བདེ་ལྡན་ཞིང་གི་མགོན་པོའི་བསྟོད་སྨོན་ཞིང་མཆོག་བགྲོད་པའི་ཐེམ་སྐས།

༄༅། །བདེ་ལྡན་ཞིང་གི་མགོན་པོའི་བསྟོད་སྨོན་ཞིང་མཆོག་བགྲོད་པའི་ཐེམ་སྐས་ཞེས་བྱ་བ་བཞུགས་སོ།། །ན་མོ་གུ་རུ་ཨ་མི་ཏ་བྷྱེ། གདོད་མའི་མགོན་པོ་འོད་མི་འགྱུར་བ་ཉིད། །ཡེ་ཤེས་རང་སྣང་གཞི་ལ་བྱང་ཆུབ་ནས། །ཆོས་ཀྱི་དབྱིངས་མཉམ་མི་ཟད་རྒྱན་འཁོར་སྤྲིན། །བསམ་མི་ཁྱབ་པར་འཕྲོ་ལ་མགོས་ཕྱག་འཚལ། །གལ་ཏེ་འགྲོ་ཀུན་བདེ་གཤེགས་ཉིད་གྱུར་ནས། །སྤོབས་པ་ཟད་མི་ཤེས་པས་བསྐལ་པའི་བར། །གང་གི་ཞིང་སྐུའི་ཡོན་ཏན་བརྗོད་བྱས་ཀྱང་། །མཐས་གཏུགས་མིན་ཞེས་ཚད་མར་གྱུར་དེས་གསུངས། །ཞིང་ཁམས་རྒྱ་མཚོའི་འདྲེན་པ་མཐའ་དག་གིས། །ཁྱོད་གཅིག་ཁོ་ནའི་བསྔགས་བརྗོད་ཚངས་པའི་རྔ། །ནམ་མཁའི་མུ་ཁྱུད་མཉམ་པར་རྗེས་བསྒྲགས་པས། །སྐྱེ་དགུའི་ཡིད་ལ་རྣམ་གྲོལ་དགའ་བ་བྱིན། །སྔོན་ཚེ་འཇིག་རྟེན་དབང་ཕྱུག་རྒྱལ་པོའི་དྲུང་། །རྨད་བྱུང་དམ་བཅའི་གོ་ཆའི་ཁྱད་པར་གྱིས། །འདྲེན་པ་ཀུན་གྱི་ནང་ན་ཟླ་མེད་པ། །མེ་ཏོག་ནང་ན་ཨུ་དུམྦཱ་ར་བཞིན། །ཆོས་སྤངས་མཚམས་མེད་བྱས་མིན་སྐྱེ་བོ་རྣམས། །ཁྱོད་ལ་དད་པས་ཁྱོད་ཞབས་པདྨོའི་དྲུང་། །བདེར་ཕྱིན་མི་ལྡོག་ལུང་བསྟན་མངོན་གྱུར་པའི། །སྨོན་ལམ་མཆོག་དེ་ཁྱོད་ཀྱིས་རྫོགས་པར་མཛད། །སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག །བརྒྱད་ཅུ་རྩ་གཅིག་ཞིང་གི་བཀོད་པའི་ཕུལ། །མ་ལུས་གཅིག་བསྡོམས་རྣམ་དག་བདེ་བ་ཅན། །ཡོངས་བཟུང་ཞིང་སྦྱངས་ཚོགས་མཆོག་ཁྱོད་ལ་མངའ། །དཔག་ཏུ་མེད་དོ་འོད་དང་སྐུ་ཚེའི་ཚད། །དེ་བཞིན་ཞིང་དང་འདུས་པའི་འཁོར་གྱི་གྲངས། །ཏིང་འཛིན་གཟུངས་སྤྲིན་མངོན་ཤེས་རྫུ་འཕྲུལ་མཐུ། །འདུལ་བཞིས་ཕྲིན་ལས་ཡོན་ཏན་ཡེ་ཤེས་ཚོགས། །རྡུལ་སྙེད་ཞིང་ཀུན་རཏྣས་བཀང་བྱས་ཏེ། །བསྐལ་པ་བྱེ་བར་སྦྱིན་པ་བྱིན་པ་བས། །གང་མཚན་ཞིང་བཀོད་ཐོས་ནས་དད་བྱེད་པའི། །བསོད་ནམས་མཆོག་ཅེས་འཇིག་རྟེན་མགོན་དེས་གསུངས། །དེ་ཕྱིར་གང་མཚན་བདུད་རྩིའི་ཟེགས་ཐིགས་ཤས། །ཐོས་འཛིན་བཅུད་སོན་ཙམ་ཡང་སྔོན་རབས་ནས། །རླབས་ཆེན་ཚོགས་གཉིས་བྲེ་ཁ་འགེངས་བྱས་པའི། །བསགས་པ་རྒྱ་ཆེར་སུ་ཡིས་བསྙོན་{སྨྱོན་འདིའི་རིགས་འདི་ལྟར་ཞུས། }དུ་ཡོད། །ནོར་བུ་སྨན་དང་སྔགས་ཀྱི་ནུས་པས་ཀྱང་། །གནས་སྐབས་ཡིད་ལ་རེ་བའི་དཔལ་སྟེར་ན། །སངས་རྒྱས་སྨོན་ལམ་ཡེ་ཤེས་ཚད་མེད་པས། །ཞལ་འཆེས་འབྲས་བུ་མི་འཆོས་ཆོས་ཉིད་མཐུ། །གནས་སྐབས་ཕན་སེམས་ཙམ་གྱིས་གཟུགས་ཁམས་ཀྱི། །བསམ་གཏན་གྲུབ་པ་མེད་ཀྱང་སྐྱེ་འཛིན་ན། །སྟོན་པས་ལེགས་བསྔགས་རྒྱུ་རྐྱེན་རྟེན་འབྲེལ་ཟབ། །ཚོགས་ན་སོ་སྐྱེ་ཞིང་བགྲོད་སུ་ཡིས་བཀག །ལན་གཅིག་དད་པའང་བསོད་ནམས་མཆོག་འགྱུར་ན། །རྟག་པར་ཞིང་སྐུའི་བཀོད་པ་དྲན་བྱས་ནས། །བསགས་སྦྱང་དཔུང་བསྐྱེད་བྱང་ཆུབ་སེམས་བསྒོམ་ཞིང་། །སྨོན་པས་ཁ་བསྒྱུར་མཁས་ལ་སུ་མི་རང་། །དུས་ཀྱི་ཐ་མར་སངས་རྒྱས་སྲས་འཁོར་བཅས། །མདུན་ན་མངོན་སྣང་དགའ་དང་དྭངས་པའི་བློས། །མིག་འཕྲུལ་བཞིན་དུ་པདྨའི་གེ་སར་རྩེར། །བྱང་ཆུབ་ལུང་ནོད་རྟེན་འབྱུང་ཚོགས་ལས་སོ། །བསོད་ནམས་བྱེ་བ་བརྒྱ་ལས་གྲུབ་པའི་ཕྱག །གང་གི་མགོ་བོའི་ཐོད་དུ་ཉུག་པའི་མོད། །བསྐལ་པར་འགྲུབ་དཀའི་གཟུངས་དང་ཏིང་འཛིན་སོགས། །ཡོན་ཏན་མངོན་གྱུར་མི་ལྡོག་ལུང་ནོད་འཚེངས། །དེར་ནི་སྐྱེ་དེས་སྲིད་པ་ཕྱིར་བསྙིལ་ནས། །རླབས་ཆེན་རྫོགས་སྨིན་སྦྱངས་པའི་ཁྱད་པར་གྱིས། །མགོན་པོ་འོད་མི་འགྱུར་བ་ཉིད་སྒྲུབ་ན། །སེམས་ཤེས་སུ་ཞིག་འདིི་ལ་སྤྲོ་མི་སྐྱེད། །དེ་སླད་བསྔགས་པའི་ཆ་ཤས་སུ་མ་ནུས། །དད་པའི་སྙིམ་པ་ཡོངས་བཀང་མགོ་བོའི་ཐོད། །ཉེར་བཀོད་སྨོན་པའི་ཤིང་རྟས་ཡིད་དྲངས་ན། །སྒྲིབ་མེད་ཐུགས་རྗེས་གཟིགས་ཤིག་མགོན་པོ་ཀྱཻ། །དྭངས་པའི་ཡིད་ཀྱིས་འདོད་པའི་ཤུགས་བསྐུལ་ཏེ། །ཡིད་ཆེས་དད་པས་ཞིང་སྐུའི་བཀོད་པའི་སྤྲིན། །རྟག་ཏུ་བསྙེལ་སྤང་ཡིད་མཁར་མངོན་གསལ་ནས། །རྩེ་གཅིག་གསོལ་འདེབས་བུ་ལ་ཐུགས་རྗེས་དགོངས། །བདག་སོགས་འགྲོ་ཀུན་ཞིང་གི་རྡུལ་སྙེད་ལུས། །མངོན་སྤྲུལ་ཡོན་ཏན་བསྔགས་པའི་གླིང་བུར་བཅས། །ཐལ་སྦྱར་པདྨ་ཁ་འབུས་བྱེ་འདྲ་བས། །སྒོ་གསུམ་འཇུག་པ་གཅིག་པས་གུས་ཕྱག་བརྩེགས། །ལུས་དང་ལོངས་སྤྱོད་ལྷ་མིའི་དཔལ་འབྱོར་རིགས། །དུས་གསུམ་བྱས་བསགས་རྣམ་དཀར་དགེ་བའི་ཚོགས། །ཀུན་ཏུ་བཟང་པོའི་སྨོན་ལམ་ལས་བསྐྲུན་པའི། །མཆོད་པའི་སྤྲིན་ཆེན་ཆོས་དབྱིངས་རྒྱས་པར་དཀྲིགས། །ཐོག་མེད་ནས་བསགས་དཀར་མིན་ཕྲ་རྒྱས་དཔུང་། །བྱང་ཆུབ་མཆོག་ལ་སྒྲིབ་པའི་ནོངས་ཀུན་དང་། །ཁྱད་པར་འཕགས་མིན་ཡིད་བྱེད་ཐེ་ཚོམ་སོགས། །སྙིང་ནས་འགྱོད་པས་བཤགས་ཤིང་ཕྱིན་ཆད་སྡོམ། །འཕགས་དང་སོ་སོ་སྐྱེ་བོ་ཇི་སྙེད་ཀྱི། །ལེགས་བྱས་ཟླ་བ་གསར་པའི་འཛུམ་ཟེར་གྱིས། །བྱང་གྲོལ་ཀུ་མུད་བཞད་པའི་དཔལ་ཡོན་ཀུན། །ཡི་རང་ཞགས་པ་གཅིག་གི་སྡུད་ཅིང་འཆིང་། །འཕགས་རྣམས་འགྲོ་བ་དཔག་མེད་བསྒྲལ་ཟིན་མོད། །ད་དུང་སེམས་ཅན་ཁམས་ནི་མཐའ་མེད་པས། །འདུལ་བཞིའི་ཕྲིན་ལས་ཟབ་མོས་གདུལ་ཞིང་ལ། །ཞི་བསིལ་ཆོས་ཀྱི་ཆར་པ་འབེབས་པར་གསོལ། །སྐྱེ་བ་མེད་ཀྱང་སྐྱེ་སོགས་རོལ་རྩེད་སྟོན། །འབད་སྩོལ་བྲལ་ཡང་གདུལ་བྱའི་ཡུལ་ལ་གཟིགས། །དེ་སླད་དབང་བཅུའི་གྲིབ་བསིལ་རྒྱ་ཆེན་པོར། །སྲིད་མཐའི་བར་དུ་འགྲོ་ཀུན་ངལ་འཚོ་མཛོད། །འཁོར་གསུམ་རྟོག་པ་བྲལ་བའི་གསེར་སྦྱངས་ཁམས། །བྱང་ཆེན་ཡོངས་བསྔོའི་རྩིབས་སྟོང་རྣམ་བརྡལ་བ། །འཕགས་པའི་མཁྱེན་དཔྱོད་ཟབ་མོའི་མཁར་གཤེགས་པས། །འགྲོ་ཚོགས་ཆོས་ཀྱི་རྒྱལ་པོའི་སྲིད་ནོན་ཤོག །རྒྱལ་མཆོག་ཡོངས་འདུས་ལྗོན་པའི་གྲིབ་བསིལ་དུ། །བདག་སོགས་འགྲོ་ཀུན་བྱང་ཆུབ་ཐོབ་ཀྱི་བར། །བདེ་བར་ངལ་འཚོ་ཐོབ་ལ་ཆེས་སྤྲོ་བས། །འཇིགས་གསུམ་ཚད་གདུང་རྨང་ནས་གཞིལ་མཛོད་ཀྱེ། །ཇི་ལྟར་མགོན་པོ་སྒྲིབ་པ་མེད་གཟིགས་པ། །གང་གིས་འགྲོ་ལ་སྨན་པའི་ཐུགས་བསྐྱེད་དང་། །མཛད་པ་སྨོན་ལམ་རྫོགས་སྨིན་སྦྱངས་པའི་ཚུལ། །དེ་དག་ཀུན་ལ་འཇུག་པར་བདག་སྤྲོའོ། །ཚད་མེད་རྣམ་བཞིས་དུལ་བའི་ཞིང་ས་ལ། ཕ་རོལ་ཕྱིན་བཅུའི་མེ་ཏོག་ཆེས་བཀྲ་ཤིང་། །ས་ལམ་ཡོན་ཏན་སྦྲང་རྩིས་བཅུད་སྨིན་པས། །སྐལ་བཟང་རྐང་དྲུག་དགའ་བའི་གསོས་སུ་སྨོན། །འདིས་མཚོན་ལེགས་བྱས་བ་དན་མཛེས་པའི་གྲུ། །རྣམ་དག་སྨོན་པའི་རླུང་གིས་ཉེར་བསྐུལ་རྒྱུས། །སྲིད་པའི་མཚོ་ཆེན་དཀའ་བ་མེད་པར་བརྒལ། །ཞིང་མཆོག་རིན་ཆེན་གླིང་ལ་ལོངས་སྤྱོད་ཤོག །རིན་ཆེན་ས་གཞི་གསེར་གྱི་དྲྭ་བས་མཛེས། །ངོ་མཚར་པདྨའི་འོད་ཟེར་ཆོས་སྒྲ་སྒྲོགས། །སྐྱེ་ཤིང་རིན་ཆེན་རྒྱན་ལྡན་ཆུ་མཚོས་བརྒྱན། །ཡ་མཚན་ཁྱད་འཕགས་ཞིང་དེར་སྐྱེ་བར་ཤོག །ནོར་བུའི་ཁང་བཟང་བཀོད་ལེགས་ཡིད་དུ་འོང་། །བྱང་ཆུབ་ལྗོན་ཤིང་ཡོན་ཏན་བརྗོད་ལས་འདས། །དཔག་ཡས་མཆོད་སྤྲིན་ནམ་མཁའ་མཛོད་ཀྱིས་བརྒྱན། །ཡིད་བཞིན་འགྲུབ་པའི་ཞིང་དེར་སྐྱེ་བར་ཤོག །ཆོས་ཀྱི་རྒྱལ་པོ་འདྲེན་པ་འོད་དཔག་མེད། །མྱ་ངན་མི་འདའ་ད་ལྟ་མངོན་སུམ་བཞུགས། །བྱང་ཆུབ་སེམས་དཔའི་འཁོར་གྱིས་མཛེས་གྱུར་པའི། །ཡོན་ཏན་དཔག་མེད་ཞིང་དེར་སྐྱེ་བར་ཤོག ལོག་པར་ལྟུང་དང་དམན་པའི་སྒྲ་མི་གྲགས། །ཐེག་ཆེན་ཆོས་ཀྱི་འཁོར་ལོ་རྟག་ཏུ་བསྐོར། །དཔའ་ཆེན་རྣམས་དང་སྤྱོད་ཡུལ་མཉམ་པར་འཇུག །རྣམ་པར་དག་པའི་ཞིང་དེར་སྐྱེ་བར་ཤོག །རྫུ་འཕྲུལ་མཐུ་ཐོབ་སངས་རྒྱས་ཞིང་ཀུན་བགྲོད། །རྒྱལ་བ་མཆོད་ཅིང་དམ་པའི་ཆོས་ཀུན་འཛིན། །གདུལ་ཡུལ་ཀུན་འདུལ་ཏིང་འཛིན་སྒོ་བརྒྱར་འཇུག །དོན་གཉིས་ལྷུན་གྲུབ་ཞིང་དེར་སྐྱེ་བར་ཤོག །འདྲེན་པ་རྣམས་ཀྱིས་བྱང་ཆུབ་ལུང་བསྟན་སྩལ། །བྱང་ཆུབ་ཕྱོགས་ཆོས་སུག་མཐིལ་གཏེར་བཞིན་ཐོབ། །ས་ལམ་ཡོན་ཏན་སྟོན་དུས་འབྲས་བཞིན་སྨིན། །བླ་ན་མེད་པའི་ཞིང་དེར་སྐྱེ་བར་ཤོག །ཚེ་འདིར་མི་མཐུན་ཉེས་བརྒྱའི་རྒུད་པ་ཞི། །མཐུན་རྐྱེན་ཚེ་དཔལ་ལེགས་དགུའི་འབྱོར་ཚོགས་རྒྱས། །འབྲེལ་ཚད་འདུན་མ་དགེ་བའི་ཕྱོགས་སུ་བསྒྱུར། །ཆོས་ལྡན་བྱ་བ་མཐའ་དག་གེགས་མེད་ཤོག །ལྷག་པའི་ལྷ་ཡི་བྱིན་རླབས་སྙིང་ལ་ཞུགས། །གཟུངས་སྤོབས་བློ་གྲོས་འཛད་མེད་སྒོ་བརྒྱ་འབྱེད། །རྩོད་འཆད་རྩོམ་པས་ཐུབ་བསྟན་རིན་པོ་ཆེ། །སྲིད་མཐའི་བར་དུ་ཉི་ཟླ་ལྟར་གསལ་ཤོག །སྣོད་ལ་གཡང་ཆགས་རྩི་སྨན་དུས་སུ་སྨིན། །བཅུད་ལ་དཔལ་འཕེལ་སྡེ་བཞིའི་མངའ་ཐང་དར། །ཀུན་ཀྱང་དོན་མཐུན་བསླབ་པས་རྒྱུད་གྲོལ་ཞིང་། །རྫོགས་ལྡན་དུས་སྟོན་གསར་པར་ལོངས་སྤྱོད་ཤོག །ཕྱོགས་དང་རིས་མེད་ཡོངས་འཛིན་དགེ་བའི་བཤེས། །ཞབས་པད་རྡོ་རྗེ་ལྟར་བརྟན་ཐུགས་བཞེད་འགྲུབ། །ནག་ཕྱོགས་ཀླ་ཀློ་འཇུག་པའི་རྩུབ་འགྱུར་ཞི། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཅེས་རྣམ་དག་བདེ་བ་ཅན་གྱི་ཞིང་དུ་སྐྱེ་བ་འཛིན་པའི་རྒྱུ་བཞི་མདོ་ནས་བཀའ་སྩལ་པའི་དོན་སྙིང་པོར་དྲིལ་ཏེ་བསྟོད་ཅིང་སྨོན་པའི་རབ་ཏུ་བྱེད་པ་ཞིང་མཆོག་བགྲོད་པའི་ཐེམ་སྐས་ཞེས་བྱ་བ་འདི་ནི། རང་གི་ཁུ་བོ་དགེ་རྒན་འགྱུར་མེད་སངས་རྒྱས་རྡོ་རྗེའི་མོས་འདུན་བཞིན། རྫོགས་པའི་སངས་རྒྱས་བློ་གྲོས་མཐའ་ཡས་ཀྱི་ཞབས་ཀྱི་ཆུ་སྐྱེས་སྤྱི་བོས་ལེན་པའི་བཙུན་ཆུང་གཞན་ཕན་ཆོས་ཀྱི་བློ་གྲོས་ཀྱིས་ཟིལ་གནོན་གྱི་ལོ་ཆོ་འཕྲུལ་ཟླ་བའི་ཚེས་བཟང་པོར་དབེན་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་སྟན་ཐོག་གཅིག་ཏུ་ཤར་མར་བྲིས་པའི་དགེ་བས་རང་གཞན་སེམས་ཅན་ཐམས་ཅད་བདེ་བ་ཅན་གྱི་ཞིང་གི་དཔལ་ལ་ལོངས་སྤྱོད་པའི་རྒྱུར་གྱུར་ཅིག།