བསྙེན་གནས་སོགས་ཚུལ་ཁྲིམས་བསྲུང་བའི་ཕན་ཡོན།

༈ ཡང་བཅོམ་ལྡན་འདས་མཉན་ཡོད་ན་བཞུགས་པའི་ཚེ་ནམ་གྱི་སྟོད་ལ་ལྷ་གཉིས་བཅོམ་ལྡན་འདས་ཀྱི་དྲུང་དུ་ཆོས་ཉན་དུ་འོང་བ་ན། ལྷ་དེ་གཉིས་ཀྱི་ལུས་ཀྱི་འོད་ཀྱིས་རྒྱལ་བུ་རྒྱལ་བྱེད་ཀྱི་ཚལ་གསེར་གྱི་མདོག་ལྟར་གཅིག་ཏུ་སྣང་བར་བྱས་སོ། །དེ་ལ་བཅོམ་ལྡན་འདས་ཀྱིས་ཆོས་བསྟན་པས་སེམས་རྣམ་པར་གྲོལ་ཏེ། གཉིས་ཀས་བྱང་ཆུབ་ཀྱི་འབྲས་བུ་ཐོབ་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་ཕྱིར་ཡང་ལྷ་གནས་སུ་སོང་ངོ་། །ཕྱིར་ཉིན་ཀུན་དགའ་བོས། ལྷ་དེ་གཉིས་ཀྱི་སྔོན་གྱི་ལས་ཅི་ཞིག་བགྱིས་པས་དེ་འདྲ་བའི་འབྲས་བུ་ཐོབ་པར་གྱུར་ཞུས་པས། བཅོམ་ལྡན་འདས་ཀྱིས། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་ཅིང་སྐུ་མྱ་ངན་ལས་འདས་ནས་དམ་པའི་ཆོས་ཀྱང་འཇིག་ལ་ཉེ་བ་ན། བྲམ་ཟེ་གཉིས་ཀྱི་ཉིན་ཞག་གཅིག་པའི་བསྙེན་གནས་ཡན་ལག་བརྒྱད་པའི་ཁྲིམས་མནོས་ཏེ། གཅིག་གི་ལྷར་སྐྱེ་བ་དང་གཅིག་གི་རྒྱལ་པོར་སྐྱེ་བར་སྨོན་ལམ་བཏབ་བོ། །རྒྱལ་པོར་སྨོན་པ་དེས་ནི་ཚུལ་ཁྲིམས་སྐྱོན་མེད་པར་བསྲུངས་པས་རྒྱལ་པོའི་རིགས་སུ་སྐྱེས་ལ། ལྷར་སྨོན་པ་དེས་ནི་དེ་ནུབ་ཁྱིམ་དུ་ཕྱིན་ཏེ་ལོ་རྒྱུས་སྨྲས་པས། རང་གི་ཆུང་མས། གལ་ཏེ་བདག་དང་ལྷན་ཅིག་ཟན་མི་ཟ་ན་ཀུན་ཏུ་རྒྱུ་གཞན་དག་ལ་གཏམ་བསྙད་དེ་གནས་ནས་སྐྲོད་དུ་གཞུག་གོ་ཞེས་བསྡིགས་པས་སྐྲག་ནས་དུས་མ་ཡིན་པར་ཟན་ཟོས་པས་ཚུལ་ཁྲིམས་ཞིག་སྟེ་ཀླུར་སྐྱེས་སོ། །དེའི་ཚེ་རྒྱལ་པོར་སྐྱེས་པ་དེའི་བཟའ་ཤིང་གི་ར་བ་སྲུང་བ་ཞིག་ཉིན་རེ་བཞིན་དུ་ཤིང་ཐོག་སྣ་ཚོགས་རྒྱལ་པོའི་དྲུང་དུ་སྐྱེལ་བ་ལས། ཕྱིས་སུ་དུས་གཞན་ཞིག་ན། ཆུ་མིག་གཅིག་གི་ནང་ནས་ཀུ་ཤུ་ཁ་དོག་དྲི་བསུང་ཕུན་སུམ་ཚོགས་པ་ཞིག་རྙེད་པ་ཕོ་བྲང་གི་སྒོ་སྲུང་བ་ལ་བྱིན་ནོ། །དེས་ཉུག་རུམ་པ་དང་། ཉུག་རུམ་པས་བཙུན་མོ། བཙུན་མོས་རྒྱལ་པོ་ལ་ཕུལ་བས། རྒྱལ་པོས་གང་ནས་བྱུང་རྩད་བཅད་པ་ན་མཐར་ར་བ་སྲུང་བ་ལ་ཐུག་ནས། དེ་ལ་རྒྱལ་པོས། ངའི་བཟའ་ཤིང་གི་ར་བ་ན་ཤིང་ཐོག་འདི་ལྟ་བུ་ཡོད་ན་ང་ལ་ཅིའི་ཕྱིར་མི་འབུལ། དེས་ལོ་རྒྱུས་ཞིབ་ཏུ་གསོལ་ཀྱང་མ་གསན་པ། དེང་ཕྱིན་ཆད་ཀུ་ཤུ་འདི་ལྟ་བུ་རྟག་ཏུ་ཕུལ་ཅིག གལ་ཏེ་མ་རྙེད་ན་ལུས་དུམ་བུར་བཅད་དོ། །ཞེས་བསྡིགས་པས། ར་བ་སྲུང་བ་དེ་ཕྱིར་རང་གནས་སུ་སོང་ནས་མྱ་ངན་བྱེད་ཅིང་ངུས་པའི་སྒྲ་ཀླུར་སྐྱེས་པ་དེས་ཐོས་ནས། དེ་མིར་སྤྲུལ་ནས་དེ་ལ་ཁྱོད་ཅིའི་ཕྱིར་མི་དགའ་ཞིང་ངུ་། དེས་ལོ་རྒྱུས་ཞིབ་པར་བསྙད་པས། ཀླུ་དེ་མི་སྣང་བར་གྱུར་ནས་རིང་པོར་མ་ལོན་པར་གསེར་གྱི་གཞོང་པ་ཞིག་ཤིང་ཏོག་བཟང་པོས་བཀང་སྟེ་མི་དེ་ལ་བྱིན་ནས་ཁྱེད་ཀྱིས་ཤིང་ཏོག་འདི་ཁྱེར་ལ་རྒྱལ་པོ་ལ་ཕུལ་ཏེ་ཕྲིན་འདི་སྐྱོལ་ཅིག་རྒྱལ་པོ་དང་བདག་གཉིས་བཤེས་ཏེ། སྔོན་ཀུན་ཏུ་རྒྱུ་ཡིན་པ་ལས། ཉིན་ཞག་གཅིག་པའི་ཁྲིམས་བརྒྱད་མནོས་ཏེ། སོ་སོར་སྨོན་ལམ་བཏབ་པ་ལས། རྒྱལ་པོས་ནི་ཚུལ་ཁྲིམས་བསྲུངས་པས་རྒྱལ་པོར་གྱུར་ལ་བདག་ནི་ཚུལ་ཁྲིམས་ཉ མས་པས་ཀླུར་སྐྱེས་ཀྱི། ང་ཡང་ཁྲིམས་བསྲུང་ཞིང་ལུས་འདི་ལས་ཐར་བར་འདོད་པས། ཉིན་ཞག་གཅིག་པའི་ཁྲིམས་བརྒྱད་ཀྱི་ཆོ་ག་བདག་ལ་སྩལ་ཏུ་གསོལ། ཅི་སྟེ་མ་གནང་ན་རྒྱལ་པོའི་ཡུལ་ཡང་རྒྱ་མཚོར་བསྒྱུར་རོ་ཞེས་ཕྲིན་སྤྲིང་བ་ལྟར་མི་དེས་རྒྱལ་པོ་ལ་རྫོགས་པར་བསྙད་ནས་ཤིང་ཏོག་ཕུལ་ལོ། །དེར་རྒྱལ་པོ་མྱ་ངན་གྱིས་ནོན་ཏེ། དེའི་ཚེ་ན་འཇིག་རྟེན་ན་སངས་རྒྱས་ཀྱང་མི་བཞུགས། དམ་པའི་ཆོས་ཀྱང་ནུབ་པས་བསྙེན་གནས་ཀྱི་དཔེ་མི་རྙེད་ལ། དེ་མ་རྙེད་ན་ཀླུས་ཡུལ་ཁམས་བརླག་པར་དོགས་ནས། བློན་པོ་མཆོག་གཅིག་ཡོད་པ་ལ། ཀླུ་ཞིག་གིས་ང་ལ་ཁྲིམས་བརྒྱད་ཀྱི་དཔེ་སློང་གིས། ཁྱོད་ཀྱིས་ཚོལ་ཅིག གལ་ཏེ་མ་རྙེད་ན་བསད་དོ་ཞེས་བསྒོའོ། །དེར་བློན་པོ་དེ་ཤིན་ཏུ་མི་དགའ་བཞིན་དུ་སོང་ནས་ཁྱིམ་དུ་ཕྱིན་པ་ན། བློན་པོ་དེ་ལ་ཕ་རྒས་འཁོགས་ཤིག་ཡོད་པ་དེས། སྔོན་ཆད་ནི་བདག་གི་བུ་འཛུམ་མུལ་ཏེ་མདངས་དང་བཅས་པས་གཏམ་ཟེར་ན། དེང་ཅིའི་ཕྱིར་སྔོན་དང་མི་འདྲ་བར་ངོ་འཛུམ་ནག་སྟེ་གཏམ་སྨྲ་ཞེས་དྲིས་པས། དེས་ཇི་ལྟར་གྱུར་པ་བརྗོད་པས། ཕ་དེས་སྨྲས་པ། བདག་གི་ཁྱིམ་ན་ཀ་བ་ཞིག་ལས་རྟག་ཏུ་འོད་འབྱུང་སྟེ། དེའི་ནང་ན་ཅི་ཡོད་ལྟོས་ཤིག་ཅེས་བསྒོ་བ་དང་། ཀ་བ་ཕྱུང་ནས་གཤགས་པས། དེའི་ནང་ན་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་མདོ་དང་། ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་ནས། བློན་པོས་རྒྱལ་པོ་ལ་ཕུལ། རྒྱལ་པོས་བསྙེན་གནས་ཀྱི་དཔེ་གསེར་གྱི་སྒྲོམ་བུར་བཅུག་ནས་ཀླུ་ལ་བསྐུར་བས། ཀླུས་དྲིན་ལན་དུ་རིན་པོ་ཆེ་མང་དུ་ཕུལ་ཞིང་། ཀླུ་དང་རྒྱལ་པོ་གཉིས་ཀས་ཉིན་ཞག་གཅིག་པའི་བསྙེན་གནས་ཀྱི་ཁྲིམས་བརྒྱད་སྲུང་བས་གཉིས་ཀ་ཚེ་འཕོས་ནས་ལྷན་ཅིག་ཏུ་ལྷར་སྐྱེས་ཏེ། དེ་གཉིས་མདངས་ནམ་གྱི་ཆ་སྟོད་ལ་ངའི་སྤྱན་སྔར་འོངས་ཏེ། ཅི་རིགས་པར་ཆོས་བསྟན་པས། རྒྱུན་ཞུགས་ཀྱི་འབྲས་བུ་ཐོབ་ནས། ངན་སོང་གསུམ་དང་ཡོངས་སུ་བྲལ་ཏེ། ལྷ་དང་མིའི་ལོངས་སྤྱོད་མྱོང་ཞིང་མཐར་མྱ་ངན་ལས་འདས་པའི་བར་དུ་གྱུར་ཏོ་གསུངས། འདི་ནི་བསྙེན་གནས་སོགས་ཚུལ་ཁྲིམས་བསྲུང་བའི་ཕན་ཡོན་མ་བསྲུངས་པའི་ཉེས་དམིགས་དང་ཟབ་གཏེར་གྱི་ཁུངས་ཀྱང་བསྟན་པ་ཡིན་ནོ། །