ཀུན་མཁྱེན་ངག་གི་དབང་པོ་ཀློང་ཆེན་རབ་འབྱམས་ལ་བསྔགས་པའི་རབ་ཏུ་བྱེད་པ་ནོར་བུ་ཆུ་ཤེལ་གྱི་ཕྲེང་བ་དཔྱོད་ལྡན་མཁས་པའི་མགུལ་རྒྱན།

༄༅། །དཔལ་བསམ་ཡས་པ་ཀུན་མཁྱེན་ངག་གི་དབང་པོ་ཀློང་ཆེན་རབ་འབྱམས་ལ་བསྔགས་པའི་རབ་ཏུ་བྱེད་པ་ནོར་བུ་ཆུ་ཤེལ་གྱི་ཕྲེང་བ་དཔྱོད་ལྡན་མཁས་པའི་མགུལ་རྒྱན་ཅེས་བྱ་བ་བཞུགས་སོ།། འཕགས་མ་དབྱངས་ཅན་མ་ལ་ཕྱག་འཚལ་ལོ། །ཀ་དག་ལྷུན་གྲུབ་ཟུང་འབྲེལ་ངེས་པའི་ལུང་། །རྟོགས་གྲོལ་ཟང་མ་ཐལ་བྱུང་རིག་པའི་གཤིས། །སྐུ་དང་ཡེ་ཤེས་འདུ་འབྲལ་མེད་པའི་མཛོད། །རང་བཞིན་རྫོགས་པ་ཆེན་པོས་རྟག་ཏུ་སྲུངས། ༡ །གདོད་མའི་མགོན་པོ་ཀུན་ཏུ་བཟང་པོ་ཉིད། །འཁོར་འདས་ཀུན་གྱི་སྔོན་དུ་བྱང་ཆུབ་ནས། །ལྷུན་གྲུབ་ཕྱིར་གསལ་གཟུགས་སྐུའི་བཀོད་པའི་སྤྲིན། །སྟོན་མཆོག་བཅུ་གཉིས་ཚུལ་དུ་སྣང་དེར་འདུད། ༢ །ཀ་དག་སྤྲོས་པ་བྲལ་བའི་མཚོ་གླིང་དུ། །ལྷུན་གྲུབ་འདབ་སྟོང་བཀྲ་བའི་ཀེ་སར་རྩེར། །རིག་རྩལ་མ་འགགས་སྤྲུལ་སྐུར་རང་ཤར་བའི། །མཚོ་སྐྱེས་རྡོ་རྗེ་སྙིང་དབུས་རྟག་བཀོད་ནས། ༣ །གྲགས་པའི་གཏེར་གྱུར་ཡོན་ཏན་རླབས་ཕྲེང་ཅན། །མཁས་གྲུབ་ཀླུ་དབང་སྟོང་གིས་བརྟེན་བྱས་པའི། །ངག་གི་དབང་པོ་སྔོན་མེད་མཚོ་ཆེན་མཆོག །སྙན་ངག་མེ་ཏོག་གསར་པས་མཆོད་པར་བགྱི། ༤ །ལྷུན་གྲུབ་རིག་འཛིན་བི་མའི་ཐུགས་རྗེའི་འཕྲུལ། །ཉི་ཟླའི་མིག་མཛེས་གདོང་ལྔའི་བརྫུ་བག་གིས། །གྲུབ་པ་མཆོག་གི་གདུང་ལ་གསོས་ཐེབས་པས། །གཞོན་ནུ་དོན་གྲུབ་རྣམ་ཐར་རིང་དུ་འགོག ༥ །གདོད་མའི་མགོན་པོ་མི་ཡི་བརྫུར་ཞུགས་པར། །དབྱིངས་ཀྱི་མཁའ་འགྲོས་མཆོད་ལ་མཚར་དུ་ཅི། །གང་སྐུ་ཕན་བདེའི་འབྲས་ལྡན་དཔག་བསམ་དབང་། །འཛིན་ནུས་ཡུམ་གྱི་ལྟོ་བའི་བསོད་ནམས་རྨད། ༦ །ལྷ་དབང་ཀླུ་མཆོག་འཇིག་རྟེན་སྐྱོང་རྣམས་ཀྱི། །གཙུག་ནོར་མཐོན་ཀ་འབར་བའི་འོད་ཟེར་གྱིས། །གཞོན་ནུའི་ཞབས་སེན་རྡུལ་བྲལ་མཛེས་མཐོང་ཚེ། །ས་ཧ་ཀ་རའི་འཁྲི་ཤིང་འདུད་པ་བཞིན། ༧ །དམ་པའི་ངང་ཚུལ་མ་ལ་ཡ་ཡི་དྲི། །གཟུར་གནས་གཏམ་གྱི་རླུང་གིས་ཉེར་བསྐྱོད་ཚེ། །ཆེན་པོར་རློམ་པའི་རྐང་འཐུང་ཕལ་རྣམས་ཀྱི། །ཁེངས་པའི་ལོ་འདབ་རྙིང་པ་ཟག་པར་བྱས། ༨ །མཚར་སྡུག་ཡོན་ཏན་རྫོགས་པའི་ལང་ཚོའི་དཔལ། །ཆོས་དང་ཆོས་མིན་འབྱེད་པའི་རྣམ་དཔྱོད་བློ། །བསྟན་འགྲོའི་ཁུར་ཆེན་ཁྱེར་བའི་སྙིང་སྟོབས་གསུམ། །ཕན་ཚུན་འགྲན་པ་བཞིན་དུ་དར་བར་འགྱུར། ༩ །ངེས་འབྱུང་རླུང་གིས་བསྐུལ་བའི་དེ་མ་འདྲོག །རྣམ་གསུམ་ངུར་སྨྲིག་གསར་པའི་བགོ་བ་ཡིས། །མཛེས་པར་བྱས་སོ་ངོ་ཚ་ཁྲེལ་ཡོད་དང་། །དྲི་མེད་ཚུལ་ཁྲིམས་རིན་ཆེན་རྒྱན་གྱིས་ཀྱང་། ༡༠ །ཐུན་མོང་ཐུན་མིན་གཙུག་ལག་ལམ་གསུམ་འབབ། །ཐོས་བསམ་བརྩོན་པའི་ཧུབ་ཀྱིས་ཉེར་དྲངས་ནས། །རྨོངས་པའི་དུག་སེལ་ལེགས་བཤད་བདུད་རྩིའི་ཆབ། །སླར་ཡང་སྐྱུག་མཁས་དྲང་སྲོང་གཉིས་པར་གྲུབ། ༡༡ །ནང་གི་མུན་སེལ་འཇམ་དཔལ་མཁྱེན་པའི་གཏེར། །བརྩེ་ལྡན་འཕགས་པའི་ཟླ་བ་གསར་པ་གང་། །བློ་མཆོག་ནམ་མཁའི་ཁམས་ལ་རྟག་གནས་རྒྱུས། །སྤོབས་པའི་གཏེར་བརྒྱད་ཀུ་མུད་བཞད་གྱུར་རྨད། ༡༢ །ཕུལ་བྱུང་སྐྱེས་ཐོབ་བློ་གྲོས་པདྨའི་ཚལ། །ལུང་རིགས་སྦྲང་རྩིས་གཏམས་པའི་དེ་མ་ཐག །ཤེས་རབ་མཆོག་སྦྱིན་མི་གཡོ་ཕག་དཀར་གྱི། །དགྱེས་ཞལ་བཞད་པའི་ཉི་འོད་ལྷུང་དེ་མཚར། ༡༣ །དབྱངས་ཅན་ཕྱག་མཐིལ་བཀྲ་ཤིས་ལ་གནས་པས། །རི་གླིང་མཚོར་བཅས་ལྟད་མོར་གཟིགས་པའི་ཚེ། །ཀུན་རྨོངས་མུན་པའི་དཔུང་ཚོགས་གང་བཏང་ཞིང་། །ཕུལ་བྱུང་བློ་གྲོས་སྣང་བ་གང་ནས་བླངས། ༡༤ །ཨཱཪྱ་དེ་ཝ་མིག་གཅིག་ཁོ་ན་ཡིས། །གསལ་བར་མཐོང་གྱུར་ཤེས་བྱའི་གཟུགས་བརྙན་གང་། །སྐྱོན་བྲལ་ཡོན་ཏན་རྫོགས་པའི་སྤྱན་ཡངས་ཀྱིས། །གཟིགས་ལ་དེ་ཙམ་ཁེངས་པ་གནང་མི་འཚལ། ༡༥ །མཁས་པའི་འདབ་ཡངས་བཙུན་པའི་གེ་སར་མཐོ། །བཟང་པོའི་དྲི་བསུང་རྒྱ་ཆེ་ཨུཏ་པ་ལ། །འཛམ་གླིང་མཛེས་པའི་རྒྱན་མཆོག་པད་ཚལ་ལས། །བརྐུས་པར་ངེས་སོ་དཔལ་ལྡན་བསམ་ཡས་པ། ༡༦ །ཐོག་མཐའ་བར་དགེ་ཞི་བསིལ་སྨན་གྱི་མཆོག །ཚད་མ་གསུམ་འབྲེལ་ཁྱོད་གསུང་བདུད་རྩིའི་ཆུས། །འགྲོ་བློའི་དྲི་མ་འཁྲུད་པའི་དཔལ་ཡོན་གྱིས། །ས་འདི་དགའ་བ་བརྒྱ་ལྡན་གྲོང་ལས་ལྷག ༡༧ །རྫིང་བུར་མྱོས་པའི་དྲེགས་ལྡན་ལག་འགྲོ་རྣམས། །བབ་ཅོལ་དུས་མིན་ཕུར་སྒྲ་མ་སྒྲོགས་ཤིག །འདི་ན་འདབ་བཟང་ཀླུ་རྒྱལ་ཟིལ་གནོན་ལེན། །རབ་རྣོན་རྡོ་རྗེའི་སྡེར་ལྡན་རྣམ་པར་རྒྱུ། ༡༨ །ཚུལ་ཁྲིམས་བློ་གྲོས་སྔོན་མེད་ཉིན་མོར་བྱེད། །ལུང་རིགས་འོད་བརྒྱ་འབར་བའི་གཟི་བརྗིད་ཕུལ། །དྲེགས་ལྡན་མུ་ཅོར་སྨྲ་བའི་འབྱུང་བྱ་ཡི། །སྙིང་ལ་བརྣག་དཀའི་མུན་པ་ཉིད་དུ་གྱུར། ༡༩ །ཀུན་ལས་རྣམ་པར་རྒྱལ་པའི་དཔའ་བོ་ཁྱོད། །འཇིགས་བྲལ་སེང་གེའི་ཁྲི་ལ་བག་ཕེབས་རོལ། །རྒོལ་བའི་རེ་བ་ཟད་པའི་གཞན་སྡེའི་དཔུང་། །རྟོག་གེའི་སེམས་ལས་ཞི་ནས་བག་ཕེབས་རོལ། ༢༠ །སྨྲ་བའི་སེང་གེ་བསམ་ཡས་ལུང་མང་པས། །ལོག་སྨྲའི་རྒོལ་བ་མ་ལུས་ཚར་བཅད་ཅེས། །བས་མཐའི་བསམ་གཏན་པ་རྣམས་དོགས་མི་འཚལ། །ཉམ་ཆུང་ཆོས་ལྟར་སྤྱོད་རྣམས་ནམ་ཡང་མིན། ༢༡ །དགེ་སྦྱོང་ནགས་ན་གནས་པ་བསོད་སྙོམས་མཁན། །ཆོས་ཀྱི་གྲགས་པའི་དཔལ་དེ་ཐོབ་པ་ལ། །བདག་ནི་ཕྱོགས་ལས་རྣམ་པར་རྒྱལ་ལོ་ཞེས། །ནམ་ཡང་རྒྱགས་པ་མཛད་པ་རིགས་ལགས་སམ། ༢༢ །དབྱངས་ཅན་མགྲིན་པར་ཆགས་པའི་ལེགས་བཤད་གླུ། །སྙན་ཚིག་བཻཌཱུར་གསལ་བའི་རྒྱུད་མངས་སྒྲ། །དཔྱོད་ལྡན་རྣ་བའི་བཅུད་དུ་ལེན་མཁས་པ། །དཔལ་ལྡན་དཔའ་བོ་ས་འདིར་འཕོས་མིན་ནམ། ༢༣ །འཆར་ནུབ་མི་སྲིད་རྟག་ཏུ་ཡོངས་གང་ཞིང་། །སྲིད་ལྡན་བློ་ཡི་རྨོངས་པ་སྲེག་བྱེད་པའི། །སྔོན་མེད་སྨྲ་བའི་ཟླ་བ་འདི་ཡོད་བཞིན། །བདེ་འབྱུང་གཙུག་གི་རྒྱན་དེས་སུ་ལ་ཅི། ༢༤ །རང་བཞིན་གྱིས་མངར་བ་ཚྭའི་རྙོགས་བྲལ་ཞིང་། །གཏུམ་པོ་ལག་འགྲོའི་ཚོགས་ཀྱིས་མ་བཟུང་བའི། །ཟབ་བརླིང་རྒྱ་ཆེའི་དག་བྱེད་གཏེར་མཆོག་འདི། །ཨེ་མ་གངས་ལྗོངས་བསོད་ནམས་སྐལ་བར་ཐོབ། ༢༥ །ཀུན་མཁྱེན་ཆོས་རྗེའི་མཁྱེན་རབ་གོས་བཟང་རྩེར། །རིག་འཛིན་ཞལ་ལུང་ནོར་བུའི་ཏོག་མཛེས་ཚེ། །དམན་ལམ་འཇིགས་བྲལ་འོད་གསལ་ཐེག་པའི་རྩེ། །གྲོལ་བ་དྲུག་ལྡན་བསྟན་པའི་རྒྱལ་མཚན་བསྒྲེངས། ༢༦ །བདུན་བརྒྱ་ཉེར་ལྔའི་དཀྱིལ་འཁོར་འཁོར་ལོའི་ལྷར། །ཟབ་རྒྱས་ཆོས་ཀྱི་འགྲོ་བ་མཛད་དོ་ཞེས། །ཀུན་གཟིགས་སྨྲ་བའི་དབང་ཕྱུག་མི་བསྔགས་ཏེ། །དེང་འདིར་ལོངས་སྐུའི་ཞིང་ཁམས་ཉུལ་དེའི་ཕྱིར། ༢༧ །འཆི་མེད་མཚོར་འཁྲུངས་རྒྱལ་བ་སྟངས་དཔྱལ་གྱིས། །དྲི་མེད་འོད་ཟེར་མཚན་གྱི་ཅོད་པཎ་མཆོག །བཅིངས་དང་ཆབས་ཅིག་དྷཱ་ཀིའི་གསང་མཛོད་ཀྱི། །ཆོས་ཀྱི་བདག་པོ་ཆེན་པོར་མངའ་དབང་གསོལ། ༢༨ །ཀློང་ཆེན་རབ་འབྱམས་ཡེ་ཤེས་སྒྱུ་མའི་སྐུ། །འོད་གསལ་སྣང་བཞིའི་ལྟད་མོར་འབྱམས་ཀླས་ཚེ། །མ་དག་ཉོན་མོངས་གཟུང་འཛིན་མི་དམིགས་ཀྱང་། །ཡེ་ཤེས་གཉིས་ཀྱི་འགྲོ་ཀུན་སྨིན་མཛད་མཚར། ༢༩ །འགྲོ་ལ་ཕན་མཛད་ཐུབ་པ་ཆེན་པོ་ཡིས། །གྲངས་མེད་གསུམ་དུ་བགྲོད་དགོས་ས་ལ མ་ཕུལ། །མཆོག་གི་སྐུ་ཚེ་གཅིག་ལ་དབང་བྱེད་འདི། །རྒྱལ་བའི་སྲས་ཀྱི་སྤྱོད་པར་རིགས་སམ་ཅི། ༣༠ །སུས་ཀྱང་མ་བྱིན་སྤངས་རྟོགས་ནོར་བུའི་མཛོད། །སྙིང་སྟོབས་བརྩོན་པས་བདག་གིར་བཞེས་པ་འདིས། །ཐུབ་པའི་སྡེ་སྣོད་བསྟན་ལ་མ་གནོད་གྲང་། མཁས་པ་མ་བྱིན་ལེན་དུ་མི་འགྱུར་རམ། ༣༡ །གྲུབ་པའི་སློབ་དཔོན་མཆོག་ཟུང་དགོངས་ཉམས་ཕུལ། །སྙིང་ཐིག་ཆོས་སྒོ་འབྱེད་པའི་ངོ་མཚར་ལྟས། །རིམ་གསུམ་བཀའ་འཁོར་དབྱེ་བའི་རྗེས་འགྲོ་ཡང་། །མཁའ་འགྲོའི་སྤྲིན་ཕུང་འཁྲིགས་དེས་ཁྱད་པར་བྱས། ༣༢ །རྣམ་བཀྲའི་དབང་གཞུ་གསར་པའི་ལྡིང་ཁང་ན། །རྣམ་ས་དབྱེ་བས་མཆོད་པའི་སྤྲིན་བཀོད་དེ། །རྣམ་ཀུན་མེ་ཏོག་སྤོས་ཆུའི་ཆར་འབེབས་བཞིན། །རྣམ་དག་ཁྱོད་གསུངས་མཉན་ལ་ཆས་གྱུར་མཚར། ༣༣ །སྡེ་བརྒྱད་ཡོངས་ཀྱི་གཙོ་བོ་རཱ་ཧུ་ལ། །སྐྱེས་བུ་ཆེ་དང་རྡོ་རྗེ་གཡུ་སྒྲོན་སོགས། །ཅི་བགྱིའི་བཀའ་ཉན་སྒྲུབ་པའི་རྣམ་དཔྱོད་དཔལ། །མཚོ་སྐྱེས་རྒྱལ་བའི་མཛད་པའི་མཐུན་ཕྱོགས་ཉིད། ༣༤ །འོད་གསལ་རྩེ་མོའི་བསྟན་པའི་བ་དན་ཆེ། །བསྒྲེངས་ལ་ཀུན་བཟང་གཉིས་པ་ཀློང་ཆེན་རྗེ། །འབྱུང་བར་དགོངས་ནས་རིག་འཛིན་དགའ་རབ་ཉིད། །ཆོས་སྐུའི་ཀློང་དུ་ངལ་གསོར་བཞུགས་པར་ཤེས། ༣༥ །གང་ཞིག་བསྟན་པ་གཅིག་ལ་སྟོན་པ་གཉིས། །མི་འབྱུང་ངེས་པར་བཤད་པའི་ལུང་འདི་རྫུན། །ཅིས་ཀྱང་བདེན་ན་ཤཱཀྱའི་བསྟན་པ་ལ། །ཀུན་མཁྱེན་ལྷ་ཡི་ལྷ་ཁྱོད་ཅི་སྟེ་འཁྲུངས། ༣༦ གདོད་མའི་མགོན་པོའི་དགོངས་བཅུད་མཐར་ཐུག་ཕུལ། །འོད་གསལ་ཀློང་ཆེན་ཐུགས་གཏེར་འབྱེད་པའི་གནས། །དཔལ་གྱི་མཆིམས་ཕུ་ཐོད་ཀར་ཨོ་རྒྱན་རྫོང་། །འོག་མིན་ཞིང་ལས་བསྔགས་འོས་མཆོག་ཏུ་གྲུབ། ༣༧ །མཁས་རློམ་སྤོས་ཀྱི་གླང་པོ་ལྔ་བརྒྱ་ཡིས། །འདེགས་པར་མ་བཟོད་ཐུབ་བསྟན་ལྕི་བའི་ཁུར། །མཐའ་དག་ཁྱེར་ལ་བསྙེང་བྲལ་སྙིང་སྟོབས་ཅན། །ས་ལ་རབ་བརྟན་ཁྱོད་ལས་གཉིས་པ་སུ། ༣༨ །བདུད་རིགས་འབྱུང་བྱའི་མིག་ལ་སིམ་སྟེར་བའི། །རྩོད་ལྡན་ནམ་མཁའི་ལྤགས་པ་འདིས་ནོངས་ཚེ། །ཁྱོད་གསུང་འོད་བརྒྱས་མ་རེག་ཐུབ་བསྟན་གཞན། །བ་མོས་རེག་པའི་མེ་ཏོག་ལྟར་རྙིང་གྱུར། ༣༩ །ཁྱོད་ནི་འགྲོ་ལ་བུ་གཅིག་ལྟར་བརྩེ་ཞེས། །གྲགས་པ་འཇིག་རྟེན་གསུམ་ལ་སྒྲོགས་གྱུར་ན། །དཔལ་འཛིན་མནར་མེད་བུད་ཤིང་མཛད་འདི་ཅི། །འོན་ཀྱང་སྐལ་ཉེས་རང་སྐྱོན་སུ་ཡིས་འོག ༤༠ །འཕགས་ཡུལ་མཛེས་པའི་རྒྱན་མཆོག་ཀླུ་སྒྲུབ་དང་། །གངས་ལྗོངས་འགྲོ་བའི་མིག་གཅིག་ཀློང་ཆེན་གཉིས། །འཁྲུངས་ཡུལ་ས་ཡི་ཁྱད་པར་ཅུང་ཙམ་ལས། །གཞན་པའི་འབྱེད་ཆོས་རྟོག་གེས་བཙལ་ཡང་དབེན། ༤༡ །གཏིང་དཔག་དཀའ་བའི་བློ་གྲོས་གཏེར་གཅིག་པུས། །འཕགས་པ་ཐོགས་མེད་མཚུངས་ཞེས་སྨྲ་མིན་ཏེ། །རྒྱལ་དགོངས་མཐར་ཐུག་འཁོར་ལོ་ཐ་མ་ཡི། །ངེས་དོན་སེང་གེའི་སྒྲ་དབྱངས་བསྒྲགས་འདིས་ཀྱང་། ༤༢ །དྲི་མེད་མཁས་ཚུལ་གསུམ་གྱིས་ཐུབ་པའི་བསྟན། །གསལ་ལ་ཕྱོགས་ཀྱི་གླང་པོའི་རྗེས་འགྲོ་ཡང་། །ཐེག་པའི་རྒྱལ་པོ་འོད་གསལ་སྙིང་པོ་ཡི། །བསྟན་སྲོག་མཐུད་པའི་རྣམ་ཐར་ཁྱོད་གཅིག་འཕགས། ༤༣ །རྨད་བྱུང་ཡོ་ག་གསུམ་གྱི་གསང་ལམ་ནས། །རིག་འཛིན་རྣམ་བཞི་ནོར་བུའི་ཕྲེང་བ་ཡིས། །ས་འདི་འོག་མིན་ཞིང་ལྟར་འབྱོར་མཛད་ན། །དབྱིག་གཉེན་ཞབས་ཀྱིས་ཁྱོད་ཀྱི་སྤུན་ཟླར་འོས། ༤༤ །འགྲན་སེམས་དུག་ཆུས་མྱོས་པའི་གཞན་དབང་གིས། །གདུག་པའི་མཚོན་འཁོར་བསྐོར་ལ་མི་ངལ་བའི། །བཟློག་དཀའ་ལྷ་མིན་གླང་པོ་ཀུན་རིན་ཡང་། །གང་མཚན་བདུད་རྩིའི་ཟེགས་མས་ཞི་གྱུར་མཚར། ༤༥ །དུག་གསུམ་མེ་རླུང་འཁྲུགས་པའི་ཚང་ཚིང་ཆེར། །ཁྱོད་གསུང་མན་ངག་ཆར་གྱིས་རེག་པའི་མོད། །མངོན་མཐོ་གསེར་གྱི་སྙེ་མ་གསར་འཁྲུངས་པར། །ངེས་ལེགས་འབྲས་བུས་གཏམས་པའི་དགེ་མཚན་ངོམས། ༤༦ །གྲུབ་པ་མཐར་ཕྱིན་ཡེ་ཤེས་སྒྱུ་མའི་སྐུ། །ཕས་རྒོལ་དཔུང་གིས་མི་མཐོང་མཚར་དུ་ཅི། །ལན་གཅིག་མཇལ་བས་སྲིད་པ་ཕྱིར་བསྙིལ་བའི། །དགྱེས་ཞལ་མཐོང་བའི་འགྲོ་རྣམས་སྐལ་བཟང་ཉིད། ༤༧ །ནམ་མཁའི་ཁྱོན་ཀུན་ཡོངས་གང་ཞི་ཁྲོའི་སྤྲིན། །སྐལ་བཟང་མིག་གི་བདུད་རྩིར་སོན་པ་ཡང་། །གྲུབ་པ་མཆོག་གི་ཐུགས་རྗེའི་བྱིན་མཐུ་དང་། །འདུས་པའི་ཚོགས་ཀྱང་སྔོན་གོམས་དགེ་བས་སོ། ༤༨ །འདི་ན་མཁའ་ལྡིང་རྒྱལ་པོའི་བརྟུལ་ཞུགས་ཀྱིས། །རབ་མཐོན་བྲག་རིའི་སྤོར་གཤེགས་ཁོ་བོ་ཞེས། །སྙེམས་པ་མི་འཚལ་ཤཱནྟ་དེ་ཝ་ཡང་། །རྟེན་མེད་ལྷ་ལམ་བསྐྱོད་པའི་གྲགས་པ་གསལ། ༤༩ །མི་མིན་བྲན་དུ་བཀོལ་བའི་རྣམ་དཔྱོད་ཀྱིས། །ཞྭ་ཡི་ལྷ་ཁང་ཞིག་གསོས་ངོ་མཚར་ཕུལ། །ལུགས་གསུམ་མི་འགྱུར་ལྷུན་གྲུབ་གཙུག་ལག་ཆེ། །བཞེངས་དང་མཚུངས་ཞེསབརྗོད་འདོད་བདག་ལ་སྐྱེས། ༥༠ །དངོས་ངན་ས་རྡོ་བསལ་བའི་ལྟོ་བ་ནས། །བཟོ་རིགས་རྫས་གཏེར་འབྱེད་དེས་ཅི་ཞིག་བྱ། །ཁྱོད་ཐུགས་མཁའ་འགྲོའི་གསང་མཛོད་སྤྲིན་ཆེན་ལས། །ཐེག་མཆོག་འདོད་དགུའི་ཆར་འབེབས་མ་དགོངས་སམ། ༥༡ །གྲུབ་གཉིས་རྩལ་རྫོགས་མི་མཆོག་གདོང་ལྔ་པས། །ལྟ་དགོངས་ཏིང་འཛིན་ང་རོལ་ཟིལ་མནན་ཚེ། །འབྱུང་པོ་མཁའ་ལ་རྒྱུ་བའི་སྒྲ་བརྒྱ་པ། །འབྲོས་པའི་མཐུ་ཟད་མནན་འོག་ཚུད་དེ་མཚར། ༥༢ །འཕྲུལ་མཁས་སྟོབས་ཀྱིས་བསྒུལ་བར་མ་བཟོད་པའི། །ལྕིད་ལྡན་དཀྱུས་རིགས་རྡོ་བའི་ཀ་བ་ཟུང་། །མི་མཆོག་བདེན་པ་གསོལ་བའི་དེ་མ་ཐག །གུས་པའི་སེམས་ལྡན་བཞིན་དུ་སློང་བར་གྱུར། ༥༣ །ལྷ་སྔགས་ཏིང་འཛིན་ཟབ་མོའི་ཆོ་ག་ཡིས། །རབ་འབྱམས་རྩ་གསུམ་འཁོར་ལོ་རྟེན་མཆོག་ལ། །བསྟིམས་པའི་དགེ་མཚན་གཟུགས་ཅན་བཞིན་རྒྱུ་འདིས། །ཆོས་འཁོར་གསུམ་ལའང་རེ་བ་ལྷོད་པོར་བྱས། ༥༤ །སྟོན་མཚན་དྭངས་པའི་མཁའ་ལ་གཟའ་སྐར་བཞིན། །ལྷ་ལམ་དོག་པོར་བྱེད་པའི་རྒྱལ་རྣམས་ཀྱིས། །བདེ་གཤེགས་རི་རབ་མར་མེའི་རྒྱལ་མཚན་ཞེས། །གྲགས་པའི་སྤྲིང་ཡིག་ཕྱོགས་མཐར་སྒྲོགས་གྱུར་རྨད། ༥༥ །ཤཱཀྱ་མུ་ནེའི་མཛོད་སྤུའི་འོད་ཟེར་གྱིས། །རེག་པའི་མོད་ལ་སྔོན་གནས་རྗེན་དྲན་མཐུས། །གངས་ཅན་འདི་ན་མ་གྲགས་གཙུག་ལག་གཞུང་། །འབུམ་ཕྲག་ཐུགས་ལ་བཀྲ་བའི་དགེ་མཚན་ངོམས། ༥༦ །ཐུབ་བསྟན་ཉིན་བྱེད་སྣང་བས་མ་བསྐྱངས་པའི། །ལྷོ་མོན་གདུལ་ཞིང་མཚན་གྱི་པདྨོ་ལྟར། །རྒུད་པར་གྱུར་ལ་བརྩེ་བ་མི་འདོར་བའི། །ཐུགས་བསྐྱེད་ཉི་མའི་གཉེན་གྱི་སྤུན་ཟླར་གྲུབ། ༥༧ །ཉི་ཟླའི་མིག་ཅན་སྔོ་བསངས་བུ་མོ་ཡི། །རབ་མཛེས་ཆུ་འཛིན་གསར་པའི་སྟོད་གཡོགས་བཅས། །དབང་གཞུའི་མཆོད་རྫས་བྱེ་བས་མདུན་བརྡར་ཏེ། །གུས་པའི་བློ་ཡིས་བསུ་ལ་རེངས་པ་བཞིན། ༥༨ །གཡུ་ལོའི་གོས་ལྡན་རྐང་འཐུང་བུ་མོ་རྣམས། །མཉེན་ལྕུག་ཡལ་གའི་ལག་པ་སྦྲེལ་བྱས་ཏེ། །གདུལ་དཀའ་འདུལ་ལ་བསྙེལ་བར་མ་གྱུར་ཞེས། །དུད་པའི་ཚུལ་གྱིས་མདུན་དུ་ཆས་མིན་ནམ། ༥༩ །གཏུམ་པོ་རྣམས་ཀྱི་གདུག་པ་ཡོངས་བཅད་ཅིང་། །ཁེངས་ལྡན་རྣམས་ཀྱི་རལ་པའི་ཅོད་པཎ་རྩེར། །ཞབས་ཀྱི་པདྨོ་རྣམ་པར་བཀོད་མཐོང་ནས། །ཉི་དགའི་ཚོགས་རྣམས་མཚར་བས་དགོད་པ་འདྲ། ༦༠ །བློ་གྲོས་མཆོག་ལྡན་ཨུ་དུམྦཱ་ར་ཡིས། །གདམས་ཟབ་བདུད་རྩི་ཅི་དགར་སྦྱིན་མཛད་པས། །སྐལ་བཟང་རྐང་དྲུག་ལ་འུར་འདུས་ཤིག་ཅེས། །ཀོ་ཀི་ལ་ཡི་ལྷང་ལྷང་འབོད་པ་བཞིན། ༦༡ །གྲུང་པོའི་བློ་ཡིས་ཀུན་ཏུ་བརྟག་དཔྱད་ཀྱང་། །སྟོན་པའི་ཞལ་ཚབ་ཁྱོད་མཚུངས་མ་རྙེད་ནས། །སྐལ་ལྡན་ཚོགས་རྣམས་དགའ་བས་དེར་ལྷག་པ། །པདྨའི་ཚལ་ན་རྐང་དྲུག་འདུ་བ་བཞིན། ༦༢ །ཀུན་དཀྲིས་འཆིང་བ་དམ་ལྡན་གསེར་དགྲའི་ཁམས། །གང་གསུང་བཅུད་ལེན་སྨན་གྱིས་རེག་པའི་མོད། །རྣམ་གྲོལ་རིན་ཐང་བྲལ་པའི་སུ་ཝརྞར། །བསྒྱུར་བའི་གྲགས་སྙན་སྲིད་པའི་ཁོངས་ན་རྒྱུ། ༦༣ །བསོད་ནམས་བྱེ་བ་འབུམ་གྱིས་ལེགས་བསྐྲུན་པའི། །མཐོང་ན་མི་མཐུན་མེད་པའི་མཛེས་སྐུའི་དཔལ། །བལྟ་བས་མི་ངོམས་མཆོད་སྦྱིན་བརྒྱ་པ་ཡིས། །སྟོང་ཕྲག་བརྒལ་བའི་འདྲེན་བྱེད་སྤྲུལ་པར་ངེས། ༦༤ །དབྱངས་ཀྱི་ཡན་ལག་རྫོགས་པ་ནཱ་དའི་སྒྲས། །ཐེག་མཆོག་སེང་གེའི་སྒྲ་བསྒྲགས་ངོ་མཚར་ཕུལ། །མཉན་ལ་རབ་དགའ་འཇིག་རྟེན་བྱེད་པོ་ཡིས། །ཐོས་འཛིན་དབང་པོ་བརྒྱད་དུ་སྤྲུལ་མིན་ནམ། ༦༥ །སྲིད་ཞི་ཀུན་ལ་ཁྱབ་པའི་སྒྲིབ་བྲལ་ཐུགས། །མཁྱེན་བརྩེའི་དཀྱིལ་འཁོར་ལྷག་པར་རྒྱས་པ་གང་། །མཐོང་བས་རབ་སྐྱེངས་ལྷ་ལམ་ཉི་ཟླར་བཅས། །ཆར་ལྡན་ཆུ་འཛིན་ཕག་ཏུ་ཡིབ་པ་འདྲ། ༦༦ །གང་གི་ཡོན་ཏན་བསམ་མི་ཁྱབ་པའི་གཏེར། །ཆ་ཙམ་བརྗོད་འདོད་ཆུ་ལྷའི་དབང་པོ་ཡིས། །བཅུ་ཕྲག་བཅུ་ཡི་སྨྲ་བའི་འབབ་སྟེགས་ཀྱིིས། །འབད་ཀྱང་མཐུ་བྲལ་ལྕེ་ལ་ངོ་ཚ་བཞིན། ༦༧ །ཁྱབ་པར་དཀྲིགས་སོ་ལྷ་ལམ་ཡངས་པའི་ངོགས། །ཐུན་མཚམས་ཆུ་འཛིན་གསར་པའི་ཕྲེང་བས་ཏེ། །འཁོར་ཡུག་དང་བཅས་ས་ཆེན་འཇིག་རྟེན་ཁྱོན། །ཁྱོད་ཀྱི་ལེགས་མཛད་ཕྲིན་ལས་ཟབ་མོས་ཀྱང་། ༦༨ །རིགས་གྲོལ་སྤོོབས་པ་རྨད་བྱུང་མཆོག་གི་འཁོར། །འབུམ་ཕྲག་བརྒལ་བའི་ཡོན་ཏན་ལྕི་བའི་ཁུར། །འདེགས་པར་མ་བཟོད་ནོར་བུ་འཛིན་མ་ཡང་། །འཁུན་པའི་སྒྲར་བཅས་རབ་ཏུ་འདར་བ་འདྲ། ༦༩ །རབ་མཛེས་ཆོས་གོས་གསར་པའི་འོད་རིས་ཀྱིས། །ལྷ་ལམ་ལེ་བརྒན་ཚོས་སུ་བཙོས་པའི་མོད། །བསླབ་གསུམ་ཡོངས་འདུའི་དྲི་ཡིས་ཀུན་ཁྱབ་པས། །དབུས་འགྱུར་འཆང་གི་མཛེས་པ་ཟུམ་པར་བྱས། ༧༠ །ཀུན་སྙོམས་ཐུགས་རྗེའི་སྤྲིན་ཆེན་ལས་འོང་བའི། །ཕན་བདེའི་ཆར་གྱིས་རྣམ་གྲོལ་ལོ་ཏོག་ཚོགས། །སྨིན་པར་མ་བྱས་འགྲོ་འགའ་ཡོད་མེད་ཅེས། །བདག་གི་ཡིད་ནི་ཐེ་ཚོམ་ཁྱོགས་ལ་འཕྱང་། ༧༡ །ཞིབ་མོར་བརྟགས་པས་འདྲེན་པ་མ་ཕམ་སོགས། །སླད་ནས་ཞིང་འདིར་མངོན་འཚང་རྒྱ་བའི་ཚུལ། །སྟོན་པར་གསུང་ན་སྐལ་ངན་ལོག་སྲེད་ཅན། །གདུལ་བྱར་མ་གྱུར་འགའ་ཞིག་ལུས་པར་སེམས། ༧༢ །ས་ཕག་འབྲི་སོགས་ཆེན་པོ་མཐའ་དག་གི། །རལ་པའི་ནགས་ཀླུང་ཁྱོད་ཞབས་ཟླ་ཚེས་ཀྱིས། །མཛེས་པའི་མོད་ལ་སྡིག་ལྟའི་མུན་སངས་དང་། །སྡེ་བཞིའི་པད་དཀར་རྒྱས་པ་ལྷན་ཅིག་བྱས། ༧༣ །ལན་ཅིག་ཀུན་མཁྱེན་དགྱེས་སྤྱན་འཛུམ་པའི་མདའ། །བློ་ལྡན་གང་གི་འབེམ་ལ་ལྷུང་བ་དེས། །སྲིད་རྩའི་འཁྲུལ་འཁོར་མ་ལུས་ཧྲུལ་བྱེད་ན། །དཀྱིལ་འཁོར་སྤྲོས་བཅས་མང་པོའི་དགོས་པ་གང་། ༧༤ །པདྨ་ལས་གྲོལ་མཚན་གྱི་སྤྲིང་ཡིག་མཆོག །ལས་ཅན་ཐོས་འཛིན་བཅུད་དུ་སོན་ཙམ་གྱིས། །ལྷན་སྐྱེས་བདེ་ཆེན་རྩོལ་མེད་སྐྱེད་མཆི་ན། །ངོ་སྤྲོད་བཤད་ཡམ་མང་པོས་སུ་ལ་ཅི། ༧༥ །ཁྱོད་ཐུགས་གཞོན་ནུ་བུམ་པའི་ཁང་བཟང་དུ། །སྐུ་གསུམ་སྟོན་འཁོར་བཀོད་པ་ཡོངས་རྫོགས་སྤྲིན། །མངོན་གྱུར་དང་པོའི་མགོན་པོ་ཉིད་གྲུབ་ན། །བརྒྱུད་ཡིག་ལོ་རྒྱུས་མང་པོ་གང་ནས་བཙལ། ༧༦ །ཀ་དག་ལྷུན་གྲུབ་རིག་སྟོང་རྫོགས་པ་ཆེ། །གློ་བུར་གཟུང་འཛིན་སྒྲིབ་རྒྱལ་ལས་གྲོལ་ཏེ། །ཇི་བཞིན་མངོན་གྱུར་སངས་རྒྱས་ཉག་གཅིག་ལ། །རྒྱལ་བའི་སྲས་ཞེས་བརྗོད་འདི་རྨོངས་པས་བསླད། ༧༧ །ཀློང་གསལ་དྲི་མེད་ཆོས་སྐུ་ཉག་གཅིག་སྟེ། །བློ་འདས་ཉིད་ལ་བློ་ཡིས་དཔྱད་དུ་ཅི། །བརྗོད་དང་བྲལ་ལ་བརྗོད་པས་ཅི་ཞིག་བྱ། །མི་བསྟོད་པ་ནི་བསྟོད་པའི་རྒྱལ་པོ་ལགས། ༧༨ །རྡོ་རྗེ་གཟི་བརྗིད་ལྷུན་གྲུབ་ལོངས་སྤྱོད་རྫོགས། །མི་ཟད་རྒྱན་འཁོར་རྣམ་ལྔའི་བཀོད་པ་ཡིས། །ཆོས་ཀྱི་དབྱིངས་ཀུན་ཁྱབ་པར་རྟག་གནས་ན། །ཕྱོགས་རེར་ཞེན་པའི་བསྔགས་བརྗོད་འཁྲུལ་རྟོག་ཉིད། ༧༩ །ཚུལ་ཁྲིམས་བློ་གྲོས་གང་འདུལ་སྤྲུལ་པའི་སྐུ། །འདུལ་བ་བཞི་ཡི་ཕྲིན་ལས་རླབས་པོ་ཆེ། །འཁོར་བ་དོང་སྤྲུག་རྣམ་ཐར་ཚད་བྲལ་གང་། །བརྗོད་ལ་འཕགས་ཆེན་རྣམས་ཀྱང་ངལ་བ་འཛིན། ༨༠ །མང་མང་ལེགས་གསུང་ཆོས་ཕུང་དག་བྱེད་གཏེར། །ཡང་ཡང་མཁྱེན་རྟོགས་ལྷུན་པོས་བསྲུབས་པ་ལས། །ཟབ་ཟབ་མན་ངག་སྔོན་མེད་ཉིན་མོར་བྱེད། །མཛེས་མཛེས་ཐུབ་བསྟན་སྣང་བའི་རྒྱན་ཏུ་སྤུད། ༨༡ །འཕགས་བོད་གཞུང་འགྲེལ་མཁན་པོ་ཆེས་མང་ཡང་། །ངེས་དོན་སྙིང་པོ་སྡུད་མཁས་ཁྱོད་མཚུངས་སུ། །མཁའ་ངོས་གསལ་བྱེད་ཕྲེང་བས་ཡོངས་མཛེས་མོད། །ཉིན་མོར་བྱེད་པ་གཅིག་ལས་གཉིས་ཡོད་མིན། ༨༢ །རྒྱུད་དང་འབྲས་བུའི་ཐེག་པའི་གཞུང་ལུགས་ཀུན། །ཚང་ལ་མ་ནོར་རྒྱལ་བ་དགྱེས་པའི་ལམ། །མཐར་ཐུག་ཐེག་པ་གཅིག་ཏུ་རྫོགས་པའི་ཕུལ། །སེམས་ཉིད་ངལ་གསོ་ཐུབ་བསྟན་མཛེས་རྒྱན་རྨད། ༨༣ །བསམ་གཏན་ངལ་གསོ་ཏིང་འཛིན་སྣ་ཚོགས་ཀྱིས། །རྩོལ་མེད་ཨ་ཏིའི་འབྲས་རྩེར་སྦྱོར་ལ་ལྟོས། །དབང་རབ་ལས་ཅན་གྲོལ་བྱེད་འབྲས་བུའི་ཐེག །གསང་སྔགས་ཐབས་ཀྱི་ཆེ་བར་སུ་ཡིས་འགོག ༨༤ །སྒྱུ་མ་ངལ་གསོ་སྤྱོད་པ་རྣམ་སྦྱོང་གིས། །ཆོས་རྣམས་དཔེ་བརྒྱད་ངོ་བོར་གཏན་དབབ་ཚེ། །མ་བརྟགས་གྱ་ཚོམ་སྨྲ་བའི་གོས་སེར་ཅན། །སྐྱེངས་པའི་ཡིད་ཀྱིས་ས་འོག་ཡིབ་པར་ངེས། ༨༥ །གསལ་བར་བྱས་སོ་ཡིད་བཞིན་རིན་ཆེན་མཛོད། །ཐོག་མཐའ་བར་གསུམ་གཞི་ལམ་འབྲས་བུའི་ཚུལ། །དྲི་མེད་ཐོས་བསམ་སྒོམ་པའི་ཤེས་རབ་མཆོག །ངེས་དོན་མཐར་ཐུག་གཞན་སྟོང་དབུ་མའི་སྲོལ། ༨༦ །ཕྱིན་དྲུག་ཚོམས་ཀྱིས་མདོ་རྒྱུད་ཟབ་མོའི་གནད། །མན་ངག་རིན་ཆེན་མཛོད་དུ་གཏམ་ཉེའི་ཚེ། །ཟབ་གསང་དོ་ཧས་འདོམས་མཛད་མདའ་བསྣུན་ཞབས། །ཟུང་འཇུག་སྐུ་ཡིས་ངལ་གསོར་བཞུགས་པར་ངེས། ༨༧ །གནས་ལུགས་བསམ་མི་ཁྱབ་པའི་མཛོད་ཁང་ནས། །མེད་ཕྱལ་ལྷུན་གྲུབ་གཅིག་པུའི་རིན་ཆེན་གཏེར། །གསར་དུ་འབྱེད་ཚེ་སྟོན་པ་བཅུ་གཉིས་ཀྱི། །དགྱེས་པའི་ཞལ་རས་སྟོན་ལ་ཐེ་ཚོམ་བྲལ། ༨༨ །ཡང་ཟབ་འབད་མེད་གྲོལ་བྱེད་ཐེག་པའི་རྩེ། །ཆོས་དབྱིངས་བསམ་མི་ཁྱབ་པའི་མཛོད་ཁང་ཆེའི། །ཡོན་ཏན་དཔག་ནུས་མིན་ཡང་འདིར་ཤོང་བ། །ཨེ་མ་སྲིད་གསུམ་ཁོངས་དེ་ཤིན་ཏུ་ཡངས། ༨༩ །ནང་རྒྱུད་ཡོ་ག་གསུམ་གྱི་ཉིན་བྱེད་གཟིས། །དམན་ལམ་གྲུབ་མཐའི་རྒྱུ་སྐར་ཟིལ་མནན་ཅིང་། །རྡོ་རྗེའི་གནས་རྣམས་འབད་མེད་གསལ་ནུས་པའི། །མཛོད་འདི་སྔ་འགྱུར་བརྒྱུད་པའི་ཁྱད་ནོར་ཕུལ། ༩༠ །ཀུན་ཏུ་བཟང་པོའི་དགོངས་ཉམས་ཨ་མྲྀ་ཏ། །གྲུབ་མཆོག་བྱེ་བའི་ཐུགས་ཀྱི་བུམ་བཟང་དུ། །བསྐྱིལ་བའི་མན་ངག་ཡོངས་བཅུད་འོད་གསལ་མཛོད། །རྟོགས་པའི་འདྲ་འབག་རྗེས་འཇུག་སྐལ་བར་གདམས། ༩༡ །རྒྱུད་རྒྱལ་འབུམ་ཕྲག་དྲུག་ཅུ་རྩ་བཞིའི་དོན། །ལུང་ཆེན་མན་ངག་བྱེ་བའི་སྙིང་པོར་བཅུད། །འོད་གསལ་སྙིང་པོའི་ལྟ་གྲུབ་གཞི་ལམ་འབྲས། །ཚང་ལ་མ་ནོར་ཐེག་མཆོག་རིན་ཆེན་མཛོད། ༩༢ །རྒྱལ་མཆོག་རིག་འཛིན་བྱེ་བའི་དགོངས་ཉམས་ཕུལ། །དབང་རྣོན་ཚེ་འདིར་གྲོལ་བྱེད་ཐེག་པའི་རྩེ། །ཟབ་པའི་ཡང་སྙིང་བླ་མ་ཡང་ཏིག་ཅེས། །ཟླ་བྲལ་ཆོས་སྐུའི་རིང་བསྲེལ་ཆེན་པོར་གྲུབ། ༩༣ །སྣང་བཞི་ཟད་སར་སྐྱེལ་བའི་གསང་ལམ་མཆོག །མཁའ་འགྲོ་ཡང་ཏིག་མན་ངག་ཉིན་བྱེད་གཟིས། །གཞན་ལ་ཟབ་པར་གྲགས་པའི་སྒོམ་རིམ་སྟོང་། །རྒྱུ་སྐར་ཚོགས་བཞིན་ལན་བརྒྱར་ཟིལ་གྱིས་མནན། ༩༤ །ངན་པ་དྲུག་སོགས་འཁྲུལ་པའིི་དྲི་བྲལ་ཞིང་། །ཡོན་ཏན་གསུམ་རྫོགས་ལུང་རིགས་ཚད་མའི་གཏེར། །ཉམས་མྱོང་མན་ངག་བྱེ་བས་ཡོངས་གཏམས་ཕྱིར། །ཁྱོད་གསུང་ཚིགས་བཅད་རེ་ཡང་ཐུབ་བསྟན་རྒྱན། ༩༥ །ཚད་མ་གསུམ་འབྲེལ་སྟོན་པ་དྲང་སྲོང་ཆེའི། །བཀའ་དང་དབྱེར་མེད་ཁྱོད་གསུང་ཚིག་རེས་ཀྱང་། །མཁས་པར་གྲགས་པ་གཞན་གྱི་ངལ་བ་བ རྒྱས། །བསྐྲུན་པའི་གཞུང་ཀུན་རི་མོའི་མར་མེ་བྱས། ༩༦ །དེ་སླད་ཡེ་ཤེས་བརྙེས་ཀྱང་འཇིག་རྟེན་ཚུལ། །ཨེ་ཀ་ཛ་ཊི་ལ་སོགས་བཀའ་སྲུང་གིས། །ཁོང་པའི་སྙིང་ལྟར་མེལ་ཚེ་མི་གཡེལ་བས། །རྟོག་གེའི་རང་བཟོའི་དུག་ཆུས་མ་བསླད་འཚེངས། ༩༧ །དྲི་མེད་ཁྱོད་གསུང་ཟབ་མོ་འདི་ཁོ་ནས། །གྲོལ་བ་དྲུག་ལྡན་འོད་གསལ་སྙིང་པོའི་སྲོལ། །དེང་ཡང་ཉམས་མེད་སྤྱོད་ཡོད་བཀའ་དྲིན་ཕུལ། །གཟུགས་སུ་གྲུབ་ན་སྲིད་གསུམ་སྣོད་དུ་ཆུང་། ༩༨ །འདི་ན་ཡིད་དཔྱོད་ལྟ་བའི་རྙོག་མ་ཡིས། །ཨ་ཏིའི་བསྟན་པའི་ཆུ་གཏེར་བསླད་ཉེའི་ཚེ། །ནམ་མཁའ་འཇིགས་མེད་མཁྱེན་བརྩེའི་འོད་ཟེར་སོགས། །རྣམ་འཕྲུལ་ཀེ་ཏ་ཀ་ཡི་ཕྲེང་བ་སྤེལ། ༩༩ །ཁྱད་པར་སྙིགས་ལྔའི་རྒུད་པའི་མུན་པ་ཡིས། །རྒྱལ་བསྟན་ཉི་དགའི་ཕྲེང་བ་ཉམས་ཉེའི་ཚེ། །མཁྱེན་རྟོགས་ཉི་མ་གསར་པའི་གཟི་འོད་ཅན། །འོད་གསལ་སྤྲུལ་པའི་རྡོ་རྗེའི་སྣང་བརྙན་ངོམ། ༡༠༠ །བཀའ་བབས་རིན་ཆེན་བདུན་གྱི་གསང་མཛོད་ཀྱིས། །ཤིང་རྟ་ཆེ་བརྒྱད་རིང་ལུགས་ཉིན་མོ་རུ། །གསལ་བྱེད་ཁྱོད་མཚུངས་འཕགས་བོད་མ་འཚལ་བས། །རང་ཉིད་དཔེ་ཟླར་བཞག་ལས་གཞན་དུ་ཅི། ༡༠༡ །ཕྱོགས་བཅུ་དུས་བཞིའི་བདེ་གཤེགས་སྲས་བཅས་ཀྱི། །གསང་གསུམ་ཡོན་ཏན་ཕྲིན་ལས་རྣམ་ཐར་སྟོང་། །ངེས་པར་འཇམ་མགོན་བླ་མར་རྫོགས་མཆི་ན། །བདག་ལྟ་བྱིིས་བློས་གཞལ་འདི་ངལ་བར་ཟད། ༡༠༢ །ཀློང་ཆེན་གཉིས་པ་རྡོ་རྗེ་གཟི་བརྗིད་ཀྱི། །དགྱེས་ཞལ་མངོན་སུམ་དབང་པོའི་སྤྱོད་ཡུལ་དུ། །སོན་དང་ཐེག་རྩེའི་སྨིན་གྲོལ་བདུད་རྩིའི་རྒྱུན། །བསོད་ནམས་ཡོལ་གོར་བསྐྱིལ་འདི་རྨི་ལམ་མིན། ༡༠༣ །བདག་རྒྱུད་དད་དམ་ཞིང་ས་གཤིན་པོ་ལ། །སྨིན་གྲོལ་གདམས་པའི་ས་བོན་ཆེར་བཏབ་པར། །མཆོག་བྱིན་དྲོད་གཤེར་གྱིས་བསྐྱངས་དགེ་མཚན་གྱིས། །སྐུ་བཞིའི་འབྲས་བཟང་སྨིན་ལ་ཐེ་ཚོམ་ཅི། ༡༠༤ །སྙིང་ཐིག་རྣམ་གཉིས་མཛོད་བདུན་ངལ་གསོ་སྐོར། །མཇལ་བའི་མོད་ལ་བྱིན་རླབས་སྙིང་སིམས་པས། །རྟོགས་པའི་རང་ཞལ་ཁོང་ནས་རྒོད་པ་ཡིས། །ཨེ་མ་ཁོ་བོའི་དལ་རྟེན་དོན་ཡོད་བྱས། ༡༠༥ །གཞི་གནས་རིག་པ་སྐུ་གསུམ་གདོད་མའི་གཤིས། །ཡིན་ལུགས་ཅོག་བཞག་བཞི་ཡི་གསེང་ལམ་ནས། །འཁྲུལ་གཞི་དབྱིངས་སུ་དག་པའི་གུ་ཡངས་པོ། །ཀུན་མཁྱེན་ཆོས་རྗེའི་དྲིན་ལས་གཞན་གྱིས་མིན། ༡༠༦ །བླུན་སྒོམ་སེམས་ལས་འདས་པའི་རྫོགས་པ་ཆེ། །རིག་སྟོང་ཆོས་ཟད་རྗེན་པའི་རང་ཞལ་མཆོག །དོན་བརྒྱུད་བྱིན་རླབས་འཕོས་འགའི་སྤྱོད་ཡུལ་ལས། །ལོང་བ་བརྒྱུད་མའི་འུར་གྱིས་ཅི་སྟེ་མཐོང་། ༡༠༧ །དེ་སླད་བདག་བློ་དད་པའི་དབང་གྱུར་ཏེ། །ཀུན་མཁྱེན་ཡོན་ཏན་ནོར་བུ་ཆུ་ཤེལ་ཕྲེང་། །རྒྱན་གསུམ་ལམ་གྱི་སྲད་བུར་བརྒྱུས་པ་འདི། །དཔྱོད་ལྡན་མཁས་པའི་མགུལ་ན་སྤ་བར་མཛོད། ༡༠༨ །གཙུག་ལག་ཀུན་ལ་སྦྱང་བ་ཕ་མཐར་སོན་མིན་ཅིང་། །སྔོན་མེད་སྙན་ངག་སྨྲ་བའི་སྤོོབས་པས་དབེན་མོད་ཀྱི། །དམ་པའི་གསུང་ལ་ཆ་ཙམ་འདྲིས་ལས་ཉེར་ཐོབ་པའི། །བསྟོད་བསྔགས་སྙན་པའི་རོལ་མོ་འཁྲོལ་ལ་མི་འོས་ཅི། ༡༠༩ །རྒྱལ་བའི་ཡོན་ཏན་ཤིན་ཏུ་རྒྱ་ཆེ་མཚོ་ཆེན་ལས། །རང་སྐལ་སྐྲ་རྩེའི་ཟེགས་ཙམ་གུས་པས་འཐོར་བ་ཡིས། །རབ་དཀར་བསོད་ནམས་སྟོན་ཟླའི་དཔལ་ལ་འཁུ་བ་དེས། །འགྲོ་རྣམས་ཀུན་མཁྱེན་ཡེ་ཤེས་སྣང་བས་མཛེས་བྱེད་ཤོག ༡༡༠ །ལྷག་པར་ངེས་གསང་བསྟན་འགྲོའི་བདེ་སྐྱིད་པདྨོའི་ཚལ། །ཅིག་ཅར་བཞད་བྱེད་ཀུན་མཁྱེན་རྣམ་འཕྲུལ་ཉིན་མོར་བྱེད། །འགྲོ་བསོད་ཡངས་པའི་མཁའ་ལ་གསར་དུ་སྣང་བ་ཡིས། །ཕུལ་བྱུང་ཕྲིན་ལས་སྣང་བས་ས་གསུམ་ཀུན་ཁྱབ་ཤོག ༡༡༡ །ཕན་བདེའི་གཞིར་གྱུར་ཐུབ་བསྟན་སྤྱི་དང་སྔ་འགྱུར་གྱི། །བཤད་སྒྲུབ་ཕྲིན་ལས་ཤིན་ཏུ་ལྕི་བའི་ས་ཆེན་ཁྱོན། །སྙིང་སྟོབས་བརྩོན་པའི་ཕྲག་པས་འདེགས་ལ་མི་ངལ་བའི། །མཁས་གྲུབ་ཁྱབ་འཇུག་གཟུགས་ཅན་མཆིས་ཀུན་ཞབས་བརྟན་གསོལ། ༡༡༢ །བདག་ཀྱང་རྣམ་གཡེང་རྦ་ཀློང་འཁྲུགས་པའི་སྲིད་མཚོ་ལས། །ཉེར་ཐར་དགྲ་མེད་མི་གཡོ་ཞི་བའི་ནགས་ཁྲོད་དུ། །འོད་གསལ་སྣང་བཞིའི་ཡེ་ཤེས་མཐར་ཕྱིན་བུམ་སྐུ་རུ། །གྲོལ་ནས་མ་ལུས་འགྲོ་བ་སྐྱོབ་པའི་མགོན་གྱུར་ཅིག ༡༡༣། གངས་ལྗོངས་འགྲོ་བའི་དད་བསོད་པཉྩ་ལི་ཀའི་རྩེར། །ཀུན་མཁྱེན་བྱིན་རླབས་དགོས་འབྱུང་ནོར་བུའི་ཏོག་མཛེས་པས། །དམན་ལམ་འཇིགས་བྲལ་འོད་གསལ་རྡོ་རྗེ་རྩེ་མོ་ཡི། །བསྟན་པའི་རྒྱལ་མཚན་མི་ནུབ་སྲིད་མཐར་བསྒྲེངས་གྱུར་ཅིག ༡༡༤ །བཀྲ་ཤིས་གང་ཞིག་གདོད་ནས་རྣམ་དག་ཡེ་ཤེས་གསུམ་ཚུལ་འདུས་མ་བྱས། །བཀྲ་ཤིས་རྨད་བྱུང་གནད་གསུམ་ཆོས་ཉིད་འཁོར་ལོས་སྣང་བཞིའི་གསེང་ལམ་ནས། །བཀྲ་ཤིས་རྣམ་དག་གདོད་མའི་གྲོལ་ས་གཞོན་ནུ་བུམ་སྐུའི་རྒྱལ་ཐབས་ཆེར། །བཀྲ་ཤིས་རྟག་པ་དམ་པའི་ངོ་བོར་འགྲོ་འདི་ངལ་གསོ་ཐོབ་གྱུར་ཅིག ༡༡༥ །ཅེས་ཀུན་མཁྱེན་ངག་གི་དབང་པོ་ཀློང་ཆེན་རབ་འབྱམས་ལ་བསྔགས་པའི་རབ་བྱེད་འདི་ནི་ཡུལ་ལྷོ་ཕྱོགས་ཀྱི་རྒྱུད་དུ་སྙན་ངག་མཁན་ཆེན་པོ་དག་གི་རིགས་སུ་སྐྱེས་ཤིང་རྒྱན་གསུམ་ལམ་གྱི་ཚུལ་ལ་བག་ཆགས་ཙམ་ཐེབས་པ་ཤཱཀྱའི་དགེ་ཚུལ་ཟེ་སྤྲུལ་མིང་འཛིན་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེས། རང་ལོ་ཉེར་དྲུག་པ་མེ་སྤྲེལ་རྒྱལ་ཟླའི་ཀུན་མཁྱེན་ཆོས་རྗེའི་དུས་ཆེན་ཉིན་གྲུབ་པར་རང་གནས་དཔལ་ཟེ་ཆེན་བསྟན་གཉིས་དར་རྒྱས་གླིང་གི་ཆོས་གྲྭ་ཆེན་པོར་སྦྱར་བ་སྟེ། འདིས་ཀྱང་རང་གཞན་ཀུན་གྱི་རྒྱུད་ལ་མཚུངས་མེད་ཆོས་ཀྱི་རྒྱལ་པོའི་བྱིན་རླབས་རྩོལ་མེད་དུ་ཞུགས་ཏེ། ཟབ་གསང་རྟོགས་པའི་ཡོན་ཏན་ཡར་ཟླ་ལྟར་རྒྱས་པའི་རྒྱུར་གྱུར་ཅིག། །།
༄༅། །ༀ་སྭསྟི། ཤེས་དང་ཤེས་བྱའི་ཆོས་རྣམས་ཀུན། །མི་ཕྱེད་ཐུགས་ཀྱི་རྡོ་རྗེ་རུ། །ཡོངས་བསྡམས་ཀུན་མཁྱེན་ཆོས་ཀྱི་རྗེ། །དྲི་མེད་འོད་ཟེར་ཞབས་ལ་འདུད། །མགོན་ཁྱོད་གདོད་ནས་བྱང་ཆུབ་ཀྱང་། །སྙིང་རྗེས་སྲིད་པར་རྗེས་ཆགས་གར། །གང་འདུལ་མཚན་དཔེའི་རོལ་མོ་ནི། །ནམ་མཁའ་ཁྱབ་པར་སྤྲོ་ལ་འདུད། །སྒྲ་ཚིག་ཡི་གེ་ལས་འདས་པའི། །གཞོམ་མེད་ནཱ་དའི་སྒྲ་དབྱངས་ཆེ། །རྗོད་མེད་བརྗོད་བྱར་སྟོན་པའི་གཞུང་། །ཆོས་སྒོ་འབུམ་ཕྲག་འབྱེད་ལ་འདུད། །ཟབ་ཞི་སྤྲོས་པ་ལས་འདས་པའི། །འོད་གསལ་འདུས་མ་བྱས་དབྱིངས་སུ། །རྟག་ཏུ་མཉམ་པར་བཞག་བཞིན་དུ། །གཟུངས་སྤོོབས་གཏེར་ཁ་འབྱེད་དེར་འདུད། །བྲལ་ཐོབ་སྨིན་པའི་ཡོན་ཏན་ཆེ། །དུས་གསུམ་གཤེགས་པའི་རྒྱལ་རྣམས་དང་། །ཀུན་ནས་མཉམ་པ་ཉིད་གྱུར་པའི། །གསང་བ་བསམ་མི་ཁྱབ་ལ་འདུད། །ནམ་མཁའི་མུ་ཁྱུད་ར་བ་ལས། །ཡོངས་བརྒལ་ཆོས་ཀྱི་དབྱིངས་ཆེན་པོར། །ཟབ་མོའི་ཕྲིན་ལས་འཇུག་པ་ནི། །དཔག་ཏུ་མེད་པར་སྣང་ལ་འདུད། །འདི་ནས་བྱང་ཆུབ་སྙིང་པོའི་བར། །ཁྱོད་ལས་སྐྱབས་གཞན་མི་འཚོལ་ན། །འབྲལ་མེད་ཐུགས་རྗེ་ཆེན་པོ་ཡིས། །ཡིད་ལ་ཡེ་ཤེས་དབབ་ཏུ་གསོལ། །ཟབ་གསལ་གཉིས་སུ་མེད་པའི་དབྱིངས། །འོད་གསལ་འདུས་མ་བྱས་པའི་བདག །ཡེ་ནས་འཆིང་གྲོལ་མེད་པའི་གཤིས། །ཇི་བཞིན་མ་ནོར་རྟོགས་བྱིན་རློབས། །གདོད་མའི་འོད་གསལ་སྙིང་པོ་ལ། །སྒྲིབ་བྱེད་གློ་བུར་ཀུན་བརྟགས་སྤྲིན། །རང་བཞིན་མེད་པར་ལེགས་རྟོགས་པས། །འཁྲུལ་པའི་རྫུན་ཕུག་གཏིབ་བྱིན་རློབས། །ཕྱི་ནང་རྟེན་ཅིང་འབྲེལ་འབྱུང་གི། །སྣང་ཆ་སྣོད་བཅུད་བདེ་སྡུག་སོགས། །མེད་སྣང་ཆུ་ཟླའི་རྫུན་རིས་ལ། །རང་མཚང་གཏིང་ནས་རྟོགས་བྱིན་རློབས། །རྟག་པར་དགེ་བའི་བཤེས་གཉེན་གྱིས། །རྗེས་བཟུང་དགོངས་པའི་གསང་མཛོད་ལོན། །གྲོགས་ངན་རྐྱེན་གྱིས་བསྒྱུར་མིན་པར། །ཉིན་མཚན་ཆོས་ཀྱིས་འདའ་བྱིན་རློབས། །ཕྱི་ནང་གྲུབ་མཐའི་དེ་ཉིད་རིག །ཡང་དག་རྟོན་པ་བཞི་ཡིས་འབྱོར། །སོ་སོ་ཡང་དག་རིག་བཞི་ཡི། །སྤོབས་པ་ཐོགས་མེད་ཐོབ་བྱིན་རློབས། །དལ་འབྱོར་རྙེད་དཀའ་ལ་སོགས་པའི། །བསམ་བྱུང་རྒྱུད་ལ་ལེགས་གོམས་པས། །བཅོས་མིན་ངེས་འབྱུང་གིས་དྲངས་པའི། །དད་པའི་སྲོག་ཤིང་བརྟན་བྱིན་རློབས། །སྔོན་འགྲོའི་སྦྱངས་པ་མཐར་ཕྱིན་ཞིང་། །མཆོག་ཏུ་ཟབ་པའི་གཞི་རྒྱུད་ལ། །ཐེ་ཚོམ་སྨག་བྲལ་ངེས་ཤེས་ཀྱིས། །ཟབ་མོའི་རྣལ་འབྱོར་བསྒོམ་བྱིན་རློབས། །ཟབ་གསལ་གཉིས་མེད་བདེ་བ་ཆེ། །འོད་གསལ་བསམ་མི་ཁྱབ་པ་ཡི། །དངོས་གཞིའི་ཉམས་ལེན་མཐར་ཕྱིན་ནས། །ས་ལམ་དབུ་མར་རྫོགས་བྱིན་རློབས། །གཟའ་བྲལ་ཉི་ཟླའི་དཀྱིལ་འཁོར་བཞིན། །ལྷུན་གྲུབ་སྐུ་དང་ཡེ་ཤེས་ཚོགས། །མངོན་གྱུར་སྲིད་པ་ཇི་སྲིད་བར། །སྤྲུལ་པས་འགྲོ་བ་འདུལ་བྱིན་རློབས། །རྒྱལ་བསྟན་དྲི་མེད་ཕྱོགས་མཐར་ཁྱབ། །འགྲོ་ཀུན་ཐེག་མཆོག་ཆོས་ལ་སྤྱོད། །སྙིགས་སྤྱོད་རྒུད་པའི་མིང་མི་གྲགས། །དོན་གཉིས་མཐར་ཕྱིན་བྱིན་གྱིས་རློབས། །ཞེས་པའང་པདྨ་བི་ཛས་དབེན་པའི་རི་སུལ་དུ་གསོལ་བ་བཏབ་པ་དེ་བཞིན་དུ་འགྲུབ་པར་གྱུར་ཅིག