ཀུན་མཁྱེན་བླ་མ་འཇམ་དབྱངས་མཁྱེན་བརྩེའི་དབང་པོ་ལ་བསྔགས་པ་ཨུཏྤལ་གཞོན་ནུའི་ཕྲེང་བ།

༄༅། །ཀུན་མཁྱེན་བླ་མ་འཇམ་དབྱངས་མཁྱེན་བརྩེའི་དབང་པོ་ལ་བསྔགས་པ་ཨུཏྤལ་གཞོན་ནུའི་ཕྲེང་བ། བླ་མ་ལ་ཕྱག་འཚལ་ལོ། །གྲགས་པའི་གཏེར་གྱུར་ཡོན་ཏན་བྱེ་བའི་རླབས་ཕྲེང་གིས། །ལྷར་བཅས་སྐྱེ་དགུའི་ཡིད་ཀྱི་གདུང་བ་ཀུན་སེལ་ཞིང་། །མཁས་གྲུབ་ཀླུ་མཆོག་བྱེ་བའི་ཚོགས་ཀྱིས་བརྟེན་བྱས་པའི། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༡ །སྔོན་རབས་དུ་མར་གོམས་པའི་ཐུགས་བསྐྱེད་རླུང་ཤུགས་ཀྱིས། །ཉེར་བསྐུལ་རླབས་ཆེན་བརྩོན་པའི་གྲུ་གཟིངས་སྟོབས་བསྐྱེད་པས། །རིས་མེད་ཐུབ་བསྟན་ནོར་བུའི་གླིང་ལ་དབང་བསྒྱུར་བའི། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༢ །འཕགས་བོད་ལོ་པཎ་མཁས་མང་ཉེ་དབང་གིས་བསྟེན་པའི། །སྒྲ་ཚད་བཟོ་གསོ་ནང་རིག་སྐལ་ལྡན་ཤིང་རྟའི་རྒྱུན། །མ་ལུས་རྣམ་དཔྱོད་ལྟོ་བར་བསྐྱིལ་མཁས་དྲང་སྲོང་མཆོག །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༣ །བདེ་སྟོང་རྡོ་རྗེའི་ཉམས་བརྒྱས་སྒེག་པའི་གྲུབ་ཚོགས་ཀྱི། །ཟབ་གསང་རྟོགས་པའི་མྱོས་གླུས་སྐལ་ལྡན་རྐང་དྲུག་ཚོགས། །ཡོངས་སྨིན་སྒྲུབ་བརྒྱུད་ཡིད་བཞིན་མཛོད་ཀྱི་གཉེར་ཁ་པ། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༤ །མཚོ་སྐྱེས་རྒྱལ་བའི་ཡེ་ཤེས་སྤྱན་གྱིས་དུས་གསུམ་དུ། །གཟིགས་ཀྱང་ཁྱོད་དང་མཉམ་པ་གཞན་འགའ་མ་རྙེད་ནས། །བཀའ་བབས་བདུན་གྱི་གསང་མཛོད་ཁྱོད་གཅིག་ཁོ་ནར་གཏད། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག །བསིལ་ལྗོངས་འདི་ན་མཁས་དང་གྲུབ་པར་གྲགས་རྣམས་ཀྱིས། །ཁྱོད་ཞབས་པདྨའི་གེ་སར་ཉེ་བར་མ་བསྟེན་སུ། །དེ་སླད་ལུང་རྟོགས་སྦྲང་རྩིའི་བཅུད་ཀྱིས་ལྕི་བར་བྱས། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༦ །ལྷ་ཀླུ་མི་བདག་སྲིད་ན་ཆེ་བར་གྲགས་རྣམས་ཀྱི། །ཁེངས་པའི་ལག་པད་ཟུམ་པས་གཙུག་ནོར་མཐོན་ཀའི་དཔལ། །ཞབས་སེན་ཟླ་བ་གསར་པའི་རྒྱན་དུ་མཛེས་བྱས་པ། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༧ །དེང་དུས་སྙིགས་མར་སྤྱོད་པའི་ངང་ཚུལ་ཆུ་བདག་སྦུབས། །ཐུབ་བསྟན་ས་ཆེན་བྱིང་ལ་ཕྱོགས་ཚེ་ཕྲག་པ་ཡིས། །འདེགས་བཟོད་དཔལ་གྱི་ལག་པ་ཁྱོད་མིན་གཞན་པ་སུ། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༨ །ཁྱོད་སྲས་མཁས་གྲུབ་ཉེ་དབང་བྱེ་བའི་བསོད་ནམས་ཀྱི། །དཔུང་པས་ཡོངས་བསྲུང་བཤད་སྒྲུབ་ལྷ་ཡི་དགའ་ཚལ་མཆོག །ཆེས་ཆེར་དར་བས་རྫོགས་ལྡན་བྲིས་པའི་རི་མོར་བྱས། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༩ །ཁྱོད་ཞལ་མཇལ་དང་གསུང་གི་བདུད་རྩིའི་ཟེགས་མ་ཙམ། །སུ་ཞིག་སྒྲ་འཛིན་བུམ་པར་སོན་པ་དེ་ཀུན་ཀྱང་། །སླད་ནས་སྲིད་པའི་རིམས་ནད་རྒྱུ་བའི་སྐབས་མིན་པ། །ཀུན་མཁྱེན་བླ་མ་མཁྱེན་བརྩེའི་དབང་པོས་རྗེས་སྐྱོངས་ཤིག ༡༠ །འདི་ནས་བཟུང་སྟེ་ཚེ་རབས་ཕྲེང་བར་ཁྱོད་ཞབས་རྡུལ། །གནས་ལྔའི་རྩེ་མོར་ཆགས་པའི་སྐལ་བཟང་ཡོལ་མིན་པར། །དད་སོགས་འཕགས་ནོར་བདུན་གྱི་འབྱོར་པ་རྒྱ་ཆེན་པོས། །ཡོངས་གཏམས་སྲིད་པའི་དབུལ་ཀུན་དེང་ནས་རྒྱུན་ཆད་མཛོད། ༡༡ །ཐེག་མཆོག་རིགས་ཁམས་འཛིན་མར་བྱང་ཕྱོགས་དཔག་བསམ་དབང་། །གཞན་ཕན་བསྡུ་བཞིའི་མེ་འབྲས་ཆེར་རྒྱས་དོན་མཐུན་འགྲོར། །རྟོན་པ་བཞི་ལྡན་ངེས་དོན་སྙིང་པོའི་འདོད་དགུའི་ཆར། །ཅི་དགར་སྦྱིན་པའི་སྐལ་བཟང་དེང་འདིར་སྩོལ་མཛོད་ཀྱེ། ༡༢ །བཀྲ་ཤིས་གང་ཞིག་མཆོག་བྱིན་རྫོགས་ལྡན་སྤྲིན་ཆེན་ལས། །དགེ་ལེགས་ཕན་བདེའི་གྲུ་ཆར་རྟག་པར་འཇོ་བ་ཡིས། །ས་འདི་དགའ་བ་བརྒྱ་ལྡན་གྲོང་བཞིན་རྟག་འབྱོར་པས། །ངེས་དོན་ཆོས་ཀྱི་རྒྱལ་སྲིད་མི་ཉམས་བརྟན་གྱུར་ཅིག ༡༣ །ཅེས་པའང་དགེ་སློང་ཞིང་སྐྱོང་ལགས་ཀྱི་གསུང་བསྐུལ་ངོར་པདྨ་བི་ཛས་བྲིས་པ་སྐྱེ་ཀུན་བླ་མས་རྗེས་སུ་འཛིན་པའི་རྒྱུར་གྱུར་ཅིག། །།