དཔལ་རྡོ་རྗེ་གཞོན་ནུ་ལ་བསྔགས་པ་ཁྲག་འཐུང་དཔལ་བོའི་དགྱེས་གླུ།

དཔལ་རྡོ་རྗེ་གཞོན་ནུ་ལ་བསྔགས་པ་ཁྲག་འཐུང་དཔལ་བོའི་དགྱེས་གླུ་ཞེས་བྱ་བ་བཞུགས་སོ། །ན་མོ་གུ་རུ་ཤྲཱི་བཛྲ་ཀུ་མཱ་ར་ཡ། མཆོག་བྱིན་རྩེ་བརྒྱ་འབར་བའི་མཚོན་ཆ་ཆེ། །དྲན་ཙམ་ཉིད་ན་ལོག་འདྲེན་བཅུད་མེད་དཔུང་། །དགའ་བའི་མངལ་གནས་ལྷུང་བྱེད་ལྷག་པའི་ལྷ། །དཔལ་ཆེན་རྡོ་རྗེ་གཞོན་ནུས་དགེ་ལེགས་སྩོལ། ༡ །ཁྱོད་ནི་སྲིད་ཞི་ཀུན་ཁྱབ་ཡེ་ཤེས་སྐུ། །སྤྲོས་པའི་ཆོས་ཀུན་ཐིག་ལེ་གཅིག་ཏུ་བཟླུམ། །ཉག་གཅིག་ཀློང་དུ་འཁོར་འདས་ཆོས་ཀུན་རྫོགས། །རང་བྱུང་ཀློང་ཡངས་བརྗོད་བྲལ་ནམ་མཁའི་གཤིས། ༣ །ཇི་ལྟར་མཁའ་ལ་འབྱུང་བཞིའི་འདུ་འགོད་བཞིན། །ཆོས་དབྱིངས་གཅིག་གིས་ཆོས་ཀུན་རྒྱས་ཐེབས་ཀྱང་། །བྱིས་པའི་བློ་ཅན་མཚན་མར་འཛིན་རྣམས་ཀྱིས། །གཅིག་དང་ཐ་དད་འཛིན་པའི་འཁྲུལ་པས་བསླད། ༣ །ཤིན་ཏུ་དྲི་མེད་ཆོས་དབྱིངས་འདུས་མ་བྱས། །འོད་གསལ་རང་བཞིན་སྤྲོས་མཚན་ཀུན་བྲལ་བ། །སྤྲོས་པ་ཅན་ལ་ཡེ་ནས་ངང་གིས་ཁྲོ། །ཟབ་པའི་ཚུལ་དེ་རྟོག་གེའི་སྤྱོད་ཡུལ་ཅི། ༤ །ཡེ་ཤེས་རང་སྣང་གསང་ཆེན་ཕོ་བྲང་དུ། །ཉིད་ལས་མི་གཞན་དཔལ་ཆེན་ཚོམ་བུའི་ཚུལ། །ཏནྟྲའི་དགོངས་ཟབ་དུས་བཞིར་མཉམ་པ་ཆེར། །མི་འགྱུར་འཕོ་མེད་རྟག་པ་དམ་པར་ཤེས། ༥ །དེ་ཡི་རང་རྩལ་སྨིན་པ་རྒྱ་མཚོ་ཡི། །དག་པའི་འཁོར་ལ་པྲ་ཕབ་ཆོ་ག་བཞིན། །ངེས་པ་ལྔ་ལྡན་ལོངས་སྐུའི་རྣམ་པ་རུ། །སྣང་ཡང་རང་སེམས་དྭངས་པའི་ཁྱད་ཆོས་ཙམ། ༦ །ཇི་ལྟར་མཚོ་ལ་གཟའ་སྐར་ཤར་བ་བཞིན། །མོས་པ་རྒྱ་མཚོའི་འཁོར་ལ་ཞི་དང་ཁྲོའི། །རྣམ་འཕྲུལ་དཔག་ཡས་འདུལ་བཞིའི་ཕྲིན་ལས་ཕུལ། །སྒྲོལ་བ་གཉིས་ཀྱིས་སྲིད་མཚོ་སྐེམ་དེ་མཚར། ༧ །ཆོས་ཉིད་གཤིས་ལ་ཅིར་ཡང་མ་གྲུབ་ཀྱང་། །ཆོས་ཅན་སྣང་ངོར་རྣམ་འཕྲུལ་མཐའ་ལས་འདས། །འདི་ཞེས་མི་མཚོན་ཚིག་གི་བརྗོད་པས་ཅི། །མཉམ་པ་ཆེན་པོའི་ཚུལ་ལ་བདག་སྤྲོའོ། ༨ །ཁྱོད་ཀྱི་རིགས་སྔགས་གྲུབ་པའི་ཁྱུ་ཆེན་པོས། །འདུས་བྱས་མཚན་མའི་རྫས་ཕུར་གདེངས་ཙམ་གྱིས། །བདུད་རིས་ཕྱེ་མར་འཐག་པའི་དཔའ་གླུ་ཡིས། །ཐུབ་བསྟན་ས་གསུམ་ཁྱབ་པའི་གཏམ་དེ་སྙན། ༩ །ཐ་མལ་སྣང་ཞེན་ཀུན་རྟོག་འཆིང་བའི་རྒྱ། །ཡེ་ནས་དག་མཉམ་དཀྱིལ་འཁོར་གསུམ་གྱི་ཚུལ། །ལེགས་རྟོགས་བསྐྱེད་རིམ་སྲིད་པ་ཕུར་བུ་ཡི། །སྣང་སྟོང་སྐུ་ཡི་རྡོ་རྗེར་སྦྱོར་དེ་མཚར། ༡༠ །རྩ་གསུམ་འཁོར་ལོ་བཞི་ལྡན་ཨེ་དབྱིངས་སུ། །ཝཾ་ཡིག་ཐབས་མཆོག་བདེ་ཆེན་བྱང་སེམས་དལ། །ཐབས་གྲོལ་ལམ་གྱིས་གསོལ་བའི་དགའ་བཞིའི་འབྲས། །གྲགས་སྟོང་གསུང་གི་རྡོ་རྗེ་སྦྱིན་པས་འཚེངས། ༡༡ །རིག་པའི་ཕུར་བུ་སྐུ་གསུམ་དགོངས་པའི་གཟེར། །ཡིན་ལུགས་ཅོག་བཞག་བཞི་ཡི་ཉམས་བླངས་འབྲས། །སྒྲོན་དྲུག་སྣང་བ་བཞི་ཡི་གསེང་ལམ་ནས། །རིག་སྟོང་ཐུགས་ཀྱི་རྡོ་རྗེར་བསྡོམས་པར་ངེས། ༡༢ །ཨ་ཧོ་གསང་མཆོག་རྒྱལ་པོ་ཟླ་མེད་ཕུལ། །ཨེ་མ་སྔོན་བསགས་མཐུས་འབྲེལ་རྟེན་འབྱུང་གིས། །ཟབ་དོན་གསལ་པོར་བརྗོད་པའི་བསྔགས་དབྱངས་འདིས། །འགྲོ་ཀུན་བདུད་བཞིའི་གཡུལ་ལས་རྒྱལ་གྱུར་ཅིག །༡༣ ཅེས་པའང་རིག་འཛིན་གྱི་བཙུན་པ་རྡོ་རྗེ་དབང་མཆོག་དགྱེས་རབ་རྩལ་གྱིས་ལྷག་པའི་ལྷ་འདི་ཉིད་བསྙེན་པའི་ཐུན་གསེང་དུ་འཕྲལ་མར་བྲིས་པ་དགེ།