ཀུན་མཁྱེན་བླ་མའི་མཚན་གྱི་དོན།
༄༅། །ཀུན་མཁྱེན་བླ་མའི་མཚན་གྱི་དོན། བླ་མ་ལ་ཕྱག་འཚལ་ལོ། །གདོད་མའི་ཤེས་པ་འཁོར་འདས་ཀུན་གྱི་གཞི། །མཐའ་དབུས་ཕྱོགས་འཛིན་བློ་བྲལ་གཉུག་མའི་བབས། །རང་གསལ་མི་གཡོ་ཡེ་ཤེས་ཆེན་པོའི་ངང་། །ཀློང་ཆེན་རབ་འབྱམས་ལྟ་བའི་རྒྱལ་པོ་ཡིན། །ཚིག་གིས་མི་མཚོན་རང་རིག་བྱང་ཆུབ་སེམས། །ངང་དྭངས་མི་གཡོ་འོད་གསལ་ཆེན་པོའི་གདངས། །བྱིང་རྒོད་རྟོག་བྲལ་རྒྱ་ཡན་ཅོག་བཞག་ངང་། །ཀློང་གསལ་དྲི་མེད་སྒོམ་པའི་རྒྱལ་པོ་ཡིན། །སྣང་སེམས་ཆོས་ཉིད་རོལ་པ་ཅི་ཤར་ཡང་། །དགག་སྒྲུབ་ཞེན་པས་མ་བཅིངས་ཅེར་བཞག་ཀློང་། །གང་ཤར་རང་གྲོལ་ཆུ་རླབས་ཕན་གནོད་བྲལ། །སྣ་ཚོགས་རང་གྲོལ་སྤྱོད་པའི་རྒྱལ་པོ་ཡིན། །སེམས་ཀྱི་གོས་བྲལ་རིག་སྟོང་རྫོགས་པ་ཆེ། །རེ་དོགས་ཞེན་འཛིན་བློ་ཡིས་མ་བསླད་པའི། །ཀློང་ཡངས་ཕྱམ་བདལ་ཀ་དག་གཉུག་མའི་གཤིས། །དྲི་མེད་འོད་ཟེར་འབྲས་བུའི་རྒྱལ་པོ་ཡིན། །དེ་ལྟར་ཀུན་མཁྱེན་བླ་མའི་མཚན་གྱི་དོན། །ལྟ་སྒོམ་སྤྱོད་འབྲས་སྙིང་པོ་གསལ་བའི་ཚུལ། །འདུ་གསུམ་སྤྱོད་པ་པདྨ་བི་ཛ་ཡས། །བདེ་ཆེན་འོད་གསལ་ཕུག་ཏུ་བྲིས་པ་དགེ། །