ངག་གི་དབང་ཕྱུག་འཕགས་མ་དབྱངས་ཅན་མ་ལ་བསྟོད་པ་རབ་སྙན་ནོར་བུའི་རྒྱུད་མང་།

༄༅། །ངག་གི་དབང་ཕྱུག་འཕགས་མ་དབྱངས་ཅན་མ་ལ་བསྟོད་པ་རབ་སྙན་ནོར་བུའི་རྒྱུད་མང་ཞེས་བྱ་བ། སྙན་ངག་གི་ལྷ་མོ་ལ་ཕྱག་འཚལ་ལོ། །རབ་དཀར་འོད་ཟེར་སྟོང་གི་དྲྭ་བ་ཡིས། །ཉེས་པའི་མུན་པ་མ་ལུས་སེལ་མཛད་པའི། །དྲི་ཟའི་ན་ཆུང་ཡིད་འོང་མཛེས་པའི་སྐུ། །བདག་གི་སྙིང་ལ་འབྲལ་བ་མེད་པར་མཛོད། ༡ །འཇིག་རྟེན་དབང་ཕྱུག་ཐུགས་རྗེའི་ཆུ་གཏེར་ལས། །ཉེར་ཐོན་ཕུལ་བྱུང་མཚན་དཔེའི་ཆ་རྫོགས་ཤིང་། །བློ་གྲོས་ཀུ་མུཏ་བཞད་པའི་དཔལ་ཡོན་ཅན། །ཟླ་གཞོན་འདྲ་བས་བདག་ལ་སྣང་བ་སྩོལ། ༢ །དབྱངས་ཀྱི་ཡན་ལག་རྫོགས་པའི་གསུང་གཅིག་གིས། །འགྲོ་ཚོགས་མ་རིག་གཉིད་ལས་སློང་མཛད་ཅིང་། །རྣམ་གྲོལ་རྨ་བྱ་དགའ་བའི་གཉེན་གཅིག་པུ། །འབྲུག་སྒྲ་འདྲ་བས་བདག་ལ་དབུགས་དབྱུང་མཛོད། ༣ །མཁྱེན་པའི་ཡེ་ཤེས་གཏིང་མཐའ་མི་དཔོག་ཅིང་། །བརྩེ་ཆེན་ཐུགས་རྗེའི་རླབས་ཕྲེང་འབུམ་ཕྲག་གིས། །སྲིད་པའི་ཚད་གདུང་མཐའ་དག་བཅིལ་ནུས་པའི། །ཆུ་གཏེར་འདྲ་བས་བདག་ལ་བགོ་སྐལ་སྩོལ། ༤ །དཔལ་ལྡན་ཡོན་ཏན་ཕན་བདེའི་འོད་སྟོང་གིས། །ས་གསུམ་དགེ་ལེགས་པདྨོ་བཞད་མཛད་ཅིང་། །ཉེས་པའི་མུན་པ་མ་ལུས་སེལ་བའི་དཔལ། །ཉི་མ་འདྲ་བས་བདག་བློའི་མུན་པ་སོལ། ༥ །ཕུལ་བྱུང་ཕྲིན་ལས་གློག་གི་ཟློས་གར་གྱིས། །གྲུབ་གཉིས་འདོད་དགུའི་གྲུ་ཆར་འཇོ་བ་ཡིས། །ལུས་ཅན་ཕན་བདེའི་མྱུ་གུ་བསྐྱེད་བསྲིང་བའི། །ཆར་སྤྲིན་འདྲ་བས་བདག་བློའི་རེ་སྐོང་མཛོད། ༦ །འཕགས་བོད་མཁས་གྲུབ་བྱེ་བས་ལེགས་མཆོད་ནས། །སྙན་ངག་ཆུ་བོ་སྟོང་ཕྲག་ཕྱོགས་བརྒྱ་རུ། །འདྲེན་པའི་ངོ་མཚར་དུས་ལས་ཡོལ་མིན་པའི། །གངས་རི་འདྲ་བས་བདག་ལ་ཆུ་བོ་བྱིན། ༧ །སྐྱེ་བོ་རྣམས་ཀྱི་སྙིང་ལ་གནས་བཅས་ནས། །བདེན་དང་དམ་བཅས་མི་འཚེར་སྦྱོར་མཛད་པའི། །ཡེ་ཤེས་རང་བཞིན་ཀུན་ལ་ཁྱབ་པའི་བདག །ཤེས་བྱ་འདྲ་བས་བདག་ལ་མཁྱེན་པར་མཛོད། ༨ །མཁས་པ་རྣམས་ཀྱི་ངག་ལ་གནས་བཅས་ཏེ། །ལེགས་བཤད་མི་ཟད་བདུད་རྩི་སྐྱུག་པ་ཡིས། །ཐུབ་བསྟན་མཚོ་ཆེན་ཆེས་ཆེར་སྤེལ་མཛད་པའི། །གསུང་དབང་འདྲ་ནས་ངག་ལ་ཤིས་པ་བྱིན། ༩ །བྲམ་ཟེ་རྣམས་ཀྱི་ལྷ་རུ་མངོན་སྤྲུལ་ནས། །རིག་བྱེད་བཞི་སོགས་གང་ལ་གང་འདུལ་གྱི། །འདོད་པའི་འབྲས་ཀུན་ཡིད་བཞིན་འཇོ་མཛད་པའི། །གཏེར་ཆེན་འདྲ་བས་བདག་ལ་འབྱོར་བར་མཛོད། ༡༠ །གང་དག་འཆད་པར་འདོད་ལ་སྨྲ་བའི་ལྕེ། །རྩོད་པར་འདོད་ལ་རིགས་པའི་མདའ་རྣོན་མཆོག །རྩོམ་པར་འདོད་ལ་ལེགས་བཤད་བྱེ་བའི་གཏེར། །ནོར་མཆོག་འདྲ་བས་བདག་ལ་དངོས་པོ་བྱིན། ༡༡ །ཁྱོད་ནི་མ་འདྲིས་ཀུན་ལ་མཛའ་བའི་གཉེན། །སྐྱེ་དགུའི་རེ་བ་སྐོང་ཞེས་ཉེར་གྲགས་ན། །རྨོངས་པ་བདག་གིས་འདོད་པའི་ཚིག་འགའ་ཞིག །གསོལ་བར་བགྱི་འོ་འཕགས་མ་དབྱངས་ཀྱི་རྒྱལ། ༡༢ །ལས་ཉོན་དྲྭ་བས་སྒྲིབ་པའི་མཐོང་བྱེད་སྒོར། །ཁྱེད་སྐུའི་བདུད་རྩི་མངོན་དུ་མ་གྱུར་ཀྱང་། །སྙིང་ལ་དད་གསུམ་པིར་གྱིས་ལེགས་བྲིས་ནས། །ཡང་ཡང་འབོད་པ་ཁྱེད་ཀྱིས་མ་གསན་ནམ། ༡༣ །བསླབ་གསུམ་སྟོབས་ཉམས་དྲན་ཤེས་མཁར་བ་ཆག །ཤེས་རབ་མིག་བྲལ་སྲིད་པའི་འབྲོག་དགོན་དུ། །རྣམ་པར་འཁྱམས་པའི་ཉམ་ཐག་བདག་འདྲ་བ། །ཀྱེ་མ་མ་ཡི་ཐུགས་རྗེས་འདོར་ཕོད་དམ། ༡༤ །དམན་ལ་དགྱེས་པའི་སྤྱན་རས་མི་བཙའ་ན། །དམ་པ་རྣམས་ལ་དགོངས་ཀྱང་ཅི་ཞིག་དགོས། །གཏུམ་པོ་རྣམས་ཀྱང་མཆོད་ན་མགོན་བྱེད་ན། །འཕགས་མ་བདག་ལ་ཅི་ཕྱིར་དགོངས་མི་མཛད། ༡༥ །དུས་ལས་ཡོལ་མེད་ཐུགས་རྗེའི་རླབས་ཕྲེང་གིས། །འགྲོ་ཀུན་རྒུད་པའི་གདུང་བ་གཞིལ་གྲགས་ན། །བདག་ལ་མཐོང་བ་ཙམ་ཡང་མ་བསྟན་ཅི། །དེ་སླད་བདག་ནི་ཤིན་ཏུ་སྐལ་མེད་ལགས། ༡༦ །འཕགས་མའི་ཐུགས་རྗེར་ཕྱོགས་རིས་མངའ་འམ་ཅི། །བདག་གི་གདུང་བའི་སྨྲེ་སྔགས་མ་གསན་ནམ། །ཅི་ཡི་སླད་དུ་བདག་ལ་བརྩེ་མི་མཛད། །ད་ནི་མ་ཐོགས་མྱུར་དུ་རྗེས་འཛིན་མཛོད། ༡༧ །མཛེས་སྐུ་མིག་གི་བདུད་རྩིར་སྟོན་{པ་ཞུ་མཆན། }དང་། །ཚངས་པའི་གསུང་དབྱངས་རྣ་བའི་ཅུད་དུ་སིམ། །ཡིད་ལ་ཡེ་ཤེས་འཇུག་པ་ཟབ་མོ་ཡིས། །སྐད་ཅིག་ཙམ་ཡང་འབྲལ་མེད་སྲུང་བར་མཛོད། ༡༨ །དབྱངས་ཀྱི་རྒྱལ་མོ་རྒྱལ་ཀུན་བསྐྱེད་པའི་ཡུམ། །ཤེས་རབ་ཕར་ཕྱིན་དོན་དམ་བདེན་པ་མཆོག །སྐྱེ་བོ་ཀུན་གྱི་མྱུར་དུ་རྟོགས་གྱུར་ནས། །ཐམས་ཅད་མཁྱེན་པའི་གནས་ལ་ངལ་འཚོ་ཤོག ༡༩ །མཁྱེན་བརྩེ་ནུས་པའི་ཡོན་ཏན་དར་དྲགས་པས། །འཆད་རྩོད་རྩོམ་གསུམ་རླབས་ཆེན་ཕྲིན་ལས་ཀྱིས། །ཐུབ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པ་རིན་ཆེན་ཡུན་དུ་གསལ་བྱེད་ཤོག ༢༠ །བཀྲ་ཤིས་ཉི་མ་སྟོང་ཁམས་བདལ་བ་ཆེ། །སྲས་བཅས་རྒྱལ་བའི་ཐུགས་རྗེའི་གྲུ་ཆར་གྱིས། །རྫོགས་ལྡན་དབྱར་གྱི་རྔ་གསང་རྟག་འབར་བས། །འགྲོ་ཀུན་ཕན་བདེའི་དགའ་སྟོན་རྒྱས་གྱུར་ཅིག ༢༡ །འཕགས་མ་དབྱངས་ཅན་མ་ལ་བསྟོད་པ་རབ་སྙན་ནོར་བུའི་རྒྱུད་མང་ཞེས་བྱ་བ་ཤཱཀྱའི་དགེ་ཚུལ་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེས་སྦྱར་བ་དགེ་ལེགས་འཕེལ།
༄༅། །ༀ་སྭསྟི། འཇིག་རྟེན་དབང་ཕྱུག་ཚེམས་ཀྱི་ཆུ་གཏེར་ལས། །ཉེར་ཐོན་ཀུན་རྨོངས་ཚད་གཞིལ་འཕགས་མའི་ཟླ། །སྙན་ངག་ཆུ་ཀླུང་མཐའ་དག་འཕེལ་མཛད་དེས། །བདག་བློའི་ཀུ་མུཏ་མཆོག་ཏུ་རྒྱས་པར་མཛོད། །སྙན་སྙན་བརྟན་གཡོ་སྲིད་པའི་སྒྲ་སྐད་ཀུན། །ཡང་ཡང་གཅིག་ཏུ་བསྡམས་ལས་མངོན་སྣང་བའི། །མཚར་མཚར་ཚངས་པའི་སྲས་མོ་དཔེ་མེད་ལ། །མང་མང་མཁས་པའི་ཚོགས་ཀྱི་བསྔགས་བྱར་གྱུར། །ཉི་མས་དབང་སྔོན་བཞུས་པའི་ཁུ་བ་ནི། །གཅིག་ཏུ་བསྐྱིལ་འདྲའི་རིན་ཆེན་མཚོ་རྫིང་འགྲམ། །པད་དཀར་ལང་ཚོས་སྒེག་པའི་ཀེེ་སར་རྩེར། །རབ་གསལ་ཚེས་བདག་རྒྱས་པའི་གདན་མཆོག་མཛེས། །སྐྱོན་བྲལ་ཡོན་ཏན་རྫོགས་པའི་མཛེས་སྐུའི་དཔལ། །སྲིད་པ་བརྟན་གཡོའི་དཀར་བའི་དངོས་པོ་ཀུན། །བྱེད་པོའི་ཕྱག་རྒྱས་ལན་སྟོང་བཞུས་པ་ཡི། །དྲི་མེད་སྙིང་པོ་མཆོག་ལས་བསྐྲུན་པ་བཞིན། །ཟླ་བའི་ཞལ་རས་ཆུ་ཤིང་བརླ་ནང་གཤིམ། །བིམ་པའི་མཆུ་སྒྲོས་གེ་སར་ཚེམས་ཕྲེང་མཛེས། །ལྕུག་ཕྲན་ཕྱག་གིས་རྒྱུད་མང་འཁྲོལ་བ་ལ། །སྤྱན་གྱི་བུང་བ་གཅིག་ཏུ་ཆགས་པ་བཞིན། །དྲི་མེད་མ་ལི་ཀ་{ལཱི་ཀཱ}ཡི་ཕྲེང་བ་ཡིས། །མངོན་མཛེས་ཐོར་ཚུགས་རྩེར་གནས་བསིལ་ཟེར་ཅན། །ཞལ་གྱི་དཀྱིལ་འཁོར་མཐོང་བས་མ་བཟོད་ནས། །སྐྱེངས་པའི་ཡིད་ཀྱིས་ཀུན་ཏུ་འདར་བ་འདྲ། །ཛམ་བུ་ན་དཱའི་སྙིང་པོ་ལས་བསྐྲུན་པའི། །འབུམ་ཕྲག་འོད་ཟེར་འཕྲོ་བའི་རྒྱན་ཆ་དང་། །རིན་ཆེན་རིན་ཐང་བྲལ་བའི་དོ་ཤལ་གཉིས། །ཕན་ཚུན་ལང་ཚོའི་དྲེགས་པས་འགྲན་པ་བཞིན། །སྲབ་འཇམ་ཡངས་པ་ལྷ་ཡི་ན་བཟའ་དང་། །ལྷབ་ལྷུབ་དར་གྱི་འཕྱང་འཕྲུལ་གཡོ་བ་ཡང་། །རབ་དཀར་ཀེ་ལ་ཤ་ཡི་ས་འཛིན་ལ། །རྣམ་བཀྲའི་དབང་པོའི་གཞུ་ཡིས་འཁྱུད་པ་བཞིན། །བཻཌཱུར་རྒྱུད་མང་སྦྲེེང་བའི་ཡིད་འཕྲོག་དབྱངས། །སྟོང་ཁམས་རྣ་བའི་བཅུད་དུ་ལེན་པའི་ཚེ། །ཏམྦུ་ར་སོགས་སྙན་སྒྲོགས་དབང་པོ་རྣམས། །ཁེངས་པ་ཞུམ་ནས་ཡང་ཡང་བཏུད་དམ་སྙམ། །གང་གི་མཛེས་སྡུག་སྐུ་ཡི་རྣམ་དཔྱོད་དཔལ། །མཐོང་བས་ཞུམ་པའི་བཅུ་གཉིས་བདག་པོ་ཡང་། །མྱུར་བའི་སྟབས་ཀྱིས་ནུབ་རིར་ཡིབ་པ་ལ། །ཀུ་མུ་ད་རྣམས་འཕྱ་བས་དགོད་པ་འདྲ། །ཡན་ལག་དྲུག་ཅུ་རྫོགས་པའི་གསུང་དབྱངས་ཀྱིས། །ཕུལ་བྱུང་སྙན་ཚིག་གླུ་རུ་བླངས་པའི་ཚེ། །རིག་བྱེད་དྲན་པོ་ཁེངས་པ་རབ་ཞི་ནས། །ཐོས་འཛིན་བརྒྱད་ཀྱིས་འབད་པས་མཉན་ནམ་སྙམ། །ཇི་ལྟ་ཇི་སྙེད་ཤེས་བྱའི་གནས་མཐའ་དག །ཇི་བཞིན་གཟིགས་པ་ཁྱོད་ཐུགས་མཁྱེན་པའི་མཐར། །ངལ་བརྒྱས་འབད་ཀྱང་འགྲན་པར་མ་བཟོད་ནས། །ཀུན་གསལ་ཆུ་འཛིན་ཕག་ཏུ་ཡིབ་མིན་ནམ། །མཆོག་གི་ཡོན་ཏན་ཤིན་ཏུ་རྒྱ་ཆེ་བ། །བརྗོད་ལ་མངོན་དགའ་ཆུ་ལྷའི་བུ་མོ་ཡིས། །རོ་འཛིན་བརྒྱ་ཡིས་བསྐལ་པར་འབད་བྱས་ཀྱང་། །ཆ་ཙམ་མ་དཔོག་ལྕེ་ལ་ངོ་ཚ་བཞིན། །གང་གི་རྗེེས་བརྩེ་འཛུམ་པའི་སྤྱན་ཟུར་མདའ། །བློ་ལྡན་གང་གི་སྙིང་ལ་རེག་ཙམ་གྱིས། །ལྷན་སྐྱེས་ཀུན་ནས་དཀྲིས་པའི་མ་རིག་དཔུང་། །དབང་ཕྱུག་སུམ་བརྩེགས་བཞིན་དུ་བཅོམ་གྱུར་མཚར། །དེ་སླད་བདག་བློ་ངང་པའི་བུ་མོ་ནི། །རྣམ་པ་ཀུན་ཏུ་གཡོ་བ་མེད་པ་རུ། །དབྱངས་ཅན་འོ་མའི་མཚོ་ལ་རབ་ཆགས་ན། །འཛུམ་པའི་རླབས་ཕྲེང་ཅིག་ཅར་གཡོ་མཛོད་ཀྱཻ། །ཁོ་བོའི་བློ་ཡི་རྫིང་བུ་དང་འཚམས་པའི། །བསྟོད་བསྔགས་མེ་ཏོག་ཕྲེང་བ་འདི་འབུལ་ན། །མཚོ་བྱུང་དཔལ་མོ་བརྩེ་བས་རྗེས་དགོངས་ཏེ། །ངག་གི་དབང་ཕྱུག་དམ་པ་དེང་འདིར་སྩོལ། །ཤུགས་དྲག་དད་པའི་ལག་པས་བསྔགས་འོས་ཀྱི། །ཨུཏྤལ་ཚིག་གི་ཕྲེང་བར་བརྒྱུས་པའི་མོད། །འདོད་བའི་རེ་སྐོང་འཕགས་མ་སྐྱེ་ཀུན་ཏུ། །བདག་གི་སྙིང་ལ་འབྲལ་བ་མེད་གྱུར་ཅིག །འཆད་རྩོད་རྩོམ་པའི་ལང་ཚོ་དར་དྲགས་པས། །ཚད་མ་གསུམ་ལྡན་ཐོག་མཐའ་བར་དགེ་བའི། །མཚུངས་མེད་ཐུབ་པའི་བསྟན་མཆོག་རིན་པོ་ཆེ། །ཕྱོགས་དུས་ཀུན་ཏུ་ཆེས་ཆེར་སྤེལ་བྱེད་ཤོག །འཕགས་མ་སྒྲ་དབྱངས་ལྷ་མོ་ལ་བསྔགས་པ་མེ་ཏོག་གི་ཕྲེང་བ་ཞེས་བྱ་བ་རྒྱལ་ཁམས་ཆུ་བཞིན་ཉུལ་བའི་ཀུ་སཱ་ལི་ཛྙཱ་ན་ས་ག་རས་བྲིས་པ་དགེ།
༄༅། །སྭ་ར་སྭསྟི་པྲཉྫ་བྷྱཿ མཁའ་ཁྱབ་མཁའ་ཡི་རྡོ་རྗེའི་ཡེ་ཤེས་སྐུ།། འཇམ་དཔལ་ཡང་དག་སེམས་དཔའ་དགྱེས་བསྐྱེད་གར། །ཤེས་རབ་ཕར་ཕྱིན་རྡོ་རྗེ་དབྱངས་ཀྱི་རྒྱལ། །བདག་ཡིད་རྩེ་དགའི་ཆགས་པས་རྗེས་སྐྱོངས་ཤིག ༡ །ཁྱོད་ནི་རྒྱལ་བ་ཐམས་ཅད་བསྐྱེད་པའི་ཡུམ། །ཆོས་དབྱིངས་མཉམ་པ་ཆེན་པོར་རྗེས་ཞུགས་པས། །ཡི་གེ་སྨྲ་བས་རྟོགས་པའི་ཡུལ་མིན་ན། །གང་གིས་གང་ལ་ཇི་ལྟར་བསྟོད་པར་བགྱི། ༢ །སྟོང་དང་རྟེན་འབྱུང་ཟུང་དུ་འཇུག་པའི་གཤིས། །རྡོ་རྗེ་ནམ་མཁའི་དཀྱིལ་ལྟར་རྣམ་དག་པ། །གློ་བུར་སྤྲོས་པས་ནམ་ཡང་ཉམས་པ་མེད། །ཟབ་པའི་ཚུལ་དེ་ཁྱོད་ཀྱི་རང་གཤིས་ལགས། ༣ །ཡོད་མེད་རྟག་ཆད་སྤྲོས་པའི་མཐའ་ལས་འདས། །འབྱོན་དང་བཞུད་དང་བཞུགས་པ་ཡང་མི་མངའ། །ནམ་མཁའི་སྐུ་ཅན་སུ་ཡིས་བསམ་པར་ནུས། །དབུ་མའི་ལམ་དེ་དོན་དམ་སྤྱོད་ཡུལ་ཉིད། ༤ །རང་བཞིན་འོད་གསལ་ཉི་མ་འཁོར་ཡུག་བརྡལ། །ཡེ་ཤེས་ཡངས་པའི་རོལ་རྩེད་བསམ་མི་ཁྱབ། །གཅིག་དང་དུ་མར་མི་གནས་ཕྱག་རྒྱ་ཆེ། །དངོས་གཅིག་དངོས་པོ་ཀུན་གྱི་རང་བཞིན་མཚར། ༥ །ཆགས་མེད་ཆགས་པ་ཆེན་པོའི་ཡེ་ཤེས་ནི། །སྲིད་ཞིར་མི་གནས་མཉམ་པ་ཉིད་ཀྱི་དབྱིངས། །སྐྲ་རྩེའི་ཁྱོན་ལ་རྡུལ་སྙེད་ཞིང་སྐུའི་སྤྲིན། །མ་འདྲེས་འཆར་བའི་སྒྱུ་མ་འདི་ཆེ་འོ། ༦ །ལས་ཀྱི་སྒྱུ་མ་སྒྱུ་མ་ཆེན་པོ་ཡི། །རྡོ་རྗེ་བསྡོམས་པས་རྗེས་སུ་བསྡོམས་པའི་གར། །ནམ་མཁའི་མུ་ཁྱུད་མཉམ་པའི་ཕ་མཐའི་ཁྱོན། །གཟིགས་མཆོག་མངའ་རྣམས་ལུང་སྟོན་མཛད་མ་ལགས། ༧ །དེ་སླད་བརྗོད་མཐས་གཏུག་གང་བརྗོད་པས་ཅི། །བརྗོད་པ་སྤངས་ཏེ་གཅིག་ཏུ་གུས་པའི་ཡིད། །བརྗོད་མེད་དོན་ལ་མཉམ་པར་འཇོག་བགྱིད་ན། །འཛད་མེད་སྤོབས་པའི་གཏེར་ཆེན་འབྱིན་མཛོད་ཀྱཻ། ༨ །དབྱངས་ཅན་ཞབས་ཀྱི་ཟླ་ཚེས་ལ། །དད་པའི་ཀུ་མུཏ་ཆེར་བཞད་པའི། །གཞན་ཕན་བློ་གྲོས་བཟང་པོས་སྦྱར། །འགྲོ་ཀུན་གསུང་དབང་འགྲུབ་གྱུར་ཅིག།
༄༅། །ན་མ་སྭ་ར་སྭསྟི་ཡེ། རྒྱལ་ཀུན་མཁྱེན་རབ་ཡེ་ཤེས་རོལ་ཅན་མ། །འགྲོ་ལ་རྗེས་ཆགས་སྙིང་རྗེ་བསྲུབས་པ་ལས། །ཉེར་འཁྲུངས་བློ་གྲོས་ངན་པའི་ཚད་གདུང་འབུམ། །གཞིལ་མཛད་རྡོ་རྗེ་དབྱངས་ཀྱི་རྒྱལ་མོར་འདུད། ༡ །བརྟན་གཡོའི་མཛེས་སྡུག་དྭངས་བཅུད་བྱེད་པོ་ཡིས། །གཅིག་ཏུ་བསྡོམས་པས་མི་མཚོན་ཁྱོད་སྐུའི་དཔལ། །རང་ཉིད་དཔེ་ཟླར་བཞག་ལས་གཞན་མིན་ཞེས། །ཞིང་ཁམས་རྒྱ་མཚོར་གྲགས་པའི་མུ་ཁྱུད་བརྡལ། ༢ །སྲིད་དང་ཞི་བའི་སྒྲ་དབྱངས་འབུམ་ཕྲག་སྙེད། །དཔལ་མོ་ཁྱོད་གསུང་ཁོ་ནས་འཕྲོག་མཐོང་ནས། །རིག་བྱེད་དྲན་པོ་མི་སྨྲའི་བརྟུལ་ཞུགས་ཀྱིས། །ཐོས་འཛིན་བརྒྱད་ཀྱིས་འབད་པས་མཉན་པར་ངེས། ༣ །ཤེས་བྱའི་ཁོངས་སུ་མི་རྫོགས་མཁྱེན་བརྩེའི་མཐར། །འགྲན་ལས་ངལ་བའི་སྔོ་བསངས་བུ་མོ་ཡིས། །ཐོད་རྒྱན་ཟླ་བ་གསར་པའི་མེ་ལོང་དེ། །ངེས་པར་གདན་དུ་བཀོད་ལ་སོམ་ཉི་ཅི། ༤ །དཔག་ཡས་ཡོན་ཏན་ནོར་བུའི་མཛོད་ཀྱི་ལྕིད། །དུས་གསུམ་ལུས་མེད་ཐུལ་དང་མཉམ་མོ་ཞེས། །རྒྱ་མཚོའི་གོས་ཅན་འཁུན་བཅས་འདར་བ་ལས། །ཡོན་པའི་ཚུལ་གྱིས་ཅུང་ཟད་འཛུམ་པ་འདྲ། ༥ །ཀུན་གསལ་གཟུགས་སུ་མ་གྲུབ་དེ་སྲིད་དུ། །ཕ་མཐའ་རྫོགས་མིན་ཁྱོད་ཀྱི་ཕྲིན་ལས་དང་། །འཁོར་མཐའ་ཕན་ཚུན་འགྲན་སྙམ་ཁོ་བོའི་ཡིད། །ཐེ་ཚོམ་ཁྱོགས་ལ་འཕྱང་འདི་ལྷན་སྐྱེས་ཉིད། ༦ །སྲིད་ཞིའི་ཁོངས་སུ་རྫོགས་མིན་ཟུར་མིག་མདའ། །གང་ལ་རེག་དེའི་སྙིང་ལ་ཐོགས་མེད་ནས། །གནས་བཅས་ཤེས་བྱར་འཁོན་པའི་དགྲ་བོ་དེས། །སླད་ནས་ཕྱི་མིག་ལྟ་བའི་སྐབས་མི་འཚལ། ༧ །ཁྱོད་ཞབས་བརྟེན་པས་སྔོན་རབ་བློ་མཆོག་འབུམ། །བྱིན་པ་མེད་པར་ཀུན་མཁྱེན་རྒྱལ་ཐབས་ཆེར། །རང་དབང་སྤྱོད་པའི་གཏམ་གྱི་གླིང་བུ་བརྒྱས། །ཨེ་མ་ཁོ་བོའི་སྒྲ་འཛིན་དོན་ལྡན་བྱས། ༨ །དེ་སླད་ཁྱོད་ཡོན་ཞགས་པས་དབང་མེད་དུ། །བདག་ཡིད་རིག་པའི་ཁྱེའུ་ཆུང་བཅིང་བའི་རྒྱུས། །ཡུལ་གཞན་གཡོ་བའི་གོ་སྐབས་མི་བགྱིད་ན། །ཐུགས་རྗེའི་ཕྱག་ཡངས་རྐྱོངས་ཤིག་འཕགས་མ་ཀྱཻ། ༩ །ཚེ་རབས་ཕྲེང་བར་ཁྱོད་ཞབས་ཟླ་ཚེས་དྲུང་། །བདེ་བར་ངལ་འཚོ་ཐོབ་པའི་དགེ་མཚན་གྱིས། །གཏེར་བརྒྱད་ཀུ་མུཏ་བཞད་པའི་བདུད་རྩིའི་སྐྱེས། །རྣམ་མང་མགྲོན་ལ་འགྱེད་པའི་དཔལ་སྩོལ་ཅིག ༡༠ །དེ་སྐད་འཕགས་མ་དྲན་པའི་ངག །དབྱངས་ཅན་དགྱེས་པའི་ཡིད་ལས་སྐྱེས། །དགེ་བས་འབྲེལ་བཅས་འགྲོ་རྣམས་ཀྱིས། །སྤོབས་པས་རྒྱལ་བསྟན་འཛིན་ནུས་ཤོག།
༄༅། །དབྱངས་ཅན་མ་ལ་ཕྱག་འཚལ་ལོ། །དཀར་མོ་ཀུན་ནས་དཀར་བའི་སྐུ། །སྐྱོན་ལས་རྣམ་པར་གྲོལ་བས་ཏེ། །རྒྱན་དང་ཆ་ལུགས་བཟང་པོས་ཀྱང་། །དཀར་བ་ཉིད་ཀྱིས་གཟིགས་སུ་གསོལ། །དཀར་མོ་ཀུན་ནས་དཀར་བའི་གསུང་། །རྫུན་སོགས་དྲི་མས་གོས་མིན་པར། །འགྲོ་རྒྱུད་ཉེས་ཚོགས་འཁྲུད་ནུས་པའི། །ཆེས་དཀར་བདུད་རྩི་བདག་ལ་སྩོལ། །དཀར་མོ་ཀུན་ནས་དཀར་བའི་ཐུགས། །སྒྲིབ་གཉིས་སྒྲ་གཅན་ལས་གྲོལ་ཞིང་། །མཁྱེན་བརྩེའི་དཀྱིལ་འཁོར་ཡོངས་རྫོགས་པའི། །འོད་དཀར་བདག་ལ་སིམ་པ་སྩོལ། །དཀར་མོ་ཡོན་ཏན་ཆེས་དཀར་ཕུལ། །མི་ཤིས་མཚན་མ་མེད་པའི་དཔལ། །ཕན་བདེའི་སྣང་བ་སྦྱིན་མཛད་མ། །དཀར་བའི་ཆ་ཤས་བདག་ལ་སྩོལ། །དཀར་མོ་ཕྲིན་ལས་ཆེས་དཀར་མ། །རྟག་པར་འགྲོ་བློའི་མུན་སེལ་ཞིང་། །ཡང་དག་ལམ་བཟང་སྣང་མཛད་པས། །བདག་ཡིད་དཀར་པོར་བསྒྱུར་དུ་གསོལ། །དཀར་མོ་མཆོག་ལ་དད་པའི་ཡིད། །དཀར་བ་ལས་ཀྱང་ཆེས་དཀར་བའི། །འོ་མའི་མཚོ་འདིར་རྗེས་དགོངས་ལ། །དཀར་མོ་རྟག་ཏུ་རྩེན་པར་མཛོད། །བདེན་དུལ་འཚེ་བ་ལས་ལྡོག་སོགས། །ལྷ་མོའི་བརྟུལ་ཞུགས་ཆེས་དཀར་བས། །རྨི་ལམ་ན་ཡང་ཉེས་སྤྱོད་དྲིས། །གོས་མིན་ཚུལ་ཁྲིམས་ཆེས་དཀར་ཤོག །དཀར་མོའི་ཏིང་འཛིན་ལ་གནས་པས། །གཡོ་བའི་སེམས་ནི་རབ་བཅིང་ཞིང་། །ཧྲཱིཾཿཡིག་བཟླས་པའི་འོད་དཀར་གྱིས། །གཟུངས་སྤོབས་བློ་གྲོས་ཆེས་དཀར་ཤོག །རྒྱགས་སོགས་དྲི་མ་མེད་པ་ཡིས། །ཀུན་ནས་དཀར་བའི་ཐོས་བསམ་དང་། །སྒོམ་པའི་ཤེས་རབ་རྒྱ་ཆེན་པོས། །འཇིག་རྟེན་སྣང་བྱེད་ཆེན་པོར་ཤོག །རང་འདོད་དྲི་མས་གཞར་མ་གོས། །ཀུན་ནས་དཀར་བའི་འཆད་རྩོད་རྩོམ། །ཐུབ་བསྟན་གསལ་བའི་སྒྲོན་མེ་ཆེར། །ལེགས་སྣང་གྲགས་དཀར་ཀུན་ཁྱབ་ཤོག །དཀར་མོའི་ཕྲིན་ལས་གདུགས་དཀར་གྱིས། །ས་གསུམ་ཡོངས་སུ་ཁེབས་གྱུར་ནས། །འགྲོ་ཀུན་དཀར་པོའི་འཇུག་པ་ཡིས། །དཀར་མོའི་གོ་འཕང་མངོན་བྱེད་ཤོག།
༄༅། །འཕགས་མ་དབྱངས་ཅན་མ་ལ་ཕྱག་འཚལ་ལོ། །རྒྱལ་བ་ཐམས་ཅད་བསྐྱེད་པའི་ཡུམ། །ཤེས་རབ་ཕ་རོལ་ཕྱིན་མ་ནི། །གང་འདུལ་མཚན་དཔེའི་སྐུར་སྣང་བ། །དབྱངས་ཅན་མ་ལ་ཕྱག་འཚལ་ལོ། །གངས་རི་ཟླ་འོད་ཀུ་མུཏ་ཀྱི། །དཀར་བ་ཉིད་ཀྱིས་མི་མཚོན་པའི། །ཡེ་ཤེས་རང་བཞིན་དག་པའི་སྐུ། །དབྱངས་ཅན་མ་ལ་ཕྱག་འཚལ་ལོ། །རྫ་རྔ་ཅང་ཏེ་པི་ཝཾ་དང་། །ཚངས་པའི་ངག་གིས་མཚོན་མིན་པའི། །གཞོམ་མེད་ནཱ་དའི་སྒྲ་ལྡན་གསུང་། །དབྱངས་ཅན་མ་ལ་ཕྱག་འཚལ་ལོ། །ཚངས་དབང་ཁྱབ་འཇུག་ཕུར་བུ་སོགས། །བློ་ཆེན་ཡོངས་ཀྱིས་ཆ་ཙམ་ཡང་། །བསྒྲུན་མིན་མཁྱེན་བརྩེའི་ཐུགས་མངའ་བ། །དབྱངས་ཅན་མ་ལ་ཕྱག་འཚལ་ལོ། །བུམ་བཟང་དཔག་བསམ་གཏེར་སོགས་ལས། །རིང་འདས་སྐྱེ་དགུའི་རེ་སྐོང་ཕུལ། །ཡོན་ཏན་བསམ་གྱིས་མི་ཁྱབ་པའི། །དབྱངས་ཅན་མ་ལ་ཕྱག་འཚལ་ལོ། །གང་གི་ཕྲིན་ལས་ཞགས་པ་ཡིས། །བརྟན་གཡོའི་དངོས་ཀུན་སྡུད་ཅིང་འཆིང་། །ནམ་མཁའི་མཐའ་དང་རབ་མཉམ་པའི། །དབྱངས་ཅན་མ་ལ་ཕྱག་འཚལ་ལོ། །དཀར་དང་དམར་དང་སེར་ལེ་བརྒན། །མཐིང་ཀ་ལ་སོགས་སྣ་ཚོགས་པའི། །དུ་མའི་གར་གྱིས་འགྲོ་བ་སྐྱོང་། །དབྱངས་ཅན་མ་ལ་ཕྱག་འཚལ་ལོ། །ཁྱོད་ནི་སྣ་ཚོགས་སྐུ་ཅན་ཏེ། །དེ་བཞིན་གསུང་དང་ཐུགས་ཀྱང་ངོ་། །བསམ་མི་ཁྱབ་ཀྱང་བསམ་བྱའི་གཞི། །དབྱངས་ཅན་མ་ལ་ཕྱག་འཚལ་ལོ། །ཁྱོད་ནི་སྣང་དང་མི་སྣང་དང་། །རྟག་དང་མི་རྟག་གཉིས་མ་ཡིན། །མཐའ་ལས་འདས་པའི་ཆོས་ཉིད་ཅན། །དབྱངས་ཅན་མ་ལ་ཕྱག་འཚལ་ལོ། །གང་ལ་མཚན་མ་མི་མངའ་ཡང་། །མཚན་མ་ཅན་ལ་ཅིར་ཡང་སྟོན། །སྒྱུ་མའི་རང་བཞིན་སྒྱུ་མ་ཆེ། །དབྱངས་ཅན་མ་ལ་ཕྱག་འཚལ་ལོ། །ལན་གཅིག་ཁྱོད་མཚན་ཐོས་པ་དང་། །དགའ་དང་དད་པའི་སེམས་སྐྱེས་ཀྱང་། །ཡིད་ལ་སྣང་བ་རབ་སྦྱིན་པའི། །དབྱངས་ཅན་མ་ལ་ཕྱག་འཚལ་ལོ། །ཁྱོད་སྐུའི་རྣལ་འབྱོར་གསལ་བཏབ་དང་། །གཟུངས་སྔགས་སྙིང་པོ་བཟླས་པའི་མོད། །བློ་ངན་འཐིབས་པོ་མིང་མཐར་བྱེད། །དབྱངས་ཅན་མ་ལ་ཕྱག་འཚལ་ལོ། །ཁྱོད་ཀྱི་བྱིན་རླབས་ཉིན་མོར་བྱེད། །དད་པའི་འདབ་བརྒྱར་ཆགས་པའི་མོད། །གཏེར་བརྒྱད་བདུད་རྩི་སྐྱུག་མཁས་པ། །དབྱངས་ཅན་མ་ལ་ཕྱག་འཚལ་ལོ། །ཨེ་མ་སྔོན་ནས་འབྲེལ་བའི་ལྷ། །ད་ལྟ་རྩེ་གཅིག་ཁྱོད་འབོད་ན། །རབ་དགྱེས་འཛུམ་པའི་བསིལ་ཟེར་གྱིས། །སྙིང་གི་ཀུ་མུཏ་བཞད་པར་མཛོད། །བདེན་དང་དུལ་དང་མི་འཚེ་བའི། །ལྷ་མོའི་དམ་ཚིག་ལ་གནས་ན། །ཐུགས་རྗེའི་འཇུག་པ་ཟབ་མོ་ཡིས། །སྐྱེ་ཀུན་འབྲལ་མེད་རྗེས་འཛིན་མཛོད། །མི་བརྗེད་གཟུངས་དང་ཐོགས་མེད་ཀྱི། །བློ་གྲོས་སྤོོབས་པ་མི་ཟད་པས། །རྩོད་འཆད་རྩོམ་པའི་ཕྲིན་ལས་ཀྱིས། །རྒྱལ་བསྟན་ཡུན་དུ་གསལ་ནུས་མཛོད། །བདག་དང་བདག་ལ་འབྲེལ་བ་རྣམས། །ཚེ་འདིར་འཕགས་མས་རྗེས་བཟུང་ཞིང་། །དུས་ཀྱི་མཐར་ཡང་མངོན་སྣང་སྟེ། །མཁའ་སྤྱོད་གནས་སུ་འདྲེན་པར་མཛོད། །དེ་ལྟར་བསྔགས་ལས་བྱུང་བ་ཡི། །དགེ་བས་འགྲོ་བ་མཐའ་དག་པ། །ངག་གི་དབང་ཕྱུག་མཆོག་གྲུབ་ནས། །དོན་གཉིས་མཐའ་རུ་ཕྱིན་པར་ཤོག །དད་གསུམ་སྙིང་ནས་རྒྱས་པའི་ངག །གང་ཤར་བཅས་བཅོས་མེད་པ་རུ། །ལྷ་མོ་སྒྲུབ་པའི་ཐུན་གསེང་དུ། །དབྱངས་ཅན་དགྱེས་པས་བྲིས་པ་དགེ། །