བདེ་བར་གཤེགས་པའི་མཛད་པའི་ཚུལ་ལ་མདོ་ཙམ་བསྔགས་པ་རིན་པོ་ཆེའི་ཕྲེང་བ།

༄༅། །བདེ་བར་གཤེགས་པའི་མཛད་པའི་ཚུལ་ལ་མདོ་ཙམ་བསྔགས་པ་རིན་པོ་ཆེའི་ཕྲེང་བ་ཞེས་བྱ་བ། །ཐམས་ཅད་མཁྱེན་པ་ལ་ཕྱག་འཚལ་ལོ། །དགེ་ལེགས་བྱེ་བས་བསྐྲུན་པ་མཚན་དཔེའི་སྐུ། །དབྱངས་ཀྱི་ཡན་ལག་རྫོགས་པ་རྡོ་རྗེའི་གསུང་། །ཇི་ལྟ་ཇི་སྙེད་མཁྱེན་པའི་ཐུགས་མངའ་བ། །བཅོམ་ལྡན་ཤཱཀྱ་སེང་གེར་ཕྱག་འཚལ་ལོ། ༡ །ཚོགས་གཉིས་ཆུ་གཏེར་ལས་འཁྲུངས་རྒྱལ་བའི་སྲས། །དམ་པ་ཏོག་དཀར་སྣང་བའི་མུ་ཁྱུད་ཀྱིས། །ལེགས་གསུང་སྣང་བས་དགའ་ལྡན་ལྷ་ཡི་ཚོགས། །རྣམ་གྲོལ་པད་ཚལ་བཞད་ལ་ཕྱག་འཚལ་ལོ། ༢། ཕུལ་བྱུང་གཟིགས་པ་ལྔ་ཡི་རྗེས་དགོངས་ཏེ། །རྩོད་དུས་འགྲོ་བ་འདུལ་སླད་མི་ཡུལ་དུ། །འབྱོན་པར་བཞེད་ནས་བདུད་རྩིའི་ཟས་ཅན་རྣམས། །དབུགས་དབྱུང་སྤྲོ་བ་བསྐྱེད་ལ་ཕྱག་འཚལ་ལོ། ༣ །སྐལ་བཟང་སྒྲོན་མ་ལྔ་པའི་དབུ་གཙུག་ཏུ། །ཉིད་ཀྱི་ཅོད་པཎ་བཅིངས་དང་ཆབས་ཅིག་པར། །སྐལ་བཟང་རྣམ་སད་འཁོར་རྣམས་ལེགས་སྐྱོང་བའི། །རྒྱལ་ཚབ་མཆོག་ཏུ་བསྐུར་ལ་ཕྱག༴ ༤ །སྲིད་གསུམ་དཀར་བའི་དངོས་པོ་གཅིག་བསྡུས་ལྟའི། །རབ་མཛེས་གཉིས་འཐུང་མཆེ་དྲུག་རྣམ་པ་ཡིས། །ལྷ་མོ་སྒྱུ་འཕྲུལ་གསོ་སྦྱོང་ལ་གནས་ཚེ། །ལྷུམས་སུ་ཞུགས་པར་མཛད་ལ༴ ༥ །དྲི་མེད་མངལ་རྒྱ་བཻཌཱུར་གཙང་མའི་སྦུབས། །མ་བསྒྲིབས་ཀུན་ནས་གསལ་བ་མཚན་དཔེའི་སྐུ། །དབང་པོས་བཀའ་བསྒོས་ལྷ་ཡི་གྱད་མཆོག་བཞིས། །ཡོངས་སུ་སྲུང་བར་གྱུར་ལ༴ ༦ །བཀྲ་ཤིས་ལུམྦཱ་ནི་ཡི་སྐྱེད་ཚལ་དུ། །མཚན་དཔེའི་དཀྱིལ་འཁོར་གསལ་དང་ཆབས་ཅིག་པར། །ས་གསུམ་དགེ་མཚན་སྣང་བས་ཁྱབ་གྱུར་ཏེ། །དོན་ཀུན་གྲུབ་མཚན་གསོལ་ལ་ཕྱག༴ ༧ །གང་གི་ལེགས་སྤྱད་ཉིན་མོར་བྱེད་པའི་གཟིས། །གཏུམ་པོ་རྣམས་ཀྱི་ལོག་སྤྱོད་བ་མོའི་ཚོགས། །ཅིག་ཅར་བཅོམ་པས་ཐུབ་པར་མཚན་གསོལ་ཞིང་། །ཤཱཀྱ་འཕེལ་གྱིས་བཏུད་ལ༴ ༨ །མངོན་ཤེས་རྫུ་འཕྲུལ་མཐུ་གྲུབ་ཉོན་མོངས་མེད། །མཆོག་གི་ཡོན་ཏན་ཞགས་པས་ཉེར་དྲངས་དེས། །ཞབས་ཀྱི་ཆུ་སྐྱེས་ཟེའུ་འབྲུ་རས་བཏུད་ནས། །ས་གསུམ་བླ་མར་བསྔགས་ལ་ཕྱག་འཚལ་ལོ། ༩ །ཡིག་རྩིས་འཕོང་སོགས་སྒྱུ་རྩལ་གནས་མཐའ་དག །མ་བསླབས་བཞིན་དུ་ཐུགས་མཚོར་འཁྱིལ་གྱུར་ཅིང་། །སྟོབས་མཆོག་མཐུ་ཡིས་ཤཱཀ་རིགས་དྲེགས་ཚོགས་ཀྱི། །ཁེངས་པ་བཅོམ་པར་མཛད་ལ༴ ༡༠ །ངོ་ཚ་ཁྲེལ་ཡོད་བཟང་པོའི་གོས་ཀྱིས་བཀླུབས། །ཕུལ་བྱུང་ཡོན་ཏན་རིན་ཆེན་རྒྱན་གྱིས་སྤྲས། །ཆེན་པོའི་མདུན་སར་རྒྱུ་འོས་གྲགས་འཛིན་མ། །ཁབ་ཏུ་བཞེས་པར་མཛད་ལ༴ ༡༡ །ལོ་ཧའི་ཏས་ཀྱང་འགོང་བའི་མཐུ་ཟད་ཅིང་། །འབུམ་ཕྲག་སྐྱེ་བོས་གཡོ་བར་མ་བཟོད་བའི། །དགེ་བའི་སྙིང་པོ་རྐང་འཐུང་ཉལ་བའི་ལུས། །མི་མཆོག་སྟོབས་ཀྱིས་བསལ་ལ༴ ༡༢ །གང་ཞིག་མཐོང་ན་ཡིད་ཀྱི་ཆོམ་རྐུན་ནི། །དབང་མེད་འགུགས་པ་བུད་མེད་རིན་ཆེན་མཆོག །ས་མཚོ་འཁོར་བཅས་ཡབ་ཀྱི་བཞེད་སྐོང་སླད། །བཙུན་མོ་དམ་པར་བཞེས་ལ༴ ༡༣ །རྒ་ན་འཆི་དང་གནས་གཙང་ལྷས་སྤྲུལ་པའི། །དགེ་སློང་མཆོག་གཟིགས་མ་ལ་ཡ་རླུང་གིས། །སྔོན་སྨོན་ཐུགས་བསྐྱེད་བ་དན་ཆེར་བསྐྱོད་པས། །ཁབ་ནས་གཤེགས་པར་དགོངས་ལ་ཕྱག༴ ༡༤ །ཞིང་པའི་གྲོང་དུ་ཛམ་བུའི་གྲིབ་མ་ཡིས། །རྒྱལ་སྲས་མཆོག་གི་སྐུ་ལུས་མ་བཏང་ཞིང་། །བསམ་གཏན་དང་པོའི་ཏིང་འཛིན་མངོན་མཛད་ལ། །ཡབ་ཀྱིས་གུས་པས་བསྟོད་ལ་ཕྱག་འཆལ་ལོ། ༡༥ །མྱ་ངན་འདས་ཞིའི་སྒྲ་དབྱངས་དབྱར་གྱི་རྔ། །ཐོས་པས་རབ་དགའ་རྒྱལ་སྲས་མདོངས་མཐའ་ཅན། །སྒེག་ཉམས་ཟློས་གར་བསྒྱུར་ཚེ་རི་དྭགས་སྐྱེས། །འཁོར་བཅས་བཙུན་མོར་བསྐུར་ལ༴ ༡༦ །ཞི་བའི་ནགས་སུ་གཤེགས་པར་བཞེད་མཐོང་ནས། །འོབས་བདུན་ལྕགས་རིའི་བསྐོར་བའི་སྒོ་འཕར་ཆེར། །ས་བདག་མཆེད་བཞི་དཔུང་གི་ཚོགས་བཅས་ཀྱིས། །ཞག་བདུན་བསྲུངས་པར་བྱས་ལ༴ ༡༧ །དེ་ཚེ་ཚངས་དང་དབང་པོས་ཉེར་བསྐུལ་ནས། །ལྷ་ཡི་གྱད་བཞིས་རྐང་བཏེགས་བསྔགས་ལྡན་ལ། །ཆིབས་ཏེ་རྒྱུ་སྐར་ལམ་ལ་རབ་འཕགས་ནས། །རྣམ་དག་དྲུང་དུ་གཤེགས་ལ༴ ༡༨ །ཨུཏྤལ་འདབ་མ་ལྟར་མཛེས་རལ་གྲི་ཡིས། །ཟོས་པ་གཏོང་ཟིལ་མདངས་འཕྲོག་དབུ་སྐྱེས་ཆུན། །རྣམ་སད་བསོད་ནམས་ཕང་བར་རབ་ཆགས་ཤིང་། །དབང་པོས་ངུར་སྨྲིག་ཕུལ་ལ༴ ༡༩ །མ་ག་དྷར་གཤེགས་གཟུགས་ཅན་སྙིང་པོས་མཆོད། །རིང་ཕུལ་ལྷག་སྤྱོད་དག་ལས་རིམ་བཞིན་དུ། །སྲིད་རྩེའི་བར་གྱི་གདམས་ངག་ཀུན་གསན་ནས། །ཏིང་འཛིན་མངོན་དུ་མཛད་ལ༴ ༢༠ །སྙིང་སྟོབས་ཞུམ་པ་མེད་པའི་བརྩོན་འགྲུས་ཀྱིས། །ནཻར་ཉྫ་ནའི་འགྲམ་དུ་ལོ་དྲུག་བར། །ཤིན་ཏུ་བརྣག་པར་དཀའ་བའི་སྤྱོད་པའི་ཚོགས། །ཡོངས་སུ་སྤྱད་པར་མཛད༴ ༢༡ །མཐའ་གཉིས་གསལ་ཕྱིར་དཀའ་ཐུབ་གྲོལ་བའི་མཐར། །ཞིང་པའི་བུ་མོས་འོ་ཐུག་བསྙེན་བཀུར་རྒྱུས། །མཚན་དཔེའི་ཆ་རྫོགས་མཛེས་སྐུ་གསེར་གྱི་ལྷུན། །གཟི་བྱིན་སྣང་འབུམ་འཕྲོ་ལ༴ ༢༢ །བྱང་ཆུབ་སྙིང་པོར་གཤེགས་ལ་ཀླུ་དབང་པོས། །རབ་བསྔགས་དགེ་མཚན་འདབ་སྟོང་ཆེར་རྒྱས་ཤིང་། །བཀྲ་ཤིས་ཀྱིས་ཕུལ་རབ་གཙང་ཀུ་ཤའི་ཁྲིར། །དམ་བཅའི་གོ་ཆ་བརྟན་ལ༴ ༢༣ །བདུད་དམག་ཁྲོས་པའི་མཚོན་ཆར་ལོག་བརྗོད་དང་། འདོད་པའི་སྒྱུ་ཐབས་སྣ་ཚོགས་གཡོ་འཕྲུལ་ཀུན། །བྱམས་པའི་མཚོན་ཆ་གཅིག་གིས་ཚར་བཅད་ནས། །ས་ལྷས་བསྔགས་པ་བརྗོད༴ ༢༤ །བདུད་ལས་རྣམ་པར་རྒྱལ་བའི་དཔའ་བོ་གང་། །རབ་མཐའི་རྟེན་ལས་ལམ་ལྔའི་ཡེ་ཤེས་མཆོག །མངོན་དུ་མཛད་ཚེ་དགེ་མཚན་སྣང་བ་ཡིས། །ས་གསུམ་ཁྱབ་པར་གྱུར་ལ༴ ༢༥ །མེ་ཁམས་ལ་ཞུགས་ཟག་མེད་དགའ་བདེར་སྤྱོད། །ཚོང་དཔོན་གྱིས་མཆོད་བཏང་གཟུང་གནས་སུ་གཤེགས། །རྟེན་འབྲེལ་དོན་དགོངས་གཅིག་པུར་ནགས་ཁྲོད་དུ། །ཐུགས་ལས་ཆུང་ངུར་བཞུགས་ལ༴ ༢༦ །ཚངས་པ་ཆེན་པོའི་དད་མོས་རིགས་སྔགས་ཀྱིས། །ཐུགས་རྗེའི་ཆུ་འཛིན་བསྐུལ་བའི་དགེ་མཚན་གྱིས། །ཆོས་ཆར་དྲི་མེད་གདུལ་བྱའི་ཞིང་ས་ལ། །ཆེས་ཆེར་འབེབས་པར་བཞེད་ལ༴ ༢༧ །ཝཱ་རཱ་ཎ་སཱིར་ལྔ་སྡེ་བཟང་པོ་དང་། །སྐལ་བཟང་རྣམ་སད་གཞོན་ནུའི་ཚོགས་རྣམས་ལ། །བདེན་བཞིའི་ཆོས་ཆར་བསིལ་པོ་ལེགས་ཕབ་པས། །རྣམ་གྲོལ་མྱུ་གུ་བསྐྱེད་ལ༴ ༢༨ །གྲགས་པ་ལ་སོགས་ཉེ་བའི་ལྔ་སྡེ་དང་། །གྲོང་གི་གཙོ་བོའི་ཁྱེའུ་བཅུ་ཕྲག་ལྔས། །གང་གསུངས་བཅུད་ལེན་སྨན་མཆོག་ལེགས་བཏུང་བས། །དགྲ་བཅོམ་རིགས་སྔགས་གྲུབ་ལ༴ ༢༩ །བཟང་སྡེ་དྲུག་ཅུའི་སྲིད་རྩའི་དྲྭ་བ་ཀུན། །གང་གསུང་ཤེས་རབ་རལ་གྲིས་ལེགས་བཅད་ཅིང་། །བྲམ་ཟེ་ལྷ་སོགས་བསླབ་ལ་རབ་བཀོད་ནས། །ལྟེང་རྒྱས་གནས་སུ་གཤེགས་ལ༴ ༣༠ །ཐོག་མེད་ནས་གོམས་གཏི་མུག་མུན་པ་ཡིས། །ཀུན་ནས་སྒྲིབ་གྱུར་རལ་པ་ཅན་གྱི་ཚོགས། །ཀུན་མཁྱེན་ཉི་མའི་མཐུ་བྱིན་གཟི་འོད་ཀྱིས། །འཕགས་ལམ་གསལ་བར་མཛད་ལ༴ ༣༡ །གཟུགས་ཅན་སྙིང་པོའི་དད་བསོད་རྒྱལ་མཚན་རྩེར། །བདེ་གཤེགས་དགོས་འབྱུང་རཏྣ་ལེགས་མཆོད་པས། །ལྷ་མིའི་སྐྱེ་བོ་འབུམ་ཕྲག་དུ་མའི་ཚོགས། །རྣམ་བཞིའི་འབྲས་བུས་ཕྱུག་ལ༴ ༣༢ །བྲམ་ཟེ་རྒྱུ་སྐར་ཁྲོད་ན་ཟླ་བ་བཞིན། །ཆེས་ཆེར་འཕགས་པ་ཉེ་རྒྱལ་པང་ན་སྐྱེས། །སྟོན་པས་ཚུར་ཤོག་གསུང་གིས་བསྙེན་རྫོགས་ནས། །མཆོག་ཟུང་ཉན་ཐོས་གྱུར་ལ༴ ༣༣ །ཨེ་ལེའི་འདབ་ཅན་ལག་འགྲོའི་དབང་པོ་ནི། །བསླབ་པའི་གནས་ལ་བཀོད་ཅིང་དབུགས་ཕྱུང་ནས། །ཀཱ་ཏྱ་ཡ་ན་མཐའ་གཉིས་གནས་བསལ་བའི། །བདུད་རྩིས་གྲོལ་བར་མཛད་ལ༴ ༣༤ །སྟོན་པའི་བཀས་བསྐུལ་ཀཱ་ཏྱ་ཡ་ན་ཡིས། །གཏུམ་པོ་རབ་སྣང་གདུག་པ་ཡོངས་བཅད་ནས། །ནུབ་ཕྱོགས་འཕགས་རྒྱལ་མཐའ་འཁོབ་མུན་ཁྲོད་དུ། །བསྟན་མཆོག་སྣང་བ་སྤེལ་ལ༴ ༣༥ །སྲིད་པ་ཐ་མའི་གང་ཟག་མེ་སྐྱེས་ཆེ། །ལུང་བསྟན་མངོན་གྱུར་ངོ་མཚར་བཀོད་པ་ཡིས། །བསིལ་བའི་ཚལ་དུ་ལྷ་མིའི་འདུས་པ་རྣམས། །རྣམ་པར་གྲོལ་བར་མཛད་ལ་ཕྱག་འཚལ་ལོ། ༣༦ །འབར་བའི་ཕུག་ཏུ་ལྷ་དབང་འཁོར་དང་བཅས། །བདུད་རྩིས་བདེན་མཐོང་གནས་ལ་རབ་སྦྱར་ཞིང་། །བསིལ་བའི་ཚལ་དུ་མགོན་མེད་ཟས་སྦྱིན་མཆོག །འཕགས་པའི་ས་ལ་བཀོད་མཛད༴ ༣༧ །ཁྱིམ་བདག་གསེར་གྱི་ཕྱེ་མ་བཤིབས་པ་ལས། །རྒྱལ་བྱེད་ཚལ་བསླུས་མུ་སྟེགས་སྒྱུ་མའི་འཕྲུལ། །ཤཱ་རིའི་བུ་ཡིས་ཆེས་ཆེར་ཕམ་བྱས་ནས། །གཙུག་ལག་ཁང་མཆོག་བཞེངས་ལ༴ ༣༨ །མགོན་མེད་ཟས་སྦྱིན་སྐྱ་རེངས་ཁ་ལོ་ཡིས། །ཀུན་མཁྱེན་ཉིན་བྱེད་དྲངས་པའི་དགེ་མཚན་གཟིས། །མཉན་ཡོད་རྒུད་པའི་མུན་ཚོགས་རབ་བསལ་ནས། །ཕན་བདེའི་པད་ཚལ་བཞད་ལ༴ ༣༩ །མི་བསྙེངས་མཁས་པ་གང་གིས་འཁོར་གྱི་དབུས། །གཞོན་ནུའི་དཔེ་ཡི་མདོ་སོགས་སེང་གེའི་སྒྲ། །ཆེས་ཆེར་བསྒྲགས་པས་རྒྱལ་པོ་གསལ་རྒྱལ་གྱི། །དད་བརྒྱའི་འདབ་སྟོང་གྲོལ་ལ༴ ༤༠ །ཡབ་ཀྱི་ཕྲིན་ཁྱེར་ནག་པོ་འཆར་ཁ་ཡིས། །གུས་པས་གསོལ་བཏབ་ནཻ་གྲོར་གཙུག་ལག་བཞེངས། །མཐའ་ཡས་རྫུ་འཕྲུལ་མངོན་པར་འདུ་མཛད་ནས། །ཡབ་སྲས་མཇལ་བར་གྱུར་ལ༴ ༤༡ །དྲི་མེད་ཆོས་ཆར་བསིལ་པོ་ཕབ་པ་ཡིས། །རིམ་བཞིན་ཟས་དཀར་མཆེད་གསུམ་འཁོར་བཅས་ཀྱིས། །བདུད་རྩི་ཐོབ་མཐར་དགའ་དང་ཞུམ་པའི་དྲི། །བསལ་བས་ཟས་གཙང་གྲོལ་ལ༴ ༤༢ །རིགས་ཀྱི་སྲས་མཆོག་གཞོན་ནུ་སྒྲ་གཅན་ཟིན། །རབ་ཏུ་བྱུང་ཞིང་རྨད་བྱུང་ཆོ་འཕྲུལ་ཆེས། །བཙུན་མོ་དྲུག་ཁྲི་དད་ལ་རྣམ་སྦྱར་ནས། །བདེན་པ་མཐོང་བར་མཛད་ལ༴ ༤༣ །ཟས་གཙང་བཀའ་ལུང་ལྷ་ཡི་རྔ་སྒྲ་ཡིས། །ཉེ་བར་བསྐུལ་གྱུར་ཤཱཀ་རིགས་ལྔ་བརྒྱའི་ཚོགས། །རབ་ཏུ་བྱུང་ཞིང་གཞོན་ནུ་ཀུན་དགའ་བོ། །བརྩེ་བས་རྗེས་འཛིན་མཛད་ལ༴ ༤༤ །ཤཱཀ་རིགས་བུད་མེད་ཚོགས་རྣམས་གྲོལ་མཛད་ཅིང་། །འདོད་པའི་འཆིང་བ་དམ་ལྡན་གཅུང་དགའ་བོ། །ཐབས་མཁས་ཐུགས་རྗེ་ཚངས་པའི་འཁོར་ལོ་ཡིས། །སྲིད་པའི་རྒྱུ་བ་བཅད་ལ༴ ༤༥ །ཀུན་དགའ་བོ་ཡིས་འབད་པས་གསོལ་བཏབ་ངོར། །སྐྱེ་དགུའི་བདག་མོ་ལ་སོགས་རབ་བྱུང་ཞིང་། །ཉེས་ལས་རྣམ་གྲོལ་ཟག་ཟད་དགྲ་བཅོམ་མའི། །འབྲས་བུ་མངོན་དུ་གྱུར་ལ་ཕྱག༴ ༤༦ །སློབ་མ་ཅན་ལྗོངས་གདུལ་ཞིང་པད་ཚལ་མཁར། །ཀུན་མཁྱེན་ཉིན་བྱེད་གང་པོས་དྲངས་པའི་རྒྱུས། །རྣམ་གྲོལ་སྦྲང་རྩིའི་བཅུད་ཀྱིས་གཏམས་བྱས་ནས། །གདེངས་ཅན་མཆོག་གཉིས་བཏུལ་ལ༴ ༤༧ །འོད་ཟེར་ཅན་བྱོན་མང་གལ་བུ་ཡི་ཡུམ། །རྒྱུན་ཞུགས་ལ་བཀོད་བྲམ་ཟེ་མ་སྡུག་བཏུལ། །པདྨའི་སྙིང་པོས་ལེགས་མཆོད་ཁེངས་བསལ་བས། །འབྲས་བུ་ཐོབ་པར་གྱུར་ལ༴ ༤༨ །རྒྱལ་རིགས་མུ་ཏོ་འབྱོར་གང་བདེན་བཀོད་ཅིང་། །པང་ན་སྐྱེས་བཏང་དགའ་བོ་གཉེན་དགའ་བཏུལ། །དེ་འཁོར་ཁྲོས་པའི་མཚོན་ཆའི་ཆར་པ་ལས། །ས་བདག་སྐྱོབ་པར་མཛད་ལ༴ ༤༩ །སྡིག་པའི་རང་བཞིན་ཞེ་སྡང་འབར་བའི་མེས། །སྟོང་ཁམས་ཟ་བར་ཆས་པ་འཕྲོག་གནས་ཀྱང་། །གང་གསུང་བདུད་རྩིའི་ཐིགས་པ་གཅིག་བྲན་པས། །ཞི་བའི་སེམས་ལྡན་གྱུར་ལ༴ ༥༠ །གནས་སྐབས་འཆི་བདག་གདུག་པའི་གྲེ་བ་ནས། །བདེ་བར་ཕྱུང་གྱུར་ལག་བརྒྱུད་འབྲོག་གནས་ཆེ། །ཆོས་ཀྱི་བདུད་རྩིས་མཐར་ཐུག་སྲིད་པ་ཡི། །གཅོང་ནད་གཞིལ་བར་མཛད་ལ༴ ༥༡ །ཐུབ་གསུང་སྐུ་གཟུགས་བྲིས་པའི་སྤྲིང་ཡིག་གིས། །སྒྲ་སྒྲོགས་ཡུལ་ཁམས་ཆོས་ལ་རབ་བཀོད་ནས། །དཔལ་རྒྱས་ས་བདག་ཨུ་དྲྭ་ཡ་ན་ཆེ། །དགྲ་བཅོམ་གནས་ལ་སྦྱར་མཛད༴ ༥༢ །སྟོབས་ཆེན་གླང་པོ་བརྒྱ་ཡི་སྙིང་ཁྲག་གིས། །མཆེ་སྡེར་ཀུན་ནས་སྦག་པའི་ཁ་ལྔ་པ། །ནུས་མཐུས་རབ་བཅོམ་དད་ལ་རྣམ་སྦྱར་བས། །ངན་འགྲོའི་རྒྱུ་བ་བཅད་ལ༴ ༥༣ །ངག་གིས་ཉེས་པར་སྤྱད་པའི་ས་བོན་བརྒྱ། །གཅིག་ཅར་སྨིན་པ་ཤད་བུ་སེར་སྐྱ་ཉ། །ངན་འགྲོའི་འདམ་ལས་བཏོན་ཅིང་ཉ་བའི་ཚོགས། །རྣམ་གྲོལ་དཔལ་ལ་སྦྱོར་མཛད༴ ༥༤ །སྔོན་གོམས་བག་ཆགས་དགེ་བའི་ཤིང་རྟ་ཡིས། །སྲིད་འབྱོར་ཀུན་ལ་ཆགས་བྲལ་ནེ་གྲོ་སྐྱེས། །རབ་ཏུ་བྱུང་ཞིང་སྦྱངས་ཡོན་ལ་གནས་མཆོག །འོད་སྲུང་ཆེན་པོར་གྱུར་ལ༴ ༥༥ །དགོངས་པས་གཟིགས་ནས་འོད་སྲུང་ཆེན་པོ་ལ། །སྟན་ཕྱེད་བསྩལ་ཅིང་ཐོས་པ་འཛིན་པའི་མཆོག །ཀུན་དགའ་བོ་ནི་མཆོག་གི་ཞབས་འབྲིང་དུ། །ལྷན་ཅིག་གནས་པར་བསྩལ་ལ་ཕྱག་འཚལ་ལོ། ༥༦ །དད་བརྒྱའི་གེ་སར་ཁོང་ནས་རྒོད་པ་ཡིས། །སྦྲང་རྩིའི་བསྙེན་བཀུར་སྟོབས་པའི་སྤྲེའུ་ཟུང་། །ངན་འགྲོའི་གཡང་ས་ཁེགས་ནས་མཐོ་རིས་ཀྱི། །རྟེན་ལས་བདུད་རྩི་རྟོགས་ལ་ཕྱག་འཚལ་ལོ། ༥༧ །འདོད་ལྷས་བསླུས་པའི་རྟོག་གེ་སྡེ་དྲུག་གིས། །ཡང་ཡང་བསྐུལ་ནས་མཉན་དུ་ཡོད་པ་རུ། །རྨད་བྱུང་ཆོ་འཕྲུལ་ཆེན་པོས་ལྷ་མིའི་འགྲོ། །གྲངས་མེད་གྲོལ་བར་མཛད་ལ༴ ༥༨ །དྲང་སྲོང་ལྔ་བརྒྱ་དགྲ་བཅོམ་སར་བཀོད་ཅིང་། །ལྔ་ལེན་གཉིས་བསྡུམ་མི་སྐྱོང་གྲོལ་མཛད་ནས། །འཚེ་ལ་གོམས་པའི་མི་བསྲུན་ཤ་ཟ་སྟོང་། །བསླབ་པའི་གནས་ལ་བཀོད་མཛད༴ ༥༩ །སྲིད་པ་གསུམ་ན་ཆེན་པོར་གྲགས་མཐའ་དག །འཁོར་བཅས་ལྷན་ཅིག་འདུས་པའི་ཚོགས་ཆེན་པོར། །ཟབ་ཞིའི་ཆོས་ཆར་བཟང་པོ་ལེགས་དབབ་སྟེ། །འབྲེལ་ཚད་དོན་ལྡན་མཛད་ལ༴ ༦༠ །མི་བསྲུན་གནོད་སྦྱིན་དཔུང་དང་རྒྱ་མཚོ་ཡི། །ཀློང་འཁོར་འཁྲུགས་ལས་ཚོང་པ་ལྔ་བརྒྱ་ཟུང་། །གནས་སྐབས་མཐར་ཐུག་འཇིགས་ལས་ཡོངས་སྐྱབས་ཤིང་། །དགྲ་བཅོམ་འབྲས་ལ་བཀོད་མཛད༴ ༦༡ །ཡུམ་གྱི་དོན་དུ་སྐབས་གསུམ་ཚལ་གཤེགས་ཏེ། །བཅུད་ལྡན་གྲངས་མེད་སྨིན་ནས་མི་ཡུལ་དུ། །ལྷས་སྤྲུལ་སྐས་ལ་རྫུ་འཕྲུལ་མཐུས་གཤེགས་ནས། །འགྲོ་མང་སྨིན་གྲོལ་མཛད་ལ༴ ༦༢ །མུ་སྟེགས་བྱེད་ཀྱི་ངལ་བ་བརྒྱ་ཕྲག་གིས། །ལོག་སྤྱོད་མཐུ་ཡིས་བཀག་ཀྱང་ལྷ་ཡི་ལྷ། །བཟང་བྱེད་གདུལ་བྱའི་ཞིང་ལ་མངོན་གཤེགས་པས། །ལུག་སོགས་སྐྱེ་བོ་གྲངས་མེད་གྲོལ་ཕྱག་འཚལ། ༦༣ །མེ་དཔུང་མཚོར་བསྒྱུར་ཆུ་སྐྱེས་རྐང་རྟེན་ལ། །ནུས་པའི་མཐུས་གཤེགས་དུག་གསུམ་འཆིང་བྲལ་བའི། །བདེན་བརྗོད་ངོ་མཚར་ལམ་གོལ་དཔལ་སྦེད་ཅན། །མི་ལྡོག་དད་ལ་སྦྱར་མཛད་ལ་ཕྱག་འཚལ། ༦༤། ས་འདིར་སྐབས་གསུམ་པ་ཡི་དཔལ་འབྱོར་དག །སྔོན་མེད་མགྲོན་དུ་འགུགས་པའི་ཆོ་ག་མཁན། །མེ་ལས་སྐྱེས་གང་ཚངས་སྤྱོད་བརྟུལ་ཞུགས་ཀྱིས། །དགྲ་བཅོམ་འབྲས་བུར་སྦྱོར་མཛད༴ ༦༥ །བུད་མེད་རྣམས་ཀྱི་མངལ་ན་གནས་པའི་ལུས། །མཐའ་དག་འཇོམས་པ་མི་བསྲུན་ཤ་ཟ་མོ། །འཕྲོག་མ་མ་སྨད་བདེན་གསུང་ཚིག་གཅིག་གིས། །བསླབ་པའི་གནས་ལ་བཀོད་མཛད༴ ༦༦ །ས་བདག་སུམ་ཁྲི་དྲུག་སྟོང་གཙུག་ནོར་གྱི། །འོད་ཀྱིས་རྐང་རྟེན་མཛེས་བྱས་ཀ་པི་ལ། །རྨད་བྱུང་ཆོ་འཕྲུལ་མཐུ་ཡིས་བཏུལ་བྱས་ནས། །འཕགས་པའི་ས་ལ་བཞག་མཛད་ལ་ཕྱག་འཚལ། ༦༧ །ལྷ་ཡིས་རབ་བསྐུལ་དྲང་སྲོང་ལྔ་བརྒྱ་དང་། །དབྱིག་གི་གདངས་ཅན་ཁྱིམ་བདག་ནོར་བཟང་བཅས། །གང་གསུང་བདུད་རྩིའི་ཆར་གྱིས་བརླན་པ་ཡིས། །བདེ་ལེགས་འབྲས་བཟང་སྨིན་ལ༴ ༦༨ །གདངས་ཅན་དད་བསོད་དུ་ཀཱུ་ལ་ཡི་རྩེར། །སྟོན་མཆོག་འཁོར་བཅས་ཞབས་སེན་མངོན་མཛེས་པས། །ཀ་ཤམྦྷི་རྣམས་སྲིད་པའི་འཇིགས་བྲལ་བའི། །དགའ་སྟོན་རྒྱལ་མཚན་བསྒྲེངས་ལ༴ ༦༩ །ཐུབ་གསུང་རབ་སྙན་དབྱར་རྔའི་སྒྲ་ཐོས་པས། །རབ་ཏུ་དགའ་བའི་རྨ་བྱ་མུ་ཏིག་ཅན། །སྤྲིང་ཡིག་གློག་ཕྲེང་གཡོ་བའི་ཟློས་གར་གྱིས། །ཟག་མེད་དགའ་བདེས་མྱོས་ལ༴ ༧༠ །མ་ག་དྷཱ་བཟང་དད་པའི་མཆོད་རྫས་ཕྲེང་། །གུས་པའི་སེམས་ལྡན་བཞིན་དུ་ཉེར་ལྷགས་ཚེ། །སྣ་ཚོགས་རྫུ་འཕྲུལ་མཐུ་ཡིས་མངོན་གཤེགས་ནས། །མཐའ་འཁོབ་འདུལ་བར་མཛད་ལ༴ ༧༡ །ཝ་སྐྱེས་སེང་གེར་བརྫུ་བ་ལྷས་བྱིན་གྱིས། །རྫུ་འཕྲུལ་བསྒྲུབས་ནས་ཟང་ཟིང་བསླུ་བྲིད་ཀྱིས། །དགེ་འདུན་འཁོར་ལོའི་དབྱེན་བཅོས་མཆོག་ཟུང་གིས། །ལེགས་པར་འདུམ་པར་མཛད་ལ༴ ༧༢ །སྡིག་པའི་གྲོགས་པོས་རབ་བསླུས་མ་སྐྱེས་དགྲས། །ལོག་སྤྱོད་རྩུབ་མོས་འཚོ་བ་མཐར་བྱས་པའི། །གཟུགས་ཅན་སྙིང་པོ་རྒྱལ་ལ་རབ་དད་རྒྱུས། །རྒྱལ་བ་ཁྱུ་མཆོག་གྱུར་ལ༴ ༧༣ །ལས་ཀྱི་རྒྱུ་བ་བསྟན་སླད་ཞབས་མཐེ་བོང་། ལྷས་བྱིན་གདུག་པའི་སྒྱོགས་རྡོའི་ཚལ་བུ་ཡིས། །རྨས་གང་སྟོབས་བཅུའི་བདེན་པ་གསོལ་ཙམ་གྱིས། །རྨ་ཡི་འཛག་པ་ཆད་ལ་ཕྱག༴ ༧༤ །སྡང་བའི་མཚོན་འཁོར་བསྐྱོད་ལ་མི་ངལ་བ། །གདུག་པ་ཀླུ་ཡི་རིགས་གྱུར་ནོར་སྐྱོང་ཆེ། །ཁྲོས་པས་རྟབ་པོར་རྒྱུག་གང་རབ་བཏུལ་ནས། །འཆི་མེད་གནས་སུ་གཏོང་མཛད་ལ་ཕྱག་འཚལ། ༧༥ །ལན་གཅིག་རྗེས་བརྩེའི་སྤྱན་གྱི་ཟུར་མིག་མདའ། །གང་ལ་ཆགས་པ་དེ་ཡི་འདུ་འཁྲུགས་དཔུང་། །མིང་གི་མཐར་བྱེད་སྨན་རྒྱལ་གཞོན་ནུས་གསོས། །བདེན་མཐོང་བདུད་རྩིས་ཕྱུག་ལ༴ ༧༦ །འཇིག་རྟེན་སྐྱོང་བཞིའི་ཀུན་དཀྲིས་དྲྭ་བའི་དཔུང་། །ཆེས་ཆེར་བཅད་ནས་བསྟན་པ་གཉེར་གཏད་ཅིང་། །རི་བོ་ཀེ་ཏའི་བུ་སོགས་དྲང་སྲོང་ཚོགས། །འབྲས་བུ་བཞི་ལ་འགོད་མཛད༴ ༧༧ །མི་སྟོང་དགུ་བརྒྱ་བསད་པའི་སོར་མོ་ཡི། །ཕྲེང་བས་ལུས་བརྒྱན་གཏུམ་པོ་མི་གདུང་བ། །ཞི་དུལ་དགེ་བའི་ཆར་གྱིས་རབ་བརླན་ཏེ། །རྣམ་གྲོལ་སྙེ་མ་འཁྲུངས་ལ༴ ༧༨ །ཕ་མ་གཉེན་གྲོགས་འབྱོར་པས་ཡོངས་བཏང་ཞིང་། །ཀུན་གྱིས་ཉེས་པར་བསྒྲགས་པའི་ལེགས་འོངས་ཀྱང་། །ཐུབ་གསུང་ཟེར་གྱིས་རེག་པའི་སྐད་ཅིག་མར། །རྣམ་གྲོལ་འདབ་སྟོང་བཞད་ལ༴ ༧༩ །ཀླུ་རྒྱལ་ཁྲོས་པའི་མཚོན་དང་མི་གཙང་ཆར། །ལེགས་འོང་བྱམས་པའི་གོ་ཆས་རབ་བཅིལ་ཞིང་། །མེ་ཁམས་ཏིང་འཛིན་མཐུ་ཡིས་བཏུལ་བྱས་ནས། །བྱིས་པ་གསོད་རི་བདེར་མཛད༴ ༨༠ །གྲོང་ཉུག་དབུལ་མོས་འབྲས་ཁུ་རྙོག་མ་ཡིས། །འོད་སྲུང་མཆོད་ལས་དགའ་ལྡན་གནས་སྐྱེས་རྒྱུས། །གཉན་ཡོད་རྒྱལ་པོས་ཐུབ་དབང་འོད་སྲུང་བཅས། །ཕུལ་བྱུང་སྲིད་ཞུས་མཆོད་ལ༴ ༨༡ །སེམས་བསྐྱེད་མཆོག་གི་ཆུ་གཏེར་ལས་འཐོན་པའི། །དབུལ་མོའི་སྒྲོན་མེ་འོད་དཀར་དབང་པོ་ཡིས། །མཆོད་ཚོགས་རྒྱུ་སྐར་ཟིལ་མནན་བྱང་ཆུབ་ཏུ། །ལུང་བསྟན་གསལ་རྒྱལ་ཁེངས་བསལ་མཛད་ཕྱག་འཚལ། ༨༢ །སྡིག་འབྲས་ནད་མཚོན་མུ་གེའི་ཚད་དབལ་གྱིས། །ཆེས་ཆེར་ཉམས་གྱུར་ས་བདག་མ་སྐྱེས་དགྲ། །བྱམས་ཆེན་ཐུགས་རྗེའི་གྲིབ་བསིལ་ལ་བརྟེན་པས། །ཕན་བདེའི་དཔྱིད་དཔལ་རྒྱས་ལ་ཕྱག་འཚལ་ལོ། ༨༣ །གྲོགས་ངན་དུག་ཆུས་མྱོས་པའི་ལོག་སྤྱོད་ཚོགས། །བསམ་བཞིན་བསམ་བཞིན་མཆི་མའི་ཆར་རྒྱུན་བཅས། །མཐོལ་བཤགས་ཕུལ་ལ་སྟོན་པས་དབུགས་ཕྱུང་བས། །དད་པའི་རི་བོ་བརྟན་ལ༴ ༨༤ །སྡིག་འབྲས་ཚེ་འདིར་སྨིན་པའི་ལྷས་བྱིན་ནི། །རབ་འབར་དམྱལ་མེའི་དོང་དུ་ལྷུང་གྱུར་ཚེ། །སྙིང་ནས་སྐྱབས་སོང་སྟོན་པས་ལུང་བསྟན་ཕྲིན། །མཆོག་ཟུང་གཉིས་ཀྱིས་བསྐྱལ་ལ༴༨༥ །དཔལ་རྒྱས་ལྷ་ཀླུ་མི་ཡི་ཚོགས་བཅས་ཀྱིས། །ཕུལ་བྱུང་མཆོད་པའི་སྤྲིན་ཕུང་གཏིབས་པའི་དབུས། །བསོད་ནམས་བྱེ་བའི་རང་བཞིན་ཉིན་མོར་བྱེད། །ཡང་ཅན་གདུལ་བྱའི་མཁའ་ལ་གཤེགས་ཕྱག་འཚལ། ༨༦ །དེར་ནི་མི་མཐུན་ཡམས་ནད་མུན་པའི་དཔུང་། །མ་ལུས་མིང་གི་ལྷག་མ་ཉིད་བྱས་ནས། །ཕན་བདེའི་པད་ཚལ་ཆེས་ཆེར་རྒོད་པ་ཡི། །དགེ་མཚན་སྣང་བས་ཁྱབ་ལ༴ ༨༧ །མི་ཐི་ལར་བྱོན་ལྷ་ཆེན་སྐྱེས་རབས་གསུངས། །སཱ་ལའི་གྲོང་དུ་སྡིག་ཅན་སྤ་བཀོང་ཞིང་། །སྡིག་པ་ཅན་དུ་སྐུ་ཡི་སྟོབས་བསྟན་ནས། །གྱད་ཚོགས་སྨིན་པར་མཛད་ལ༴ ༨༨ །ནཻ་གྲོ་དྷ་ཡི་གྲོང་དང་ཀ་པི་ལ། །ཀུ་རུའི་ཡུལ་དང་བྱང་ཕྱོགས་ལྔ་ལེན་གྱི། །གྲོང་རྡལ་གླང་པོ་ཅན་དང་སྲུབ་སྣ་རུ། །འགྲོ་མང་སྨིན་གྲོལ་མཛད་ལ༴ ༨༩ །བྲམ་ཟེའི་གྲོང་བྱོན་མེ་ཡི་འཇིགས་པ་སྐྱབས། །ནག་པོའི་གྲོང་དུ་སངས་རྒྱས་གདན་བཞི་བསྟན། །གླང་ཆེན་སྟོབས་སོགས་གནོད་སྦྱིན་ཚོགས་བཏུལ་ཞིང་། །བསོད་ནམས་སྤྲིན་ཆེན་སྤེལ་ལ༴ ༩༠ །གསང་བའི་བདག་པོ་དང་བཅས་རྫུ་འཕྲུལ་གྱིས། །མཁའ་ལ་མངོན་གཤེགས་བྱང་ཕྱོགས་རྒྱུད་གནས་པའི། །མི་དང་མི་མིན་འགྲོ་བ་མཐའ་ཡས་པ། །བྱང་ཆུབ་གསུམ་ལ་བཀོད་མཛད༴ ༩༡ །བཅོམ་བརླག་ཏུ་བྱོན་གནོད་སྦྱིན་བོང་བུ་སོགས། །བཏུལ་ནས་ནོར་འཛིན་གཙུག་ལག་ཁང་གིས་བརྒྱན། །ཨོ་ཏ་ལ་བྱོན་འགྲོ་མང་སྨིན་བྱས་ནས། །དགྲ་མཐར་དབྱར་གནས་མཛད་ལ༴ ༩༢ །ལྔ་ལེན་ཡུལ་བྱོན་ལམ་དུ་དགའ་བོ་སོགས། །གནག་རྫི་ལྔ་བརྒྱའི་སྐྱེ་བའི་རྒྱུན་བཅད་ཅིང་། །གང་གཱའི་ངོགས་སུ་ངང་པ་རུ་སྦལ་ཉ། །ཡི་དྭགས་ལྔ་བརྒྱ་དྲངས་ལ༴ ༩༣ །ཐུག་པའི་བསྙེན་བཀུར་སྟོབས་པའི་བྲམ་ཟེ་བཀྲེན། །བདེན་མཐོང་ལོ་ཐོག་གསེར་སྨིན་དགེ་མཚན་གྱིས། །ཞིང་པ་ལྔ་བརྒྱ་ལ་སོགས་མཐའ་ཡས་འགྲོར། །ཐར་པའི་མྱུ་གུ་བསྐྱེད་ལ༴ ༩༥ །མ་དྲོས་མཚོ་དབུས་པདྨའི་གེ་སར་རྩེར། །མངོན་བརྗིད་ལས་ཀྱི་རྒྱུ་བ་ལུང་བསྟན་ཞིང་། །སྐུ་ཡི་གཉེན་གྱུར་ཤཱཀྱ་ལྷག་མ་རྣམས། །བདུད་རྩིས་གྲོལ་བར་མཛད་ལ་ཕྱག་འཚལ་ལོ། ༩༥ །བྲམ་ཟེ་གང་པོ་བྱང་ཆུབ་ལུང་བསྟན་ཞིང་། །བྱ་རྒོད་སྤུངས་རིར་མི་ཉམས་རྒྱུ་བདུན་གསུངས། །དམར་བུ་ཅན་བརྒྱུད་ཡངས་པ་ཅན་གཤེགས་ནས། །ཤ་བའི་ཚལ་དུ་བཞུགས་ལ༴ ༩༦ །བསོད་ནམས་རྒྱ་ཆེ་ནོར་ཅན་ཚོགས་བཅས་ཀྱིས། །གུས་པས་མཆོད་ཅིང་ལི་ཙ་བི་ཡི་ཚོགས། །བྱང་ཆུབ་གསུམ་དུ་ངེས་པར་མཛད་ནས་ནི། །སྐུ་ཚེའི་འདུ་བྱེད་བཏང་ལ༴ ༩༧ །རུ་ཏའི་གྲོང་སོགས་གྲོང་ཁྱེར་བརྒྱད་པོ་དག །རིམ་གྱིས་བརྒྱུད་ནས་མཐའ་ཡས་འགྲོ་རྒྱུད་ལ། །ཐར་པའི་ས་བོན་རྒྱ་ཆེར་བཞག་མཛད་ནས། །རྩྭ་ཅན་གྲོང་དུ་གཤེགས་ལ༴ ༩༨ །གནས་དེར་ཐ་མའི་གཟིམས་ཁྲིར་བཞུགས་ནས་ཀྱང་། །ལྷ་མིའི་གདུལ་བྱ་རྒྱ་མཚོ་སྨིན་མཛད་ཅིང་། །རྫུ་འཕྲུལ་མཐུ་ཡིས་རབ་དགའ་ལེགས་བཏུལ་ནས། །འཕགས་པའི་ས་ལ་བཀོད་མཛད༴ ༩༩ །གང་གསུང་འཕགས་ལམ་ཡན་ལག་བརྒྱད་ཀྱི་ཆུས། །རབ་བཟང་བློ་ཡི་དྲི་མ་ཀུན་བཀྲུས་པས། །སྐད་ཅིག་ཉིད་ལ་དགྲ་བཅོམ་མངོན་བྱས་ནས། །ཆོ་འཕྲུལ་དང་བཅས་མྱ་ངན་འདས་ཕྱག་འཚལ། ༡༠༠ །དེ་ལྟར་གདུལ་བྱ་རྒྱ་མཚོ་སྨིན་ཟིན་ནས། །ཡེ་ཤེས་ཉི་མ་ཀུན་མཁྱེན་ལྷ་ཡི་ལྷ། །བསམ་གཏན་བཞི་པའི་རབ་མཐའ་ལ་བརྟེན་ནས། །ཞི་བའི་དབྱིངས་སུ་གཟིམས་ལ་ཕྱག་འཚལ་ལོ། ༡༠༡། སྣ་ཚོགས་མཆོད་པའི་སྤྲིན་གྱི་ལྡིང་ཁང་དབུས། །འོད་སྲུང་ཆེན་པོས་བཏུད་མཐར་ཐུགས་ཀ་ནས། །རང་བྱུང་ཡེ་ཤེས་མེ་ཡི་རབ་བཞུས་ཏེ། །རིང་བསྲེལ་ཕུང་པོར་གཏམས་ལ་ཕྱག་འཚལ་ལོ། ༡༠༢།སྤྱན་ལྡན་དེ་ཡི་ཚེམས་དང་སྐུ་གདུང་ཚོགས། །ཆ་བརྒྱད་བགོས་པ་ལྷ་ཀླུ་མི་གསུམ་གྱིས། །སོ་སོར་མཆོད་པའི་རྟེན་དུ་རབ་བཟུང་ནས། །བསོད་ནམས་རྒྱ་ཆེན་བསྐྱེད་ལ་ཕྱག་འཚལ་ལོ། ༡༠༣། ནེ་གྲོའི་ཕུག་ཏུ་ལྷ་ཡིས་འཕྱ་བའི་སྐྱོན། །བསལ་དང་བསྟན་མཆོད་ཡུན་དུ་གནས་བྱའི་ཕྱིར། །འོད་སྲུང་ཀུན་དགའ་ཉེ་བར་འཁོར་སོགས་ཀྱིས། །བཀའ་ཡིིས་བསྡུ་བ་མཛད་ལ་ཕྱག་འཚལ་ལོ། ༡༠༤། གནས་བརྟན་འོད་སྲུང་ཆེན་པོ་ཀུན་དགའ་བོ། །ཤཱ་ནཱའི་གོས་དང་ཉེར་སྦས་དྷི་ཏི་ཀ །ནག་པོ་ལེགས་མཐོང་ཆེན་པོ་ལ་སོགས་ཀྱིས། །བསྟན་པ་རིན་ཆེན་བསྐྱངས་ལ་ཕྱག་འཚལ་ལོ། ༡༠༥། དེ་ལྟར་མཚུངས་མེད་ཐུབ་པའི་མཛད་པའི་ཚོགས། །དད་པའི་ངག་གིས་ཅུང་ཟད་བསྔགས་པའི་དགེས། །འགྲོ་རྣམས་སྲིད་པའི་དུབ་བ་མྱུར་སེལ་ནས། །རྣམ་མཁྱེན་ཐར་པའི་གྲོང་དུ་ངལ་གསོ་ཤོག ༡༠༧། གཡེངས་པའི་རང་བཞིན་པད་རྣམ་རྨོངས་པ་ཡང་། །ཚེ་རབས་ཕྲེང་བར་དལ་བའི་རྟེན་རྙེད་ཅིང་། །བསླབ་གསུམ་ནོར་བུའི་མཛོད་ཀྱིས་ལེགས་འབྱོར་ནས། །ཐུབ་པའི་བསྟན་ལ་བྱ་བ་བྱེད་པར་ཤོག ༡༠༨། བཀྲ་ཤིས་འགྲོ་བསོད་ཡངས་པའི་ནམ་མཁའ་ལ། །རྒྱལ་བའི་ཕྲིན་ལས་འོད་སྟོང་རྟག་འཆར་བས། །ཕན་བདེའི་སྣང་བ་གསར་པས་ས་གསུམ་ཁྱོན། །ཀུན་ཏུ་ཁྱབ་པའི་དགེ་མཚན་རྒྱས་གྱུར་ཅིག། །།