ཕྱོགས་རེར་ཞེན་ནས་རང་སྟོང་གཞན་སྟོང་གི།

༄༅། །ཕྱོགས་རེར་ཞེན་ནས་རང་སྟོང་གཞན་སྟོང་གི། བླ་མ་ལ་ཕྱག་འཚལ་ལོ། །རྒྱལ་བས་འཁོར་ལོ་བར་པའི་དངོས་བསྟན་དུ། །གཟུགས་ནས་རྣམ་མཁྱེན་བར་གྱི་ཆོས་མཐའ་དག །སྟོང་ཞིང་བདག་མེད་སྤྲོས་མཐའ་བྲལ་བའི་དབྱིངས། །གནས་ལུགས་རྣམ་ཐར་གསུམ་ལྡན་ངོ་བོར་བསྟན། །འདི་ནི་ངེད་ཅག་རྫོགས་པ་ཆེན་པོ་ཡི། །ངོ་བོ་ཀ་དག་ཡེ་ཤེས་དབྱིངས་སུ་རྫོགས། །ཡེ་གྲོལ་སོར་བཞག་དགོངས་པའི་ཉམས་ལེན་གྱིས། །བློས་བྱས་ཡིད་དཔྱོད་ཙམ་ལ་མི་རེ་བའི། །མངོན་སུམ་ལམ་བྱེད་ཐེག་པ་ཀུན་གྱི་རྩེ། །འཁོར་ལོ་ཐ་མར་བདེ་གཤེགས་སྙིང་པོའི་ཁམས། །རྣམ་བྱང་ཆོས་ཀུན་ཡེ་ནས་ཉི་མཁའ་བཞིན། །འགྲོ་ལ་གནས་ཀྱང་ཁམས་ཀྱི་སྒྲིབ་པ་ཡིས། །ཡོན་ཏན་མི་མངོན་འཁྲུལ་བའི་སྦུབས་སུ་ཆུད། །དེ་ལྟར་ན་ཡང་རང་གི་ངོ་བོ་ལ། །འཕེལ་འགྲིབ་མི་མངའ་བུམ་ནང་མར་མེའི་ཚུལ། །ལེགས་པར་བཀའ་སྩལ་བྱམས་འཇམ་ཀླུ་དབང་སོགས། །ཤིང་རྟ་ཆེ་རྣམས་ལེགས་པར་བཀྲལ་པའི་བཅུད། །རང་བཞིན་ལྷུན་གྲུབ་ཡེ་ཤེས་དབྱིངས་སུ་རྫོགས། །གྲངས་མེད་དུ་མར་ཚོགས་གཉིས་གོམས་པའི་མཐུས། །ཁམས་ཀྱི་སྒྲིབ་པ་བྲལ་ལས་རིགས་ཁམས་ཀྱི། །ཡོན་ཏན་ཕྱི་དུས་མངོན་རེར་ལྟོས་མིན་པར། །གནད་གསུམ་ཆོས་ཉིད་འཁོར་ལོའི་མན་ངག་གིས། །ད་ལྟ་ཉིད་ནས་སྣང་བཞིའི་ཡེ་ཤེས་མཆོག །མངོན་བྱེད་རྡོ་རྗེ་རྩེ་མོའི་ཉེ་ལམ་རྨད། །ཁ་ཅིག་འཁོར་ལོ་བར་ཐའི་དགོངས་པ་དང་། །གསང་ཆེན་རྒྱུད་སྡེའི་དགོངས་པ་འགྲེལ་ཚུལ་ལ། །ཕྱོགས་རེར་ཞེན་ནས་རང་སྟོང་གཞན་སྟོང་གི། །གྲུབ་མཐའི་རྩོད་པས་མགོ་ཡུ་འཁོར་ནའང་། །བློ་བྲལ་ཆོས་ཉིད་གཉུག་མའི་རྒྱལ་ཁམས་ན། །ཐ་སྙད་གྲུབ་མཐའི་རི་མོ་དབྱིངས་སུ་ཡལ། །ཡེ་ཤེས་ཡངས་པའི་སྤྱོད་ཡུལ་བསམ་མི་ཁྱབ། །འདི་ནི་འབྲས་བུའི་ཐེག་གཅིག་ཐེག་ཀུན་རྩེ། །དུས་གསུམ་རྒྱལ་བ་ཀུན་གྱི་གཤེགས་ཤུལ་ཡིན། །དེ་ཕྱིར་ཕྱོགས་ལྷུང་དྲི་མས་མ་སྦགས་པར། །ཐེག་མཆོག་རྒྱལ་པོའི་ལམ་འདིར་ཞུགས་ཤིག་དང་། །རང་གནད་མངོན་སུམ་སྟོན་པའི་ཁྱད་ཆོས་ཀྱིས། །ཚེ་གཅིག་གདོད་མའི་རྒྱལ་སར་སྙེགས་པར་ངེས། །
༈ ཟབ་ཞི་སྦྲོས་པ་བྲལ་བའི་དབྱིངས། །འོད་གསལ་འདུས་མ་བྱས་པ་ཡི། །དོན་དམ་རྫོགས་པ་ཆེན་པོ་ལ། །བཏུད་ནས་བྱུང་རྒྱལ་གཏམ་འདི་སྒྲོགས། །རྒྱལ་བས་འཁོར་ལོ་བར་པ་རུ། །གཟུགས་ནས་རྣམ་མཁྱེན་བར་གྱི་ཆོས། །སྟོང་ཞིང་བདག་མེད་སྤྲོས་བྲལ་བ། །རྣམ་ཐར་སྒོ་གསུམ་ཚུལ་གྱིས་བསྟན། །ཐ་མར་བདེ་གཤེགས་སྙིང་པོའི་ཁམས། །སྟོབས་སོགས་རྣམ་བྱང་ཆོས་རྣམས་ཀུན། །འགྲོ་ལ་ཡེ་ནས་གནས་པའི་ཚུལ། །ཕྱིར་མི་ལྡོག་པའི་འཁོར་ལོར་བསྐོར། །སྔ་མས་ངོ་བོ་ཀ་དག་གི། །སྤྲོས་བྲལ་ཡེ་ཤེས་གཏན་ལ་ཕབ། །ཕྱི་མས་རང་བཞིན་ལྷུན་གྲུབ་ཀྱི། །ཡེ་ཤེས་ཆེན་པོ་གསལ་བར་བྱས། །དེ་གཉིས་དབྱེར་མེད་ངོ་བོ་གཅིག །རྫོགས་པ་ཆེན་པོའི་གྲུབ་མཐའ་སྟེ། །མཐའ་བརྒྱད་སྤྲོས་པའི་དྲྭ་བ་འབུམ། །ཐལ་འགྱུར་རིགས་པའི་མཚོན་རྣོན་གྱིས། །བཀྲལ་ལས་ཁས་ལེན་མ་གྲུབ་པའི། །སྟོང་འཛིན་ཙམ་ལས་རིང་འདས་ཏེ། །སེམས་དང་སེམས་བྱུང་རྙོག་མ་ཡིས། །མ་བསླད་ཡེ་གྲོལ་ཀ་དག་གཤིས། །ཡེ་ནས་མ་བཅིངས་མ་བཀྲོལ་བའི། །རིག་པ་ཆོས་ཟད་ཟད་ཀ་མ། །ཅོག་བཞག་བཞི་ཡི་མན་ངག་གིས། །མངོན་སུམ་ལམ་བྱེད་ཁྱད་པར་འཕགས། །ཀུན་བརྟགས་གཞན་དབང་འཁྲུལ་པ་ཡི། །དྲི་མ་རིམ་བཞིན་སྦྱོང་སྟོབས་ཀྱིས། །ཁམས་ཀྱི་ཡོན་ཏན་ཇི་ཞིག་ན། །མངོན་ལ་ཕྱི་དུས་རེ་མིན་པར། །སྒོ་ཡུལ་རླུང་གི་གནད་བཅུན་པས། །ཡིན་ལུགས་སྒྲོན་བཞིའི་གསེང་ལམ་ནས། །སྣང་བཞིའི་ཡེ་ཤེས་ད་ལྟ་རུ། །མངོན་བྱེད་མན་ངག་ཁྱད་པར་འཕགས། །དེ་སླད་རྫོགས་པ་ཆེན་པོ་ནི། །ཐེག་མཆོག་ལམ་སྲོལ་ཟླ་མེད་ཕུལ། །སྐལ་བ་མཆོག་གི་སྤྱོད་ཡུལ་ཏེ། །ལམ་འདིར་ཞུགས་རྣམས་སྐལ་བ་བཟང་། །དེ་ཕྱིར་བློས་བྱས་གྲུབ་མཐའ་ཡི། །ཡིད་དཔྱོད་ལམ་ལ་མ་སྨོན་པར། །བློ་བྲལ་གཉུག་མའི་གསེང་ལམ་ནས། །ཡེ་ཤེས་རྒྱལ་ཁམས་སྙེགས་པར་མཛོད། །
༈ ཡོད་པར་འཛིན་དང་མེད་པར་འཛིན། །རྟག་པར་འཛིན་དང་ཆད་པར་འཛིན། །དེ་ཀུན་བློ་ཡི་དཔྱོད་ཡུལ་ཏེ། །དོན་དམ་བློ་ཡི་ཡུལ་མི་གནས། །བློ་བྲལ་ངང་དུ་ཅི་བདེར་ཉོལ། །དབུ་མ་ཕྱག་རྒྱ་རྫོགས་པ་ཆེ། །ལམ་འབྲས་ཞི་བྱེད་གཅོད་ཡུལ་སོགས། །གྲུབ་མཐའི་ཆོས་སྐད་ཆེས་མང་ཡང་། །རང་སེམས་གཏན་ལ་འབེབས་པར་གཅིག །སེམས་ཀྱི་སེམས་ཉིད་བརྗོད་དུ་མེད། །ལྐུགས་པས་བུ་རམ་མྱོང་བ་བཞིན། །བརྗོད་མེད་ངང་དུ་མཉམ་པར་ཞོག །ཞོག་ཅེས་བྱ་བ་ཚིག་ཡིན་ཏེ། །ཚིག་གི་སྤྲོས་པ་བོར་ལ་ཐོངས། །ད་ལྟའི་ཐ་མལ་ཤེས་པ་འདི། །བློ་འདས་ཆོས་སྐུར་ལྷུན་གྱིས་གྲུབ། །བརྟག་དཔྱད་བྱེད་པ་གོ་ཡུལ་ཡིན། །གོ་ཡུལ་ཚིག་གི་ཕན་པ་མེད། ཆོས་ཉིད་ངང་དུ་ཅི་བདེར་ཉོལ། །དེ་སྐད་རྣལ་འབྱོར་སྨྱོན་པའི་ཚིག །མ་བཅོས་ཐོལ་བྱུང་གླུ་རུ་གདམས། །དགེ་བས་འགྲོ་ཀུན་ཡོངས་གྲོལ་ཤོག །
༈ གདོད་ནས་རྣམ་དག་ཡེ་གྲོལ་གཉུག་མའི་གཤིས། །ལྟ་སྒོམ་སྤྱོད་པའི་ཞེན་པས་མ་བསླད་པའི། །རབ་དྭངས་མི་གཡོ་འོད་གསལ་ཆེན་པོའི་གདངས། །རང་བབས་སྐྱོང་བའི་ཉམས་ལེན་ཡེངས་མེད་འབུངས། །རྒྱལ་དགོངས་མཐར་ཐུག་ངེས་དོན་སྙིང་པོའི་བཅུད། །མཁས་གྲུབ་བྱེ་བའི་གཤེགས་ཤུལ་ཟླ་མེད་པ། །སྒྲུབ་བརྒྱུད་ཆེ་བརྒྱད་རིང་ལུགས་ཉིན་མོར་བྱེད། །སྲིད་མཐའི་བར་དུ་མི་ཉམས་དར་གྱུར་ཅིག །