སུམ་ཚན་བཅུར་དྲིལ་གྱི་ཕྲེང་བ།
༄༅། །སུམ་ཚན་བཅུར་དྲིལ་གྱི་ཕྲེང་བ། རྗེ་འགྲན་ཟླ་མེད་པའི་བཀའ་དྲིན་ཅན། །ཕ་བློ་གྲོས་མཐའ་ཡས་ཞབས་ལ་འདུད། །བུའི་བློ་སྣ་ཆོས་ལ་བསྒྱུར་དུ་གསོལ། །ཀྱེ་གསོན་དང་རྣལ་འབྱོར་དུང་རྒྱན་ཅན། །ཁྱེད་རྣལ་འབྱོར་རྒྱན་མེད་མ་ལགས་ཀྱང་། །དོན་མེད་ཐབས་མེད་པའི་རྒྱན་འགའ་ཞིག །དུས་དེ་རིང་ཉམས་ལ་ཤར་ནས་སྨྲ། །ཁྱེད་རྣལ་འབྱོར་སྤྱོད་པའི་རྒྱན་དུ་མཛོད། །མཚན་ལྡན་བླ་མ་ཚོལ་དང་གཅིག །གདམས་ཟབ་སྒྲོ་འདོགས་གཅོད་དང་གཉིས། །ཐོས་དོན་ཉམས་སུ་ལེན་དང་གསུམ། །འདི་གསུམ་རྣལ་འབྱོར་རྒྱན་དུ་ཆེ། །ངེས་འབྱུང་བློ་སྣ་བསྟུང་དང་གཅིག །ཕྱོགས་མེད་རྒྱལ་ཁམས་འགྲིམ་དང་གཉིས། །གང་བྱུང་ལམ་དུ་ཁྱེར་དང་གསུམ། །འདི་གསུམ་ཡང་རྣལ་འབྱོར་རྒྱན་དུ་ཆེ། །དག་སྣང་ཕྱོགས་མེད་རྒྱས་དང་གཅིག །སྡོམ་གསུམ་གནང་བཀག་ཤེས་དང་གཉིས། །སྤྱོད་པ་དུས་ཚོད་འབྲེལ་དང་གསུམ། །འདི་གསུམ༴ བླ་མ་སྤྱི་བོར་སྒོམ་དང་གཅིག །ཡི་དམ་བསྙེན་སྒྲུབ་བརྩོན་དང་གཉིས། །མཁའ་འགྲོ་གྲོགས་སུ་བསྟེན་དང་གསུམ། །འདི་གསུམ་ཡང་༴ སྒྲུབ་ཕུག་ཞྭ་ལྟར་གྱོན་དང་གཅིག །དཀའ་སྤྱད་སྙིང་རུས་ཐོན་དང་གཉིས། །དམ་བཅའ་མཐའ་རུ་ཕྱིན་དང་གསུམ། །འདི་གསུམ་ཡང་རྣལ་འབྱོར་པའི༴ སྦྱོར་བ་སེམས་བསྐྱེད་བཟང་དང་གཅིག །དངོས་གཞི་ཤེར་ཏིང་འཛོམས་དང་གཉིས། །འགྲུབ་རྟགས་མངོན་དུ་འགྱུར་དང་གསུམ། །འདི་གསུམ་ཡང་༴ ལྟ་བ་ཡིད་དཔྱོད་བྲལ་དང་གཅིག །སྒོམ་པ་དབྱིངས་རིག་འབྲལ་མེད་གཉིས། །སྤྱོད་པ་རང་གྲོལ་ལམ་ཁྱེར་གསུམ། །འདི་གསུམ་ཡང་རྣལ་འབྱོར༴ སེམས་རིག་ལ་ཤན་ཕྱེད་དང་གཅིག །གཟུང་འཛིན་རྟོད་ཕུར་བུད་དང་གཉིས། །ཆོས་ཉིད་བཙན་ས་ཟིན་དང་གསུམ། །འདི་གསུམ༴ ཉིན་མོ་སྣང་བ་རྒྱས་འདེབས་གཅིག །མཚན་མོ་འོད་གསལ་སྦུབས་འཇུག་གཉིས། །དུས་རྒྱུན་རྩོལ་མེད་དྲན་བརྟེན་གསུམ། །འདི་གསུམ༴ སྒྲུབ་མཐའ་འཆི་ལ་གཏད་དང་གཅིག །སྒྲུབ་འབྲས་བསྟན་ལ་ཕན་དང་གཉིས། །འབྲེལ་ཚད་དགེ་ལ་སྦྱོར་དང་གསུམ། །འདི་གསུམ་ཡང་རྣལ་འབྱོར་རྒྱན་དུ་ཆེ། །ཁྱེད་རྣལ་འབྱོར་རི་ཁྲོད་འཛིན་པ་ལ། །རྒྱན་ཕལ་པ་བརྒྱ་ཡི་དགོས་པ་མེད། །དོན་མེད་ཐབས་མེད་པའི་རིན་ཆེན་རྒྱན། །སུམ་ཚན་བཅུར་དྲིལ་གྱི་ཕྲེང་བ་འདི། །དུས་དེ་རིང་ཉམས་ཀྱི་རྩལ་ལས་ཤར། །སྙིང་ཉེ་བས་བཀག་མེད་གླུ་རུ་བླངས། །དགེ་འདིས་ཀྱང་རྣལ་འབྱོར་སྤྱོད་པ་ཁྱེད། །ཚེ་སྒྲུབ་པ་མཉམ་པའི་སྨོན་ལམ་ཞུ། །ཞེས་པའང་འགྱུར་བསྟན་ངོར་པདྨ་བི་ཛས་བརྗོད་པ་དགེ།