འཕགས་མ་ཡིད་བཞིན་འཁོར་ལོ་ལ་བསྟོད་ཅིང་གསོལ་བ་གདབ་པ་འཆི་མེད་གྲུབ་པའི་བཅུད་ལེན།༄༅། །འཕགས་མ་ཡིད་བཞིན་འཁོར་ལོ་ལ་བསྟོད་ཅིང་གསོལ་བ་གདབ་པ་འཆི་མེད་གྲུབ་པའི་བཅུད་ལེན་ཞེས་བྱ་བ་བཞུགས་སོ།། ན་མ་ཨཱཪྱ་ཏཱ་རཱེ་ཡཻ། སྟོང་ཆེན་དག་པ་གཉིས་ལྡན་ཨེ་དབྱིངས་སུ། །ངེས་དོན་རྒྱལ་ཀུན་བསྐྱེད་པའི་ཡུམ་གཅིག་པུ། །དྲན་པས་གྲུབ་གཉིས་ཡིད་བཞིན་འཇོ་བའི་དཔྱིད། །ཆོས་ཀྱི་འཁོར་ལོའི་དཔལ་དུ་འབྲལ་མེད་མཛོད། ༡ །དངོས་གཅིག་དངོས་པོ་ཀུན་གྱི་དེ་བཞིན་ཉིད། །མཁའ་ཁྱབ་མཁའ་ཡི་རྡོ་རྗེ་གར་མཁན་མས། །རིག་སྟོང་རིག་པའི་དབྱིངས་སུ་འཁོར་འདས་ཆོས། །འཆིང་འདི་འཆིང་བྲལ་རྣམས་ཀྱི་སྤྱོད་ཡུལ་ལགས། ༢ །འབྲལ་མེད་རིག་པའི་ཁྱེའུ་ཆུང་སྐྱོ་གྲོགས་སུ། །སྟོང་དབྱིངས་ལང་ཚོ་བདོ་བའི་སྨིན་ལེགས་མ། །ཟག་མེད་འབྲས་ཆོས་ཉེར་ལྔའི་འཇོ་སྒེག་གིས། །རྟག་ཏུ་རྩེན་ཡང་མ་མཐོང་འགྲོ་འདི་ནོངས། ༣ །དཔལ་མོ་ཁྱོད་ནི་ནམ་མཁའི་རང་བཞིན་ཏེ། །སྤྲོས་པའི་མཚན་དང་ཡེ་ནས་མཛའ་མིན་ཡང་། །སྤྲོས་པ་ཅན་ལ་ཅིར་ཡང་སྤྲོ་ཚུལ་སྟོན། །ཟབ་པའི་ཚུལ་དེ་རྟེན་འབྱུང་ཁྱད་ཆོས་ཉིད། ༤ །ཀུན་རྟོག་པིར་གྱིས་ཁྱོད་སྐུའི་རྣམ་འགྱུར་དཔལ། །དད་པའི་མཁའ་ལ་ཡང་ཡང་འདྲི་བྱེད་ལ། །ཚེ་དཔལ་འབྱོར་སོགས་ལེགས་དགུའི་སྒོ་འཕར་བརྒྱ། །འབྱེད་པའི་གྲགས་དཀར་ཚངས་པའི་འཇིག་རྟེན་བརྒལ། ༥ །ཉེས་ཟད་ཟླ་བ་བཞུས་པའི་ཁུ་བ་ཡིས། །ལན་སྟོང་བྱུགས་པའི་འཆི་མེད་ལྗོན་པའི་ལུས། །ཤེལ་ལྕུག་ཡལ་འདབ་བཀྲ་བའི་ཕྱག་སོར་རྩེར། །པད་དཀར་འགྲོ་ལ་རྗེས་བརྩེས་བཞད་པ་བཞིན། ༦ །ཤེས་བྱའི་ཁོངས་སུ་རྫོགས་སྨིན་ཟུར་མིག་མདའ། །འཁོར་ཡུག་རི་བོའི་སྤོ་ལ་མ་ཤོང་ནས། །ཅུང་ཟད་ལྡེམ་པོའི་ཚུལ་གྱིས་འཁྱོགས་པ་ལ། །ཞལ་གྱི་ཆུ་སྐྱེས་མཚར་བས་འཛུམ་པ་འདྲ། ༧ །ཐབས་ཤེས་འོ་འཛིན་ལྕི་བའི་ལང་ཚོའི་ཁུར། །སྐེད་སྐབས་ཕྲ་བས་འདེགས་པར་མ་བཟོད་ནས། །མཆོག་སྦྱིན་བརྐྱང་བའི་ཟོལ་གྱིས་པད་ཟླའི་ཁྲིར། །ཡོན་པོའི་ཚུལ་དུ་ཅུང་ཟད་འགྱིང་བར་ངེས། ༨ །ལྷ་དབང་མིག་སྟོང་ལྡན་ཡང་ཆ་ཙམ་དུ། །མཐོང་མིན་བྱང་ཆུབ་ཡན་ལག་བདུན་ལྡན་པའི། །འདྲེན་བྱེད་བུང་བ་གཞོན་ནུའི་རྩེ་དགའི་དཔལ། །གདུལ་ཞིང་པདྨོའི་ཚལ་དུ་རྣམ་པར་གཡོ། ༩ །བརྒྱ་དང་བཅུ་གཉིས་མཚན་དཔེའི་ལང་ཚོའི་དཔྱིད། །མཐོང་བས་སྐྱེངས་པའི་བདེ་འབྱུང་གཙུག་གི་རྒྱན། །རྒྱབ་བརྟེན་ཟོལ་གྱིས་ཕག་ཏུ་ཡིབ་པ་ལ། །ཐོད་རྒྱན་མེ་ཏོག་འཕྱ་བས་དགོད་པར་དོགས། ༡༠ །སྲིད་གསུམ་བདག་པོའི་ཟོང་གིས་ཁུག་མིན་པའི། །བརྒྱ་ཕྲག་རིན་པོ་ཆེ་ཡི་རྒྱན་ཕྲེང་དང་། །རིན་བྲལ་ལྷ་གོས་པཉྩ་ལི་ཀའི་དཔལ། །ཕན་ཚུན་འབྱོར་པའི་ཁྱད་པར་འགྲན་པ་བཞིན། ༡༡ །ཏི་སེའི་རི་བོར་ཟག་མེད་ཡོན་ཏན་གྱིས། །མངོན་འཕགས་ཐོར་ཅོག་སྔོན་པའི་ནགས་ཀླུང་རྩེར། །ཚེ་འོད་དཔག་མེད་ཞབས་སེན་འཆར་ཀའི་ཟླས། །སྤུད་ན་མྱུར་མ་ཁྱོད་སྐུའི་སྤུན་ཟླར་འོས། ༡༢ །དུག་ཅན་རྒྱ་མཚོ་བསྲུབས་ལས་ཐོན་མིན་ཞིང་། །གདུག་པ་སྒྲ་གཅན་ཁ་ཡིས་མི་བརྫི་བའི། །བློ་གྲོས་ངན་པ་སྲེག་བྱེད་རི་བོང་འཛིན། །ཨེ་མ་འགྲོ་བསོད་དགེ་བའི་དཔལ་ལས་རྙེད། ༡༣ །བཅུ་ཕྲག་ཟུང་ལ་བསེ་རུས་ལྷག་བྱས་སོགས། །རྣམ་འགྱུར་དཔག་ཡས་འགྲོ་ལ་མངོན་སྟོན་མོད། །ཁྱོད་སྐུའི་རང་བཞིན་དུས་གསུམ་རྒྱལ་བས་ཀྱང་། །གཟིགས་པ་མེད་ན་བདག་གིས་ཅི་ལྟར་བལྟ། ༡༤ །པད་སྐྱེས་གདངས་ཀྱིས་མཚོན་མིན་དབྱངས་གཅིག་ཉིད། །སྒྲ་ཀུན་རྗེས་ཞུགས་ལམ་བདེན་བདུད་རྩིའི་ཆབ། །ས་གསུམ་རྣ་བའི་བཅུད་ལེན་གྲུབ་ལགས་ཀྱང་། །ཁྱོད་ཀྱིས་ཚིག་གཅིག་མ་གསུང་ཨེ་མ་མཚར། ༡༥ །ཇི་སྙེད་ཤེས་བྱར་སྲིད་པའི་གཟུགས་བརྙན་ཀུན། །མཁྱེན་བཟང་མེ་ལོང་ངོགས་སུ་རྟག་འཆར་མོད། །ཇི་ལྟའི་གཟིགས་པས་དེ་བཞིན་ཉིད་ཀློང་དུ། །རྡུལ་ཆ་ཙམ་ཡང་སྣང་བ་མེད་ན་ཅི། ༡༦ །ཆོས་དང་སེམས་ཅན་རང་བཞིན་མ་དམིགས་ཀྱང་། །འཁོར་མཐའ་གཏུགས་པར་སྙིང་རྗེའི་ཞགས་པ་ཡིས། །མི་གཏོང་འཆིང་བའི་ངང་ཚུལ་འདི་གཅིག་པུས། །མེ་ཏོག་མདའ་ཅན་རེ་བ་འབྲས་མེད་བྱས། ༡༧ །དུས་གསུམ་དཔལ་སྟུག་ཡོངས་དང་རབ་མཉམ་པའི། །ཡོན་ཏན་ནོར་བུའི་མཛོད་ཀྱིས་ཕྱུག་ལགས་གྲང་། །ཟག་མེད་དབྱིངས་ལ་སྔར་མེད་གསར་ཐོབ་ཀྱི། །ཁྱད་པར་ཕྲ་མོའང་བདག་གིར་མཛད་པ་མེད། ༡༨ །འཇུག་པ་བརྒྱ་པས་མཚོན་མིན་ཆེས་མྱུར་བའི། །ཕྲིན་ལས་ནོར་བུའི་ཞགས་པས་ས་གསུམ་ཁྱོན། །བརྒྱད་གཉིས་འཇིགས་ལས་སྲུང་སོགས་གྲུབ་གཉིས་དཔལ། །སྦྱིན་དེས་སྐྱབས་གཞན་རེ་བའི་འཆིང་ཐག་ལྷོད། ༡༩ །དེ་ཚུལ་ཤེས་པའི་བསྔགས་བརྗོད་ཏམྦུ་ར། །དད་གསུམ་སོར་མོའི་འཕྲུལ་གྱིས་བརྡུང་ལགས་ན། །ཐུགས་རྗེའི་གློག་ཕྲེང་གཡོ་དང་ཆབས་ཅིག་ཏུ། །དོན་གཉིས་འདོད་དགུའི་ཆར་རྒྱུན་ཕོབས་ཤིག་ཀྱཻ། ༢༠ །མ་དག་གཞན་དབང་ལྔ་ཕུང་གསེར་དགྲའི་གཤིས། །ཡོངས་གྲུབ་གདན་གསུམ་འཁོར་ལོའི་སུ་ཝརྞར། །སྒྱུར་བྱེད་འཆི་མེད་གྲུབ་པའི་བཅུད་ལེན་རྩི། །སློང་བར་བགྱིའོ་སྦྱིན་པའི་ཕྱག་རྐྱོངས་ཤིག ༢༡ །མི་བསྲུན་བརྒྱད་གཉིས་འཇིགས་པ་ཐིག་ལེའི་ལུས། །འཇོམས་བྱེད་མཁའ་འགྲོའི་དབང་ཕྱུག་གཤོག་གྲིབ་ལ། །ལུས་ཅན་ངལ་འཚོ་ཐོབ་པའི་དགའ་སྟོན་གྱིས། །སྙིང་གི་ཟུག་རྔུ་མིང་གི་ལྷག་མར་མཛོད། ༢༢ །རྟོག་མེད་ལྷུན་གྲུབ་ཆེ་ཡོན་མ་ཎི་ཀ །ལེགས་བྱས་རྒྱལ་མཚན་རྩེ་མོར་མཆོད་པའི་མོད། །སྡེ་བཞིའི་གྲུ་ཆར་འཇོ་བའི་ལེགས་བྱས་ཀྱིས། །འཕྲུལ་དགའི་ལོངས་སྤྱོད་བྲིས་པའི་རི་མོར་བྱོས། ༢༣ །སྲིད་དང་ཞི་བའི་ཕུན་ཚོགས་མཐའ་དག་མགྲོན། །མཆོག་བྱིན་བྱ་མ་རྟ་ཡིས་ཉེར་བཀུག་རྒྱུས། །ཆེ་དགུའི་ཡིད་ཀྱི་བརྟན་པ་འཕྲོག་པའི་དཔལ། །བསྟན་དང་བསྟན་འཛིན་མངའ་ཐང་དགུང་དུ་སྤེལ། ༢༤ །ཤེས་བྱར་སྲིད་ཚད་རྣམ་དཔྱོད་ལྟོ་བ་རུ། །ལེགས་བསྐྱིལ་ཟབ་གསང་རྟོགས་པའི་ལུས་སྟོབས་རྒྱས། །མཁས་ཚུལ་བདུད་རྩི་བསྐྱུགས་པས་ཐུབ་བསྟན་མཚོ། །འཕེལ་བྱེད་དྲང་སྲོང་མཆོག་ཏུ་བདག་བསྒྱུར་ཅིག ༢༥ །འཁོར་མཐར་འགྲ ན་བཟོད་གཞན་ཕན་དམ་བཅའི་གོ །མཁའ་གཟུགས་གྲུབ་མིན་དེ་སྲིད་མ་རྨས་པར། །ཐབས་མཁས་འཇུག་པས་ལུས་པ་མེད་པའི་འགྲོ། །རྣམ་མཁྱེན་རྒྱལ་ཐབས་སྦྱིན་ནུས་མཐུ་དཔལ་སྩོལ། ༢༦ །མདོར་ན་འདི་ནས་བྱང་ཆུབ་སྙིང་པོའི་བར། །ཁྱོད་ཞབས་བདུད་རྩིའི་འབྱུང་གནས་སྤྱིར་ཐོབ་རྒྱུས། །འཇིགས་ཚོགས་སྙིང་གི་གདུང་བ་ཡོངས་བཅིལ་ནས། །དོན་གཉིས་ཀུ་མུད་བཞད་པའི་དགའ་སྟོན་སྩོལ། ༢༧ །ཅེས་འཕགས་མ་ཡིད་བཞིན་འཁོར་ལོ་ལ་བསྟོད་ཅིང་གསོལ་བ་བཏབ་པའི་ཚིགས་སུ་བཅད་པ་འདིའང་རྒྱལ་བའི་སྲས་ཀྱི་མིང་གིས་བསྙད་པ་གཞན་ཕན་ཆོས་ཀྱི་བློ་གྲོས་ཀྱིས་བསྟན་གཉིས་དར་རྒྱས་གླིང་གི་རང་ཤག་འཆི་མེད་འོད་སྣང་དུ་ཤར་མར་བྲིས་པ་འགྲོ་ཀུན་འཆི་བདག་གི་གཡུལ་ལས་རྒྱལ་བའི་རྒྱུར་གྱུར་ཅིག |