བདག་ཅག་གི་སྟོན་པའི་ཡོན་ཏན་རྗེས་དྲན་གྱིས་བསྟོད་པ་ངོ་མཚར་ནོར་བུའི་དོ་ཤལ།

༄༅། །བདག་ཅག་གི་སྟོན་པའི་ཡོན་ཏན་རྗེས་དྲན་གྱིས་བསྟོད་པ་ངོ་མཚར་ནོར་བུའི་དོ་ཤལ་ཞེས་བྱ་བ་བཞུགས་སོ།། སྐལ་བཟང་རྣམ་འདྲེན་ལུས་པ་མེད་པ་ཡི། །ཐུགས་བསྐྱེད་བཟོད་པའི་གོ་ཆ་གཅིག་པུས་བགོས། །གདུལ་དཀའི་ཞིང་འདི་ཡོངས་བཟུང་ཤཱཀྱའི་ཏོག །མཚན་ཐོས་ཙམ་གྱིས་གྲོལ་བ་སྟེར་ལ་འདུད། ༡ །གང་གི་རྗེས་འཇུག་མཁས་པ་སྔོན་བྱོན་རྣམས། །རྒྱུ་མཚན་ཤེས་པས་བསྔགས་བརྗོད་མུ་ཏིག་ཕྲེང་། །མགུར་ན་སྦ་བར་བྱས་པའི་ལད་མོ་རུ། །ངོ་མཚར་ནོར་བུའི་དོ་ཤལ་འདིར་ཡང་སྤྲོས། ༢ །མདོ་རྒྱུད་བསྟན་བཅོས་ཚད་མའི་ལུས་རྩལ་རྫོགས། །གངས་ཁྲོད་གནས་པའི་གདོང་ལྔ་མིན་ལགས་གྲང་། །ཚོགས་ཕྱིར་རིག་པའི་གད་རྒྱངས་གསང་མཐོ་རུ། །སྒྲོག་འདི་སེང་གེའི་ཕྲུ་གུ་རང་ཚུལ་ཡིན། ༣ །སྤངས་རྟོགས་ཡོན་ཏན་ཆས་གང་བདེ་བར་གཤེགས། །གཟོད་མའི་དུས་ནས་རྣམ་གྲོལ་མཆོག་བརྙེས་ནས། །བདུད་རྩིའི་བགོ་སྐལ་འགྲོ་ལ་ཡོངས་བསྩལ་ཀྱང་། །ཞིང་འདིར་ཡང་འཚང་རྒྱ་བའི་ཚུལ་ཡང་སྟོན། ༤། བསྟན་ལས་ཕྱིར་ཕྱོགས་ཏརྐའི་སྟོན་སྡེ་ཡིས། །མི་མཇེད་འཇིག་རྟེན་མོག་པོར་བྱས་པའི་ཚེ། །དམ་པ་ཏོག་དཀར་ཐུགས་བསྐྱེད་ཆུ་ཁུར་ཕྲེང་། །དགའ་བ་བརྒྱ་ལྡན་གྲོང་ན་དལ་གྱིས་བྲེས། ༥།མ་ཕམ་མགོན་པོའི་དབུ་ལ་ཅོད་པཎ་ཆེ། །བཅིངས་དང་ཆབས་ཅིག་རྒྱལ་ཚབ་མངའ་དབང་བསྐུར། །རིང་མིན་རྣམ་གྲོལ་བརྙེས་པའི་དབུགས་དབྱུང་བཅས། །གཙང་མ་རིས་ཀུན་ཞི་བདེའི་དཔལ་ལ་སྦྱར། ༦ །རྣམ་ལྔའི་གཟིགས་པ་རབ་བཅས་ཟས་གཙང་ཁབ། །སྒྱུ་འཕྲུལ་ལྷ་མོས་གཙང་སྦྲ་ལྷུར་ལེན་དུས། །གངས་རིའི་དུམ་བུ་འགྲོ་ཤེས་རྗེས་ཞུགས་པ། །ཐལ་དཀར་མཆེ་དྲུག་རྣམ་ཆས་ལྷུམས་སུ་ཞུགས། ༧ །དགུ་ཟླའི་གྲངས་དང་ཕྱོགས་ཞག་གྲོལ་བའི་མོད། །དཀུ་གཡས་རྩིབ་མའི་སྒོ་འཕར་བྱེ་བ་ནས། །གཞོན་ནུ་དོན་གྲུབ་ཤར་རིའི་ཕྲག་གོང་དུ། །ཉིན་མོར་བྱེད་པ་འཆར་བཞིན་འཁྲུངས་པར་གྱུར། ༨ །མུན་པའི་ཕྲེང་བ་ཡོངས་ནུབ་དགེ་མཚན་གསར། །ཕྱོགས་བཅུའི་འཇིག་རྟེན་འོད་ཀྱིས་འགེངས་བཞིན་དུ། །བཙས་མ་ཐག་པར་ཞབས་མཐིལ་སར་བཀོད་ཆར། །ཉེས་སྐྱོན་དྲི་མས་མ་གོས་པད་འབུམ་བརྡལ། ༩ །སྲིད་ན་ཆེ་དགུས་དར་དཀར་འདོ་ལི་ལ། །བཏེག་ཅིང་ཡན་ལག་བརྒྱད་ལྡན་ཁྲུས་ཆབ་སྦྲེངས། །གནས་གཙང་ལྷ་བུས་གདུགས་དཀར་བསིལ་གཡབ་གཡོབ། །མི་མཆོག་དམ་པར་བསྔགས་པའི་གླིང་བུའང་བསྒྱུར། ༡༠། བྲམ་ཟེ་མཚན་བརྟག་མཁན་པོ་དད་པའི་མིག །དགའ་བའི་མཆི་མས་ཡང་ཡང་བརླན་བཞིན་དུ། །ལོ་ཀའི་ཁམས་སུ་རྒྱལ་འཕགས་བྱོན་སྨྲ་ཡང་། །གང་ཡིན་མ་འཚལ་འཕྱང་མོ་ཉུག་ཏུ་གྱུར། ༡༡། དེ་ཚེ་དེ་དུས་བརྟན་དང་གཡོ་བའི་ཁོངས། །སྲིད་ཞིའི་དགེ་མཚན་དཔལ་ཡོན་སྲིད་དོ་ཅོག །བྱེད་པོས་གཅིག་ཏུ་བསླན་འདྲའི་གྲགས་འབར་བ། །རྒྱལ་བུ་དོན་གྲུབ་བསོད་ནམས་མཐུ་ལས་སོན། ༡༢ །པང་དུ་བླངས་དང་འོ་འཛིན་བསྣུན་པ་སོགས། །མ་མ་སོ་གཉིས་བསྐྱེད་བསྲིངས་དེ་མ་འདྲོག །རྫིང་ན་གནས་པའི་པདྨོ་ཇི་ལྟ་བར། །ལང་ཚོའི་དཔལ་ནི་ཉིན་རེ་བཞིན་དུ་འཕེལ། ༡༣། སྒྱུ་རྩལ་སྙེམས་འཆང་ཤཱཀྱ་གཞོན་ནུའི་ཚོགས། །དྲེགས་ཅན་གནམ་རུ་སྟོང་གི་རྒྱུད་ནས་བཀུག །སྒྲོ་ལྡན་སྐྱེན་པོའི་མཐེབ་རྩལ་ལག་གིས་བླན། །རྒྱལ་བའི་རུ་མཚོན་བདག་ཉིད་གཅིག་པུས་བསྒྲེངས། ༡༤ །གཞན་ཡང་རྒྱལ་རིགས་ལམ་ལ་མི་གནས་པ། །ཆོས་བརྒྱད་དོན་དུ་གཉེར་བའི་ལག་ལྡན་སྟོང་། །སྤྱི་བོར་ངལ་གསོ་ཐོབ་པའི་འཕྲུལ་ལྡན་དེས། །ཁེངས་པའི་རི་བོ་དུ་མ་ས་ལ་བསྙིལ། ༡༥ །གཞན་གྱི་ལོག་རྟོག་བཟློས་སོགས་དགོས་པ་འགའ། །གཟིགས་ནས་འཇིག་རྟེན་མཐུན་འཇུག་སྤྱོད་པ་མཛད། །ས་མཚོ་གྲགས་འཛིན་རི་དྭགས་མིག་ཅན་སོགས། །བཙུན་མོ་སུམ་སྟོང་དྲུག་ཁྲི་ཁབ་ཏུ་བཞེས། ༡༦། མ་བྲིས་སྨིན་ལེགས་ཡིད་ཀྱི་ཆོམ་རྐུན་མོ། །གྲགས་པ་འཛིན་མར་དགྱེས་རོལ་རིགས་ཀྱི་སྲས། །སྒྲ་གཅན་ཟིན་བསྐྲུན་སྲིད་པའི་ཕྲེང་རྒྱུད་ཆད། །ཉེར་དགུའི་བར་དུ་ཐབས་མཁས་རྒྱལ་སྲིད་བསྐྱངས། ༡༧།སྔོན་དུས་ཐུགས་བསྐྱེད་ས་བོན་བཏབ་པའི་ཕྱིར། །རྩོད་ལྡན་འཛིན་མར་བྱང་ཆུབ་སེམས་གཉིས་ཀྱི། །མྱུ་གུ་གསར་སྐྱེས་འཁོར་བའི་སྐྱོན་དང་བྲལ། །ཐར་གྲོལ་འབྲས་བཟང་སྨིན་ལ་རིངས་པའི་ཆར། ༡༨། རྒ་བས་ལུས་གདུང་ནད་ཀྱིས་ཉམ་ཐག་ཅིང་། །སྲོག་སོང་ཕུང་པོ་སྨྲིག་འཛིན་ཞི་དུལ་ཅན། །གཟིགས་པའི་རྐྱེན་གྱིས་འཁོར་བར་ཡིད་དབྱུང་དང་། །ཐར་པར་སྤྲོ་བ་འགྲན་པ་བཞིན་དུ་གྱུར། ༡༩ །བྱང་ཆུབ་ལམ་ལ་གཤེགས་སུ་མི་སྟེར་བའི། །སྒོ་སྲུང་གྱད་དམག་བར་མེད་བསྐོར་གྱུར་ཀྱང་། །ཅང་ཤེས་བསྔགས་ལྡན་ཆིབས་པའི་རྐང་ལག་བཞི། །རྒྱལ་ཆེན་སྡེ་བཞིས་བཏེགས་ནས་མཁའ་ལམ་བསྙེགས། ༢༠ །སྐྱེ་བོས་རིང་བཏང་ཉམས་དགའ་སར་གཞོལ་ཚེ། །འདུན་པ་རྟར་བཅས་སླར་ལ་ལྡོག་ནས་སུ། །སྟོབས་འབྱོར་ལོངས་སྤྱོད་མཆིལ་མའི་ཐལ་བ་ལྟར། །བོར་ཞིང་ཕྱག་དར་ཁྲོད་པའི་བགོ་བ་བླངས། ༢༡ །དབུ་སྐྲ་མི་གཤོར་སྟང་ཟིལ་འོད་ལ་འཚེར། །མཁའ་ལྟར་སྔོ་བའི་རལ་གྲི་བླངས་ནས་བྲེགས། །རྣམ་དག་པུ་རིའི་དྲུང་དུ་རབ་བྱུང་ཞིང་། །རང་ལ་རང་གིས་བསྙེན་པར་རྫོགས་དེ་མཚར། ༢༢ །ནཻརཉྫ་ནའི་ཀླུང་ངོགས་ལོ་དྲུག་ཏུ། །མི་གཡོའི་དམ་བཅའ་བླངས་ནས་དཀའ་བ་སྤྱད། །དགེ་སྦྱོང་ཆོས་བཞི་ལྡན་པས་སྲིད་རྩེ་ཡི། །བསམ་གཏན་བཞི་པོའི་ཏིང་འཛིན་མངོན་དུ་བསྒྲུབས། ༢༣ །དཀའ་ཐུབ་ཁོ་ནས་གྲོལ་བའི་མཐའ་འགེགས་ཕྱིར། །ཁྱིམ་བདག་ལེགས་སྐྱེས་བུ་མོས་ཞོ་སྟོབ་པ། །གསོལ་བའི་མོད་ལ་སྐུ་ལུས་གསེར་སྦྱངས་ཀྱི། །གཏན་པ་ཕྱིས་བཞིན་དག་པའི་རང་ཚུལ་ངོམ། ༢༤ །མཚན་གྱི་མེ་ཏོག་རྒྱས་ཤིང་དག་པ་ལ། །དཔེ་བྱད་བཟང་པོའི་འབྲུ་ཆགས་མཛེས་པའི་སྐུ། །ས་ཆེན་རྣམ་དྲུག་གཡོ་བའི་གོམ་སྟབས་ཀྱིས། །བྱང་ཆུབ་ལྗོན་པའི་ཤིང་དྲུང་བསྙེགས་པར་ཆས། ༢༥ །རྨ་བྱའི་མགྲིན་པའི་སྤུ་ལྟར་ཡིད་འོང་རྩྭ། །བཀྲ་ཤིས་ལས་བླངས་འདིང་བའི་ཉེར་བ སྡོགས་བཅས། །བསྐལ་པ་སྟོངས་ཀྱང་མི་གཞིག་རྡོ་རྗེའི་གདན། །མནན་པའི་མོད་ལ་སྲིད་ཞིའི་བླ་མར་གྱུར། ༢༦ །སྲོད་དུས་མ་རིག་གཉིད་ཡུར་སྡིག་ཏོའི་ཚོགས། །སྦྲོན་ཕྱིར་བདུད་ཀྱི་དཀྱིལ་འཁོར་སྣང་བའི་འོད། །བཀྱེས་མ་ཐག་པར་བྱེ་བ་ཁྲག་ཁྲིག་དཔུང་། །མལ་ནས་ལྡང་ཞིང་ཞེ་སྡང་བ་སྤུ་གཟིངས། ༢༧ །དེ་ལ་སྨན་སླད་བྱམས་པའི་ཏིང་འཛིན་བརྟན། །སྙིང་རྗེའི་གོ་ཆ་བགོས་པའི་བླ་གོས་ལ། །མེ་ཏོག་མདའ་ཅན་མཚོན་གྱིས་ཕིག་མ་གྱུར། །བསྣུན་པ་སྟེར་བར་མེ་ཏོག་དགའ་ཆར་རྩེན། ༢༨ །ལག་པ་བསྒྲེངས་པའི་མཛུབ་མོ་ཆད་གྱུར་ཀྱང་། །མི་སྙན་ངག་གིས་འོ་དོད་བོས་པའི་ཚེ། །འཕགས་ཆེན་བདེན་དཔང་ཚད་མ་ས་ལྷས་མཛད། །བདུད་སྡེ་དཔུང་བཅས་ཡི་མུག་ག་ཆད་དོ། ༢༩ །ཨེ་མ་དགེ་སྦྱོང་ཁྱོད་ཀྱི་རྡོ་རྗེའི་སྐུར། །ཡིད་སྲུབ་མཚོན་གྱིས་ཚུགས་པ་མི་སྲིད་ཀྱང་། །ཕྱག་དར་ཁྲོད་བླངས་བླ་གོས་རྐྱང་གཅིག་འདི། །རྩུབ་མོའི་རེག་པས་མ་རལ་ངོ་མཚར་ཆེ། ༣༠། ནམ་གུང་རྡོ་རྗེ་ལྟ་བུའི་ཏིང་འཛིན་ལ། །མཉམ་པར་བཞག་ཚེ་ཤེས་སྒྲིབ་བག་ཉལ་སྦྱངས། །ལམ་ལྔའི་མངོན་རྟོག་རྒྱུད་ལ་བསྐྱེད་ཚུལ་སོགས། །གདུལ་བྱའི་ངོར་བསྟུན་རྣམ་འཕྲུལ་བསམ་མི་ཁྱབ། ༣༡ །ཐོ་རེངས་རྣམ་ཐར་སྒོ་གསུམ་ལྡང་འཇུག་གིས། །རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས། །ཕྱོགས་བཅུའི་རྒྱལ་བས་མགྲིན་ག ཅིག་མངའ་དབང་གསོལ། །རྡོ་རྗེ་གདན་པ་མངོན་རྫོགས་རྒྱལ་པོར་གྱུར། ༣༢ །སྐྱིལ་ཀྲུང་གཅིག་གིས་ཏཱ་ལ་བདུན་སྲིད་མཁར། །མདུད་པ་བོར་ཞིང་མི་བསྙེངས་སེང་གེའི་སྒྲས། །ལམ་གྱི་རྒྱུན་ཆད་བྲལ་འབྲས་གཞི་ལ་རྫོགས། །རང་བྱུང་སངས་རྒྱས་ཞེས་སོགས་ཞལ་གྱིས་འཆེས། ༣༣། སྲིད་ན་ཆེས་མཐོ་མིག་སྟོང་རྣ་བརྒྱད་པ། །དུ་མའི་འཁོར་བསྐོར་སྐྱེ་ལྔའི་སྒྲ་ཡིས་བསྐུལ། །གསེར་སྦྱངས་རྩིབས་སྟོང་བརྡལ་ནས་ཆོས་གསུང་ཞུས། །ཅང་མི་གསུང་བའི་ལན་གྱིས་གནང་བའང་བྱིན། །མཛོད་སྤུ་གཡས་འཁྱིལ་དུང་ལྟར་དཀར་བ་ལས། །འོད་ཟེར་གྲངས་མེད་བཀྱེ་བས་གདུལ་འགྲོར་གཟིགས། །བདུན་ཕྲག་བདུན་མཐར་ཚངས་དབྱངས་ཆོས་སྒོ་གྲོལ། །ཐོག་མར་དོན་གཉེར་མགྲོན་པོ་ཤིས་པར་མཛད། ༣༥ །ཝཱ་རཱ་ཎ་སཱིར་ཁྱུ་མཆོག་རླབས་པོ་ཆེའི། །གནས་སུ་དམ་བཅས་མི་བསྙེངས་སེང་གེའི་སྒྲས། །འཁོར་གྱི་ཐོག་མ་ལྔ་སྡེ་བཟང་པོ་ལ། །བདེན་བཞིའི་ཆོས་ཀྱི་འཁོར་ལོ་ཐོག་མར་བསྐོར། ༣༦ །བཞི་བཞིར་ཕྱེས་ཤིང་ཆོས་དང་གང་ཟག་གི། །བདག་མེད་ཕྱེད་དང་གཉིས་རྟོགས་ཉན་རང་རྣམས། །ཟུང་བཞི་ཡ་བརྒྱད་འབྲས་བུ་མངོན་དུ་གྱུར། །ཡིད་བཞིན་བདེ་བ་མཆོག་གི་ས་ལ་སྦྱར། ༣༧ །ཐེག་དམན་དགྲ་བཅོམ་ས་ལས་རིང་སོན་པར། །ལམ་ལྔ་ས་བཅུའི་མངོན་རྟོགས་ངོམས་པའི་ཆོས། །འཕགས་ཆེན་རྒྱལ་བའི་མྱུག་རྣམས་བསྐྲུན་པའི་གཞི། །ཆེན་པོ་བདུན་ལྡན་བླ་ན་མེད་པའི་ཐེག ༣༨ །གནས་དུས་ཕུན་ཚོགས་བྱ་རྒོད་ཕུང་པོའི་རིར། །སྟོན་པ་ཕུན་ཚོགས་རྣམ་འདྲེན་བཞི་པ་ཡིས། །ཞུ་པོ་ཕུན་ཚོགས་རྒྱལ་སྲས་འཁོར་རྣམས་ལ། །དམ་ཆོས་ཕུན་ཚོགས་བཀའ་འཁོར་བར་པ་བསྐོར། ༣༩ །གཟུགས་ནས་རྣམ་མཁྱེན་བར་གྱི་ཆོས་ཐམས་ཅད། །སྟོང་ཞིང་བདག་མེད་མཐའ་བྲལ་དབུ་མ་ཡི། །ལམ་དུའང་མི་གནས་སྲིད་ཞིའི་མཐའ་ལས་འདས། །སྤྲོས་ཀུན་ཉེ་བར་ཞི་བའི་བདེན་དོན་འདོམས། ༤༠ །མཚན་ཉིད་གསུམ་གྱིས་གཏན་ལ་ཕབ་པ་ཡི། །རྣམ་རིག་ལས་འདས་ངེས་དོན་དབུ་མ་ཆེ། །ཡོངས་སྨིན་གདུལ་བྱར་ལེགས་པར་རྣམ་ཕྱེ་བའི། །ངེས་དོན་མཐར་ཐུག་འཁོར་ལོ་གསུམ་པའང་བསྐོར། ༤༡། དོན་དམ་འདུས་མ་བྱས་པ་ཆོས་ཀྱི་སྐུ། །གཙང་རྟག་བདེ་བ་བདག་དམ་ཕ་རོལ་ཕྱིན། །དུས་གསུམ་རྒྱལ་བའི་བགྲོད་པ་གཅིག་པུའི་ལམ། །བསྟན་པས་བྱང་ཆོས་སོ་བདུན་མངོན་རྟོགས་རྫོགས། ༤༢། གཙང་མའི་ལུས་རྟེན་བསླབ་གསུམ་ཁྲིམས་ཀྱིས་བསྡམས། །ཚད་མེད་བཞི་དང་ཕར་ཕྱིན་དྲུག་ལྡན་སློབ། །རྗེས་ཐོབ་དམིགས་མེད་སྙིང་རྗེས་རྩིས་ཟིན་པས། །གཟུགས་སྐུའི་ས་བོན་ཐེབས་འདིའང་ཁྱོད་ཀྱིས་བསྟན། ༤༣ །ཆོས་ཀྱི་སྡོམ་བཞི་དྲི་མ་མེད་པའི་བཀས། །འདུལ་བ་ལ་སྣང་མདོ་སྡེའི་དོན་ལ་འཇུག །རྒྱ་ཆེན་མངོན་པའི་བཀའ་དང་མི་འགལ་བ། །བྱུང་ན་རྗེས་འཇུག་ཡིད་ཆེས་གནས་སུ་གནང་། ༤༤། དབང་རབ་ཐུན་མིན་འཁོར་ལ་རྡོ་རྗེའི་ཐེག །བསྟན་ཀྱང་ཁྱབ་བརྡལ་ཉིད་དུ་གསུངས་པ་མེད། །དུག་ལྔ་སྤོང་བསྒྱུར་ལམ་བྱེད་ཁྱད་པར་གྱིས། །རྒྱལ་བའི་མདོ་སྔགས་གཞུང་ལམ་སོ་སོར་བཀྲལ། ༤༥ །འོན་ཀྱང་གནས་སྐབས་གདུལ་བྱ་དཀྲི་ཚུལ་ལས། །མཐར་ཐུག་དེ་བཞིན་ཉིད་དབྱིངས་རིགས་གཅིག་ཕྱིར། །ཐེག་པ་ཐ་དད་ཡོད་པར་མི་བཞེད་དེ། །བསམ་མི་ཁྱབ་པའི་ཡེ་ཤེས་ཀློང་དུ་གཅིག ༤༦ །མ་རིག་མུན་སེལ་ཐར་པའི་ལམ་སྟོན་མཆོག །རྒྱལ་བའི་ཉི་མ་ནུབ་རིར་གཞོལ་ཉེའི་ཚེ། །སྙན་སྒྲོགས་རབ་དགའ་ཀུན་རྒྱུ་རབ་བཟང་ཟུང་། །གདུལ་བྱའི་མཐར་གྱུར་བདེན་མཐོང་ས་ལ་སྦྱར། ༤༧ །མི་མཇེད་ཞིང་འདིར་གཟུགས་སྐུའི་འགྲོ་བའི་དོན། །རྫོགས་དང་ཆབས་ཅིག་སྲིད་པ་སྡིག་ཏོ་ཅན། །མྱ་ངན་འདའ་བསྐུལ་རེ་བ་དོན་ལྡན་ཕྱིར། །སྙིང་རྗེའི་གཞན་དབང་གྱུར་དེས་ཞལ་འཆེས་མཛད། ༤༨ །རྡོ་རྗེའི་སྐུ་ལ་ན་རྒ་འཆི་བ་ཡིས། །གོས་པ་མེད་ཀྱང་རྟག་ལྟ་སུན་འབྱིན་ཆེ། །འཚོ་བའི་འདུ་བྱེད་གཏོང་བའི་སྔ་ལོགས་སུ། །ཟླ་གསུམ་ཕྱིར་བསྲིངས་ཉི་བུར་སྐྱེངས་པའང་བྱིན། ༤༩། རྩྭ་ཅན་གྲོང་དུ་ཐ་མའི་གཟིམས་ཁྲི་ལ། །ཉེ་བར་ཕྱོགས་ཚེ་སྐུ་ཡི་སྟོད་གཡོགས་བསལ། །ཟག་མེད་ཕུང་པོར་ལྟོས་ཤིག་ཡང་ཡང་དུ། །མཐོང་དཀའ་ཨུ་དུམྦཱ་རའི་རྗེས་སུ་འགྲོ། ༥༠ །འདི་ལྟར་འདུས་བྱས་མཐའ་དག་འཇིག་པ་ཡི། །ཆོས་ཅན་ཉིད་ལས་གཞན་དུ་མ་སེམས་ཞེས། །གསུང་གི་ཐ་མས་བསྐུལ་ཏེ་མྱ་ངན་ལས། །འདས་པ་ཆེན་པོ་ཆོས་འཁོར་བསྐོར་བའི་མོད། །ཐུགས་རྗེའི་འོད་ཀྱི་སྣང་བས་སྟོང་གསུམ་གྱི། །འཇིག་རྟེན་ཕྱུར་བུར་བཀང་ལས་རིགས་དྲུག་གི། །གནས་ངན་ལེན་པའི་སྒྲིབ་པ་ཀུན་བསལ་ཀྱང་། །འཁོར་མཐའ་ཚད་དང་ཟད་དུ་མེད་པར་མཐོང་། ༥༢། དེ་ཚེ་ཡིད་ཅན་སྐྱེ་དགུ་རེ་ཞིག་ཏུ། །དྲན་པ་སྟོར་བས་ལྡེར་སོ་བཞིན་དུ་ལུས། །ས་འདི་རིར་བཅས་རླུང་གིས་གཡོ་བ་ཡི། །ལྗོན་ཤིང་ལྟ་བུར་བརྟན་པ་རིང་ནས་བྲལ། ༥༣ །ཀུན་གསལ་ལམ་ལས་གཙང་མ་རིས་ཀྱི་ལྷས། །དབང་པོའི་གཞུ་རིས་བྲིས་པའི་ལྡིང་ཁང་ནས། །མཆོད་རྫས་སུ་མ་ན་ཡི་ཆར་འབེབས་པས། །ཞིང་ཀུན་ཡོངས་བཀང་ངོ་མཚར་དཔྱིད་དུ་སོན། ༥༤ །ཆུ་བོ་དབྱིག་ལྡན་བརྒལ་བའི་ཕ་རོལ་ཏུ། །ཉེ་གནས་མཆོག་དང་གྱད་བུས་ཉེར་བསྡོགས་གཤམ། །སྐུ་གདུང་མཆོད་སྡོང་རས་ཟུང་ལྔ་བརྒྱས་བསྒྲིལ། །འབྲུ་མར་ཞུགས་ལ་བཞེན་པའི་དགོས་པ་གང་། ༥༥། རྒྱལ་པོའི་ཁབ་ནས་གནས་བརྟན་འོད་སྲུང་ལྷགས། །པུར་སྒྲོམ་ཞལ་ཕྱེ་གདུང་མཇལ་ཐོབ་པའི་མོད། །ཐུགས་ལས་མེ་འབར་རགས་པའི་སྐུ་ལུས་བསྲེགས། །བཀྲི་བྱེད་རས་ཟུང་ལས་པ་མ་གཟིགས་སམ། ༥༦ །སྲིད་པའི་ཁོངས་སུ་རིན་ཐང་སྤངས་པ་ཡི། །ཡུངས་འབྲུ་ལྟ་བུའི་རིང་བསྲེལ་མང་འཕེལ་བ། །ཆ་བརྒྱད་བསིལ་དེ་ལྷ་མིས་མཆོད་པར་ཐོབ། །ཆོས་སྐུའི་རྟེན་མཆོག་ཤུལ་དུ་བཞག་པས་འཚེངས། ༥༧ །འཇིག་རྟེན་གསུམ་མགོན་ཞི་བའི་དབྱིངས་མནལ་བ། །མ་བཟོད་གང་པོ་ལ་སོགས་ཉན་ཐོས་མཆོག །བརྒྱད་ཁྲིའི་འཁོར་བཅས་ལྷག་མེད་མྱང་འདས་སུ། །གཞོལ་འདི་རྒྱལ་བའི་བསྟན་ལ་རིགས་སམ་ཅི། ༥༨ །མི་བརྗེད་གཟུངས་ཐོབ་བློ་ཆེན་འོད་སྲུང་དང་། །ཞམ་རིང་ཀུན་དགའ་ཉེ་བར་འཁོར་སོགས་ཀྱིས། །དགེ་སློང་མང་བསྡུས་བཀའ་ཡི་བསྡུ་བ་མཛད། །དེང་ཡང་སྤྱོད་ཡོད་དྲིན་དུ་མི་ཆེའམ། ༥༩ །སྡེ་སྣོད་བསླབ་གསུམ་ཡན་ལག་བཅུ་གཉིས་ཀྱི། །ཆོས་དབྱངས་སྙན་འཁྲོལ་བསྟན་པའི་གཏད་རབ་བདུན། །རྒྱན་དྲུག་མཆོག་གཉིས་གྲགས་པ་སྲིད་རྩེར་འཕྲོ། །དབུས་འགྱུར་འཆང་བ་འོག་མིན་ཞིང་ལས་བརྒལ། ༦༠།སྒྱུ་འཕྲུལ་སྲས་པོའི་ཞབས་ཀྱིས་མ་བཅགས་རུང་། །གསུང་གི་འོད་ཟེར་འཕོག་པ་བོད་ཀྱི་ཡུལ། །མེས་དབོན་རྣམ་གསུམ་ཤིང་རྟས་བཀའ་བསྟན་དྲངས། །གངས་ཅན་ལྗོངས་ཞེས་བརྗོད་པ་དོན་དང་ལྡན། ༦༡ །རི་བཞིའི་མཐིལ་དུ་མཁན་སློབ་ཆོས་གསུམ་པོ། །མངོན་པར་གདན་འཛོམ་འཕགས་བོད་པཎ་ལོ་ཡིས། །དམ་ཆོས་བསྒྱུར་བཤད་ཉི་ཟླའི་འགྲོས་ལས་མྱུར། །རྒྱལ་བའི་ཕྲིན་ལས་མུ་མེད་སྲིད་མཐར་འཇུག ༦༢ །ཚངས་དང་དབང་སོགས་དྲེགས་ལྡན་ཆེ་དགུ་ཡི། །དབང་སྔོན་རལ་པའི་རྩེ་ལ་ཞབས་རྡུལ་ཡང་། །མཆོད་པར་འཐོབ་དཀའ་གང་གི་རིང་ལུགས་བཟང་། །འཛིན་འདི་མངོན་སུམ་ཡིན་གྱི་རྨི་ལམ་མིན། ༦༣ །ཚུལ་གནས་ཐོས་དང་བསམ་པའི་ཤེས་རབ་ཀྱིས། །བསྒོམ་བྱུང་ཡོན་ཏན་ཡར་ངོའི་ཟླ་ལ་འགྲན། །ས་ལམ་བྲལ་འབྲས་འོད་དཀར་གང་བ་རྫོགས། །མཁྱེན་གཉིས་ཟེར་གྱིས་འཁོར་བའི་མུན་པ་བཅིལ། ༦༤ །བསྟན་མཆོག་རིན་ཆེན་མི་འཕྲོག་དབང་གི་རྒྱལ། །མི་ནུབ་རྒྱལ་མཚན་རྩེ་མོར་མངོན་བཀོད་པས། །སྲིད་ཞི་ཟུང་སྦྱོར་གཏན་བདེའི་པདྨོ་བཀྲག །ཐར་པ་ཆེན་པོའི་གྲོང་ཁྱེར་མཛེས་པར་བྱས། ༦༥ །དེ་ལྟར་སྟོན་དང་དེས་བསྟན་ལུང་རྟོགས་ཆོས། །དེ་འཛིན་བྱེད་པོ་རིག་གྲོལ་བརྒྱད་ལྡན་པ། །མཆོག་གི་སྒྲ་འཇུག་རྣམས་ལ་ཡིད་རབ་དྭངས། །ལུས་དཔག་མེད་པར་སྤྲུལ་ནས་གུས་ཕྱག་བཙལ། ༦༦ །བདག་པོས་བཟུང་དང་མ་བཟུང་མཆོད་པའི་སྤྲིན། །ཇི་སྙེད་བློ་ཡིས་བླངས་ནས་ཕྱོགས་ཆ་བསླན། །རབ་འབྱམས་རྒྱ་མཚོའི་ཞིང་ཀུན་དོག་བགྱིད་པ། །རྒྱལ་བ་སྲས་བཅས་དགྱེས་པ་བསྐྱེད་ཕྱིར་སྟོབས། ༦༧ །རྣམ་འདྲེན་སྟོབས་བཅུ་མངའ་བའི་གཡར་ལམ་དུ། །སྒོ་གསུམ་དྲན་ཤེས་མི་བརྟན་རྨོངས་པ་བདག །བག་མེད་དབང་གྱུར་དཀར་མིན་ལས་བགྱིས་པ། །ཚེ་རབས་བསགས་པའི་བསྒྲིབ་དང་ལྷན་ཅིག་འཆག ༦༨ །དུས་གསུམ་གྲོལ་བ་སྟེར་རྣམས་བསམ་བཞིན་བྱོན། །མཛད་པ་བཅུ་གཉིས་སྒོ་ནས་འགྲོ་དོན་འཇུག །འཁོར་བ་མཐའ་ཅན་བྱེད་པ་ངོ་མཚར་ཆེ། །བསམ་གྱིན་རྗེས་སུ་ཡི་རངས་ལྷག་པར་འཕེལ། ༦༩། མགོན་པོ་འདས་དང་མ་བྱོན་ད་ལྟར་བཞུགས། །རྟག་པར་བཏང་སྙོམས་ལེ་ལོ་མ་མཛད་པར། །ཉོན་མོངས་འཇོམས་བྱེད་ཆོས་ཀྱི་འཁོར་ལོ་ཆེ། །གདུལ་བྱའི་སྐལ་བ་དང་འཚམས་བསྐོར་བར་བསྐུལ། ༧༠། ཐུགས་རྗེ་ཆེན་པོས་འཇིག་རྟེན་དུས་དྲུག་གཟིགས། །རྩོད་ལྡན་གདུལ་འགྲོ་ཡལ་བར་དོར་ཡང་བཟོད། །འཁོར་མཐའ་མ་སྟོང་བར་དུ་མྱ་ངན་ལས། །མི་འདའ་བཞུགས་པར་གསོལ་བ་ལྷང་ལྷང་འདེབས། ༧༡ །བདག་གིས་བསོད་ནམས་ཚོགས་ཕྱིར་བསྔགས་བརྗོད་ཀྱི། །འབད་འབྲས་མི་བསླུ་ཡེ་ཤེས་ཚོགས་ཆེན་རྫོགས། །སྐུ་གཉིས་འབྱོར་པས་འགྲོ་བའི་དོན་བགྱིད་སླད། །བླ་མེད་རྫོགས་པའི་བྱང་ཆུབ་ཕྱིར་ཡང་བསྔོ། ༧༢ །གནས་སྐབས་སུ་ཡང་ནག་པོའི་རྩ་ལག་གི། །བདག་འབྲས་མངོན་གྱུར་ཡིད་ཀྱི་བསྲུབས་ཤིང་དེའི། །བྱེད་ལས་རྩུབ་མོས་ཉམས་ཉེས་ཡངས་པའི་ཁྱོན། །བྱམས་པའི་རུ་མཚོན་གཅིག་གིས་སྲུང་གྱུར་ཅིག ༧༣། མཐར་ཐུག་ཐུབ་བསྟན་རྒྱ་མཚོའི་གོས་ཅན་གཞིར། །ཡོངས་ཁྱབ་གྲུབ་མཐའི་རང་ཚུལ་མ་འདྲེས་གཟུགས། །སྙིགས་ལྔའི་ཐིབ་བུས་མོག་པོར་བསྒྱུར་དེ་ལའང་། །བདེན་དཔང་ཚད་མའི་ཁྲུས་ཀྱི་རིལ་བ་སྒྲེངས། ༧༤ །ཡང་དག་ལམ་གྱི་བཤེས་བྲལ་དམུས་ལོང་ཚོགས། །དམན་ལམ་འཕྱན་པར་དགེ་བཅུའི་དམིགས་བུ་བརྟེན། །གཏན་བདེའི་ཞིང་སར་དབུགས་དབྱུང་ཚངས་གནས་བསྙེགས། །ཕར་ཕྱིན་དྲུག་གི་གོམ་སྟབས་མི་ལྷོད་ཤོག ༧༥། གསེར་སྦྱངས་གཏན་པ་ཕྱིས་འདྲའི་ལྷུན་པོ་ལ། །ཉི་འབུམ་གཟི་ཡིས་འཁྱུད་ལ་རྒྱལ་སྐུའི་འོད། །འཕོས་པས་ས་འོག་མུན་པའི་ཚོགས་ཀྱང་བཅོམ། །ཕན་བདེའི་འདབ་བརྒྱ་བཞད་པའི་བཀྲ་ཤིས་ཤོག །དེ་ལྟར་བདག་ཅག་གི་སྟོན་པའི་ཡོན་ཏན་རྗེས་དྲན་གྱི་བསྔགས་པ་ངོ་མཚར་ནོར་བུའི་དོ་ཤལ་ཞེས་བྱ་བ་འདིའང་རང་རེའི་མེས་པོ་གནས་ལྔ་རིགས་པའི་པཎྜི་ཏ་ཆེན་པོ་སྒྲ་དབྱངས་ཟླ་བ་འཆི་མེད་ལང་ཚོ་མཆོག་ཏུ་རྒྱས་པའི་སྡེའི་གསུངས་ལ་གཞིར་བྱས་ཏེ། ཤཱཀྱའི་དགེ་ཚུལ་འཇམ་དབྱངས་མཁས་གྲུབ་རྒྱ་མཚོའི་སྡེས་རང་གནས་ཞེ་ཆེན་བསྟན་གཉིས་དར་རྒྱས་གླིང་གི་གཟིམས་སྤྱིལ་འཆི་མེད་འོད་སྣང་དུ་སྦྱར་བ་འདིས་ཀྱང་རྒྱལ་ཁམས་ཐམས་ཅད་དུས་ཀྱི་འཁྲུག་པ་ཞི་ཞིང་རིས་མེད་རྒྱལ་བའི་བསྟན་པ་རིན་པོ་ཆེ་མི་ནུབ་ཡུན་དུ་དར་ཞིང་རྒྱས་ལ་བརྟན་པའི་རྒྱུར་གྱུར་ཅིག། །།