བླ་མ་མཆོད་པའི་ཆོ་གའི་སྙིང་པོ་བྱིན་རླབས་སྤྲིན་ཕུང་།
༄༅། །བླ་མ་མཆོད་པའི་ཆོ་གའི་སྙིང་པོ་བྱིན་རླབས་སྤྲིནཕུང་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་ཤྲཱི་ཡེ། ཡེ་ཤེས་རལ་གྲིས་སྲིད་རྩའི་འཁྲི་ཤིང་གཅོད། །བྱམས་པའི་ཆར་གྱིས་རྣམ་གྲོལ་མྱུ་གུ་བསྐྱེད། །འབྲེལ་ཚད་དོན་ལྡན་མ་ཧཱ་པཎྜི་ཏ། །འཇམ་དབྱངས་དགྱེས་པའི་རྡོ་རྗེར་ཕྱག་བགྱིའོ། །གང་ཉིད་རིགས་ཀུན་བདག་པོར་ངེས་རྙེད་ནས། །རྩེ་གཅིག་གསོལ་བ་འདེབས་པའི་སྐལ་བཟང་ལ། །གྲུབ་གཉིས་འདོད་པ་འཇོ་བ་དངོས་པོའི་གཤིས། །དེ་ཚུལ་ཉུང་ངུའི་ངག་གིས་མདོ་ཙམ་འཆད། །དེ་ཡང་བླ་མ་སངས་རྒྱས་ཆོས་ཀྱི་སྐུར་ཐག་ཆོད་པའི་སྐལ་བ་མཆོག་དང་ལྡན་པའི་གང་ཟག་རྣམས་ཀྱིས་དོན་དུ་གཉེར་བྱའི་སྙིང་པོ་ནི་ལམ་ཟབ་མོ་བླ་མ་མཆོད་པ་ཉིད་ཡིན་ལ། དེའི་ཚུལ་ཉམས་སུ་ལེན་པར་འདོད་པས་གནས་དབེན་པར་བླ་མའི་སྐུ་འབག་སོགས་རྟེན་ཁྱད་པར་ཅན་གྱི་སྤྱན་སྔར་ཅི་འབྱོར་བའི་མཆོད་པ་བཤམས་ནས། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་ལ། ཐོག་མར་སྐྱབས་སུ་འགྲོ་བ་ནི། ཨཱཿཀ་དག་ལྷུན་གྲུབ་ཟུང་འབྲེལ་རིག་པའི་གཤིས། །ཡེ་ནས་བཅིངས་གྲོལ་མེད་པ་གཉུག་མའི་གདངས། །མ་བཅོས་བློ་འདས་གདོད་མའི་མགོན་པོ་ལ། །དོན་དམ་རང་ངོ་ཤེས་པས་སྐྱབས་སུ་མཆི། །སེམས་བསྐྱེད་པ་ནི། འོད་གསལ་རང་བཞིན་བདེ་གཤེགས་སྙིང་པོའི་ཁམས། །ཡེ་ནས་གནས་པའི་ཆོས་ཉིད་བྱང་ཆུབ་སེམས། །སྐྱེ་འགག་གནས་དམིགས་འགྲོ་འོང་བྲལ་བའི་ངང་། །ཅོག་བཞག་གཅེར་མཐོང་ངང་དུ་སེམས་བསྐྱེད་དོ། །གནས་ཡོ་བྱིན་རླབས་ནི། འཁོར་འདས་ཆོས་ཀུན་རང་བཞིན་མཉམ་པ་ཉིད། །འོད་གསལ་རང་མདངས་གྲུབ་པའི་གཞལ་མེད་ཁང་། །ཅིར་སྣང་འདོད་ཡོན་འཛད་མེད་རོལ་པའི་རྒྱན། །ཀུན་བཟང་མཆོད་པའི་སྤྲིན་གྱི་བླ་རེས་མཛེས། །རྟེན་བསྐྱེད་པ་ནི། ཀ་དག་སྤྲོས་པ་བྲལ་པའི་མཁའ་དབྱིངས་སུ། །ལྷུན་གྲུབ་དྭངས་མ་ལྔ་ལྡན་འཇའ་ཟེར་སྦུབས། །རིག་རྩལ་མ་འགགས་གང་འདུལ་འཆར་བའི་སྐུ། །གདོད་མའི་མགོན་པོ་འཇམ་དཔལ་དགྱེས་པ་ནི། །དཀར་གསལ་ཁྲོ་འཛུམ་པཎྜི་ཏ་ཡི་ཆས། །ཕྱག་གཉིས་མཉམ་བཞག་ལྟ་སྟངས་མཁའ་ལ་གཟིགས། །གཡས་གཡོན་ཐབས་ཤེས་རྡོར་དྲིལ་གླེགས་རལ་མཛེས། །རྡོ་རྗེ་སྐྱིལ་ཀྲུང་པད་ཟླའི་སྟེང་ན་བཞུགས། །སྐུ་ལ་གདན་གསུམ་དཀྱིལ་འཁོར་ཡོངས་སུ་རྫོགས། །མཐའ་སྐོར་དགོངས་བརྡའ་སྙན་བརྒྱུད་བླ་མ་སོགས། །རབ་འབྱམས་རྩ་གསུམ་ཆོས་སྲུང་སྤྲིན་ལྟར་འཁྲིགས། །དྲན་པས་བདེ་སྟེར་གཟི་བྱིན་ལྷམ་མེར་གསལ། །སྤྱན་འདྲེན་པ་ནི། དོན་དམ་དབྱིངས་སུ་འཁོར་འདས་རོ་མཉམ་ཕྱིར། །གཤེགས་བཞུགས་སྤྲོས་པའི་མཚན་མ་མ་དམིགས་ཀྱང་། །ཀུན་རྫོབ་སྒྱུ་མ་མཁན་གྱིས་སྤྲུལ་བསྒྱུར་བཞིན། །དབྱིངས་ནས་འདིར་གཤེགས་རྟེན་དང་གཉིས་མེད་གྱུར། །དེ་ནས་ཡན་ལག་བདུན་པ་འབུལ་བ་ནི། གང་གི་དྲིན་གྱིས་ལྷན་སྐྱེས་བདེ་བ་ཆེའི། །ཡེ་ཤེས་ཟབ་མོ་ནམ་མཁའི་གཟུགས་ཅན་མཆོག །སྐད་ཅིག་ཉིད་ལ་འཆར་བར་མཛད་པ་ཡི། །རྡོ་རྗེ་ཅན་ཞབས་པདྨོར་ཕྱག་བགྱིའོ། །གང་མཚན་དྲན་དང་ཐོས་པ་ཙམ་གྱིས་ཀྱང་། །སྲིད་ཞིའི་རྒུད་པ་མ་ལུས་རྒྱུན་གཅོད་ཅིང་། །ཕན་བདེའི་དངོས་པོ་མཐའ་དག་སྦྱིན་མཛད་པ། །ཡིད་བཞིན་གཏེར་འཆང་ཁྱེད་ལ་ཕྱག་བགྱིའོ། །རབ་འབྱམས་རྒྱལ་བ་ཀུན་གྱི་ཡེ་ཤེས་སྐུ། །ལུང་རྟོགས་ཆོས་ཕུང་རྒྱ་མཚོ་འབྱུང་བའི་དཔྱིད། །བསྟན་འཛིན་དགེ་འདུན་བྱེ་བའི་གཙུག་གི་རྒྱན། །སྐྱབས་ཀུན་འདུས་ཞལ་མཆོག་ལ་ཕྱག་བགྱིའོ། །བསོད་ནམས་བསམ་མི་ཁྱབ་པའི་སྤྲིན་ཆེན་ལས། །ལེགས་འོང་ཕུལ་བྱུང་སྲིད་ཞིའི་མཆོད་པའི་རྫས། །མ་ཚང་མེད་པར་བློ་ཡིས་ཡོངས་བླངས་ཏེ། །ཡེ་ཤེས་སྐུ་ཅན་འཁོར་ལོའི་དབང་ཕྱུག་མཆོད། །རྣམ་དག་སོ་ཐར་ཁྲིམས་ཀྱི་མཎྜ་ལར། །གཞན་ཕན་བྱང་ཆུབ་སེམས་ཀྱི་ཚོམ་བུ་བཀོད། །རིམ་གཉིས་རྣལ་འབྱོར་ཟབ་མོའི་ཏོག་འབར་བས། །ཁྱབ་བདག་དཔལ་ལྡན་བླ་མ་མཉེས་པར་བགྱི། །དྲི་མེད་ལྷག་བསམ་གསེར་གྱི་ས་གཞི་ལ། །ཐོས་བསམ་སྒོམ་པའི་རི་གླིང་བཀོད་ལེགས་ཤིང་། །འཆད་རྩོད་རྩོམ་པའི་ཉི་ཟླའི་རྣ་ཆ་ཅན། །ཕུལ་བྱུང་འབྱོར་པའི་ཁྱད་པར་བྱེ་བས་མཆོད། །དུས་འདི་ནས་བཟུང་ཇི་སྲིད་སྙིང་པོའི་བར། །བདག་གི་སྒོ་གསུམ་ལེགས་ཚོགས་ཅི་མཆིས་པ། །འཇམ་མགོན་དགྱེས་པའི་རོལ་མོར་འབུལ་ལགས་ན། །རྣམ་ཐར་ཟབ་མོ་མཉམ་པ་ཉིད་དུ་སྨོན། །བདག་གཞན་འཁོར་ཚེ་ཐོག་མ་མེད་པ་ནས། །མི་ཤེས་བག་མེད་ཉོན་མོངས་དབང་གྱུར་པས། །འོས་མིན་ལས་ལ་ཞུགས་པའི་ནོངས་པ་ཀུན། །སྙིང་ནས་བཤགས་སོ་དག་ཚངས་ཁྲུས་ཆབ་སྩོལ། །གང་དག་ཕྱོགས་བཅུའི་བདེ་བཤེགས་སྲས་བཅས་དང་། །ཉན་རང་འཕགས་པ་སློབ་དང་མི་སློབ་དང་། །མ་ལུས་འགྲོ་བའི་ལེགསསྤྱད་ཅི་མཆིས་པ། །དེ་དག་ཀུན་ལ་རྗེས་སུ་ཡི་རང་ངོ། །མ་ལུས་འགྲོ་ཀུན་བདེ་བཤེགས་སྙིང་པོ་ཅན། །རང་བཞིན་དག་པའི་ཆོས་ཉིད་རྟག་བཞུགས་པས། །ཀུན་ཀྱང་ཐེག་པ་ཆེན་པོའི་རིགས་ཅན་ཕྱིར། །ཟབ་རྒྱས་ཆོས་འཁོར་རྟག་པར་བསྐོར་བར་གསོལ། །དོན་དམ་སྐྱེ་འཇིག་མཚན་མ་ཀུན་བྲལ་ཡང་། །གདུལ་བྱའི་སྐལ་བར་འཚམ་པ་གཟུགས་སྐུའི་སྤྲིན། །ལོག་རྟོག་དབང་གིས་ནམ་ཡང་སྒྲིབ་མིན་པར། །སྲིད་མཐའི་བར་དུ་རྡོ་རྗེ་ལྟར་བརྟན་གསོལ། །འདིས་མཚོན་དུས་གསུམ་བྱས་བསགས་རྣམ་དཀར་རྒྱུན། །འོད་གསལ་ཆོས་དབྱིངས་ཆེན་པོར་བསྔོ་བགྱིད་ན། །སྲས་བཅས་རྒྱལ་བའི་དགོངས་མཚོར་རོ་གཅིག་འདྲེས། །ཀུན་ཀྱང་རྡོ་རྗེ་འཛིན་པའི་ས་ཐོབ་ཤོག །ཅེས་ཚོགས་བསགས། དེ་ནས་གསོལ་བ་གདབ་པ་ནི། རྒྱལ་ཀུན་ཡེ་ཤེས་གཅིག་བསྡུས་འཇམ་པའི་དབྱངས། །གང་འདུལ་འགྲོ་ངོར་དགེ་བའི་བཤེས་སྤྲུལ་ནས། །དྲི་མེད་ཐུབ་བསྟན་ནོར་བུའི་རྒྱལ་མཚན་བསྒྲེངས། །མཚུངས་མེད་དཔལ་ལྡན་བླ་མར་གསོལ་བ་འདེབས། །རྣམ་ཐར་རྒྱ་མཚོ་ཞིང་ཁམས་ཀུན་ཏུ་བྲེས། །མཛད་པ་རྒྱ་མཚོ་བསྟན་འགྲོའི་བླ་ན་འཕགས། །ཡོན་ཏན་རྒྱ་མཚོ་བསམ་མི་ཁྱབ་པའི་གཏེར། །མི་ཕམ་རྒྱ་མཚོའི་ཞབས་ལ༴བྱམས་འཇམ་བརྒྱུད་པའི་བཀའ་སྲོལ་གཅིག་ཏུ་དྲིལ། །རྟོན་པ་བཞི་ལྡན་ངེས་དོན་རྒྱལ་སྲིད་སྐྱོང་། །ལུང་རིགས་གད་རྒྱངས་སྲིད་ཞིའི་བླ་ན་མཐོ། །སྨྲ་བའི་སེང་ཆེན་མཆོག་ལ༴བཅུ་ཕྲག་རིགས་ལམ་རིན་ཆེན་རྒྱན་གྱིས་སྒེག །ནང་རྒྱུད་སྡེ་གསུམ་ནོར་བུའི་ཏོག་གིས་བརླིང་། །དོན་བརྒྱུད་དགོངས་པའི་རྒྱལ་སར་དབང་འབྱོར་པའི། །ཆོས་ཀྱི་རྒྱལ་པོ་མཆོག་ལ༴མདོར་ན་མཁྱེན་བརྩེ་ནུས་པའི་ཡེ་ཤེས་ཆེ། །རིགས་གསུམ་སེམས་དཔའི་སྐུ་གསུངཐུགས་རྡོ་རྗེར། །མི་ཕྱེད་རོ་མཉམ་རྣམ་ཐར་བསམ་མི་ཁྱབ། །ཟླ་བྲལ་དཔལ་ལྡན་བླ་མར་གསོལ་བ་འདེབས། །དེ་ལྟར་རྩེ་གཅིག་གུས་པས་གསོལ་འདེབས་ན། །ཡེ་ཤེས་གཟིགས་པས་མྱུར་བར་དགོངས་མཛོད་ལ། །དུས་འདི་ནས་བཟུང་བྱང་ཆུབ་སྙིང་པོའི་བར། །འབྲལ་མེད་རྗེས་སུ་ཟུངས་ཤིག་དྲིན་ཆེན་རྗེ། །རྙེད་དཀའི་དལ་འབྱོར་ལན་གཅིག་ཐོབ་ཟིན་ཀྱང་། །མི་རྟག་འཆི་བདག་ཕོ་ཉའི་མཆེ་བར་གནས། །རྟག་འཛིན་གདོན་གྱི་ཞགས་པས་ཉམས་ཉེས་པས། །ངེས་འབྱུང་རྒྱུད་ལ་སྐྱེད་ཅིག༴སྐབས་རེར་སྐྱེས་པའི་དགེ་བློ་ཉམ་ཆུང་ཞིང་། །གཞན་དབང་སྡིག་གྲོགས་ངན་པའི་འཆིང་བས་ཟིན། །ཅི་བྱེད་ཐམས་ཅད་ཚེ་འདིའི་ལག་ཆར་སོང་། །བདག་བློ་ཆོས་ལ་དྲོངས་ཤིག༴འདུལ་ཁྲིམས་ནོས་ཀྱང་ངེས་འབྱུང་རྩ་བ་བྲལ། །སེམས་སྡོམ་ཞུས་ཀྱང་གཞན་ཕན་ལྷག་བསམ་དབེན། །དབང་བཞི་ནོས་ཀྱང་རིམ་གཉིས་སྒོམ་མ་ནུས། །ཆོས་དྲེད་འདི་ལས་སྐྱོབས་ཤིག༴ཐོས་བསམ་བྱས་ཀྱང་དཀའ་བའི་གནད་མ་ཁྲོལ། །སྒོམ་པར་རློམ་ཡང་གནས་ལུགས་དོན་མ་མཇལ། །བྱ་བྱེད་མང་ལ་གྲུབ་འབྲས་གཅིག་ཀྱང་མེད། །ཀྱེ་མ་ཐུགས་རྗེས་གཟིགས་ཤིག་དྲིན་ཆེན་རྗེ། །བདག་ནི་འདི་ནས་བྱངཆུབ་མ་ཐོབ་བར། །མགོན་པོ་ཁྱོད་ལས་སྐྱབས་གཞན་མ་མཆིས་པས། །ཡེ་ཤེས་ཆེན་པོས་ཉེ་བར་དགོངས་མཛོད་ལ། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །ངེས་འབྱུང་འཛིན་མའི་གཞི་ལས་ཉེར་འཁྲུངས་པའི། །ཚུལ་ཁྲིམས་རྣམ་པར་དག་པའི་པདྨ་དཀར། །གཞན་ཕན་བྱང་སེམས་བསྡུ་བཞིའི་ཀེ་སར་མཛེས། །རིམ་གཉིས་སྦྲང་རྩིས་གཏམ་པར་བྱིན་གྱིས་རློབས། །མང་དུ་ཐོས་པའི་ལུང་རིགས་རྒྱ་ཆེ་ཞིང་། །བསམ་པའི་ཤེས་རབ་ཡིད་ཆེས་གཏིང་ནས་རྙེད། །སྒོམ་བྱུང་ཉམས་མྱོང་རྟོགས་པ་ཀློང་ནས་རྡོལ། །བསྟན་ལ་བྱ་བ་ནུས་པར་བྱིན་གྱིས་རློབས། །ཕྱོགས་རིས་མེད་པའི་དག་པའི་བློ་མིག་ཐོབ། །ངོས་ལྐོག་མེད་པའི་སྲུང་སྡོམ་རྣམ་པར་དག །ཁ་ཞེ་མེད་པའི་མོས་གུས་གཏིང་ནས་འབྱོངས། །ཆོས་དང་སེམས་རྒྱུད་འདྲེས་པར་བྱིན་གྱིས་རློབས། །རྣམ་གཡེང་མེད་པའི་སྒྲུབ་པའི་རྒྱལ་མཚན་ཚུགས། །རེ་དོགས་མེད་པའི་དགོངས་པའི་རྩལ་ཆེན་རྫོགས། །ཆོས་བརྒྱད་མེད་པའི་དོན་གཉིས་གཏེར་ཁ་འབྱེད། །འབྲེལ་ཚད་དོན་དང་ལྡན་པར་བྱིན་གྱིས་རློབས། །དོན་བརྒྱུད་དགོངས་པའི་བྱིན་རླབས་སྙིང་ལ་འཕོས། །སྣང་གྲགས་རྟོག་གསུམ་ལྷ་སྔགས་ཆོས་སྐུར་ཤར། །དག་མཉམ་ཆེན་པོའི་དགོངས་པའི་གདེང་ཚད་རྙེད། །གདོད་མའི་བཙན་ས་ཟིན་པར་བྱིན་གྱིས་རློབས། །ཀ་དག་ལྟ་བ་ཡིད་དཔྱོད་ཤུབ་ནས་དོན། །ལྷུན་གྲུབ་སྒོམ་པ་དབྱིངས་རིག་ཚད་ལ་ཕེབས། །རང་གྲོལསྤྱོད་པ་སྤང་བླང་མཚན་མ་ཞིག །གསང་མཆོག་འབྲས་བུ་ཚེ་འདིར་མངོན་བྱེད་ཤོག །ཅེས་རྩེ་གཅིག་ཏུ་གསོལ་བ་གདབ། སྐབས་འདིར་ཚོགས་མཆོད་བྱ་བར་སྤྲོ་ན། དམ་ཚིག་ཏུ་འོས་པའི་རྫས་རྣམས་འདུ་བྱས་ལ། ཀ་པཱ་ལ་རུ་འདོད་ཡོན་དམ་ཚིག་རྫས། །ཁ་དོག་དྲི་རོ་ཕུན་སུམ་ཚོགས་པའི་བཅུད། །ག་ཎ་ཙ་ཀྲའི་ལོངས་སྤྱོད་རྒྱ་ཆེན་པོས། །ང་ཡི་སྐྱབས་གཅིག་འཁོར་ལོའི་དབང་ཕྱུག་མཆོད། །ཅ་ག་ལྷ་རྫས་མཛེས་པའི་མེ་ཏོག་སོགས། །ཆ་ཤས་ཡོན་ཏན་ཀུན་རྫོགས་འདོད་ཡོན་ལྔ། །ཇ་ཆང་ཤ་སོགས་བཟའ་བཏུང་འབྱོར་པའི་རིགས། །ཉ་རྒྱས་ཟླ་ལྟར་ལྷག་བསམ་དག་པས་འབུལ། །ཏ་ཐཱ་ག་ཏའི་བསྟན་སྒོར་ཞུགས་གྱུར་ཀྱང་། །ཐ་མལ་སྐྱེ་བོའི་བསམ་སྤྱོད་དབང་གྱུར་པས། །ད་ལྟའི་དུས་སུ་ཉམས་ཆག་ཉེས་ལྟུང་དྲི། །ན་མར་སྙིང་ནས་བཤགས་སོ་བྱང་གྱུར་ཅིག །པ་སངས་ལྟ་བུར་དཀར་བའི་ཞལ་སྟོན་ལ། །ཕ་རོལ་ཕྱིན་ལམ་གསང་སྔགས་འབྲས་བུའི་ཚུལ། །བ་མཆོག་འཇོ་ལྟར་བདག་བློའི་གདུང་སེལསྩོལ། །མ་དག་འཁྲུལ་རྟོག་མཚན་མ་དབྱིངས་སུ་སྒྲོལ། །ཙཱ་རི་ཏྲ་སོགས་གནས་ཡུལ་རྟག་རྒྱུ་བའི། །ཚ་ངར་མཐུ་ལྡན་ཌཱ་ཀི་བསྟན་སྐྱོང་ཚོགས། །ཛ་གད་ཕུད་ལྷག་གཙང་མ་འདི་བཞེས་ལ། །ཝ་ལེར་དགྱེས་པའི་ཞལ་བཟང་མྱུར་བར་སྟོན། །ཞྭ་མོའི་ཏོག་ལྟར་མཆོག་གསུམ་ལེགས་ཁུར་ཞིང་། །ཟ་མའི་ཡུན་ཙམ་བསྙེལ་སྤངས་གསོལ་འདེབས་ལ། །འ་འུར་གློ་བུར་འབྱུང་པོའི་འཚེ་བ་དང་། །ཡ་མ་ར་ཛའི་ཕོ་ཉའི་འཇུག་པ་ཟློག །ར་བ་བརྒལ་དཀའ་སྲིད་པའི་འགྲོ་བ་རྣམས། །ལ་བུར་སྒྲོལ་བའི་དམ་བཅའི་ཁུར་ཁྱེར་ན། །ཤ་ཤ་རྷ་རའི་དཀྱིལ་འཁོར་གང་བ་བཞིན། །ས་ལམ་ཡོན་ཏན་བླ་ནས་བླར་འཕེལ་མཛོད། །ཧ་སྱ་དགྱེས་པའི་ཉམས་ཀྱིས་སྒེག་བཞིན་དུ། །ཨ་ཧོ་ཚོགས་ཀྱི་འདུ་བར་ལོངས་སྤྱོད་ན། །ཧ་ལ་ལྟ་བུའི་ལོག་འཚོའི་སྒྲིབ་བྱང་ནས། །ཨ་ཏི་དགོངས་པའི་རྩལ་ཆེན་རྫོགས་པར་ཤོག །ཅེས་བརྗོད་ཅིང་ཚིམ་པ་དྲུག་ལྡན་གྱིས་ལོངས་སྤྱོད། སྤྲོ་ན། རྡོ་རྗེའི་གླུ་དང་སྨོན་ལམ་ཀྱང་བྱའོ། །རྗེས་ཡན་ལག་བདུན་པ་འབུལ་བ་ནི། རབ་འབྱམས་དཀྱིལ་འཁོར་རྒྱ་མཚོའི་ཁྱབ་བདག་མཆོག །ཡེ་ཤེས་སྐུ་ཅན་དཔལ་ལྡན་བླ་མ་ལ། །མི་ཕྱེད་སྒོ་གསུམ་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་ཀུན་བཟང་མཆོདསྤྲིན་འབུལ། །ཚེ་རབས་ནས་བསགས་སྡིག་ལྟུང་འགྱོད་པས་བཤགས། །དགེ་ལ་ཡི་རང་ཆོས་འཁོར་བསྐོར་བཞིན་དུ། །བསྐལ་བརྒྱར་བཞུགས་གསོལ་འདིས་མཚོན་དགེ་ཚོགས་རྣམས། །འགྲོ་ཀུན་བླ་མེད་སངས་རྒྱས་ཐོབ་ཕྱིར་བསྔོ། །དབང་ལེན་པ་ནི། སྐྱབས་ཀུན་འདུས་ཞལ་དྲིན་ཆེན་བླ་མ་ལ། །མི་ཕྱེད་སྙིང་ནས་གུས་པས་གསོལ་འདེབས་ན། །ཡེ་ཤེས་ཆེན་པོའི་བྱིན་རླབས་སྙིང་ལ་ཞུགས། །དབང་བསྐུར་སྒྲིབ་སྦྱང་སྨིན་གྲོལ་དངོས་གྲུབ་སྩོལ། །ཞེས་པས་གསོལ་བཏབ་འཁོར་རྣམས་གཙོ་བོར་ཐིམ། །བླ་མའི་སྐུ་ལས་བདུད་རྩིའི་རྒྱུན་བབས་པ། །སྤྱི་བོ་ནས་ཞུགས་ལུས་ཀུན་ལྟེམ་གྱིས་གང་། །དབང་བཞིས་རྒྱུད་སྨིན་སྒྲིབ་བཞིའི་དྲི་མ་བཀྲུས། །ལམ་བཞིའི་སྣོད་རུང་སྐུ་བཞིའི་རྟེན་འབྲེལ་སྒྲིག །མཐར་ནི་དགྱེས་པས་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །བློ་བྲལ་རྫོགས་པ་ཆེན་པོའི་ཀློངདུ་ཨཱཿ། །ཞེས་བརྗོད་ལ་མཉམ་པར་བཞགཐུན་ལས་ལྡང་བ་ན། སྣང་སྟོང་ཟུང་འཇུག་ལྷ་སྐུ་ཕྱག་རྒྱ་ཆེ། །གྲགས་སྟོང་རྗེས་མེད་བརྗོད་བྲལ་སྔགས་ཀྱི་གདངས། །རིག་སྟོང་དབྱེར་མེད་རང་གྲོལ་རྒྱལ་བའི་ཐུགས། །རྡོ་རྗེ་གསུམ་གྱི་རྣལ་འབྱོར་ཨེ་མ་ཧོ། །ཞེས་མོས་ལ་བསྔོ་སྨོན་དང་ཤིས་བརྗོད་ཇི་ལྟར་རིགས་པས་མཐའ་བརྒྱན་པར་བྱའོ། །ཞེས་པའང་རང་ཉིད་ནས་བྲི་འདུན་ཡོད་པའི་ཐོག་ཉེ་ཆར་ནག་ཀྲན་སྨྱུ་གུ་སྤྲུལ་སྐུ་ཆོས་དཔལ་རྒྱ་མཚོའི་གསུང་གིས་བསྐུལ་བའི་ངོར། མགོན་པོ་གང་གི་ཞབས་པད་ལ་སྤྱི་བོས་རེག་པའི་བཙུན་པ་འཇམ་དབྱངས་བློ་གྲོས་རྒྱ་མཚོས་གང་ཤར་ཡུད་ཙམ་ལ་བྲིས་པའི་ཡེ་གེ་པ་ནི། རྣམ་དཔྱོད་དང་ལྡན་པ་འཇམ་དབྱངས་དགེ་ལེགས་ཆོས་འཕེལ་གྱིས་བགྱིས་པ་སྟེ། འདིས་ཀྱང་སྐྱེ་ཀུན་བླ་མ་མཆོག་གིས་རྗེས་སུ་འཛིན་པའི་རྒྱུར་གྱུར་ཅིག། །།