ཕན་པར་འདོམས་པའི་བསླབ་ཕྲེང་།

༄༅། །ཕན་པར་འདོམས་པའི་བསླབ་ཕྲེང་། སྙིང་རྗེའི་དབང་ཕྱུག་འཕགས་པ་སྤྱན་རས་གཟིགས། །མུ་མེད་འགྲོ་བའི་སྐྱབས་མགོན་པདྨ་འབྱུང་། །བདག་སྙིང་པདྨའི་ཟེའུ་འབྲུར་རྟག་བཞུགས་ནས། །དད་ལྡན་བློ་སྣ་ཆོས་ལ་བསྒྱུར་དུ་གསོལ། །ཀ་ཡེ་སྔོན་བསགས་བཟང་པོའི་འབྲས་བུ་མཆོག །ད་རེས་དལ་འབྱོར་ལན་གཅིག་ཐོབ་པ་འདི། །དེད་དཔོན་གསེར་གླིང་ཕྱིན་པའི་དོ་ཟླ་མིན། །མདོ་མེད་སྟོང་ལོག་མ་བྱེད་ཨ་ནེ་མ། །ཚེ་ནི་དགོང་ཀའི་ཉི་བཞིན་ཕར་ཕར་འགྲོ། །འཆི་བདག་གྲིབ་སོ་བཞིན་དུ་ཚུར་ཚུར་འོང་། །སང་ཙམ་སྡོད་པའི་བློ་གདེང་ཡོད་མ་ཡིན། །ཆོས་ལ་ཕྱི་བཤོལ་མ་བྱེད་ཨ་ནེ་མ། །ད་ལྟའི་བདེ་སྡུག་སྔོན་བསགས་ལས་ཀྱི་འབྲས། །ཕྱི་མ་ཅིར་འགྱུར་ད་ལྟའི་ལས་ལ་རག །ལས་འབྲས་མི་བསླུ་ལུས་དང་གྲིབ་མ་འདྲ། །དཀར་ནག་འཇུག་ལྡོག་མ་འཛོལ་ཨ་ནེ་མ། །སྲིད་པའི་གནས་ནི་མེ་ཡི་འོབས་དང་འདྲ། །གང་དུ་སྐྱེས་ཀྱང་སྡུག་བསྔལ་གསུམ་གྱི་སྣོད། །ཡང་སྐྱེ་ཡང་འཁོར་ཟོ་ཆུའི་ཁྱུད་མོ་བཞིན། །འདི་ལ་སྐྱོ་བར་གྱིས་ཤིག་ཨ་ནེ་མ། །ཚེ་འདིའི་ལྟོ་གོས་ཇི་ལྟར་བྱས་ཀྱང་ཕྱིད། །ཕྱི་མའི་ལམ་རྒྱགས་གཞན་ནས་བཙལ་དུ་མེད། །ཕོ་མོ་མདོ་དོན་ཆེ་ཆུང་ད་རེས་ཡིན། །རང་མགོ་རང་གིས་ཐོན་ཅིག་ཨ་ནེ་མ། །སྐྱབས་གནས་དཀོན་མཆོག་མ་གཏོགས་འཇིག་རྟེན་ན། །ཡིད་བརྟན་ཕེར་བ་སུ་ཡང་མ་མཆིས་ལས། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང་། །བློ་སྙིང་བྲང་གསུམ་གཏོད་ཅིག༴ ཁམས་གསུམ་སེམས་ཅན་ཕ་མའི་རང་བཞིན་ལ། །ཉེ་རིང་ལྟ་བ་བྱིས་བློའི་སྐྱོན་དུ་ཟད། །ཀུན་ལ་བྱམས་དང་སྙིང་རྗེའི་དཔུང་བསྐྱེད་ལ། །བྱང་ཆུབ་སེམས་མཆོག་སྒོམས་ཤིག༴ འགྲོ་ཀུན་བདེ་གཤེགས་སྙིང་པོ་ཅན་ཡིན་ཀྱང་། །གློ་བུར་བསྒྲིབས་པས་སྲིད་པར་ཉམ་རེ་ཐག །དེ་བསལ་སླད་དུ་སྟོབས་བཞིའི་མན་ངག་གཅེས། །སྒྲིབ་སྦྱོངས་རྡོར་སེམས་སྒོམས་ཤིག༴ ཚོགས་གཉིས་བསགས་མཐུས་སྐུ་གཉིས་འབྲས་བུ་འབྱིན། །ཚོགས་མ་བསགས་ལ་ནམ་ཡང་དེ་ལྟ་མིན། །དེ་སླད་བསོད་ནམས་ཡེ་ཤེས་ཚོགས་བསགས་མཆོག །སྐུ་གསུམ་ཞིང་ཁམས་ཕུལ་ཅིག༴ བླ་མའི་བྱིན་རླབས་སེམས་ལ་མ་ཞུགས་ན། །ནམ་ཡང་གནས་ལུགས་རྟོགས་པའི་ཐབས་མི་སྲིད། །དེ་སླད་བླ་མ་སངས་རྒྱས་དངོས་མཐོང་བློས། །ཐུན་བཞིར་རྣལ་འབྱོར་སྒོམས་ཤིག༴ མ་བརྟགས་ཉམས་དགའ་སྣང་ཙམ་ཀུན་རྫོབ་གཤིས། །དེ་ལ་རང་བཞིན་མ་གྲུབ་དོན་དམ་བདེན། །ཡེ་ནས་དབྱེར་མེད་རང་བཞིན་མཉམ་པ་ཉིད། །སྣང་སྟོང་ཟུང་འཇུག་གོ་འམ་ཨ་ནེ་མ། །ནང་གི་སེམས་ཉིད་མ་སྐྱེས་སྟོང་པའི་ངང་། །སྟོང་པའི་རང་མདངས་མ་འགགས་ཅིར་ཡང་གསལ། །གསལ་སྟོང་དབྱེར་མེད་ཆུ་ཟླ་འཇའ་ཚོན་བཞིན། །ཐ་མལ་ཤེས་པ་སྐྱོངས་ཤིག༴ གནས་འགྱུ་ལ་སོགས་འཆར་སྒོ་ཅི་བྱུང་ཡང་། །དགག་སྒྲུབ་མ་བྱེད་རིག་མཁན་རྩ་བ་ཆོད། །ཡེ་ནས་མཉམ་ཉིད་བྱང་ཆུབ་སེམས་ཀྱི་བབས། །རིག་སྟོང་རྗེན་པར་ཞོག་ཅིག༴ སྟོང་ཉིད་རྟོགས་ན་སྙིང་རྗེ་ངང་གིས་སྐྱེ། །སྙིང་རྗེའི་ངོ་བོ་སྟོང་ལ་རང་བཞིན་མེད། །འདི་གཉིས་ཟུང་འབྲེལ་ཐེག་ཆེན་ལམ་གྱི་སྲོག །ཡ་བྲལ་གོལ་ས་ཡིན་ནོ༴ རྟེན་འབྱུང་ཆོས་ཀུན་སྟོང་ཉིད་ཡིན་མོད་ཀྱི། །སྟོང་པའི་རང་མདངས་རྟེན་འབྱུང་སྒྱུ་མར་ཤར། །དེ་སླད་ཞེན་མེད་སྒོ་གསུམ་དགེ་ལ་འབུངས། །གཅིག་གོ་གཅིག་གིས་མ་འགེགས༴ དུས་གསུམ་བྱས་བསགས་རྣམ་དཀར་དགེ་བའི་རྒྱུན། །འཁོར་གསུམ་དམིགས་པའི་མཚན་མས་བསླད་མིན་པར། །འཇམ་དཔལ་ཀུན་ཏུ་བཟང་པོའི་རྣམ་ཐར་བཞིན། །གཞན་དོན་རྫོགས་བྱང་བསྔོས་ཤིག་ཨ་ནེ་མ། །མདོར་ན་དུས་རྒྱུན་རང་གི་རྒྱུད་ལ་རྟོགས། །རང་རྒྱུད་ཉོན་མོངས་མགོ་བོ་ཆོམ་འདུག་ན། །ཆོས་དེ་ལམ་དུ་སོང་གིས་གཞན་གྱིས་མིན། །དཔང་པོ་སེམས་ལ་ཆོངས་ཤིག་ཨ་ནེ་མ། །དེ་སྐད་ཕན་པར་འདོམས་པའི་བསླབ་ཕྲེང་འདི། །བདེ་ཆེན་པདྨ་འོད་ཀྱི་དབེན་སྤྱིལ་ནས། །པདྨ་བི་ཛས་ཕན་འདོད་བརྩེ་བས་བྲིས། །དགེ་བས་ཆོས་མཐར་ཕྱིན་པའི་བཀྲ་ཤིས་ཤོག །དད་ལྡན་ཁྲ་གྲོགས་ལའོ། །