འཕགས་མ་ཀུ་རུ་ཀུལླེ་ལ་བསྟོད་ཅིང་གསོལ་བ་ཨུཏྤལ་དམར་པོའི་ཕྲེང་བ།༄༅། །འཕགས་མ་ཀུ་རུ་ཀུལླེ་ལ་བསྟོད་ཅིང་གསོལ་བ་ཨུཏྤལ་དམར་པོའི་ཕྲེང་བ་བཞུགས། ན་མ་ཀུ་རུ་ཀུལླེ་ཡཻ། ཞིང་ཁམས་རྒྱ་མཚོའི་འདྲེན་པ་བསྐྱེད་པའི་ཡུམ། །ཤེས་རབ་ཕར་ཕྱིན་གང་འདུལ་སྤྲུལ་པའི་གར། །དྲན་པས་སྙིང་ལ་བདེ་སྟེར་རིགས་བྱེད་མ། །ཡིད་ཀྱི་དཔལ་དུ་འབྲལ་བར་མ་གྱུར་ཅིག ༡ །གང་དག་འགྲོ་རེའི་མདུན་དུ་བཀོད་པ་རེ། །རྣམ་རོལ་དཔག་ཡས་ཆོས་དབྱིངས་རྒྱས་པར་འགེངས། །དུ་མར་སྣང་ཡང་སྤྲོས་བྲལ་གཅིག་པུ་ཉིད། །ནམ་མཁའི་གར་མཁན་མ་ལ་བདག་དགའ་འོ། ༢ །ཆོས་སྐུའི་ཀློང་ན་བཅོམ་ལྡན་ཝཱ་ར་ཧི། །ལོངས་སྤྱོད་རྫོགས་སྐུ་སངས་རྒྱས་དམར་པོའི་ལྕམ། །སྤྲུལ་སྐུའི་ཞིང་དུ་ཕུག་གནས་ཌཱ་ཀི་ནི། །ངོ་མཚར་རྣམ་ཐར་མཁའ་དབྱིངས་རྗེས་སུ་འཆིང་། ༣ །འགྲོ་ལ་ཕན་བདེ་སྦྱིན་པས་འཆི་མེད་ལྗོན། །ཉེས་པའི་དྲི་མ་འཁྲུད་པས་གང་གཱའི་ཆབ། །ལུས་ཅན་མཐོ་རིས་འདྲེན་པས་དཔྱང་ཐག་སྟེ། །འཇིགས་ལས་སྐྱོབ་པས་རྡོ་རྗེའི་མཁར་ཡང་ཡིན། ༤ །མ་འདྲེས་ཀུན་ལ་མཛའ་བའི་མ་མ་མཆོག །བླང་དོར་སྣང་བ་སྟོན་པས་ཉིན་མོར་བྱེད། །སྲིད་པའི་རིམས་ནད་རྒྱུད་གཅོད་སྐྱེ་ལྔའི་སྒྲ། །དགེ་བའི་ཆོས་ཀུན་སྡུད་པའི་ལག་པའང་ཡིན། ༥ །ཁྱོད་ནི་གཏེར་དང་བུམ་བཟང་མ་རྨོས་འབྲས། །འདོད་འཇོའི་བ་མཆོག་བདུད་རྩིའི་སྤྲིན་ཆེན་ཏེ། །ས་ཆེན་བཞིན་དུ་སྐྱེ་དགུའི་ངལ་འཚོའི་གསོས། །ཆུ་བོའི་རྒྱུན་བཞིན་ཡོན་ཏན་མཛད་པ་མེད། ༦ །དམར་སེར་ཉི་མ་འཆར་ཁའི་ལང་ཚོ་ཅན། །དྲན་པས་ས་གསུམ་དབང་བྱེད་ཡིད་འཕྲོག་མ། །ལན་གཅིག་སྙིང་ལ་ཤར་བའི་དགའ་བ་ཡང་། །མཆོད་སྦྱིན་བརྒྱ་པས་ཉམས་སུ་མྱོང་མ་ལགས། ༧ །རབ་འཇམ་ཨུཏྤལ་མདའ་སྟན་པདྨའི་མཚོན། །སྲིད་པ་གསུམ་ལས་རྒྱལ་ཕྱེད་རུ་མཚོན་ཆེ། །གང་ལ་འགྲན་ན་དགའ་མའི་བདག་པོའི་མདའ། །དྲེས་ཐག་ཚིག་པའི་ཐལ་བ་བཞིན་དུ་མངོན། ༨ །ལི་ཁྲིའི་མེ་ཏོག་གསར་པའི་ཐོད་རྒྱན་དང་། །ཨུ་ཏྤལ་ཕྲེང་བའི་དོ་ཤལ་དཔྱང་བ་ལ། །སྤྱན་ཟུང་བུང་བ་གཡོ་བའི་རྣམ་འགྱུར་གྱིས། ཐིག་ལེ་མཆོག་མའི་མཛེས་པ་སྲོག་དང་ཕྲལ། ༩ །སིལ་ཁྲོལ་རིན་ཆེན་འཐབ་པའི་སྒྲ་དབྱངས་དང་། །ལྷབ་ལྷུབ་དར་གྱི་ཅོད་པཎ་འཕུར་ལྡིང་བཅས། །སྒེག་བཞད་གར་སྟབས་གཡོ་བའི་འཇོ་སྒེག་གིས། །ཆགས་བྲལ་ཞི་བའི་ཡིད་ཀྱང་གཅིག་ཏུ་འཆིང་། ༡༠ །ཁྱོད་སྐུའི་རྣམ་འགྱུར་གསལ་བའི་ཏིང་འཛིན་མེ། །བཟླས་བརྗོད་ལུང་གིས་བསྐུལ་བའི་འཕྲོ་འདུའི་ཟེར། །སྲིད་གསུམ་ཟ་བར་ཆས་པའི་བྱ་མ་རྟས། །ལས་བཞི་གྲུབ་བརྒྱད་སུག་མཐིལ་གཏེར་བཞིན་འབྱིན། ༡༡ །ཨེ་མ་རྐང་ཐང་ནང་ནས་རྟ་པ་དང་། །རྐང་འཐུང་ཕལ་ལས་ཡོངས་འདུ་ས་བརྟོལ་ལྗོན། །མེ་ཏོག་ནང་ནས་ཨུ་དུམྦཱ་ར་བཞིན། །མཆོག་སྦྱིན་ནང་ན་བཅོམ་ལྡན་རིགས་བྱེད་མ། ༡༢ །གང་ལ་བརྟེན་ནས་ཁམས་གསུམ་དབང་ཕྱུག་དཔལ། །མངོན་བྱས་གྲུབ་པའི་ཚོགས་ཀྱིས་འཛིན་མའི་ཁྱོན། །འགེངས་མཐོང་ཨུ་མའི་བདག་པོ་སྐྱེངས་པའི་ཡིད། །གངས་རིར་དཀའ་ཐུབ་ཟོལ་གྱིས་ངལ་བ་བརྟེན། ༡༣ །དེ་སླད་ཆེ་དགུའི་གཙུག་གི་ཅོད་པཎ་གྱིས། །ཞབས་སེན་མནྡར་བ་མཆོད་པའི་མོད། །སྲིད་ལ་བསྙེང་བྲལ་ཞི་བའི་དགེ་མཚན་གྱིས། །དགའ་སྟོན་རྒྱལ་མཚན་གསར་པས་མཛེས་པར་བྱས། ༡༤ །ལེགས་པར་ཁེབས་སོ་འཁོར་ཡུག་རི་བོའི་ཁོངས། །ཁྱོད་ཀྱི་ཕྲིན་ལས་གདུགས་དཀར་གཅིག་ཉིད་དེ། །སྔོ་བསངས་རྒྱུ་སྐར་ཕྲེང་བའི་དོ་ཤལ་ཚོགས། །ཆར་ལྡན་ཆུ་འཛིན་གསར་པའི་བླ་རེས་ཀྱང་། ༡༥ །ལྷ་ལ་ལྷ་ཡི་དཔག་བསམ་མནྡཱ་ར། །ཀླུ་ལ་འཇོག་པོའི་གཙུག་གི་གདེངས་ཀའི་རྒྱན། །བདག་ལ་ཕན་བདེའི་འདོད་སྟེར་བཅོམ་ལྡན་མ། །རེ་བའི་འབྲས་བུ་འབྱིན་ལ་མཚུངས་པ་ཉིད། ༡༦ །འཕགས་མ་ཁྱོད་ཀྱི་ཐུགས་བསྐྱེད་དམ་བཅའི་སྒོ། །ལྷག་པར་འཇུག་པའི་དུས་ནི་དེང་ལགས་ཏེ། །དར་བའི་དཔལ་དང་ཡ་རབས་མཛའ་བའི་གྲོགས། །དེ་ལ་ཁྱོད་ཀྱིས་སྡུད་དང་འཆིང་ཅི་དགོས། ༡༧ །དེང་སང་སྐྱེ་བོ་མི་བསྲུན་གདུལ་བར་དཀའ། །སྣོད་བཅུད་དཔལ་ཉམས་ཕན་ཚུན་དགྲ་ལྟར་སྡང་། །བསྟན་དང་བསྟན་འཛིན་མངའ་ཐང་ཉམས་དུས་འདིར། །འགུགས་བྱེད་ཟེར་གྱིས་ཆོས་ཀུན་དབང་དུ་བསྡུས། ༡༨ །ཞི་བའི་ཚིག་གིས་བཤད་ཀྱང་ཉན་མཁན་མེད། །དྲག་པོའི་ལས་ཀྱིས་བསྒྲལ་ཀྱང་རྣམ་སྨིན་ལྕི། །རང་གར་བཞག་ན་དཀོན་མཆོག་དབུ་འཕང་དམད། །དེ་ཕྱིར་དབང་མཛད་མཐུ་རྩལ་མ་ཆུང་ཞིག ༡༩ །ཕན་པར་བསླབས་ཀྱང་འཁོན་གྱི་བསམ་པ་སྐྱེས། །དྲང་པོར་གནས་ཀྱང་གཡོ་སྒྱུས་བསླུ་ཞེས་ཟེར། །ཇི་ལྟར་བྱས་ཀྱང་ཕྱིར་ཕྱིར་སྙད་ཅིག་འདོགས། །དེང་སང་སྐྱེ་བོ་ཁྱེད་ཀྱི་ཐུགས་རྗེའི་ཡུལ། ༢༠ །མི་བསྲུན་གདུལ་དཀའ་འདུལ་བར་མི་མཛད་ཅིང་། །བསྐུལ་ཡང་མི་གསན་བཅོལ་ཡང་མི་དགོངས་ན། །ཁྱོད་ཀྱི་དམ་བཅའི་ཁུར་ཡང་ཅི་ཞིག་འགྱུར། །ལས་ངན་འགྲོ་ལ་ལྷག་པར་གཟིགས་ཤིག་ཀྱཻ། ༢༡ །སྣོད་བཅུད་བརྟན་གཡོ་སྲིད་ཞིའི་ཕྱྭ་གཡང་དཔལ། །དབང་བསྡུས་གྲུབ་གཉིས་ནོར་བུའི་ཆར་རྒྱུན་གྱིས། །ས་འདི་འཕྲུལ་དགའི་ཞིང་ལྟར་འབྱོར་པ་དང་། །འགྲོ་རྣམས་མ་བུ་བཞིན་དུ་འདུམ་པར་མཛོད། ༢༢ །དཀར་ཕྱོགས་དབང་བསྡུས་ལེགས་དགུའི་རྟེན་འབྲེལ་སྒྲིགས། །ནག་ཕྱོགས་དབང་སྡུས་མི་མཐུན་འགལ་བྱེད་སོལ། །ཆེ་དགུ་དབང་སྡུས་བསྟན་འགྲོའི་མངའ་ཐང་སྤེལ། །མཁས་བཙུན་དབང་སྡུས་བཤད་སྒྲུབ་དར་བར་མཛོད། ༢༣ །འཐབ་དང་རྩོད་སོགས་མི་ཤིས་མིང་མི་གྲགས། །ཨར་ཇག་རྐུན་པོའི་རྒྱུ་འགྲུལ་ངང་གིས་ཆད། །ནག་ཕྱོགས་ཀླ་ཀློའི་འཚུབ་འགྱུར་མིང་ {རྨིག} མེད་ཞི། །རྫོགས་ལྡན་དུས་བཞིན་དགེ་བཅུའི་རྐང་པ་ཚུགས། ༢༤ །མདོར་ན་གུས་ལྡན་ཡིད་ལ་རེ་བའི་དཔལ། །གནས་སྐབས་མཐར་ཐུག་ཕན་བདེའི་འབྲས་མང་བཅུད། །མ་ལུས་དབང་སྡུས་སྦྱིན་པའི་ཕྱག་རྐྱོངས་ལ། །ཡིད་ཀྱི་ཤིང་རྟ་ཕྱུར་བོར་འགེང་བར་མཛོད། ༢༥ །ཁྱད་པར་རླུང་སེམས་སྣང་བ་རྟེན་འབྲེལ་ཆོས། །མ་ལུས་དབང་འདུས་གྲུབ་པའི་རོལ་རྩེད་ཀྱིས། །གཟུང་འཛིན་མདུད་པ་དབུ་མའི་དབྱིངས་སུ་བཀྲོལ། །ངེས་དོན་བདེ་ཆེན་ཕྱག་རྒྱའི་སྐུ་འགྲུབ་མཛོད། ༢༦ །འཆི་ཚེ་བླ་མ་མཆོག་དང་ལྷག་པའི་ལྷས། །འཛུམ་བཞད་མེ་ཏོག་ཆར་གྱིས་མདུན་བསུས་ནས། །མཁའ་སྤྱོད་དབུ་མའི་གྲོང་ཁྱེར་ཉམས་དགའ་བར། །ལྷན་སྐྱེས་བདེ་ཆེན་སྤེལ་བའི་གྲོགས་མཛོད་ཅིག ༢༧ །ཅེས་རྒྱལ་ཡུམ་མ་རིགས་བྱེད་ལྷ་མོ་ལ་བསྟོད་ཅིང་གསོལ་བ་གདབ་པའི་ཚིགས་བཅད་འདིའང་སྔགས་བཙུན་འགྱུར་མེད་པདྨ་རྣམ་རྒྱལ་གྱིས་རང་ཤག་བཀྲ་ཤིས་འཆི་མེད་འོད་སྣང་དུ་འབྲུ་མར་གྱི་སྣང་བ་ལ་བརྟེན་ནས་གང་ཤར་གསོལ་བ་བཏབ་པ་ཕྱོགས་ཀུན་ཏུ་བདེ་ལེགས་ཀྱི་སྣང་བ་ཆེན་པོས་ཁྱབ་པར་གྱུར་ཅིག |