ཚིག་རྗེས་མ་འབྲངས་དོན་གྱི་རྩ་བ་ཆོད།
༄༅། །ཚིག་རྗེས་མ་འབྲངས་དོན་གྱི་རྩ་བ་ཆོད། །ཚིག་གི་ལོ་མས་དོན་དམ་སྒྲིབ་ཉེན་ཆེ། །དོན་དམ་ལྷན་ཅིག་སྐྱེས་པའི་ཡེ་ཤེས་ནི། །སྨྲ་བསམ་བརྗོད་པའི་ཡུལ་ལས་འདས་པར་གསུངས། །བློ་འདས་ཉིད་ལ་བློ་ཡི་དཔྱོད་པས་ཅི། །བརྗོད་བྲལ་ཉིད་ལ་རྗོད་པས་ཅི་ཞིག་འགྱུར། །མ་བཅོས་གཉུག་མ་དོན་གྱི་ཡེ་ཤེས་ཆེ། །རང་གར་བཞག་ན་རང་བཞིན་ལྷུག་པར་འཆང་། །བཅོས་ཤིང་བཅོས་ཤིང་རྣལ་མའི་དོན་ལ་སྒྲིབ། །ཆུ་རྙོག་རང་སར་དྭངས་པའི་དཔེ་ལྟོས་ལ། །རང་བབས་མི་གཡོ་དགོངས་པའི་བཙན་ས་ཟུངས། །རྩལ་རྟོག་གང་ཤར་རང་གྲོལ་ལམ་དུ་ཁྱེར། །འདི་ལ་གཉེར་ཁ་མི་དགོས་གང་དགར་ཞོག །གོ་ལྡོག་རྔ་མོ་ལྟ་བུའི་ཚུལ་ལ་ལྟོས། །སྨིག་རྒྱུའི་ཐག་པས་སུ་ཞིག་འཆིང་བར་བྱེད། །སྐད་ཅིག་རྟོག་པས་སུ་ལ་ཕན་གནོད་ཅི། །ལྷོ་སྤྲིན་ནམ་མཁར་དེངས་པའི་དཔེ་ལྟོས་ལ། །གང་ཤར་གདོད་མའི་དབྱིངས་སུ་སྐྱེལ་བར་མཛོད། །ངེས་འབྱུང་དད་མོས་གཞན་ཕན་བྱང་སེམས་གསུམ། །ནམ་ཡང་མེད་ཐབས་མེད་པའི་ཆོས་གསུམ་ཡིན། །ཐབས་ཚུལ་དུ་མས་རང་གི་རྒྱུད་ལ་སྦྱོར། །ཚོགས་བསགས་སྒྲིབ་སྦྱང་ལས་འབྲས་འདོར་ལེན་གསུམ། །ལམ་ཁྱེར་གྲོགས་སུ་མེད་ཐབས་མེད་པར་གོ། སྟོང་ལྟ་ཧད་པོས་ཁྱད་དུ་མི་གསོད་པར། །རྒྱལ་བ་དགྱེས་པའི་ལམ་ལ་སློབ་པར་མཛོད། །ཁ་ཅིག་དེང་སང་སྒྲུབ་པའི་དུས་མིན་ལས། །གནས་ལུགས་བསྒོམས་ཀྱང་ཡར་སྐྱེད་མི་འབྱུང་ལོ། །མཐུན་གྱུར་ཡུལ་གནས་སྐྱེས་བུ་དམ་པས་ཟིན། །བདག་ཉིད་ལེགས་སྨོན་སྔོན་བསགས་བསོད་ནམས་ཏེ། །མཐུན་རྐྱེན་འཁོར་ལོ་བཞི་ཡིས་འབྱོར་དུས་འདིར། །ལམ་གྱི་ཡོན་ཏན་མཐའ་དག་སྐྱེ་མིན་ན། །ངན་འགྲོ་ལོག་པར་ལྟུང་ཚེ་ཡིན་ནམ་ཅི། །ཉོན་མོངས་རྒྱུད་དྲག་སྙིགས་མ་ལྔ་བདོའི་ཚེ། །འབྲས་བུ་གསང་ཆེན་འབྱོན་པའི་དུས་སུ་གསུངས། །ཁྱད་པར་ཀུན་བཟང་ཐུགས་ཀྱི་བསྟན་པ་ཞེས། །རྒྱུད་ནས་བསྔགས་པའི་དུས་ནི་དེང་ལགས་པས། །ཉམས་ལེན་ནུས་ན་ཚེ་འདིར་འབྲས་སྨིན་ངེས། །དེ་སླད་བརྩོན་པའི་གོ་ཆ་མི་གཡེལ་འཚལ། །ཞེས་པའང་བི་ཛས་སོ། །
༄༅། །བླ་མ་ལ་ཕྱག་འཚལ་ལོ། །རྙེད་དཀའི་དལ་འབྱོར་ཐོབ་ཚེ་སྙིང་པོ་ཆོས་ལ་དྲིལ། །ནམ་འཆི་ངེས་མེད་སེམས་ལ་ལོང་མེད་བློ་སྣ་སྟུངས། །ལས་འབྲས་ཡིད་ཆེས་སྐྱེད་ལ་འཇུག་ལྡོག་ལག་ལེན་དྲིལ། །འཁོར་བའི་སྡུག་བསྔལ་སོམས་ལ་ངེས་འབྱུང་སྐྱོ་ཤས་སྐྱེད། །བྱས་པ་དོན་མེད་སོམས་ལ་འདིར་སྣང་བྱ་བ་ཐོངས། །གཏན་གྱི་འདུན་མ་སྒྲུབ་ཕྱིར་སྒོ་གསུམ་དགེ་ལ་འབོད། །ཡོན་ཏན་ཀུན་གྱི་གཞི་མ་ཚུལ་ཁྲིམས་མིག་བཞིན་སྲུངས། །ཐེག་ཆེན་ལམ་གྱི་རྩ་བ་བྱམས་དང་སྙིང་རྗེ་སྒོམས། །དབང་ཐོབ་དམ་ཚིག་གཙང་མས་རིམ་གཉིས་ཟབ་མོར་དྲིལ། །དམ་པ་གསུམ་གྱིས་ཟིན་པས་བྱས་པ་དོན་ལྡན་མཛོད། །དེ་ལྟར་མཛད་ན་འདིར་བདེ་ཕྱི་མར་སྐྱིད་པ་ལགས། །འདི་དོན་ཐུགས་ལ་འཇོག་མཛོད་རྣམ་ཀུན་དགེ་གྱུར་ཅིག །པདྨ་བི་ཛས་སོ། །