རྒྱལ་དབང་མཚོ་སྐྱེས་རྡོ་རྗེ་ལ་བསྟོད་ཅིང་སྨྲེ་སྔགས་སུ་གསོལ་བ་གང་གཱའི་རླབས་ཕྲེང་།

༄༅། །རྒྱལ་དབང་མཚོ་སྐྱེས་རྡོ་རྗེ་ལ་བསྟོད་ཅིང་སྨྲེ་སྔགས་སུ་གསོལ་བ་གང་གཱའི་རླབས་ཕྲེང་ཞེས་བྱ་བ། ངག་གི་དབང་ཕྱུག་བློ་ལྡན་མཆོག་སྲས་ལ་ཕྱག་འཚལ་ལོ། །རྒྱལ་ཀུན་གསུང་གི་དབང་ཕྱུག་མཆོག །ཐུགས་རྗེས་འགྲོ་ལ་རྗེས་ཆགས་གར། །དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་ལ་འདུད། ༡ །གང་མཚན་རབ་སྙན་དབྱར་གྱི་རྔ། །ཐོས་པས་རབ་དགའ་མདོངས་མཐའ་ཅན། །དད་བརྒྱའི་སྒྲོ་གདུགས་ངོམ་བཞིན་དུ། །བསྟོད་ཚིག་ཟློས་གར་ཅིར་ཡང་བསྒྱུར། ༢ །ཐུབ་མཆོག་ཉིན་མོར་བྱེད་པའི་སྐུ། །མཛད་པ་ཐ་མའི་ནུབ་རི་ལ། །གཞོལ་ནས་རིང་མིན་ཁྱོད་སྐུའི་ཟླ། །འགྲོ་བསོད་ཤར་རིའི་ཕྲག་ནས་ཐོན། ༣ །འབྱུང་དཀོན་དྲི་བྲལ་མཐུ་ལྡན་ཞིང་། །རྒྱན་གྱུར་མཆོག་གི་རཏྣ་ཆེ། །མི་དབང་ཨིནྡྲ་བོ་དྷི་ཡི། །བསོད་ནམས་སུག་པའི་མཐིལ་དུ་ཐོབ། ༤ །མཚན་གྱི་མེ་ཏོག་རྒྱས་པ་ལ། །དཔེ་བྱད་འབྲུ་ཆགས་མཛེས་པའི་སྐུར། །འགྲན་སྙམ་རྟ་བདུན་དབང་པོ་ཡང་། །སྐྱེངས་ནས་ནུབ་རིར་ཡིབ་པར་དོགས། ༥ །གསུང་དབྱངས་ཡན་ལག་རྒྱ་མཚོའི་གདངས། །མཉན་འདོད་འཇིག་རྟེན་བྱེད་པོ་ཡིས། །ཐོས་འཛིན་བརྒྱད་ཀྱིས་འབད་བསྐྱེད་ཀྱང་། །ཆ་ཙམ་མ་དཔོག་རང་གནས་སྙོག ༦ །སྲིད་དང་ཞི་བའི་ཆོས་སོ་ཅོག །མ་འདྲེས་མཁྱེན་པའི་རྣམ་དཔྱོད་མཐའ། །དཔོག་མིན་སྔོ་བསངས་དགའ་མ་ལ། །རྒྱུ་སྐར་ཚོགས་ཀྱིས་འཕྱ་བ་བཞིན། ༧ །བྲལ་ཐོབ་རྣམ་པར་སྨིན་པ་ཡི། །དཔག་ཡས་ཡོན་ཏན་ལྕི་བའི་ཁུར། །འདེགས་པར་མ་བཟོད་ནོར་འཛིན་ཡང་། །དུས་བཞིའི་མཐའ་ལ་སྙེག་མིན་ནམ། ༨ །གྲུབ་གཉིས་འདོད་རྒུར་བསྒྱུར་བ་ཡི། །ཕྲིན་ལས་ཟབ་ལ་མྱུར་བའི་དཔལ། །ཁྱོད་མཚུངས་འགའ་ཡང་མ་འཚལ་བས། །རང་ཉིད་དཔེ་ཟླར་བཞག་ལས་ཅི། ༩ །ལྷ་དབང་ཀླུ་བདག་དྲང་སྲོང་ཚོགས། །ཉི་བུའི་གཡུལ་ལས་རྒྱལ་མ་གྱུར། །ཁྱོད་ཀྱི་གྲུབ་པའི་རིགས་སྔགས་ཀྱིས། །དགྲ་དེ་ཐལ་བར་བྱས་པ་ལགས། ༡༠ །རབ་འབར་ཏིལ་མར་བྱིན་ཟ་ཡིས། །ཁྱེད་སྐུ་བརྫི་བར་མ་ནུས་ཀྱང་། །ཁྱོད་ཀྱི་ཡེ་ཤེས་མེ་ཆེན་གྱིས། །འགྲོ་ཚོགས་སྲིད་པའི་བུད་ཤིང་བསྲེགས། ༡༡ །འགྲོ་འདི་ཉོན་མོངས་ཞགས་པ་ཡིས། །སྲིད་པའི་བཙོན་རར་དམ་བཅིང་མོད། །ཁྱོད་ཀྱིས་ཉོན་མོངས་སྤོང་མིན་པར། །ཡེ་ཤེས་ཆེན་པོ་བདག་གིར་མཛད། ༡༢ །ཐུབ་པས་མཚན་ཉིད་ཐེག་པའི་གཞུང་། །གྲངས་མེད་གསུམ་མཐར་གཟིགས་པའི་སྤྱན། །ཁྱོད་ཀྱི་བདེ་མྱུར་ཐེག་པ་ཡིས། །ཚེ་ཐུང་གཅིག་ལ་འདུམ་པར་བསྟན། ༡༣ །དབུ་མར་ཤེས་བྱའི་བུད་ཤིང་ཚོགས། །བསྲེགས་ནས་རྒྱལ་རྣམས་ཞི་བར་བཞེད། །ཁྱོད་ནི་ཞི་ལ་གཞོལ་མིན་པར། །འཕོ་ཆེན་རྡོ་རྗེའི་སྐུར་ཡང་བཞེངས། ༡༤ །རྒྱལ་རྣམས་སྤངས་རྟོགས་རབ་མཉམ་ཡང་། །རྩོལ་མེད་ཨ་ཏིའི་གསེང་ལམ་ནས། །འཇའ་ལུས་རྡོ་རྗེའི་ཕྲེང་སྤེལ་བ། །ཁྱོད་གཅིག་ཁོ་ནའི་ཁྱད་ཆོས་ལགས། ༡༥ །དེ་སླད་དཔེ་ཟླར་བྲལ་ཁྱོད་ཀྱི། །གྲགས་དཀར་ཕུང་པོ་དཔག་ནུས་ཅི། །འོན་ཀྱང་ས་ཆེན་འདིར་ཤོང་བ། །ཨེ་མ་འཁོར་ཡུག་འཇིག་རྟེན་ཡངས། ༡༦ །ཞིང་ཁམས་རྒྱ་མཚོའི་འདྲེན་པ་ཀུན། །ཁྱོད་གཅིག་ཁོ་ནའི་སྒྱུ་འཕྲུལ་ཏེ། །དེ་སླད་འཕྲུལ་མཚན་ཉེར་ལྔ་སོགས། །ཕྱོགས་རེར་བགྲང་བའི་བློ་འདི་ནོངས། ༡༧ །ཁྱོད་ཀྱི་ཞབས་སེན་ཀེ་ཏ་ཀས། །མ་དག་ཉེས་ཚོགས་བགྲུང་བའི་རྒྱུས། །ས་ལའི་ནགས་ཀྱི་ལྗོངས་འདི་ཡང་། །འོག་མིན་ལས་ཀྱང་བསྔགས་འོས་ཉིད། ༡༨ །ཁྱབ་པར་དཀྲིགས་སོ་ཆོས་ཀྱི་དབྱིངས། །ཁྱོད་ཀྱི་རྣམ་ཐར་རྒྱ་མཚོ་སྟེ། །ནོར་འཛིན་ཁྱོན་ཀུན་ཁྱོད་ཀྱི་སྲས། །རིག་འཛིན་གྲུབ་ཐོབ་ཕྲེང་བས་ཀྱང་། ༡༩ །མཚན་རྒྱུ་ཤ་རྗེན་ཟ་རྣམས་ལ། །ཁྱོད་ཀྱི་ཕྲིན་ལས་ཟླ་ཟེར་གྱིས། །རེག་དང་ཕན་སེམས་ཀུ་མུ་དའི། །གེ་སར་རྒོད་པ་ལྷན་ཅིག་བྱས། ༢༠ །སྣང་མུན་དུས་དྲུག་གཟིགས་པའི་སྤྱན། །འགྲོ་ཁམས་རྒྱ་མཚོར་འཇུག་པ་ཡིས། །དུས་ལས་ཡོལ་མེད་ཐུགས་རྗེ་ཆེའི། །བཀའ་དྲིན་ཆ་ཙམ་སུ་ཡིས་གསོ། ༢༡ །དེ་སླད་བདག་ཡིད་ཆོམ་རྐུན་ནི། །ཁྱོད་ཀྱི་ཡོན་ཏན་ཞགས་པས་དྲངས། །ཉིན་མཚན་བརྗེད་པ་ཡོད་མིན་པར། །སྐྱབས་གསོལ་སྙིང་ནས་འོ་དོད་འབོད། ༢༢ །མགོན་ཁྱོད་ཐུགས་རྗེེ་མ་ཎི་ཀས། །འགྲོ་ཚོགས་རེ་སྐོང་ཞལ་བཞེས་ན། །བདག་ཀྱང་སེམས་ཅན་གྲལ་གཏོགས་པས། །ཅི་སླད་རྗེས་སུ་འཛིན་མི་མཛད། ༢༣ །འདོད་ཆགས་ལ་སོགས་མི་བཟད་པའི། །ཉོན་མོངས་ཆུ་སྲིན་ཁར་ཚུད་ནས། །མཐའ་མེད་འཁོར་མཚོར་བྱིང་བ་ཡི། །སྐྱབས་མེད་བདག་ལ་ཅིས་མ་གཟིགས། ༢༤ །བདག་འདྲ་ལས་ངན་འབྲས་སྨིན་པའི། །དམན་ལ་བརྩེ་བས་མི་དགོངས་ན། །བློ་མཆོག་གྲོལ་བ་བརྙེས་རྣམས་ལ། །ཐུགས་རྗེས་གཟིགས་ཀྱང་ཅི་ཞིག་དགོས། ༢༥ །ཀྱེ་ཧུད་འགྲོ་བ་སྐྱོབ་པའི་མགོན། །ཀུན་ལ་བྱམས་པའི་ཕ་མ་ལ། །ཉམ་ཐག་ང་རོས་སྟོང་བོས་ཀྱང་། །མཐོང་བ་ཙམ་ཡང་མ་བསྟེན་ཅི། ༢༦ །བུ་ཡིས་ཉེས་སྤྱད་གང་མཆིས་པ། །སྙིང་ནས་འགྱོད་པས་མཐོལ་བཤགས་ན། །མ་བསྒྲིབས་ཚངས་པར་བསྩལ་ནས་ཀྱང་། །དགྱེས་པའི་ཞལ་རས་མྱུར་སྟོན་མཛོད། ༢༧ །བདག་གཞན་སྐྱེ་ཞིང་སྐྱེ་བ་ཀུན། །མགོན་པོའི་ཐུགས་རྗེས་རྗེས་བཟུང་མཐུས། །སྡིག་སེམས་ཡིད་ལ་མི་འགྱུ་ཞིང་། །ཉིན་མཚན་ཆོས་ཀྱི་འདའ་ཐོབ་མཛོད། ༢༨ །བདག་གི་མིང་ཙམ་ཐོས་པའམ། །མཐོང་དང་དྲན་དང་རེག་ཙམ་གྱིས། །འགྲོ་ཚོགས་སྡིག་ཟད་ཉོན་མོངས་མེད། །ཚེ་དེས་སྲིད་པ་ཕྱིར་བསྙིལ་མཛོད། ༢༩ །དེ་ལྟར་མཚོ་སྐྱེས་རྒྱལ་བ་ལ། །བསྟོད་ཅིང་སྨྲེ་གསོལ་གསོལ་བཏབ་མཐུས། །འགྲོ་ཀུན་མགོན་པོས་རྗེས་བཟུང་ནས། །དོན་གཉིས་བསམ་ཀུན་ལྷུན་གྲུབ་ཤོག ༣༠ །མཁའ་ལ་རིག་འཛིན་བརྒྱུད་པའི་སྤྲིན་ཆེན་འཁྲིགས། །བར་ན་གྲུབ་གཉིས་འདོད་དགུའི་ཆར་བཟང་འབེབས། །ས་ལ་དོན་གཉིས་ཕན་བདེའི་ལོ་ཏོག་རྒྱས། །རྫོགས་ལྡན་ལང་ཚོ་དར་བའི་བཀྲ་ཤིས་ཤོག །ཅེས་པའང་ག ནམ་འཕྱང་གི་ལོ་དུས་ཚེས་དགེ་བར་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེས་བྲིིས་པ་སྟེ། འདིས་ཀྱང་འགྲོ་ཀུན་མ་ཧཱ་གུ་རུས་རྗེས་སུ་བཟུང་ཞིང་སྔ་འགྱུར་ཡོ་ག་རྣམ་གསུམ་གྱི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་སྨིན་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག། །།