ཁེངས་དྲེགས་ཀྱི་ཉེས་པ་དང་། རྟེན་ལ་མར་མེ་ཕུལ་བ་དང་བསམ་པ་རྣམ་པར་དག་པའི་ཕན་ཡོན་ཁྱད་པར་དུ་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་དབུལ་མོ་བསྙེན་དགའ་མོ་ཞེས་པ་འཚོ་བ་སློང་མོ་ལ་ལྟོས་པ་ཞིག་ཡོད་པ་དེས། རྒྱལ་པོ་ལ་སོགས་པའི་སྐྱེ་བོ་དུ་མས་སངས་རྒྱས་འཁོར་དང་བཅས་པ་ལ་བསྙེན་བཀུར་བ་མཐོང་ནས་བདག་གིས་སྔོན་གྱི་ལས་ཅི་ཞིག་བགྱིས་ནས་འདི་ལྟར་དབུལ་བར་གྱུར་ཏེ་བསོད་ནམས་ཀྱི་ཞིང་དང་ཕྲད་ཀྱང་ས་བོན་མི་བདོག་སྙམ་དུ་སེམས་ཤིང་། ཉི་མ་གཅིག་གི་ཐོག་ཐག་ཏུ་བསླངས་ཀྱང་དོང་ཙེ་ག ཅིག་ལས་མ་རྙེད་པས། དེ་ཐོགས་ནས་མར་ཉོར་ཕྱིན་པ་ན་མར་ཚོང་པས། ཁྱོད་ཀྱིས་ཅི་ཞིག་བྱ་དྲིས་པ་དང་། དྲང་པོར་བཤད་པས། དེ་ཡང་དགའ་ནས་མར་ལྷག་པོར་བྱིན་ནོ། །དེར་བསྙེན་དགའ་མོ་རབ་ཏུ་དགའ་ནས། གཙུག་ལག་ཁང་དུ་ཕྱིན་ཏེ། བཅོམ་ལྡན་འདས་ཀྱི་སྤྱན་སྔར་མར་མེ་བཙུགས་ཏེ། བདག་ད་ལྟར་དབུལ་ཕོངས་ཏེ་མར་མེ་ཆུང་ངུ་འདིས་སངས་རྒྱས་ལ་མཆོད་དོ། །བསོད་ནམས་འདིས་མ་འོངས་པའི་དུས་སུ་བདག་ཤེས་རབ་ཀྱི་མར་མེ་དང་ལྡན་ཏེ་སེམས་ཅན་ཐམས་ཅད་ཀྱི་མུན་པའི་དྲི་མ་བསལ་བར་ཤོག་ཅིག ཅེས་སྨོན་ལམ་བཏབ་བོ། །ཕྱིར་ནང་མར་མེ་གཞན་ཟད་ཀྱང་དབུལ་མོའི་མར་མེ་གཅིག་པུ་མ་ཟད་དེ་མར་དང་སྙིང་པོ་མ་ཉམས་པར་གསར་དུ་སྦར་བ་བཞིན་དུ་གྱུར་པ་ལ། དེའི་ཉིན་གྱི་དུས་འཛིན་པ་འཕགས་པ་མོའུ་འ གལ་གྱི་བུ་ཡིན་པས། མར་མེ་དེ་ཉིད་གསོད་པར་བརྩམས་པ་ན་མ་སོད་དེ། གོས་ཀྱིས་གཡབ་པ་དང་། བཅོམ་ལྡན་འདས་ཀྱིས་ཁྱོད་ཀྱིས་དེ་བསད་པར་སེམས་ཀྱང་མི་སོད་དེ། ཁྱོད་ཉན་ཐོས་ཀྱིས་བསྒུལ་ཞིང་བསྐྱོད་ནུས་པའང་མ་ཡིན་ནོ། །གལ་ཏེ་ཁྱོད་ཀྱིས་རྒྱ་མཚོ་ཆེན་པོ་བཞིའི་ཆུ་དྲངས་ཀྱང་སོད་པར་མི་འགྱུར་ཏེ། མར་མེ་འདི་སེམས་ཅན་ཀུན་གྱི་དོན་རྒྱ་ཆེན་པོ་བྱེད་པར་བསམ་པ་ཆེན་པོ་བསྐྱེད་ནས་ཕུལ་བ་ཡིན་ནོ་གསུངས་ནས། བསྙེན་དགའ་མོ་ལ། ཁྱོད་མ་འོངས་པའི་དུས་ན་བསྐལ་པ་གཉིས་འདས་ནས་མངོན་པར་སངས་རྒྱས་ཏེ་མཚན་ཡང་མར་མེ་འོད་ཅེས་བྱ་སྟེ། དབང་བཅུ་དང་ལྡན་པར་འགྱུར་རོ། །ཞེས་ལུང་བསྟན་པས་དེ་ཉིད་རབ་ཏུ་དགའ་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བར་གསོལ་བས། སྟོན་པས་ཀྱང་རྗེས་སུ་གནང་ངོ་། །དེར་ཀུན་དགའ་བོས་དེ་ཉིད་ཀྱི་ལས་ཀྱི་རྒྱུ་ཞུས་པས། བཀའ་སྩལ་པ། སྔོན་འདས་པའི་དུས་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ་བསྙེན་དགའ་མོ་འདི་ཁྱིམ་བདག་ཞིག་གི་ཆུང་མར་གྱུར་ཏེ། སངས་རྒྱས་འཁོར་བཅས་སྤྱན་དྲངས་པ་ན་སྔར་དབུལ་མོ་ཞིག་གི་དྲངས་ཟིན་པས་དེར་གཤེགས་ལ། དབུལ་མོ་དེ་ཡང་ལན་གཅིག་ཕྱིར་མི་ལྡོག་པ་ཞིག་སྟེ། དེའི་ཚེ་ཁྱིམ་བདག་གི་ཆུང་མ་ཁེངས་དྲེགས་ཀྱི་བསམ་པས་ཅིའི་སླད་དུ་བདག་གིས་སྤྱན་དྲངས་པར་མི་གཤེགས་པར་སྤྲང་མོས་སྤྱན་དྲངས་པར་གཤེགས་ཞེས་ཚིག་ངན་སྨྲས་ཏེ། འཕགས་པ་ལ་བརྙས་སྨད་པས་སྐྱེ་བ་ལྔ་བརྒྱའི་བར་དུ་སྤྲང་པོར་གྱུར་ལ། དེའི་ཕྱིར་ཉིན་དུ་སངས་རྒྱས་འཁོར་བཅས་བྱོན་པས་རབ་ཏུ་དགའ་ཞིང་མཆོད་པས། ད་ལྟར་སངས་རྒྱས་དང་ཕྲད་ནས་རབ་ཏུ་བྱུང་ཞིང་ལུང་བསྟན་པ་ཡིན་ནོ་གསུངས། དེའི་ཚེ་རྒྱལ་པོ་དང་། བློན་པོ་དང་། ཡུལ་གྱི་སྐྱེ་བོ་དག་གིས་དབུལ་མོ་སངས་རྒྱས་སུ་ལུང་བསྟན་པ་ཐོས་པས་ལྷག་པར་ཡང་དད་ཅིང་སྤྲོ་བར་འགྱུར་ནས་ཀུན་གྱིས་མར་མེ་སྦྱར་ཏེ་ཕུལ་བས་རྒྱལ་བྱེད་ཀྱི་ཚལ་ཀུན་ཡོངས་སུ་གང་སྟེ། དེ་ལྟར་ཞག་བདུན་གྱི་བར་དུ་རྒྱུན་མ་ཆད་པར་ཕུལ་ལོ། །དེར་ཀུན་དགའ་བོ་ངོ་མཚར་དུ་གྱུར་ནས། བཅོམ་ལྡན་འདས་ཀྱི་སྔོན་ཕྲིན་ལས་ཅི་ཞིག་བགྱིས་ན། འདི་ལྟ་བུའི་མར་མེ་ཚད་མེད་པ་དང་ལྡན་པར་གྱུར་ཅེས་གསོལ་པ་ན། བཅོམ་ལྡན་འདས་ཀྱིས་སྔོན་འདས་པའི་དུས་ན་འཛམ་བུ་གླིང་འདིར། རྒྱལ་པོ་པ་སི་ལ་ཞེས་བྱ་བའི་སྲས། དེ་བཞིན་གཤེགས་པ་རིན་ཆེན་གཙུག་ཕུད་ཅེས་བྱ་བ་འཇིག་རྟེན་དུ་བྱོན་ནས་མངོན་པར་སངས་རྒྱས་པ་ན་ཡབ་རྒྱལ་པོས་སངས་རྒྱས་དགེ་འདུན་དང་བཅས་པ་སྤྱན་དྲངས་ནས་ཟླ་བ་གསུམ་གྱི་བར་དུ་ཆོས་སྟོན་གསོལ་ལོ། །དེའི་ནང་ན་དགེ་སློང་འཕགས་པའི་བཤེས་གཉེན་ཞེས་བྱ་བ་ཞིག་ཟླ་བ་གསུམ་དུ་མར་མེ་སྦྱར་བའི་ཡོན་བདག་ཏུ་ཁས་བླངས་ནས། ཉིན་རེ་བཞིན་ཏུ་གྲོང་དུ་རྒྱུ་ཞིང་། སྐྱེ་བོ་མང་པོ་ལས་མར་དང་འབྲུ་མར་དང་། མེ་མར་དང་སྙིང་པོ་བསླངས་སོ། །དེར་རྒྱལ་པོའི་བུ་མོ་ཐུབ་པ་ཞེས་པས་མཐོང་ནས་དགེ་སློང་ལ་རྒྱུ་མཚན་དྲིས་པ་དང་། དགེ་སློང་གི་ལོ་རྒྱུས་ཞིབ་པར་བསྙད་པས། བུ་མོ་དེ་རབ་ཏུ་དགའ་ནས་དགེ་སློང་དེ་ལ། ད་ཕྱིན་ཆད་དེ་ལྟར་འགྲོ་མི་དགོས་ཀྱི་མེ་མར་གྱི་ཡོ་བྱད་ཁོ་མོས་སྦྱར་གྱིས་ལོངས་ཤིག་སྨྲས་པས། དགེ་སློང་གིས་ཀྱང་དེ་བཞིན་དུ་བྱའོ་ཞེས་སྨྲས་ནས། དེ་ཕྱིན་གྱི་ཡོ་བྱད་གང་དགོས་དེ་ནས་བླངས་ཏེ་ཉིན་རེ་བཞིན་དུ་མར་མེ་ཕུལ་ནས། ཀུན་ལ་ཕན་པའི་དོན་རྒྱ་ཆེན་པོའི་སེམས་བསྐྱེད་པས། བཅོམ་ལྡན་འདས་ཀྱི་དགེ་སློང་དེ་ལ། མ་འོངས་པའི་དུས་ན་བསྐལ་པ་གྲངས་མེད་པ་འདས་ནས་མངོན་པར་འཚང་རྒྱ་སྟེ་མཚན་ཡང་མར་མེ་མཛད་ཅེས་བྱ་བར་འགྱུར་རོ། །ཞེས་ལུང་བསྟན་ཏོ། དེར་རྒྱལ་པོའི་བུ་མོས་ཐོས་པ་ན། སངས་རྒྱས་ལ་ཕུལ་བའི་མར་མེ་ནི་བདག་གིས་སྦྱར་ཏེ། དགེ་སློང་དེས་བསྐུལ་བ་ཙམ་བྱས་ཀྱང་ལུང་བསྟན་ན་བདག་ལ་ནི་ལུང་མ་བསྟན་ནོ། །སྙམ་དུ་བསམ་ནས། བཅོམ་ལྡན་འདས་ཀྱི་དྲུང་དུ་སོང་སྟེ་དོན་དེ་དྲང་པོར་གསོལ་པ་དང་བཅོམ་ལྡན་འདས་ཀྱིས། བུ་མོ་ཐུབ་པ་ཁྱོད་མ་འོངས་པའི་དུས་ན་བསྐལ་པ་གྲང་མེད་པ་དགུ་བཅུ་རྩ་གཅིག་འདས་ནས་མངོན་པར་འཚང་རྒྱ་སྟེ། མཚན་ཡང་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །དེར་བུ་མོའང་རབ་ཏུ་དགའ་ནས་སངས་རྒྱས་ཀྱི་བསྟན་པ་ལ་རབ་ཏུ་བྱུང་ཞིང་བརྩོན་འགྲུས་རྩོམ་མོ། །དེའི་དུས་ཀྱི་དགེ་སློང་འཕགས་པའི་བཤེས་གཉེན་ནི་སྔོན་འདས་པའི་སངས་རྒྱས་མར་མེ་མཛད་ཡིན་ལ། རྒྱལ་པོའི་བུ་མོ་ཐུབ་པ་ནི་ད་ལྟར་ང་ཡིན་ཏེ། སྔོན་མར་མེ་ཕུལ་བས་བསྐལ་པ་གྲངས་མེད་པའི་བར་དུ་ལྷ་དང་མི་ཡི་གནས་ན་བསོད་ནམས་མྱོང་སྟེ་གཟུགས་ཀྱང་གཞན་ལས་འཕགས་པར་བཟང་ཞིང་། ད་ལྟར་མངོན་པར་སངས་རྒྱས་ནས་ཀྱང་མར་མེ་མང་པོ་དང་ལྡན་པར་གྱུར་ཏོ་གསུངས། འདིས་ནི་ཁེངས་དྲེགས་ཀྱི་ཉེས་པ་དང་། རྟེན་ལ་མར་མེ་ཕུལ་བ་དང་བསམ་པ་རྣམ་པར་དག་པའི་ཕན་ཡོན་ཁྱད་པར་དུ་བསྟན་པ་ཡིན་ནོ། །