ཐུབ་དབང་ཆོ་འཕྲུལ་ཆེན་པོའི་ཚུལ་ལ་བསྔགས་པ་མི་འཇིགས་སེང་གེའི་ང་རོ།

༄༅། །ཐུབ་དབང་ཆོ་འཕྲུལ་ཆེན་པོའི་ཚུལ་ལ་བསྔགས་པ་མི་འཇིགས་སེང་གེའི་ང་རོ་བཞུགས། །ན་མཿསརྦཱ་ཛྙཱ་ཡ། སྟོབས་བཅུའི་མཚོན་ཆས་བདུད་བཞིའི་ཕྲུ་མ་མིང་མཐར་བྱས། །མི་འཇིགས་བཞི་ཡི་སེང་གེའི་སྒྲ་ཡིས་ས་གསུམ་ཁྱབ། །མ་འདྲེས་ཡོན་ཏན་མཁའ་བཞིན་མཚུངས་པ་མེད་པའི་སྐུ། །མཚན་དཔེའི་ཉི་མ་བརྒྱ་ཕྲག་རྟག་འབར་ཤཱཀྱའི་སྲས། །གང་གི་ཡོན་ཏན་མཁའ་དང་རབ་མཉམ་མཚོ་ཆེན་བཞིན། །ཤིན་ཏུ་ཟབ་གྱུར་བློ་ཆེན་གྱིས་ཀྱང་མཐོང་སྐར་གྱི། །ཉི་ཞུར་ཙམ་ལས་དཔོག་ནུས་མིན་ན་ཕལ་གྱིས་ཅི། །འོན་ཀྱང་དད་པའི་རྗེས་འབྲངས་ཆོ་འཕྲུལ་ཚུལ་ལ་བསྔགས། །ས་བདག་གསལ་རྒྱལ་གཙུག་ནོར་འོད་ཀྱི་པ་ཏྲ་ཡིས། །ཁྱོད་ཞབས་བསྙེན་ཚེ་ཚེམས་ཤིང་ལས་སྐྱེས་རྐང་འཐུང་དབང་། །དཔག་ཚད་ལྔ་བརྒྱར་ཁྱབ་གྱུར་སྐྱེ་བོ་ཚིམ་བྱེད་དཔལ། །འཆི་མེད་ལྗོན་པས་མཚོན་མིན་རང་ཉིད་དཔེ་ཟླར་བྱས། །ཨུ་དྲ་ཡཱ་ནའི་དད་བསོད་རྒྱལ་མཚན་རྩེ་མོ་རུ། །ཁྱོད་ཞབས་ནོར་བུའི་ཏོག་གིས་སྤ་ཚེ་གཡས་གཡོན་དུ། །རིན་ཆེན་རྡུལ་མང་བརྩེགས་པའི་ལྷུན་པོ་མཛེས་འབར་བས། །དགའ་བ་བརྒྱ་ལྡན་གྲོང་ཁྱེར་བྲིས་པའི་རི་མོར་བྱས། །ཤུཉྩ་ཡཱ་ནའི་ལེགས་བྱས་སྐྱ་རེངས་ཕོ་ཉ་ཡིས། །མི་མཆོག་ཉིན་བྱེད་མགྲོན་དུ་ཁུག་ཚེ་ཞབས་བསིལ་ཆབ། །རྫིང་བུར་ལེགས་འཁྲུངས་སྣ་ཚོགས་པདྨའི་འོད་ཟེར་འཕྲེང་། །དམར་པོ་མཆོག་གི་ཞིང་ཁམས་ས་འདིར་འཕོས་པ་བཞིན། །ཨིཎྜ་ཝ་ཎའི་བསོད་ནམས་ཟོང་གིས་ཁུག་པའི་ཚེ། །ཕྱོགས་བཞིར་ཡུར་བ་བརྒྱད་ལྡན་རིན་ཆེན་རྫིང་བུའི་སྒྲས། །ཐེག་ཆེན་ཆོས་དབྱངས་སྙན་པར་སྒྲོགས་པའི་དགེ་མཚན་དཔལ། །ཆ་ཙམ་མཚོན་མིན་འཆི་མེད་རྔ་སྒྲ་འཁུན་པར་ངེས། །བསོད་ནམས་བྱེ་བ་འབུམ་ལས་ལེགས་བསྐྲུན་གང་ཞལ་ལས། །ལེགས་འོངས་རྣམ་མང་འོད་ཀྱིས་རིག་པས་སྒྲིབ་པའི་མུན། །རབ་གཞིལ་ལུས་སེམས་བདེ་བས་ཁྱབ་པའི་ངོ་མཚར་གྱི། །དཔེར་འོས་སྲིད་ན་དབེན་པར་ཚངས་སྦྱིན་ལེགས་པར་རྟོགས། །གང་གི་མཐུ་ཡིས་འཁོར་གྱི་སེམས་ཅན་ཕལ་དག་ཀྱང་། །ཕན་ཚུན་སེམས་རྒྱུད་ལག་མཐིལ་རྫས་བཞིན་མངོན་གྱུར་ནས། །རབ་ཏུ་དགའ་བས་རྗེས་བསྔགས་སྨོན་པའི་འབྲས་བཟང་གིས། །ལི་ཙ་བི་རྣམས་སྲིད་པའི་འཆིང་ཐག་ཡུད་ཀྱིས་གྲོལ། །གང་དག་ཤཱཀྱའི་རིགས་སྐྱེས་འཁོར་གྱི་སྐྱེ་ཕལ་ཡང་། །རིན་ཆེན་བདུན་ལྡན་རྒྱལ་སྲིད་འབྱོར་པའི་ཁྱད་པར་གྱིས། །ལྕིད་ཀྱིས་ཡོངས་གནོན་ནོར་འཛིན་ཏི་མིར་བྱིང་དོགས་ནས། །ཁྱབ་འཇུག་ཕག་པའི་གཟུགས་ཀྱིས་བརྟེན་ལ་སོམ་ཉི་ཅི། །གང་ཞིག་སོར་རྩེའི་རྡུལ་ལ་དུས་མཐའི་ཐོར་རླུང་བཞིན། །གང་གི་མཐུ་ནི་དཔག་པར་ནུས་མིན་རྣམ་འཕྲུལ་ཆེས། །གང་དག་མུ་སྟེགས་ཝ་ཚོགས་ཕྱོགས་མཐར་འབྱེར་བྱེད་པ། །གང་ལ་བལྟ་ཕྱིར་བརྒྱ་བྱིན་མིག་སྟོང་སྤྲུལ་པར་ངེས། །མཚན་དཔེའི་འོད་ཟེར་སྟོང་གི་དྲྭ་བས་འཁྱུད་པའི་སྐུ། །སྔོན་མེད་གསེར་སྦྱངས་མཆོད་སྡོང་ཚངས་གནས་རྒྱན་གྱུར་ཚེ། །རིག་བྱེད་དྲན་པོས་གདོང་པ་བཞི་རུ་ལེགས་སྤྲུལ་ནས། །ཡང་ཡང་བལྟས་ཀྱང་ངོམས་པར་མ་གྱུར་ཨེ་མ་མཚར། །གང་ཞིག་སྲིད་རྩེར་ཁྱབ་པའི་སྐུ་ཡི་སྣང་བ་ཡིས། །ས་གསུམ་འཇིག་རྟེན་གསལ་བྱས་གསུང་གི་གསང་བ་ཆེས། །རྒྱལ་ཆེན་བཞི་སོགས་སྐྱེ་ཀུན་ཡོངས་སུ་སྨིན་མཛད་པའང་། །ཕྱོགས་གཅིག་གདུལ་བྱའི་ངོར་སྟེ་ཚད་གཟུང་སུ་ཡིས་ནུས། །ཡེ་ཤེས་སྐུ་ལས་ཟག་བཅས་གདོད་ལུས་མ་དམིགས་ཕྱིར། །འོད་ཀྱི་ཕུང་པོར་བཞུགས་ལ་ངོ་མཚར་མི་འཛིན་ཡང་། །བསོད་ནམས་བརྒྱ་ལས་གྲུབ་པའི་གང་སྐུ་མངོན་སུམ་དུ། །མཐོང་གྱུར་ཁྱིམ་བདག་ཟས་སྦྱིན་འདྲེན་བྱེད་བསྔགས་འོས་ཉིད། །ལྟེ་བའི་འོད་ཀྱིས་སྟོང་གསུམ་ཡོངས་ཁྱབ་པདྨའི་སྟེང་། །སངས་རྒྱས་རྣམས་བཞུགས་ཀུན་ཀྱང་དེ་སྙེད་སྟོན་བྱེད་མོད། །ཆོས་ཀྱི་དབྱིངས་སུ་ཐ་དད་གྲུབ་པ་རྡུལ་ཙམ་ཅི། །འོན་ཀྱང་ཁྱིམ་བདག་ཙིནྟའི་དལ་འབྱོར་འབྲས་ལྡན་བྱས། །མི་མཇེད་ཞིང་ཀུན་ཡོངས་ཁྱབ་འོད་མཆོག་ཉི་མ་ཡིས། །སྐྱེ་དགུའི་སྙིང་གི་མུན་སེལ་སྒྲིབ་གཉིས་བ་མོའི་ཚོགས། །ཅིག་ཅར་གཞོམ་པའི་དགའ་བ་འདི་མཚུངས་སླན་ཆད་དུ། །ཁྱོད་སྐུའི་འོད་ཀྱིས་རེག་ལས་གཞན་མིན་ཤུཉྩས་རྟོགས། །ས་ཡི་ཚངས་པ་ཨུ་དྲས་ལེགས་གཏོར་མེ་ཏོག་ཚོགས། །རིན་ཆེན་ཤིང་རྟར་ཉེར་གྱུར་སྟོང་གསུམ་ཁྱབ་པའི་དཔལ། །ཀུན་གྱིས་གསལ་མཐོང་བསྔགས་བརྗོད་སྤྲིན་གྱི་བླ་བྲེ་ཡིས། །མེ་ཏོག་གཞུ་ཅན་སྙིང་གི་དགའ་བ་ཟུམ་པར་བྱས། །རོ་བརྒྱ་ལྡན་པའི་ཟས་ཀྱིས་སྣོད་ཀུན་ཡོངས་བཀང་ཞིང་། །ཕྱག་མཐིལ་ས་ལ་བརྡབ་པས་སེམས་དམྱལ་གྲངས་མེད་ཚོགས། །སྲིད་པའི་དམ་བཅའ་རྡུལ་དུ་གཞིག་དང་ཆབས་ཅིག་པར། །གཟུགས་ཅན་སྙིང་པོ་རྣམ་གྲོལ་དཔལ་ལ་སྦྱོར་མཛད་རྨད། །དེ་ལྟར་མཚུངས་མེད་སྟོན་པའི་ཆོ་འཕྲུལ་མདོ་ཙམ་ཞིག །གུས་ལྡན་སྙན་ངག་མེ་ཏོག་ཆུན་པོས་མཆོད་པའི་རྒྱུས། །རིང་པོར་མི་ཐོགས་སྐྱོབ་པ་ཁྱོད་འདྲར་བདག་གྱུར་ཏེ། །ཆོ་འཕྲུལ་ཆེན་པོ་འཇིག་རྟེན་ཀུན་ན་སྟོན་བྱེད་ཤོག །སྐྱེ་སོགས་བྲལ་ཡང་འགྲོ་ལ་སྐྱེ་བའི་ཆོ་འཕྲུལ་སྟོན། །འགག་པ་མེད་ཀྱང་ཀུན་རྟོག་འགོག་བྱེད་ལམ་བདེན་ཆར། །འབད་སོགས་གཡོ་བའི་རྣམ་རྟོག་ཟད་ཀྱང་རྟག་འཇོ་བའི། །ས་གསུམ་བླ་མ་ཁྱོད་མཚུངས་འགྲོ་ལ་ཕན་བྱེད་ཤོག །བཀྲ་ཤིས་གང་ཞིག་ཐུབ་དབང་སྲས་ཀྱིས་བསྐོར་རྣམས་དང་། །དཀར་ཕྱོགས་ལྷ་ཀླུ་མཐུ་ལྡན་སྲུང་མའི་བདེན་བྱིན་གྱིས། །ནག་ཕྱོགས་གདུག་པའི་རྩུབ་འགྱུར་ཀུན་ཞི་ཕྱོགས་ཀུན་བདེ། །རྒྱལ་བསྟན་ཡུན་གནས་བསམ་ཀུན་འགྲུབ་པའི་དཔལ་སྩོལ་ཅིག །ཅེས་པའང་རབ་ཚེས་ལྕགས་ཁྱི་གསར་དུ་འཆར་བའི་ཆོ་འཕྲུལ་ཆེན་པོའི་དུས་ཚེས་དགེ་བར་བནྡེ་འཇམ་དབྱངས་བློ་གྲོས་རྒྱ་མཚོ་དབྱངས་ཅན་དགྱེས་པའི་སྡེས་བྲིས་ཤིང་གསོལ་བ་བཏབ་པ་དགེ་ལེགས་ཀྱི་སྣང་བ་ཆེན་པོས་ཕྱོགས་ཀུན་ཏུ་ཁྱབ་པའི་རྒྱུར་གྱུར་ཅིག། །།
༄༅། །ༀ་སྭསྟི་སིདྡྷཾ། རང་བཞིན་འོད་གསལ་ཆོས་དབྱིངས་འདུས་མ་བྱས། །གློ་བུར་སྒྲིབ་པའི་སྦུབས་རྒྱ་ལས་གྲོལ་བའི། །ཟག་མེད་ཡོན་ཏན་བགྲེས་རྒུད་བྲལ་བའི་དཔལ། །སྟོན་པ་ཐམས་ཅད་སྐྱོབ་ལ་ཕྱག་བགྱིའོ། །ཁྱོད་ནི་སྲིད་ཞི་ཀུན་ཁྱབ་ཡེ་ཤེས་ཆེ། །བརྟན་གཡོའི་དངོས་ཀུན་ཕྱག་རྒྱས་མ་བཏབ་སུ། །གཟུང་འཛིན་ཀུན་རྟོག་སྤྲོས་པའི་དྲྭ་བ་འབུམ། །སྤྲོས་བྲལ་ཐིག་ལེ་ཉག་གཅིག་ཉིད་དུ་ཟླུམ། །མ་བརྟགས་ཉམས་དགའ་རྟེན་འབྱུང་སྒྱུ་མའི་གར། །བརྟགས་ཤིང་དཔྱད་ན་རྒྱུ་འབྲས་ངོ་བོས་སྟོང་། །སྣང་སྟོང་ཟུང་འཇུག་བྱིས་བློས་ཕིག་དཀའ་བ། །ཟབ་མོའི་ཚུལ་དེ་འཕགས་པའི་སྤྱོད་ཡུལ་ཉིད། །རྣམ་ཀུན་མཆོག་ལྡན་སྟོང་ཆེན་དེ་བཞིན་ཉིད། །འོད་གསལ་རང་མདངས་ཉི་དང་ཟེར་བཞིན་དུ། །རྒྱལ་ཆོས་མཐའ་དག་ཡེ་ནས་འདུ་འབྲལ་མེད། །བདེ་གཤེགས་སྙིང་པོ་ཆོས་ཁམས་དགེ་བའང་དེ། །འདི་ཉིད་འགྲོ་ བ་ཀུན་ལ་ཡོད་པའི་དཔེ། །པད་ནང་སྐུ་སོགས་རྣམ་དགུས་རྗེས་བསྟན་བཞིན། །བྲི་གང་བྲལ་བའི་ཆོས་ཉིད་ཡེ་གནས་ཀྱང་། །སྒྲིབ་པས་ཁེབས་པའི་འགྲོ་འདིས་མ་མཐོང་ནོངས། །འདི་ཡོད་འགྲོ་ཀུན་རྣམ་གྲོལ་མཆོག་འགྱུར་ཕྱིར། །འདི་ནི་མཐར་ཐུག་ཐེག་གཅིག་སྒྲུབ་པའི་རྟེན། །འདི་མེད་ལམ་དང་འབྲས་བུའི་ཡོན་ཏན་ཅི། །འདི་ཚུལ་ཤེས་པ་བསམ་མི་ཁྱབ་ལ་འཇུག །ནམ་ཞིག་རྐྱེན་གྱིས་སད་པའི་རྒྱས་འགྱུར་རིགས། །ཚོགས་གཉིས་ལམ་གྱིས་གསོས་ལས་ཉེར་ཐོབ་པའི། །རྣམ་པར་མི་རྟོག་ཡེ་ཤེས་རྡོ་རྗེ་ཡིས། །སྒྲིབ་བའི་སྦུབས་རྒྱ་བཤིག་ཚེ་མངོན་འགྱུར་ཉིད། །དེ་ཚེ་སྟོབས་བཅུ་མི་འཇིགས་མ་འདྲེས་སོགས། །བྲལ་བའི་ཡོན་ཏན་ཉིན་མོར་བྱེད་པའི་དཔལ། །ཆོས་ཀྱི་དབྱིངས་མཉམ་ཁྱབ་པར་དཀྲིགས་མོད་ཀྱི། །རང་སྣང་ཙམ་ལས་མཚན་མའི་སྤྱོད་ཡུལ་མིན། །ཇི་ལྟར་སྟོན་གནམ་དྭངས་པའི་ཟླ་དཀྱིལ་བཞིན། །དག་པའི་འཁོར་ལ་མཚན་དཔེ་འབར་བའི་སྐུ། །མངོན་སྣང་ཟབ་རྒྱས་ཆོས་ཀྱི་རྒྱལ་ཐབས་ཆེར། །རྫོགས་པར་ལོངས་སྤྱོད་འཕོ་མེད་རྟག་པར་ཤེས། །དེ་ཡི་རང་རྩལ་ཆུ་སྣོད་ཟླ་གཟུགས་བཞིན། །སྣ་ཚོགས་འཁོར་ལ་མ་ངེས་བཀོད་པ་བརྒྱས། །འདུལ་བཞིའི་ཆོ་འཕྲུལ་འཛད་མེད་སྟོན་པའང་། །གདུལ་བྱའི་རང་སྣང་ཙམ་ལས་གཞན་དུ་ཅི། །ཇི་ལྟར་ཤིན་ཏུ་དྭངས་པའི་བཻཌཱུཪྱ། །འོག་གཞིའི་དབྱེ་བས་སྣ་ཚོགས་མདོག་འཆང་ཡང། །དེའི་ངོར་{ངོ་བོར} མིན་བཞིན་བཟོ་སྐྱེ་མཆོག་ལ་སོགས། །ཅིར་ཡང་འཕྲུལ་མོད་དབྱིངས་ལས་མ་གཡོས་མཚར། །འཁོར་མཐས་གཏུགས་པར་གསང་གསུམ་མི་ཟད་སྤྲིན། །འགྲོ་བློའི་མོས་པའི་རྗེས་འགྲོ་དེ་ལྟ་ནའང་། །འབད་སོགས་སྤྲོས་པས་གཞར་ཡང་གོས་མིན་པར། །ལྷུན་གྱིས་གྲུབ་པའི་ཕྲིན་ལས་སུ་ཡིས་དཔོག །ཞིང་ཁམས་རྒྱ་མཚོའི་རྡུལ་སྙེད་འགྲོ་མང་ཁམས། །རྣམ་གྲོལ་དཔལ་ལ་སྦྱར་མོད་ཁྱོད་ཀྱིས་ནི། །གདུལ་བྱའི་སེམས་ཅན་འགའ་ཡང་གཟིགས་མ་གྱུར། །སྒྱུ་མའི་ཚུལ་དེ་སུ་ཡིས་བསམ་པར་ནུས། །གཅིག་ཏུ་སྣང་ཡང་དུ་མར་འཕྲུལ་བའི་གཞི། །དུ་མར་འཕྲུལ་ཡང་ཆོས་དབྱིངས་གཅིག་གི་ངང་། །གཅིག་དང་དུ་མར་མི་གནས་མཉམ་པ་ཉིད། །དོན་དམ་འཕགས་པའི་ཡུལ་ལ་བདག་སྤྲོའོ། །དེ་སླད་སྤྲོས་དང་བྲལ་བའི་ཆོས་དབྱིངས་ཁམས། །རིག་སྟོང་རིག་པའི་དབྱིངས་སུ་ཆོས་ཀུན་འུབ། །ཟུང་འཇུག་བརྗོད་པ་བྲལ་བའི་གཤིས་ལུགས་ལ། །བརྗོད་པ་སྤངས་ཏེ་གཅིག་པུར་གནས་པར་བྱ། །ཡིད་བྱེད་སྤངས་པའི་ཧ་ཤང་རྒན་པོ་ཡང་། །གཡོ་བའི་སེམས་འདི་ན་བུན་བཞིན་དུ་དྭངས། །བརྗོད་པའི་ངག་ཀྱང་བྲག་ཅ་བཞིན་གྱུར་ནས། །ཆོས་ཀྱི་དབྱིངས་སུ་མི་གནས་ཐོབ་གྱུར་ཅིག །ཅེས་པའང་རབ་ཚེས་ས་བྱ་གསར་དུ་འཆར་བའི་ཆོ་འཕྲུལ་ཟླ་བའི་དུས་ཚེས་དགེ་བར་འཇམ་དབྱངས་བློ་གྲོས་རྒྱ་མཚོས་བསྟན་གཉིས་དར་རྒྱས་གླིང་གི་རང་ཤག་འཆི་མེད་འོད་སྣང་དུ་ཐུན་གསེང་དུ་འཕྲལ་མར་བྲིས་པ་དགེ། །།