ཀུན་མཁྱེན་ངག་གི་དབང་པོའི་གསུང་རབ་ཆོས་དབྱིངས་མཛོད་ལ་བསྔགས་པ་ངོ་མཚར་དཔག་བསམ་སྙེ་མ།

༄༅། །ཀུན་མཁྱེན་ངག་གི་དབང་པོའི་གསུང་རབ་ཆོས་དབྱིངས་མཛོད་ལ་བསྔགས་པ་ངོ་མཚར་དཔག་བསམ་སྙེ་མ་ཞེས་བྱ་བ། དཔལ་བསམ་ཡས་པ་ཀུན་མཁྱེན་ངག་གི་དབང་པོ་ལ་ཕྱག་འཚལ་ལོ། །ལྷ་དབང་ཀླུ་མཆོག་དྲང་སྲོང་གྲུབ་པས་བཏུད་གྱུར་ཅིང་། །རྒོལ་བ་ཚར་གཅོད་བདུད་སྡེའི་གཡུལ་ལས་རྣམ་རྒྱལ་ཏེ། །ས་གསུམ་སྐྱེ་དགུ་ཐེག་མཆོག་ཆོས་ཀྱིས་སྐྱོང་མཛད་པ། །འགྲོ་བའི་བླ་མ་ཀུན་མཁྱེན་ངག་གི་དབང་པོར་འདུད། །གང་ཐུགས་འོད་གསལ་ཀློང་ཆེན་ཡངས་པའི་མཁར། །ཕུལ་བྱུང་མཁྱེན་བརྩེའི་ཆུ་འཛིན་དཀྲིགས་པ་ལས། །ཟབ་དོན་ལེགས་བཤད་གདམས་པའི་ཆར་ཕབ་པས། །གདུལ་འགྲོའི་རྣམ་གྲོལ་མྱུ་གུ་བསྐྱེད་པ་ལགས། །ཡང་ཟབ་ཡང་ཟབ་ཀུན་བཟང་དགོངས་པའི་བཅུད། །ཡང་ཟབ་ཡང་ཟབ་ཐེག་རྒྱལ་ཨ་ཏིའི་ལུང་། །ཡང་ཟབ་ཡང་ཟབ་འབད་མེད་གྲོལ་བའི་གནད། །ཡང་ཟབ་ཡང་ཟབ་སྙིང་པོའི་བཅུད་འདི་ཡིན། །སེམས་ལུང་ཉེར་གཅིག་ས་འཛིན་གདན་ཁྲི་ཆེར། །ཀློང་གསུམ་དགོངས་པའི་བང་རིམ་བུམ་བྲིས་མཛེས། །མན་ངག་སྡེ་བཞིའི་ཆོས་འཁོར་ཏོག་འབར་བ། །ཆོས་དབྱིངས་མཛོད་མཆོག་ཆོས་སྐུའི་མཆོད་སྡོང་ཡིན། །རིག་འཛིན་བརྒྱུད་པའི་ཞལ་ལུང་ལྟེ་བ་ཟླུམ། །ལུང་རིགས་མན་ངག་རྩིབས་སྟོང་རྣམ་བཀྲ་ཤིང་། །རྟོགས་དོན་མཐར་ཕྱིན་ཏིང་འཛིན་མུ་ཁྱུད་ཅན། །ཆོས་དབྱིངས་མཛོད་འགྲེལ་ཆོས་ཀྱི་འཁོར་ལོ་ཡིན། །ཟབ་དང་རྒྱ་ཆེའི་གཞུང་བཟང་དག་བྱེད་གཏེར། །མན་ངག་རིན་ཆེན་བྱེ་བས་ཡོངས་གཏམས་པ། །མཁས་གྲུབ་ཀླུ་དབང་སྟོང་གིས་ཉེར་བསྟེན་པའི། །ཆོས་དབྱིངས་མཛོད་འགྲེལ་ཟབ་དོན་རྒྱ་མཚོ་ཡིན། །ཐེག་པའི་རྒྱལ་པོ་རི་རབ་ལྷུན་པོའི་རྩེར། །ཚིག་དོན་བཀོད་ལེགས་ཉི་ཟླ་རྣམ་བཀྲ་བས། །ས་གསུམ་རྒུད་པའི་མུན་ཚོགས་སེལ་མཛད་པ། །ཆོས་དབྱིངས་མཛོད་འགྲེལ་འཛམ་གླིང་མཛེས་རྒྱན་ཡིན། །འགྲོ་བ་མ་རིག་ལིང་ཐོག་གིས་ལྡོང་བ། །རང་བྱུང་རིག་པའི་ཐུར་མས་མིག་ཕྱེས་ཏེ། །བྱར་མེད་ཀློང་ཡངས་འབྲས་བུའི་རྩེར་སྦྱོར་བའི། །ཆོས་དབྱིངས་མཛོད་འགྲེལ་སྨན་པའི་རྒྱལ་པོ་ཡིན། །མ་རྟོག་ལོག་རྟོག་འཁྲུལ་རྟོག་རྙོག་པའི་སེམས། །ཡིད་དཔྱོད་མཚན་འཛིན་ཐེ་ཚོམ་དབུལ་བསལ་ནས། །ཟང་ཐལ་རིག་པ་འདོད་དགུའི་མཆོག་སྦྱིན་པའི། །ཆོས་དབྱིངས་མཛོད་འགྲེལ་གདེངས་ཅན་གཙུག་ནོར་ཡིན། །དང་པོར་བལྟས་ཚེ་གྲུབ་མཐའི་གནད་དོན་རིགས། །བར་དུ་བསམ་པས་སེམས་རིག་ལ་ཤན་འབྱེད། །ཐ་མ་སྒོམ་ན་རྟོགས་པ་ཀློང་ནས་འཆར། །ཆོས་དབྱིངས་མཛོད་འགྲེལ་ཐར་གླིང་དེད་དཔོན་ཡིན། །ཚིག་གི་རྗེས་གཅོད་རྟོག་གེའི་སྤྲོས་པ་དང་། །དཔེ་མང་ཀློག་པའི་ངལ་བ་སེལ་བྱེད་པའི། །ཟབ་ཅིང་འགྲེལ་ལ་མན་ངག་དོན་ཚང་བ། །ཆོས་དབྱིངས་མཛོད་འདི་སྔ་འགྱུར་ཁྱད་ནོར་ཡིན། །ཆོས་སྐུའི་སྟོན་མཆོག་དྲི་མེད་འོད་ཟེར་གྱིས། །ཆོས་ཕུང་བརྒྱད་ཁྲི་བཞི་སྟོང་བཅུད་ཕྱུང་བ། །ཆོས་ཉིད་མངོན་སྟོན་བྱིན་རླབས་སྤྲིན་ཕུང་ཅན། །ཆོས་དབྱིང་མཛོད་འདི་རྟོགས་པའི་འདྲ་འབག་ཡིན། །སྔར་འདས་རྒྱལ་བ་བྱང་ཆུབ་བརྙེས་པའི་གནས། །མ་འོངས་རྒྱལ་བ་རྒྱ་མཚོ་འབྱུང་བའི་དབྱིངས། །ད་ལྟའི་རྒྱལ་བ་ཀུན་གྱི་དགོངས་པའི་བཅུད། །ཆོས་དབྱིངས་མཛོད་འདི་རྒྱལ་བའི་འབྱུང་གནས་ཡིན། །ཟབ་དང་རྒྱ་ཆེའི་རྒྱུད་ལུང་མཐའ་ཡས་ཤིང་། །འཕགས་བོད་མཁས་པའི་ལེགས་བཤད་གཞུང་མང་ཡང་། །ངེས་དོན་སྙིང་པོ་ཟབ་པའི་མཐར་ཐུག་པ། །ཆོས་དབྱིངས་མཛོད་འདིར་མ་འདུས་ཡོད་མ་ཡིན། །འཁོར་འདས་ཀ་དག་འཁྲུལ་གྲོལ་གདོད་ནས་དབེན། །གཟུང་འཛིན་ཀ་དག་བཅིངས་གྲོལ་མཐའ་ལས་འདས། །སྤང་བླང་ཀ་དག་བྱར་མེད་ནམ་མཁའི་ཀློང་། །ཆོས་དབྱིངས་མཛོད་འདི་ཆོས་སྐུའི་དགོངས་པ་ཡིན། །ཡེ་ནས་ལྷུན་གྲུབ་རང་རིག་འདུས་མ་བྱས། །ཡོན་ཏན་ལྷུན་གྲུབ་འོད་གསལ་སྙིང་པོའི་དབྱིངས། །སྐུ་དང་ཡེ་ཤེས་ལྷུན་གྲུབ་བརྡལ་བ་ཆེ། །ཆོས་དབྱིངས་མཛོད་མཆོག་ལོངས་སྐུའི་རོལ་བ་ཡིན། །ལྷུན་མཉམ་ཡངས་པ་ཆེན་པོའི་དགོངས་པའི་ཀློང་། །མ་འགགས་རོལ་པ་མིང་ཚིག་ཡི་གེར་ཤར། །མཐའ་ཡས་སྐྱེ་དགུའི་འདོད་གཏེར་རོལ་པ་ཅན། །ཆོས་དབྱིངས་མཛོད་འདི་སྤྲུལ་སྐུའི་ཕྲིན་ལས་ཡིན། །ཆོས་དབྱིངས་མཛོད་འགྲེལ་ཆོས་ཀྱི་མཆོག་འདི་ནི། །དུས་གསུམ་སངས་རྒྱས་ཀུན་གྱི་དགོངས་པ་སྟེ། །དཔག་ཡས་ཡོན་ཏན་རྨད་བྱུང་གངས་ཆེན་མཚོ། །མཐའ་དག་བརྗོད་པར་འཕགས་པས་ནུས་མ་ཡིན། །འོན་ཀྱང་བདག་བློ་དད་པ་འཕེལ་བའི་ངག །ཅུང་ཟད་བརྗོད་པ་འདིས་ཀྱང་རང་གཞན་འགྲོ། །མ་རིག་གཟུང་འཛིན་འཁྲུལ་རྟོག་དབྱིངས་སངས་ནས། །ཀུན་བཟང་ཆོས་སྐུའི་རྒྱལ་སྲིད་ཟིན་པར་ཤོག །ཅེས་པའང་ཟབ་ཆོས་རིན་པོ་ཆེ་འདི་ཉིད་ཐོག་མར་མཇལ་བའི་སྐབས་སུ་མི་ཕྱེད་པའི་དད་པ་སྙིང་ནས་རྒྱས་པའི་དབང་གི་དུས་མཐའི་བཙུན་ཆུང་པདྨ་བི་ཛས་རང་ལོ་ཉེར་བཞི་པ་ལ་དབེན་པའི་རི་སུལ་དུ་བྲིས་པ་དགེ།