ལྟ་སྒོམ་སྤྱོད་པའི་གླུ།
༄༅། །ལྟ་སྒོམ་སྤྱོད་པའི་གླུ། ཕ་དྲིན་ཆེན་ཆོས་རྗེའི་ཞབས་ལ་འདུད། །བུའི་བློ་སྣ་དམ་པའི་ཆོས་ལ་བསྒྱུར། །ཀྱེ་གསོན་དང་འདིར་ཚོགས་སྒོམ་ཕྲུག་ཚོ། །ད་ལྟ་ཡི་རིག་པ་སོ་མ་འདི། །ཀ་དག་ཆོས་ཟད་རྗེན་པ་རུ། །ངེས་ཤེས་བསྐྱེད་དེ་བལྟ་བ་ལ། །ཡིད་དཔྱོད་ཀྱི་འཛིན་པས་མ་བསླད་འཚལ། །འདི་སྒོམ་གྱི་དམིགས་གཏད་བྲལ་བའི་ངང་། །ཡེངས་པ་རུ་ཕྱལ་བར་མ་སོང་བར། །མ་བཅོས་རང་བབས་ཀྱི་སྒོམ་པ་ལ། །འཇུར་དྲན་གྱི་ཐག་པས་མི་འཆིང་འཚལ། །རང་གྲོལ་གྱི་གནད་དང་མ་བྲལ་བར། །རྟོག་ཚོགས་ཀུན་སྦྲུལ་མདུད་བཞིན་གྲོལ་ངང་། །རྒྱལ་སྲས་ཀྱི་སྤྱོད་ལ་བསླབ་པ་ལ། །ཚུལ་འཆོས་ཀྱི་འདྲ་འབག་མི་གསོལ་འཚལ། །ཡེ་གྲོལ་གྱི་རིག་པ་ཕྱམ་བརྡལ་འདི། །སྐུ་གསུམ་གྱི་ངོ་བོར་ལྷུན་གྲུབ་པས། །ད་འབྲས་བུ་གཞན་ནས་ཚོལ་མ་དགོས། །རེ་དོགས་ཀྱི་འཕྲང་ལ་མི་གཅུན་འཚལ། །ཚུལ་དེ་སྐད་ལྟ་སྒོམ་སྤྱོད་པའི་གླུ། །སྤྲང་ཆོས་གཟུགས་པདྨ་རྣམ་རྒྱལ་གྱིས། །བློར་གང་ཤར་སོར་མོའི་ཟློས་གར་བསྒྱུར། །ཁྱེད་དད་པ་ཅན་གྱིས་གཟིགས་མོར་ཞུ། །
༈ ཀྱེ་གསོན་དང་སྐལ་ལྡན་གྲོགས་པོ་རྣམས། །ཕྱི་རྣམ་རྟོག་སྣ་ཚོགས་འཁྲུལ་བའི་སེམས། དེ་བལྟས་པས་ཆོས་ཉིད་དོན་ལ་རིང་། །ནང་རིག་མཁན་སོ་མའི་ངོ་ལ་ལྟོས། །བློ་བྲལ་གྱི་དགོངས་པ་འཆར་ཏེ་མཆི། །སེམས་འཇུར་བུས་བཅིངས་པའི་སྒོམ་པ་འདིས། །དོན་གཉུག་མའི་རང་སོ་མི་ཟིན་པས། །མ་བཅོས་རྣལ་མ་ཡི་ངང་ལ་ཞོག །གང་ཤར་ཀུན་སྒོམ་དུ་འཆར་ཏེ་མཆི། །བློ་ཡུལ་ཕྱིར་འབྲེང་ན་དུག་རོ་ལྡང་། །རང་གྲོལ་གྱི་གནད་མེད་ཐ་མལ་པ། །བུ་ཤར་གྲོལ་རྗེས་མེད་ཀྱི་ངང་ལ་ཞོག །སྣང་རྐྱེན་ཀུན་གྲོགས་སུ་འཆར་ཏེ་མཆི། །སྒོམ་ཆེན་ཀུན་སྒོམ་གྱིས་བཅིངས་ནས་གདའ། །བདེ་གསལ་མི་རྟོག་གི་བསླུ་བྲིད་མཁས། །བུ་ཞེན་མེད་འཛིན་མེད་ཀྱི་ངང་དུ་ཞོག །དོན་རྟོགས་པའི་རང་ཞལ་མཇལ་ཏེ་མཆི། །ཚུལ་དེ་སྐད་གང་ཤར་ཡི་གེའི་ཕྲེང་། །སྤྲང་གཏད་མེད་ཀུན་བཟང་བསྟན་རྒྱལ་གྱིས། །གནས་ཡོན་ཏན་ཀུན་འཛོམས་སེང་གེ་རྫོང་། །དཔལ་པདྨ་འོད་གླིང་སྒྲུབ་སྡེར་བྲིས། །