འཛམ་གླིང་མཛེས་པའི་རྒྱན་མཆོག་རྣམས་ལ་བསྟོད་ཕྱག་ཕུལ་བ་དོན་གཉིས་པདྨོ་བཞད་པའི་ཉིན་བྱེད།

༄༅། །འཛམ་གླིང་མཛེས་པའི་རྒྱན་མཆོག་རྣམས་ལ་བསྟོད་ཕྱག་ཕུལ་བ་དོན་གཉིས་པདྨོ་བཞད་པའི་ཉིན་བྱེད་ཅེས་བྱ་བ། ༀ་སྭ་སྟི། རྡོ་རྗེ་རྣོན་པོའི་ཐུགས་རྗེའི་བསིལ་ཟེར་གྱིས། །ལེགས་བསྐྱངས་བདེན་མཐོང་ཀུ་མུ་ད་ཡི་ཚལ། །ཟབ་མོ་ལྟ་བའི་གེ་སར་ཆེས་རྒོད་པའི། །དཔལ་མགོན་ནཱ་ག་རྫུ་ནར་མགོས་ཕྱག་འཚལ། །བྱམས་མགོན་ཉི་མའི་འོད་ཀྱིས་ལེགས་བསྐྱངས་པས། །ས་གསུམ་རྟོགས་པའི་འདབ་སྟོང་བཞད་པའི་བཅུད། །རྒྱ་ཆེན་སྤྱོད་པའི་དྲི་བསུང་འབུམ་འཕྲོ་བའི། །ཐོགས་མེད་འཕགས་པའི་མཆོག་ལ་མགོས་ཕྱག་འཚལ། །བསླབ་གསུམ་རྣམ་དག་གསེར་སྦྱངས་སྙིང་པོའི་ཁམས། །རླབས་ཆེན་ཕྲིན་ལས་རྩིབས་སྟོང་རྣམ་བཀྲ་ཞིང་། །རྨད་བྱུང་གྲགས་པའི་མུ་ཁྱུད་རབ་བརྟན་པའི། །ཨཱཪྱ་དེ་ཝའི་ཞབས་ལ་མགོས་ཕྱག་འཚལ། །ཐུབ་གསུང་རྒྱ་ཆེན་ཚངས་པའི་རལ་ཀླུང་རྒྱུན། །མ་ལུས་མཁྱེན་བཟང་ལྟོ་བར་བསྐྱིལ་ནས་སླར། །ལེགས་བཤད་འཛད་མེད་སྐྱུག་པའི་སྤོབས་པ་ཅན། །དབྱིག་གཉེན་སངས་རྒྱས་གཉིས་པར་མགོས་ཕྱག་འཚལ། །ཕས་རྒོལ་ལག་ལྡན་སྟོང་གི་ཀླད་ཁྲག་གིས། །རབ་བརླན་ལུང་དང་རིགས་པའི་སྦར་ཁྱིམ་ཅན། །སྦྱངས་ཡོན་རྩལ་གསུམ་རྫོགས་པའི་བཤེས་གཉེན་མཆོག །ཕྱོགས་གླང་མི་ཡི་སེང་གེར་མགོས་ཕྱག་འཚལ། །རིགས་མཚོན་གནམ་ལྕགས་ཐོག་གི་འཁྲུལ་འཁོར་གྱིས། །ལོག་སྨྲའི་བྲག་རི་འབུམ་ཕྲག་ཕྱེ་མ་རུ། །འཐག་པའི་རྒྱལ་རྔ་སྲིད་ན་ལྷང་ངེ་བ། །འགྲན་བྲལ་ཆོས་ཀྱི་གྲགས་པར་མགོས་ཕྱག་འཚལ། །འདུལ་གཞུང་བདུད་རྩིའི་བུམ་པ་ལེགས་ཐོགས་ནས། །དོན་གཉེར་སྐྱེ་བོའི་རེ་བ་སྐོང་བའི་དཔྱིད། །ཉེ་བར་འཁོར་གྱི་རྣམ་ཐར་རྗེས་སྙེགས་པའི། །མཁན་པོ་ཡོན་ཏན་འོད་ལ་མགོས་ཕྱག་འཚལ། །རྣམ་དག་ཚུལ་ཁྲིམས་རྩ་བ་རབ་བརླིངས་ཤིང་། །ཏིང་འཛིན་ཞི་བའི་ཡལ་འདབ་ཕྱོགས་བརྒྱར་རྒྱས། །ཤེས་རབ་མེ་ཏོག་འབྲས་མང་དཔག་བསམ་ལྗོན། །མཁས་མཆོག་ཤཱཀྱ་འོད་ལ་མགོས་ཕྱག་འཚལ། །རྨད་བྱུང་བྱང་ཆུབ་སེམས་ཀྱི་ཞིང་ས་ལ། །རིགས་ཁམས་ཡོན་ཏན་གསེར་གྱི་སྙེ་མ་འཁྲུངས། །དོན་གཉིས་འབྲས་བུ་ས་གསུམ་ཀུན་དགའི་གསོས། །སློབ་དཔོན་ཤཱནྟ་དེ་ཝར་མགོས་ཕྱག་འཚལ། །སྙིང་རྗེའི་ལྷ་ཡི་ཐུགས་རྗེའི་ཆུ་གཏེར་ལས། །ཉེར་ཐོན་དགེ་མཚན་རི་མོ་གཡས་འཁྱིལ་དུང་། །སྲིད་གསུམ་རྒུད་པའི་རིམས་ནད་རྒྱུན་གཅོད་པའི། །དགེ་བསྙེན་ཟླ་བའི་ཞབས་ལ་མགོས་ཕྱག་འཚལ། །གཞན་ཡང་འཆད་རྩོད་རྩོམ་པའི་དཔུང་པ་ཡིས། །ཐུབ་བསྟན་རྒྱལ་མཚན་སྒྲེང་མཁས་དཔའ་བོ་དང་། །ཟླ་གྲགས་ཆོས་སྐྱོང་ལེགས་ལྡན་ཞི་འཚོ་སོགས། །མཁས་གྲུབ་སྐྱེས་ཆེན་ཡོངས་ལ་མགོས་ཕྱག་འཚལ། །དེ་ལྟར་རྣམ་ཐར་བཀའ་དྲིན་རྗེས་དྲན་པས། །འཕགས་པའི་ཚོགས་ལ་གུས་པར་བཏུད་པའི་མཐུས། །དམ་པ་རྣམས་དང་རྣམ་ཐར་མཚུངས་པ་ཡིས། །སྐལ་བ་མཆོག་གིས་རྟག་ཏུ་འབྱོར་གྱུར་ཅིག །བཀྲ་ཤིས་ཉི་མ་ས་ཆེན་གླིང་བཞིིའི་རྒྱན། །གདུང་སེལ་ཟླ་བ་ཕན་བདེའི་འོད་དཀར་ཅན། །ཐུབ་བསྟན་རིན་ཆེན་ཕྱོགས་ཀྱི་མཐར་ཁྱབ་པའི། །སྣང་བ་དམ་པས་འཇིག་རྟེན་མཛེས་གྱུར་ཅིག །ཅེས་པའང་ཆུ་བྱའི་ཆོ་འཕྲུལ་ཅན་གྱི་གྲལ་ཚེས་དགེ་བར་ཤཱཀ་བཙུན་འགྱུར་མེད་པདྨ་རྣམ་རྒྱལ་གྱིས་ཤར་མར་བྲིས་ཏེ་གསོལ་བ་བཏབ་པ་དགེ།
༄༅། །ༀ་སྭསྟི། ཡེ་གྲོལ་རིག་པ་གདོད་མའི་གཞི་དབྱིངས་སུ། །ཞལ་ཕྱག་འཛིན་པའི་སྤྲོས་པ་ལས་འདས་པའི། །དག་པ་གཉིས་ལྡན་གཞོན་ནུ་བུམ་པའི་སྐུ། །ཀུན་བཟང་ཆོས་ཀྱི་སྐུ་ལ་ཕྱག་འཚལ་ལོ། །སྲིད་ན་དཀར་བའི་དངོས་ཀུན་གཅིག་བསྡུས་པར། །ཟླ་གཞོན་ཁུ་བས་བྱུགས་པས་མཚོན་མིན་པའི། །ཕུལ་བྱུང་མཚན་དཔེའི་དཔལ་འབར་རྡོ་རྗེ་སེམས། །ཁྱོད་སྐུའི་སྤུན་ཟླ་རང་ཉིད་བཞག་ལས་ཅི། །སྣང་བཞིའི་རྩལ་རྫོགས་རྟོགས་པའི་གད་རྒྱངས་ཀྱིས། །ཐེག་དམན་རི་དྭགས་མ་ལུས་སྔངས་མཛད་པའི། །ཐེག་མཆོག་བསྟན་པའི་གངས་རིའི་རྒྱན་གཅིག་པུ། །དགའ་རབ་རྡོ་རྗེ་གདོང་ལྔའི་དབང་པོ་བརྗིད། །མཁྱེན་རབ་ཟུར་ཕུད་ལྔ་པའི་ཡེ་ཤེས་སྐུ། །གང་དང་མཛའ་བ་མིན་པ་རྨོངས་པའི་མུན། །མ་ལུས་མིང་མཐར་བྱེད་པའི་བཅུ་གཉིས་བདག །འཇམ་དཔལ་བཤེས་གཉེན་གྲགས་སྙན་སྲིད་ན་དཀར། །མཁྱེན་པའི་སྤྲིན་ཆེན་རྟོགས་པའི་འབྲུག་སྒྲ་ཅན། །སྙིང་རྗེའི་ཆར་རྒྱུན་ཕན་བདེའི་གློག་ཕྲེང་གིས། །སྐལ་བཟང་རྨ་བྱ་དགའ་བྱེད་དཔལ་སེང་གེ། །ཁྱོད་ཡོན་ཆུ་ལྷའི་ལྕེས་ཀྱང་གཞལ་བྱ་ཅི། །བསླབ་གསུམ་ཡལ་འདབ་རྫོགས་པའི་རྐང་འཐུང་རྩེར། །སྣང་བཞིའི་འབྲས་ཁུལ་དུད་པའི་གྲིབ་བསིལ་ལ། །དམན་ལམ་དུབ་པའི་མགྲོན་པོ་ངལ་འཚོའི་སྨན། །ཛྙཱ་ན་སུ་ཏྲ་གོ་བིནྡ་ཁྱོད་བརྗིད། །དྲི་མེད་བཤེས་གཉེན་ལྟ་དགོངས་རྟོགས་པའི་མཛོད། །རིག་འཛིན་བརྒྱུད་པའི་ཚོགས་དང་ཐུན་མོང་མོད། །འཕོ་ཆེན་འཇའ་ལུས་རྡོ་རྗེའི་ཡེ་ཤེས་སྐུས། །སྲིད་མཐར་གཟིགས་པའི་དཔལ་གྱིས་ཁྱད་པར་བྱས། །གྲངས་མེད་གསུམ་དུ་བགྲོད་དགོས་ས་ལམ་ཕུལ། །སྙིགས་དུས་ཚེ་ཐུང་གཅིག་ལ་བགྲོད་བྱེད་པའི། །བདེ་མྱུར་ཐེག་པའི་ཤིང་རྟ་པད་འབྱུང་རྗེ། །ཁྱོད་འདྲའི་སྟོན་པ་སྲིད་ཞིའི་ཁམས་ན་དབེན། །རྩོལ་མེད་ཐེག་རྩེའི་གསེང་ལམ་དུས་མེ་ཡིས། །གཟུང་འཛིན་ཉོན་མོངས་རགས་པའི་ཕུང་ཁམས་ཀུན། །ཟོས་པའི་སྙིགས་མ་དབང་གཞུའི་དྲྭ་བ་ཡིས། །མཁའ་ངོས་ཁེབས་པའི་གར་མཁན་ཏིང་འཛིན་བཟང་། །སྙིང་ཏིག་གསང་བའི་ཆོས་གཏེར་འབུམ་ཕྲག་གིས། །གངས་ཁྲོད་རྒུད་པའི་དབུལ་ཀུན་སེལ་མཛད་པའི། །ལྷུན་གྱི་རྒྱལ་མཚན་སྔོན་མེད་གདེངས་ཅན་དབང་། །ཁྱོད་ཀྱི་གྲགས་པ་མི་ནུབ་རྣམ་པར་འཕེལ། །སེང་ཧེ་ཤྭ་ར་ཡེ་ཤེས་སྒྱུ་འཕྲུལ་གར། །དྭངས་མའི་འོད་སྐུར་དེངས་ལ་མི་མཚར་ཡང་། །གྲོལ་བ་དྲུག་ལྡན་འདས་རྗེས་གདམས་པའི་ཕུལ། །ལོངས་སུ་སྤྱོད་རྣམས་ཨེ་མ་སྐལ་བ་བཟང་། །ཀློང་གསལ་དྲི་མེད་མཁྱེན་བརྩེ་ནུས་པའི་ཕུལ། །བསྟན་ལ་དགོངས་པའི་འཆད་རྩོད་རྩོམ་པའི་དཔལ། །འཕགས་བོད་མཁས་དང་གྲུབ་པའི་ཚོགས་རྣམས་ཀྱི། །རྣམ་ཐར་གཅིག་ཏུ་བསྡོམས་ལས་འཕྲུལ་བ་བཞིན། །གངས་ཅན་མགོན་པོའི་ཐུགས་བསྐྱེད་ཆུ་གཏེར་ལས། །ཉེར་ཐོན་མཁྱེན་རྟོགས་ཆ་རྫོགས་རི་བོང་འཛིན། །རང་བྱུང་རྡོ་རྗེའི་ངོ་མཚར་རྣམ་ཐར་ཕྲེང་། །ཤཱཀྱའི་སྲས་པོ་མཆོག་དང་ཐུན་མོང་ཉིད། །སྙིང་ཏིག་བཀའ་གཏེར་གདམས་པའི་གཙང་བྱེད་རྒྱུན། །འབུམ་ཕྲག་གཅིག་ཏུ་བསྐྱིལ་མཁས་སྨིན་གླིང་པ། །སྔོན་མེད་གདེངས་ཅན་དབང་པོ་གཏེར་ཆེན་རྗེ། །ཡབ་སྲས་བརྒྱུད་པའི་བཀའ་དྲིན་འཁོར་མཐའ་ཅི། །ཆེར་སྙིགས་ལྔ་བདོའི་རྒུད་པའི་ཐན་པ་ཡིས། །གྲུབ་མཐའི་ཆུ་བྲན་མ་ལུས་སྐེམ་ཉེའི་ཚེ། །ཐུགས་གཏེར་རྒྱ་མཚོའི་བརྡ་འགྲོལ་འཇིགས་མེད་གླིང་། །སྔོན་མེད་རྫོགས་ལྡན་ནོར་བུའི་སྤྲིན་ཆེན་འཁྲིགས། །དེ་ཡི་ཐུགས་བསྐྱེད་སྐྱ་རེངས་ཁ་ལོ་ཡིས། །ཉེར་དྲངས་འོད་གསལ་སྤྲུལ་པའི་རྡོ་རྗེ་ཞེས། །ཕན་མཛད་ནམ་མཁའི་ནོར་བུ་དེང་ཤར་བས། །ངེས་གསང་བསྟན་པའི་པད་ཚལ་ཅི་ཡང་དར། །ཁྱད་པར་གསང་བའི་བདག་པོ་རྡོ་རྗེ་ཆོས། །བློ་མཆོག་སྨྲ་བའི་ཟླ་བར་ལེགས་ཤར་བས། །སྒྲུབ་བརྒྱུད་ཤིང་རྟ་བརྒྱད་ཀྱི་ཆུ་གཏེར་འབུམ། །ཆེར་བཞད་ངོ་མཚར་བཀའ་དྲིན་སུ་ཡིས་དཔོག །ཨེ་མ་སྐུ་དྲིན་ཆེའོ་འདྲེན་མཆོག་ཟུང་། །ཨ་ཧོ་ངོ་མཚར་རེ་ཆེ་གདོད་མའི་མགོན། །ཨ་ལ་ལ་སྟེ་རྒྱལ་མཆོག་འཇིག་རྟེན་དུ། །བྱོན་འདྲའི་སྐྱེས་མཆོག་ཁྱེད་མཚུངས་སྲིད་ན་སུ། །དེ་སླད་ངོ་མཚར་བཀའ་དྲིན་དྲན་པའི་ཡིད། །དད་བརྒྱའི་ཟིལ་གྱིས་ནོོན་ནས་བསྟོད་གསོལ་ཕྲེང་། །ཐོལ་བྱུང་མགྲིན་པའི་རྒྱུད་ནས་ཉེར་ཐོན་འདི། །མགོན་ཁྱོད་སྙན་གྱི་པདྨོར་དེངས་གྱུར་ཅིག །སྐྱེ་བ་འདི་བཟུང་ཚེ་རབས་ཕྲེང་བ་རུ། །འབྲལ་མེད་མགོན་པོ་མཆོག་གིས་རྗེས་བཟུང་སྟེ། །གསང་ཆེན་སྨིན་གྲོལ་ཟབ་མོའི་དགའ་སྟོན་ལ། །སྤྱོད་པའི་སྐལ་བཟང་དུས་ལས་མི་ཡོལ་ཤོག །ཕན་བདེའི་འབྱུང་གནས་རྒྱལ་བསྟན་དར་སྨིན་རྒྱས། །བསྟན་འཛིན་ཞབས་བརྟན་བཤད་སྒྲུབ་ཕྲིན་ལས་འཕེལ། །བོད་ཁམས་བདེ་སྐྱིད་དགེ་བཅུའི་སྣང་བས་མཛེས། །རྫོགས་ལྡན་དགའ་སྟོན་འཕེལ་བའི་བཀྲ་ཤིས་ཤོག །ཅེས་པའང་འཕར་བ་ལྕགས་གླང་གནམ་ལོ་གསར་དུ་འཆར་བའི་དགའ་བ་དང་པོའི་ཚེས་ལ་པདྨ་བི་ཛས་བྲིས་པ་དགེ།