ཐུབ་དབང་ཉེ་སྲས་བརྒྱད་ལ་བསྟོད་ཅིང་སྨོན་ལམ་དུ་བྱ་བ་དོན་ཀུན་གྲུབ་པའི་དབྱངས་སྙན།

༄༅། །ཐུབ་དབང་ཉེ་སྲས་བརྒྱད་ལ་བསྟོད་ཅིང་སྨོན་ལམ་དུ་བྱ་བ་དོན་ཀུན་གྲུབ་པའི་དབྱངས་སྙན་བཞུགས། ན་མོ་གུ་རུ་བུདྡྷ་བོ་དྷཱི་ས་ཏྭ་ཡ། དྭངས་པའི་མཁའ་ངོས་གཟའ་བྲལ་ཉི་ཟླའི་གཟུགས། །རྙོག་མེད་བསིལ་པའི་མཚོ་སྔོན་ལ་འཆར་བཞིན། །གང་འདུལ་བཀོད་པ་བསམ་མི་ཁྱབ་པའི་སྤྲིན། །རྒྱལ་དང་རྒྱལ་སྲས་བརྒྱད་ཚུལ་སྟོན་ལ་འདུད། །གློ་བུར་ཀུན་རྟོག་སྤྲོས་པ་ལས་གྲོལ་དབྱིངས། །ཟག་མེད་འོད་གསལ་འདུས་མ་བྱས་པའི་མདངས། །སྟོབས་སོགས་ཡོན་ཏན་རྒྱ་མཚོས་མངོན་མཛེས་ཀྱང་། །ཟབ་པའི་ཚུལ་དེ་ཕལ་གྱི་སྤྱོད་ཡུལ་ཅི། །ཆོས་ཀྱི་དབྱིངས་དང་སེམས་ཅན་མཐའ་ཇི་སྲིད། །དེ་སྲིད་གང་འདུལ་སྒྱུ་འཕྲུལ་བཀོད་པའི་སྤྲིན། །གཙོ་དང་འཁོར་སོགས་ཞི་ཆགས་ཁྲོ་བོའི་གར། །ནམ་ཡང་འཛད་མེད་ཁྱོད་སྐུའི་ངོ་མཚར་འབར། །གང་གི་རང་བཞིན་བསམ་བརྗོད་ལས་འདས་ཀྱང་། །སྐལ་བ་ཅན་ལ་རང་རང་མོས་པ་ཡི། །རྗེས་འགྲོ་དབྱངས་གཅིག་གིས་ཀྱང་ཆོས་སྒོ་བརྒྱ། །རྣམ་པར་འབྱེད་པ་ཁྱོད་གསུང་རང་བཞིན་ལགས། །གཟུང་འཛིན་རྟོག་པས་གཞར་ཡང་གོས་མིན་ཀྱང་། །མཁྱེན་གཉིས་ནོར་བུའི་སྒྲོན་མེས་སྲིད་པའི་མུན། །རབ་བསལ་འགྲོ་ཁམས་ཐུགས་རྗེའི་ཞགས་པ་ཡིས། །མ་བཏབ་ཤེས་བྱར་སྲིད་མིན་གང་ཐུགས་དཔལ། །མ་ལུས་འགྲོ་ཚོགས་སྤོོབས་པ་སངས་རྒྱས་བཞིན། །གྱུར་ཏེ་བསྐལ་པའི་མཐའ་བར་བརྗོད་བྱས་ཀྱང་། །བ་སྤུའི་ཁུང་བུ་གཅིག་གི་ཡོན་ཏན་མཐའ། །རྫོགས་པ་མིན་ན་ཕལ་གྱིས་གཞལ་བྱ་ཅི། །སྲིད་ན་ཕན་དང་བདེ་བའི་དངོས་མཐའ་དག །ཁྱོད་གཅིག་ཁོ་ནའི་ཕྲིན་ལས་འབའ་ཞིག་ལས། །གཞན་དུ་མིན་ན་འདི་ཞེས་ཕྱོགས་གཅིག་ཏུ། །བརྗོད་པར་རློམ་པ་བྱིས་པའི་ངང་ཚུལ་ཉིད། །ལྷ་ལ་ལྷ་ཡི་དཔག་བསམ་མནྡ་{ནྡཱ་འདིའི་རིགས་འདི་ལྟར་ཞུས། }ར། །ཀླུ་ལ་ཀླུ་ཡི་ནོར་བུ་དགོས་འབྱུང་ཉིད། །སྒྲུབ་ལ་འདོད་དགུའི་མཆོག་སྦྱིན་སྲས་བཅས་རྒྱལ། །རྟོག་མེད་ལྷུན་གྲུབ་མཛད་པ་མཉམ་པ་ཉིད། །འོན་ཀྱང་དཔག་བསམ་ཤིང་དང་ཡིད་བཞིན་ནོར། །བེམ་པོའི་རང་བཞིན་རྙེད་པར་དཀའ་བའང་མིན། །ཡེ་ཤེས་སྐུ་ཅན་ཁྱོད་མཚན་སྐྱེ་ལྔའི་སྒྲ། །བསྐལ་པ་བྱེ་བ་དུ་མར་ཐོས་དཀའི་གནས། །དེ་སླད་ཁྱོད་ནི་དཔེ་དང་བྲལ་བ་སྟེ། །དཔེ་དང་བྲལ་གང་ཇི་ལྟར་མཚོན་པར་ནུས། །དེས་ན་བསམ་མི་ཁྱབ་ལ་བདག་དགའ་བས། །བརྗོད་པ་སྤངས་ཏེ་གནས་འདི་བསྟོད་པའི་མཆོག །ཡེ་ཤེས་ཡངས་པའི་སྤྱོད་ཡུལ་བསམ་མི་ཁྱབ། །གཟུངས་སྤྲིན་ཏིང་འཛིན་སྨོན་ལམ་འཛད་པ་མེད། །ཐབས་མཁས་ཐུགས་རྗེའི་རོལ་མོ་ཕ་མཐའ་ཡས། །ཁྱོད་ཀྱི་སྒྱུ་མ་འདི་ནི་སུ་ཡིས་དཔོག །དེ་ལྟའི་རྣམ་ཐར་ཟབ་མོའི་ཚུལ་ཐོས་ནས། །དད་པའི་ཆུ་མཚོ་ལས་ཐོན་སོར་བཅུ་ཡི། །ཐལ་སྦྱར་པདྨ་དཀར་པོའི་ཁ་འབྱེད་བཞིན། །རྡུལ་སྙེད་ལུས་སྤྲུལ་གུས་པས་ཕྱག་བགྱིའོ། །དངོས་བཤམས་ཡིད་སྤྲུལ་དུས་གསུམ་དགེ་ཚོགས་བཅས། །མ་ལུས་ཡོངས་བསྡོམས་ཀུན་བཟང་མཆོད་པའི་སྤྲིན། །སྲིད་པ་གནས་པར་མཁའ་ཁྱབ་ཞིང་ཀུན་ཏུ། །མི་འཛད་ནམ་མཁའ་མཛོད་ཀྱི་བླ་རེ་བྲིས། །ཐོག་མ་མེད་ནས་མི་ཤེས་བག་མེད་དང་། །ཉོན་མོངས་དབང་གིས་བྱས་བསགས་སྒྲིབ་པའི་གཡས། །རིགས་ཁམས་སྙིང་པོ་སྒྲིབ་པའི་ནོངས་པའི་ཆ། །མ་ལུས་སྟོབས་བཞིའི་ཁྲུས་ཀྱིས་བྱི་དོར་བགྱི། །འཕགས་པའི་སྤྱོད་ཡུལ་འཕགས་པ་ཁོ་ནས་མཁྱེན། །འགྲོ་ཁམས་དགེ་ཚོགས་རྒྱ་མཚོའང་དཔག་པར་དཀའ། །དེ་ཀུན་ཡི་རང་གཅིག་གིས་དབང་བྱེད་པའི། །རྨད་བྱུང་ཐབས་མཁས་ཚུལ་ལ་ཡིད་རབ་དྭངས། །གཞན་དོན་མཛད་ལ་བསྐུལ་གདབ་མི་འཚལ་ཡང་། །གདུལ་བྱའི་ཡུལ་ལ་འཇུག་གང་རྟེན་འབྱུང་མཐུ། །དེ་སླད་འགྲོ་ཁམས་རྒྱ་མཚོར་ཁམས་དབང་བཞིན། །ཟབ་ཞིའི་ཆོས་ཆར་བསིལ་བོ་འབེབས་པར་མཛོད། །རྡོ་རྗེའི་སྐུ་ལ་འཆི་བདག་བདུད་ཚོགས་ཀྱིས། །བརྫི་ནུས་མིན་ཡང་ཆུ་སྣོད་ཟླ་གཟུགས་བཞིན། །གདུལ་བྱའི་དབང་གིས་སྐྱེ་དང་འཕོ་ཚུལ་སྟོན། །དེ་སླད་སྲིད་པ་ཇི་སྲིད་གཡོ་མེད་མཛོད། །འདིས་མཚོན་དུས་གསུམ་བྱས་བསགས་དགེ་ཚོགས་རྒྱུན། །འཁོར་གསུམ་རྟོག་པའི་རྙོག་མས་བསླད་མིན་པར། །བྱང་ཆེན་རྒྱ་མཚོར་ཡོངས་སུ་བསྔོ་བགྱིད་ནས། །སྲས་བཅས་རྒྱལ་བའི་དགོངས་མཚོར་སིམ་གྱུར་ཅིག །གཞན་དོན་རྫོགས་བྱང་མཆོག་ལས་མི་ལྡོག་ཕྱིར། །བྱང་ཆུབ་བར་དུ་སྐྱབས་སུ་ལེགས་བསྟེན་ཅིང་། །སྨོན་འཇུག་དམ་བཅའི་གོ་ཆ་བགོ་བགྱིད་ན། །ནམ་ཡང་བྱང་ཆུབ་སེམས་གཉིས་བརྗེད་མ་གྱུར། །རྟག་པར་མི་ཁོམ་བརྒྱད་དང་ཆོས་འགལ་བར། །སྤྱོད་པའི་གནས་གྲོགས་འཚེ་བའི་མིང་མི་གྲགས། །མཐུན་རྐྱེན་འཁོར་ལོ་བཞི་ཡི་འབྱོར་པ་ཡིས། །དཀར་པོའི་རིགས་ཀྱི་ནུས་པ་སད་གྱུར་ཅིག །དེ་ཚེ་ངེས་དོན་སྙིང་པོ་ཚུལ་བཞིན་དུ། །སྟོན་པའི་དགེ་བའི་བཤེས་དང་ལེགས་མཇལ་ནས། །སོ་སོ་ཐར་ནས་རྡོ་རྗེ་ཐེག་པའི་བར། །འགལ་མེད་ཉམས་ལེན་སྐལ་བཟང་མྱོང་གྱུར་ཅིག །རྨི་ལམ་དུ་ཡང་སྡིག་པའི་སེམས་མི་སྐྱེ། །རྟག་པར་བྱམས་དང་སྙིང་རྗེ་བྱང་སེམས་འབྱོང་། །རིམ་གཉིས་ལམ་ལ་བརྟན་པ་མཐར་ཕྱིན་ནས། །ཚེ་དེས་སྲིད་པའི་རྒྱ་མཚོ་བརྒལ་གྱུར་ཅིག །ལུས་ངག་རྩོམ་པ་རྟག་ཏུ་དོན་ཡོད་པས། །རྗེ་བཙུན་བླ་མའི་ཕྲིན་ལས་སྒྲུབ་པ་དང་། །མཁའ་ཁྱབ་འགྲོ་ལ་ཕན་བདེ་བྱེད་པ་ཡིས། །རྫོགས་སྨིན་སྦྱངས་པ་མཐར་ཕྱིན་སངས་རྒྱས་ཤོག །བདག་གི་ཕ་མ་གཉེན་བཤེས་དགེ་བའི་གྲོགས། །བཟང་ངན་ལས་ཀྱིས་འབྲེལ་སོགས་མཁའ་ཁྱབ་འགྲོ། །ཀུན་ཀྱང་ཚེ་འདིར་བདེ་སྐྱིད་ཆོས་འཕེལ་ཞིང་། །སྐྱེ་ཀུན་རྣམ་གྲོལ་ཡོན་གྱིས་འབྱོར་གྱུར་ཅིག །ནམ་ཞིག་འདིར་སྣང་ནུབ་པར་གྱུར་པའི་ཚེ། །གནད་གཅོད་སྡུག་བསྔལ་དྲག་པོ་མི་འབྱུང་ཞིང་། །བླ་མ་མཆོག་དང་རྒྱལ་བ་སྲས་བཅས་ཀྱིས། །མདུན་ནས་མངོན་བསུ་ཞིང་མཆོག་བགྲོད་པར་ཤོག །དེར་ནི་རྒྱལ་སྲས་འཕགས་པ་མཆོག་རྣམས་དང་། །རིག་འཛིན་དཔའ་བོ་མཁའ་འགྲོའི་ཚོགས་དང་བཅས། །ལྷན་ཅིག་སྤྱོད་པ་མཉམ་པ་ཉིད་གྱུར་ནས། །དཀའ་བ་མེད་པར་ལམ་ཀུན་བགྲོད་གྱུར་ཅིག །ནམ་ཞིག་འགྲོ་ལ་ཕན་པའི་དུས་གྱུར་ཚེ། །ཇི་ལྟར་ས་སོགས་འབྱུང་བ་ཆེན་པོ་བཞིན། །སྐད་ཅིག་ཙམ་ཡང་སྐྱོ་བའི་སེམས་མི་བགྱིད། །རླབས་ཆེན་གཞན་དོན་འབའ་ཞིག་སྤྱོད་གྱུར་ཅིག །བདེ་གཤེགས་ཉེ་སྲས་བརྒྱད་ཀྱི་ཐུགས་བསྐྱེད་དང་། །མཛད་པ་སྨོན་ལམ་མཁྱེན་བརྩེ་ནུས་པའི་ཚུལ། །བླ་མེད་ཡེ་ཤེས་སྒྱུ་འཕྲུལ་ཇི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །སྐྱེ་བ་ཀུན་ཏུ་བློ་གྲོས་མཐའ་ཡས་སོགས། །ཡོངས་འཛིན་དམ་པ་རྣམས་དང་མི་འབྲལ་ཞིང་། །གསུང་བཞིན་རྗེས་སུ་སྒྲུབ་པའི་སྐལ་བཟང་གིས། །དོན་གཉིས་པདྨོ་བཞད་པའི་བཀྲ་ཤིས་ཤོག །ཅེས་པའང་ལྕགས་བྱ་ས་ག་ཟླ་བའི་ཚེས་བཅོ་ལྔའི་དུས་ཆེན་ཉིན་རྒྱལ་བའི་སྲས་ཀྱི་རྟགས་ཙམ་འཆང་བ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་མདོ་ཁམས་སེང་གེ་གནམ་རྫོང་བྱང་ཆུབ་ཤིང་གི་ནགས་ཁྲོད་ན་མངོན་པར་མཛེས་པའི་སྒྲུབ་སྡེ་བདེ་ཆེན་པདྨ་འོད་གླིང་གི་དབེན་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བྲིས་ཤིང་སྨོན་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །།