འཇམ་མགོན་རྡོ་རྗེ་འཆང་བློ་གྲོས་མཐའ་ཡས་ལ་སྙན་ངག་དོན་རྒྱན་གྱི་སྒོ་ནས་བསྔགས་པ་པུཎྜ་རི་ཀའི་ཕྲེང་བ།

༄༅། །འཇམ་མགོན་རྡོ་རྗེ་འཆང་བློ་གྲོས་མཐའ་ཡས་ལ་སྙན་ངག་དོན་རྒྱན་གྱི་སྒོ་ནས་བསྔགས་པ་པུཎྜ་རི་ཀའི་ཕྲེང་བ། ངག་གི་དབང་ཕྱུག་ལ་ཕྱག་འཚལ་ལོ། །རང་བཞིན་བརྗོད་པ། རྒྱལ་བས་ལུང་བསྟན་རྩོད་བྲལ་སྤྲུལ་པའི་སྐུ། །ཤེས་བྱ་ཀུན་མཁྱེན་མཛོད་ལྔའི་ལམ་སྲོལ་འབྱེད། །རིས་མེད་བསྟན་ལ་ཕྱག་བཞེས་རྨད་བྱུང་བ། །བློ་གྲོས་མཐའ་ཡས་ཞབས་ལ་ཕྱག་བགྱིའོ། །དཔེ་རྒྱན། གང་གི་ཐུགས་བསྐྱེད་པདྨ་དཀར་པོ་བཞིན། །སྙིགས་ལྔའི་མཐར་ཡང་དམ་ཆོས་འཛིན་པའི་ཚུལ། །མཆོག་དང་མཚུངས་པ་འགའ་ཡང་མ་འཚལ་བས། །རང་ཉིད་དཔེ་ཟླར་བཞག་ལས་གཞན་དུ་ཅི། །གཟུགས་ཅན། རྣམ་དག་ཚུལ་ཁྲིམས་གསེར་གྱི་ཀ་ལཱ་ཤར། །ཟག་མེད་ཏིང་འཛིན་བདུད་རྩིའི་བཅུད་ཀྱིས་གཏམས། །ཤེས་རབ་རྣམ་བཀྲའི་རྒྱན་གྱིས་རབ་མཛེས་པ། །ཐར་འདོད་སྐྱེ་བོ་ཡོངས་ཀྱིས་བསྟེན་འོས་ཉིད། །གསལ་བྱེད། སྣང་བར་བྱས་སོ་ཐུན་མོང་ཤེས་བྱའི་གཞུང་། །ཐུན་མིན་མདོ་དང་རྒྱུད་སྡེའི་བཤད་བཀའི་རྒྱུན། །ཟབ་གསང་སྒྲུབ་བརྒྱུད་སྙིང་པོའི་རིང་ལུགས་ཏེ། །ཡང་ཟབ་རྩོལ་མེད་ཨ་ཏིའི་གསེང་ལམ་ཡང་། །བསྐོར་བ། ཁྱོད་ཀྱི་ལུང་རིགས་ཟབ་མྱུར་སྤོོབས་པ་ཡིས། །གཞན་སྡེའི་སྨྲ་བ་ཟིལ་མནན་བག་ཕེབས་རོལ། །རྒོལ་བའི་རེ་བ་ཟད་པའི་སྐྱེ་བོ་ཕལ། །སེམས་ལས་ཆུང་ངུས་རང་ཁྱིམ་བག་ཕེབས་རོལ། །འགོག་རྒྱན། སྒྲུབ་བརྒྱུད་ཤིང་རྟ་བརྒྱད་ཀྱི་རིང་ལུགས་ཆེར། །ཕྱག་བཞེས་ཆེ་ཞེས་ཉིད་ལ་མི་བསྟོད་དེ། །གསང་འཛིན་མགོན་པོ་རང་གི་བསྟན་པ་མཆོག །སྤེལ་ཕྱིར་བསམ་བཞིན་སླར་ལ་འབྱོན་དེའི་ཕྱིར། །དོན་གཞན་བཀོད་པ། འཁྲུལ་པའི་དྲི་བྲལ་རྒྱལ་ཀུན་གསང་བའི་མཛོད། །ཟབ་མོའི་ཚུལ་ལའང་ཁ་ཅིག་འཁུ་ལ་ལྟོས། །འོན་ཀྱང་ལོག་ལྟས་བསྒྲིབས་པའི་མཐོང་བྱེད་སྒོར། །སྟོན་པའི་མཛད་སྤྱོད་གཡོ་སྒྱུར་མཐོང་མིན་ནམ། །ལྡོག་པ་ཅན། མང་དུ་ཐོས་པའི་ཡོན་ཏན་རྒྱ་ཆེ་ཞིང་། །རྒྱལ་བའི་ཆོས་མཛོད་ཡོངས་སུ་སྡུད་མཛད་པས། །ཁྱོད་དང་ཉེ་གནས་ཀུན་དགའ་མཚུངས་ཐ་དད། །མགོན་ཁྱོད་བསིལ་ལྗོངས་གདུལ་བྱའི་མགོན་འདིས་སོ། །སྲིད་པ་ཅན། རྒྱུ་ཡིས་མ་བསྐྱེད་ཐེག་མཆོག་རིགས་ཁམས་བརྟས། །རྐྱེན་གྱིས་བསྒྱུར་མིན་དམ་པའི་ངང་ཚུལ་འཛིན། །གཞན་གྱི་མ་བཅོལ་ཉིད་ཀྱི་ཐུགས་བསྐྱེད་མཐུས། །བསྟན་དང་འགྲོ་ལ་ཕན་པ་རྒྱ་ཆེན་མཛད། །བསྡུས་བརྗོད། འདི་ན་ཉིན་མོར་བྱེད་པའི་གཟི་འོད་ཀྱིས། །འཇིག་རྟེན་མུན་ཚོགས་སེལ་ལ་མི་མཚར་བ། །མཚན་དུས་མི་ཁྱེར་སྣང་བའི་འོད་ཙམ་ལ། །རེ་ལྟོས་འཆའ་བའི་སྐྱེ་བོ་འགའ་ཡང་མཐོང་། །ཕུལ་བྱུང་། མགོན་པོ་མཆོག་གི་ཐུགས་སུ་མ་ཆུབ་པའི། །ཤེས་བྱའི་ཆོས་གང་སྲིད་ན་མ་འཚལ་བས། །ཀུན་མཁྱེན་མཛོད་དུ་འགའ་ཞིག་ཡོད་མེད་ཅེས། །བདག་གི་བློ་ནི་ཐེ་ཚོམ་དྲྭ་བར་ཆུད། །རབ་བཏགས། མཁའ་ཁྱབ་འགྲོ་ལ་རྗེས་བརྩེའི་སྙིང་རྗེའི་ལྕིད། །འདེགས་པར་མ་བཟོད་ནོར་འཛིན་དགའ་མ་ཡང་། །འཁུན་པའི་སྒྲར་བཅས་ཅུང་ཟད་འདར་བ་ལ། །རྒྱུ་སྐར་ཚོགས་རྣམས་འཕྱ་བས་རྒོད་པ་འདྲ། །རྒྱུ་རྒྱན། གང་གི་ལེགས་མཛད་ཕྲིན་ལས་བཟང་པོ་ཡིས། །རིས་བྲལ་བསྟན་འགྲོའི་དགའ་སྟོན་སྤེལ་བ་འདིས། །རྣམ་དཔྱོད་ལྡན་དང་གཟུ་བོར་གནས་རྣམས་ཀྱི། །ཡིད་ལ་སྔོན་མེད་དགའ་བ་རྒྱས་པར་བྱེད། །ཕྲ་མོ། ཚེ་རབས་ཕྲེང་བར་ཁྱོད་ཞབས་མནྡར། །བརྟེན་པའི་སྐལ་བཟང་སྙིང་ནས་སྨོན་པའི་མོད། །དགྱེས་ཞལ་འཛུམ་པའི་པུཎྜ་རི་ཀའི་ཕྲེང་། །དད་པའི་འདྲེན་བྱེད་ངོགས་སུ་མངོན་དུ་གྱུར། །ཆ་རྒྱན། རྒྱ་ཆེན་ཆོས་མཛོད་ཟབ་མོར་མ་ཆུད་འགར། །རང་ལུགས་འཛིན་པའི་བཤེས་གཉེན་ཆེས་མང་ཕྱིར། །ནམ་ཡང་ནུབ་པ་མེད་པའི་གནས་གཟིགས་ནས། །ཐུགས་ཁྲེལ་ཆུང་བར་དགོངས་ལས་གཞན་དུ་ཅི། །རིམ་པ་ཅན། མགོན་པོ་ཁྱོད་ཀྱི་འཆད་པའི་ལེགས་བཤད་དང་། །རྩོམ་པའི་རྣམ་དཔྱོད་རྩོད་པའི་རིགས་ལམ་ཚུལ། །མཁས་མཆོག་དབྱིག་གཉེན་དཔའ་བོ་ཆོས་གྲགས་ལས། །བརྐུས་པར་ངེས་སོ་ཐུབ་པས་ལུང་བསྟན་རྗེ། །དགའ་བའི་རྒྱན། མཆོག་གི་ཞལ་བཟང་བལྟ་དང་གདམས་ཟབ་ཉན། །དེང་བདག་ཡིད་ལ་དགའ་བ་སྐྱེས་པ་གང་། །སླར་ཡང་བསོད་ནམས་ཟོང་གི་འདི་འདྲའི་དཔལ། །མངོན་སུམ་ཉམས་སུ་མྱོང་ལས་གཞན་གྱིས་མིན། །ཉམས་ལྡན། སྒྲིན་པོའི་བློ་ཡིས་བརྩོན་ཀྱང་བསྐལ་བ་བརྒྱར། །རྟོགས་པར་ནུས་མིན་ལྷན་སྐྱེས་ཕྱག་རྒྱ་ཆེ། །མགོན་པོ་གང་གི་བརྡ་ཐབས་རྟེན་འབྲེལ་གྱིས། །ཨེ་མ་མངོན་སུམ་བསྟན་འདི་རྨི་ལམ་མིན། །གཟི་བརྗིད་ཅན། པདྨ་གར་དབང་ནུས་མཐུའི་ཚ་དབལ་གྱིས། །ནག་ཕྱོགས་གདུག་པ་མཐའ་དག་ཚར་བཅད་ཅེས། །དཀར་ཕྱོགས་སྐྱེ་དགུའི་ཚོགས་རྣམས་འཇིགས་མི་འཚལ། །ངང་ཚུལ་དགེ་བར་སྤྱོད་རྣམས་ནམ་ཡང་མིན། །རྣམ་གྲངས་བརྗོད་པ། མཆོག་གི་ཐུགས་བསྐྱེད་བརྩོན་པའི་གྲུ་གཟིངས་ཀྱིས། །གཅིག་ཀྱང་མ་ལུས་སྲིད་པའི་འགྲོ་བ་རྣམས། །བདེ་བའི་ངལ་སྟེགས་མཆོག་ལ་འགོད་མཛོད་དང་། །བདག་འདྲ་བཏང་ཉོམས་ངང་དུ་གྱུར་ཀྱང་བཟོད། །ཀུན་ཕན། བློ་གྲོས་མཐའ་ཡས་ཟབ་མོའི་ཆོས་གཏེར་མཛོད། །བསྡུ་བར་བཞེད་ཚེ་མདོ་སྒྱུ་སྒྲུབ་སྡེ་སོགས། །སྔོན་མེད་བཀའ་བབས་བདུན་གྱི་སྒོ་འཕར་ཡང་། །མཚོ་སྐྱེས་རྒྱལ་བའི་ཐུགས་རྗེས་རྣམ་པར་དབྱེ། །རྒྱ་ཆེ་བ། སྔོན་བྱོན་མཁས་དང་གྲུབ་པ་བརྒྱ་ཕྲག་གིས། །འདེགས་པར་མ་བཟོད་ཐུབ་བསྟན་ལྕི་བའི་ཁུར། །སྙིགས་མས་གཙེས་ཤིང་རྒུད་པས་ཉམ་ཐག་འདིར། །འདེགས་བཟོད་ཐུགས་བསྐྱེད་སྤོབས་པ་ཁྱོད་ལ་མངའ། །བསྙོན་དོར། མཆོག་གི་གསང་གསུམ་བཀོད་པ་གཅིག་ཉིད་མིན། །འབུམ་ཕྲག་རྣམ་པར་འཕྲུལ་ལ་བསྙོན་དུ་ཅི། །དེ་ལས་གཞན་དུ་ངོ་མཚར་མཛད་ཕྲིན་འདི། །སྙིགས་དུས་ཚེ་ཐུང་གཅིག་ལ་ཅི་ཕྱིར་རྫོགས། །སྦྱར་བ། སྤོབས་པ་མཐའ་ཡས་བློ་གྲོས་བྱང་ཆུབ་སེམས་དཔའ་བློ་གྲོས་མི་ཟད་པ་དང་སྒྲ་སྦྱར། འཛད་མི་ཤེས། །ཉེས་ལས་རྣམ་གྲོལ་ཡོན་ཏན་བྱེ་བའི་གཏེར། །རྒྱལ་སྲས་མཆོག་དང་ཁོ་བོའི་འདྲེན་པ་རྗེས། །སྟོན་པའི་ཆོས་མཛོད་རྒྱ་མཚོ་འཛིན་པར་བྱས།། ཁྱད་པར་བརྗོད་པ། ཁྱོད་གསུང་རྣམ་མང་ལེགས་པར་བཤད་པའི་གཏེར། །འདོད་ལ་གོམས་པའི་སྒྱུ་རྩལ་ལྡན་མིན་ཞིང་། །ཟོལ་སྦྱོར་ངོ་བསྟོད་ཚིག་གིས་འབྲིད་མིན་ཡང་། །ས་སྟེང་མཁས་པ་ཀུན་གྱི་ཡིད་དབང་འཕྲོག །མཚུངས་སྦྱོར་གྱི་རྒྱན། རིགས་གསུམ་སེམས་དཔའ་འོད་སྲུང་ཀུན་དགའ་བོ། །ཉེ་བར་འཁོར་དང་བདག་གི་མགོན་ཁྱོད་ཀྱང་། །རབ་འབྱམས་བཀའ་ཡི་སྡུད་པ་པོ་ཉིད་ཅེས། །ངོ་མཚར་སྙན་པ་ཡུལ་གཞན་མེད་པར་འཛིན། །འགལ་རྒྱན། ཁྱོད་ཀྱི་ལེགས་མཛད་གྲགས་པའི་སྙན་དབྱངས་མཆོག །ཐར་འདོད་སྐལ་བཟང་རྣ་བའི་བདུད་རྩི་སྟེ། །སྐལ་དམན་ལོག་པར་ལྟ་བའི་གཞན་དབང་དང་། །ཕྱོགས་ཞེན་ཅན་འགའི་རྣ་བར་དུག་ཏུ་གྱུར། །སྐབས་མིན་བསྟོད་པ། ཕྱོགས་ཞེན་དུག་ཆུས་མྱོས་པའི་བཙུན་གཟུགས་ཕལ། །མཐོང་ཚེ་ནགས་སུ་རྩྭ་ཆུས་ཉེར་འཚོ་ཞིང་། །བག་ཕེབས་བདེ་ལ་རོལ་བའི་རི་སྐྱེས་ཚོགས། །ཆོས་སྤངས་སྒྲིབ་པས་མ་སྦགས་སྐལ་བཟང་ཉིད། །ཟོལ་བསྟོད། དགེ་སྦྱོང་གྲོང་དུ་རྒྱུ་བའི་སྨྱིག་མ་མཁན། །མདའ་བསྣུན་ཞབས་ཀྱི་གོ་འཕང་དེ་བརྙེས་པར། །བདག་ནི་ཟུང་འཇུག་གྲུབ་པ་མཆོག་ཡིན་ཞེས། །སྙེམས་པ་མཆོག་གི་འཁྲི་ལ་འཛེགས་འོས་མིན། །ངེས་བསྟན། དབྱར་སྐྱེས་ཆུ་འཛིན་ལས་ཐོན་བསིལ་བཅུད་ཀྱིས། །རྩ་ལྗང་མྱུ་གུ་གསར་པའི་ཕྲེང་སྤེལ་འདིས། །མཆོག་གི་ཞལ་ལུང་ཟབ་དགུའི་གདམས་པ་ཡིས། །སྐལ་བཟང་སློབ་མའི་ཉམས་རྟོགས་བསྐྱེད་པ་མཚོན། །ལྷན་ཅིག་བརྗོད་པ། བསྟན་འགྲོའི་ཁུར་ཆེན་བཞེས་པའི་ཐུགས་བསྐྱེད་དང་། །ལྷན་ཅིག་སྲས་བཅས་རྒྱལ་བས་རྗེས་གནང་སྩལ། །ཟབ་གསང་ཆོས་སྒོ་གསར་དུ་ཕྱེ་བ་དང་། །བགྲང་ཡས་སློབ་ཚོགས་འདུ་བ་མཉམ་དུ་བྱས། །ཡོངས་བརྗེས། སྲིད་རྩའི་འཁྲི་ཤིང་གཅོད་པའི་མཚོན་རྣོན་པོ། །དཔའ་བོ་ཁྱོད་ཀྱིས་གང་ལ་གཟས་པ་དེའི། །ཀུན་འབྱུང་འཆིང་ཐག་ཆད་པའི་ཡོན་ཏན་ཆོས། །མ་ལུས་ཉིད་ཀྱི་གྲགས་པའི་རྒྱན་དུ་བཞེས། །ཤིས་བརྗོད། ཁྱོད་ནི་ཡེ་ཤེས་སྒྱུ་མའི་གར་མཁན་ཏེ། །མཉམ་ཉིད་ཀློང་དུ་སྐྱེ་སོགས་སྤྲོས་མཚན་དབེན། །དོན་དམ་ཉིད་དེ་སྒྲ་རྟོག་ཡུལ་ལས་འདས། །ཟབ་པའི་ཚུལ་གྱིས་འགྲོ་འདི་སྲུང་གྱུར་ཅིག །རབ་སྤེལ། ཡོན་ཏན་ཚད་མེད་མཁའ་ལྟར་རྒྱ་ཆེ་བ། །བློ་ཆུང་སྦྲང་བུའི་རྩལ་གྱིས་བགྲོད་རློམ་ཚེ། །རྔུལ་ཆུ་མུ་ཏིག་དཀར་པོའི་འཛུམ་དཀར་ཕྲེང་། །བདག་ལ་འཕྱ་ཕྱིར་ཡང་ཡང་རྒོད་མིན་ནམ། །འོན་ཀྱང་དད་པའི་ཡིད་ཀྱིས་ཆུ་ཐིགས་ཙམ། །བརྗོད་པ་འདི་ཡང་དོན་མེད་མི་འགྱུར་ཕྱིར། །བདག་གཞན་སྨྲ་བྱེད་རལ་གྲིའི་མཚོན་རྣོན་གྱིས། །འཐག་པའི་ལས་ངན་འཁྲུལ་འཁོར་རྒྱུན་ཆད་ཤོག །སྐྱེ་བ་ཀུན་ཏུ་ལེགས་བཤད་སྨྲ་བའི་ལྗགས། །རབ་མཉེས་པདྨ་རྒྱས་འདྲའི་དཔལ་ཐོབ་ནས། །སྲས་བཅས་རྒྱལ་ཀུན་དགྱེས་པའི་བསྟོད་དབྱངས་སྤྲིན། །ཞིང་ཁམས་རྒྱ་མཚོར་སྲིད་མཐར་སྒྲོགས་བྱེད་ཤོག །མཁས་པ་མཁས་པའི་ལེགས་བཤད་རྗེས་སུ་སྨྲ། །བླུན་རྣམས་བླུན་ཚིག་མགལ་དུམ་ཕྲེང་བ་སྤེལ། །དེ་ཕྱིར་འདི་ལྟར་ཅུང་ཟད་སྨྲ་བ་ཡང་། །ཡོངས་འཛིན་དམ་པའི་དྲིན་ཡིན་གཞན་གྱིས་མིན། །དེ་སླད་དགེ་བ་འདིའང་དེ་ཡི་ཕྱིར། །ཡོངས་བསྔོ་འཇམ་དཔལ་ཀུན་ཏུ་བཟང་སོགས་ཀྱི། །དགོངས་སྤྱོད་རྒྱ་མཚོར་མཉམ་པ་ཉིད་གྱུར་ཏེ། །ཀུན་མཁྱེན་ཡེ་ཤེས་སྣང་བ་འཛིན་གྱུར་ཅིག །བཀྲ་ཤིས་གང་ཞིག་སྲིད་ཞིའི་འཆིང་གྲོལ་བའི། །ཡེ་ཤེས་སྐུ་མཆོག་མཚན་དཔེས་བརྒྱན་པའི་གར། །འགྲོ་ལ་སྟོན་དང་ཚངས་དབྱངས་སྙན་གསུང་གིས། །ཆོས་སྒྲ་སྒྲོགས་པས་འཇིག་རྟེན་མཛེས་བྱེད་ཤོག །ཅེས་པའང་ལྔ་རིག་སྨྲ་བ་ངག་དབང་འཇམ་དཔལ་ལེགས་བཤད་རྒྱ་མཚོའི་བཀའ་དྲིན་ལས། དཎྜའི་གཞུང་ལ་བག་ཆགས་ཙམ་ཐེབས་པ་དབྱངས་ཅན་དགྱེས་པའི་སྡེས། ༧ འཇམ་མགོན་རྡོ་རྗེ་འཆང་ཆེན་པོ་ལ་སངས་རྒྱས་དངོས་མཐོང་གི་མོས་གུས་དང་ལྡན་པ་དགེ་སློང་ཞིང་སྐྱོང་ལགས་ཀྱི་གསུང་གིས་བསྐུལ་བའི་རྐྱེན་ལས་སྟན་ཐོག་གཅིག་ཏུ་ཤར་མར་བྲིས་པའི་དགེ་བས་སྐྱེ་ཀུན་བླ་མ་མཆོག་གི་རྗེས་སུ་འཛིན་པའི་རྒྱུར་གྱུར་ཅིག། །།
༄༅། །ན་མོ་གུ་རུ། དཔལ་ལྡན་རྣམ་གྲོལ་ཡོན་ཏན་བྱེ་བའི་གཏེར། །དྲན་པ་ཙམ་གྱིས་སྲིད་ཞིའི་འཇིགས་འཕྲོག་ཅིང་། །ཕན་བདེའི་དངོས་ཀུན་ཡིད་བཞིན་སྩོལ་མཛད་པ། །བློ་གྲོས་མཐའ་ཡས་ཞབས་ལ་ཕྱག་འཚལ་ལོ། །མགོན་པོ་གདོད་ནས་མངོན་པར་བྱང་ཆུབ་ཀྱང་། །སྙིང་རྗེ་ཆེན་པོས་སྲིད་པ་ཇི་སྲིད་བར། །སྣ་ཚོགས་ཐབས་ཀྱིས་འགྲོ་བའི་རེ་སྐོང་བའི། །ཡིད་བཞིན་ནོར་མཆོག་ཁྱོད་ལ་ཕྱག་འཚལ་ལོ། །ཁྱོད་ཀྱི་བ་སྤུའི་ཁུང་བུ་རེ་རེར་ཡང་། །སངས་རྒྱས་ཞིང་ཁམས་རྒྱ་མཚོའི་རྡུལ་སྙེད་སྤྲུལ། །དེ་དེར་ཐེག་གསུམ་བདུད་རྩིའི་སྨན་ཆར་གྱིས། །འགྲོ་བའི་དུག་གསུམ་ནད་གཞིལ་མཛད་ཕྱག་འཚལ། །རྒྱུ་དང་འབྲས་བུའི་ཐེག་པའི་གནས་མཐའ་དག །སྟོན་པ་པོ་ཁྱོད་ཞུ་དང་སྡུད་པའང་ཁྱོད། །དེ་བཞིན་འཛིན་དང་སྤེལ་པོ་ཀུན་ཀྱང་ཁྱོད། །རྣམ་ཐར་བསམ་མི་ཁྱབ་ལ་ཕྱག་འཚལ་ལོ། །རྒྱལ་དང་རྒྱལ་སྲས་ཉན་རང་འཕགས་པའི་ཚུལ། །དགེ་སྦྱོང་བྲམ་ཟེ་རིག་འཛིན་ལྷ་དབང་ཀླུ། །འགྲོ་ལ་གང་འདུལ་སྐུ་ཡི་བཀོད་པའི་སྤྲིན། །བསམ་མི་ཁྱབ་པར་སྤྲོ་ལ་ཕྱག་འཚལ་ལོ། །དེ་བཞིན་ཉི་ཟླ་ནོར་བུ་དཔག་བསམ་དབང་། །བུམ་བཟང་གཏེར་དང་སྨན་ཤིང་འབྲས་བུའི་ཚལ། །ཆུ་ཀླུང་ལྡེང་ཀ་གྲུ་ཟམ་ངལ་སྟེགས་སོགས། །ཕན་བདེའི་གཞི་ཀུན་འཕྲུལ་ལ་ཕྱག་འཚལ་ལོ། །འཕགས་བོད་བཤད་སྒྲུབ་བསྟན་པའི་མངའ་བདག་ཀུན། །ཁྱོད་གཅིག་ཁོ་ནའི་ཡེ་ཤེས་ཟབ་མོའི་འཕྲུལ། །དེ་སླད་ཕྱོགས་རེར་བགྲང་བའི་བློ་འདི་ནོངས། །ཡིད་བཞིན་སྤྲིན་ཆེན་མཆོག་ལ་ཕྱག་འཚལ་ལོ། །མདོ་རྒྱུད་ཀུན་ནས་བདེན་གསུང་སེང་གེའི་སྒྲས། །ཆེས་ཆེར་བསྔགས་པའི་བདེན་དོན་མི་བསླུ་འབྲས། །སྔོན་མེད་མཛོད་ལྔའི་སྒོ་འབྱེད་ཤིང་རྟ་ཆེ། །ཀུན་མཁྱེན་སྨྲ་བའི་ཟླ་བ་ལ་ཕྱག་འཚལ། །མཁྱེན་རབ་རལ་གྲིས་རྨོངས་པའི་དྲྭ་བ་འབུམ། །བཅད་དང་ཆབས་ཅིག་བློ་མཆོག་པདྨོའི་ཚལ། །ཅིག་ཅར་བཞད་མཛད་དོན་གྱི་འཇམ་པའི་དཔལ། །ཡེ་ཤེས་ཉི་མ་ཆེ་ལ་ཕྱག་འཚལ་ལོ། །བརྩེ་ཆེན་ཐུགས་རྗེའི་བསིལ་ཟེར་འབུམ་ཕྲག་གིས། །འགྲོ་ཀུན་སྲིད་པའི་ཚད་གདུང་ཀུན་བཅིལ་ནས། །ཕན་བདེའི་ཀུ་མུཏ་བཞད་མཛད་སྙིང་རྗེའི་གཏེར། །གདུང་སེལ་ཟླ་བ་མཆོག་ལ་ཕྱག་འཚལ་ལོ། །ནུས་མཐུ་བརྩེ་བརྒྱ་འབར་བའི་མཚོན་ཆར་གྱིས། །ལོག་འདྲེན་བདུད་སྡེའི་ཀླད་པ་འགེམས་བྱས་ནས། །ཐེག་མཆོག་སྙིང་པོའི་སྲིད་སྲུང་གསང་འཛིན་མགོན། །དཔའ་ཆེན་སྟོབས་ཀྱི་སེང་གེ་ལ་ཕྱག་འཚལ། །ཤེས་བྱའི་ཆོས་ཚུལ་ཚངས་པའི་རལ་ཀླུང་རྒྱུན། །མ་ལུས་ཐོས་བསམ་སྒོམ་པའི་ཧུབ་གཅིག་གིས། །ཉེར་དྲངས་ལྟོ་བར་བསྐྱིལ་མཛད་དྲང་སྲོང་མཆོག །མཁས་དབང་འཇིག་རྟེན་རྒྱན་ལ་ཕྱག་འཚལ་ལོ། །ཉེས་སྤྱོད་དྲི་ཡི་མ་གོས་དག་བྱེད་གཏེར། །དགེ་བ་ཆོས་སྡུད་རིན་ཆེན་བྱེ་བས་གཏམས། །གཞན་ཕན་བསྡུ་བཞིའི་ཕྲིན་ལས་རླབས་ཕྲེང་ཅན། །བཙུན་མཆོག་ཐུབ་བསྟན་རྒྱན་གྱུར་ལ་ཕྱག་འཚལ། །ས་སོགས་འབྱུང་བ་ཆེན་པོ་ཇི་བཞིན་དུ། །ལོག་སྒྲུབ་རྐྱེན་གྱིས་མི་འཁྲུགས་གོ་ཆ་བརྟན། །རྟག་པར་གཞན་ཕན་འབའ་ཞིག་མཛད་པ་ཡི། །ཀུན་བཟང་སྤྱོད་མཐར་ཕྱི ན་ལ་ཕྱག་འཚལ་ལོ། །ཐུན་མོང་ཐུན་མིན་གཙུག་ལག་བྱེ་བའི་ཆབ། །མཁྱེན་དཔྱོད་བུམ་པར་བསྐྱིལ་གང་དོན་གཉེར་འགྲོར། །རྩོལ་བས་ཐེ་ཚོམ་དྲི་ཀུན་འཁྲུད་མཛད་པའི། །འཆད་མཁས་ངག་གི་དབང་ཕྱུག་ཁྱོད་ཕྱག་འཚལ། །ཆོས་ཀུན་དེ་ཉིད་གཟིགས་པས་ཕྱོགས་ལྷུང་གི། །ཆགས་སྡང་རྩོད་པ་སྤངས་མོད་ལུང་རིགས་མཐུས། །ཕས་རྒོལ་ཝ་སྐྱེས་སྟོང་གི་དྲེགས་པ་བསྙིལ། །རྩོད་མཁས་སྨྲ་བའི་ཁྱུ་མཆོག་ལ་ཕྱག་འཚལ། །རྒྱུད་ལུང་མན་ངག་བྱེ་བའི་ཆུ་གཏེར་ལས། །སྔོན་སྦྱངས་མཐུ་ཡིས་རྙེད་པ་མཛོད་ལྔའི་ནོར། །བརྩེ་བས་རྗེ་འཇུག་སྐལ་བར་ལེགས་སྩོལ་བའི། །རྩོམ་མཁས་ཨུ་དུམྦཱ་ར་ཁྱོད་ཕྱག་འཚལ། །མདོར་ན་སྤང་ཀློག་ལས་ཀྱི་འཁོར་ལོ་གསུམ། །ཕྱོགས་རེར་མ་གྱུར་རྒྱལ་པའི་མཛད་པ་ཅན། །རིས་མེད་བསྟན་འགྲོའི་སྐྱབས་གཅིག་པད་འབྱུང་དངོས། །ཡོན་ཏན་རྒྱ་མཚོའི་གཏེར་ལ་ཕྱག་འཚལ་ལོ། །ལུས་དང་ལོངས་སྤྱོད་ཀུན་བཟང་མཆོད་པའི་སྤྲིན། །མ་ཚང་མེད་པའི་འདོད་ཡོན་ཟད་མེད་གཏེར། །ཐོས་བསམ་སྒོམ་པའི་རི་གླིང་བཀོད་ལེགས་བཅས། །གུས་པའི་བློ་ཡིས་འབུལ་གྱིས་བརྩེ་བས་བཞེས། །ཐོག་མེད་ནས་བསགས་སྡིག་ལྟུང་ཅི་མཆིས་དང་། །ཁྱད་པར་རྡོ་རྗེ་འཛིན་དབང་བླ་མ་རྗེར། །ཐ་མལ་མི་རུ་བཟུང་བའི་བློ་ངན་སྒྲིབ། །སྙིང་ནས་བཤགས་སོ་དག་ཚང་དངོས་གྲུབ་སྩོལ། །རྒྱལ་བ་རྒྱ་མཚོའི་ཕྲིན་ལས་ཁུར་བཞེས་ནས། །གདུལ་བྱ་རྒྱ་མཚོ་ཡོངས་སུ་སྨིན་བྱའི་ཕྱིར། །ཐེག་པ་རྒྱ་མཚོའི་སྒོ་འཕར་རྟག་དབྱེ་བའི། །རྣམ་ཐར་རྒྱ་མཚོའི་ཕྲེང་བར་རྗེས་ཡི་རང་། །ད་དུང་སེམས་ཅན་ཁམས་ནི་ཚད་མེད་ཅིང་། །དེ་ཀུན་ལས་ཉོན་ནད་ཀྱིས་གདུང་ལགས་ན། །བརྩེ་ཆེན་སྨན་པའི་རྒྱལ་པོ་རྗེས་དགོངས་ཏེ། །ཐེག་གསུམ་བདུད་རྩིའི་སྨན་མཆོག་སྩོལ་བར་མཛོད། །མགོན་ཁྱོད་བདུད་བཞིའི་གཡུལ་ལས་རྣམ་རྒྱལ་ཕྱིར། །སྐྱེ་འཇིག་མཚན་མོའི་ཆོས་ལས་རིང་བརྒལ་བས། །ད་དུང་འགྲོ་ཁམས་རྒྱ་མཚོ་གནས་ཀྱི་བར། །གཟུགས་སྐུ་རྡོ་རྗེ་ལྟ་བུར་བརྟན་པར་མཛོད། །འདིས་མཚོན་དུས་གསུམ་བསགས་པའི་ལེགས་བྱས་མཐུས། །དཔལ་ལྡན་བླ་མའི་ཞབས་པད་རབ་བརྟན་ཅིང་། །རྨད་བྱུང་ཐུགས་རྗེའི་གྲིབ་བསིལ་སྣུམ་པོ་ལ། །མཐའ་ཡས་སྐྱེ་དགུ་ངལ་འཚོ་ཐོབ་གྱུར་ཅིག །སྒྲུབ་བརྒྱུད་ཤིང་རྟ་ཆེ་བརྒྱད་པདྨོའི་ཚལ། །མཆོག་བྱིན་ཉིན་བྱེད་གསར་པས་རྟག་བསྐྱངས་མཐུས། །དཀར་ཕྱོགས་བུང་བ་དགའ་བའི་མྱོས་གླུ་ཡིས། །རྫོགས་ལྡན་དབྱར་གྱི་ལང་ཚོ་དར་གྱུར་ཅིག །བདག་ཀྱང་སྐྱེ་ཀུན་སྐྱབས་མཆོག་སྨྲ་བའི་ཟླས། །རྗེས་བཟུང་ཡིད་མཁའི་མུན་པ་གཏན་བཅོམ་ནས། །བློ་གྲོས་ཀུ་མུཏ་བཞད་པའི་དཔལ་ཡོན་གྱིས། །དོན་གཉིས་སྦྲང་རྩིའི་དགའ་སྟོན་འགྱེད་གྱུར་ཅིག །ཅེས་པའང་མགོན་པོ་གང་གི་ཚད་མེད་པའི་བཀའ་དྲིན་གྱིས་བསྐྱངས་པའི་སློབ་ཐ་འདུ་གསུམ་པ་འགྱུར་མེད་པདྨ་རྣམ་རྒྱལ་གྱིས་ཐེག་མཆོག་སེང་གེའི་སྒྲ་དབྱངས་རྒྱུན་མི་ཆད་པར་སྒྲོགས་ཤིང་སྒྲུབ་བརྒྱུད་རྟོགས་པའི་ཡོན་ཏན་དར་ལ་སྨིན་པའི་གནས་ཙ་འདྲ་རིན་ཆེན་བྲག་གི་མགུལ་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་རྗེ་བཙུན་ཐམས་ཅད་མཁྱེན་པའི་གཟིམས་སྤྱིལ་གྱི་འདབས་ཞོལ་དུ་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག། །།
༄༅། །རབ་འབྱམས་རྒྱལ་བའི་ཡེ་ཤེས་གཅིག་བསྡོམས་པ། །ལུང་དང་རྟོགས་པའི་བསྟན་པ་ཀུན་གྱི་མཛོད། །བསྟན་འཛིན་དགེ་འདུན་བྱེ་བའི་གཙུག་ནོར་མཆོག །དཔལ་མགོན་བླ་མའི་ཞབས་ལ་མགོས་ཕྱག་འཚལ། །སྤངས་རྟོགས་ཡོན་ཏན་ནོར་བུའི་ཏོག་མཛེས་ཤིང་། །རྨད་བྱུང་ཐུགས་རྗེའི་དར་ཤམ་གཡོ་བ་ཡིས། །སྲིད་པའི་ཚད་གདུང་དྲག་པོ་གཞི ལ་མཛད་པ། །དཔལ་མགོན་བླ་མ་བཀྲ་ཤིས་གདུགས་དཀར་ཡིན། །ཇི་ལྟ་ཇི་སྙེད་མཁྱེན་པའི་སྤྱན་ཟུང་བཀྲ། །ཐབས་དང་ཤེས་རབ་གཤོག་པ་ལེགས་བརྐྱངས་ནས། །བྱང་ཆེན་སྤྱོད་པའི་རྒྱ་མཚོར་འཇུག་མཛད་པ། །དཔལ་མགོན་བླ་མ་བཀྲ་ཤིས་གསེར་ཉ་ཡིན། །དྲི་མེད་ཚུལ་ཁྲིམས་གསེར་སྦྱངས་ལྟོ་བ་ཟླུམ། །ཏིང་འཛིན་དཔག་ཡས་བདུད་རྩིའི་བཅུད་ཀྱིས་གཏམས། །རྣམ་བཀྲའི་ཤེས་རབ་དཔག་བསམ་ཁ་རྒྱན་ཅན། །དཔལ་མགོན་བླ་མ་བཀྲ་ཤིས་བུམ་པ་ཡིན། །དྲི་མེད་ཐོས་པའི་འདབ་མ་རབ་ཏུ་ཡངས། །བསམ་བྱུང་ཤེས་རབ་གེ་སར་ཆེས་མཐོ་ཞིང་། །སྒོམ་པའི་ཡོན་ཏན་ཟིལ་དངར་མཆོག་ལྡན་པ། །དཔལ་མགོན་བླ་མ་བཀྲ་ཤིས་པདྨ་ཡིན། །ཆོས་དབྱིངས་རིན་འབྱུང་གནས་ལས་ཉེར་ཐོན་ཞིང་། །ཕུལ་བྱུང་མཁྱེན་བརྩེའི་རི་མོ་གཡས་སུ་འཁྱིལ། །ནུས་མཐུའི་སྒྲ་ཡིས་འགྲོ་ཀུན་དགའ་བསྐྱེད་པ། །དཔལ་མགོན་བླ་མ་བཀྲ་ཤིས་དུང་དཀར་ཡིན། །ཟབ་དང་ཞི་བ་སྤྲོས་མཚན་ཀུན་བྲལ་ཞིང་། །དྲི་མེད་འོད་གསལ་འདུས་མ་བྱས་པ་ཡི། །བདུད་རྩི་ལྟ་བུའི་ཆོས་ཉིད་མངོན་གཟིགས་པ། །དཔལ་མགོན་བླ་མ་བཀྲ་ཤིས་དཔལ་བེའུ་ཡིན། །འདུལ་ཁྲིམས་རྣམ་དག་ལྷ་རྫས་དྲི་བྲལ་ལ། །གཞན་ཕན་ཕར་ཕྱིན་དྲུག་གི་དར་དཔྱངས་གཡོ། །རིམ་གཉིས་ཏོག་མཛེས་ཕྱོགས་ལས་རྣམ་རྒྱལ་བའི། །དཔལ་མགོན་བླ་མ་བཀྲ་ཤིས་རྒྱལ་མཚན་ཡིན། །ཉེས་སྤྱོད་སྡོམ་པའི་ཚུལ་ཁྲིམས་ལྟེ་བ་ཟླུམ། །དགེ་བ་ཆོས་སྡུད་ཕྱིན་དྲུག་རྩིབས་སྟོང་བཀྲ། །བསྡུ་བའི་དངོས་པོ་བཞི་ཡི་མུ་ཁྱུད་ཅན། །དཔལ་མགོན་བླ་མ་བཀྲ་ཤིས་འཁོར་ལོ་ཡིན། །རང་དོན་ཡིད་བྱེད་གཡའ་ཡིས་མ་གོས་པར། །སྤངས་རྟོག་ཡོན་ཏན་མཁའ་ལ་མངོན་འཕགས་ཏེ། །འགྲོ་ཀུན་ཁ་ལོ་དགེ་བའི་ལམ་ལ་བསྒྱུར། །དཔལ་མགོན་བླ་མ་འཁོར་ལོ་རིན་ཆེན་ཡིན། །ཉམས་རྟོགས་ཡོན་ཏན་ལང་ཚོ་མཆོག་ཏུ་རྒྱས། །ངོ་ཚ་ཁྲེལ་ཡོད་ལྷ་རྫས་གོས་ཀྱིས་བཀླུབས། །མང་དུ་ཐོས་པ་ནོར་བུའི་རྒྱན་གྱིས་སྒེག །དཔལ་མགོན་བླ་མ་བཙུན་མོ་རིན་ཆེན་ཡིན། །ས་གསུམ་རྒུད་པའི་མུན་ཀུན་སེལ་མཛད་ཅིང་། །དགེ་ལེགས་འདོད་དགུའི་གྲུ་ཆར་ལེགས་དབབ་པས། །སྐལ་བཟང་འགྲོ་བའི་རེ་བ་ཡོངས་སྐོང་བ། །དཔལ་མགོན་བླ་མ་ནོར་བུ་རིན་ཆེན་ཡིན། །ཆོས་དང་ཆོས་མིན་འབྱེད་པའི་བློ་གྲོས་མངའ། །ཟབ་རྒྱས་གདམས་པའི་རིན་ཆེན་མཛོད་ཀྱིས་ཕྱུག །འགྲོ་ཀུན་འདུན་མ་དགེ་བའི་ཕྱོགས་སུ་བསྐུལ། །དཔལ་མགོན་བླ་མ་བློན་པོ་རིན་ཆེན་ཡིན། །ལུང་རིགས་མན་ངག་སྣ་ཤལ་མཆོག་ཏུ་རིང་། །རྒོལ་ངན་ཡུལ་ལ་འཇིགས་མེད་སྤོབས་པ་མཐོ། །འཆད་རྩོད་རྩོམ་པ་གསེར་གྱི་དྲྭ་བས་མཛེས། །དཔལ་མགོན་བླ་མ་གླང་པོ་རིན་ཆེན་ཡིན། །ཚད་མེད་བཞི་ཡི་སྤུ་ནི་ཡིད་དུ་འོང་། །གཞན་དོན་མི་སྐྱོ་བཟོད་པའི་ཁུར་ཁྱེར་ནས། །ས་བཅུ་ཅིག་ཅར་བགྲོད་པའི་གོམ་ཤུགས་ཅན། །དཔལ་མགོན་བླ་མ་རྟ་མཆོག་རིན་ཆེན་ཡིན། །སྙིང་སྟོབས་ཆེན་པོའི་གོ་ཆ་ཆེར་བགོས་ཏེ། །བདག་མེད་རྟོགས་པའི་ཤེས་རབ་མཚོན་རྣོན་གྱིས། །བདག་འཛིན་ཉོན་མོངས་དགྲ་བོ་གསོད་མཁས་པ། །དཔལ་མགོན་བླ་མ་དམག་དཔོན་རིན་ཆེན་ཡིན། །འཕགས་ནོར་རིན་ཆེན་བདུན་གྱིས་སྣ་དྲངས་ནས། །དོན་གཉིས་ལྷུན་གྲུབ་ལྷ་ཡི་ལམ་ལ་བསྐྱོད། །མཐའ་ཡས་འགྲོ་ཀུན་བརྩེ་བས་ལེགས་སྐྱོང་བའི། །དཔལ་མགོན་བླ་མ་འཁོར་ལོས་སྒྱུར་རྒྱལ་ཡིན། །དཔག་ཡས་ཐུགས་རྗེའི་ཆུ་འཛིན་ལྷུན་འཐུག་ཅིང་། །མཛད་པ་ཕྲིན་ལས་བདུད་རྩིའི་ཟེགས་མ་ཡིས། །འགྲོ་རྒྱུད་རྣམ་གྲོལ་མྱུ་གུ་བསྐྱེད་མཛད་པ། །དཔལ་མགོན་བླ་མ་ལྷ་ཡི་རྫིང་རིང་ཡིན། །ཕུལ་བྱུང་ཡོན་ཏན་ཀུན་གྱི་གཞི་འཛིན་ཅིང་། །མཐའ་ཀླས་སྐྱེས་དགུའི་ངལ་གསོའི་རྟེན་གནས་མཆོག །ལོག་སྒྲུབ་རྐྱེན་གྱིས་ནམ་ཡང་འཁྲུགས་མེད་པའི། །དཔལ་མགོན་བླ་མ་རྒྱ་མཚོའི་གོས་ཅན་ཡིན། །དེ་ལྟར་མཚུངས་མེད་བླ་མའི་ཡོན་ཏན་ལ། །དད་པའི་ངག་གིས་ཅུང་ཟད་བསྔགས་པའི་དགེས། །འགྲོ་ཀུན་ཐེག་མཆོག་བཤེས་ཀྱི་རྗེས་བཟུང་ནས། །བྱང་ཆུབ་ཞི་བའི་བདུད་རྩིས་འཚོ་གྱུར་ཅིག །ཅེས་པའང་པདྨ་བི་ཛས་དབེན་པའི་རི་བོར་བྲིས་པ་དགེ།
༄༅། །ཡོན་ཏན་རྒྱ་མཚོའི་མཇིང་ལས་མངོན་སྣང་ཞིང་། །འཕྲོག་མིན་གཟི་ལྡན་འགྲོ་བའི་རེ་སྐོང་བ། །ལྷར་བཅས་སྐྱེ་དགུའི་གཙུག་ན་མཆོད་འོས་པའི། །མཚུངས་མེད་བླ་མའི་ཞབས་ལ་མགོས་ཕྱག་འཚལ། །བསྟན་འགྲོའི་བསོད་ནམས་མཁའ་ལ་ལེགས་འཆར་བས། །ས་གསུམ་རྒུད་པའི་མུན་པ་ཀུན་བསལ་ནས། །དགེ་ལེགས་ཕན་བདེའི་པད་ཚལ་འབྱེད་མཛད་པ། །དཔལ་ལྡན་བླ་མ་ནམ་མཁའི་ནོར་བུ་ཡིན། །ཚོགས་གཉིས་གདེངས་ཅན་གནས་ལས་ཉེར་ཐོན་པའི། །ཉེས་པའི་དྲི་བྲལ་ཐུགས་རྗེའི་བསིལ་ཟེར་ཅན། །སྲིད་པའི་ཚད་གདུང་དྲག་པོ་གཞིལ་མཛད་པ། །དཔལ་ལྡན་བླ་མ་གདུང་སེལ་ཟླ་བ་ཡིན། །རྣམ་དག་ཚུལ་ཁྲིམས་དྲི་བྲལ་གསེར་སྦྱངས་ཁམས། །ཏིང་འཛིན་མི་གཡོ་ཞི་བའི་མུ་ཁྱུད་ཅན། །ཤེས་རབ་ཟབ་མོའི་རྩིབས་སྟོང་རྣམ་བཀྲ་བའི། །དཔལ་ལྡན་བླ་མ་འཁོར་ལོ་རིན་ཆེན་ཡིན། །དད་མོས་རྒྱལ་མཚན་རྩེ་མོར་ལེགས་མཆོད་ནས། །རྩེ་གཅིག་གསོལ་བ་འདེབས་པའི་སྐལ་བཟང་ལ། །མཆོག་ཐུན་འདོད་དགུའི་གྲུ་ཆར་འབེབས་མཛད་པ། །དཔལ་ལྡན་བླ་མ་ཡིད་བཞིན་ནོར་བུ་ཡིན། །འཕགས་ནོར་གསེར་རིའི་ཕྲེང་བས་ཡོངས་མཛེས་ཤིང་། །བསྡུ་བའི་དངོས་པོ་བཞི་ཡི་བང་རིམ་བརྗིད། །ཐབས་ཤེས་ཉི་ཟླ་གསར་པའི་གཟི་འོད་ཅན། །དཔལ་ལྡན་བླ་མ་ས་འཛིན་དབང་པོ་ཡིན། །མཁྱེན་རབ་གཏིང་ཟབ་བརྩེ་བའི་རླབས་ཕྲེང་གཡོ། །མན་ངག་རིན་ཆེན་མཛོད་ཀྱིས་ཡོངས་གཏམས་པས། །མཁས་དབང་ཀླུ་མཆོག་སྟོང་གིས་བསྟེན་འོས་པའི། །དཔལ་ལྡན་བླ་མ་གདེངས་ཅན་རོལ་གནས་ཡིན། །རྨད་བྱུང་དུས་གསུམ་གཟིགས་པའི་སྤྱན་སྟོང་བཀྲ། །ནུས་མཐུ་རྩེ་བརྒྱ་འབར་བའི་མཚོན་ཆ་ཡིས། །ལྷ་མིན་འབྱུང་པོའི་ཚོགས་རྣམས་འཐག་མཛད་པ། །དཔལ་ལྡན་བླ་མ་འཆི་མེད་དབང་པོ་ཡིན། །གྲུབ་གཉིས་རྟོགས་པའི་རྩལ་གསུམ་རབ་རྫོགས་པས། །མི་མཐུན་གཡུལ་ལ་འཇིགས་མེད་སྤོབས་པ་མཐོ། །ཐེག་མཆོག་ང་རོས་ས་གསུམ་ཁྱབ་མཛད་པ། །དཔལ་ལྡན་བླ་མ་གདོང་ལྔའི་དབང་པོ་ཡིན། །མང་ཐོས་གཙུག་ལག་རྒྱ་མཚོའི་ཐེག་པ་ཆེ། །བསམ་བྱུང་ཤེས་རབ་གསེར་གྱི་དྲྭ་བས་མཛེས། །སྒོམ་པའི་བློ་གྲོས་རིན་ཆེན་དང་ལྡན་པའི། །དཔལ་ལྡན་བླ་མ་གཉིས་འཐུང་དབང་པོ་ཡིན། །གཏིང་མཐའ་མི་དཔོག་སྲིད་པའི་ཆུ་གཏེར་ལས། །མཐའ་ཡས་འགྲོ་རྣམས་མངོན་པར་བསྒྲལ་ནས་ཀྱང་། །ཞི་བདེ་རིན་ཆེན་གླིང་དུ་འདྲེན་མཛད་པ། །དཔལ་ལྡན་བླ་མ་རིན་ཆེན་གྲུ་བོ་ཡིན། །སྡུག་བསྔལ་མང་ལྡན་སྲིད་པའི་འབྲོག་དགོན་དུ། །རྣམ་པར་འཁྱམས་པའི་ཉམ་ཐག་འགྲོ་བ་རྣམས། །རྣམ་མཁྱེན་ཐར་པའི་གྲོང་ལ་འགོད་མཛད་པའི། །དཔལ་ལྡན་བླ་མ་སྐྱེལ་མ་དཔའ་བོ་ཡིན། །མ་རིག་གཟུང་འཛིན་གདོན་གྱིས་ཆེར་རློམ་ཞིང་། །སྡུག་བསྔལ་ཀུན་འབྱུང་ནད་ཀྱིས་ཟིན་པའི་འགྲོ། །ཟབ་རྒྱས་གདམས་པའི་སྨན་གྱིས་གསོ་མཛད་པ། །དཔལ་ལྡན་བླ་མ་འཚོ་མཛད་དབང་པོ་ཡིན། །ཡོན་ཏན་རང་བཞིན་དཔག་ཡས་གངས་ཆེན་མཚོ། །རྨད་བྱུང་ཐུགས་རྗེའི་རླབས་ཕྲེང་འབུམ་གཡོ་བས། །འཁོར་བ་དོང་ནས་སྤྲུག་པའི་ཕྲིན་ལས་ཅན། །དཔལ་ལྡན་བླ་མ་རྫོགས་པའི་སངས་རྒྱས་ཡིན། །དཀྱིལ་འཁོར་ཀུན་གྱི་གཙོ་མཆོག་རྡོ་རྗེ་སེམས། །ཐུན་མོང་འགྲོ་ངོར་བཤེས་གཉེན་ཚུལ་བཟུང་ནས། །བདག་སོགས་འགྲོ་ཀུན་སྐྱོབ་མཛད་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །དྲི་མེད་ཚངས་སྤྱོད་གསེར་གྱི་མཎྜ་ལར། །རྨད་བྱུང་བྱང་ཆུབ་ལམ་གྱི་ཚོམ་བུ་བཀོད། །འོད་གསལ་རྡོ་རྗེ་སྙིང་པོའི་ཏོག་མཛེས་པ། །དཔལ་ལྡན་བླ་མ་དགྱེས་པའི་གསོས་སུ་འབུལ། །སངས་རྒྱས་ཀུན་དངོས་རྩ་བའི་བླ་མ་ལ། །ཐ་མལ་མི་རུ་བཟུང་བའི་བློ་ངན་གྱིས། །རྩ་བ་ཡན་ལག་ཆག་ཉམས་ཅི་བགྱིས་པ། །སྙིང་ནས་འགྱོད་པས་བཤགས་ཤིང་སྡོམ་པར་བགྱི། །སྲས་བཅས་རྒྱལ་བའི་ཕྲིན་ལས་ཁུར་བཞེས་ནས། །བསྟན་མཆོག་ཉི་གཞོན་ཕྱོགས་མཐར་ཁྱབ་མཛད་ཅིང་། །སྲིད་པའི་ཆུ་གཏེར་ཡོངས་སུ་སྐེམ་པ་ཡི། །ཕུལ་བྱུང་མཛད་པའི་ཚོགས་ལ་ཡི་རངས་འབུལ། །སྐལ་བཟང་འགྲོ་བའི་ཤེས་རྒྱུད་འགྲོལ་བ་དང་། །བསྟན་མཆོག་རིན་ཆེན་ཡུན་དུ་གནས་པའི་ཕྱིར། །ཟབ་རྒྱས་ཐེག་པའི་སྒོ་འཕར་བརྒྱ་ཕྱེས་ནས། །རྨད་བྱུང་ཆོས་འཁོར་རྟག་པར་བསྐོར་བར་བསྐུལ། །ངེས་དོན་ཆོས་སྐུ་ནམ་མཁའ་ལྟ་བུ་སྟེ། །སྐྱེ་འཇིག་མཚན་མའི་སྤྲོས་པ་ཀུན་བྲལ་ཡང་། །སྲིད་པའི་རྒྱ་མཚོ་མ་སྐེམ་དེ་སྲིད་དུ། །གཟུགས་སྐུའི་བཀོད་པ་གཡོ་མེད་བརྟན་པར་མཛོད། །འདིས་མཚོན་དུས་གསུམ་བསགས་པའི་དགེ་ཚོགས་རྣམས། །འཁོར་གསུམ་དམིགས་པའི་དུག་གིས་ཡོངས་བཏང་སྟེ། །དམིགས་མེད་ཆོས་དབྱིངས་ཆེན་པོར་བསྔོ་བགྱིད་ན། །འཕགས་ཆེན་རྣམས་ཀྱི་སྤྱོད་ཡུལ་དང་མཚུངས་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ནས། །ས་དང་ལམ་གྱི་ཡོན་ཏན་རབ་རྫོགས་ནས། །དཔལ་ལྡན་བླ་མའི་གོ་འཕང་མྱུར་ཐོབ་ཤོག །བག་ཡང་ལྷོད་པོ་པདྨ་བི་ཛས་བྲིས་པ་དགེ།