འཕགས་མ་ཡིད་བཞིན་འཁོར་ལོ་ལ་བསྟོད་ཅིང་གསོལ་བ་འདེབས་པ་འཆི་མེད་ལྗོན་ཤིང་།༄༅། །འཕགས་མ་ཡིད་བཞིན་འཁོར་ལོ་ལ་བསྟོད་ཅིང་གསོལ་བ་འདེབས་པ་འཆི་མེད་ལྗོན་ཤིང་། ན་མོ་གུ་རུ་ཨཱཪྱ་ཏཱ་རཱ་ཡཻ། དུས་གསུམ་རྒྱལ་བ་ཐམས་ཅད་བསྐྱེད་མཛད་ཡུམ། །ངེས་དོན་སྤྲོས་བྲལ་ཤེས་རབ་ཕར་ཕྱིན་ཉིད། །རྣམ་རོལ་མ་འགགས་གང་འདུལ་ཕྱག་རྒྱའི་གར། །ཡོངས་ཤར་འཕགས་མ་ཡིད་བཞིན་འཁོར་ལོ་འདུད། །ཟླ་གཞོན་བྱེ་བས་མཚོན་མིན་མཚན་དཔེའི་གར། །ཟུང་བཞིའི་ན་ཚོད་མཆོག་ཏུ་སྒེག་པའི་ཉམས། །ལྷ་ཡི་ཆ་ལུགས་ལྷ་ལས་ཁྱད་འཕགས་ཕུལ། །གང་གིས་དྲན་ལ་དོན་གཉིས་འདོད་འཇོར་བྱེར། །སྒྲ་དབྱངས་རྒྱ་མཚོས་འཁྱུད་པ་ནཱ་དའི་སྒྲ། །བརྟན་གཡོ་སྲིད་ཞིའི་དཔལ་ཀུན་སྡུད་པའི་འཕྲུལ། །གང་འདུལ་སྔགས་སུ་སྣང་བ་ཏཱ་རེའི་དབྱངས། །གང་གིས་སྒྲོགས་ལ་རིང་འཚོའི་བཅུད་ལེན་སྦྱིན། །བསམ་གྱིས་མི་ཁྱབ་ཡེ་ཤེས་ཡངས་པའི་མཁའ། །ཚད་མེད་བརྩེ་ཆེན་ཆུ་འཛིན་བླ་རེས་མཛེས། །འཇིགས་ལས་ཡོངས་སྐྱོབ་ཕན་བདེའི་ཆར་འབེབས་པ། །གང་གིས་དྲན་ལ་འཕོ་མེད་ལྷན་སྐྱེས་བསྐྱེད། །བྲལ་ཐོབ་སྨིན་པའི་ཡོན་ཏན་བྱེ་བའི་གཏེར། །ཉི་མཁའ་བཞིན་དུ་གདོད་ནས་འབྲལ་མེད་པ། །ཇི་བཞིན་མངོན་གྱུར་མཆོག་ཏུ་དག་པའི་ཁམས། །གང་ལ་སྤྲོ་རྣམས་ཟག་མེད་འབྱོར་བས་ཕྱུག །འབད་རྩོལ་རྣམ་རྟོག་གཡོ་བས་བསླད་མིན་ཀྱང་། །དུས་ལས་ཡོལ་མེད་ཕྲིན་ལས་རྒྱ་མཚོའི་རླབས། །ཆོས་དབྱིངས་དང་མཉམ་ལྷུན་གྲུབ་རྒྱུན་མི་འཆད། །གང་ལ་དད་ཀུན་བརྒྱད་གཉིས་འཇིགས་ལས་རྒྱལ། །སྣང་བྱེད་རྒྱུ་སྐར་ཁྲོད་ན་ཉིན་བྱེད་དང་། །རྐང་འཐུང་ཕལ་ལས་ཡོངས་འདུའི་ལྗོན་བཟང་བཞིན། །མཆོག་སྦྱིན་ཀུན་གྱི་ནང་ན་ༀ་མཛད་མ། །ཁྱོད་མཚུངས་འགའ་ཡང་མ་འཚལ་བདག་དགའ་འོ། །དེ་སླད་གང་གི་ཞབས་ཀྱི་ཆུ་སྐྱེས་དྲུང་། །བདེ་བར་ངལ་འཚོ་འདོད་པས་དད་པའི་རླབས། །རྣམ་པར་བསྐྱོད་པའི་ངང་ཚུལ་འདི་ལགས་ན། །འཕགས་མ་དགྱེས་པའི་སྤྱན་རས་བཙའ་བར་མཛོད། །ཡིད་བཞིན་ནོར་མཆོག་ཐོབ་པའི་སྐྱེ་བོ་བཞིན། །བདག་ཅག་ཁྱེད་ལ་བརྟེན་པའི་སྐལ་བཟང་རྣམས། །ནམ་ཡང་འཇིགས་དང་རྒུད་པ་གནས་མིན་ཕྱིར། །ཐུགས་རྗེའི་གྲིབ་བསིལ་རྟག་པར་ཡོལ་མེད་མཛོད། །ངེས་པར་འབྱུང་བའི་ཚུལ་ཁྲིམས་རྣམ་པར་དག །བྱང་ཆུབ་སེམས་འབྱོངས་ཐོས་བསམ་བྱ་བ་འཕེལ། །རྩེ་གཅིག་བསྒོམས་པས་གཉུག་མའི་གཏན་སྲིད་ཟིན། །བདུད་བཞིའི་འཇིགས་པ་ཀུན་ལས་དབུགས་འབྱིན་མཛོད། །སྤྲོས་བྲལ་ལྟ་བས་གཟུང་འཛིན་འཁྲུལ་པ་ཞིག །དམིགས་མེད་སྙིང་རྗེས་གཞན་ཕན་སྒོ་བརྒྱ་འབྱེད། །རྩོལ་མེད་ཕྲིན་ལས་གདུལ་བྱའི་ཁམས་ལ་འཇུག །དོན་གཉིས་པདྨོ་མཆོག་ཏུ་བཞད་པར་མཛོད། །མི་ཤིགས་སྲོག་གི་ཀ་བ་ལོ་བརྒྱར་བརྟན། །གཟུངས་སྤོབས་བློ་གྲོས་བྱེ་བའི་སྣང་བ་རྒྱས། །རྩོད་འཆད་རྩོམ་སོགས་རྣམ་དཀར་ཕྲིན་ལས་ཀྱིས། །རྒྱལ་བསྟན་སྲིད་མཐར་འཛིན་ནུས་བྱིན་རླབས་སྩོལ། །གསལ་དག་བརྟན་གསུམ་འཛོམས་པའི་རྣལ་འབྱོར་མཆོག །ཏིང་འཛིན་རླུང་གིས་བསྐུལ་བའི་བཟླས་བརྗོད་མེས། །ཀུན་རྟོག་འཁྲུལ་སེམས་བུད་ཤིང་ཀུན་བསྲེགས་ནས། །ཡེ་ཤེས་རྡོ་རྗེའི་ཚེ་མཆོག་དེང་སྩོལ་ཅིག །ལུས་ལ་རྡོ་རྗེའི་སྐུ་ཡི་བྱིན་ཆེན་ཕོབས། །ངག་ལ་ཚངས་དབྱངས་གསུང་གི་བདེན་ཚིག་སྒྲུབས། །ཡིད་ལ་མཁྱེན་གཉིས་ཡེ་ཤེས་རབ་བཞུགས་ནས། །མཆོག་དང་སྐལ་བ་མཉམ་པར་མཛད་དུ་གསོལ། །གཞན་ཡང་རིས་མེད་བསྟན་འཛིན་སྐྱེས་བུ་རྣམས། །བསྐལ་བརྒྱར་ཞབས་བརྟན་བཤད་སྒྲུབ་ཕྲིན་ལས་རྒྱས། །འགྲོ་ཀུན་བདེ་སྐྱིད་ཚེ་ཆོས་འབྱོར་པ་འཕེལ། །ཀུན་ཀྱང་རྣམ་མཁྱེན་གོ་འཕང་མྱུར་ཐོབ་མཛོད། །བླ་མ་ལྷག་པའི་ལྷ་མོའི་བདེན་བྱིན་དང་། །བདག་ཅག་དད་མོས་ལྷག་བསམ་དགེ་བའི་མཐུས། །ཇི་ལྟར་གསོལ་བཏབ་སྨོན་པའི་འབྲས་བཟང་ཀུན། །འགོག་མེད་མྱུར་དུ་སྣང་བའི་རྒྱུར་གྱུར་ཅིག །བཀྲ་ཤིས་གང་ཞིག་སྲས་བཅས་རྒྱལ་རྣམས་ཀྱི། །བདེན་ཚིག་ཤིས་པའི་མེ་ཏོག་མནྡ་རས། །དོན་གཉིས་ལྷུན་གྲུབ་རྟག་པ་དམ་པའི་དཔལ། །ཕྱོགས་དུས་འཇིག་རྟེན་ཀུན་ན་བདེ་ལེགས་ཤོག །ཅེས་པའང་རྔ་ཆེན་ཆུ་ཁྱི་གསར་དུ་འཆར་བའི་འཕེལ་ཕྱོགས་ཀྱི་རྒྱལ་བ་གཉིས་པར་མདོ་ཁམས་སེང་གེ་གནམ་རྫོང་རང་བྱུང་འཕགས་པའི་སྐུའི་རྣམ་པ་ཅན་གྱི་བྱང་ཆུབ་ཤིང་གི་ནགས་ཁྲོད་ན་མངོན་པར་མཛེས་པའི་ཡང་དབེན་བདེ་མཆོག་བཀྲ་ཤིས་དགེ་འཕེལ་དུ་ཐོག་མར་བསྙེན་བསྒྲུབ་ལ་ཞུགས་པའི་སྐབས་སུ་སྔགས་བཙུན་ཨོ་རྒྱན་ཐུགས་མཆོག་རྡོ་རྗེ་ཚེ་དབང་གྲུབ་པའི་མགོན་པོས་འདོད་པའི་དོན་ལ་གསོལ་བ་བཏབ་པ་དགེ། |