བདག་ཅག་གི་སྟོན་པ་ནི་དྲང་སྲོང་དེ་དག་གི་སྟོན་པ་ཨུད་པ་ལ་ཞེས་བྱ་བར་འཁྲུངས་ཚུལ།
༈ ཡང་བསྐལ་པ་གྲངས་མེད་ཚད་མེད་པ་འདས་པའི་ཕ་རོལ་ན། ཡུལ་ཝཱ་རཱ་ཎ་སཱི་ན། དྲང་སྲོང་ལྔ་བརྒྱ་ཞིག་གནས་ཏེ་བདག་ཅག་གི་སྟོན་པ་ནི་དྲང་སྲོང་དེ་དག་གི་སྟོན་པ་ཨུད་པ་ལ་ཞེས་བྱ་བར་འཁྲུངས་ཏེ། དེ་དམ་པའི་ཆོས་སློབ་ཅིང་བསྒོམས་པ་ལ་དགའ་བས་ཀུན་ཏུ་རྒྱུ་ཞིང་། སུ་ལ་དམ་པའི་ཆོས་ཡོད་པ་དེ་བདག་ལ་སྨྲ་ན། ཅི་དང་ཅི་འདོད་པ་སྦྱིན་ཅིང་དེའི་གཡོག་བྱའོ་ཞེས་བསྒྲགས་པ་དང་། བྲམ་ཟེ་ཞིག་དེར་འོངས་ནས། གལ་ཏེ་ཁྱོད་ཀྱིས་པགས་པ་བཤུས་ཏེ་ཤོག་ཤོག་ཏུ་བྱས་ལ། རུས་པ་ནི་སྨྱུ་གུར་བྱས། ཁྲག་ནི་སྣག་ཚལ་བྱས་ཏེ། ངས་བསྟན་པའི་ཆོས་ཡི་གེར་འབྲི་ནུས་ན་ཁྱོད་ལ་ཆོས་བསྟན་ཏོ། །ཞེས་སྨྲས་པས། དྲང་སྲོང་དེ་རབ་ཏུ་དགའ་མགུ་རངས་ཏེ། དེ་བཞིན་གཤེགས་པའི་བསྟན་པ་ལ་བསྐུར་སྟིར་བྱ་བའི་ཕྱིར་པགས་པ་བཤུས་ནས་ཤོག་ཤོག་ཏུ་བྱས། རུས་པ་སྨྱུ་གུར་བྱས། ཁྲག་ལ་སྣག་ཚལ་བྱས་ནས། དུས་ལ་བབ་ཀྱི་མྱུར་དུ་གསུངས་ཤིག་ཅེས་སྨྲས་པ་དང་། བྲམ་ཟེས། ལུས་ཀྱི་སྤྱོད་པ་རབ་བསྡམས་ཤིང་། །སྲོག་གཅོད་རྐུ་དང་གཡེམ་མི་བྱ། །ཕྲ་མ་བརྫུན་དང་ཚིག་རྩུབ་དང་། །འཁྱལ་བ་སྨྲ་བར་མི་བྱའོ། །འདོད་པ་རྣམས་ལ་མི་ཆགས་ཤིང་། །ཞེ་སྡང་སེམས་ཀྱང་མེད་པར་བྱོས། །ངན་པར་བལྟ་བ་ཀུན་སྤངས་ན། །བྱང་ཆུབ་སེམས་དཔའི་སྤྱོད་པའོ། །ཞེས་ཚིགས་སུ་བཅད་པ་འདི་དག་སྨྲས་མ་ཐག་ཏུ། ཡི་གེར་བྲིས་ནས་འཛམ་བུ་གླིང་ཀུན་ཏུ་བསྒྲགས་ཏེ། མི་མང་པོ་ཐམས་ཅད་ཀྱིས་དེ་ལ་སློབ་ཅིང་བསྟན་པ་བཞིན་དུ་ནན་ཏན་བྱེད་དུ་བཅུག་གོ །