གང་དག་ཚུལ་ཁྲིམས་བསྲུང་བ་དག་ནི་ལུས་དང་སྲོག་སྟོར་ཡང་བླའི་ཚུལ་ཁྲིམས་ནི་ཉམས་པར་བྱ་བ་མ་ཡིན་ཚུལ།

༈ ཡང་གང་དག་ཚུལ་ཁྲིམས་བསྲུང་བ་དག་ནི་ལུས་དང་སྲོག་སྟོར་ཡང་བླའི་ཚུལ་ཁྲིམས་ནི་ཉམས་པར་བྱ་བ་མ་ཡིན་ཏེ། ཚུལ་ཁྲིམས་ནི་བྱང་ཆུབ་ཏུ་འཇུག་པའི་རྩ་བ་ཟག་པ་མེད་པའི་མཆོག མྱ་ངན་ལས་འདས་པར་འགྲོ་བའི་ལམ་བསོད་ནམས་ཚད་མེད་པའི་གཞིར་རིགས་པར་བྱ་སྟེ། བཅོམ་ལྡན་འདས་མྱ་ངན་འདས་ནས། ཡུལ་ཨན་ཏ་ཞེས་བྱ་བ་ན། དགེ་སློང་བསོད་སྙོམས་པ་དགོན་པར་དགའ་བ། འདོད་པ་ཉུང་ཞིང་ཆོག་ཤེས་པ། ཡོན་ཏན་གྱི་ཆོས་དུ་མ་དང་ལྡན་པ་ཞིག་གནས་ཏེ། སྤྱོད་ལམ་ཀུན་མཛེས་པས་ཀུན་ཏུ་གྲགས་པར་གྱུར་ཏོ། །དེའི་ཚེ་ཡུལ་དེ་ན་དགེ་བསྙེན་དཀོན་མཆོག་ལ་ཤིན་ཏུ་དད་ཅིང་བསླབ་པའི་ཁྲིམས་ལྔ་བསྲུང་བ་ཞིག་ཡོད་པ་དེས། དགེ་སློང་བསོད་སྙོམས་པ་དེ་ལ་ཚེ་གཅིག་གི་བར་དུ་འཚོ་བ་སྦྱར་ཞིང་། དེ་ཡང་ལམ་དུ་ཚ་གྲང་གིས་ཉོན་མོངས་ཏེ་བསྒོམ་པའི་བར་ཆད་དུ་ཡང་འགྱུར་བར་མཐོང་ནས། ཉིན་རེ་བཞིན་དུ་ཁ་ཟས་རྣམ་པ་སྣ་ཚོགས་པ་བཤམས་ཏེ་སྐྱེལ་བར་བྱེད་དོ། །དེའི་ཚེ་ཡུལ་དེ་ན་ཁྱིམ་བདག་དད་པ་ཅན་ཞིག་ལ་བུ་ཞིག་ཡོད་དེ་ཕ་དེས་བདག་གི་བུ་འདི་རབ་ཏུ་བྱུང་གི། སྟོན་པ་མཁས་པ་ཞིག་བཙལ་བར་བྱ་སྟེ། དེས་དགེ་བའི་ཆོས་ཀུན་འཕེལ་བར་འགྱུར་རོ་བསམ་ནས། དགེ་སློང་དགོན་པ་བ་དེ་ལ་ཞུས་པས་གནང་སྟེ། ཁྱེའུ་དེ་རབ་ཏུ་བྱུང་ནས་དགེ་ཚུལ་དུ་བྱས་སོ། །དུས་ནམ་ཞིག་གི་ཚེ་འཚོ་བ་སྦྱོར་བའི་དགེ་བསྙེན་དེ་ཁྱིམ་བདག་གཞན་ཞིག་གི་སར་ཕྱིན་པས་བསོད་སྙོམས་སྐྱེལ་བ་མ་བྱུང་ནས། དགེ་ཚུལ་དེ་བསོད་སྙོམས་ལེན་དུ་བཏང་བ་ན། སློབ་དཔོན་གྱིས་ཁྱོད་སྤྱོད་ལམ་ཤིན་ཏུ་བསྡམས་ཏེ་བཅོམ་ལྡན་འདས་ཀྱིས་གསུངས་པ་ལྟར་གྲོང་ནས་བསོད་སྙོམས་ལོངས་ལ་ཅི་ལའང་ཆགས་པར་མ་བྱེད་ཅིག ཅེས་བསྒོའོ། །དེ་ནས་དགེ་ཚུལ་དེ་ཁྱིམ་དུ་སོང་བ་ན། དགེ་བསྙེན་མི་འདུག་ནས། དེའི་བུ་མོ་ལོ་བཅུ་དྲུག་མ་ཤིན་ཏུ་མཛེས་ཤིང་ལྟ་ན་སྡུག་པ་ཞིག་ཡོད་པ་དེས་ནང་དུ་བོས་ཏེ། འདི་འདོད་ཆགས་ཀྱིས་བསླུའོ་སྙམ་སྟེ། ཆགས་པའི་རྣམ་འགྱུར་སྣ་ཚོགས་པ་བསྟན་ཀྱང་། དགེ་ཚུལ་དེས་སྤྱོད་ལམ་ཤིན་ཏུ་བསྡམས་པས་སྐབས་མ་རྙེད་དོ། །དེར་བུ་མོ་དེས་ཕྱག་བྱས་ཏེ། ཁྱིམ་འདིའི་ནང་ན་རིན་པོ་ཆེ་དང་གསེར་དངུལ་སོགས་རྣམ་ཐོས་བུའི་གཏེར་དང་འདྲ་བར་ཡོད་ཀྱང་བདག་པོ་མེད་ཀྱིས་ཁྱོད་ཁྱིམ་དང་བཅས་པའི་བདག་པོ་མཛོད་ལ། བདག་ཁྱོད་ཀྱི་ཁོལ་མོ་བགྱིས་ཏེ་བཀུར་སྟི་དང་རིམ་གྲོ་བགྱི་བས། འདི་ལས་མི་འགལ་བར་བདག་གི་རེ་བ་སྐོངས་ཤིག་སྨྲས་པས། དགེ་ཚུལ་དེས། བདག་སྡིག་པའི་ལས་ཅི་ཞིག་བྱས་ན། འདི་ལྟ་བུའི་རྐྱེན་དང་ཕྲད་པར་གྱུར། བདག་ལུས་དང་སྲོག་ཡལ་བ་ཡང་བླའི་དུས་གསུམ་གྱི་སངས་རྒྱས་ཀྱིས་བཅས་པའི་ཚུལ་ཁྲིམས་ནི་ཉམས་པར་མི་བྱའོ། །གལ་ཏེ་བྲོས་ན་ནི་བུ་མོ་འདི་འདོད་ཆགས་ཀྱིས་གདུངས་པས་ཁྲེལ་དང་ངོ་ཚ་ཡང་མེད་དེ། ཕ་རོལ་དུ་བདག་ཟིན་ནས་བདག་ལ་སྐུར་བ་འདེབས་པར་འགྱུར་ཏེ། གྲོང་མི་དག་གིས་མཐོང་ན་སུན་འབྱིན་པར་འགྱུར་གྱིས། བདག་ནི་ངེས་པར་ཁང་པ་འདིར་ཚེ་འཕོས་པར་བྱའོ་སྙམ་དུ་བསམས་ནས་བུ་མོ་དེ་ལ་ཁྱོད་ཀྱིས་སྒོ་དམ་དུ་ཆོད་ཅིག བདག་ནི་ཁང་པ་གཅིག་གི་ནང་དུ་བྱ་བ་ཅུང་ཟད་ཡོད་པ་དེ་བྱས་ནས་ཁྱེད་དང་འཕྲད་པར་བྱའོ། །ཞེས་སྨྲས་ནས། བུ་མོ་སྒོ་གཅོད་དུ་སོང་བའི་འོག་ཏུ་དགེ་ཚུལ་ཁང་པ་གཅིག་གི་ནང་དུ་ཞུགས་ནས། ལུས་ལ་གྱོན་པའི་གོས་རྣམས་ཕུད་ནས་གདང་བུ་ལ་གཟེར་ཏེ། ཐལ་མོ་སྦྱར་ནས་གྲོང་ཁྱེར་ཀུ་ཤ་གང་ན་བར་སངས་རྒྱས་མྱ་ངན་ལས་འདས་པའི་ལོགས་སུ་པུས་མོ་ས་ལ་བཙུགས་ནས། བདག་གིས་ནི་སངས་རྒྱས་དང་ཆོས་དང་དགེ་འདུན་དང་མཁན་པོ་དང་སློབ་དཔོན་དང་ཚུལ་ཁྲིམས་རྣམས་སྤོང་བ་མ་ལགས་ཀྱིས་ཚུལ་ཁྲིམས་བསྲུང་བའི་སླད་དུ་ལུས་འདི་སྤོང་ངོ་། །བདག་གར་སྐྱེས་ཀྱང་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་དང་། ཚངས་པར་སྤྱོད་པ་རྣམ་པར་དག་པ་དང་། ཟག་པ་ཟད་པ་དང་འབྲས་བུ་གྲུབ་པར་གྱུར་ཅིག ཅེས་སྨོན་ལམ་བཏབ་ནས་སྤུ་གྲིས་རང་གི་མགུལ་བཅད་ནས་ཚེ་འཕོས་སོ། །དེ་ལྟར་གྱུར་པ་མཐོང་ནས་བུ་མོ་ཡང་རབ་ཏུ་འགྱོད་ཅིང་། དགེ་བསྙེན་བྱུང་བ་དང་ལོ་རྒྱུས་དྲང་པོར་བཤད་པས། དེས་ཀྱང་ཡུལ་གྱི་རྒྱལ་པོ་སོགས་ལ་གོ་བར་བྱས་པས་ཐམས་ཅད་ངོ་མཚར་དུ་གྱུར་ནས། དགེ་ཚུལ་ཚུལ་ཁྲིམས་སྲུང་བའི་བསྔགས་པ་བརྗོད་ཅིང་རུས་བུ་ལའང་མཆོད་པར་བྱས་སོ། །དེར་སློབ་དཔོན་ཡང་བྱོན་ཏེ་འཁོར་མང་པོ་ལ་ཆོས་བསྟན་པས། དེ་རྣམས་ཀྱང་རབ་ཏུ་བྱུང་ཞིང་ཚུལ་ཁྲིམས་བསྲུང་བ་དང་། བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཐམས་ཅད་རྗེས་སུ་ཡི་རང་བར་གྱུར་ཏོ། །