བཅོམ་ལྡན་འདས་རྒྱལ་པོའི་ཁབ་བྱ་རྒོད་སྤུངས་པའི་རི་ལ་བཞུགས་པའི་ཚེ།

༈ ཡང་བཅོམ་ལྡན་འདས་རྒྱལ་པོའི་ཁབ་བྱ་རྒོད་སྤུངས་པའི་རི་ལ་བཞུགས་པའི་ཚེ། སྐུ་ལ་བསེར་མའི་སྙུན་བྱུང་ནས། སྨན་པ་འཚོ་བྱེད་གཞོན་ནུས་སྨན་རྣམ་པ་སུམ་ཅུ་རྩ་གཉིས་མར་དང་སྦྱར་ཏེ། ཉིན་རེ་བཞིན་སྨན་སྲང་སུམ་ཅུ་རྩ་གཉིས་རེ་གསོལ་བ་ན། ལྷས་སྦྱིན་ཕྲག་དོག་སྐྱེས་ནས་སྨན་བསླངས་པ་ཉིན་རེ་སྲང་བཞི་རེ་ཐོང་ཞེས་བསྒོས་ཀྱང་མ་ཉན་པར་སྲང་སུམ་ཅུ་རྩ་གཉིས་ཟོས་པས་དེར། ལྷས་སྦྱིན་གྱིས་སྨན་མར་མ་ཞུ་ནས་ནད་དུ་གྱུར་ཏེ་ཤིན་ཏུ་སྡུག་བསྔལ་བ་ལ། བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ། རྒྱང་རིང་མོ་ནས་ཕྱག་བརྐྱང་བ་ལྷས་སྦྱིན་གྱི་མགོར་བཞག་པའི་མོད་ལ་ནད་ལས་གྲོལ་བ་དང་། ལྷས་སྦྱིན་གྱིས་དེ་ཤེས་ནས། རྒྱལ་བུ་དོན་གྲུབ་ཀྱིས་སྨན་ཡང་བསླབས་ཏེ་ཤེས་པ་འདྲ་སྟེ་བདག་མི་འདོད་དོ་ཞེས་ཟེར། དེ་ཀུན་དགའ་བོས་ཐོས་ནས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་ལྷས་སྦྱིན་གྱིས་ད་ལྟར་འདི་འབའ་ཞིག་ཏུ་ང་ལ་མི་དགེ་བའི་སེམས་བསྐྱེད་ནས་གནོད་པར་སེམས་པར་མ་ཟད་ཀྱིས། སྔོན་འདས་པའི་དུས་ནའང་ང་ལ་སྡིག་པའི་སེམས་བསྐྱེད་ནས་བསད་པར་གྱུར་ཏེ། སྔོན་ཝཱ་རཱ་ཎ་སཱི་ན། རྒྱལ་པོ་ཚངས་སྦྱིན་ཞེས་བྱ་བ་ཁྲོ་ཞིང་གཏུམ་ལ་སྙིང་རྗེ་མེད་པར་གསོད་ལ་དགའ་བ་ཞིག་བྱུང་སྟེ་དེས་རྨི་ལམ་དུ། གཅན་གཟན་གྱི་ལུས་སྤུ་གསེར་ལྟར་སྣང་ཞིང་འོད་འཕྲོ་བ་ཞིག་རྨིས་པས། དེའི་པགས་པ་འཚོལ་བའི་དོན་དུ་རྔོན་པ་རྣམས་བསྡུས་ཏེ། རྨི་ལམ་དུ་བྱུང་བ་ལྟ་བུའི་སེམས་ཅན་ཞིག་ཡུལ་འདིར་ཡོད་ངེས་པས་དེ་ཚོལ་ལ་པགས་པ་བདག་ལ་ཕུལ་ཅིག་དང་། ཁྱེད་ཀྱི་བདུན་རྒྱུད་ཚུན་ཆོད་བདེ་བར་བྱ་ལ། གལ་ཏེ་མ་ཚོལ་ཞིང་མ་རྙེད་ན་ཁྱེད་རྣམས་རྩ་རྒྱུད་ཚུན་ཆོད་མེད་པར་བྱའོ། །ཞེས་བསྒོས་པས། དེ་དག་ཤིན་ཏུ་མི་དགའ་སྟེ། དེ་ལྟ་བུ་སྔོན་ཆད་ཡོད་པར་ཡང་མ་ཐོས་ཤིང་། ནགས་ཁྲོད་ནི་སྦྲུལ་དང་གཅན་གཟན་གདུག་པ་ཅན་གྱིས་གང་བས་བགྲོད་དཀའ་ལ་གལ་ཏེ་མ་རྙེད་ན་རྒྱལ་པོ་གདུག་པ་ཅན་གྱིས་ཕུང་བར་འགྱུར་རོ་བསམས་ནས། ཐམས་ཅད་བགྲོས་ཏེ་མི་གཅིག་འཚོལ་དུ་བཏང་བ་ལས། དེ་ཉིད་ནགས་ཁྲོད་དུ་སོང་སོང་བས་ཤིན་ཏུ་ཉམ་ཐག་སྟེ། དབྱར་ཚ་བའི་དུས་ཀྱི་བྱེ་ཚན་པུས་ནུབ་ཙམ་ཞིག་ཏུ་ཕྱིན་པ་དང་། ངལ་ཆད་དེ། སྐོམ་གྱིས་གདུང་ནས་འཆི་ལ་ཐུག་པ་དང་། སྙིང་རྗེ་དང་ལྡན་པ་སུ་ཞིག་བདག་ལ་འདི་ལྟར་སྡུག་བསྔལ་བ་ལས་ལུས་སྲོག་གི་སྐྱབས་སུ་གྱུར་པ་ཡོད་དམ་ཞེས་སྨྲེ་སྔགས་ཀྱིས་བོས་པས། དེའི་ཚེ་ན་རི་དེ་ལ་གཅན་གཟན་ཀུན་ཏ་ཞེས་བྱ་བ་ལུས་ཀྱི་སྤུའི་མདོག་གསེར་གྱི་ཁ་དོག་ལྟ་བུ་ལ་སྤུའི་ཐོག་མ་ལ་གསེར་གྱི་འོད་འབྱུང་བ་ཞིག་ཡོད་པ་དེས་རྒྱང་རིང་མོ་ནས་ཐོས་ཏེ། ཤིན་ཏུ་སྙིང་བརྩེ་བའི་སེམས་སྐྱེས་ཏེ། གང་ན་ཆུ་མིག་གྲང་མོ་ཡོད་པའི་ནང་དུ་ལུས་བཅུག་ནས་མི་དེའི་དྲུང་དུ་འོངས་ཏེ། པང་པས་འཁྱུད་ནས་ཅུང་ཟད་ཉམས་བརྟས་པ་དང་། ཆུ་འགྲམ་དུ་ཁྲིད་དེ་བཀྲུས་ནས་ཤིང་ཐོག་བསྡུས་ཏེ་ཟར་བཅུག་པས་མི་དེ་སོར་ཆུད་པ་ན། རྒྱལ་པོས་འདོད་པའི་གཅན་གཟན་ནི་འདི་ཁོ་ན་ཡིན་མོད། བདག་སྲོག་དང་བྲལ་བ་ལས་འདིས་སྲོག་བཏོན་པར་བྱས་ན་ཇི་ལྟར་གསོད་པར་ནུས། གལ་ཏེ་མ་རྙེད་ན་ནི་རྔོན་པ་དེ་དག་གཉེན་ཚན་དང་བཅས་པ་གྱོད་ལ་ཐོགས་པར་འགྱུར་སྙམ་དུ་སེམས་མི་དགའ་ཞིང་འདུག་པ་ན། གཅན་གཟན་དེས་ཁྱོད་ཅིའི་ཕྱིར་མི་དགའ་ཞེས་དྲིས་པས། དེས་མཆི་མ་འབྱིན་བཞིན་རྒྱས་པར་སྨྲས་པས་ཀུན་ཏས་ཁྱོད་མི་དགའ་བར་མ་བྱེད་ཅིག བདག་གིས་པགས་པ་ཁྱེད་ཅག་སྲོག་བསྐྱབ་པའི་ཕྱིར་སྦྱིན་པར་བྱའོ། །ཁྱོད་ཀྱིས་ཁོ་བོའི་སྲོག་མ་བཅད་པར་པགས་པ་བཤུས་ཏེ་ཁྱེར་ཅིག ཅེས་སྨྲས་པས། དེ་དགའ་ནས་པགས་པ་དལ་གྱིས་བཤུས་སོ། །དེའི་ཚེ་ཀུན་ཏས་བདག་གིས་པགས་པ་བཤུས་ལ་བྱིན་ཏེ་མི་མང་པོའི་སྲོག་བསྐྱབས་པའི་བསོད་ནམས་འདི་སེམས་ཅན་ཐམས་ཅད་ལ་བསྔོས་ཏེ། བདག་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་ཞིང་སེམས་ཅན་ཐམས་ཅད་འཁོར་བའི་སྡུག་བསྔལ་ལས་བསྒྲལ་ནས། མྱ་ངན་ལས་འདས་པའི་བདེ་བ་ལ་འགོད་པར་ཤོག་ཅིག ཅེས་སྨོན་ལམ་བཏབ་པས་སྟོང་གསུམ་གྱི་འཇིག་རྟེན་གྱི་ཁམས་ས་རྣམ་པ་དྲུག་ཏུ་གཡོས་ཤིང་ལྷ་རྣམས་ཀྱིས་ཀྱང་མཆོད་པ་བྱས་སོ། །པགས་པ་བཤུས་ནས་སོང་བའི་འོག་ཏུ་དེའི་ལུས་ལ་སྦྲང་མ་དང་གྲོག་མ་སོགས་སྲོག་ཆགས་སྟོང་ཕྲག་བརྒྱད་ཅུ་རྙེད་འདུས་ནས་ཟ་བ་ལ། དེ་དག་བྲོས་སུ་དོགས་པས་ལུས་ཀྱང་མི་འགུལ་བར། དེ་དག་ལ་སྦྱིན་ནས་ཚེ་ཡི་དུས་བྱས་སོ། །སྦྲང་མ་དང་སྲིན་བུ་བྱང་ཆུབ་སེམས་དཔའི་ཤ་ཟོས་པ་རྣམས་ཀྱང་ཚེ་འཕོས་ནས་ལྷར་སྐྱེས་སོ། །དེའི་ཚེ་རྔོན་པས་པགས་པ་དེ་ཁྱེར་ནས་རྒྱལ་པོ་ལ་ཕུལ་བས། རབ་ཏུ་དགའ་ནས་འཇམ་པའི་ཟླ་མེད་དོ་ཞེས་ཉལ་སྟན་བྱས་སོ། །དེའི་དུས་ཀྱི་གཅན་གཟན་ཀུན་ཏ་ནི་ང་ཡིན་ལ། རྒྱལ་པོ་དེ་ནི་ལྷས་སྦྱིན་ནོ། །སྲིན་བུ་སྟོང་ཕྲག་བརྒྱད་ཅུ་པོ་ནི། ཐོག་མར་ཆོས་འཁོར་བསྐོར་བ་ན་འབྲས་བུ་ཐོབ་པའི་ལྷ་བརྒྱད་ཁྲི་ཡིན་ཏེ། ལྷས་སྦྱིན་གྱིས་དེའི་ཚེ་ན་ཡང་ང་བསད་དེ་ད་ལྟར་གྱི་བར་དུ་ང་ལ་སྡིག་པའི་སེམས་ཀྱིས་གསོད་པར་སེམས་སོ། །ཞེས་གསུངས་པས་འཁོར་མང་པོ་དག་བྱང་ཆུབ་གསུམ་གྱི་ལམ་ལ་བཀོད་དོ། །དེས་ན་སྟོན་པའི་ཡོན་ཏན་གྱི་ཚུལ་དྲན་ནས་མཆོག་ཏུ་གུས་པར་བྱའོ། །