ཚེས་བཅུའི་བསྟོད་ཕྱག་འདོད་འབྱུང་ནོར་བུའི་འཁྲི་ཤིང་།
༄༅། །ཚེས་བཅུའི་བསྟོད་ཕྱག་འདོད་འབྱུང་ནོར་བུའི་འཁྲི་ཤིང་། ན་མོ་གུ་རུ་སིདྡྷི་ཧཱུྃ། རྒྱལ་ཀུན་གསུང་གི་རྡོ་རྗེ་སྣང་མཐའ་ཡས། །ལྔ་བདོའི་འགྲོ་ལ་རྗེས་ཆགས་མཚན་དཔེའི་གར། །སྐྱེ་འཆི་གཞོམ་གཞིག་བྲལ་བ་རྡོ་རྗེའི་སྐུ། །གུ་རུ་ཡིད་བཞིན་ནོར་བུར་ཕྱག་འཚལ་བསྟོད། །སྤྲེལ་ཟླའི་ཚེས་བཅུར་ཀོ་ཤའི་མཚོ་གླིང་དུ། །ངོ་མཚར་པདྨའི་སྙིང་པོར་བརྫུས་ཏེ་འཁྲུངས། །མཚོ་གླིང་མཁའ་འགྲོའི་ཚོགས་ལ་ཆོས་ཆར་ཕབ། །རྒྱལ་དབང་མཚོ་སྐྱེས་རྡོ་རྗེར་ཕྱག་འཚལ་བསྟོད། །སྟག་ཟླའི་ཚེས་བཅུར་ཨིཎྜ་བྷོ་དྷི་ཡི། །དད་བསོད་རྒྱལ་མཚན་རྩེ་མོར་ལེགས་མཆོད་རྒྱུས། །ཆབ་འབངས་ཡོངས་ལ་དགེ་བཅུའི་དབུགས་དབྱུང་བསྩལ། །ཨོ་རྒྱན་པདྨ་རྒྱལ་པོར་ཕྱག་འཚལ་བསྟོད། །ཡོས་ཟླའི་ཚེས་བཅུར་ཐབས་མཁས་རོལ་རྩེད་ཀྱིས། །ཆོས་བརྒྱད་སྲིད་པའི་འཆིང་ཐག་ཡུད་ཀྱིས་བཅད། །བསིལ་བ་ཚལ་དུ་ཏན་གན་སྤྱོད་པ་བསྐྱངས། །ཤཱཏྣ་རཀྵི་ཏ་ལ་ཕྱག་འཚལ་བསྟོད། །འབྲུག་ཟླའི་ཚེས་བཅུར་འདུལ་ཁྲིམས་རྩ་བ་བཙུགས། །གཙུག་ལག་ཀུན་སྦྱངས་ཤེས་བྱའི་ཆོས་ཀུན་གཟིགས། །བསྟན་པའི་སྒྲོན་མེ་སྲིད་ཞིའི་བླ་ན་མཐོ། །ཤཱཀ་སེང་བློ་ལྡན་མཆོག་ལ་ཕྱག་འཚལ་བསྟོད། །སྦྲུལ་ཟླའི་ཚེས་བཅུར་ཚེ་ལམ་གཟུངས་མར་བཅས། །རྡོ་རྗེའི་སྐུ་བརྙེས་མེ་དཔུང་མཚོ་རུ་བསྒྱུར། །ཟ་ཧོར་རྒྱལ་ཁམས་སྨིན་གྲོལ་ལམ་ལ་བཀོད། །འཆི་མེད་པདྨཱ་ཀ་རར་ཕྱག་འཚལ་བསྟོད། །རྟ་ཟླའི་ཚེས་བཅུར་ཨོ་རྒྱན་རྒྱལ་ཁམས་སུ། །བྱིན་ཟའི་འཇིགས་བཅིལ་བཀའ་འདུས་དལ་ཞལ་ཕྱེས། །སྐྱེ་དགུ་མཐའ་དག་བྱང་ཆུབ་ལམ་ལ་བཀོད། །པདྨ་བཛྲ་རྩལ་ལ་ཕྱག་འཚལ་བསྟོད། །ལུག་ཟླའི་ཚེས་བཅུར་མུ་སྟེགས་རྩོད་པ་བཟློག །རིག་སྔགས་དབལ་གྱིས་བྱད་མ་རང་གཤེད་དབབ། །བསྟན་པའི་རྒྱལ་མཚན་མི་ནུབ་སྲིད་རྩེར་བསྒྲེངས། །སེང་གེ་སྒྲ་སྒྲོགས་རྩལ་ལ་ཕྱག་འཚལ་བསྟོད། །བྱ་ཟླའི་ཚེས་བཅུར་གང་གཱ་གྱེན་དུ་བསྐྱིལ། །ཟང་གླིང་ཡུལ་གྱི་རྟག་ཆད་སྨྲ་བའི་སྡེར། །ཡང་དག་ཐར་པའི་ལམ་བཟང་སྣང་བར་མཛད། །ཁྱེའུ་ཆུང་མཁའ་ལྡིང་རྩལ་ལ་ཕྱག་འཚལ་བསྟོད། །ཁྱི་ཟླའི་ཚེས་བཅུར་ལོག་སྦྱོར་དུག་གཡོས་རིགས། །བདུད་རྩིར་བསྒྱུར་བའི་ངོ་མཚར་ཆོས་འཕྲུལ་གྱིས། །ཏརྐའི་སྡེ་རྣམས་དད་པའི་གནས་ལ་སྦྱར། །ཉི་མ་འོད་ཟེར་ཞབས་ལ་ཕྱག་འཚལ་བསྟོད། །ཕག་ཟླའི་ཚེས་བཅུར་རྡོ་རྗེ་ཕུར་པ་ཡིས། །བར་ཆད་བགེགས་བཏུལ་ཡང་དག་གྲུབ་པའི་བཅུད། །ཕྱག་རྒྱ་ཆེན་པོའི་དངོས་གྲུབ་བདག་གིར་བཞེས། །རྡོ་རྗེ་ཐོད་ཕྲེང་རྩལ་ལ་ཕྱག་འཚལ་བསྟོད། །བྱི་ཟླའི་ཚེས་བཅུར་ལྷ་སྲིན་དམ་ལ་བཏགས། །བསམ་ཡས་ས་བཏུལ་བསྟན་པའི་སྒྲོན་མེ་སྦར། །གངས་ལྗོངས་རྗེ་འབངས་རིག་འཛིན་གནས་ལ་སྦྱར། །པདྨ་སམྦྷའི་སྐུ་ལ་ཕྱག་འཚལ་བསྟོད། །གླང་ཟླའི་ཚེས་བཅུར་བོད་ཁམས་མཐའ་དབུས་ཀུན། །ཟབ་གཏེར་གསང་བ་ནོར་བུའི་སྒྲོམ་གྱིས་གཏམས། །སྲིད་མཐའི་བར་དུ་མི་ཉམས་ངོ་མཚར་འབར། །རྡོ་རྗེ་གྲོ་ལོད་རྩལ་ལ་ཕྱག་འཚལ་བསྟོད། །ཚེས་བཅུ་ནམ་ཤར་སྐུ་དངོས་བོད་ལ་བྱོན། །བརྩེ་བའི་ཐུགས་རྗེས་རྒྱུན་ཆད་མེད་པར་གཟིགས། །དད་པ་ཅན་ལ་དབང་བསྐུར་བྱིན་གྱིས་རློབས། །བཀའ་དྲིན་བསམ་མི་ཁྱབ་ལ་ཕྱག་འཚལ་བསྟོད། །དེ་ལྟར་མི་ཕྱེད་གུས་པས་བསྟོད་པའི་མཐུས། །ཐུགས་རྗེའི་ཁྱད་པར་ལྔ་ལྡན་དྲིན་ཆེན་རྗེས། །ཞལ་བཞེས་ཐུགས་དམ་རྗེས་སུ་དགོངས་མཛོད་ལ། །རྡོ་རྗེའི་ཡེ་ཤེས་འབེབ་པར་མཛད་དུ་གསོལ། །སྣང་སྲིད་ཐམས་ཅད་བླ་མའི་དཀྱིལ་འཁོར་ཆེ། །སྒྲ་གྲགས་ཐམས་ཅད་སྙིང་པོ་སྔགས་ཀྱི་དབྱངས། །དྲན་རྟོག་ཐམས་ཅད་བདེ་བ་ཆེན་པོའི་ཀློང་། །མཆོག་དངོས་གྲུབ་པའི་དགའ་སྟོན་དེང་སྩོལ་ཅིག །སྐྱེ་བ་ཀུན་ཏུ་ཨོ་རྒྱན་བླ་མ་ཡི། །རིང་ལུགས་ཐེག་པ་མཆོག་དང་མི་འབྲལ་ཞིང་། །རང་གཞན་དོན་གཉིས་འབད་མེད་ངང་གིས་འགྲུབ། །འབྲེལ་ཚད་པདྨ་འོད་དུ་བྱང་ཆུབ་ཤོག །མཁའ་ལ་རིག་འཛིན་བརྒྱུད་པའི་སྤྲིན་ཆེན་འཁྲིགས། །ས་ལ་དམ་ལྡན་སློབ་མའི་འདུ་ཚོགས་རྒྱས། །བར་ལ་སྨིན་གྲོལ་བདུད་རྩིའི་གྲུ་ཆར་འཇོ། །བསམ་པ་ལྷུན་གྲུབ་བཀྲ་ཤིས་འཕེལ་གྱུར་ཅིག །ཅེས་པའང་ཆུ་བྱི་ཆོ་འཕྲུལ་ཟླ་བའི་འཕེལ་ཕྱོགས་ཀྱི་ཚེས་བཟང་པོར་འགྱུར་མེད་པདྨ་བསྟན་འཛིན་གྱིས་བྲིས་པ་དགེ་ལེགས་འཕེལ།