སྒྲོལ་མ་དམར་མོ་ལ་བསྟོད་ཅིང་གསོལ་བ་འདེབས་པ་སིནྡྷུཝ་རིའི་མེ་ཏོག

༄༅། །སྒྲོལ་མ་དམར་མོ་ལ་བསྟོད་ཅིང་གསོལ་བ་འདེབས་པ་སིནྡྷུཝ་རིའི་མེ་ཏོག་ཅེས་བྱ་བ། དབང་གི་ལྷ་མོ་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱི་ཕྲིན་ལས་བཅུད། །ཆགས་མེད་ཆགས་པ་ཆེན་པོའི་ཡེ་ཤེས་ནི། །སྲིད་ཞིར་མི་གནས་མཉམ་ཉིད་བདེ་བ་ཆེ། །དུ་མའི་དཔལ་གྱིས་རྣམ་པར་འཁྱུད་དེར་འདུད། །ལྷན་སྐྱེས་བདེ་བ་ཆེན་པོའི་ཟུར་མིག་གིས། །སྲིད་ཞིའི་ཆོས་ཀུན་ཐིག་ལེ་གཅིག་ཏུ་བཟླུམས། །བཅུ་དྲུག་ཉམས་ཀྱིས་སྒེག་པ་ལི་ཁྲིའི་རྡུལ། །སྒྱུ་མ་ཆེན་པོའི་ཚུལ་ལ་བདག་དགའ་འོ། །སྤྱན་ལྔ་དག་པའི་ཡུལ་གྱུར་འཕགས་བཞིའི་ཚོགས། །ཁྱོད་ལས་འཁྲུངས་ཀྱང་ཁྱོད་ནི་རྒྱལ་ཀུན་གྱི། །ཕྲིན་ལས་ཀུན་འཆང་གང་འདུལ་བཀོད་པའི་སྤྲིན། །ནམ་མཁའ་ཇི་སྲིད་གནས་པར་སྟོན་དེ་མཚར། །གནས་ཚུལ་ངང་དུ་མི་རྟོག་སྤྲོས་ལས་འདས། །སྣང་ཚུལ་དག་པའི་སྒྱུ་འཕྲུལ་བསམ་མི་ཁྱབ། །གང་ཡང་མིན་ལ་ཅིར་ཡང་འཆར་བའི་དཔྱིད། །ནམ་མཁའི་གར་མཁན་མ་ལ་བདག་སྤྲོའོ། །ཀུན་རྟོག་དབྱིངས་སུ་བཅིངས་པའི་དེ་མ་ཐག །སྟོང་ཉིད་ནམ་མཁའི་བུ་མོ་བཞིན་བཟང་མས། །ལྷན་སྐྱེས་ནུ་མ་སྣུན་པའི་དགེ་མཚན་གྱིས། །ནམ་མཁའི་ཞགས་པས་སྐྱེ་དགུ་འཆིང་དེ་མཚར། །རབ་མཛེས་བྱེ་རུའི་ལྕུག་ཕྲན་གསར་པའི་རྩེར། །ལང་ཚོས་རྣམ་པར་དུད་པའི་འཛུམ་པའི་ཞལ། །སྨིན་མའི་འཁྲི་ཤིང་འཁྱོགས་པོའི་གར་སྟབས་ཅན། །ཁྱོད་སྐུས་སྲིད་གསུམ་འགྲོ་བ་མ་བཅོམ་སུ། །ཐུན་མཚམས་ཆུ་འཛིན་གསར་པའི་ཁུ་བ་ཡིས། །བྲིས་མིན་མཚན་དཔེའི་རི་མོ་བརྒྱ་བཅུ་གཉིས། །རྣམ་བཀྲ་ཉི་མ་འཆར་ཁའི་གཟི་བྱིན་ཅན། །མིག་ལ་ཟླ་བ་ཡིད་ལ་བདུད་རྩི་དངོས། །ལྷ་ཡི་ཆ་ལུགས་ལྷ་ལས་ཁྱད་འཕགས་ཕུལ། །མཆོག་སྦྱིན་ཨུཏྤལ་དམར་པོའི་སྡོང་བུ་འཛིན། །བརྐྱང་བསྐུམ་སྟབས་ཀྱིས་འགྱིང་བག་རོལ་བའི་སྐུ། །གང་གིས་དྲན་བྱེད་དེ་ལ་ཤིས་པ་སྩོལ། །སྔོན་ཚེ་ཐུགས་བསྐྱེད་སྨོན་པའི་ཁྱད་པར་གྱིས། །བུད་མེད་རྟེན་གྱིས་སངས་རྒྱས་མཛད་པ་སྒྲུབ། །ཀུན་དང་མཉམ་ཞིང་ཀུན་ལས་ཁྱད་འཕགས་པའི། །མྱུར་མ་དཔལ་མོ་བདག་ལ་བརྩེ་བར་མཛོད། །དཔལ་མོ་ཁྱོད་ལ་སྦྱིན་པའི་མཐུ་ཡོད་ཀྱང་། །སློང་བའི་སྐལ་བ་ཕྲ་བ་སྙིགས་མའི་འགྲོ། །རྒུད་པར་གྱུར་འདི་མ་ཡིས་མ་གཟིགས་སམ། །ཉམ་ཐག་བུ་ལ་ལྷག་པར་དགོངས་ཤིག་ཀྱེ། །བརྒྱད་གཉིས་འཇིགས་པའི་མེ་ཡིས་ཀླུབ་པའི་བུ། །ཉམ་ཐག་ང་རོས་འབོད་པའི་གདངས་ཞན་ཡང་། །བརྩེ་བའི་སྤྱན་རས་བཙའ་བའི་དབུགས་འབྱིན་ཕྱག །ལ་འུར་སྐྱོངས་ཤིང་སྐྱོབ་པར་མཛད་དུ་གསོལ། །སྟོན་དུས་པད་རྫིང་ལྟར་རྒུད་སྣོད་བཅུད་དཔལ། །གསོ་བྱེད་ཐུགས་བསྐྱེད་སྨོན་པའི་སྤྲིན་ཆེན་ལས། །ཚེ་དཔལ་འབྱོར་པ་འདོད་དགུའི་གྲུ་ཆར་གྱིས། །རྫོགས་ལྡན་མགྲོན་དུ་འགུགས་པར་མཛད་དུ་གསོལ། །ཁྱད་པར་སྟོབས་དང་དྲེགས་པའི་མ་དཱ་ནས། །ཆེར་མྱོས་ལམ་གོལ་གཡང་ལ་འཆེལ་བའི་ཡིད། །མཆོག་བྱིན་པདྨའི་ལྕགས་ཀྱུས་ཉེར་དྲངས་ཏེ། །ངེས་གསང་བསྟན་ལ་འདུན་པར་མཛད་དུ་གསོལ། །མཁས་པའི་ཕྱག་རྗེས་བསྟན་ལ་སྨན་པའི་གསོས། །གྲུབ་པའི་ཉམས་རྟོགས་གཞན་སྣང་གདུལ་བའི་སྒོ། །འཁོར་ལོ་གསུམ་ལྡན་བཤེས་གཉེན་ཀུན་བསྡུས་ལ། །ཕྱོགས་འདིར་ཐུབ་བསྟན་རྒྱས་པར་མཛད་དུ་གསོལ། །མཐོ་རིས་ཡོན་ཏན་བདུན་གྱི་འཁྲི་ཤིང་རྩེར། །ལྷག་བསམ་བརྩོན་པའི་མེ་ཏོག་ཆེས་རྒོད་པའི། །བློ་གསལ་སྐྱེ་བོ་མཐའ་དག་དབང་བསྡུས་ལ། །བཤད་སྒྲུབ་བསྟན་པ་དར་བར་མཛད་དུ་གསོལ། །འཕགས་ནོར་ཡོན་ཏན་བདུན་གྱིས་མངོན་མཐོའི་དཔལ། །བསླབ་གསུམ་ལུས་ཤེད་རྫོགས་པའི་འཕྱོར་སྒེག་ཅན། །མཆོད་འོས་དམ་པ་ཐམས་ཅད་དབང་བསྡུས་ལ། །དགེ་འདུན་སྡེ་ཆེན་ཚུགས་པར་མཛད་དུ་གསོལ། །སྡེ་བཞིའི་འབྲས་ཁུར་ལྕི་བའི་གྲིབ་བསིལ་དུ། །འབངས་འཁོར་ངལ་འཚོ་སྦྱིན་ལ་མི་ངལ་བའི། །རྒྱལ་བློན་བཙུན་འཁོར་བཅས་རྣམས་དབང་བསྡུས་ལ། །ཡུལ་ཁམས་ཆོས་ལ་ཚུད་པར་མཛད་དུ་གསོལ། །སྦྱིན་པའི་འབྲས་བཟང་དུས་སུ་སྨིན་པའི་བཅུད། །དད་གཏོང་བློ་གྲོས་ཡོན་གྱི་ཁུར་ལྕི་བའི། །འབྱོར་ལྡན་ཡོན་བདག་ཐམས་ཅད་དབང་བསྡུས་ལ། །དགེ་འདུན་བཀུར་སྟི་འཕེལ་བར་མཛད་དུ་གསོལ། །དཀར་ཕྱོགས་ལ་དགའ་མཐུ་སྟོབས་འཛད་མི་ཤེས། །ནགས་ཕྱོགས་ཕྲུ་མ་གཞོམ་ལ་ཆེས་དཔའ་བའི། །ལྷ་ཀླུ་གཞི་བདག་ཐམས་ཅད་དབང་བསྡུས་ལ། །བཀྲ་ཤིས་བདེ་ལེགས་འཕེལ་བར་མཛད་དུ་གསོལ། །མངོན་མཐོའི་རྟེན་གྱི་རྫིང་བུ་ཉམས་དགའ་བར། །རྣམ་རིག་མེ་ཏོག་གསར་པས་ཆེས་བཀྲག་པའི། །སྐྱེ་འགྲོ་ཕོ་མོ་ཐམས་ཅད་དབང་བསྡུས་ལ། །ལུས་སེམས་དགེ་ལ་སྦྱོར་བར་མཛད་དུ་གསོལ། །དཀར་མིན་ལས་ཀྱིས་སྒྲིབ་པའི་མཐོང་བྱེད་སྒོར། །ཀུན་རྟོག་སྐྲ་ཤད་འཛིང་བའི་མ་རུངས་སེམས། །བདུད་རིགས་ལོག་ལྟ་ཅན་རྣམས་དབང་བསྡུས་ནས། །བསྟན་ལ་བར་ཆད་མེད་པར་མཛད་དུ་གསོལ། །གྲགས་པའི་རྔ་ཆེན་ཚངས་པའི་གཞི་ལས་བརྒལ། །མཁོ་དགུའི་ལོངས་སྤྱོད་འཛད་མེད་ཆར་དུ་བསྐྱིལ། །སྲིད་ཞིའི་དཔལ་འབྱོར་མ་ལུས་དབང་བསྡུས་ལ། །འབད་མེད་ལྷུན་གྱིས་གྲུབ་པར་མཛད་དུ་གསོལ། །ཁྱད་པར་ཐབས་མཁས་ཟབ་མོའི་རྟེན་འབྲེལ་གྱིས། །རླུང་སེམས་སྣང་བ་མ་ལུས་དབང་འདུས་ནས། །དོན་གཉིས་ལྷུན་གྲུབ་ཡིད་བཞིན་རིན་ཆེན་སྤྲིན། །ཚེ་གཅིག་སངས་རྒྱས་འགྲུབ་པར་མཛད་དུ་གསོལ། །འདི་ནས་བཟུང་སྟེ་ཚེ་རབས་ཐམས་ཅད་དུ། །གང་གི་ཞབས་ཀྱི་ཆུ་སྐྱེས་ལ་བརྟེན་ནས། །འཇིག་རྟེན་འཇིག་རྟེན་འདས་པའི་དགེ་མཚན་གྱིས། །ཕུན་ཚོགས་བསམ་ཀུན་འགྲུབ་པའི་བཀྲ་ཤིས་ཤོག །ཅེས་སྒྲོལ་མ་དམར་མོ་མི་མཐུན་ཀུན་སེལ་གྱི་བསྟོད་པ་འདོད་གསོལ་དང་བཅས་པའི་ཚིགས་སུ་བཅད་པ་འདི་ཡང་། མེ་རྟ་ཆོ་འཕྲུལ་ཟླ་བའི་ཡར་ཚེས་གྲུབ་པའི་གཟའ་སྐར་བཟང་པོ་ལ་གཞན་ཕན་ཆོས་ཀྱི་བློ་གྲོས་ཀྱིས་ཟླ་བྲལ་མཁས་གྲུབ་དུ་མས་ཞབས་ཀྱིས་བཅགས་ཤིང་འཁོར་ལོ་གསུམ་གྱི་ཕྲིན་ལས་རྒྱ་ཆེར་བསྐྱངས་པའི་གནས་བདེ་ཆེན་པདྨ་འོད་གླིང་དུ་བྲིས་ཤིང་གསོལ་བ་བཏབ་པ་དགེ་ལེགས་ཀྱི་སྣང་བ་ཆེན་པོས་ས་གསུམ་དུ་ཁྱབ་པའི་རྒྱུར་གྱུར་ཅིག