དབྱངས་ཅན་དཀར་མོ་ལ་བསྟོད་ཅིང་གསོལ་བ་འདེབས་པ་ཚངས་སྲས་དགྱེས་པའི་གླུ་དབྱངས།༄༅། །དབྱངས་ཅན་དཀར་མོ་ལ་བསྟོད་ཅིང་གསོལ་བ་འདེབས་པ་ཚངས་སྲས་དགྱེས་པའི་གླུ་དབྱངས་ཞེས་བྱ་བ། ངག་དབང་ལྷ་མོ་ལ་ཕྱག་འཚལ་ལོ། །ཤེས་རབ་ཕར་ཕྱིན་དོན་དམ་བདེན་པ་ནི། །གང་ལའང་མི་གནས་ཟབ་པའི་ཆོས་ཉིད་དེ། །སྤྲོས་པའི་ཡུལ་མིན་ཚིག་གིས་ཇི་ན་མཚོན། །དེ་སླད་བསལ་བཞག་བྲལ་བའི་ངང་དུ་བསྟི། །སྐྱེ་བ་མེད་ལས་སྐྱེ་བའི་ཆོ་འཕྲུལ་སྟོན། །སྐྱེས་ཙམ་ཉིད་ནས་སྐྱེ་བ་གང་ཡང་མེད། །གཅིག་དང་དུ་མར་མི་གནས་སྒྱུ་མ་ཆེ། །རྟེན་འབྱུང་ཟབ་མོའི་སྣང་ཚུལ་འདི་ཆེ་འོ། །ཟུང་འཇུག་སྒྱུ་འཕྲུལ་དྲྭ་བའི་རོལ་རྩེད་ནི། །མཁའ་ཁྱབ་མཁའ་ཡི་རྡོ་རྗེའི་ཡེ་ཤེས་མཆོག །རིག་སྟོང་ཆོས་ཟད་རྗེན་པའི་རང་མདངས་ལས། །གཟུངས་སྤོོབས་བློ་གྲོས་སྒོ་བརྒྱ་འབྱེད་དོ་མཚར། །གཉིས་མེད་མཉམ་པ་ཆེན་པོའི་ཡེ་ཤེས་རྒྱས། །སྲིད་ཞིའི་ཆོས་ཀུན་མ་བཏབ་ཡོད་མིན་ཡང་། །བྱིས་པའི་བློ་ཅན་མཚན་མར་འཛིན་པས་བསླད། །ཀྱེ་མ་དུས་རིང་སྲིད་པའི་དྲྭ་བར་ཆུད། །རང་སྣང་ལོག་པར་བཟུང་བའི་འཁྲུལ་པའི་གཡས། །རིགས་ཁམས་ཆོས་ཉིད་གདོད་ནས་རྣམ་དག་ཀྱང་། །སྟོབས་སོགས་ཡོན་ཏན་མི་མངོན་གསེར་བཞིན་གནས། །དེ་བསལ་སླད་དུ་རྒྱལ་རྣམས་སྤྲོ་བ་མཛད། །གང་གང་འདུལ་ལ་དེ་དེར་སྟོན་པའི་འཕྲུལ། །འགྲོ་སེམས་རྗེས་འགྲོ་ནམ་མཁའི་མྱུ་ཁྱུད་མཐའ། །གཞལ་བར་འདོད་གང་བྱིས་པའི་བློ་སྐྱོན་ཏེ། །བློ་ལྡན་རྣམས་ནི་བསམ་མི་ཁྱབ་ལ་འཇུག །སྤྱན་ལྔ་རྣམ་པར་དག་པས་གཟིགས་པའི་ཁྱོན། །གང་ན་འཕགས་བཞིའི་ཕྲེང་བ་མཆིས་དེ་ཀུན། །ཁྱོད་ཀྱིས་མ་བསྐྱེད་འགའ་ཡང་ཡོད་མ་ཡིན། །དེ་སླད་རྒྱལ་བའི་ཡུམ་ཞེས་ཞིང་ཀུན་གྲགས། །སྟོང་ཉིད་ལང་ཚོ་བདོ་བའི་སྨིན་ལེགས་མ། །སྙིང་རྗེའི་ཟུར་མིག་གཡོ་བའི་ངང་ཚུལ་ལས། །ཞིང་ཁམས་རྒྱ་མཚོར་རྩེ་དགའི་རོལ་གར་ནི། །འདོད་དགུར་བསྒྱུར་བའི་ཆ་ཤས་འདི་ལྟར་སྒྲོགས། །སྙིང་རྗེ་ལྷ་ཡི་མཆེ་བའི་འོད་ཟེར་ལས། །ཉེར་ཐོན་བརྟན་གཡོའི་སྒྲ་དབྱངས་བྱེ་བ་འབུམ། །གཅིག་བསྡུས་ཚངས་པའི་སྲས་མོ་དཔེ་མེད་མ། །ཏམྦུ་ར་ལ་དགའ་སྐྱེད་ཚུལ་ཡང་སྟོན། །ཁྱོད་སྐུ་སྲིད་ན་དཀར་བའི་དངོས་པོ་ཀུན། །ལན་འབུམ་བཞུས་པའི་སྙིང་པོ་ལས་བསྐྲུན་བཞིན། །མ་བྲིས་རྣམ་པར་བཀྲ་བའི་ལང་ཚོའི་དཔལ། །བློ་ལྡན་སྐྱེ་བོའི་མིག་ལ་བདུད་རྩི་ཉིད། །སྲིད་ཞིའི་ཁོངས་སུ་མི་རྫོགས་ཟུར་མིག་མདའ། །སྙོམ་པར་སྤྲོ་ཡང་རྨོངས་དག་ལས་ཀྱིས་བསྐལ། །བློ་ལྡན་ཁ་ཅིག་སྙིང་ལ་གཟས་པའི་མོད། །ཤེས་བྱར་འཁོན་པའི་དགྲ་དེ་མིང་ཙམ་བྱས། །སྲིད་འབྱོར་བྱེ་བའི་ཟོང་གིས་ཁུག་མིན་པའི། །བརྒྱ་ཕྲག་རྒྱན་གྱིས་སྒེག་པའི་འགྱིང་བག་སྐུ། །ཟུང་བཞིའི་ན་ཚོད་ཙོག་པུའི་འདུག་སྟངས་ཅན། །དྲན་པ་ཙམ་གྱིས་ཡིད་ལ་སིམ་པ་སྟེར། །རྒྱུད་སྟོང་ལྡན་པ་དྲི་ཟའི་པི་ཝཾ་མཆོག །སྦྲེང་པའི་ཟོལ་གྱིས་དབྱངས་ཀུན་རྫོགས་པའི་གསུང་། །དོན་ཟབ་བདུད་རྩིར་སྨིན་པའི་སྙན་ངག་བཅུད། །རྟག་པར་འགྲོ་ལ་འཇོ་བའི་ཤིས་པ་སྒྲུབ། །མི་འཚེ་དགའ་དང་དམ་བཅའ་བརྟན་རྣམས་ཀྱི། །ངག་ཡིད་ཁ་ཡི་སྒོར་ཞུགས་རྣམ་དཔྱོད་བློ། །དཔྱིད་དུས་ས་བོན་བཟང་ལ་མྱུ་གུ་བཞིན། །མོས་ལྡན་རེ་བའི་ཤིང་རྟ་འགེངས་འདི་རྨད། །མཁྱེན་བརྩེའི་ཡོན་ཏན་ཆ་ཤས་ཕྲ་མོ་ཡང་། །དཔགས་ནུས་མིན་ན་མཐའ་དག་འདིར་རྫོགས་པའི། །ཨེ་མ་ཀུན་གསལ་ཁྱོན་འདི་ཆེས་ཡངས་ཤིང་། །འདེགས་བཟོད་ནོར་འཛིན་གཞི་ཡང་ཤིན་ཏུ་བརླིང་། །ཚངས་སྤྱོད་གཙང་སྦྲར་ལྡན་པས་ཡུམ་བོས་ན། །འཛུམ་བཅས་ངག་གི་དབང་ཕྱུག་ཅི་བཞེད་ཅེས། །དཀར་གསུམ་ཟས་ཀྱི་ཚུལ་དུ་གྲུབ་པ་མཆོག །ཅི་དགར་སྦྱིན་ཞེས་གྲགས་པའི་རེ་ཁ་བཀྲ། །དེ་ལྟ་ན་ཡང་ལས་ཀྱིས་བསྐལ་པ་བདག །རིང་མོ་ཉིད་ནས་ཁྱོད་ལ་དད་པའི་ཡིད། །གཅིག་ཏུ་གཡོ་ཡང་ཡུད་ཙམ་མཐོང་བའི་སྐབས། །མ་འཚལ་དེ་སླད་ཀྱེ་མ་སྡུག་བསྔལ་ལོ། །སྣང་སྟོང་ལྷ་ཡི་སྐུར་སྦྱངས་སྲོག་གི་ཟེར། །འབར་བའི་ཕྲེང་བས་དྲངས་པའི་འཁོར་ལོ་མཆོག །དྲི་བཞོན་རྟ་ལ་སྐྱོན་ཚེ་ཡེ་ཤེས་ཀྱི། །སྣང་བ་སྙིང་ལ་འཇུག་པར་མཛད་དུ་གསོལ། །སྙིང་དབུས་ཟླ་བས་ནོན་པའི་པདྨ་དཀར། །བཅུ་དྲུག་དབྱངས་ཀྱིས་བསྐོར་བའི་སྲོག་ཡིག་ཧྲཱིཾཿ། །འབར་ཞིང་བསྐོར་བའི་འཕྲོ་འདུའི་འོད་ཟེར་གྱིས། །སྙིང་གི་མུན་པ་གཞོམ་པར་མཛད་དུ་གསོལ། །ཟླ་བ་བདུ་རྩིར་བཞུས་པའི་ཟིལ་ཐིགས་བཅུད། །སྲོག་འཁོར་ལས་སྐྱེས་སྒྲིབ་ཀུན་འཁྲུད་པའི་ཆབ། །འཇོ་བས་གཟུངས་སྤོབས་བློ་གྲོས་ཟབ་མོའི་དཔལ། །ཆེར་འཕེལ་ནམ་ཡང་འགྲིབ་མེད་མཛད་དུ་གསོལ། །གསེར་སྦྱངས་ཐགས་སུ་བསྐྲུན་པའི་འོད་ཟེར་ཕྲེང་། །སྲིད་ཞིའི་དཔལ་ཀུན་སྡུད་པའི་བྱ་མ་རྟར། །ཆས་པའི་མོད་ལ་ཕྱྭ་གཡང་འདོད་དགུའི་གཏེར། །འཛད་མེད་ཆར་དུ་བསྐྱིལ་བར་མཛད་དུ་གསོལ། །ཆགས་མེད་ཆགས་པ་ཆེན་པོའི་ཡེ་ཤེས་མདངས། །རབ་དམར་བདུད་རྩིར་འཕྲུལ་བའི་ཏིང་འཛིན་ཆུས། །ཀུན་དཀྲིས་དྲི་མ་འཁྲུད་པའི་དཔལ་ཡོན་གྱིས། །ཆགས་པའི་མེ་ཆེན་གཞིལ་བར་མཛད་དུ་གསོལ། །སྙིང་རླུང་རྙོག་མ་ཞི་བའི་དག་བྱེད་གཏེར། །ཨིཎྜ་ནི་ལ་བཞུས་པའི་ཁུ་བ་ཡིས། །ལུས་ཀུན་འགེངས་པས་སྐྱོན་དག་ཡོན་ཏན་སྒོ། །རྣམ་འབྱེད་ཤེས་རབ་སྐྱེད་པར་མཛད་དུ་གསོལ། །གང་དག་དཔྲལ་བར་འདབ་བརྒྱད་པད་དཀར་བཅུད། །སྲོག་སྔགས་དུག་སེལ་བདུད་རྩིར་འཇོ་བའི་དཔྱིད། །མི་མཐུན་གནོད་དུག་ཞི་བའི་ཕྲིན་ལས་ཀྱིས། །གཞན་ཕན་སྒོ་འཕར་འབྱེད་པར་མཛད་དུ་གསོལ། །རོ་འཛིན་སྲབ་མོར་རྫས་བཞིས་བྲིས་པའི་སྔགས། །གསེར་མདོག་འཁོར་ལོ་འབར་བའི་འཕྲོ་འདུ་ཡིས། །ལེགས་བཤད་སྨྲ་ལ་ཐོགས་མེད་སྤོབས་པའི་ལྗགས། །ངག་གི་དབང་ཕྱུག་གྲུབ་པར་མཛད་དུ་གསོལ། །གཏོང་སེམས་རྗེས་ཆགས་རོལ་བའི་རང་མདངས་ལས། །རབ་མཉེན་པདྨའི་ལྕགས་ཀྱུས་ཆེ་དགུའི་ཡིད། །རང་དབང་བརྟན་པ་འཕྲོག་པའི་དཔལ་ཡོན་གྱིས། །དབང་ཕྱུག་འདོད་དགུར་འཕྲུལ་བར་མཛད་དུ་གསོལ། །དྲག་པོར་འཕྲུལ་བའི་ཏིང་འཛིན་ཕྲ་མོས་ཀྱང་།། རྒོལ་ངན་ལྕེ་ལ་སྨྲ་བཅད་རྒྱ་ཡིས་ཐེབས། །ཕྱོགས་ལས་རྣམ་རྒྱལ་གྲགས་པའི་རྔ་གསང་གིས། །འཇིགས་མེད་སེང་གེ་ལྟ་བུར་མཛད་དུ་གསོལ། །མདོར་ན་འདི་ནས་ཚེ་རབས་ཕྲེང་བ་རུ། །དད་པའི་རླབས་ཕྲེང་གཡོ་བའི་ཡིད་ཀྱི་མཚོར། །དབྱངས་ཅན་ངང་པའི་བུ་མོ་རྩེན་པའི་གར། །གྲུབ་གཉིས་འདོད་དགུར་བསྒྱུར་བར་མཛད་དུ་གསོལ། །མཐར་ཐུག་ཤེས་དང་ཤེས་བྱ་རོ་མཉམ་པའི། །མི་ཕྱེད་ཐུགས་ཀྱི་རྡོ་རྗེ་འདུས་མ་བྱས། །ངེས་དོན་འཕགས་མའི་གོ་འཕང་མངོན་བྱས་ནས། །མཁའ་ཁྱབ་འགྲོ་བའི་དཔལ་གྱུར་མཛད་དུ་གསོལ། །འཕགས་མའི་བྱིན་རླབས་འགྲོ་བའི་རྒྱུད་ལ་ཞུགས། །འགྲོ་རྣམས་འཕགས་མ་དགེས་པའི་བརྟུལ་ཞུགས་བརྟན། །རྒྱུ་རྐྱེན་རྟེན་འབྲེལ་དཔྱིད་དུས་ས་མྱུག་བཞིན། །ཡོན་ཏན་སྙེ་མས་འཇིག་རྟེན་འགེངས་གྱུར་ཅིག །ཅེས་པའང་ཚངས་སྤྱོད་བྲམ་ཟེ་གཞོན་ནུའི་བརྟུལ་ཞུགས་ལ་འདུན་ཅིང་འཕགས་མའི་རིགས་བྱེད་ལ་མོས་པ་འཆང་བ་འཇམ་དབྱངས་བློ་གྲོས་རྒྱ་མཚོས་མེ་རྟ་ཆོ་འཕྲུལ་ཟླ་བའི་ཚེས་བཅུ་གསུམ་རྒྱལ་དང་ཕུར་བུའི་འགྲུབ་པ་བཟང་པོ་ལ་བྲིས་ཤིང་གསོལ་བ་བཏབ་པ་ངག་གི་དབང་ཕྱུག་མྱུར་དུ་འགྲུབ་པའི་རྒྱུར་གྱུར་ཅིག |