རྡོ་རྗེའི་ཆོས་སྐྱོང་རྣམས་ལ་བསྟོད་ཅིང་ཕྲིན་ལས་སུ་གསོལ་བ།

རྡོ་རྗེའི་ཆོས་སྐྱོང་རྣམས་ལ་བསྟོད་ཅིང་ཕྲིན་ལས་སུ་གསོལ་བ། ༀ་སྭསྟི་བི་ཛ་ཡན་ཏུ། གང་གི་ཐུགས་ནི་གཟོད་ནས་རྣམ་གྲོལ་ཞི་བ་ཆེན་པོར་རྟག་གནས་ཀྱང་། །སྙིང་རྗེ་ཆེན་པོས་གདུལ་དཀའི་འགྲོ་ལ་ཆེར་ཁྲོས་འབར་བ་ཆེན་པོའི་སྐུ། །མི་བསྲུན་བདུད་སྡེའི་སྙིང་ཁྲག་གིས་མྱོས་འཇིགས་རུང་གད་མོས་ས་གསུམ་གཡོ། །སྒྲུབ་མཆོག་རྣལ་འབྱོར་བུ་བཞིན་སྐྱོང་མཛད་དམ་ཅན་སྲུང་མའི་ཚོགས་ལ་འདུད། །འཇིག་རྟེན་སྐྱོང་བ་ཡོངས་ཀྱི་གཙུག་གི་ནོར་བུས་མངོན་པར་བཏུད་གྱུར་ཅིང་། །ལྷ་ཀླུ་གནོད་སྦྱིན་མིའམ་ཅི་དང་གྲུབ་པའི་ཚོགས་ཀྱིས་རྟག་ཏུ་བསྟོད། །ལྷ་མིན་གཡུལ་བཟློག་ལྷ་རྣམས་རྒྱལ་བའི་རུ་མཚོན་མི་ཉམས་སྲིད་རྩེའི་བླར། །ཆེས་ཆེར་བསྒྲེང་མཛད་མ་ཧཱ་ཀ་ལ་ལྕམ་དྲལ་བཀའ་སྡོད་བཅས་ལ་འདུད། །ཡེ་ཤེས་ཆེན་པོའི་སྤྱན་གྱིས་སྲིད་པ་གསུམ་པོ་མ་བསྒྲིབས་ས་ལེར་གཟིགས། །དམ་ཚིག་ཆེན་པོས་ངེས་གསང་བསྟན་དང་བསྟན་འཛིན་གང་དུ་འདུག་ཀྱང་སྐྱོངས། །ནུས་མཐུ་ཆེན་པོས་ཉམས་པ་བདུན་ལྡན་བདུན་བརྒྱུད་མིང་གི་ལྷག་མར་བྱེད། །སྙན་གྲགས་ཆེན་པོས་ཕྱོགས་ཀྱི་མཐར་ཁྱབ་རྒྱུད་གསུམ་དམ་ཅན་ཚོགས་ལ་འདུད། །ལ་ལ་ཡེ་ཤེས་ཚུལ་འཛིན་སྒྲུབ་ལ་གྲུབ་གཉིས་འདོད་དགུའི་ཆར་རྒྱུན་འབེབས། །ལ་ལ་འཇིག་རྟེན་ཚུལ་སྟོན་དྲག་གཏུམ་གསོད་པའི་ལས་ལ་ཤིན་ཏུ་རྔམས། །ཀུན་ཀྱང་ཕྱི་རུ་མཐུ་ཆེ་ནང་དུ་སྙིང་ཉེ་སྒྲུབ་ལ་བཀྲ་ཤིས་པའི། །རྟག་ཆགས་བརྟེན་སྒྲུབ་མཆོད་པའི་འོས་གྱུར་དམ་ལྡན་ཆོས་སྲུང་ཡོངས་ལ་འདུད། །མི་མཐུན་ཉེས་བརྒྱའི་གཅོང་ནད་ཞི་བྱེད་བདུད་རྩི་སྨན་གྱི་བུམ་པ་བཟང་། །ཕུན་ཚོགས་སྡེ་བཞིའི་དཔལ་འབྱོར་མཚོ་ཆེན་ཆེས་ཆེར་རྒྱས་བྱེད་རི་བོང་འཛིན། །བརྟན་གཡོའི་དངོས་ཀུན་སྡུད་ཅིང་འཆིང་བྱེད་དོན་ཡོད་ནོར་བུའི་ཞགས་པ་མཆོག །སྡང་བྱེད་རྩད་ནས་གཅོད་ལ་དྲང་སྲོང་དམོད་པའི་མཚོན་ཆར་གྱུར་ལ་འདུད། །རིག་འཛིན་བརྒྱུད་པའི་བཀའ་རྟགས་ནོར་བུའི་ཅོད་པཎ་གཙུག་ན་རབ་བརླིང་པའི། །ཐ་ཚིག་རྡོ་རྗེའི་གཡར་དམ་རྗེས་དགོངས་སྒྲུབ་མཆོག་བདག་ཅག་འཁོར་བཅས་ལ། །བྱང་ཆུབ་བར་དུ་མི་འབྲལ་རྗེས་དགོངས་ལས་བཞི་གྲུབ་པ་བརྒྱད་སོགས་ཀྱིས། །ཕྱོགས་ལས་རྣམ་པར་རྒྱལ་བའི་དཔལ་དང་ཡིད་ལ་འདོད་པའི་མཆོག་སྩོལ་ཅིག །མ་ལུས་སྐྱེ་དགུའི་ཕན་བདེའི་ཨུཏྤལ་ཅི་དགར་བཞད་མཛད་ཉིན་མོར་བྱེད། །ངེས་གསང་སྙིང་པོའི་བསྟན་མཆོག་ཕས་རྒོལ་སྒྲ་གཅན་ལག་པས་འགེབ་མིན་པར། །འགྲོ་བསོད་དགེ་བའི་མཁའ་ལ་རྟག་བརྟན་བཤད་སྒྲུབ་ཕྲིན་ལས་སྣང་བ་ཡིས། །ཕྱོགས་དུས་ཀུན་ཁྱབ་དོན་གཉིས་ལྷུན་གྲུབ་བཀྲ་ཤིས་དཔལ་གྱིས་མཛེས་གྱུར་ཅིག །ཅེས་རྡོ་རྗེའི་ཆོས་སྐྱོང་རྣམས་ལ་བསྟོད་ཅིང་ཕྲིན་ལས་སུ་གསོལ་བ་རྒྱལ་སྲིད་རིན་པོ་ཆེ་རྣམ་པ་བདུན་གྱི་གྲངས་ལྡན་འདི་ནི། དུས་ཞབས་ཀྱི་སྔགས་བན་རྒན་པོ་རྡོ་རྗེ་དབང་མཆོག་དགྱེས་པ་རྩལ་གྱིས་ལོ་གསུམ་སྒྲུབ་པའི་དམ་བཅའ་ལེགས་པར་ཟིན་པའི་གཏོང་རག་དང་། སླད་ནས་ཀྱང་འདོད་པའི་དོན་ལ་གསོལ་བ་བཏབ་པའི་ཆེད་དུ་གང་ཤར་སྨྲས་པ་དགེ་ལེགས་སུ་གྱུར་ཅིག