བདེ་བར་གཤེགས་པ་སྨན་གྱི་བླ་མར་བསྟོད་ཅིང་གསོལ་བ་འདེབས་པ་འདོད་འབྱུང་ནོར་བུའི་འཁྲི་ཤིང་།
༄༅། །བདེ་བར་གཤེགས་པ་སྨན་གྱི་བླ་མར་བསྟོད་ཅིང་གསོལ་བ་འདེབས་པ་འདོད་འབྱུང་ནོར་བུའི་འཁྲི་ཤིང་ཞེས་བྱ་བ་བཞུགས་སོ།། ༀ་སྭསྟི། འདོད་འབྱུང་ཡིད་བཞིན་ནོར་དང་བུམ་པ་བཟང་གྱུར་དཔག་བསམ་ལྗོན་པ་མཆོག །རྟ་བདུན་དབང་པོ་རྒྱུ་སྐར་བདག་དང་གྲུ་ཟམ་སྨན་ཤིང་ངལ་སྟེགས་བཞིན། །རྟོག་མེད་ལྷུན་གྲུབ་ཚུལ་གྱིས་མཐའ་ཡས་འགྲོ་བའི་རེ་བ་སྐོང་མཛད་པ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །འགྲོ་སྒྲོལ་དམ་བཅའི་རྩ་བ་རབ་བརླིང་ཕ་རོལ་ཕྱིན་བཅུའི་ཡལ་འདབ་རྒྱས། །ས་བཅུ་ལམ་ལྔའི་མངོན་རྟོགས་ལོ་འབྲས་སྐུ་དང་ཡེ་ཤེས་མེ་ཏོག་ཅན། །ཐུགས་རྗེའི་གྲིབ་བསིལ་ཤིན་ཏུ་རྒྱ་ཆེ་མཐའ་ཀླས་འགྲོ་བའི་ངལ་འཚོའི་སྨན། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །དུས་གསུམ་གྲོལ་བ་བརྙེས་ཀུན་སྤངས་དང་རྟོགས་པའི་ཡོན་ཏན་རབ་མཉམ་ཡང་། །སྔོན་ཚེ་རྨད་བྱུང་བཅུ་གཉིས་སྨོན་པའི་འབྲས་བུ་དུས་སུ་སྨིན་པ་ཡིས། །ཁྱད་པར་བྱས་གང་ཤཱཀྱའི་ཏོག་སོགས་རྒྱལ་བ་རྒྱ་མཚོས་བསྔགས་གྱུར་པའི། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །རྒྱལ་ཀུན་ཡབ་གྱུར་མཁྱེན་པའི་གཏེར་མངའ་སྙིང་རྗེའི་རང་མདངས་པད་དཀར་འཆང་། །གསང་བའི་མཛོད་འཛིན་རྡོ་རྗེ་ཅན་སོགས་དཔའ་ཆེན་རྣམས་ཀྱིས་ཕྱག་བྱས་ཤིང་། །ཚངས་དབང་འཇིག་རྟེན་སྐྱོང་བ་རྣམས་ཀྱི་གཙུག་ནོར་མཐོན་ཀས་མཆོད་ཐོབ་པའི། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །འབུམ་ཕྲག་རིན་པོ་ཆེ་ཡིས་མཛེས་བྱས་འདོད་དགུ་ལྷུན་གྱིས་གྲུབ་པའི་གནས། །ངན་སོང་ལོག་པར་ལྟུང་སོགས་སྡུག་བསྔལ་ཉེས་པའི་སྒྲ་ཡང་མི་གྲགས་པའི། །བཻཌཱུཪྱ་ལྟར་སྣང་བའི་ཞིང་ལ་མངའ་དབང་འབྱོར་པའི་སྟོན་པ་མཆོག །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །རིན་ཆེན་མཆོག་རབ་བཻཌཱུར་སྔོན་པོའི་རྡུལ་མང་བརྩེགས་པའི་ལྷུན་པོ་ལ། །བརྒྱ་ཕྲག་ཉི་མ་འཆར་ཀའི་འོད་ཀྱིས་འཁྱུད་པས་ཆ་ཙམ་མི་མཚོན་སྐུ། །ཕུལ་བྱུང་མཚན་དཔེའི་རི་མོ་བརྒྱ་དང་བཅུ་གཉིས་མངོན་མཛེས་ལྷམ་མེ་བ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །སྒྲ་ཚིག་བྱ་རྩོལ་སྤྲོས་ལས་འདས་ཀྱང་གང་འདུལ་འགྲོ་བའི་སྣང་ངོ་རུ། །དབྱངས་ཀྱི་ཡན་ལག་རྒྱ་མཚོ་རྫོགས་པའི་གསུང་གིས་མཐའ་ཀླས་ཐེག་པའི་སྒོ། །གསལ་བར་འབྱེད་པས་སྲིད་པའི་རིམས་ནད་མ་ལུས་གཞིལ་བའི་དཔལ་ཡོན་ཅན། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །གཟུང་འཛིན་རྣམ་རྟོག་གཡོ་བའི་སྤྲིན་བྲལ་ཟབ་ཡངས་དྲི་མེད་ཆོས་དབྱིངས་ཆེར། །ཕུལ་བྱུང་མཁྱེན་དང་བརྩེ་བའི་ཉིན་བྱེད་དཀྱིལ་འཁོར་གསལ་བས་མཛེས་གྱུར་པ། །ཚུར་མཐོང་བྱིས་བློའི་སྤྱོད་ཡུལ་ལས་འདས་ནམ་མཁའ་ལྟ་བུའི་ཐུགས་མངའ་བ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཕྱོགས་བཅུ་དུས་བཞིའི་སྐྱོབ་པ་མི་ཡི་སེང་གེ་སྲས་དང་བཅས་རྣམས་ཀྱི། །བྲལ་ཐོབ་སྨིན་པ་ལས་བྱུང་དགོས་འབྱུང་ནོར་བུའི་ཚོགས་ཀྱིས་ཡོངས་གཏམས་པའི། །བསམ་བརྗོད་ལས་འདས་ཡོན་ཏན་མི་འཛད་རིན་པོ་ཆེ་ཡི་བང་མཛོད་མཆོག །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཆོས་དབྱིངས་མཁའ་ལ་ཐུགས་རྗེ་ཆེན་པོའི་ཆུ་འཛིན་ལྷུན་སྟུག་དཀྲིགས་པ་ལས། །ཕུལ་བྱུང་ཕྲིན་ལས་ཆར་གྱིས་འགྲོ་ཚོགས་ཉེས་པའི་དྲི་ཀུན་འཁྲུད་པ་དང་། །ཆབས་ཅིག་ཐར་གྲོལ་ཕན་བདེའི་མྱུ་གུ་མེ་འབྲས་མཐའ་དག་སྐྱེད་མཛད་པ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཞིང་ཁམས་རྒྱ་མཚོར་མི་ཟད་རྒྱན་འཁོར་རྣམ་ལྔའི་བཀོད་པའི་སྤྲིན་ཆེན་གྱིས། །སེམས་ཅན་རྒྱ་མཚོ་སྣ་ཚོགས་ཐབས་ཀྱིས་བྱང་ཆུབ་གསུམ་ལ་སྨིན་མཛད་པའི། །རྒྱལ་བ་རྒྱ་མཚོའི་རྣམ་ཐར་མ་ལུས་རྫོགས་པར་མཛད་ལ་མི་ངལ་བའི། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །མཚན་དཔེའི་འོད་འབར་རྒྱལ་སྲས་རྒྱུ་སྐར་ཕྲེང་བའི་དབུས་ན་མངོན་མཐོ་བའི། །ཉི་དང་ཟླ་ལྟར་རྣམ་པར་སྣང་བྱེད་ཁྱུ་མཆོག་སེང་གེ་གླང་ཆེན་གྱིས། །གུས་པས་བསྙེན་ཅིང་གསང་བ་བསམ་མི་ཁྱབ་པའི་མཛོད་ལ་བསྟེན་གྱུར་པ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །བརྟན་གཡོ་སྲིད་པའི་རིན་ཆེན་ལྗོན་ཤིང་མེ་ཏོག་འབྲས་བུ་རྩི་བཅུད་རིགས། །སྨན་ལྷ་དྲང་སྲོང་ཚེ་ཡི་རིག་བྱེད་འཛིན་དང་དེ་ཡི་བསྟན་བཅོས་སོགས། །འགྲོ་བའི་གཅོང་ནད་གཞི ལ་བར་ནུས་ཀུན་གང་གི་མཐུ་ལས་མངོན་ཤར་བ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །གང་གི་མཚན་ཙམ་བཟུང་བས་ངན་འགྲོ་ལོག་པར་ལྟུང་དུ་མི་སྐྱེ་ཞིང་། །རྟག་ཏུ་སྐྱེས་པ་ཉིད་འགྱུར་དབང་རྣོན་མཁས་གསལ་ཡིད་གཞུངས་དགེ་ལ་བརྩོན། །དགེ་བའི་བཤེས་དང་གྲོགས་ཀྱིས་ཟིན་སོགས་ཡོན་ཏན་དཔག་མེད་ཐོབ་གྱུར་པ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །བདུད་ཀྱི་ཞགས་པ་དམ་པོ་གཅོད་བྱེད་ཡེ་ཤེས་མཚོན་ཆེན་འབར་བ་སྟེ། །མ་རིག་སྒོང་ངའི་སྦུབས་གཅོག་ཤེས་རབ་ཟབ་མོའི་རྡོ་རྗེ་ཕ་ལམ་མཆོག །ཉོན་མོངས་ཆུ་ཀླུང་མཐའ་དག་སྐེམ་ལ་སྔོན་མེད་ཉིན་མོར་བྱེད་པ་ཆེ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །བདུད་དང་སྲིན་པོ་གཤིན་རྗེའི་འཇིགས་པ་ལས་སྐྱོབ་སྐྱེ ལ་མ་དཔའ་བོ་སྟེ། །བསམ་ཀུན་འགྲུབ་བྱེད་ཡིད་བཞིན་གཏེར་མཆོག་འཁོར་མཚོ་ལས་སྒྲོལ་རིན་ཆེན་གྲུ། །དུག་གསུམ་རྒྱུ་འབྲས་གཅོང་ནད་གཞིལ་སྔོན་མེད་བདུད་རྩིའི་ལྗོན་ཤིང་མཆོག །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །བཻཌཱུཪྱ་ལྟར་སྣང་བའི་ཞིང་དང་སྟོན་པ་རྗེས་སུ་དྲན་བྱས་ན། །འཆི་ཚེ་བྱང་ཆུབ་སེམས་དཔའ་བརྒྱད་མཐོང་རབ་ཏུ་དགའ་བ་འཐོབ་གྱུར་ཅིང་། །པདྨའི་སྦུབས་སུ་བརྫུས་ཏེ་སྐྱེས་ནས་ཚེ་དེས་སྲིད་པ་ཕྱིར་བསྙིལ་བ། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ལེགས་མཛད་ཡོན་ཏན་བསམ་མི་ཁྱབ་ཀྱང་བསམ་བྱ་ཀུན་གྱི་གཞིར་གྱུར་ཅིང་། །ཚུར་མཐོང་ངག་གིས་བརྗོད་པའི་ཡུལ་ལས་འདས་ཀྱང་བརྗོད་པ་ཀུན་གྱི་གཞི། །གཉིས་སུ་མེད་ཀྱང་ཐ་དད་ཚུལ་གྱིས་མཚན་དང་སྐུ་བཀོད་སྣ་ཚོགས་སྟོན། །བདེ་གཤེགས་སྨན་གྱི་བླ་མས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །མཚན་གྱི་མེ་ཏོག་རྒྱས་པར་དཔེ་བྱད་བཟང་པོའི་འབྲུ་ཆགས་མཛེས་པའི་སྐུ། །སྐལ་བཟང་རྐང་དྲུག་རེ་བ་སྐོང་མཛད་དམ་ཆོས་ཟིལ་དངར་འཇོ་བའི་གསུང་། །ཕུལ་བྱུང་མཁྱེན་བརྩེའི་ཡོན་ཏན་འབུམ་ལྡན་ཤིན་ཏུ་ཟབ་པའི་ཐུགས་མངའ་བ། །སྟོན་པ་མཚན་ལེགས་དཔལ་གྱིས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཐུགས་རྗེའི་མཁའ་ལ་རྨད་བྱུང་བརྩེ་བའི་ཆུ་འཛིན་ལྷུན་སྟུག་དཀྲིགས་པ་ལས། །ངོ་མཚར་མཛད་ཕྲིན་ཟབ་མོའི་ཆར་གྱིས་ས་གསུམ་འཇིག་རྟེན་དགའ་སྐྱེད་པ། །རིན་ཆེན་ཟླ་དང་པདྨས་རབ་ཏུ་བརྒྱན་གྱུར་མཁས་པ་གཟི་བརྗིད་ཅན། །སྒྲ་དབྱངས་རྒྱལ་པོ་མཆོག་གིས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །སྒྲིབ་གཉིས་བག་ཆགས་གཡའ་ཡིས་རབ་བཏང་དྲི་མེད་གསེར་སྦྱངས་སྙིང་པོའི་ཁམས། །བསྡུ་དངོས་བཞི་ཡི་བང་རིམ་རབ་མཛེས་མཁྱེན་རྟོགས་ཡོན་ཏན་བུམ་བྲེ་ཅན། །འགྲོ་བ་སྐྱོབ་པའི་ཆོས་འཁོར་རབ་བརྗིད་སྲིད་པ་གསུམ་གྱི་མཆོད་སྡོང་མཆོག །གསེར་བཟང་དྲི་མེད་སྣང་བས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཆོས་དབྱིངས་མཁའ་ལ་རྟག་ཏུ་གནས་བཅས་སྤངས་རྟོགས་ཡོན་ཏན་ཆ་རྫོགས་ཤིང་། །སྔོན་མེད་ཐུགས་བསྐྱེད་སྐྱ་རེངས་ཀྱིས་བསྐུལ་གྲོང་ཁྱེར་དྲུག་གི་འགྲོ་རྣམས་ཀྱི། །རྒུད་དང་མྱ་ངན་མུན་ཚོགས་སེལ་བྱེད་སྔོན་མེད་ཉིན་མོར་བྱེད་པ་མཆོག །མྱ་ངན་མེད་མཆོག་དཔལ་གྱིས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཆགས་སོགས་ཉོན་མོངས་ཀུན་ནས་སེལ་བྱེད་ལེགས་གསུངས་སེང་གེའི་སྒྲ་བསྒྲགས་པས། །འགྲོ་རྣམས་མ་རིགས་གཉིད་ལས་སློང་བྱས་ཡེ་ཤེས་སྣང་བ་ཟབ་མོ་ཡིས། །ཐར་གྲོལ་ཡོན་ཏན་འབྲས་བཟང་སྨིན་མཛད་སྲིད་ན་དཔེ་མེད་ཐམས་ཅད་མཁྱེན། །ཆོས་བསྒྲགས་རྒྱ་མཚོའི་དབྱངས་ཀྱིས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །ཤེས་རབ་ཟབ་མོས་གདོད་ནས་འཁོར་བའི་ཆུ་གཏེར་ཕ་རོལ་བརྒལ་ཟིན་ཀྱང་། །སྙིང་རྗེ་ཆེན་པོས་སྲིད་པར་རྗེས་ཆགས་ཐབས་མཁས་ཐུགས་རྗེའི་གྲུ་གཟིངས་ཀྱིས། །ཡིད་ཅན་རྒྱ་མཚོ་རྣམ་གྲོལ་རིན་ཆེན་གླིང་དུ་འགོད་མཛད་དེད་དཔོན་ཆེ། །ཆོས་གླིང་མངོན་མཁྱེན་རྒྱལ་པོས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །བྱམས་པའི་གོ་ཆས་བདུད་དམག་བྱེ་བ་འབུམ་གྱི་གཡུལ་ལས་རྣལ་རྒྱལ་ཞིང་། །བདག་མེད་རྟོགས་པའི་ཤེས་རབ་མཚོན་གྱིས་སྲིད་རྩའི་དྲྭ་བ་གཅོད་མཁས་པ། །སྡུག་བསྔལ་གསུམ་གྱི་འཇིགས་ལས་འགྲོ་བ་སྐྱོབ་པའི་དཔའ་བོ་མཚུངས་མེད་པ། །ཤཱཀྱའི་རྒྱལ་པོ་མཆོག་གིས་བདག་སོགས་དུག་གསུམ་རྒྱུ་འབྲས་ནད་ལས་སྲུངས། །གང་གི་སྤྱན་སྔར་མཐའ་ཡས་འགྲོ་རྣམས་སྐྱོབ་པར་ཞལ་གྱིས་བཞེས་པ་ཡི། །འཇམ་དཔལ་སྐྱབས་སྒྲོལ་གསང་བའི་བདག་དང་ཚངས་དབང་འཇིག་རྟེན་སྐྱོང་བ་བཞི། །གནོད་སྦྱིན་སྡེ་དཔོན་དྲུག་ཚན་ཟུང་དང་ཞང་བློན་དམ་ཅན་སྡེ་དགུ་སོགས། །སྨན་ལྷ་དྲང་སྲོང་རིག་འཛིན་ཚོགས་ཀྱིས་བདག་སོགས་རྒྱུ་འབྲས་ནད་ལས་སྲུངས། །རྒྱལ་བའི་ཡོན་ཏན་མཁའ་ལྟར་རྒྱ་ཆེ་རྒྱ་མཚོ་བཞིན་དུ་གཏིང་ཟབ་ཅིང་། །སྣ་ཚོགས་སྒྱུ་མའི་རོལ་གར་གང་འདུལ་དེར་སྟོན་བསམ་མི་ཁྱབ་པའི་བདག །མཐའ་དག་བརྗོད་ལ་བློ་མཆོག་སྨྲ་བའི་ཟླ་བ་རྣམས་ཀྱང་ངལ་འཛིན་ན། །བདག་ལྟ་བྱིས་པ་བླུན་པོའི་ངག་གིས་བརྗོད་པར་རློམ་འདི་བཞད་གད་གནས། །དེ་ལྟ་ན་ཡང་ཡིད་ནི་དད་བརྒྱའི་ཆང་གིས་ཀུན་ནས་མྱོས་པའི་རྒྱུས། །རྒྱལ་བའི་ཡོན་ཏན་ཆ་ཙམ་བསྔགས་ཤིང་གསོལ་བ་བཏབ་པའི་དགེ་འབྲས་ཀྱིས། །བསོད་ནམས་བརྒྱ་ལས་གྲུབ་པའི་བདེ་གཤེགས་ཕྱག་གིས་མགོ་ལ་ཉུག་མཛད་པས། །སྐྱེ་བཞི་བརྒྱུད་ལྔའི་འགྲོ་རྣམས་བདེ་བར་ངལ་འཚོ་ཐོབ་པའི་རྒྱུར་གྱུར་ཅིག །ཅེས་པའང་མཁས་བཙུན་བཟང་པོའི་ཡོན་ཏན་གྱིས་མངོན་པར་མཐོ་བའི་ཚེ་ཡི་རིག་བྱེད་འཛིན་པ་ཆེན་པོ་ཚུལ་ཁྲིམས་རྒྱལ་མཚན་ནས་ལྷ་རྫས་ཀྱི་སྐྱེས་བཅས་གསུང་གིས་བསྐུལ་མ་གནང་བ་བཞིན། རྨོངས་བཙུན་འདུ་གསུམ་པ་འགྱུར་མེད་པདྨ་རྣམ་རྒྱལ་གྱིས་མཆོག་ཏུ་གུས་པའི་ཡིད་ཀྱིས་བྲིས་ཤིང་གསོལ་བ་བཏབ་པ་སྟེ། འདིས་ཀྱང་འགྲོ་ཀུན་དུག་གསུམ་རྒྱུ་འབྲས་ཀྱི་ནད་ལས་ཐར་པའི་རྒྱུར་གྱུར་ཅིག། །།