འཕགས་པ་སྤྱན་རས་གཟིགས་ལ་བསྟོད་ཅིང་གསོལ་བ་འདེབས་པ་གཞན་ཕན་འདོད་དགུའི་འཇོ་བའི་ཡིད་བཞིན་རིན་པོ་ཆེ་སྤྲིན་གྱི་ཕྲེང་བ།

༄༅། །འཕགས་པ་སྤྱན་རས་གཟིགས་ལ་བསྟོད་ཅིང་གསོལ་བ་འདེབས་པ་གཞན་ཕན་འདོད་དགུའི་འཇོ་བའི་ཡིད་བཞིན་རིན་པོ་ཆེ་སྤྲིན་གྱི་ཕྲེང་བ་ཞེས་བྱ་བ། འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ། །དཔལ་ལྡན་སྟོབས་བཅུ་མངའ་བ་སྲས་བཅས་ཀྱི། །བརྩེ་ཆེན་ཐུགས་རྗེ་གཅིག་ཏུ་བསྡོམས་པའི་དཔྱིད། །ཞིང་ཁམས་རྒྱ་མཚོའི་འདྲེན་པ་གཅིག་པུ་པ། །སྙིང་རྗེའི་ལྷ་མཆོག་བདག་ལ་དགོངས་པར་མཛོད། །ཐོས་པས་ཚིམ་པའི་ཞལ་བཞེས་བདག་གིར་མཛད། །དྲན་པས་ཆོག་པའི་སྨོན་ལམ་ཡོངས་སུ་རྫོགས། །བཀླགས་པས་གྲུབ་པའི་རིགས་སྔགས་བཅུད་ལེན་སྦྱིན། །ཕན་བདེའི་སྤྲིན་ཆེན་ཁྱོད་ལ་མི་བསྔགས་སུ། །ཁྱོད་ཀྱི་བ་སྤུའི་ཁུང་བུ་རེ་རེས་ཀྱང་། །ཞིང་རྡུལ་སངས་རྒྱས་མཛད་པ་རྗེས་སྒྲུབ་མོད། །རྒྱལ་བའི་སྤྱན་སྔར་རྒྱལ་སྲས་ཚུལ་ཡང་སྟོན། །སྒྱུ་མ་ཆེན་པོའི་ཚུལ་འདི་སུ་ཡིས་ཤེས། །བྱེ་བ་ཁྲག་ཁྲིག་བརྒྱ་སྟོང་དུ་མའི་འགྲོ། །ཉིན་བཞིན་སྨིན་པར་བྱེད་པའི་སྐྱོབ་པ་མཆོག །དེ་འདྲ་རྒྱལ་ལའང་མེད་ཅེས་རྗེས་བསྔགས་ན། །ཕྲིན་ལས་ཟབ་མོའི་ཚུལ་ལ་སུ་མི་རང་། །ཕྱག་གི་འོད་ཟེར་ཆ་ལས་འདྲེན་པ་སྟོང་། །དེ་བཞིན་ཉི་ཟླ་ཚངས་དབང་མཐུ་བོ་ཆེ། །དབྱངས་ཅན་མ་སོགས་སྐུ་ཡི་ཆ་ཤས་ལས། །མཁའ་ཁྱབ་ཕན་བདེའི་གཞི་ཀུན་འཕྲུལ་བས་འཚེངས། །བ་སྤུའི་ཁུང་བུ་གཅིག་གི་ཡོན་ཏན་མཐའ། །བློ་ཆེན་ཀུན་ཏུ་བཟང་པོས་རྟོགས་མིན་ཞིང་། །སྐུ་ཡི་རང་བཞིན་བདེ་བར་གཤེགས་པས་ཀྱང་། །གཟིགས་པ་མིན་ན་ཕལ་གྱིས་སྨོས་ཅི་འཚལ། །རྡུལ་སྙེད་རྒྱལ་བས་བསྐལ་པར་བསྔགས་བརྗོད་ཀྱང་། །ཡོན་ཏན་མཁའ་མཐའ་རྫོགས་པར་མི་འགྱུར་ཞིང་། །དཔའ་ཆེན་གཞན་གྱིས་ཆ་ཙམ་བསྐྲུན་མིན་པའི། །ཚད་མེད་ཏིང་ངེ་འཛིན་ལ་འཇུག་ཅིང་ལྡང་། །སྙིང་རྗེའི་བདག་ཉིད་མནར་མེད་གྲོང་དུ་ཡང་། །གཞན་ཕན་ལ་སྤྲོ་པདྨའི་མཚོ་ལྟར་འཇུག །བྱམས་པའི་ཆར་གྱིས་སྡིག་སེམས་མི་གཞིལ་བའི། །དགེ་མཚན་ངོ་མཚར་སུམ་རྩེན་གྲོང་བཞིན་མཛེས། །བལྟས་པ་ཙམ་གྱིས་ཕུན་ཚོགས་དཔལ་ཡོན་ཀུན། །སེར་སྣའི་དུག་གིས་ཉམས་བྱེད་དབུལ་པོའི་གྲོང་། །རྗེས་བརྩེའི་ཕྱག་གནས་བབས་པའི་ཆར་རྒྱུན་གྱིས། །དུག་བཅོམ་འཕྲུལ་དགའི་དཔལ་ལ་སྦྱོར་བས་འཚེངས། །མི་གཙང་ཁྲོད་ན་སྦྲང་བུའི་གཟུགས་ལ་སོགས། །གང་འདུལ་འཕྲུལ་བས་ཤེས་རབ་ཟབ་མོའི་མིག །མུན་པས་ལོང་བའི་འགྲོ་ལ་རྗེས་སྩལ་མཐུས། །བདེ་ལྡན་ཞིང་མཆོག་པདྨོའི་དཔལ་ལ་རྩེན། །རྡོ་རྗེའི་མངལ་དང་གསེར་གྱི་གཞི་སོགས་སུ། །ལྷ་མིན་གནོད་སྦྱིན་འདྲེ་སྲིན་གདུལ་དཀའི་འགྲོ། །ཆོས་ཀྱི་སྦྱིན་པས་རྒྱུད་གྲོལ་རྣམ་གྲོལ་གྱི། །ཡོན་ཏན་མཆོག་དེ་ཁྱོད་ཀྱིས་སྩལ་པར་མཛད། །མི་མཐུན་རླུང་གིས་ཉམས་ཉེས་སྲིན་མོའི་གླིང་། །བཟུར་མེད་འཆི་བདག་མཆེ་བའི་བར་ཆུད་འགྲོ། །གསེར་གྱི་བྱེ་མར་ལུས་སྤྲུགས་ཅང་ཤེས་ཆེས། །དབུགས་འབྱིན་ཤི་བ་སློང་དེ་ཁྱོད་ཀྱི་མཐུ། །རྒྱལ་དང་དེ་སྲས་ཉན་རང་དགེ་བའི་བཤེས། །ལྷ་མཆོག་མི་བདག་གང་འདུལ་རོལ་རྩེད་ཀྱིས། །མཐོ་རིས་རྟེན་ལ་རྣམ་གྲོལ་དཔལ་སྟེར་ཞིང་། །ཁྱད་འཕགས་ཐུགས་རྗེས་གངས་ལྗོངས་འགྲོ་ལ་དགོངས། །མདོར་ན་ཤེས་བྱར་སྲིད་པའི་ཕན་བདེའི་དཔལ། །མཐའ་དག་ཁྱོད་གཅིག་ཁོ་ནས་རྣམ་འཕྲུལ་ན། །ཕྱོགས་རེར་འདྲེན་ལ་མཁས་རྣམས་མཚར་དུ་ཅི། །རྣམ་ཐར་བསམ་མི་ཁྱབ་ལ་བདག་སྤྲོའོ། །དྲུག་ཅུ་རྩ་གཉིས་གང་གཱའི་བྱེ་སྙེད་གྲངས། །རྒྱལ་རྣམས་དངོས་སུ་བསྙེན་དང་གང་གིས་མཚན། །ཐོས་ནས་དད་པས་ཐལ་སྦྱར་བསོད་ནམས་ཕུལ། །མཉམ་ཞེས་བདེན་གསུང་སེང་གེའི་སྒྲ་ཡིས་བསྙད། །ཐུབ་མཆོག་རྣམས་དང་དེ་སྲས་གྲགས་ཆེན་པོ། །སྒྲིབ་སེལ་སོགས་ཀྱང་ཁྱོད་ཞལ་བལྟ་བ་དང་། །རིགས་སྔགས་འཚོལ་བའི་ཚུལ་ལ་རྗེས་ཞུགས་ན། །སྲིད་ཞིའི་ཁོངས་ན་རྣམ་ཐར་མཉམ་པ་སུ། །ཡུམ་ཆེན་མོས་ཀྱང་ཕྱག་བྱས་རིགས་སྔགས་མཆོག །གང་གིས་འཆང་དེའི་བ་སྤུའི་ཁུང་རེར་ཡང་། །སངས་རྒྱས་བྱེ་བ་མང་བཞུགས་དབུགས་དབྱུང་ཞིང་། །ལུས་སེམས་རྡོ་རྗེ་ལྟར་བརྟན་དགེ་མཚན་འཛིན། །གང་དག་དེ་ལུས་རེག་མཐོང་འགྲོ་ཀུན་ཀྱང་། །རྒྱལ་སྲས་སྲིད་པ་ཐ་མར་ངེས་འགྱུར་ཞིང་། །འཆལ་སོགས་ཉེས་ཀུན་ཟིལ་གནོན་ཆོས་སྨྲ་དེ། །རྒྱལ་དང་མཉམ་པར་བལྟ་བྱར་ཐུབ་རྣམས་བསྔགས། །མཚན་ཐོས་ཙམ་གྱིས་བྱང་ཆུབ་ཕྱིར་མི་ལྡོག །དྲན་པའི་མོད་ལ་བརྒྱད་གཉིས་འཇིགས་ཀུན་འཕྲོག །ཡིད་བཞིན་ནོར་ལྟར་ཕན་བདེའི་རེ་སྐོང་བའི། །ཁྱོད་ཞབས་པདྨོ་བསྟེན་རྣམས་སྐལ་བཟང་ཉིད། །གང་གིས་དུས་དྲུག་གཟིགས་པའི་སྤྱན་ཡངས་ཀྱིས། །ལུས་ཅན་ཀུན་ལ་དབུགས་འབྱིན་སྩལ་པའི་ཕྱག །རིང་པོར་རྐྱོང་མོད་ཀྱེ་ཧུད་བདག་ལྟ་བུ། །སྐལ་ཉེས་པ་ཡིས་མ་མཐོང་སྡུག་བསྔལ་ལོ། །དུས་རིང་སྲིད་པར་བདག་ཏུ་རྟོག་པའི་རྒྱུས། །མ་རིག་དབང་གིས་འཕགས་ལ་མི་མཉེས་སྒྲུབ། །འགྲོ་ལ་འཚེ་སོགས་མི་འོས་ལས་ཀུན་བགྱིས། །ད་ནི་གདུང་བའི་ང་རོས་མགོན་ལ་བཤགས། །ཤིན་ཏུ་ཉམ་ཐག་སྡུག་གི་མཆི་མ་འདི། །བྱམས་ཆེན་མ་ཡི་ཕྱག་གིས་མི་སེལ་ན། །སྲིད་པའི་མལ་ནས་ནམ་ཞིག་ལྡང་བར་འགྱུར། །སློང་བའི་དུས་སྐབས་མཆོག་ཀྱང་དེང་ལགས་སོ། །བདག་ནི་འཕགས་མཆོག་ཁྱེད་ལ་སྐྱབས་གསོལ་ན། །སྐལ་བས་ཕོངས་ཞེས་བཏང་སྙོམས་བཞག་ན་ཀོ །ཐུགས་རྗེ་ཆེ་ཞེས་སུ་ལ་བརྗོད་པར་རུང་། །ཞལ་འཆེས་རྫུན་དུ་མ་གཏོང་མགོན་པོ་ཀྱཻ། །སྔོན་ཚེ་བདེ་གཤེགས་བྱེ་བ་ཕྲག་ཅུའི་དྲུང་། །འཕགས་མཆོག་ཁྱེད་ཀྱིས་ཇི་ལྟར་ཐུགས་བསྐྱེད་ཅིང་། །རླབས་ཆེན་རྫོགས་སྨིན་སྦྱངས་པའི་ཁྱད་པར་ཚུལ། །དེ་དག་ཀུན་ལ་འཇུག་པར་བདག་སྤྲོའོ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །རྨི་ལམ་ཙམ་དུའང་སྡིག་པའི་སེམས་མི་སྐྱེད། །སྒོ་གསུམ་བརྩམ་པ་གཞན་དོན་འབའ་ཞིག་འགྱུར། །རྣམ་ཐར་རྒྱ་མཚོར་མཉམ་པར་འཇུག་བྱིན་རློབས། །མི་ཁོམ་བརྒྱད་དང་རྒྱུད་དྲགས་ཉོན་མོངས་སེམས། །ལྟུང་ལྡན་ཆོས་སྤངས་མཚམས་མེད་བྱས་ལ་སོགས། །དགེ་རྩ་ཆད་ཅིང་སྐྱབས་མགོན་མ་མཆིས་པ། །དེ་དག་ཀུན་གྱིས་བདག་རྗེས་དྲན་གྱུར་ཅིག །དེ་ཡི་མོད་ལ་བདག་གི་སྨོན་པའི་མཐུས། །ལས་ཉོན་དྲྭ་བ་ཡེ་ཤེས་རལ་གྲིས་བཅད། །སྡུག་བསྔལ་མེ་ཚོགས་ཐུགས་རྗེའི་ཆུ་ཡིས་གཞིལ། །རྣམ་གྲོལ་རྒྱལ་སྲིད་སྦྱིན་ནུས་བྱིན་དངོས་སྩོལ། །བདག་གི་མིང་ཙམ་ཐོས་པས་སྒྲིབ་ཀུན་བྱང། །འཇིགས་བྲལ་ལེགས་སྨོན་ཀུན་འགྲུབ་དམན་ལུས་སྤངས། །དག་པའི་ཞིང་འགྲོ་ཏིང་འཛིན་གཟུངས་སྤྲིན་བརྙེས། །བྱང་ཆུབ་ལམ་ལས་ཕྱིར་ལྡོག་མ་གྱུར་ཅིག །མཁའ་ཁྱབ་འགྲོ་ལ་གང་ལ་ཅིས་འདུལ་གཟུགས། །མངོན་སྤྲུལ་རང་སྐལ་འཚམ་པའི་ཆོས་ཆར་སྤྲོ། །གདུལ་དཀའི་ཤེས་རྒྱུད་བྱམས་དང་སྙིང་རྗེས་བརླན། །འཁོར་བ་དོང་ནས་སྤྲུགས་ནུས་བྱིན་རླབས་སྩོལ། །མདོར་ན་འདི་ནས་བྱང་ཆུབ་མ་ཐོབ་བར། །འཕགས་མཆོག་བདག་གི་དགེ་བའི་བཤེས་གྱུར་ཏེ། །ཕ་རོལ་ཕྱིན་བཅུའི་ས་ཀུན་མྱུར་རྫོགས་ནས། །གྲུབ་གཉིས་པདྨོ་བཞད་པར་མཛད་དུ་གསོལ། །བཀྲ་ཤིས་གང་ཞིག་འཕགས་པའི་བདེན་བྱིན་གྲུ། །རྣམ་དག་སྨོན་པའི་རླུང་གི་ཉེར་བསྐུལ་རྒྱུས། །འགྲོ་ཀུན་སྲིད་པའི་རྒྱ་མཚོ་རབ་བརྒལ་ནས། །དོན་གཉིས་ནོར་བུའི་གླིང་ལ་ངལ་འཚོ་ཤོག །ཅེས་པའང་ཟིལ་གནོན་ཆོ་འཕྲུལ་ཆེན་པོའི་དུས་ཚེས་དགེ་བར། འགྲོ་འདུལ་འཕགས་པའི་གནས་མཆོག་མདོ་ཁམས་སེང་གེ་གནམ་རྫོང་འཆི་མེད་ལྗོན་པའི་བསིལ་གྲིབ་ན་མངོན་པར་མཛེས་པའི་སྒྲུབ་སྡེ་བདེ་ཆེན་པདྨ་འོད་གླིང་དུ་རྒྱལ་བའི་སྲས་ཀྱི་མིང་གིས་བསྙད་པའི་བཙུན་པ་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་གསོལ་བ་བཏབ་པ་བདག་སོགས་ཡིད་ཅན་མཐའ་དག་སྐྱེ་བ་ཀུན་ཏུ་འཕགས་པས་རྗེས་སུ་འཛིན་པའི་རྒྱུར་གྱུར་ཅིག