སྔ་འགྱུར་བསྟན་པའི་ཉི་མ་ལོ་ཆེན་དྷརྨ་ཤྲཱི་ལ་བསྔགས་པ་དོན་ལྡན་སྙན་པའི་རོལ་མོ།

༄༅། །སྔ་འགྱུར་བསྟན་པའི་ཉི་མ་ལོ་ཆེན་དྷརྨ་ཤྲཱི་ལ་བསྔགས་པ་དོན་ལྡན་སྙན་པའི་རོལ་མོ་ཞེས་བྱ་བ། ངག་གི་དབང་ཕྱུག་ཆོས་དཔལ་རྒྱ་མཚོ་ལ་ཕྱག་འཚལ་ལོ། །དགེ་ལེགས་བྱེ་བའི་དཔལ་གྱིས་མངོན་མཐོ་ལྷར་བཅས་སྐྱེ་དགུའི་མཆོག་སྡོང་མཆོག །ཕུལ་བྱུང་གྲགས་པའི་གཏེར་གྱུར་ལེགས་བཤད་འཛད་མེད་འཇོ་བའི་བུམ་པ་བཟང་། །ས་གསུམ་སྐྱེ་དགུའི་ཉེས་པའི་གདུང་སེལ་རྫོགས་ལྡན་ནོར་བུའི་སྤྲིན་ཆེན་པོ། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༡ །གང་གི་ཐུགས་བསྐྱེད་མ་ལ་ཡ་སྐྱེས་ཙན་དན་ལྗོན་པའི་ནགས་ཚལ་ལས། །ལེགས་འོང་རླབས་ཆེན་ཕྲིན་ལས་དྲི་བཞོན་འཁོར་ཡུག་རི་བོའི་ཁོངས་ཁྱབ་པས། །ཐུབ་བསྟན་སྐྱེད་ཚལ་མཛེས་པའི་རྒྱན་གཅིག་མཁས་གྲུབ་ཡོངས་ཀྱི་གཙུག་ནོར་མཆོག །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༢ །ངེས་འབྱུང་འཛིན་པའི་གཞི་ལས་ཉེར་འཁྲུངས་སྡོམ་པའི་ཚུལ་ཁྲིམས་རྩ་བ་བརྟན། །གཞན་ཕན་ཕྱིན་དྲུག་བརྩོན་མའི་ཡལ་འདབ་བསྡུ་བཞིའི་མེ་ཏོག་ཆེར་རྒྱས་ཤིང་། །རིམ་གཉིས་ལམ་གྱི་འབྲས་བཟང་ཡོངས་སྨིན་ཐུགས་རྗེའི་གྲིབ་བསིལ་སྣུམ་ལྡན་པ། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༣ །མང་དུ་ཐོས་པའི་ཆུ་ཀླུང་བྱེ་བ་ཕྲག་བརྒྱ་གཅིག་ཏུ་འདུས་པའི་མཚོ། །དྲི་མེད་བསམ་བྱུང་རིགས་པའི་རླབས་ཕྲེང་འབུམ་ཕྲག་ཆེས་ཆེར་གཡོ་བྱེད་ཅིང་། །སྒོམ་པའི་ཡོན་ཏན་ཤིན་ཏུ་གཏིང་ཟབ་གཟུངས་སྤྲིན་ཡེ་ཤེས་ནོར་བུའི་གཏེར། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༤ །མཁྱེན་པའི་དཀྱིལ་འཁོར་ཤིན་ཏུ་རྒྱ་ཆེ་རྡུལ་བྲལ་ནོར་བུའི་མེ་ལོང་མཆོག །རྨད་བྱུང་བརྩེ་བའི་གཟུགས་བརྙན་འབུམ་བཀྲ་ནུས་མཐུ་ཚད་མེད་དར་དཔྱངས་གཡོ། །སྲས་བཅས་རྒྱལ་བའི་རྣམ་ཐར་དཔག་ཡས་འཛིན་ལ་མི་ངལ་རྒྱལ་བའི་སྲས། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༥ །མཁས་པའི་རྣམ་དཔྱོད་ངོ་མཚར་རྨད་བྱུང་ས་ཆེན་གླིང་བཞིའི་རྒྱན་གཅིག་པུ། །བཙུན་པའི་ཡོན་ཏན་ཉེས་པའི་རྡུལ་བྲལ་རིན་ཆེན་རང་བཞིན་བླ་ན་འཕགས། །བཟང་པོའི་ཕྲིན་ལས་ཉི་ཟླའི་རྣ་ཆས་ཕྱོགས་ཀྱི་མུན་པའི་གོ་སྐབས་འཕྲོག །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༦ །ཇི་སྙེད་ཤེས་བྱའི་ཡུལ་གྱུར་ཐུན་མོང་ཐུན་མིན་གཙུག་ལག་བྱེ་བའི་ཀླུང་། །རྣམ་དཔྱོད་བརྩོན་པའི་ཧུབ་གཅིག་གིས་དྲངས་སླར་ཡང་ལེགས་བཤད་ཛ་ཧུའི་རྒྱུན། །འཛད་མེད་འཇོ་བས་ས་གསུམ་ཉེས་བཤད་དྲི་མ་འཁྲུད་མཁས་དྲང་སྲོང་མཆོག །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༧ །དཔྱད་གསུམ་རྣམ་དག་ལུང་གི་གསེར་སྦྱངས་འཐད་ལྡན་རིགས་པའི་རྩིབས་སྟོང་བཀྲ། །རྟོན་པ་བཞི་ཡི་མུ་ཁྱུད་མཛེས་འབར་རྣམ་དཔྱོད་ལྷ་ཡི་ལམ་དུ་རྒྱུ། །ལོག་སྨྲ་ཁམས་ཀྱི་རྒྱལ་ཕྲན་ཟིལ་གནོན་ཐུབ་བསྟན་ངེས་དོན་གླིང་བཞིར་འདྲེན། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༨ །སོ་སོར་ཡང་དག་རིག་བཞིར་དབང་འབྱོར་སྤོབས་པ་བསམ་མི་ཁྱབ་པའི་གཏེར། །མཁྱེན་བཟང་ཟུར་ཕུད་ལྔ་པས་ལེགས་ཕྱེས་དབྱངས་ཅན་རྩེ་དགའི་རྒྱུད་མང་སྒྲ། །མགྲིན་པའི་འོ་མཚོར་འཕོས་པས་ལེགས་འོང་རྩོམ་པས་མཁས་མང་ཡིད་དབང་ཕྲོག །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༩ །ཁྱད་པར་དུས་གསུམ་རྒྱལ་བའི་གསང་མཛོད་ཤིན་ཏུ་ཟབ་བརླིང་ནོར་བུའི་སྒྲོམ། །ལེགས་པར་འབྱེད་པའི་རྣམ་དཔྱོད་ལྡེ་མིག་རྡོ་རྗེ་ཆོས་ཀྱིས་ཁྱོད་ལ་གཏད། །དེ་སླད་ཁྱོད་དང་མཉམ་པ་འགའ་ཡང་བསིལ་ལྡན་ལྗོངས་འདིར་ཡོད་མ་ཡིན། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༡༠ །ངེས་གསང་ཐེག་མཆོག་སྙིང་པོའི་སེང་གེའི་སྒྲ་ཡིས་ས་གསུམ་ཀུན་ཁྱབ་ཅིང་། །རྒོལ་ངན་གཉིས་འཐུང་སྟོང་གི་སྙིང་ཁྲག་ས་ལ་ཟག་བྱེད་གདོང་ལྔ་པ། །དོན་བརྒྱུད་མཛེས་པའི་གཡུ་རལ་ལེགས་ངོམ་མཆོག་བརྟན་གངས་རི་མཛེས་པའི་རྒྱན། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༡༡ །གཞན་ཡང་སྔ་འགྱུར་རིང་ལུགས་བརྒྱུད་པའི་འདུལ་བསྟན་པདྨའི་དགའ་ཚལ་མཆོག །གང་གི་ཐུགས་བསྐྱེད་ཉིན་བྱེད་ཀྱིས་བསྐྱངས་བསླབ་གསུམ་སྦྲང་རྩིས་ཡོངས་གཏམས་པའི། །འདུས་པའི་ཚོགས་ཀྱིས་ས་ཆེན་ཡོངས་བཀང་དེང་ཡང་ཕྲིན་ལས་ཉམས་པ་མེད། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༡༢ །བློ་གསལ་བློ་ཡི་པདྨ་དཀར་པོའི་འདབ་བརྒྱ་གསར་དུ་ཁ་འབྱེད་ཅིང་། །བློ་ཆེན་བློ་ཡི་ཆུ་གཏེར་གཏིང་ཟབ་ཀུན་ནས་བསྐྱེད་ཅིང་འཕེལ་བྱེད་པ། །བློ་མཆོག་སྨྲ་བའི་ཟླ་བ་མཆོག་གི་ལེགས་བཤད་མཐུ་ལས་གཞན་གྱིས་མིན། །ངག་གི་དབང་ཕྱུག་ཆོས་དཔལ་རྒྱ་མཚོས་བྱང་ཆུབ་བར་དུ་རྗེས་སྐྱོངས་ཤིག ༡༣ །མགོན་པོ་ཁྱོད་ཀྱི་ཡོན་ཏན་རྒྱ་ཆེ་རྣམ་ཐར་དཔག་ཡས་སྤྲིན་བཀོད་པ། །ཚུར་མཐོང་བྱིས་བློའི་སྤྱོད་ཡུལ་ལྟ་ཅི་འཕགས་རྣམས་ཀྱིས་ཀྱང་གཞལ་དཀའི་གནས། །དེ་སླད་བདག་ལྟས་བརྗོད་པར་ནུས་མིན་ཆ་ཙམ་དད་པའི་རྗེས་འབྲང་པའི། །ལེགས་བྱས་གང་དེས་སྐྱེ་ཀུན་མགོན་པོ་མཆོག་གི་བསྟན་ལ་འཇུག་གྱུར་ཅིག ༡༤། མཁའ་ལ་རིག་འཛིན་བརྒྱུད་པའི་སྤྲིན་འཁྲིགས་སྨིན་གྲོལ་གདམས་པའི་གྲུ་ཆར་འཇོ། །ས་ལ་དམ་ལྡན་སློབ་མའི་ཚོགས་རྒྱས་བཤད་སྒྲུབ་བསྟན་པས་ཕྱོགས་ཀུན་ཁྱབ། །དེའི་མཐུས་དཀར་ཕྱོགས་ལྷ་ཀླུ་དགའ་བས་སྣོད་བཅུད་དཔལ་གྱི་འབྱོར་པས་གང་། །ཀུན་ཀྱང་བདེ་སྐྱིད་ཐེག་མཆོག་ལ་སྤྱོད་རྣམ་གྲོལ་ཡོན་གྱིས་མཛེས་གྱུར་ཅིག ༡༥ །ཅེས་པའང་མགོན་པོ་མཆོག་གི་བཀའ་དྲིན་རྗེས་སུ་དྲན་ཞིང་རྒྱུ་མཚན་ཤེས་པའི་མོས་གུས་སྙིང་ལ་འཆང་བ། འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བྲིས་ཤིང་སྨོན་པ་དགེ། །།