སངས་རྒྱས་ཚེ་དཔག་མེད་ལ་བསྟོད་པ་འཆི་མེད་རྔ་སྒྲ།

༄༅། །སངས་རྒྱས་ཚེ་དཔག་མེད་ལ་བསྟོད་པ་འཆི་མེད་རྔ་སྒྲ་ཞེས་བྱ་བ། ན་མོ་གུ་རུ་ཨ་པ་རི་མི་ཏཱ་ཨ་ཡུརྫྙཱ་ནཱ་ཡ། རྣམ་ཀུན་མཆོག་ལྡན་ཆོས་དབྱིངས་འདུས་མ་བྱས། །གློ་བུར་དྲི་མ་ཀུན་བྲལ་ངོ་བོ་ཉིད། །ཡོན་ཏན་ཕར་ཕྱིན་བཞིས་འཁྱུད་རྡོ་རྗེའི་སྐུ། །ཚེ་དང་ཡེ་ཤེས་དཔག་མེད་མགོན་ལ་འདུད། ༡ །བྱང་ཆུབ་ཕྱོགས་ཆོས་གསེར་སྦྱངས་སྙིང་པོའི་ཁམས། །ཚད་མེད་བཞི་ཡི་མུ་ཁྱུད་ཆེས་བརླིངས་ཤིང་། །རྣམ་ཐར་བརྒྱད་ཀྱི་རྩིབས་སྟོང་ལེགས་བཀྲ་བ། །ཚེ་དང་ཡེ་ཤེས་དཔག་མེད་མགོན་ལ་འདུད། ༢ །སྙོམས་འཇུག་དགུ་ཡི་ཆུ་གཏེར་ལས་ཐོན་ཅིང་། །ཟིལ་གནོན་སྐྱེ་མཆེད་ཕུལ་བྱུང་གཟི་ཡིས་འཁྱུད། །ཟད་པར་ཏིང་འཛིན་འདོད་དགུའི་ཆར་འབེབས་པའི། །ཚེ་དང་ཡེ་ཤེས་དཔག་མེད་མགོན་ལ་འདུད། ༣ །ཉོན་མོངས་མེད་པའི་ཀུན་སྤྱོད་ཤིན་ཏུ་གཙང་། །སྨོན་ནས་མཁྱེན་པའི་སྒྱུ་རྩལ་དྲུག་བཅུར་མཁས། །མངོན་ཤེས་དྲུག་གི་རེག་བྱའི་བདེ་བ་སྟེར། །ཚེ་དང་ཡེ་ཤེས་དཔག་མེད་མགོན་ལ་འདུད། ༤ །སོ་སོ་ཡང་དག་རིགས་བཞིའི་མཛོད་ཀྱིས་ཕྱུག །རྣམ་པ་ཐམས་ཅད་དག་བཞིའི་གཟིགས་པ་རྨད། །དབང་བཅུའི་དཔུང་པས་དགེ་བཅུའི་རྩ་བ་འཛུག །ཚེ་དང་ཡེ་ཤེས་དཔག་མེད་མགོན་ལ་འདུད། ༥ །སྟོབས་བཅུའི་ཤུགས་ཀྱིས་ས་རྣམས་བསྐོར་ནུས་ཤིང་། །མི་འཇིགས་བཞི་ཡི་ཡན་ལག་རྣམ་པར་མཛེས། །མ་འདྲེས་བཅོ་བརྒྱད་རིན་ཆེན་ཆར་བཟང་འབེབས། །ཚེ་དང་ཡེ་ཤེས་དཔག་མེད་མགོན་ལ་འདུད། ༦ །བསྲུང་མེད་ཡན་ལག་བདུན་གྱིས་ལེགས་མཛེས་ཤིང་། །དྲན་པ་ཉེར་བཞག་གསེར་གྱི་དྲྭ་བས་བརྗིད། །བསྙེལ་བ་མི་མངའ་ཐེག་པའི་སྟོབས་མཆོག་མངའ། །ཚེ་དང་ཡེ་ཤེས་དཔག་མེད་མགོན་ལ་འདུད། ༧ །བག་ཆགས་གཏན་བཅོམ་རྡོ་རྗེའི་གོ་ཁྲབ་བརླིངས། །ཐུགས་རྗེ་ཆེན་པོས་གཞན་སྡེ་འཇོམས་ལ་དཔའ། །རྣམ་མཁྱེན་མཚོན་གྱིས་ཀུན་རྨོངས་སྲོག་རྩ་གཅོད། །ཚེ་དང་ཡེ་ཤེས་དཔག་མེད་མགོན་ལ་འདུད། ༨ །མཚན་དཔེ་ཉི་མ་འཆར་ཀའི་ལང་ཚོ་ཡིས། །འོག་མིན་ཆེན་པོར་དག་པའི་སེམས་དཔའ་ལ། །ཐེག་ཆེན་ཆོས་དབྱིངས་སྲིད་པ་ཇི་སྲིད་སྟོན། །ཚེ་དང་ཡེ་ཤེས་དཔག་མེད་མགོན་ལ་འདུད། ༩ །སྣ་ཚོགས་གདུལ་བྱར་གང་འདུལ་མཆོག་དང་ནི། །བཟོ་སྐྱེ་སྣ་ཚོགས་སྤྲུལ་པའི་ཟློས་གར་གྱིས། །འདུལ་བཞིའི་ཕྲིན་ལས་འཛད་མེད་རྟག་པར་སྣང་། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༠ །ཚོགས་བརྒྱད་གནས་གྱུར་ཡེ་ཤེས་ཆེན་པོའི་འཕྲུལ། །ཟག་མེད་ཕུང་པོ་ལྔ་ལ་དབང་བསྒྱུར་ཞིང་། །གསང་བ་ཟབ་མོ་ཆོས་དབྱིངས་མཉམ་པར་འཇུག །ཚེ་དང་ཡེ་ཤེས་དཔག་མེད་མགོན་ལ་འདུད། ༡༡ །སྨོན་ལམ་སྟོབས་དང་འགྲོ་སེམས་དག་པའི་རྒྱུས། །གང་སྐུའི་སྣང་བ་བཻཌཱུར་ས་གཞི་ལ། །ལྷ་དབང་གཟུགས་ཀྱི་བཀོད་པ་ཇི་བཞིན་སྟོན། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༢ །འགྲོ་ཁམས་རྒྱ་མཚོར་དཀར་པོ་རྣམ་འཕེལ་རྒྱུས། །སུམ་རྩེན་གྲོང་དུ་འཆི་མེད་རྔ་སྒྲ་བཞིན། །གང་གསུང་བག་མེད་འཇིགས་ཀུན་སེལ་ལ་དབང་། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༣ །ཁྱོད་ཐུགས་ཟབ་ཡངས་མཁྱེན་བརྩེའི་སྤྲིན་ཆེན་ལས། །འཕགས་ལམ་ཡན་ལག་བརྒྱད་ལྡན་ཞི་བསིལ་ཆར། །སྣོད་ཀྱི་དབྱེ་བས་ཐེག་སྒོ་སོ་སོར་སྣང་། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༤ །ཚངས་ཆེན་བཞིན་དུ་གང་འདུལ་སྤྲུལ་པའི་གར། །དུ་མར་སྣང་བས་འགྲོ་ལ་ཕན་བརྩོན་ཡང་། །ཆོས་སྐུ་ཉིད་ལས་ནམ་ཡང་གཡོས་པ་མེད། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༥ །འབད་སོགས་སྤྲོས་པའི་གཡོ་བ་མི་མངའ་ཡང་། །ཡེ་ཤེས་ཟེར་གྱིས་རིགས་ཅན་གསུམ་གྱི་འཁོར། །མཐར་ཐུག་ཐེག་གཅིག་སྨིན་ནུས་ཉིན་བྱེད་དབང་། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༦ །རྟོག་མེད་ལྷུན་གྲུབ་ཐུགས་ཀྱི་གསང་བ་ལས། །གཞན་ཕན་ཕྲིན་ལས་འདོད་དགུའིི་དངོས་ཀུན་འཇོ། །ཡིད་བཞིན་ནོར་མཆོག་བྱེ་བས་མཚོན་མིན་པ། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༧ །དབྱངས་གཅིག་ཡན་ལག་དྲུག་བཅུར་གོ་བའི་གསུང་། །འགྲོ་ཚོགས་ཁམས་དབང་བསམ་པའི་རྗེས་ཞུགས་ཀྱང་། །བྲག་ཅ་བཞིན་དུ་སྒྲ་ཚིག་རང་མཚན་མིན། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༨ །རྟག་བརྟན་གཞོམ་གཞིག་བྲལ་བ་ཆོས་ཀྱི་སྐུས། །སྲིད་ཞིའི་དངོས་ཀུན་ཡོངས་ཁྱབ་གཞན་དོན་གྱི། །གོ་སྐབས་འབྱེད་ལ་ལྷས་རྩེན་གཟུགས་ཀྱི་ཟླ། །ཚེ་དང་ཡེ་ཤེས་དཔག་མེད་མགོན་ལ་འདུད། ༡༩ །ཟག་བཅས་ཆོས་ཀུན་ཟག་པ་མེད་དབྱིངས་སུ། །གནས་གྱུར་མཐར་ཐུག་བརྙེས་པའི་ཐུགས་རྗེ་ཆེ། །ས་ཆེན་བཞིན་དུ་ཕན་བདེ་ཀུན་གྱི་རྟེན། །ཚེ་དང་ཡེ་ཤེས་དཔག་མེད་མགོན་ལ་འདུད། ༢༠ །རྒྱལ་ཀུན་གསུང་གི་གསང་བ་འདུས་པའི་དཔྱིད། །མཚན་ཙམ་གྱིས་ཀྱང་འཆི་བདུད་ཕྱེ་མར་འཐག །རྡོ་རྗེའི་ཚེ་མཆོག་སྲོག་གི་ཀ་བར་བརླིང་། །ཚེ་དང་ཡེ་ཤེས་དཔག་མེད་མགོན་ལ་འདུད། ༢༡ །ཕུང་ལྔ་དག་པ་ཡེ་ཤེས་ལྔ་ཡི་འཕྲུལ། །ཁམས་ལྔ་རྣམ་དག་ཡུམ་དང་མཉམ་པར་སྦྱོར། །འབྱུང་ལྔ་བརྟན་གཡོ་སྲིད་ཞིའི་ཚེ་བཅུད་ཀུན། །སྡུད་མཛད་ཚེ་བདག་རྒྱལ་བ་རིགས་ལྔར་འདུད། ༢༢ །དབང་ཡུལ་གནས་དག་གཙོ་ལ་དགྱེས་པ་སྐྱེད། །ཕྱོགས་བཞིའི་གནས་ནས་རིགས་བཞིའི་ཚེ་མཆོག་འགུགས། །སྒྲུབ་པ་པོ་ལ་རིང་འཚོའི་བཅུད་ལེན་མཆོག །སྦྱིན་མཛད་སྤྲུལ་པའི་ལྷ་མོ་བརྒྱད་ལ་འདུད། ༢༣ །ཕྱིན་ཅི་ལོག་བཞིའི་རྟོག་པ་གནས་གྱུར་པས། །ཚད་མེད་བཞི་ལྡན་ལས་བཞིའི་ཕྲིན་ལས་ཀྱིས། །གདོན་བཞིའི་ལག་ནས་ཚེ་དཔལ་འགུགས་པ་མོ། །ཡང་སྤྲུལ་སྒོ་སྐྱོང་ལྷ་མོ་བཞི་ལ་འདུད། ༢༤ །གཞན་ཡང་ཉི་མ་ལས་ནི་ཟེར་བཞིན་དུ། །ཡེ་ཤེས་གཅིག་ལས་གཙོ་དང་འཁོར་གྱི་ཚུལ། །གྲུབ་པའི་རིག་འཛིན་བཀའ་སྡོད་སྲུང་མར་བཅས། །རབ་འབྱམས་དཀྱིལ་འཁོར་འཁོར་ལོར་ཤར་ལ་འདུད། ༢༥ །དགོངས་ཀློང་ཟབ་མོ་ནམ་མཁའི་མཐའ་དང་མཉམ། །རྩོལ་མེད་ཐུགས་རྗེའི་ཕྲིན་ལས་གློག་ལས་མྱུར། །བསྐུལ་ཞིང་གསོལ་བའི་དུས་ནི་དེང་ལགས་པས། །རེ་བའི་འབྲས་བུ་མཆིས་པར་མཛོད་ཅིག་ཀྱེ། ༢༦ །འཁོར་འདས་ཚེ་བཅུད་སྲོག་གི་དྭངས་མར་བསྟིམ། །གསང་གསུམ་བྱིན་རླབས་ལུས་ངག་ཡིད་ལ་ཕོབས། །ཁམས་དྲུག་དག་པ་རྡོ་རྗེ་གསུམ་གྱི་ངང་། །མཆོག་དང་རྣམ་དབྱེར་མེད་པའི་དཔལ་སྩོལ་ཅིག ༢༩ །མི་འགྱུར་བརྟན་པ་རི་རབ་ལྟ་བུའི་ཚེ། །མི་ནུབ་གསལ་བ་ཉི་ཟླ་ལྟ་བུའི་མདངས། །མི་འགྲིབ་རྣམ་དཔྱོད་གཟུངས་སྤོབས་མཚོ་ཆེན་ལྟའི། །སྐལ་བ་མཆོག་གིས་རྟག་ཏུ་སྐྱོང་བར་མཛོད། །བསྟན་པ་དམ་པ་ངེས་གསང་སྒྲུབ་བརྒྱུད་བརྒྱད། །བསྟན་འཛིན་རྒྱལ་པོ་རིག་འཛིན་འདུས་པའི་ཚོགས། །བསྟན་པའི་སྙིང་པོ་སྤང་ཀློག་བྱ་བ་ཡིས། །དུས་ཀྱི་མཐར་ཡང་དབྱར་མཚོ་ལྟར་རྒྱས་ཤོག ༢༩ །བཀྲ་ཤིས་གང་ཞིག་གཞི་རྒྱུད་བདེ་གཤེགས་སྙིང་། །བཀྲ་ཤིས་ལམ་རྒྱུད་བསྙེན་སྒྲུབ་ཡན་ལག་བཞིས། །བཀྲ་ཤིས་འབྲས་རྒྱུད་སྐུ་བཞི་མངོན་གྱུར་པའི། །བཀྲ་ཤིས་རྟག་པ་དམ་པའི་དཔལ་གྱུར་ཅིག །ཚེ་དཔག་མེད་མགོན་དྲན་པའི་ངག །ཚེ་དབང་གྲུབ་པའི་མགོན་པོ་ཡིས། །ཚེ་མཆོག་སྒྲུབ་པའི་སྐབས་སུ་བྲིས། །ཚེ་ཡི་རིག་འཛིན་མྱུར་འགྲུབ་ཤོག །