ཉུང་གསལ་གཏམ་འདི་ཐུགས་དབུས་སུ་བཅང་འོས།༄༅། །ཉུང་གསལ་གཏམ་འདི་ཐུགས་དབུས་སུ་བཅང་འོས། ན་མོ་གུ་རུ་རཏྣ་ཏྲ་ཡ་ཡ། བྲལ་ཐོབ་སྨིན་པའི་ཡོན་ཏན་རྒྱལ་རྣམས་དང་མཉམ་ཡང་། །བཀའ་དྲིན་སངས་རྒྱས་ལས་ལྷག་འཇམ་མགོན་གྱི་ཞལ་སྐྱིན། །འབྲལ་མེད་སྙིང་དབུས་དད་པའི་པདྨོ་རུ་བཀོད་ནས། །ཕན་སེམས་གཏིང་ནས་དཀར་བའི་མཆིད་གྲོས་འདི་འབུལ་ལོ། །སྙན་ཚིག་བྱིས་པ་འདྲིད་པའི་དབང་གཞུ་ཡི་རི་མོ། །ཟོལ་བསྟོད་ཚོན་མདོག་ལེགས་པའི་གྱ་གྱུར་ཡི་བཀོད་པ། །དགྱེས་པའི་སྤྱན་རས་བཙའ་བའི་འབབས་སྟེགས་སུ་ཆེ་མོད། །ཁེ་ཉེན་འདམ་ཀ་ཤེས་ན་ཆུ་ཤིང་གི་སྙིང་པོ། །སོས་དལ་ཉེ་རིང་འཕུལ་བའི་སོར་མོ་ཡི་ཟློས་གར། །འབྲེལ་མེད་བྲག་ཅའི་རོལ་མོ་བརྒྱ་ཕྲག་དུ་བསྒྲགས་ཀྱང་། །ཉམས་ཕན་སྨིག་རྒྱུའི་བཏུང་བའི་སྤུན་ཟླ་དེས་ཅི་བྱེད། །དེ་བས་ཉུང་གསལ་གཏམ་འདི་ཐུགས་དབུས་སུ་བཅང་འོས། །བླ་མ་མཆེད་གྲོགས་འདུས་པའི་ཆོས་གྲྭ་ལས་ལྷག་པའི། །ཟ་འདུས་གསར་འགྲོགས་ཆེ་བའི་བཙུན་གྲོགས་ཀྱི་ཞལ་རས། །ཡུད་ཙམ་བལྟ་ལ་གེགས་བྱེད་མིག་ལྕིབ་ལ་རྒོལ་ཡང་། །ནམ་ཕུག་མི་འབྲལ་འགྲོགས་པའི་ཁྱད་ཆོས་ཤིག་ཡོད་དམ། །གཏན་དུ་མི་བསླུ་དམ་ཆོས་བདུད་རྩི་ཡི་སྨན་གྱིས། །མཚོན་མིན་ངོ་བསྟོད་ཆེ་བའི་གསང་ཚིག་གི་མཆིད་གྲོས། །འགྱུར་མེད་རྡོ་ཡི་རི་མོར་ཧ་ཅང་ནི་བརླིང་དྲགས། །རི་སྐྱེས་གླིང་བུས་དྲང་པའི་དཔེར་སོན་ཞིག་འོང་ཐང་། །བསླབ་གསུམ་ཡོན་ཏན་བཟང་པོའི་མཛོད་ཁང་ཞིག་མེད་ཕྱིན། །མིང་སྙན་ཆེན་པོར་བཏགས་པའི་ཨོ་ཟོབ་ཀྱི་ཡོས་སྙི། །ཆོས་བརྒྱད་མགོ་འཕང་མཐོ་བའི་རྩེ་གར་ལ་ཡེང་ཡེང་། །ནམ་ཕུག་སྟོན་རྒྱགས་དབུལ་བའི་ངང་ཚུལ་དེ་ཨེ་གཟིགས། །མང་མང་འཁོར་གྱིས་འགུར་བའི་གཟི་བྱིན་གྱིས་མྱོས་ནས། །ཡིན་ཡིན་སྣང་བ་མཐོན་པོའི་གོམ་འགྲོས་ནི་འཁྱོལ་ལེ། །རྒས་རྒས་འདོད་ལྔའི་ཁོལ་པོར་བར་མེད་དུ་བརྒྱུགས་ན། །ཡང་ཡང་ཕྱིས་ནས་འགྱོད་པའི་དུས་སྐབས་ཞིག་འོང་མཆི། །ད་ལྟ་རྣམ་རིག་བཀྲ་ཚེ་ཐོས་བསམ་གྱི་བདུད་རྩི། །དོན་གཉེར་སྙིམ་པས་འཐུང་བའི་ཡི་ག་ཞིག་མེད་ཕྱིན། །རྒས་ནས་དབང་ཤེས་རྒུད་པའི་མགྲིན་པ་ནས་མི་འཆུན། །ལུང་རྟོགས་ལུས་སྟོབས་རྒྱས་དུས་ནམ་ཞིག་ན་འབྱུང་ཨང་། །མཐོང་ཚད་གྲོགས་སུ་བསྡེབས་ན་ངོ་སྲུང་དེ་སུས་ནུས། །ཟེར་ཚད་ཁ་ལ་ཉན་ན་གྲོས་ཐག་དེ་སུས་ཆོད། །དྲན་ཚད་ལག་ཏུ་བཏབ་ན་འགྲུབ་དུས་དེ་ནམ་ཡོད། །དེ་བས་རང་སེམས་མཛུབ་མོ་ནང་དུ་རང་བཀུག་འཚལ། །དོན་བརྒྱུད་གཡུ་རལ་ངོམ་པའི་ཆེ་ཚུགས་ཀྱིས་བརླིང་བཞིན། །སྒྲུབ་བརྒྱུད་གངས་རིའི་སྤོ་ན་འཇིགས་མེད་དུ་རྒྱུ་བའི། །མཁས་གྲུབ་སེང་ཆེན་ཁྱུ་ཡི་རིགས་བརྒྱུད་ཞིག་ལགས་ན། །གོང་མའི་རྣམ་ཐར་ཚུལ་ལ་གྱེན་མིག་རེ་གཏོད་རན། །གཏེར་གཟུགས་བགྲང་བྱར་སོན་པའི་སྔོན་རབས་ཀྱི་ཡང་མེས། །མཁྱེན་རྟོགས་རྩལ་གསུམ་རྫོགས་པའི་ངང་ཚུལ་གྱི་གད་མོས། །དྲེགས་ལྡན་ཝ་སྐྱེས་སྟོང་གི་སྙེམས་པ་དེ་ཕྲོགས་ནས། །བསྡུ་བཞིའི་ཕྲིན་ལས་ཟབ་མོས་བསིལ་ལྗོངས་ཀུན་ཁྱབ་སོང་། །མེས་པོ་དྲང་སྲོང་གཞོན་ནུའི་རྣམ་དཔྱོད་ཀྱི་ལྟོ་བར། །ཕྱོགས་གྲངས་ཤེས་བྱའི་ཆུ་བོ་ལྷག་མེད་དུ་བསྐྱིལ་ཟིན། ལེགས་བཤད་ཟེགས་མ་སྐྱུག་པས་ཐུབ་བསྟན་གྱི་མཚོ་ཆེན། །ཆེས་ཆེར་སྤེལ་བའི་མཁྱེན་དཔྱོད་འཛུམ་དཀར་ལ་རོལ་འདུག །བུ་ཀྱེ་ན་ཚོད་མཉམ་པའི་ལང་ཚོ་ཡིས་འབྱོར་ཡང་། །ཡོན་ཏན་བང་ཤེད་མཉམ་པའི་སྐལ་བ་འདྲ་བདོག་གམ། །དེ་བས་ཚུལ་གནས་ཐོས་བསམ་སྒོམ་པ་ཡི་བཅུད་ལེན། །རིང་འཚོའི་གསོས་སུ་སྨིན་པའི་དགའ་སྟོན་ལ་རོལ་མཛོད། །ཀྱེ་མ་སྙིགས་སྤྱོད་འགྱུར་བ་ལོ་རེ་དང་ཟླ་རེ། །གཞན་དབང་གྲོགས་ཀྱི་ངོ་འཛུམ་སྔ་དྲོ་དང་ཕྱི་དྲོ། །ཚེ་སྲོག་གློག་གི་གར་མཁན་སྐད་ཅིག་དང་ཡུད་ཙམ། །ཕྱི་ཚེའི་དྲན་རྒྱ་མང་པོ་བསྐྱེད་ཁོམ་ཞིག་འདུག་གམ། །འདོད་ཡོན་ཚྭ་ཆུ་བཏུང་བཏུང་སྔ་མ་ནི་དེ་ཙམ། །བསྟན་འགྲོར་ཕན་པའི་སྲོག་གི་ཟུངས་བཅུད་དུ་ལྟ་ཅི། །འཕྲལ་སྣང་ལྟོ་གོས་ཙམ་གྱིས་བྲེལ་ལུགས་འདི་ཨེ་གཟིགས། །ད་ནི་འདོད་ཆུང་ཆོག་ཤེས་འཕགས་ནོར་ལ་དྲིལ་རན། །གནས་བཟང་མི་མེད་ལུང་སྟོང་གོང་མ་ཡི་གདན་ས། །རྩོད་དང་འདུ་འཛི་ཉུང་བ་བསམ་གཏན་གྱི་ཁ་ཟས། །མི་རྟག་དུས་བཞིའི་འགྱུར་བ་ངེས་འབྱུང་གི་སྐྱོ་གྲོགས། །ཚེ་གང་སྒྲུབ་ལ་གཞོལ་བ་གྲུབ་ཐོབ་ཀྱི་ཆེ་ཚུགས། །ནང་དུ་བདག་འཛིན་འགོང་པོའི་སྒོ་ལྕགས་དེ་ཆོམས་དང་། །ཕྱི་རུ་གཞན་ཕན་ཕྲིན་ལས་སྒོ་བརྒྱ་རང་འབྱེད་འོང་། །དོན་གཉིས་ལྷུན་གྱིས་གྲུབ་པའི་རྒྱལ་ཐབས་ལ་རོལ་ན། །མིང་དོན་ཀུན་ནས་མཚུངས་པའི་བསྟན་འཛིན་ནི་དེའོ། །ཕྱི་ཚུལ་སོ་ཐར་ཁྲིམས་ཀྱི་འདབ་ཕྲེང་ནི་བཀོད་ལེགས། །ནང་དུ་བྱང་ཆུབ་སེམས་ཀྱི་གེ་སར་ནི་ཆེས་མཐོ། །གསང་བ་རིམ་གཉིས་འབྲས་བུའི་ཟིལ་དངར་གྱིས་གཏམས་པས། །སྐལ་བཟང་བུང་བ་འགུགས་པའི་རྩེ་བྲོ་ལ་ཕེབས་ཤོག །མང་ཐོས་འཛིན་མའི་གཞི་ལ་བསམ་བྱུང་གི་ལྷུན་པོ། །ཡང་དག་རྟོན་པ་བཞི་ཡི་བང་རིམ་གྱིས་བརྗིད་ཅིང་། །སྒོམ་བྱུང་ཉི་ཟླའི་བགྲོད་པས་མཁོར་ཡུག་ཀུན་གསལ་ནུས། །ཐུབ་བསྟན་གླིང་བཞིའི་རྒྱན་དུ་ལ་འུར་དུ་ཕེབས་ཤོག །ལེགས་བཤད་འཆད་པའི་སྤྲིན་སྒྲ་ཕྱོགས་ཀུན་ན་སྙན་ཞིང་། །རྩོད་ངག་རིགས་ལམ་རྣོན་པོའི་གློག་ཕྲེང་དང་རྟག་འགྲོགས། །འཆོས་སྐྱོབ་ཡོན་ཏན་ཞི་བསིལ་ཆར་བཟང་རྒྱུན་ཕབ་པས། །ངེས་གྲོལ་ཆུ་གཏེར་འཕེལ་བའི་དུས་སྟོན་ལ་ཕེབས་ཤོག །མཁས་པའི་རྣམ་དཔྱོད་རྒྱ་ཆེ་ནོར་འཛིན་གྱི་ཕང་པར། །བཙུན་པའི་ཡོན་ཏན་རྣམ་དག་གསེར་རི་ཡི་ཕྲེང་མཛེས། །བཟང་པོའི་ཕྲིན་ལས་ལྕགས་རི་མུ་ཁྱུད་ཀྱིས་བརླིང་པས། །རིས་བྲལ་བསྟན་འགྲོའི་ངལ་འཚོའི་གསོས་མཆོག་ཏུ་ཕེབས་ཤོག །ལྟ་བ་ཡེ་གྲོལ་ཀ་དག་ཀུན་བཟང་གི་མཁའ་ཀློང་། །སྒོམ་པ་འོད་གསལ་ལྷུན་གྲུབ་གཟའ་སྐར་གྱི་ཚོམ་བུ། །སྤྱོད་པ་ཤར་གྲོལ་འཛིན་མེད་སྐྱི་སེར་གྱི་ངང་ཚུལ། །ཁྱད་ཆོས་དྲུག་ལྡན་འབྲས་བུའི་རྒྱལ་ས་ལ་ཕེབས་ཤོག །གདན་གསུམ་དཀྱིལ་འཁོར་ཡོངས་རྫོགས་ལྷ་སྐུ་ཡི་རང་བཞིན། །རླུང་སྔགས་གྲགས་སྟོང་སྐྱེ་མེད་སྙིང་པོ་ཡི་ཡང་བཅུད། །རིག་སྟོང་ཟང་མ་ཐལ་བྱུང་རྒྱལ་ཀུན་གྱི་གསང་མཛོད། །རྡོ་རྗེ་གསུམ་གྱི་རྣལ་འབྱོར་འབྲལ་མེད་ལ་ཕེབས་ཤོག །བདེན་གཉིས་གནས་ལུགས་ཤེས་པའི་མིག་ཟུང་དེ་བགྲད་བཞིན། །ཚོགས་གཉིས་ཟུང་དུ་འབྲེལ་བའི་གཤོག་རླབས་ནི་གཅིག་གིས། །སྐུ་གཉིས་ཚང་མལ་མཆོག་ལ་མིག་འཕྲུལ་བཞིན་བསྐྱོད་པའི། །རྒྱལ་སྲས་མཁའ་ལྡིང་དབང་པོའི་བརྟུལ་ཞུགས་ལ་ཕེབས་ཤོག །སྦྱོར་བ་སེམས་བསྐྱེད་བཟང་པོའི་ཁ་ལོ་ཡིས་དྲངས་ནས། །དངོས་གཞི་འཁོར་གསུམ་རྟོག་བྲལ་ཤིང་རྟ་ཡི་སྒྱུ་ཐབས། །བྱང་ཆུབ་ཡོངས་བསྔོས་གཏན་བདེའི་གྲོང་ཁྱེར་ལ་སྦྱོར་བའི། །སྲས་བཅས་རྒྱལ་བ་གཤེགས་པའི་བཤུལ་ལམ་ལ་ཕེབས་ཤོག །དེ་སྐད་གུ་ཡངས་ཡན་པའི་མཉམ་བཞག་གི་མཁའ་ལ། །རྗེས་ཐོབ་ཚིག་དོན་རྣམ་བཀྲའི་ལུས་དཀར་ཞིག་རྒྱུ་འདི། །ཁྱེད་བློ་ཟབ་ཡངས་འོ་མཚོར་བརྟན་ཆགས་སུ་གནས་ནས། །དོན་འགྱུར་མགྲིན་པའི་རྫ་རྔ་དར་དིར་དུ་སྒྲོགས་ཤོག །ཨ་ཧོ་དྲན་པས་བདེ་སྟེར་ཡེ་ཤེས་ཀྱི་སྐུ་ཅན། །སྙིང་དབུས་འབྲལ་བ་མེད་བཞུགས་དྲིན་ཆེན་གྱི་ཆོས་རྗེའི། །ཐུགས་རྗེའི་ཉི་འོད་ཁྱེད་བློའི་པད་མཚོ་རུ་སོན་ནས། །སྨིན་གྲོལ་འདབ་སྟོང་བཞད་པའི་བདེན་སྨོན་ཞིག་ཞུའོ། །ཞེས་པའང་རྫོགས་པའི་སངས་རྒྱས་བློ་གྲོས་མཐའ་ཡས་སོགས་དམ་པ་དུ་མའི་ཞབས་ཀྱི་པདྨོ་ལ་སྤྱི་བོས་རེག་པའི་འདུ་གསུམ་སྤྱོད་པ་འགྱུར་མེད་པདྨ་བསྟན་འཛིན་གྱིས་ལྷག་པའི་བསམ་པ་ཟླ་བ་ལྟར་དཀར་བས་ཀུན་ནས་བསླངས་ཏེ། རང་གི་ཚ་བོ་སྒྲུབ་སྤྲུལ་དམ་པ་པདྨ་མཁས་གྲུས་རྒྱ་མཚོ་ལ་ཐོག་མར་གདམས་པ་སྙིང་གཏམ་སྙིང་གི་ཟུངས་དུ་གྱུར་ནས་གོང་མའི་རྣམ་ཐར་གྱི་རྗེས་སུ་སྙེག་ནུས་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། |