འདོད་པས་ཆོག་མི་ཤེས་པ་དང་བྱས་པ་མིི་གཟོ་བའི་ཉེས་དམིགས་ཀྱང་བསྟན་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ལྷས་བྱིན་རྙེད་པ་ལ་ཆགས་པས། སྟོན་པའི་སྐུ་མཚལ་ཕྱུང་བ་དང་། གླང་ཆེན་སྨྱོན་པ་བཏང་བ་དང་། དགེ་འདུན་གྱི་དབྱེན་དང་། དགྲ་བཅོམ་མ་བཀྲོངས་པ་སོགས་མཚམས་མེད་པའི་ལས་བགྱིས་པ། ཕྱི་མའི་རྣམ་སྨིན་ལ་འཇིགས་ཏེ། མུ་སྟེགས་སྟོན་པ་སྡེ་དྲུག་གི་ཐད་དུ་སོང་ནས་དྲིས་པ་ན། དེ་དག་གིས་ཚེ་སྔ་ཕྱི་དང་ལས་རྒྱུ་འབྲས་མེད་པའི་ལྟ་བ་ངན་པ་བསྟན་པས། ལྷས་བྱིན་དེ་ལ་ཡིད་ཆེས་ཏེ་དགེ་བའི་རྩ་བ་བཅད་དོ། །དེར་ཀུན་དགའ་བོས་ནི་ལྷས་བྱིན་རང་གི་སྤུན་ཟླར་གྱུར་པས་སྙིང་བརྩེ་བའི་ཕྱིར་རབ་ཏུ་མི་དགའ་ཞིང་སྨྲེ་སྔགས་དང་བཅས་མཆི་མ་འབྱིན་པ་ལ། བཅོམ་ལྡན་འདས་ཀྱིས་བཀའ་སྩལ་པ་ལྷས་བྱིན་འདི་ནི་ཚེ་འདི་འབའ་ཞིག་ལ་རྙེད་པ་དང་གྲགས་པའི་ཕྱིར་དགེ་བའི་རྩ་བ་བཅད་པར་མ་ཟད་ཀྱི། འདས་པའི་དུས་ནའང་རྙེད་པ་དང་གྲགས་པའི་ཕྱིར་ལུས་དང་སྲོག་ཀྱང་སྟོར་བའི་ལས་བྱས་ཏེ། སྔོན་བསྐལ་པ་གྲངས་མེད་པའི་ཕ་རོལ་ན་འཛམ་བུ་གླིང་འདིར་ཡུལ་ཝཱ་རཱ་ཎ་སཱི་ན་བྲམ་ཟེ་ཧ་ཡི་ཞེས་བྱ་བའི་ཆུང་མ་ལ་ཁྱེའུ་གཉིས་བྱུང་སྟེ་སྔ་མ་མངལ་ན་གནས་པའི་ཚེ་མ་ཡི་རྒྱུད་ཤིན་ཏུ་འཇམ་ཞིང་ངེས་པར་གྱུར་པས་མིང་ལེགས་ཚོལ་དང་། ཕྱི་མ་མངལ་ན་གནས་པའི་ཚེ་རྒྱུད་ཁྲོ་ཞིང་གཏུམ་པར་གྱུར་པས་མིང་ཉེས་ཚོལ་དུ་བཏགས། གཉིས་ཀ་ཆེར་སྐྱེས་པ་ན་རྒྱ་མཚོར་ནོར་བུ་ལེན་པའི་ཕྱིར་སོ་སོར་འཁོར་ལྔ་བརྒྱ་ལྔ་བརྒྱ་དང་བཅས་སོང་བ་ལས། ལམ་རིང་བས་ཞག་བདུན་གྱི་གནས་སུ་མ་ཕྱིན་པར་རྒྱགས་ཆད་ནས་ཤི་ལ་ཐུག་པ་དང་། ལེགས་ཚོལ་གྱིས་ལྷ་ལ་གསོལ་བ་བཏབ་པས་འབྲོག་སྟོང་པ་དེ་ན་རྒྱང་མ་ནས་སྐྱེ་ཤིང་བཟང་པོ་ཞིག་མཐོང་ནས་དེར་ཕྱིན་པ་དང་། ཤིང་དེའི་དྲུང་དུ་ཆུ་མིག་བཟང་པོ་ཞིག་ཀྱང་འདུག་པས་དེ་ལ་འཐུང་ཞིང་ཁྲུས་བྱས་པ་ན། ལྷས་མངོན་སུམ་དུ་ཤིང་འདིའི་ཡལ་ག་ཆོད་ཅིག་དང་འདོད་པ་ཐམས་ཅད་འབྱུང་ངོ་ཞེས་ལུང་བསྟན་པས། ཡལ་ག་གཅིག་བཅད་པས་བཏུང་བ་ཞིམ་པོ་བྱུང་། ཡང་གཅིག་བཅད་པས་ཁ་ཟས་རོ་བརྒྱ་དང་ལྡན་པ་བྱུང་ཞིང་། དེ་བཞིན་དུ་གོས་དང་། རིན་པོ་ཆེ་སྣ་ཚོགས་པའང་བྱུང་བས་ཐམས་ཅད་ཚིམས་ཤིང་། རྒྱབ་ཁལ་ལོངས་པ་ན་ཉེས་ཚོལ་ཡང་དེར་ཕྱིན་ཏེ། ཤིང་འདིའི་ཡལ་ག་བཅད་པ་ལས་ཕུ་བོས་འདི་ལྟ་བུ་ཞིག་རྙེད་ན། བདག་གིས་རྩ་བ་ནས་བཅད་ན་འདི་ལས་ལྷག་པ་ཞིག་རྙེད་པར་ངེས་སོ་སྙམ་ནས་གཅོད་པར་བརྩམས་པ་ན། ལེགས་ཚོལ་གྱི་བདག་ཅག་ནི་ཕོངས་ཏེ་སྲོག་དང་བྲལ་བ་ལས་མ་ཤི་བར་འཚོ་བ་འདི་ཤིང་འདི་ཡི་དྲིན་ཡིན་པས་མ་གཅོད་ཅེས་སྨྲས་ཀྱང་མ་ཉན་པས། དེ་ནི་བདག་གིས་མཐོང་བར་མི་འདོད་དོ་ཞེས་ལེགས་ཚོལ་ཚོང་པ་དང་བཅས་པ་སྔོན་དུ་སོང་བའི་འོག་ཏུ་ཉེས་ཚོལ་གྱིས་ཤིང་དེ་བཅད་པས་དེའི་རྩ་བ་ནས་སྲིན་པོ་ལྔ་བརྒྱ་བྱུང་སྟེ་ཉེས་ཚོལ་འཁོར་དང་བཅས་པ་ཟོས་སོ། །དེའི་དུས་ཀྱི་ལེགས་ཚོལ་ནི་ད་ལྟ་ང་ཡིན་ལ། དེའི་དུས་ཀྱི་ཕ་མ་ནི་ད་ལྟའི་ཡབ་ཡུམ་གཉིས་དང་། ཉེས་ཚོལ་ནི་ལྷས་བྱིན་ཡིན་ནོ་གསུངས། འདིས་ནི་འདོད་པས་ཆོག་མི་ཤེས་པ་དང་བྱས་པ་མིི་གཟོ་བའི་ཉེས་དམིགས་ཀྱང་བསྟན་པ་ཡིན་ནོ། །