞིག་དགོས་ཞེས་མ་ཧཱ་ལོ་ཙཱ་བ་འདར་པ་ངག་དབང་ཕུན་ཚོགས་ལྷུན་གྲུབ་ཀྱི་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དུས་བཞི་བདེ་གཤེགས་ཀུན་གྱི་གསར་གསུམ་གར། །མི་ཟད་རྒྱན་གྱི་འཁོར་ལོའི་བདག་ཉིད་ཆེ། །ཨཽ་ཌཱི་ཡ་ནའི་སློབ་དཔོན་པདྨ་འབྱུང༌། །སྙིང་དབུས་གཞོན་ནུ་བུམ་སྐུར་རིག་པའི་རྩལ། །འོན་ཏེ་ཉི་མ་དང་ནི་འོད་ཟེར་བཞིན། །ཕུལ་བྱུང་ཐུགས་རྗེའི་མཐུ་དཔུང་རླབས་པོ་ཆེས། །ངག་དབང་ཀུན་བཟང་འཇིགས་མེད་རྣམ་པར་འཕྲུལ། །དབུས་གཙང་དག་ཞིང་ལྗོངས་འདིར་མྱུར་འབྱོན་མཛོད། །ངོ་བོ་ཀ་དག་ཆོས་སྐུ་སྤྲོས་བྲལ་ཀློང༌། །རང་བཞིན་ལྷུན་གྲུབ་ཡེ་ཤེས་དབང་པོའི་གཞུ། །ཐུགས་རྗེ་འགག་པ་མེད་པ་སྒྱུ་མའི་འཕྲུལ། །ཞིང་འདིར་འགྲོ་ལ་མངོན་སུམ་གསལ་སྟོན་ཤོག །ཀུན་བཟང་ཧེ་རུ་ཀ་དཔལ་ཀོང་ཆེན་པ། །བདུད་བཞིའི་གཡུལ་ལས་རྣམ་པར་རྒྱལ་བ་ཡི། །(༡༧༤བ) ― GLG021_Page_0350 ―
[མ་དཔེ་གཟིགས་ན་འདིར་གནོན།]
སྔ་འགྱུར་བསྟན་པའི་སྲོག་ཏུ་ཐུགས་བསྐྱེད་པའི། །ཡང་སྲིད་མཁས་གྲུབ་རྒྱུན་མི་ཆད་པར་ཤོག །རྒྱ་བོད་རིགས་འཛིན་རྩ་བརྒྱུད་བླ་མ་དང༌། །ཡི་དམ་དཀྱིལ་འཁོར་སྒྲུབ་པ་བཀའ་བརྒྱད་ལྷ། །དྲེགས་པའི་སྡེ་དཔོན་དམ་ཅན་རྒྱ་མཚོ་ཡིས། །འདོད་པའི་རེ་བ་སྐོང་བའི་འཕྲིན་ལས་སྒྲུབས། །རྫོགས་ཆེན་སྤྲུལ་སྐུ་ངག་དབང་ཀུན་བཟང་འཇིགས་མེད་ཀྱི་སྤྲུལ་སྐུ་མྱུར་དུ་འབྱོན་པའི་ཚིགས་བཅད་དགོས་ཞེས་དབོན་པོ་ཆོས་དབྱིངས་ལྷུན་གྲུབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྒྱལ་དང་དེ་སྲས་སྣང་བརྙན་གཟུགས་སྐུའི་རྟེན། །ཆོས་ཕུང་བརྒྱ་ཕྲག་གླེགས་བམ་གསུང་གི་རྟེན། །རིན་ཆེན་བྱང་ཆུབ་མཆོད་སྡོང་ཐུགས་ཀྱི་རྟེན། །བླ་མེད་ཡེ་ཤེས་མངོན་དུ་བྱེད་ཐབས་རྟེན། །རབ་ཡངས་གཏོང་བའི་སྒོ་འཕར་འབྱེད་ལ་སྤྲོ། །རབ་དཀར་ལྷག་བསམ་འགྲོ་ལ་སྤེལ་ཕྱིར་སྤྲོ། །རབ་འབྱམས་བསོད་ནམས་ཚོགས་ཆེན་སྤེལ་ལ་སྤྲོ། །རབ་བརྟན་མི་ཕྱེད་དད་པའི་ཤུགས་ཀྱིས་སྤྲོ། །རྨད་བྱུང་འདོད་ཡོན་ཕུང་པོར་སྤུངས་པའི་གཏེར། །གཏེར་མཛོད་འཛད་མེད་ལེགས་བྱས་བྱེ་བའི་ཞིང༌། །ཞིང་ས་གཤིན་པོར་རབ་བཏབ་གཏན་བདེའི་འབྲས། །འབྲས་བཟང་རོ་བདའ་བྱང་ཆེན་བར་མྱོང་ཤོག །ངལ་ངལ་ལུས་ངག་ཡིད་ཀྱིས་ཡོངས་འབད་པས། །མང་མང་བགྲང་ཡས་སྐྱེ་བའི་མ་རྒན་རྣམས། །རིང་རིང་སངས་རྒྱས་ཞེས་བྱའི་གོ་འཕང་དེ། །མྱུར་མྱུར་རྩོལ་བ་མེད་པར་མངོན་(༡༧༥ན) གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་གི་དགེ་འདུན་རྣམས་ཀྱི་ཞལ་འདོན་དུ་གནང་བའི་སྨོན་ལམ་ཚིགས་བཅད་སོགས།― GLG021_Page_0351 ―
[མ་དཔེ་གཟིགས་ན་འདིར་གནོན།]
གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་གི་དགེ་འདུན་རྣམས་ཀྱི་ཞལ་འདོན་དུ་གནང་བའི་སྨོན་ལམ་ཚིགས་བཅད་སོགས། །མགོན་པོ་གར་གྱི་དབང་ཕྱུག་ཚེ་མཐའ་ཡས། །བྱིན་རླབས་བུམ་པའི་གཟུགས་ཤར་ཕྱག་སོར་གྱིས། །ལེགས་བཏེག་ཟིལ་མངར་རྒྱུན་གྱིས་ཡིད་ཅན་ཚོགས། །བདུད་བཞིའི་གཡུལ་ལས་རྒྱལ་བའི་བཀའ་དྲིན་སྩོལ། །ཐུབ་པའི་ལྗགས་བཟང་རིང་པོར་བརྐྱང་པ་ལས། །རབ་བསྔགས་གཙུག་ཏོར་རྣམ་པར་རྒྱལ་མའི་ལྷ། །ཡིད་བཞིན་འཁོར་ལོ་ཚེ་ཡི་མཆོག་སྦྱིན་མཁན། །མ་སྨད་ཐུགས་རྗེའི་འོད་ཀྱིས་གདུང་མུན་སོལ། །རྫོགས་སངས་རྒྱས་རྣམས་དཔང་པོར་ལེགས་བཞུགས་པར། །ལུང་རྟོགས་ཆོས་ཀྱི་རྒྱུད་གཏམས་དགེ་འདུན་ཚོགས། །རྩེ་གཅིག་དང་བའི་སྒོ་ནས་ཉེར་གསུངས་པའི། །བདེན་ཚིག་བརྗོད་པ་དོན་དང་ལྡན་གྱུར་ཅིག །བགྲང་ཡས་ཆོས་ཕུང་སྨྲ་ལ་ཡངས་པའི་ངག །དབང་ཕྱུག་འཇམ་མགོན་བློ་བཟང་གྲགས་པའི་བསྟན། །རྒྱ་མཚོའི་མཐའ་ཀླས་ཀུན་(༡༧༥བ) ― GLG021_Page_0352 ―
[མ་དཔེ་གཟིགས་ན་འདིར་གནོན།]
བཟོད་ཡོངས་ཁྱབ་པར། །རྒྱས་མཛད་རྗེ་བཙུན་བླ་མ་བརྟན་པར་ཤོག །ཡིད་སྲུབས་དཔུང་ལ་འཇིགས་མེད་སྙིང་སྟོབས་གོ །ཆ་གང་རི་བོང་འཛིན་ལྟར་ཐུབ་པའི་བསྟན། །སྤེལ་བར་རྣམ་དཔྱོད་ལང་ཚོ་དར་བའི་སྡེ། །གཡུང་དྲུང་ལྟ་བུར་ནམ་ཡང་འགྱུར་མེད་ཤོག །སེང་གེས་ཡོངས་བཏེག་རྡོ་རྗེས་མཚན་པའི་ཁྲིར། །མི་གཞིག་སྐྱིལ་མོ་ཀྲུང་བཅས་ཞབས་སེན་ཟླ། །མཐའ་ཡས་ཡིད་ཅན་མགྲིན་སྔོན་རལ་པའི་རྩེར། །བསྐལ་པར་མི་ནུབ་མཛེས་པའི་རྒྱན་འགྱུར་ཤོག །རྩེ་མོའི་བགྲང་བྱར་བརླམས་པའི་ལྷ་མིའི་གདོན། །དུས་དགྲའི་དབང་པོ་དཔལ་ལྡན་མ་ཧེའི་ཞལ། །མྱུར་མཛད་མགོན་པོ་ལས་ཀྱི་གཤིན་རྗེ་ཡིས། །ཚར་བཅད་དམིགས་མེད་དབྱིངས་སུ་གཞིལ་བར་མཛོད། །ཆོས་རྣམས་གདོད་ནས་རང་བཞིན་གྱིས་སྟོང་མཁར། །ཆོས་ཅན་རྒྱུ་འབྲས་དབང་པོའི་གཞུ་རིས་ལྟར། །ནམ་ཡང་སླུ་བ་མེད་ཕྱིར་ཉེར་བཏབ་པའི། །སྨོན་པའི་རེ་བ་ཡོངས་སུ་སྐོང་བར་ཤོག །རིག་གྲོལ་གཉིས་ལྡན་འདུས་པས་བསྒྲུབ་བྱའི་ཆོས། །འགོག་ལམ་ཕ་མཐར་ཕྱིན་ལས་མཁྱེན་བརྩེ་ནུས། །རབ་བརྙེས་སངས་རྒྱས་ཐུགས་རྗེ་ཕུན་ཚོགས་པས། །ཡངས་པའི་འཇིག་རྟེན་མ་ལུས་ཁྱབ་པར་ཤོག །ཅེས་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་གི་དགེ་འདུན་རྣམས་ཀྱི་ཞལ་འདོན་དུ་འཛུགས་རྒྱུ་ཡིན་པས་ཉི་བུའི་གཡུལ་ལས་རྒྱལ་བའི་ཚིགས་སུ་བཅད་པ་འདི་ལྟ་བུ་ཞིག་རྩོམས་ཞེས་ཡོངས་རྫོགས་བསྟན་པའི་མངའ་(༡༧༦ན) ― GLG021_Page_0353 ―
[མ་དཔེ་གཟིགས་ན་འདིར་གནོན།]
བདག་ཁྲི་རིན་པོ་ཆེ་བྱམས་པ་བཀྲ་ཤིས་ཀྱི་བཀས་བསྐུལ་བ་དང་དུ་བླངས་ཏེ་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་འཕྱོང་རྒྱས་བསམ་གྲུབ་མཐོང་སྨོན་པ་ཕུན་ཚོགས་དབང་པོའོ། །རྒྱལ་ཀུན་གསང་བ་རབ་འབྱམས་འཁོར་ལོའི་མཛོད། །འཛམ་གླིང་ཆེ་བའི་བརྟུལ་ཞུགས་ཡོངས་གྲུབ་གར། །པདྨའི་ཟེའུ་འབྲུར་རྫུས་སྐྱེས་ཐོད་འཕྲེང་རྩལ། །ཕུལ་བྱུང་ཐུགས་རྗེའི་བྱིན་རླབས་ཆར་དུ་ཕོབ། །ཞི་ཁྲོ་ཡོངས་འདུས་སྒྲུབ་པ་སྡེ་བརྒྱད་དང༌། །ལྷ་ཡི་མགོན་པོ་ལེགས་ལྡན་མ་ནིང་སོགས། །བླ་མ་ཡི་དམ་མཁའ་འགྲོ་ཆོས་སྲུང་གིས། །མ་སྨད་མཐུ་སྟོབས་ནུས་པའི་དཔུང་ཆེན་བསྐྱེད། །བརྗོད་པ་རྣམ་དག་ངག་གི་དབང་ཕྱུག་པས། །ཀུན་མཁྱེན་ཤཱཀྱའི་བསྟན་པ་འཛིན་པ་ལ། །བློ་མཆོག་རབ་ཏུ་ཡངས་པའི་སྤྲུལ་པའི་གར། །མི་གཡོ་རྡོ་རྗེ་ལྟ་བུར་བརྟན་གྱུར་ཅིག །ཚེ་དཔག་མེད་མགོན་ཕྱག་གི་བུམ་པའི་བཅུད། །དྷཱུ་ཏཱིའི་ཟུངས་གྱུར་ཨ་ཧཾ་འགྱུར་མེད་པས། །འཆི་བདག་གཡུལ་ལས་རྣམ་པར་རྒྱལ་བ་ཡི། །ཕུན་ཚོགས་དགའ་སྟོན་དཔལ་ལ་སྤྱོད་པར་ཤོག །དོན་དམ་སྤྲོས་དང་བྲལ་ཡང་ཀུན་རྫོབ་ཀྱི། །སྣང་བ་མི་འགོག་ཐབས་ཤེས་ཟུང་འཇུག་པ། །བསླུ་མེད་རྒྱུ་འབྲས་རྟེན་ཅིང་འབྲེལ་འབྱུང་མཐུས། །འདོད་པའི་དོན་ཀུན་ལྷུན་གྲུབ་བཀྲ་ཤིས་ཤོག །ཅེས་ཁྱབ་བདག་ཁྲ་ཚང་བ་ཆེན་པོ་བློ་མཆོག་རིག་པའི་རྡོ་རྗེའི་སྤྲུལ་སྐུའི་བརྟན་བཞུགས་ཀྱི་བདེན་པ་བརྗོད་པ་འདི་ནི་ཆོས་རྗེས་ངག་དབང་ཐུབ་བསྟན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རབ་འབྱམས་(༡༧༦བ) ― GLG021_Page_0354 ―
[མ་དཔེ་གཟིགས་ན་འདིར་གནོན།]
པ་ངག་དབང་དགེ་ལེགས་སོ། །ཨཱ ཧ དྲྀ ཥྟཻ རྒ ཏོ དྷཱི བི ཀ ལྐཱ བི ན སཾ ཁྱ བྷྲ མེ ནྡེ ཏྶ མ ཎྜ ལྱ ཡཱ བཱ ད ཧཾ། ཚུར་མཐོང་འགྲོ་བློའི་རྙོག་བྲལ་རྫིང་བུའི་གྲངས། །དེ་སྙེད་འཁྲུལ་ཟླའི་དཀྱིལ་འཁོར་ཇི་བཞིན་བདག །མཱ རི ཙཱ ཏྟྲ ཤྩ ཧཻ མ ལྱ ནཱི ལཱ བྷ བ སྱེ ཀི ལཱ ལ སྱ ཧཱི ནི ཏྱ ནོ དེ ཤ ཙ། སྨིག་རྒྱུ་གཤེར་དང་གངས་ཅན་མདངས་སྔོན་དུ། །སྣང་བར་ཅལ་སྒྲོག་ཚད་མའི་ཡུལ་མིན་ཀྱང༌། །བདེ་ཆེན་ཆོས་ཀྱི་རྒྱལ་པོ་ཡན་ཆད་དུ། །དུས་མཚུངས་སྤྲུལ་པའི་རྒྱུ་གཅིག་རིམ་བྱོན་སོགས། །དམ་པའི་ཡང་སྲིད་ཕ་མཐའ་ཡས་པའི་དཔྱ། །གྲོ་བཞིན་སྐྱེས་ཀྱི་གདན་ལྟར་འཛད་པ་མེད། ཁོ་ར་ཁོར་ཡུག་ཁ་བའི་རྡུལ་བརྩེགས་ལྗོངས། །སྐྱེ་རྒུའི་ལྷ་མཆོག་ལག་ན་པད་དཀར་འཆང༌། །གང་འདུལ་དེར་སྟོན་སྣ་ཚོགས་འཕྲུལ་པོ་ཆེས། །སྒྱུ་མ་མཁན་གྱི་ཁེངས་པ་བག་ལ་ཞ། །འཕགས་བོད་རྒྱ་བལ་པཎ་གྲུབ་ས་སྤྱོད་དབང༌། །གཅིག་ལས་དུ་མའི་གར་བསྒྱུར་ལ་མཁུ་བར། །སྣང་བརྙན་(༡༧༧ན) ― GLG021_Page_0355 ―
[མ་དཔེ་གཟིགས་ན་འདིར་གནོན།]
རླུང་གི་རྒྱལ་མཚན་ཚོན་རིས་ལ། །ཡེ་ཤེས་སེམས་དཔའི་མདངས་བཀྲག་འོད་དུ་འཚེར། །རྒྱ་ཆེན་སྤྱོད་དང་ཟབ་མོ་ལྟ་བའི་གཞུང༌། །ཤིང་རྟ་ཆེ་གཉིས་ལས་འོངས་ལམ་རིམ་བརྒྱུད། །སྙིགས་མའི་འགྲོ་ལ་རྗེས་བརྩེ་ཐུགས་རྗེའི་མཐུ། །ཐུབ་པ་གཞན་ལས་ཁྱད་ཞུགས་བདེར་གཤེགས་བརྒྱད། །དུག་ལྔ་དབྱིངས་དག་རྒྱལ་བ་རིགས་ལྔ་དང༌། །ཉེས་ཀུན་ཡོངས་སེལ་སེང་ལྡེང་ནགས་སྒྲོལ་མའི། །རྣམ་འགྱུར་ཉེར་གཅིག་ངོ་མཚར་བཀོད་པ་ལ། །བལྟ་ཕྱིར་བརྒྱ་བྱིན་མིག་སྟོང་སྤྲུལ་པ་བཞིན། །སྣང་སྲིད་རི་མོར་བསྐྲུན་ལ་ཡངས་པའི་མིག །དཀྱུས་རིང་ནམ་མཁའི་ཕ་མཐའ་གཞལ་ནུས་པ། །ཟུར་རིགས་སྔགས་འཆང་གཞིས་ཀ་ཤར་པ་སོགས། །བཀྲ་ཤིས་གྲགས་ལྡན་སོར་མོའི་ཟློས་གར་བསྒྱུར། །བསོད་ནམས་བྱས་འབྲས་བོད་ཧོར་ཡོངས་ཀྱི་ལྷ། །ཐུབ་བསྟན་རྒྱ་མཚོའི་མཐར་འཛིན་རྒྱལ་པོ་ཡི། །འདི་དང་སྐྱེ་བ་ཀུན་ཏུ་ཕན་དང་བདེ། །འཛད་མེད་མུ་ཐི་ལ་ཡི་ཆར་འབེབས་ཤོག །རྒྱུ་སྦྱོར་སྒོ་གསུམ་འབད་རྣམས་ཁེངས་འབྱོར་སྟོབས། །རྣམ་མང་ཐོས་པའི་སྲས་ཀྱི་རྗེས་སོང་སྟེ། །མ་སྨད་སྙན་པའི་གྲགས་པ་དུནྡྷུབྷིཿ། །ཚངས་པའི་ཡུལ་ས་བརྒལ་བར་སྒྲོག་གྱུར་ཅིག །བསྟན་འཛིན་ད་ལའི་ས་ཆེན་སྐྱོང་བའི་རྒྱལ། །ལེགས་བྱས་གསེར་གྱི་འཁོར་ལོ་མཁར་འཕགས་པ། །ཁམས་གསུམ་ཟིལ་གྱིས་གནོན་པའི་དབང་ཕྱུག་གཙུག །ཞབས་སེན་ཀུནྡའི་གཉེན་དེ་ཚེས་པར་ཤོག །ཟོ་ཆུན་ལྟར་བརྒྱུད་ཡང་སྲིད་མཐའ་དག་གུང༌། །ལྷ་མིའི་རྟེན་བཟང་ཉི་མ་ཉེར་ཤར་བའི། །བདེ་སྐྱིད་སྣང་བས་ཡོངས་ཁྱབ་(༡༧༧བ) ― GLG021_Page_0356 ―
[མ་དཔེ་གཟིགས་ན་འདིར་གནོན།]
རྒུད་པའི་མུན། །མིང་གི་ལྷག་མ་བཙལ་ཀྱང་མ་རྙེད་ཤོག །དལ་དང་འབྱོར་བའི་རིན་ཆེན་ཐེམ་སྐས་ལ། །དགེ་བའི་གོམ་སྟབས་ལྷོད་པོར་རབ་འཛེགས་པས། །སྟོབས་བཅུ་མངའ་བའི་ཁང་པར་ལེགས་ཞུགས་ཏེ། །མྱུར་དུ་འགྲོ་ཀུན་འདྲེན་པའི་དཔལ་ཐོབ་ཤོག །མཁའ་ལ་འཕྲོད་སྦྱོར་བཟང་པོའི་གཟའ་སྐར་འཛོམ། ཁྲི་གདུགས་འོད་ཀྱིས་ནོར་འཛིན་དྲོད་ཆེན་ཕེབས། །མཆོག་གསུམ་ལྷ་དང་དྲང་སྲོང་བདེན་ཚིག་གི །བཀྲ་ཤིས་ཆར་གྱིས་འཇིག་རྟེན་ཁྱབ་གྱུར་ཅིག །ཅེས་གནམ་སའི་དབང་ཕྱུག་བསྟན་འཛིན་ད་ལའི་རྒྱལ་པོས་ཐམས་ཅད་མཁྱེན་པ་བདེ་ཆེན་ཆོས་ཀྱི་རྒྱལ་པོའི་འཁྲུངས་རབས་གྲྭ་ཚར་ཉི་ཤུ་རྩ་གསུམ། ལྷ་མགྲོན་ལམ་རིམ་བླ་བརྒྱུད། སྨན་བླ་བདེ་གཤེགས་བརྒྱད། རྒྱལ་བ་རིགས་ལྔ། སྒྲོལ་མ་ཉི་ཤུ་རྩ་གཅིག་རྣམས་ཀྱི་གསེར་ཐངས་བཞེངས་པའི་རི་མོ་བ་སྔགས་འཆང་གཞིས་ཀ་ཤར་པ་ཨ་གུར། ལེགས་པ་རྒྱལ་མཚན། ལགས་རྟ་མགྲིན། ཤུན་ཤག་ཁྱི་སྐྱག་ཆོས་སྐྱོང༌། ཨ་ཁུ་བསམ་འགྲུབ། ཨྱོན། རྐོས་པ་དོ་དམ་པ་ཀོང་པོ་གུར་བཟང་པ་བསོད་ནམས་དར་རྒྱས་རྣམས་ཀྱིས་བགྱིས་པའི་རྒྱབ་ཡིག་སྨོན་ལམ་འདི་ནི་གསུང་གིས་སྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བསམ་མཐོང་བ་ཕུན་ཚོགས་དབང་པོའོ། །ཁྱབ་བདག་པདྨ་རྒྱལ་པོའི་ཐུགས་རྗེའི་མཐུས། །འཇིག་རྟེན་སྤྱི་དང་ཁྱད་པར་བོད་ཡུལ་འདིར། །ཐུབ་པའི་ལུང་རྟོགས་བསྟན་པ་འཕེལ་བ་དང༌། །སེམས་ཅན་ཐ་དག་བདེ་ཞིང་སྐྱིད་པར་ཤོག །ཟ་ཧོར་རིགས་འཛིན་ཆེ་མཆོག་འདུས་པ་(༡༧༨ན) ― GLG021_Page_0357 ―
[མ་དཔེ་གཟིགས་ན་འདིར་གནོན།]
རྩལ། །བསྐལ་པ་རྒྱ་མཚོར་མི་གཡོ་རྟག་བརྟན་ཅིང༌། །ཆོས་སྲིད་ཟུང་དུ་འཇུག་པའི་འཕྲིན་ལས་ཀྱིས། །ཡངས་པའི་ནོར་འཛིན་མ་ལུས་ཁྱབ་པར་ཤོག །ཀུན་བཟང་ཐུགས་ཀྱི་ཐིག་པས་རྣམ་གྲོལ་ཏེ། །བདུད་བཞིའི་གཡུལ་ལས་རྒྱལ་བའི་ཧེ་རུ་ཀ །རྫོགས་ཆེན་རྣལ་འབྱོར་ཀོང་སྨྱོན་སྤྲུལ་པའི་གར། །ཆད་མེད་བསྟན་པའི་ཉེར་འཚོར་བསྒྱུར་བར་ཤོག །གནས་ཆེན་མང་པོར་སྐུ་གསུང་ཐུགས་རྟེན་སོགས། །དགེ་ཚོགས་བསྐྲུན་པའི་བྱེད་པོ་མ་ལུས་པ། །འདིར་སྣང་བསམ་པའི་རེ་བ་ལྷུན་གྲུབ་ཅིང༌། །ཕྱི་མ་པདྨ་འོད་དུ་སྐྱེ་བར་ཤོག །འདིའི་ཆེད་མཐུན་རྐྱེན་སྦྱོར་རྣམས་ངེས་ལེགས་ལམ། །མ་རྙེད་དེ་སྲིད་རྩ་གསུམ་ལྷ་ཚོགས་ཀྱི། །ཐུགས་རྗེ་སྙིང་གི་ཟ་མ་ཏོག་ཞུགས་པའི། །བཟང་པོའི་སྐལ་པ་ཅན་དུ་བྱིན་གྱིས་རློབས། །ཞེས་གཟུངས་འབུལ་གྱི་སྨོན་ལམ་ཚིགས་བཅད་འདི་ལྟ་བུ་ཞིག་དགོས་ཞེས་དབོན་པོ་ཆོས་དབྱིངས་ཀྱི་ངོར་ཟ་ཧོར་ཀྱི་བནྡེས་སྦྱར་བའི་ཡི་གེ་པ་ནི་བསམ་གྲུབ་མཐོང་བ་ཕུན་དབང་ངོ༌། །ཤཱཀྱ་སེང་གེའི་འཇིགས་མེད་ང་རོའི་དབྱངས། །རྣམ་གསུམ་ཆོས་ཀྱི་འཁོར་ལོའི་པུསྟ་ཀཿ །བཞེངས་པས་རྒྱལ་བའི་བསྟན་པ་རབ་རྒྱས་ཤིང༌། །འཇིག་རྟེན་ཀུན་ཏུ་བདེ་སྐྱིད་འབྱུང་བར་ཤོག །ཁྱད་པར་ངག་གི་དབང་ཕྱུག་འཇམ་དཔལ་དབྱངས། །བློ་བཟང་གྲགས་སྙན་འབར་བའི་ལུང་རིགས་ཀྱིས། །རྒྱ་མཚོའི་གོས་ཅན་ཁྱོན་རྣམས་ཡོངས་ཁྱབ་ཅིང༌། །སྲིད་མཐའི་བར་དུ་མི་འགྱུར་བརྟན་པར་ཤོག །རྒྱུ་སྦྱོར་འདྲི་ཀློག་མཐུན་པའི་རྐྱེན་སྦྱར་ཚོགས། །འདི་ཕྱིར་རྣམ་(༡༧༨བ) ― GLG021_Page_0358 ―
[མ་དཔེ་གཟིགས་ན་འདིར་གནོན།]
སྨིན་དཀར་པོ་རབ་འཛག་ཅིང༌། །རིང་པོར་མི་ཐོགས་མི་འཇིགས་བཞི་ལྡན་པའི། །གོ་འཕང་མཆོག་དེ་མངོན་དུ་འགྱུར་བར་ཤོག །ཅེས་པའང་དབུ་མཛད་བློ་བཟང་ཡོན་ཏན་གྱིས་པོ་ཏི་སོ་སོའི་མཇུག་ཏུ་འདྲི་རྒྱུ་ལ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་བཀོད། །སྨྲ་བ་ངག་གི་དབང་ཕྱུག་པའི། །བློ་གྲོས་ཆོས་བཟང་རྒྱ་མཚོ་ལྟར། །གཏིང་དཔོག་ནུས་མིན་བཤེས་གཉེན་གྱིས། །རྒྱུ་སྦྱོར་འཁོར་བཅས་ཤིས་གྱུར་ཅིག །ཅེས་པའང་སྒྱིད་ཐང་ནོར་བུས་བསྐུལ་བ་ལྟར་ཟ་ཧོར་གྱི་བནྡེས་བཀོད། །བདེ་ལྡན་ཞིང་ཁམས་རྒྱ་མཚོའི་རྣམ་འདྲེན་གྱི། །ཐུགས་གསང་དཔལ་བེ་ལས་འཕྲོས་ཟེར་འཕྲེང་ཐིག །སིནྡྷུའི་ཆུ་གཏེར་འདབ་སྟོང་གེ་སར་རྩེར། །སྒྱུ་འཕྲུལ་རོལ་གར་འཆི་མེད་རིགས་འཛིན་ཀྱེ། །བཀའ་གཏེར་སྨིན་གྲོལ་གདམས་པའི་ལུང་རྟོགས་བསྟན། །སྤེལ་ལ་མགོན་ཁྱོད་གདུང་སོབ་ལེགས་ལྡན་རྗེ། །ཉི་ཟླ་འོད་ཟེར་མཆོག་གི་སྤྲུལ་པའི་སྐུ། །ཚེ་མཐའ་ཡས་པའི་ངོ་བོར་བྱིན་གྱིས་རློབས། །སྤྲོས་པའི་མཚན་མ་ཡོངས་དག་ཀུན་ཏུ་བཟང༌། །ངོ་བོ་ཆོས་དབྱིངས་རིག་རྩལ་ཐུགས་ཀྱི་ཀློང༌། །གཞོན་ནུ་བུམ་སྐུར་རྟག་བརྟན་དངོས་པོའི་གཤིས། །བདག་སོགས་ལུས་ཅན་སྣང་ངོར་འཕོ་མེད་ཤོག །འོད་གསལ་སྒྲོན་མ་དྲུག་གི་རྣམ་པར་འཕྲུལ། །རིགས་ལྔའི་རང་བཞིན་གར་མཁན་དབང་པོའི་གཞུ། །ནམ་ཡང་འཆར་ནུབ་སྤངས་པའི་གཟི་འབར་ཆེ། །གཞན་མིན་འཁོར་ཚོགས་གཟིགས་མོར་མཚར་བར་ཤོག །གངྒཱའི་ཀླུང་གི་རྡུལ་གྱིས་མི་བསྒྲུན་པ། །སྣ་ཚོགས་(༡༧༩ན) ― GLG021_Page_0359 ―
[མ་དཔེ་གཟིགས་ན་འདིར་གནོན།]
སྤྲུལ་པ་བསྟན་ལས་སྨན་ལྗོངས་འདིར། ཀུན་ཁྱབ་ཐུགས་རྗེས་ཆོས་རྒྱལ་དབང་པོའི་སྡེའི། །རིང་ལུགས་སྲོག་གི་ཀ་བར་འགྱུར་མེད་ཤོག །བློ་གསལ་གདུལ་བྱའི་སྐལ་པ་བཟང་པོ་ལ། །རབ་སྦྱོར་པདྨ་ཐོད་འཕྲེང་འཕྲིན་ལས་རྩེ། །ཐེག་མཆོག་དབང་གི་རྒྱལ་པོ་ལས་འོངས་པའི། །བགྲང་ཡས་དངོས་གྲུབ་ཆར་ཆེན་རྟག་འབེབས་ཤོག །ཡོངས་འདུ་ལྟ་བུར་འདོད་པའི་རེ་སྐོང་སྡེའི། །སྐུ་ཚེའི་འཕྲང་གེགས་ཡིད་སྲུབ་དཔུང་གི་མུན། །འཁོར་འདས་ཕྱག་རྒྱ་ཟིལ་གནོན་ཉིན་བྱེད་ཀྱིས། །མཐར་བསྐྲད་ཕན་བདེའི་སྣང་བ་འབར་བར་ཤོག །དངོས་རྒྱུད་བླ་མའི་ངོ་བོ་པདྨ་འབྱུང༌། །ཡི་དམ་བདེ་གཤེགས་ཀུན་འདུས་བཀའ་བརྒྱད་ལྷ། །བསྟན་སྲུང་ཡོངས་རྫོགས་དཔལ་ལྡན་མགོན་པོ་ཡིས། །བཞེད་པའི་དོན་རྣམས་མ་ལུས་སྒྲུབ་པར་མཛོད། །ཆོས་ཉིད་ཀ་ནས་དག་པའི་ཤེལ་ངོས་སུ། །ཆོས་ཅན་རྒྱུ་འབྲས་རྣམ་བཀྲ་ཚོན་གྱི་རིས། །རྗེན་པར་འཆར་བ་བསླུ་མེད་རྟེན་འབྱུང་མཐུས། །བསམས་པའི་རེ་བ་ཡིད་བཞིན་འགྲུབ་པར་ཤོག །ཅེས་རིགས་འཛིན་སྤྲུལ་པའི་སྐུ་མཆོག་བརྟན་པར་བཞུགས་པའི་བདེན་བརྗོད་ཨེ་ཝཾ་ལྕོག་སྒར་བའི་ཚོགས་འདོན་དུ་འཛུགས་རྩིས་ཀྱི། །རྣམ་གླིང་པཎ་ཆེན་དཀོན་མཆོག་ཆོས་གྲགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བགྲང་ཡས་རྒྱུད་སྡེར་མཁྱེན་རབ་དཀྱིལ་འཁོར་རྒྱས། །འགྲོ་ལ་བྱམས་པའི་རི་དྭགས་སྣང་བརྙན་མཛེས། །གསུང་ངག་དབང་ཆུའི་བསིལ་(༡༧༩བ) ― GLG021_Page_0360 ―
[མ་དཔེ་གཟིགས་ན་འདིར་གནོན།]
ཟེར་ཡོངས་འཕྲོ་བར། །ལྷུན་གྲུབ་བསྟན་པའི་ཟླ་བ་ཞབས་བརྟན་ཤོག །དཔལ་ལྡན་ཤཱཀྱའི་རིང་ལུགས་རྒྱལ་མཚན་ཆེ། །ལེགས་བསྒྲེང་འདམ་བུ་སྦྱིན་གྱི་འདུས་པའི་སྡེར། །ཟབ་རྒྱས་ཆོས་ཀྱི་འཁོར་ལོ་རབ་བསྐོར་ནས། །གདུལ་བྱའི་རེ་བ་མ་ལུས་སྐོང་བར་ཤོག །ནམ་མཁའི་མཐའ་ཀླས་སྐྱེ་རྒུའི་བསོད་ནམ་ཞིང༌། །མི་ནུབ་དབང་གི་ཆུ་བོ་འདྲེན་མཁས་པ། །ཚར་ཆེན་ཆོས་ཀྱི་རྒྱལ་པོའི་བསྟན་པའི་སྲོག །འཛིན་ཕྱིར་བསྐལ་བརྒྱར་རྡོ་རྗེ་ལྟར་བརྟན་ཤོག །གྲུབ་མཆོག་ཐང་སྟོང་རྒྱལ་པོའི་ཐུགས་རྗེའི་གཟིས། །ངག་དབང་ཉི་ཟླ་བཟང་པོའི་བསྟན་འཛིན་པར། །རྡོ་རྗེའི་ཁྲི་ལ་མི་འགྱུར་རྟག་བཞུགས་ཏེ། །ཕུན་ཚོགས་འཕྲིན་ལས་ཡུན་རིང་རྒྱས་པར་ཤོག །གསུང་ངག་སློབ་བཤད་ཉིན་བྱེད་དཀྱིལ་འཁོར་གྱིས། །གངས་ཅན་རྨོངས་པའི་སྨག་རུམ་ཉེར་སངས་ནས། །སྙན་བརྒྱུད་བཤད་སྒྲུབ་སྣང་བ་འོད་པོ་ཆེས། །ཐུབ་བསྟན་མ་ནུབ་དེ་སྲིད་དར་གྱུར་ཅིག །ཁྱབ་བདག་ཞ་ལུ་བ་ཆེན་པོས་བླ་མ་རྣམ་གསུམ་ལ་གསུང་ངག་གནང་བའི་ཚེ། འདི་ལྟ་བུ་ཞིག་དགོས་ཞེས་བཀའ་སྩལ་པ་བཞིན་ཟ་ཧོར་གྱི་བནྡེས་འཕྲལ་དུ་བཀོད་པའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །གཉིས་མེད་གསུང་བ་མ་ལུས་པའི། །ཡབ་གཅིག་མཁྱེན་པའི་གཏེར་ཆེན་པོ། །གཞོན་ནུ་ཟུར་ཕུད་ལྔ་ལྡན་པས། །དྲི་མེད་སྤྱན་གྱིས་དགྱེས་པར་གཟིགས། །བྱང་ཆུབ་མངོན་དུ་གྱུར་མིན་པར། །ཁྱོད་ཀྱིས་དགེ་བའི་བཤེས་མཛད་ནས། །བླང་དང་དོར་བྱའི་གནས་ཀུན་ལ། །མི་ཟད་བློ་གྲོས་སྤོབས་པ་སྩོལ། །འདིས་མཚོན་བསོད་ནམས་གང་(༡༨༠ན) ― GLG021_Page_0361 ―
[མ་དཔེ་གཟིགས་ན་འདིར་གནོན།]
བྱས་པ། །དྲིན་གྱིས་བསྐྱངས་པའི་མ་རྒན་རྣམས། །སྟོབས་བཅུ་མངའ་བའི་གོ་འཕང་མཆོག །རིང་མིན་ཐོབ་པའི་རྒྱུ་རུ་བསྔོ། །ཞེས་པ་འདིའང་རྒྱལ་སྐོར་བ་བསོད་ནམས་དབང་པོའི་ངོར་ཟ་ཧོར་གྱི་བནྡེས་བཀོད། །ངག་དབང་འཇམ་དབྱངས་དགྱེས་པའི་བློ། །སྐལ་བཟང་གདུལ་བྱ་རྒྱ་མཚོའི་གཉེན། །འདྲ་འབག་ངག་དབང་ནམ་མཁའ་ཡིས། །བཞེངས་འབྲས་བྱངས་ཆེན་རྒྱུ་རུ་བསྔོ། །འཕྱོང་རྒྱས་པ་ངག་དབང་ནམ་མཁས་འདྲ་འབག་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད། །རྒྱ་སྟོན་ངག་གི་དབང་པོའི་རིང་ལུགས་ཀྱི། །ཀུནྡཱའི་དགའ་བསྐྱེད་བསིལ་ཟེར་མཛའ་ན་མོ། །བཞིན་མཛེས་ཀཏྤུ་ར་རྡུལ་འཛག་པའི་བདེ། །ནམ་ཡང་མི་གཏོང་ལྷུན་གྱིས་གྲུབ་པར་ཤོག །ཐུབ་ཆེན་བསྟན་པ་སི་ཏའི་ཆོམ་རྐུན་མགྲིན། །དགེ་ཚོགས་ལེགས་ལམ་འཕོངས་ཀྱིས་ཉེར་བཅད་པས། །འཁྲུལ་པའི་སྨིག་རྒྱུར་མ་འབྱམས་རཱ་མ་ཎའི། །ཡང་སྲིད་དཔལ་ལྡན་སྐལ་བཟང་རྙེད་པར་ཤོག །ལྷ་གཟིགས་བཀའ་བརྒྱུད་རྣམ་པར་རྒྱལ་བ་ཡི། །ཐུགས་རྗེ་ཨུརྦྷའི་བང་སྟེང་བསྲུབས་པའི་འབྲས། །ཐབས་ཤེས་གངྒཱས་བསྐྱེད་བསྲིངས་གདོང་དྲུག་སྡེ། །སྐྱོང་ཕྱིར་གཙུག་ན་ཟླ་བ་སླར་ཚེས་ཤོག །ཕག་གྲུའི་གཞུང་ལུགས་ཉ་ཕྱིས་ཡངས་པའི་ཁོག །འབྲུག་བསྟན་ཕྱུར་པོར་སྤུངས་པའི་མུ་ཐི་ལ། །ཕྱག་རྒྱའི་དཀྱུས་རིང་རི་དྭགས་མིག་ཅན་མའི། །སྤེལ་ལེགས་རྒྱན་གྱི་བྱེད་པོར་མྱུར་འབྱོན་ཤོག །བརྒྱུད་པ་ཀུན་འདུས་དཔག་བསམ་ཡོངས་འདུའི་(༡༨༠བ) ― GLG021_Page_0362 ―
[མ་དཔེ་གཟིགས་ན་འདིར་གནོན།]
དབང༌། །དཀོན་ཆོག་གསུམ་དངོས་འཁོར་ལོ་སྡོམ་པ་ཆེ། །མ་མགོན་བྱ་རོག་གདོང་ཅན་མཐུ་སྟོབས་ཀྱིས། །འདོད་པའི་རེ་བ་སྐོང་བའི་འཕྲིན་ལས་མཛོད། །ཅེས་སྤྲུལ་སྐུ་ངག་དབང་ཀུན་དགའ་ལྷུན་གྲུབ་ཐུབ་བསྟན་དགེ་ལེགས་དཔལ་བཟང་པོའི་ཡང་སྲིད་མྱུར་འབྱོན་གྱི་སྨོན་ལམ་ཞིག་དགོས་ཞེས་གྲ་རིགས་རྣམས་སྤྱི་ཚོགས་ནས་སྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡེ་གེ་པ་ནི་འཕྱོང་རྒྱས་བསམ་མཐོང་པ་ཕུན་ཚོགས་དབང་པོའོ། །བློ་གྲོས་འཇམ་དབྱངས་མཁྱེན་པའི་བདག་ཉིད་ལ། །བཟང་པོའི་ལྷག་བསམ་ཕྱག་ན་པདྨ་དངོས། །མཐུ་སྟོབས་གསང་བདག་གྲགས་པས་ཡོངས་ཁྱབ་སྐུ། །བཞེངས་པས་སྐྱེ་བ་ཀུན་ཏུ་རྗེས་འཛིན་ཤོག །ངག་དབང་ཕྲིན་ལས་ཀྱིས་རྒྱལ་བ་བཙོང་ཁ་པ་ཆེན་པོའི་སྐུ་བརྙན་བཞེངས་པའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བྲིས། །སྙིགས་དུས་ཐུགས་རྗེའི་མཐུ་དཔུང་འབར་བའི་མེས། །ལུས་ཅན་སྡུག་བསྔལ་སྡོང་དུམ་བསྲེག་མཛད་པའི། །བདེ་བཤེགས་བརྒྱད་ཀྱི་སྣང་བརྙན་ཚར་དངར་བ། །ཐེག་གསུམ་སྐྱེ་འཕགས་སྐུ་པར་སྣ་ཚོགས་བསྐྲུན། །རྒྱལ་བའི་བཀའ་དང་དེ་འགྲེལ་གསུང་རབ་སོགས། །རང་གིས་ཉན་དང་གཞན་ལ་ལེགས་བཤད་མཐུས། །ཐུབ་བསྟན་སྤྱི་དང་མཉམ་མེད་ཙོང་ཁ་པའི། །ལུགས་བཟང་སྲིད་མཐའི་བར་དུ་དར་བར་ཤོག །བསྟན་འཛིན་ཚོགས་འཕེལ་མི་འགྱུར་རབ་ཏུ་བརྟན། །ཡིད་ཅན་ཐམས་ཅད་བདེ་སྐྱིད་དཔལ་ལ་སྤྱོད། །འབྲས་བུ་མ་རྒན་དོན་ཆེད་བྱང་ཆུབ་མཆོག །རིང་མིན་མངོན་དུ་འགྱུར་བའི་(༡༨༡ན) ― GLG021_Page_0363 ―
[མ་དཔེ་གཟིགས་ན་འདིར་གནོན།]
རྒྱུ་རུ་བསྔོ། །སྐྱིད་ཤོད་ཉང་བྲན་ཕ་བོང་ཁའི་གདན་ས་པ་བཤེས་གཉེན་ཆེན་པོ་འཇམ་དབྱངས་གྲགས་པས་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་པའི་ཡེ་གེ་པ་ནི་དགེ་སློང་འཇམ་གྲགས་པའོ། །བདུད་རྩི་འཁྱིལ་སྣོད་སྦྲོན་སྐྱོགས་ཟུང༌། །དངུལ་སྲང་ཉེར་གཉིས་ལས་གྲུབ་པ། །ངག་དབང་ཆོས་འཛིན་གྱིས་ཕུལ་དགེས། །འདི་ཕྱིའི་དོན་ཀུན་གྲུབ་པར་ཤོག །ཅེས་པའང་གྲྭ་ཚང་གི་སྐུ་དྲིན་བསབ་ཆེད་ལ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །མཆོག་གསུམ་མཐུ་དང་རྟེན་ཅིང་འབྲེལ་འབྱུང་གི །ཚུལ་ཁྲིམས་བསྲུངས་སོགས་ལེགས་བྱས་རྒྱ་མཚོ་ཡིས། །སྐྱེ་བར་རྣམ་འབྱེད་ཤེས་རབ་ལ་བརྟེན་ནས། །ཐུབ་པའི་བསྟན་པར་ཐོས་བསམ་བགྱི་བར་ཤོག །ངག་དབང་བློ་གསལ་བསྐལ་བཟང་རྒྱ་མཚོའི་མགོན། །གཡུང་དྲུང་ལྟ་བུར་མི་འགྱུར་རྟག་བརྟན་ཞིང༌། །ཚེ་རབས་ཀུན་ཏུ་ཁྱེད་ཀྱིས་རྗེས་བཟུང་ནས། །མྱུར་དུ་མཁའ་མཉམ་འགྲོ་བ་འདྲེན་པར་ཤོག །ཅེས་པ་འདི་ལྟ་བུ་ཞིག་དགོས་ཞེས་ཚུལ་ཁྲིམས་རྒྱ་མཚོ་དང་ཤེས་རབ་བསྟན་པ་གཉིས་ཀྱིས་བསྐུལ་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྔགས་རམས་པ་ངག་དབང་དགེ་ལེགས་སོ། །ལྷག་བསམ་ཟླ་བའི་དཀྱིལ་འཁོར་ཉ་གང་ལ། །རིན་ཆེན་ལས་གྲུབ་སྣང་བརྙན་རི་དྭགས་གཟུགས། །རབ་གསལ་བསོད་ནམས་འབྲས་བུ་ཡོངས་སྨིན་ལས། །མགོན་ཁྱོད་རྡོ་རྗེ་ལྟ་བུར་བརྟན་པར་ཤོག །རྒྱུ་སྦྱོར་དེང་ནས་བྱང་ཆུབ་སྙིང་པོའི་ས། །མངོན་དུ་གྱུར་མིན་དེ་སྲིད་འཁོར་(༡༨༡བ) ― GLG021_Page_0364 ―
[མ་དཔེ་གཟིགས་ན་འདིར་གནོན།]
འདས་ཀྱི། །ལེགས་ཚོགས་ཡོན་ཏན་མ་ལུས་བླ་ནས་བླར། །མཐོན་པོར་སྤྱོད་པའི་དགའ་སྟོན་འཕེལ་བར་ཤོག །སྐྱེ་བར་དལ་བརྒྱད་འབྱོར་བཅུའི་རྟེན་བཟང་ཐོབ། །དམ་པའི་མགོན་གྱིས་རྟག་ཏུ་རྗེས་བཟུང་ནས། །ཟབ་རྒྱས་ཆོས་ཀྱི་བདུད་རྩིར་ལོངས་སྤྱོད་ཅིང༌། །མ་རྒན་འགྲོ་རྣམས་བྱང་ཆུབ་ཐོབ་ཕྱིར་བསྔོ། །ཞེས་གསོལ་དཔོན་གེ་རེ་བ་བློ་བཟང་མཁྱེན་བརྩེས་འདྲ་འབག་བཞེངས་པའི་ཚེ་འདི་བཞིན་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྔགས་རམས་པ་ངག་དབང་དགེ་ལེགས་སོ། །ཆེ་མཆོག་ལ་སོགས་ཞི་ཁྲོ་རབ་འབྱམས་ཀུན། །འདུས་པའི་དཀྱིལ་འཁོར་མགོན་པོ་རྡོ་རྗེ་འཛིན། །ཐོགས་མེད་རིག་སྔགས་ལྷུན་གྱིས་གྲུབ་པའི་མཐུས། །འཁོར་འདས་ཟིལ་གནོན་བཞད་པ་རྩལ་ལ་འདུད། །འཁོར་ལོས་ལེགས་མཚན་འཇིགས་པ་མེད་པའི་ཁྲིར། །འགྱུར་མེད་བརྟན་པར་བཞུགས་ནས་བདུད་སྡེའི་དཔུང༌། །མི་བཟད་ཕ་མཐར་བྱས་ནས་ར་གུར་དུ། །ཉེར་ཆུད་སྒོ་གསུམ་གཡོ་བ་མེད་བྱིན་རློབས། །དེང་ནས་ངེས་པར་ལེགས་པའི་ལམ་ཟབ་མོ། །མངོན་དུ་གྱུར་མིན་དེ་སྲིད་མགོན་ཁྱེད་ཀྱིས། །རྗེས་བཟུང་སྲིད་དང་ཞི་བའི་ལེགས་ཚོགས་ཀུན། །འབད་པ་མེད་པར་ལྷུན་གྱིས་གྲུབ་པར་ཤོག །ཅེས་བློ་བཟང་དོན་ཡོད་ཀྱི་ཁ་ཏོན་དུ་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །དངུལ་དཀར་བཅོ་བརྒྱད་སྲང་ལས་ཉེར་གྲུབ་པའི། །ཕུད་ཕོར་ཟུང་ལྡན་དམ་རྫས་གཏོར་མའི་སྣོད། །དགའ་གདོང་སྔགས་རམས་དོན་གྲུབ་རྒྱ་མཚོ་ཡིས། །ཕུལ་བས་འདི་ཕྱིའི་དོན་ཀུན་འགྲུབ་པར་ཤོག །ཅེས་པའང་ཟ་ཧོར་གྱི་བནྡེས་སྦྱར། ། རྗེ་བཙུན་བཅོམ་ལྡན་འདས་མ་ཚེ་སྦྱིན་ཡིད་བཞིན་འཁོར་ལོ་མཆོག་དང་རྗེས་སུ་འབྲེལ་བར་བརྟན་བཞུགས་བྱ་ཚུལ་འདོད་པའི་རེ་སྐོང་སོགས།― GLG021_Page_0365 ―
[མ་དཔེ་གཟིགས་ན་འདིར་གནོན།]
རྗེ་བཙུན་བཅོམ་ལྡན་འདས་མ་ཚེ་སྦྱིན་ཡིད་བཞིན་འཁོར་ལོ་མཆོག་དང་རྗེས་སུ་འབྲེལ་བར་བརྟན་བཞུགས་བྱ་ཚུལ་འདོད་པའི་རེ་སྐོང་སོགས། །ན་མོ་གུ་རུ་ཤྣ ཡུ རྡ་ཙཱིནྟ ཙཀྲཱ བྷྱཾ། མཚན་ཙམ་དྲན་པའི་མོད་ལ་འཆི་བདག་མུན། །མཐར་བྱས་སྲོག་གི་ཟུངས་ཀྱུར་ཟིལ་དངར་གྱིས། །ཡིད་དབང་སིམ་པའི་ཆོ་ག་རྟག་སྟེར་མཁན། །འཕགས་མ་དགྱེས་པའི་སྤྱན་གྱིས་དུས་ཀུན་གཟིགས། །ཚེ་སྦྱིན་ཟབ་དོན་གངས་ལྡན་རི་བོ་ལས། །དམ་པའི་བཞེས་སྲོལ་བཀའ་བབས་ཆུ་ཀླུང་རྣམས། །མཁྱེན་དཔྱོད་ཟླ་བའི་མ་མར་ལེགས་འཁྱིལ་བའི། །བློ་གསལ་རྒྱ་མཚོ་སྙན་བརྒྱུད་བྱེ་བའི་མཛོད། །ཞལ་ལུང་རྗེས་གནང་ཉམས་ཁྲིད་མན་ངག་སོགས། །ཉེར་སྩོལ་རྡོ་རྗེ་འཆང་དངོས་གནས་གསར་བ། །ཟུར་རིགས་ཀུན་མཁྱེན་ཁྱབ་བདག་ཞ་ལུ་པ། །རྣམ་གསུམ་བླ་མའི་མཛད་པས་ཡིད་རབ་འཕྲོག །བགྲང་ཡས་བདེ་གཤེགས་མ་ལུས་བསྐྱེད་པའི་ཡུམ། །འཆི་མེད་ཚེ་ཡི་མཆོག་སྦྱིན་སྩོལ་བའི་མར། །གསོལ་བཏབ་མཚོན་གྱིས་ལྷ་ཆེན་ཉི་བུའི་ཞགས། །བཅད་དེ་མི་འགྱུར་བརྟན་བདེར་ངེས་པ་བརྙེད། །དེ་ཕྱིར་ཚད་མའི་ཕྱག་བཞེས་མང་མཐོང་དང༌། །ལུང་རིགས་གཏན་ཚིག་ཚོགས་ཀྱིས་བསྒྲུབ་ནུས་པས། །རྡོ་རྗེ་སློབ་དཔོན་འོག་མིན་ཞིང་གཙོ་ལྟར། །བཞུག་ཐབས་འདོད་པའི་རེ་སྐོང་འདི་ན་སྤེལ། །དེའང་བརྟན་བཞུགས་ཀྱི་ཆོ་ག་ཞེས་བྱ་བ་གསང་སྔགས་སྔ་འགྱུར་གྱི་ཕྱོགས་སུ་མཁའ་འགྲོའི་བརྟན་བཞུགས་སོགས་བརྡ་ཆད་གསལ་བར་བྱུང་ཞིང༌། ཕྱི་འགྱུར་དང་མདོ་ཕྱོགས་སུ་དེ་རིགས་ཀྱི་གསལ་ཁ་ཆེར་མ་བྱུང་ནའང་ཡན་ལག་བདུན་པ་རྣམས་ཀྱི་དྲུག་པ་མྱ་ངན་ལས་མི་(༡༨༢བ) ― GLG021_Page_0366 ―
[མ་དཔེ་གཟིགས་ན་འདིར་གནོན།]
འདའ་བར་གསོལ་བ་གདབ་པ་དོན་གྱི་བརྟན་བཞུགས་ཡིན་ལ། འཆི་མེད་རྔ་སྒྲ་སོགས་སུ་འཆི་བླུའི་ཆོ་ག་བཤད་པ་བརྟན་བཞུགས་ཀྱི་དགོས་དོན་འཆི་བདག་གི་གཡུལ་ལས་རྒྱལ་བའི་ཐབས་སུ་དགོངས་པ་གཅིག་ཅིང་རྒྱུ་མཚན་དེ་དག་ལ་བརྟེན་ནས་མཁས་གྲུབ་དུ་མས་ཆོ་ག་ལ་བརྟེན་པ་དང་མ་རྟེན་ཡང་རྟེན་ཅིང་འབྲེལ་བའི་སྒོ་བསྒྲིག་ཐབས་མང་དུ་གསུངས་པའི་ནང་ནས་ཡུལ་དེ་སྐྱེ་འཆི་ལ་དབང་དུ་གྱུར་པ་ཡིན་ན་ཞུ་བ་པོའི་རེ་བ་སྐོང་བའི་སླད་དུ་སྐུ་ཚེ་བྱིན་གྱིས་བརླབ་ལ། གཞན་དག་ལའང་དཀོན་མཆོག་གི་ཐུགས་རྗེ་བསྐུལ་བའི་བྱིན་རླབས་དང་ལྷ་སྔགས་ཡེ་ཤེས་ཀྱི་མཐུ་དང་བདེན་ཚིག་སོགས་ཀྱི་ནུས་པས་བར་ཆད་ལས་རྒྱལ་བས་མཆོག་དམན་བར་པ་གང་ལའང་བྱ་རུང་བར་མངོན་ཞིང་རཀྴ་གཏེར་སྟོན། ཆོས་དབང་རིན་པོ་ཆེ། རཏྣགླིང་པ། དྲི་མེད་ཀུན་དགའ་སོགས་ཀྱི་གཏེར་ཁས་མཚོན་པ་རྣམ་གྲངས་ཇི་སྙེད་པར་མཁའ་འགྲོ་བསུ་བཟློག་གི་ཆོ་ག་དཀྱིལ་འཁོར། མདོས་གཏོར་མར་བརྟེན་པའི་རྒྱས་འབྲིང་བསྡུས་གསུམ་ཤིན་ཏུ་མང་བར་གཞོགས་དྲུང་པ་རྒོད་ཚང་པའི་གསང་ཡུམ་མཁའ་འགྲོ་མ་འགྲོ་བ་བཟང་མོ་ནས་བརྒྱུད་པར་གྲགས་པའི་མཁའ་འགྲོའི་དར་ལམ་གཅོད་པའི་ཡི་གེ་དགས་རྒྱུད་ཤས་ཆེ་བའི་གྲུབ་མཐའ་མང་པོར་དར་བ་མི་འཕྱིང་པ་དང་ཁྱི་མཇུག་མའི་དཔེ་ལྟར་མཚན་ཉིད་དང་མི་ལྡན་པའི་རིགས་དགོས་པ་ཆུང་ཞིང་ཁྱད་པར་སྔགས་གསར་མའི་ཆེ་བ་ལ་སྦྱར་ན་ཉ་དང་ཉུང་མ་བསྲེས་པ་ལྟ་བུའི་དཔྱོད་ལྡན་མགུ་བའི་ཡུལ་དུ་མི་འགྱུར་བར་མཐོང་ལ། དེའང་རྗེ་བཙུན་ཚེ་སྦྱིན་སྒྲོལ་དཀར་ཡིད་བཞིན་འཁོར་ལོ་སྐུ་ཚེ་བསྲིང་(༡༨༣ན) ― GLG021_Page_0367 ―
[མ་དཔེ་གཟིགས་ན་འདིར་གནོན།]
བར་བྱིན་རླབས་ཆེ་བ་ལོ་རྒྱུས་རྣམས་སུ་གྲགས་པ་དོན་ལའང་གནས་ཤིང་དཀྱིལ་འཁོར་གྱི་ཆོ་གར་མ་བརྟེན་པས་འཇུག་བདེ་དོན་ཚང་གི་དབང་དུ་བགྱིས། དེའི་སྒོ་ནས་རྡོ་རྗེ་སློབ་དཔོན་བསྐལ་བརྒྱར་བཞུགས་པའི་རྟེན་འབྲེལ་བསྒྲིག་པར་རྗེ་བཙུན་མ་འདི་ཉིད་ལ་ཐུན་མོང་མ་ཡིན་པ་དང་ཐུན་མོང་བ་བཀའ་བབས་བདུན་ལྡན་གྱི་རྗེས་གནང༌། ཉམས་འཁྲིད། ལས་ཁ་ཚར་གྱི་ཡི་གེ་པཎྜིཏ་ངག་དབང་གྲགས་པའི་འཆི་བླུའི་ཡི་གེ་རྣམས་སུ་མི་གསལ་ཡང་ཛེ་ཏཱ་རིའི་ཚེ་དཔག་མེད་དུ་གསུངས་པ་སྤྱིར་གསང་སྔགས་ནང་གཤིན་པས་རྒྱུ་མཚན་དང་འབྲེལ་བའི་རུང་མཐུན་སྦྱར་སྲོལ་ཡང་སྣང་ཞིང་ཁྱད་པར་བྱ་རྒྱུད་པདྨའི་རིགས་ཀྱི་གཙོ་བོ་དང་སྒྲོལ་དཀར་རིགས་ཀྱི་ཡུམ་དུ་གཏོགས་པ་འབྲེལ་ཆགས་པར་མངོན་པས་འདི་ཉིད་ཀྱི་རྗེས་སུ་གནང་བ་ལེགས་པར་ཐོབ་པའི་རྣལ་འབྱོར་པས་འཆི་བ་བླུ་བའི་ཕྱག་ལེན་ཁ་བསྒྱུར་བར་གཤིན་རྗེའི་གཟུགས་དང་བྲེ་སྲང་སོགས་ཡོ་བྱད་རྣམས་སྟ་གོན་གྲུབ་ནས་མདུན་བསྐྱེད་ཀྱི་ཚོམ་བུ། བུམ་པ། མཆོད་གཏོར་སོགས་ཉེ་བར་མཁོ་བའི་རྫས་དང་ཡོ་བྱད་རྣམས་བསྒྲིག་གཤོམ་དང་བུམ་པ་སྒྲུབ་ཚུལ་སོགས་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་ཟིན་ཐོ་དང་དེའི་མཐར་རམ་སྟེགས་གཞན་མ་གང་ཡང་རུང་བར་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྟེན་རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་སོགས་བཤམས་ལ་གནས་ཡོ་བྱིན་གྱིས་རླབ། བདག་མདུན་བུམ་གསུམ་བསྐྱེད་ཆོག་རྡོ་རྗེ་འཆང་ཚར་པ་ཆོས་རྗེས་མཛད་པའི་ཚེ་འཁྲིད་ཟླ་བའི་ཆུ་རྒྱུན་གྱི་ཉམས་ལེན་བསྡུས་པའི་སྟེང་ནས་རྗེས་(༡༨༣བ) ― GLG021_Page_0368 ―
[མ་དཔེ་གཟིགས་ན་འདིར་གནོན།]
གནང་གི་སྐབས་བཞིན་ཉམས་སུ་བསྟར། ལོང་སྐབས་དང་བསྟུན་པའི་བཟླས་པ་དང་ཚོམ་བུ་རྗེ་བཙུན་མར་གསལ་བ་ལ་བླ་མ་དམ་པ་སོགས་འབུལ་ཡུལ་གང་ཡིན་པ་དེའི་སྐུ་ཚེའི་བར་ཆད་ཞི་ཞིང་བསྐལ་བརྒྱར་འཚོ་ཞིང་གཞེས་པར་བྱིན་གྱིས་བརླབས་པའི་འདོད་དོན་གྱི་གསོལ་བ་ནན་ཏན་དུ་གདབ་ཅིང་དཔང་པོ་ཞུ། །ཆོས་སྐྱོང་ལ་གཏོར་སྔོའི་དུས་ཀྱང་འཕྲིན་ལས་འཆོལ། །དེ་ནས་འཆི་བླུའི་ཆོ་ག་མཁན་རྡོ་རྗེ་འཆང་རིན་ཆེན་བསོད་ནམས་མཆོག་གྲུབ་ཀྱིས་མཛད་པའི་ཚེ་དཔག་མེད་འཆི་མེད་རྔ་སྒྲ་འཆི་བླུ་མཐོང་བས་དོན་གྲུབ་སོར་བཞག་ལ་ལྷ་སྔགས་སོགས་སྐབས་ཐོབ་ཀྱི་འབྱིན་འཇུག་དང་འདོན་པ་བསྒྱུར་བ་རིག་པས་འཕུལ་ཤེས་པར་བྱ། །བརྟན་བཞུགས་དངོས་ལ། དར་རས་སོགས་ལ་བྲིས་པའི་སྣ་ཚོགས་རྡོ་རྗེའི་རི་མོ་ཅན་འབུལ་ཡུལ་གྱི་སྟན་དུ་བཏིང༌། འབུལ་ཡུལ་སྭ་བྷ་ཝས་སྦྱངས། སྟོང་པའི་ངང་ལས་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་གཞོམ་གཞིག་དང་བྲལ་བ་སྣ་ཚོགས་རྡོ་རྗེས་མཚན་པའི་དབུས་སུ་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དུས་གསུམ་སངས་རྒྱས་ཀུན་གྱི་ངོ་བོ་དཔལ་ལྡན་བླ་མ་དམ་པའི་ཐུགས་རྣམ་པར་མི་རྟོགས་པའི་ཡེ་ཤེས་བདེ་སྟོང་ཟུང་དུ་འཇུག་གང་ཟག་དཀྱུས་མའི་རིགས་ལ་ཆེ་གེ་མོའི་རྣམ་པར་ཤེས་པ་ཞེས་བསྒྱུར། པའི་ངོ་བོ་ཏཱཾ་ཡིག་དཀར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་བ་ལས་རྡོ་གང་ཟག་གཞན་ལ་ཚིག་ཟུར་བསྒྱུར། རྗེ་སློབ་དཔོན་རྗེ་བཙུན་ཡིད་བཞིན་འཁོར་ལོ་སྐུ་མདོག །(༡༨༤ན) ― GLG021_Page_0369 ―
[མ་དཔེ་གཟིགས་ན་འདིར་གནོན།]
ཅེས་པ་ནས་རྒྱས་གདབ་ཀྱི་བར་མདུན་བསྐྱེད་བཞིན་སྙིང་ག་སོགས་ཀྱིས་མཚོན་པའི་འབུལ་ཡུལ་ལ་ཁ་བསྒྱུར། སྦྱར། མཆོད་པ་རྣམས་བྱིན་གྱིས་བརླབ། མཎྜལ་ཚོམ་བུ་སོ་བདུན་མ། ལྷ་རྫས་ལས་གྲུབ་ཡན་ལག་བརྒྱད་ལྡན་ཆུ། །འཐུངས་པས་གདུང་སེལ་མཆོད་ཡོན་ཡིད་འོང་འདི། །ནམ་མཁའ་རབ་འབྱམས་ཁམས་ཀྱིས་མཐའ་གཏུགས་པ། །བཀང་སྟེ་བཅོམ་ལྡན་འཁོར་དང་བཅས་ལ་འབུལ། །ཨོཾ་གུ་རུ་ཨཱརྱ་ཏཱ་ར་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཧཱུཾ། ཞེས་སོགས་ཆུ་བཞི། ཉེར་སྤྱོད་རོལ་མོ། གོས་ཟུངས། རྒྱལ་སྲིད་སྣ་བདུན། ཉེ་བའི་རིན་ཆེན་སྣ་བདུན། བཀྲ་ཤིས་རྟགས་བརྒྱད། འདོད་ཡོན་ལྔ། ཇ་བྲེ། གདུགས། རྒྱལ་མཚན། བ་དན། སིལ་སྙན། མཆོད་པ་ཉི་ཤུ་ལྔ་དང་བཅས་པ་གསང་འདུས་འཇམ་རྡོར་གྱི་སྒྲུབ་ཐབས་ཤར་ཆེན་ཡེ་ཤེས་རྒྱལ་མཚན་གྱི་དངོས་སློབ་ཟར་བྱང་ཕུག་པ་ཀུན་དགའ་ལེགས་པས་མཛད་པ་ལྟར་བྱ་ཞིང་མཆོད་ཕྲེང་གི་རིགས་གཞན་ནས་ཇངས་ཀྱང་མི་འགལ། བསྟོད་པ་ནི། འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་འཆི་རྣམས་ལས་སྒྲོལ། །སྒྲོལ་མ་ལ་ནི་ཕྱག་འཚལ་ལོ། །པདྨ་དཀར་པོའི་དབུས་གནས་པའི། །ཟླ་རྒྱས་གཟུགས་ཀྱི་གདན་སྟེང་ན། །རྡོ་རྗེ་སྐྱིལ་ཀྲུང་བཅས་མཛད་ཅིང༌། །མཆོག་སྦྱིན་མ་ལ་ཕྱག་འཚལ་ལ། །སྟོན་ཀའི་ཟླ་བའི་མདངས་འདྲ་ཞིང༌། །ཟླ་བ་ལ་ནི་རྒྱབ་བརྟེན་མ། །རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ་ཕྱག་(༡༨༤བ) ― GLG021_Page_0370 ―
[མ་དཔེ་གཟིགས་ན་འདིར་གནོན།]
འཚལ་ལོ། །བཅུ་དྲུག་ལོ་ལོན་སྐུ་ཉམས་ལྡན། །རྫོགས་སངས་རྒྱས་ཀུན་དེ་ཡི་སྲས། །འདོད་སྦྱིན་དཔལ་ནི་འཆང་བའི་ཡུམ། །འཕགས་མ་སྒྲོལ་མ་ལ་ཕྱག་འཚལ། །འཁོར་ལོ་དཀར་པོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་བསྐོར་བའི་རྣམ་པ་ཅན། །འཁོར་ལོ་ཅན་ལ་ཕྱག་འཚལ་ལོ། །ཞེས་པཎྜི་ཏ་ངག་དབང་གྲགས་པས་མཛད་པའི་བསྟོད་པ་འདི་དང་གཞན་ཡང་རྒྱ་བོད་ཀྱི་མཁས་གྲུབ་ཀྱིས་མཛད་པའི་རིགས་ཀྱང་སྤྲོ་ན་བྱ། །སྔ་མ་རྗེ་བཙུན་མར་གསལ་བའི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པ་ཞེས་པ་ནས། །དེའི་ཕྱི་རོལ་ཏུ་འོད་ཟེར་སྣ་ལྔའི་ཕྲེང་བ་གཡས་སྐོར་དུ་འབར་བར་བསམ་པའི་བར་མངོན་རྟོགས་ལྟར་ལ། དེ་ནས་མདུན་གྱི་ནམ་མཁར་རྩ་བརྒྱུད་ཀྱི་སྔ་མ་རྣམས་མངོན་སུམ་དུ་བཞུགས་པར་མོས་ཏེ་ཐུགས་དམ་གྱི་བརྒྱུད་བསྐུལ་བ་ནི། བཅོམ་ལྡན་ཐུབ་པའི་དབང་པོ་ཡང༌། གནས་འདིར་སྤྱན་འདྲེན་གཤེགས་སུ་གསོལ། །གནས་མཆོག་འདི་རུ་བྱོན་ནས་ཀྱང༌། །དཔལ་ལྡན་ཇ་མ་དམ་པ་ཡི། །སྐུ་ཚེ་བསྐལ་བརྒྱའི་བར་དུ་སྲིངས། །འཆི་བ་མེད་པ་ཚེ་ཡི་དངོས་གྲུབ་སྩོལ་མཛོད། །ཨོཾ་ཏཱ་རེ་ཏུ་ཏྟཱ་རེ་ཏུ་རེ་སངྒུ་རང་དོན་མ་མའི་ཚབ་ཏུ་འབྲུ་གསུམ་བཅུགས་པ་ཡིན། རོ་རཱ་ཡུར་པུ་ཎྱ་ཛྙཱ་ན་པུཥྟིཾ་ཀུ་རུ་སྭཱ་ཧཱ། རྗེ་བཙུན་ཡིད་བཞིན་འཁོར་ལོ་དང༌། །མཁས་པ་ངག་དབང་གྲགས་པ་དང༌། །པཎ་གྲུབ་རྡོ་རྗེ་གདན་པ་ཡང༌། །གནས་འདིར་སྤྱན་འདྲེན་གཤེགས་སུ་གསོལ། །འགྲེལ་ཆེན་རིན་ཆེན་གྲགས་པ་དང༌། །གྲུབ་པའི་དབང་ཕྱུག་སླེ་ནག་པ།(༡༨༥ན) ― GLG021_Page_0371 ―
[མ་དཔེ་གཟིགས་ན་འདིར་གནོན།]
།བཤེས་གཉེན་སྒྲེ་པ་ཆེན་པོ་ཡང༌། །གནས་འདིར་༝། ཆོས་རྒྱལ་ཟླ་འོད་གཞོན་ནུ་དང༌། །སྒམ་པ་ཚུལ་ཁྲིམས་སྙིང་པོ་དང༌། །སྒོམ་ཆུང་ཤེས་རབ་བྱང་ཆུབ་ཀྱང༌། །གནས་འདིར་༝། མཚུངས་མེད་དྭགས་པ་འདུལ་འཛིན་དང༌། །ཆོས་རྗེ་འབྲི་གུང་གླིང་པ་དང༌། །བླ་མ་དམ་ཆོས་གླིང་པ་ཡང༌། །གནས་འདིར་༝། རྣམ་འདྲེན་ཆོས་ཀྱིས་ཚུལ་ཁྲིམས་དང༌། །མཉམ་མེད་བླ་མ་ལྷ་ལུང་པ། །མཁས་གྲུབ་ཐོག་གནས་ཆེན་པོ་ཡང༌། །གནས་འདིར་སྤྱན་འདྲེན་གཤེགས་སུ་གསོལ། །མཁས་བཙུན་ཆོས་ཀྱི་དབང་ཕྱུག་དང༌། །འདྲེན་མཆོག་བྱང་ཆུབ་བཟང་པོ་དང༌། །ཀུན་མཁྱེན་བཀྲ་ཤིས་རྣམ་རྒྱལ་ཡང༌། །གནས་འདིར་༝། །སྤྱན་སྔ་བསོད་ནམས་ལྷ་དབང་དང༌། །ཡོངས་འཛིན་དཔལ་ལྡན་རྒྱལ་མཚན་དང༌། །པཎ་ཆེན་ཕྱོགས་ལས་རྣམ་རྒྱལ་ཡང༌། །གནས་འདིར་༝། ཚར་ཆེན་ཆོས་ཀྱི་རྒྱལ་པོ་དང༌། །ཀུན་མཁྱེན་མཁྱེན་བརྩེའི་དབང་ཕྱུག་དང༌། །མཁན་ཆེན་བསླབ་གསུམ་རྒྱལ་མཚན་ཡང༌། །གནས་འདིར་༝། ཁྱབ་བདག་དབང་ཕྱུག་རབ་བརྟན་དང༌། །རྡོ་རྗེ་འཆང་དབང་བཀའ་འགྱུར་བ། །མཁན་ཆེན་ཚེ་དབང་ལྷུན་གྲུབ་ཀྱང༌། །གནས་འདིར་༝། ཞེས་ཚེ་དཔག་མེད་གྲུབ་རྒྱལ་མའི་ཚེ་འཛབ་ཀྱི་གདངས་དང་བཅས་རྩེ་གཅིག་ཏུ་གསོལ་བ་བཏབ་པས་བླ་མ་རྣམས་དང་མདུན་བསྐྱེད་ཀྱི་ཚོམ་བུ་ཐུགས་ཀ་ནས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས་ཤིང༌། དེ་དང་དུས་མཉམ་དུ་སྤྱི་བོའི་བླ་མ་འོད་དཔག་མེད་(༡༨༥བ) ― GLG021_Page_0372 ―
[མ་དཔེ་གཟིགས་ན་འདིར་གནོན།]
ཡོངས་སུ་གྱུར་པ་ལས། ཞེས་པ་ནས། གདོན་བགེགས་ཐམས་ཅད་བྱ་སྒྲོ་མགར་གྱི་སོལ་མལ་དུ་བབས་པ་ལྟར་གཞོབ་ཐུལ་ཐུལ་ཚིག་པར་བསམ་གྱི་བར་མངོན་རྟོགས་བཞིན་བྱ། དེ་ནས་དམིགས་པ་དང་མ་བྲལ་བར་ཡི་གེ་བཅུ་པ་སྤེལ་ཚིག་ཅན་བརྒྱ་རྩ་ཙམ་ཟླ། བླ་མའི་ཕྱག་ཏུ་རྗེ་བཙུན་མའི་སྐུ་བྲིས་འབུར་གང་ཡང་རུང་བ་ཕུལ་ཏེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་བསྟན་དང་འགྲོ་བའི་དཔུང་གཉེན་དང་བདག་སོགས་གདུལ་བྱ་རྣམས་ཀྱི་བསོད་ནམས་ཀྱི་ཞིང་དུ་སྐུ་མི་ཟད་པ་རྒྱན་གྱི་འཁོར་ལོ་དུས་འཁོར་བ་མ་སྟོངས་ཀྱི་བར་དུ་བརྟན་པར་བཞུགས་སུ་གསོལ། ཚེ་མདོའི་གླེགས་བམ་ཕུལ་ཏེ་བསོད་ནམས་ཀྱི་ཞིང་དུ་ཡན་གོང་ལྟར་ལ། གསུང་མི་ཟད་པ་རྒྱན་གྱི་འཁོར་ལོ་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་སྒྲ་དབྱངས་ཕྱོགས་བཅུར་སྒྲོག་པར་མཛད་དུ་གསོལ། པད་སྤུངས་ཕུལ་ཏེ། ཐུགས་མི་ཟད་པ་རྒྱན་གྱི་འཁོར་ལོ་རིམ་གཉིས་ཟབ་མོའི་ཏིང་ངེ་འཛིན་ལ་གཡོ་བ་མེད་པས་འགྲོ་བའི་དོན་རྒྱ་ཆེན་པོ་མཛད་དུ་གསོལ། བུམ་པ་བཅུད་ལྡན་ཕུལ་ཏེ། འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གྱི་ཕུང་པོ་ཟད་མི་ཤེས་པ་ཡིད་བཞིན་གྱི་ནོར་བུ་ལྟར་འགྲོ་བའི་རེ་བ་མ་ལུས་པ་སྐོང་བར་མཛད་དུ་གསོལ། རིགས་ལྔའི་ཕྱག་མཚན་ཕུལ་ཏེ། རིགས་སོ་སོའི་བློ་དང་འཚམ་པར་ཟབ་མོ་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བའི་འཕྲིན་ལས་འཁོར་བ་ཇི་སྲིད་ཀྱི་བར་རྒྱུན་མི་ཆད་པ་གདུལ་བྱ་རྣམས་ཀྱི་ཁམས་དང་བསམ་པ་བཞིན་འཇུག་པར་མཛད་དུ་གསོལ། རྒྱལ་(༡༨༦ན) ― GLG021_Page_0373 ―
[མ་དཔེ་གཟིགས་ན་འདིར་གནོན།]
སྲིད་སྣ་བདུན་རིམ་པར་ཕུལ་ཏེ། །ལྷ་རྫས་ལས་གྲུབ་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང༌། །སྡང་བའི་དགྲ་ལས་རྣམ་པར་རྒྱལ་གྱུར་བའི། །འཁོར་ལོ་རིན་ཆེན་འབུལ་གྱི་བརྟན་པར་བཞུགས། །ཨོཾ་ཙཀྲ་རཏྣ་ནཱིཪྻ་ཏ་ཡ་མི། སོ་སོའི་ཚིག་རྐང་ཐ་མའི་ཟུར་བསྒྱུར་ཞིང་སྔགས་འབྱིན་འཇུག་བྱེད། བཀྲ་ཤིས་རྫས་བརྒྱད་རབ་གནས་ཀྱི་སྐབས་བཞིན་དབུལ། ཚིགས་སུ་བཅད་པའི་བརྟན་བཞུགས་ཀྱི་རིགས་རྣམས་ཀྱིས་གསོལ་བ་བཏབ་རྗེས། ཡུན་ཇི་ཙམ་བཞུགས་ཀྱི་ཞལ་བཞེས་ཞུས་ཏེ་ཞལ་གྱི་བཞེས་པའི་ཡོན་ཏན་དུ་མཎྜལ་དབུལ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ་སོགས་བཀྲ་ཤིས་ཀྱི་ཚིགས་སུ་བཅད་པས་མེ་ཏོག་གི་ཆར་དབབ། རྟེན་འབྲེལ་གྱི་ཁྱད་ནས་མདུན་བསྐྱེད་ཀྱི་ཚོམ་བུ་ཞག་གསུམ་ཙམ་གྱི་བར་བསྡུ་ཆོག་མི་བྱ་ཞིང༌། དེ་ནས་མཇུག་ཆོག་སྤྱི་དང་འདྲའོ། །སྨྲས་པ། རྡོ་རྗེ་སློབ་དཔོན་འཁོར་བ་ཇི་སྲིད་བར། །བསྟན་འགྲོའི་དཔུང་གཉེན་དམ་པར་ལེགས་བཞུགས་ཤིང༌། །མི་བདག་ལ་སོགས་མཆོག་དམན་འཆི་བདག་ལས། །མཐར་བྱེད་རྟེན་ཅིང་འབྲེལ་བར་འབྱུང་འདི་མཚར། །སྔོན་རབས་མཁས་པའི་བཞེད་པ་འགའ་མཐོང་བར། །ཡོངས་དཔྱད་ངེས་རྙེད་སྟེར་བའི་ཁུངས་ལྡན་ལས། །གཞན་ཟེར་ཚིག་རྗེས་ཙམ་འབྲེང་འཁོར་བ་ལ། །བརྟེན་པའི་བླུན་པོའི་གདོལ་གཏམ་འདི་མ་ཡིན། །དེ་འདྲ་རྒྱལ་བ་ཀུན་འདུས་གནས་གསར་བའི། །གསུང་གི་བདུད་རྩི་སྙིང་གི་ཟ་མ་(༡༨༦བ) ― GLG021_Page_0374 ―
[མ་དཔེ་གཟིགས་ན་འདིར་གནོན།]
ཏོག །ཡོངས་སུ་འཁྱིལ་བས་བརྗོད་པ་དོན་ཡོད་གླུ། །སྤོབས་པའི་རྒྱུད་མངས་སྒྲ་དང་ལྷན་ཅིག་ལེན། །དགེ་དེས་གདན་གསུམ་ཚང་བའི་འཁོར་ལོའི་མགོན། །ཐ་མལ་གདུལ་བྱའི་སྣང་ངོར་ངུར་སྨྲིག་གར། །ལེགས་བསྒྱུར་དྲིན་ཆེན་འདྲེན་པ་ཞ་ལུ་པ། །འོག་མིན་ཞིང་གཙོའི་མགོན་ལྟར་གཡོ་མེད་ཤོག །ལུས་སུ་སྣང་བ་ཡིད་བཞིན་འཁོར་ལོའི་སྐུ། །ངག་གི་སྒྲ་ཀུན་ཡི་གེ་བཅུ་པའི་གདངས། །ཡིད་ངོར་གང་ཤར་བདེ་ཆེན་ཡེ་ཤེས་ལ། །རྣམ་པར་རོལ་བའི་བཀྲ་ཤིས་དགའ་སྟོན་ཤོག །ཅེས་སྐྱིད་ཤོད་འཛིན་མའི་ཐིག་ལེ་ལྷོ་མོས་གཞིས་ཀར་རིགས་བརྒྱའི་ཁྱབ་བདག་མཁན་ཆེན་ཞ་ལུ་པ་ཚེ་དབང་ལྷུན་གྲུབ་རབ་བརྟན་བསྟན་པའི་རྒྱལ་མཚན་དཔལ་བཟང་པོས་གསང་བ་ལས་ཀྱང་ཆེས་གསང་བ་ལམ་འབྲས་བུ་དང་བཅས་པའི་སྙན་རྒྱུད་ཚད་མ་བཞི་ལྡན་གསང་ཆེན་སློབ་བཤད་ཀྱི་ཆོས་ཀྱི་འཁོར་ལོ་རྒྱ་ཆེར་བསྐོར་བའི་ཚེ་དཀྱིལ་འཁོར་རྒྱ་མཚོའི་མངའ་བདག་ཆོས་རྗེ་བཅོ་བརྒྱད་པ་བྱམས་པ་ངག་དབང་ལྷུན་གྲུབ་དང་དྲིན་ཅན་རྡོ་རྗེ་འཆང་བཀའ་འགྱུར་བ་ཆེན་པོའི་རིགས་ཀྱི་དབོན་ནམ་མཁའ་བསོད་ནམས་དབང་གི་རྒྱལ་པོ། ལྕགས་ཟམ་རྗེ་དྲུང་ངག་དབང་བསྟན་འཛིན་ཕུན་ཚོགས་གསུམ་གྱིས་རྗེ་བླ་མ་དམ་པ་ལ་ངེད་མཆེད་གྲོགས་རྣམས་ཀྱིས་བརྟན་བཞུགས་བཟབས་རྒྱས་ཤིག་འབུལ་རྩིས་ཡིན་པ་ཡིད་བསྲུབས་ཀྱི་གཡུལ་ལས་རྒྱལ་བར་གང་ཟབ་ཅིག་ཁྱོད་ཀྱིས་བརྟགས་ནས་ཆོ་ག་སྒྲིགས་ཤིག་པར་གསུང་གིས་བསྐུལ་བ་ན་རྗེ་བཙུན་མ་ཉིད་སྐབས་སུ་བབས་པར་མངོན་ནས་རྒྱལ་བ་ཀུན་(༡༨༧ན) ― GLG021_Page_0375 ―
[མ་དཔེ་གཟིགས་ན་འདིར་གནོན།]
ཡུམ་ཚེ་སྦྱིན་ཡིད་བཞིན་འཁོར་ལོའི་ཆོ་ག་དང་འབྲེལ་བར་འཆི་བླུ་དང་བརྟན་བཞུགས་ཀྱིས་མཛེས་རྒྱན་དུ་བྱས་པ་འདོད་པའི་རེ་སྐོང་འདི་ནི་མེ་འབྲུག་ས་ག་ཟླ་བའི་དཀར་ཆའི་ཚེས་བཞི་ལ་ཟ་ཧོར་གྱི་བནྡེས་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་འདིས་ཀྱང་ངེས་གསང་བསྟན་པའི་ཉི་མ་ཕྱོགས་བཅུར་འཆར་བའི་རྒྱུར་གྱུར་ཅིག །སྲང་གྲངས་བཅོ་ལྔའི་རིན་ཆེན་གཉིས་པ་ལས། །ལེགས་གྲུབ་གསང་འདུས་བླ་མའི་སྒྲུབ་གཏོར་སྣོད། །ཆོས་རྗེ་བློ་བཟང་པདྨས་ལེགས་ཕུལ་མཐུས། །ཐོད་ཕྲེང་རྩལ་གྱིས་རྟག་ཏུ་རྗེས་འཛིན་ཤོག །ཅེས་པའང་གྲྭ་ཚང་གི་དགེ་སྐོས་ལས་སྣའི་འཇོག་ཏུ་ཕུལ་བའི་ཟ་ཧོར་གྱིས་བནྡེས་སྦྱར། །འཇོན་དམར་གསེར་ཞུན་ལས་གྲུབ་པའི། །འདྲ་འབག་ངག་དབང་འཇམ་དབྱངས་ཀྱིས། །བཞེངས་འབྲས་འདི་ཕྱི་དུས་ཀུན་ཏུ། །ཕན་བདེའི་དཔལ་ལ་སྤྱོད་པར་ཤོག །ཅེས་པའང་ཟ་ཧོར་གྱིས་བནྡེས་བཀོད། །རིན་ཆེན་ལས་གྲུབ་འདྲ་བའི་གཟུགས། །ཆང་ཁྱིམ་བློ་བཟང་དངོས་གྲུབ་ཀྱིས། །བཞེངས་པས་སྲིད་དང་ཞི་བ་ཡི། །ལེགས་ཚོགས་ཐམས་ཅད་ལྷུན་གྲུབ་ཤོག །ཅེས་པའང་ཟ་ཧོར་བནྡེས་བྲིས།།གཟུགས་བརྙན་རིན་ཆེན་རྒྱུ་ཚོགས་ལས། །དཀར་བྲག་ངག་དབང་བྱམས་པ་ཡི། །རྒྱུ་སྦྱར་འབྲས་བུ་མངོན་མཐོ་དང༌། །ངེས་ལེགས་དོན་ཀུན་འགྲུབ་པར་ཤོག །ཅེས་པའང་ཟ་ ― GLG021_Page_0376 ―
[མ་དཔེ་གཟིགས་ན་འདིར་གནོན།]
ཧོར་བནྡེས་བཀོད། །ཆོས་ཀུན་རྣམ་པར་འབྱེད་པའི་ཤེས་རབ་ཀྱིས། །ལེགས་བཤད་སྦྱིན་པས་གདུལ་བྱ་ཚིམ་མཛད་པ། །བློ་ལྡན་སྐལ་བཟང་དགའ་སྟོན་སྤེལ་བའི་གཉེན། །རྡོ་རྗེ་ལྟ་བུར་མི་འགྱུར་བརྟན་པར་ཤོག །དཀོན་མཆོག་རིན་ཆེན་རྣམ་གསུམ་བྱིན་རླབས་མཐུ། །ལྷ་དང་དྲང་སྲོང་བདེན་ཚིག་གྲུབ་རྣམས་ཀྱིས། །དེང་འདིར་སྨོན་ལམ་ཇི་ལྟར་བཏབ་པ་བཞིན། །འདོད་པའི་འབྲས་བུ་ཡོངས་སུ་སྨིན་པར་མཛོད། །ཅེས་པ་འདིའང་ཉི་ཐང་སྤྱི་ཚོགས་ཀྱི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཟླ་བ་ལན་བརྒྱར་བྱུགས་པའི་ཤེལ་དཀར་གྱིས། །ཆ་ཙམ་བསྒྲུན་མིན་འཕགས་མའི་མཛེས་ཞལ་ཁྱིམ། །བསྟན་ནས་ཚེ་ཡི་མཆོག་སྦྱིན་རྒྱལ་ཀུན་ཡུམ། །ཡིད་བཞིན་འཁོར་ལོས་བགྲང་ཡས་འགྲོ་འདི་སྐྱོངས། །དབང་སྔོན་རལ་ཁུར་གྱིས་དཔལ་འཕྲོག་བྱེད་ཀྱིས། །ལེགས་བཏེག་རྡོ་རྗེའི་རི་མོ་བཀྲ་བའི་ཁྲིར། །རིས་མེད་འགྲོ་བ་འདྲེན་པའི་དེད་དཔོན་དུ། །དཔལ་ལྡན་བླ་མ་བསྐལ་བརྒྱར་བརྟན་པར་ཤོག །རྫོགས་སངས་རྒྱས་དངོས་རྗེ་བཙུན་བཙོང་ཁ་པའི། །རིང་ལུགས་ཆོས་དང་སྲིད་ཀྱི་ཀུན་བཟོད་མཐའ། །བཅིངས་མིན་དེ་སྲིད་བདེ་ལྡན་ཞིང་མགོན་ལྟར། །བཞུགས་གསོལ་འདོད་པའི་རེ་བ་དོན་ཡོད་ཤོག །སྟོབས་ཀྱི་འཁོར་ལོ་ནམ་མཁར་འཕགས་པ་ཡི། །ལེགས་བྱས་དཔུང་གིས་ནོར་འཛིན་རབ་སྐྱོང་བ། །རབ་བརྟན་ཆབ་སྲིད་དཀར་ཆའི་ཟླ་བ་ལྟར། །འཕེལ་བའི་དུས་སྟོན་ལྷུན་གྱིས་གྲུབ་པར་ ― GLG021_Page_0377 ―
[མ་དཔེ་གཟིགས་ན་འདིར་གནོན།]
ཤོག །བཤེས་གཉེན་གར་མི་ཡོན་ཏན་གཡུང་དྲུང་གི །ཀུན་དགའ་ར་བར་ཟུང་འབྲེལ་དྲི་གཙང་ཁང༌། །འདུས་པའི་སྡེ་བཅས་ལྔ་བརྒྱ་ཕྲག་བཅུའི་བར། །མི་ཉམས་བླ་ནས་བླ་རུ་འཕེལ་བར་ཤོག །དགེ་བཅུར་ལོངས་སུ་སྤྱད་པའི་རྣམ་སྨིན་གྱིས། །གསིལ་བའི་ག་བུར་ཟེགས་རྡུལ་ཉེར་བབས་པས། །འཇིག་རྟེན་ཀུན་ཏུ་བདེ་སྐྱིད་ཨུཏྤལ། །དཀར་པོའི་འདབ་མ་ཡོངས་སུ་བཞད་པར་ཤོག །འཇམ་དཔལ་དྲག་པོར་ཁྲོས་པ་མ་ཧེའི་ཞལ། །ལེགས་ལྡན་ནག་པོ་མྱུར་མཛད་ཡེ་ཤེས་མགོན། །སྲིད་གསུམ་དབང་སྒྱུར་དམག་དང་ཟོར་གྱི་ལྷས། །སྨོན་ལམ་བཏབ་པ་ཇི་བཞིན་འགྲུབ་པར་མཛོད། །མི་ཡི་སེང་གེ་ངེས་གསུངས་ལུང་རྟོགས་ཆོས། །ཉེར་འཛིན་སློབ་མར་བཅས་པའི་བྱིན་རླབས་མཐུས། །ལུས་ཅན་ཡོངས་ལ་རྟག་ཏུ་བདེ་ལེགས་ཀྱི། །ཕུན་སུམ་ཚོགས་པས་དུས་ཀུན་ཁྱབ་པར་ཤོག །ཅེས་རྫིང་ཕྱི་ཆོས་སྡེ་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འདུས་ཚོགས་བསོད་ནམས་ཞིང་དུ་གྱུར་པའི་ཚལ། །འཁོར་ཡུག་གཉིས་མེད་ཤཱཀྱ་སེང་གེ་བཅས། །སྣང་བརྙན་མཁའ་ལ་འཇའ་ཚོན་ལྟར་བཀྲ་བ། །མིག་གི་བདུད་རྩི་གསར་པའི་དགའ་སྟོན་དཔྱིད། །རྒྱལ་བའི་སྐུ་གསུང་ཐུགས་རྟེན་བསྐྲུན་པ་དང༌། །ཕྱག་མཆོད་བཀུར་བསྟི་བགྱིད་ལ་མངོན་ཕྱོགས་པའི། །སྒོ་གསུམ་འདུ་བྱེད་ཕྲ་མོའི་ལེགས་བྱས་ཀྱི། །ཕུང་པོ་མི་མཇེད་འཇིག་རྟེན་འདིར་ཤོང་མིན། །རང་རྒྱུད་འདུལ་བར་(༡༨༨བ) ― GLG021_Page_0378 ―
[མ་དཔེ་གཟིགས་ན་འདིར་གནོན།]
ནུས་པའི་སློབ་དཔོན་ཆེ། །མཐོ་བཙུན་ཆིང་གིས་གནམ་གྱི་རིགས་ལས་སོན། །བློ་བཟང་དགའ་ལྡན་ལྷག་བསམ་སྟོན་ཟླ་ལྟར། །ཆེས་དཀར་མཐུ་ལས་ཚུལ་བདེ་འབད་པས་བསྒྲུབས། །དགེ་འདིས་རྒྱལ་ཀུན་ཡབ་ཅིག་འཇམ་དཔལ་དབྱངས། །བཤེས་གཉེན་སྒྱུ་དྲའི་རྣམ་འཕྲུལ་བཙོང་ཁ་པའི། །བསྟན་པ་དབུས་འགྱུར་འཆང་དུ་བྱམས་པ་མགོན། །མ་བྱོན་དེ་སྲིད་འཕེལ་ཞིང་རྒྱས་གྱུར་ཅིག །ངག་དབང་དབྱངས་ཅན་ལྷ་མོ་མགྲིན་འཁྱུད་པའི། །བློ་གྲོས་ཡངས་པའི་སྤོབས་པ་བཟང་པོ་ཡིས། །རྒྱ་མཚོ་ལྟར་ཟབ་ལྔ་རིག་གཙུག་ལག་ཀུན། །འཛིན་ཁྱོད་རྡོ་རྗེ་ལྟ་བུར་བརྟན་པར་ཤོག །བློ་བཟང་སྙན་གྲགས་འབར་བའི་རྗེས་སུ་ཞུགས། །དགའ་སྤྲོས་ཐོས་བསམ་ལྷུར་བླངས་དོན་ལྡན་གྱིས། །ཐོག་མ་མེད་ནས་ད་ལྟའི་བར་བསགས་པའི། །སྡིག་ལྟུང་དྲི་མའི་ཚོགས་ཀུན་བྱང་བར་ཤོག །མི་ཁོམ་བགྲོད་དཀའི་ཆུ་བོ་ཆེན་པོ་ལ། །དལ་འབྱོར་རྟེན་གྱི་ཟམ་པ་རབ་བཙུགས་ནས། །ཕ་རོལ་ངེས་ལེགས་གནས་སུ་ཉེར་སོན་ཏེ། །རྟག་དུ་སིམ་པའི་ཚོར་བ་མྱོང་བར་ཤོག །ཞི་བདེ་དམན་ལམ་གོལ་བའི་ཉེས་སྐྱོན་སོགས། །ཤེས་ནས་བདག་གཞན་མཉམ་བརྗེའི་སེམས་བསྐྱེད་དེ། །རིན་མིན་སྟོབས་བཅུ་མངའ་བའི་གོ་འཕང་མཆོག །མངོན་གྱུར་འགྲོ་བ་མ་ལུས་འདྲེན་པར་ཤོག །འདིས་མཚོན་བྱས་སོ་ཅོག་གི་བསོད་ནམས་ཀྱི། །འབྲས་བུ་རང་ཉིད་ཁོ་ན་བསམས་མིན་པ། །མཐའ་དང་ཚད་དུ་བྲལ་བའི་ལུས་ཅན་ཀུན། །ཕན་དང་བདེ་བ་འབྱུང་བའི་རྒྱུ་རུ་བསྔོ། །ཞེས་འདུལ་བ་སློབ་དཔོན་ལྷ་བཙུན་བློ་བཟང་དགའ་ལྡན་གྱིས་སྟོད་ལུང་རྫིང་གའི་ཀུན་(༡༨༩ན) ― GLG021_Page_0379 ―
[མ་དཔེ་གཟིགས་ན་འདིར་གནོན།]
དགའ་ར་བར་ལྡེབས་བྲིས་བགྱིས་པའི་དགེ་བ་བསྔོ་བའི་སྨོན་ལམ་འདི་བཞིན་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རིག་རྩལ་འཕོ་མེད་ཆོས་སྐུའི་ཀློང་ཆེན་པོར། །ཡེ་ཤེས་འོད་ལྔའི་མཚན་དཔེ་རྫོགས་པའི་གར། །ཀུན་ཁྱབ་འགྲོ་འདྲེན་མཚོ་སྐྱེས་རྡོ་རྗེ་ཡིས། པདྨ་ཚུལ་ཁྲིམས་རྗེས་བཟུང་ཐར་པར་དྲོངས། །ཉོན་མོངས་རྩ་བ་གཏི་མུག་མུན་པའི་སྨག །ཐུགས་རྗེ་ཉི་མའི་འོད་ཀྱིས་ཉེར་སྦྱངས་ནས། །མེ་ལོང་ཡེ་ཤེས་གསལ་བའི་སྣང་མཛད་ཀྱིས། །པདྨའི་སྦུབས་སུ་ཚུལ་ཁྲིམས་མིང་ཅན་དྲོངས། །རྣམ་པར་སྣང་མཛད་ཐུགས་རྗེའི་ཆུ་རྒྱུན་གྱིས། །ཚེ་འདས་ཐོག་མེད་ནས་བསགས་སྡིག་པའི་དྲི། །རབ་བཀྲུས་དག་པ་བདེ་བ་ཆེན་པོའི་སར། །ལེགས་བཀོད་དོན་གཉིས་མ་ལུས་འགྲུབ་བྱིན་རློབས། །ཞེས་པའང་གསང་མཁར་བས་མའི་དོན་དུ་བྲིས་ཐང་གསུམ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྒྱལ་བ་ཀུན་འདུས་པདྨ་ཐོད་འཕྲེང་དང༌། །དབྱེར་མེད་དྲིན་ཅན་རྩ་བའི་བླ་མ་ལ། །བྱང་ཆུབ་མ་ཐོབ་བར་དུ་གསོལ་བ་འདེབས། །འདི་ཕྱིའི་དོན་ཀུན་འགྲུབ་པར་བྱིན་གྱིས་རློབས། །ཞེས་པའང་གསང་མཁར་བ་བདེ་ཆེན་དབང་རྒྱལ་གྱི་ཁ་ཏོན་དུ་དགོས་ཚུལ་ལྟར་བྲིས། །འཁོར་འདས་ཕྱག་རྒྱ་ཟིལ་གནོན་ཀུན་ཏུ་བཟང༌། །འཇམ་དཔལ་རྡོ་རྗེ་བཞད་པའི་འཕྲིན་ལས་རྣམས། །ཐོགས་པ་མེད་སྒྲུབ་(༡༨༩བ) ― GLG021_Page_0380 ―
[མ་དཔེ་གཟིགས་ན་འདིར་གནོན།]
རྩལ་ལྡན་འདྲེན་པ་མཆོག །བསླུ་མེད་སྐྱབས་ཀྱི་ངོ་བོར་གསོལ་བ་འདེབས། །ཆོས་ཀུན་གདོད་ནས་དག་དབྱིངས་འདུ་མ་བྱས། །གསལ་སྟོང་རིག་པའི་ཁྱབ་བདག་རྡོ་རྗེ་སེམས། །བཤེས་གཉེན་གཟུགས་ཀྱི་རྣམ་རོལ་སྲིད་མཐའི་བར། །གཙུག་ཏོར་མཛེས་བྱེད་རྒྱན་དུ་བརྟན་གྱུར་ཅིག །རྡོས་བཅས་ཆོས་ཀུན་ཡེ་དག་འཇའ་འོད་ལུས། །ཟད་སར་འཁྱོལ་ཏེ་བརྗོད་བྲལ་བདེ་བ་ཆེ། །ཐོབ་མིན་སྐྱེ་བར་ཟབ་མོའི་ལམ་བསྒོམས་ནས། །འདི་ཕྱི་གཏན་གྱི་མདུན་མ་འགྲུབ་པར་ཤོག །ཅེས་པའང་ངག་དབང་འཇམ་དབྱངས་ཀྱིས་ཁ་ཏོན་དུ་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བསོད་ནམས་ཉེར་བསགས་གྲངས་མེད་སྐྱེ་བའི་མཚོར། །མགོན་ཁྱོད་ཐུགས་རྗེའི་ཟླ་གཟུགས་རྟག་ཤར་ཏེ། །བྱང་ཆུབ་བར་དུ་འབྲལ་མེད་རྗེས་འཛིན་པར། །སྨོན་པའི་རེ་བ་ཇི་བཞིན་འགྲུབ་གྱུར་ཅིག །ཅེས་པ་འདིའང་གསོལ་དཔོན་གེ་ར་བ་བློ་བཟང་མཁྱེན་བརྩེས་ངེད་རང་གི་འདྲ་འབག་བཞེངས་པའི་ཁ་བྱང་སྐྱེ་བར་རྗེས་འཛིན་གྱི་སྨོན་ལམ། རབ་གནས་བརྒྱ་རྩ་དང་བཅས་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར། །འགྲིན་པར་ངག་དབང་དབྱངས་ཅན་འཇོ་སྒེག་གིས། །འཆད་རྩོད་རྩོམ་པའི་བློ་ཡིས་སྐལ་བཟང་གི །གདུལ་བྱ་རྒྱ་མཚོར་སྨྲ་བའི་འཇིགས་མེད་གོ །ཆ་གང་ཐུབ་བསྟན་ལང་ཚོའི་སྡེར་གསོལ་འདེབས། །ཚངས་སྲས་ཟླ་ཞིན་བཞད་པའི་འཇུམ་ཟེར་གྱིས། །ལྔ་རིག་ཨུཏྤལ་འདབ་སྟོང་ཡོང་གྲོལ་བས། །བླུན་རྨོངས་ཉེས་བརྒྱ་འཇོམས་པ་རྡོ་རྗེའི་མཚོན། (༡༩༠ན) ― GLG021_Page_0381 ―
[མ་དཔེ་གཟིགས་ན་འདིར་གནོན།]
།གདེགས་མཛད་དཔལ་ལྡན་བླ་མར་གསོལ་བ་འདེབས། །ཐ་སྙད་གཙུག་ལག་རྣམས་དང་ནང་དོན་གྱི། །མ་མར་ལྟ་བའི་རྣམ་དཔྱོད་གདོང་དྲུག་པར། །བསྙེམས་པའི་སྔོན་མེད་ལང་ཚོར་དར་བབ་ཅན། །བློ་གསལ་ཡིད་དབང་འགུགས་པར་གསོལ་བ་འདེབས། །རྡུལ་མུན་གྱིས་བསྒྲིབས་མཐོར་བརྩེགས་ཁྲི་སྟན་ལ། །མི་ཤིགས་སྐྱིལ་ཀྲུང་གཅིག་གིས་རྗེས་ཤར་བ། །མིག་གསུམ་འཕྲུལ་ཆེ་དེས་ཀྱང་མི་དབྱི་བར། །དོན་གྲུབ་དེ་གསུང་འདུས་པས་དེང་བྱིན་རློབས། །བློ་གྲོས་སྤོབས་པ་ཡངས་པར་འཇམ་པའི་དབྱངས། །མཆོག་ཏུ་དགའ་བས་མཐོན་མཐིང་སྤྱན་རས་ཀྱིས། །མངོན་པར་ཡོངས་བཙའ་མ་འདྲེས་འགྲོ་བའི་བཤེས། །ཉི་མའི་གཉེན་གྱི་བདེན་པས་རབ་བརྟན་ཤོག །གཡོན་འཁྱིལ་ནམ་མཁའི་རང་བཞིན་གཡུང་དྲུང་གི །ཁོག་པར་ཚུགས་པ་སྲོག་གི་ཀ་བ་ལ། །རྡོ་རྗེ་ལུ་གུ་རྒྱུད་ཀྱིས་ཉེར་བསྡམས་པར། །ལྷ་དང་དྲང་སྲོང་དམོད་པ་འདོར་གྱུར་ཅིག །ཐོས་བསམ་མེ་ཏོག་ཆུན་པོ་མ་རྙིངས་པར། །ཐུབ་བསྟན་ལུས་ཕྲར་འཁྱུད་པའི་རྩེ་དགའ་ཅན། །རྣམ་གསུམ་འཁོར་ལོའི་ནུ་མར་སེན་རྗེས་རིས། །བློ་བཟང་གྲགས་པའི་རིང་ལུགས་འཕེལ་བར་ཤོག །རྡུལ་བརྩེགས་ཁ་བའི་དོ་ར་ཡངས་པའི་ནང༌། །རྣམ་སྨིན་དཀར་པོར་འཛག་པའི་ཟློས་གར་གྱིས། །འགྲོ་ཀུན་སིམ་པའི་ཚོར་བས་ཡིད་བརྟས་ཏེ། །སྐྱིད་པའི་དགའ་སྟོན་སྐབས་གསུམ་མཆེད་ཟླར་ཤོག །ས་འོག་ས་སྟེང་ས་བླར་བཅས་པ་ལ། །བཀྲ་ཤིས་བདེ་ལེགས་ཆེན་པོས་ཡོངས་ཁྱབ་པར། །སྐྱབས་གནས་ཚོགས་ལ་ཐལ་སྦྱར་(༡༩༠བ) ― GLG021_Page_0382 ―
[མ་དཔེ་གཟིགས་ན་འདིར་གནོན།]
གསོལ་འདེབས་ན། །རེ་འབྲས་དོན་དང་ལྡན་པར་བདག་བྱིན་རློབས། །ཞེས་གསོལ་འདེབས་སྨོན་ལམ་དང་འབྲེལ་བའི་ཚིགས་སུ་བཅད་པ་འདི་ནི་རྟ་ཚགས་རྗེ་དྲུང་རིན་པོ་ཆེ་ངག་དབང་དཀོན་མཆོག་ཉི་མའི་གསུང་གིས་བསྐུལ་བ་ལྟར་འདུ་ཤེས་གསུམ་པ་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་ཙོང་ཁ་པའི། །ཆོས་སྲིད་བསྟན་པ་རིན་པོ་ཆེ། །རབ་སྤེལ་བློ་ལྡན་སྐལ་བཟང་རྟེན། །རྒྱ་མཚོའི་གོས་ཅན་དེ་ལ་འདུད། །བསླུ་མེད་དཀོན་མཆོག་རྣམ་གསུམ་གྱི། །རྨད་བྱུང་ཐུགས་རྗེ་ཆེན་པོའི་མཐུས། །བསྐལ་པར་མགོན་ཁྱོད་རྡོ་རྗེའི་ཁྲིར། །གཡུང་དྲུང་ལྟ་བུར་བརྟན་པར་ཤོག །བདག་སོགས་རྣམས་ཀྱི་བསོད་ནམས་དང༌། །ཚེ་དཔལ་དབང་ཐང་རབ་རྒྱས་ཤིང༌། །སྐྱེ་བར་བདེ་འགྲོའི་རྟེན་རྙེད་ནས། །རིན་མིན་སངས་རྒྱས་ཐོབ་པར་ཤོག །ཅེས་གསོལ་འདེབས་སྨོན་ལམ་དང་འབྲེལ་བ་འདིའང་ས་དཀར་འགོ་པ་ལྷུན་གྲུབ་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་འཇམ་མགོན་ཙོང་ཁ་པ། །བློ་བཟང་གྲགས་པའི་བསྟན་སྲིད་གདུགས་དཀར་གྱིས། །རྒྱ་མཚོའི་གོས་ཅན་ཡོངས་ཁྱབ་འཕྲིན་ལས་ཅན། །རྗེ་བཙུན་བླ་མ་མཆོག་ལ་གསོལ་བ་འདེབས། །ནད་གདོན་བར་ཆད་མི་མཐུན་ཕྱོགས་ཀུན་ཞི། །ཚེ་དང་བསོད་ནམས་དཔལ་འབྱོར་དབང་ཐང་རྒྱས། །ཕྱི་མ་བདེ་བ་ཅན་དུ་པདྨའི་སྦུབས། །སྐྱེས་ནས་རྣམ་གྲོལ་ལམ་ལ་འགོད་པར་ཤོག །(༡༩༡ན) ― GLG021_Page_0383 ―
[མ་དཔེ་གཟིགས་ན་འདིར་གནོན།]
ཅེས་གསོལ་འདེབས་སྨོན་ལམ་དང་བཅས་པ་འདི་ནི་གོང་དཀར་རྟ་ར་མདོ་པ་འཛམ་ལས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འོད་དཔག་མེད་མགོན་འཁོར་དང་བཅས་པ་ལ། །རྩེ་གཅིག་གདུང་ཤུགས་དྲག་པོའི་ཡིད་བསྟད་མཐུས། །འདི་ནས་ཉིང་མཚམས་བདེ་ལྡན་སྐྱེད་ཚལ་གྱི། །འདབ་སྟོང་ཟེའུ་འབྲུའི་དབུས་སུ་སྦྱོར་བར་ཤོག །ཅེས་རྟ་ར་མདོ་པ་ངག་དབང་ལྷུན་གྲུབ་ཀྱིས་ཉམ་སྒོམ་གྱི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འབོད་སྒྲོགས་ཟིལ་གནོན་པདྨ་རྒྱལ་པོའི་ཁབ། །དཔལ་གྱི་རི་བོར་དབྱངས་སྐྱིད་ཉེར་དྲངས་ནས། །ཐེག་མཆོག་སྣང་བ་བཞི་ཡི་ལམ་ཟབ་མོར། །ཕུང་པོ་འོད་སྐུར་གྲོལ་བར་བྱིན་གྱིས་རློབས། །ཞེས་པ་འདི་ཡང་དགེ་སློང་འཇམ་དབྱངས་གྲགས་པས་མའི་དོན་དུ་བསྐུལ་བ་ལྟར་ཟ་ཧོར་གྱི་བནྡེས་སྦྱར། །ཡོན་སྦྱོར་ཐོགས་མེད་ནས་བསགས་སྡིག་ལྟུང་དྲི། །སུམ་ཅུ་རྩ་ལྔའི་སངས་རྒྱས་ཐུགས་རྗེའི་ཆུས། །རབ་བཀྲུས་མྱང་འདས་ཕོ་བྲང་ཉམས་དགའ་བར། །སྤྱོད་པའི་སྐལ་བ་བཟང་པོར་རྗེས་སུ་བཟུང༌། །མ་རིག་འཁོར་འཁྱམས་འཁྲུལ་བའི་འགྲོ་བ་རྣམས། །བདེ་ཆེན་དབྱིངས་སུ་རྣམ་པར་གྲོལ་བྱེད་ལྷ། །ཞི་དང་ཁྲོ་བོའི་སྐྱེད་རྫོགས་རྫོགས་པ་ཆེས། །ཚེ་འདིར་འཕོ་བ་ཆེན་པོ་འགྲུབ་བྱིན་རློབས། །རྒྱ་བོད་མཁས་དང་གྲུབ་པ་དུ་མའི་སྐུ། །རི་མོར་ལེགས་སྤེལ་བསོད་ནམས་མཐུ་བརྟས་པས། །སྐྱེ་བར་དགེ་(༡༩༡བ) ― GLG021_Page_0384 ―
[མ་དཔེ་གཟིགས་ན་འདིར་གནོན།]
བའི་བཤེས་དང་མི་འབྲལ་བར། །ཟབ་རྒྱས་ཆོས་རྣམས་ཐོས་བསམ་སྒོམ་པར་ཤོག །དུས་ཀྱི་དགྲ་བོ་གར་དགུའི་གཟི་བརྗིད་ཀྱིས། །འཁོར་འདས་ཕྱག་རྒྱའི་ཚོགས་རྣམས་ཟིལ་གནོན་ལྷས། །འདི་ཕྱི་བར་དོ་ཐམས་ཅད་རྗེས་བཟུང་ནས། །ཀུན་བཟང་འཇམ་དཔལ་མངོན་དུ་འགྱུར་བར་མཛོད། །ཅེས་གྲམ་པ་བློ་བཟང་ངག་དབང་གིས་བྲིས་ཐང་ལ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །གང་ཞིག་མོས་པའི་མཚོ་ནང་ཆུ་ཤེལ་དབང༌། །སྣ་ཚོགས་སྒྱུ་འཕྲུལ་དྲ་བ་མཁའ་དབྱིངས་ཀྱི། །ཟླ་གཟུགས་ངོ་བོ་མི་གཏོང་འོད་ཟེར་གྱིས། །བདག་སོགས་གཏན་བདེའི་ཀུནྡ་རྒྱས་པར་ཤོག །ཅེས་པ་འདི་ཡང་འགྲེས་ལྔ་ཆུ་སྐོར་པ་ངག་དབང་འཕྲིན་ལས་ཀྱིས་རྗེ་དགེ་འདུན་གྲུབ་ཀྱི་འཁྲུངས་རབས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །འཇམ་མགོན་ལྗོངས་འདིར་ངུར་སྨྲིག་ཚུལ་བཟུང་ཡང༌། །ངོ་མཚར་རྨད་བྱུང་བཀོད་པའི་ཞིང་ཁམས་ན། །སེང་གེའི་ང་རོའི་ཚུལ་སྟོན་ཙོང་ཁ་པས། །བྱང་ཆུབ་མ་ཐོབ་བར་དུ་བདག་རྗེས་བཟུང༌། །ཞེས་པའང་འཕྱོང་རྒྱས་པ་བློ་བཟང་དབང་ལྡན་གྱིས་རྗེ་བཙུན་བཙོང་ཁ་པའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །མཁའ་སྤྱོད་དག་པའི་ཞིང་ལས་མ་གཡོས་པར། །ཉི་ཤུ་རྩ་བཞིའི་གནས་ཀྱི་གཙོ་མོ་མཆོག །དཔལ་ལྡན་ཁྲོས་(༡༩༢ན) ― GLG021_Page_0385 ―
[མ་དཔེ་གཟིགས་ན་འདིར་གནོན།]
མ་ནག་མོས་རྗེས་བཟུང་ནས། །བདེ་ཆེན་རིགས་འཛིན་ས་རུ་འགོད་པར་ཤོག །འཕགས་བོད་པཎ་གྲུབ་རྒྱལ་བློན་སྣ་ཚོགས་ཀྱི། །སྣང་བརྙན་ཚོན་རིས་དང་ཉེ་ཤེལ་དཀར་བཞིན། །རྣམ་པར་བཀྲ་བའི་བསོད་ནམས་གང་ཐོབ་དེས། །སྲིད་དང་ཞི་བའི་དགེ་ལེགས་འཕེལ་བར་ཤོག །ཆོས་རྣམས་མ་ལུས་བསྐྱེད་མཛད་ཤེར་ཕྱིན་མའི། །མ་སྨད་ཐུགས་རྗེས་ཉོན་མོངས་ཕྲག་དོག་ཚོགས། །ཡོངས་དག་བྱ་བ་གྲུབ་པའི་ཡེ་ཤེས་སྐུར། །བསྟན་འཛིན་མངོན་པར་རྫོགས་པ་འཚང་རྒྱ་ཤོག །ཅེས་ཆོས་རྗེ་རྐན་ཕུ་བ་ཟིལ་གནོན་རྡོ་རྗེས་རང་དང་ནུ་བོའི་དོན་དུ་བྲིས་ཐང་ལེ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ལྷ་ཡི་ལྷར་གྱུར་ཤཱཀྱ་སེང་གེའི་ཞབས། །སྤྲུལ་པ་དགྲ་བཅོམ་གནས་བརྟན་བཅུ་དྲུག་ཚོགས། །དགེ་བསྙེན་ཆོས་འཕེལ་ཕྱོགས་སྐྱོང་རྒྱལ་པོ་བཞི། །འཁོར་ཚོགས་འདིར་སྤྱོན་བདེན་པའི་དཔང་པོར་བཞུགས། །བརྗོད་པ་རྣམ་དག་ངག་ལ་དབང་ཕྱུག་བློས། །སྐལ་བཟང་གདུལ་བྱའི་རེ་བ་ཡོངས་སྐོང་བར། །རྒྱ་ཆེན་གཙུག་ལག་མཚོ་ལྟར་གཏིང་ཟབ་མཐའ། །ཉེར་འཇལ་བཤེས་གཉེན་རྡོ་རྗེ་ལྟར་བརྟན་ཤོག །རྩེ་གཅིག་དད་དུངས་ཞིང་ས་གཤིན་པོ་ལ། །བཏབ་པའི་སྨོན་ལམ་སྨྱུ་གུ་བསྐྱེད་བསྲིངས་པ། །རེ་བ་དོན་ལྡན་འབྲས་བུ་རབ་དུད་ཁུར། །ལེགས་སྨོན་རོ་བདའི་ཟས་ལ་སྤྱོད་པར་ཤོག །ཅེས་འདི་ཡང་གཉལ་བ་བློ་བཟང་རྣམ་དག་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །(༡༩༢བ) ― GLG021_Page_0386 ―
[མ་དཔེ་གཟིགས་ན་འདིར་གནོན།]
ཝཱ གི ནྡྲཻ ར སུ མ ཏི ར ས མུ དྲ སེ ནེ དཾ བི མྦ ཀ རོ ཏྠི སེ ཕ ལཿ ནཱ། །ཏཾ ན མི ཏཱ བྷ ཀེ བ མཱ ནཱ ཤཱ ཀྱེ ཥུ ཧི གོ རུ བཻ རླ བྷཻ། ངག་དབང་བློ་བཟང་རྒྱ་མཚོའི་སྡེའི། །སྣང་བརྙན་འདི་བསྐྲུན་ལེགས་བྱས་འབྲས། །མགོན་ཁྱོད་ཚེ་མཐའ་ཡས་པ་ལྟར། །གཞོམ་མེད་རྡོ་རྗེའི་སྐུ་བརྙེས་ཤིང༌། །རྒྱུ་སྦྱོར་དེང་ནས་བྱང་ཆུབ་བར། །ཡང་དག་དགེ་བའི་བཤེས་མཛད་དེ། །འདི་ཕྱི་གཏན་མདུན་མ་ལུས་པ། །བསམས་པ་ཇི་བཞིན་འགྲུབ་པར་ཤོག །ཅེས་པའང་དཔལ་གྲོང་སྔགས་རམས་པས་རྟེན་བཞེངས་དུས་བསྐུལ་བ་ལྟར་ཟ་ཧོར་གྱི་བནྡེས་བྲིས། །འཁོར་ལོའི་མགོན་པོ་ཁྱབ་བདག་རྡོ་རྗེ་སེམས། །དངོས་གྲུབ་ཀུན་སྩོལ་ཕྱག་རྒྱ་ཟིལ་རྡོ་རྗེ་དྲག་པོ་རྩལ། སེང་ལྡེང་ནགས་གྱི་སྒྲོལ་མ། གནོན་ལྷ། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །རྩ་གསུམ་ཡོངས་འདུས་བཤེས་གཉེན་གཟུགས་ཅན་གྱིས། །བདག་(༡༩༣ན) ― GLG021_Page_0387 ―
[མ་དཔེ་གཟིགས་ན་འདིར་གནོན།]
སོགས་རྣམ་པ་ཐམས་ཅད་མཁྱེན་པའི་སར། །འགྲོ་མིན་ཐར་བའི་ས་མཁན་ལེགས་མཛད་ནས། །འདི་ཕྱི་བར་གྱི་མདུན་མ་གྲུ་བཞི་རུ། །འགྲུབ་པའི་སྐལ་བ་བཟང་པོར་བྱིན་གྱིས་རློབས། །སྒོ་གསུམ་འབད་པའི་ཆོས་དཀར་ཕུང་པོའི་ཚོགས། །རང་ཉིད་གཅིག་པུའི་ཆེད་མིན་མཁའ་མཉམ་གྱི། །འགྲོ་ཀུན་དོན་དུ་དམིགས་པའི་བསོད་ནམས་རྒྱུན། །མཐོ་རིས་ཆུ་བོ་ལྟ་བུར་ཆད་མེད་ཤོག །རྩ་བ་གསུམ་དང་དབྱེར་མེད་དུ་མོས་གདུང་གིས་བྱིན་རླབས་འཇུག་བྱེད་འདི་ལྟ་བུ་ཞིག་དགོས་ཞེས་ལྷ་ས་བ་བློ་གྲོས་ལེགས་པ། ངག་དབང་མཁས་བཙུན། བསྟན་འཛིན་རྒྱ་མཚོ་གསུམ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རང་སེམས་དྲི་བྲལ་མེ་ལོང་གཙང་མའི་ངོས། །ཁྱབ་བདག་རྡོ་རྗེ་སེམས་དཔའ་ངུར་སྨྲིག་གར། །བསྒྱུར་བར་ངེས་རྙེད་འཇམ་དབྱངས་དགའ་བའི་བཤེས། །དཔལ་ལྡན་བླ་མ་དམ་པར་གསོལ་བ་འདེབས། །མགོན་ཁྱོད་སྐྱེ་རྒུའི་བསོད་ནམས་ཞིང་མཆོག་ཏུ། །རྟག་པར་འགྱུར་བ་མེད་པ་གཡུང་དྲུང་གི །དངོས་པོར་སྐུ་ཚེ་འཚོ་ཞིང་ཉེར་གཞེས་པའི། །སྨོན་ལམ་མཆོག་གསུམ་མཐུ་ཡིས་འགྲུབ་བྱིན་རློབས། །བདག་སོགས་ཚེ་འདིར་བདེ་སྐྱིད་དཔལ་ལ་སྤྱོད། །ཡང་སྲིད་ཕྱི་མར་མངོན་མཐོ་ངེས་ལེགས་ཀྱི། །ཐེམ་སྐས་རིམ་བགྲོད་ཟུང་འཇུག་རྡོ་རྗེ་འཆང༌། །མངོན་གྱུར་འགྲོ་བ་མ་ལུས་འདྲེན་གྱུར་ཅིག །ཅེས་པ་འདིའང་རབ་འབྱམས་པ་བློ་བཟང་ཆོས་ལྡན་གྱི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །(༡༩༣བ) ― GLG021_Page_0388 ―
[མ་དཔེ་གཟིགས་ན་འདིར་གནོན།]
ཀ ལྐ དུ རྑ སྱ ན ཀྟོ ད ཡཻ རྨཻ ཏྲ ཧཱ ཡོ པ ནཱ ཀཱ རུ ཎཱ ཤེ ནྡ བོ ར སྨི ནཱ། ཤྲཱ མ བྷཱ ནཱུ ཏྶ བེ བཱ ར དོ པ དྷྱ ཡཱ ཥྟ ནྭི ནཱ ཡཱ དྱ ཧེ ག མྱ བྷི པྲཱ ཡ ཀཿ ཆེར་སྙིགས་དུ༔ཁའི་སྨག་ཏུ་བྱམས་བརྩེའི་རྟས། །ཉེར་དྲངས་ཐུགས་རྗེའི་ཆ་གང་ཟླ་ཟེར་གྱི། །བདེ་སྐྱིད་སྣང་བའི་དགའ་སྟོན་མཆོག་སྦྱིན་མཁན། །རྣམ་འདྲེན་བརྒྱད་ཀྱི་བདག་སོགས་འགྲོ་ལ་དགོངས། །ཐོག་མེད་འཁོར་འཁྱམས་སུ་བསགས་ལས་ཉོན་དྲི། །འཁྲུད་པའི་བྱིན་རླབས་ཆུ་བོ་ལྷབ་ལྷུབ་སྟེང༌། །གཏན་བདེ་འཕྲོག་བྱེད་རྐང་པའི་ཏོག་བརྗིད་པ། །ངེས་ལེགས་འཆི་མེད་ཁང་རྩེར་བསྒྲེང་བར་ཤོག །མགོན་པོ་རྣམས་ཀྱིས་སྨོན་ལམ་གང་བཏབ་པའི། །འབྲས་བཟང་རོ་བརྒྱ་འབར་བར་བདག་ཉིད་ཙམ། །མིན་པར་མཁའ་མཉམ་འགྲོ་ཀུན་ལོངས་སྤྱོད་རྒྱུར། །ཉེར་བསྔོས་བྱང་ཆུབ་མཆོག་བར་འཛད་མེད་ཤོག །རྒྱལ་གཞན་གྱིས་སྤངས་གདུལ་དཀའ་འདུལ་(༡༩༤ན) ― GLG021_Page_0389 ―
[མ་དཔེ་གཟིགས་ན་འདིར་གནོན།]
བ་ལ། །མ་སྨད་ཐུགས་རྗེའི་མཐུ་དཔུང་ཟླ་མེད་པ། །བུ་རམ་ཤིང་པ་ཁྱོད་བསྟན་རབ་འཛིན་པས། །རྒྱན་དྲུག་མཆོག་གཉིས་སྙན་པའི་གྲགས་པ་དཀར། །གསེར་གྱི་མདོག་ཅན་འཁོར་ལོས་མཚན་པའི་ཕྱག །རིང་པོ་རྒྱུ་སྦྱོར་གྱིས་མཚོན་ལུས་ཅན་གྱི། །སྤྱི་བོར་བཀོད་ནས་སྲིད་ཞིའི་འཇིགས་པ་ལས། །དབུགས་དབྱུང་ཕན་བདེའི་ས་ལ་སྦྱོར་བྱིན་རློབས། །ཤིང་རྟ་ཆེ་གཉིས་རྗེས་འབྲངས་གཞུང་ལུགས་ལ། །དེང་ནས་སྐྱེ་བར་ཐོས་བསམ་སྒོམ་པའི་འབྲས། །རིང་མིན་ཀུན་མཁྱེན་ཡེ་ཤེས་མངོན་གྱུར་ནས། །མཁའ་མཉམ་འགྲོ་འདྲེན་དེད་དཔོན་བགྱིད་པར་ཤོག །འབྲོམ་སྟོན་ཆོས་ཀྱི་རྒྱལ་པོའི་སྤྲུལ་པའི་གར། །ངོ་མཚར་འཕྲེང་བར་སྤེལ་ལེགས་མཛེས་རྒྱན་དུ། །མར་མེ་མཛད་དཔལ་རྒྱལ་དབང་བཙོང་ཁ་པའི། །སྣང་བརྙན་མཐོང་ན་མི་མཐུན་མེད་བཀོད་ཅིང༌། །མོས་བློའི་དངས་མཚོར་ཤར་གཟུགས་མཁའ་ཟླའི་གྲལ། །ཉེར་བསྒྲིགས་ངག་དབང་བརྟན་པའི་འཁོར་ལོ་ཡིས། །རྗེས་བཟུང་བློ་གསལ་སྐལ་བཟང་རྒྱ་མཚོའི་མཐར། །ཡོངས་ཁྱབ་འདྲེན་རློམས་འདྲ་འབག་ལེགས་བྲིས་དགེས། །ཟོ་ཆུན་འཁྱུད་ལྟར་འཁོར་བའི་སྲིད་ལམ་ལས། །བགྲོད་དེ་ཐར་པའི་གྲོང་དུ་མ་སླེབས་བར། །ཡང་དག་དགེ་བའི་བཤེས་ཀྱི་ས་མཁན་དང༌། །ནམ་ཡང་འབྲལ་མེད་རྗེས་སུ་འཛིན་པར་ཤོག །ཡོན་སྦྱོར་བྱེད་པོ་འདི་སྣང་མཐོ་རིས་ཀྱི། །བདག་པོའི་ཚེ་དང་དཔལ་འབྱོར་ལ་སྤྱོད་ཅིང༌། །མྱུར་དུ་མཐའ་མེད་འཁོར་བ་མཐའ་ཅན་(༡༩༤བ) ― GLG021_Page_0390 ―
[མ་དཔེ་གཟིགས་ན་འདིར་གནོན།]
དུ། །བྱས་ཏེ་མི་འཇིགས་བཞི་ལྡན་མངོན་གྱུར་ཤོག །ཅེས་འཕྱོང་རྒྱས་སྤུན་བདུན་པ་ལྷུན་གྲུབ་རྒྱ་མཚོས་སྨན་བླ་བདེ་གཤེགས་བརྒྱད། ཐུབ་དབང་ལ་རྒྱན་དྲུག་མཆོག་གཉིས་ཀྱིས་བསྐོར་བ། རྗེ་དགེ་འདུན་གྲུབ་པའི་འཁྲུངས་རབས་ཏེ་གསུམ་བཞེངས་པའི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །བདེ་གཙོ་ཐང༌། གཤེགས་ཡོངས་འདུས་གསང་གསུམ་མི་ཟད་པ། །རྒྱན་གྱི་འཁོར་ལོ་ཡོངས་རྫོགས་ཞི་དང་ཁྲོའི། །སྟང་སྟབས་གར་ལ་རྡོ་རྗེ་སློབ་དཔོན་ཆེ། །ཉེར་བཞེངས་ཐུགས་རྗེ་བྱང་ཆུབ་བར་འཇུག་ཤོག །རྒྱུད་ཐིག་ལེ་བཅུ་དྲུག །སྡེ་རྣམ་བཞིའི་ལྷ་དང་ཇ་མ་ཀུན། །བཅུ་དྲུག་ཐིག་ལེར་ཤར་བའི་གནད་གཅིག་ལ། །ཐུབ་བསྟན་ཡོངས་སུ་རྫོགས་པ་ཉམས་ལོངས་པར། །ཇོ་འབྲོམ་ཡབ་སྲས་རྣམས་ཀྱིས་བདག་བྱིན་རློབས། །དུག་ཐུགས་རྗེ་ཆེན་པོ་འཇིག་རྟེན་དབང་ཕྱུག །ལྔ་ཡེ་དག་ཕུང་པོ་རྣམ་པ་ལྔ། །གནས་བསྒྱུར་ཡེ་ཤེས་ལྔ་ཡི་ཚོན་རིས་མདངས། །འཇིག་རྟེན་དབང་ཕྱུག་གཙོ་འཁོར་རྟེན་བརྟེན་པར། །སྣང་བས་ཆེར་སྙིགས་འགྲོ་རྣམས་ཐར་ལམ་དྲོངས། །རིགས་བཀའ་བརྒྱད་རིགས་འཛིན་ཞལ་ལུང་འཛིན་བྱིན་རླབས་ས་བོན་སྙིང་དབུས་སར། །སྨིན་འབྲས་རིག་པ་སྒྲུབ་སྡེ་བརྒྱད་ཀྱི་སྐུར། །རང་ཤར་ལྷུན་གྲུབ་ཡེ་ཤེས་འོད་ལྔའི་ཟེར། །ཡོངས་ཁྱབ་འཕྲིན་ལས་འགྲོ་ལ་རྟག་འསྔུག་ཤོག །ངོ་ཐུགས་སྒྲུབ་ཡང་སྙིང་ཀུན་འདུས་མཚར་བཀོད་པའི་ཆོ་འཕྲུལ་(༡༩༥ན) ― GLG021_Page_0391 ―
[མ་དཔེ་གཟིགས་ན་འདིར་གནོན།]
མཐའ་ཀླས་དིང༌། །བརྒྱད་གྲངས་མཚན་སྙན་ལྷ་ཚོགས་འབོད་སྒྲོགས་མགོན། །བསྟན་དེས་དཔལ་གྱི་རི་ནས་གངས་ཅན་འགྲོར། །གཟིགས་ཏེ་ཐུགས་རྗེའི་འབླུག་པ་ཆད་མེད་མཛོད། །ཀུན་བཀའ་བརྒྱད་ཞི་ཁྲོ་རྣམ་རོལ། ལ་རྗེས་ཆགས་ཁྲག་གིས་མྱོས་པའི་གར། །བདེ་ཆེན་སང་རོལ་དཔལ་དགུ་ཝཾ་ཡིག་ཐབས། །སྟོང་ཉིད་ཤེས་རབ་ཨེ་དབྱིངས་མཉམ་སྦྱོར་བས། །ཚེ་འདིར་རིག་ངོ་འཕྲོད་ནས་རང་གྲོལ་ཤོག །མ་རུངས་རྟ་མགྲིན་དམ་སྲི་ཟིལ་གནོན། དམ་སྲིའི་སྙིང་ག་འདམ་ལྟ་བུར། །བརྫི་བའི་དྲག་པོའི་བྲོ་ཡིས་ནག་ཕྱོགས་དཔུང༌། །ཟིལ་གནོན་སྲིད་གསུམ་ཁྱབ་པའི་རྟ་སྐད་སྒྲས། །ཁྱབ་མཛད་དབང་ཆེན་ལྷ་དེས་བདག་རྗེས་བཟུང༌། །ཚེ་ཚེ་དཔག་མེད་འཆི་མེད་མཆོག་སྦྱིན། ལྷ་རིགས་འདུས་ལྔ་ལྡན་འཆི་མེད་རྒྱུན། །མཆོག་ཏུ་སྦྱིན་མཛད་དཔལ་ལྡན་གར་དབང་ལྷ། །དངོས་གྲུབ་བྱེ་བའི་གཏེར་མཛོད་སྒོ་འཕར་བརྒྱ། །ཕྱེ་ནས་བདག་སོགས་ཕན་དང་བདེ་ལ་སྦྱོར། །ཉོན་ཡང་གསང་ཀརྨ་དྲག་པོ། མོངས་དུག་ལྔ་ལྷོང་ལྷོང་འཚུབ་དུས་འདིར། །བདུད་བཞིའི་སྙིང་ལ་གནམ་ལྕགས་ཕུར་བའི་དཔལ། །གཟིར་མཛད་ཡང་གསང་དྲག་པོའི་ལྷ་ཚོགས་ཀྱིས། །མཐུ་སྟོབས་ནུས་རྩལ་གཟི་བྱིན་བསྐྱེད་དུ་གསོལ། །མཚོ་སྐུ་གསུམ་སྒྱུ་འཕྲུལ་རོལ་པ། སྐྱེས་རྡོ་རྗེ་གཅིག་པུ་ཉིད་ཀྱི་གར། །དུ་མར་བསྒྱུར་བ་སྐུ་གསུམ་སྒྱུ་མའི་འཕྲུལ། །གཅིག་ཏུ་བརྩེན་པའི་ངོ་མཚར་རོལ་གར་གྱིས། །མཁའ་མཉམ་འགྲོ་ཀུན་རྒྱུད་ལ་བྱིན་ཆེན་ཕོབ། །ཕྱག་ཕྱག་རྡོར་དྲེགས་འདུལ་བདུད་སྡེ་ཕྱེར་འཐག(༡༩༥བ) ― GLG021_Page_0392 ―
[མ་དཔེ་གཟིགས་ན་འདིར་གནོན།]
ན་རབ་འབར་མཚོན་རྣོན་རྡོ་རྗེ་ཡི། །རི་མོ་འཇིག་རྟེན་དྲེགས་པ་མཐའ་དག་གི །གཙུག་ཏུ་འཆར་བ་མཐུ་ཆེན་གསང་བདག་ཀྱེ། །སྡེ་བརྒྱད་ཀུན་འདུལ་ནུས་དབང་སྩལ་དུ་གསོལ། །བགྲང་རྡོ་རྗེ་གྲོ་ལོད། ཡས་རྩ་གསུམ་དཀྱིལ་འཁོར་འཁོར་ལོའི་མགོན། །འཆོལ་བའི་ཁྲོ་རྒྱལ་གཏུམ་དྲག་གྲོ་བོ་ལོད། །རྡོ་རྗེ་ཉེར་གཟས་ཕུར་པ་ཕྱིར་གདེངས་རྩེ། །དགའ་རབ་དབང་ཕྱུག་སྡེ་བཅས་སྙིང་ལ་གཟིར། །ཐབས་ཚེ་དཔག་མེད་དངས་མ་བཅུད་འདྲེན། ཤེས་ཟུང་འཇུག་དགའ་བ་བཞི་ཡི་ཆ། །དངས་མ་བཅུད་དུ་དྲངས་པས་འཆི་བའི་དངོས། །ཉེར་བཅོམ་སྲོག་གི་ཀ་བ་གཡུང་དྲུང་དུ། །འགྲུབ་པར་ཚེ་དཔག་མེད་ཀྱིས་བྱིན་གྱིས་རློབས། །རྟ་རྟ་མགྲིན་ཁམས་གསུམ་ཟིལ་གནོན། ཞལ་མགྲིན་ནས་འཚེར་བ་སྐད་བསངས་སྒྲ། །འབྲུག་སྟོང་ལྟ་བུར་བསྒྲགས་པས་ཁམས་གསུམ་ཀུན། །ཁྱབ་ཚེ་སྣང་སྲིད་དྲེགས་པ་ཟིལ་གནོན་པའི། །མཐུ་རྩལ་དབང་བསྐུར་བདག་ལ་དེང་སྩོལ་ཞིག །རྡོ་དཔལ་ལྡན་ལྷ་མོ་རྗེ་དབྱིངས་ཕྱུག་སྲིད་པའི་རྒྱལ་མོ་རུ། །རྣམ་པར་སྤྲུལ་པ་འདོད་ཁམས་དབང་སྒྱུར་མ། །དམག་དང་ཟོར་གྱིས་མི་བསྲུན་དགྲ་སྡེ་ཀུན། །འསྔོམས་མཛད་རེ་མ་ཏཱི་ཡིས་ལས་རྣམས་སྒྲུབས། །ཨེ་མ་ཆོས་ཀུན་རྫུན་པའི་རང་དཔལ་ལྡན་ལྷ་མོ། འཚང་ལ། །མིག་འཕྲུལ་བྱིས་པ་ཇོ་འདྲིད་ངེས་པར་བརྫུན། །འོན་ཏེ་རྩ་གསུམ་ལྷ་ཚོགས་ལེགས་བཞེངས་པའི། །བསོད་ནམས་ཕ་མཐའ་ནམ་མཁས་གཞལ་ནུས་མིན། །དེ་ཕྱིར་རྒྱ་བོད་ཡིག་རིགས་ལ་སྦྱངས་ཤིང༌། །ཚད་མ་བཞི་ལྡན་ཆོས་ཀྱིས་རྒྱུད་སྨིན་པ། །འཇམ་དབྱངས་བསྟན་(༡༩༦ན) ― GLG021_Page_0393 ―
[མ་དཔེ་གཟིགས་ན་འདིར་གནོན།]
འཛིན་ཇོ་བརྩོན་གཏོང་ཕོད་ཀྱིས། །གཙུག་ལག་གཉིས་པ་ཤེས་འགའ་བརྟེན་ནས་བསྐྲུན། །དགེ་འབྲས་རྒྱལ་བསྟན་དར་ཞིང་དེ་འཛིན་ཀུན། །ཞབས་བརྟན་ཕ་མས་གཙོ་བྱས་མཁའ་མཉམ་འགྲོ། །མཐོ་རིས་ཐེམ་སྐས་ལ་འཛེགས་མི་རིང་བར། །མྱ་ངན་འདས་པའི་གྲོང་དུ་འསྔུག་པར་ཤོག །ཡོན་སྦྱོར་ལས་བྱེད་ཕན་པར་བསྒྲུབས་པ་ཀུན། །སྐྱེ་བར་མི་ཁོམ་གནས་བྲལ་དལ་འབྱོར་ཐོབ། །ཟབ་རྒྱས་ཆོས་ལ་ཐོས་བསམ་སྒོམ་བྱས་ནས། །མྱུར་དུ་ཟུང་འཇུག་སྐུ་བཞི་མངོན་གྱུར་ཤོག །ཅེས་གོང་དཀར་གནས་གསར་བ་སྔགས་བཙུན་འཇམ་དབྱངས་བསྟན་འཛིན་གྱིས་འབད་པ་ཆེན་པོས་ཡོ་བྱད་རྣམས་འདུ་བྱས། ལྷ་བྲིས་པ་གསང་སྔགས་མཁར་དབུ་མཛད་ཚེ་འཕེལ། བྱམས་པ་རྒྱལ་མཚན། བསོད་ནམས་དོན་འགྲུབ། བསོད་ནམས་མགོན་པོ། གོས་བཟོ་པ་དགོས་པ། དོན་ཆེན་པ་རྣམས་ཀྱིས་བྱས་ཏེ་རྒྱ་ཅན་གྱི་བྲིས་ཐང་བཞེངས་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་རབ་དཀར་དང་བའི་ཡིད་ཀྱིས་སྤྱི་འབུལ་བྱས་པའི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་ཛ་ཡནྟུ། །དད་མཚོར་གདན་གསུམ་ཚང་བའི་ངག་གི་དབང༌། །བློ་བཟང་སྐལ་ལྡན་རྒྱ་མཚོའི་སྣང་བརྙན་ལ། །ཤཱཀྱ་སེང་གེ་གནས་བརྟན་བཅུ་དྲུག་དང༌། །རྒྱལ་ཆེན་སྡེ་བཞི་དགེ་བསྙེན་ཧ་ཤང་བཅས། །སྲིད་གསུམ་ཟིལ་གནོན་པདྨ་ཐོད་འཕྲེང་རྩལ། །ཐམས་ཅད་མཁྱེན་དངོས་ཀུན་(༡༩༦ན) ― GLG021_Page_0394 ―
[མ་དཔེ་གཟིགས་ན་འདིར་གནོན།]
མཁྱེན་ཙོང་ཁ་པས། །ཉེར་མཚོན་སྐྱབས་གསུམ་འདུས་ཚོགས་རབ་བཀྲ་བ། །བློ་བཟང་ཆོས་ལྡན་བརྩོན་པས་ཡོངས་བསྐྲུན་དགེས། །སྐྱེ་བར་རྗེས་འཛིན་ནུས་པར་སྨོན་པའི་འབྲས། །འགྲུབ་སྟེ་འདི་ཕྱིར་བདེ་སྐྱིད་དཔལ་ལ་སྤྱོད། །རིང་པོར་མི་ཐོགས་མཁའ་མཉམ་ལུས་ཅན་ཀུན། །སྟོབས་བཅུ་མངའ་བའི་ས་ལ་རབ་སྦྱོར་ཤོག །ཅེས་བྱིང་པ་བློ་བཟང་ཆོས་ལྡན་གྱིས་ངེད་རང་གི་འདྲ་འབག་ལ་གནས་བཅུ་སོགས་ལྷ་མགྲོན་དུ་མས་བསྐོར་བའི་བྲིས་ཐང་གི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བྱུ་རུའི་ལྷུན་པོ་ཉི་འོད་གོས་ཀླུབས་པས། །གཟི་འབར་ཚེ་མཐའ་ཡས་པའི་མགོན་པོ་ཡིས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་བརྟན་བྱིན་རློབས། །ལྷ་ཡི་རྗེར་གྱུར་གསོ་རིག་རྒྱ་མཚོ་ལ། །ཡངས་པའི་བློ་ཡིས་སྐལ་བཟང་གདུལ་བྱའི་མགོན། །ཆོས་ཀྱི་སྙན་གྲགས་འཕྲིན་ལས་ཡོངས་ཁྱབ་པ། །མཚུངས་མེད་མཁས་པའི་དབང་པོར་གསོལ་བ་འདེབས། །སྨན་བླ་དྲང་སྲོང་རིགས་འཛིན་སྲུང་མ་ཡིས། །འདྲེན་པ་མཆོག་ཁྱོད་རྡོ་རྗེ་ལྟར་བརྟན་ཞིང༌། །དཔལ་ལྡན་རྒྱུད་བཞི་ཆ་ལག་བཅས་པའི་གཞུང༌། །འཆད་ཉན་དར་ཞིང་གོ་འཕང་རྒྱས་པར་ཤོག །ཅེས་འདི་གར་རིང་འཚོ་དང་དར་མོ་སྨན་རམས་པ་བློ་བཟང་ཆོས་གྲགས་ཀྱི་གསོལ་འདེབས་བརྟན་བཞུགས་ཤིག་དགོས་ཞེས་འཚོ་བྱེད་ངག་དབང་སྐལ་ལྡན་སོགས་(༡༩༧ན) ― GLG021_Page_0395 ―
[མ་དཔེ་གཟིགས་ན་འདིར་གནོན།]
སློབ་མ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བླ་མ་དགྱེས་མཛད་རྡོ་རྗེ་གུར་གྱི་མགོན། །སྟོབས་འཕྲོག་དབང་པོ་ལ་སོགས་མཁའ་འགྲོ་ལྔས། །ངག་དབང་མཁྱེན་བརྩེའི་བདག་ཉིད་རབ་བརྟན་ཞིང༌། །གསང་ཆེན་བསྟན་པའི་ཉི་འོད་གསལ་བར་ཤོག །ཅེས་པའང་སྐུ་ཞང་དབོན་བརྒྱུད་གསར་ཚེས་ཀྱི་རྟེན་འབྱུང་དུ་ཟ་ཧོར་གྱི་བནྡེས་སྦྱར། །སྒྲིབ་བྲལ་ཡེ་ཤེས་སྤྱན་གྱིས་ཤེས་བྱའི་ཁྱོན། །མངོན་སུམ་གཟིགས་པ་ལྔ་ལྡན་ཟུར་ཕུད་ཅན། །ངུར་སྨྲིག་གར་གྱི་སྒྱུ་འཕྲུལ་བཙོང་ཁ་པ། །གཡེལ་མེད་ཐུགས་རྗེའི་འཇུག་པ་སྐུལ་བྱེད་ན། །རབ་འབྱམས་སྨྲ་བ་དགེ་འདུན་ཆོས་འཕེལ་གྱིས། །བཀའ་དང་བསྟན་བཅོས་པར་དུ་གསར་བསྐྲུན་པ། །ཤོག་གྲངས་ཆིག་ཁྲི་དྲུག་སྟོང་བཞི་བརྒྱ་ལྷག །ཞིབ་མོར་དཔྱད་དེ་ཞུས་དག་བགྱིས་པ་དང༌། །དགེ་གཞོན་བློ་གྲོས་བརྟན་པས་དེའི་ཆེད་དུ། །སྐུ་གསུང་ཐུགས་རྟེན་ཆེས་མང་བཞེངས་པའི་མཐུས། །སྐྱེ་བར་མངོན་མཐོའི་ཐེམ་སྐས་ལ་འཛེགས་ནས། །རིང་མིན་རྣམ་པ་ཐམས་ཅད་མཁྱེན་ཐོབ་ཤོག །ཅེས་པའང་པར་ཞུས་པ་བློ་གྲོས་བརྟན་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བསམ་མཐོང་པ་ཕུན་ཚོགས་དབང་པོའོ། །ཀུན་ཁྱབ་ཀུན་བཟང་པདྨ་ཚེ་དབང་རྩལ། །རང་རིག་རང་གསལ་གཞོན་ནུ་བུམ་པའི་སྐུར། །ཡེ་ནས་ཡེ་ཤེས་ཆེན་པོར་ལྷུན་གྲུབ་མཐུས། །རྟག་ཏུ་རྟག་པའི་རྡོ་རྗེ་བཞུགས་(༡༩༧བ) ― GLG021_Page_0396 ―
[མ་དཔེ་གཟིགས་ན་འདིར་གནོན།]
བྱིན་རློབས། །ཆེ་མཆོག་ཞི་ཁྲོ་འདུས་པའི་སྲིད་ཞིའི་ཚོགས། །ཟིལ་གནོན་འཇམ་དཔལ་འགྲུབ་པའི་བཞད་པ་རྩལ། །རྩ་བ་གསུམ་གྱི་བསྐལ་པ་རྒྱ་མཚོའི་བར། །གཞོམ་མེད་ཁྲི་སྟེང་འོག་མིན་མགོན་ལྟར་ཤོག །ལྷ་སྲས་མངྒའི་མཚན་ཅན་འཕྲིན་ལས་ཆ། །ཨེ་ཝཾ་ལྕོག་སྒར་འདུས་གྲ་མ་དང་བུ། །གསང་སྔགས་ཆོས་འཁོར་གླིང་ཟུར་འབྲེལ་བའི་སྡེ། །སྲིད་མཐའི་བར་དུ་བླ་ནས་བླར་འཕེལ་ཤོག །པདྨ་ཀ་ར་འཕགས་ཡུལ་རིགས་འཛིན་བརྒྱད། །རྗེ་འབངས་ཉེར་ལྔ་སོ་ཟུར་གནུབས་ཉང་སོགས། །མཁས་གྲུབ་རིམ་བྱོན་ཡི་དམ་བསྟན་སྲུང་གིས། །འདོད་པའི་རེ་འབྲས་ཡོངས་སུ་སྨིན་པར་མཛོད། །སྭསྟི་ཀ་ཡི་རྒྱུད་མངས་ལས་དྲངས་པ། །དུས་ཀུན་བཀྲ་ཤིས་སྙན་པའི་གླུ་དབྱངས་ཀྱིས། །ཡངས་པའི་འཇིག་རྟེན་ཁམས་རྣམས་ལེགས་ཁྱབ་སྟེ། །བདེ་སྐྱིད་ཟློས་གར་རྟག་ཏུ་རྩེ་བར་ཤོག །ཅེས་པ་འདིའང་ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་བ་དང་ཡར་འབྲོག་སྟག་ལུང་གསང་སྔགས་ཆོས་འཁོར་བ་མ་བུའི་འདུས་ཚོགས་ཀྱི་ཞལ་འདོན་དུ་རིགས་འཛིན་སྤྲུལ་པའི་སྐུ་མཆོག་གིས་རྩོམས་ཤིག་པའི་གསུང་དང་དུ་བླངས་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དྲུག་ཅུ་ལྷག་བཅས་པཉྩ་ལི་ཀའི་དར། །དབང་གཞུ་ལྟ་བུར་བཀྲ་བའི་ལྡ་ལྡིའི་ཚོགས། །རྣམ་ལྔའི་མཁའ་འགྲོ་དགྱེས་པའི་མཆོད་སྤྲིན་དུ། །མི་ཟད་ནམ་མཁའ་མཛོད་བཞིན་སྤེལ་བའི་མཐུས། །མཐའ་ཀླས་འགྲོ་ལ་བདེ་སྐྱིད་འབྱུང་བའི་གཞི། །ལུང་རྟོགས་བསྟན་པ་དེ་འཛིན་སྐྱེས་བུ་དང༌། །(༡༩༨ན) ― GLG021_Page_0397 ―
[མ་དཔེ་གཟིགས་ན་འདིར་གནོན།]
འདུས་པའི་སྡེ་རྣམས་དཀར་ཆའི་ཟླ་བ་ལྟར། །བླ་ནས་བླར་ཡང་ཆ་ཤས་ཀུན་འཕེལ་ཞིང༌། །རྒྱུ་སྦྱོར་འདི་སྣང་ལྷ་མིའི་བདེ་སྐྱིད་མྱོང༌། །སྐྱེ་བར་རྩ་བ་གསུམ་གྱིས་རྗེས་བཟུང་ནས། །རིང་མིན་ཟུང་འཇུག་རྡོ་རྗེ་འཆང་གི་སྐུ། །མངོན་གྱུར་དོན་གཉིས་ལྷུན་གྱིས་གྲུབ་པར་ཤོག །ཅེས་དན་འབག་བློ་བཟང་དབང་རྒྱལ་གྱིས་ཕན་བདེ་ལེགས་བཤད་གླིང་དུ་སྙན་དར་དྲུག་ཅུ་ལྷག་བཅས་ཕུལ་བའི་ཚེ་ཁ་བྱང་དགོས་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཚེ་དཔག་མེད་སོགས་དུས་གསུམ་རྒྱལ་ཀུན་གྱི། །ཐུགས་རྗེའི་མཐུ་ལས་ངག་དབང་བློ་ཡི་གཏེར། །སྐལ་བཟང་གདུལ་བྱ་རྒྱ་མཚོའི་མགོན་གྱུར་པ། །གཞོམ་མེད་གཡུང་དྲུང་ལྟ་བུར་གནས་པར་ཤོག །ངག་གི་དབང་ཕྱུག་རྗེ་བཙུན་བཙོང་ཁ་པའི། །འཕྲིན་ལས་ནམ་མཁའི་ཕ་མཐར་ཁྱབ་མཛད་པས། །འཇམ་དབྱངས་རབ་དགྱེས་ངོ་མཚར་སྤྲུལ་པའི་སྐུ། །བསྐལ་པ་རྒྱ་མཚོར་འཚོ་གཞེས་ཞབས་བརྟན་ཤོག །དཀོན་མཆོག་རྣམ་གསུམ་ཐུགས་རྗེའི་དཔུང་ཚོགས་དང༌། བསྟན་སྲུང་དམ་ཅན་རྒྱ་མཚོའི་ནུས་པའི་སྟོབས། །རྟེན་ཅིང་འབྲེལ་འབྱུང་བསླུ་བ་མེད་པའི་མཐུས། །ཇི་ལྟར་སྨོན་པ་ལྷུན་གྱིས་གྲུབ་པར་ཤོག །ངེད་རང་དང་དེ་མོ་སྤྲུལ་པའི་སྐུ་ངག་དབང་ནམ་མཁའ་འཇམ་དབྱངས་ཀྱི་བརྟན་བཞུགས་འདི་ལྟ་བུ་དགོས་ཞེས་སྤོ་བོ་སྐུ་སྐྱེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལྷ་སྔགས་ཡེ་ཤེས་རྡོ་རྗེ་རྩེ་བརྒྱ་པ། །ཡིད་སྲུབས་ལྷ་མིན་འཇོམས་ལ་ཐོགས་མེད་དུ། །ཉེར་གདེངས་(༡༩༨བ) ― GLG021_Page_0398 ―
[མ་དཔེ་གཟིགས་ན་འདིར་གནོན།]
བརྟུལ་ཞུགས་གྲུབ་པའི་རྩལ་འཆང་བ། །འཁོར་ལོའི་མགོན་པོ་མཆོག་ལ་གསོལ་བ་འདེབས། །རྨ་བྱ་བརྒྱད་ཀྱིས་རབ་བཏེག་རིན་ཆེན་ཁྲི། །པདྨ་ཉི་ཟླ་འོད་ཟེར་འབར་བའི་དབུས། །མགོན་ཁྱོད་རྩ་གསུམ་འདུས་པའི་ཐོད་ཕྲེང་རྩལ། །ཚེ་དབང་རིགས་འཛིན་ངོ་བོར་རྟག་བཞུགས་གསོལ། །བཻ་རོའི་རྣམ་སྤྲུལ་འགྱུར་མེད་རྡོ་རྗེ་རྩལ། །མགྲིན་པའི་འཁོར་ལོ་གྲོལ་བའི་ངག་གི་དབང༌། །རྒྱལ་དབང་པདྨའི་བསྟན་སྲོག་འཛིན་པའི་ཆེད། །བསྐལ་པ་རྒྱ་མཚོར་གཡོ་མེད་བརྟན་པར་ཤོག །རིགས་འཛིན་གཏེར་བདག་གླིང་པའི་རང་སྐལ་དུ། །ཟབ་རྒྱས་ཆོས་དད་དམ་རྫས་ཡོད་དོ་ཅོག །གེགས་མེད་སྤྱན་དྲངས་ཁ་བའི་སྨན་ལྗོངས་འདིར། །ཕན་བདེ་ཉི་མའི་དངོས་བརྒྱ་འབར་བར་ཤོག །ཨྱོན་མཁན་པོ་པདྨ་འབྱུང་གནས་ཀྱི། །སྨིན་གྲོལ་རིང་ལུགས་འཛིན་པ་འདུས་པའི་གླིང༌། །རྣམ་གསུམ་འཁོར་ལོའི་རིམ་པ་བླ་ནས་བླར། །དཀར་ཆའི་ཟླ་བ་ཇི་བཞིན་འཕེལ་བར་ཤོག །བཀའ་གཏེར་དངོས་བརྒྱུད་བླ་མའི་ཚོགས་རྣམས་དང༌། །ཡི་དམ་སྒྲུབ་པ་བཀའ་བརྒྱད་དཀྱིལ་འཁོར་ལྷ། །མ་མགོན་དྲེགས་པའི་སྡེ་དཔོན་བཅས་པ་ཡིས། །བསམ་དོན་མ་ལུས་གྲུབ་པར་མཛད་དུ་གསོལ། །མཆོག་ཏུ་མི་འགྱུར་བདེ་ཆེན་མཁའ་དབྱིངས་ངོས། །མཆོག་གསུམ་ཐུགས་རྗེའི་ཆུ་འཛིན་ཁྲིགས་པ་ལས། །མཆོག་དང་ཐུན་མོང་དངོས་གྲུབ་འདོད་དགུའི་ཆར། །མཆོག་དམན་བར་མའི་འཇིག་རྟེན་ཀུན་ཁྱབ་ཤོག །ཅེས་པ་འདིའང་རྒྱལ་དབང་པདྨའི་གདུང་འཚོབ་ཆོས་རྒྱལ་གཏེར་བདག་གླིང་པའི་དབོན་ཀུན་དགའ་ཚུལ་ཁྲིམས་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་(༡༩༩ན) ― GLG021_Page_0399 ―
[མ་དཔེ་གཟིགས་ན་འདིར་གནོན།]
དཔལ་གྲོང་སྔགས་རམས་པའོ། །ངོ་མཚར་ཞིང་ཁམས་བདེ་ལྡན་སྐྱེད་ཚལ་དུ། །འདབ་སྟོང་ཟེའུ་འབྲུར་ཀུན་ཕན་ཉ་གང་སྟེང༌། །མཚན་དཔེའི་གཟི་འབར་པད་རཱག་མདངས་འོད་ཅན། །མགོན་པོ་ཚེ་མཐའ་ཡས་པའི་ཐུགས་རྗེའི་མཐུས། །ངག་གི་དབང་ཕྱུག་བློ་བཟང་གྲགས་སྙན་བསྟན། །རྒྱ་མཚོའི་གོས་ཀྱི་ཕ་མཐའ་དེ་སྲིད་བར། །སྤེལ་ཕྱིར་འགྱུར་མེད་གཡུང་དྲུང་རང་བཞིན་དུ། །སྨོན་པའི་རེ་འབྲས་ལྷུན་གྱིས་འགྲུབ་པར་ཤོག །སྟོབས་བཅུ་མངའ་བ་བཞི་ལྡན་མངོན་གྱུར་བར། །འཁོར་བ་མྱ་ངན་ཐང་ལས་ཉེར་བསྒྲལ་ཏེ། །ཐར་པའི་རིན་ཆེན་གླིང་དུ་ཡོངས་བགྲོད་ནས། །འགྲོ་རྣམས་ཕན་བདེའི་འདོད་དགུས་ཚིམ་བྱེད་ཤོག །ཅེས་པ་འདིའང་རི་སྒོ་ཤག་ལྷོ་པ་བློ་བཟང་མཁས་བཙུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཚངས་གནས་འཁོར་ལོའི་ལྟེ་བར་སེང་ཁྲིའི་སྟེང༌། །འཇམ་དཔལ་དབྱངས་དངོས་དགའ་བའི་བཤེས་གཉེན་ལ། །སྙིང་ནས་མི་ཕྱེད་གུས་པས་གསོལ་བ་འདེབས། །མགོན་ཁྱོད་རྡོ་རྗེ་ལྟ་བུར་བརྟན་པར་ཤོག །དཀོན་མཆོག་རིན་ཆེན་རྣམ་གསུམ་མ་ལུས་པ། །འདུས་པའི་ངོ་བོར་རབ་མོས་བྱིན་རླབས་མཐུས། །བདག་སོགས་འདི་ཕྱི་བར་དོ་ཐམས་ཅད་དུ། །བདེ་སྐྱིད་དགའ་སྟོན་དཔལ་ལ་སྤྱོད་པར་ཤོག །ཅེས་པའང་ལྷ་བྲིས་པ་ལེགས་པ་རྒྱལ་མཚན་གྱིས་བསྐུལ་བའི་ངོར་ཟ་ཧོར་གྱི་བནྡེས་བཀོད། །བཞི་ཡིས་ལྷག་པའི་བཅུ་ཕྲག་དངུལ་དཀར་ལས། །པདྨའི་(༡༩༩བ) ― GLG021_Page_0400 ―
[མ་དཔེ་གཟིགས་ན་འདིར་གནོན།]
འདབ་ཅན་དམ་རྫས་གཏོར་མའི་སྣོད། །སྔགས་བན་བློ་བཟང་ངག་དབང་གིས་ཕུལ་མཐུས། །མཆོག་ཐུན་དངོས་གྲུབ་མ་ལུས་ཆར་དུ་ཕོབ། །ཅེས་གྲམ་པ་བ་བློ་བཟང་ངག་དབང་གིས་དགེ་སྐོས་ཀྱི་འཇོག་ལ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ཨེ ཀྵ ར པྲ ཛྙ པ དྨ སྱ ཀེ སཱ ར རཱ སཾ བ མ ཀྵ ཪྻ བཱ རོ པ ཡ སྭཱ དུ རཿ ཨེ་དབྱིངས་ཤེས་རབ་པདྨའི་ཟེའུ་འབྲུའི་བཅུད། །ཝཾ་ཡིག་ཐབས་མཆོག་བྷྲ་མ་རས་མྱངས་པས། །སུ ཁྱ ཤཱུ ནཱ དཤུ མཱ དྷོ ཧ མོ ནཱ དྱ དྷཱུ ཏཱ བ བྷཱི ཥྟཱ ཀྲྀ ཌ པྲཱི ཡ ཏོ མི ཏྲི ཀཱ། བདེ་སྟོང་དངས་མའི་སྦྲང་རྩི་ཧཾ་གི་རྒྱུན། །དྷཱུ་ཏཱིར་མངོན་འདོད་རྩེ་དགའི་མཛའ་ན་མོ། །ཕྱི་རུ་གནས་གསུམ་ཌཱ་ཀཱི་ཡོངས་ཀྱི་གཙོ། །ནང་གི་རྡོ་རྗེ་བཙུན་མོ་ཝཾ་གི་དབྱིབས། །གསང་བ་སེམས་ཉིད་གཅིག་པུའི་རྣམ་འཕྲུལ་གྱི། །གསལ་སྟོང་མཁའ་ལ་སྤྱོད་པའི་སྨིན་ལེགས་མ། །བླ་མེད་ཐེག་པའི་གནད་ཀུན་དབང་བཞི་རུ། །ཚང་པ་རྒྱལ་(༢༠༠ན) ― GLG021_Page_0401 ―
[མ་དཔེ་གཟིགས་ན་འདིར་གནོན།]
ཡུམ་ཁྱོད་ཀྱི་བསྐྱོད་རྫོགས་ལམ། །ཉམས་བསྟར་ཉེ་སྙིང་བཀླགས་པ་དམ་བཅའི་གཟུགས། །རི་མོ་ཡིད་མཁར་ནམ་ཡང་མ་ཡལ་མཐུས། །དྲིལ་བུའི་ཞབས་དང་རྗེ་བཙུན་ནཱ་རོ་པ། །འཁོན་རིགས་འཇམ་མགོན་ཚར་པ་ཡབ་སྲས་སོགས། །གོང་མའི་རྣར་ཐར་བདག་གིས་ཉེར་འཁྱོངས་ནས། །རྟེན་འདིར་རབ་མཛེས་ལྷ་མོས་ཞལ་སྟོན་གསོལ། །སྐལ་དམན་ཚེ་གཅིག་མཁའ་སྤྱོད་མ་འགྲུབ་ན། །སྒྱུ་མའི་སྐྱས་ཆེན་འདེགས་དུས་རྗེས་བཙུན་མས། །སེམས་གྱི་ཁྱེའུ་ཆུང་དཔའ་བོ་དཔའ་མོའི་གྲོང༌། །ཁྲིད་ནས་ཟུང་འཇུག་གོ་འཕང་མངོན་འགྱུར་ཤོག །མིང་བཏགས་སྐྱེ་བའི་གྲགས་སྐམ་མ་ཡིན་པར། །གངྒཱའི་ཀླུང་རྡུལ་སྙེད་ཀྱི་སྤྲུལ་པའི་གར། །ཞིང་ཁམས་རྒྱ་མཚོར་བསྒྱུར་ནས་འགྲོ་འདྲེན་པ། །འཕགས་ཆེན་དམ་པའི་རྣམ་ཐར་འཛིན་པར་ཤོག །བཤད་ཡམས་བློས་བྱས་ཟོག་རྫུན་དང་བྲལ་བ། །སྙན་བརྒྱུད་ཚད་མ་བཞི་ཡིས་བརྒྱན་པའི་ཆོས། །རྣམ་དག་བསྟན་པས་སྐལ་བཟང་གདུལ་བྱ་ཀུན། །འདྲེན་པའི་དེད་དཔོན་མཆོག་ཏུ་བདག་འགྱུར་ཤོག །ཅེས་པ་འདིའང་ལེགས་སྦྱར་གྱི་བསྟན་བཅོས་པཱ་ཎི་པ་སོགས་གཙུག་ལག་རྒྱ་མཚོར་བློ་གྲོས་གྱི་འཇུག་པ་ཡངས་པ་སེ་སྐར་རིགས་ཀྱི་ཐེག་ལེ་འདར་ལོ་ངག་དབང་ཕུན་ཚོགས་ལྷུན་གྲུབ་ཀྱིས། དགེ་སྦྱོར་གྱི་དམིགས་རྟེན་དུ་རྡོ་རྗེ་བཙུན་པོའི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་སློབ་བཤད་པ་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་འཇམ་དཔལ་(༢༠༠བ) ― GLG021_Page_0402 ―
[མ་དཔེ་གཟིགས་ན་འདིར་གནོན།]
དབྱངས། །བློ་བཟང་གྲགས་པའི་ཆོས་སྲིད་བསྟན། །རྒྱ་མཚོའི་གོས་ཅན་མཐར་སྤེལ་བའི། །མགོན་ཁྱོད་ཚེ་དཔག་མེད་པ་ལྟར། །འཁོར་བ་མ་སྟོངས་བར་བཞུགས་ནས། །འགྲོ་ཀུན་ཕན་དང་བདེ་བ་ཡི། །ཕུལ་བྱུང་དགའ་སྟོན་རྟག་སྦྱོར་ཤོག །ཞྭ་སེར་ཅོད་པན་འཆང་བའི་བསྟན། །དེ་འཛིན་དགེ་འདུན་འདུས་པའི་སྡེ། །རྒྱ་ཧོར་བོད་ཡུལ་ཡོངས་ཁྱབ་ཅིང༌། །ལུས་ཅན་ངལ་གསོར་འགྱུར་བར་ཤོག །ས་སྐྱོང་རྒྱལ་པོའི་སྐུ་ཚེ་དང༌། །མངའ་ཐང་ཆབ་སྲིད་མཚན་ཇུས་རྒྱས། །ངག་གིས་འདི་བསྐུལ་མཆོད་སྤྲིན་སྦྱོར། །དབང་བའི་ཤེས་རབ་རབ་ཏུ་རྒྱལ། །དཔལ་ལྡན་མྱུར་མཛད་ཡེ་ཤེས་མགོན་པོ་དང༌། །དབྱེར་མེད་བླ་མ་སྙིང་གའི་པདྨ་རུ། །བྱང་ཆུབ་བར་དུ་མི་འབྲལ་རྟག་བཞུགས་ནས། །མཆོག་མཐུན་དངོས་གྲུབ་མ་ལུས་སྩལ་དུ་གསོལ། །ཞེས་པའང་བསམ་བློ་ཆོས་རྒྱ་མཚོའི་ངོར་ཟ་ཧོར་བནྡེས་སྦྱར། །ངག་ལ་བརྗོད་པ་རྣམ་དག་དབང་ཕྱུག་བློས། །སྐལ་བཟང་རྒྱ་མཚོ་དགའ་བསྐྱེད་འདྲེན་པ་མཆོག །འོག་མིན་ཞིང་མགོན་ལྟ་བུར་རྟག་བཞུགས་ནས། །ཕན་བདེའི་ཉི་མས་འཇིགས་རྟེན་གསུམ་ཁྱབ་ཤོག །གསུང་ངག་ཆད་མེད་དབང་དང་གྲོལ་བའི་ལམ། །ལེགས་སྟོན་བླ་མ་ཡི་དམ་ཆོས་སྲུང་ཚོགས། །ཀུན་བཟང་མཆོད་པས་མཉེས་བྱེད་ཤེས་རབ་ཀྱིས། །མ་སྨད་རི་མོ་ཐགས་སུ་བསྐྲུན་འདི་མཚར། །ཞེས་པའང་ཝཱ་གིནྡྲ་པྲ་ཛྙཱས་རྩོལ་བས་བསྒྲུབས་པའི་ཚེ་མྲྀ་དུ་སྭ་ར་པྲི་ཡ་སྱ་མི་ཏྲས་བྲིས་པ་དགེ་བར་གྱུར་ཅིག །གཙང་(༢༠༡ན) ― GLG021_Page_0403 ―
[མ་དཔེ་གཟིགས་ན་འདིར་གནོན།]
བྱེད་འདབ་སྟོང་ཀེ་ས་ར་ཡི་དབུས། །མཚན་དཔེའི་ལང་ཚོ་མིག་གི་གཟིལ་དངར་ཅན། །གཞོམ་མེད་འཕོ་བ་ཆེན་པོའི་སྐུ་འགྲུབ་པའི། །ཐོད་ཕྲེང་རྩལ་སོགས་རྩ་བརྒྱུད་བླ་མ་དང༌། །ཞི་ཁྲོ་འདུས་སོ་ཅོག་གི་རྟེན་བརྟེན་པར། །ཡོངས་སུ་རྫོགས་པའི་ཁྱབ་བདག་ཧེ་རུ་ཀ༔ །ཆེ་མཆོག་དཔལ་དགུའི་ཡེ་ཤེས་སྒྱུ་མའི་འཕྲུལ། །རྣམ་གསུམ་ཡོ་གར་འབྱམས་ཀླས་ཡི་དམ་ལྷ། །ཕོ་རྒྱུད་མོ་རྒྱུད་སྣང་སྲིད་དྲེགས་པའི་ཚོགས། །གཉིས་མེད་རིག་པའི་རང་རྩལ་ཁྲག་འཐུང་དབང༌། །དགྲ་སྲོག་གཅོད་ལ་དཔལ་མགོན་མ་ནིང་ནག །གནམ་ལྕགས་སྤུ་གྲི་ངར་མའི་བསྟན་སྲུང་ཀྱི། །དིང་དུས་པད་འབྱུང་གསུང་གི་སྲས་གཅིག་པུ། །བཻ་རོའི་རྣམ་སྤྲུལ་ཟབ་གཏེར་ཆོས་ཀྱི་སྒོ། །འབྱེད་མཛད་རྡོ་རྗེ་སེམས་དཔའ་མི་ཡི་ཟོལ། །ཉེར་འཛིན་གང་གི་བཞེད་པའི་སྙིང་པོའི་དོན། །དངོས་ཉམས་གཏེར་བྱོན་ལུང་བསྟན་ལས་བྱུང་ལྟར། །ཨྱོན་སྨིན་གྲོལ་གླིང་ཞེས་རིག་སྔགས་སྡེའི། །གནྡྷོ་ལ་དང་དཔའ་བོའི་གྲོང་ཁྱེར་གྱི། །དགོན་གནས་ལས་ཀྱི་འཁོར་ལོའི་མཛད་པའི་འབྲས། །རྒྱལ་བསྟན་སྙིང་པོའི་ཡང་སྙིང་ཐེག་པའི་རྩེ། །བཀའ་གཏེར་ཟུང་འཇུག་སྔ་འགྱུར་རིང་ལུགས་ཀྱིས། །ཁ་བའི་སྨན་ལྗོངས་དོག་པོར་ཡོངས་བཀོད་མཐུས། །ཨཽཌྜི་ཡ་ནའི་གླིང་དང་མཚུངས་པར་ཤོག །རྒྱལ་སྲས་གཏེར་བདག་གླིང་པའི་སྐུ་ཚེ་འཕྲེང༌། །ཀུན་སྒྲོལ་ཕ་མཐར་ཕྱིན་ནས་རང་སྐལ་གཏེར། །རྫོགས་པར་གདན་དྲངས་དེ་འཛིན་སྨིན་གྲོལ་གླིང༌། །ཆོས་སྲིད་མཐའ་དག་བླ་ནས་བླར་འཕེལ་ཤོག །པདྨ་འབྱུང་གནས་དགྱེས་(༢༠༡བ) ― GLG021_Page_0404 ―
[མ་དཔེ་གཟིགས་ན་འདིར་གནོན།]
པའི་སྤྱན་རས་ཀྱི། །གཟིགས་པ་མི་ཡོལ་རྡོ་རྗེ་ཐོགས་མེད་རྩལ། །ཟིལ་གནོན་འཇམ་དཔལ་གྲུབ་པའི་རིག་པ་འཛིན། །ཨ་ཧཾ་སྲོག་གི་ཀ་བ་ཚུགས་པར་ཤོག །མི་བསྲུན་བརླང་པོར་སྤྱོད་པ་དགྲ་བགེགས་དཔུང༌། །ཕྱོགས་མཚམས་སྟེང་འོག་གར་གནས་མ་ལུས་པ། །རྩ་གསུམ་མཐུ་སྟོབས་འབར་བའི་ཐོག་མདའ་ཡིས། །ཕྱེར་བཏགས་མིང་གི་ལྷག་མར་གཏོང་བར་ཤོག །གནམ་བསྐོས་དགའ་བ་ལྡན་པའི་ཕོ་བྲང་ནས། །ཡངས་པའི་ས་ཆེན་སྐྱོང་བ་རྒྱལ་པོའི་ཁྲིམས། །གསེར་གྱི་གཉའ་ཤིང་མཆོག་དམན་མཐའ་དག་གི །ཕྲག་པར་ནམ་ཡང་མི་འགྱུར་ལྕི་བར་ཤོག །བོད་ཡུལ་སཱ་ལའི་ལྗོངས་འཁོད་འབངས་རྣམས་ཀུན། །གཡུལ་འཁྲུག་དབུལ་ཕོངས་ནད་རིམས་རྩོད་པའི་སྐྱོན། །ཡོངས་བྲལ་རིང་པོའི་ཚེ་དང་རྣམ་ཐོས་བུའི། །དཔལ་འབྱོར་ལ་སྤྱོད་རྫོགས་ལྡན་དུས་ལྟར་ཤོག །རིགས་འཛིན་རྗེ་ལ་དངོས་བརྒྱུད་འབྲེལ་ཐོགས་ཚོགས། །སྐྱེ་བར་སྒྲིབ་པའི་ལུས་ཀྱི་འཆིང་རྒྱ་ལས། །གྲོལ་ནས་ཞི་བའི་གོ་འཕང་བདེ་བ་ཆེ། །མྱོང་བའི་བཟང་པོའི་སྐལ་པ་ཅན་འགྱུར་ཤོག །དེ་ལྟར་བདེན་བརྗོད་སྨོན་ལམ་ས་བོན་རྣམས། །མཆོག་གསུམ་ཐུགས་རྗེའི་བརླན་གཤེར་གྱིས་སྨིན་པས། །བཞེད་དོན་དཔག་བསམ་ཡོངས་འདུ་ས་བརྟོལ་འབྲས། །ལས་ལྡན་འཆི་མེད་དགའ་སྟོན་ལ་སྤྱོད་ཤོག །ཅེས་པ་འདིའང་གཏེར་ཆེན་ཆོས་ཀྱི་རྒྱལ་པོ་རྡོ་རྗེ་གླིང་པ་སོགས་གཏེར་སྟོན་རིམ་པར་བྱོན་པའི་ཡང་སྲིད་སྤྲུལ་པའི་སྐྱེ་མཆོག་པདྨ་དབང་འགྱུར་མེད་རྡོ་རྗེ་རྩལ་གྱིས་གཡོ་རུ་གྲ་ཕྱི་ཡོན་ཏན་དུ་མས་བརྒྱན་པའི་ཡུལ་གྲུར་ཨྱོན་སྨིན་གྲོལ་གླིང་པར་གྲགས་པའི་སྔགས་(༢༠༢ན) ― GLG021_Page_0405 ―
[མ་དཔེ་གཟིགས་ན་འདིར་གནོན།]
སྡེའི་རྟེན་བརྟེན་པ་མཐའ་དག་འཕྲིན་ལས་ཀྱི་ཆ་ཤས་ལས་ལེགས་པར་བསྐྲུན་པའི་ཚེ་གཟུངས་འབུལ་གྱི་སྤེལ་ཚིག་དང་ཚོགས་འདོན་གྱི་ཆེད་དུ་རྩོམས་ཤིག་པར་བཀས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞོ་བཞིས་ལྷག་པའི་ཉེར་གཉིས་སྲང་གི་དངུལ། །ལས་གྲུབ་ཀོང་བུ་ཕུལ་བས་མ་རིག་མུན། །གསལ་བྱེད་ཡེ་ཤེས་སྒྲོན་མེས་འཇིག་རྟེན་གསུམ། །ཕན་བདེའི་སྣང་བ་མཆོག་ལ་འགོད་པར་ཤོག །ཅེས་པ་རྩེས་དང་བྲག་གདོང་པ་བློ་བཟང་ཚེ་དབང་གིས་སྔགས་རམས་པ་བྱས་སྐབས་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །མཁྱེན་བརྩེ་རབ་ཏུ་ཡངས་པའི་བློ་ལྡན་མས། །རྡོ་རྗེ་བཙུན་མོ་སྒྲུབ་པ་ཉེ་བའི་ལམ། །བསྟར་པའི་འབྲས་བུས་མ་དང་དཔའ་བོའི་གླིང༌། །མཁའ་སྤྱོད་ཞིང་དུ་ཐོགས་མེད་བགྲོད་བྱིན་རློབས། །ང་རྒྱལ་སེར་སྣའི་ལས་སྒྲིབ་བག་ཆགས་ཀུན། །ཡོངས་དག་ཚར་བའི་ཕུང་པོ་གནས་བསྒྱུར་ཏེ། །མཉམ་ཉིད་ཡེ་ཤེས་ངོ་བོར་སངས་རྒྱས་ནས། །ནམ་མཁའི་མཐའ་སྙེད་འགྲོ་རྣམས་སྒྲོལ་བར་ཤོག །སློབ་ལམ་སྤྱོད་ཚེ་ཚད་མ་བཞི་ལྡན་ཆོས། །སྟོན་པའི་རྡོ་རྗེ་སེམས་དངོས་བཤེས་གཉེན་གྱིས། །རྗེས་བཟུང་འདུས་པ་གསུམ་གྱི་འཕྲང་བསྒལ་ཏེ། །རིང་མིན་ཟུང་འཇུག་ཡེ་ཤེས་མངོན་འགྱུར་ཤོག །ཅེས་འ་ཞ་མཁྱེན་རབ་བློ་ལྡན་གྱི་ཕྱི་རྟེན་དུ་འ་ཞ་མཁྱེན་རབ་རྣམ་རྒྱལ་གྱིས་རྗེ་བཙུན་མཁའ་སྤྱོད་དབང་མོར་རིན་འབྱུང་གིས་བསྐོར་བའི་བརྒྱ་ཐང་བཞེངས་པའི་ཚེ་དགོས་ཚུལ་ལྟར་(༢༠༢བ) ― GLG021_Page_0406 ―
[མ་དཔེ་གཟིགས་ན་འདིར་གནོན།]
ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་གྲགས་སོ། །ཟིལ་གནོན་འཇམ་དཔལ་དཔའ་བོ་བཞད་པ་རྩལ། །འཁོར་ལོའི་མགོན་པོར་ངེས་ནས་གསོལ་འདེབས་ན། །གཡོ་མེད་རྡོ་རྗེ་ལྟར་བརྟན་བྱིན་རླབས་ཀྱིས། །བདུད་རྩིས་བདག་སྙིང་ཟ་མ་ཏོག་འགང་ཤོག །ཅེས་པའང་ནམ་མཁའ་རྒྱ་མཚོས་དགོས་ཚུལ་ལྟར་ཟ་ཧོར་གྱི་བནྡེས་བྲིས། །དགའ་ལྡན་རྣམ་པར་རྒྱལ་བའི་འདུས་གླིང་གི །སངས་རྒྱས་གཉིས་པ་རིམ་བྱོན་རིན་ཆེན་ཁྲིའི། །མཛེས་རྒྱན་སྤྲུལ་པའི་ཟློས་གར་ངག་གི་དབང༌། །བློ་བཟང་བསྟན་པ་འཛིན་ལ་གསོལ་བ་འདེབས། །མགོན་ཁྱོད་སྤྱི་དང་ཁྱད་པར་མཐའ་འཁོབ་ཀྱི། །འགྲོ་རྣམས་ཐར་པར་ཁྲིད་པའི་དེད་དཔོན་དུ། །ཚེ་དཔག་མེད་མགོན་ལྟ་བུར་རབ་བརྟན་ཞིང༌། །ཆོས་འཁོར་རྒྱུན་ཆད་མེད་པར་སྐོར་བར་ཤོག །ཅེས་ཤར་ཁང་ཆོས་ཀྱི་རྒྱལ་པོའི་བརྟན་བཞུགས་འདི་ནི་འཇམ་དབྱངས་སྤྲུལ་པའི་སྐུའི་གསུང་གིས་བསྐུལ་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མ་འདྲིས་ལུས་ཅན་ཀུན་གྱི་གཉེན་གཅིག་པུ། །ལྔ་བརྒྱའི་མགོན་པོ་ཤཱཀྱ་སེང་གེ་ཡི། །བསྟན་པའི་གྲིབ་མར་འགྲོ་རྣམས་ངལ་གསོ་བ། །ངག་དབང་བློ་བཟང་རྒྱ་མཚོར་གསོལ་བ་འདེབས། །དད་པའི་མེ་ལོང་ངོས་སུ་ཐུགས་རྗེའི་གཟུགས། །མངོན་སུམ་ཤར་བའི་བྱིན་རླབས་རྨད་པོ་ཆེས། །སྐྱེ་བར་དལ་འབྱོར་ཚང་བའི་རྟེན་རྙེད་ནས། །རིང་མིན་སྟོབས་བཅུ་མངའ་བ་ཐོབ་པར་ཤོག །ཅེས་པའང་ཨུ་ཆུ་མུ་ཆུ་ཆེ་ཆེན་ཆིང་དབང་གི་དེ་ཤི་དང༌།(༢༠༣ན) ― GLG021_Page_0407 ―
[མ་དཔེ་གཟིགས་ན་འདིར་གནོན།]
པོ་རོ་གཉིས་ཀྱི་ངོར་ཟ་ཧོར་གྱི་བནྡེས་སྦྱར། །བཀའ་དྲིན་མཉམ་མེད་རྩ་བའི་བླ་མ་དང༌། །དབྱེར་མེད་སེང་ལྡེང་ནགས་ཀྱི་སྒྲོལ་མ་ལ། །དེང་ནས་བྱང་ཆུབ་སྙིང་པོར་མཆིས་ཀྱི་བར། །གསོལ་འདེབས་སོ་ཐུགས་རྗེས་བྱིན་གྱིས་རློབས། །གླང་ཆེན་སེང་གེ་མེ་དང་སྨྱོན་པ་སྦྲུལ། །ལྕགས་སྒྲོག་ཤ་ཟ་རྒྱ་མཚོའི་འཇིགས་གྲོལ་ཏེ། །ཚེ་དང་བསོད་ནམས་དཔལ་འབྱོར་མངའ་ཐང་སོགས། །ཐུན་མོངའདོད་པའི་རེ་བ་ཡོངས་འགྲུབ་ཤོག །སྐྱེ་བ་ཀུན་ཏུ་མི་ཁོམ་གནས་བརྒྱད་སྤངས། །མཐོ་རིས་སྐས་ལས་ཐར་པའི་ཁང་པར་ཞུགས། །ཉིང་མཚམས་སྦྱར་དུས་བདེ་ལྡན་ཞིང་ཁམས་སུ། །སྐྱེས་ནས་འོད་དཔག་མེད་ཀྱི་རྗེས་འཛིན་ཤོག །ཅེས་པའང་སྒྱིད་ཐང་ནོར་བུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རང་ལུས་ཞི་ཁྲོའི་དཀྱིལ་འཁོར་ཆེན་པོ་རུ། །མངོན་སུམ་ངོ་སྤྲད་ཁྱབ་བདག་བླ་མ་དང༌། །དབྱེར་མེད་རིགས་འཛིན་རྡོ་རྗེ་དྲག་པོ་རྩལ། །རིག་པའི་རང་ངོར་ངེས་པས་གསོལ་བ་འདེབས། །མ་རིག་མལ་དུ་མི་ཁོམ་གཉིད་པོ་ཆེ། །སང་བྱེད་རྩ་གསུམ་ཐུགས་རྗེའི་སྐྱ་རེངས་མས། །ཡང་སྲིད་བཅུ་གཉིས་ཁྱིམ་ཀུན་མངོན་མཐོ་དང༌། །ངེས་ལེགས་སྣང་བའི་རྩེད་འཇོར་རོལ་བར་ཤོག །སྐྱབས་མཆོག་བླ་མ་ལྷར་བཅས་བྱིན་རླབས་ཀྱིས། །གནས་སྐབས་ནད་གདོན་དབུལ་ཕོངས་དགྲ་ལས་རྒྱལ། །རིང་འཚོའི་ཚེ་དང་ལོངས་སྤྱོད་དབང་ཐང་རྣམས། །འཆི་མེད་བདག་པོའི་དཔལ་དང་སྐལ་(༢༠༣བ) ― GLG021_Page_0408 ―
[མ་དཔེ་གཟིགས་ན་འདིར་གནོན།]
མཉམ་ཤོག །རང་རིག་པད་འབྱུང་གདོད་ནས་ལྷུན་གྲུབ་གདངས། །མ་འདྲེས་འོད་ལྔར་མངོན་སུམ་ཤར་བའི་རྩལ། །ཆོས་ཉིད་ཟད་སར་འཁྱོལ་ནས་འཕོ་བ་ཆེ། །ཚེ་འདིར་ཉམས་སུ་མྱོང་བར་བདག་བྱིན་རློབས། །དྲུག་ལྡན་རྩ་བརྒྱུད་བླ་མ་ཡི་དམ་དང༌། །ཆོས་ནོར་གཏེར་སྲུང་མཐུ་ལྡན་ཚོགས་རྣམས་ཀྱིས། །མཆོག་ཐུན་དངོས་གྲུབ་ཆར་ཀྱིས་བདག་རྒྱུད་ཞིང༌། །ཉེར་བརླན་གཏན་བདེའི་མྱུ་གུ་སྨིན་པར་ཤོག །ཅེས་གྲ་ཕྱི་སྨོན་གྲུབ་པ་རིན་ཆེན་བཀྲ་ཤིས་ཀྱིས་བྱང་གཏེར་ཐུགས་སྒྲུབ་དྲག་པོ་རྩལ་གྱི་ཉམས་ལེན་དང་འབྲེལ་བ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྒྱལ་ཀུན་ངོ་བོ་ཚེ་དབང་རིགས་འཛིན་དང༌། །དབྱེར་མེད་ཆེས་ཆོག་འདུས་རྩལ་བླ་མ་རྗེ། །སྙིང་དབུས་པདྨར་བཞུགས་ལ་གསོལ་འདེབས་ན། །བྱང་ཆུབ་བར་དུ་བྱིན་གྱིས་བརླབ་ཏུ་གསོལ། །རྩ་གསུམ་ཐུགས་རྗེ་རྟེན་འབྲེལ་མི་བསླུ་དང༌། །བདག་སོགས་རྣམས་ཀྱིས་དད་མཐུས་མགོན་པོ་ཁྱོད། །སྐུ་ཚེ་གཡུང་དྲུང་རང་བཞིན་ལྟར་གྱུར་ནས། །བཞེད་པའི་དོན་ཀུན་ལྷུན་གྱིས་འགྲུབ་པར་ཤོག །ཅེས་པའང་རྟ་དཔོན་རྣམ་འཇོམས་ཀྱིས་རིང་འཚོའི་རྟེན་འབྱུང་བསྒྲིགས་པའི་ཚེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བདེ་ལྡན་ཞིང་མགོན་ཕྱག་གི་བུམ་བཟང་ལས། །ཟག་མེད་བདུད་རྩི་ཚེ་ཡི་སྙིང་པོའི་བཅུད། །རེག་པའི་མོད་ལ་འགྲོ་རྣམས་འཆི་བདག་གི། །མེ་ཏོག་མདའ་ཅན་གཡུལ་ལས་རྒྱལ་བར་མཛོད། །(༢༠༤ན) ― GLG021_Page_0409 ―
[མ་དཔེ་གཟིགས་ན་འདིར་གནོན།]
མི་ཡི་སེང་གེའི་རིང་ལུགས་འཛིན་པའི་རྗེ། །མི་ཤིགས་རྡོ་རྗེའི་ཁྲི་ལ་རྟག་བཞུགས་ནས། །མི་འགྱུར་མཆོག་ཏུ་ཡངས་པའི་བདེ་བ་ཆེར། །མི་སོགས་ལྷར་བཅས་འགྲོ་ཀུན་སྦྱོར་བར་ཤོག །ཚངས་སྲས་ངག་གི་དབང་ཕྱུག་ངང་མོ་དཀར། །བློ་གྲོས་འོ་མའི་རྫིང་བུར་རྟག་རྒྱུ་བས། །མཁས་བཙུན་བཟང་པོའི་འཕྲིན་ལས་རྒྱ་མཚོ་ཆེས། །མཐའ་ཀླས་བསྐལ་པའི་བར་དུ་ཁྱབ་པར་ཤོག །ཕ་རོལ་རྒོལ་བར་འཇིགས་མེད་འཆད་རྩོད་དང༌། །རྩོམ་པའི་གོ་ཆ་བརྟན་པོས་ཐུབ་བསྟན་གྱིས། །ལང་ཚོ་སླར་འཕེལ་ཐོས་བསམ་སྒོམ་པའི་སྡེ། །འཇམ་དབྱངས་དགའ་བའི་བཤེས་ཁྱོད་ཞབས་བརྟན་ཤོག །དགའ་ལྡན་ཡིད་དགའ་ཆོས་འཛིན་གཉིས་པའི་གཟུགས། །གཙང་རོང་སར་འཕོས་བྱམས་ཆེན་འདུས་ཚོགས་གླིང༌། །སྲིད་མཐའི་བར་དུ་བཤད་དང་སྒྲུབ་པ་ཡིས། །དཀར་ཆའི་ཟླ་བ་ལྟ་བུར་འཕེལ་བར་ཤོག །འཇིག་རྟེན་ཀུན་ཏུ་འགྲོ་རྣམས་ནད་མཚོན་དང༌། །དབུལ་ཕོངས་ཉེས་བརྒྱའི་དྲི་མ་ཉེར་ཞི་ཞིང༌། །རྫོགས་ལྡན་དུས་ལྟར་བདེ་སྐྱིད་ཕུན་ཚོགས་ལ། །སྤྱོད་པའི་སྐལ་བ་བཟང་པོར་བདག་འགྱུར་ཤོག །ཅེས་རིང་འཚོའི་ཚིགས་བཅད་འདིའང་གསོ་རིག་གཙུག་ལག་འཛིན་པ་སྒོ་མོ་རབ་པ་རཏྣ་ཨཱི་ཤས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །དཔའ་གཏུམ་སྟག་སྟེང་གར་དགུའི་ཉམས་འགྱུར་ཅན། །འཆོལ་བའི་ཁྲོ་རྒྱལ་གནམ་ལྕགས་ཕུར་བུ་ཡིས། །བདུད་དཔུང་ཚར་བཅད་ཚེ་ཡི་བར་གཅོད་ཀུན། །བརྟུལ་(༢༠༤བ) ― GLG021_Page_0410 ―
[མ་དཔེ་གཟིགས་ན་འདིར་གནོན།]
ཞུགས་དྲག་པོའི་སྟོབས་ཀྱིས་ཐལ་བར་རློག །མཚོ་སྐྱེས་རིགས་འཛིན་བླ་མའི་ཐུགས་རྗེའི་མཐུས། །འཁོར་ལོའི་མགོན་པོ་རྡོ་རྗེ་ཐོགས་མེད་རྩལ། །མི་འགྱུར་སྲོག་གི་ཀ་བ་གཡུང་དྲུང་གི །ངོ་བོར་བྱིན་རླབས་བསམས་དོན་ལྷུན་གྲུབ་ཤོག །ཅེས་པ་འདིའང་ལྷ་ས་བ་བློ་བཟང་རབ་བརྟན་གྱིས་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཁ་ཚར་ཕུན་ཚར་དང་ལྡན་ཟ་འོག་གི །རྣམ་བཀྲ་ངོ་མཚར་རི་མོ་བཀོད་ལེགས་ཅན། །སྐྱབས་གསུམ་དམ་པར་བསྐྲུན་པའི་སྲི་ཞུ་ཡིས། །ཚོགས་གཉིས་ཕུང་པོ་བླ་ནས་བླར་མཐོ་ཤོག །བགྲང་ཡས་ཞི་ཁྲོ་དགེ་འདུན་དཀོན་མཆོག་གཟུགས། །སྐྱེ་རྒུའི་མིག་ལ་མངོན་སུམ་རབ་གསལ་བར། །བཀུར་སྟིའི་ཆེད་དུ་གནམ་རྒྱན་ཡོངས་སྤེལ་བས། །འཁོར་འདས་ཡོན་ཏན་དབྱར་མཚོ་ལྟར་འཕྱུར་ཤོག །མཆོད་དཔོན་ངག་དབང་ཤེས་རབ་སྤུན་ཚས་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད་པ་དགེ །དཔལ་ལྡན་རྩ་གསུམ་མཐུ་བྱིན་རབ་འབར་བས། །བདུད་སྡེའི་གཡུལ་ལས་རྣམ་པར་ཡོངས་རྒྱལ་བ། །སྲིད་ཞིའི་ཕན་བདེའི་འབྱུང་གནས་རྡོ་རྗེའི་ཐེག །ལེགས་བཤད་དབྱངས་སྙན་འཁྲོལ་བའི་འདུལ་གླིང་དུ། །རྒྱ་ཧོར་བཟང་གོས་སྣ་ཚོགས་ཉེར་བསྒྲིགས་ནས། །ནམ་མཁའི་རྒྱན་དུ་སྒོ་འཕར་ཕྱེ་བའི་མཛོད། །མཆོད་སྤྲིན་སྤྲོ་བྱེད་ངག་དབང་ཤེས་རབ་ཀྱི། །སྟོན་མཚན་ཟླ་འདྲའི་ལྷག་བསམ་གྱིས་ཕུལ་མཐུས། །ཐུབ་བསྟན་དེ་འཛིན་སྡེར་བཅས་མཐའ་ཀླས་འགྲོའི། །བསོད་(༢༠༥ན) ― GLG021_Page_0411 ―
[མ་དཔེ་གཟིགས་ན་འདིར་གནོན།]
ནམས་བྱེ་བའི་ཞིང་དུ་ཉེར་འཕེལ་ཞིང༌། །རྒྱུ་སྦྱོར་འདི་དང་གཏན་གྱི་ལེགས་ཚོགས་ཀུན། །རབ་རྒྱས་འདོད་པའི་རེ་བ་ཡོངས་སྐོང་ཤོག །དམར་སེར་ཅན་ཞེས་པ་མེ་མོ་སྦྲུལ་གྱི་ལོར་དིང་ཕོན། ཧོར་གོས་བར་སྣང་མཛོད་ལེ་ཚན། རྒྱ་གོས་ཐོན་ཐི་ཚོན་ཁྲ། རྒྱན་བཞི་སོགས་གོས་སྣ་ཚོགས་ལས་གྲུབ་པའི་རྒྱུར་གྲ་རྒན་དང་ལྷ་ས་གནས་ཚད་ཀྱིས་གསུམ་བཅད་འབྲིང་པོར་བརྩིས་པའི་གོང་ཐང་གསེར་ཞོ་བརྒྱད་བརྒྱ་རི་བ་འབྲས་སྤུངས་གསང་སྔགས་ཕོ་བྲང་གི་ཁྲིའི་སྟེང་ལྷོ་ཏལ་རྒྱུད། ཤར་གླིང་གཉིས། ནུབ་གླིང་གཉིས། བྱང་གླིང་གཅིག་བཅས་འདུ་ཁང་ཁེབས་པའི་བླ་བྲེ་ཡར་ཀླུངས་ཁེ་གསུམ་པ་མཆོད་དཔོན་ངག་དབང་ཤེས་རབ་སྤུན་ཚས་ཕུལ་བའི་ཚེ་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད་པ་ལཀྵྨཱི། །སྒྲིབ་ཤར་གླིང་གཉིས་པ་བྲལ་རྣམ་པ་ཐམས་ཅད་མཁྱེན་པའི་ཐུགས། །རིས་མེད་འགྲོ་འདྲེན་རྗེས་སུ་ཉེར་འཇུག་པས། །ཀུན་ར་ཡོངས་ཁྱབ་གནམ་རྒྱན་འདིའི་ཆེད་དུ། །འབད་རྣམས་དོན་གཉིས་ལྷུན་གྱིས་གྲུབ་པར་མཛོད། །རྒྱལ་ནུབ་གླིང་དང་པོ་བ་ཞི་ཁྲོའི་རོལ་གར་བསྟན་པའི་སྐུ། །རབ་བཞུགས་ཕོ་བྲང་མཁའ་ཁྱབ་མཛེས་རྒྱན་གྱི། འབྲས་བུ་འཁོར་དང་མྱང་འདས་རྣམ་པར་སྨིན། །ཆེས་དཀར་བྱང་ཆུབ་བར་དུ་མྱོང་བར་ཤོག །རྫོགས་ནུབ་གླིང་གཉིས་པ། ལྡན་སྐྱེ་རྒུ་ལྟ་བུའི་རིང་པོའི་ཚེ། །ཕུན་ཚོགས་འབྱོར་པར་མྱོང་བའི་བདེ་སྐྱིད་ལ། །ཡོན་སྦྱོར་ཕན་པ་སྒྲུབ་ཀུན་ལོངས་སྤྱོད་པར། །སངས་རྒྱས་སྲས་དང་བཅས་པས་བྱིན་གྱིས་རློབས། །གནོད་བྱང་གླིང༌། བྱེད་གཟུགས་(༢༠༥བ) ― GLG021_Page_0412 ―
[མ་དཔེ་གཟིགས་ན་འདིར་གནོན།]
ཅན་གཟུགས་མེད་ནག་པོའི་མུན། །རྩ་གསུམ་ཐུགས་རྗེ་ཆེན་པོའི་ཉི་འོད་ཀྱིས། །མིང་གི་ལྷག་མར་བྱས་ནས་ཕན་དང་བདེའི། །སྣང་བ་དམ་པའི་གཟི་བྱིན་འབར་བར་ཤོག །རིགས་རྣམས་ཀུན་གྱི་རྒྱལ་སྲིད་ཆེན་པོའི་ཁྲིར། །ཧོར་གོས་ལྷབ་ལྷུབ་མཉེ་ཤུན་ལེགས་བསྐྲུན་པའི། །དགེ་ཚོགས་བདེ་ཕྱི་བར་གྱི་མདུན་མ་དག །ལྷུན་གྱིས་གྲུབ་པར་མཆོག་གསུམ་མཐུས་བྱིན་རློབས། །ཞེས་པའང་གསང་སྔགས་ཕོ་བྲང་གི་ཁྲིའི་མཉེ་འབོལ་དང་འབོལ་ཤུན་ཁེབས་དང་བཅས་ཧོར་གོས་ལས་གྲུབ་པ་མཆོད་དཔོན་ངག་དབང་ཤེས་རབ་ཀྱིས་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད་པ་དགེ ། གོང་གསལ་དང་སྔོན་མའི་གནམ་རྒྱན་གྱི་ཨ་ལོང་རྒྱབ་ཤ་བླ་བྲེའི་ཤམ་བུ་སོགས་ཁྱོན་བསྡོམས་རིན་ཐང་གསེར་ཞོ་སྟོང་དང་སོ་བདུན་སོང་ངོ༌། །ཟ་འོག་སྣ་ཚོགས་རི་མོ་རབ་མཛེས་པ། །དབང་གཞུ་ལྟར་བཀྲ་སྤེལ་ལེགས་འཕན་གྱི་འཕྲེང༌། །རྒྱལ་བ་རྒྱ་མཚོའི་ཞིང་ཁམས་འཕྲུལ་སྣང་གི །རྟེན་དང་བརྟེན་པར་བཅས་ལ་ཕུལ་བའི་དགེ །ཟུར་རིགས་སྔགས་འཆང་གུ་རུ་སྤུན་ཟླ་བརྒྱུད། །ཁྱོ་ཤུགས་མཐའ་དག་ཚེ་འདིར་རྫོགས་ལྡན་ལྟར། །བདེ་སྐྱིད་དཔལ་ལ་ཡུན་དུ་སྤྱོད་པ་དང༌། །བགྲང་རིང་སྐྱེ་བར་ལྷ་མིའི་ལུས་ཐོབ་ནས། །རང་གཞན་དོན་གཉིས་གྲུབ་པ་སངས་རྒྱས་ཀྱི། །གོ་འཕང་མངོན་གྱུར་འདིས་མཚོན་དགེ་བ་ཀུན། །མི་མཛད་བྱང་ཆུབ་ཆེན་པོའི་རྒྱུ་རུ་བསྔོ། །ཞེས་གཞིས་ཀ་ཤར་པ་ཨ་གུར་ནང་མིར་བཅས་པའི་གོན་པའི་ཕྱི་ཤ་སོགས་བཟང་གོས་སྣ་ཚོགས་ལས་གྲུབ་པའི་འཕན་མེ་(༢༠༦ན) ― GLG021_Page_0413 ―
[མ་དཔེ་གཟིགས་ན་འདིར་གནོན།]
སྦྲུལ་ས་ག་ཟླ་བའི་དུས་ཆེན་གསུམ་འཛོམ་གྱི་ཉིན་འཕྲུལ་སྣང་དུ་ཕུལ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །མཆོད་ཁང་སྤྱི། གང་གི་ཡོན་ཏན་ཆ་ཙམ་དྲན་པའི་མོད། །འཁོར་འདས་གདུང་གཅིལ་ཀུན་མཁྱེན་ཉི་མའི་གཉེན། །སྲས་དང་སློབ་མར་བཅས་ལ་སྲི་ཞུའི་གོས། །བླ་བྲེ་ལྷག་བསམ་དག་པས་ཡོངས་ཕུལ་དགེས། །ཟད་པའི་མཐའ་བྲལ་མར་གྱུར་འགྲོ་བ་རྣམས། །སྡུག་བསྔལ་གསུམ་ལས་རྣམ་གྲོལ་ངེས་ལེགས་ཀྱི། །རིན་ཆེན་ཁང་པར་བདེ་བ་ཆེན་པོ་ལ། །ལོངས་སུ་སྤྱོད་བྱིན་རློབས་ཤིག་འཕགས་མཆོག་ཀྱེ། །བསོད་ནམས་བྱས་འབྲས་འཛད་མེད་ཆུ་གཏེར་ཆེ། །ཉེས་ཚོགས་རོ་དང་ལྷན་ཅིག་མི་གནས་ཤིང༌། །ཚེ་དང་དབང་ཐང་གཏན་མདུན་ཐར་པའི་བདེའི། །ཡིད་བཞིན་ནོར་གྱི་འདོད་དགུ་བསྙིལ་བར་ཤོག །ཇོཤཱཀ་རྣམ་སྦྱར། ཐུབ་དབང་ཞལ་སྐྱིན་མཐོང་བས་དོན་ལྡན་པར། །གོས་བཟང་བླ་གོས་ཕུལ་བས་སྐྱེ་བ་ཀུན། །རྣམ་དག་ཆོ་ག་ལ་བརྟེན་རབ་བྱུང་ནས། །གཙང་མའི་ཚུལ་ཁྲིམས་བསྲུང་བར་བདག་བྱིན་རློབས། །བྱམས་པ་ཆོས་འཁོར། ཡིད་དགའ་ཆོས་འཛིན་མགོན་པོ་འཛམ་གླིང་འདིར། །དངོས་བྱོན་ལྟ་བུའི་སྣང་བརྙན་འོད་སྲུངས་ཆེས། །ཡེ་ཤེས་སེམས་དཔའ་བཅུག་པའི་བྱམས་ཆེན་མེས། །བདུད་བཞིའི་ཚང་ཚིང་མ་ལུས་བསྲེག་པར་ཤོག །བྱམས་པ་ཁྲུས་མཛད། ལྷ་གཅིག་སྲོང་བཙན་ཡབ་ཡུམ་ཁྲུས་གསོལ་བའི། །སྨན་འདམས་ལས་གྲུབ་མ་ཕམ་མགོན་པོ་ཡིས། །སྤྱི་དང་ཁྱད་པར་གངས་ཅན་དུ༔ཁའི་(༢༠༦བ) ― GLG021_Page_0414 ―
[མ་དཔེ་གཟིགས་ན་འདིར་གནོན།]
མུན། །མཐར་བྱས་ཕན་བདེའི་འོད་ཀྱིས་འགེང་བར་མཛོད། །རྗེ་བཙུན་སྒྲོལ་མ། རྒྱལ་བ་ཀུན་ཡུམ་ཨཱཪྻ་ཏཱ་རཱ་ཀྱེ། །བདག་སོགས་འགྲོ་ལ་གཟིགས་པའི་སྤྱན་རས་ཀྱིས། །འཇིགས་ཆེན་བརྒྱད་མཚོན་ཉེས་ཚོགས་ལས་སྐྱབས་ནས། །དགའ་ཞིང་སྐྱིད་པའི་དཔལ་ལ་རྟག་ཏུ་སྦྱོར། །བཀའ་འགྱུར་རིན་པོ་ཆེ། ཐུབ་རྣམས་མཛད་པའི་ཡང་རྩེ་ལུང་གི་ཆོས། །གླེགས་བམ་གཟུགས་ཤར་འགྱུར་རོ་རོ་ཅོག་གི་བཀའ། །མཐོང་ཐོས་དྲན་དང་རེག་པས་རྣམ་གྲོལ་བའི། །དོན་བཟང་བདག་སོགས་འགྲོ་རྒྱུད་ལ་འཇུག་ཤོག །གནས་བཅུ། འགྲོ་ངོར་ཉན་ཐོས་ཚུལ་གྱིས་ཐུབ་པའི་བསྟན། །འཛིན་ཀྱང་ཚོགས་གཉིས་ཡོངས་རྫོགས་སངས་རྒྱས་དངོས། །འཕགས་པའི་གནས་བརྟན་རྣམས་ཀྱིས་ཉེས་བརྒྱའི་མུན། །མཐར་བྱས་སྒོ་གསུམ་སིམ་པ་མྱོང་བྱིན་རློབས། སྨན་བླ་བདེ་གཤེགས་བརྒྱད། མཚན་ལེགས་རིན་ཆེན་ཟླ་བ་གསེར་བཟང་དང༌། །མྱ་ངན་མེད་དཔལ་ཆོས་སྒྲགས་མངོན་པར་མཁྱེན། །སྨན་བླ་ཤཱཀྱ་ཐུབ་པའི་ལྷ་ཚོགས་ཀྱིས། །བདག་སོགས་སྙིགས་མའི་ལུས་ཅན་རྗེས་སུ་བཟུང༌། མཆོད་རྟེན་གངས་ལ་ཉི་ཤར། མི་འགྱུར་ཆོས་སྐུ་བདེ་གཤེགས་ཐུགས་ཀྱི་རྟེན། །བྱིན་རླབས་གཟི་བྱིན་རབ་འབར་རྨད་པོ་ཆེ། །གངས་ལ་ཉི་མ་ཤར་ལྟར་མཁའ་མཉམ་འགྲོའི། །དུག་ལྔའི་སྨག་རུམ་དཔུང་ཚོགས་ཕ་མཐར་མཛོད། །དམར་སེར་ཅན་གྱི་ལོ་ས་ག་ཟླ་བའི་ནང་དུ་སྟོད་ཧོར་གྱི་གོས་རྒྱ་གོས་ཚོན་ཁྲ་ཁྱད་མཚར་དྲང་གསེར་གཞི་མ་གཉིས་ཀྱིས་གཙོས་པའི་བེར་ཉེར་གཅིག་ནང་ལྡན། ར་ས་འཕྲུལ་སྣང་དང་ར་མོ་ཆེའི་གནམ་རྒྱན་དུ་ཕུལ་ཞིང་འགན་སྦྱར་གཉིས་ལ་བླ་གོས་ཀྱི་ཚལ་བུས་བརྒྱན་ཏེ་ཇོ་ཤཱཀ་གཉིས་ལ་ཕུལ་བའི་ཆེ་བ་བྱང་དུ་ཟ་ཧོར་གྱི་བནྡེས་སྦྱར་(༢༠༧ན) ― GLG021_Page_0415 ―
[མ་དཔེ་གཟིགས་ན་འདིར་གནོན།]
བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །གཅད་བྱེད་འདབ་སྟོང་གྲོལ་ལས་སྤྲུལ་པའི་གར། །རྒྱལ་ཀུན་ཡོངས་འདུས་རྔ་ཡབ་གླིང་པ་ཡི། །ཐུགས་གསང་བྱིན་ཆེན་ཉེར་འཕྲོས་འོད་ཟེར་གྱིས། །འཇིག་རྟེན་གསུམ་སྣང་དགེ་བའི་ཤིས་པ་སྩོལ། །པདྨ་ཐོད་ཕྲེང་རིང་ལུགས་འཛིན་པའི་གཙོ། །སྐད་གཉིས་སྨྲ་བ་བཻ་རོའི་སྒྱུ་མའི་འཕྲུལ། །ལེགས་བསྟན་མཁས་གྲུབ་ཡང་སྲིད་གངས་ལྗོངས་མཁར། །ངོ་མཚར་སྤྲུལ་པའི་ཟླ་བ་ཚེས་པར་ཤོག །བསླུ་མེད་རྟེན་འབྲེལ་མཐུ་ཡིས་རྩ་གསུམ་དང༌། །ཆོས་སྲུང་ཕྲིན་ལས་ས་བོན་རབ་སྨིན་པས། །སྨོན་ལམ་དཔག་བསམ་ལྗོན་པ་རྒྱས་པའི་རྩེར། །འདོད་དོན་འབྲས་བཟང་སྙེ་མས་དུད་གྱུར་ཅིག །ཅེས་རྩེ་ལེ་སྤྲུལ་པའི་སྐུ་པདྨ་ལེགས་གྲུབ་ཀྱི་སྤྲུལ་སྐུ་མྱུར་འབྱོན་གྱི་སྨོན་ལམ་དགོས་ཚུལ་བུ་སློབ་སྤྱི་ཚོགས་ནས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་གྲགས་པའོ། །རྒྱུད་མངས་གླུ་ལས་ཆོས་ཀྱི་དབྱངས་སྙན་སྒྲ། །འཁྲོལ་ཡང་སྲིན་མོའི་གཟུགས་ཅན་རེ་མ་ཏཱི། །ཞི་བའི་ལས་ལ་དུང་སྐྱོང་སྟོན་ཟླའི་བཞིན། །འཆི་མེད་ལུས་ཕྲའི་ལང་ཚོའི་དཔལ་འཕྲོག་ཀྱེ། །འཁོར་ལོའི་རི་མོ་རྣམ་པར་བཀྲ་བའི་གདུགས། །དངོས་བཤམས་ཡིད་སྦྲུལ་མཆོད་དང་ཆབས་ཅིག་པར། །དབང་ལྔའི་ཡུལ་དུ་ཟག་བྲལ་བདེ་བའི་གདངས། །ཡོངས་ཤར་བསོད་ནམས་ཚངས་པའི་ཡུལ་བརྒལ་དེས། །ལས་གཞི་གསེར་སྒོང་ཡོངས་སུ་སྨིན་པའི་སྦུབས། །གངས་ཅན་བསྟན་འགྲོའི་བདེ་སྐྱིད་ཞལ་སྒོ་ལས། །ཆོས་ནོར་འདོད་ཐར་དགའ་སྟོན་ལ་སྤྱོད་བའི། །རེ་སྐོང་དཔག་བསམ་སྙེ་མ་(༢༠༧བ) ― GLG021_Page_0416 ―
[མ་དཔེ་གཟིགས་ན་འདིར་གནོན།]
དུད་པར་མཛོད། །ཅེས་སྣྲོན་ཟླའི་བཟང་པོའི་ཚེས་ལ་དཔལ་ལྡན་དུང་སྐྱོང་མར་དབུ་ཁེབས་བུམ་གདན་མ་ཕུལ་བའི་ཁ་བྱང་དུ་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །སྲིད་ཞིའི་འཇིགས་པ་ཀུན་སྐྱོབ་ལྷ་ཡི་ལྷ། །མཐོང་བས་རྣམ་གྲོལ་ཤཱཀྱ་མུ་ནེའི་སྐུར། །བཀྲ་ཤིས་འཁོར་ལོའི་རི་མོ་རབ་བཀྲ་བ། །ངུར་སྨྲིག་གོས་ཟུངས་ཕུལ་བའི་ལེགས་བྱས་འབྲས། །མཐའ་དང་ཚད་དུ་གཞལ་དཀའི་མ་གྱུར་འགྲོ། །འཁོར་བའི་མཚོ་ལས་སྒྲོལ་བའི་གྲུ་བོ་ཆེ། །སྟོབས་བཅུ་མངའ་བའི་གོ་འཕང་མྱུར་ཐོབ་ནས། །ངེས་ལེགས་རིན་ཆེན་གླིང་དུ་འཁྲིད་བྱིན་རློབས། །བསིལ་ལྡན་སྐྱེ་རྒུའི་ཕན་བདེའི་རྩ་ལག་གཞི། །བློ་བཟང་སྙན་པའི་གྲགས་འབར་ཆོས་སྲིད་ཀྱི། །བསྟན་པའི་ཉི་མ་འཇིག་རྟེན་གསུམ་གྱི་མཁར། །རྟག་ཏུ་འཆར་བའི་འོད་སྣང་འབར་བར་ཤོག །ཅེས་མེ་སྦྲུལ་སྣོན་ཟླའི་བཟང་པོའི་ཚེས་ལ་ཇོ་བོ་ཤཱཀྱ་མུ་ནེའི་ན་བཟའ་བུམ་གདན་མ་ཕུལ་བའི་ཁ་བྱང་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །བསླུ་མེད་དཀོན་མཆོག་རིན་ཆེན་ཐུགས་རྗེ་དང༌། །མི་ཕྱེད་དད་པའི་རྟེན་ཅིང་འབྲེལ་འབྱུང་མཐུས། །ནམ་མཁའི་མཐའ་ཁྱབ་འགྲོ་བ་འདྲེན་པ་ལ། །རྣམ་པ་རབ་བཀྲ་རྟག་ཏུ་ཤིས་པར་ཤོག །ཡང་སྲིད་ཕྱི་མར་འདྲེན་བྱེད་སྤྱོད་ཡུལ་དུ། །བཤེས་གཉེན་དམ་པས་མངོན་སུམ་ཉེར་བལྟ་བར། །ལེགས་སྨིན་ས་བོན་ཡོངས་དུད་ཨ་མྲའི་ཤིང༌། །རེ་བའི་འབྲས་བུ་རོ་བརྒྱའི་དཔལ་ལྡན་ཤོག །ཅེས་པ་འདིའང་བྱ་ལུང་བླ་མ་ནམ་མཁའ་བཀྲ་ཤིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །(༢༠༨ན) ― GLG021_Page_0417 ―
[མ་དཔེ་གཟིགས་ན་འདིར་གནོན།]
དྲྀ ཥྟེ ན ཀཱུ ལཱ སུ ནི མི ཏྟ བ ཌཱོ ཌ ཤྱཻ ཪྻུ བཱ ངྴེ ཥུ སུ པཱུ རྞ ཛཿ མཐོང་ན་མི་མཐུན་མེད་པའི་མཚན་བཟང་ཅན། །བཅུ་དྲུག་ལང་ཚོའི་ཆ་ཤས་གང་བའི་གཟིས། །ནོ མྲྀ ཏྱ བཱ ལཱ ཧི ག །ཎི ཀྱ ན ཀྟ ཏྲ སྱཱ བྷི བྷཱུ ཡཱ ཛ ཡ མཱ ཏ རཱ ཪྻེ། འཆི་མེད་ལུས་ཕྲ་རྒྱུ་སྐར་ཚོགས་ཀྱི་ཟིལ། །གནོན་མཛད་རྒྱལ་བ་ཀུན་ཡུམ་འཕགས་མ་ཀྱེ། །བསྐལ་མང་ཐིབས་པོར་སྤུངས་པ་མུན་པའི་སྨག །ཉི་མའི་དཀྱིལ་འཁོར་གཅིག་ཤར་སངས་པ་བཞིན། །སྒྲིབ་གཉིས་དེས་བསྐྱེད་སྲིད་ཞིའི་སྡུག་བསྔལ་རྣམས། །བཅོམ་ལྡན་འདས་མའི་ཐུགས་རྗེས་གཞིལ་བར་མཛོད། །འདོད་ཞེན་ཉེར་འཇུངས་ང་རྒྱལ་ཞེ་སྡང་བ། །ཕྲག་དོག་ལྟ་ངན་ཐེ་ཚོམ་ཉེས་ཀུན་གཞི། །གཏི་མུག་འཇིགས་ཆེན་བརྒྱད་ཀྱིས་འཁོར་བའི་མཚོར། །འཕྱན་ལས་མྱུར་དུ་སྒྲོལ་ཞིག་རྗེ་བཙུན་མ། །མཐོ་རིས་ཡོན་ཏན་བཅུན་ཚང་རྟེན་བཟང་པོ། །ཆད་མེད་ལེགས་ཐོབ་བདེ་ལྡན་དག་ཞིང་དུ། །(༢༠༨བ) ― GLG021_Page_0418 ―
[མ་དཔེ་གཟིགས་ན་འདིར་གནོན།]
གར་དབང་འོད་མཐའ་ཡས་པས་རྗེས་བཟུང་ཏེ། །དོན་གཉིས་ལྷུན་གྱིས་གྲུབ་པར་བདག་བྱིན་རློབས། །སྣང་བརྙན་འདི་སྒྲུབ་བྱེད་པོར་གཏོགས་སོ་ཅོག །དཔལ་མོ་ཁྱོད་ཞབས་དྲན་པའི་མོད་ཉིད་ལ། །འཁོར་འདས་འཇིགས་ཀུན་མིང་ཡང་མི་གྲག་པར། །སྲིད་དང་ཞི་བའི་ཕུན་ཚོགས་སླར་འཕེལ་ཤོག །ཅེས་མེ་སྦྲུལ་སྣོན་གྱི་ཟླ་བར་རྗེ་བཙུན་སེང་ལྡེང་ནགས་ཀྱི་སྒྲོལ་མའི་སྐུ་བརྙན་དད་རྟེན་དུ་རི་མོ་བ་དབུ་མཛད་རག་ཁ་ཨ་བར་དང༌། དགོས་བསམ་གཉིས་ཀྱིས་བཟབས་བྲིས་སུ་བྱས་པའི་ཚེ་རྒྱབ་ཡིག་གི་སྨོན་ལམ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་པ་སརྦྦཱརྠནིརཱབྷོགབྷཝནྟུ། །ཀྱེ་མ་སྲོག་གཅོད་སྤངས་པའི་རྣམ་པར་སྨིན། །གཅིག་ཏུ་དཀར་པོར་འཛག་པ་མུ་ཐི་ལ། །ཚེ་ཡི་གཡུང་དྲུང་ཉ་ཕྱིས་ཁོག་ཡངས་པོར། །ལེགས་འཁྱིལ་རྟེན་ཅིང་འབྲེལ་འབྱུང་སླུ་མེད་ཤོག །ལུས་ངག་ཡིད་གསུམ་བག་ཡོད་ར་བ་རུ། །ཉེར་བཅུག་བསོད་ནམས་དར་དྲགས་ས་སྲུང་དབང༌། །བློ་མིག་སྟོང་ལྡན་ཐུབ་བསྟན་ཆོས་བཟང་གི །རིན་ཆེན་ཁྲི་ལ་རྟག་ཏུ་འགྱིང་བར་ཤོག །རྒྱ་ཆེའི་གཙུག་ལག་རྒྱུད་མང་གླུར་འདྲེན་པ། །མཚོ་བྱུང་མགྲིན་ཆགས་འཆད་རྩོད་རྩོམ་པ་ལ། །འཇིགས་པ་མེད་པར་རྣམ་དཔྱོད་ཡངས་པའི་གོ །དཀར་ཆའི་ཟླ་བ་ལྟར་འཕེལ་བརྟན་པར་ཤོག །བདུད་བཞི་ཉེར་ཐུབ་ཤཱཀྱ་སེང་གེའི་བསྟན། །ཐོས་བསམས་རབ་བསྒོམས་ལང་ཚོ་རྒྱས་པའི་སྡེ། །ཁྲིམས་ལྡན་འདུས་པའི་ཚོགས་ཀྱིས་རྩེ་གཅིག་ཏུ། །སྨོན་པའི་འབྲས་བུ་ཡོངས་སུ་སྨིན་པར་ཤོག །རྒྱལ་(༢༠༩ན) ― GLG021_Page_0419 ―
[མ་དཔེ་གཟིགས་ན་འདིར་གནོན།]
སྲས་ཉན་རང་གཙང་རིས་མགོན་རྣམས་ཀྱི། །བདེན་ཚིག་མཐུ་ཡིས་ཀུན་མཁྱེན་ཙོང་ཁ་པའི། །བསྟན་པ་གདུགས་དཀར་གྲིབ་མར་འཇིག་རྟེན་གསུམ། །བདེ་བའི་སྟེགས་ལ་དགའ་སྐྱིད་ངལ་གསོར་ཤོག །ཅེས་རྟེན་འབྱུང་གི་ཚིགས་བཅད་འདི་ནི་ཤར་ཕྱོགས་བསྟན་པའི་སྒྲོན་མེ་དྭགས་གྲ་ཚང་བླ་སྤྱི་ཐུན་མོང་ནས་དོན་གཉེར་ཆེན་པོས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྟོན་མཚན་ཟླ་བས་བསྒྲུན་མིན་བཞིན་རས་ཀྱི། །དཀྱུས་རིང་སྤྱན་རས་གཟིགས་པའི་མོད་ཉིད་ལ། །འཆི་བའི་དངོས་ཀུན་འཇོམས་པ་འཕགས་མའི་ཞབས། །ཡིད་བཞིན་འཁོར་ལོས་ཕུན་ཚོགས་དགའ་སྟོན་སྩོལ། །རྒྱལ་དབང་བློ་བཟང་གྲགས་པའི་བསྟན་སྲིད་རྒྱུན། །མི་འཛད་མཆོད་སྦྱིན་སྒོ་བརྒྱ་འབྱེད་མཁས་པ། །ས་སྤྱོད་ཁྲིམས་གཉིས་སྲོང་བའི་འགྱུར་མེད་ཁྲིར། །གཡུང་དྲུང་ལྟ་བུར་ཞབས་ཟུང་རྟག་བརྟན་ཤོག །རྣམ་དག་བརྗོད་པའི་བདེན་ཚིག་ཁུག་པ་ལ། །མཆོག་གསུམ་ཐུགས་རྗེའི་ལྕགས་ཀྱུ་ཡོངས་བཏབ་པས། །སུམ་རྩེན་སར་སྙེག་རིང་འཚོའི་སྐུ་ཚེ་ཡི། །སྐལ་པ་འཇིག་རྟེན་མེས་པོ་དང་མཉམ་ཤོག །ཅེས་ས་སྐྱོང་བློ་བཟང་སྦྱིན་པའི་བརྟན་བཞུགས་འདི་ཤར་ཕྱོགས་དྭགས་གྲ་ཚང་བླ་སྤྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །འཇམ་དབྱངས་དགའ་བའི་བཤེས་གཉེན་ངག་གི་དབང༌། །བློ་བཟང་གྲགས་སྙན་རབ་འབར་བསྟན་པ་ཡི། །རྒྱ་མཚོའི་གོས་ཅན་ཀུན་བཟོད་ཡངས་(༢༠༩བ) ― GLG021_Page_0420 ―
[མ་དཔེ་གཟིགས་ན་འདིར་གནོན།]
པའི་མཐའ། །འཆིང་མཛད་རྗེ་བཙུན་བླ་མར་གསོལ་བ་འདེབས། །ཆུ་སྲིན་རྒྱལ་མཚན་དཔུང་ལ་འཇིགས་མེད་པ། །འགྲོ་ལ་རྗེས་ཆགས་བྱམས་བརྩེའི་གོ་ཆ་ཡིས། །ཐུབ་བསྟན་ལང་ཚོ་རྒྱས་པའི་དཔྱོད་ལྡན་སྡེ། །མཚུངས་བྲལ་ཡོངས་འཛིན་མཆོག་ལ་གསོལ་བ་འདེབས། །འཇམ་མཉེན་པདྨ་ཟླ་བ་ཉ་གང་སྟེང༌། །ཚེ་མཐའ་ཡས་པའི་སྐུར་གསལ་ཚངས་དབྱངས་སྒྲས། །གདུལ་བྱར་དགའ་སྟོན་སྤེལ་བའི་མ་འདྲིས་བཤེས། །སྐྱེ་རྒུའི་དཔུང་གཉེན་བསྐལ་བརྒྱར་མི་གཡོ་ཤོག །ངག་དབང་མཁྱེན་པའི་འོད་ཀྱིས་བློ་མུན་མཐར། །ཉེར་བསྐྲད་དོན་བཟང་རྒྱ་ཆེའི་རྗོད་བྱེད་གཞུང༌། །མཚོ་ལྟར་གཏིང་དཔག་དཀའ་ལ་འཇིགས་མེད་མགོན། །རྡོ་རྗེའི་ཁྲི་ལ་འགྱུར་བ་མེད་པར་ཤོག །གཞན་ཟེར་ཚིག་རྗེས་མི་འབྲང་གྲུབ་མཐའ་བཞིའི། །བཞེད་སྲོལ་གོ་རིམ་མ་འཁྲུགས་ཆ་རྫོགས་པས། །ཐུབ་དབང་བསྟན་པའི་སྙིང་པོ་ཐོས་བསམ་སྒོམ། །སྤེལ་ཕྱིར་འོག་མིན་མགོན་ལྟར་བརྟན་པར་ཤོག །ལང་ལོང་གཡོ་བའི་སྤྲིན་དབུས་དབྱར་རྔའི་སྒྲས། །རྨ་བྱ་མངལ་ཁུར་འཛིན་ཚོའི་དགའ་བསྐྱིད་ན། །སཱ་ལའི་སྨན་ལྗོངས་སྡེ་བཞིའི་སྒོ་འཕར་བརྒྱ། །འབྱེད་ཆེད་གསོལ་བཏབ་རེ་བ་འབྲས་ལྡན་ཤོག །བགྲང་རིང་བགྲོད་དཀའི་སྐྱེ་བ་ཐམས་ཅད་དུ། །མགོན་པོ་ཁྱོད་ཀྱིས་ཉེར་བསྟན་དམ་པའི་ཆོས། །ཟབ་རྒྱས་ཉམས་སུ་བསྟར་བས་གནས་སྐབས་དང༌། །མཐར་ཐུག་དོན་ཀུན་ལྷུན་གྱིས་གྲུབ་པར་ཤོག །ཁྱད་པར་ཁྲག་འཐུང་རྡོ་རྗེ་གཞོན་ནུ་ཡིས། །རྗེས་བཟུང་འཕྲིན་ལས་ཕུར་པའི་རིགས་འཛིན་དུ། །གྱུར་ནས་བདུད་སྡེའི་གཡུལ་ལས་རབ་རྒྱས་ཞིང༌། །རང་(༢༡༠ན) ― GLG021_Page_0421 ―
[མ་དཔེ་གཟིགས་ན་འདིར་གནོན།]
རིག་དཔལ་ཆེན་རང་ངོ་མྱུར་འཕྲོད་ཤོག །མདོར་ན་དུས་གསུམ་བསགས་པའི་ལེགས་བྱས་མཐུས། །འབྲས་བུ་རོ་བརྒྱ་བདའ་བར་མཁའ་མཉམ་གྱི། །མ་གྱུར་འགྲོ་དང་ལྷན་ཅིག་ལོངས་སྤྱོད་པར། །ཀུན་ཏུ་བཟང་པོའི་སྨོན་ལམ་ཇི་བཞིན་བསྔོ། །ཞེས་པ་འདིའང་བྱ་རིགས་རྣམ་སྣང་གི་བཙུན་པ་རྣམ་གླིང་ཆོས་མཛད་ངག་དབང་བློ་གསལ་གྱིས་བསྐུལ་བའི་ངོར་ཟ་ཧོར་གྱི་ཡི་གེ་པ་ནི་གནས་བརྟན་འཇམ་གྲགས་པའོ། །ཕུན་ཚོགས་ངོ་མཚར་རྨད་བྱུང་བཀོད་པར་དེང༌། །སེང་གེའི་ང་རོར་བསྟན་ཀྱང་ཐུགས་རྗེའི་ཉི། །འཇིག་རྟེན་གསུམ་མཁར་འཆར་ནུབ་ཉེར་སྤངས་པ། །ཀུན་མཁྱེན་ཙོང་ཁ་པ་དེས་དགེ་ལེགས་སྩོལ། །མགོན་དེའི་བཤད་སྒྲུབ་བསྟན་ལ་ངག་གི་དབང༌། །བློ་གྲོས་ལང་ཚོ་རྒྱས་པའི་སྐལ་བཟང་ཅན། །གཙུག་ལག་རྒྱ་མཚོར་ལྟ་བའི་མིག་ཡངས་པ། །རིས་བྲལ་སྐྱེ་རྒུའི་གཉེན་དུ་མི་གཡོ་ཤོག །ངག་གི་དབང་ཕྱུག་དཀོན་མཆོག་རྣམ་གསུམ་དང༌། །དབྱེར་མེད་བསྟན་པའི་ཉི་མ་ཡོངས་འདུའི་ལྗོན། །བསྐལ་བརྒྱར་ཞབས་བརྟན་རིབ་མར་གདུལ་བྱ་རྣམས། །ངལ་གསོས་བདེ་སྐྱིད་དགའ་སྟོན་མྱོང་ཐོབ་ཤོག །གངས་ཅན་ར་བས་ཡོངས་བསྐོར་སྟོད་སྨད་ཀྱི། །རིགས་ལམ་སྨྲ་བ་གཞན་གྱིས་ཟླ་བྲལ་བ། །ཆོས་གྲགས་རིང་ལུགས་སྣང་བ་འོད་པོ་ཆེས། །ཀུན་ཁྱབ་འདུས་སྡེ་རྟག་ཏུ་དར་བར་ཤོག །རྒྱ་ཆེན་སྤྱོད་དང་ཟབ་མོ་ལྟ་བ་ཡི། །དངོས་བརྒྱུད་བླ་མ་ཡི་དམ་སྲུང་མར་བཅས། །བདེན་ཚིག་གྲུབ་པ་རྣམས་ཀྱི་ནུས་པའི་མཐུས། །སྨོན་ལམ་ཅི་བཏབ་རེ་འབྲས་འགྲུབ་པར་ཤོག །འདི་ལྟ་བུ་ཞིག་དགོས་ཞེས་འཕྱོས་པ་སྐུ་སྐྱེ་བསྟན་འཛིན་རྒྱ་མཚོས་བསྐུལ་བའི་ངོར་(༢༡༠བ) སྡོམ་བརྩོན་འཇམ་དབྱངས་གྲགས་པས་ཉམས་ལེན་གྱི་དད་རྟེན་དུ་དགྱེས་མཛད་རྡོ་རྗེ་གཙོ་བོར་གྱུར་པའི་སྐུ་བརྙན་བཞེངས་ཚེ་རྒྱབ་ཡིག་གནང་བ་སོགས།― GLG021_Page_0422 ―
[མ་དཔེ་གཟིགས་ན་འདིར་གནོན།]
སྡོམ་བརྩོན་འཇམ་དབྱངས་གྲགས་པས་ཉམས་ལེན་གྱི་དད་རྟེན་དུ་དགྱེས་མཛད་རྡོ་རྗེ་གཙོ་བོར་གྱུར་པའི་སྐུ་བརྙན་བཞེངས་ཚེ་རྒྱབ་ཡིག་གནང་བ་སོགས། མཱུ ལོ ཏྟ ར ཏྲྱཱ ས ནི ཀེ ན ས རྦཻ རྶཱ མཱུ ཧ མ ཎྜ ལྱ ས རེ ཤ ཧེ གོཿ རྩ་བའི་བླ་མ་གདན་གསུམ་ཡོངས་ཚང་བ། །དཀྱིལ་འཁོར་རྒྱ་མཚོའི་དབང་ཕྱུག་ཀྱེ་རྡོ་རྗེར། །ཨོ ད ཡྻ བཻ ཎོ ཏྟ མ ནཱ ས ཀཱུ ལ སྶཽ ཤོ བྷ ར ཏྣེ བ མ ལ པྲ ཤོ བྷཿ ཤར་བ་རྒྱུད་ལྡན་འདྲེན་མཆོག་རིགས་ཀུན་བདག །སྤེལ་ལེགས་རིན་ཆེན་འཕྲེང་ལྟར་རབ་མཛེས་པ། །ལམ་བཟང་ངེས་གསང་ཐེག་(༢༡༡ན) ― GLG021_Page_0423 ―
[མ་དཔེ་གཟིགས་ན་འདིར་གནོན།]
པའི་ཉིང་ཁུའི་བཅུད། །ཚེ་འདིར་བཅུ་གསུམ་རྡོ་རྗེའི་སར་བགྲོད་པ། །ས་སྐྱའི་བླ་ཆེན་ཁོ་ནའི་ཁྱད་པར་ཆོས། །ཉམས་སུ་བསྟར་ལ་དམིགས་རྟེན་འདི་ཀོ་རྨད། །གྲུབ་ཐོབ་ཡོངས་ཀྱི་འཁོར་སྒྱུར་བིརཱུ་པའི། །རྣལ་འབྱོར་སྤྱོད་པས་མེ་ཏོག་མངའ་ཅན་སྡེ། །རྒྱ་མཚོའི་མཐར་བསྐྲད་མཆོག་ཐུན་དངོས་གྲུབ་ཀྱི། །བྱིན་རླབས་གཟི་བྱིན་ཉི་མ་སྟོང་ལས་འབར། །མནར་མེད་བུད་ཤིང་སྡིག་ཀྱང་མིང་ཙམ་དུ། །གཏོང་ཞིང་བདེ་ཆེན་མཁའ་སྤྱོད་གྲོང་ཁྱེར་ཆེར། །ཟངས་ཐལ་འཁྲིད་བྱེད་རྗེ་བཙུན་རྣལ་འབྱོར་མ། །ནཱ་རོ་ཏ་པའི་སྙན་བརྒྱུད་ཡིད་བཞིན་ནོར། །རྒྱ་མཚོའི་མཐས་གཏུགས་ལུས་ཅན་ཡོད་དོ་ཅོག །ཆོས་རྒྱལ་འཕགས་པའི་འབངས་སུ་དབང་བསྡུས་པ། །རིག་བྱེད་མ་དང་ཚོགས་བདག་འདོད་རྒྱལ་ཞེས། །ཐུན་མོང་བསྒྲུབས་ཞིར་མཆོག་གི་དངོས་གྲུབ་སྟེར། །ཉམས་ལེན་རྟེན་དུ་དགེ་སྦྱོང་འཇམ་གྲགས་པས། །དབང་རྣོན་ཆོས་ཀྱི་རྗེས་འབྲངས་ལེགས་བཞེངས་པའི། །རི་མོ་འདྲེན་བྱེད་བདུད་རྩི་འཕྲུལ་པོ་ཆེ། །ཟུར་རིགས་འཕྲིན་ལས་རྣམ་པར་རྒྱལ་ངེས་སོ། །དངོས་བརྒྱུད་བླ་མར་རྩེ་གཅིག་གསོལ་བཏབ་མཐུས། །གཞི་ལམ་འབྲས་བུར་གྲོལ་བྱེད་དབང་བཞིའི་རྒྱུན། །མ་ནུབ་ཉམས་བླངས་འདུས་གསུམ་འཕྲང་སྒྲོལ་ནས། །ཟུང་འཇུག་ཚེ་འདིར་འགྲུབ་ནུས་སྐལ་ལྡན་ཤོག །བརྟུལ་ཞུགས་སྤྱོད་པའི་ང་རྒྱལ་བརྟན་པོའི་ངང༌། །ཤངས་སྦུག་དྲག་པོར་རབ་སྤུས་འཐོར་རླུང་གིས། །བར་ཆད་བགེགས་རིགས་ཕ་མཐར་ཉེར་བསྐྲད་དེ། །མཆོག་ཐུན་དངོས་གྲུབ་ལག་རྩེར་སོན་པར་ཤོག །ཚེ་འདིར་མ་གྲོལ་དཔའ་མོས་མཁྲིག་མ་ནས། །བཟུང་སྟེ་མངོན་སུམ་ཁྲིད་པའི་སྐལ་དམན་ན། །སྒྱུ་ལུས་འདོར་དུས་རྡོ་རྗེ་བཙུན་མོ་ཡིས། །མཁའ་སྤྱོད་གནས་སུ་བསུས་ནས་རྗེས་འཛིན་ཤོག །བརྟན་གཡོའི་དངོས་ཀུན་འདར་བྱེད་དམར་འོད་ཞགས། །འཕངས་པའི་མོད་ལ་སྲིད་ཞིའི་ལེགས་ཚོགས་རྣམས། །རང་གིར་བྱེད་(༢༡༡བ) ― GLG021_Page_0424 ―
[མ་དཔེ་གཟིགས་ན་འདིར་གནོན།]
ནུས་དབང་གི་ལྷ་གསུམ་གྱིས། །ཐུགས་རྗེའི་བྱིན་ཆེན་མངོན་སུམ་བདག་ལ་ཕོག །བསོད་ནམས་གངས་བརྩེགས་ཏེ་སེའི་གཙུག་ཏོར་ནས། །ཕན་བདེའི་ཆུ་བོ་སྐྱིད་པའི་ལྷུང་ལྷུང་སྒྲ། །མྱང་འདས་མཚོར་བབས་རླངས་ཀྱི་ཆུ་འཛིན་ཆར། །འགྲོ་ཀུན་བྱང་ཆུབ་ལོ་ཏོག་སྨིན་རྒྱུར་བསྔོ། །ཞེས་པ་འདིའང་སྡོམ་བརྩོན་འཇམ་དབྱངས་གྲགས་པས་ཉམས་ལེན་གྱི་དད་རྟེན་དུ་དགྱེས་མཛད་རྡོ་རྗེ་གཙོ་བོར་གྱུར་བའི་སྐུ་བརྙན་བཞེངས་ཚེ་རྒྱབ་ཡིག་དགོས་ཚུལ་ལྟར་སློབ་བཤད་པ་ཟ་ཧོར་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ཤུ ཀླ ཤུ ཀླ ཤྴ ར ཙྩ ནྡྲ ཀོ ཊཱ ས མེ ཤོ བྷ ཤོ བྷ པྲ ཏཻ ལཱ ཀ ག རྦཾ ཧརཿ དཀར་དཀར་སྟོན་ཟླ་བྱེ་བས་བསྒྲུན་མིན་ཞིང༌། །མཛེས་མཛེས་ཐིག་ལེ་མཆོག་མའི་ཁེངས་པ་འཕྲོག །པཽ ན པཽ ན དྷ མ ཏྲི བི ན མི ཏྟྱ ཏྟི ཛཿ ཀཱ ཤ ཀཱ ཤ རྷི ཙཱ ཡུ རྡ ཙི ཉྩ ཀྲི ཀཱ། ཡང་ཡང་ལྟ་བས་མི་ངོམས་མཚན་དཔེ་གཟི། །གསལ་གསལ་ཚེ་སྦྱིན་ཡིད་བཞིན་འཁོར་ལོ་མ། །སྙན་སྙན་ཡན་ལག་དྲུག་ཅུའི་(༢༡༢ན) ― GLG021_Page_0425 ―
[མ་དཔེ་གཟིགས་ན་འདིར་གནོན།]
ཆོས་ཀྱི་སྒྲ། །ཁྲོལ་ཁྲོལ་རྒྱུད་མང་སྟོང་ལས་དྲངས་པ་བཞིན། །ལྷུང་ལྷུང་རྣ་བའི་བཅུད་དུ་བླངས་པའི་ཚེ། །སིམ་སིམ་ཡིད་ལ་ཕན་བདེའི་འདོད་འཇོ་མཁན། །ཡང་ཡང་ལྐོག་གྱུར་ཤེས་བྱའི་ཕ་མཐའ་རྣམས། །ཞིབ་ཞིབ་མ་འདྲེས་འབྱེད་པ་མཁྱེན་པའི་ཚད། །ངལ་ངལ་ཚངས་པས་བཅལ་ཀྱང་མ་རྙེད་དེ། །འབོལ་འབོལ་སྟན་ལ་བསྐལ་པར་གཉིད་དུ་གཡུར། །མཚན་ཐོས་ཙམ་གྱིས་འཆི་བདག་དཔུང་འཇོམས་ཚེ། །ཚེ་དང་ཡེ་ཤེས་སྩོལ་བའི་ལྷ་མོ་གང༌། །གང་ཞིག་ཏིང་འཛིན་བཟླས་བརྗོད་ལྷུར་ལེན་དངོས། །དངོས་གྲུབ་ཐམས་ཅད་ལྷུན་གྱིས་འགྲུབ་མཛད་མ། །རིང་ནས་ཁྱོད་ཞབས་ཞབས་པད་བསྙེན་པའི་བློ། །སྐོམ་པ་ཆུ་འདོད་འདོད་ཅན་ནོར་ལ་བཞིན། །གསོལ་འདེབས་གདུང་ཤུགས་ཤུགས་དྲག་གིས་འབོད་ན། །བརྩེ་ཆེན་ཐུགས་རྗེས་རྗེས་སུ་འཛིན་ལས་ཅི། །ཐང་ཡངས་མཐའ་སྐོར་ཚང་ཚིངའཁྲིགས་པའི་ནགས། །ཁོ་ར་ཁོར་ཡུག་ཁ་བའི་དོ་ར་འདིར། །མཐར་ཐུག་དོན་རྣམས་ཐོས་བསམ་གྱིས་སྒྲུབ་བསྟན། །འཛིན་མཁས་ཚུལ་ལྡན་ཕ་མཐའ་ཡས་ཁེངས་ཤོག །པད་རྩ་ལྟར་དཀར་ག་བུར་དྲི་ངད་ཅན། །རྩེ་གཅིག་རབ་བསྒྲུབས་འབྲས་བུ་དུས་མིན་པར། །ལྔ་པའི་ལམ་དུ་འགྲོ་ལས་ཉེར་བཟློག་སྟེ། །འཆི་མེད་བདུད་རྩིས་སྙིང་བུམ་གང་བར་མཛོད། །མིང་དང་དོན་མཚུངས་བཅོམ་ལྡན་མ་ཁྱོད་ལ། །མོས་གུས་དང་བས་རྩེ་གཅིག་གསོལ་འདེབས་ན། །མེ་ཏོག་ལྟ་བུར་འཇམ་པའི་ཕྱག་བརྐྱང་སྟེ། །མ་ལུས་འགྲོ་འདྲེན་ས་ལ་ཁྲིད་པར་ཤོག །ཅེས་བརྡ་སྤྲོད་གཞུང་བརྒྱ་སྨྲ་བར་སྤོབས་པ་དགེ་བ་(༢༡༢བ) ― GLG021_Page_0426 ―
[མ་དཔེ་གཟིགས་ན་འདིར་གནོན།]
འདར་པ་ལོ་ཆེན་ངག་དབང་ཕུན་ཚོགས་ལྷུན་གྲུབ་ཀྱིས་ཚེ་སྦྱིན་ཡིད་བཞིན་འཁོར་ལོའི་བྲིས་སྐུ་གསར་བཞེངས་ཀྱི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེ་ཚངས་སྲས་བཞད་པའི་རྡོ་རྗེས་ལེའུ་དང་པོ་དང་གསུམ་པའི་དགོངས་དོན་ལྟར་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མཚན་ཙམ་གྱིས་ཀྱང་ངེས་ལེགས་ལ་བཀོད་པ། །འཇིག་རྟེན་གསུམ་ན་ཡོངས་གྲགས་དཔལ་གྱི་རྒྱལ། །མགོན་པོ་ཐུགས་རྗེ་ཆེན་པོས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །མ་དག་ལོག་ལམ་འཕྱན་ལས་འདྲེན་མཁས་ཤིང༌། །སྲིད་པའི་ཉེས་བརྒྱ་ཟིལ་གནོན་གཟི་བརྗིད་ཅན། །སྙན་པའི་སྒྲ་དབྱངས་རྒྱལ་པོས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །འཛམ་བུ་ཆུ་བོའི་གསེར་སྦྱངས་བཟང་པོའི་འོད། །མུན་ཚོགས་དྲི་མེད་རིན་ཆེན་སྣང་བ་ཅན། །བརྟུལ་ཞུགས་གྲུབ་པའི་མཐུ་ཡིས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །འཁོར་བ་མྱ་ངན་ཚོགས་ལ་འཇིགས་མེད་པ། །མཆོག་གི་མཛད་པའི་དཔལ་གྱི་རྒྱལ་པོ་ཡིས། །སྐྱེ་རྒུ་ཡོངས་ལ་རྗེས་བརྩེས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །བདེན་གཉིས་ཟུང་འཇུག་ཆོས་སྒྲ་འགྲོ་ཀུན་གྱི། །ཐོས་འཛིན་རྒྱན་དུ་ལེགས་བསྒྲགས་རྒྱ་མཚོ་ཆེའི། །གོས་ཅན་དབྱངས་ཀྱིས་འགེངས་དེས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །ཆོས་ཀྱི་རྒྱ་མཚོར་མཆོག་གི་བློ་གྲོས་རླབས། །ཡོལ་མེད་རྣམ་པར་རོལ་པས་གཞན་གྱི་སེམས། །མངོན་པར་མཁྱེན་པའི་རྒྱལ་པོས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །ཐུགས་རྗེ་སྨན་གྱི་དྲི་ཡིས་སྒྲིབ་གཉིས་ནད། །དྲུང་འབྱིན་འགྲོ་བའི་བླ་མ་བཻཌཱུཪྻའི། །མདོག་བཟང་འོད་ཀྱི་རྒྱལ་པོས་རབ་བཏབ་པའི། །སྨོན་ལམ་བདག་སོགས་འགྲོ་ལ་འགྲུབ་བྱིན་རློབས། །སྙིགས་མ་ལྔ་བདོའི་སྐྱེ་(༢༡༣ན) ― GLG021_Page_0427 ―
[མ་དཔེ་གཟིགས་ན་འདིར་གནོན།]
རྒུར་བརྩེ་བ་ཆེས། །བདེ་བར་གཤེགས་པ་བདུན་གྱི་སྨོན་ལམ་མདོ། །ཤཱཀྱ་སེང་གེས་ལེགས་གསུངས་དེ་དོན་བཞིན། །མ་རྒན་འགྲོ་དྲུག་ཀུན་གྱིས་འགྲུབ་པར་ཤོག །གྲུ་འཛིན་རི་བོའི་སྤོ་ནས་དུས་དྲུག་ཏུ། །དཀྱུས་རིང་སྤྱན་ཀྱིས་གཟིགས་པ་ལྷུར་མཛད་པའི། །ཕྱག་ན་པད་དཀར་འཆང་དེས་སེམས་ཅན་རྣམས། །མཐོ་རིས་ཐར་པའི་ལམ་དུ་དྲང་བར་གསོལ། །རྡོ་རྗེ་སློབ་དཔོན་ལུས་ལ་རྒྱལ་བ་ཀུན། །ཚང་བའི་རྟེན་འབྲེལ་རྒྱུ་འབྲས་བསླུ་མེད་འབྲས། །འདི་དང་ཚེ་རབས་གཏན་གྱི་མདུན་མའི་ཚོགས། །འགྲུབ་པའི་སྐལ་བ་བཟང་པོར་བདག་འགྱུར་ཤོག །ཅེས་པ་འདིའང་དྲུང་འཚོ་ངག་དབང་ལྷག་བསམ་གྱིས་སྨན་བླ་བདེ་གཤེགས་བརྒྱད། སྤྱན་རས་གཟིགས། འདྲ་འབག་རྣམས་བཞེངས་པའི་རྒྱབ་ཡིག་དགོས་ཚུལ་བཞིན་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཚེ་མཐའ་ཡས་པའི་མགོན་པོས་རབ་བསྔགས་པ། །བདེར་གཤེགས་ཀུན་ཡུམ་གཙུག་ཏོར་རྣམ་རྒྱལ་མས། །གཤིན་རྗེའི་ལས་མཁན་མེ་ལོང་འཛིན་པའི་ཁུར། །ཉེར་གཏོང་འཆི་མེད་གྲུབ་པས་མཆོག་སྦྱིན་སྩོལ། །སྐྱབས་གསུམ་སྤྱན་སྔར་འདུས་ཚོགས་བདེན་བརྗོད་མཐུས། །སྨྲ་བ་ངག་གི་དབང་ཕྱུག་བློ་གྲོས་གཏེར། །མཁས་བཙུན་བཟང་པོའི་འཕྲིན་(༢༡༣བ) ― GLG021_Page_0428 ―
[མ་དཔེ་གཟིགས་ན་འདིར་གནོན།]
ལས་རྒྱ་མཚོའི་མཐར། །ཡོངས་བརྒལ་གདོང་ལྔས་བཏེག་ཁྲིར་གཡོ་མེད་ཤོག །ཡངས་པའི་བློ་དང་སྐྱེ་མང་ཉེར་གོམས་པའི། །བཟང་པོའི་བག་ཆགས་སད་པའི་མུ་ཏིག་ཆར། །གསེར་ལྡན་ཀུན་ཁྱབ་ས་སྐྱོང་མཐུ་སྟོབས་དབང༌། །རྡོ་རྗེའི་གདན་ལ་མི་འགྱུར་བརྟན་པར་ཤོག །བློ་བཟང་གྲགས་སྙན་བསྟན་པའི་གདུགས་དཀར་པོ། །འཛིན་ལ་ལེགས་བྱས་ཕུང་པོ་རབ་སྤུངས་པས། །མི་འཇིགས་སྦྱིན་པའི་དགའ་སྟོན་ཡོངས་འགྱེད་པ། །སྐྱེ་རྒུའི་གཉེན་དུ་གཡུང་དྲུང་ལྟ་བུར་ཤོག །ཀློག་སྤོང་བྱ་བའི་ཆོས་ཀྱི་འཁོར་ལོ་གསུམ། །བསྐོར་བར་རྒྱལ་བས་ཆེས་བསྔགས་ཁྲིམས་ལྡན་སྡེ། །འཇིག་རྟེན་ཀུན་གྱི་བསོད་ནམས་ཞིང་མཆོག་ཏུ། །བྱམས་བསྟན་མ་ཤར་དེ་སྲིད་དར་བར་ཤོག །ཅེས་འདི་ལྟ་བུ་ཞིག་རྩོམས་ཤིག་པར་ཆོས་འཁོར་རྒྱལ་གྱི་གནས་སྲུང་ཆེན་པོས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞི་ཁྲོ་ཆེ་མཆོག་ངོ་བོར་ཡོངས་འདུས་པའི། །ཕྱག་རྒྱས་བདུད་དཔུང་ཟིལ་གནོན་བཞད་པ་རྩལ། །རྡོ་རྗེ་སློབ་དཔོན་གཟུགས་སུ་ལེགས་ཤར་བ། །སྲིད་པའི་མཐའ་བསྙེག་དཀྱིལ་འཁོར་མགོན་པོར་བཞུགས། །ཐོད་ཕྲེང་རིགས་ལྔ་རང་སྣང་ཤེས་རབ་མར། །སྙོམས་འཇུག་དངས་མའི་བདུད་རྩིས་རྩ་འཁོར་ཀུན། །གཏམས་པས་ཨ་ཧཾ་སྲོག་གི་ཀ་བའི་ཟུངས། །མི་ཤིགས་རྡོ་རྗེའི་ཁམས་སུ་དེང་བྱིན་རློབས། །མ་(༢༡༤ན) ― GLG021_Page_0429 ―
[མ་དཔེ་གཟིགས་ན་འདིར་གནོན།]
དང་མཁའ་འགྲོ་ཆོས་སྐྱོང་ནོར་གྱི་ལྷ། །གཏེར་སྲུང་དམ་ཅན་མཐུ་སྟོབས་ལྡན་རྣམས་ཀྱིས། །ནག་ཕྱོགས་རྩ་ལག་ཕམ་པའི་དཀར་པོའི་དར། །ཚངས་པའི་ཡུལ་སར་འཕྱར་བའི་བཀྲ་ཤིས་སྩོལ། །ཞེས་པ་འདིའང་ལྷ་ས་བྱང་གླིང་པ་བློ་བཟང་ལྷུན་གྲུབ་སྤུན་མ་སྲུ་རྣམས་ཀྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་རྒྱུན་འཛུགས་ཀྱི་ཆེད་དུ་ཇི་སྲིད་ཀྱི་བར་ཞིང་ཕུལ་ནས་ཞལ་འདོན་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཕྱག་ན་སྣ་ཚོགས་འགྲོ་འདུལ་རྡོ་རྗེའི་མཚོན། །རབ་འབར་ལངྐ་པུ་རིར་སྲིན་པོའི་རྒྱལ། །འཕྲིན་ལས་རིགས་འཛིན་ཀརྨ་གུ་རུ་ཡིས། །མཆོག་དང་ཐུན་མོང་དངོས་གྲུབ་ཆར་ཆེན་ཕོབ། །རྒྱལ་ཀུན་འདུས་པ་ཀརྨ་གུ་རུའི་གར། །ཡང་གསང་དྲག་པོར་ཁྲོས་པའི་སྟང་སྟབས་ཀྱིས། །བདུད་བཞིའི་ཞར་ལ་འདྲེ་སྲིན་འབྱུང་པོའི་ཚོགས། །ཕྱེར་འཐག་མངོན་སྤྱོད་ལས་རྣམས་འགྲུབ་བྱིན་རློབས། །ཞེས་པ་འདིའང་དབུ་མཛད་བློ་བཟང་ཡོན་ཏན་གྱིས་དད་རྟེན་བཞེངས་པའི་རྒྱབ་ཡིག་ཤློ་ཀ་རེ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་མཉྫུའོ། །རྡོ་རྗེ་སློབ་དཔོན་གཟུགས་སྐུའི་ཟ་མ་ཏོག །མངོན་སུམ་གདུལ་བྱའི་དོན་དུ་རྟག་བརྟན་ཅིང༌། །བདག་སོགས་བྱང་ཆུབ་ཐོབ་མིན་དགེ་བའི་བཤེས། མཛད་དེ་ཐེག་མཆོག་ལམ་ལ་འགོད་པར་ཤོག །ཅེས་པའང་(༢༡༤བ) ― GLG021_Page_0430 ―
[མ་དཔེ་གཟིགས་ན་འདིར་གནོན།]
གསང་གླིང་སྔགས་རམས་པ་ངག་དབང་ལེགས་ལྡན་གྱིས་ངོར་ཟ་ཧོར་གྱི་བནྡེས་བཀོད། །སྒྲིབ་གསུམ་རྒྱ་གྲོལ་ཡོན་ཏན་ཡོངས་རྫོགས་པར། །རྣམ་འདྲེན་མཐའ་དག་མཉམ་ཡང་སྙིགས་མ་ལྔ། །ཆེར་བདོའི་འགྲོ་འདུལ་ཐུགས་རྗེ་མཐུ་སྟོབས་རྣམས། །གཞན་ལས་ཁྱད་ཞུགས་སྨན་བླ་མཆེད་བདུན་དགོངས། །དོན་ཀུན་གྲུབ་པའི་མཉེན་འཇམ་ལྗགས་རིང་པོའི། །ཚངས་དབྱངས་སྒྲར་དྲངས་བརྒྱད་བརྒྱའི་གྲངས་ལྡན་མདོར། །རབ་དངར་ཚད་མའི་བཀའ་དེ་མི་བསླུ་བའི། །བདེན་གཏམ་ཡིད་ཆེས་གཏན་ཚིགས་གང་གིས་འགོག །དེ་ཕྱིར་བདེ་གཤེགས་མཆེད་བརྒྱད་ལྷ་ཚོགས་རྣམས། །ཆོས་རྗེས་འབྲངས་དང་དྭངས་ཤེལ་རྩིག་ངོས་ལ། །གཟུགས་སྐུ་བཀོད་པའི་ཚོན་རིས་རྣམ་བཀྲ་བ། །མངོན་སུམ་སྨོན་ལམ་དབང་པོར་དེང་བཞུགས་གསོལ། །ཤཱཀྱ་སེང་གེའི་ལུང་རྟོགས་ཆོས་ཀྱི་མཛོད། །སྤྱི་དང་ཁྱད་པར་མཉམ་མེད་བཙོང་ཁ་པའི། །བསྟན་པ་རིན་ཆེན་རྫོགས་ལྡན་ཤར་མིན་པར། །འཇིག་རྟེན་ཀུན་ཁྱབ་བླ་ནས་བླར་འཕེལ་ཤོག །བརྗོད་པ་རྣམ་དག་ངག་ལ་དབང་ཕྱུག་བློ། །བསྐལ་བཟང་འདྲེན་པ་བཞི་པའི་རྒྱ་ཆེན་གཞུང༌། །འཆད་རྩོད་རྩོམ་པར་མཚོ་བྱུང་དབྱངས་ཅན་མགྲིན། །བཞུགས་དེས་སྲིད་མཐར་ཆོས་འཁོར་བསྐོར་དུ་གསོལ། །གངས་ལྗོངས་དང་པོའི་དཔལ་ལྡན་འབྲས་སྤུངས་སྡེར། །རྒྱན་དྲུག་མཆོག་གཉིས་རྗེས་འབྲངས་བཀའ་པོད་ཚོགས། །བཤད་ཉན་ཀློག་པའི་བྱ་བ་དཀར་(༢༡༥ན) ― GLG021_Page_0431 ―
[མ་དཔེ་གཟིགས་ན་འདིར་གནོན།]
ཟླའི་ཆར། །རབ་འགྲན་མཁས་བཙུན་ཀུནྡའི་ཚལ་བཞད་ཤོག །སྡུག་བསྔལ་མང་བརྩེགས་ངན་སོང་གསུམ་གྱི་འགྲོ། །འགྱུར་དང་འདུ་བྱེད་ཀྱིས་མནར་ལྷ་མིའི་རྟེན། །རྒྱུ་དང་མི་རྒྱུའི་མཁའ་མཉམ་ལུས་ཅན་རྣམས། །དཀར་མིན་ལས་ཀྱི་ཟུག་རྔུ་ཞི་བར་ཤོག །གནས་སྐབས་སྒོ་གསུམ་བརྣག་དཀའི་མིང་ཙམ་ཡང༌། །གྲག་མིན་སིམ་པའི་ཚོར་བ་རྟག་མྱོང་ཞིང༌། །མཐོ་རིས་ལམ་ལ་གྱེན་ནས་གྱེན་འཛེགས་ཏེ། །ཐར་པའི་སྒོར་ཞུགས་གཏན་བདེར་ལོངས་སྤྱོད་ཤོག །རྒྱ་ཧོར་བོད་དང་ཁྱད་པར་གངས་ལྗོངས་སུ། །གློ་རྡེག་འཆི་བ་ནད་གདོན་འཁྲུགས་བཀྲེན་སོགས། །དུས་ཀྱི་ཆད་རྒྱུ་ཀུན་འབྱུང་དེས་སྐྱེད་པའི། །སྡུག་བསྔལ་བདེན་ལས་རྣམ་པར་གྲོལ་བར་ཤོག །རིང་འཚོ་འདུ་བ་ཆ་སྙོམས་ལོ་ཏོག་སྦྲུམ། །ཁེ་སྤོགས་འགྲོ་དང་མི་འགྲོའི་བྱ་བ་ཀུན། །རྫོགས་ལྡན་ལྟར་འགྲུབ་དེ་རྒྱུ་དགེ་བ་བཅུའི། །ཁྲིམས་ཀྱི་ར་བར་བག་ཡོད་གནས་པར་ཤོག །སྐྱེ་མང་བརྒྱུད་དང་ཚེ་འདིར་རང་དབང་དུ། །གྱུར་དང་མ་གྱུར་མི་ཟད་སྡིག་པའི་ལས། །བསམ་གྲུབ་རྒྱལ་པོས་བསགས་ཀུན་དགེ་བའི་མཐུས། །ཡོངས་དག་འོད་དཔག་མེད་ཞལ་མཐོང་བར་ཤོག །ལྷ་ལྡན་སྤྲུལ་པའི་གཙུག་ལག་ཁང་ཆེན་གྱི། །བྱ་འདབས་གྲིབ་མར་ངལ་གསོ་བྱང་གླིང་པ། །མི་ནོར་ལོངས་སྤྱོད་འདི་སྣང་རབ་འཕེལ་ཞིང༌། །རིང་པོར་མི་ཐོགས་ངེས་ལེགས་སར་བགྲོད་ཤོག །ཀུན་ཏུ་བཟང་(༢༡༥བ) ― GLG021_Page_0432 ―
[མ་དཔེ་གཟིགས་ན་འདིར་གནོན།]
པོའི་སྨོན་ལམ་ཇི་ལྟ་བར། །བསགས་དང་བསག་བཞིན་གསོག་འགྱུར་དགེ་བ་རྣམས། །ལུས་ཅན་མཐའ་དག་བྱང་ཆེན་ཐོབ་པའི་རྒྱུར། །བསྔོས་པའི་འབྲས་བུ་དཀོན་མཆོག་མཐུས་སྨིན་ཤོག །བྱང་གླིང་པ་བློ་བཟང་ལྷུན་གྲུབ་མ་སྲུ་རྣམས་ཀྱིས་དགེ་འཕེལ་རི་ཁྲོད་པ་རྣམས་ལ་ཟླ་གཅིག་གི་བར་ཞབས་ཏོག་དང་དེ་ནས་མཐུན་རྐྱེན་སྦྱར་ཏེ་འཛུགས་རྩིས་ཀྱི་རིང་འཚོའི་ཚིགས་བཅད་ཤློཀ་མ་ཉུངས་ཙམ་དགོས་ཚུལ་བྱུང་བ་སྨོན་ལམ་ཁྱབ་ཆེ་བ་ལེགས་པར་མངོན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །གར་དབང་ཚེ་མཐའ་ཡས་པའི་ཐུགས་རྗེའི་མཐུས། །ནོར་འཛིན་སྐྱོང་བ་བློ་བཟང་སྦྱིན་པ་ཡི། །སྐུ་ཚེ་རྡོ་རྗེ་ལྟ་བུར་རབ་བརྟན་ཞིང༌། །ལེགས་བྱས་དབྱར་མཚོ་ལྟ་བུར་འཕེལ་བར་ཤོག །ཅེས་པ་འདི་ནི་རི་སྒོ་དགེ་འདུན་རབ་བརྟན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །མཚོ་ཟླའི་སྲང་གྲངས་དངུལ་དཀར་པདྨའི་དབྱིབས། །དམ་རྫས་གཏོར་མ་ཕྱུར་བུར་སྤུངས་པའི་སྣོད། །ཕུལ་བས་རེ་འབྲས་མི་མཐུན་ཕྱོགས་ཀུན་ཞི། །རིང་མིན་དཔལ་ཆེན་ཧེ་རུ་ཀ་འགྲུབ་ཤོག །ཅེས་པའང་རི་བོ་ཆོས་གླིང་པ་དམ་ཆོས་དབང་རྒྱལ་དགེ་སྐོས་དུས་པད་སྡེར་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད། །(༢༡༦ན) ― GLG021_Page_0433 ―
[མ་དཔེ་གཟིགས་ན་འདིར་གནོན།]
འཇམ་དབྱངས་དགའ་བའི་བཤེས་གཉེན་གྱི། །འདྲ་འབག་གསེར་ཟངས་ལས་གྲུབ་པ། །ངག་དབང་འཕྲིན་ལས་ལྷག་བསམ་གྱིས། །བཞེངས་འབྲས་དོན་གཉིས་ལྷུན་གྲུབ་ཤོག །ཅེས་པའང་ཟ་ཧོར་གྱི་བནྡེས་བཀོད། །བགྲང་ཡས་བདེ་གཤེགས་རྣམས་ཀྱི་གསང་བའི་མཛོད། །རབ་འཛིན་ཕྱག་གིས་གཟས་པ་རྡོ་རྗེའི་རྭ། །གདེངས་པས་བདུད་བཞི་ལས་རྒྱལ་ཞི་དུལ་གྱིས། །གར་བསྒྱུར་དྲང་སྲོང་ཆེན་པོ་དྲི་མ་མེད། །སྤྲོས་ཀུན་མཚན་རྟོག་དང་བྲལ་ཆོས་དབྱིངས་ནས། །སྡེ་བརྒྱད་གཉེན་པོར་ཁྲོས་པའི་ཞེ་སྡང་གིས། །ལྕགས་སྲེག་རྔམས་པའི་ཤུགས་དྲག་རྡོ་རྗེའི་ཐོག །མི་སྲུན་འབྱུང་པོའི་ཀླད་པ་ཚལ་བརྒྱར་འགེམ། །ལྷ་སྲིན་མདུན་བཀུག་རྒྱ་གྲམ་བརྗིད་ཀྱིས་མནན། །སྲོག་ཡིད་ཉེར་དྲངས་ཧཱུཾ་གི་གདན་དུ་བྱས། །ལྕེ་ཡི་རྭ་གུར་མེ་འབར་བདུད་དཔུང་བསྲེག །སྙིང་དབུས་རིག་རྩལ་ཆོས་སྐུར་ངོ་འཕྲོད་ཤོག །གནས་པ་རྩ་དང་སྲོག་ཡིག་ཉེ་བར་འདྲེན། །གཅོད་པ་རྩེ་དང་མན་ངག་རང་སེམས་སུ། །ཤེས་ནས་གནས་སྐབས་ལས་བཞི་ཀུན་འགྲུབ་ཅིང༌། །རིང་མིན་ཡེ་ཤེས་ཀློང་དུ་གྲོལ་བར་ཤོག །ལྷོ་ཕྱོགས་ཨིནྡྲའི་ནགས་ཚལ་ཉམས་དགའ་བར། །དྲང་སྲོང་ཚུལ་གྱིས་འགྲོ་བ་ལེགས་འདྲེན་ཀྱང༌། །སྣང་སྲིད་དྲེགས་འདུལ་ཁྲོ་བོའི་དབང་པོ་ཡིས། །དེང་ནས་བྱང་ཆུབ་བར་(༢༡༦བ) ― GLG021_Page_0434 ―
[མ་དཔེ་གཟིགས་ན་འདིར་གནོན།]
དུ་རྗེས་ཟུང་ཤིག །ཅེས་པ་འདིའང་དབུ་མཛད་ངག་དབང་ཕུན་ཚོགས་ཀྱིས་ཐང་ཁའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཀུན་རྟོག་པིར་གྱིས་རི་མོར་བྲིས་པའི་གཟུགས། །ཕྲ་རགས་རྣམ་པ་ཐམས་ཅད་མཁྱེན་སྤྱན་ངོར། །གཟིགས་ནས་སྨོན་པའི་དབང་པོར་དུས་གསུམ་རྒྱལ། །སྲས་དང་སློབ་མར་བཅས་པ་མཐའ་དག་དགོངས། །འཇམ་དབྱངས་དགྱེས་པས་ངག་ལ་དབང་ཕྱུག་པ། །བློ་ལྡན་མཁས་བཙུན་བཟང་པོའི་ཟློས་གར་ཅན། །རྒྱ་མཚོའི་གོས་ཀྱིས་འཇིག་རྟེན་བཏེག་པའི་བར། །བགྲང་ཡས་འགྲོ་བའི་གཉེན་དུ་བརྟན་པར་ཤོག །བློ་བཟང་གྲགས་སྙན་ཆོས་སྲིད་འབྲེལ་བའི་བསྟན། །གྱེན་དུ་འདེགས་པའི་མཐུ་སྟོབས་ནུས་ལྡན་དང༌། །བདེ་སྐྱིད་སྦྱིན་པའི་སྒོ་འཕར་འབྱེད་མཁས་པ། །མི་དབང་ཟུང་འཇུག་རྡོ་རྗེ་ལྟར་བརྟན་ཤོག །ཐུབ་དབང་གནས་བརྟན་ཆེན་པོ་བཅུ་དྲུག་བཅས། །སྙིགས་མའི་མགོན་པོ་བདེ་བར་གཤེགས་པ་བདུན། །འཆི་མེད་དྲང་སྲོང་བདེན་ཚིག་འགྲུབ་རྣམས་ཀྱིས། །བརྗོད་པ་དོན་དང་ལྡན་པར་བྱིན་གྱིས་རློབས། །དཔའ་བོ་མཁའ་འགྲོ་འདུ་བ་དཀར་མོའི་ལྗོངས། །སྦས་ཡུལ་ཆོས་འཁོར་རྒྱལ་གྱིས་འདུས་པའི་སྡེ། །ཤཱཀྱའི་བསྟན་པ་ཇི་སྲིད་གནས་ཀྱི་བར། །ཡར་ངོའི་ཟླ་ལྟར་འཕེལ་བའི་བཀྲ་ཤིས་ཤོག །ཅེས་ངེད་རང་དང་སྡེ་པ་(༢༡༧ན) ― GLG021_Page_0435 ―
[མ་དཔེ་གཟིགས་ན་འདིར་གནོན།]
གཉིས་ཀྱི་རིང་འཚོའི་ཚིགས་བཅད་ཆོས་འཁོར་རྒྱལ་སྤྱི་སོ་ནས་བསྐུལ་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །དག་པ་དོན་དམ་མི་ཟད་འཁོར་ལོའི་མཛོད། །ཤེས་རབ་ཕ་རོལ་ཕྱིན་པ་བཞིན་ལག་སྐུར། །ཉེར་བསྟན་བརྒྱ་ཕྲག་གསེར་སྦྱངས་ཞུན་མ་རུ། །ལེགས་བཞེངས་པད་རྩ་ལྟར་དཀར་དགེ་བའི་འབྲས། །མོས་གུས་མཐར་ཕྱིན་སྟག་ལུང་ཐང་པའི་བསྟན། །རབ་འཛིན་ངག་དབང་བཀྲ་ཤིས་དཔལ་གྲུབ་ཀྱི། །རིམ་གྲོར་ལྷོད་མེད་བློ་བཟང་ངག་གི་དབང༌། །དལ་བརྒྱད་འབྱོར་བཅུའི་རྟེན་བཟང་རྙེད་པར་ཤོག །སྐྱེ་མང་རྒྱུད་ལ་ཉེར་བགོས་ནག་པོའི་དྲི། །ཡུམ་ཆེན་ཐུགས་རྗེའི་ཀླུང་གིས་རབ་བཀྲུས་ནས། །ཐར་པའི་ས་བོན་བསྐྱེད་བསྲིངས་བྱང་ཆུབ་ཀྱི། །ཕུན་ཚོགས་རོ་བརྒྱའི་སྙེ་མར་ལོངས་སྤྱོད་ཤོག །དམན་ལམ་ཞི་བདེ་རང་ཉིད་འཁོར་བ་ལས། །ཡོངས་ཐར་སྲིད་པའི་ཚོར་བ་རྟག་མྱོང་བར། །མ་ཆགས་སྲིད་ཞིའི་མཐའ་ལས་ཉེར་འདས་པ། །རིང་མིན་ཀུན་མཁྱེན་ཡེ་ཤེས་ཐོབ་པར་ཤོག །ཇི་ལྟར་སྨོན་ལམ་རབ་བཏབ་དཔང་པོ་རུ། །དུས་གསུམ་རྣམ་འདྲེན་སྲས་བཅས་ལ་གསོལ་ན། །དེ་དོན་མངོན་སུམ་འགྲུབ་པར་གྱུར་ཅིག་ཅེས། །དྲུག་ཅུའི་དབྱངས་སྙན་རྣ་བའི་རྒྱན་དུ་མཛོད། །ཅེས་སྟག་ལུང་(༡༡༧བ) ― GLG021_Page_0436 ―
[མ་དཔེ་གཟིགས་ན་འདིར་གནོན།]
ཕྱག་མཛོད་དབུ་མ་པ་བློ་བཟང་ངག་དབང་གི་དོན་དུ་རིགས་བརྒྱུད་རྣམས་ཀྱིས་ཡུམ་ཆེན་མོའི་བརྒྱ་ཐང་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །པདྨ་རཱ་གའི་ལྷུན་པོ་ལ། །ཉིན་བྱེད་འབུམ་གྱི་གོས་ཀླུབས་པ། །ཚེ་དང་ཡེ་ཤེས་དཔག་ཏུ་མེད། །སྒྲིབ་བྲལ་སྤྱན་གྱིས་དུས་ཀུན་གཟིགས། །བདེ་གཤེགས་ལྗགས་ཀྱི་པདྨ་ལས། །བསྔགས་བརྗོད་རྐང་དྲུག་སྙན་པའི་ཀླུ། །རྣ་བའི་བཅུད་གྱུར་བཅོམ་ལྡན་འདས། །རྣམ་པར་རྒྱལ་མས་དགེ་ལེགས་སྩོལ། །གསལ་བཏབ་གཟུངས་སྔགས་བཟླས་ཙམ་གྱིས། འཆི་བདག་མེ་ལོང་འཛིན་པ་ཡི། །ངལ་བ་གཏོང་བྱེད་འཕགས་མའི་ཞབས། །ཡིད་བཞིན་འཁོར་ལོས་འགྲོ་འདི་སྲུངས། །བརྗོད་པ་རྣམ་དག་སྨྲ་བའི་ངག །དབང་ཕྱུག་བློ་ལྡན་དགའ་སྐྱིད་བ། །སྐལ་བཟང་གདུལ་བྱ་རྒྱ་མཚོའི་མགོན། །རྡོ་རྗེ་ལྟ་བུར་བརྟན་པར་ཤོག །ཐེག་ཆེན་ཆོས་ཀྱི་མྱུ་གུ་མཆོག །བྱང་ཆུབ་ལམ་གྱི་རིམ་པ་ཡི། །ལུགས་འཛིན་དགེ་འདུན་འདུས་པའི་གླིང༌། །སྲིད་མཐའི་བར་དུ་དར་བར་ཤོག །འཇིག་རྟེན་གསུམ་གྱི་སྐྱེ་རྒུ་རྣམས། །རིང་པོའི་བར་དུ་འཚོ་བའི་ཚེ། །དཔལ་འབྱོར་ལོངས་སྤྱོད་གནོད་སྦྱིན་ལྟར། །ཉམས་སུ་མྱོང་བའི་སྐལ་ལྡན་ཤོག །རྒྱལ་ཀུན་ངོ་(༢༡༨ན) ― GLG021_Page_0437 ―
[མ་དཔེ་གཟིགས་ན་འདིར་གནོན།]
བོ་བཙོང་ཁ་པའི། །ཆོས་སྲིད་གཉིས་ལྡན་བསྟན་པ་ཡི། །གདུགས་དཀར་གྲིབ་མར་ལུས་ཅན་ཚོགས། །ངལ་སོར་སྤྱོད་པའི་བཀྲ་ཤིས་ཤོག །ཅེས་རིང་འཚོ་དང་འབྲེལ་བའི་སྨོན་ལམ་ཚིགས་བཅད་འདིའང་འཕྱོས་པ་ནམ་མཁའ་རྒྱ་མཚོས་ལམ་རིམ་པའི་ཚོགས་སུ་འཛུགས་རྩིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །དྷཱི ཀཱ ཤ པ ཎྜི ཏྱ བ ཧུཾ ས ར པྲ སཱུ ཀྵཱི ཥཱ གྲ ཀཱི རྟི དྷྭ ཛ སཻ ཏ བོ དི བཿ བློ་གསལ་མཁས་མང་རྒྱ་མཚོའི་གཙུག་ཏོར་རྩེར། །མཛེས་རྒྱན་གྲགས་པའི་རྒྱལ་མཚན་ཚངས་གནས་ཡུལ། །སཱུ ཙྪཱ ཡ ཀ རྞོ ས ར རཱ ཤུ དྷཱ ར ཙ ཀྲཻ རྨཽ ནྱ ཙཱ ཏུ རྡྭི བ བ རྟྱ ཧོ སྭ མཱི། ལེགས་བསྒྲེངས་སྙན་བརྒྱུད་གསེར་སྦྱངས་རྩིབས་འཁོར་གྱིས། །ཐུབ་བསྟན་གླིང་བཞིར་དབང་སྒྱུར་ཚར་པ་རྗེ། །(༢༡༨བ) ― GLG021_Page_0438 ―
[མ་དཔེ་གཟིགས་ན་འདིར་གནོན།]
ངེས་པའི་དོན་དུ་བགྲང་ཡས་དཀྱིལ་འཁོར་ཀུན། །སྤྲོ་དང་བསྡུ་བའི་རྡོ་རྗེ་འཆང་དངོས་ཀྱང༌། །ཐུན་མོང་སྣ་ངོར་དཔལ་ལྡན་ཆོས་སྐྱོང་ནས། །ངོ་མཚར་སྐྱེས་རབས་བཅུ་གཉིས་ཚར་དུ་དངར། །གཉིས་མེད་རྒྱུད་རྒྱལ་དགྱེས་མཛད་ཧེ་རུ་ཀ༔། །བསྟན་སྲུང་བྱེ་བའི་སྡེ་དཔོན་རྡོ་རྗེ་གུར། །རབ་དཀར་ཀཱ་ཤིའི་ངོས་ལ་སྒྱུ་མའི་འཕྲུལ། །ལྷ་ལམ་ངོས་སུ་དབང་པོའི་གཞུ་རིས་བཞིན། །མཐོང་བས་རྣམ་གྲོལ་ཐོས་པས་དོན་ལྡན་པ། །བླ་མ་ཡི་དམ་བསྟན་སྲུང་སྣང་བརྙན་ཚོགས། །དབང་རྣོན་ཆོས་རྗེས་འབྲངས་པའི་དད་པ་ཡིས། །བསོད་ནམས་ཉེར་བྱས་ལྗིད་ཀྱིས་ཀུན་བཟོད་རྡུལ། །འབྲས་བུ་དེང་ནས་སྲིད་བར་རྣམ་ཐོས་བུའི། །ཡོན་ཏན་ཀུན་ལ་མཉམ་པར་ལོངས་སྤྱོད་ཅིང༌། །རིང་མིན་མདུད་པ་གསུམ་གྱི་འཕྲང་གེགས་ལས། །ཡོངས་བསྒྲལ་བཅུ་གསུམ་རྡོ་རྗེའི་ས་བརྙེས་ཤོག །དེ་མ་གྱུར་ཀུན་རྣམ་དག་དགེ་བའི་བཤེས། །དམ་པའི་མགོན་གྱིས་གཅེས་པར་ལེགས་བསྐྱངས་ནས། །ཚད་མ་བཞི་ལྡན་སྙན་བརྒྱུད་སློབ་བཤད་ཀྱི། །སྨིན་གྲོལ་བདུད་རྩིས་ཅི་དགར་མྱོས་པར་ཤོག །མདོར་ན་འདི་ཕྱི་བར་དོའི་གནས་རྣམས་སུ། །མགོན་ཁྱོད་ཐུགས་རྗེའི་ཉི་མ་སྙིང་དབུས་སུ། །ཤར་ནས་ཕན་བདེའི་སྣང་བ་འོད་པོ་ཆེའི། །བཀྲ་ཤིས་དཔལ་གྱིས་རྟག་ཏུ་ཁྱབ་པར་ཤོག །(༢༡༩ན) ― GLG021_Page_0439 ―
[མ་དཔེ་གཟིགས་ན་འདིར་གནོན།]
ག མྨཱུ ཁ ཏཱ རྟྱཱ ས ན ས རྦ པ ནྣ སཱ དྭཱ གི ནྡྲ དྷཱི པྲོ ཏྤ ཊུ ཀེ སུ ཀ རྨ ཀཻཿ འགྲོ་ངོར་གདན་གསུམ་ཀུན་ཚང་ངག་དབང་བློ། །རབ་ཡངས་མཁས་བཙུན་བཟང་པོའི་འཕྲིན་ལས་ཀྱི། །སཱ རཱ ནྟ བི ཥྤྲ ཧྨ ཎ ཧ ངྶ ཤུ ཀླ ཧཱ ས ྈྐ ནྛ ཛ སྱཱ བྷ ཡ བ ཛྲ སེ ན ཏཱ། །རྒྱ་མཚོའི་མཐར་ཁྱབ་ཚངས་སྲས་ངང་མོ་དཀར། །བཞད་པའི་མགྲིན་ཁྲོལ་འཇིགས་མེད་རྡོ་རྗེའི་སྡེར། །སྒྲོ་བཏགས་མིང་སྙན་ཡང་སྲིད་བཻཌཱུརྱའི། །འཕྲེང་བ་ཚིག་གི་སྲད་བུར་ཉེར་བརྒྱུས་པ། །མཁས་གྲུབ་ཆོས་རྒྱལ་སྣང་བརྙན་ཚར་དངར་བ། །ལེགས་བྱས་མགྲོན་དེ་རིང་ནས་བསུ་བ་བཞིན། །དགྲ་བོའི་སྲོག་ལ་མི་བཟད་ཧ་ལའི་དུག །རྣལ་འབྱོར་ལས་རྣམས་སྒྲུབ་ལ་ཡིད་བཞིན་ནོར། །འདོད་ལྷའི་སྙིང་ལ་བྲོ་བརྡུང་སྟོབས་འཕྲོག་དབང༌། །གཉན་ཞིང་མྱུར་ལ་གྲགས་པ་དོན་ལྡན་ཅན།(༢༡༩བ) ― GLG021_Page_0440 ―
[མ་དཔེ་གཟིགས་ན་འདིར་གནོན།]
།དམ་ཚིག་མཚོ་ལ་ཡེ་ཤེས་སེམས་དཔའི་ཆར། །རོ་གཅིག་སྐལ་བར་མི་དབྱེར་ཏིཥྛནྟུ། །བརྒྱ་ཕྲག་མེ་ཏོག་འཐོར་ཚེ་ལྷ་རྣམས་ཀྱི། །མགྲིན་པའི་ལམ་ལས་བཀྲ་ཤིས་གླུ་དབྱངས་ལེན། །ལེགས་བྱས་མཐུ་ཡིས་དེང་ནས་བྱང་ཆུབ་བར། །རྡོ་རྗེའི་སློབ་དཔོན་གཙུག་ཏུ་མི་འབྲལ་བར། །ཁས་བླངས་ཇི་བཞིན་བརྩེ་བས་རྗེས་བཟུང་སྟེ། །མཐར་ཐུག་དོན་རྣམས་འགྲུབ་པར་བདག་བྱིན་རློབས། །མཻ ཏྲཻ རྡ ཡེ ན སྭ པ རཾ ས མོ མ ཧཱ ས ཏྭོ ག །བི ཏྶི དྡྷ མ ཏི ཛྙ བཻ ཙ རཿ བྱམས་བརྩེས་བདག་གཞན་མཉམ་པའི་སེམས་དཔའ་ཆེ། །ངག་དབང་བློ་གྲོས་ཡོངས་གྲུབ་མཁྱེན་དཔྱོད་ཅན། །ཀཱ རུ ཎྱ པུ ཎྱཱ དི ཤ བྷཱ བ བྷཱ ཥ སཱ དྷཻ ཤྴཱ ས ན དྷྭཱ ཛི ཀ ད ཀྵ གོ དྷ རཿ། མཐའ་ཡས་བསོད་ནམས་ཞིང་གྱུར་བཤད་སྒྲུབ་ཀྱི། །ཐུབ་བསྟན་རྒྱལ་མཚན་བསྒྲེང་མཁས་རྡོ་རྗེ་འཛིན། །(༢༢༠ན) ― GLG021_Page_0441 ―
[མ་དཔེ་གཟིགས་ན་འདིར་གནོན།]
དཀྱིལ་འཁོར་རྒྱ་མཚོའི་དེད་དཔོན་མཚམས་སྤྲིན་གོས། །ཉེར་ཀླུབས་མི་འཇིགས་བཞི་ལྡན་ཐོབ་མིན་བར། །འཁྲིད་མཛད་ས་མཁན་བསླུ་མེད་གཏན་གྱི་སྐྱབས། །ཟླ་བས་ཡོངས་ལྷག་དམ་པ་བཅུ་ཕྲག་གཅིག །བདེ་ཆེན་མཁའ་ལ་སྤྱོད་པའི་ཕོ་བྲང་དུ། །བཅུ་དྲུག་ལང་ཚོར་དར་བའི་རྗེ་བཙུན་མ། །ཟླ་ཞུན་ཁུ་བས་ལན་བརྒྱར་བྱུགས་པས་ཀྱང༌། །མཚོན་མིན་མིག་གི་བདུད་རྩི་ཚེ་སྦྱིན་ལྷ། །ཁྲག་དྲོན་རྔུབས་པས་མ་ཚིམ་དགྲ་བོའི་སྙིང༌། །རྗེན་པར་ཟ་བ་བེག་ཙེ་ལྕམ་དྲལ་དང༌། །དམ་ཅན་ཁྱུང་ལུང་མཐུ་སྟོབས་རྫུ་འཕྲུལ་གྱིས། །ས་གསུམ་ཅིག་ཅར་འགེམས་ལ་རིངས་པ་བཞིན། །འབད་པའི་ལེགས་བྱས་སློབ་བུ་མཆོག་རྣམས་ལ། །གཅེས་པར་གདམས་པ་ཚད་མ་བཞི་ལྡན་ཆོས། །སྟོན་པས་སྐྱེ་བར་ཡོངས་འཛིན་སྤང་རྟོགས་ཀྱི། །ཡོན་ཏན་དབྱར་མཚོ་ལྟ་བུར་འཕེལ་བར་ཤོག །འཇའ་ལུས་འགྲུབ་དང་རྡོ་རྗེ་བཙུན་མོ་ཡི། །མངོན་སུམ་རྗེས་འཛིན་སྐལ་བཟང་མ་ཐོབ་ན། །སྒྱུ་མའི་སྐྱེས་ཆེན་འདེགས་དུས་རྗེ་བཙུན་མས། །སྐར་མདའ་འཕངས་ལྟར་མཁའ་སྤྱོད་གནས་འདྲེན་ཤོག །འདི་སྣང་ཚེ་དཔལ་སྟོབས་འབྱོར་ལ་འཁུ་ཞིང༌། །དམ་ཆོས་བསྒྲུབ་པའི་བར་གཅོད་དགྲ་དང་བགེགས། །བསྟན་སྲུང་དབང་པོའི་ཚོགས་ཀྱིས་རྐན་སྒྲར་བཅས། །ཆེམ་ཆེམ་ཟ་སོགས་ལས་བཞི་བསྒྲུབ་པར་ཤོག །(༢༢༠བ) ― GLG021_Page_0442 ―
[མ་དཔེ་གཟིགས་ན་འདིར་གནོན།]
ཨི ནྡྲ ཙཱ པེ རུ ཕ ཀྵཱ ར སི དྡྷཱ མྲྀ ཏོ ཌཱ ཀི ནཱི ནྡྲཱ མ ནོ དྷཱ མ ཧཱ གྲཱ མ ཀཱ །འཇའ་ལུས་འཕོ་བ་ཆེ་འགྲུབ་ཐོད་ཕྲེང་རྩལ། །མཁའ་འགྲོའི་དབང་མོ་ཡིད་འཛིན་མཁར་ཆེན་བཟའ། །ག མྦྷི རཱ རྠེ ཎ དྷ རྨ སྱ མཱུ ཁོ དྒྷ ཊ དྭི ཐྱ བཱ དྱཱ ཛྙ ནི དྷྱེ མ མཱ ཧཱ རྦྷི ཀཿ། ཟབ་དོན་ཆོས་ཀྱི་སྒོ་འབྱེད་རྣམ་གཉིས་སོགས། །བཀའ་གཏེར་བརྒྱུད་པ་ངོ་མཚར་འཕྲུལ་པོ་ཆེ། །རྡོ་རྗེ་དྲག་རྩལ་ཞི་ཁྲོ་ཀུན་འདུས་ལྷ། །ངེས་གསང་བསྟན་པ་བསྲུང་བ་རལ་གཅིག་མ། །བོད་སྐྱོང་རྒྱལ་པོའི་སྐུ་ལྷ་དྲི་ཟའི་རྒྱལ། །རྩ་གསུམ་ཡོངས་འདུས་ཤེལ་ལ་ཚོན་བརྒྱ་བཞིན། །འབོད་སྒྲོགས་མགོན་པོའི་གར་དུ་རྔ་ཡབ་གླིང༌། །དངོས་བཞུགས་བོད་ཡུལ་འགྲོ་ལ་དགྱེས་པའི་སྤྱན། །གཡེལ་བ་མེད་ཀྱང་ལྷག་པར་གསོལ་འདེབས་བུར། །ཐུགས་རྗེའི་བྱིན་དབབ་མཆོག་ཐུན་དངོས་གྲུབ་སྩོལ། །རིགས་འཛིན་བརྒྱུད་པའི་ཐུགས་རྗེ་མཁའ་གླང་འཁྲིག །སྒྲུབ་སྡེ་(༢༢༡ན) ― GLG021_Page_0443 ―
[མ་དཔེ་གཟིགས་ན་འདིར་གནོན།]
བརྒྱད་ཀྱི་དངོས་གྲུབ་ཆར་དུ་བསྙིལ། །དམ་ཅན་འཕྲིན་ལས་སྙེ་མ་གཡུར་ཟ་བས། །བསམ་དོན་ལྷུན་གྱིས་ཡོངས་འགྲུབ་བཀྲ་ཤིས་ཤོག །བྱང་པ་རིགས་ལྡན་རིམ་བྱོན་གྱི་མདུན་ན་འདོན་ངག་རིག་པ་འདར་བའི་བརྒྱུད་ལས་པཱ་ཎི་ཀ་ཙན་དབྱངས་ཅན་མ་སྟེ་བརྡའ་སྤྲོད་བཞི། སྡེབ་སྦྱོར་སྙན་ཚིག་རྩིས་དཀར་ནག་སོགས་རིག་གནས་མང་པོར་བློ་གྲོས་ཀྱི་སྣང་བ་དཀར་བའི་ལོ་ཆེན་ངག་དབང་ཕུན་ཚོགས་ལྷུན་གྲུབ་ཀྱིས་གོང་གསལ་ཐང་ཁ་གྲ་ཚར་གསུམ་དང་ཨྱོན་ཆེན་པོའི་ཐང་ཁ་ཆུང་བ་ཞིག་བཅས་བཞེངས་པའི་རྒྱབ་ཡིག་སྤྱི་དང་བྱེ་བྲག་ཏུ་སྐྱེ་བར་རྗེས་འཛིན་དང་མེ་ཏོག་བརྒྱ་ཚར་དགོས་ཚུལ་ལྟར་རིག་བྱེད་པ་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབངདགེ་ལེགས་ཀྱིས་བགྱིས་པ་སརྦཛཱ་མངྒ་ལེ་བྷ་ཝནྟུ། །རྒྱལ་བ་འོད་དཔག་མེད་པ་འགྲོ་ཀུན་སྐྱབས། །སྐྱབས་བཟུང་འཆི་མེད་མཆོག་སྦྱིན་རྣམ་པར་རྒྱལ། །རྒྱལ་ཡུམ་ཚེ་སྦྱིན་ཡིད་བཞིན་འཁོར་ལོའི་ཞབས། །ཞབས་པད་གཙུག་བསྟེན་འདོད་པའི་འབྲས་ཀུན་སྩོལ། །གསལ་གསལ་མཁའ་ལ་སངས་རྒྱས་སྲས་སློབ་རྣམས། །ཡང་ཡང་བདེན་ཚིག་བརྗོད་པའི་དཔང་པོ་རུ། །དུང་དུང་དང་བའི་ཡིད་ཀྱིས་སྤྱན་འདྲེན་ན། །འཛུམ་འཛུམ་ཞལ་ཁྱིམ་བསྟན་ནས་སྤྱོན་ཞིག་གུ། །དུས་གསུམ་རྒྱལ་ཀུན་ཀུན་མཁྱེན་བཙོང་ཁ་པའི། །རྒྱ་ཆེན་གསུང་རབ་རབ་ཏུ་འབྱམས་ཀླས་པ། །མང་དུ་ལེགས་ཐོས་ཐོས་དོན་བསམ་བསྒོམ་བསྟན། །ཁམས་(༢༢༡བ) ― GLG021_Page_0444 ―
[མ་དཔེ་གཟིགས་ན་འདིར་གནོན།]
གསུམ་མ་ལུས་ལུས་མེད་དར་བ་ཤོག །ངག་གི་དབང་པོ་དབང་ཕྱུག་བརྒྱད་ལྡན་ལྷས། །རྗེས་བཟུང་བློ་གྲོས་བློ་གསལ་ཀུན་དགའི་དཔྱིད། །སྐལ་བཟང་དགའ་སྐྱེད་དགའ་སྟོན་རྒྱ་མཚོའི་མཐར། །སྤེལ་མཛད་སྲིད་འདིར་སྲིད་ཞིའི་མགོན་དུ་བཞུགས། །ཡིད་སྲུབས་ཚོགས་ཀྱིས་མཚོན་ཆར་ཕབ་ཀྱང་ཡིད། །འཕམ་བྱེད་མཆོག་གསུམ་ཐུགས་རྗེས་བདུད་སྡེ་འཕམ། །སྲ་བརྟན་མི་འགྱུར་རྡོ་རྗེའི་ཁྲི་འཕང་ས། །གྲུབ་ནུས་སྨོན་ལམ་ཅི་བཏབ་ལྷུན་གྱིས་གྲུབ། །དགའ་བ་བརྒྱ་པ་ལ་སོགས་གཙུག་གི་རྒྱན། །དགའ་བའི་དཔལ་ལྡན་ཐུབ་པའི་གསུང་རབ་ལ། །དགའ་འགུར་སྤྱོད་པ་ཁྲིམས་ལྡན་འདུས་གླིང་གི །དགའ་སྟོན་སྲིད་མཐའི་བར་དུ་རྒྱས་པར་ཤོག །རྣམ་གསུམ་ཆོས་ཀྱི་འཁོར་ལོ་དང་པོའི་དོན། །རྣམ་དག་ཁྲིམས་ལས་ཉེར་སྦྱོར་མཁན་པོ་དང༌། །རྣམ་མཁྱེན་ཡེ་ཤེས་མཆོག་དེ་ཐོབ་མིན་བར། །རྣམ་པ་ཀུན་ཏུ་འབྲལ་མེད་བཀྲ་ཤིས་ཤོག །ཅེས་རྗེས་འཛིན་དང་རིང་འཚོའི་ཚིགས་བཅད་སྨོན་ལམ་དང་བཅས་པ་འདིའང་རྣམ་སྲས་གླིང་པ་བསླབ་གསུམ་རྒྱ་མཚོས་དོལ་གསུང་རབ་གླིང་དུ་འཛུགས་རྩིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ངེས་པའི་དོན་དུ་དྲིན་ཅན་བླ་མ་མཆོག །དཔལ་ལྡན་རྒྱལ་བ་ཡོངས་ཀྱི་གསང་བའི་མཛོད། །འཛིན་མཛད་དྲང་སྲོང་ཆེན་པོ་དྲི་མ་མེད། །གཏུམ་དྲག་ཞེ་སྡང་རྡོ་རྗེའི་རྣམ་རོལ་བ། །དེང་ནས་ཀུན་བཟང་གོ་འཕང་མ་ཐོབ་བར། །(༢༢༢ན) ― GLG021_Page_0445 ―
[མ་དཔེ་གཟིགས་ན་འདིར་གནོན།]
སྙིང་གི་ཟེའུ་འབྲུར་འབྲལ་མེད་རྟག་བཞུགས་ཏེ། །མི་བཟད་མཐུ་སྟོབས་འབར་བའི་རྫུ་འཕྲུལ་གྱིས། །བདུད་བཞིའི་གཡུལ་ལས་རྒྱལ་བར་བྱིན་གྱིས་རློབས། །ལག་ན་རྡོ་རྗེའི་བསྐྱེད་རྫོགས་གྲུ་རྫིངས་ལ། །བརྟེན་ནས་འགྲོ་རྣམས་སྲིད་ཞི་ཆུ་གཏེར་མཐར། །སྒྲོལ་ལ་ཆོས་རྒྱལ་མྱ་ངན་མེད་པ་དང༌། །མཚུངས་པའི་སྙིང་སྟོབས་བླ་ནས་བླར་འཕེལ་ཤོག །ཅེས་བླ་མ་དང་ཡི་དམ་དབྱེ་བ་མེད་པར་གསོལ་བ་འདེབས་པ་ཞིག་དགོས་ཞེས་བྲག་སྡོང་སྔགས་རམས་པ་བློ་བཟང་ཚེ་དབང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རྩེས་ཐང་སྔགས་རམས་པ་ངག་དབང་དགེ་ལེགས་སོ། །རིག་དང་གྲོལ་བའི་དཔལ་ལྡན་དགེ་འདུན་ཚོགས། །གཙུག་ན་ངེས་པར་ཐམས་ཅད་མཁྱེན་པ་རུ། །ལྷུན་གྱིས་གྲུབ་པ་བསླུ་བ་མེད་པའི་སྐྱབས། །མ་སྨད་ཐུགས་རྗེའི་ལྕགས་ཀྱུས་བདག་བཟུང་ཞིག །སྐྱེ་བར་དགེ་ལེགས་གངས་ཅན་རི་བོ་ལ། །གཅིག་ཏུ་འདུན་པས་མཁས་གྲུབ་རྣམ་དཔྱོད་ཀྱི། །གངྒཱ་ཐུབ་བསྟན་རྒྱ་མཚོར་རྟག་འབབ་པ། །དབྱངས་ཅན་བཞད་པའི་རྡོ་རྗེས་བདག་རྗེས་བཟུང༌། །ཆེན་པོ་ཧོར་དང་བོད་འབངས་སྐྱེ་རྒུ་ཡི། །བསོད་ནམས་བྱེ་བའི་ཞིང་གྱུར་འཕྲིན་ལས་ཀྱིས། །རྒྱ་མཚོའི་མཐའ་ཀླས་ནོར་འཛིན་ཀུན་ཁྱབ་པའི། །མཁྱེན་བརྩེ་ནུས་བྱིན་སྙིང་ལ་རྟག་བཞུགས་མཛོད། །མཐའ་ཡས་ཡོན་ཏན་མཁའ་ལྟར་རྒྱ་ཆེ་(༢༢༢བ) ― GLG021_Page_0446 ―
[མ་དཔེ་གཟིགས་ན་འདིར་གནོན།]
ཞིང༌། །མཚོ་ལྟར་གཏིང་ཟབ་བདེ་ཆེན་ཆོས་ཀྱི་རྒྱལ། །ལྷར་བཅས་ལུས་ཅན་ཀུན་གྱི་སྐྱབས་གཅིག་པུ། །བྱང་ཆུབ་ཐོབ་མིན་དེ་སྲིད་མགོན་མཛོད་ཅིག །གསུང་ངག་ཆད་མེད་དབང་གི་ཆུ་རྒྱུན་གྱིས། །རབ་སྨིན་བློ་གྲོས་ལམ་བཟང་ཟབ་རྒྱ་ཆེ། །མཚོ་ལྟར་གཏིང་དཔོག་མི་མངོན་བརྒལ་བ་ལ། །འཇིགས་མེད་ཐོས་བསམ་སྒོམ་པའི་གོ་ཆ་ཅན། །སྒྲིབ་གཉིས་དགྲ་ཚོགས་ཉེར་ཐུབ་ཟས་གཙང་སྲས། །བསྟན་པ་རིན་ཆེན་འཆད་རྩོད་རྩོམ་གསུམ་གྱིས། །ལུང་རྟོགས་ལང་ཚོ་དར་ལ་བབས་པའི་སྡེའི། །གཟུགས་བརྙན་མོས་རྟེན་ཤེལ་ལ་ཚོན་རིས་བཞིན། །རབ་དཀར་འདབ་སྟོང་ཡོངས་བཞད་ཟེའུ་འབྲུ་ལ། །ལག་རྗེས་རི་མོ་རྣམ་བཀྲ་བྷྲ་མ་ར། །དངོས་གྲུབ་ཆེས་དངར་སྦྲང་རྩིའི་བཅུད་ཀྱི་རོ། །མྱང་བའི་སྐལ་བ་བཟང་པོར་འགྱུར་བར་ཤོག །རང་རིག་བླ་མའི་ངོ་བོར་ཐག་ཆོད་ནས། །རང་གཞན་དོན་གཉིས་སྒྲུབ་ནུས་རྡོ་རྗེ་སེམས། །རང་ཞལ་མངོན་དུ་མ་གྱུར་དེ་སྲིད་བར། །རང་དང་ནམ་ཡང་འདུ་འབྲལ་མེད་པར་ཤོག །འབད་པས་བསོད་ནམས་བསགས་པ་བཟང་པོའི་ལས། །ལས་དཀར་རྣམ་སྨིན་མ་གྱུར་སེམས་ཅན་ཚོགས། །ཚོགས་གཉིས་རྫོགས་པའི་ཆེད་དུ་ཡོངས་བསྔོས་འབྲས། །འབྲས་བུ་ཡོངས་དུད་རོ་བདའ་མྱོང་བར་ཤོག །ཅེས་པ་འདིའང་ལྷ་ས་བ་ངག་དབང་དཀོན་མཆོག་གི་བྲིས་ཐང་ལྔ་ཚར་བཞེངས་པའི་སྨོན་ལམ་དུ་ལག་རྗེས་འཁྲུལ་མེད་དང་སྐྱེ་བར་འབྲལ་མེད་ཀྱི་ཚིག་སྦྱོར་དགོས་ཚུལ་ལྟར་ཟ་ཧོར་(༢༢༣ན) ― GLG021_Page_0447 ―
[མ་དཔེ་གཟིགས་ན་འདིར་གནོན།]
གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མར་གད་ལྷུན་པོའི་མཛེས་པ་ཡོངས་འཕྲོག །རྒྱལ་ཡུམ་འཕགས་མའི་སྣང་བརྙན་འདི་ལ། །མེ་ཏོག་བརྒྱ་རྩའི་ཤིས་པ་བརྗོད་མཐུས། །འཇིགས་པ་བརྒྱད་ལས་མྱུར་དུ་སྐྱོབས་ཤིག །སྤེལ་ལེགས་མེ་ཏོག་བརྒྱ་རྩའི་འཕྲེང་མཛེས་པ། །མྱུར་མཛད་ཡེ་ཤེས་མགོན་པོའི་ཟློས་གར་གྱིས། །དགྲ་བགེགས་ཡོངས་ཞི་བར་དོའི་འཇིགས་སྐྱབས་ནས། །ཡང་སྲིད་ཕྱི་མར་གྲུ་འཛིན་ཞིང་བགྲོད་ཤོག །སྲིད་གསུམ་དབང་སྒྱུར་དཔལ་ལྡན་ནམ་གྲུ་མའི། །སྣང་བརྙན་ཤིས་བརྗོད་བརྒྱ་ཕྲག་གིས་སྤུད་པ། །འབྲས་བུ་འཕྲིན་ལས་རྣམ་བཞིའི་དཔལ་ཡོན་ཀུན། །འབད་སྩོལ་མེད་པར་ལྷུན་གྱིས་གྲུབ་པར་ཤོག །ཅེས་པ་འདིའང་ཕོ་བྲང་གེ་ར་བ་བློ་བཟང་མཁྱེན་བརྩེས་གོང་གསལ་གསུམ་གྱི་བྲིས་སྐུ་བཞེངས་པར་ཐོར་ནས་བརྒྱ་རྩ་ཡོད་ཚུལ་དགོས་ཟེར་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རྩེས་ཐང་སྔགས་རམས་པ་ངག་དབང་དགེ་ལེགས་སོ། །དཀོན་ཅོག་རིན་ཆེན་རྣམ་གསུམ་ཐུགས་རྗེའི་མཐུས། །འདིར་སྣང་འགལ་རྐྱེན་བར་གཅོད་མ་ལུས་ཞི། །ཚེ་དཔལ་སྟོབས་འབྱོར་ལུང་རྟོགས་ཡོན་ཏན་ཀུན། །ཡར་ངོའི་ཟླ་ལྟར་འཕེལ་བར་བྱིན་གྱིས་རློབས། །ཉིང་མཚམས་སྦྱར་ཚེ་འོད་དཔག་མེད་མགོན་གྱི། །ཡེ་ཤེས་ལྕགས་ཀྱུས་བདེ་བ་ཅན་ཞིང་དུ། །ཉེར་དྲངས་པདྨའི་སྦུབས་(༢༢༣བ) ― GLG021_Page_0448 ―
[མ་དཔེ་གཟིགས་ན་འདིར་གནོན།]
སུ་རྫུས་སྐྱེས་ཏེ། །ས་ལམ་ཡོན་ཏན་མཐའ་དག་ལྷུན་གྲུབ་ཤོག །དཔོན་པོ་ཚེ་རིང་ཀྱི་ཁ་ཏོན་དུ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རས་དཀར་ཟླ་བའི་དཀྱིལ་འཁོར་ཉ་གང་ངོས། །དངོས་བརྒྱུད་བླ་མའི་སྣང་བརྙན་རི་དྭགས་གཟུགས། །བྱིན་རླབས་ག་བུར་ཟེགས་མས་སྒྲིབ་གཉིས་དང༌། །བསྐྱེད་འབྲས་ཚ་གདུང་གཞིལ་བའི་ཆོ་ག་མཁན། །དགེ་སྡིག་གཟུགས་བརྙན་མ་འདྲེས་སོ་སོ་རུ། །དབྱེ་བའི་བསོད་ནམས་ཉེར་བྱས་དགའ་བྱེད་ལྷས། །རྣམ་སྨིན་ཆེས་གནག་ལངྐའི་མགྲིན་བཅད་དེ། །གཏན་བདེའི་སཱི་ཏཱར་རྟག་ཏུ་རྩེ་འཇོར་ཤོག །རྫོགས་ལྡན་སྐྱེ་རྒུ་ཇི་བཞིན་རིང་པོར་འཚོ། །དབང་ཐང་ཉ་ཕྱིས་ཁོག་པ་ཡངས་པའི་ནང༌། །སྟོབས་འབྱོར་མུ་ཏིག་ཕྱུར་བུར་ཡོངས་སྤུངས་ནས། །རེ་འབྲས་གྲགས་པ་དོན་དང་ལྡན་པར་ཤོག །ཅེས་སྒྱིད་ཐང་ནོར་བུས་ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་བཞེངས་པའི་གཙོ་ཐང་གི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མདོ་ཁམས་སྒང་གསུམ་རབ་ཡངས་ས་ཆེན་པོར། །རྒྱལ་བའི་དབང་པོ་ཀུན་མཁྱེན་བཙོང་ཁ་པའི། །ཆོས་དང་སྲིད་ཀྱི་བསྟན་པས་ལེགས་ཁྱབ་ནས། །འགྲོ་རྣམས་མ་ལུས་བདེ་ཞིང་སྐྱིད་པར་ཤོག །མགོན་དེའི་གསུང་རབ་ལུང་གི་ཆར་ཆེན་པོས། །འགྲོ་རྒྱུད་རྟོགས་པའི་སྙེ་མ་བསྐྱེད་བསྲིངས་པ། །(༢༢༤ན) ― GLG021_Page_0449 ―
[མ་དཔེ་གཟིགས་ན་འདིར་གནོན།]
ཐོས་བསམ་སྒོམ་གསུམ་ཉི་མས་སྨིན་བྱེད་མཁན། །ངག་དབང་བློ་བཟང་རྒྱ་མཚོ་བརྟན་གྱུར་ཅིག །འཐབ་རྩོད་དབུལ་ཕོངས་དུས་ཀྱི་ཆད་པ་ཞི། །ལོ་ཏོག་སྦྲུམ་ཞིང་ཚོང་རྣམས་ཁེ་སྤོགས་ཐོན། །ཚེ་དང་བསོད་ནམས་འདོད་དགུ་ལྷུན་གྲུབ་སྟེ། །བདེ་སྐྱིད་དཔལ་གྱིས་ས་སྟེང་ཁྱབ་པར་ཤོག །ཅེས་པ་འདིའང་མདོ་གཞིས་སྡོད་བློ་བཟང་དབང་ཕྱུག་དང་ལོང་པོ་ང་ཕོད་ཨ་བོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སྭསྟི་སིདྡྷཾ། དོན་ཀུན་གྲུབ་སོགས་དུས་གསུམ་སངས་རྒྱས་སྲས། །སློབ་མར་བཅས་པ་དཀོན་མཆོག་ཐུགས་རྗེའི་དཔུང༌། །ལྷ་དང་དྲང་སྲོང་བདེན་ཚིག་དམོད་པའི་མཐུས། །བདུད་བཞིའི་གཡུལ་ལས་རྣམ་པར་རྒྱལ་བར་ཤོག །རིན་ཆེན་བསོད་ནམས་མཆོག་གྲུབ་བཤེས་གཉེན་ཆེར། །ཚེ་མཐའ་ཡས་དང་ཡིད་བཞིན་འཁོར་ལོ་ཡིས། །དབང་བསྐུར་གཡུང་དྲུང་སྲོག་ཏུ་ལྷུན་གྲུབ་པས། །རབ་བརྟན་ཆོས་ཀྱི་འཁོར་ལོ་བསྐོར་བར་ཤོག །གུར་མགོན་ལེགས་ལྡན་གདོང་བཞི་རྣམ་ཐོས་སྲས། །དམག་ཟོར་རྒྱལ་མོ་རྡོ་རྗེ་རབ་བརྟན་མ། །དཀར་ཕྱོགས་སྐྱོང་བའི་མཐུ་ལྡན་སྲུང་མ་ཡིས། །འདོད་པའི་རེ་འབྲས་ལྷུན་གྱིས་གྲུབ་པར་མཛོད། །ཅེས་མཁན་ཆེན་ཁྱབ་བདག་ཞ་ལུ་པ་ཆེན་པོ་ཞབས་པད་བརྟན་པའི་བདེན་པའི་ཚིག་འདི་ནི་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་རིག་པ་བསམ་(༢༢༤བ) ― GLG021_Page_0450 ―
[མ་དཔེ་གཟིགས་ན་འདིར་གནོན།]
མཐོང་ཕུན་ཚོགས་དབང་པོའོ། །བསྐལ་བཟང་འདྲེན་པ་བཞིན་པ་ཤཱཀྱའི་ཏོག །སྣང་བརྙན་བརྒྱ་ཕྲག་བཅུས་བསྒྱུར་གསེར་ཞུན་ལས། །ལེགས་གྲུབ་འདི་ཕྱིར་སིམ་པའི་བྱེད་པོ་རུ། །རབ་བསྐྲུན་འབྲས་བུ་ལྷུན་གྱིས་འགྲུབ་བྱིན་རློབས། །མཛོད་སྤུ་ནས་འཕྲོས་འོད་ཀྱི་སྣང་བ་ཡིས། །བདག་བློ་འདབ་སྟོང་བཞད་པའི་ཟེའུ་འབྲུ་ལས། །ཉེར་འཛག་ཕན་བདེའི་སྦྲང་རྩིར་ཡང་སྲིད་ཀུན། །ལོངས་སྤྱོད་བཟང་པོའི་སྐལ་པ་ལྡན་པར་ཤོག །ཐོག་མཐའ་བར་དུ་དགེ་བ་དམ་པའི་ཆོས། །རྟག་ཏུ་ཐོས་བསམ་སྒོམ་པ་ལྷུར་བླངས་ཏེ། །འགྲོ་བ་ཀུན་འདྲེན་དེད་དཔོན་ཆེན་པོ་རུ། །འགྱུར་ཕྱིར་དགེ་ཚོགས་བསྔོས་འབྲས་ཟད་མེད་ཤོག །ཅེས་ལྷ་ས་བ་ངག་དབང་མཁས་བཙུན་གྱི་སྐྱཻ་རྟགས་དང་ལྷག་པའི་ལྷར་བཅོམ་ལྡན་འདས་ཤཱཀྱ་སེང་གེའི་སྟོང་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །པད་དཀར་ཟླ་བ་ཞུན་མ་འཁྱིལ་བའི་སྟེང༌། །མཛེས་སྡུག་ལུས་ཕྲའི་ཉམས་ཀྱི་འཇོ་སྒེག་ཅན། །དྲན་པས་འཆི་བདག་དཔུང་འཇོམས་ཚེ་སྦྱིན་ལྷ། །སྒྲོལ་དཀར་ཡིད་བཞིན་འཁོར་ལོས་དངོས་གྲུབ་སྩོལ། །མཁྱེན་བརྩེ་ནུས་པ་མ་ལ་ཡ་ཡི་དྲིས། །སེང་གླང་མེ་སྦྲུལ་ཆོམ་རྐུན་ལྕགས་སྒྲོག་དང༌། །ཆུ་ཀླུང་ཤ་ཟ་འཇིགས་བརྒྱད་ཚ་གདུང་རྣམས། །ཞི་མཛད་ནགས་ཀྱི་སྒྲོལ་མས་མཐུ་དཔུང་བསྐྱེད། །འཇམ་དཔལ་རྡོ་རྗེ་དྲས་དྲུབས་གོས་མནབས་པ།(༢༢༥ན) ― GLG021_Page_0451 ―
[མ་དཔེ་གཟིགས་ན་འདིར་གནོན།]
།རྗེ་བཙུན་བླ་མ་ཀུན་མཁྱེན་ཙོང་ཁ་པའི། །རིང་ལུགས་སྤེལ་མཁས་ངག་དབང་བློ་གྲོས་བཟང༌། །ཐུབ་བསྟན་རྒྱ་མཚོ་གཡུང་དྲུང་ལྟར་བརྟན་ཤོག །མྱུར་མཛད་ཡེ་ཤེས་མགོན་པོས་ཕྱག་དྲུག་པ། །ལས་ཀྱི་གཤིན་རྗེ་ལྷ་ཆེན་ཉི་མའི་བུ། །འདོད་ཁམས་དབང་སྒྱུར་དམག་དང་ཟོར་གྱི་ལྷས། །བསམས་པའི་རེ་བ་བཀོང་བའི་འཕྲིན་ལས་མཛོད། །གཙང་རིས་དཔལ་མགོན་བདུན་ཅུ་ལ་སོགས་པ། །དཀར་ཕྱོགས་སྐྱོང་བ་རྣམས་ཀྱི་ཡུལ་ཁམས་འདིར། །དགེ་འདུན་སྡེ་རྒྱས་སྐྱེ་རྒུའི་བདེ་སྐྱིད་ཚོགས། །འཕེལ་བའི་བཀྲ་ཤིས་དགའ་སྟོན་སྩལ་དུ་གསོལ། །ཞེས་རིང་འཚོའི་ཚིགས་བཅད་འདི་ནི་བླ་མ་སངས་རྒྱས་བཀྲ་ཤིས་ཀྱི་སྐུ་སྐྱེ་གྲགས་པ་ཆོས་འཛིན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །འབྲལ་མེད་སྤྱི་བོར་བསྒོམས་ནས་གསོལ་འདེབས་ན། །སྐུ་གསུང་ཐུགས་ཡོན་འཕྲིན་ལས་མ་ལུས་པ། །བདག་སོགས་སྙིང་ལ་འཇུག་པར་བྱིན་གྱིས་རློབས། །གུའུ་ཤི་ཇའི་སང༌། དགེ་ཚུལ། ཆི་ཁུ་ལ། ཐ་བུ་ནོང༌། ཨུ་པ་ཤི་རྣམས་ཀྱི་ངོར་ཟ་ཧོར་གྱི་བནྡེས་སྦྱར། །སྟོན་དང་སྐྱབས་དངོས་ཟླ་གྲོགས་མཆོག་གསུམ་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་དཔལ། །གདུལ་བྱའི་དོན་དུ་ངེས་པ་ལྔ་ལྡན་ལྟར། །འཚོ་(༢༢༥བ) ― GLG021_Page_0452 ―
[མ་དཔེ་གཟིགས་ན་འདིར་གནོན།]
གཞེས་གསོལ་བཏབ་རེ་བ་དོན་ཡོད་ཤོག །རྒྱ་བོད་ས་མཚམས་ཕུན་ཚོགས་འདོད་དགུའི་སར། །དགའ་ལྡན་བསྟན་པའི་གདུགས་དཀར་གྲིབ་བསིལ་ལ། །རང་གཞན་ཕན་བདེའི་སྲོག་ཟུངས་གཡུང་དྲུང་གཞིར། །རབ་བརྟན་འཛམ་གླིང་རྒྱན་དུ་འཕེལ་བར་ཤོག །སྡེ་འདིར་དཔོན་སློབ་ཡོན་སྦྱོར་དང་བཅས་པ། །ཆོས་དང་སྲིད་ཀྱི་ལེགས་ཚོགས་མ་ལུས་པ། །ལྷུན་གྱིས་གྲུབ་པར་དམག་ཟོར་རྒྱལ་མོ་སོགས། །དམ་ཅན་སྲུང་མས་འཕྲིན་ལས་སྤེལ་བར་མཛོད། །དགའ་བ་བརྒྱ་པའི་བསོད་ནམས་གཟི་བྱིན་གྱིས། །མཆེད་གྱུར་སྡེ་བཞིའི་དཔལ་ལྡན་ཕོ་བྲང་ཆེའི། །ཁྲིམས་གཉིས་གསེར་ཤིང་སྐྱེ་རྒུའི་གཉའ་བ་རུ། །རབ་ལྕི་ཆབ་སྲིད་བླ་ནས་བླར་འཕེལ་ཤོག །འཇིག་རྟེན་སྤྱི་དང་ཁྱད་པར་ཡུལ་ཕྱོགས་འདིར། །མི་ཕྱུགས་ནད་རིམས་གཡུལ་འཁྲུགས་མཚང་འབྲུས་མཚོན། །རྣམ་སྨིན་ནག་པོར་འཛག་འབྲས་སྙིགས་དུས་ཀྱི། །ཆད་ལས་རྒུད་པ་ནམ་ཡང་མེད་པར་ཤོག །རིང་འཚོའི་སྲོག་གི་ཀ་བ་ཉེར་ཚུགས་ཤིང༌། །ལོ་ཏོག་རབ་སྦྲུམས་ཁེ་སྤོགས་དར་དྲག་སོགས། །འབྱོར་བའི་དབང་ཐང་རྣམ་མང་ཐོས་པའི་བུར། །འགྲན་པའི་སྐལ་བ་བཟང་པོར་སྤྱོད་པར་ཤོག །རྩ་གསུམ་ཐུགས་རྗེའི་མཁའ་ལ་བྱིན་རླབས་སྤྲིན། །ཡོངས་འཁྲིགས་དངོས་གྲུབ་ཆར་གྱིས་མཆོག་མཐུན་གྱི། །འདོད་དགུའི་སྙེ་མ་གཡུར་དུ་ལེགས་ཟ་བའི། །ཕུན་སུམ་ཚོགས་པས་དུས་ཀུན་ཁྱབ་པར་ཤོག །ཅེས་དར་རྩེ་མདོ་དགའ་(༢༢༦ན) ― GLG021_Page_0453 ―
[མ་དཔེ་གཟིགས་ན་འདིར་གནོན།]
ལྡན་གཞན་ཕན་གླིང་གི་སློབ་དཔོན་ངག་དབང་འཇམ་དབྱངས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བསམ་མཐོང་པ་ངག་རིག་ཕུན་ཚོགས་དབང་པོའོ། །རྣམ་འདྲེན་སྨན་གྱི་བླ་མ་མངོན་པར་མཁྱེན། །ཆོས་བསྒྲགས་རྒྱ་མཚོའི་དབྱངས་དང་མྱ་ངན་མེད། །རིན་ཆེན་སྣང་བ་སྒྲ་དབྱངས་རྒྱལ་པོ་ཆེ། །མཚན་ལེགས་བདུན་མདོ་དེ་གསུང་ཤཱཀྱ་ཐུབ། །མཐོང་ཐོས་དྲན་པས་རྣམ་པར་གྲོལ་བའི་སྐུ། །རི་མོ་རབ་བཀྲའི་ཆོས་དཀར་ཕུང་པོའི་གཟུགས། །མངོན་སུམ་ནོར་འཛིན་དཔལ་མོའི་ལྟོ་བ་རུ། །མི་ཤོང་ཚངས་པས་གསར་སྣོད་བསྐྲུན་དགོས་འབྲས། །སྒྱུ་སྦྱོར་རིགས་བརྒྱུད་ཚེ་དང་སྟོབས་འབྱོར་སོགས། །ལེགས་ཚོགས་ཡོན་ཏན་བླ་ནས་བླར་འཕེལ་ཏེ། །ཉིང་མཚམས་སྦྱར་ཚེ་བཻཌཱུར་སྣང་ཞིང་གི །པདྨའི་སྦུབས་སྐྱེས་མྱུར་དུ་འཚང་རྒྱར་ཤོག །རྒྱལ་བའི་གཙུག་ཏོར་རྩེ་ལས་ཉེར་འཁྲུངས་པ། །བཅོམ་ལྡན་མ་ཁྱོད་མཐུ་སྟོབས་བྱིན་ཟ་ཡིས། །མི་མཐུན་བགེགས་ཚོགས་བུད་ཤིང་རབ་བསྲེགས་ཤིང༌། །བདེ་སྐྱིད་འོད་ཀྱིས་ཕྱོགས་རྣམས་ཁྱབ་པར་ཤོག །འཇམ་མགོན་བྱིན་རླབས་དཔུང་པས་ཡོངས་བཏེག་པ། །རྣམ་དཔྱོད་ཨུཏྤལ་ཟེའུ་འབྲུ་བཞད་པའི་རྩེར། །མཁྱེན་པའི་རལ་གྲི་རྣོན་པོས་ཆོས་ཀུན་གྱི། །ལོག་རྟོག་དྲ་བ་གཅོད་མཛད་ཙོང་ཁ་པའི། །སྣང་བརྙན་ཀ་ཤིའི་ངོས་ལ་དབང་གཞུའི་ཚོན། །ཉེར་གསལ་བསོད་ནམས་མཐོ་རིས་ཆུ་བོ་ཡིས། །སྡིག་སྒྲིབ་དེ་འབྲས་དུཿཁའི་དྲི་མའི་ཚོགས། །རབ་བཀྲུས་རྨད་བྱུང་བཀོད་པའི་ཞིང་ཁམས་(༢༢༦བ) ― GLG021_Page_0454 ―
[མ་དཔེ་གཟིགས་ན་འདིར་གནོན།]
སུ། །ཁྱོད་ཀྱིས་རྗེས་སུ་འཛིན་པར་བདག་བྱིན་རློབས། །མཁས་དང་གྲུབ་པའི་མཁའ་ལྡིང་ཤུགས་འགྲོའི་རྗེས། །སྒྲོ་བཏགས་ཕ་བོང་བསྙེག་པའི་འཁྲུང་རབས་འཕྲེང༌། །སྤེལ་འདིས་སྐྱེ་བར་ཡོངས་འཛིན་བླ་མ་ཡིས། །འབྲལ་མེད་བརྩེ་བས་བྱང་ཆེན་སར་འཁྲིད་ཤོག །འོལ་དགའ་འབྲི་ལུང་པ་བློ་བཟང་དཔལ་འབྱོར་གྱིས་བདེར་གཤེགས་བརྒྱད། གདུགས་དཀར། རྗེ་བཙུན་བཙོང་ཁ་པ། བློ་བཟང་རྒྱལ་མའི་ནང་གི་བྲིས་ཐང་རྣམས་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བཅོམ་ལྡན་འོད་མཐའ་ཡས་པའི་ཕྱག་སོར་གྱིས། །ལེགས་བཏག་བདུད་རྩིའི་ཆུ་རྒྱུན་སྲོག་ཟུངས་སུ། །སྒྱུར་ནས་རྡོ་རྗེའི་སློབ་དཔོན་འོག་མིན་མགོན། །ཇི་བཞིན་གཡུང་དྲུང་ཁྲི་ལ་གཡོ་མེད་ཤོག །ངག་དབང་འཇམ་དབྱངས་དགྱེས་པའི་བློ་གྲོས་ཀྱིས། །མཁས་བཙུན་བཟང་པོའི་འཕྲིན་ལས་རྒྱ་མཚོ་ལྟར། །གཏིང་མཐའ་དཔོག་པར་ནུས་མིན་བཤེས་གཉེན་མཆོག །རིས་མེད་འགྲོ་བའི་ཉེར་འཚོར་བརྟན་པར་ཤོག །ཕྱི་ལྟར་དུར་ཁྲོད་བརྒྱད་མྱུལ་བྲམ་ཟེའི་གཟུགས། །ནང་ལྟར་རྩ་ཁམས་དག་པ་ཞིང་སྐྱོང་ཆེ། །གསང་བ་སེམས་ཉིད་གསལ་སྟོང་སྟོབས་འཕྲོག་དབང༌། །མཐུ་རྩལ་ནུས་པས་འཕྲིན་ལས་རྣམ་བཞི་སྒྲུབས། །ཞེས་ཡུན་དུ་འཚོ་བའི་ཚིགས་བཅད་དགོན་ཁག་ཚོར་འཛུགས་རྒྱུ་ཞིག་དགོས་ཞེས་རི་ཁུད་བླ་མ་ཤཱཀྱ་ཀུན་དགས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ།། །།(༢༢༧ན) ― GLG021_Page_0455 ―
[མ་དཔེ་གཟིགས་ན་འདིར་གནོན།]
བཻ ཌཱུཪྻ བ རྞཽ ཛ ས རེ ཙ ལ ཀྴཱནུ བྱ ཉྫ ན པྲ ཏྱ བྷ བ པྲ ཙི ཏྲཾ། བཻཌཱུཪྻ་མདོག་དངས་གསལ་མཚོན་ནང་དུ། །མཚན་དང་དཔེ་བྱད་སྣང་བརྙན་རབ་བཀྲ་བ། །བུ དྡྷེ ན གུ རྭཽ ཥ དྷི སཱུ པྟ སཱ ཀཱ དྷི ཥྠཾ ཕ ལཱི ཧཾ པྲ ཎི དྷཱ ན ཡེ ཥཾ། བཅོམ་ལྡན་སྨན་གྱི་བླ་མས་ལེགས་བཏབ་པའི། །སྨོན་ལམ་འབྲས་བུ་དེང་འདིར་སྨིན་བྱིན་རློབས། །གང་དུ་ཐོབ་པའི་ལུས་ཀུན་ཁོ་ལག་ཡངས། །ཉི་ཟླ་ལས་ལྷག་འོད་ཀྱིས་མུན་པ་སེལ། །འགྲོ་རྣམས་ཟད་མི་ཤེས་པའི་འབྱོར་པར་སྤྱོད། །དམན་ལམ་ལྡོག་དེ་ཐེག་ཆེན་ལམ་འཇུག་ཤོག །ཚུལ་ཁྲིམས་རྣམ་དག་ངན་འགྲོའི་ལམ་ལས་ལྡོག །ནད་སོགས་ལུས་སྐྱོན་ཀུན་བྲལ་དབང་པོ་ཚང༌། །མགོན་སྐྱབས་མེད་རྣམས་ཟུག་རྔུའི་སྡུག་བསྔལ་བྲལ། །བྱང་ཆུབ་བར་དུ་ཡོ་བྱད་ཕུན་ཚོགས་ཤོག །སྐྱེ་བར་སྐྱེས་པའི་རྟེན་བཟང་རབ་རྙེད་ཅིང༌། །བདུད་(༢༢༧བ) ― GLG021_Page_0456 ―
[མ་དཔེ་གཟིགས་ན་འདིར་གནོན།]
ཞགས་འཆིང་གྲོལ་ཡང་དག་ལྔ་དང་ལྡན། །རླབས་ཆེན་སྤྱོད་པས་བྱང་ཆུབ་འཚོལ་ལ་སྦྱོར། །བགྲང་ཡས་གནོད་པས་འཚེ་ལས་གྲོལ་བར་ཤོག །བཀྲེས་རྣམས་བཟའ་བཅའ་བཏུང་བ་ཆོས་ཀྱིས་ཚིམ། །བརྣག་དཀའི་ཚོར་བ་མེད་པར་བདེ་བ་མྱོང༌། །འཕགས་པ་དགྱེས་པའི་ཚུལ་ཁྲིམས་དང་ལྡན་ཞིང༌། །ཉོན་མོངས་ཚོགས་བྲལ་རྣམ་གྲོལ་ས་ཐོབ་ཤོག །འདི་ནས་འཕོས་ཚེ་བཻ་ཌཱུཪྻ་འོད་ཞིང༌། །པདྨའི་སྙིང་པོར་རྫུས་ཏེ་ཉེར་སྐྱེས་ནས། །བཟུངས་དང་ཏིང་འཛིན་ལ་སོགས་ཡོན་ཏན་ཐོབ། །རྒྱལ་བས་བྱིན་རླབས་རྫུ་འཕྲུལ་མངའ་བརྙེས་ཤོག །བསླུ་མེད་ཤཱཀྱ་སེང་གེའི་ལྗགས་རིང་ལས། །ལེགས་གསུངས་མདོ་ཆོག་འདྲེན་པ་སྨན་གྱི་བླའི། །བཅུ་གཉིས་སྨོན་ལམ་དོན་རྣམས་ཉམས་མྱོང་པ། །ཉིས་སྟོང་སྐུ་བརྙན་བཞེངས་མཐུས་ལྷུན་གྲུབ་ཤོག །ཅེས་པ་འདིའང་དཔོན་ས་བུ་ཁྲིད་རྒྱལ་མོ་སྐྱེ་གནས་ངན་པ་ལས་ལྡོག་པའི་ཆེད་དུ་གྲོང་སྨད་པ་སངས་རྒྱས་རྒྱ་མཚོ་མ་བུ་གཉིས་ཀྱིས་སྟོང་ཐང་ཚར་རེ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རྒྱལ་བས་ལུང་བསྟན་སྦས་ཡུལ་དཀར་མོ་ལྗོངས། །ལེགས་བཤད་སྒྲོག་པའི་དགེ་འདུན་ཚོགས་རྣམས་ཀྱིས། །སྟོན་དང་སྐྱབས་དངོས་ཟླ་བཅས་དཔང་བཞག་ནས། །བདེན་པའི་ཚིག་གིས་ཉེར་བརྗོད་སྨོན་ལམ་མཐུས། །མགྲིན་པར་འཇམ་དབྱངས་དབྱངས་ཅན་ལེགས་ཞུགས་ངག །དབང་ཕྱུག་དོན་ཀུན་ཀུན་ནས་བསྒྲུབ་པའི་བློ། །དཔལ་ལྡན་(༢༢༨ན) ― GLG021_Page_0457 ―
[མ་དཔེ་གཟིགས་ན་འདིར་གནོན།]
སྐལ་བཟང་བཟང་པོའི་བག་ཆགས་སད། །ཐུབ་བསྟན་མཛེས་བྱེད་བྱེད་པོ་བརྟན་པར་ཤོག །བརྒྱ་ཕྲག་ལོར་བྱོན་ཤཱཀྱ་སེང་གེ་ཡི། །རྒྱ་ཆེན་སྡེ་སྣོད་གསུམ་དང་རྒྱུད་སྡེའི་དོན། །མཚོ་ལྟར་གཏིང་ཟབ་བརྒལ་ལ་འཇིགས་མེད་པ། །རྣམ་དཔྱོད་གོ་ཆ་མནབས་ཁྱོད་ཞབས་བརྟན་ཤོག །སྒྲིབ་གཉིས་དགྲ་ཚོགས་མ་ལུས་ཉེར་ཐུབ་ཅིང༌། །མ་སྨད་བསྟན་པ་ལང་ཚོ་དར་དྲག་པའི། །སྡེ་བཞིའི་སྦྱིན་པ་རིས་མེད་འགྲོ་བ་ལ། །གཏོང་ཕྱིར་སྲིད་མཐའི་བར་དུ་བརྟན་པར་ཤོག །འཕྲུལ་སྣང་བྱ་འདབས་འོད་ཀྱིས་རབ་བསྐྱངས་པའི། །བྱང་གླིང་བསམ་འགྲུབ་རྒྱལ་པོ་གནས་ངན་ལས། །ཡོངས་གྲོལ་དལ་འབྱོར་རྟེན་ཐོབ་རིང་མིན་དུ། །མྱ་ངན་འདས་པའི་ས་དེར་ཕྱིན་པར་ཤོག །ཤུལ་ན་མཆིས་སོགས་ཚེ་དཔལ་མངའ་ཐང་གིས། །ལེགས་མཚོན་འདི་སྣང་ཡོན་ཏན་མ་ལུས་པ། །བླ་ནས་བླར་འཕེལ་མངོན་པར་མཐོ་བའི་ལམ། །རིམ་བརྒྱུད་ཐར་པའི་གྲོང་ཁྱེར་ལ་བགྲོད་ཤོག །མི་འགྱུར་ལྷུན་གྲུབ་ཆོས་འཁོར་རྒྱལ་གྱི་སྡེ། །གངས་ཅན་ཕན་བདེ་བཞད་པའི་ཉེར་འཚོའི་གཞིར། །བྱམས་པའི་འདུས་པ་དང་པོ་འཕགས་ཡུལ་དུ། །མ་བྱོན་དེ་སྲིད་ཉི་ཟླ་ལྟར་གསལ་ཤོག །ཅེས་པ་འདིའང་ལྷ་ས་བྱང་གླིང་པས་སྦུག་ཆོལ་གྱི་སྤྱི་འབུལ་སོགས་རྙེད་བསྐུར་དང་བཅས་ཆོས་འཁོར་རྒྱལ་དུ་འཛུགས་རྒྱུའི་སྨོན་ལམ་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །(༢༢༨བ) ― GLG021_Page_0458 ―
[མ་དཔེ་གཟིགས་ན་འདིར་གནོན།]
སྣ་ཚོགས་རབ་བཀྲའི་སྲད་བུ་ཉེར་བཏགས་པ། །དྲ་བ་དྲ་ཕྱེད་འཇའ་ཚོན་རི་མོ་ཅན། །བགྲང་ཡས་ཞི་ཁྲོ་འདུས་པའི་དཀྱིལ་འཁོར་ཆེ། །བར་སྣང་མཛེས་བྱེད་རྒྱན་དུ་ལེགས་སྤུད་ཆུས། །དགེ་བའི་མྱུ་གུ་བླ་ནས་བླར་འཕེལ་བ། །ངེས་ལེགས་ཁྲི་ཤིང་རབ་རྒྱས་རྩེ་མོ་རུ། །བྱང་ཆེན་སྙེ་མ་རོ་མདའ་མྱངས་བའི་རྒྱུན། །འགྲོ་ལ་མཆོད་སྦྱིན་སྟེར་བའི་མ་མར་ཤོག །སྔོན་བསགས་སྡིག་སྟུང་དྲི་འཁྲུད་མཐོ་རིས་ཀླུང༌། །འདི་དང་སྐྱེ་མང་བརྒྱུད་པ་རྐང་པའི་རྩེར། །བདེ་བའི་ཏོག་མཛེས་ཉེར་སྐྱིད་ལྷབ་ལྷུབ་གོས། །རྒྱུ་སྦྱོར་འཕྲོག་བྱེད་ཞབས་སུ་བསིལ་བར་ཤོག །ཐབས་མཁས་འཕྲུལ་གྱིས་སྐྱེ་རྒུའི་ཟུག་རྔུ་རྣམས། །དྲུངས་ནས་འབྱིན་པ་ལྷ་ཡི་རྗེ་བོ་གང༌། །བསྐལ་པར་འཚོ་བའི་ཚེ་དང་དབང་ཐང་སོགས། །ལེགས་པའི་ཡོན་ཏན་དབྱར་མཚོ་ལྟར་འཕེལ་ཤོག །འདིས་མཚོན་བསགས་དང་བསག་འགྱུར་བསག་བཞིན་པའི། །བསོད་ནམས་ཕུང་པོ་ས་འཛིན་དངོས་རྒྱུ་བ། །ནམ་མཁའ་ཕ་མཐའ་དེས་ཀྱང་མཇལ་དཀའ་བའི། །འགྲོ་རྣམས་ཀུན་མཁྱེན་ཐོབ་པའི་རྒྱུ་རུ་བསྔོ། །ཞེས་པ་འདིའང་འཚོ་བྱེད་ཐབས་མཁས་ཀྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་སྙན་དར་བརྒྱ་སྐོར་ཕུལ་བའི་ཁ་བྱང་དགོས་ཚུལ་ལྟར་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འདྲེན་མཆོག་བཞི་པ་ཤཱཀྱ་སེང་གེ་ཡི། །ལེགས་གསུང་རྣམ་གསུམ་ཆོས་ཀྱི་འཁོར་ལོའི་དོན། །ལྷུན་གྲུབ་གདུལ་བྱ་རྒྱ་མཚོར་འདོམས་མཛད་པ། །བཤེས་གཉེན་དམ་པའི་(༢༢༩ན) ― GLG021_Page_0459 ―
[མ་དཔེ་གཟིགས་ན་འདིར་གནོན།]
ཞབས་ལ་གསོལ་བ་འདེབས། །ཐོག་མཐའ་བར་དུ་བཀྲ་ཤིས་ལུང་རྟོགས་བསྟན། །ཕུན་ཚོགས་སྒོ་བརྒྱ་མང་པོ་ཡོངས་ཕྱེ་བ། །བགྲང་ཡས་འདུས་པའི་ཉེར་འཚོར་མགོན་པོ་ཁྱོད། །རྡོ་རྗེ་ལྟ་བུར་རབ་ཏུ་བརྟན་པར་ཤོག །སྙིང་ནས་མི་ཕྱེད་དད་པས་གསོལ་བཏབ་ན། །ནམ་ཡང་བསླུ་བ་མེད་པ་དཀོན་ཅོག་གསུམ། །ཕུལ་བྱུང་ཐུགས་རྗེའི་འཕྲིན་ལས་ཉལ་འགྲོའི་རྒྱུན། །བདག་སོགས་མོས་ལྡན་ཡོངས་ལ་འཇུག་པར་ཤོག །ཅེས་སྒོ་མངས་སློབ་དཔོན་དོན་གྲུབ་རྒྱ་མཚོའི་གསོལ་འདེབས་བརྟན་ཞུགས་འདི་ནི་གྲྭ་ཚང་སྤྱི་སོས་སྐྱེས་དང་བཅས་ཏེ་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རིགས་འཛིན་རྡོ་རྗེ་ཐོགས་མེད་རྩལ། །གང་གིས་རང་རིག་ཀུན་ཏུ་བཟང༌། །མངོན་གསུམ་རང་ངོ་མ་འཕྲོད་བར། །རྗེས་བཟུང་དོན་གཉིས་འགྲུབ་བྱིན་རློབས། །འདིའང་སྔགས་འཆང་བློ་གྲོས་རྒྱལ་བས་འདྲ་འབག་བཞེངས་པའི་ཁ་བྱང་དགོས་ཚུལ་ལྟར་ཟ་ཧོར་བནྡེས་བཀོད། །རབ་དཀར་ལྷག་བསམ་སིནྡྷུ་རྒྱ་མཚོའི་ཀློང༌། །འདབ་བརྒྱད་སྙིང་དབུས་ཀེ་ས་ར་ཡི་རྩེར། །དྲིན་ཅན་བླ་མ་པད་འབྱུང་མནྠ་རར། །མཉམ་སྦྱོར་བདེ་ཆེན་དབྱིངས་སུ་རྟག་བཞུགས་གསོལ། །གཞོན་ནུ་བུམ་སྐུར་ངོ་བོ་ཆོས་སྐུའི་གདངས། །རང་བཞིན་མཚན་དཔེའི་འཇའ་རིས་ལོངས་སྤྱོད་རྫོགས། །ཀུན་ཁྱབ་ཐུགས་རྗེའི་སྤྲུལ་པ་མཐའ་ཀླས་ཀྱང༌། །ཞིང་འདིར་བདག་སོགས་འགྲོ་ངོར་བརྟན་པར་ཤོག །(༢༢༩བ) ― GLG021_Page_0460 ―
[མ་དཔེ་གཟིགས་ན་འདིར་གནོན།]
པདྨ་གར་དབང་རྒྱ་གར་པཎ་ཆེན་གྱི། །འཕྲིན་ལས་གངས་ཅན་སྨིན་ལེགས་ལྟོར་འགེང་ཆེད། །གདོད་ནས་འགྱུར་མེད་འཕོ་བ་ཆེན་པོའི་སྐུ། །གྲུབ་པས་རྡོ་རྗེའི་རང་རྩལ་དེང་སྟོན་ཤོག །ཟབ་གཏེར་ཆོས་ཀྱི་བདག་པོར་གླིང་པའི་མཚན། །རིམ་བརྒྱུད་ཐུགས་རྗེའི་འོད་འབར་ཉིན་མོར་བྱེད། །བོད་ཡུལ་སྨག་རུམ་སེལ་བར་དངོས་བྱོན་པ། །འཆར་ནུབ་དང་བྲལ་བསྟན་པའི་མཁར་གསལ་ཤོག །དུག་ལྔ་ཡོངས་དག་ཡེ་ཤེས་རྣམ་ལྔའི་གཟུགས། །ཀུན་འདུས་རིགས་བརྒྱའི་བདག་པོར་རབ་བཞེངས་ནས། །གང་སྣང་ལྷ་སྐུར་ཤར་བྱེད་བུམ་དབང་གིས། །སྐལ་བཟང་སྤྲུལ་སྐུར་བསྒྱུར་ཕྱིར་ཞབས་བརྟན་ཤོག །གནམ་ཞལ་ཡུམ་གྱི་མཁར་བསྐྱིལ་བྱང་ཆུབ་སེམས། །དཀར་དམར་དངས་མས་གདུལ་བྱའི་རྩ་ཁམས་རྣམས། །ལེགས་ཁྱབ་གཏུམ་མོའི་དྲོད་འབར་ལོངས་སྐུའི་སར། །ཁྲིད་མིན་དེ་སྲིད་རྡོ་རྗེ་ལྟར་བརྟན་ཤོག །ཐབས་ཤེས་ཟུང་དུ་འཇུག་པ་དགའ་བཞིའི་འགྲོས། །བཅུ་དྲུག་ཕྱེད་ཕྱེད་རྫོགས་པའི་བདེ་བ་ཆེ། །ཕོ་ཉའི་ལམ་གྱིས་སྐལ་ལྡན་ཆོས་སྐུའི་འབྲས། །མྱོང་མིན་བར་དུ་གཡུང་དྲུང་ལྟ་བུར་ཤོག །ཡེ་ནས་སངས་རྒྱས་རིག་པ་སྒྱིད་རྡོའི་གསེར། །ཉེར་གྲུབ་རང་ངོ་མངོན་གསུམ་ངོ་སྤྲད་དེ། །བརྗོད་བྲལ་ཀུན་བཟངངོ་བོ་ཉིད་ཀྱི་སྐུ། །འགྲོ་བཀོད་མ་གྱུར་འོག་མིན་མགོན་བཞིན་ཤོག །འཚོ་རྒྱལ་ཞིང་འདིར་ཟངས་མདོག་དཔལ་རི་ནས། །དངོས་བྱོན་དྷཱུ་ཏཱིའི་མདུད་པ་ཡོངས་བཀྲོལ་མཐུས། །གངས་ཅན་ཕན་བདེའི་དཔྱིད་དུ་(༢༣༠ན) ― GLG021_Page_0461 ―
[མ་དཔེ་གཟིགས་ན་འདིར་གནོན།]
ཟབ་མོ་གཏེར། །སྒོ་འཕར་འབྱེད་པའི་རྟེན་འབྲེལ་ལྷུན་གྲུབ་ཤོག །མ་དང་མཁའ་འགྲོའི་བཀའ་རྟགས་ཕྱག་གི་རྒྱ། །འགྲོལ་བའི་དུས་བབས་ཆོས་ཀྱི་འཕྲིན་ལས་ལ། །མཐོ་འཚམ་བདུད་སྡེའི་སྙིང་གར་རྩ་བ་གསུམ། །རབ་ཁྲོས་གཏུམ་དྲག་འབར་བའི་བྲོ་ཆེན་རྡུངས། །སངས་རྒྱས་ཀུན་འདུས་རྔ་ཡབ་གླིང་པ་ཡིས། །བོད་འབངས་འགྲོ་བའི་དོན་བཏབ་སྨོན་ལམ་འབྲས། །ཕུན་ཚོགས་རོ་བདའ་སྨིན་པའི་དཔག་བསམ་ལྗོན། །ཐུགས་རྗེའི་གྲིབ་མར་ཡིད་ཅན་ངལ་གསོར་ཤོག །ཚེ་མཐའ་ཡས་སོགས་དཀོན་མཆོག་རིན་ཅེན་གྱི། །གསང་གསུམ་མི་ཟད་འཁོར་ལོའོ་གཟི་བྱིན་དང༌། །འབར་མ་མ་ནིང་བསྟན་སྲུང་རྒྱ་མཚོ་ཡིས། །ཞི་རྒྱས་དབང་དྲག་བཞེད་པའི་དོན་ཀུན་སྒྲུབས། །འཕྲིན་ལས་རྒྱལ་མཚན་མགོན་ཁྱོད་ཕྱག་སོར་གྱིས། །ཉེར་བཟུང་བཀའ་གཏེར་ཛམ་བུའི་གསེར་ཏོག་རྩེར། །བཤད་སྒྲུབ་ཡིད་བཞིན་ནོར་ལས་དངོས་གྲུབ་ཆར། །ཕྱོགས་དུས་ཀུན་ཏུ་བསྙིལ་བའི་བཀྲ་ཤིས་ཤོག །ཅེས་སློབ་དཔོན་ཆེན་པོ་བཻ་རོ་ཙ་ནའི་རྣམ་འཕྲུལ་སྤྲུལ་པའི་སྐུ་ཆོས་རྒྱལ་གཏེར་བདག་གླིང་པའི་བརྟན་བཞུགས་ཀྱི་ཚིགས་སུ་བཅད་འདི་ནི་དམར་སེར་ཅན་གྱི་ལོ་མགོ་ཟླའི་ཡར་ངོ་ཚེས་བཅུའི་མཆོད་པའི་ཚེ་ཟ་ཧོར་གྱི་བནྡེས་རྡོ་རྗེ་ཐོགས་མེད་རྩལ་གྱིས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོས་བྲིས་པ་སུ་སིདྡྷི་རསྟུ། །(༢༣༠བ) ― GLG021_Page_0462 ―
[མ་དཔེ་གཟིགས་ན་འདིར་གནོན།]
བརྟན་པའི་འཁོར་ལོ་དགྱེས་ཞལ་ཉི་ཟེར་གྱིས། །ངག་ལ་སྨྲ་བའི་འདབ་བརྒྱ་བཞད་པའི་དབུས། །མ་ནུབ་དབང་གི་ཆུ་བོ་ཟེའུ་འབྲུའི་བཅུད། །གདུལ་བྱ་བུང་བའི་དགའ་སྟོན་རྒྱས་མཛད་བསྔགས། །བློ་གྲོས་རྣམ་པར་ཡངས་པས་གསེར་མངལ་དུ། །མཁས་བཙུན་བཟང་པོའི་རིག་བྱེད་བཞི་ལྡན་ལྷ། །ཡོངས་སྨིན་ཐུབ་བསྟན་མི་མཇེད་ཞིང་གི་གཙོ། །མཚུངས་མེད་སྐྱེ་རྒུའི་གཉེན་ལ་གསོལ་བ་འདེབས། །རྒྱ་ཆེན་མདོ་དང་རྒྱུད་སྡེ་མ་ལུས་པ། །མཚོ་ལྟར་གཏིང་མཐའ་དཔོག་པར་ནུས་མིན་གནས། །སྨྲ་ལ་སྤོབས་པའི་མགྲིན་པ་གཟེངས་མཐོ་བ། །ཟླ་བྲལ་དགེ་བའི་བཤེས་ལ་གསོལ་བ་འདེབས། །སྒྲ་ཆད་གཟོ་གསོ་ལ་སོགས་གཙུག་ལག་གི །དཀའ་གནད་ཚིག་དོན་རྒྱུད་མངས་ལས་དྲངས་པ། །བརྗོད་པ་རྣམ་དག་གླུར་འབབ་དབྱངས་ཅན་མ། །སྙིང་དབུས་པདྨར་བཞུགས་ལ་གསོལ་བ་འདེབས། །ཚད་དུ་འཆིང་ལ་ནམ་མཁའི་སྐ་རགས་ཀྱང༌། །ཐུང་ངུར་བྱེད་པ་མ་གྱུར་འགྲོ་བའི་དོན། །སྒྲུབ་པར་འཇིགས་མེད་ལྷག་བསམ་བཙན་པོའི་གོ །དཀར་ཆའི་ཟླ་རྗེས་འགྲོ་ལ་གསོལ་བ་འདེབས། །སྒྲིབ་གཉིས་ཀུན་ཐུབ་རྒྱལ་བ་ཟས་གཙང་སྲས། །ལུང་རྟོགས་བསྟན་པའི་ལང་ཚོ་བླ་ནས་བླར། །ཐོས་བསམ་སྒོམ་པས་རབ་སྤེལ་རྣམ་དཔྱོད་སྡེ། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །མཚན་ཙམ་ཐོས་པའི་མོད་ལ་དུས་མིན་གྱི། །འཆི་བདག་གཡུལལས་རྒྱལ་བའི་སྨོན་ལམ་མཐུ། །ལེགས་གྲུབ་ཚེ་མཐའ་ཡས་པའི་ལྷ་ཚོགས་རྣམས། །བདེན་ཚིག་གྲུབ་པའི་དཔང་པོ་མཛད་དུ་གསོལ། །ངག་དབང་འཇམ་དབྱངས་དབྱངས་ཅན་དགའ་བའི་བློ།(༢༣༡ན) ― GLG021_Page_0463 ―
[མ་དཔེ་གཟིགས་ན་འདིར་གནོན།]
།བསྐལ་བཟང་འདྲེན་མཆོག་མཆོག་གྱུར་བཞི་པའི་བསྟན། །སྤེལ་ནུས་རྣམ་དཔྱོད་དཔྱོད་ལྡན་ཡིད་དབང་འཕྲོག །ཡོངས་ཁྱབ་སྙན་གྲགས་གྲགས་འབར་ཞབས་བརྟན་ཤོག །རྒྱ་མཚོའི་གོས་ཀྱིས་ཉེར་བཏེག་ལུས་ཅན་ལ། །འཇིགས་མེད་སྐྱབས་ཀྱི་སྦྱིན་པས་ལེགས་སྨན་ཞིང༌། །གཞན་ཕན་ཕྲག་པར་ལེན་པའི་སེམས་བསྐྱེད་ཀྱིས། །མ་རྨད་གོ་ཆ་བགོས་ཁྱོད་ཞབས་བརྟན་ཤོག །ཐུབ་བསྟན་ལང་ཚོ་དར་བའི་སྒོ་འཕར་ནས། །སྡེ་བཞིའི་ལོངས་སྤྱོད་འགྲོ་ལ་གཏོང་མཁས་པ། །མ་འདྲིས་སྐྱེ་རྒུའི་གཉེན་ཁྱོད་རྡོ་རྗེའི་ཁྲིར། །བསྐལ་བརྒྱར་བཞུགས་ལ་གདུལ་བྱའི་རེ་སྐོང་གསོལ། །དཔལ་ལྡན་ནཱ་ལནྡ་ཡི་འདུས་སྡེ་ཆེར། །དགེ་འདུན་བཤད་སྒྲུབ་དར་ཞིང་དབང་ལུང་ཁྲིད། །རྗེས་གནང་རིག་གཏད་ཆོས་འཁོར་བསྐོར་མཛད་པའི། །ངེས་པར་བསྟན་འཛིན་ཚོགས་རྣམས་ཞབས་བརྟན་ཤོག །གཉིས་མེད་རྒྱུད་སྡེའི་རིགས་བདག་ཀྱེ་རྡོ་རྗེའི། །བསྟན་སྲུང་བྱེ་བའི་སྡེ་དཔོན་གུར་གྱི་མགོན། །མཐུ་ཆེན་སྟོབས་འཕྲོག་ལེགས་ལྡན་ནག་པོ་སོགས །དམ་ཅན་རྒྱ་མཚོས་བསམས་པའི་རེ་བ་སྐོངས། །དྲན་པས་ཁམས་གསུམ་དབང་སྡུད་རིག་བྱེད་མ། །ཚོགས་ཀྱི་བདག་པོ་འདོད་པའི་རྒྱལ་པོ་ཡིས། །སྲིད་ཞིའི་དགེ་ལེགས་མ་ལུས་རབ་བཀུག་སྟེ། །བཀྲ་ཤིས་དཔལ་གྱིས་དུས་ཀུན་ཁྱབ་པར་ཤོག །ངེད་རང་གི་གསོལ་འདེབས་རིང་འཚོའི་ཚིགས་བཅད་ཤློ་ཀ་བཅུ་གསུམ་ཙམ་ཡོད་པ་ཞིག་དགོས་ཞེས་རྒྱུད་སྡེ་རྒྱ་མཚོར་མི་འཕྲོགས་པའི་མཁྱེན་(༢༣༡བ) ― GLG021_Page_0464 ―
[མ་དཔེ་གཟིགས་ན་འདིར་གནོན།]
རབ་མཆོག་ཏུ་ཡངས་པའི་མཁས་གྲུབ་ཆེན་པོ་བཅོ་བརྒྱད་ཆོས་ཀྱི་རྗེ་བྱམས་པ་ངག་དབང་ལྷུན་གྲུབ་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཁྱོད་ཞབས་འཁོར་ལོའི་རི་མོ་འགྲོ་ཀུན་གྱི། །གཙུག་ཏོར་རྩེར་འཛེགས་འདྲེན་མཆོག་ཤཱཀྱའི་རྒྱལ། །ཐུགས་རྗེའི་ཉི་འོད་བདག་སྙིང་པདྨ་ལ། །ཉེར་ཞུགས་སྲིད་ཞིའི་མདུན་མ་ལྷུན་གྲུབ་ཤོག །རྣམ་མཁྱེན་སྲང་ལ་ཤེས་བྱའི་ཕུང་པོ་དང༌། །ཁྱོད་ཀྱི་བློ་གྲོས་གཞལ་ཚེ་ལྕི་ཡང་དུ། །མི་མངོན་བསྐལ་བཟང་བཞི་པའི་ལུང་རྟོགས་ཆོས། །གྲགས་པ་ཕྱོགས་བརྒྱར་བསྒྲགས་དེས་བདག་བྱིན་རློབས། །ལུས་ངག་ཡིད་དབང་གླང་སྣར་བག་ཡོད་བློའི། །ལྕགས་ཀྱུས་ཡོངས་བཏབ་མཁས་བཙུན་བཟང་པོའི་གར། །བསྒྱུར་བའི་འཕྲིན་ལས་རྒྱ་མཚོའི་མཐར་ཁྱབ་པས། །དོན་གཉིས་གྲུབ་པའི་དཔལ་ལ་བདག་འགོད་གསོལ། །ཞེས་དཔོན་ས་བུ་ཁྲིད་རྒྱལ་མོའི་དད་རྟེན་དུ། །ཐུབ་དབང༌། རྒྱལ་བ་ཙོང་ཁ་པ་ངེད་རང་གི་འདྲ་འབག་རྣམས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྟག་ཏུ་ཡིད་ལ་དད་པའི་རི་མོ་བྲིས། །དམ་བཅས་གཟུངས་བཀླགས་འབྲས་བུ་མ་ཕམ་མགོན། །མངོན་འཚང་རྒྱས་ཚེ་བདག་དང་ཐོས་སོ་ཅོག །བཙལ་ཏེ་བྱང་ཆུབ་ལུང་བསྟན་དབུགས་དབྱུང་ཤོག །ངན་སོང་སྡུག་བསྔལ་མངལ་གྱི་དྲི་མ་དག །སྟོང་ཕྲག་བསྐལ་པར་འཁོར་ལོས་སྒྱུར་རྒྱལ་འཐོབ། (༢༣༢ན) ― GLG021_Page_0465 ―
[མ་དཔེ་གཟིགས་ན་འདིར་གནོན།]
།དགེ་བཅུ་དང་ལྡན་བསམས་པའི་དོན་ཀུན་འགྲུབ། །ནམ་ཡང་མི་བརྗེད་ཞལ་འཆེས་འབྲས་སྨིན་ཤོག །སྡིག་པའི་སྟོབས་བསྐྱེད་ཐོན་ཀའི་གནས་ངན་དུ། །སྐྱེས་ཀྱང་ཉི་མའི་གཉེན་ལ་གསོལ་བའི་དོན། །ཇི་བཞིན་རྗེས་སུ་བཟུང་ནས་བདག་སོགས་རྣམས། །བྱང་ཆུབ་མ་ཐོབ་བར་དུ་བཤེས་མཛོད་ཅིག །བྱམས་པས་དམ་བཅས་པའི་གཟུངས་ཀྱི་རྗེས་སུ་འདོན་རྒྱུའི་སྨོན་ལམ་ཚིགས་བཅད་ཅིག་དགོས་ཞེས་གཞིས་ཀ་ཤར་རྒྱལ་མོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དུས་གསུམ་རྒྱལ་བའི་ངོ་བོ་ཐོད་ཕྲེང་རྩལ། །ཞི་ཁྲོ་ཀུན་འདུས་བཀའ་བརྒྱད་དཀྱིལ་འཁོར་ལྷ། །མ་ནིང་ཆོས་སྐྱོང་ཡོངས་རྫོགས་གཏེར་སྲུང་ཚོགས། །ཐུགས་རྗེ་མཐུ་སྟོབས་ནུས་པའི་དཔུང་སྐྱེད་ལ། །པདྨ་ཀ་རའི་འཕྲིན་ལས་སྤེལ་བའི་སྡེ། །མཁའ་འགྲོའི་གླིང་དུ་བསུ་བའི་ཕོ་ཉ་མོའི། །དར་ལམ་བཅད་ནས་མི་གཡོ་རྡོ་རྗེའི་ཁྲིར། །བཞུགས་པར་བྱིན་གྱིས་བརླབ་ཅིང་ལས་ཀུན་སྒྲུབས། །མཆོག་གསུམ་ཐུགས་རྗེ་ཆོས་ཉིད་འགྱུར་བ་མེད། །ཆོས་ཅན་རྒྱུ་འབྲས་མི་སླུའི་རྟེན་འབྲེལ་མཐུས། །རིགས་འཛིན་ཆེ་ཁྱོད་སྐུ་ཚེའི་འཕྲང་བསྒྲལ་ནས། །གཡུང་དྲུང་ལྟར་བརྟན་བདེན་ཚིག་འགྲུབ་པར་ཤོག །ཅེས་པ་འདིའང་ཐུབ་བསྟན་རྡོ་རྗེ་བྲག་ཏུ་རིགས་འཛིན་སྤྲུལ་པའི་སྐུ་མཁའ་འགྲོའི་བསུན་མ་སོགས་འཕྲང་གེགས་ཀྱི་སྐུ་ཚེའི་དོག་གཞི་ཆེ་ཞིང་སྐུ་ཁམས་ནན་ཏར་མི་བདེ་བའི་དུས་ཟ་ཧོར་གྱི་བནྡེས་བདེན་ཚིག་(༢༣༢བ) ― GLG021_Page_0466 ―
[མ་དཔེ་གཟིགས་ན་འདིར་གནོན།]
ཏུ་བརྗོད་པའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དཀོན་ཅོག་རིན་ཅེན་རྣམ་གསུམ་ཐུགས་རྗེའི་མཐུས། །ཚེ་རབས་ཀུན་ཏུ་སྐྱེས་པའི་རྟེན་རྙེད་པར། །དལ་འབྱོར་ཚང་ཞིང་བསྟན་ལ་རབ་བྱུང་སྟེ། །ཁྲིམས་ལྡན་ངུར་སྨྲིག་འཛིན་པའི་དཔལ་ཐོབ་ཤོག །རང་བློར་འཚམ་པའི་ཐེག་གསུམ་ཆོས་ཀྱི་སྒོ། །འཁྲུལ་བ་མེད་སྟོན་བཤེས་གཉེན་དམ་པ་ཡིས། །རྗེས་བཟུང་ལམ་བཟང་ཐེམ་སྐས་རིམ་བགྲོད་ནས། །མྱ་ངན་འདས་པའི་ཁང་པར་རབ་འཇུག་ཤོག །མདོར་ན་དེང་ནས་བྱང་ཆུབ་མངོན་གྱུར་བར། །འཁོར་བའི་སྡུག་བསྔལ་མཚོ་ལས་ལེགས་བྱས་གྲུས། །བསྒྲལ་ཏེ་བདེ་སྐྱིད་རིན་ཆེན་གླིང་ཡངས་པོར། །འཛད་མེད་སིམ་པའི་བདོག་པར་ལོངས་སྤྱོད་ཤོག །ཅེས་པ་འདིའང་རྒྱ་མཚོ་དགེ་ཚུལ་མས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མཚོ་སྐྱེས་རྡོ་རྗེ་དར་ནག་བེར་ཆེན་སྐུ། །སྲིན་པོའི་རྒྱལ་པོར་ཀརྨ་གུ་རུའི་གར། །ཡང་གསང་དྲག་ཏུ་ཁྲོས་པ་བྲིས་ཐང་དུ། །སྒོ་གསུམ་འབད་པས་བཞེངས་པའི་ལེགས་བྱས་འབྲས། །གནམ་ལྕགས་ཕུར་བུས་བདུད་བཞིའི་སྙིང་གཟེར་བའི། །མོད་ལ་རལ་འགྲིའི་དབལ་གྱིས་བཅད་པའི་མགོ། །དོ་ཤལ་རིང་པོར་འཕྱང་ནས་ཕྱོགས་ཀུན་ལས། །རྣམ་པར་རྒྱལ་བའི་འཕྲིན་ལས་འགྲུབ་པར་ཤོག །ཉིང་མཚམས་སྦྱར་ཚེ་རང་ཉིད་ཐོད་ཕྲེང་རྩལ། །ཆེས་ཕྲ་རླུང་གི་བཞོན་པ་ལ་བརྟེན་ཏེ། །ལངྐའི་རྒྱལ་ཁབ་ཆེར་(༢༣༣ན) ― GLG021_Page_0467 ―
[མ་དཔེ་གཟིགས་ན་འདིར་གནོན།]
བཞུགས་མགོན་པོའི་ཐུགས། །བདེ་སྟོང་ཆོས་སྐུའི་ངང་དུ་རོ་གཅིག་ཤོག །ཅེས་པའང་ཕོ་བྲང་གནང་བྱུང་བ་སྔགས་འཆང་བློ་བཟང་མཁྱེན་བརྩེའི་དམིགས་རྟེན་དུ་ཡང་གསང་དྲག་པོའི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡིགེ་པ་ནི་དགེ་སློང་འཇམ་དབྱངས་གྲགས་པའོ། །བློ་བཟང་ཐོགས་མེད་ལྷག་བསམ་དག་པའི་མཁར། །འདྲ་འབག་ཟླ་བའི་དཀྱིལ་འཁོར་རབ་བཞེངས་པས། །དུཿཁའི་སྨག་རུམ་ཀུན་སངས་སྲིད་དང་ཞིའི། །བདེ་སྐྱིད་སྣང་བའི་འོད་ཀྱིས་ཁྱབ་པར་ཤོག །ཅེས་གསེར་སྐུ་བཞེངས་པའི་ཁ་བྱང་སྨོན་ལམ་དགོས་ཚུལ་ལྟར་ཟ་ཧོར་བནྡེས་བཀོད། །རྟ་མཆོག་རོལ་པ་བསྙེན་ཅིང་བསྒྲུབས་པའི་མཐུས། །བདུད་སྡེའི་བར་ཆད་གཡུལ་ལས་རྣམ་རྒྱལ་ཏེ། །དེང་ནས་ཀུན་མཁྱེན་ཡེ་ཤེས་ཐོབ་མིན་པར། །བཤེས་གཉེན་དམ་པའི་མགོན་གྱིས་རྗེས་འཛིན་ཤོག །ཅེས་པའང་ལེགས་བཤད་གླིང་ཆོས་རྗེའི་ཞལ་འདོན་དུ་ཟ་ཧོར་གྱི་བནྡེས་བྲིས། །ཕྱེད་ཀྱིས་ལྷག་པའི་དངུལ་སྲང་བཅུ་བཞི་ལས། །ལེགས་གྲུབ་བ་ལིཾ་བདུད་རྩི་འཁྱིལ་བའི་གནོད། །ངག་དབང་ཚུལ་ཁྲིམས་ཀྱིས་ཕུལ་དགེ་ཚོགས་འབྲས། །མཆོག་ཐུན་དངོས་གྲུབ་མ་ལུས་འགྲུབ་པར་ཤོག །ཅེས་པའང་གྲྭ་ཚང་གི་དགེ་བསྐོས་ལས་སྣེའི་འཇོག་ལ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་བནྡེས་བཀོད་པ་སིདྡྷི་རསྟུ། །འཇམ་ཞིང་ཆེས་དུལ་ངུར་སྨྲིག་གོས་ཀྱིས་ཀླུབས།(༢༣༣བ) ― GLG021_Page_0468 ―
[མ་དཔེ་གཟིགས་ན་འདིར་གནོན།]
།དམ་ཆོས་དབྱངས་སྙན་སྐྱེ་རྒུའི་རྣ་ལུང་འཇེབས། །གྲགས་པས་ཀུན་ཁྱབ་བཤེས་གཉེན་ཞིང་གཞན་དུ། །གཤེགས་ཀྱང་བདག་སོགས་འགྲོ་ལ་ཐུགས་རྗེས་གཟིགས། །ཇི་ལྟར་བཞེད་པའི་རྣམ་དཀར་འཕྲིན་ལས་རྒྱུན། །ནམ་མཁའི་ཕ་མཐར་བསྙེགས་པའི་ཡིད་ཅན་གྱིས། །རྒྱུད་ལ་ཉེར་ཞུགས་མངོན་པར་མཐོ་བ་དང༌། །ངེས་ལེགས་ལམ་དེར་མྱུར་དུ་བཀྲི་བར་ཤོག །དངོས་སུ་བཤམས་དང་ཡིད་ཀྱིས་རབ་སྤྲུལ་པའི། །མཆོད་པའི་སྤྲིན་གྱིས་སྲི་ཞུར་བརྩོན་བྱེད་ན། །བསོད་ནམས་བྱེ་བའི་ཞིང་གྱུར་བླ་མ་ཡིས། །ཚེ་རབས་ཀུན་ཏུ་རྗེས་སུ་འཛིན་པར་ཤོག །ཅེས་པ་འདིའང་སྐྱིད་ཤོད་སྤྲུལ་པའི་སྐུའི་གསུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འསྔམ་དབྱངས་གྲགས་པའོ། །རིས་མེད་ཀུན་ལ་རྗེས་སུ་ཆགས་པའི་མདངས། །མཚན་དཔེའི་འཇའ་འོད་དང་འདྲེས་མཛོད་སྤུའི་ཟེར། །བདུད་རྩིའི་ཟེགས་མ་ལེགས་འབབ་འགྲོ་ཀུན་གྱི། །ཨ་ཧཾ་མི་ཤིགས་སྲོག་གི་ཀ་བ་ཚུགས། །ཞལ་ཁྱིམ་ཕྱག་ཞབས་མཐིལ་དུ་རབ་གསལ་སྤྱན། །དཀྱུས་རིང་ཆོས་ཀྱི་ཕ་མཐའ་འཇལ་འདྲ་བས། །ཤེས་བྱར་སྲིད་ལ་མ་བསྒྲིབས་ཡེ་ཤེས་ཀྱི། །འདྲེན་བྱེད་འགྲོ་ལ་མངོན་སུམ་དངོམ་པ་བཞིན། །རྣམ་འདྲེན་ལྗགས་རིང་པདྨའི་ཟེའུ་འབྲུའི་རྩེར། །ཆེད་དུ་བཇགས་པའི་མཚན་སྙན་བུང་བའི་གླུས། །གཤིན་རྗེའི་ལས་ཀྱི་མེ་ལོང་ངལ་གསོ་རུ། །བྱས་ཞེས་ཕྱོགས་བྲལ་རྣ་བར་ལེན་པ་བཞིན། །རྒྱལ་ཀུན་སྤང་རྟོགས་ཐུགས་རྗེར་ལྕི་དང་ཡང༌། །(༢༣༤ན) ― GLG021_Page_0469 ―
[མ་དཔེ་གཟིགས་ན་འདིར་གནོན།]
ཚད་མའི་སྲང་ལ་གཞལ་ཚེ་རྙེད་མིན་ཀྱང༌། །སྔོན་གྱི་སྨོན་ལམ་དམ་བཅས་འཆི་བདག་གཡུལ། །ཕམ་པར་གཅིག་ཏུ་དཔའ་རྣམས་དཔང་པོར་གསོལ། །རྣམ་དག་ངག་ཡིད་ཚངས་པའི་རལ་ཀླུང་ནས། །དབང་བཞིའི་གངྒས་གདུལ་བྱའི་བློ་ཡི་དྲི། །རབ་བཀྲུས་ལྔ་ལྡན་ཡེ་ཤེས་བསྐལ་བཟང་དུ། །བསྒྱུར་ཏེ་བསྐལ་པར་མངོན་སུམ་ཡུལ་འགྱུར་ཤོག །ཟབ་དང་རྒྱ་ཆེ་ཐུབ་གཞུང་གཏིང་དཔོག་པར། །མཚོ་བྱུང་དྲིན་ལས་མི་འཇིགས་སྤོབས་པ་ཡིས། །ཡོད་མེད་མཐའ་བྲལ་དབུ་མར་གནས་པའི་གོ །ཆ་གང་དཀར་ཕྱོགས་ཟླར་མཚུངས་འགྲིབ་མེད་ཤོག །སྒྲིབ་གཉིས་དགྲ་ཚོགས་ཉེར་ཐུབ་ལུང་རྟོགས་ཀྱི། །བསྟན་པའི་ལང་ཚོ་དར་ལ་བབ་པའི་སྡེ། །མཁའ་སྦྱོར་ལོངས་སྤྱོད་བདུན་ལྡན་ཇི་བཞིན་དུ། །འཁོར་མཐའ་རྙེད་མིན་ཆོས་འཁོར་བསྐོར་དུ་གསོལ། །འཇམ་དཔལ་དབྱངས་ཀྱིས་དགའ་མགུར་བརྩེ་བའི་ལྷ། །ཡིད་འཕྲོག་དྲི་ཟའི་བུ་མོས་བཤེས་མཛད་གང༌། །རིས་མེད་འགྲོ་བའི་གཉེན་དུ་གཡུང་དྲུང་གི །ལེགས་མཚན་ཁྲི་ལ་གཡོ་བ་མེད་པར་ཤོག །ཉམས་འགྱུར་སྟོང་གི་བརྗོད་པ་རྣམ་དག་གླུར། །ཚངས་པའི་སྲས་མོ་དགྱེས་པས་ཉེར་བཞད་ལས། །འཆད་རྩོད་རྩོམ་པའི་རྡོ་རྗེས་རབ་རྨོངས་པའི། །ས་འཛིན་བགྲོད་བྱེད་མཐར་མཛད་བརྟན་པར་ཤོག །དགའ་བཞིའི་འགྲོས་ལྡན་གསང་ཆེན་སྔགས་ཀྱི་ལམ། །རྨད་བྱུང་ཐེག་མཆོག་རིག་འཛིན་འདུས་པའི་གླིང༌། །རིམ་གསུམ་འཁོར་ལོའི་བྱ་བ་སྲིད་མཐའི་བར། །དབྱར་གྱི་ཆུ་(༢༣༤བ) ― GLG021_Page_0470 ―
[མ་དཔེ་གཟིགས་ན་འདིར་གནོན།]
གཏེར་བཞིན་དུ་འཕེལ་བར་ཤོག །དགའ་ལྡན་རྣམ་པར་རྒྱལ་བའི་ཕོ་བྲང་ཆེའི། །ཁྲིམས་གཉིས་རྩིབས་སྟོངས་གསེར་གྱི་འཁོར་ལོ་ཡིས། །ཀུན་བཟོད་ཕ་མཐའི་ཁྱོན་ལ་མངའ་སྒྱུར་ཏེ། །འཛམ་གླིང་ཡོངས་ཀྱི་གཙུག་ན་མངོན་མཐོར་ཤོག །གསེར་མདོག་ཞྭ་ཡི་ཅོད་པན་འཆང་བའི་བསྟན། །ལུས་ཅན་ཡོངས་ཀྱི་བསོད་ནམས་ཞིང་མཆོག་ཏུ། །མ་ཕམ་མགོན་གྱི་རིང་ལུགས་འཕགས་པའི་ཡུལ། །བྱོན་མིན་འཇིག་རྟེན་གསུམ་གྱི་མུན་སེལ་ཤོག །མཁའ་ལ་དཀོན་མཆོག་ཐུགས་རྗེའི་ཉི་འོད་བརྡལ། །བར་སྣང་ལྷ་རྣམས་བཀྲ་ཤིས་མེ་ཏོག་འཐོར། །ས་ལ་འགྲོ་ཀུན་བདེ་སྐྱིད་རྩེད་འཇོར་རོལ། །དགའ་མགུར་སྤྱོད་ཅིང་མཆེད་ལྕམ་སྤུན་གྲོགས་རྣམས། །ཞེས་པ་འདིའང་དགའ་ལྡན་གསང་སྔགས་གླིང་སློབ་དཔོན་ངག་དབང་ནོར་བུ་གཉེར་པ་གྲྭ་དམངས་དང་བཅས་པས་ནན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་པའི་ཡི་གེ་པ་ནི་སྙན་ཚིག་སྨྲ་བ་ལྕང་གསེབ་པ་བསྟན་འཛིན་དབང་པོའོ། །སོར་རྟོག་ཡེ་ཤེས་རང་གདངས་ཟད་མི་ཤེས། །སྣང་བ་མཐའ་ཡས་མཚན་དཔེའི་སྒྱུ་འཕྲུལ་ཕྱག །བདུད་རྩིའི་བུམ་བཟང་བཏེག་ནས་འགྲོ་ཀུན་ལ། །འཆི་མེད་རྡོ་རྗེའི་སྲོག་གི་ཀ་བ་ཚུགས། །ངག་དབང་བློ་ཡི་ཉི་མས་རྨོངས་པའི་མུན། །ཉེར་སངས་མཁས་བཙུན་བཟང་པོའི་འདབ་སྟོང་བཅུད། །རབ་མྱོང་གདུལ་བྱ་བུང་བས་རྒྱ་མཚོའི་མཐའ། །ཡོངས་ཁྱབ་སྲིད་པའི་ཕ་མཐར་མི་གཡོ་ཤོག །ཚངས་སྲས་ལྷ་མོས་བདུངས་པའི་པི་ཝཾ་རྒྱུད། །མགྲིན་པར་(༢༣༥ན) ― GLG021_Page_0471 ―
[མ་དཔེ་གཟིགས་ན་འདིར་གནོན།]
འཁྲོལ་བས་དཔྱོད་ལྡན་ལེགས་བཞད་པས། །དྷཱུ་ཏཱིའི་ཀ་བ་གཞོམ་མེད་རྡོ་རྗེ་རུ། །འགྲུབ་པར་ཚེ་མཐའ་ཡས་པས་བྱིན་གྱིས་རློབས། །འཁྲུལ་བྲལ་ལམ་སྟོན་རྒྱུད་ལ་མངོན་བྱེད་སྐྱབས། །ཟླ་གྲོགས་མཆོག་གསུམ་ཐུགས་རྗེའི་ཆུ་འཛིན་སྦུབས། །བདེན་ཚིག་དབྱར་རྔས་སྐལ་ལྡན་རྨ་བྱའི་ཚོགས། །དགའ་བའི་སྒོ་གཤོག་ཟླུམ་པོར་གར་བྱེད་ཤོག །ལྷག་བསམ་ཆུ་གཏེར་ནང་ལྷུངས་བསོད་ནམས་ཀྱིས། །འཛམ་བུའི་སྙེ་མ་གསེར་དུ་བསྒྱུར་བའི་དཔྱས། །ཕན་བདེའི་དཔལ་འབྱོར་མཛོད་ལ་ལུས་ཅན་ཀུན། །སྤྱོད་པར་མི་འཛད་གཏེར་གྱི་རྒྱུ་རུ་བསྔོ། །ཞེས་རིང་འཚོའི་ཚིགས་བཅད་ཅིག་དགོས་ཚུལ་གྲུབ་རིགས་རྒྱ་མཚོའི་གཙུག་ཏོར་རྩེ་མོར་ཞབས་སེན་གྱི་ཟླ་བ་མངོན་པར་ཚེས་པ་དཔལ་སྟག་ལུང་པ་ཆེན་པོ་རྣམ་རྒྱལ་ལེགས་གྲུབ་ཀྱི་བཀའ་སྩལ་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་འཛིན་དབང་པོའོ། །མཁྱེན་བརྩེ་ནུས་པ་མངའ་བས་དོན་གཉིས་གྲུབ། །འགོག་ལམ་ལྡན་པས་སྲིད་ཞིའི་འཆིང་ལས་གྲོལ། །མྱ་ངན་འདས་པར་ལེགས་བཀྲི་ཟླ་གྲོགས་ཅན། །བསླུ་མེད་མཆོག་གསུམ་ཐུགས་རྗེ་ཆེན་པོའི་མཐུས། །བག་ཡོད་ཁྲིམས་ཀྱིས་རང་རྒྱུད་འཇམ་ཞིང་མཉེན། །འཆད་རྩོད་རྩོམ་པའི་སྒྲ་དབྱངས་ཕྱོག་བཅུར་ཁྱབ། །ཡོངས་སྙན་གྲགས་པ་རབ་འབར་དགེ་བའི་བཤེས། །ལྗོངས་འདིར་ཡང་སྲིད་མྱུར་དུ་འབྱོན་བྱིན་རློབས། །ཞིང་གཞན་གང་འཚམ་འཇུག་པའི་འཕྲིན་ལས་ཀྱིས། །ནམ་མཁའི་མཐའ་(༢༣༥བ) ― GLG021_Page_0472 ―
[མ་དཔེ་གཟིགས་ན་འདིར་གནོན།]
བསྙེག་ཟད་པ་མེད་ན་ཡང༌། །བདག་སོགས་བསམ་པའི་འདོད་པ་ལེགས་འཇོའི་ཆེད། །གངས་ཅན་ཡུལ་དུ་གསལ་པོར་སྟོན་པར་ཤོག །མངོན་གྱུར་ཉོན་མོངས་འདུལ་བ་ཚུལ་ཁྲིམས་ཀྱི། །ལྷག་པའི་བསླབ་པས་ཐུགས་རྒྱུད་ཉེར་གཏམས་པ། །འདུས་སྡེའི་ཚོགས་ཀྱིས་བདེན་ཚིག་རབ་བརྗོད་མཐུས། །འབྲས་བུ་རིང་པོར་མི་ཐོགས་སྨིན་པར་ཤོག །ལེགས་ལྡན་མ་ཧཱ་ཀཱ་ལ་ཕྱག་དྲུག་པ། །བཀའ་སྡོད་བདུད་ཀྱི་མགོན་པོ་ཏྲག་ཤད་དང༌། །དཔལ་ལྡན་དུང་སྐྱོང་དབང་མོ་ལ་སོགས་པས། །བསམས་པའི་དོན་ཀུན་གྲུབ་པའི་འཕྲིན་ལས་མཛོད། །སློབ་དཔོན་འཇམ་དབྱངས་གྲགས་པའི་སྐུ་སྐྱེ་མྱུར་འབྱོན་གྱི་ཚིགས་སུ་བཅད་པ་ཞིག་དགོས་ཞེས་དབོན་པོ་བློ་བཟང་མཁས་བཙུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཤེས་བྱ་ཀུན་མཁྱེན་ངག་དབང་ལྷག་པའི་ལྷས། །ཕུལ་བྱུང་བློ་གྲོས་བཟང་པོའི་མཆོག་སྦྱིན་པས། །གཙུག་ལག་རྒྱ་མཚོར་སྤོབས་པ་རབ་དགེ་བའི། །སྣང་བརྙན་ངོ་མཚར་དད་རྟེན་འདི་བསྐྲུན་མཐུས། །སྒོ་གསུམ་གདུང་བའི་ཚོར་བ་དང་བྲལ་ཞིང༌། །བདེ་སྐྱིད་སུམ་རྩེན་བདག་པོའི་དཔལ་ལ་འགྲན། །འཁོར་བ་ཆུ་སྲིན་འབྱུང་གནས་ལས་ཐར་ཏེ། །མྱ་ངན་འདས་པའི་གྲོང་ཁྱེར་ལ་འཇུག་ཤོག །སྐྱེ་བ་རིམ་བརྒྱུད་མགོན་ཁྱོད་ཞམ་རིང་དུ། །སྐྱེས་ནས་ངེས་གསང་ཆོས་ཀྱི་བང་མཛོད་ལ། །ལོངས་སུ་སྤྱད་པས་རང་རྒྱུད་ལེགས་སྨིན་ཅིང༌། །གཞན་རྒྱུད་འགྲོལ་བའི་སྨོན་པ་ལྷུན་གྲུབ་ཤོག །འཇམ་མགོན་ངུར་སྨྲིག་འཆང་བ་(༢༣༦ན) ― GLG021_Page_0473 ―
[མ་དཔེ་གཟིགས་ན་འདིར་གནོན།]
བཙོང་ཁ་པའི། །མདོ་སྔགས་ཟབ་དང་རྒྱ་ཆེའི་ཆོས་ཚུལ་ཀུན། །ཐོས་དོན་ལེགས་བསམས་སྒོམ་པ་མཐར་ཕྱིན་ཏེ། །གང་གི་འཕྲིན་ལས་བདག་རྒྱུད་ལ་འཇུག་ཤོག །རྒྱལ་བ་སྨན་གྱི་བླ་མ་མཆེད་བདུན་གྱི། །ཐུགས་རྗེས་འདི་སྣང་དགའ་སྐྱིད་ཕུན་སུམ་ཚོགས། །ཉིང་མཚམས་སྦྱར་ནས་བདེ་ལྡན་དག་ཞིང་དུ། །འོད་དཔག་མེད་པའི་སྲས་སུ་སྐྱེ་བར་ཤོག །མཆོག་མཐུན་དངོས་གྲུབ་སྒྲུབ་ཚེ་བདུད་སྡེའི་སྙིང༌། །དཔལ་ཆེན་ཕྱག་ན་བསྒྲིལ་བའི་ཕུར་པ་ཡིས། །ཐལ་བྱུང་ཕུག་སྟེ་བར་ཆད་ལས་རྒྱལ་བའི། །འཕྲིན་ལས་རྣམ་བཞི་བདེ་བླག་འགྲུབ་བྱིན་རློབས། །འཆི་བདག་དཔུང་ཚོགས་འཇོམས་བྱེད་གཤིན་རྗེའི་གཤེད། །གར་དགུའི་ཉམས་ཀྱི་རོལ་པའི་སྟང་སྟབས་ཞབས། །ཡིད་སྲུབས་སྡེར་བཅས་སྙིང་ལ་བྲོ་བརྡུངས་པས། །དགྲ་བགེགས་གཡུལ་ལས་རྣམ་པར་རྒྱལ་བར་ཤོག །ཅེས་ངེད་རང་གི་འདྲ་འབག་གཙོ་ཐང་དུ་བྱས་པའི་བྲིས་ཐང་ལྔ་ཆར་བཀྲས་རབ་དཀའ་བཅུ་བ་བློ་བཟང་ལྷུན་གྲུབ་ཀྱིས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཉེར་གསུམ་སྲང་ལྡན་རིན་ཆེན་གཉིས་པ་ལས། །ལེགས་གྲུབ་ཀོང་བུར་ཡོངས་སྦར་སྒྲོན་མེ་ཡིས། །དཀོན་མཆོག་མཆོད་པས་འཁོར་འདས་གདུང་བའི་མུན། །རབ་བཅིལ་བདེ་སྐྱིད་སྣང་བས་ཁྱབ་པར་ཤོག །ཅེས་པ་འདིའང་འཕྱོང་རྒྱས་པ་བློ་བཟང་ཐུགས་རྗེས་སྔགས་རམས་པ་བྱས་སྐབས་གྲྭ་ཚང་དུ་དངུལ་ཀོང་ཕུལ་བའི་ཚེ་ཁ་བྱང་དགོས་ཚུལ་ལྟར་ཟ་ཧོར་གྱི་(༢༣༦བ) ― GLG021_Page_0474 ―
[མ་དཔེ་གཟིགས་ན་འདིར་གནོན།]
བནྡེས་བཀོད་པ་མངྒ་ལཾ། །རྟག་ཏུ་བཀྲ་ཤིས་དབྱངས་སུཉེར་སྒྲོག་གླུ། །ཨོཾ་ཡིག་ཟོལ་གྱིས་ལེན་པའི་ཞལ་གི་སྒོའི། །མཁུར་ཚོས་ནས་བརྡོལ་ཨཱ་ཐས་དྲན་གསོས་པ། །ཚེ་ཡི་རིག་བྱེད་སྲོག་གི་ཟུངས་འགྱུར་ཤོག །འཆི་མེད་སོར་མོས་གཏོར་བ་མནྡ་རའི། །སྤེལ་ལེགས་ཆར་དུ་བསྙིལ་དང་ལྷན་ཅིག་ཏུ། །བདེན་བརྗོད་གྲུབ་པར་མཆོག་གསུམ་དྲང་སྲོང་སོགས། །མཐུན་འགྱུར་ཚིག་གི་རྒྱུད་མང་འཁྲོལ་བར་ཤོག །བརྗོད་པ་རྣམ་པར་དག་པ་ངག་གི་དབང༌། །བློ་གཏེར་དྲི་ཟའི་ལུས་ཕྲ་ངང་མོ་དཀར། །མགྲིན་པའི་རྫིང་བུར་རྟག་རོལ་བསྐལ་བཟང་གཏམ། །རྒྱ་མཚོའི་གོས་ཅན་ཁྱབ་ལ་གསོལ་བ་འདེབས། །འཇམ་དབྱངས་བློ་བཟང་གྲགས་པའི་ཆོས་སྲིད་བསྟན། །སྤེལ་ལ་དགའ་བ་བརྒྱ་བའི་ཤེ་མོང་གིས། །གནམ་གྱི་མཐོངས་ནས་དབང་བསྐུར་བཤེས་གཉེན་མཆོག །གཡུང་དྲུང་ལྟ་བུར་འགྱུར་མེད་བརྟན་པར་ཤོག །ཁྲིམས་གཉིས་གསེར་གྱི་གཉའ་ཤིང་འགྲོ་ཀུན་གྱི། །ཕྲག་པར་རབ་ལྕི་ནོར་འཛིན་སྐྱོང་བ་ཡི། །སྐུ་ཚེ་མངའ་ཐང་ཆབ་སྲིད་བླ་ནས་བླར། །མཐོར་བརྩེགས་ཚངས་པའི་ཡུལ་སར་བསྙེག་པར་ཤོག །རྒྱན་དྲུག་མཆོག་གཉིས་ཐུགས་ལ་མངའ་བའི་གཞུང༌། །རིས་མེད་ཐོས་དང་བསམ་པར་བྱེད་པའི་གྲ། །ཕྱོགས་བྲལ་ཀུན་ནས་ཚང་བ་འདུས་ཚོགས་སྡེ། །རྫོགས་ལྡན་གསར་འབྱུང་དེ་སྲིད་དར་བར་ཤོག །ངེས་པའི་དོན་དུ་རྡོ་རྗེ་དབྱིངས་ཕྱུག་མ། །ཐུན་མོང་གདུལ་བྱར་ས་བཅུ་མངོན་གྱུར་ཚུལ། །ཐུབ་བསྟན་བསྲུང་ལ་དམག་དང་ཟོར་གྱི་ལྷ། །འདོད་ཁམས་བདག་མོས་ལས་བཞི་སྒྲུབ་ཏུ་གསོལ།(༢༣༧ན) ― GLG021_Page_0475 ―
[མ་དཔེ་གཟིགས་ན་འདིར་གནོན།]
། གསོལ་འདེབས་སྨོན་ལམ་གྱི་ཤིས་པ་བརྗོད་པ་འདིའང་མངའ་རིས་གྲྭ་ཚང་སློབ་དཔོན་བློ་བཟང་ནོར་བུས་ཆེད་གཉེར་དུ་བསྐུལ་བ་ལ་བརྟེན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་འཛིན་དབང་པའོ། །དཔལ་ལྡན་ཤཱཀྱའི་སྐྱེས་མཆོག་ཟས་གཙང་སྲས། །རྒྱལ་ཚབ་ས་བཅུའི་བདག་ཉིད་བྱམས་པ་མགོན། །འཇིག་རྟེན་དབང་ཕྱུག་པད་དཀར་འཆང་ལ་སོགས། །སྲས་བཅས་རྣམ་འདྲེན་ཐམས་ཅད་དེང་འདིར་དགོངས། །བརྒྱ་ཕྲག་མཆོད་པ་དངོས་སུ་བཤམས་པ་དང༌། །མོས་དང་ཏིང་འཛིན་སྟོབས་ལས་ལེགས་སྤེལ་ཏེ། །ལྷ་ལྡན་སྤྲུལ་པའི་གཙུག་ལག་ཁང་བཟང་དུ། །ནམ་མཁའ་མཛོད་ཀྱི་སྒོ་འཕར་ལྟར་ཕྱེའི་མཐུས། །ལུས་ཅན་ཀུན་ལ་སྨན་ཡོན་འབྱུང་བའི་གཞི། །ཐུབ་བསྟན་སྙིང་པོ་བཤད་དང་སྒྲུབ་པའི་དཔལ། །འཛིན་མཛད་དགེ་འདུན་སྡེ་རྣམས་དར་བ་དང༌། །འཇིག་རྟེན་མ་ལུས་བདེ་ཞིང་སྐྱིད་པར་ཤོག །སངས་རྒྱས་ཀུན་འདུས་རྩ་བའི་བླ་མ་ཡི། །ཞབས་ཟུངས་རྡོ་རྗེའི་ཁྲི་ལ་རྟག་བརྟན་ཅིང༌། །དགའ་བའི་དཔལ་ལྡན་སྡེ་བཞིའི་ཕོ་བྲང་གི །ཆབ་སྲིད་མངའ་ཐང་འཕེལ་ཞིང་རྒྱས་པར་ཤོག །ཟང་ཟིང་བདོག་པའི་རྒྱུ་ཚོགས་གཏོང་བ་དང༌། །ཆེད་དུ་བསྒྲུབ་ཚུལ་གཡོས་སུ་བྱ་བ་སོགས། །མི་དང་དུད་འགྲོས་མཐའ་བརྟེན་གཏོགས་སོ་ཅོག །ནད་གདོན་དབུལ་ཕོངས་རྒུད་ཚོགས་ཞི་བར་ཤོག །བརྒྱ་ཕྲག་ལོར་གནས་སྟོན་བརྒྱའི་འབྲུ་བཅུད་མྱང་། །འདོད་དགུའི་དཔལ་འབྱོར་དབྱར་གྱི་ཆར་བཞིན་འབབ། །སིམ་པའི་ཚོར་བས་ལུས་ངག་ཡིད་གསུམ་ལ། །བདེ་བར་སྤྱོད་པའི་བསོད་ནམས་འཐོབ་པར་ཤོག །ཐོས་བསམས་(༢༣༧བ) ― GLG021_Page_0476 ―
[མ་དཔེ་གཟིགས་ན་འདིར་གནོན།]
སྒོམ་ལ་བློ་གྲོས་རབ་ཏུ་ཡངས། །བག་ཡོད་དང་ལྡན་རྣམ་དཀར་ས་བོན་ཚོགས། །བསྔོ་བ་སྨོན་ལམ་བརླན་གཤེར་གྱིས་བསྐྲུན་པས། །བྱང་ཆུབ་བར་གྱི་མྱུ་གུ་སྨིན་པར་ཤོག །རྣམ་འདྲེན་བཞི་པ་ཤཱཀྱ་སེང་གེ་ཡི། །ཕྱག་མཐིལ་འཁོར་ལོའི་རི་མོ་རབ་བཀྲ་བ། །བདག་སོགས་ལུས་ཅན་ཀུན་གྱི་སྤྱི་བོ་རུ། །བཞག་ནས་དབུགས་དབྱུང་བྱང་ཆུབ་ལུང་སྟོན་ཤོག །མ་ཕམ་མགོན་ཁྱོད་རིས་སུ་མ་ཆད་པར། །རབ་སྙོམས་བྱམས་པའི་ཆུ་རྒྱུན་བདག་རྒྱུད་ལ། །ཞུགས་ཏེ་རྗེས་བརྩེའི་མེ་ཏོག་ཆུན་པོ་ཡིས། །བདུད་སྡེའི་དཔུང་ཚོགས་འཆིང་བའི་ནུས་ལྡན་ཤོག །རིགས་གསུམ་སྒྱུ་དྲའི་གར་མཁན་ཆོས་ཀྱི་རྒྱལ། །མེས་དབོན་རིམ་བྱོན་གྱིས་བཞེངས་གཙུག་ལག་ཁང༌། །རྟེན་དང་བརྟེན་པར་བཅས་ལ་ཚེ་རབས་ཀུན། །བསོད་ནམས་ཞིང་དུ་སྲིད་ཞུ་བསྐྲུན་ནུས་ཤོག །ཉིང་མཚམས་སྦྱར་ཚེ་བདེ་བ་ཅན་ཞིང་དུ། །པདྨའི་སྦུབས་སུ་རྫུས་ཏེ་ལེགས་སྐྱེས་ནས། །འོད་དཔག་མེད་གསུང་ཆོས་ཐོས་རབ་གྲོལ་བས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །སྐལ་དམན་དག་ཞིང་སྐྱེ་བར་མ་ནུས་ན། །མི་ཁོམ་གནས་སུ་ནམ་ཡང་མི་འགྲོ་ཞིང༌། །དལ་བརྒྱད་འབྱོར་བཅུ་ཚང་བའི་རྟེན་བཟང་པོ། །ཐོབ་ནས་ཐེག་ཆེན་ཆོས་ལ་སྦྱོར་བར་ཤོག །བསྐལ་པ་མང་པོར་བྱ་དཀའི་སྤྱོད་པ་ཡིས། །ས་ལམ་ཚོགས་ཀྱིས་བསྒྲུབ་ལ་མི་བལྟོས་པར། །གསང་སྔགས་སྨིན་ཅིང་གྲོལ་བའི་གདམས་པ་ཡིས། །མྱུར་དུ་ཟུང་འཇུག་སྐུ་བཞི་མངོན་འགྱུར་ཤོག །ནམ་མཁའི་མཐས་ཀྱང་སྙེད་པར་མི་ནུས་པའི། །མ་རྒན་མཐའ་དག་བསྡུ་བ་རྣམ་པ་བཞིས། །(༢༣༨ན) ― GLG021_Page_0477 ―
[མ་དཔེ་གཟིགས་ན་འདིར་གནོན།]
འཁོར་དུ་བྱས་ཏེ་ཕ་རོལ་ཕྱིན་དྲུག་གི །རླབས་ཆེན་སྤྱོད་པའི་ཚུལ་ལ་སྤྱོད་པར་ཤོག །མདོར་ན་ཇི་སྙེད་བསགས་པའི་ཆོས་དཀར་གྱི། །འབྲས་བུས་སྐྱེ་རྒུ་མཐའ་དག་སྟོབས་བཅུའི་རྩལ། །ཡོངས་རྫོགས་ཐེག་པ་ཆེན་པོའི་མི་སློབ་ལམ། །རིང་མིན་སྔོན་དུ་འགྱུར་བའི་རྒྱུ་རུ་བསྔོ། །ཞེས་པ་འདིའང་ས་རྟ་ཆོ་འཕྲུལ་ཆེན་མོའི་ཐོག་དབུ་མཛད་བློ་བཟང་ཡོན་ཏན་གྱིས་བརྒྱ་མཆོད་ཕུལ་བའི་དུས་ངག་འདོན་དུ་བྱས་ཆོག་པ་ཞིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་འཛིན་དབང་པོའོ། །དུག་གསུམ་དེས་བསྐྱེད་ནད་འཇོམས་གསེར་མདོག་དང༌། །ལྷུང་བཟེད་ཟིལ་མངར་བཅུད་ཀྱིས་ཉེར་གཏམས་པས། །ལུས་ཅན་ཡོངས་ཀྱི་སྡུག་བསྔལ་གཞིལ་མཛད་པ། །བཻ་ཌཱུཪྻ་འོད་ཡེ་ཤེས་སྤྱན་གྱིས་གཟིགས། །འཇམ་དབྱངས་དགའ་བའི་ན་ཆུང་ཚངས་སྲས་ཐུགས། །རྣམ་དཔྱོད་ལང་ཚོས་ཕྲོགས་པས་ཡོངས་བཞད་པའི། །བཤེས་གཉེན་རྡོ་རྗེ་རྩེ་བརྒྱས་རྒོལ་ངན་རི། །མཐར་བྱེད་འགྲོ་བའི་ཉེ་འཚོར་བརྟན་བྱིན་རློབས། །ལུས་ངག་ཡིད་གསུམ་དྲི་འཁྲུད་དབང་བཞིའི་ཆུས། །བློ་གྲོས་མྱུ་གུ་ཡེ་ཤེས་ལྔ་འབྲས་སུ། །སྨིན་པས་སྐལ་བཟང་གདུལ་བྱའི་འདྲེན་པ་མཆོག །རྒྱ་མཚོའི་གོས་ཅན་གཞི་འདིར་བརྟན་པར་ཤོག །སྲོག་འཚོའི་རིག་བྱེད་གངྒཱའི་ཡབ་ཅིག་ལས། །འཆི་མེད་གྲུབ་རྒྱུན་ཕྱོག་བཞིར་སྦགས་པའི་ཀླུང༌། །དྲང་སྲོང་འདུས་པ་ཟླ་བའི་མ་མའི་གླིང༌། །བསྐལ་པའི་ཕ་མཐའ་དེ་སྲིད་འབབ་པར་ཤོག །གནོད་སྦྱིན་སྡེ་དཔོན་རྡོ་རྗེ་བདུད་འདུལ་དང༌། །ངག་(༢༣༨བ) ― GLG021_Page_0478 ―
[མ་དཔེ་གཟིགས་ན་འདིར་གནོན།]
གི་ནུས་ཐོབ་ལྷ་མིའི་རིག་འཛིན་གྱིས། །ཇི་ལྟར་སྨོན་པའི་རེ་བ་ལྷུན་གྲུབ་པ། །ཡོངས་འདུའི་གྲིབ་མར་རྟག་ཏུ་ངལ་གསོར་ཤོག །ཅེས་སྨན་བླ་དང་འབྲེལ་བའི་བདེན་བརྗོད་ཀྱི་ཚིགས་བཅད་ལྔ་ཙམ་ཡོད་པ་ཞིག་དྲང་སྲོང་འདུས་པའི་གླིང་དུ་འཛུགས་རྩིས་ཀྱི་ལྷའི་རྗེ་བོ་ཚངས་རིས་གྲུབ་པའི་སྨན་པ་ཚ་རོང་པ་སྤུན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་འཛིན་དབང་པོའོ། །ལྗགས་བཟང་བཀྲམ་པའི་རྒྱུད་མང་གླུར། །མདོ་ཆོག་སྒྲ་འཁྲོལ་ཉི་མའི་གཉེན། །བསོད་ནམས་དར་རྒྱས་མངོན་མཐོ་དང༌། །ངེས་པར་ལེགས་པའི་ལམ་ལ་སྦྱོར། །བཻ་ཌཱུཪྻ་འོད་རྒྱལ་པོ་ཡིས། །ཐུགས་བསྐྱེད་སྨོན་པའི་དོན་ཇི་བཞིན། །བསོད་ནམས་དེར་རྒྱས་སྡུག་ཀུན་གྱི། །བདེན་ལས་རྣམ་པར་གྲོལ་བྱིན་རློབས། །མངོན་མཁྱེན་རྒྱལ་པོའི་ཐུགས་རྗེའི་ཟླ། །ཡོངས་བསིལ་ཟེགས་མ་འབུམ་ཕྲག་གིས། །བསོད་ནམས་དར་རྒྱས་འཁོར་བ་ཡི། །སྲེག་བྱེད་ཚ་གདུང་མཐའ་དག་གཅིལ། །ཆོས་གྲགས་རྒྱ་མཚོའི་དབྱངས་སྙན་པོས། །སྐྱེ་བར་ཡིད་ལ་ལེགས་སིམ་སྒྲས། །བསོད་ནམས་དར་རྒྱས་ཐོས་འཛིན་དུ། །འཇེབས་པའི་དགའ་སྟོན་མྱོང་བར་མཛོད། །མི་བཟད་མྱ་ངན་མིང་ཙམ་ཡང༌། །མེད་པ་ཡིད་བདེའི་ཚོར་བ་ལ། །བསོད་ནམས་དར་རྒྱས་སྐྱེ་བ་ཀུན། །སྤྱོད་པར་མཛོད་ཅིག་མཆོག་གི་དཔལ། །ལེགས་བྱས་བསགས་པའི་ཛམྦུའི་འབྲས། །གསེར་བཟང་སྙེ་མར་ཡོངས་བསྒྱུར་ཏེ། །བསོད་ནམས་དར་རྒྱས་སྲིད་པ་ཡི། །ཟུག་རྔུའི་དྲི་མ་མེད་པར་ཤོག །ཚོགས་གཉིས་ཡིད་བཞིན་རིན་(༢༣༩ན) ― GLG021_Page_0479 ―
[མ་དཔེ་གཟིགས་ན་འདིར་གནོན།]
ཆེན་ལས། །རྡུལ་བྲལ་སྟོན་ཀའི་ཟླ་འོད་ལྟར། །བསོད་ནམས་དར་རྒྱས་ཆོས་དཀར་གྱིས། །བརྒྱ་ཕྲག་བྱུགས་པས་ཆེས་གསལ་ཤོག །སྲིད་ཞིའི་མཐའ་བྲལ་སངས་རྒྱས་མཚོན། །ལེགས་པར་ཡོངས་བསྒྲགས་ལུང་བསྟན་གྱིས། །བསོད་ནམས་དར་རྒྱས་རིང་མིན་དུ། །སྟོབ་བཅུ་མངའ་བ་བརྙེས་པར་ཤོག །གྲུ་འཛིན་ལ་དགྱེས་པད་དཀར་འཆང༌། །བྱམས་དང་བརྩེ་བའི་སྤྱན་རས་ཀྱིས། །བསོད་ནམས་དར་རྒྱས་སྲིད་མཚོ་ལས། །སྒྲོལ་བའི་གཟིགས་པ་ལྷོད་མེད་སྩོལ། །རྒྱལ་རྣམས་པདྨའི་འདབ་སྟོང་དབུས། །ལེགས་བྱུང་གཏན་གྱི་སྐྱབས་གནས་ཀྱིས། །བསོད་ནམས་དར་རྒྱས་རང་རིང་རྩལ། །ཀུན་བཟང་ངོ་འཕྲོད་དེ་སྲིད་སྐྱོངས། །སྟོང་ཉིད་སྙིང་རྗེའི་ཉམས་ཀྱི་གར། །མཛེས་སྡུག་ཕྱག་རྒྱ་མནྡ་རས། །བསོད་ནམས་དར་རྒྱས་མཁའ་འགྲོའི་གྲོང༌། །ཁྲིད་ལ་བདེ་ཆེན་ལམ་དུ་དྲོངས། །མཁའ་ལ་མཁའ་ཡི་སྦྱོར་བ་བཞིན། །རྡོ་རྗེ་བཙུན་མོ་འཚོ་རྒྱལ་མས། །བསོད་ནམས་དར་རྒྱས་པདྨ་འོད། །དག་པའི་ཞིང་དེར་དྲང་དུ་གསོལ། །ཝཾ་ཡིག་པདྨ་འབྱུང་གནས་སྐུར། །ཨེ་དབྱིངས་གཟུངས་མ་ལེགས་འཁྲིལ་བས། །བསོད་ནམས་དར་རྒྱས་དགའ་བཞིའི་འགྲོས། །ཚེ་གཅིག་རྡོ་རྗེ་འཆང་བརྙེས་མཛོད། །རྣམ་དག་ཚུལ་ཁྲིམས་དྲི་ངད་ཀྱིས། །ཡོངས་ཁྱབ་པདྨ་སམ་བྷ་ཝས། །བསོད་ནམས་དར་རྒྱས་བག་ཡོད་སོགས། །ཡོན་ཏན་སྣ་ཚོགས་ལ་སྦྱོར་གསོལ། །ཇི་ལྟ་ཇི་སྙེད་ཀུན་གཟིགས་པའི། །མཁས་པ་བློ་ལྡན་མཆོག་སྲེད་ཀྱིས། །བསོད་ནམས་དར་རྒྱས་ཤེས་བྱའི་གནས། །ངེས་པར་ཐམས་(༢༣༩བ) ― GLG021_Page_0480 ―
[མ་དཔེ་གཟིགས་ན་འདིར་གནོན།]
ཅད་མཁྱེན་པར་ཤོག །པདྨ་རཱ་གའི་མདངས་འཛིན་པ། །འཁོར་འདས་ཡོངས་ཀྱི་རྒྱལ་པོ་ཡིས། །བསོད་ནམས་དར་རྒྱས་སྲིད་ཀུན་ཏུ། །ལེགས་ཚོགས་མ་ལུས་དབང་དུ་སྡུས། །བྱིན་རླབས་ཉི་མའི་དཀྱིལ་འཁོར་ལས། །ཐུགས་རྗེའི་འོད་ཟེར་རྨད་པོ་ཆེས། །བསོད་ནམས་དར་རྒྱས་རིང་མིན་དུ། །འགྲོ་རྣམས་འདུལ་བའི་མགོན་པོར་མཛོད། །མཚན་དཔེའི་དཔལ་གྱི་གཟི་འབར་བ། །བཅོམ་ལྡན་ཤཱཀྱ་སེང་གེའི་མཐུས། །བསོད་ནམས་དར་རྒྱས་བདུད་བཞི་ཡི། །གཡུལ་ལས་རྣམ་པར་རྒྱལ་བྱིན་རློབས། །འཇིགས་པ་དང་བྲལ་སེང་གེའི་སྒྲ། །རབ་སྒྲོག་ཁྲོ་བོ་དྲག་ཤུལ་ཅན། །བསོད་ནམས་དར་རྒྱས་མུ་སྟེགས་སོགས། །ལྟ་ངན་གནོད་བྱེད་ཚོགས་ཀུན་སྐྱོབས། །གཏུམ་དྲག་རྡོ་རྗེ་གྲོ་བོ་ལོད། །ཟ་བྱེད་རྔམས་པའི་སྟང་སྟབས་ཀྱིས། །བསོད་ནམས་དར་རྒྱས་སྐྱེ་བ་ཀུན། །འབྱུང་པོའི་གདོན་བགེགས་ལས་མཐར་མཛོད། །འཇམ་དཔལ་དགེ་སློང་ཚུལ་འཆང་བ། །འདྲེན་མཆོག་བློ་བཟང་གྲགས་པ་ཡིས། །བསོད་ནམས་དར་རྒྱས་བྱང་ཆེན་ས། །མ་ཐོབ་བར་དུ་རྗེས་སུ་གཟུང༌། །ཡོངས་རྫོགས་བསྟན་པའི་མངའ་བདག་ཆེ། །བློ་བཟང་ཆོས་ཀྱི་རྒྱལ་མཚན་གྱིས། །བསོད་ནམས་དར་རྒྱས་ཐར་པ་ཡི། །ཕོ་བྲང་ཆེན་པོར་དྲང་བར་གསོལ། །ངག་དབང་ཚངས་སྲས་བློ་གྲོས་ལ། །སྤྱོད་པའི་སྐལ་བཟང་རྒྱ་མཚོའི་སྡེས། །བསོད་ནམས་དར་རྒྱས་གཏན་གྱི་བདེར། །འགོད་སྨོན་མཆོག་གསུམ་དཔང་པོར་གསོལ། །ཞེས་སྒེམ་བུ་བ་བསོད་ནམས་དར་རྒྱས་ཀྱི་ཆེད་དུ་རྒྱལ་ཕུར་རབ་བརྟན་སོགས་ཤུལ་མི་རྣམས་ཀྱིས་སྨན་བླ་བདེ་(༢༤༠ན) ― GLG021_Page_0481 ―
[མ་དཔེ་གཟིགས་ན་འདིར་གནོན།]
གཤེགས་བརྒྱད་ཚར་གཉིས། བཅུ་གཅིག་ཞལ་གུ་རུ་མཚན་བརྒྱད་དང་ཇོ་མོ་གཉིས། རྒྱལ་བ་ཙོང་ཁ་པ་གཉིས། པཎ་ཆེན་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་གཉིས། ངེད་རང་གི་འདྲ་འབག་བཞི་རྣམས་གསེར་ཟངས་ལས་བཞེངས་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །སྨིན་བྱེད་བདུད་རྩི་མཛེས་འཁྱིལ་བའི། །དངུལ་དཀར་བུམ་བཟང་རབ་འབྱམས་པ། །བསོད་ནམས་རྒྱལ་མཚན་གྱིས་ཕུལ་འབྲས། །ཡེ་ཤེས་སྣ་ལྔ་མངོན་གྱུར་ཤོག །ཅེས་འཕྱོས་པ་སྔགས་རམས་པ་བསོད་ནམས་རྒྱལ་མཚན་གྱིས་གྲ་ཚང་དུ་ཞོ་དགུས་ལྷག་པའི་དངུལ་སྲང་ཉི་ཤུ་རྩ་གཉིས་ཡོད་པའི་བུམ་པ་ཕུལ་བའི་ཁ་བྱང་དུ་ཟ་ཧོར་གྱི་བནྡེས་བཀོད་པ་སིདྡྷི་རསྟུ། །ཁྱབ་བདག་པདྨ་ཀ་རའི་བྱིན་རླབས་ཀྱིས། །རིག་སྔགས་ལྷུན་གྲུབ་འཇམ་དབྱངས་ཆོས་ཀྱི་རྒྱལ། །རྣལ་འབྱོར་སྤྱོད་པའི་རྡོ་རྗེ་གདུལ་བྱའི་དོན། །སྤྲུལ་སྐུའི་ཡང་སྲིད་མྱུར་དུ་འབྱོན་པར་ཤོག །ཞི་ཁྲོ་རབ་འབྱམས་དཀྱིལ་འཁོར་ལྷ་ཚོགས་དང༌། །ལེགས་ལྡན་འབར་མ་མ་ནིང་བསྟན་སྲུང་སོགས། །དྲེགས་པའི་སྡེ་དཔོན་ཟབ་གཏེར་སྐྱོང་རྣམས་ཀྱིས། །རྣམ་པར་དཀར་བའི་འཕྲིན་ལས་འབད་མེད་སྒྲུབ། །གཞོན་ནུའི་བུམ་སྐུར་ངོ་བོ་དག་པའི་དབྱིངས། །ཡེ་རྫོགས་ཆོས་སྐུ་རྩལ་སྣང་ལོངས་སྐུའི་ཞིང༌། །རང་བཞིན་ཉི་མའི་དཀྱིལ་འཁོར་འོད་ཀྱི་ཟེར། །ཐུགས་རྗེ་མཆོག་དམན་ཀུན་ལ་ཁྱབ་པར་ཤོག །རྫོགས་པ་ཆེན་པོའི་རྣལ་འབྱོར་པ་(༢༤༠བ) ― GLG021_Page_0482 ―
[མ་དཔེ་གཟིགས་ན་འདིར་གནོན།]
དྲེས་པ་འཇམ་དབྱངས་ཆོས་རྒྱལ་རྡོ་རྗེའི་སྤྲུལ་སྐུ་མྱུར་བྱོན་གྱི་ཚིགས་བཅད་ཅིག་དགོས་ཞེས་གཞན་ཕན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །གྲུ་དཀར་ནོར་བུའི་ཕྲ་བཀོད་གསེར་སྦྱངས་རྒྱན། །མི་ཕྱེད་དད་པས་ཕུལ་བའི་དགེ་ལེགས་འབྲས། །དགོས་པ་ནོར་བུ་བསོད་ནམས་ཕུན་ཚོགས་གསུམ། །མངོན་མཐོའི་རྟེན་བརྒྱུད་སངས་རྒྱས་ཉེར་ཐོབ་ཤོག །རྒྱུ་སྦྱོར་བསོད་ནམས་དཔལ་མོ་ཚེ་འདིར་བདེ། །ལྷ་མིའི་རྟེན་བཟང་རིམ་རྙེད་མ་ཕམ་མགོན། །མཆོག་གི་སྤྲུལ་སྐུར་གྱུར་དུས་འདུས་པ་རུ། །སྐྱེས་ནས་རྣམ་པར་གྲོལ་བ་ཐོབ་པར་ཤོག །ཀ་བརྒྱད་སྦུག་བསོད་ནམས་དཔལ་མོས་གཙུག་གཡུ་འགངས་ཆེ་བ་ཇོ་བོ་རིན་པོ་ཆེའི་སྐུ་རྒྱན་དུ་ཕུལ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་བཀོད་པའོ། །རྣམ་འདྲེན་ཡོངས་ཀྱི་མཁྱེན་བརྩེ་ནུས་སྟོབས་གཟུགས། །མཚམས་སྤྲིན་བླ་གོས་རབ་ཀླུབས་འཇམ་དཔལ་དབྱངས། །བློ་བཟང་གྲགས་པའི་ཐུགས་རྗེའི་ཉི་འོད་ཀྱིས། །ཕན་བདེའི་སྣང་བ་ཆེས་ཆེར་འབར་གྱུར་ཅིག །ཁེད་ཤོད་ཁུན་འདུ་ལུར་འབོད་ཨུ་བ་ཤ །རིགས་རྒྱུད་བསྟན་འཛིན་ཧུང་གི་མིང་ཅན་སོགས། །སྤུན་ཟླ་ཚ་བོར་བཅས་རྣམས་ལེགས་བྱས་ཀྱི། །དགེ་བའི་འབྲས་བཟང་མངོན་སུམ་མྱོང་བར་ཤོག །ཞྭ་སེར་ཅོད་པན་འཆང་བའི་བསྟན་པའི་ཞབས། །བླ་ནས་བླར་འདེགས་ཡོན་གྱི་བདག་པོ་རུ། །ཡོངས་གྱུར་འདི་དང་ཕྱི་མའི་དོན་ཆེན་ཚོགས། །འབད་པ་མེད་པར་ལྷུན་གྱིས་གྲུབ་པར་ཤོག །བཤེས་གཉེན་དམ་པ་(༢༤༡ན) ― GLG021_Page_0483 ―
[མ་དཔེ་གཟིགས་ན་འདིར་གནོན།]
ཞབས་པད་རྟག་བརྟན་ཅིང༌། །བྱང་ཆུབ་བར་དུ་འབྲལ་མེད་རྗེས་བཟུང་སྟེ། །བླང་དང་དོར་བྱའི་གནས་ཀུན་མ་ལུས་པ། །སྟོན་པའི་སྐལ་བ་བཟང་པོར་འགྱུར་བར་ཤོག །འཐབ་རྩོད་ནད་མུག་རྒུད་པའི་འཚེ་བ་རྣམས། །རྗེ་འབངས་ཡོངས་ལ་མིང་ཡང་མི་གྲག་ཅིང༌། །རྫོགས་ལྡན་དཔྱིད་ཀྱི་དཔལ་མོ་རབ་འབོད་པ། །གཞན་གསོས་མགྲིན་རྔ་སྙན་པོ་འཁྲོལ་བར་ཤོག །ཨེར་ཁེ་དའི་ཆིང་གི་བུ་རབ་འབྱམས་པ་བློ་བཟང་བཀྲ་ཤིས་དང་བསྟན་འཛིན་ཧུང་ཐའི་ཇིའི་མི་སྣ་ཆེ་ཆེན་ཆོས་རྗེ་གཉིས་ཀྱིས་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་གྲུབ་པའི་བློ་གྲོས་ཀྱི། །མཁས་བཙུན་བཟང་པོར་རྣམ་རོལ་འཕྲིན་ལས་རྒྱུན། །རྒྱ་མཚོའི་གོས་ཀྱི་མཐའ་སྙེད་ཡོངས་བརྙེས་པ། །བཤེས་གཉེན་མཆོག་གི་མགོན་ལ་གསོལ་བ་འདེབས། །བདག་སོགས་གདུལ་བྱའི་ལེགས་བྱས་མཆོད་སྡོང་གཞིར། །རྡོ་རྗེའི་ཁྲི་ལ་འཁོར་བ་སྟོངས་མིན་བར། །ཚེ་མཐའ་ཡས་པའི་མགོན་དང་དབྱེར་མེད་དུ། །གསོལ་བཏབ་ཡོངས་སྨིན་རེ་བ་འབྲས་ལྡན་ཤོག །བྱང་ཆུབ་མཆོག་གི་གྲོང་ཁྱེར་ཉམས་དགའ་བར། །བདག་སོགས་བགྲོད་མིན་དེ་སྲིད་མགོན་ཁྱོད་ཀྱིས། །རྗེས་བཟུང་འཁོར་འདས་ཡོན་ཏན་མ་ལུས་པ། །དཀར་ཆའི་ཟླ་བ་ལྟ་བུར་འཕེལ་བར་ཤོག །ཅེས་པ་འདིའང་རྒྱལ་མོ་ནོ་ཡོན་དྷ་རའི་ངག་འདོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་(༢༤༡བ) ― GLG021_Page_0484 ―
[མ་དཔེ་གཟིགས་ན་འདིར་གནོན།]
སྔགས་རམས་པའོ། །གསུང་ངག་དབང་ཆུ་བློ་གྲོས་མཐོ་རིས་ལམ། །ལེགས་བརྒྱུད་བསྐལ་བཟང་སྙིང་གི་ཟ་མ་ཏོག །རབ་འཁྱིལ་སྨིན་གྲོལ་རྒྱ་མཚོ་ལྟར་ཟབ་པས། །རང་གཞན་དོན་གཉིས་འགྲུབ་ལ་གསོལ་བ་འདེབས། །འོག་མིན་ཞིང་གི་ཞིང་ཁམས་གཙོ་བོ་རུ། །ཉེར་བཞུགས་ལྔ་ལྡན་ལོངས་སྤྱོད་རྫོགས་སྐུ་བཞིན། །ལྔ་བརྒྱའི་ལུས་ཅན་ཉེར་འཚོར་རྡོ་རྗེ་ཡི། །སྲོག་སོང་འགྱུར་བ་མེད་པར་བརྟན་གྱུར་ཅིག །བདག་སོགས་རྣམས་ཀྱི་སྲིད་ཞིའི་ལེགས་ཚོགས་ཀུན། །དབྱར་གྱི་ཆུ་གཏེར་ལྟ་བུར་རབ་འཕེལ་ཞིང༌། །ཀུན་མཁྱེན་ཡེ་ཤེས་མངོན་དུ་མ་གྱུར་བར། །འབྲལ་མེད་རྗེས་སུ་འཛིན་པའི་རྒྱུར་གྱུར་ཅིག །ཅེས་པ་འདིའང་མདོ་པ་དབོན་ཆུང་གིས་ནན་ཏན་དུ་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འོད་དཔག་མེད་མགོན་རྒྱལ་སྲས་འཁོར་བཅས་ལ། །མི་ཕྱེད་དང་བའི་དད་པས་རྩེ་གཅིག་ཏུ། །ཀུན་ཏུ་བཟང་པོའི་སྨོན་ལམ་ཤུགས་དྲག་པོར། །བཏབ་པའི་དོན་བཞིན་མངོན་སུམ་འགྱུར་བར་ཤོག །ཡིད་འཕྲོག་ལྟ་བས་མི་ངོམས་ཞིང་གི་མཆོག །བདེ་བ་ཅན་དུ་པདྨ་སྦུབས་ནང་དུ། །རྫུས་སྐྱེས་སྣང་བ་མཐའ་ཡས་ཞལ་མཐོང་ནས། །ཡན་ལག་དྲུག་ཅུའི་སྒྲ་དབྱངས་རྣར་སིམ་ཤོག །ཐོས་པའི་མོད་ལ་བདག་རྒྱུད་རྣམ་གྲོལ་ཏེ། །ནམ་མཁའི་ཕ་མཐར་འཇལ་བྱེད་སེམས་ཅན་རྣམས། །འཁོར་བའི་མཚོ་ལས་ཉེར་བསྒྲལ་ཐར་གླིང་དུ། །འདྲེན་པའི་དེད་དཔོན་ཆེན་པོར་འགྱུར་བར་ཤོག །ཅེས་པའང་ཨེར་ཁེ་(༢༤༢ན) ― GLG021_Page_0485 ―
[མ་དཔེ་གཟིགས་ན་འདིར་གནོན།]
ཆོས་རྗེས་བསྐུལ་བའི་ངོར་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་ཀུན་མཁྱེན་ཙོང་ཁ་པའི། །དྲི་བྲལ་བསྟན་པ་རིན་ཆེན་རྗེས་ཞུགས་ནས། །ངུར་སྨྲིག་རྒྱལ་མཚན་འཛིན་པ་དགེ་བའི་གཤེས། །དཔལ་ལྡན་བླ་མའི་ཞབས་ལ་གསོལ་བ་འདེབས། །རྣམ་མང་གདུལ་བྱར་ཆོས་ཀྱི་འཁོར་ལོའི་རྒྱུན༌། །ཆད་མེད་བསྐོར་ཕྱིར་མི་གཡོ་རབ་བརྟན་ཅིང༌། །ཐོས་བསམ་ཚུལ་བཞིན་བསྒྲུབ་པ་འདུས་པའི་གླིང༌། །སྲིད་མཐའི་བར་དུ་དར་ཞིང་རྒྱས་པར་ཤོག །ཅེས་པ་འདིའང་བི་ལིག་རབ་འབྱམས་པ་བློ་བཟང་ཆོས་འཕེལ་གྱི་ངོར་ཟ་ཧོར་གྱི་བནྡེས་སྦྱར། །པད་རཱག་ཞུན་འཁྱིལ་ཧྲཱི་ཡིག་ཚེག་དྲག་ཅན། །མི་འགྱུར་དང་མའི་སྲོག་རྩ་ཀ་བའི་དབྱིབས། །ཟླ་ཉིའི་རང་བཞིན་ཨ་ཧཾ་བསྐལ་བརྒྱའི་བར། །འཆི་མེད་གྲུབ་པའི་རྣམ་པར་རྟེན་བྱིན་རློབས། །མཁའ་ཁྱབ་བཞུགས་པའི་ཕྱོགས་གསུམ་རིན་ཆེན་ལ། །བླ་གོས་ཁྲག་གཟར་པུས་བཙུགས་ཡན་ལག་འདབ། །སྙིང་གའི་ཐད་ཟུམ་མོས་གུས་གདུང་ཤུགས་ཀྱིས། །སྨོན་ལམ་བཏབ་པས་འབྲས་བུ་དེར་སྨིན་ཤོག །ཚེ་མཐའ་ཡས་པས་ཕྱག་གི་བུམ་དབང་བསྐུར། །གོས་དཀར་མ་སོགས་མགྲིན་པའི་རྒྱུད་མང་འཁྲོལ། །སེམས་པ་བརྒྱད་ཀྱི་མེ་ཏོག་ཆར་དུ་ཕོབ། །ཁྲོ་བོའི་སྟང་སྟབས་ལྷ་མོས་ཉེར་སྤྱོད་སྦྲེང༌། །འཆི་མེད་ཟིལ་མངར་མཐོ་རིས་ཆུ་བོའི་རྒྱུན། །ཆད་མེད་ཕུང་ཁམས་སྐྱེ་མཆེད་ཡོངས་བཏབ་པས། །གཞོམ་(༢༤༢བ) ― GLG021_Page_0486 ―
[མ་དཔེ་གཟིགས་ན་འདིར་གནོན།]
མེད་གཡུང་དྲུང་ངོ་བོར་གྱུར་བའི་ལྷག །འགྱུར་མེད་རིགས་བདག་སྣང་མཐའ་རྟག་ཞུགས་གསོལ། །རྒྱལ་གསུང་མཐར་ཐུག་ཐེག་མཆོག་ངག་གི་གླུར། །ལེགས་ཁུགས་དབང་གི་རྒྱུད་མང་བློ་ལྡན་རྣར། །སིམ་པའི་སྐལ་བཟང་རྒྱ་ཆེན་མཚོ་བྱུང་མའི། །དྲིན་ལས་བརྙེད་དེ་རྡོ་རྗེ་ལྟར་བརྟན་ཤོག །ཕུན་ཚོགས་འདོད་དགུ་དར་བའི་ཡང་རྩེའི་མདོར། །སུམ་རྩེན་བདག་པོའི་དགའ་སྟོན་དཔལ་ལྡན་པ། །རིས་མེད་གཞན་ཕན་རབ་བསྒྲུབས་འདུས་གླིང་སྡེ། །ནམ་མཁའ་གཞན་གྱུར་དེ་སྲིད་འཕེལ་བར་ཤོག །བཅུ་གཉིས་གོ་ལའི་ཁྱིམ་གྱི་རྒྱུད་ལམ་དུ། །གཟའ་སྐར་འཕྲོད་དགེ་དུས་ཀྱི་སྦྱོར་བ་བཟང༌། །འབྲུ་བཅུད་ལྗོན་པས་ནོར་འཛིན་མངལ་ཁུར་ལྕི། །ལེགས་བྱས་འབྲས་བུ་དར་བའི་བཀྲ་ཤིས་ཤོག །ཅེས་པ་འདིའང་ས་དཀར་འགོ་པ་ལྷུན་གྲུབ་བརྒྱ་མཚོས་མདོ་དགའ་ལྡན་གཞན་ཕན་གླིང་དུ་འཛུགས་རྒྱུའི་རྟེན་འབྱུང་གི་ཚིགས་བཅད་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམས་དབྱངས་གྲགས་པའོ། །དངུལ་དཀར་རིན་ཆེན་རྒྱུར་གྲུབ་བདེ་གཤེགས་ཀྱི། །ངོ་མཚར་བཀྲ་ཤིས་སྒོ་མང་ཆེ་བའི་ནང༌། །སྨན་མདོ་ལས་གསུངས་ལྷ་ཚོགས་ཉེ་སྲས་བརྒྱད། །འཕགས་པའི་གནས་བརྟན་བཅུ་དྲུག་ཚེ་སྦྱིན་སྐུ། །གཏོང་དང་དད་པའི་ལང་མཚོ་ཆེར་བརྟས་པ། །འཕྲུལ་སྣང་བྱ་འདབས་ཆུ་མིག་ཁར་གྲགས་ནས། །ཨ་བསོད་རྒྱལ་མོའི་བགྲང་ཡས་སྐྱེ་བའི་སྡིག །འཁྲུལ་བྱེད་མཐོ་རིས་ཉལ་འགྲོ་དེང་འདིར་བབས། །ཆོས་དཀར་འབྲས་བུ་མངོན་མཐོའི་ཐེམ་སྐས་ལ། །གོམ་སྟབས་ལྷོད་པོར་བཀོད་(༢༤༣ན) ― GLG021_Page_0487 ―
[མ་དཔེ་གཟིགས་ན་འདིར་གནོན།]
པ་དེ་ངེས་ལེགས་ཀྱི། །རིན་ཆེན་ཁང་པར་བཞུགས་པའི་སྨོན་པ་ཀུན། །འགྲུབ་པར་སྲས་བཅས་རྒྱལ་བས་བྱིན་གྱི་རློབས། །ཞེས་པའང་ལྷ་ས་ཆུ་མིག་ཁ་པ་ཨ་བསོད་རྒྱལ་མོས་སྒོ་མངས་མཆོད་རྟེན་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མཁྱེན་སྤྱན་དགུ་ཚོགས་ཞགས་པས་ཤེས་བྱའི་མཁའ། །བཅིངས་ཚེ་དབྱངས་ཅན་ལྷ་མོ་ཉེར་བཞད་པས། །ཕས་རྒོལ་འཇོམས་པའི་རྡོ་རྗེ་ཐམས་བཅད་གཟིགས། །དགེ་འདུན་དཀོན་མཆོག་རྒྱ་མཚོའི་བདག་ཉིད་སྐུར། །སྣ་ཚོགས་འདོད་ལྷས་ཡོངས་སྐོར་རས་དཀར་ངོས། །མ་བྲིས་རང་བྱུང་ཤར་འདྲ་འཕྲུལ་པོ་ཆེ། །སྒྱུ་མའི་ཁེངས་པ་བག་ཞར་ལྷ་ཡུལ་ནས། །བི་ཤྭ་ཀརྨ་གོམ་བཀོད་ལས་གཞན་ཅི། །འབྲས་བུ་བྱང་ཆུབ་སེམས་པ་ཆེན་པོ་ཡི། །རྣམ་པར་སྤྲུལ་པའི་ལུགས་གཉིས་བཞེད་པ་ཀུན། །འབད་དང་རྩོལ་བར་བལྟོས་མིན་སྤྱི་བོ་སྐྱེས། །གཉིས་པའི་ངོ་མཚར་འཛིན་ནུས་བྱིན་གྱི་རློབས། །སྲིད་པར་ཟོ་ཆུན་ལྟར་འཁོད་བྱིས་བློ་ཅན། །བཟང་པོའི་བག་ཆག་ཙམ་ལ་བྱི་བའི་ལུས། །གླང་པོར་མིང་བཏགས་དྲི་བཞོན་གྱིས་བཏེག་སྒྲོའི། །ཚུལ་བཟུང་ཟ་ཧོར་བནྡེའི་འདྲ་འབག་འདི། །རྒྱལ་སྲས་སྤྲུལ་སྐུ་གང་སྣང་ལྷར་ཤར་བར། །དམ་པར་གསལ་བའི་བསླུ་མེད་རྟེན་འབྱུང་མཐུས། །མཁའ་ཉམས་འགྲོ་འདྲེན་བཞེད་པའི་འཕྲིན་ལས་ཀྱི། །ཕ་མཐའ་ནམ་མཁའི་ཚད་ལས་བརྒལ་བར་ཤོག །རྒྱ་གར་དགྲ་ལྷ་མི་ཡུལ་ཆོས་སྲུང་ཆེ། །མ་རུ་ཙི་ཡི་དུར་ཁྲོད་གནས་ཀྱི་བདག །དབང་ཕྱུག་མ་ཧཱ་དེ་ཝའི་བཀའ་ཉན་ཅན།(༢༤༣བ) ― GLG021_Page_0488 ―
[མ་དཔེ་གཟིགས་ན་འདིར་གནོན།]
། གཤིན་རྗེ་ལས་མཁན་གནོད་སྦྱིན་བཤན་པ་ཡི། །རིས་མེད་འགྲོ་ལ་བརྩེ་ལྡན་སེམས་པ་ཆེའི། །ཆོས་དང་སྲིད་ཀྱི་ལེགས་ཚོགས་མ་ལུས་པའི། །ཡོན་ཏན་མཐའ་དག་དབྱར་གྱི་ཆུ་གཏེར་བཞིན། །འཕེལ་བའི་འཕྲིན་ལས་ཐམས་ཅད་སྒྲུབ་པར་མཛོད། །ཅེས་དབུས་རུ་སྟོད་སེམས་པ་ཆེན་པོ་བློ་གྲོས་རྒྱལ་མཚན་གྱི་སྤྲུལ་སྐུ་ངག་དབང་ཕུན་ཚོགས་ཀྱིས། ཐམས་ཅད་མཁྱེན་པ་དགེ་འདུན་རྒྱ་མཚོ། ངེད་རང་གི་འདྲ་འབག །གནོད་སྦྱིན་བེག་ཙེ་གསུམ་ལ་འདོད་ལྷ་སྣ་ཚོགས་ཀྱིས་བསྐོར་བའི་སྐུ་བརྙན་བསྐྲུན་པའི་རྒྱབ་ཡིག་བྲིས་ཤིག་པར་གསུང་གི་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གི་པ་ནི་དགེ་སློང་འཇམས་དབྱངས་གྲགས་པའོ། །ཤཱཀ་ཐུབ་ཐོས་སྒྲོག་བཅུ་དྲུག་ཆོས་འཕེལ་དང༌། །ཧྭ་ཤང་རྒྱལ་ཆེན་བཞི་ཡི་སྣང་བརྙན་ཟླ། །ཀ་ཤིའི་དངས་མཚོར་ཤེལ་ཚོན་ལྟར་ཤར་བ། །པད་རྩའི་རྗེས་འགྲོ་ལྷག་བསམ་གྱི་བསྐྲུན་མཐུས། །གནས་ངན་སྡོང་དུམ་དཀར་མིན་འཐོར་རླུང་གིས། །སྦར་བའི་བརྣག་དཀའ་ཚ་རེག་ཞུགས་ཀྱི་དབལ། །ཐུགས་རྗེ་ས་འཛིན་རྩེ་ནས་བྱིན་རླབས་ཆབ། །ཤུགས་དྲག་རྦས་གཞིལ་གསུམ་ཡགས་བདེར་སྦྱོར་ཤོག །ཐུབ་དབང་རྒྱལ་ཚབ་རྣམ་གཉིས་གནས་བརྟན་ཆེ། །གཟོད་མ་ཉིད་ནས་རིས་བྲལ་འགྲོ་བ་ལ། །རྗེས་ཆགས་འགྲོ་འདྲེན་མ་དོར་དམ་བཅའི་ཁུར། །ཡོལ་མེད་ཐུགས་རྗེའི་མཐུ་དཔུང་དེང་འདིར་བསྐུལ། །འཁོར་བ་ཆུ་སྲིན་ཆེན་པོའི་དབའ་ཀློང་དུ། །ཡང་སྲིད་གྲུ་རྫིངས་བྱིང་འདེགས་ནང་གནས་པ། །སུམ་ཡག་དགེ་ཚོགས་འདོད་པའི་རླུང་ཤུགས་ཀྱིས། །ཐར་པ་ནོར་བུའི་གླིང་མཆོག་(༢༤༤ན) ― GLG021_Page_0489 ―
[མ་དཔེ་གཟིགས་ན་འདིར་གནོན།]
འདྲེན་པར་ཤོག །གཏུམ་ཆེན་ལག་ན་འབར་བ་རྡོ་རྗེའི་མཚོན། །གདེངས་དང་ལྷན་ཅིག་སུམ་ཡགས་ཐོག་མེད་ནས། །བསགས་པའི་སྡིག་འབྲས་མུན་ཁུང་སྒྲོན་མེ་བཞིན། །མིང་གི་ལྷག་མ་ཙམ་ཡང་ལུས་མིན་ཤོག །རྣམ་འདྲེན་ལྗགས་ཀྱི་རྩེ་མོས་ལྷ་མོ་ལྔའི། །རྒྱུན་ཆགས་ལེགས་པར་གསུང་པའི་དོན་གྱི་འབྲས། །དམིགས་ཡུལ་བསྒྲུབ་བྱ་ཡང་སྲིད་ཐམས་ཅད་དུ། །འགྲུབ་པའི་སྐལ་པ་བཟང་པོར་འགྱུར་བར་ཤོག །ཅེས་སུམ་ཡགས་ཀྱི་དོན་དུ་འཕྱོང་རྒྱས་ལྐོག་པ་ལྷ་དབང་གྲུབ་པའིབློ་ལྡན་དུ་འབོད་པའི་རིག་བྱེད་པས་གནས་བཅུ་ཚར་གཉིས་དང་ཕྱག་རྡོར་ལ་གྲ་ལྔས་བསྐོར་བའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམས་དབྱངས་གྲགས་པའོ། །སྒྱུ་འཕྲུལ་དྲ་བའི་རྒྱུད་ཀྱི་སྙིང་པོའི་དོན། །ཡེ་དག་འཇམ་དཔལ་རིགས་ལྡན་ལྷུན་རྫོགས་པ། །རང་རིག་འདོད་མའི་རང་བཞིན་མངོན་གསུམ་དུ། །ཚེ་འདིར་རྟོགས་གྲོལ་དུས་གཅིག་འབྱུང་བྱིན་རླབས། །པདྨའི་ཐུགས་བཅུད་སྟག་ཚང་བསམ་གྲུབ་ནས། །སར་ཕན་ཟླ་བྲལ་གྱིས་དྲངས་རིགས་འཛིན་ཚོགས། །བརྒྱུད་ལྡན་ཞལ་དྲོད་དངར་པོར་འཐུལ་བྱེད་པ། །རྒྱལ་ཀུན་སྤྱི་གཟུགས་རྗེ་བཙུན་པདྨ་དབང༌། །བཀའ་དྲིན་འཁོར་མེད་ཕ་རྒོད་བླ་མ་དེའི། །བསྐྱེད་རྫོགས་རྫོགས་ཆེན་སྙིང་གི་དཔལ་བེའུར། །འཁྱིལ་བའི་གང་ཤར་རང་སར་ཉེར་གྲོལ་བ། །ཟ་ཧོར་སྔགས་སྨྱོན་རྡོ་རྗེ་ཐོགས་མེད་རྩལ། །དྲན་པའི་མོད་ལ་བདུད་སྡེའི་དཔུང་(༢༤༤བ) ― GLG021_Page_0490 ―
[མ་དཔེ་གཟིགས་ན་འདིར་གནོན།]
ཚོགས་རྣམས། །འཇོམས་དང་ཆབས་ཅིག་མཆོག་མཐུན་དངོས་གྲུབ་ཀུན། །སྩོལ་བར་ཟླ་བྲལ་སྲིད་གསུམ་དབང་སྒྱུར་མ། །རྩ་གསུམ་འདུས་པའི་སྣང་བརྙན་འདི་རྨད་བྱུང་། །ཆེད་བཏབ་ས་བོན་སྨོན་ལམ་དྲོད་གཤེར་གྱིས། །སྨིན་འབྲས་གཞོན་ནུ་བུམ་སྐུར་རིགས་པའི་གཤིས། །ཀ་དག་ཉི་མའི་སྙིང་པོ་དྲི་བྲལ་གདངས། །ལྷུན་གྲུབ་འཇམ་དཔལ་རིགས་ལྔ་མངོན་གྱུར་ཤོག །སྐལ་དམན་ཚེ་འདིར་འོད་སྐུར་མ་གྲོལ་ན། །ཐེག་མཆོག་ལམ་འདི་སྟོན་པའི་བཤེས་གཉེན་གྱིས། །སྐྱེ་བར་རྗེས་སུ་བཟུང་ནས་ཀུན་བཟང་གི །ས་ལམ་ཡོན་ཏན་མྱུར་དུ་མཐར་ཕྱིན་ཤོག །མཚོ་སྐྱེས་རྡོ་རྗེ་དེས་གསུངས་དམ་པའི་ཆོས། །སྒྲུབ་པའི་རིགས་སྔགས་འཆང་དུ་དཀོན་མཆོག་གསུམ། །འདུས་པར་ངེས་རྙེད་སྐྱབས་གཞན་མི་འཚོལ་བས༌། །བྱིན་རླབས་སྙིང་ལ་ཞུགས་པའི་བཀྲ་ཤིས་ཤོག །སྙེ་མོ་བ་བློ་བཟང་ཚེ་དབང་གིས་འཇམ་དཔལ་རིགས་ལྔའི་བྲིས་ཐང་རྒྱབ་ཡིག་དང་རྒྱུན་དུ་ཁ་ཏོན་སྦྲགས་མ་ཞིག་དགོས་ཚུལ་ལྟར་ཟ་ཧོར་གྱི་སྔགས་འཆང་གང་ཤར་རང་གྲོལ་གྱིས་སྦྱར་བའི་ཡི་གེ་པ་ནི་དགེ་སློང་འཇམ་དབྱངསགྲགས་པའོ། །འོད་དཔག་མེད་མགོན་ཁྱོད་ཞབས་སྙིང་དབུས་སུ། །རྟགས་ཏུ་གོམས་པའི་བསམ་གཏན་ལ་བརྟེན་ནས༌། །ཞིང་ཁམས་རྒྱ་མཚོའི་དབང་ཕྱུག་བདེ་བ་ཅན། །དག་པའི་གནས་དེར་ཉིང་མཚམས་སྦྱོར་བྱེད་ཤོག །འཇམ་མཉེན་པདྨའི་དབུས་སུ་ཐལ་སྦྱར་ཏེ༌། །གང་གསུང་ལྷང་ལྷང་རྣ་བར་ཉེར་ཐོས་མོད། །སྒྲིབ་གསུམ་འཆིང་རྒྱ་ཡོངས་དབྲལ་འགྲོ་བ་རྣམས། །འདྲེན་པའི་དེད་དཔོན་ཆེན་པོར་བདག་འགྱུར་ཤོག(༢༤༥ན) ― GLG021_Page_0491 ―
[མ་དཔེ་གཟིགས་ན་འདིར་གནོན།]
།གཅིག་ལས་དུ་མར་ཤར་བ་ཆུ་ཟླ་བཞིན། །གང་གའི་རྡུལ་གྱི་གྲངས་སྙེད་འཇིགས་རྟེན་ཀུན། །ཁྱབ་པའི་འཕྲུལ་གྱིས་མཐའ་ཡས་ལུས་ཅན་རྣམས། །ཕན་བདེ་ལ་སྦྱོར་སྨོན་ལམ་འགྲུབ་པར་ཤོག །ཅེས་པའང་རབ་འབྱམས་པ་བསམ་གཏན་རྒྱ་མཚོའི་ཁ་ཏོན་དུ་དགོས་ཚུལ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་དགེ་སློང་འཇམས་དབྱངས་གྲགས་པའོ། །དབྱངས་ཅན་ལྷ་མོས་མགྲིན་འཁྱུད་འཇམ་དཔལ་དབྱངས། །དགའ་བའི་བློ་གྲོས་དཔྱོད་ལྡན་ཚོགས་ཀུན་དགའ། །གཤེས་གཉེན་སྟོན་པའི་རྗེས་ཞུགས་རིས་མེད་བཤེས། །དད་པས་གསོལ་འདེབས་བྱིན་རླབས་འཇུགས་ལ་དད། །དུང་དུང་ཡིད་ཀྱི་མོས་པ་བརྟན་པོ་དང༌། །ལྷང་ལྷང་ཚིག་གི་གསོལ་བ་འདེབས་བྱེད་ན། །མང་མང་བསྐལ་པར་བགྲང་ཡས་སྐྱེ་རྒུའི་དོན། །བརྟན་བརྟན་གཡུང་དྲུང་ལྟ་བུར་འགྱུར་མེད་ཤོག །འཇམ་འཇམ་སྙིང་རྗེ་ཆེ་ལས་མ་གཡོས་ཀྱང༌། །འཇིགས་འཇིགས་སྲིན་པོའི་གཟུགས་ཅན་ཕྱག་དྲུག་པས། །རིང་རིང་སངས་རྒྱས་ཞེས་བྱའི་སྒྲ་བོ་ཆེ། །རྙེད་རྙེད་དེ་སྲིད་མགོན་སྐྱབས་དཔུང་གཉེན་མཛོད། །ཅེས་པའང་བཀའ་བཅུ་བློ་བཟང་རྒྱ་མཚོའི་ངོར་ཟ་ཧོར་གི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ།།གར་དབང་ཐུགས་ཟེར་གཙང་བྱེད་པདྨའི་སྦུབས། །མཚན་དཔེའི་གཟི་འབར་འཁོར་འདས་ཡོངས་ཀྱི་མེས། །གདུལ་དཀའི་གཉེན་པོར་རྔ་ཡབ་གླིང་པ་ཞེས། །སྲིད་གསུམ་ཀུན་ཁྱབ་མཚོ་སྐྱེས་གྲུབ་པས་སྐྱོངས། །ཤེས་རབ་སྟོང་ཉིད་རང་གདངས་མཁར་(༢༤༥བ) ― GLG021_Page_0492 ―
[མ་དཔེ་གཟིགས་ན་འདིར་གནོན།]
ཆེན་བཟའི། །དག་སྣང་ཟབ་གཏེར་དུ་མར་ལུང་ཟིན་པ། །བརྗོད་པ་རྣམ་དག་ངག་གི་དབང་པོའི་མཐུས། །པདྨའི་འཕྲིན་ལས་སྤེལ་དེ་ཞབས་བརྟན་ཤོག །གན་ཇག་ཐང་ཏའི་རིགས་སྤྲུལ་རསྨིའི་ཞབས། །ཐུགས་སྲས་ཀརྨ་ཀུན་ཏུ་བཟང་པོའི་གདུང༌། །དཀོན་མཆོག་ཆོས་ཀྱི་དབང་ཕྱུག་གྲགས་པའི་དཔལ། །ཡང་སྲིད་གཡུང་དྲུང་ལྟ་བུར་བརྟན་པར་ཤོག །ཡོན་ཏན་འོད་ཟེར་ལེགས་ལྡན་རྡོ་རྗེ་མཆེད། །བཀའ་གཏེར་རིང་ལུགས་ཡོངས་འཛིན་འབྲི་གུང་པ། །རིན་ཆེན་ཕུན་ཚོགས་བརྒྱུད་པར་བཅས་པའི་བསྟན། །བཀའ་བབས་ཇི་བཞིན་གཟུང་ཕྱིར་གཡོ་མེད་ཤོག །ཟངས་མདོག་དཔལ་གྱི་རི་བོ་གཉིས་པའི་སྤོར། །རིགས་སྔགས་འཆང་བའི་དགེ་འདུན་སྡེ་རྣམས་དང༌། །ཟུང་འབྲེལ་མཆིམས་ཕུ་གསུང་གི་ཡང་དབེན་བཅས། །སྔ་འགྱུར་བསྟན་པའི་བཙས་སུ་རྒྱས་པར་ཤོག །ཟབ་གཏེར་ཆོས་སྐྱོང་སྲུང་མའི་ཚོགས་སྤྱི་དང༌། །ཁྱད་པར་རྡོ་རྗེ་གཤོག་རྒོད་གཡུ་སྒྲོན་མས། །འདོད་པའི་བསམས་པ་ཐམས་ཅད་ཡིད་བཞིན་དུ། །རེ་སྐོང་འཕྲིན་ལས་རྣམ་བཞི་ལྷུན་གྲུབ་མཛོད། །གངས་ཅན་ར་བའི་ཁོར་ཡུག་སྨན་ལྗོངས་འདིར། །དུ༔ཁའི་མུན་བཅིལ་བདེ་སྐྱིད་ཕུན་ཚོགས་པ། །མཁན་སློབ་ཆོས་རྒྱལ་རྣམ་གསུམ་བཞེད་པ་ཡི། །སྨོན་པའི་འབྲས་བུ་རབ་སྨིན་བཀྲ་ཤིས་ཤོག །ཅེས་པ་དཔལ་རི་གྲ་ཚང་སྤྱི་སོས་ངེད་རང་དང་སྤྲུལ་སྐུ་ཟུང་འབྲེལ་དུ་བརྟན་བཞུགས་ཤིག་དགོས་ཚུལ་བྱུང་བ་འདི་གར་དམིགས་པའིཚིགས་བཅད་སྤྲུལ་སྐུ་ཉིད་ཀྱིས་སྔོན་ནས་བསྐུལ་སོང་གཤིས་བསྐྱར་བལྡབ་ལ་བརྗོད་དོན་ལྷག་པོར་མ་མཐོང་བས་དངོས་དོན་ཇི་བཞིན་ཚིགས་སུ་བཅད་པ་འདིའང་ཟ་ཧོར་(༢༤༦ན) ― GLG021_Page_0493 ―
[མ་དཔེ་གཟིགས་ན་འདིར་གནོན།]
སྔགས་སྨྱོན་གྱིས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཕུན་ཚོགས་བློ་གསལ་དགེ་འདུན་འདུས་པའི་དབུས། །བཤད་སྒྲུབ་རྒྱལ་མཚན་བསྒྲེང་བའི་བཤེས་གཉེན་ཆེ། །མི་འགྱུར་མཆོག་གི་བདེ་བ་ཆེན་པོའི་ཀློང༌། །ཟག་མེད་དགོངས་པ་ཡོངས་སུ་རྫོགས་པར་ཤོག །ཅེས་པའང་གཞི་བ་སློབ་དཔོན་ཕུན་ཚོགས་བསྟན་འཕེལ་གྱིས་བསྐུལ་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་དབང་ངོ༌། །ངག་གི་འོ་མཚོར་དབྱངས་ཅན་ངང་མོ་དཀར། །རྐང་གདུབ་དྲིལ་ཆུང་འཁྲོལ་ལ་ཉེར་དབང་བས། །བློ་གྲོས་ཛམ་བུའི་སྙེ་མ་གསེར་བཟང་ཁམས། །ཐོས་བསམ་རྒྱ་མཚོར་སྨིན་དེས་རྟག་ཏུ་སྐྱོངས། །སྟེས་དབང་བྱ་སྒྲོ་མཐོན་པོར་གཡེངས་པའི་རྗེས། །བགྲོད་ཀྱང་སྤངས་རྟོགས་ཕུན་ཚོགས་སུ་ཝརྣ། །ར་གན་གུར་ཀུམ་མདངས་བསྒྱུར་འདྲ་འབག་ལ། །འཕགས་ཆེན་དམ་པའི་སྣང་བརྙན་ཚར་དུ་དངར། །དགེ་ལེགས་རྡུལ་མངས་བརྩེགས་པ་ལྷུན་པོའི་སྤོར། །འགྲན་བཟོད་བཀའ་གདམས་གཙང་མའི་རྣམ་ཐར་ལ། །སྐལ་ལྡན་གདུལ་བྱ་རབ་འདུན་བདེར་སྦྱོར་བའི། །མཁས་གྲུབ་རིམ་བྱོན་སྐྱེས་རབས་ཕྲེང་སྤེལ་བར། །སྟོན་མཚན་ཟླ་འདྲའི་དད་དང་བརྩོན་པ་ཡིས། །རྒྱུ་སྦྱོར་ནོར་བུ་ཁྱོ་ཤུགས་རིགས་བརྒྱུད་རྣམས། །འདི་སྣང་ཚེ་དཔལ་མངའ་ཐང་འབྱོར་པ་ཀུན། །སྐབས་གསུམ་བདག་པོའི་སྐལ་བ་དང་མཉམ་ཤོག །མངོན་པར་མཐོ་བའི་བཤུལ་རིང་ལམ་བརྒྱུད་དེ། །གཏན་གྱི་བདེ་བ་མི་གནས་མྱང་འདས་གྲོང༌། །ཉེར་བཞུགས་ནམ་མཁའི་མཐའ་སྙེག་སེམས་ཅན་(༢༤༦བ) ― GLG021_Page_0494 ―
[མ་དཔེ་གཟིགས་ན་འདིར་གནོན།]
རྣམས། །སྒྲོལ་ནུས་མི་འཇིག་བཞི་ལྡན་བརྙེད་པར་ཤོག །གྲོང་ཁྱེར་ཕོ་བྲང་རྩེ་མོ་ནས། །བསིལ་ལྡན་འགྲོ་འདྲེན་དུས་བབ་རྗེར། །རྣམ་རོལ་སྲོང་བཙན་སྒམ་པོ་ཞེས། །ཕན་དང་བདེ་བའི་འབྱུང་གནས་རྒྱལ། །ལྷ་ཆོས་བདུན་ལྡན་བསྟན་པ་ཡི། །མེས་པོ་དགེ་བསྙེན་ཚུལ་བཟུང་ཡང༌། །དོན་གྱི་ཚངས་སྤྱོད་དཔལ་འཛིན་པ། །འབྲོམ་སྟོན་ཆོས་ཀྱི་རྒྱལ་པོར་བསྔགས། །རྒྱན་དྲུག་མཆོག་གཉིས་གཞུང་ལུགས་ཀུན། །འཆད་ལ་རྣམ་དཔྱོད་སྤོབས་པའི་རྩལ། །འཇིགས་མེད་སེང་གེའི་ང་རོ་ཅན། །དགེ་འདུན་གྲུབ་ཞབས་བཙུག་ན་བསྟེན། །ཚངས་པའི་སྲས་མོ་དབྱངས་ཅན་མ། །མགྲིན་པར་ཞུགས་པའི་ལེགས་བཤད་ཀྱི། །འདོད་པ་འཇོ་བའི་དཔག་བསམ་དབང༌། །དགེ་འདུན་རྒྱ་མཚོས་བདག་རྗེས་བཟུང༌། །གསེར་གྱི་རྒྱལ་པོ་ལ་སོགས་པའི༌། །ཆེ་རྒུའི་གཙུག་ཏོར་རལ་པའི་རྩེར། །ཞབས་སེན་ཟླ་བ་རྟག་འཆར་བ། །བསོད་ནམས་རྒྱ་མཚོས་དེང་བྱིན་རློབས། །གདུལ་དཀའི་འགྲོ་བ་འདྲེན་པའི་ཆེད། །ཚེ་རིང་གནམ་གྱི་ཤེ་མོང་རྒྱུད། །བསམ་བཞིན་སྲིད་པ་ལེགས་བཟུང་བ། །ཡོན་ཏན་རྒྱ་མཚོས་ཤིས་པར་སྐྱོངས། །ཞེས་སྒྱིད་ཐང་ནོར་བུས་དགེ་འདུན་གྲུབ་པའི་འཁྲུངས་རབས་བྲིས་ཐང་བདུན་ཚར་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྣ་ཚོགས་ནད་བྲལ་དབང་པོ་ཀུན་ཚང་སོགས། །མཚན་ལེགས་ཡོངས་གྲགས་དཔལ་གྱི་ཞལ་འཆེས་པའི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །འཁོར་འཁྱམས་སྡུག་བསྔལ་དང་(༢༤༧ན) ― GLG021_Page_0495 ―
[མ་དཔེ་གཟིགས་ན་འདིར་གནོན།]
བྲལ་བདེར་སྤྱོད་སོགས། །མཁས་པ་གཟི་བརྗིད་སྒྲ་དབྱངས་རྒྱལ་པོ་ཡི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །དུས་མིན་འཆིས་མཚོན་དུཿཁ་ཀུན་བྲལ་སོགས། །གསེར་བཟང་དྲི་མེད་རིན་ཆེན་སྣང་བ་ཡི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །མཐའ་ཀླས་སྡུག་བསྔལ་ཀུན་དང་བྲལ་བ་སོགས། །མྱ་ངན་མེད་པ་མཆོག་གྱུར་དཔལ་ལྡན་པོའི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །ལོག་པར་བལྟ་སོགས་སྒྲིབ་གཉིས་འབྲས་བྲལ་བར། །བཅོམ་ལྡན་ཆོས་གྲགས་རྒྱ་མཚོའི་དབྱངས་སྙན་གྱི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །དགེ་ལ་རྟག་སྦྱོར་སྡིག་དང་ཡོངས་བྲལ་སོགས། །ཆོས་ཀུན་རྒྱ་མཚོ་མཆོག་བློས་མངོན་མཁྱེན་པའི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །མཚན་དཔེ་ལྡན་སོགས་ཡོན་ཏན་ཀུན་རྫོགས་པར། །བཻཌཱུཪྻ་འོད་རྒྱལ་པོ་སྨན་གྱི་བླའི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །ཡངས་པ་ཅན་གསུངས་བརྒྱད་བརྒྱ་སྨན་མདོའི་དོན། །ཤཱཀྱ་སེང་གེས་ལེགས་པར་བཀའ་སྩལ་བའི། །སྨོན་ལམ་ཡོངས་གྲུབ་འགྲོ་རྣམས་ཁྱོད་དྲུང་དུ། །བརྫུས་ཏེ་སྐྱེས་ནས་མཁའ་ཁྱབ་འགྲོ་སྒྲོལ་ཤོག །བཞིན་བཟང་ཚོན་རིས་ཡིད་ཀྱི་ཤེལ་དཀར་ངོས། །ཤར་བའི་མོད་ལ་འཆི་བདག་ཀུན་འཇོམས་པ། །ཚེ་མཐའ་ཡས་པའི་ཞལ་བཞེས་སྨོན་ལམ་འབྲས། །རོ་བརྒྱ་བདག་སོགས་འགྲོ་ཀུན་རྗེས་མྱོང་ཤོག །ཀུན་བཟང་སྨོན་ལམ་དོན་བཞིན་གང་གི་སྐུར། །རྩེ་གཅིག་མི་གཡོའི་ཏིང་འཛིན་བརྟན་པོ་ཡིས། །ཉིང་མཚམས་སྦྱར་ཚེ་བདེ་ལྡན་དག་ཞིང་དུ། །ལུས་ཅན་མཐའ་དག་ཐོགས་པ་མེད་སྒྲོལ་ཤོག །སྡིག་ལྟུང་ཤིང་ལས་སྦྱར་བ་ངན་འགྲོའི་མེ། །ཐུགས་རྗེའི་ཆར་གྱིས་གཞིལ་མཛོད་བཅོམ་ལྡན་འདས། །མི་འཁྲུགས་རྒྱལ་པོས་མཁའ་མཉམ་སེམས་ཅན་རྣམས། །མངོན་དགའི་ཞིང་གི་བདེ་བར་ཡོངས་སྦྱོར་ཤོག །གཟུང་ཇགས་ཐོས་པ་ཙམ་གྱིས་མཐའ་བརྟན་(༢༦༧བ) ― GLG021_Page_0496 ―
[མ་དཔེ་གཟིགས་ན་འདིར་གནོན།]
རྣམས། །གནས་ངན་ལས་གདོན་དམ་བཅས་མི་ཕམ་མགོན། །མཆོག་གི་སྤྲུལ་སྐུར་བཞེངས་ཚེ་བདག་སོགས་འགྲོ། །འདུས་པ་དང་པོའི་འཁོར་དུ་སྐྱེ་བར་ཤོག །ཁྱོད་ཞབས་རྡུལ་དམར་ལྷུངས་པས་གངས་ཅན་གྱི། །ཉེས་པའི་དྲི་བཀྲུས་རྒྱལ་བསྟན་གསལ་མཛད་པ། །པདྨ་ཀ་རས་བདུད་སྡེའི་དཔུང་བཅོམས་ནས། །འཕོ་མེད་རྡོ་རྗེའི་སྐུ་རུ་འགྱུར་བར་ཤོག །དྷཱིཿཡིག་ཞུན་འཁྱིལ་སྔ་གོས་མཚམས་སྤྲིན་སྦུབས། །ཤེས་བྱ་ཐམས་ཅད་གཟིགས་པའི་ཉིན་མོར་བྱེད། །ཆོས་ཀྱི་རྒྱལ་པོ་ཀུན་མཁྱེན་ཙོང་ཁ་བས། །ཇ་མེད་བྱང་ཆུབ་བར་དུ་རྗེས་འཛིན་ཤོག །ངག་དབང་དབྱངས་ཅན་མཐུ་ལས་ཇོ་གྲོས་ཀྱི། །བཟང་པོའི་སྐལ་ཐོབ་ཐུབ་བསྟན་རྒྱ་མཚོའི་སྡེ། །འཁོར་ལོའི་མགོན་པོར་ངེས་རྙེད་དད་པའི་མཐུས། །ཚེ་རབས་ཀུན་ཏུ་རྗེས་སུ་འཛིན་པར་ཤོག །རྨུག་འཛིན་པདྨ་ར་གའི་འོད་གཟི་ཡིས། །སྲིད་ཞི་དབང་སྡུད་ནེའུ་ལིའི་མགྲིན་པ་ནས། །འཛད་མེད་ནོར་བུའི་ཕུང་པོ་འཁྲིག་པའི་དབྱངས། །ལེགས་ཆགས་འདོད་རྒུའི་དཔལ་འབྱོར་རྒྱས་པར་ཤོག །རིན་ཆེན་ཁུ་བས་བྲིས་པ་ཐུབ་གསུང་རྩེར། །གསེར་ཞུན་མཛོད་ལྡན་ཏོག་གི་འོད་འབར་སོགས། །སྲི་ཞུར་བསྐྲུན་པའི་དགེ་བ་བྱང་ཆུབ་བར། །ལེགས་མྱོང་བཀྲ་ཤིས་དགའ་སྟོན་འཕེལ་བར་ཤོག །ཅེས་པ་འདིའང་མཆོད་དཔོན་ངག་དབང་ཤེས་རབས་ཀྱིས་ཁྲ་འབྲུག་དང་སྒེར་གཞིས་སུ་རྟེན་བཞེངས། །རི་བོ་ཆོས་གླིང་དུ་བཀའ་འགྱུར་དང་གན་འཇིར་ཕུལ་བའི་སྨོན་ལམ་ཚོགས་འདོན་དུ་གཙུག་ཆོག་ཞིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྕང་གསེབ་པ་བསྟན་འཛིན་དབང་པོའོ། །(༢༤༨ན) ― GLG021_Page_0497 ―
[མ་དཔེ་གཟིགས་ན་འདིར་གནོན།]
པཎ་གྲུབ་དཔལ་ལྡན་ཆོས་སྐྱོང་ཞལ་གྱི་དྲོད། །གསུང་ངག་དབང་ཆུ་བློ་གྲོས་བུམ་བཟང་དུ། །རྒྱ་མཚོ་ལྟར་འཁྱིལ་འཇམ་དབྱངས་དགའ་བའི་བཤེས། །ཚངས་སྲས་བཞད་པའི་རྡོ་རྗེར་གསོལ་བ་འདེབས། །དགྱེས་མཛད་རྡོ་རྗེའི་ངོ་བོར་བླ་མ་ཀུན། །ཡོངས་འདུས་གདན་གསུམ་ཚང་བྱིན་སྙིང་ཞུགས་པས། །ལམ་དུས་དབང་བཞིའི་འགྲོས་ཀྱིས་ཕྲང་གསུམ་བརྒལ། །ཟུང་འཇུག་གྲུབ་མཐའ་ཚེ་འདིར་སྙོག་པར་ཤོག །གུར་མགོན་ཙ་ཏུ་རྨུ་ཁ་ལས་མཁན་བཅས། །གསང་རྟེན་ལུས་སྦའི་གནད་ཀྱི་བྱང་ཆུབ་བར། །མི་འབྲལ་མཆོག་མཐུན་དངོས་གྲུབ་འཕྲིན་ལས་རྣམས། །ཐོགས་མེད་གྲུབ་པའི་རྟེན་འབྲེལ་ལྷུན་གྲུབ་ཤོག །ཤློ་ཀ་གསུམ་ཙམ་ཡོད་པའི་ཞལ་འདོན་ཞིག་རྩོམས་ཞེས་ཁྱབ་བདག་བླ་མ་བཀའ་འགྱུར་བ་ཆེན་པོའི་རིགས་དང་ཆོས་ཀྱི་དབོན་རིན་པོ་ཆེ་ངག་དབང་བློ་གསལ་མཆོག་ལྡན་གྱི་གསུང་གིས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བསྟན་འཛིན་དབང་པོའོ། །རྩ་གསུམ་དགྱེས་སྐྱེད་བ་ལིཾ་ཏ། །ཟག་མེད་བདུད་རྩི་ལེགས་འཁྱིལ་སྣོད། །རྒྱུ་སྦྱོར་ཕུན་ཚོགས་ལྷུན་གྲུབ་ཀྱི། །ལེགས་བྱས་བྱང་ཆུབ་བར་འཕེལ་ཤོག །དགེ་སྐོས་ཀྱི་འཇོག་ཏུ་དངུལ་སྲང་བཅུ་བཞི་ལས་བསྐྲུན་པ་ཕུལ་བའི་སྨོན་ལམ་ཟ་ཧོར་གྱི་བནྡེས་བཀོད་པ་ཤུ་བྷཾ། །བཟང་པོའི་སྐལ་བར་འགྲོ་འདྲེན་སྟོང་གི་ནང༌། །སྙིང་སྟོབས་ཆེན་པོས་དཔའ་བ་ཤཱཀྱའི་བསྟན། །འཛིན་ལ་ཟླ་བྲལ་འཇམ་མགོན་ཙོང་ཁ་པས། །བྱང་ཆུབ་བར་དུ་རྗེས་བཟུང་བྱིན་གྱིས་རློབས། །ངག་དབང་དབྱངས་ཅན་མགྲིན་པར་འཇོ་སྒེག་གིས།(༢༤༨བ) ― GLG021_Page_0498 ―
[མ་དཔེ་གཟིགས་ན་འདིར་གནོན།]
བློ་གསལ་བྱེ་བའི་གཙུག་ཏོར་རྩེ་མོ་རུ། །མཁས་བཙུན་བཟང་པོའི་ཟླ་ཚེས་ཆ་འཕེལ་བའི། །ཐོས་བསམ་སྒོམ་པའི་རྒྱ་མཚོ་རྒྱས་ལ་འདུད། །སྙིང་དབུས་འདབས་སྟོང་ཟེའུ་འབྲུ་ཉེར་བཞད་སྟེང༌། །དཀོན་མཆོག་ཀུན་འདུས་ངོ་བོ་བླ་མ་ལ། །མི་ཕྱེད་དད་པས་གསོལ་བ་རབ་བཏབ་མཐུས། །ཐུགས་རྗེའི་འཇུག་པ་དུས་ལས་ཡོལ་མེད་ཤོག །ཚེ་དང་བསོད་ནམས་སྟོབས་འབྱོར་མཐའ་དག་ལ། །དབང་ཐང་མེས་པོའི་བསྐལ་བ་དང་མཉམ་ཞིང༌། །ཆོས་སྲིད་བསྟན་པ་བླ་ནས་བླར་འདེགས་པར། །མྱ་ངན་མེད་པའི་སྤུན་ཟླར་འགྱུར་བར་ཤོག །བགྲོད་དཀའི་སྐྱེ་བའི་ཕྲང་ལ་བཤེས་གཉེན་གྱིས། །སྐྱེལ་མའི་མགོན་སྐྱབས་མཛད་ནས་མངོན་མཐོའི་རྟེན། །བདེ་བར་ཉེར་ཁྲིད་བླ་མེད་བྱང་ཆུབ་ཀྱི། །གྲོང་ཁྱེར་ཆེན་པོར་མྱུར་དུ་འཇུག་པར་ཤོག །ཅེས་གསོལ་འདེབས་སྨོན་ལམ་གྱི་ཚིགས་སུ་བཅད་པ་འདི་ནི་དད་སྟོབས་ལྡན་པ་དགའ་ལྡན་དཱ་ཆིན་བོ་ཤོག་ཐུ་ཇུ་ནོང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམ་པ་ངག་དབང་དགེ་ལེགས་སོ། །འཆི་གསོས་བདུད་རྩིས་མཐའ་ཀླས་ནད་ཀྱི་རིགས། །དྲུངས་ནས་ཕྱུང་དང་ལྷན་ཅིག་སྒྲིབ་གཉིས་ཀྱི། །ཟུག་རྔུ་རྣམ་པར་གྲོལ་ནས་ལུས་ཅན་ཀུན། །གཏན་གྱི་བདེ་བར་རྟག་ཏུ་སྤྱོད་པར་ཤོག །ས་སྐྱོང་བློ་བཟང་སྦྱིན་པས་ཁུར་བཞེས་ཡར་སྟོད་དར་མོ་སྨན་རམས་པས་ལག་ལེན་བྱས་ནས་རིན་ཆེན་གྲང་སྦྱོར་འདི་རབ་བྱུང་བཅུ་གཅིག་པའི་ནང་གི་ས་རྟ་ཟླ་བ་ལྔ་པའི་ཚེས་བཅུ་དགུ་ལ་དབུ་བཙུགས་ཤིན་ཏུ་རུ་ང་བའི་ཧོར་ཟླ་བདུན་པའི་ཚེས་བཅུ་སྐོར་ལ་གྲུབ་པར་ལྷག་བསམ་གྱི་སྨོན་ལམ་ཟ་ཧོར་གྱི་བནྡེས་(༢༤༩ན) ― GLG021_Page_0499 ―
[མ་དཔེ་གཟིགས་ན་འདིར་གནོན།]
བཀོད་པས་འགྲོ་བ་མཐའ་དག་ནད་ཀྱི་འཇིག་པ་ལས་གྲོལ་བར་གྱུར་ཅིག །རིན་ཆེན་རྟ་རི་མ་སྦྱོར་སྡེ་ཤིན་ཏུ་རྒྱས་པ་འདི་ཉིད་སྡེ་པ་བློ་བཟང་སྦྱིན་པས་ཁུར་བཞེས་ཡར་སྟོད་དར་མོ་སྨན་རམ་པ་བློ་བཟང་ཆོས་གྲགས་ཀྱི་ལག་ལེན་བྱས་ནས་རབ་བྱུང་བཅུ་གཅིག་པའི་ས་ཕོ་རྟའི་ལོ་ཧོར་ཟླ་ལྔ་པའི་ཚེས་བཅུ་དགུ་ནས་དབུ་བཙུགས་ཏེ་སྦྱར་བའི་དགེ་བས་ལུས་ཅན་མཐའ་དག་བཞི་བརྒྱ་རྩ་བཞིའི་ནད་དང་སྐྱེ་མཆེད་ཉོན་མོངས་པའི་སྒྲིབ་པ་ལས་རྣམ་པར་གྲོལ་བར་གྱུར་ཅིག །དབང་ཕྱུག་ཆེན་པོའི་གསུང་རྒྱུད་མེ་ལྕེ་འབར་མའི་དུག་འཇོམས་དབང་པོའི་རིལ་བུ་འདི་ཉིད་སྡེ་པ་བློ་བཟང་སྦྱིན་པས་ཁུར་བཞེས་ཡར་སྟོད་དར་མོ་སྨན་རམ་པ་བློ་བཟང་ཆོས་གྲགས་ཀྱིས་ལག་ལེན་བྱས་ནས་རབ་བྱུང་བཅུ་གཅིག་པའི་ས་ཕོ་རྟའི་ལོ་ཧོར་ཟླ་ལྔ་པའི་ཚེས་བཅུ་དགུ་ནས་དབུ་བཙུགས་ཏེ་སྦྱར་བའི་དགེ་བས་ལུས་ཅན་མཐའ་དག་བཞི་བརྒྱ་རྩ་བཞིའི་ནད་དང་སྐྱེ་མཆེད་ཉོན་མོངས་པའི་སྒྲིབ་པ་ལས་རྣམ་པར་གྲོལ་བར་གྱུར་ཅིག །རྣམ་དཀར་དགེ་ལ་འདུན་པའི་གོམས་སྟབས་ཀྱིས། །དོན་ཀུན་གྲུབ་པའི་རྟེན་ལ་སླར་འཇུག་པ། །ས་སྲུང་ཐོས་བསམ་སྒོམ་པའི་རྒྱན་ལྡན་གང༌། །མངོན་སུམ་རྒྱུ་བར་མཆོག་གསུམ་མཐུས་བྱིན་རློབས། །ཞེས་པའང་ལེགས་པ་རྒྱལ་མཚན་གྱི་ངོར་ཟ་ཧོར་བནྡེས་སྦྱར། །མཐིང་ཞུན་ཉིན་བྱེད་དངོས་བརྒྱ་ལེགས་འབར་གཟི། །མཚན་དཔེའི་རི་མོ་རབ་གསལ་མཐོང་བའི་མོད། །རྣམ་འདྲེན་སྨན་གྱི་བླ་མའི་སྤྱན་རས་ཀྱི། །བྱང་ཆེན་བར་དུ་ལྷོད་པ་མེད་པར་སྐྱོངས། །(༢༤༩བ) ― GLG021_Page_0500 ―
[མ་དཔེ་གཟིགས་ན་འདིར་གནོན།]
ཚེ་ཡི་རིགས་བྱེད་ཉེར་དྲན་སྐྱེ་དགུའི་བདག །གཙུག་ན་ཟླ་སོགས་ལྷ་དང་དྲང་སྲོང་ཆེ། །འཆི་གསོས་གྲུབ་པའི་བཅུད་ལེན་འགྲོ་ཀུན་ལ། །ཡོངས་སྩལ་བདེ་བའི་ངལ་གསོ་སྦྱིན་རྣམས་རྒྱལ། །འཚོ་བྱེད་གཞོན་ནུ་མ་ཁོལ་ཟླ་མངོན་ཞབས། །རིས་མེད་སྐྱེ་འགྲོའི་སྲོག་ཟུངས་གཡུ་ཐོག་མགོན། །གཙུག་ལག་གཉིས་པ་རབ་ཤེས་མཁས་མང་གི །མཛད་པའི་ཤིང་རྟས་དཔྱོད་ལྡན་ཡིད་དབང་འདྲེན། །རིན་ཆེན་གྲང་སྦྱོར་དེའི་མཆེད་རྟ་རི་མ། ལྷ་ཆེན་གསུང་རྒྱུད་ལས་འོངས་དུག་འཇོམས་རིལ། །སྲོག་གི་ཆད་འཐུད་རྡོ་རྗེ་བཞུ་བླུགས་པ། །བདུད་རྩི་སྙིང་པོའི་བཅུད་ཀྱི་ཡང་ཞུན་མཚར། །ས་ཁམས་ཅང་ཤེས་བགྲང་བྱའི་སྣྲོན་ཟླ་ནས། །མཁའ་ཀླུའི་ཞག་པར་དཔོན་ཚང་དར་མོ་བ། །བློ་བཟང་ཆོས་གྲགས་སུམ་ཅུའི་སློབ་བུར་བཅས། །སྒོ་གསུམ་གཅིག་དྲིལ་སྤེལ་བའི་དགེ་ཚོགས་ཀྱིས། །ངག་དབང་བློ་བཟང་སྐལ་བཟང་རྒྱ་མཚོའི་སྡེས། །ཉེར་མཚོན་བཤེས་གཉེན་རྣམས་དང་གསོ་རིག་ལ། །ཟླ་མེད་སློབ་དཔོན་བློ་བཟང་ཆོས་གྲགས་ཀྱིས། །སྐྱེ་བར་མི་འབྲལ་རྗེས་སུ་འཛིན་པར་ཤོག །བག་ཡོད་ཁྲིམས་ལྡན་ཤེས་བྱའི་གནས་སྤྱི་དང༌། །ཁྱད་པར་གསོ་རིག་གཙུག་ལག་མཐར་སོན་ཞིང༌། །རྒྱལ་སྲས་སྤྱོད་ལ་འཇུག་པའི་སེམས་བསྐྱེད་ཀྱིས། །འགྲོ་བའི་དཔག་ཡས་ཟུག་རྔུ་ཡོངས་འབྱིན་ཤོག །བྱེ་བྲག་བདག་གཞན་མཐའ་དག་རྒྱུ་བ་དང༌། །མི་རྒྱུའི་དུག་དཔལ་འཇོམས་ལ་གསེར་གྱི་མདོག །སྨན་མཆོག་རྣམ་པར་རྒྱལ་བའི་རོ་ནུས་པ། །ཞུ་རྗེས་ཡོན་ཏན་མ་ལུས་དེར་སྨིན་ཤོག །རང་བྱུང་བཅོས་མའི་སྦྱོར་ངན་ལ་(༢༥༠ན) ― GLG021_Page_0501 ―
[མ་དཔེ་གཟིགས་ན་འདིར་གནོན།]
སོགས་པའི། །བཞི་བརྒྱ་རྩ་བཞིའི་ནད་བསྐྱེད་ལས་ཉོན་དང༌། །རབ་བྲལ་དེ་རྒྱུས་ཚུགས་མིན་སྨན་པ་མཆོག །བཻ་ཌཱུཪྻ་འོད་རྒྱལ་པོ་འགྲུབ་པར་ཤོག །སྨོན་ལམ་དེང་བཏབ་བསམ་པ་ཇི་བཞིན་དུ། །མཆོག་གསུམ་ལེགས་བྲིས་དྲང་སྲོང་ཕྱི་ནང་གི །ཚེ་ཡི་རིག་བྱེད་འཛིན་དང་ཞང་བློན་སོགས། །མཐུ་ལྡན་སྲུང་མས་ལྷུན་གྱིས་གྲུབ་པར་མཛོད། །ལུས་ངག་ཡིད་ལ་ཁོད་སྙོམས་ལེགས་བཀྲམ་པ། །བདེ་བའི་ས་བོན་བཏབ་སྨིན་མྱུ་གུའི་ལྗོན། །དར་དྲག་སིམ་པའི་ཚོར་བ་མྱོང་བའི་འབྲས། །རོ་བརྒྱར་ལོངས་སྤྱོད་བཀྲ་ཤིས་དཔལ་འབར་ཤོག །ཅེས་རབ་བྱུང་བཅུ་གཅིག་པ་ས་ཕོ་རྟའི་ལོ་དར་མོ་དཔོན་ཚང་བློ་བཟང་ཆོས་གྲགས་སློབ་བུར་བཅས་པས་རིན་ཆེན་རིལ་བུ་གྲང་སྦྱོར། དབང་ཕྱུག་ཆེན་པོའི་གསུང་རྒྱུད་མེ་ལྕེ་འབར་མ་ལས་བྱུང་བའི་དུག་འཇོམས་རིལ་བུ། རིན་ཆེན་རྟ་རི་མ་རྒྱས་པ་རྣམས་ཞག་བརྒྱད་བཅུའི་བར་སྒོ་གསུམ་འབད་པ་ཆེན་པོས་དངོས་གཙང་བར་བསྐྲུན་པའི་ཚེ་དཀར་ཆག་ཏུ་གསལ་བའི་སློབ་མ་རྣམས་ཀྱིས་བཀྲས་བཏགས། གསེར་ཞོ་གང་བཟང་ཇ་བར་ཁག་དང་བཅས་དོན་གཉེར་ཆེ་བས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བྱང་ཆེན་མཆོད་རྟེན་དངུལ་དཀར་ལས་གྲུབ་པ། །བུ་ཁྲིད་རྒྱལ་མོས་ལྷག་བསམ་རྣམ་དག་མཐུས། །བཞེངས་འབྲས་སྐྱེ་བར་ལྷ་མིའི་རྟེན་རྒྱུད་ནས། །རིང་མིན་རྣམ་པ་ཐམས་ཅད་མཁྱེན་ཐོབ་ཤོག །དད་པའི་མེ་ལོང་ངོས་སུ་ཐུགས་རྗེའི་གཟུགས། །ལེགས་འཆར་དཔལ་ལྡན་བླ་མས་སྐྱེ་བ་ཀུན། །འབྲལ་མེད་རྗེས་འཛིན་དགེ་བའི་བཤེས་མཛད་ནས།(༢༥༠བ) ― GLG021_Page_0502 ―
[མ་དཔེ་གཟིགས་ན་འདིར་གནོན།]
།མཐོ་རིས་ཐར་པའི་ལམ་དུ་འདྲེན་པར་ཤོག །དཀོན་མཆོག་བྱིན་རླབས་རྟེན་ཅིང་འབྲེལ་འབྱུང་མཐུས། །བདག་སོགས་རིགས་བརྒྱུད་བཅས་རྣམས་གནས་སྐབས་དང༌། །མཐར་ཐུག་ཕན་བདེའི་བསོད་ནམས་དཔལ་འབར་བ། །སྐྱིད་པའི་ཉི་མ་དགུང་ནས་འཆར་བ་ཤོག །ཅེས་དཔོན་ས་བུ་ཁྲིད་རྒྱལ་མོས་དངུལ་གྱི་བྱང་ཆེན་མཆོད་རྟེན་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཨོཾ་ཨཱ་ཐ། །བཱ གི ནྡྲ ཀཱ ནཱ ག མ བ ཀྟྲ ཏོ མ ཏེ རྶཽ ཀུ མྦྷ ནེ སཱ རི ཀ ཀུ ཎྜུ བཻ ཙ རེ། ངག་དབང་ཚངས་སྲས་ཞལ་ལུང་བློ་གྲོས་ཀྱི། །བུམ་བཟང་རྒྱ་མཚོ་ལྟར་འཁྱིལ་རྣམ་དཔྱོད་ལ། །མ ཉྫུ སྭ ར པྲཱི ཡ ཀ མཻ ཏྲ ཎྜི ཏོ བི མྦཱ ནྟ སི དྡྷཱ ལི ཀ ར ཏྣ བྲྀ དྡྷ ཧོ། །འཇམ་དབྱངས་དགའ་བའི་བཤེས་གཉེན་སྣང་བརྙན་མཐར། །མཁས་གྲུབ་རིན་ཆེན་འཕྲེང་མཛེས་སྤེལ་འདི་མཚར། །དད་པའི་ཟླ་བར་(༢༥༡ན) ― GLG021_Page_0503 ―
[མ་དཔེ་གཟིགས་ན་འདིར་གནོན།]
བསོད་ནམས་རི་དྭགས་གཟུགས། །ཡོངས་གསལ་རལ་དཀར་རྫིང་བུར་ཉེར་ཤར་བ། །རིག་བྱེད་འཛིན་པ་ཕུན་ཚོགས་དབང་པོ་ཞེས། །ལྷ་དབང་གྲུབ་པའི་བློ་གྲོས་ལྡན་དེས་སོ། །ངས་སྲིད་ཀུན་ཏུ་འབྲལ་མེད་རྗེས་འཛིན་བར། །རང་མཐུ་དམན་ཡང་མཆོག་གསུམ་ཐུགས་རྗེ་ཡིས། །ཡོངས་སྨོན་ཁས་འཆེའི་དཔག་བསམ་ལྗོན་པའི་འབྲས། །བྱང་ཆེན་ཐོབ་མིན་བར་དུ་སྤྱོད་པར་ཤོག །དགེ་འདུན་འདུས་པའི་གཙུག་ན་མཁས་གྲུབ་ཀྱི། །ཞབས་སེན་ཟླ་ཚེས་དོན་ལྡན་ཐམས་ཅད་མཁྱེན། །སྐུ་བརྙན་རྣམ་སྤྲུལ་གར་གྱིས་རབ་བསྐོར་བའི། །བྱིན་རླབས་བུང་བ་བདག་སྙིང་པདྨར་གཞུག །དགེ་ལེགས་ལུས་ཕྲར་ཡིད་འདུན་ཐོས་བསམ་གྱི། །མངོན་འདོད་རྒྱ་མཚོ་འཕེལ་ལ་དབྱངས་ཅན་མ། །བཞད་པ་རྡོ་རྗེ་སྐྱེས་ཆེན་ཕྲེང་བ་ཡིས། །ཡོངས་བསྐོར་བསྐྲུན་པའི་བསོད་ནམས་མཁར་བསྙེག་ཤོག །བློ་གྲོས་བསྐལ་བཟང་འདྲེན་པ་བཞི་བསྟན་སྲོག །ཟུངས་འགྱུར་གྲགས་པས་འཇིག་རྟེན་གསུམ་ཁྱབ་པར། །དངོས་གྲུབ་ཉེར་སྩོལ་འདོད་ལྷ་ཤེལ་ཚོན་བཞིན། །ཤར་བའི་གཟི་བྱིན་སྐྱེ་བར་གསལ་གྱུར་ཅིག །བདེ་གཤེགས་མཆེད་བརྒྱད་བྱིན་རླབས་ཉིན་བྱེད་ཀྱིས། །སྲིད་ཞིའི་ཉེས་བརྒྱའི་སྨག་རུམ་ཀུན་བསངས་ནས། །ཇི་ལྟར་ཞལ་འཆེས་སྨོན་ལམ་རོ་བདའི་ཟས། །སྤྱོད་པའི་སྐལ་བ་བཟང་པོར་བདག་འགྱུར་ཤོག །ཅེས་འཕྱོང་རྒྱས་ལྐོག་པ་བསམ་མཐོང་བ་ལྷ་དབང་གྲུབ་པའི་བློ་ལྡན་གྱིས། ཐམས་ཅད་མཁྱེན་པ་དགེ་འདུན་གྲུབ། དགེ་འདུན་རྒྱ་མཚོ། འདི་གའི་འདྲ་འབག་གསུམ་གཙོ་ཐང་དུ་བྱས་པར། ས་སྤྱོད་མཁས་གྲུབ་ལོ་པན་གྱི་འཕྲེང་བ་མཚར་དུ་(༢༥༡བ) ― GLG021_Page_0504 ―
[མ་དཔེ་གཟིགས་ན་འདིར་གནོན།]
དངར་བ། །རྒྱལ་བ་བཙོང་ཁ་པ་ཆེན་པོ་དང༌། སངས་རྒྱས་སྨན་གྱི་བླར་འདོད་ལྷས་སྐོར་བའི་བྲིས་ཐང་ལྔ་ཚར་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སིདྡྷི་རསྟུ། །ཨ བྱ ཡཱ ར སྱ བ ཀྟྲེ ཀ རཻ ྈྐ རྨ མཱཡ ཀྵ རེ ཝཾ པ རཱ ནྟཱ ཪྻ ཀཻ རྦྷོ ཊ ཀཿ མི་ཟད་འགྲོ་ངོར་མཛད་འཕྲིན་སྒྱུ་མའི་འཕྲུལ། །རྣམ་འགྱུར་ཕ་མཐའ་ཡས་ཀྱང་འཕགས་བོད་ཡུལ། །ཨ ཥྟ ནཱ མེ ཤ ཏཾ ས རྒ ནཻ དྷྱ ཀྵ རཱ ཧོ བྻུ ཧ ཀྵེ ཏྲ ཀཱཀྵམྲྀ ཏཱ ནཱཾ གུ རུཿ མཚན་བརྒྱད་སརྒ་བརྒྱ་རྩའི་ཐང་ཡིག་གི །ངོ་མཚར་ཞིང་བཀོད་མིག་གི་བདུད་རྩིའི་དཔྱིད། །གྲངས་མེད་མཁས་གྲུབ་རྟོགས་བརྗོད་དམན་བློ་དང༌། །མཚམ་པའི་ཟོལ་སྦྱོར་འཕྲུལ་ལ་ཡ་མཚན་ཅི། །སངས་རྒྱས་གཞན་ལས་ཆེ་བའི་ཡོན་ཏན་ཚོགས། །པདྨ་ཀ་ར་ཁོ་ནའི་ཁྱད་པར་ཙམ། །རྒྱལ་རྣམས་ཚོགས་གཉིས་ཟླ་བའི་དཀྱིལ་འཁོར་ལ། །གཅིག་ཏུ་མཚུངས་(༢༥༢ན) ― GLG021_Page_0505 ―
[མ་དཔེ་གཟིགས་ན་འདིར་གནོན།]
ཀྱང་ཆེར་རྙིགས་སྐྱེ་རྒུ་ཡི། །བསམ་ངོ་བཅོ་ལྔའི་ཚེས་ཀྱི་ནམ་མཁའ་ལ། །ཐུགས་རྗེའི་ཉ་གང་དང་འདྲ་གཞན་དུ་མིན། །མགོན་ཁྱོད་ཁོ་ནར་འབད་པའི་སྲི་ཞུ་ཡིས། །རྣམ་འདྲེན་ཀུན་ལ་ཉེར་བྱས་བསོད་ནམས་འབྲས། །ཐོབ་ཕྱིར་ཨ་ཕྱི་དབྱངས་ཅན་སྒྲོལ་མ་གང༌། །འཁོར་བ་མཐའ་ཅན་ཐར་ལམ་བགྲོད་པར་ཤོག །དམིགས་པའི་ཡུལ་དང་ཡོན་སྦྱོར་ལས་བྱེད་ཀུན། །པདྨ་འོད་ཀྱི་ཕོ་བྲང་ཉམས་དགའ་བར། །རིགས་འཛིན་གྲལ་ཆུད་རང་རིག་རྫོགས་སངས་རྒྱས། །གཞན་ནས་མི་འཚོལ་རང་ངོ་འཕྲོད་པར་ཤོག །སྔགས་ཀྱི་རྣལ་འབྱོར་བདུད་འཇོམས་རྡོ་རྗེ་ལ། །མདོ་ཙམ་བསྟན་པ་སིནྡྷུ་རྒྱ་མཚོ་མའི། །བཀོད་པ་འདི་བཞིན་མས་གཙོས་འགྲོ་བ་རྣམས། །མགོན་ཁྱོད་རྣམ་ཐར་དང་མཚུངས་འཇུག་ནུས་ཤོག །སྡེ་བརྒྱད་གཉེན་པོར་རྡོ་རྗེ་སྲིན་པོའི་སྐུར། །ཐུགས་སྒྲུབ་རྣམ་གསུམ་ལོ་རྒྱུས་གསེར་རྡོར་འཕྲེང༌། །མཛེས་པས་རྒྱུ་སྦྱོར་ལུས་ཀྱི་རྩ་འཁོར་ལ། །ཞི་ཁྲོའི་ལྷ་ཚོགས་མངོན་སུམ་རྫོགས་པར་ཤོག །འབོད་སྒྲོགས་གྲོང་ཁྱེར་ཡངས་པའི་ཁོར་ཡུག་དབུས། །ཙིཏྟིའི་དབྱིབས་ཅན་དཔལ་གྱི་རི་བོའི་རྩེར། །རྩ་གསུམ་རབ་འདུས་དཀྱིལ་འཁོར་ལེགས་བྲིས་མཐུས། །ཉིང་མཚམས་སྦྱར་ཚེ་ཞིང་དེར་སྐྱེ་བར་ཤོག །རྒྱ་བོད་སྐྱེས་ཆེན་སྒྱུ་སྐར་ཉེར་བརྒྱད་མཐར། །སོ་སྐྱེའི་གཟུགས་བརྙན་དུད་པ་ཉེར་འཐུལ་བ། །འཁྲུལ་ངོར་གངས་རི་སྔོན་པོར་སྣང་བ་བཞིན། །དམ་པར་མོས་འབྲས་ཐུགས་རྗེ་འཇུག་པར་ཤོག །ཅེས་གྲྭ་ཕྱི་སྨོན་གྲུབ་པ་རིན་ཆེན་བཀྲ་ཤིས་ཀྱིས་ཨ་ཕྱི་དབྱངས་ཅན་སྒྲོལ་མའི་དོན་དུ་ཨོ་(༢༥༢བ) ― GLG021_Page_0506 ―
[མ་དཔེ་གཟིགས་ན་འདིར་གནོན།]
རྒྱན་ཆེན་པོ་མཚན་བརྒྱད་རྣམས་གཙོ་བོར་བྱས་པའི་གྲ་ཚར་དགུ་ལ། ཐང་ཡིག་ཤེལ་བྲག་མའི་བཀོད་པ། གཙོ་བོ་སློབ་དཔོན་ཆེན་པོ་ལ་སིནྡྷུ་རྒྱ་མཚོའི་ཞིང་བཀོད། རྡོ་རྗེ་དྲག་པོ་རྩལ་ལ་ཐུགས་སྒྲུབ་གསུམ་གྱི་ལོ་རྒྱུས། མནལ་ལམ་གསེར་གྱི་རྡོ་རྗེ་མས་བསྐོར་བ། ཟངས་མདོག་དཔལ་རིའི་ཞིང་བཀོད། ངེད་རང་གི་འདྲ་འབག་ལ་ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་ཀྱིས་བསྐོར་བའི་བྲིས་ཐང་བཅས་བཅུ་གསུམ་གྱི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སིངྔྷི་རསྟུ། །ངག་གི་དབང་ཕྱུག་བློ་བཟང་གྲགས་པ་ཡི། །རིང་ལུགས་རྒྱ་མཚོའི་ཕ་མཐའ་ཡོངས་སྤེལ་བ། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །བགྲང་ཡས་སྐྱེ་བར་རྗེས་སུ་འཛིན་པར་ཤོག །རྒྱལ་བ་ཀུན་ཡུམ་སེང་ལྡེང་ནགས་སྒྲོལ་མ། །སྐྱབས་སོང་སྙིང་ནས་གསོལ་བ་འདེབས་བྱེད་ན། །སེང་གེ་གླང་ཆེན་རྐུན་པོ་མེ་དང་སྦྲུལ། །ལྕགས་སྒྲོག་ཤ་ཟ་རྒྱ་མཚོའི་འཇིགས་ལས་སྐྱོབས། །མདོར་ན་སྔོན་ལས་འཕྲལ་རྐྱེན་གྱིས་བསྐྱེད་པའི། །མི་མཐུན་ཉེར་འཚེ་ཐམས་ཅད་རབ་ཞི་ཞིང༌། །ཚེ་དང་བསོད་ནམས་དཔལ་འབྱོར་མ་ལུས་པ། །ཡར་ངོའི་ཟླ་ལྟར་རྒྱས་པར་བྱིན་གྱིས་རློབས། །ཞེས་པ་འདིའང་དགའ་ལྡན་ཨེ་ཏེ་ན་ཨུ་ཆེན་གྱིས་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་བྲིས། །བདེ་ལྡན་ཞིང་ཁམས་རྒྱ་མཚོའི་མགོན་མཆོག་གི །ཐུགས་རྗེའི་འོད་ཀྱིས་འཆི་བདག་མུན་བསལ་ཏེ། །ལེགས་བྱས་སྣང་བའི་ཁྲི་ལ་(༢༥༣ན) ― GLG021_Page_0507 ―
[མ་དཔེ་གཟིགས་ན་འདིར་གནོན།]
ངག་གི་དབང༌། །བློ་གསལ་སྐལ་བཟང་རྒྱ་མཚོ་བརྟན་པར་ཤོག །འདུས་པའི་སྡེ་ལ་མཆོད་བསྟོད་བསྙེན་བཀུར་རྒྱུན། །ལྷག་བསམ་དག་པས་སྤེལ་བའི་བསོད་ནམས་ཀྱིས། །སྦྱིན་པའི་བདག་པོ་རིགས་བརྒྱུད་བཅས་པ་ཡི། །སྲིད་ཞིའི་བདེ་སྐྱིད་མ་ལུས་ལྷུན་གྲུབ་ཤོག །གསོལ་བ་བཏབ་ན་ནམ་ཡང་མི་བསླུ་བ། །གཏན་གྱི་སྐྱབས་གཅིག་མཆོག་གསུམ་བྱིན་རླབས་ཀྱིས། །སྨོན་ལམ་ས་བོན་ལེགས་པར་སྨིན་པའི་འབྲས། །ཡོངས་སུ་ཉེར་དུད་དགའ་སྟོན་རབ་རྒྱས་ཤོག །ཅེས་པ་འདི་ནི་ལྷ་ས་བྱང་གླིང་པས་གསང་ཕུ་གྲྭ་ཚང་སྦེ་སེར་དུ་དགེ་རྒྱུན་སྦྱར་ནས་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འཆི་བདག་དཔུང་བཅས་ཟ་ལ་མ་ཧེའི་ཞལ། །གདངས་པའི་དཔའ་བོ་འཇམ་དཔལ་ཁྲོ་བོའི་དབང༌། །ལེགས་ལྡན་ཕྱག་དྲུག་མྱུར་མཛད་མགོན་པོ་ཡི། །མཐུ་སྟོབས་ནུས་པས་འདོད་པའི་རེ་བ་སྐོངས། །གདོང་ལྔས་ཡོངས་བཏེག་རྡོ་རྗེའི་ཁྲི་ཆེན་པོར། །བཤེས་གཉེན་དམ་པའི་ཟློས་གར་གཡོ་མེད་དུ། །གཡུང་དྲུང་སྲོག་གི་ཀ་བ་ཉེར་ཚུགས་པ། །སྨོན་པའི་འབྲས་བུ་དུས་སུ་སྨིན་པར་ཤོག །ཐམས་ཅད་མཁྱེན་དངོས་བློ་བཟང་གྲགས་པ་ཡི། །བསྟན་པ་ཛམ་བུ་ཏྲི་ཤའི་གྲིབ་བསིལ་གྱིས། །ཁྱབ་པར་དབྱར་གྱི་ཆུ་གཏེར་ཇི་བཞིན་དུ། །འཕེལ་བའི་བཀྲ་ཤིས་དགའ་སྟོན་དར་དྲག་ཤོག །ཅེས་པའང་ལྷ་ས་བྱང་གླིང་པས་འབྲས་སྤུང་སྔགས་པ་གྲྭ་ཚང་དུ་སྦུག་ཆོལ་གྱི་སྤྱི་རྫས་འབུལ་བ་མང་འགྱེད་ཀྱི་ཡོན་སྦྱར་ནས་དགོས་ཚུལ་ལྟར་ཟ་(༢༥༣བ) ― GLG021_Page_0508 ―
[མ་དཔེ་གཟིགས་ན་འདིར་གནོན།]
ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྣམ་ཤེས་ཚོགས་བརྒྱད་འབོད་སྒྲོགས་གྲོང་ཁྱེར་དབུས། །ཙིཏྟ་ཟུར་གསུམ་ཟངས་མདོག་དཔལ་རིའི་རྩེར། །རྩ་བའི་བླ་མ་པདྨ་ཐོད་ཕྲེང་དང༌། །དབྱེར་མེད་སྲིད་མཐའི་བར་དུ་བཞུགས་སུ་གསོལ། །ངོ་བོ་ནམ་ཡང་མི་འགྱུར་ཆོས་སྐུའི་གདངས། །རང་བཞིན་རྡོ་རྗེའི་འོད་ལུས་ལོངས་སྤྱོད་རྫོགས། །ཐུགས་རྗེའི་སྤྲུལ་པ་མཁའ་ཁྱབ་འགྲོ་བ་རྣམས། །འདྲེན་པའི་སྐྱབས་དང་གླིང་དུ་རྟག་བརྟན་ཤོག །ཁྲག་འཐུང་ཕྱག་རྒྱ་རྡོ་རྗེ་འབར་བའི་རྗེས། །གཙུག་ཏུ་གསལ་བ་དཔལ་མགོན་མ་ནིང་ནག །དྲེགས་པའི་སྡེ་དཔོན་སུམ་ཅུའི་ཚོགས་རྣམས་ཀྱིས། །འཕྲིན་ལས་ལུས་པ་མེད་པར་ལྷུན་གྱིས་སྒྲུབས། །ཞེས་ལྷ་ས་བྱང་གླིང་པས་སྟག་ལུང་གསང་སྔགས་ཆོས་འཁོར་གླིང་དུ་སྦུག་ཆོལ་གྱིས་སྤྱི་རྫས། འབུལ་བ་མང་འགྱེད་སོགས་སྦྱར་ཏེ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །གངས་ཅན་ཕན་བདེའི་འབྱུང་གནས་ཐོག་མའི་སྒོར། །རིགས་གསུམ་སྒྱུ་འཕྲུལ་དྲ་བའི་གར་མཁན་གྱིས། །སྲོང་བཙན་བཞེད་པ་ཡོངས་གང་སིམ་པའི་རྒྱུན། །སྲིད་མཐར་ཆད་བྲལ་རྟེན་ཅིང་འབྲེལ་འབྱུང་མཐུས། །འཇམ་དབྱངས་གཞོན་ནུ་དགའ་བའི་བཤེས་གཉེན་དཔལ། །འཆི་མེད་གྲུབ་པའི་ཉ་ཕྱིས་ཁོག་ཡངས་པོར། །མི་འགྱུར་སྲོག་གི་ཟུངས་གྱུར་མུ་ཐི་ལས། །ཕྱུར་བུར་གཏམས་པའི་བསོད་ནམས་རབ་འབར་ཤོག །སངས་རྒྱས་ཀུན་ཡུམ་དུང་སྐྱོང་རྒྱལ་མོ་དང༌། །བདུད་མགོན་ཏྲག་ཤད་ལ་སོགས་སྲུང་མ་ཡིས། །དགེ་འདུན་སྡེ་འདི་དར་(༢༥༤ན) ― GLG021_Page_0509 ―
[མ་དཔེ་གཟིགས་ན་འདིར་གནོན།]
ཞིང་རྒྱས་པས་མཚོན། །སྨོན་ལམ་གང་བཏབ་གྲུབ་བའི་འཕྲིན་ལས་མཛོད། །ཅེས་པའང་ལྷ་ས་བྱང་གླིང་པས་ཕ་བོང་ཁར་སྤྱི་འབུལ་མང་འགྱེད་སོགས་སྦྱར་ནས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རིགས་གསུམ་མགོན་པོའི་མཁྱེན་བརྩེ་ནུས་མཐུ་ཀུན། །གཅིག་ཏུ་ཡོངས་བསྡུས་རྗེ་བཙུན་བཙོང་ཁ་པར། །ཡིད་ཆེས་ངེས་པ་རྙེད་ནས་གསོལ་འདེབས་ན། །སྨོན་ལམ་ཅི་བཏབ་ཡོངས་འགྲུབ་བདག་བྱིན་རློབས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །བདེ་ལྡན་ཞིང་གི་མགོན་པོ་ཇི་བཞིན་དུ། །བདག་སོགས་འགྲོ་རྣམས་བྱང་ཆུབ་ཆེན་པོ་ཡི། །ས་ལ་བཀོད་མིན་དེ་སྲིད་བརྟན་གྱུར་ཅིག །འཇིག་རྟེན་སྤྱི་དང་ཁྱད་པར་གངས་ཅན་འདིར། །ཞྭ་སེར་ཅོད་པན་འཆང་བའི་བསྟན་པ་ཡི། །ཡོངས་ཁྱབ་ལྗོན་པའི་གྲིབ་མར་སྐྱེ་རྒུ་རྣམས། །བདེ་བའི་སྟེགས་ལ་ངལ་གསོ་བགྱིད་པར་ཤོག །ཅེས་པའང་ལྷ་ས་བྱང་གླིང་པས། ར་ས་ར་མོ་ཆེ། པོ་ཏཱ་ལའི་དམིགས་བརྩེ་མ་ཁག་བཞིར། སྤྱི་འབུལ་མཆོད་རྫས་ཞབས་ཏོག་སོགས་སྦྱར་ནས་འཛུགས་རྒྱུར་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ནོར་བུ་པདྨའི་གཟུངས་ལས་རབ་འཕྲོས་པའི། །འོད་ཀྱིས་འགྲོ་དྲུག་སྡུག་བསྔལ་ཀུན་སྦྱངས་ནས། །སྣང་བ་ལྷ་དང་གྲག་སྟོང་སྔགས་ཀྱི་སྒྲ། །དྲན་རྟོག་ཐུགས་ཀྱི་ཁྱེར་སོར་འགྱུར་བར་ཤོག །གངས་ཅན་ལྷ་གཅིག་ཐུགས་བསྐྱེད་སྨོན་ལམ་མཐུས། །ཁྱོད་ཀྱི་ཐུན་མོང་མ་ཡིན་འདུལ་ཞིང་(༢༥༤བ) ― GLG021_Page_0510 ―
[མ་དཔེ་གཟིགས་ན་འདིར་གནོན།]
གི །འབངས་རྣམས་སྐྱོང་བའི་བླ་དཔོན་ཟུང་འཇུག་པར། །འཆི་མེད་གྲུབ་པའི་རིགས་འཛིན་སྩོལ་བྱིན་རློབས། །བདག་སོགས་གནས་སྐབས་བདེ་སྐྱིད་ཕུན་ཚོགས་ཤིང་། །སྐྱེ་བར་མགོན་པོ་གང་གི་རྗེས་བཟུང་ནས། །གྲུ་འཛིན་རི་བོའི་གཞལ་མེད་ཉམས་དགའ་བར། །ཞུགས་ཏེ་རླབས་ཆེན་སྤྱོད་ལ་འཇུག་པར་ཤོག །ཅེས་པའང་ལྷ་ས་བྱང་གླིང་པས། ར་ས་ར་མོ་ཆེ་པོ་ཏཱ་ལ་གསུམ་གྱི་མ་ཎི་བ་ཁག་བཅོ་ལྔར་སྤྱི་འབུལ་མཆོད་རྫས་ཞབས་ཏོག་སོགས་བསྐྲུན་ནས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཐུབ་དབང་སྐུ་གཟུགས་སངས་རྒྱས་དངོས་ཉིད་དུ། །རབ་མོས་འཁོར་བའི་ཚུལ་ལ་ངེས་འབྱུང་བློས། །ཡན་ལག་བརྒྱད་པའི་དུས་ཁྲིམས་ལེགས་སྲུངས་པའི། །འབྲས་བུ་མྱང་འདས་དེ་སྲིད་འཛད་མེད་ཤོག །ཐོག་མའི་དུས་ནས་ད་ལྟའི་བར་དག་ཏུ། །འབད་པས་བསགས་པའི་དགེ་ཚོགས་ནུས་མཐུ་ཡིས། །དཔལ་ལྡན་བླ་མ་རྡོ་རྗེས་ཡོངས་བཏེག་ཁྲིར། །བསྐལ་པ་རྫོགས་སྨིན་གཡོ་མེད་བརྟན་པར་ཤོག །སངས་རྒྱས་རང་སངས་རྒྱས་དང་ཉན་ཐོས་ཀྱིས། །བྱང་ཆུབ་འཐོབ་པའི་ཆེད་དུ་བག་ཡོད་དགེ །བགྲང་ཡས་མཁའ་མཉམ་སེམསཅན་མ་ལུས་པ། །ངེས་པར་ལེགས་པའི་གོ་འཕང་འཐོབ་ཕྱིར་བསྔོ། །ཞེས་པའང་ལྷ་ས་བྱང་གླིང་པས་ར་སའི་བསྙེན་གནས་མ་ཚོར་སྤྱི་རྫས་འབུལ་བ་ཞབས་ཏོག་སོགས་སྦྱར་ནས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བདེ་བ་ཅན་ཞིང་ཆོས་སྐུ་འོད་མཐའ་(༢༥༥ན) ― GLG021_Page_0511 ―
[མ་དཔེ་གཟིགས་ན་འདིར་གནོན།]
ཡས། །གྲུ་འཛིན་སྤོ་ན་ལོངས་སྐུ་འཇིག་རྟེན་དབང༌། །སིནྡྷུའི་རྒྱ་མཚོར་སྤྲུལ་སྐུ་པདྨ་འབྱུང༌། །སྐུ་གསུམ་དབྱེར་མེད་ཐུགས་རྗེས་བདག་བྱིན་རློབས། །འཁོར་འདས་ཕྱག་རྒྱ་མ་ལུས་ཟིན་གནོན་པར། །མཐུ་སྟོབས་གྲུབ་པའི་རིག་འཛིན་བཞད་པ་རྩལ། །གངས་ཅན་ཕན་བདེའི་ཉེར་འཚོར་རྡོ་རྗེ་ཡི། །སྲོག་གི་ཀ་བ་འགྱུར་མེད་ཚུགས་པར་ཤོག །རུ་བཞིའི་རྒྱལ་ཁམས་ཀུན་ཏུ་མི་ཕྱུགས་ནད། །འཐབ་རྩོད་དབུལ་ཕོངས་དུས་ཀྱི་ཆད་པ་རྣམས། །རབ་ཞི་རྫོགས་ལྡན་དགའ་སྟོན་ལ་སྤྱོད་པའི། །བཟང་པོའི་སྐལ་པ་ཅན་དུ་འགྱུར་བ་ཤོག །ཅེས་པའང་ལྷ་ས་བྱང་གླིང་པས་ར་ས་ར་མོ་ཆེ་པོ་ཏཱ་ལ་གསུམ་གྱི་ཚེས་བཅུ་ཁག་ལྔར། སྤྱི་འབུལ་མཆོད་རྫས་ཞབས་ཏོག་སྦྱར་ནས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །གདོད་ནས་རང་རིག་དོན་གྱི་ཚེ་མཐའ་ཡས། །དབྱེར་མེད་རྡོ་རྗེ་སློབ་དཔོན་དྭངས་མའི་ལུས། །འོད་སྐུར་སྨིན་པ་འཕོ་བ་ཆེན་པོ་རུ། །གྲུབ་པའི་འཆི་བདག་གཡུལ་ལས་རྒྱལ་བར་ཤོག །ལས་ཀྱི་གཤིན་རྗེའི་རླང་སྤྱོད་རྦ་རླབས་འཕྲེང༌། །རང་སེམས་ཆུ་བོའི་དབྱིངས་སུ་ཡོངས་དག་པས། །འཁྲུལ་བའི་རྣམ་རྟོག་བདེ་ཆེན་དབྱིངས་ཐིམ་པས། །པད་འབྱུང་ཐུགས་རྗེའི་འཕྲིན་ལས་དེང་འཇུག་ཤོག །ཀ་དག་ངང་དུ་སྤྲོས་པའི་མཚན་མ་ཀུན། །རབ་ཞི་གཞོན་ནུ་བུམ་སྐུ་ལས་ཤར་གདངས། །མ་འགགས་ལོངས་སྐུའི་སྣང་བ་འཁོར་བའི་མཐའ། །དེ་སྲིད་གཡུང་དྲུང་ལྟ་བུར་བརྟན་པར་ཤོག །ཅེས་པའང་ལྷ་ས་བྱང་གླིང་པས་ཨྱོན་ཆོས་གཏེར་གླིང་དུ་སིལ་སྙན་གྱི་སྤྱི་རྫས་(༢༥༥བ) ― GLG021_Page_0512 ―
[མ་དཔེ་གཟིགས་ན་འདིར་གནོན།]
འབུལ་བ་མང་འགྱེད་སོགས་མཐུན་རྐྱེན་སྦྱར་ནས་རྟེན་འབྱུང་དགོས་ཚུལ་ལྟར་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཆུ་མཚོའི་ཟླ་བར་ཞེན་པའི་བྱིས་པ་བཞིན། །མགོན་ཁྱོད་ཕྱག་ན་པདྨར་ངེས་རྙེད་དེ། །ཁྱོད་ཤེས་མི་ཕྱེད་དད་པས་གསོལ་འདེབས་ན། །བྱིན་རླབས་བདུད་རྩི་སྙིང་ལ་འཇུག་པར་ཤོག །ཆོས་ཉིད་ནམ་ཡང་འགྱུར་བ་མེད་པ་དང༌། །ཆོས་ཅན་རྒྱུ་འབྲས་མི་བསླུའི་ནུས་པ་ཡིས། །དེང་ནས་བྱང་ཆུབ་བར་དུ་དགེ་བའི་བཤེས། མཛད་དེ་ཕན་བདེའི་དཔལ་ལ་སྦྱོར་བར་ཤོག །འདི་ནས་ཉིང་མཚམས་སྦྱར་ཚེ་གྲུ་འཛིན་སྤོར། །འདྲེན་བྱེད་ཐུགས་རྗེའི་འོད་ཟེར་ལྕགས་ཀྱུ་ཡིས། །ཉེར་དྲངས་རྒྱལ་བའི་སྲས་སུ་རབ་བསྐྲུན་ཏེ། །ཐེག་ཆེན་ཆོས་ཀྱི་བདུད་རྩིར་ལོངས་སྤྱོད་ཤོག །ཅེས་པ་འདི་ལྟ་བུ་ཞིག་དགོས་ཞེས་མང་བཀུར་རྒྱལ་ཁབ་ཆེན་པོའི་ཉེ་འདབ་ནས་བསམ་བློ་མེར་རྒན་ཆོས་རྗེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སྤྱི་གཙུག་སེང་ཁྲི་པདྨ་ཉི་ཟླའི་སྟེང༌། །སངས་རྒྱས་ཀུན་འདུས་རྩ་བའི་བླ་མ་ལ། །མི་ཕྱེད་དད་པས་གསོལ་བ་འདེབས་བྱེད་ན། །ཐུགས་རྗེ་ཆེན་པོས་བྱང་ཆེན་བར་དུ་སྐྱོངས། །ཞེས་པའང་མ་ཧཱ་ཙི་ནའི་རྒྱལ་ཁམས་ནས་དོན་གྲུབ་དཔལ་འབྱོར་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བགྲང་ཡས་དགེ་ཚོགས་ལ་འདུན་མཁས་གྲུབ་ཀྱི། །འཁྲུངས་རབས་མུཀྟི་ཀ་འཕྲེང་བརྒྱུས་པའི་མཐར། །བདག་ལྟའི་སོ་སྐྱེར་སྒྲོ་བཏགས་(༢༥༦ན) ― GLG021_Page_0513 ―
[མ་དཔེ་གཟིགས་ན་འདིར་གནོན།]
རྡོ་བ་ཡི། །མཐའ་བརྟེན་དེར་མ་འདུས་པའི་ཐུགས་དམ་ལྷ། །རང་གཞན་མཉམ་པར་བརྗེ་བའི་སེམས་དཔའ་ཆེ། །ངག་གི་དབང་ཕྱུག་ཕུན་ཚོགས་རྒྱ་མཚོ་ཡིས། །བདོག་པར་བཅས་ཏེ་མཁྱེན་དཔྱོད་ཞལ་བཀོད་ཀྱིས། །སྤེལ་འདི་འཇིག་རྟེན་རྒན་པོས་དེང་མ་དྲན། །དགེ་བས་སྤྲུལ་སྐུ་གང་དེའི་ཆོས་དང་སྲིད། །བཞེད་པ་མཐའ་དག་ལྷུན་གྱིས་རབ་གྲུབ་ཅིང༌། །འབྲས་བུ་འགྲོ་རྣམས་འཁོར་བ་ཆུ་སྲིན་གྱི། །འབྱུང་གནས་ཆེ་ལས་སྒྲོལ་བའི་རྒྱུ་རུ་བསྔོ། །ཞེས་པ་འདིའང་སེམས་དཔའ་སྤྲུལ་པའི་སྐུས་སྨོན་ལམ་རྩོམས་ཤིག་པར་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བགྲང་ཡས་གདུལ་བྱའི་བསོད་ནམས་ཞིང་མཆོག་ཏུ། །རྒྱ་ཧོར་ཆེ་དགུའི་སྟོན་པ་བླ་ན་མེད། །འཕྲིན་ལས་རྒྱ་མཚོའི་ཕ་མཐའ་ཀུན་ཁྱབ་པའི། །ལག་ན་པདྨ་ངུར་མྲིག་བླ་གོས་བཟུང༌། །ཡེ་ཤེས་དབྱིངས་སུ་དམ་པ་ཁྱོད་ཉིད་དང༌། །ཐུགས་རྒྱུད་གཅིག་འདྲེས་རིས་བྲལ་བླ་མའི་སྐུ། །ཆོས་སྲུང་དུ་མས་ཡོངས་བསྐོར་གསེར་སྦྱངས་ལས། །བསྐྲུན་པའི་དགེ་ཚོགས་ནམ་མཁའི་མཐས་འཇལ་དཀའ། །རྒྱུ་སྦྱོར་གནམ་སྐོས་གོང་མའི་གསེར་ཡིག་པ། །བསམ་བློ་རབ་འབྱམས་ཆོས་རྗེ་ཨེར་ཏེ་ནས། །ལྷག་བསམ་དག་པས་སྤེལ་འབྲས་འདི་ཕྱི་ཡི། །འདོད་པའི་རེ་བ་མ་ལུས་འགྲུབ་པར་ཤོག །སྲིད་ཞིའི་ཡོན་ཏན་ཀུན་གྱི་ཕུང་པོའི་ཚོགས། །རྒྱ་མཚོའི་འཇིངས་ལྟར་ཟད་པ་མེད་པའི་གཏེར། །བདེ་ཆེན་ཆོས་ཀྱི་རྒྱལ་པོ་དཔལ་བཟང་ཞེས། །ས་གསུམ་སྐྱེ་རྒུའི་མ་འདྲིས་མཛའ་བའི་བཤེས། །གང་དང་ཐུགས་རྒྱུད་ཡོངས་འདྲེས་(༢༥༦བ) ― GLG021_Page_0514 ―
[མ་དཔེ་གཟིགས་ན་འདིར་གནོན།]
རྣམ་པར་འཕྲུལ། །གཅིག་ལས་དུ་མར་ཤར་བའི་བླ་མ་དང༌། །བཀའ་སྡོད་ཕོ་ཉས་མཐའ་ནས་རབ་ཏུ་བཏེག །གོས་དམར་ངོས་སུ་ས་ཟླའི་ཁུ་བས་བྲིས། །གནམ་སྐོས་ཚངས་པས་མངགས་པའི་གསེར་ཡིག་པ། །ཨ་ཞང་རབ་འབྱམས་ཆོས་རྗེ་ཨེར་ཏི་ནས། །བསོད་ནམས་སྤེལ་བ་འབྲས་བུ་བྱང་ཆུབ་བར། །ནམ་ཡང་འཛད་པ་མེད་པའི་རྒྱུ་རུ་བསྔོ། །རྒྱལ་དང་དེ་སྲས་སློབ་མར་བཅས་པ་ཡི། །ཡོན་ཏན་རྡུལ་གྱི་ཆ་ཡང་མི་ལྡན་པར། །ཚུར་མཐོང་བདག་འདྲའི་སོ་སྐྱེར་སྒྲོ་བཏགས་པ། །ཐག་ཁྲར་སྦྲུལ་དུ་དངངས་པའི་ཚུལ་ནས་ཅི། །འོན་ཏེ་རྡོ་བའི་རིང་བསྲེལ་ཇི་ལྟ་བར། །མཆོག་གསུམ་ངོ་བོར་གཏིང་ནས་ངེས་རྙེད་ན། །བསླུ་མེད་རྟེན་འབྲེལ་མཐུ་ལས་བྱིན་རླབས་དྲོད། །འབར་བའི་འབྲས་བུ་སྨིན་ལ་ཀླན་ཀ་སུ། །མགྲིན་པར་ཚངས་སྲས་བཞད་པའི་གཙུག་ལག་སྒྲ། །འཇིགས་མེད་རྡོ་རྗེའི་གླུ་རུ་རབ་ལེན་པར། །འཇམ་དབྱངས་དགའ་བས་ལེགས་འཁྱུད་བཤེས་གཉེན་ལ། །ངག་དབང་བློ་བཟང་རྒྱ་མཚོའི་མིང་དུ་འབོད། །པད་རཱག་མདངས་འཛིན་གོས་ངོས་སུ་ཝརྞས༌། །ཡོངས་བསྐྲུན་བྱེད་པོ་རབ་འབྱམས་ཨེར་ཏེ་ནར། །ཉེར་གྲགས་གསེར་གྱི་རྒྱལ་ཁབ་ཆེན་པོ་ནས། །གོང་མའི་ལུང་གིས་ཆེད་དུ་མངགས་དེས་སོ། །སྟོན་ཟླ་པད་རྩ་དུང་ལྟར་རབ་དཀར་བའི། །རྣམ་སྨིན་བྱང་ཆེན་བར་དུ་མི་ཆད་པ། །དགེ་བའི་ཚོགས་ཀྱིས་སྲིད་ཞིའི་ལེགས་བྱས་ཀུན། །བླ་ནས་བླར་འཕེལ་ཟད་པ་མེད་པར་ཤོག །ཅེས་ཏཱ་ལའི་བླ་མ་བསོད་ནམས་རྒྱ་མཚོ། ཡོན་ཏན་རྒྱ་མཚོ། ངེད་རང་གི་འདྲ་འབག་རྣམས་ལ་འཁྲུངས་རབས་དང་ཆོས་སྲུང་གིས་བསྐོར་བའི་གསེར་ཐང་གོང་གི་གསེར་ཡིག་པ་ཨེར་ཏེ་(༢༥༧ན) ― GLG021_Page_0515 ―
[མ་དཔེ་གཟིགས་ན་འདིར་གནོན།]
ན་རབ་འབྱམས་ཆོས་རྗེས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྩ་བའི་བླ་མ་འོད་དཔག་མེད་པ་དང༌། །དབྱེར་མེད་གཅིག་ཏུ་སྙིང་ནས་གསོལ་འདེབས་ན། །སྐྱེ་བར་འབྲས་མེད་རྗེས་སུ་ཉེར་བཟུང་སྟེ། །འདི་དང་གཏན་གྱི་མདུན་མ་ལྷུན་གྲུབ་ཤོག །ཅེས་པའང་དགེ་སློང་བློ་བཟང་ཀུན་དགའི་འདོད་པ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པའོ། །ཀུན་ཁྱབ་ཐུགས་རྗེའི་ཉི་མས་འཇིག་རྟེན་རྣམས། །གསལ་མཛད་སངས་རྒྱས་ཡོངས་འདུས་བཙོང་ཁ་པ། །འཇམ་མགོན་བླ་མའི་ཞབས་ཀྱི་པདྨ་ལ། །བདག་སོགས་འགྲོ་བའི་གཙུག་བཏུད་གསོལ་བ་འདེབས། །མདོ་རྒྱུད་མན་ངག་ཐ་སྙད་མཐའ་ཀླས་པར། །དབང་པོའི་བློ་གྲོས་ལུས་ཕྲའི་འགྲམ་ཆང་གིས། །སྐལ་བཟང་བ་ཀུ་ལ་འབྱེད་ཐུབ་བསྟན་གྱི། །རྒྱ་མཚོ་སྲིད་རྩེར་འཕྱོ་ལ་གསོལ་བ་འདེབས། །མཉམ་མེད་དགའ་ལྡན་སུམ་རྩེན་ལྟར་འཕགས་གླིང༌། །ལུགས་གཉིས་དཔལ་གྱིས་མངོན་པར་རབ་མཐོ་ཞིང༌། །ཕྱོགས་འདིར་ཞྭ་སེར་ཅོད་པན་འཆང་བའི་བསྟན། །རིས་བྲལ་སྐྱེ་རྒུའི་མགོན་དུ་འགྱུར་བར་ཤོག །ལེགས་ལྡན་ནག་པོ་མྱུར་མཛད་ཕྱག་དྲུག་པ། །དུས་ཀྱི་དགྲ་བོ་ལས་གཤིན་མ་ཧེའི་ཞལ། །འདོད་ཁམས་དབང་ཕྱུག་དམག་དང་ཟོར་གྱི་ལྷས། །མཐུ་སྟོབས་ནུས་བསྐྱེད་མགོན་སྐྱབས་དཔུང་གཉེན་མཛོད། །སེམས་ཅན་ཀུན་གྱི་སྙིང་ལ་ཐོག་མཐའ་བར། །གཅིག་ཏུ་དགེ་བ་དཀོན་མཆོག་རྣམ་གསུམ་དང༌། །བསླུ་(༢༥༧བ) ― GLG021_Page_0516 ―
[མ་དཔེ་གཟིགས་ན་འདིར་གནོན།]
མེད་རྟེན་འབྲེལ་བདེན་པས་སྨོན་པའི་དོན། །ལེགས་འགྲུབ་འཇིག་རྟེན་ཁམས་རྣམས་ཤིས་པར་ཤོག །ཅེས་པ་འདིའང་དགའ་ལྡན་སུམ་རྩེན་གླིང་གི་སློབ་དཔོན་ངག་དབང་རྣམ་རྒྱལ་དང་གཉེར་པ་བློ་བཟང་རབ་རྒྱས་གཉིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བློ་གྲོས་ཀུན་གསལ་དྭངས་པའི་ངོས། །བཟང་པོའི་འཕྲིན་ལས་དབང་གཞུའི་གཟུགས། །རྣམ་བཀྲ་ཡེ་ཤེས་སྤྲུལ་སྐུའི་གར། །ལེགས་པར་བསྒྱུར་ལ་གསོལ་བ་འདེབས། །འཕྲོག་བྱེད་ལངས་པའི་སྡེར་མོ་ཡིས། །ཉེར་བཏེག་རིན་ཆེན་ཁྲི་འཕང་སྟེང༌། །འགྲོ་རྣམ་འཁོར་བ་མཐའ་ཅན་དུ། །བསྒྲལ་མིན་དེ་སྲིད་ཞབས་བརྟན་ཤོག །དགེ་བས་མགོན་ཁྱོད་དག་པ་དང༌། །མ་དག་ཞིང་གི་འདྲེན་པ་རུ། །གང་དུ་བཞུགས་ཀྱང་འབྲལ་མེད་དུ། །རྗེས་འཛིན་བྱང་ཆེན་འགྲུབ་རྒྱུར་བསྔོ། །ཞེས་སྤྲུལ་སྐུ་རིན་པོ་ཆེ་བློ་བཟང་ཡེ་ཤེས་ཀྱི་གསོལ་འདེབས་བརྟན་བཞུགས་སྨོན་ལམ་འདི་ནི་ཨ་ཞང་ཆོས་རྗེ་ཨེར་ཏེ་ནི་རབ་འབྱམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ཀུན་གཟིགས་ཞིང་གི་མགོན་པོ་འཇམ་པའི་དཔལ། །ལྔ་ལྡན་ཟུར་ཕུད་ཅོད་པན་འཆང་བའི་སྐུ། །བཙོ་མ་ས་ཟླའི་ཁུ་བས་ལེགས་བསྐྲུན་པའི། །བསོད་ནམས་ཆེད་དུ་ཡོངས་བྱས་འབྲས་བུ་ལས། །གཡང་སྐྱིད་ཡིད་ལ་མི་ཁོམ་བརྒྱད་ཀྱི་དྲིས། །མ་སྦགས་དལ་བརྒྱད་འབྱོར་བཅུའི་ཐེམ་སྐས་ངོས༌། །འཛེགས་ནས་རིང་པོར་མི་ཐོགས་མྱང་འདས་ཀྱི། །གྲོང་ཁྱེར་ཆེར་ཞུགས་གཏན་མདུན་འགྲུབ་པར་ཤོག །(༢༥༨ན) ― GLG021_Page_0517 ―
[མ་དཔེ་གཟིགས་ན་འདིར་གནོན།]
དགེ་བ་ནམ་མཁའི་ཚད་ཀྱིས་གཞལ་དཀའ་བའི། །ཕ་མཐའ་བྱང་ཆུབ་སྙིང་པོ་དེ་སྲིད་དུ། །འཛད་མེད་བྱེད་པོར་རིས་བྲལ་སེམས་ཅན་ཀུན། །རྫོགས་པའི་སངས་རྒྱས་འཐོབ་པའི་རྒྱུ་རུ་བསྔོ། །ཞེས་པ་འདིའང་གཡང་སྐྱིད་ཀྱི་དོན་དུ་དགེ་སློང་འཇམ་དབྱངས་གྲགས་པས་འཇམ་དབྱངས་ཀྱི་བརྒྱ་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བྲིས་སོ། །འཛད་མེད་མཆོད་སྤྲིན་ཕྱུར་བུར་སྤུང་བའི་སྣོད། །རྩ་གསུམ་དམ་སྐོང་རིན་ཆེན་གཉིས་པ་ལས། །ལེགས་བསྐྲུན་དགེ་སློང་བློ་གྲོས་རྒྱལ་བ་ཡིས། །ཕུལ་བས་སྲིད་ཞིའི་འདོད་དོན་ལྷུན་གྲུབ་ཤོག །ཅེས་དངུལ་སྲང་ཕྱེད་བཅུ་བཞི་ལས་གྲུབ་པའི་པད་སྡེར་ཕན་བདེ་ལེགས་བཤད་གླིང་གི་དགེ་བསྐོས་སྐབས་ཕུལ་བའི་ཁ་བྱང་ཟ་ཧོར་བནྡེས་བཀོད་པ་མངྒ་ལཾ། །མཁའ་ཁྱབ་རྒྱལ་དང་དེ་སྲས་སློབ་མར་བཅས། །སྤྱན་སྔར་ཀུན་བཟང་མཆོད་སྤྲིན་འཛད་མེད་སྒོ། །མངོན་པར་ཕྱེ་བས་བསྟན་འགྲོའི་ཕན་བདེ་རྣམས། །དཀར་ཆའི་ཟླ་བ་ལྟ་བུར་འཕེལ་བར་ཤོག །རྒྱུ་སྦྱོར་ཚུལ་འདིའི་བྱེད་པོར་གཏོགས་སོ་ཅོག །གནས་སྐབས་རྒུད་པའི་སྨག་རུམ་ཀུན་སངས་ཏེ། །བསོད་ནམས་ཉི་མའི་འོད་བརྒྱ་ཡོངས་འབར་ཞིང༌། །རིང་མིན་རྣམ་མཁྱེན་གོ་འཕང་འཐོབ་རྒྱུར་བསྔོ། །ཞེས་ས་སྐྱོང་བློ་བཟང་སྦྱིན་པས་ཁུར་བཞེས་ཏེ་ཇོ་བོ་རིན་པོ་ཆེའི་ཕྱག་མཛོད་ནས་བཟོས་པའི་ཕྱེ་ཕུར་བདུན་ཅུ་དོན་དྲུག །ཁ་བཏགས་ཀྱི་འཕན་ཆུང་དོན་དྲུག །གཞུང་གི་ཕྱག་མཛོད་ནས་བཏོན་པའི་ཕྱེ་ཕུར་ཆེ་བ་ཆ། འཕན་རིང་ཆ་གསུམ། ཐུང་བ་ཆ་ལྔ།(༢༥༨བ) ― GLG021_Page_0518 ―
[མ་དཔེ་གཟིགས་ན་འདིར་གནོན།]
སྟོད་གཡོགས་བརྒྱད་ཅུ་གྱ་དགུ སྨད་གཡོགས་དྲུག་ཅུ་རེ་བདུན། པད་ཁེབས་ཆིག་བརྒྱ་སོ་བཞི་རྣམས་ས་ལུག་ཆོ་འཕྲུལ་མཆོད་པའི་དུས་ར་ས་འཕྲུལ་སྣང་དུ་ཕུལ་བའི་སྨོན་ལམ་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །དངོས་བརྒྱུད་བླ་མ་ཞི་ཁྲོའི་དཀྱིལ་འཁོར་ལྷ། །ཕ་མ་གཉིས་མེད་རྒྱུད་གསུམ་ཐུབ་པའི་བསྟན། །རབ་སྐྱོང་ཆོས་སྲུང་དྲེགས་པ་དམ་ཅན་ཚོགས། །དགྱེས་སྐོང་དར་གྱི་ལྡ་ལྡི་དབང་པོའི་གཞུ། །ཡིད་སྲུབས་སྡེ་ལས་རྣམ་རྒྱལ་ཕན་བདེའི་སྒོ། །ཡོངས་འབྱེད་སྨིན་གྲོལ་ལེགས་བཤད་དགའ་སྟོན་ཅན། །རིག་སྔགས་འཆང་བའི་འདུས་གྲར་ཕུལ་བའི་མཐུས། །རྒྱུ་སྦྱོར་འདི་ཕྱིའི་དོན་གཉིས་ལྷུན་གྲུབ་ཅིང༌། །བསྟན་འགྲོའི་བདེ་སྐྱིད་བརྒྱ་ཕྲག་ཉི་ལྟར་གསལ། །དགེ་འབྲས་བདག་གཞན་མ་ལུས་རིང་མིན་དུ། །བཅུ་གསུམ་རྡོ་རྗེའི་ས་ལ་བསྙེག་རྒྱུར་བསྔོ། །ཞེས་ཡར་མཐིལ་པ་དགེ་སློང་བློ་བཟང་འཕགས་པ་དང་རྒྱལ་སྨན་པ་ངག་དབང་ཕུན་ཚོགས་གཉིས་ཀྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་སྙན་ཤལ་བརྒྱ་ཉི་ཤུ་སྐོར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དཀོན་མཆོག་གསུམ་ལ་སྙིང་ནས་གསོལ་བཏབ་མཐུས། །འཚོ་བྱེད་སྐལ་བཟང་རྒྱུད་ལ་སྔོན་བསགས་དང༌། །འཕྲལ་རྐྱེན་གྱིས་བསྒྱུར་ནད་གདོན་ཀུན་ཞི་ཞིང༌། །མངོན་མཐོ་རིམ་བརྒྱུད་ངེས་ལེགས་འཐོབ་པར་ཤོག །ཅེས་ཏྲེ་བོ་(༢༥༩ན) ― GLG021_Page_0519 ―
[མ་དཔེ་གཟིགས་ན་འདིར་གནོན།]
སྐལ་བཟང་གིས་དགོས་ཚུལ་བཞིན་ཟ་ཧོར་གྱི་བནྡེས་བཀོད། །རྒྱལ་བ་ཀུན་འདུས་མཚོ་སྐྱེས་རྡོ་རྗེ་དང༌། །མངའ་བདག་ཁྲི་སྲོང་ལྡེ་བཙན་ཐུགས་རྗེའི་ཟེར། །བདག་སོགས་འགྲོ་ངོར་དངོས་སྣང་རྡོ་རྗེ་འཛིན། །ཆེ་མཆོག་འདུས་པ་རྩལ་ལ་གསོལ་བ་འདེབས། །པདྨས་མིང་བཏགས་རྡོ་རྗེ་ཐོགས་མེད་རྩལ། །གངས་ཅན་བསྟན་འགྲོའི་ཕན་བདེའི་ཉེར་འཚོ་ཆེར། །འོག་མིན་ཞིང་གི་མགོན་ལྟར་རྟག་བཞུགས་པར། །རེ་སྨོན་རྩ་གསུམ་ཐུགས་རྗེས་འགྲུབ་བྱིན་རློབས། །ཀ་ནས་དག་པ་ཆོས་སྐུའི་རང་གདངས་ལས། །ལྷུན་གྲུབ་ཡེ་ཤེས་འོད་གསལ་ཁོར་ཡུག་ངང༌། །རང་རིག་དོན་གྱི་ཀུན་བཟང་ཚེ་འདི་ལ། །མངོན་གྱུར་མཁའ་ཁྱབ་འགྲོ་བ་འདྲེན་པར་ཤོག །ཅེས་པ་འདིའང་ཞོམ་མདངས་བླ་མ་རྫོགས་ཆེན་པ་ནམ་མཁའ་རིགས་འཛིན་དབང་གྲགས་ཀྱི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །མ་ཕམ་མགོན་ཁྱོད་འཕགས་ཡུལ་མ་ག་དྷར༌། །མཆོག་གི་སྤྲུལ་སྐུར་བསྟན་ཏེ་བདག་སོགས་འགྲོ། །འདུས་པ་དང་པོའི་འཁོར་དུ་ལེགས་སྐྱེས་ནས། །རྣམ་པར་གྲོལ་བའི་ལམ་བཟང་རྙེད་པར་ཤོག །དགེ་ཚོགས་རབ་འཕེལ་སྤུངས་པའི་འདུས་སྡེ་རྣམས། །དབྱར་ཟླ་གསུམ་དུ་ཞལ་འཆེས་མཐུན་རྐྱེན་ལ། །འདོད་དགུའི་སྙེ་མ་གཡུར་དུ་ཟ་བའི་ཞིང༌། །པད་རྩ་ལྟར་དཀར་ལྷག་བསམ་གྱིས་ཕུལ་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །གདོང་ལྔས་བཏེག་པའི་ཁྲི་ལ་རྟག་བརྟན་ཞིང༌། །རྒྱུ་སྦྱོར་རིགས་བརྒྱུད་(༢༥༩བ) ― GLG021_Page_0520 ―
[མ་དཔེ་གཟིགས་ན་འདིར་གནོན།]
བཅས་པ་དེང་ནས་བཟུང༌། །བྱང་ཆུབ་བར་དུ་ཕན་བདེ་ལ་སྤྱོད་ཤོག །ཅེས་པ་འདི་ཡང་སྒྱིད་ཐང་ནོར་བུས་དགེ་འཕེལ་རི་ཁྲོད་པ་རྣམས་ཀྱི་དབྱར་གནས་ཐེབས་སུ་ཞིང་ཕུལ་བའི་དུས་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རིན་ཆེན་འབྱུང་ལྡན་ཐུགས་རྗེ་ཡིས། །ཀུན་དགའ་བུ་ཁྲིད་འཇུར་གེགས་ལས། །ཉེར་བསྒྲལ་ཚོར་ཕུང་གནས་བསྒྱུར་ཏེ། །མཉམ་ཉིད་ཡེ་ཤེས་མངོན་གྱུར་ཤོག །ཕྱག་ན་པདྨའི་སྦྱན་རས་ཀྱིས། །ཀུན་དགའ་བུ་ཁྲིད་ཉེར་བཙའ་བས། །འཁོར་བ་ཆུ་སྲིན་འབྱུང་གནས་ལས། །བསྒྲལ་ཏེ་ཐར་པའི་གླིང་ཁྲིད་ཤོག །བདེ་གཤེགས་མཐའ་དག་བླ་མ་ཡི། །ངོ་བོར་རྟོགས་ནས་གཟུགས་སྐུའི་འཕྲེང༌། །བཞེངས་མཐུས་བྱང་ཆུབ་མ་ཐོབ་བར། །བཤེས་གཉེན་དམ་པས་རྗེས་འཛིན་ཤོག །རྒྱལ་གསུང་སྙིང་པོ་ཤེར་ཕྱིན་གྱི། །ཡང་བཅུད་སྟོང་ཕྲག་བརྒྱད་པ་ཡི། །གླེགས་བམ་བསྒྲུབས་མཐུས་མཐའ་གཉིས་དང༌། །བྲལ་བའི་གནས་ལུགས་རྟོགས་པར་ཤོག །ཆོས་ཀུན་སྐྱེ་མེད་འོད་གསལ་བ། །ཤེར་ཕྱིན་སྣ་ཚོགས་པུ་སྟ་ཀཿ །བཞེངས་པས་སྲིད་པའི་དུཿཁ་ལས། །ཀུན་དགའ་བུ་ཁྲིད་ཐར་བར་ཤོག །ཅེས་པའང་འོལ་དགའ་སྟག་རུ་པའི་མ་ཀུན་དགའ་བུ་ཁྲིད་ཀྱི་དོན་དུ་ཐང་སྐུ་གསུམ། བརྒྱད་སྟོང་པ། ཤེར་ཕྱིན་སྣ་ཚོགས་གླེགས་བམ་བཞེངས་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་(༢༦༠ན) ― GLG021_Page_0521 ―
[མ་དཔེ་གཟིགས་ན་འདིར་གནོན།]
པ་ངག་དབང་དགེ་ལེགས་སོ། །ཉེར་གསུམ་སྲང་གི་གྲངས་ལྡན་དངུལ་དཀར་གྱི། །བུམ་བཟང་སྔགས་རམས་ངག་དབང་དགེ་ལེགས་ཀྱི། །རྣམ་པར་རྒྱལ་བ་ཕན་བདེ་འབྱུང་བའི་གནས། །ལེགས་བཤད་གླིང་དུ་དང་བས་ཉེར་ཕུལ་དགེས། །གནས་སྐབས་ལྷ་མིའི་བདེ་སྐྱིད་ལ་སྤྱོད་ཅིང༌། །ཉོན་མོངས་ལྔ་དག་ཕུང་ལྔ་གནས་འགྱུར་བ། །ཡེ་ཤེས་ལྔ་ལྡན་རིགས་རྣམས་ཀུན་གྱི་བདག །མངོན་གྱུར་རང་གཞན་དོན་གཉིས་ལྷུན་གྲུབ་ཤོག །ཅེས་རྩེས་ཐང་དཔལ་གྲོང་སྔགས་རམས་པས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་བནྡེས་བཀོད་པ་ཛ་ཡནྟུ། །ལུས་ངག་ཡིད་གསུམ་སྤྱན་རས་གཟིགས་དབང་གིས། །བྱིན་རླབས་བློ་ལྡན་བཟང་པོའི་བག་ཆགས་མཐུས། །རྒྱ་མཚོའི་མཐའ་ཀླས་འགྲོ་འདྲེན་མགོན་ཁྱོད་ཀྱིས། །སྐྱེ་བར་བཤེས་མཛད་རྗེས་སུ་འཛིན་པར་ཤོག །འཇིག་རྟེན་དབང་ཕྱུག་བོད་འབངས་གཉའ་བའི་ཁྲིར། །བཙད་པོའི་ལྷ་གཅིག་སླར་ཡང་གང་ཅན་རྗེར། །སྲོང་བཙན་སྒམ་པོར་བསྟན་དེས་སྐྱེ་བ་ཀུན། །ལུས་རྗེས་གྲིབ་མ་བཞིན་དུ་སྐྱོང་བར་ཤོག །ལྷ་ཡི་རྒྱལ་དང་ཐོ་རི་སྙན་ཤལ་གྱི། །རྟེན་འབྱུང་དུས་བབས་ཕྱི་དར་བསྟན་པའི་སྲོག །འཛིན་མཛད་འབྲོམ་སྟོན་རྒྱལ་བའི་འབྱུང་གནས་ཀྱི། །ཞབས་པད་རྡུལ་དམར་གཙུག་ཏུ་རྟག་ལྷུང་ཤོག །མི་འགྱུར་དད་བརྟན་ཁྲི་སྲོང་ལྡེ་བཙན་ཞབས། །དམ་ཆོས་སྒྲོན་མེ་ལེགས་སྤར་སྔོན་གོམས་ཅན། །དགེ་འདུན་གཙོ་བོར་མཁས་གྲུབ་གར་བསྒྱུར་བའི། །རྣམ་ཐར་བྱང་ཆེན་དེ་(༢༦༠བ) ― GLG021_Page_0522 ―
[མ་དཔེ་གཟིགས་ན་འདིར་གནོན།]
སྲིད་འཛིན་ནུས་ཤོག །དཀོན་ཅོག་གསུམ་འབངས་ཁྲི་རལ་ཀསྨི་རའི། །རྣལ་འབྱོར་ཉེར་སྤྱོད་དགེ་ཚོགས་ལ་འདུན་ཐུགས། །རྒྱ་མཚོ་ལྟར་འཁྱིལ་དབྱངས་ཅན་བཞད་པའི་གཏེར། །སྒོ་འཕར་ཚེ་རབས་ཀུན་ཏུ་འབྱེད་ནུས་ཤོག །དགེ་བའི་དཔལ་ལྡན་བརྩེ་ཆེན་སྙིང་པོ་དང༌། །མངའ་བདག་ལས་འཕྲོའི་ཉི་ཟེར་སྣང་བ་ཆེས། །བགྲང་ཡས་ལུས་ཅན་བསོད་ནམས་རྒྱ་མཚོའི་ཞིང༌། །རོ་བདའི་སྙེ་མར་རྟག་ཏུ་ལོངས་སྤྱོད་ཤོག །གཡུ་བྲག་དགེ་འབུམ་པདྨ་བཛྲ་ཡི། །རིགས་སད་བདེ་ཆེན་ཆོས་རྒྱལ་ཡོན་ཏན་གཏེར། །རྒྱ་ཆེའི་མཚོ་ལྟར་དཔག་དཀའི་འཕྲིན་ལས་རྒྱུན། །འཁོར་བ་ཇི་སྲིད་བདག་སྙིང་ལ་འཇུག་ཤོག །ཅེས་གདན་ས་ཆེན་པོ་དགའ་ལྡན་གྱི་འཇམ་དབྱངས་ལྔ་པ་བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་ངག་དབང་དཀོན་ཅོག་ཉི་མས་ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་གྲ་ཚར་བཞེངས་པའི་རྒྱབ་ཡིག་སྨོན་ལམ་དང་འབྲེལ་བ་རྩོམས་ཤིག་པར་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སིདྡྷི་རསྟུ། །འོད་མཚན་སྟོང་ཕྲག་ཟེར་འཕྲེང་མཛོད་སྤུ་ནས། །འཕྲོས་པའི་འཁོར་འདས་གདུང་སེལ་གར་གྱི་དབང༌། །བདེ་ལྡན་ཞིང་དུ་ཉིང་མཚམས་སྦྱར་མ་ཐག །འདབ་སྟོང་ཟེའུ་འབྲུར་བརྫུས་ཏེ་སྐྱེ་བར་ཤོག །རྣམ་དཔྱོད་ཨུཏྤལ་གྱིས་བཏེག་ལེགས་བཤད་ཀྱི། །རལ་གྲིས་འཁྲུལ་པའི་དྲ་བ་ཡོངས་གཅོད་པ། །བློ་བཟང་སྙན་གྲགས་འབར་བའི་རིང་ལུགས་ལ། །ཚེ་རབས་ཀུན་ཏུ་འཇུག་པར་བདག་བྱིན་རློབས། །ངག་དབང་ཟུར་(༢༦༡ན) ― GLG021_Page_0523 ―
[མ་དཔེ་གཟིགས་ན་འདིར་གནོན།]
ཕུད་ལྔ་པའི་བློ་གྲོས་གཏེར། །སྐལ་བཟང་གདུལ་བྱར་སྒོ་བརྒྱ་འབྱེད་ནུས་པ། །རྒྱ་ཆེ་ཆོས་ཀྱི་གནས་དོན་མཚོ་བྱུང་མས། །སྩལ་བའི་བཤེས་ཁྱོད་ཐུགས་རྗེས་རྟག་ཏུ་བཟུང༌། །འཕྲིན་ལས་རིགས་འཛིན་དར་ནག་བེར་ཆེན་སྐུ། །ལངྐའི་རྒྱལ་པོར་ཀརྨ་གུ་རུའི་གར། །ཆེར་ཁྲོས་ཡང་གསང་དྲག་པོས་བདུད་བཞིའི་དཔུང༌། །ཆོམས་ལ་སྣང་སྲིད་དྲེགས་པ་བྲན་འཁོལ་མཛོད། །ཞི་ཁྲོ་ནས་བཟུང་གྲོང་རྒྱུ་འགོང་པོའི་བར། །ཕྱག་རྒྱ་མ་ལུས་ཟིལ་གནོན་སྟང་སྟབས་ཀྱི། །ཁྲོ་གཏུམ་ཕལ་ཆེར་ལག་ཆ་དུས་གཅིག་ཏུ། །འཆོར་བྱེད་འཇམ་དཔལ་རྡོ་རྗེས་རྟག་བྱིན་རློབས། །ཞེས་གོང་དཀར་བློ་བཟང་དཔལ་འབྱོར་གྱིས་འོད་དཔག་མེད། རྗེ་བཙུན་བཙོང་ཁ་པ་ཆེན་པོ་འདི་གའི་འདྲ་འབག །ཡང་གསང༌། འཇམ་དཔལ་ཕྱག་རྒྱ་ཟིལ་གནོན་བཅས་པའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འཇམ་དབྱངས་མི་ཡི་ཟློས་གར་ཅན། །བློ་བཟང་གྲགས་པས་དེང་ནས་བཟུང༌། །རྣམ་འདྲེན་ཐོབ་མིན་དེ་སྲིད་དུ། །འབྲལ་མེད་དགེ་བའི་བཤེས་མཛད་ཤོག །ཆེ་མཆོག་ལྷ་ཚོགས་ཞི་ཁྲོའི་མཐུ། །ཡོངས་འདུས་ཟིན་གནོན་བཞད་པ་རྩལ། །སྐྱེ་བར་རྡོ་རྗེའི་སློབ་དཔོན་དུ། །གྱུར་ནས་ངེས་གསང་ལམ་ཁྲིད་ཤོག །བགྲང་ཡས་བདེ་བར་གཤེགས་པ་ཀུན། །དཀྱིལ་འཁོར་གཅིག་འདུས་སྒྲུབ་སྡེ་བརྒྱད། །ལྷ་སྔགས་ཡེ་ཤེས་ཆོ་འཕྲུལ་གྱིས། །རོལ་པ་ཆེན་པོར་(༢༦༡བ) ― GLG021_Page_0524 ―
[མ་དཔེ་གཟིགས་ན་འདིར་གནོན།]
འབྱམས་ཀླས་ཤོག །ཅེས་བློ་བཟང་དོན་ཡོད་ཀྱིས་རྒྱལ་བ་བཙོང་ཁ་པ། །འདི་གའི་གཟུགས་བརྙན། བཀའ་བརྒྱད་གསུམ་གྱི་དམིགས་རྟེན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འཇམ་དབྱངས་དགའ་བའི་དཤེས་གཉེན་སྣང་བརྙན་ལ། །རྒྱལ་དབང་པད་འབྱུང་ཀུན་མཁྱེན་བཙོང་ཁ་པ། །རིགས་འཛིན་སྤྲུལ་སྐུ་འཕགས་མོས་བསྐོར་བཞེངས་མཐུས། །དམ་པའི་བཤེས་ཀྱིས་རྟག་ཏུ་རྗེས་འཛིན་ཞིང༌། །འཆི་མེད་ཚེ་ཡི་བཏུང་བས་འཚོ་བ་དང༌། །སེང་གེ་གླང་ཆེན་ཆོམ་རྐུན་ལྟོ་འགྲོ་མེ། །ལྕགས་སྒྲོག་ཤ་ཟ་རྒྱ་མཚོའི་འཇིགས་པ་སོགས། །སྲིད་ཞིའི་རྒུད་པ་ཀུན་ལས་ཐར་བར་ཤོག །ཅེས་པ་འདིའང་ཟུར་ཁང་དོན་གྲུབ་དབང་རྒྱལ་གྱིས་དད་རྟེན་བྲིས་སྐུའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །སྣང་སྲིད་ཟིལ་གནོན་པདྨ་ཐོད་ཕྲེང་གི །སྤྱན་སྔར་ཁས་བླངས་མཐའ་འོག་རྒྱལ་པོ་ཆེ། །སྔོན་གྱི་དམ་ཚིག་གཉེན་པོ་མི་གཡེལ་བར། །བྲིས་རྟེན་འདི་ལ་གཡོ་མེད་ཏིཥྠ་ནྟུ། །རྒྱལ་ཀུན་ངོ་བོ་རྗེ་བཙུན་བཙོང་ཁ་པའི། །བསྟན་པ་སྤྱི་དང་བྱེ་བྲག་གྲྭ་ཚང་སྨད། །ཐོས་དང་བསམ་བར་རབ་ཏུ་ཡོངས་འདུས་གྲར། །བཤད་སྒྲུབ་དཔལ་འབྱོར་དབྱར་མཚོ་ལྟར་འཕེལ་མཛོད། །མི་མཐུན་བགེགས་རིགས་ཀུན་ཞི་འཁོར་འདས་ཀྱི། །ཡོན་ཏན་རབ་རྒྱས་ཆོས་སྲིད་དབང་དུ་སྡུས། །གནོད་བྱེད་ཚར་གཅོད་འཕྲིན་ལས་རྣམ་པ་བཞི། །ཐོགས་(༢༦༢ན) ― GLG021_Page_0525 ―
[མ་དཔེ་གཟིགས་ན་འདིར་གནོན།]
མེད་ལྷུན་གྱིས་གྲུབ་པའི་དཔུང་བསྐྱེད་མཛོད། །ཅེས་ཆོས་སྡེ་ཆེན་པོ་སེ་ར་ཐེག་ཆེན་གླིང་གི་སྨད་གྲྭ་ཚང་གི་རིགས་ལུང་དགེ་སྐོས་ཀྱིས་མཐའ་འོག་རྒྱ་པོའི་བྲིས་ཐང་བཞེངས་པར་རྒྱབ་ཡིག་ཏུ་འཕྲིན་བཅོལ་དགོས་ཚུལ་འཆད་ཉན་པ་བློ་བཟང་དོན་གྲུབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཡིད་བཞིན་མཚོ་འཁྱིལ་འདབ་སྟོང་ཟེའུ་འབྲུའི་དབུས། །མངལ་གྱི་དྲི་བྲལ་ཚེ་དབང་ཐོད་ཕྲེང་རྩལ། །ཐུགས་རྗེས་ཆེར་ཆེར་སྙིགས་དུས་མྱུར་འཇུག་ཤུགས། །དྲག་འབར་བྱིན་ཆེན་འབེབས་པར་གསོལ་བ་འདེབས། །ཨ་དབྱིངས་ཤེས་རབ་འཚོ་རྒྱལ་ཌཱ་ཀིའི་གཙོ། །ཝཾ་ཡིག་ཐབས་མཆོག་ཟུང་འཇུག་ཞལ་ལུང་ལས། །རྡོ་རྗེ་ཐོགས་མེད་རྩལ་དུ་ཉེར་བཏགས་པ། །གངས་ཅན་བསྟན་པའི་དཔྱིད་དུ་བརྟན་པར་ཤོག །སྐྱབས་གནས་རྩ་གསུམ་བྱིན་རླབས་བདེན་བརྗོད་མཐུས། །མི་ཕྱེད་སྙིང་ནས་ལེགས་བཏབ་སྨོན་ལམ་གྱི། །འབྲས་བུ་ཡོངས་འདུའི་བཅུད་ལ་མིག་མི་འཛུམ། །སྤྱོད་པའི་སྐལ་བཟང་གཉིས་པར་བདག་འགྱུར་ཤོག །ཅེས་སྔགས་པ་དབུས་སྡིངས་པ་བློ་བཟང་འཕྲིན་ལས་དབང་ཕྱུག་གིས་བསྐུལ་བ་ལྟར་ཟ་ཧོར་གི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འབྱམས་ཀླས་འཁྲུལ་པའི་གྲོང་དུ་རང་རིག་རྩལ། །པདྨཱ་ཀཱ་རར་ཤར་བའི་ཞལ་དྲོད་ལས། །རྡོ་རྗེ་ཐོགས་མེད་རྩལ་དུ་ཉེར་བཏགས་པ། །དྲིན་ཅན་བླ་མ་མཆོག་ལ་གསོལ་བ་འདེབས། །ཚེ་མཐའ་ཡས་པའི་ཕྱག་གི་བུམ་བཟང་ལས། །བདུད་རྩིས་ལྕགས་ཁམས་(༢༦༢བ) ― GLG021_Page_0526 ―
[མ་དཔེ་གཟིགས་ན་འདིར་གནོན།]
སྲོག་རྩའི་ཀ་བ་ཡི། །ཨ་ཧཾ་མི་འགྱུར་འཆི་མེད་རིགས་འཛིན་དུ། །ཉེར་འགྲུབ་བསྐལ་བརྒྱར་མི་གཡོ་བརྟན་པར་ཤོག །ཆོས་དབྱིངས་འདུས་མ་བྱས་པའི་ཀློང་ཡངས་སུ། །བདག་སོགས་གྲོལ་མིན་དེ་སྲིད་མགོན་ཁྱོད་ཀྱིས། །བསྐྱེད་རྫོགས་རྫོགས་ཆེན་ལམ་སྟོན་བཤེས་མཛད་ནས། །ཚེ་རབས་ཀུན་ཏུ་འབྲལ་མེད་རྗེས་འཛིན་ཤོག །ཅེས་པ་འདིའང་འོན་པ་ངག་དབང་བཀྲ་ཤིས་ཀྱིས་ཚིགས་བཅད་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །མཚམས་སྤྲིན་སྣང་བ་རབ་གསལ་གཞོན་ནུའི་སྐུ། །མཚན་བཟང་འཇོ་སྒེག་ཟུར་ཕུད་ལྔ་པ་ཅན། །དཔུང་སྟེང་ཨུཏྤལ་གྱིས་བཏེག་རལ་གྲི་ཡིས། །བདག་སོགས་འཁྲུལ་པའི་དྲ་བ་བཅད་དུ་གསོལ། །ཆོས་ཀུན་སྙིང་པོ་ཤེར་ཕྱིན་གླེགས་བམ་གྱི། །དགོངས་དོན་ཇི་བཞིན་གནས་ལུགས་མ་ལུས་པ། །མངོན་སུམ་མཐོང་ནས་འཁོར་བའི་འཇིགས་ཚོགས་ལས། །རྣམ་པར་ཉེར་གྲོལ་ལམ་བཟང་རྙེད་པར་ཤོག །མགོན་པོ་ཁྱོད་ལ་ལྷག་པའི་ལྷར་བཟུང་མཐུས། །སྒྱུ་འཕྲུལ་དྲ་བའི་རྒྱུད་ཀྱི་དོན་རྣམས་ཀུན། །ཐོས་བསམ་སྒོམ་པས་གཏན་ལ་ལེགས་ཕབ་ནས། །ཟུང་འཇུག་སྐུ་བཞི་མངོན་དུ་ཐོབ་པར་ཤོག །དུས་དགྲར་འཇམ་དཔལ་ཁྲོས་པའི་ཞི་ཁྲོ་ནས། །གྲོང་རྒྱུ་འགོང་པོའི་བར་གྱི་སྣང་སྲིད་ཀུན། །སྟང་སྟབས་ཕྱག་རྒྱ་གཅིག་གིས་ཟིལ་གནོན་པ། །དྲན་པའི་མོད་ལ་བདུད་བཞི་མཐར་བྱེད་ཤོག །དྲག་སྔགས་སྤུ་གྲི་རྣོན་པོས་ལོག་འདྲེན་སྙིང༌། །རབ་གཅོད་(༢༦༣ན) ― GLG021_Page_0527 ―
[མ་དཔེ་གཟིགས་ན་འདིར་གནོན།]
ལས་སྒྲུབ་འཇམ་མགོན་ཀུན་ཏུ་བཟང༌། །རང་ཞལ་མཐོང་བས་འདི་ཕྱི་བར་གསུམ་གྱི། །མགོན་པོ་ཁྱོད་ཀྱིས་རྗེས་སུ་འཛིན་པར་ཤོག །འཁྲུལ་ངོར་ཤར་བའི་དགྲ་རྣམས་མཆོད་རྟེན་ཞབས། །བཟློག་བསད་མནན་གཏད་ལས་ཀྱང་ལུགས་འབྱུང་དུ། །ཡོངས་བསྒྲལ་རྣམ་ཤེས་ལུགས་ལྡོག་ཉེ་བའི་ལམ། །འཕོ་མེད་ཆོས་སྐུའི་ཀློང་དུ་འདྲེན་པར་ཤོག །ཅེས་པ་འདིའང་རི་བོ་ཆོས་གླིང་པ་ཆོས་རྒྱལ་མཚན་གྱིས་འཇམ་དབྱངས་དང༌། ཕྱག་རྒྱ་ཟིལ་གནོན་གྱི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཡེ་ཤེས་འཇའ་ཚོན་སྣ་ལྔའི་གུར་ཁྱིམ་དབུས། །གར་དབང་མཚན་དཔེའི་གཟི་ཡིས་འཆི་བདག་མུན། །མཐར་བྱས་ཕན་བདེའི་སྣང་བ་འགྲོ་ཀུན་གྱི། །སྙིང་ལ་སིམ་པའི་དགའ་སྟོན་རྟག་ཏུ་རྩོལ། །གསུང་དབྱངས་དྲུག་ཅུར་འཁྲོལ་བའི་ངག་གི་དབང༌། །ངུར་སྨིག་གོས་ཀླུབས་བློ་བཟང་གྲགས་པ་ཡི། །རྒྱ་ཆེན་རིང་ལུགས་དབྱར་མཚོ་ཇི་བཞིན་དུ། །འཕེལ་མཛད་བསྐལ་བརྒྱར་གཡོ་མེད་བརྟན་པར་ཤོག །ཀུན་ཏུ་དགའ་བ་ཆོས་ནོར་འདོད་ཐར་སྡེ། །གདོང་བཞིའི་ཞལ་སྒོ་ལས་འོངས་འདུས་ཚོགས་གྲ། །སྲིད་མཐའི་བར་དུ་བླ་ནས་བླར་འཕེལ་བའི། །སྨོན་པའི་རེ་བ་ཡིད་བཞིན་འགྲུབ་གྱུར་ཅིག །སངས་རྒྱས་དེའི་གསུང་དགེ་འདུན་གཏན་གྱི་སྐྱབས། །ལེགས་བྲིས་དྲང་སྲོང་ངག་གི་མཐུ་ལྡན་པ། །ཁྱད་པར་གནས་སྲུང་རྒྱལ་པོ་ཤིང་བྱ་ཅན། །དཀར་ཕྱོགས་སྐྱོང་བས་འཕྲིན་ལས་ལྷུན་གྲུབ་ཤོག །ལྷག་བསམ་མཁའ་ལ་སྨོན་ལམ་རྟ་བདུན་པ། །བདེན་ཚིག་དྲོད་(༢༦༣བ) ― GLG021_Page_0528 ―
[མ་དཔེ་གཟིགས་ན་འདིར་གནོན།]
ཀྱི་སྙེ་མ་གཡུར་ཟ་བ། །འཛད་མེད་འབྲས་བུར་དེང་ནས་ཚེ་རབས་ཀུན། །ལོངས་སུ་སྤྱོད་པའི་སྐལ་བཟང་རྙེད་པར་ཤོག །ཅེས་དགའ་བ་གདོང་གནས་སྲུང་རྒྱལ་པོ་ཤིང་བྱ་ཅན་གྱི་སྔགས་རམས་པ་དོན་གྲུབ་རྒྱ་མཚོར་འདི་གའི་འདྲ་འབག་གསར་དུ་བཞེངས་ནས་དགོན་པར་སྐྱེལ་བ་དང་ལྷན་དུ་རིང་འཚོའི་ཚིགས་བཅད་ཀྱང་དགོས་པའི་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བདུད་ལས་རྣམ་པར་རྒྱལ་བ་ཞི་དང་ཁྲོའི། །དངོས་གྲུབ་ཕན་བདེའི་ལེགས་ཚོགས་འབྱུང་བའི་སྒོ། །བཤད་སྒྲུབ་རིགས་འཛིན་གླིང་དུ་ཕུལ་བའི་དགེ །ཆད་མེད་དབང་གི་ཆུ་བོས་རྒྱུད་སྨིན་ཤོག །ཅེས་དངུལ་སྲང་ཉི་ཤུ་རྩ་གསུམ་ལས་གྲུབ་པའི་རྣམ་རྒྱལ་བུམ་པ་གནུབས་བཙུན་ཟིལ་གནོན་རྡོ་རྗེས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །སྨིན་བྱེད་དབང་གི་ཆུ་བོ་འཁྱིལ་བའི་སྣོད། །ཕན་བདེའི་འབྱུང་གནས་ལེགས་བཤད་གླིང་ཆེན་པོར། །ཕུལ་བས་འདི་དང་ཕྱི་མའི་དོན་རྣམས་ཀུན། །འགྲུབ་པའི་སྐལ་བ་བཟང་པོར་འགྱུར་བར་ཤོག །ཅེས་དངུལ་སྲང་ཉི་ཤུ་རྩ་གསུམ་ལས་གྲུབ་པའི་རྣམ་རྒྱལ་བུམ་པ་གནུབས་བཙུན་ཟིན་གནོན་རྡོ་རྗེས་འཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བགྲང་ཡས་དཀྱིལ་འཁོར་བྱེ་བའི་སྤྱན་ལྔ་རུ། །གསལ་བྱེད་མར་མེ་སྦར་སྣོད་དངུལ་དཀར་ཀོང༌། །ཕུལ་བས་སྒྲིབ་གཉིས་དེ་འབྲས་སྨག་རུམ་རྣམས། །ཉེར་སངས་འཁོར་འདས་ཡོན་ཏན་ཀུན་ཐོབ་ཤོག །ཅེས་འཕྱོས་(༢༦༤ན) ― GLG021_Page_0529 ―
[མ་དཔེ་གཟིགས་ན་འདིར་གནོན།]
པ་སྔགས་རམས་པ་ནམ་མཁའ་རྒྱ་མཚོས་གྲྭ་སྐོར་བྱས་པའི་ཚེ་ཕན་བདེ་ལེགས་བཤད་གླིང་དུ་དངུལ་སྲང་ཉེར་གསུམ་གྱི་མཆོད་ཀོང་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཟག་མེད་བདུད་རྩི་རབ་འཁྱིལ་པད་འདབ་སྣོད། །ཞོས་ལྷག་དངུལ་དཀར་བཅུ་བཞིའི་སྲང་གྲངས་ལས། །ལེགས་སྒྲུབ་བཀྲས་རབ་དཀའ་བཅུ་ངག་ལྷུན་པས། །ཕུལ་མཐུས་འདི་དང་གཏན་མདུན་འགྲུབ་པར་ཤོག །ཅེས་རྣམ་པར་རྒྱལ་བའི་ཕན་བདེ་ལེགས་བཤད་གླིང་གི་དགེ་སྐོས་ཐོག་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྒྱལ་ཀུན་ཐུགས་རྗེའི་ཟློས་གར་སྤྲུལ་པའི་སྐུ། །རང་བཞིན་ལོངས་སྐུའི་ཞིང་དུ་ཉེར་བསྡུས་ཏེ། །ངོ་བོ་ཆོས་སྐུ་ཡེ་དག་དབྱིངས་འདྲེས་པ། །རྣམ་སྤྲུལ་གསར་པའི་དགའ་སྟོན་སླར་གསལ་ཤོག །ངག་དབང་འཇམ་དཔལ་ཀུན་བཟང་པདྨ་འབྱུང༌། །འཕྲིན་ལས་སྒོ་བརྒྱ་དབྱེ་བའི་རིག་པ་འཛིན། །ཡང་སྲིད་ཀླ་ཀློའི་ཡུལ་དུ་མ་བཟུང་བར། །དབུས་གཙང་དག་པའི་ལྗོངས་སུ་འབྱོན་པར་ཤོག །སེལ་ཅན་རྙོག་མའི་རྫིང་བུ་དང་བྲལ་བའི། །རིན་ཅེན་ཕུན་ཚོགས་སྨིན་གྲོལ་དྭངས་མའི་མཚོར། །པད་འབྱུང་རིང་ལུགས་ཟླ་གཟུགས་ཉ་གང་བ། །འགྲིབ་མེད་བསྟན་པའི་གསལ་བྱེད་འཆར་བར་ཤོག །བཻ་རོའི་ཐུགས་སྤྲུལ་པྲཛྙ་ར་སྨི་ཡི། །བཞེད་གཞུང་རབ་སྤེལ་དཔལ་གྱི་རི་བོའི་ངོས༌། །ཐེག་མཆོག་སྒྲུབ་པའི་འདུས་སྡེའི་མགོན་གཅིག་པུར། །བསམས་བཞིན་སྐྱེ་བའི་ཟློས་གར་མྱུར་འཛིན་ཤོག །རྩ་(༢༦༤བ) ― GLG021_Page_0530 ―
[མ་དཔེ་གཟིགས་ན་འདིར་གནོན།]
གསུམ་ཐུགས་རྗེའི་ཉི་མ་ཡོངས་སྨིན་པས། །རྣམ་དག་སྨོན་ལམ་སྙེ་མ་གཡུར་ཟ་བ། །འདོད་དོན་འབྲས་བུ་དུད་པའི་རོ་བདའི་ཟས། །མྱོང་བའི་སྐལ་བ་བཟང་པོར་བདག་འགྱུར་ཤོག །ཅེས་དཔལ་རི་སྤྲུལ་སྐུ་ངག་དབང་པདྨ་འཕྲིན་ལས་མཁར་ཆེན་བཟའི་ཐུགས་ཀར་བསྡུས་པའི་ཚེ་སྤྲུལ་སྐུ་མྱུར་འབྱོན་གྱི་སྨོན་ལམ་དགོས་ཚུལ་དཔལ་རི་སྤྱི་སོས་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྟོད་ཧོར་ས་ཆེན་སྐྱོང་བའི་གན་མཛོད་ཀྱི། །རྣམ་བཀྲ་གོས་ཡོལ་རིགས་འཛིན་འདུས་གླིང་དུ། །ཕུལ་དགེས་བསྟན་དང་སྐྱེ་རྒུའི་བདེ་སྐྱིད་རྣམས། །རབ་སྤེལ་རྡོ་རྗེའི་སློབ་དཔོན་བརྟན་པར་ཤོག །མི་ཕྱེད་དད་མོས་ཞིང་ས་གཤིན་པོ་རུ། །ལེགས་བྱས་ས་བོན་བསྐྲུན་པའི་མྱུ་གུའི་སྐྱེད། །ཉེར་བསྲིངས་དུས་ཀུན་ཡིད་སིམ་ཚོར་བ་ཡི། །རོ་བདའི་སྙེ་མར་ལོངས་སུ་སྤྱོད་ནུས་ཤོག །རྒྱལ་ཁབ་གོང་རི་དཀར་པོའི་བྱ་འདབས་ནས། །ངག་དབང་བྱམས་པ་རིགས་བརྒྱུད་དཔལ་འབྱོར་རྣམས། །དབྱར་གྱི་ཆུ་གཏེར་ལྟ་བུར་ཡོངས་འཕེལ་བར། །རབ་འབྱམས་ཞི་ཁྲོའི་ཚོགས་ཀྱིས་དེང་བྱིན་རློབས། །ཞེས་དཀར་བྲག་པ་ངག་དབང་བྱམས་པས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་ཡོལ་བ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །དྭངས་མཚོར་འདབ་སྟོང་བཞད་པའི་གེ་སར་སྟེང༌། །ལོ་བརྒྱད་ལང་ཚོ་དར་དྲག་འདྲེན་བྱེད་ལ། །བདུད་རྩིའི་མཆོག་སྦྱིན་དུས་གསུམ་རྒྱལ་བའི་གཙོ། །པདྨ་ཀ་རས་ཚེ་རབས་ཀུན་ཏུ་སྐྱོངས། །འཛམ་བུ་ཏྲི་ཤའི་མཚན་(༢༦༥ན) ― GLG021_Page_0531 ―
[མ་དཔེ་གཟིགས་ན་འདིར་གནོན།]
མས་མཛེས་གླིང་འདིར། །བགྲང་ཡས་མཛད་བཟང་འཕྲུལ་པོ་ཆེ་ཡི་ཞིང༌། །ངོ་མཚར་བཀོད་པ་དམན་བློའི་ཡུལ་འདས་པའི། །འདྲེན་བྱེད་བདུད་རྩི་ལེགས་བྱས་ཤིང་རྟས་དྲངས། །མཐོང་ཐོས་དྲན་རེག་ཡིད་ཅན་མངོན་མཐོ་དང༌། །ངེས་ལེགས་ལམ་ལ་སྦྱོར་བའི་ས་བོན་རྣམས། །དད་མོས་དྲོད་གཤེར་གྱིས་བསྐྱེད་ཨ་མྲའི་ལྗོན། །རོ་བདའི་འབྲས་བུར་རྟག་ཏུ་སྤྱོད་འདི་རྨད། །ཆགས་བྲལ་ཆགས་པའི་ཉམས་ལྡན་ཟླ་བའི་བཞིན། །གངས་རིའི་ནུ་འབུར་སྨིན་མའི་འཁྲི་ཤིང་ཅན། །མཚོ་སྐྱེས་རྡོ་རྗེ་རྩེ་འཇོའི་གར་མཁན་མ། །པད་འབྱུང་བདག་སོགས་བདེ་ཆེན་ས་ལ་སྦྱོར། །སོ་ཐར་ཁྲིམས་འཆལ་ལྟ་གཞོག་བྱང་སེམས་སྔགས། །ཆེས་ཕྲ་ལྟུང་བས་མ་གོས་སྡོམ་བརྩོན་མཆོག །པདྨ་སམྦྷའི་ཚུལ་ཁྲིམས་ཙནྡན་དྲིས། །ཉོན་མོངས་གདུང་གཞིལ་དེ་རྗེས་འཇུག་བྱིན་རློབས། །མཁྱེན་སྤྱན་དགུ་ཚིགས་ཞགས་པས་ཤེས་བྱའི་མཁའ། །ཕ་མཐའ་བཅིངས་ཚེ་ལྐོག་ཏུ་གྱུར་པའི་ཆོས། །མ་རྙེད་བློ་ལྡན་མཆོག་སྲེད་ངང་ཚུལ་དིང༌། །མངོན་གྱུར་རྣམ་པ་ཐམས་ཅད་མཁྱེན་བརྙེད་ཤོག །ཞབས་སེན་ཟླ་བ་འཁོར་འདས་ཡོངས་ཀྱི་གཙུག །ཤར་བའི་མོད་ལ་བརྟན་གཡོ་མ་ལུས་པ། །དབང་སྡུད་པདྨ་རྒྱལ་པོ་ཁྱོད་བཞིན་དུ། །བདག་སོགས་ལུས་ཅན་མཐའ་དག་འགྱུར་བར་ཤོག །འགྲོ་བའི་བདེ་སྐྱིད་མྱུ་གུ་སྨིན་བྱེད་པ། །འབུམ་ཕྲག་ཐུགས་རྗེའི་ཉི་མ་འོད་ཟེར་གྱིས། །གང་འདུལ་འཕྲིན་ལས་འཇུག་པ་སྲིད་མཐའི་བར། །ཚད་མེད་རྣམ་ཐར་བདག་གིས་འཛིན་ནུས་ཤོག །ཤཱཀྱ་སེང་གེའི་རྒྱུད་ཀྱི་ང་རོའི་དབྱངས། །འཇིགས་མེད་མགྲིན་པར་བླངས་པས་བདུད་བཞིའི་སྡེ། །གླང་ཆེན་སྨྱོན་པའི་ཀླད་འགེམས་བརྟུལ་ཞུགས་རྩལ། །འབད་མེད་ལྷུན་གྲུབ་དབང་ཕྱུག་བདག་ལ་རྩོལ། །གཏུམ་དྲག་རྡོ་རྗེ་རབ་འབར་ཁྲོ་བོ་ཆེ། །སེང་གེའི་སྒྲ་ཆེན་བསྒྲགས་པས་ཏིརྟིཀ །བགྲང་(༢༦༥བ) ― GLG021_Page_0532 ―
[མ་དཔེ་གཟིགས་ན་འདིར་གནོན།]
ཡས་རི་དྭགས་མཐར་བྱས་ཐུབ་པའི་བསྟན། །འཛིན་སྐྱོང་སྤེལ་བའི་རྗེས་སུ་སློབ་པར་ཤོག །འཆོལ་བའི་ཁྲོ་རྒྱལ་རྡོ་རྗེ་གྲོ་བོ་ལོད། །སྟང་སྟབས་ཙམ་གྱིས་དྲེགས་པ་སྡེ་བརྒྱད་ཚོགས། །ཚར་གཅོད་ལས་ལ་བཀོལ་བ་ཇི་བཞིན་དུ། །ཐོགས་མེད་རྫུ་འཕྲུལ་མཐུ་མངའ་བརྙེས་པར་ཤོག །དགེ་སྦྱོང་ཆོས་བཞི་སྤྱོད་པར་ཉེར་འདུན་གྲར། །བཅུ་ཕྲག་བཀའ་ཆེན་བཤད་དང་ཉན་པའི་འབྲས། །མཁས་གྲུབ་བྱེ་བས་ཐུབ་བསྟན་གསལ་མཛད་པ། །ཐམས་ཅད་མཁྱེན་དངོས་དེ་ཡིས་བདག་རྗེས་གཟུང༌། །ངོ་མཚར་དགེ་མཚན་ལྡན་པ་མཁའ་འགྲོའི་གླིང༌། །དཀར་མོའི་ལྗོངས་སུ་ཐོས་བསམ་སྒོམ་སྒྲུབ་ལ། །རབ་འདུན་ཆོས་ཀྱི་སྡེ་སྤེལ་འཕྲིན་ལས་རྒྱུན། །རྒྱ་མཚོའི་རླབས་ལྟར་ཡོལ་བ་མེད་དེ་བསྔགས། །བསོད་ནམས་ཞིང་སར་ཕན་བདེའི་ལོ་ཏོག་ཚོགས། །སྤེལ་ཕྱིར་རྒྱ་ཧོར་བོད་ཀྱི་འབྱོར་བའི་རྒྱུན། །མ་དྲོས་མཚོ་ཆེན་ལས་བབས་གངྒཱ་བཞིན། །ཆད་མེད་སྲིད་གསུམ་རྣམ་པར་འདྲེན་ཁྱོད་བསྔགས། །ཆིང་གིས་རིགས་བརྒྱུད་ཡོན་ཏན་རྒྱ་མཚོ་ཆེར། །བདེ་ཆེན་ཆོས་ཀྱི་རྒྱལ་པོ་ཡིད་བཞིན་ནོར། །སྲིད་ཞིའི་ཀླུ་དབང་གདེངས་ཀའི་རྩེར་འཛེགས་པ། །སྙན་གྲགས་ཕྱོགས་བྲལ་རྣར་འཇེབས་དད་པའི་སོས། །ངག་དབང་འཇམ་དབྱངས་མགྲིན་ཞུགས་བློ་ལྡན་པའི། །བཟང་པོའི་སྐལ་བ་ཟབ་བརླིང་རྒྱ་ཆེན་པོར། །མཚོ་བྱུང་ལུས་ཕྲས་འཁྱུད་པ་མི་གཏོང་བར། །ངེས་པས་འདི་ཕྱིའི་དོན་ཀུན་འགྲུབ་བར་ཤོག །ཅེས་ཟུར་ཁང་པ་དོན་གྲུབ་དབང་རྒྱལ་གྱིས་སློབ་དཔོན་སངས་རྒྱས་གཉིས་པ། གུ་རུ་མཚན་བརྒྱད་ལ་པདྨ་བཀའི་ཐང་ཡིག་ཞིང་བཀོད་ཀྱིས་བསྐོར་བ་དང་ཐམས་ཅད་མཁྱེན་པ་དགེ་འདུན་གྲུབ་སོགས་ཀྱི་སྣང་བརྙན་གྲ་ཚར་དུ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱ་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་ཨོཾ་ཨ་ཐཱ། །ས་གསུམ་ཡོངས་ཀྱི་རྣམ་འདྲེན་ཙོང་ཁ་པའི།(༢༦༦ན) ― GLG021_Page_0533 ―
[མ་དཔེ་གཟིགས་ན་འདིར་གནོན།]
།ལུགས་འཛིན་འཇམ་དབྱངས་དགའ་བའི་བཤེས་གཉེན་སོགས། །བླ་མ་ཡིད་དམ་ཆོས་སྲུང་ཐུགས་རྗེ་དང༌། །བདེན་ཚིག་མཐུ་ཡིས་དོན་རྣམས་འགྲུབ་པར་ཤོག །དགའ་ལྡན་བསྟན་པའི་ཞབས་འདེགས་མངའ་འབངས་ཚོགས། །སྐྱོང་བའི་རྣམ་དག་བསམ་པ་ཚུལ་བཞིན་དུ། །རབ་བསྒྲུབ་ཚེ་དང་བསོད་ནམས་དབང་ཐང་དཔལ། །བླ་ནས་བླར་འཕེལ་སྐལ་བཟང་རྙེད་པར་ཤོག །ཕ་རོལ་ལོག་འདྲེན་ཉེར་འཚེའི་སྨག་རུམ་སངས། །བཀྲ་ཤིས་གཡང་ཆགས་ཉི་འོད་གཟི་འབར་བར། །ལེགས་ལྡན་ཕྱག་དྲུག་འཆི་བདག་གཤིན་རྗེའི་རྒྱལ། །འདོད་ཁམས་མ་སོགས་སྲུང་མས་གདོང་གྲོག་མཛོད། །ཅེས་མཆོག་དམན་ཡོངས་ཀྱི་ཁ་ཏོན་འཁྱེར་བདེའི་སྨོན་ལམ་བདེན་བརྗོད་འདི་ལྟ་བུ་ཞིག་དགོས་ཞེས་ཨེ་ཁེ་པཎྜི་ཏས་དོན་གཉེར་ཆེན་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བདེ་ལྡན་ཞིང་གི་མགོན་པོ་གར་གྱི་དབང༌། །ཡིད་བཞིན་འཁོར་ལོའཆི་མེད་མཆོག་སྦྱིན་མཁན། །རྣམ་པར་རྒྱལ་མ་སོགས་ཀྱིས་ཐུགས་རྗེའི་དཔུང༌། །སྐྱེད་ལ་དེང་འདིར་འདོད་པའི་འབྲས་སྨིན་མཛོད། །སངས་རྒྱས་སྟོང་ལས་པད་དཀར་བཞིན་བཇགས་པ། །དོན་ཀུན་གྲུབ་བསྟན་རྒྱ་ཆེན་འཛམ་གླིང་གཞིར། །དབྱར་མཚོ་ལྟར་སྤེལ་གནམ་སའི་དབང་ཕྱུག་ཆེའི། །སྐུ་ཚེ་གཡུང་དྲུང་སྲོག་སོང་བརྟན་པར་ཤོག །ཀ་བ་མེད་པ་གནམ་གྱི་མཐོངས་ནས་སྒོ། །རབ་ཕྱེ་དུས་ཀྱི་བདག་པོའི་ལས་ཤུགས་བཙན། །དར་དྲག་ཁྲིམས་གཉིས་གཉའ་ཤིང་སྐྱེ་རྒུ་ཡི། །ཕྲག་པར་ལྕི་བས་རྫོགས་ལྡན་གསར་བསྐྲུན་ཤོག །བསོད་ནམས་འོད་གཟི་ཡོངས་འབར་རྩིབས་སྟོང་ཅན། །སྟོབས་ཀྱི་འཁོར་ལོ་མཁའ་ལ་ཉེར་འཕགས་ཏེ། །ཀུན་བཟོད་ལྟོ་བར་ལེགས་བསྒྱུར་དབུ་རྨོག་བཙན། །ཆབ་སྲིད་མངའ་ཐང་བླ་ནས་བླར་འཕེལ་ཤོག །མཆོག་གསུམ་ལྷ་དང་དྲང་སྲོང་རིག་འཛིན་སོགས།(༢༦༦བ) ― GLG021_Page_0534 ―
[མ་དཔེ་གཟིགས་ན་འདིར་གནོན།]
།བདེན་ཚིག་གྲུབ་པ་རྣམས་ཀྱིས་ཉེར་བཏབ་པའི། །སྨོན་ལམ་རིན་ཆེན་དབང་གི་རྒྱལ་པོ་ལས། །འདོད་འཇོའི་ཆར་གྱིས་འཇིག་རྟེན་ཁྱབ་པར་ཤོག །ཅེས་ས་སྐྱོང་སངས་རྒྱས་རྒྱ་མཚོའི་བརྟན་བཞུགས་འདི་ནི་གངས་རིའི་ཁྲོད་ཀྱི་རིགས་གཞུང་རྒྱ་མཚོའི་འབྱུང་ཁུངས་གཅིག་པུ་བ་དཔལ་གསང་ཕུ་ནེའུ་ཐོག་གི་ཆོས་རྗེ་རྣམ་གཉིས་ཆེན་སློབ་གྲྭ་རིགས་རྣམས་ཀྱིས་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་ཛཡནྟུ། །ཛ ཡེནྡྲོ བྫཀཱ རུ ཎྱ སཱུ ཪྻ ཛྭ ལཻ རྷཱི ཧྲི དཱ བྫེཧ སཱ ས མྦྲྀ ཏཾ དྷརྨ ཀོ ཧཱི། རྒྱལ་དབང་པདྨའི་ཐུག་རྗེའི་ཉེར་ཟེར་གྱིས། །སྙིང་གི་འདབ་བརྒྱ་བཞད་པས་ཀུན་རྫོབ་ཆོས། །ཡ པཱུ རྦཱ ཏི ཀཱ ཙྪུདྡྷཔ ཪྻའུ རྨ སཽ པྲཱ ཀྲྀ ཏོ མུ ཀྟ ཏ ཀཱུལ བྷ རཾ ཛ ཡ ནྟུ། གང་ཤར་ཨ་ཏི་ཀ་དག་ཀློང་ཡངས་པོར། །རང་སར་གྲོལ་བའི་རིགས་འཛིན་རྒྱས་གྱུར་ཅིག །ཆེ་མཆོག་ཨ་ནུ་ལུས་ཀྱི་དཀྱིལ་འཁོར་དུ། །ཞི་ཁྲོ་(༢༦༧ན) ― GLG021_Page_0535 ―
[མ་དཔེ་གཟིགས་ན་འདིར་གནོན།]
རབ་འབྱམས་ཡོངས་འདུས་ལྷ་སྔགས་དང༌། །ཡེ་ཤེས་རིག་རྩལ་མ་འགགས་གདངས་གསལ་བ། །རྣལ་འབྱོར་སྤྱོད་པའི་དབང་པོར་གསོལ་བ་འདེབས། །སྒྲུབ་པ་སྡེ་བརྒྱད་མ་ཧཱ་ཡོ་ག་ཡི། །དཀྱིལ་འཁོར་འཁོར་ལོ་ཤེལ་ངོས་ཚོན་རིས་ལྟར། །མ་འདྲེས་ལེགས་ཤར་བླ་མེད་ཧེ་རུ་ཀཿ། །རྡོ་རྗེ་འཛིན་པའི་གཙོ་བོས་དེང་བྱིན་རློབས། །བདེར་གཤེགས་ཞི་ཁྲོ་ནས་བཟུང་གྲོང་རྒྱུག་གི །ཐེའུ་རང་འགོང་པོའི་བར་གྱི་ཕྱག་རྒྱ་ཀུན། །ཟིལ་གནོན་བརྟུལ་ཞུགས་ཡོངས་གྲུབ་བཞད་པ་རྩལ། །མགོན་པོ་ཁྱོད་ཀྱིས་སྐྱེ་བར་རྗེས་འཛིན་ཤོག །ཟབ་གཏེར་ཆོས་ཀྱི་ཉི་མ་པད་གླིང་རྗེའི། །ཐུགས་སྲས་དབང་ཆེན་སྤྲུལ་པའི་རོལ་གར་མཁན། །བསྟན་འཛིན་འགྱུར་མེད་རྡོ་རྗེའི་ལུང་རྟོགས་དང༌། །སྐུ་ཚེ་དཔལ་འབྱོར་བཞེད་དོན་ལྷུན་གྲུབ་ཤོག །དབང་ཆེན་རྣམ་འཕྲུལ་ཐུགས་སྲས་ཟླ་བའི་སྤྲུལ་སྐུ་བསྟན་འཛིན་འགྱུར་མེད་རྡོ་རྗེས་འདི་གའི་བྲིས་ཐང་བཞེངས་པའི་རྒྱབ་ཡིག་འདི་ལྟ་བུ་ཞིག་དགོས་ཞེས་གསུངས་གིས་བསྐུལ་བར་བརྟེན་སྙན་ངག་མཁན་པོའི་སྒྲོ་བཏགས་ལ་ངེས་པ་མེད་པས་དཔའ་གཟིད་དང་བཅས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཆོས་རྒྱལ་མཁས་གྲུབ་མང་པོར་ལས་དཀར་འབྲེལ། །ཐོབ་ལ་སྐྱེ་བར་སྒྲོ་བཏགས་ལྔ་རིག་གཞུང༌། །སྨྲ་བས་འཇམ་དབྱངས་གཞོན་ནུ་དགའ་བའི་འཛུམ། །ཞལ་ཁྱིམ་ལྷུག་པར་སྟོན་ལ་གསོལ་བ་འདེབས། །གཞོམ་གཞིག་དང་བྲལ་རྡོ་རྗེའི་རང་བཞིན་ཅན། །གང་ལ་ཐོགས་མེད་བརྟུལ་ཞུགས་རྩལ་ལྡན་པར། །པད་འབྱུང་འཚོ་རྒྱལ་ཡབ་ཡུམ་མགྲིན་གཅིག་གིས། །དབུགས་དབྱུང་ཇི་བཞིན་མི་གཡོ་རྟག་བརྟན་ཤོག(༢༦༧བ) ― GLG021_Page_0536 ―
[མ་དཔེ་གཟིགས་ན་འདིར་གནོན།]
།བསོད་ནམས་ཆུ་གཏེར་ཀློང་ནས་ཁྲིམས་གཉིས་ཀྱི། །ཉི་ཟླ་ཟུང་གི་འཇིག་རྟེན་མུན་སེལ་བ། །ས་ཆེན་སྐྱོང་མཛད་སངས་རྒྱས་རྒྱ་མཚོ་ཡི། །སྐུ་ཚེ་ཆབ་སྲིད་བརྟན་ཅིང་འཕེལ་བར་ཤོག །མཉམ་མེད་དགེ་ལྡན་རིང་ལུགས་ཡོངས་འཛིན་པས། །ཐར་བའི་གླིང་དུ་བགྲོད་ལ་ཐོས་བསམ་དང༌། །ཉེ་བར་སྒོམ་པའི་འདུས་གྲ་སྲིད་མཐའ་རུ། །དབྱར་གྱི་ཆུ་གཏེར་ལྟ་བུར་རྒྱས་གྱུར་ཅིག །སྐྱབས་གནས་རིན་ཅེན་གསུམ་གྱི་བྱིན་རླབས་དང༌། །ལེགས་བྲིས་དྲང་སྲོང་བདེན་ཚིག་གྲུབ་པའི་མཐུ། །དམ་ཅན་ཆོས་སྐྱོང་སྲུང་མའི་འཕྲིན་ལས་ཀྱིས། །སྨོན་ལམ་བཏབ་པའི་རེ་འབྲས་སྨིན་པར་ཤོག །ཅེས་པ་འདིའང་དགའ་ལྡན་ཐར་པ་གླིང་སློབ་དཔོན་གྱིས་བསྐུལ་བ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལྷར་བཅས་སྐྱེ་རྒུའི་རྣམ་འདྲེན་བཙོང་ཁ་པའི། །ཆོས་སྲིད་བསྟན་པ་གྱེན་འདེགས་སྙིང་སྟོབས་ཁུར། །བློ་བརྩོན་ཕྲག་པར་ལེན་ནུས་དགེ་བའི་བཤེས། །ཚངས་སྲས་བཞད་པའི་རྡོ་རྗེར་གསོལ་བ་འདེབས། །གདོང་ལྔས་རབ་བཏེག་རིན་ཅེན་རྡུལ་བརྩེགས་ཁྲི། །འགྱུར་མེད་རྡོ་རྗེས་མཚན་པར་ཞབས་པད་ཟུང་། །བསྐལ་བརྒྱར་གཡུང་དྲུང་སྲོག་སོང་གར་གྱི་དབང༌། །འཆི་མེད་གྲུབ་པའི་ངོ་བོར་བཞུགས་གྱུར་ཅིག །དགའ་ལྡན་དམ་ཆོས་གླིང་གི་འདུས་སྡེ་འདིར། །ཐོས་བསམ་སྒོམ་སོགས་རྣམ་པར་དཀར་བ་ཡི། །འཕྲིན་ལས་འགྲོ་ཀུན་རྒྱུད་ལ་ཉེར་ཞུགས་ཏེ། །ལུས་ཅན་བསོད་ནམས་ཞིང་དུ་རྒྱས་གྱུར་ཅིག །སྒོ་མང་ཟུར་པ་ཆོས་རྗེ་ངག་དབང་ལྷུན་གྲུབ་ཀྱིས་དགའ་ལྡན་དམ་ཆོས་གླིང་དུ་འཛུགས་རྒྱུར་འདི་ལྟ་བུ་ཞིག་དགོས་ཞེས་བསྐུལ་མ་བྱུང་བ་ལྟར་ཟ་ཧོར་གྱི་(༢༦༨ན) ― GLG021_Page_0537 ―
[མ་དཔེ་གཟིགས་ན་འདིར་གནོན།]
བནྡེས་སྦྱར་བའི་ཡི་གེ་པ་ནི་གནས་བརྟན་འཇམདབྱངས་གྲགས་པའོ། །ངག་དབང་དབྱངས་ཅན་དགྱེས་པའི་བློ་གྲོས་གཏེར། །མཁས་བཙུན་བཟང་པོའི་རྒྱ་མཚོ་རབ་འཁྱིལ་བར། །གསོལ་བཏབ་ཇི་བཞིན་རྡོ་རྗེ་ལྟ་བུར་བརྟན། །ཚེ་རབས་ཀུན་ཏུ་རྗེས་བཟུང་བྱིན་གྱིས་རློབས། །ཞེས་པའང་ཆོས་རྗེ་ངག་དབང་ལྷུན་གྲུབ་ཀྱི་ངོར་ཟ་ཧོར་གྱི་བནྡེས་བཀོད། །ངོ་མཚར་རྨད་དུ་བྱུང་བའི་བཀོད་པ་ཡི། །ཞིང་གཙོ་སེང་གེའི་རྒྱུད་ལས་དྲངས་པའི་ཆོས། །ང་རོས་ཡིད་སྲུབས་རི་དྭགས་ཀླད་འགེམས་པ། །རྗེ་བཙུན་འཇམ་དཔལ་སྙིང་པོར་གསོལ་བ་འདེབས། །དེ་བསྟན་སྤེལ་ལ་ངག་དབང་དབྱངས་ཅན་བློ། །བཟང་པོའི་བག་ཆགས་མཐུས་རྙེད་རྒྱ་ཆེན་གཞུང༌། །མཚོ་ལྟར་གཏིང་ཟབ་འཆད་རྩོད་རབ་རྩོམ་པར། །འཇིགས་བྲལ་སྤོབས་པ་དགེ་བར་གསོལ་བ་འདེབས། །གདན་གསུམ་ཚང་བའི་དཀྱིལ་འཁོར་ལྷ་ཚོགས་ཀུན། །མགོན་ཁྱོད་རང་བྱུང་ལུས་ཀྱི་ཕོ་བྲང་ཆེར། །དད་མོས་མེ་ལོང་ངོས་སུ་རྟག་ཤར་བས། །སླུ་མེད་ལེགས་བྱས་འབྲས་བུ་མྱོང་བྱིན་རློབས། །འོད་གསལ་ལྷ་ཡི་ལམ་ནས་འོངས་པའི་རིགས། །ཆོ་འབྲང་གདུང་གིས་མཐོ་བཙུན་སའི་དབང་ཕྱུག །ཡབ་སྲས་བརྒྱུད་པར་བཅས་པའི་སྐུ་ཚེ་དང༌། །མངའ་ཐང་ཆབ་སྲིད་བླ་ནས་བླར་འཕེལ་ཤོག །མྱུར་མཛད་ལེགས་ལྡན་ལས་ཀྱི་གཤིན་རྗེའི་རྒྱལ། །རེ་མ་ཏྲི་དང་སྟོབས་འཕྲོག་གདོང་བཞི་བ། །དམ་ཅན་སྲུང་མས་མི་མཐུན་ཀུན་ཞི་ཞིང༌། །ཕུན་ཚོགས་བཞེད་དོན་མ་ལུས་ལྷུན་གྲུབ་མཛོད། །ཅེས་ས་སྐྱོང་ལྷ་རྒྱ་རི་བ་ངག་དབང་ཆོས་རྒྱལ་གྱིས་ཞལ་འདོན་གསོལ་འདེབས་སྨོན་ལམ་གྱི་རིམ་པ་ཞིག་དགོས་ཚུལ་གསུང་པ་ལྟར་(༢༦༨བ) ― GLG021_Page_0538 ―
[མ་དཔེ་གཟིགས་ན་འདིར་གནོན།]
ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལེགས་བྱས་མི་འཛད་གཏེར་གྱི་སྒོ་འཕར་བརྒྱ། །ཕྱེ་བའི་འབྲས་བུ་རྡོ་རྗེ་ཐོགས་མེད་རྩལ། །འཕོ་བ་ཆེན་པོ་འཇའ་ལུས་ཚེ་མཐའ་ཡས། །གྲུབ་པའི་རིགས་འཛིན་ངོ་བོར་བརྟན་གྱུར་ཅིག །མཆོད་དཔོན་ལས་འཛིན་ངག་དབང་ཤེས་རབ་ཀྱིས། །ཆེས་དཀར་བསམ་དང་སྦྱོར་བྱུང་བརྩོན་འགྲུས་མཐུས། །འཇོན་དམར་གསེར་བཞུན་ཟུང་དུ་འཇུག་པའི་སྐུ། །མཐོང་ཐོས་དྲན་པས་རྣམ་པར་གྲོལ་འདི་བསྐྲུན། །རང་རིག་རང་ཞལ་ཀུན་བཟང་ཧེ་རུ་ཀཿ །མངོན་གྱུར་དེ་སྲིད་མི་འབྲལ་མགོན་མཛད་ནས། །མཆོག་དང་ཐུན་མོང་དངོས་གྲུབ་མ་ལུས་པ། །རབ་སྩོལ་ཡིད་བཞིན་དབང་གི་རྒྱལ་པོར་ཤོག །ཅེས་འདྲ་འབག་གི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འོད་མཚན་སྟོང་འབར་མཛོད་སྤུའི་ཟེར་འཕྲེང་གིས། །རྡོ་རྗེ་བུ་ཁྲིད་རྣམ་ཤེས་འཁོར་བ་ལས། །དྲངས་ཏེ་བདེ་བ་ཅན་གྱི་ཞིང་ཁམས་སུ། །ཆུ་སྐྱེས་འདབ་དབུས་སྐྱེ་བར་བྱིན་གྱིས་རློབས། །ཆེད་དུ་བསོད་ནམས་བྱས་སོ་ཅོག་གི་འབྲས། །མཆོག་གསུམ་སྤྱན་སྔར་རབ་བསྔོས་ཟད་པའི་མཐའ། །རྣམ་མཁྱེན་གཟིགས་པས་མ་རྙེད་བླ་མེད་ཀྱི། །བྱང་ཆུབ་ཆེ་དང་རོ་གཅིག་འགྱུར་བར་ཤོག །གནས་སྐབས་ལྷ་མིའི་ཡང་སྲིད་ཆད་མིན་པར། །བརྒྱུད་དེ་མི་ཕམ་མགོན་པོ་འཕགས་ཡུལ་དུ། །ཆོས་འཁོར་བསྐོར་བའི་འདུས་པ་དང་པོ་རུ། །སྐྱེས་ནས་སྨིན་གྲོལ་དགའ་སྟོན་ལ་སྤྱོད་ཤོག །ཅེས་རྡོ་རྗེ་བུ་ཁྲིད་ཀྱི་དོན་དུ་སྨོན་ལམ་ཚིགས་བཅད་དགོས་ཚུལ་(༢༦༩ན) ― GLG021_Page_0539 ―
[མ་དཔེ་གཟིགས་ན་འདིར་གནོན།]
ལྷ་ས་ཟུར་ཁང་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྒྱ་བཏབ་ར་མོ་ཆེ་ཡི་གནྡྷོ་ལར། །མི་བསྐྱོད་རྡོ་རྗེ་གཙོ་གྱུར་སྲས་སློབ་ཀྱི། །སྐུ་བརྙན་མཐོང་བས་འགྲོ་ཀུན་དོན་ལྡན་དུ། །ལེགས་མཛད་བསོད་ནམས་བགྲང་ཡས་ཞིང་ས་ཆེར། །ཏོང་ཁུན་ཡུལ་གྲུའི་གན་གོས་སྣ་ཚོགས་ལས། །འཇམ་མཉེན་ལུས་ལ་བདེ་བའི་རེག་བྱ་ཅན། །ཕུལ་བའི་ཐུབ་བསྟན་རབ་འཕེལ་སྐྱེ་རྒུ་རྣམས། །སུམ་རྩེན་བདག་པོའི་དགའ་སྟོན་མྱོང་བར་ཤོག །བདོག་པ་གཏོང་དང་ཡོངས་སྤེལ་འདུ་འཁོད་མཁན། །མཐའ་དག་འདི་ཕྱིར་ལྷ་མིའི་དཔལ་ཐོབ་ཅིང༌། །བྱང་ཆེན་རིང་པོར་མི་ཐོགས་མངོན་གྱུར་ནས། །འགྲོ་རྣམས་སྲིད་པའི་མཚོ་ལས་སྒྲོལ་བར་ཤོག །ཅེས་རྒྱ་བཏབ་ར་མོ་ཆེའི་གཙུག་ལག་ཁང་དུ་གོས་སྣ་ཚོགས་ལས་བསྐྲུན་པའི་པད་ཁེབས་ལྔ་བཅུ་ང་གཅིག་སྟོད་གཡོག་དང་སྨད་གཡོག་བཅུ་རེ་ས་སྐྱོང་བློ་བཟང་སྦྱིན་པས་ཁུར་བླངས་ཏེ་བཟོས་པའི་ཚེ་སྨོན་ལམ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལོག་རྟོག་རྙོག་བྲལ་དད་པའི་ནམ་མཁའ་ལ། །རྒྱལ་ཀུན་ཡོངས་འདུས་རི་བོང་ཅན་གྱི་གཟུགས། །ཐུགས་རྗེའི་ཆ་གང་འཇམ་དབྱངས་དགའ་བའི་བཤེས། །ངག་དབང་བློ་བཟང་རྒྱ་མཚོར་གསོལ་བ་འདེབས། །སྤྱི་བོར་སེང་གེས་བཏེག་པའི་རྡོ་རྗེའི་ཁྲིར། །མགོན་ཁྱོད་རིགས་རྣམས་བདག་པོར་རབ་མོས་ནས། །གསོལ་བཏབ་ཐུགས་རྗེའི་བདུད་རྩི་སྙིང་དབུས་སུ། །རྟག་ཏུ་ཆད་མེད་འཇུག་པར་བྱིན་གྱི་རློབས། །དེང་ནས་སྟོབས་བཅུ་མངའ་བ་མ་ཐོབ་བར། །རྗེ་བཙུན་(༢༦༩བ) ― GLG021_Page_0540 ―
[མ་དཔེ་གཟིགས་ན་འདིར་གནོན།]
བླ་མས་མི་འབྲལ་རྗེས་བཟུང་སྟེ། །ལྷ་མིའི་རྟེན་གྱི་རིན་ཅེན་ཐེམ་སྐས་ལ། །རིམ་འཛེགས་ཐར་བའི་གྲོང་དུ་འཇུག་པར་ཤོག །གནས་སྐབས་སུ་ཡང་དགྲ་གདོན་དབུལ་ཕོངས་ནས། །ཉེར་འཚེའི་རྒུད་པ་མ་ལུས་རབ་ཞི་ཞིང༌། །ཚེ་དང་བསོད་ནམས་དཔལ་འབྱོར་དབང་ཐང་སོགས། །ཡར་ངོའི་ཟླ་བ་ལྟ་བུར་འཕེལ་བར་ཤོག །མདོར་ན་དཀོན་ཅོག་རིན་ཅེན་རྣམ་གསུམ་གྱི། །སྐུ་གསུང་ཐུགས་ཡོན་འཕྲིན་ལས་འཇུག་པ་ཀུན། །ཞུགས་པའི་འབྲས་བུ་ཡོངས་འདུའི་ལྗོན་ཤིང་ལྟར། །བསམ་དོན་ལྷུན་གྱིས་འགྲུབ་པའི་བཀྲ་ཤིས་ཤོག །ཅེས་གསོལ་འདེབས་སྨོན་ལམ་དང་བཅས་པ་འདི་ནི་ཁལ་ཁ་ཨུ་རང་ཁང་གི་ཨུལ་ཆིང་དཔོན་པོ་ངོས་ཀྱི་འབྱོར་སྐབས་ཁ་ཏོན་དུ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །གསང་ཆེན་རྒྱུད་སྡེའི་གསུང་ངག་སྙིང་པོའི་བཅུད། །སྨིན་བྱེད་དབང་གྱི་ཆུ་བོ་རྣམ་བཞིའི་རྒྱུན། །བློ་གསལ་སྐལ་བཟང་རྒྱ་མཚོར་འབེབས་མཛད་པའི། །གདན་གསུམ་ཚང་བའི་མགོན་པོར་གསོལ་བ་འདེབས། །ཕས་རྒོལ་ལོག་སྨྲའི་དཔུང་ལ་འཇིགས་མེད་པ། །འཆད་རྩོད་རྩོམ་ནུས་གོ་ཆ་བཙན་པོ་ཅན། །ཐུབ་བསྟན་ལུང་རྟོགས་ལང་མཚོ་རྒྱས་པའི་སྡེ། །རྗེ་བཙུན་བླ་མའི་ཞབས་ལ་གསོལ་བ་འདེབས། །འཇམ་དབྱངས་ངང་མོ་དགའ་བའི་མགྲིན་ཚལ་ན། །པད་དཀར་གེ་སར་སྟེང་དུ་ཚངས་སྲས་མ། །བཞད་པའི་ལུང་རིགས་རྡོ་རྗེ་རྩེ་བརྒྱ་པ། །འཛིན་མཛད་བཤེས་གཉེན་དམ་པར་གསོལ་བ་འདེབས། །གར་དབང་མཉམ་གཞག་གིས་བཏེག་ཀེ་ལ་ཤ །ཡོངས་གཏམས་བདུད་རྩི་བདེ་ཆེན་འཁོར་ལོ་(༢༧༠ན) ― GLG021_Page_0541 ―
[མ་དཔེ་གཟིགས་ན་འདིར་གནོན།]
ནས། །དབུ་མའི་ལམ་རྒྱུད་ཨ་ཧཾ་འགྱུར་མེད་མཐུས། །མགོན་ཁྱོད་ཞིང་འདིར་མི་འགྱུར་བརྟན་པར་ཤོག །དྲུག་སྦྲགས་འོད་ཁྱིམ་གུར་ནང་པད་ཟླའི་སྟེང༌། །སྨིན་ལེགས་ལང་མཚོ་དར་བའི་ཐུགས་ཀའི་དབུས། །འཁོར་ལོ་སྔགས་འཕྲེང་ཟིལ་དངར་ཆད་མེད་ཀྱིས། །རྡོ་རྗེའི་སྲོག་ཏུ་འགྲུབ་པར་དེང་བྱིན་རློབས། །བདེ་ལྡན་ཞིང་གི་མགོན་དེས་ཆེར་བསྔགས་དོན། །ཇི་བཞིན་གྲུབ་པའི་བྱིན་རླབས་འཕྲུལ་པོ་ཆེས། །འཆི་བདག་གཡུལ་ལས་རྣམ་པར་རྒྱལ་མཛད་མས། །འདོད་དོན་རེ་བ་མ་ལུས་དེང་སྐོང་གསོལ། །རིན་ཅེན་ལས་གྲུབ་སེང་གེས་ཉེར་བཏེག་ཁྲི། །སྲ་བརྟན་རྡོ་རྗེས་ལེགས་མཚན་རེ་ཁཱ་ལ། །མི་ཤིགས་སྐྱིལ་ཀྲུང་བཅས་ཏེ་བསྐལ་བརྒྱའི་བར། །གཡུང་དྲུང་ལྟ་བུར་གཞོམ་ཞིག་བྲལ་བར་ཤོག །ཇི་ལྟར་བསམས་པའི་དོན་ཀུན་གྲུབ་ཆེད་དུ། །སངས་རྒྱས་དེ་གསུང་སྲས་དང་ཉན་རང་བཅས། །ཁྱད་པར་ལེགས་ལྡན་ནག་པོ་ཕྱག་དྲུག་པ། །ལས་ཀྱི་གཤིན་རྗེ་འདོད་ཁམས་དབང་ཕྱུག་སོགས། །དམ་ཅན་རྒྱ་མཚོས་རྟག་ཏུ་གྲོགས་མཛད་ཤོག །རྟེན་ཅིང་འབྲེལ་བར་འབྱུང་བའི་ཞིང་ས་ལ། །རྒྱུ་འབྲས་སྨོན་ལམ་ས་བོན་དྲོད་གཤེར་གྱིས། །རབ་སྨིན་བདེ་སྐྱིད་གསེར་གྱི་སྙེ་མ་ལ། །སྤྱོད་པའི་སྐལ་བཟང་དེང་འདིར་ལྷུན་གྲུབ་ཤོག །ཅེས་གསོལ་འདེབས་རིང་འཚོའི་ཚིགས་བཅད་ཁ་ཐག་རིང་ཙམ་ཞིག་དགོས་ཞེས་ཧོར་ཚང་ཆོས་རྗེ་ཏཱའི་སི་ཏུ་བློ་བཟང་ཆོས་སྐྱོང་གིས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། ། འཕགས་པ་ཕྱོགས་བཅུ་མུན་སེལ་གྱི་དོན་དང་སྦྱར་བའི་སྨོན་ལམ་ཚིགས་བཅད་སོགས།― GLG021_Page_0542 ―
[མ་དཔེ་གཟིགས་ན་འདིར་གནོན།]
ཤར་ཕྱོགས་ཉོན་མོངས་བསྐྱོད་པའི་ཞིང་ཁམས་ན། །དེ་བཞིན་གཤེགས་པ་རྗེས་སུ་སྦྱོང་བ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །འཇིགས་པ་ཡོངས་ཞི་དོན་ཀུན་འགྲུབ་པར་ཤོག །ལྷོ་ཕྱོགས་མུན་ནག་བཅོམ་པའི་ཞིང་ཁམས་ན། །བདེ་བར་གཤེགས་པ་མངོན་འཕགས་རྒྱལ་པོ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །ནུབ་ཕྱོགས་ཡུལ་ཕེབས་བྱ་བའི་ཞིང་ཁམས་ན། །དེ་བཞིན་གཤེགས་པ་རྣམ་པར་གནོན་པ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །བྱང་ཕྱོགས་སྤོབས་པ་ཅན་གྱི་ཞིང་ཁམས་ན། །དེ་བཞིན་གཤེགས་པ་རིན་ཅེན་འོད་སྣང་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །བྱང་ཤར་བདུད་སྡེ་བཅོམ་པའི་ཞིང་ཁམས་ན། །དེ་བཞིན་གཤེགས་པ་བདུད་འཇོམས་རྣམ་གནོན་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །ཤར་ལྷོ་རྟག་ཏུ་སྣང་བའི་ཞིང་ཁམས་ལ། །དེ་བཞིན་གཤེགས་པ་འཁོར་ལོ་འབྱུང་དཔལ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །ལྷོ་ནུབ་གསེར་དྲས་གཡོགས་པའི་ཞིང་ཁམས་ན། །དེ་བཞིན་གཤེགས་པ་གདུགས་འཕགས་སྣ་བ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །ནུབ་བྱང་མངོན་པར་འཕགས་པའི་ཞིང་ཁམས་ན། །དེ་བཞིན་གཤེགས་པ་འདུལ་བ་ཞེས་བྱ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །སྟེང་ཕྱོགས་ཡིད་ལ་བྱེད་ཅན་ཞིང་ཁམས་ན། །དེ་བཞིན་གཤེགས་པ་མངོན་འཕགས་རྒྱལ་པོ་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །འོག་ཕྱོགས་ཡོན་ཏན་བརྒྱན་པའི་ཞིང་ཁམས་ན། །དེ་བཞིན་གཤེགས་པ་ཐེ་ཚོམ་གཅོད་མཛད་ལ། །མ་ཡེངས་ཕྱག་བཙལ་ཡིད་ལ་དྲན་པའི་མཐུས། །འཇིགས་པ་ཡོངས་ཞི་དོན་ཀུན་འགྲུབ་པར་ཤོག །ཤཱཀྱ་གཞོན་ནུ་བཞིན་རས་རབ་གསལ་ལ། །ཉི་མའི་གཉེན་གྱིས་ཇི་ལྟར་ཞལ་འཆེས་པའི། །འབྲས་བུ་ཇི་བཞིན་བདག་སོགས་འཁོར་བཅས་(༢༧༡ན) ― GLG021_Page_0543 ―
[མ་དཔེ་གཟིགས་ན་འདིར་གནོན།]
ལ། །རབ་སྨིན་རོ་བདའི་ཟས་ལ་སྤྱོད་པར་ཤོག །ཅེས་འཕགས་པ་ཕྱོགས་བཅུ་མུན་སེལ་གྱི་དོན་དང་སྦྱར་བའི་སྨོན་ལམ་ཞིག་དགོས་ཞེས་ཏྲེའོ་ཧོར་ཚང་ཏཱའི་སི་ཏུ་བློ་བཟང་ཆོས་སྐྱོང་གིས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སྨན་བླ་མཆེད་བདུན་ཀུན་མཁྱེན་ཉི་མའི་གཉེན། །ཉེ་བའི་སྲས་བརྒྱད་གནས་བརྟན་བཅུ་དྲུག་དང༌། །ལུང་རྟོག་དམ་ཆོས་བསླུ་བ་མེད་པའི་མགོན། །ཐུགས་རྗེའི་མཐུ་མངའ་སྐྱབས་མཆོག་མ་ལུས་དགོངས། །ཁྱད་པར་བྱང་ཆུབ་སེམས་དཔའ་སའི་སྙིང་པོས། །ཏྲེ་བོ་ཧོར་ཚང་ཡུལ་དང་ས་ཕྱོགས་འདིར། །ནོར་འཛིན་གཡོ་བའི་འཇིགས་པ་ཆེན་པོ་ཀུན། །ཉེར་ཞི་བདེ་སྐྱིད་དཔལ་ལ་འགོད་པར་ཤོག །ཆོས་ཉིད་མི་འགྱུར་རྒྱུ་འབྲས་སླུ་མེད་ཕྱིར། །དཀོན་ཅོག་གསུམ་གྱི་ཐུགས་རྗེ་རབ་བསྐུལ་བའི། །གསོལ་བ་གདུང་ཤུགས་དྲག་པོས་འདེབས་བྱེད་ན། །འཇིག་སྐྲག་སྡུག་བསྔལ་ཀུན་ལས་ཐར་བར་ཤོག །ཅེས་པ་འདིའང་ཏྲེ་བོ་ཧོར་ཚང་ཆོས་རྗེས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔ་རམས་པའོ། །གདུལ་དཀའ་འདུལ་ཕྱིར་ཕྱག་ན་པད་དཀར་འཆང༌། །རྡོ་རྗེ་སྲིན་པོའི་སྐུར་བསྟན་ཕྱག་དྲུག་མགོན། །བླ་མ་ཡི་དམ་ཆོས་སྐྱོང་དབྱེར་མེད་པ། །གཏན་གྱི་སྐྱབས་མཆོག་མཐུ་སྟོབས་ནུས་པ་ཡི། །འཇམ་དབྱངས་དགའ་བའི་བཤེས་གཉེན་བདེ་ལྡན་ཞིང༌། །དབང་ཕྱུག་ཚེ་མཐའ་ཡས་ལྟར་རབ་བརྟན་ཞིང༌། །གེགས་མེད་འབྲང་རིའི་གནས་སུ་འདུས་སྡེ་དང༌། །ཐོས་བསམ་སྒོམ་པ་དར་ཞིང་(༢༧༡བ) ― GLG021_Page_0544 ―
[མ་དཔེ་གཟིགས་ན་འདིར་གནོན།]
རྒྱས་པར་ཤོག །ཅེས་པ་འདི་ནི་རབ་འབྱས་པ་ནམ་མཁའ་རྒྱལ་མཚན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནྀ་དཔལ་གྲོང་སྔགས་རམས་པའོ། །མང་དུ་ཐོས་པས་ངག་ལ་དབང་འབྱོར་ཞིང༌། །རྒྱ་ཆེན་གཞུང་ལུགས་དབྱར་མཚོ་ལྟར་སྤེལ་བར། །ཟླ་བྲལ་རྣམ་དཔྱོད་ཡངས་པའི་ཡོངས་འཛིན་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །མགོན་ཁྱོད་འཕྲིན་ལས་མཁའ་མཉམ་འགྲོ་བ་ལ། །འཇུག་པའི་ཕ་མཐའ་རྫོགས་མིན་དེ་སྲིད་དུ། །བདག་སོགས་སློབ་མར་བཅས་པ་རྗེས་བཟུང་ནས། །འབྲལ་མེད་དམ་པའི་ཆོས་ལ་ལོངས་སྤྱོད་ཤོག །ཅེས་སྐྱོར་ལུང་མཁན་པོ་ངག་དབང་རྒྱ་མཚོ་ལ་གསོལ་འདེབས་སྨོན་ལམ་དང་བཅས་པ་འདི་ནི་ལྷོ་བྲག་དགའ་ལྡན་དོན་གཉིས་གླིང་གྲྭ་དམངས་ཀྱིས་བསྐུལ་བ་ལྟར་ཟ་ཧོར་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཕྱག་ན་པདྨའི་ཐུགས་རྗེ་སྤྱན་རས་ཀྱིས། །ཨ་སྙིང་བྱང་ཆུབ་བར་དུ་རྗེས་བཙའ་བས། །འཁོར་དང་མྱ་ངན་འདས་པའི་ལེགས་ཚོགས་རྣམས། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །རྩིས་གཞི་བས་ཨ་སྙིང་གི་དོན་དུ་ཐུགས་རྗེ་ཆེན་པོ་ཕྱག་བཞི་པའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་བཞིན་བྲིས། །རྒྱལ་ཀུན་ངོ་བོ་པདྨ་འབྱུང་གནས་ཀྱི། །གསང་གསུམ་སྒྱུ་འཕྲུལ་ཉིན་མོར་བྱེད་པ་ལས། །མཚན་བརྒྱད་རོལ་གར་འོད་ཀྱིས་ཕན་དང་བདེའི། །འདབ་སྟོང་འཁོར་མཐའ་དེ་སྲིད་བཞད་པར་ཤོག །གངས་ཅན་འགྲོ་ལ་སྲོང་བཙན་སྒམ་པོ་ཡི། །ཐུགས་རྗེའི་འཇུག་པ་ཡོལ་མེད་ཡང་སྲིད་ཀྱི། །རིན་ཅེན་ཕྲེང་བ་གཙུག་ཏོར་རྩེར་བཅིངས་ནས།(༢༧༢ན) ― GLG021_Page_0545 ―
[མ་དཔེ་གཟིགས་ན་འདིར་གནོན།]
།འདི་ཕྱིའི་མདུན་མ་ཐམས་ཅད་འགྲུབ་པར་ཤོག །མི་བསྲུན་གདུག་པ་འདུལ་ཕྱིར་པད་དཀར་འཆང༌། །རྡོ་རྗེ་སྲིན་པོའི་སྐུར་བསྟན་མྱུར་མཛད་མགོན། །ལྕམ་དྲལ་གནོད་སྦྱིན་རྣམ་བཞི་བཀའ་སྡོད་ཚོགས། །མ་གཡེལ་ཞི་རྒྱས་དབང་དྲག་ལས་རྣམས་མཛོད། །ཅེས་སྤྱི་ཁང་དཀོན་ཅོག་གི་དད་རྟེན་དུ་ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས། གུ་རུ་མཚན་བརྒྱད། མགོན་པོ་ཕྱག་དྲུག་པ་བཅས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བྲིས། །མདུན་གྱི་ནམ་མཁར་པད་ཟླའི་དཀྱིལ་འཁོར་སྟེང༌། །ཚེ་དཔག་མེད་མགོན་སྲས་བཅས་རྒྱལ་བ་ཡིས། །ཡོངས་བསྐོར་མཆོག་གསུམ་འདུས་པའི་ངོ་བོ་ལ། །དཔང་པོར་གསོལ་ན་བདེན་ཚིགས་འགྲུབ་བྱིན་རློབས། །ངག་དབང་འཇམ་དབྱངས་བློ་བཟང་གྲགས་འབར་བསྟན། །རྒྱ་མཚོའི་གོས་ཅན་ཁྱབ་མཛད་ཚངས་སྲས་ལྷ། །བཞད་པའི་སྲོག་གི་ཀ་བ་རྡོ་རྗེ་ལྟར། །སྲིད་མཐའི་བར་དུ་ནམ་ཡང་འགྱུར་མེད་ཤོག །དགའ་ལྡན་བཤད་སྒྲུབ་ཟུང་འབྲེལ་དོན་གཉིས་ཀུན། །ཉེར་གྲུབ་འདུས་གླིང་རྣམ་གསུམ་འཁོར་ལོའི་ལས། །བྱམས་མགོན་མཆོག་གི་སྤྲུལ་སྐུར་མ་གྱུར་བར། །ཡར་ངོའི་ཟླ་ལྟར་འཕེལ་ཞིང་རྒྱས་པར་ཤོག །ཅེས་རིང་འཚོའི་ཚིགས་བཅད་འདི་ནི་ལྷོ་བྲག་བསྔགས་འཆང་དབང་ཆེན་ལྷུན་གྲུབ་ཀྱིས་དགའ་ལྡན་དོན་གཉིས་གླིང་དུ་འཛུགས་རྩིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །པད་རཱག་མདངས་ལྡན་རྡུལ་བརྩེགས་གསེར་ཞུན་གོས། །ཉེར་ཀླུབས་ངག་དབང་བློ་བཟང་རྒྱ་མཚོའི་གཟུགས། (༢༧༢བ) ― GLG021_Page_0546 ―
[མ་དཔེ་གཟིགས་ན་འདིར་གནོན།]
།བློ་བཟང་བསོད་ནམས་དད་པའི་ཟླ་དཀྱིལ་ངོས༌། །ཤར་བས་སྐྱེ་བར་བདེ་སྐྱིད་འོད་གསལ་ཤོག །ཅེས་འདྲ་འབག་གི་གདན་ངོས་ལ་བརྐོ་རྒྱུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་བྲིས་པ་སརྦ་ཨཋསིདྡྷ་མེབྷ་ཝནྟུ། །པད་འབྱུང་ལུས་དཀྱིལ་ཤེལ་ངོས་ཞི་ཁྲོའི་ཚོན། །རབ་བཀྲ་བཀའ་བརྒྱད་ལྷར་རྫོགས་དྲག་པོ་རྩལ། །གར་དགུའི་སྒྱུ་འཕྲུལ་མངོན་གསུམ་གསལ་འདྲ་འདི། །དངོས་གྲུབ་ཆར་ཆེན་འབེབས་ལ་དངོམ་པ་བཞིན། །སད་སེར་ནད་འཁྲུགས་ལྷ་མིན་གདོན་གྱི་མཚོན། །འབེབས་སོགས་མི་བཟད་ཟུག་རྔུ་ལས་སྐྱོབ་ཅིང༌། །བདེ་སྐྱིད་ཆོ་གར་བོད་འབངས་ཅི་དགའ་རུ། །ཉེར་སྤྱོད་འཕྲིན་ལས་མང་བསྒྲུབ་དམིགས་རྟེན་མཚར། །ཆོས་དཀར་འབྲས་བུ་མཚོ་སྐྱེས་རྡོ་རྗེ་ཡིས། །གངས་ལྗོངས་འགྲོ་རྣམས་རྗེས་འཛིན་ཞལ་འཆེས་པའི། །བྱིན་རླབས་གཟི་བྱིན་བརྒྱ་ཕྲག་ཉི་མའི་འོད། །ཆེས་ཆེར་འབར་བའི་དཔལ་ལ་འགྲན་ནུས་ཤོག །ཅེས་པའང་འདི་ཁ་བས་བསྐོར་བའི་སྨན་ལྗོངས་འདིར་ཕན་བདེའི་སྒོ་བརྒྱ་འབྱེད་པའི་འཕྲིན་སྒྲུབ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པས་གང་དགོས་སུ་མཛད་པའི་རྟེན་ཞིག་བྱུང་ན་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བས་རྐྱེན་བྱས་དོན་གྲུབ་ཀྱི་ལོར་གཞིས་ཀ་ཤར་པ་འཕྲིན་ལས་རྣམ་རྒྱལ་གྱིས་སྐྱ་རིས་དང་སྤྱན་འབྱེད། ཤུན་པ་ཤག་ཁྱི་སྐྱག་གིས་ཚོན་མདངས་དང་གསེར་བཅད། སོག་པོ་བསྟན་པ་ཚུལ་ཁྲིམས་ཀྱིས་ཀྱང་བཅད་དང་གསེར་རིས་སོགས་བགྱིས་པའི་ཚེ་སྨོན་ལམ་དུ་ཟ་ཧོར་སྔགས་སྨྱོན་གྱིས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །ཆོས་ཀུན་གདོད་ནས་ཉེར་ཞི་འཇམ་(༢༧༣ན) ― GLG021_Page_0547 ―
[མ་དཔེ་གཟིགས་ན་འདིར་གནོན།]
པའི་ཀློང༌། །རབ་ཁྲོས་སྲིད་གསུམ་ཟར་བརྔམས་འཇིགས་མེད་དབྱངས། །དྲག་པོའི་ངར་སྒྲ་ཆེར་སྒྲོག་དུས་དགྲའི་དབང༌། །འཁོར་འདས་ཕྱག་རྒྱ་ཟིལ་གནོན་གར་གྱི་རོལ། །དྲན་པའི་ཡིད་མཁར་དཔའ་པོའི་སྟང་སྟབས་ཉི། །ཤར་ཚེ་རང་སྲིད་འདབ་བརྒྱ་བཞད་པ་དང༌། །ཕས་རྒོལ་ཀུནྡ་ཟུམ་ནུས་མངོན་སྤྱོད་ཀྱིས། །འཕྲིན་ལས་ཐོག་འཁྱུག་གློག་གི་ཟེགས་མ་འཕྲོ། །བསོད་ནམས་ཉེར་བྱས་དབང་ཕྱུག་མིག་གི་མེའི། །དཔལ་རྩེར་དགྲ་བགེགས་འདོད་ལྷ་སྡེ་བཅས་གཟུགས། །ལྷག་མར་རབ་བྱས་རྣམ་པར་རྒྱལ་བ་ཡི། །རུ་མཚོན་སྲིད་པའི་རྩེ་མོར་བསྒྲེང་བར་མཛོད། །ཅེས་པའང་རྣམ་པར་རྒྱལ་བའི་ཕན་བདེ་ལེགས་བཤད་གླིང་པས་འཇམ་དཔལ་ཚེ་བདག་གི་ལས་སྦྱོར་སྐབས་ཐོབ་གང་དགོས་ཀྱི་ཚེ་སྒྲུབ་རྟེན་ཞིག་བྱུང་ན་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བས་རྐྱེན་བྱས་དོན་གྲུབ་ཀྱི་ལོར་གཞིས་ཀ་ཤར་པ་འཕྲིན་ལས་རྣམ་རྒྱལ་གྱིས་སྐྱ་རིས་དང་སྤྱན་འབྱེད། །ཤུན་པ་ཤག་ཁྱི་སྐྱག་གིས་ཚོན་མདངས་དང་གསེར་བཅས། སོག་པོ་བསྟན་པ་ཚུལ་ཁྲིམས་ཀྱིས་ཀྱང་བཅད་དང་གསེར་རིས་སོགས་བགྱིས་པའི་ཚེ་སྨོན་ལམ་དུ་ཟ་ཧོར་སྔགས་སྨྱོན་གྱིས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །དྲི་མེད་དྲང་སྲོང་གསེར་གྱི་འཁོར་ལོའི་རྩིབས། །སྣང་སྲིད་སྡེ་བརྒྱད་སྲོག་ལ་མངའ་བསྒྱུར་བ། །ཞེ་སྡང་དག་པའི་རྡོ་རྗེ་གཏུམ་པོའི་སྐུ། །མཐོང་ཚེ་ཡིད་སྲུབས་སྡེ་བཅས་སྙིང་རྩ་འགས། །དེ་ཉིད་སེམས་སུ་ཤར་བའི་རྣམ་པར་འཕྲུལ། །གནས་པ་རྩ་དང་འདྲེན་དཀྱིལ་གཅོད་བྱེད་ལྕེའི། །ཏིང་འཛིན་སྲུང་བཟློག་བསད་མནན་འབྱུང་(༢༧༣བ) ― GLG021_Page_0548 ―
[མ་དཔེ་གཟིགས་ན་འདིར་གནོན།]
བཞིའིམཚོན། །རྣོན་པོས་འགེགས་དཔུང་ལུས་སྲོག་ཕྱེ་མར་འཐག །གདུག་རྩུབ་བསམ་སྦྱོར་ལ་བརྩེའི་རྒྱུས་བསྐྱེད་ནས། །རབ་བསྒྲལ་དུས་ཀྱི་སྡང་སེམས་འབར་བའི་མེས། །ལོག་འདྲེན་དུག་རླངས་དེས་བསྐྲུན་ལས་ཉོན་ཚོགས། །ཅིག་ཅར་མིང་གི་ལྷག་མར་བསྲེག་པར་ཤོག །ཅེས་པའང་རྣམ་པར་རྒྱལ་བའི་ཕན་བདེ་ལེགས་བཤད་གླིང་ནས་དྲང་སྲོང་དམོད་པའི་ཚེ་སྒྲུབ་རྟེན་ཞིག་བྱུང་ན་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བས་རྐྱེན་བྱས་ས་ལུག་ལོར་གཞིས་ཀ་ཤར་པ་འཕྲིན་ལས་རྣམ་རྒྱལ་གྱིས་སྐྱ་རིས་དང་སྤྱན་འབྱེད། ཤུན་པ་ཤག་ཁྱི་སྐྱག་གིས་ཚོན་མདངས་དང་གསེར་བཅད། སོག་པོ་བསྟན་པ་ཚུལ་ཁྲིམས་ཀྱིས་ཀྱང་བཅད་དང་གསེར་རིས་སོགས་བགྱིས་པའི་ཚེ་སྨོན་ལམ་དུ་ཟ་ཧོར་སྔགས་སྨྱོན་གྱིས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །གནམ་སྟོང་སྨག་གི་རུམ་ལས་ཆེས་གནག་སེམས། །ཉེར་འཆང་དགྲ་བགེགས་ལྕགས་ཀྱུས་བཀུག་པའི་མགོ །འབར་བའི་ཐོ་ཆེན་བསྣུན་པས་རྐང་མཐིལ་བར། །ཕྱེར་འཐག་སྲོག་བདུད་གཤིན་རྗེ་ཀིངྐང་དམར། །ཀ་དག་གདོད་མའི་འཇམ་མགོན་ཀུན་ཏུ་བཟང༌། །ཆུ་ལས་ཆུ་ལྦུར་བཞིན་དུ་དུས་ཀྱི་དགྲར། །ལྷུན་གྲུབ་དབང་པོའི་གཞུ་ལྟར་ཡོངས་ཤར་བ། །སྲིད་གསུམ་སྐྱེ་རྒུའི་བླ་ཚེར་བརྔམས་པ་བཞིན། །མཐའ་མེད་རྒྱ་མཚོའི་གཏིང་ནས་འཆི་བདག་ནག །ཆུ་སྲིན་རྣམ་པར་ལངས་པའི་གྲེ་བ་རུ། །མ་རུང་ལོག་འདྲེན་གཟུགས་ཅན་གཟུགས་མེད་ཅེས་པའང་རྣམ་པར་(༢༧༤ན) ― GLG021_Page_0549 ―
[མ་དཔེ་གཟིགས་ན་འདིར་གནོན།]
རྒྱལ་བའི་ཕན་བདེ་ལེགས་བཤད་གླིང་ནས་དགྲ་བགེགས་རྣམས་ཐར་མེད་ལྕགས་ཁང་ནག་པོར་འཇུག་པའི་ཚེ་སྒྲུབ་རྟེན་ཞིག་བྱུང་ན་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བས་རྐྱེན་བྱས་དོན་གྲུབ་གྱི་ལོར་གཞིས་ཀ་ཤར་པ་འཕྲིན་ལས་རྣམ་རྒྱལ་གྱིས་སྐྱ་རིས་དང་སྤྱན་འབྱེད། ཤུན་པ་ཤག་ཁྱི་སྐྱག་གིས་ཚོན་མདངས་དང་གསེར་བཅད། སོག་པོ་བསྟན་པ་ཚུལ་ཁྲིམས་ཀྱིས་ཀྱང་བཅད་དང་གསེར་རིས་སོགས་བགྱིས་པའི་ཚེ་སྨོན་ལམ་དུ་ཟ་ཧོར་སྔགས་སྨྱོན་གྱིས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །མ་ཚོགས་བྲན་དུ་བཀོལ་བ་རེ་མ་ཏཱིར། །བོད་སྐྱོང་བདུད་དང་གནོད་སྦྱིན་སྨན་མོའི་རིགས། །བསྟན་མ་བཅུ་གཉིས་ཀྱིས་བསྐོར་ལྷ་ཡི་ལམ། །དབང་པོའི་གཞུ་རིས་ལྟ་བུར་རྣམ་པར་བཀྲ། །མདོས་གཏོར་དངོས་བཤམ་ཡིད་སྤྲུལ་མཐུན་པའི་རྫས། །སྔགས་དང་ཕྱག་རྒྱས་ཉེར་སྤེལ་པུར་རྒྱལ་གྱི། །ནད་ཡམས་མུ་གེ་འཁྲུག་རྩོད་ཞི་བའི་ཆེད། །འབུལ་རྟེན་འདི་ལ་ཡེ་ཤེས་མངོན་གསུམ་ཕོབ། །ལུས་ངག་ཡིད་ལ་མི་བཟད་གདུང་བ་ཡི། །ཚོར་བ་དྲག་པོ་མིང་གི་ལྷག་མ་རུ། །བྱས་ནས་བདེ་སྐྱིད་དཔག་བསམ་ལྗོན་པའི་འབྲས། །སྤྱོད་ལ་ལྷ་ཡི་སྤུན་ཟླར་འགྱུར་བར་ཤོག །ཅེས་པའང་རྣམ་པར་རྒྱལ་བའི་ཕན་བདེ་ལེགས་བཤད་གླིང་ནས་ནད་ཡམས་མུ་གེའི་རྒུད་པ་སེལ་བའི་སླད་དུ་བོད་སྐྱོང་བསྟན་མ་མཆོད་པའི་ཚེ་སྒྲུབ་རྟེན་ཞིག་བྱུང་ན་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བས་རྐྱེན་བྱས་དོན་གྲུབ་ཀྱི་ལོར་གཞིས་ཀ་ཤར་པ་འཕྲིན་ལས་རྣམ་རྒྱལ་གྱིས་སྐྱ་རིས་དང་སྤྱན་འབྱེད། ཤུན་པ་ཤག་ཁྱི་སྐྱག་(༢༧༤བ) ― GLG021_Page_0550 ―
[མ་དཔེ་གཟིགས་ན་འདིར་གནོན།]
གིས་ཚོན་མདངས་དང་གསེར་བཅད། སོག་པོ་བསྟན་པ་ཚུལ་ཁྲིམས་ཀྱིས་ཀྱང་བཅད་དང་གསེར་རིས་སོགས་བགྱིས་པའི་ཚེ་སྨོན་ལམ་དུ་ཟ་ཧོར་སྔགས་སྨྱོན་གྱིས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །ཕུན་ཚོགས་ཆོས་དཀར་ས་བོན་བཏབ་པའི་འབྲས། །མངོན་མཐོའི་རྟེན་ལ་དབང་འབྱོར་ཡང་སྲིད་ཀུན། །དོན་གཉིས་རྒྱ་མཚོ་འཕྲིན་ལས་གྲུབ་རྫིངས་ཀྱིས། །གཏན་བདེའི་རིན་ཅེན་གླིང་དུ་བགྲོད་པར་ཤོག །ཅེས་རྒྱལ་བྱེད་སློབ་དཔོན་ཆོས་དབང་རྒྱ་མཚོ་དུས་ལས་འདས་པར་སྨོན་ལམ་ལ་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ལུས་ངག་ཡིད་གསུམ་ལྷ་སྔགས་ཡེ་ཤེས་ལ། །དབང་ཕྱུག་བློ་མངའ་མཁས་བཙུན་བཟང་པོའི་སྒྲ། །རྒྱ་ཆེན་ནོར་འཛིན་ཡོངས་ཁྱབ་མཚོ་བྱུང་མས། །མགྲིན་འཁྱུད་རྡོ་རྗེ་འཛིན་པར་གསོལ་བ་འདེབས། །འཇམ་དབྱངས་བློ་བཟང་གྲགས་པའི་བསྟན་སྲིད་ཟུང༌། །དགའ་བའི་དཔལ་ལྡན་ཕོ་བྲང་ནས་འདེགས་པ། །གནམ་བསྐོས་རྒྱལ་ཁབ་སྡེ་བཞིའི་འདུན་ས་ཆེར། །བཤེས་གཉེན་དམ་པ་མཆོག་ལ་གསོལ་བ་འདེབས། །སྙིང་ནས་དད་པས་ཉེར་བསྐུལ་ལྷང་ལྷང་སྒྲས། །མགོན་ཁྱོད་བསྐལ་བརྒྱར་གཡོ་མེད་བདེན་པའི་ཚིག །བརྗོད་ན་དཀོན་ཅོག་རྣམ་གསུམ་ཐུགས་རྗེའི་མཐུས། །རེ་བ་དོན་དང་ལྡན་པར་བདག་བྱིན་རློབས། །ལེགས་ཚོགས་ཡོན་ཏན་མ་ལུས་ལྷུན་གྲུབ་པ། །རབ་བརྟན་རིགས་བརྒྱུད་དངོས་གྲུབ་འབད་མེད་དུ། །ཡིད་བཞིན་ནོར་བུའི་མཛོད་ལ་མངའ་འབྱོར་པས། །བསམས་པའི་རེ་འདོད་མཐའ་དག་འཇོ་བར་ཤོག །འཇམ་དཔལ་ཁྲོས་པ་མ་ཧེའི་ཞལ་ཅན་དང༌། །མྱུར་མཛད་(༢༧༥ན) ― GLG021_Page_0551 ―
[མ་དཔེ་གཟིགས་ན་འདིར་གནོན།]
མགོན་པོ་ལས་གཤིན་ཆོས་ཀྱི་རྒྱལ། །འདོད་ཁམས་དབང་ཕྱུག་ལ་སོགས་སྲུང་མ་ཡིས། །གཡེལ་བ་མེད་པར་རྟག་ཏུ་གྲོགས་བྱེད་ཤོག །ཅེས་པ་འདིའང་འབའ་རྫོང་སྡོད་ཤུན་ལྷུན་གྲུབ་རབ་བརྟན་པ་དངོས་གྲུབ་ནོར་བུས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འོད་མཚན་སྟོང་འབར་རྗེས་བརྩེའི་སྐྱ་རེངས་མས། །ཉེར་དྲངས་མཁས་བཙུན་བཟང་པོའི་ཉི་ཟེར་གྱིས། །ལྔ་བདོའི་མུན་སེལ་ཕན་བདེའི་སྣང་བ་ཡིས། །ཁྱབ་མཛད་ལྷ་གཅིག་ཇོ་བོ་ཨ་ཏི་ཤར། །ཟས་གཙང་སྲས་དང་མ་ཕམ་ཐོགས་མེད་མཆེད། །རིམ་བརྒྱུད་རྒྱ་ཆེན་སྤྱོད་པའི་བཤེས་གཉེན་ཚོགས། །ནོར་བུའི་དོ་ཤལ་ཇི་ལྟར་ཆད་མེད་པས། །བསྐོར་འདི་བསོད་ནམས་ཞིང་དུ་དངོས་བྱོན་ཞིང༌། །དགེ་བས་ཆུང་འབྲིང་ལམ་གྱི་སྣ་དྲངས་ནས། །བདག་ལས་གཞན་གཅེས་བསྒོམ་པའི་སེམས་བཟང་པོས། །རླབས་ཆེན་རྒྱལ་སྲས་མཛད་པར་བྱང་ཆུབ་མཆོག །མ་རྙེད་དེ་སྲིད་ཉམས་སུ་བསྟར་ནུས་ཤོག །མཐའ་བྲལ་དབུ་མའི་མཁའ་དབྱིངས་བདེ་བའི་འཇའ། །ཟུང་འཇུག་ཁ་སྦྱོར་བདུན་ལྡན་མངོན་གྱུར་ཡང༌། །ཆགས་བྲལ་ངུར་སྨྲིག་ཟོལ་གྱི་གདུལ་བྱའི་ཚོགས། །གཙང་མའི་རྣམ་ཐར་ལ་འགོད་བཙོང་ཁ་པར། །ཤཱཀྱ་སེང་གེ་འཇམ་མགོན་ཀླུ་སྒྲུབ་སོགས། །ཟབ་མོ་ལྟ་བའི་བརྒྱུད་འཛིན་བླ་མ་ཡིས། །ཡོངས་བསྐོར་ཚོན་བརྒྱར་ཉེ་བའི་དྭངས་ཤེལ་རྗེས། །རབ་བསྙེག་སྔོན་མེད་འདྲེན་བྱེད་ཟིལ་དངར་བཅུད། །བསོད་ནམས་བྱས་འབྲས་བདེན་གཉིས་ཟུང་འཇུག་མཚོན། །རྣོན་པོས་སྲིད་རྩ་ངར་འཛིན་དྲ་བའི་(༢༧༥བ) ― GLG021_Page_0552 ―
[མ་དཔེ་གཟིགས་ན་འདིར་གནོན།]
ཚོགས། །བཅད་ནས་གཏན་མདུན་ཐར་བའི་བ་གམ་དུ། །རབ་བགྲོད་སྐལ་བ་བཟང་པོར་བདག་འགྱུར་ཤོག།སངས་རྒྱས་ཀྱིས་གསུངས་སྐྱབས་དངོས་མྱ་ངན་འདས། །ཚུལ་བཞིན་བསྟར་བ་དགེ་འདུན་ཡོངས་ཀྱི་གཙོ། །གྲགས་པ་དོན་ལྡན་པཎ་གྲུབ་རྣམ་པར་ཐར། །སྟོན་ཕྱིར་འབྲོམ་སྟོན་སླར་བྱོན་རོལ་གར་ལ། །སྲས་བཅས་རྒྱལ་བའི་སྣང་བརྙན་རྙོག་བྲལ་མཚོར། །ཆུ་ཤེལ་དབང་པོའི་དཀྱིལ་འཁོར་ལྟར་གསལ་བ། །དད་པའི་ཀུནྡ་འཛུམ་བྱེད་ཆོ་ག་ལ། །འཇིག་རྟེན་མེས་པོས་གསར་དུ་བསྐྲུན་པ་བཞིན། །ཆེད་དུ་ཉེར་འབད་དྲང་སྲོང་ཨཱ་གསྟྱས། །བདག་སོགས་འགྲོ་རྒྱུད་དུག་གསུམ་ཉལ་འགྲོའི་དྲི། །དྲུང་ཕྱུངས་གཏན་མདུན་ཡན་ལག་བརྒྱད་ལྡན་ཆུས། །འཁོར་འདས་ཡོངས་ཀྱི་ནད་བརྒྱ་སེལ་བར་ཤོག །དགེ་ལེགས་ཡོངས་འདུའི་རྩ་བ་བརྟན་པོ་རུ། །འཛུགས་པར་གཅིག་ཏུ་ཉེར་འདུན་སྙིང་སྟོབས་གོམ། །རྒྱ་མཚོའི་ཕ་མཐར་འཇོག་ལ་ཁྱབ་འཇུག་ཁེངས། །ཐུང་ངུར་རབ་བྱས་དབྱངས་ཅན་བཞད་པའི་སྡེར། །རྩ་གསུམ་མཛེས་ཆགས་རྔམ་བརྗིད་རོལ་བ་ཡི། །སྟང་སྟབས་གདུལ་བྱའི་མོས་ངོར་ཤར་བའི་གཟུགས། །སྒྱུ་མའི་འཁྲུལ་ལ་གདུང་བ་འཕོག་ནུས་པ། །ཀུན་དགའི་ཡིད་ཀྱི་རྩེ་འཇོར་བྱོན་ནམ་སྙམ། །མགོན་ཁྱོད་ཐུགས་རྗེ་ཀཏྤུ་ར་ཡི་རྡུལ། །བདག་སེམས་དུག་ལྔའི་ཚ་གདུང་ཉེར་བཅིལ་ནས། །ཤེས་བྱ་ཐམས་ཅད་མཁྱེན་པའི་གོ་འཕང་དེ། །རིང་པོར་མི་ཐོགས་མངོན་དུ་འགྱུར་བར་ཤོག །གྲུ་འཛིན་རི་བོའི་སྤོ་ནས་བསམས་བཞིན་དུ། །གནམ་བསྐོས་རྗེ་འབངས་བསོད་ནམས་ཉེར་བྱོན་པ། །རྒྱ་ཆེན་ཐུགས་བསྐྱེད་(༢༧༦ན) ― GLG021_Page_0553 ―
[མ་དཔེ་གཟིགས་ན་འདིར་གནོན།]
དབྱར་མཚོ་ལྟར་འཕེལ་བ། །འགྲོ་རྣམས་མཐོང་ཐོས་དྲན་པས་འདྲེན་མཛད་ཆེར། །སྐྱབས་གནས་སྣ་ཚོགས་སྒྱུ་འཕྲུལ་དྲ་བའི་གར། །སྟེང་འོག་ཕྱོགས་མཚམས་ཀུན་ཏུ་ཡོངས་བསྒྱུར་བ། །ཕུན་ཚོགས་ཆོས་དཀར་རིང་ནས་འབོད་བྱེད་བརྡར། །ཕྲ་ཞིབ་པིར་གྱི་རྩེ་མོར་ཤར་གྱི་དོགས། །མཁྱེན་བརྩེ་ནུས་མཐུ་བརྒྱ་བྱིན་གཙུག་གཏོར་གྱིས། །འཁོར་འཁྱམས་མི་ཡི་ལུས་ལ་རེག་པའི་མོད། །ངེས་ལེགས་སྐབས་གསུམ་ལུས་སུ་སྐད་ཅིག་ཏུ། །འགྱུར་བའི་དགའ་སྟོན་མངོན་སུམ་བདག་ལ་རྩོལ། །དུས་སུམ་རྒྱལ་ཀུན་ཡོན་ཏན་ཕུང་པོའི་ཚོགས། །རྒྱ་མཚོའི་དབུས་ན་ལྷུན་པོ་ལྟར་འཕྱུར་བ། །བདེ་ཆེན་ཆོས་ཀྱི་རྒྱལ་པོ་ལྷར་བཅས་འགྲོའི། །གཙུག་ན་མངོན་པར་འགྱིང་ཁྱོད་མཆོག་ཏུ་བསྔགས། །དད་པའི་ཟླ་ཟེར་འཐུང་བའི་པདྨ་དཀར། །འདབ་བརྒྱ་ཕྱོགས་བཅུར་གྲོལ་ལྟར་བླ་མ་དང༌། །ཡི་དམ་སངས་རྒྱས་བྱང་སེམས་ཆོས་སྐྱོང་གིས། །ཡོངས་བསྐོར་མཐོང་བའི་མོད་ལ་རྣམ་པར་གྲོལ། །འཇམ་གཉེན་ཕྱག་མཐིལ་བདག་གི་གཙུག་བཀོད་ནས། །སྲིད་ཞིའི་འཇིགས་པ་རྣམས་ལས་དབུགས་དབྱུང་སྟེ། །འདི་ཕྱི་བར་དོ་ཀུན་ཏུ་ཕན་བདེ་ཡི། །ལམ་དུ་འཁྲིད་པའི་ས་མཁན་མཛད་དུ་གསོལ། །རྡོ་རྗེ་འཆང་ནས་རྩ་བརྒྱུད་བླ་མའི་བར། །གསུང་ངག་དབང་བཞིའི་ཆུ་བོ་ཆད་མེད་རྒྱུན། །བློ་གྲོས་བཟང་པོའི་བུམ་པར་འཁྱིལ་བའི་གཏམ། །རྒྱ་མཚོའི་གོས་ཅན་ཡོངས་ལ་ཁྱབ་དེ་བསྔགས། །ལྷུང་ལྷུང་འཆི་བ་མེད་པ་བདུད་རྩིའི་ཆབ། །ལྷོད་ལྷོད་ཚངས་བུག་ནས་འབབ་མི་འཇིགས་སྦྱིན། །ཡང་ཡང་རབ་རྩོལ་ཚེ་མཐའ་ཡས་པའི་ལྷ། །མང་(༢༧༦བ) ― GLG021_Page_0554 ―
[མ་དཔེ་གཟིགས་ན་འདིར་གནོན།]
མང་ཉི་བུའི་གཉེན་པོར་ཆས་པ་བཞིན། །འཕྲིན་ལས་ཀུན་བསྒྲུབ་དཔལ་ཆེན་ཕུར་པའི་ལྷ། །ལྷ་མཆོག་དབྱངས་ཅན་རབ་ཁྲོས་དམག་ཟོར་རྒྱལ། །རྒྱལ་ཆེན་འདོད་དགུ་གཏེར་གྱུར་རྣམ་ཐོས་སྲས། །སྲས་བཙུན་བློན་འཁོར་རྣམས་ཀྱིས་དེང་འདིར་སྐྱོངས། །གསང་སྔགས་རྒྱུད་སྡེར་འབྱམས་ཀླས་དོན་གཉིས་ཀུན། །ལྷུན་གྲུབ་ཆེད་དུ་བློ་བརྩོན་གྲུ་རྫིངས་ཀྱིས། །གཏན་མདུན་རྒྱ་མཚོར་བགྲོད་འདོད་ལྷག་བསམ་གྱིས། །བྲིས་ཐང་བདུན་ཚར་འབད་པས་བཞེངས་པའི་མཐུས། །རྡོ་རྗེའི་སློབ་དཔོན་བསྐལ་བརྒྱར་ཞབས་བརྟན་ཅིང༌། །བདག་སོགས་བྱང་ཆེན་བར་དུ་མི་འབྲལ་བར། །རྗེས་བཟུང་འདི་ཕྱི་གཏན་མདུན་ལེགས་ཚོགས་ཀུན། །བསམས་པ་ཇི་བཞིན་ལྷུན་གྱིས་གྲུབ་པར་ཤོག །ཅེས་དགའ་གདོང་སྔགས་རམས་པ་དོན་འགྲུབ་རྒྱ་མཚོས་དཔལ་མར་མེ་མཛད་དང་རྒྱལ་བ་ཙོང་ཁ་པ་ལ་ལམ་རིམ་བརྒྱུད་པས་བསྐོར་བ། ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་དང་བཅས་པའི་བྲིས་ཐང་བཞེངས་པར་རྒྱབ་ཡིག་སྨོན་ལམ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སརྦམངྒལཾ། །བདུད་རྩིའི་རང་བཞིན་འཆི་མེད་སྐྱེད་ཚལ་ལ། །ཅོ་འདྲིའི་གཏོར་སྣོད་བཅུ་བཞིར་ཞོས་ལྷག་པའི། །དངུལ་དཀར་ལས་གྲུབ་བློ་བཟང་བཀྲ་ཤིས་ཀྱིས། །ཕུལ་བས་བསམ་དོན་ལྷུན་གྱིས་གྲུབ་པར་ཤོག །ཅེས་པ་འདིའང་དགེ་སྐོས་འཇོག་ཏུ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ཡིད་འཕྲོག་འཇའ་(༢༧༧ན) ― GLG021_Page_0555 ―
[མ་དཔེ་གཟིགས་ན་འདིར་གནོན།]
ཚོན་འཁྲིགས་པའི་གུར་ཁྱིམ་ནང༌། །སྣ་ཚོགས་པད་འདབ་བཞད་པའི་གེ་སར་རྩེར། །ཉ་གང་ཟླ་དཀྱིལ་སྟེང་ན་འཇོ་སྒེག་ཅན། །རྗེ་བཙུན་བརྟན་པའི་འཁོར་ལོར་གསོལ་བ་འདེབས། །བཅུ་དྲུག་ལང་ཚོ་དར་བའི་མཚམས་སྤྲིན་མདངས། །འཛུམ་ཞལ་ཚེམས་དཀར་ཕྲེང་མཛེས་འགྲོར་ཆགས་པའི། །དཀྱུས་རིང་སྤྱན་ལྡན་གནག་སྣུམ་ཐོར་ཚུགས་ལས། །ཟུར་ཕུད་རྣམ་ལྔ་གཡོ་ལ་གསོལ་བ་འདེབས། །འཇམ་གཉེན་ཆོས་འཁོར་ཕྱག་བརྒྱའི་སོར་མོ་ཡིས། །བཟུང་བའི་ཨུཏྤལ་སྙན་ཐད་གྱེས་པའི་སྟེང༌། །མི་ཤེས་གཅོད་པའི་རལ་གྲི་སྤྲོས་བྲལ་དོན། །གསལ་མཛད་གླེགས་བམ་འཛིན་ལ་གསོལ་བ་འདེབས། །འགྲོ་ཀུན་མཐའ་གཉིས་བསྒལ་མིན་མི་བཤིག་པར། །དམ་བཅས་རྡོ་རྗེའི་སྐྱིལ་མོ་ཀྲུང་གི་བཞུགས། །རིན་ཅེན་རྒྱན་དང་དར་གྱི་ན་བཟའ་ཡིས། །འཇའ་ཚོན་ལྟ་བུར་བཀྲ་ལ་གསོལ་བ་འདེབས། །དཔལ་གྱི་མགུར་ནས་ཚངས་པའི་དབྱངས་སྙན་པོས། །ཆོས་ཀྱི་འཁོར་ལོ་བསྐོར་ཚེ་སྐལ་ལྡན་རྣམས། །གནས་ལྔ་རིག་པར་བློ་གྲོས་རྒྱས་མཛད་པ། །ངག་གི་དབང་ཕྱུག་སྩོལ་ལ་གསོལ་བ་འདེབས། །སྒྲིབ་གཉིས་གཡའ་བྲལ་ཐུགས་ཀྱི་ཨཱ་དརྴར། །བདེན་གཉིས་ཆོས་ཚུལ་གནས་ལུགས་ཡོངས་གཟིགས་པས། །འགྲོ་རྣམས་འདྲེན་ལ་ཐབས་མཁས་ཐུགས་རྗེ་ཅན། །ཤེས་བྱ་ཐམས་ཅད་མཁྱེན་པར་གསོལ་བ་འདེབས། །དགེ་ཚོགས་བསྒྲུབ་འདུན་དཔལ་འབྱོར་རབ་རྒྱས་དེས། །མགོན་ཁྱོད་ལྷར་བསྟེན་སྣང་བརྙན་བཞེངས་པའི་མཐུས། །དེང་ནས་བྱང་ཆུབ་བར་དུ་རྗེས་བཟུང་སྟེ། །འཁོར་(༢༧༧བ) ― GLG021_Page_0556 ―
[མ་དཔེ་གཟིགས་ན་འདིར་གནོན།]
འདས་ཡོན་ཏན་མ་ལུས་ལྷུན་གྲུབ་ཤོག །བཀའ་པོད་ཆེན་པོ་བཞི་དང་བཅུ་ཡི་གྲངས། །གཞུང་ལུགས་རྒྱ་མཚོར་རབ་ཏུ་འབྱམས་ཀླས་པར། །བློ་གྲོས་ཡངས་ཤིང་གསལ་བའི་འདུས་སྡེའི་གླིང༌། །མ་ཕམ་དབུས་འགྱུར་བྱོན་མིན་དར་བར་ཤོག །འཆད་པའི་སྤོབས་པ་དབྱིག་གཉེན་ལྟ་བུར་མཐོ། །རྩོད་དང་ཆོས་ཀྱི་གྲགས་པ་གཟུགས་གཞན་བཟུང༌། །རྩོམ་ལ་དཔའ་བའི་རྗེས་འགྲོ་མཁས་མང་གི །ཁྲིམས་ལྡན་སྡེ་འདིར་རྟག་ཏུ་གང་གྱུར་ཅིག །བྱེ་བྲག་མངོན་པར་རྟོགས་པ་རྒྱན་རྩ་འགྲེལ། །དབུ་མའི་རྩ་བ་དེ་ལ་འཇུག་པའི་གཞུང༌། །མདོ་རྩ་ཆོས་མངོན་མཛོད་བཞིན་ཡོངས་སྦྱངས་པ། །དཔྱོད་ལྡན་མཁས་མང་དབྱར་མཚོ་ལྟར་འཕེལ་ཤོག །མདོར་ན་རྣམ་གསུམ་འཁོར་ལོའི་བྱ་བ་ཀུན། །ཡར་ངོའི་ཟླ་བ་བཞིན་དུ་རབ་རྒྱས་པས། །བློ་བཟང་གྲགས་སྙན་འབར་བའི་བསྟན་པ་ལ། །མཛེས་རྒྱན་སྐྱེ་རྒུའི་བསོད་ནམས་ཞིང་འགྱུར་ཤོག །ཅེས་སྤོ་འབོར་ཆོག་ཐུ་ཆོས་རྗེ་དགེ་འདུན་དཔལ་འབྱོར་གྱིས་མཁས་མང་བློ་གསལ་གླིང་པར་མཚན་ཡང་དག་པར་བརྗོད་པ་གསུང་བའི་སླད་དུ་དངུལ་སྲང་ལྔ་བཅུ་དང་རྗེས་སུའང་སྐུ་བཞེང་པའི་ཐེབས་སྦྱར་བའི་སྐུ་གཙང་ཁང་དུ་བཞུགས་ཏེ་གསོལ་འདེབས་འཛུགས་རྒྱུའི་བསྐུལ་མ་དང༌། དེ་ལ་གྲྭ་ཚང་འཕེལ་རྒྱས་ཀྱི་སྨོན་ལམ་ཡོད་པ་ཞིག་དགོས་ཚུལ་འཆད་ཉན་མང་ཐོས་ལེགས་པ་དོན་གྲུབ་གྲྭ་དམངས་དང་བཅས་པས་ཟུར་བརྒྱན་པར་བརྟེན། ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ངེས་གསང་རྡོ་རྗེའི་ཤུགས་འབར་མཚོན་རྣོན་པོ། །གདེངས་(༢༧༨ན) ― GLG021_Page_0557 ―
[མ་དཔེ་གཟིགས་ན་འདིར་གནོན།]
བས་བདུད་ལས་རྣམ་པར་རབ་རྒྱལ་བའི། །སྙིང་པོ་ཕན་བདེའི་ལེགས་ཚོགས་བཤད་སྒྲུབ་ཀྱིས། །བསྐལ་བར་ཡོངས་སྤེལ་རིགས་འཛིན་གླིང་ཆེན་པོར། །བདུན་ཞོས་ལྷག་པའི་དངུལ་སྲང་ཉེར་གསུམ་རྒྱུར། །ཉེར་གྲུབ་བུམ་བཟང་དབང་ཆུ་ཀུན་མཁྱེན་སྣོད། །ཕུལ་བས་སྲིད་འདིར་ཚེ་དཔལ་དབང་ཐང་རྒྱས། །རིང་མིན་ཐར་པའི་གྲིང་དུ་བགྲོད་པར་ཤོག །འཕྱོས་པ་གཟིམས་དཔོན་བློ་བཟང་དོན་གྲུབ་ཀྱིས་དངུལ་བུམ་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད་པ་ལཀྵྨཱི། །ཛམ་བུ་ཆུ་བོའི་གསེར་གྱི་ཁ་དོག་ལ། །མཚན་དཔེའི་སྣང་བ་རབ་བཀྲ་མཐོང་བས་དོན། །ཀུན་གྲུབ་བུ་རམ་ཤིང་པའི་ཞལ་ཁྱིམ་དངོས། །ཇོ་བོ་ཤཱཀྱ་མུ་ནེའི་སྐུ་གཟུགས་ལ། །འཇམ་གཉེན་རེག་བྱའི་ཡོན་ཏན་ཁྱད་པར་རྣམས། །ལེགས་ཚང་དགེ་སློང་མཆོག་གི་སྤྱད་བྱའི་འོས། །དྲས་ཤིང་དྲུབས་སམ་ལྷན་ཐབས་སྦྱར་བ་ཡི། །སྣམ་སྦྱར་ངུར་སྨྲིག་རྒྱལ་མཚན་ཕུལ་བའི་དགེས། །འཇིག་རྟེན་འདི་ན་ཕན་བདེ་མ་ལུས་ཚོགས། །འབྱུང་གནས་རྣམ་འདྲེན་བསྟན་པ་རབ་རྒྱས་ཤིང༌། །ངག་དབང་བློ་གསལ་སྐལ་བཟང་རྒྱ་མཚོའི་སྡེ། །གཡུང་དྲུང་སྲོག་གི་ཀ་བ་ཚུགས་གྱུར་ཅིག །ལྷག་བསམ་དག་པས་ཆེད་དུ་རྒྱུ་སྦྱོར་བ། །སྒྲ་དབྱངས་མཆོད་པའི་སྤྲིན་ཕུང་སྤྲོ་བ་ཡི། །དབུ་མཛད་བློ་བཟང་ཡོན་ཏན་ཚེ་དཔལ་དང༌། །འབྱོར་ལྡན་དངོས་ཀུན་བླ་ནས་བླར་འཕེལཤོག །སྐྱེ་བར་ཉི་མའི་གཉེན་གྱིས་རྗེས་བཟུང་ནས། །ལྷ་མིའི་རྟེན་བཟང་རིམ་བརྒྱུད་ཐར་པ་ཡི། །མི་གནས་མྱ་ངན་འདས་པའི་གྲོང་ཁྱེར་དུ།(༢༧༨བ) ― GLG021_Page_0558 ―
[མ་དཔེ་གཟིགས་ན་འདིར་གནོན།]
།འཇུག་པར་ཐུགས་རྗེའི་གཏེར་གྱི་བདག་བྱིན་རློབས། །ཞེས་པའངདབུ་མཛད་བློ་བཟང་ཡོན་ཏན་གྱིས་ལྕགས་ཕོ་སྤྲེའུའི་ཆོ་འཕྲུལ་ཟླ་བའི་ཚེས་གསུམ་ནས་བཅུའི་བར་ར་ས་འཕྲུལ་སྣང་དུ་བརྒྱ་མཆོད་དང༌། ཚེས་བརྒྱད་ཀྱི་ཉིན་ཇོ་བོ་རིན་པོ་ཆེར་སྣམ་སྦྱར་ཕུལ་བའི་ཞལ་བྱང་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མཐོང་བས་དོན་དང་ལྡན་པ་ཉི་མའི་གཉེན། །དགུང་གྲངས་བརྒྱད་ལོར་སླེབས་པའི་སྐུ་ཡི་ཚད། །ཇོ་བོ་མི་བསྐྱོད་རྡོ་རྗེར་རུང་མཐུན་གོས། །བློ་བཟང་ཡོན་ཏན་དད་པས་ཕུལ་བའི་དགེས། །སངས་རྒྱས་བསྟན་པ་སྲིད་མཐར་རབ་རྒྱས་ཤིང༌། །དེ་འཛིན་རྗེ་བཙུན་བླ་མའི་ཞབས་པད་བརྟན། །བྱེ་བ་ཕྲག་བརྒྱའི་འཇིག་རྟེན་གསུམ་གྱི་འགྲོ། །རྫོགས་ལྡན་དགའ་སྟོན་དཔལ་ལ་སྤྱོད་པར་ཤོག །བསོད་ནམས་བྱེད་པོ་ཚེ་རབས་ཐམས་ཅད་དུ། །མི་ཁོམ་སྐྱོན་བྲལ་རྟེན་བཟང་ལེགས་རྙེད་དེ། །ཐོས་བསམ་སྒོམ་པའི་ཐེམ་སྐས་ལ་འཛེགས་ནས། །བྱང་ཆུབ་མཆོག་གི་ཁང་པར་མྱུར་འཇུག་ཤོག །ཅེས་ལྕགས་སྤྲེ་ཆོ་འཕྲུལ་མཆོད་པའི་དུས་ར་མོ་ཆེར་དབུ་མཛད་བློ་བཟང་ཡོན་ཏན་གྱིས་མཆོད་པ་སྣ་ལྔ་བརྒྱ་རྩ་དང་སྣམ་སྦྱར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔོན་ཚང་དར་མོ་བའོ། །(༢༧༩ན) ― GLG021_Page_0559 ―
[མ་དཔེ་གཟིགས་ན་འདིར་གནོན།]
མ ཉྫུ གྷོ ཥེ ནྡྲ ཝཱ། དྶ ཤུ ཀླ ཤྩ ཀ ནྛ སྱ པཱ ཡ སྶ ར ཀྲཱི ཌ དཽ ཧྱེ ནྲྀ ཏཱ། འཇམ་དབྱངས་ངག་གི་དབང་ཕྱུག་ངང་མོ་དཀར། །མགྲིན་པའི་འོ་མཚོར་རྩེ་འཇོའི་རོལ་གར་གྱིས། །དྷཱི པྲ བྷཱ ཀ རྣ སཱ མི རྨ དྷོ ཏུ ཙྱ ཤ བྡཾ ཛྷ པི ཏྶཽ བྷ ག པྲི ཡ མཻ ཏྲོ ཏྟ མཿབློ་གསལ་རྣ་བར་སྙན་འཇེབས་གདུབ་སིལ་སྒྲ། །འཁྲོལ་བས་སྐལ་བཟང་དགའ་བའི་བཤེས་གཉེན་མཆོག །རྒྱ་ཆེན་གཙུག་ལག་ཏམ་བུ་ར་ཡི་རྒྱུད། །མཚོ་བྱུང་ལུས་ཕྲའི་སོར་རྩེས་ཉེར་བསྐུལ་གླུ །ལེན་པར་རྣམ་དཔྱོད་འཇིགས་མེད་གོ་ཆ་ཅན། །ཐུབ་བསྟན་ལང་ཚོའི་སྡེ་ཡི་འདྲ་འབག་ལ། །རྩ་བའི་བླ་མ་འཁོན་སྟོན་རྡོ་རྗེ་འཆང༌། །འཆི་མེད་ཟིལ་དངར་སྟེར་བྱེད་ཚེ་ལྷ་ཟུང༌། །འཁོར་འདས་ཕྱག་རྒྱ་ཟིལ་གནོན་ཡི་དམ་དང༌། །ཆོས་སྲུང་བྲམ་ཟེའི་རྣམ་རོལ་གྱིས་བསྐོར་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །དྲིན་ཅན་མ་རྒན་ཕུན་ཚོགས་ཕྱག་སྐོར་དང༌། །མཆོད་པའི་རྟེན་དུ་ཟླ་(༢༥༩བ) ― GLG021_Page_0560 ―
[མ་དཔེ་གཟིགས་ན་འདིར་གནོན།]
འོད་ལྟར་དཀར་བ། །རྣམ་དག་བསམ་པས་བསྐྲུན་པའི་བསོད་ནམས་འབྲས། །བྱེད་པོར་གཏོགས་རྣམས་དེང་ནས་ཚེ་རབས་ཀུན། །བདེ་སྐྱིད་ལྷ་ཡི་དཔལ་ལ་འགྲན་པའི་ངང༌། །རིང་མིན་འཁོར་བའི་རྒྱ་མཚོ་ལས་བསྒྲལ་ནས། །ཐར་པ་རིན་ཆེན་གླིང་དུ་བགྲོད་ནུས་ཤོག །སྐྱེ་མང་འཕྲེང་བར་ཡང་དག་མ་ནོར་ལམ། །སྟོན་པའི་བཤེས་གཉེན་མགོན་པོ་ཁྱོད་ཉིད་ཀྱིས། །ནམ་ཡང་འབྲལ་བ་མེད་པར་རབ་མཛད་དེ། །སྲིད་ཞིའི་དགེ་ལེགས་ཅི་བསམ་ལྷུན་གྲུབ་ཤོག །བླ་མ་ཡིད་དམ་མཁའ་འགྲོ་ཀ་ཤི་ཀའི། །ངོས་སུ་འཇའ་མཚོན་ལྟར་ཤར་གྱིས་མཚོན་ཏེ། །སླུ་མེད་དཀོན་ཅོག་རིན་ཅེན་རྣམ་གསུམ་གྱི། །ཐུགས་རྗེའི་བྱིན་རླབས་སྙིང་ལ་འཇུག་པར་ཤོག །གྲུ་འཛིན་རི་བོའི་སྤོ་ནས་པད་དཀར་འཆང༌། །གངས་ཅན་སྐྱེ་རྒུའི་མགོན་སྐྱབས་དཔུང་གཉེན་དུ། །གནམ་སའི་དཀྱིལ་འཁོར་ཡོངས་ཀྱི་བདག་པོ་རུ། །ལེགས་བྱོན་སྲོང་བཙན་སྒམ་པོའི་སྣང་བརྙན་ལ། །སྤྲུལ་པའི་དགེ་སློང་སེམས་ཉིད་ངལ་གསོ་དང༌། །འཇིག་རྟེན་དབང་ཕྱུག་གནང་བ་གསལ་བའི་ཞབས། །ཆགས་མེད་ཀུན་དགའ་ཡི་དམ་བཅུ་གཅིག་ཞལ། །བསྟན་སྲུང་དུང་སྐྱོང་དབང་མོས་བསྐོར་བ་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །སོགས་ཤློ་ཀ་བཞི་པོ་སྦྱོར་བ་འོག་མ་ཀུན་ལ་འགྲེ། །དགེ་བསྙེན་ཚུལ་གྱིས་དམན་ཆ་བླངས་ན་ཡང༌། །དོན་གྱི་སྒོ་གསུམ་བག་ཡོད་བཙུན་པའི་མཆོག །བགྲང་ཡས་རྒྱལ་བ་རྒྱ་མཚོའི་འབྱུང་གནས་ཆེ། །བཀའ་གདམས་མེས་པོ་བཤེས་གཉེན་འབྲོམ་སྟོན་ལ། །ཕུལ་བྱུང་རྒྱལ་པོ་ལྷ་སྐྱེས་དཀོན་ཅོག་འབངས། །དད་པ་བརྟན་དང་རབ་བརྟན་བློ་གྲོས་འཕེལ། །ཁྱིའུ་དགའ་འཛིན་ཡི་(༢༨༠ན) ― GLG021_Page_0561 ―
[མ་དཔེ་གཟིགས་ན་འདིར་གནོན།]
དམ་མི་གཡོ་མགོན། །ཆོས་སྲུང་ལེགས་ལྡན་ལྷོ་ནུབ་པས་བསྐོར་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །སྒྲ་ཚད་བཟོ་གསོ་མདོ་རྒྱུད་རིག་པའི་གནས། །ཀུན་གཟིགས་གསལ་བའི་སྤྱན་སྟོང་རབ་བཀྲ་བས། །མཁས་མང་ཉེ་དབང་གཙུག་འགྱིང་འཆི་མེད་བདག །ཐམས་ཅད་མཁྱེན་ངེས་དགེ་འདུན་གྲུབ་པ་ལ། །བློ་བཟང་གྲགས་སྙན་བཙུན་པ་ནོར་བུ་དང༌། །ཟླ་བ་རིན་ཅེན་སྙིང་པོ་པདྨའི་མཚན། །འོད་ཟེར་ཡི་དམ་ཡིད་བཞིན་འཁོར་ལོའི་ཞབས། །བསྟན་སྲུང་འདོད་ཁམས་དབང་མོས་བསྐོར་བ་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །སྙིང་ལ་དབྱངས་ཅན་མཛའ་ན་མོས་འཁྱུད་པས། །བགྲང་ཡས་ཤེས་བྱ་སྨྲ་བར་སྤོབས་པའི་རྩེ། །མཐོན་པོར་སོན་པ་དགེ་བའི་དབང་པོའི་མཆེད། །པཎ་ཆེན་དགེ་འདུན་རྒྱ་མཚོའི་སྐུ་གཟུགས་མཐར། །མཁས་གྲུབ་ནོར་བཟང་བྱམས་པ་སེང་གེའི་སྒྲ། །བདེ་མཆོག་ལྷ་ཡི་རྒྱལ་པོ་དགེ་འདུན་འཕེལ། །སྲོ་ལོང་ཀུན་རྒྱུ་ཡི་དམ་འཁོར་ལོ་སྡོམ། །ཆོས་སྲུང་གནོད་སྦྱིན་བེག་ཙེས་བསྐོར་བ་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །ཐུགས་རྗེ་མཐུ་དཔུང་ཁབ་ལེན་རྡོ་བ་ཡིས། །རྒྱ་ཧོར་བོད་ཀྱིས་ལུས་ཅན་ལྕགས་ཕྱེ་ཀུན། །དབང་མེད་སྡུད་མཛད་བཞད་པའི་རྡོ་རྗེ་ཞེས། །བསོད་ནམས་རྒྱ་མཚོའི་སྐུ་ཡི་འདྲ་འབག་ལ། །དགེ་འདུན་བཀྲ་ཤིས་སྐྱབས་སྦྱིན་གཉའ་ཁྲི་བཙན། །ཐོ་རི་སྙན་ཤལ་ཁྲི་སྲོང་རལ་པ་ཅན། །དགེ་དཔལ་ཡི་དམ་རྣལ་འབྱོར་ནམ་མཁའ་ཆེ། །བསྟན་སྲུང་སྡེ་དཔོན་གུར་མགོན་གྱིས་བསྐོར་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །གདུལ་དཀའ་འདུལ་བའི་འཕྲིན་ལས་སྒོ་འཕར་(༢༨༠བ) ― GLG021_Page_0562 ―
[མ་དཔེ་གཟིགས་ན་འདིར་གནོན།]
བརྒྱ། །འབྱེད་ལ་ཚེ་རིང་གནམ་གྱི་རིགས་བརྒྱུད་དུ། །གཏིང་མཐའ་མི་མངོན་ཡོན་ཏན་རྒྱ་མཚོའི་གཏེར། །བདེ་ཆེན་ཆོས་ཀྱི་རྒྱལ་པོ་དཔལ་བཟང་པོ། །བློ་བཟང་ཆོས་རྒྱལ་ཁ་ཆེ་དགོན་པ་བ། །ས་ཆེན་གཡུ་བྲག་ཉང་རལ་དགེ་བ་འབུམ། །པདྨ་བཛྲ་ཡི་དམ་དུས་ཀྱི་དགྲ། །ཆོས་སྲུང་ལས་ཀྱི་གཤིན་རྗེས་བསྐོར་བ་འདི། །དཔལ་གྲོང་སྔགས་རམས་ངག་དབང་དགེ་ལེགས་ཀྱིས། །ཞེས་རྩེ་དང་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་རང་དང་མ་ཕུན་ཚོགས་ཀྱི་ཆེད་དུ་བཀའ་གདམས་གླེགས་བམ་རིན་པོ་ཆེ་གཙོ་བོར་གྱུར་པའི་འཁྲུངས་རབས་གསོལ་འདེབས་རིན་ཅེན་འཕྲེང་མཛེས་ནང་བཞིན་ལ་སོ་སོའི་བླ་མ་རྣམས་རིགས་བདག་གི་ཚུལ་དུ་བཞུགས་པའི་བྲིས་ཐང་བདུན་ཚར་བཞེངས་པར་གཟུངས་སུག་བྲིས་རབ་གནས་མེ་ཏོག་བརྒྱ་རྩ་དང་བཅས་པ་བགྱིས་པར་ཁ་བྱང་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བྱས་པ་བྷ་ཝནྟུ། །འོད་གསལ་ལྷ་ཡི་རྨུ་ཐག་ལས་བརྒྱུད་དེ། །འཁོན་སྟོན་གྲུབ་བརྙེས་སྔགས་འཆང་མང་བྱོན་མཐར། །ཟུར་ཕུད་ལྔ་ལྡན་བླ་ཆེན་བརྩེ་བ་ཆེའི། །ཆོས་སྲིད་རིང་ལུགས་སྤེལ་ལ་གསོལ་བ་འདེབས། །འཇམ་དཔལ་དབྱངས་དངོས་འགྲོ་བའི་བསོད་ནམས་ཞིང༌། །ཐུབ་བསྟན་ཡོངས་འཛིན་དབང་པོར་བྱམས་པའི་ཐུགས། །ལེགས་སྐྱེས་ཆོས་ཀྱི་རྒྱལ་མཚན་བསྒྲེངས་མཁས་པ། །དཔལ་ལྡན་སྐལ་བ་བཟང་པོར་གསོལ་བ་འདེབས། །ཉི་མའི་གཉེན་གྱི་མི་འཇིགས་སེང་ཁྲིའི་སྟེང༌། །མགོན་ཁྱེད་བསྐལ་བརྒྱར་གཡུང་དྲུང་ལྟར་བཞུགས་ནས། །ཟབ་རྒྱས་འཁོར་ལོ་གསུམ་གྱིས་འགྲོ་(༢༨༡ན) ― GLG021_Page_0563 ―
[མ་དཔེ་གཟིགས་ན་འདིར་གནོན།]
བ་རྣམས། །མངོན་མཐོ་ངེས་ལེགས་ས་ལ་འགོད་བྱིན་རློབས། །ཁྱད་པར་དབང་བཞིའི་ཆུ་བོ་ཆད་མེད་པ། །དཔལ་ལྡན་ཆོས་སྐྱོང་ཐུགས་ཀྱི་ཉིང་ཁུ་ཡིས། །རིན་ཅེན་ལྟ་བུའི་གདུལ་བྱ་འཕྲང་རིང་གསུམ། །བརྒལ་ནས་ཟུག་འཇུག་གྲོང་དུ་འདྲེན་པར་ཤོག །དགྱེས་མཛད་རྡོ་རྗེ་མཁའ་སྤྱོད་བཙུན་མོ་ཆེ། །རིགས་བྱེད་མ་དང་ཚོགས་བདག་འདོད་པའི་རྒྱལ། །གུར་མགོན་སྟོབས་འཕྲོག་དབང་པོ་ལས་མཁན་བཅས། །མཁའ་སྤྱོད་རྣམ་ལྔས་དུས་ཀུན་བཀྲ་ཤིས་སྩོལ། །ཞེས་དཔལ་ལྡན་ས་སྐྱ་པའི་གདན་ས་འོག་ནས་བདག་ཆེན་འཇམ་དབྱངས་བསོད་ནམས་བསྟན་འཛིན་དབང་པོ་བྱམས་པ་ཆོས་ཀྱི་རྒྱལ་མཚན་དཔལ་བཟང་པོའི་གསོལ་འདེབས་བརྟན་བཞུགས་འདི་ནི་རབ་འབྱམས་རྒྱུད་སྡེ་རྒྱ་མཚོར་གཞན་དྲིང་མི་འཇོག་པ་བཅོ་བརྒྱད་ཆོས་རྗེ་བྱམས་པ་ངག་དབང་ལྷུན་གྲུབ་ཀྱི་གསུང་གིས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་སོ། །ཐུགས་རྗེ་བསྐུལ་གསོལ་ལྷུན་པོ་བསྒྲིལ་བ་ཡིས། །བྱིན་རླབས་ཆུ་གཏེར་ལས་ཐོན་འཆི་མེད་ཀྱི། །བདུད་རྩི་སྲོག་རྩ་རྡོ་རྗེའི་ངོ་བོ་རུ། །ཡིད་བཞིན་འཁོར་ལོས་ཏིཥྛ་བཛྲ་མཛོད། །ལུས་ངག་ཡིད་གསུམ་ཐོས་བསམ་སྒོམ་པ་ལ། །དབང་སྒྱུར་བློ་གསལ་བག་ཆགས་བཟང་པོའི་མཐུས། །གསེར་མདོག་ཞྭ་ཡི་རིང་ལུགས་རྒྱ་མཚོའི་གོས། །ཕ་མཐའ་མི་འགྱུར་ཆེད་དུ་ཞབས་བརྟན་ཤོག །སངས་རྒྱས་ཀུན་དངོས་རྗེ་བཙུན་བཙོང་ཁ་པའི། །ཆོས་སྲིད་མངའ་ཐང་རྒྱ་མཚོའི་རླབས་ཀྱི་ཕྲེང༌། །ནམ་ཡང་ཡོལ་མེད་ཚངས་རིས་ཡུལ་ས་ཆེར། །ཡོངས་འདེགས་(༢༨༡བ) ― GLG021_Page_0564 ―
[མ་དཔེ་གཟིགས་ན་འདིར་གནོན།]
མི་དབང་རྡོ་རྗེ་ལྟར་བརྟན་ཤོག །རྒྱལ་བ་བློ་བཟང་གྲགས་པའི་མོས་རྒྱུད་བསྟན། །བོད་དང་བོད་ཆེན་ཀུན་ཏུ་རབ་འཕེལ་ཞིང༌། །སྡེ་འདིར་རྣམ་གསུམ་འཁོར་ལོའི་བྱ་བ་རྣམས། །ཡར་ངོའི་ཟླ་བ་ལྟ་བུར་རྒྱས་བྱེད་ཤོག །མཆོག་དམན་བར་པའི་གཉའ་བར་ཁྲིམས་གཉིས་ཀྱི། །གསེར་ཤིང་རྣམ་པར་ལྕི་བས་བརྒྱད་ཁྲིའི་ཚོར། །ཉེར་སྤྱོད་སྐྱེ་རྒུའི་བདེ་སྐྱིད་མངོན་སུམ་དུ། །མངའ་འབངས་ཡོངས་ཀྱིས་ཉམས་སུ་མྱོང་ནུས་ཤོག །མྱུར་མཛད་མགོན་པོ་དམ་ཅན་གཤིན་རྗེའི་རྒྱལ། །འདོད་པ་ཁམས་ཀྱི་དབང་ཕྱུག་མ་ལ་སོགས། །ཆོས་སྐྱོང་སྲུང་མས་ཇི་ལྟར་སྨོན་པ་ཡི། །འཕྲིན་ལས་བསྒྲུབ་ལ་ནམ་ཡང་མི་གཡེལ་ཤོག །དཀོན་ཅོག་རིན་ཅེན་གསུམ་གྱི་བྱིན་རླབས་དང༌། །ཆོས་ཉིད་འགྱུར་མེད་ཆོས་ཅན་རྒྱུ་འབྲས་ཚོགས། །རྟེན་འབྱུང་བདེན་པས་རབ་སྨོན་རེ་བ་ཀུན། །ལེགས་སྐོང་བཀྲ་ཤིས་དགའ་སྟོན་རྒྱས་པར་ཤོག །ཅེས་སེ་ར་ཐེག་ཆེན་གླིང་གི་ཧ་སྡོང་མི་ཚན་སྤྱི་ཚོགས་ནས་ངེས་རང་དང་སྡེ་པ་ཟུང་འབྲེལ་གྱི་རིང་འཚོའི་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞོ་དོས་དམན་པའི་དངུལ་ཀོང་ཉེར་གསུམ་གྱི། །སྲང་ལྡན་ཕན་བདེ་ལེགས་བཤད་གླིང་པ་ལ། །ངག་དབང་མཁས་བཙུན་གྲྭ་སྐོར་དུས་ཕུལ་མཐུས། །འགྲོ་ཀུན་མ་རིག་མུན་པ་སེལ་བར་ཤོག །ཅེས་པའང་ཟ་ཧོར་བནྡེས་སུག་བྲིས་བྱས་པ་ཤུབྷཾ། །ལྷ་ཆོས་བདུན་ལྡན་བཀའ་གདམས་རིན་པོ་ཆེའི། །མེས་པོ་གནས་ལྔ་མཁྱེན་པའི་པཎྜི་ཏ། །དགེ་ཚོགས་ལ་འདུན་མཁས་གྲུབ་དམ་པ་ཡི། །རྣམ་འཕྲུལ་(༢༨༢ན) ― GLG021_Page_0565 ―
[མ་དཔེ་གཟིགས་ན་འདིར་གནོན།]
མུ་ཏིག་འཕྲེང་ལྟར་རབ་སྤེལ་མཐུས། །ཐུབ་དབང་བསྟན་པའི་གྲིབ་ཏུ་ཉེར་བསིལ་བར། །ལུས་ཅན་ཐམས་ཅད་བདེ་བར་ངལ་གསོ་ཞིང༌། །རྩ་བའི་བླ་མ་རིགས་རྣམས་ཀུན་གྱི་བདག །འགྱུར་མེད་གཡུང་དྲུང་ངོ་བོར་རྟག་བཞུགས་ཤོག །བསོད་ནམས་ས་བོན་མཐའ་ཀླས་སེམས་ཅན་ཚོགས། །བྱང་ཆུབ་སྙེ་མ་གཡུར་ཟའི་རྒྱུར་འགྱུར་ཞིང༌། །བློ་བཟང་ཆོས་སྐྱོང་དགེ་བའི་བཤེས་གཉེན་གྱིས། །ཚེ་རབས་ཀུན་ཏུ་མི་འབྲལ་རྗེས་འཛིན་ཤོག །ཆེས་ཆེར་སྙིགས་མའི་སྨག་ཏུ་དུ༔ཁའི་མལ། །དུག་གསུམ་གོས་ཀྱིས་གཏུམས་པའི་སེམས་ཅན་རྣམས། །མ་རིག་གཉིད་སློང་ཐུགས་རྗེ་ཆེན་པོའི་རྔ། །འཇིག་རྟེན་ཀུན་ཁྱབ་བརྡུང་མཛད་བདེ་གཤེགས་ཀྱིས། །བརྒྱད་བརྒྱའི་སྨན་མདོ་དཔལ་གྱི་མགུར་པ་ནས། །ཚངས་པའི་དབྱངས་ཀྱིས་ལེགས་གསུང་ཤྭཀྱའི་རྒྱལ། །མཐོང་ཐོས་དྲན་པས་རྣམ་པར་གྲོལ་བའི་སྐུ། །ལྷག་བསམ་དག་པས་ཆེད་དུ་བསྐྲུན་མཐུ་ཡིས། །རྒྱུ་སྦྱོར་འཁོར་བ་ཆུ་སྲིན་འབྱུང་གནས་ལས། །ཉེར་དྲངས་གཏན་གྱི་བདེ་སྐྱིད་རིན་ཅེན་གླིང༌། །སྲིད་ཞིའི་འདོད་པ་འཇོ་བ་དབང་གི་རྒྱལ། །གཙུག་ཏོར་རྩེ་མོར་རྟག་ཏུ་འཆིང་བར་ཤོག །གྱེན་ཐུར་སྤྱན་གྱིས་གཟིགས་པ་མི་ཡོ་བས། །བདུད་རིགས་འབྱུང་པོ་ཕྱེ་མར་འཐག་པའི་ལྷ། །སླུ་མེད་གཏན་གྱི་མགོན་པོ་བཅོམ་ལྡན་འདས། །ཁྲོ་རྒྱལ་མ་ལུས་འདུས་པའི་བདག་ཉིད་ལ། །བདེ་གཤེགས་ཐམས་ཅད་ཚང་བ་ཤཱཀྱའི་རྒྱལ། །བྱང་སེམས་ཡོད་དོ་ཅོག་འདུས་སྤྱན་རས་གཟིགས། །ལྷ་མོའི་རིགས་འདུས་འཕགས་མ་སྒྲོལ་མ་ཡིས། །རབ་བསྐོར་མིག་གི་བདུད་རྩིར་སྤེལ་བའི་དགེས། །ཨ་ཏི་ཤ་དང་འབྲོམ་སྟོན་སྐུ་མཆེད་གསུམ། །གླང་ཤར་(༢༨༢བ) ― GLG021_Page_0566 ―
[མ་དཔེ་གཟིགས་ན་འདིར་གནོན།]
རིམ་བརྒྱུད་ཇོ་བོ་བཀའ་གདམས་པའི། །བསྟན་ལ་ཚེ་རབས་ཀུན་ཏུ་ལེགས་བཞུགས་ནས། །རྣམ་ཐར་གཙང་མའི་བཀའ་བརྒྱུད་འཛིན་པར་ཤོག །ཅེས་གཉལ་པ་བློ་བཟང་ཆོས་སྐྱོང་གིས་གོང་གསལ་བྲིས་ཐང་གསུམ་བཞེངས་པའི་རྒྱབ་ཡིག་བརྟན་བཞུགས་སྨོན་ལམ་དང་བཅས་པ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཛ་ཡནྟུ། །གསལ་གསལ་འདྲེན་བྱེད་བགྲད་ནས་ཉེར་བལྟ་ཞིང༌། །ལྷང་ལྷང་སྙན་པའི་སྒྲ་ཡིས་གསོལ་འདེབས་ན། །ཡང་ཡང་ཐུགས་རྗེའི་འཇུག་པ་འབད་མེད་དུ། །ལྷུག་ལྷུག་སྩོལ་བ་བདེ་གཤེགས་སྨན་པའི་རྒྱལ། །རྒྱལ་སྲས་བླ་བརྒྱུད་སྲུང་མ་འཁོར་གྱི་ཚོགས། །ཚོགས་ཆེན་རྫོགས་ཕྱིར་སྤེལ་བས་མགོན་པོས་སྔོན། །སྔོན་ནས་རབ་བཏབ་སྨོན་ལམ་ལྷུན་གྲུབ་སྐལ། །སྐལ་བཟང་བདག་སོགས་འགྲོ་ལ་འབྱོར་བར་ཤོག །དམ་པའི་ཆོས་ཀྱི་གྲགས་པ་རྒྱ་མཚོའི་དབྱངས། །དབྱངས་བདུན་ཉེར་རྫོགས་ཀླུ་ཡི་ཁེངས་འཕྲོག་གང༌། །གང་ཞིག་གདུལ་བྱའི་རྣ་བར་འཇེབས་མཁས་མཆོག །མཆོག་གསུམ་དངོས་ཞབས་སེང་ཁྲིར་བཀོད་པའི་འཁོར། །འཁོར་གཙོ་བྱང་སེམས་གནོད་སྦྱིན་གྱིས་མཚོན་ཀུན། །ཀུན་ནས་རྣམ་པར་རབ་བཀྲ་ལུས་ཅན་ཚོགས། །ཚོགས་གཉིས་རྫོགས་ནས་བླ་མེད་ཡེ་ཤེས་ལམ། །ལམ་རིང་མྱུར་དུ་བགྲོད་པའི་མཐུ་ལྡནཤོག །ཁ་དོག་གསེར་བཟང་བཟང་པོ་དྲི་མེད་ཀྱིས། །མཚོན་མིན་རབ་མཛེས་མཛེས་སྐུ་མཚན་དཔེའི་དཔལ། །རིན་ཅེན་སྣང་འོད་འོད་ཀྱིས་ལུས་ཅན་ཀུན། །ཁྱབ་མཛད་རྣམ་འདྲེན་འདྲེན་མཆོག་གཟུགས་ཀྱི་སྐུ། །སྐུ་བརྙན་ལྟ་བས་མི་ངོམས་བཀྲག་མདངས་གཟི། །གཟི་བརྗིད་ཕུང་པོར་ཞམ་རིང་སྣ་(༢༨༣ན) ― GLG021_Page_0567 ―
[མ་དཔེ་གཟིགས་ན་འདིར་གནོན།]
ཚོགས་མཐའ། །མཐའ་མེད་འཁོར་བ་སྒྲོལ་བའི་ས་མཁན་ཁྱོད། །ཁྱོད་ཀྱི་ཡོན་ཏན་བདག་ལ་འཇུག་པར་ཤོག །སྐལ་བཟང་རྣམ་འདྲེན་རྣམ་པ་ཐམས་ཅད་མཁྱེན། །དོན་གཉིས་ཀུན་གྲུབ་ཀུན་ལ་རིས་མེད་བརྩེ། །ཤཱཀྱའི་དབང་པོ་དབང་ཕྱུག་བརྒྱད་ལྡན་པ། །འོ་སྐོལ་སྟོན་པ་སྟོན་ཚབ་སླུ་མེད་ལ། །མང་མང་ཆད་མེད་ཆོས་འདིའི་བརྒྱུད་པའི་འཕྲེང༌། །འཇམ་འཇམ་ཆེས་དུལ་བྱང་ཆུབ་སེམས་པ་དང༌། །འཇིགས་འཇིགས་སྲུང་མས་བསྐོར་བ་བཞེངས་པའི་མཐུས། །དུང་དུང་བསམས་པ་ཐམས་ཅད་འགྲུབ་པར་ཤོག །ལག་ན་པད་དཀར་འཆང་བའི་སྤྲུལ་པའི་འཕྲེང༌། །འཕྲེང་བ་ཆད་མེད་ཡིད་བཞིན་ནོར་བུའི་རྗེས། །རྗེས་འཇུག་ཙམ་ལ་སྒྲོ་བཏགས་མཆིང་བུའི་ཟོང༌། །ཟོང་བཅས་དབང་གཞུ་ལྟ་བུར་རབ་བྲིས་འདི། །འདི་ཕྱིའི་དོན་ཀུན་འགྲུབ་པ་མདུན་མའི་རྩེ། །རྩེ་མོར་སོན་འདོད་རྣམ་དག་བསམ་པའི་ཟླ། །ཟླ་རྒྱས་སྟོན་མཚན་ཤར་ཚེ་འཁོར་མཐའི་ཚད། །ཚད་དུ་གཞལ་སླ་རིང་མིན་ཐར་གྲོང་རྙེད། །རྙེད་འདོད་བརྩོན་པས་འདིར་སྣང་ཚེ་དཔལ་དང༌། །དང་པོའི་སངས་རྒྱས་ཐོབ་ནས་ཡིད་ཅན་ཀུན། །ཀུན་མཁྱེན་སར་འགོད་སྨོན་ལམ་འགྲུབ་པའི་དཔང༌། །དཔང་གྱུར་རྒྱལ་སྲས་སློབ་མས་མཛད་པར་ཤོག །ཅེས་གླང་ར་བ་ངག་དབང་དཔལ་བཟང་གིས་གཙོ་བོ་བདེ་གཤེགས་བཞི་ལ་སྨན་བླའི་མདོ་ཆོག་གི་བླ་བརྒྱུད་དང་མདོ་ནས་བཤད་པའི་འཁོར་ཚོགས་རྣམས་ཀྱིས་བསྐོར་བ། ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་འགྲོ་ལ་རྗེས་བརྩེ་མ་སོར་གནས་དང་བཅས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་(༢༨༣བ) ― GLG021_Page_0568 ―
[མ་དཔེ་གཟིགས་ན་འདིར་གནོན།]
གྲོང་སྔགས་རམས་པས་བགྱིས་པ་ཤྲཱིབྷཝནྟུ། །རང་རྒྱུད་གཉིས་འཐུང་ལང་ཚོ་ཆེས་དར་གོམ། །མཐའ་མེད་འཁོར་ཁྲོད་ནགས་སུ་རྒྱུ་བའི་སྣར། །བག་ཡོད་ལྕགས་ཀྱུ་བཏབ་ནས་དུལ་བྱེད་པ། །བསྟན་པའི་རྩ་བ་སོ་ཐར་ལས་གཞན་ཅི། །ཁྱིམ་པར་རབ་བྱུང་བསྒྲུབ་བྱ་རིགས་བརྒྱད་ཀྱི། །ཡང་རྩེ་ཚངས་པར་སྤྱོད་པ་དཔལ་གྱི་མཆོག །དགེ་སློང་ལ་འོས་སྣམ་སྦྱར་གླེགས་བུ་རུ། །སྦྱར་འདི་ཆོས་ཀྱི་རྒྱལ་མཚན་བསྒྲེང་བ་བཞིན། །རྒྱ་ཧོར་བཟང་གོས་སྣ་ཚོགས་ཕྱི་ནང་གི །རི་ཟླའི་གྲངས་ལྡན་ཕན་བདེ་འབྱུང་བའི་གནས། །ལེགས་བཤད་གླིང་དུ་རབ་འཕུལ་བསོད་ནམས་མཐའ། །སྙེག་པར་གངྒ་བྱུང་ཡང་མ་ཟིན་ངལ། །ཆེད་དུ་ཡོངས་བསྐྲུན་འབྲས་བུ་སྐྱེ་བ་འདིས། །ཉེར་མཚོན་ཡང་སྲིད་ཕྱི་མ་ཐམས་ཅད་ཀུན། །ལྷ་མིའི་རྟེན་དུ་སིམ་པའི་ཚོར་བ་ལ། །རྟག་ཏུ་ལེགས་སྤྱོད་དགའ་སྟོན་མྱོང་བར་ཤོག །སངས་རྒྱས་བསྟན་དང་མཇལ་ཞིང་དེར་འཇུག་ཅིང༌། །ཁྱད་པར་ཐེག་མཆོག་ངེས་གསང་སྨིན་གྲོལ་གྱི། །བཅུ་གསུམ་རྡོ་རྗེ་འཛིན་པའི་ས་ཆེན་མོར། །བགྲོད་ནས་འགྲོ་བའི་དེད་དཔོན་བྱེད་ནུས་ཤོག །ཅེས་འཆམས་དཔོན་གྲམ་པ་བློ་བཟང་ངག་དབང༌། གོང་དཀར་བ་བློ་བཟང་དཔལ་འབྱོར། འཕྱོངས་རྒྱས་པ་ངག་དབང་ནམ་མཁའ་གསུམ་གྱིས་ཕན་བདེ་ལེགས་བཤད་གླིང་གི་དཀོན་གཉེར་རྩིས་སྤྲོད་བྱས་པའི་མཇུག་ཏུ་རིང་མཚོའི་རྟེན་བྱུང་གི་ཐོག་གྲྭ་ཚང་ལ་སྤྱི་འབུལ་སྣམ་སྦྱར་མ་གོས་དམར་འཇམ་སང༌། དྲ་ལྕགས་གན་འཇུས་སངས་རྒྱས་སྟོང་སྐུ་ཐགས་གྲུབ་ཅན་མཐའ་འཇག་ཏ་ཧུན། ཡང་གོས་དམར་འཇམ་དྲ་ལྕགས་ཧོར་ཇུས་གཞི་ལུ། ཡང་གོས་དམར་ཞེ་མི་འགྲེ་དྲ་གན་ཇུས་གཞི་དམར་ལྕགས་ར་ཡས་མས་གན་ཇུས་(༢༨༤ན) ― GLG021_Page_0569 ―
[མ་དཔེ་གཟིགས་ན་འདིར་གནོན།]
མ་ཎི་མ་ཀག་ལངས་རག་ཇུས། ཡང་མ་གོས་དམར་དྲ་ལྕགས་གོས་སྐྱེར་གྱིས་བྱས་པ་དགུ། གོས་སྐྱེར་གྱི་གཅིག །བྱང་དར་ཟ་ཧུན་ལ་དྲ་ལྕགས་གོས་སྐྱེར་གྱིས་བྱས་པ་བཞི་རྣམས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སརྦ་མངྒ་ལཾ་བྷ་ཝནྟུ། །ལྗོན་དམར་ལས་གྲུབ་ཀ་ཐོ་ར། །ཆེ་ལེགས་ཟུང་ལྡན་ཕུལ་བའི་དགེས། །མཆོད་གཏོར་རྒྱ་མཚོ་འཛད་མེད་ལྟར། །བསོད་ནམས་ཕུང་པོ་ཆེས་འབར་ཤོག །ཅེས་ལྕགས་སྤྲེ་སྣམ་སྦྱར་བཅུ་བདུན་དང་ལྷན་དུ་ཕུལ་བའི་ཚེ་ཟ་ཧོར་བནྡེས་བཀོད་པ་དགེ ། ངག་དབང་བློ་བཟང་གྲགས་པའི་རིང་ལུགས་མཆོག །ཛཱ་ཏིའི་མེ་ཏོག་བཀྲ་ནས་རྒྱ་མཚོའི་མཐར། །སྤེལ་བར་འཇིགས་མེད་སྙིང་སྟོབས་གོ་ཆ་ཅན། །ཐུབ་བསྟན་ལང་མཚོའི་སྡེ་ལ་གསོལ་བ་འདེབས། །འཇམ་གཉེན་ཨུཏྤལ་རྩེ་མོར་ཤེར་ཕྱིན་གྱི། །གླེགས་བམ་ཆོས་ཀུན་གནད་ལུགས་དབྱངས་བདུན་སྒྲ། །དགའ་བས་འགྲིན་པའི་དབུས་འཁྲོལ་མ་འདྲིས་འགྲོའི། །མཛའ་བཤེས་དཔུང་གཉེན་དམ་པར་གསོལ་བ་འདེབས། །ཚངས་སྲས་ལྷ་མོའི་སྙིང་དབུས་འཇོ་སྒེག་གི །རྣམ་དཔྱོད་སོར་མོས་ལྔ་རིག་རྒྱུད་མངས་གླུར། །ལེན་ལ་འཛུམ་བཞད་སྤོབས་བའི་རྩེར་སོན་པ། །རྡོ་རྗེའི་ཁྲི་ལ་བསྐལ་པར་བརྟན་པར་ཤོག །མི་རིག་གཉིད་མུན་མཐར་སངས་ལུགས་བརྒྱ་ཡི། །གཙུག་ལག་ཡོངས་ལ་བློ་གྲོས་རབ་རྒྱས་པ། །མཁའ་ལྟར་རྒྱ་ཆེ་མཚོ་བཞིན་གཏིང་ཟབ་འཕངས། །ནོར་(༢༨༤བ) ― GLG021_Page_0570 ―
[མ་དཔེ་གཟིགས་ན་འདིར་གནོན།]
འཛིན་ཀུན་ཁྱབ་སྐྱོང་ཁྱོད་ཞབས་བརྟན་ཤོག །ཞྭ་སེར་ཅོད་ཅན་འཆང་བའི་ཆོས་འདི་བསྟན། །གྱེན་འདེགས་གནམ་སའི་དབང་ཕྱུག་སྐུ་ཚེ་དང༌། །མངའ་ཐང་ཆབ་སྲིད་རབ་འཕེལ་ཁྲིམས་གཉིས་ཀྱི། །གསེར་ཤིང་གཉའ་བར་རྟག་ཏུ་ལྕི་བར་ཤོག །ཨེ་དབྱིབས་རིག་པའི་འབྱུང་གནས་ལྟེ་བ་རུ། །བཀྲ་ཤིས་རི་སྒོ་སྟེང་གི་ཆོས་ཀྱི་སྡེ། །འཁོར་ལོ་གསུམ་གྱི་བྱ་བ་བསྐལ་མཐའི་བར། །ཡར་ངོའི་ཟླ་བ་ཇི་བཞིན་འཕེལ་བར་ཤོག །སྨོན་ལམ་འདི་ཆེད་བསྒྲུབ་པར་གཏོགས་སོ་ཅོག །རྫོགས་ལྡན་སྐྱེ་རྒུ་དང་མཚུངས་དེང་ནས་བཟུང༌། །སྐྱེ་བར་བདེ་སྐྱིད་ལ་སྤྱོད་རིང་མིན་དུ། །བླ་མེད་ཡེ་ཤེས་མངོན་དུ་འགྱུར་བར་ཤོག །བསྟན་སྲུང་བྱེ་བའི་སྡེ་དཔོན་མྱུར་མཛད་མགོན། །འཇམ་དཔལ་བཀའ་ཉན་ལས་གཤིན་མ་ཧེའི་ཞལ། །འདོད་ཁམས་དབང་ཕྱུག་དམག་ཟོར་རྒྱལ་མོ་ཡིས། །བསམས་དོན་ལྷུན་གྱིས་འགྲུབ་པའི་འཕྲིན་ལས་མཛོད། །སླུ་མེད་སྐྱབས་ཀྱི་དམ་པ་དཀོན་ཅོག་གསུམ། །ལྷ་དང་རིགས་འཛིན་དྲང་སྲོང་བདེན་ཚིག་ལ། །དབང་སྒྱུར་རྣམས་ཀྱི་དེང་སྨོན་རེ་འདོད་ཚོགས། །འཇོ་བའི་བཀྲ་ཤིས་དཔལ་གྱིས་ཁྱབ་པར་ཤོག །ཅེས་ངེད་རང་གི་གསོལ་འདེབས་སྡེ་པ་དང་ཐུན་མོང་དུ་རིང་འཚོའི་རྟེན་འབྱུང་བསྟན་པ་སྤྱི་སྒོས་རྒྱས་པའི་སྨོན་ལམ་ཚིག་སུ་བཅད་པ་འདི་ནི་ཨེ་རི་སྒོ་ཆོས་སྡེའི་དབུ་མཛད་དགེ་འདུན་རབ་བརྟན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་པ་ངག་རིག་པའི་ལོ་ཙཱ་བ་ཕུན་ཚོགས་དབང་པོས་བགྱིས་པ་ཛ་ཡནྟུ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །སྙིང་དབུས་པད་ཟླར་ཚེ་དཔག་མེད་མགོན་(༢༨༥ན) ― GLG021_Page_0571 ―
[མ་དཔེ་གཟིགས་ན་འདིར་གནོན།]
སྐུར། །གསལ་བས་སྐྱེ་འདིར་བདག་རྒྱུད་བྱིན་རླབས་ཅིང༌། །ཕྱི་མ་བདེ་བ་ཅན་དུ་འདྲེན་པར་ཤོག །ཅེས་པའང་བཱ་མཁན་དགེ་སློང་གི་ངོར་བྲིས། །སྒྲུབ་བརྒྱུད་ཨུཏྤལ་མ་རྙིངས་གསར་པའི་འཕྲེང༌། །ཚད་མེད་སྐལ་ལྡན་ལེགས་བྲིས་ཐོད་བཅིངས་མཐར། །སྤྲུལ་སྐུའི་སྣང་བརྙན་ཟླ་བ་ཡོངས་ཚེས་པ། །གདུལ་བྱའི་ཀུ་མུད་བཞད་ཕྱིར་མྱུར་འཆར་ཤོག །ངག་དབང་དབྱངས་ཅན་རབ་དགྱེས་སྙན་གྲགས་ཅན། །རིང་མིན་བཟང་པོའི་བག་ཆགས་ཡོངས་སད་དེ། །དྭགས་རྒྱུད་གསེར་སྒོང་རྡོལ་ལས་རིག་བྱེད་བཞིའི། །ཞལ་སྒོ་མངོན་སུམ་མྱུར་དུ་སྟོན་པར་ཤོག །འཕགས་ཡུལ་རྩ་བཤད་སྙན་གྲགས་བཟང་པོའི་གཟུགས། །བོད་ཡུལ་མེ་ལོང་ངོས་ཤར་སྐལ་ངན་འགྲོའི། །རྡུལ་དང་མུན་པས་བསྒྲིབས་པ་རིང་མིན་དུ། །བསལ་ནས་གདུང་སེམས་ངལ་དུབ་མཐར་བྱེད་ཤོག །མཉམ་མེད་ལྷ་རྗེའི་གདུང་ཚབ་ཕག་གྲུ་པའི། །ཐུགས་སྲས་གླིང་ཆེན་རྟོགས་པ་མཐོ་རིས་ཆབ། །སླར་ཡང་འབྲུག་བསྟན་རྒྱ་མཚོར་འདྲེན་མཁས་དེ། །སྐལ་ལྡན་ཤིང་རྟའི་མཆེད་པོར་དེང་འབྱོན་ཤོག །འདོད་པ་བསོད་ཉམས་མཐའ་བརྟེན་ཅོག་བུའི་གྲ། །སྟོང་ཆེན་ཕྱག་རྒྱའི་རྣལ་འབྱོར་དགེ་སྦྱོང་ཚུལ། །རབ་འཛིན་སློབ་མར་བཅས་པའི་དཔལ་མགོན་དུ། །དངོས་བྱོན་ཡིད་ཀྱི་རེ་བ་ཡོངས་སྐོང་ཤོག །དོན་རྒྱུད་རྟོགས་པའི་བདག་ཉིད་རྣམ་འདྲེན་ཚོགས། །མ་དང་མཁའ་འགྲོའི་སྡེ་དཔོན་ཧེ་རུ་ཀཿ ། ཕྱི་ནང་གསང་བའི་མགོན་པོ་བྱ་རོག་མཚན། །བླ་མ་ཡི་དམ་སྲུང་མས་ལས་བསྒྲུབ་ཤོག །དཀོན་ཅོག་ཐུགས་རྗེའི་འཇུག་པ་རྒྱུན་ཆད་མེད། །ལྷ་དང་དྲང་སྲོང་རིག་འཛིན་ཚིག་ལ་དབང༌། །རྟེན་ཅིང་འབྲེལ་(༢༨༥བ) ― GLG021_Page_0572 ―
[མ་དཔེ་གཟིགས་ན་འདིར་གནོན།]
བར་འབྱུང་བའི་བདེན་སྟོབས་མཐུས། །བསམ་དོན་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་མཉམ་མེད་འབྲུག་པ་རིན་པོ་ཆེའི་བསྟན་འཛིན་མང་ཐོས་གནས་ལྔ་རིག་པ་ཅོག་གྲ་སྤྲུལ་སྐུ་ངག་དབང་སྙན་གྲགས་བཟང་པོའི་སྐུ་སྐྱེ་མྱུར་གསལ་དུ་འབྱོན་པའི་སྨོན་ལམ་ངག་དོན་དུ་བྱས་ཆོག་པ་དགོས་ཚུལ་གྲ་རིགས་རྣམས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །གང་ཤར་རང་གྲོལ་རྡོ་རྗེ་ཐོགས་མེད་རྩལ། །འཁོར་འདས་ཕྱག་རྒྱ་ཟིལ་གནོན་ཚེ་བདག་ནག །འདོད་པ་ཁམས་ལ་མངའ་སྒྱུར་རེ་མ་ཏཱི། །དཔའ་ལྡན་རྩ་བ་གསུམ་ལ་གསོལ་ཇ་མཆོད་སྐབས་ལ་མཆོད་པར་འབུལ་ཞེས་བསྒྱུར། བ་འདེབས། །ངག་དབང་འཇམ་དགོན་གྲུབ་པའི་བློ་གྲོས་ཅན། །སྐལ་བཟང་རྒྱ་མཚོའི་རེ་སྐོང་འཁོར་ལོའི་མགོན། །ཆེ་མཆོག་འདུས་པ་བླ་མེད་རྡོ་རྗེའི་རྩལ། །སྐྱབས་གསུམ་ཀུན་གྱི་ངོ་མཆོད་པར་འབུལ་ཞེས་འགྱུར་བོར་བརྟན་འགྱུར་ཅིག །ལེགས་ལྡན་ནག་པོ་སྲིད་གསུམ་དབང་མོས་གཙོས། །བསྟན་དང་ཟབ་གཏེར་སྐྱོང་བའི་སྲུང་མའི་ཚོགས། །དཔལ་མགོན་བདུན་ཅུ་ལ་སོགས་དཀར་ཕྱོགས་ལྷ། །མཐུ་སྟོབས་ནུས་ལྡན་རྣམས་ལ་མཆོད་པར་འབུལ་ཞེས་བསྒྱུར་པས་བསམ་དོན་འགྲུབ་བྱིན་རློབས། །གྲངས་མེད་ལུས་སྤྲུལ་ཡན་ལག་ལྔ་ཕྱག་འཚལ། །ནམ་མཁའི་མཛོད་ཕྱེ་ཀུན་བཟང་མཆོད་སྤྲིན་སྤྲོ། །སྒྲིབ་གསུམ་དེས་བསགས་ཉེས་ཚོགས་མཐའ་དག་བཤགས། །མཐའ་ཀླས་རྣམ་དཀར་ལས་ལ་སྙིང་ནས་རངས། །རྒྱལ་སྲས་སློབ་མར་ཆོས་སྟོན་མཛད་པར་བསྐུལ། །གཟུགས་སྐུ་སྲིད་མཐར་མངོན་སུམ་བཞུགས་གསོལ་(༢༨༦ན) ― GLG021_Page_0573 ―
[མ་དཔེ་གཟིགས་ན་འདིར་གནོན།]
འདེབས། །འདིས་མཚོན་བྱས་སོ་ཅོག་གི་བསོད་ནམས་འབྲས། །བདག་གཞན་སངས་རྒྱས་མྱུར་ཐོབ་རྒྱུ་རུ་བསྔོ། །དགའ་བཞིའི་འགྲོས་ཀྱིས་ཟག་མེད་བདེ་ལྡན་གྲོང༌། །ངེས་གསང་རིག་སྔགས་འཆང་བ་འདུས་པའི་གླིང༌། །ཉན་ཐོས་འདུལ་ཁྲིམས་བག་ཡོད་བསྐྱེད་རྫོགས་དང༌། །རྫོགས་ཆེན་ལྷ་སྔགས་ཡེ་ཤེས་ལ་རོལ་ཤོག །སྲིད་ཞི་ཡོངས་ཀྱི་ལེགས་ཚོགས་མ་ལུས་པས། །སྡེ་འདི་རབ་གང་ཡིད་ལ་བསམས་པའི་དོན། །ཡོངས་འདུའི་སྙེ་མ་ཆར་དུ་བབས་པའི་རོ། །སྤྱོད་པར་ལེགས་བྲིས་མཆེད་པོར་བདག་འགྱུར་ཤོག །རྩ་གསུམ་གསོལ་འདེབས་བརྟན་བཞུགས། ཇ་མཆོད་གང་ལའང་བསྒྱུར་ཆོག་པ་བདུན་རྣམ་དག་དང་བཅས་པ་ཞིག་དགོས་ཞེས་དགའ་ལྡན་གསང་སྔགས་གླིང་གི་དབུ་མཛད་སྔགས་རམས་པ་ངག་དབང་ནམ་མཁའ་དང༌། བློ་བཟང་མཁས་བཙུན་གྱིས་རིང་འཚོའི་རྟེན་འབྲེལ་བསྒྲིགས་པའི་ཚེ་གྲྭ་ཚང་དུ་འཛུགས་རྒྱུར་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞི་ཁྲོ་ཀུན་འདུས་བཀའ་བརྒྱད་དཀྱིལ་འཁོར་ལྷ། །རང་བྱུང་ལུས་ཀྱི་རྩ་ཁམས་ཐིག་ལེ་ལ༌། །གདོད་ནས་དག་པའི་ཡེ་ཤེས་རས་དཀར་ངོས༌། །ཆུ་ནང་ཟླ་གསུམ་ལྟ་བུར་ཡོངས་ཤར་དགེས། །དེང་ནས་རང་རིག་དཔལ་ལྡན་ཀུན་ཏུ་བཟང༌། །རང་ངོ་འཕྲོད་མིན་དེ་སྲིད་རྩ་གསུམ་གྱིས། །རྗེས་སུ་བཟུང་སྟེ་འདི་ཕྱི་བར་དོ་རུ། །དངོས་གྲུབ་ཆར་ཆེན་མ་ལུས་དབབ་ཏུ་གསོལ། །རྩ་བརྒྱུད་བླ་མ་རང་སེམས་ངོ་བོར་རྟོགས། །ཡི་དམ་ཞི་ཁྲོ་རིག་པའི་རྩལ་དུ་རྫོགས། །དམ་ཅན་རང་ཤར་ལས་གྲུབ་རང་སར་གྲོལ། །སྣང་གྲག་(༢༨༦བ) ― GLG021_Page_0574 ―
[མ་དཔེ་གཟིགས་ན་འདིར་གནོན།]
རིག་གསུམ་ཆོས་སྐུའི་ཀློང་གྲོལ་ཤོག །ཅེས་པའང་བློ་བཟང་དོན་ཡོད་ཀྱིས་བཀའ་བརྒྱད་ཀྱི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཕྱག་ན་པདྨའི་ཡེ་ཤེས་གཅིག་པུའི་ཟླ། །གདུལ་བྱའི་དངས་མཚོར་ཤར་ཚད་ཚུར་མཐོང་བློས། །ཞལ་དཀར་ཇི་ཙམ་སྤོབས་པའི་མིག་འཕྲུལ་གར། །མཁའ་ལ་འཇའ་ལྟར་འདྲེན་བྱེད་གཟིགས་མོའི་དཔྱིད། །ཉེར་བརྒྱད་རྒྱུ་སྐར་ཕྲེང་དུ་མཇུག་རིང་བཞི། །བདག་འདྲ་བསྒྲིག་འོས་མིན་ཀྱང་དད་ཤུགས་ཀྱིས། །བྱིན་རླབས་ཕུག་རོན་སྐྱེ་བོའི་རྐང་རྗེས་ཞོར། །འཆར་ལྟར་རྒྱུ་འབྲས་རྟེན་བྱུང་གང་གིས་བསླུ། །དེ་ཕྱིར་གྲ་ནང་ཕུན་ཚོགས་དགེ་བའི་གླིང༌། །མཐོ་རིས་སྐྱེད་ཚལ་འཕོས་འདྲའི་ཡུལ་གྲུ་ནས། །དཀར་ནག་རྩིས་རིག་ཚུལ་ལ་མིག་ཡངས་པ། །བླ་མཁྱེན་སྔགས་འཆང་ལྷུན་གྲུབ་ཀྱིས་བཞེངས་མཐུས། །བསྐལ་པར་འཚོ་བའི་ཚེ་རིང་རྣམ་ཐོས་བུའི། །འབྱོར་པར་ཉེར་འགྲན་བདེ་སྐྱིད་འདི་སྣང་དང༌། །ཡང་སྲིད་ཀུན་ཏུ་མྱོང་བ་བསོད་ནམས་ཀྱི། །ཕུང་པོ་ཚངས་པའི་ཡུལ་སར་འཕྱུར་བར་ཤོག །འཁོར་བར་མ་ཆགས་མྱང་འདས་ཁང་བཟང་དུ། །འཇུག་བྱེད་ཚོགས་གཉིས་ཐེམ་སྐས་ལ་འཛེགས་ནས། །རིང་མིན་འགྲོ་རྣམས་སྲིད་མཚོ་ལས་སྒྲོལ་བའི། །ཀུན་མཁྱེན་དེད་དཔོན་ཐོབ་པར་བདག་བྱིན་རློབས། །ཞེས་གྲ་ནང་ནས་རྩིས་རིག་སྨྲ་བ་སྔགས་འཆང་འཕྲིན་ལས་དབང་དྲག་བདུད་འཇོམས་ཀྱིས་འགྲོ་ལ་རྗེས་བརྩེ་མ་དང་མཐུན་པའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །(༢༨༧ན) ― GLG021_Page_0575 ―
[མ་དཔེ་གཟིགས་ན་འདིར་གནོན།]
ལྔ་བརྒྱའི་གཙུག་རྒྱན་དཔལ་ལྡན་ཨ་ཏི་ཤཱ །བཀའ་གདམས་མེས་པོ་འབྲོམ་སྟོན་ཆོས་ཀྱི་རྒྱལ། །ཡབ་སྲས་ཟུང་དང་ལས་སྨོན་འབྲེལ་ཙམ་གྱི། །འཇམ་དབྱངས་དགའ་བའི་བཤེས་ལ་ཕྱག་འཚལ་ལོ། །ལྷ་མིའི་དཔལ་འབྱོར་ལོངས་སྤྱོད་ཇི་སྙེད་པས། །ཉེར་མཚོན་མཆོད་པའི་སྤྲིན་ཕུང་མཐའ་ཡས་གང༌། །འཕགས་པ་ཀུན་ཏུ་བཟང་པོའི་རྣམ་སྤྲུལ་ལས། །བྱུང་བ་ཇི་བཞིན་དངོས་བཤམས་ཡིད་སྤྲུལ་མཆོད། །ཉོན་མོངས་ཤེས་བྱ་བག་ལ་ཉལ་སྒྲིབ་ཀྱིས། །འཐིབས་པོའི་མུན་པར་འཐོམས་པས་བླ་དོར་ལ། །ཆེར་རྨོངས་མི་དགེའི་ལས་ངན་ཅི་བསགས་པ། །གཉེན་པོ་སྟོབས་བཞི་ཚང་བས་སྙིང་ནས་བཤགས། །རྫོགས་སངས་རྒྱས་ནས་བཟུང་སྟེ་ས་གུ་ཙི། །ཡན་གྱིས་བསྒྲུབས་པའི་ཆོས་དཀར་ཕུང་པོའི་ཚད། །རང་གིས་བསྐྲུན་པ་ཇི་བཞིན་སྤྲོ་དགའ་དང༌། །བཅས་ཏེ་བསམ་པ་ཐག་པས་རྗེས་ཡི་རང༌། །ཚངས་དབང་གཉིས་ཀྱིས་ཤཱཀྱ་སེང་གེ་ལ། །གསོལ་བཏབ་དང་མཚུངས་རྣམ་འདྲེན་སྲས་སློབ་ཚོགས། །ཀུན་གྱི་འགྲོ་བློར་འཚམ་པའི་དམ་ཆོས་ཀྱི། །འཁོར་ལོ་ཆད་པ་མེད་པར་བསྐོར་བར་བསྐུལ། །ངག་དབང་བློ་ལྡན་སྐལ་བཟང་རྒྱ་མཚོའི་དཔལ། །བདག་སོགས་འགྲོ་ངོར་ན་རྒ་སྐྱེ་འཆི་ལས། །རྣམ་གྲོལ་ཐེག་གསུམ་འཕགས་པའི་ངོ་བོ་རུ། །མོས་ལྡན་སྲིད་པ་ཇི་སྲིད་གཡོ་མེད་གསོལ། །ཕ་མཐའ་མི་སྔོན་འཁོར་བར་འཁྱམས་པ་ནས། །ད་ལྟའི་བར་བསགས་སླད་ནས་གསོག་འགྱུར་གྱི། །ལེགས་བྱས་ཕུང་པོར་སྤུངས་ཏེ་བསྒྲུབས་པའི་འབྲས། །མཁའ་མཉམ་མ་རྒན་སེམས་ཅན་དོན་དུ་བསྔོ། །ཐུབ་པས་རླབས་ཆེན་བྱ་(༢༨༧བ) ― GLG021_Page_0576 ―
[མ་དཔེ་གཟིགས་ན་འདིར་གནོན།]
དཀའ་ཚོགས་མཐའ་ཀླས། །བསྐྲུན་པའི་དབང་པོ་ས་ཡི་ལྷ་མོ་ཡིས། །ཁས་བླངས་ནམ་ཡང་སླུ་མེད་བདེན་པའི་མཐུས། །ལུང་རྟོགས་བསྟན་པ་ཡུན་རིང་འབར་ཅིག །གྲི་གུག་དམར་ནག་དཀར་པོ་བརྒྱད་ཅུ་དང༌། །ཕྱེད་དཀར་ཇོ་བོ་ལ་སོགས་བཀའ་གདམས་ཀྱི། །བསྟན་པ་རིན་ཅེན་སྐྱོང་མཛད་ཆོས་སྲུང་གིས། །བསམས་དོན་ལྷུན་གྱིས་གྲུབ་པའི་འཕྲིན་ལས་མཛོད། །ཅེས་ཡན་ལག་བདུན་པའི་ནང་དུ་དམིགས་གསལ་གྱི་ཕྱག་འཚལ་དང་བརྟན་བཞུགས་ཤློ་ཀ་གཅིག་ལ་བསྟན་འབར་མ་ཚང་བ། ཆོས་སྐྱོང་ལ་གཉེར་གཏད་དང་བཅས་པ་འདི་ནི་རྭ་བསྒྲེང་དབུ་མཛད་རྒྱལ་མཚན་བཀྲ་ཤིས་ཀྱིས་རང་གི་ཁ་ཏོན་དང་ཚོགས་སུ་འཛུགས་རྒྱུར་འགོད་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཉོན་མོངས་ཀྱིས་བརླམས་ཞེ་སྡང་གདུག་རྩུབ་མེ། །རིས་མེད་བྱམས་པའི་ཆུ་ཡིས་རབ་བཅིལ་བ། །མ་ཕམ་མགོན་པོའི་སྣང་བརྙན་ཉེར་མཐོང་མོད། །མི་བཟད་འཁོར་བའི་ཕ་མཐའ་ཐུང་ངུར་བྱས། །རྒྱལ་ཀུན་ངོ་བོ་པདྨ་ཀ་ར་སོགས། །བླ་མ་ཡིད་དམ་འདོད་ལྷས་ཡོངས་བསྐོར་འདི། །བྲིས་པ་བློ་བཟང་ཚེ་འཕེལ་གྱིས་བསྐྲུན་པའི། །ཡོན་སྦྱར་བསོད་ནམས་གངྒའི་རྒྱུན་ལྟར་རིང༌། །དགེ་བས་སྦྱིན་པའི་བདག་པོ་བདེ་སྐྱིད་ཀྱི། །ཉི་མ་འདིར་སྣང་མཁའ་ཡི་དགུང་ནས་ཤར། །ཕྱི་མར་ལྷ་མིའི་ཡང་སྲིད་རབ་བརྒྱུད་མཐར། །ངེས་པར་ལེགས་པའི་གོ་འཕང་མྱུར་ཐོབ་ཤོག །འཇམ་དབྱངས་དགའ་བའི་བཤེས་ཀྱི་འདྲ་འབག་ལ། །ཇོ་འབྲོམ་ཡབ་སྲས་ཚེ་དཔག་མེད་མགོན་སྐུ། །བརྒྱ་ཕྲག་གིས་བསྐོར་རི་མོ་པད་དཀར་གྱིས། །སྒྱུ་མའི་ཁེངས་འཕྲོག་(༢༨༨ན) ― GLG021_Page_0577 ―
[མ་དཔེ་གཟིགས་ན་འདིར་གནོན།]
ཆེད་དུ་སོར་རྩེས་བསྐྲུན། །ཐུགས་རྗེའི་ཉི་མའི་འོད་ཀྱིས་རབ་སངས་ནས། །རྡོ་རྗེའི་སྲོག་གི་ཀ་བ་གཡུང་དྲུང་གི །ངོ་བོར་ལྷུན་གྲུབ་འགྱུར་བ་མེད་པར་ཤོག །ཉིང་མཚམས་སྦྱར་ཚེ་བདེ་བ་ཅན་ཞིང་དུ། །མགོན་ཁྱོད་སྤྱན་སྔར་སྐྱེས་ཏེ་ཐེག་མཆོག་ཆོས། །ཐོས་བསམ་སྒོམ་པས་རང་རྒྱུད་ལེགས་གྲོལ་ནས། །གཞན་དོན་རླབས་ཆེན་སྤྱད་པ་སྤྱོད་པར་ཤོག །ཅེས་སྒྱིད་ཐང་ནོར་བུ་བྱམས་པ་དང་ཚེ་དཔག་མེད་ཀྱི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ནོར་བུ་ཆུ་ཤེལ་ལྟར་དངས་དཀར་མཛེས་སྐུ། །རབ་གསལ་མཁྱེན་བརྩེའི་སྤྱན་བདུན་དཀྱུས་རིང་མ། །དུས་གསུམ་རྒྱལ་མཚོན་ཨུཏྤལ་གྲིབ་བསིལ་དུ། །ཉི་བུའི་གདུང་སྐྱོབ་ཡིད་བཞིན་འཁོར་ལོ་ཀྱེ། །ཐུགས་རྗེ་བདུད་རྩི་ཚངས་བུག་ནང་བརྒྱུད་དེ། །ལུས་ངག་ཡིད་ཁྱབ་སྲོག་རྩ་རྡོ་རྗེའི་ཁམས། །བཞུ་བླུགས་གཞོམ་དུ་མེད་པའི་གཡུང་དྲུང་གི །ངོ་བོར་བརླབ་པའི་ནུས་པ་དེང་བསྐྱེད་མཛོད། །ཚངས་སྲས་ལྷ་མོ་མགྲིན་དབུས་འཇོ་སྒེག་མ། །འཇམདབྱངས་གཞོན་ནུ་དགའ་བས་ཉེར་འཁྱུད་པ། །གནས་ལྔ་རིག་པ་སྨྲ་བ་དགེ་བའི་བཤེས། །བདུད་བཞིའི་གཡུལ་ལས་རྟག་ཏུ་རྒྱས་པར་ཤོག །མ་རིག་གཉིད་སངས་གཙུག་ལག་གཟུང་ལྡན་མ། །རྣམ་དཔྱོད་འཇུག་པ་རྒྱས་པའི་ཁྲིམས་གཉིས་ཀྱི། །འཁོར་ལོ་རྒྱ་མཚོའི་གོས་ཅན་ཀུན་ཁྱབ་པ། །ས་དབང་སྐུ་ཚེ་ཆབ་སྲིད་འཕེལ་བརྟན་ཤོག །རྒྱལ་ཡུམ་འཕགས་མའི་སྐུ་དབྱིབས་གནས་ཆེན་དུ། །དགའ་(༢༨༨བ) ― GLG021_Page_0578 ―
[མ་དཔེ་གཟིགས་ན་འདིར་གནོན།]
ལྡན་རིང་ལུགས་གསང་བ་སྔགས་ཀྱི་སྡེ། །ཐོས་བསམ་སྒོམ་པའི་ཡང་རྩེར་རབ་སོན་པ། །ལུས་ཅན་བསོད་ནམས་ཞིང་དུ་དར་བར་ཤོག །པདྨ་སཾ་བྷ་སྲོང་བཙན་སྒམ་པོའི་ཞབས། །ཇོ་འབྲོམ་ལ་སོགས་སྔ་ཕྱི་བར་གསུམ་དུ། །རིམ་བྱོན་དངོས་བརྒྱུད་བླ་མའི་བཀའ་སྲུང་གིས། །བསམ་པའི་རེ་བ་སྐོང་བའི་འཕྲིན་ལས་མཛོད། །ཅེས་ངེད་རང་དང་སྡེ་པ་ཐུན་མོང་གི་རིང་འཚོའི་ཚིགས་བཅད་ཅིག་དགོས་ཞེས་ཡེར་པ་དགའ་ལྡན་གསང་སྔགས་གླིང་པའི་བླ་གཉེར་གྲྭ་དམངས་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ལྗོན་ཤིང་ཕུར་མའི་སྙིང་པོ་སྐྱེམས་ཀྱི་མཆོག །དཔལ་ལྡན་འབྲས་སྤུངས་འདུས་ཚོགས་མཆོད་ཡོན་དུ། །སྦྲེང་སྣོད་དངུལ་རྒྱན་བུམ་གཟུགས་གྲངས་ཚང་བ། །ལེགས་ཕུལ་བསོད་ནམས་ནམ་མཁའི་མཐའ་ཀླས་པས། །འཇིག་རྟེན་སྤྱི་དང་ཁྱད་པར་རྒྱ་བོད་ཧོར། །འགྲོ་རྣམས་བདེ་ཞིང་ཀུན་མཁྱེན་བཙོང་ཁ་པའི། །རིང་ལུགས་རབ་རྒྱས་དེ་འཛིན་ངག་གི་དབང༌། །བློ་གསལ་སྐལ་བཟང་རྒྱ་མཚོའི་ཞབས་བརྟན་ཤོག །དགའ་ལྡན་བསྟན་པ་འཛིན་པའི་སྦྱིན་བདག་ཆེ། །གནམ་སའི་དཀྱིལ་འཁོར་དབང་ཕྱུག་བོ་ཤོག་ཐུ། །རྒྱལ་པོའི་སྐུ་ཚེ་རབ་བརྟན་སྟོབས་འབྱོར་རྣམས། །ཡར་ངོའི་ཟླ་བ་ལྟར་བུར་འཕེལ་བར་ཤོག །ཅེས་པ་འདིའང་ཨོ་རོད་ཀྱི་ཡངས་པའི་ས་ཆེན་པོར་མངའ་སྒྱུར་བའི་བསྟན་པའི་སྦྱིན་བདག་དགའ་ལྡན་བོ་ཤོག་ཐུ་ཁང་གིས་ཆོས་སྡེ་ཆེན་པོ་དཔལ་ལྡན་འབྲས་སྤུངས་སུ་དངུལ་རྒྱན་བཅུ་དགུ་ཕུལ་བའི་ཚེ་གསེར་ཡིག་ཚོགས་གསོག་དརྒན་(༢༨༩ན) ― GLG021_Page_0579 ―
[མ་དཔེ་གཟིགས་ན་འདིར་གནོན།]
རབ་འབྱམས་པ་བློ་བཟང་རྒྱལ་མཚན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་གྲགས་པའོ། །འཆི་མེད་མཆོག་སྩོལ་བཅོམ་ལྡན་གར་གྱི་དབང༌། །འཕགས་མ་ཡིད་བཞིན་འཁོར་ལོ་ཚེ་སྦྱིན་མ། །ཐུབ་པས་རབ་སྔགས་རྣམ་པར་རྒྱལ་མ་ཡིས། །བདུད་རྩིའི་རྒྱུན་གྱིས་སྲོག་གི་ཀ་བ་ཚུགས། །སངས་རྒྱས་གཉིས་པ་རྗེ་བཙུན་བཙོང་ཁ་པའི། །བསྟན་པ་རིན་ཅེན་རྒྱ་མཚོའི་གོས་ཅན་གཞིར། །ཡོངས་ཁྱབ་བླ་ནས་བླར་སྤེལ་གནམ་སའི་བདག །སྐུ་ཚེ་གཡུང་དྲུང་བཞིན་དུ་འགྱུར་མེད་ཤོག །འཇམ་མགོན་ས་སྤྱོད་ཁྲི་སྲོང་ལྡེ་བཙན་གྱི། །ལྷ་སྲས་མུ་ཁྲི་བཙན་པོའི་རྣམ་འཕྲུལ་དུ། །རྒྱལ་དབང་པདྨའི་ཞལ་ལུང་གིས་ཟིན་པའི། །མི་དབང་རྡོ་རྗེ་ལྟ་བུར་ཞབས་བརྟན་ཤོག །གང་གི་བཀའ་ཁྲིམས་གསེར་གྱི་གཉའ་ཤིང་གིས། །འཇིག་རྟེན་གསུམ་གྱི་གཉའ་བར་ཡོངས་ལྕི་བས། །མངའ་འབངས་ཀུན་བདེ་ཆབ་སྲིད་སྟོབས་འབྱོར་རྣམས། །གསེར་གྱི་འཁོར་ལོས་སྒྱུར་རྒྱལ་རྗེས་འགྲོར་ཤོག །ལྷོ་རྒྱུད་ཡངས་པའི་གསེར་ལྡན་ལྟོ་བ་རུ། །ཞྭ་སེར་འཆང་བའི་ལུགས་གཉིས་བསྟན་པ་ཡི། །ཉིན་བྱེད་ལེགས་བྱས་དགུང་ནས་རབ་ཤར་བས། །ཡིད་སྲུབས་མུན་ཞི་ཕན་བདེའི་སྣང་རྒྱས་ཤོག །མྱུར་མཛད་མགོན་པོ་ལས་ཀྱི་གཤིན་རྗེའི་རྒྱལ། །འདོད་ཁམས་དབང་ཕྱུག་དམག་ཟོར་རྒྱལ་མོ་སོགས། །དམ་ཅན་ཆོས་སྲུང་རྒྱ་མཚོའི་ཚོགས་རྣམས་ཀྱིས། །བསམས་དོན་ལྷུན་གྱིས་གྲུབ་པའི་འཕྲིན་ལས་མཛོད། །དཀོན་ཅོག་བདེན་པའི་མཐུ་དཔུང་བསམ་ཡས་ཤིང༌།(༢༨༩བ) ― GLG021_Page_0580 ―
[མ་དཔེ་གཟིགས་ན་འདིར་གནོན།]
།རྒྱུ་འབྲས་རྟེན་འབྱུང་ནམ་ཡང་བསླུ་བ་མེད། །ལྷ་དང་དྲང་སྲོང་རིག་འཛིན་ཚོགས་རྣམས་ཀྱིས། །བཀྲ་ཤིས་དཔལ་གྱི་ཟླ་བ་ཡར་རྒྱས་ཤོག །ཅེས་བདེན་ཚིག་གི་ཤིས་པ་བརྗོད་པ་འདིའང་མེ་རག་བླ་མ་བློ་གྲོས་རྒྱ་མཚོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོས་བགྱིས་པ་ཛ་ཡནྟུ། །སངས་རྒྱས་ཀུན་འདུས་པདྨ་ཐོད་འཕྲེང་རྩལ། །སྒྲ་བསྒྱུར་དབང་པོ་བཻ་རོ་ཙ་ནའི་ཞབས། །ཟབ་གཏེར་བསྟན་པ་རྒྱལ་མཛད་རྡོ་རྗེ་གླིང༌། །བླ་མ་ཡི་དམ་ཆོས་སྲུང་བྱིན་རླབས་མཐུས། །ཟ་ཧོར་གདུང་འཛིན་ཆེ་མཆོག་འདུས་པ་རྩལ། །གདོང་ལྔས་ཉེར་བཏེག་རྡོ་རྗེའི་ཁྲི་ཆེན་པོར། །ཚེ་མཐའ་ཡས་པའི་ངོ་བོར་རབ་བཞུགས་ནས། །འགྲོ་བའི་ལེགས་བྱས་འབྲས་བཟང་དུད་པར་ཤོག །བོད་སྐྱོང་ས་སྤྱོད་ཁྲིམས་ཀྱི་ཉ་ཕྱིས་ཁོག །ཡངས་པོར་མངའ་འབངས་བདེ་སྐྱིད་ལ་སྤྱོད་ཅིང༌། །ཆབ་སྲིད་སྐུ་ཚེ་སྟོབས་འབྱོར་འཆི་མེད་གཙོ། །མཆོད་སྦྱིན་བརྒྱ་པའི་དཔལ་ལ་འགྲན་ནུས་ཤོག །ངེས་གསང་བཀའ་གཏེར་རིང་ལུགས་མ་ལུས་དང༌། །ཁྱད་པར་འཇམ་དཔལ་ཆོས་ཀྱི་བཤེས་གཉེན་གྱི། །སྨིན་གྲོལ་ལུང་དང་མན་ངག་དབྱར་དུས་ཀྱི། །ཟླ་བའི་མ་མ་ཇི་བཞིན་གྱེན་འཕྱུར་ཤོག །ལུང་བསྟན་ཞལ་འཆེས་ཇི་བཞིན་དམ་པ་ཁྱོད། །དུས་བབས་སྐྱེ་རྒུའི་གཉེན་གྱུར་གཏེར་བདག་གླིང༌། །རང་སྐལ་ཟབ་ཆོས་མ་ལུས་གེགས་མེད་དུ། །ལེགས་བཞེས་སྣོད་ལྡན་རེ་བ་ཡོངས་སྐོང་ཤོག །པད་འབྱུང་བཻ་རོའི་སྨོན་ལམ་མཐུ་བཙན་པོས། །པུར་རྒྱལ་བོད་དང་བོད་ཆེན་འཛིན་མའི་གཞིར། །འཁོར་བའི་འགྲོ་རྣམས་རྫོགས་ལྡན་སྐྱེ་རྒུ་ཡི། །(༢༩༠ན) ― GLG021_Page_0581 ―
[མ་དཔེ་གཟིགས་ན་འདིར་གནོན།]
ཚེ་དཔལ་འབྱོར་པ་དང་མཚུངས་ཐོབ་པར་ཤོག །གདོད་ནས་རྣམ་དག་ཆེ་མཆོག་ཧེ་རུ་ཀཿ །གཉིས་མེད་མ་ནིང་ནག་པོར་ཡོངས་ཤར་བ། །ཆོས་དང་གཏེར་སྐྱོང་སྲུང་མའི་ཚོགས་རྣམས་ཀྱིས། །བསམས་པ་ལྷུན་གྱིས་གྲུབ་པའི་འཕྲིན་ལས་མཛོད། །ཅེས་པ་འདིའང་འབྲོམ་གྱི་སྔགས་འཆང་རྡོ་རྗེ་དབང་གྲགས་རྒྱ་མཚོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །བགྲང་ཡས་རྒྱལ་ཀུན་མཁྱེན་པའི་ཆུ་གཏེར་ལས། །འཇམ་མགོན་ཉིན་བྱེད་དམར་སེར་ལི་ཁྲིའི་གོས། །ལེགས་བསྒྱུར་འགྲོ་བའི་མུན་སེལ་ཙོང་ཁ་པ། །ཟླ་མེད་གཏན་གྱི་སྐྱབས་དེར་གསོལ་བ་འདེབས། །གང་གི་ཆོས་སྲིད་བསྟན་པ་རྒྱ་ཧོར་དང༌། །བོད་དང་བོད་ཆེན་འཛིན་མར་སྤེལ་བ་ལ། །སྙིང་སྟོབས་ལང་ཚོ་དར་བབས་ངག་གི་དབང༌། །བློ་གསལ་སྐལ་བཟང་རྒྱ་མཚོར་གསོལ་བ་འདེབས། །བདག་སོགས་གདུལ་བྱའི་བསོད་ནམས་བྱེ་བའི་ཞིང༌། །དགེ་ལེགས་སྙེ་མའི་འབྲས་བུ་གཡུར་ཟའི་ཆེད། །མགོན་ཁྱོད་ཚེ་དཔག་མེད་པའི་ངོ་བོ་རུ། །རབ་བཞུགས་ཕུན་ཚོགས་འཇིག་རྟེན་གསུམ་ཁྱབ་ཤོག །ཅེས་པ་འདིའང་ཨ་ཆི་ཐུ་ཆོས་རྗེའི་གྲ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རྫོགས་སངས་རྒྱས་པའི་སྤྱན་གྱིས་འགྲོ་བའི་ཁམས། །ཉེར་གཟིགས་ལེགས་གསུངས་དམ་ཆོས་དེ་དོན་རྣམས། །རབ་འཛིན་སྐྱེ་འཕགས་དགེ་འདུན་བཅས་པ་ཡི། །སླུ་མེད་ཐུགས་རྗེ་རྟེན་ཅིང་འབྲེལ་འབྱུང་མཐུས། །ཨ་ཆི་ཐུར་གྲགས་ཆོས་རྗེས་ཐོག་(༢༩༠བ) ― GLG021_Page_0582 ―
[མ་དཔེ་གཟིགས་ན་འདིར་གནོན།]
མེད་ནས། །བསགས་པའི་དགེ་ཚོགས་མཐུ་ལས་དལ་བའི་རྟེན། །ལེགས་ཐོབ་གྲྭ་རིགས་སྦྱིན་བདག་ཚོགས་རྣམས་ཀྱིས། །མངོན་སུམ་ངེས་རྙེད་འདོད་དོན་འགྲུབ་བྱིན་རློབས། །ཞེས་པའང་ཨ་ཆི་ཐུ་ཆོས་རྗེའི་གྲྭ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །མ་རིག་མུན་སེལ་སྒྲོན་མེ་སྦར་སྣོད་ཀོང༌། །ཉེར་གསུམ་སྲང་ལྡན་ངག་དབང་གྲགས་པ་ཡིས། །ཕན་བདེའི་ལེགས་བཤད་གླིང་པར་ཕུལ་བའི་དགེས། །སྐྱེ་བ་ཀུན་ཏུ་སྐྱིད་པའི་དཔལ་འབར་ཤོག །ཅེས་པའང་རྩེས་ཐང་དུ་སྔགས་རམས་པ་བྱེད་སྐབས་དགོས་ཚུལ་ལྟར་ཟ་ཧོར་གྱི་བནྡེས་བཀོད། །སྙན་བརྗིད་སྒྲ་དབྱངས་འཁྲོལ་བའི་སྟོད་ཀྱི་རྒྱན། །ཟ་འོག་རྣམ་པར་བཀྲ་བའི་གོས་བཟང་ལ། །སོ་གཉིས་མཛེས་པའི་དར་དཔྱངས་ལྷབ་ལྷུབ་ཅན། །འཇའ་ཚོན་ལྟ་བུའི་འདྲེན་བྱེད་བདུད་རྩི་གང༌། །ཀསྨི་ར་པའི་པཎ་ཆེན་བསོད་སྙོམས་པའི། །ལུགས་འཛིན་སྟན་གཅིག་ཚ་མིག་ཁྲིམས་ལྡན་སྡེར། །ཕུལ་བས་བདག་སོགས་མཁའ་མཉམ་ལུས་ཅན་ཀུན། །རིང་མིན་རྣམ་པ་ཐམས་ཅད་མཁྱེན་ཐོབ་ཤོག །ཅེས་པའང་ངག་དབང་གྲགས་པ་ཆོས་གྲ་ཆེན་པོ་རྩེས་དང་དུ་སྔགས་རམས་པ་བྱེད་སྐབས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བློ་བཟང་དབང་པོའི། །རྒྱལ་གཞན་ལས་ལྷག་མི་ཟད་ཐུགས་རྗེའི་དཔུང༌། །ཆེས་འབར་སྨན་གྱི་བླ་མ་མངོན་པར་མཁྱེན། །ཆོས་གྲགས་མྱ་ངན་མེད་དཔལ་གསེར་བཟང་པོ། །རིན་ཟླ་མཚན་ལེགས་བདུན་གྱིས་འགྲོ་འདི་སྐྱོངས། །རྣམ་དག་(༢༩༡ན) ― GLG021_Page_0583 ―
[མ་དཔེ་གཟིགས་ན་འདིར་གནོན།]
སེམས་བསྐྱེད་དག་པའི་སྨོན་ལམ་མདོ། །དཔལ་གྱི་མགུར་ནས་ཉེར་གསུང་ཐུགས་དབང་གི །སླུ་མེད་བཀའ་ཡི་དོན་བཞིན་འཇིག་རྟེན་གསུམ། །བདེ་ལེགས་སྒོ་འཕར་བརྒྱ་ཕྲག་འབྱེད་པར་ཤོག །རྣམ་འདྲེན་མཆེད་བརྒྱད་བྱང་སེམས་གནོད་སྦྱིན་སོགས། །ཕོ་བྲང་ཆེན་པོའི་ཁོར་ཡུག་མཛེས་བརྗིད་པས། །སྙིགས་མར་ཆེར་སྤྱོད་སྐྱེ་རྒུ་མཐའ་ཀླས་པའི། །མགོན་སྐྱབས་གཉེན་དང་གླིང་དུ་མཐུ་དཔུང་སྐྱེད། །ལུས་ངག་ཡིད་གསུམ་དྲན་ཤེས་ལྕགས་ཀྱུའི་དབང༌། །ཡོངས་སྒྱུར་བློ་ལྡན་ཐོས་བསམ་གོམ་འགྲོས་ཀྱིས། །སྐལ་བཟང་ཤལླི་ཀ་ཡི་ནགས་རྒྱུ་བའི། །གཞན་ཕན་རྒྱ་མཚོའི་ཁར་འཁྱེར་ཞབས་བརྟན་ཤོག །བདེ་སྐྱིད་ནོར་འཛིན་སྙིང་སྟོབས་རུས་སྦལ་གྱིས། །འདེགས་ལ་འཇིགས་མེད་འཇུག་པ་བཅུ་ལྡན་གོ །བཅོ་ལྔའི་ཟླ་ལྟར་ཆ་རྫོགས་ཐུབ་པའི་བསྟན། །འཕྲུལ་ཆེན་ལང་ཚོའི་སྡེ་གང་ཞབས་བརྟབ་ཤོག །རྣམ་འདྲེན་ཡོངས་ཀྱི་མཁྱེན་བརྩེ་ནུས་ཚོགས་ཀུན། །བཤེས་གཉེན་གཟུགས་ཤར་རྗེ་བཙུན་བཙོང་ཁ་པའི། །བཤད་སྒྲུབ་བསྟན་པ་རིས་མེད་སྐྱེ་རྒུ་ཡི། །བསོད་ནམས་བྱེ་བའི་ཞིང་དུ་དར་བར་ཤོག །དགའ་བ་བརྒྱ་པའི་དཔལ་ལྡན་ཕོ་བྲང་ཆེ། །གནམ་སའི་དབང་ཕྱུག་སྐུ་ཚེ་མངའ་ཐང་རྒྱས། །ཆོས་སྲིད་ཁྲིམས་གཉིས་གསེར་གྱི་འཁོར་ལོ་ཡིས། །གླིང་བཞིའི་ཁྱོན་ལ་མངོན་པར་སྒྱུར་བར་ཤོག །མགོན་མེད་ཟས་སྦྱིན་ཀུན་དགའ་ར་བ་དངོས། །གངས་ཅན་སར་འཕོས་རྒྱལ་བྱེད་ཚལ་གཉིས་པར། །འདུས་པའི་ཚོགས་འཕེལ་འཁོར་ལོ་རྣམ་པ་གསུམ། །སྲིད་མཐའི་བར་དུ་བླ་ནས་བླར་རྒྱས་ཤོག །བཻ་ཌཱུཪྻ་(༢༩༡བ) ― GLG021_Page_0584 ―
[མ་དཔེ་གཟིགས་ན་འདིར་གནོན།]
འོད་མཆེད་བདུན་མཆོད་ཆོག་རྒྱུན། །ཉེར་འཛུགས་དངོས་གྲུབ་རྒྱ་མཚོ་གཉེན་མདུན་དང༌། །རྩ་ལག་བཅས་པའི་འདི་ཕྱི་བར་གསུམ་གྱི། །འདོད་ཡོན་མ་ལུས་ལྷུན་གྱིས་གྲུབ་པར་ཤོག །རྡུལ་བྲལ་སྟོན་ཟླ་ལྟ་བུར་རབ་དཀར་བ། །རྣམ་དག་བསམ་པས་ལེགས་བཏབ་སྨོན་ལམ་འབྲས། །ཡོངས་སྨིན་འཕྲིན་ལས་གནོད་སྦྱིན་དེད་དཔོན་དང༌། །སྟོབས་ཆེན་རྒྱལ་པོ་སྡེ་བཞིས་སྤེལ་བར་མཛོད། །ལན་ཅིག་མིན་པ་སྲིད་པའི་འཁོར་ཡུག་ཏུ། །དྲིན་གྱིས་ཉེར་བསྐྱངས་ནམ་མཁའི་མཐས་གཏུགས་འགྲོ །མ་འཇིགས་བཞི་ལྡན་མངོན་དུ་འགྱུར་བའི་རྒྱུར། །དུས་གསུམ་རབ་བསགས་བསོད་ནམས་ཐམས་ཅད་བསྔོ། །ཞེས་སྙེ་མོ་རྒྱལ་བྱེད་ཚལ་གྱི་ཆོས་སྡེར་སྨན་བླའི་མདོ་ཆོག་ཡིད་བཞིན་དབང་རྒྱལ་འདི་གའི་རིང་འཚོར་དམིགས་ནས་བཙུགས་པའི་སྨན་བླའི་དཀྱིལ་འཁོར། ཙཀླི། སྨན་མདོ་བརྒྱད་རྒྱ་པ་སྟེགས་བཅས། གོས་བཟང་ལས་གྲུབ་པའི་གདུགས་གཅིག །རྒྱལ་མཚན་བཞི་དང༌། གསེར་འབྲུ་ལྔ། འཕན་ཆུང་བརྒྱད། སྟེགས་བུ། མདོ་ཆོག་ཚར་བརྒྱད། འཛུགས་སྟོན་ལྷ་མཆོད་མི་མཆོད་ཀྱི་བསྙེན་བཀུར་ཉིན་གཅིག་དང་རྒྱུན་འཇགས་སུ་བོགས་མཁར་རུའི་ཁལ་ཉི་ཤུ་རེ་རྣམས་ཨ་གླིང་ཆོས་མཛད་དངོས་གྲུབ་རྒྱ་མཚོས་སྦྱར་བའི་ཚེ་རིང་འཚོའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ལྷ་གཅིག་སྲོང་བཙན་ཐབས་མཆོག་བདེ་ཆེན་དང༌། །མཉམ་སྦྱོར་མོང་བཟའ་ཁྲི་ལྕམ་ཤེས་རབ་ཡུམ། །ཟུང་འཇུག་ཐུགས་དམ་ལྷ་ཁང་འཕགས་པའི་སྐུ། །བྲག་དབྱིབས་ཡེར་པ་ར་སའི་གོང་པའི་ཚུལ། (༢༩༢ན) ― GLG021_Page_0585 ―
[མ་དཔེ་གཟིགས་ན་འདིར་གནོན།]
།སངས་རྒྱས་ཀུན་དངོས་པདྨ་ཐོད་ཕྲེང་རྩལ། །ལྔ་བརྒྱའི་གཙུག་རྒྱན་ཇོ་བོ་ཡབ་སྲས་དང༌། །ཀུ་མ་ར་ཛ་ཀློང་ཆེན་རབ་འབྱམས་སོགས། །སྐྱེས་མཆོག་མང་པོས་བྱིན་བརླབས་ངོ་མཚར་གནས། །རྟེན་དང་བརྟེན་པར་བཅས་པའི་གནྡྷོ་ལར། །དུས་བཟང་རྩ་གསུམ་མཆོད་པའི་རྒྱུན་འཛིན་པ། །ལྷ་ལྡན་བྱ་འདབས་ཚེས་བཅུ་ཤར་མ་བ། །སྤྱི་བསྡུས་གན་གོས་འཕན་མང་ཕུལ་བའི་དགེས། །རིང་པོར་འཚོ་ཞིང་དཔལ་འབྱོར་ལོངས་སྤྱོད་རྒྱས། །ཕོ་རིགས་བུ་བརྒྱུད་གནོད་སྦྱིན་ངལ་བསོས་པོའི། །སྲས་ཀྱི་རྗེས་འགྲོར་འཕེལ་སོགས་བསམས་པའི་དོན། །རེ་བ་ཇི་བཞིན་ལྷུན་གྱིས་གྲུབ་བྱིན་རློབས། །འདི་ནས་ཉིང་མཚམས་སྦྱར་ཚེ་རྔ་ཡབ་ཀྱི། །གླིང་དབུས་ཟངས་མདོག་དཔལ་རིའི་ཕོ་བྲང་དུ། །པད་འབྱུང་འཁོར་དུ་སྐྱེས་ཏེ་རྫོགས་པ་ཆེས། །རྣམ་གྲོལ་རང་རིག་ཀུན་བཟང་ངོ་འཕྲོད་ཤོག །ལྕགས་སྤྲེ་སྤྲེལ་ཟླའི་ཡེར་པ་ཚེས་བཅུའི་སྐབས་ལྷ་ས་ཚེས་བཅུ་ཤར་མ་བ་རྣམས་ཀྱིས་གོས་འཕན་དུ་མ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཆོས་སྐུ་སྣང་མཐའ་རིག་རྩལ་མ་འགགས་གདངས། །ལོངས་སྐུར་སྤྱན་རས་གཟིགས་དབང་འཇའ་ཀློང་ལས། །སྤྲུལ་སྐུ་པད་འབྱུང་འོད་ཟེར་འགྲོ་ཀུན་ལ། །ཡོངས་ཁྱབ་སྐུ་གསུམ་དབྱེར་མེད་བརྩེ་བ་ཅན། །མགོན་པོ་ཐུགས་རྗེ་བསྐུལ་བའི་བཟླས་བརྗོད་དབྱངས། །རྩེ་གཅིག་དད་པའི་རྒྱུད་ལས་ཉེར་དྲངས་གླུ །རབ་འབྱམས་ཞི་ཁྲོའི་ལྷ་ཚོགས་མ་ལུས་པ། །དགྱེས་བསྐྱེད་ཀུན་བཟང་མཆོད་སྤྲིན་ཡོངས་སྤྲོས་མཐུས། །རིས་མེད་རྒྱུད་ལྔའི་(༢༩༢བ) ― GLG021_Page_0586 ―
[མ་དཔེ་གཟིགས་ན་འདིར་གནོན།]
སེམས་ཅན་ཡོད་དོ་ཅོག །མངོན་མཐོ་ངེས་ལེགས་སར་འཁྲིད་ཤིང་རྟ་ཆེ། །ཐུབ་བསྟན་མ་ལ་ཡ་ལྗོན་དར་བའི་དྲིས། །འགྲོ་རྣམས་སྙིང་ལ་སིམ་པའི་རེག་བྱར་ཤོག །ཕྱན་ན་པདྨས་ཆེད་དུ་འདུལ་ཞིང་དངོས། །བོད་དང་བོད་ཆེན་བཤད་དང་སྒྲུབ་པའི་སྡེ། །ནོར་འཛིན་སྐྱོང་བའི་དབང་ཕྱུག་འབངས་བཅས་ལ། །གནོད་བྱེད་ཉེར་འཚེ་མ་ལུས་བཟློག་ཏུ་གསོལ། །འབྲུམ་ནག་སྟོད་ཚད་རྒྱུ་གཟེར་བཤལ་རིམས་ཡམས། །སད་སེར་བཙའ་ཐན་དབུལ་ཕོངས་མཚང་འདྲུ་དང༌། །འཐབ་རྩོད་འཁྲུག་ལོང་རྩོད་ལྡན་དུས་ངན་གྱི། །ཆད་པ་མ་ལུས་བཟློག་ཅིང་བསྒྱུར་དུ་གསོལ། །ཁྱད་པར་པུར་རྒྱལ་བསྟན་དང་རྗེ་འབངས་ལ། །བསམ་ངན་སྦྱོར་རྩུབ་འཆང་བའི་སྟོད་སྨད་ཧོར། །རྒྱ་གར་རྒྱ་ནག་བལ་ཀློ་རྡོ་མོན་སོགས། །ཕྱོགས་མཚམས་མཐའ་དམག་ཉེར་འཚེ་བཟློག་ཏུ་གསོལ། །ཕྱོགས་བཞིའི་འདོད་དགུ་མ་ལུས་ཀུན་འདུ་ཞིང༌། །ཐོས་བསམ་སྒོམ་འཕེལ་བསྟན་འཛིན་འདུས་སྡེ་དར། །རྗེ་འབངས་ཚོགས་རྣམས་རྫོགས་ལྡན་གསར་པ་ཡི། །རྩེ་དགའ་ཁོང་ནས་རྒོད་པའི་བཀྲ་ཤིས་ཤོག །ཅེས་ལྕགས་སྤྲེ་བསམ་ཡས་མཆིམས་ཕུར་ཡིག་དྲུག་དུང་ཕྱུར་ཞིག་གཏོང་བ་དང་དེའི་དུས་སུ་སྨོན་ལམ་འདི་ལྟ་བུ་ཞིག་བརྩམས་ན་ལེགས་ཞེས་གནས་ཀྱི་སྲུང་མ་དཔལ་ལྡན་ལྷ་མོ་རལ་གཅིག་མའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མཚོ་སྐྱེས་རྡོ་རྗེ་གཏེར་སྟོན་ཆོས་ཀྱི་དབང༌། །སྨན་ལུང་ཡབ་སྲས་སྒྲུབ་སྡེ་བརྒྱད་ཀྱི་ལྷ། །ལེགས་ལྡན་ཚོགས་བདག་མ་ནིང་ནག་པོ་སོགས། །རྩ་གསུམ་ཐུགས་རྗེའི་བྱིན་རླབས་(༢༩༣ན) ― GLG021_Page_0587 ―
[མ་དཔེ་གཟིགས་ན་འདིར་གནོན།]
ནུས་མཐུ་ཡིས། །བགྲང་ཡས་རིགས་རྣམས་ཀུན་གྱི་ཁྱབ་བདག་ཆེ། །བློ་གྲོས་མཆོག་གི་རྡོ་རྗེ་དཔལ་བཟང་པོའི། །སྤྲུལ་སྐུའི་ཟློས་གར་མྱུར་སྟོན་བཀའ་གཏེར་གྱི། །བཤད་སྒྲུབ་བསྟན་པའི་སྒྲོན་མེ་སྦར་བར་ཤོག །སྐྱབས་གསུམ་ལྷ་དང་དྲང་སྲོང་བདེན་ཚིག་སྟོབས། །རྒྱུ་འབྲས་རྟེན་ཅིང་འབྲེལ་འབྱུང་སླུ་མེད་མཐུས། །སྨོན་ལམ་ཅི་བཏབ་རེ་བ་མ་ལུས་པ། །བསམ་དོན་ཇི་བཞིན་ལྷུན་གྱིས་གྲུབ་པར་ཤོག །ཅེས་ཁྱབ་བདག་ཁྲ་ཚང་པ་ཆེན་པོའི་སྤྲུལ་པའི་སྐུ་མྱུར་དུ་ཕེབས་པའི་བདེན་ཚིག་ཏུ་བརྗོད་པ་འདི་ནི་གདན་ས་ཆོས་རྗེ་སྐུ་སྐྱེ་ངག་དབང་འཇམ་དབྱངས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཁམས་གསུམ་ཆོས་ཀྱི་རྒྱལ་པོ་ཙོང་ཁ་པའི། །བཤད་སྒྲུབ་བསྟན་དང་དེ་འཛིན་དགེ་འདུན་སྡེ། །སྤྱི་དང་ཁྱད་པར་བན་མཁར་ཆོས་ཀྱི་གྲ །སྲིད་མཐའི་བར་དུ་འཕེལ་ཞིང་རྒྱས་པར་ཤོག །ངག་དབང་བློ་གྲོས་ཡངས་པའི་རྫིང་བུ་རུ། །མཁས་བཙུན་བཟང་པོའི་འདབ་སྟོང་ཟེ་འབྲུའི་བཅུད། །དཔྱོད་ལྡན་རྒྱ་མཚོས་མྱངས་པའི་ལེགས་བཤད་གླུས། །ཀུན་ཁྱབ་གཡུང་དྲུང་ལྟ་བུར་བརྟན་པར་ཤོག །དཀོན་ཅོག་རྣམ་གསུམ་དྲང་སྲོང་གྲུབ་པའི་གཙོ། །ལྷ་དང་རིག་འཛིན་ཚོགས་ཀྱི་བདེན་པའི་མཐུས། །མི་ཕྱེད་དད་པས་བཏབ་པའི་སྨོན་ལམ་གྱི། །འབྲས་བུ་ཇི་བཞིན་དུས་སུ་སྨིན་པར་ཤོག །ཅེས་པ་འདིའང་བན་མཁར་བླ་མས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བློ་བཟང་དབང་པོའོ། །འཆི་མེད་འཕོ་བ་ཆེན་པོའི་སྐུ་འགྲུབ་པ། །འཁོར་བའི་ཕ་མཐའ་ཇི་སྲིད་མྱ་ངན་ལས། །(༢༩༣བ) ― GLG021_Page_0588 ―
[མ་དཔེ་གཟིགས་ན་འདིར་གནོན།]
མི་འདའ་རྡོ་རྗེའི་སྐུ་བརྙེས་པདྨ་འབྱུང༌། །ཟླ་བྲལ་གཏན་གྱི་སྐྱབས་ཀྱི་བདག་བྱིན་རློབས། །ཚངས་པ་ལྷ་ཡི་མེ་ཏོག་བག་ཆགས་མཐུ། །སྲིད་པས་ཞི་ཁྲོ་ཆེ་མཆོག་འདུས་པའི་རྩལ། །གན་ཇག་ཐང་ཏའི་སྒྱུ་འཕྲུལ་གཏེར་བདག་གླིང༌། །རྣམ་འདྲེན་ཟུང་གིས་ཚེ་རབས་ཀུན་ཏུ་སྐྱོངས། །རིགས་འདུས་པདྨ་ཀ་རའི་རྣལ་འབྱོར་དང༌། །ཡི་དམ་འཇིག་རྟེན་དབང་ཕྱུག་སྒོམ་བཟླས་ཀྱིས། །འདི་སྣང་ཕུན་ཚོགས་ལྷ་ཡི་དཔལ་ལ་འགྲན། །ཡང་སྲིད་བརྒྱུད་མར་དལ་འབྱོར་རྟེན་ཐོབ་ཤོག །ཐེག་མཆོག་ཆོས་ཀྱི་དགའ་སྟོན་ལ་སྤྱད་པས། །ཟངས་མདོག་དཔལ་རི་བདེ་ལྡན་པོ་ཏ་ལ། །སོ་སོར་སྣང་ཡང་རིག་རྩལ་དག་ཞིང་དུ། །སྐུ་གསུམ་དབྱེར་མེད་མགོན་གྱིས་རྗེས་འཛིན་ཤོག །མདོ་སྔགས་བཤད་སྒྲུབ་སྡེ་རྣམས་དར་ཞིང་རྒྱས། །འདྲེན་མཆོག་བླ་མ་མཐའ་དག་ཞབས་པད་བརྟན། །བདག་གིས་སྨོན་ལམ་བཏབ་པའི་འབྲས་བུ་ཀུན། །བསམས་པ་ཇི་བཞིན་འགྲུབ་པའི་བཀྲ་ཤིས་ཤོག །ཅེས་རིགས་འཛིན་གཏེར་བདག་གླིང་པའི་ཞབས་འབྲིང་བ་དགེ་སློང་ངག་དབང་ཚུལ་ཁྲིམས་ཀྱིས་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཨོཾ་ཨཱ་ཧཱུཾ། བ ཛྲ གུ རུཔ དྨ སི དྡྷི ཧཱུཾ ། ཨོཾཨཱ་ཨཱུཾ། བཛྲ་གུ་རུ་པདྨ་ཐོད་འཕྲེང་རྩལ་བཛྲ་ས་མ་ཡ་ཛ༔ སིདྡྷིཕལ་ཧཱུཾཨཱཿཧྲི་མཧ་རིནིས། ར་ཙ་ཧྲི་ཡ། ཙིཏྟཧྲིཾ་ཧྲིཾ་ཛཿཛཿ ཞི་ཁྲོ་ཀུན་འདུས་པདྨ་ཐོད་འཕྲེང་རྩལ། །དངོས་བྱོན་གཞན་མིན་འདྲེན་བྱེད་བདུད་རྩིའི་དཔྱིད། །མཐོང་བས་དོན་ལྡན་ཡིད་བཞིན་དབང་གི་རྒྱལ། །དངོས་གྲུབ་འདོད་འཇོའི་བང་མཛོད་དེང་སྒོ་འབྱེད། །འདི་འབྲས་དད་གདུང་ཤུགས་ཀྱིས་གསོལ་བཏབ་ཚེ། །དཔལ་རི་(༢༩༤ན) ― GLG021_Page_0589 ―
[མ་དཔེ་གཟིགས་ན་འདིར་གནོན།]
པདྨ་འོད་ཀྱི་གཞལ་ཡས་ནས། །ཐོགས་མེད་སྤྱོན་ཏེ་ལུང་བསྟན་དབུག་དབྱུང་ཞིང༌། །དབང་བཞི་ཉེར་བསྐུལ་སྨིན་ཅིང་གྲོལ་བྱིན་རློབས། །རྒྱུད་ལྔའི་ལུས་ཅན་ཀུན་ལ་གདོད་མ་ནས། །རིག་པ་ཡེ་སངས་རྒྱས་པའི་པདྨ་འབྱུང༌། །རང་ངོ་ཤེས་ཏེ་འཁོར་བའི་མཐས་གཏུགས་པའི། །འགྲོ་འདྲེན་དེད་དཔོན་ཆེན་པོར་འགྱུར་བར་ཤོག །ཅེས་ཁྲི་སྲོང་རྣམ་འཕྲུལ་དཔལ་བཀྲ་ཤིས་སྟོབས་རྒྱལ་གྱི་ཐུགས་དམ་འབྲལ་སྤང་རྟེན་གྱི་ཞལ་ཐང་ལས་ལྷ་མགྲོན་གྱི་བླ་མ་གསུམ་མ་གཏོགས་འདྲ་བཤུས་སུ་དད་རྟེན་ལ་ལྕགས་ཕོ་སྤྲེ་ལོ་སྤྲེལ་ཟླའི་དུས་སྔགས་འཆང་གཞིས་ཀ་ཤར་པ་ཟུར་འཕྲིན་ལས་རྣམ་རྒྱལ་གྱིས་ལེགས་པར་གྲུབ་པའི་རྒྱབ་ཡིག་སྨོན་ལམ་དུ་ཟ་ཧོར་གྱི་བནྡེ་གང་ཤར་རང་གྲོལ་གྱིས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཚེ་དཔག་མེད་མགོན་འཕགས་མ་རྣམ་པར་རྒྱལ། །ཡིད་བཞིན་འཁོར་ལོ་འཇིགས་པ་བརྒྱད་སྐྱོབས་སོགས། །ཐུགས་རྗེའི་བཞུ་བླུགས་རྡོ་རྗེའི་སྲོག་གི་ཟུངས། །མི་འགྱུར་གཡུང་དྲུང་ལྟ་བུར་བྱིན་གྱིས་རློབས། །སངས་རྒྱས་ཀུན་འདུས་རྗེ་བཙུན་ཙོང་ཁ་པའི། །གསུང་ངག་ཆོས་ཀྱི་མཛོད་ལ་དབང་སྒྱུར་བློས། །མཁས་བཙུན་བཟང་པོའི་འཕྲིན་ལས་རྒྱ་མཚོའི་མཐར། །ཡོངས་ཁྱབ་བཤེས་གཉེན་དམ་པ་ཞབས་བརྟན་ཤོག །ཕས་རྒོལ་ས་སྲུངས་འགྲོས་ལ་འཇིགས་མེད་པར། །ཐོས་བསམ་གདོང་ལྔའི་རྩལ་གསུམ་གོ་ཆ་ཅན། །ཐུབ་བསྟན་གངས་རིར་ཉེར་བསྒོམ་ལང་ཚོའི་སྡེ། །འོག་མིན་ཞིང་གཙོ་ལྟ་བུར་བརྟན་པར་ཤོག །ཞྭ་སེར་བཤད་སྒྲུབ་བསྟན་པ་དགེ་འདུན་ཚོགས། །ལུགས་གཉིས་ཕོ་བྲང་སྐྱོང་བ་མི་ཡི་དབང༌།(༢༩༤བ) ― GLG021_Page_0590 ―
[མ་དཔེ་གཟིགས་ན་འདིར་གནོན།]
།སྐུ་ཚེ་ཆབ་སྲིད་མངའ་འབངས་བདེ་སྐྱིད་རྣམས། །རྫོགས་ལྡན་དུས་བཞིན་བླ་ནས་བླར་འཕེལ་ཤོག །མྱུར་མཛད་མགོན་པོ་དམ་ཅན་མ་ཧའི་ཞལ། །འདོད་ཁམས་དབང་ཕྱུག་སྤྲུལ་པའི་ཆོས་རྒྱལ་ཆེ། །ལྷ་དང་དྲང་སྲོང་བདེན་ཚིག་ལ་དབང་བས། །སྨོན་ལམ་ཅི་བཏབ་ལྷུན་གྲུབ་འཕྲིན་ལས་མཛོད། །ཅེས་བདེན་པ་བརྗོད་པའི་ཚིགས་སུ་བཅད་པ་ཚིག་ཉུང་ལ་དོན་རྒྱས་པ་ཞིག་ཚོགས་ཆེན་དང་གྲྭ་ཚང་དུ་འཛུགས་རྒྱུ་ལ་རྩོམས་ཤིག་ཅེས་གནས་ཆུང་ལྕོག་ནས་བསྟན་སྲུང་སྤྲུལ་པའི་ཆོས་རྒྱལ་ཆེན་པོས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འཕྲིན་ལས་ནོར་བུ་དེང་ནས་སངས་རྒྱས་སར། །བགྲོད་མིན་བར་དུ་རྗེ་བཙུན་འཕགས་མ་ཡིས། །འཇིགས་ཆེན་བརྒྱད་སོགས་སྒྲིབ་གཉིས་དེས་བསྐྱེད་པའི། །སྡུག་བསྔལ་ཀུན་ལས་རྣམ་པར་གྲོལ་བར་ཤོག །ཅེས་པའང་ཟ་ཧོར་གྱི་བནྡེས་བྲིས། །ཞི་ཁྲོ་ཡོངས་འདུས་དཀྱིལ་འཁོར་རྒྱ་མཚོ་ལ། །ཀུན་བཟང་མཆོད་པའི་སྤྲིན་ཕུང་ཆེར་སྤྲོས་པས། །ངག་དབང་བློ་གསལ་རང་ངོ་ལེགས་འཕྲོད་ནས། །ཡི་གེ་འཁོར་ལོ་ཚོགས་ཆེན་ས་ནོན་ཤོག །སྐྱེ་མང་གོམས་པའི་ང་རྒྱལ་སེར་སྣའི་དྲི། །ཚོར་བའི་ཕུང་པོ་ཉེར་གོས་རབ་བཀྲུས་ནས། །མཉམ་ཉིད་ཡེ་ཤེས་ངོ་བོར་གནས་བསྒྱུར་ཏེ། །རིན་ཅེན་འབྱུང་ལྡན་སྐུ་རུ་འཚང་རྒྱར་ཤོག །ཚེ་རབས་གཞན་དུ་འཇུངས་པའི་དོ་ར་ན། །མི་བཟད་དབུལ་ཕོངས་རྒྱུ་ལ་ལོངས་སྤྱོད་པ། །རཏྣ་ཌཱཀཱིའི་མཐུ་ཆེན་རྨད་པོ་ཆེས། །ཡོངས་བཅིལ་བདེ་ལེགས་འདོད་དགུའི་ཆར་ཆེན་ཕབ། །ཆོས་མཛད་ངག་དབང་བློ་གསལ་གྱི་ཆེད་དུ་(༢༩༥ན) ― GLG021_Page_0591 ―
[མ་དཔེ་གཟིགས་ན་འདིར་གནོན།]
རྣམ་གླིང་པཎ་ཆེན་གྱིས་ཕན་བདེ་ལེགས་བཤད་གླིང་པར་ཞི་ཁྲོའི་སྐོངས་བཤགས་ཐོག་ཁ་ཐིའི་བླ་བྲེ་དཀྱུས་འདོམ་གསུམ་མ་ལོངས་ཙམ་ནང་ཞེང་འདོམ་གང་ལྷག་ཙམ་ཕུལ་བ་དང༌། བརྒྱ་ཐང་ལེ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞོ་གསུམ་གྱིས་ལྷག་བཅུ་བཞིའི་སྲང་གི་སྣོད། །ཕན་བདེ་ལེགས་བཤད་གླིང་དུ་ཕུལ་བའི་དགེས། །ཟག་མེད་ཡེ་ཤེས་བདུད་རྩིའི་རྒྱ་མཚོ་ལ། །ཚེ་རབས་ཀུན་ཏུ་ལོངས་སུ་སྤྱོད་པར་ཤོག །ཅེས་པའང་བཀྲ་ཤིས་བདེ་ཆེན་པ་ངག་དབང་དོན་གྲུབ་ཀྱིས་དགེ་སྐོས་ཀྱི་ལས་སྣེའི་ཐོག་ཕུལ་བ་ཤུ་བྷཾ།།དོན་གཉིས་ལྷུན་གྱིས་གྲུབ་པ་སངས་རྒྱས་དང༌། །ལེགས་གསུང་སྐྱབས་དངོས་གཏན་བདེ་དམ་པའི་ཆོས། །དེ་བསྒྲུབ་ཐེག་པ་ཆེ་ཆུང་དགེ་འདུན་ཏེ། །དཀོན་ཅོག་གསུམ་གྱིས་རྟག་ཏུ་ཤིས་པར་མཛོད། །སངས་རྒྱས་ཀུན་དངོས་རྗེ་བཙུན་བཙོང་ཁ་པའི། །ཆོས་སྲིད་བསྟན་པ་རྒྱ་མཚོའི་མཐའ་ཀླས་པར། །བླ་ནས་བླར་འདེགས་གནམ་སའི་དབང་ཕྱུག་ལྷ། །རྡོ་རྗེ་ལྟ་བུར་མི་འགྱུར་ཞབས་བརྟན་ཤོག །སྟོབས་ལྡན་ཁྲོ་བཅུའི་མཐུ་རྩལ་ཉི་མའི་གཟིས། །ནག་ཕྱོགས་ཡིད་སྲུབས་མུན་པ་མཐར་བྱས་ཏེ། །གཞོམ་མེད་རྡོ་རྗེ་བཞུ་བླུགས་སྲ་མཁྲེགས་གུར། །མི་བཤིག་སྲོག་གི་ཟུངས་སུ་འགྱུར་བྱིན་རློབས། །གར་དབང་ཕྱག་སོར་གྱིས་བཏེག་གསེར་བུམ་ནང༌། །འཆི་མེད་བདུད་བརྩིའི་རྒྱུན་གྱིས་ལུས་གང་བས། །གཡུང་དྲུང་ཚེ་ཡི་ཉ་ཕྱིས་ཁོག་ཡངས་པོར། །འཁོར་འདས་ཡོན་ཏན་མུ་ཏིག་འཕྱུར་བར་ཤོག །མི་དབང་བསོད་ནམས་ཕུང་པོ་(༢༩༥བ) ― GLG021_Page_0592 ―
[མ་དཔེ་གཟིགས་ན་འདིར་གནོན།]
རྣམ་ཐོས་བུར། །འགྲན་པར་ནུས་པའི་ཁྲིམས་གཉིས་གྲིབ་བསིལ་དུ། །མངའ་འབངས་མཐའ་དག་ཚེ་ལོ་བརྒྱད་ཁྲི་བའི། །སྐྱེ་རྒུ་ཇི་བཞིན་བདེ་སྐྱིད་ཕུན་ཚོགས་ཤོག །རྒྱ་ཧོར་བོད་དང་བོད་ཆེན་འཛིན་མའི་གཞིར། །དཔལ་ལྡན་འབྲས་སྤུངས་ཆོས་སྡེ་གཙོར་གྱུར་པའི། །ཞྭ་སེར་རིང་ལུགས་ཙནྡན་ལྗོན་པ་ལས། །ཕན་བདེའི་དྲི་བསུང་ཕྱོགས་བརྒྱར་ཆད་མེད་ཤོག །མྱུར་མཛད་མགོན་པོ་ཀྵེཏྲ་པཱ་ལ་དང༌། །དམ་ཅན་གཤིན་རྗེ་འདོད་ཁམས་དབང་ཕྱུག་མ། །བསྟན་སྲུང་སྤྲུལ་པའི་ཆོས་རྒྱལ་ཆེན་པོ་ཡིས། །བསམས་དོན་ལྷུན་གྱིས་གྲུབ་པའི་འཕྲིན་ལས་མཛོད། །སྡེ་པ་སངས་རྒྱས་རྒྱ་མཚོའི་བརྟན་བཞུགས་ཚོགས་སུ་བཙུགས་ཆོག་པ་ཞིག་དགོས་ཞེས་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་བླ་སྤྱི་རྣམས་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་ཆུ་སྟོད་ཟླ་བའི་ཡར་ཚེས་ལ་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །མ་རིག་མུན་སེལ་ཡེ་ཤེས་སྒྲོན། །སྤར་བྱེད་ཉེར་གཉིས་སྲང་གྲངས་ཅན། །དངུལ་ཀོང་རིགས་འཛིན་འདུས་གླིང་དུ། །ཕུལ་བས་ཆོས་ཀུན་མཐོང་བར་ཤོག །ཅེས་འཕྱོང་རྒྱས་པ་མཁས་བཙུན་རྒྱ་མཚོ་རབ་འབྱམས་གྲྭ་སྐོར་གྱི་དུས་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །འཇོན་དམར་ཁལ་གསུམ་གྲངས་ཀྱི་ནང་ཤ་ལ། །ཞོ་དོས་ལྷག་པའི་གསེར་སྲང་ཉེར་གཅིག་གིས། །ལེགས་གཏུམས་ཀོང་བུར་སྒྲོན་མེ་རབ་སྤར་ནས། །དཀོན་ཅོག་གསུམ་འདུས་ཇོ་ཤཱཀ་དྲུང་ཕུལ་དགེས། །བཱ་དུར་ནོ་མོན་ཁན་སོགས་ཚེ་འདས་དོན། །རྒྱུ་སྦྱོར་བྷ་ཡན་ཤུ་ལིང་ལྷག་བསམ་གྱིས། །བསྐྲུན་པས་སྲིད་ཞིའི་མ་རིག་མུན་བསལ་ཏེ། །མངོན་མཐོ་ངེས་ལེགས་སྣང་བས་ཁྱབ་པར་(༢༩༦ན) ― GLG021_Page_0593 ―
[མ་དཔེ་གཟིགས་ན་འདིར་གནོན།]
ཤོག །ཅེས་ལྕགས་སྤྲེ་སྦུས་སྲང་སེར་ཁང་དུ་བལ་པོ་བར་པ་ཤི མུ་ཎི། ཡ་ན་ཛ་ཏི་གསུམ་གྱིས་ཟླ་གཅིག་བར་བཟོས་པའི་གླ་ལྟོ་ཟི་གོང་མཁར་ཁལ་བརྒྱ་དང་དོན་དྲུག་སོང་ཞིང༌། འཛུགས་ཉིན་དཀོན་གཉེར་རྣམས་ལ་སྟོན་མོ་བསྐྲུན་པ་སོགས་དགེ་བ་སྤེལ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཚུལ་འདུལ་བ་ལུང་ཁྲིམས་ས་བོན་བག་ཡོད་འཛིན་མའི་གཞིར། །རབ་སྨིན་མངོན་མཐོའི་མྱུ་གུ་དར་དྲག་རྩེར། །མྱང་འདས་སྙེ་མ་གཡུར་དུ་ཟ་བ་ལ། །མཁའ་མཉམ་སེམས་ཅན་ཀུན་གྱིས་ལོངས་སྤྱོད་ཤོག །ཁྱད་པར་བསྟན་འཛིན་ད་ལའི་རྒྱལ་པོ་ཡི། །སྐུ་ཚེ་མངའ་ཐང་ཆབ་སྲིད་རབ་སྤེལ་ཞིང༌། །བགྲང་ཡས་སྐྱེ་བར་ལྷ་མིའི་རྟེན་བརྒྱུད་ནས། །རིང་མིན་ཞི་བའི་གྲོང་དུ་འཇུག་པར་ཤོགའཁྲུལ་ཤར་ཕྱོགས་རྟོག་བདེན་འཛིན་སྣང་བ་བཀྲག་པོ་ཆེ། །གཟུང་ཡུལ་སྒྱུ་མའི་རྟ་གླང་ལྟ་བུའི་ཆོས། །གདོད་ནས་རང་བཞིན་གྱིས་སྟོང་མཐའ་བྲལ་ལྟས། །སྲིད་པའི་མཚོ་ལས་འགྲོ་རྣམས་སྒྲོལ་བར་ཤོག །རྒྱུ་སྦྱོར་ནོར་འཛིན་སྐྱོང་བའི་དབང་ཕྱུག་ཆེ། །ཆོས་རྒྱལ་མྱ་ངན་མེད་ཀྱི་རྣམ་པར་ཐར། །བཟུང་ནས་འདི་ཕྱིའི་མདུན་མ་མ་ལུས་པ། །འབད་རྩོལ་མེད་པར་ལྷུན་གྱིས་འགྲུབ་ནུས་ཤོག །དཀོན་བརྩེགས་ཐ་དད་གདུལ་བྱའི་བློ་ཡི་དངས་མཚོའི་ནང༌། །ཐུབ་གསུང་གཟུགས་བརྙན་བྱེ་བ་ཕྲག་བརྒྱ་རུ། །ཤར་ཡང་དྲང་ངེས་ཕྱེ་བའི་གནས་ལུགས་དོན། །ལུས་ཅན་ཡོངས་ཀྱི་མངོན་སུམ་རྟོགས་པར་ཤོག །སྦྱིན་བདག་མི་དབང་ལེགས་བྱས་མུ་ཐི་ལའི། །ཆར་རྒྱུན་ཟད་མི་ཤེས་(༢༩༦བ) ― GLG021_Page_0594 ―
[མ་དཔེ་གཟིགས་ན་འདིར་གནོན།]
པའི་འཁྲི་ཤིང་གི །གཉིས་པའི་ངང་ཚུལ་བཟུང་ནས་ཚེ་རབས་སུ། །ཤྭཀྱ་སེང་གིས་རྗེས་སུ་འཛིན་པར་ཤོག །ཕལ་ཆེན་ཞིང་ཁམས་རྒྱ་མཚོར་རྒྱལ་དང་དེ་སྲས་ཀྱི། །རླབས་ཆེན་སྤྱོད་པས་དོན་གཉིས་སྒྲུབ་པའི་སེམས། །ཆེས་དཀར་སྐྱེ་རྒུ་ཀུན་གྱི་ཡིད་དབང་དུ། །ཉེར་འཇུག་ཕྲག་པར་འཁུར་ཆེན་འཁྱེར་ནུས་ཤོག །བསོད་ནམས་བརྒྱ་བྱིན་གཙུག་ཏོར་རེག་པའི་མོད། །མི་བདག་དབང་ཐང་ལེགས་བྲིས་ལུས་བསྒྱུར་ནས། །འཁོར་འདས་ཡོན་ཏན་གསེར་སྒོང་ཡོངས་སྨིན་པ། །འཇིག་རྟེན་མེས་པོའི་ངང་ཚུལ་འཛིན་པརཤོག །སྣ་མདོ་སྣ་ཚོགས་ཚོགས་ཐེག་པ་རོ་བརྒྱའི་བྲོ་བ་རྣམས། །སོ་སོར་སྣང་ཡང་སྒྲིབ་གཉིས་བཀྲེས་ཕོངས་ལས། །མཐར་བྱེད་གཙོ་དང་ཡན་ལག་འགལ་མེད་དུ། །ཡིད་ཅན་རྣམས་ཀྱིས་ཇི་བཞིན་རྟོགས་པར་ཤོག །བཟང་པོའི་བསྐལ་པ་འདི་ལ་མི་ཡི་རྗེ། །སྔ་ན་མེད་པའི་བྱང་ཆུབ་མཆོག་བརྙེས་ནས། །སྣ་ཚོགས་ཐབས་ཀྱིས་སེམས་ཅན་མ་ལུས་ཀུན། །ཐར་པའི་གྲོང་ཁྱེར་ཆེན་པོར་འདྲེན་པར་ཤོག །རྒྱུད་རྒྱུད་འབུམ་སྡེ་རྒྱ་མཚོར་འཇུག་པ་སྨིན་གྲོལ་ལམ། །རྫིངས་ཀྱིས་སྐུ་བཞིའི་གྲོང་ཁྱེར་ཆེན་པོ་རུ། །སྙིགས་དུས་ཚེ་ཐུང་གཅིག་ལ་འགྲོ་བ་རྣམས། །བྱ་ཇ་ཚེགས་ཆུང་ཐབས་ཀྱིས་བགྲོད་ནུས་ཤོག །སྦྱིན་པའི་བདག་པོ་ཨིནྡྲབྷཱུ་ཏི་ལྟར། །འདོད་ཡོན་མ་སྤངས་ལམ་དུ་ཡོངས་ཁྱེར་ནས། །ཁ་སྦྱོར་བདུན་ལྡན་རྡོ་རྗེ་འཆང་ཆེན་པོ། །གྲུབ་པའི་སྐལ་བ་བཟང་པོར་འགྱུར་བར་ཤོག །ཅེས་པའང་བསྟན་འཛིན་ད་ལའི་རྒྱལ་པོས་ལུང་སྡེ་བཞི། ཤེར་ཕྱོགས། དཀོན་བརྩེགས། ཕལ་ཆེན། མདོ་སྣ་ཚོགས། རྒྱུད་འབུམ་རྣམས་བཞེངས་པའི་དུས་སྨོན་ལམ་དགོས་ཚུལ་ལྟར་ཟ་(༢༩༧ན) ― GLG021_Page_0595 ―
[མ་དཔེ་གཟིགས་ན་འདིར་གནོན།]
ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ཚེ་མཐའ་ཡས་དང་སྒྲུབ་སྡེ་བརྒྱད་ཀྱི་ལྷ། །མ་དང་མཁའ་འགྲོ་དམ་ཅན་སྲུང་མ་ཡིས། །དུས་མིན་འཆི་བའི་བར་ཆད་ཉེར་འཚེ་ཀུན། །ཞི་ཞིང་ཚེ་དང་བསོད་ནམས་རྒྱས་པར་མཛོད། །གལ་ཏེ་དུས་ལ་བབ་ན་འོད་དཔག་མེད། །མངོན་སུམ་བྱོན་ནས་བདེ་བ་ཅན་ཞིང་དུ༌། །དྲངས་ནས་ཐེག་པ་མཆོག་གི་ཆོས་ཚུལ་ལ། །སྐྱེ་བ་ཀུན་ཏུ་སྤྱོད་པར་བྱིན་གྱིས་རློབས། །ཞེས་པའང་མེས་སྟོན་ཁྲོ་རྒྱལ་དཔལ་མགོན་གྱི་དོན་དུ་ཟ་ཧོར་གྱི་བནྡེས་སྦྱར། །ཨོཾཨཱཿཧཱུཾ་བཛྲ་གུ་རུ་པདྨ་སི་དྡྷི་ཧཱུྃ། ཨོཾཨཱཿཧཱུཾ་བཛྲ་གུ་རུ་པདྨ་ཐོད་ཕྲེང་རྩལ། བཛྲ་ས་མཡཛཿསིདྡྷིཕ་ལ་ཧཱུཾཨཱཿཧྲཱིཿ མ་ཧ་རི་ནི་སར་ཙཧྲི་ཡ། ཙིཏྟ་ཛཿཧྲིཾ་ཧྲིཾ། དག་དང་མ་དག་བྱེ་བ་ཕྲག་ཞིང་དུ། །འགྲོ་འདྲེན་སངས་རྒྱས་གཞན་ཀུན་གཅིག་བསྡོམས་པའི། །རྣམ་པར་ཐར་དང་སྲང་ལ་བཏེག་པ་ན། །ལྕི་ཡང་ཚད་མའི་ཡུལ་དུ་གཞལ་བྱ་མིན། །འོན་ཏེ་སྣང་བ་མཐའ་ཡས་ཐུགས་ཀའི་ཟེར། །སིནྡྷུའི་མཚོ་དབུས་པདྨའི་སྦུབས་ཞུགས་ཏེ། །སྤྲུལ་སྐུར་བསྟན་ནས་སྲིན་པོ་འདུལ་བར་གྱི། །རྣམ་ཐར་འཕྲུལ་ཆེན་ཚད་བཟུང་ནུས་མིན་ཀྱང་། །སྣ་ནམ་རྡོ་རྗེ་བདུད་འཇོམས་གསོལ་བཏབ་ངོར། །བཀའ་སྩལ་རྟོགས་བརྗོད་དཔག་བསམ་ལྗོན་ཤིང་ལས། །འཕྲོས་དོན་ཡལ་འདབ་འབྲས་བུ་གཡུར་ཟ་བ། །བདེ་བའི་གྲིབ་མར་དད་པའི་རོ་བཅུད་མྱོང༌། །རང་ལུས་ཕུང་ཁམས་སྐྱེ་མཆེད་འཛམ་གླིང་གཞིར། །རིག་པའི་ཁྱེའུ་ཆུང་པདྨ་ཐོད་འཕྲེང་རྩལ། །ཚོགས་བརྒྱད་མཚོན་དང་རྣམ་འགྱུར་སྒྱུ་མའི་འཕྲུལ། །འདུལ་ཞིང་སྒོ་ལྔའི་(༢༩༧བ) ― GLG021_Page_0596 ―
[མ་དཔེ་གཟིགས་ན་འདིར་གནོན།]
ཡུལ་དུ་ཅི་ཡང་འཇུག །སྤྲོས་བྲལ་ཆོས་སྐུའི་དབྱིངས་སུ་ལོངས་སྐུའི་གདངས། །ཡོངས་ཤར་སྣང་བཞི་མཐར་སོན་ཀུན་ཏུ་བཟང༌། །བརྗོད་བྲལ་རིག་པ་དོན་གྱི་བླ་མ་རུ། །རང་ངོ་མངོན་སུམ་འཕྲོད་པར་དེང་བྱིན་རློབས། །སངས་རྒྱས་རང་ལ་དབུལ་པོའི་སྒྱེད་རྡོ་གསེར། །ཇི་བཞིན་རིང་མིན་རྟོགས་ཏེ་མགོན་ཁྱོད་ཀྱི། །རྣམ་ཐར་བཟུང་ནས་བགྲང་ཡས་ལུས་ཅན་ཀུན། །འདྲེན་པའི་སྐྱོབ་པ་མཆོག་ཏུ་འགྱུར་བར་ཤོག །འདིའི་ཆེད་སྒོ་གསུམ་བདོག་པ་ཆ་ཕྲས་ཀྱང༌། །མཐུན་རྐྱེན་སྒྲུབ་ཀུན་ཚེ་འདིར་བདེ་སྐྱིད་འཕེལ། །ཕྱི་མ་པདྨ་འོད་ཞིང་རིགས་འཛིན་གྲལ། །འཇའ་ལུས་འཕོ་བ་ཆེན་པོའི་སྐུ་འགྲུབ་ཤོག །སངས་རྒྱས་གཉིས་པ་ཨྱོན་ཆེན་པོའི་རྣམ་ཐར་སིནྡྷུ་རྒྱ་མཚོ་མ་འཕྲོས་དོན་དང་བཅས་པ་ཁྲི་སྲོང་རྣམ་འཕྲུལ་ཆོས་རྒྱལ་བཀྲ་ཤིས་སྟོབས་རྒྱལ་གྱི་ལྗགས་བཀོད་མའི་བྲིས་ཐང་གི་འདྲ་བཤུས་ལྕགས་ཕོ་སྤྲེའུའི་ལོ་ཟུར་འཕྲིན་ལས་རྣམ་རྒྱལ་གྱིས་སྐྱ་རིས་དང༌། ཚོན་འབྱུག་གི་རོགས་སོག་པོ་བསྟན་པ་ཚུལ་ཁྲིམས་ཀྱིས་བགྱིས་པར་ཞལ་བྱང་ཆོས་རྒྱལ་འབྲི་གུང་པ་ཆེན་པོའི་ཐུགས་དམ་རྟེན་གྲ་ཚར་འདུག་པ་དང༌། །རྡོ་རྗེ་བྲག་སྤྲུལ་སྐུ་རིན་པོ་ཆེའི་གསུང་རྒྱུན་གཞན་ཡང་རྣམ་ཐར་ཡིག་ཚང་མང་པོ་དང་སྒོ་བསྟུན་ནས་བཀོད་པའི་རྒྱབ་ཡིག་སྨོན་ལམ་དུ་ཟ་ཧོར་གྱི་སྔགས་སྨྱོན་རྡོ་རྗེ་ཐོགས་མེད་རྩལ་གྱིས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་གུ་རུ་ཨ་དྷི་ཥྛན་ཨ་དྷིཥྛིཏེ་སྭཱཧཱ། །མཐོང་ཐོས་དྲན་དང་རེག་པས་འགྲོ་བ་ཀུན། །མངོན་མཐོ་ངེས་ལེགས་ལ་སྦྱོར་ཉི་མའི་གཉེན། །ཉན་ཐོས་ཚུལ་འཛིན་གནས་བཅུར་བླ་མ་དང༌། །སངས་རྒྱས་བྱང་སེམས་འདོད་ལྷས་ཡོངས་བསྐོར་བ། (༢༩༨ན) ― GLG021_Page_0597 ―
[མ་དཔེ་གཟིགས་ན་འདིར་གནོན།]
།རས་དཀར་དངས་ཤེལ་ཚོན་རིས་བཀྲ་བའི་རྒྱུ། །སྒྱིད་ཐང་ནོར་བུའི་བློ་བརྩོན་གྱིས་སྦྱར་ནས། །བློ་བཟང་ཚེ་འཕེལ་ཚེ་རིང་བསམ་འགྲུབ་ཅེས། །རྣམ་དཔྱོད་མིག་ཡངས་སོར་རྩེའི་གར་བསྒྱུར་མཐུས། །སྲས་བཅས་རྒྱལ་བས་སྐྱེ་བར་རྗེས་བཟུང་སྟེ། །ཚེ་འབྱོར་དབང་ཐང་རྣམ་ཐོས་བུར་འགྲན་ཞིང༌། །རིང་མིན་སྐུ་གསུམ་གྲོང་དུ་འཇུག་པ་ལ། །མདའ་བསྣུན་ཞབས་ཀྱི་མཆེད་པོར་འགྱུར་བར་ཤོག །གངས་ཅན་ས་འཛིན་སྤོ་ལ་དགྲ་བཅོམ་པ། །སྟོང་དང་སུམ་བརྒྱས་ལེགས་བསྐོར་ཡན་ལག་འབྱུང༌། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ལྷག་པའི་བསླབ་པ་གསུམ་ལ་སྦྱོར་བྱིན་རློབས། །ཉོན་མོངས་དགྲ་ཚོགས་ལས་རྒྱལ་ཆིག་བརྒྱ་དང༌། །དྲང་སྲོང་རི་ཡི་ངོས་བཞུགས་མ་ཕམ་པ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ནག་ཕྱོགས་ཀུན་ཞི་རྟག་ཏུ་ཤིས་བྱིན་རློབས། །ཉོན་མོངས་ལས་རྒྱལ་ཆིག་སྟོང་བཞི་བརྒྱས་བསྐོར། །ལོ་མ་བདུན་པའི་ཕུག་བཞུགས་ནགས་ན་གནས། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །སྡིག་པའི་དྲི་མ་ཀུན་དང་བྲལ་བྱིན་རློབས། །ཟངས་གླིང་གནས་སུ་ཆིག་བརྒྱས་ལྷག་པ་ཡི། །དགྲ་བཅོམ་སྟོང་ཕྲག་གཅིག་བསྐོར་དུས་ལྡན་ཞབས། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །རྒྱལ་སྲས་སྤྱོད་པས་ལུས་ཅན་སྐྱོང་བྱིན་རློབས། །རྡོ་རྗེ་མོའི་བུ་དགྲ་བཅོམ་ཆོག་སྟོང་བཅས། །གནས་མཆོག་སིདྒ་ལ་རུ་ལེགས་བཞུགས་པ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །མགོན་སྐྱོབས་གླིང་དང་དཔུང་གཉེན་མཛད་དུ་གསོལ། །བརྒྱ་ཕྲག་གཉིས་ལྷག་དགྲ་བཅོམ་སྟོང་དང་བཅས། །བཟང་པོ་ཡ་མུ་ན་ཡི་གླིང་བཞུགས་པ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །སེམས་ཅན་བསོད་ནམས་(༢༩༨བ) ― GLG021_Page_0598 ―
[མ་དཔེ་གཟིགས་ན་འདིར་གནོན།]
ཞིང་དུ་འགྱུར་བྱིན་རློབས། །ཁ་ཆེར་བརྒྱ་ཕྲག་ལྔ་ཡི་དགྲ་བཅོམ་པས། །ལེགས་བསྐོར་འཕགས་པའི་གནས་བརྟན་གསེར་བེའུ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ཆོས་ཀུན་རྣམ་འབྱེད་ཤེས་རབ་ཐོབ་པར་ཤོག །བ་ལང་སྤྱོད་གླིང་བདུན་བརྒྱའི་དགྲ་བཅོམ་དང༌། །ལྷན་ཅིག་བྷ་ར་དྷ་ཛ་གསེར་ཅན་ཞབས། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །རྫོགས་སངས་རྒྱལ་ཞལ་མངོན་སུམ་མཐོང་བྱིན་རློབས། །བྱང་གི་སྒྲ་མི་སྙན་གླིང་ཉོན་མོངས་དགྲ །བཅོམས་པ་དགུ་བརྒྱས་བསྐོར་བ་བྷ་ཀཱུ་ལ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །དབུལ་བའི་སྡུག་བསྔལ་མཐའ་དག་སེལ་བྱིན་རློབས། །པྲི་ཡངྐུའིགླིང་འཕགས་པ་སྒྲ་ཅན་འཛིན། །ཆིག་བརྒྱ་སྟོང་གི་དགྲ་བཅོམ་གྱིས་བསྐོར་བ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །སྐྱེ་རྒུ་མི་ཁོམས་ལས་འདྲེན་ནུས་བྱིན་རློབས། །དགྲ་བཅོམ་སྟོང་དང་དྲུག་བརྒྱས་བསྐོར་བ་ཡི། །བྱ་རྒོད་ཕུང་རིར་གནས་བརྟན་ལམ་ཕྲན་བསྟན། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ཉམ་ང་བརྒྱད་ཀྱི་འཇིགས་ལས་སྒྲོལ་བྱིན་རློབས། །དགྲ་བཅོམ་སྟོང་བཅས་ཤར་གྱི་ལུས་འཕགས་སུ། །བྷ་ར་དྷཛ་ཆེན་པོ་བསོད་སྙོམས་ལེན། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ཉེན་པ་བཅུ་ཡི་འཇིགས་ལས་ཐར་བྱིན་རློབས། །ལམ་བསྟན་དགྲ་བཅོམ་དགུ་བརྒྱས་ཡོངས་བསྐོར་བ། །སུམ་ཅུ་རྩ་གསུམ་ལྷ་ཡི་གནས་བཞུགས་པ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །རྣམ་དག་ཚུལ་ཁྲིམས་བསྲུང་བར་ནུས་བྱིན་རློབས། །རི་རྒྱལ་ངོས་ཡངས་གནས་བརྟན་ཀླུ་ཡི་སྡེ། །སྟོང་དང་ཉིས་བརྒྱའིདགྲ་བཅོམ་གྱིས་བསྐོར་བ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །རྟག་ཏུ་སངས་རྒྱས་ཞིང་ཁམས་མྱུལ་བྱིན་རློབས། །གནས་བརྟན་སྦེད་བྱེད་རི་རྒྱལ་བི་ཧུ་ལར། །སྟོང་དང་བཞི་བརྒྱའི་དགྲ་བཅོམ་གྱིས་བསྐོརབ། །(༢༩༩ན) ― GLG021_Page_0599 ―
[མ་དཔེ་གཟིགས་ན་འདིར་གནོན།]
ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །ཆོས་ཀུན་གདོད་ནས་སྟོང་པར་རྟོགས་བྱིན་རློབས། །ཉོན་མོངས་ཚོགས་བཅོམ་སྟོང་ཕྲག་འཁོར་དང་བཅས། །གངས་ཅན་རི་ཡི་རྒྱལ་པོར་མི་ཕྱེད་པ། །ཁྱེད་ཀྱིས་བདག་སོགས་འགྲོ་རྣམས་སྐྱེ་བ་རུ། །བྱང་ཆུབ་ཕྱོགས་ཀྱི་ཆོས་རྣམས་བསྐྱེད་བྱིན་རློབས། །ཞེས་སྒྱིད་ཐང་ནོར་བུས་གནས་བཅུ་ལྷ་མགྲོན་དང་བཅས་ཞལ་ཐང་གྲ་ཚར་བཅུ་བདུན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཉི་མའི་གཉེན་གྱི་ལྗགས་ཡངས་འོ་མའི་མཚོར། །བདེ་གཤེགས་བདུན་གྱི་སྨོན་ལམ་ངང་མོ་དཀར། །མཐའ་ཡས་ཡོན་ཏན་སྙན་པོ་མགྲིན་པའི་རྔ། །ཡོངས་སྒྲོག་སླུ་མེད་བདེན་གཏམ་གང་གིས་འགོག །ཆེར་སྙིགས་ལྔ་བདོའི་ཕུང་པོ་ལས་ཉོན་སྦྲུལ། །སྡུག་བསྔལ་དུག་ལྕེའི་རླངས་ཀྱིས་བདེ་སྐྱིད་སྲོག །རབ་འཕྲོག་གཉེན་པོའི་སྨན་མཆོག་འདྲེན་པ་མཆེད། །བདུན་གྱི་བྱིན་རླབས་ཆིག་ཐུབ་ཕ་ལམ་བཞིན། །ཁྲི་སྲོང་རྗེ་འབངས་ཐུག་བརྒྱུད་ལ་གོས་སྒྲིབ། །འབྲས་བཅས་གླང་གདོང་མཆེ་བ་ཉེར་ཕྱུང་ནས། །ངེས་ལེགས་ལམ་སྣར་རྣམ་དཔྱོད་མདོངས་མཐའ་ལ། །ཞོན་པའི་མཁན་ཆེན་ཞི་འཚོ་མེ་སྐྱེས་ལྷ། །བརྒྱད་བརྒྱའི་མདོ་སྙིང་ཆོ་ག་སྦྱིན་པའི་སྒོ། །གངས་ཅན་ཆོས་དཀར་ཆེད་བསྐྲུན་སིམ་ཚོར་གྱི། །རིན་ཅེན་འབྲུ་སོགས་མཁོ་དགུའི་ལོངས་སྤྱོད་ཆར། །གསེར་མདོག་རྒྱལ་པོའི་རྗེས་སུ་རྐང་པ་འཇོག །སྨན་ཡོན་ཟླ་བཞིན་ལང་ཚོས་ཕྲོགས་པའི་ཡིད། །བསོད་ནམས་ལུས་ཕྲར་ཉེར་འཁྱུད་རྩེ་འཇོ་ཡིས། །དགེ་འབྲས་ཁྱིའུ་སྲིད་ཞིའི་ཁང་བཟང་དུ། །བཙའ་བའི་དགའ་སྟོན་ཆོ་གར་གཅིག་ཏུ་(༢༩༩བ) ― GLG021_Page_0600 ―
[མ་དཔེ་གཟིགས་ན་འདིར་གནོན།]
བྲེལ། །བདེ་གཤེགས་བརྒྱད་ཀྱི་ལྷ་ཚོགས་ང་གཉིས་གྲངས། །གསེར་བཟང་ལས་གྲུབ་རྒྱལ་ཕུར་རབ་བརྟན་གྱིས། །གླང་ཆེན་འགྱིང་འདྲ་རི་བོའི་སྡེ་ཆེན་པོར། །པད་རྩ་ལྟར་དཀར་ལྷག་བསམ་གྱིས་ཕུལ་མཐུས། །བསོད་ནམས་དར་རྒྱས་རིགས་བརྒྱུད་དང་བཅས་པའི། །ཐོག་མེད་ནས་བསགས་སྡིག་པའི་དྲི་མ་ཀུན། །རྣམ་འདྲེན་བྱིན་རླབས་མཐོ་རིས་ཆུ་བོ་ཡིས། །བཀྲུས་རྒྱུན་བྱང་ཆེན་ཟླ་འཕེལ་ནང་འབབ་ཤོག །འཇམ་དབྱངས་གཞོན་ནུ་དགའ་བའི་བཤེས་གཉེན་མཆོག །བསྐལ་བརྒྱར་རབ་བརྟན་དམིགས་ཡུལ་ཡིད་ཅན་ཚོགས། །ཡང་སྲིད་ཀུན་ཏུ་རྗེས་བཟུང་འཁོར་འདས་ཀྱི། །བདེ་ལེགས་དཔལ་ལ་རྟག་ཏུ་སྤྱོད་བྱིན་རློབས། མདོར་ན་མདོ་ཆོག་སྨོན་ལམ་དོན་ཇི་བཞིན། །རྒྱུ་སྦྱོར་ལས་བྱེད་རྣམས་ཀྱིས་འགྲུབ་པ་ལྟར། །འགྲོ་བ་ཀུན་ཀྱང་མཉམ་པོར་ལོངས་སྤྱོད་པར། །ཡོངས་བསྔོས་འབྲས་བུ་ནམ་ཡང་འཛད་མེད་ཤོག །ཅེས་རི་བོ་བདེ་ཆེན་དུ་སྐུ་བརྙན་རྣམས་འབུལ་སྐབས་འཛུགས་རྒྱུའི་སྨོན་ལམ་ཚིག་དོན་འདི་བཞིན་དགོས་ཞེས་འབྲོང་རྩེ་བ་རྒྱལ་ཕུར་རབ་བརྟན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྤྱི་གཙུག་པདྨ་ཉི་ཟླའི་གདན་སྟེང་དུ། །རྩ་བའི་བླ་མ་ཚེ་དཔག་མེད་མགོན་ངོར། །གསོལ་བ་བཏབ་པས་དུས་མིན་འཆི་བདག་གི །འཇིགས་པ་ཀུན་ལས་རྣམ་པར་རྒྱལ་བར་ཤོག །མགོན་པོ་ཁྱོད་ཀྱི་ཐུགས་ཀར་སེམས་ཉིད་ནི། །རླུང་གི་བཞོན་པ་ལ་བརྟེན་འགྲོ་འོང་གིས། །ཐུགས་རྗེ་བསྐུལ་བས་བྱིན་རླབས་ཉེར་བཞུགས་ཏེ། །དབྱེར་མེད་དག་པའི་རང་ཞལ་མཐོང་བར་ཤོག །མདོར་ན་དེང་ནས་སངས་རྒྱས་མ་ཐོབ་བར། །འོད་(༣༠༠ན) ― GLG021_Page_0601 ―
[མ་དཔེ་གཟིགས་ན་འདིར་གནོན།]
དཔག་མེད་མགོན་སྲས་ཀྱི་ཐུ་བོ་གཉིས། །འཁོར་ཚོགས་རྒྱ་མཚོས་རྟག་ཏུ་རྗེས་བཟུང་ནས། །བཞེད་འབྲས་མ་ལུས་ལྷུན་གྱིས་འགྲུབ་པར་ཤོག །ཅེས་འདི་ཕྱིར་དགེ་བའི་ཁ་ཏོན་དུ་དབོན་ཆུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །བླ་མ་སྤྱན་རས་གཟིགས་དབང་བྱིན་རླབས་ཀྱིས། །ཚེ་འདིའི་བདེ་སྐྱིད་དཔལ་འབྱོར་ཕུན་ཚོགས་ཤིང༌། །རིགས་དྲུག་འཁོར་བའི་སྡུག་བསྔལ་ལས་བསྐྱབས་ནས། །དག་པའི་ཞིང་དུ་འདྲེན་པར་བྱིན་གྱིས་རློབས། །ཞེས་པ་འདིའང་བསྟན་འཛིན་ཐོ་ཡོན་གྱི་བུ་ཚ་བརྒྱུད་དང་བཅས་པས་ཁ་ཏོན་དུ་བྱས་ཆོག་པའི་ཉུང་ངུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །ངག་གི་དབང་ཕྱུག་བློ་བཟང་རྒྱ་མཚོའི་སྡེར། །མི་ཕྱེད་དད་པ་བརྟན་པོས་གསོལ་འདེབས་ན། །བདག་གི་འདི་ཕྱི་བར་དོར་བསམས་པའི་དོན། །སྨོན་ལམ་ཅི་བཏབ་ལྷུན་གྱིས་འགྲུབ་པར་ཤོག །ཅེས་པའང་རྒྱལ་མོ་རྡོ་རྗེ་རབ་བརྟན་གྱི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་བཀོད། །སྤྱན་རས་གཟིགས་དང་རྒྱལ་བུ་འཇིག་རྟེན་དབང༌། །ལྷ་ཡི་རྒྱལ་པོ་གཉའ་ཁྲི་བཙན་པོ་རྗེ། །ཐོ་ཐོ་རི་དང་ཆོས་རྒྱལ་དད་པ་བརྟན། །དཀོན་ཅོག་འབངས་གྱུར་སྲོང་བཙན་ལྷའི་མེ་ཏོག །ཁྲི་རལ་དགེ་བ་དཔལ་དང་དགོན་པ་བ། །འབྲོམ་རྗེ་ས་ཆེན་གཡུ་བྲག་མངའ་བདག་མྱང༌། །དགེ་འབུམ་པདྨ་བཛྲ་དགེ་འདུན་གྲུབ། །བཞད་པའི་རྡོ་རྗེ་བསོད་ནམས་རྒྱ་མཚོའི་སྡེ། །བདེ་ཆེན་ཆོས་རྒྱལ་སོགས་དང་ལས་སྨོན་གྱིས། །འབྲེལ་བའི་རྣམ་དཀར་བག་ཆགས་ཡོངས་སད་པར། །ཀུན་(༣༠༠བ) ― GLG021_Page_0602 ―
[མ་དཔེ་གཟིགས་ན་འདིར་གནོན།]
འདུས་ངག་དབང་བློ་བཟང་རྒྱ་མཚོའི་སྡེར། །ཡིད་ཆེས་གདུང་ཤུགས་དྲག་པོས་གསོལ་བ་འདེབས། །གདན་གསུམ་ཚང་བའི་དཀྱིལ་འཁོར་ལྷ་ཚོགས་ཀུན། །མགོན་ཁྱོད་རྡོ་རྗེ་ལུས་ཀྱི་ཕོ་བྲང་ཆེར། །ཉོན་མོངས་ལྔ་དག་ཡེ་ཤེས་ཆེན་པོའི་གདངས། །འགག་མེད་གསལ་བར་ཤར་ལ་གསོལ་བ་འདེབས། །ཕུང་ཁམས་སྐྱེ་མཆེད་གཞལ་ཡས་ཁང་གཅིག་ཏུ། །རྫོགས་པའི་སྙིང་ཤུན་པདྨ་སྙིང་གི་ཚིལ། །ཟླ་སྟེང་སེམས་ཉིད་ངལ་གསོ་དྲང་སྲོང་སྐུ། །ཚངས་སྤྱོད་ཆ་ལུགས་འཛིན་ལ་གསོལ་བ་འདེབས། །ལོག་འདྲེན་དགྲ་བགེགས་སྡེར་བཅས་གཉེན་པོ་རུ། །འཇམ་དཔལ་རྡོ་རྗེ་རབ་ཁྲོས་དུས་དགྲའི་དབང༌། །སྒེག་པ་དཔའ་བ་མི་སྡུག་སྐུ་ཡི་འཕྲུལ། །སྣང་སྟོང་ཟློས་གར་བསྒྱུར་ལ་གསོལ་བ་འདེབས། །རྒྱལ་བསེན་དམ་སྲིའི་དོན་སྙིང་ཕྱིར་འདོན་པར། །ལག་ན་པདྨ་དབང་ཆེན་ཁྲོ་བོའི་རྒྱལ། །རྒོད་དང་དྲག་ཤུལ་འཇིགས་རུང་གསུང་གི་གདངས། །གྲག་སྟོང་དབྱངས་སུ་ལེན་ལ་གསོལ་བ་འདེབས། །གཟའ་ཀླུ་སྡེ་བརྒྱད་ཀུན་གྱི་གཤེད་མ་རུ། །གསང་བའི་མཛོད་འཛིན་དྲེགས་ཚོགས་ཀུན་འདུལ་སྐུ། །སྙིང་རྗེ་རྔམ་པ་ཞི་བ་ཐུགས་ཀྱི་དབྱིངས། །རིག་སྟོང་ཀུན་ཁྱབ་ངོ་བོར་གསོལ་བ་འདེབས། །གཡེལ་མེད་རྩེ་གཅིག་གསོལ་བ་བཏབ་པའི་མཐུས། །བདག་སོགས་གདུལ་བྱའི་བསོད་ནམས་དཔལ་མགོན་དུ། །ནམ་ཡང་འཕོ་འགྱུར་མེད་པར་རྟག་བཞུགས་ནས། །ཟབ་རྒྱས་ཆོས་ཀྱི་འཁོར་ལོ་བསྐོར་བར་ཤོག །སངས་རྒྱས་ཀུན་གྱི་བློ་གྲོས་གཅིག་བསྡུས་མཐུས། །བདུད་ལས་རྒྱལ་བའི་འཇམ་དཔལ་གཤིན་རྗེ་ཡི། །རྣལ་འབྱོར་ལྷུར་ལེན་བྱང་ཆུབ་མ་ཐོབ་བར། །འབྲལ་མེད་བརྩེ་བས་རྗེས་སུ་འཛིན་པར་ཤོག(༣༠༡ན) ― GLG021_Page_0603 ―
[མ་དཔེ་གཟིགས་ན་འདིར་གནོན།]
།གནས་སྐབས་ཚེ་རིང་ནད་མེད་དབང་ཐང་རྒྱས། །ལུང་དང་རྟོགས་པའི་ཡོན་ཏན་རབ་འཕེལ་ནས། །རིང་པོར་མི་ཐོགས་འཇམ་མགོན་ཀུན་ཏུ་བཟང༌། །མངོན་གྱུར་ལུས་ཅན་མ་ལུས་འདྲེན་པར་ཤོག །ཅེས་དགེ་སློང་བློ་གྲོས་རྒྱལ་བས་འགྲོ་ལ་རྗེས་བརྩེ་མའི་བྲིས་ཐང་བཞེངས་པའི་རྒྱབ་ཡིག་སྨོན་ལམ་དང་བཅས་པ་ཁ་དོན་དུ་བྱས་ཆོག་པ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྨུགས་འཛིན་དབང་པོའི་བང་མཛོད་ལ་འགྲན་པ། །རྒྱ་བོད་ཕུན་ཚོགས་འདོད་དགུ་འབྱུང་བའི་སྒོ། །དགེ་བཅུའི་ཡོན་ཏན་ཚང་བ་དར་རྩེ་མདོའི། །དགའ་ལྡན་གཞན་ཕན་གླིང་གི་གནྡྷོ་ལར། །སློབ་དཔོན་ངག་དབང་འཇམ་དབྱངས་ལྷག་བསམ་གྱིས། །ཁུར་བླངས་ཤིང་རྩི་རི་མོ་བསྐྲུན་པ་ལ། །མདོ་ཡི་རྫོང་སྡོད་བློ་ང་སྦྲེལ་པོ་ཡིས། །དགེ་བསྐུལ་ཁ་འདེབས་དང་བཅས་ལེགས་བསྒྲུབས་མཐུས། །ཆེད་དུ་ལུས་ངག་ཡིད་གསུམ་འབད་རྩོལ་དང༌། །དངོས་པོའི་མཐུན་རྐྱེན་སྤེལ་བར་བྱེད་པ་ཀུན། །ནད་གདོན་དུས་མིན་འཆི་དང་དབུལ་ཕོངས་སོགས། །སྲིད་པའི་ཟུག་རྔུ་ཐམས་ཅད་ཞི་བར་ཤོག །ལེགས་བྲིས་ལྟ་བུར་རིང་པོར་འཚོ་བའི་ཚེ། །གནོད་སྦྱིན་བཞིན་དུ་འཛད་མེད་ལོངས་སྤྱོད་སོགས། །མཐོ་རིས་བདེ་སྐྱིད་ཡོན་ཏན་མཐའ་དག་ལ། །འདི་དང་སྐྱེ་བ་ཀུན་ཏུ་སྤྱོད་པར་ཤོག །འཁོར་བ་སྡུག་བསྔལ་ཆུ་སྲིན་འབྱུང་གནས་ལས། བསོད་ནམས་རྫིངས་ཀྱིས་བསྒྲལ་ཏེ་ཐར་པའི་གླིང༌། །བགྲོད་ནས་གཏན་གྱི་མདུན་མ་རིན་པོ་ཆེ། །སྤེལ་ལེགས་ཕྲེང་བ་རྒྱན་དུ་འཆང་བར་ཤོག །སེམས་ཅན་ཀུན་(༣༠༡བ) ― GLG021_Page_0604 ―
[མ་དཔེ་གཟིགས་ན་འདིར་གནོན།]
དོན་སྟོབ་བཅུ་མངའ་བ་ཡི། །གོ་འཕང་མངོན་དུ་བྱས་ནས་སྐྱེ་རྒུ་རྣམས། །རྫོགས་པའི་སངས་རྒྱས་ཐོབ་ཕྱིར་འདིས་མཚོན་པས། །དུས་གསུམ་བསགས་དང་གསོག་འགྱུར་དགེ་བ་བསྔོ། །སླུ་མེད་དཀོན་ཅོག་རིན་ཅེན་བདེན་པ་དང༌། །ལྷ་དང་དྲང་སྲོང་རིག་འཛིན་གྲུབ་པའི་མཐུས། །ཡངས་པའི་འཇིག་རྟེན་ཀུན་ཏུ་བཀྲ་ཤིས་འཆར། །ཕབ་ནས་བདེ་སྐྱིད་སྙེ་མ་གཡུར་ཟ་ཤོག །ཅེས་པ་འདིའང་མདོ་དགའ་ལྡན་གཞན་ཕན་གླིང་གི་མཆོད་ཁང་དང་འདུ་ཁང་གི་ཤིང་རྩིའི་ཁུར་བླས་ཏེ་གླ་ལྟོ་དང་སྤང་མ་སྲང་ཞེ་གཅིག །མཐིང་སྲང་གོ་བདུན། དེ་ཕྱིན་རྫོང་སྡོད་བློ་བཟང་དབང་ཕྱུག་དང༌། ང་ཕོད་པ་གཉིས་དགེ་བསྐུལ་བྱས་པར་བརྟེན་ལྔ་མཆོད་སྤྱི་སོས་ཤ་ཕིན་དང་འབོ་ཇ་འཁོར་དྲུག་རེ། སྤུ་ཁ། དྲིལ་སྔོ་ལྗང༌། སྨན་ཁ་གསུམ། ཁ་བཏགས། དགེ་སློང་ཤེས་རབ་ཀྱིས་མཐིང་སྲང་ཕྱེད་ཉེར་གཉིས། དབུ་མཛད་བློ་བཟང་ཡར་འཕེལ་གྱིས་གསེར་ཤོག་བརྒྱ་བམ། ལྕགས་ལ་དཔོན་མཆེད་ཀྱིས་ཆུང་ཇུ་ཤ་ཕིན་འཁོར་དྲུག་རེ། དར་ཡུག་བཅད། ཁ་བཏགས་ལྔ། ཆུ་འགྲམ་དཔོན་ཆུང་གིས་གསེར་ཤོག་བརྒྱ་བམ་གཉིས། བན་གཟན། སྨན་ཁ། དབོན་ཨ་ཆོས་ཀྱིས་མཚལ་སྲང་གསུམ། རས་ཁ་བདུན། ཁྲོམ་གཉའ་པ་དཔོན་ཚེ་དབང་ལྷུན་གྲུབ་ཀྱིས་དངུལ་ཞོ་གང་སྐར་གསུམ། སྨན་ཁ། ཀོང་སྐེད། སྤུ་ཁ། ཏྲེ་བོ་དཔོན་གྱིས་མཚལ་ཞོ་བཅོ་ལྔ། གསེར་ཤོག་བརྒྱ་བམ་གཉིས། གོས་སྔོན་ཁ་བཅུ། ས་ཡང་ཡ་རུའི་གསེར་ཞོ་དོ། སྤོས་དཀར་དང་མཚལ་དཀར་ཆ་ཕྱེད་དོ་རེ། ས་དཀར་མགོ་ཐབ་ཆེན་ནས། མཐིང་སྲང་གསུམ། རམས་སྲང་བཞི་ཞོ་གསུམ། བླ་མ་ཡེ་ཤེས་བསྟན་འཕེལ་གྱིས་དངུལ་(༣༠༢ན) ― GLG021_Page_0605 ―
[མ་དཔེ་གཟིགས་ན་འདིར་གནོན།]
སྲང་དོ། ཡ་རུ་གུ་རུས་སྲང་དོ། འབྲུག་དར་གྱིས་སྲང་དྲུག།དཀོན་ཤུ་རུས་སྲང་དྲུག །མཆོད་རྟེན་སྐྱབས། ཚེ་རིང་དར་རྒྱས། བཀྲ་ཤིས་ཕྲག །རྒྱ་བཀྲ་ཤིས་བཞིས་སྲང་དོ་རེ། དགེ་འདུན་སྐྱབས་ཀྱིས་སྲང་གང་ཞོ་ལྔ། སེའུ་བཀྲ་ཤིས་ཀྱིས་སྲང་གསུམ། ཇོ་འབུམ་གྱིས་སྲང་གང༌། གཞུང་ར་བ་ནང་ཨ་ཤི་སྐྱབས་ཀྱིས་སྲང་གང་ཞོ་དོ། གཡུང་དྲུང་དགེས་སྲང་གང་ཞོ་བརྒྱད། རྒྱལ་མཚན་གྱིས་ཞོ་གང་སྐར་བདུན། ཨ་འདབ་ཀྱིས་སྲང་གང་ཞོ་ལྔ། ཨ་དགེས་སྲང་གང་ཞོ་བདུན་སྐར་ལྔ། ཤེས་རབ་ཐར་གྱིས་ཞོ་བདུན། གནམ་འཕེལ་ཨ་མ་ཆོས་ཞོ་དགུ་སྐར་ལྔ། ལྕགས་ལ་ར་བ་ནང་དུད་བརྒྱད་ཀྱིས་སྲང་དོ། ཁ་བཏགས། རྒྱ་ཧོར་གྱིས་ཞོ་གང་སྐར་དྲུག །རྣམ་རྒྱལ། དགེ་འདུན། ཨ་སྤོ་བ། ཨ་མདོ། བནྡེ་རྒྱལ་ལྔས་ཞོ་གང་སྐར་བཞི་རེ། གསང་མཁར་གྱིས་ཞོ་གང༌། ལྷུ་བར་གྱིས་ཞོ་གང་སྐར་དྲུག །ས་བདག་ཆོས་སྐྱབས་ཀྱིས་ཞོ་བརྒྱད་སྐར་ལྔ། ཚེ་རིང་སྐྱབས་དང་རྣམ་རྒྱལ་ཐར་གྱིས་ཞོ་རེ། སྒྲོན་མ་གཟུངས་ཀྱིས་ཞོ་གསུམ། བར་ལམ་ར་བ་ནང་དུད་བཅུ་བཞིས་ཞོ་དགུ་སྐར་དོ། ཁ་རྟག་གིས་ཞོ་གང་སྐར་གསུམ། ཀི་ཤི་བན་ཀོ་དང་ཚེ་དབང་བསོད་ནམས། ཚེ་རིང་ཐར་བཅས་ཀྱིས་ཞོ་གང་སྐར་གསུམ་རེ། ཡ་རུ་གཟུངས་དར་གྱིས་མཚལ་སྲང་ཉི་ཤུ། མཐིང་དང་ལི་ཁྲི་སྲང་བཅུ་རེ། སྤང་མ་སྲང་ཉེར་དྲུག །བར་ལམ་ཐབ་ཆེན་གྱིས་དངུལ་ཞོ་བཞི། མཚལ་སྲང་དོ་སྐར་ལྔ། མཐིང་སྲང་གང་ཞོ་དགུ། དུད་ཆུང་ཤེས་རབ་སྐྱབས་ཀྱིས་མཚལ་ཞོ་དགུ། ཨ་མ་སྡེ་ལྔས་མཚལ་སྲང་གསུམ་ཞོ་བཞི། གསེར་ཤོག་བརྒྱ་བམ། ལུག་དོར་(༣༠༢བ) ― GLG021_Page_0606 ―
[མ་དཔེ་གཟིགས་ན་འདིར་གནོན།]
ཤཱཀྱས་སྤང་མ་སྲང་གང་ཞོ་དོ། གསེར་ཤོག་བརྒྱ་བམ། ཁ་བཏགས། ཚེ་གཟུངས་སྒྲོན་གྱིས་མཚལ་སྲང་གང་ཞོ་གང༌། བར་ལམ་ཨ་སྲས་ཀྱིས་སྤང་མ་སྲང་བཅུ་གཅིག །གཞུང་ར་བ་ནང་སྤྱི་པས་མཚལ་སྲང་གང་ཞོ་ལྔ། སྤུ་ཁ། རྒྱ་རས་ཁ་གསུམ། ལ་བ་འདོམ་བཅུ་དྲུག །སྔགས་པ་ཐར་གྱིས་ལྡོང་རོས་སྲང་གསུམ་ཞོ་དོ། སྤང་མཐིལ་ཞོ་བརྒྱད། ཆུ་འགྲམ་རྩ་ར་རྒྱལ་གྱིས་མཐིང་སྲང་ལྔ་ཞོ་གསུམ། རྣམ་རྒྱལ་གྱིས་མཚལ་སྲང་གང་ཞོ་བཞི། ཆང་ཤུག་གིས་སྤང་མ་སྲང་ཕྱེད་བཞི། སྤྲུལ་སྐུ་ཤེས་རབ་རྒྱལ་མཚན་གྱིས་རམས་ཞོ་ལྔ། དཀར་དྲེག་སྲང་ལྔ། ཡ་རུ་རྒྱལ་གྱིས་གསེར་ཞོ་གང་སྐར་ལྔ། ཆུ་འགྲམ་ཡ་རུ་ཚེ་དབང་ནོར་བུས་སྐར་བརྒྱད། རྒྱ་དུང་ཨ་ཀ་བཀྲ་ཤིས་ཀྱིས་ཞོ་དོ། གོན་ཇ་ཨ་འབུམ་དང་འགི་བ་གཉིས་ཀྱིས་ཞོ་གང་སྐར་བཞི། རྣམ་རྒྱལ་ཚེ་རིང་གིས་གསེར་ཤོག་བརྒྱ་བམ་བཞི། རྒྱ་དུང་ཨ་མས་གསེར་ཤོག་བརྒྱ་བམ་རྣམས་ཕུལ་བའི་དགེ་བ་རྫོགས་བྱང་དུ་བསྔོ་བའི་ཚིགས་བཅད་དགོས་ཞེས་བླ་མ་ངག་དབང་འཇམ་དབྱངས་ཀྱིས་བསྐུལ་བ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །མཆོག་གསུམ་ཐུགས་རྗེ་བྱིན་རླབས་བདེན་པའི་མཐུས། །འཇམ་དབྱངས་དགའ་བའི་ངག་དབང་བློ་ཡི་གཏེར། །མཁས་བཙུན་བཟང་པོའི་གར་བསྒྱུར་ཞབས་པད་ཟུང༌། །རྒྱ་མཚོའི་གོས་ཅན་ཞིང་འདིར་རྟག་བརྟན་ཤོག །སྨྲ་བ་ངག་གི་དབང་པོར་བློ་གྲོས་ཀྱིས། །བག་ཆགས་བཟང་པོའི་དཔལ་ལ་མངའ་འབྱོར་བ༌། །མི་ཤིགས་སྲོག་གི་ཟུངས་སུ་རྒྱལ་ཀུན་གྱིས། །ཐུགས་རྗེའི་བདུད་རྩིས་རྩ་(༣༠༣ན) ― GLG021_Page_0607 ―
[མ་དཔེ་གཟིགས་ན་འདིར་གནོན།]
བ་ཚུགས་པར་ཤོག །ལྷོ་རྒྱུད་ནོར་འཛིན་ཡངས་པའི་ལྟོ་བ་རུ། །དགའ་ལྡན་བཤད་སྒྲུབ་བསྟན་པ་རབ་རྒྱས་སྡེ། །ཁྲིམས་ལྡན་འདུས་གླིང་ལུས་ཅན་བསོད་ནམས་ཀྱི། །ཞིང་མཆོག་དམ་པར་བླ་ནས་བླར་འཕེལ་ཤོག །གྲུ་ཆར་ལེགས་འབབ་ལོ་ཏོག་འབྲས་བུ་སྨིན། །མཐའ་བཞི་ལས་སྒོའི་འདོད་པ་མ་ལུས་འཇོ། །ནད་འཁྲུགས་མུ་གེ་དུས་ཀྱི་ཆད་ལས་ཞི། །བདེ་སྐྱིད་ལྷ་ཡི་སྤུན་ཟླར་འགྲན་ནུས་ཤོག །ཆོས་ཉིད་འགྱུར་མེད་དངས་པའི་རྫིང་ཡངས་པོར། །རྒྱུ་འབྲས་རྟེན་འབྲེལ་མི་བསླུ་ལེགས་འགྲིག་གཟུགས། །ཡོངས་ཤར་སྨོན་ལམ་འདྲེན་བྱེད་གཟིགས་མོ་རུ། །ཚར་དུ་དངར་བའི་དགའ་སྟོན་རྒྱས་པར་ཤོག །ཅེས་མཚོ་སྣ་དགའ་ལྡན་རབ་བརྒྱས་གླིང་སྤྱི་སོས་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཚེ་དཔག་མེད་སོགས་མཆོག་གསུམ་ཐུགས་རྗེ་དང༌། །ལྷ་དང་དྲང་སྲོང་རིག་འཛིན་བདེན་པའི་མཐུ། །རྟེན་འབྲེལ་རྒྱུ་འབྲས་བསླུ་བ་མེད་པ་ཡིས། །ཅི་བཏབ་སྨོན་ལམ་ལྷུན་གྱིས་གྲུབ་པར་ཤོག །རྒྱལ་ཀུན་ཡབ་ཅིག་འཇམ་དབྱངས་དགའ་བའི་བཤེས། །མ་འདྲིས་འགྲོ་བའི་གཉེན་གྱུར་ངག་གི་དབང༌། །བློ་བཟང་གྲགས་སྙན་བསྟན་པ་རྒྱ་མཚོའི་གོས། །ཁྱབ་འཛད་བསྐལ་བརྒྱར་ཞབས་པད་བརྟན་པར་ཤོག །མ་རིག་གཉིད་སངས་རྣམ་དཔྱོད་རབ་བརྒྱས་པས། །རྒྱ་ཆེན་གཙུག་ལག་མཚོ་ལྟར་གཏིང་ཟབ་པར། །མཁྱེན་དཔྱོད་ཡངས་པའི་ལྷས་སྐྱོང་ལྷ་སྲས་ཀྱི། །རྣམ་འཕྲུལ་གཡུང་དྲུང་ལྟ་བུར་རྟག་བརྟན་(༣༠༣བ) ཐུགས་རྗེ་ཆེན་པོའི་དམར་ཁྲིད་ཀྱི་ཉམས་ལེན་སྙིང་པོ་བསྡུས་པ་སོགས།― GLG021_Page_0608 ―
[མ་དཔེ་གཟིགས་ན་འདིར་གནོན།]
ཐུགས་རྗེ་ཆེན་པོའི་དམར་ཁྲིད་ཀྱི་ཉམས་ལེན་སྙིང་པོ་བསྡུས་པ་སོགས། འཁོར་བའི་རྒྱ་མཚོ་ཆེ་ལས་ཉེར་སྒྲོལ་བའི། །སྙིང་ནས་སྐྱབས་འགྲོའི་གྲུ་གཟིངས་བཟོ་བ་དང༌། །བྱང་ཆེན་ཁང་པར་བགྲོད་པའི་སེམས་བསྐྱེད་ཀྱིས། །རིན་ཅེན་ཐེམ་སྐས་འཛུགས་པར་བྱིན་གྱིས་རློབས། །ཐོག་མེད་བསགས་པའི་སྡིག་ལྟུང་ཚན་པོ་ཆེ། །(༣༠༤ན) ― GLG021_Page_0609 ―
[མ་དཔེ་གཟིགས་ན་འདིར་གནོན།]
ཁྱབ་བདག་རྡོ་རྗེ་སེམས་དཔའི་རྣལ་འབྱོར་དང༌། །ཡི་གེ་བརྒྱ་པའི་གཟུངས་ཆུས་རབ་བཀྲུས་ནས། །རྡུལ་བྲལ་སྟོན་ཟླ་ལྟ་བུར་འགྱུར་བར་ཤོག །བླ་མ་སྤྱན་རས་གཟིགས་ལ་སྐྱབས་གནས་ཀུན། །འདུས་པར་རྩེ་གཅིག་གསོལ་བཏབ་རྣལ་འབྱོར་གྱིས། །ཐུགས་རྗེ་མ་ལུས་སྙིང་ལ་ལེགས་བཞུགས་ནས། །ལམ་མཆོག་རྒྱུད་ལ་འབྱོངས་པར་བྱིན་གྱིས་རློབས། །ཕུན་ཚོགས་ཡོན་ཏན་མཐའ་དག་ཀུན་ཚང་བའི། །མཎྡྲལ་དངོས་བཤམས་ཡིད་སྤྲུལ་ལེགས་ཕུལ་བས། །བསོད་ནམས་ཚོགས་ཆེན་མ་ལུས་ཡོངས་རྫོགས་ནས། །དག་པའི་ཞིང་མཆོག་འགྲུབ་པར་བྱིན་གྱིས་རློབས། །རང་སྙིང་སྟོང་པར་བསྒོམས་པ་ཡེ་ཤེས་ཚོགས། །བསགས་པའི་ངང་ནས་ཐུགས་རྗེ་ཆེན་པོའི་སྐུ། །ཕྲ་རགས་ལྷ་ཡི་ང་རྒྱལ་བརྟན་པོ་ལ། །གནས་པའི་གཡོ་མེད་ཏིང་འཛིན་འགྲུབ་པར་ཤོག །སྣོད་རྣམས་ཐམས་ཅད་རབ་འབྱམས་དག་པའི་ཞིང༌། །བཅུད་ཀྱི་སེམས་ཅན་ཕྱག་ན་པད་དཀར་སྐུར། །གྲག་སྟོང་རང་སྒྲ་ཡི་གེ་དྲུག་པའི་གདངས། །འགག་མེད་སྒྲ་ཡིས་འཇིག་རྟེན་ཀུན་ཁྱབ་ཤོག །བསྒོམ་བྱ་སྒོམ་བྱེད་ཐམས་ཅད་རང་བཞིན་གྱི། །གདོད་ནས་སྟོང་པ་སྐྱེ་འགག་གནས་གསུམ་དང༌། །ཡོངས་བྲལ་བདེ་སྟོང་ཡེ་ཤེས་འཕགས་པའི་ཐུགས། །མངོན་སུམ་རྒྱུད་ལ་ཉམས་སུ་མྱོང་བར་ཤོག །ཚེ་འདིར་མ་གྲོལ་འདའ་ཁའི་ཉམས་ལེན་དང༌། །འཕོ་བར་མ་ནུས་བར་དོ་ལེགས་སྦྱང་ནས། །ཆོས་འདི་ཉམས་སུ་ལེན་པའི་དལ་འབྱོར་གྱིས། །རྟེན་བཟང་རྣམ་དག་སྐྱེ་སྲིད་འཛིན་པར་ཤོག །ཐ་མལ་ལུས་ངག་ཡིད་ཀྱི་སྤྱོད་པ་ཀུན། །ཆུ་(༣༠༤བ) ― GLG021_Page_0610 ―
[མ་དཔེ་གཟིགས་ན་འདིར་གནོན།]
བོ་རྒྱུན་གྱི་རྣལ་འབྱོར་ལ་བརྟེན་ནས། །ཅི་བྱས་ཆོས་སུ་འགྲོ་བའི་མན་ངག་གིས། །འདི་ཕྱི་བར་དོའི་གཏན་མདུན་འགྲུབ་པར་ཤོག །ཅེས་ཐུགས་རྗེ་ཆེན་པོའི་དམར་ཁྲིད་ཀྱི་ཉམས་ལེན་སྙིང་པོ་བསྡུས་པ་འདི་ནིབསྟན་པ་དགེ་སློང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པའོ། །སྭསྟི་པྲ་ཛཱ་བྷྱ༔ བསྐལ་བཟང་སྒྲོན་མེ་བཞི་པའི་བསྟན་པ་མཆོག །གདོང་དམར་ཁ་བའི་ལྗོངས་སུ་ཡོངས་འཕེལ་ནས། །ཕྱི་དར་གསལ་བྱེད་གྲུ་མེར་ཕྱེད་བརྒྱད་ཀྱི། །ཕྱག་རྗེས་སོལ་ནག་ཐང་ཆེན་གནྡྷོ་ལ། །སྣང་བ་མཐའ་ཡས་མགོན་པོ་ཨ་ཏི་ཤ །གསང་བདག་ཁུ་སྟོན་བརྩོན་འགྲུས་གཡུང་དྲུང་སོགས། །མཁས་དང་གྲུབ་པའི་སྐྱེས་ཆེན་མཐའ་ཀླས་པས། །བྱིན་རླབས་ཐུགས་རྗེའི་སྤྲིན་ཕུང་ཅིག་ཅར་གཏིབས། །གཙུག་ལག་སྡེ་བཅས་སྐྱོང་བ་ཡོན་ཏན་རྒྱལ། །བཀའ་ཡི་བློན་པོ་བཤན་པ་ལག་དམར་གྱི། །གསུང་བཞིན་རྟེན་དང་བརྟེན་པའི་ཞིག་གསོས་སུ། །གསར་བསྐྲུན་མིག་གི་བདུད་རྩི་བླ་ན་མེད། །བགྲང་ཡས་ལུས་ཅན་བསོད་ནམས་སྤེལ་བའི་སླད། །རྒྱལ་སྲས་སློབ་མར་བཅས་པའི་སྣང་བརྙན་དྲུང༌། །གནས་སྲུང་ཆེན་པོས་བརྒྱ་ཕྲག་མཆོད་པ་ཡི། །འཛད་མེད་ནམ་མཁའ་མཛོད་ཀྱི་སྒོ་འཕར་ཕྱེ། །འབྲས་བུ་འཇིག་རྟེན་སྤྱི་དང་ཁྱད་པར་དུ། །བོད་དང་བོད་ཆེན་སྐྱེ་རྒུའི་བདེ་སྐྱིད་ཚོགས། །དེ་འཕེལ་རྩ་ལག་ཤཱཀྱ་སེང་གེའི་བསྟན། །སྲིད་མཐའི་བར་དུ་དར་ཞིང་རྒྱས་པར་ཤོག །གསུང་ངག་ཆད་མེད་དབང་གི་ཆུ་བོ་བཞི། །བློ་གསལ་སྐལ་བཟང་རྒྱ་མཚོར་ལེགས་འབབ་པ། །འཇམ་དབྱངས་(༣༠༥ན) ― GLG021_Page_0611 ―
[མ་དཔེ་གཟིགས་ན་འདིར་གནོན།]
དགའ་བའི་བཤེས་གཉེན་དཔལ་བཟང་པོ། །ངེས་པ་ལྔ་ལྡན་མགོན་ལྟར་བརྟན་པར་ཤོག །དགའ་ལྡན་རིང་ལུགས་གྱེན་འདེགས་སྲིད་ཀྱི་ཁྲིམས། །གནམ་ཐིག་དྲང་པོར་འདེབས་པའི་ཕོ་བྲང་ཆེ། །ལེགས་སྐྱོང་མི་དབང་སྲས་བརྒྱུད་མངའ་ཐང་རྒྱས། །སྐུ་ཚེ་གཡུང་དྲུང་རང་བཞིན་ལྟར་བརྟན་ཤོག །གཡོ་རུའི་ས་ཕྱོགས་ཀུན་དང་བྱེ་བྲག་ཏུ། །སོལ་ནག་ཐང་ཆེན་ལྷ་མི་སྡེར་བཅས་ཀུན། །རྟག་ཏུ་བདེ་བའི་རོ་བཅུད་མྱོང་བ་ལ། །སྐབས་གསུམ་བདག་པོའི་ངང་ཚུལ་འཛིན་པར་ཤོག །འགྲོ་བ་རྣམས་ཀྱི་ཕྱག་དང་མཆོད་པ་ཡི། །ཡུལ་དུ་གཙུག་ལག་ཁང་བཟང་རབ་བརྟན་ཅིང༌། །སྡེ་འདིར་ཆོས་སྲིད་ལེགས་ཚོགས་མ་ལུས་ཀུན། །ཡར་ངོའི་ཟླ་བ་ལྟ་བུར་འཕེལ་བར་ཤོག །པདྨ་ཀཱ་རའི་སྲོལ་འཛིན་སྔགས་འཆང་སྤྱི། །བྱེ་བྲག་པྲ་ཛྙ་ར་སྨི་དབང་པོའི་སྡེ། །དམ་ཚིག་ཇི་བཞིན་སྤྲུལ་པའི་ཆོས་རྒྱལ་ཆེས། །གཡེལ་བ་མེད་པར་རྟག་ཏུ་གྲོགས་མཛད་ཤོག །མཁའ་ལ་གཟའ་སྐར་བཟང་པོ་འཕྲོད་ཀྱི་དགེ །ས་ལ་ཁྲི་གདུགས་ཉི་མའི་འོད་ཀྱིས་ཁྱབ། །བཀྲ་ཤིས་ཟླ་བ་རྒྱས་པ་ཡར་ངོ་བཞིན། །རྟག་ཏུ་འགྲིབ་པ་མེད་པའི་དགེ་ལེགས་སྩོལ། །ཞེས་དཔལ་སོལ་ནག་ཐང་པོ་ཆེའི་གཙུག་ལག་ཁང་གི་ཕྱི་ནང་གི་ཞིག་གསོས་སྡེ་པ་བློ་བཟང་སྦྱིན་པ་དང་སངས་རྒྱས་རྒྱ་མཚོ་གཉིས་ཀྱིས་བཀོད་པས་ཁྱབ་པའི་དུས་རིགས་ཀྱི་སྲུང་མ་བཤན་པ་ལག་དམར་གྱིས་མཆོད་པ་རྒྱ་ཆེན་པོ་མཛད་པའི་ཚེ་སྨོན་ལམ་ཚིགས་བཅད་འདི་ལྟ་བུ་ཞིག་དགོས་ཞེས་གསུངས་པ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །(༣༠༥བ) ― GLG021_Page_0612 ―
[མ་དཔེ་གཟིགས་ན་འདིར་གནོན།]
ཉ་སྟོང་བརྒྱད་གསུམ་ཡན་ལག་བརྒྱད་པའི་ཁྲིམས། །ལེགས་བསྲུངས་སྙིང་པོ་ཡི་གེ་དྲུག་པ་བཟླས། །ཀུན་ཏུ་བཟང་པོའི་སྨོན་ལམ་བཏབ་པའི་མཐུས། །ཨོད་ཁོན་ངན་འགྲོའི་འཇིགས་ལས་ཐར་བར་ཤོག །ཡང་སྲིད་ཀུན་ཏུ་ལྷ་མིའི་རྟེན་བཟང་ཐོབ། །སངས་རྒྱས་བསྟན་མཇལ་ཆོས་ཀྱི་སྒོ་རུ་ཞུགས། །ཚུལ་བཞིན་ཉམས་སུ་བླངས་བས་འཁོར་བ་ཡི། །མི་བཟད་སྡུག་བསྔལ་ཆེ་ལས་ཐར་བར་ཤོག །འགྲོ་ལ་བརྩེ་བའི་སྙིང་རྗེ་ཆེན་པོ་དང༌། །བདག་གཞན་མཉམ་པར་བརྗེ་བའི་བྱང་ཆུབ་སེམས། །ཆོས་ཀུན་རང་བཞིན་སྟོང་པ་དབུ་མའི་ལམ། །ཟུང་འབྲེལ་ཉམས་བླངས་སངས་རྒྱས་སར་བགྲོད་ཤོག །ཅེས་པ་འདིའང་དད་ལྡན་ཨོད་ཁོན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བླ་མ་ཐུགས་རྗེ་ཆེན་པོ་དབྱེར་མེད་ཀྱིས། །ཚེ་འདིའི་བར་ཆད་ཀུན་ཞི་བསམས་དོན་འགྲུབ། །ཕྱི་མ་བདེ་བ་ཅན་གྱི་ཞིང་ཁམས་སུ། །སྐྱེ་བར་གསོལ་བ་འདེབས་སོ་བྱིན་གྱིས་རློབས། །ཞེས་ཚིག་ཉུང་དོན་རྒྱས་ཞིག་དགོས་ཞེས་དར་ཇི་ཐའི་ཇི་ཁྱོ་ཤུགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །གྲུ་འཛིན་ལ་དགྱེས་ཕྱག་ན་པད་དཀར་འཆང༌། །རྣམ་འཕྲུལ་འཇིག་རྟེན་དབང་ཕྱུག་ལྷའི་རྒྱལ་པོ། །གངས་ཅན་ཐོག་མའི་རྗེ་པོ་གཉའ་ཁྲི་བཙན། །ཐོ་རི་དད་པ་བརྟན་པར་གསོལ་བ་འདེབས། །དཀོན་ཅོག་གསུམ་འབངས་བསམས་བཞིན་སྲོང་བཙན་རྗེར། །ལེགས་སྤྲུལ་རིམ་བརྒྱུད་ཁྲི་སྲོང་རལ་པ་ཅན། །འཕགས་ཡུལ་དགེ་བ་དཔལ་དང་དགོན་པ་བ། །འབྲོམ་སྟོན་རྩེ་(༣༠༦ན) ― GLG021_Page_0613 ―
[མ་དཔེ་གཟིགས་ན་འདིར་གནོན།]
ཆེན་སྙིང་པོར་གསོལ་བ་འདེབས། །གཡུ་བྲག་མགོན་དང་གཏེར་སྟོན་མངའ་བདག་མྱང༌། །དགེ་འབུམ་པདྨ་བཛྲ་དགེ་འདུན་གྲུབ། །དབྱངས་ཅན་བཞད་པ་བསོད་ནམས་རྒྱ་མཚོའི་དཔལ། །བདེ་ཆེན་ཆོས་ཀྱི་རྒྱལ་པོར་གསོལ་བ་འདེབས། །ཡང་སྲིད་དུ་མར་དམ་པ་དེ་དག་དང༌། །རྣམ་དཀར་ལས་ཀྱིས་འབྲེལ་བའི་བག་ཆགས་མཐུ། །ཡོངས་སད་ངག་དབང་བློ་བཟང་རྒྱ་མཚོའི་སྡེ། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །རྒྱ་བོད་མཁས་ཤིང་གྲུབ་བརྙེས་དུ་མ་ཡི། །སྣང་བརྙན་སྨན་འདམ་རིག་བྱེད་སོར་མོའི་འཕྲུལ། །གྲང་གསེར་ཁུ་བས་ཉེར་བྱུགས་ལེགས་བྱས་ཤིང༌། །བློ་བརྩོན་གཏོང་བས་རབ་བསྐྲུན་དགེ་ཚོགས་འབྲས། །ནད་གདོན་དབུལ་ཕོངས་མི་མཐུན་ཕྱོགས་ཀུན་ཞི། །ཚེ་དཔལ་བསོད་ནམས་སྟོབས་འབྱོར་མ་ལུས་འཕེལ། །ཉིང་མཚམས་སྦྱར་ཚེ་རི་བོ་པོ་ཏཱ་ལར། །འཕགས་མཆོག་སྙིང་རྗེའི་གཏེར་གྱིས་རྗེས་འཛིན་ཤོག །མཐོ་རིས་ལམ་བརྒྱུད་ཐར་པའི་གྲོང་དུ་ཞུགས། །ཕྱིན་དྲུག་རླབས་ཆེན་སྤྱོད་པར་གཅིག་ཏུ་བརྩོན། །གསང་སྔགས་ཐེག་པ་མཆོག་གི་རྣལ་འབྱོར་གྱིས། །འགྲོ་བའི་དོན་དུ་སངས་རྒྱས་མྱུར་ཐོབ་ཤོག །འཇིག་རྟེན་བདེ་ཞིང་ཐུབ་པའི་བསྟན་པ་དར། །དེ་འཛིན་སྐྱེས་བུ་སྲིད་མཐའི་བར་དུ་བརྟན། །ས་སྐྱོང་རྒྱལ་པོའི་སྐུ་ཚེ་མངའ་ཐང་རྒྱས། །འབངས་རྣམས་ལྷ་ཡི་དགའ་སྟོན་ལ་སྤྱོད་ཤོག །དཀོན་ཅོག་རིན་ཅེན་གསུམ་གྱི་བྱིན་རླབས་དང༌། །དྲང་སྲོང་ལྷ་སོགས་བདེན་ཚིགས་གྲུབ་པའི་མཐུ། །རྟེན་ཅིང་འབྲེལ་འབྱུང་བསླུ་བ་མེད་པ་ཡིས། །སྨོན་ལམ་ཅི་བཏབ་ལྷུན་གྱིས་གྲུབ་པར་ཤོག །ཅེས་གསོལ་དཔོན་ཚེ་དབང་རབ་བརྟན་གྱིས་འགྲོ་ལ་(༣༠༦བ) ― GLG021_Page_0614 ―
[མ་དཔེ་གཟིགས་ན་འདིར་གནོན།]
རྗེས་བརྩེ་མའི་ནང་བཞིན་འཁྲུངས་རབས་འབུར་སྐུ་བཞེངས་པའི་ཚེ་གསོལ་འདེབས་སྨོན་ལམ་དང་འབྲེལ་བའི་ཁ་ཏོན་དུ་བྱས་ཆོག་པ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱ་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འཇིག་རྟེན་དབང་ཕྱུག་ཟློས་གར་འཕགས་བོད་ཀྱི། །མཁས་ཤིང་གྲུབ་པའི་སྒྱུ་འཕྲུལ་རྨད་པོ་ཆེ། །རིན་ཆེན་ཕྲེང་བ་ལྟ་བུར་སྤེལ་ལེགས་སུ། །མཁས་ལ་དབང་གཞུ་ཇི་བཞིན་རྣམ་བཀྲའི་མཐུས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཉི་མ་སྦས་པས་ལེགས་བསྟན་འཕགས་མའི་སྐུ། །རྣམ་འགྱུར་ཅིར་ཡང་སྟོན་པའི་འཕྲུལ་པོ་ཆེ། །ཉེར་གཅིག་གྲངས་ལྡན་དྲི་མེད་རས་དཀར་ངོས། །སྣ་ཚོགས་ཚོན་གྱི་མདངས་བཀྲག་རབ་གསལ་བས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཕྱག་ན་པད་དཀར་སྲོང་བཙན་འབྲོམ་སྟོན་རྗེ། །བསོད་ནམས་རྒྱ་མཚོའི་ཞིང་གྱུར་དགེ་འདུན་གྱི། །ཡོན་ཏན་རྒྱན་གྱིས་ལེགས་སྤུང་རྙོག་དྲལ་མཚོར། །ཆུ་ཤེལ་དབང་པོའི་དཀྱིལ་འཁོར་ལྟར་ཤར་བས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །སྣ་ཚོགས་ཚོན་བརྒྱ་ཉེ་བའི་མལ་ཤེལ་ལྟར། །རབ་དཀར་ཀ་ཤི་ཀ་ཡི་ངོས་ཡངས་པོར། །འཇམ་དབྱངས་དགའ་བའི་བཤེས་གཉེན་འདྲ་བག་ལ། །སྐྱབས་མཆོག་དུ་མའི་སྣང་བརྙན་གྱིས་བསྐོར་མཐུས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཉན་ཐོས་ཚུལ་གྱི་ཤཱཀ་སེང་བསྟན་པ་ལ། །རི་མོར་ལེགས་མཛད་གནས་བརྟན་བཅུ་དྲུག་གི །སྐུ་གཟུགས་སྣ་ཚོགས་འདོད་ལྷས་ཡོངས་བསྐོང་བ། །མི་ཕྱེད་དད་པའི་ཤུགས་ཀྱིས་ཉེར་(༣༠༧ན) ― GLG021_Page_0615 ―
[མ་དཔེ་གཟིགས་ན་འདིར་གནོན།]
བཞེངས་མཐུས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཐོག་མེད་དུས་ནས་འཁོར་བར་འཁྱམས་པ་ལས། །སྡིག་སྟུང་སྨག་རུམ་ཐུགས་རྗེའི་ཉི་མ་ཡིས། །མཐར་མཛད་སུམ་ཅུ་རྩ་ལྔའི་རྫོགས་སངས་རྒྱས། །སྣང་བརྙན་རི་མོར་འབད་པས་བསྐྲུན་པའི་དགེས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །སེང་གེ་གླང་ཆེན་མེ་དང་ཆོམ་རྐུན་སྦྲུལ། །ལྕགས་སྒྲོག་ཤ་ཟ་ཆུ་བོའི་འཇིགས་པ་ལས། །སྐྱོབ་མཛད་རྒྱལ་བ་ཀུན་ཡུམ་འཕགས་མའི་སྐུ། །ཆེད་དུ་བསྐྲུན་པའི་ཆོས་དཀར་ཕུང་པོ་ཡིས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །བདེ་གཤེགས་སོ་སོའི་སྨོན་ལམ་བདེན་ཚིག་འབྲས། །ནམ་ཡང་ཡོལ་མེད་ཐུགས་རྗེ་རླབས་ཀྱི་ཕྲེང༌། །འཁོར་བ་ཆུ་སྲིན་འབྱུང་གནས་འདིར་གཡོ་བའི། །སྙིགས་མའི་མགོན་པོ་བདུན་གྱི་དེང་དགོངས་ལ། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཉི་མའི་རྒྱུད་འཁྲུངས་རིས་མེད་འགྲོ་བའི་བཤེས། །གསེར་གྱི་ལྷུན་པོ་སྟོང་ཁྲག་ཉི་འོད་ཀྱིས། །འཁྱུད་པའི་དཔལ་འཛིན་ཤཱཀྱ་སེང་གེའི་ཕྱག །གླང་པོ་རྣ་ཞགས་ལྟ་བུ་བརྐྱང་བ་ཡིས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །མཐའ་ཡས་སེམས་ཅན་སྣང་ངོར་མཛད་པའི་འཕྲུལ། །རླབས་ཆེན་སྟོན་ཀྱང་བློ་དམན་དང་འཚམ་ཆེད། །ཞིང་བཀོད་བཅུ་གཉིས་རྣམ་པར་ཐར་པ་དང༌། །མཚུངས་པར་སློབ་འདོད་ལྷག་བསམ་ཡོངས་དག་པས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །རྣམ་མཁྱེན་སྲང་ལ་པདྨ་ཀཱ་ར་ཡི། །མཛད་མཐའ་འདེགས་པར་དཀའ་ཡང་སྣ་ནམ་བར། །ཞལ་འཆེས་ངོ་མཚར་བཀོད་པ་རྒྱ་མཚོ་ལ། །བལྟ་བའི་སྐལ་བ་བཟང་པོར་ཡོངས་བསྒྱུར་བས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཉིང་མཚམས་སྦྱར་ཚེ་ཡིད་འཕྲོག་བདེ་ལྡན་ནས། །སྣང་མཐའ་ཞལ་དཀྱིལ་མངོན་སུམ་སྟོན་པའི་ཆེད། །མགོན་ཁྱོད་ཚོགས་ཀྱིས་བསྒྲུབས་པའི་ཞིང་གི་མཆོག །མངོན་(༣༠༧བ) ― GLG021_Page_0616 ―
[མ་དཔེ་གཟིགས་ན་འདིར་གནོན།]
སུམ་ས་ལ་འཕོས་འདྲའི་བཀོད་པ་ཡི། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །སློབ་དཔོན་སངས་རྒྱས་གཉིས་པའི་སྐུ་གཅིག་ལ། །རྣམ་འཕྲུལ་བརྒྱད་ཀྱིས་འགྲོ་བ་འདུལ་བའི་གར། །བསྒྱུར་ཚེ་སྲིད་ཞིའི་ཉེས་བརྒྱ་འཇིག་པ་ཡི། །བྱིན་རླབས་ནུས་མཐུའི་ཆོ་ག་ཡོངས་བསྟར་བས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཐུབ་པའི་དབང་པོར་སྙིགས་མའི་མགོན་པོ་བདུན། །འཕགས་པའི་གནས་བརྟན་ཆེན་པོ་བཅུ་དྲུག་དང༌། །རྒྱལ་ཆེན་དྷརྨ་ཝརྡྷ་ཧ་ཤང་གི །སྐུ་བརྙན་གྲ་མཚུངས་ལྔ་རུ་བཞེངས་པའི་མཐུས། །ཡོན་སྦྱོར་སྦྱིན་པའི་བདག་པོ་མི་ནོར་དང༌། །རིགས་བརྒྱུད་ཚེ་དང་དཔལ་འབྱོར་རབ་རྒྱས་ཤིང༌། །འདིའི་ཆེད་སྒོ་གསུམ་འབད་བརྩོན་བརྟེན་པ་ཀུན། །དོན་གཉིས་མཐའ་དག་ལྷུན་གྱིས་གྲུབ་པར་ཤོག །ཅེས་གསོལ་དཔོན་ཚེ་དབང་རབ་བརྟན་གྱིས་སྒྲོལ་མ་ཉེར་གཅིག །འདི་གའི་འདྲ་འབག་ལེ་ཚན་གཉིས། གནས་བཅུ་ཐང་གཅིག་མ་གཉིས་དང་བཅུ་གསུམ་གྲ་ཚར། སངས་རྒྱས་སུམ་བཅུ་སོ་ལྔ། སྒྲོལ་མ་འཇིགས་པ་བརྒྱད་སྐྱོབ། སྨན་བླ་བདེ་གཤེགས་བརྒྱད་ཚར་གཉིས། ཐུབ་དབང་གི་སྐུ་གཅིག །མཛད་པ་བཅུ་གཉིས། སིནྡྷུ་རྒྱ་མཚོའི་ཞིང་བཀོད། མཚན་བརྒྱད་ཀྱི་ཐང་ག་གཉིས། བཅས་ཁྱོན་བསྡོམས་སུམ་ཅུ་སོ་ལྔ་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཤློ་ཀ་ཕྱི་མ་བལྡབས་ཆོག་པའི་རྩིས་འདི་བཞིན་བཅས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སྦྱིན་སོགས་ཕྱིན་དྲུག་སྤྱོད་པའི་རྒྱ་མཚོ་ཆེར། །ཉེར་གོམས་བཤེས་གཉེན་དམ་པར་གསོལ་བཏབ་པས། །ཚེ་མཐའ་ཡས་པའི་མགོན་པོ་ལྟར་བཞུགས་ནས། །ཆོས་འཁོར་རྒྱུན་ཆད་མེད་པར་ཡོངས་བསྐོར་ཤོག །ཅེས་པའང་སྨད་རྒྱུད་སྤྱི་ཚོགས་ཀྱི་ངོར་ཟ་ཧོར་གྱི་བནྡེས་བཀོད། །བསླུ་བ་མེད་པའི་དཀོན་ཅོག་རྣམ་གསུམ་ལ། །མི་ཕྱེད་དད་པས་གསོལ་བ་བཏབ་པའི་མཐུས། །ཐུགས་རྗེ་སྙིང་ལ་ཞུགས་ནས་འདི་དང་ཕྱིའི། །ལེགས་(༣༠༨ན) ― GLG021_Page_0617 ―
[མ་དཔེ་གཟིགས་ན་འདིར་གནོན།]
ཚོགས་དོན་ཀུན་ལྷུན་གྱི་གྲུབ་པར་ཤོག །ཅེས་པའང་ཐུ་མེད་དགེ་འདུན་ཤི་གེ་མེ་རེང་གིས་དགོས་ཚུལ་ལྟར་བྲིས། །རྒྱལ་སྲས་སློབ་མར་བཅས་པའི་རྟེན་བརྟེན་པ། །མངོན་སུམ་འགྲོ་བའི་བསོད་ནམས་ཞིང་མཆོག་ཏུ། །ལེགས་དངོམ་མཐོང་ཐོས་དྲན་དང་རེག་པས་ཀྱང༌། །མངོན་མཐོ་ངེས་ལེགས་ས་ལ་སྦྱོར་མཛད་ཀྱེ། །འདིས་མཚོན་བསགས་པའི་མི་ཟད་དགེ་བའི་འབྲས། །ཐུབ་པའི་བསྟན་དར་སྐྱེ་རྒུའི་བདེ་སྐྱིད་རྒྱས། །མཁའ་མཉམ་འགྲོ་བ་མ་ལུས་ཐར་པ་དང༌། །རྣམ་མཁྱེན་ཡེ་ཤེས་མངོན་དུ་འགྱུར་བར་ཤོག །ཡོན་སྦྱོར་རྣམས་ཀྱི་ནད་གདོན་བར་གཅོད་ཞི། །ཚེ་རིང་དཔལ་འབྱོར་ཆོས་སྲིད་ལེགས་ཚོགས་འཕེལ། །ཡང་སྲིད་ཀུན་ཏུ་དལ་བའི་རྟེན་ཐོབ་ནས། །རིང་པོར་མི་ཐོགས་བྱང་ཆེན་མྱུར་ཐོབ་ཤོག །འཇམ་དཔལ་གྲགས་པའི་རྒྱུད་ཀྱི་ཡང་སྙིང་མཚན། །བརྗོད་པ་རྣམ་དག་གསང་ཆེན་ཀུན་གྱི་མ། །ཆོས་ཀྱི་སྦྱིན་པའི་སྒོ་འཕར་ཡོངས་ཕྱེ་བའི། །བསོད་ནམས་བྱས་པའི་ཕུང་པོ་འདི་ཡི་མཐུས། །བློ་བཟང་གྲགས་པའི་རིང་ལུགས་བླར་སྤེལ་ཆེད། །འཇམ་དབྱངས་དགའ་བའི་བཤེས་གཉེན་དཔལ་བཟང་པོ། །བསྐལ་བརྒྱར་ཞབས་བརྟན་ཡོན་སྦྱོར་ལས་བྱེད་རྣམས། །འདི་ཕྱིའི་དོན་ཚོགས་ལས་ཀུན་འགྲུབ་པར་ཤོག །དཀོན་ཅོག་རིན་ཅེན་གསུམ་གྱི་ཐུགས་རྗེ་དང༌། །ལྷ་དང་དྲང་སྲོང་རིག་འཛིན་བདེན་པའི་ཚིག །རྟེན་འབྲེལ་བསླུ་བ་མེད་པའི་ནུས་པ་ཡིས། །སྨོན་ལམ་ཅི་བཏབ་འགྲུབ་པའི་བཀྲ་ཤིས་ཤོག །ཅེས་ཀ་བཞི་སྨད་པ་བསོད་ནམས་ནོར་བུས་མཚན་བརྗོད་ཀྱི་པར་བརྐོས་པའི་པར་བྱང་འདི་བཞིན་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ལྐོག་པ་བསམ་མཐོང་ལོ་ཙཱ་བས་བྲིས་པ་ཛ་ཡནྟུ། །སརྦ་མངྒལཾ། ། སྡེ་པ་སངས་རྒྱས་རྒྱ་མཚོའི་དད་རྟེན་དུ་བྲིས་ཐང་བཅོ་ལྔ་བཞེངས་པའི་རྒྱབ་ཡིག་སྨོན་ལམ་ཚིགས་བཅད་སོགས།― GLG021_Page_0619 ―
[མ་དཔེ་གཟིགས་ན་འདིར་གནོན།]
སྨོན་ལམ་ཤིས་བརྗོད་བརྟན་བཞུགས་སོགས་ཀྱི་ཚིགས་སུ་བཅད་པ་རབ་དཀར་དགེ་བའི་ཆུ་ཀླུང་ལས་གླེགས་བམ་གཉིས་པ་བཞུགས་སོ། ། ― GLG021_Page_0620 ―
[མ་དཔེ་གཟིགས་ན་འདིར་གནོན།]
ཛི དྭཱ ཙ ཤ བྡ སྭ ར བ ཛྲ གཱི ཏ ཙཱ ཏུ ཪྻའ བྷི ཥ ཉྩ ཀྵ ར སཱ མ ཀོ མ ཏེཿ བཱ ཎཱ ད ན ཡ རྐ རྞ བྷུ ཥ སུ བྷཱ ག །སཱ རེ ནཱ དི ཀཱ ཡེ བ ཡ ཐཱ མ ཚེ ད ཏཱ། རྒྱལ་གསུང་ངག་གི་སྒྲ་དབྱངས་རྡོ་རྗེའི་གླུ། །དབང་བཞིའི་སྙན་འགྱུར་གདངས་སུ་བློ་གྲོས་ཀྱི། །རྒྱུད་མངས་ལས་དྲངས་སྐལ་བཟང་རྣ་བའི་རྒྱན། །རྒྱ་མཚོར་ཆུ་ཀླུང་ཇི་བཞིན་ཆད་མེད་པར། །ཕྱག་ན་པད་དཀར་འཇིག་རྟེན་དབང་ཕྱུག་དང༌། །ལྷ་ཡི་རྒྱལ་པོ་གཉའ་ཁྲི་བཙན་པོ་རྗེ། །ཐོ་རི་དད་བརྟན་མེས་དབོན་རྣམ་པ་གསུམ། །དགེ་བ་དཔལ་དང་ཁ་ཆེ་དགོན་པ་འབྲོམ། །ས་ཆེན་(༢ན) ― GLG021_Page_0621 ―
[མ་དཔེ་གཟིགས་ན་འདིར་གནོན།]
གཡུ་བྲག་ཉང་རལ་དགེ་བ་འབུམ། །པདྨ་བཛྲ་དགེ་འདུན་བསོད་ནམས་གཏེར། །ཡོན་ཏན་རྒྱ་མཚོའི་སྐྱེས་རབས་འཕྲེང་མཛེས་ཀྱིས། །ལེགས་བསྐོར་འདོད་ཁམས་དབང་ཕྱུག་པེ་ཧ་ར། །སྦྱིན་བདག་རིན་ཅེན་སྣ་བདུན་སྔོན་འགྲོ་བ། །གནམ་སའི་ཁྱོན་ལ་དབང་སྒྱུར་སངས་རྒྱས་བསྟན། །རབ་མཛེས་ལུགས་གཉིས་རྣམ་དཔྱོད་རྒྱ་མཚོ་ལྟར། །ཟབ་ཡངས་རིགས་བརྒྱུད་ཚུལ་འདིར་འབད་དོ་ཅོག །ཆོས་དཀར་འབྲས་བུ་ནད་འཁྲུག་དབུལ་ཕོངས་སོགས། །རྩོད་ལྡན་ཆད་པ་མིང་གི་མཐར་བྱས་ནས། །ཚེ་རིང་སྟོབས་འབྱོར་མངའ་ཐང་ཆབ་སྲིད་ཀུན། །མཆོད་སྦྱིན་བརྒྱ་པའི་དཔལ་ལ་འགྲན་པར་ཤོག །དེང་ནས་རྣམ་མཁྱེན་ཡེ་ཤེས་མ་ཐོབ་བར། །བཤེས་གཉེན་མགོན་དང་ནམ་ཡང་མི་འབྲལ་ཞིང༌། །དལ་བའི་རྟེན་ལ་ཐོས་བསམ་བསྒོམས་པའི་མཐུས། །བྱང་ཆུབ་ཆེན་པོའི་ས་ལ་མྱུར་བགྲོད་ཤོག །དགའ་བ་རྒྱ་བའི་ཤེ་མོང་དར་དྲག་པས། །ལུགས་ཟུང་དཔལ་དང་ལྡན་པ་ཕོ་བྲང་ཆེ། །ཆོས་སྲིད་གསེར་གྱི་འཁོར་ལོ་འཛམ་གླིང་གི །ཡངས་པའི་ནོར་འཛིན་ཁྱོན་ལ་བསྒྱུར་བར་ཤོག །ཅེས་སྡེ་པ་(༢བ) ― GLG021_Page_0622 ―
[མ་དཔེ་གཟིགས་ན་འདིར་གནོན།]
སངས་རྒྱས་རྒྱ་མཚོའི་དད་རྟེན་དུ་བྲིས་ཐང་བཅོ་ལྔ་བཞེངས་པའི་གཙོ་བོ་དང་གཡས་བདུན་ལ་ལྷ་མགྲོན་འདོད་ལྷ་སྣ་ཚོགས་དང་སིནྡྷུ་རྒྱ་མཚོ་ཆེ་བའི་ཞིང་བཀོད་དར་རྒྱས་ཤིན་ཏུ་ཆེ་ཡང་གཞན་རྣམས་ཀྱི་བཀོད་པ་ཡོད་འཕྲོས་མ་ཐོས་པར་སྡེ་པ་རང་ཉིད་ལྷ་སྲས་ཀྱི་བག་ཆགས་སད་པའི་མཐུ་དང༌། འཕྲོག་ཏུ་མེད་པའི་དད་པ་དང་སོ་སོར་འབྱེད་པའི་ཤེས་རབ་སྨོན་ལམ་རྣམ་པར་དག་པའི་རྐྱེན་གྱིས་ལེའུ་རྣམས་ལ་ཞིང་བཀོད་འདི་ལྟ་བུ་ཞིག་བྱུང་ན་ལེགས་པ་འདུག་ཅེས་འཆར་བསྟན་བྱུང་བ་དང་རིགས་འཛིན་ཡོངས་འདུས་ཀྱི་དགོངས་དོན་མཐུན་པར་འདུག་པས་དེ་དོན་བཞིན་བསམ་པ་ལྷུན་གྲུབ་མར་འདི་ག་ནས་ངག་སྤོད་དང༌། དེ་ཕྱིན་འདར་བ་ལོ་ཆེན། རྣམ་གླིང་པཎ་ཆེན། དགེ་སློང་འཇམ་དབྱངས་གྲགས་པ་གསུམ་ཟིན་བྲིས་བརྒྱག་བཅུག་པར་ངེད་རང་ནས་ཞིབ་མོར་དཔྱད་དེ་གཙོ་ཐང་གི་སྐྱ་བྲིས་དང་གཞུག་ཚགས་དབུ་འབྲིང་ལྷ་ས་འཇམ་དབྱངས་དབང་པོ། ཚོན་མདངས་དགའ་ལྡན་གླིང་རྟ་མགྲིན་རྒྱལ་པོ་དང་མཁར་རྩེ་དགེ་བསྙེན་རྒྱལ་པོ། འཁོར་གྱི་མཇུག་སྐྱོང་རོང་པ་བསོད་ནམས་རྒྱལ་པོ། གསེར་རིས་འཕྲེང་འགོ་དཀོན་ཅོག་དང་ལྕང་སྲུང་ཁང་རིན་ཅེན་རྡོ་རྗེས་བྱས་ཤིང༌། ཐང་ཁ་གཞན་ཚོར་ཡང་རི་མོ་བ་མཇུག་ཏུ་མིང་བྱང་ཐེབས་པ་ལྟར་དང༌། ཁ་བྱང་གི་ཡི་གེ་རྒྱལ་རྩེ་འཇམ་དབྱངས་དབང་པོ་དང་ངག་དབང་ཕུན་ཚོགས། ཚོན་སྦྱོར་བ་ལྷ་ས་དཀོན་ཅོག་དང་ཟ་དམ་ཀར་ཀར། དོ་དམ་པ་འབོག་གོང་བློ་གྲོས་རྒྱལ་མཚན་གྱི་བགྱིས་ནས་བཞེངས་པའི་རྒྱབ་ཡིག་སྨོན་ལམ་འདི་ནི་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སརྦ་ལཀྵྨཱི་བྷ་ཝནྟུ། །(༣ན) ― GLG021_Page_0623 ―
[མ་དཔེ་གཟིགས་ན་འདིར་གནོན།]
ཉེ་གཡས་དང་པོ། རིང་མེད་པ་ཐུགས་རྗེའི་རྩི་སྨན་གྱིས། །འགྲོ་རྣམས་སྙིང་ལ་བདེ་བ་སྦྱིན་མཛད་མཁན། །སྐལ་བཟང་སྣམ་འདྲེན་བཞི་པ་དོན་ཀུན་གྲུབ། །མཐོང་ཐོས་དྲན་རེག་རྣམ་གྲོལ་སྐྱབས་མགོན་ལ། །ཉིད་ལས་གཞན་མིན་སྣ་ཚོགས་གདུལ་བྱའི་ངོར། །གནས་བརྟན་བཅུ་དྲུག་བཀའ་སྐྱོང་རྒྱལ་ཆེན་བཞི། །ཆོས་འཕེལ་ཧྭ་ཤང་གནམ་བསྐོས་ཐང་གི་རྒྱལ། །མང་བཀུར་ཁབ་ཀྱི་བཀོད་པ་གཅིག་ཏུ་མཚར། །ཤཱཀྱ་སེང་གེའི་བྱིན་རླབས་རྨད་པོ་ཆེ། །དགྲ་བཅོམ་སོ་སོས་སྲིད་ཞིའི་ཡོན་ཏན་ཀུན། །མཆོད་ཆོག་གཞུང་ལས་བྱུང་ལྟར་ཡོན་སྦྱོར་དང༌། །ཕྱོགས་འདིར་བྱེད་པོར་གཏོགས་རྣམས་ལ་འབྱོར་ཤོག །གཡས་དང་པོའི་གཙོ་བོའི་སྐྱ་བྲིས་དབུ་འབྲིང་ལྷ་ས་འཇམ་དབྱངས་དབང་པོ། འཁོར་གྲ་སྡིངས་མི་འགྱུར། ཚོན་མདངས་ཕོ་བྲང་རབ་བརྟན། གཞུག་ཚགས་སྙེ་མོ་ཀརྨ། གསེར་རིས་འཕྲེང་འགོ་དཀོན་ཅོག་རྣམས་ཀྱིས་བགྱིས། །བདེ་གཡས་གཉིས་པ། གཤེགས་ཀུན་གྱི་བློ་གྲོས་མ་ལུས་པ། །ཐུགས་ཀྱི་བུམ་བཟང་བཅུད་འཁྱིལ་གྲགས་པའི་སྒྲ། །ཚངས་གནས་ཡུལ་སར་དགེ་བ་ཙོང་ཁ་པ། །ཟླ་མེད་གཏན་གྱི་སྐྱབས་གནས་གཅིག་པུ་བར། །རྒྱན་དྲུག་མཆོག་གཉིས་ཕུལ་བྱུང་ཁུ་རྔོག་ཟུང༌། །མཁན་ཆེན་ཕྱག་ན་རྡོ་རྗེ་དབུ་མ་པ། །ཐུགས་སྲས་རྣམ་བཞི་ནོར་བཟང་དཔལ་ལྷུན་རྗེ། །མྱུར་མཛད་མགོན་དང་ལས་གཤིན་གྱིས་བསྐོར་བས། །ཚེ་རབས་ཀུན་ཏུ་སྙིང་ལ་འཇམ་དཔལ་དབྱངས། །ཞུགས་ནས་ཇི་ལྟ་ཇི་སྙེད་ཤེས་བྱའི་གནད། །རྟོགས་ཏེ་འཁོར་འདས་ལེགས་པའི་ཡོན་ཏན་ཚོགས། །ཐོགས་མེད་སྔོན་དུ་(༣བ) ― GLG021_Page_0624 ―
[མ་དཔེ་གཟིགས་ན་འདིར་གནོན།]
འགྱུར་བར་བདག་བྱིན་རློབས། །གཡས་གཉིས་པའི་གཙོ་བོའི་སྐྱ་བྲིས། དབུ་འབྲིང་ཕོ་བྲང་ཕུན་ཚོགས། འཁོར་སྙེ་མོ་ཀརྨ། ཚོན་མདངས་ལྷ་ས་ཁྱི་སྐྱག །ལྕང་སྲུང་ཁང་རིན་ཅེན་རྡོ་རྗེ། གཞིས་རྩེ་རྡོ་རྗེ་རབ་བརྟན་བཅས་གསུམ། གཞུག་ཚགས་སྙེ་མོ་ཀརྨ། གསེར་རིས་ལྷ་ས་གྲགས་པ་རྣམས་ཀྱིས་བགྱིས། འོད་གཡས་གསུམ་པ། མཚན་སྟོང་གི་དྲ་བའི་གར་བསྒྱུར་ཕྱག །མ་རྒད་མདངས་འཛིན་ལྷུང་བཟེད་ཟིལ་མངར་གྱིས། །ལེགས་གཏམ་ཆུ་རྒྱུན་གདུལ་བྱའི་ཚངས་བུག་བརྒྱུད། །སྙིང་གི་ཟ་མ་ཏོག་ཏུ་འཁྱིལ་མཛད་པ། །ཕྱག་མཆོད་སྐྱབས་སུ་སོང་བས་སྡིག་ལྟུང་དྲི། །སྦྱོང་མཛད་བདེ་བར་གཤེགས་པ་མདའ་རྩེ་དང༌། །རྡོ་རྗེ་ནག་པོ་ཆེན་པོ་གུར་གྱི་མགོན། །མཁའ་འགྲོའི་གཙོ་མོ་འདོད་ཁམས་མས་སྐོར་བས། །སྲོག་གཅོད་འབྲས་བུ་དུས་མིན་འཆི་བའི་མུན། །ཐུགས་རྗེ་ཉི་མའི་འོད་ཀྱིས་མཐར་བསྐྲད་ཅིང༌། །ལས་ནག་བརྣག་དཀའི་རྡུལ་རྙོག་མ་ལུས་པ། །བྱིན་རླབས་ཀེ་ཏ་ཀ་ཡིས་དྲུངས་པར་ཤོག །གཡས་གསུམ་པའི་གཙོ་བོའི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། །འཁོར་ལྷ་ས་བ་གྲགས་པ། ཚོན་མདངས་མས་གྲོ་ཐུབ་དབང༌། གཞུག་ཚགས་ལྕང་སྲུང་ཁང་རིན་ཅེན་རྡོ་རྗེ། གསེར་རིས་མཚོ་སྨད་རྡོ་རྗེ་རྣམས་ཀྱིས་བགྱིས། །སྟང་གཡས་བཞི་པ། ཟིལ་བརྩེགས་པའི་ལྷུན་པོ་རྟ་ལྗང་ཅན། །བརྒྱ་ཕྲག་གོས་ཀྱིས་ཀླུབས་པ་མཉྫུ་ཤྲཱི། ཀཱ་ལ་འབར་བའི་བརྔམས་བརྗིད་མི་མཐུན་ཕྱོགས། །མ་ལུས་ཅིག་ཅར་ཟིལ་གྱིས་གནོན་འདྲ་བར། །འཇམ་དབྱངས་དཀར་སེར་ནག་དང་སྤྱན་རས་གཟིགས། །རྣམ་འགྱུར་སྣ་ཚོགས་དམར་པོ་སྐོར་གསུམ་སོགས། །(༤ན) ― GLG021_Page_0625 ―
[མ་དཔེ་གཟིགས་ན་འདིར་གནོན།]
ཁམས་གསུམ་དབང་བྱེད་ནོར་ལྷ་མཐའ་ཀླས་དང༌། །ཆོས་སྐྱོང་རྒྱལ་ཆེན་ངལ་བསོས་པོས་བསྐོར་མཐུས། །གདོན་རིམས་མི་གཙང་ཉེས་བརྒྱ་ཀུན་སངས་ཤིང༌། །བློ་གྲོས་རབ་ཡངས་གདུལ་དཀའི་འགྲོ་རྣམས་འདུལ། །བརྟན་གཡོ་དབང་སྡུས་ལྷ་མིའི་ཐོར་ཚུགས་རྩེར། །རྐང་སེན་ཟླ་བའི་དཀྱིལ་འཁོར་འཆར་བར་ཤོག །གཡས་བཞི་པའི་གཙོ་བོའི་སྐྱ་བྲིས་དབུ་འབྲིང་ལྷ་ས་འཇམ་དབྱངས་དབང་པོ། འཁོར་དབུ་ཆུང་སྟག་ལུང་བཀྲ་ཤིས། ཚོན་མདངས་ཁྱོག་པོ་དགེ་བསྙེན། གཞུག་ཚོགས་ལྕང་སྲུང་ཁང་རིན་ཅེན་རྡོ་རྗེ། གསེར་རིས་མཚོ་སྨད་རྡོ་རྗེ་རྣམས་ཀྱིས་བགྱིས། ལས་འབྲས་གཡས་ལྔ་པ། གཟུགས་འཆར་མཚུན་ལྷའི་མེ་ལོང་དེ། །བསྐལ་བརྒྱར་གཟུང་ཡང་ངལ་ནུས་ཚེ་སྦྱིན་མ། །ཡིད་བཞིན་འཁོར་ལོ་དངོས་གྲུབ་བྱེ་བའི་མཛོད། །མཛེས་སྐུ་སྲིད་ཞིའི་བརྟན་པ་ཡོངས་འཕྲོག་མར། །སྣ་ཚོགས་འཇིགས་པའི་འཚེ་བ་ལས་སྐྱོབ་པའི། །འཕགས་མའི་རྣམ་འགྱུར་ཟླ་མིག་གྲངས་ཅན་དང༌། །དྲག་པོ་གཟི་ལྡན་དབང་ཕྱུག་སྟོབས་འཕྲོག་ནས། །སྒྲོལ་གིང་གནོད་སྦྱིན་ཆེན་པོས་བསྐོར་བའི་མཐུས། །སྲོག་གི་གཡུང་དྲུང་ཀ་བ་བརྟན་པོ་ལ། །མི་གཤིག་རྡོ་རྗེའི་ཚེ་ཡིས་རྒྱས་བཏབ་ཅིང༌། །རྒྱུ་དང་མི་རྒྱུའི་འཇིགས་པ་དུག་གི་ཆུ། །བདུད་རྩིའི་གཡང་ལོན་རྀ་ཥིའི་སྤུན་ཟླར་ཤོག །གཡས་ལྔ་པའི་གཙོ་འཁོར་གྱི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། ཚོན་མདངས་ལྷ་ས་བརྐོས་པ། གཞུག་ཚགས་སྙེ་མོ་ཀརྨ། གསེར་རིས་ལྷ་ས་ལགས་རྟ་མགྲིན་རྣམས་ཀྱིས་བགྱིས། །གཡས་དྲུག་པ། གངྒཱའི་ཡབ་གཅིག་ཟླ་ཞུན་བྱེ་བ་ཡིས། །བྱུགས་(༤བ) ― GLG021_Page_0626 ―
[མ་དཔེ་གཟིགས་ན་འདིར་གནོན།]
པས་སྒྲུན་མིན་ཡིད་འཕྲོག་ལྷ་མོའི་གཟུགས། །བདུད་རྩིའི་རྒྱུན་གྱིས་ཨ་ཧཾ་མི་འགྱུར་བ། །གཞོམ་མེད་ལྕགས་ཀྱི་སྲོག་རྩར་གྲུབ་མཛད་ལ། །མཐའ་ཀླས་ཟབ་གཏེར་ལས་འོངས་ཚེ་ཡི་ལྷ། །མཚན་དང་ཉམས་འགྱུར་སྒྱུ་འཕྲུལ་རྨད་པོ་ཆེ། །དུང་སྐྱོང་རྒྱལ་མོ་ཞི་རྒྱས་དབང་དྲག་གི །འདོད་ཁམས་བདག་མོའི་རྣམ་རོལ་གྱིས་བསྐོར་བས། །སྲོག་གི་འཚོ་བ་དོན་དང་ལྡན་བྱེད་ཐབས། །སྒྲུབ་ཡུན་བསྐལ་བརྒྱའི་བར་དེར་ཉི་མའི་བུ། །ལས་ཀྱི་འཕེན་པ་རྫོགས་ནས་ཡང་སྲིད་གཞན། །འཛིན་པའི་སྐལ་བ་བཟང་པོར་འགྱུར་བར་ཤོག །གཡས་དྲུག་པའི་གཙོ་བོའི་སྐྱ་བྲིས་དང༌། །གཞུག་ཚགས་ལྷ་ས་འཇམ་དབྱངས་དབང་པོ། འཁོར་རོང་པ་བསོད་རྒྱལ། ཚོན་མདངས་ཞོལ་བློ་བཟང༌། གཞུག་སྐྱོང་དང་གསེར་རིས་ལྷ་ས་ལགས་རྟ་མགྲིན་རྣམས་ཀྱིས་བགྱིས། །བྱང་གཡས་བདུན་པ། སེམས་ནམ་མཁའི་སྙིང་པོ་དྲེགས་པའི་གཤེད། །གཉན་རིགས་བོད་སྐྱོང་རྒྱལ་པོའི་སྐུ་ཡི་ལྷ། །རྣམ་འགྱུར་བརྒྱད་དང་གསང་ཡུམ་གཡུ་སྒྲོན་མ། །འཇིགས་རུང་སྣང་བརྙན་ཆོ་འཕྲུལ་ཅིར་ཡང་བརྫུ། །ཕོ་ལྷ་མོ་ལྷ་དགྲ་ལྷ་སྲོག་གི་ལྷ། །ཡུལ་ལྷར་བཅས་པ་འགོ་བའི་སྲུང་མ་ཡི། །གཅིག་ལས་དུ་མར་འཕྲོས་པའི་ཟློས་གར་མཁན། །ཀུན་རྟོག་འཆར་སྒོར་འཛད་པ་མེད་པའི་ལྷས། །ཉིན་མཚན་དུས་དྲུག་རྣམས་སུ་མེལ་ཚེ་དང༌། །སྲུང་སྐྱོབ་སྦ་བའི་འཕྲིན་ལས་ཡོངས་མཛད་དེ། །མི་ནོར་རིགས་བརྒྱུད་འཁོར་འབངས་བཅས་པ་ཡི། །བསམས་པའི་དོན་ཀུན་ལྷུན་གྱིས་གྲུབ་པར་མཛོད། །གཡས་བདུན་པའི་གཙོ་བོའི་སྐྱ་བྲིས་དང་གཞུག་ཚགས་དབུ་འབྲིང་ལྷ་ས་འཇམ་དབྱངས་དབང་པོ། །(༥ན) ― GLG021_Page_0627 ―
[མ་དཔེ་གཟིགས་ན་འདིར་གནོན།]
འཁོར་བ་ནམ་མགོན་པོ་བཀྲ་ཤིས། ཚོན་མདངས་པ་ནམ་མགོན་པོ་བཀྲ་ཤིས་དང་ལྷ་ས་འབའ་ལྷུག་གཉིས། གཞུག་ཚགས་རོང་པ་བསོད་རྒྱལ། གསེར་རིས་མཚོ་སྨད་རྡོ་རྗེ་རྣམས་ཀྱིས་བགྱིས། །སྣང་གཡོན་དང་པོ། བ་མཐའ་ཡས་སིནྡྷུ་རྒྱ་མཚོའི་ཀློང༌། བརྫུས་སྐྱེས་སྤྲུལ་པའི་གར་མཁན་པདྨ་འབྱུང༌། །ཁམས་གསུམ་དབང་སྡུད་སྲིད་གསུམ་ཟིལ་གནོན་ཞིང༌། །ཁྱད་པར་བོད་འབངས་སྐྱེ་རྒུའི་གཉེན་གཅིག་པུས། །ལས་ཅན་འཁོར་ལྔར་བཀའ་སྩལ་ལེའུ་བདུན་མའི། །བླ་མ་སྐུ་གསུམ་སྒྲུབ་པའི་བཀོད་པ་དང༌། །འདིའི་བརྒྱུད་རིགས་འཛིན་རིམ་བྱོན་སྤེལ་ལེགས་འཕྲེང༌། །དཔལ་ལྡན་སྔགས་སྲུང་རྡོར་ལེགས་ཀྱིས་བསྐོར་བས། །འདི་དང་གཏན་འདུན་བསམ་འཕེལ་དབང་གི་རྒྱལ། །རེ་བ་བསྐོང་བའི་དགོས་འདོད་ཆར་འབེབས་ཤིང༌། །ཆོས་ཀྱི་དབྱིངས་ནས་ལོངས་སྤྱོད་རྫོགས་པའི་འཇའ། །སྤྲུལ་སྐུའི་ཟེར་གྱིས་འགྲོ་ཀུན་འདྲེན་པར་ཤོག །གཡོན་དང་པོའི་གཙོ་བོའི་སྐྱ་བྲིས་དང་གཞུག་ཚགས་དབུ་འབྲིང་ལྷ་ས་འཇམ་དབྱངས་དབང་པོ། འཁོར་སྐྱ་བྲིས་དང་ཚོན་མདངས་གཞུག་ཚགས་རྣམས་རོང་པ་བསོད་རྒྱལ། གསེར་རིས་ཞོལ་བློ་བཟང་རྣམས་ཀྱིས་བགྱིས། །བགྲང་གཡོན་གཉིས་པ། ཡས་ཞི་ཁྲོའི་ལྷ་ཚོགས་ལུས་དཀྱིལ་ལ། །ཡོངས་འདུས་སྐྱབས་གནས་མཐའ་དག་ཀུན་གྱི་གོ །གཅིག་ཆོད་རིགས་འཛིན་རྡོ་རྗེ་དྲག་པོ་རྩལ། །མཆོག་མཐུན་དངོས་གྲུབ་ཆར་དུ་འབེབས་མཛད་པར། །བསྟན་པ་རྨད་བྱུང་གསོལ་འདེབས་མངའ་བདག་རྗེར། །སྩལ་བའི་སྟོང་ཐུན་དངོས་བསྟན་བཀོད་པ་རྣམས། །སྙིང་(༥བ) ― GLG021_Page_0628 ―
[མ་དཔེ་གཟིགས་ན་འདིར་གནོན།]
མཛོད་གཏེར་སྟོན་དགོངས་དོན་ལྟར་བཀོད་ཅིང༌། །དུར་ཁྲོད་མ་གསུམ་ཁྱབ་འཇུག་གིས་བསྐོར་བས། །བདེ་བར་གཤེགས་པ་སྒྲུབ་སྡེ་བརྒྱད་ཀྱི་ལྷའི། །ཐུགས་རྗེ་རང་གི་སེམས་ལ་རབ་ཞུགས་ཏེ། །བདུད་བཞིའི་དཔུང་ཚོགས་མཐར་བྱས་དེང་ནས་བཟུང༌། །བྱང་ཆུབ་བར་གྱི་འདུན་མ་ལྷུན་གྲུབ་ཤོག །གཡོན་གཉིས་པའི་གཙོ་བོའི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། གཞུག་ཚགས་དབུ་འབྲིང་ལྷ་ས་འཇམ་དབྱངས་དབང་པོ། འཁོར་སྐྱ་བྲིས་དང་མཚོན་མདངས་གཞུག་ཚགས་ལྷ་ས་གྲགས་པ། གསེར་རིས་འོ་རློན་ནས་དང་ལྷ་ས་གྲགས་པ་རྣམས་ཀྱིས་བགྱིས། །དག་གཡོན་གསུམ་པ། དང་མ་དག་ཞིང་དབྱེ་བརྫུན་པའི་གཏམ། །རླུང་ལ་སྐུར་བྱེད་སྲིན་པོའི་གྲོང་ཁྱེར་དབུས། །ཟངས་མདོག་དཔལ་རིའི་གཞལ་མེད་ཁང་བཟང་དུ། །རྒྱལ་དབང་པདྨའི་སྒྱུ་འཕྲུལ་ཕ་མཐའ་ཡས། །མ་དང་མཁའ་འགྲོའི་གཙོ་མོ་འཚོ་རྒྱལ་མར། །ཉི་མ་ལྷོ་ནུབ་མ་གསུངས་རྟེན་བརྟེན་པའི། །ཞིང་བཀོད་རྗེས་འབྲེལ་དུར་ཁྲོད་བརྒྱད་ཀྱི་ཚུལ། །དབང་གི་མ་མོ་མཆེད་བདུན་གྱིས་བསྐོར་བས། །འདིར་སྣང་ལངྐའི་རྒྱལ་ཁབ་དང་མཚུངས་སུ། །ཕྱོགས་ལས་རྣམ་པར་རྒྱལ་བའི་དཔལ་ཐོབ་ཅིང༌། །ཡང་སྲིད་ཕྱི་མར་པདྨ་འོད་ཞིང་དུ། །འོད་གསལ་བཞི་ཡི་ལམ་གྱིས་གྲོལ་ནུས་ཤོག །གཡོན་གསུམ་པའི་སྐྱ་བྲིས་དང་གཞུག་ཚགས་སྙེ་མོ་ཀརྨ། །ཚོན་མདངས་རོང་པ་ཚེ་བདག །གསེར་རིས་ལྷ་ས་ལགས་རྟ་མགྲིན་རྣམས་ཀྱིས་བགྱིས། །གཡོན་བཞི་པ། ལག་ན་རྡོ་རྗེ་དྲང་སྲོང་ཞི་ཁྲོའི་སྐུར། །ཟློས་གར་བསྒྱུར་ནས་དམོད་པའི་མཚོན་ཆ་ཡིས། །(༦ན) ― GLG021_Page_0629 ―
[མ་དཔེ་གཟིགས་ན་འདིར་གནོན།]
སྡེ་བརྒྱད་ལུས་ཚོགས་ཕྱེ་མར་འཐག་བྱེད་པ། །ཁྲོ་རྒྱལ་སྟོབས་ལྡན་ཞེ་སྡང་རྡོ་རྗེ་ལ། །ནམ་མཁའི་སྙིང་པོར་སྤྲོས་བྲལ་བདེ་ཆེན་མ། །གསུངས་པའི་བརྗོད་བྱའི་དོན་ཀུན་ཉེར་ཚང་བ། །མིག་གི་བདུད་རྩིར་བྱེད་དང་སྒྲོལ་གིང་ཆེ། །སྟོང་དཔོན་ལི་བྱིན་ཧ་རས་ཡོངས་བསྐོར་བས། །རྡོ་རྗེ་བྲག་རིའི་བར་དུ་གནོད་བྱེད་ཚོགས། །ཕྱེར་བཏགས་ལྷག་མ་སྡིག་པའི་ཟས་སུ་རོལ། །རིགས་འཛིན་བླ་མའི་ཚོགས་ཀྱིས་སྐྱེ་བ་ནས། །ཚེ་རབས་ཀུན་ཏུ་རྗེས་སུ་འཛིན་པར་ཤོག །གཡོན་བཞི་པའི་གཙོ་བོའི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། འཁོར་རྡོ་རྗཻ་བྲག་པ་པདྨ་ཀུན་མཁྱེན། ཚོན་མདངས་རྡོ་རྗེ་བྲག་པ་པདྨ་ཀུན་མཁྱེན་དང་མལ་གྲོ་ཐུབ་དབང༌། གཞུག་ཚགས་དབུ་ཆུང་འོ་རློན་ནས། གསེར་རིས་དགའ་ལྡན་རྟ་མགྲིན་རྒྱལ་པོ་རྣམས་ཀྱིས་བགྱིས། །རྟ་གཡོན་ལྔ་པ། སྐད་ཐེངས་གསུམ་བསྒྲགས་པའི་མོད་ཉིད་ལ། །སྡེ་བརྒྱད་སྤྱི་དང་ཁྱད་པར་རྒྱལ་བསེན་གྱི། །དོན་སྙིང་དུམ་བུར་འགས་ནུས་དབང་གི་རྒྱལ། །གཏུམ་ཆེན་གར་དགུའི་ཉམས་ཀྱིས་རྣམ་རོལ་བར། །རྟོགས་བརྗོད་སེནྡྷུ་རྒྱ་མཚོ་ཆེར་གྲགས་པ། །རྡོ་རྗེ་བདུད་འཇོམ་ལ་གསུངས་ཞིང་བཀོད་དང༌། །སྐབས་སུ་བབས་པའི་འཕྲོས་དོན་ངོ་མཚར་བ། །བོད་སྐྱོང་བསྟན་མ་བཅུ་གཉིས་ཀྱིས་བསྐོར་བས། །མགོན་པོ་གང་གི་འགྲོ་འདྲེན་དམ་བཅིའི་ཁུར། །འཛིན་པར་འདོད་པའི་སེམས་བསྐྱེད་ཀྱིས་དྲངས་ནས། །ཚེ་འདིར་འཇའ་ལུས་འཕོ་བ་ཆེན་པའི་སྐུར། །འགྲུབ་པའི་སྐལ་བ་བཟང་པོར་འགྱུར་བར་ཤོག །གཡོན་ལྔ་པའི་གཙོ་བོའི་སྐྱ་བྲིས་(༦བ) ― GLG021_Page_0630 ―
[མ་དཔེ་གཟིགས་ན་འདིར་གནོན།]
དང་གཞུག་ཚགས་ལྷ་ས་འཇམ་དབྱངས་དབང་པོ། འཁོར་གྲ་སྡིངས་མི་འགྱུར། ཚོན་མདངས་མཁར་རྩེ་དགེ་བསྙེན་རྒྱལ་པོ། གཞུག་སྒྱོང་ལྕང་སྲུང་ཁང་རིན་ཅེན་རྡོ་རྗེ། གསེར་རིས་ལྷ་ས་ལགས་རྟ་མགྲིན་རྣམས་ཀྱིས་བགྱིས། །གཡོན་དྲུག་པ། དུས་ཀྱི་དགྲ་བོ་ཕྱག་རྒྱ་ཟིལ་གནོན་ཆེ། །བན་བོན་བྱད་མའི་གཉེན་པོར་ཁྲོས་པའི་ཞལ། །གནམ་ས་ཙམ་གདངས་རབ་དཀར་མཆེ་བའི་རྩེར། །ཕས་རྒོལ་ཁོང་ཁྲག་ཝུ་འཕྲེང་འཁྲིག་བྱེད་པར། །མུ་ཁྲི་བཙན་པོར་སྐུ་གསུང་ཐུགས་ཡོན་འཕྲིན། །གསུངས་པའི་གསོལ་འདེབས་སིནྡྷུ་རྒྱ་མཚོ་ཆུང༌། །གདངས་དབྱངས་བྱ་ཚུལ་སོ་སོར་ཞལ་གདམས་སྩལ། །བཀྲ་བཟང་ཞིང་སྐྱོང་རྣམས་ཀྱིས་ཡོངས་བསྐོར་བས། །ཡིད་ཀྱི་གདུང་ཤུགས་རྒྱུད་མངས་གླུ་ཇི་བཞིན། །རྩེ་གཅིག་གསོལ་བ་བཏབ་པས་གནས་ལྔ་ལས། །སྤྲུལ་པ་ལེགས་བསྟན་དང་མཚུངས་བྱིན་རླབས་རྣམས། །བདག་སོགས་འགྲོ་བ་ཀུན་ལ་འཇུག་པར་ཤོག །གཡོན་དྲུག་པའི་གཙོ་བོའི་སྐྱ་བྲིས་དང་གཞུག་ཚགས་ལྷ་ས་འཇམ་དབྱངས་དབང་པོ། འཁོར་ལྕང་སྲུང་ཁང་རིན་ཅེན་རྡོ་རྗེ། ཚོན་མདངས་མཁར་རྩེ་དགེ་བསྙེན་རྒྱལ་པོ། གཞུག་ཚགས་དབུ་ཆུང་འོ་རློན་ནས། གསེར་རིས་འཕྲང་འགོ་དཀོན་ཅོག་རྣམས་ཀྱིས་བགྱིས། གཡོན་བདུན་པ། གསང་འཛིན་ལག་ན་རྡོ་རྗེའི་ཐུགས་ཀ་རུ། །མཚོ་སྐྱེས་རྡོ་རྗེ་སྨན་པའི་རྒྱལ་པོའི་ཚུལ། །མཁའ་ལྡིང་བྱ་ནག་དུག་སྨན་ལྟོ་འགྲོ་དང༌། །རྒོད་གཡུང་ཕག་རྒོད་ཆོ་འཕྲུལ་མཐའ་ཀླས་པར། །ལྷ་སྲས་ལ་གསུངས་བསམས་པ་ལྷུན་གྲུབ་མའི། །ལས་ཚོགས་བཅུ་གསུམ་སླར་ཡང་རྔ་ཡབ་ནས། །སློབ་(༧ན) ― GLG021_Page_0631 ―
[མ་དཔེ་གཟིགས་ན་འདིར་གནོན།]
དཔོན་བོད་རྗེས་འཛིན་པར་བྱོན་ཚུལ་དང༌། །དཔལ་ལྡན་ལྷ་མོ་ནོར་བཟང་གིས་བསྐོར་བས། །ས་ནད་གཉན་རྒོད་རིམས་ཀྱི་འཚེ་བ་ཀུན། །ཚ་གྲང་ཉི་ཟླ་བརྡབས་པས་ཆེར་འཐག་ཅིང༌། །འདི་ཕྱི་བར་དོའི་གནས་སྐབས་མ་ལུས་པ། །བསམས་དོན་ལྷུན་གྱིས་འགྲུབ་པའི་བཀྲ་ཤིས་ཤོག །གཡོན་བདུན་པའི་གཙོ་བོའི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། གཞུག་ཚོགས་དབུ་འབྲིང་ལྷ་ས་འཇམ་དབྱངས་དབང་པོ། ཞིང་བཀོད་ལྕང་སྲུང་ཁང་རིན་ཅེན་རྡོ་རྗེ། གཞུག་ཚགས་རོང་པ་བསོད་རྒྱལ། གསེར་རིས་ལྷ་ས་ལགས་རྟ་མགྲིན་རྣམས་ཀྱིས་བགྱིས། གཙོ་ཐང༌། བ་སྦུའི་བུ་ག་ཀུན་ནས་མེ་དཔུང་དང༌། །ལྷན་ཅིག་ཁྲོ་ཚོགས་ཉི་མའི་ཟེར་རྡུལ་ལྟར། །འཕྲོས་པས་སྟོང་གསུམ་འབྱུང་པོའི་སྦུར་མ་རྣམས། །བསྲེག་མཛད་རྟ་མཆོག་རོལ་པ་ཁྲོ་བོའི་རྒྱལ། །ལྷ་ཁྱོད་དྲན་པའི་མོད་ལ་ཡོན་སྦྱོར་བདག །མི་ནོར་རིགས་བརྒྱུད་བཅས་པར་འཚེ་བའི་བགེགས། །གནོད་བྱེད་སྡེ་བརྒྱད་ཐམས་ཅད་ཚར་བཅད་ནས། །རྟ་སྐད་གཅིག་གི་འོག་ཏུ་ཟིལ་གྱིས་གནོན། །འབོད་གྲོགས་གྲོང་ཁྱེར་དབུས་ན་སྲིན་པོའི་རྒྱལ། །པདྨ་ཐོད་ཕྲེང་དྲག་པོའི་རོལ་གར་ཅན། །ཁྱོད་ཀྱིས་བྱང་ཆུབ་བར་དུ་རྗེས་བཟུང་སྟེ། །མཆོག་དང་ཐུན་མོང་དངོས་གྲུབ་མ་ལུས་སྩོལ། །གཙོ་བོའི་སྐྱ་བྲིས་དབུ་འབྲིང་ཕོ་བྲང་ཕུན་ཚོགས། འཁོར་གྲ་སྡིངས་མི་འགྱུར། གཞུག་ཚགས་དབུ་འབྲིང་ལྷ་ས་འཇམ་དབྱངས་དབང་པོ་དང་ལྕང་སྲུང་ཁང་རིན་ཅེན་རྡོ་རྗེ། གསེར་རིས་ལྕང་སྲུང་ཁང་རིན་ཅེན་རྡོ་རྗེ་རྣམས་ཀྱིས་བགྱིས། །འདུས་མ་བྱས་(༧བ) ― GLG021_Page_0632 ―
[མ་དཔེ་གཟིགས་ན་འདིར་གནོན།]
པ་རང་རིག་ཆོས་སྐུའི་རྩལ། །རྣམ་དག་དབྱིངས་ཀྱི་སྒྲོན་མར་ལོངས་སྐུའི་ཞིང༌། །མྱུལ་བས་བླ་མེད་ཡེ་ཤེས་ཕུན་ཚོགས་པ། །འཁྲུལ་མེད་སྤྲུལ་པའི་ཟློས་གར་མྱུར་འབྱོན་ཤོག །ཨོཌི་ཡ་ཎའི་མཁན་པོའི་ཐུགས་ཀྱི་བཅུད། །ཆོས་རྒྱལ་རཏྣ་གླིང་པའི་ཟབ་མོའི་གཏེར། །སླར་ཡང་འཛིན་ཞིང་སྤེལ་བའི་སྤྲུལ་པའི་གར། །རྩ་གསུམ་ཐུགས་རྗེའི་མཐུ་ཡིས་མྱུར་འགྲུབ་ཤོག །དྨ་ཀ་རས་དམ་ལ་ཉེར་བཏགས་པ། །མཐུ་ལྡན་བསྟན་སྲུང་རྒྱ་མཚོའི་ཚོགས་རྣམས་ཀྱིས། །གློ་བུར་བཅས་པས་རྩེ་གཅིག་གསོལ་བཏབ་པའི། །འབྲས་བུ་ཇི་བཞིན་དུས་སུ་སྨིན་པར་མཛོད། །ཅེས་པའང་དགེ་སློང་ཡེ་ཤེས་ཕུན་ཚོགས་ཀྱི་སློབ་མ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བློ་བཟང་དབང་པོའོ། །སྐྱབས་གནས་ཀུན་འདུས་པདྨ་ཐོད་ཕྲེང་རྩལ། །ཚེ་དབང་རིགས་འཛིན་གྲུབ་པའི་ཕྱག་སོར་གྱིས། །ལེགས་བཏེག་བུམ་བཟང་ལས་འོངས་མཐོ་རིས་ཆབ། །བདུད་རྩི་སྙིང་གི་དཔལ་བེར་འཁྱིལ་བར་མཛོད། །ཟིལ་གནོན་བཞད་པའི་ཆེ་མཆོག་འདུས་པ་རྩལ། །གང་ཤར་ཆོས་ཀུན་རང་སར་ཡོངས་གྲོལ་བ། །ཀ་དག་དབྱིངས་སུ་ལྷུན་གྲུབ་འོད་ལྔའི་གདངས། །སྤྲུལ་པའི་ཟེར་ཕྲེང་འཕོ་མེད་བརྟན་པར་ཤོག །སངས་རྒྱས་བསྟན་པ་རྒྱ་མཚོའི་གོས་ཅན་གཞིར། །རྒྱས་མཛད་མི་དབང་སྐུ་ཚེ་མངའ་ཐང་དང༌། །ཆབ་སྲིད་འཕེལ་ཞིང་ལུགས་གཉིས་བཀའ་ཁྲིམས་ཀྱིས། །འབངས་རྣམས་རྫོགས་ལྡན་དགའ་སྟོན་ལ་འགོད་ཤོག །རྒྱལ་དབང་པདྨའི་ལུང་བཞིན་ཤ་འུག་གི །ཟབ་ཆོས་སྒོ་ཕྱེ་སྤྲུལ་སྐུ་གཏེར་བདག་གླིང༌། །སྐུ་ཚེ་འཕྲིན་(༨ན) ― GLG021_Page_0633 ―
[མ་དཔེ་གཟིགས་ན་འདིར་གནོན།]
ལས་མཐར་ཕྱིན་རང་སྐལ་གཏེར། །བསྟན་འགྲོའི་དོན་དུ་སླར་ཡང་བཞེས་པར་ཤོག །ཚེ་རིང་གནམ་གྱི་ལུང་གིས་ཡངས་པའི་ས། །སྟོབས་ཀྱི་འཁོར་ལོས་མངོན་པར་སྒྱུར་བ་ཡིས། །དགའ་ལྡན་ཕོ་བྲང་ཆོས་དང་སྲིད་ཀྱི་བསྟན། །རྒྱ་ཧོར་བོད་ཁྱབ་འཕེལ་ཞིང་བརྟན་པར་ཤོག །གཏེར་གསར་བཤད་སྒྲུབ་ལུགས་འཛིན་སྨིན་གྲོལ་གླིང༌། །ཐོས་བསམ་སྒོམ་དང་སྲིད་ཞིའི་ཡོན་ཏན་ཚོགས། །བླ་ནས་བླར་འཕེལ་གངས་ཅན་བདེ་སྐྱིད་སྲོག །སྔ་འགྱུར་བསྟན་པའི་རྒྱན་དུ་མཛེས་པར་ཤོག །རིགས་འཛིན་རྩ་བརྒྱུད་བླ་མའི་ཐུགས་རྗེ་དང༌། །བདེ་གཤེགས་རྒྱལ་བ་ཞི་ཁྲོའི་བྱིན་རླབས་མཐུ། །འབར་མ་མ་ནིང་བསྟན་སྲུང་རྒྱ་མཚོ་ཡིས། །སྨོམ་ལམ་ཅི་བཏབ་འགྲུབ་པའི་འཕྲིན་ལས་མཛོད། །ཅེས་པའང་ཆོས་རྗེ་ཀུན་དགའ་ཚུལ་ཁྲིམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་བློ་བཟང་དབང་པོའོ། །ངག་ལ་སྨྲ་བའི་དབང་པོར་དབྱངས་ཅན་ལྷས། །གཟེངས་སྟོད་བློ་གྲོས་བཟང་པོའི་ཟ་མ་ཏོག །གཙུག་ལག་རྒྱ་མཚོར་འཁྱིལ་བས་འཇམ་དཔལ་དབྱངས། །དགའ་བའི་བཤེས་གཉེན་མཆོག་ལ་གསོལ་བ་འདེབས། །བསྐལ་པར་སྐྱིལ་མོ་ཀྲུང་གཅིག་རྡོ་རྗེའི་ཁྲིར། །བཅས་ཏེ་བདག་སོགས་ཡིད་ཅན་མཐའ་དག་གི །མགོན་སྐྱབས་གླིང་དང་དཔུང་དུ་རྟག་བཞུགས་ནས། །ཐུགས་རྗེའི་བྱིན་རླབས་སྙིང་དབུས་འཇུག་པར་ཤོག །ཆོས་བཞིན་སྤྱོད་པའི་འདོད་དོན་མ་ལུས་པ། །འབད་རྩོལ་དག་ལ་བལྟོས་མིན་ལྷུན་གྱིས་གྲུབ། །ཉིང་མཚམས་སྦྱར་ཚེ་གྲུ་འཛིན་རི་བོའི་སྤོར། །སྐྱེས་ཏེ་ཕྱག་ན་པདྨ་རྗེས་བཟུང་ཤོག །ཅེས་པ་འདི་ཡང་བླ་མ་ངག་དབང་དོན་ལྡན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །བ་སོ་སྤྲུལ་སྐུ་ངག་གི་(༨བ) ― GLG021_Page_0634 ―
[མ་དཔེ་གཟིགས་ན་འདིར་གནོན།]
དབང་ཕྱུག་མཆོག །དཀོན་མཆོག་ཉི་མའི་ཐུགས་དམ་རྟེན་ཐང་འདི། །བཞེངས་པས་སྲིད་ཞིའི་བཞེད་དོན་ལྷུན་གྲུབ་སྟེ། །འགྲོ་ཀུན་བྱང་ཆུབ་ཆེན་པོར་འདྲེན་གྱུར་ཅིག །ཅེས་པའང་སྤྲུལ་སྐུ་རིན་པོ་ཆེ་ངག་དབང་དཀོན་ཅོག་ཉི་མའི་ཐུགས་དམ་རྟེན་གྱི་རྒྱབ་ཡིག་ཤློཀ་གཅིག་པ་ཞིག་དགོས་ཚུལ་བཞིན་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཐང་པའི་གདན་ས་ངག་དབང་དཔལ་བཟང་གིས། །ཚིགས་གསུམ་ནོས་པ་མཁན་པོའི་འདྲ་འབག་འདི། །བསྐྲུན་པའི་དགེ་བས་སྐྱེ་བར་སངས་རྒྱས་ཀྱི། །རྗེས་སུ་ཞུགས་ནས་བྱ་བ་བྱེད་པར་ཤོག །བསྟན་རྩ་སོ་ཐར་འདུལ་ཁྲིམས་མཆོག་ཏུ་གཙང༌། །རླབས་ཆེན་སྤྱོད་པས་རིས་མེད་འགྲོ་རྣམས་འདྲེན། །གསང་སྔགས་ཐེག་པ་ཉེ་བའི་ལམ་བརྒྱུད་དེ། །འགྲོ་ཀུན་བཅུ་གསུམ་རྡོ་རྗེའི་སར་ཁྲིད་ཤོག །ངག་གི་དབང་ཕྱུག་ཐང་པའི་ལུང་རྟོགས་གཉིས། །སྤེལ་བར་དཔལ་ལྡན་བཟང་པོའི་སྐལ་བ་ཅན། །གྲུབ་རིགས་ཡོངས་ཀྱི་བསྟན་ལ་འཕྲིན་ལས་རྣམས། །དབྱར་མཚོ་ལྟ་བུར་འཕེལ་ཞིང་རྒྱས་པར་ཤོག །ཅེས་སྟག་ལུང་གདན་ས་པ་ཀ་དྲུག་པ་ངག་དབང་དཔལ་བཟང་གིས་ངེད་རང་གི་གཟུགས་བརྙན་འབྲི་བར་མཛད་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །རྒྱལ་ཀུན་འདུས་པ་རྔ་ཡབ་གླིང་པ་ཡི། །ཐུགས་རྗེའི་ཉི་མའི་འོད་ཀྱིས་མཚུན་ལྷའི་མུན། །མཐར་བྱས་འཆི་མེད་གྲུབ་པའི་ཕན་དང་བདེའི། །སྣང་བ་དམ་པས་ཁམས་གསུམ་ཡོངས་ཁྱབ་ཤོག །ཐ་སྙད་མདོ་སྔགས་གཞུང་ལུགས་རྒྱ་མཚོ་ཆེ། །སྨྲ་མཁས་ངག་གི་དབང་ཕྱུག་ཆོས་རྣམས་ལ། །འཆད་རྩོད་རྩོམ་པའི་དཔལ་གྱིས་དབང་འབྱོར་བ། །འཇིག་རྟེན་མིག་གཅིག་བསྐལ་བརྒྱར་ཞབས་བརྟན་ཤོག །སྒྲུབ་སྡེ་བརྒྱད་དང་འབར་མ་མ་(༩ན) ― GLG021_Page_0635 ―
[མ་དཔེ་གཟིགས་ན་འདིར་གནོན།]
ནིང་སོགས། །ཡི་དམ་ཆོས་སྲུང་རྒྱ་མཚོའི་ཚོགས་རྣམས་ཀྱིས། །རིགས་འཛིན་ཆོས་རྗེར་སྔར་གྱི་སྲི་ངན་ཀུན། །རབ་ཞི་གཡུང་དྲུང་ལྟ་བུར་བརྟན་པར་ཤོག །ལོ་ཆེན་ངག་དབང་ཆོས་དཔལ་གྱི་བརྟན་བཞུགས་ཤིག་དགོས་ཞེས་ཆོས་མཛད་ངག་དབང་འཕྲིན་ལས་ཀྱིས་བསྐུལ་བ་ལྟར་ཟ་ཧོར་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །བཻཌཱུཪྻ་མདོག་མཚན་དཔེའི་གཟི་འབར་བ། །ཐུགས་སྤྲུལ་མི་བསྐྱོད་རྡོ་རྗེ་ལྷུང་བཟེད་བསྣམས། །དཔལ་ལྡན་རྩ་བའི་རྒྱུད་ཀྱི་རྒྱལ་པོ་ཆེ། །ཚངས་པའི་དབྱངས་ཀྱིས་ལེགས་གསུངས་སྟོན་པ་པོ། །དེ་བཞིན་སྐུ་དང་ཡོན་ཏན་གསུང་སྤྲུལ་ལ། །གཡུ་ཐོག་རྙིང་མའི་གདུང་རབས་རྣམ་པར་ཐར། །སྐལ་བཟང་ཡིད་ཆེས་བསྐྱེད་པའི་ངོ་མཚར་གཏམ། །འཁྲུལ་མེད་ཞིང་བཀོད་མིག་གི་བདུད་རྩིའི་དཔྱིད། །དགེ་འབྲས་གསོ་དཔྱད་མ་དྲོས་མཚོ་ཆེན་ལས། །ལྷ་མི་དྲང་སྲོང་མུ་སྟེགས་ཚེའི་རིག་བྱེད། །ཆུ་ཀླུང་རྣམ་བཞིས་འགྲོ་བའི་དུག་གསུམ་པོ། །དེས་བསྐྱེད་ནད་ཀྱི་རྙོག་དྲི་ཡོངས་འཁྲུད་ཤོག །སྨན་རྒྱལ་རིགས་འདུས་གཡུ་ཐོག་ལེགས་བཤད་ཀྱི། །བདུད་རྩི་སྐྱེ་བར་བཏུངས་པས་ཐར་པ་དང༌། །ཀུན་མཁྱེན་ཡེ་ཤེས་ལྕགས་ཀྱི་སྲོག་རྩ་ཡིས། །འཆི་མེད་གཏན་གྱི་མདུན་མ་འགྲུབ་བྱིན་རློབས། །གསོ་རིག་རིང་ལུགས་སྲིད་མཐར་འཕེལ་ཞིང་རྒྱས། །བསྟན་དང་དེ་འཛིན་སྐྱེས་བུ་ཞབས་པད་བརྟན། །ས་སྤྱོད་སྐུ་ཚེ་ཆབ་འབངས་མངའ་ཐང་དར། །འཇིག་རྟེན་ཀུན་ཏུ་བདེ་སྐྱིད་འབྱུང་བར་ཤོག །ཡོན་སྦྱོར་དར་མོ་དཔོན་ཚང་སྨན་རམས་པའི། །འདི་ཕྱི་གཏན་གྱི་ལེགས་ཚོགས་(༩བ) ― GLG021_Page_0636 ―
[མ་དཔེ་གཟིགས་ན་འདིར་གནོན།]
མ་ལུས་པ། །བསམ་དོན་ཇི་བཞིན་འབད་མེད་ལྷུན་གྲུབ་པར། །སྨན་བླ་དྲང་སྲོང་བརྒྱུད་པས་ཐུགས་རྗེས་ཟུངས། །འགྲོ་ལ་སྲོག་འཚོ་མི་འཇིགས་སྦྱིན་པའི་སྨན། །རབ་བསྐྲུན་གཙུག་ལག་པཻཌཱུཪྻ་ཡི་འཕྲེང༌། །བཤད་སྒྲུབ་སྲད་བུར་བརྒྱུས་ནས་ཆད་མེད་དུ། །འཇིག་རྟེན་གསུམ་གྱི་བསོད་ནམས་དཔལ་འབར་ཤོག །ཅེས་དར་མོ་སྨན་རམས་པ་བློ་བཟང་ཆོས་གྲགས་ཀྱིས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་སྟོན་པ་ལྔ་ལ་གཡུ་ཐོག་གསར་རྙིང་གི་རྣམ་ཐར་གྱིས་བསྐོར་བ། རྣམ་སྲས་གཙོ་འཁོར། སྨན་བླ་དང་སྒྲོལ་དཀར་སོ་སོར་སྟོང་ཐང་རེ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །རབ་དཀར་སྐུ་སྤྲུལ་རྣམ་པར་སྣང་མཛད་ལྷ། །འཁོར་ལོ་ལྷུང་བཟེད་འཛིན་པས་བཤད་པའི་རྒྱུད། །ཇི་ལྟར་སྩལ་བའི་ཚིགས་དོན་མ་ལུས་པ། །སྐལ་ལྡན་འགྲོ་བ་ཀུན་གྱིས་རྟོགས་པར་ཤོག །ཡོན་ཏན་སྤྲུལ་པ་རིན་ཅེན་འབྱུང་ལྡན་ཆེ། །ནོར་བུ་ལྷུང་བཟེད་བསྣམས་པས་མན་ངག་རྒྱུད། །གསུངས་ལྟར་འགྲོ་བའི་གཙུག་ནས་རྐང་མཐིལ་བར། །ནད་རྣམས་འཇོམས་པའི་སྨན་གྱི་ལྗོན་པར་ཤོག །མདོག་དམར་སྣང་མཐའ་གསུང་སྤྲུལ་ཞུ་བ་པོ། །པདྨ་ལྷུང་བཟེད་འཛིན་པས་སླད་མར་ཡང༌། །རིགས་ལྔ་འདུས་པས་སྨན་གྱི་བླ་མ་ལ། །ཆོས་འཁོར་ཆད་མེད་རྟག་ཏུ་བསྐུལ་གྱུར་ཅིག །མདོག་ལྗང་འཕྲིན་ལས་སྤྲུལ་པ་དོན་གྲུབ་རིགས། །རྒྱ་གྲམ་ལྷུང་བཟེད་འཛིན་པས་ཕྱི་མའི་རྒྱུད། །གསུངས་པ་ཇི་བཞིན་སྨན་དཔྱད་ཐོག་མདའ་ཡིས། །ནད་གདོན་བྲག་རི་ཕྱེ་མར་འཐག་པར་ཤོག །བརྒྱ་ཕྲག་ཉི་མའི་(༡༠ན) ― GLG021_Page_0637 ―
[མ་དཔེ་གཟིགས་ན་འདིར་གནོན།]
འོད་ཀྱང་ཟིལ་གནོན་པ། །ངལ་བསོས་པོ་ཡི་ཞལ་དང་ནེའུ་ལེའི་ཁར། །བབས་པའི་ཕུན་ཚོགས་འདོད་དགུའི་ཆར་ཆེན་པོས། །དབུལ་བའི་སྡུག་བསྔལ་མཐའ་དག་དྲུངས་འབྱིན་ཤོག །ཐུགས་རྗེ་སྙིགས་མའི་དུས་འདིར་ཆེར་ལྷག་པ། །སྨན་གྱི་བླ་མའི་སྐུ་བརྙན་སྟོང་ཕྲག་གི །གྲངས་ལྡན་བཞེངས་པས་སྲིད་དང་ཞི་བ་ཡི། །བདེ་སྐྱིད་དཔལ་ལ་སྤྱོད་པར་བྱིན་གྱིས་རློབས། །སྤྱན་བདུན་གཟིགས་པའི་མོད་ལ་ཉི་བུའི་དཔུང༌། །མཁའ་མཐར་བསྐྲད་དེ་འཆི་མེད་བདུད་རྩིའི་སྲོག །འཚོ་བ་དོན་ལྡན་སྟེར་བའི་སྟོང་ཕྲག་སྐུ། །བཞེངས་མཐུས་ཚེ་སྦྱིན་ལྷ་མོས་རྗེས་ཟུངས་ཤིག །ཚེ་དཔག་མེད་མགོན་ཕྱག་གི་བུམ་བཟང་ལས། །འཆི་མེད་ཟིལ་མངར་ཆུ་རྒྱུན་རབ་སྦྲེངས་ཏེ། །སྤྲུལ་སྐུ་ངག་དབང་ཀུན་དགའ་བདེ་ལེགས་ལ། །མི་འགྱུར་གཡུང་དྲུང་ལྟར་བརྟན་དབང་བསྐུར་སྩོལ། །མཁའ་འགྲོ་སྡེ་ལྔ་སྣང་སྲིད་ལྷ་འདྲེ་ཡིས། །ཞིང་གཞན་འདྲེན་པའི་བསུན་མ་ཕྱིར་བཟློག་ནས། །དཔལ་ལྡན་བླ་མ་རྡོ་རྗེ་མཁའ་འགྲོའི་སྐུར། །སྲ་བརྟན་ཁྲི་ལ་གཡོ་བ་མེད་པར་ཤོག །བདེ་བ་ཅན་དང་པདྨ་འོད་ཞིང་མགོན། །ཚེ་མཐའ་ཡས་པའི་ངོ་བོ་ཐོད་ཕྲེང་རྩལ། །ཡི་དམ་རྒྱལ་བ་རྒྱ་མཚོའི་ཚོགས་རྣམས་ཀྱིས། །བྱིན་རླབས་ཐུགས་རྗེའི་སྤྲིན་ཕུང་དབབ་ཏུ་གསོལ། །མཚན་བཅས་མཚན་མེད་རྣམ་པར་དཀར་བ་ཡི། །རྒྱ་ཆེ་རིམ་གྲོའི་ས་བོན་ཡོངས་སྨིན་ལས། །སྐུ་ཚེའི་སྙེ་མ་དར་དྲག་འབྲས་བུ་ལ། །སྐལ་བཟང་གདུལ་བྱ་ཀུན་གྱིས་ལོངས་སྤྱོད་ཤོག །ཐུབ་བསྟན་སྲུང་བར་ཞལ་བཞེས་ཡེ་ཤེས་མགོན། །ལྕམ་དྲལ་དམ་ཅན་རྒྱ་མཚོའི་ཚོགས་རྣམས་(༡༠བ) ― GLG021_Page_0638 ―
[མ་དཔེ་གཟིགས་ན་འདིར་གནོན།]
ཀྱིས། །ཡིད་སྲུབས་སྡེ་ལས་རྣམ་པར་རྒྱལ་བ་ཡི། །རུ་མཚོན་སྲིད་རྩེར་བསྒྲེང་བའི་འཕྲིན་ལས་མཛོད། །ཅེས་གནས་རྙིང་སྤྲུལ་པའི་སྐུར་བརྗོད་དོན་འདི་ལྟ་བུ་ཡོད་པའི་བརྟན་བཞུགས་ཡང་ཡང་འབུལ་དགོས་ཚུལ་ཐང་སྲས་དང༌། གནས་རྙིང་གི་རྟ་སྒོ་ལྷ་བཙན་གཉིས་ཀྱིས་ལུང་བསྟན་ལྟར་དྲུང་ཆེན་དང་རི་བོ་བདེ་ཆེན་གྱི་དབུ་མཛད་ཀྱིས་བསྐུལ་མ་བྱུང་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །དགེ་འདིས་དཀོན་ཅོག་རྣམ་གསུམ་ཐུགས་རྗེའི་མཐུས། །དགའ་ལྡན་ཕོ་བྲང་ཆོས་དང་སྲིད་ཀྱི་བསྟན། །དེ་འཛིན་ངག་དབང་བློ་བཟང་རྒྱ་མཚོའི་སྡེ། །བསྐལ་བརྒྱར་ཞབས་ཟུང་རྡོ་རྗེ་ལྟར་བརྟན་ཤོག །ས་ཡི་དབང་ཕྱུག་སངས་རྒྱས་རྒྱ་མཚོ་ཡི། །སྐུ་ཚེ་མངའ་ཐང་ཆབ་སྲིད་མ་ལུས་པ། །རྣམ་མང་ཐོས་པའི་སྲས་ལ་འགྲན་ནུས་པར། །བླ་མ་ཡི་དམ་སྲུང་མས་བྱིན་གྱིས་རློབས། །ལྷག་བསམ་སྟོན་ཟླ་ལྟར་དཀར་རྒྱུ་སྦྱོར་བ། །འདིར་སྣང་ཚེ་རིང་ནད་མེད་བདེ་སྐྱིད་འཕེལ། །སྐྱེ་བར་ལྷ་མིའི་རྟེན་བཟང་ཉེར་བརྒྱུད་ནས། །བླ་མེད་བྱང་ཆུབ་མྱུར་དུ་ཐོབ་པར་ཤོག །ཅེས་པ་འདིའང་དར་མོ་སྨན་རམས་པ་བློ་བཟང་ཆོས་གྲགས་རིས་མེད་ལ་མང་བཀོལ་དུས་ཚོགས་འདོན་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཟ་ཧོར་རིགས་ལས་ཚངས་སྲས་མ། །བཞད་པའི་རྡོ་རྗེའི་འདྲ་འབག་འདི། །བསྐྲུན་པས་ངག་དབང་ཀུན་ཏུ་དགའ། །ཕུན་ཚོགས་བདེ་ལེགས་བརྟན་ཁྱབ་ཤོག །བརྒྱ་ཕྲག་ཟླ་ཞུན་(༡༡ན) ― GLG021_Page_0639 ―
[མ་དཔེ་གཟིགས་ན་འདིར་གནོན།]
བྱུགས་པས་བསྒྲུན་མིན་པ། །མཚར་སྡུག་ལང་ཚོའི་དཔལ་གྱི་འཇོ་སྒེག་ཅན། །འཆི་མེད་ཚེ་དཔལ་མཆོག་སྦྱིན་ཕྱག་རྒྱ་ཡིས། །འགྲོ་ཀུན་རྡོ་རྗེའི་སྲོག་ཏུ་འགྲུབ་བྱིན་རློབས། །ལྔ་རིག་གཞུང་བརྒྱར་བརྗོད་པ་རྣམ་དག་ངག །དབང་ཕྱུག་བློ་ཡི་མ་དྲོས་ཀླུང་ཆེན་ལས། །ལེགས་བཤད་རྣམ་བཞིའི་ཆུ་བོ་སྐལ་བཟང་གི །ཐོས་འཛིན་རྒྱ་མཚོའི་ཀློང་དུ་འབབ་པར་ཤོག །ཕས་རྒོལ་འཁྱོག་ཚིག་མཚོན་ཆར་འཇིགས་མེད་པ། །ལུང་རིགས་བཙན་པོའི་གོ་ཆས་ཐུབ་བསྟན་སྲོག །ཡོངས་སྐྱོབ་འཁོར་ལོ་གསུམ་གྱི་ལང་ཚོའི་འཕྲུལ། །སྡེ་བཞིའི་སྒོ་འཕར་རྟག་ཏུ་འབྱེད་པར་ཤོག །འཇམ་དབྱངས་མཁྱེན་པའི་རལ་གྲིས་མ་རིག་རྒྱ། །ཕྲལ་བས་མུན་སངས་དགའ་སྟོན་སྣང་བའི་དཔྱིད། །ཐར་ལམ་གསལ་བྱེད་མཛའ་བཤེས་དཔུང་གཉེན་མཆོག །རྡོ་རྗེའི་ཁྲི་ལ་ནམ་ཡང་གཡོ་མེད་ཤོག །རྒྱལ་ཀུན་ངོ་བོ་རྗེ་བཙུན་བཙོང་ཁ་པའི། །བཤད་སྒྲུབ་བསྟན་པ་རབ་སྤེལ་ཆོས་དང་སྲིད། །ཟུང་འབྲེལ་ཁྲིམས་ཀྱིས་གྱེན་འདེགས་མི་ཡི་དབང༌། །སྐུ་ཚེ་མངའ་ཐང་ཆབ་འབངས་དར་བར་ཤོག །ཉོན་མོངས་དགྲ་བཅོམས་སྦས་ཏི་ཆེན་པོ་ཡིས། །ལེགས་བཏབ་སྐྱེ་བ་ལུང་གི་ཆོས་ཀྱི་སྡེ། །བྱམས་མགོན་བསྟན་པ་མ་ཤར་དེ་སྲིད་དུ། །སཱ་ལའི་སྨན་ལྗོངས་མཛེས་པའི་རྒྱན་དུ་ཤོག །ཀུན་བཟོད་རབ་ཡངས་ཕ་མཐའ་བསོད་ནམས་ཀྱི། །དོ་རར་ཡོངས་སུ་ཆུད་པ་འཇིག་རྟེན་འདིར། །ནད་མཚོན་དབུལ་སོགས་ལྔ་བདོའི་ཆད་པ་རྣམས། །ཉེར་ཞི་སིམ་པའི་ཚོར་བ་རྟག་མྱོང་ཤོག །འདིས་མཚོན་དུས་གསུམ་ཡོངས་བསགས་རྣམ་དཀར་གྱི། །ས་བོན་(༡༡བ) ― GLG021_Page_0640 ―
[མ་དཔེ་གཟིགས་ན་འདིར་གནོན།]
སྨོན་ལམ་དྲོད་གཤེར་གྱིས་སྨིན་ཏེ། །ས་བཅུ་ལམ་ལྔ་ཛམྦུ་ཏྲི་ཤའི་འབྲས། །ཀུ་བའི་གསེར་གྱི་སྙེ་མར་འགྱུར་བར་ཤོག །རྣམ་འདྲེན་དེའི་གསུང་ལེགས་འཛིན་སྐྱེ་འཕགས་ཚོགས། །ལྷ་དང་དྲང་སྲོང་བདེན་པའི་ཚིག་ལ་དབང༌། །སླུ་མེད་རྟེན་ཅིང་འབྲེལ་བར་འབྱུང་བའི་མཐུས། །རེ་བའི་འདོད་དོན་མ་ལུས་འགྲུབ་པར་ཤོག །ཅེས་བདེན་པ་བརྗོད་པའི་ཚིགས་སུ་བཅད་པ་འདི་ནི་ཁྱམས་པ་སློབ་དཔོན་བཀྲ་ཤིས་ཚུལ་ཁྲིམས་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །པདྨ་འདབ་རྒྱས་རྗེས་འགྲོ་དངུལ་དཀར་སྡེར། །སྲང་གྲངས་བཅུ་བཞི་ལས་གྲུབ་བ་ལིཾ་སྣོད། །དཔལ་འབྱོར་རྒྱ་མཚོས་རྩ་གསུམ་སྤྱན་སྔ་རུ། །ཕུལ་དགེས་དོན་གཉིས་ལྷུན་གྱིས་གྲུབ་པར་ཤོག །ཅེས་ཕན་བདེ་ལེགས་བཤད་གླིང་གི་དགེ་སྐོས་ཐོག་སྤྱི་རྫས་སུ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །སངས་རྒྱས་ཀུན་དངོས་རྗེ་བཙུན་ཙོང་ཁ་པའི། །སྐུ་བརྙན་དགེ་སློང་དཔལ་འབྱོར་རྒྱ་མཚོ་ཡིས། །གསེར་ཟངས་ལས་གྲུབ་བཞེངས་པས་ཚེ་རབས་ཀུན། །འབྲལ་བ་མེད་པར་རྗེས་སུ་འཛིན་པར་ཤོག །ཅེས་པའང་ཟ་ཧོར་བནྡེས་བཀོད། །སྡོམ་བརྩོན་དཔལ་འབྱོར་རྒྱ་མཚོས་གསེར་ཟངས་རྒྱུར། །ཉེར་བཞེངས་འཇམ་དབྱངས་དགའ་བའི་བཤེས་གཉེན་གཟུགས། །བསྐྲུན་པས་དད་པའི་རིན་ཅེན་ཐེམ་སྐས་ལ། །འཛེགས་ནས་ངེས་ལེགས་གྲོང་དུ་བགྲོད་པར་ཤོག །ཅེས་པའང་ཟ་ཧོར་བནྡེས་བཀོད། །མཁྱེན་བརྩེ་ནུས་(༡༢ན) ― GLG021_Page_0641 ―
[མ་དཔེ་གཟིགས་ན་འདིར་གནོན།]
མངའ་སངས་རྒྱས་གར་གྱི་དབང༌། །བདེན་གཉིས་ཆོས་ཕུང་དབྱངས་སྙན་ཚེ་ཡི་གཟུངས། །རིག་གྲོལ་དཔལ་ལྡན་རྒྱལ་སྲས་དགེ་འདུན་ཏེ། །མཆོག་གསུམ་ཐུགས་རྗེའི་གཟི་འོད་དེང་འབར་མཛོད། །གཙུག་ལག་བྱེ་བར་བརྗོད་པ་རྣམ་དག་ངག །དབང་ཕྱུག་གྲུབ་པའི་བློ་གྲོས་སྐལ་བཟང་གི །རྣམ་འདྲེན་བཞི་པའི་རིང་ལུགས་རྒྱ་མཚོའི་གཏིང༌། །དཔོགས་ནུས་འཇིགས་མེད་བཤེས་གཉེན་རྟག་བརྟན་ཤོག །ཐོས་བསམ་སྒོམ་པའི་གོ་ཆ་བཙན་པོ་ཅན། །ཐུབ་བསྟན་རུ་བཞིའི་དཔུང་གིས་བདུད་ཚོགས་ཀྱི། །གཡུལ་ལས་རྒྱལ་བའི་ལང་ཚོ་དར་དྲག་པའི། །སྡེ་བཞིའི་སྒོ་འཕར་འབྱེད་ཕྱིར་སླུ་མེད་ཤོག །མ་རིག་མུན་སངས་ཆོས་ནོར་འདོད་ཐར་ལ། །འཇུག་པའི་བློ་རྒྱས་ལུགས་གཉིས་རྒྱ་མཚོའི་མཐའ། །མཁྱེན་དཔྱོད་རྫིངས་ཀྱིས་བརྒལ་ནས་བདེ་སྐྱིད་དབྱིག །འདྲེན་པའི་ས་དབང་གཡུང་དྲུང་ལྟར་བརྟན་ཤོག །དགའ་བ་བརྒྱ་པའི་རྗེས་འགྲོ་རྫོགས་ལྡན་གྱི། །རྣམ་ཐར་སྒོ་བཞི་ཕྱེ་བའི་ཕོ་བྲང་ཆེའི། །ཁྲིམས་གཉིས་གསེར་འཁོར་ཛམྦུའི་ལྗོན་པ་ཡིས། །མཚན་པའི་ཀུན་བཟོད་ལྟོ་བར་རྟག་བསྒྱུར་ཤོག །ཉི་མའི་གཉེན་གྱི་ལུང་རྟོགས་དམ་པའི་ཆོས། །འཁྲུལ་བྲལ་ཚུལ་བཞིན་འཛིན་པའི་མདོ་རྒྱུད་སྡེ། །ཀློག་དང་སྤོང་བ་ལས་ཀྱི་འཁོར་ལོའི་རྒྱུན། །སྲིད་མཐའ་དེ་སྙེད་ཚད་མེད་འཕེལ་བར་ཤོག །དབུལ་ཕོངས་འཐབ་རྩོད་ནད་མཚོན་དུས་མིན་དུ། །འཆི་སོགས་ཆེར་སྙིགས་ལྔ་བདོའི་ཆད་པའི་མུན། །ཕ་མཐར་བྱེད་པ་ལེགས་བྱས་རྟ་བདུན་ཅན། །འཇིག་རྟེན་ཁམས་ཀྱི་དགུང་དུ་འཆར་བར་ཤོག །སྒོ་གསུམ་ཉེར་(༡༢བ) ― GLG021_Page_0642 ―
[མ་དཔེ་གཟིགས་ན་འདིར་གནོན།]
བདེ་སྨན་སྔགས་མཐུ་ནུས་འགྲུབ། །ལྷ་མིན་འབྱུང་པོ་རང་རྒྱུད་ཞི་ཞིང་དུལ། །ལོ་ཏོག་རྩི་བཅུད་ཚོང་གི་ཁོ་སྤོགས་འཕེལ། །སྲིད་འབྱོར་ཡོངས་འདུའི་སྙེ་མ་གཡུར་ཟ་ཤོག །མང་ཐོས་དོན་བསམ་སྒོམ་པའི་ཐེམ་སྐས་ལ། །ངེས་འབྱུང་བྱང་སེམས་སྟོང་ཉིད་བསྐྱེད་རྫོགས་ཀྱི། །གོམ་སྟབས་ལྷོད་པོར་འཛེགས་ནས་སྐུ་བཞི་དང༌། །ཡེ་ཤེས་ལྔ་ལྡན་གྲོང་དུ་བགྲོད་པར་ཤོག །འདིའི་ཆེད་ཡོན་སྦྱོར་གྱིས་མཚོན་བདག་གཞན་གྱི། །དུས་གསུམ་བསགས་པའི་ལེགས་བྱས་ཇི་སྙེད་པ། །ནམ་མཁའི་མཐས་ཀྱང་གཞལ་དཀའི་ལུས་ཅན་རྣམས། །སྟོབས་བཅུ་མངའ་བའི་གོ་འཕང་ཐོབ་རྒྱུར་བསྔོ། །དཀོན་ཅོག་རིན་ཅེན་རྣམ་གསུམ་ཐུགས་རྗེ་དང༌། །བཅུད་ལྡན་རིག་འཛིན་དྲང་སྲོང་བདེན་པའི་ཚིག །རྟེན་འབྲེལ་སླུ་མེད་མཐུ་ཡིས་འགྲོ་ཀུན་ལ། །ཡོངས་ཁྱབ་ཕན་བདེའི་བཀྲ་ཤིས་འདོད་འཇོ་ཤོག །ཅེས་པ་འདིའང་དབུས་གཙང་གི་གྲུབ་མཐའ་རིས་སུ་མ་ཕྱེ་བ་མཐའ་དག་གིས་མགྲིན་གཅིག་ཏུ་བདེན་ཚིག་བརྗོད་བདེ་བ་ཞིག་བརྩམས་ནས་འཛུགས་དགོས་ཞེས་རྒྱུད་སྡེ་རྒྱ་མཚོའི་མངའ་བདག་ན་ལནྡཱའི་བཅོ་བརྒྱད་ཆོས་རྗེ་མཁྱེན་རབ་བྱམས་པ་ངག་དབང་ལྷུན་གྲུབ་ཀྱིས་བཀྲས་བཏགས་ཉིན་མོ་བདེ་ལེགས་མ། གོས་ཕྱི་ནང་རྟ་སོགས་དགུ་ཚན་གྱི་མཎྜལ་དང་བཅས་འབད་རྩོལ་ཆེན་པོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེ་ཚངས་སྲས་བཞད་པའི་རྡོ་རྗེ་ལྕགས་མོ་བྱ་ལོ་ཆོ་འཕྲུལ་གྱི་ཟླ་བའི་ཡར་ཚེས་དགེ་བར་ཕོ་བྲང་དམར་པོ་རིར་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བས་བགྱིས་པ་སིདྡྷི་རསྟུ། །ནམ་མཁའི་(༡༣ན) ― GLG021_Page_0643 ―
[མ་དཔེ་གཟིགས་ན་འདིར་གནོན།]
གཟུགས་རྣམས་གཞན་དུ་མ་གྱུར་བར། །མི་ཤིགས་སྐྱིལ་ཀྲུང་གཅིག་བཅས་ཚེ་དཔག་མེད། །མཛོད་སྦུའི་ཟེར་གྱིས་སྲིད་འཁྱམས་འགྲོ་ཀུན་གྱི། །དུས་མིན་འཆི་བའི་སྨག་རུམ་མཐར་སྐྲོད་ཅིག །མགྲིན་པར་འཇམ་མགོན་གཞོན་ནུའི་འཇོ་སྒེག་ལ། །ཚངས་སྲས་ལྷ་མོས་ཉེར་འཁྱུད་བཞད་པའི་སྒྲ། །གཞོམ་མེད་རྡོ་རྗེའི་གླུར་ལེན་ངག་གི་དབང༌། །བློ་གསལ་སྐལ་བཟང་རྒྱ་མཚོ་བརྟན་པར་ཤོག །རྫོགས་སངས་རྒྱས་བསྟན་རྒྱ་མཚོའི་མཐའ་ཀླས་པར། །བླ་ནས་བླར་འདེགས་གནམ་སའི་དཀྱིལ་འཁོར་ལ། །དབང་ཕྱུག་སྐུ་ཚེ་མངའ་ཐང་ཆབ་སྲིད་གང༌། །རྣམ་ཐོས་བུ་ཡི་མཆེད་པོར་འགྲན་ནུས་ཤོག །བཀའ་བརྒྱུད་གཙུག་རྒྱན་དཔལ་ལྡན་སྒམ་པོ་པའི། །སྤྲུལ་སྐུ་རིམ་པར་བྱོན་རྣམས་མགོན་ཁྱོད་དང༌། །བྲལ་མེད་མཐའ་ཀླས་རྣམ་དཀར་འཕྲིན་ལས་རྒྱུན། །རྒྱ་ཆེར་སྤེལ་བའི་བཞེད་དོན་ལྷུན་གྲུབ་ཤོག །བཤད་སྒྲུབ་བསྟན་པ་ཁ་བའི་སྨན་ལྗོངས་འདིར། །དབྱར་གྱི་ཆུ་གཏེར་ལྟ་བུར་རབ་འཕེལ་ཞིང༌། །འཇིག་རྟེན་ཁམས་སུ་རྫོགས་ལྡན་གསར་པ་ཡི། །བདེ་སྐྱིད་རྩེ་དགའ་ཁོང་ནས་རྒོད་པར་ཤོག །ཀུན་ལ་སྙོམས་པར་འཇུག་པ་མཆོག་གསུམ་གྱི། །ཐུགས་རྗེ་ཉི་མའི་དངོས་བརྒྱ་འབར་བའི་ལུས། །འཇིག་རྟེན་སྤྱི་དང་ཁྱད་པར་རྒྱ་ཧོར་བོད། །སྐྱེ་རྒུའི་བསོད་ནམས་མཁའ་ལ་འཆར་བར་ཤོག །ཅེས་ངེད་རང་དང་སྡེ་པའི་རིང་འཚོ་སྤྲུལ་སྐུ་རིན་པོ་ཆེ་ཉིད་ངོས་ཀྱི་གམ་དུ་འཁྲུངས་ཤིང་ཇི་ལྟར་བཞེད་པའི་འཕྲིན་ལས་བསྒྲུབ་ནུས་པའི་བདེན་ཚིག་སྨོན་ལམ་དང་བཅས་པ་ཞིག་དྭགས་ནང་གི་ཆོས་སྡེ་ཁག་དང་(༡༣བ) ― GLG021_Page_0644 ―
[མ་དཔེ་གཟིགས་ན་འདིར་གནོན།]
རྒྱལ་པོར་མང་ཇ་འགྱེད་བཅས་གང་ལྕོགས་ཐོག་འཛུགས་རྩིས་ཡིན་པས་རྩོམས་ཤིག་པར་དྭགས་ལྷ་སྒམ་པོ་ནས་སྤྲུལ་སྐུ་རིན་པོ་ཆེ་བློ་བཟང་འཕྲིན་ལས་རྣམ་རྒྱལ་ངེས་དོན་གྲུབ་པའི་ཤིང་རྟ་མཆོག་གི་སྡེའི་གསུང་གིས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རྩ་གསུམ་བྱིན་རླབས་རྟེན་འབྲེལ་སླུ་མེད་མཐུས། །ངག་དབང་བློ་བཟང་རྒྱ་མཚོ་བསྐལ་བརྒྱའི་བར། །རྡོ་རྗེ་ལྟར་བརྟན་ཐུགས་རྗེ་བདག་སྙིང་ལ། །ཞུགས་ནས་འདི་ཕྱིའི་དོན་གཉིས་ལྷུན་གྲུབ་ཤོག །ཅེས་པའང་གཞིས་ཀ་བ་བློ་བཟང་ཆོས་ལྡན་གྱི་ངག་འདོན་དུ་བསྐུལ་བ་ལྟར་ཟ་ཧོར་གྱི་བནྡེས་བཀོད། ཕན་བདེ་ལེགས་བཤད་གླིང་དུ་ཉེར་གསུམ་སྲང༌། །གྲངས་ལྡན་དངུལ་ཀོང་བློ་བཟང་ཐོགས་མེད་ཀྱིས། །ཕུལ་བས་སྲིད་ཞིའི་མུན་སེལ་ཡེ་ཤེས་ཆེ། །སྒྲོན་མེས་ཟུང་འཇུག་མངོན་སུམ་མཐོང་བར་ཤོག །ཅེས་པའང་རབ་འབྱམས་གྲྭ་སྐོར་གྱི་ཚེ་དགོས་ཚུལ་ལྟར་ཟ་ཧོར་གྱི་བནྡེས་བཀོད། །མཚན་དཔེ་ཉི་མ་སྟོང་གི་གཟི་བྱིན་གྱིས། །འགྲོ་ལ་ཕན་བདེའི་སྣང་བ་ཆེས་དཀར་བས། །ཆེར་སྙིགས་ལྔ་བདོའི་སྨག་རུམ་མཐར་མཛད་པ། །ཤཱཀྱའི་སྐྱེས་མཆོག་མཐོང་ཐོས་དྲན་ཀུན་གྲོལ། །མགོན་པོ་ཁྱོད་དང་མཉམ་པའི་སྤང་རྟོགས་ཀྱི། །ཡོན་ཏན་ཕ་རོལ་སོན་ཀྱང་གདུལ་བྱའི་ངོར། །ཐེག་དམན་དགྲ་བཅོམ་ཚུལ་འཛིན་གནས་བརྟན་ཆེ། །བཅུ་དྲུག་བསྟན་པའི་མཐའ་རྙེད་མངོན་སུམ་བཞུགས། །རྒྱལ་དང་དེ་སྲས་སློབ་མར་བཅས་པ་རྣམས། །(༡༤ན) ― GLG021_Page_0645 ―
[མ་དཔེ་གཟིགས་ན་འདིར་གནོན།]
རིས་མེད་སྐྱེ་རྒུར་བརྩེ་ཡང་ཞི་བའི་དབྱིངས། །གཟུགས་སྐུ་མ་བསྡུས་འདོད་ཁམས་གནས་སོ་སོར། །ལེགས་བཞུགས་ཟུག་རྔུ་འབྱིན་ཅིང་སིམ་པ་སྟེར། །དེ་ཕྱིར་ཐུབ་དབང་གནས་བརྟན་བཅུ་དྲུག་གི །སྣང་བརྙན་བྲིས་ཐང་བདུན་ལ་ཉེར་ཚང་བ། །ལྷ་བཟོ་ཆོས་སྐྱོང་སྤུན་དང་མར་བཅས་པས། །རྣམ་དག་བསམ་དང་སྦྱོར་བས་བཞེངས་པའི་མཐུས། །དུས་ཀྱི་ཆོས་ཉིད་གྱུར་བ་དཔལ་ལྷ་ཡི། །བགྲང་རིང་སྐྱེ་བར་རབ་བསགས་སྡིག་ལྟུང་དང༌། །ལས་ཉོན་འབྲས་བུ་བརྣག་དཀའི་སྡུག་བསྔལ་དྲི། །ཐུགས་རྗེ་ཆུ་རྒྱུན་གྱིས་བཀྲུས་དག་པར་ཤོག །ཚེ་རབས་ཀུན་ཏུ་ལྷ་མིའི་རྟེན་བཟང་མཆོག །ཉེར་བརྒྱུད་འཁོར་བའི་རྒྱ་མཚོ་ཆེན་པོ་ལ། །ཐོས་བསམ་སྒོམ་པའི་རྫིངས་ཀྱིས་ལེགས་བསྒྲལ་ནས། །མྱང་འདས་ནོར་བུའི་གླིང་དུ་བགྲོད་པར་ཤོག །རྒྱུ་སྦྱོར་འཁོར་བཅས་གནས་སྐབས་ལྷ་མི་ཡི། །བདེ་སྐྱིད་དཔལ་ལ་སྤྱོད་ཅིང་རིང་མིན་དུ། །རྣམ་པ་ཐམས་ཅད་མཁྱེན་པའི་གོ་འཕང་མཆོག །མངོན་གྱུར་འགྲོ་བ་མ་ལུས་འདྲེན་པར་ཤོག །ཡིད་དགའ་ཆོས་འཛིན་གནས་སུ་རིན་པོ་ཆེའི། །ཅོད་པན་དབུ་ལ་བཅིངས་ནས་རྒྱལ་ཚབ་ཏུ། །བཞུགས་ཀྱང་བསྐལ་བཟང་རྣམ་འདྲེན་ལྔ་པ་རུ། །རིང་མིན་དབུས་འགྱུར་འཆང་འབྱོན་མ་ཕམ་མགོན། །ཁྱོད་ཀྱི་དམ་བཅའི་གཟུངས་སྔགས་ཐོས་སོ་ཅོག །གནས་ངན་ལས་དྲངས་བྱང་ཆུབ་ལ་འགོད་པར། །ཞལ་འཆེས་རྡོ་བའི་རི་མོ་སླུ་མེད་དུ། །མི་འགྱུར་དཔྱོད་ལྡན་མཐའ་དག་སོམ་ཉི་བྲལ། །བརྒྱ་ཕྲག་སྣང་བརྙན་རས་དཀར་རྫིང་བུའི་ངོས། །འཆར་བྱེད་ཁྱོད་ཞལ་(༡༤བ) ― GLG021_Page_0646 ―
[མ་དཔེ་གཟིགས་ན་འདིར་གནོན།]
ནམ་མཁའི་ཟླ་བ་ཡི། །དཔལ་ལྷ་ངན་སོང་གསུམ་མུན་ལ་འབྱོན་པ། །རབ་གསལ་མངོན་མཐོའི་ཀུནྡ་བཞད་བྱིན་རློབས། །དམིགས་ཡུལ་ཡོན་སྦྱོར་གྱིས་མཚོན་མཁའ་མཉམ་གྱི། །སེམས་ཅན་མཐའ་དག་སྲིད་ཞིའི་མཐའ་གཉིས་སུ། །མ་ལྷུངས་དབུ་མར་གནས་པ་རྫོགས་སངས་རྒྱས། །ཐོབ་ཕྱིར་བྱམས་མགོན་ཕྱག་རིང་གཙུག་རྐྱོང་མཛོད། །ཅེས་པའང་ལྷ་བཟོ་བ་ཆོས་སྐྱོང་ནང་མིར་བཅས་པས་ཚེ་འདས་དཔལ་ལྷའི་དོན་དུ་ཐུབ་དབང་ལ་གནས་བཅུས་བསྐོར་བ་དང་མ་ཕམ་མགོན་པོའི་བརྒྱ་ཐང་བཞེངས་པར་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ནམ་མཁའི་རང་བཞིན་གཞན་དུ་མ་གྱུར་བར། །མཚན་དཔེའི་སྣང་བརྙན་མངོན་སུམ་རབ་གསལ་བ། །བདེ་ལྡན་ཞིང་ན་བཞུགས་ཀྱང་འཛམ་གླིང་འདིར། །ཐུགས་རྗེས་ཉེར་གཟིགས་སྤྱན་དཀྱུས་རིང་པོར་ཁྱོངས། །པདྨ་རཱ་གའི་མདངས་འཛིན་ཧྲཱིཿཡིག་མཐར། །གཟུངས་སྔགས་འཁོར་ལོ་འོད་ཟེར་དྲ་བ་ཅན། །ཀུན་ཁྱབ་སྣང་བས་དུས་ཀྱི་ཕོ་ཉའི་མུན། །མཐར་བྱས་སྐྱེ་རྒུ་མ་ལུས་དབུགས་ཕྱུངས་ཤིག །རྨད་བྱུང་ཐུགས་རྗེ་བསྐུལ་བའི་གསོལ་འདེབས་རྔ། །ལྷག་བསམ་རྣམ་དག་དབྱུ་གུས་བསྣུན་པའི་མཐུས། །ངག་དབང་བློ་བཟང་རྒྱ་མཚོ་མགོན་ཁྱོད་དང༌། །དབྱེར་མེད་རིགས་ཀྱི་བདག་པོར་བརྟན་པར་ཤོག །རྫོགས་སངས་རྒྱས་དངོས་འཇམ་དཔལ་སྙིང་པོའི་བསྟན། །འདེགས་ལ་མཁྱེན་དཔྱོད་མཁའ་ལྟར་རྒྱ་ཆེ་ཞིང༌། །མཚོ་ལྟར་གཏིང་ཟབ་གནམ་(༡༥ན) ― GLG021_Page_0647 ―
[མ་དཔེ་གཟིགས་ན་འདིར་གནོན།]
སའི་དབང་ཕྱུག་མཆོག །གཞོམ་མེད་རྡོ་རྗེའི་ངོ་བོར་ལྷུན་གྲུབ་ཤོག །སྐུ་ཚེ་རིགས་བརྒྱུད་ཕུན་ཚོགས་དཔལ་འབྱོར་ཀུན། །གསེར་གྱི་འཁོར་ལོ་སྒྱུར་རྒྱལ་ཇི་བཞིན་གྱི། །ཁྲིམས་གཉིས་གཉའ་ཤིང་མངའ་འབངས་ཕྲག་པ་ལ། །ལྕི་བའི་རྫོགས་ལྡན་དུས་ཀྱི་རྗེས་འགྲོར་ཤོག །ཐུབ་པས་ལེགས་གསུངས་བགྲང་ཡས་མདོ་རྒྱུད་ཆོས། །འགལ་མེད་བྱང་ཆུབ་བསྒྲུབ་ལ་གདམས་པ་རུ། །ངེས་པར་འཆར་བ་ཀུན་མཁྱེན་བཙོང་ཁ་པའི། །རིང་ལུགས་ཐོས་བསམ་སྒོམ་པས་འཕེལ་རྒྱས་ཤོག །བསྟན་འདི་གྱེན་དུ་འདེགས་ལ་རྣམ་དག་སེམས། །ཆེས་དཀར་རྒྱ་ཧོར་བོད་སོགས་འཛམ་གླིང་དུ། །གནས་པའི་འགྲོ་ཀུན་འདི་ཕྱི་བར་གསུམ་གྱི། །ཕན་བདེའི་དོན་རྣམས་བདེ་བླག་འགྲུབ་པར་ཤོག །འདུས་ཚོགས་འདིར་ཡང་འདུལ་ཁྲིམས་རྩ་བ་བརྟན། །ཀློག་པ་ཐོས་བསམ་སྡོང་པོ་ཡལ་ག་རྒྱས། །སྤོང་བ་བསམ་གཏན་འབྲས་བུའི་ཁུར་གྱིས་དུད། །ལས་ཀྱི་འཁོར་ལོའི་ལོ་འདབ་སྟུག་པོར་ཤོག །རྩི་བཅུད་ལོ་ཏོག་ཁེ་སྤོགས་རྐང་བཞི་དར། །སྨན་སྔགས་མཐུ་ལྡན་ནད་ཅན་ནད་ལས་གྲོལ། །མི་དང་མི་མིན་འབྱུང་པོའི་གདུག་རྩུབ་ཞི། །འཇིག་རྟེན་ཁམས་སུ་བདེ་སྐྱིད་འཕེལ་བར་ཤོག །ཡོན་སྦྱོར་གྱིས་མཚོན་བདག་གཞན་འགྲོ་རྣམས་ཀྱི། །དགེ་འབྲས་གནས་སྐབས་ལྷ་མིའི་དགའ་སྟོན་དང༌། །མཐར་ཐུག་བླ་མེད་ཡེ་ཤེས་རིང་མིན་དུ། །ཐོབ་པའི་སྐལ་པ་བཟང་པོར་འགྱུར་བར་ཤོག །ཐུབ་བསྟན་བསྲུང་མཛད་ལེགས་ལྡན་ལྕམ་དྲལ་དང༌། །གཙང་རིས་དཔལ་མགོན་བདུན་ཅུ་རྩ་ལྔ་སོགས། །མཐུ་ཆེན་དཀར་ཕྱོགས་སྐྱོང་བའི་(༡༥བ) ― GLG021_Page_0648 ―
[མ་དཔེ་གཟིགས་ན་འདིར་གནོན།]
ཚོགས་རྣམས་ཀྱིས། །བསམས་པའི་དོན་ཀུན་འགྲུབ་པའི་གྲོགས་བྱེད་ཤོག །ཅེས་ངེད་རང་དང་སྡེ་པའི་རིམ་གྲོ་གཙོ་བོར་གྱུར་པའི་སྨོན་ལམ་གྱི་བདེན་བརྗོད་ཚིག་སྦྱོར་གསལ་ཞིང་འཇམ་བདེ་བ་ཞིག་འབྲས་སྤུངས་དང་རི་བོ་ཆོས་གླིང་སོགས་ཆོས་སྡེ་ཁ་ཤས་སུ་འཛུགས་རྩིས་ཡིན་པས་དགོས་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ཡིད་བཞིན་མཚོ་དབུས་པད་སྡོང་ཟེའུ་འབྲུའི་སྟེང༌། །བདེ་ཆེན་གར་གི་ཉམས་ལྡན་ཚེ་དབང་རྩལ། །སྟོང་ཉིད་སྙིང་རྗེའི་རང་གདངས་འཚོ་རྒྱལ་མ། །མཉམ་སྦྱོར་དངས་མས་སྲོག་གི་ཀ་བ་ཚུགས། །ཙཎྜ་ལཱི་སོགས་འཆི་མེད་ལྷ་ཚོགས་ཀྱིས། །མཁའ་འགྲོ་ཤུགས་འགྲོ་ལྷ་སྲིན་གདུག་ཅན་གྱི། །བསུན་མའི་ལམ་ཆོད་བླ་ཚེ་སྲོག་འཕྲོག་པའི། །རྩུབ་སེམས་དཔལ་ཞི་ཕྱིར་བཟློག་འཕྲིན་ལས་མཛོད། །འཁོར་འདས་ཡོངས་ཀྱི་ཕྱག་རྒྱ་ཟིལ་གནོན་པར། །ཀུན་བཟང་འཇམ་མགོན་རིག་པའི་མཁའ་དབྱིངས་སུ། །གང་ཤར་རང་གྲོལ་རྡོ་རྗེ་ཐོགས་མེད་རྩལ། །དཀྱིལ་འཁོར་རྒྱ་མཚོའི་བྱེད་པོར་བརྟན་གྱུར་ཅིག །གངས་ཅན་ལུགས་གཉིས་སྐྱོང་བ་མུ་ཁྲི་བཙན། །གནམ་སའི་ཁྱོན་ལ་སྟོབས་ཀྱི་འཁོར་ལོ་ཡིས། །དབང་སྒྱུར་སངས་རྒྱས་རྒྱ་མཚོ་གཡུང་དྲུང་གི །ཨཧཾ་ཀ་བ་ཉེར་ཚུགས་ཞབས་བརྟན་ཤོག །རིགས་བརྒྱུད་དཔལ་འབྱོར་ལོངས་སྤྱོད་མངའ་ཐང་སོགས། །ངལ་བསོས་པོ་ཡི་བསོད་ནམས་སྐལ་མཉམ་ཞིང༌། །འཇིག་རྟེན་གསུམ་གྱི་གཙུག་ན་ཞབས་སེན་ཟླ། །འཆར་བར་མེས་པོ་ཚངས་པའི་(༡༦ན) ― GLG021_Page_0649 ―
[མ་དཔེ་གཟིགས་ན་འདིར་གནོན།]
མཆེད་པོར་ཤོག །ཤཱཀྱ་སེང་གེའི་རིང་ལུགས་མ་ལུས་དང༌། །ཁྱད་པར་ཞྭ་སེར་ཅོད་པན་འཆང་བའི་བསྟན། །ལྷ་གཅིག་སྙིང་སྟོབས་བརྩོན་པའི་དཔུང་པ་ཡི། །ཉེར་བཏེག་སྲིད་མཐའི་བར་དུ་ཡར་རྒྱས་ཤོག །མཐའ་བཞི་དབུས་ཀྱི་འབངས་སུ་གཏོགས་སོ་ཅོག །ནད་མཚོན་དབུལ་ཕོངས་སྡུག་བསྔལ་ཀུན་ཞི་ཞིང༌། །རིང་པོའི་ཚེ་དང་མཁོ་དགུའི་འབྱོར་པ་རྣམས། །ལྷ་ཡི་གྲོང་ཁྱེར་ས་ལ་འཕོས་འདྲར་ཤོག །འཁོར་འདས་ཡོངས་ཀྱི་ཡོན་ཏན་མ་ལུས་པས། །རྣམ་པར་རྒྱལ་བའི་ཕན་བདེ་ལེགས་འབྱུང་བའི། །བཤད་དང་སྒྲུབ་པའི་གླིང་འདི་ཉེར་བཀང་སྟེ། །སྲིད་མཐའི་བར་དུ་དར་ཞིང་རྒྱས་པར་ཤོག །འདིས་མཚོན་ཐོག་མ་མེད་ནས་ད་ལྟའི་བར། །བསགས་པའི་བསོད་ནམས་ཕུང་པོར་སྤུངས་པ་ལས། །དེང་ནས་བྱང་ཆུབ་བར་དུ་ཕུན་ཚོགས་ཀྱི། །མདུན་མ་མཐའ་དག་ལྷུན་གྱིས་གྲུབ་པར་ཤོག །ཁྲིམས་ལྡན་རིགས་འཛིན་འདུས་གླིང་ཚོགས་རྣམས་ཀྱིས། །ལྷག་བསམ་རྣམ་དག་ཀུན་བླངས་བདེན་བརྗོད་དང༌། །རྟེན་ཅིང་འབྲེལ་པར་འབྱུང་བ་སླུ་མེད་མཐུས། །སྨོན་ལམ་རབ་བཏབ་རེ་བ་འབྲས་ལྡན་ཤོག །སྲིད་གསུམ་དབང་སྒྱུར་དམག་ཟོར་ལྷ་མོ་སོགས། །བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། །བསམས་པ་ཇི་བཞིན་འགྲུབ་པའི་འཕྲིན་ལས་དང༌། །བཀྲ་ཤིས་དཔལ་གྱིས་དུས་ཀུན་ཁྱབ་པར་མཛོད། །ཅེས་རིང་འཚོའི་ཚིགས་བཅད་དོན་བཟང་ལ་ཚིག་འཇམ་བདེ་བ་གྲྭ་ཚང་དུ་འཛུགས་རྒྱུ་ཞིག་དགོས་ཞེས་མཆོད་དཔོན་ངག་དབང་ཤེས་རབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་(༡༦བ) ― GLG021_Page_0650 ―
[མ་དཔེ་གཟིགས་ན་འདིར་གནོན།]
པ་ངག་དབང་དགེ་ལེགས་སོ། །སོ་སོ་ཐར་དང་རྒྱ་ཆེན་སྤྱོད་པའི་གཞུང༌། །ཟབ་མོ་ལྟ་བ་རྡོ་རྗེ་ཐེག་པ་ཡི། །རྩ་བ་བརྒྱུད་པའི་བླ་མ་ཀུན་འདུས་པ། །ངག་དབང་བློ་བཟང་རྒྱ་མཚོར་གསོལ་བ་འདེབས། །གསང་བ་འདུས་པ་གཤེད་སྐོར་བདེ་དགྱེས་དང༌། །དུས་འཁོར་རྡོར་དབྱིངས་རྣམ་སྣང་མངོན་བྱང་སོགས། །རྒྱུད་སྡེ་རྣམ་བཞིའི་ལྷ་ཚོགས་ཀུན་འདུས་པ། །ངག་དབང་བློ་བཟང་རྒྱ་མཚོར་གསོལ་བ་འདེབས། །རྣམ་སྣང་ངེས་པ་ལྔ་ལྡན་ལོངས་སྤྱོད་རྫོགས། །རིགས་ལྔ་བསྐལ་བཟང་རྣམ་འདྲེན་སྟོང་ལ་སོགས། །དུས་གསུམ་སངས་རྒྱས་འདུས་པའི་ངོ་བོ་ཉིད། །ངག་དབང་བློ་བཟང་རྒྱ་མཚོར་གསོལ་བ་འདེབས། །བྱམས་པ་རིགས་གསུམ་མགོན་སོགས་རྒྱལ་བའི་སྲས། །མཐའ་ཀླས་ཞིང་ཁམས་རྒྱ་མཚོར་སེམས་དཔའ་ཡི། །ཚུལ་འཛིན་རྒྱལ་སྲས་འདུས་པའི་ངོ་བོ་ཉིད། །ངག་དབང་བློ་བཟང་རྒྱ་མཚོར་གསོལ་བ་འདེབས། །ཚོགས་སྤྱོད་བསེ་རུ་སྐྱེས་བུ་ཟུང་བཞི་དང༌། །གང་ཟག་ཡ་བརྒྱད་ལ་སོགས་ཉན་རང་གི །སྐྱེ་འཕགས་དགེ་འདུན་འདུས་པའི་ངོ་བོ་ཉིད། །ངག་དབང་བློ་བཟང་རྒྱ་མཚོར་གསོལ་བ་འདེབས། །གནས་གསུམ་དཔའ་བོ་མཁའ་འགྲོའི་ཚོགས་རྣམས་དང༌། །ཐུབ་པའི་སྤྱན་སྔར་བསྟན་པ་བསྲུང་བ་རུ། །ཞལ་བཞེས་ཆོས་སྐྱོང་འདུས་པའི་ངོ་བོ་ཉིད། །ངག་དབང་བློ་བཟང་རྒྱ་མཚོར་གསོལ་བ་འདེབས། །མི་ཕྱེད་དད་པའི་སྙིང་དབུས་མེ་ལོང་དུ། །སྐྱབས་གནས་ཀུན་གྱི་ཐུགས་རྗེའི་གཟུགས་འཆར་བ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །རྩ་བརྒྱུད་བླ་མའི་ངོ་བོར་ཞབས་བརྟན་ཤོག །ཚེ་ཅིག་ཉིད་ལ་སྨིན་གྲོལ་ཟབ་ལམ་(༡༧ན) ― GLG021_Page_0651 ―
[མ་དཔེ་གཟིགས་ན་འདིར་གནོན།]
གྱི། །བཅུ་གསུམ་རྡོ་རྗེ་འཛིན་པའི་སར་འགོད་པ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །ཡི་དམ་ཀུན་འདུས་ངོ་བོར་ཞབས་བརྟན་ཤོག །མཐོང་ཐོས་དྲན་དང་རེག་པ་མ་ལུས་ཀུན། །འདི་ཕྱིའི་གཏན་མདུན་འགྲུབ་པའི་བྱེད་པོ་མཆོག །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །སངས་རྒྱས་འདུས་པའི་ངོ་བོ་ཞབས་བརྟན་ཤོག །བདག་གཞན་མཉམ་པར་བརྗེ་བའི་སེམས་བཟང་པོས། །སྲིད་ཞིའི་འཆིང་བ་ཀུན་ལས་གྲོལ་མཛད་པ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །བྱང་སེམས་འདུས་པའི་ངོ་བོར་ཞབས་བརྟན་ཤོག །ངེས་པར་འབྱུང་བའི་ཁྲིམས་ལ་མཆོག་དམན་ཀུན། །བཀོད་ནས་ཐར་པའི་ལམ་ལ་བཀྲི་མཛད་པ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །ཉན་རང་འདུས་པའི་ངོ་བོར་ཞབས་བརྟན་ཤོག །ནད་གདོན་བགེགས་སོགས་བར་གཅོད་ཐམས་ཅད་ལས། །བསྲུང་ཞིང་སྐྱོབ་པའི་མཐུ་སྟོབས་ནུས་ལྡན་པ། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །ཆོས་སྲུང་འདུས་པའི་ངོ་བོར་ཞབས་བརྟན་ཤོག །སྨོན་ལམ་བཏབ་པ་ཇི་བཞིན་མགོན་པོ་ཁྱོད། །ལོངས་སྤྱོད་རྫོགས་པའི་སྐུ་བཞིན་འཁོར་བའི་མཐའ། །སྟོངས་མིན་བར་དུ་གཟུགས་སྐུའི་བཀོད་པ་མཆོག །གཡོ་མེད་རྡོ་རྗེ་ལྟ་བུར་བརྟན་པར་ཤོག །དགེ་འདིས་ཞྭ་སེར་ཅོད་པན་འཆང་བའི་བསྟན། །བྱམས་པའི་བསྟན་པ་མ་ཤར་དེ་སྲིད་དུ། །འཇིག་རྟེན་གསུམ་གྱི་སྐྱབས་མགོན་དཔུང་གཉེན་དུ། །ཆེས་ཆེར་དར་ཞིང་ཡུན་དུ་གནས་པར་ཤོག །དགའ་ལྡན་བསྟན་འཛིན་བོ་ཤོག་ཐུ་རྒྱལ་པོ། །བཙུན་མོ་སྲས་བློན་འབངས་འཁོར་སྐྱེ་བ་ཀུན། །བློ་བཟང་(༡༧བ) ― GLG021_Page_0652 ―
[མ་དཔེ་གཟིགས་ན་འདིར་གནོན།]
གྲགས་པའི་བསྟན་དང་ལེགས་མཇལ་ཞིང༌། །ཆོས་དང་སྲིད་ཀྱི་འཛིན་སྐྱོང་སྤེལ་ནུས་ཤོག །ངག་གི་དབང་ཕྱུག་བློ་བཟང་རྒྱ་མཚོ་ཡིས། །ཚེ་རབས་ཀུན་ཏུ་འབྲལ་མེད་རྗེས་བཟུང་ནས། །མགོན་ཁྱོད་མཉེས་པ་ཁོ་ན་ལེགས་བསྒྲུབ་ཅིང༌། །ལུགས་གཉིས་འཕྲིན་ལས་རྒྱས་པའི་བྱེད་པོར་ཤོག །བསྟན་དང་བསྟན་འཛིན་གཙུག་ཏུ་ཉེར་བསྟན་ནས། །སྐྱེ་བ་ཀུན་ཏུ་ཐོས་བསམ་སྒོམ་པའི་མཐུས། །ས་དང་ལམ་གྱི་ཐེམ་སྐས་རིམ་འཛེགས་ཏེ། །འགྲོ་འདྲེན་སངས་རྒྱས་གོ་འཕང་མྱུར་ཐོབ་ཤོག །སླུ་མེད་དཀོན་མཆོག་གསུམ་གྱི་ཐུགས་རྗེ་དང༌། །དམ་ཅན་ཆོས་སྐྱོང་སྲུང་མའི་མཐུ་སྟོབས་ཀྱིས། །བསྟན་པའི་སྦྱིན་བདག་བོ་ཤོག་ཐུ་རྒྱལ་པོ། །སྐུ་ཚེ་རིགས་བརྒྱུད་མངའ་ཐང་རྒྱས་པར་ཤོག །མཁའ་ལ་ཉི་ཟླ་གཟའ་སྐར་འཕྲོད་སྦྱོར་དགེ །ས་ལ་ཕུན་ཚོགས་བདེ་སྐྱིད་གཡང་དུ་ཆགས། །ཕྱོགས་དུས་ཀུན་དུ་བསམ་དོན་ལྷུན་གྲུབ་པའི། །ཐོག་མཐའ་བར་དུ་དགེ་བའི་བཀྲ་ཤིས་ཤོག །ཅེས་སྐྱབས་གནས་ཀུན་འདུས་ཀྱི་བརྗོད་བྱ་དང་འབྲེལ་བའི་གསོལ་འདེབས་བརྟན་བཞུགས་སྨོན་ལམ་འདི་ལྟ་བུ་ཞིག་དགོས་ཞེས་བསྟན་པ་རིན་པོ་ཆེ་ལ་མི་ཕྱེད་པའི་དད་པ་དང་སྙིང་སྟོབས་ཕུལ་དུ་བྱུང་བས་ཆོས་རྒྱལ་མྱ་ངན་མེད་དང་ཚུལ་མཚུངས་པ་མིའི་དབང་ཕྱུག་དགའ་ལྡན་བསྟན་འཛིན་བོ་ཤོག་ཐུ་རྒྱལ་པོས་རྒྱང་རིང་ནས་གསོལ་བ་བཏབ་པ་ལ་བརྟེན། རང་ལ་དེ་ལྟ་བུའི་ཡོན་ཏན་མེད་ཀྱང་གདུལ་བྱ་ལ་ཡིད་ཆེས་ཀྱི་མོས་པ་ཡོད་ཕྱིན་བྱིན་རླབས་འཇུག་པ་རྟེན་འབྲེལ་གྱི་ཆོས་ཉིད་ཡིན་པས་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་མཆོག་དམན་ཀུན་གྱིས་གོ་བདེ་ཕྱིར་སྙན་དངགས་ཀྱི་(༡༨ན) ― GLG021_Page_0653 ―
[མ་དཔེ་གཟིགས་ན་འདིར་གནོན།]
ལམ་ནས་མ་དྲངས་པར་འབོལ་རྩོམ་དུ་སྦྱར་བའི་ཡི་གེ་པ་ནི་དཔལ་གྲོང་སྔགས་རམ་པ་ངག་དབང་དགེ་ལེགས་སོ། །ཕྱག་རྡོར་དབང་ཕྱུག་བློ་གྲོས་རྣམ་རྒྱལ་དང༌། །བྲག་གདོང་སྔགས་རམས་གསུམ་གྱི་དུངལ་བུམ་བཅུར། །དགུ་བཅུའི་སྲང་གྲངས་དཀོན་གཉེར་ལས་འཛིན་དུས། །རབ་དཀར་བསམ་པས་ཕུལ་བའི་དགེ་ཚོགས་ཀྱིས། །རྣམ་པར་རྒྱལ་བའི་ཕན་བདེ་ལེགས་བཤད་གླིང༌། །སྲིད་མཐའི་བར་དུ་དར་ཞིང་རྒྱས་པ་དང༌། །འདི་ཕྱི་གཏན་གྱི་སྡུག་བསྔལ་མུན་བསལ་ནས། །སྒོ་གསུམ་སྐྱིད་པའི་སྣང་བས་ཀུན་ཁྱབ་ཤོག །ཅེས་པའང་ཟ་ཧོར་བནྡེ་བྲིས། །གསེར་ཞུན་བརྩེགས་པའི་ལྷུན་པོ་བརྒྱ་ཕྲག་ཉིས། །ལན་བརྒྱར་འཁྱུད་པས་བསྒྲུན་མིན་མཚན་དཔེའི་དཔལ། །རབ་འབར་གདུལ་དཀའི་འགྲོ་འདྲེན་ཤཱཀྱའི་ཏོག །མཐོང་ཐོས་དྲན་པས་རྣམ་གྲོལ་ཟས་གཙང་སྲས། །དབུ་སེམས་མདོ་སྡེ་བྱེ་སྨྲའི་གྲུབ་མཐའ་ལ། །མཁས་པའི་རྩེར་སོན་རྒྱན་དྲུག་མཆོག་གཉིས་དང༌། །གང་གི་རྗེས་སུ་འཇུག་ལ་ཉེར་སྨོན་པ། །ངག་དབང་བློ་བཟང་རྒྱ་མཚོའི་སྣང་བརྙན་རྣམས། །བློ་བཟང་སྐྱེས་མཆོག་དད་པས་བཞེངས་པའི་མཐུས། །ཚེ་རིང་ནད་མེད་ལོངས་སྤྱོད་ཕུན་སུམ་ཚོགས། །སྐྱེ་བར་ལྷ་མིའི་རྟེན་བཟང་ལེགས་བརྒྱུད་ནས། །རིང་པོར་མི་ཐོགས་སངས་རྒྱས་ཐོབ་པར་ཤོག །ཅེས་པའང་རྣམ་གླིང་པ་བློ་བཟང་སྐྱེས་མཆོག་གིས་ཐང་གའི་རྒྱབ་ཡིག་དགོས་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཐ་མལ་སོ་སྐྱེའི་བགས་ཆགས་ཉེར་གོམས་(༡༨བ) ― GLG021_Page_0654 ―
[མ་དཔེ་གཟིགས་ན་འདིར་གནོན།]
པས། །དུག་གསུམ་གོམ་སྟབས་ཤུགས་དྲག་གཉིས་འཐུང་ལ། །འཕགས་ཆེན་དམ་པའི་སེང་གེར་སྒྲོ་བཏགས་ནས། །ཐུབ་བསྟན་གངས་རིའི་སྤོ་ལ་འགྱིང་བ་མཚར། །འོན་ཏེ་གདུལ་བྱའི་དད་པ་དངས་མའི་མཚོར། །སངས་རྒྱས་དངོས་ཀྱི་ཟླ་གཟུགས་ཡོངས་ཤར་ན། །བྱིན་རླབས་ཐོགས་མེད་འཇུག་པའི་རྟེན་འབྲེལ་གྱིས། །རྒྱུ་འབྲས་བསླུ་བ་མེད་ལ་གང་གི་བསྙོན། །དེ་ཕྱིར་བདག་འདྲའི་གཟུགས་བརྙན་བྲིས་པའི་དགེས། །སྐྱེ་བར་ཐེག་པ་མཆོག་གི་བཤེས་གཉེན་གྱིས། །རྗེས་སུ་བཟུང་ནས་འཁོར་འདས་ལེགས་ཚོགས་ཀུན། །ཡར་ངོའི་ཟླ་བ་ལྟ་བུར་འཕེལ་བར་ཤོག །ཅེས་པ་འདིའང་སྒྱིད་ཐང་ནོར་བུའི་འདོད་སྦྱར་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཡིད་དགའ་ཆོས་འཛིན་གནས་སུ་ཐེག་ཆེན་གྱི། །ཚིག་དོན་རྒྱུན་ཆད་མེད་པར་རྟག་གསུང་ཡང༌། །འཛམ་བུའི་གླིང་འདིར་ཐུགས་རྗེའི་སྤྱན་རས་དཀྱུས། །བཙའ་བར་མི་གཡེལ་མ་ཕམ་མགོན་པོ་ཀྱེ། །གང་གི་སྣང་བརྙན་རི་མོ་བྲིས་པ་དང༌། །དམ་བཅའི་གཟུངས་སྔགས་བཟླས་བརྗོད་ལྷུར་བླངས་པས། །རྒྱུ་སྦྱོར་ནོར་བུས་མཚོན་པའི་སེམས་ཅན་རྣམས། །གནས་ངན་གང་དུ་སྐྱེས་ཀྱང་མྱུར་དུ་དྲོངས། །འདི་ནས་འཕོས་ཏེ་རིམ་བརྒྱུད་སྐྱེ་བ་ཀུན། །ལྷ་མིའི་རྟེན་བཟང་ཐོབ་ཅིང་དམ་ཆོས་དང༌། །རབ་མཇལ་ཐོས་བསམ་སྒོམ་པས་རིང་མིན་དུ། །ངེས་པར་ལེགས་པའི་གོ་འཕང་མངོན་འགྱུར་ཤོག །ཁྱད་པར་དབུས་འགྱུར་འཆང་དུ་རྗེ་བཙུན་ཉིད། །མཆོག་གི་སྤྲུལ་སྐུར་མངོན་སངས་རྒྱས་པའི་ཚེ། །བདག་སོགས་འདུས་པ་དང་པོའི་འཁོར་(༡༩ན) ― GLG021_Page_0655 ―
[མ་དཔེ་གཟིགས་ན་འདིར་གནོན།]
གྱུར་ནས། །བདུད་རྩིའི་ཐོག་མ་ལོངས་སུ་སྤྱོད་པར་ཤོག །འདིས་མཚོན་ཐོག་མ་མེད་ནས་ད་ལྟའི་བར། །བསགས་པའི་རྣམ་དཀར་དགེ་ཚོགས་མ་ལུས་པ། །ནམ་མཁའི་ཕ་མཐའ་དང་མཉམ་སེམས་ཅན་རྣམས། །སངས་རྒྱས་གོ་འཕང་ཐོབ་པའི་རྒྱུ་རུ་བསྔོ། །ཞེས་པ་འདིའང་སྒྱིད་ཐང་ནོར་བུས་ཐང་གའི་རྒྱབ་ཡིག་དགོས་ཚུལ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །མི་ཟད་རྒྱན་གྱི་འཁོར་ལོའི་སྐུ་གསུང་ཐུགས། །དྲན་པའི་མོད་ལ་འཁོར་བའི་འཇིགས་པ་ཀུན། །ཉེར་ཞི་མངོན་མཐོ་ངེས་ལེགས་ལ་སྦྱོར་བ། །ཤཱཀྱ་སེང་གེས་ཚེ་རབས་གཏན་དུ་སྐྱོངས། །རིགས་གསུམ་མཁྱེན་བརྩེའི་ནུས་མཐུ་འཕྲུལ་པོ་ཆེ། །བཤེས་གཉེན་དམ་པར་ཤར་བ་ཙོང་ཁ་པའི། །བསྟན་ལ་སྐྱེ་བར་ཞུགས་ནས་མདོ་རྒྱུད་དོན། །ཐོས་བསམ་སྒོམ་པ་ཕ་མཐར་ཕྱིན་པར་ཤོག །སྒྱུ་མས་སྤྲུལ་པའི་མཁའ་ལྡིང་ནམ་མཁའི་མཐའ། །འཇལ་བའི་དོན་བྱེད་ནུས་ལྟར་གདུལ་བྱ་ཡི། །གྲངས་མེད་བསོད་ནམས་བྱེ་བའི་ཞིང་གྱུར་པ། །ངག་དབང་བློ་བཟང་རྒྱ་མཚོར་གསོལ་བ་འདེབས། །མཐོང་བའི་མོད་ལ་ཁྲོ་རྒྱལ་མཐའ་དག་གི །ལག་ཆ་སྟབས་གཅིག་འཆོར་ནུས་མ་ཧེའི་ཞལ། །འཇམ་དཔལ་ཞི་ཁྲོས་དེང་ནས་ཚེ་རབས་ཀུན། །རྗེས་སུ་བཟུང་ནས་དོན་གཉིས་འགྲུབ་པར་ཤོག །གང་གི་སྐུ་ལ་སྐྱབས་གནས་མ་ལུས་ཚོགས། །ཚང་བར་ངེས་ཤེས་བརྟན་པོས་གསོལ་བཏབ་པ། །ཇི་བཞིན་ལྷུན་གྱིས་གྲུབ་པར་འཇམ་དཔལ་དབྱངས། །དགའ་བའི་བཤེས་གཉེན་ཁྱོད་ཀྱིས་བདག་རྗེས་ཟུངས།(༡༩བ) ― GLG021_Page_0656 ―
[མ་དཔེ་གཟིགས་ན་འདིར་གནོན།]
།རྒྱལ་ཀུན་འདུས་པ་བློ་བཟང་གྲགས་པ་ཡི། །ལེགས་གསུངས་མདོ་སྔགས་ལམ་གྱི་རིམ་པའི་གནད། །ཚུལ་བཞིན་ཉམས་སུ་བསྟར་བས་ཚེ་གཅིག་ལ། །བཅུ་གསུམ་རྡོ་རྗེ་འཛིན་པའི་སར་བགྲོད་ཤོག །ཅེས་བྱིང་པ་བྱམས་པ་ནོར་བུ་དང་རྣམ་རྒྱལ་གཉིས་ཀྱི་དད་རྟེན་དུ་ཐུབ་དབང༌། རྗེ་བླ་མ། འདི་གའི་འདྲ་འབག་གསུམ་ལ་ལམ་རིམ་བརྒྱུད་པས་བསྐོར་བ། འཇིགས་བྱེད། འདི་ག་དང༌། རྗེ་བླ་མའི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །གདན་གསུམ་ཚང་བའི་དཀྱིལ་འཁོར་ལྷ་ཚོགས་རྣམས། །རང་བྱུང་ལུས་ཀྱི་ཕོ་བྲང་ལ་རྫོགས་པ། །རྡོ་རྗེའི་སློབ་དཔོན་ངག་དབང་བློ་ཡི་གཏེར། །སྐལ་བཟང་རྒྱ་མཚོའི་གཉེན་ལ་གསོལ་བ་འདེབས། །མགོན་ཁྱོད་རྨ་བྱས་བཏེག་པའི་རིན་ཅེན་ཁྲི། །པད་ཟླའི་གདན་ལ་ཚེ་མཐའ་ཡས་པའི་སྐུར། །ཞེངས་ནས་བསྐལ་བརྒྱར་མི་འགྱུར་རྟག་བཞུགས་ཏེ། །ཆོས་འཁོར་རྒྱུན་ཆད་མེད་པར་སྐོར་བར་ཤོག །བདག་སོགས་འདི་ནས་ཉིང་མཚམས་སྦྱར་མ་ཐག །བདེ་བ་ཅན་དུ་འཇམ་མཉེན་པདྨ་ལ། །བརྫུས་སྐྱེས་གར་དབང་ལྷ་ཡིས་རྗེས་བཟུང་ནས། །འགྲོ་བ་འདྲེན་པའི་དེད་དཔོན་བྱེད་པར་ཤོག །རྒྱུན་གྱི་ཁ་ཏོན་བྱེད་རྒྱུ་འདི་ལྟ་བུ་ཞིག་དགོས་ཞེས་རྟ་ར་མདོ་པ་ངག་དབང་ལྷུན་གྲུབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་དཀོན་ཅོག་གོ །རྒྱལ་ཡུམ་སེང་ལྡེང་ནགས་ཀྱི་སྒྲོལ་མ་ལ། །བཟླས་བརྗོད་ཕྱག་འཚལ་གསོལ་བ་བཏབ་པའི་མཐུས། །སེང་གེ་གླང་(༢༠ན) ― GLG021_Page_0657 ―
[མ་དཔེ་གཟིགས་ན་འདིར་གནོན།]
ཆེན་ཆོམ་རྐུན་མེ་དང་སྦྲུལ། །ལྕགས་སྒྲོག་ཤ་ཟ་ཆུ་བོའི་འཇིགས་ལས་སྐྱོབ། །མདོར་ན་སྔོན་དང་འཕྲལ་རྐྱེན་ལས་བྱུང་བའི། །དུག་མཚོན་ནད་རིམས་བཀྲེས་ཕོངས་འཐབ་རྩོད་དང༌། །མཐུ་བྱད་ལྷ་འདྲེའི་དལ་ཁ་ཟུག་པ་སོགས། །བར་ཆད་མི་མཐུན་ཕྱོགས་ཀུན་ཞི་བར་ཤོག །ཡུན་དུ་འཚོ་ཞིང་ལུས་ངག་ཡིད་གསུམ་བདེ། །དཔལ་འབྱོར་སྙན་གྲགས་མངའ་ཐང་ལོངས་སྤྱོད་འཕེལ། །སྲིད་པའི་ལེགས་ཚོགས་སེམས་ལ་གང་བསམས་པ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །ཚེ་འདིའི་སྣང་བ་འགགས་དུས་གྲུ་འཛིན་ཞེས། །ཕྱག་ན་པདྨའི་ཞིང་དུ་ཉེར་དྲངས་ནས། །ཐེག་ཆེན་ཆོས་ལ་ཐོས་བསམ་སྒོམ་པ་ཡིས། །ལུས་ཅན་མཐའ་དག་བྱང་གྲོལ་སར་འགོད་ཤོག །མདོར་ན་དེང་ནས་སངས་རྒྱས་མ་ཐོབ་བར། །བཅོམ་ལྡན་འཕགས་མ་སྒྲོལ་མས་འབྲལ་མེད་དུ། །རྗེས་བཟུང་ལུང་བསྟན་དབུགས་དབྱུང་ལེགས་མཛད་དེ། །ཕན་དང་བདེ་བའི་དཔལ་ལ་སྦྱོར་བར་ཤོག །ཅེས་རྗེ་བཙུན་སྒྲོལ་མ་ལ་འདོད་དོན་གསོལ་བའི་ཚིགས་སུ་བཅད་པ་འདི་ནི་རྒྱལ་སྲས་ལྷ་བཟང་ཀླུ་དབང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བླ་སྨན་ཤཱཀྱ་དབང་ཕྱུག་སྤྲུལ་པའི་གར། །གླིང་སྟོད་བློ་བཟང་ཆོས་ཀྱི་རྒྱ་མཚོ་ཡི། །ཡང་སྲིད་གསོ་དཔྱད་སྨྲ་ལ་ངག་གི་དབང༌། །འཚོ་བྱེད་གཞོན་ནུ་གཉིས་པར་གསོལ་བ་འདེབས། །སྐྱེ་མང་གོམས་པས་ཚེ་ཡི་རིག་བྱེད་ཆབ། །བློ་གྲོས་ཧུབ་ཀྱིས་འཐུང་ནུས་དྲང་སྲོང་ཆེ། །ངག་དབང་གཞོན་ནུ་གྲངས་མེད་ཡིད་ཅན་(༢༠བ) ― GLG021_Page_0658 ―
[མ་དཔེ་གཟིགས་ན་འདིར་གནོན།]
གྱི། །གཉེན་བཤེས་མགོན་དུ་མི་འགྱུར་བརྟན་པར་ཤོག །རོ་ནུས་ཞུ་རྗེས་བསྡེབས་པའི་བདུད་རྩི་ཡིས། །འགྲོ་མང་སྲོག་གི་ཆད་འཐུད་འཆི་མེད་ཀྱི། །མཆོག་སྦྱིན་སྒོ་འབྱེད་གསོ་རིག་གཙུག་ལག་གཞུང༌། །འཕྲིན་ལས་དབྱར་གྱི་མཚོ་ལྟར་རྒྱས་པར་ཤོག །སྨན་རྒྱལ་རིགས་འདུས་རྗེ་བཙུན་གཡུ་ཐོག་མགོན། །བཞེད་ཕུགས་ཆ་ལག་དང་བཅས་མ་ལ་ཡའི། །ནགས་ཀླུང་ནས་ལྡང་ཐངས་གསོས་དྲི་བསུང་གིས། །ཡངས་པའི་འཇིག་རྟེན་ཀུན་ཏུ་ཁྱབ་པར་ཤོག །གནོད་སྦྱིན་ཞང་བློན་རྡོ་རྗེ་བདུད་འདུལ་ཆེ། །ལྷ་དང་དྲང་སྲོང་རིག་པ་འཛིན་རྣམས་ཀྱི། །བདེན་པའི་ཚིག་གིས་ཡིད་ལ་བསམས་དོན་ཀུན། །ཐོགས་པ་མེད་པར་ལྷུན་གྱིས་འགྲུབ་པར་ཤོག །ཅེས་གླིང་སྟོད་ཆོས་རྗེ་བློ་བཟང་རྒྱ་མཚོའི་སྐུ་སྐྱེ་ངག་དབང་གཞོན་ནུར་གསོལ་འདེབས་བརྟན་བཞུགས་སྨོན་ལམ་དང་བཅས་པ་ཞིག་དགོས་ཞེས་ཉི་ཐང་གྲྭ་ཚང་སྤྱི་ཚོགས་དང༌། དཔོན་ཚང་དར་མོ་སྨན་རམས་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཞིང་ཁམས་རྒྱ་མཚོའི་སངས་རྒྱས་སྲས་སློབ་རྣམས། །དཔལ་ལྡན་འབྲས་སྤུངས་གཙུག་ལག་ཁང་ཆེན་གྱི། །ཡེ་ཤེས་སེམས་དཔའ་རབ་འཁྱིལ་གཟུགས་སྐུ་དང༌། །དབྱེར་མེད་མཆོག་གསུམ་འདུས་པའི་སྤྱན་སྔ་རུ། །གོས་འཕན་ཟུང་གིས་ཉེར་མཚོན་དངོས་བཤམས་ཤིང༌། །ཡིད་སྦྲུལ་མཆོད་སྤྲིན་ནམ་མཁའ་མཛོད་ཀྱི་སྒོ། །རབ་ཕྱེ་ས་བོན་དར་དྲག་ལེགས་བྱས་ཚོགས། །འཛམ་བུའི་སྙེ་མ་འཛད་མེད་གཡུར་ཟ་ཤོག །རྒྱལ་བསྟན་གྲིབ་མར་ཡིད་ཅན་ངལ་བསོས་བདེ། །འགྲོ་འདྲེན་(༢༡ན) ― GLG021_Page_0659 ―
[མ་དཔེ་གཟིགས་ན་འདིར་གནོན།]
བཤེས་གཉེན་འདུས་སྡེ་བརྟན་ཅིང་འཕེལ། །ཁྲིམས་གཉིས་ལྕི་ལྡན་ས་དབང་ཆབ་སྲིད་རྒྱས། །འཇིག་རྟེན་ཁམས་སུ་སྐྱིད་པའི་ཉི་འཆར་ཤོག །འདིས་མཚོན་གྲངས་མེད་སྐྱེ་བར་ཡོངས་བསགས་དགེ །རྣམ་སྨིན་གཅིག་ཏུ་དཀར་པོར་འཛག་པ་ལས། །ཡོན་སྦྱོར་མི་ནོར་འཕེལ་ཞིང་ཚེ་དཔལ་དང༌། །དབང་ཐང་ངལ་བསོས་པོ་ཡི་མཆེད་ཟླར་ཤོག །ནད་རིམས་གདོན་བགེགས་དབུལ་ཕོངས་དུས་མིན་དུ། །འཆི་སོགས་འཁོར་བའི་ཟུག་རྔུའི་ཚེར་མ་རྣམས། །དཀོན་ཅོག་ཐུགས་རྗེའི་ཆ་དཔྱད་ཀྱིས་ཕྱུངས་ནས། །སྒོ་གསུམ་སིམ་པའི་ཚོར་བ་འབྲལ་མེད་ཤོག །མི་ཁོམ་གནས་ཀྱི་སྲིད་པ་མི་འཛིན་ཞིང༌། །དམ་ཆོས་སྒྲུབ་རྟེན་ལྷ་མིའི་ལུས་བརྒྱུད་ནས། །སྒྲིབ་གཉིས་འཆིང་རྒྱ་ལས་གྲོལ་ཡེ་ཤེས་མཆོག །རིང་པོར་མི་ཐོགས་མངོན་དུ་འགྱུར་བར་ཤོག །བསགས་སོ་ཅོག་གི་བསོད་ནམས་ཏེ་སིའི་གངས། །མཐོ་བརྩེགས་ལས་བབས་ཕན་བདེ་གངྒཱའི་ཀླུང༌། །མཁའ་མཉམ་ལུས་ཅན་རྫོགས་སངས་རྒྱས་ཐོབ་པའི། །ཆུ་གཏེར་དང་འདྲེས་འཕེལ་བའི་རྒྱུ་རུ་བསྔོ། །ལྕགས་མོ་བྱ་ལོ་མཆོད་དཔོན་ངག་དབང་ཤེས་རབ་ཀྱིས་སྤྱི་བྱེ་བྲག་གི་དགེ་ལེགས་འཕེལ་བའི་སྨོན་ལམ་གྱི་ཚིགས་བཅད་གསར་བཙུགས་ཀྱི་ཚེ་ཆོས་སྡེ་ཆེན་པོ་དཔལ་ལྡན་འབྲས་སྤུངས་སུ་གོས་འཕན་ཆ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཨརྠསིདྡྷིརསྟུ། །འཇམ་དབྱངས་དགའ་བའི་བཤེས་གཉེན་ངག་གི་དབང༌། །བློ་གྲོས་རྫིང་བུར་མཁས་བཙུན་བཟང་པོ་ཡི།(༢༡བ) ― GLG021_Page_0660 ―
[མ་དཔེ་གཟིགས་ན་འདིར་གནོན།]
།ཚངས་སྲས་ངང་མོའི་ལེགས་བཤད་མགྲིན་རྔའི་སྒྲ། །རྒྱ་མཚོའི་གོས་ཅན་ཁྱབ་ལ་གསོལ་བ་འདེབས། །གྲུ་འཛིན་དམར་པོ་རི་ཡི་ཕོ་བྲང་ཆེའི། །རྟེན་དང་བརྟེན་པར་བཅས་ལ་ཕྱག་སྐོར་གྱིས། །ལེགས་མཚོན་སྒོ་གསུམ་ཉེར་བསགས་རྣམ་དཀར་དགེ །འགྲོ་ཀུན་དོན་བསྔོས་ནམ་ཡང་འཛད་མེད་འབྲས། །བདག་སོགས་སྐྱེ་བ་དལ་འབྱོར་རྟེན་བཟང་ཐོབ། །དམ་པས་རྗེས་བཟུང་ཐོས་བསམ་སྒོམ་པའི་མཐུས། །འཁོར་བའི་ཕ་མཐའ་མྱུར་དུ་བརྒལ་བྱས་ནས། །བླ་མེད་ཀུན་མཁྱེན་ཡེ་ཤེས་ཐོབ་པར་ཤོག །ཅེས་དགེ་སློང་ཕུན་ཚོགས་རྒྱ་མཚོས་པོ་ཏ་ལའི་སྐོར་ཚད་བཟོ་བ་དང༌། རྒྱུན་གྱི་ཁ་ཏོན་གསོལ་འདེབས་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་འཛིན་གྱི་བཙུན་པ་ངག་དབང་དཀོན་ཅོག་གོ །དུས་གསུམ་སངས་རྒྱས་ཀུན་འདུས་པདྨ་འབྱུང༌། །ཡེ་ཤེས་རང་གདངས་ནོར་གྱི་ལྷ་ཚོགས་སུ། །ཤར་བས་མི་ཟད་ནམ་མཁའ་མཛོད་ཀྱི་སྒོ། །ཕྱེ་ནས་ལོངས་སྤྱོད་ཆར་དུ་ཉེར་འབབ་པར། །ཞལ་བཞེས་རྡོ་བའི་རི་མོ་འཆི་མེད་ལམ། །རྣམ་པ་གཞན་དུ་གྱུར་ཀྱང་འཇིག་མིན་ཕྱིར། །ཆེས་ཕོངས་ཉམ་ཐག་འགྲོ་བ་མ་ལུས་པའི། །བརྣག་དཀའི་ཟུག་རྔུ་མཐའ་དག་དྲུངས་འབྱིན་མཛོད། །ཁྱད་པར་གནས་ཁང་འདི་ན་ལྷ་དང་མིའི། །ཕུན་ཚོགས་འདོད་དགུའི་ཆུ་ཀླུང་ཆེན་པོ་བཞི། །ལེགས་བབས་འཁྱིལ་བའི་རྒྱ་མཚོར་བསོད་ནམས་ཀླུའི། །གཙུག་ཏོར་ཡིད་བཞིན་ནོར་བུས་རེ་སྐོང་ཤོག །ཅེས་ཁྲི་སྨད་ཕུན་ཚོགས་དབང་པོས་བསམ་པ་ལྷུན་གྲུབ་མའི་ལས་ཚོགས་བཅུ་གསུམ་པའི་ཞིང་བཀོད་(༢༢ན) ― GLG021_Page_0661 ―
[མ་དཔེ་གཟིགས་ན་འདིར་གནོན།]
བཞེངས་པའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །བློ་ཆེན་བསྐལ་བཟང་འདྲེན་པ་སྟོང་ཕྲག་གི། །མཁྱེན་རབ་མགོན་ཁྱོད་གཅིག་པུར་ཡོངས་ཚང་བའི། །སྙན་གྲགས་ས་གསུམ་ཁྱབ་དང་རྒྱལ་ཚབ་རྗེ། །ཤེས་རབ་སེང་གེའི་གཟུགས་སྐུའི་སྣང་བརྙན་ལ། །དགའ་ལྡན་གནས་ནས་འཇམ་དཔལ་སྙིང་པོའི་ཞབས། །ཁ་བའི་ལྗོངས་འདིར་མི་ཡི་སྲིད་བཟུང་ནས། །མཁས་བཙུན་བཟང་པོའི་རྟོགས་བརྗོད་ཀྱིས་བསྐོར་ཆར། །བབས་པས་དད་པའི་མྱུ་གུ་གོང་འཕེལ་གསོས། །རིང་ནས་མི་ཕྱེད་མོས་གུས་ཅང་ཤེས་ལ། །བརྩོན་འགྲུས་ལྕག་གིས་བསྐུལ་བས་ཚོགས་གཉིས་འགྲོས། །ངེས་ལེགས་ཐང་ལ་དཀྱུས་ཐོག་ལེགས་བཅད་ནས། །བྱང་ཆུབ་ཆེན་པོའི་མདུན་སར་བགྲོད་པར་ཤོག །གནས་སྐབས་ཡོན་སྦྱོར་བྱེད་པོ་རིང་འཚོའི་ཚེ། །རྨུགས་འཛིན་མཛོད་ལ་འགྲན་པའི་འབྱོར་པ་སོགས། །སྲིད་ཞིའི་ཡོན་ཏན་དགེ་བའི་གཤོག་རླབས་ཀྱིས། །ཕན་བདེའི་མཁའ་ངོས་ནམ་འཕང་གཅོད་པར་ཤོག །ཚེ་འདིའི་ལུས་བསྐྱེད་ཕ་མས་ཐོག་དྲངས་ཏེ། །རྒྱུད་ལྔའི་སེམས་ཅན་ཐམས་ཅད་མཐོ་རིས་དང༌། །ཐར་པ་ཀུན་མཁྱེན་ཡེ་ཤེས་ཐོབ་པའི་རྒྱུར། །འདིས་མཚོན་དུས་གསུམ་དུ་བསགས་དགེ་ཚོགས་བསྔོ། །ཞེས་གྲམ་པ་བ་དགེ་སློང་བློ་བཟང་ངག་དབང་གིས་རྒྱལ་བ་ཙོང་ཁ་པ་ཆེན་པོའི་རྣམ་ཐར་ཞིང་བཀོད་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་(༢༢བ) ― GLG021_Page_0662 ―
[མ་དཔེ་གཟིགས་ན་འདིར་གནོན།]
པའོ། །ཡན་ལག་དྲུག་ཅུའི་གསུང་ངག་རྒྱུད་མང་གླུར། །ལེན་པར་མཁས་དབང་བག་ཡོད་བློ་ཡིས་བཙུན། །བཟང་པོའི་ལྷག་བསམ་རྒྱ་མཚོའི་རླབས་འཕྲེང་ལྟར། །ཡོལ་མེད་འཇམ་དབྱངས་དགའ་བའི་བཤེས་གཉེན་ལ། །ལག་ན་པད་དཀར་རྣམ་པར་འཕྲུལ་པོ་ཆེ། །འཕགས་བོད་ཆོས་རྒྱལ་པཎ་གྲུབ་རྩ་གཉིས་ཀྱི། །རབ་བསྐོར་སྒྱུ་མའི་ཁེངས་པ་བག་ལ་ཞར། །གཏོང་བྱེད་བསོད་ནམས་མགྲོན་དུ་དངོས་བྱོན་བཞིན། །ལེགས་བྱས་ཚོགས་ཀྱིས་བསྐྲུན་པའི་དལ་བའི་ལུས། །དོན་ལྡན་གྲུབ་ལ་སྐལ་བ་བཟང་པོ་དེ། །རྣམ་དག་བསམ་པས་ཉེར་བསྐུལ་བརྩོན་པ་ཡིས། །མི་ཕྱེད་དད་པའི་རྟེན་དུ་དེང་འདིར་བསྐྲུན། །དགེ་ཚོགས་ཆ་ཤས་གོང་འཕེལ་ཆུ་ཤེལ་དབང༌། །མཚམས་སྦྱར་སྨོན་ལམ་ག་བུར་གཟེགས་མའི་རྡུལ། །བབས་པས་སྲིད་ཞིའི་སྡུག་བསྔལ་ཚ་བའི་དབལ། །ཉེར་ཞི་བདེ་སྐྱིད་དཔལ་ལ་སྤྱོད་པར་ཤོག །རང་ཉིད་གཅིག་པུར་མ་དམིགས་མཁའ་མཉམ་འགྲོར། །ཆོས་དཀར་འབྲས་བུ་བསྔོས་རྒྱུན་འཛད་མེད་ནོར། །ལོངས་སུ་སྤྱོད་པ་རྫོགས་པའི་སངས་རྒྱས་ཀྱི། །གོ་འཕང་རིང་པོར་མི་ཐོགས་མངོན་འགྱུར་ཤོག །ཅེས་ལྷ་ས་བ་དཔལ་འབྱོར་བཟང་པོའི་དད་རྟེན་གསར་བཞེངས་ཀྱི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཙནྡན་བྱུག་པ་སྟེའུ་ཁར་གཟས་ལ། །སྙིང་རྗེའི་ཆབ་ཀྱིས་ཐུགས་རྒྱུད་ཞིང་སའི་ཁྱོན། །མཉམ་པར་བརླན་མཛོད་དོན་ཀུན་གྲུབ་པའི་ཕྱག །རིང་པོར་བྱང་ཆུབ་བར་དུ་བདག་གཙུག་ཁྱོངས། །མཐའ་བྲལ་རྒྱ་མཚོར་སྟོང་(༢༣ན) ― GLG021_Page_0663 ―
[མ་དཔེ་གཟིགས་ན་འདིར་གནོན།]
ཉིད་ནོར་བུའི་ཐོད། །འོད་འབར་རྣམ་འདྲེན་ཀླུ་དབང་རང་གྲིབ་ལ། །བལྟོས་མིན་མཆེད་ཟླ་ལང་རིགས་སྲིད་སྒྲུབ་ཕོངས། །ཤེས་རབ་བདག་པོར་རྩལ་གྱིས་འཕེན་ནུས་ཤོག །རང་བཞིན་གྲུབ་འདོད་འཁྱོག་པོའི་གཏན་ཚིགས་དུག །འཕགས་མཆོག་བཞེད་པའི་རྣམ་རྒྱལ་གསེར་མདོག་གིས། །དྲུངས་འབྱིན་ལྷ་ཡི་སྨན་པ་ཐར་སྐར་སྐྱེས། །ཉོན་མོངས་ནད་བརྒྱ་སེལ་སྨོན་དེང་འགྲུབ་ཤོག །བཅུ་གཉིས་བགྲང་བྱར་སྤྱད་པའི་དཀའ་ཐུབ་འབྲས། །དགའ་ལྡན་གནས་སུ་ཐོགས་པ་མེད་གཤེགས་ནས། །མ་ཕམ་གསུང་ངག་ཐེག་ཆེན་འཛམ་གླིང་འདིར། །དར་བའི་རྣམ་པར་ཐར་དེ་འཛིན་ནུས་ཤོག །ཤེས་བྱ་གཞི་ལྔ་དབྱིག་གི་བང་མཛོད་ནས། །ལེགས་བཤད་མཆོག་སྦྱིན་ལུས་ཅན་ཀུན་གྱི་གཉེན། །དགུ་བཅུ་གོ་དགུའི་གཙུག་ལག་དོ་ཤལ་ཕྲེང༌། །སྦུད་པའི་བསྙེམས་པ་རིང་མིན་འཕྲོག་ནུས་ཤོག །ཕྱོགས་བྲལ་དངོས་སྟོབས་རིག་པའི་འཁོར་ལོ་ཡིས། །རྒོལ་ངན་ཕྱེར་འཐག་གླང་པོ་ཐུབ་གསུང་གིས། །ཤལླི་ཀ་ཚལ་རྟག་རྒྱུར་འཇམ་མགོན་གྱིས། །རྗེས་བཟུང་ཡོངས་འཛིན་དང་མཚུངས་བདག་ཐོབ་ཤོག །མུ་སྟེགས་ཆོས་ཀྱི་གནད་གསང་ཀུན་རྟོགས་ནས། །དཔྱད་གསུམ་ཐོག་མངས་ལོག་སྨྲའི་བྲག་བསྙིལ་བའི། །གྲགས་པ་ཇི་བཞིན་རྟོག་གེའི་ཚིག་དོན་ལ། །འཇུག་པའི་སྤོབས་པ་རྟག་ཏུ་དགེ་བར་ཤོག །འཁོར་འདས་ཡོན་ཏན་ཡོངས་འདུའི་རྩ་ལག་མཆོག །རང་རྒྱུད་འདུལ་ལུང་སྡེ་བཞིའི་སྙིང་པོའི་གཟུགས། །རབ་སྣང་མཁྱེན་པའི་ཉི་འོད་སྟོང་འབར་བ། །མཚར་འཛིན་གཟིགས་མོར་དལ་འབྱོར་མི་གཡེང་ཤོག །ཤཱཀྱ་སེང་གེའི་དཔྱད་(༢༣བ) ― GLG021_Page_0664 ―
[མ་དཔེ་གཟིགས་ན་འདིར་གནོན།]
ཁྲིམས་ཨུཏྤལ་ཐོད། །མ་རྙིགས་བག་ཡོད་རང་འོད་འདོམ་གང་གིས། །འཁོར་འདས་ཉིན་མཚན་བར་མེད་རབ་གསལ་ལྷའི། །རྐང་རྗེས་ནོན་པའི་གོམ་པ་དེང་འགོད་ཤོག །རྒྱལ་དང་དེ་བསྟན་མཛེས་བྱེད་རྒྱན་མཆོག་ལ། །འཕགས་ཡུལ་སྣ་ཚོགས་མཁས་མང་རྟོགས་བརྗོད་འཕྲེང༌། །བཀོད་ལེགས་སྲད་བུར་རབ་བརྒྱུས་དབང་པོའི་གཞུ། །རས་དཀར་མཁར་ཤར་བྱེད་པོ་གདོང་བཞིའི་སྤུན། །སྔོན་ཆོག་བ་གམ་ཡང་ཐོག་འགོལ་གནས་ལ། །རང་བཟོའི་མིག་བུ་བགྲད་པའི་དགྲ་མིན་པར། །དར་ཆོག་བརྒྱུད་པ་མ་ལ་ཡ་ཡི་དྲི། །ཆེས་དངར་ཚུལ་ཁྲིམས་འཁོར་བའི་གདུང་བ་སེལ། །ཉེར་དཀོན་དལ་འབྱོར་རྟེན་མཆོག་དོན་ལྡན་དུ། །བྱེད་ལ་རྒྱ་ཆེན་ཆོས་ཀྱི་རྣམ་གྲངས་མཐའ། །འཇལ་བའི་གྲགས་སྙན་ཏམ་བཱུ་ར་ཡི་རྒྱུད། །བརྡུང་མཁས་བྱ་རིགས་པཎ་ཆེན་མེ་ན་ཀཿ །བཅུ་ཕྲག་རིག་གནས་ཡོངས་ལ་བག་ཆགས་མཐུ། །ཚེ་འདིར་སད་པ་ཡང་སྲིད་ཕྱི་མ་ཀུན། །རང་ནོར་བཅོལ་བ་བླངས་འདྲས་སྒྲིབ་གསུམ་མདུད། །གྲོལ་བས་མྱང་འདས་གྲོང་དུ་འཇུག་པར་ཤོག །ཅེས་བྱ་རིགས་རྣམ་གླིང་པཎ་ཆེན་དཀོན་ཅོག་ཆོས་གྲགས་ཀྱིས་འོ་སྐོལ་གྱི་སྟོན་པ་རྒྱན་དྲུག་མཆོག་གཉིས་དང་བཅས་པར་པཎ་གྲུབ་དུ་མའི་ཞིང་བཀོད་ངོ་མཚར་ཐོར་བསྡུས་སྤེལ་བར་རྒྱབ་ཡིག་སྨོན་ལམ་དགོས་ཚུལ་ལྟར་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་པྲཎིདྷ་ན་སིདྡྷིབྷ་ཝནྟུ། །ཕྱག་ན་གསེར་སྦྱངས་ལས་འོངས་བདུད་རྩིའི་རྒྱུན། །རྒྱུན་ཆད་དང་བྲལ་འཆི་མེད་མཆོག་སྦྱིན་སྒོ། །སྒོ་འཕར་བརྒྱ་ཕྲག་འབྱེད་མཛད་(༢༤ན) ― GLG021_Page_0665 ―
[མ་དཔེ་གཟིགས་ན་འདིར་གནོན།]
གར་གྱི་དབང༌། དབང་ཕྱུག་བརྒྱད་ལྡན་ཐུགས་རྗེས་འགྲོ་ཀུན་སྐྱོངས། །འཇམ་དབྱངས་དབྱངས་ཅན་དགའ་བའི་འཛུམ་ཞལ་ལས། །ལེགས་བཤད་བཤད་པས་བཅུ་ཕྲག་རིག་གནས་ལ། །སྨྲ་མཁས་མཁས་པའི་གྲལ་ཆུད་བཤེས་གཉེན་མཆོག །དམ་ཆོས་ཆོས་འཁོར་བསྐོར་ཕྱིར་རབ་བརྟན་ཤོག །རྣམ་མང་ཐོས་སྲས་རྗེས་འགྲོའི་བསོད་ནམས་ཀྱིས། །རྣམ་འདྲེན་རྫོགས་སངས་རྒྱས་ཀྱི་བསྟན་པ་མཆོག །རྣམ་དག་བསམ་པས་རྒྱ་མཚོའི་གོས་ཅན་གཞིར། །རྣམ་པར་རྒྱལ་ཕྱིར་གཡུང་དྲུང་ལྟར་བརྟན་ཤོག །མང་མང་གྲུབ་མཐའ་རྣམ་བཞིའི་གཞུང་ལུགས་ལ། །ཡང་ཡང་ཐོས་བསམ་སྒོམ་པ་ལྷུར་བླངས་པས། །མཁས་མཁས་འདུ་བ་དགའ་ལྡན་ཆོས་འཁོར་སྡེ། །རིང་རིང་འཁོར་བ་སྟོངས་མིན་རྒྱས་པར་ཤོག །རྒྱལ་བ་སྲས་བཅས་རྣམས་ཀྱིས་མགྲིན་གཅིག་ཏུ། །རྒྱལ་བར་འགྱུར་བའི་ཤིས་པ་བརྗོད་པའི་གཏམ། །རྒྱལ་རྔ་སྲིད་པའི་རྩེ་མོར་བརྡུངས་པའི་སྒྲས། །རྒྱལ་སྲས་རླབས་ཆེན་སྤྱོད་ལ་བདག་འཇུག་ཤོག །ཅེས་བདེན་པ་བརྗོད་པའི་ཚིགས་སུ་བཅད་པ་འདི་ནི་ཤངས་དགའ་ལྡན་ཆོས་འཁོར་དུ་འཛུགས་རྒྱུ་ཞིག་དགོས་ཞེས་ངག་དབང་བཟོད་པས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་སྔོ་བཟང་དབང་པོའོ། །ངག་དབང་དབྱངས་ཅན་དྲིན་ལས་བློ་གྲོས་ཀྱི། །ལང་ཚོ་སྨྱིག་ཚལ་བཟང་པོ་དར་དྲག་པས། །གཙུག་ལག་རྒྱ་མཚོར་འཇུག་པའི་རྣམ་དཔྱོད་གདོང༌། །དྲུག་དངོམ་ཀརྟི་ཀ་ལ་གསོལ་བ་འདེབས། །བདག་སོགས་དེང་ནས་སྐྱེ་བར་རྣམ་ཐོས་བུའི། །(༢༤བ) ― GLG021_Page_0666 ―
[མ་དཔེ་གཟིགས་ན་འདིར་གནོན།]
ཚེ་འབྱོར་དབང་ཐང་མངོན་སུམ་ཉམས་མྱོང་ཞིང༌། །ཚད་མ་བཞི་ལྡན་སྨིན་གྲོལ་ཟབ་ལམ་གྱིས། །རིང་མིན་ཟུང་འཇུག་གོ་འཕང་མངོན་གྱུར་ཤོག །གསོལ་འདེབས་སྨོན་ལམ་འདི་ནི་འབྲོག་ཁྲི་དཔོན་ཀུན་དགའ་བསོད་ནམས་ལྷུན་གྲུབ་གྱི་ཞལ་འདོན་དུ་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །བླ་མ་ཡི་དམ་སྲུང་མའི་ཚོགས་རྣམས་ཀྱིས། །དད་སྟོབས་དབང་ཕྱུག་ད་ལས་ཧོང་ཐའི་ཇི། །དུས་མིན་འཆི་བདག་ལས་རྒྱལ་རིང་པོའི་ཚེ། །གེགས་མེད་ཕ་མཐར་ཕྱིན་པར་བྱིན་གྱིས་རློབས། །ནད་རིམས་དབུལ་ཕོངས་འཐབ་རྩོད་དགྲ་གདོན་གྱི། །བར་གཅོད་ཉེར་འཚེ་མཐའ་དག་ཡོངས་ཞི་ནས། །སྟོབས་འབྱོར་མངའ་ཐང་བསོད་ནམས་ཡོན་ཏན་རྣམས། །ཡར་ངོའི་ཟླ་ལྟར་འཕེལ་བར་བྱིན་གྱིས་རློབས། །ཡབ་གཅིག་བསྟན་འཛིན་ཆོས་ཀྱི་རྒྱལ་པོ་ཡི། །བཞེད་དོན་ཇི་བཞིན་རྗེ་བཙུན་བཙོང་ཁ་པའི། །བསྟན་སྲིད་གྱེན་དུ་འདེགས་པའི་བསམ་སྦྱོར་ཚོགས། །འབད་རྩོལ་བྲལ་ཏེ་འགྲུབ་པར་བྱིན་གྱིས་རློབས། །ཐོག་མ་མེད་ནས་ད་ལྟའི་བར་བསགས་པའི། །དགེ་ཚོགས་འབྲས་བུ་རིགས་འདྲ་ཕྱི་མ་རུ། །དལ་བརྒྱད་འབྱོར་བཅུ་ཚང་བའི་རྟེན་ཐོབ་ནས། །སངས་རྒྱས་བསྟན་དང་མཇལ་ཞིང་འཇུག་པར་ཤོག །ངག་དབང་བློ་བཟང་རྒྱ་མཚོ་དཔལ་བཟང་པོའི། །འཁོར་དུ་སྐྱེས་ནས་རྒྱལ་བའི་གསུང་རབ་དོན། །ཐོས་དང་བསམ་པས་ཚུལ་བཞིན་བསྒོམས་པའི་མཐུས། །མྱུར་དུ་རྣམ་མཁྱེན་ཡེ་ཤེས་ཐོབ་པར་ཤོག །སྐྱོན་བྲལ་ཡོན་ཏན་ཀུན་ཚང་རྫོགས་སངས་རྒྱས། །དེས་གསུངས་ལུང་རྟོགས་དམ་(༢༥ན) ― GLG021_Page_0667 ―
[མ་དཔེ་གཟིགས་ན་འདིར་གནོན།]
པ་ཆོས་ཀྱི་སྒོ། །རབ་འབྱེད་སྐྱེ་འཕགས་དགེ་འདུན་ཚོགས་རྣམས་ཀྱིས། །སྨོན་ལམ་ཅི་བཏབ་ཉེར་འགྲུབ་དཔང་པོ་མཛོད། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །གནས་གསུམ་མཁའ་འགྲོ་ཆོས་སྐྱོང་སྲུང་མ་ཡིས། །ཕུན་སུམ་ཚོགས་པའི་འཕྲིན་ལས་ཡོངས་སྤེལ་ནས། །ཐོག་མཐའ་བར་དུ་དགེ་བའི་བཀྲ་ཤིས་ཤོག །ཅེས་རིང་པོར་འཚོ་ཞིང་བསྟན་པའི་ཞབས་འདེགས་དང་ཕྱི་མ་དལ་འབྱོར་གྱི་རྟེན་ཐོབ་ནས་འཁོར་དུ་སྐྱེས་ཏེ་ཆོས་བསྒྲུབ་པའི་སྨོན་ལམ་ཁ་ཏོན་བྱེད་རྒྱུ་ཞིག་དགོས་ཞེས་བསོད་ནམས་ཀྱི་དཔུང་པས་ས་ཆེན་པོ་ལ་དབང་སྒྱུར་བའི་སྟོབས་ཀྱི་དབང་ཕྱུག་ད་ལས་ཧོང་ཐའི་ཇིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་དཀོན་ཅོག་གོ །གསེར་གྱི་ལྷུན་པོ་མཚན་དཔེས་རབ་འཁྱུད་སྐུ། །ཚངས་དབྱངས་སྙེམས་འཕྲོག་ཡན་ལག་དྲུག་ཅུའི་གསུང༌། །བདེན་གཉིས་ཆོས་ཀུན་མངོན་སུམ་གཟིགས་པའི་ཐུགས། །བསྐལ་བཟང་འདྲེན་མཆོག་བཞི་པ་ཤཱཀྱའི་ཏོག །རི་མོ་གཡས་འཁྱིལ་མགྲིན་པའི་པི་ཝང་ཁོག །སེང་གེའི་རྒྱུད་ལས་དྲངས་པ་སྨན་མདོའི་གླུ། །ཆེར་སྙེགས་ལུས་ཅན་ཡོངས་ཀྱི་རྣ་བ་རུ། །ཡོངས་འགྱེད་ཕན་བདེའི་སྲོག་འཚོ་བདུད་རྩིའི་བཅུད། །བརྒྱད་བརྒྱའི་པུསྟཀཿནས་ཉེར་བསྟན་པ། །སྨན་བླ་མངོན་མཁྱེན་ཆོས་གྲགས་མྱ་ངན་མེད། །གསེར་བཟང་རིན་ཅེན་ཟླ་བ་མཚན་ལེགས་ཞེས། །རྒྱལ་གཞན་ཀུན་ལས་ཆེས་ལྷག་ཐུགས་རྗེའི་གཏེར། །གངས་ཅན་ལྷ་གཅིག་ཁྲི་སྲོང་ལྡེའུ་བཙན་གྱི། །སྐུ་ཡི་རིམ་གྲོར་ཐུབ་བསྟན་རྩ་ལག་ཆེ།(༢༥བ) ― GLG021_Page_0668 ―
[མ་དཔེ་གཟིགས་ན་འདིར་གནོན།]
།མཁན་ཆེན་བོ་དྷི་སཏྭས་ལེགས་བཀྲལ་བའི། །མདོ་ཆོག་སྔོན་མེད་དཔག་བསམ་ཡོངས་འདུའི་མཆེད། །ཕོ་བྲང་ལྔ་བཅུ་རྩ་གསུམ་ལྷ་ཚོགས་སྐུ། །བདུན་ཚར་མཆོད་སྤྲིན་དངོས་བཤམས་ཡིད་སྤྲུལ་ནས། །སྤྱན་འདྲེན་ཕྱག་མཆོད་རྣམ་དག་སྨོན་ལམ་གྲངས། །སྟོང་ཕྲག་ལོ་རེ་སྟར་ཆུག་སྤེལ་བའི་དགེས། །འཇིག་རྟེན་སྤྱི་དང་ཁྱད་པར་རྒྱ་ཧོར་བོད། །བྱེ་བྲག་ཁྲི་སྐོར་བཅུ་གསུམ་རྒྱལ་ཁམས་འདིར། །མདོ་ཚིག་དོན་བཞིན་སྡུག་བསྔལ་རྣམ་གསུམ་གྱི། །མི་ཟད་ཟུག་རྔུ་དྲུངས་ནས་འབྱིན་པར་ཤོག།ཆོས་ནོར་འདོད་ཐར་སྡེ་བཞིའི་སྒོ་ཕྱེ་ནས། །སྲིད་ཞིའི་ཕུན་ཚོགས་ཡོན་ཏན་མཐའ་ཡས་པ། །ལུས་ངག་ཡིད་ལ་རྟག་ཏུ་ཉམས་མྱོང་བ། །འབྲལ་མེད་གོང་ནས་གོང་དུ་འཕེལ་བར་ཤོག །མིང་ཙམ་མིན་པར་ཤཱཀྱ་སེང་གེ་ཡི། །རྗེས་སུ་ཞུགས་སོ་ཅོག་གི་བསྟན་པ་དང༌། །ཡང་སྒོས་མཉམ་མེད་རི་བོ་དགའ་ལྡན་པའི། །རིང་ལུགས་སྲིད་མཐའི་བར་དུ་རྒྱས་པར་ཤོག །ཆོས་སྤྱོད་རྣམ་བཅུ་ཐུབ་གསུང་དགོངས་འགྲེལ་རྣམས། །ཐོས་བསམ་སྒོམ་པས་ལེགས་འཛིན་མདོ་སྔགས་སྡེ། །དབྱར་གྱི་ཆུ་གཏེར་ལྟ་བུར་རབ་འཕེལ་ཞིང༌། །བཤད་སྒྲུབ་རླབས་འཕྲེང་དུས་ལས་ཡོལ་མེད་ཤོག །གྲུབ་མཐའ་རྣམ་བཞིའི་བཞེད་གཞུང་སྨྲ་བའི་ངག །དགེ་དབང་གཉིས་པའི་བློ་ཡི་སྐལ་བཟང་ལ། །ལེགས་སྤྱོད་གཙུག་ལག་རྒྱ་མཚོའི་འཇུག་ངོགས་ཅན། །རྡོ་རྗེའི་ཁྲི་ལ་གཡོ་མེད་བརྟན་པར་ཤོག །སངས་རྒྱས་བསྟན་པ་འདེགས་ལ་བསོད་ནམས་མཐུ། །རྒྱ་ཆེན་མཚོ་ལྟར་གཏིང་ཟབ་ཁྲིམས་གཉིས་ཀྱི། །གསེར་འཁོར་མཁའ་ལ་རབ་(༢༦ན) ― GLG021_Page_0669 ―
[མ་དཔེ་གཟིགས་ན་འདིར་གནོན།]
འཕགས་མི་ཡི་བདག །སྐུ་ཚེ་ཆབ་སྲིད་མངའ་ཐང་རྒྱས་པར་ཤོག །ལྷག་བསམ་ཚངས་པའི་རལ་ཀླུང་སྟུག་པོ་ནས། །དགེ་ཚོགས་འཛད་མེད་གངྒཱ་འདྲེན་མཁས་པས། །སྐལ་ལྡན་ཤིང་རྟའི་མཆེད་ཟླ་ཧོར་བོད་ཀྱི། །སྐད་གཉིས་སྨྲ་བ་སེ་ཆེན་དབོན་པོ་གང༌། །བརྒྱ་ཕྲག་བགྲང་བྱར་ཉེ་བ་རིང་པོའི་ཚེ། །རྣམ་ཐོས་བུ་ལ་འགྲན་བཟོད་བསོད་ནམས་ཀྱི། །འཆར་དང་ནུབ་པ་དང་བྲལ་དུས་ཀུན་ཏུ། །སྐྱིད་པའི་ཉི་མ་དགུང་དུ་གསལ་བར་ཤོག །འདི་སྣང་ནུབ་ཚེ་བདེ་བར་གཤེགས་པ་བདུན། །མངོན་སུམ་བྱོན་ནས་དག་པའི་ཞིང་ཁམས་སུ། །ཐོག་མེད་ཁྲིད་དེ་རྒྱལ་བའི་སྲས་སུ་སྐྱེ། །རང་གཞན་དོན་གཉིས་འགྲུབ་པར་བྱིན་གྱིས་རློབས། །རྗེས་འཇུག་རྣམས་དང་དོན་འདིར་འབད་པ་ཀུན། །སྲས་བཅས་རྒྱལ་བའི་བྱིན་རླབས་སྙིང་ཞུགས་ནས། །འདི་ཕྱི་བར་དོའི་མདུན་ས་མ་ལུས་པ། །བསམས་པ་ཇི་བཞིན་འགྲུབ་པའི་བཀྲ་ཤིས་ཤོག །ཅེས་ཧོར་བོད་ཀྱི་ལོ་ཙཱ་བ་སེ་ཆེན་དབོན་པོ་བློ་བཟང་ཆོས་འཕེལ་གྱིས་སྨན་བླ་སྟོང་རྩ་ལོ་སྟར་གྱི་གཏོང་རྒྱུན་བཙུགས་པའི་ཚེ་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །རྣམ་དག་དད་པའི་མེ་ལོང་གཙང་མའི་ངོས། །རྒྱལ་ཀུན་འདུས་པའི་གཟུགས་བརྙན་ཡོངས་འཆར་བ། །འཇམ་དཔལ་དབྱངས་དངོས་དགའ་བའི་བཤེས་གཉེན་ལ། །སྒོ་གསུམ་གུས་པ་ཆེན་པོས་གསོལ་བ་འདེབས། །ཤུགས་དྲག་མོས་པས་ཐུགས་རྗེ་རབ་བསྐུལ་མཐུས། ། ― GLG021_Page_0670 ―
[མ་དཔེ་གཟིགས་ན་འདིར་གནོན།]
རྗེ་འབངས་རྣམས་ལ་ནད་གདོན་བར་གཅོད་ཀྱིས། །ཉེར་འཚེ་ཀུན་ཞི་ཚེ་དཔལ་རིགས་བརྒྱུད་སོགས། །ཡར་ངོའི་ཟླ་ལྟར་འཕེལ་བར་བྱིན་རློབས་ཤིག །སྨོན་ལམ་ཅི་བཏབ་རེ་བ་ཇི་བཞིན་དུ། །ལྷུན་གྱིས་གྲུབ་པར་བླ་མ་ཡི་དམ་ལྷ། །སངས་རྒྱས་བྱང་སེམས་ཉན་རང་ཆོས་སྐྱོངས་གིས། །དངོས་གྲུབ་ཆར་འབེབས་ལས་ཀུན་བསྒྲུབས་པར་ཤོག །ཅེས་སྡེ་མང་གི་འདོན་རྒྱུ་འདི་ལྟ་བུ་ཞིག་དགོས་ཞེས་ཇོ་རོག་ཐུ་ཁོ་ཤོར་ཆེ་ཐའི་ཇིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཚེ་རབས་དུ་མར་ངག་དབང་ལྷ་མོ་ཡིས། །བློ་གྲོས་བདུད་རྩིས་གང་བའི་བུམ་པ་བཟང༌། །ཐོས་བསམ་རྒྱ་མཚོ་ལས་ཐོན་ལེགས་བཤད་སྲོག །རབ་བརྟན་ཚངས་པའི་མཆེད་ཟླར་འགྱུར་མེད་ཤོག །གནས་ལྔ་རིག་པ་སྨྲ་ལ་འཇིགས་མེད་ཀྱི། །སྤོབས་མཐོའི་གོ་ཆ་བཙན་པོས་ཐུབ་བསྟན་ལ། །རྒོལ་ངན་ཉེར་བསྲུང་རྣམ་དཔྱོད་ལང་ཚོའི་སྡེ། །འོག་མིན་མགོན་པོ་ལྟ་བུར་བརྟན་པར་ཤོག །སངས་རྒྱས་གཉིས་པ་བློ་བཟང་གྲགས་པའི་བསྟན། །མཁའ་ལྟར་རྒྱ་ཆེ་མཚོ་བཞིན་གཏིང་ཟབ་པ། །ལེགས་སྐྱོང་ནོར་འཛིན་དབང་པོའི་སྐུ་ཚེ་དང༌། །མངའ་ཐང་འཆི་མེད་གཙོ་བོར་འགྲན་ནུས་ཤོག །ལྷོ་བྲག་ལུང་གསུམ་ལྗོངས་སུ་དགའ་ལྡན་པའི། །གྲུབ་མཐའ་གཙང་མས་རང་གཞན་དོན་གཉིས་ཀུན། །ཉེར་གྲུབ་འདུས་གླིང་འཁོར་ལོ་རྣམ་གསུམ་གྱི། །ནམ་མཁའ་གཞན་གྱུར་དེ་སྲིད་འཕེལ་རྒྱས་ཤོག །དཀོན་ཅོག་གསུམ་གྱི་ཐུགས་རྗེ་ཉི་འོད་བརྡལ། །འགྲོ་བའི་བདེ་སྐྱིད་སྣང་བས་ཕྱོགས་བཅུར་ཁྱབ། །ལྷ་དང་དྲང་སྲོང་བདེན་པའི་(༢༧ན) ― GLG021_Page_0671 ―
[མ་དཔེ་གཟིགས་ན་འདིར་གནོན།]
ཚིག་ལ་དབང༌། །ཚུལ་ཁྲིམས་ལྡན་པའི་སྨོན་ལམ་དེང་འགྲུབ་ཤོག །ཅེས་བརྗོད་དོན་དང་མང་ཉུང་འདི་ཙམ་ཡོད་པའི་སྨོན་ལམ་ཞིག་དགའ་ལྡན་དོན་གཉིས་གླིང་བླ་སྤྱི་མཐུན་མོང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །དུས་ཀྱི་དགྲ་བོར་ཁྲག་འཐུང་རོལ་གར་གྱིས། །འཁོར་འདས་ཕྱག་རྒྱ་ཟིལ་གནོན་བཞད་པ་རྩལ། །འཇམ་དཔལ་ཚེ་བདག་ངོ་བོར་རྟག་བཞུགས་ནས། །བདུད་བཞིའི་གཡུལ་ལས་རྣམ་པར་རྒྱལ་བར་ཤོག །རྩ་གསུམ་ཐུགས་རྗེ་ཆེན་པོའི་བྱིན་རླབས་ཀྱིས། །གནམ་ལྕགས་འབར་བའི་ཐོག་ཀྱང་ཟིལ་གནོན་པར། །དཔའ་བོའི་ལག་རྟགས་སོ་སྟོན་གོང་མ་ཡི། །རྣམ་པར་ཐར་པ་ཚུལ་བཞིན་འཛིན་ནུས་ཤོག །ཧེ་རུ་ཀཿདཔལ་སོ་ཟུར་གནུབས་གསུམ་གྱི། །བཀའ་གཏེར་བསྟན་སྐྱོང་དམ་ཅན་རྒྱ་མཚོ་ཡིས། །དབང་དྲག་རྒྱས་ཞི་མཆོག་གི་དངོས་གྲུབ་རྣམས། །བསམས་པ་ཇི་བཞིན་འགྲུབ་པའི་འཕྲིན་ལས་མཛོད། །ཅེས་པ་འདིའང་སོའི་སྔགས་འཆང་གནས་བྱུང་བ་གནམ་ལྕགས་ཟིལ་གནོན་དཔའ་བོས་བསྐུལ་བ་ལྟར་ཟིལ་གནོན་བཞད་པ་རྩལ་གྱིས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །འཆི་མེད་བདུད་རྩིའི་བཅུད་ཀྱི་དངས་མ་ཀུན། །ལྷ་སྔགས་རྩ་ཐིག་རླུང་གསུམ་རིག་རྩལ་གྱིས། །ཨ་ཧཾ་མི་བཤིག་སྲོག་ཏུ་ལེགས་འདྲེན་པ། །ཐོད་འཕྲེང་རིགས་ལྔའི་ཐུགས་རྗེ་རྨད་པོ་ཆེ། །གང་བྱིན་ཉེར་བརླབས་རིང་པོར་འཚོ་ཐབས་ཀྱི། །རྟེན་ཅིང་འབྲེལ་འབྱུང་(༢༧བ) ― GLG021_Page_0672 ―
[མ་དཔེ་གཟིགས་ན་འདིར་གནོན།]
ཡོངས་བསྒྲིགས་ཆོ་ག་ཡིས། །བདུད་ལས་རྣམ་པར་རྒྱལ་བའི་ཕན་བདེའི་སྒོ། །ལེགས་འབྱེད་བཤད་སྒྲུབ་ངེས་གསང་ཐེག་མཆོག་གླིང༌། །དེའི་ཆེད་བརྩོན་ལྡན་དགེ་སློང་རིག་པ་འཛིན། །འཇམ་དབྱངས་གྲགས་པས་སྒོ་གསུམ་འབད་པའི་མཐུས། །རྡོ་རྗེ་སློབ་དཔོན་སྟུག་པོ་བཀོད་ཞིང་གི །མགོན་ལྟར་བསྐལ་པར་གཡོ་མེད་བརྟན་པར་ཤོག །མི་ཡི་དབང་ཕྱུག་སྐུ་ཚེ་མངའ་ཐང་དང༌། །ཆབ་སྲིད་ཡར་ངོའི་ཟླ་བ་བཞིན་དུ་འཕེལ། །སྤྱི་དང་བྱེ་བྲག་འཇིག་རྟེན་ཁམས་མ་ལུས། །རྫོགས་ལྡན་གསར་པའི་དགའ་སྟོན་དགོད་པར་ཤོག །རྒྱུ་སྦྱོར་མི་ནོར་འཁོར་བཅས་རྨུགས་འཛིན་ལ། །འགྲན་པར་ནུས་པ་སྲིད་པའི་ཕུན་ཚོགས་ཀུན། །རབ་རྒྱས་ལུས་ངག་ཡིད་གསུམ་བདེ་སྐྱིད་ལ། །རྟག་ཏུ་སྤྱོད་པའི་བསོད་ནམས་ཐོབ་པར་ཤོག །ཕྱི་མའི་ཡང་སྲིད་རྣམས་སུ་དལ་འབྱོར་ལུས། །རྙེད་ནས་སངས་རྒྱས་བསྟན་ལ་ཐོས་བསམ་དང༌། །སྒོམ་པས་དུས་གསུམ་རྒྱལ་རྣམས་གཤེགས་བཤུལ་དེར། །མྱུར་བགྲོད་ལུས་ཅན་མཐའ་དག་འདྲེན་པར་ཤོག །འདིས་མཚོན་སྔོན་བསགས་རྣམ་པར་དཀར་བའི་འབྲས། །མ་ལུས་ནམ་མཁའི་མཐས་གཏུགས་སེམས་ཅན་རྣམས། །སྲིད་ཞིའི་མཐའ་བྲལ་རྫོགས་པའི་སངས་རྒྱས་ཀྱི། །གོ་འཕང་མངོན་དུ་འགྱུར་བའི་རྒྱུ་རུ་བསྔོ། །ཞེས་གནས་བརྟན་འཇམ་དབྱངས་གྲགས་པས་ལྕགས་མོ་བྱ་ལོ་ས་ག་ཟླ་བར་རིང་པོར་གནས་པའི་རྟེན་འབྲེལ་བསྒྲིགས་སྐབས་ཉིན་བདེ་མ་སོགས་སྣ་ཚོགས་པའི་ཁ་བཏགས་ཉི་ཤུ་རྩ་ལྔ། ཁ་བཏགས་ཧོར་དུས་མའི་ཡོལ་བ་རྣམ་པ་དྲུག །དར་(༢༨ན) ― GLG021_Page_0673 ―
[མ་དཔེ་གཟིགས་ན་འདིར་གནོན།]
ལིང་ཁ་བཅུ་དྲུག །སྨན་རྙིང་ཁ་བཅུ། རྟེན་ཁེབས་གཉིས། རྒྱ་གོས་སེའུ་མ། གོས་ཡུག་བཞི། གོས་གསང་ཚོན་ཁྲ་ཁ་དོ། ལིང་སེར་ཡུག་དང་ལིང་དཀར་ཁ་ལྔ། དྲིལ་བུ་ཐེག་ཆེན་གསུམ་དང་བོད་དྲིལ་གཅིག །ཚོགས་ཁྲོ་གཅིག །ཟངས་དམར་གྱི་ཀ་ཋོ་ར་ཆ་གཅིག་རྣམས་ལ་དགེ་སྐོས་ཐེར་ཟན་ཚོས་གོང་བརྒྱབ་ལ་ཁྱོན་བསྡོམས་དངུལ་སྲང་ཉིས་བརྒྱ་དང་ཞོ་གསུམ་ཐོབ་པ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་སྤྱི་འབུལ་གྱི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་དཀོན་ཅོག་གོ །སྦྱང་གཞི་དུག་ལྔའི་ལྕགས་ཁམས་ཐབས་མཁས་རྩི། །སྣ་ཚོགས་ལམ་གྱིས་བསྒྱུར་བ་ཡེ་ཤེས་ལྔ། །གསེར་ཞུན་འོད་འབར་ཁྱབ་བདག་རྡོ་རྗེ་སེམས། །སྟོང་ཕྲག་སྣང་བརྙན་བཞེངས་པའི་དགེ་ལེགས་འབྲས། །འཕྲིན་ལས་རྣམ་རྒྱལ་རྒྱུད་ལ་ཐོག་མེད་ནས། །ཉེར་བགོས་ལས་ཉོན་དྲི་མ་ཅི་མཆིས་པ། །ཐུགས་རྗེའི་ཆབ་ཀྱིས་དེང་བཀྲུས་མི་ཡི་ལུས། །ཆོས་ལྡན་རྟེན་དུ་ཉིང་མཚམས་སྦྱོར་བར་ཤོག །ཡང་སྲིད་བར་མེད་གསུམ་དུ་དལ་བའི་རྟེན། །རྙེད་ཀྱང་གཞན་རྐྱེན་གེགས་དབང་གྱུར་པའི་རྒྱུན། །རབ་བཅད་འདི་ཕྱི་གཏན་མདུན་བསྒྲུབ་པ་ཡི། །འདོད་དོན་འགྲུབ་པའི་གྲོགས་ཀུན་ཚང་བར་ཤོག །བདེ་ལྡན་ཞིང་གི་མགོན་པོ་གར་གྱི་དབང༌། །ཐུགས་ཀ་ནས་འཕྲོས་འོད་དཀར་སྦུབས་ལམ་དུ། །འཕྲིན་ལས་རྣམ་པར་རྒྱལ་བ་རབ་དྲངས་ཏེ། །ཆུ་སྐྱེས་དབུས་སུ་བརྫུས་ནས་སྐྱེ་བར་ཤོག །མགོན་དེས་ལྗགས་ཀྱི་པདྨ་ཉེར་བཀྲམ་ནས། །ལེགས་གསུངས་(༢༨བ) ― GLG021_Page_0674 ―
[མ་དཔེ་གཟིགས་ན་འདིར་གནོན།]
ཐེག་ཆེན་དམ་ཆོས་ཐོས་བསམ་དང༌། །སྒོམ་པས་སྤྱན་རས་གཟིགས་དང་གསང་བའི་བདག །ཇི་བཞིན་རླབས་ཆེན་སྤྱོད་པ་འགྲུབ་པར་ཤོག །གནས་དེར་རང་བདེར་མ་ཆགས་སྙིང་སྟོབས་ཀྱི། །སྤྲུལ་པ་མཐའ་དག་བཀྱེ་ནས་མ་དག་པ། །གྲངས་མེད་ཞིང་དུ་གནས་པའི་སེམས་ཅན་ཚོགས། །ཐར་པར་འཁྲིད་པའི་ས་མཁན་བྱེད་པར་ཤོག །སྒྲིབ་གཉིས་དགྲ་བཅོམས་སྤང་རྟོགས་ཡོན་ཏན་ཀུན། །རྫོགས་པར་སངས་རྒྱས་ཐམས་ཅད་མཉམ་ན་ཡང༌། །གངས་ཅན་འགྲོ་ལ་ཐུགས་རྗེ་ཚད་མེད་དུ། །རབ་འཇུག་པད་འབྱུང་ཀུན་བཟང་ཧེ་རུ་ཀཿ །གངྒཱའི་ཀླུང་རྡུལ་སྙེད་ཀྱིས་མཚོན་མིན་སྤྲུལ། །སྤྲོ་ཡང་འཛམ་བུ་གླིང་འདིར་གྲགས་ཆེ་བ། །གཅིག་ལས་དུ་མའི་རོལ་གར་ཀ་ཤི་ཀར། །སོར་མོའི་འཕྲུལ་གྱིས་བསྒྱུར་བའི་བསོད་ནམས་མཐུས། །འཕྲིན་ལས་རྣམ་རྒྱལ་རྔ་ཡབ་གྲོང་ཁྱེར་དུ། །སྲིན་ཕྲུག་བཟང་པོའི་བག་ཆགས་ཉེར་སད་པར། །གྱུར་ནས་པདྨ་འོད་ཀྱི་ཕོ་བྲང་ཆེར། །ཆོས་ཉིད་ཟད་སར་འཁྱོལ་བར་བྱིན་གྱིས་རློབས། །ཞེས་གཞིས་ཀ་ཤར་པ་ཟུར་འཕྲིན་ལས་རྣམ་རྒྱལ་དུས་ཀྱི་ཆོས་ཉིད་དུ་གྱུར་པའི་ཚེ་རྡོ་རྗེ་སེམས་དཔའ་འོད་དཔག་མེད་ཀྱི་སྟོང་ཐང༌། སློབ་དཔོན་ཆེན་པོར་མཚན་བརྒྱད་ཀྱིས་བསྐོར་བ་རྣམས་ཀྱི་ཐང་ག་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །རྒྱལ་ཀུན་མཐུ་སྟོབས་གཅིག་བསྡུས་གསང་བའི་བདག །དྲང་སྲོང་ཆེན་པོ་དྲི་མེད་ཟློས་གར་ཅན། །སྡེ་བརྒྱད་གཉེན་པོར་ཞེ་སྡང་(༢༩ན) ― GLG021_Page_0675 ―
[མ་དཔེ་གཟིགས་ན་འདིར་གནོན།]
རྡོ་རྗེའི་སྐུར། །བསྟན་ནས་ཡིད་སྲུབས་སྡེ་བཅས་མཐར་བྱེད་མཁར། །ཁྱོད་བསྙེན་ལྷག་པའི་ལྷར་བཟུང་བསྒྲུབས་པ་དང༌། །ལས་ལ་སྦྱར་བས་སྲིད་གསུམ་འབྱུང་པོའི་སྲོག །ཉེར་དྲངས་བཀའ་ལས་འདས་རྣམས་ལག་མཐིལ་གཉིས། །གནམ་སའི་བར་བཅར་སྡིག་པས་ཁོང་ཁྲག་དྲོངས། །ཀུན་རྫོབ་ཙམ་ལ་མི་ཞེན་རང་གི་སེམས། །གདོད་ནས་རྣམ་དག་ཕྱག་ན་རྡོ་རྗེའི་མཚོན། །རྣོན་པོས་གཉིས་འཛིན་འཆིང་རྒྱ་ཡོངས་བཅད་དེ། །བདེ་ཆེན་ཆོས་སྐུའི་ཀློང་དུ་གྲོལ་བར་ཤོག །ཅེས་ཡར་ཀྲུང་པ་འཆམས་དཔོན་ངག་དབང་སྐལ་བཟང་གིས་དགེ་སྦྱོར་དམིགས་རྟེན་དུ་དྲང་སྲོང་དྲི་མེད་ཞི་ཁྲོའི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །གྲུ་འཛིན་རི་བོའི་སྤོ་ན་པད་དཀར་འཆང༌། །རྒྱུད་ལྔའི་འགྲོ་ལ་རྟག་ཏུ་རྗེས་བརྩེ་ཡང༌། །མ་རུངས་གདུལ་དཀའི་གཉེན་པོར་སྲིན་པོའི་གཟུགས། །སྟོབས་ཆེན་མྱུར་མཛད་མགོན་པོ་ཕྱག་དྲུག་པ། །རང་སྙིང་འདབ་སྟོང་རྒྱས་པའི་ཟེའུ་འབྲུའི་རྩེར། །འཇམ་དབྱངས་དགའ་བའི་བཤེས་གཉེན་དཔལ་བཟང་དང༌། །ལྷ་མཆོག་མ་ཧཱ་ཀཱ་ལ་དབྱེར་མེད་དུ། །ནམ་ཡང་མི་གཡོ་བཞུགས་པར་གསོལ་འདེབས་ན། །དེང་ནས་བྱང་ཆུབ་བར་གྱི་སྐྱབས་མཛད་དེ། །འདི་ཕྱི་བར་དོའི་འཇིགས་ལས་སྒྲོལ་བ་དང༌། །མཁའ་སྤྱོད་ཞིང་དུ་གསང་སྔགས་ཉེ་བའི་ལམ། །ཉམས་སུ་བསྟར་ནས་རྡོ་རྗེ་འཆང་ཐོབ་ཤོག །ཅེས་སྤྱི་ཁང་མདོ་པ་དཀོན་ཅོག་རབ་བརྟན་གྱིས་ངག་འདོན་བྱེད་རྒྱུ་འདི་ལྟ་(༢༩བ) ― GLG021_Page_0676 ―
[མ་དཔེ་གཟིགས་ན་འདིར་གནོན།]
བུ་ཞིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །ལྷོ་ཕྱོགས་གྲུ་འཛིན་རི་བོའི་ཕོ་བྲང་རྩེར། །རྟག་ཏུ་བཞུགས་ཀྱང་འགྲོ་དྲུག་སེམས་ཅན་ལ། །ཐུགས་རྗེས་ནམ་ཡང་མི་ལྷོད་དོན་མཛད་པ། །འཕགས་མཆོག་སྤྱན་རས་གཟིགས་ལ་གསོལ་བ་འདེབས། །པད་ཟླའི་གདན་སྟེང་མཉམ་པར་བཞེངས་པའི་སྐུ། །གངས་རི་ལྟར་དཀར་མཚན་དཔེའི་ལང་ཚོ་ཅན། །རིན་ཅེན་རྒྱན་དང་དར་གྱི་ན་བཟས་སྤྲས། །འཇིག་རྟེན་དབང་ཕྱུག་ཞབས་ལ་གསོལ་བ་འདེབས། །ཚེ་རབས་མང་པོར་ཉེར་བསགས་སྡིག་ལྟུང་འབྲས། །མ་རིག་རང་མདངས་མིག་ལ་ཤར་བ་ཡི། །ཕྱི་ནང་བར་གྱི་འགྲིབ་བྱེད་རྩ་ཕྱག་གི །སྲིན་ལག་འཕྲུལ་གྱིས་སེལ་བར་བྱིན་གྱིས་རློབས། །ཞིང་ཁམས་རབ་འབྱམས་གསལ་བའི་མེ་ལོང་ངོས། །དངུལ་བུམ་བདུད་རྩིས་བཀྲུས་པས་སྐྱེ་རྒུ་ཡི། །ལས་ཉོན་དེས་བསྐྱེད་སྡུག་བསྔལ་ཡོངས་སྦྱར་ནས། །ལུས་ངག་ཡིད་གསུམ་བདེ་དང་ལྡན་པར་ཤོག །མགོན་པོ་ཁྱོད་སྐུ་སྣང་སྟོང་ལྷ་རུ་བསྒོམ། །གསང་སྔགས་བཟླས་བརྗོད་ཆུ་ཡིས་སྲིན་ལག་མཉེས། །ཕྱག་རྒྱའི་ཐབས་ཀྱིས་མིག་གི་ནད་རིགས་ཀུན། །ཉེར་སངས་རབ་རིབ་མཐའ་དག་དྲུངས་འབྱིན་ཤོག །སྔོན་གྱི་ལས་ངན་མཐུ་དང་ཚེ་འདི་ལ། །འབྱུང་པོའི་གདོན་ཚོགས་རྐྱེན་ལས་བྱུང་བ་ཡི། །ཕྱི་ནང་བར་གྱི་མིག་སྐྱོན་མ་ལུས་པ། །ཞི་བར་ཕྱག་ན་པདྨས་བྱིན་གྱིས་རློབས། །གནས་སྐབས་གཟུགས་སྣང་མཐའ་དག་གསལ་བར་མཐོང༌། །ཆོས་ཉིད་མངོན་སུམ་བལྟ་བའི་ནུས་ཐོབ་པས། །བདག་སོགས་(༣༠ན) ― GLG021_Page_0677 ―
[མ་དཔེ་གཟིགས་ན་འདིར་གནོན།]
མཁའ་མཉམ་སེམས་ཅན་མ་ལུས་པ། །རྣམ་དག་ཡེ་ཤེས་སྤྱན་དང་ལྡན་པར་ཤོག །ཅེས་པ་འདིའང་དཔོན་ས་བུ་ཁྲིད་རྒྱལ་མོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །རྣམ་དག་དད་པའི་དངས་མཚོར་རྒྱལ་ཀུན་གཟུགས། །ཡོངས་ཤར་གཅིག་འདུས་ངག་དབང་བློ་གྲོས་གཏེར། །མཁས་བཙུན་བཟང་པོའི་ངང་ཚུལ་ཟབ་རྒྱ་ཅན། །མཚོ་བྱུང་དྲིན་ལས་རྙེད་ལ་གསོལ་བ་འདེབས། །རྩེ་གཅིག་གསོལ་བ་བཏབ་པའི་བྱིན་རླབས་ཀྱིས། །བདག་སོགས་འགྲོ་བའི་མགོན་དང་སྐྱབས་གཅིག་པུར། །མི་ཤིགས་རྡོ་རྗེའི་ཁྲི་ལ་སྐྱིལ་མོ་ཀྲུང༌། །བཅས་ཏེ་ཆོས་འཁོར་བསྐལ་བརྒྱར་སྐོར་བར་ཤོག །ཚེ་རབས་ཀུན་ཏུ་དགེ་བའི་བཤེས་གཉེན་ཆེ། །ནམ་ཡང་འབྲལ་མེད་གཙུག་ཏུ་ལེགས་བསྟེན་ནས། །ཟབ་རྒྱས་ཆོས་ཀྱི་རོ་ལ་ལོངས་སྤྱད་དེ། །ཕྱིན་དྲུག་སྤྱོད་པས་འགྲོ་རྣམས་འདྲེན་པར་ཤོག །གནས་སྐབས་སུ་ཡང་དགྲ་གདོན་དབུལ་ཕོངས་ནད། །དུས་མིན་འཆི་བའི་འཇིགས་པ་མཐའ་དག་ཞི། །ཚེ་དང་བསོད་ནམས་སྟོབས་འབྱོར་དབང་ཐང་རྣམས། །ཡར་ངོའི་ཟླ་བ་ལྟ་བུར་འཕེལ་བར་ཤོག །སངས་རྒྱས་ཆོས་དང་དགེ་འདུན་བདེན་པའི་མཐུ། །མྱུར་མཛད་མགོན་པོ་ལས་ཀྱི་གཤིན་རྗེ་གཤེད། །འདོད་ཁམས་མ་སོགས་དཀར་ཕྱོགས་སྐྱོང་བ་ཡི། །དམ་ཅན་སྲུང་མ་རྣམས་ཀྱིས་གྲོགས་བྱེད་ཤོག །ཅེས་གསོལ་འདེབས་སྨོན་ལམ་དང་བཅས་པ་འདི་ལྟ་བུ་ཞིག་དགོས་ཞེས་སའི་ཚངས་པ་བསྟན་འཛིན་དཱ་ལའི་རྒྱལ་པོའི་སྲས་བསྟན་(༣༠བ) ― GLG021_Page_0678 ―
[མ་དཔེ་གཟིགས་ན་འདིར་གནོན།]
འཛིན་དབང་རྒྱལ་དང༌། ལྷ་བཟང་ཀླུ་དབང༌། ཀུན་དགའ་རབ་བརྟན་ལྕམ་སྲིང་གསུམ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །འཇམ་དཔལ་ཚེ་བདག་རིགས་ཀྱི་ཅོད་པན་དུ། །ལེགས་བཞུགས་རྡོ་རྗེ་དབྱིངས་ཀྱི་དབང་ཕྱུག་མ། །ཡིད་སྲུབས་གཤེད་དུ་དམག་ཟོར་རྒྱལ་མོའི་སྐུར། །ཉེར་བསྟན་བྱིན་རླབས་མཐུ་སྟོབས་རྫུ་འཕྲུལ་གྱིས། །ཟ་ཧོར་རིགས་འཛིན་ཆེ་མཆོག་འདུས་པ་རྩལ། །ཨཧཾ་ནམ་ཡང་འགྱུར་བ་མེད་པ་ཡི། །སྲོག་གི་ཀ་བ་རྡོ་རྗེ་ལྟར་ཚུགས་ནས། །བགྲང་ཡས་གདུལ་བྱའི་རེ་བ་བཀོང་བར་ཤོག །བདུད་བཙན་ལྟ་བུར་དཔའ་བའི་དྲག་ཤུལ་དང༌། །ལུགས་གཉིས་རྣམ་པར་དཔྱོད་པའི་ཤེས་རབ་ཀྱིས། །དཔལ་ལྡན་སྐལ་བཟང་ཆོས་སྲིད་དོན་རྣམས་ཀུན། །ཐོགས་མེད་ལྷུན་གྱིས་གྲུབ་པའི་འཕྲིན་ལས་མཛོད། །ཅེས་འཕྱོས་ཕུག་པོ་ལུང་པ་བདུད་བཙན་དཔལ་བཟང་གིས་དཔལ་ལྡན་དམག་ཟོར་མའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །སྲིད་གསུམ་དྲེགས་པ་ཀུན་གྱི་གཉེན་པོ་རུ། །བརྟན་པའི་འཁོར་ལོ་ཟ་བྱེད་མ་ཧེའི་ཞལ། །གནམ་ས་ལྟ་བུར་གདངས་ཀྱང་ཆོས་ཀྱི་དབྱིངས། །འཇམ་ཞིང་ཆེས་དུལ་འགྲོ་ལ་གཅིག་ཏུ་བརྩེ། །གང་གི་སྣང་བརྙན་བཞེངས་པས་གནས་སྐབས་སུ། །འགལ་རྐྱེན་བར་ཆད་མི་མཐུན་ཀུན་ཞི་ཞིང༌། །འཁོར་འདས་ཡོན་ཏན་མཐའ་དག་དཀར་ཕྱོགས་ཀྱི། །ཟླ་བའི་ཆ་ཤས་ལྟ་བུར་འཕེལ་བར་ཤོག །དབང་(༣༡ན) ― GLG021_Page_0679 ―
[མ་དཔེ་གཟིགས་ན་འདིར་གནོན།]
བཞིའི་ཆུ་བོས་མ་དག་དྲི་བཀྲུས་ནས། །སྐུ་བཞིའི་ས་བོན་ཐེབས་པས་རང་རྒྱུད་སྨིན། །ལམ་བཞི་རྫོགས་རིམ་འགྲོས་ཀྱིས་ཡོངས་གྲོལ་ཏེ། །ལས་བཞིས་འགྲོ་བ་མ་ལུས་འདྲེན་ནུས་ཤོག །ཅེས་གདོང་དཀར་རྫོང་སྡོད་མས་གྲོ་ཚེ་བརྟན་གྱིས་འཇིག་བྱེད་ཀྱི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དབོན་ངག་དབང་དཀོན་ཅོག་གོ །འོད་ཟེར་དྲུག་སྦྲགས་རྩིབས་བརྒྱད་མེ་དཔུང་དབུས། །ཚེ་སྦྱིན་ཡིད་བཞིན་འཁོར་ལོའི་ངོ་བོ་རུ། །ངག་དབང་བློ་བཟང་རྒྱ་མཚོ་ལེགས་བཞུགས་པར། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །མགོན་ཁྱོད་གཞོམ་མེད་རྡོ་རྗེའི་སྐུར་གྱུར་པའི། །མི་ཤིགས་སྲུང་བའི་གུར་ཁང་བཙན་པོ་རུ། །བདག་སོགས་ཉེར་ཆུད་བདུད་བཞི་ལས་རྒྱལ་ཏེ། །དངོས་གྲུབ་ཡར་ངོའི་ཟླ་ལྟར་འཕེལ་བར་ཤོག །དམག་ཟོར་ལྷ་མོ་ཚངས་དབང་དྲི་ཟའི་རྒྱལ། །ཟུར་ཕུད་ལྔ་པས་བར་ཆད་ཀུན་སྐྱོབ་ཅིང༌། །ཚེ་དཔལ་བསོད་ནམས་དབང་ཐང་སྟོབས་འབྱོར་རྣམས། །རྣམ་ཐོས་སྲས་དང་མཚུངས་པའི་འཕྲིན་ལས་མཛོད། །ཅེས་པ་འདིའང་གྲོང་སྨད་པ་དམག་ཟོར་ཚངས་དབང་གི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་ལྕགས་བྱ་ཧོར་ཟླ་ལྔ་པའི་ཚེས་བཞིའི་རྒྱལ་ཕུར་འགྲུབ་སྦྱོར་གྱི་ཐོག་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །ཀ་དག་དབྱིངས་ནས་འཆི་མེད་ཆོས་སྐུའི་གདངས། །འཇའ་ལུས་གར་དབང་ལོངས་སྤྱོད་རྫོགས་སྐུའི་ཟེར། །སིནྡྷུའི་འདབ་སྟོང་རྩེ་མོར་སྤྲུལ་སྐུའི་གར། །(༣༡བ) ― GLG021_Page_0680 ―
[མ་དཔེ་གཟིགས་ན་འདིར་གནོན།]
ལེགས་བསྒྱུར་མཚོ་སྐྱེས་རྡོ་རྗེའི་ཐུགས་རྗེའི་མཐུས། །ཟ་ཧོར་རིགས་ལས་ཟིལ་གནོན་བཞད་པ་རྩལ། །ཆེ་མཆོག་ཞི་ཁྲོ་ཀུན་བདུས་རྣལ་འབྱོར་པ། །པདྨས་མིང་བཏགས་རྡོ་རྗེ་ཐོགས་མེད་རྩལ། །སྲོག་གི་ཀ་བ་གཡུང་དྲུང་ལྟར་བརྟན་ཤོག །རྨོངས་པའི་མུན་སངས་བློ་གྲོས་སྣང་བ་རྒྱས། །རྒྱ་མཚོ་ལྟ་བུར་ཟབ་དང་རྒྱ་ཆེའི་ཁྲིམས། །བཀའ་རྟགས་བཙན་པོ་མཆོག་དམན་གཉར་ལྕི་ཞིང༌། །ས་དབང་སྐུ་ཚེ་ཆབ་སྲིད་འཕེལ་བར་ཤོག །གངས་ཅན་པདྨའི་ལྟེ་བར་བསོད་ནམས་ཀྱི། །མངལ་ཁུར་སྦྲུམས་པས་བདེ་སྐྱིད་རྔུལ་ཆུའི་རྒྱུན། །ཡན་ལག་བརྒྱད་ལྡན་ཟླ་བའི་མ་མ་རུ། །འཁྱིལ་བས་རླབས་འཕྲེང་མཁའ་ལ་འཕྱུར་བར་ཤོག །ལོ་ཆེན་དཔལ་བརྩེགས་དཔལ་གྱི་རྡོ་རྗེ་ཡི། །མཁྱེན་བརྩེའི་རང་གཟུགས་འདི་མཆོག་སྤྲུལ་པའི་སྐུར། །ཤར་པའི་བཀའ་གཏེར་འཕྲིན་ལས་རོ་བརྒྱའི་བཅུད། །སྐལ་བཟང་གདུལ་བྱའི་ཚོགས་ཀྱིས་མྱོང་བར་ཤོག །ཨྱོན་བླ་མའི་ཟབ་རྒྱས་ཆོས་ཀྱི་གཏེར། །རབ་འབྱེད་གསང་སྔགས་འཆར་བ་འདུས་པའི་གླིང༌། །བཤད་དང་སྒྲུབ་པའི་སྒྲོན་མེས་སྔ་འགྱུར་གྱི། །རིང་ལུགས་སྣང་བས་འཇིགས་རྟེན་ཁྱབ་པར་ཤོག །རྒྱ་བོད་རིགས་འཛིན་བླ་མ་བཀའ་བརྒྱད་ལྷ། །སྔགས་སྲུང་མ་ནིང་དྲེགས་པའི་སྡེ་དཔོན་སོགས། །རྩ་གསུམ་ལྷ་ཡིས་འདོད་དོན་མ་ལུས་པ། །བསམས་པ་ཇི་བཞིན་འགྲུབ་པའི་འཕྲིན་ལས་མཛོད། །ཅེས་པ་འདིའང་འོད་མཆོག་སྤྲུལ་པའི་སྐུས་ཨྱོན་ཆོས་གཏེར་གླིང་དུ་འཛུགས་རྒྱུ་ཞིག་དགོས་ཚུལ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །(༣༢ན) ― GLG021_Page_0681 ―
[མ་དཔེ་གཟིགས་ན་འདིར་གནོན།]
མཁའ་ཁྱབ་མཁའ་ཡི་རྡོ་རྗེ་སྟོང་ཆེན་དབྱིངས། །ཟུང་འཇུག་གར་དགུའི་སྒྱུ་འཕྲུལ་རྨད་པོ་ཆེ། །བསྒྱུར་མཛད་བཅོམ་ལྡན་ཧེ་རུ་ཀ་དཔལ་གྱིས། །ཐུགས་རྗེའི་རང་གཟུགས་འགྲོ་ངོར་མྱུར་འཆར་ཤོག །འཁོར་ལོའི་མགོན་ནུས་གསུང་ངག་ཆད་མེད་པ། །བསྐྱེད་རྫོགས་སྙན་བརྒྱུད་ཟབ་མོ་ལ་དབང་བ། །རས་ཆུང་བསྟན་པའི་ཉི་འོད་བརྡལ་བ་ལ། །ཆོས་རྒྱལ་དབང་པོའི་ཡང་སྲིད་མྱུར་འབྱོན་ཤོག །མཐའ་ཀླས་ཞིང་མང་སྐྱེ་རྒུའི་དོན་གྱི་ཆེད། །སྣ་ཚོགས་སྤྲུལ་པ་གངྒཱའི་ཀླུང་རྡུལ་ལྟར། །སྟོན་ལ་འགོག་པ་མེད་བཞིན་གངས་ལྗོངས་འདིར། །མོས་ལྡན་གདུལ་བྱའི་འདྲེན་པར་མྱུར་འབྱོན་ཤོག །རྩ་ཁམས་རླུང་གི་ཟབ་གསང་འཕྲུལ་པོ་ཆེ། །རང་བྱུང་ལུས་ཀྱི་ཟློས་གར་བརྟུལ་ཞུགས་ལ། །སྤྱོད་པས་རྡོ་རྗེའི་གྲགས་པ་ཀུན་ཁྱབ་པས། །དེང་སྨོན་ཅི་བཏབ་འགྲུབ་པར་བྱིན་གྱིས་རློབས། །རྗེ་བཙུན་ཐོས་པས་རབ་དགའི་སྒྲུབ་རྒྱུད་ཀྱི། །བསྟན་པ་བསྲུང་བར་ཞལ་བཞེས་དམ་ཅན་གྱིས། །ཇི་ལྟར་བསམས་པའི་རེ་བ་མ་ལུས་ཡོངས། །འབད་མེད་ལྷུན་གྱིས་གྲུབ་པའི་འཕྲིན་ལས་མཛོད། །ཅེས་རས་ཆུང་ཕུག་སྤྲུལ་སྐུ་ངག་དབང་ཆོས་རྒྱལ་དབང་པོའི་སྐུ་སྐྱེ་མྱུར་འབྱོན་གྱི་སྨོན་ལམ་ཞིག་དགོས་ཞེས་ཕྱག་མཛོད་གཟི་བརྗིད་དབང་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །འདབ་སྟོང་པདྨའི་ལྟེ་བར་ཟླ་བའི་སྟོང༌། །ཚེ་མཐའ་ཡས་པ་པདྨ་རཱ་གའི་མདོག །མཉམ་པར་རབ་བཞེངས་མཚན་དཔེའི་ལང་ཚོ་ཅན། །བསྒོམས་པས་གཞོམ་མེད་(༣༢བ) ― GLG021_Page_0682 ―
[མ་དཔེ་གཟིགས་ན་འདིར་གནོན།]
རྡོ་རྗེའི་སྐུ་འགྲུབ་ཤོག །ཐུགས་ཀར་ཉི་མའི་སྟེང་དུ་ཧྲཱིཿཡིག་མཐར། །གཟུངས་སྔགས་སྒྲ་དབྱངས་སེང་གེའི་ང་རོ་ཡི། །དུས་མིན་འཆི་བའི་རི་དྭགས་མཐར་བྱས་ནས། །བསྒོམས་པས་འགག་མེད་རྡོ་རྗེའི་གསུང་འགྲུབ་ཤོག །ལྷ་སྔགས་ཐམས་ཅད་རིག་པའི་རང་རྩལ་དུ། །ཤར་ནས་ཆོས་སྐུ་བདེ་སྟོང་ཆེན་པོའི་ཀློང༌། །རོ་གཅིག་འཆར་བའི་རྣལ་འབྱོར་ལ་གཞོལ་བས། །འགྱུར་མེད་ཐུགས་ཀྱི་རྡོ་རྗེ་འགྲུབ་པར་ཤོག །འཁོར་འདས་ཚེ་དང་བསོད་ནམས་བཅུད་འཁྱིལ་བ། །མར་གད་ལྷུང་བཟེད་ལས་བབས་ཚངས་བུག་ལམ། །བརྒྱུད་དེ་ལུས་ཀྱི་ཟུངས་དང་སྲོག་རྟེན་དུ། །གྱུར་པས་ཚེ་ཡི་རིགས་འཛིན་ཐོབ་པར་ཤོག །རིང་པོར་འཚོ་བའི་དལ་འབྱོར་རྟེན་བཟང་ལ། །བསྐྱེད་རྫོགས་རྫོགས་པ་ཆེན་པོའི་རྣལ་འབྱོར་གྱིས། །འཇའ་ལུས་འཕོ་བ་ཆེན་པོའི་སྐུ་འགྲུབ་ནས། །འགྲོ་བ་མ་ལུས་འདྲེན་པའི་རྒྱུ་རུ་བསྔོ། །ནམ་ཡང་འཕོ་འགྱུར་མེད་པ་ཆོས་ཀྱི་སྐུ། །གདོད་ནས་དག་པའི་རང་རིག་གར་གྱི་དབང༌། །གཞན་ནས་བཙལ་དུ་མེད་པ་རང་ཆས་སུ། །ཡོད་པར་རང་ངོ་འཕྲོད་པའི་བཀྲ་ཤིས་ཤོག །གཞོན་ནུ་བུམ་སྐུ་བདེ་ལྡན་ཞིང་ཁམས་སུ། །སེམས་ཉིད་ཚེ་དཔག་མེད་མགོན་བཞུགས་བཞིན་དུ། །འཆི་མེད་རིགས་ལྔའི་འཆར་སྒོ་ནང་གདངས་ཕྱིར། །ཤར་བ་ངེས་པ་རྙེད་པའི་བཀྲ་ཤིས་ཤོག །གློ་བུར་འཆི་བས་ཉམས་ཐག་འགྲོ་བའི་དབུགས། །འབྱིན་པར་ཉི་མའི་ཟེར་ལྟར་སྤྲུལ་པའི་གར། །ཕྱོགས་བཅུར་བཀྱེ་ནས་ཚེ་ཡི་མཆོག་སྦྱིན་པས། །འཕྲིན་ལས་རྒྱུན་མི་ཆད་པའི་བཀྲ་ཤིས་ཤོག །ཅེས་དཔལ་འབྲི་གུང་པ་ལྷ་སྲས་རྒྱལ་པོའི་རྣམ་སྤྲུལ་དཀོན་མཆོག་ཕུན་ཚོགས་སམ་དབུར་སྨྱོན་ལ་དཔལ་ཨྱོན་ཆེན་པོས་དངོས་སུ་གནང་བའི་གཟུངས་ལ་བརྟེན་པའི་དེ་སྒྲུབ་དང་འབྲེལ་བའི་བསྔོ་(༢༣ན) ― GLG021_Page_0683 ―
[མ་དཔེ་གཟིགས་ན་འདིར་གནོན།]
སྨོན་བཀྲ་ཤིས་ཤིག་དགོས་ཞེས་དགའ་གདོང་སྔགས་རམས་པ་དོན་གྲུབ་རྒྱ་མཚོས་ཚེ་སྒྲུབ་ཀྱི་མཚམས་བྱས་སྐབས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་མཆོག་གོ །ཡིད་བཞིན་འཁོར་ལོའི་སྣང་བརྙན་བརྒྱ་ཕྲག་ཏུ། །སྤེལ་བས་བཀྲ་ཤིས་དབང་ཕྱུག་དུས་མིན་གྱི། །འཆི་བདག་ལས་རྒྱལ་རིང་འཚོའི་དལ་རྟེན་ལ། །འདི་ཕྱིའི་དོན་ཀུན་འགྲུབ་པར་བྱིན་གྱིས་རློབས། །ཞེས་ཤློཀ་གཅིག་པ་ཞིག་དགོས་ཚུལ་ལྟར་ཟ་ཧོར་གྱི་བནྡེས་བྲིས། །གཏིང་མཐའ་མི་མངོན་ཡོན་ཏན་བྱེ་བའི་གཏེར། །ཀུན་མཁྱེན་ཡེ་ཤེས་སྤྱན་གྱིས་སྒྲིབ་མེད་དུ། །གཟིགས་ནས་ཆེད་དུ་རབ་བསྔགས་འཕགས་མའི་ཞབས། །གཙུག་གཏོར་རྣམ་པར་རྒྱལ་མས་དངོས་གྲུབ་སྩོལ། །ངག་དབང་འཇམ་དཔལ་བློ་བཟང་གྲགས་པའི་བསྟན། །རྒྱ་ཆེན་མདོ་རྒྱུད་གཞུང་ལུགས་དགའ་བའི་མདུད། །འགྲོལ་ལ་མཚོ་བྱུང་ལྷ་མོ་མགྲིན་བཞུགས་པ། །ཚངས་སྲས་བཞད་པའི་རྡོ་རྗེ་ཞབས་བརྟན་ཤོག །སངས་རྒྱས་ཀུན་དངོས་རྗེ་བཙུན་བཙོང་ཁ་པའི། །ཆོས་སྲིད་བསྟན་པ་རྒྱ་མཚོའི་མཐའ་ཀླས་པར། །གྱེན་དུ་འདེགས་མཁས་ས་སྐྱོང་ཆོས་ཀྱི་རྒྱལ། །གཡུང་དྲུང་ལྟ་བུར་འགྱུར་མེད་རབ་བརྟན་ཤོག །ཐང་སག་དགའ་ལྡན་ཆོས་སྤྱོད་རྣམ་བཅུ་ཡི། །འཁོར་ལོ་རྒྱུན་ཆད་མེད་བསྐོར་འདུས་པའི་སྡེ། །བྱམས་མགོན་བསྟན་པ་གླིང་འདིར་མ་ཤར་བར། །དབྱར་མཚོ་ལྟ་བུར་འཕེལ་ཞིང་རྒྱས་པར་ཤོག །གནམ་ས་བར་ལ་ངན་རྩུབ་མཚན་ལྟས་རྒྱུས། །ཉེར་བསྐྱེད་འབྲས་བུ་རང་བཞིན་གྱིས་སྟོང་ཡང༌། །ཀུན་རྫོབ་འཁྲུལ་ངོར་སྒྱུ་མ་ལྟར་ཤར་བ། །དཀོན་མཆོག་བདེན་པའི་མཐུ་ཡིས་ཞི་བར་ཤོག །འགྲོ་རྣམས་སྡིག་ལྟའི་བསམ་སྦྱོར་ངན་དང་བྲལ། །ལྷ་འདྲེའི་གདུག་རྩུབ་ཞི་ནས་(༣༣བ) ― GLG021_Page_0684 ―
[མ་དཔེ་གཟིགས་ན་འདིར་གནོན།]
སེམས་རྒྱུད་དུལ། །རྩི་སྨན་རིགས་སྔགས་མཐུ་ལྡན་ལྔ་བདོ་བའི། །མི་བཟད་ཟུག་རྔུ་དྲུངས་ནས་འབྱིན་པར་ཤོག །འདུ་བ་འཁྲུགས་རྣམས་སྒོ་གསུམ་ནད་དང་བྲལ། །སྦྲུམ་མ་བདེར་བཙའ་ཚོང་པ་ཁེ་སྤོགས་ལོན། །སོ་ནམ་འབྲས་སྨིན་ཤ་འཁོན་འཐབ་རྩོད་བྲལ། །འཇིག་རྟེན་ཁམས་ཀུན་བདེ་ཞིང་སྐྱིད་པར་ཤོག །བསླུ་བ་མེད་པའི་སྐྱབས་མགོན་ཡིན་ནོ་ཅོག །སྨོན་ལམ་གདབ་ཡུལ་དབང་པོར་སྤྱན་དྲངས་ནས། །རྩེ་གཅིག་གདུང་ཤུགས་དྲག་པོས་གསོལ་འདེབས་ན། །ཐུགས་རྗེའི་ཕྱག་རིང་ཁྱོངས་ལ་བདག་དབུགས་ཕྱུང༌། །རེ་བ་དོན་ལྡན་མྱ་ངན་མེད་པ་ཡི། །ལྗོན་ཤིང་ལོ་འདབ་ཕང་ཕུང་གྲིབ་བསིལ་ལ། །སྐྱིལ་མོ་ཀྲུང་བཅས་ཡིད་ལ་བདེ་བའི་རོ། །མྱོང་བའི་ཕུན་ཚོགས་རྩེ་དགར་དགོད་པར་ཤོག །ཅེས་བདེན་ཚིག་བརྗོད་པའི་སྨོན་ལམ་གྱི་ཚིགས་སུ་བཅད་པ་འདི་ནི་ཐང་སག་དགའ་ལྡན་ཆོས་འཁོར་གྱི་སློབ་དཔོན་དཀྱིལ་འཁོར་རྒྱ་མཚོའི་བྱེད་པོ་སྔགས་རམས་པ་ནམ་མཁའ་བཟང་པོ་གྲ་བཅས་ཀྱིས་འབད་པ་ཆེན་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །གསུམ་ཞོས་ལྷག་པ་བཅུ་བཞིའི་སྲང་གྲངས་ཀྱི། །རིན་ཆེན་གཉིས་པའི་པད་ཕོར་མཆོད་སྤྲིན་སྣོད། །འཆམས་དཔོན་རབ་འབྱམས་བློ་བཟང་སྐྱེས་མཆོག་གིས། །ཕུལ་བས་དོན་གཉིས་ལྷུན་གྱིས་གྲུབ་པར་ཤོག །ཅེས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་དགེ་སྐོས་ཀྱི་ཐོག་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་བནྡེས་བྲིས་པ་མངྒ་ལཾ། །གྲངས་མེད་བསྐལ་པར་བསགས་པའི་ལེགས་བྱས་ཕུང་པོ་རི་བོ་མངོན་སུམ་ལྟར་རྒྱུ་ཀུན་མཁྱེན་བུ་རམ་ཤིང་པ་ལ། །གཟོད་མ་ཉིད་ནས་སྒྲིབ་གཉིས་སྤངས་ཀྱང་སློབ་མའི་ཚུལ་འཛིན་བསྟན་པ་ཇི་སྲིད་དངོས་(༣༤ན) ― GLG021_Page_0685 ―
[མ་དཔེ་གཟིགས་ན་འདིར་གནོན།]
བཞུགས་གནས་བརྟན་བཅུ་དྲུག་གི །ཆོ་གའི་གཞུང་ལས་བྱུང་བ་ལྟ་བུར་བདག་སོགས་སྐྱེ་རྒུའི་སྡིག་ལྟུང་དེས་བསྐྱེད་ཉེས་ཚོགས་མ་ལུས་རབ་བྱེད་ཞིང༌། །སྲིད་དང་ཞི་བའི་ཕ་མཐར་མི་ལྟུང་བདེན་གཉིས་རྫིངས་ཀྱིས་འཁོར་བ་ཆུའི་སྲིན་འབྱུང་གནས་ངག་ལས་སྒྲོལ་ནུས་ཤོག །མར་མེ་མཛད་དཔལ་ཡབ་སྲས་བཞེད་སྲོལ་ལྷ་ཆོས་བདུན་ལས་ཁྲོ་རྒྱལ་ཀུན་འདུས་རྗེ་བཙུན་མི་གཡོ་མགོན་པོ་ལ། །བཀའ་གདམས་གཞུང་པའི་བསྟན་སྲོག་ལེགས་འཛིན་དཔལ་ལྡན་རྣར་ཐང་མཁན་ཆེན་མཆིམས་ཀྱི་དགེ་སློང་ནམ་མཁའ་གྲགས་པ་ཡིས། །གོང་མ་རྣམས་ཀྱི་ཐུགས་དམ་སྙིང་པོ་ཕྱོགས་གཅིག་བསྡེབས་པ་བརྒྱ་རྩར་གྲགས་པ་ཡི་དམ་ཆོས་སྐྱོང་གིས་བསྐོར་བ། །ཡོངས་བསྐྲུན་དགེ་བ་པད་རྩ་ལྟ་བུར་གང་བསགས་དེའི་མཐུས་འདི་ཕྱི་གཏན་གྱི་མདུན་མ་ཐམས་ཅད་འགྲུབ་པར་ཤོག །འཁོར་བ་སྟོངས་མིན་གཞན་དོན་མཛད་ལ་ཞུམ་པ་མེད་ཀྱང་ཆེས་ཆེར་སྙིགས་མ་ལྔ་བདོའི་སྐྱེ་རྒུ་གདུལ་དཀའ་བ། །འདུལ་ཕྱིར་མིག་སྨན་ལྷུན་པོ་བསྐལ་མེའི་གོས་གྱོན་མ་མགོན་ལྕམ་དྲལ་གནོད་སྦྱིན་བཞི་དང་དམ་ཅན་རྒྱ་མཚོ་ཡིས། །འདིར་སྣང་ཞི་རྒྱས་དབང་དྲག་ལས་ཀུན་ཐོགས་པ་མེད་སྒྲུབས་ཉིང་མཚམས་སྦྱར་ཚེ་བར་དོར་ལྷ་ཁྱོད་དངོས་བྱོན་ནས། །མཁའ་སྤྱོད་དག་པའི་ཞིང་དུ་ཉེར་ཁྲིད་ས་ལམ་སྤང་རྟོགས་ཡོན་ཏན་ལྷུན་རྫོགས་རྡོ་རྗེ་འཛིན་པའི་ས་ཐོབ་ཤོག །ཅེས་གདོང་ཁ་བ་བློ་བཟང་བསྟན་འཛིན་དབང་རྒྱལ་གྱིས་བྲིས་ཐང་གསུམ་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལུས་ངག་ཡིད་གསུམ་བག་ཡང་ལ་དབང་བའི། །བློ་གྲོས་བསྐལ་བཟང་སངས་རྒྱས་བཞི་པ་ཡི། །རིང་ལུགས་རྒྱ་མཚོར་འཆད་རྩོད་རྩོམ་པའི་གྲུས། །འགྲོ་ཀུན་ཐར་གླིང་འདྲེན་ལ་(༣༤བ) ― GLG021_Page_0686 ―
[མ་དཔེ་གཟིགས་ན་འདིར་གནོན།]
གསོལ་བ་འདེབས། །ཐོས་དང་བསམ་པར་འཇིགས་མེད་བརྩོན་པ་ཡིས། །རྟག་ཏུ་ཉེར་གོམས་ཤེས་རབ་གོ་ཆ་ཅན། །ཐུབ་དབང་ཤིང་རྟ་ཆེ་གཉིས་དགོངས་དོན་བསྟན། །ལང་ཚོ་རྒྱས་པའི་སྡེ་ལ་གསོལ་བ་འདེབས། །འཇམ་དཔལ་དབྱངས་དངོས་བློ་བཟང་གྲགས་པ་ཡི། །རིང་ལུགས་དགའ་བ་བརྒྱ་པའི་ཡུལ་སའི་བར། །སྤེལ་མཁས་རིས་མེད་འགྲོ་བའི་བཤེས་གཉེན་མཆོག །མཚུངས་བྲལ་བླ་མ་མཆོག་ལ་གསོལ་བ་འདེབས། །དགྲ་བཅོམ་ཚོགས་ཀྱང་ཕྲ་རྒྱས་བ་སྤུའི་རྩེ། །མཐོང་བས་གྱེན་སློང་ཚངས་སྲས་ལུས་ཕྲ་མ། །མགྲིན་པར་བཞད་པའི་ལེགས་བཤད་རྡོ་རྗེའི་གླུ། །རྣམ་དཔྱོད་རྒྱུད་ལས་འདྲེན་ལ་གསོལ་བ་འདེབས། །མ་ཆགས་པདྨ་ཐབས་ཤེས་ཉི་ཟླའི་ཁྲིར། །མགོན་ཁྱོད་ཧྲཱིཿཡིག་ལས་འཁྲུངས་ཚེ་མཐའ་ཡས། །མཚན་དཔེའི་གཟི་བྱིན་འབར་བར་ལེགས་བསྒྱུར་ནས། །བསྐལ་བར་མི་ཤིགས་སྐྱིལ་ཀྲུང་བཅའ་བར་ཤོག །ཐུགས་ཀའི་འོད་ཟེར་ལྕགས་ཀྱུས་བཀུག་པ་ཡིས། །འཁོར་འདས་ཡོངས་ཀྱི་ཚེ་བཅུད་མ་ལུས་ཀུན། །ཏིང་འཛིན་ཕྱག་རྒྱས་བཏེག་པའི་ཀ་ལ་ཤར། །རབ་འབྱམས་གྱེན་འཕྱུར་ཟིལ་དངར་གྱིས་བརྟན་ཤོག །མ་རིག་འཐིབས་མུན་རྣམ་དཔྱོད་སྐྱ་རེངས་ཀྱིས། །སངས་པའི་བློ་རྒྱས་རྒྱ་ཆེན་ལུགས་ཟུང་སོགས། །མཚོ་ལྟར་གཏིང་ཟབ་ཁྲིམས་གཉིས་རིན་ཆེན་གཏེར། །སྒོ་འབྱེད་ས་དབང་རྡོ་རྗེ་ལྟར་བརྟན་ཤོག །ལྷ་ཁྱོད་དུས་ཀྱི་བདག་པོའི་ཆེ་བ་ཡིས། །འབངས་རྣམས་ཚེ་ཡང་རིང་དུ་འཕེལ་བ་དང༌། །ལུས་ངག་ཡིད་བདེ་དཔལ་འབྱོར་ཕུན་ཚོགས་པ། །གསེར་གྱི་འཁོར་ལོས་སྒྱུར་རྒྱལ་རྗེས་འགྲོར་ཤོག །བོད་ཡུལ་མངའ་བདག་ཁྲི་ལྡེ་གཙུག་བརྟན་གྱིས། །འཕྲུལ་སྣང་ཕྱོགས་བཞིར་རབ་བྱུང་སྡེ་བཙུགས་པས། །དམར་རུང་རབ་སྔགས་དགེ་འདུན་འདུས་པའི་གླིང༌། །འདུལ་(༣༥ན) ― GLG021_Page_0687 ―
[མ་དཔེ་གཟིགས་ན་འདིར་གནོན།]
ཁྲིམས་ཡོངས་གཙང་ཐོས་བསམ་འཕེལ་བར་ཤོག །གདོན་བགེགས་ནད་སོགས་སྣ་ཚོགས་རྐྱེན་ངན་གྱིས། །དུས་མིན་འཆིས་མཚོན་འཇིགས་པ་མཐའ་དག་ཞི། །འཐབ་རྩོད་ཤ་འཁོན་དང་བྲལ་ཕུ་ནུ་ལྟར། །མཉེས་གཤིན་བྱམས་པས་རྟག་ཏུ་མཛའ་བར་ཤོག །སྲོང་བཙན་ཞལ་གྱིས་འཆེས་བཞིན་མཐའ་བཞི་ཡི། །ལས་སྒོ་ལྷ་ལྡན་གནས་སུ་ཡོངས་འདུ་བ། །དཔག་བསམ་ཤིང་གི་འབྲས་བུ་སྡེ་འདིར་ཡང༌། །ལོངས་སྤྱོད་གནོད་སྦྱིན་མཛོད་མཚུངས་འཕེལ་བར་ཤོག །འཇིག་རྟེན་སྤྱི་དང་ཁྱད་པར་བོད་ཁམས་སུ། །དུས་སུ་ཆར་འབེབས་ལོ་འབྲས་རྐང་འཐུང་འཕྲེང༌། །མེ་ཏོག་རྩྭ་སོགས་སྣོད་ཀྱི་ཡོན་ཏན་ཀུན། །རྫོགས་ལྡན་དཔལ་གྱི་རྩེ་དགའ་དགོད་པར་ཤོག །མི་ཕྱུགས་ནད་རིམས་འཐབ་རྩོད་མཚང་འདྲུ་བ། །དགྲ་ཇག་ཆོམ་རྐུན་བཀྲེས་སྐོམ་མྱ་ངན་སོགས། །དུས་ཀྱི་ཆད་པའི་སྨག་རུམ་མཐར་བྱས་ནས། །བདེ་སྐྱིད་སྣང་བའི་ཉི་མ་ཆེས་འབར་ཤོག །སངས་རྒྱས་དམ་ཆོས་དགེ་འདུན་བདེན་པ་དང༌། །རྒྱལ་བ་སྲས་བཅས་བྱིན་རླབས་ཚོགས་གཉིས་རྫོགས། །དོན་དམ་སྤྲོས་བྲལ་རྒྱུ་འབྲས་སླུ་མེད་ཀྱིས། །སྨོན་ལམ་ཅི་བཏབ་འགྲུབ་པའི་བཀྲ་ཤིས་ཤོག །ཅེས་གསོལ་འདེབས་དང་བདེན་བརྗོད་ཀྱི་སྨོན་ལམ་ཟུང་འབྲེལ་འདི་ནི་ལྷ་ས་སྨེ་རུ་སློབ་དཔོན་དཀོན་མཆོག་དཔལ་བཟང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་གྲགས་པའོ། །རུང་མཐུན་གོས་གསུམ་ཅོད་པན་གསེར་འོད་འཕྲོ། །ཆོས་འཁོར་ཕྱག་རྒྱས་བཟུང་བའི་ཨུཏྤལ་རྩེར། །གླེགས་བམ་རལ་གྲི་ཞབས་གཉིས་སྐྱིལ་མོ་ཀྲུང༌། །མཐོང་བས་དོན་ལྡན་རྒྱལ་དབང་ཙོང་ཁ་པ། །གང་གི་རྗེས་འཇུག་ཚངས་སྲས་(༣༥བ) ― GLG021_Page_0688 ―
[མ་དཔེ་གཟིགས་ན་འདིར་གནོན།]
བཞད་པ་ལ། །ལྷག་པའི་ལྷས་བསྐོར་བྲིས་ཐང་བཞེངས་པའི་དགེས། །སྐྱེ་བ་ཀུན་ཏུ་ལྷ་མིའི་བདེ་སྐྱིད་མྱོང༌། །རིང་པོར་མི་ཐོགས་བྱང་ཆུབ་མཆོག་ཐོབ་ཤོག །སེམས་ཅན་ཡོངས་ལ་ཆགས་དང་སྡང་མེད་པར། །བྱམས་བརྩེས་ཉེར་འཁྱུད་ཤཱཀྱ་སེང་གེ་ཞེས། །མཐོང་ཐོས་དྲན་རེག་ཡོད་དོ་ཅོག་གྲོལ་བའི། །ཉན་ཐོས་ཚུལ་འཛིན་གནས་བརྟན་བཅུ་དྲུག་དགོངས། །བདག་ཅག་གཏི་མུག་མུན་ཁུང་ཆུད་པ་ལ། །ཐུགས་རྗེ་ཡེ་ཤེས་སྒྲོན་མེ་རབ་སྤར་ཏེ། །ཐར་པ་ཐམས་ཅད་མཁྱེན་པའི་གཟུགས་སྣང་ཀུན། །དྲི་མེད་གསལ་བར་མཐོང་བའི་དངོས་གྲུབ་སྩོལ། །རྒྱལ་རྣམས་སྤངས་རྟོགས་མཉམ་ཡང་སྡིག་ལྟུང་ཚོགས། །བཤགས་ཡུལ་མཆོག་ཏུ་གྱུར་པ་དཀོན་བརྩེགས་ཀྱི། །ཕུང་པོ་གསུམ་པ་ལས་བསྟན་རྫོགས་སངས་རྒྱས། །སུམ་ཅུ་རྩ་ལྔའི་སྤྱན་གྱིས་ལེགས་གཟིགས་ཏེ། །ངག་དབང་རྒྱ་མཚོས་ཐོག་མ་མེད་པ་ནས། །ཆེར་བསགས་རྣམ་སྨིན་ནག་པོའི་རྒྱུན་བཅད་དེ། །མཐའ་བྲལ་འཁོར་བའི་འཇིགས་པས་མི་བརྫི་བར། །གཏན་གྱི་བདེ་བ་ཐོབ་པའི་བཀའ་དྲིན་སྩོལ། །པད་དཀར་འཆང་དང་ལག་ན་རྡོ་རྗེ་སོགས། །བྱང་ཆུབ་སེམས་པའི་འཁོར་ཚོགས་རྒྱ་མཚོར་བཅས། །སྣང་བ་མཐའ་ཡས་ཐོགས་མེད་མངོན་སུམ་དུ། །བདག་སོགས་འཆི་ཁར་བྱོན་ནས་དབུགས་དབྱུང་མཛོད། །རྣམ་པར་ཤེས་པ་སྐར་མདའ་འཕངས་པ་ལྟར། །བདེ་བ་ཅན་གྱི་ཞིང་ཁམས་ཉམས་དགའ་བར། །པདྨའི་སྦུབས་སུ་བཙས་ཏེ་ཐེག་པ་ཆེའི། །དམ་ཆོས་ཉམས་སུ་ལེན་པར་བྱིན་གྱིས་རློབས། །ཞི་ཁྲོ་ཀུན་གྱི་ཁྱབ་བདག་རྡོ་རྗེ་སེམས། །རྫུས་སྐྱེས་རྒྱ་གར་པཎ་ཆེན་ཚུལ་བཟུང་བར། །སྐུ་གཅིག་ལྡོག་པ་ཐ་དད་མཚན་བརྒྱད་ཅེས། །གང་འདུལ་གདུལ་བྱའི་སྣང་ངོར་ཅིར་ཡང་བསྒྱུར། །ཞབས་སེན་རྡུལ་དམར་དེང་ནས་བྱང་ཆུབ་བར། །གཙུག་ཏུ་འབྲལ་(༣༦ན) ― GLG021_Page_0689 ―
[མ་དཔེ་གཟིགས་ན་འདིར་གནོན།]
མེད་བསྟེན་ན་དངོས་གྲུབ་ཀུན། །སྩོལ་བར་རྒྱལ་དབང་པདྨ་ཀ་ར་ལ། །གསོལ་བ་འདེབས་ན་གཏན་དོན་འགྲུབ་བྱིན་རློབས། །ཞེས་ཆབ་ནག་པ་ངག་དབང་རྒྱ་མཚོས་གོང་གསལ་ཐང་ག་ལྔ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །བསྐལ་མང་ཚོགས་ཀྱིས་ཡོངས་བསྒྲུབས་དག་པའི་ཞིང༌། །སྣང་ལ་རང་བཞིན་མེད་པ་འོད་ལྔའི་གདངས། །རྣམ་མང་རིན་ཆེན་ལས་གྲུབ་གཞལ་ཡས་ཁང༌། །རྒྱ་ཕུབས་དྲ་བ་དྲ་ཕྱེད་རྒྱན་གྱིས་སྤུད། གསེར་ཞུན་མིག་མངས་རིས་བྲིས་བཻ་ཌཱུཪྻའི། །ས་གཞི་ཁོད་སྙོམས་ལག་མཐིལ་ལྟར་མཉམ་པ། །མེ་ཏོག་རབ་བཀྲ་ལྗོན་ཤིང་ཡལ་ག་དང༌། །ལོ་འདབ་གཡུར་ཟ་དར་ཟབ་ལྡ་ལྡི་བྲེས། །རྩེ་མོར་སྣ་ཚོགས་བྱ་རིས་ཟློས་གར་བསྒྱུར། །མཚོ་རྫིང་འབབ་ཆུ་ལྷུང་ལྷུང་སྒྲ་སྙན་སྒྲོག །མར་གད་ཁུ་བས་བྱུགས་པའི་སྤང་ལྗོངས་ལ། །ལྷ་རྣམས་པི་ཝཾ་གླིང་བུ་རྫ་རྔ་བརྡུང༌། །ཁོར་ཡུག་གྲོང་གི་བཀོད་པ་ངོ་མཚར་བས། །བསྐོར་བའི་ཕོ་བྲང་དབུས་སུ་པད་ཟླའི་སྟེང༌། །སྣང་བ་མཐའ་ཡས་འཁོར་ཚོགས་རྒྱ་མཚོ་དང༌། །མཁའ་ལ་རྫུ་འཕྲུལ་མངའ་རྣམས་འཕུར་ལྡིང་རོལ། །མགྲོན་ཐབས་ཤཱཀ་སེང་བཻཌཱུར་སྨན་གྱི་བླ། །ཀླུ་དབང་མ་ཕམ་སྣང་བརྙན་བཞེངས་པས་མཚོན། །དུས་གསུམ་རབ་བསགས་དགེ་བ་ཇི་སྙེད་འབྲས། །སྔོན་ཚེ་དགེ་སློང་ཆོས་ཀྱི་འབྱུང་གནས་ཐུགས། །ལེགས་བསྐྱེད་ཇི་བཞིན་འོད་གསལ་འ་ཞའི་རིགས། །རྗེ་དཔོན་མཁྱེན་རབ་རྣམ་པར་རྒྱལ་བ་གང༌། །འདི་ནས་ཉེར་འཕོས་ཡང་སྲིད་ཕྱི་མའི་དུས། །བདེ་ལྡན་ཞིང་དུ་ཐོགས་པ་མེད་བགྲོད་ནས། །གར་དབང་ལྷ་ཡིས་རྗེས་བཟུངཐེག་ཆེན་གྱི། །དམ་པའི་ཆོས་ལ་ཐོས་དང་བསམ་སྒོམ་པས།(༣༦བ) ― GLG021_Page_0690 ―
[མ་དཔེ་གཟིགས་ན་འདིར་གནོན།]
།རྒྱལ་བའི་སྲས་གྱུར་རླབས་ཆེན་སྤྱོད་པ་སྤྱད། །གཅིག་ལས་དུ་མར་ཤར་བའི་རྣམ་སྤྲུལ་གྱི། །རིགས་བརྒྱའི་ཁྱབ་བདག་རྗེ་བཙུན་བཀའ་འགྱུར་བ། །མགོན་པོ་བསོད་ནམས་མཆོག་ལྡན་དཔལ་བཟང་དང༌། །ཟ་ཧོར་རིགས་འཛིན་འཇམ་དབྱངས་དགའ་བའི་བཤེས། །དབྱེར་མེད་དངོས་པོ་གཅིག་ཏུ་གྱུར་པའི་དྲུང༌། །སྐྱེ་བ་བཟུང་ནས་སྒོ་གསུམ་ཆིག་སྒྲིལ་གྱིས། །དཀའ་སྤྱད་བརྩོན་བ་ཟང་ཟིང་སྤྱོད་ལམ་སོགས། །སྣ་ཚོགས་ཐབས་ཀྱིས་སྲི་ཞུ་རབ་བསྐྲུན་པས། །གཞལ་དཀའི་སྐུ་དྲིན་མ་ལུས་གསོབ་ནུས་ཤིང༌། །ཐེག་མཆོག་ཨ་ཏི་མྱུར་བའི་གསང་ལམ་ལ། །རིག་རྩལ་རང་ངོ་ཉེར་འཕྲོད་གོམ་སྟབས་ཀྱིས། །ལོངས་སྐུའི་ཞིང་མང་མྱུལ་ཡང་མ་དག་པའི། །འགྲོ་བའི་དབང་པོ་དང་འཚམ་དོན་གྱི་ཆེད། །བྱམས་མགོན་མཆོག་གི་སྤྲུལ་སྐུར་སངས་རྒྱས་ཆེ། །འཁོར་གྱི་ཐོག་མར་སྐྱེས་ནས་ཆོས་ཉན་པས། །ས་བཅུ་རིམ་བགྲོད་རྣམ་པ་ཐམས་ཅད་མཁྱེན། །མངོན་གྱུར་སེམས་ཅན་མ་ལུས་འདྲེན་པར་ཤོག །ཅེས་པའང་གནས་གསར་རྗེ་དྲུང་མཁྱེན་རབ་རྣམ་རྒྱལ་གྱིས་བྲིས་ཐང་གི་རྒྱབ་ཡིག་འདི་ལྟ་བུ་ཞིག་དགོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་མཆོག་གོ །གཙོ་ཐང༌། གསུང་གི་དབང་ཕྱུག་རྟ་མཆོག་ཐུགས་ཀ་ནས། །ངོ་མཚར་ཞིང་ཁམས་གངྒཱའི་ཀླུང་རྡུལ་གྱིས། །མཚོན་པར་ནུས་མིན་བཀོད་པ་རྒྱ་མཚོ་ཆེ། །དངོས་གྲུབ་རླབས་འཕྲེང་དུས་ལས་ཡོལ་བ་ཅི། །བདེ་ཆེན་ཆོས་སྐུའི་དབྱིངས་སུ་མི་གཡོ་བཞིན། །བགྲང་ཡས་རྩ་གསུམ་ཞི་ཁྲོའི་སྒྱུ་འཕྲུལ་གར། །རྡོ་རྗེ་ཐོགས་མེད་རྩལ་གྱི་འཕྲུལ་སྣང་གི །དངས་མཚོར་སྒྲིབ་བྲལ་འཆར་ལ་སུ་ཞིག་བསྙོན། །འདིས་མཚོན་བཅུ་གཅིག་གྲངས་ལྡན་ཇ་མ་དང༌། །སངས་རྒྱས་བྱང་སེམས་ཉན་རང་ཆོས་སྲུང་གི །བྲིས་ཐང་བཞེངས་མཐུས་འདི་ཕྱི་བར་གསུམ་གྱི། །ལེགས་བྱས་དོན་ཀུན་ལྷུན་གྱིས་གྲུབ་པར་(༣༧ན) ― GLG021_Page_0691 ―
[མ་དཔེ་གཟིགས་ན་འདིར་གནོན།]
ཤོག །ཐུབ་གཡས་དང་པོ། བསྟན་ཇི་སྲིད་དངོས་སྐུ་མ་བསྡུས་པར། །ཉེར་བཞུགས་འཕགས་པའི་གནས་བརྟན་བཅུ་དྲུག་གི །འཁོར་ཚོགས་ཟླ་བའི་དཀྱིལ་འཁོར་ཉ་གང་བར། །རྒྱུ་སྐར་འཕྲེང་བས་བསྐོར་འདྲའི་དོན་ཀུན་གྲུབ། །མི་བཟད་མཐུ་སྟོབས་རྡོ་རྗེ་འབར་བ་ཡིས། །ཡིད་སྲུབས་སྡེར་བཅས་འསྔོམས་པའི་དཔའ་བོ་ཆེ། །བསྟན་སྲུང་གཙོ་བོ་རྒྱལ་ཆེན་སྡེ་བཞིའི་དཔུང༌། །རྩུབ་འགྱུར་ཚལ་དུ་ལྷ་རྣམས་ཆས་པ་བཞིན། །སྲི་ཞུ་སྐྲུན་བྱེད་དགེ་བསྙེན་དྷརྨ་ཏཱ། །མི་དབང་ཐང་ག་ཕོ་ཉ་ཧྭ་ཤང་སོགས། །ཇོན་བྱུང་ཕུན་ཚོགས་རྣམ་པར་ཇི་སྙེད་པ། །དེང་འདིར་བདག་སོགས་འགྲོ་བས་འགྲུབ་བྱིན་རློབས། གཡོན་དང་པོ། གངས་ཅན་སྐྱེ་རྒུ་བརྩེ་བས་རྗེས་འཛིན་པར། །ཞལ་འཆེས་གསོལ་འདེབས་ཚངས་པའི་དབྱངས་སྙན་པོ། །ལྷ་སྲས་མུ་ཏིག་བཙན་པོར་བཀའ་སྩལ་བ། །ལས་སྦྱོར་བཅུ་གསུམ་ཡིད་བཞིན་ནོར་འདྲའི་ཆོས། །སྔོན་མེད་ངོ་མཚར་ཞིང་གི་བཀོད་པའི་དབུས། །མཚོ་སྐྱེས་རིགས་འཛིན་པདྨ་ཀ་ར་ཞེས། །འཁོར་འདས་ཡོངས་ཀྱི་རྒྱལ་པོས་སྲིད་པ་གསུམ། །ཟིལ་གྱིས་མནན་པས་འགྲོ་རྣམས་སྐལ་བཟང་བྱས། །བསོད་ནམས་འདི་ཡིས་གནས་སྐབས་མཐར་ཐུག་ཀུན། །ཕན་བདེའི་དཔག་བསམ་སྡོང་པོ་དར་དྲག་པའི། །ཕུན་ཚོགས་རོ་བརྒྱའི་འབྲས་བུ་མྱོང་བ་ཡི། །བཀའ་དྲིན་ཟླ་མེད་མགོན་པོ་ཁྱོད་ཀྱིས་སྩོལ། གཡས་གཉིས་པ། ཕུང་པོ་འོད་སྐུར་གྲོལ་དང་སྒྱུ་མའི་ལུས། །མངོན་སུམ་མཁའ་སྤྱོད་བགྲོད་པར་སྐལ་དམན་རྣམས། །འཆི་བ་འོད་གསལ་དོན་གྱི་རྣལ་འབྱོར་མས། །དག་པའི་ཞིང་དུ་ཐོགས་མེད་འདྲེན་པ་དང༌། །རིགས་བྱེད་ལྷ་མོ་འདོད་པའི་རྒྱལ་པོ་ཡིས། །སྲིད་ཞིའི་བརྟན་པ་མ་ལུས་ཡོངས་ཕྲོགས་ནས། །རྐང་སེན་ཟླ་ཚེས་དྲེགས་ལྡན་མཐའ་དག་གི །གཙུག་ཏོར་རྩེ་མོའི་རྒྱན་དུ་རབ་འཆིང་ཞིང༌། །ཚོགས་བདག་རྨུག་(༣༧བ) ― GLG021_Page_0692 ―
[མ་དཔེ་གཟིགས་ན་འདིར་གནོན།]
འཛིན་དབང་པོས་ལྷ་ཀླུ་མི། །གནོད་སྦྱིན་ཚོགས་ཀྱི་བང་མཛོད་ཁ་ཕྱེ་སྟེ། །མི་འཛད་ནོར་བུ་སྐྱུགས་པ་ནེའུ་ལེ་ཡི། །མགྲིན་ལས་རྟག་ཏུ་ཆད་མེད་འབབ་པར་མཛོད། གཡོན་གཉིས་པ། རྣམ་དཔྱོད་དཔུང་པས་བཏེག་པ་ཨུཏྤལ་རྩེར། །ཤེས་རབ་རལ་གྲི་རྣོན་པོས་མ་རིག་རྒྱ། །གཅོད་མཛད་འཇམ་པའི་རྡོ་རྗེ་ཙོང་ཁ་པ། །ཐུབ་བསྟན་ཡོངས་ཀྱི་སྤྱི་མེས་ཆེན་པོ་ལ། །ཚེ་མཐའ་ཡས་པ་ལོངས་སྤྲུལ་ཆ་བྱད་ཅན། །ཀླུ་ཡི་དབང་ཕྱུག་རྒྱལ་པོ་བཅོམ་ལྡན་འདས། །ལྔ་བདོར་ཐུགས་རྗེ་ཆེས་ཆེར་ལྷག་པ་ཡི། །བདེ་གཤེགས་བདུན་གྱིས་བསྐོར་བ་ལེགས་བསྐྲུན་མཐུས། །དུས་མིན་འཆི་དང་ས་བདག་ཀླུ་གཉེན་སོགས། །འབྱུང་པོའི་གདོན་གྱི་ཉེར་འཚེ་རབ་ཞི་ཞིང༌། །སངས་རྒྱས་རྣམས་ཀྱིས་སྨོན་ལམ་གང་བཏབ་འབྲས། །དེང་འདིར་མཁའ་མཉམ་འགྲོ་བས་མྱོང་བར་ཤོག །གཡས་གསུམ་པ། རྒྱལ་རྣམས་སྙིང་རྗེའི་དངོས་ཀུན་རབ་བསྡུས་ནས། །ཕྱག་ན་པད་དཀར་ཟླ་བའི་དཀྱིལ་འཁོར་ཆེ། །ཡོངས་གང་དངོས་གྲུབ་ཀཏྤུ་ར་ཡི་རྡུལ། །སྐྱེ་རྒུའི་གདུང་སེལ་འཇིག་རྟེན་དབང་ཕྱུག་ལ། །གཉན་རིགས་གྲུབ་པ་མཆོག་བརྙེས་ཚེམ་བུ་པའི། །བཞེད་སྲོལ་དམར་ཁྲིད་བརྒྱུད་པ་རིན་ཆེན་ཕྲེང༌། །སྣ་ཚོགས་ཚོན་གྱི་སྲད་བུར་ལེགས་བརྒྱུས་ཏེ། །རབ་དཀར་ཀ་ཤི་ཀའི་ངོས་ཟློས་གར་བསྒྱུར། །སྣང་གྲག་རིག་གསུམ་འཁྱེར་སོ་སུམ་ལྡན་གྱི། །རྣལ་འབྱོར་ཟབ་མོའི་ཐེམ་སྐས་ལ་འཛེགས་ནས། །ལྷོ་ཕྱོགས་གྲུ་འཛིན་གཞལ་མེད་ཉམས་དགའ་བར། །མཁའ་མཉམ་སེམས་ཅན་མ་ལུས་བགྲོད་པར་ཤོག །གཡོན་གསུམ་པ། རྒྱ་གར་མཁས་པ་པདྨ་ཐོད་འཕྲེང་དང༌། །གངས་ཅན་མིག་གཅིག་ལོ་ཆེན་བཻ་རོ་ཡི། །ཐུགས་དམ་ཟབ་ལས་ཆོས་ཟབ་རྟ་མཆོག་དཔལ། །དབང་ཆེན་ཡང་གསང་ཁྲོས་པ་ལྷ་དགུར་གྲགས། །མཐོང་བས་དོན་དང་ལྡན་པའི་གཟུགས་སྐུ་(༣༨ན) ― GLG021_Page_0693 ―
[མ་དཔེ་གཟིགས་ན་འདིར་གནོན།]
འདི། །མཆོད་དཔོན་ངག་དབང་ཤེས་རབ་སྒྲུབ་རྟེན་དུ། །བཞེངས་པས་ཚེ་འདིའི་ནད་གདོན་བར་ཆད་སོགས། །མི་མཐུན་ཕྱོགས་ལས་རྣམ་པར་རབ་རྒྱལ་ཞིང༌། །རིང་པོའི་ཚེ་དང་དཔལ་འབྱོར་སྙན་གྲགས་སོགས། །བསམས་པའི་དོན་རྣམས་ལྷུན་གྱིས་གྲུབ་པ་དང༌། །མྱུར་དུ་དབང་ཆེན་ཀུན་བཟང་རིག་པའི་རྩལ། །མངོན་གྱུར་ལུས་ཅན་མ་ལུས་འདྲེན་པར་ཤོག །གཡས་བཞི་པ། རྟག་ཏུ་ཞི་ཞིང་དུལ་བ་འཇམ་དཔལ་དབྱངས། །དུས་ཀྱི་དགྲ་བོར་ཕྱག་རྒྱ་ཟིལ་གནོན་གར། །བསྒྱུར་ཏེ་རབ་འབར་མཚོན་ཆ་གདེངས་པའི་མོད། །དགྲ་བགེགས་ཡོངས་ཀྱི་དོན་སྙིང་དུམ་བུར་གས། །ངོ་བོ་གཅིག་ལ་ལྡོག་པ་ཐ་དད་པ། །སྣ་ཚོགས་གཤིན་རྗེ་གཤེད་པོའི་སྒྱུ་འཕྲུལ་ཆེ། །དྲང་སྲོང་དམོད་པའི་མཐུ་རྩལ་གསང་བའི་བདག །གཏུམ་ཆེན་ཞེ་སྡང་རྡོ་རྗེའི་ལྷ་ཚོགས་ཀྱིས། །བན་བོན་རིགས་སྔགས་རྦོད་གཏོང་མདོ་སྒྲུབ་དང༌། །ལྷ་སྲིན་སྡེ་བརྒྱད་ཟ་ཁ་ཟུག་པ་སོགས། །རང་གཤེད་རང་ལ་བབ་པའི་སྦྱོར་བ་ཡིས། །ཕྱོགས་ལས་རྣམ་པར་རྒྱལ་བའི་འཕྲིན་ལས་མཛོད། །དྲན་པའི་མོད་ལ་རིང་པོར་འཚོ་བའི་ཚེ། །སྦྱིན་མཛད་ཡིད་བཞིན་འཁོར་ལོའི་མཛེས་སྐུ་ལས། །དབང་གཞུའི་ཟེར་གྱིས་འཆི་བའི་མུན་བསལ་ཏེ། །བདུད་རྩིས་ཕྱི་ནང་ལུས་ཀུན་ཁྱབ་པ་དང༌། །འཕྲོག་བྱེད་གཉིས་འཐུང་ཆོམ་རྐུན་ལྟོ་འགྲོ་ཞུགས། །གཡོན་བཞི་པ། ལྕགས་སྒྲོག་ཤ་ཟ་ཆུ་བོའི་འཇིགས་བརྒྱད་སོགས། །ལེགས་སྐྱོབ་ཨཱརྱ་ཏཱ་རེ་རྒྱལ་བའི་ཡུམ། །མཁྱེན་བརྩེ་ནུས་པས་ཉེས་ཚོགས་མཐའ་དག་སྲུངས། །སེང་ལྡེང་ནགས་སྒྲོལ་རྣམ་འགྱུར་ཉེར་གཅིག་གི། ཕྱག་འཚལ་བརྗོད་དོན་སླུ་མེད་རོ་བདའི་འབྲས། །མངོན་སུམ་སྨིན་ནས་སྐྱེ་འགྲོ་མཐའ་དག་རྣམས། །སིམ་པའི་ཚོར་བ་ཉམས་སུ་མྱོང་བར་ཤོག །གཡས་ལྔ་པ། སྣ་ཚོགས་རིན་ཆེན་ལས་གྲུབ་གཞལ་(༣༨བ) ― GLG021_Page_0694 ―
[མ་དཔེ་གཟིགས་ན་འདིར་གནོན།]
ཡས་ཁང༌། །མཚོ་རྫིང་ལྟེང་ཀ་མེ་ཏོག་ལྗོན་ཤིང་འཕྲེང༌། །ཡིད་འོང་སྐྱེད་ཚལ་གྲོང་གིས་ལེགས་བསྐོར་ཞིང༌། །འདབ་ཆགས་རབ་རྒྱུ་ལྷ་ཡི་བུ་བུ་མོ། །རིན་ཆེན་རྒྱན་དང་གོས་བཟང་མཛེས་པས་ཀླུབས། །སྙན་པའི་རོལ་མོ་བསྟོད་བསྔགས་གླུ་དབྱངས་ལེན། །འཕན་གདུགས་བླ་བྲེ་ཕྱེ་ཕུར་མཆོད་སྤྲིན་སྤྲོ། །རྫུ་འཕྲུལ་ཅན་རྣམས་མཁའ་ལ་འཕུར་ལྡིང་དབུས། །འོད་དཔག་མེད་མགོན་སྲས་ཀྱི་ཐུ་བོ་ཟུང༌། །འཁོར་ཚོགས་རྒྱ་མཚོས་ཡོངས་བསྐོར་བཀོད་པ་འདི། །རི་མོར་བྲིས་པ་ཇི་བཞིན་མངོན་སུམ་དུ། །མྱོང་བའི་སྐལ་པ་བཟང་པོར་འགྱུར་བར་ཤོག །གཡོན་ལྔ་པ། ས་འོག་ས་སྟེང་ས་བླའི་གདུག་ཅན་སོགས། །འདུལ་ཕྱིར་དབུ་དགུ་སུམ་ཅུ་སོ་བཞིའི་ཕྱག །བཅུ་དྲུག་ཞབས་དང་མཚན་མ་གྱེན་བསྒྲེང་བ། །རྭ་ཆེན་ཞལ་གྱི་དྲོད་རླངས་འཁྲུལ་བྲལ་བར། །ཕ་རྒྱུད་འདུས་པ་མ་རྒྱུད་འཁོར་ལོ་སྡོམ། །གཉིས་མེད་དགྱེས་མཛད་རྡོ་རྗེ་ལ་སོགས་པ། །གོང་འོག་རྒྱུད་སྡེའི་ལྷ་ཚོགས་མང་པོ་ཡིས། །ལེགས་བསྐོར་མཁའ་དབྱིངས་འཇའ་ལྟར་རྣམ་བཀྲ་བ། །ཉོན་མོངས་ལྔ་བཀྲུས་ཕུང་ཁམས་སྐྱེ་མཆེད་རྣམས། །ཐབས་མཁས་ལམ་གྱི་འབྲས་བུ་ཡེ་ཤེས་ལྔར། །བསྒྱུར་ནས་རིགས་ཀུན་བདག་པོ་རྡོ་རྗེ་སེམས། །ཚེ་འདིར་མངོན་དུ་འགྱུར་བར་བྱིན་གྱིས་རློབས། །གོང་གསལ་བྲིས་ཐང་བཅུ་གཅིག་ལྕགས་མོ་བྱའི་ལོ་མཆོད་དཔོན་ངག་དབང་ཤེས་རབ་ཀྱིས་དད་རྟེན་དུ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པའོ། །ཉི་མའི་གཉེན་མཆོག་སྐུ་བལྟམས་ཚེ། །བང་རིམ་བཞི་པ་ཟླུམ་པོ་ཅན། །པདྨ་སྤུངས་པ་སེར་སྐྱ་རུ། །བཞེངས་ལྟར་བུ་ཁྲིད་རྒྱལ་མོ་ཡིས། །ཡོན་སྦྱར་མཐུ་ལས་མིག་སྐྱོན་སོགས། །ནད་གདོན་ཀུན་ཞི་མཐོ་རིས་དང༌། །ཐར་པ་མྱུར་(༣༩ན) ― GLG021_Page_0695 ―
[མ་དཔེ་གཟིགས་ན་འདིར་གནོན།]
ཐོབ་རིགས་བརྒྱུད་བཅས། །འདི་ཕྱིའི་གཏན་མདུན་ལྷུན་གྲུབ་ཤོག །རྡོ་རྗེ་གདན་དུ་སངས་རྒྱས་ཚེ། །གྲུ་དང་བང་རིམ་བཞི་ལྡན་པ། །བདུད་བཅོམ་བྱང་ཆུབ་མཆོད་རྟེན་ཆེ། །བཞེངས་ལྟར་༝། ཡོན་༝། ནད་༝། ཐར་༝། །འདི་ཕྱིའི་༝། ཝ་ར་ཎཱ་སིར་ཆོས་གསུངས་ཚེ། །བང་རིམ་གྲུ་བཞི་གློ་འབུར་ཅན། །བཀྲ་ཤིས་སྒོ་མང་མཆོད་རྟེན་ཆེ། །བཞེངས་༝། ཡོན་༝། ནད་༝། ཐར་༝། །འདི་ཕྱིའི་༝། སུམ་ཅུ་རྩ་གསུམ་སྒྱུ་འཕྲུལ་ཡུམ། །བདེན་པ་ལ་བཀོད་ཐེམ་སྐས་ལས། །ཉེར་བྱོན་ལྷ་བབས་མཆོད་རྟེན་ཆེ།༝༝༝། །མཉན་ཡོད་སྟོན་པ་དྲུག་བཏུལ་ཚེ། །བང་རིམ་གྲུ་བཞི་གློ་འབུར་ཅན། །ཆོ་འཕྲུལ་ཆེན་པོའི་མཆོད་རྟེན་ཆེ།༝༝༝། རྒྱལ་པོའི་ཁབ་ཏུ་དགེ་འདུན་རྣམས། །བརྩོད་པར་བང་རིམ་བཞི་ཟུར་བརྒྱད། །ཆ་མཉམ་དབྱེན་འདུམས་མཆོད་པའི་རྟེན།༝༝༝། ཡངས་པ་ཅན་དུ་ཟླ་གསུམ་བར། །སྐུ་ཚེ་བྱིན་བརླབས་བང་རིམ་གསུམ། །ཟླུམ་པོ་རྣམ་རྒྱལ་མཆོད་རྟེན་ཆེ།༝༝༝། གཟུགས་སྐུ་རྩྭ་མཆོག་གྲོང་བསྡུས་ཚེ། །བང་རིམ་དང་བྲལ་མགུར་ཆུ་ཡན། །ཁྲི་སྟེང་མྱང་འདས་མཆོད་རྟེན་ཆེ།༝༝༝། །མཚན་ལེགས་སྨོན་ལམ་བརྒྱད་བཏབ་ལྟར། །བུ་ཁྲིད་རྒྱལ་མོའི་མིག་ནད་སོགས། །ཞི་ཞིང་རིགས་བརྒྱུད་དང་བཅས་པའི། །སྲིད་ཞིའི་ཡོན་ཏན་དར་དྲག་ཤོག །སྒྲ་དབྱངས་སྨོན་ལམ་བརྒྱད་བཏབ་ལྟར།༝༝༝། གསེར་བཟང་སྨོན་ལམ་བཞི་བཏབ་ལྟར།༝༝༝། མྱ་ངན་མེད་སྨོན་བཞི་བཏབ་ལྟར།༝༝༝། ཆོས་བསྒྲགས་སྨོན་ལམ་བཞི་བཏབ་ལྟར།༝༝༝། མངོན་མཁྱེན་སྨོན་ལམ་བཞི་བཏབ་ལྟར།༝༝༝། སྨན་བླའི་སྨོན་ལམ་བཅུ་གཉིས་ལྟར།༝༝༝། །ཤཱཀ་ཐུབ་སྨོན་ལམ་གྲངས་མེད་ལྟར།༝༝༝། སེང་ལྡེང་ནགས་ཀྱི་སྒྲོལ་མ་ཡིས། །(༣༩བ) ― GLG021_Page_0696 ―
[མ་དཔེ་གཟིགས་ན་འདིར་གནོན།]
བུ་ཁྲིད་རྒྱལ་མོའི་མིག་ནད་སོགས། །ཞི་ཞིང་རིགས་བརྒྱུད་དང་བཅས་པ། །འཇིགས་བརྒྱད་ཀུན་ལས་སྐྱོབ་བྱིན་རློབས། ངག་དབང་བློ་བཟང་རྒྱ་མཚོ་ཡི། །སྣང་བརྙན་བཞེངས་མཐུས་སྦྱིན་པའི་བདག །རིགས་བརྒྱུད་བཅས་པ་སྐྱེ་བ་ཀུན། །དགེ་བའི་བཤེས་ཀྱིས་རྗེས་འཛིན་ཅིང༌། །འདི་སྣང་མིག་གི་རབ་རིབ་སོགས། །མི་མཐུན་ཀུན་ཞི་བསོད་ནམས་ཚེ། །རབ་འཕེལ་ལྷ་མིའི་རྟེན་བརྒྱུད་ནས། །མྱུར་དུ་རྣམ་མཁྱེན་ཐོབ་པར་ཤོག །ཚངས་སྲས་བཞད་པའི་རྡོ་རྗེ་ཡིས། །འདྲ་འབག་བཞེངས་འབྲས་མཆོག་གསུམ་གྱི། །ཐུགས་རྗེས་རྒྱུ་སྦྱོར་རིགས་བརྒྱད་བཅས། །བསམས་པའི་དོན་ཀུན་ལྷུན་གྲུབ་ཤོག །མཚན་ལེགས་སྒྲ་དབྱངས་གསེར་བཟང་མྱ་ངན་མེད། །ཆོས་བསྒྲགས་མངོན་མཁྱེན་སྨན་བླ་ཤཱཀ་ཐུབ་སྐུ། །སྨན་མདོ་བརྒྱད་བརྒྱ་པར་གྲགས་སངས་རྒྱས་བཀའ། །པད་སྤུངས་བྱང་ཆེན་སྒོ་མང་ལྷ་ལས་བབས། །ཆོ་འཕྲུལ་དབྱེན་འདུམ་རྣམ་རྒྱལ་མྱ་ངན་འདས་ཀྱི། །ཐུགས་རྟེན་ཡོན་སྦྱར་བུ་ཁྲིད་རྒྱལ་མོ་ཡིས། །ལེགས་བཞེངས་རིགས་དང་བརྒྱུད་པར་བཅས་རྣམས་ཀྱི། །སྟོན་ཟླ་ལྟར་དཀར་བསམ་པ་རྣམ་དག་མཐུས། །བརྒྱ་ཕྲག་ལུས་སྤྲུལ་གུས་པས་ཕྱག་འཚལ་ལོ། །དབང་སྔོན་ཞུན་འདྲའི་མཆོད་ཡོན་ལྷ་དང་མིའི། །མེ་ཏོག་ཕྱེ་ཕུར་དྲི་དང་ཤིང་སྨན་སྤོས། །རྩི་བཅུད་འབྲུ་མར་ཉི་ཟླ་ནོར་བུ་ཡི། །སྣང་གསལ་བཟང་དྲུག་ག་པུར་ཙནྡན་ཆབ། །ལྷ་ཀླུ་གནོད་སྦྱིན་མི་ཡི་རོ་བདའི་ཟས། །རྣ་བར་སྙན་འཇེབས་རོལ་མོ་ཇི་སྙེད་འཁྲོལ། །གདུགས་དང་རྒྱལ་མཚན་བ་དན་ལྡ་ལྡི་བྲེས། །རྒྱལ་སྲིད་སྣ་བདུན་ཉེ་བའི་རིན་ཆེན་བདུན། །བཀྲ་ཤིས་རྫས་རྟགས་འདོད་ཡོན་ལྔ་དངོས་བཤམས། །རྒྱ་ཆེར་སྤེལ་བ་བདག་པོས་ཡོངས་སུ་བཟུང༌། །ལྷུན་པོ་གསེར་ཀྱི་རི་དང་རོལ་མཚོ་བདུན། །གླིང་བཞི་གླིང་ཕྲན་ཉི་ཟླ་ལ་སོགས་པ། །བདག་པོས་ཡོངས་སུ་མ་བཟུང་མཆོད་པའི་ཚོགས། །ཡིད་བཞིན་ནོར་དང་(༤༠ན) ― GLG021_Page_0697 ―
[མ་དཔེ་གཟིགས་ན་འདིར་གནོན།]
ཁང་བཟང་མངའ་འབངས་ཀྱི། །རྣམ་པར་བདག་གི་ལུས་འདིར་རབ་སྤྲུལ་ནས། །འབུལ་བ་བཀའ་བཞིན་བསྒྲུབ་པའི་མཆོད་པ་དང༌། །མཆོད་པའི་སྤྲིན་གྱི་གཟུངས་སྔགས་བརྗོད་པ་ཡི། །ཀུན་ཏུ་བཟང་པོའི་མཆོད་པ་བླ་ན་མེད། །དེ་དག་ཚད་བཟུང་བྲལ་བ་བློ་ཡུལ་ལས། །བརྒལ་བར་སྤེལ་བ་མོས་པའི་མཐུ་ཡིས་མཆོད། །སྐྱབས་ཡུལ་རྟེན་དང་བྱས་པའི་སྡིག་པ་ལ། །འགྱོད་པས་སུན་འབྱིན་སླད་ནས་མི་བགྱིད་པའི། །སླར་ལྡོག་སྡིག་ཚོགས་ངོ་བོ་སྤྲོས་བྲལ་ཡང༌། །ཀུན་རྫོབ་ཆུ་ཟླ་ལྟར་སྣང་བཤགས་སྨོན་མཐུས། །རྣམ་འདྲེན་འཁོར་བཅས་ཐུགས་ཀའི་འོད་ཟེར་གྱིས། །བདག་སོགས་འགྲོ་ཀུན་སྒྲིབ་སྦྱངས་ཀུན་ཏུ་སྤྱོད། །སྟོབས་བཞི་ཚང་བའི་སྒོ་ནས་འཐོལ་ཞིང་བཤགས། །བདག་གཞན་ཡོངས་ཀྱིས་བསགས་པའི་དགེ་ལ་རངས། །གདུལ་བྱའི་བློར་འཚམ་ཆོས་འཁོར་སྐོར་བར་བསྐུལ། །བསྐལ་བར་མྱ་ངན་མི་མདའ་བརྟན་པར་བཞུགས། །དགེ་བ་བྱང་ཆུབ་ལ་བསྔོས་བསོད་ནམས་ཀྱིས། །བདུད་བཞི་གཏན་བཅོམས་བུ་རམ་ཤིང་པ་ཡི། །མགུར་ནས་ལེགས་གསུངས་མདོ་ཆོག་བརྒྱད་བརྒྱ་པའི། །དགོངས་དོན་ཇི་བཞིན་བདེ་བར་གཤེགས་བརྒྱད་སྲས། །འཁོར་བཅས་སྨོན་ལམ་བཏབ་པའི་ནང་ཚན་ཁྲོད། །བདག་དང་མཁའ་མཉམ་སེམས་ཅན་ཐམས་ཅད་ཀྱིས། །མྱོང་བའི་འོས་མིན་ཕྱིན་ཆད་རྩ་བ་ནས། །སྐྱེ་མི་རུང་གི་ཆོས་ཅན་སྤང་བྱའི་རིགས། །རྣམ་སྨིན་ནག་པོར་འབྱིན་པ་འདི་ལྟ་སྟེ། །ལྔ་བརྒྱའི་ཐ་མར་གཞན་འདྲིད་ཚུལ་འཆོས་མཐུས། །འགྲོ་རྣམས་ལས་ངན་གྱིས་བསྒྲིབས་ནད་ཀྱིས་གཟེར། །མྱ་ངན་སྡུག་བསྔལ་ཚོགས་ཀྱིས་གཙེས་ཕོངས་སོགས། །རྣམ་དག་སྨོན་ལམ་མཐུ་ཡིས་ཞི་བར་ཤོག །རིམས་གཤེད་མཐུ་བྱད་རོ་ལངས་འཇིགས་ཤིང་སྐྲག །ལོང་འོན་སྨྱོ་དང་ཤ་བཀྲ་ཚ་གྲང་ནད། །དུག་གསུམ་མཚམས་(༤༠བ) ― GLG021_Page_0698 ―
[མ་དཔེ་གཟིགས་ན་འདིར་གནོན།]
མེད་ལྔས་བསྒྲིབས་ངན་སྤྱོད་ཀྱིས། །མཚོན་པའི་བྱ་བ་དེ་འབྲས་མི་འབྱུང་ཤོག །ཆོས་སྤོང་མི་དགེའི་ལས་མང་ངན་འགྲོར་སྐྱེ། །དབུལ་པོ་ཟས་སྐོམ་གོས་ནོར་འབྲུ་མལ་ཆ། །སྤོས་ཕྲེང་བྱུག་པ་ན་བའི་གསོས་སྨན་སོགས། །ཡོ་བྱད་བྲལ་དང་གཞན་དབང་གྱུར་བ་ཡི། །ཆད་ལས་བཅིངས་བརྡེག་གོ་ཆར་གཞུག་པ་དང༌། །མཚོན་བསྣུན་མེས་བསྲེགས་སྲོག་ཆགས་གདུག་པས་འཚེ། །ཕན་ཚུན་འཐབ་རྩོད་འཇིགས་སྐྲག་འཁྲུག་ལོང་དང༌། །དངངས་སྐྲག་མི་འདོད་ཐམས་ཅད་དྲུངས་འབྱིན་ཤོག །ཆུ་བོ་ཆེན་པོ་བརྒལ་དང་གྲུར་འཇུག་པའི། །ཉེས་དམིགས་རྟེན་ཡུལ་གླིང་མེད་ཐང་ལ་འཁྱོམས། །སྨྲེ་སྔགས་འདོན་དང་ཚོང་ཞིང་ལས་བྱས་པར། །ཁེ་སྤོགས་མེད་སོགས་མནར་བ་ཀུན་བྲལ་ཤོག །རྒན་འཚེ་རྒུད་ཡོད་བློ་བ་ཚ་གྲང་བཀྲེས། །བུད་མེད་ནད་མང་སྐྱེ་གནས་དག་ལ་སྨོད། །བཙའ་བའི་སྡུག་བསྔལ་དགྲ་དང་འབྲོག་སྟོང་དགོན། །གཉེན་སྣག་མཛའ་བོ་ཉེ་དུའི་མྱ་ངན་གྱིས། །མཚན་རྒྱུ་ལས་མཐའ་མང་ཞུགས་སྡིག་ཅན་གདོན། །དམན་མོས་ཤེས་ཆུད་རྨོངས་པས་ཉན་རང་ལམ། །དོན་གཉེར་བསྐལ་མེ་འབར་བ་ངུ་ཞིང་སྡུག །ལོག་པའི་ལམ་འཕྱན་དེས་བསྐྱེད་དག་པར་ཤོག །ཚེ་ཐུང་དབུལ་ཕོངས་བསྒྲོན་མེ་མདོག་ངན་ཞིང༌། །ཕན་ཚུན་གནོད་སེམས་སྲོག་གཅོད་ཚུལ་འཆལ་བས། །དད་ཟས་དཀོར་གྱིས་ངན་སོང་གནས་སུ་སྐྱེ། །བསྐལ་པའི་ཚེ་ལྡན་དམྱལ་བར་སྡུག་བསྔལ་མྱོང༌། །མནར་མེད་མུན་འཁྱམས་གནོད་སྦྱིན་སྲིན་པོ་ཡིས། །མདངས་འཕྲོག་ལོག་ལྟས་སྐྱབས་འགྲོ་སེམས་བསྐྱེད་པོར། །ཆོས་ཀྱི་མིང་ཙམ་མེད་པའི་མཐའ་འཁོབ་ཏུ། །མི་དགེའི་བཤེས་དང་ནམ་ཡང་མི་འཕྲད་ཤོག །ལུས་ངན་དབང་པོ་མ་ཚང་མདོག་མི་སྡུག །ཤ་བེམ་ཡན་ལག་ཞྭ་རྒུར་མགོན་སྐྱབས་བྲལ། །བུད་མེད་སྐྱོན་གྱི་ཉོན་མོངས་མཐའ་དག་པ། །མི་མཐུན་ལྟ་བས་ཉེར་ཟིངས་བདུད་ཞགས་ཐེབས། །རྒྱལ་པོས་འཇིགས་སྐྲག་གསོད་(༤༡ན) ― GLG021_Page_0699 ―
[མ་དཔེ་གཟིགས་ན་འདིར་གནོན།]
པའི་རྒྱུ་མང་ཆང༌། །སྦྲང་བུ་ཤ་སྦྲང་གིས་ཟ་རྒྱལ་པོ་ལ། །བྲོ་ནད་དམག་གཤོམས་གཟའ་སྐར་སྦྱོར་བྱེད་སོགས། །ཇུ་ཞགས་རྩིས་ཀྱི་ཉེས་ཀུན་དང་བྲལ་ཤོག །དུས་མིན་རླབ་ཆེན་སད་སེར་ཐན་ཆར་གྱིས། །ལོ་ཏོག་ཉམས་དང་ནད་རིམས་མཚན་བཀྲ་ངན། །བགེགས་རིགས་ཉེར་གྱུར་ལས་རྐྱེན་ཀེག་སྲི་ཡིས། །བསྐྱེད་པའི་བྱུར་སོགས་ཉེས་ཚོགས་ཞི་བར་ཤོག །མདོར་ན་ཐོག་མ་མེད་ནས་ད་ལྟའི་བར། །ལས་ངན་སྡིག་སྒྲིབ་ཀྱིས་སྦགས་འབྲས་བུའི་དྲི། །བདེ་གཤེགས་སྐུ་གསུང་ཐུགས་རྟེན་རབ་བཞེངས་པའི། །མཐོ་རིས་ཆུ་བོས་བྱང་ཞིང་དག་པར་ཤོག །སྐྱབས་ཡུལ་རྣམས་ཀྱི་མཁྱེན་བརྩེ་འཕྲིན་ལས་མཐུས། །ཐུབ་བསྟན་དར་ཞིང་དེ་འཛིན་སྐྱེས་བུ་ཡི། །སྐུ་ཚེ་དགེ་འདུན་ཚོགས་རྣམས་ཀློག་པ་དང༌། །སྤོང་བ་ལས་ཀྱི་འཁོར་ལོ་འཕེལ་བའི་མཐུས། །འཇིག་རྟེན་སྤྱི་དང་ཁྱད་པར་རྒྱ་ཧོར་བོད། །ཡང་སྒོས་གངས་ཅན་ཁ་བའི་སྨན་ལྗོངས་འདིར། །འགྲོ་རྣམས་བདེ་ཞིང་ས་སྤྱོད་རྒྱལ་པོ་ཡི། །སྐུ་ཚེ་མངའ་ཐང་ཆབ་སྲིད་རྒྱས་པར་ཤོག །བྱེ་བྲག་སྒོ་གསུམ་འབད་པས་བདེ་གཤེགས་བརྒྱད། །བཞེང་པའི་སྦྱིན་བདག་བུ་ཁྲིད་རིགས་བརྒྱུད་བཅས། །ལྷ་མིའི་བདེ་ཐོབ་ཕན་ཚུན་བྱམས་ཤིང་བརྩེ། །འཇིགས་པ་ཀུན་བྲལ་ཞི་བའི་གནས་ཐོབ་ཤོག །དེང་ནས་སངས་རྒྱས་གོ་འཕང་མ་ཐོབ་བར། །བཟའ་བཏུང་བགོ་བ་རྒྱན་ཕྲེང་མལ་ཆ་སྤོས། །བྱུག་པ་གསོས་སྨན་ནོར་འབྲུ་དབྱིག་གསེར་དངུལ། །ལོངས་སྤྱོད་ཕུན་སུམ་ཚོགས་པ་རྙེད་པར་ཤོག །དགེ་བ་འཕེལ་ཞིང་གཞན་ཕན་བྱང་སེམས་བརྟན། །རླབས་ཆེན་སྤྱོད་འགྲུབ་སངས་རྒྱས་མ་ཐོབ་པར། །སྐྱེ་བའི་སྡུག་བསྔལ་མེད་ཅིང་ཕོ་ལུས་ཐོབ། །མཆོད་པ་རིམ་གྲོ་དག་ལ་བརྩོན་པར་ཤོག །ཆོས་སྟོབས་བྱང་ཆུབ་ཡན་ལག་ཏིང་འཛིན་དང༌། །གཟུངས་ཀྱི་སྒོ་དང་དཀོན་ཅོག་རྗེས་སུ་དྲན། །ཤེས་རབ་ཆེན་པོས་རྫོགས་བྱེད་ལས་མི་ལྡོག །དམན་པའི་ས་ལས་(༤༡བ) ― GLG021_Page_0700 ―
[མ་དཔེ་གཟིགས་ན་འདིར་གནོན།]
རྟག་ཏུ་འདས་པར་ཤོག །ཚེ་རིང་ནད་བྲལ་དུས་མིན་འཆི་བ་མེད། །དབང་ཕྱུག་ཕུན་ཚོགས་ལས་སྒྲིབ་ཉེ་ཉོན་བྲལ། །བྱང་ཆུབ་བར་དུ་ཁྲིམས་གཙང་སྒོ་གསུམ་སྡོམ། །མཚམས་མེད་ལྔ་བྱང་རེ་བ་རྫོགས་པར་ཤོག །བརྩེ་བའི་གཉེན་སྡུག་དག་དང་མི་འབྲལ་ཞིང༌། །སངས་རྒྱས་སྐུ་ཡི་འོད་ཀྱི་རེག་པ་དང༌། །མཐོང་བས་སྡིག་དག་ལྷ་ཡི་ལང་ཚོ་རྒྱས། །འབྱུང་པོའི་གནོད་པ་དང་བྲལ་བྱམས་ལྡན་ཤོག །ཡང་དག་ལྟ་བས་དཀོན་ཅོག་གསུམ་ལ་དད། །སངས་རྒྱས་མཚན་དང་ཆོས་ཀྱི་སྒྲ་ཐོས་པས། །ལས་ངན་ཟད་ཅིང་གནོད་པས་འཕངས་པའི་མཚོན། །ཕྱིར་བཟློག་དགྲ་རྣམས་བྱམས་པའི་སེམས་ལྡན་ཤོག །རིང་འཚོ་རང་རང་སྟབས་ཀྱིས་ཆོག་ཤེས་ལྡན། །མཁོ་རྒུའི་འབྱོར་པ་འཛོམ་ཞིང་དགེ་བཅུར་སྤྱོད། །རང་དབང་ཐོབ་ཅིང་བདེ་བར་གཤེགས་པའི་མཚན། །འཆི་ཁར་ཐོས་པས་མཐོ་རིས་ཐོབ་པར་ཤོག །བདག་ལུས་མཚན་དཔེས་བརྒྱན་པ་ཅི་འདྲ་བར། །འགྲོ་རྣམས་དེར་གྱུར་འོད་ཀྱིས་འཇིག་རྟེན་ཁམས། །མཐའ་ཀླས་གསལ་ཞིང་བཻཌཱུཪྻ་འདྲའི་ལུས། །རབ་གསལ་ཁོ་ལག་ཡངས་ཤིང་རྒྱ་ཆེ་བ། །དཔལ་དང་གཟི་བརྗིད་ཉི་ཟླ་དག་ལས་ལྷག །འོད་ཀྱིས་སྟུག་པོའི་མུན་པ་ཡོངས་སངས་ནས། །ཕྱོགས་རྣམས་ཀུན་ཏུ་དགའ་མགུར་འགྲོ་བ་དང༌། །རང་རང་ལས་རྣམས་ཐོགས་མེད་བྱེད་པར་ཤོག །སྨན་རྒྱལ་ཐབས་ཤེས་མཐུ་ཡིས་ལུས་ཅན་ཀུན། །ལོངས་སྤྱོད་ཟད་མི་ཤེས་པས་བྲལ་གཡེང་བྲལ། །སྡོམ་པ་སུམ་ལྡན་འཕགས་པ་དགྱེས་པ་ཡི། །ཚུལ་ཁྲིམས་རྣམ་པར་དག་པ་སྲུང་བར་ཤོག །ད་ལྟ་སེམས་ཅན་མཐའ་དག་བཟའ་བཏུང་གིས། །ཚིམ་པས་སླད་མར་ཆོས་ཀྱི་བདེ་ལ་འགོད། །གོས་མང་རིན་ཆེན་རྒྱན་ཕྲེང་རོལ་མོ་ཡིས། །འགྲོ་རྣམས་དགའ་ཞིང་རྣམ་གྲོལ་ཐོབ་པར་ཤོག །ཐབས་མཁས་སྨོན་ལམ་གཟུངས་ཀྱི་མཐུ་དག་གིས། །བདེ་གཤེགས་ཀྱིས་དགོངས་སྲས་བཅས་རྣམས་ཀྱིས་སེམས། །རྡོ་རྗེ་འཛིན་པས་(༤༢ན) ― GLG021_Page_0701 ―
[མ་དཔེ་གཟིགས་ན་འདིར་གནོན།]
བསྲུང་ཞིང་ལྷ་རྣམས་ཀྱིས། །ཉིན་མཚན་དུས་དྲུག་རྣམས་སུ་སྐྱོང་བར་ཤོག །དགྲ་ཡི་དབང་དུ་མི་འགྲོ་ཅི་བསམ་འགྲུབ། །ཡང་དག་བཀའ་དོན་འགྱུར་བ་མེད་པ་རུ། །ལུས་ཅན་ཀུན་གྱིས་མངོན་སུམ་མཐོང་བ་དང༌། །བདུད་ཀྱིས་མི་བརྫི་སྐྱེ་རྒུའི་རེ་སྐོང་ཤོག །མདོ་སྡེ་འདི་འཆང་གཞན་ལ་རྒྱ་ཆེར་སྟོན། །གླེགས་བམ་བྲིས་པར་སྲི་ཞུ་བྱེད་རྣམས་ལ། །བདག་གིས་དངོས་དང་རྨི་ལམ་ཙམ་དུ་ཡང༌། །སྨན་གྱི་བླ་མའི་མཚན་གྱི་སྒྲ་སྒྲོགས་ཤོག །བཀའ་འདི་རྣམ་དག་བསམ་པས་འཛིན་པ་རྣམས། །ཚེ་མཐར་ཕྱིན་པས་དུས་མིན་འཆི་བ་བྲལ། །གཞན་གྱི་བཀྲག་མདངས་མི་འཕྲོག་འཕྲོགས་ན་ཡང༌། །རིང་པོར་མི་ཐོགས་རང་དབང་ཐོབ་པར་ཤོག །ནད་ཀྱིས་གདུངས་ཏེ་རྣམ་ཤེས་གཤིན་རྗེའི་གྲོང༌། །ཕྱིན་པར་ཞེ་དགུ་བར་དུ་བདུན་ཚན་གྱི། །མཆོད་ཅིང་ཆོ་གས་རྣམ་ཤེས་སླར་ལྡོག་ནས། །ནད་ཅན་ནད་བྲལ་རིང་པོར་འཚོ་བར་ཤོག །རྒྱལ་པོས་མདོ་ཆོག་གིས་མཆོད་སེམས་བསྐྱེད་ཀྱིས། །བཙོན་རྣམས་བཏང་བས་ཚེ་སྟོབས་དབང་ཕྱུག་རྒྱས། །ལོ་ལེགས་ལྟས་ངན་འབྱུང་པོའི་གནོད་པ་ཞི། །བདེ་དང་མཆོག་ཏུ་དགའ་བ་ཐོབ་པར་ཤོག །མདོ་སྡེ་འདི་ཉིད་གཙོ་བོར་འདོན་པ་ལ། །རྒྱལ་བ་རྣམས་དང་གསང་བདག་འཁོར་བཅས་ཀྱིས། །བསྲུང་ཞིང་རྟག་ཏུ་ཚེ་རབས་དྲན་པ་དང༌། །དམ་ཆོས་བསྟན་པ་ཡུན་རིང་གནས་པར་ཤོག །གྲོང་ངམ་གྲོང་ཁྱེར་གྲོང་རྡལ་དགོན་གནས་སུ། །སྐུ་གསུང་ཐུགས་རྟེན་ཚོགས་ལ་མཆོད་བྱེད་རྣམས། །གནོད་སྦྱིན་བཅུ་གཉིས་བདུན་འབུམ་འཁོར་བཅས་ཀྱིས། །གཡེལ་བ་མེད་པར་རྟག་ཏུ་བསྲུང་བར་ཤོག །ཟ་ཧོར་རིགས་ལས་འཇམ་དབྱངས་དགའ་བའི་བཤེས། །ངག་གིས་དབང་ཕྱུག་བློ་བཟང་རྒྱ་མཚོའི་དཔལ། །གཡུ་དྲུང་ལྟ་བུར་འགྱུར་མེད་རབ་བརྟན་ཞིང༌། །རྣམ་དཀར་འཕྲིན་ལས་ཕྱོགས་བཅུར་རྒྱས་པར་ཤོག །དགའ་ལྡན་རྣམ་པར་(༤༢བ) ― GLG021_Page_0702 ―
[མ་དཔེ་གཟིགས་ན་འདིར་གནོན།]
རྒྱལ་བའི་ཕོ་བྲང་ཆེའི། །ཆོས་སྲིད་སྐྱོང་བ་སངས་རྒྱས་རྒྱ་མཚོ་ཡི། །སྐུ་ཚེ་རྡོ་རྗེ་ལྟར་བརྟན་མངའ་ཐང་དང༌། །རིགས་བརྒྱུད་དཔལ་འབྱོར་རྣམ་ཐོས་སྲས་མཚུངས་ཤོག །ཡོན་སྦྱོར་བུ་ཁྲིད་རྒྱལ་མོའི་འདི་སྣང་གི །མིག་གི་རབ་རིབ་ལ་སོགས་ནད་གདོན་ཀུན། །ཞི་ཞིང་སྐྱེ་བར་ལྷ་མིའི་རྟེན་བཟང་བརྒྱུད། །མྱུར་དུ་སངས་རྒྱས་གོ་འཕང་ཐོབ་པར་ཤོག །གང་གི་བུ་དང་ཚ་བོ་ཡང་ཚ་སོགས། །རིགས་བརྒྱུད་གངྒཱའི་རྒྱུན་ལྟར་ཆད་མེད་ཅིང༌། །ཚེ་རིང་དཔལ་འབྱོར་བདེ་སྐྱིད་ཕུན་ཚོགས་པ། །འཆི་མེད་བདག་པོའི་བསོད་ནམས་ལ་འགྲན་ཤོག །སྐུ་གསུང་ཐུགས་རྟེན་འདི་དག་བཞེད་པ་ལ། །བཟོ་བོས་མཚོན་པའི་ལས་བྱེད་ཟང་ཟིང་གི། །ཕན་པ་བསྒྲུབ་རྣམས་འདི་ཕྱིར་བདེ་ཞིང་སྐྱིད། །རིང་མིན་བྱང་ཆུབ་ཆེན་པོ་ཐོབ་པར་ཤོག །ཐུབ་པས་མཛད་པ་བསྟན་པའི་མཆོད་སྡོང་ཆེ། །བདེ་གཤེགས་མཆེད་འཁོར་བཅས་པའི་སྨོན་ལམ་སྟོབས། །སླུ་མེད་རྟེན་ཅིང་འབྲེལ་བར་འབྱུང་བ་ཡིས། །དཔག་བསམ་ཡོངས་འདུ་ཇི་བཞིན་རེ་སྐོང་ཤོག །ཐར་པའི་ལམ་བཟང་སྟོན་པ་རྫོགས་སངས་རྒྱས། །ཐོག་མཐའ་བར་དུ་དགེ་བ་དམ་པའི་ཆོས། །དེ་དོན་ཚུལ་བཞིན་བསྒྲུབ་པ་དགེ་འདུན་གྱིས། །སྲིད་ཞི་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་ཉང་བྲན་གྲོང་སྨད་གཞིས་ཀར་གོང་གསལ་རྟེན་མཆོད་རྣམས་བཞེངས་པའི་དུས་རྒྱབ་ཡིག་ལ་བརྐོ་རྒྱུ་ཚིག་རྐང་བདུན་མ་དང༌། གཟུངས་བཞུགས་ཀྱི་སྤེལ་ཚིག་དང་ཁ་ཏོན་སོགས་གང་འོས་ལ་བྱས་ཆོག་པའི་ཚིག་རྐང་དགུ་མ་འདི་ནི་བསྐུལ་བ་པོའི་འདོད་པ་ལྟར་ཚིག་གི་སྦྱོར་སྡེ་བཏང་སྙོམས་སུ་བྱས་ནས་གོ་སླ་བ་གཙོ་བོར་བཏོན་ཏེ། ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བྲིས་པ་སརྦཱརྠསིདྡྷིབྷཝནྟུ། །བྱམས་མགོན་དགའ་ལྡན་ཆོས་ཀྱི་སེང་གེའི་ཁྲིར། །མཁྱེན་བརྩེ་རྣམ་པར་བཀྲ་བའི་ལེགས་བཤད་ཀྱིས།(༤༣ན) ― GLG021_Page_0703 ―
[མ་དཔེ་གཟིགས་ན་འདིར་གནོན།]
།འགྲོ་རྣམས་ཐོག་མཐའ་བར་དུ་བཤེས་མཛད་པ། །རྗེ་བཙུན་བླ་མ་སྐུ་ཚེ་རབ་བརྟན་ཤོག །ལྕགས་བྱ་དགའ་ལྡན་ཁྲི་རིན་པོ་ཆེ་བྱམས་པ་བཀྲ་ཤིས་སྐུ་སྙུན་པའི་ཚེ་ཆབ་ཤོག་ཏུ་སྩལ་བའི་བརྟན་བཞུགས། །ཕྱག་ན་པད་དཀར་འཆང་སོགས་མཁས་གྲུབ་ཀྱི། །སྒྱུ་འཕྲུལ་ཡིད་བཞིན་རིན་ཆེན་འཕྲེང་བའི་གྲལ། །ཟ་ཧོར་བནྡེའི་སྣང་བརྙན་འཆིང་བུའི་རྡོ། །མོས་པས་རས་དཀར་མཁའ་ལ་འཇའ་ལྟར་ཤར། །ཀུན་རྫོབ་རྒྱ་མཚོར་བཟང་ངན་བར་མའི་རླབས། །འཁྲུལ་རྟོག་ཡོལ་མེད་དོན་དམ་ཆུ་བོའི་གཤིས། །རོ་གཅིག་ཆོས་སྐུའི་ཀློང་དུ་རང་གྲོལ་ན། །དད་པའི་རི་མོ་རྡར་བྲིས་གང་གིས་བསུབ། །དེ་ཕྱིར་ངག་དབང་བློ་བཟང་རྒྱ་མཚོའི་སྡེ། །སྲས་བཅས་རྒྱལ་བ་ཡོངས་འདུས་ངོ་བོ་རུ། །ཡིད་ཀྱི་ཟླ་ངོས་ཤར་བའི་རི་དྭགས་གཟུགས། །བྱང་ཆེན་བར་དུ་འབྲལ་མེད་རྗེས་སུ་གཟུང༌། །རྒྱ་བོད་ཡིག་རིགས་གཙུག་ལག་གཉིས་པའི་མིག །རབ་ཡངས་ངག་དབང་ཕུན་ཚོགས་ལྷག་བསམ་གྱིས། །ཉེར་བསྐྲུན་དགེ་བས་ཚེ་དཔལ་བསོད་ནམས་སོགས། །དེང་ནས་ཡང་སྲིད་ཀུན་ཏུ་འཕེལ་བར་ཤོག །ལུང་རྟོགས་ཡོན་ཏན་ས་བོན་དར་དྲག་པ། །སྨོན་ལམ་གཤེར་གྱིས་བསྐྱེད་པ་ཨམྲའི་ལྗོན། །ངེས་ལེགས་འབྲས་བུ་རོ་བརྒྱ་དངར་བའི་ཟས། །མྱངས་ནས་རིས་མེད་འགྲོ་ལ་སྟེར་བར་ཤོག །སངས་རྒྱས་ཀུན་དངོས་རྗེ་བཙུན་ཙོང་ཁ་པར། །ཆོས་བརྒྱད་འཆིང་གྲོལ་དག་པའི་འཁོར་བརྒྱད་དང༌། །མགྲོན་ཐབས་ལྔ་བརྒྱའི་གཙུག་རྒྱན་ཇོ་འབྲོམ་ཟུང༌། །ཁྱབ་བདག་རིན་ཆེན་བསོད་ནམས་མཆོག་གྲུབ་ཞབས། །རྣམ་འབྱེད་ཤེས་རབ་སྦྱིན་མཛད་འཇམ་དཔལ་དབྱངས། །ལས་ཀུན་ཐོགས་མེད་བསྒྲུབ་པ་ངལ་བསོས་པོ། །སྲིད་ཞིའི་འདོད་པ་འཇོ་བ་རྨུགས་འཛིན་དབང༌། །ཚོན་བརྒྱ་ཉེ་བའི་དྭངས་ཤེལ་ལྟ་བུར་བཀྲ། །བསོད་ནམས་བྱས་འདིས་ཐུ་མི་གཉིས་པའི་རིགས། །སྨྱུག་ཐོགས་ཁ་ལོ་བསྒྱུར་བའི་(༤༣བ) ― GLG021_Page_0704 ―
[མ་དཔེ་གཟིགས་ན་འདིར་གནོན།]
དཔྱོད་ལྡན་ཅན། །རྒྱལ་རྩེ་ངག་དབང་ཕུན་ཚོགས་དེང་ནས་བཟུང༌། །ཡང་སྲིད་ཀུན་ཏུ་བདེ་ཞིང་སྐྱིད་པར་ཤོག །བདོག་པའི་ཡོན་སྦྱོར་རི་མོའི་འདུ་བྱེད་མཁན། །ལུས་ངག་ཡིད་ཀྱིས་ཕན་པ་བསྒྲུབས་སོ་ཅོག །ཆོས་དཀར་མུ་ཏིག་འཁྲི་ཤིང་ཆར་ཆེན་པོ། །རིམ་བརྒྱུད་སྐྱེ་བ་ཀུན་ཏུ་འབབ་པར་ཤོག །ཚེ་འདིའི་ལུས་བསྐྱེད་ཕ་མས་ཐོག་དྲངས་པའི། །ནམ་མཁའི་མཐས་ཁྱབ་གཞལ་དཀའི་སེམས་ཅན་ཚོགས། །སྟོབས་བཅུ་མངའ་བའི་གོ་འཕང་ཐོབ་པའི་རྒྱུར། །ཐོག་མེད་ནས་བསགས་ལེགས་བྱས་ཐམས་ཅད་བསྔོ། །བརྒྱ་ཕྲག་ཉི་མས་འཁྱུད་པ་མར་གད་ཀྱི། །ལྷུན་པོའི་མཛེས་བརྗིད་ལ་འགོངས་སྨིན་ལེགས་རྟེན། །དྲན་པས་འཇིགས་ཚོགས་སྐྱོབ་པ་རྒྱལ་ཀུན་ཡུམ། །རྗེ་བཙུན་སེང་ལྡེང་ནགས་ཀྱི་སྒྲོལ་མ་ལ། །གང་གི་རྣམ་པར་འཕྲུལ་པོ་ཆེ་ཡི་གར། །ཟླ་མིག་གྲངས་སུ་བསྒྱུར་ནས་ལུས་ཅན་ལ། །ཞི་རྒྱས་དབང་དྲག་ལས་ཀྱི་འདོད་པའི་དོན། །བསྒྲུབ་མཛད་འཁོར་གྱིས་ཡོངས་བསྐོར་རབ་སྤེལ་མཐུས། །འཕགས་བོད་བརྡ་དག་གཟུགས་ཀྱི་རིན་ཆེན་རྒྱན། །ཡིག་རིགས་ས་སྲུང་གོམ་འགྲོས་ཤོག་བུའི་ཐང་། །སྒྱུ་རྩལ་སོར་མོས་བགྲོད་པ་རྒྱལ་རྩེ་བ། །ངག་དབང་ཕུན་ཚོགས་དད་པས་བཞེངས་པའི་འབྲས། །དེང་ནས་བྱང་ཆུབ་བར་དུ་འཇིགས་པའི་ཚོགས། །དངོས་དང་རྨི་ལམ་ཙམ་དུ་མི་འབྱུང་ཞིང༌། །སུམ་རྩེན་དག་པའི་དགའ་སྟོན་ལྷན་ཅིག་པར། །སྤྱོད་པའི་སྐལ་བ་བཟང་པོར་འགྱུར་བར་ཤོག །ཞེས་རྒྱལ་རྩེ་ཡིག་མཁན་ངག་དབང་ཕུན་ཚོགས་ཀྱིས་རྒྱལ་བ་ཙོང་ཁ་པ་ཆེན་པོ། སེང་ལྡེང་ནགས་སྒྲོལ། ངེད་རང་གི་འདྲ་འབག་གསུམ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རྒྱ་བོད་ཀྱི་ཡིག་རིགས་དུ་མ་དང་རྩིས་དཀར་ནག་ལ་བློ་གྲོས་ཀྱི་སྣང་(༤༤ན) ― GLG021_Page_0705 ―
[མ་དཔེ་གཟིགས་ན་འདིར་གནོན།]
བ་ཡངས་པ་མཐར་རྒྱས་པ་བློ་བཟང་དབང་པོའོ། །སངས་རྒྱས་ཀུན་དངོས་པདྨ་འབྱུང་གནས་སྐུ། །གཅིག་ལས་དུ་མར་བསྒྱུར་བ་མཚན་བརྒྱད་དང༌། །ཡིད་འཛིན་འཚོ་རྒྱལ་ཌཱཀྐིའི་གཙོ་མོ་ཡིས། །ཀུན་བཟང་རང་ཞལ་མ་མཐོང་བར་རྗེས་ཟུངས། རྔ་ཡབ་གླིང་པ་པད་འབྱུང་སམ་བྷ་ཝ། །མཆོག་སྲེད་པདྨ་རྒྱལ་པོ་མཁའ་འགྲོ་ཟུང༌། །ཟ་ཧོར་རིགས་འཛིན་དྲི་ཟའི་རྒྱལ་པོ་ཡིས། །ཚེ་རབས་ཀུན་ཏུ་ཕན་བདེའི་དཔལ་ལ་སྦྱོར། །བཀའ་བརྒྱད་ཡོངས་འདུས་རྡོ་རྗེ་དྲག་པོ་རྩལ། །ཉི་མ་འོད་ཟེར་སེང་གེ་སྒྲ་སྒྲོག་དང༌། །འཇམ་དཔལ་སྙིང་པོ་དམ་ཅན་སྲུང་མར་བཅས། །རྟེན་འདིར་བཞུགས་ནས་དངོས་གྲུབ་སྩལ་དུ་གསོལ། །ཤཱཀ་སེང་འཆོལ་བའི་ཁྲོ་རྒྱལ་བཟང་པོ་གྲགས། །རྒོད་ལྡེམ་དཔལ་གྱི་ལྷ་མོ་ལ་སོགས་པ། །རྩ་བ་གསུམ་གྱིས་རྒྱུ་སྦྱོར་སྦྱིན་པའི་བདག །འདི་ཕྱིའི་ལེགས་ཚོགས་མཐའ་དག་འགྲུབ་བྱིན་རློབས། །ཞེས་པ་འདིའང་རི་མོ་བ་འབག་ལྷུག་གིས་ཐང་བཀོད་ལ་གཞི་ལྟས་ནས་སྨོན་ལམ་གྱི་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །ཐག་ཁྲར་སྦྲུལ་དུ་མངོན་པའི་དངངས་སྐྲག་གིས། །དོན་བྱེད་ནུས་ལྟར་འཇམ་དབྱངས་དགའ་བའི་བཤེས། །སྤྱན་རས་གཟིགས་དང་དབྱེར་མེད་རོ་གཅིག་པར། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། །གངས་ཅན་སྐྱེ་རྒུ་ཡོངས་ཀྱི་ཆོས་སྐལ་དུ། །བཀའ་བབས་ཡིག་དྲུག་ལྷང་ལྷང་གསོལ་འདེབས་དང༌། །བགྲང་ཡས་རིལ་བསྒྲུབ་མཐུ་ཡིས་མགོན་པོ་ཁྱོད། །གཡུང་དྲུང་ལྟ་བུར་རྟག་ཏུ་ཞབས་བརྟན་ཤོག །རྣམ་དག་དགེ་འདུན་འདུས་པའི་ཐུགས་རྗེ་དང༌། །རྟེན་འབྲེལ་རྒྱུ་འབྲས་བསླུ་བ་མེད་པ་ཡིས། །དམ་རྫས་འདི་ཟོས་མཐའ་དག་འཁོར་བ་ཡི། །འཇིགས་བྲལ་ངེས་ལེགས་ལམ་དུ་བགྲོད་པར་ཤོག །(༤༤བ) ― GLG021_Page_0706 ―
[མ་དཔེ་གཟིགས་ན་འདིར་གནོན།]
དགེ་བཅུ་ཀུན་ཚང་ཡར་འོན་གསེར་གཞོང་ཁ། །ཉེར་སྤྲད་གསས་ཁང་རྩེ་མོར་མངའ་རིས་པར། །ཡོངས་གྲགས་འདུས་གྲ་འཁོར་ལོ་རྣམ་གསུམ་གྱི། །སྲིད་མཐའི་བར་དུ་བླ་ནས་བླར་འཕེལ་ཤོག །མཁས་བཙུན་བཟང་པོའི་རྣམ་པར་ཐར་པའི་དཔྱིད། །གངས་ཅན་འཛིན་མ་ཆེས་རྡུལ་བཤད་སྒྲུབ་ཀླུང༌། །ཕྱོགས་བརྒྱར་ཡོངས་འཕེལ་ཞྭ་སེར་འཆང་བའི་བསྟན། །འཁོར་འདས་ཡོངས་ཀྱི་གཙུག་ཏོར་རྩེར་མཛེས་ཤོག །ཆོས་རྒྱལ་ཚངས་པ་ལྷ་ཡི་མེ་ཏོག་སྲས། །མུ་ཏིག་བཙན་པོའི་ཡང་སྤྲུལ་སངས་རྒྱས་ཀྱི། །བསྟན་པ་རྒྱ་མཚོ་འདེགས་པའི་ས་དབང་ཆེ། །ངལ་བསོས་པོ་དང་སྐལ་བ་མཉམ་པར་ཤོག །ཆོས་སྲིད་དགའ་སྟོན་དཔལ་དང་ལེགས་ལྡན་པ། །རྣམ་པར་རྒྱལ་བའི་ཕོ་བྲང་ཆེན་པོ་ཡི། །ཁྲིམས་གཉིས་གསེར་གྱི་འཁོར་ལོ་རྩིབས་སྟོང་ཅན། །གནམ་སའི་ཁྱོན་ལ་བར་མེད་འཁོར་བར་ཤོག །ས་འོག་ས་སྟེང་ས་བླའི་འཇིག་རྟེན་ན། །འཁོད་ནས་འགྲོ་བ་རིགས་དྲུག་སྐྱེ་རྒུ་དང༌། །མི་འགྲོ་བར་དོ་མཐའ་དག་སྡུག་བསྔལ་བའི། །ཚོར་བ་དང་བྲལ་སྒོ་གསུམ་སིམ་པར་ཤོག །ཁྱད་པར་དབུས་གཙང་ཁྲི་སྐོར་བཅུ་གསུམ་གྱི། །ལྗོངས་འདིར་མི་ཕྱུགས་ནད་རིམས་བཙའ་འབུ་ཐན། །སད་སེར་མཐའ་བཞིའི་ཚོང་ཁེའི་འདུ་སྒོ་ཉམས། །ཇག་ཆོམས་དམག་འཁྲུག་ངན་འབྲས་ཞི་བར་ཤོག །བརྒྱ་ཕྲག་ལོར་འཚོ་ཟས་གོས་མལ་ཆ་སྟན། །ཁང་ཞིང་སྒོ་ལྡུར་འབྲུ་ཇ་རྩ་མར་ཤིང༌། །རྟ་དྲེལ་གནག་ཕྱུགས་རིན་ཆེན་གོས་དར་སོགས། །མཁོ་དགུའི་འབྱོར་བ་ཕུན་སུམ་ཚོགས་པར་ཤོག །པད་དཀར་འཆང་བའི་འཁྱེར་སོ་སུམ་ལྡན་དང༌། །ནོར་བུ་པདྨ་འབོད་པའི་དབྱངས་སྙན་པོས། །འགྲོ་ལ་སྤྱན་རས་རྟག་ཏུ་ཉེར་གཟིགས་ནས། །བཀྲ་ཤིས་དཔལ་གྱི་རྩེ་དགའ་དགོད་པར་ཤོག །མ་ཎི་དུང་ཕྱུར་གཏོང་སྐབས་སྨོན་ལམ་འདི་ལྟ་བུ་ཞིག་དགོས་ཞེས་གཉེར་པ་འཕྱོང་རྒྱས་པ་དཀའ་བཅུ་གྲགས་པ་ལེགས་(༤༥ན) རྒྱལ་བ་ཉི་མའི་གཉེན་གྱི་མཛད་པ་བརྒྱའི་ཞལ་ཐང་གི་རྒྱབ་ཡིག་སྨོན་ལམ་སོགས།― GLG021_Page_0707 ―
[མ་དཔེ་གཟིགས་ན་འདིར་གནོན།]
རྒྱལ་བ་ཉི་མའི་གཉེན་གྱི་མཛད་པ་བརྒྱའི་ཞལ་ཐང་གི་རྒྱབ་ཡིག་སྨོན་ལམ་སོགས། སྲས་བཅས་རྒྱལ་བས་མགྲིན་གཅིག་བསྔགས་པའི་གཏམ། །ཚངས་དབྱངས་རྒྱུད་དུ་བཀུག་པ་སྙན་འགྱུར་གླུར། །ལེགས་འབབ་སྙིང་སྟོབས་ཆེན་པོ་པད་དཀར་ལྟར། །རྣམ་འདྲེན་གཞན་ལས་ཁྱད་ཞུགས་དོན་ཀུན་གྲུབ། །ཨ་ཧོ་གྲངས་མེད་བསྐལ་མང་རྒྱལ་སྲས་ཀྱི། །རླབས་ཆེན་སྤྱོད་པའི་ཚད་བཟུང་ཚངས་པ་ཡིས། །གདོང་བཞི་སྤྲུལ་ནས་བལྟས་ཀྱང་ནུས་མིན་ན། །ཚུར་མཐོང་བྱིས་བློ་ཕྲ་མོ་དེས་ཀྱང་ཅི། །འོན་ཏེ་ཨ་མའི་ཚི་གུས་རྒྱ་མཚོ་བཞིན། །དཔལ་ལྡན་དཔའ་བོས་ཕ་རོལ་ཕྱིན་པ་བཅུ། །བཅུ་ཚན་བཅད་པ་རྟོགས་བརྗོད་མནྡྷརའི། །ཆུན་པོ་སྐལ་བཟང་ཐོད་དུ་འཆིང་བྱའི་རྒྱན། །གཙུག་ལག་གཉིས་པ་ཤེས་པའི་མིག་ཡངས་ཀྱིས། །རས་དཀར་ངོས་སུ་ངོ་མཚར་ཞིང་བཀོད་གར། །རི་གཟུགས་གྲངས་སྤེལ་མཐོང་བས་དོན་ལྡན་ལ། །བལྟ་ཕྱིར་ཉི་ཟླ་མཁའ་ལ་ཡང་ཡང་འཁོར། །བསོད་ནམས་ཞིང་སར་འདྲེན་ལ་ས་ཟླ་ཡི། །བདོག་པའི་མཆོད་སྦྱིན་གཏོང་ཕོད་ཟུར་གྱི་རིགས། །འཇམ་དབྱངས་དབང་རྒྱལ་ལྷག་བསམ་པད་རྩ་ལྟར། །དཀར་བའི་འབད་རྩོལ་མཐུ་ལས་དེང་དེར་འགྲུབ། །ཕྱག་མཆོད་རི་མོར་བྲིས་པའི་ལེགས་བྱས་མཐུས། །རིང་འཚོའི་ཚེ་དང་དཔལ་འབྱོར་དབང་ཐང་སོགས། །ཐོས་བསམ་སྒོམ་སོགས་ཡོན་ཏན་གོང་འཕེལ་ཞིང༌། །ལྷ་མིའི་རྟེན་བརྒྱུད་བྱང་ཆེན་མྱུར་ཐོབ་ཤོག །ཕ་མས་ཐོགས་དྲངས་ཉེ་དུ་རིགས་བརྒྱུད་རྣམས། །འདི་སྣང་རྨུགས་འཛིན་དབང་པོའི་དཔལ་ལ་འགྲན། །དགེ་བའི་གཟིངས་ཀྱིས་འཁོར་བའི་མཚོ་བསྒྲལ་ནས། །ཐར་པ་རིན་ཆེན་གླིང་དུ་བགྲོད་པར་ཤོག །རྒྱལ་བ་ཉི་མའི་གཉེན་གྱི་མཛད་པ་བརྒྱའི་ཞལ་ཐང་གི་རྒྱབ་ཡིག་སྨོན་ལམ་དང་བཅས་པ་ཞིག་དགོས་ཞེས་ཟུར་བཙུན་འཇམ་དབྱངས་ ― GLG021_Page_0708 ―
[མ་དཔེ་གཟིགས་ན་འདིར་གནོན།]
དབང་རྒྱལ་གྱིས་བསྐུལ་བའི་ངོར་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ངག་དབང་དབྱངས་ཅན་ཉེར་དགྱེས་བློ་གྲོས་ལ། །བཟང་པོའི་བག་ཆགས་སད་པས་རིག་པའི་གནས། །བཅུ་ཕྲག་རྒྱ་མཚོར་རབ་འཇུག་ཐོས་བསམ་རྫིངས། །རྣམ་དཔྱོད་རླུང་གིས་བསྐུལ་ལ་གསོལ་བ་འདེབས། །བརྗོད་པ་ཡོངས་དག་ངག་གི་རྟ་བདུན་གྱིས། །འཆད་རྩོད་རྩོམ་ལ་རབ་དབང་ཉིན་མོར་བྱེད། །བློ་གྲོས་མཁའ་ལས་མཁས་བཙུན་བཟང་པོའི་འོད། །རྒྱ་མཚོའི་གོས་ཅན་ཁྱབ་ཁྱོད་ཞབས་བརྟན་ཤོག །ཚེ་ལྷ་དྲང་སྲོང་རིག་འཛིན་བདེན་པའི་སྟོབས། །མཁའ་འགྲོ་དམ་ཅན་སྲུང་མའི་ནུས་མཐུ་དང༌། །བསླུ་བ་མེད་པ་རྟེན་ཅིང་འབྲེལ་འབྱུང་ལས། །སྨོན་ལམ་བཏབ་པ་ཇི་བཞིན་འགྲུབ་པར་ཤོག །ཅེས་སློབ་དཔོན་དཀོན་ཅོག་ངག་དབང་ཕག་མོ་ཆོས་སྡེའི་བླ་མར་འགྲོ་སྐབས་ཆོས་སྐྱོང་ཆེན་པོའི་བསླབ་སྟོན་བྱུང་ཚུལ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །འགྲོ་བ་ཀུན་ལ་བུ་གཅིག་ལྟར་གཟིགས་ཕྱག་ན་པད་དཀར་འཛིན་པ་ལ། །ཐམས་ཅད་མཁྱེན་པ་བཙོང་ཁ་པ་དང་རྗེས་འབྲངས་འཇམ་དབྱངས་དགའ་བའི་བཤེས། །ནོར་གྱི་གཏེར་མཛོད་རྨུགས་འཛིན་དབང་པོ་སྲིད་གསུམ་བདག་མོ་དུང་སྐྱོང་མས། །ཡོངས་བསྐོར་བྲིས་སྐུའི་རྒྱུ་རྐྱེན་སྦྱར་མཐུས་བསོད་ནམས་ཉི་མ་བདུན་འབར་ཤོག །སྟོང་ཕྲག་བརྒྱ་པའི་གླེགས་བམ་དོན་བཞིན་མཚན་འཛིན་དྲ་བ་མ་ལུས་པ། །ཤེས་རབ་རལ་གྲི་རྣོན་པོས་བཅད་ནས་རྣམ་དཔྱོད་དཔུང་པས་རབ་བཏེག་ལྷ། །མཚམས་སྤྲིན་གོས་གྱོན་མགོན་པོ་ཁྱོད་དང་དབྱེར་མེད་ཇོ་བོ་ཡབ་སྲས་གསུམ། །ཞབས་རྡུལ་གཙུག་བསྟེན་ཚངས་སྲས་བཞད་པས་བདག་སོགས་འགྲོ་ཀུན་རྒྱུད་བྱིན་རློབས། །འཆི་བའི་དངོས་པོ་མ་ལུས་མཐར་བྱེད་ཚེ་སྦྱིན་ཡིད་བཞིན་འཁོར་ལོའི་ཞབས། །ཀླུ་མཁའ་གཟུགས་གྲངས་གཙུག་ཏོར་རྩེ་མོར་མི་ཕམ་མགོན་(༤༦ན) ― GLG021_Page_0709 ―
[མ་དཔེ་གཟིགས་ན་འདིར་གནོན།]
པོའི་རིགས་བདག་ཅན། །ནམ་མཁའ་བསེ་རུའི་གྲངས་སུ་ཡོངས་སྤེལ་བྲིས་ཐང་བསྐྲུན་པའི་རྣམ་དཀར་དགེས། །ཡོན་སྦྱོར་ནོར་བུ་རིགས་བརྒྱུད་བཅས་པ་སྲོག་གི་ཀ་བ་ཚུགས་པ་ཤོག །གཟུངས་དང་འཛིན་པའི་ནགས་ཚལ་སྟུག་པོར་རྟག་ཏུ་ཉེར་འཁྱམས་འགྲོ་བ་རྣམས། །འཇིགས་བརྒྱད་གཅན་གཟན་མཆེ་སྡེར་རྣོན་པོས་བདེ་སྐྱིད་ལུས་སྲོག་ཡོངས་དབྲལ་བར། །མར་གད་འཁྲི་ཤིང་ཡལ་འདབ་བསྐྱོད་འདྲའི་འཇམ་མཉེན་ཕྱག་རིང་གཙུག་ཁྱོངས་ལ། །སིམ་པའི་ཚོར་བར་དབུགས་དབྱུང་མཛོད་ཅིག་སེང་ལྡེང་ནགས་ཀྱི་སྒྲོལ་མ་ཀྱེ། །ཕུང་པོ་གསུམ་པའི་མདོ་ལས་ལེགས་གསུངས་ཤཱཀ་ཐུབ་ལ་སོགས་བདེ་གཤེགས་བདུན། །ཡི་གེ་དྲུག་པ་ཁརྶ་པ་ཎི་རྣམ་སྲས་ནོར་རྒྱུན་དཔལ་ལྷ་མོ། །རྒྱུ་སྐར་དབུས་ན་ཟླ་བ་བཞིན་དུ་སོ་སོར་འབྲང་མའི་སྒྱུ་འཕྲུལ་གྱིས། །རོལ་པས་རྒྱུ་སྦྱོར་ནོར་བུའི་རིགས་བརྒྱུད་ཏིལ་གྱི་གང་བུ་ལྟར་འཕེལ་ཤོག །ཕུང་པོ་གསུམ་པའི་མདོ་ལས་ལེགས་གསུངས་རིན་ཆེན་ཟླ་སོགས་བདེ་གཤེགས་བདུན། །སེང་གེའི་སྒྲ་དང་ཧ་ལ་ཧ་ལ་ནོར་བུ་བཟང་པོ་འཇམ་དཔལ་ཟུང༌། །རྒྱུ་སྐར་དབུས་ན་ཟླ་བ་ཇི་བཞིན་སྟོང་ཆེན་རབ་འཇོམས་སྒྱུ་འཕྲུལ་གྱི། །རོལ་པས་༝། ཕུང་པོ་གསུམ་པའི་གདོ་ལས་ལེགས་གསུངས་ཆུ་ལྷའི་ལྷ་སོགས་བདེ་གཤེགས་བདུན། །གར་དབང་འཇིག་རྟེན་དབང་ཕྱུག་ནོར་བཟང་ཛམ་དམར་སྲོག་སྒྲུབ་ཡང་དག་ཤེས། །རྒྱུ་སྐར་དབུས་ན་ཟླ་བ་ཇི་བཞིན་གསང་སྔགས་རྗེས་འཛིན་སྒྱུ་འཕྲུལ་གྱི། །རོལ་པས་༝། ཕུང་པོ་གསུམ་པའི་མདོ་ལས་ལེགས་གསུངས་སྲེད་མེད་བུ་སོགས་བདེ་གཤེགས་བདུན། །སྤྱན་རས་གཟིགས་དབང་མགྲིན་སྔོན་དོན་ཞགས་ལྔས་རྩེན་ཛམ་སེར་ཀུ་བེ་ར། །རྒྱུ་སྐར་དབུས་ན་ཟླ་བ་ཇི་བཞིན་བསིལ་བའི་ཚལ་གྱི་སྒྱུ་འཕྲུལ་གྱི། །རོལ་(༤༦བ) ― GLG021_Page_0710 ―
[མ་དཔེ་གཟིགས་ན་འདིར་གནོན།]
པས་༝། ཕུང་པོ་གསུམ་པའི་མདོ་ལས་ལེགས་གསུངས་དབང་པོའི་ཏོག་སོགས་བདེ་གཤེགས་བདུན། །དོན་ཞགས་ཕྱག་བཞི་ཕྱག་དྲུག་འབྲོག་གནས་ཛམ་ནག་པི་ཙི་ཀུཎྜ་ལི། །རྒྱུ་སྐར་དབུས་ན་ཟླ་བ་ཇི་བཞིན་རྨ་བྱ་ཆེན་མོའི་སྒྱུ་འཕྲུལ་གྱི། །རོལ་པས་༝། ཅེས་སྒྱིད་ཐང་ནོར་བུས་བྲིས་ཐང་དགུ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཡིག་རྩིས་བརྡ་དག་ལ་བློ་གྲོས་དཀར་བ་མཐར་རྒྱས་པ་བློ་བཟང་དབང་པོའོ། །འཇིག་རྟེན་དབང་ཕྱུག་སྲོང་བཙན་སྒམ་པོའི་ཞབས། །འགྲོ་འདྲེན་དགེ་འདུན་ཀུན་འདུས་མཁས་ཤིང་གྲུབ། །བསོད་ནམས་ཞིང་དུ་སྲིད་ཞིའི་ཡོན་ཏན་ཚོགས། །རྒྱ་མཚོའི་རླབས་ལྟར་ཡོལ་བ་མེད་པ་ལ། །རྣམ་དཀར་འབྲེལ་བར་སྒྲོ་བཏགས་ཟ་ཧོར་རིགས། །འཇམ་དབྱངས་ཚངས་སྲས་ལུས་ཕྲར་དགའ་མགུ་རུ། །རྩེ་བའི་ལེགས་བཤད་རྒྱུད་མང་ཉེར་བཞད་པའི། །འཇིགས་མེད་རྡོ་རྗེའི་གླུར་ལེན་སྣང་བརྙན་ཚོགས། །བྲིས་པས་རྒྱུ་སྦྱོར་བཟོ་རིགས་ལས་གྲོགས་རྣམས། །ལྷ་མིའི་བདེ་སྐྱིད་སྐྱེ་བ་རིམ་བརྒྱུད་མྱོང༌། །མྱུར་དུ་ཐར་པའི་ཐེམ་སྐས་ལ་འཛེགས་ནས། །བྱང་ཆེན་ཁང་པར་འཇུག་པའི་སྐལ་ཐོབ་ཤོག །ཅེས་པའང་རྡོ་རྗེས་བགྲང་ཡས་མའི་ནང་བཞིན་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་རིག་བྱེད་པ་བློ་བཟང་དབང་པོའོ། །ངག་གི་དབང་ཕྱུག་བློ་བཟང་རྒྱ་མཚོའི་སྡེར། །རྒྱ་བོད་ཆོས་རྒྱལ་དུ་མས་ཡོངས་བསྐོར་བ། །བསྐྲུན་པའི་སྦྱིན་བདག་འདི་ཕྱི་ཀུན་བདེ་ཞིང༌། །རྫོགས་པའི་སངས་རྒྱས་གོ་འཕང་མྱུར་ཐོབ་ཤོག །ལྔ་རིག་པཎ་ཆེན་དགེ་འདུན་གྲུབ་པ་ལ། །རྒྱ་བོད་ས་སྐྱོང་མཁས་གྲུབ་བདུན་ཕྲག་གིས། །བསྐོར་བ་བཞེངས་པས་གནས་སྐབས་མཐར་ཐུག་གི །འདོད་པའི་དོན་རྣམས་མ་ལུས་གྲུབ་པར་ཤོག །ཤེས་བྱ་ཀུན་མཁྱེན་དགེ་འདུན་རྒྱ་མཚོ་ལ། །གངས་ལྗོངས་སྐྱེས་མཆོག་དྲུག་དང་དུང་(༤༧ན) ― GLG021_Page_0711 ―
[མ་དཔེ་གཟིགས་ན་འདིར་གནོན།]
སྐྱོང་མས། །བསྐོར་བ་བཞེངས་དགེས་སྲིད་ཞིའི་ཡོན་ཏན་ཚོགས། །ཡར་ངོའི་ཟླ་བ་ལྟ་བུར་འཕེལ་བར་ཤོག །དགེ་འདིས་རིང་པོར་འཚོ་བའི་ཚེ་དང་ལྡན། །འཇིགས་པ་བརྒྱད་སོགས་སྡུག་བསྔལ་མཐའ་དག་བྲལ། །དམ་པའི་མགོན་གྱིས་རྗེས་བཟུང་འདི་ཕྱི་དང༌། །གཏན་གྱི་མདུན་མ་ལྷུན་གྱིས་གྲུབ་པར་ཤོག །ཅེས་དགོས་དགོས་ཨ་བར་གྱིས་འགྲོ་ལ་རྗེས་བརྩེ་མ་དང་བསྟུན་པའི་འཁྲུངས་རབས་ཐེང་གྲངས་གསུམ་དང༌། སེང་ལྡེང་ནགས་སྒྲོལ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོའོ། །སྦྱང་གཞི་གཞོན་ནུ་བུམ་རྒྱ་གྲོལ་བའི་ནང༌། །འབྲས་བུ་རང་རིག་ངོ་བོ་པདྨ་འབྱུང༌། །ཆོས་སྐུ་འཕོ་འགྱུར་མེད་པའི་ངང་ཉིད་དུ། །གང་ཤར་རང་སར་གྲོལ་ཕྱིར་ཞབས་བརྟན་ཤོག །ནད་དབྱིངས་དག་པའི་སེམས་ཉིད་འཇའ་ཚོན་ཟེར། །ཆུ་སྒྲོན་ལས་ཐོན་རང་བཞིན་ལོངས་སྤྱོད་རྫོགས། །ཞི་ཁྲོའི་རྣམ་རོལ་སྒྱུ་འཕྲུལ་ཟད་མི་ཤེས། །ཆེ་མཆོག་འདུས་རྩལ་ངོ་བོར་ཞབས་བརྟན་ཤོག །སེམས་ཅན་བསམ་པའི་ཁྱད་པར་དེ་སྙེད་དུ། །འཇུག་ནུས་ཐུགས་རྗེའི་སྤྲུལ་སྐུ་འཐའ་ཀླས་ཀྱང༌། །སུམ་ལྡན་རིག་འཛིན་གར་གྱིས་ཕྱག་རྒྱ་ཀུན། །ཟིལ་གནོན་བཞད་པ་རྩལ་དུ་ཞབས་བརྟན་ཤོག །པདྨ་ཐོད་འཕྲེང་དྲི་མེད་བཤེས་གཉེན་ནས། །རྨ་གཉགས་སོ་ཟུར་གནུབས་སོགས་མདོ་སྒྱུ་སེམས། །བསྟན་འཛིན་ཧེ་རུ་ཀཿ དཔལ་མི་གཟུགས་སུ། །བསྒྱུར་སྤེལ་བཀའ་མའི་རིང་ལུགས་དར་རྒྱས་ཤོག །ཉང་རལ་ཆོས་དབང་རྒོད་ཀྱི་ལྡེམ་ཕྲུ་སོགས། །བཀའ་བབས་ལས་འཕྲོ་སད་པ་བརྒྱ་ཕྲག་གིས། །སྤྱན་དྲངས་མཁའ་འགྲོའི་ཞལ་ལུང་དངར་པོའི་ངད། །འཐུལ་བའི་ཟབ་གཏེར་བསྟན་པ་རྒྱས་པར་ཤོག །དར་རྗེ་དཔལ་གྲགས་ནས་བཟུང་ནམ་མཁའ་ལ། །རིག་འཛིན་ཟམ་པ་མ་ཆད་དཀྱིལ་འཁོར་བཀྲག །ས་ལ་མ་ཡལ་སྔགས་འཆང་བོན་གྲོང་པའི། །ཆོས་སྲིད་རིགས་(༤༧བ) ― GLG021_Page_0712 ―
[མ་དཔེ་གཟིགས་ན་འདིར་གནོན།]
བརྒྱུད་དར་ཞིང་རྒྱས་པར་ཤོག།སྐྱབས་གཅིག་བླ་མ་པད་འབྱུང་གནུབས་བན་རྗེ། །ཡི་དམ་ཚེ་བདག་ཁྲོ་ཆུ་དུག་སྡོང་ནག །བཀའ་སྲུང་མ་གཟའ་རྡོར་གསུམ་ཚོགས་རྣམས་ཀྱིས། །འཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །རིང་པོར་འཚོ་ཞིང་སྔ་འགྱུར་སྤྱི་དང་བྱེ་བྲག་བོན་གྲོང་པ་དར་རྒྱས་ཀྱི་སྨོན་ལམ་ཞིག་དགོས་ཞེས་དར་རྗེ་དཔལ་གྱི་གྲགས་པའི་རིགས་ལས་སྔགས་འཆང་མཆོག་གྲུབ་རྒྱལ་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཡིག་རིགས་བརྡ་དག་ལ་བློ་གྲོས་ཀྱི་འཇུག་པ་ཡངས་པ་མཐར་རྒྱས་པ་བློ་བཟང་དབང་པོའོ། །དཀོན་ཅོག་གསུམ་གྱི་མཚན་སྙན་སྐྱེ་བ་ཀུན། །འབྲལ་མེད་ཐོས་བྱེད་བསོད་ནམས་འབོད་པའི་དུང༌། །དངུལ་ཤོག་རིན་ཆེན་ཕྲས་བརྒྱན་འདུས་ཚོགས་རྣམས། །ཀུན་རར་འདུ་ལ་སྒྲ་དབྱངས་བསྒྲགས་པ་བཞིན། །འཇུངས་བྲལ་བདོག་པ་གཏོང་བའི་མཆོད་སྦྱིན་སྒོ། །རབ་འབྱེད་སྒྲུབ་གྲོགས་བཅས་པ་རྫོགས་ལྡན་གྱི། །དགའ་སྟོན་མྱོང་བའི་མོད་ལ་ཐར་པ་དང༌། །ཐམས་ཅད་མཁྱེན་པར་བགྲོད་པའི་ལམ་འཇུག་ཤོག །དགེ་ལེགས་ཟླ་ཟེར་རྣམ་བཀྲའི་ག་པུར་རྡུལ། །བཀྲ་ཤིས་ཆོས་ཀྱི་ཀུནྡར་འཐུལ་བའི་འདབ། །འཛུམ་པའི་རྐང་དྲུག་བདེ་བ་ཆེན་པོའི་གླུ། །ཉེར་སྒྲོགས་སིམ་པའི་སྦྲང་རྩི་རྟག་འཁྱིལ་ཤོག །ཅེས་དབུ་མཛད་བློ་བཟང་ཡོན་ཏན་གྱིས་བཀྲ་ཤིས་བདེ་ཆེན་པའི་དུང་ལ་དངུལ་ཤོག་རིན་ཆེན་ཕྲ་ཚོམ་བརྒྱབ་པའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བས་བགྱིས་པའོ། །ལྕགས་བྱ་དབུ་མཛད་བློ་བཟང་ཡོན་ཏན་གྱིས་དུང་གཤོག་གཉིས་གསར་བསྐྲུན་གྱི་རྒྱུར་འབའ་དངུལ་ལེགས་པ་སྲང་ཞེ་བདུན་དང་ཞོ་གསུམ། གསེར་ཞོ་བཞི་བཅུ་ཞེ་གཅིག །གཡུ་པད་གཉིས་དང་ཕུད་རྒྱུ་གཅིག་གི་གཡུ་བསྡོམས་པའི་རིན་གོང་གསེར་ཞོ་ཞེ་གཉིས། བཻཌཱུཪྻ་བྱུ་རུ་བཅས་པའི་རིན་གོང་ལ་གསེར་ཞོ་བཅུ་དགུ །གཞན་མ་བྱུ་རུ། མུ་མེན། ཀེ་ཀེ་རུ། པད་རཱག །ཤེལ་ཚོས་ཁ་སྣ་ཚོགས་མུ་ཏིག་དང་བཅས་པའི་ཕྲས་ལེགས་(༤༨ན) ― GLG021_Page_0713 ―
[མ་དཔེ་གཟིགས་ན་འདིར་གནོན།]
པར་སྤྲས་བ་སརྦདཛཡནྟུ། །སྣ་ཚོགས་ཆོས་ཀྱི་དེ་ཉིད་རོ་གཅིག་པའི། །མིག་སྨན་གྱིས་བསལ་ཡེ་ཤེས་རྣམ་དག་སྤྱན། །ཤེས་བྱར་སྲིད་ཀུན་རེས་འཇོག་མེད་གཟིགས་པ། །དགེ་འདུན་གྲུབ་སོགས་འཁྲུངས་རབས་ཚར་དུ་དངར། །རྟེན་མཆོག་སྤྱན་སྔར་སྲན་མའི་མེ་ཏོག་ལྟར། །སྐྱེ་ཕལ་མཆིང་བུ་འཕགས་ཆེན་ཡིད་བཞིན་གྲལ། །བསྒྲིགས་བདག་རྒྱལ་རྣམས་སྣོད་བཅུད་དག་སྣང་དུ། །སྦྱོང་ཕྱིར་བསྙེམས་པའི་སྤོབས་མཐོ་དེང་འདིར་བརྩེགས། །ཚངས་སྲས་ལྷ་མོས་བཞད་པའི་མཆོག་སྦྱིན་ལས། །ལེགས་བཤད་རྡོ་རྗེའི་གླུ་དབྱངས་ལེན་མཁས་པར། །འཇིག་རྟེན་དབང་ཕྱུག་ཆོས་རྒྱལ་དགེ་བའི་བཤེས། །ཆོས་སྲུང་གིས་བསྐོར་མཁའ་ངོས་འཇའ་ལྟར་བཀྲ། མགོན་ཁྱོད་ཐུགས་རྗེ་ཡོངས་འདུའི་གྲིབ་བསིལ་དུ། །ངལ་གསོའི་སྟེགས་ལ་འབྲལ་མེད་རྗེས་བཟུང་སྟེ། །སྲིད་ཞིའི་ལེགས་ཚོགས་དངར་བ་འབྲས་བུའི་རོ། །བྱང་ཆེན་བར་དུ་དགའ་སྟོན་མྱོང་བར་ཤོག །བསོད་ནམས་བསགས་ཀུན་ཚེ་ལུས་སྟོབས་འབྱོར་གྱི། །སྲོག་སོང་མིག་སྟོང་ཅན་དང་སྐལ་མཉམ་ཐོབ། །ལྷ་མིའི་རྟེན་བཟང་རིམ་པར་དགེ་བཅུའི་སྐས། །འཛེགས་ནས་རྣམ་མཁྱེན་གཞལ་མེད་ཁང་འཇུག་ཤོག །འགྲོ་ཀུན་རྗེས་བརྩེའི་ས་བོན་ཁྱོད་ཐུགས་ཀྱི། །ཞིང་སར་སྙོམས་པར་བཀྲམ་པས་སྲིད་དང་ཞིའི། །བདེ་སྐྱིད་སྙེ་མ་དར་དྲག་གཏོང་བའི་སྒོ། །རབ་འབྱེད་དོན་ཀུན་གྲུབ་ཕྱག་བདག་གཙུག་ཁྱོངས། །རྒྱལ་དང་དེ་སྲས་སློབ་མ་དང་བཅས་འཁོར། །བཀྲ་ཤིས་གྲངས་ལྡན་རས་དཀར་དངས་མའི་མཚོར། །ཟླ་གཟུགས་འཆར་བྱེད་ཐུ་མི་གཉིས་པའི་རིགས། །བསྟན་འཛིན་དབང་པོའི་བློ་བརྩོན་གཏོང་བའི་མཐུས། །ལེགས་བསྐྲུན་འབྲས་བུ་དེང་ནས་བྱང་ཆུབ་ཀྱི། །ཕ་མཐའ་རྫོགས་མིན་དེ་སྲིད་འཛད་མེད་དུ། །མྱོང་བར་འདི་དོན་བསྒྲུབ་ལ་ཕན་འདོགས་མཁན། །ཀུན་དང་བགོ་ཤར་སྨོན་པ་འགྲུབ་བྱིན་རློབས། །(༤༨བ) ― GLG021_Page_0714 ―
[མ་དཔེ་གཟིགས་ན་འདིར་གནོན།]
མཉམ་གཞག་ཕྱག་རྒྱས་ངན་འགྲོའི་སྒོ་འགགས་ཤིང༌། །དགའ་བདེ་རིག་པའི་ཡེ་ཤེས་སྤེལ་མཛད་པ། །བྷ་ར་དྷ་ཛ་གསེར་ཅན་འཁོར་བཅས་ཀྱིས། །ཡོན་སྦྱོར་མངོན་མཐོ་ངེས་ལེགས་སར་འགོད་ཤོག །ནེའུ་ལེ་མཐོང་རེགས་འདོད་པའི་ཡོན་ཏན་ལྔ། །བྱམས་དང་སྙིང་རྗེ་བསྐྱེད་མཛད་བ་ཀུ་ལ། །འཁོར་ཚོགས་རྣམས་ཀྱི་འཇིག་རྟེན་འཇིག་རྟེན་ལས། །འདས་པའི་ཡོན་ཏན་ཐམས་ཅད་མངོན་གྱུར་ཤོག །གར་དབང་མཛོད་སྤུའི་ཟེར་གྱིས་འཆི་བའི་མུན། །ཉེར་བསལ་ཤཱཀྱ་སེང་གེས་བདུད་ཚོགས་ཐུལ། །རིགས་བྱེད་ལྷ་མོ་ཛམ་དམར་སྲོག་སྒྲུབ་ཀྱིས། །འཛད་མེད་མཁོ་དགུའི་འབྱོར་བ་སྙིལ་བ་དང༌། །གཟུགས་མིག་གྲངས་ལྡན་ཨཱཪྻ་ཏཱ་རེ་མས། །བརྣག་དཀའི་ཟུག་རྔུ་ཞི་དང་བསོད་ནམས་རྒྱས། །མི་ནོར་དབང་སྡུད་ལོག་འདྲེན་ཚར་གཅོད་པའི། །ཐུགས་རྗེའི་མཐུ་དཔུང་བསྐུལ་ན་དེང་དགོངས་ཤིག །ཡིག་རིས་བརྡ་དག་དཎྜིའི་གཞུང་ལུགས་སོགས། །གཙུག་ལག་མང་པོར་མིག་ཡངས་ལྕང་གསེབ་པ། །བསྟན་འཛིན་དབང་པོའི་མི་ནོར་རིགས་བརྒྱུད་རྣམས། །སྤེལ་ལེགས་གསར་པའི་ཟླ་ཚེས་འཕེལ་བར་ཤོག །སེང་ལྡེང་ནགས་སྒྲོལ་བཀོད་པ་སྒྱུ་འཕྲུལ་གྱིས། །འཇིགས་ཚོགས་བརྒྱད་སོགས་ཟུག་རྔུ་ཀུན་ཞི་ཞིང༌། །མར་མེ་མཛད་ཀྱིས་དབུགས་དབྱུང་གནས་སྐབས་སུ། །འདོད་པའི་ཡོན་ཏན་ལྔ་ལ་སྤྱོད་པར་ཤོག །ཟླ་ཞུན་སྟོང་གིས་བྱུགས་མིན་ཚེ་སྦྱིན་མའི། །བཞིན་གྱིས་ཉི་བུའི་སྨག་རུམ་ཕ་མཐར་བྱས། །བྱམས་པའི་འདུས་པ་དང་པོར་མ་གྱུར་བར། །རྨུགས་འཛིན་བང་མཛོད་རང་གིར་དབང་ཐོབ་ཤོག །ལྕང་གསེབ་པ་དྲུང་ཡིག་བསྟན་འཛིན་དབང་པོས་བྲིས་ཐང་བདུན་ཚར་བཞེངས་པའི་རྒྱབ་ཡིག་དགོས་ཚུལ་ལྟར་ཤློཀའི་གྲངས་སོགས་བློ་དང་སྦྱར་ཏེ་ཟ་ཧོར་གྱི་བནྡེས་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པས་བགྱིས་པ་ཨརྠ་སིདྡྷཾ། །བདུད་བཞིའི་དགྲ་བཅོམ་ཚེ་(༤༩ན) ― GLG021_Page_0715 ―
[མ་དཔེ་གཟིགས་ན་འདིར་གནོན།]
དཔག་མེད་པའི་མགོན། །མགོན་སྐྱབས་གླིང་གྱུར་འཕགས་མ་རྣམ་པར་རྒྱལ། །རྒྱལ་བའི་ཡུམ་གཅིག་ཡིད་བཞིན་འཁོར་ལོའི་ཞབས། །ཞབས་པད་གཙུག་བསྟེན་ཚེ་ཡི་དངོས་གྲུབ་སྩོལ། །ངག་གི་དབང་ཕྱུག་བློ་བཟང་གྲགས་པའི་བསྟན། །བསྟན་པ་རྒྱ་མཚོའི་མཐར་སྤེལ་འཕྲིན་ལས་སྒོ། །སྒོ་འཕར་བརྒྱ་ཕྲག་འབྱེད་མཁས་སྐྱེ་རྒུའི་བཤེས། །བཤེས་གཉེན་དམ་པ་སྲིད་མཐར་ཞབས་བརྟན་ཤོག །སངས་རྒྱས་ཀུན་དངོས་ཀུན་མཁྱེན་ཙོང་ཁ་པའི། །ཆོས་སྲིད་གོང་ནས་གོང་དུ་སྤེལ་བ་ལ། །སྙིང་སྟོབས་རྒྱ་ཆེན་རྒྱ་མཚོ་ལྟར་ཟབ་པ། །གཞོམ་གཞི་རབ་སྤངས་རབ་ཏུ་བརྟན་པར་ཤོག །རྣོ་རྣོ་རྟོག་གེའི་རིག་པ་བརྒྱ་ཕྲག་གིས། །ཡང་ཡང་དཔྱད་ཀྱང་ཀླན་ཀའི་སྐབས་བྲལ་བ། །དག་དག་དྲི་མེད་དགའ་ལྡན་རིང་ལུགས་ལ། །མཁས་མཁས་གཟུར་གནས་མ་ལུས་འཇུག་པར་ཤོག །དགྱེས་མཛད་རྡོ་རྗེའི་ཕོ་བྲང་དགའ་བཞི་ཀུན། །ཀུན་ནས་རྫོགས་ལྡན་གསང་བ་སྔགས་ཀྱི་གྲོང༌། །གྲོང་ཁྱེར་བདེ་ཆེན་གཏེར་མཛོད་སྲས་ཀྱི་གནས། །གནས་འཛིན་འདུས་སྡེ་རྟག་ཏུ་དར་རྒྱས་ཤོག །ཡང་ཡང་རྔུལ་ཆུ་འགྲམ་ངོས་མི་འཛག་པར། །ལྷོད་ལྷོད་གཙུག་ལག་ཀུན་ལ་མིག་ཡངས་པའི། །དམ་དམ་ཁྲིམས་གཉིས་གསེར་ཤིང་རབ་ལྕི་བས། །སྙན་སྙན་དགའ་བའི་རྒྱང་གླུ་ལེན་པར་ཤོག །ཚུར་མཐོང་སྲིད་གདུང་མུན་སྟུག་འཁྱམས་པ་རྣམས། །ཚ་ཟེར་རྣམ་འདྲེན་ཐུགས་རྗེའི་གཟིགས་སངས་ནས། །ཚེ་རབས་ལྷ་མིའི་བདེ་སྐྱིད་ལ་སྤྱོད་པ། །མཚོ་ཆེན་རླབས་ལྟར་དུས་ལས་ཡོལ་མེད་ཤོག །ལོང་ལོང་སྤྲིན་དཀར་གཡོ་བའི་སྦུབས་ནང་ནས། །ལྡིར་ལྡིར་དབྱར་གྱི་རྔ་གསང་བསྒྲགས་པའི་ཚེ། །མཛེས་མཛེས་མདོངས་ལྡན་མངལ་ཁུར་འཛིན་པ་ལྟར། །རིང་རིང་སངས་རྒྱས་ས་དེ་མྱུར་ཐོབ་ཤོག །རྒྱལ་བར་གྱུར་ཅིག་སྭ་སྟི་ཀ་ཡི་གླུ། །རྒྱལ་སྲས་མགྲིན་གཅིག་བླངས་པས་བདུད་བཞི་ལས། །རྒྱལ་རྟགས་བ་དན་བསྒྲེང་དང་དུས་(༤༩བ) ― GLG021_Page_0716 ―
[མ་དཔེ་གཟིགས་ན་འདིར་གནོན།]
མཚུངས་སུ། །རྒྱལ་རྔ་སྲིད་རྩེའི་བར་དུ་བརྡུང་བར་ཤོག །ཅེས་སྨོན་ལམ་གྱི་ཚིགས་སུ་བཅད་པ་འདི་ནི་ལྷོ་བྲག་སྲས་དགྱེས་པ་རྡོ་རྗེའི་གཞལ་མེད་ཁང་དུ་འཁོད་པའི་དགའ་ལྡན་གསང་སྔགས་བདེ་ཆེན་གྱི་སློབ་དཔོན་དོན་གྲུབ་རྒྱ་མཚོས་བསྐུལ་བའི་ངོར་ཟ་ཧོར་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སྙིགས་དུས་འགྲོ་འདྲེན་ཐུབ་དབང་ཤཱཀྱའི་ཏོག །འོད་དཔག་མེད་སྤྲུལ་ཇོ་བོ་ཡབ་སྲས་ཞབས། །ཁམས་གསུམ་ཆོས་ཀྱི་རྒྱལ་པོ་བཙོང་ཁ་པ། །སྐྱབས་གནས་ཀུན་འདུས་རྨད་བྱུང་ཐུགས་རྗེའི་མཐུས། །བློ་བཟང་སྙན་གྲགས་བསྟན་པ་འཛིན་སྤེལ་བར། །རྣམ་གསུམ་འཁོར་ལོའི་རིམ་པ་རྒྱ་མཚོའི་རླབས། །ནམ་ཡང་ཡོལ་བ་མེད་པར་བསམས་བཞིན་དུ། །སྐྱེ་བའི་ཟློས་གར་མྱུར་དུ་བསྒྱུར་བར་ཤོག །རྗེས་འཇུག་སློབ་བུ་གྲ་རིས་ཡོན་གྱི་བདག །རྣམ་དག་བསམ་པས་དཀོན་ཅོག་རྣམ་གསུམ་མཆོད། །དབུལ་ཕོངས་སྦྱིན་གཏོང་སྐུ་གསུང་ཐུགས་རྟེན་བཞེངས། །དགེ་ཚོགས་ཆེད་དུ་དམིགས་པའི་འབྲས་འབྱིན་ཤོག །རྩེ་གཅིག་དད་པའི་མཐུན་རྐྱེན་རླུང་ཤུགས་ཀྱིས། །གསོལ་འདེབས་གྲུ་རྫིངས་བསྐུལ་བས་མངོན་མཐོ་ཡི། །ཡོན་ཏན་བདུན་ཚང་རིན་ཆེན་གླིང་ཡངས་པོར། །ཡོངས་འཛིན་ཡང་སྲིད་ཡིད་བཞིན་ནོར་རྙེད་ཤོག །སྒོ་གསུམ་འབད་པས་ཉེར་བསགས་བསོད་ནམས་མཐུས། །གདུལ་བྱའི་དོན་དུ་དཔལ་ལྡན་བླ་མ་ཁྱོད། །སླར་ཡང་འབྱོན་པའི་ཞལ་བཟང་མངོན་སུམ་དུ། །མཐོང་བའི་སྐལ་བ་བཟང་པོར་འགྱུར་བར་ཤོག །མྱུར་མཛད་ལེགས་ལྡན་ནག་པོ་ཕྱག་དྲུག་པ། །མ་ཧེའི་ཞལ་ཅན་ལྷ་ཆེན་ཉི་མའི་བུ། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱིས། །བསམས་དོན་ལྷུན་གྱིས་གྲུབ་པའི་འཕྲིན་ལས་མཛོད། །དོན་དམ་རང་བཞིན་གྱིས་སྟོང་དབུ་མའི་ལམ། །ཀུན་རྫོབ་རྒྱུ་འབྲས་ནམ་ཡང་སླུ་མེད་པ། །བདེན་གཉིས་ཐབས་(༥༠ན) ― GLG021_Page_0717 ―
[མ་དཔེ་གཟིགས་ན་འདིར་གནོན།]
དང་ཐབས་བྱུང་རྟེན་འབྲེལ་གྱིས། །སྨོན་ལམ་ཅི་བཏབ་འགྲུབ་པའི་བཀྲ་ཤིས་ཤོག །ཅེས་ཏྲེ་བོ་ཆོས་རྗེ་བློ་བཟང་བསྟན་འཛིན་རྒྱ་མཚོའི་སྐུ་སྐྱེ་མྱུར་དུ་འབྱོན་པའི་སྨོན་ལམ་དགོས་ཚུལ་གྲ་རིས་རྣམས་ཀྱིས་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྒྱལ་སྲས་སྙིང་རྗེའི་གཏེར་ཆེན་པད་དཀར་འཆང༌། །རང་བྱོན་ལོ་ཀེ་ཤྭ་རའི་སྣང་བརྙན་ལ། །གོས་འཕན་འདིས་མཚོན་དངོས་སུ་བཤམས་པ་དང༌། །ཡིད་སྤྲུལ་ཀུན་བཟང་མཆོད་སྤྲིན་ཕུལ་བའི་དགེས། །བདག་སོགས་གདུལ་བྱའི་བསོད་ནམས་ཞིང་དམ་པ། །ངག་དབང་འཇམ་དབྱངས་དགའ་བའི་བཤེས་གཉེན་མཆོག །ཚེ་མཐའ་ཡས་པའི་ངོ་བོར་རྟག་བཞུགས་ནས། །ཆོས་འཁོར་རྒྱུན་མི་འཆད་པ་བསྐོར་བར་ཤོག །བློ་བཟང་དཔལ་འབྱོར་ཐོག་མེད་ནས་བསགས་པའི། །སྡིག་ལྟུང་མི་དགེའི་ལས་ཀུན་རབ་བྱང་ནས། །སྐྱེ་བར་ལྷ་མིའི་བདེ་སྐྱིད་ལ་སྤྱོད་རིང༌། །མྱུར་དུ་སངས་རྒྱས་གོ་འཕང་འཐོབ་པར་ཤོག །ཅེས་རི་མོ་བ་བློ་བཟང་དཔལ་འབྱོར་གྱིས་བསྐུལ་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་ཅོག་གོ །བརྒྱུད་པ་ཀུན་འདུས་པདྨ་ཐོད་འཕྲེང་རྩལ། །ཡི་དམ་ཀུན་འདུས་སྒྲུབ་པ་བཀའ་བརྒྱད་ལྷ། །ཆོས་སྐྱོང་ཀུན་འདུས་ལེགས་ལྡན་མ་ནིང་ནག །རྩ་གསུམ་ཀུན་འདུས་ཚོགས་ཀྱིས་བྱིན་ཆེན་ཕོབ། །པཎ་ཆེན་དྲི་མེད་བཤེས་གཉེན་རྣམ་པར་འཕྲུལ། །ཉང་རིགས་བློ་གྲོས་མཆོག་གི་རྡོ་རྗེ་ཡི། །སྤྲུལ་པའི་ཟློས་གར་ཞིང་འདིར་མངོན་གྱུར་པ། །ཡིད་སྲུབས་སྡེར་བཅས་ཚོགས་ལས་རྒྱལ་བར་ཤོག །གསང་གསུམ་མི་གཞིག་རྡོ་རྗེའི་རང་བཞིན་དུ། །ཚེ་དབང་རིགས་འཛིན་ཚོགས་ཀྱིས་བྱིན་བརླབས་ཏེ། །སྔ་འགྱུར་བསྟན་ལ་མཁྱེན་བརྩེ་ནུས་མཐུའི་བདག །དཔལ་ལྡན་སྐལ་པ་བཟང་པོར་འགྱུར་བར་ཤོག །མདོ་སྒྱུ་སེམས་ཕྱོགས་གཏེར་ཁ་གོང་འོག་སོགས། །གསང་ཆེན་རྙིང་མའི་སྨིན་གྲོལ་རྒྱུད་བཤད་ལུང༌། །ཟབ་དོན་མན་ངག་སྤེལ་ཕྱིར་(༥༠བ) ― GLG021_Page_0718 ―
[མ་དཔེ་གཟིགས་ན་འདིར་གནོན།]
སླར་བྱོན་གང༌། །གཡུ་དྲུང་སྲོག་གི་ཀ་བ་ཚུགས་པར་ཤོག །སྡེ་བརྒྱད་འབྱུང་པོས་གླགས་བལྟ་ཁོན་གྲིབ་བྱད། །སྔོན་གྱི་དུས་སྲི་ངན་སོགས་བར་གཅོད་ཀུན། །དབང་དྲག་པདྨའི་ཕྱག་གཡོན་ལྕགས་སྡིག་གིས། །ཚར་བཅད་མཐར་བསྐྲད་མཐུ་རྩལ་དབྱུང་བར་ཤོག །གངས་རི་སེར་པོར་མཐོང་ལྟར་ལོག་རྟོག་མཐུས། །ཉམས་གྲིབ་རྐྱེན་གྱིས་མཁའ་འགྲོའི་འཁུ་ལྡོག་རྣམས། །སེལ་བྱེད་སྣ་ཚོགས་ཐབས་ཀྱི་སྦྱོར་བ་ཡིས། །རྡུལ་བྲལ་སྟོན་གྱི་ཟླ་བ་ལྟར་འགྱུར་ཤོག །བདག་སོགས་རྣམས་ཀྱི་རྫས་སྔགས་ཏིང་འཛིན་ལ། །བརྟེན་ནས་འཆི་མེད་གྲུབ་པའི་བཅུད་ལེན་ཀུན། །མི་གཞིག་སྲོག་ཏུ་སོང་ནས་མགོན་པོ་ཁྱོད། །འགྲོ་བའི་རེ་སྐོང་ཆེད་དུ་བརྟན་པར་ཤོག །ཁྱད་པར་སྨན་ལུང་ཁུ་དབོན་རིམ་བྱོན་གྱི། །རིགས་དང་བརྒྱུད་ལ་འགོ་ཞིང་དུས་རྒྱུན་དུ། །བསྟེན་ཅིང་སྒྲུབ་པའི་ཆོས་སྐྱོང་སྲུང་མ་ཡིས། །རྟག་ཏུ་གཡེལ་མེད་འཕྲིན་ལས་བྱེད་པར་ཤོག །ངོ་བོ་ཆོས་སྐུའི་ཀློང་ལས་མ་འགགས་གདངས། །རང་བཞིན་ལོངས་སྤྱོད་རྫོགས་པའི་སྐུར་ཤར་ལས། །ཐུགས་རྗེ་སྤྲུལ་སྐུ་མངོན་སུམ་དེང་བྱོན་པ། །འགྲོ་ལ་ཆོས་འཁོར་བསྐོར་ཕྱིར་བརྟན་པར་ཤོག །ཁྱབ་བདག་ཁྲ་ཚང་པ་ཆེན་པོ་བློ་གྲོས་མཆོག་གི་རྡོ་རྗེའི་སྤྲུལ་སྐུ་གཙང་རོང་རྒྱལ་མཁར་ཕྱོགས་སུ་ཟུར་གྱི་རིགས་ལས་བྱོན་པ་རྡོ་རྗེ་ཚེ་དབང་དཔལ་བཟང་གི་བརྟན་བཞུགས་འདི་ནི་ཆོས་རྗེ་སྐུ་སྐྱེ་ངག་དབང་འཇམ་དབྱངས་རབ་རྒྱས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ངག་དབང་བློ་བཟང་རྒྱ་མཚོ་དཔལ་བཟང་པོ། །སངས་རྒྱས་ཀུན་གྱི་ངོ་བོར་ཡིད་ཆེས་ནས། །གསོལ་བ་འདེབས་ན་འདི་ཕྱི་བར་གསུམ་གྱི། །བསམས་པའི་འདོད་དོན་མ་ལུས་ལྷུན་གྲུབ་ཤོག །ཅེས་པ་འདི་ཡང་ཨ་ཁས་ཀྱིས་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གསོལ་དཔོན་སྔགས་རམས་པའོ། །(༥༡ན) ― GLG021_Page_0719 ―
[མ་དཔེ་གཟིགས་ན་འདིར་གནོན།]
ཀཱ པཱ རཱ ཙྪ མཱུ ཁེ ཥུ ལོ ཀེ ཤྭ རོ མཱ ཡ ལཱ ལི ཏྱ ན རྟཱ མི ཐཱ ཀཱ ཤ བི མྦཿ གཙོ་ཐང༌། རས་དཀར་མན་ཤེལ་ངོས་སུ་འཇིག་རྟེན་དབང༌། །སྒྱུ་འཕྲུལ་རོལ་གར་མ་འདྲེས་གསལ་བའི་གཟུགས། །མ ཧཱ བོ དྷི ས ནྡྷཽ དྲྀ ཤཱ བཱ ལི པུ ཎྱཱ ཧ རོ ཤཱ ཏ མཱ བྷཱ བ ན ཤཱི ཛྭ ལ ནྟུ། བྱང་ཆེན་བར་དུ་གཟིགས་མོར་ཚར་དངར་བ། །བསོད་ནམས་ཉི་མའི་དངོས་བརྒྱ་དཔལ་འབར་ཤོག །ངག་གི་འདོད་འཇོ་དབང་བའི་བློ་གྲོས་ལ། །བཟང་པོའི་སྐལ་བ་ཅན་སྦྱོར་རྒྱ་མཚོའི་རླབས། །འཕྲེང་བ་ཡོལ་མེད་རྟེན་འབྱུང་མི་བསླུའི་མཐུས། །སྲིད་ཞིའི་བདེ་ལེགས་ལྷུན་གྱིས་གྲུབ་པར་ཤོག །བྱང་སེམས་ནམ་སྙིང་ཚངས་རིས་དྲི་ཟའི་རྒྱལ། །སྡེ་བརྒྱད་དྲེགས་ལྡན་གཙུག་ན་ཞབས་སེན་རྡུལ། །དམར་འོད་ཆགས་པའི་གཟི་ཡིས་དབང་དྲག་དང༌། །ཞི་རྒྱས་ལས་ཀུན་ལྷུན་གྱིས་གྲུབ་པར་ཤོག །འདིའི་གྲས་མེ་ཡིས་བསྒྱུར་བ་མདའ་ཡི་གྲངས། །བསྐྲུན་པས་གཡོ་རུ་ཡར་ཀླུངས་ཁེ་གསུམ་པའི། །(༥༡བ) ― GLG021_Page_0720 ―
[མ་དཔེ་གཟིགས་ན་འདིར་གནོན།]
མི་ནོར་རིགས་བརྒྱུད་དབང་ཐང་གསར་ཚེས་ཟླ། །དཀར་ཆ་ཇི་བཞིན་བླ་ནས་བླར་འཕེལ་ཤོག །མཁས་གྲུབ་དམ་པའི་ཐུགས་རྗེ་ལྷ་ལམ་ངོས། །སྲས་བཅས་ཞི་ཁྲོའི་བྱིན་རླབས་ཆུ་འཛིན་འཁྲིགས། །ཆོས་སྲུང་འཕྲིན་ལས་དབྱར་རྔ་ལྡིར་བ་ལས། །ཕུན་ཚོགས་དགའ་སྟོན་ཆར་ཆེན་འབེབས་པར་ཤོག །གཡས་དང་པོ། ཤིན་ཏུ་འཇམ་ཞིང་སྙན་པའི་དབྱངས་ལྡན་ཀྱང༌། །དུས་དགྲར་ཟ་བྱེད་མ་ཧེའི་ཞལ་གདངས་པས། །བདུད་བཞིའི་ཀླད་འགེམས་ཉི་མའི་གཟི་བྱིན་གྱིས། །ས་གསུམ་འབྱུང་པོའི་མེ་ཁྱེར་འཇོམས་པར་ཤོག །དགྲ་ནག་དཀྱིལ་འཁོར་འཁོར་ལོའི་བདག་ཉིད་ཀྱིས། །ལས་ཀྱི་མཐར་ཐུག་སྒྲུབ་པ་མི་གཡེལ་ཞིང༌། །དངོས་གྲུབ་ཀུན་འབྱུང་ཡ་མཱ་རི་ཏཱ་ག །སྤྲོས་མེད་ལམ་གྱི་ཟུང་འཇུག་མངོན་གྱུར་ཤོག །ཤེས་བྱར་སྲིད་ཚད་འཇལ་བའི་བློ་གྲོས་མིག །ཡངས་པའི་མཆོག་སྟེར་དཀར་སེར་ཟུར་ཕུད་རྒྱན། །རྣམ་རྟོག་ལྕགས་ཁམས་བདེ་སྐྱིད་གསེར་སྦྱངས་སུ། །བསྒྱུར་མཛད་འཇམ་དཔལ་ནག་པོས་དེང་སྐྱོངས་ཤིག །གཉིས་པ། འཁོར་བའི་མཚོ་ལས་འགྲོ་བ་ཀུན་སྒྲོལ་བར། །གྲུ་འཛིན་རི་བོའི་སྤོ་ན་འཇིག་རྟེན་དབང༌། །བགྲང་ཡས་དཀྱིལ་འཁོར་ཆེན་པོའི་ཁྱབ་བདག་ཏུ། །བཞེངས་པར་འོད་མཚན་འབར་བའི་ཅོད་པན་མཛེས། །ལེགས་བྲིས་བཅུད་བྲལ་མི་དང་བྱོལ་སོང་དང༌། །ཡི་དྭགས་དམྱལ་བའི་ལུས་ཅན་རྣམ་འདྲེན་མགོན། །གང་འདུལ་སྤྲུལ་པའི་རོལ་གར་ཐུབ་པ་དྲུག །འཁོར་གདུང་ཟུག་རྔུ་འབྱིན་པ་སྨན་གྱི་མཆོག །བྱམས་དང་སྙིང་རྗེ་དགའ་བ་བཏང་སྙོམས་ཀྱི། །ངོ་བོ་ཕྱག་རྒྱ་མཚན་མའི་གཟུགས་ཤར་བ། །སྡུག་བསྔལ་གསུམ་ལས་སྐྱེ་རྒུ་མ་ལུས་པ། །དྲོངས་ཤིག་སྒོ་སྐྱོང་ཁྲོ་མོ་རྣམ་པ་བཞི། །གསུམ་པ། རྡོ་(༥༢ན) ― GLG021_Page_0721 ―
[མ་དཔེ་གཟིགས་ན་འདིར་གནོན།]
རྗེའི་ལུས་ཀྱི་ཕོ་བྲང་ཆེན་པོ་ལ། །སྒྲུབ་པ་སྡེ་བརྒྱད་ལྷ་ཚོགས་ཀུན་ཚང་བ། །རྩ་གསུམ་འདུས་པའི་བདག་ཉིད་དྲག་པོ་རྩལ། །བྱིན་ཕོབ་དབང་དང་དངོས་གྲུབ་མ་ལུས་སྩོལ། །ཉི་བུའི་གཉེན་པོར་འཇམ་དཔལ་ཁྲོ་བོའི་རྒྱལ། །ཚེ་བདག་དྲེགས་པའི་རྒྱལ་པོ་འཆར་ཀ་ནག །ཀི་ཀང་ཕྱག་རྡོར་ཁྲོས་པ་དྲང་སྲོང་གི །དམོད་པས་སྡེ་བརྒྱད་གནོད་པ་རྦོད་གཏོང་བཟློག །ལྷུང་བཟེད་ཀ་ལ་ཤ་ནས་ཕྱིར་ལུད་པའི། །འཆི་མེད་ཟིལ་དངར་རྒྱུན་གྱིས་སྲོག་གི་ཟུངས། །ཡོངས་གྱུར་ཚེ་ཡི་གཡུང་དྲུང་ཉི་ཟླ་ལྟར། །རྟག་ཏུ་གཞོམ་ཞིག་བྲལ་བར་བྱིན་གྱིས་རློབས། །བཞི་པ། ཆོས་རྣམས་སྤྲོས་བྲལ་དབུ་མའི་ལམ་པོ་ཆེར། །དུས་གསུམ་རྒྱལ་ཀུན་བགྲོད་པའི་ཡུམ་གཅིག་མ། །ཤེས་རབ་ཕ་རོལ་ཕྱིན་པ་བཞིན་ལག་ཏུ། །ཤར་བའི་མི་མཐུན་ཕྱོགས་རྣམས་ཟིལ་གྱིས་གནོན། །སོ་སོར་འབྲང་མ་རྨ་བྱ་ཆེན་མོ་དང༌། །སྟོང་ཆེན་རབ་འཇོམས་གསང་སྔགས་རྗེས་སུ་འཛིན། །བསིལ་པའི་ཚལ་གྱིས་རིགས་བརྒྱུད་གངྒཱའི་རྒྱུན། །ཇི་བཞིན་ཆད་པ་མེད་པར་རྗེས་སུ་གཟུང༌། །བདེ་བར་གཤེགས་པའི་གཙུག་ཏོར་ལས་བྱོན་པ། །གདུགས་དཀར་ལྷ་མོས་ཕ་རོལ་རྦོད་གཏོང་བྱད། །གདོན་བགེགས་དུས་མིན་འཆི་དང་ནད་རིམས་མུན། །མཐུ་སྟོབས་ཉི་མའི་འོད་ཀྱིས་སངས་པར་མཛོད། །ལྔ་པ། ཞལ་ཁྱིམ་རྒྱལ་མཚན་ཏོག་དང་ནེའུ་ལེ་ཡི། །མགྲིན་ལས་བསྐྱུགས་པའི་ཕུན་ཚོགས་རིན་ཆེན་དབྱེ། །ཕྱུར་བུར་སྤུངས་དང་མཉམ་པར་འདོད་དགུའྀ་ཆར། །ཕོབ་ཅིག་དཔལ་ལྡན་རྣམ་མ་ཐོས་པའི་སྲས། །རྨུགས་འཛིན་ནོར་བུ་བཟང་པོ་སུ་པུ་རྞ། །ཀུ་བེ་ར་དང་ཡང་དག་ཤེས་འབྲོག་གནས། །ལྔ་རྩེན་འཇམ་པོ་འཁྱིལ་རྣམས་ཅང་ཤེས་ལ། །ཞོན་ནས་སྲིད་ཞིའི་དཔལ་འབྱོར་སྐད་ཅིག་སྡུས། །གནོད་སྦྱིན་བྱེ་བའི་དཔུང་གི་ཚོགས་རྣམས་ཀྱིས། །ལོག་འདྲེན་དགྲ་སྡེ་(༥༢བ) ― GLG021_Page_0722 ―
[མ་དཔེ་གཟིགས་ན་འདིར་གནོན།]
མཐའ་དག་ཚར་བཅད་དེ། །རྣམ་པར་རྒྱལ་བའི་རུ་མཚོན་འཇའ་རིས་ཀྱིས། །དར་ཆེན་ལྷ་ལམ་ཀུན་ཏུ་ཁྱབ་པར་ཕྱོར། །དྲུག་པ། མཁའ་ལ་བེ་ཅོན་གཟས་པས་དགྲ་བགེགས་ཀླད། །བཅོམ་པའི་ཁྲག་རྒྱུན་བདེ་སྐྱོང་ཡོལ་གོ་རུ། །བླུག་ནས་འཐུང་བའི་དཔལ་ལྡན་རེ་མ་ཏཱིས། །བསམ་ངན་སྦྱོར་རྩུབ་འཆང་བའི་དགྲ་བགེགས་ཆོམས། །ཟླ་བའི་བཞིན་དངོམ་གསེར་ཞུན་བརྗིད་མདངས་ཅན། །རྗེས་ཆགས་ལང་ཚོ་དར་བའི་སྤྲུལ་སྒྱུར་གྱིས། །སྒྲིབ་གཉིས་ནད་གདོན་ཡོངས་ཞི་ཚེ་འབྱོར་རྒྱས། །སྲིད་ཞིའི་ལེགས་ཚོགས་དངོས་ཀུན་དབང་སྡུས་ཤིག །སྔ་ཕྱིར་རྒྱུག་པའི་གདོང་ཅན་རྣམ་གཉིས་དང༌། །དམར་སེར་རལ་པའི་ཁྲོད་ཤར་མ་མོ་བཞིས། །དུས་བཞིའི་མི་བཟད་ཆོ་འཕྲུལ་སྣ་དྲངས་ནས། །ལོག་འདྲེན་ཡུལ་འཁོར་བཅས་པ་རྡུལ་དུ་རློག །བདུན་པ། ཤེལ་དཀར་ལྷུན་པོ་དབང་གཞུས་འཁྱུད་པ་ཡི། །རྗེས་འགྲོ་མཚར་སྡུག་ན་ཆུང་འཆི་མེད་སྐུར། །དར་ཟབ་རིན་ཆེན་རྒྱན་གྱིས་རྣམ་པ་བཀྲག །སྲིད་ཞིའི་དབུལ་སེལ་དཔལ་ལྡན་དུང་སྐྱོང་མ། །རྒྱལ་དབང་པདྨའི་སྤྱན་སྔར་པུར་རྒྱལ་གྱི། །བསྟན་འགྲོའི་བདེ་སྐྱིད་སྤེལ་བའི་གཡར་དམ་ཅན། །བདུད་དང་གནོད་སྦྱིན་སྨན་མའི་རིགས་འཛིན་པ། །བསྟན་མ་བཅུ་གཉིས་འཁོར་དང་བཅས་རྣམས་ཀྱིས། །ནད་རིམས་གདོན་བགེགས་སད་སེར་བཙའ་ཐན་སོགས། །རྒུད་པའི་ཉེར་འཚོ་མཐའ་དག་དྲུང་ཕྱུངས་ནས། །སྣོད་བཅུད་ཡོན་ཏན་ཐམས་ཅད་མ་རྨོས་པའི། །ལོ་ཏོག་ཇི་བཞིན་ལྷུན་གྱིས་གྲུབ་པར་མཛོད། །གཡོན་དང་པོ། བགྲང་ཡས་བློ་གསལ་མགོན་དུ་མཁས་བཙུན་བཟང༌། །ལེགས་གྱུར་གྲགས་པའི་དཔལ་འབར་མཁྱེན་བརྩེ་ནུས། །རིགས་གསུམ་མགོན་པོའི་བདག་ཉིད་ཙོང་ཁ་པ། །ཟླ་མེད་གཏན་གྱི་སྐྱབས་དང་དཔུང་གཉེན་མཆོག །ལྔ་བརྒྱའི་གཙུག་རྒྱན་ཇོ་འབྲོམ་ཡབ་སྲས་གཉིས། །ཤེས་བྱར་སྲིད་ཀུན་མཁྱེན་པ་བུ་སྟོན་རྗེ། །གསང་བདག་དངོས་གྱུར་ནམ་མཁའ་རྒྱལ་མཚན་(༥༣ན) ― GLG021_Page_0723 ―
[མ་དཔེ་གཟིགས་ན་འདིར་གནོན།]
ཞབས། །སྲས་ཀྱི་ཐུ་བོ་རྣམ་གསུམ་ཚར་དུ་དངར། །དུས་གསུམ་འདྲེན་རྣམས་མ་དག་གདུལ་བྱའི་དོན། །བཤེས་གཉེན་གཟུགས་སུ་འཆར་ཕྱིར་ཐུགས་རྗེའི་སྤྲིན། །ལང་ལོང་ཁྲིགས་ལས་བྱིན་རླབས་གྲུ་ཆར་གྱིས། །བདེ་སྐྱིད་མྱུ་གུ་སྐྱེད་དུ་བསྲིང་བར་ཤོག །གཉིས་པ། མི་བསྐྱོད་འཇམ་དཔལ་སྐུ་ལ་གདན་གསུམ་ལྷ། །ཅིག་ཅར་ཚང་བ་བསྐྱེད་པའི་རིམ་པ་དང༌། །རིམ་ལྔ་གྲོལ་བའི་ཐིག་ལེའི་ལམ་བཟང་ལ། །བརྟེན་ནས་རྡོ་རྗེ་འཆང་དབང་མྱུར་འགྲུབ་ཤོག །བགྲོད་དཀའ་གསུམ་གྱི་འཕྲང་རིང་ལས་བརྒལ་ནས། །ཟུང་འཇུག་བདེ་བ་ཆེན་པོའི་གྲོང་ཁྱེར་དུ། །འཁྲིད་པའི་དེད་དཔོན་དགྱེས་མཛད་ཧེ་རུ་ཀཿ །བདག་མེད་རྡོ་རྗེ་བཙུན་མོ་དུས་ཀུན་སྐྱོངས། །གསུམ་པ། རྣམ་པར་འཇོམས་པའི་གསང་སྔགས་མེ་དཔུང་གིས། །གདོན་ཚོགས་འབྱུང་པོའི་བུད་ཤིང་ཀུན་བསྲེག་ཅིང༌། །དྲན་པས་འཆི་མེད་དཔལ་སྟེར་བི་ཛ་ཡ། །གཙུག་ཏོར་ལྷ་མོས་ཚེ་ཡི་མཆོག་སྦྱིན་ཞིག །བཞི་པ། ཤིན་ཏུ་གདུལ་དཀའི་སེམས་ཅན་ནམ་མཁའི་མཐའ། །ཇི་སྙེད་ཞི་བས་འདུལ་ཡུལ་མ་གྱུར་པས། །སྤྱན་རས་གཟིགས་དབང་ཁྲོ་བོའི་སྐུར་བཞེངས་པ། །བླ་མགོན་ངོ་བོ་གཅིག་གྱུར་མྱུར་མཛད་ལྷ། །གནོད་སྦྱིན་ལྷ་ཆེན་གཤིན་རྗེ་བདུད་ཀྱི་རིགས། །བཀའ་སྡོད་རྫུ་འཕྲུལ་ཐོགས་མེད་རྣམ་བཞི་སོགས། །དམ་ཅན་རྒྱ་མཚོས་གང་འཚམ་ཆོ་འཕྲུལ་གྱིས། །ལོག་འདྲེན་གདུག་པའི་ཚོགས་རྣམས་སྤ་བཀོངས་ཤིག །བསྟན་སྲུང་བྱེ་བའི་སྡེ་དཔོན་གུར་གྱི་མགོན། །ལེགས་ལྡན་གདོང་བཞི་དཔའ་བོ་བྲམ་ཟེའི་གཟུགས། །ཞི་རྒྱས་དབང་དྲགས་ལས་ཀུན་མ་ལུས་པ། །སྒྲུབ་པའི་མཐུ་སྟོབས་ནུས་པ་ད་སྐྱེད་ཅིག །ལྔ་པ། ཡིད་བཞིན་ནོར་བུའི་མཚན་དང་དོན་མཐུན་པར། །བཀྲེས་སྐོམ་ཚ་གདུང་བཅིལ་བའི་ཟླ་ཞལ་མགོན། །དངོས་གྲུབ་ཀཏྤུར་ཡི་ཟེགས་མའི་(༥༣བ) ― GLG021_Page_0724 ―
[མ་དཔེ་གཟིགས་ན་འདིར་གནོན།]
རྡུལ། །ཕབ་ནས་ཡིད་ཀྱི་གདུང་བ་སེལ་བར་མཛོད། །སྲིད་གསུམ་བརྟན་པ་འཕྲོག་པ་རིགས་བྱེད་མ། །གླང་པོའི་གདོང་ཅན་ལྷ་ཆེན་བགེགས་ཀྱི་རྒྱལ། །འདོད་པའི་རྒྱལ་པོས་ས་འོག་ས་སྟེང་དང༌། །ས་བླའི་ལེགས་ཚོགས་ཝ་ཤངྐུ་རུ་ཧོ། །ཕྱག་མཚན་བཞི་འཛིན་གནོད་སྦྱིན་ངལ་བསོས་པོས། །དབང་དྲག་འཕྲིན་ལས་ཅིག་ཅར་བསྒྲུབ་པ་དང༌། །གངས་རིའི་མདངས་འཛིན་དཔལ་ལྡན་ཛམ་བྷ་ལས། །ལྷ་མིའི་ཟས་ནོར་ལོངས་སྤྱོད་ཕྱུར་བུར་སྤུངས། །དྲུག་པ། རིམ་བདུན་ས་འོག་ཐོད་པ་ལྕགས་མཁར་ནང༌། །སྲིད་གསུམ་སྐྱེ་རྒུའི་སྲོག་གི་བདག་པོའི་གཤེད། །ཕྱི་ནང་གསང་བའི་ལས་གཤིན་འཁོར་བཅས་ཀྱིས། །མངོན་སྤྱོད་དྲག་པོའི་ལས་རྣམས་བསྒྲུབ་པར་མཛད། །བརྐྱང་བསྐུམ་ཞབས་ཀྱིས་སྲིད་གསུམ་འབྱུང་པོའི་ལུས། །གཡོ་འགུལ་མེད་པར་གནོན་མཛད་གསང་བའི་བདག །ལོག་འདྲེན་འདུལ་བའི་ཕྱག་རྒྱ་ཐུགས་ཀ་རུ། །བཅིངས་ནས་ནམ་ཡང་ལྡང་བ་མེད་པར་མཛོད། །འཇིགས་བརྒྱད་སྐྱོབ་དང་ཉེར་གཅིག་ལས་བསྒྲུབ་པའི། །རྣམ་འགྱུར་དུ་མ་སྤྲོ་བའི་གཞི་གཅིག་པོ། །སེང་ལྡེང་ནགས་ཀྱི་སྒྲོལ་མས་མི་འཇིགས་པའི། །སྦྱིན་པའི་སྒོ་འཕར་བརྒྱ་ཕྲག་དབྱེ་བར་མཛོད། །བདུན་པ། ཡིད་འཕྲོག་རིན་ཆེན་ཆུ་མཚོའི་གཞལ་མེད་དབུས། །རྒྱལ་ཀུན་མཐུ་སྟོབས་གཅིག་བསྡུས་གསང་བའི་བདག །ཕྱག་ན་རྡོ་རྗེ་འབར་བའི་མཚོན་རྣོན་པོས། །ཀླུ་གཉེན་ས་བདག་གདུག་རྩུབ་ཞི་བར་མཛོད། །དཀྱིལ་འཁོར་གཅིག་ཏུ་གདེངས་ཅན་མ་ལུས་པ། །འདུས་ནས་དགའ་བདེར་སྤྱོད་པའི་རྟེན་འབྲེལ་མཐུས། །ས་བརྐོས་རྡོ་གཤགས་ཤིང་བཅད་རྩིང་སྤྱོད་ཀྱིས། །ཕོག་ཐུག་ཉེས་ཚོགས་མ་ལུས་ཞི་བར་ཤོག །མི་བཟད་གདུང་བས་ལྟོ་འགྲོའི་ཚོགས་མན་རེག །ཏིང་འཛིན་སྔགས་རྫས་ཆོ་ག་ལ་བརྟེན་ནས། །ཉེར་ཞི་ལུས་སེམས་བདེ་བས་ཁྱབ་གྱུར་པའི། །རྒྱུ་འབྲས་བསླུ་བ་མེད་པ་ལྷུན་གྲུབ་ཤོག །ཅེས་ཡར་ཀླུངས་ཁེ་གསུམ་དུ་འགྲེམ་རྒྱུའི་བྲིས་ཐང་གྲྭ་ཚར་བཅོ་ལྔའི་རྒྱབ་ཡིག་མཆོད་དཔོན་ངག་དབང་ཤེས་རབ་(༥༤ན) ― GLG021_Page_0725 ―
[མ་དཔེ་གཟིགས་ན་འདིར་གནོན།]
ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གཙུག་ལག་དུ་མར་བློ་མིག་ཡངས་པ་མཐར་རྒྱས་པ་བློ་བཟང་དབང་པོས་བགྱིས་པ་ཛཡནྟུ། །དགེ་བཅུ་ཀུན་ཚང་གངས་ཅན་ལྷ་ལམ་ངོས། །ས་ཧོར་རྒྱལ་རིགས་ཆུ་ཤེལ་དཀྱིལ་འཁོར་ལ། །དལ་འབྱོར་རི་དྭགས་སྣང་བརྙན་རབ་བཀྲ་བ། །ཕན་བདེའི་ཀུནྡ་བཞད་ལ་གསོལ་བ་འདེབས། །ཐག་ཁྲར་སྦྲུལ་བཞིན་སྐྱེ་བའི་གྲགས་སྙན་འབར། །རྗེ་བཙུན་རིམ་བྱོན་གདན་སར་གོམ་པ་བཀོད། །མཐའ་ཡས་གདུལ་བྱའི་རེ་བ་ཡོངས་སྐོང་བ། །མཚུངས་མེད་སྤྲུལ་སྐུའི་ཞབས་ལ་གསོལ་བ་འདེབས། །བཅུ་ཕྲག་རིག་པའི་གནས་ལ་སྦྱངས་པས་མཁས། །སོ་ཐར་ཁྲིམས་ཀྱི་རྩ་བ་བརྟན་པས་བཙུན། །རིས་མེད་འགྲོ་ལ་ལྷག་བསམ་དཀར་བས་བཟང༌། །ཐུབ་བསྟན་འཛེས་པའི་རྒྱན་ལ་གསོལ་བ་འདེབས། །རྡོ་རྗེ་འཆང་དངོས་དུ་མའི་ཞབས་པད་བསྙེན། །བགྲང་ཡས་གསང་ཆེན་འཁོར་ལོར་ཡོངས་སུ་སྨིན། །གྲོལ་ལམ་བསྐྱེད་རྫོགས་རྫོགས་ཆེན་ཐོས་བསམ་ལ། །སྒོམ་པའི་བག་ཆགས་སད་པར་གསོལ་བ་འདེབས། །རྒྱུད་བཤད་གདམས་པ་རིག་གཏད་རྒྱབ་བརྟེན་ལུང༌། །འཕྲིན་ལས་རྣམ་བཞིའི་ཕྱག་བཞེས་མན་ངག་སོགས། །ཚུལ་བཞིན་འབད་པས་བརྒྱན་པའི་གོམས་འདྲིས་ཀྱི། །སྨྲ་བའི་སྤོབས་པ་དགེ་ལ་གསོལ་བ་འདེབས། །ལྷ་སྔགས་ཡེ་ཤེས་ནམ་མཁའི་གླང་པོ་ལས། །ཞི་རྒྱས་དབང་གི་དངོས་གྲུབ་གྲུ་ཆར་འབེབས། །མངོན་སྤྱོད་ཐོག་མདས་ཡིད་སྲུབས་སྡེ་བཅས་བྲག །མིང་གི་ལྷག་མར་འཐག་ལ་གསོལ་བ་འདེབས། །གསུང་རབ་འཆད་ལ་དབྱིག་གཉེན་རྗེས་སུ་འགྲོ། །རྩོད་པས་རྒོལ་ངན་ཚར་གཅོད་ཆོས་གྲགས་མཆེད། །རྩོམ་ལ་དགེ་དབང་ངུར་སྨྲིག་གོས་མནབས་པས། །བློ་གསལ་རེ་བ་སྐོང་ལ་གསོལ་བ་འདེབས། །ལེགས་བྱས་ཚེ་རིང་གནམ་གྱི་དཔུང་པ་ཡིས། །རྩོལ་བའི་ངལ་བར་བལྟོས་མིན་རྐང་སེན་ཟླ། །རྒྱ་ཧོར་བོད་སོགས་ཆེ་དགུ་མགྲིན་སྔོན་གྱི། །གཙུག་ཏོར་རྩེ་མོར་འཆར་ལ་གསོལ་བ་འདེབས། །ངག་དབང་འཇམ་དབྱངས་དགའ་བའི་བློ་གྲོས་(༥༤བ) ― GLG021_Page_0726 ―
[མ་དཔེ་གཟིགས་ན་འདིར་གནོན།]
ཀྱིས། །སྐལ་བཟང་གདུལ་བྱའི་མཛའ་བཤེས་གཉེན་གྱུར་པ། །ཚངས་སྲས་བཞད་པའི་ལེགས་བཤད་རྒྱ་མཚོའི་གཏེར། །འཇིགས་མེད་རྡོ་རྗེའི་སྡེ་ལ་གསོལ་བ་འདེབས། །གསོལ་བཏབ་མཐུ་ལས་དབང་ཆེན་སྤྲུལ་པའི་གར། །བསྟན་འཛིན་འགྱུར་མེད་རྡེ་རྗེ་དཔལ་བཟང་པོ། །ཀུན་བཟང་གདོད་མའི་རང་ཞལ་མངོན་གྱུར་པར། །མི་འབྲལ་བརྩེ་བས་རྗེས་སུ་འཛིན་པར་ཤོག །དུས་གསུམ་སངས་རྒྱས་ཕ་མཐའ་མི་མངོན་ཀྱང༌། །ཀུན་འདུས་གཅིག་ཆོས་པདྨ་ཐོད་འཕྲེང་གིས། །ཆོས་དང་སྲིད་ཀྱི་བསམ་དོན་མ་ལུས་པ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །དབང་ཆེན་ཟློས་གར་ཐུགས་སྲས་ཟླ་བའི་སྤྲུལ་སྐུ་བསྟན་འཛིན་འགྱུར་མེད་རྡོ་རྗེས་རྒྱུན་གྱི་ཞལ་འདོན་དང་ཐེག་མཆོག་རབ་རྒྱས་གླིང་དུ་འཛུགས་རྒྱུའི་རྣམ་ཐར་གསོལ་འདེབས་རྗེས་འཛིན་གྱི་སྨོན་ལམ་དང་བཅས་པ་ཞིག་དགོས་ཞེས་གསུངས་གིས་བསྐུལ་བ་ལྟར་བྱི་བ་ལ་གླང་ཆེན་གྱི་དཔེ་བཞིན་སྒྲོ་བཏགས་གྱི་སྟོང་ཤོབ་བླ་ཆེན་སྤྱི་པའི་ཕྱག་མཛོད་ནས་བཏོན་ཏེ་ཟ་ཧོར་གྱི་བནྡེས་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་རིག་བྱེད་སྨྲ་བ་མཐར་རྒྱས་པ་བློ་བཟང་དབང་པོའོ། །གཙོ་ཐང༌། ངག་ལ་ངག་སྟེར་ཟུར་ཕུད་ལྔ་ལྡན་པ། །རབ་གསལ་རབ་མང་ཤེས་རབ་སྣང་བའི་ལྷ། །འཇམ་མཉེན་འཇམ་དཀར་སྨྲ་བའི་དབང་ཕྱུག་གིས། །བློ་ལྡན་བློ་ཡི་འདབ་སྟོང་བཞད་ལ་འདུད། །རྣམ་འདྲེན་བསྐལ་བཟང་བཞི་པ་ཤཱཀྱའི་རྒྱལ། །རྒྱལ་ཚབ་རྣམ་གཉིས་གཞུང་ལུགས་རྒྱ་མཚོའི་འཐའ། །མཐའ་འཇལ་རྣམ་དཔྱོད་གཟིངས་ཀྱིས་ཤེས་ལྡན་ཀུན། །ཀུན་དགའི་འདོད་འཇོ་མི་འཛད་སྟེར་ལ་འདུད། །འཇིགས་འཇིགས་ཡོལ་མེད་མཐའ་ཟུང་མ་ལྷུང་དབུས། །དྲང་དྲང་སྲིད་སྒྲུབ་མདའ་འདྲའི་བདེན་གཉིས་གོ །བཙན་བཙན་ཞི་བའི་ཆ་གང་ཐུབ་བསྟན་ཟླ། །གསལ་གསལ་ལང་ཚོ་དར་བའི་སྡེ་ལ་འདུད། །མཆོག་གསུམ་(༥༥ན) ― GLG021_Page_0727 ―
[མ་དཔེ་གཟིགས་ན་འདིར་གནོན།]
འདུས་པའི་བྱིན་རླབས་ཟིལ་དངར་ཅན། །མགོན་ཁྱོད་ཕྱག་སོར་གྱིས་བཏེག་ཡོལ་གོའི་ནང༌། །གྱེན་འཕྱུར་ཆུ་རྒྱུན་ཡོན་སྦྱོར་ཚངས་བུག་ནས། །ཉེར་ཞུགས་ལུས་གང་རྟེན་ཅིང་འབྲེལ་འབྱུང་མཐུས། །འགོས་རིགས་ཡེ་བཟང་རྩེ་པ་གཡུ་ལོ་པའི། །རྒྱུད་ལས་ཉེར་སོན་སྐྱིད་སྐྱིད་དུས་མིན་གྱི། །འཆི་བའི་གཡུལ་ལས་རྣམ་པར་རབ་རྒྱལ་ཏེ། །མི་ཤིགས་སྲོག་གི་ཀ་བ་ཚུགས་པར་ཤོག །མཛད་པ་བཅུ་གཉིས། སྐད་ཅིག་བསྐལ་པར་བསྒྱུར་བའི་རྫུ་འཕྲུལ་མཐའ། །བྱང་སེམས་སློབ་མར་བཅས་པས་རྙེད་མིན་ན། །ཚུར་མཐོང་བློ་གྲོས་ཕྲ་མོས་འཇལ་བའི་ཁུར། །བྱུང་བཤུལ་བསྙེག་པའི་བུང་བ་ཇི་བཞིན་ངལ། །དཔག་ཚད་ལྔ་བཅུར་ལྡན་པ་ཆུ་ཤེལ་དབང༌། །རྨིག་རྗེས་ཆུ་ནང་འཆར་ལྟར་འགྲོ་བའི་བློར། །ཉེར་འཚམ་མིག་གཟུགས་གྲངས་ཀྱི་མཛད་པ་ལ། །བལྟ་བའི་སྐལ་བཟང་ལེགས་བྱས་བྱ་བས་བསྐྲུན། །བསོད་ནམས་སྤེལ་འདིས་མགོན་ཁྱོད་རླབས་ཆེན་ཚོགས། །བསགས་པའི་ཕུང་པོར་ཡོན་སྦྱོར་སྦྱིན་པའི་བདག །མཉམ་པོར་ལོངས་སུ་སྤྱོད་བྱིན་རླབས་པའི་ཆེད། །འཁོར་ལོས་མཚོན་པའི་ཕྱག་མཐིལ་དེང་གཙུག་ཁྱོངས། །ཚེ་དཔག་མེད། མཛོད་སྤུའི་འོད་ཟེར་སྤྲོས་པས་མཚུན་ལྷའི་མུན། །མཐར་བྱེད་ཚེ་དང་ཡེ་ཤེས་དཔག་མེད་སྐུ། །མདའ་མིག་གྲངས་སུ་བསྐྲུན་པའི་ལེགས་བྱས་ཀྱིས། །ཕུང་པོར་རི་བོ་དངོས་སུ་རྒྱུ་བ་བཞིན། །འགོས་རིགས་ཡེ་བཟང་རྩེ་བ་གཡུ་ལོ་པའི། །རྒྱུད་ལས་ཉེར་སོན་སྐྱིད་སྐྱིད་དུས་མིན་གྱི། །འཆི་བའི་གཡུལ་ལས་རྣམ་པར་རབ་བརྒྱལ་ཏེ། །མི་ཤིགས་སྲོག་གི་ཀ་བ་ཚུགས་པར་ཤོག །མགོན་ཁྱོད་ཞལ་བཟང་པདྨ་རྭ་གའི་མདངས། །རྗེས་ཆགས་གསེར་འགྱུར་རྩི་ཡིས་བདུད་བཞིའི་ལྕགས། །གཏན་མདུན་ས་ལེ་སྦྲམ་དུ་ཉེར་བསྒྱུར་ནས། །བདེ་སྐྱིད་འབྱོར་པའི་དཔལ་ལ་སྤྱོད་པར་ཤོག །རྣམ་པར་རྒྱལ་མ། ཁྱོད་ཞལ་མཐོང་སྒོམ་མཚན་ཙམ་འཛིན་པས་ཀྱང༌། །གཤིན་རྗེའི་མེ་ལོང་འཆང་བའི་ཕོ་ཉ་རྣམས། །སྒྱིད་སྐྱུར་ཉི་མའི་གཉེན་གྱིས་(༥༥བ) ― GLG021_Page_0728 ―
[མ་དཔེ་གཟིགས་ན་འདིར་གནོན།]
ཆེར་བསྔགས་པས། །རྣམ་པར་རྒྱལ་མ་དབང་ཟུང་བསྐྲུན་པའི་དགེས། །འགོས་རིགས་ཡེ་བཟངརྩེ་པ་གཡུ་ལོ་པའི། །རྒྱུད་ལས་ཉེར་སོན་སྐྱིད་སྐྱིད་དུས་མིན་གྱི། །འཆི་བའི་གཡུ་ལས་རྣམ་པར་རབ་རྒྱལ་ཏེ། །མི་ཤིགས་སྲོག་གི་ཀ་བ་ཚུགས་པར་ཤོག །གང་གི་གཙུག་ཏོར་རེག་པའི་མོད་ཉིད་ལ། །ཉི་བུའི་ཞགས་པས་བཅིངས་པ་མི་ཡི་གཟུགས། །འཆི་མེད་ལུས་སུ་གྱུར་ནས་བསྐལ་པར་ཡང༌། །གནས་པའི་འཚོ་བ་དོན་དང་ལྡན་པར་ཤོག །སྒྲོལ་དཀར། ཚེ་དཔག་སྦྱིན་པར་ཡིད་བཞིན་ནོར་བུ་ལྟར། །རེ་འདོད་འཁོར་ལོ་རྟག་སྐོར་སྒྲོལ་དཀར་སྐུ། །འབྱུང་ལག་གྲངས་སྤེལ་ལེགས་བྱས་ཡོངས་འདུའི་ལྗོན། །ཕན་བདེའི་འབྲས་བཟང་དུས་སུ་སྨིན་པའི་མཐུས། །འགོས་རིགས་ཡེ་བཟང་རྩེ་པ་གཡུ་ལོ་པའི། །རྒྱུད་ལས་ཉེར་སོན་སྐྱིད་སྐྱིད་དུས་མིན་གྱི། །འཆི་བའི་གཡུལ་ལས་རྣམ་པར་རབ་རྒྱལ་ཏེ། །མི་ཤིག་སྲོག་གི་ཀ་བ་ཚུགས་པར་ཤོག །སྔགས་འཕྲེང་ཟིལ་མངར་སྲོག་གི་ཟུངས་གྱུར་ཅིང༌། །འོད་ཟེར་དྲུག་སྦྲགས་མཉེན་ལྕུག་ཨུཏྤ་ལས། །ཉེར་གཏམས་བསྐལ་པའི་རླུང་གིས་མི་གཞོམ་པར། །བཅུག་གནས་ཨཱཪྻ་ཏཱ་རེས་རྗེས་ཟུངས་ཤིག །ཅེས་ཡར་ཀླུང་ཁེ་གསུམ་དུ་འདི་གའི་འདྲ་འབག །མཛད་བཅུ། ཚེ་དཔག་མེད། སྒྲོལ་དཀར་རྣམ་རྒྱལ་མ་ལྔ་སོ་སོར་མཆོད་དཔོན་ངག་དབང་ཤེས་རབ་ཀྱིས་མའི་ཚེ་སྒྲུབ་ཏུ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོའོ། །རང་རིག་ཆེ་མཆོག་ངོ་བོར་གདོད་མ་ནས། །ཤར་བའི་རང་གདངས་ཡེ་ཤེས་འོད་ལྔའི་གཟུགས། །དཔལ་ཆེན་ཁྲག་འཐུང་ལུས་ཀྱི་དཀྱིལ་འཁོར་ལ། །ཞི་ཁྲོ་ཀུན་འདུས་གཅིག་ཆོག་ཡི་དམ་ལྷ། །ཤེལ་ལ་ཚོན་བཞིན་སེམས་ཀྱི་རྣམ་འཕྲུལ་དུ། །སྐྱེད་རིམ་གསལ་སྣང་རང་ལས་གཞན་མིན་གདེངས། །རྙེད་ནས་ཡ་ང་མེད་(༥༦ན) ― GLG021_Page_0729 ―
[མ་དཔེ་གཟིགས་ན་འདིར་གནོན།]
པའི་སྟང་སྟབས་ཀྱིས། །བདུད་བཞིའི་སྙིང་གར་ཐོག་བརྫིས་རབ་གཏད་ཞིང༌། །རྩ་ཐིག་རླུང་གི་བགྲོད་པ་ལ་བརྟེན་ནས། །ཚེ་འདིར་གྲོལ་ལམ་རྫོགས་པའི་རིམ་པ་དང༌། །རང་རིག་དོན་གྱི་སྒྲུབ་པ་བཀའ་བརྒྱད་རྣམས། །ཕྲེག་ཆོད་ཐོད་བརྒལ་གནད་ཀྱི་ངོ་འཕྲོད་ཤོག །ཅེས་ཁེ་གསུམ་པ་བློ་བཟང་བསྟན་འཛིན་གྱི་དམིགས་རྟེན་བཀའ་བརྒྱད་བྲིས་ཐང་གི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོའོ། །མི་བསྲུན་འབྱུང་པོ་ལྷ་མིན་མོ་ཡི་མངལ། །གར་དགུའི་ཉམས་ཀྱི་རྡོ་རྗེ་རྩེ་བརྒྱ་པ། །གདེངས་པའི་མོད་ལྷུང་རྟ་མཆོག་རོལ་པ་ཞེས། །དུས་གསུམ་སངས་རྒྱས་བདེ་འབྱུང་ཐུགས་ཀྱི་བཅུད། །སྣང་སྟོང་ལྷ་སྐུར་བསྒོམ་དང་གྲག་སྟོང་འཛབ། །ཉེར་བཟླས་རིག་སྟོང་ཆོས་སྐུའི་ཀློང་ཉིད་ནས། །ཟག་མེད་བདེ་སྟོང་ཆུ་འཛིན་སྟུག་པོ་ལས། །དངོས་གྲུབ་ཆར་གྱིས་དོན་གཉིས་འབྲས་སྨིན་ཅིང༌། །ཡེ་ཤེས་རྡོ་རྗེའི་ཚ་ཚ་འཕྲོས་པའི་དཔལ། །བགེགས་རིགས་རྩ་སྤུར་མ་ལུས་རབ་བསྲེགས་ལྷག །རྒྱ་མཚོའི་མཐར་བྲོས་དོན་སྙིང་ལྐོག་མར་འཐོན། །རྣམ་ཤེས་གར་དབང་ཐུགས་དང་འདྲེས་གྱུར་ཅིག །ཅེས་གནས་ཆུང་ཆོས་རྒྱལ་ཆེན་པོའི་སྐུ་ཁོག་ཚེ་དབང་དཔལ་བཟང་གི་ཁ་ཏོན་གྱི་དམིགས་རྟེན་རྒྱབ་ཡིག་འདིའང་མཆོད་དཔོན་ངག་དབང་ཤེས་རབ་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་བློ་བཟང་དབང་པོའོ། །ཡིད་སྲུབས་སྙིང་སྟོབས་ཆུང་ངུར་བྱེད་པ་ཡི། །མཆོག་གསུམ་སྣང་བརྙན་དྲང་སྲོང་ཆུ་ལྷའི་བུས། །དམིགས་ཡུལ་ལས་ཉོན་དུག་བྲལ་ཡང་སྲིད་ཆབ། །གཏན་མདུན་ཡན་ལག་བརྒྱད་དུ་འགྱུར་བར་ཤོག །ཐུབ་གསུང་འཁོར་ལོ་ཐར་པའི་རྩེར་སོན་པ། །ཤེར་ཕྱིན་རྒྱས་འབྲིང་བསྡུས་གསུམ་པུསྟ་ཀའི། །དོན་བཞིན་སྒྲུབ་བྱ་འཁོར་བའི་སྡུག་བསྔལ་ལས། །བསྒྲལ་ནས་བྱང་ཆེན་གྲོང་དུ་བགྲོད་པར་ཤོག །མདོ་རྒྱུད་གཟུངས་སྔགས་ནོར་བུ་བཻ་ཌཱུཪྻ། །བརྡ་དག་གཟུགས་མཛེས་ཡི་གེའི་(༥༦བ) ― GLG021_Page_0730 ―
[མ་དཔེ་གཟིགས་ན་འདིར་གནོན།]
སྲད་བུ་ལ། །ཉེར་བརྒྱུས་ཕན་ཡོན་དོ་ཤལ་སྐྱེ་བ་ཀུན། །མགུལ་པ་མཛེས་པའི་རྒྱན་དུ་སྤུད་པར་ཤོག །ཧོར་རྫ་དམར་དཔོན་རྒྱ་མཚོའི་དགེ་བར་སྐུ་དང་གསུང་རྟེན་བཞེངས་པའི་སྨོན་ལམ་ཞིག་དགོས་ཞེས་གཙུག་ལག་མང་པོར་བལྟ་བའི་མིག་ཡངས་པ་འཇམ་དབྱངས་བློ་ལྡན་གྱིས་བསྐུལ་བའི་ངོར་ཟ་ཧོར་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །བསྐལ་བཟང་རྣམ་འདྲེན་བཞི་པའི་བསྟན་པ་ལ། །སྡེ་སྣོད་ཐོས་འཛིན་བསམ་སྒོམ་ལྷུར་ལེན་པས། །སྒོ་གསུམ་འབད་ནས་བརྩོན་པའི་དགེ་ཚོགས་སྤེལ། །སྨོན་ལམ་རྣམ་དག་ཚོན་གྱིས་ཁ་བསྒྱུར་བས། །ཞྭ་སེར་ཆོས་སྲིད་བསྟན་པ་རབ་འཕེལ་ཞིང༌། །དེ་འཛིན་དགེ་བའི་བཤེས་རྣམས་ཞབས་པད་བརྟན། །འདུས་པའི་ཚོགས་ཀུན་སྐྱེ་རྒུའི་བསོད་ནམས་ཀྱི། །ཞིང་དུ་ཆོས་སྤྱོད་རྣམ་བཅུ་འཕེལ་བར་ཤོག །བོད་ཧོར་ས་ཆེན་སྐྱོང་བ་སྦྱིན་པའི་བདག །གནམ་སའི་དབང་ཕྱུག་ཚོགས་རྣམས་སྐུ་ཚེ་དང༌། །སྟོབས་འབྱོར་མངའ་ཐང་ཡར་ངོའི་ཟླ་ལྟར་རྒྱས། །འབངས་རྣམས་བདེ་སྐྱིད་དགའ་སྟོན་ལ་སྤྱོད་ཤོག །སྐལ་བཟང་བསྟན་འཛིན་སྔོན་བསགས་སྡིག་སྒྲིབ་ཀྱིས། །བསྒྲུབས་པའི་སྡུག་བསྔལ་མཐའ་དག་རབ་ཞི་ཞིང༌། །རིང་འཚོ་བསོད་ནམས་དབང་ཐང་མ་ལུས་པ། །འཆི་མེད་བདག་པོའི་དཔལ་ལ་འགྲན་པར་ཤོག །དཀོན་ཅོག་རིན་ཆེན་གསུམ་གྱི་ཐུགས་རྗེ་དང༌། །རྟེན་འབྲེལ་རྒྱུ་འབྲས་བསླུ་བ་མེད་པའི་མཐུས། །ཇི་ལྟར་སྨོན་ལམ་ཡོངས་བཏབ་རེ་བ་ཀུན། །འབད་མེད་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་མཐར་རྒྱས་རབ་འབྱམས་པ་སྐལ་བཟང་བསྟན་འཛིན་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །(༥༧ན) ― GLG021_Page_0731 ―
[མ་དཔེ་གཟིགས་ན་འདིར་གནོན།]
ཨཱ ཛི དྡཱ ཡ ཛྙཱ ཤཱ ཀྱ བཱ པུ ཏྤ ཏེ ཏཱ དཱི རྒྷཱ ཏྶ དྨཻ ཏྲེ བ ནྡྷུ ཀཱ ཀ ལྤ བྲྀ ཀྵཿ རྒྱལ་ཀུན་མཁྱེན་བརྩེ་ནུས་པའི་ས་བོན་སྐྱེད། །བསྲིངས་ལས་བཤེས་གཉེན་དམ་པ་དཔག་བསམ་ལྗོན། །ཀཱ རུ ཎྱ དྲཱུ མཾ པ ཏྲ བྷཱུ རི ཤྱ ཡ གྲེ སི དྡྷི ར སྶཱ ཐཽ ཕ ལྱ བྷཱ རཻ རྒ རི ཥྛཿ ཐུགས་རྗེ་སྡོང་པོ་ཡལ་འདབ་ཕང་ཕུང་རྩེར། །དངོས་གྲུབ་རོ་བདའི་འབྲས་བུའི་ཁུར་གྱིས་ལྕི། །དབང་རྣོན་དད་པའི་རྡོ་ངོས་ཡང་དག་གི །གཏན་ཚིགས་རི་མོར་ཉེར་བྲིས་སྣང་བརྙན་གཟུགས། །གཅམ་བུ་ཙམ་མིན་མོས་པའི་ཞིང་ས་ལ། །བགྲང་ཡས་བསོད་ནམས་སྙེ་མ་གཡུར་ཟ་ལྡེམ། །ཀ་ཤིའི་ཚལ་དུ་ཡན་ལག་བཞི་ཡི་རྗེས། །པུནྜརཱིཀ་ཡོངས་བཞད་ཡེ་ཤེས་སེམས། །མངོན་སུམ་འཇུག་པའི་ཆོ་ག་བྷྲ་མ་རའི། །བདེན་ཚིག་རྒྱང་གླུ་རྣ་བའི་དཔྱིད་དུ་བླངས། །དེ་ཕྱིར་ཀུན་རྫོབ་འཁྲུལ་ངོའི་རི་མོ་ཙམ། །མ་ཡིན་དོན་དམ་གདན་གསུམ་རབ་ཚར་མགོན། །རྡོ་(༥༧བ) ― GLG021_Page_0732 ―
[མ་དཔེ་གཟིགས་ན་འདིར་གནོན།]
རྗེའི་སློབ་དཔོན་གཞན་ནས་མི་འཚོལ་བར། །མཐོང་བའི་མོད་ལ་བྱིན་རླབས་སྙིང་དབུས་འཇུག །ལེགས་བྱས་གཡུང་དྲུང་འཁྱིལ་བ་གར་དགུའི་སྟན། །ཚེ་མཐའ་ཡས་སྐུར་བཞེངས་ཏེ་སྐྱིལ་མོ་ཀྲུང༌། །བསྐལ་བརྒྱར་མི་ཤིགས་མཛོད་སྤུ་ལས་སྤྲོས་པའི། །འོད་ཀྱིས་བདུད་བཞིའི་མུན་པ་ཟིལ་གནོན་ཅིང༌། །མ་དག་གདུལ་དཀའི་སེམས་ཅན་ལྕགས་ཁམས་གཞི། །སྣ་ཚོགས་འཕྲིན་ལས་ལམ་གྱི་རྩིས་བསྒྱུར་ནས། །འཁོར་འདས་བདེ་སྐྱིད་ས་ཟླ་ཆེར་སྤུངས་པ། །སྲིད་རྩེར་བསྙེག་པའི་བཞེད་པ་ལྷུན་གྲུབ་ཤོག །མདོ་རྒྱུད་གཞུང་ལུགས་དཔྱད་གསུམ་གྱིས་དག་པ། །བློ་བཟང་གྲགས་སྙན་འབར་བའི་རིང་ལུགས་དང༌། །ཞྭ་སེར་བསྟན་སྲིད་ཉི་ཟླ་ཟུང་འབྲེལ་གྱི། །སྣང་བས་འཇིག་རྟེན་གསུམ་གྱི་མུན་སེལ་ཞིང༌། །སྣ་མང་གྲུབ་མཐའ་ཆོས་ཀྱིས་བསླད་པ་དང༌། །རང་ལུགས་ཚུལ་འཆོས་དུག་ཅན་དྲིས་སྦགས་ཀླུང༌། །རྟེན་འབྱུང་ཆུ་ལྷའི་བུ་ཡིས་རབས་བཀྲུས་ནས། །བཞེད་གཞུང་ཡན་ལག་བརྒྱད་དུ་འགྱུར་བར་ཤོག །མཁས་གྲུབ་ཆོས་རྒྱལ་རིམ་བྱོན་ཨུཏྤ་ལའི། །ཆུན་པོ་སྒོ་གསུམ་ལ་བསྟེན་ཐོད་མཛེས་སུ། །ཉེར་བཅིངས་མི་བསླུའི་རྒྱུ་ལས་བྱུང་བའི་འབྲས། །དམ་པའི་དྲི་མེད་སྤྱན་རས་ཀྱིས་གཟིགས་མཐུས། །ལྷ་མིའི་རྟེན་བཟང་ཟོ་ཆུན་ལྟར་འཁོར་བར། །ནད་གདོན་ཕོངས་སོགས་མི་བཟད་ཟུག་རྔུ་ཡི། །ཚོར་བ་དང་བྲལ་རིང་པོར་འཚོ་བའི་ཚེ། །བསོད་ནམས་རྣམ་ཐོས་བུ་དང་མཚུངས་པར་ཤོག །ངག་དབང་ལྷ་མོས་བློ་གྲོས་སྐལ་བཟང་ལ། །སྦྱར་བས་འཇམ་(༥༨ན) ― GLG021_Page_0733 ―
[མ་དཔེ་གཟིགས་ན་འདིར་གནོན།]
དབྱངས་གཞོན་ནུར་དགའ་བའི་ཕྱག །མགྲིན་འཁྱུད་རིས་བྲལ་སྐྱེ་རྒུའི་བཤེས་གཉེན་དཔུང༌། །ཐུགས་རྗེ་རྒྱ་མཚོའི་རླབས་འཕྲེང་ཡོལ་མེད་པས། །དེང་ནས་རྣམ་པ་ཐམས་ཅད་མཁྱེན་པའི་སར། །བགྲོད་ཕྱིར་དམ་ཆོས་ཐུར་མས་མ་རིག་མིག །རབ་ཕྱེ་ཇི་ལྟ་ཇི་སྙེད་ཀུན་མཐོང་ནས། །བགྲང་ཡས་འགྲོ་འདྲེན་དཔལ་དུ་འགྱུར་བར་ཤོག །ཆེད་དུ་རྩོལ་བར་བལྟོས་མིན་སྨོན་པའི་དོན། །ལྷུན་གྲུབ་མ་རྨོས་ལོ་ཏོག་སྙེ་མ་ལ། །ལུས་ཅན་ཡོངས་ཀྱིས་སྤྱོད་པར་མཆོག་གསུམ་གྱི། །མཁྱེན་བརྩེ་ནུས་པས་ཀུན་ཁྱབ་བཀྲ་ཤིས་ཤོག །ཐང་ཁ་གཞན་བརྒྱད་ལ་འབྲི་རྒྱུ། མཁའ་ཁྱབ་མཁའ་ཡི་རྡོ་རྗེ་གཅིག་པུའི་འཕྲུལ། །དུ་མར་བསྒྱུར་བ་མིག་གི་བདུད་རྩི་ཡི། །ཡོན་སྦྱོར་འདིའི་ཆེད་འབད་རྣམས་གནས་སྐབས་དང༌། །མཐར་ཐུག་བདེ་སྐྱིད་དཔལ་ལ་སྦྱོར་བྱིན་རློབས། །ཞེས་མང་ཐོས་མཁས་པའི་དབང་པོ་བྱང་མ་ཁང་གསར་བ་དཔལ་འབྱོར་བསོད་ནམས་ལྷུན་གྲུབ་ཀྱི་དབོན་བརྒྱུད་ཞྭ་སེར་ཅོད་པན་འཆང་བའི་བསྟན་པ་ལ་མི་ཕྱེད་པའི་དད་པ་དང་ལྡན་པ་འཕྱོས་ཆང་ཁྱིམ་པ་ངག་དབང་མཁྱེན་བརྩེས་ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་གསོལ་འདེབས་རིན་ཅེན་འཕྲེང་མཛེས་ལ་གཞི་བྱས་གྲྭ་ཚར་བཞེངས་པའི་གཙོ་ཐང་གི་འདྲ་འབག་ལ་བརྗོད་དོན་གྱི་ས་བོན་དམིགས་བསལ་བགྱིས་འདུག་པ་གཞན་དག་ཁྲེལ་བའི་རྒྱུར་སོང་དོགས་ཀྱང༌། སྙན་ངག་རབ་བཏགས་ཀྱི་རྒྱན་ལ་མཐའ་གཅིག་ཏུ་མ་ངེས་པས་བསྐུལ་བ་པོའི་བློ་དང་སྦྱར་ཏེ་ཚངས་སྲས་བཞད་པའི་རྡོ་རྗེས་(༥༨བ) ― GLG021_Page_0734 ―
[མ་དཔེ་གཟིགས་ན་འདིར་གནོན།]
བཀོད་པའི་ཡི་གེ་པ་ནི་གཙུག་ལག་དུ་མར་བློ་མིག་ཡངས་པ་མཐར་རྒྱས་པ་བློ་བཟང་དབང་པོའོ། །བདེ་བ་ཅན་གྱི་ཞིང་བཀོད། རྩེ་གཅིག་ཏིང་འཛིན་རླུང་གི་འགྲོ་འོང་གིས། །འོད་དཔག་མེད་ཞལ་མངོན་གསུམ་ཉེར་མཐོང་བ། །ཚེགས་ཆུང་དོན་ཆེན་ཇི་ལྟར་སྨོན་པ་བཞིན། །འགྲུབ་པར་གར་དབང་སྲས་བཅས་མཐུ་དཔུང་སྐྱེད། །རྗེ་བཙོང་ཁ་པ། ཤིང་རྟ་ཆེ་གཉིས་རྗེས་འབྲངས་གསེར་རིའི་དབུས། །མཁས་བཙུན་བཟང་པོའི་བང་རིམ་མཐོ་བརྩེགས་པར། །ལེགས་བཤད་ཉི་ཟླའི་སྒྲོན་མེས་གླིང་བཞི་ཡི། །མ་རིག་མུན་སེལ་བཙོང་ཁ་པས་བྱིན་རློབས། །གཙོ་བོ། ལུས་ངག་ཡིད་དྲི་དབང་བཞིའི་ཆུས་བཀྲུས་པས། །ཕུང་ལྔ་གནས་གྱུར་བློ་ཡི་བུམ་བཟང་དུ། །ལྔ་ལྡན་ཡེ་ཤེས་རྒྱ་མཚོས་ཡོངས་འཁྱིལ་བ། །འཇམ་དབྱངས་དགའ་བའི་བཤེས་ཀྱིས་བདག་རྗེས་བཟུང༌། །སྲས་བཅས་རྒྱལ་བའི་སྣང་བརྙན་ཆུ་ཤེལ་དབང༌། །རས་དཀར་ཀུན་གསལ་ལ་ཤར་སྣ་ཚོགས་གཟུགས། །བགྲང་ཡས་བསོད་ནམས་རྫིང་བུར་རྟག་གསལ་བ། །འོད་སྣང་བྱང་ཆུབ་བར་དུ་འབར་བར་ཤོག །རྒྱུ་སྦྱོར་རབ་འབྱམས་བློ་བཟང་ཆོས་ལྡན་དང༌། །རི་མོའི་འདུ་བྱེད་མཁན་སོགས་ཕྱོགས་འདི་ལ། །སྒོ་གསུམ་འབད་རྣམས་འཁོར་འདས་ཡོན་ཏན་ཀུན། །དབྱར་གྱི་ཆུ་གཏེར་ལྟ་བུར་འཕེལ་བར་ཤོག །སྲོང་བཙན་སྒམ་པོ། ཁྲིམས་གཉིས་དྲང་པོར་སྲོང་ལ་ཆོས་བཙན་པ། །སྒམ་པོའི་བློ་ཡིས་དཔའ་མཛངས་བརྟུལ་ཕོད་ཅན། །གངས་ལྗོངས་ཕན་བདེའི་སྒོ་འབྱེད་རྩི་སྨན་གྱིས། །དུག་གསུམ་(༥༩ན) ― GLG021_Page_0735 ―
[མ་དཔེ་གཟིགས་ན་འདིར་གནོན།]
ནད་བརྒྱ་མཐའ་དག་གསོ་བར་མཛོད། །འབྲོམ། ཚངས་སྤྱོད་དགེ་བསྙེན་དམར་ཆའི་ན་ཕྲ་ཡང༌། །གཞན་ཕན་སྙིང་རྗེ་རྒྱལ་རིགས་ཆེ་བ་ཡིས། །མཁས་བཙུན་མདུན་ན་འདོན་རྣམས་ཟིལ་གནོན་པ། །འབྲོམ་སྟོན་དྲི་མེད་སྤྱན་གྱིས་བཙའ་བར་མཛོད། །རྗེ་དགེ་འདུན་གྲུབ། ཤེས་བྱ་ཐམས་ཅད་མཁྱེན་པའི་ཡིད་བཞིན་ནོར། །བགྲང་ཡས་དགེ་འདུན་ཡོངས་ཀྱི་གཙུག་རྒྱན་དུ། །ལྷུན་གྲུབ་རྣམ་འདྲེན་མཆོག་གིས་སྲིད་ཞི་ཡི། །འཇིགས་པ་ཀུན་ལས་བསྐྱབས་ནས་བདག་རྗེས་གཟུང༌། །རྗེ་དགེ་འདུན་རྒྱ་མཚོ། རྟག་ཏུ་དགེ་བའི་རྐང་གདུབ་དྲིལ་ཆུང་སྒྲ། །འཁྲོལ་བར་འདུན་པའི་ལེགས་བྱས་ངང་མོ་དཀར། །ཡེ་ཤེས་འོ་མའི་རྒྱ་མཚོར་རྩེ་འཇོ་མཁན། །དབྱངས་ཅན་བཞད་པའི་རྡོ་རྗེས་རྟག་ཏུ་སྐྱོངས། །རྗེ་བསོད་ནམས་རྒྱ་མཚོ། བསོད་ནམས་དཔལ་འབར་རྒྱ་ཧོར་ཆེ་དགུའི་གཙུག །ཞབས་སེན་རྡུལ་དམར་བཀོད་པའི་སྙན་གྲགས་རྔ། །མཚོ་བྱུང་ལྷ་མོས་ཕྱོགས་བརྒྱར་ལེགས་བརྡུངས་པ། །མགོན་པོ་བདག་སོགས་འགྲོ་ཀུན་དབུགས་དབྱུང་ཞིག །སྲིད་ཞིའི་ཡོན་ཏན་རིན་ཅེན་འབྱུང་བའི་གནས། །འཕྲིན་ལས་རྒྱ་མཚོའི་རླབས་འཕྲེང་ཡོལ་མེད་པ། །མཐུ་སྟོབས་ནུས་པས་མཁའ་མཉམ་ཡིད་ཅན་ཀུན། །བདུད་བཞིའི་འཇིགས་པ་ཆེ་ལས་སྐྱོབ་ཏུ་གསོལ། །ཞེས་འཕྱོང་རྒྱས་སྔགས་རམས་པ་བློ་བཟང་ཆོས་ལྡན་གྱིས་བདེ་བ་ཅན་གྱི་ཞིང་བཀོད། རྗེ་བཙུན་བཙོང་ཁ་པ། འདི་གའི་འདྲ་འབག་གཙོ་ཐང་དུ་བྱས་པར། ཆོས་རྒྱལ་སྲོང་བཙན་སྒམ་པོ། འབྲོམ་སྟོན་པ། ཐམས་ ― GLG021_Page_0736 ―
[མ་དཔེ་གཟིགས་ན་འདིར་གནོན།]
ཅད་མཁྱེན་པ་རིམ་པ་བཞིའི་བྲིས་ཐང་ལ་གསོལ་འདེབས་རིན་ཅེན་འཕྲེང་མཛེས་སོར་བཞག་གིས་བསྐོར་བ་རྣམས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རེག་བྱེད་སྨྲ་བ་བློ་བཟང་དབང་པོས་བགྱིས་པ་ལཀྵྨཱི། །གྲངས་མེད་བསྐལ་མང་བསྒྲུབས་པའི་ཚོགས་གཉིས་ཀྱིས། །བདུད་སྡེའི་གཡུལ་ལས་རྣམ་རྒྱལ་ཐུབ་པ་མཆོག །དམ་ཚིག་གསུམ་བཀོད་ལྷ་ཡིས་གྲངས་རིང་གི །སྐྱེ་བར་རྗེས་གཟུང་མྱང་འདས་ས་ལ་སྦྱོར། །སྐྱབས་གསུམ་ཀུན་འདུས་སྣང་བརྙན་ཆུ་ཤེལ་དབང༌། །རས་དཀར་ཀུན་གསལ་ལ་ཤར་སྣ་ཚོགས་གཟུངས། །བགྲང་ཡས་བསོད་ནམས་རྫིང་བུར་རྟག་གསལ་བ། །འོད་སྣང་བྱང་ཆུབ་བར་དུ་འབར་བར་ཤོག །རྒྱུ་སྦྱོར་ལྷ་ས་ངག་དབང་ཐུབ་བསྟན་དང༌། རི་མོའི་འདུ་བྱེད་མཁན་སོགས་ཕྱོགས་འདི་ལ། སྒོ་གསུམ་འབད་རྣམས་འཁོར་འདས་ཡོན་ཏན་ཀུན། དབྱར་གྱི་ཆུ་གཏེར་ལྟ་བུར་འཕེལ་བར་ཤོག །ཞི་ཁྲོ་རབ་འབྱམས་མཐའ་དག་མགོན་ཁྱོད་སྐུར། །རྫོགས་པས་སྐྱབས་མགོན་གཅིག་ཆོག་དྲག་པོ་རྩལ། །གསལ་སྟོང་རིག་ངོར་རང་ངོ་འཕྲོད་པ་ཡིས། །ཕུང་པོ་འོད་སྐུར་ཚེ་འདིར་གྲོལ་བར་ཤོག །ཅེས་ལྷ་ས་བ་ངག་དབང་ཐུབ་བསྟན་གྱིས་ཐུབ་པ་དམ་ཚིག་གསུམ་བཀོད་དང་དྲག་པོ་རྩལ་གྱི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་སྨྲ་བ་བློ་བཟང་དབང་པོའོ། །པད་འབྱུང་གསང་གསུམ་མཛད་མཐའ་རྙེད་མིན་ཀྱང༌། །གླིང་(༦༠ན) ― GLG021_Page_0737 ―
[མ་དཔེ་གཟིགས་ན་འདིར་གནོན།]
འདིར་སྒྱུ་འཕྲུལ་རོལ་གར་ཆེ་ལོང་ཙམ། །སྣ་ནམ་པར་གསུངས་འདི་མཚུངས་བརྟུལ་ཤུགས་ཀྱི། །སྤྱོད་པ་བདག་གིས་འགྲུབ་པར་བྱིན་གྱིས་རློབས། །རྩ་བ་གསུམ་གྱི་སྣང་བརྙན་ཆུ་ཤེལ་དབང༌། །རས་དཀར་ཀུན་གསལ་ལ་ཤར་སྣ་ཚོགས་གཟུགས། །བགྲང་ཡས་བསོད་ནམས་རྫིང་བུར་རྟག་གསལ་བ། །འོད་སྣང་བྱང་ཆུབ་བར་དུ་འབར་བར་ཤོག །རྒྱུ་སྦྱོར་ལྷ་ས་བློ་གྲོས་ལེགས་པ་དང༌། །རི་མོའི་འདུ་བྱེད་མཁན་སོགས་ཕྱོགས་འདི་ལ། །སྒོ་གསུམ་འབད་རྣམས་འཁོར་འདས་ཡོན་ཏན་ཀུན། །དབྱར་གྱི་ཆུ་གཏེར་ལྟ་བུར་འཕེལ་བར་ཤོག །དུས་དགྲར་དབྱིངས་ནས་བཞེངས་པའི་འཇམ་དཔལ་དབྱངས། །ཟིལ་གནོན་ཕྱག་རྒྱའི་ཟློས་གར་ལོངས་སྤྱོད་རྫོགས། །མི་བཟད་འཆི་བདག་སྤྲུལ་པའི་ཆོ་འཕྲུལ་གྱིས། །དགྲ་བགེགས་སྲོག་མཐར་བྱས་ནས་རུ་མཚོན་སྒྲེངས། །ལྷ་ས་བ་བློ་གྲོས་ལེགས་པའི་དད་རྟེན་དུ་སིནྡྷུ་རྒྱ་མཚོའི་ཞིང་བཀོད་དང་འཇམ་དཔལ་ཟིལ་གནོན་གྱི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་སྨྲ་བ་བློ་བཟང་དབང་པོའོ། །མགོན་ཁྱོད་ཐུགས་ཀའི་ལམ་གྱི་སྦུབས་ནང་དུ། །ཉིང་མཚམས་སྦྱར་ཚེ་ཐོགས་པ་མེད་བགྲོད་ནས། །བརྫུས་ཏེ་པདྨའི་སྦུབས་སྐྱེས་རྒྱལ་སྲས་སུ། །ཡོངས་གྱུར་མཁའ་ཁྱབ་འགྲོ་ཀུན་འདྲེན་པར་ཤོག །མཚན་ལེགས་ཡོངས་བསྒྲགས་དཔལ་གྱི་རྒྱལ་པོ་ཡིས། །གཟོད་མ་ཉིད་ནས་ཐུགས་བསྐྱེད་སྨོན་ལམ་གྱི། །འབྲས་བུ་བདག་གིས་(༦༠བ) ― GLG021_Page_0738 ―
[མ་དཔེ་གཟིགས་ན་འདིར་གནོན།]
མངོན་སུམ་ཉམས་མྱོང་ནས། །གྲངས་མེད་ལུས་ཅན་ཚོགས་ལ་སྦྱིན་ནུས་ཤོག །རིན་ཅེན་ཆུ་ཤེལ་ཁམས་ལས་ལེགས་གྲུབ་པ། །ཐུགས་རྗེ་ཟླ་བའི་དཀྱིལ་འཁོར་ཆ་རྫོགས་ལས། །ཕན་བདེའི་ཀཏྤུ་ར་ཡི་ཟེགས་མ་ཡིས། །སྡུག་ཀུན་བདེན་པའི་ཚ་གདུང་བཅིལ་བར་ཤོག །སྔོན་གོམས་འགྲོ་ལ་ཐུགས་བསྐྱེད་ཛམྦུའི་འབྲས། །རིས་མེད་སྐྱེ་རྒུའི་བསོད་ནམས་མཚོར་ལྷུངས་པར། །གཏན་བདེའི་གསེར་བཟང་སྙེ་མས་ལུས་ཅན་རྣམས། །དབུལ་ཕོངས་སྡུག་བསྔལ་དྲུངས་ནས་འབྱིན་པར་ཤོག །དུ་བྱེད་འགྱུར་དང་མི་བཟད་སྡུག་བསྔལ་གྱིས། །མནར་བའི་མྱ་ངན་ཟུག་རྔུ་མཐའ་དག་ཀུན། །འཇིག་རྟེན་ཡོངས་ལ་མིང་ཙམ་མེད་པ་རུ། །བདེ་གཤེགས་ཐུགས་རྗེ་ཅན་གྱིས་རྗེས་སུ་གཟུང༌། །དམ་པའི་ཆོས་ཀྱི་བདུད་རྩིས་རྒྱུད་ལྔའི་འགྲོའི། །ཐར་པའི་སྲོག་གི་འཚོ་བ་འགྱུར་མེད་དུ། །མཛད་པའི་གྲགས་སྙན་ཇི་བཞིན་བདག་སོགས་ལ། །སླད་མར་དོན་དང་ལྡན་པའི་བཀའ་དྲིན་སྩོལ། །ལུས་ཅན་བསམ་པའི་ཁྱད་པར་མཐའ་ཀླས་པ། །མངོན་སུམ་མཁྱེན་ནས་སྒྲིབ་གཉིས་བག་ལ་ཉལ། །འཇོམས་པའི་གཉེན་པོ་ཐབས་མཁས་ཐུགས་རྗེའི་སྒོ། །ཆེར་སྙིགས་དུས་འདིར་ལྷག་པར་འབྱེད་དུ་གསོལ། །སྨན་གྱི་བླ་མའི་མཚན་སྙན་ཐོས་པ་དང༌། །སྐུ་བརྙན་བཞེངས་ཤིང་མཆོད་བསྟོད་སྨོན་ལམ་མཐུས། །ཉིང་མཚམས་སྦྱར་ཚེ་བཻཌཱུར་སྣང་བའི་འོད། །དག་པའི་ཞིང་དེར་ཐོགས་མེད་སྐྱེ་བར་ཤོག །ཐུབ་དབང་དཔལ་གྱི་མགུར་ནས་ལེགས་གསུངས་པ། །བདེ་གཤེགས་བདུན་གྱི་མདོ་ཆོག་ཚད་མའི་བཀའ། །སླུ་མེད་འབྲས་བུ་མཁའ་(༦༡ན) ― GLG021_Page_0739 ―
[མ་དཔེ་གཟིགས་ན་འདིར་གནོན།]
མཉམ་སེམས་ཅན་གྱིས། །མངོན་སུམ་ཉམས་སུ་མྱོང་བར་བྱིན་གྱིས་རློབས། །བགྲང་ཡས་ཞིང་རྡུལ་ཞབས་ཀྱིས་ཉེར་བཅགས་ཀྱང༌། །ཀུ་ཤའི་རྩེས་གཏོར་རྒྱ་མཚོའི་ཐིགས་པ་བཞིན། །བཅུ་གཉིས་མཛད་པ་བསྟན་པའི་རྣམ་པར་ཐར། །རིང་པོར་མི་ཐོགས་བདག་གིས་འཛིན་པར་ཤོག །བསོད་ནམས་མཐུ་ཡིས་ངག་དབང་ནམ་མཁའ་དང༌། །རྣམ་རྒྱལ་དཔལ་བཟང་འདི་ཕྱི་བར་གསུམ་གྱི། །མདུན་མ་ལྷུན་གྲུབ་དགེ་ཚོགས་ཅི་མཆིས་པ། །མཁའ་མཉམ་འགྲོ་རྣམས་སངས་རྒྱས་ཐོབ་རྒྱུར་བསྔོ། །ཞེས་འཕྱོང་རྒྱས་པ་ངག་དབང་ནམ་མཁའ་དང་རྣམ་རྒྱལ་དཔལ་བཟང་གཉིས་ཀྱིས་བྲིས་ཐང་བཅུ་ཚར་བཞེངས་པའི་རྒྱབ་ཡིག་དགོས་ཚུལ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོས་བགྱིས་པ་མངྒ་ལཾ། །ངག་དབང་དབྱངས་ཅན་མགྲིན་ཆགས་བློ་གྲོས་ཀྱིས། །བསྐལ་བཟང་རྣམ་འདྲེན་བཞི་པའི་རིང་ལུགས་ཀུན། །སྤེལ་ཕྱིར་རིག་གནས་རྒྱ་མཚོའི་སྒོ་འཕར་བརྒྱ། །འབྱེད་མཛད་བཤེས་གཉེན་དམ་པར་གསོལ་བ་འདེབས། །གདོང་ལྔས་ཉེར་བཏེག་སྣ་ཚོགས་རྡོ་རྗེ་དང༌། །མ་ཆགས་པདྨ་ཉི་ཟླའི་གདན་སྟེང་དུ། །མགོན་ཁྱོད་ཚེ་མཐའ་ཡས་པའི་ངོ་བོ་རུ། །བཞེངས་ནས་བསྐལ་བརྒྱར་གཞོམ་ཞིག་བྲལ་བར་ཤོག །སངས་རྒྱས་གཉིས་པ་ཀུན་མཁྱེན་བཙོང་ཁ་པའི། །ཆོས་སྲིད་བསྟན་པ་གཏིང་ཟབ་རྒྱ་ཆེ་བ། །དབྱར་མཚོ་ལྟ་བུར་འཕྱུར་མཛད་སའི་ཚངས་པ། །སྐུ་ཚེ་མངའ་ཐང་མཚན་ཇུས་དར་དྲག་ཤོག །དགའ་ལྡན་གཙུག་(༦༡བ) ― GLG021_Page_0740 ―
[མ་དཔེ་གཟིགས་ན་འདིར་གནོན།]
ལག་བླ་ནས་བླར་འཕེལ་ཞིང༌། །ཉེར་རྒྱས་ངེས་གསང་དགེ་འདུན་འདུས་པའི་གླིང༌། །འཁོར་ལོ་གསུམ་གྱི་བྱ་བ་མ་ལུས་པ། །དཀར་ཆའི་ཟླ་བཞིན་ཆ་ཤས་གང་བར་ཤོག །དཀོན་ཅོག་བདེན་དང་བྱིན་རླབས་ཚོགས་གཉིས་ཀྱིས། །མངའ་ཐང་རབ་འབར་ཆོས་དབྱིངས་རྣམ་དག་ཅིང༌། །རྒྱུ་འབྲས་ནམ་ཡང་བསླུ་བ་མེད་པའི་མཐུས། །ཇི་ལྟར་སྨོན་ལམ་བཏབ་པ་ལྷུན་གྲུབ་ཤོག །ཅེས་པ་འདིའང་མངའ་རིས་ཁྱུང་རྫོང་དཀར་པོའི་ཆོས་སྡེ་དགའ་ལྡན་འཕེལ་རྒྱས་གླིང་སྤྱི་སོས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས། །བརྒྱ་ཕྲག་སྣང་བརྙན་བསྐྲུན་པའི་དགེ་ཚོགས་ཀྱིས། །རི་མོའི་འདུ་བྱེད་མཁན་པོ་རྟ་མགྲིན་གྱིས། །རང་རིག་གདོད་མའི་དབྱིངས་སུ་ངོ་འཕྲོད་ཤོག །གལ་ཏེ་སྔོན་གོམས་ལས་ཉེན་བག་ཆགས་མཐུས། །དེ་ཚུལ་རྙེད་པའི་སྐལ་བ་ཆེས་ཕྲ་ན། །སྲིད་པ་བར་དོའི་འཇིགས་པ་ལས་ཐར་ནས། །དལ་འབྱོར་རིན་ཅེན་མྱུར་དུ་ཐོབ་པར་ཤོག །མངོན་མཐོའི་རྟེན་ལ་ངེས་གསང་ཐེག་པ་ཡི། །སྨིན་གྲོལ་གདམས་པ་ཉམས་སུ་བླངས་བྱས་ནས། །བཅུ་གསུམ་རྡོ་རྗེ་འཛིན་པའི་ས་ཆེན་པོར། །མྱུར་དུ་བགྲོད་དེ་རང་གཞན་དོན་འགྲུབ་ཤོག །སྤང་རྟོགས་ཡོན་ཏན་གཅིག་ཏུ་མཚུངས་ན་ཡང༌། །འཛམ་གླིང་སྤྱི་དང་ཁྱད་པར་གངས་ཅན་འདིར། །བཀའ་དྲིན་འགྲན་ཟླ་མེད་པའི་རིགས་བརྒྱའི་བདག །པད་འབྱུང་གཟུགས་སྐུ་བཅུ་ཕྲག་བཅུ་བཞེངས་མཐུས། །ལངྐའི་ཕོ་བྲང་པདྨ་འོད་ཀྱི་ཞིང༌། །བགྲང་ཡས་རིགས་འཛིན་བྱེ་(༦༢ན) ― GLG021_Page_0741 ―
[མ་དཔེ་གཟིགས་ན་འདིར་གནོན།]
བའི་འདུན་ས་རུ། །པིར་ཐོགས་རྟ་མགྲིན་སྲིད་པ་ཡོངས་བཟུང་ནས། །རྣམ་གསུམ་ཡོ་གའི་ཆོས་ལ་སྤྱོད་པར་ཤོག །སངས་རྒྱས་གཞན་ནས་མི་འཚོལ་རང་གི་སེམས། །ཀུན་ཏུ་བཟང་པོ་དབུལ་པོའི་སྒྱིད་རྡོའི་གསེར། །ཇི་བཞིན་ངོ་འཕྲོད་སྣ་ཚོགས་སྤྲུལ་པ་ཡིས། །ནམ་མཁའི་མཐའ་ཀླས་འགྲོ་བའི་དོན་བྱེད་ཤོག །རི་མོ་བ་རྟ་མགྲིན་གྱི་ཆེད་རྟེན་ལེ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །རྒྱལ་ཀུན་འཕྲིན་ལས་བསམ་འཕེལ་ཡིད་བཞིན་ནོར། །ཚོགས་གཉིས་རྒྱལ་མཚན་རྩེར་བཀོད་ཕན་བདེའི་ཆར། །བསྟན་འགྲོའི་ཉེར་འཚོར་འབེབས་མཛད་ངག་གི་དབང༌། །བློ་གསལ་སྐལ་བཟང་རྒྱ་མཚོར་གསོལ་བ་འདེབས། །འཆད་རྩོད་རྩོམ་ལ་ཚངས་སྲས་དབྱངས་ཅན་ལྷ། །དགྱེས་འཛུམ་བཞེད་པས་རྒོལ་ངན་གཉེན་པོ་རུ། །འཇིག་མེད་དཔྱད་གསུམ་དག་པ་རྡོ་རྗེའི་སྡེ། །གཡུང་དྲུང་སྲོག་གི་ཀ་བ་ཚུགས་པར་ཤོག །རྣམ་དཔྱོད་ཟླ་ཚེས་གསལ་བས་རྨོངས་མུན་སངས། །བློ་གྲོས་ཆ་རྒྱས་ལུགས་གཉིས་རྒྱ་མཚོ་ཆེ། །འཕེལ་མཛད་མི་དབང་སྐུ་ཚེ་མངའ་ཐང་ཀུན། །གསེར་གྱི་འཁོར་ལོས་སྒྱུར་རྒྱལ་ལ་འགྲན་ཤོག །ལེགས་བཤད་ཀེ་ཏ་ཀས་དྲུངས་ཤཱཀྱའི་བསྟན། །དངས་མཚོར་བློ་བཟང་གྲགས་པའི་རིང་ལུགས་བཞིན། །མ་ཕམ་དབུས་འགྱུར་འཆང་དུ་བྱོན་མིན་པར། །རབ་དཀར་སྐྱེ་རྒུའི་དཔུང་གཉེན་དམ་པར་ཤོག །ཚུལ་འདི་བསྐུལ་དང་ཁ་ཏོན་བྱེད་པོ་རྣམས། །དམ་པའི་མགོན་(༦༢བ) ― GLG021_Page_0742 ―
[མ་དཔེ་གཟིགས་ན་འདིར་གནོན།]
གྱིས་སྐྱེ་བར་རྗེས་འཛིན་ཞིང༌། །འདི་ཕྱི་བར་དོའི་ལེགས་ཚོགས་མ་ལུས་པ། །བསམས་པ་ཇི་བཞིན་ལྷུན་གྱིས་འགྲུབ་པར་ཤོག །རྒྱ་ཧོར་བོད་ཀྱི་ནོར་འཛིན་པདྨའི་ལྟོར། །ནད་མཚོན་མུ་གེའི་ཟུག་རྔུ་དང་བྲལ་བའི། །བདེ་སྐྱིད་སྦྲུམས་པའི་ཁྱེའུ་ཉེར་བཙས་ཏེ། །རྫོགས་ལྡན་བཞོན་ནུའི་རྩེ་འགྱུར་འཇོ་བར་ཤོག །མཁའ་ལ་གཟའ་སྐར་འཕྲོད་སྦྱོར་ཕུན་སུམ་ཚོགས། །ས་གཞིར་བཀྲ་ཤིས་གཡང་ཆགས་གཡས་སུ་འཁྱིལ། །དགེ་ལེགས་ཡར་ངོའི་ཟླ་བ་ལྟར་རྒྱས་པས། །ཡངས་པའི་འཇིག་རྟེན་ཀུན་ཏུ་ཁྱབ་གྱུར་ཅིག །ཅེས་པ་འདིའང་ཤོ་པ་མདོའི་རྫོང་སྡོད་དགེ་སློང་རིན་ཅེན་རྒྱལ་མཚན་དང་སྟོད་ལུང་ཆ་དཀར་བ་གཉིས་ཀྱིས་དགའ་ལྡན་བཤད་སྒྲུབ་གླིང་སོགས་ཆོས་སྡེ་ཁག་ཚོར་འཛུགས་རྒྱུ་དང་རང་གི་ཁ་ཏོན་གྱི་ཆེད་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །གང་གི་སྐུ་ལ་རྩ་བ་གསུམ་གྱི་ལྷ། །ཡོངས་ཤར་འཁོར་འདས་ཟིལ་གནོན་བཞད་པ་རྩལ། །ངག་གི་དབང་ཕྱུག་བློ་བཟང་རྒྱ་མཚོའི་སྡེའི། །སྣང་བརྙན་ས་ཟླའི་ཁུ་བས་ལེགས་བྲིས་དགེས། །དེང་ནས་བཟུང་སྟེ་ཞི་ཁྲོའི་དཀྱིལ་འཁོར་དུ། །རབ་སྨིན་བསྐྱེད་རྫོགས་རྫོགས་པ་ཆེན་པོ་ཡི། །གྲོལ་བའི་ལམ་གྱིས་བཅུ་གསུམ་རྡོ་རྗེའི་སར། །མྱུར་དུ་བགྲོད་ནས་འགྲོ་ཀུན་འདྲེན་པར་ཤོག །གནས་སྐབས་སུ་ཡང་ནད་གདོན་བར་གཅོད་སོགས། །མི་མཐུན་ཉེས་པའི་ཚོགས་རྣམས་རབ་ཞི་ཞིང༌། །རིང་པོའི་ཚེ་དང་དཔལ་འབྱོར་ལུང་རྟོགས་ཀྱི། །ཡོན་(༦༣ན) ― GLG021_Page_0743 ―
[མ་དཔེ་གཟིགས་ན་འདིར་གནོན།]
ཏན་མཐའ་དག་གོང་དུ་འཕེལ་བར་ཤོག །རི་ཆོས་པ་ཆོས་དབང་རྒྱ་མཚོས་འདི་གའི་འདྲ་འབག་གི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །གདན་གསུམ་ཚང་བ་ངེས་གསང་ལྷ་ཡི་ཚོགས། །འདུས་པའི་འཁོར་ལོ་མཉམ་ཉིད་ཡེ་ཤེས་རྟེན། །དབུ་རྒྱན་སྤེལ་ལེགས་ཚར་དུ་དངར་བའི་རྒྱུད། །ལྷག་བསམ་དག་པས་བདོག་པ་སྦྱར་བའི་མཐུས། །འཇམ་པའི་དབྱངས་དངོས་དགའ་བའི་བཤེས་གཉེན་ཞབས། །འཕྲོག་བྱེད་སྡེར་མོས་གྱེན་དུ་བཏེག་པའི་ཁྲི། །སྣ་ཚོགས་རྡོ་རྗེའི་རེ་ཁས་མཚན་པའི་སྟེང༌། །བསྐལ་བརྒྱར་མི་གཡོ་ཆོས་འཁོར་སྐོར་བར་ཤོག །ཡོན་སྦྱོར་བྱེད་པོ་རིགས་བརྒྱུད་མངའ་ཐང་ཚེ། །རྨུགས་འཛིན་དབང་པོའི་མཆེད་པོར་འགྲན་བཟོད་ཅིང༌། །རིང་པོར་མི་ཐོགས་མཁའ་མཉམ་སེམས་ཅན་ཀུན། །འདྲེན་པའི་དེད་དཔོན་ཆེན་པོར་འགྱུར་བར་ཤོག །ཅེས་ལྷ་ས་ལ་ཁང་པ་ཚེ་དབང་བསྟན་འཛིན་གྱིས་ཆུ་ཤུར་ཐར་གླིང་བར་ལོ་རིམ་ཙར་གྱི་བར་རིགས་ལྔ་ལྔ་རེ་དབུལ་བའི་སྨོན་ལམ་དགོས་ཚུལ་བྱུང་བ་བྱང་གཏེར་ཐུགས་རྗེ་ཆེན་པོར་རིགས་ལྔ་གྱོན་སྲོལ་མེད་ཀྱང་གསང་འདུས་ལ་བྱེད་རྒྱུ་ཡིན་འདུག་གཤིས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ངོ་བོ་ཀ་དག་ནང་དབྱིངས་འོད་གསལ་དང༌། །གང་ཤར་རང་སར་གྲོལ་བ་ཆོས་ཀྱི་སྐུ། །སེམས་ཉིད་དོན་གྱི་བླ་མར་ངོ་འཕྲོད་པ། །ནམ་ཡང་འཕོ་འགྱུར་(༦༣བ) ― GLG021_Page_0744 ―
[མ་དཔེ་གཟིགས་ན་འདིར་གནོན།]
བྲི་གང་མེད་པར་ཤོག །རང་བཞིན་ལྷུན་གྲུབ་སྣང་སྲིད་རྒྱལ་བའི་ཞིང༌། །འབྱམས་ཀླས་ཆེ་མཆོག་ཡོངས་འདུས་རིག་པའི་རྩལ། །ཡེ་ཤེས་དབང་པོའི་སྒོར་ཤར་ལོངས་སྤྱོད་རྫོགས། །མངོན་གསུམ་དབྱིངས་རིག་དབྱེར་མེད་བརྟན་པར་ཤོག །ཀུན་ཁྱབ་ཐུགས་རྗེ་ཕྱག་རྒྱའི་ཆོ་འཕྲུལ་གཟིས། །འཁོར་འདས་ཟིལ་གྱིས་གནོན་པའི་བཞད་པ་རྩལ། །ཞིང་འདིར་འཇམ་དབྱངས་དགའ་བའི་བཤེས་གཉེན་དུ། །སྤྲུལ་པའི་ཟློས་གར་མི་ནུབ་བརྟན་པར་ཤོག །ཁྲི་སྲོང་སྡེའུ་བཙན་འཕྲིན་ལས་སྒྱུ་མའི་འཕྲུལ། །ངག་དབང་ཚངས་སྲས་བཞད་པ་བློ་མཛོད་སྒོ། །འབྱེད་པའི་སྐལ་བཟང་རྒྱ་མཚོས་གངས་ལྗོངས་ཀྱིས། །ཕན་བདེའི་དགའ་སྟོན་སྤེལ་བཞེད་ལྷུན་གྲུབ་ཤོག །གནམ་སའི་དཀྱིལ་འཁོར་ཀུན་ལ་དབང་ཕྱུག་པའི། །བསོད་ནམས་དཔུང་པས་རྫོགས་སངས་རྒྱས་ཀྱི་བསྟན། །འདེགས་པའི་སྐུ་ཚེ་མངའ་ཐང་རྒྱ་མཚོའི་རླབས། །སྲིད་མཐའི་བར་དུ་ཡོལ་བ་མེད་པར་ཤོག །ལྷ་སྲས་མུ་ཁྲི་བཙན་པོ་སྔོན་གོམས་ཀྱི། །བག་ཆགས་བཟང་པོས་བོད་དང་བོད་ཆེན་གྱི། །སྐྱེ་རྒུའི་གཉའ་བར་ཁྲིམས་གཉིས་གསེར་གྱི་ཤིང༌། །ལྕི་བའི་རྫོགས་ལྡན་དགའ་སྟོན་དར་དྲག་ཤོག །འགྱུར་མེད་རྡོ་རྗེས་རབ་མཚན་ཁྲི་ཆེན་པོར། །ངག་གི་དབང་ཕྱུག་གྲུབ་པའི་རྣམ་དཔྱོད་ཀྱིས། །པདྨ་ཀཱ་རའི་བཀའ་གཏེར་བཤད་སྒྲུབ་བསྟན། །འཛིན་ཕྱིར་ཆོས་འཁོར་རྟག་ཏུ་སྐོར་བར་ཤོག །གན་ཇག་ཐང་ཏ་ཞིང་འདིར་སྲིད་བཟུང་སྟེ། །སྔོན་ནས་ཟབ་གཏེར་སྒོ་ཕྱེའི་འཕྲིན་ལས་དང༌། །སླད་མར་བཀའ་བབས་མཐའ་དག་གེགས་མེད་དུ། །ལྷུན་གྲུབ་བསྟན་འགྲོའི་ཉེར་འཚོར་འགྱུར་བར་ཤོག །ཆོས་རྒྱལ་(༦༤ན) ― GLG021_Page_0745 ―
[མ་དཔེ་གཟིགས་ན་འདིར་གནོན།]
ཡབ་སྲས་ལོ་ཆེན་བཻ་རོའི་ཞབས། །རྣམ་དག་སྨོན་ལམ་འབྲས་སྨིན་དུས་གཅིག་ཏུ། །འཛོམ་པའི་རྟེན་འབྲེལ་མཐུ་ལས་སཱ་ལའི་ལྗོངས། །ཕན་བདེའི་སྲོག་གི་ཀ་བ་ཚུགས་པར་ཤོག །སངས་རྒྱས་གཉིས་པ་ཨྱོན་པདྨ་ཡི། །ཐེག་པ་རིམ་དགུའི་སྨིན་གྲོལ་གདམས་པའི་གླིང༌། །ཀློག་པ་ཐོས་བསམ་སྤོང་བ་བསམ་གཏན་དང༌། །བྱ་བ་ལས་ཀྱི་འཁོར་ལོ་རྒྱས་པར་ཤོག །འཇིག་རྟེན་སྤྱི་དང་ཁྱད་པར་རྒྱ་ཧོར་བོད། །ཡང་སྒོས་དབུས་གཙང་རུ་བཞིའི་རྒྱལ་ཁམས་འདིར། །མི་ཕྱུགས་ནད་རིམས་འཐབ་རྩོད་དབུལ་ཕོངས་སོགས། །དུས་ཀྱི་ཆད་པ་མཐའ་དག་ཞི་བར་ཤོག །ཚེ་ཡང་རིང་པོར་གནས་པའི་དགེ་མཚན་དང༌། །ལོ་ཏོག་རྩི་ཤིང་ནགས་ཚལ་དུས་སུ་སྨིན། །མཐའ་བཞིའི་དངོས་ཀུན་འདུ་བ་ལོངས་སྤྱོད་འཕེལ། །སྒོ་གསུམ་སིམ་པའི་ཚོར་བ་མྱོང་བར་ཤོག །རྣམ་དག་བསམ་པས་འདིར་འབད་རྒྱུ་སྦྱོར་མཁན། །སྐྱེ་བར་དམ་པའི་མགོན་གྱིས་རྗེས་བཟུང་ནས། །དོན་གཉིས་ལྷུན་གྱིས་གྲུབ་པའི་དགའ་སྟོན་གྱིས། །ཕྱོགས་དུས་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་བདེན་པ་བརྗོད་པའི་སྨོན་ལམ་གྱི་ཚིགས་བཅད་འདི་ནི་ཆོས་རྒྱལ་གཏེར་བདག་གླིང་པའི་འཁྲུངས་རབས་གསོལ་འདེབས་དང་ལྷན་དུ་ཨྱོན་སྨིན་གྲོལ་གླིང་དུ་འཛུགས་རྩིས་ཀྱིས་འཆམས་དཔོན་དགེ་སློང་ངག་དབང་དཀོན་ཅོག་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བསྐུལ་བ་པོ་ཉིད་དོ། །ཕྱག་ན་པད་དཀར་ཐུགས་རྗེའི་བྱིན་རླབས་མཐུས། །ཟ་ཧོར་རིགས་འཛིན་བྱང་སེམས་མྱུ་གུ་རྩལ། །རྣམ་སྣང་གངས་ཅན་མཚོ་ལྟར་(༦༤བ) ― GLG021_Page_0746 ―
[མ་དཔེ་གཟིགས་ན་འདིར་གནོན།]
འཁོར་བའི་མཐའ། །སྟོས་མིན་དེ་སྲིད་རྡོ་རྗེ་ལྟར་བརྟན་ཤོག །སངས་རྒྱས་བསྟན་དང་འགྲོ་བའི་བདེ་སྐྱིད་རྣམས། །རྒྱ་མཚོ་ཆེ་བཞིན་རྟག་ཏུ་འཕེལ་མཛད་པ། །མི་དབང་སྐུ་ཚེ་ཉི་ཟླ་དང་མཉམ་ཞིང༌། །རིགས་བརྒྱུད་མཚན་ཇུས་མངའ་ཐང་འཕེལ་བར་ཤོག །འཇིག་རྟེན་སྤྱི་དང་ཁྱད་པར་བོད་ཡུལ་དུ། །དབུལ་ཕོངས་ནད་རིམས་འཐབ་རྩོད་ཀུན་ཞི་ཞིང༌། །འཛམ་གླིང་ཚེ་ལོ་བརྒྱད་ཁྲིའི་སྐྱེ་རྒུ་ཡི། །བསོད་ནམས་མཉམ་པོར་དབང་བའི་སྐལ་ཐོབ་ཤོག །ཉ་སྟོང་བརྒྱད་གསུམ་ལ་སོགས་དུས་བཟང་པོར། །འཕགས་མཆོག་མཆོད་བསྟོད་སྒོམ་བཟླས་བགྱིས་པ་ཀུན། །ཚེ་འདིར་བདེ་སྐྱིད་ཉམས་སུ་མྱོང་བ་དང༌། །ཕྱི་མ་གྲུ་འཛིན་གནས་སུ་སྐྱེ་བར་ཤོག །ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པདྨ་འབྱུང་གནས་བྱིན་རླབས་ཀྱིས། །དེང་འདིར་སྨོན་ལམ་ཇི་ལྟར་བཏབ་པ་ཀུན། །འབད་རྩོལ་མེད་པར་ངང་གིས་འགྲུབ་པར་ཤོག །ཅེས་པ་འདི་ཡང་མ་ཎི་བ་དགོས་པ་སོགས་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །འཇམ་དབྱངས་དགའ་བའི་བཤེས་གཉེན་འདྲ་འབག་ལ། །བླ་མ་བདེ་གཤེགས་ཡི་དམ་དཀྱིལ་འཁོར་ལྷ། །དམ་ཅན་སྲུང་མས་ཡོངས་བསྐོར་འཇའ་ཚོན་བཞིན། །རྣམ་བཀྲ་མིག་གི་གཟིགས་མོར་ཚར་དུ་དངར། །ལྷག་བསམ་དག་པའི་ཞིང་ས་གཤིན་པོ་ལ། །ཟང་ཟིང་གཏོང་བའི་ས་བོན་ཡོངས་བཏབ་པ། །ལེགས་བྱས་ཟད་མི་ཤིས་པའི་སྙེ་མ་ཡི། །འབྲས་བུའི་ཁུར་གྱིས་རྟག་ཏུ་དུད་པར་ཤོག །གཡོར་(༦༥ན) ― GLG021_Page_0747 ―
[མ་དཔེ་གཟིགས་ན་འདིར་གནོན།]
པ་མདོ་བཙུན་ངག་དབང་ལྷུན་གྲུབ་ཀྱི། །མི་ནོར་རིགས་བརྒྱུད་ཚེ་དཔལ་འབྱོར་པ་ཀུན། །ཉི་ཟླའི་བགྲོད་པ་ཇི་བཞིན་ཆད་མེད་ཅིང༌། །བདེ་སྐྱིད་སྣང་བས་ཡོངས་སུ་ཁྱབ་པར་ཤོག །ཅེས་མདོ་པ་ངག་དབང་ལྷུན་གྲུབ་ཀྱིས་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོས་བགྱིས་པ་མངྒ་ལཾ། །ཐུགས་བསྐྱེད་ས་བོན་ཚོགས་གཉིས་བརླན་གཤེར་གྱིས། །ལེགས་བསྲིངས་ཆོས་གཟུགས་སྡོང་པོ་དར་དྲག་པར། །འཕྲིན་ལས་འབྲས་བུའི་ཁུར་ལྕི་འགྲོ་ཀུན་ལ། །ཉེར་འཇུག་བུ་རམ་ཤིང་པ་ས་བརྟོལ་དབང༌། །ཨེ་མ་སྲིད་པའི་མིག་འཕྲུལ་བཀྲག་པོ་ཆེས། །འདྲིད་པ་སེམས་ཅན་བསམ་པའི་ཁྱད་པར་བཞིན། །དཔལ་གྱི་མགུར་ལས་གསུངས་པའི་ཆོས་ཀྱི་མཐའ། །ནམ་མཁའི་སྐེ་རགས་མས་ཀྱང་ག་ལ་འཆིང༌། །འོན་ཏེ་སྔ་ཕྱིའི་བསྟན་ལ་ཚད་མའི་དཔང༌། །ལོ་པཎ་གྱིས་བསྒྱུར་མདོ་མང་མཁས་རྣམས་ཀྱིས། །དཀར་ཆག་བཏབ་ལས་གླེགས་བམ་བུ་གའི་གྲངས། །ལེགས་བསྐྲུན་བསོད་ནམས་བྱེ་བའི་ཕུང་པོ་ཡིས། །རྩོད་ཅན་དོགས་པའི་གནས་མིན་དཔྱོད་ལྡན་ཀུན། །རྣམ་དག་ཐུབ་གཞུང་དགོངས་འགྲེལ་བགྲང་བྱ་རུ། །འདྲེན་ནུས་ཤཱཀྱ་སེང་གེའི་ལུང་རྟོགས་བསྟན། །བཤད་སྒྲུབ་བྱ་བས་དབྱར་མཚོ་ལྟར་འཕེལ་ཞིང༌། །བཀའ་གདམས་བསྟན་པའི་སྲོག་ཏུ་མཁྱེན་བརྩེའི་སྨན། །ལེགས་སོང་འཇམ་དཔལ་རྡོ་རྗེ་བཙོང་ཁ་པའི། །རིང་ལུགས་དར་ཞིང་དེ་འཛིན་བཤེས་གཉེན་བསྟན། །ཁྲིམས་ལྡན་(༦༥བ) ― GLG021_Page_0748 ―
[མ་དཔེ་གཟིགས་ན་འདིར་གནོན།]
འདུས་སྡེ་བླ་ནས་བླར་འཕེལ་ཤོག །གསེར་མདོག་ཞྭ་ཡི་ཆོས་སྲིད་གཉིས་ལྡན་ཁྲིམས། །ཛམྦུ་པྲྀཀྵས་མཚན་པའི་ས་ཆེན་པོར། །ལེགས་ཁྱབ་སྡུག་བསྔལ་ཀུན་ཞི་བདེ་སྐྱིད་ཀྱི། །རྫོགས་ལྡན་གཞོན་ནུའི་རྩེ་དགའ་དགོད་པར་ཤོག །རྒྱལ་བའི་མཛད་མཆོག་གསུང་གི་འཕྲིན་ལས་ཀྱི། །ཟླ་བའི་མ་མ་ཨ་མྲའི་ཚིག་གུ་ཡིས། །གཅུས་པའི་གླེགས་བམ་ཡོན་སྦྱོར་སྦྱིན་པའི་བདག །ཚེ་དབང་དར་རྒྱས་མཆིས་འབྲང་རིགས་བརྒྱུད་བཅས། །བྲིས་མཁན་ཤོག་སྦྱོར་སྒོ་གསུམ་འབད་པའི་བྲན། །མདོར་ན་ཆེད་དུ་ངལ་བསྟེན་དུད་འགྲོ་སོགས། །འདི་སྣང་ནད་མུག་འཐབ་རྩོད་ཚེར་རྣོན་རྩེས། །ལུས་ངག་ཡིད་ལ་ཟུག་རྔུ་མི་འབྱིན་ཤོག །དལ་འབྱོར་རྟེན་ལ་ཚེ་ཡང་རིང་པོར་གནས། །འཛད་མེད་ལོངས་སྤྱོད་སྙན་པའི་གྲགས་པ་འབར། །སྐྱེས་བུ་གསུམ་གྱི་ལམ་བཟང་ལ་བརྟེན་ནས། །གཏན་གྱི་མདུན་མ་རྣམ་དག་བསྒྲུབ་ནུས་ཤོག །ཡང་སྲིད་བརྒྱུད་མར་ལྷ་མིའི་རིན་ཅེན་སྐས། །དགེ་བཅུའི་གདང་བུར་འཛེགས་ནས་ངེས་ལེགས་ཀྱི། །ནོར་བུའི་བ་གམ་མཐོ་བརྩེགས་ལ་ཞུགས་ཏེ། །སྒྲིབ་གཉིས་གཏན་བཅོམས་སངས་རྒྱས་མངོན་གྱུར་ཤོག །ཚེ་འདིའི་ལུས་བསྐྱེད་ཕ་མས་ཐོག་དྲངས་པའི། །མཁའ་མཉམ་འགྲོ་རྣམས་བྱང་ཆེན་ཐོབ་ཆེད་རྒྱུར། །འདིས་མཚོན་སྔོན་བསགས་ཆོས་དཀར་བསྒྲུབས་སོ་ཅོག །དྲི་བྲལ་ལྷག་བསམ་དག་པའི་མཐུ་ཡིས་བསྔོ། །ཞེས་མདུན་ན་འདོན་ཚེ་དབང་དར་རྒྱས་ཀྱིས་མདོ་སྡེ་བསྐལ་བཟང༌། རྒྱ་ཆེ་རོལ་པ། ཕལ་ཆེན། སྙིང་རྗེ་པད་དཀར། དམ་ཆོས་པད་དཀར་དང་བཅས་པའི་གླེགས་བམ་དགུ་བློ་ངན་ཞེས་(༦༦ན) ― GLG021_Page_0749 ―
[མ་དཔེ་གཟིགས་ན་འདིར་གནོན།]
པ་ལྕགས་མོ་བྱའི་ལོ་གསར་དུ་བཞེངས་པའི་བསྔོ་སྨོན་འདི་ལྟ་བུ་ཞིག་དགོས་ཞེས་རྒྱུ་སྦྱོར་མཁན་པོས་བསྐུལ་བ་ལྟར་ཟ་ཧོར་གྱི་བནྡེས་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་རིག་བྱེད་འཛིན་པ་མཐར་རྒྱས་པ་བློ་བཟང་དབང་པོས་བགྱིས་པ་སརྦདེཀྐཱ་ལེཥུལཀྵྨཱིབྷ་ཝནྟུ། །སླུ་མེད་དཀོན་ཅོག་རིན་ཅེན་རྣམ་པ་གསུམ། །ཁྱད་པར་འོད་དཔག་མེད་མགོན་ཐུགས་རྗེ་ཡིས། །ཧོར་ཚང་ནོར་བུའི་མཆིས་འབྲང་ཀླུ་ག་དང༌། །ཕུན་ཚོགས་རབ་བརྟན་དོན་གཉིས་ལྷུན་གྲུབ་ཤོག །ངག་གི་དབང་ཕྱུག་བློ་བཟང་རྒྱ་མཚོའི་སྡེར། །མི་ཕྱེད་དད་པས་གསོལ་བ་བཏབ་པའི་མཐུས། །འགལ་རྐྱེན་བར་ཆད་ཐམས་ཅད་ཞི་བ་དང༌། །ཚེ་དཔལ་བསོད་ནམས་མངའ་ཐང་རྒྱས་པར་ཤོག །ཡང་སྲིད་ཀུན་ཏུ་མགོན་པོ་ཁྱོད་ཉིད་ཀྱིས། །འབྲལ་བ་མེད་པར་རྗེས་སུ་རབ་འཛིན་ཅིང༌། །བདེ་བ་ཅན་དུ་བརྫུས་ཏེ་པདྨ་ལས། །སྐྱེས་ནས་འགྲོ་རྣམས་མ་ལུས་འདྲེན་པར་ཤོག །ཅེས་འདི་ལྟ་བུ་ཞིག་དགོས་ཞེས་ཏྲེ་བོ་ཧོར་ཚང་ནོར་བུས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །བགྲང་ཡས་ལུས་ཅན་བསོད་ནམས་ཞིང་མཆོག་ཏུ། །སྐྱེ་འཕགས་དགེ་འདུན་སྡུད་པའི་སྒྲ་སྙན་པོ། །ཕྱོགས་བཅུར་ལྷང་ལྷང་སྒྲོག་བྱེད་དུང་གི་གོས། །སྣ་ཚོགས་ཟ་འོག་དར་གྱི་ཕོན་པོ་ཅན། །མི་ཕྱེད་དད་པས་ཕུལ་བས་རྒྱུ་སྦྱོར་རྣམས། །ཡང་སྲིད་ཀུན་ཏུ་རྒྱལ་བའི་གསུང་རབ་ཚོགས། །རྣ་བའི་རྒྱན་དུ་ཉེར་སྤུད་ཉམས་བསྟར་བས། །འདི་ཕྱིའི་འདུན་མ་ལྷུན་གྱིས་གྲུབ་པར་(༦༦བ) ― GLG021_Page_0750 ―
[མ་དཔེ་གཟིགས་ན་འདིར་གནོན།]
ཤོག །ཅེས་འཕྱོས་བཀྲ་ཤིས་སྡེ་ཆེན་གྱི་དུང་གོས་དར་བཅས་རྣམ་པར་རྒྱལ་བའི་ཕན་བདེ་ལེགས་བཤད་གླིང་གི་གྲ་རྒྱུན་བཅུ་གཉིས་ཀྱིས་སོ་སོ་ནས་དངུལ་སྲང་དོ་དང་ཞོ་རེ་བསྡུས་ནས་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །ནམ་མཁའི་མཐའ་ལྟར་ཡངས་པའི་བློ་གྲོས་ཀྱིས། །ལེགས་པར་བཤད་པས་བགྲང་ཡས་གདུལ་བྱ་རྣམས། །སྐལ་པ་བཟང་པོར་བསྒྱུར་མཛད་ངག་གི་དབང༌། །དོན་ཀུན་གྲུབ་པའི་དཔལ་ལ་གསོལ་བ་འདེབས། །སྲ་བརྟན་སེང་གེས་བཏེག་པའི་ཁྲི་ཆེན་པོ། །པདྨ་ཉི་ཟླའི་གདན་ལ་མགོན་པོ་ཁྱོད། །ཚེ་མཐའ་ཡས་པའི་ངོ་བོར་བཞུགས་གྱུར་ནས། །ཆོས་འཁོར་རྒྱུན་ཆད་བྲལ་བར་རྟག་བསྐོར་ཤོག །སྐྱབས་མཆོག་རིན་ཅེན་གསུམ་གྱི་བདེན་པ་དང༌། །མཁའ་འགྲོ་དམ་ཅན་སྲུང་མའི་མཐུ་སྟོབས་ཀྱིས། །ཇི་ལྟར་བསམ་པའི་རེ་བ་མ་ལུས་པ། །ཐོགས་པ་མེད་པར་ལྷུན་གྱིས་གྲུབ་པར་ཤོག །ཅེས་ཆོས་རྗེ་སྔགས་རམས་པ་ནམ་མཁའ་བཟང་པོའི་གསོལ་འདེབས་བརྟན་བཞུགས་འདི་ནི་ཐང་སག་དགའ་ལྡན་ཆོས་འཁོར་བ་སྤྱི་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །ཚེ་མཐའ་ཡས་མགོན་ཕྱག་གི་ལྷུང་བཟེད་ཀྱི། །ཁ་ནས་གྱེན་འཕྱུར་བདུད་རྩི་སྲོག་ཟུངས་སུ། །འགྱུར་བར་གསོལ་བ་ཉེར་བཏབ་རེ་འབྲས་ཀུན། །འགྲུབ་པར་མཆོག་གསུམ་(༦༧ན) ― GLG021_Page_0751 ―
[མ་དཔེ་གཟིགས་ན་འདིར་གནོན།]
ཐུགས་རྗེས་དེང་བྱིན་རློབས། །འཁྲུལ་མེད་རྒྱལ་བའི་གསུང་ངག་སྨིན་གྲོལ་ལ། །དབང་ཕྱུག་བློ་གྲོས་བུམ་བཟང་ཡོངས་གཏམས་པ། །རྒྱ་ཆེན་གནས་ལྔ་རིག་པ་མཚོ་བྱུང་མའི། །དྲིན་ལས་ལེགས་རྙེད་བསྐལ་པར་ཞབས་བརྟན་ཤོག །གཏི་མུག་མུན་སངས་སྡེ་བཞིའི་གཙུག་ལག་ཆེར། །རྣམ་དཔྱོད་རབ་རྒྱས་ཁྲིམས་གཉིས་གསེར་འཁོར་གྱིས། །རྒྱ་མཚོའི་གོས་ཅན་ཁྱོན་ལ་མངའ་སྒྱུར་བ། །སྐུ་ཚེ་གཡུང་དྲུང་ལྟ་བུར་བརྟན་པར་ཤོག །བློ་བཟང་གྲགས་བསྙན་བསྟན་པའི་རྒྱལ་མཚན་ཏོག །འོད་སྟོང་སྲིད་གསུམ་ཀུན་ཁྱབ་འགྲོ་རྣམས་ཀྱིས། །འཁོར་མུན་དུ༔ཁ་མཐར་བྱས་ཕན་དང་བདེའི། །སྣང་བ་གསར་པ་ཕྱོགས་བརྒྱར་འབར་བར་ཤོག །དགའ་ལྡན་ལུགས་གཉིས་ཕོ་བྲང་རྒྱལ་པོའི་ཁབ། །རྫོགས་ལྡན་རྣམ་པར་ཐར་པ་སྒོ་བཞི་པོ། །མ་ཕམ་འཕགས་ཡུལ་བྱོན་པར་ཡོངས་ཕྱེ་ནས། །ལུས་ཅན་ཀུན་གྱི་ངལ་གསོར་འགྱུར་བར་ཤོག །ཤེས་རབ་མཆོག་གྱུར་ཤཱ་རིའི་བུ་ཡི་སྤྱན། །གཡས་པ་བསོད་ནམས་ཞིང་བཞུགས་གནྡཱོ་ལ། །གྲ་པ་མངོན་པར་ཤེས་པས་ལེགས་བཏབ་པ། །སྡེ་དགོན་མ་བུ་སྲིད་མཐར་རྒྱས་པར་ཤོག །རིན་ཅེན་རྣམ་གསུམ་བདེན་པ་རྒྱལ་སྲས་བཅས། །བྱིན་རླབས་ཚོགས་གཉིས་རབ་རྫོགས་མངའ་ཐང་ཆེ། །ཆོས་དབྱིངས་མི་འགྱུར་ཆོས་ཅན་སླུ་མེད་མཐུས། །སྨོན་པའི་རེ་བ་མཐའ་དག་ལྷུན་གྲུབ་ཤོག །ཅེས་སྤྱན་གཡས་སྤྱི་སོས་རིང་འཚོའི་རྟེན་འབྱུང་བསྒྲིགས་པའི་ཚེ་མཁན་ཆེན་རབ་འབྱམས་སྨྲ་བའི་ཤེས་གཉེན་སྐུ་སྐྱེ་བསྟན་འཛིན་རྒྱ་(༦༧བ) ― GLG021_Page_0752 ―
[མ་དཔེ་གཟིགས་ན་འདིར་གནོན།]
མཚོའི་གསུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །རྣམ་ཤེས་ཚོགས་བརྒྱད་སྲིན་པོའི་གྲོང་ཁྱེར་དབུས། །ཟུར་གསུམ་སྙིང་དབྱིབས་ཟངས་མདོག་དཔལ་རིའི་རྩེར། །རིག་པའི་རང་རྩལ་པདྨ་ཐོད་འཕྲེང་དང༌། །དབྱེར་མེད་དྲིན་ཅན་བླ་མར་གསོལ་བ་འདེབས། །ཆེ་མཆོག་ལ་སོགས་ཞི་ཁྲོ་ཡོངས་འདུས་པའི། །མ་འགགས་གདངས་ལས་སྣང་སྲིད་འཁོར་འདས་ཆོས། །གང་ཤར་རང་གྲོལ་བསྐར་བརྒྱར་ཞབས་བརྟན་ཅིང༌། །ཚེ་རབས་ཀུན་ཏུ་དབང་བསྐུར་བདག་བྱིན་རློབས། །ཉེ་ལྡེ་དབོན་པོ་ངག་དབང་འཕྲིན་ལས་ཀྱི་ཁ་ཏོན་དུ་ཚིགས་བཅད་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །རྣམ་འདྲེན་དེ་སྲས་སློབ་མའི་ཚོགས་རྣམས་ཀྱི། །ཕུལ་བྱུང་ཐུགས་རྗེ་ཆེན་པོའི་བྱིན་རླབས་མཐུས། །རྗེ་དབོན་ངག་དབང་དཀོན་ཅོག་རྒྱ་མཚོ་ཡི། །དལ་འབྱོར་རྟེན་བཟང་སྲིད་པ་མྱུར་འཛིན་ཤོག །རྒྱལ་གསུང་ཡོངས་ལ་ཀློག་པ་ཐོས་བསམ་དང༌། །ནང་དུ་མཉམ་པར་འཇོག་པ་ཚུལ་བཞིན་དུ། །བསྒྲུབ་ནུས་དབུས་གཙང་དག་པའི་ཞིང་ཁམས་འདིར། །མཐོ་རིས་ཡོན་ཏན་བདུན་ཚང་ལུས་ཐོབ་ཤོག །བརླང་པོར་སྤྱོད་པ་ལྷ་མིའི་གདོན་ཚོགས་ཀྱིས། །ཉེར་འཚེ་གླགས་བལྟའི་མུན་པ་ཀུན་སངས་ནས། །བསྟན་འགྲོའི་སྣང་བ་རབ་སྟེར་ཉིན་མོར་བྱེད། །གདུལ་བྱའི་མཁའ་(༦༨ན) ― GLG021_Page_0753 ―
[མ་དཔེ་གཟིགས་ན་འདིར་གནོན།]
ལ་ཤར་ཞིང་བརྟན་པར་ཤོག །ཅེས་དྷཱི་ཚ་དབོན་པོ་ངག་དབང་དཀོན་ཅོག་རྒྱ་མཚོའི་ཡང་སྲིད་གྱུར་འབྱོན་གྱི་བདེན་ཚིག་བརྗོད་པ་འདི་ནི་སྤྲུལ་སྐུའི་གསུང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་བསམ་མཐོང་ལོ་ཙཱ་བ་ཕུན་ཚོགས་དབང་པོའོ། །རྩ་བརྒྱུད་བླ་མ་ཡི་དམ་མཁའ་འགྲོ་དང༌། །དམ་ཅན་ཆོས་སྲུང་ཐམས་ཅད་ཁྱོད་ཀྱི་སྐུར། །ཉེར་ཚང་འཇམ་མགོན་བློ་བཟང་གྲགས་པ་ཡི། །ཐུགས་རྗེ་བྱིན་རླབས་ནུས་པའི་མཐུ་དཔུང་སྐྱེད། །གང་གི་བསྟན་པ་ནམ་མཁའི་མཐའ་ཀླས་པར། །སྤེལ་བའི་བཀའ་བབས་ངག་དབང་བློ་ཡི་གཏེར། །སྐལ་བཟང་རྣམ་འདྲེན་བཞི་པའི་འཕྲིན་ལས་རྒྱུན། །རྒྱ་མཚོའི་རླབས་བཞིན་ཡོལ་མེད་ཞབས་བརྟན་ཤོག །སངས་རྒྱས་གཉིས་པ་ཀུན་མཁྱེན་བཙོང་ཁ་པའི། །བསྟན་སྲིད་རྒྱ་ཆེ་མཚོ་ལྟར་གཏིང་ཟབ་པ། །ཡོངས་འཛིན་ལྷ་མིའི་དབང་ཕྱུག་རྣམ་ཐོས་བུར། །ལེགས་ལྡན་སྐུ་ཚེ་མངའ་ཐང་རྒྱས་པར་ཤོག །ཚེ་རིང་གནམ་གྱི་ཤེ་མོང་དཔུང་པ་ཡིས། །ས་ལ་སྟོབས་ཀྱི་འཁོར་ལོས་ཡོངས་སྒྱུར་བ། །དགའ་ལྡན་ཕོ་བྲང་ལུགས་གཉིས་རྒྱལ་བའི་ཁྲིམས། །གསེར་ཤིང་ཀུན་གྱི་གཉའ་བར་རྟག་ལྕི་ཤོག །མཐའ་འཁོབ་མོན་ཡུལ་ལྷ་མིན་གཉེན་པོ་རུ། །དགའ་ལྡན་ཚངས་པའི་འཁོར་ལོས་སྒྲ་གཅན་མགྲིན། །བཅད་ནས་རྣམ་པར་རྒྱལ་བའི་དར་དཀར་པོ། །ལྷ་དབང་ཕོ་བྲང་རྩེ་མོར་འཕྱར་བར་ཤོག །ཡེ་ཤེས་མགོན་པོ་ལྕམ་དྲལ་བཀའ་སྡོད་ཚོགས། །ཁྱད་པར་གནོད་སྦྱིན་ཀྵེ་ཏྲ་པཱ་ལ་དང༌། །ལས་(༦༨བ) ― GLG021_Page_0754 ―
[མ་དཔེ་གཟིགས་ན་འདིར་གནོན།]
ཀྱི་གཤིན་རྗེ་འདོད་ཁམས་དབང་ཕྱུག་མས། །བསྟན་ལ་འཁུ་བའི་དགྲ་བགེགས་ཚར་ཆོད་ཅིག །བསླབ་གསུམ་ལུས་ལ་སྡེ་སྣོད་གསུམ་གྱི་རྒྱན། །ཉེར་སྤྲས་ཞྭ་སེར་རྣམ་དག་བསྟན་པ་ཡི། །རྟེན་འབྲེལ་མི་བསླུ་དཀོན་ཅོག་བདེན་པའི་མཐུས། །བདུད་སྡེ་སྙིང་ཞུགས་དཔུང་ཚོགས་ཞི་བར་ཤོག །ཅེས་པ་འདིའང་དགའ་ལྡན་རྣམ་རྒྱལ་ལྷ་རྩེར་འཛུགས་རྒྱུར་མེ་རག་བླ་མ་བློ་གྲོས་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ངག་དབང་ཚངས་སྲས་བཞད་པའི་བློ་གྲོས་ཀྱིས། །སྐལ་བཟང་རྒྱ་མཚོའི་རེ་སྐོང་ཕས་རྒོལ་ཚོགས། །གཞོམ་ལ་མི་འཇིགས་རྡོ་རྗེ་ཕ་ལམ་མཚན། །ཐུབ་བསྟན་ཡོངས་ཀྱི་ཤིང་རྟར་གསོལ་བར་འདེབས། །འཇམ་དབྱངས་དབྱངས་ཅན་མགྲིན་པར་རྩེ་འཇོ་ཡི། །རྣམ་དཔྱོད་དཔྱོད་ལྡན་དགའ་སྟོན་སྤེལ་བའི་བཤེས། །མ་འདྲིས་འདྲིས་པའི་འགྲོ་བཞིན་རིས་མེད་གཉེན། །སྲིད་མཐའ་མཐའ་བྲལ་བར་དུ་ཞབས་བརྟན་ཤོག །ཤེས་བྱ་ཀུན་ལ་འཇིགས་མེད་གྲགས་པའི་སྒྲ། །ཕྱོགས་ལས་རྣམ་པར་རྒྱལ་བའི་ཤིང་རྟ་ཆེ། །འདྲེན་པའི་འདུས་སྡེ་དབྱར་མཚོ་ལྟར་འཕེལ་ཞིང༌། །བཤད་སྒྲུབ་འཕྲིན་ལས་རྒྱུན་མི་ཆད་པར་ཤོག །ཅེས་སྨོན་ལམ་གྱི་ཚིགས་སུ་བཅད་པ་འདི་ནི་མངོན་དགའ་ཆོས་སྡེ་སོགས་ཀྱི་མཁན་པོ་རྗེ་དབོན་ངག་དབང་ནམ་མཁས་བསྐུལ་མ་མཛད་པ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །ཤེལ་གྱི་ལྷུན་པོ་ཟླ་བ་ཞུན་མ་ཡིས། །(༦༩ན) ― GLG021_Page_0755 ―
[མ་དཔེ་གཟིགས་ན་འདིར་གནོན།]
ལན་བརྒྱར་བྱུགས་པས་བསྒྲུན་མིན་མཚན་དཔེའི་སྐུ། །འགྲོ་བ་ཀུན་སྒྲོལ་ཕྱག་ན་པད་དཀར་འཆང༌། །ཐུབ་དྲུག་སྒོ་མ་བཞིར་བཅས་ལྷ་ཚོགས་ལ། །ཟབ་གཏེར་རིགས་འཛིན་བརྒྱུད་པ་མུ་ཏིག་འཕྲེང༌། །སྤེལ་ལེགས་ངོས་ཀྱི་སུག་པའི་རི་མོ་ཡི། །མཛེས་རྒྱན་མཐོང་ཐོས་དྲན་རེག་ཡིད་ཅན་ཀུན། །གྲུ་འཛིན་རི་བོར་འཁྲིད་པའི་ས་མཁན་བཞིན། །རིས་མེད་སེམས་ཅན་ཀུན་ལ་བྱམས་པའི་སྤྱན། །དཀྱུས་རིང་ཉེར་གཟིགས་རླུང་གིས་བསྐུལ་བའི་གཟིངས། །འཁོར་བའི་མཚོ་ལས་བསྒྲལ་ཏེ་མྱང་འདས་ཀྱི། །རིན་ཅེན་གླིང་དུ་འཁྲིད་པར་བདག་བྱིན་རློབས། །ཚེ་དབང་རབ་བརྟན་མཆིས་འབྲང་རིགས་ཀྱི་བུ། །བརྒྱུད་པར་བཅས་ཀུན་ཚེ་དཔལ་བསོད་ནམས་སྟོབས། །རབ་རྒྱས་ཡང་སྲིད་ཕྱི་མར་འཕགས་མཆོག་གིས། །རྗེས་བཟུང་དག་པའི་ཞིང་དུ་འདྲེན་པར་ཤོག །སྤངས་དང་རྟོགས་པའི་ཡོན་ཏན་སངས་རྒྱས་རྣམས། །མཉམ་ཡང་ལྔ་བདོའི་འགྲོ་ལ་ཐུགས་རྗེའི་དཔུང༌། །རྣམ་འདྲེན་གཞན་གྱིས་འགྲན་མིན་པདྨ་འབྱུང༌། །དུས་གསུམ་རྒྱལ་བའི་སྤྱི་གཟུགས་ཁྱོད་ཁོ་ན། །གང་གི་གདམས་པས་རྣམ་གྲོལ་རྒྱུ་འཕྲུལ་གར། །ངོ་མཚར་བཀོད་པའི་གཟིགས་མོ་ཚར་དངར་བ། །རྗེ་འབངས་ཉེར་ལྔས་ཡོངས་བསྐོར་ལེགས་བྱས་ཀྱི། །ཤིང་རྟས་དྲངས་པའི་ནོར་བུའི་མཆེད་ཟླ་བཞིན། །དད་པ་རས་དཀར་གཙང་མའི་རྫིང་བུའི་ངོས། །ལག་པའི་རི་མོ་པདྨའི་འདབ་མའི་རྒྱ། །གསལ་བའི་བྱིན་རླབས་སྙིང་ལ་ཉེར་འཇུག་པ། །མིག་སྔོན་འཕྲུལ་པོ་ཆེས་ཀྱང་འགོག་ནུས་ཅི། །ཚེ་དབང་རབ་བརྟན་མཆིས་(༦༩བ) ― GLG021_Page_0756 ―
[མ་དཔེ་གཟིགས་ན་འདིར་གནོན།]
འབྲང་རིགས་ཀྱི་༝༝༝། །རྫུས་སྐྱེས་མིག་གསུམ་མེ་ཡིས་བདུད་དཔུང་ལུས། །བསྲེགས་ཀྱང་སྟེང་འོག་བར་གསུམ་ལྷ་མ་སྲིན། །འདུལ་ཕྱིར་རྡོ་རྗེ་དྲག་པོ་རྩལ་གྱི་སྐུར། །རབ་བཞེངས་ཞི་ཁྲོའི་ལྷ་ཚོགས་ཡོངས་ཤར་བར། །བརྒྱུད་པ་དྲུག་ལྡན་བླ་བརྒྱུད་ཀུན་གསལ་ངོས། །དབང་པོའི་གཞུ་རིས་ལྟ་བུར་རྣམ་བཀྲ་བ། །མཆོག་ཐུན་དངོས་གྲུབ་སྩོལ་བའི་བྱེད་པོ་རུ། །རྩ་གསུམ་ཐུགས་རྗེ་མངོན་སུམ་ཤར་བ་བཞིན། །མོས་པའི་ལྕགས་ཀྱོས་ཁྲིད་པའི་གླང་པོ་ཡིས། །ལག་པའི་གོམ་འགྲོས་ལྷོད་པོར་བཀོད་པའི་རྗེས། །མངོན་སུམ་གསལ་བའི་བྱིན་རླབས་གྲུ་ཆར་གྱིས། །ཕན་བདེའི་མྱུ་གུ་བྱང་ཆེན་བར་སྐྱེད་སྲིངས། །ཚེ་དབང་རབ་བརྟན་༝༝༝། །ཇི་ལྟ་ཇི་སྙེད་ཆོས་ཀུན་སྤྱན་རས་ཀྱིས། །གཟིགས་པས་ལྷག་པོ་རྒྱལ་གཞན་མཐའ་དག་ལ། །མེད་ཀྱང་ས་བཅུའི་དབང་ཕྱུག་འཇམ་པའི་དབྱངས། །ངུར་སྨྲིག་གར་དུ་ཉེར་བརྫུ་བཙོང་ཁ་པར། །ཟབ་རྒྱས་བརྒྱུད་པ་མ་ཆད་རིན་ཅེན་འཕྲེང༌། །བཀོད་ལེགས་སྲད་བུར་བརྒྱུས་པ་འདྲེན་བྱེད་ལ། །སྔོན་མེད་ཟིལ་དངར་དགའ་སྟོན་ཆོ་ག་དག །རྫོགས་འདི་སྐལ་བཟང་བསོད་ནམས་ཟོང་གིས་བསྒྲུབས། །སྐྱེ་བར་ཕན་པ་བསྒྲུབ་ལ་རབ་སྨོན་པའི། །ལག་སོར་རྟགས་ཀྱི་རི་མོ་རྣམ་བཀྲ་བ། །ནམ་ཡང་ལྷོད་པ་མེད་པའི་མཛའ་ན་མོ། །རེ་བའི་འདོད་པ་འཇོ་བ་ཀུན་དགའི་དཔྱིད། །ཚེ་དབང་རབ་བརྟན་༝༝༝། །འཁོར་འདས་ཡོན་ཏན་ཕུན་ཚོགས་མི་ལྡན་ཀྱང༌། །གངས་རི་སྔོན་པོར་སྣང་བའི་འཁྲུལ་ཤེས་ལྟར། །ཟ་ཧོར་བཙུན་པ་ཨ་ཝདྷཱུ་ཏཱི་པའི། །གཟུགས་བརྙན་(༧༠ན) ― GLG021_Page_0757 ―
[མ་དཔེ་གཟིགས་ན་འདིར་གནོན།]
དད་ལྡན་བསོད་ནམས་ཞིང་གི་ཕུལ། །ལག་པའི་རི་མོ་རབ་བཀྲའི་མཐའ་སྐོར་དུ། །ལམ་རིམ་བླ་བརྒྱུད་གོང་གི་འཕྲོ་མཐུད་པས། །རྒྱལ་བའི་སྲས་ཀྱི་རླབས་ཆེན་སྤྱོད་པའི་ཚུལ། །སྐལ་བཟང་གདུལ་བྱར་སྟོན་ལ་རིངས་པ་བཞིན། །ཀླུ་སྒྲུབ་ཐོགས་མེད་བཞེད་སྲོལ་མཐོ་རིས་ཆབ། །མར་མེ་མཛད་དཔལ་ཛཧྣུས་བཏུངས་རྒྱུན། །བློ་བཟང་གྲགས་སྙན་ཐུགས་ཀྱི་རྒྱ་མཚོ་ཆེར། །བབས་འདིས་འགྲོ་བའི་སྒྲིབ་གཉིས་སྒོ་ཀུན་འཁྲུད། །ཚེ་དབང་རབ་བརྟན་༝༝༝། གསེར་གྱི་མདོག་ཅན་མཚན་དཔེའི་ཉི་མ་ཡིས། །འགྲོ་ཀུན་མ་རིག་གཉིད་ལས་སློང་མཛད་པ། །བུ་རམ་ཤིང་པའི་ཞབས་སེན་རྡུལ་དམར་པོ། །བདག་སོགས་ཀུན་གྱི་གཙུག་ཏུ་ལྷུང་བར་མཛོད། །རྣམ་དག་བསམ་པས་ཉེར་བསྐྲུན་བསོད་ནམས་འདིས། །ཚེ་དབང་རབ་བརྟན་མཆིས་འབྲང་རིགས་བརྒྱུད་དང༌། །བཟོ་བོར་བཅས་པའི་འདི་ཕྱི་བར་གསུམ་གྱི། །མདུན་མ་མཐའ་དག་ལྷུན་གྱིས་གྲུབ་པར་ཤོག །ཚངས་སྲས་བཞད་པའི་ངག་གི་དབང་ཕྱུག་གིས། །ཇི་སྙེད་ཤེས་བྱར་བལྟ་བའི་བློ་གྲོས་མིག །ཡངས་པས་སྐལ་བཟང་གདུལ་བྱ་རྒྱ་མཚོ་ཡི། །སྙིང་གི་གདུང་སེལ་ཁྱོད་ཀྱིས་རྗེས་སུ་ཟུངས། །རྣམ་དག་༝༝༝། །རྫོགས་སངས་རྒྱས་ཀྱང་རྒྱ་གར་པཎ་ཆེན་ཚུལ། །ཆགས་དང་བྲལ་ཡང་ཤེས་རབ་དགའ་མར་རོལ། །ཀུན་ལ་བརྩེ་ཡང་སྡེ་བརྒྱད་སྙིང་རྩ་འདར། །སྲིན་ཡུལ་རྟག་བཞུགས་རྒྱུན་དུ་བོད་སྐྱོང་མཚར། །རྣམ་དག་༝༝༝། །དག་ཞིང་ཡིད་དགའ་ཆོས་འཛིན་གཞལ་ཡས་སུ། །བཞུགས་ཀྱང་འཛམ་གླིང་འགྲོ་བའི་(༧༠བ) ― GLG021_Page_0758 ―
[མ་དཔེ་གཟིགས་ན་འདིར་གནོན།]
དོན་མཛད་པར། །ནམ་ཡང་ངལ་བ་མེད་པར་མི་ཕམ་མགོན། །ལྔ་བདོའི་འགྲོ་བ་མཐའ་དག་འདྲེན་པར་མཛོད། །རྣམ་དག་༝༝༝། །ཕུར་པའི་དཔལ་གྱི་བདུད་སྡེའི་སྙིང་འགས་ཀྱང༌། །ཐུབ་བསྟན་འཕྲིན་ལས་སྤེལ་བའི་དར་ཆེན་པོ། །སྲིད་རྩེའི་བར་དུ་འཕྱར་བའི་ཁྲོ་བོའི་རྒྱལ། །རྡོ་རྗེ་གཞོན་ནུས་མཆོག་ཐུན་དངོས་གྲུབ་སྩོལ། །རྣམ་དག་༝༝༝། །གར་དབང་མགོན་པོའི་སྲས་མཆོག་གྲུ་འཛིན་མགོན། །གངས་ཅན་ལྷ་གཅིག་ལག་ན་པད་དཀར་འཆང༌། །ཐུགས་ཀའི་ཡི་གེ་ལས་བབས་བདུད་རྩི་ཡིས། །འགྲོ་བ་དྲུག་གི་སྡུག་བསྔལ་མཐར་མཛོད་ཅིག །རྣམ་དག་༝༝༝། །མགོན་པོ་ཀུན་ཏུ་གཟིགས་ཁྱོད་བློ་གྲོས་མཐའ། །རྣམ་པ་ཐམས་ཅད་མཁྱེན་པས་གཞལ་དཀའ་ཡང༌། །ད་དུང་སློབ་པའི་ལམ་ལ་གནས་པའི་ཚུལ། །སྟོན་མཛད་ཟུར་ཕུད་ལྔ་པས་རྟག་ཏུ་སྐྱོངས། །རྣམ་དག་༝༝༝། །དམར་ཟླུམ་སྤྱན་གྱིས་ལྟ་སྟངས་གཟིགས་པའི་མོད། །བདུད་དཔུང་ལག་ཆ་སྟབས་ཅིག་འཆོར་ནུས་པ། །གསང་བ་ཀུན་གྱི་མཛོད་འཛིན་ཁྲོ་བོའི་རྒྱལ། །ལག་ན་རྡོ་རྗེས་མི་མཐུན་ཕྱོགས་ལས་སྲུངས། །རྣམ་དག་༝༝༝། །འཁོར་བ་སྟོངས་མིན་དེ་སྲིད་རང་གི་དོན། །ཡལ་བར་བོར་བའི་དམ་བཅའི་ཁུར་ཆེན་པོ། །སྙིང་སྟོབས་ཕྲག་པར་ལེན་པ་སྤྱན་རས་གཟིགས། །འཇམ་མཉེན་ཕྱག་ཁྱོངས་འགྲོ་དབུགས་མ་ལུས་ཕྱུངས། །རྣམ་དག་༝༝༝། །ཡངས་པའི་ནོར་འཛིན་གཡོ་དང་བཅུད་འཚོར་སོགས། །ཉེས་ཚོགས་མཐའ་དག་གང་གི་ཐུགས་རྗེའི་མཐུས། །རྣམ་པར་གཞིལ་ཏེ་བདེ་སྐྱིད་ལ་སྦྱོར་བར། །(༧༡ན) ― GLG021_Page_0759 ―
[མ་དཔེ་གཟིགས་ན་འདིར་གནོན།]
བྱང་སེམས་ས་ཡི་སྙིང་པོས་མཐུ་དཔུང་སྐྱེད། །རྣམ་དག་༝༝༝། །ལུས་ཅན་ཀུན་གྱི་རྒྱུད་ལ་ཤེས་བྱ་དང༌། །ཉོན་མོངས་བག་ལ་ཉལ་གྱི་སྒྲིབ་པ་ཀུན། །རྣམ་པར་སེལ་བ་ས་བཅུའི་དབང་ཕྱུག་གིས། །སྲིད་མཐར་ལྷོད་མེད་རྗེས་སུ་འཛིན་པར་ཤོག །རྣམ་དག་༝༝༝། །ལྷ་ཡི་ལམ་ནས་བཀྲ་ཤིས་དགེ་བ་ཡི། །མཚན་ལྟས་བཟང་པོས་འཇིག་རྟེན་མ་ལུས་པ། །ཁྱབ་མཛད་ནམ་མཁའི་སྙིང་པོའི་ཐུགས་རྗེ་ཆེའི། །མཐུ་དཔུང་བསྐྱེད་པར་གསོལ་ལ་དེང་དགོངས་ཤིག །རྣམ་དག་༝༝༝། །མཐོ་དམའ་མེད་པར་སྙོམས་པས་ཉེར་དྲངས་ཏེ། །རྗེས་བརྩེའི་ཆུ་ཡིས་དུ༔ཁའི་མེ་དཔུང་ཀུན། །བསད་ནས་སིམ་པའི་ཚོར་བས་བསིལ་པ་ཡི། །རེག་བྱ་ལ་སྦྱོར་བྱམས་པ་མགོན་པོ་ཀྱེ། །རྣམ་དག་༝༝༝། །འདས་དང་མ་འོངས་ད་ལྟའི་དུས་ཀུན་ཏུ། །མ་རིག་འཁྲུལ་པའི་དབང་གིས་ཉེར་འཕྱན་ཏེ། །སྒོ་གསུམ་མནར་རྣམས་ལམ་བཟང་ལ་འཁྲིད་པར། །མཛོད་ཅིག་ཆོས་ཀྱི་སྤྲིན་གནས་སེམས་དཔའ་ཆེ། །རྣམ་དག་༝༝༝། །འདི་ཕྱི་བར་དོ་གསུམ་གྱི་སྐྱབས་གཅིག་པོར། །བླ་མ་ཆོས་སྐྱོང་དབྱེར་མེད་ཐུགས་རྗེའི་གཏེར། །མྱུར་མཛད་ཡེ་ཤེས་མགོན་པོ་ཕྱག་དྲུག་པས། །དེང་ནས་བྱང་ཆུབ་བར་དུ་རྗེས་ཟུངས་ཤིག །རྣམ་དག་༝༝༝། །རྒྱལ་མཚན་ཏོག་དང་ནེའུ་ལེའི་ཁ་ནང་ནས། །ཕུན་ཚོགས་ནོར་བུའི་ཆར་རྒྱུན་ལེགས་ཕབ་སྟེ། །དབུལ་ཕོངས་དང་བྲལ་རྨུགས་འཛིན་འབྱོར་པ་ལ། །བདག་སོགས་སྦྱོར་ཞིག་ལྷ་(༧༡བ) ― GLG021_Page_0760 ―
[མ་དཔེ་གཟིགས་ན་འདིར་གནོན།]
ཆེན་ངལ་བསོས་པོ། །རྣམ་དག་༝༝༝། །ཀླུ་སྒྲུབ་བཞེད་པའི་ཟབ་མོ་ལྟ་བ་དང༌། །གསང་བ་འདུས་པའི་སྒྲུ་ལུས་གནད་འགག་ལ། །སྔོན་མེད་ཤིང་རྟ་ཆེན་པོ་ཙོང་ཁ་པ། །འཇམ་མགོན་བླ་མའི་བྱིན་རླབས་སྙིང་འཇུག་མཛོད། །རྣམ་དག་༝༝༝། །ཕྱག་སོར་གྱིས་སྤྲས་གསེར་སྦྱངས་བུམ་པ་ནས། །དཀར་དམར་མདངས་ལྡན་ཟིལ་དངར་བབས་པའི་རྒྱུན། །དུས་ཀུན་ཁྱབ་པའི་འཆི་མེད་དཔལ་སྟེར་བའི། །ཚེ་མཐའ་ཡས་དེ་གཙུག་གི་རྒྱན་དུ་བཞུགས། །རྣམ་དག་བསམ་༝༝༝། །གཞོན་ནུའི་མཚན་འཛིན་རྒན་པོའི་བློ་གྲོས་འཆང༌། །རྒྱལ་ཀུན་ཡབ་གྱུར་རྒྱལ་སྲས་ངང་ཚུལ་འཛིན། །འཇམ་ཞིང་དུལ་ཡང་ཕས་རྒོལ་ཚར་གཅོད་པ། །རྗེ་བཙུན་བརྟན་པའི་འཁོར་ལོས་ཤིས་པར་མཛོད། །རྣམ་དག་༝༝༝། །རྒྱུ་འབྲས་གཅིག་པར་གསེར་མདོག་ཞལ་ལྡན་པས། །ཉི་བུའི་གཤེད་གྱུར་གཞན་ལས་ཁྱད་ཞུགས་པ། །རྡོ་རྗེ་འཇིགས་བྱེད་མཐོང་ཚེ་ཁྲོ་བོ་ཀུན། །ལག་ཆ་ཅིག་ཅར་འཆོར་དེ་ཨེ་མ་མཚར། །རྣམ་དག་༝༝༝། །འཇིགས་ཆེན་བརྒྱད་སོགས་སྲིད་པའི་དུ༔ཁ་ལས། །སྐྱོབ་པའི་རྒྱལ་ཡུམ་ཨཱཪྻཏཱ་རེ་ཀྱེ། །མརྒད་འཁྲི་ཤིང་གཞོན་ནུའི་ཕྱག་རིང་པོ། །བདག་སོགས་སེམས་ཅན་ཀུན་གྱི་གཙུག་ཏུ་ཁྱོངས། །རྣམ་དག་༝༝༝། །མཚན་ཙམ་ཐོས་པས་དུས་མིན་འཆི་འཇོམས་ན། །གཟུངས་སྔགས་མཐུ་ཡིས་གཞོམ་མེད་ཚེ་ཡི་དཔལ། །སྦྱིན་མཛད་བཅོམ་ལྡན་ཡིད་བཞིན་འཁོར་ལོ་མས། །མི་ཤིགས་རྡོ་རྗེའི་སྲོག་གི་ཀ་བ་ཚུགས། །རྣམ་དག་༝༝༝། །གསེར་སྦྱངས་མདངས་འཛིན་སེར་(༧༢ན) ― GLG021_Page_0761 ―
[མ་དཔེ་གཟིགས་ན་འདིར་གནོན།]
དཀར་སྔོ་དམར་ཞལ། །རལ་གྲི་འཁོར་ལོ་རྩེ་གསུམ་མདའ་དགྲ་སྟེ། །གཞུ་ཞགས་རྡོ་རྗེ་འཛིན་ཅིང་རོལ་པའི་སྟབས། །སྣ་ཚོགས་རྒྱན་ལྡན་སོ་སོར་འབྲང་མས་སྐྱོངས། །རྣམ་དག་༝༝༝། །མརྒད་མདངས་ཅན་ལྗང་ནག་དཀར་བའི་ཞལ། །རྨ་བྱའི་སྒྲོ་མངའ་མཆོག་སྦྱིན་རིན་ཅེན་ཆུན། །གཞུ་བུམ་འཛིན་ཅིང་ཕྱེད་པའི་སྐྱིལ་ཀྲུང་བཞུགས། །སྣ་ཚོགས་རྒྱན་ལྡན་རྨ་བྱ་ཆེན་མོས་སྐྱོངས། །རྣམ་དག་༝༝༝། །ཁ་བའི་རྡུལ་བརྩེགས་ལྟར་དཀར་ཞལ་འཛུམ་པ། །རལ་གྲི་མདའ་དང་མཆོག་སྦྱིན་གཞུ་ཞགས་པ། །དགྲ་སྟ་འཛིན་ཅིང་སྒེག་ཉམས་སེམས་སྐྱིལ་རྒྱན། །ལེགས་སྤྲས་སྟོང་ཆེན་རབ་འཇོམས་མ་ཡིས་སྐྱོངས། །རྣམ་དག་༝༝༝། །སྟང་ཟིལ་བརྩེགས་པའི་སྐུ་དང་ཞལ་མཚུངས་པ། །རྡོ་རྗེ་མཆོག་སྦྱིན་དགྲ་སྟ་ཞགས་པ་བསྣམས། །སྣ་ཚོགས་མཛེས་པའི་རྒྱན་གྱིས་ཉེར་སྤྲས་པ། །གསང་སྔགས་རྗེས་སུ་འཛིན་མས་རྟག་ཏུ་སྐྱོངས། །རྣམ་དག་༝༝༝། །པདྨ་རཱ་གའི་གཟུགས་སྐུ་ཆགས་པའི་ཞལ། །བགྲད་འཕྲང་མཆོག་སྦྱིན་ལྕགས་ཀྱུ་པོ་ཏི་བསྣམས། །སྐྱིལ་ཀྲུང་ཕྱེད་པས་བཞུགས་ཤིང་སྣ་ཚོགས་རྒྱན། །རབ་སྤྲས་བསིལ་པའི་ཚལ་གྱིས་དུས་ཀུན་སྐྱོངས། །རྣམ་དག་༝༝༝། །བསྟན་འགྲོའི་བདེ་སྐྱིད་འཕྲོག་པའི་ཆོམ་རྐུན་སྐེ། །བདུད་ཞགས་ནག་པོས་བཅིངས་ནས་ཐོད་དབྱུགས་གིས། །ཕྱེ་མར་འཐག་འཛད་འཆི་བདག་གཤིན་རྗེའི་རྒྱལ། །དཔལ་ལྡན་མ་ཧེའི་ཞལ་ཅན་ཁྱོད་ཅིག་བསྔགས། །རྣམ་དག་༝༝༝། །མ་རུངས་གདུལ་དཀའ་འདུལ་ཕྱིར་དབྱིངས་ཕྱུག་མ། །སྲིད་པ་གསུམ་(༧༢བ) ― GLG021_Page_0762 ―
[མ་དཔེ་གཟིགས་ན་འདིར་གནོན།]
ལ་དབང་སྒྱུར་རེ་མ་ཏཱི། །འདོད་ཁམས་བདག་མོ་དམར་ཟོར་རྒྱལ་མོ་ཡིས། །ཚེ་རབས་ཀུན་ཏུ་མགོན་སྐྱབས་དཔུང་གཉེན་མཛོད། །རྣམ་དག་༝༝༝། །ལས་བཞི་བསྒྲུབ་པའི་སྣ་ཚོགས་འཕྲུལ་ཆེན་ལས། །རབ་དཀར་ལྷ་མཆོག་ཞི་བའི་དངོས་གྲུབ་ཀུན། །སྩོལ་མཛད་དུང་སྐྱོང་མ་ཡིས་དུས་ཀུན་ཏུ། །གཡེལ་བ་མེད་པར་མེལ་ཚེ་མཛད་དུ་གསོལ། །རྣམ་དག་༝༝༝། །ཞེས་གསོལ་དཔོན་ཚེ་དབང་རབ་བརྟན་གྱིས་འདི་གའི་ལག་རྗེས་གསལ་བའི་ཐང་ག་ལྔ། གཞན་མ་སུམ་ཅུ་ཐམ་པ་བཞེངས་པའི་རྒྱབ་ཡིག་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་རིག་བྱེད་དུ་མ་ལ་བློ་གྲོས་ཀྱི་སྣང་བ་དཀར་བ་མཐར་རྒྱས་པ་བློ་བཟང་དབང་པོའོ། །ཞོ་དོས་ལྷག་པ་བཅུ་བཞིའི་སྲང་གྲངས་ཀྱི། །ཀུན་བཟང་མཆོད་པའི་སྤྲིན་ཕུང་འཁྲིགས་པའི་སྣོད། །དགེ་སློང་ཡོན་ཏན་དཔལ་བཟང་གིས་ཕུལ་བས། །འདི་ཕྱིའི་བསམ་དོན་མ་ལུས་ལྷུན་གྲུབ་ཤོག །ཅེས་པའང་ཕན་བདེ་ལེགས་བཤད་གླིང་པའི་དགེ་སྐོས་སྐབས་པད་སྡེར་ཕུལ་བའི་ཁ་བྱང་དུ་ཟ་ཧོར་བནྡེས་བཀོད། །ཤེལ་དཀར་ཞུན་མའི་ལྷུན་པོ་འབུམ་ཕྲག་ཟླས། །འཁྱུད་པའི་འོད་ཀྱིས་འཆི་བདག་སྨག་རུམ་རྣམས། །མཐར་བྱེད་རྒྱལ་བ་ཀུན་ཡུམ་ཚེ་སྦྱིན་མ། །ཡིད་བཞིན་འཁོར་ལོའི་སྤྱན་བདུན་གྱིས་གཟིགས་ཤིག །བགྲང་ཡས་རྒྱུད་སྡེའི་གསུང་ངག་སྙིང་པོའི་དབང༌། །སྒོ་གསུམ་སྨིན་པ་བློ་གྲོས་བུམ་བཟང་ནས། །རྒྱ་ཆེན་གདུལ་བྱའི་རེ་འདོད་དབྱར་མཚོ་ལྟར། །སྤེལ་མཛད་དམ་པའི་མགོན་ཁྱོད་ཞབས་(༧༣ན) ― GLG021_Page_0763 ―
[མ་དཔེ་གཟིགས་ན་འདིར་གནོན།]
བརྟན་ཤོག །ཆེ་མཆོག་ལ་སོགས་ཞི་ཁྲོ་མ་ལུས་པ། །ཡོངས་འདུས་འཁོར་འདས་ཀུན་གྱི་ཕྱག་རྒྱ་རྣམས། །ཅིག་ཅར་ཟིལ་གྱིས་གནོན་པ་བཞད་པ་རྩལ། །གང་ཤར་རང་སར་གྲོལ་ཁྱོད་ཞབས་བརྟན་ཤོག །འཇམ་དབྱངས་མགྲིན་བཞུགས་མགུལ་པར་དགའ་བའི་ཕྱག །ཉེར་འཁྱུད་ཚངས་སྲས་བཞད་པའི་བཤེས་གཉེན་མཆོག །འཆད་རྩོད་རྩོམ་ལ་འཇིགས་མེད་རྡོ་རྗེའི་སྡེ། །གཡུང་དྲུང་སྲོག་གི་ཀ་བ་ཚུགས་པར་ཤོག །རྨོངས་པའི་མུན་སངས་རྣམ་དཔྱོད་རྟ་ལྗང་གི །དཀྱིལ་འཁོར་རབ་རྒྱས་རྒྱ་མཚོའི་མཐའ་ཀླས་པའི། །སྐྱེ་རྒུའི་དབང་ཕྱུག་ས་ཡི་ཚངས་པ་ཆེའི། །སྐུ་ཚེ་རིགས་བརྒྱུད་ཆབ་སྲིད་དར་བར་ཤོག །དགའ་ལྡན་ཕོ་བྲང་གནམ་སྐོས་རྒྱལ་པོའི་ཁྲིམས། །གསེར་གྱི་འཁོར་ལོའི་ཤེ་མོང་དཔུང་པ་ཡི། །ཡིད་ཅན་ལྟ་ཞོག་སེམས་མེད་ནོར་འཛིན་མ། །རྗེས་སུ་འབྲང་བའི་དབང་ཐང་འབར་བར་ཤོག །ཞྭ་སེར་ཅོད་པན་འཆང་བསྟན་རྗེས་ཞུགས་པ། །རྒྱ་ཧོར་བོད་དང་བོད་ཆེན་སྐྱེ་རྒུ་ཀུན། །དུ༔ཁའི་མིང་ཡང་མཐར་བྱས་རྫོགས་ལྡན་དུས། །གསར་པའི་དགའ་སྟོན་མགྲོན་དུ་བསུ་བར་ཤོག །བསམ་མཁར་བདེ་ཆེན་དབང་གི་རྒྱལ་པོ་ཡི། །རིགས་བརྒྱུད་འཁོར་བཅས་ནད་གདོན་དབུལ་ཕོངས་བྲལ། །འཆི་མེད་བདག་པོར་འགྲན་ནུས་ཡུན་རིང་འཚོ། །བསོད་ནམས་མངའ་ཐང་བླ་ནས་བླར་འཕེལ་ཤོག །ཚེ་འདིའི་ལུས་བསྐྱེད་ཕ་མས་ཐོག་དྲངས་པའི། །ནང་མི་གཉེན་འཁོར་གྱིས་མཚོན་མཁའ་མཉམ་གྱི། །སེམས་ཅན་མཐའ་དག་འཁོར་བའི་སྡུག་བསྔལ་ལས། །བསྒྲལ་ནས་ཐར་པའི་གྲོང་ཁྱེར་(༧༣བ) ― GLG021_Page_0764 ―
[མ་དཔེ་གཟིགས་ན་འདིར་གནོན།]
འཇུག་པར་ཤོག །མཁྱེན་བརྩེ་ནུས་གསུམ་ལྡན་པ་རྫོགས་སངས་རྒྱས། །བདེན་པ་གཉིས་དང་ལྡན་པ་དམ་པའི་ཆོས། །རིག་དང་གྲོལ་བའི་དཔལ་ལྡན་དགེ་འདུན་ཏེ། །སླུ་མེད་བདེན་པའི་རྟེན་འབྲེལ་ལྷུན་གྲུབ་ཤོག །ཅེས་པ་འདིའང་བསམ་མཁར་བ་བདེ་ཆེན་དབང་རྒྱལ་གྱིས་དགའ་ལྡན་ཐར་པ་གླིང་དང༌། གསང་སྔགས་བྱང་ཆུབ་གླིང་གཉིས་སུ་འཛུགས་རྩིས་ཀྱི་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་རིག་བྱེད་པ་བློ་བཟང་དབང་པོའོ། །མཆོག་གསུམ་སླུ་མེད་ཐུགས་རྗེ་བདེན་ཚིག་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །རྡོ་རྗེས་མཚན་པའི་ཁྲི་ལ་སྲིད་མཐའི་བར། །ལེགས་བཞུགས་བཞེད་དོན་འཕྲིན་ལས་ལྷུན་གྲུབ་ཤོག །འདིས་མཚོན་དུས་གསུམ་བསགས་པའི་དགེ་ཚོགས་ཀྱིས། །བློ་བཟང་ཚེ་རིང་རིགས་བརྒྱུད་བཅས་པ་ཡི། །ཚེ་དཔལ་བསོད་ནམས་དབང་ཐང་མ་ལུས་པ། །ཡར་ངོའི་ཟླ་བ་ལྟ་བུར་འཕེལ་བར་ཤོག །འདི་སྣང་ཉིང་མཚམས་སྦྱར་ཚེ་མགོན་ཁྱོད་ཀྱིས། །རྗེས་གཟུང་ལྷོ་ཕྱོགས་རི་བོ་པོ་ཏ་ལར། །ཕྱག་ན་པདྨའི་འཁོར་དུ་ལེགས་སྐྱེས་ནས། །གཏན་གྱི་མདུན་མ་ལྷུན་གྱིས་གྲུབ་པར་ཤོག །ཅེས་པ་འདིའང་བློ་བཟང་ཚེ་རིང་གིས་བདེ་ཡངས་དང་སྔགས་པའི་གྲྭ་ཚང་གཉིས་སུ་ལོ་ཇ་ནམ་འཚོའི་བར་བཙུགས་པའི་ཚེ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་བཟང་དབང་པོའོ། །སྔོན་བསགས་ལས་འཕྲོ་འོད་ཀྱིས་ལོག་རྟོག་དུག །རབ་བསལ་དད་པའི་མཚོ་ནང་བཤེས་གཉེན་གཟུགས། །སྲིད་ཞིའི་ཡོན་(༧༤ན) ― GLG021_Page_0765 ―
[མ་དཔེ་གཟིགས་ན་འདིར་གནོན།]
ཏན་ཆ་གང་སྟོན་ཀའི་ཟླ། །ཕན་བདེའི་ག་བུར་ཟེགས་མ་འབུམ་འགྱེད་པ། །མགོན་ཁྱོད་བྱིན་རླབས་བདུད་རྩི་བདག་སྙིང་ལ། །ཞུགས་ནས་ཚེ་རིང་བསོད་ནམས་དབང་ཐང་འཕེལ། །ཡང་སྲིད་ཕྱི་མར་དལ་བའི་རྟེན་ཐོབ་སྟེ། །རིང་མིན་སངས་རྒྱས་ས་ལ་བགྲོད་པར་ཤོག །རྒྱལ་ཀུན་མཐུ་སྟོབས་གཅིག་ཏུ་བསྡུས་པའི་མཚོན། །རབ་འབར་རྡོ་རྗེ་རྩེ་བརྒྱ་གདེངས་པའི་མོད། །བདུད་བཞིའི་ཀླད་འགེམས་གསང་བ་ཀུན་གྱི་མཛོད། །འཛིན་མཛད་གར་དགུའི་རྣམ་འགྱུར་སྟོན་མཛད་ཀྱེ། །བདག་སོགས་བྱང་ཆུབ་བར་དུ་རྗེས་བཟུང་ནས། །གནས་སྐབས་སྲིད་པའི་ལེགས་ཚོགས་རབ་འཕེལ་ཞིང༌། །རིང་པོར་མི་ཐོགས་མཁའ་མཉམ་སེམས་ཅན་ཀུན། །འདྲེན་པའི་དེད་དཔོན་ཆེན་པོར་འགྱུར་བར་ཤོག །ཅེས་པ་འདིའང་དགའ་རུ་ཤག་པ་འཇིགས་མེད་དབང་པོས་དད་རྟེན་དུ་འདི་གའི་འདྲ་འབག་དང་གསང་བའི་བདག་པོའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་རིག་བྱེད་པ་བློ་དབང་ངོ༌། །རྣམ་དག་བསམ་པས་སྨོན་ལམ་བཏབ་པའི་མཐུས། །བྱང་ཆུབ་མ་ཐོབ་བར་དུ་མགོན་ཁྱོད་ཀྱིས། །ལམ་བཟང་སྟོན་པའི་དགེ་བའི་བཤེས་མཛད་ནས། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །ཞེས་པ་འདིའང་པད་རྡོར་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པའོ། །ཞོ་གང་གིས་དམན་སྲང་གྲངས་ཉེར་བཞི་ཡི། །དངུལ་དཀར་ལས་གྲུབ་གསལ་བྱེད་མར་མེའི་ཀོང༌། །བྱམས་པ་སྐལ་བཟང་རབ་འབྱམས་གྲ་སྐོར་དུས། །(༧༤བ) ― GLG021_Page_0766 ―
[མ་དཔེ་གཟིགས་ན་འདིར་གནོན།]
ཕན་བདེ་ལེགས་བཤད་གླིང་དུ་ཕུལ་བའི་དགེས། །མ་རིག་སྨག་རུམ་སྟུག་པོ་མཐར་བྱས་ནས། །ལུང་རྟོགས་ཡོན་ཏན་རྨད་བྱུང་འོད་པོ་ཆེས། །སྲིད་ཞིའི་ལེགས་ཚོགས་གཟུགས་བརྙན་མ་ལུས་པ། །མངོན་སུམ་མཐོང་བའི་སྐལ་པ་བཟང་བར་ཤོག །ཅེས་པའང་ཟ་ཧོར་བནྡེས་བཀོད། །བགྲང་ཡས་སྲིད་ཞིའི་ལམ་སྟོན་རྫོགས་སངས་རྒྱས། །སླུ་མེད་གཏན་གྱི་སྐྱབས་མགོན་དམ་པའི་ཆོས། །ཚུལ་བཞིན་སྒྲུབ་པ་སྐྱེ་འཕགས་དགེ་འདུན་ཏེ། །དཀོན་ཅོག་གསུམ་གྱི་རྨད་བྱུང་ཐུགས་རྗེའི་མཐུས། །གནམ་གྱི་ཤེ་མོང་འཛིན་པ་ཇིང་གིར་བརྒྱུད། །དད་བརྩོན་གཏོང་ཕོད་དང་ལྡན་མི་ཡི་བདག །ཐའི་ཇི་བློ་བཟང་ཚེ་རིང་མིང་ཅན་གང༌། །སྐྱེ་བ་ཀུན་ཏུ་དལ་པའི་རྟེན་ཐོབ་ཤོག །དེར་ཡང་འཇམ་དབྱངས་དགའ་བའི་བཤེས་གཉེན་གྱིས། །རྟག་ཏུ་འབྲལ་མེད་རྗེས་སུ་ཉེར་བཟུང་སྟེ། །བསྙེན་པར་རྫོགས་པའི་སྡོམ་པ་ལེགས་ཕོག་ནས། །ཚུལ་ཁྲིམས་མིག་གི་འབྲས་ལྟར་བསྲུང་བར་ཤོག །ངུར་སྨྲིག་འཛིན་པ་ཚངས་སྤྱོད་མཆོག་རྟེན་ལ། །ཐེག་ཆེན་ལམ་ཞུགས་བདག་པས་གཞན་གཅེས་མཐུས། །འགྲོ་བའི་དོན་དུ་ལུས་སྲོག་འདོར་ནུས་སོགས། །ཕ་རོལ་ཕྱིན་དྲུག་ཡོངས་སུ་རྫོགས་པར་ཤོག །གྲངས་མེད་ཕུན་ཚོགས་སྲོག་ལ་མ་བལྟོས་པར། །གསང་བ་སྔགས་ཀྱི་སྨིན་གྲོལ་ལ་བརྟེན་ནས། །རིང་པོར་མི་ཐོགས་རྡོ་རྗེ་འཛིན་པའི་སར། །ལེགས་བགྲོད་འགྲོ་བ་འདྲེན་པའི་དོན་བྱེད་ཤོག །ཅེས་པ་འདིའང་ཁལ་ཁ་གཡས་རུ་ནས་དད་སྟོབས་ལྡན་པ་བློ་བཟང་ཚེ་རིང་གིས་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་(༧༥ན) ― GLG021_Page_0767 ―
[མ་དཔེ་གཟིགས་ན་འདིར་གནོན།]
ངག་དབང་དཀོན་ཅོག་གོ །མ་རིག་གཉིད་སངས་ལུང་རྟོགས་ཆ་ཤས་ཀུན། །ཉེར་རྒྱས་ཡེ་ཤེས་ཟླ་བའི་འོད་ཟེར་གྱིས། །ཕན་བདེའི་ཀུན་ད་བཞད་པའི་བཤེས་གཉེན་མཆོག །དཔལ་ལྡན་བླ་མའི་ཞབས་ལ་གསོལ་བ་འདེབས། །བློ་བཟང་གྲགས་སྙན་བསྟན་པ་བྱང་ཕྱོགས་སུ། །འཛིན་པའི་སྙིང་སྟོབས་རྒྱས་སྲས་སྤྱོད་པ་ཡིས། །འཕྲིན་ལས་རྒྱ་མཚོའི་རབས་འཕྲེང་ཡོལ་མེད་ཅན། །མཚུངས་བྲལ་སྤྲུལ་པའི་སྐུ་ལ་གསོལ་བ་འདེབས། །དགའ་ལྡན་བསྟན་པ་རིན་ཅེན་འཛིན་པ་ལ། །སླར་ཡང་བྱང་ཕྱོགས་ཡངས་པའི་ས་ཆེན་པོར། །དབང་སྒྱུར་དད་སྟོབས་ལྡན་པ་བོ་ཤོག་ཐུ། །ཆོས་ཀྱི་རྒྱལ་པོར་གྱུར་ལ་གསོལ་བ་འདེབས། །གང་གི་སྐུ་ཚེ་ཉི་ཟླ་དང་མཉམ་ཞིང༌། །བསོད་ནམས་སྣམ་ཐོས་སྲས་ཀྱི་མཆེད་ཟླར་འགྲན། །ཆབ་སྲིད་མི་ནུབ་ཆུ་བོའི་རྒྱུན་བཞིན་དུ། །ཆད་པ་མེད་པར་དཀོན་ཅོག་མཐུས་བྱིན་རློབས། །ལེགས་བྱས་གསེར་གྱིས་བཏེག་པའི་ཁྲི་ཆེན་པོར། །ས་ཡི་ཚངས་པ་མི་ཤིགས་སྐྱིལ་མོ་ཀྲུང༌། །བཅས་ནས་བསྟན་ལ་དད་པའི་ཕུ་དུད་དང༌། །མངའ་འབངས་སྐྱོང་བའི་བཞེད་དོན་ལྷུན་གྲུབ་ཤོག །ཅེས་དགའ་ལྡན་བསྟན་འཛིན་བོ་ཤོག་ཐུ་རྒྱལ་པོའི་འཁྲུངས་རབས་གསོལ་འདེབས་དང་བརྟན་བཞུགས་ཤིག་དགོས་ཞེས་སྔགས་པ་གྲྭ་ཚང་སྤྱི་སོས་བདོག་པའི་དངོས་པོ་མཎྜལ་དང་བཅས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ ། ངག་དབང་བློ་བཟང་རྒྱ་མཚོར་གསོལ་བཏབ་མཐུས། །འདི་ཕྱི་བར་དོའི་འཇིགས་པ་ཀུན་ཞི་ནས། །ཚེ་རིང་ནད་མེད་(༧༥བ) ― GLG021_Page_0768 ―
[མ་དཔེ་གཟིགས་ན་འདིར་གནོན།]
བདེ་སྐྱིད་ཕུན་སུམ་ཚོགས། །རིང་མིན་རྫོགས་པའི་སངས་རྒྱས་མྱུར་ཐོབ་ཤོག །ཅེས་དཔོན་མོ་ཨལ་པན་གྱི་ཁ་ཏོན་དུ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའོ། །སྐྱབས་གསུམ་ཀུན་འདུས་འཇམ་དབྱངས་དགའ་བའི་བཤེས། །སྤྱི་གཙུག་པད་མཚོར་བཞུགས་ལ་གསོལ་འདེབས་ན། །འདི་ཕྱིའི་དོན་ཀུན་མ་ལུས་ཉེར་འགྲུབ་པའི། །ཐུགས་རྗེའི་བྱིན་རླབས་འཇུག་པ་མྱུར་སྩོལ་ཤོག །ཅེས་བི་ལིག་ཨེར་ཁེ་ཐའི་ཇིའི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའོ། །སྲས་བཅས་རྒྱལ་བའི་ཐུགས་རྗེའི་བྱིན་རླབས་མཐུས། །སྐུ་སྐྱེ་ངག་དབང་བསྟན་འཛིན་འཕྲིན་ལས་ཀྱི། །ཡང་སྲིད་ཞིང་ཁམས་གང་དུ་ལེན་པ་ལ། །ཉེར་འཚེའི་བར་ཆད་ཐམས་ཅད་ཞི་བར་ཤོག །འདྲ་བརྫུས་འཁྲུལ་པའི་དབང་དུ་མི་འགྲོ་བར། །རྣམ་དག་སྐྱེ་སྲིད་བཟུང་དེར་རིང་པོའི་ཚེ། །བསོད་ནམས་ལུང་རྟོགས་ཆོས་ཀྱི་ཡོན་ཏན་ཀུན། །བླ་ནས་བླར་འཕེལ་རང་གཞན་ཕན་འགྲུབ་ཤོག །གདུལ་བྱ་གདུལ་བའི་ཡུལ་གྲུ་ཕ་མཐའ་ཡས། །སྔོན་ནས་ལས་འབྲེལ་ཐོགས་དང་སྨོན་ལམ་གྱི། །མཚམས་སྦྱར་ཇི་བཞིན་འགྲུབ་པའི་དོན་བཟང་འབྲས། །རབ་སྨིན་རོ་བརྒྱའི་དཔལ་ལ་སྤྱོད་པར་ཤོག །ནམ་ཡང་བདེན་པར་གསུང་བ་རྫོགས་སངས་རྒྱས། །སླུ་མེད་སྐྱབས་གནས་ཉག་ཅིག་དམ་པའི་ཆོས། །སྐྱེ་འཕགས་དགེ་འདུན་ཚོགས་ཀྱི་ཐུགས་རྗེ་ཡིས། །འཇུག་པ་དུས་ལས་གཡེལ་བ་མེད་པར་ཤོག །དཔལ་ལྡན་མགོན་པོ་ལྕམ་དྲལ་བསྟན་སྲུང་(༧༦ན) ― GLG021_Page_0769 ―
[མ་དཔེ་གཟིགས་ན་འདིར་གནོན།]
ཚོགས། །དཀར་ཕྱོགས་སྐྱོང་བའི་འཆི་མེད་དྲང་སྲོང་དང༌། །རིག་འཛིན་ཚིག་གི་དམོད་པ་ལ་དབང་བས། །བདེན་པ་ལེགས་བརྗོད་དོན་ཀུན་ཤིས་པར་ཤོག །སྐྱིད་ཤོད་སྤྲུལ་སྐུ་ངག་དབང་བསྟན་འཛིན་འཕྲིན་ལས་ཀྱི་ཡང་སྲིད་གང་དུ་འཛིན་ཀྱང་བར་ཆད་མི་འབྱུང་ཞིང་ལེགས་ཚོགས་འཕེལ་བའི་སྨོན་ལམ་འདི་ནི་གྲ་རིགས་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཚེ་སྦྱིན་ཡིད་བཞིན་འཁོར་ལོའི་བྱིན་རླབས་དང༌། །རྒྱུ་སྦྱོར་བདོག་པའི་གཏོང་ཕོད་ལྷག་པའི་སེམས། །ཟླ་ཤར་ཀུན་ཏུ་དགེ་འདུན་མཆོད་པ་སོགས། །བྱང་ཆུབ་མཆོག་བསྔོས་མི་འཛད་རྣམ་དཀར་མཐུས། །རྡོ་རྗེའི་ཁྲི་ལ་འཇམ་དབྱངས་དགའ་བའི་བཤེས། །འོག་མིན་མགོན་པོ་ལྟ་བུར་རྟག་བརྟན་ཅིང༌། །བསྟན་དང་ལུས་ཅན་ཕན་བདེ་མ་ལུས་པ། །ཡར་ངོའི་ཟླ་བ་བཞིན་དུ་རྒྱས་པར་ཤོག །སོ་ཐར་བྱང་སེམས་རིག་འཛིན་སྡོམ་པ་དང༌། །གྲོལ་ལམ་མན་ངག་རྣམ་བཤད་ལ་སོགས་ཀུན། །ལེགས་པར་སྟོན་མཛད་དངོས་དང་བརྒྱུད་པ་ཡི། །མཉམ་མེད་བླ་མ་རྣམས་ལ་གསོལ་བ་མཆོད་པ་འབུལ་བཀྲ་ཤིས་ཤོག་གང་དགོས་ཀྱི་འདོན་པ་བསྒྱུར། འདེབས། །ཆོས་ལོངས་སྤྲུལ་སྐུའི་བདེ་གཤེགས་ཐམས་ཅད་དང༌། །ཞི་ཁྲོ་ཡི་དམ་དཀྱིལ་འཁོར་ལྷ་ཡི་ཚོགས། །རྒྱལ་སྲས་ཉན་རང་སྐྱེ་འཕགས་དགེ་འདུན་ལ། །མི་ཕྱེད་གུས་པ་ཆེན་པོས་གསོལ་བ་འདེབས། །མཆོད་འབུལ་བཀྲ་ཤིས་ལ་བསྒྱུར་ཆོག །སྐྱེས་བུ་གསུམ་གྱི་ལམ་རིམ་སྔོན་སོང་ནས། །བསྐྱེད་རྫོགས་(༧༦བ) ― GLG021_Page_0770 ―
[མ་དཔེ་གཟིགས་ན་འདིར་གནོན།]
ཉམས་བསྟན་ཐུབ་བསྟན་འགལ་མེད་རྟོགས། །གསུང་རབ་གདམས་པར་ཤར་ནས་རིང་མིན་དུ། །འགྲོ་འདྲེན་ཀུན་མཁྱེན་ཡེ་ཤེས་འཐོབ་པར་ཤོག །ཅེས་དཀར་བྲག་དཔོན་པོ་ངག་དབང་བཟོད་པས་རང་གི་ལུས་ཆས་སོགས་བདོག་པའི་གཏོང་ཕོད་ལ་བརྟེན་ཐོད་རི་དགའ་ལྡན་བཤད་སྒྲུབ་གླིང་དུ་སྲིད་མཐའི་བར་དུ་ཟླ་ཇ་བཙུགས་པའི་དུས་ཚོགས་པའི་ཞལ་འདོན་དང་རང་གི་དགེ་སྦྱོར་དུ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །བརྗོད་པ་རྣམ་དག་ངག་ལ་དབང་ཕྱུག་པ། །དབྱངས་ཅན་དྲིན་ལས་ཕུལ་བྱུང་བློ་གྲོས་མཐུས། །བསྐལ་བཟང་འདྲེན་པ་བཞི་པའི་སྡེ་སྣོད་གསུམ། །རྒྱ་མཚོའི་ཕ་མཐར་སྤེལ་ཁྱོད་ཞབས་བརྟན་ཤོག །རྟོག་གེའི་རྒོལ་བར་འཇིགས་མེད་ལུང་རིགས་ཀྱི། །བཙན་པོའི་གོ་ཆས་ཐུབ་བསྟན་ལང་ཚོའི་སྲོག །འཛིན་ལ་སྡེ་བཞིའི་སྒོ་འཕར་ཡོངས་འབྱེད་པ། །སྐུ་ཚེ་གཡུང་དྲུང་ལྟ་བུར་བརྟན་པར་ཤོག །འཆད་རྩོད་རྩོམ་པའི་རྣམ་དཔྱོད་གཞོན་ནུ་ལ། །འཇམ་དབྱངས་དགའ་བས་མགྲིན་པར་ལེགས་འཁྱུད་པས། །མདོ་རྒྱུད་གཞུང་བརྒྱ་སྨྲ་བའི་སྤོབས་པ་ཅན། །མཚུངས་མེད་བཤེས་གཉེན་རྡོ་རྗེ་ལྟར་བརྟན་ཤོག །སྙིང་དབུས་ཚངས་སྲས་ལྷ་མོ་འཇོ་སྒེག་ཅན། །གཙུག་ལག་བྱེ་བའི་རྒྱུད་མང་བཞད་པའི་གླུར། །བདེན་གཉིས་ཆོས་ཀུན་བླངས་པས་ལེགས་བཤད་ཀྱི། །རྡོ་རྗེ་རྩེ་བརྒྱ་གདེངས་ཁྱོད་ཞབས་བརྟན་ཤོག །སངས་རྒྱས་གཉིས་པ་རྗེ་བཙུན་ཙོང་ཁ་པའི། །རིང་ལུགས་ཐོས་བསམ་སྒོམ་སོགས་བྱ་བ་རྣམས། །བྱམས་(༧༧ན) ― GLG021_Page_0771 ―
[མ་དཔེ་གཟིགས་ན་འདིར་གནོན།]
མགོན་འཕགས་ཡུལ་མ་བྱོན་དེ་སྲིད་དུ། །ཡར་ངོའི་ཟླ་ལྟར་འཕེལ་ཞིང་རྒྱས་པར་ཤོག །ཤཱཀྱའི་བསྟན་པ་རྒྱ་མཚོ་ཡོངས་འཛིན་པའི། །རྒྱུ་སྦྱོར་ཁ་ཏོན་བྱེད་རྣམས་མགོན་ཁྱོད་ཀྱིས། །རྗེས་བཟུང་མྱང་འདས་ཐེམ་སྐས་ལ་འཛེགས་ཏེ། །འགྲོ་བ་འདྲེན་པའི་དེད་དཔོན་བྱེད་པར་ཤོག །མཆོག་གསུམ་འདོད་ཁམས་བདག་མོའི་ནུས་མཐུ་ཡིས། །གཏི་མུག་མུན་སངས་གཙུག་ལག་མཐའ་ཀླས་པར། །རྣམ་དཔྱོད་རབ་རྒྱས་རྒྱ་ཆེན་ལེགས་བྱས་མཚོའི། །རླབས་འཕྲེང་སྲིད་རྩེར་འཕྱུར་ཁྱོད་ཞབས་བརྟན་ཤོག །དགའ་ལྡན་ཕོ་བྲང་ལུགས་ཟུང་རབ་འབྲེལ་བ། །ཁྲིམས་གཉིས་གསེར་གྱི་གནམ་གྱི་ཤེ་མོང་གིས། །འཛམ་གླིང་ཀུན་ཏུ་འཁོར་བའི་རྒྱལ་ཁབ་ཆེར། །མང་པོས་བཀུར་བའི་རྣམ་ཐར་འཛིན་པར་ཤོག །མངའ་འབངས་མཐའ་དག་འཐབ་རྩོད་ནད་མུག་སོགས། །སྡིག་འབྲས་དུ༔ཁའི་མུན་པ་མཐར་བསྐྲད་ནས། །རིང་པོའི་ཚེ་དང་དཔག་ཡས་བསོད་ནམས་ཚོགས། །རྫོགས་ལྡན་སྐྱེ་རྒུའི་སྐལ་མཉམ་འཐོབ་པར་ཤོག །ཅེས་རབ་འབྱམས་སྨྲ་བའི་མཁན་ཆེན་བསྟན་འཛིན་རྒྱ་མཚོས་འཕྱོང་རྒྱས་ལྷོ་བྲག་སོགས་ཀྱི་དགོན་པའི་འཛིན་བདག་ནམ་མཛད་ཀྱི་བར་དུ་ས་ག་ཟླ་བའི་ཚེས་བཅོ་ལྔའི་ཉིན་བསྙེན་བཀུར་ཉིན་ཐུབ་ཀྱི་ཐོག་སྨོན་ལམ་འཛུགས་རྒྱུ་འདི་ལྟ་བུ་ཞིག་དགོས་ཞེས་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ངག་གི་དབང་ཕྱུག་བློ་བཟང་རྒྱ་མཚོ་ལ། །མི་ཕྱེད་གུས་པའི་སྒོ་(༧༧བ) ― GLG021_Page_0772 ―
[མ་དཔེ་གཟིགས་ན་འདིར་གནོན།]
ནས་གསོལ་བ་འདེབས། །མཆོག་གསུམ་ཐུགས་རྗེས་སྲིད་མཐར་བརྟན་བཞུགས་ཤིང༌། །འདི་ཕྱི་ཀུན་ཏུ་དགེ་བའི་དངོས་གྲུབ་སྩོལ། །ཞེས་པ་འདིའང་དབུ་མཛད་ཆོས་རྗེའི་ཁ་ཏོན་དུ་ཟ་ཧོར་གྱི་བནྡེས་བཀོད། །རིན་ཅེན་གསེར་ཟངས་ལས་གྲུབ་འདྲ་འབག་ལ། །ཕྱག་ན་པདྨ་སྲོང་བཙན་འབྲོམ་སྟོན་རྗེ། །དགེ་འདུན་གྲུབ་སོགས་རིམ་བྱོན་བཞིས་བསྐོར་བ། །ངོ་མཚར་མིག་གི་བདུད་རྩི་བླ་མེད་འདི། །ཚེ་དབང་རབ་བརྟེན་དད་དང་གཏོང་ཕོད་སོགས། །བློ་དང་བརྩོན་པས་ཉེར་བར་བསྒྲུབས་པ་ལ། །ཡེ་ཤེས་སེམས་དཔའ་མཐའ་ཀླས་ཉེར་འཇུག་ཆེད། །བརྒྱ་ཕྲག་མེ་ཏོག་དང་བཅས་རབ་ཏུ་གནས། །དགེ་འདིས་ཡང་སྲིད་བརྒྱུད་མར་ལྷ་མིའི་རྟེན། །ལེགས་པར་ཐོབ་ནས་བདེ་སྐྱིད་ཕུན་ཚོགས་ཤིང༌། །རིང་པོར་མི་ཐོགས་འགྲོ་བ་མ་ལུས་པ། །འདྲེན་པའི་དེད་དཔོན་མཆོག་ཏུ་འགྱུར་བར་ཤོག །རྗེ་བཙུན་མ་ཕམ་སྣང་བརྙན་རིན་ཅེན་ལས། །ལེགས་གྲུབ་ཚེ་དབང་རབ་བརྟན་གྱིས་བཞེངས་མཐུས། །གླིང་འདིར་མགོན་ཁྱོད་མཆོག་གི་སྤྲུལ་སྐུ་རུ། །གྱུར་ཚེ་འདུས་པ་དང་པོར་སྐྱེ་བར་ཤོག །གནས་སྐབས་སྲིད་པའི་ཉེས་རྒྱ་ཡོངས་ལས་གྲོལ། །མཐར་ཐུག་ཞི་མཐར་མི་གནས་བྱང་ཆེན་ཐོབ། །དོན་གཉིས་ལྷུན་གྱིས་གྲུབ་ནས་ལུས་ཅན་ཀུན། །འདྲེན་པའི་དེད་དཔོན་ཆེན་པོར་བདག་གྱུར་ཤོག །གང་གི་ཞབས་རྡུལ་མེ་ཏོག་མནྡྷ་ར། །ཐོད་དུ་བཅིངས་ནས་སྨོན་ལམ་བཏབ་པའི་མཐུས། །འཁོར་བའི་སྡུག་བསྔལ་མཚོ་ལས་སྒྲོལ་བའི་གྲུ། །མཛོད་ཅིག་བདེ་གཤེགས་མཚན་ལེགས་ཡོངས་བསྒྲགས་དཔལ། །(༧༨ན) ― GLG021_Page_0773 ―
[མ་དཔེ་གཟིགས་ན་འདིར་གནོན།]
ཐུགས་རྗེ་ཆེན་པོའི་འོད་དཀར་འབུམ་ཕྲག་ཏུ། །བཀྱེ་བས་སྡུག་བསྔལ་དེ་རྒྱུ་ཀུན་འབྱུང་མུན། །མཐར་བྱས་བདེ་སྐྱིད་སྣང་བའི་སྒོ་འཕར་བརྒྱ། །ཕྱེ་ཞིག་བདེ་གཤེགས་རིན་ཅེན་ཟླ་བའི་ཞབས། །མ་སྨད་མཁྱེན་བརྩེ་ནུས་པའི་ཆར་རྒྱུན་གྱིས། །སེམས་ཅན་ཀུན་གྱི་ལེགས་བྱས་མྱུ་གུ་རྣམས། །སྐྱེད་བསྲིངས་རྟེན་འབྲེལ་སྙེ་མ་རབ་སྨིན་པར། །མཛོད་ཅིག་བདེ་གཤེགས་གསེར་བཟང་དྲི་མ་མེད། །ཚེ་རབས་མང་བསགས་རྣམ་སྨིན་ནག་པ་ཡིས། །བསྐྱེད་པའི་རིགས་དྲུག་ཡང་སྲིད་གོམས་པའི་འགྲོས། །སྒོ་གསུམ་མནར་བའི་ཐང་དུ་མི་འཁྱམ་པར། །མཛོད་ཅིག་བདེ་གཤེགས་མྱ་ངན་མེད་པའི་དཔལ། །སེམས་ཅན་རྣམས་ཀྱི་ཁམས་དང་བསམ་པ་དང༌། །འཚམ་པར་དམ་པའི་ཆོས་ཀྱི་བདུད་རྩི་ཡིས། །ཐར་པའི་སྲོག་གི་རྩ་བ་ལེགས་ཚུགས་པར། །མཛོད་ཅིག་བདེ་གཤེགས་ཆོས་བསྒྲགས་རྒྱ་མཚོའི་དབྱངས། །ངན་སོང་གནས་ཀྱི་མེ་འོབས་གཏིང་ཟབ་པར། །ཐུགས་རྗེའི་ཆར་རྒྱུན་ཕབ་ནས་སྒོ་གསུམ་པོར། །སིམ་པའི་ཚོར་བ་རྟག་ཏུ་མྱོང་བ་རུ། །མཛོད་ཅིག་བདེ་གཤེགས་མངོན་པར་མཁྱེན་པ་རྒྱལ། །ཕྱག་སོར་གྱིས་བཏེག་གསེར་མདོག་རྣམ་པར་རྒྱལ། །རོ་ནུས་ཁམས་གསུམ་ཁྱབ་པའི་འགྲོ་ཀུན་གྱི། །མི་བཟད་ནད་བརྒྱ་མཐའ་དག་དྲུངས་འབྱིན་པར། །མཛོད་ཅིག་བདེ་གཤེགས་སྨན་གྱི་བླ་མ་མཆོག །མཛོད་སྤུའི་འོད་ཟེར་འདོམ་གང་སྤྲོས་པས་ཀྱང༌། །ཕ་མཐའ་མི་མངོན་སྐྱེ་རྒུའི་དབུགས་དབྱུང་ནས། །མི་གནས་མྱང་འདས་ས་ལ་ལེགས་འགོད་པར། །མཛོད་ཅིག་བདེ་གཤེགས་(༧༨བ) ― GLG021_Page_0774 ―
[མ་དཔེ་གཟིགས་ན་འདིར་གནོན།]
ཤཱཀྱ་སེང་གེ་ཀྱེ། །ཞེས་གསོལ་དཔོན་ཚེ་དབང་རབ་རྟེན་གྱིས་དད་རྟེན་གསར་བཞེངས་ཀྱི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །རས་དཀར་དངས་མཚོར་ཡན་ལག་རྗེས་བཀོད་ཟླ། །ཤར་བའི་དཀྱིལ་འཁོར་སྣང་བརྙན་རི་དྭགས་གཟུགས། །སྣ་ཚོགས་མོས་ལྡན་སྐུ་ཡི་ཀཏྤུ་རའི། །ཟེགས་མས་སྒོ་གསུམ་དུ༔ཁའི་ཚ་གདུང་བཅིལ། །བསོད་ནམས་མ་དྲོས་མཚོ་ལས་བབས་པའི་ཀླུང༌། །ཆད་མེད་རྙོག་བྲལ་རྒྱུ་བའི་རླབས་ཀྱི་འཕྲེང༌། །ཕན་བདེའི་དབུ་བ་དཀར་པོའི་དོ་ཤལ་དེ། །སྐྱེ་མང་ཆུ་ལྷའི་བུ་མོའི་མགྲིན་པར་དངོམ། །མཐའ་མེད་སྲིད་པའི་ཁ་དོག་ཆ་བསགས་སྒྲོ། །ཟླུམ་པོའི་གདུགས་འཁྱིར་འདི་སྣང་རྨ་བྱ་མོ། །གཏན་མདུན་མངལ་ཁུར་སྦྲུམས་པ་དགེ་བའི་འབྲུ། །ཐར་ལམ་སྤྲིན་གྱི་ལམ་ནས་སྐད་གསང་ལྡིར། །རྒྱུ་སྦྱོར་དབུ་མཛད་ངག་དབང་ཕུན་ཚོགས་ཀྱིས། །རྫོགས་ལྡན་དབྱར་གྱི་དགའ་སྟོན་འབོད་པའི་བྱ། །དགེ་ལེགས་གཞན་བསོས་གླུ་དབྱངས་ཕང་འགྲོའི་སྒྲ། །སྙན་པོ་རྣ་བའི་གསོས་སུ་འཇེབས་པར་ཤོག །ཡོན་སྦྱོར་ཙམ་མིན་བཟོ་རིས་ལས་བྱེད་དུ། །གཏོགས་རྣམས་སྲིད་ཞིའི་དགེ་བ་ཀེ་ས་ར། །བཅུད་དུ་མྱངས་པའི་དངར་པོ་སྦྲང་རྩིའི་རོ། །སྐྱེ་བ་ཀུན་ཏུ་ལོངས་སུ་སྤྱོད་པར་ཤོག །ཅེས་དབུ་མཛད་ངག་དབང་ཕུན་ཚོགས་ཀྱིས་འདི་གའི་འདྲ་འབག་ཡན་ལག་གི་རྗེས་ཡོད་པ་ཞིག་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་(༧༩ན) ― GLG021_Page_0775 ―
[མ་དཔེ་གཟིགས་ན་འདིར་གནོན།]
དཀོན་ཅོག་གོ །འཇམ་དཔལ་དབྱངས་དངོས་དགའ་བའི་བཤེས་གཉེན་ལ། །ལུས་ངག་ཡིད་གསུམ་གུས་པས་གསོལ་བ་འདེབས། །རིགས་ཀྱི་བདག་པོ་ཚེ་མཐའ་ཡས་པའི་སྐུར། །བཞེངས་ནས་སྐྱེ་བ་ཀུན་ཏུ་རྗེས་འཛིན་ཤོག །ཅེས་པཎྜི་ཏ་ཆོས་རྗེའི་ངོར་ཟ་ཧོར་གྱི་བནྡེས་སྦྱར་བའོ། །སྲས་བཅས་རྒྱལ་བའི་སྒྱུ་འཕྲུལ་གངྒཱའི་རྡུལ། །དེ་སྙེད་འགྲོ་བློར་གྲངས་སུ་ཉེར་བཅད་པ། །བསོད་ནམས་ཞིང་དུ་སྤེལ་བས་ངག་གི་དབང༌། །བློ་གསལ་སྐལ་བཟང་རྒྱ་མཚོ་ཞབས་བརྟན་ཤོག །འཆད་རྩོད་རྩོམ་ལ་འཇིགས་པ་མེད་པའི་མཐུ། །རྣམ་དཔྱོད་བཙན་པོའི་གོ་ཆ་རབ་བགོས་པས། །ཐུབ་དབང་ཤཱཀྱ་སེང་གེའི་བསྟན་པ་ཡི། །ལང་ཚོ་རྒྱས་པའི་སྡེ་གང་བརྟན་གྱུར་ཅིག །སྣ་ཚོགས་བདོག་པའི་ཕུང་པོ་ཆེར་སྤུངས་ཤིང༌། །བློ་མིག་ཡངས་པའི་མཁན་པོ་རིག་བྱེད་བཀུག །སྒོ་གསུམ་རབ་འབད་ཞིང་ས་གཤིན་པོ་ལ། །འདི་སྣང་བདེ་སྐྱིད་སྣང་བ་སྨིན་པར་ཤོག །ཚེ་རབས་མང་པོར་རང་རྒྱུད་ལ་བགོས་པའི། །སྡིག་ལྟུང་དེས་བསྐྱེད་དུ༔ཁའི་དྲི་མ་ཀུན། །ལེགས་བྱས་ཆུས་བཀྲུས་གཏན་མདུན་ཟླ་བའི་བཞིན། །ལས་ཀྱི་མེ་ལོང་ངོས་སུ་འཆར་བར་ཤོག །སྒྲིབ་ལུས་ལྟོ་འགྲོའི་ཤུན་པ་ལྟར་རྗེས་ཤུལ། །ངོ་མཚར་མཚན་དཔེའི་སྣང་བ་ཡོངས་ཤར་བ། །སེམས་ཅན་ཀུན་གྱིས་མཐོང་བས་དོན་ལྡན་པ། །སྟོབས་བཅུ་མངའ་བའི་གོ་འཕང་ཐོབ་པར་ཤོག །ཅེས་བཀྲ་ཤིས་དབང་ཕྱུག་གིས་འགྲོ་ལ་རྗེས་བརྩེ་མའི་ཐང་ག་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་(༧༩བ) ― GLG021_Page_0776 ―
[མ་དཔེ་གཟིགས་ན་འདིར་གནོན།]
སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ ། ཡིད་ཆེས་མོས་པས་གཏན་གྱི་སྐྱབས་གནས་སུ། །བཟུང་སྟེ་མེ་ཁྱེར་ནམ་མཁའི་ནོར་བུ་རུ། །སྒྲོ་བཏགས་སྣང་བརྙན་མཐའ་སྐོར་བླ་མ་དང༌། །སངས་རྒྱས་བྱང་སེམས་མགྲོན་ཐབས་ཚུལ་བཞེངས་དགེས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་བརྟན་བཞུགས་ནས། །ཆོས་འཁོར་རྒྱུན་ཆད་མེད་པར་བསྐོར་བ་སོགས། །བཞེད་པའི་དོན་ཀུན་ལྷུན་གྱིས་གྲུབ་པར་ཤོག །བདག་སོགས་མགོན་པོ་ཁྱོད་ཀྱིས་ཚེ་རབས་སུ། །འབྲལ་མེད་དགེ་བའི་བཤེས་གཉེན་མཛད་པའི་མཐུས། །དལ་བའི་རྟེན་ཐོབ་ཐོས་བསམ་སྒོམ་པ་ཡིས། །ས་ལམ་ཡོན་ཏན་ཕ་མཐར་ཕྱིན་པར་ཤོག །གནས་སྐབས་སུ་ཡང་དུས་མིན་འཆི་བ་དང༌། །འཐབ་རྩོད་དབུལ་ཕོངས་ནད་རིམས་གདོན་བགེགས་སོགས། །འཇིགས་ཆེན་བརྒྱད་དང་བཅུ་དྲུག་གིས་མཚོན་པའི། །མི་འདོད་ཉེས་པའི་ཚོགས་ཀུན་ཞི་བར་ཤོག །ཚེ་རིང་ལུས་ངག་བདེ་ཞིང་ཡིད་དགའ་རྙེད། །ཚོང་ལ་ཁེ་སྤོགས་ལོ་ཏོག་དུས་སུ་སྨིན། །དབང་པོ་སྒོ་ལྔར་སིམ་པའི་ཚོར་བ་ཡི། །བསམ་དགུ་ཐམས་ཅད་ཡིད་བཞིན་འགྲུབ་པར་ཤོག །ནག་ཕྱོགས་བདུད་རིགས་འབྱུང་པོའི་བསམ་སྦྱོར་ཞི། །དཀར་ཕྱོགས་སྐྱོང་རྣམས་མཐུ་སྟོབས་ནུས་པ་ལྡན། །རྟེན་ཅིང་འབྲེལ་པར་འབྱུང་བ་བསླུ་བ་མེད། །བདེན་པའི་སྟོབས་ཀྱིས་འགྲོ་རྣམས་བདེ་བར་ཤོག །ཀུན་ལ་མ་འདྲིས་མཛའ་བཤེས་རྫོགས་སངས་རྒྱས། །མཐོང་ཐོས་དྲན་རེག་འཚེངས་པ་དམ་པའི་(༨༠ན) ― GLG021_Page_0777 ―
[མ་དཔེ་གཟིགས་ན་འདིར་གནོན།]
ཆོས། །ཡང་དག་ལམ་སྟོན་སྐྱེ་འཕགས་དགེ་འདུན་ཏེ། །དཀོན་ཅོག་གསུམ་གྱི་བཀྲ་ཤིས་དེང་འདིར་སྩོལ། །ཞེས་འདི་གའི་འདྲ་འབག་ལ་འདོད་ལྷས་བསྐོར་བའི་བྲིས་ཐང་སྒྲོལ་མ་ལྷ་མཛེས་ཀྱིས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཤཱཀ་སེང་རིང་ལུགས་འཆད་རྩོད་རྩོམ་པ་ལ། །ངག་གི་དབང་ཕྱུག་བློ་གྲོས་བྱེ་བའི་གཏེར། །མཁས་བཙུན་བཟང་བའི་མཛད་ཕྲིན་རྒྱ་མཚོའི་མཐར། །ཡོངས་ཁྱབ་བསྟན་པའི་བདག་པོར་གསོལ་བ་འདེབས། །གང་སྐུ་བླ་མ་ཡི་དམ་སྲུང་མའི་ཚོགས། །མ་ཚང་མེད་པར་རབ་གཏམས་ནུས་མཐུ་ཡིས། །མི་ཤིགས་སྲོག་གི་ཀ་བ་ཉེར་ཚུགས་ནས། །གཡུང་དྲུང་ལྟ་བུར་སྲིད་མཐར་ཞབས་བརྟན་ཤོག །ཞྭ་སེར་འཆང་བའི་སྟོབས་འབྱོར་ལོངས་སྤྱོད་སོགས། །གྱེན་དུ་འདེགས་ལ་འགྲན་བྲལ་གདུགས་དཀར་པོའི། །གྲིབ་མར་མངའ་འབངས་སྐྱེ་རྒུ་ཕན་བདེ་ལ། །སྦྱོར་མཛད་སངས་རྒྱས་རྒྱ་མཚོ་ཞབས་བརྟན་ཤོག །ཐུབ་བསྟན་སྤྱི་དང་རྗེ་བཙུན་ཙོང་ཁ་པའི། །ཆོས་སྲིད་བྱ་བ་མཐའ་དག་བླ་ནས་བླར། །གོང་འཕེལ་མི་མཐུན་བར་བཅོད་རབ་ཞི་སྟེ། །བསམ་དོན་ཐམས་ཅད་ཡིད་བཞིན་འགྲུབ་པར་ཤོག །དཀོན་ཅོག་རིན་ཅེན་རྣམ་གསུམ་ཐུགས་རྗེ་དང༌། །མཐུ་ལྡན་དམ་ཅན་རྒྱ་མཚོའི་དྲག་རྩལ་སྟོབས། །བདེན་ཚིག་གྲུབ་པའི་དྲང་སྲོང་ལ་སོགས་པས། །རེ་འབྲས་ཇི་བཞིན་འགྲུབ་པའི་བཀྲ་ཤིས་ཤོག །ཅེས་པ་འདི་ནི་སྔགས་(༨༠བ) ― GLG021_Page_0778 ―
[མ་དཔེ་གཟིགས་ན་འདིར་གནོན།]
རམས་པ་དོན་གྲུབ་རྒྱ་མཚོས་ངེད་རང་སྡེ་པ་རིང་འཚོའི་ཚིགས་བཅད་དགའ་བ་གདོང་དུ་འཛུགས་རྒྱུར་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །བརྒྱ་ཕྲག་རོ་བདའི་དཔག་བསམ་ཉིང་ཁུ་ཡིས། །ཟླ་ཞུན་ལྟར་དཀར་དངུལ་རྒྱན་གྲངས་ལྡན་ནང༌། །ལེགས་གཏམས་བསོད་ནམས་བྱ་བའི་ཞིང་གི་མཆོག །མཐའ་ཡས་དགེ་འདུན་ཚོགས་ལ་ཡོངས་ཕུལ་དགེས། །ངག་དབང་འཇམ་མགོན་བློ་བཟང་གྲགས་པ་ཡི། །ལུང་རྟོགས་བསྟན་པ་རྒྱ་མཚོའི་མཐར་ཐུག་པར། །སྤེལ་ཕྱིར་ཕྱག་ན་པདྨ་ངུར་སྨྲིག་གར། །ལེགས་བསྒྱུར་རྗེ་བཙུན་བླ་མ་ཞབས་བརྟན་ཤོག །གནམ་སའི་དཀྱིལ་འཁོར་ཆེན་པོ་མ་ལུས་པར། །སྟོབས་འབྱོར་མངའ་ཐང་ལ་སོགས་འཛད་མེད་བསྒོ། །ཡོངས་བྱེད་བསྟན་པའི་སྦྱིན་བདག་བོ་ཤོག་ཐུ། །བཙུན་མོ་སྲས་བཅས་བློན་འབངས་ཐམས་ཅད་ཀྱི། །རང་གདོན་ཀུན་བྲལ་ཚེ་དང་བསོད་ནམས་རྒྱས། །ཁམས་གསུམ་དབང་འདུས་ཕ་རོལ་ལོག་འདྲེན་དཔུང༌། །རང་ཞིར་གྱུར་ནས་ཡིད་ལ་གང་བསམས་པའི། །བཞེད་དོན་མཐའ་དག་ལྷུན་གྱིས་གྲུབ་པར་ཤོག །ཅེས་པ་འདི་ནི་ནོར་འཛིན་གྱི་གཞི་ཆེན་པོར་སྟོབས་ཀྱི་དཔུང་པས་དབང་སྒྱུར་བ་བསྟན་པའི་སྦྱིན་བདག་དགའ་ལྡན་བསྟན་འཛིན་བོ་ཤོག་ཐུ་དང༌། རྒྱལ་མོ་ཨཎྱ་ལྷག་བསམ་རྣམ་པར་དག་པས་ཀུན་ནས་བླངས་ཏེ་ཚོགས་གསོག་དར་རྒན་རབ་འབྱམས་པ་བློ་བཟང་རྒྱལ་མཚན་ཆེད་དུ་མངགས་ནས་ཆོས་སྡེ་ཆེན་པོ་སོ་སོར་མང་ཇ་བརྒྱ་ཕྲག་གསུམ་རེ་བཏང་བ་གྲུབ་(༨༡ན) ― GLG021_Page_0779 ―
[མ་དཔེ་གཟིགས་ན་འདིར་གནོན།]
འཚམས་དཔལ་ལྡན་འབྲས་སྤུངས་དང་བཀྲ་ཤིས་ལྷུན་པོར་སྔ་སོར་ཕུལ་བའི་འཕྲོས་དངུལ་རྐྱན་ལྔ་རེ། སེ་ར་ཐེག་ཆེན་གླིང་དུ་བཅུ་གསུམ། རི་བོ་དགའ་ལྡན་དུ་བཅུ་གཅིག་རྣམས་འབུལ་རྒྱུར་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་ཛཡནྟུ། །སྐྱེ་རྒུའི་མགོན་གྱུར་བླ་མ་རྗེར། །གདན་གསུམ་ཚང་བའི་སྣང་བརྙན་འདི། །ཡོངས་བཞེངས་མཐུ་ཡིས་ཡང་སྲིད་ཀུན། །བཤེས་གཉེན་དམ་པ་མཛད་དུ་གསོལ། །ཞེས་ཨ་གླིང་ཆོས་མཛད་དངོས་གྲུབ་རྒྱ་མཚོས་དད་རྟེན་དུ་ངེད་རང་གི་འདྲ་འབག་གསེར་ཟངས་ལས་གྲུབ་པ་བཞེངས་པའི་ཁ་བྱང་དུ་ཟ་ཧོར་གྱི་བནྡེས་བཀོད་པ་བྷ་ཝནྟུ། །མཆོག་ཐུན་དངོས་གྲུབ་ཡིད་བཞིན་དབང་གི་རྒྱལ། །འབྲལ་མེད་སྩོལ་མཛད་རྗེ་བཙུན་ཐམས་ཅད་མཁྱེན། །མི་ཕྱེད་དད་པས་སྙིང་ནས་གསོལ་འདེབས་ན། །བྱིན་རླབས་ཐུགས་རྗེས་བདག་རྒྱུད་སྨིན་པར་ཤོག །ཅེས་པའང་བོ་རོ་ཇང་གིའི་ངོར་ཟ་ཧོར་བནྡེས་བྲིས། །ངག་དབང་འཇམ་མགོན་བློ་བཟང་གྲགས་པ་ཡི། །རྨད་བྱུང་ལུང་རྟོགས་བསྟན་པ་རྒྱ་མཚོའི་གཞིར། །ཁྱབ་པར་ཡོངས་སྤེལ་བཤེས་གཉེན་དམ་པ་མཆོག །གཡུང་དྲུང་ལྟ་བུར་བསྐལ་བརྒྱར་ཞབས་བརྟན་ཤོག །དེང་ནས་ཇི་སྲིད་བྱང་ཆུབ་སྙིང་པོའི་བར། །བླ་མ་མཆོག་དང་ནམ་ཡང་མི་འབྲལ་ཞིང༌། །བྱམས་བརྩེའི་ཐུགས་རྗེ་ཆེན་པོས་ཉེར་བཟུང་སྟེ། །ཟག་བྲལ་བདུད་རྩིའི་རོ་ཡིས་ཚིམ་ནུས་ཤོག །སླུ་མེད་དཀོན་(༨༡བ) ― GLG021_Page_0780 ―
[མ་དཔེ་གཟིགས་ན་འདིར་གནོན།]
ཅོག་རྣམ་གསུམ་བྱིན་རླབས་ཀྱིས། །གནས་སྐབས་ནད་གདོན་ཉེས་ཀུན་ཞི་བ་དང༌། །མཐར་ཐུག་ངེས་པར་ལེགས་པའི་གཏན་གྱི་བདེར། །སྦྱོར་བའི་སྨོན་ལམ་མྱུར་དུ་འགྲུབ་པར་ཤོག །ཅེས་པའང་ཐོ་གོལ་ཐའི་ཇི་ནང་ཚང་གཉིས་ཀྱིས་འདི་ལྟ་བུ་ཞིག་དགོས་ཚུལ་བྱུང་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཞིང་ཁམས་རྒྱ་མཚོའི་གཙོ་བོ་བདེ་ལྡན་མགོན། །མཚན་དཔེས་ཉེར་སྤྲས་ཚེ་དང་ཡེ་ཤེས་གཏེར། །ཡིད་བཞིན་འཁོར་ལོ་རྣམ་པར་རྒྱལ་མ་སོགས། །འཆི་མེད་གྲུབ་པའི་ལྷ་ཡིས་ཤིས་པ་སྩོལ། །ཟབ་ཅིང་རྒྱ་ཆེའི་གནད་རྣམས་མ་ལུས་པ། །བསྟན་ནས་འགྲོ་བ་མཐའ་དག་ངེས་ལེགས་ལ། །འཁྲིད་པར་འགྲན་བྲལ་མཐུ་སྟོབས་ནུས་པའི་བདག །མཚུངས་མེད་དཔལ་ལྡན་བླ་མར་གསོལ་བར་འདེབས། །གདོང་ལྔས་རབ་བཏེག་རིན་ཅེན་ཁྲི་ཆེན་པོར། །མི་འགྱུར་གཡུང་དྲུང་གཡས་སུ་འཁྱིལ་བའི་སྟེང༌། །ཤི་རལ་ཐུ་ཡི་སྤྲུལ་པའི་སྐུ་མཆོག་འདི། །བསྐལ་བརྒྱར་རྟག་བཞུགས་ཐེག་མཆོག་ཆོས་འཁོར་སྐོར། །ཚུལ་ཁྲིམས་ལེགས་གཙང་སྒོ་གསུམ་བག་དང་ལྡན། །དངོས་སྟོབས་རིགས་པས་ཕ་རོལ་རྒོལ་བ་བཅོམས། །ཐུབ་གསུང་དགོངས་པ་ཇི་བཞིན་ཡོངས་རྟོགས་ཏེ། །སངས་རྒྱས་བསྟན་པ་ཕྱོགས་བཅུར་རྒྱས་པར་ཤོག །ཆོས་ཀུན་རྒྱུ་འབྲས་རྟེན་འབྲེལ་སླུ་མེད་ཅིང༌། །ལྷ་དང་དྲང་སྲོང་བདེན་པར་གྲུབ་པའི་ཚིག །དཀར་ཕྱོགས་སྐྱོང་བའི་སྲུང་མའི་ཚོགས་རྣམས་ཀྱིས། །སྨོན་པ་ཇི་བཞིན་(༨༢ན) ― GLG021_Page_0781 ―
[མ་དཔེ་གཟིགས་ན་འདིར་གནོན།]
རེ་འབྲས་ལྷུན་གྲུབ་མཛོད། །ཅེས་པའང་དགེ་སློང་ཕྱག་ན་རྡོ་རྗེས་གོང་མ་ཤི་རལ་ཐུའི་སྐུ་སྐྱེའི་གསོལ་འདེབས་བརྟན་བཞུགས་སྨོན་ལམ་དང་བཅས་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །མཁྱེན་བརྩེ་ནུས་སྟོབས་བཀྲག་མདངས་འོད་པོ་ཆེས། །མ་རིག་རྨོངས་པའི་མུན་ཚོགས་སེལ་མཛད་པ། །རྩ་བའི་བླ་མ་ཁྱབ་བདག་རྡོ་རྗེ་འཆང༌། །གཉིས་མེད་ངོ་བོར་མི་ཕྱེད་གསོལ་འདེབས་ན། །ཡང་ཡང་དྲིན་གྱིས་བསྐྱངས་པའི་འགྲོ་བ་རྣམས། །མི་བཟད་དུ༔ཁས་མནར་བ་མ་བཟོད་པར། །སྨོན་འཇུག་བྱང་ཆུབ་སེམས་གཉིས་ཡོངས་བསྐྱེད་དེ། །རྒྱལ་སྲས་སྤྱོད་པའི་ཉིན་མཚན་འདའ་བར་ཤོག །གྲངས་མེད་བསྐལ་པར་མ་བལྟོས་ཚེ་གཅིག་ལ། །མཚན་ལྡན་བླ་མས་དཀྱིལ་འཁོར་ཆེན་པོ་རུ། །ལེགས་བཅུག་སྐྱེ་ཤི་བར་དོ་སྐུ་གསུམ་དུ། །མངོན་གྱུར་བླ་མེད་ཟུང་འཇུག་འཐོབ་པར་ཤོག །ཅེས་པའང་རབ་འབྱམས་པ་ཤཱཀྱ་རིན་ཅེན་གྱིས་བླ་མ་ཡི་དམ་དབྱེར་མེད་ལ་གསོལ་འདེབས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །བླ་མ་ཡི་དམ་ཆོས་སྐྱོང་སྲུང་མའི་ཚོགས། །དགྱེས་སྐོང་སླད་དུ་དངུལ་དཀར་བཀོད་ལེགས་སྣོད། །ཕུལ་བས་སྐྱེ་བར་མཐོ་རིས་རྟེན་བརྙེད་ཅིང༌། །རིང་མིན་ཀུན་མཁྱེན་ཡེ་ཤེས་ཐོབ་བྱིན་རློབས། །ཞེས་(༨༢བ) ― GLG021_Page_0782 ―
[མ་དཔེ་གཟིགས་ན་འདིར་གནོན།]
པའང་འཕྱོང་རྒྱས་སྔགས་རམས་པ་བློ་བཟང་ཐུགས་རྗེས་གྲ་ཚང་དགེ་སྐོས་ཀྱི་འཇོག་ལ་དངུལ་སྲང་བཅོ་ལྔར་ཞོ་དོས་མ་ལོངས་པའི་པད་སྡེར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བྲིས། །ལྷ་སྔགས་ཡེ་ཤེས་རོལ་པའི་ཕོ་བྲང་ཆེར། །གན་གོས་དབང་གཞུ་ལྟར་བཀྲའི་བཀོད་ལེགས་ལ། །སྣ་ཚོགས་ལྡ་ལྡིའི་ཆུན་པོ་རབ་གཡོའི་འཕྲེང༌། །མཆོད་སྤྲིན་ནམ་མཁའ་མཛོད་ཀྱི་སྒོ་འཕར་ཕྱེ། །དུས་གསུམ་རྩ་བརྒྱུད་བླ་མ་ཐམས་ཅད་དང༌། །ཞི་ཁྲོའི་ལྷ་ཚོགས་ཀུན་འདུས་འཕྲིན་ལས་ལྷ། །རྡོ་རྗེ་གཞོན་ནུ་གཙོར་གྱུར་གསར་རྙིང་གི །ཡི་དམ་རྒྱལ་བ་རྒྱ་མཚོ་མཁའ་འགྲོར་བཅས། །ཐུགས་དམ་གཉན་པོ་སྐོང་བའི་བྱིན་རླབས་དང༌། །ནུས་སྟོབས་མཐུ་ཡིས་རྡོ་རྗེ་ཐོགས་མེད་རྩལ། །བསྐལ་པའི་བར་དུ་ཨ་ཧཾ་མི་ཤིགས་པའི། །ཀ་བ་བརྟན་པོ་ཉེ་བར་ཚུགས་པར་ཤོག །འཕྲིན་ལས་རྣམ་བཞི་གྲུབ་ཆེན་བརྒྱད་ལ་སོགས། །ཐུན་མོང་ལས་ཀུན་ཐོགས་མེད་བསྒྲུབས་པའི་ཞར། །ཕན་བདེའི་རྩ་བ་ངེས་ལེགས་གོ་འཕང་མཆོག །བཤད་སྒྲུབ་བྱ་བས་འཛམ་གླིང་ཡོངས་ཁྱབ་ཤོག །དགེ་བས་རྒྱུ་སྦྱོར་འཁོར་བཅས་ནད་གདོན་ཞི། །ཚེ་དཔལ་བསོད་ནམས་དབྱར་མཚོ་ལྟ་བུར་སྤེལ། །མི་ནོར་ལོངས་སྤྱོད་སྲིད་ཞིའི་འདོད་རྒུ་སྡུས། །ལོག་པར་འཁུ་བའི་ཚོགས་རྣམས་འཇོམས་པར་ཤོག །ཅེས་པའང་ཡར་ཀླུངས་ཆུ་མིག་མགོ་པ་དབུ་མཛད་དམ་ཆོས་དབང་རྒྱལ་གྱིས་སྙན་དར་གོང་བ་གན་གོས་ཚོན་(༨༣ན) ― GLG021_Page_0783 ―
[མ་དཔེ་གཟིགས་ན་འདིར་གནོན།]
ཁྲ། །གོང་སྐྱོར་ཁ་ཐི་ལྗང་ཁྲ། མཐའ་འཇའ་སུམ་གཤིབས། རྒྱབ་ཤ་རས་ལྗང༌། ལྗང་སེར་གྱི་ཨ་ལུང༌། ཤམ་བུ་ལིང་ལྗང་དང་བཅས་པ་འདོམ་ཉི་ཤུ་རྩ་བཞི། སྙན་དར་ཉིན་བདེ་རྣམ་བཅུ་མངགས་བཏགས་མ་བཅུ་དྲུག །མ་རིག་གཉིད་སངས་མ་གསུམ། རྟགས་བརྒྱད་མ་བརྒྱད། མཐིང་ཁྲ་གསུམ། ཟངས་ཁྲ་གཉིས། ལིང་གསེར་བར་མ་ཚོས་ཁ་སྣ་ཚོགས་བདུན། སྨན་རྙིང་ཁ་ཕྱེད་སུམ་འབྲེལ་གཅིག །དཀར་ཆག་བྲིས་པའི་འདོམ་འཁོར་མ་གཅིག་རྣམས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་ཕུལ་བའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཆོས་ཀུན་འབྱུང་གནས་བདེ་བར་གཤེགས་པའི་ཡུམ། །གདོད་ནས་སྐྱེ་འགག་གནས་བྲལ་ནམ་མཁའི་དབྱིངས། །བསླུ་བ་མེད་པའི་རྒྱུ་འབྲས་དབང་གཞུ་ལྟར། །ཡོངས་ཤར་རྟེན་འབྲེལ་གཤིས་ལུགས་ཁོ་ནར་ངེས། །ཤཱཀ་སེང་མགུར་ནས་གསུང་དབྱངས་དྲུག་ཅུ་ཡི། །ཆོས་འཁོར་བར་མའི་ཡང་སྙིང་པུསྟ་ཀ༔ ། ལེགས་པར་བཞེངས་པས་དཀྱིལ་འཁོར་རྒྱ་མཚོའི་གཙོ། །རྡོ་རྗེ་འཆང་དངོས་ཁྱབ་བདག་ཞ་ལུ་པ། །རིན་ཅེན་བསོད་ནམས་མཆོག་གྲུབ་དཔལ་བཟང་པོ། །དག་པའི་ཞིང་དུ་སྐལ་ལྡན་གདུལ་བྱ་རྣམས། །ཚོགས་གཉིས་རྫོགས་ཕྱིར་མཆོག་གི་སྤྲུལ་སྐུའི་གར། །ཉེར་བསྒྱུར་བླ་མེད་ཡེ་ཤེས་སྦྱོར་བར་ཤོག །རྣམ་དཀར་གངྒཱའི་ཡབ་ཅིག་ནས་བབས་ཏེ། །འཕྲིན་ལས་ཆད་པ་མེད་པའི་ཆུ་བོའི་རྒྱུན། །(༨༣བ) ― GLG021_Page_0784 ―
[མ་དཔེ་གཟིགས་ན་འདིར་གནོན།]
ལུས་ཅན་བདེ་སྐྱིད་རྒྱ་མཚོ་ཆེན་པོ་རུ། །དབབ་མཛད་ཁྱོད་ཉིད་ཐུགས་བཞེད་འགྲུབ་པར་ཤོག །བླ་མ་ཡི་དམ་རྣམས་ཀྱི་བྱིན་རླབས་དང༌། །དཔའ་བོ་མཁའ་འགྲོ་ཆོས་སྲུང་ལྷ་ཀླུར་བཅས། །བདེན་ཚིག་གྲུབ་པའི་ཚོགས་ཀྱི་ནུས་མཐུ་ཡིས། །ཇི་བཞིན་འགྲུབ་པའི་རེ་བ་བསྐོང་བར་མཛོད། །ཅེས་ཁྱབ་བདག་རྡོ་རྗེ་འཆང་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོ་དག་པའི་ཞིང་ཁམས་སུ་སྐལ་ལྡན་གྱི་གདུལ་བྱ་རྣམས་སྨིན་གྲོལ་མཆོག་ལ་འགོད་པར་བཞེད་དོན་འགྲུབ་པའི་ཆེད་དུ་ཕྱག་མཛོད་བསོད་ནམས་རིན་ཅེན་གྱིས་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་གསེར་ཆོས་དབུས་གཙང་གསུང་རྟེན་དུ་བཞེངས་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །དུས་གསུམ་རྒྱལ་བའི་མཁྱེན་བརྩེ་ནུས་མཐུ་རྣམས། །ཡོངས་འདུས་ངག་དབང་བློ་བཟང་རྒྱ་མཚོ་ཡིས། །ཡང་སྲིད་ཀུན་ཏུ་མི་འབྲལ་རྗེས་བཟུང་ནས། །མཆོག་ཐུན་དངོས་གྲུབ་མ་ལུས་འགྲུབ་བྱིན་རློབས། །ཞེས་པའང་ཨེམ་ཆི་བློ་བཟང་ནོར་བུའི་ངོར་ཟ་ཧོར་གྱི་བནྡེས་བྲིས། །བླ་མེད་ཡེ་ཤེས་བདུད་རྩི་གདོད་མ་ནས། །མཚན་དཔེའི་གཟི་བྱིན་འབར་བ་སྤྲུལ་པའི་གར། །སྨན་གྱི་བླ་མ་མཆེད་བདུན་ཞེས་གྲགས་པ། །སྐྱེ་རྒུའི་བསོད་ནམས་གཞི་རྟེན་རྨད་པོ་ཆེ། །བྱིན་རླབས་ལུས་ཅན་ཁམས་དང་ཉེར་འཚམ་པར། །(༨༤ན) ― GLG021_Page_0785 ―
[མ་དཔེ་གཟིགས་ན་འདིར་གནོན།]
ཡོངས་འཇུག་བརྒྱད་བརྒྱའི་གྲངས་ཚང་སྨན་གྱི་མདོ། །འགྲོ་བའི་གཉེན་གྱུར་ཐུབ་གསུང་ལྗགས་རིང་ལས། །ལེགས་འོང་སྐལ་ལྡན་གདུལ་བྱའི་དཔལ་དུ་ཤར། །ཁྱེད་གསུང་པར་དུ་བསྐྲུན་པའི་བཟང་པོའི་ཆབ། །བརྩོན་འགྲུབ་མ་དྲོས་ཀླུང་ཆེན་ནས་བབས་པ། །སྨོན་ལམ་ཟླ་བའི་མ་མ་ཟད་མིན་པར། །རོ་གཅིག་འབྲས་མཆོག་ཟླ་ལྟར་འཕེལ་བར་ཤོག །ཅེས་པའང་ཨུན་དུ་སུ་མཁན་པོས་སྨན་བླའི་མདོ་པར་དུ་བརྐོས་དུས་དགོས་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །མཁྱེན་བརྩེའི་སྤྱན་ཟུར་ནམ་ཡང་ཡོལ་མེད་དུ། །ཅུང་ཟད་ལྷུང་བས་འཁོར་བའི་གདུང་བཅིལ་བ། །བུ་རམ་ཤིང་པས་ཕྱག་རིང་རབ་བརྐྱངས་ཏེ། །སྤྱི་བོར་ཞོག་ལ་བྱང་ཆུབ་ལུང་བསྟན་མཛོད། །ཕྱི་ནང་དྲང་སྲོང་ཀླ་ཀློ་ལ་སོགས་པའི། །སྟོན་པར་བཏགས་པ་མང་ཡང་ས་ལྷ་ཡིས། །གསེར་ལྡན་ལས་ཐོན་ཐལ་མོ་ཉེར་སྦྱར་ནས། །སྐྱོབ་པ་ཁྱོད་ཉིད་ཟླ་བྲལ་དཔང་པོ་བྱས། །ཆོས་རྒྱལ་མེས་དབོན་སྲས་བཅས་བློན་འབངས་དང༌། །པཎ་ཆེན་འཇིག་རྟེན་མིག་གཅིག་མཛད་བཟང་གྲུས། །རྒྱ་གར་རྒྱ་མཚོ་ཆེར་བསྒྲལ་གངས་ལྗོངས་འདིར། །ལེགས་དྲངས་རྒྱས་འབྲིང་བསྡུས་པ་ཡིད་བཞིན་ནོར། །དགེ་མཚན་བཅུ་ཚང་ལྷ་ལྡན་ཡུལ་གྲུ་ནས། །དཀོན་ཅོག་མཆིས་འབྲང་བཅས་པའི་བདོག་པའི་ཚོགས། །སྙིང་པོ་ལེན་ཕྱིར་ཉེར་གཅིག་གླེགས་བམ་འཕྲེང༌། །འབད་རྩོལ་སྲད་བུར་ལེགས་བརྒྱུས་ཚར་དངར་བསྒྲུབས། །ཐུབ་གསུང་སྲི་ཞུར་དང་བས་རྒྱུད་རབ་བསྐུལ། །འདྲི་ཀློག་ཆེད་དུ་མཆོད་སྤྲིན་ལེགས་སྤྲོས་(༨༤བ) ― GLG021_Page_0786 ―
[མ་དཔེ་གཟིགས་ན་འདིར་གནོན།]
དགོས། །ཚེ་རབས་ཐོག་མ་མེད་ནས་དེང་གི་བར། །བསགས་པའི་སྡིག་ལྟུང་ཚོགས་རྣམས་དག་པར་ཤོག །ཤིན་ཏུ་བགྲོད་ཀའི་མི་ཁོམ་ཆུ་ཆེན་ལ། །དལ་བརྒྱད་འབྱོར་བཅུའི་ཟམ་པ་ཉེར་བཙུགས་པར། །རབ་ཕྱིན་བླ་མེད་ཡེ་ཤེས་གནས་སོན་ཏེ། །རྟག་ཏུ་བདེ་བའི་དགའ་སྟོན་ལོངས་སྤྱོད་ཤོག །འདིས་མཚོན་རྣམ་དཀར་བསོད་ནམས་བྱས་སོ་ཅོག །འབྲས་བུ་རང་ཉིད་ཁོ་ནའི་ཆེད་མིན་པར། །ནམ་མཁའི་མཐའ་དང་མཉམ་པའི་འགྲོ་བ་ཀུན། །འདྲེན་པའི་དེད་དཔོན་ཆེན་པོར་འགྱུར་བར་ཤོག །དར་གླིང་དཀོན་ཅོག་གཡང་ཅན་དཔལ་འཛོམ་ནང་མིར་བཅས་པར་དགྲ་ལྷ་དམག་དཔོན་གངས་ལ་ཉི་ཤར་དང་རབ་འབྱམས་པ་མཁས་བཙུན་གཉིས་ཀྱིས་བཞེང་པའི་བསྐུལ་མ་བྱུང་བར་བརྟེན་བཀའ་བར་པའི་ཡང་སྙིང་མདོ་རྒྱས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་པོ་ཏི་བཅུ་དྲུག །འབྲིང་ཉི་ཁྲི་པོ་ཏི་བཞི། བསྡུས་པ་བརྒྱད་སྟོང་པ་པོ་ཏི་གཅིག་རྣམས་བཞེངས་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །སངས་རྒྱས་སྲས་བཅས་སློབ་མའི་ཚོགས་རྣམས་ཀྱི། །དྲི་མེད་ཡེ་ཤེས་སྤྱན་གྱིས་རབ་གཟིགས་ནས། །དོན་གྲུབ་དབང་རྒྱལ་སྲིད་པ་གར་འཕྱན་ཡང༌། །མཐུ་དཔུང་སྐྱེད་ལ་དག་པའི་ཞིང་དུ་དྲོངས། །ཞིང་ཁམས་ཁྱད་འཕགས་བདེ་ལྡན་པདྨ་ལས། །ཉེར་ཐོན་སྟོན་པ་འོད་དཔག་མེད་མགོན་ཞལ། །མཐོང་སྟེ་དམ་ཆོས་བདུད་རྩི་རབ་མྱངས་པས། །འགྲོ་བ་འདྲེན་པའི་དེད་དཔོན་མྱུར་ཐོབ་ཤོག །འདིས་མཚོན་དུས་(༨༥ན) ― GLG021_Page_0787 ―
[མ་དཔེ་གཟིགས་ན་འདིར་གནོན།]
གསུམ་ཡོངས་བསགས་དགེ་བའི་མཐུས། །སྒྲིབ་གཉིས་བག་ཆགས་བཅས་པ་དྲུངས་ཕྱུངས་ནས། །རིང་པོར་མི་ཐོགས་སྟོབས་བཅུ་མངའ་བའི་རྩལ། །ཐོབ་པར་མཆོག་གསུམ་ཐུགས་རྗེས་འགྲུབ་བྱིན་རློབས། །ཞེས་པའང་ཟུར་ཁང་དོན་གྲུབ་དབང་རྒྱལ་དུས་ཀྱི་ཆོས་ཉིད་དུ་གྱུར་བའི་ཚེ་གཞིས་མི་རྣམས་ཀྱིས་དགོན་ཁ་ཤས་སུ་འཛུགས་རྒྱུར་དགོས་ཚུལ་ལྟར་ཟ་ཧོར་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །པ དྨ མཱ ལཱི ཀ པཱ ལཱ ནུ ཀ མྤེ མ ཧཱ ར སྨ ས ཏྭཱ ན བི དྱཱ ནྡྷ ཀཱ རོ གྷ ནཿ པདྨ་ཐོད་འཕྲེང་བརྩེ་ཆེན་འོད་པོ་ཆེས། །སྐྱེ་རྒུའི་མ་རིག་སྟུག་པོའི་སྨག་གི་རུམ། །བྷ པྲ བཱི ཤཱ རི རཾ དྷ རྨ རཱ ཛ ནྣ དྷིཿ ཧཱི པ ཏི དྭཱི པ བོ དྷྱ ནྟ ཙི ཏྟ ཥྛ ཎ། བསེལ་ཕྱིར་གདུང་འཚོབ་ཆོས་རྒྱལ་གཏེར་བདག་གླིང༌། །བྱང་ཆུབ་བར་དུ་མི་འབྲལ་སྙིང་གར་བཞུགས། །ཁྱོད་ཀྱི་གསང་(༨༥བ) ― GLG021_Page_0788 ―
[མ་དཔེ་གཟིགས་ན་འདིར་གནོན།]
གསུམ་ཟློས་གར་བགྲང་ཡས་པ། །བརྗོད་པར་ནུས་མིན་རྡོ་རྗེ་ཆོས་ལ་སོགས། །ཉེར་བྱོན་འཁྲུངས་རབས་ཅུང་ཟད་འཕྲེང་བཀོད་པའི། །ངོ་མཚར་སྒྱུ་འཕྲུལ་མཐོང་བས་དད་གུས་འཕེལ། །ཟབ་ལས་ཆེས་ཟབ་ཐུགས་གཏེར་ནས་བྱུང་བའི། །རྩ་གསུམ་སྣང་བརྙན་དབང་གཞུ་ལྟར་བཀྲ་བ། །མ་འདྲེས་ཡིད་ཀྱི་དངས་མཚོར་རབ་ཤར་བས། །ལྷ་སྔགས་ཡེ་ཤེས་རོལ་པ་ཅིར་ཡང་འཆར། །གཡེལ་མེད་རྩེ་གཅིག་གསོལ་བསྒྲུབ་བགྱིད་པ་ཡི། །དམིགས་རྟེན་བཞེངས་མཐུས་སྐྱེ་ཞིང་སྐྱེ་བ་རུ། །བདག་སོགས་འགྲོ་བའི་མགོན་སྐྱབས་རབ་མཛད་དེ། །རེ་འདོད་ཇི་བཞིན་འགྲུབ་པར་བྱིན་གྱིས་རློབས། །གནས་སྐབས་ནད་གདོན་ཞི་ཞིང་ཚེ་བསོད་རྒྱས། །སྲིད་གསུམ་དབང་འདུས་ཉེར་འཚེ་ལས་རྒྱལ་ཏེ། །མཐར་ཐུག་མཁའ་སྦྱོར་ཡན་ལག་བདུན་ལྡན་སྐུར། །འགྱུར་བར་རིང་མིན་མཆོག་གསུམ་མཐུས་བྱིན་རློབས། །ཞེས་པའང་ངེད་རང་གི་དམིགས་རྟེན་དུ་པདྨའི་གདུང་འཚོབ་སྤྲུལ་སྐུ་གཏེར་བདག་གླིང་པའི་འཁྲུངས་རབས་དང་ཕྱག་ཞབས་ཀྱི་རྗེས། ཟབ་གཏེར་ལས་བྱུང་བའི་བླ་མ་ཡི་དམ་མཁའ་འགྲོའི་སྐུ་བརྙན་དང་བཅས་པ་དབུ་ཆུང་སྙེ་མོ་ཀརྨ་དང་མཁར་རྩེ་དགེ་བསྙེན་རྒྱལ་པོས་ལྕགས་བྱ་ནས་དབུ་བཙུགས་པ་ཆུ་ཁྱི་ལོར་གྲུབ་པའི་ཚེ་རྒྱབ་ཡིག་ཏུ་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སརྦསིདྡྷི་ཧོ༔། །(༨༦ན) ― GLG021_Page_0789 ―
[མ་དཔེ་གཟིགས་ན་འདིར་གནོན།]
དྷཱ ཏོ མ ཧཱ སུ ཁ ས མ ནྟ སུ མ ཉྫུ གྷོ ཥ ཤྲཱི ནྱ ཉྫ ཏེ ཛ སུ ནི མི ཏྟ བྷ བ ནྟ ཤུ ནྱ། བདེ་ཆེན་དབྱིངས་ལས་ཀུན་བཟང་འཇམ་དཔལ་དབྱངས། །མཚན་དཔེའི་གཟི་བྱིན་འཁོར་བ་སྟོངས་མིན་བར། །ནི རྤ ཉྩ ཝཱཾ བི ཙ ལ ཤ ཤྲ ཏ ཡ སྱ དེ བཿ ཤུ དྡྷ པྲ པཱ རི ཏ སུ མ ཎྜ ལ ཙ ཀྲ ཀཱ ཤྱ། ནམ་ཡང་གཡོ་མེད་ངེས་པ་ལྔ་ལྡན་པའི། །དག་པ་རབ་འབྱམས་ལྷ་ཡི་འཁོར་ལོར་གསལ། །ལོག་འདྲེན་དགྲ་བགེགས་གཤེད་དུ་ཁྲོ་གཏུམ་གཟུགས། །དྲག་ཤུལ་རྔམས་བརྗིད་མི་བཟད་གར་དགུའི་ཉམས། །དུས་ཀྱི་དགྲ་བོར་ཁྲོས་པའི་གཤིན་རྗེའི་གཤེད། །མཐོང་བ་ཙམ་གྱིས་ཁྲོ་གཞན་ལག་ཆ་འཆོར། །ཕྱི་དཀྱིལ་བཅོས་མའི་གཞལ་ཡས་ཉམས་དགའ་དང༌། །རང་བྱུང་ལུས་ཀྱི་ཕོ་བྲང་གཉིས་མེད་པ། །ཕྱག་རྒྱའི་འདུ་འཕྲོ་དོན་དམ་དཀྱིལ་འཁོར་ཆེར། །རབ་བཞུགས་ཀུན་བཟང་གོ་འཕང་མངོན་འགྱུར་ཤོག །རྒྱུད་ལྔའི་ཡིད་ཅན་རྣམས་ཀྱང་དང་པོ་ནས། །རང་ངོ་མ་འཕྲོད་འཁོར་བར་ཉེར་འཁྱམས་པ། །རྣམ་དག་ལམ་གྱིས་བརྟན་གཡོའི་དངོས་པོའི་ཚོགས། །བཅོམ་ལྡན་རྟེན་དང་བརྟེན་པར་(༨༦བ) ― GLG021_Page_0790 ―
[མ་དཔེ་གཟིགས་ན་འདིར་གནོན།]
འཆར་བར་ཤོག །དཀོན་ཅོག་རིན་ཅེན་མཐུ་དཔུང་བརྗོད་ལས་འདས། །རྒྱུ་འབྲས་རྟེན་ཅིང་འབྲེལ་འབྱུང་བསླུ་བ་མེད། །བདེན་ཚིག་གྲུབ་པ་རྣམས་ཀྱིས་བཀྲ་ཤིས་ཆར། །ཕྱོགས་བཅུར་ཕོབ་ལ་རེ་འབྲས་ལྷུན་གྲུབ་མཛོད། །ཅེས་པའང་ངེད་རང་གི་དམིགས་རྟེན་དུ་གཤེད་དམར་རུ་མཚོན་དམར་པོའི་ལྷ་ཚོགས་རྣམས་དབུ་ཆུང་སྙེ་མོ་ཀརྨ་དང་མཁར་རྩེ་དགེ་བསྙེན་རྒྱལ་པོས་ཆུ་ཁྱི་ལོར་བྲིས་པའི་ཚེ་རྒྱབ་ཡིག་ཏུ་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སརྦ་སིདྡྷི་པྲ་ཡཙྪ། །སྠཱ ན ས རྦཱ ར མཱ ཛྙཱ ན ཛཱི ཡཾ སྱ ཝཱ ཀྵཱ མ ཏི སྭཱ ར དཱ ཏྟཱ དི བཱ བྷཱ སྐ རཱ། ཤེས་བྱའི་གནས་ཀུན་ཆགས་ཐོགས་མེད་མངའ་བ། །ངག་དབང་དབྱངས་ཅན་ལྷ་མོའི་བློ་གྲོས་ཀྱིས། །བྷ དྲ ཀ ནྚ སྱ པ ཏྲཾ བི ཧཱ བེ ན ས རྦ པྲ བ པྲཱ ས མུ དྲེ ས ཧ སྭཱ ཀྵ ཛིཿ ། མགྲིན་པའི་འདབ་བཟང་ལྷག་པར་ཡོངས་བཞད་པས། །གསུང་རབ་རྒྱ་མཚོར་བལྟ་བའི་མིག་སྟོང་རྒྱས། །དད་བརྩོན་སྙིང་སྟོབས་(༨༧ན) ― GLG021_Page_0791 ―
[མ་དཔེ་གཟིགས་ན་འདིར་གནོན།]
རྣམ་དཔྱོད་ཟླ་བྲལ་རྗེ། །ཞྭ་སེར་ཅོད་པན་རིང་ལུགས་བླ་ནས་བླར། །རབ་སྤེལ་དགའ་ལྡན་བསྟན་འཛིན་བོ་ཤོག་ཐུས། །མངོན་མཐོ་ངེས་ལེགས་རྣམ་དཀར་བསྐྲུན་པའི་ཆེད། །འཇམ་དབྱངས་དགའ་བའི་བཤེས་གཉེན་སྣང་བརྙན་ལ། །བླ་མ་ཡི་དམ་མཁའ་འགྲོས་ཡོངས་བསྐོར་བ། །བཞེངས་མཐུས་སྐྱེ་ཞིང་སྐྱེ་བར་མགོན་ཁྱོད་དང༌། །འབྲལ་མེད་རྗེས་སུ་འཛིན་པའི་བཀའ་དྲིན་སྩོལ། །གནས་སྐབས་ཀུན་རྫོབ་འཁྲུལ་ངོར་ཤར་བ་ཙམ། །མ་ཡིན་དོན་དམ་ཕུང་ཁམས་ཕོ་བྲང་ཆེར། །གདན་གསུམ་རབ་ཚང་རྡོ་རྗེ་འཆང་དབང་ལས། །དཔུང་གཉེན་གཞན་ནས་མི་འཚོལ་བརྩེ་བས་སྐྱོངས། །མཐོང་ཐོས་རེག་པས་སྲིད་ཞིའི་ཡོན་ཏན་ཀུན། །བདེ་བླག་ཉིད་གྲུབ་མཁྱེན་པའི་སྤྱན་རས་ཀྱིས། །ཉེར་གཟིགས་གནས་སྐབས་མི་མཐུན་རབ་ཞི་ཞིང༌། །བདེ་སྐྱིད་སུམ་རྩེན་རྩེ་དགའ་དགོད་པར་ཤོག །མ་དག་སྐྱེ་རྒུའི་བརྣག་སེམས་ལྕགས་ཀྱི་ཁམས། །ཐབས་མཁས་ཉམས་ལེན་སྒོམ་པའི་རྩིས་བསྒྱུར་ཏེ། །འཁོར་འདས་ལེགས་བྱས་ས་ཟླའི་ཕུང་པོ་ཆེ། །སྲིད་པའི་རྩེ་མོར་འཕྱུར་བར་བྱིན་གྱིས་རློབས། །ཐུབ་བསྟན་གཞུང་ལུགས་དཔྱད་གསུམ་ཡངས་དག་པའི། །དགོངས་དོན་འཁྲུལ་མེད་འཛིན་མཛད་ཐམས་ཅད་མཁྱེན། །བློ་བཟང་གྲགས་པའི་ཆོས་སྲིད་ཉི་ཟླ་ཡི། །འོད་ཀྱིས་འཇིག་རྟེན་མུན་ཚོགས་སེལ་བར་ཤོག །འདི་ནས་བཟུང་ཐང་ག་སོ་སོར་འོག་གི་དུས་གསུམ་རྒྱལ་བའི་མཁྱེན་བརྩེ་ནུས་མཐུའི་ཚོགས་ཞེས་པའི་ཤློཀ་གཉིས་པོ་བལྡབ་དགོས། གཡས་དང་པོ། རྒྱལ་བའི་སྲས་མཆོག་གྲུ་འཛིན་བརྩེ་ཆེན་བདག །(༨༧བ) ― GLG021_Page_0792 ―
[མ་དཔེ་གཟིགས་ན་འདིར་གནོན།]
ས་ལྷའི་མགོན་གཅིག་པད་དཀར་འཆང་བའི་ལྷ། །ཐུགས་ཀའི་ཧྲཱི༔ལས་ཟག་མེད་བདུད་རྩིའི་རྒྱུན། །བབས་པས་ཡིད་ཅན་བདེ་ཆེན་ཡེ་ཤེས་རྙེད། །གཡས་གཉིས་པ། ཤིན་ཏུ་མཐོ་བའི་རིགས་གཟིགས་དད་པ་བརྟན། །མི་བསྲུན་སྲིན་པོའི་དཔུང་ཚོགས་བགྲང་ཡས་པས། །ཐབས་ཀྱིས་རབ་བཏུལ་མཁའ་འགྲོ་སྤྱན་དྲངས་པས། །བདུད་མོ་ཉེར་བསྒྲལ་རྣམ་དག་ཕྱག་རྒྱ་ལྡན། །གཡས་གསུམ་པ། ཉི་མའི་གཉེན་གྱུར་རྒྱལ་རིགས་སཱ་ལ་པའི། །བརྒྱུད་དུ་ལེགས་བྱོན་འཕགས་མཆོག་ཐུགས་རྗེ་ཡི། །བྱིན་རླབས་བོད་ཁམས་ཡོངས་ཀྱི་སྐྱབས་མགོན་དུ། །གནམ་གྱི་ཡོངས་བསྐོས་གཉའ་ཁྲི་བཙན་པོ་ཞེས། །གཡས་བཞི་པ། མི་རུང་ས་གཞི་བཏུལ་ཞིང་གངས་ལྗོངས་འདིར། །དམ་པའི་ཆོས་ཀྱི་སྲོལ་ཆེན་ཉེར་བཏོད་པར། །སྣང་བ་མཐའ་ཡས་སྒྱུ་འཕྲུལ་རྨད་པོ་ཆེ། །སྲོང་བཙན་སྒམ་པོས་སླར་ཡང་ཕན་བདེ་སྤེལ། །གཡས་ལྔ་པ། ཡབ་མེས་མཛད་བཟང་རྣམ་དཀར་ཕུན་ཚོགས་ཀྱིས། །ཐུགས་རབ་ཕྲོགས་ཏེ་ཐུབ་བསྟན་རིན་པོ་ཆེར། །བརྒྱ་ཕྲག་སྲི་ཞུ་མི་ཟད་ནམ་མཁའ་མཛོད། །སྒོ་འཕར་ཕྱོགས་ཀུན་རབ་ཕྱེ་ཁྲི་རལ་རྗེ། །གཡས་དྲུག་པ། མདོ་སྔགས་གཞུང་ལུགས་ཤིན་ཏུ་རྟོགས་དཀའི་མདུད། །རྣམ་དཔྱོད་སོར་རྩེས་ཉེར་བཀྲོལ་དགོངས་དོན་རྣམས། །མཐོང་བ་ཙམ་གྱིས་བསིལ་ལྡན་མགོན་པོ་རུ། །བྱོན་པར་ངེས་འདྲོངས་པཎ་ཆེན་དགེ་འདུན་གྲུབ། །གཡས་བདུན་པ། ཤར་ཕྱོགས་མཧཱ་ཙི་ནའི་མང་བཀུར་རྗེའི། །གཙུག་ཏུ་ཞབས་ཟུང་ཟླ་ཚེས་གསལ་བཀོད་ཅིང༌། །གདུལ་དཀའི་འགྲོ་(༨༨ན) ― GLG021_Page_0793 ―
[མ་དཔེ་གཟིགས་ན་འདིར་གནོན།]
ཚོགས་སྨིན་གྲོལ་ལམ་བཟང་མཆོག །སྦྱིན་མཁས་རྒྱལ་དབང་བསོད་ནམས་རྒྱ་མཚོའི་སྡེ། །གཡོན་དང་པོ། ཇི་ལྟ་ཇི་སྙེད་ཆོས་ཀུན་ཐུགས་མཚོའི་ནང༌། །ཟླ་གཟུགས་ལྟར་གཟིགས་ཨྱོན་མཁའ་འགྲོ་ཡི། །ཡེ་ཤེས་གཙོ་མོས་བདེ་སྟོང་ལམ་བཟང་པོར། །ཉེར་བཀོད་དཀོན་ཅོག་འབངས་ཀྱི་སྙན་གྲགས་འབར། །གཡོན་གཉིས་པ། ལོངས་སྤྱོད་མངའ་ཐང་འབྱོར་པས་མ་གོས་པར། །མར་མེ་མཛད་ཀྱིས་རྗེས་བཟུང་ལྷག་པའི་ལྷས། །སྔོན་ནས་འབྱུང་འགྱུར་ལྐོག་གྱུར་དངོས་པོ་ཀུན། །ཇི་བཞིན་ཡོངས་མཁྱེན་ལྷ་ཡི་རྒྱལ་པོའི་ཞབས། །གཡོན་གསུམ་པ། གངས་ཅན་སྐྱོང་བར་ཆེས་ཆེར་དཔའ་བའི་མགོན། །ཀུན་བཟང་སྒྱུ་འཕྲུལ་འོད་སྟོང་འབར་བའི་གཟིས། །འགྲོ་བའི་ཉོན་མོངས་མུན་སྟུག་རབ་སངས་ཏེ། །དམ་ཆོས་དབུ་བརྙེས་ཐོ་རི་སྙན་ཤལ་རྗེ། །གཡོན་བཞི་པ། ཡབ་མེས་དུས་ཀྱི་གཡུང་དྲུང་བོན་ཆོས་ཀྱི། །གྲོལ་ཐབས་མེད་དགོངས་མཁན་སློབ་ལོ་པཎ་གྱིས། །སངས་རྒྱས་བསྟན་པ་རིན་ཅེན་བླ་ནས་བླར། །དར་མཛད་ཁྲི་སྲོང་ལྡེ་བཙན་ཁྱོད་མིན་སུ། །གཡོན་ལྔ་པ། བཀའ་དང་བསྟན་བཅོས་གསུང་རབ་མ་ལུས་པ། །མི་འགལ་ཉམས་ལེན་གཅིག་ཏུ་འཁྱེར་ཤེས་པའི། །ལམ་མཆོག་སྒྲོན་མེས་འཇིག་རྟེན་གསུམ་ཁྱབ་བསྟན། །བདག་པོར་མངའ་གསོལ་འབྲོམ་སྟོན་བླ་མ་རྗེ། །གཡོན་དྲུག་པ། དྲི་མེད་རྒྱལ་བའི་གསུང་རབ་མཐའ་ཡས་པར། །མཁྱེན་པའི་སྤྱན་རས་ལྷུངས་པའི་མོད་ཉིད་ལ། །ཐུགས་ཆུད་འཇིག་རྟེན་ཀུན་གྱི་མིག་གཅིག་པུ། །ཐམས་ཅད་མཁྱེན་པ་དགེ་འདུན་རྒྱ་མཚོའི་ཞབས། །(༨༨བ) ― GLG021_Page_0794 ―
[མ་དཔེ་གཟིགས་ན་འདིར་གནོན།]
ཚེ་རིང་གནམ་གྱི་ཤེ་མོང་གིས་བཏེག་པའི། །མང་བཀུར་རིགས་བྱོན་ལྷ་སྔགས་ཡེ་ཤེས་མདས། །ལོག་འདྲེན་བདུད་དཔུང་དོན་སྙིང་ཆེར་ཕུག་སྟེ། །དག་པའི་ཞིང་སྦྱོར་བདེ་ཆེན་ཆོས་ཀྱི་རྒྱལ། །དུས་གསུམ་རྒྱལ་བའི་མཁྱེན་བརྩེ་ནུས་མཐུ་ཚོགས། །གཡོན་བདུན་པ། ཡོངས་འདུས་རྗེ་བཙུན་བློ་བཟང་གྲགས་པ་ཡི། །ཆོས་སྲིད་དཔག་བསམ་ལྗོན་འབྲས་ཕན་བདེ་ལ། །རྟག་ཏུ་ཚད་མེད་ལོངས་སུ་སྤྱོད་བྱིན་རློབས། །སྤྱི་དང་ཁྱད་པར་ཡངས་པའི་ནོར་འཛིན་མགོན། །བསྟན་པའི་སྦྱིན་བདག་དགའ་ལྡན་བོ་ཤོག་ཐུའི། །མི་མཐུན་རབ་ཞི་ཆབ་སྲིད་མངའ་ཐང་སོགས། །གོང་འཕེལ་འདི་ཕྱིའི་འདུན་མ་ལྷུན་གྲུབ་ཤོག །ཅེས་པ་ཡངས་པའི་ས་ཆེན་པོར་བསོད་ནམས་སྟོབས་ཀྱིས་དཔུང་པས་བདག་གིར་སྤྱོད་ཅིང་ཁམས་གསུམ་ཆོས་ཀྱི་རྒྱལ་པོ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་བསྟན་པ་རིན་པོ་ཆེར་མི་ཕྱེད་པའི་དད་གུས་ཀྱི་དབང་ཕྱུག་དགའ་ལྡན་བསྟན་འཛིན་བོ་ཤོག་ཐུའི་དད་རྟེན་དུ་ངེད་རང་གི་འདྲ་འབག །ཐམས་ཅད་མཁྱེན་པ་དགེ་འདུན་གྲུབ་ཀྱི་འཁྲུངས་རབས་གཞན་ཡངའདོད་ལྷ་སྣ་ཚོགས་པས་བསྐོར་བའི་བྲིས་ཐང་གྲྭ་ཚར་དགོས་ཚུལ་ལྟར་སྡེ་པ་སངས་རྒྱས་རྒྱ་མཚོས་ལེགས་པར་བཞེངས་པའི་ཚེ་རྒྱབ་ཡིག་ཏུ་ཟ་ཧོར་གྱི་བནྡེས་དགེ་སྦྱོང་སྡེ་སྣོད་གསུམ་པས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་ཛ་ཡནྟུ། །དཀོན་ཅོག་སྣང་བརྙན་འདི་བཞེངས་རྣམ་དཀར་མཐུས། །ངག་ལ་དབང་ཐོབ་བློ་གྲོས་བཟང་པོ་ཡི། །འཆད་རྩོད་རྩོམ་པས་རྒྱ་མཚོའི་གོས་ཅན་ཀུན། །ཁྱབ་ཕྱིར་མི་ཤིགས་(༨༩ན) ― GLG021_Page_0795 ―
[མ་དཔེ་གཟིགས་ན་འདིར་གནོན།]
སྲོག་གི་ཀ་བ་ཚུགས། །བྱམས་མགོན་དབུས་འགྱུར་འཆང་དུ་མ་བྱོན་པར། །དགའ་ལྡན་ཕོ་བྲང་ཆོས་སྲིད་ཟུང་འཇུག་བསྟན། །དར་ཞིང་འགྲོ་རྣམས་སྨིན་གྲོལ་ལ་འགོད་པའི། །གཏན་གྱི་མདུན་མ་མཐའ་དག་ལྷུན་གྲུབ་ཤོག །སླུ་མེད་རྟེན་ཅིང་འབྲེལ་འབྱུང་ཞིང་ས་ལ། །ལྷག་བསམ་རྣམ་དག་ས་བོན་རབ་བཏབ་པ། །མཚམས་སྦྱོར་དྲོད་གཤེར་གྱིས་བསྐྱངས་གསེར་གྱི་སྙེ། །ལེགས་སྨིན་མངོན་སུམདགའ་སྟོན་ལ་སྤྱོད་ཤོག །ཅེས་པའང་སྡེ་པ་སངས་རྒྱས་རྒྱ་མཚོས་ངེད་རང་གི་རིམ་གྲོར་མོ་རྩིས་ནས་བྱུང་བའི་གསེར་ཐང་བཞེངས་པའི་ཚེ་སྨོན་ལམ་ཚིགས་བཅད་དེ་ལམ་དུ་མ་ཟད་ངེད་རང་གི་རིང་འཚོའི་ཆེད་དུ་བྲིས་འབུར་སོགས་སྣང་བརྙན་ཆུང་ངུ་བཞེངས་རེས་ཀྱི་ཚིགས་བཅད་གསར་པ་མི་དགོས་པར་བྲིས་ཆོག་མ་ཞིག་དགོས་ཟེར་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །འཇམ་དབྱངས་དགའ་བའི་བཤེས་གཉེན་གྱི། །སྣང་བརྙན་འཇོན་དམར་གསེར་ཞུན་ལས། །ཡོངས་གྲུབ་བཞེངས་མཐུས་རྒྱུ་སྦྱོར་ཀུན། །སྐྱེ་བར་ཡང་དག་ལམ་འཁྲིད་ཤོག །གནས་སྐབས་ནད་རིམས་ཀེག་སྲི་དང༌། །ཆགས་ཆེ་ཉམ་ང་རབ་ཞི་ཞིང༌། །ཚེ་བསོད་དཔལ་འབྱོར་མངའ་ཐང་རྣམས། །རྨུགས་འཛིན་དབང་པོར་འགྲན་བཟོད་ཤོག །ལྷག་བསམ་སྨོན་ལམ་མཁའ་གོས་ལས། །དངོས་གྲུབ་འཛད་མེད་ཆར་གྱི་རྒྱུན། །བྱང་ཆེན་མྱུ་གུ་ཆེར་སྨིན་ཏེ། །དོན་གཉིས་འབྲས་བུར་གཡུར་ཟ་ཤོག །བཅོམ་ལྡན་ཐུབ་པའི་དབང་པོ་ལ། །སྤྲུལ་པའི་གནས་བརྟན་བཅུ་དྲུག་ཚོགས། །དྷརྨཏཱ་ལ་རྒྱལ་(༨༩བ) ― GLG021_Page_0796 ―
[མ་དཔེ་གཟིགས་ན་འདིར་གནོན།]
ཆེན་བཞི། །ཧཱ་ཤང་ལ་སོགས་འཁོར་དང་བཅས། །དྲི་བསུང་ངད་འཐུལ་མ་ལ་ཡའི། །རྒྱུར་བསྐྲུན་དགེ་བས་ཤི་གསོན་ཀུན། །འདི་ཕྱིའི་བསམ་དོན་ལྷུན་གྲུབ་ནས། །རྣམ་འདྲེན་གོ་འཕང་མྱུར་འགྲུབ་ཤོག །ཅེས་པ་འདིའང་རིག་བྱེད་པ་བསྟན་འཛིན་དབང་པོས་འཇམ་དབྱངས་དཔལ་བཟང་དགོས་པ། བསོད་ནམས་དབང་འཛིན་གསུམ་དུས་ལས་འདས་པ་དང་མ་ཨ་སྙིང་སོགས་ཤུལ་མི་རྣམས་ཀྱི་དོན་དུ་གསེར་ཟངས་ལས་གྲུབ་པའི་ངེད་རང་གི་འདྲ་འབག་ཁྲུ་གང་ལྷག་པ་དང་ཙན་དན་གྱི་གནས་བཅུའི་སྐུ་བཞེངས་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཐོག་མེད་ནས་བཟུང་ད་ལྟའི་བར། །བསགས་དང་འདིས་མཚོན་རྣམ་དཀར་མཐུས། །ཟ་ཧོར་ཟིལ་གནོན་བཞད་པ་རྩལ། །གཡུང་དྲུང་ལྟ་བུར་བརྟན་པར་ཤོག །ཅེས་པའང་གོང་དཀར་ངག་དབང་བསླབ་གསུམ་གྱིས་ངེད་རང་གི་འདྲ་འབག་བཞེངས་པའི་ཚེ་ཁ་བྱང་དགོས་ཚུལ་བཞིན་ཟ་ཧོར་བནྡེས་བཀོད་པ་བྷ་ཝནྟུ། །བཀོད་མཛེས་རྔམས་བརྗིད་ལྡན་པའི་དཔལ་བཤོས་སྣོད། །རབ་དཀར་ཟླ་ཞུན་ལས་གྲུབ་ཡོངས་ཕུལ་བས། །རིང་མིན་ལྷག་པའི་ལྷ་ཡིས་རྗེས་བཟུང་སྟེ། །རང་གཞན་དོན་ཀུན་འགྲུབ་པར་བྱིན་གྱིས་རློབས། །ཞེས་པ་རྡོ་པ་བསོད་ནམས་རྒྱལ་མཚན་གྱིས་ཕན་བདེ་ལེགས་བཤད་གླིང་པའི་དགེ་སྐོས་ཀྱི་འཇོག་ལ་དངུལ་སྲང་བཅོ་ལྔ་ཞོ་དོའི་པད་སྡེར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བ་ཛ་ཡནྟུ། །བརྩེ་བ་ཆེན་པོའི་ཐུགས་བསྐྱེད་སྨོན་ལམ་(༩༠ན) ― GLG021_Page_0797 ―
[མ་དཔེ་གཟིགས་ན་འདིར་གནོན།]
མཐུ། །ཉེར་སྨིན་ཐུན་མོང་མ་ཡིན་འདུལ་ཞིང་ཆེ། །གངས་ཅན་འགྲོ་རྣམས་སྐྱོང་བའི་འཇིག་རྟེན་མགོན། །སྤྱན་རས་གཟིགས་ཀྱིས་དཔུང་གཉེན་མཛད་དུ་གསོལ། །མ་གྱུར་སྐྱེ་རྒུའི་གནས་སྐབས་བདེ་སྐྱིད་རྒྱས། །སྐྱེ་བར་ཁྱོད་ཀྱིས་འབྲལ་མེད་རྗེས་བཟུང་སྟེ། །ས་ལམ་སྤངས་རྟོགས་ཡོན་ཏན་མཐར་ཕྱིན་ནས། །ཀུན་མཁྱེན་ཡེ་ཤེས་ཆེན་པོ་ཐོབ་བྱིན་རློབས། །ཞེས་པའང་གཟིམས་དཔོན་གྱི་ལས་འཛིན་དགེ་སློང་བློ་བཟང་དོན་གྲུབ་ཀྱིས་མ་དཀོན་ཅོག་སྒྲོལ་མའི་དོན་དུ་ཐུགས་རྗེ་ཆེན་པོའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཁྱབ་བདག་དཔལ་ལྡན་རྡོ་རྗེ་སེམས་དཔའ་དང༌། །དབྱེར་མེད་འཇམ་དབྱངས་དགའ་བའི་བཤེས་གཉེན་གྱི། །འདྲ་འབག་བཞེངས་མཐུས་སྐྱེ་བར་འབད་མེད་དུ། །རྗེས་གཟུང་མཆོག་ཐུན་དངོས་གྲུབ་ཐོབ་བྱིན་རློབས། །ཞེས་རྡོ་པ་དགེ་སློང་ཕྱག་རྡོར་དབང་ཕྱུག་གིས་འདྲ་འབག་གསེར་ཟངས་ལས་བཞེངས་པའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ལྷད་བྲལ་རིན་ཅེན་གཉིས་པ་ཕྱེད་བཅས་སྲང༌། །ཉེར་བཞི་ལས་གྲུབ་སྣང་བྱེད་སྒྲོན་མེའི་ཀོང༌། །ཕན་བདེའི་འབྱུང་གནས་ངེས་གསང་འདུས་སྡེ་ཆེར། །ཕུལ་བས་མ་རིག་ལས་ཉོན་སྟུག་པོའི་སྨག །ཡེ་ཤེས་འོད་ཀྱིས་འཐར་བྱས་སྨིན་གྲོལ་ལམ། །བདག་སོགས་སྐྱེ་རྒུ་ཀུན་གྱིས་རབ་ཐོབ་ནས། །རིང་མིན་རྣམ་པ་ཐམས་ཅད་མཁྱེན་པ་ཡི། །གོ་འཕང་མངོན་དུ་འགྱུར་བར་(༩༠བ) ― GLG021_Page_0798 ―
[མ་དཔེ་གཟིགས་ན་འདིར་གནོན།]
བྱིན་གྱི་རློབས། །ཞེས་པའང་བློ་བཟང་ཐབས་མཁས་ཀྱིས་སྨོན་ལམ་ཆེན་མོར་རབ་འབྱམས་ཀྱི་གྲྭ་སྐོར་བྱས་དུས་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ཟབ་གསལ་མཚན་དཔེའི་ཉི་འོད་འབར་བའི་གཟིས། །སྐྱེ་རྒུའི་ཕན་བདེའི་སྣང་བ་རབ་དཀར་བས། །ཆེས་ཆེར་བདོ་བའི་སྙིགས་མ་ལྔ་ཡི་སྨག །མཐོང་ཐོས་དྲན་པས་རྣམ་གྲོལ་ཤཱཀྱའི་རྒྱལ། །བདུད་བཞིའི་སྡེ་བཅོམ་བླ་མེད་ཡེ་ཤེས་ཀྱི། །གོ་འཕང་བརྙེས་ཚེ་མ་ག་དྷ་ཡི་ཡུལ། །བྱང་ཆུབ་ཆེན་པོའི་མཆོད་རྟེན་བཞེངས་པ་ལྟར། །བསྐྲུན་པས་དོན་གྲུབ་དབང་རྒྱལ་འཁོར་བ་དང༌། །ངན་འགྲོའི་འཇིགས་པ་ཀུན་ལས་ཐར་བའི་དཔུང༌། །མགོན་སྐྱབས་མཛད་དེ་ཡང་སྲིད་ཐམས་ཅད་དུ། །གནས་སྐབས་ལྷ་མིའི་དཔལ་ལ་སྤྱོད་པའི་ནང༌། །དལ་འབྱོར་རྟེན་ཐོབ་དགེ་བའི་བཤེས་གཉེན་གྱིས། །རྗེས་བཟུང་ཐུན་མོང་ལམ་གྱིས་རྒྱུད་སྦྱངས་ནས། །ཐེག་པའི་མཆོག་གྱུར་གསང་སྔགས་ཉེ་བའི་ལམ། །སྨིན་གྲོལ་ཁ་སྦྱོར་བདུན་ལྡན་རྡོ་རྗེ་འཆང༌། །མངོན་དུ་འགྱུར་བའི་རྟེན་འབྲེལ་ལྷུན་གྲུབ་ཤོག །དྲི་ངད་ཕྱོགས་བཅུར་འགེང་བའི་ལྗོན་ཤིང་ལས། །ཉེར་གྲུབ་བཀྲ་ཤིས་སྒོ་མང་མཆོད་པའི་རྟེན། །བཀོད་ལེགས་ཕུན་སུམ་ཚོགས་པ་བཞེངས་པའི་འབྲས། །སྒྲིབ་བྱང་རྫོགས་པའི་སངས་རྒྱས་ཐོབ་པར་ཤོག །རྒྱལ་བ་སྲས་བཅས་སྙིང་རྗེའི་དངོས་པོ་ཀུན། །ཡོངས་འདུས་མི་འཁྲུགས་མགོན་གྱི་ཟླ་དཀྱིལ་ན། །རབ་གང་བྱིན་རླབས་ག་བུར་ཟེགས་འཕྲེང་གིས། །དམིགས་ཡུལ་རྨོངས་པའི་གདུང་བཅིལ་ལྷག་པའི་ལྷ། །ཞི་ཁྲོ་བདེ་གཤེགས་ཀུན་འདུས་ཐོད་ཕྲེང་རྩལ། །(༩༡ན) ― GLG021_Page_0799 ―
[མ་དཔེ་གཟིགས་ན་འདིར་གནོན།]
དངོས་སུ་འདྲེན་བྱེད་ཡུལ་དུ་བདུད་རྩིའི་དཔྱིད། །མཐོང་བ་ཙམ་གྱིས་དོན་ལྡན་ཡིད་བཞིན་ནོར། །འདོད་འཇོའི་སྐུ་བརྙན་ལྷག་བསམ་དག་པས་བསྐྲུན། །དགེ་བས་དོན་གྲུབ་དབང་རྒྱལ་དཔལ་གྱི་རིར། །སྐྱེ་སྲིད་བཟུང་ནས་ཐེག་མཆོག་དམ་ཆོས་ཀྱི། །དགའ་སྟོན་ངོམས་པ་མེད་པར་ལེགས་མྱངས་ཏེ། །རིགས་འཛིན་རྣམ་བཞིའི་གོ་འཕང་འགྲུབ་བྱིན་རློབས། །ཀ་དག་དབྱིངས་ལས་མཐིང་ཞུན་འོད་བཀྲག་འཚེར། །མཚན་དཔེའི་གཟི་བྱིན་རབ་འབར་པདྨ་འབྱུང༌། །རྡོར་དྲིལ་དང་བཅས་ཟུང་འཇུག་བདེ་བ་ཆེས། །མི་བཟད་གནས་ངན་ལེན་ལས་འདྲེན་བྱིན་རློབས། །བཤེས་གཉེན་ཞི་བའི་ཆ་བྱད་རབ་བཟུང་པ། །པདྨ་སཾ་བྷའི་མཆོག་སྦྱིན་ཕྱག་རྒྱ་ཡིས། །ཀུན་རྫོབ་ལོག་ལྟའི་འཇིགས་པ་ལས་བསྐྱབས་ཏེ། །དོན་དམ་ཀ་དག་སྙིང་པོ་རྟོགས་བྱིན་རློབས། །ཤིན་ཏུ་བྱ་དཀའི་མཛད་བཟང་འཕྲུལ་པོ་ཆེ། །ཐུན་མོང་གདུལ་བྱའི་སྣང་ངོར་ར་བ་ལས། །རབ་འདས་བློ་ལྡན་མཆོག་སྲེད་ཐོད་རྔའི་སྒྲས། །མ་རིག་གཉིད་རུམ་ཐུག་པོ་སློང་བྱིན་རློབས། །སྣང་སྲིད་འཁོར་འདས་ཆོས་རྣམས་མ་ལུས་པ། །ཅིག་ཅར་དབང་བསྡུ་པདྨ་རྒྱལ་པོ་ཆེས། །ཨཱ་ལི་ཀཱ་ལིའི་ཆར་གྱི་ཟིལ་མངར་རོར། །སྤྱོད་པའི་སྐལ་བཟང་མྱུར་བར་ཐོབ་བྱིན་རློབས། །ལས་ཉོན་སྡིག་སྒྲིབ་ཉེས་ལྟུང་དྲི་མའི་སྨག །མཁྱེན་པའི་སྤྱན་མངའ་ཉི་མ་འོད་ཟེར་གྱི། །སྣང་བ་ཆེན་པོས་ཉེར་བསལ་མངོན་མཐོ་དང༌། །ངེས་ལེགས་ལམ་མཆོག་ཐོབ་པར་བྱིན་གྱིས་རློབས། །གཟོད་མ་ཉིད་ནས་འགྲོ་བ་མ་ལུས་པ། །འདྲེན་མཛད་(༩༡བ) ― GLG021_Page_0800 ―
[མ་དཔེ་གཟིགས་ན་འདིར་གནོན།]
ཤཱཀྱ་སེང་གེའི་སྤྱོད་ཚུལ་གྱིས། །བདུད་བཞིའི་སྡེ་དཔུང་བཏུལ་ནས་ཐར་པ་དང༌། །རྣམ་མཁྱེན་ཡེ་ཤེས་རྒྱུད་ལ་སྐྱེ་བྱིན་རློབས། །དྲག་ཤུལ་འཇིགས་རུང་མི་བཟད་མེ་འབར་བའི། །སྐུར་བཞེངས་ཁྲོ་རྒྱལ་སེང་གེ་སྒྲ་སྒྲོག་གི །གནམ་ལྕགས་རྡོ་རྗེས་ལོག་འདྲེན་འབྱུང་པོའི་ཚོགས། །མྱུར་བར་ཚར་གཅོད་དངོས་གྲུབ་སྩོལ་བྱིན་རློབས། །གར་དགུའི་ཉམས་ཀྱི་སྟང་སྟབས་བཅས་པས་ཀྱང༌། །གནོད་བྱེད་སྡེ་བརྒྱད་དོན་སྙིང་ཕྱིར་འབྱིན་པའི། །རིགས་འཛིན་བླ་མ་རྡོ་རྗེ་གྲོ་ལོད་ཀྱིས། །སྒོ་གསུམ་སྒྲིབ་སྦྱོངས་སྐུ་གསུམ་འགྲུབ་བྱིན་རློབས། །ངག་དབང་བློ་བཟང་རྒྱ་མཚོའི་འདྲ་འབག་མཆོག །བཞེངས་མཚོན་དུས་གསུམ་རྣམ་དཀར་ཇི་སྙེད་པ། །བསགས་མཐུས་དོན་གྲུབ་དབང་རྒྱལ་ཡང་སྲིད་ཀུན། །དམ་པའི་མགོན་དང་ནམ་ཡང་མི་འབྲལ་ཤོག །ཅེས་པའང་ལྷ་ས་ཟུར་ཁང་པ་དོན་གྲུབ་དབང་རྒྱལ་དུས་ཀྱི་ཆོས་ཉིད་དུ་གྱུར་པའི་ཚེ་གཞིས་མི་རྣམས་ཀྱིས་ཙནྡན་ལས་གྲུབ་པའི་བཀྲ་ཤིས་སྒོ་མང་གི་མཆོད་རྟེན་དང༌། གསེར་ཟངས་ཀྱི་བྱང་ཆུབ་མཆོད་རྟེན། རྡོ་རྗེ་མི་འཁྲུགས་པ། སློབ་དཔོན་རིན་པོ་ཆེ། སྤྲུལ་པའི་གུ་རུ་མཚན་བརྒྱད། ངེད་རང་གི་འདྲ་འབག་རྣམས་བཞེངས་པའི་དུས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ངག་གི་དབང་ཕྱུག་བློ་བཟང་རྒྱ་མཚོ་ཡི། །འདྲ་འབག་བློ་བཟང་བཀྲ་ཤིས་བཞེངས་པའི་དགེས། །མི་མཐུན་ཉེས་བརྒྱ་ཞི་ཞིང་སངས་རྒྱས་ཀྱི། །གོ་འཕང་མྱུར་དུ་ཐོབ་པར་བྱིན་གྱིས་རློབས། །ཞེས་པ་འདིའང་འཇོན་དམར་ལས་གྲུབ་པ་བཞེངས་(༩༢ན) ― GLG021_Page_0801 ―
[མ་དཔེ་གཟིགས་ན་འདིར་གནོན།]
པའི་ཚེ་དགོས་ཚུལ་ལྟར་ཟ་ཧོར་བནྡེས་བཀོད། །ལྷག་པའི་ལྷ་མཆོག་འཕགས་པ་སྤྱན་རས་གཟིགས། །མཆོད་གསོལ་བསྙེན་སྒྲུབ་རྩེ་གཅིག་རབ་འབད་མཐུས། །འདི་ནང་ནད་གདོན་ཞི་ཞིང་ཚེ་བསོད་རྒྱས། །ཕྱི་མ་པོ་ཏ་ལ་རུ་སྐྱེ་བར་ཤོག །ཅེས་པའང་དཔོན་ས་བུ་ཁྲིད་རྒྱལ་མོས་དད་རྟེན་དུ་མིག་འབྱེད་ཐུགས་རྗེ་ཆེན་པོ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད། །རྒྱལ་བའི་ཡབ་གཅིག་རྗེ་བཙུན་འཇམ་དཔལ་དབྱངས། །དཀྱིལ་འཁོར་རྒྱ་མཚོའི་སྤྲོ་བསྡུའི་བྱེད་པོ་རུ། །བཤེས་གཉེན་ཚུལ་བཟུང་ཀུན་དགའ་སྙིང་པོའི་བསྟན། །སྲིད་མཐར་མི་ཉམས་སྤེལ་ཕྱིར་གསོལ་བ་འདེབས། །གདོད་ནས་ཡོངས་དག་བདེ་ཆེན་སྣང་མཐའ་དང༌། །མི་ཕྱེད་རྡོ་རྗེ་སློབ་དཔོན་དངས་མའི་སྲོག །མཚན་དཔེའི་གཟི་འབར་ཚེ་དབང་རིག་པ་འཛིན། །སྐྱེ་རྒུའི་གཉེན་གྱུར་ཁྱོད་ལ་གསོལ་བ་འདེབས། །ཕན་བདེའི་རྩ་ལག་དཔལ་ལྡན་ཆོས་སྐྱོང་གི །ཞལ་ལུང་ཆད་མེད་ཕུན་ཚོགས་བཀྲ་ཤིས་སྒོ། །རབ་ཕྱེ་ཚངས་དབྱངས་དྲུག་ཅུར་གྲགས་པའི་སྒྲས། །ས་གསུམ་ཅིག་ཅར་འགོད་ལ་གསོལ་བ་འདེབས། །ལྷ་སྔགས་ཡེ་ཤེས་མི་བཟད་རྡོ་རྗེ་ཡིས། །སྦྱིན་སྐྱེས་སྡེ་དཔུང་ཕྱེར་བཏགས་སྲིད་རྩེའི་བར། །རྒྱལ་མཚན་ཆེར་བསྒྲེངས་དཔལ་ལྡན་སྐལ་བཟང་ཆེའི། །མགོན་པོར་གཡུང་དྲུང་ཁྲི་ལ་ཞབས་བརྟན་ཤོག །སྙན་བརྒྱུད་ཚད་མ་བཞི་ལྡན་ཟབ་མོའི་ཆོས། །གོ་རིམ་མ་འཆོལ་རྟེན་ཅིང་འབྲེལ་འབྱུང་སྒོ །རྩོལ་བར་བལྟོས་མིན་ཡོངས་(༩༢བ) ― GLG021_Page_0802 ―
[མ་དཔེ་གཟིགས་ན་འདིར་གནོན།]
འགྲིག་བཞེད་དོན་ཀུན། །ཇི་བཞིན་ལྷུན་གྲུབ་གཡོ་བ་མེད་པར་ཤོག །རྩ་བརྒྱུད་བླ་མ་དགྱེས་མཛད་ཧེ་རུ་ཀ༔། །ཁམས་གསུམ་བརྟན་པ་འཕྲོག་མཛད་དབང་ལྷར་བཅས། །མཐུ་ལྡན་སྲུང་མས་དུས་དྲུག་མ་གཡེལ་བར། །མཆོག་ཐུན་དངོས་གྲུབ་ཆར་ཆེན་ཉེ་བར་ཕོབ། །གནམ་ལ་གཟའ་སྐར་འཛོམ་པའི་འཕྲོད་བཟང་དང༌། །ས་ལ་བཀྲ་ཤིས་གཡང་ཆགས་ཕུན་སུམ་ཚོགས། །མཆོག་གསུམ་ཐུགས་རྗེ་བསྐུལ་བའི་བདེན་མཐུ་ཡིས། །རྫོགས་ལྡན་དགའ་སྟོན་དཔལ་སྦྱང་བཀྲ་ཤིས་ཤོག །གདན་ས་འོག་གི་ཁྲི་ཆེན་འཇམ་དཔལ་དབྱངས་ཚེ་དབང་རིགས་འཛིན་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་བསྟན་འགྲོའི་ཕན་བདེ་སྤེལ་ཕྱིར་ཡུན་དུ་འཚོ་བཞེས་ཀྱི་བརྟེན་བཞུགས་འདི་ལྟ་བུ་ཞིག་དགོས་ཞེས་གསང་ཆེན་རྒྱུད་སྡེ་རྒྱ་མཚོའི་འབྱུང་གནས་བཅོ་བརྒྱད་ཆོས་རྗེ་མཁྱེན་རབ་ངག་དབང་ལྷུན་གྲུབ་ཀྱི་གསུང་གིས་བསྐུལ་མ་བྱུང་བ་ལྟར་ཟ་ཧོར་གྱི་བནྡེ་ཚངས་སྲས་བཞད་པའི་རྡོ་རྗེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་བིཛཡ། །ཐུབ་པའི་གསུང་ངག་མདོ་རྒྱུད་ལ་དབང་བ། །གཏིང་མཐའ་མི་མངོན་རྣམ་དཔྱོད་རྒྱ་མཚོ་ཆེར། །སྐུ་གསུམ་ནོར་བུའི་སྙན་གྲགས་སྲིད་གསུམ་ཁྱོན། །ཡོངས་འགེང་བསྟན་པའི་རྒྱལ་མཚན་འཛིན་ཁྱོད་རྒྱལ། །མཚན་ཙམ་ཐོས་པས་ཉི་བུའི་ཕོ་ཉ་ཡིས། །བླང་དོར་བལྟ་བའི་མེ་ལོང་ཕྱིར་དོར་ཏེ། །ངལ་གསོ་རབ་སྟེར་མགོན་པོ་ཚེ་དཔག་མེད། །བུམ་བཟང་བདུད་རྩིའི་རྒྱུན་གྱིས་དབང་བསྐུར་མཛོད། །ཆོས་ཀུན་སྤྲོས་དང་བྲལ་བའི་ངང་ཉིད་ལས། །རྒྱུ་འབྲས་ནམ་ཡང་བསླུ་བ་མེད་པའི་མཐུས། །འཆི་བདག་(༩༣ན) བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་མཁྱེན་རབ་ཀྱི་དབང་ཕྱུག་ངག་དབང་དཀོན་ཅོག་ཉི་མའི་འཁྲུངས་རབས་དང་འབྲེལ་བའི་གསོལ་འདེབས་སྨོན་ལམ་ཚིགས་བཅད་སོགས།― GLG021_Page_0803 ―
[མ་དཔེ་གཟིགས་ན་འདིར་གནོན།]
བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་མཁྱེན་རབ་ཀྱི་དབང་ཕྱུག་ངག་དབང་དཀོན་ཅོག་ཉི་མའི་འཁྲུངས་རབས་དང་འབྲེལ་བའི་གསོལ་འདེབས་སྨོན་ལམ་ཚིགས་བཅད་སོགས།ཨོཾསྭསྟི་པྲ་ཛ་བྷྱཿ། རབ་འབྱམས་གངྒཱའི་ཞིང་རྡུལ་ལས་འདས་པའི། །རྒྱལ་ཀུན་རྣམ་མཁྱེན་ཕུང་པོ་གཅིག་བསྡུས་གང༌། །གསང་གསུམ་མི་ཟད་རྒྱན་གྱི་རོལ་གར་རྩེན། །རྗེ་བཙུན་འཇམ་དཔལ་དབྱངས་ལ་གསོལ་བ་འདེབས། །ཤེས་བྱའི་ཆོས་རྣམས་བློ་གྲོས་མེ་ལོང་ནང༌། །ཉེར་ཤར་མཁས་བཙུན་བཟང་པོའི་སྙན་གྲགས་ཆེ། །སྲིད་པའི་རྩེར་སྒྲོག་སྲས་ཀྱི་ཐུ་བོ་པ། །བ་སོ་ཆོས་རྒྱན་ཞབས་ལ་གསོལ་བ་འདེབས། །(༩༣བ) ― GLG021_Page_0804 ―
[མ་དཔེ་གཟིགས་ན་འདིར་གནོན།]
ཐུགས་རྒྱུད་ཡོངས་དག་དབྱིག་འཛིན་འཇམ་པོའི་ངོས། །བསོད་ནམས་ནོར་མཆོག་ཕུང་པོར་རབ་སྤུངས་ཏེ། །རྣམ་དཔྱོད་ཤིང་རྟས་ཐར་གྲོང་ཆེར་འཇུག་པ། །འཕགས་དབོན་རིན་ཅེན་ཞབས་ལ་གསོལ་བ་འདེབས། །གསལ་སྟོང་མ་འགགས་རྫིང་བུར་ཟླ་གཟུགས་ལྟར། །བདེན་དངོས་དང་བྲལ་གང་ལའང་མི་འཇིགས་པས། །སྒྲིབ་གཉིས་འཆིང་བཅོམ་དོན་གཉིས་མཐར་ཕྱིན་མཛད། །ལྷ་ཡི་སྐྱབས་གྱུར་ཞབས་ལ་གསོལ་བ་འདེབས། །སྔོན་གོམས་མ་ལ་ཡ་ཡི་ཀླུང་ཆེན་ནས། །དམ་པའི་བག་ཆགས་ཉེར་སད་ཙནྡན་དྲི། །སྐལ་བཟང་སྙིང་ཞུགས་སྟོབས་འབྱོར་མངའ་ཐང་ཆེར། །འགོད་མཛད་ལི་ཡི་རྒྱལ་པོར་གསོལ་བ་འདེབས། །བརྗོད་དཀའི་གཞུང་ལུགས་མང་གཟིགས་ཐུགས་རྗེའི་གྲིབ། །མཐའ་ཡས་སྐྱེ་རྒུ་བདེ་བར་ངལ་གསོ་བའི། །མ་འདྲིས་ལུས་ཅན་དཔུང་གཉེན་ལྷ་དབང་རྗེ། །ཆོས་ཀྱི་རྒྱལ་མཚན་ཞབས་ལ་གསོལ་བ་འདེབས། །ཡེ་ཤེས་རང་སྣང་ངོ་མཚར་སྒྱུ་འཕྲུལ་ཆེའི། །ལང་ཚོར་རབ་དར་ངག་དབང་དབྱངས་ཅན་ལྷས། །མགྲིན་འཁྱུད་མང་རྒྱུད་ཐ་སྙད་གཙུག་ལག་སོགས། །ཀུན་མཁྱེན་དཀོན་ཅོག་ཉི་མར་གསོལ་བ་འདེབས། །རང་བཞིན་རྣམ་དག་མ་བསྒྲིབས་ཐུགས་མཚོའི་ནང༌། །ཆོས་རྣམས་ཟླ་སྣང་ཇི་བཞིན་རོལ་གར་ཅན། །རྒྱུ་འབྲས་མི་བསླུར་ངེས་པ་ཡོངས་གཟིགས་པ། །མཚུངས་བྲལ་རྗེ་བཙུན་བླ་མར་གསོལ་བ་འདེབས། །རིས་མེད་འགྲོ་ལ་བརྩེ་ཆེན་ལྷག་བསམ་ལྗིད། ཁུར་གྱིས་ནོར་འཛིན་བུ་མོ་མ་བཟོད་རྔུལ། །ཉེར་བབས་ལས་ཉོན་བཀྲུ་བའི་ཆོ་ག་མཁན། །ཐུགས་རྗེའི་གཏིང་གྱུར་ཁྱོད་ལ་(༩༤ན) ― GLG021_Page_0805 ―
[མ་དཔེ་གཟིགས་ན་འདིར་གནོན།]
གསོལ་བ་འདེབས། །བཅོམ་ལྡན་འཇིགས་མཛད་རྡོ་རྗེའི་རྣལ་འབྱོར་ཆེར། །གཞོལ་གྲུབ་གནམ་ལྕགས་ཐོག་མདའི་ཚ་དབལ་གྱིས། །མི་བསྲུན་བྲག་རི་ཕྱེ་མར་རབ་འཐག་པའི། །ནུས་མཐུའི་གཟི་བྱིན་འབར་ལ་གསོལ་བ་འདེབས། །བླ་མེད་ཡེ་ཤེས་བཻཌཱུར་ཞུན་མའི་ཁམས། །མཐའ་ཡས་ཚེ་ཡི་གཟུགས་སུ་ཉེར་གྲུབ་སྣོད། །འཆི་བ་མེད་པའི་བཅུད་དུ་ལེགས་འཁྱིལ་བ། །ལྷ་མཆོག་དབང་བསྐུར་དམ་པ་མྱུར་དུ་སྩོལ། །ངག་གི་དབང་ཕྱུག་བློ་བཟང་གྲགས་པ་ཡི། །རིང་ལུགས་རྒྱས་པར་གེགས་བྱེད་ནག་པོའི་མུན། །དཀོན་ཅོག་ཐུགས་རྗེའི་ཉི་མའི་ཟེར་འོད་ཀྱིས། །རབ་གསལ་སྣང་བ་ཆེན་པོས་ཁྱབ་གྱུར་ཅིག །ཞི་དུལ་སྡོམ་བརྩོན་དམ་པའི་དཔལ་མངའ་ཞིང༌། །བརྟན་པའི་འཁོར་ལོས་རྗེས་སུ་བཟུང་བ་ལས། །གསུང་རབ་དགའ་སྟོན་བྱེ་བའི་ཟིལ་དངར་རོ། །སྐལ་ལྡན་ཡོངས་ལ་འགྱེད་ཕྱིར་ཞབས་བརྟན་ཤོག །མཁྱེན་དཔྱོད་ཟབ་བརླིང་མཁས་བཙུན་བཟང་པོ་ཡིས། །ལུང་དང་རྟོགས་པའི་ལེགས་བཤད་ཉེར་སྩལ་བས། །ཀུན་གཟིགས་འཇམ་དཔལ་སྙིང་པོའི་ཆོས་སྲིད་བསྟན། །མི་ཉམས་སྤེལ་ཕྱིར་གཡུང་དྲུང་ལྟར་བརྟན་ཤོག །སྔོན་གྱི་ཐུགས་བསྐྱེད་ས་བོན་རབ་སྨིན་ལས། །འགྲོ་བའི་ཡང་དག་མཛའ་བཤེས་དར་བའི་འབྲས། །ལུས་ཅན་ཕན་བདེར་འགོད་པའི་གཉེན་གཅིག་པུ། །འཁོར་བ་སྟོངས་མིན་ཆོས་འཁོར་རྒྱ་ཆེར་སྐོར། །མཆོག་གསུམ་རིན་ཅེན་བྱིན་རླབས་རྨད་པོ་ཆེ། །ཟླ་བའི་མ་མ་ལས་འོངས་བདུད་རྩི་ཡི། །དྲི་མེད་ཐུགས་ཀྱི་ཟ་མ་ཏོག་ཡངས་པོར། །ཡོངས་འཁྱིལ་བཞེད་དོན་ལྷུན་གྱིས་(༩༤བ) ― GLG021_Page_0806 ―
[མ་དཔེ་གཟིགས་ན་འདིར་གནོན།]
གྲུབ་པར་ཤོག །ཁྲིམས་ལྡན་མང་ཐོས་འདུས་པའི་ཚོགས་ཆེན་གྱི། །རྣམ་པར་དག་པའི་ལྷག་བསམ་རྒྱལ་མཚན་རྩེར། །རྩེ་གཅིག་སྨོན་ལམ་བཏབ་ལྟར་ཡིད་ནོར་ཆེས། །ཅི་བསམ་དོན་ཀུན་མྱུར་དུ་འགྲུབ་པར་ཤོག །དེ་ལྟར་བདེན་སྟོབས་བརྗོད་མཐུས་མཁའ་དབྱིངས་ལས། །མ་སྨད་མཁྱེན་བརྩེ་ནུས་པའི་གྲུ་ཆར་ཆེ། །བབས་པས་དོན་གཉིས་མྱུ་གུ་ལེགས་སྨིན་ནས། །དགའ་སྟོན་མཆོག་ལ་སྤྱོད་པར་བྱིན་གྱིས་རླབས། །ཀློག་པ་ཐོས་བསམ་སྤོང་བ་བསམ་གཏན་དང༌། །བྱ་བ་ལས་ཀྱི་འཁོར་ལོ་རྣམ་གསུམ་གྱིས། །བདག་སོགས་གདུལ་བྱའི་ཡིད་ལ་ཅི་འདོད་ཀུན། །སྐོང་བར་བྱིན་གྱིས་བརླབ་པའི་མཐུ་དཔུང་སྐྱེད། །དགེ་བཅུར་སྤྱད་པའི་རྣམ་སྨིན་ཉེར་བདོ་བས། །བསིལ་བྱེད་ཀཏྤུ་ར་ཡི་ཟེགས་རྡུལ་གྱིས། །འཇིག་རྟེན་ཁམས་སུ་བདེ་སྐྱིད་ཨུཏྤ་ལའི། །འདབ་འཕྲེང་གསར་པས་ཕྱོགས་ཀུན་འགེང་བར་ཤོག །ཡིད་ཅན་ཕན་བདེ་མ་ལུས་འབྱུང་བའི་གནས། །ཟས་གཙང་སྲས་པོའི་དྲི་མེད་རིང་ལུགས་དང༌། །ཁྱད་པར་ཞྭ་སེར་ཅོད་པན་འཆང་བའི་བསྟན། །སྲིད་ཞིའི་སྣང་བྱེད་སྒྲོན་མེ་ཆེས་འབར་ཤོག །ས་གསུམ་གཏོགས་སོ་ཅོག་གི་ལུས་ཅན་སྤྱི། །བྱེ་བྲག་སཱ་ལའི་སྨན་ལྗོངས་མདོ་ཁམས་འགྲོ། །རྣམ་དཀར་འབྲས་བུ་རྫོགས་ལྡན་སྐྱེ་རྒུ་དང༌། །ལྷན་ཅིག་སྤྱོད་པའི་སྐལ་བ་དེང་སྨིན་ཤོག །ཁྱད་པར་ཡུལ་འདིའི་བླ་དཔོན་སྦྱིན་པའི་བདག །འབངས་བཅས་གནས་སྐབས་ནད་ཡམས་འཐབ་རྩོད་དང༌། །མི་མཐུན་གདོན་བགེགས་འཚེ་བྲལ་ཕན་ཚུན་ཀུན། །མཉེས་གཤེན་བྱམས་ལས་རྟག་ཏུ་མཛའ་བར་ཤོག །ཚེ་རིང་ལོངས་སྤྱོད་(༩༥ན) ― GLG021_Page_0807 ―
[མ་དཔེ་གཟིགས་ན་འདིར་གནོན།]
དཔལ་འབྱོར་མངའ་ཐང་རྣམས། །གོང་འཕེལ་མཐའ་བཞིའི་ལས་སྒོ་ཀུན་འདུས་ཏེ། །རྨུགས་འཛིན་དབང་པོའི་ཕུན་ཚོགས་ལ་འགྲན་པའི། །བདེ་སྐྱིད་ཉི་མ་གུང་ནས་འཆར་བར་ཤོག །ཆོས་ཉིད་མི་འགྱུར་ལྷ་ལམ་ཡངས་པའི་དབྱིངས། །ཆོས་ཅན་རྟེན་ཅིང་འབྲེལ་འབྱུང་མཁའ་གླང་ལས། །སླུ་མེད་བདེན་ཚིག་མི་འཛད་ཆུ་རྒྱུན་གྱིས། །ཇི་ལྟར་འདོད་པའི་འབྲས་བུ་གཡུར་ཟ་ཤོག །དུས་དགྲའི་དབང་པོ་རྟ་མཆོག་ཧེ་རུ་ཀ༔ །ཡེ་ཤེས་མགོན་པོ་ལས་གཤིན་རྣམ་ཐོས་སྲས། །གུར་ཞལ་བེག་ཙེ་འདོད་ཁམས་མ་ལ་སོགས། །མཐུ་ལྡན་སྲུང་མས་ལས་བཞི་ལྷུན་བསྒྲུབ་ཤོག །སངས་རྒྱས་བྱང་སེམས་ཉན་རང་སྐྱེ་འཕགས་ཚོགས། །ལྷ་དང་དྲང་སོང་བདེན་མཐུར་དབང་རྣམས་ཀྱིས། །རྨད་བྱུང་བདེ་ལེགས་མེ་ཏོག་ཆར་ཕབ་ནས། །ཕྱོགས་དུས་ཀུན་ཏུ་དགེ་བའི་བཀྲ་ཤིས་ཤོག །ཅེས་པའང་ཁམས་གསུམ་ཆོས་ཀྱི་རྒྱལ་པོ་ཤར་ཙོང་ཁ་པ་བློ་བཟང་གྲགས་པའི་དཔལ་གྱི་གདན་ས་དྲུག་པ་བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་མཁྱེན་རབ་ཀྱི་དབང་ཕྱུག་ངག་དབང་དཀོན་ཅོག་ཉི་མའི་འཁྲུངས་རབས་དང་འབྲེལ་བའི་གསོལ་འདེབས་སྨོན་ལམ་འདི་ལྟ་བུ་ཞིག་དགོས་ཚུལ་གྱི་ས་བོན་དང་བཅས་སྤག་ཤོད་མཁར་གསོལ་བཀྲ་ཤིས་རབ་བརྟན་གྲྭ་མང་རྣམས་ཀྱིས་བསྐུལ་མ་བྱུང་བ་ལྟར་ཡུལ་ལྷོ་བརྒྱུད་དུ་སྐྱེས་པའི་ཟ་ཧོར་གྱི་བན་རྒན་ཚངས་སྲས་བཞད་པའི་རྡོ་རྗེས་ཆུ་ཕག་ཧོར་ཟླ་གཉིས་པར་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པའོ། །རྒྱ་ཆེའི་ཐབས་(༩༥བ) ― GLG021_Page_0808 ―
[མ་དཔེ་གཟིགས་ན་འདིར་གནོན།]
དང་ཤེས་རབ་ས་བོན་ལས། །སྐུ་བཞིའི་འབྲས་བུ་རོ་བདར་ལེགས་སྨིན་བཅུད། །སྐྱེ་རྒུ་ཡོངས་ཀྱི་ལོངས་སྤྱོད་སྐལ་བཟང་ཅན། །ཐུབ་དབང་ཤཱཀྱའི་རྒྱལ་པོས་ཤིས་པ་སྩོལ། །ཕྱོགས་དུས་དགེ་བའི་ཆུ་ཀླུང་རབ་འཁྱིལ་ནང༌། །ཕུན་ཚོགས་དབྱངས་ཀྱི་མགྲིན་རྔ་ཆེར་བསྒྲགས་པས། །རྣ་བའི་ཟིལ་དངར་རབ་སྟེར་ཀུན་དགའི་དཔྱིད། །ཉེར་སྩོལ་ལུས་དཀར་དབང་པོས་ཟས་གཙང་སྲས། །ཁྱོད་ཀྱི་མཁྱེན་བརྩེ་ནུས་མཐུའི་དྲི་ངད་ཀྱིས། །སྲིད་ཞིའི་ཚ་གདུང་བཅིལ་བའི་བྱེད་པོ་རུ། །ཐེག་གསུམ་སྐྱེས་འཕགས་སློབ་མ་དང་བཅས་པའི། །སྔོན་མེད་ས་མཆོག་ལྗོན་པས་ལུས་ཅན་སྐྱོངས། །ཐོག་མ་མེད་ནས་ད་ལྟའི་དུས་ཀྱི་བར། །རྣམ་དཀར་བྱས་དང་བྱེད་འགྱུར་གྱིས་མཚོན་པའི། །དགེ་བས་སྐྱེ་ཞིང་སྐྱེ་བ་ཐམས་ཅད་དུ། །བཤེས་གཉེན་དམ་པས་རྗེས་སུ་འཛིན་པར་ཤོག །བགྲང་དཀར་ལས་ཉོན་མི་བཟད་འབྲས་སྨིན་ཏེ། །འཇིགས་རུང་དུཿཁའི་གཡང་སར་ཉེར་འཕྱན་པ། །བྱིན་རླབས་ཐུགས་རྗེའི་ཤུགས་ཀྱིས་རབ་དྲངས་ནས། །ཐར་པའི་གྲོང་ཁྱེར་ཆེན་པོར་འཇུག་པར་ཤོག །མི་ཁོམ་དང་བྲལ་དལ་བའི་རྟེན་བཟང་པོས། །དབང་ཕྱུག་བརྒྱད་ལྡན་གོ་འཕང་བསྒྲུབ་པ་ལ། །འགྲུབ་བྱེད་རྒྱུ་འབྲས་རྟེན་འབྲེལ་མི་བསླུ་བའི། །ཆོས་ཉིད་མི་འཛད་གཏེར་ལ་མྱུར་སྤྱོད་ཤོག །གནས་སྐབས་སུ་ཡང་འབྱུང་འཁྲུགས་ནད་རིགས་དང༌། །གདོན་བགེགས་མི་མཐུན་བར་གཅོད་ཀུན་ཞི་ཞིང༌། །རིང་འཚོ་མངའ་ཐང་དཔལ་འབྱོར་ལོངས་སྤྱོད་རྒྱས། །མྱུར་དུ་སངས་རྒྱས་ཐོབ་པའི་རྒྱུ་རུ་བསྔོ། །ཞེས་པའང་དཔལ་གྲོ་བ་འབག་ལྷུག །ཁྱིམ་འཛིན་མཆོག་ཡགས། བུ་མོ་བདེ་ཆེན་དབང་མོ་དང་དབྱངས་འཛིན་(༩༦ན) ― GLG021_Page_0809 ―
[མ་དཔེ་གཟིགས་ན་འདིར་གནོན།]
བཅས་པས་སྟོན་པ་ཤཱཀྱའི་རྒྱལ་པོའི་གསུང་རབ་ཀུན་གྱི་སྙིང་པོར་གྱུར་པ་ཡུམ་རྒྱས་པ་པོད་ཚད་བཅུ་དྲུག་འདི་ཕྱིའི་དོན་དུ་བཞེངས་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །གནས་གསུམ་ཞིང་མཆོག་བདེ་ཆེན་པདྨ་འོད། །སྐུ་གསུམ་རང་བཞིན་གྲུབ་པའི་མཁའ་དབྱིངས་ལས། །རྩ་གསུམ་མཁྱེན་བརྩེ་ནུས་མཐུའི་སྤྲིན་གཏིབས་ནས། །གསང་གསུམ་བྱིན་རླབས་ཆར་ཆེན་དབབ་ཏུ་གསོལ། །འོད་གསལ་སྙིང་པོ་འཇའ་ལུས་འཕོ་མེད་སྐུར། །ལྷུན་གྲུབ་ཀུན་བཟང་རྡོ་རྗེ་ཐོགས་མེད་རྩལ། །བཀའ་གཏེར་བཤད་ཉན་སྨིན་གྲོལ་ཟབ་ཆོས་ལ། །འགྲོ་རྣམས་བཀོད་མིན་དེ་སྲིད་བརྟན་པར་ཤོག །མི་ཕྱེད་དད་པའི་གདུང་ཤུགས་དྲག་པོ་ཡིས། །དཀོན་ཅོག་ཐུགས་རྗེ་ལེགས་པར་བསྐུལ་བའི་མཐུས། །དེང་འདིར་འདོད་འབྲས་རེ་བ་མ་ལུས་ཀུན། །བསམས་པ་ཇི་བཞིན་འགྲུབ་པར་བྱིན་གྱིས་རློབས། །ཞེས་པའང་པདྨ་དབང་ཆེན་གྱི་སྤྲུལ་པའི་ཟློས་གར་དུ་ལུང་གིས་ཟིན་པ་ཐུགས་སྲས་བསྟན་འཛིན་འགྱུར་མེད་རྡོ་རྗེས་རང་དོན་ཕུན་ཚོགས་ལོ་གསུམ་ལ་མངོན་པར་གྲུབ་སྟེ་ངེད་རང་གི་རིང་འཚོའི་ཆེད་དུ་ལྷག་བསམ་རྣམ་དག་གི་སྒོ་ནས་ཞི་དྲག་གི་གསུང་བསྙེན་ལོ་སྒྲུབ་ཐུན་མཚམས་ཀྱི་ཚེ་བདེན་བརྗོད་མཛད་རྒྱུར་བསྐུལ་མ་བྱུང་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཨོཾསྭསྟི་པྲ་ཛྙ་བྷྱཿ བགྲང་ཡས་སྐྱེ་རྒུ་ཉེར་འཚོ་(༩༦བ) ― GLG021_Page_0810 ―
[མ་དཔེ་གཟིགས་ན་འདིར་གནོན།]
དཔྱིད་ཀྱི་སྤྲིན། །བདེ་སྐྱིད་དགའ་སྟོན་ཆར་རྒྱུན་སྙན་པོའི་རྔ། །ཆབས་ཅིག་རབ་ལྡིར་རྫོགས་ལྡན་གསར་མགྲོན་དུ། །འགུགས་མཛད་རྩ་གསུམ་ལྷ་ཚོགས་འཁོར་བཅས་ཀྱེ། །མི་མཐུན་གཡུལ་ལས་རྣམ་པར་ཡོངས་རྒྱལ་བའི། །ཕན་བདེའི་སྒོ་འཕར་ཕྱེ་བ་འབྱེད་ནུས་པ། །གསང་སྔགས་རྒྱ་མཚོར་ལེགས་བཤད་འདུས་གླིང་ཆེར། །ཐབས་ཤེས་ཟུང་དུ་འཇུག་པའི་རྟེན་འབྱུང་ཆེར། །རིན་ཅེན་ཞུན་མའི་ཡོལ་གོར་རོ་བརྒྱའི་བཅུད། །མྱངས་པའི་ཟག་མེད་བདེ་ཆེན་དྲངས་མཐུ་ཡིས། །མ་གྱུར་འགྲོ་ཀུན་འདྲེན་པའི་འཕྲིན་ལས་ཀྱིས། །ཕ་མཐའ་ནམ་མཁའི་ཚད་ཀྱང་བརྒལ་ནུས་ཤོག །ཅེས་རྡོ་པ་བློ་བཟང་བཀྲ་ཤིས། ཡར་ཀླུངས་པ་ངག་དབང་སྐལ་བཟང༌། ལྷ་ས་བ་བློ་གྲོས་ལེགས་པ་གསུམ་གྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་གྲྭ་ཚང་གི་དཀོན་གཉེར་འཇོག་ལ་དངུལ་སྲང་དགུ་བཅུ་ལས་གྲུབ་པའི་ལྟི་རི་ཆ་བལ་པོའི་གླ་ལྟོ་དང་བཅས་ཟིན་པའི་དུས་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་ཛཡནྟུ། །ལྷག་བསམ་ཟླ་དཀྱིལ་ཆ་ཤས་ཡོངས་རྫོགས་པར། །རིན་ཅེན་གཉིས་པའི་རི་དྭགས་རྣམ་བུམ་ཆེར། །ཉེར་ཤར་སྐྱེ་བར་སོར་རྟོག་ཤེས་རབ་ཀྱིས། །དཔྱད་དེ་ཐུབ་བསྟན་འཛིན་པའི་དཔལ་ཐོབ་ཤོག །ཅེས་པའང་ཕོ་བྲང་སྔགས་རམས་པ་བློ་བཟང་སྐྱེས་མཆོག་གིས་ཕན་བདེ་ལེགས་བཤད་གླིང་དུ་དངུལ་བུམ་ཕུལ་བའི་ཚེ་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད་པ་བྷ་ཝནྟུ། །འཆི་མེད་ཟིལ་མངར་རོ་བདའ་མི་ཟད་རྒྱུན། །འཁྱིལ་བས་རྩ་གསུམ་ལྷ་ཚོགས་མ་ལུས་པ། །དགྱེས་སྐོངས་(༩༧ན) ― GLG021_Page_0811 ―
[མ་དཔེ་གཟིགས་ན་འདིར་གནོན།]
དགའ་བཞིའི་འགྲོས་ཀྱིས་ཐར་གྲོང་ཆེར། །ཉེར་ཞུགས་ཟུང་འཇུག་གོ་འཕང་མྱུར་ཐོབ་ཤོག །ཅེས་པའང་ལྷ་ས་བ་བློ་བཟང་རབ་བརྟན་གྱིས་དགེ་སྐོས་ཀྱི་འཇོག་ལ་དངུལ་སྲང་བཅུ་བཞི་དང་ཞོ་དགུའི་པད་སྡེར་ཕུལ་བའི་ཚེ་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །སྲས་བཅས་རྒྱལ་བས་རབ་བསྔགས་བདེ་ཆེན་ཞིང༌། །ངོ་མཚར་བཀོད་ལེགས་མགོན་པོ་སྣང་མཐའ་ཡས། །མཛོད་སྤུའི་ཟེར་འཕྲེང་གཟི་བྱིན་ཡོངས་འབར་བས། །འཆི་བདག་བདུད་སྡེའི་སྨག་རུམ་ལྷག་པར་གཞིལ། །ངག་དབང་ལྷ་མོས་མགྲིན་འཁྱུད་བློ་གྲོས་གཟིངས། །སྐལ་བཟང་རྒྱ་མཚོར་སྒྲོལ་ལ་འཇིགས་མེད་ཀྱི། །བཙན་པོའི་གོ་ཆས་ཡིད་སྲུབས་དཔུང་ཚོགས་བཅོམ། །ཐུབ་བསྟན་ལང་ཚོའི་སྡེ་ལ་གསོལ་བ་འདེབས། །འཇམ་དཔལ་དབྱངས་དངོས་བློ་བཟང་གྲགས་པ་ཡི། །མདོ་སྔགས་རིང་ལུགས་འགྱུར་བ་བརྒྱ་ཕྲག་གླུར། །ཉེར་བླངས་དཔྱོད་ལྡན་དགའ་བ་བསྐྱེད་པའི་བཤེས། །བསྟན་འགྲོའི་དཔུང་གཉེན་དམ་པར་གསོལ་བ་འདེབས། །བདེན་ཚིག་མཐུ་ཡིས་འདི་ཕྱི་བར་དོ་རུ། །མགོན་སྐྱབས་རེ་འབྲས་གཞན་ནས་མི་འཚོལ་བས། །སྲིད་ཞིའི་གདུང་བ་མཐའ་དག་ལེགས་བསལ་ཏེ། །བདེ་སྐྱིད་དཔལ་ལ་སྤྱོད་པར་བྱིན་གྱིས་རློབས། །ཐུབ་བསྟན་སྤྱི་དང་ཁྱད་པར་དུས་གསུམ་གྱི། །སངས་རྒྱས་ཀུན་འདུས་རྗེ་བཙུན་ཙོང་ཁ་པའི། །ལུང་རྟོགས་ཆོས་སྲིད་ཡོངས་འདུའི་ལྗོན་པ་ཡིས། །རོ་བདའི་འབྲས་བུ་འགྲོ་བས་རྟག་མྱོང་ཤོག །བསྟན་ལ་གུས་མཆོད་དགའ་ལྡན་བོ་ཤོག་ཐུའི། །སྐུ་ཚེ་བསོད་ནམས་སྟོབས་འབྱོར་གོང་འཕེལ་ནས། །མཚན་ཇུས་མངའ་ཐང་མེས་(༩༧བ) ― GLG021_Page_0812 ―
[མ་དཔེ་གཟིགས་ན་འདིར་གནོན།]
པོའི་སྐལ་པ་དང༌། །མཉམ་ཞིང་མྱ་ངན་མེད་པའི་མཆེད་ཟླར་ཤོག །རབ་ཡངས་ས་སྟེང་སྐྱོང་བའི་རྒྱལ་པོ་ཆེའི། །ལེགས་བྱས་གསེར་འཁོར་ནམ་མཁར་ཉེར་འཕགས་པ། །སྲིད་གསུམ་ཟིལ་གྱིས་གནོན་པའི་དབང་ཕྱུག་གཙུག །ཞབས་སེན་ཀུནྡ་ཚེས་ལས་ཡོལ་མེད་ཤོག །དཀོན་ཅོག་རིན་ཅེན་རྣམ་གསུམ་བདེན་དཔང་དུ། །མངའ་གསོལ་སྤྱི་སྒོས་རིང་པོར་འཚོ་ཐབས་ལ། །ཆིག་དྲིལ་བརྟན་བཞུགས་གསོལ་འདེབས་གྲ་ཚང་གིས། །ཇི་ལྟར་སྨོན་པ་ལྷུན་གྱིས་གྲུབ་པར་ཤོག །ཆོས་ཉིད་མི་འགྱུར་མཁའ་དབྱིངས་ཡོངས་དག་ལས། །ཆོས་ཅན་སླུ་མེད་རྟེན་འབྱུང་འོད་བཀྲག་ཅན། །ཤར་ཏེ་མཁྱེན་བརྩེ་ནུས་པའི་བྱིན་རླབས་ཀྱིས། །རེ་བའི་འབྲས་བུ་ཡིད་བཞིན་འགྲུབ་པར་ཤོག །དངོས་བརྒྱུད་བླ་མ་དུས་དགྲའི་དབང་པོ་དང༌། །ཕྱག་དྲུག་མགོན་པོ་ལས་གཤིན་ཕྱི་ནང་གསང༌། །རྣམ་མང་ཐོས་སྲས་འདོད་ཁམས་མ་ལ་སོགས། །མཐུ་ལྡན་ཚོགས་ཀྱིས་ཉིན་མཚན་མ་གཡེལ་སྲུངས། །མཆོག་གསུམ་ཡོན་ཏན་བརྗོད་པ་རྣམ་པར་དག །གླུ་དབྱངས་རྒྱུད་ལས་ཉེར་དྲངས་གཏམ་སྙན་དང༌། །ལྷན་ཅིག་མནྡ་ར་ཡི་ཆར་ཆེན་པོས། །ཕྱོགས་དུས་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་པའང་རབ་འབྱམས་པ་བསྟན་པ་ལྷུན་གྲུབ་ཀྱིས་བརྟན་བཞུགས་གྲྭ་ཚང་ལ་འཛུགས་རྒྱུར་གོང་གི་བརྗོད་དོན་ཚང་བའི་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་སརྦ་མངྒ་ལཾ། །བགྲང་ཡས་དྭངས་མཚོར་སྣང་བ་འབུམ་ཕྲག་བརྒྱ། །ཉེར་ཤར་མཁའ་ཟླ་(༩༨ན) ― GLG021_Page_0813 ―
[མ་དཔེ་གཟིགས་ན་འདིར་གནོན།]
གཅིག་པུའི་རྣམ་འཕྲུལ་ལྟར། །སྐུ་ཡི་བཀོད་པའི་བྱེ་བྲག་མཐའ་ཡས་ཀྱང༌། །སྟོང་ཉིད་སྙིང་རྗེའི་རང་གདངས་དབྱངས་ཅན་མ། །རྟག་ཏུ་བསྟེན་ན་བསམ་པའི་རེ་བ་ཀུན། །ཡིད་བཞིན་དབང་གི་རྒྱལ་པོའི་མཆེད་པོ་རུ། །ངེས་རྙེད་སྙིང་མུན་སེལ་དང་ཆབས་ཅིག་པར། །སྡེ་བཞིའི་སྒོ་འཕར་རྫོགས་ལྡན་ལྟར་འབྱེད་ཕྱིར། །ཁྲག་ཞག་འཁྲུག་སྟེང་མེ་རླུང་འཁྱིལ་བའི་ནང༌། །རྐྱང་སེར་དྲེའུར་ཕྱེད་སྐྱིལ་སྲིན་གཟུགས་གར། །ཡོངས་བསྒྱུར་དཔལ་ལྡན་དམག་ཟོར་རེ་མ་ཏཱི། །རྡོ་རྗེ་འཆང་དངོས་དགེ་འདུན་རྒྱ་མཚོ་ཡིས། །སྡེ་འདིའི་ཕྱི་ནང་ནོར་རྫས་མ་ལུས་དང༌། །ཁྱད་པར་ལུང་རྟོགས་ཡོན་ཏན་བླ་ནས་བླར། །སྤེལ་བར་བཀའ་བསྒོས་དམ་ཚིག་གཉེན་དགོངས་ཏེ། །དལ་མེད་མགོན་སྐྱབས་མཛོད་ཅིག་སྲུང་མའི་གཙོ། །ཀུན་མཁྱེན་སངས་རྒྱས་གཉིས་པ་བཙོང་ཁ་པའི། །དྲི་བྲལ་རིང་ལུགས་བསྟན་པས་ནོར་འཛིན་ཁྱོན། །རབ་གང་ལེགས་ཚོགས་དཀར་ཆའི་ཆུ་ཤེལ་དབང༌། །ཉ་རྒྱས་ཇི་བཞིན་གོང་འཕེལ་འཕྲིན་ལས་སྒྲུབས། །ཐམས་ཅད་མཁྱེན་པ་དགེ་འདུན་རྒྱ་མཚོ་དཔལ་བཟང་པོས་ཕྱག་བསྟར་བའི་ཆོས་འཁོར་རྒྱལ་ཞེས་མཁས་མང་འབྱུང་གནས་འདུས་སྡེའི་ནང་ཚན་མངའ་རིས་གྲྭ་ཚང་བླ་གཉེར་ཐུན་མོང་ནས་འདོད་ཁམས་དབང་ཕྱུག་མའི་འབྲལ་སྤང་ཐང་གའི་རྒྱབ་ཡིག་ལ་ཆོས་སྲིད་གཉེར་གཏད་ཀྱི་འཕྲིན་བཅོལ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་སརྦ་སིདྡྷི་མེ་པྲ་ཡཙྪ། །ལྷག་བསམ་དག་པས་གསེར་(༩༨བ) ― GLG021_Page_0814 ―
[མ་དཔེ་གཟིགས་ན་འདིར་གནོན།]
ཟངས་ལས། །འཇམ་དབྱངས་དགའ་བའི་བཤེས་གཉེན་གྱི། །འདྲ་འབག་བཞེངས་མཐུས་ལྷ་མིའི་རྟེན། །རིམ་བརྒྱུད་མྱང་འདས་མྱུར་ཐོབ་ཤོག །ཅེས་པའང་སྔགས་རམས་པ་ངག་དབང་གྲགས་པ་དང་གཞོན་ནུ་སྐལ་བཟང་སྤུན་གྱི་ངོར་བྲིས་པ་ཤྲཱི་བྷ་ཝནྟུ། །རབ་དཀར་བསོད་ནམས་ཡོངས་སྨིན་མུ་ཐི་ལ། །འཛད་མེད་ཉེར་སྩོལ་ཐུབ་དབང་ཤཱཀྱའི་ཏོག །ཁྱེད་གསུང་སློབ་བཅས་སྤྱན་སྔར་རྣམ་བཀྲའི་གོས། །ཁྱད་མཚར་བར་སྣང་མཛོད་རིས་ཅན་ཕུལ་དགེས། །ངག་དབང་ལྷ་མོས་མགྲིན་འཁྱུད་བློ་གྲོས་གཏེར། །བསྐལ་བཟང་རྣམ་འདྲེན་བཞི་པའི་ལུང་རྟོགས་བསྟན། །དབྱར་གྱི་རྒྱ་མཚོ་ཇི་བཞིན་རབ་འཕྱུར་ཆེད། །མི་འཇིགས་སེང་གེའི་ཁྲི་ལ་ཞབས་བརྟན་ཤོག །སངས་རྒྱས་ཀུན་དངོས་རྗེ་བཙུན་བཙོང་ཁ་པའི། །དྲི་མེད་རིང་ལུགས་རྒྱ་མཚོའི་སྒོ་འཕར་བརྒྱ། །འབྱེད་མཛད་ས་ཡི་དབང་ཕྱུག་ཚངས་པ་ཆེ། །མི་འགྱུར་གཡུང་དྲུང་ལྟ་བུར་རྟག་བརྟན་ཤོག །ཅེས་པ་འདིའང་མཆོད་དཔོན་ངག་དབང་ཤེས་རབ་སྤུན་ཚས། ངེད་རང་ཡུན་རིང་འཚོ་དགོས་པའི་ནན་བསྐྱེད་བྱུང་བ་སྒྲིབ་པའི་ལུས་ཅན་དུ་སོང་གཤིས་རང་དབང་ཅིར་འདུ་རུང་མཆོག་གསུམ་གྱི་ཐུགས་རྗེ་བསྐུལ་བའི་མཐུས་འགྲུབ་བམ་སྙམ་ཁས་ལེན་བྱས་པའི་གཏང་རག་དང༌། སྡེ་པའང་བསྟན་པ་རིན་པོ་ཆེ་གྱེན་དུ་འདེགས་ཕྱིར་རིང་པོར་གནས་པའི་རྟེན་འབྱུང་མཚོན་བྱེད་ཐུན་མོང་ལ། བཀྲས་བཏགས་ཉིན་བདེ་མ། བཀྲ་ཤིས་ཁ་བཏགས་བརྒྱ་ཐམ་པ། གོན་པ་ཆ་ཚང་རེ། གསེར་ཞོ་བརྒྱ། དངུལ་སྲང་བརྒྱ། (༩༩ན) ― GLG021_Page_0815 ―
[མ་དཔེ་གཟིགས་ན་འདིར་གནོན།]
སྨན་རྩ་ཡུག་བརྒྱ། བྱང་དར་ཡུག་བརྒྱ། གོས་ཆེན་ལེགས་པ་ཡུག་ལྔ། གོས་ལོག་ཐང་གསེར་མ་ཡུག་དྲུག་ཅུ་དང་ཚོས་གཅིག་མ་བཞི་བཅུ་བཅས་ཡུག་བརྒྱ། རྒྱ་དཀར་ཡུ་ཐུང་ཉིས་བརྒྱ། ཟམ་སོ་ཡུག་བརྒྱ། སག་རི་བུབས་བརྒྱ། བུར་ལྟང་བཅུ་གཉིས། བྱེ་ཤེལ་ལྟང་རྩེ་རེ། སྤོས་དཀར་ལྟང་རྩེ་གསུམ། གོས་རྒྱན་བཞིའི་ཡོལ་བ་རྣམ་པ་སུམ་ཅུ་སོ་གཉིས་རེ་ཡོད་པའི་ཆ་གཅིག །གོས་དཀར་ཡུག་བཅས། གོང་གསལ་རྣམས་གནས་ཚད་གསུམ་གྱིས་ལམ་ཙམ་དངུལ་ལ་ཕབ་པར། ཁྱོན་དངུལ་སྲང་སྟོང་ཕྲག་གཅིག་དང་དྲུག་བརྒྱ་བདུན་ཅུ་དོན་བདུན་ཐོབ་པ་དང་བཅས་སྟོང་འབུལ་བསྟར་བའི་ཚེ་ཡོལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་གྱིས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་པ་སརྦ་མངྒལཾ་བྷ་ཝནྟུ། །ཕུལ་བྱུང་བདེ་ལྡན་ཞིང་གཙོ་འོད་དཔག་མེད། །རྣམ་པར་རྒྱལ་མ་ཚེ་སྦྱིན་ཡིད་བཞིན་འཁོར། །ལྷ་དང་དྲང་སྲོང་བདེན་ཚིག་གྲུབ་མཐུ་ཡིས། །སྲ་བརྟན་མི་འགྱུར་གཡུང་དྲུང་གཡས་འཁྱིལ་སྟེང༌། །ངག་དབང་ལྷ་མོས་རྗེས་བཟུང་ཤེས་བྱའི་ཆོས། །ས་ཆེན་བློ་གྲོས་གོམ་པ་གཅིག་གིས་ཀྱང༌། །འགོམ་མཛད་བཟང་པོའི་བག་ཆགས་ཉེར་སད་པ། །དབྱར་གྱི་རྒྱ་མཚོ་ཇི་བཞིན་ཡོངས་ཕྱུར་ཤོག །གུར་བཀུམ་ངད་པ་འཐུལ་བའི་ཡུལ་གྲུ་ནས། །ཤར་ཕྱོགས་ཆུ་གཏེར་མཐར་ཐུག་འཛིན་མའི་ཁྱོན། །ཞྭ་སེར་ཅོད་པན་མནབས་པའི་ལུགས་བཟང་བསྟན། །ཉི་ཟླས་མུན་སེལ་དེ་བཞིན་ཀུན་ཁྱབ་ཤོག །དད་(༩༩བ) ― GLG021_Page_0816 ―
[མ་དཔེ་གཟིགས་ན་འདིར་གནོན།]
དང་གཏོང་བས་མཆོག་གསུམ་བསྙེན་བཀུར་བར། །མགོན་མེད་ཟས་སྦྱིན་ལ་འགྲན་དཔའ་ཞིང་མཛངས། །རྟུལ་ཕོད་རྩལ་མངའ་དགའ་ལྡན་བོ་ཤོག་ཐུའི། །ཚེ་བསོད་སྟོབས་འབྱོར་བླ་ནས་བླར་འཕེལ་ཤོག །རྒྱལ་བ་སྲས་བཅས་མཁྱེན་བརྩེ་མ་ཡོལ་ཆབ། །ཕན་བདེའི་ཆུ་གཉེར་བགྲང་ཡས་འཁྲིགས་ཀློང་ལས། །གང་བསམ་འདོད་པ་འཇོ་བའི་དབང་རྒྱལ་ནོར། །མི་འབྲལ་སྤྱི་བོའི་གཙུག་ཏུ་མཛེས་གྱུར་ཅིག །ཅེས་པའང་ཐ་སུར་ཁའི་བུ་རབ་འབྱམས་པ་བློ་བཟང་དར་རྒྱས་ཀྱིས་རྩལ་སྟོབས་བསྐྱེད་ནས་ཕྱིན་ཏེ་ཡངས་པའི་ས་ཆེན་བདེ་བར་སྐྱོང་བ་དགའ་ལྡན་བསྟན་འཛིན་བོ་ཤོག་ཐུ་རྒྱལ་པོར་ཇ་ཚུལ་ཐེབས་ཀྱི་སྦྱིན་བདག་བསྐུལ་བར་དད་པས་ཀུན་ནས་བླངས་ཏེ་རི་བོ་དགའ་ལྡན་ཚོགས་ཆེན་དུ་དངུལ་སྲང་སྟོང་དང་ལྔ་བརྒྱ། རྒྱུད་སྨད་དུ་ཉིས་བརྒྱ། ཐོས་བསམ་གླིང་པར་སྟོང་དང་ཕྱེད་སུམ་བརྒྱ་རྣམས་སྦྱར་བའི་དུས་སོ་སོར་འཛུགས་རྒྱུའི་རིང་འཚོའི་ཚིགས་བཅད་དགོས་ཚུལ་ལྟར་ཟ་ཧོར་གྱི་བནྡེ་གདོང་དྲུག་བསྙེམས་པའི་ལང་ཚོས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །རྒྱལ་བ་ཀུན་འདུས་པདྨ་འབྱུང་གནས་ཀྱི། །མ་སྨད་མཁྱེན་བརྩེ་ནུས་པའི་གཟི་བྱིན་ཉིས། །ཟུར་གྱི་སྔགས་འཆང་ཨ་གུར་སྒོ་གསུམ་མུན། །ཉེར་སངས་རྔ་ཡབ་གླིང་དང་འབྲལ་མེད་ཤོག །ཞི་ཁྲོའི་དཀྱིལ་འཁོར་མཐོང་ཐོས་དྲན་རེག་མཐུས། །རང་རིག་རང་ཞལ་ཀུན་བཟང་རྡོ་རྗེ་འཆང༌། །མངོན་དུ་གྱུར་མིན་དེ་སྲིད་རིགས་འཛིན་ལས། །མི་འགྱུར་ཡིད་བཞིན་དབང་གི་རྒྱལ་པོར་ཤོག །འདིས་མཚོན་(༡༠༠ན) ― GLG021_Page_0817 ―
[མ་དཔེ་གཟིགས་ན་འདིར་གནོན།]
རྣམ་དཀར་དགེ་ཚོགས་ཞིང་ས་ལ། །ལྷག་བསམ་སྨོན་ལམ་ས་བོན་དྲོད་གཤེར་གྱིས། །རབ་སྨིན་བདེ་སྐྱིད་གསེར་སྙེ་དར་དྲག་པར། །སྤྱོད་པའི་སྐལ་མཆོག་མྱུར་དུ་འགྲུབ་པར་ཤོག །ཅེས་གཞིས་ཀ་ཤར་གུ་རུ་རྟ་མགྲིན་དུས་ཀྱི་ཆོས་ཉིད་དུ་གྱུར་པའི་ཚེ་ཟུར་དཔལ་ནོར་བུས་ཚེས་བཅུ་ཁག་སོགས་སུ་འཛུགས་རྒྱུར་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སིདྡྷི་རསྟུ། །སྒྲིབ་གཉིས་འཆིང་རྒྱ་ཉེར་གྲོལ་ཡོན་ཏན་ཀུན། །རྫོགས་པར་རྣམ་འདྲེན་མཐའ་དག་མཉམ་ན་ཡང༌། །ཚེ་དང་ཡེ་ཤེས་གཏེར་ལ་མངའ་བརྙེས་པའི། །འོད་དཔག་མེད་ཀྱིས་མཁྱེན་བརྩེ་ནུས་དཔུང་སྐྱེད། །ཟླ་ཞུན་བྱེ་བའི་མདངས་ལྡན་དངུལ་དཀར་ལས། །ལེགས་གྲུབ་མཚན་དཔེའི་གཟི་བྱིན་རབ་རྒྱས་སྐུ། །བསྐྲུན་པས་ངག་དབང་བློ་བཟང་རྒྱ་མཚོའི་སྡེ། །མི་འགྱུར་སྲོག་གི་ཀ་བ་བརྟན་ཚུགས་ཤོག །གསེར་མདོག་ཞྭ་ཡི་ཅོད་པན་ཡོངས་འཆང་བའི། །དྲི་མེད་ལུང་རྟོགས་ལུས་ཅན་བསོད་ནམས་ཀྱི། །ཞིང་དུ་མ་ཕམ་མགོན་པོ་འཛམ་གླི་ང་དབུས། །བྱོན་མིན་དེ་སྲིད་བླ་ནས་བླར་འཕེལ་ཤོག །ཅེས་ནོར་འཛིན་གྱི་ཁྱོན་ཡངས་པོར་མངའ་སྒྱུར་བ་དད་སྟོབས་ཀྱི་དབང་ཕྱུག་དགའ་ལྡན་བསྟན་འཛིན་བོ་ཤོག་ཐུ་རྒྱལ་པོས་ཀུནྡ་ལྟར་དཀར་བའི་ལྷག་བསམ་ཀུན་བླངས་ཀྱིས་ངེད་རང་རིང་པོར་འཚོ་བའི་རྟེན་འབྲེལ་དུ་རིན་ཅེན་གཉིས་པ་ལས་གྲུབ་པའི་སངས་རྒྱས་འོད་དཔག་མེད་ཀྱི་སྐུ་ལྔ་བཅུ་གྲུབ་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་(༡༠༠བ) ― GLG021_Page_0818 ―
[མ་དཔེ་གཟིགས་ན་འདིར་གནོན།]
དབང་དཀོན་ཅོག་གིས་བགྱིས་པ་ཨཱཡུ༔སིདྡྷི་པྲ་ཡཙྪ། །ཟག་བྲལ་མི་ཟད་འཆི་མེད་ཨ་མྲི་ཏ། །ལྷ་སྔགས་ཡེ་ཤེས་རོལ་པའི་འོད་སྣང་ལས། །ལྷུན་གྲུབ་ཨ་ཧཾ་ཀ་བ་སྲ་བརྟན་སྲོག །ཉེར་འཇུག་རིགས་བདག་པདྨ་ཚེ་དབང་རྩལ། །ཐུགས་རྗེས་བྱིན་རློབས་དབྱངས་ཅན་བཞད་པའི་སྡེར། །རྟེན་ཅིང་འབྲེལ་འབྱུང་ཆོས་ཟབ་རབ་བསྒྲིགས་པས། །ཕྱོགས་ལས་རྣམ་པར་རྒྱལ་བའི་ཕན་བདེའི་སྒོ། །ལེགས་ཕྱེ་ངེས་གསང་བཤད་དང་སྒྲུབ་གླིང་ཆེར། །དཔག་བསམ་བཅུད་འཁྱིལ་རིན་ཅེན་གཉིས་པ་ལས། །ཡོངས་གྲུབ་ཕུལ་མཚོན་སྒོ་གསུམ་གང་འབད་མཐུས། །རྗེ་བཙུན་བླ་མ་འོག་མིན་མགོན་པོ་ལྟར། །མི་འགྱུར་འཕྲིན་ལས་ཕྱོགས་ཀུན་ཁྱབ་པར་ཤོག །ཅེས་པ་འདིའང་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་བསྟན་པ་ལ་མི་ཕྱེད་པའི་དད་སྟོབས་ཀྱི་དབང་ཕྱུག་དགའ་ལྡན་བསྟན་འཛིན་བོ་ཤོག་ཐུ་རྒྱལ་པོས་ངེད་རང་རིང་པོར་འཚོ་བའི་རྟེན་འབྲེལ་བསྒྲིགས་སྐབས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་དངུལ་ལྟིར་ཚ་གསེར་མ་ངོ་མཚར་བཀོད་ལེགས་དགུ་ཕུལ་བའི་ཚེ་སྨོན་ལམ་དགོས་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་ཤྲེ་ཡ་བྷཝནྟུ། །ཞི་དང་ཁྲོ་བོའི་དཀྱིལ་འཁོར་མ་ལུས་པའི། །ལྷ་སྔགས་ཡེ་ཤེས་ཡོངས་འདུས་རིག་རྩལ་གདངས། །མ་འགགས་རང་ཤར་ཁྲོ་རྒྱལ་གྲོ་བོ་ལོད། །གར་དགུའི་ཉམས་ཀྱིས་རྒྱལ་བསེན་གདོན་བགེགས་བརྫིས། །རྣམ་གསུམ་ཡོ་གའི་(༡༠༡ན) ― GLG021_Page_0819 ―
[མ་དཔེ་གཟིགས་ན་འདིར་གནོན།]
དགོངས་དོན་མཐའ་ཀླས་པ། །ཡོངས་ཚང་ཡི་དམ་སྒྲུབ་སྡེ་བཀའ་བརྒྱད་ལྷའི། །མཆོག་ཐུན་དངོས་གྲུབ་མངའ་བརྙེས་རྗེ་དང་འབངས། །ཉེར་ལྔའི་འཕྲུལ་གྱིས་སྐྱེ་རྒུ་ཕན་བདེར་བཀོད། །ཚེ་དབང་རིགས་འཛིན་སྔགས་སྲུང་རལ་གཅིག་མ། །གཟའ་མཆོག་ཆེན་པོ་དམ་ཅན་རྡོར་ལེགས་ཀྱིས། །རྒྱུ་སྦྱོར་ཉིན་མཚན་སྲུང་སྐྱོབ་མ་གཡེལ་བར། །འདོད་དོན་ལྷུན་གྱིས་གྲུབ་པའི་འཕྲིན་ལས་མཛོད། །གཡས་ཐང་བརྒྱད་པའི་སྐྱ་རིས་ནས་མཇུག་ཚགས་ཀྱི་བར་ལྕང་སྲུང་ཁང་པ་རིན་ཅེན་རྡོ་རྗེས་བགྱིས། །རབ་འབྱམས་དཀྱིལ་འཁོར་ཁྱབ་བདག་དབང་པོའི་སྡེ། །ཟབ་གཏེར་ཉིང་ཁུ་འཆི་མེད་སྐུ་གསུམ་དཔྱིད། །རིགས་འདུས་མཚོ་སྐྱེས་རྡོ་རྗེ་ཉི་སྣང་གིས། །དུས་མིན་མཚུན་ལྷའི་སྨག་རུམ་མཐའ་དག་གཞིལ། །མཁའ་སྤྱོད་ཌཱ་ཀིའི་གཙོ་མོ་ཙནྜ་ལཱི། །རྩ་བརྒྱུད་བླ་མ་འཇིག་རྟེན་དབང་ཕྱུག་དང༌། །པདྨ་ཀཱ་ར་རྟ་མཆོག་བདུད་བཙན་ཀླུས། །ཡོངས་བསྐོར་བཞེངས་མཐུས་ས་སྤྱོད་སངས་རྒྱས་བསྟན། །རྒྱ་མཚོའི་མཐར་སྤེལ་སྐྱེ་རྒུའི་རྩ་ལག་གི །གཞི་མར་བསྟན་འགྲོའི་ལེགས་ཚོགས་རབ་འབར་བའི། །ཉི་མ་སྲིད་པ་གསུམ་གྱི་ཀུན་གསལ་ངོས། །རྟག་ཏུ་འཆར་བའི་འོད་སྣང་དེང་འབར་ཤོག །གཡས་ཐང་དགུ་པའི་སྐྱ་རིས་ནས་མཇུག་ཚགས་ཀྱི་བར་རྣམ་སྲས་གླིང་པ་ཇི་ལས་བགྱིས། །གྲུབ་པའི་དབང་ཕྱུག་རིན་ཅེན་གསལ་བ་ཡི། །དཀྱུས་རིང་སྤྱན་ཟུར་ལྷུང་བའི་མོད་ཉིད་ལ། །རྡོ་རྗེ་རྩེ་བརྒྱ་ཉེར་གདེངས་སྟེང་གདོན་ཀུན། །ཐལ་བར་རློག་ཅིག་གསང་བདག་གཏུམ་པོ་ཆེ། །རྡོ་རྗེ་འཆང་(༡༠༡བ) ― GLG021_Page_0820 ―
[མ་དཔེ་གཟིགས་ན་འདིར་གནོན།]
ནས་རྩ་བའི་བླ་མའི་བར། །མ་ཆད་བརྒྱུད་འཕྲེང་བཅོམ་ལྡན་རིགས་གསུམ་མགོན། །ལྷ་ཆེན་ལྕམ་དྲལ་དང་བཅས་རབ་བསྐོར་བས། །ས་འོག་ས་སྟེང་ས་བླའི་འགྲོ་ཀུན་སྙིང༌། །ཉེར་སྒུལ་ཡིད་ལ་བསམ་དགུའི་འདོད་ཡོན་ནོར། །གཏེར་སྒོ་ཕྱེ་སྟེ་རྒྱལ་ཁབ་ཡོལ་གོའི་ནང༌། །ཕྱུར་བུར་སྤུངས་ཤིག་དབུལ་བྲལ་ལོངས་སྤྱོད་ཚོགས། །དབྱར་མཚོ་ཇི་བཞིན་རྒྱས་པར་མཛད་དུ་གསོལ། །གཡོན་ཐང་བརྒྱད་པའི་སྐྱ་རིས་ནས་མཇུག་ཚགས་ཀྱི་བར་རོང་པ་བསོད་ནམས་རྒྱལ་པོས་བགྱིས། །ངེས་ངོར་དབྱངས་ཅན་ལྷ་མོ་མ་རུངས་པའི། །གཤེད་མར་འདོད་ཁམས་དབང་ཕྱུག་བརྒྱུད་པར་བཅས། །དྲི་ཟའི་རྒྱལ་པོ་ཟུར་ཕུད་ལྔ་པ་དང༌། །དགྲ་ལྷ་སྐྱེས་གཅིག་རྡོ་རྗེ་གྲགས་ལྡན་གྱིས། །དུས་དྲུག་མི་གཡེལ་གདོང་གྲོགས་སྐྱབས་མཛད་པར། །ཐུགས་དམ་གཉེན་བསྐུལ་དབྱིངས་ནས་ཉེར་དགོངས་ལ། །སྒྲིབ་གཉིས་ནད་གདོན་འཆི་མེད་བུམ་པས་ཁྲུས། །བསམ་འཕེལ་ནོར་གྱིས་ཚེ་བསོད་མངའ་ཐང་སྤེལ། །འགུགས་བྱེད་ཚོགས་ཀྱིས་བརྟན་གཡོ་དབང་དུ་སྡུས། །མི་བཟད་མཚོན་ཆས་དགྲ་བགེགས་ཕྱེ་མར་ཐོགས། །དགའ་ལྡན་ཕོ་བྲང་ལུགས་ཟུང་ཉེར་འདེགས་པའི། །སྙིང་སྟོབས་ལྷག་བསམ་བླ་ནས་བླར་འཕེལ་མཛོད། །གཡོན་ཐང་དགུ་པའི་སྐྱ་རིས་ནས་བཟུང་མཇུག་ཚགས་ཀྱི་བར་ལྷ་ས་བ་བསོད་ནམས་ཀྱིས་བགྱིས། །ཞེས་པ་འདིའང་ལྷ་སྲས་ཀྱི་རྣམ་སྤྲུལ་མི་དབང་སངས་རྒྱས་རྒྱ་མཚོས་ལྕགས་སྤྲེ་དད་རྟེན་གྲྭ་ཚར་བཅོ་ལྔ་བཞེངས་པའི་ཁ་ལོངས་སུ་རྡོ་རྗེ་གྲོ་ལོད་ལ་པདྨ་ཚེ་དབང་རྩལ། བྱིན་རླབས་དབང་གི་ཆུ་རྒྱུན་ལས་བྱུང་བའི་རྗེ་འབངས་ཉེར་ལྔ། །མ་གཟའ་(༡༠༢ན) ― GLG021_Page_0821 ―
[མ་དཔེ་གཟིགས་ན་འདིར་གནོན།]
རྡོར་གསུམ་གྱིས་བསྐོར་བ། །ཚེ་དཔག་མེད་སྐུ་གསུམ་རིགས་འདུས་ལ་ལྷ་མོ་ཙནྜལཱི་བརྒྱུད་པའི་བླ་མ་དང་ལུས་དཀྱིལ་གྱི་ལྷ་གཉིས། བདུད་བཙན་ཀླུ་གསུམ་གྱིས་བསྐོར་བ། ཉི་མ་མདུང་གང་མའི་ཕྱག་རྡོར། བླ་བརྒྱུད། རིགས་གསུམ་མགོན་པོ། གཏེར་གསར་ལྷ་ཆེན་གྱིས་བསྐོར་བ། དཔལ་ལྡན་དམག་ཟོར་མ་ཞི་དྲག་གཙོ་འཁོར་ལ་བླ་བརྒྱུད། གཉེན་ཆེན་པོ། རྡོ་རྗེ་གྲགས་ལྡན་དང་བཅས་པས་བསྐོར་བ་ལྷ་བཟོ་བ་སོ་སོས་རྩལ་གང་ཡོད་འདོན་པ་ལས་གཞན་འདྲེས་མེད་པར་ལེགས་ཉེས་ཕྱེད་ཅིང་མིག་ལྟོས་ལ་ཕན་པ་ཆུ་ཕག་ལོར་བཞེངས་པའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སརྦ་སིདྡྷི་མེ་པྲ་ཡཙྪ། །གསང་གསུམ་ཡོན་ཏན་ཆ་ཙམ་དྲན་པས་ཀྱང༌། །སྲིད་ཞིའི་གདུང་བཅིལ་རྩ་གསུམ་ལྷའི་འཁོར་ལོར། །པད་རཱག་མདངས་འཛིན་གན་གོས་རི་མོ་ཅན། །དབང་གཞུ་ལྟར་བཀྲའི་ཡོལ་བ་ཡོངས་སྤེལ་དགེས། །སྐྱིད་སྐྱིད་སྲི་ཐར་དབང་མོ་མ་དག་གནས། །རབ་སྤངས་བདེ་བ་ཅན་དུ་པདྨའི་སྦུབས། །རྫུས་སྐྱེས་འོད་དཔག་མེད་ཀྱིས་རྗེས་བཟུང་ནས། །འགྲོ་འདྲེན་དེད་དཔོན་མྱུར་དུ་བྱེད་པར་ཤོག །ནམ་མཁའི་མཐའ་མཉམ་མ་གྱུར་སེམས་ཅན་རྣམས། །ཟུག་རྔུའི་དུ༔ཁ་ལས་གྲོལ་ངེས་ལེགས་ཀྱི། །རིན་ཅེན་ཡིད་འོང་ཁང་པར་བདེ་ཆེན་ལ། །རྟག་ཏུ་སྤྱོད་པའི་སྐལ་བཟང་ཉེར་ཐོབ་ཤོག །རྣམ་དཀར་འབྲས་བུ་མི་འཛད་རྒྱ་མཚོ་ཆེ། །ཉེས་(༡༠༢བ) ― GLG021_Page_0822 ―
[མ་དཔེ་གཟིགས་ན་འདིར་གནོན།]
བརྒྱའི་རོ་དང་ལྷན་ཅིག་མི་གནས་ཤིང༌། །ཕུན་ཚོགས་དཔལ་འབྱོར་ལྷུན་གྲུབ་གཏན་མདུན་བདེའི། །ཡིད་བཞིན་ནོར་གྱིས་ཅི་འདོད་རེ་སྐོང་ཤོག །རྩ་བརྒྱུད་བླ་མ་ཡི་དམ་ཞི་ཁྲོའི་ལྷ། །དཔའ་བོ་མཁའ་འགྲོ་དམ་ཅན་སྲུང་མ་ཡིས། །ལེགས་བྱས་འཕྲིན་ལས་སྒོ་འཕར་ཡོངས་ཕྱེ་སྟེ། །ཐོག་མཐའ་བར་དགེའི་ཕུན་ཚོགས་བཀྲ་ཤིས་སྩོལ། །ཞེས་པ་འདིའང་མཆོད་དཔོན་ངག་དབང་ཤེས་རབ་ཀྱིས་མ་སྐྱིད་སྐྱིད་དང་སྲིང་མོ་སྲི་ཐར་དབང་མོ་སོགས་ཀྱི་དོན་དུ་གཡོ་རུ་ཁྲ་འབྲུག་བདེ་གཤེགས་མཐོང་གྲོལ་ལྷ་ཁང་དུ་ཅོད་ལྡན་དམར་པོའི་ཡོལ་བ་ཕུལ་བའི་ཚེ་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་བྷ་ཝནྟུ། །རིན་ཅེན་གཉིས་པ་ལས་གྲུབ་པདྨའི་དབྱིབས། །དམ་རྫས་བ་ལིཾ་རྒྱན་ལྡན་གཏམས་པའི་སྣོད། །མཆོག་གསུམ་ལ་ཕུལ་བདེ་སྣང་བདེ་ཞིང་སྐྱིད། །ཕྱི་མ་རྔ་ཡབ་དཔལ་རིར་སྐྱེ་བར་ཤོག །ཅེས་པའང་སྙེ་ཐང་པ་བློ་གྲོས་རྣམ་རྒྱལ་གྱིས་དགེ་སྐོས་བྱས་པའི་འཇོག་ལ་སྲང་བཅུ་བཞིར་གྲུབ་པའི་པད་སྡེར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་བནྡེས་བཀོད་པ་བྷཝནྟུ། །མཁས་པའི་རྩེར་སོན་ངག་དབང་བློ་གཏེར་དངོས། །བྱམས་བརྩེས་འགྲོར་ཆགས་རྗེ་བཙུན་པད་དཀར་འཆང༌། །བཟང་པོའི་མཐུ་སྟོབས་རྒྱ་མཚོ་རྡོ་རྗེ་འཛིན། །རིགས་འཛིན་འདུས་པའི་ངོ་བོར་གསོལ་བ་འདེབས། །དེང་ནས་སྐྱེ་བ་ཀུན་ཏུ་མགོན་ཁྱོད་དང༌། །ནམ་ཡང་འབྲལ་མེད་མི་ཁོམ་སྐྱོན་བྲལ་ཞིང༌། །དལ་བརྒྱད་འབྱོར་བཅུ་ཚང་བའི་རྟེན་བཟང་པོ། །(༡༠༣ན) ― GLG021_Page_0823 ―
[མ་དཔེ་གཟིགས་ན་འདིར་གནོན།]
ཉེར་ཐོབ་ཐེག་ཆེན་དམ་ཆོས་སྟོན་པར་ཤོག །བསྐལ་མང་ཚིགས་ཀྱིས་རླབས་ཆེན་སྤྱད་པ་དང༌། །ས་ལམ་ཚོགས་བསྒྲུབ་བལྟོས་པས་མ་ངོམས་པར། །གསང་སྔགས་སྨིན་ཅིང་གྲོལ་བས་རྒྱུད་སྦྱངས་ནས། །ཁ་སྦྱོར་བདུན་ལྡན་མྱུར་དུ་འགྲུབ་བྱིན་རློབས། །བེ་རི་རབ་འབྱམས་པ་ངག་དབང་ལེགས་པས་འདི་ལྟ་བུ་ཞིག་དགོས་ཞེས་ནན་གྱིས་བསྐུལ་བར་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །ཉེར་བཞིའི་སྲང་ལྡན་དངུལ་དཀར་ལས། །ཡོངས་གྲུབ་ཀོང་ཕུལ་མ་གྱུར་འགྲོའི། །སྒྲིབ་གཉིས་སྨག་རུམ་ཡེ་ཤེས་ཀྱི། །མེས་བསལ་ཟུང་འཇུག་མྱུར་ཐོབ་ཤོག །ཅེས་པའང་སྙེ་མོ་ཨ་གླིང་ཆོས་མཛད་དངོས་གྲུབ་རྒྱ་མཚོས་སྔགས་རམས་པ་བགྱིས་པའི་ཚེ་དགོས་ཚུལ་བཞིན་ཟ་ཧོར་གྱི་བནྡེས་བཀོད་པ་ཛ་ཡནྟུ། །ཕུན་ཚོགས་གསུང་རབ་མཐའ་ཡས་གཞུང་ལུགས་དོན། །ལེགས་པར་ཐོས་བསམ་སྒོམ་པའི་ཤེས་རབ་གྱིས། །གཏན་ཕབ་ངག་དབང་བློ་བཟང་ལྷག་བསམ་ཅན། །རྒྱ་མཚོ་ཇི་བཞིན་ཟབ་ཡངས་བརྩེ་ཆེན་མགོན། །ཟས་གཙང་སྲས་པོའི་རིང་ལུགས་དྲི་མ་མེད། །ཡོངས་སུ་ཉེར་བཟུང་སྤོབས་པ་རྩེར་སོན་མཐུ། །དར་དྲག་འཕྲིན་ལས་བླ་ནས་བླར་སྤེལ་བ། །དབྱངས་ཅན་བཞད་པའི་སྡེ་ལ་གསོལ་བ་འདེབས། །དད་གུས་གདུང་ཤུགས་དྲག་པོས་རྩེ་གཅིག་ཏུ། །མི་ཕྱེད་སྙན་པའི་གདངས་ཀྱིས་གསོལ་བཏབ་པས། །བྱང་ཆེན་ཐོབ་མིན་དེ་སྲིད་དཔུང་གཉེན་མཆོག །རབ་མཛད་འདི་ཕྱིའི་མདུན་མ་ལྷུན་གྲུབ་ཤོག །ཅེས་(༡༠༣བ) ― GLG021_Page_0824 ―
[མ་དཔེ་གཟིགས་ན་འདིར་གནོན།]
པ་འདིའང་མཁར་སྔོན་བློ་བཟང་དཔལ་འབྱོར་དགེ་སློང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འགྲོ་ཁམས་དང་འཚམ་རིས་མེད་རྗེས་འཛིན་པར། །འཆར་ནུབ་སྤངས་པའི་དམ་བཅའ་བརྟན་པོའི་ཁུར། །ཡོངས་བཏེགས་སངས་རྒྱས་དེ་གསུང་དགེ་འདུན་བཅས། །དཀོན་ཅོག་ཐུགས་རྗེའི་མཐུ་དཔུང་ཆེས་ཆེར་སྐྱེད། །ལུས་ངག་ཡིད་གསུམ་ལྷ་སྔགས་ཡེ་ཤེས་ཀྱི། །རྣལ་འབྱོར་ལ་དབང་བློ་གྲོས་བཟང་པོའི་གྲུས། །རིམ་གཉིས་རྒྱ་མཚོའི་མཐར་སོན་ཟུང་འཇུག་ནོར། །འདྲེན་མཆོག་དེད་དཔོན་ཁྱེད་ལ་གསོལ་བ་འདེབས། །དད་གུས་བློ་བརྩོན་མི་དམན་ལྷག་བསམ་གྱིས། །གཏོང་ཕོད་རི་བོ་དངོས་སུ་རྒྱུ་འདྲ་བའི། །བསོད་ནམས་བསགས་མཐུས་ཡང་སྲིད་བཟུང་མ་ཐག །མགོན་པོ་ཁྱོད་ཀྱི་འཁོར་དུ་སྐྱེ་བར་ཤོག །འཇམ་དབྱངས་མི་ཡི་ཚུལ་བཟུང་ཙོང་ཁ་པའི། །རིང་ལུགས་བསྐལ་འཚོ་ལུས་ཅན་རྟག་བདེ་ལ། །འགོད་ཆེད་མང་བཀུར་རིགས་ཐོབ་ཞྭ་སེར་བསྟན། །ཕྱོགས་བཅུར་གོང་ནས་གོང་དུ་སྤེལ་ནུས་ཤོག །འདིས་མཚོན་དུས་གསུམ་རྣམ་དཀར་དགེ་ཚོགས་རྣམས། །འཛད་མེད་མཐོ་རིས་ཆུ་བོའི་མཆེད་པོ་བཞིན། །ཀུན་མཁྱེན་ཡེ་ཤེས་རྒྱ་མཚོ་ཆེན་པོའི་ཀློང༌། །ཉེར་བབས་སྐལ་བཟང་མངོན་སུམ་མཐོང་བར་ཤོག །ཅེས་པ་འདིའང་ཨོད་ནོད་དྷུ་རིང་ཝང་གི་མ་མི་འཕྲོག་པའི་དད་པ་དང་ལྡན་པ་ཁོ་ཤོལ་གེ་གེ་ཤེས་རབ་རྒྱ་མཚོས་ཟང་ཟིང་གི་བདོག་པ་གྱ་ནོམ་པ་དང་བཅས་འདི་ལྟ་བུ་ཞིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་(༡༠༤ན) ― GLG021_Page_0825 ―
[མ་དཔེ་གཟིགས་ན་འདིར་གནོན།]
བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སིདྡྷི་རསྟུ། །ཚོགས་གཉིས་བསིར་བུའི་ཤུགས་འཆང་རྟ་བདུན་གྱིས། །རབ་དྲངས་ཟས་གཙང་སྲས་པོ་ཚ་ཟེར་ཅན། །བྱིན་རླབས་འོད་སྟོང་སྐྱེ་རྒུའི་སྙིང་གི་དབུས། །མྱུར་དུ་བཀྱེ་ཞིག་མ་འདྲིས་མཛའ་བའི་བཤེས། །དཔལ་གྱི་མགུར་ནས་བདེན་གཉིས་དམ་པའི་ཆོས། །ནམ་མཁའི་མཐའ་ལྟར་ཚད་བཟུང་དང་བྲལ་བ། །ཚུལ་བཞིན་བསྒྲུབ་པའི་སྐྱེ་འཕགས་དགེ་འདུན་ཏེ། །མཆོག་གསུམ་སྤྱི་དང་བྱེ་བྲག་ལྔ་བདོའི་འགྲོ། །སྒྲིབ་གཉིས་དེས་བསྐྱེད་གཉིད་པོ་ཆེར་འཐིབས་ལས། །ཉེར་སློང་ཐུགས་རྗེའི་གཟི་འབར་བདེ་གཤེགས་བདུན། །བྱང་སེམས་གནོད་སྦྱིན་ཕྱོགས་སྐྱོང་རྒྱལ་ཆེན་བཞིས། །རྟག་ཏུ་འཆར་ནུབ་སྤངས་པའི་སྣང་བ་སྩོལ། །དགེ་བཅུའི་ཡོན་ཏན་ཀུན་ཚང་སྨན་ལྗོངས་ནང༌། །རྡོ་རྗེ་གདན་མཚུངས་ལྷ་ལྡན་གཙུག་ལག་འདབས། །སྔོན་བསགས་མཐུར་གྲུབ་རྣམ་འཇོམས་ཨོ་ཆོག་ཟུང༌། །སངས་རྒྱས་བསྟན་མཇལ་དལ་འབྱོར་རྟེན་རྙེད་ནས། །ཚེ་འདིའི་སྲིད་འབྱོར་ནགས་ཀླུང་སྟུག་པོའི་ལྗོན། །དད་མོས་ཤེས་རབ་རྣོན་པོའི་རལ་གྲི་ཡིས། །ཡོངས་བཅད་ངེས་ལེགས་སྤང་ལྗོངས་ཆས་ཡངས་པོར། །གཏན་མདུན་ཆུ་སྐྱེས་འདབ་བརྒྱ་དེང་བཞད་སྨོན། །རྟེན་གསུམ་བཞེངས་དང་བཀའ་གསང་རབ་བསྒྲགས་ཤིང༌། །དཀོན་ཅོག་བསྙེན་བཀུར་དབུལ་ཕོངས་སྦྱིན་ལ་སོགས། །བྱས་དང་བྱེད་བཞིན་བྱེད་འགྱུར་རྣམ་དཀར་ལས། །མ་(༡༠༤བ) ― GLG021_Page_0826 ―
[མ་དཔེ་གཟིགས་ན་འདིར་གནོན།]
ལུས་གཅིག་ཏུ་བསྡུས་པའི་དགེ་བའི་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །བསྐལ་བརྒྱར་ཞབས་པད་རབ་བརྟན་རྒྱུ་སྦྱོར་བ། །དེང་ནས་རྣམ་མཁྱེན་ཡེ་ཤེས་འཐོབ་མིན་བར། །བརྩེ་བས་རྗེས་བཟུང་ནམ་ཡང་འབྲལ་མེད་ཤོག །ཐུབ་པའི་བསྟན་དར་ཞྭ་སེར་འཛིན་པའི་སྡེའི། །རིང་ལུགས་གོང་འཕེལ་མངའ་འབངས་གཏོགས་ཀུན་གྱི། །མི་མཐུན་དུས་ཀྱི་སྐལ་ངན་ཉེར་ཞི་ཞིང༌། །མཁོ་དགུའི་འབྱོར་པར་རྫོགས་ལྡན་ལྟར་སྤྱོད་ཤོག །ཡང་སྲིད་བརྒྱུད་མར་ལྷ་མིའི་རྟེན་བཟང་ཐོབ། །དམ་ཆོས་སྒོར་ཞུགས་ཐོས་བསམ་སྒོམ་ལ་སོགས། །ཚུལ་བཞིན་ཉམས་སུ་བསྟར་བས་འཁོར་བ་ཡི། །སྡུག་བསྔལ་གསུམ་གྱི་རྩ་བ་དྲུངས་འབྱིན་ཤོག །གྲངས་མེད་བསྐལ་མང་ཡུན་ཚད་མ་གྱུར་འགྲོའི། དུ༔ཁ་མ་བཟོད་གསུང་གསང་རྒྱ་ཆེའི་ནང༌། །ཐེག་པ་ཆེན་པོའི་ཉེ་ལམ་ཆེས་ཟབ་མོས། །རྒྱུད་གྲོལ་སྐུ་བཞིའི་དབང་ཕྱུག་ཉེར་འཐོབ་ཤོག །བྱིན་རླབས་ཉེར་སྩོལ་རྩ་བརྒྱུད་བླ་མ་དང༌། །དངོས་གྲུབ་ཆར་འབེབས་རྒྱལ་སྲས་སློབ་མར་བཅས། །བར་ཆོད་ཀུན་སེལ་མཐུ་ལྡན་ཆོས་སྲུང་གིས། །འདོད་དོན་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པ་འདིའང་ཀ་བརྒྱད་མདོ་པ་ཁྱོ་ཤུགས་ཀྱིས་དམར་སེར་ཅན་ནས་བཟུང་ཁྲག་སྐྱུག་གི་ལོའི་བར་ཟང་ཟིང་གི་བདོག་པ་དངུལ་ཐོག་ཏུ་ཕབ་པ་སྲང་སྟོང་ཕྲག་ཕྱེད་བཞི་ལྷག་བཅས་ཀྱིས་ཇོ་ཤཱཀ་གིས་གཙོས་དཀོན་ཅོག་མཆོད་པ། སེར་འབྲས་དགེ་གསུམ་སོགས་དགེ་འདུན་ལ་བསྙེན་བཀུར་བ། སོ་སྐྱེར་སྦྱིན་གཏོང༌། རྟེན་གསུམ་བཞེངས་པ། རང་གིས་(༡༠༥ན) ― GLG021_Page_0827 ―
[མ་དཔེ་གཟིགས་ན་འདིར་གནོན།]
ཁ་ཏོན་བགྱིས་པས་མཚོན་རྣམ་དཀར་དགེ་ཚོགས་བསམ་གྱིས་མི་ཁྱབ་པ་བསྐྲུན་པར་བརྟེན། སྤྱིར་སངས་རྒྱས་ཀྱི་བསྟན་པ་ཡུན་རིང་དུ་གནས་པ་དང༌། དེ་འཛིན་གྱི་སྐྱེས་བུ་ཞབས་པད་བརྟན་ཅིང་སེམས་ཅན་ལ་བདེ་སྐྱིད་འབྱུང་བ། སྒོས་སུ་ངེད་རང་དང་མཆོད་ཡོན་གྱི་རིང་འཚོ། རྟ་དཔོན་རྣམས་འཇོམས། ཨ་ཆོག །དཔལ་མོ། ཆོག་སྐྱིད་རྣམས་ཀྱི་འདི་ཕྱིའི་ལེགས་ཚོགས་སོགས་བླ་ནས་བླར་འཕེལ་བའི་བསྔོ་སྨོན་གྱི་མཚམས་སྦྱོར། སྨན་བླ་ཚུགས་པའི་གྲྭ་ཚང་རྣམས་དང༌། སྡེ་དགོན་ཆེ་ཕྲ་མང་པོ་ལ་འཛུགས་རྒྱུར་དགོས་ཚུལ་ལྟར་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་གྱིས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་བྷ་ཝནྟུ། །ཟབ་གསལ་ཡེ་ཤེས་རྒྱ་མཚོར་མངའ་འབྱོར་བའི། །འདུས་ཚོགས་བླ་མ་ཡི་དམ་མཁའ་འགྲོ་ཡི། །དགྱེས་སྐོང་བཅུད་འཁྱིལ་ཡོལ་གོ་ཆེས་ཡངས་པ། །ཕུལ་དགེས་མཆོག་ཐུན་དངོས་གྲུབ་ཆར་དུ་སྙིལ། །ཞེས་པའང་བྱིངས་པ་བྱམས་པ་ནོར་བུས་དགེ་སྐོས་འཇོག་ལ་དངུལ་སྲང་བཅོ་ལྔ་ལྷག་བཅས་ཀྱི་པད་སྡེར་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད་པ་བྷ་ཝནྟུ། །སྣོད་བཅུད་བདེ་ལྡན་ཞིང་མགོན་འོད་དཔག་མེད། །ལྔ་ལྡན་ལོངས་སྤྱོད་རྫོགས་སྐུའི་མཛོད་སྤུ་ནས། །ཉེ་བར་འཕྲོས་པའི་འོད་འཕྲེང་སྣང་བ་ཡིས། །མི་བསྲུན་འཆི་བདག་མུན་རུམ་མཐར་སྐྲོད་མཛོད། །སངས་རྒྱས་དེ་གསུང་བྱང་སེམས་ཉན་རང་ཚོགས། །(༡༠༥བ) ― GLG021_Page_0828 ―
[མ་དཔེ་གཟིགས་ན་འདིར་གནོན།]
སླུ་མེད་སྐྱབས་གནས་དཀོན་ཅོག་རྣམ་གསུམ་དང༌། །ཁྱད་པར་བླ་མ་ཡི་དམ་མཁའ་འགྲོར་བཅས། །ལྷག་བསམ་དག་པའི་རེ་འབྲས་དེང་སྨིན་སྩོལ། །ངག་དབང་དབྱངས་ཅན་བློ་གྲོས་ཟབ་གཏེར་གྱིས། །སྐལ་བཟང་ཡོངས་ལ་རྒྱ་ཆེའི་གསུང་རབ་དོན། །དྭངས་མཆོར་ཟླ་གཟུགས་ཇི་བཞིན་མངོན་སུམ་དུ། །སྟོན་མཛད་རིགས་ཀུན་བདག་པོར་གསོལ་བ་འདེབས། །ཕྱི་ནང་རིག་གནས་འཆད་ལ་འཇིགས་མེད་ཀྱི། །སྤོབས་མཐོའི་གོ་བཙན་རྣམ་དཔྱོད་ཆ་རྫོགས་ཉ། །ཐུབ་བསྟན་ཆུ་ཀླུང་ལང་ཚོར་དར་བའི་སྡེ། །ཚངས་སྲས་བཞད་པའི་རྡོ་རྗེ་ཞབས་བརྟན་ཤོག །མེས་པོའི་ལུང་གིས་མང་བཀུར་ཁྲི་ཡངས་པོར། །དབང་བསྐུར་ནོར་འཛིན་སྐྱོང་བའི་མི་བདག་རྗེའི། །སྐུ་ཚེ་སྟོབས་འབྱོར་མངའ་ཐང་མཚན་ཇུས་སོགས། །དབྱར་གྱི་ཆུ་གཏེར་ལྟ་བུར་གུང་འཕྱུར་ཤོག །འཇིག་རྟེན་སྤྱི་དང་བྱེ་བྲག་གངས་ལྗོངས་འདིར། །ཕྱོགས་དུས་ཀུན་ཏུ་བདེ་སྐྱིད་དཔལ་སྤྱད་རྗེས། །རིང་པོར་མི་ཐོགས་ཐམས་ཅད་མཁྱེན་པ་ཡི། །གོ་འཕང་མྱུར་ཐོབ་བཤེས་གཉེན་མཛད་པར་ཤོག །རྒྱུ་འབྲས་མི་བསླུ་རྟེན་ཅིང་འབྲེལ་འབྱུང་ཆོས། །བདེ་བར་གཤེགས་པས་ཉེ་བར་གསུངས་པའི་བཀའ། །ཚད་མའི་དཔང་གྱུར་སྨོན་ལམ་བཏབ་དོན་བཞིན། །ལྷུན་གྱིས་གྲུབ་པར་མཆོག་གསུམ་མཐུས་བྱིན་རློབས། །ཞེས་པ་འདིའང་གཉའ་ནང་ཤོ་པ་ཇོ་རྫོང་པ་དང་སྤྱི་ཁང་དཀོན་ཅོག །བསྟན་འཛིན་བཟང་པོ་སྤུན། རྒན་པོ་དང་བཅས་པས་རིང་འཚོར་བྱང་གཏེར་ཐུགས་སྒྲུབ་ལས་བྱང་འབྲིང་པོར་བརྟེན་ནས་ཚེས་བཅུ་(༡༠༦ན) ― GLG021_Page_0829 ―
[མ་དཔེ་གཟིགས་ན་འདིར་གནོན།]
བཙུགས་སྐབས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །རྣམ་དཀར་ལེགས་བྱས་འབུམ་ཕྲག་ཀུན་གསལ་བུ་མོའི་འགྲམ་པར་རྟག་ཏུ་ཡང༌། །ཉེར་རྒྱུ་མཚན་དང་དཔེ་བྱད་ཀུ་མུད་དར་བབ་རྗེས་ཆགས་རབ་བཀྲའི་གཟུགས། །སྐལ་བཟང་གདུལ་བྱའི་ཡིད་ཀྱི་དྭངས་ཤེལ་ངོས་ཤར་ངོ་མཚར་ཕུལ་བྱུང་གར། །བསྒྱུར་ལ་ལྷར་བཅས་འགྲོ་བ་ཡོངས་ཀྱིས་མི་ཕྱེད་དད་པས་ཡོངས་སུ་འདུད། །ཤིན་ཏུ་བགྲང་དཀའི་བསྐལ་པར་རླབས་ཆེན་ཚོགས་བསགས་བདེན་དཔང་དུ། །སྐད་ཅིག་དེ་ཉིད་ས་ཡི་ལྷ་མོ་མངོན་སུམ་རབ་འཐོན་ནས། །ལེགས་སོའི་དྲང་ཚིག་མེ་ཏོག་ཆར་གྱིས་ཕྱོགས་ཀུན་དོག་པོ་རུ། །བཀང་སྟེ་བུ་རམ་ཤིང་པ་ཟས་གཙང་སྲས་མཆོག་སྐྱེ་རྒུའི་གཉེན། །རྒྱལ་རྣམས་སྤང་རྟོགས་མཉམ་པར་མཚུངས་ཀྱང་ལྷག་པའི་ཐུགས། །གཞན་གྱིས་འགྲན་ཟླའི་དཔེར་བྱ་སྙེམས་པ་དང་བྲལ་བའི། །དམ་བཅའི་ཁུར་ཆེན་སྙིགས་མ་ལྔ་ཡི་བགོ་སྐལ་དུ། །ཐོབ་ལ་རྣམ་འདྲེན་སྲས་སློབ་ཀུན་གྱིས་མགྲིན་གཅིག་བསྔགས། །རིག་གནས་བཅུ་ཕྲག་སྨྲ་བར་སྤོབས་དགེ་བས། །མ་ག་དྷ་སོགས་འཕགས་པའི་ཡུལ་གྲུ་ཆེའི། །ཐུབ་གསུང་དགོངས་འགྲེལ་དང་བཅས་བསིལ་ལྡན་ལྗོངས། །བསྒྱུར་མཛད་ལོ་པཎ་ཚོགས་ཀུན་ཕྱག་གི་གནས། །དུས་གསུམ་རྒྱལ་བས་ཤེས་བྱ་གང་མཁྱེན་གནང༌། །ཇི་བཞིན་མངོན་གཟིགས་རྗེ་བཙུན་ཙོང་ཁ་པ། །འཇམ་མགོན་མི་སྲིད་ཟློས་གར་བརྩེ་(༡༠༦བ) ― GLG021_Page_0830 ―
[མ་དཔེ་གཟིགས་ན་འདིར་གནོན།]
བ་ལ། །ངེས་རྙེད་ཆོས་རྗེས་དད་པ་ཅིས་མི་ཐོབ། །བདེ་བར་གཤེགས་པའི་གསང་གསུམ་བཀོད་པ་ཆེའི། །མཛད་འཕྲིན་སྨྲ་བསམ་བརྗོད་པའི་ཡུལ་འདས་ནང༌། །ཁྱད་འཕགས་མགུར་བུམ་ལས་དྲངས་བདེན་གཉིས་ཆོས། །ཡོངས་འཁྱིལ་བུས་འཕྲེང་ཕ་མཐའ་སུ་ཡིས་རྙེད། །བྱེ་བྲག་ཆོས་རྣམས་དོན་དམ་གདོད་མ་ནས། །བདེན་སྟོང་ཀུན་རྫོབ་མི་འགལ་འཇོག་ནུས་ཀྱི། །མཉམ་གཞག་རྗེས་ཐོབ་ཟུང་དུ་འབྲེལ་བྱེད་པའི། །ལམ་མཆོག་ཉེ་བར་སྟོན་པ་ཤེར་ཕྱིན་བཀའ། །རྒྱས་འབྲིང་བསྡུས་པའི་གསུང་རབ་ཡིད་བཞིན་དབང༌། །འདྲི་ཀློག་འཆད་ཉན་འཆང་སོགས་སྲི་ཞུ་ཡི། །ལེགས་བྱས་ཕུང་པོ་ཆེར་སྤུངས་རིན་ཅེན་རི། །རིངས་བརྒྱུས་དབུལ་བྲལ་དགའ་སྐྱིད་ཕན་བདེའི་དཔྱིད། །རབ་འཇམ་ཤོག་བུ་མན་ཤེལ་ལྟར་དྭངས་ངོགས། །བརྡ་དག་གཟུགས་མཛེས་འོད་བཀྲག་བརྗིད་ཆགས་པའི། །བཅུ་ཕྲག་སུམ་སྐོར་གླེགས་བམ་ཚར་དངར་བ། །སྟོན་ཟླ་ལྟ་བུའི་ལྷག་བསམ་མཆོག་གིས་བསྒྲུབས། །སངས་རྒྱས་ཀུན་དངོས་བློ་བཟང་གྲགས་པ་ཡི། །བསྟན་པའི་གདུགས་དཀར་འཛིན་པར་སྔོན་གོམས་མཐུས། །བསོད་ནམས་ཚར་སྤུངས་སྦྱིན་པའི་སྒོ་འཕར་བརྒྱ། །ཕྱེ་སྟེ་དབུལ་ཕོངས་མིང་ཡང་མི་གྲགས་ཤོག །བྱས་འབྲས་རཱ་མ་ཎ་ཡི་མདའ་བོ་ཆེས། །སྒྲིབ་གཉིས་དེ་རྒྱུ་ལངྒའི་མགྲིན་བཅད་དེ། །བཤེས་གཉེན་སི་ཏུའི་མཛའ་ན་མོར་བརྟེན་ནས། །རྣམ་མཁྱེན་རྩེད་འཇོར་འགྲོ་བས་གར་བསྒྱུར་ཤོག །འབངས་འཁོར་ཉ་ཕྱིས་རྒྱ་ཁྱོན་རབ་ཡངས་པོར། །ལེགས་ཚོགས་(༡༠༧ན) ― GLG021_Page_0831 ―
[མ་དཔེ་གཟིགས་ན་འདིར་གནོན།]
མུ་ཐི་ལ་ཡིས་ཆེར་གཏམས་པ། །རིན་ཐང་དང་བྲལ་དགའ་བདེ་ཟག་མེད་ཀྱི། །སྐྱིད་པའི་དཔལ་འབྱོར་སུམ་རྩེན་རྗེས་བསྙེག་ཤོག །དཀོན་ཅོག་རིན་ཅེན་བྱིན་རླབས་མི་ཟད་རྒྱུན། །དམིགས་བྱའི་ལུས་ངག་ཡིད་ལ་ཕོག་པའི་མོད། །སྡིག་སྒྲིབ་བཅས་རང་ཁ་ན་མ་ཐོ་བའི། །མི་དགེའི་དྲི་ཚོགས་རྩ་བ་དྲུངས་འབྱིན་ཤོག །རྣམ་དག་བསམ་པས་ཚུལ་འདིར་སྒོ་གསུམ་གྱིས། །བཟོ་གཡོས་བྲན་དང་ཡང་བྲན་ཉེར་བཀོལ་སོགས། །རྡུལ་ཕྲན་ཙམ་གྱིས་མཐའ་བརྟེན་བྱེད་པོ་རུ། །གཏོགས་རྣམས་བརྒྱ་བྱིན་སྐལ་མཉམ་དེང་ཐོབ་ཤོག །འཇིག་རྟེན་གསུམ་དང་ཁྱད་པར་གངས་ཅན་ལྗོངས། །མི་མཐུན་དུས་ངན་བཙལ་ཀྱང་མི་རྙེད་པར། །རྫོགས་ལྡན་གསར་བའི་དགའ་སྟོན་རྨད་བྱུང་རོས། །སྐྱེ་རྒུའི་རོ་འཛིན་རྟག་ཏུ་སིམ་ནུས་ཤོག །སྔོན་གོམས་ཤིང་རྟ་བཅུ་ཡི་ཤུགས་དྲག་གིས། །འགོག་མེད་བསྟན་ཉི་མཁར་ཤར་ཨ་ཏི་ཤའི། །རིང་ལུགས་ལེགས་འཛིན་ཀུན་མཁྱེན་བཙོང་ཁ་པའི། །བཤད་སྒྲུབ་བསྟན་དང་སྐྱེ་བར་མཇལ་བར་ཤོག །སྲིད་པར་ཐོག་མ་མེད་ནས་ད་ལྟའི་བར། །ངལ་དུབ་དང་བྲལ་བྱམས་པའི་མ་གྱུར་འགྲོ། །ལྷ་མིའི་རྟེན་བཟང་ལེགས་ཐོབ་མི་རིང་བར། །ཐར་པའི་གྲོང་ཁྱེར་ཆེན་པོར་མྱུར་འཇུག་ཤོག །རེ་འབྲས་ཇི་བཞིན་འགྲུབ་པའི་དཔང་པོ་རུ། །དུས་གསུམ་རྒྱལ་བ་སྲས་བཅས་ཉེར་དགོངས་ལ། །སྨོན་ལམ་གང་བཏག་མངོན་སུམ་ལྷུན་གྲུབ་པར། །དྲུག་ཅུའི་གསུང་དབྱངས་རྣ་བའི་དཔྱིད་དུ་སྒྲོགས། །སླུ་མེད་(༡༠༧བ) ― GLG021_Page_0832 ―
[མ་དཔེ་གཟིགས་ན་འདིར་གནོན།]
མཆོག་གསུམ་ཐུགས་རྗེའི་བྱིན་རླབས་དང༌། །ཆོས་ཉིད་མི་འགྱུར་གདོད་ནས་རྣམ་པར་དག །ཆོས་ཅན་རྒྱུ་འབྲས་འཆར་བའི་རྟེན་འབྲེལ་སླད། །ཀུན་མཁྱེན་གོ་འཕང་ཐོབ་པའི་རྒྱུར་བསྔོའོ། །ཞེས་སྡེ་པ་ཟུར་པ་སྣེའུ་སྡོང་བློ་བཟང་སྦྱིན་པ་དུས་ཀྱི་ཆོས་ཉིད་དུ་གྱུར་པའི་དུས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་ཆེད་འདི་གནས་བྱང་བུ་བཞུ་བའི་རྟགས་གསལ་ལྟར། འོ་སྐོལ་གྱི་སྟོན་པ་མཉམ་མེད་ཐུབ་པའི་དབང་པོས་ཆོས་ཕུང་བརྒྱད་ཁྲི་བཞི་སྟོང་གསུངས་པའི་ནང་ནས་ཆེས་ཆེར་རྨད་དུ་བྱུང་བའི་སྙིང་པོ་བཀའ་བར་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ། ཉི་ཁྲི། ཁྲི་བརྒྱད་སྟོང་པ། ཤེས་རབ་ཁྲི་པ། བརྒྱད་སྟོང་པ། ཁྲི་སྣ་ཚོགས་ཏེ་པོད་ལོངས་ཉི་ཤུ་རྩ་བདུན་བཞེངས་པར་བསྔོ་སྨོན་གྱི་མཚམས་སྦྱོར་ཞིག་དར་རྒྱས་བཀྲ་ཤིས་སོགས་ལས་བྱེད་པ་རྣམས་ཀྱིས་དགོས་ཚུལ་ལྟར་ཟ་ཧོར་གྱི་བནྡེ་སྡེ་སྣོད་གསུམ་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་ཡ་ཐཱ་སརྦ་པྲ་ཎི་དྷ་ན་ནི་ར་བྷོ་ག་སྱཤྲེ་ཡ་བྷ་བནྟུ། །ཟླ་བ་དུ་མ་སྤུངས་པའི་འོད་ཀྱིས་ཀྱང༌། །ཆ་ཙམ་བསྒྲུན་མིན་རིན་ཅེན་གཉིས་པ་ལས། །ཉེར་གྲུབ་རྩ་གསུམ་ཐུགས་དམ་གཉན་སྐོང་སྣོད། །ཕུལ་དགེས་ཁ་སྦྱོར་བདུན་ལྡན་སར་བགྲོད་ཤོག །ཅེས་པའང་ངག་དབང་ནམ་མཁས་དགེ་སྐོས་ཀྱི་ལས་སྣེའི་འཇོག་ལ་སྲང་ཕྱེད་བཅོ་ལྔའི་པད་སྡེར་ཕུལ་བའི་ཚེ་ཟ་ཧོར་བནྡེས་བཀོད་པའི་ཛ་ཡ། །(༡༠༨ན) ― GLG021_Page_0833 ―
[མ་དཔེ་གཟིགས་ན་འདིར་གནོན།]
སུ ག །ཏ ཙ བི ཤྭ ནཱ ཀ ས མ མ གཱ ཏི ནཱི པྲ ཏཱི ཛྙཱ། །ཨ བ ཡ བ ས རྦ པཱུ རྞ ན བི ས རྦ ཎཱ བ ཀ ཪྵ། རྒྱལ་ཀུན་མཁའ་མཉམ་འགྲོ་འདྲེན་དམ་བཅའ་ཡི། །ཆ་ཤས་ཡོངས་རྫོགས་འཕེལ་འགྲིབ་རབ་སྤངས་པ། །པྲ བྷ ནི དྷི བྷཱ བ ཤཱ ནྟྱ ཙ བི པ ཤྩི མོ ད ཡ སྱ། །ཀ རུ ཎ ཙ ལོ ཙ ནཱ ཡ ཏ ཙ དཱི རྒྷ རེ ཏྲ ད ཪྵི། སྣང་མཛོད་སྲིད་ཞིར་འཆར་ནུབ་དང་བྲལ་བའི། །ཐུགས་རྗེའི་སྤྱན་དཀྱུས་རིང་པོ་དེང་འདིར་གཟིགས། །སྐུ་རྟེན་འདིས་མཚོན་རྣམ་དཀར་བགྱིས་སོ་ཅོག །ཉེར་བསྡུས་བསྟན་འགྲོའི་ལེགས་བྱས་རྒྱ་མཚོའི་ཞིང༌། །སླར་སྤེལ་ཆེད་དུ་མགོན་ཁྱོད་སྲིད་པ་འདིར། །འགྱུར་མེད་འདོད་དོན་ཡིད་བཞིན་སྐོང་བར་ཤོག །དགའ་བའི་དཔལ་ལྡན་ཕོ་བྲང་ལུགས་ཟུང་བསྟན། །ཕུལ་བྱུང་སྡེ་བཞི་དྲུག་ཅུའི་གཡས་འཁྱིལ་དུང༌། །བློ་བཟང་སྙན་གྲགས་སྲིད་པའི་རྩེ་མོའི་བར། །ཆེར་སྒྲོགས་གཏན་གྱི་མདུན་མ་ལྷུན་གྲུབ་ཤོག །ཅེས་པའང་མི་དབང་སངས་རྒྱས་རྒྱ་མཚོས་ངེད་རང་རིང་པོར་འཚོ་ཐབས་སུ་གཙོ་བོ་(༡༠༨བ) ― GLG021_Page_0834 ―
[མ་དཔེ་གཟིགས་ན་འདིར་གནོན།]
སངས་རྒྱས་སུམ་ཅུ་སོ་ལྔ། སྨན་བླ་བདེ་གཤེགས་བརྒྱད། གདུགས་དཀར་གྱི་བཅུ་བདུན། ཕྱོགས་བཅུ་མུན་སེལ་དང་ཁྱེའུ་ཟླ་བའི་བཅུ་རེ། དོན་གྲུབ་སྟེ་བརྒྱད་ཅུ་གྱ་གཅིག་སྟེང་པཎ་ཆེན་དགེ་འདུན་གྲུབ་ཀྱི་སྐྱེས་རབས། ཨྱོན། ཇོ་བོ་རྗེ། རྒྱལ་བ་བཙོང་ཁ་པ། འཁོར་སངས་རྒྱས་སྟོང༌། དཔང་སྐོང་ཕྱག་རྒྱ་པའི་སངས་རྒྱས། བྱམས་འཇམ་དབྱངས། །སྦྱིན་བདག །ཆོས་སྐྱོང་དམག་ཟོར་མ་དང་བཅས་པའི་སྐུ་རྒྱུར་གོས་ཏ་ཧུང་འཇམ་སང་ཡུག་ཉེར་བདུན་ལ་ཁ་བཞིབརྒྱ་དང་གྱ་དྲུག །གྲང་གསེར་ཞོ་བཞི་བརྒྱ་དང་ལྔ། ཚོན་འོས་འཚམ་སོང་བའི་ལར་རྒྱའི་འགོ་པ་འབོག་བཙུན་བློ་གྲོས་རྒྱལ་མཚན། །དོ་དམ་པ་གྲོང་མོ་ཆུང་བ་དང་མཐར་རྒྱས་པ། རི་མོ་བ་ལྷ་ས་འཇམ་དབྱངས་དོན་གྲུབ་སོགས་ཉེར་བདུན། གོང་གཤམ་ཁ་ཐི་སྔོན་པོ་ཁ་བཞི་བརྒྱ་གོ་དྲུག །དམར་པོ་ཁ་གྱ་ལྔ། སེར་པོ་ཁ་གྱ་གཅིག །ཧོར་གོས་ལུ་ཧང་ཁ་ཞེ་གཉིས། འཆོར་ལིང་འདྲེས་པ་ཁ་ཆིག་སྟོང་བདུན་བརྒྱ་ཉི་ཤུ། ཞལ་ཁེབས་སྨན་རྙིང་ཁ་ཆིག་སྟོང་ཉིས་བརྒྱ་བཅུ་གཅིག །ཧོར་དར་དམར་པོ་ཁ་ཆིག་སྟོང་དྲུག་བརྒྱ་གྱ་གསུམ། རླུང་གནོན་ཧོར་དར་སྔོན་པོ་ཁ་ལྔ་བརྒྱ་རེ་བདུན། འདོགས་ཐག་ལིང་མེན་འདྲེས་པ་ཁ་སུམ་བརྒྱ་སོ་ལྔ། སྐུད་རྒྱུར་གོས་སྣ་ཚོགས་ཁ་བརྒྱ་ཞེ་བཞི། ཟུར་བཀག་ལ་སག་རི་ཞེ་བརྒྱད། །འདྲ་བའི་འགོ་པ་བྱ་སྒོ་བ་བློ་བཟང་དབང་ཕྱུག །དོ་དམ་ཚོགས་རྒྱལ་གླིང་པ། དབུ་ཆེན་ར་རྩེ་ཤག་པ་བསོད་ནམས། དབུ་ཆུང་རྒྱལ་རྩེ་དཔལ་འབྱོར་དང་ཆོས་དབང༌། བྱིངས་བཅུ་བདུན། སྔོ་བཟོ་དབུ་ཆེན་གུ་རུ། དབུ་ཆུང་ཨ་ལྐུག་དང་ཕག་སྐྱག །བྱིངས་ཉེར་ལྔ། ཏོག་(༡༠༩ན) ― GLG021_Page_0835 ―
[མ་དཔེ་གཟིགས་ན་འདིར་གནོན།]
ལ་དངུལ་སྲང་ཕྱེད་སུམ་བརྒྱ། ཏི་ཚ་ཞོ་དྲུག །གསེར་འདམ་སྲང་ཉི་ཤུ། དངུལ་ཆུ་སྲང་བཅུ་བཅས་བཟོ་བོའི་འགོ་པ་རྒྱས་བསྐོར་བ་དང་གཞིས་ཀ་བ། བལ་པོ་ཨིན་དུ་ཤིང་དང་དྷ་ན་ཤིང༌། བྱིངས་ཉེར་བརྒྱད། རྒྱ་བོད་ཀྱི་ཡིག་རིགས་འདྲི་མི་རྒྱལ་རྩེ་འཇམ་དབྱངས་དབང་པོ་སོགས་ཀྱིས་བྱས་ཏེ་གྲུབ་པའི་ཚེ་རྒྱབ་ཡིག་སྨོན་ལམ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་བྷ་བནྟུ། །ངག་གི་དབང་ཕྱུག་འཇམ་མགོན་བློ་གྲོས་གཏེར། །སྐལ་བཟང་གདུལ་བྱ་རྒྱ་མཚོའི་རེ་སྐོང་མཆོག །ཟ་ཧོར་ཚངས་སྲས་བཞད་པའི་རྡོ་རྗེ་ཆེ། །སྐྱབས་གནས་ཀུན་འདུས་ངོ་བོར་གསོལ་བ་འདེབས། །སྙོམས་པར་འཇུག་པ་གསང་གསུམ་མི་ཟད་པའི། །བྱིན་རླབས་ཉིན་བྱེད་དངོས་བརྒྱ་རབ་འབར་བ། །འཇིག་རྟེན་སྤྱི་དང་བྱེ་བྲག་རྒྱ་ཧོར་སོགས། །ལུས་ཅན་བསོད་ནམས་མཁའ་ལ་རྟག་འཆར་ཤོག །དེང་ནས་བཟུང་སྟེ་ཡང་སྲིད་ཐམས་ཅད་དུ། །ཐེག་པ་མཆོག་གི་བཤེས་གཉེན་ལེགས་མཛད་དེ། །སྲིད་དང་ཞི་བའི་ཡོན་ཏན་མ་ལུས་པ། །དཀར་ཆའི་ཟླ་བ་ལྟ་བུར་འཕེལ་བར་ཤོག །ཅེས་པ་འདིའང་ཐོར་གོད་ཐུར་ཁེན་ཐའི་ཇིའི་དཔོན་མོ་ཚེ་སྐྱིད་ཀྱི་ངོར་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །སྭ་སྟི་པྲ་ཛཱ་བྷྱ༔ དངུལ་དཀར་ཟླ་ཞུན་རྗེས་འགྲོའི་ཀོང་ཕུལ་དགེས། །ཤེས་རབ་ཡེ་ཤེས་སྒྲོན་མེའི་གཟི་བྱིན་གྱིས། །ཡིད་ཅན་ལས་ཉོན་མུན་པ་གཏན་བཅོམས་ཏེ། །རྫོགས་པའི་(༡༠༩བ) ― GLG021_Page_0836 ―
[མ་དཔེ་གཟིགས་ན་འདིར་གནོན།]
སངས་རྒྱས་མངོན་སུམ་སྐལ་ཐོབ་ཤོག །ཅེས་ལྷ་ས་བ་ངག་དབང་ཐུབ་བསྟན་གྱིས་སྨོན་ལམ་ཆེན་མོར་སྔགས་རམས་པ་བགྱིས་སྐབས་གྲྭ་ཚང་དུ་སྲང་ཉེར་གསུམ་གྱི་ཀོང་ཕུལ་བའི་ཁ་བྱང་དགོས་ཚུལ་བཞིན་ཟ་ཧོར་བནྡེས་བྲིས། །ན ནྟ ཙཱ བྷ ཡཾ ཤ ཏོ མ ན པྲ ཎཱི དྷ རེ ན ན ནྡ བྷཱ བ ནེ ཥུ སཱ དྷུ མཱ རྒ ལ ཀྵ དྷ རྨ དྷཱ ར མཽ ལི ཤ སྟྲ ཀེ ན ཤི རཱ བ ནྡྷ ། འཇིགས་མེད་དགའ་བ་བརྒྱ་ཕྲག་དང་ལྡན་ཡིད་སྨོན་ཙམ་གྱིས་དགའ་བའི་གནས། །ལེགས་ལམ་འབུམ་སྡེའི་དམ་ཆོས་འཛིན་པར་སྟོན་པས་ཅོད་པན་དབུར་བཅིངས་ཏེ། །བྱ ཉྫ ལ ཀྵ ཎཱ པྲ ཏཱི ཀུ ལོ པ ད ཏྟ ཀཱ ཡ ཏེ ཛ བྷཱ བ དཱི པྟ གཽསྭ རོ བ ས ནྟ ལེ ཁ ཀ རྞ ཀཱ རུ ཎཻ རྦི ཏཱ པ མཻ ཏྲི ནཱ ཐ། རྒྱལ་སྲིད་ཉེར་གཏད་མི་མཐུན་མེད་པའི་མཚན་དཔེའི་གཟི་བྱིན་འབར་བའི་སྐུ། །གསུང་དབྱངས་ལེགས་བྲིས་རྣ་བའི་དཔྱིད་གྱུར་ཐུགས་རྗེས་གདུང་སེལ་མི་ཕམ་མགོན། །ལུས་ཅན་བརྒྱུ་དང་མི་བརྒྱུར་བཅས་ཀུན་རྣམ་མཁྱེན་ཡེ་ཤེས་སར། །འཁྲིད་པའི་དམ་བཅའ་དཔལ་བེའི་ངོས་གསལ་རི་མོར་རབ་(༡༡༠ན) ― GLG021_Page_0837 ―
[མ་དཔེ་གཟིགས་ན་འདིར་གནོན།]
བཀྲ་བ། །ནམ་ཡང་ཟུབས་མིན་ལྷོད་མེད་བརྩོན་པས་ཐར་པའི་ཁང་བཟང་ཆེར། །མྱུར་པར་འདྲེན་ཕྱིར་མ་ཡེངས་སྤྱན་དཀྱུས་རིང་པོ་རྟག་ཏུ་གཟིགས། །ཁྱོད་ཀྱི་མཚན་ཙམ་སྐྱེ་རྒུའི་རྣ་བའི་ཁུང་བུ་རུ། །ཐོས་པས་འཁོར་བའི་འཇིགས་སྐྲག་བྲལ་བ་བསམ་ཡས་ན། །མཐོང་བས་སྲིད་ཞིའི་ཕ་མཐའ་མི་གནས་རྣམ་གྲོལ་བའི། །བླ་མེད་བྱང་ཆུབ་ཆེན་པོའི་ས་མཆོག་མི་རིང་ཉེ། །ཆོས་ཀུན་ཡེ་ནས་དག་ཀྱང་སྤྲོ་བསྡུ་ཡི། །ཁྱབ་བདག་རྡོ་རྗེ་འཆང་དབང་ཐོད་ཕྲེང་སྐུ། །རྫོགས་པས་དམ་པ་རིགས་བརྒྱ་ལ་སོགས་པ། །གཞན་ནས་རྙེད་མིན་བདེ་གཤེགས་ཀུན་འདུས་གཙོ། །གཅིག་པུ་ཉིད་ལས་དུ་མའི་གར་ཇི་བཞིན། །གདུལ་བྱའི་སྣང་ངོར་མཚན་བརྒྱད་སྐུའི་བཀོད་པ། །སྣ་ཚོགས་ཚོན་དང་ཉེ་བའི་མན་ཤེལ་ལྟར། །མ་འདྲེས་སོ་སོར་ཤར་འདི་རྨད་དུ་བྱུང༌། །པུར་རྒྱལ་བསྟན་པའི་རིན་ཅེན་བ་གམ་ངོས། །ལྟ་ལོག་ལངྐའི་གཟུགས་བརྙན་ཤར་བའི་མོད། །མཁྱེན་རབ་མདའ་ཡིས་སྙིང་ཕུག་རཱ་མ་ཎའི། །ཁེངས་པའི་རི་བསྙིལ་དཔལ་ལྡན་ཨ་ཏི་ཤ །བློ་གྲོས་བཟང་པོས་སྐལ་ལྡན་ཡོངས་སྨིན་པར། །ཟླ་མེད་གྲགས་པའི་དབྱངས་སྙན་སྲིད་རྩེའི་ཁོངས། །ཆེས་ཆེར་རབ་ལྡིར་ཐོས་འཛིན་རྣ་བའི་རྒྱན། །ཁམས་གསུམ་འགྲོ་བའི་འདྲེན་པ་ཙོང་ཁ་པ། །སངས་རྒྱས་གཉིས་པ་བློ་བཟང་གྲགས་པ་ཡི། །དམ་པའི་ཆོས་ཀྱི་བདུད་རྩིས་ལེགས་མྱོས་ཤིང༌། །རིང་ལུགས་རྒྱལ་མཚན་མཐོན་པོར་ཉེར་བཏེག་པའི། །གྲིབ་མར་ལོངས་སྤྱོད་དཔྱིད་ཀྱི་ཐིག་ལེ་དངོམ། །སྐྱེ་བར་འཇམ་དཔལ་དབྱངས་ཀྱིས་རྗེས་བཟུང་བས། །ཀུན་ལ་དགའ་(༡༡༠བ) ― GLG021_Page_0838 ―
[མ་དཔེ་གཟིགས་ན་འདིར་གནོན།]
བ་སྟེར་བའི་སྟོན་པ་མཆོག །ཕུལ་བྱུང་ཚོགས་གཉིས་ལྷུན་གྲུབ་བཤེས་གཉེན་ཆེ། །མི་འབྲལ་བརྩེ་བས་རྗེས་སུ་འཛིན་ལ་བྲེལ། །ལྷ་དང་མི་ཡི་འབྱོར་བའི་ཡིད་བཞིན་ནོར། །ཕྱུར་བུར་འཁྱིལ་བའི་ཡོལ་གོ་ཆེར་ཡངས་ནང༌། །མགྲིན་བཙིར་མི་མཛད་འདོད་དགུའི་ལོངས་སྤྱོད་ཆར། །འབེབས་མཁས་གནོད་སྦྱིན་ཨཱཪྻ་ཛམྦྷ་ལ། །མ་ཚང་མེད་པའི་དགེ་བཅུ་ཕུན་ཚོགས་ཀྱིས། །མངལ་ཁུར་ཉེར་དུད་གཡོ་རུའི་ནོར་འཛིན་གཞིར། །ལུགས་གཉིས་ཁ་ལོ་བསྒྱུར་བ་དཔའ་མཛངས་དང༌། །བློ་མིག་ཟུང་འབྲེལ་སྙིང་སྟོབས་ཆེ་འདི་རྨད། །འདིའི་ཆེད་སྒོ་གསུམ་འབད་པར་གཏོགས་ཀུན་དང༌། །ཁྱད་པར་ཡོན་གྱི་བདག་པོར་བཅས་པ་རྣམས། །དེང་ནས་བཟུང་སྟེ་རྣམ་མཁྱེན་མ་ཐོབ་བར། །འཆི་མེད་དབང་པོའི་མངའ་ཐང་ལ་སྤྱོད་ཤོག །ཡོངས་རྫོགས་སྡེ་བཞིའི་དཔལ་ལྡན་སྒོ་འཕར་བརྒྱ། །འབྱེད་པ་བརྒྱད་ཁྲིའི་ཚེ་ལོར་འཛམ་གླིང་འདིར། །མགོན་ཁྱོད་ཆོས་འཁོར་བསྐོར་བའི་ཐོག་མ་རུ། །གདུལ་བྱར་སྐྱེས་ནས་བྱང་ཆེན་མྱུར་ཐོབ་ཤོག །དགེ་བ་མཁའ་མཉམ་སེམས་ཅན་ལ་བསྔོས་པའི། །ལེགས་བྱས་ཆུ་ཡི་ཟེགས་མའི་ཐིགས་འཕྲེང་རྒྱུན། །རྫོགས་པའི་སངས་རྒྱས་ཀླུང་ཆེན་དང་འདྲེས་ཏེ། །མི་འཛད་ནམ་མཁའི་མཛོད་ལ་མངའ་བརྙེས་ཤོག །དཀོན་ཅོག་རིན་ཅེན་རྣམ་གསུམ་བྱིན་རླབས་དང༌། །རྒྱུ་འབྲས་རྟེན་ཅིང་འབྲེལ་འབྱུང་སླུ་མེད་ཀྱི། །བདེན་སྟོབས་མཐུ་ཡིས་ས་འོག་ས་ཡི་སྟེང༌། །ས་བླར་ཕུན་ཚོགས་དགའ་སྟོན་ཁྱབ་པར་ཤོག །ཅེས་ལྷ་ཆེན་ཚངས་པ་དུང་གི་ཐོར་ཚུགས་ཅན་གྱིས་ས་སྐྱོང་ལྷ་རྒྱལ་རབ་(༡༡༡ན) ― GLG021_Page_0839 ―
[མ་དཔེ་གཟིགས་ན་འདིར་གནོན།]
བརྟན་གྱི་སྒོས་རིམ་ལ་ཟན་གཡང་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དུ་རྒྱལ་བ་བྱམས་པ་མགོན་པོར་སྤྲུལ་པའི་གུ་རུ་མཚན་བརྒྱད་ཀྱིས་བསྐོར་བ་སྤྲེ་ཟླར་གྲུབ་པ་བཞེངས་ཤིག་པའི་བསྐུལ་མ་མཛད་པ་བཞིན་གོང་སྟེང་འདོད་ལྷར་སློབ་དཔོན་པདྨ་སཾ་བྷ་ཝ། དཔལ་མར་མེ་མཛད། ཆོས་ཀྱི་རྒྱལ་པོ་བཙོང་ཁ་པ། པཎ་ཆེན་བློ་བཟང་ཆོས་ཀྱི་རྒྱལ་མཚན། ངེད་རང་གི་འདྲ་འབག །ཛཾ་བྷ་ལ་སེར་པོ། ཚེ་རིང་ལྗོངས་དང་བཅས་པ་རི་མོ་བ་དབུ་མཛད་ཕུན་ཚོགས། རོགས་བྱེད་ཆོས་གྲགས། གོས་བཟོ་བ་ཚེ་རིང༌། བདུད་འདུལ། བཞི་འཛོམ་གསུམ་གྱིས་གཙོས་བྱིངས་སུམ་ཅུས་བྱས་ཏེ་བཞེངས་པའི་ཚེ་ས་སྐྱོང་རྡོ་རྗེ་རྣམ་རྒྱལ་གྱིས་སྨོན་ལམ་བསྡུས་པ་ཞིག་དགོས་ཚུལ་ལྟར་ཟ་ཧོར་གྱི་སྔགས་རྒན་ཟིལ་གནོན་བཞད་པ་རྩལ་གྱིས་ཤིང་གླང་ཧོར་ཟླ་གཉིས་པའི་དམར་ཕྱོགས་དཔའ་བོ་མཁའ་འགྲོ་འདུ་བའི་ཉེར་ལྔར་འཕྲལ་དུ་བྲིས་པའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གིས་བགྱིས་པ་སིདྡྷིརསྟུ།། ། |
