གངས་རིའི་ཁྲོད་ཙམ་ན་ཕུལ་དུ་བྱུང་བའི་མཁས་པ་ཆེན་པོ་རོང་ཟོམ་པ་ཆོས་ཀྱི་བཟང་པོ་ལ་བསྔགས་པ་དགེ་ལེགས་རྒྱ་མཚོའི་སྤྲིན་ཕུང་།

༄༅། །གངས་རིའི་ཁྲོད་ཙམ་ན་ཕུལ་དུ་བྱུང་བའི་མཁས་པ་ཆེན་པོ་རོང་ཟོམ་པ་ཆོས་ཀྱི་བཟང་པོ་ལ་བསྔགས་པ་དགེ་ལེགས་རྒྱ་མཚོའི་སྤྲིན་ཕུང་ཞེས་བྱ་བ། ཀུན་མཁྱེན་རོང་ཟོམ་པ་ཆེན་པོའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །དགེ་ལེགས་བྱེ་བའི་དཔལ་གྱིས་མངོན་མཛེས་ཚ ངས་དང་དབང་པོས་ཕྱག་བྱས་ཤིང་། །དགེ་ལེགས་ཕན་བདེའི་སྣང་བ་མཆོག་གིས་ས་གསུམ་འཇིག་རྟེན་དགའ་མཛད་པའི། །དགེ་ལེགས་མཁྱེན་གཉིས་ནོར་བུའི་གཏེར་མངའ་ཐུབ་དབང་ཡེ་ཤེས་སྒྱུ་མའི་གར། །དགེ་ལེགས་ཡོན་ཏན་རྒྱ་མཚོའི་སྤྲིན་འཆང་ཆོས་ཀྱི་བཟང་པོས་བདག་སྐྱོངས་ཤིག ༡ །དཔའ་ཆེན་ཤེས་རབ་རལ་གྲིས་ཀུན་དཀྲིས་འཆིང་བ་དམ་པོ་གཅོད་མཛད་པའི། །ཡེ་ཤེས་མེ་ལོང་ཀུན་ནས་མཛེས་འབར་གང་གིས་ཐུགས་ལ་རབ་གནས་པས། །དཔལ་ལྡན་སྲས་བཅས་རྒྱལ་བའི་མཁྱེན་བརྒྱའི་གཟུགས་བརྙན་འབུམ་ཕྲག་འཛིན་པ་པོ། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༢ །སྙིང་རྗེ་ཆེན་པོའི་ཆར་གྱིས་ཁོང་ཁྲོའི་མེ་ཚོགས་ཆེས་ཆེར་གཞིལ་མཛད་པའི། །ཕྱག་ན་པད་དཀར་འཆང་བའི་བདུད་རྩིའི་དོགས་པ་སྙིང་ལ་སིམ་པ་ཡིས། །མུ་མེད་འགྲོ་ལ་བུ་གཅིག་ལྟར་བརྩེ་ཐུགས་རྗེའི་རླབས་ཕྲེང་གཡོ་བ་ཅན། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༣ །མཐུ་སྟོབས་རྩེ་བརྒྱ་འབར་བའི་མཚོན་གྱིས་བདུད་སྡེའི་ཀླད་པ་འགེམས་མཛད་པའི། །གསང་སྔགས་མགོན་པོ་ཡེ་ཤེས་ཉི་མ་མཁྱེན་བརྩེའི་མཁའ་ལ་རྟག་འབར་བས། །སྲིད་པ་གསུམ་ན་དཔེ་མེད་ནུས་པའི་རྩལ་རྫོགས་གྲུབ་མཆོག་གདོང་ལྔ་པ། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༤ །ཐུན་མོང་ཐུན་མིན་གཙུག་ལག་བྱེ་བའི་ཆུ་ཕྲན་མཐའ་དག་གཅིག་བསྡོམས་པར། །ཐོས་བསམ་རླབས་ཕྲེང་འབུམ་ཕྲག་གཡོ་བཞིན་སྒོམ་བྱུང་ནོར་བུའི་མཛོད་ཀྱིས་གཏམས། །སྔོན་མེད་མཁས་དབང་མཚོ་ཆེན་འདི་འདྲ་འཕགས་བོད་གཉིས་ན་ཡོད་མིན་པའི། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག །ཉེས་སྤྱོད་སྡོམ་པའི་གེ་སར་ཆེས་མཐོ་དགེ་བ་ཆོས་སྡུད་འདབ་སྟོང་བཀྲ། །སེམས་ཅན་དོན་བྱེད་དྲི་བསུང་རྒྱ་ཆེ་ཉེས་བྲལ་བཙུན་པའི་ཨུཏྤ་ལ། །འཛམ་གླིང་མཛེས་པའི་རྒྱན་མཆོག་སྐྱེད་མོས་ཚལ་ནས་ས་འདིར་འཕོས་པ་བཞིན། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༦ །གང་ཞིག་སྲིད་གསུམ་ཁྲོས་པའི་རུ་མཚོན་མཐའ་དག་དུས་གཅིག་ལྷུང་གྱུར་ཀྱང་། །བྱམས་ཆེན་དམ་བཅའི་གོ་ཆ་ཆེན་པོ་ཆ་ཙམ་དབྲལ་བར་ནུས་མིན་པའི། །མི་མཆོག་ཤཱཀྱ་སེང་གེ་བཟང་པོའི་རྣམ་ཐར་རྒྱ་མཚོའི་རྗེས་སྙེགས་པའི། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༧ །ཡང་དག་ཚད་མ་གསུམ་ལྡན་མདོ་རྒྱུད་བསྟན་བཅོས་ནོར་བུའི་ཏམྦུ་ར། །རྣམ་དག་མགྲིན་པའི་རྒྱུད་ལས་ལེགས་དྲང་སྔོན་མེད་ངོ་མཚར་འཆད་པའི་དབྱངས། །ཆ་ཙམ་མཉན་འདོད་འཇིག་རྟེན་བྱེད་པོས་ཐོས་འཛིན་ཟུང་བཞིར་སྤྲུལ་བར་ངེས། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༨ །འཕགས་ཡུལ་མཁས་མང་གཙུག་གི་ཅོད་པཎ་མཚུངས་མེད་དཔལ་ལྡན་ཨ་ཏི་ཤས། །སྲིད་ན་ཟླ་བྲལ་བསྔགས་བརྗོད་མནྡ་ར་ཡི་ཆར་གྱིས་མཆོད་མཛད་ན། །འཐད་ལྡན་ལུང་རིགས་རྩོད་པའི་མདའ་ལས་དཔྱོད་ལྡན་སུ་ཞིག་འགོང་བར་ནུས། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༩ །ཚངས་པའི་བུ་མོ་ཡིད་འོང་སྐུ་ཅན་མགྲིན་པའི་འོ་མཚོར་རྟག་རོལ་རྒྱུས། །མཐའ་དྲུག་ཚུལ་བཞིིས་ལེགས་པར་བཅིངས་པའི་མདོ་རྒྱུད་མན་ངག་ཟབ་མོའི་ལུང་། །རྒྱན་གསུམ་ཏམ་བུ་རར་དྲངས་རྩོམ་གྱིས་འཕགས་བོད་མཁས་མང་རི་དྭགས་འགུགས། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༡༠ །མཁྱེན་བརྩེ་ནུས་པའི་ཏོག་གི་བློ་གྲོས་མཁས་བཙུན་བཟང་ཡོན་སྣང་འབུམ་མཛེས། །འཆད་རྩོད་རྩོམ་གསུམ་འདོད་དགུའི་ཆར་འབེབས་སྔ་འགྱུར་ཀླུ་དབང་གཙུག་གི་རྒྱན། །ཁྱོད་མཚུངས་འགའ་ཡང་དུས་གསུམ་མ་འཚལ་དེ་སླད་དཔེ་དང་བྲལ་བ་ཉིད། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༡༡ །ཚེ་དབང་རིག་འཛིན་གྲུབ་པའི་རྩལ་རྫོགས་མི་མཆོག་གདོང་པ་ལྔ་པ་ཡིས། །འཆི་བདག་གླང་པོ་ཁྲོས་པའི་དཔུང་ཚོགས་ཅིག་ཅར་གཞོམ་པའི་ང་རོའི་སྒྲས། །རྩོད་ལྡན་ཚེ་ལོ་བརྒྱ་པར་གྲགས་པའི་གཏམ་ཡང་ངེས་པར་རྫུན་དུ་བྱས། །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག །བློ་སྟོབས་ཕུལ་ཕྱིན་གཞོན་ནུ་དོན་ཀུན་འགྲུབ་གྱུར་དེད་དཔོན་མཆོག་གིས་ཀྱང་། །གྲངས་མེད་གསུམ་དུ་ཚོགས་གཉིས་ཆུ་གཏེར་བརྒལ་ལས་རྙེད་པའི་རྣམ་གྲོལ་ནོར། །སྙིགས་དུས་སྐུ་ཚེ་གཅིག་ལ་དབང་བྱེད་འདི་འདྲ་སུ་ཞིག་བརྗོད་པར་དཔོག །འཇིག་རྟེན་མིག་གཅིག་ཆོས་ཀྱི་བཟང་པོས་བྱང་ཆུབ་བར་དུ་བདག་སྐྱོངས་ཤིག ༡༣ །ཁྱོད་ནི་སངས་རྒྱས་ཉག་གཅིག་ལགས་ཀྱི་ཡོན་ཏན་དཔག་ཡས་ནམ་མཁའི་ཁམས། །རྨོངས་བློའི་ཁབ་ཀྱི་མིག་བུར་འདྲེན་ལ་ངོ་མཚར་མིན་ཡང་ཁོ་བོའི་ཡིད། །རྣམ་གསུམ་དད་པའི་ཟིལ་གྱིས་བརླན་རྒྱུས་ཅུང་ཟད་བརྗོད་པའི་དགེ་བ་ཡིས། །འགྲོ་ཀུན་མགོན་པོ་མཆོག་གིས་རྗེས་བཟུང་དོན་གཉིས་ལྷུན་གྲུབ་བཀྲ་ཤིས་ཤོག །ཅེས་པའང་མདོ་ཁམས་ཞེ་ཆེན་རྒྱལ་ཚབ་སྤྲུལ་མིང་པ་འཇམ་དབྱངས་མཁས་གྲུབ་རྒྱ་མཚོ་དབྱངས་ཅན་དགྱེས་པའི་སྡེས། དཔལ་གཡོ་རུ་ཁྲ་འབྲུག་བཀྲ་ཤིས་བྱམས་སྙོམས་ཀྱི་གཙུག་ལག་ཁང་དུ་བྲིས་པ་མངྒལཾ།། །།